{Терехова Л. Г., Эрдели В. Г. @ География @ география @ Л. Г. Терехова и В. Г. Эрдели.
География. Часть первая @ 1938 @ Лб. .}
Л. Г. Терехова, В. Г. Эрдели.
ГЕОГРАФИЯ.
Медодзза часть.
Начальнӧй школа понда куимӧт класслӧ велӧтчан книга.
ПЫРТАС
Тiйö пондöтчат велöтны география.
Уна вильсö да интереснöйсö тiйö тöдатö му йылiсь, кöда вылын мийö олам.
География уроккез вылын тiйö тöдсасятö ас гöгöрись местностькöт.
Тiйö тöдмалатö, кытшöм ыджыт миян муыс, кытшöм сылöн формаыс да мый сы вылын эм.
География велöтiкö тiйö тöдмалатö, кытшöм природа да кыдз олöны отир мукöд местаэзын му вылас.
География кузя занятияэз вылын тiйö велалатö вежöртны планнэз да картаэз — местность чертёжжез.
Эна чертёжжез сьöртi позяс адззыны (представитны) любöй места.
Миян велöтчан книгаыс отсалас тiянлö географиясö велöтiкö.
Велöтчан книга бердö пуктöмöсь план да картаэз.
Берегитö нiйö.
Планнэзтöг да картаэзтöг оз туй велöтны географиясö.
КЫДЗ ТÖДНЫ, КЫТШÖМ МИЯН ГÖГÖРЫН МЕСТНОСТЬ
Мыля мийö öшимö
Ме ёртöкöт важын ни лöсьöтчимö пионеррез дынö, кöдна сулалiсö лагерьöн неылын миян городсянь.
Юалiмö туй и мунiмö.
Вуджим шорок, поперегалiм ыджыт видз.
Вот и пожумаин, кытöн сулалö лагерь.
Пондiм мунны просека кузя.
Бытшöм вöлi вöрас.
Кылiс пожум дук.
Небура шумитiсö пу йыввез.
Ылын кöкис кöк.
Чожа должен лоны поперечнöй просека.
Друг миян дынсянь шульгаланяс мелькнитiс ур.
Мийö уськöтчим сы сьöрö.
Сiя миян дынсянь.
Чеччöвтiс пожум вылö, дзебсисис уввез коласö.
Мийö сулыштiм невна да мунiмö одзлань.
Вот вöлись и поперечнöй просека.
Кежим веськытланьö.
Чожа лагерь.
Но мунам час, кыкö, а лагерьыс сё абу.
Кытчö мунны?
Просекаэс мунöны и доль и поперег да быдöнныс öтамöд вылö вачкисьöны.
Гöгöр некин абу.
Мийö öшим.
Дыр броддим вöр кузяс, сё кошшим лагерьсö.
Друг пондiс кывны понлöн вувтöм, мыччисис объезшик.
Вöлöма, што лагерьыс дынсянь миян километр сизим гöгöр мунсьöма бокö.
Тыдалö, мийö öштiм веськöвсö, кöр котöртiм урыс сьöрö.
Объезшик нуöтiс миянöс аслас гортö, юкталiс чайöн, и сылöн зоныс мунiс миянöс кольлыны.
Пемыт ни вöлi, кöр мийö ю берег вылын казялiмö пионерскöй костёр.
Лун бöртi пионеррез миянöс кольлiсö гортö.
Кык челядь кутчисö лоны нуöтiссезöн.
Нiя кайисö мысок вылö, кöдасянь тыдалiс гöгöр местностьыс.
Ас одзаныс паськöтiсö местностьлiсь план да пуктiсö неыджыт приборок — «компас».
Дыр ны вылö видзöтiсö да мыйкö йылiсь баитiсö.
Сыбöрын нiя миянлö мыччалiсö, кöдаланьын городыс, кöть вылынiноксяняс вöр сайсис сiя эз тыдав.
Мерайтiсö мыйкö планыс сьöртi, лыддисö да висьталiсö, што городöдззис нёль километр и, примерно, час бöртi мийö лоам гортын.
Мийö решитiм, што нiя токо керöны вид, што быдöс этö тöдöны.
Но сёжö мунiмö ны сьöрö.
Кыдз эд мийö дивуйтчим, кöр 40 минута бöртi былись ылын мыччисис город, а час бöртi мийö вöлiмö гортын.
Меным тöдвылам усис, кыдз мийö броддимö вöрöттис бытьтö синтöмöсь, и ме чорыта решитi велавны, кыдз пионеррез, адззыны туй.
Быд морт должен бытшöма тöдны ас гöгöрись местность, тöдны, кытшöм местаын сiя олö, мый эм сы гöгöрын, кужны адззыны кöть кытшöм туй.
Медбы бытшöма тöдны ас гöгöрись местность, колö кужны определяйтны (тöдны) веськöввез да ылынаэз, пользуйтчыны местность планöн.
«Веськытлань», «шульгалань» веськöввез вежсьöны
Видзöтö рисунок.
Кöдаланьын велöтчиссез дынсянь öшыннэз — веськытланьын али шульгаланьын?
Кöдаланьын ны дынсянь ыбöс?
А кöдаланьын велöтiсьыс дынсянь?
Заданнё.
Висьталö, парта сайын пукалiкö: Кöдаланьын тiян дынсянь öшыннэз тiян классын?
Кöдаланьын тiян дынсянь ыбöс?
А кöдаланьын нiя велöтiсьыс дынсянь?
abu
Бергöтчам кö мийö чужöмнаным öтiк ладорö — мукöд предметтэз миян дынсянь лоасö веськытланьын.
Бергöтчам мöдöрö — нiя жö предметтэс лоасö шульгаланьын.
Кин туйлiсь веськöввесö определяйтö ас дынсяняс — «веськытлань», «шульгалань», «одзлань», «бöрлань», — сiя тöдтöм местаын кокнита вермас öшны.
Колö сувтöтны сэтшöм веськöввез, кöдна мортыс бергалöм дырни эзö бы вежсьö.
Отирыс важын ни этö вежöртiсö и веськöввесö пондiсö определяйтны шондi сьöртi.
Кыдз отир велалiсö шондi сьöртi адззыны веськöв
Öддьöн важся кадсянь, лунiсь лунö отир адззылiсö, што шондi ветлö нёбо кузя.
Мыччисьö сiя асылöн, жагвыв лэбтiсьö сё вылöжык и вылöжык; луншöрöн локтö медвылынöдз, а сыбöрын пондöтчö лэдзчыны.
Рыт кежö шондi сайöвтчö, нöбöтö сьöрас лунся югытсö да шонытсö.
Отир сiдз жö казялiсö, што шондiа лунö быдöс предметтэз чапкöны вуджöр.
Но вуджöрыслöн кузяыс лун сьöрна вежсьö. Кыным лажмытжык му вевдöрас шондiыс, сыным вуджöрыс кузьжык, кыным сiя вылынжык, сыным вуджöрыс дженытжык.
Лун сьöрна вежсьö и вуджöрыслöн веськöлыс.
Эна наблюденнёэзöн пользуйтчöмöн отирыс пондiсö площаддез вылö сувтöтлыны столббез (рис. 4.).
Столб дынсянь вуджöр кузя сьöртi да сы веськöв сьöртi нiя определяйтiсö кад.
Шондi сьöрын наблюдайтiкö отир казялiсö, што луншöрнас вуджöрыс меддженыт и видзö пыр öтiк веськöв.
Сiйö веськöвсö, кытчö усьö луншöрся вуджöрыс, отирыс шуисö севернöй веськöлöн, либо северöн.
Паныта веськöвсö шуисö южнöй веськöлöн, либо югöн.
Юг вылын шондiыс пыр овлö луншöрö.
Сiдз жö сувтöтiсö эшö кык веськöв: веськöв востокланьö да западланьö.
Энö веськöввесö определяйтöны сiдз, кыдз мыччалöма рисунок вылын.
Чужöмнас мортыс сувтö север ладорö да киэсö нюжöтö öтмöдöрö.
Веськыт киыс мыччалö веськöвсö восток ладорö, шульга киыс — запад ладорö.
Север, юг, восток да запад — основнöй веськöввез.
Кыдз бы мортыс эз бергöтчы, северланьö, югланьö, востокланьö, западланьö, веськöввес оз вежсьö.
Дженытика эна веськöввес гижсьöны сiдз: север — С, юг — Ю, восток — В, запад — 3.
Заданнёэз.
1. Мича лунö замечайтö:
Кöдалань тiянсянь усьö вуджöр кöр тiйö мунат школаö?
Кöдалань — кöр локтат гортö?
2. Мерайтö: Мый кузя вуджöрыс усьö пусянь, кöр тiйö мунат школаö?
Мый кузя вуджöрыс эта жö пусянь, кöр тiйö локтат школасянь?
3. Следитö: Кöдна öшыннэзö школаас сидзö шондiыс асывнас, кöднаэзö — луншöрöн, кöдна öшыннэзö совсем оз павк?
4. Öтiк шондiа лунö пятнайтö мелöн джодж вылын веськöвсö да кузясö вуджöрлiсь, кöда усьö классын öшын рамасянь — луншöрöдз, луншöрöн да луншöр бöрын.
Кыдз мийö адззимö шондi сьöртi основнöй веськöввез
Эшö велöтчан год пондöтчикö школа оградааным мийö керимö географическöй наблюденнёэз понда площадка.
Эта понда мийö бöрйимö неыджыт участок, кöда вылö бура сидзö шондi.
Ровняйтiмö сiйö да киськалiмö песокöн.
Эта географическöй площадка вылö мийö сувтöтiмö шест да веськöтiмö сiйö отвес сьöртi.
Шондiа мича лунö, луншöр гöгöр, площадка вылö мийö локтiм быдса классöн да пуксимö неылö шест гöгöрас.
Миша да Ваня велöтiськöт локтiсö шест дынö и пондiсö определяйтны веськöв да мерайтны вуджöрлiсь кузясö.
Вуджöрыс веськöв вылöт Миша нуöтiс черта, Ваня вуджöрыслö поперег кырöвтöмöн пятнайтiс сылiсь кузясö.
Кынымкö минута бöртi мийö казялiмö, што вуджöрыс невна вешшис бокö.
Сэк Миша нуöтiс виль черта, а Ваня бöра пятнайтiс вуджöрыслiсь кузясö.
Вуджöрыс лоис дженытжык.
Раз-мöдiсь Миша да Ваня пятнайтiсö вуджöрлiсь кузясö да веськöвсö.
Вуджöрыс сё вешшис одзлань да лоис дженытжык.
Но вот мийö казялiмö, што вуджöрыс невна лоис кузьжык.
Меддженыт вуджöр конецас Миша вартiс майöжок.
А велöтiсьыс эта веськöлö кинас мыччалiс да висьталiс: «Сэтчин — север».
А сыбöрын велöтiсьыс висьталöм сьöртi Ваня чужöмнас сувтiс север ладорö да мыччалiс миянлö, кытöн юг, восток да запад.
Медбы быдöнныс тöдiсö, кытöн север, уроккез бöрын площадка вылö мийö керим указатель: «север — юг».
Эта понда луншöрся вуджöр веськöв сьöртi гарйимö векнитик канаваок да тыртiмö сiйö кирпич да из торрезöн.
Заданнё.
Адззö и тiйö этадз жö основнöй веськöввесö.
Компас
Шондi сьöртi веськöвсö позьö адззыны токо мича лунö.
Но не пыр сулалöны шондiа мича луннэз.
Кымöра луннэзö, а сiдз жö ойöн веськöвсö кокнита позьö адззыны прибор сьöртi, кöда шусьö компасöн.
Важся каддэзö путешествиеэз коста пользуйтчисö öддьöн простöя лöсьöтöм компасöн.
Сiя вöлi лöсьöтöма магниталöм пластинкаись, кöдö öшöтлiсö сунис вылö.
Кöр суниссö босьлiсö киö, пластинкаыс пондывлiс качыкайтчыны.
Кынымиськö качыкнитчöм бöрын сiя сувтлiс — öт конецыс сылöн мыччалiс север вылö, а мöдыс юг вылö.
Öння кадö отирыс пользуйтчöны мöдкодя лöсьöтöм компасöн.
Сiя лöсьöтöма магниталöм стальнöй стрелкаись.
Стрелкаыслöн öт конецыс лöз, мöдыс югыт.
Стрелкаыс бергалö осёк вылын.
Осёкыс крепитöма стекляннöй вевтöсока гöгрöса коробка пыдöс вылын.
Сувтöтöны компассö сiдз: пуктöны сiйö ровнöй места вылö да сетöны стрелкаыслö сувтчыны.
Север вылö веськöв адззöма.
Сыбöрын коробкасö бергöтöны сэтчöдз, кытчöдз стрелкаыслöн лöз конецыс оз лок коробка пыдöс вылын С буква весьтöдз.
Коробка пыдöс вылiсь мöдiк букваэс мыччаласö мукöд веськöввесö: В — восток вылö веськöв, 3 — запад вылö веськöв, Ю — юг вылö веськöв.
Компас сьöртi кокнит адззыны не токо главнöй веськöввесö, но и коласiссесö: С-В (северо-восток) мыччалö север да восток коласiсь веськöв, Ю-В (юго-восток) — юг да восток коласiсь веськöв, Ю-3 — юго-запад вылö веськöв, С-З — северо-запад вылö веськöв.
Компас — неыджыт прибор.
Сiйö бур новйöтны корманын.
Компасöн некытöн он öш.
Колö токо пыр следитны компас сьöртi, кытшöм веськöв кузя мунан; бöр мунiкö видзсьыны бöрланься веськöв сьöртi.
Шуам, тэ мунiн север веськöв кузя, то бöрлань локтiкö колö мунны юг вылö.
Компасыс öддьöн колö путешествиеэз коста, öддьöнжыксö морскöйез коста, кöр уна лун оз тыдалö береггез.
Заданнёэз.
1. Адззö компас сьöртi: Кытшöм веськöввезын тiян классын öшыннэз?
Кытшöм веськöлын ыбöс?
2. Пятнайтö асланыт классын стрелкаöн потолок вылын либо джодж вылын север вылö веськöв.
Кыдз аслыт керны компас
Сэтшöм простöй компас, кытшöмöн пользуйтчисö важся кадö, абу сьöкыт керны и аслыт.
Босьтö обыкновеннöй ем да магнит.
Магнит öт конецнас ем шöрсяняс сы лэчыт йывланьö нуöтö 10 — 20 кынымись; магнитыс мöд конецöн сынымись жö зыртö емыслiсь пыса конецсö.
Ем магнитсялiс.
Босьтö векнитик бумага полоска.
Керö керку крыша кодьö да мöртö сiйö магниталöм емöн.
Керöм приборнытö öшöтö гардтöм сунис вылö. Лэбтö сiйö сунисöт, кыдз мыччалöма рисунок вылын.
Кынымиськö качыкнитöм бöрын приборыс сувтчас,
а емыс öнi мыччалö: öт конецнас — север вылö, мöднас — юг вылö.
Проверитö ассиныт компаснытö настоящöй компас сьöртi да эд вунöтö, кöда конецыс емыслöн (ёсяыс али пысаыс) видзöтö север вылö.
Эта конецöн тiян компас-емныт пондас пыр мыччавны север вылö.
Заданнё.
Адззö аскерöм компас сьöртi, кöдалань нюжалöма улица, кöдаын сулалö школа?
Кыдз мыччалöны веськöввесö чертёж вылын
Мийö сулалiм площадь вылын.
Северланьын миян дынсянь тыдалiс завод, югланьын — школа, востокланьын — сельсовет, западланьын — кооператив.
Велöтiсь миянлö висьталiс гижны энö пункттэсö тетраддезö.
Кöр мийö сравнитiм энö чертёжжесö, то лоис, што быдöнныс керöмась неöтмоз.
Сэк велöтiсь мыччалiс миянлö, кыдз колö керны правильнöя.
Мийö велöтiсь висьталöм сьöртi тетраддезаным пятнайтiмö гöглянокöн сiйö местасö, кытöн вöлiмö.
Сыбöрын ассиным тетраддезнымöс бергöтiмö сiдз, што вылiсь дорыс вöлi иньдöма северланьö, улiсьыс — югланьö, веськытыс — востокланьö и шульгаыс — западланьö.
Основнöй веськöввесö мыччалiмö стрелкаэзöн, кыдз мыччалöма 9 рисунок вылын.
Эта бöрын мийö кокнита казялiмö, кытшöм веськöлöн колö пятнайтны быд пунктсö.
Проверитö, правильнöя ли велöтчиссес мыччалiсö чертёж выланыс: завод, школа, сельсовет да кооператив.
Основнöй веськöввесö босьтамö мыччавны сiдз, кыдз эта керöма чертёж вылын:
кытшöм-либо пунктсянь север вылö — бумага лист вывланись дорланьö;
юг вылö — улiсьланьö;
восток вылö — лист веськыт дорланьö;
запад вылö — шульгаланьö.
Заданнё.
Сувтö паськыт местаö.
Адззö ас гöгöрсиныт пункттэз, кöдна сулалöны север вылын, юг вылын, восток вылын да запад вылын.
Пятнайтö нiйö асланыт тетраддезын.
Кыдз тöдöны ылына
Медбы бытшöма тöдны местность, етша тöдны, кытшöм веськöввезын öтамöд дынсянь куйлöны быдкодь пункттэз.
Колö сiдз жö тöдны, ыджыт я ылынаыс эна пункттэз коласын.
Кыдз жö тöдöны ылынасö?
Неыджыт ылынасö часто мерайтöны оськöввезöн;
ыджытсö — туйын чулалан чассэз либо луннэз сьöртi.
Мукöд коста баитöны сiдз: «Миян деревнясянь городöдз — вöлöн мунны куим лун, либо подöн вит лун».
«Миян посадсянь вöрöдззис — подöн мунны вит час».
Но эттшöм способöн ылына тöдöмыс абу точнöй.
Öтiк мортлöн оськöлыс (шагыс) ыджыт, а мöдiклöн учöт; öтiк вöв кыскö перыта, а мöдiк жагöна.
Медбы подöн либо вöлöн мунны сiйö жö öтiк ылынасö, вермас ковсьыны кадыс неöтмымда.
Ылынасö колö мерайтны точнöй мераэзöн: неыджыт ылынасö — метррезöн; ыджыттэсö — километррезöн.
Медбы тöдiсö быдöнныс, кыным километр лоö городдэз коласын, кöрттуй станцияэз коласын, деревняэз да колхоззэз коласын, кöрттуй полотноэзöт да шоссеэзöт доль сувтöтöны столббез-указателлез.
Километр — не учöт ылына.
Нельки ыджыт морт этö ылынасö мунö 10–15 минута.
Заданнёэз.
1. Пятнайтö школа оградаö (улицаö) доль ылына 100 метр.
2. Проверитö чассэз сьöртi, дыр я мунатö этö ылынасö.
3. Лыддьö, кытшöм кадö верматö мунны 1 километр.
4. Мунö километр да проверитö, правильнöя ли лыддитö.
5. Лыддьö, кыным оськöв тiян тöрö 100 метрö.
6. Лыддьö, кыным оськöв лоас 1 километрын.
7. Мунö асланыт деревнясянь 1 километр ылына, бергöтчö, видзöтö бöрлань да мерайтö синвылын этö ылынасö.
Кыдз мыччалöны чертёж вылын ылына
Мийö мерайтiмö ылынасö школа дынсянь библиотека дынöдз.
Лоис 25 метр.
Кыдз мыччавны этö ылынасö бумага вылын?
Бумага вылö 25 метрыс оз тöр.
Но этö ылынасö бумага вылын мийö вермамö мыччавны учöтжык мераэзöн, шуам сантиметррезöн.
Босьтам кö мийö быд сантиметрсö бумага вылас лыддьыны 5 метр туйö, сэк быдöс ылынасö позяс мыччавны 5 сантиметр кузя визьöн.
Медбы миян условиеыс вöлi вежöртана быдöнлö, черта увдöрас сувтöтам миян учöтсьöтöм меркалiсь показатель.
Условнöй учöтсьöтöм меркаыс, кöда сьöртi керöны чертёжжез, шусьö масштабöн.
Масштабыс сувтöтсьö чертёж увдöрас.
«Масштаб» кыв увдöрын мыччассьö условнöй учöтсьöтöмыс: кыным метр либо километр колö лыддьыны 1 сантиметрын.
Гижöмыс увдöрын нуöтöны визь да юкöны сiйö сантиметррез вылö.
Визьсö медодзза юкöм вевдöрын гижöны 0; 0 дынсянь веськытланьö быд сантиметр вевдöрö гижöны метррезлiсь либо километррезлiсь сiйö числосö, кынымö сiя мыччалö.
Медодзза сантиметрсö юкöны учитик часттез вылö.
Мыччалöм масштаб вылын учитик юкöтсö колö лыддьыны 1 метр туйö.
____________
abu
Чертёж вылын ылынасö мерайтöм понда пользуйтчöны масштабнöй линейкаöн.
Неыджыт бумага листок кöстöны линейка чужöмö.
Линейкаоксö пуктöны масштаб дынö да вуджöтöны сы вылö масштаб вылiсь юкöммесö.
Масштабнöй линейкаöн бур тöдны чертёжыс сьöртi ылынаэсö: сiйö вештöны чертёжыс кузя да лыддьöны, кынымись сiя тöрас.
Упражненнёэз.
1. Лöсьöтö масштабнöй линейка 13 рисунок вылiсь масштаб дынö.
2. Проверитö масштабнöй линейканас, правильнöя ли 12 чертёж вылын мыччалöма школа да библиотека коласiсь ылынаыс.
3. Тöдö 15 чертёж сьöртi, мый ылына школа дынсянь почтовöй отделеннё дынöдз.
Чертёжыс лöсьöтöма масштабын 1 сантиметрын — 10 метр.
4. Школа дынсянь ты дынöдз 200 метр.
Мыччалö этö ылынасö масштаб сьöртi: 1 сантиметрын — 20 метр.
Общöй вид да план
Мийö велалiм определяйтны веськöв да ылына.
Но сы понда, медбы бура кужны тöдмавны местностьсö, колö эшö кужны пользуйтчыны планöн.
План сьöртi позьö бытшöма тöдны мулiсь любöй участок, любöй местность, кöть нiя и куйлöны миян дынсянь öддьöн ылын.
Тiйö мöдатö, кыдзи бы син одзын, адззыны öтiк школалiсь усадьба, кöдö тiйö некöр эдö адззылö, кöдаын некöр эдö вöлö.
Тiйö босьтат рисунок, кöда вылын мыччалöма школа участоклöн общöй вид.
Рисунок вылын бытшöма тыдалöны: öтiк этажа школьнöй зданнё, вылын йöр да школа участоклöн неыджыт часть.
Но быдсöн участоксö адззыны оз туй — сiйö сайöвтö школаыс да вылын йöрыс.
Сэк тiйö босьтатö школа участоклiсь фотографическöй снимок, кöда керöма самолёт вывсянь (рис. 17).
Эта снимок вылын бытшöма тыдалö быдöс школа участокыс.
Тыдалöны: школа гöгöр вылын йöр, школьнöй зданнё, сарай, карчйöр гряддэз, пчельникын вит улей, плода садын пуэз, гöгрöса цветочнöй клумба.
Но самолёт вывсянь снимок вылын тыдалöны токо предметтэслöн вевдöрись часттес да местаыс, кöда ны увтын.
Школьнöй зданнёыслöн тыдалöны токо крышаыс да местаыс, кöда сы увтын.
Пуэслöн тыдалöны токо йыввес да местаыс, кöда пуэс увтын.
Школьнöй участокыскöт кокни тöдсасьны чертёж сьöртi, сiя керöма сiдз, кыдз бытьтö мийö видзöтам школа участокыс нылö вылiсянь веськыта.
Видзöтö этö чертёжсö (рис. 18).
Сiя вачкисьö самолёт вывсянь снимок вылö.
Сы вылын мыччалöма быдöс, мый мийö адззылiм снимок вылiсь.
Медбы бытшöмжыка вежöртны этö чертёжсö, видзöтö условнöй знаккез.
Нiя мыччалöмöсь чертёжыс увдöрын.
Самолёт вывсянь снимок дынö да школа участок чертёж дынö сетöмöсь масштаббез.
Масштаббес сьöртi абу сьöкыт тöдны, мый ыждаöсь быдöс школа участок, школьнöй зданнё, сарай да торья школа участоккез.
Позьö сiдз жö тöдны, кöда ладорын да мый ылына öтамöд дынсянь сулалöны торья предметтэс.
Школа участоклöн фотографическöй снимок, кöда снимайтöма самолёт вывсянь да школа участоклöн чертёж — эта планнэз.
Упражненнёэз.
1. План-чертёж сьöртi адззö, кытшöм масштаб сьöртi сiя чертитöма.
2. Условнöй знаккез сьöртi адззö, кытöн школа, географическöй площадка, плодовöй сад, сарай.
3. Адззö, кöда ладорын школа дынсянь сулалöны: сарай, географическöй площадка.
4. Тöдö, мый ылынаын школа дынсянь нiя сулалöны.
5. Адззö, мый кузя да мый пасьта школьнöй участок, мый кузя да мый пасьта школьнöй зданнёыс.
Местностьлöн план
Вылына школа вевдöрöт лэбзис самолёт.
Сы вывсянь керисö фотографическöй снимок.
Видзöтö этö снимоксö.
Кык километр вылынасянь школа участокыс тыдалö öддьöн учöтöн.
Но тöдны сiйö позьö форма да положеннё сьöртi.
Снимокыс сьöртi тыдалö, што школа участокыс дынö западсянь да востоксянь матö локтöны посёлоклöн керкуоккез саддэзöн да карчйöррезöн.
Югланьын школа участок дынсянь мунö шоссе; кык ладорсянь сы гöгöр садитöмöсь пуэз.
Шоссеыс мöд ладорын тыдалöны посёлоклöн керкуоккез да векнитик улицаэз.
Керкуоккес да улицаэс локтöны вöр дынö, кöда кыссьö югланьö ю дынöдз.
Снимайтны самолёт вывсянь плансö позьö перытжыка, чем керны план-чертёж.
Лэбзис самолёт, керис снимок — и готово.
Оз ков мерайтны места, кöда вылын сулалö быд керкуокыс, картаыс, садыс, карчйöрыс.
Оз ков мерайтны быд улицалiсь кузясö да пасьтасö.
Сiдз снимайтöны миян Союзын планнэз ыджыт городдэзлiсь, планнэз участоккезлiсь, кöдна вылын быдмö вöр да куйлöны нюррез.
Местностьлöн план — эта местность мыччалöм, кыдз тыдалö сiя, кöр видзöтны сы вылö вылiсянь, ыджыт вылынасянь.
План вылын мыччассьö местность вылас предметтэзлöн не общöй видыс, а токо нылöн кырöввез, токо сiя местаыс, кöдö предметтэс занимайтöны му вылас.
План дынö пыр сетсьöны условнöй знаккез да масштаб.
Масштаб сьöртi абу сьöкыт мерайтны быд ладорö.
Упражненнёэз.
1. Адззö план сьöртi, кöда снимайтöма самолёт вывсянь, кытшöм масштабын сiя керöм.
2. Адззö план вылас северо-западнöй пельöсын школа участок.
3. Адззö сы вылiсь: школа, сарай, сад, карчйöр.
4. Определитö, кöда ладорын школа участок дынсянь куйлöны: школа дынiсь переулок, шоссе.
5. Тöдö, мый пасьта шоссеыс.
6. Определитö, мый ылынаын школьнöй участок дынсянь визывтö ю.
Заданнё.
Велалö пользуйтчыны асланыт местность планöн.
1. Сувтöтö основнöй веськöввез кузя план.
Крепитö плансö картонiсь неыджыт лист бердö либо фанераись пöлок бердö.
Босьтö плансö киö, кыдз мыччалöма 20 рисунок вылын, да бергöтлö сiйö сэтчöдз, кытчöдз северной ладорыс план вылас оз öтлаась компас сьöртi северланьö веськöвкöт.
2. Адззö план в ылiсь предметтэз, кöдна тыдалöны гöгöрас.
Кöр планыс сувтöтöма правильнöя, то план вылас мыччалöм предметтэс пондасö куйлыны сiдз жö, кыдз и местность вылын предметтэс.
Адззö план вылiсь сiйö местасö, кытöн тiйö сулалат.
Öнi абу сьöкыт адззыны план вылiсь и нiйö предметтэсö, кöдна тыдалöны местность вылын,
Висьталам, тiйö адззат востокланьö ас дынсиныт заводлiсь труба.
Видзöтö план вылö, и сы вылын востокланьö мыччалöма завод.
Сiдз план вылiсь позьö адззыны и мöдiк предметтэз, кöдна тыдалöны местность вылас.
3. Велалö план сьöртi адззыны туй.
Висьталам, тiйö мöдат адззыны мельница дынö туй.
Но мельница оз тыдав сiя местасянь, кытöн тiйö сулалат: сiя вöр сайын.
Адззö план вылiсь мельницасö и определитö, кöда ладорын сiя сулалö сы места дынсянь, кытöн тiйö сулалат (рис. 21).
Адззö сiйö жö веськöвсö местность вылiсь.
Öнi абу сьöкыт адззыны мельница дынö туйсö местность вылын.
Кыдз рисуйтны школа гöгöрлiсь план.
Босьтö асланыт местностись план.
Пуктö сы вылö вевдöрсяняс гижтöм бумага лист, крепитö нiйö булавкаэзöн либо вурö сунисöн.
Бумага листнас вевттьöм плансö пуктö öшын стекло бердö.
Кыдзи öшыныс бура югйöтöм, то планыс пондас тыдавны бумага-пыр.
Кольччö токо бумагаöттис новйöтны карандашöн.
II. МУ ВЕВДÖРЛÖН ФОРМАЭЗ
Заданнё.
Ветлö экскурсияöн вылын места вылö.
Эта экскурсия дырни видзöтö: кытшöм формаыс миян местностьлöн, кыдз сiя используйтöма отирöн.
Мый мийö адззам вылынiн вывсянь
...
Заданнё.
Гижö эта образец сьöртi сiя местность йылiсь, кöдö тiйö видзöтiт асланыт экскурсия дырни.
Сравнитö асланыт местностьлiсь вевдöрсö книгаын öнi токо гижöм местность вевдöркöт.
Географическöй площадка вылын не уроккез коста уджалöм.
1. Керö равниналiсь модель.
Сувтöтö географическöй площадка вылö 1 сантиметр ыжда морт фигурка.
Кыдзи бы вöлiсö сэтшöм учöт отир, то географическöй площадкаыс нылö кажитчис бы кыдз конечтöм равнина.
2. Керö мыслiсь модель.
Уль песокись керö кынымöкö 5, 10 да 25 сантиметр сувда песока мысочоккез.
Ныкöт ордчöн сувтöтö мортлiсь фигурка.
Сэтшöм мортокыслö мысочоккес кажитчисö бы ыджыт мыссэзöн.
3. Керö кырассэзлiсь модель.
Уль песокись мысочоккес боккезö керö ёсёкöн крут бока векнит канаваоккез.
Кырас пытшкас сувтöтö морт фигурка.
Мый сэтшöм топографическöй план и мыйлö сiя колö
Вылына, вылына сiя жö местность вевдöрöт, Светлöй ю вевдöрöт, лэбзьö самолёт.
Лётчик ылö адззö вылiсянь равнинасö, кöда паськалöма быд ладорö да вевттьöма ыббезöн, видззезöн, вöррезöн.
Самолёт увтас свиттялан ленточкиöн чуклясьö ю.
Мелькайтöны селеннёэз.
Лётчик лэбзьö эстi первуись, но сiя тöдö мый нима сiя юыс, кöда вевдöрöт лэбзьö, да селеннёэс, кöдна мелькайтöны ю береггес кузя.
Сiя тöдö, кöда ладорö нуöтны самолётсö.
Сiя бытшöма тöдö, кытöн му вевдöрыс ровнöйжык, кытöн буржык пуксьыны.
Кытiсь жö сiя быдöс этö тöдö?
Эд воздухас абу туйес, абу и отир, кöдналiсь позьö юасьны.
Лётчиклöн эм топографическöй план.
Сы вылын мыччалöма местность, кöда вевдöрöт лэбзьö самолёт.
План вылын мыччалöм, кытöн местностьыс вылынжык, кытöн лажмытжык, мыччалöмöсь селеннёэз, ыббез, видззез, вöррез, юэз, туйез.
Компас сьöртi лётчик сувтöтö план и тöдö, кöда ладорö колö лэбзьыны.
Топографическöй план либо карта колöны не токо лётчиклö.
Ны сьöртi адззöны туй путешественниккез-исследователлез.
Нiйöн пользуйтчöны инженеррез, кöр бöрйöны места строитны заводдэз да электростанцияэз.
Нiя колöны быд колхозлö, медбы правильнöя янсöтны му.
Топографическöй план либо карта — красноармеецлöн сы боевöй уджын пырся спутниккез.
Нiйöн должен кужны пользуйтчыны и быд гражданин, медбы любöй кадö, кöр ковсяс, отсавны Краснöй армиялö Советскöй Союз оборонаын.
__________
abu
Общöй вида местностьöн, кöда вевдöрöт лэбзис самолёт, тiйö тöдсаöсь ни «Миян местность» картинка сьöртi, кöда сетöма учебникас.
Картинка увтын эм план, кöдöн лэбзикö пользуйтчис лётчик.
Заданнёэз.
1. Видзöтö бытшöмжыка эта план увтiсь условнöй знак: «Кыдз мыччассьöны план вылын лажмытжык да вылынжык местаэз?»
Кытшöм рöмöн мичöтöма медвылын места?
Кыдз вежсьö рöм, кöр местаыс лоö лажмытжык?
Кытшöм рöмöн мичöтöмöсь медлажмыт местаэз?
Видзöтö, кыдз мыччассьöны крут да пологöй покаттэз.
2. Адззö картинка вылiсь Высокöй посад дынiсь медвылын места.
Адззö рöм сьöртi сiйö жö местасö топографическöй план вылiсь.
3. Адззö план вылiсь рöм сьöртi медлажмыт местаэз.
4. Адззö план вылiсь Высокöй посад дынiсь кырассэз.
Географическöй площадка вылын не уроккез коста уджалöм.
Мерайтö участок 96 сантиметр кузяö да 68 сантиметр пасьтаö.
Эта участок вылын уль песокись керö модель топографическöй план вылын мыччалöм местностьлiсь.
Быдöс размерресö, кöдна мыччалöмöсь топографическöй план вылас, колö ыждöтны 4-ись.
Высокöй посад дынiсь мыссö колö керны 10 сантиметр вылынаö.
Медбы модельныт тiян буражык вачкисис план вылын да картинка вылын мыччалöм местность вылö, вундалö юэсö да тыэсö лöз бумагаись, кöрттуйез керö вöснитик проволокаись, керкуоккез — торрез вылö вундалöм квадратнöй брусоккезiсь, вöр — нитшись.
Керöс вылö кайöм
Кык лун ни мийö кайим керöс вылö.
Керöсыс лоис сё крутжык и крутжык.
Иззэс часто мезмывлiсö миян коккез увтiсь да гымалöмöн усялiсö увланьö.
Мийö öдва видзсьывлiм местааным, кутчисьлiм скалаэз бердö.
Часто ковлiс мунны пыдын пропасть весьтöт.
Туёкыс вöлi сэтшöм векнитик, што юр бергöтчылiс, кöр видзöтышлiм улö.
Кöр туёкыс орлiс, и миянлö ковлiс чеччавны пропастьыс вевдöрöт.
Вот вöлись мийö 3 километр сувдаын лымöн вевттьöм керöс йыв дынын.
Эшö джын километр мымда вывланьö — и мийö лоам керöс йыв вылын.
Но туй вылас стена кодь крут скала.
Мый керны?
Кöртасям öтамöд бердö гезöн: кыдзи öтiк мезмас, дак кыкыс вермасö сiйö видзны.
Пондöтчам жагвыв кайны вылö.
Ме адзза киэзнам изовöй выступ, кутчися сы бердö, лэбта коккез, сыбöрын бöра кутчися и сiдз сё вылöжык и вылöжык.
Менам ёрттэзö сiдз жö мунöны ме бöрын.
Киэз вирöдз гыжьялöмöсь.
Коккез чуть да и мезмöны иззэс вылiсь.
А изовöй стенаыслöн конецыс оз тыдав.
«Мый лоас, вынтöмсяласö кö киэз, либо орас гезыс?»
— думайтö быдыс миян коласiсь.
Но вот скалаын ыджыт выступ.
Шоччисям 10 минута да бöра пондöтчам кайны вылö.
Вöлись сувтам йы вылö.
Неылынöсь ни йыв дынсянь.
Кольö токо йы кузя öтiк подъём.
Но сiя сэтшöм крут, што йы кузя мунны некыдз оз позь.
Ковсьö лёдорубöн керавны тшупöттэз.
Быд шаг вылö мунö öддьöн уна удж.
Лолавны сьöкыт — оз тырмы воздух, кöсичаэзын стукöтö, юр бергалö, öсöтö.
Кынымкö шаг бöрын ковсьö сувтчыны да шоччисьны.
Медбöрья 20 шагсö огö мунö, а кыссям.
Эшö медбöрья вынсьöтчöм — и мийö йыв вылын.
Некöр ог вунöт сiйö картинасö, кöдö мийö казялiм сы вывсянь.
Ылын, ылын, мый ылына судзис син, нюжалiсö керöссэз.
Вылö лэбтiсисö лымья йыввез.
Паськыт юэзöн лэдзчисис ны вылiсь йы.
Ылын улын чуклясис ю.
Сы дынын чуть казялана точкаэзöн тыдалiсö селеннёэз.
Вöлi лöнь.
Шондi лöсьöтчис ни пуксьыны.
Сылöн косöй югöррес югдöтiсö лымья йыввесö розовöй да золотöй югытöн.
Но недыр любуйтчим мийö этöн картинанас.
Чожа увтi быдöс вевттисис кымöррезöн.
Юэс да селеннёэс дзебсисисö.
Керöссэс öтамöд бöрын öшисö кымöррезас.
Мийö пондiм лэдзчыны.
Колiс тэрмасьны пемытöдз адззыны места узьны.
Вылын керöссэз вылö кайлöмыс зорöтö вын да ловкость, велöтö вермавны сьöкыттэз да опасносттез.
СССР-ись не öтiк тысяча пролетарскöй турист кайлöны быд годö öддьöн вылын керöс йыввезö.
Заданнёэз.
1. Сравнитö керöссэзлiсь общöй видсö мыссэз общöй видкöт.
2. Сравнитö öнi токо гижöм керöссэз вылö кайöмсö мыс вылö тiян кайöмкöт.
Кытшöм опасносттез пантасьöны отирлö, кöдна кайöны вылын керöссэз вылö?
3. Керö журнальнöй да газетнöй картинаэзiсь, открыткаэзiсь да быдкодь гижöммезiсь альбом «Керöссэз».
Географическöй площадка вылын не уроккез коста уджалöм.
Керö мыс да керöс модель.
Керö географическöй площадка вылын уль песокись (тöвнас — лымись) 25 сантиметр сувда мыс модель да 110–150 сантиметр сувда керöс модель.
Сравнитö нiйö вылына сьöртi.
Керöс модель дынö сувтöтö морт фигурка.
Сэтшöм лоас фигурка сьöртi неыджыт керöс.
А ыджыт керöссэз эта фигурка сьöртi 5-ись, 10-ись да 15-ись вылынжыкöсь сiя керöсокся, кöдö тiйö керит.
Му вевдöрлöн быдкодь формаэз
Мулöн вевдöр овлö не öткодь.
Тшöкжыка пантасьлöны равнинаэз.
Нiя кыссьöны не öтiк сотня да тысяча километрöн.
Мукöд равнинаэс кажитчöны совсем плоскöйезöн.
Но и плоскöй равнинаэс лэдзчисьöны пыр кöда-нибудь ладорö.
Равнинаэс вылын часто овлöны неыджыт вылынiннэз — мыссэз.
Ылiсянь, самолёт вывсянь, мыссэс почти озö тöдчö.
Но овлö, што вылынiннэс лэбтiсьöны гöгöрись вевдöрысся 200 метрöн вылынжыка.
Сэтшöм вылынiннэс шусьöны керöссэзöн, а местностьыс — керöсаöн.
Овлöны керöссэз и не öтiк километр вылынаöсь.
Унажыксö овлö сiдз, што лэбтiсьö не öтiк и не кык, а уна керöс.
Сьöрсьöн-бöрсьöн мунöны керöссэз.
Кымöррезся вылынжыка кайöны нiя вылö.
Вылын керöс йыввес вевттьöмöсь пырся лымöн.
Кыдз используйтсьö миян школа гöгöр му
Миян школа строитöма колхознöй деревняын.
Муыс сы гöгöрись унажыксö гöрöма.
Гöгöр паськалöны колхознöй ыббез, карчйöррез, саддэз.
Но мукöд муыс используйтсьö и природнöй видын.
Эта ыджыт лыса вöр, заливнöй видззез ю береггез кузя.
Вöрсис миян колхозниккес пилитöны пес, видззез вылiсь ытшкöны уна турун.
Эм эшö и нюр, кöдö медбöрья кадöдз некыдз эзö используйтö.
Неважын сiйö видзöтiсö и адззисö сетiсь уна бур торф.
Локтан годö сiйö пондасö шедтыны.
Уна му миян гöгöр займитöма быдкодь постройкаэзöн: олан керкуэзöн, колхознöй амбаррезöн, сарайезöн, пода картаэзын.
Неылын колхозыс дынсянь сулалö механическöй завод да рабочöй посёлок, кытöн олöны 8 тысяча рабочöй.
Ыджыт му участок вылын эстöн сулалöны токо постройкаэз.
Эстöн абуöсь не ыббез, не карчйöррез.
Ны туйö посёлок гöгöр паськалöма парк да и посёлокас керкуэс гöгöр садитöмöсь пуэз.
Не етша мусö миян гöгöр занимайтöны и туйез.
Паськыт улица мунö колхознöй деревня шöрöт, да кынымкö улица эмöсь рабочöй посёлокын.
Волькыт ленточкиöн нюжалiс миян дынöдз Москвасянь асфальтöн вöвдöм шоссе.
Куим грунтовöй туй öтлаöтöны миянöс заводкöт да матiсьжык посаддэзкöт.
Неылын колхоз дынсяняс мунöны кык кöрттуй. Подъезднöй кöрттуй öтлаöтö кöрттуйсö заводкöт.
Заданнё.
Висьталö, кыдз используйтöма му вевдöрыс тiян школа гöгöр.
Кытшöм измененнёэз лоисö эстöн Великöй Октябрьскöй социалистическöй революция бöрын.
Му вевдöр используйтсьö не öтмоз
Öтiк му участоккез уджассьöны да пöртчöны ыббезö, карчйöррезö, саддэзö.
Мöдiккез — сельскöй хозяйство понда используйтсьöны природнöй видын. Шуам, вöррез, видззез.
Му участоккез, кöдна используйтсьöны сельскöй хозяйство понда, шусьöны сельскохозяйственнöй угоддёэзöн.
Сельскохозяйственнöй угоддёэс овлöны быдкодьöсь: ыб угоддёэз, видз угоддёэз, вöр угоддёэз да мöдiккез.
Уна мусö босьтöны ас увтаныс быдкодь постройкаэз — керкуэз, заводдэз, фабрикаэз, электростанцияэз, складдэз да мöдкодь зданнёэз.
Не етша мусö босьтöны увтаныс улицаэз да быдкодь туйез — грунтовöйез, шоссейнöйез да кöрттуйез.
Равнинаэзын да керöса местаэзын му вевдöрыс используйтсьö не öтмоз.
Равнинаын унажык муыс куйлö ыббез увтын.
Ю гöгöр паськалöмöсь карчйöррез.
Лажмыт берег дынын — видз да нюр участоккез.
Мыс йыввез вылын вöррез либо поскотинаэз.
Селеннёэз частожыксö куйлöны юэз дынын.
Туйес равнинаас веськытöсь; ны кузя кокнит кыскавны груззэз.
Керöса местаэзын ыббес увтын неыджыт участоккез, кöдна куйлöны лажмытiннэзын керöссэз коласас.
Керöс боккесö вевттьöны вöррез.
Нiя абуöсь токо сэтчин, кытöн керöс боккес стена кодь веськытöсь.
Видззес куйлöны керöссэз вылын, кытöн кончайтчöны вöррез.
Керöс йыввес вевттьöмöсь пырся лымöн да йыöн.
Селеннёэс куйлöны равнинаэзын керöссэз коласас.
Керöссэзас туйес чуклясьöмöн мунöны пологöй покаттэз кузя; керöссэз кузя груз кыскалöм — öддьöн сьöкыт удж.
Упражненнёэз.
Тöдö топографическöй план сьöртi:
1. Кытшöм местаэзын — вылынiннэзын либо лажмытiннэзын — мыччалöмöсь видззез?
2. Кытшöм местаэзын мыччалöмöсь нюррез?
4. Кытöн мыччалöмöсь поскотинаэз?
5. Кытшöм участоккез вылын — вылынiннэзын либо лажмытiннэзын — быдмö вöр?
6. Кöда ладорын Высокöй посад дынсянь быдмö листа вöр, кöда ладорын — сора, кöда ладорын — лыса вöр?
7. Кытöн план вылын карчйöр?
8. Картинка сьöртi адззö план вылiсь ыббез.
III. МУ ПЫТШКИСЬ ДА МУ ВЕВДÖРИСЬ ВАЭЗ
Му пытшкись ва
Видзöтö, мый керсьö оградаын, садын, карчйöрын, кöр зэрö.
Кöс му перыта сöскö медодзза ва воттесö да вамö.
Зэр кисьтö сё буражык и буражык.
«Мый бура зэрö», — баитöны отир да термасьöны дзебсисьны керкуэзö, крыша увтö.
Зэр сё кисьтö, «кыдз ведра понiсь».
Ва шороккез котöртöны ограда кузя, сад кузя.
Неыджыт шороккес öтлаасьöны, пöртчöны быдса шоррезö, кöдна котöртöны туй кузя да гряддэз коласöт.
Но вот зэрны дугдiс.
Петiс шондi.
Шоррес да шороккес, кöдна котöртiсö зэр коста, öшисö.
А мымдакö ваыс йиджис муас.
Кытчö сiя лоис?
Уськöтö тöдвыланыт опыт, кöдö тiйö керит естествознаннё урок вылын сы понда, медбы тöдны, кыдз ва йиджö песок-пыр да сёй-пыр.
Мый тiйö адззылiт?
Песок-пыр ваыс йиджис перыта, сёй-пыр öддьöн жагöна, и сысянь дырöн видзсис сёй вылын.
Тiйö баитiт: «песокыс — вайиджöтан, «сёйыс — ванейиджöтан».
Сiя жö овлö и му вылын.
Зэр воттес да шоррес пырöны сё пыдынжыка и пыдынжыка, йиджöны рышкыт му-пыр да песок-пыр.
Но вот ваыс локтö сёй дынöдз либо чорыт из дынöдз.
Ва эстöн пондö öксьыны.
Лоö му пытшкись ва.
Ключчез, либо источниккез
Му пытшкись ва визывтö ванейиджöтан слой кузя.
Пантасяс туй вылас кырас либо ю берег, кытöн эта слойыс петö вевдöрас, и ва пондö кыссьыны му вевдöрö.
Сiдз аркмö ключ либо источник.
Заданнё.
Видзöтö ключчез асланыт местаэзiсь.
Кырасын деревня дынын ыджыт из увтiсь петö ключ.
Лун и ой ключ дынсянь дзёльöтö шорок, котöртö улö кырас кузя и сэтчин усьö юокö.
Ключас ваыс öддьöн сöдз да сэтшöм кöдзыт, нельки пиннез висьöны, кöр сiйö юан.
Пыдöсыс ключыслöн песока, и сэтчин свиттялöны волькыт да басöк изоккез.
Ключ дынö лэбзьöны кайез — юны да кыйны насекомöйезöс.
Жар луннэзö челядь любитöны орсны ключ дынас да видзöтны сы сöдз ваö.
Сэтöн сэтшöм бур, ыркыт.
Ключчез сетöны бытшöм, сöдз юан ва.
Нiя жö тыртöны ваöн юэз, пруддэз да тыэз.
Мукöд пора купайтчикö шедлан сэтшöм местаö, кытöн ваыс öддьöн кöдзыт.
Эта местаын пыдöссис петö ключ.
Упражненнё.
Адззö топографическöй план вылiсь ключ.
Кытшöм селеннё дынын сiя петö?
Колодеццез
Öтiк деревняын эз вöв ключ, а сiйöн эз вöв и бур юан ва.
Решитiсö гарйыны колодец.
Кутчисисö удж бердö.
Зыррез увтiсь пондiс киссьыны сöстöм песок.
Гарйисö быдса лун.
Яма гöгöрас быдмис песокись ыджыт куча, а ваыс сё эшö эз вöв.
Мукöдыс пондiсö видчыны: «Кытшöм толк гарйыны, песоксис васö огö адззö».
Мöдiк лунö — бöра песок, а ва абу.
Сiя жö и куимöт лунö.
Мöдiсö чапкыны ни, кыдз друг томыник зонка, кöда гарйисис яма пыдöсас, горöтiс: «Вазьöм песокыс, ва!»
Перыта кутчисисö вились удж бердö.
Эз чулав и час, кыдз ямасис пондiсö чапкыны не песок, а сёй.
Пыдöсас мыччисис ва.
«Сулалö! — горöтчис бригадир, — тырмас гарйыны, локтiмö ни ва дынöдз».
Ашынас колодецын джынöдззис сулалiс сöдз ва.
Сэтчин, кытöн абуöсь ключчез, кытöн му пытшкись ваыс оз пет му вевдöрö, сэтчин васö отирлö колö судзöтны аслыныс.
Гарйöны колодеццез, кытчöдз озö локтö ванейиджöтан слой дынöдз, кöда вевдöрын öксьö му пытшкись ва.
Мукöд коста колодеццез овлöны öддьöн пыдынöсь — видзöт керан, нельки и ваыс оз тыдав.
Мый керöны тулысся да зэр ваэз
Тiйö тöдатö ни, што шороккез да шоррез, кöдна аркмöны зэр коста, сыспотека визывтiсö юö.
Ограда, сад, карчйöр, туй лоисö кöсöсь ни.
Но видзöтö, мый лоис му вевдöркöт: сiя омöн гарйöма зэр ваöн.
Рышкыт му да песок нöбöтöмöсь ямаö, ограда лажмытiнö.
А сэтчин, кытi котöртiс зэр ваыс — кушмисö иззэз, кыдз бытьтö кинкö нарошно вöвдiс нiйöн кырöтöм канаваэсö.
Карчйöрын быдсöн кырöтiс кынымкö гряд.
Но медбура кырöтiс мыс вылiсь туй.
Сэтчин медбура бушуйтiс зэр ваыс.
А öнi сы местаын аркмис пыдын канава: туй кузя оз позь мунны.
А видзöтö, мый керöны тулыснас лым ва шоррез.
Бурнöй шороккез да шоррез перыта котöртöны быд ладорсянь ю дынö.
Ю петö береггезсис да паськыта нiйö вöтьö.
Эстöн кырöтöма туй, сэтчин нöбöтöма забор, ыббезö да карчйöррезö вайöтöма песок да тина.
Он вермы и лыддьыны быдöс бедаэсö, кöднö керö тулысся ва.
Заданнёэз.
1. Наблюдайтö, кыдз ыджыт зэр бöрын оградаын, садын, туй вылын аркмöны шоррез.
Видзöтö, кыдз вежсис му вевдöрыс шоррес туй вылын.
Эз я лоö разрушеннёэз туй вылын, карчйöрын, ыб вылын, ю дорын?
Эз я пуксьöссэзöн тшыкöт ыббез, видззез, карчйöррез?
2. Кыдзи тiян местностьын эм кырас, то видзöтö сiйö.
Пыдын я сiя?
Котöртö я кырасöттяс шорок?
Оз я сод кырасыс зэррез бöрсянь да тулыснас?
Оз я тшыкöт кырасыс туй либо ыб?
Оз я петкöт ваыс кырассис юö песок да тина?
Абу я кырас, кöдаын быдмö вöр?
Кытшöм кырас буражык кырöто ваыс — кöдаын эмöсь быдмассэз либо кöдаын нем оз быдмы?
Кырас
Пырö пыдын кырасö.
Вылына кайöны сылöн крут боккес.
Векнит полосаöн тыдалö нёбо.
Пыдöсöттяс котöртö шорок.
Мунö кырас йылöдз.
Эстöн сiя не öддьöн пыдын.
Öдва котöртö сы пытшкын учитик шорок.
Мукöд кырассэзын абу и учитик шорокыс.
Но вот пондiс кисьны ыджыт зэр.
Быд ладорсянь кырасö пондiс котöртны ва.
Шумöн котöртö кырас кузя нять да гудыра ва, вартö сы береггезö; нетшкö му глыбаэз да нöбöтö нiйö улö кырас кузя.
Ваэс кырöтöны кырас йывсö, гарйöны ямаэз сы пыдöсö.
Аркмöтöны виль ордча кырасоккез.
Нiя кыссьöны быд ладорö, вундалöны ыббез, локтöны селеннёэз дынö, кырöтöны улицаэз, жугдöны туйез, гарйисьöны керкуэз увтö.
Кырассэз вайöны ыджыт вред сельскöй хозяйстволö.
Ыббез вылын, кытöн муыс гöрöм — небыт, нiя быдмöны öддьöн перыта да лоöны öддьöн ыджытöсь.
Сiдз, Харьков дынын 15 годöн кырасыс быдмис 230 метр кузяöдз.
Öнi кырассэзкöт пессьöны.
Берегитöны вöр, особенно кырас йыввез дынын сiйöн, што пуэс асланыс вужжезöн крепитöны мусö.
Кытöн вöрыс кералöм, сiйö садитöны вились.
Крепитöны кырас йыввесö плетеннезöн.
Упражненнё.
Адззö топографическöй план вылiсь, кытшöм селеннё дынын куйлöны кырассэз.
Шор
Ивановка деревня дынын, неылын школа дынсянь, эм неыджыт шор.
Сiйö шуöны Елицаöн, сiйöн што сiя котöртö кöзъя вöр-пыр.
География урок вылын велöтiсь юалiс аслас велöтчиссезлiсь: «Кытчö котöртö миян шорыс да кытöн сылöн конецыс?»
Челядь пондiсö баитны не öтмоз, пондiсö споритны.
И петiс, што некин ассис шорсö бытшöмика оз тöд.
Решитiсö керны шор дынас экскурсия.
Ашынас босьтiсö сьöраныс бумага, карандашшез, компас да мунiсö шор дынö.
Шорлöн исток.
Вöснитик змеяокöн шорок котöртiс вöр кузя.
— Но, челядь, кин первöй адззас, кысянь котöртö шорыс?
Быдöнныс котöртiсö кушин вылö.
Эстöн вöлi уль, кок увтын больöтышлiс ва.
— Ме адззи, то ключыс, — висьталiс Катя.
Уськöтчисö яма дынö, кöда пыдöсiсь петiс ва.
— Эта — Елица шорлöн исток, — висьталiс велöтiсь.
— Рисуйтö этö местасö.
Ва ньылат.
Видзöтiсö компас сьöртi, кöда ладорö котöртö шор, и пондiсö мунны ва ньылат.
Перво шор котöртiс востокланьö, сыбöрын пондiс бергöтчыны югланьö.
Мукöд местаэзын сiя дзебсисьлiс тшöк кустарник коласö.
Челядь видзöтiсö компас вылö и шорыслiсь быд ыджыт чукыльсö отмечайтiсö бумага вылын.
Вот петiсö вöрись да лэбтiсисö мыс вылö.
Эссянь ылö тыдалiс, кыдз шорыс чуклясьöма видз кузя.
Шор чукыллесö рисуйтiсö.
Велöтiсь висьталiс: «Гöп, кöда кузя котöртö шор либо ю, шусьö руслоöн».
Шорлöн удж.
Гажаа котöртiсö керöсок увтö челядь, локтiсö шор дынöдз.
Чапкисö сы вылö улок, видзöтiсö, кыдз сiя пондiс кывтны ва ньылат.
Пондiсö мунны ва ньылат.
Тöдмалiсö челядь, кыдз колö шор котöртöм сьöртi тöдны веськытланись да шульгаланись береггез.
Кыдзи сувтны чужöмöн ва ньылат, то веськытланьын лоас веськытлань берег, шульгаланьын — шульгалань.
Спокойнöя котöртö шор, чуть больöтö иззэз кузя.
Ва сылöн сöдз: тыдалö песока пыдöсыс, кöда кыдзи киськалöма волькыт изоккезöн — «галькаэзöн».
Кытöн ваыс котöртö перытжыка, тыдалö, кыдз сiя вешталö пыдöс кузя песок да поснит изоккез.
Пантасяс туй вылас мыс либо ыджыт из — шор сiйö гöгöртас да пондас котöртны сы ладорö, кытi кокнитжык визывтны.
Быд чукыль вылын тыдалö шорлöн удж.
Вынöн вартö визылыс öтiк берегас — кырöтö сiйö, нетшкö да нöбöтö быдса му кусöккез сiдз, што кушмöны пу вужжез (рис. 32).
А мöд берегöттис шор котöртö невизыла — сэтчин пуксьö шорöн кырöтöм песок.
Сiдз годiсь годö шорыс кырöтö öтiк берегсö да пуксьöтö песоксö мöд берегас.
Лоö долина (рис. 33).
— Видзöтö, челядь, шор шöрас — му.
Сiя остров, — висьталiс велöтiсь (рис. 34).
— А вот эстöн, видзöтö, берегыс ылö пырö ва пытшкас — сiя полуостров.
Шорлöн устье.
Челядь тöдiсö, што Елица усьö Ока юö.
Сэтчинöдз и решитiсö мунны.
Мунiсö не етша ни, öддьöнкодь мыдзыштiсö.
— Эдö полö, челядь, чожа локтам, видзöтö, Елицаыс унаöн ни паськытжык лоис.
— А мыля сiя лоис паськытжык?
— Ме тöда, — пондiс баитны Вася, — ме адззылi, кыдз ва тороккес берегсяняс котöртöны шорас!
— Быль, этö шороккез котöртöны Елицаас да сё буражык и буражык тыртöны сiйö ваöн.
Ылын пондiс свиттявны Ока вевдöр.
Елица лоис унаöн паськытжык, котöртны пондiс жагöнжык.
Эшö невна ылынжык, — и Елица усис Окаö.
— Вот эта местаыс шусьö шор устьеöн.
Видзöтö: шорыс усьöм дынын — пуксьöссэз; а ю шорас — песока остров.
Сiя: аркмис песокись да пуксьöсiсь, кöднö вайис шор.
Заданнёэз.
Керö шор кузя (либо ю кузя) экскурсия да обследуйтö сiйö сэтшöм план сьöртi:
1. Адззö шорлiсь исток.
2. Компас сьöртi адззö, кöда ладорö котöртö шор.
3. Видзöтö, эмöсь я сылöн притоккез.
Эмöсь кö, кöда ладорсянь усьöны.
4. Адззö, кöда местаын шор кырöтö берегсö, кöда местаö пуксьöтö песок.
5. Видзöтö, эмöсь я островвез, полуостроввез.
6. Тöдö, кытчö усьö шор.
7. Рисуйтö шорсö да гижö, кытöн сылöн исток да устье.
Стрелкаöн мыччалö, кöдöрö котöртö шор.
Гижö, кöда веськытлань, кöда шульгалань берег.
Упражненнёэз (топографическöй план сьöртi).
I. Светлöй ю кузя экскурсия.
1. Тöдö стрелка сьöртi, кöда ладорö котöртö Светлöй ю?
2. Кöда берег вылын (веськытланяс али шульгаланяс) куйлö деревня Бугровка?
3. Кöда берегыс крут, кöда пологöй?
4. Кöда берег вылын нюррез да тыэз?
5. Кöда местаö шорыс пуксьöтiс песоккез?
6. Кöда местаö шорас керöмöсь поссэз (видзöт условнöй знак)?
7. Кöда местаын шорас брод (видзöт условнöй знак)?
8. Кыдз вежсьö Светлöй ю береггез кузя быдмас пöлöс (видзöт условнöй знаккез)?
II.
...
Ыджыт ю
Равнинаэз вылын ыджыт юэз часто пондöтчöны учитик шороккезöн.
Шороккес öтлаасьöны да аркмöтöны шоррез да юэз.
Юэс котöртöны ылöжык и ылöжык.
Асланыс туй вылын юэс примитöны уна притоккез: шороккез, шоррез да юэз.
Сыбöрын, кыдз сыö усясö уна притоккез, юыс лоö ыджыт, унаваа.
Жагöна да спокойнöя котöртö сiя равнина кузя, иньдöтчö то öтладорö, то мöдладорö.
Крут береггесö юыс кырöтö, лажмыттэс дынö кольö песока пуксьöссэз.
Паськыт ю вылöт свободнöя мунöны ыджыт пассажирскöй пароходдэз, уйöны плоттэз, не öтiк тысяча ыджыт да учöт судноэз кыскалöны быдкодь груз — нефть, вöр, сов, чери, нянь.
Ыджыт равниннöй ю вылын пыр оживленнё: быд ладорö ветлöны пароходдэз, кöднöн кыскалöны пассажиррезöс да груззэз.
Керöс ю
Керöс юэз оз вачкисьö равнинаэз вылiсь спокойнöй юэз вылö.
Быгсялöмсянь нiя чочкомöсь, бешенöя котöртöны керöссэз вывсянь.
Чеччалöны гырись иззэз вылö, котöртöны ны вевдöрöт да зыкöн сьöраныс нöбöтöны гырись иззэз.
Беда сылö, кин кутчас вуджны сэтшöм юсö бродöн.
Вот мый лоис öтiк путешественниккöт, кöда кутчис вуджны керöс ю.
Сiя мунiс вöлöн верзьöмöн.
Ештiс токо вöлыс пырны ваас, кыдз перыта котöртан ваыс пöрöтiс сiйö кок йывсис да бергöтлöмöн шупыта кыскис ю шöрас.
Эшö кынымкö секунда — и вöлыс öшис бергалан ваас.
Отирыс, кöдна сулалiсö берег вылас, адззылiсö, кыдз сiя недыр кежö мыччисьлiс,
но седло вылас некин ни эз вöв.
Куим лун кошшисö вöйöмыслiсь телосö, но сiдз и эзö адззö.
Мыйöн неöткодьöсь керöс юэс нiя юэзкöт, кöдна котöртöны равнина кузя?
Мыйöн опаснöй керöс ю вуджöмыс?
Кыдз морт используйтö юэз
Юэзлiсь вынсö отирыс велалiсö босьны асланыс хозяйство понда.
Юэз вылö строитöны мельницаэз, заводдэз, электростанцияэз, кöдна уджалöны ва вынöн.
СССР-ын уна ни эмöсь ыджыт электростанцияэс, но строитасö эшö унажык.
Ва выныс подчнняйтчö да служитö мортыслö (рис. 40).
Но эта етша.
Отирыс вежöны юэслiсь визывтöмсö, тшöктöны котöртны нылö сэтчин, кытчö колö.
Эта понда гарйöны каналлэз.
Мукöд пора каналнас öтлаöтöны öтiк ю мöдiккöт.
СССР-лöн столицаыс, Москва — город ыджыт.
А Москва-юын, кöда вылын сулалö столицаыс, ваыс öддьöн етша, непыдын.
Сы вылöт озö вермö ветлыны гырись пароходдэз.
Москва-юсö öтлаалiсö каналöн Волгакöт.
Волгалöн ваыс пондiс котöртны Москва-юö.
Москва-юыс лоис унаваа и Советскöй Союз быд конецсянь пондiсö локны столица дынö пароходдэз.
Ты да пруд
Уна местаэзын му вевдöрас пантасьлöны ыджыт, ваöн тыртöм гöппез.
Нiя — тыэз.
Нiя местаэзын, кытöн абуöсь тыэз, отирыс часто керöны пруддэз.
Заданнё.
Кыдзи тiян местаын эм ты, то ветлö сы дынö экскурсияöн да видзöтö сiйö.
Упражненнёэз.
1. Адззö топографическöй план вылiсь тылiсь да прудлiсь условнöй знаккез.
2. Тöдö топографическöй план сьöртi:
Кыным ты мыччалöма сы вылын?
Кыным пруд?
Кыдз шусьö план вылас медыджыт ты?
Масштаб сьöртi тöдö сылiсь кузясö.
Ты
Не öтiк километр ылына паськалöма быд ладорö тылöн лöнь вевдöр.
Öддьöн бура югьялö сiя гожся шондi югöррез увтын.
Лажмыта ва вевдöрыс дынын лэбалöны чочком черигадяэз.
Песока да вылын берегас быдмö пожума вöр.
Вывланьын тыыс дынсянь, вöр пытшкын, ютитчö деревняок.
Песока лажмыт пуксьöс вылын сулалöны черикыйиссезлöн пыжжез да öшалöны черикыян снасттез.
Пыжжес гöгöр челядь.
Песок вылас и ваас быдлаын мелькайтöны нылöн сотчöм спинаэзныс.
Лажмыт берег дынöт доль уйö пыжйöн черикыйись.
Пыжыс шарöтö кувшинка паськыт листтэз кузя, мунö камыш да тростник коласöт.
Черикыйись сувтöтö черикыян снасть.
Кончитiс черикыйисьыс ассис уджсö, локтiс берег дынö, кыскис пыжсö берег вылö да пондiс мунны гортас нюрья лажмыт берег кузя.
Мунö нюр кузя черикыйись да думайтö: «Эз вöв одзжык эстöн нюрыс.
Вöр дынöдз вöлi ты, а сэтчин, кытöн öнi камыш, вöлi сöдз ва.
Тырö миян тыным быдмасöн береггес дынöт да пöрö нюрö» (рис. 41 да 42).
Нюр
Деревня бокын вöр шöрын — нитшья ыджыт нюр.
Сы доррезын сулалöны вылын да веськыт пожуммез, а шöрас — совсем лажмыт да винерик пожумоккез, уна ны коласiсь быдсöн ни косьмöмась.
Пуэс коласын — читкыля торф нитшись ыджыт кöчкаэз.
Кöчкаэс вылын поснит листа кыдз кустоккез, лажмытик бадь.
А нитш вылас ольсасьöны гырись да гöрд ягöддэза туримольöн узöра улоккез.
Лöз видзöны сьöдъягöд чужöма пьяникалöн ягöддэз.
Быдмö юрбöбсьöтан дука багульник.
Кыдззес кельдöтöмась.
Локтiс ни ар.
Пора мунны нюрö туримольла.
Öксисö нывкаэз, босьтiсö корзинаэз.
Платтёэзнысö лэбталiсö, пöрччасисö.
Вот и нюр.
Кöмтöм коккез вöйöны нитш ковёрас, кыдз подушкаö.
Кöчкаэс бытьтö киськалöмöсь гöрд ягöднас.
Корзинаэз перыта тырöны.
Нывкаэс видзсьöны öтлаын.
Токо Маша кольччис, эз казяв, кыдз подружкаэс мунiсö.
Гажтöм öтнаслö нюрас.
Чожажык вöтны подружкаэсö!
Берегитчöмöн мунö сiя одзлань кöчкаэс кузя, горöтлö, но некин оз шыась.
Кутчис котöртны, оз видзöт кок увтас.
Друг кылö, што коккес сылöн пидзöсви ва пытшкын.
— Кытчö тэ нылiньöй?
— кылiс баитöм.
Куим шаг ылына сы дынсянь сулалiс пöрись лесник.
— Разь позьö нюр кузя веськыта ветлöтны.
Эшö невна и шедiн бы «öшынö».
И былись, неылын свиттялiс ва.
Одзжык эстöн вöлi ты.
Доррессянь сiя важын ни тырис быдмассэзöн, позьö ветлöтны, а шöрас токо нитшись вöснитик ковёр, а сы увтын ва.
Мукöд местаэзын быдсöн осьта ва «öшыннэз».
Тыэз местаö часто лоöны нюррез.
Тыэз тырöны нюр туруннэзöн.
Быд арö нюр туруннас кулöны. Ны местаö быдмöны вильöсь.
Кулöм быдмассэс лэдзчисьöны пыдöсö.
Нюр пыдöсас öксьö кулöм быдмассэзiсь слой.
Ва увтас нiя озö сiсьмö, а сьöдöтöны, топалöны да пöртчöны торфö.
Уна годдэз бöртi öксьö торфись кыз слой.
Мукöд коста нюррес лоöны не ты вылын, а просто уль местаын, кытöн сулалö ва, и мыччисьö торфа нитш.
Уна умöльсö вайöтöны нюррез.
Ыджыт пространствоэз мулöн куйлöны весь, нiйö оз туй используйтны му-видз уджалöмын.
Туйез мунöны гöгралöмöн.
Нюррезын аркмö лихорадка да мöдiк шогöттэз.
Советскöй власть дырни нюррезкöт пессьöны, нiйö косьтöны, и ны местаын лоöны видззез, ыббез да карчйöррез.
Заданнё.
Кыдзи тiян местаын эм нюр, то ветлö сэтчö экскурсияöн да гижö сы йылiсь.
Нюрын лонтiсян
20 километр ылына лажмыт берег кузя паськалöма нюр.
Не вöлöн не подöн оз позь мунны!
«Гиблöй места.
Весь куйлö му», — баитiсö сы йылiсь крестьяна.
Локтiсö нюрас инженеррез да рабочöйез.
Исследуйтiсö вöтяна нюрсö да адззисö уна бур лонтiсян — торф.
Ловзис нюр.
Пондiсö уджавны землечерпалкаэз.
Транöтны зыррез.
Жольöтны вагонеткаэз.
Вундалiсö нюрсö канаваэз, и пондiс котöртны ны кузя юö быдладорсянь ва.
Косьтiсö нюрсö.
Гиблöй местаэз кузя нуöтiсö туйез.
Ветлöны кöркöся нюр кузя тракторрез, кыскалöны ас сьöраныс вундаланнэзöн барабаннэз.
Вундаланнэс вундалöны торфсö.
Механическöй куран бергöтлö сiйö, кыдз турунöс.
Торфсö öктöны кучаэзö и кыскалöны сiйö фабрикаэзö да заводдэзö.
Чожа этчö строитасö электростанция.
Торф пондас сотчыны горрезын да вайöтны движеннёö машинаэз.
Машинаэс пондасö керны электрическöй ток, и сiя пондас мунны проводдэз кузя фабрикаэзö, заводдэзö, колхоззэзö, совхоззэзö.
Упражненнёэз.
...
Море
Му вевдöрын тыэзся пантасьöны эшö и мореэз.
Нiя унаöн ыджытжыкöсь тыэзся и ва нылöн пыр курыт-сола.
Тылöн, кöть и ылын, пыр тыдалöны береггез.
А мореыслiсь, мымда эн видзöт ылö — берегсö он казяв.
Уйö море кузя пароход лун, мöдiкö, а берег сё абу.
Кытчö бы эн видзöт — быдлаын ва.
Нельки шондiыс асывнас бытьтö ваись петö, а рытнас бöр ваö лэдзчö.
Первуись моресö ме казялi вагон öшынсянь.
Поезд жагвыв локтiс неыджыт городок дынö, кöда сулалiс Чёрнöй море берег вылын.
Ме дзар кери öшынас да дивуйтчöмсянь бытьтö кынми.
Ме одзын паськалiс конечтöм лöз море.
Поезд сувтчис.
Ме перыта петi дука вагонiсь.
Пöльтыштiс ыркыт да сола дука морскöй тöв.
Кынымкö минута бöртi ме сулалi ни берег дорын.
Менам коккез дынын больöтiс море.
Берег вылö шумöн котöртiсö зелёнöйкодь голубöй ваввез да гусьöна шумитöмöн котöртiсö бöр.
Ылынжык мореыс öтлаасис нёбокöт и эз позь тöдны, кытöн кончайтчö море да кытöн пондöтчö нёбо.
Ме кайи ыджыт из вылö, кöда нырöн моз пырöма мореас.
Сы гöгöр ваыс вöлi сöдз да шуч тыдалана.
Пыдöсас бытшöма тыдалiсö изоккез, уялiсö чериоккез, тыдалiсö зелёнöй, бурöй да гöрд рöма морскöй быдмассэз.
Вöлi море вылас ме и буря коста.
Мийö уйим Чёрнöй море кузя.
Нёбо вöлi вевттисьöма сьöд кымöррезöн.
Вына тöлыс лэбтывлiс быгья гырись ваввез.
Море бушуйтiс, пизис, гымалiс.
Воздухын ветлiсö не öтiк тысяча ва воттез.
Тöвлöн уннялöмыс да шутнялöмыс и ваввезлöн шумыс глухöйсьöтiсö.
Миянлiсь пароходсö чапкалiс, кыдзи чагöс.
Сiя то кайлiс ваввез гребень вылö, то ныряйтiс сы пыдына, што повзьöмсянь эн вермы и ловзисьны.
Ваввес вартiсö борттэз вевдöрöт.
Öтпырись менö невна эз нöбöт палубаыс вылiсь, ме öдва ештi кутчыны перилаэз бердö.
Ветлöтны палуба вылöт эз позь.
Колiс перыта котрасьны öтiк предмет дынсянь мöдiк дынö да ёна ны бердö видзсьыны.
Öдва ме верми локны каютаöдз.
Но и эстöн эз туй сулавны кокйылын мыйкö бердö кутчисьтöг.
Джодж то кок увтiсь пышшылiс, то лэбтiсьлiс öддьöн вылына.
Стенаэз пöрласисö то öтладорö, то мöдладорö.
Пельöсiсь пельöсö тарласисö корзинаэз, чемоданнэз да жугалöм посудалöн торрез.
Пассажиррез, кöдна шогалiсö качайтöмсянь, вöрöтчытöг куйлiсö койкаэз вылын.
Нiя ёна видзсисö койкаэз бердö, медбы не усьны джоджö.
Ме тожö водi.
Пароход дугдывтöг дрöжитiс вына ваввез вартöмсянь.
Мукöд коста кажитчис, што вот-вот нiя жугдасö пароходлiсь кöртöн кутöм боккесö.
Дас час шумитiс буря.
Сэсся, уна сёрмöмöн мийö локтiм берег дынö.
Мукöд кадö буряыс овлö не öтiк лун сьöрна.
Не етша судноэз вöйöны сэк.
IV. ГЕОГРАФИЧЕСКÖЙ КАРТА
Мый сэтшöм географическöй карта
Мийö тöдсасим быдкодь планнэзкöт: школьнöй участок планкöт, школа гöгöрись планкöт, топографическöй планкöт.
Быдöс эна планнэз вылын мыччалöма мулöн неыджыт пространство.
Мыччалам кö мийö чертёж вылын ыджыт пространство, висьталам, быдса область либо быдса государство, то сэтшöм чертёжыс шусьö географическöй картаöн.
План да географическöй карта сравнитöм
Видзöтö 46 рисунок вылiсь Москвалiсь план.
Кытшöм сылöн масштаб?
Адззö масштаб сьöртi, кыным километр кузя эстöн мыччалöма Москвалöн частьыс северсянь югланьö да западсянь востокланьö.
Адззö эта план вылiсь Москва-ю, Яуза ю, канал, Кремль, городлiсь улицаэз.
Öнi видзöтö Москва гöгöрлiсь плансö.
Кытшöм сылöн масштаб?
Быд ладорыс эта планлöн, сiдз жö кыдз и одззаыслöн, 5 сантиметр кузя.
А кыным километр кузя северсянь югланьöдз да западсянь востокланьöдз паськалöма эстöн мыччалöм му участокыс?
Кыдз мыччалöма Москвасö?
Учитик квадратокöн план шöрас мыччалöма Москвалöн сiя частьыс, кöда вöлi мыччалöма первöй план вылас.
Адззатö, кытшöм учöтöн лоис эстöн городыслöн эта частьыс?
Эта сысянь, што мöд план вылас масштабыс учöтжык: Москва план вылас 1 сантиметрын — 1 километр, а мöд план вылас 1 сантиметрын — 10 километр.
Масштаб учöтсьöтöма дасiсь, сiйöн и мыччалöмыс лоис поснитжык.
Адззö мöд план вылiсь Москва-ю да Яуза ю.
А кытöн жö каналыс?
Кытöн Кремль?
Нiя озö тыдалö, нiйö оз позь мыччавны сэтшöм поснит масштабын.
Но сы туйö мöд план вылö тöрисö и мöдiк юэз, мöдiк городдэз, кöрттуйез, станцияэз.
Öнi видзöтö картасö СССР Европейскöй часть центрлiсь.
Кытшöм масштабыс эта карталöн?
Кынымись эта масштабыс поснитжык Москва гöгöр план вылiсь масштабся?
Видзöтö, кытшöм учитик квадратокöн мыччалöма карта вылас быдöс сiя пространствоыс, кöда вöлi мыччалöма мöд план вылас.
Кыдз мыччалöма карта вылын город Москва?
Тыдалöны я Москва-ю, Яуза ю?
Мыччалöм я карта вылас город Мытищи да Москва гöгöрись мöдiк городдэз?
Нiя абуöсь, нiйö оз позь мыччавны эта масштаб дырни.
Но сы туйö эта картаö тöрисö городдэз: Ярославль, Калуга, Тула да мöдiккез.
Öнi асьныт сравнитö СССР Европейскöй часть центрлiсь картасö быдсöн СССР картакöт.
Мый неöткодьыс эна картаэз масштаббезын?
Кöдаын мыччалöма мулöн ыджытжык пространствоыс?
Быдöс я юэс да городдэс, кöдна мыччалöмöсь первöй карта вылас, мыччалöмöсь и мöд вылас?
Кыным поснитжык планлöн да географическöй карталöн масштаб, сыным етшажык ны вылын мыччалöмöсь подробносттез.
Кыдз план сьöртi уна позьö тöдны мыччалöм местность йылiсь, сiдз жö и карта сьöртi позьö уна тöдны любöй страна йылiсь.
Картаэз чертитöны, кыдз и планнэз жö, кыдз бытьтö видзöтöны му вылас вылiсянь, аэроплан вывсянь.
Географическöй картаэз неöткодьöсь планнэз сьöртi масштабöн.
Планнэз чертитiкö босьтöны гырись масштаб: висьталам, план вылас öтiк сантиметрын — кынымкö дас либо кынымкö сотня метр.
Картаэз чертитiкö масштабыс поснитжык: географическöй картаас öтiк сантиметрын — кынымкö дас либо кынымкö сотня километр.
Посни подробносттез (неыджыт тыэз, юэз, селеннёэз) карта вылын оз мыччалö.
Гыриссесö мыччалöны то кытшöм знаккезöн: юэз — чукыля виззезöн, городдэз — кружоккезöн, кöрттуйез — веськыт виззезöн.
Заданнёэз.
Босьтö асланыт селеннёлiсь (колхозлiсь либо городлiсь план, асланыт районлiсь план, областьлiсь карта да СССР карта.
Öшöтö нiйö ордчöн да сравнитö öтамöд коласаныс.
1. Кытшöм масштаб сьöртi чертитöмöсь: селеннёлöн (колхозлöн либо городлöн) план, районлöн план?
Кытшöм сьöртi — областьлöн карта?
Кытшöм сьöртi — СССР-лöн карта?
Кытöн масштабыс гырисьжык?
Кытöн поснитжык?
2. Кыдз мыччалöма район план вылын тiян селеннё?
Мыля район план вылас абу мыччалöмöсь керкуэз да улицаэз, кöдна тыдалöны селеннё план вылын?
3. Район план вылiсь адззö районнöй центр.
Кытшöм селеннёэз, юэз да тыэз куйлöны районнöй центр дынын?
Область карта вылiсь адззö асланыт районлiсь центр.
Эмöсь я область карта вылын быдöс селеннёэс, юэс да тыэс, кöдна мыччалöмöсь район план вылын ?
Область карта вылiсь адззö областнöй центр.
Кытшöм селеннёэз да юэз куйлöны областнöй центр дынын?
СССР карта вылiсь адззö область.
Эмöсь я СССР карта вылас селеннёэз да юэз, кöдна мыччалöмöсь область карта вылын?
4. Тöдö масштаб сьöртi:
1) Кыным километр тiян селеннё дынсянь районнöй центр дынöдз?
2) Районнöй центр дынсянь областнöй дынöдз?
3) Областнöй центр дынсянь Москва дынöдз?
Кыдз мыччалöны карта вылын страналiсь вевдöр
Мийö тöдам ни, што топографическöй план вылын лажмыт местаэс мичöтöмöсь зелёнöй рöмöн, а вылыннэс — вежöн да пемыт вежöн.
Сэтшöм жö рöммезöн мичöтöма и географическöй карта.
(Видзöтö СССР карта вылö).
Эна рöммес карта вылас сiдз жö мыччалöны быдкодь вылына местаэз.
Кöсiныслiсь вылынасö пыр мыччалöны мореись ва уровень дынсянь, сiдз кыдз ваыс мореэзас сулалö öтiк уровеньын.
Ыджыт пространствоэз карта вылын мичöтöмöсь зелёнöй, веж да пемытвеж рöмöн.
Нiя — равнинаэз.
Но эна равнинаэс куйлöны неöтвылына море уровеньыс вевдöрын.
Равнинаэз, кöдна карта вылас мичöтöмöсь зелёнöй рöмöн, лэбтiсьöны море уровеньсянь 200 метрся не вылынжыка; сэтшöм равнинаэс шусьöны лажмытiннэзöн.
Равнинаэз, кöдна лэбтiсьöны море уровеньсянь 200 метрся вылынжыка, шусьöны вылынiннэзöн; нiя карта вылын мичöтöмöсь чочком, веж да пемытвеж рöмöн.
Векнитик веж да коричневöй полоскаэз карта вылын мыччалöны керöссэз.
Кыным вылынжыка море уровеньсянь лэбтiсьöны керöссэз, сыным пемытжык нылöн рöм.
abu
Упражненнё.
Видзöтö СССР физическöй карта увдöрись, кытшöм условнöй знаккезöн мыччалöмöсь лажмытiннэз, вылынiннэз, шöрöт вылынаа керöссэз, вылын керöссэз да нылöн лымья йыввез.
СССР-лöн му вевдöр
Видзöтö СССР карта вылö.
Тiйö адззат, што унажыкыс сiя мичöтöма зелёнöй рöмöн.
Синöн куттöм лажмытiна равнинаэс сылöн паськалiсö Советскöй Союзас öддьöн паськыт пространствоэз кузя.
Мунан поездын луннэз да неделлез и адззан ас одзат токо ылö мунан конечтöм равнина.
Уральскöй керöссэз янсöтöны этö лажмытiна равнинасö кык торйö.
(Адззö карта вылiсь, кыдз шусьöны Уральскöй керöссэз öтладорись да мöдладорись лажмытiннэс.)
Мукöд местаэзöт СССР картаыс мичöтöма веж рöмöн.
Эстöн — вылынiннэз.
(Адззö карта вылiсь, кыдз шусьö СССР-ас медыджыт вылынiныс.)
Уна местаэзын равнина доррез кузя вылын стенаэзöн лэбтiсьöны öддьöн гырись изъя керöссэз.
Нiя кыссьöны кузь хребёттэзöн не öтiк сотня да тысяча километр вылö.
(Адззö Кавказскöй керöссэз.)
Упражненнёэз.
1. Следитö Москвасянь Владивосток городöдз (Японскöй море берег дорын) кöрттуй да висьталö, кытшöм лажмытiннэз, вылынiннэз да керöссэз кузя мунö эта туйыс.
2. Адззö город Москва.
Следитö, кытшöм юэз кузя позьö мунны Москвасянь Каспийскöй море дынöдз.
Мерайтö масштаб сьöртi ылынасö Москвасянь Волга устьеöдз веськыта.
V. МУ ШАР
Кытшöмöн одзжык отирыс думайтiсö мусö
Важся отир тöдiсö токо неыджыт пространство сiя места гöгöр, кытöн нiя олiсö.
Сэк эзö вöлö эшö кöрттуйез, кöдна кузя öнi мийö кокнита да перыта мунам ыджыт ылынаэз.
Эзö вöлö и пароходдэз, кöдна вылын öнi уйöны мореэз да океаннэз кузя.
Важся кадö мореэс кузя уялiсö неыджыт пуовöй корабллез вылын, кöдна ветлiсö веслоэзöн да паруссэзöн.
Сiя кадö отирыс эзö тöдö компас, кöдатöг море шöрын оз позь тöдны, кöда ладорö колö мунны.
Сысянь важся отир повлiсö петны ылö мореас и уялiсö токо береггез дынын.
Мусö важся отирыс думайтiсö неыджытöн.
Нiя думайтiсö, што муыс — плоскöй круг, кöда куйлö океан шöрын.
Керсисö сказкиэз, што муыс видзсьö «куим кит вылын»; мöдiк местаэзын баитiсö — «куим слон вылын», «ыджыт черепаха вылын».
Важся греккез дынсянь, сiя кадö медобразованнöй народ дынсянь, колисö географическöй картаэз.
Öтiк вылын ны коласiсь мыччалöма быдöс мирыс, кöдö сэк тöдiсö.
Карта шöрас куйлö Греция; сы гöгöр куйлöны муэз, кöднö тöдiсö сэк греккез.
Быдöс эна муэс гöгрöстöмöсь ваöн — океанöн.
Греккес лыддисö океансö öддьöн ыджыт юöн; нiя баитiсö, што океан визывтö му гöгöр.
Океан сайын, кыдз думайтiсö греккес, вöлi мулöн конец.
Мулöн форма да ыжда
Сыспотека отирыс сё унажык тöдмавлiсö мусö.
Путешественниккез, купеццез да завоевателлез мунлiсö сё ылöжык да ылöжык виль странаэзö, но некытöн эзö адззывлö мулiсь конецсö.
Важся учонöйез пондiсö думайтны, што муыс не плоскöй круг, што сiя шар кодь.
400 год чулалiс, кыдз путешественник Магеллан мунiс му гöгöр и аслас кругосветнöй путешествиеöн подтвердитiс, што муыс былись шар кодь.
Öнi отирлö муыс быдсöн тöдса.
Пароходдэз уйöны мореэз кузя, аэропланнэз лэбалöны му вевдöрöт быдланьö.
Некытöн мулöн конецыс абу.
Öнi быдöнныс ни тöдöны, што муыс — шар.
Му шарыс öддьöн ыджыт.
Медбы сiйö гöгöртны, колö мунны 40 тысяча километр.
Почти куим год колiс бы эта понда, кыдзи бы мунны 40 километрöн суткинас да не шоччисьны и öтiк лун.
Мийö ас гöгöр адззам токо му вевдöрлiсь учитик тор и сiйöн огö казялö, што оламö шар вылын.
Кытöн му шарлöн вевдöр да кытöн увт.
Видзöтö 52 рисунок.
Сы ылын рисуйтöма му шар.
Му шар вылас разнöй местаэзын сулалöны морттэз.
Коккезнаныс нiя сулалöны му шар центр ладорö.
Отир, кöдна сулалöны паныт ладоррезын, коккезнаныс сулалöны öтамöд дынö.
Но мыля жö отирыс, кöдна сулалöны миян дынсянь мöд ладорын, озö усьö му вывсис, мыля оз киссьы мореэзiсь, юэзiсь да тыэзiсь ва?
А этö сiйöн, што муыс кыскö ас дынас быдöс, мый эм сы вылын.
Предметтэз, кöднö чапкан му вылiсь, озö лэбзьö вылö, усьöны му вылас.
Глобус
Мусö мыччалöны учитик шар кодьöн, кöда шусьö — глобусöн.
Глобус — этö мулöн учитик модель.
Глобуслöн шарыс кышалöма стержень вылö — ось вылö да крепитöма кок вылö.
Му шарлöн, конешно, не ось не кок абуöсь.
Глобус — му шарлöн медвернöй изображеннё.
Вевдöрыс глобусыслöн мичöтöма сiдз жö, кыдз и географическöй карта.
Лöзöн да голубöй рöмöн мичöтöма пространство, кöда вевттьöма ваöн, зелёнöйöн, вежöн да коричневöйöн — му, либо, кыдз шуöны мöднёдж, кöсiн.
Мый эм му шар вевдöр вылын
Глобус вылын тыдалö, што му шарыслiсь ыджытжык частьсö вевттьö ва.
Токо му шарыслöн куимöт частьыс — му.
Кык куимöт часть вевттьöмöсь ваöн (рис. 53).
Быдöс ва пространствосö юкöны нёль океан вылö: Тихöй, Атлантическöй, Индийскöй да Севернöй Ледовитöй вылö.
Океаннэс коласö ыджыт участоккезöн петö кöсiн.
Кöсiнсö юкöны квать часть вылö: Европа, Азия, Африка, Америка (Севернöй да Южнöй), Австралия да Антарктида.
Вит му часть вылас олöны отир.
Кватьöт вылын — Антарктида вылын — некин оз ов.
Видзöтö глобус вылö, мыйöн янсöтöмöсь öтамöд дынсянь Африка да Европа.
Тiйö адззат эстiсь пространство, кöда вевттьöма голубöй краскаöн.
Эта — Атлантическöй океанлöн часть.
Сiя пырö Европа, Азия да Африка коласö и шусьö Средиземнöй мореöн.
Море — эта океанлöн часть, кöда пырö му коласö, либо гöгöртöма островвезöн.
Упражненнёэз.
1. Адззö глобус вылiсь нёль океан да мулiсь квать часть.
2. Адззö глобус вылiсь Средиземнöй море да Японскöй море.
Первöй кругосветнöй путешествие
Кыдз тiйö тöдат ни, первöйöн мунiс му шар гöгöр путешественник Магеллан. Эта кадсянь чулалiс 400 год мымда.
Сiя кадö Европа быд странаись купеццез торгуйтiсö Индиякöт да островвезкöт, кöдна куйлöны Азия да Австралия коласын.
(Адззö Индия да энö островвесö глобус вылiсь.)
Купеццес öтамöдся одзжык старайтчисö босьны богатствоэз, кöдна вöлiсö сэтчин.
Нылöн торговöй корабллес уйлылiсö сэтчин Африка гöгöр да ылынжыка Индийскöй океан-пыр.
(Мыччалö этö туйсö глобус вылын.)
Испанскöй купеццесö мöдiк странаэзiсь купеццес эта туй кузя эзö лэдзö, и Магеллан предложитiс испанскöй корольлö адззыны мöдiк туй.
Магеллан тöдiс, што муыс — шар, и мöдiс уйны островвес дынö мöдладорсянь.
Но сiя эз тöд, мый ыжда му шарыс и кытшöм опасносттез да трудносттез сiя панталас туй вылас.
Магелланлöн вит паруснöй корабль уйисö Европа береггезсянь (Испания дынiсь) да мунiсö Южнöй Америка береггез дынö.
(Мыччалö глобус вылiсь Магелланлiсь туй.)
Куим мисеч уйисö корабллес Атлантическöй океан кузя.
Гöгöр ольсасис берегтöм волькыт ва.
Керсис сё жаржык.
Лунтырöн Магеллан сулалiс палуба вылын да видзöтiс одзлань.
Сэсся, мыччисис Южнöй Америкалöн берег.
Корабллес пондiсö уйны доль эта берег дынöт.
Öтiк местаын корабллес локтiсö берег дынö, медбы босьны юан ва да сёян.
Вöлi öддьöн жар.
Берег вылас быдмисö роскошнöй пуэз.
Эстöн олiсö индееццез.
Нылöн, кыдз бронзаовöй, гöрд медь рöма телоэзныс свиттялiсö шондi вылын.
Нiя петiсö путешественниккез дынö да пондöтiсö ныкöт торгуйтöм.
Сынан понда индееццез сетлiсö кык дзодзог, стекло тор понда — сымда чери, што тырмис сёйны не öтiк мортлö.
Ва да сёян запас босьтöм бöрын корабллес пондiсö мунны одзлань.
Керсис кöдзытжык.
Öтпыр лэбтiсис вына буря.
Тöлыс бешенöя пöльтiс корабллес вылö.
Лэбтiсьлiсö öддьöн гырись ваввез.
Корабллес дюттясисö ны вылын, кыдз öрек кышшез.
Кажитчис, што вот-вот нiйö шупкас изъя берег бердö, и смев моряккес вöясö ваввезас.
Öтiк корабль сiдз и вöйис эта буря коста, а мукöдыс мунiсö одзлань да одзлань Южнöй Америка береггез дынöт доль.
Локтiс март мисеч.
Родинаын, Европаын, вöлi тулыс, а эстöн лоис кöдзыт.
Локтiс июнь, а эстöн вачкисö мороззэз, пондöтчисö лымья пургаэз.
Эшö неважын путешественниккес маитчисö жарсянь, а öнi öддьöн бура кынмисö.
Ковсис сувтчыны тöвйыны.
Кыдз токо чулалiсö мороззэз, корабллес вöрзисö туйö одзлань.
Медбöрын, нiя адззисö пролив да сы-пыр уйисö Атлантическöй океанiсь Тихöй океанö.
Матроссэс радувьяныс горзiсö.
Нiя думайтiсö, што матынöсь ни островвез, кöдна дынö нiя мунiсö.
Быдöнныс öнi веритiсö, што запад вылö уйикö позьö локны Индия береггез дынö.
Эта проливыс сёрöнжык вöлi шуöма Магеллан проливöн.
(Адззö сiйö глобус вылiсь.)
Сулалiс лöнь погоддя, пöльтiс кокнитик попутнöй тöв.
Океан вöлi лöнь, кокнит ряддэзöн котöртiсö поснит ваввез.
Магеллан шуис этö океансö «Тихöйöн» (лöньöн), сiя эз тöд, што мöдiк кадö сы вылын овлöны вына буряэз.
Корабллес чожа петiсö кöдзыт местаэзiсь; керсис сё шонытжык и шонытжык.
Уна мисеччез сьöрна уйисö океан кузя корабллес, нiя эзö панталö островвез и эзö адззылö му.
Некытiсь вöлi босьны сёян.
Сёйисö пильнöй чаг, пулiсö кучик, кöдöн вöлiсö вурöмöсь мачтаэз.
Сёйисö корабллез вылiсь крысаэзöс; крысаэз лыддисисö нельки чöскыт сёянöн.
Эз тырмы юöм понда ва, кöть гöгöр вöлi ваыс.
Океанiсь васö юны оз туй, сiя курыт-сола.
Юан ва, кöдö босьтiсö корабллез вылö, тшыкис.
Ковсис юны гудыра, сiсь ва.
Отир шогалiсö да кулiсö.
Моряккез думайтiсö, што ны уялöмлö оз ло конец.
Медбöрын, почти кык год бöртi путешествие пондöтчöмсянь, Магеллан казялiс островвез, кöдна дынö мунiс.
Цель вöлi судзöтöм — виль туй вöлi осьтöм.
Эссянь туйыс Европаас вöлi тöдса ни.
Островвез вылын жара шонтiс шондi.
Самöй береггез дынын быдмисö сук вöррез.
Öддьöн басöк тöдтöм пуэз быдмисö эна вöррезын.
Почти быд остров вылын Магеллан пантавлiс отирöс.
Нiя эзö новйö паськöм, керкуэзнысö строитiсö уввезiсь да листтэзiсь, вöлiсö вооружитчöмöсь стрелаэзöн да копьёэзöн.
Уна природнöй богатствоэз вöлiсö эна островвез вылын — золото, дона быдмассэз.
Магеллан пондöтiс торгуйтны островвез вылын олiссескöт.
Кöртовöй изделлёэз понда, простöй тканнез понда да донтöмик украшеннёэз понда сiя получитiс уна золото, дона плоддэз да сёян продукттэз.
Магеллан мöдiс босьны энö островвесö, керны нiйö испанскöй король владеннёэз увтö.
Лэбтiсис островвез вылын олiссезкöт тышкасьöм; эта тышкасьöм дырни Магелланöс вийисö
Путешествие вöлi кончитöма Магеллантöг.
Вит кораблись бертiс токо öтiк.
265 мортiсь бертiсö токо 18 маитчöм да вынтöмсялöм морт.
Сiдз вöлi керöма первöй кругосветнöй путешествие, кöда кыссис куим год гöгöр.
Магеллан бöрын мöдiк путешественниккез не öтпырись ветлiсö му шар гöгöр.
Öння кадö кругосветнöй путешествиеэс абу сьöкытöсь да абу опаснöйöсь.
Öддьöн ыджыт да вына пароходдэз кокнита уйöны океаннэсö кынымкö лунöн.
Поезддэз да автомобиллез перыта мунöны му кузя öддьöн ылына.
Керöма ни кругосветнöй перелёт аэроплан вылын.
Сы понда ковсис токо 8 сутки.
Европасянь Америкаö
Портовöй городын изъя пристань дынын сулалö пароход.
Пристань вевдöрö вылына лэбтiсьö сылöн сьöд борт, кöдаын не öтiк ряд круглöй öшыннэз.
Пароход пытшкас не öтiк этаж сувда корöмöсь пассажирскöй каютаэз, столовöйез, кухняэз да быдкодь служебнöй помещеннёэз.
Ны увдöрын машиннöй отделеннё.
Глухöя шумитöны сэтчин öддьöн гырись топкаэз, кöдна сёйöны каменнöй уголь.
Сэтчин уджалö öддьöн вына паровöй машина.
А вылын, капитанскöй посок вылын, сулалö рулевöй.
Рулевöй колесоöн сiя бергöтлö руль да компас сьöртi веськöтлö пароходсö кытчö колö.
Пароход готов мунны.
Лисниччез кузя борт вылö кайöны пассажиррез, подъёмнöй краннэз лэбтöны пароход вылö öддьöн гырись тюккез товаррезöн да лэдзöны нiйö пыдын трюмо.
Но вот пондiс кывны öддьöн гора гудок, ылö паськалiс сiя город кузя, ылiсянь сылö паныт горöтiс говк.
Мöдiк гудок, куимöт...
Пондiс уджавны корма сайын винт.
Пондiс бульöтны ва.
Пароход мездöтчис пристань бердiсь.
Сiя жагöна уйис пароходдэз коласöт, кöдна сулалiсö портын, да петiс мореö.
Берег мунö сё ылöжык и ылöжык, сайöвтчö син одзись.
Кынымкö час бöртi берегыс эз ни понды тыдавны, гöгöр паськалö синöн куттöм море.
Пароход вундалö ваввесö.
Нiя вартчöны сы борттэз бердö.
Пароход сьöрö лэбзьöны черигадяэз, вöтöны сiйö, пуксьöны мачтаэз вылö, а сыбöрын кольччöны да бертöны бöр му вылö.
Квать лун мунö эта великаныс Атлантическöй океан кузя.
Сiйö панталöны буряэз, но öддьöн ыджыт пароход токо дюттясьышлö ваввес вылын да öштöг мунö одзлань.
Туйсö мунiкö пассажиррез вермöны баитны радио кузя и Европакöт и Америкакöт.
Квать лун кыссьö öнi Европасянь Америкаö океан кузя вуджöмыс.
А 450 год одзтi путешественник Колумб уйис Европасянь Америкаö куим мисеч.
Упражненнё.
Мыччалö глобус вылiсь Европасянь Севернöй Америкаö Атлантическöй океанöт туй.
Му да шондi
Мийö тöдам ни, кытшöм ыджыт миян муыс.
Но сiя кажитчö совсем учöтöн, кöр сiйö сравнивайтан шондiкöт (рис. 56).
Шондi ыджытжык муся 1300000-ись.
Сiя кажитчö миянлö учöтöн сiйöн, што сiя öддьöн ылын миян дынсянь.
Кыдз бы позис мунны мусянь шондi вылö перыт поездöн, то поезд должен вöлi бы мунны 250 годся дыржык.
Шондi — эта öддьöн ыджыт калитчöм шар.
Шондi иньдö му вылö югыт да шоныт.
Мыйсянь овлöны лун да ой
Медбы вежöртны, мыйсянь овлöны лун да ой, керö наблюденнёэз му да шондi модель вылын.
Керö уль сёйись шарик, бытшкö сiйö проволокаöн, осьтаас пысалö гезок (увдöрсяняс кöрталö сiйö узöлöн).
Шарикыс пондас мыччавны му.
Пемыт жырйын сувтöтö пызан вылö öзтöм масiсь.
Сiя пондас мыччавны шондi.
Видзö гезокöт шариксö масiсь одзын.
Быдöс я шарикыс югдöтöма масiсьнас?
Не, шарикыслöн югдöтöм токо джыныс, а мöд джыныс кольö пемытын (рис. 57).
Сiдз и шондiыс югдöтö му шарыслiсь пыр токо джынсö.
Югдöтöм ладорас тыдалö шондi — эстöн лун, а мöд ладорас шондi оз тыдав — сэтчин ой.
Жагвыв бергöтлö шариксö масiсь одзын.
Öнi масiсь югдöтö нiйö местаэсö, кöдна одзжык вöлiсö пемытын, а одзжык югдöтöм местаэс öнi мунöны пемытö.
Гардö гезоксö да видзöтö, кыдз шарикыс бергалö масiсь одзын.
Сiдз жö бергалö шондi одзын му шар, и му вылас лунсö вежö ой.
Муыс быдсöн бергöтчö ас гöгöрас суткиöн.
Мийö огö адззö муыслiсь бергалöмсö, сысянь што öтлаын миянкöт бергалö быдöс, мый эм му вылас миян гöгöр, — керкуэз, ыббез, видззез.
Миянлö кажитчö, што шондi петö, лэбтiсьö нёбоö да бöра пуксьö.
Сiя жö овлö миянкöт, кöр мийö мунам поездын.
Кöр поездыс мунö ровнöя, зэгöттöг, то миянлö кажитчö, што мийö сулалам öтiк местаын, а телеграфнöй столббез да туй бокись пуэз котöртöны поездыслö паныт.
Упражненнёэз.
1. Сувтöтö масiсь одзö глобус.
Мыччалö, кыдз мунö му бергалöмыс, кöдакöт тiйö öнi токо тöдсасит.
Кытöн глобус вылын лун, кытöн ой?
2. Бергöтö масiсь одзын глобуссö сiдз, медбы лун вöлi Европаын.
Видзöтö лун али ой сэк Америкаын, Африкаын, Австралияын.
Полюссэз да экватор
Кыдз мийö тöдам ни, му шар бергалö пыр ас гöгöрас öтпырись суткиö.
Видзöтамö бытшöмжыка, кыдз керсьö эта бергалöмыс, кыдз мунöны му шар бергалiкö сы вылiсь разнöй местаэз.
Босьтö эта понда ассиныт му шар модель — гезок вылын сёёвöй шарик — да сувтöтö чернилоöн сы вылö öта мöд увдöрö кынымкö точка.
Кыкö ны коласiсь колö сувтöтны нiя местаэзö, кытi шарикись петö гезокыс.
Бергöтö шариксö.
Тiйö адззат, што быд точка шарик бергалiкö керö круг; öтiк точка — ыджытжык круг, мöдiккез — учöтжыкö; и токо кык точка — вевдöрисьыс да увдöрисьыс — совсем озö керö кругсö.
Эта жö овлö и му шар бергалiкö.
Му вылас разнöй точкаэз ветлöны не öтмоз.
Öтiккез керöны суткинас ыджытжык круг, мöдiккез — учöтжыкö.
А кык точка совсем оз керö круггесö.
Нiя — му шар полюссэз.
Öтiк полюс шусьö — севернöй, сiдз кыдз му шар вылас сiя медсевернöй точка.
Мöдiк полюс — южнöй.
Сiя — му шар вылас медъюжнöй точка.
Кыкнан полюс дынсянь öтылынаын му шарыс гöгöр думайтöмöн (мысленнöя) нуöтсьö визь, кöда шусьö экваторöн.
Сiя юкö му шарсö кык джыншар вылö — севернöй да южнöй джыншаррез вылö.
Упражненнёэз.
1. Адззö глобус вылiсь севернöй да южнöй полюссэз, экватор.
2. Видзöтö глобус сьöртi, кытшöм свет часттез куйлöны южнöй джыншарын, кытшöмöсь — севернöйын; кытшöм свет часттез вылöт мунö экватор.
Кыдз адззыны глобус вылын веськöв
Мийö тöдам, што морт сулалö кö чужöмнас север ладорö, то бöрас сылöн — юг, веськытланьын — восток, шульгаланьын — запад.
Кыдз бы мийö вермим асланым школа дынсянь мунны, кежтöг, веськыта северланьö, то мийö локтiмö бы севернöй полюс дынö.
Кыдз бы мийö мунiм югланьö, то локтiм бы южнöй полюс дынö.
Север — юг веськöв мунö öтiк полюс дынсянь мöдiк дынö.
Медбы вежöртны, кыдз адззыны глобус вылын веськöв, думайтам аслыным, што глобус вылын сулалö «наблюдатель».
Сувтöтам глобус вылö фигурка да бергöтам сiйö чужöмнас севернöй полюс дынö.
Сэк сы бöрын лоас юг (рис. 58).
«Наблюдатель» сулалö чужöмнас севернöй полюсланьö, нюжöтöм киэс мыччалöны востокланьö да западланьö.
Сувтöтам глобус вылö кынымкö сэтшöм наблюдательöс да адззам, кытöн нылöн север, кытöн юг.
Кыдзи мийö бытшöмжыка видзöтам глобуссö, то казялам, што глобус вылас север — юг веськöввес мыччалöмöсь кырöввезöн, кöдна мунöны полюс дынсянь полюс дынö.
Эна кырöввес быдлаын мыччалöны веськöввесö северсянь югланьö либо югланьсянь северланьö.
Кыдзи глобус вылас кытшöм-ненабудь точкасянь колö мунны северланьö, сiдзкö, колö мунны эта кырöв кузя севернöй полюс дынö.
Öнi видзöтам, кыдз адззыны глобус вылiсь веськöввесö востокланьö да западланьö.
Бертам миян наблюдатель дынö.
Наблюдатель нюжöтöм киэз сьöртi тыдалö, кöда ладорын сы дынсянь куйлö восток, кöда ладорын — запад.
Видзöтам бытшöмжыка глобус, кöда вылын кынымкö наблюдатель сулалöны чужöмнаныс севернöй полюслань öтмöдöрö нюжöтöм киэзöн.
Мийö казялам, што восток — запад веськöввез сiдз жö мыччалöмöсь глобус вылас кырöввезöн.
Эна кырöввес мунöны поперег нiя кырöввез кузя, кöдна мыччалöны север — юг.
Му шарлöн карта
Глобус — му шарлöн модель.
Но пользуйтчыны глобусöн неудобно.
Учитик глобус вылын оз позь подробнöя мыччавны мусö, а ыджыт глобус сьöкыт керны.
Босьтавны глобуссö сьöрö экскурсияэз дырни либо путешествиеэз дырни, конешно, оз туй.
Сiйöн частожык пользуйтчöны бумага вылын мусö мыччалöмöн — географическöй картаöн.
Важся кадсянь отир пондiсö чертитны картаэз — быдöс мулiсь либо сы торья участоккезлiсь изображеннёэз.
Перво картаэс вöлiсö öддьöн простöйöсь.
Син сьöртi отирыс рисуйтiсö береггезлiсь очертаннёэз, пятналiсö юэз, керöссэз да городдэз.
Пользуйтчыны сэтшöм картаэзöн вöлi сьöкыт.
Рисуйтлiсö часто неправильнöя, ылынаэсö сувтöтлiсö наугад.
Сэтшöм карта сьöртi сьöкыт вöлi босьны вернöй веськöв, лыддьыны, кыным лунöн позьö мунны кытшöм либо туй.
Отирыс важын ни мöдiсö керны картасö точнöйöн, но этö позис керны токо сэк, кöр лоисö точнöя мерайтан приборрез.
Öнi му шарыс почти быдсöн ни велöтöм, — колисö тöдмавтöг токо неыджыт местаэз, кöдна дынö умöля позьö сибöтчыны.
Аэропланнэз да дирижабллез, автомобиллез да пароходдэз-ледоколлэз керöм бöрын отирыс вермöны шедны медпустыннöй, меднесибöтчана местаэзö.
Миян эмöсь öнi му шар подробнöй да правильнöй картаэз, кöдна сьöртi позьö уна тöдны любöй страна йылiсь.
Быд грамотнöй мортлö колö велавны лыддьöтны картасö сiдз жö, кыдз книга.
Му шарсö карта вылас мыччалöны, кыдз кык джыншар.
Öтiк джыншар вылас мыччалöны му шарыслiсь öтiк джынсö, мöдiк вылас — мöд джынсö.
Öт джыншарыс — восточнöй, мöдыс — западнöй.
Джыншаррезлöн картаыс мичöтöма сiдз жö, кыдз и глобус.
Джыншаррез карта вылын, сiдз жö кыдз и глобус вылын, нуöтöмöсь кырöввез северсянь югланьö да западсянь востокланьö.
Нiя карта вылас мыччалöны веськöввез.
Упражненнёэз.
1. Видзöтö джыншаррезлiсь карта.
Адззö свет часттез.
Кытшöм свет часттез восточнöй джыншарын, кытшöмöсь — западнöйын?
2. Адззö быд джыншар вылiсь севернöй да южнöй полюссэз, экватор.
Мыччалö кырöввез, кöдна мыччалöны север — юг, восток — запад веськöввез.
3. Мыччалö веськöввесö Австралиясянь северланьö, югланьö, востокланьö да западланьö.
4. Мыччалö джыншаррез карта вылiсь му шар гöгöр Магелланлiсь туй.
5. Мыччалö джыншаррез карта вылiсь Средиземнöй море.
Кытшöм свет часть куйлö сы дынсянь северланьö, кытшöм — югланьö?
Сравнитö, кыдз Средиземнöй мореыс мыччалöма джыншаррез карта вылын да важынся греккез карта вылын.
6. Мыччалö глобус вылiсь да джыншаррез карта вылiсь Севернöй Ледовитöй океан.
Кытшöм свет часттез куйлöны сы гöгöр?
7. Адззö джыншаррез карта вылiсь Советскöй Союз (СССР).
Кытшöм свет часттезын сiя куйлö?
Удж не уроккез коста.
Керö медодзза куим удж, кöдна сетöмöсь приложеннёын.
Мулöн годовöй ветлöм
Му шар бергалö не токо ас гöгöрас, но и ветлö шондi гöгöр.
Шондi гöгöр быдса кругсö му керö öтiк годöн.
Эта кадö быд местаыс му вылас югдöтсьö шондiнас не öтмоз, шонытсö получайтö не öтмымда.
Миян овлö годнас нёль кад: гожум, ар, тöв да тулыс.
Медбы вежöртны, мыля миян годнас овлöны не öткодь каддэз, керö пемыт жырйын глобус вылын то кытшöм наблюденнёэз.
Сувтöтö пöлiня ось вылын глобус сiдз, кыдз мыччалöма 59 рисунок вылын, да югдöтö сiйö масiсьöн.
Адззö глобус югдöтöм ладорын севернöй джыншар вылiсь Москва.
Клейитö эта места вылö гöрд кружок.
(59 рисунок вылын Москвалöн местаыс мыччалöма М букваöн.)
Клейитö сiдз жö кружок кытöн-ненабудь южнöй джыншарын, висьталам, Африка юг вылын.
(Рисунок вылын эта местаыс мыччалöма точкаöн.)
Бергöтö глобуссö ось гöгöр.
Местаыс, кытöн куйлö Москва, суткинас унажыксö югдöтöма.
Сiдзкö, Москваын пондöтчисö кузь луннэз да дженыт ойез.
Эта овлö гожумöн.
Местаыс, кöда мыччалöма южнöй джыншарын эта кадö унажыксö овлö пемытiнын.
Эта точкаын öнi дженыт луннэз да кузь ойез.
Эта овлö тöлöн.
Кöр севернöй джыншарын гожум, сэк южнöй джыншарын — тöв.
Глобус вылын да рисунок вылын тыдалö, што севернöй полюс да пространствоыс сы гöгöр, кöр глобусыс бергалö ас гöгöр, пыр югдöтöмöсь.
Севернöй полюс гöгöр эта кадö шондi югьялö быдса сутки.
Самöй полюс вылас шондiыс оз саясьлы джынгод.
Южнöй полюс да сы гöгöрись пространствоыс эта кадö пыр куйлöны пемытiнын.
Южнöй полюс дынын быдса сутки сулалö ой.
Самöй полюс вылас шондiыс оз мыччась джынгод.
Сувтöтö глобуссö масiсьыс мöд ладорö (кыдз мыччалöма 60 рисунок вылын).
Öнi буражык югдöтöма южнöй джыншар да етшажык — севернöйыс.
Бергöтö глобуссö ось гöгöр и тiйö казялат, што Москваыс унажыксö суткинас лоас пемытiнын.
Москва понда локтiсö дженыт луннэз да кузь ойез.
Эта овлö тöвнас.
Точка, кöдö пятнайтöма южнöй джыншарын, унажыксö лоас югдöтöм.
Эстöн эта кадö кузь луннэз да дженыт ойез.
Эта овлö гожумнас..
Кöр севернöй джыншар вылын тöв, южнöй джыншар вылын — гожум (рис. 60).
Глобус вылын да рисунок вылын тыдалö, што муыс сэтшöм положеннё дырни севернöй полюс да сы гöгöрись пространствоыс пыр пемытiнын.
Севернöй полюс гöгöр шондiыс оз тыдав быдса сутки, а самöй полюс вылас — джынгод.
Южнöй полюс да пространствоыс сы гöгöр эта кадö пыр югдöтöмöсь.
Самöй полюс вылас лун кыссьö джынгод.
Тулыс да ар овлöны муыс сэтшöм положеннё дырни, кöр шондi öтмоз югдöтö севернöй и южнöй джыншарресö.
Сiдз шондi гöгöр му ветлöм дырни вежсьöны годыслöн каддэс.
Упражненнёэз.
1. Сувтöтö глобуссö масiсь одзö сiдз, медбы севернöй джыншар понда локтiс гожум.
2. Сувтöтö глобуссö масiсь одзö сiдз, медбы севернöй джыншар понда локтiс тöв.
Вичку пессьö паныт наукалö
Первöй учонöй, кöда докажитiс ас гöгöр да шондi гöгöр муыслiсь бергалöмсö, вöлi Николай Коперник.
Нёбо вылiсь светилоэз сьöрын наблюдайтiкö сiя локтiс дума дынö, што вичкуыслöн велöтöмыс сы йылiсь, што шондi ветлö му гöгöр, неправильнöй.
Коперниклöн велöтöмыс орöтлiс вичкулö да енлö веритöм.
Вичку ёрдiс Коперниклiсь книгаэсö и 200 год сьöрна нiйö некинлö эз туй лыддьöтны.
Учонöй Джордано Бруно пондiс быдлаö паськöтны Коперниклiсь велöтöмсö.
Поппез казялiсö опасность и Бруносö арестуйтiсö.
Сизим год пукалiс сiя тюрьмаын, сiйö сэтчин мучительнöя пытайтiсö.
Вичку суд судитiс сiйö сотны костёр вылын.
Сiдз сотчис истина понда пессись Джордано Бруно.
Эта вöлi 300 год одзтi.
Сiя кадö быдöнлö тöдса мöдiк учонöйöс Галилейöс сiдз жö пуксьöтiсö тюрьмаö.
Сiйö тшöктiсö сетны клятва, што сiя откажитчö аслас думаись, што му бергалö.
Токо эта откажитчöмсянь сiя эз кув костёр вылын.
Но локтiс кад, кöр быдöнныс долженöсь лоисö шуны Коперниклiсь велöтöмсö правильнöйöн.
Му шарлöн тепловöй пояссэз
Мийö тöдам, што лун сьöрна шондi не öтмоз шонтö мусö аслас югöррезöн.
Нельки годнас меджар кадö асывнас овлö не жар — эта кадö нёбоас шондiыс сулалö лажмыта, и сылöн югöррсс шонтöны умöля.
Но луншöрöдз шондiыс лэбтiсьö вылынжыка и вылынжыка, и югöррес сылöн шонтöны буражык и буражык.
Рыт кежас шондi бöра лэдзчисьö лажмыта, и югöррес бöра шонтöны умöля.
Кыным вылынжыка нёбоас сулалö шондiыс, сыным буражык сiя шонтö мусö.
Шондi сiдз жö не öтмоз шонтö му вылiсь разнöй местаэсö.
Сувтöтам глобус вылö куим «наблюдательöс»: öтiкö — экватор вылö, кыксö — матöжык полюссэз дынö.
Неылö глобус дынсянь сувтöтам лампа — «шондi».
Видзöтам, кыдз лампаыс югдöтö наблюдателлесö (рис. 61).
Наблюдатель вылö, кöда сулалö экватор вылын, лампа дынiсь югытыс усьö веськыта вылiсянь.
Шондi сулалö сы юр вевдöрын.
Сiдзкö, экватор дынын шондiыс шонтö öддьöн бура.
Экватор дынын куйлöны му шарлöн меджар странаэз — эстöн жар пояс.
Быдса год экватор дынын сулалö öткодь жар погоддя.
Кöдзыт кад сэтчин оз овлы.
Наблюдателлез, кöдна сулалöны матöжык полюссэз дынын, югдöтсьöны лампанас боккезсянь.
Шондi сэтчин сулалö лажмыта и шонтö умöля, а мымдакö кадö годнас и совсем оз югдöт.
Полюссэз гöгöр куйлöны медкöдзыт странаэз, либо му шар вылiсь кöдзыт пояссэз.
Кöдзыт да жар пояссэз коласын куйлöны кык умереннöй пояс — севернöй да южнöй.
Эстöн луннас шондiыс лэбтiсьö вылынжыка, чем кöдзыт поясын, но некöр оз овлы сы вылына, кыдз жар поясын.
Сiйöн умереннöй поясыс шонытжык кöдзыт поясся и кöдзытжык жар поясся.
Видзöтö 62 рисунок.
Сы вылын тепловöй пояссэс юкöмöсь кырöввезöн.
Кыкнан ладорын экватор дынсянь нуöтöмöсь кык круг, кöдна шусьöны тропиккезöн, — севернöй тропикöн да южнöй тропикöн.
Ны коласын куйлö жар либо тропическöй пояс.
Полюссэз гöгöр нуöтöмöсь кык полярнöй круг.
Нiя лоöны границаэзöн севернöй да южнöй кöдзыт пояссэзлöн.
Тропиккез да полярнöй круггез коласын куйлöны севернöй да южнöй умереннöй пояссэз.
Сiдз му шар юксьö вит тепловöй пояс вылö.
Былисьсö тепловöй пояссэс коласын абу резкöй границаыс.
Жар пояс сыспотека вуджö умереннöй пояссэзö, а умереннöй пояссэз сыспотека вуджöны кöдзыттэзö.
Границаэс тепловöй пояссэз коласын условнöйöсь.
Упражненнёэз.
Адззö глобус вылiсь да джыншаррез карта вылiсь тропиккез да полярнöй круггез.
Мыччалö глобус вылiсь да карта вылiсь вит тепловöй пояс.
Кытшöм свет часттез куйлöны тропическöй поясын, кытшöмöсь — умереннöйезын, кытшöмöсь — кöдзыттэзын?
Кытшöм пояссэзын куйлöны Европа, Америка?
Кытшöм пояссэзын куйлö миян Союз?
VI. ПОГОДДЯ ДА КЛИМАТ
Кинлö и мый понда колö тöдны погоддя
— Кытшöм талун погоддяыс?
— саймисö да юалöны велöтчиссез.
Гажöна котöртöны нiя школаö, кöр öтöрас шондiа, шоныт да лöнь.
Дыша петöны нiя керкуись, кöр уль, кöдзыт да пöльтö вына тöв.
Погоддяöн интересуйтчöны моряккез, кöр мунöны уявны, да лэбзьöм одзын лётчиккез.
Сук туманын опасно уйны море кузя.
Гöгöр нем оз тыдав.
Пароход мунiкас сеталö гудоккез, медбы сылö сетiсö туй.
А ташкисяс кö сiя мöдiк пароход вылö, либо берег дорись скалаэз вылö — торкнитас сэтчö, лэбас гым, ризьöтöм... письтiс и гибель.
Сук туманын опасно лэбавны и лётчиклö.
Сылö оз тыдав, кытшöм места вевдöрын лэбзьö самолёт.
Сiя оз тöд, кытчö вермас пуксьыны, кöр ковсяс лэдзчисьны.
Эшö опаснöйжыкöсь моряккез да лётчиккез понда видзчисьтöм буряэз.
Но кöр нiя буря локтöм нылiсь тöдöны одзжык, нiя вермöны не шедöтчыны эта опасность увтö.
Öтiк самолёт оз лэбтiсь аэродром вылiсь, кöр видзчиссьö умöль погоддя.
Уна умöльсö вайö неблагоприятнöй погоддяыс сельскöй хозяйстволö.
Абу зэр тулыснас да гожум пондöтчикö — ыб вылын нянь вежöтö да сотчö.
Дыр кисьтöны урожай дзимлялiкö зэррез — вундöм нянь вамö да сiсьмö.
Не етша умöльсö керöны кöс тöввез, буряэз, шер да кынтöм.
Сiйöн колхоззэзын да совхоззэзын бура следитöны погоддя сьöрын, медбы не сетны лоны умöльыслö, кöдö вермас керны неблагоприятнöй погоддяыс.
Медбы правильнöя нуöтны Союзлiсь хозяйство, öддьöн важно тöдны, кыдз вежсьö разнöй местаэзын Союзас погоддяыс.
Этасянь позяс тöдны, кöр пондöтны кöдзöм да сю дзимлялöм и правильнöя юкны — кытöн да кытшöмöсь колö быдтыны быдмассэз.
Важно тöдны, кыдз вежсьö му шар вылiсь разнöй местаэзын погоддяыс, медбы бытшöма представитны аслыт, кытшöм сэтчин природа.
Но мыля погоддяыс вежсьö?
Медбы вежöртны этö, колö дыр да быд лунö нуöтны погоддяыс сьöрын наблюденнёэз.
Наблюдайтöмись позьö тöдны: кытшöм тöв дырни тiян местностьын сувтö кымöра да зэра погоддя, кытшöм дырни — мича да кöс; кöр колö видзчисьны шоныт луннэз, а кöр — кöдзыттэз.
Заданнё.
Нуöтö асланыт местностьын погоддя сьöрын наблюденнёэз.
Быд лунö пыр öтiк часö отмечайтö: 1) воздухлiсь температура (шоныт, кöдзыт), 2) тöвлiсь веськöв да сылiсь вын, 3) кымöра, 4) осадоккез: зэр. лым, шер, лысва да пуж.
Öтпырись мисечö, луннас 12 часö, керö наблюденнёэз, мый вылына сулалö шондi.
Погоддя сьöрын наблюдайтöмсö пондöтö велöтчан год пондöтчöмсянь да керö быдса год.
Кыдз мийö нуöтiм миян школаын погоддя сьöрын наблюденнёэз
Миян школаыс — Москва увдöрын.
Наблюдайтны погоддясö мийö пондöтiм сентябрь мисечсянь.
Воздухлiсь температура наблюдайтöм понда мийö школа коридор öшын сайö öшöтiм термометр; дорим сiйö вуджöр ладорö, медбы шондiыслöн югöррес эзö шонтö сiйö.
Тöв пöльтöмсö наблюдайтöм понда мийö керим флюгер.
Видзöтö 63 рисунок.
Сувтöтiм флюгерсö школьнöй географическöй площадка вылö компас сьöртi: крестовиналiсь С букваöн конецсö бергöтiм север ладорö.
Флюгер столб вылö дорим таблицаа пöлок, кöда сьöртi тöдiм тöвлiсь вын.
Эта таблицаöн мийö пользуйтчим быд лунö наблюденнёэз коста.
Медбы таблицаыс вылö эз сидз зэр, мийö вевттим сiйö стеклоöн,
Наблюденнёэсö нуöтiсö кык дежурнöй.
Мийö нiйö шуим наблюдателлезöн.
Нiя вежсьывлiсö быд куим лун бöртi.
Наблюденнёлiсь результаттэсö нiя гижлiсö журналö, а сыбöрын таблицаö, кöда вöлi öшöтöма классын.
Воздух температура сьöрын наблюденнёэз.
Быд лунö (луннас 1 часö) наблюдателлез определяйтiсö воздухлiсь температура (рис. 64).
Наблюденнёэзнысö гижлiсö.
Термометрыс мыччалiс кö шоныт, градуссэз число одзö сувтöтлiсö + знак, термометрыс мыччалiс кö мороз, сувтöтлiсö — знак.
Вит градус шоныт, шуам, мыччассьö то кыдз: +5°; вит градус мороз мыччассьö: — 5°.
Тöвлiсь веськöв да вын наблюдайтöм.
Эна наблюденнёэс керсисö географическöй площадка вылын.
Тöвлiсь веськöвсö определяйтлiм флюгер сьöртi.
Кыдзи ленточкаыс флюгерыслöн вöлi бергöтöм С буква ладорö (север), — сiдзкö тöв пöльтiс юглань, и наблюдателлес гижлiсö Ю.
Кыдзи ленточка вöлi бергöтöма В буква ладорö (восток) — сiдзкö, тöв пöльтiс западланьсянь и наблюдателлез гижлiсö З.
Кыдзи сiя вöлi бергöтöма С да В букваэз коласö, мöднёдж, северо-востокланьö, — сiдзкö, тöв пöльтiс юго-запад ладорсянь и наблюдателлез гижлiсö Ю-З.
Вынсö тöлыслiсь наблюдателлес определяйтiсö таблица сьöртi, кöда вöлi дорöма флюгер бердö.
ТÖВЛIСЬ ВЫН ТÖДÖМ ПОНДА ТАБЛИЦА.
Тöвлöн действуйтöм
Тöвлöн вын
Трубаэзiсь тшыныс кайö вылö веськыта
Пуэз вылын листтэз оз вöрö
Лöнь.
Тöв абу
Листтэз вöрöны
Флаг чуть токо павьялö
Учöт тöв
Вöрöны пу стволлэз
Ыджыт тöв
Пуэз нетшкиссьöны öтлаын вужжезкöт, летсьöны керку крышаэз
Буря
Кымöррез сьöрын наблюденнёэз.
Эна наблюденнёэс нуöтсисö синвылö.
Кыдзи нёбоын кымöррес эзö вöлö, либо нiя вöлiсö етша, наблюдателлез сувтöтлiсö таблицаас знак [].
Сiя мыччалiс «мича».
Кыдзи быдöс нёбоыс вöлi вевттьöма кымöррезöн, сувтöтлiсö знак [].
Сiя мыччалiс «кымöра».
Кыдзи унажык нёбосö вевттисö кымöррез, то сувтöтлiсö знак [], кöда мыччалiс, што нёбоас эмöсь «кымöррез».
Осадоккез сьöрын наблюденнёэз.
Наблюдателлез следитiсö лун сьöрна усян осадоккез сьöрын.
Гижлiсö нiйö таблицаö то кытшöм условнöй знаккезöн: зэр [], лым [], шер [], крупа [], лысва [], пуж [].
Шондi вылына сьöрын наблюденнёэз.
Öтпырись мисечнас мийö быдса классöн керлiм наблюденнёэз шондi вылына сьöрын.
Мийö определяйтiм, кыдз шондi сулалö луншöрнас, — вылынжыка либо лажмытжыка, чем чулалöм мисечö.
Эта понда географическöй площадка вылын шест дынiсь мерайтлiм луншöрся вуджöрлiсь кузясö.
Сравнивайтлiм сiйö вуджöр кузякöт, кöдö мийö наблюдайтiм чулалöм мисечö.
Луншöрся вуджöр керсис кö кузьжык, мийö тöдiм, што шондiыс сулалö лажмытжыка, чем чулалöм мисечö.
Вот кыдз мийö гижлiм погоддя сьöрын ассиным наблюденнёэзнымöс.
ПОГОДДЯ СЬÖРЫН НАБЛЮДЕННЁЭЗЛÖН ТАБЛИЦА.
Сентябрь 1933 год.
Число
Луншöрся вуджöрлöн кузя
Воздухлöн температура
Кымöррез
Осадоккез
Тöвлöн веськöв
Тöвлöн вын
Примечаннё
1 +20 ○ * З Лöнь
2 +15 ● * Ю-З Учöт
3 50 см +10 Ю-З „ Ю-З тöв вайöтiс зэр
Мисеч сьöрна наблюденнёэзлöн сводка.
Быд мисеч конецын мийö быдса классöн керлiм асланым наблюденнёэзлiсь сводка.
Медодз, адззывлiм мисеч сьöрна луншöрся шöрöт температура.
Керимö этö сiдз: öтлаöтлiм быдöс числоэсö, кöдна мыччалiсö температура, и лоöм числосö юклiм сыным лун вылö, кыным лун мисечас.
Кыдз мисечнас вöлiсö и мороза луннэз, сэк керлiмö мöднёдж: тэчлiм торйöн числоэсö, кöдна мыччавлiсö шонытлiсь градуссэз, да торйöн числоэсö, кöдна мыччавлiсö морозлiсь градуссэз.
Ыджытжык числоись чинтлiм учöтжыксö.
Кольöм числосö юклiм число вылö, кöда мыччалiс, кыным лун мисечын.
Сэсся мийö лыддьывлiм:
1) Кынымись мисечас пöльтiс севернöй тöв, северо-восточнöй, юго-западнöй да мöдiк тöв.
2) Кынымись мисечнас вöлi лöнь, кынымись пöльтiс учöт тöв, кынымись вына тöв.
3) Кыныма вöлiсö мича да кыныма кымöра луннэс.
4) Кынымись мунiс зэр, усьлiс лым, вöлi туман.
Мийö гижлiм сiдз жö, кыдз вежсьывлiс погоддя тöв вежсикö: кытшöм тöв дырни вöлi топыт, кытшöм дырни кöдзыт; кытшöм тöв вайöтлiс осадоккез, кытшöм дырни вöлi кöс погоддя.
Арся мисеччез сьöрын наблюденнёэзлöн сводка.
АРСЯ КАД ПОГОДДЯ СЬÖРЫН НАБЛЮДЕННЁЭЗIСЬ ТАБЛИЦА.
Кытшöм мисеч
Луншöрся вуджöрлöн кузя
Шöрöт температура
Кымöра
Осадоккез
Тöвлöн веськöв
Тöвлöн вын
Примечаннё
Сентябрь 60 СМ + 10° • 15 Лун
...
Ноябрь 15 лунö усис лым.
Ноябрь 18 лунö кынмис ю
Заданнё.
Мийö быдса классöн керим арся мисеччез сьöрын наблюденнёэзiсь таблица.
Сiя гижöма 73 страница вылö.
То мый тöдiм мийö эта таблицаись: арнас быд мисечöн луншöрнас шондi сулалiс му вевдöрын сё лажмытжыка (луншöрся вуджöрыс лоис кузьжык).
Быд мисечö шондi югöррес усисö нежык веськыта, лоис кöдзытжык.
Медшоныт мисечöн вöлi сентябрь.
Медкöдзытöн — ноябрь.
Ноябрь 15 лунö лым вевттис мусö, 18 лунö кынмис ю (пондöтчис тöв).
Мича луннэс быд мисечöн чинiсö, а кымрасьöмыс содiс.
Медкымöра мисечöн вöлi ноябрь.
Осадока луннэз ар конец кежö содiсö.
Часто арнас мунiсö поснит зэррез.
Октябрь мисечö мыччасьлiсö первöй лымоккез.
Ноябрь шöрсянь зэр туйö пондiс усьны лым.
Арнас почти быд лунö пöльтiс тöв.
Лöнь погоддя вöлi шоча.
Быд мисечö тöлыс лоис вынажык.
Ноябрь мисечö тöлыс вöлi вынажык, нежели октябрь да сентябрь мисеччезö.
Тöв пöльтiс тшöкжыка западсянь да юго-западсянь.
Тöв вежис погоддясö: западнöй да юго-западнöй тöв дырни часто усьлiсö осадоккез; северо-восточнöй тöв дырни сувтчывлiс кöс либо кöдзыт погоддя.
abu
Керö эта образец сьöртi сводка асланыт наблюденнёэзiсь арся, тöвся да тулысся мисеччез сьöрын.
Сводкаэз керан уджсö торья мисеччез кузя юкö ас коласын.
Мый колö тöдны погоддя йылiсь
Мыйсянь вежсьö воздухлöн температура.
Шондi иньдö му вылö не токо югыт, но и шоныт.
Этö позьö кокнита вежöртны: кöр шондi югöррес усьöны тiян вылö — тiянлö шоныт; мунатö вуджöрö — лоö кöдзытжык.
Шондi шонтö мусö.
Шоныт мусянь шоналö и воздух.
Вот мыля воздухлöн увтiсь слойес, кöдна матынжыкöсь муыс дынö, пыр шонытжыкöсь вылiссезся.
Луннас шондiыс шонтö мусö неöтмоз.
Асывнас му вевдöрын шондiыс сулалö лажмыта.
Сылöн югöррес му вылас усьöны пöлiньöн и озö вермö сiйö бытшöма шонтны (рис. 65).
Луншöрнас нёбоын шондi сулалö медвылына: сылöн югöррес веськытжыка усьöны му вылö, и му босьтö шонытсö медуна (рис. 66).
Рыт кежö шондi бöра лажмыта сулалö му вевдöрас и умöля сiйö шонтö.
Кыным дыржык югдöтö шондi, сыным буражык шоналö му.
Шондiа мöд джын лунö пыр шонытжык, чем первöяс; луншöрöдз шондiыс шонтö ойöн сайкалöм мусö; луншöр бöрсянь сiя шонтö шонтöм ни мусö.
Кыным матöжык гожумöдз, сыным шондi шонтö буражык.
Одз петö сiя асывнас да сёрöн сайöвтчö рытнас; вылына сулалö му вевдöрын луншöрнас.
Муыс бытшöма шоналö.
Лоö шоныт.
Тöвнас — мöднёдж: шондi мыччисьлö недыр кежö и лажмыта сулалö му вевдöрын луншöрнас.
Муыс оз ешты шонавны, а кузь ойö бура сайкалö.
Лоö кöдзыт.
Сiдз годiсь годö: гожумнас — шоныт, а тöвнас — кöдзыт.
Воздухын пыр эмöсь ва паррез.
Пондöтчам наблюденнёсянь.
Мича лунö петкöтам öтöрö ва простыня.
Кынымкö час бöртi простыняыс лоас кöс.
Кытчö лоис ваыс?
Ваыс пакмис — пöртчис парö, кöдö оз позь адззыны синöн.
Воздухын пыр эм ваыс (парöн).
Ва пар шедö воздухö, кöр пакмö нюррезiсь, юэзiсь, тыэзiсь да мореэзiсь ва.
Кыным шонытжык воздухыс, сыным унажык босьтö сiя ас пытшкас ва парресö.
Кöдзыт воздухын ва паррез етшажыкöсь.
Кыдз шогмöны осадоккез.
Кöр шоныт воздух сайкалö, сыись янсалöны ва паррез.
Эна паррезiсь шогмöны: туман, кымöррез да осадоккез — зэр, лысва, пуж, лым да шер.
Туман.
Мороза лунö бытшöма лонтöм жырйись осьтам öтöрö ыбöс.
Ыбöс дынын сэк жö лоасö кыдз тшын тшакыллез.
Эта не тшын, а туман.
Кöр жырйись шоныт воздухыс пантасяс кöдзыт воздухкöт, нетыдалана ва парыс сукмö — пöртчö ва вотёккезö.
Эна ва вотёккез сэтшöм кокнитöсь, што озö усьö му вылö, а лэбалöны воздухын.
Öддьöн уна ва вотёккес керöны воздухсö шуч нетыдаланаöн.
Сiдз шогмö природаын туман.
Кöр туманыс овлö сэтшöм сук, што баитöны: кык шаг сайын нем оз тыдав.
Кымöррез.
Кымöррез шогмöмсö бытшöм наблюдайтны жар да шондiа лунö.
Асывсянь нёбоыс мича.
Луншöр кежö нёбоын мыччисьöны кымöррез.
Перво нiя вата тороккез чужöмаöсь, сыбöрын ылiсь мыссэз да керöссэз чужöмаöсь.
Кымöррес öтiк места вылын озö сулалö: нiя пыр ветлöны да вежöны ассиныс форманысö.
Кысянь лоисö кымöррес?
Шондi шонтiс мусö.
Му дынсянь шоналiс воздух да перыта пондiс кайны вылö.
Öтлаын шоныт воздухыскöт пондiсö кайны вылö и ва паррез.
Вылын воздухыс сайкалiс, а нетыдалана ва паррес пöртчисö туманö.
Кымöррез — вылына му вевдöрö кайöм туман.
Кымöррес, кыдз и туман, лоöны поснитик ва вотёккезiсь, кöдна эмöсь воздухын.
Зэра кымöррез да зэр.
Мукöд коста нёбоас кымöррес туйö мыччисьöны сьöдкодь зэра кымöррез.
Нiя шогмöны не токо поснитик ва вотёккезiсь — ныын мыччисьöны и гырисьжык ва воттез.
Öтамöдкöт öтлаасьöмсянь ва воттес лоöны сьöкытöсь да усьöны улö.
Зэрö.
Шер.
Гожумся кадö мукöд коста усьлö шер.
Шер — этö гöгрöса йы тороккез.
Шогмöмась нiя öддьöн вылын му вевдöрас, кытöн öддьöн кöдзыт.
Сэтчин зэр воттес кынмисö да пöртчисö йы тороккезö.
Улö лэдзчисикö ны вылö вились-виль кынмöны йы слойез.
Сiдз вермöны аркмыны шер тусёккез 1 килограмм сьöкытаöсь.
Лым.
Тöвнас — кöр кöдзыт — ва парыс кымöррезас пöртчö не ни ва воттезö, а öддьöн учöт йыа емоккезö.
Ныись шогмöны басöк узöра лымоккез.
Жагöна бергалöмöн усьöны нiя му вылö да вевттьöны сiйö чочком, шондi вылын свиттялана вевтöсöн.
Лысва да пуж.
Ва парыс вермö сукмыны не токо вылына му вевдöрас, но и му вылын.
Мича гожумся да арся рыттэзö, а сiдз жö и асыввезö быдмас заэз да листтэз вылö пуксьöны поснит ва воттез — лысва.
Лысвасянь турун лоö ва.
Лысва шогмö, кöр ва воздух павкалö сайкалöм предметтэз бердö.
Сiйö жö позьö наблюдайтны и жырйын, кыдзи кынымиськö лолышны öшынiсь кöдзыт стекло вылö.
Арнас кынтывлiкö да тöвнас, кöр öддьöнжык сайкалöны му да быдмассэз, ны вевдöрын мыччисьö не лысва, а йыись чочком емоккез.
Эта пуж (рис. 67).
Вопроссэз.
1. Кысянь воздухас лоöны ва паррез?
2. Кытшöм воздухын ва парыс унажык — шонытын али кöдзытын?
3. Мый лоö уль воздухкöт сайкалiкö?
4. Мыля туман коста воздух лоö нетыдаланаöн?
5. Мыйöн неöткодьöсь туман да кымöррез?
6. Мыйöн неöткодьöсь кымöррез да зэра кымöррез?
7. Кытшöм кадö годнас усьö шер?
8. Мыля лым усьö тöвнас?
9. Мыля гожумнас лысва аркмö асыввезöн да рыттэзöн?
10. Мыйöн неöткодьöсь лысва да пуж?
11. Мыля пуж овлö сёр арöн да тöлöн?
Кыдз аркмöны тöввез.
Пондöтчам наблюденнёэзсянь.
Первöй наблюденнё.
Лöнь да кöдзыт лунö осьтам лонтöм жырйись форточка.
Матына вайöтам чужöмнымöс осьтöм форточкаыс увдöрö и мийö пондам чувствуйтны, кыдз пöльтö кöдзыт воздух.
Лэбтам чужöмнымöс форточка вевдöр дынö — пондам чувствуйтны шоныт воздух.
Мöдiк наблюденнё.
Лöнь да кöдзыт лунö лонтöм жырйись осьтыштам öтöрö ыбöс.
Шельыс вевдöрö вайöтам папироснöй бумагаись векнитик флажок — флажоксö пондас пöльтны жырйись шоныт воздух (рис. 68).
Вайöтам флажоксö шельыс увдöрö — флажоксö пондас пöльтны жырйö öтöрись кöдзыт воздух.
Сiя, мый мийö наблюдайтам осьтыштöм ыбöс дынын, лоö и му вылын.
Сiя местаэзын, кытöн воздухыс шоналö, сiя лоö кокнитжык и лэбö вылö.
Сiя местаö сэк жö локтö сьöкытжык кöдзыт воздух.
Сiя локтö нiя местаэзiсь, кытöн воздухыс шонтöма умöльжыка.
Сiдз аркмö воздухлöн ветлöм либо тöв.
Тöввес овлöны неöткодь вынаöсь, и пöльтöны неöтладорсянь.
Тöввес часто вежöны погоддя.
Кöр асывсянь сулалö лöнь, шондiа погоддя.
Тöв чуть вöрöтлö пуэз вылiсь листтэз.
Нёбоын абу и öтiк кымöрок.
Но друг пондiс пöльтны тöв.
Мыччисисö кымöррез.
Нiя перыта быдмöны и пöртчöны зэра кымöррезö.
Эна кымöррезiсь пондö кисьны зэр.
Овлö и мöднёдж.
Асывсянь мунö зэр,
зэра кымöррез вевттьöны быдöс нёбосö.
Думайтан, зэрлö оз ло и конец.
Но вот пондiс пöльтны тöв.
Кымöррез öшiсö.
Пондiс югьявны шондi.
Öтöрын лоис шоныт и кöс.
Одзлань погоддя висьталöм
Поппез велöтiсö, што погоддясö иньдö ен.
Царь дырни крестьяна коласiсь унажыкыс вöлiсö неграмотнöйöсь и эзö тöдö сэтшöм наука йылiсь, кöда тöдмалö (изучайтö) погоддясö.
Крестьяна кывзiсö поппесö и думайтiсö, што позьö погоддясö вежны, служитны кö енлö молебен.
Эта молебен понда крестьяна вештывлiсö ассиныс медбöрья грошшезнысö.
Öнi етша ни адззисясö сэтшöм морттэс, кöдна бы веритiсö поппес бöбöтчöмлö.
Почти быдöнныс тöдöны, што наука отсалöмöн позьö висьтавны одзлань, кытшöм лоас погоддяыс и пессьыны сiя вредкöт, кöдö погоддяыс вермас вайöтны.
Погоддясö научнöя велöтöм понда лöсьöтöны метеорологическöй станцияэз.
Ныын быд лунö керöны погоддя сьöрын
Сэтшöм станцияэс СССР-ын уна.
Нiя эмöсь городдэзын, селеннёэзын, етша доступнöй керöс йыввезын, Севернöй Ледовитöй океан островвез вылын и нельки Севернöй полюс дынын йы пласт вылын.
Быд лунö радио кузя гырись метеорологическöй станцияэз иньдöны асланыс наблюденнё йылiсь сводкаэз центральнöй станцияэзö.
Центральнöй станцияэзын керöны наблюденнёэзсис сводкаэз, и ны сьöртi учонöйез висьталöны одзлань погоддя.
Погоддясö одзлань висьталöмыс видзö ыджыт значеннё народнöй хозяйство понда.
Колхоззэз да совхоззэз радио кузя тöдöны, кöр тулыснас да арнас видзчисьны заморозоккез, гожумнас — зэррез; железнодорожниккез — лымья заноссэз; моряккез, лётчиккез да черикыйиссез — буряэз.
Кыдзи одзжык тöдан, кöр лоас умöль погоддя, позьö сы кежö лöсьöтчыны.
Кынтiкас сотöны тшына кöстеррез, тшыныс оз сет кынмыны саддэзiсь да карчйöррезiсь быдмассэслö.
Медбы лымöн эз тырт кöрттуйез, сувтöтöны особöй щиттэз (рис. 69).
Засуха дырни керöны искусственнöй киськалöм да искусственнöй орошеннё.
СССР-ын засушливöй районнэзын успешнöя сувтöтöны опыттэз керны искусственнöй кымöррез да зэр.
Неылын и сiя кад, кöр позяс керны либо дугдöтны зэр.
Вопроссэз.
1. Мыля научнöя одзлань погоддясö висьталöмыс сетö ыджыт значеннё народнöй хозяйство понда?
2. Кыдз позьö пессьыны сiя вредкöт, кöдö вайöтö умöль погоддяыс?
Кыдз год каддэз сьöртi вежсьö погоддя
Наблюденнёэзiсь мийö тöдамö ни, што погоддяыс пыр вежсьö.
Но дыржык кö нуöтны погоддя сьöрын наблюденнёэз, позьö казявны, што быд кадлöн годас эм аслас обычнöй погоддя, погоддя, кöда повторяйтчö частожык.
Пример туйö босьтам, кытшöм обычнöй погоддя эм разнöй каддэзö Москва увтын.
Пондöтам тöвсянь да гожумсянь — годыслöн кык противоположнöй кадсянь.
Москва увтiсь тöвся погоддяыс резкöя мöдкодь гожумсяыс сьöртi.
Тöв.
Москва увтын тöлыс кузь, 5 мисеч гöгöр.
Сувтчö сiя частожык ноябрь шöрсянь.
Сёрöн тöвнас петö шондi.
Лажмыта сулалö сiя луншöрнас.
Пöлiньöн усьöны сылöн югöррес да умöля шонтöны мусö.
Луннэс лоöны дженытжыкöсь, а ойес кузьжыкöсь.
Декабрь 21 лун — меддженыт лун: сiя токо 7 час кузя, а ой — 17 час гöгöр (рис. 70).
Декабрь 21 лунсянь лун пондö невнаöн содны.
Медкöдзыт тöвся мисеч — январь.
Шöрöт температураыс сылöн — 11°; но мукöд коста мороззэс овлöны 20, 25 и нельки 35°.
Тöвнас унажыкыс мороза луннэз.
Тöвся лунö нельки шондi дырни кöдзыт.
Отирыс каттисьöны шаллезö да пассезö.
Быдöнныс тэрмасьöны.
Кок увтын дзуртö лым.
Пуэз вевттьöмöсь йыа емоккезöн.
Шондi югöррез увтын сэтшöм югыта свиттялöны лымоккес, нельки синнэз гусялö (рис. 71).
Тöвтöм луннэс тöвнас етшаöсь.
Часто пöльтöны тöввез да часто вежöны погоддя.
Юго-западнöй тöв дырни перыта шонтö, нёбо вевттисьö кымöррезöн, лым сылö, öтöрын лоö уль.
Северо-восточнöй тöлыс бöра вайöтö кöдзыттэз.
Мукöд коста тöвнас локтöны лымья буряэз — пурга-падераэз.
Тöв нöбöтö сьöрас öддьöн уна лым да бергöтö сiйö.
Бергалан лымсянь кык шаг сайын нем оз тыдав.
Вына тöв перыта керö лымсис столаэз, тыртö лажмытiннэзiсь кырассэз да канаваэз.
Пурга коста позьö кокнита öштыны ыб вылын туй да кынмыны нельки неылын селеннё дынсянь.
Гожум.
Москва увдöрын гожум кыссьö куим мисеч.
Пондöтчö сiя июньын.
Гожумнас одз петö шондi да сёрöн пуксьö.
Вылына сулалö сiя луншöрнас да бура шонтö мусö.
Сё кузьжыкöсь лоöны луннэз да дженытжыкöсь ойез.
Июнь 21 лунö — медкузь лун. Сiя кыссьö 17 час гöгöр.
Июнь 21 лун бöрын луннэс пондöны чинны (рис. 72).
Меджар мисеч — июль.
Сылöн шöрöт температураыс +19°.
Мукöд луннэзö жарыс овлö 35°-öдз.
Гожумнас унажыксö жар луннэз.
Жар луннэзö воздухыс кыдз бы кынмас — оз вöр.
Нёбоын мыччисьлöны кымöроккез да перыта сылöны.
Шондi сотö.
Быдöнлö охота юны.
Нельки кайез вöрöтчытöг пукалöны осьта öммезöн да лэдзöм борддэзöн (рис. 73).
Гожумнас овлöны слевнöй зэррез.
Шочыника овлöны и ыджыт грозаэз (гымалöм да вирдалöм).
Эта одзын асывсянь воздухыс сьöкыт.
И отир, и животнöйез, и быдмассэз мучитчöны сьöкыт да жар воздухсянь.
Но вот ылiсянь пондiс пöльтны кöдзыткодь воздух.
Öддьöн ыджыт кымöр вевттис быдöс нёбосö.
Öддьöн горöн гымалö.
Нёбо сотчö дугдывтöм вирдалöмсянь.
Мунö слевнöй зэр, кöр и шер сорöн.
Гроза частожыксö шумитö час-кык.
Гожумнас быдмас быдмö медбура.
Воöны сюэз да мöдiк сельскохозяйственнöй быдмассэз.
Гожум конецö дзимлялöны урожай.
Ар да тулыс.
Ар да тулыс — годнас вуджан каддэз: ар — гожумсянь тöлö вуджан; тулыс — тöвсянь гожумö.
Арнас погоддяыс вежсяна.
Ар пондöтчикö часто сулалö шоныт да шондiа погоддя.
Шочыника локтас кымöр, мунö поснит зэр.
Мöд джын арö часто ольсасьöны туманнэз.
Нёбо вевттисьö слоистöй кымöррезöн — и сэк не öтiк лун мунö поснит зэр.
Öтöрын — шлякöть, ва, кöдзыт.
Кöр и кынтышлö.
Мукöд пора öтлаын зэрыскöт усьö лым.
Кöр кыза усьö лымыс, но чожа сылö.
Медбöрын сувтö кöдзыт погоддя.
Му вевттисьö лымöн.
Тулыснас погоддяыс тожö вежсяна.
Тулыс пондöтчикö мороза луннэз вежласьöны шоныттэзкöт.
abu
Мукöд местаэзын мыччисьö му.
Но пондасö пöльтны севернöй тöввез — и бöра кöдзыт.
Сылöм местаэс бöра вевттисьöны лымöн.
Но сё тшöкжыка и тшöкжыка сулалöны шоныт луннэз.
Лым перыта сылö.
Быдлаын котöртöны гудыра шоррез.
Оссьöны юэз.
Косьмöны ыббез да видззез.
Тшöк щетинаöн петöны туруннэз.
Пондöны цветитны цветтэз да пуэз.
Овлöны эта кадö и неыджыт заморозоккез, но недыр кежö.
Медбöрын сувтö жар погоддя.
Заданнё.
Керö асланыт местностись разнöй каддэзö погоддяись описаннё.
Кыным мисеч тiян кыссьö тöв?
Кынымö гожум?
Кынымö — тулыс да ар?
Кытшöм мисеч тiян медкöдзыт?
Кытшöм меджар?
Кыным градусöдз овлö тiян дынын мороз? Жар?
Кöр тiян местностьын кынмö ю?
Кöр сiя оссьö?
Мый сэтшöм климат
Мийö тöдамö ни, што годiсь быд кадлöн эм кыдз бы аслас обычнöй погоддя.
Отир, кöдна дырöн олöны öтiк местаын, вермасö висьтавны, кытшöм нылöн обычнöй погоддяыс ар понда да тöв понда; кытшöм тулыс понда да гожум понда.
Местность понда год каддэзö обычнöй погоддя вежсьöмыс шусьö эта местаись климатöн.
Быд месталöн эм аслас климат.
Мукöд местаэзын СССР-ас климатыс öтчужöма московскöйкöт, мöдiк местаэзын климатыс унаöн мöдкодь.
Кытшöм климатыс му вылас разнöй местаэзын, мийö тöдам одзлань.
VII. МУ ШАР РАЗНÖЙ ПОЯССЭЗЫН ПРИРОДАЛÖН ДА НАСЕЛЕННЁ ОЛÖМЛÖН КАРТИНАЭЗ
ТРОПИЧЕСКÖЙ ПОЯС
Тропическöй пояслöн природа
Экватор кыкнан ладорöт паськыт полосаöн нюжалö му шар гöгöр жар пояс.
(Адззö глобус вылiсь да джыншаррез карта вылiсь жар пояс.
Мыччалö сiйö асланыт керöм сёёвöй му шар моделлез вылын).
Жар овлö гожумнас миян умереннöй поясын.
Но чулаласö гожумся мисеччез, локтас арся кöдзыт, а сэтчин и тöвся мороззэз.
Совсем не сiя тропическöй поясын.
Кöр мийö любöй кадö годнас — гожумöн, тöлöн, арöн либо тулысöн — юалам радио кузя тропическöй поясын олiссезлiсь, шоныт тiян али кöдзыт, нiя пыр висьталасö: «Миян жар».
Кыдз тiйö тöдат ни, сэтчин луншöрнас пыр вылына лэбтiсьö шондi.
Веськыта вылiсянь усьöны му вылö сылöн югöррез да бура шонтöны.
И этасянь сэтчин некöр оз овлы кöдзыт кад.
Но не быдлаын тропическöй поясас овлö öткодь погоддя.
Öтiк местаэзын почти быдса год быд лунö öтiк чассэзö мунöны слевнöй зэррез.
Почваыс эстöн пыр влажнöй.
Öддьöн басöк пырзелёнöй тропическöй вöррез вевттьöны мусö.
Мöдiк местаэзын не öтiк мисеч подряд сулалö засуха, а сыбöрын не öтiк мисеч почти быд лунö мунöны зэррез.
Эна местаэзын вöррес абуöсь.
Öддьöн ыджыт пространствоэз вевттьöмöсь турунöн.
Токо öтiкöн да неыджыт группаэзöн сулалöны пуэз, кöдна озö полö засухалiсь.
Эна местаэс шусьöны саваннаэзöн.
Засуха коста саваннаэзын совсем сотчö турун, усьöны пуэз вылiсь листтэз, косьмöны шоррез да юэз.
Но пондасö кисьны зэррез, и саванна бöра зелёнöйсялö, вевттисьö вылын туруннэзöн, пуэс пасьтасьöны том листтэзöн.
А эмöсь тропическöй поясын местаэз, кытöн зэррес почти совсем озö овлö.
Быдса год эстöн терпиттöг сотö шондi.
Почва кöс, быдмассэс пантасьöны шоча.
Быдлаын, кытчö он видзöт, — калитчöм песоккез, мукöд местаэзын сёй либо иззэз.
Эта — пустыня.
Тропическöй вöрын
Адззö джыншаррез карта вылiсь Африка.
Адззö сiйö местасö, кытöн Африкасö янсöтö экватор.
Эстöн Конго ю кузя да сы притоккез кузя öддьöн ыджыт пространство вылын быдмö сук да мунны нетуяна тропическöй вöр.
Вот мый эта вöр йылiсь висьтасьö öтiк путешественник.
Жар луншöрö.
Мийö мунiм слоннэз туёкöт африканскöй вöр кузя.
Вылö нёбоас мунiсö колонна чужöма веськыт пальмаэз да не öтiк тысяча миянлö тöдтöм пуэз.
Мукöд местас миянлö пантасьлiсö бамбуккезiсь да бананнэзiсь быдса вöррез: бананнэз вылiсь öшöтчисö роззэзöн золото рöма воöм плоддэз.
Пуэслöн вылiсь уввес каттисисö сук да почти сплошнöй шатёрö.
Улын вöлi джынви пемыт.
Токо мукöд местас мыччасисö шондi югöррез.
Быдкодьöсь, öддьöн гырисьöсь кыссяна да каттиссяна быдмассэз — лианаэз — öшöтчисö öтiк пу вывсянь мöдiк вылö. Нiя каттисисö пу стволлэз гöгöр йыввезöдз да сэтчинсянь öшöтчисö чуть не му дынöдз.
Гырись да басöк рöма цветтэз видзöтчисö сук да пемыт листтэз коласöт.
Муыс вöлi вевттьöма кыз слойöн эшö абу сiсьмöм уввезiсь да листтэзiсь.
Быдлаын куйлiсö пöрöм пуэз, и быдöс каттьöма лианаэзöн.
Нiя бура каттисö сiдз жö пуэсö и му бердсяняс.
Уналöн ны коласiсь вöлiсö крючоккез да бытшкасяннэз, кöднö эз позь орддьыны, медбы не кышасьны да не ранитны асьтö.
Вöрöт совсем эз туй мунны.
Мийö чертöг эго вермö керны и öтiк шаг не шульгаланьö не веськытланьö сiя туёк вылiсь, кöда кузя мунiмö.
Почваыс уна местаэзын вöлi зыбун кодь, и миянлö колiс керавны вöр чашьяас векнитик туёккез, медбы позис орддьыны вöтяна местаэсö.
Вöлi жар да уль.
Лолавны вöлi сьöкыт.
Мийö öдва мунiм одзлань.
Звиррез да кайез дзебсисисö жарсяняс.
Вöрын вöлi лöнь.
Лöньсö повзьöтлiс токо насекомöйезлöн дугдывтöм дзинöтöм.
Ойнас.
Туёкыс, кöда кузя мийö мунiм, вайöтiс миянöс ю дынö.
Мийö сувтчим да пондiмö лöсьöтчыны узик кежö.
Шондi пуксис, и сразу пемдiс.
Вöр, кöда ловзьывлiс рыт кежö, пондiс чöвны.
Но недыр кежö.
Эгö ештö мийö водны узьны, кыдз сiя бöра тырис шыэзöн.
Пондiсö сильöтны да дзинöтны не öтiк тысяча ойся насекомöйез.
Уна горöн ургисö лягушаэз.
Мукöд кадö кылiсö обезьянаэзлöн тревожнöя горöтöммез.
Кылiс шутнялöм, а кöр и кайезлöн нявзöмкодь шы.
Кинкö норöн пондiс уннявны...
Кöр кылiс и леопардлöн урзöм.
Мийö ойбыт эгö узьö.
Öдöлейттöм полöм кутiс миянöс.
Мийö тöдiм, што жестокöй расправа мунö ойнас вöрын, што не öтiк сотня кайезöс да мöдiк животнöйезöс нетшкöны öнi вöрись хищниккез.
Мийö полiмö, што нiя уськöтчасо миян вылö.
Асывнас одз.
Югдiс.
Ме зарядалi пишаль да петi палаткаись.
Казялi вылын скала да кайи сы вылö, медбы видзöтны сы гöгöрись местностьсö.
Пондiс кывны ризьöтöм да шум...
Друг совсем ме увдöрын мыччисис öддьöн ыджыт слонлöн спина, сыбöрын мöдiк, куимöт...
Ме кайи вылöжык.
Видзöтi-кери улö и пайми.
Вöр кузя жагöн мунiсö ыджыт табунöн слоннэз.
Нiя öтамöд бöрын мунiсö вöр туёк кузя ва дынö.
Друг менö кылiс пöрись слониха.
Сiя котöртiс скала гöгöр да горöн пондiс трубитны.
Слоннэс сувтiсö да чöлiсö.
Но секунда бöртi нестройнöй массаöн уськöтчисö одзлань, быдöс асланыс туй вылiсь чеглалöмöн.
Ризьöтöмöн усисö слоннэзöн бергöтöм пуэз.
Вöрыс тырис ризьöтöмöн да шумöн.
Эз чулав и минута, кыдз быдöс стадоыс сайöвтчис.
Ме сулалi-кери скала вылас да пондi лэдзчыны ю дынö.
Эг ешты ме лэдзчисьны скала вылiсь, кыдз казялi обезьянаэз быдса табун.
Звироккез мунiсö ю дынö.
Осторожнöя видзöтлiсö нiя гöгöр, оз я гусясь ны сьöрö враг...
Друг кылiс вожаклöн горöтöм, кöда мунiс одзлань.
Сiя сувтчис, чеччöвтiс бöр да кыдз чарньöв öшис ордчöн сулалан пу уввезын; сы сьöрö горöтлöмöн уськöтчис быдöс стаяыс.
Кöр ме матöжык локтi сiя места дынö, то казялi ыджыт змеяöс.
Сiя лэбтiсис да лöгöн пондiс пишкыны.
Ме бертi лагерьö.
Гроза.
Завтрак бöрын мийö лöсьöтчим мунны матiсьжык деревня дынö, босьны сэтчинiсь пыжжез да кывтны одзлань ю кузя.
Но эта миянлö эз удайтчы.
Миян весьтö локтiсö кымöррез.
Ылын пондiс гымавны.
Пондiс вирдавны.
Лэбтiсис буря.
Пуэс, кöдна эта минутаöдз сулалiсö вöрöтчытöг, пондiсö бура нёкрасьны бокись бокö.
Кажитчис, што нiя нетшкöвтчасö местаэзныс вылiсь.
Йыввезныс нылöн то нёкыртчывлiсö одзлань, то перыта кöстiсьлiсö бöрлань.
Пемыт да лажмыт кымöррез уйисö вöр вевдöрöт.
Кылiс ризьöтöм, шутнялöм, тöвлöн уннялöм, не öтiк тысяча стволлöн дзуртöм.
Кымöррес лоисö почти сьöдöсь.
Дугдывтöг вирдалiс.
Гымнитiс öддьöн горöн, и пондiс кисьны зэр.
Секунда кык-куим бöртi эта вöлi не зэр ни, а ливень.
Ва уськöтчiс миян лагерь вылö.
Чулалiс кынымкö минута и миян палаткаэз, припассэз да вещщез — быдöс вöлi ваын.
Ливеньсянь сэтшöм вöлi шум, што мийö эгö кылö öтамöднымöс.
Лоис совсем почти пемыт.
Не öтiк час кисьтiс ливень, и мийö пукалiм вöрзьöтчытöг.
Сыбöрын ливень сразу дугдiс, и бöра пондiс югьявны шондi.
Миян лагерьлöн видыс вöлi гажтöм.
Эз вöв и öтiк кöс тор.
Миян паськöм вылiсь ва котöртiс шороккезöн.
Матын ни вöлi рыт, и мийö тэрмасьöмöн пондiм лöсьöтчыны узик кежö.
Колiс, мый бы эз ло, а öзтыны кöстеррез, медбы лагерь вылас эз уськöтчö дикöй звиррез.
Задача вöлi сьöкыт, мыля быдöс вöлi шуч ва.
Тропическöй вöррез быдмöны не токо Африкаын, но и светыс мöдiк часттезын.
Унаöн нiя öткодьöсь эта вöркöт, кöда йылiсь гижöм вылынжык.
Но не быдлаын, конешно, быдмöны токо нiя жö öтiк быдмассэз, олöны нiя жö öтiк животнöйез.
Тропическöй вöррезын животнöйез
Тропическöй вöрлöн богатöй быдмас пöлöс, öддьöн уна быдкодь плод да кöдзыссэз сетöны сёянсö öддьöн уна быдкодь животнöйезлö да кайезлö.
А уна кö животнöйез да кайез, кöдна сёйöны быдмассэсö, — сiдзкö, и хищнöй животнöйес кокнита вермасö адззыны аслыныс сёян.
Öддьöн уна звиррез да кайез олöны тропическöй вöрын.
Но одзжык нiя вöлiсö эшö унажык.
Уна ны коласiсь быдсöн ни вийöмöсь отирöн.
Тропическöй вöррезын олöны: слоннэз, обезьянаэз, тигррез, леопарддэз.
Нысся тропическöй вöррезын öддьöн уна олöны кайез.
Обезьянаэз — öддьöн ловкöй да перыта вöрöтчись животнöйез, олöны пуэз вылын; кузь да цепкöй коккезнаныс кокнита кутчисьöны уввез да пуэз бердö да чеччалöны пу вылiсь пу вылö.
Сейöны плоддэз.
Слон — му вылын олiсь медыджыт животнöй.
Сейö быдмасовöй сёян.
Аслас ыджыт телоöн кокнита керö чашья коласöт туй.
Кузь хоботöн нетшкö пуэз вылiсь уввез да плоддэз.
Бегемот — öддьöн ыджыт животнöй.
Олö Африкаын тыэз да ыджыт юэз дорын.
Унажык кадсö чулöтö ваын, сёйö ва быдмассэз да тростник.
Ойезнас сёйны петалö берегö.
Ачыс некин вылö оз уськöтчы.
Тигр — ыджыт хищнöй звир,
олö сiя тшöк вöроккезын.
Сылöн веж, полосатöй кучик оз тыдав шондi вылын кельдöтöм заэз коласын.
Леопард — хищнöй звир.
Невна учöтжык тигрся, но сэтшöм жö вына да перытжыка вöрöтчись; кайö пуэз вылö да сэтчинсянь чеччалö животнöйез вылö.
Питон — öтiк медыджыт да медопаснöй змеяэз коласiсь.
Уськöтчö животнöйез вылö, каттисьö ны гöгöр да пöдтö нiйö аслас вына телоöн.
Сыбöрын быдсöн ньылыштö добычасö.
Вермö кокнита ньылышны баляöс, понöс.
Попугайез — тусь сёйись кайез.
Бытшöма чылöны пу уввез кузя. Чывны отсалöны нылö бура кутчисян вына коккез да ён, крючокöн кöстöм ныр.
Аслас нырöн кокнита поткöтö öреккез да чорыт кöдзыссэз.
Тропическöй вöррезын быдмассэз
Кокосовöй пальма — увтöм пу, вылынанас 25 метра гöгöр.
Листтэс 6 метр кузяöсь.
Плоддэз — öреккез кага юр ыждаöсь.
Банан — тропиккезын важнöй быдмас.
Сылöн чöскыт питательнöй плоддэс — основнöй сёян тропическöй странаэзын олiссезлöн.
Бамбук — быдмас, кöда быдмö 40 — 50 метр вылына; тростник чужöма, но заыс сылöн кызжык уна пуэзлöнся.
Быдмö öддьöн перыта.
Видзсьö техникаын, кыдз öддьöн ён да кокнит материал.
Заданнёэз.
1. Видзöтö му шар быдмассэз карта сьöртi, кытöн быдмöны тропическöй вöррез.
2. Мыччалö нiйö жö местаэсö джыншаррез карта вылiсь.
3. Эд вунöтö, кытшöм быдмассэз да животнöйез пантасьöны тропическöй вöрын, да велалö адззыны нiйö картинка вылiсь
Африканскöй саванна кузя
Сук вöр, кöда пемытын мийö мунiм не öтiк лун, шочамис.
Пу йыввез коласын мыччисис нёбо.
Югйöвтiс сингусялана шондi.
Эшö невна... и миян одзын оссис туруннэзлöн зелёнöй море.
Эта туруновöй просторын, то кучкаэзöн, то öтiкöн быдмисö пуэз.
Öддьöнжык торьясисö пуэз-великаннэз — баобаббез.
Быд сэтшöм пу увтын позис дзебсисьны не öтiк дас мортлö.
Стволыс сылöн вöлi сэтшöм кыз, што токо 10 морт, киись киö кутчисьöмöн, вермисö бы сiйö омöн кутны (рис. 86).
Терпиттöг сотiс шондi.
Мийö сувтчимö и решитiм видзчисьны баобаб вуджöр увтын, кытчöдз оз чулав жарыс.
Шоччисьöм бöрын, рытъяв дорас, мийö пондiм мунны одзлань.
Шондi бергöтчис рытланьö.
Жарыс невна чулалiс.
Одзлань, мымда судзис син, важмоз паськалiс туруннэзöн вевттьöм равнина.
Мийö видзчисим, оз я мелькнит кытöн-ненабудь турун коласын антилопа, оз я чеччав зебра, оз я мыччись пуэз сайись жирафа.
Но весь.
Одзза каддэзö, миян проводниккез-негррез висьтасьöм сьöртi, эна животнöйес ветлöтлöмась быдса табуннэзöн, и нiйö кокнит вöлöм адззывны.
Эмöсь нiя эстöн и öнi, но лоисö унаöн етшажык — уна нiйö вийис морт.
Нiя öддьöн полöны мортлiсь и кыдз токо сiйö казяласö, сэк жö дзебсисьöны.
Мунны вöлi кокнит да гажа.
Мийö чорыта тальччалiмö невылын да сук туруновöй ковёр вылöт да любуйтчим орлытöг паськалан зелёнöй ылынаэзöн.
Но чожа местностьыс пондiс вежсьыны.
Туруныс сыспотека керсис сукжык да вылынжык.
Вот сiя косви ни, пельпоннэз дынöдз, юрся вылынжык.
Быдöс дзебсисис туруновöй стена сайö.
Сьöкыта мунам векнитик туёк кузя, старайтчам не öштыны синодзись öтамöднымöс.
Час гöгöр мунам эта туруновöй коридор кузя.
Мукöд пораö полöм петö: а друг ордчöн, кытöн-ненабудь турунас дзебсисис хищнöй звир, поди нельки ны коласiсь медвына — лев...
Миянлö лоис долытжык, кöр мийö казялiм, што туруныс лоö сё дженытжык и дженытжык.
Недыр мыйись миян одзын бöра оссисö туруна зелёнöй просторрез.
Вот ылын туруновöй море коласын мелькнитiс быд рöма чуклясян ленточка...
Вот сiя чукыльтчис, веськöтчис, пондiс нюжавны, лоны матынжык.
Секунда бöрын мийö казялiм, што этö носильщиккезiсь — негррезiсь караван.
Сто витдас негр мунiсö öтамöд бöрын да нöбöтiсö юррезныс либо пельпоннэзныс вылын ыджыт тюккез.
Кöр караваныс локтiс миян дынö, мийö тöдiм, што сiя мунö кофейнöй плантацияись да нöбöтö кофе.
Негррез висьталiсö миянлö, што неылын деревня, и мийö содтiм шаг, медбы югытöн локны сэтчö.
Эшö и öння кадö африканскöй саваннаэзын быд ладорö ветлöны носильщиккезiсь сэтшöм караваннэз.
Лев — медвына хищник.
Вöралö ойнас.
Уськöтчö зебраэз, жирафаэз, антилопаэз да горт пода вылö.
Зебра — быдмас сёйись животнöй.
Мыгöрнас вöв чужöма, токо полосатöй рöма
Жирафа — быдмас сёйись животнöй.
Сылöн вылынöсь одзись коккес да кузь голя; нiя сылö отсалöны судзлавны вылын пуэз вылiсь уввез.
Враггез шогья спасайтчö перыта котрасьöмöн.
Страус — öддьöн гырись кайез,. кöдна озö лэбалö, но перыта котрасьöны.
Сёйöны быдмассэз да кöдзыссэз.
Сёян кошшикö котöртöны öддьöн ыджыт ылынаэз асланыс кузь да ён коккезöн.
Антилопа — быдмас сёйись животнöйез.
Полiсьöсь.
Осторожнöйöсь.
Видзсьöны табуннэзöн.
Кöр кыласö опасность, тöвчикöн котöртöны враг дынiсь.
Заданнёэз.
1. Адззö карта вылiсь, кытöн куйлöны саваннаэз.
2. Гижö, мыйöн тропическöй вöррез климат сьöртi неöткодь климатыс саваннаэзлöн.
3. Эд вунöтö, кытшöм быдмассэз да животнöйез тшöкжыка пантасьöны саваннаэзын.
4. Гижö, кыдз годыс каддэзö вежсьö саваннаэзлöн вид.
Негритянскöй деревняын лун
Негритянскöй деревнясö не пыр позьö казявны ылiсянь.
Сiя частожык куйлö сук да вылын кустарник коласын, кöда каттьöма каттисян быдмассэзöн.
Медбы сайöвтны деревнясö отир да звиррез уськöтчöмсянь, сы гöгöр керöма вылын стын, пыраланыс пöднассьö ён воротаэзöн.
Пытшкас рядöн сулалöны гöгрöсаöсь, сёёвöй да идзасöн вевттьöм хижинаэз.
Хижинаэс гöгöр невылын заборрезöн янсöтöмöсь неыджыт оградаэз.
Деревня шöрын свободнöй площадка.
Эстöн ойнас олö пода.
Одз асыв.
Эшö эз пет шондi, а деревня кокйылас ни.
Быд хижина дынын öзйöны кöстеррез.
Баксöны мöссэз, сьылöны петуккез, вувтöны поннэз.
И ыджыттэз и челядь — быдöнныс öтöрын.
Нылöн куш телоэзныс свиттялöны кöстерыс бисянь.
Женскöйез лöсьöтöны сёян.
Быд семья аслас хижина дынö пуксьö кружокö да завтракайтö.
Мужиккес деревняас етша.
Уна ны коласiсь силой нуöтöмöсь европейскöй капиталисттэз плантацияэз вылö и не öтiк недель ни эзö вöлö асланыс деревняын.
Лэбтiсьö шондi.
Быдöнныс кутчисьöны асланыс удж бердö.
Мужиккез мунöны вöравны да кыйны чери.
Инькаэс занимайтчöны хозяйствоöн: масьтöны проса либо бананнэз, пöжалöны да пуöны, дзимлялöны хижинаын да оградаын.
Мукöд инькаэс мунöны деревнясис пуовöй куштаннэзöн, спина саяныс нöбöтöны нимасян кагаэзöс.
Инькаэслö колö гарйыны ассиныс ыбнысö, медбы кöдзны проса.
Луншöр гöгöр пондöтчö терпиттöм жар и быдöнныс öксьöны шоччисьны асланыс хижинаэзö. Озö локтö токо мужиккез, кöдна мунiсö вöравны.
Кулöмкодь лöнь лоö деревняын; кажитчö, што сыын некин абу.
Невна чинас лунся жар, и деревня бöра ловзьö — дугдöтöм удж бöра пондöтчö.
Но вот шондi пуксис и сразу лоö дзирс пемыт.
Бöра хижинаэз дынын öзйöны кöстеррез.
Ужнайтöны.
Инькаэз уджалöны пыд ойöдз, кöр вöрись кылöны ни хищнöй звиррезлöн шыэз.
Кытшöм народдэз олöны тропическöй поясын да мыйöн нiя занимайтчöны.
Уна быдкодь народдэз олöны тропическöй поясын.
Африкаын — негррез, Австралияын — австралиеццез? Тихöй океан островвез вылын — малаеццез.
(Мыччалö карта вылын, кытöн олöны эна народдэс).
Тропическöй природа вермö сетны отирыслö быдкодь сёян.
Саваннаэзын да вöррезын öддьöн уна быдкодь плоддэз да кöдзыссэз, эм уна дичь.
Юэзын да тыэзын уна чери.
Жара шонтö тропическöй поясын шондi, и сэтчин олiссеслö оз колö не шоныт оланiннэз, не шоныт паськöм.
Нылö эшö колö дзебсисьны луншöрся жар шондi югöррез шогья.
Правда, сэтчин олiсь народдэслöн кучикыс пемыт рöма, кöда мымдакö берегитö тропическöй шондi жар югöррез сотöмсянь.
Оланiннэсö нiя унажыксö керöны лисстэзiсь да уввезiсь.
Мукöд коста мавтöны сёйöн.
Паськöм обычно озö новйö.
Африканскöй негррез занимайтчöны мууджалöмöн, вöралöмöн да чери кыйöмöн.
Му уджалöны первобытнöйез моз — пуовöй орудиеэзöн (куштанöн либо просто ёся палкаöн).
Народдэз, кöдна занимайтчöны мууджалöмöн, олöны оседлöя, мöднёдж шуны, öтiк местаын.
Мöдiк народдэз вердчöны токо вöралöмöн, чери кыйöмöн и плоддэз да кöдзыссэз öктöмöн.
Сэтшöм народдэс, сёянсö кошшикö, бродитöны местаись местаö и узьöны сэтчин, кытöн вöтас ой.
Нылöн абуöсь пырся оланiннэз, нiя керöны токо турунiсь да уввезiсь временнöй шалашшез.
Кыдз овсьö тропическöй поясiсь народдэзлö.
Природа тропическöй странаэзын богат.
Позьö думайтны, што отирлö, кöдна олöны тропическöй странаэзын, овны кокнит.
Сiдз я эта?
Конешно, не сiдз.
Жар странаэзiсь мортсö гöгöр панталöны опасносттез.
Мунiс негр вöравны вöрö, а локтас я ловйöн — он тöд.
Гöгöр дикöй звиррез...
Умöля видзöтiн, эн казяв, эн бергöтчы аскадö — и кулiн.
Ойезнас звиррес ветлöтöны матына оланiн гöгöр, и быд минутаö колö овны синмöн.
Негррез асланыс деревняэз гöгöр строитöны вылын стын кодь заборрез.
Мукöд народдэз звиррес шогья строитöны ассиныс оланiннэсö пуэз вылö.
Пода кöть эн и видз — звиррес новйöны.
Африкаын мукöд местаэзын подаыс часто кулö це-це гут курччалöмсянь.
Кöдзöм ыббез тожö пыр опасностьын.
Пондас воны урожай, умöльжыка кö сторожитан, уськöтчасö сы вылö обезьянаэз и сiдз талясö да сёясö, кыдз бытьтö эз вöв и кöдзöм.
Неверно, што жар странаэзын мортлö быдöс сетсьö уджтöг.
Не öтiк час подряд, а кöр и быдса лун ветлöтöны вöралiссез бытшкасяна да сук тропическöй вöррез кузя.
Быд шаг понда кералöны нiя аслыныс туй, керöны западняэз, загоннэз, гусясьöны звирыс следдэз кузя, вашöтöны сiйö.
Разь эта не удж?
Удж и öддьöн опаснöй.
А кöр негррез пуовöй куштаннэзöн, ёся палкаэзöн гарйöны ыб, разь эта не сьöкыт удж?
Оз ков вунöтны эта дырни, што быд физическöй удж жар странаын унаöн сьöкытжык, чем миян умереннöйын.
Терпиттöм луншöрся жар вынтöмсьöтö мортсö.
Мучитöны чушкалöмöн не öтiк миллион насекомöй.
Нюрреза местаэзын мучитöны лёк лихорадкаэз.
Дугдывтöг пессьöны сёйöм понда да олöм понда жар поясiсь олiссез.
Умöля вооружитöмöсь нiя эта пессьöмын.
Нылöн уджалöм понда абуöсь медколана орудиеэз, абу бур оружие.
Нылöн абуöсь некытшöм знаннёэз.
Нылö сьöкыт пессьыны природакöт.
abu
Öддьöн сьöкыт лоис овны жар странаэзiсь отирлö медбöрья 50–70 годдэзö, кöр сэтчин локтiсö европееццез-капиталисттэз.
Англияись, Бельгияись да мöдiк государствоэзiсь капиталисттэз босьтiсö медбур муэз, хищническöя бырöтiсö (истребитiсö) уна ценнöй звиррезöс да быдмассэз.
Нiя силой тшöктöны жар странаэзiсь отирсö уджавны плантацияэз вылын, кöрттуйез строитöмын, шедтыны каучук, новйыны груззэз (рис. 96).
Не öтiк дас тысяча негррез кулiсö Африкаын кöрттуйез строитiкö, вöрын каучук шедтiкö, сьöкыт уджсянь асланыс угнетателлез вылö.
Уна селеннёэз, кöднаись отирыс эзö мунö уджавны, вöлiсö громитöмöсь да сотöмöсь.
Негритянскöй селеннё громитöм
(Путешественниклöн висьтасьöм)
Эта вöлi кынымкö год одзтi Африкаын, öтiк негритянскöй селеннёын.
Селеннёыс эта сулалiс Бельгия владеннёэзын.
Сiя куйлiс роскошнöй тропическöй вöр дорын.
Селеннё гöгöр вöлi кöдзöма африканскöй проса.
Öддьöн гырись пальмаэз да мöдiк тропическöй пуэз быдмисö сы гöгöр. Эна пуэс, кыдз змеяэзöн, вöлiсö каттьöмöсь лианаэзöн.
Ме мунi тропическöй вöрöт. Бура мыдзи и пыри шоччисьны пöрись гончар Убану хижинаö.
Старик быдса луннэзöн бергöтiс гончарнöй круг да керис простöй посуда.
Мирнöя олiс негритянскöй селеннё.
Вöррезын, кöдна быдмисö сы гöгöр, уна вöлiсö бананнэз да пальмаэз, уна быдкодь звиррез.
Юын уна вöлi чери.
Сёян тырмис быдса год кежö.
Мужиккез кыйисö чери да вöралiсö.
Женскöйез занимайтчисö сельскöй хозяйствоöн.
Челядь орсiсö, велöтчисö лыйсьыны луккезiсь, строитiсö учитик хижинаэз.
Павжун бöрын селеннёыс быдсöн онмöссьывлiс.
Сiдз вöлi и эта лунö.
Ме пукалi хижина порог вылын да куритi трубка.
Гöгöр вöлi лöнь.
Друг кытöнкö ылын пондiс кывны кавалерийскöй трубалöн шы.
Ме невольнöя кутчиси револьвер бердö, кöда пыр öшалiс менам йы вылын.
Пондiс кывны вöввезлöн гöнитöм.
Секунда бöртi ю ладорсянь мыччисис вöввезöн бельгийскöй военнöй отряд.
Сiя гöнитiс веськыта кöдзöм ыббез кузя.
Эшö секунда — и быдöс отрядыс уськöтчис селеннё вылö.
Солдаттэз перыта чеччисö вöввез вылiсь и уськöтчисö кыйны да кöртавны геззэзöн мужиккезöс да томыник зонкаэзöс.
Кöрталöммезлöн горöтлöм, инькаэзлöн да челядьлöн горзöм да ойзöм тыртiсö воздухсö.
Эг ешты ме и дзар керны, кыдз ме одзын куйлiс быдса керöс кöрталöм отирись.
Уна валяйтчисö вийöммез.
Быдöнныс, кин токо пондöтчылiс кутчисьны паныт, сэк жö вöлiсö вийöмöсь.
Нiйö, кöдна пондылiсö пышшыны, кыйисö арканнэзöн.
Пондiсö громитны беднöй хижинаэз.
Öтiк код солдат биа головняöн локтiс Убану хижина дынö и мöдiс сiйö öзтыны.
Ме лэбтi револьвер да лыйи сылö киас.
Головняыс усис.
Лыйöмсö кылiсö солдаттэз и перыта локтiсö миян дынö, но кöр казялiсö чочком мортöс, нiя мунiсö бöр.
Кык час гöгöр кыссис громитöм.
Но вот быдöс шумсö вевттьöмöн, трубач пондiс орсны отбой.
Кончитчис отирöс кыйöм.
Солдаттэс лэбтiсö кöрталöммесö коккез вылö, сувтöтiсö нiйö колоннаö, пуксисö вöввез вылö да быд ладорсянь гöгöртiсö колоннасö.
Эшö военнöй трубалöн сигнал — и кöрталöм негррезiсь колонна вöрзис.
Сiдз öктiсö рабочöйезöс строитны кöрттуй.
Заданнё.
Сетö ответ то кытшöм вопроссэз вылö:
1. Кытшöм народдэз олöны тропическöй поясын?
2. Мыйöн занимайтчöны тропическöй поясын олiссес?
3. Кыдз нылö овсьö?
Пустыняын
Адззö карта вылiсь Африкалiсь севернöй часть.
Западсянь восток вылö эстöн кыссьö мирын медыджыт пустыня — Сахара.
Не öтiк лун ни мунiс миян караван Сахара калитчöм песоккез кузя.
Гöгöр лэбисö песокись вылын мыссэз.
Позис думайтны, што мийö мунам конечтöм песока море кынмöм ваввез кузя.
Öтi-мöдiлаын пантасьлiсö чорыт да бытшкасяна туруннэз да кустарниккез.
Локтiс луншöр.
Шондi сотiс, кыдз биöн.
Гöгöр сулалiс шы не тöв.
Мийö сувтчимö шоччисьны и куйлiмö палаткаэзын, вöлi терпитны непозяна луншöрся жар.
Верблюддэз тожö шоччисисö.
Но вот калитчöм воздухын пондiс кывны кыдз бы сьылöм.
Ме петi палаткасис, медбы тöдны, кысянь локтöны эна шыэс.
«Этö сьылöны песоккез, — висьталiс проводник, — не бур одзын эта»
Ме вежöртi, што локтö песока буря — самум.
Песокись öддьöн ыджыт керöссэз, кöдна öнöдз сулалiсö вöрöтчытöг — ловзисö.
Йыввес нылöн пондiсö кыдз бы тшынасьны.
Этö лэбис тöв да пондiс пöльтны ны вылiсь песок.
Пустыняись песоккес пондiсö вöрны.
Пемыт пондiс каттьыны быдöс.
Нёбоыс бытьтö водiс му бердас.
Чожа быдса бус тшакыллез лэбтiсисö воздухö да сайöвтiсö шондiсö.
Тöв керсис сё вынажык.
Верблюддэз водiсö песок вылö да нюжöтiсö ассиныс юррезнысö.
Дзик шебрасьöмöн да пеллезнысö тупкалöмöн водiсö и отир.
Быд ладорсянь кылiс лэбзян песоккезлöн шум да горзöм.
Медбöрын быдöс сорласис да пондiс бергавны сплошнöй песока ураганын.
Бушуйтiс самум.
Сьöлöм бура стукöтiс.
Висис юр.
Öм да горш косьмисö, тырппез потласисö вирöдз.
Часся дыржык ни бушуйтiс песока буря.
Кажитчис, эшö час — и мийö пöдам песоксяняс.
Миян счассё вылö самум чожа мунiс ылöжык.
Вились оссисö голубöй нёбо да веж песока ылынаэз...
Караван вöрзис одзлань туйö.
Жагöна мунiс миян караван.
Кык лун ни эзö юö отир.
Вит лун мунiсö ютöг верблюддэз.
Öтiк верблюд совсем вынтöмсялiс, и сiйö ковсис кольны пустыняö.
Мöдiк вылiсь босьтiмö груз, мыля сiя öдва ни вешталiс коккесö.
Кöр мийö öштiмö ни вын, миян вожатöй казялiс ылiсь сьöд точка.
Чожа сiйö казялiмö и мийö, а недыр мыйись мийö пондiм адззыны голубöй нёбо вылiсь пальма йыввез.
Эта вöлi оазис.
Сiдз шусьöны пустыняын сэтшöм местаэз, кöднаын эм ва, а сiдзкö и быдмассэз.
Медбöрын, миян караван пырис пальма вуджöррез увтö, и мийö казялiм ва, кöда должен вöлi спаситны миянлiсь олан.
Ваыс шороккезöн котöртiс да больöтiс пуэз увтын.
Верблюддэз и отир уськöтчисö сы дынö и жаднöя юисö и юисö орöтчытöг.
Оазисын олiсö отир.
Миянöс панталiсö приветливöя.
Мужиккез кайлiсö пальмаэз вöснит стволлэз кузя да вылiсянь чапкалiсö миянлö воöм золотистöй финиккез.
Оазисын олiссез бережнöя видзöны дона валiсь быд вотьсö.
Нiя ключчез дынiсь канаваэз кузя лэдзöны васö пуэз дынö да кöдзöм ыббез вылö.
Мийö пöттöдз юим, öктiм васö кучиковöй мешöккезö, шоччисим да бöра мунiм ватöм пустыняö.
Отирыс сыспотека босьтö пустынясö ас кипод увтö.
Уна местаэзын пустыняас керöны колодеццез, гарйöны каналлэз, кöдна кузя лэдзöны васö керöс юэзiсь.
Сэтчин, кытöн пустыняын мыччисьö ва, быдмöны саддэз да ыббез.
Мукöд пустыняэз пырйöт лöсьöтöны ни туйез.
Медбöрья кадö керöма особöй автомобиль (гусеничнöй), кöда вермö мунны песоккез кузя.
Заданнёэз.
1. Адззö джыншаррез карта вылiсь пустыня Сахара.
2. Висьталö: кытшöм вид пустынялöн; кытшöм вид оазислöн.
Мыля пустынялöн да оазислöн природаыс не öткодь ?
Удж не уроккез коста.
Открыткаэзiсь газетнöй, журнальнöй да мöдiк картинкаэзiсь керö альбом: «Тропическöй поясын природа да олöм».
КÖДЗЫТ ПОЯССЭЗ
Кöдзыт пояссэзын природа
Му шар вылын Севернöй да Южнöй полюссэз гöгöр куйлöны мулöн кöдзыт пояссэз — севернöй да южнöй.
(адззö кöдзыт пояссэсö глобус вылiсь да джыншаррез карта вылiсь.
Мыччалö нiйö асланыт сёёвöй му шар моделлез вылын).
Шондi эстöн, кыдз тiйö тöдатö ни, некöр оз лэбтiсь вылына.
Нельки луншöрнас сiя овлö сы лажмыта, кыдз миянын пуксян дорын.
Югöррес сылöн усьöны косöя и öддьöн етша шонтöны.
Öкмыс-дас мисеч годнас эстöн сулалöны ыджыт мороззэз.
Севернöй Ледовитöй океан
Адззö глобус вылiсь да джыншаррез карта вылiсь Севернöй Ледовитöй океан.
Сiя куйлö Севернöй полюс гöгöр.
Севернöй полюс куйлö почти эта океан шöрын.
Тöвнас Севернöй Ледовитöй океан — йыа пустыня.
Не öтiк мисеч эстöн шондi совсем оз мыччась, сулалö ой.
Токо звездаэз, тöлiсь да кöр полярнöй сияннё вашöтöны пемытсö.
Друг мыччисясö нёбоас биа столббез да строитчасö рядö, либо паськыт югыт полоса нюжалас нёбоöттяс дугаöн, кыдз радуга.
Пондасö орсны сы гöгöр быдкодь рöма югöррез да югдöтасö лымья пустынясö лöз, зелёнöй, веж да гöрд биэзöн.
Но кусас полярнöй сияннё, и бöра лоас пемыт.
Мороз Севернöй Ледовитöй океан вылын овлö 50°-öдз.
Океан вевттьöма гырись йыа ыббезöн, кöдна уна километр кузяöсь да пасьтаöсь.
Эна йыа ыббес вöрöны, кайöны öтамöд вылö да горöн потласьöны.
Локтö гожум, и Севернöй Ледовитöй океан ловзьö.
Шондi не öтiк мисеч сьöрна совсем оз саясьлы.
Йы пондö сывны, йыа ыббез чегласьöны.
Йыэз вешшöны öтамöд дынiсь, пазалöны, бöра локтöны öтамöд дынö.
Но дженыт полярнöй гожумыс.
Озö ештö йыэс сывны, кыдз бöра кынмöны гырись йыовöй ыббезö, и океан бöра пöртчö йыа пустыняö.
Севернöй Ледовитöй океанын животнöйез
Быдса год почти Севернöй Ледовитöй океан вылын кöдзыт.
Но и эстöн эм олан.
Полярнöй шондi увтын сунасьö йыэз вылын тюлень стадо.
Вот йы керöсок сайын вöрзис мыйкö вежкодь — эта ош. Быдса семья — кык ыджыт ош да куим ош пиян — гусясьöны тюленнез дынö.
Ошшез жагöна кыссьöны, нiя нюжöтчöмась да жмитчöмась йы бердö.
Эз вермы терпитны öтiк ош пиян, веськöтчыштiс да чеччöвтiс нёльнан лапа вылас.
Горöтiс сторожевöй тюлень, и быдöс стадоыс сэк жö нырнитiс йы увтö.
Паськыт ва полоса тыдалö йыа ыб сайын.
Йы дынö уйö морж.
Эта ыджыт да вына животнöй, часто нельки ош кулö сы клыккезсянь.
Морж бöрын уйö иньпöв, сы спина вылын пукалö пиянок.
Нiя тожö уйöны шонтiсьышны шондi вылын.
Ылын мыччисис кинлöнкö öддьöн ыджыт юр.
Этö лэбтiсис ва вевдöрас лолалышны Севернöй Ледовитöй океанын медыджыт олiсь — кит.
Сiя кузянас овлö 30 метрöдз.
Быдöс эта морскöй населеннё питайтчö чериöн да быдкодь поснит животнöйезöн, кöдна öддьöн уна олöны Севернöй Ледовитöй океанын.
Чочком ош.
Олö йыэз да лым шöрын.
Сёйö тюленнезöс.
Чочком гöныс сайöвтö сiйö, керö нетöдчанаöн.
Бытшöма уялö, вына лапаэзнас да уялан перепонкаэзнас сынсьöмöн.
Шоныт сук гöныс да госыс дорйöны сiйö кöдзыт шогья.
Морж.
Унажык кадсö чулöтö ваын.
Сылöн черилöн кодь тушаыс, коккес да бöжыс удобнöйöсь уялöм понда.
Лолалö тыэзöн (лёгкоэзöн).
Сёйö поснит морскöй животнöйезöс.
Госыс дорйö сiйö кöдзыт шогья.
Кит.
Му вылын медыджыт животнöй.
Олö ваын, сёйö поснит морскöй животнöйезöс.
Лолалö тыэзöн.
Госыс дорйö сiйö кöдзыт шогья.
Заданнёэз.
1. Висьталö, кытшöм вид Севернöй Ледовитöй океанлöн тöвнас да гожумнас.
2. Эдö вунöтö, кытшöм животнöйез олöны Севернöй Ледовитöй океанын да велалö тöдны нiйö картинка вылiсь.
Кыдз отир олöны полярнöй странаэзын
Севернöй Ледовитöй океанын уна эмöсь островвез.
Быдса год куйлö ны вылын йы да лым.
Гожумнас öтi-мöдiлаын лым сылö; иззэз вылын мыччисьö нитш, поснитик басöк цветтэз, да ольсасьöны лажмытик кустарниккез.
Вот и быдöс быдмас пöлöсыс полярнöй островвезлöн.
Унажык островвес Америка береггез дынын.
Ны коласiсь мирын медыджыт остров — Гренландия.
(Адззö сiйö джыншаррез карта вылiсь).
Эна островвез вылын олöны эскимоссэз.
Сьöкыт нылöн олöмыс йы да лым коласын.
Быдöс олöмыс эскимоссэзлöн чулалö сёян кошшикö, и сё жö нiя часто олöны тшыгйöн: кыдзи умöля шедö чери, öшöны тюленнез да моржжез — тшыгсянь кулöм видзчисьö нiйö.
Тюленнез да моржжез сетöны эскимоссэзлö не токо сёян. Аслыныс паськöмнысö эскимоссэз керöны тюлень да морж кучиккезiсь.
Нельки пыжжез вурöны тюлень кучикись.
Сунис туйö видзöны жылаэз, а ем туйö — чери коскаэз.
Эскимоссэзлöн гожумся керкуэс тожö керöмöсь кучиккезiсь, а пыкöттэзöн ны понда часто служитöны кит коскаэз.
Тöвся керкуэз керöны иззэзiсь да ежаись, а вевдöрсяняс киськалöны ваöн, медбы вевттьыны йы слойöн.
Керöны керкуэсö и лымись.
Крышаö сувтöтöны йы тор, кöда-пыр шедö югытыс.
Медбы пырны сэтшöм оланiнö, колö кыссьыны векнит коридор кузя, кöда керöма лымас.
Путешественник Нансен аслас экспедиция дырни вовлiс Гренландияö эскимоссэз дынö.
Вот кыдз сiя гижö ны гожумся оланiн йылiсь:
«Мийö мышкыртчöмöн мунiм тюлень кучикись крыша увтöт, и казялiм асьнымöс жырйын, югдöтöмын кынымкö лампаöн, кöднаын сотчис тюлень гос; фитиллес вöлiсö керöмöсь нитшись.
Ме гöгöр вöлiсö уна куш отир, кöдна вылын вöлiсö токо йыэз.
Чужöммес эскимоссэзлöн свиттялiсö госсянь, нять вевттис нiйö кыз слойöн.
Миянöс пуксьöтiсö ящик вылö, кöда сулалiс палаткаö пыралан дынын, — эта лыддисис почотнöй местаöн гöссез понда.
Асьныс хозяиннэс пуксисö бöрись стена дынiсь кровать вылö, кöда вöлi вевттьöма тюлень кучиккезöн.
Эскимоссэс чулöтöны сы вылын быдöс каднысö.
Сы вылын нiя узьöны и сёйöны; эстöн жö уджалöны инькаэз, кöдна пукалöны ас увтаныс кöстöм коккезöн.
Лампаэз вылын, кöдна пыдын тарелка чужöмаöсь, эскимоссэз пуöны аслыныс сёян.
Лампаэс сотчöны лун и ой, мыля нылöн мöдiк лонтiсян абу.
Эскимоссэзлöн охота
Токо море вердö эскимоссэсö.
Но морскöй звир вылö охотаыс сьöкыт да опаснöй.
Эскимос Коовокно 20 километр мунiс йыэз кузя, кöдна куйлiсö öтамöд вылын.
Куим пон, кöдна вöлiсö доддялöмöсь нартаö (додьö), совсем вынтöмсялiсö.
Сэсся сiя локтiс волькыт йыа ыб дынöдз.
Эстöн йыас вöлiсö осьтаэз.
Эна осьтаэз дынö вовлiсö тюленнез лолавны воздухöн.
Коовокно босьтiс кöртовöй йыла копьё да осторожнöя пондiс кыссьыны осьта дынö.
Кöр кынöм вылас локтiс осьта дорыс дынöдз, сiя водiс гусьöн лолалöмöн да пондiс видзчисьны, кöр ваись петас тюлень.
Друг осьтасис пондiс кывны кышöтчöм, и ва вевдöрö мыччисис тюлень юр.
Коовокно макнитiс копьёнас да мöртiс сiйö животнöйыслö голяас.
Чожа звир дугдiс йы увтас вартчыны.
Копьё вöлi кöрталöма гез бердö, и эскимос кыскис тюленьсö йы вылö.
Сiя вундыштiс тюлень бердiсь яй тор да вердiс поннэзöс.
Сыбöрын сiя пуктiс тюленьсö нартаэз вылö да пондiс мунны добычанас семья дынö.
Шоччисьöм поннэз котöртiсö перыта.
Кайисö вылын йы пласт вылö.
Но сэтöн эскимос казялiс, што йы пластыс, кöда вылын сiя охотитчис, орöма берег бердiсь, и тöв нöбöтö сiйö океанö.
Беда!
Мый öнi керны?
Локтiс гибель.
Тöв лэбтiсис буражык и буражык, и сё ылöжык нöбöтiс йысö мореö...
Но Коовокнолö эз ло умöльыс нем.
Йысö сылiсь вайöтiс ылын пустыннöй остров дынö.
Куим год олiс сiя эта остров вылын совсем öтнас, питайтчис тюленнезöн да ошшезöн.
Сэсся, поннэс вылын сiя мунiс мöдiк остров вылö, кытiсь сiйö адззисö промышленниккез-звиркыйиссез.
Охота не пыр кончайтчö эскимоссэз понда благополучнöя.
Часто нiя öшöны мореын.
Заданнё.
Висьталö, кыдз олöны Гренландияын олiссез — эскимоссэз: кытшöмöсь нылöн оланiннэз, кытшöм паськöм, мый нiя сёйöны, мыйöн нiя занимайтчöны, мыйöн опаснöйöсь нылöн промысёллэз?
Севернöй полюс дынö
Важын ни путешественниккез, быдкодь странаэсö тöдмалiссез, пондылiсö шедны Севернöй полюс дынö.
Öтiккез уйисö корабллез вылын, мöдiккез мунлывлiсö поннэзöн, куимöттэз лэбзьывлiсö воздухöт.
Деньгаыс эна смев отирлöн эз вöвлы, и нiя нешоча ветлывлiсö туяс медколана снаряженнётöг.
Ны йылiсь некин эз заботитчы.
Уна ны коласiсь йы пласттэз коласын кулiсö тшыгьялöмсянь, кöдзытсянь да шогöттэзсянь.
Токо мукöдыс ны коласiсь вермисö вовлыны полюсöдззас, но некинлö эз удайтчы керны сэтчин научнöй иссследованнёэз.
Сiйö, мый эз вермö керны öтiкöн уджалiкö капиталистическöй странаэзiсь исследователлез, керисö öтласа вынöн коммунистическöй партия да советскöй правительство веськöтлöм увтын миян исследователлез.
Май мисечö 1937 годö нёль ыджыт советскöй самолёт, Советскöй Союз герой О. Ю. Шмидт юралöм сьöртi, лэбзисö (локтiсö) полюс дынö, пуксисö йы пласт вылö и колисö сэтчö научнöй приборрез, палаткаэз и быдöс, мый колö полярнöй тöвйöм понда.
И недыр мыйись сэтчин пондiс уджавны мирын медсевернöй полярнöй станция.
Севернöй полюс дынын, уялан йы пласт вылын олiсö социалистическöй родиналö преданнöй, отважнöй нёль морт: Папанин, Кренкель, Фёдоров, Ширшов.
Нiя керисö сэтчин ыджыт да важнöй удж: наблюдайтiсö погоддя, тöдмалiсö (изучайтiсö) йыэзлiсь уйöмсö, йыэз увтын морскöй валiсь теченнёсö, изучайтiсö киннэз олöны морскöй ваас.
Удж кончитöм бöрын героическöй четвёркасö ледокольнöй судноэз, кöднö специально эта понда иньдiс правительство Гренландскöй мореö, февраль 19 лунö 1938 годö босьтiсö йы вылiсь и вайöтiсö Ленинградö.
Недыр мыйись Москва радöн да торжествоöн панталiс Арктикаись геройезöс, кöдна доблестнöя тыртiсö правительстволiсь, партиялiсь да сы вождьлiсь ёрт Сталинлiсь заданнёсö.
Москва — Севернöй полюс — Америкалöн Соединённöй Штаттэз
Эз и чулав кык мисеч сiя кадсянь, кöр вöлi керöма Севернöй полюс дынын научнöй станция, кыдз быдсöн мирыс пондiс тöдны советскöй исследователлезлiсь полярнöй природа вылын виль победа йылiсь.
Советскöй Союз геройез лётчиккез Чкалов, Байдуков, Беляков, сёрöнжык Громов, Юмашев, Данилин пуксьывтöг лэбзисö мощнöй советскöй самолёттэзöн Москвасянь Севернöй полюс весьтöт Америка Соединённöй Штаттэзö.
Öддьöн ыджыт трудносттез нiя панталiсö лэбзиканыс.
Но нiя мужественнöя писькöтчисö буряэз-пыр да туманнэз-пыр, пессисö самолёттэз йысялöмкöт и честьöн тыртiсö заданнёсö, кöдö нылö сетiс ёрт Сталин.
Советскöй Союзiсь Америка Соединённöй Штаттэзö меддженыт туйыс öнi осьтöм!
Севернöй Ледовитöй океан мореэзын ледокол
Сьöкыт мунны полярнöй йыэзöт нельки ыджыт да вына пароходдэзлö.
Опасность видзчисьö нiйö быд минутаö.
Токо особöя лöсьöтöм пароходдэз — ледоколлэз — вермöны керны йыа ыббезын аслыныс туй.
Öддьöн вына ледоколлэз эмöсь миян, Советскöй Союзын.
Нiя уялöны Севернöй Ледовитöй океан мореэзын Союзыс севернöй береггез дынöт.
То кыдз вермасьö йыэзкöт миян краснознамённöй ледокол «Красин».
________
«Красин» пырис йыэзö.
Гöгöр ыджыт, лымöн вевттьöм йыа ыб, кöда быд ладорö вундалöм векнит да чуклясяна ва каналлэзöн.
Йыэс ветлöны шумöн да гымалöмöн и кайöны öтамöд вылö.
«Красин» чинтö перытасö да пондöтö удж.
Öддьöн ыджыт ледокол аслас быд сьöкытаöн кайö йыа ыб вылö, сiя личкö сiйö да поткöтлö йыа массасö.
Йыэс потласьöны да вешшöны судно ныр одзын.
______
Ледоколлэз керисö Севернöй Ледовитöй океан мореэз кузя туй.
Нiя нуöтöны ас сьöраныс судноэз быдса караваннэзöн.
Мый эм Южнöй полюс дынын
Адззö карта вылiсь Южнöй полюс.
Южнöй полюс дынын куйлö ыджыт му Антарктида, кöда вылын отир озö олö совсем: муыс быдса год вевттьöма лымöн да йыöн.
Южнöй полюс дынö
Öддьöн ыджыт трудносттез колiс вермыны Антарктида исследователлезлö.
Не öтпырись нiя пондылiсö шедны Антарктидаö пыдöжык.
Но токо знаменитöй норвежскöй путешественник Амундсен аслас ёрттэзкöт вермис шедны Южнöй полюс вылö.
Вöлi тöв.
Сулалiсö нёльдас градуса мороззэз.
Март конецсянь августöдз дугдывтöг нёль мисеч кыссис ой.
Путешественниккез тöвйисö пуись строитöм хижинаын, кöдö вайисö пароход вылын и кöда вартöма тюлень кучиккезöн.
Гöгöр паськалiс öддьöн ыджыт лымья пустыня.
Вöлi лöнь, кылiс токо пургалöн уннялöм.
Октябрь шöрын локтiс гожум.
Но и гожумнас Антарктида, эз чапкы йы вевтöссö.
Гожум висьталiссезöн локтiсö пингвиннэз.
Пустыннöй берег вылын пондiс кывны нылöн горöтлöм.
Пингвиннэз локтiсö севернöй ладорись шонытжык островвез вылiсь да кузь лёдззезöн мунiсö нiя местаэзö, кытöн велалiсö керны поззэз.
Нiя некöр эзö адззывлö отирöс и повтöг сибöтчисö путешественниккез дынö.
Кыдз токо нёбоын мыччисис шондi, Амундсен вöрзис туйö.
Мунны вöлi öддьöн сьöкыт.
Пурга вайöтiс гырись столаэз.
Отир и поннэз вöйисö лым пытшкö пидзöсöдзся пыдынжыка.
Лым увтас сайöвтчисö öддьöн ыджыт потöминнэз.
Коккез, киэз да чужöм кынмисö.
Поннэз öдва кыскисö доддез, кöднаын куйлiс сёян, палатка да пасёвöй узян мешöккез.
Медшондiа луннэзö вöлi мороз 25°.
Кынымкö лун бöрын туй вылас пондiсö пантасьны керöссэз, кöдна кыссисö гырись йыа гряддэзöн.
Поннэз и отир часто вöйлiсö йы потöминнэзö и öдва ныись петлiсö.
Вынтöмсялöм да кынмалöм отир жагöна мунiсö полюс дынö.
38 лун бöртi Амундсен локтiс полюс дынö.
Эта места вылö сiя сувтöтiс палатка да сы бердö кöрталiс норвежскöй флаг.
Токо сысянь, што Амундсен вöлi опытнöй да экспедиция вöлi бытшöма организуйтöма, сiя кончитчис удачнöя.
Быдöнныс благополучнöя бертiсö гортаныс.
Не сiя вöлi англичанин Скотт экспедициякöт.
Нiя локтiсö полюс дынö Амундсен бöрсянь, и бöр мунiкö Скотт да сылöн ёрттэс кынмисö.
Заданнёэз.
1. Висьталö, кыдз путешественниккез локтiсö Севернöй да Южнöй полюссэз дынöдз.
2. Тöдмалö, кытшöм полюс гöгöр куйлö му, кытшöм полюс гöгöр — океан.
3. Висьталö, кытшöм кад годлöн Южнöй полюс дынын, кöр Севернöй полюс дынын гожум.
Тундра
Севернöй Ледовитöй океан береггез кузя паськалöмась гырись да вöртöм пространствоэз — тундраэз.
Гожумнас тундраын муыс сылö токо вевдöрсяняс;
50 сантиметрся пыдынжыка куйлö «вечно кын» слой.
Пуэз тундраын быдмыны озö вермö, а быдмö токо лажмытик карликовöй поснит листа кыдзок, ягоднöй кустарниккез: пуягöд, морошка, голубика да туримоль.
Главнöй быдмас эстöн — нитш да лишайник «ягель», нiя мусö вевттьöны омöн.
Ва оз йидж кын му-пыр, сысянь тундраын гожумнас öддьöн уна тыэз да нюррез.
Европейскöй тундраын да азиатскöй тундра западнöй частьын олöны ненеццез.
Кыдз олöны ненеццез.
Тундраын тöвнас.
Ненец Окатетталöн семьяыс тöвйис тундра юг вылын, вöррез дынын.
Эстöн кöррез копытаэзöн гарйисö лым да адззылiсö нитш, лишайник да томыник кустарниккез.
Кöр лишайниксö кöррез сёйисö быдöс, ненеццез тэчлiсö ассиныс имуществонысö нартаэз вылö да вуджлiсö мöдiк местаэзö.
Гöгöр паськалiс конечтöм лымья равнина.
Йыöн вевттисисö юэз да тыэз.
Петiс Окатетта аслас шалашись — чумись — видзöтны, кытöн кöррез.
Мунiс чум дынiсь кынымкö шаг.
Вына тöв пöрöтö кок вылiсь, тыртö синнэз.
Маласьöмöн локтiс Окатетта чум дынö, сiдз эз и тöд, мый керöны сылöн кöррез.
Чумын сiя дыр чышкис синнэсö пасёвöй йöрнöсöн да бобгис:
«Мый эм ме чумын?
Кык котёл, куим пöв да пишаль.
Эшö чай юны кык чашка.
Эшö павжнайтны эм бекöр.
Вот и быдöс.
Кöррез колисö токо 20.
Уна сёйисö кöиннэз.
Колхозын олöны буржыка.
Колö мунны колхозö!»
Тулысöн.
Но вот локтiс тулыс.
Пондiсö котöртны шороккез.
Окатетта пондiс лöсьöтчыны туйö.
Иньыслö тшöктiс öктыны чум. И доддез, кöднаö вöлiсö доддялöмöсь куим кöрöн öтамöд бöрын, вöрзисö соседнöй колхозö.
Ордчöн котöртiсö поннэз.
Лым сылiс.
Гöгöр котöртiсö шороккез.
Сылiсö нюррез.
Лэбзисö дзодзоггез, юссез, уткаэз, черигадяэз.
Кайез кылiсö тулыс и тэрмасисö роднöй местаэзö керны поззэз, кольттявны да пöжны пияннэз.
Окатетта колхозкöт пондiс мунны северланьö — океан дынö.
Сэтчин абуöсь номмез, кöдна озö сетö спокой не мортлö, не кöрлö.
Гожумöн.
Быд лунö шондi сё дыржык и дыржык сулалiс нёбоас.
Ой туйö кыссис сплошнöй югыт заря.
Локтiс, медбöрын, и полярнöй лун.
Шондi совсем эз саясьлы.
Тундраын цветитiсö быд рöма цветтэз.
Быдлаын, кытчö он видзöт, учöт и ыджыт тыэз свиттялöны шондiсянь.
Койкаэз кузя, кыдз чочком звездаэз, свиттялöны морошкалöн цветтэз, ва дорын тшöка лöзöтöны незабудкаэз.
Öддьöн уна басöк рöма цветтэз паськалiсö тундраын.
Гажöна мунö Окатетта, гажöна видзöтöны асланыс доддез вылiсь челядёк.
Гажöна котöртöны кöррез; нiя тэрмасьöны бур поскотинаэз вылö океан береггез дынö.
Сэтчин абуöсь надоедливöй номмез, кöдна кымöррезöн ветлöны юррез вевдöрын и озö сетö сулавны местаын.
Сувтчанiннэзын инькаэз сувтöтлöны чуммез да шöрас тэчöны би.
Токо тшын пытшкын кöстер дынас позьö шоччисьны номмез шогья.
Мöртасö 20 потш, кöрталасö вевдöрись конеццесö гезöн, а вевдöрсянь вевттясö потшшесö кöр кучиккезöн.
Вот чум и готов.
Му вылö ольсаласö симöтовöй цыновкаэз да вевттясö нiйö кучиккезöн — сэтöн ольпась и пызан.
Дыр мунiсö колхозниккез-ненеццез.
Часто сувтчылiсö.
Шоччисясö, сёйыштасö кöррез — да бöра туйö.
Кöр — ненеццезлöн главнöй богатство (рис. 110).
Кöррезкöт кöртасьöма нылöн быдöс олан.
Кöр сетö ненецлö быдöс.
Кöр кучик шонтö сiйö и тöв и гожум.
Сы шоныт кучикись ненец керö аслыс ольпась.
Кöр кучиккезöн сiя вевттьö ассис чум.
Кучикись вурö аслыс кöмкöт.
Шапкаэз, кеписсез, сумкаэз — быдлаö мунö кöр кучик.
Сэсся, сереброöн пондiс свиттявны океан вевдöр.
Сувтöтiсö чуммез.
Пастуххезкöт да поннэзкöт лэдзисö кöрресö поскотина вылö, а асьныс быдсöн колхозöн пондiсö кыйны чери.
Некöр одзжык Окатетталöн эз вöв черисянь доход.
Черисö колхоз быдса керöссэз сетiс кооперативлö, да эшö быд колхозник бур запас колис аслыс.
Арöн.
Перыта мелькнитiс дженыт полярнöй гожум.
Август мисечö шондi пондiс пуксьывлыны.
Сентябрь мисечö локтiсö öтлаын кöдзыткöт настоящöй ойез.
Быдöс тэрмасис мунны сэтчин, кытöн шоныт.
Лэбзисö кайез.
Öшисö насекомöйез.
Дзебсисисö лым увтö полярнöй шыррез-пеструшкаэз.
Бура вежсис Окатетталöн оланыс.
Кöррес сылöн общöй табунын, и нiя не кыкдас ни, а кыкдас вит.
Оз пов Окатетта, што нiйö кöин джагöтас, што нiя куласö шогöтсянь.
Неылын кöррез понда врачебнöй пункт.
Севернöй природаыс суровöй.
Сiя пыр грöзитö морт олöмлö.
Сьöкыт вöлi сэтчин оланыс мортлöн. Сiя вöлi чапкöма и некин сы йылiсь эз заботитчы.
Защитатöм мортыс природаыслiсь полiс.
Сiя веритiс, што сыын олöны лöг духхез, кöдна вермöны керны мортлö умöль.
Эта вераöн пользуйтчисö колдуннэз — шаманнэз, кöдна быднёдж бöбöтлiсö уджалiсь отирсö.
Советскöй власть локтöм бöрын миян Союзiсь севернöй народдэзлöн олöмыс перыта пондiс вежсьыны.
Советскöй власть заботитчö ылiсь Северись отир йылiсь, сiя отсалö нылö пессьыны природакöт.
Советскöй Северын строитсьöны рудниккез и заводдэз, быдмöны совхоззэз да колхоззэз, общежитиеэза школаэз.
Советскöй Северись уджалiсь отирлöн оланныс лоис зажиточнöй да культурнöй.
Заданнёэз.
1. Мыччалö карта вылiсь, кытöн куйлö тундра.
2. Мыччалö карта вылiсь, кытöн олöны ненеццез.
3. Висьталö, кытшöм природа тундраын.
4. Висьталö, кыдз олöны ненеццез: кытшöмöсь нылöн оланiннэз? кытшöм паськöм? мый нiя сёйöны?
5. Мыйöн занимайтчöны тундраись народдэз?
Мыйын нылöн главнöй богатство?
Мый вылын нiя ветлöны?
6. Кыдз олiсö севернöй народдэз одзжык?
7. Мый керö севернöй народдэз понда советскöй власть?
Удж не уроккез коста.
Керö альбом сэтшöм тема вылö: «Природа да олöм кöдзыт пояссэзын олiссезлöн».
УМЕРЕННÖЙ ПОЯССЭЗ
Умереннöй пояссэзын природа
Му шарлöн умереннöй пояссэз кык паськыт полосаöн кыссьöны жар да кöдзыт пояссэз коласын.
(Адззö глобус вылiсь да джыншаррез карта вылiсь севернöй да южнöй умереннöй пояссэз).
Умереннöй пояссэзын абу сiя вынтöмсьöтан жарыс, кыдз жар поясын, не сiя кынтан кöдзытыс, кыдз кöдзыт поясын.
Умереннöй пояссэзын овлöны годлöн нёль кад. Этöн нiя не öткодьöсь жар да кöдзыт пояссэзкöт.
Но не быдлаын умереннöй пояссэзас öтiк кадö öтмоз шоныт либо кöдзыт.
Кыным ылынжык кöдзыт пояс дынсянь да матынжык жар пояс дынö, сыным климат лоö небытжык, сыным дженытжык да шонытжык лоö тöв, сыным кузьжык да жаржык лоö гожум.
Мийö олам севернöй умереннöй поясын.
Полярнöй круг дынсянь тропик дынö самолётöн
Мича кöдзыт мартовскöй лунö Севернöй Америка полярнöй береггез вылiсь лэбтiсьö самолёт да лэбзьö юг вылö.
Куим час бöртi тундра кольччö ылö бöрö.
Самолёт лэбзьö сук да лымöн киськалöм щетина чужöма вöррез вевдöрöт.
Вековöй вöррез конецтöг кыссьöны быд ладорö.
Мукöд местаэзын нiя орöны гырись чочком пятноэзöн — тыэзöн.
Быд ладорö тыэс дынсянь чуклясьöны юэз (рис. 111).
Мукöд коста мелькайтöны индееццезлöн-вöралiссезлöн ёся йыла хижинаэз.
Шочыника ты дынын либо ю дынын тыдалöны вöр кераланiннэз, а неылын ны дынсянь — селеннёэз.
Даскык час ни лэбзис самолёт.
Почти пыр эта кадö тысяча километр ылына лётчиккез адззисö вöррез.
Но вот местность пондiс вежсьыны.
Локтiсö вöртöм пространствоэз.
Нiя мелькайтöны сё тшöкжыка и тшöкжыка, а вöр öшö син одзись.
Вот сiя эз ни ло совсем.
Лётчиккез син одзын куш лымья равнина.
Невна ылынжык лымыс куйлö не сплош ни, а пятноэзöн.
Эшö ылынжык лым абу ни.
Самолёт лэбзьö туруновöй море вевдöрöт.
Эта степпез.
Ветлöтö гырись табуннэзöн сюра пода.
Мелькайтöны фермеррезлöн оланiннэз.
Самолёт увтын перыта мунöны бöрлань городдэз.
Городдэз дынсянь кыссьöны кöрттуй линияэз (рис. 112).
Самолёт лэбзьö сё ылöжык и ылöжык.
Етшажык и етшажык лоöны поскотинаэз, унажык ыббез.
Вот, медбöрын, степыс почти быдöс гöрöма да вежöтö быдмассэзöн.
Самолёт увтын уйöны öддьöн гырись ыббез.
Сё частожык мелькайтöны городдэз да селеннёэз.
Быд ладорö кыссьöны кöрттуй линияэз, и ны кузя перыта котöртöны поезддэз.
Тысяча километрся унажык лэбзяс самолёт степпез вевдöрöт.
Но вот виль картинаэз паськалöны лётчиккез син одзын.
Перыта мунöны вöроккез, а сыбöрын быдса вöррез, кöдна совсем оз вачкисьö нiя вöррез вылö, кöдна вевдöрöт самолёт лэбзис одзжык.
Нiя быдöс листаöсь.
Вöррез да вöроккез коласын куйлöны паськыт пространствоэз, кöдна кыдз бы немöн абу займитöмöсь, уна местаэзын ны вылын сулалö тулысся ва.
Кöр тулысся ва котöртас, ны вылö кöдзасö хлопок.
Вöррез да вöроккез пасьтасясö тулысся зелёнöй паськöмö.
А эшö ылынжык, вöрыс вевттисьöма сук да пемыткодь, листтэзöн, кöть и сулалö вöлись одз тулысся кад.
Самолёт локтiс умереннöй пояс шоныт частьö.
Эстöн мороззэз почти озö овлö, и уна пуэз тöв кежö листтэзнысö озö чапкылö, быдса год сулалöны зелёнöйöсь.
Этасянь нiйö шуöны вечнозелёнöйезöн.
Важмоз мелькайтöны фермеррезлöн оланiннэз.
Сiдз жö, кыдз и одзжык, самолёт часто лэбзьö городдэз вевдöрöт.
Эшö унажык лоисö кöрттуйез.
Сё öддьöнжык и öддьöнжык чувствуйтчö, што матын тропическöй пояс.
Быдмассэз лоöны басöкжыкöсь.
Городдэзын и селеннёэзын мелькайтöны пальмаэз, а мукöд пора нельки быдса аллеяэз пальмаэзiсь да мöдiк тропическöй быдмассэзiсь.
Ылын мыччисис лöз волькыт море.
Чожа туйлöн конец.
Умереннöй пояссэзлöн быдмас пöлöсыс не быдлаын öткодь.
Севернöй умереннöй пояс кöдзыт частьын омöн Европаöт, Азияöт да Америкаöт паськыт полосаöн кыссьöны вöррез.
Югланьынжык, вöррез полоса бöрын, куйлöны öддьöн ыджыт вöртöм пространствоэз, кöдна вылын быдмö турун.
Нiя — степпез.
Севернöй умереннöй пояс медъюжнöй шоныт частьын, кытöн почти озö овлö мороззэз, быдмöны вечнозелёнöй быдмассэз.
Эна быдмассэс жар поясiсь быдмассэз чужöмаöсь.
Южнöй джыншар умереннöй поясын сiдз жö быдкодь чужöмаöсь быдмассэз.
Сэтчин сiдз жö эмöсь вöррез, степпез да вечнозелёнöй быдмассэз.
Заданнёэз.
1. Видзöтö быдмас карта вылiсь, кытöн севернöй умереннöй поясын куйлöны вöррез, степпез, кытöн быдмöны вечнозелёнöй быдмассэз.
2. Адззö СССР карта сьöртi да быдмас карта сьöртi, кытшöм быдмаса полосаын тiйö олатö.
3. Тöдсасьö экскурсия вылын тiян гöгöрись быдмассэзкöт.
Öктö да косьтö нiйö быдмассэсö, кöдна унажыкöсь тiян местностьын.
4. Уськöтö тöдвыланыт, кыдз год каддэз сьöртi вежсьö тiян местностьын погоддя.
Тайгаын
Не öтiк тысяча километр ылына кыссьö дремучöй тайга.
Токо шочыника сiйö орöтöны тыэз да юэз.
Сплошнöй стенаöн сулалöны вековöй кöззэз, ньыввез, кедраэз, лиственницаэз.
Вöр юоккез береггез кузя быдмöны бадь, ловпу да калина.
Шочыника пантасьöны чочком кыдззез.
Быдлаö валитöм валёжник да бурелом.
Кыным ылöжык вöрас, сыным сукжык лоö чашьяыс.
Чочком паськöмö пасьтасис тайга.
Тырисö туёккез, лöнисö шоррез.
Вöр доррезöт быд ладорö котöртiсö поснит да узöра следдэз:
мыччисис чашьяись гажа хорёк, пуксьыштiс, видзöтыштiс гöгöр да бöра чашьяö уськöтчис.
Чеччалöмöн петыштiс кöч и давай чеччавны да дзугны ассис следсö.
Свиттьöвтiс собольлöн сьöд бархатнöй спинка.
Дзебсисисö быдöнныс, и петiс неперыта осторожнöя мунöмöн гöрд руч.
Нюкайтыштiс следдэз и пондiс котöртны.
А вот глухöй чашьяись петö сёйны лоссезлöн семья.
Сюра пöрись лось — вожак — мунö одзас.
Сiя тöдö быдöс опаснöй местаэз, кытöн вермас дзебсисьны сылöн медстрашнöй враг — рысь.
Сiя ылiсянь кылö вöралiсьöс.
Лось нуöтö семьясö осторожнöя, пыр видзöтлö гöгöр, нюкайтö, кывзiсьö.
Осторожнöя мунö тайга кузя и вöралiсь.
Котöртö сыкöт сылöн вернöй отсалiсь — пон.
Бура видзöтö следдэз вöралiсь.
Кыдз книгаись, лыддьöтö сiя лым вылiсь, кытчö кытшöм звир мунiс.
Гусьöна мунö вöралiсь, кывзö быд кышöтöмсö...
Кылöны сiйö звиррез, дзебсисьöны...
Но пöрись да опытнöй вöралiсь звиррезся хитрöйжык.
Велöтiс вöралiсь и понöс кошшыны звирсö.
Сувтчышлöмöн пондас вувтны пон.
Вöралiсь — сы дынö, казялас урöс либо собольöс, лэбтыштас пишаль, лыяс — и вот звирыс лыйöм ни куйлö лым вылын.
Локтiс тулыс.
Керöсоккез вылiсь да вöр доррез вылiсь лым сылiс.
Оссисö юэз да шоррез, вöтисö лажмытiннэз, сылiсö тайгаись гырись нюррез.
Локтiсö кайез да пондiсö сьывны ассиныс тулысся сьыланкыввез.
Быдлаын, кытчö токо сидзис шондi, пондiс вежöтны турун.
Пондiсö цветитны тайга доррес кузя да крут керöссэз кузя веж, голубöй да чочком цветтэз.
Локтiс гожум.
Шогмисö звир пияннэз.
Гажа лоис тайгаын.
Но сьöкыт мунны мортлö гожумнас тайга кузя.
Уна местаын куйлöны не öтiк километр пасьта нюррез.
Сiсь мыррез да пöрöм пуэз поперегалöны туй.
Заданнёэз.
1. Видзöтö карта вылiсь, кытöн куйлö тайга.
2. Уськöтö тöдвыланыт, кытшöм животнöйез да быдмассэз частожык пантасьöны тайгаын.
Велалö тöдны нiйö картинка вылiсь.
Степын
Ме вöлi степын тулысöн.
Гажа тулысся шондi шонтiс сылöм лымсянь ва мусö.
Степын быдмис свежöй да зелёнöй турун, цветитiсö быдрöма цветтэз.
Шутнялiсö сусликкез.
Котрасисö турун пытшкын ыб шыррез.
Часто чеччавлiсö нiя чуть не самöй кок увтiсь.
Жужгисö, дзинöтiсö да сильöтiсö насекомöйез.
Сьылiсö кайез.
Вылiсянь киссис ыбшаррезлöн горöна сьылöм.
Степь вевдöрын лэбалiс орёл, видзöтiс добыча.
Адззылi ме степсö жар гожумöн.
Сотчис да бурöйсялiс сiя.
Не веж турун, не быд рöма цвет абуöсь.
Важын ни эз вöв зэрыс воть, и бус вевттис му бердö водöм кöс турунсö.
Лöнь да пустыннöй сiя вöлi гожумся жар лунö.
Ловзьылiс сiя токо одз асывнас.
Хлопотливöя котрасисö ыб шыррез да сусликкез — нiя öктiсö аслыныс запассэз тöв кежö.
Лэбзьышлiсö быд ладорö перепёлкаэз да мöдiк степнöй кайез.
Важмоз нёбоын вылына лэбалiс орёл.
Адззылi ме степсö и тöлöн.
Чочком лымовöй шебрасöн вöлi вевттьöм сiя.
Лэбзисö кайез, дзебсисисö асланыс нораэзö ыб шыррез да сусликкез.
Дзебсисисö насекомöйез.
Лымовöй одеяло увтын куйлiсö степнöй туруннэзлöн клубеннез, луковицаэз да кöдзыссэз.
Мукöд кадö пöльтiсö вына тöввез да уннялiсö лымья пургаэз.
Пустыннöй вöлi степь.
Токо ровнöй лымовöй вевтöс вылын следдэз баитiсö сы йылiсь, што ойнас эстöн ветлöтiсö кöиннэз да котрасисö кöччэз.
Мортöн сэтшöм вöрзьöттöмöн колис степыс токо сэтöн, кытöн öддьöн кöс.
Севернöй умереннöй поясiсь степпеслöн ыджытжык частьыс öнi пöртчис гöрöм ыббезö.
Ыббез коласын
Мийö мунiм кöрттуй кузя.
Асывсянь вагон öшынсянь тыдалiсö степпез.
Гöгöр эз вöв öтiк пуок.
Туйыс кыкнан бокöт котöртiсö ыббез.
Гыасис шогдiовöй конечтöм золотистöй море.
Сотчисö шондi вылын подсолнух ыббез.
Мелькайтiсö арбуззэзöн кöдзöм баштаннэз.
Дзимлялiсö сю.
Ветлiсö ряддэзöн вундан машинаэз, кöдна колисö ас бöраныс вундöм сюсö.
Мукöд местаэзын сулалiсö гырись шороммез да уджалiсö вартан машинаэз.
Ылын мелькайтiсö посаддэз да лэбтiсисö элеваторрез.
Быд ладорсянь элеваторрес дынö кыссисö ровнöй да веськыт туйез, кöдна кузя мунiсö виль урожайöн подводаэз да грузовиккез.
Матын вöлi ни рыт, а картина сё сiя жö — гöгöр вöлi сё ыббез, ыббез, ыббез...
Заданнёэз.
1. Адззö карта вылiсь, кытöн куйлöны степпез.
2. Висьталö, кыдз год каддэз сьöртi вежсьö степлöн вид.
3. Висьталö, кыдз отирыс вежисö степпесö.
Умереннöй пояс шоныт частьын.
Испанияын
Адззö карта вылын Испания.
Испаниялöн восточнöй береггес миськассьöны Средиземнöй мореöн.
Сэтчин некöр оз овлы кöдзыт тöлыс.
Январь мисечö сэтчин сэтшöм шоныт, кыдз Москваын май мисечö.
Токо ылын берегыс дынсянь керöссэз вылын куйлö лым.
Испанияын пуэз коласiсь унажыкыс быдсöн годнас пыр зелёнöйöсь.
Быдлаын быдмöны оливковöй тальниккез.
Правильнöй ряддэзöн садитöмöсь каштаннэз да шелковицаэз.
Ны коласын, öтiк ув вылiсь мöдiк ув вылö вуджöмöн, каттисьöны винограднöй роззэз.
Фруктовöй саддэзын уна апельсиновöй да лимоннöй пуэз.
Нылöн золотистöй да веж плоддэс пемыт-зелёнöй листтэз коласын, кыдз биоккез, югьялöны шондi вылын.
Ыббез вылын испанеццез вöдитöны шогдi, кукуруза, рис.
Карчйöррезiсь босьтöны карч урожайсö годнас куимись.
Удж не уроккез коста.
Керö альбом сэтшöм тема вылö: «Умереннöй пояссэзын природа да населеннёлöн олан».
Севернöй умереннöй поясын главнöйжык государствоэз
Му шар вылын олiсь отир коласiсь унажыкыс олöны Севернöй умереннöй поясын.
Сыын куйлö почти быдсöн Советскöй Социалистическöй Республикаэзлöн Союз (СССР).
Умереннöй поясын куйлöны сiдз жö мирын медыджыт капиталистическöй странаэз: Америкалöн Соединённöй Штаттэз, Англия, Франция, Германия, Италия, Япония.
Сыын куйлö ыджыт да öддьöн тшöк населеннёа страна — Китай, кöда пессьö японскöй захватчиккезкöт.
(Адззö карта вылiсь быдöс энö висьталöм странаэсö.)
Кыдз используйтсьöны севернöй умереннöй поясын природнöй богатствоэз
Öддьöн важся кадсянь севернöй умереннöй поясiсь уна населеннёыс пользуйтчö сы природнöй богатствоэзöн.
Отир гöрöны му, кералöны вöр, вöралöны звиррез да кайез вылö, судзöтöны полезнöй ископаемöйез.
Севернöй умереннöй поясын природаыс, бура вежöма.
Кералöм вöррез да первобытнöй степпез местаö быдмисö öддьöн ыджыт городдэз да селеннёэз, не öтiк тысяча фабрикаэз да заводдэз, паськалiсö ыббез, саддэз, парккез, быдладорö нюжалiсö кöрттуйез.
Но не уджалiссез киын капиталистическöй странаэзас природалöн вын да богатство.
Буржык му, полезнöй ископаемöйез, фабрикаэз да заводдэз — капиталисттэз киын, и нiя уджавтöг наживайтöны лыддьытöм богатствоэз.
Миллионнэз рабочöйес асланыс уджöн сетöны энö богатствоэсö.
Асланыс жö нылöн нем абу, удж понда вештöмся, кöда öдва-öдва тырмö олöм понда.
СССР-ын совсем не сiдз.
Советскöй Социалистическöй Республикаэзлöн Союз — мирын единственнöй страна, кытöн Ленин — Сталин коммунистическöй партия веськöтлöм увтын капиталистическöй строй уничтожитöм.
СССР-ын быдöс богатствоэз уджалiсь отир киын.
Миян странаын некин оз наживайтчы мöдiк морт труд вылын.
Советскöй Союзiсь граждана активнöя участвуйтöны коммунистическöй общество строитöмын, кöда мунö быдсöн страна пасьта.
Быд годö уджалiсь отирлöн оланыс лоö зажиточнöйжык.
Гырись капиталистическöй государствоэзiсь правительствоэз старайтчöны мырддьыны чужöй муэз.
Нiя лэбтöны (чулöтöны) уна вир кисьтан войнаэз, медбы подчинитны аслыныс мöдiк народдэз да мырддьыны нылiсь богатствоэз.
СССР — мирын медвына, медмогучöй страна.
Но советскöй правительство оз старайтчы мырддьыны чужöй муэз и неизменнöя нуöтö мир политика.
Быдöс народдэз, кöдна олöны СССР-ын, быдсöн равноправнöйöсь и коммунистическöй стройкаын сетöны öтамöдлö братскöй отсöт.
СССР-ын властьыс Советтэз киын, кöднö бöрйöны быдöс граждана, кöдналö тырис 18 год.
Советскöй Союзiсь уджалiсь отирлöн праваэз, а сiдз жö и обязанносттез висьталöмöсь (гижöмöсь) Сталинскöй Конституцияын — миян социалистическöй родиналöн основнöй законын.
ПРИЛОЖЕННЁ
Джыншаррез картасö паметьын крепитöм понда уджжез
1. Вундалö бумагаись свет часттез.
Керö этö то кыдз: пуктö шуч тыдалана бумага лист джыншаррез карта вылö да рисуйтö сы вылö рисуйтöм свет часттесö.
Вундалö быдсö ны коласiсь торйöн.
Тэчö вундалöм свет часттесö рöма бумага вылö, новйöтö нiйö карандашöн да вундалö.
Лöсьöтö сiдз быд частьсö кыкöн.
Кыдз рöма бумагаыс абу, то вундалöм свет часттесö позьö краситны рöма карандашöн нето краскаöн.
2. Тэчö вундалöм свет часттесö ны ыжда сьöртi, клейитö нiйö бумага лист вылö нето тетрадьö.
Гижö ны увтö ниммез.
3. Керö джыншаррез карталiсь апликация.
а) Чертитö ордчöн кык окружность.
Керö эта понда бумагаись линейка.
Öтiк конецсö сылiсь мöртö веськыта сулалан булавкаöн бумага лист шöрö.
Керö линейкаас 73 мм ылына булавкаыс дынсянь осьта, сюйыштö осьтаас карандаш йыв да нуöтö булавкаыс гöгöр окружностьсö.
б) Öтiк окружность вевдöрас гижö «Восточнöй джыншар», мöд вевдöрас — «Западнöй джыншар».
в) Быд окружность пытшкö клейитö свет часттез.
Тэчö нiйö сiдз, кыдз этö керöма джыншаррез карта вылын учебникас.
г) Гижö ниммез быд свет частьлiсь да океаннэзлiсь.
Му шар вылын главнöйжык государствоэзлiсь положеннёсö паметьын крепитöм понда уджжез
4. Вундалö бумагаись то кытшöм государствоэз: СССР, США, Англия, Франция, Германия, Япония да Италия.
Керö этö сiдз жö, кыдз керит одзза уджын.
Образец понда пользуйтчö 124 листбок вылiсь чертёжжезöн.
Краситö энö государствоэсö разнöй рöмöн.
5. Тэчö вундалöм государствоэсö ны ыжда сьöртi, клейитö нiйö бумага лист вылö нето тетрадьö.
Гижö нылiсь ниммез.
6. Керö му шар вылын главнöйжык государствоэз карталiсь апликация:
а) Рисуйтö бумага лист вылö нето тетрадьö Европа да Азия сiя образец сьöртi, кöда сетöма чертёж вылын (124 листбок).
Керö этö сiдз, кыдз керит одзза уджжезын.
б) Тэчö и клейитö рисуйтöм свет часттез вылö вундалöм государствоэсö.
Кыдз тэчны государствоэз Европаö да Азияö, — видзöтö чертёж сьöртi.
abu
ПРИМЕЧАННЁ.
Сы понда, медбы керны шуч тыдалана бумага, колö вадны керосинöн либо подсолнушковöй виöн трепич, мавтны сiйöн бумага, чышкыны бумагасö кöсöдз да косьтыны.
ПЫТШКÖС.