{Терехова Л. Г., Эрдели В. Г. @ География @ география @ Л. Г. Терехова и В. Г. Эрдели.
География. Часть первая @ 1938 @ Лб. .}
==n Л. Г. ТЕРЕХОВА но В. Г. ЭРДЕЛИ
ГЕОГРАФИЯ
НЫРЫСЕТӤ ЛЮКЕТЭЗ
НАЧАЛЬНОЙ ШКОЛАЛЭН КУИНЬМЕТӤ КЛАССЭЗЛЫ УЧЕБНИК
КУТСКОН
Тӥ дышетыны кутскиськоды географиез.
Асьмелэн улон музъеммы сярысь тӥ тододы трос выльёссэ но интереснойёссэ.
География урокъёсын тӥ тодматскоды тӥледды котыртӥсь интыосын.
Тӥ тододы, кыӵе бадӟым асьмелэн музъеммы, кыӵе солэн тусыз но ма со вылын вань.
Географиез дышетыса, тӥ тододы, кыӵе природа но кызьы уло адямиос музъемлэн пӧртэм интыосаз.
География занятиосын тӥ валаны дышоды планъёсты но картаосты — интыослэсь чертежъёссэс.
Со чертежъёсъя син азяд пуктыны быгатод котькыӵе интыез.
Милям учебникмы тӥледлы юрттоз географиез дышетыны.
Учебник борды ватсамын планъёс но картаос.
Соосты умой утялтэ.
Географиез планъёстэк но картаостэк дышетыны уг луы.
I. КЫЗЬЫ ТОДОНО СОЕ, КЫӴЕ ИНТЫ КОТЫРТЭ АСЬМЕДЫ.
Малы ми йыромим.
Ми эшеным кемалась дасяськыса улӥм, милям городмы дорысен кыдёкын ик ӧвӧл, лагерьын улӥсь пионеръёс доры мыныны.
Сюрессэ тодӥм но мынӥм.
Пичи шурез выжим, бадӟым возь вылтӥ ортчим.
Пужым нюлэсэ но вуим, отын интыяськемын лагерь.
Просекаетӥ мынӥм.
Умой вал нюлэсын.
Пужым зын кылӥське.
Писпу йылъёс каллен ӵашето.
Кыдёкын кикы силе.
Ӝоген луыны кулэ вамен выжись просека.
Паллян паламы малпамтэ шорысь уӵерак адскиз коньы.
Ми со сьӧры бызим.
Со милесьтым пегӟе.
Тэтчиз пужыме но улвайёсыз пӧлы ватскиз.
Ми ӧжыт сылӥм но азьлане мынӥм.
Тани, берпумаз, вамен выжись просека но вуиз.
Бурлань кожим.
Ӝоген лагерь.
Озьы ке но, мынӥськом час, кык, нош лагерь ӧвӧл.
Кытчы мыноно?
Просекаос вамен но, кузяла но мыно, соос ваньзы ик огкадесь.
Котырын одӥг лул но ӧвӧл.
Ми йыромим.
Кема ветлӥм нюлэсэтӥ, лагерез утчаса.
Шӧдтэк шорысь кыдёкын кылӥськиз пуны утэм куара, собере лесник адскиз.
Лагерьлэсь ми сизьым километр кеме палэнэ кошкиськеммы вылэм.
Коньы сьӧры бызьыкумы, шӧдске, ми кудлань мынонмес ыштӥськеммы.
Лесник милемды нуиз ас дораз, чаен сектаз. Солэн пиез собере милемды келяса мынӥз.
Пионеръёслэсь шур дурысь тылскемзэс адӟыкумы, пеймыт вал ини.
Одӥг нунал улыса, пионеръёс милемды дорамы келяны кариськизы.
Кыкез пиналъёс милемды келяны мынӥзы.
Соос тубизы вырйылэ. Со вырйылысен адско вал котыртӥсь интыос.
Со интылэсь планзэ азьпалазы вӧлдӥзы но отчы пичи прибор „компас“ понӥзы.
Соос вылэ кема учкыса, маке сярысь куспазы вераськизы.
Собере соос милемлы возьматӥзы, куд палан город луэ, хотя вырйылысен нюлэс сьӧрысь со уг ке но адскы вал.
Планъя маке мертазы, лыдъязы но веразы, что городозь ньыль километр но, час котыр ортчыса, ми дорамы луом шуизы.
Милемлы потӥз, соос асьсэды токма гинэ тодӥсен возьмато шуыса.
Озьы ке но, мынӥм соос сьӧры.
Кыӵе ми паймим, 40 минут эсэп ортчыса, зэмзэ ик кыдёкысь городэз адӟыкумы, нош час ортчыса, ми вуим ини дорамы.
Мынам тодам лыктӥз, кызьы ми, синтэмъёс сямен, йыромыса, нюлэсэтӥ ветлӥм. Собере кыл сётӥ, пионеръёс сямен ик, сюресэз шедьтыны дышетско шуыса.
Котькуд адямилы умой тодыны кулэ ас котырысьтыз, интыез кыӵе интыын улэмзэ, ас котыраз ма ваньзэ, быгатыны кулэ котькыӵе сюресъёсты шедьтыны.
Котыртӥсь интыез умой тодыны понна, тодыны быгатоно кудланьёсты но кусыпъёсты, уже кутыны быгатоно интылэсь планзэ.
„Бур пал“ но „паллян пал“ кудланьёс вошъясько.
Учке суредэз.
Кудланьын луо укноос дышетскисьёс дорысен — бурын-а, паллянын-а?
Соос дорысен кудланьын ӧс луэ?
Нош кудланьын луэ дышетӥсь дорысен?
Уж.
Тодэ, парта вылын пукыса: Классысьтыды укноос тӥ дорысен кудланьын луо?
Тӥ дорысен кудланьын ӧс луэ?
Нош кудланьын соос луо дышетӥсь дорысен?
„Бурпал“ но „паллян пал“ кудланьёс вошъясько соя, кудпала ымнырын сылӥськом.
Одӥг пала ке ымнырын берытским, тросэз макеос асьмелэн бур паламы луозы.
Берлань ке берытским — со макеос ик паллян паламы луозы.
Кин ке кудланьёсты — „бур палэз“ но „паллян палэз“, „азьпалэз“ но „берпалэз“ — ас дорысеныз ке возьматэ, со тодмотэм интыын туж ӝог йыромоз.
Шедьтоно сыӵе кудланьёсты, кудъёсыз адямилэн берытскемезъя медаз вошъяськылэ.
Адямиос сое кемалась валазы но кудланез шундыя тодыны кутскизы.
Кызьы адямиос кудланьёсты шундыя шедьтыны дышизы.
Туж вашкала дыръёсын адямиос нуналысь нуналэ адӟизы шундылэсь инэтӥ бергамзэ.
Со ӵукна адскыны кутске но каллен вылэ но вылэ ӝутске; нуназе шорын самой вылын луэ, собере лэзькыны кутске улэ.
Ӝытазе шунды пуксе, ас сьӧраз нуназе югытэз но шунытэз нуыса.
Адямиос озьы ик шӧдӥзы, что шундыё нуналэ котькуд макеослэн вужерзы луэ. Нош котькуд макелэн вужерезлэн кузьдалаез нунал ӵоже вошъяське.
Шунды макем улын, вужер но сокем ик кузь луэ: макем со вылын, сокем ик вужер но вакчи луэ.
Вужерлэн кудланьын луэмез но нунал ӵоже вошъяське.
Озьы луэмез эскерылыса, адямиос пуктылыны кутскизы площадьёс вылэ нимысьтыз юбоос (4 сур.).
Юболэн вужерезлэн кузьдалаезъя но солэн кудланезъя соос тодыны кутскизы дырез но.
Шундыез эскерылыса, адямиос валазы, что нуназе шорын вужер туж вакчи но ялан одӥг палан луэ.
Со палэз, кудлане вужер усе нуназе шор дыръя, адямиос нимазы север пал, яке север шуыса.
Солы пумит палэз юг пал яке юг шуыса нимазы.
Юг палан шунды ялан нуназе шор дыръя луэ.
Озьы ик шедьтӥзы на еще кык кудланьёсты: восток палэз но запад палэз.
Та кудланьёс тодӥсько озьы, кызьы возьматэмын суред вылын.
Адями, север пала ымнырын султыса, киоссэ урдэсаз золтэ.
Бур киыз возьматэ восток пала, паллян киыз — запад пала.
Север, юг, восток но запад — основной кудланьёс луо.
Адями котькызьы мед берыкъяськоз, север, юг, восток но запад — кудланьёс уг вошъясько.
Та кудланьёс вакчияк гинэ тазьы пусйисько: север — С, юг — Ю, восток — В, запад — З.
Ужъёс.
1. Сайкыт нуналэ эскере:
Школае мыныкуды, тӥ дорысен кудлане усе тӥляд вужерды?
Кудланьын луэ, школаысь бертыкуды?
2. Мерталэ: Писпу вужер ма кузьда луэ, школае мыныкуды?
Со писпулэн ик вужерез ма кузьда луэ бертыкуды?
3. Эскере: Школалэн кудъёстӥз укноостӥз шунды ӵукна пиштэ, кудъёстӥз — нуназе шорын, кудъёстӥз чик уг пишты?
4. Шундыё нуналэ пол вылэ мелэн пусъе классысь укно рамалэн вужерезлэсь кудланьзэ но кузьдалазэ: нуназелэсь азьвыл, нуназе шорын но нуназе бере.
Кызьы ми шундыя тодӥм основной кудланьёсты.
Дышетскон ар кутскыку ик, ми школа азбаре лэсьтӥм географической эскерылонъёслы площадка.
Со понна бырйим шунды: умой пиштон интыысь пичи участок.
Сое ӵошатӥм но луоен пызьнам.
Географической площадкае ми пуӵ майыгам но отвесъя пуктӥм.
Сайкыт шундыё нуналэ, нуназе шор котырын, быдэс классэнымы лыктӥм площадка вылэ но пуӵ котыртӥ султӥм.
Миша но Ваня, дышетӥсен ӵош пуӵ доры мыныса, кудланез эскерыны но вужерлэсь кузьдалазэ мертаны кутскизы.
Миша вужерлэн кудланезъя гож гожтӥз, Ваня со вылэ пичи вамен гожен пусйиз вужерлэсь кузьдалазэ.
Кӧня ке минут ортчыса, ми адӟим вужерлэсь кӧня ке урдсаз кошкемзэ.
Соку Миша выль гож лэсьтӥз, нош Ваня вужерлэсь кузьдалазэ выльысь пусйиз.
Вужер вакчигес луиз.
Миша но Ваня трос пол пусйылӥзы вужерлэсь кудланьзэ но кузьдалазэ.
Вужер интызэ ялан воштэ но вакчиоме.
Ми нош ик адӟим, вужерлэсь ӧжыт гинэ кузёмемзэ.
Самой вакчи вужерлэн пумаз Миша ӵог шуккиз.
Нош дышетӥсь со кудлане киыныз возьматӥз но шуиз: „Отын — Север“.
Собере дышетӥсь косэмъя, Ваня север пала ымнырын султӥз но милемлы возьматӥз, кытын юг, восток но запад.
Кытын север, сое ваньзы умой мед тодозы шуыса, урок бере ми площадка вылэ „север — юг“ шуыса, возьматӥсь пус пуктӥм.
Со понна нуназе шор вужерлэн кудланезъя пичи гинэ канава копам но сое тӥяськем кирпичен но изъёсын тырмытӥм.
abu
Тӥ но озьы ик основной кудланьёсты тодыны кариське.
Компас.
Сайкыт нуналэ гинэ кудланьёсты шундыя шедьтыны луэ.
Нош нуналъёс ялан шундыё уг луо ук.
Куазь пильмо дыръя, озьы ик уин но кудланьёсты приборъя шедьтыны капчи. Со прибор компас шуыса нимаське.
Туж кемалась, вашкала дыръя, путешествовать карыкузы, уже кутылӥллям огшоры гинэ лэсьтэм компасэз.
Со — магнитам пластинкаез сӥньыс йылэ ошыса лэсьтэм маке вылэм.
Сӥньыссэ кие кутыку, пластинкаез шонаськыны кутске вал.
Кӧня ке шонаськем бераз, пластинка дугдэ вал — одӥгез пумыз солэн север пала возьматылӥз, мукетыз нош юг пала.
Али дыре адямиос уже куто мукет лэсьтэм компасэз.
Со луэ магнитам андан стрелкалэсь.
Стрелкалэн одӥгез пумыз лыз, мукетыз тӧдьы.
Стрелка берга пичи стержень вылын.
Пичи стержень юнматэмын стекло шобрето котырес коробкалэн пыдэсаз.
Компасэз тупато тазьы: пукто сое ӵошкыт интые но стрелкалы пуксьыны сёто.
Север пал шедьтэмын.
Собере коробкаез берыкто со дырозь, пока стрелкалэн лыз пумыз коробка пыдэсысь С букваез уз возьматы.
Коробка пыдэсысь мукетъёсыз букваос возьматозы мукетъёссэ кудланьёсты: В — восток палэз, З — запад палэз, Ю — юг палэз
Компасъя каньылэн шедьтыны луэ главнойёссэ кудланьёсты сяна, озьы ик соос вискысь кудланьёсты но: С-В (северо-восток) возьматэ северен востокен вискысь кудланез; Ю-В (юго-восток) — юген но востокен вискысь кудланез; Ю-З — юго-запад палэз, С-З — северо-запад палэз.
Компас — пичи прибор.
Сое кисыын но нуллыны умой.
Компасэн нокытын но уд йыромы.
Кыӵе кудлане мынэмдэ компасъя гинэ эскероно луэ, берлань бертыку нош возиськоно азьлань мынэмедлы пумит.
Если, кылсярысь, тон север пала ке мынӥд вал, бертыкуд, юг пала мыноно ини.
Компас кулэ путешествиос дыръя, тужгес ик, олокӧня нуналъёс ярдуръёсты адӟылытэк, мораостӥ уянъёс дыръя.
Ужъёс
1. Вералэ компасъя: Кудланьын луо асьме классысь укноос?
Кудланьын луэ ӧс?
2. Пусъе стрелкаен асьтэ класстылэн потолоказ яке пол вылаз север пал кудланез.
Кызьы лэсьтоно аслыд компас.
Огшоры компасэз, вашкала дыръя уже кутылэмзэ, аслыд но лэсьтыны шуг ик ӧвӧл.
Басьтэ огшоры венез но магнитэз.
Магнитлэн огпал пумыныз 10–20 пол зырӟе веньлэн шорысеныз солэн йылозяз; магнитлэн мукет пумыныз сомында пол ик зыралэ веньлэн шорысеныз пасё пал пумозяз.
Вень магнитаськиз.
Та вененыды собере бышкалтэ, коркалэн липетэз кадь, лэсьтэм пичи бумагаез.
Лэсьтэм прибордэс оше пӧлэстымтэ сӥньыс йылэ.
Ӝутэ сое сӥньыстӥз, суред вылын возьматэм сямен.
Кӧня ке шонаськем бераз, прибор дугдэ,
нош вень табере возьматэ ини: одӥг пумыныз — север пала, мукетыныз — юг пала.
Асьтэлэсь прибордэс эскере настоящой компасъя но эн вунэтэ, веньлэн кудпал пумыз (йылыз-а, пасё палыз-а) возьматэ север пала.
Со пумыныз ик тӥляд вень компасты ялан возьматоз север пала.
Уж.
Тодэ асьтэ лэсьтэм компастыя, кудлане кыстӥськемын со ульча, кудаз сылэ школады.
Кызьы пусйыло кудланьёсты чертёж вылэ.
Ми сылӥм площадьын.
Ми дорысен север палан адске завод, юг палан — школа, восток палан — сельсовет, запад палан — кооператив.
Дышетӥсь милемды косӥз пусйыны та пунктъёсты тетрадямы.
Куке ми чертёжъёсмес куспазы ӵошатӥм, соку адскиз, что котькудӥз сое пӧртэм лэсьтэм.
Соку дышетӥсь милемлы возьматӥз, кызьы умой чертить кароно.
Дышетӥсь косэмъя, ми пусйим сылэм интымес тетрадямы котретэн.
Собере ми тетрадьмес берыктӥм озьы, что солэн вылӥ дурыз шонертэмын вал север пала, улӥез — юг пала, бур палыз — восток пала, нош паллян палыз — запад пала.
Основной кудланьёсты стрелкаосын пусйим 9-тӥ суред вылын возьматэмъя.
Собере ми капчиен гинэ валам, кыӵе кудлане пусъёно котькуд пунктэз.
Эскере, дышетскисьёс шонер-а пусйиллям чертёжазы: заводэз, школаез, сельсоветэз но кооперативез.
Основной кудланьёсты возьматыны кутэмын чертёж вылын лэсьтэм сямен:
кыӵе ке пунктысен север пала — бумагалэн вылӥ дур палаз;
юг пала — улӥ палаз;
восток пала — листлэн бур пал дураз;
запад пала — паллян палаз.
Уж.
Султэ кыр интые.
Асьтэ котырысь шедьтэ пунктъёсты, север палан, юг палан, восток палан но запад палан интыяськемъёссэ.
Пусъе соосты асьтэлэн тетрадяды.
Кызьы тодо кусыпез.
Интыез ӟеч тодон понна, уг тырмы на пӧртэм пунктъёслэсь ваче куспазы кудланьын луэмзэс тодэмен гинэ.
Озьы ик тодыны кулэ, со пунктъёслэн ма быдӟа кусыпсы.
Кызьы бен тодо кусыпез?
Пичи кусыпез ӵем дыръя вамышен мертало,
бадӟымзэ — сюрес вылын ортчем часлэн но нуналъёслэн лыдзыя.
Шуо куддыръя тазьы: „Милям поселокысенымы городозь куинь нунал валэн мынымон, яке вить нунал пыдын мынымон“.
„Милям селоысенымы нюлэсозь вить час мыноно пыдын“.
Нош тазьы кусыпез тодон амал шонер ӧвӧл.
Одӥгезлэн адямилэн вамышез кузь, мукетызлэн вакчи; одӥгез вал ӝог нуэ, мукетыз калленгес.
Со кусыпез пыдын яке валэн ортчыны понна, пӧртэм дыр кулэ луоз.
Кусыпез мертаны кулэ точной мертэтъёсын: пичи кусыпъёсты — метрен, бадӟымъёссэ — километрен.
Городъёслэн кусыпсы, чугун сюрес станциослэн, гуртъёслэн но колхозъёслэн кусыпсы кӧня километр луэмез котькин мед тодоз шуыса, чугун сюресъёс но шоссе сюресъёс кузя пуктылэмын кусыпез возьматӥсь юбоос.
Километр — со вакчи кусып ӧвӧл.
Воргорон адями но сое 10–15 минут ӵоже мыноно луэ.
Ужъёс.
1. Мерталэ школа азбарды (ульча) кузяна 100 метр.
2. Эскере часъя, кӧня дыр ӵоже тӥ та кусыпез ортчиськоды.
3. Лыдъялэ, кӧня дыр ӵоже ортчыны быгатоды 1 километрез.
4. Километр ортче но эскере лыдъямдылэсь шонерзэ.
5. Лыдъялэ, тӥляд кӧня вамышты пыре 100 метре.
6. Лыдъялэ, кӧня вамыш 1 километрын.
7. Асьтэ гурт дорысеныды кошке одӥг километр кеме, но берлань учкыса, та кусыпез синйылтэ.
Кызьы возьмато кусыпез чертёж вылын.
Ми мертамы школаысенымы библиотекаозь кусыпез.
25 метр потӥз.
Кызьы возьматоно со кусыпез бумага вылын?
Бумага вылэ 25 метр уз тэры.
Нош асьмелэн возьматэммы луэ та кусыпез бумага вылын пичиесь мертэтъёсын, кылсярысь, сантиметрен.
Если асьмеос котькуд сантиметрез бумага вылын метр интые ке басьтыны кариським, соку быдэс кусыпез возьматыны луоз 5 сантиметр кузя гожен.
Асьмелэн условимы котькинлы валамон мед луоз шуыса, чертёж уламы сётӥськом пичиятэм мертэтлэсь суредзэ.
Условной пичиятэм мертэт, кудӥзъя чертёжъёсты лэсьто, масштаб шуыса нимаське.
Масштаб котьку чертеж улэ сётӥське.
„Масштаб“ кыл улэ гожто условной пичиятэмез: кӧня метр яке километр лыдъяно 1 сантиметрын.
Гожтэм улэ гож лэсьто но сое сантиметрлы люкыло.
Гожлэн нырысь люкетэз вадьсы 0 гожто; 0-лэн бур палаз котькуд сантиметр вадьсы гожто метрлэсь яке километрлэсь со лыдзэ, кудӥзлы со тупа.
Нырысьсэ сантиметрез люкыло векчи люкетъёслы.
Возьматэм масштаб вылысь котькуд пичи люкетсэ условно лыдъяно 1 метр интые.
__________
abu
Чертеж вылысь кусыпез мертан понна уже куто масштабной линейкаез.
Пичи бумага листэз линейка тусъем куасалто.
Линейкаез масштаб вӧзы пукто но со вылэ пусйыло масштаблэсь люкетъёссэ.
Масштабной линейкаен капчи тодыны кусыпез чертеж вылысь: линейкаез чертёж вылтӥ нулло но лыдъяло, кӧня пол со отчы тэриз.
Ужъёс.
1. Лэсьтэ масштабной линейка 13-тӥ суредысь масштаблы.
2. Проверить каре масштабной линейкаен, 12-тӥ чертёж вылын шонер-а суредамын школаен но библиотекаен кусып.
3. Тодэ 15-тӥ чертёжъя, ма быдӟа кусыпсы школа дорысен почтовой отделениозь.
Чертёж лэсьтэмын таӵе масштабен: 1 сантиметрын 10 метр.
4. Школа дорысен ты дорозь 200 метр.
Возьматэ та кусыпез таӵе масштабъя: 1 сантиметрын 20 метр.
Огъя тус но план.
Асьмеос дышим ини кудланез но кусыпъёсты тодыны.
Интыез шонер умой валан понна, планэз уже кутыны быгатэм кулэ на.
Планъя туж умой пуктыны луэ син азе музъемлэсь котькыӵе люкетсэ, котькыӵе интызэ, асьме дорысен соос кыдёкын ке но.
Тӥляд син азяды пуктэмды потэ одӥг школалэсь усадьбазэ, кудзэ ноку но адӟемды но ӧвӧл, кудаз ноку но ветлэмды но ӧвӧл.
Тӥ басьтӥськоды суредэз, кудӥз вылын возьматэмын школьной участоклэн огъя тусыз.
Суред вылын умой адско: одӥг этажъем школа, ӝужыт кенер но школьной участоклэн пичи люкетэз.
Участоксэ нош быдэс адӟыны уг луы — сое сайяло школа но ӝужыт кенер.
Тӥ соку басьтӥськоды школьной участоклэсь снимоксэ, самолётысен фотографировать каремзэ (17 сур.).
Та снимок вылын умой адске школалэн быдэс участокез.
Адско: со котырысь ӝужыт кенер, школа, сарай, бакча, убоос, муш садын вить уморто, емышо садын писпуос, сяськаё котырес клумба.
Нош самолётысен фотографировать карем снимок вылын адско предметъёслэн вылӥ люкетъёссы но соослэн басьтэм интыоссы гинэ.
Школалэн липетэз но интыез гинэ адске.
Писпуослэн йылъёссы но сылон интызы гинэ адско.
Школьной участокен капчи тодматскыны озьы ик чертёжъя но, со лэсьтэмын озьы, асьмеос школьной участоке вылласянь кадь учкиськом.
Со чертёжез учке, эскере (18 сур.).
Со туж тупа самолётысен фотографировать карем снимоклы.
Со вылын чертить каремын ваньмыз, маосты асьмеос адӟим снимок вылысь.
Та чертёжез умой валан понна, эскере условной пусъёссэ.
Соос чертёж улын пуктэмын.
Самолётысен фотографировать карем снимок бордын но школьной участоклэн чертёжез бордын сётэмын масштабъёс.
Масштабъя шуг ик ӧвӧл тодыны школалэн быдэс участокезлэсь быдӟалазэ, школалэсь, сарайлэсь но участоклэн нимаз люкетъёсызлэсь быдӟалазэс.
Озьы ик тодыны луэ, кыӵе кудланьын но огзы дорысь огзы кыӵе кусыпын луо предметъёс.
Вылӥысен, самолётысен, школьной участокез шонерак фотографировать карем снимок но школьной участоклэн чертёжез — планъёс со.
Ужъёс.
1. Чертёж-планъя тодэ, кыӵе масштабен со лэсьтэмын.
2. Условной пусъёсъя шедьтэ, кытын школа, географической площадка, емышо сад, сарай.
3. Тодэ, кыӵе кудланьын луо школа дорысен: сарай, географической площадка.
4. Тодэ, школа дорысен ма кемын соос луо.
5. Тодэ, школьной участоклэсь но школалэсь кузьдалазэс но пасьталазэс.
Интылэн планэз
Школа вадьсытӥ вылэтӥ лобӟиз самолёт.
Самолёт вылысен лэсьтӥзы школалэсь фотографической снимоксэ.
Учке та снимокез.
Кык километр кем вылӥысен школьной участок пичи гинэ адске.
Но тодманы сое луэ, солэн интыезъя но тусызъя.
Снимокъя адске, что школьной участок борды запад ласянь но восток ласянь матэ вуо посёлоклэн коркаосыз, садъёсыз но бакчаосыз.
Школьной участок дорысен юг пала шоссе мынэ; солэн мыд-мыд палтӥз писпу мерттэмын.
Шосселэн мукет палтӥз адско посёлоклэн коркаосыз но сюбег ульчаосыз.
Коркаос но ульчаос вуо нюлэс доры, со кыстӥське юг пала шур дорозь.
План-чертёж лэсьтытозь, планэз самолётысен ӝоггес снять карыны луэ.
Лобӟиз самолёт, лэсьтӥз снимок но — дась луиз.
Мертано ӧвӧл ни котькуд коркаен, азбарен, садэн, бакчаен басьтэм интыез.
Мертано ӧвӧл ни котькуд ульчалэсь пасьталазэ но кузьдалазэ.
Озьы снимать каро асьмелэн Союзамы бадӟым городъёслэсь планъёссэс, нюлэсэн но паськытэсь нюръёсын басьтэм участокъёслэсь планъёссэс.
Интылэн планэз — со интыез озьы возьматон, кызьы со адске, со вылэ вылласянь, туж вылӥысен, меӵак учкыса.
План вылын уг возьматӥськы интыысь предметъёслэн огъя туссы, а возьматӥсько соослэн гожъёссы гинэ, соослэн музъем вылын басьтэм интызы гинэ.
План борды котьку сётӥсько масштаб но условной пусъёс.
Масштабъя котькудлань мертаны шуг ӧвӧл.
Ужъёс.
1. Тодэ самолётысен снять карем планъя, кыӵе масштабен со лэсьтэмын.
2. Планлэн северо-запад пал сэрегысьтыз шедьтэ школьной участокез.
3. Шедьтэ со вылысь: школаез, сараез, садэз, бакчаез.
4. Тодэ, кудланьын луо школьной участок дорысен школа дорысь переулок, шоссе.
5. Тодэ, шосселэн кыӵе пасьталаез.
6. Тодэ, школьной участок дорысен кыӵе кусыпын луэ шур.
Ужъёс.
Дышетске асьтэ интыдылэсь планзэ уже кутыны.
1. Планэз тупатэ основной кудланьёсъя.
Пландэс юнматэ пичи картон лист борды яке фанер доска борды.
Планэз кияды басьтэ, 20-тӥ суред вылын возьматэмъя но, берыктэ сое со дырозь, пока план вылысь север пал кудлань уз вадьсаськы компасъя север пал кудланен.
2. План вылысь шедьтэ котырак адскись предметъёсты.
План шонер ке тупатэмын, план вылын пусъем предметъёс озьы ик пуксемын луозы, кызьы ке пуксемын интыын предметъёс.
План вылысь шедьтэ со интыез, кытын тӥ сылӥськоды.
Табере план вылысь шедьтыны шуг ӧвӧл ни со предметъёсты но, кудъёсыз адско интыын.
Шуом, тӥ адӟиськоды ас дорысеныды восток палась заводлэсь мурызэ.
Учке план вылэ, со вылын восток палан завод пусъемын.
План вылысь озьы шедьтыны луоз ваньзэ интыын адскись мукет макеосты но.
3. Планъя сюрес шедьтыны дышетске.
Шуом, тӥляд шедьтэмды потэ вукое сюресэз.
Сылон интыысеныды нош вуко уг адскы: нюлэс сьӧрын со.
План вылысь шедьтэ вукоез но тодэ, сылон интыысеныды со кудланьын луэ. (21 сур.)
Со кудланез ик шедьтэ интыысен.
Вукое сюресэз но интыысен пусйыны табере шуг ик ӧвӧл ни.
Кызьы суредано школаез котыртӥсь интылэсь планзэ.
Басьтэ асьтэ интыдылэсь планзэ.
Понэ со вылэ чылкыт бумага листэз. Соосты булавкаен тэче яке сӥньысэн вуре.
Бумагаен шобыртэм пландэс понэ укнолэн стекло бордаз.
Укноетӥ югыт умой ке пыре, бумага пыртӥ план чильпыралоз.
Со вылтӥ карандашен гожъян гинэ кыле на.
II. МУЗЪЕМ ВЫЛЛЭН ТУСЪЁСЫЗ
Ужъёс.
Лэсьтэ экскурсия ӝужыт интые.
Та экскурсиын эскере: кыӵе выл тусыз тӥляд интыдылэн, кызьы сое адямиос уже куто.
Мае адӟиськом асьмеос вырйылысен.
...
Уж.
Та образецъя описать каре со интыез, кудзэ тӥ экскурсиысен эскериды.
Ӵошатэ асьтэ интыдылэсь вылзэ али верам интылэн вылыныз.
Уроктэм дыръя географической площадка вылын ужан.
1. Ӵошкыт интылэсь модельзэ лэсьтэ.
Географической площадка вылэ пуктэ 1 сантиметр ӝужда адями мугор фигурка.
Адямиос таӵе пичиесь ке луысалзы, географической площадка соослы адскысал пумтэм-йылтэм ӵошкыт инты кадь.
2. Вырйыллэсь модельзэ лэсьтэ.
Нюр луолэсь лэсьтэ кӧня ке луо муӵъёс 5, 10 но 25 сантиметр ӝуждалаемесь.
Соосын артэ пуктэ адями мугор фигуркаез.
Сыӵе адямилы муӵъёс, вырйылъёс кадь, адскысалзы.
3. Вукыремъёслэсь модельзэс лэсьтэ.
Нюр луоез лэсьтэм вырйылъёслэн бамъёсазы йылсо ӵоген кырылэ меӵ бамо сюбегесь канаваос.
Вукыреме пуктэ адями фигуркаез.
Ма со топографической план но малы со кулэ.
Вылэтӥ, вылэтӥ со инты вадьсытӥ ик Быстрой шур кузя лобӟе самолёт.
Вылысен лётчик адӟе котькуд пала кыдёке кыстӥськись ӵошкыт интыез, кудӥз шобырскемын бусыосын, возьёсын, нюлэсъёсын.
Самолёт улын, чилясь лента кадь, шур бызе.
Уӵерак гинэ ортчыло гуртъёс.
Лётчик татӥ нырысьсэ лобӟе, но со тодэ, кызьы нимаське шур, кудӥз вадьсытӥ лётчик лобӟе, но гуртъёс, кудъёсыз уӵерак адскыло шурлэн ярдуръёстӥз.
Со тодэ кудлане нуоно самолётсэ.
Со умой тодэ, кытын музъем выл ӵошкытгес, кытчы умойгес лэзькыны.
Кытысь бен со ваньзэ сое тодэ?
Ведь омырын сюрес но ӧвӧл, юаны адямиос но ӧвӧл.
Лётчиклэн топографической планэз вань.
Со вылын суредамын со инты, кудӥз вадьсытӥ лобӟе самолёт.
План вылын возьматэмын, кытын выргес инты, кытын улыггес, возьматэмын гуртъёс, бусыос, возьёс, нюлэсъёс, шуръёс, сюресъёс.
Лётчик планзэ компасъя пуктэ но кудлань лобӟыны тодэ.
Топографической план яке карта не только лётчиклы гинэ кулэ луо.
Соосъя путешественник-исследовательёс но сюресэз шедьто.
Соосты инженеръёс но уже куто заводъёс но электростанциос пуктыны инты быръён дыръязы.
Соос кулэ луо котькуд колхозлы музъемез шонер люкылон понна.
Топографической план яке карта — красноармеецлэн боевой ужаз ялан кулэ макеос.
Соосты уже кутыны мед быгатоз котькуд гражданин, котькыӵе дырын, куке кулэ ке луиз, Советской Союзэз оборонять каронын Красной Армилы юрттыны.
__________
abu
Кудӥз вадьсытӥ лобӟиз самолёт, со интылэн оглом тусыныз тӥ тодматскиды ини „Вырйыло инты“ суредъя, кудӥз учебник борды ватсамын.
Суред улэ пыртэмын лётчиклэн лобӟыкуз уже кутэм планэз.
Ужъёс.
1. Умой учке та план улысь таӵе условной пусэз: „Кызьы возьматӥсько план вылын улыггес но выргес интыос?“
Кыӵе тусъем буямын самой ӝужытэз инты?
Кызьы воштӥське буёлам тусыз интылэн улыггес луэмезъя?
Кыӵе тусъем буёламын самой улыг интыос?
Эскере нялмыт но меӵ гурезь бамъёслэсь кызьы суредаськемзэс.
2. Суред вылысь шедьтэ Молотово село дорысь самой ӝужыт интыез.
Со интыез ик тусызъя шедьтэ топографической план вылысь.
3. План вылысь шедьтэ туссыя самой улыг интыосты.
4. План вылысь шедьтэ бадӟым вукыремъёсты.
Уроктэм дыръя географической площадка вылын ужан.
Мерталэ участок кузялаен 96 сантиметръем, пасьталаен 68 сантиметръем.
Та участок вылэ мускыт луолэсь лэсьтэ топографической планын суредам интылэсь модельзэ.
Топографической планын возьматэм быдӟалаосты ваньзэс ик 4 пол бадӟыматыны кулэ.
Молотово село дорысь вырйыллэсь ӝуждалазэ 10 сантиметръем лэсьтоно.
Тӥляд модельды планын но суредын возьматэм интылы умой мед тупалоз шуыса, шуръёсты, тыосты лыз бумагалэсь вандылэ, чугун сюресъёсты — векчи езъёслэсь, коркаосты — шори вандылэм квадратной брусокъёслэсь, нюлэсъёсты ӝуйёслэсь лэсьтылэ.
Гурезь йылэ тубон.
Кык нунал ми тубиськом ини гурезь йылэ.
Тубон меӵ но меӵ луэ.
Милям пыд улысьтымы изъёс туж ӵем тӥяськылӥзы но дыбыртыса усьылӥзы улэ.
Ми мырдэм возиськылӥм интыямы, скала борды кырмиськылӥм.
Куддыръя мыноно луылӥз мур гуос дуртӥ.
Сюрес сокем сюбег вал, что улэ учкыку, сюлэм ик путыны медэ.
Куддыръя сюрес бырылэ вал, соку милемлы гу вамен тэтчылоно луылӥз.
Тани, берпумаз ми лымыен согиськем гурезь йыл дорын 3 километр ӝуждалаын.
Еще ӝыны километр кеме вылэ ӝутским на ке, — ми гурезь йылын луом.
Нош азьпаламы туж меӵ скала.
Ма карод?
Огмы борды огмес гозыен думылӥм: одӥгез ке усиз, мукетъёсыз кыкез сое возьыны быгатозы.
Каллен гинэ вылэ тубыны кутскиськом.
Мон кийыгырыным шедьтӥсько мычкем изэз, кырмиськисько со борды, пыдъёсме кыскисько, собере нош ик кырмиськисько но озьы вылэ но вылэ тубисько.
Мынам эшъёсы мон сьӧры тубо.
Киос кормаськемын.
Пыдъёс изъёс бордысь ялан мозмыло.
Нош из бордлэн пумыз но уг адскылы.
„Ма луоз, киос ке лябомизы яке гозы ке чигиз?“,
— ми пӧлысь котькудӥз ас понназ малпа.
Но тани скалалэн бадӟым мычиськемез.
10 минут шутэтскиськом но нош ик выллань ӵабъяськиськом.
Берпумаз, вамыштӥськом йӧ вылэ.
Гурезь йылозь кыдёкын ик ӧвӧл ни.
Йӧ вылтӥ гинэ одӥг ӝутскон кылиз на.
Но ӝутскон сокем меӵ, что йӧ вылтӥ нокызьы но мыныны уг луы.
Лёгиськон инты корано луэ йӧ коранэн.
Котькуд вамышез туж шуген вамыштоно.
Шоканы секыт — омыр уг тырмы, пельдӥньёс вӧсь луо, йыр пороме, сюлэм шуг.
Кӧня ке вамыштэм бере шутэтсконо луэ.
Берпум 20 метрзэ ум вамышъяське ни, а нюжтӥськиськом.
Еще ӧжыт кужым понӥм на но, ми гурезь йылэ вуим.
Ноку но ми ум вунэтэ гурезь йылысен адӟем картинаез.
Кыдёке, кыдёке, кӧня ке син сузе, гурезьёс кыстӥсько.
Вылэ ӝутско лымы гурезь йылъёс.
Соос вылысь васько йӧос паськыт потокъёсын.
Улын туж пыдлон шур бызе.
Со котырын ӧжыт гинэ тодмамон точкаен адске гурт.
Туж чалмыт вал.
Шунды пуксён палаз матэ вуэ.
Солэн кырыж лучъёсыз лымы гурезь йылъёсты льӧль но зарни югытэн пиштыто.
Но кема ик учкыны ӧз кылды та картиналэсь чеберзэ.
Ӝоген улӥысь интыос пилемен шобырскизы.
Шуръёс но гуртъёс ышизы.
Гурезь бӧрсьы гурезь ышылӥз пилем сьӧры.
Ми васькыны кутским.
Дыртыны кулэ вал кӧлон инты пеймытлэсь азьло шедьтыны понна.
Ӝужыт гурезьёс йылэ тубан развивать каре кужымез но капчилыкез, вормыны дышетэ шуг но кышкыт дыръёсты.
СССР-ын сюрсэн лыдъямон пролетарской туристъёс арлы быдэ тубало гурезьёслэн самой ӝужыт йылъёсазы.
Ужъёс.
1. Ӵошатэ гурезьёслэсь огъя туссэс вырйылъёслэн огъя тусэнызы.
2. Ӵошатэ гурезьёс йылэ тубам сярысь али гинэ верамез асьтэлэн вырйылэ тубаменыды.
Кыӵе кышкытъёс улэ шедё адямиос, ӝужыт гурезьёс йылэ тубакузы?
3. Лэсьтэ „Гурезьёс“ нимо альбом журналъёсысь но газетъёсысь иллюстрациослэсь, открыткаослэсь но пӧртэм описаниослэсь.
Уроктэм дыръя географической площадка вылын ужан.
Лэсьтэ вырйыллэсь но гурезьлэсь модельзэс.
Географической площадка вылэ мускыт луолэсь (толалтэ — лымылэсь) лэсьтэ вырйыллэсь модельзэ 25 сантиметр ӝужда, гурезьлэсь модельзэ — 110–150 сантиметр ӝужда.
Собере соосты ӵошатэ ӝуждалазыя.
Гурезь модель доры пуктэ адямилэсь фигурказэ.
Таӵе адскоз пичи гурезь, адямиен ӵошатыса.
Нош бадӟым гурезьёс, фигуркаен ӵошатыса, 5, 10 но 15 пол ӝужыт луозы тӥляд лэсьтэм пичи гурезьдылэсь.
Музъем выллэн пӧртэм тусъёсыз.
Музъемлэн вылыз пӧртэм луэ.
Котьмалэсь но ӵем шедьыло ӵошкыт интыос.
Соос кыстӥсько трос сю но сюрс километръёс.
Кудӥз ӵошкыт интыос копак шонересь адско.
Но шонересь ӵошкыт интыос но котьку ик кудлань ке но нялмыт луо.
Ӵошкыт интыосын котькугес ик луо пичиесь лёг интыос — вырйылъёс.
Кыдёкысен, самолётысен, вырйылъёс почти уг но тодматско.
Но сыӵе но луылэ, что ӝужыт интыос котырысьтызы музъем выллэсь 200 метрлэсь но вылэ ӝутскемын луыло.
Сыӵе ӝужыт интыос гурезьёс шуыса нимасько, нош интыез — гурезё инты.
Гурезьёс луыло трос километръем ӝуждалаосыз но.
Котькугес озьы луэ: одӥг но кык гурезь гинэ ӧвӧл, а трос гурезьёс ӝутско.
Огзы бӧрсьы огзы мыно гурезьёс.
Пилемъёслэсь но вылэ ӝутскыло соос.
Гурезьёслэн ӝужытэсь йылъёссы шобырскемын ноку но шуналлясьтэм лымыен.
Кызьы уже кутӥське милям школа котырысьтымы музъем.
Милям школамы колхозын интыяськемын.
Котырысьтыз музъемлэн бадӟым люкетэз ужаське.
Котыртӥз вӧлскемын колхозлэн бусыосыз, бакчаосыз но садъёсыз.
Нош музъемлэн ог люкетэз природной тусэныз но уже кутӥське.
Со туж бадӟым лысо нюлэс но шур дурысь заливной возьёс.
Нюлэсын милям колхозникъёсмы пу вандо, возьёс вылысь трос турын ӝуто.
Вань на еще нюр но, кудӥз та дырозь чик но уже кутымтэ на.
Алигес та нюрез эскеризы но татысь ӟеч торф шедьтӥзы.
Ӝоген кутскозы ини сое ужаны.
Ми котыртӥ тросэз музъем пӧртэм юртъеръёсын басьтэмын: улон коркаосын, колхоз кеносъёсыя, сарайёсын, пудо гидъёсын.
Колхоз дорысен кыдёкын ик ӧвӧл интыяськемын механической завод но рабочий посёлок, отын 8 сюрс рабочийёс уло.
Музъемлэн бадӟым люкетэз татын почти юртъер улэ гинэ басьтэмын.
Отын ӧвӧл бусыос но, бакчаос но.
Со понна посёлок дорын парк лэсьтэмын, посёлоклэн коркаосыз котыртӥ писпуос мерттэмын.
Тросэз музъем ми котыртӥ сюрес улэ шедемын.
Колхозлэн шортӥз паськыт ульча ортче но рабочий поселокын но кӧня ке ульчаос вань на.
Асфальтэн шобыртэм сюрес Москваысен ми доры, шонер лента кадь, кыстӥське.
Куинь грунтовой сюресъёс герӟало милемды заводъёсын но матысь селоосын.
Колхоз дорысен матэтӥ гинэ ортчо кык чугун сюрес линиос, подъездной чугун сюрес линия герӟа заводэз чугун сюресэн.
Ужъёс.
Гожъятэк гинэ вералэ, тӥляд школа котырысьтыды музъем выл кызьы уже кутэмын.
Кыӵе воштӥськемъёс луизы татын Великой Октябрьской социалистической революция бере.
Музъем выл уже пӧртэм кутӥське.
Музъемлэн куд люкетъёсыз, ужаськыса, бусылы, бакчаослы но садъёслы пӧрмо.
Мукетъёсыз сельской хозяйствое озьы ик природной тусэнызы кутӥсько. Кылсярысь нюлэсъёс, возьёс.
Сыӵеосыз музъем люкетъёс, кудъёсыз кутӥсько сельской хозяйстволы, сельскохозяйственной угодиос шуыса нимасько.
Сельскохозяйственной угодиос пӧртэмесь луо: бусы, возь, нюлэс но мукет.
Музъемлэн бадӟым люкетэз шедемын юртъеръёс улэ — коркаос, заводъёс, фабрикаос, электростанциос, складъёс но пӧртэм мукет зданиос улэ.
abu
Ӵошкыт но гурезё интыосын музъем выл уже пӧртэм кутӥське.
Ӵошкыт интыын бадӟым площадьёс гырон-кизён улэ басьтэмын.
Шурлы матэ вӧлскемын бакчаос.
Шурлэн лапег ярдураз — возьёс но нюро интыос.
Вырйылъёс нюлэсэн яке турын куарен шобырскемын.
Гуртъёс ӵем дыръя шурлы матэ интӥяськемын.
Ӵошкыт интыысь сюресъёс вольытэсь; соос вылтӥ грузъёсты ворттыны каньыл.
Гурезьёсын гырон-кизён ӧжыт инты басьтэ, гурезь висъёслэн улыгъёсазы гинэ.
Нюлэсъёс гурезь бамъёсты шобырто.
Гурезь бамъёс меӵ ярдурен — утёсэн — васькон интыын гинэ соос уг луо.
Возьёс нюлэс выллапалан луо, нюлэсъёс бырон интыын.
Гурезь йылъёс лымыен но йӧэн шобырскемын.
Гуртъёс пуксемын гурезьёс вискысь нёжалъёсын.
Гурезьёсысь сюресъёсты лэсьто нялмыт гурезь бамъёстӥ котыръяса; гурезьёстӥ грузъёсты ворттон бадӟым кужымез кулэ каре.
Ужъёс.
Топографической планъя тодэ:
1. Кыӵе интыосын — улыгын-а, выр интыын-а возьёс возьматэмын?
2. Кыӵе интыосын нюръёс возьматэмын?
3. Кытын выгонъёс пусъемын?
4. Кыӵе интыосын — улыгын-а, выр интыын-а — нюлэсъёс интыяськемын?
5. Молотово село дорысен кудланьын луэ куаро нюлэс, кытын — суро нюлэс, кытын — лысо нюлэс?
6. План вылын кытыназ бакча?
7. Суредэз уже кутыса, план вылысь шедьтэ гырон-кизён интыез.
III. МУЗЪЕМ УЛЫСЬ НО МУЗЪЕМ ВЫЛЫСЬ ВУОС.
Музъем улысь ву.
Учке, ма луэ зорыку азбарын, садын, бакчаын.
Кӧс музъем зорлэсь нырысь шапыкъёссэ ӝог пыӵатэ но котме.
Кужмогес но кужмогес зорыны кутске.
„Кыӵе кужмо зоре“, — шуо адямиос но ватскыны дырто коркаосы, липет улъёсы.
Зор „ведраысь кадь“ кисьтэ.
Ӧръяськем вуос садэтӥ, азбаретӥ бызё. Ӧръяськемъёс пичи шур кадь луо.
Пичи шуръёс, огазеяськыса, бадӟымесь, кужмоесь потокъёс пӧрмыто, сюрес кузя, бакча убоос вискытӥ бызё.
Нош тани зор ортчиз.
Шунды потӥз.
Зорыку кылдэм пичи шуръёс но потокъёс пумен бызьыса быризы.
Нош кӧняез ке ву музъеме пыӵаз.
Кытчы со луиз?
Кызьы пыӵа ву луо но горд сюй пыртӥ, сое тодыны понна тодады вае естествознание урокын лэсьтэм опытэз.
Мае тӥ отысь адӟиды?
Луо пыр ву ӝоггес пыӵаз, горд сюй пыр ву каллен пыӵаз но, соин ик горд сюй сӥ вылын ву кема пукылӥз.
Тӥ шуиды: „луо ву пыӵатӥсь“, „горд сюй ву пыӵатӥсьтэм“.
Озьы ик луэ музъем вылын но.
Зор шапыкъёс но пичиесь ӧръяськем вуос бугырес почва пыртӥ но луо пыртӥ пыдлогес но пыдлогес пыӵало.
Но тани ву горд сюйлэн сӥяз яке чурыт из вылэ вуэ.
Ву татын люкаськыны кутске.
Музъем ул ву кылдэ.
Ошмесъёс, яке ошмес синъёс.
Музъем ул ву мынэ вупыӵасьтэм сӥ вылтӥ.
Солэн сюрес вылтӥз пумитаз мур вукырем яке шурлэн ярдурез ке шеде, со вупыӵасьтэм сӥ педлань потон интыетӥ ву музъем вылэ киське.
Озьы кылдэ ошмес, яке ошмес син.
Ужъёс.
Эскере асьтэ интыысьтыды ошмесъёсты.
Гурт дорысь мур вукыремысь, бадӟым из улысь, ошмес бызе.
Уй но нунал ошмесысь пичи шур ӵашетэ, вукыреметӥ уллань бызе но отын шуре киське.
Ву ошмесын чылкыт, дун но туж кезьыт, сое юыку, пиньёс ик вӧсь луо.
Ошмеслэн пыдэсыз луо но, ву улын чиляло вольытэсь, чебересь векчи кӧльыос.
Ошмес доры лобало тылобурдоос — юыны но нымы-кибыосты кутылыны.
Пӧсь нуналъёсы нылпиос ошмес дорын шудыны но солэсь дун вузэ учкыны ярато.
Татын туж умой, салкым.
Ошмесъёс сёто умой, чылкыт юон ву.
Соос ик вуэн тырмыто шуръёсты, тыметъёсты но тыосты.
Пыласькон дыръя куддыръя шедёно луэ сыӵе интые, кытын ву туж кезьыт.
Та интыын пыдэсаз ошмес потэ, мукет сямен шуэмзыя, ошмес синэз вань.
Ужъёс.
Топографической план вылысь шедьтэ ошмесэз.
Кыӵе гурт дорын со луэ?
Колодчаос.
Одӥг гуртын ошмессы ӧй вал, соин ик юыны умой вузы но ӧй вал.
Колодча гудыны кариськизы.
Уж борды кутскизы.
Лопаткаоссы улысь чылкыт луо пырдэ.
Быдэс нунал гудӥзы.
Гу котыре туж бадӟым луо люк будӥз, нош ву ялан ӧвӧл.
Кутскизы кесяськыны: „Гудэмлэн ма пайдаез, луоысь ву ум шедьтэ“.
Ӵуказяз — нош ик луо, вуэз нош ик ӧвӧл.
Озьы ик куиньметӥяз нуналэ но.
Куштыны ӧдъяло вал ини но, гулэн пыдэсаз копась егит пи шӧдтэк шорысь кесяськыны кутскиз: „Луо кот, ву!“
Ӝогак выльысь кутскизы уж борды.
Час но ӧз ортчы, гуысь куяны кутскизы луо интые горд сюй.
Пыдэсаз ву адскиз.
„Сылэ! — кеськиз бригадир, — тырмоз гудыны, ву дорозь гудӥськеммы“.
Ӵуказеяз колодча ӝыныозяз тырмиз чылкыт вуэн.
Кытын ӧвӧл ошмесъёс, кытын музъем ул ву музъем вылэ уг поты, отын адямиослы асьсэлы шедьтоно луэ ву.
Колодчаос гудо ву пыӵасьтэм сӥ доры вуытозязы, со сӥ вылын люкаськемын луэ музъем ул ву.
Куддыръя колодчаос туж муресь луыло — учкиськод ке, вуэз но уг адскы.
Ма каро зор вуос но тулыс зол кошкись вуос.
Тӥ тодӥськоды ини, что зор дыръя кылдэм пичиесь шуръёс но зол кошкись потокъёс шуре бызё.
Азбар, сад, бакча, сюрес мозмытскизы вулэсь.
Нош учке ай, ма луиз музъемлэн вылыз: быдэс со кырылэмын ӧръяськыса бызись зор вуэн.
Бугырес почва но луо васькытэмын азбарлэн улланесаз гопе.
Нош ӧръяськем зор вуос кошкем интыын изъёс кыре потэмын, гылтэм канаваосы соосты кин ке юри вӧлдэм кадь.
Бакчаын кӧня ке убоосты копак гылтэм.
Нош тужгес ик юн гылтӥз вырйылысь сюресэз.
Отын тужгес юн ӵашетӥз зор ву.
Со интые табере кылдэм туж мур вукырем: сюрес вылтӥ валэн ветлыны но уг лу ни.
Нош учке ай, ма каро тулыс, лымы шунаса, ӧръяськем вуос.
Ӝог кошкись пичи шуръёс котькудласянь кужмо бызё шуре.
Шур ярдуръёсысьтыз потэ но соос вылтӥ туж паськыт вӧлске.
Татын сюресэз гылтэм, отын кенерез нуэм, луд вылъёсы но бакчаосы луо но сумед ваем.
Лыдъяса но уд быдты ваньзэ тулыс вуэн лэсьтэм изъянэз.
Ужъёс.
1. Эскере, кызьы кылдо пичи шуръёс бадӟым зор бере азбарын, садын, сюрес вылын.
Учке, кыӵе воштӥськонъёс лэсьтӥзы та пичи шуръёс асьсэлэн сюрес вылазы.
Ӧз луэ-а ву гылтэмъёс сюрес вылын, бакчаын, бусыын, шурлэн ярдураз?
Бусыосты, возьёсты яке бакчаосты сюй пуктэмен ӧз сӧры-а?
2. Тӥляд интыяды мур вукырем вань ке, сое эскере.
Мур-а со?
Мур вукыремын пичи шурез бызе-а?
Тулысэн но зор бере бадӟымгес уг луы-а мур вукырем?
Уг куашкаты-а вукырем сюресэз яке бусыез?
Мур вукыремысь луоез но сумедэз ву уг потты-а шуре?
Ӧвӧл-а сыӵе вукырем, кудӥз вылын нюлэс будэмын?
Кыӵеез вукырем вуэн тросгес гылске — будосэн шобырскемез-а, будостэмез-а?
Вукырем.
Пыре бадӟым вукыреме.
Вылэ ӝутско солэн ӝужытэсь меӵ бордъёсыз.
Сюбег чурен гинэ адске ин бам.
Пыдэстӥз пичи шур жильыртэ.
Мынэ вукыремлэн йылозяз, яке солэн кутскон дорозяз.
Татын со туж мур ӧвӧл.
Отын каллен гинэ бызе пичи шур.
Кудъёсаз мур вукыремъёсын нош таӵе пичи шур но уг луы.
Тани нош кужмо зориз.
Ӧръяськем зор вуос котькуд ласянь вукыреме бызё.
Вукыреметӥ ӵашетыса ваське пож, дэриесь ву, солэсь ярдуръёссэ шукке, музъемез, муӵен-муӵен ишкалтыса, вукырем кузя уллань нуэ.
Бызись вуос вукыремлэсь йылзэ гылто, солэн пыдэсаз гуос гудо.
Урдэсъёсазы вылесь пичи вукыремъёс кылдыто.
Соос котькудлань кошко, бусыосты кырыло, гуртъёс доры вуо, ульчаосты гылто, сюресъёсты быдто, коркаос улэ пыро.
Вукыремъёс сельской хозяйстволы бадӟым изъян лэсьто.
Нянь удалтон интыосын кытын ке музъем гыремын, отын соос туж ӝог будо но туж бадӟымесь луо.
Озьы, Харьков дорын 15 ар ӵоже одӥг вукырем 230 метр кузя будӥз.
Табере вукыремъёсын нюръясько.
Нюлэсъёсты возьмало, тужгес ик вукырем йылъёсысь, малы ке шуоно, писпуос асьсэлэн выжыосынызы почваез юнмато.
Кытын ке нюлэс корамын ке, отчы выльысь мертто.
Вукыремлэсь йылзэ кутам кенерен юнмато.
Уж.
1. Топографической план вылысь шедьтэ, кыӵе гурт дорын вукыремъёс вань.
Пичи шур.
Ивановка гурт дорын, школа дорысен кыдёкын ик ӧвӧл, пичи гинэ шур вань.
Сое Елица шуо, со кыз нюлэсэтӥ бызе но, соин озьы шуо.
Одӥгаз география урокын дышетӥсь аслаз дышетскисьёсызлэсь юаз: „Кытчы бызе асьмелэн пичи шурмы но кытын солэн пумыз?“
Пиналъёс пӧртэм вераны, спорить карыны кутскизы.
Нокин но аслэсьтыз пичи шурзэ умой уг тоды, вылэм.
Вераськизы пичи шур доры экскурсия лэсьтыны.
Ӵуказеяз, сьӧразы карандашъёс, бумагаос, компасъёс басьтыса, пичи шур доры мынӥзы.
Пичи шурлэн кутсконэз.
Пичи шур нюлэсэтӥ, векчи кый кадь, бызе.
— Я, пиналъёс, кин нырысь ик шедьтоз, кытысь потэ пичи шур?
Юрак потӥзы кыр интые.
Татын кот вал, пыд улын ву сапыльтэ.
— Мон шедьтӥ, тани ошмес, — шуиз Катя.
Ваньзы гу доры бызизы. Солэн пыдэсаз музъем улысь ву бызе.
— Та Елица шурлэн шурйылыз, — шуиз дышетӥсь.
— Суредалэ та интыез.
Пичи шурлэн быземез кузя уллань.
Пичи шурлэсь кудлань быземзэ компасъя учкизы но солэн бызёнэзлы нялтас уллань мынӥзы.
Пичи шур нырысь бызе восток пала, собере юг пала берытске.
Интыен-интыен со ышылэ ӝокыт куакъёс пӧлы.
Котькуд кожоназ пиналъёс компасэз учкылӥзы но пичи шурлэсь бадӟым кожонъёссэ асьсэлэн суредазы пусйылӥзы.
Тани нюлэсысь потӥзы но вырйылэ ӝутскизы.
Татысен кыдёке адске вал пичи шурлэн возь вылтӥ читыр-чутыр кошкемез.
Пичи шурлэсь кожонъёссэ суредазы.
Дышетӥсь шуиз: „Со гоп, кытӥ бызе пичи шур яке бадӟым шур, ӧр шуыса нимаське
Пичи шурлэн ужез.
Пиналъёс гурезь уллань шулдыр бызьыса васькизы но пичи шур доры вуизы.
Отчы собере писпу ул куштӥзы но учкизы солэсь шурлэн быземезъя васькемзэ.
Васькизы уллань шур кузя.
Тодӥзы пиналъёс, кызьы кутэмын шурлэн бызёнэзъя тодыны бур пал но паллян пал ярдуръёсты.
Шур бызёнлань ке ымнырын султӥд, бур палан луоз бур пал ярдур, паллян палан — паллян пал ярдур.
Каллен гинэ бызе шур, ӧжыт гинэ жильыртэ пичи изъёс вылтӥ.
Вуэз солэн туж дун: вольытэсь векчи изэн — „кӧльыен“ вӧлдэм пыдэсыз ик адске.
Вулэн ӝог бызён интыостӥз адске, кызьы ву нуэ пичи шурлэн пыдэстӥз луоез но векчи изъёсты.
Пичи шур, бызён сюрес шораз вырйылэн яке бадӟым изэн ке пумиське, соосты котыртыса, со пала кариське, кытӥ умойгес кошкыны.
Котькуд кожоназ пичи шурлэн ужез адске.
Шурлэн бызёнэз одӥгаз ярдуре кужмо шуккиське, — сое гылтэ, тӥя но музъемез быдэс муӵен тӥяса нуэ, писпу выжыос ик, гольык луыса, кыре пото (32 сур.).
Мукет пал ярдуртӥз каллен бызе — отчы пуксе пичи шурен гылтэм луо.
Озьы арысь аре пичи шур одӥгзэ ярдурзэ гылтэ, мукетаз ярдураз луо пуктэ.
Нёжал кылдэ (33 сур.).
— Учке, пиналъёс, пичи шур шорын — музъем.
Со остров, — шуиз дышетӥсь (34 сур.).
— Нош отын, учке, ярдурлэн люкетэз кыдёке вуэ мычиське — со полуостров.
Пичи шурлэн шурвожез.
Пиналъёс тодо вал, что Елица шур Ока шуре усе.
Отчыозь ик мыныны кариськизы.
Ичи гинэ ӧз мынэ, жадизы ини.
— Номыре ӧвӧл, пиналъёс, ӝоген вуом, учке Елица трос паськыт луиз ини.
— Нош малы со паськыт луиз?
— Мон тодӥсько, — кеськиз Вася, — мон адӟи кызьы ву ярдурысен пичи шуре ӟиза!
— Зэм, со ошмесъёс Елица шуре бызё но солэсь вузэ пумен будэто.
Кыдёкын Окалэн вылыз чиля:
Елица трос паськыт луиз, бызёнэз калленазгес.
Ӧжытак кыдёказгес — Елица Ока шуре усиз ини.
— Тани та инты пичи шурлэн шурвожез (шур усён) шуыса нимаське.
Учке: шур усён интыын — сумед, нош шур шорын луо остров.
Со кылдэмын пичи шурен ваем луолэсь но сумедлэсь.
Ужъёс.
Лэсьтэ экскурсия пичи шур кузя (яке бадӟым шур кузя) но сое эскере таӵе планъя:
1. Шедьтэ пичи шурлэсь шурйылзэ.
2. Компасъя тодэ, кудлане пичи шур бызе.
3. Учке, вань-а солэн притокъёсыз (усись шуръёсыз).
Вань ке, кудласянь соос усё.
4. Шедьтэ, пичи шур кыӵе интыосын ярдурзэ куашкатэ, кыӵе интыосын луо пуктэ.
5. Учке, вань-а островъёсыз, полуостровъёсыз.
6. Тодэ, кытчы усе пичи шур.
7. Пичи шурез суредалэ но со улэ гожтэ, кытын солэн шурйылыз но кытын шурвожез.
Стрелкаен возьматэ ву быземлэсь кудланьзэ.
Вылаз гожтэ, кытын паллян пал ярдурез, кытын бур пал ярдурез.
Ужъёс (топографической планъя).
I. Экскурсия Быстрой шур кузя.
1. Стрелкая тодэ, кудлане бызе Быстрой шур?
2. Кудаз ярдурын (бураз-а, палляназ-а) пуксемын Лужки гурт?
3. Шурлэн кудӥз ярдурез меӵ, кудӥз нялмыт?
4. Кудпал ярдураз интыяськемын нюръёс но тыос?
Шур кыӵе интыяз луо пуктэм?
5. Кыӵе интыосаз шур вамен выжъёс лэсьтэмын (условной пусэз учкы)?
6. Кыӵе интыетӥз шурез колыса выжыны луоно (условной пусэз учкы)?
7. Быстрой шурлэн ярдуръёстӥз кызьы воштӥсько будосъёс (условной пусъёсты учкы)?
II.
...
Бадӟым шур.
Ӵошкыт интыосысь бадӟым шуръёс ӵем дыръя пичи шуръёсын кутско.
Пичи шуръёс огазеясько но бадӟымесь шуръёс кылдыто.
Шуръёс ялан азьлань но азьлань бызё.
Бадӟым шуръёс асьсэлэн кузь сюресъёссы кузя трос притокъёсты куто: пичи шуръёсты но бадӟымъёссэгес шуръёсты.
Кӧня ке притокъёс усьыса, шур туж бадӟым но трос вуо луэ.
Каллен но дыртытэк кошке со ӵошкыт интыетӥ, одӥг пала яке мукет пала палэнъяськыса.
Меӵ ярдуръёссэ шур куашкатэ, лапегъёсыз доры луо сумед кельтэ.
Ӵошкыт интыосысь бадӟым шуръёс вылын котьку но улон адске: котькуд пала пароходъёс мыно, со пароходъёс грузъёсты но пассажиръёсты нулло.
abu
Гурезьысь шур.
Гурезьысь шуръёс ӵошкыт интыысь чалмыт шуръёслы уг тупало.
Гурезьёс уллань соос, тӧдьы шукыяськыса, шузимем кадь васько.
Из люкъёс вылэ тэтчыса, соос вылтӥ погыльско, бадӟым изъёсты сьӧразы нуо, соосын пыдэстӥзы йыггето.
Беда солы, кин ке гурезьысь шур вамен колыса выжыны кариськиз ке.
Тани ма луиз одӥг путешественниклы, гурезь шур вамен выжыкуз.
Со вал вылын мынэ вал.
Вал вуэ пырыны гинэ вуиз, ӵашетыса кошкись ву сое пыдйылысьтыз погыльтӥз но, бергатыса, туж ӝог нуиз шурлэн шораз.
Еще кӧня ке секунд ортчыса, вал ву поръянэ ышиз.
Ярдурын сылӥсь адямиос адӟизы солэсь вуысь ӧжытак гинэ ӝутскылэмзэ, нош энерез буш вал ни.
Вылаз адямиез ӧй вал ни.
Бырем адямилэсь шӧйзэ куинь нунал ӵоже утчазы но, озьы чик ӧз шедьтэ.
Кыӵе пӧртэмзы гурезьысь шуръёслэн ӵошкыт интыетӥ бызись шуръёслэсь?
Гурезьысь шур вамен выжон малы кышкыт?
Кызьы адями уже кутэ шуръёсты.
Шуръёслэсь кужымзэс адямиос асьсэ хозяйствоязы уже кутыны дышизы.
Шуръёс вылэ лэсьто ву кужымен ужась вукоос, заводъёс но электростанциос.
СССР-ын туж трос электростанциос пуктэмын ини но еще трос пуктӥськозы на.
Вулэн кужымез адямилы подчиняться кариське но солы ужа (40 сур.).
Нош со ӧжыт ай.
Адямиос шуръёслэсь кудлань бызёнзэс но вошто, соосты отчы бызьыто, кытчы асьсэлы кулэ.
Со понна каналъёс кыро.
Куддыръя каналэн огазеяло одӥгзэ шурез мукетэныз.
Бадӟым город, СССР-лэн столицаез — Москва.
Нош Москва шур, кудӥзлэн дураз сылэ столица, лазег вуем.
Бадӟымесь пароходъёс отӥ ветлыны уг быгато.
Москва шурен но Волга шурен вискы канал гудӥзы.
Волгаысь ву Москва шуре бызьыны кутскиз.
Москва шур трос вуо луиз но, столицае Советской Союзлэн котькуд пал пумысьтыз лыктыны кутскизы пароходъёс.
Ты но тымет.
Трос интыосын музъем вылтӥ шедьыло вуэн тырмем бадӟымесь гопъёс.
Со тыос.
Кытын ке тыос ке ӧвӧл, сыӵе интыосын адямиос ӵем дыръя тыметъёс тымо.
Уж.
Тӥляд интыяды ты ке вань, отчы экскурсия лэсьтэ, учке сое.
Ужъёс.
1. Топографической план вылысь шедьтэ тыметлэсь но тылэсь условной пусъёссэс.
2. Топографической планъя тодэ:
Кӧня ты со вылын суредамын?
Кӧня тымет?
Самой бадӟымез ты план вылын кызьы нимаське?
Масштабъя тодэ солэсь кузьдалазэ.
Ты.
Котькуд пала олокӧня километр кыстӥське тылэн чус пукись вылыз.
Синэз вӧсь карымон со пиштэ гужем шундылэн лучъёсыз улын.
Ву вадьсын улӥетӥ лобало тӧдьы чайкаос.
Луоё ӝужыт ярдур пужым нюлэсэн шобырскемын.
Ты вадьсын, нюлэс сайын, гурт пуксемын.
Лапег ярдурлэн луо пуксемаз чорыгасьёслэн пыжъёссы сыло но мурдооссы куасьтӥсько.
Пыжъёс котырын нылпиос.
Луо вылын но, вуын но — огъя адскыло соослэн шунды пыжем гольык тыбыръёссы.
Лапег ярдур кузя пыжын чорыгась уя.
Вуысь ӵуж сяськаослэн паськытэсь куаръёссы вылтӥ пыж ӵаштыртэ, ӵем будэм камыш пӧлтӥ но тросник пӧлтӥ кошке.
Чорыгась мурдооссэ пуктэ.
Чорыгась аслэсьтыз ужзэ быдтӥз, ярдуре лыктӥз но, пыжзэ ярдуре поттыса, лапег нюр ярдур кузя гуртаз кошкиз.
Чорыгась нюр вылтӥ малпаса мынэ: „Азьвыл татын нюрез ӧй вал.
Ты нюлэс доры ик вуэ вал, нош кытын али ӵем камыш будэмын, отын чылкыт вулэн ӵошкинэз вал.
Милям тымы ярдуръёстӥз турынкуарен шобырске но нюрлы пӧрме“ (41 но 42 сур.).
Нюр.
Гуртлэсь палэнын нюлэс шорын — ӝуё бадӟым нюр.
Солэн дуръёстӥз сыло ӝужытэсь веськрес пужымъёс, нош шораз — лапегесь гинэ чиедэсь пужымъёс, тросэз копак быремын.
Писпуос вискын — баблес торфяной ӝуен согиськем муӵъёс.
Муӵъёс вылын — векчи куаро пичиесь кызьпуос, лапег бадьпу.
Нош ӝуй вылын вӧлскемын нюрмульылэн пужыё вайёсыз бадӟымесь горд емышъёсынызы.
Кудымульы тусъемесь пьяника емышъёс лыз-лыз адско.
Туж кӧш зыно багульник будэ.
Кызьпуос ӵужектӥзы.
Сӥзьыл вуиз ини.
Нюрмульы понна нюр вылэ мынон дыр вуиз.
Люкаськизы нылъёс, корзинкаос басьтӥзы.
Дэремъёссэс ӝиктӥзы, пыдъёссэс кылизы.
Тани нюр доры вуизы.
Гольык пыдъёс, небыт миндэре кадь, выё ӝуй ковере.
Муӵъёс горд емышен шобырскемын.
Корзинкаос туж ӝог тырмо.
Нылъёс ваньзы огинынгес ветло.
Маша гинэ огназ кылиз, со ӧвӧл шӧдэм эшъёсызлэсь кошкемзэс.
Кышкыт огнын нюр вылын.
Эшъёсты ӝоггес сутоно!
Со эскерыса вамышъя азьпала муӵъёс вылтӥ, кесяське, нош куара сётӥсь нокин но ӧвӧл.
Бызьыны кутскиз, пыдулзэ но уг учкы.
Шуак со шӧдыны кутскиз — пыдъёсыз солэн пыдесыныз ӵош вуын.
— Кытчы тон, ныл?
— кылӥськиз куара.
Со дорысен куинь вамыш кемын гинэ сылэ пересь лесник.
— Яра-а ма нюретӥ кужен ветлыны.
Ӧжыт гинэ мынысал на ке, „укнояз“ шедьысал.
Зэм но, кыдёкын ик ӧвӧл ву чиля.
Азьвыл татын ты вал.
Дуръёстӥз со кемалась будосэн согиськемын но, отӥ ветлыны луэ, нош шораз векчи ӝуй ковер гинэ, нош со улын ву.
Интыен-интыен кылемын чылкак шара ву — „укноос“.
Нюръёс ӵем дыръя ты бервылэ кылдо.
Ты ӵоксаське нюр будосъёсын.
Сӥзьыллы быдэ нюр будосъёс быро но, вуоно араз соос интые выльёсыз будо.
Бырем будосъёс пыдэсаз выё.
Нюр пыдэсын люкаське бырем будосъёслэсь сӥ.
Ву улын соос уг сисьмо, а сьӧдэкто, пӧсектыса, таӵ-таӵ пуксё но торф луо.
Трос аръёс ӵоже торфлэн зӧк сӥез люкаське.
Куддыръя ты вылэ нюр уг кылды, огшоры кот интые гинэ кылдэ, сыӵе интыын, кытын ву кема пуке но, отчы торф ӝуй потыны кутске.
Нюръёс трос изъян лэсьто.
Музъемлэн бадӟым люкетъёсыз буш кыллё, гырон-кизён уже уг кутӥсько.
Ветлон сюресъёс, котырскыса, палэнтӥз кошко.
Нюр вылын кезег но мукет висёнъёс вӧлмемын луо.
Советской власть кылдэм бере нюръёсын нюръясько ини, соосты куасьто, соос интые возьёс, бусыос но бакчаос вӧлмыто.
Уж.
Тӥляд интыяды нюр вань ке, отчы экскурсия лэсьтэ, сое описать каре.
Эстӥськон нюр вылын.
Шурлэн улыг ярдуртӥз 20 километр кеме нюр кыстӥське.
Пыдын но, валэн но отӥ мыныны уг луы!
„Бырем инты.
Юнме музъем быре“, — шуылӥзы со сярысь крестьянъёс.
Лыктӥзы нюр вылэ инженеръёс но ужасьёс.
Сыръясь нюрез эскеризы но нюрысь трос эстӥськон — торф шедьтӥзы.
Нюр улӟиз.
Землечерпалкаос ужаны кутскизы.
Лопаткаос жингырто.
Вагонеткаос дыбырто.
Нюре канаваос кыризы но, со канаваостӥ котькуд ласянь шуре ву бызьыны кутскиз.
Куасьтӥзы нюрез.
Азьло бырем интыостӥ сюресъёс лэсьтӥзы.
Азьло нюр вылэм интыетӥ тракторъёс ветло, сьӧразы резецо бадӟымесь барабанъёсты нулло.
Резецъёс торфе бышкасько.
Механической мажесъёс торфез, турынэз сямен, берыкто.
Торфез люкъёсы люкало но заводъёсы но фабрикаосы нуо.
Ӝоген татчы электростанция пуктэмын луоз.
Торф топкаосын сутӥськоз но машинаосты ужатоз.
Машинаос электрической ток поттозы но, со ток проводъёс кузя мыноз фабрикаосы, заводъёсы, колхозъёсы но совхозъёсы.
Уж.
...
Мора.
Тыос сяна, музъем вылын вань на мораос но.
Тыос сярысь соос туж бадӟымесь но, вузы котьку курыт-кузьыт луэ.
Тылэн кыдёкысь ярдуръёсыз адско.
Моралэсь нош, котькӧня кыдёке учкы, — ярдурзэ уд адӟы.
Мора вылтӥ пароход нунал, кык мынэ, нош ярдурез ялан уг адскы.
Котькытчы учкы — огъя ву.
Шунды но ӵукнаосы вуысь ӝужа кадь, нош ӝытазе выльысь вуэ пуксе кадь.
Нырысь ик мон мораез вагон укноетӥ адӟи.
Поезд каллен гинэ матэ вуэ вал пичи город доры Черной моралэн ярдураз.
Мон укноетӥ учки но, адӟемелы шумпотыса, сюлмы ик путэ вал.
Мон азям пумтэм-йылтэм вӧлскемын лыз мора.
Поезд дугдӥз.
Ӝокыт вагонысь мон потӥ.
Ымныр шоры моралэн юзгес но кузьыталэс тӧлыз ыртэ.
Кӧня ке минут ортчыса, мон ярдурын сылӥ ини.
Мынам пыд дорам мора пальккаське.
Ӵаш вазьыса шуккиськылӥзы ярдуре вожмыт чагыр тулкымъёс но, берен кошкылӥзы, каллен гинэ ӵашетыса.
Кыдёкын мора ик бамен ваче вуэ но, валаны уг луы вал, кытын моралэн пумыз, кытын ин бам кутске.
Мон султӥ мораысь мычиськем бадӟым из вылэ.
Ву котырак чылкыт но дун вал.
Пыдэсысьтыз умой адско векчи изъёс, уясь чорыгъёс, вожесь, курень но гордалэсэсь морской будосъёс.
Мон сильтӧл дыръя но мора вылын вадьсаськылӥ.
Ми мынӥм Черной мораетӥ.
Ин шобыртэмын вал сьӧд пилемъёсын.
Кужмо тӧл шукыё бадӟымесь тулкымъёс ӝутъя.
Мора шукыръяське, бугыръяське, ӵашетэ.
Омырын пумтэм-йылтэм нуллӥсько ву пазьгиськемъёс.
Тӧллэн вузэмез но шуламез, тулкымъёслэн ӵашетэмзы но пальккаськемзы пелез урмыто.
Милесьтым пароходмес, шелепез кадь, нуллэ, куя.
Со яке тулкымъёс йылэ тубе, яке кӧт шурдымон мур зумылэ.
Тулкымъёс пароходлэн дуръёсыз вамен шуккиськыло.
Одӥг полаз монэ ӧжыт гинэ ӧз нуэ ву тулкымъёс, гылтыса. Ӧжыт гинэ возькыны быгатӥ, перилаос борды кутскыса.
Пыд улын лэйкась палуба вылтӥ ветлыны луонтэм вал.
Одӥг предмет дорысь мукет предмет доры ӝог бызьылыса но соос борды зол кырмиськыса, улоно луылӥз.
Ас каютаям мон мырдэм-мырдэм гинэ вуи.
Татын но маке борды кутскытэк, пыд йылын сылыны уг луы вал.
Пол пыдъёс улысь яке кошкылӥз, яке туж вылэ ӝутскылӥз.
Бордъёс солань-талань берыкъяськылӥзы.
Корзинаос, чемоданъёс но сӧриськем посудаослэн пырыоссы сэрегысь сэреге сэрпалляськылӥзы.
Пароход лэйкамлэсь висьыны кутскем пассажиръёс, номыр карыны быгатытэк, койка вылазы кыллизы.
Музэ медаз усе шуыса, соос койка бордазы юн кырмиськыса улӥзы.
Мон но выдӥ.
Тулкымъёс кужмо шуккиськылэмен, пароход ялан зуркалскылэ.
Пароходлэсь кортэн шуккем дуръёссэ тулкымъёс тани-тани пазьгозы кадь потэ вал.
Дас час ӵоже кыстӥськиз сильтӧл.
Берпумаз, ми туж бер гинэ ярдуре вуим
Мораосын куддыръя озьы бӧрсе олокӧня нуналъёс ӵоже сильтӧл кыстӥське.
Трос пароходъёс бырыло сыӵе дыръёсы.
IV. ГЕОГРАФИЧЕСКОЙ КАРТА
Ма со географической карта.
Асьмеос тодматским пӧртэм планъёсын, школа участоклэн, школа котырысь интылэн планъёсынызы но топографической планэн.
Ваньмаз ик со планъёс вылын суредамын музъемлэн пичи люкетэз.
Асьмеос чертёж вылын бадӟым интыез ке возьматӥськом, кылсярысь, быдэс областез яке быдэс государствоез, соку сыӵе чертёж нимаське географической карта шуыса.
Планэз географической картаен ӵошатон.
Учке Москвалэсь планзэ 46-тӥ суред вылысь.
Кыӵе солэн масштабез?
Масштабъя тодэ, Москвалэн татын возьматэм люкетэз кӧня километр луэ северысен юг пала но западысен восток пала.
Та план вылысь шедьтэ Москва шурез, Яуза шурез, каналэз, Кремлез, городлэсь ульчаоссэ.
Табере учке Москва котырысь интылэсь планзэ.
Кыӵе солэн масштабез?
Та планлэн котькуд палыз, азьло планлэн сямен ик, быдэн 5 сантиметръем.
Музъемлэн татын возьматэм люкетэз кӧня километр луэ север паласен юг пала но запад паласен восток пала?
Кызьы возьматэмын Москва?
Планлэн шораз пичи квадратэн пусъемын Москвалэн со люкетэз, кудӥз возьматэмын вал нырысетӥяз план вылын.
Адӟиськоды-а, кыӵе пичи луиз городлэн та люкетэз?
Соин со пичи луиз, что кыктэтӥ планын масштаб пичиомиз: Москвалэн план вылаз 1 сантиметрын — 1 километр, нош кыктэтӥяз планын 1 сантиметрын — 10 километр.
Масштаб 10 пол пичиятэмын, соин ик суредэз но пичи луиз.
Кыктэтӥ план вылысь шедьтэ Москва шурез но Яуза шурез.
Кытын нош канал?
Кытын Кремль?
Соос уг адско, соосты возьматыны уг луы таӵе пичи масштабын.
Но со понна кыктэтӥ планэ тэризы мукетъёсыз но шуръёс, мукет городъёс, чугун сюресъёс но станциос.
Табере учке СССР-лэн Европейской люкетэзлэн Центрезлэсь картазэ.
Кыӵе масштабез та карталэн?
Кӧня пол пичи та масштаб, Москва котырысь интылэн планэзлэн масштабез сярысь?
Учке, кыӵе гинэ пичи квадратэн возьматэмын план вылын быдэсак со инты, кудӥз возьматэмын вал кыктэтӥ план вылын.
Кызьы возьматэмын карта вылын Москва город?
Адско-а Москва шур, Яуза шур?
Возьматэмын-а карта вылын Мытищи город но мукетъёсыз Москва дорысь городъёс?
Соос ӧвӧл, соосты возьматыны уг луы таӵе масштабен.
Но со понна карта вылэ пыртэмын Ярославль, Калуга, Тула но мукетъёсыз городъёс.
Табере асьтэос ӵошатэ СССР-лэн Европейской люкетэзлэн Центрезлэсь картазэ быдэс СССР-лэн картаеныз.
Кыӵе пӧртэмез та картаослэн масштабъёсазы?
Музъемлэн бадӟымезгес люкетэз кудаз возьматэмын?
Нырысетӥ карта вылын возьматэм шуръёс но городъёс ваньмыз-а возьматэмын кыктэтӥяз но карта вылын?
Планлэн но географической карталэн масштабзы макем пичи, сокем ик ӧжыт возьматэмын соос вылын подробностьёс.
Суредам интыез макем трос тодыны луэ планъя, картая но сокем ик трос тодыны луэ котькуд страна сярысь.
Картаосты, планъёсты сямен ик, чертить каро, музъем вылэ вылӥысен, аэропланысен, кадь учкыса.
Географической картаос планлэсь пӧртэм луо масштабъя.
Планэз чертить карыку, басьто бадӟым масштаб: кылсярысь, планлэн 1 сантиметраз — олокӧня дасо но сю метръёс.
Картаосты чертить карыку, масштаб пичигес луэ: географической карталэн 1 сантиметраз — олокӧня дасо яке сю километръёс луо.
Пичи предметъёс (пичи тыос, шуръёс) карта вылын уг возьматӥсько.
Бадӟымъёсыз возьматэмын луо таӵе пусъёсын: шуръёс — читыр-чутыр линиосын, городъёс — котретъёсын, чугун сюресъёс — линиосын.
Ужъёс.
Басьтэ асьтэ гурттылэсь (колхозлэсь яке городлэсь) планзэ, асьтэ райондылэсь планзэ, областьлэсь картазэ но СССР-лэсь картазэ.
Соосты артэ оше но куспазы ӵошатэ.
1. Кыӵе масштабъёсын лэсьтэмын: гуртлэн (колхозлэн яке городлэн) планэз, районлэн планэз?
Кыӵе масштабен — областьлэн картаез?
Кыӵе масштабен — СССР-лэн картаез?
Кытын масштабез бадӟымгес?
Кытын пичигес?
2. Кызьы пусъемын тӥляд гуртты районлэн план вылаз?
Районлэн планэз вылын малы пусъемын ӧвӧл гуртлэн планэз вылын адскись коркаос но ульчаос?
3. Районлэн планэз вылысь шедьтэ районной центрез.
Кыӵе шуръёс, тыос но гуртъёс вань районной центр котырын?
Областьлэн картаез вылысь шедьтэ асьтэ райондылэсь центрзэ.
Областьлэн картаез вылын возьматэмын-а ваньмыз районлэн планэз вылын возьматэмъёсыз гуртъёс, шуръёс, тыос?
Областьлэн картаез вылысь шедьтэ областной центрез.
Областной центр котырын кыӵе шуръёс но кыӵе гуртъёс вань?
СССР-лэн картаез вылысь шедьтэ областьтэс?
Областьлэн картаез вылын возьматэм гуртъёс но шуръёс СССР-лэн картаез вылын вань-а?
4. Масштабъя лыдъялэ:
1) Кӧня километр тӥляд гуртысеныды районной центрозь?
2) Районной центрысен областной центрозь?
3) Областной центрысен Москваозь?
Кызьы возьмато страналэсь вылзэ карта вылын.
Асьмеос тодӥськом ини, что топографической план вылын улыг интыос буясько вожен, нош выр интыос — ӵужен но тӧдьмыт ӵужен.
Сыӵе буйёсын ик буямын луэ географической карта но.
(СССР-лэсь картазэ учке).
Со буйёс карта вылын но озьы ик возьмато пӧртэм ӝуждалаё интыосты.
Мувырлэсь ӝуждалазэ котьку возьмато мораысь вулэн уровеньысеныз (ӵошкинысеныз), малы ке шуоно, ву котькуд мораын котьку огкадь уровеньын луэ.
Карта вылын бадӟым интыос вожен, сьӧдмыт ӵужен яке ӵужен буямын.
Со ӵошкыт интыос.
Но со ӵошкыт интыос мора уровеньысен пӧртэм ӝуждалаын кыллё.
Ӵошкыт интыос, кудъёсыз карта вылын вожен буямын, мора уровеньлэсь 200 метрлэсь вылэ уг ӝутско, сыӵе ӵошкыт интыос нимасько улыг интыос шуыса.
Мора уровеньысен 200 метрлэсь вылэ ӝутскись интыос выр интыос шуыса нимасько, карта вылын соос сьӧдмыт ӵужен но ӵужен буямын.
Карта вылын сюбегесь ӵужесь но тӧдьмыт ӵужесь полосаос гурезьёсты возьмато.
Гурезьёс моралэн уровенезлэсь макем вылэ ӝутско, соослэн буйзы но сокем ик сьӧдмытгес луэ.
Гурезьёслэн лымыен но йӧэн шобырскем йылъёссы тӧдьыен возьматэмын.
Ужъёс.
Учке СССР-лэн физической картаез улысь, кыӵеесь условной пусъёсын возьматэмын улыгъёс, выр интыос, шоролык ӝуждалаё гурезьёс, ӝужытэсь гурезьёс но соослэн лымыё йылъёссы.
СССР-лэн музъем вылыз.
Учке СССР-лэн картаез вылэ.
Тӥ адӟиськоды, что солэн бадӟым люкетэз вожен буямын.
Син сузёнтэм бадӟымесь улыг ӵошкыт интыос Советской Союзын туж паськыт пространствое вӧлскемын.
Поездын мынӥськод нуналъёсын, арняосын но азьпаласьтыд пумтэм кыдёке кошкись ӵошкыт интыез гинэ адӟиськод.
Со ӵошкыт интыез Уральской гурезьёс кык люкетлы люко.
(Карта вылысь шедьтэ, Уральской гурезьёслэн кыкна палазы улыг интыос кызьы нимасько.)
СССР-лэн картаезлэн куд-ог интыосыз сьӧдмыт ӵужен буямын.
Татын — выр интыос.
(Карта вылысь шедьтэ, кызьы нимаське СССР-лэн самой бадӟым выр интыез.)
Ӵошкыт интыослэн дуръёстӥзы тросэтӥ ӝутско, ӝужытэсь бордъёс кадь, бадӟымесь из гурезьёс.
Соос кузь хребетъёсын кыстӥсько трос сю но сюрс километр кеме.
(Шедьтэ Кавказской гурезьёсты.)
Ужъёс.
1. Москваысен Владивостокозь (Японской мора дурын) чугун сюресэз эскере но вералэ, со сюрес кыӵе улыг интыостӥ, выр интыостӥ но гурезьёс пыр ортче.
2. Шедьтэ Москва городэз.
Эскере, кыӵе шуръёс кузя мыныны луоз Москваысен Каспийской морае.
Москваысен Волга шур вожозь кусыпез масштабъя шонерак мерталэ.
V. МУЗЪЕМ ШАР.
Вашкала дыръя адямиос кыӵе малпаллязы музъемлэсь туссэ.
Вашкала калыкъёс асьсэ улон интызы котырысь пичи пространствоез гинэ тодылӥзы.
Соку ӧй на вал чугун сюресъёс, кудъёсыз вылтӥ асьмеос али капчиен но ӝог ортчиськом бадӟымесь кусыпъёсты.
Мораос, океанъёс вылтӥ ветлон пароходъёс но ӧй вал.
Вашкала дыръя мораос вылтӥ полысъёсын яке парусъёсын нуллӥськись пичиесь пу корабльёсын ветлылӥзы.
Соку компасэз но ӧз тодылэ, мора шортӥ мыныку, мыноно сюрестэ компастэк уг луы шедьтыны.
Соин ик вашкала калыкъёс кышкаллязы мора вылэ кыдёказ мыныны но ярдур котыртӥз гинэ уяллязы.
Вашкала калыкъёс музъемез пичи гинэ кожало вал.
Соос малпаллязы, что музъем океанлэн шораз кыллись ӵошкыт круг гинэ.
Таӵе сказкаос потылӥзы: музъем, пе, „куинь китъёс вылын“ пуке, мукет интыосын шуылӥзы — „слонъёс вылын“, „бадӟым черепаха вылын“.
Вашкала грекъёслэсь, соку дыре самой образованной калыкъёслэсь, кылемын географической картаос.
Соос пӧлысь одӥгез возьматэ соку тодэм дуннеез быдэсак.
Карталэн шораз ик Греция интыяськемын; со котыртӥ интыяськемын вашкала грекъёслы тодмо музъемъёс.
Ваньмыз со музъемъёс вуэн — океанэн — котыртэмын.
Грекъёс океанэз лыдъяллязы туж бадӟым шурен; соос шуылӥзы, что океан музъем котыртӥ бызе.
Океан сьӧрын, грекъёслэн малпамзыя, музъемлэн пумыз луэ.
Музъемлэн тусыз но быдӟалаез.
Адямиос музъемлэсь туссэ пумен умойгес тодыны кутскизы.
Путешественникъёс, купецъёс но завоевательёс ялан кыдёке но кыдёке выль странаосы вуылӥзы но музъемлэн пумозяз ноку но ӧз вуылэ.
Вашкала ученойёс вуизы таӵе малпанозь, что „музъем — ӵошкыт круг ӧвӧл, что солэн тусыз (формаез) шар кадь.
Магеллан путешественник 400 ар талэсь азьло музъемез котыртӥз но аслаз путешествиеныз оскытӥз, что музъем зэмен ик шар тусъем.
Табере калыкъёслы музъем быдэсак тодмо ини.
Пароходъёс вань мораос вылтӥ ветло, аэропланъёс музъем вадьсытӥ пӧртэм-пӧртэм палъёсы лобало.
Музъемлэн пумыз нокытын но ӧвӧл.
Табере котькин тодэ ини, что музъем — шар.
Музъем шар туж бадӟым.
Сое котыртыны понна 40 сюрс километр ортчоно.
Одӥг нунал но шутэтскытэк, суткалы 40 километр мыныса, музъемез котыртыны понна куинь аръёс мыноно луысал.
Асьмеос котырысьтымы музъем вылэз пичи гинэ адӟиськом, соин ум шӧдӥське шар вылын улэммес.
Музъем шарлэн кытын улӥез но кытын вылӥез.
Эскере 52-тӥ суредэз.
Со вылын суредамын музъем шар.
Музъем шарлэн пӧртэм интыосаз адямиос сыло.
Музъем вылын сылӥсь адямиослэн ваньзылэн ик пыдъёссы музъем шарлэн шор палаз, центраз, шонерскемын.
Нош музъемлэн мыд-мыд пал люкетъёсаз сылӥсь адямиос огзылы огзы пыдъёсынызы ваче пумит луо.
Нош асьме вадьсысь, асьмелы пумит сылӥсь, адямиос малы уг усё, мораосысь, шуръёсысь но тыосысь ву малы уг кисьтӥськы?
Музъем, со вылын ма гинэ вань, сое ваньзэ ас бордаз кыске, вылэм.
Музъем вылысь лэзем макеос вылӥе уг лобӟо, музъем вылэ усё.
Глобус.
Музъемез пичи шар выллем возьмато, сое глобус шуыса нимало.
Глобус — со музъемлэн пичиятэм моделез.
Глобус шар стержень — ось (черс) вылэ бырттэмын но пуктос борды юнматэмын.
Музъем шарлэн, конечно, осез но, пуктосэз но ӧвӧл.
Глобус — музъем шарез самой умой, шонер возьматӥсь маке.
Глобуслэн вылыз географической карта кадь ик буямын.
Лыз но чагыр буен возьматэмын вуэн шобыртэм пространство, вожен, Чужен но бусӥрен — музъем, яке, мукет сямен шуэмзыя, мувыр.
Музъем шар вылын маиз вань.
Глобус вылысь адске, что музъемлэн бадӟым люкетэз вуэн шобырскемын.
Музъем шарлэн одӥг куиньмос люкетэз гинэ мувыр.
Кык куиньмос люкетэз вуэн шобырскемын (53 сур.).
Вань ву пространствоез люко ньыль океанлы: Тихой, Атлантической, Индийской но Северной Ледовитой океанъёслы.
Океанъёс вискын бадӟымесь люкетъёсын мувыр потэмын.
Мувырез люко куать дунне люкетъёслы: Европа, Азия, Африка, Америка (Северной но Южной), Австралия но Антарктида.
Витяз дунне люкетъёсын калыкъёс уло.
Куатетӥяз — Антарктидаын — улӥсь калыкез ӧвӧл.
Глобус вылысь учке, Африка но Европа маин люкемын огзылэсь огзы.
Татысь тӥ адӟиськоды чагырен буям пространствоез.
Со — Атлантической океанлэн люкетэз.
Со пыремын Европаен, Азиен но Африкаен вискы но нимаське Средиземной мора шуыса.
Мора — со океанлэн мувыре пырем люкетэз яке островъёсын котыртэм люкетэз.
Ужъёс.
1. Глобус вылысь шедьтэ ньыль океанъёсты но куать дунне люкетъёсты.
2. Глобус вылысь шедьтэ Средиземной мораез но Японской мораез.
Музъем котыртӥ нырысетӥез путешествие.
Тӥ тодӥськоды ини, музъем шарез нырысь ик 400 аръёс талэсь азьло Магеллан путешественник котыртэм.
Соку дыре Европалэн пӧртэм странаосысьтыз купецъёс вузкарылӥзы Азиен но Австралиен вискын интыяськем островъёсын но Индиен.
(Глобус вылысь шедьтэ Индиез но та островъёсты.)
Со купецъёс отысь узырлыкъёсты вожмаськыса киултыны турттылӥзы.
Соослэн вузкарон корабльёссы отчы Африка котыртӥ но кыдёкетӥ Индийской океан вамен ветлылӥзы.
(Возьматэ со сюресэз глобус вылысь).
Испанской купецъёсты мукет странаосысь купецъёс со сюрес кузя ветлыны ӧз лэзьылэ. Соин Магеллан испанской корольлы дэмлаз мукет сюрес утчаны.
Магеллан умой оске вал, что музъем — шар, соин со мукет ласянь вуыны медэ вал островъёс доры.
Но со уг тоды вал, кыӵе бадӟым музъем шар но кыӵе шуг-секытъёсты со адӟоно луоз сюрес вылын.
Магелланлэн вить парусной корабльёсыз Европалэн ярдуръёсысьтыз (Испаниысен) потӥзы но Южной Америкалэн ярдуръёсыз пала кошкизы.
(Глобусъя возьматэ Магелланлэсь сюрессэ.)
Куинь толэзь ӵоже мынӥзы корабльёс Атлантической океан вылтӥ.
Котырак, нокыӵе ярдуръёс адскытэк, пасьтана ву гинэ адске вал.
Пумен пӧсь луиз.
Быдэс нуналъёс ӵоже Магеллан палубаын сылӥз, азьпалзэ умой учкылыса.
Бератаз, Южной Америкалэн ярдурез адскиз.
Корабльёс со ярдур кузя мынӥзы.
Одӥг интыын корабльёс ярдуре ик мынӥзы шӧг ву но сион-юон басьтыны понна.
Туж пӧсь вал.
Со ярдурын туж усто писпуос будо.
Татын индеецъёс уло вал.
Соослэн ыргон тусъем горд мугоръёссы шунды шорын, бронза кадь, чиляло.
Соос путешественникъёс доры лыктӥзы но соосын вузкарыны кутскизы.
Гребенка понна индеецъёс кык ӟазег сётылӥзы, нош стекло кусок понна — уно муртлы сиыны тырмымон чорыг.
Запас ву но сион-юон басьтыса, корабльёс нош ик азьпала кошкизы.
Мынэмзыя шӧдскымон салкым луыны кутскиз.
Огпол туж кужмо сильтӧл потӥз.
Корабльёсты кужмо шуккылӥз туж лек тӧл.
Туж бадӟымесь тулкымъёс ӝутскылӥзы.
Корабльёс тулкымъёс вылын, маке кӧмъёс кадь, лэйкаллязы.
Тани-тани гурезь скалаос борды мырӟиськозы но, дано морякъёс тулкымъёсы бырозы кадь потылӥз.
Одӥгез корабльзы сильтӧл дыръя озьы ик выиз, нош кылемъёсыз Южной Америкалэн ярдуръёсыз кузя пумен кыдёке кошкизы.
Март толэзь вуиз.
Родинаязы, Европаын, шуныт тулыс вал, а татын кезьыт луиз.
Июнь толэзь вуиз, а татын ӟарт кезьытъёс, лымы пельсконъёс кутскизы.
Кемалась ик ӧвӧл путешественникъёс пӧсьлэсь курадӟизы, табере нош кезьытлэсь чидантэм курадӟо ини.
Толйыны дугдоно луиз.
Юн кезьытъёс ортчем бере ик корабльёс нош ик азьпала мыныны потӥзы.
Бератаз ини, соос пролив шедьтӥзы но отӥ потӥзы Атлантической океанысь Тихой океанэ.
Морякъёс шумпотэменызы бӧрдӥзы.
Соос малпало вал, лэсьтоно ужзы быдэсме ини шуыса.
Запад пала мыныса, Индие уз вуэ шуыса, нокин оскисьтэмез ик ӧй вал.
Со пролив берло Магеллан пролив шуыса нимамын вал.
(Сое глобус вылысь шедьтэ.)
Куазь чус-чус, мынонлы нялтас тӧл ӧжытак пельтэ.
Океан шып вал, векчи тулкымъёсыз каньылэн гинэ бӧрсе-бӧрсе кошко.
Магеллан со океанэз „Тихой“ (чус) шуыса нимаз, со ӧз тодылы, что куддыръя со океан вылын туж лек сильтӧлъёс луыло.
Ӝоген корабльёс потӥзы кезьыт интыосысь; пумен шуныт луыны кутскиз.
Корабльёс кема толэзьёс ӵоже мынӥзы океан вылтӥ, островъёсты но шедьтылытэк, музъемез но адӟылытэк.
Сион-юон басьтыны нокытысь вал.
Пу опилкаосты (пила пызез) сиылӥзы, мачтаос вылэ вурылэм куэз пӧзьтылӥзы.
Корабльёсысьтызы комакъёсты сиылӥзы; соос ческыт сионэн лыдъясько вал.
Юон вузы ӧз тырмылы, котырак вуэн ке но котырскемын вал.
Океанысь вуэз юыны уг луы, малы ке шуоно, со курыталэс кузьыт.
Нош сьӧразы басьтэм шӧг вузы корабльын кӧшектӥз.
Юоно луылӥзы пож, сисьмем вуэз.
Адямиос висьылӥзы но кулылӥзы.
Морякъёс малпало вал, ву вылтӥ мынонзылэн пумыз но уз вуылы ни шуыса.
Бератаз, путешествизы кутскем дырысен кык аръёс ортчыса, Магеллан адӟиз утчано островъёссэ.
Лэсьтоно ужез быдэсмиз — выль сюрес усьтэмын вал.
Татысен Европае сюрес тодмо вал ини.
Островъёс вылын шунды пӧсь шунтэ вал.
Ярдуръёс доры ик сьӧд нюлэсъёс вуо.
Со нюлэсъёсын будо адӟылымтэ туж чебересь писпуос.
Почти ваньмаз ик островъёс вылын Магеллан адӟылӥз адямиосты.
Соос вылазы дӥсьтэк ветлылӥзы, улон юртъёс писпу улвайёслэсь но куаръёслэсь лэсьтылӥзы, стрелаосын но копъёосын вооружиться каремын вал.
Со островъёс вылын уно вал природной уэырлыкъёс — зарни, дуно будосъёс.
Магеллан островъёс вылын улӥсьёсын вузкарыны кутскиз.
Корт котыр понна, простой тканьёс понна но дунтэм чеберъяськонъёс понна со уно басьтылӥз зарни, дуно емышъёс, сион-юон продуктъёс.
Магеллан медэ вал островъёсты, киултыса, испанской король киулэ сётыны.
Островъёс вылын улӥсьёсын пумитъяськонъёс луизы; со пумитъяськон дыръя Магеллан виемын вал.
Путешествизы Магеллантэк йылпумъяськиз.
Вить корабльёс пӧлысь одӥгез гинэ берытскиз на.
265 мурт пӧлысь 18-эз гинэ вуизы на, соос но жуммемын, лябесь вал.
Тӥни озьы ортчытэмын вал музъем котыртӥ нырысетӥ путешествие, кудӥз куинь ар кыстӥськиз.
Магеллан бере мукетъёсыз путешественникъёс музъем шарез одӥг пол гинэ ӧз котыртылэ ини.
Али дыръя музъемез котыртон путешествиос чик секытэсь но кышкытэсь ӧвӧл.
Туж бадӟымесь кужмо пароходъёс кӧня ке нуналъёс куспын гинэ ортчо океанъёсты.
Поездъёс но автомобильёс туж ӝог ортчыло музъем вылтӥ олома быдӟа кусыпъёсты.
Музъем шар, аэропланэн лобӟыса но, котыртэмын ини.
Со понна тямыс сутка гинэ кулэ луиз.
Европаысь Америкае.
Портовой городлэн из пристань дораз пароход сылэ.
Вылын пристань вадьсын ӝутске солэн котыресэсь бӧрсьысь укноё сьӧд бортэз.
Пароход пушкын трос этажъем лэсьтэмын пассажирской каютаос, столовойёс, кухняос, пӧртэм служебной помещениос.
Соос улын, улӥын, машинной отделение.
Отын ӝокыт кылӥське музъем эгырез ньылӥсь исполинской гуръёслэн ӝуам куаразы.
Отын кужмо паровой машина ужа.
Нош вылын, капитанской тубат вылын, рулевой сылэ.
Рулевой колёсаен со рулез берыкъя но пароходэз компасъя шонеръя кулэ кудлане.
Пароход кошкыны дась.
Борт вылэ тубатъёс вылтӥ бӧрсьысь тубо пассажиръёс, ӝутъясь кранъёс пароход вылэ ӝутъяло вузъёсын бадӟымесь тюкъёсты но соосты мур трюме лэзё.
Тани кужмо гудок кеськиз, со быдэс городэ кыдёке вӧлскиз, кыдёкысь кылӥськиз чузъяськемез.
Кыктэтӥез гудок, куиньметӥез...
Корма сьӧрысь винт ужаны кутскиз.
Ву бульыртыны кутскиз.
Пароход пристаньысь вырӟиз.
Портын сылӥсь пароходъёс пӧлтӥ со каллен кошкиз но морае потӥз.
Ярдур ялан кыдёке но кыдёке ватскыса кыле.
Ог кӧня ке час мыныса, ярдур уг адскы ни, котырак вӧлскемын пумзэ адӟонтэм мора.
Пароход тулкымъёсты вандэ.
Со тулкымъёс пазясько солэн бортъёсаз.
Пароход сьӧры чайкаос лобо, уиськыса, мачтаосыз вылэ пуксё, собере кылё но берлань, музъем вылэ берытско.
Куать нунал ӵоже мынэ ини со великан Атлантической океан вылтӥ.
Сое сильтӧлъёс пумитало, но со туж бадӟым пароход, ас сюрессэ ыштытэк, тулкымъёс вылтӥ лэйкаса гинэ мынэ.
Пассажиръёслэн океанэз выжон ӵожазы ик радио пыр вераськемзы луэ Европаен но Америкаен.
Табере куать нунал гинэ кулэ на Европаысь Америкае океан вамен выжыны.
Нош 450 ар талэсь азьло Колумб путешественник куинь толэзь ӵоже мынӥз Европаысь Америкае.
Уж.
Глобус вылысь возьматэ Европаысен Северной Америкае Атлантической океан вамен выжон сюресэз.
Музъем но шунды.
Асьмеос тодӥськом ини, кыӵе бадӟым асьмелэн музъеммы.
Нош шундыен ӵошатыса, со туж пичи адске (56 сур.).
Шунды музъемлэсь 1300000 пол бадӟым.
Со асьмелы пичи адске, соин, что со асьме дорысь туж кыдёкын.
Ӝог кошкись поездэн музъем вылысен шунды вылэ мыныны луысал ке, поездлы шунды дорозь 250 арлэсь но кема мыноно луысал.
Шунды — со туж бадӟым шар.
Шунды музъем вылэ югыт но шуныт сётэ.
Малы нунал но уй луэ.
Нуналлэсь но уйлэсь малы луэмзэс тодыны понна, ортчытэ музъем но шунды лэсьтэм модельёс вылын эскерон.
Кот горд сюез шар лэсьтыса, езэн пась каре но со пыртӥ сӥньыс поттэ (улӥтӥз сое герӟалэ).
Со пичи шар возьматоз музъемез.
Пеймыт комнатаын ӝӧк вылэ пуктэ ӝуатэм кӧйтылэз.
Со шундыез возьматоз.
Шардэс, сӥньыстӥз кутыса, кӧйтыл азьын возе.
Кӧйтыл быдэс шарез-а югдытэ?
Уг, шарлэн ӝыны люкетэз гинэ югдытэмын, нош кыктэтӥ ӝыны люкетэз пеймытэ кыле (57 сур.).
Шунды но озьы ик котьку музъем шарлэсь ӝыны люкетсэ гинэ югдытэ.
Югдытэм люкетэз палан шунды адске — татын нунал, мукет пал люкетаз шунды уг адскы — отын уй.
Шардэс кӧйтыл азьын одӥг интыяз каллен бергатэ.
Табере кӧйтыл югдытэ со интыоссэ, кудъёсыз азьвыл пеймытын вал, нош азьвыл югдытэм интыосыз табере пеймытэ кошко.
Сӥньыстэс позыртэ но эскере, шар кызьы берга кӧйтыл азьын.
Тӥни озьы ик музъем шар но берга шунды азьын но, музъем вылын нунал уен воштӥське.
Музъем ас котыртӥз быдэс котырак берытсконзэ сутка ӵоже ортчытэ.
Асьмеос ум шӧдӥське музъемлэсь со бергамзэ, потому что асьмемын ӵош берытске ваньмыз, ма вань асьме котырын музъем вылын, — коркаос, лудъёс, возьёс,
Солы пумит, асьмелы адске, что шунды ӝужа, инме ӝутске но, берен уллань лэзькыса, пуксе кадь.
Поездын мыныкумы но тӥни озьы ик куддыръя асьмелы адске.
Поезд зуркатэк ке мынэ, асьмелы ӵем дыръя озьы адске, что асьмеос интыямы сылӥськом, нош телеграф юбоос но писпуос сюрес урдсытӥ поезд пумитэ лыкто кадь.
Ужъёс.
1. Кӧйтыл азе глобус пуктэ.
Возьматэ, кызьы ортче музъемлэн берганэз, кудӥныз тӥ али гинэ тодматскиды.
Глобус вылын кытӥяз нунал, кытӥяз уй?
2. Глобустэс кӧйтыл азьын озьы берыктэ, чтобы нунал Европаын мед луоз.
Учке, Америкаын, Африкаын, Австралиын соку нунал-а, уй-а.
Полюсъёс но экватор.
Асьмеос тодӥськом ини, музъем шар ас котыртӥз, дугдылытэк берытскыса, суткалы одӥг пол берытске.
Умойгес эскером, кызьы ортче музъемлэн берганэз, кызьы мыно музъем шар берытскыку, со вылын пӧртэм интыос.
Басьтэ со понна асьтэлэсь музъем модельдэс — сӥньыс йылын горд сюй шардэс — но со вылэ пуктылэ чернилаен огез улэ огзэ-ог кӧня ке точкаос.
Соос пӧлысь кыксэ пуктоно со интыосы, кытӥ шарысь сӥньыс потэ.
Шардэс берыктэ.
Тӥ адӟиськоды, что шар берытскыку, котькуд точка лэсьтэ круг; одӥгез точка — бадӟым круг, мукетъёсыз — пичи; шарлэн кыкез гинэ точкаосыз — улысез но вылысез круг уг лэсьто.
Самой озьы ик луэ музъем шар берытскыку но.
Музъем вылысь пӧртэм точкаос одӥг кадь уг берытско.
Одӥгъёсыз точкаос сутка куспын бадӟым круг лэсьто, мукетъёсыз — пичи.
А кыкез точкаосыз музъем шарлэн чик уг лэсьто круг.
Со — музъем шарлэн полюсъёсыз.
Одӥгез полюс северной полюс шуыса нимаське, малы ке шуоно, со музъем шарлэн самой северной точкаез.
Мукетыз — южной полюс.
Таиз — музъем шарлэн самой южной точкаез.
Кыкна полюсъёс дорысен огбыдӟа кусыптӥ музъем шар котыртӥ, малпаса гинэ, линия ортчытӥське. Со линиез экватор шуо.
Со линия музъем шарез кык полушариослы люке — северной но южной полушариослы.
Ужъёс.
1. Глобус вылысь шедьтэ северной но южной полюсъёсты но экваторез.
2. Глобус вылысь учке, кыӵе дунне люкетъёс южной полушариын, кыӵеосыз северной полушариын; кыӵеосыз вамен экватор выже.
Кызьы тодоно кудланьёсты глобус вылысь.
Асьмеос тодӥськом, что адями ымнырын север пала ке берытскыса сылэ, солэн мышказ луэ — юг, бур палаз — восток, паллян палаз — запад.
Асьмеос асьме школаысьтымы север пала шонерак, нокытчы кожатэк, мыныны быгатысалмы ке, северной полюс доры вуысалмы.
Нош юг пала ке мынысалмы, южной полюс доры вуысалмы.
Север пал — юг пал кудлань огысьтыз полюсысь мукетаз мынэ.
Север пала яке юг пала кудланез глобус вылын тодыны понна, глобус вылын „эскерись“ сылэ, шуом.
Глобус вылэ фигура пуктом но сое ымнырын северной полюс пала берыктом.
Соку солэн мышказ юг луоз (58 сур.).
abu
Глобус вылэ сыӵе эскерисьёсты кӧня ке пуктом но тодом, кытын соослы север пал луэ, кытын — юг пал.
Глобус вылэ умой-умой учким ке, адӟом, что север — юг пал кудлань возьматэмын глобус вылын линиосын, со линиос полюс дорысен полюс дорозь мыно.
Со линиос котькытын возьмато север палась юг пала яке юг палась север пала кудланьёсты.
Глобуслэн кыӵе ке точкаысеныз север пала ке потоно, со линия кузя северной полюс пала мыныны кулэ.
Табере учком, глобус вылысь кызьы шедьтоно восток пала, запад пала кудланьёсты.
Нош ик басьтом эскерисьмес.
Эскерисьлэн мыд-мыд пал золтэм киосызъя адске, кытын луэ солы восток пал, кытын — запад пал.
Табере сыӵе глобусэз басьтом, кудӥз вылын ог кӧня ке эскерисьёс сыло ымнырын северной полюс пала, киоссэс мыд-мыд пала золтыса.
Асьмеос адӟом, что восток пал — запад пал кудланьёс глобус вылын озьы ик линиосын возьматэмын.
Со линиос мыно север пал — юг палэз возьматӥсь линиос вамен.
Музъем шарлэн картаез.
Глобус — музъем шарлэн моделез.
Но глобусэз уже кутыны шуггес.
Пичи глобус вылын музъемез умой-умой возьматыны уг луы, нош бадӟым глобус лэсьтыны шуг.
Экскурсие яке путешествовать карыны мынон дыръя глобусэз сьӧре басьтыны уг луы.
Соин ик музъемез ӵем дыръя возьмато бумага вылын — географической картаен.
Вашкала дырысен калыкъёс чертить карыны кутскизы картаос — быдэс музъемлэсь яке солэн нимаз люкетъёсызлэсь туссэс.
Нырысь картаос туж простоесь гинэ вал.
Адямиос учкыса гинэ суредаллязы ярдуръёслэсь тусъёссэс, пусйылӥзы шуръёсты, гурезьёсты но городъёсты.
Сыӵе картаосты уже кутыны шуг вал.
Суредамъёссы ӵем дыръя мыдлань лэсьтылэмын вал, кусыпъёсты мертатэк гинэ пусйылӥзы.
Сыӵе картая шонер кудланез шедьтыны шуг вал, мыныны малпам сюрес вылын кӧня нунал ортчонэз но тодыны уг луы вал.
Калыкъёс кемаласен малпаллязы точной карта поттыны но сое лэсьтыны быгатӥзы мертаськыны точной приборъёс поттэм бере гинэ.
Музъем шар табере быдэсак сямен тодэмын ини, пичиесь ветлыны луонтэм люкетъёсыз гинэ эскерытэк кылемын на.
Самолётъёс но дирижабльёс, автомобильёс но ледокол-пароходъёс поттэм бере адямиослэн мынэмзы луэ ини самой пустынной но чик ветлыны луонтэм интыосы.
Асьмелэн табере вань ини музъем шарез пыр-поч но шонер возьматӥсь картаосмы. Со картаосъя котькыӵе странаез умой тодэммы луэ.
Котькуд грамотной адямилы картаез но, книгаез сямен ик, умой лыдӟыны дышетсконо.
Музъем шарез карта вылын кык полушариен возьмато.
Одӥгаз полушариын музъемлэсь одӥг ӝыны люкетсэ возьмато, мукетаз мукет пал люкетсэ.
Одӥгез полушарие — восточной, мукетыз — западной.
Полушариослэн картазы глобус кадь ик буямын.
Полушариослэн картазы вылын, глобус вылын сямен ик, линиос ортчытэмын север паласен юг пала но запад паласен восток пала.
Соос карта вылын кудланьёсты возьмато.
Ужъёс.
1. Учке полушариослэсь картазэс.
Шедьтэ дунне люкетъёсты.
Кыӵе дунне люкетъёс восточной полушариын, кыӵеосыз — западной полушариын.
2. Котькудысьтыз полушариос вылысь шедьтэ северной но южной полюсъёсты, экваторез.
Возьматэ север пал — юг пал, восток пал — запад пал кудланьёсты возьматӥсь линиосты.
3. Возьматэ Австралиысен север пала, юг пала, восток пала, но запад пала кудланьёсты.
4. Полушариослэн картазы вылысь возьматэ Магелланлэсь музъем шар котыртӥ котырскем сюрессэ.
5. Полушариослэн картазы вылысь возьматэ Средиземной мораез.
Кыӵе дунне люкет со дорысен север талан луэ, кыӵеез — юг палан?
Ӵошатэ Средиземной моралэсь полушариослэн картазы вылын но вашкала грекъёслэн картазы вылын интыяськемъёссэ.
6. Глобус вылысь но полушариослэн картазы вылысь возьматэ Северной Ледовитой океанэз.
Кыӵе дунне люкетъёс сое котырто?
7. Карта вылысь шедьтэ Советской Союзэз (СССР-ез).
Кыӵе дунне люкетъёсын со интыяськемын.
Уроктэм дыръя ужан.
Быдэстэ ватсанын сётэм нырысетӥоссэ куинь ужъёсты.
Музъемлэн ар ӵоже бергамез.
Музъем шар, ас котыртӥз сяна, шунды котыртӥ но берга.
Шунды котыртӥ быдэсак котырсконзэ музъем одӥг ар ӵоже ортчытэ.
Со дыре музъем вылын пӧртэм интыос огкадь уг югдытско шундыен, шуныт но огмында уг басьто.
Асьмелэн ар дыръёсмы ньыль: гужем, сӥзьыл, тол но тулыс.
Малы пӧртэм ар дыръёс луо, сое тодыны понна, пеймыт комнатаын глобусэн таӵе эскеронъёс лэсьтэ.
Чукиналэс осен глобусэз, 59-тӥ суред вылын возьматэм сямен, пуктэ но сое кӧйтылэн югдытэ.
Глобуслэн югдытэм люкетысьтыз северной полушариысь шедьтэ Москваез.
Со интые горд котрет ляке.
(59-тӥ суред вылын Москвалэн интыяськемез М. букваен возьматэмын).
Южной полушарие но кытчыяз ке озьы ик котрет ляке, кылсярысь, Африкалэн юг палаз.
(Суред вылын со инты точкаен возьматэмын).
Глобустэс берыктэ ось котыртӥз.
Москвалэн пуксем интыез суткалэн кема дыраз югдытскыса улэ.
Озьыен, Москваын кузь нуналъёс но вакчи уйёс вуэмын.
Со луэ гужем.
Южной полушариын возьматэм инты со дыре кема ӵоже пеймытын улэ.
Со точкаын али нуналъёс вакчиесь, уйёс кузесь.
Со луэ толалтэ.
Северной полушариын гужем дыръя южной полушариын тол.
Глобус вылысь но суред вылысь адӟиськом, что глобус ас котыртӥз бергаку, северной полюс но со котырысь инты ялан югдытэмын луо.
Со дыре северной полюс котырын шунды сутка ӵоже ик пиштэ.
Нош самой полюс вылаз шунды ӝыны ар пуксьылытэк улэ.
Южной полюс но со котырысь инты со дыре пеймытын луо.
Южной полюс котырын быдэс сутка ӵоже уй луэ.
Самой полюс вылаз шунды ӝыны ар ӵоже уг адскылы.
Глобустэс кӧйтыллэн мукет палаз пуктэ. (60-тӥ суред вылын возьматэм сямен)
Табере южной полушарие бадӟымгес югдытэмын, северной полушарие — пичигес.
Глобустэс осез котыртӥ берыктэ но соку адӟоды, что Москва суткалэн кема дыраз пеймытын улэ.
Москваын вакчи нуналъёс но кузь уйёс вуэмын.
Со луэ толалтэ.
Южной полушариын пусъем точка, солы пумит, табере кема дыре югдытэмын луоз.
Со дыре татын нуналъёс кузесь, уйёс вакчиесь луо.
Со луэ гужем.
Северной полушариын тол дыръя южной полушариын гужем луэ (60 сур.).
Глобус вылын но суред вылын адске, что музъем таӵе положениын луон дыръя северной полюс но со котырысь инты ялан пеймытын луо.
Северной полюс котырын шунды быдэс сутка ӵоже уг адскылы, нош самой полюс вылаз — ӝыны ар.
Южной полюс но со котырысь инты со дыръя быдэс сутка югдытскыса уло.
Самой полюс вылаз нунал ӝыны ар кыстӥське.
Тулыс но сӥзьыл луо музъемлэн сыӵе положениез дыръя, куке шунды огкадь югдытэ северной но южной полушариосты.
Тӥни озьы музъем шунды котыртӥ бергаку, ар дыръёс вошъясько.
Ужъёс.
1. Глобусэз кӧйтыл азе озьы пуктэ, чтобы северной полушариын мед луоз гужем.
2. Глобусэз озьы пуктэ, чтобы северной полушариын мед луоз тол.
Черк наукалы пумит.
Нырысетӥез ученой, кудӥз доказать кариз музъемлэсь ас котыртӥз но шунды котыртӥ бергамзэ, Николай Коперник вал.
Инмысь югдэтъёсты кема ӵоже эскерыса, со валаз, что, музъем котыртӥ шунды берга шуыса, черклэн дышетэмез шонер ӧвӧл.
Коперниклэн дышетэмез куашкатӥз черклы но инмарлы осконлыкез.
Коперниклэсь книгаоссэ черк проклять кариз но со книгаос 200 ар ӵоже пытсаськыса улӥзы.
Джордано Бруно ученой Коперниклэсь дышетэмзэ котькытын вӧлмытыны ӧдъяз.
Попъёс асьсэлы кышкытэз адӟизы но, Бруноез арестовать каризы.
Сизьым ар пукиз со тюрьмаын, отын сое туж юн курадӟытылӥзы.
Церковной суд приговорить кариз сое тылын сутыны.
Озьы быриз истина (зэм) понна нюръяськись Джордано Бруно.
Со 300 ар пала талэсь азьло вал.
Мукетыз но со дыре улэм адями, тодмо ученой Галилей тюрьмае пуктэмын вал.
Сое кужмысь косӥзы клятва сётыны, музъем берган сярысь ас малпанъёсызлэсь со куштӥське шуыса.
Клятва сётэменыз гинэ тӥни со тылын сутскыса быронлэсь мозмиз.
Но вуиз дыр, соку ваньмыз шонерен лыдъяно луизы Коперниклэсь дышетэмзэ.
Музъем шарлэн шунытлыко поясъёсыз.
Асьмеос тодӥськом, что шунды нунал ӵоже музъемез огкадь уг шунты.
Арлэн туж пӧсь вадесаз но, ӵукна пӧсь уг луы, — соку шунды инмын улын луэ на но, солэн лучъёсыз ляб шунто.
Нош нуназе вуон пал шунды вылэ но вылэ тубе но, лучъёсыз кужмо но кужмо шунтыны кутско.
Ӝытазе шунды нош ик улэ лэзьке но, солэн лучъёсыз нош ик ляб шунтыны кутско.
Шунды макем вылын луэ, сокем кужмо шунтэ со музъемез но.
Шунды озьы ик огкадь уг шунты музъем шарлэсь пӧртэм интыоссэ но.
Глобус вылэ пуктом куинь „эскерись“: одӥгзэ — экватор вылэ, кык мукетъёссэ — полюсъёслы матэ.
Глобуслы матэгес пуктом лампа — „шунды“.
Эскером, кызьы лампа югдытэ эскерисьёсты (61 сур.).
Экватор вылын сылӥсь эскерись вылэ лампалэн югытэз вылласянь меӵак усе.
Шунды солэн йыр вадьсаз сылэ.
Озьы бере, экватор дорын шунды туж кужмо шунтэ.
Экватор дорын луо музъем шарлэн самой пӧсь странаосыз — татын пӧсь пояс.
Экватор дорын быдэс ар ӵоже куазь огкадь пӧсь улэ.
Кезьыт дыръёс чик уг луыло.
Полюслы матын сылӥсь эскерисьёс лампалэн югытэныз урдэс ласянь гинэ югдытско.
Шунды отын улын сылэ но ляб шунтэ, арлэн ог кӧня ке люкетаз нош чик уг но пишты.
Полюсъёс котырын луо музъем шарлэн самой кезьыт странаосыз, яке кезьыт поясъёсыз.
Кезьытэсь но пӧсь поясъёс куспын кык умеренной поясъёс вань — северной но южной.
Татын шунды, кезьыт поясъёсын сярысь, вылэ ӝутске, озьы ке но, пӧсь поясын кадь вылын ноку но уг луылы.
Соин ик умеренной поясъёсын, кезьыт поясъёсын сярысь, шунытгес, нош пӧсь поясын сярысь, кезьытгес.
Учке 62-тӥ суредэз.
Со вылын шуныт поясъёс линиосын висъямын.
Экваторлэн кыкна пал урдэсъёстӥз кык кругъёс котыртэмын, соосты северной но южной тропикъёс шуыса нимало.
Соос куспын интыяськемын пӧсь, яке тропической, пояс.
Полюсъёс дортӥ котыртэмын кык полярной кругъёс.
Соос луо северной но южной кезьыт поясъёслэн границаоссы.
Тропикъёс но полярной кругъёс куспын интыяськемын северной но южной умеренной поясъёс.
Озьы тӥни музъем шарез шунытлыко вить поясъёслы люко.
Нош шунытлыко поясъёслэн куспазы зэмен ӝотак висъясь границазы ӧвӧл.
Пӧсь пояс пумен потэ умеренной поясъёсы, нош умеренной поясъёс пумен пото кезьыт поясъёсы.
Шунытлыко поясъёслэн кусып границаоссы условной гинэ.
Ужъёс.
Глобус вылысь но полушариослэн картазы вылысь шедьтэ тропикъёсты но полярной кругъёсты.
Глобус вылысь но карта вылысь возьматэ шунытлыко вить поясъёсты.
Дуннелэн кыӵе люкетъёсыз тропической поясын интыяськемын, кыӵеосыз — умеренной поясъёсын, кыӵеосыз — кезьыт поясъёсын?
Кыӵе поясъёсын интыяськемын Европа, Америка.
Кыӵе поясъёсын асьмелэн Союзмы?
VI. КУАЗЬ НО КЛИМАТ
Кинлы но ма понна тодыны кулэ куазез.
— Кыӵе туннэ куазь?
— юало дышетскись пиналъёс, иземысь сайкаса.
Шулдырак бызё соос педлон шундыё, шуныт но чалмыт дыръя.
Нош кот, кезьыт дыръя но кужмо тӧласькыку, соос, мылзы потытэк, коркась пото.
Куазез тодэмзы потэ морякъёслэн но уяны кошкыкузы, лётчикъёслэн но лобаны дасяськыкузы.
Туж нап бус дыръя мораетӥ уяны кышкыт.
Котыр номыр но уг адскы.
Пароход ялан кесяськыса мынэ, солэсь мед палэнскозы шуыса.
Нош мукет пароход шоры яке ву дурысь скала борды ке шуккиськиз, пась луоз но выёз.
Нап бус пыртӥ лётчиклы но лобаны кышкыт.
Солы уг адскы, кыӵе инты вадьсытӥ самолёт лобӟе.
Со уг тоды, кытчы лэзькыны быгатоз кулэ дыръяз.
Еще кышкытгес на морякъёслы но лётчикъёслы шуак ӝутскись сильтӧлъёс.
Нош соос сильтӧллэсь матэктэмзэ азьвыл ке тодо, кышкытлэсь палэнскыны быгато.
Куазь жобан азьын аэродромысь одӥг самолёт но уг ӝутскы.
Урод куазь трос изъян лэсьтэ сельской хозяйстволы но.
Тулыс но гужем кутскыку, зор ке ӧвӧл — бусыысь ю-нянь ӵужектэ, сутске.
Ю-нянез октыку-калтыку, дугдылытэк ке зоре арам ю-нянь котме но сисьме.
Кӧс тӧлъёс, сильтӧлъёс, йӧзор но пужмеръёс трос изъян каро.
Соин ик колхозъёсын но совхозъёсын, урод куазьлэн изъянэзлэсь палэнскон понна, куазез туж сак эскеро.
Союзлэсь хозяйствозэ шонер нуон понна туж кулэ луэ сое тодон, кызьы вошъяське куазь солэн пӧртэм интыосаз.
Тае тодон юрттоз дыраз кутскыны кизёнэз но, ю-нянь октон калтонэз но, юрттоз шонер люкылыны, кытын но кыӵеоссэ будосъёсты будэтыны кулэ.
Музъем шарлэн пӧртэм интыосаз кызьы вошъяське куазь, сое тодон туж кулэ луэ, отысь природаез умой тодыны понна.
Нош малы куазь вошъяське?
Тае валаны понна, нуналлы быдэ но кема дыр ӵоже эскерыны кулэ куазез.
Эскеремъёсъя тодыны луэ: кыӵе тӧл дыръя тӥляд интыяды пилемо но зоро луэ, кыӵе тӧл дыръя шундыё но кӧс куазь луэ; ку витьыны луэ шуныт нуналъёсты, нош ку — кезьыт нуналъёсты?
Уж.
Эскере асьтэ интыысь куазез.
Нуналлы быдэ огвадес часэ ик пусйылэ: 1) омырлэсь температуразэ (шунытэз, кезьытэз), 2) тӧллэсь кудланьзэ но солэсь кужымзэ, 3) пилемоез, 4) зор-кӧтэз: зорез, лымыез, йӧзорез, лысвуэз, пужмерез.
Толэзьлы одӥг пол нуназе 12 часын эскере шундылэсь ӝуждалазэ.
Куазез эскерондэс дышетскон ар кутскон дырысен быдэс ар ӵоже нуэ.
Кызьы ми куазез эскерим асьме школаын.
Милям школамы Москва дорын.
Куазез эскерыны ми сентябрь толэзьысен кутским.
Омырлэсь температуразэ эскерон понна школа корказьмылэн укно дораз термометр ошим; сое ми сайул палаз юнматӥм, шунды пӧсь медаз шунты шуыса.
Тӧлэз эскерон понна ми флюгер лэсьтӥм
(63-тӥ суредэз учке).
Флюгерез ми пуктӥм географической площадка вылэ, компасъя тупатыса: кечатлэсь С букваен пумзэ север пала берыктӥм.
Флюгерлэн юбо бордаз шукким тӧл кужымез тодон таблицаен пул.
Эскерон вадесамы ми нуналлы быдэ таблицаез уже кутылӥм.
Таблицаез зорлэсь утялтон понна, ми сое стекло сьӧры юнматӥм.
Эскеронэз кык дежурнойёс нуизы.
Соосты ми эскерисьёс шуыса нимамы.
Куинь нунал ортчыса, соос вошъяськылӥзы.
Эскеремзылэсь результатсэ ялан гожтылӥзы журналэ, нош собере пусйылӥзы классэ ошем таблица вылэ.
Омырлэсь температуразэ эскерон.
Эскерисьёс нуналлы быдэ нуназе бере 1 часын омырлэсь температуразэ тодылӥзы (64 сур.).
Эскеремзэс гожтылӥзы.
Термометр шунытэз ке возьматэ, градус лыдлэн азяз таӵе пус: + пуктылӥзы; термометр кезьытэз возьматыку, таӵе пус: − пуктылӥзы.
Кылсярысь, вить градус шунытэз тазьы гожъязы: +5°; вить градус кезьытэз: −5°.
Тӧллэсь кудпаласьсэ но кужымзэ эскерон.
Та эскеронъёс географической площадка вылын лэсьтылӥськизы.
Тӧллэсь кудпаласьсэ флюгеръя тодылӥм.
Флюгерлэн ленточкаез С буква (север) пала ке берытскемын вал — тӧл юг палась тӧлаз, соин ик эскерисьёс гожтӥзы Ю.
Нош ленточка В буква пала ке берытскемын вал — тӧл западысь тӧлаз, соин ик эскерисьёс гожтӥзы З.
Нош лента С но В букваос вискы ке берытскемын вал, мукет сямен, северо-восток пала, — значит, тӧл юго-западысь тӧлаз, соин ик эскерисьёс гожтӥзы Ю-З.
Эскерисьёс тӧл кужымез пусйылӥзы флюгер борды шуккем таблицая.
ТӦЛ КУЖЫМЕЗ ТОДОН ТАБЛИЦА.
Тӧллэн действиез.
Тӧллэн кужымез.
Муръёсысь ӵын меӵак вылэ тубе.
Писпу куаръёс уг выро.
Чус.
Тӧл ӧвӧл.
Флаг ӧжыт гинэ тӧла.
Куаръёс выро.
Ляб тӧл.
Писпу модосъёс выро.
Кужмо тӧл.
Писпуос выжыенызы ик пограло. Корка липетъёс усьыло.
Сильтӧл.
Пилемоез эскеронъёс.
Та эскеронъёс синмын учкыса гинэ нуэмын вал.
Ин вылын пилемъёс чик ке ӧй вал яке туж ӧжыт ке вал, эскерисьёс таблицае таӵе пус: [] пусйылӥзы.
Та пус возьматэ „сайкыт“ куазез.
Ин нош быдэсак ке пилемен ӵоксаськемын вал, таӵе пус: [] пусйылӥзы.
Та пус возьматэ „пилемо куазез“.
Пилемъёсын нош инлэн трос люкетэз ӵоксамын ке вал, таӵе пус: [] пусйылӥзы. Та пус возьматэ „комокъяськем пилемо куазез“.
Зор-котэз эскерон.
Эскерисьёс эскерылӥзы нунал ӵоже зор-кот усемез.
Эскеремзэс таблицае пусйылӥзы таӵе условной пусъёсын: зор [], лымы [], йӧзор [], куака кеньыр [], лысву [], пужмер [].
Шундылэсь ӝуждалазэ эскерон.
Толэзьлы одӥг пол ми быдэс классэнымы эскерылӥм шундылэсь ӝуждалазэ.
Ми тодылӥм, кызьы сылэ шунды нуназе шорын, — кылем толэзе сярысь, улынгес-а, вылынгес-а.
Со понна ми мерталлямы географической площадкаысь майыглэн нуназе шор вужерезлэсь кузьдалазэ.
Собере сое ӵошатъямы кылем толэзе мертам вужерезлэн кузьдалаеныз.
Нуназе шор вужер кузь ке луыны кутскем, ми тодылӥм, что шунды, азьло толэзе сярысь, улын сылэ.
Тани кызьы ми гожъяллямы куазез эскереммес.
КУАЗЕЗ ЭСКЕРЕМЛЫ ТАБЛИЦА.
Сентябрь 1933 арын.
Число.
Нуназе шор вужерлэн кузьдалаез.
Омырлэн температураез.
Пилемо.
Зор-кот.
Кудпалась тӧл.
Тӧллэн кужымез.
Примечание.
1 +20° о [] 3 Чус
2 +15° о ю-з Ляб Ю-З тӧл
3 50 см. +10° о ю-з зор ваиз
Толэзь ӵоже эскеремлы сводка.
Котькуд толэзь ортчем бере асьме эскереммылы ми быдэс классэнымы сводка лэсьтылӥм.
Нырысь ик тодылӥм нуназе шор температуралэсь толэзь ӵоже шоролыксэ.
Сое тазьы лэсьтылӥм: температураез возьматӥсь лыдъёсты ваньзэ огазе лыдъям но соослэсь суммазэс люким толэзьын нуналъёслэн лыдзылы.
Толэзьын туж кезьыт нуналъёс но ке вал, соку мукет сямен лэсьтылӥм: шунытлэсь градусъёссэ возьматӥсь лыдъёсты нимаз лыдъямы, кезьытлэсь градусъёссэ возьматӥсь лыдъёсты но нимаз лыдъямы.
Бадӟым суммаысь куштӥм пичи суммаез.
Потэм лыдэз люким толэзьын нуналъёслэн лыдзылы.
Со сяна, ми лыдъяллямы:
1. Толэзь ӵоже кӧня пол тӧлазы северо-восток палась тӧлъёс, юго-запад палась но мукет тӧлъёс.
2. Толэзь ӵоже кӧня пол чус вал, кӧня пол вал ляб тӧлъёс, кӧня пол — кужмо тӧлъёс.
3. Кӧня вал шундыё чебер нуналъёс но пилемо нуналъёс.
4. Кӧня пол зор вал, кӧня пол лымы усиз, кӧня пол бус вал.
Ми озьы ик пусйылӥм куазьлэсь тӧлъя вошъяськемзэ но: кыӵе тӧлъёс дыръя шуныт вал, кыӵеосыз дыръя кезьыт; кыӵе тӧлъёс вайылӥзы зор-кот но кыӵеосыз дыръя кӧс куазь вал.
Сӥзьыл толэзьёсы эскеремъёслы сводка.
СӤЗЬЫЛ ТОЛЭЗЬЁСЫ КУАЗЕЗ ЭСКЕРЕМЛЫ ТАБЛИЦА.
Толэзь ним
Нуназе шор вужерлэн кузьдалаез
Шоро-куспо температура
Пилемо
Зор-кот
Кудпалась тӧл
Тӧллэн кужымез
Примечание
Сентябрь 50 см. + 10° [] 15 нун.
...
15 ноябре лымы усиз,
18 ноябре шур кынмиз
abu
Сӥзьыл толэзьёсы эскеремъёсмес ми быдэс классэнымы таблицае гожтӥм.
Со пыртэмын 72 страницаын.
Тани мае ми тодӥм та таблицаысь: сӥзьыл толэзьысь толэзе шунды нуназе шорын музъем вадьсын ялан улынгес луыны кутскиз (нуназе шор вужер кузёмыны кутскиз).
Толэзьлы быдэ шунды лучъёс нялмыт усьыны кутскизы, пумен кезьыт луыны кутскиз.
Самой шунытэз толэзь сентябрь вал.
Самой кезьытэз — ноябрь.
15 ноябре музъемез лымы шобыртӥз, нош 18 ноябре шур кынмиз (толлэн кутскемез).
Шундыё чебер нуналъёслэн лыдзы толэзьлы быдэ кулэсмиз, нош пилемо нуналъёс йылӥзы.
Самой пилемоез толэзь ноябрь луиз.
Зор-кото нуналъёслэн лыдзы сӥзьыллэн пумаз пумен йылӥз.
Сӥзьыл ӵем зорылӥзы векчи зоръёс.
Октябрь толэзе нырысетӥ лымы пырыос вуизы.
Ноябрь толэзьлэн ӝыныысеныз кутскыса, зор интые лымыяны кутскиз.
Тӧлъёс сӥзьыл нуналлы быдэ сямен тӧлазы.
Тӧлтэм куазь туж шер вал.
Толэзьлы быдэ тӧлъёс кужмояны кутскизы.
Сентябре но октябре сярысь, ноябре тӧлъёс туж кужмоесь вал.
Тӧл ӵемгес тӧлаз запад палась но юго-запад палась.
Тӧл куазез вошъяз: западысь но юго-западысь тӧлъёс ӵем вайылӥзы зор-кот; северо-востокысь тӧл дыръя куазь кӧс яке кезьыт луылӥз.
Уж.
Та образецъя лэсьтэ сводка сӥзьыл, толалтэ но тулыс толэзьёсы эскеремдылы.
Нимаз толэзьёслы сводка лэсьтон уждэс куспады люкылэ.
Куазь сярысь мае тодыны кулэ.
Малы омырлэн температураез вошъяське.
Шунды музъем вылэ, югытсэ сяна, шунытсэ но сётэ.
Талы оскыны капчи: шундылэн лучъёсыз тӥледды югдытыкузы — тӥледлы шуныт; вужере пыриды ке, — салкым луоз.
Шунды музъемез шунтэ.
Шунам музъем бордысь омыр но шуна.
Тӥни малы омырлэн улӥ сӥосыз, музъемлы матынъёсыз, вылӥ сӥосыз сярысь, котьку золгес шунамын луо.
Нунал ӵоже шунды музъемез огкадь уг шунты.
Ӵукнаосы шунды музъем вадьсын улын луэ.
Солэн лучъёсыз музъем вылэ нялмыт гинэ усё но сое умой-умой шунтыны уг быгато (65 сур.).
Нуназе шорын шунды котькулэсь вылын луэ: солэн лучъёсыз соку музъем вылэ меӵакгес усё но, музъем соку котькулэсь но трос шуныт басьтэ (66 сур.).
Ӝытпал шунды нош ик музъем вадьсын улын гинэ луэ но музъемез ляб шунтэ.
Макем кема шунды пиштэ, музъем но сокем ик кужмо шуна.
Нуназелэсь азьло сярысь, нуназе бере котьку шуныт луэ; нуназеозь шунды шунтэ уин сӥям музъемез; нуназе бере нош со шунтэ ини шунам музъемез.
Гужем матэктэмъя шунды зол шунтыны кутске.
Ӵукна со вазь ӝужа, пуксёнзэ нош бер гинэ пуксе; нуназе шорын со музъем вадьсын туж вылын луэ.
Музъем ӟеч шуна.
Шуныт кариське.
Тол матэктэмъя мукет луэ: шунды вакчи дырлы гинэ пота но нуназе шорын музъем вадьсын улын гинэ луэ.
Музъем шунаны уг вуы, нош кузь уйёс ӵоже со зол сӥя.
Кезьытъёс вуо.
Озьы арлы быдэ: гужем — шуныт, нош толалтэ — кезьыт.
Омырын котьку луо ву паръёс.
Эскерон бордысен кутском.
Шундыё чебер куазен азбаре кот простыняез поттом.
Кӧня ке час ортчем бере простыня кӧс луоз.
Кытчы луиз ву?
Ву пар луиз яке синэн адӟыны луонтэм парлы пӧрмиз.
Омырын котьку ик ву пар тусэн улэ.
Ву пар омыре шеде нюръёсысь, шуръёсысь, тыосысь но мораосысь ву париськыса.
Макем омыр шуныт, сокем ик со ву парез пушказ трос басьтэ.
Кезьыт омырын ву парез котьку ик ӧжыт луэ.
Кызьы кылдо зор-котъёс.
Шуныт омыр сӥякуз ву парзэ висъяны кутске.
Та паръёслэсь кылдо: бусъёс, пилемъёс но зор-котъёс — зоръёс, лысвуос, пужмеръёс, лымы но йӧзор.
Бус.
Кезьыт нуналэ умой эстэм коркалэсь ӧссэ усьтом.
Ӧс доры соку ик ӵын кадь маке кылдоз.
Со ӵын ӧвӧл, со бус.
Коркась шуныт омыр кезьыт омырен пумиськыку, синэн адӟонтэм ву паръёс, напчыса, пичиесь шапыклы пӧрмо.
Та шапыкъёс сокем капчиесь, что соос, музъем вылэ усьытэк, омырын нуллӥсько.
Таӵе туж трос шапыкъёс омырез пыртӥз адскисьтэм каро.
Озьы ик природаын но бус кылдэ.
Куддыръя бус сокем нап луэ, что шуо: кык вамыш кемысь но номыре но уд адӟы.
Пилемъёс.
Пилемъёслэсь кылдэмзэс эскерыны пӧсь шундыё нуналэ туж умой.
Ӵукнаысен ин чылк-чылк.
Нуназе шор вуон азьын пилемъёс потылыны кутско.
Нырысь соос мамык юдэслы укшало, собере кыдёкысь вырйылъёслы, но гурезьёслы.
Пилемъёс одӥг интыязы уг сыло: соос ялан ветло но ас туссэс вошъяло.
Кытысь кылдӥзы пилемъёс?
Шунды музъемез шунтӥз.
Омыр музъем бордысь шуназ но ӝог тубыны кутскиз вылэ.
Шуныт омырен ӵош ву паръёс но вылэ тубыны кутскизы.
Омыр вылӥын сӥяз, нош синэн адӟонтэм ву паръёс буслы пӧрмизы.
Пилемъёс — со сыӵе ик бус, но только со музъем вадьсы вылэ тубемын.
Бус сямен ик пилемъёс но луо омыретӥ нуллӥськись пичиесь гинэ ву шапыкъёслэсь.
Пилемъёс но зор.
Куддыръя гинэ тӧдьы пилемъёс интые сьӧд пилемъёс кылдо.
Соос пичиесь гинэ ву шапыкъёслэсь луо, нош соос пӧлын бадӟымесь ву шапыкъёс но луо.
Соос, куспазы огазеяськылыса, секытэсь луо но музъем вылэ усё.
Зорыны кутске.
Йӧзор.
Гужем куддыръя йӧзор усе.
Йӧзор — со быгылесэсь йӧ пырыос.
Соос кылдэмын музъем вадьсын вылын, туж кезьыт азьын.
Отын ву шапыкъёс кынмизы но йӧ пырыослы пӧрмизы.
Уллань усьыкузы соос выль но выль йӧ сӥен кынмо.
Озьы йӧ пыры 1 килограмм секта но луыны быгатэ.
Лымы.
Толалтэ — кезьыт дыръя — ву парлэсь пилемын ву шапыкъёс уг пӧрмо, а солэсь пӧрмо векчиесь гинэ йӧ веньёс.
Со йӧ веньёслэсь чебересь лымы пырыос кылдо.
Каллен бергаса, соос музъем вылэ усё но сое шобырто шундыя чиль-валь кисьтаськись тӧдьы шобретэн кадь.
Лысву но пужмер.
Ву пар, вылӥын напчем сяна, музъем вылын но напчылэ.
Гужем но сӥзьыл сайкыт ӝытъёсы, нош озьы ик ӵукнаосы но будосъёслэн модосъёссы но куаръёссы вылэ люкасько векчи ву шапыкъёс — лысву.
Лысву усьыса, турын кот луэ.
Лысву кылдэ, кезьыт предметъёс борды нюр омыр йӧтыса.
Таӵе ик ужез эскерыны луэ комнатаын но, кезьыт укно стекло вылэ кӧня ке пол шокчыса.
Сӥзьыл кынтылыку но толалтэ, почва но будосъёс туж сӥям дыръя, соос вылэ лысву уг кылды, а тӧдьыесь йӧ веньёс кылдо.
Со пужмер (67 сур.).
Юанъёс.
1. Омыре кытысь ву паръёс кылдо?
2. Кыӵе омырын ву пар трос луэ — шунытаз-а, кезьытаз-а?
3. Мускыт омыр сӥяса, ма луэ?
4. Бус дыръя малы омыр пыртӥз адскись уг луы?
5. Пилемъёс буслэсь маин пӧртэм луо?
6. Тӧдьы пилемъёс сьӧд пилемъёслэсь маин пӧртэм луо?
7. Арлэн кыӵе вадесаз йӧзор луэ?
8. Малы лымы толалтэ усе?
9. Малы гужем ӵукна но ӝытазе лысву усе?
10. Лысвулэсь пужмер маин пӧртэм луэ?
11. Малы пужмер бер сӥзьыл но толалтэ луэ?
Кызьы кылдо тӧлъёс.
Эскерон бордысен кутском.
Нырысетӥез эскерон.
Тӧлтэм но кезьыт нуналэ шуныт комнатаысь форточказэ усьтом.
Усьтэм форточкалэн улӥяз матэ ке ымнырмес карим — асьмеос шӧдом кезьыт омырлэсь пыремзэ.
Ымнырмес форточкалэн вылӥяз ке ӝутӥм, соку шуныт омырез шӧдом.
Кыктэтӥез эскерон.
Тӧлтэм кезьыт нуналэ шуныт коркалэсь педпал ӧссэ усьтом.
Ӟубисатэм ӧслэн вылӥяз матэ каром папирос бумагалэсь лэсьтэм пичи флагез — флагез коркась шуныт омыр педло пельтоз (68 сур.).
Флагез ӟубислэн улӥяз каром — флагез педлось кезьыт омыр корка пушкы пельтоз.
Ӟубисатэм ӧс дорын мае асьмеос эскерим, со ик музъем вылын но луэ.
Омыр шунан интыяз капчиоме но вылэ тубе.
Со интые соку ик лыктэ секыт кезьыт омыр.
Со лыктэ вӧзысь интыосысь, кытын со лябгес шунамын.
Озьы омырлэн движениез, яке тӧл, кылдэ.
Тӧлъёс пӧртэм кужымо но пӧртэм палась луо.
Тӧлъёс куазез ӵем вошъяло.
Куддыръя ӵукна шундыё шулдыр чус куазь луэ.
Тӧл писпу куаръёсты туж каллен гинэ выретэ.
Ин вылын одӥг пилем но ӧвӧл.
Но шӧдтэк шорысь тӧласькыны кутскиз.
Пилемъёс кылдӥзы.
Соос, ӝог будыса, сьӧд пилемъёслы, пӧрмо.
Сьӧд пилемысь зорыны кутске.
Мукет но луэ.
Ӵукна зоре.
Сьӧд пилемъёс ин бамез ӵоксазы.
Зор дугдоно кадь ик ӧвӧл.
Нош шуак тӧланы кутскиз.
Пилемъёс пазяськизы.
Шунды пиштыны кутскиз.
Педлон шуныт но кӧс луиз.
Куазез азьпала тодон.
Попъёс дышетылӥзы, куазез инмар ыстэ шуыса.
Царь дыръя тросэз крестьянъёс неграмотноесь вал но уг тодо вал куазез изучать карись наука сярысь.
Крестьянъёс попъёслэсь кылскылӥзы но малпаллязы, что куазез воштыны луэ, инмарлы молебен служить карыса.
Со молебен понна крестьянъёс попъёслы берпум грошъёссэс тырылӥзы.
Табере одӥг-огез гинэ оске на попъёслэн пӧямъёссылы.
Почти ваньмыз тодо ини, что наукалэн юрттэменыз куазез азьпала тодыны луэ но урод куазьлэн изъянтонэныз нюръяськыны луэ.
Куазез научно изучать карыны понна метеорологической станциос пуктыло.
Со станциосын нуналлы быдэ ортчытъяло куазез эскеронъёс.
Сыӵе станциос СССР-ын трос.
Соос городъёсын но, гуртъёсын но, мырдэм тубаны луоно бадӟым гурезь йылъёсын но, Северной Ледовитой океанысь островъёсын но вань и даже Северной полюс дорын йӧ вылын но вал.
Бадӟымесь метеорологической станциос асьсэ эскеремзэс нуналлы быдэ радио пыр иворто центральной станциосы.
Эскеремъёслы центральной станциосын сводка лэсьтыло но, ученойёс соосъя куазьлэсь кыӵе луонзэ азьпала верало.
Куазьлэсь азьланьын кыӵе луонзэ тодон народной хозяйстволы туж кулэ маке.
Колхозъёс но совхозъёс радио пыр тодо тулыс но сӥзьыл кынтылонъёс луонэз, гужем зор-котъёс луонэз; чугун сюрес вылын ужасьёс — лымы пельтон сярысь; морякъёс, летчикъёс но чорыгасьёс — сильтӧл луонэз.
Урод куазь луонэз азьвыл ик ке тодоно, солы дасяськыны луэ.
Кынтылон дыръя садысь писпуэз, бакчаысь будосъёсты утялтон понна, садъёсты но бакчаосты кезьытлэсь, тыл тылскыса, ӵынэн утялто.
Чугун сюресэз лымы пельтэмлэсь сайлан понна нимаз щитъёс пуктыло (69 сур.).
Куазь зорытэк туж кӧс улыку, искусственной мускытан но ву кисьтан ортчытъяло.
СССР-ын усто опытъёс ортчыло кӧс районъёсын искусственной пилем но зор кылдытон ласянь.
Сыӵе дыр но кыдёкын ӧвӧл ни, куке кулэ дыръяз куазез зорытыны яке зоремысь дугдытыны но луоз.
Юанъёс.
1. Малы народной хозяйстволы туж кулэ маке луэ куазьлэсь азьланьын кыӵе луонзэ наукая тодон?
2. Кызьы нюръяськыны луоз урод куазьлэн изъян лэсьтонэныз?
Кызьы вошъяське куазь арлэн дыръёсызъя.
Эскеремъёсъя асьмеос тодӥськом ини, куазь ялан вошъяське шуыса.
Нош кема дыр ӵоже куазез эскерыса, адӟоно, что арлэн котькуд вадесаз ас куазез луэ, котьку ик ог пӧртэмгес луись куазез.
Кылсярысь учком, кыӵе куазь котькугес луэ арлэн пӧртэм дыръёсаз Москва котырын.
Кутском тол но гужем бордысен — арлэн кык ваче пумит дыръёсыз бордысен.
Москва дорын толалтэ куазь гужем куазьлэсь туж пӧртэм луэ.
Тол.
Москва дорын тол кузь луэ, 5 толэзь ӵоже кыстӥське.
Котьку сямен ик со ноябрьлэн ӝыныысеныз кутске.
Шунды толалтэ бер гинэ ӝужа.
Нуназе шорын но со вылэ уг ӝутскы.
Солэн лучъёсыз нялмыт усё но музъемез ляб шунто.
Нуналъёс вакчиесь, уйёс кузесь луыны кутско.
21 декабре самой вакчи нунал: со сизьым час гинэ кыстӥське, нош уй — 17 час котыр (70 сур.).
21 декабрь бере нунал каллен кузёмыны кутске.
Толалтэ самой кезьыт толэзь — январь.
Солэн шоролыко температураез −11°; нош куддыръя кезьытъёс 20, 25 но даже 35°-озь но вуо.
Толалтэ нуналъёс котькугес кезьытэсь луо.
Толалтэ нуналъёсы шунды шорын но кезьыт.
Калык шуныт кышетъёсын биниське, шуба дӥся.
Ваньзы дырто.
Пыд улын лымы кеж-кеж куажыртэ.
Писпу вайёс йӧ веньёсын шобырскемын.
Шунды лучъёс улын лымы пырыос сокем чиль-валь кисьтасько, что пиштэм югытсылы дышымтэ синэз мальдыто (71 сур.).
Тӧлтэм нуналъёс толалтэ ӧжыт.
Тӧлъёс ӵем тӧлало но куазез чутрак вошто.
Юго-западысь тӧл тӧлаку, шӧдтэк шорысь шуныт луэ, ин пилемъёсын шобырске, лымы шуна, ульчаосын кот луэ.
Северо-востокысь тӧл дыръя нош ик кезьытъёс кутско.
Куддыръя толалтэ лымыё сильтӧлъёс луо.
Пумтэм трос лымы пырыосты тӧл сьӧраз нуэ но соосты бергатэ.
Омырын бергась лымы пырыослэсь кык вамыш кемысь но номыре но адӟыны уг луы.
Кужмо тӧл, лымыез огазе люкаса, туж ӝог кылдытэ бадӟымесь лымы пельтэмъёс, улыг интыосысь гопъёсты, канаваосты лымыен ӵошатэ.
Лымыен суро сильтӧл дыръя, гуртлы матэ ке но луид, бусыысь сюресэз ыштыса, кынмыны кема ик ӧвӧл.
Гужем.
Москва дорын гужем куинь толэзь кыстӥське.
Со июнь толэзе кутске.
Гужем шунды вазь ӝужа но бер пуксе.
Нуназе шорын со туж вылын луэ но музъемез зол шунтэ.
Нуналъёс пумен кузь луыны кутско, нош уйёс вакчияны.
21 июне — самой кузь нунал: со ог 17 час котыр кыстӥське.
21 июнь бере нунал каллен вакчияны кутске (72 сур.):
Самой пӧсь толэзь — июль.
Солэн шоролыко температураез + 19°.
Куд-куд нуналъёсы пӧсь 35°-озь вуэ.
Гужем нуналъёс пӧсесь луо.
Пӧсь нуналъёсы омыр, кынмем кадь, тып-тып улэ, интыысьтыз уг вырӟылы.
Ин вылэ пилемъёс кылдо но ӝоген шунало.
Шунды пыже.
Ваньмыз юэм потонэн курадӟе.
Даже тылобурдоос но чусомемын, бурдзэс лэзьыса но ымзэс усьтыса пуко (73 сур.).
Гужем кужмо зоръёс луо.
Куддыръя туж кужмо гудыриё зоръёс но ортчыло.
Сыӵе зор азьын ӵукна ик ӝокыт луэ.
Адямиос но, пудоос но, будосъёс но ӝокыт пӧсь омырен окаса уло.
Нош шуак лыктӥз кыдёкысь салкым омыр.
Бадӟым сьӧд пилем быдэс инэз ӵоксаз.
Гудыри пелез ӵоксамон гудыръя.
Ялан чилекъямен ин ик ӝуа кадь.
Кужмо зор зоре, куддыръя йӧзорен суро но зоре.
Кужмо зор котькугес ик кык час пала шукыръяське.
Гужем ӵоже будосъёс тырмыт тэлезё.
Ю-нянь но мукет сельскохозяйственной будосъёс кисьмало (вуо).
Гужем ортчыку, ю-нянез окто-калто.
Сӥзьыл но тулыс.
Сӥзьыл но тулыс — соос арлэн вошкон дыръёсыз: сӥзьыл — гужемысь толэ вошкон дыр луэ; тулыс — толысь гужеме вошкон дыр.
Сӥзьыл куазь вошъяськись.
Сӥзьыл кутскыку, ӵем дыръя шуныт но шундыё куазь луэ.
Куддыръя шерос пилемъёс вуо но, векчи зор зоре.
Сӥзьыллэн кыктэтӥ ӝыныяз ӵем дыръя бус вӧлме.
Ин сӥё пилемъёсын шобырске — соку олокӧня нунал ӵоже векчи зор кыда.
Педлон — нӧд, дэри, кот, кезьыт.
Кынтылон дыръёс но луыло.
Куддыръя зорен суро лымы но усе.
Дырын-дырын лымы но усе но, соку ик шуна.
Бератаз кезьыт куазь пуксе.
Музъем лымыен шобырске.
Тулыс но куазь вошъяськись луэ.
Тулыс кутскыку, кезьыт нуналъёс шуныт нуналъёсын вошъясько.
Шундыё нуналъёсы лымы шуна.
Шунаса, гольык интыос кылдыло.
Нош север пал тӧл тӧланы кутске ке, — нош ик кезьыт кариське.
Музъемлэн гольык интыосыз нош ик лымыен шобырско.
Озьы ке но, шуныт нуналъёс ялан ӵем луыны кутско.
Лымы ӝог шуна.
Котькытӥ пож вуос бызё.
Шуръёс усьтӥсько.
Бусыос но возьёс куасьмо.
Щётка кадь, ӵем но вож-вож турын ӝужаны кутске.
Сяськаос кылдо. Писпуос сяськаяськыны кутско.
Та вадес куддыръя кынтылэ, но кемалы уг кынтылы.
Бератаз пӧсь куазь пуксе.
Уж.
Тӥ дорысь куазьлэсь арлэн дыръёсаз кыӵе луэмзэ вералэ.
Тӥ дорын кӧня толэзь толалтэ кыстӥське?
Кӧня толэзь — гужем?
Кӧня толэзь — тулыс но сӥзьыл?
Тӥ дорын кыӵе толэзь самой кезьытэз?
Кыӵеез — самой пӧсез?
Тӥ дорын кӧня градусозь вуылэ кезьыт, пӧсь?
Ку тӥ дорын шур кынме?
Ку со усьтӥське?
Ма со климат.
Асьмеос тодӥськом ини, что котькуд ар дырлэн нимаз аслаз пӧртэм куазез луэ.
Одӥг интыын кема улӥсь адямиос вераны тодо, кыӵе куазьзы соослэн луэ сӥзьыл но толалтэ; кыӵе — тулыс но гужем.
Одӥг интыын арлэн дыръёсызъя куазьлэн огкадьгес вошъяськемез нимаське интылэн климатэз шуыса.
Котькуд интылэн аслаз климатэз луэ.
СССР-лэн куд интыосаз климат Москва дорысь климатэн огкадь луэ, мукет интыосаз — шӧдскымон пӧртэм луэ.
Музъемлэн пӧртэм интыосаз кыӵе климат, сое асьмеос азьланьысь тодом.
VII. МУЗЪЕМ ШАРЛЭН ПӦРТЭМ ПОЯСЪЁСАЗ ПРИРОДАЛЭН НО КАЛЫКЛЭН УЛОНЭЗЛЭН КАРТИНАОСЫЗ.
ТРОПИЧЕСКОЙ ПОЯС.
Тропической пояслэн природаез.
Экваторлэн кык палтӥз ик музъем котыртӥ паськыт полосаен кыстӥське пӧсь пояс.
(Шедьтэ пӧсь поясэз глобус вылысь но полушариослэн картазы вылысь.
Пусъе сое горд сюйлэсь лэсьтэм музъем шар модельды вылэ).
Асьме умеренной поясын гужем пӧсь луэ.
Нош гужем толэзьёс ортчыса, сӥзьыл кезьытъёс вуо, нош отӥяз тол кезьытъёс но кутско.
Тропической поясын чик сыӵе ӧвӧл.
Асьмеос арлэн котькыӵе дыръёсаз — гужем-а, толалтэ-а, сӥзьыл-а, тулыс-а — куазьлэсь кыӵезэ отын улӥсьёслэсь радио пыр юам ке, соос котьку ик шуозы: „Ми дорын пӧсь“.
Тӥ тодӥськоды ини, отын нуназе шорын шунды туж вылэ ӝутске.
Солэн лучъёсыз музъем вылэ вылласянь меӵак усё но музъемез зол шунто.
Соин ик отын арлэн кезьыт дырыз ноку но уг луылы.
Нош тропической поясын но куазь котькытыназ одӥг кадь ӧвӧл.
Куд интыосаз быдэс ар ӵоже нуналлы быдэ ялан ог дыре кужмо кисьтыса зоре.
Почва татын ялан нюромемын луэ.
Ноку но усьылӥсьтэм вож куаро чебересь тропической нюлэсъёс музъемез шобырто.
Мукет интыосаз кӧня ке толэзьёс ӵоже, чик зорытэк, кӧс улэ, нош собере кӧня ке толэзь ӵоже нуналлы быдэ сямен кужмо зоре.
Таӵе интыосын нюлэсъёс ӧвӧл.
Туж бадӟым интыос турынэн гинэ шобырскемын.
Кӧслэсь кышкасьтэм писпуос гинэ огназы яке люкен-люкен шерос шедьыло.
Та интыос саваннаос шуыса нимасько.
Кӧс дыръя саваннаысь турынкуар ваньмыз куасьмыса, пыжыса быре, писпуос вылысь куаръёс усьыло, шуръёс куасьмо.
Зоръёс ортчем бере саванна нош ик улӟе, вожектэ, ӝужыт турынэн шобырске, писпуос но выль куарен куаръясько.
Нош тропической поясын сыӵе интыос но вань, кытын зоръёс чик уг луыло.
Ар ӵоже татын сутэ чиданы луонтэм пӧсь шунды.
Почва кӧс, будосъёс шер гинэ шедьыло.
Котырак, кытчы гинэ эн учкы, — ӟырдам луо, интыен-интыен горд сюй яке изъёс.
Со — пустыняос.
Тропической нюлэсын.
Полушарие карта вылысь шедьтэ Африкаез.
Шедьтэ со интыез, кытӥ Африка вамен экватор ортче.
Татын Конго шур кузя но солэн притокъёсыз кузя туж бадӟым интыын будэ пырыны луонтэм тропической нюлэс.
Тани ма вера одӥг путешественник та нюлэс сярысь.
Пӧсь нуназе шорын.
Ми мынӥм африканской нюлэсэтӥ слонъёслэн ветлон сюрессы кузя.
Вылэ инме ик тубемын веськрес пальма колоннаос но трос сюрс асьмелы тодмотэм пӧртэм писпуос.
Интыен-интыен милем шедьылӥзы туж ӵем будэм бамбукъёс но бананъёс. Бананлэн кисьмам емышъёсыз зарни кадь чилясь ӟускиосын ошкылэмын.
Писпу йылъёс, огазе герӟаськылыса, кабын липет кадь маке кылдыто.
Улӥяз ӝом-ӝом вал.
Интыен-интыен гинэ шунды лучъёс пыро.
Биниськыса кошкись туж бадӟымесь пӧртэм будосъёс — лианаос, — зӧк гозы сямен, одӥг писпуысь потыса, мукет писпуэ ошкылэмын, писпу модос котыре йылозяз биниськыса, отысен музъем вылэ ик ошиськемын.
Ӵем но ӝомыт куаръёс пӧлысь мычиськыса уло пиштӥсь бадӟымесь сяськаос.
Почва зӧк сӥен шобырскемын вал сисьмымтэ векчи улвайёсын но куаръёсын.
Огъя вылысьтыз-вылаз пограм писпу модосъёс кыллё но, ваньмыз ветлыны луонтэм герӟаськемын ӵем потэм лианаосын.
Соос писпу модосъёслэсь улӥзэс но озьы ик быдэс герӟаллям, кечат-вамат ӵем пунӥськыса.
Тросэзлэн соослэн дэмӟиськонъёссы но мертчись шиоссы вань, бордазы дэмӟиськытэк но астэ ранить картэк, соос дортӥ ортчыны но уг луы вал.
Нюлэс чик ветлыны луонтэм вал.
Милям мынон сюресмылэн бур палаз яке паллян палаз тӥртэк одӥг вамыш но кожеммы ӧз луылы.
Почва трос интыетӥ сыръясь вал но, милемлы сыръясь интыослэсь кыдёкетӥ ортчоно луылӥз, ӵем нюлэс пыртӥ потон сюрес кораса.
Пӧсь но нюр вал.
Шоканы ик секыт вал.
Ми туж шуген вамышъямы азьпала.
Пӧйшуръёс но тылобурдоос ваньзы пӧсьлэсь ватскылэмын.
Нюлэсын чал-чал.
Нюлэслэсь чуссэ дугдылытэк жингыртӥсь нымы-кибыос гинэ сӧро.
Уин.
Мынон сюресмы милемды шур дуре вуттӥз.
Ми дугдӥм но кӧлыны дасяськыны кутским.
Шунды пуксиз но, соку ик тёпак пеймыт луиз.
Ӝытпал улӟем нюлзс нош ик чусак луиз.
Нош кемалы ик ӧз.
Ми изьыны но выдыса ӧм вуттэ, нош ик нюлэс пӧртэм куараосын тырмиз.
Жингыртыны но тачыртыны кутскизы сюрсэн лыдъяськись пӧртэм уй нымы-кибыос.
Эбекъёс пеле пырымон зол куараен хорен кесясько.
Дырын-дырын кыдёкысь кылӥськыло кышкам обезьян куараос.
Шулам куара кылӥськылӥз, нош куддыръя тылобурдоослэн, мяугетэм кадь, кеськемзы кылӥськылӥз.
Кин ке ӝож куараен вузыны кутскиз...
Дырын-дырын леопардлэн ыргетэмез кылӥськылӥз.
Ми уйбыт ӧм изе.
Милемды кутылӥз вормыны луонтэм кышкан.
Ми тодӥськом вал, что нюлэсын уин шурдыт расправа мынэ, что сюэн лыдъямон тылобурдоос но мукет животнойёс али быро нюлэс сьӧсьёс улэ.
Ми кышкаса улӥм, сьӧсьёс ми вылэ но лыктозы шуыса.
Вазь ӵукна.
Куазь ӟардӥз.
Мон пыӵалме зарядай но палаткаысь потӥ.
Ӝужыт скалаез адӟыса, мон со йылэ туби, котырак интыез учкыны понна.
Тачыртэм но ӵашетэм кылӥськиз...
Мынам уллапалам ик ӵем чащаысь шуак адскиз туж бадӟым слонлэн тыбырыз, со бӧрсьы кыктэтӥез, куиньметӥез...
Мон вылэгес туби.
Нош уллань учки но чылкак пайми.
Нюлэсэтӥ быдэс уллё слонъёс каллен гинэ кошко.
Соос нюлэсэтӥ пичи сюрес вылтӥ огзы бӧрсьы огзы мыно ву дуре юыны.
Шӧдтэк шорысь одӥг пересь мумы слон монэ шӧдӥз.
Скала котыртӥ со бызьыса котырскиз но бадӟым куараен кеськиз.
Слонъёс дугдӥзы но шыпак кариськизы.
Нош ог секунд улыса, соос азьлане бызьыса кошкыны кутскизы, сураськыса, азязы ма шедем, сое тӥяса, погыръяса.
Слонъёсын мекалъям писпуос лучыр-лачыр гинэ пограло.
Нюлэс резь-куаж кылӥськись куараен тырмиз.
Одӥг минут но ӧз ортчы, уллё пегӟиз.
Мон скала вылын ӧжытак сылӥ на но шур дуре васькыны кутски.
Скала вылысь васькыны но ӧй вуы мон, быдэс уллё обезьянъёсты адӟи.
Пичи пӧйшуръёс шур дуре мыно.
Бӧрсязы кин ке тушмон уг лыкты-а шуыса, соос котыр утчалляськыса мыно...
Шӧдтэк шорысь кылӥськиз азязы мынӥсь вожаксылэн кеськем куараез.
Со дугдӥз но, берлань тэтчыса, маке чилектэм кадь, пегӟиз дорысьтыз писпу улвайёс пӧлы; со бӧрсьы быдэс уллё кесяськыса пегӟиз.
Со инты доры матэгес мынӥ но мон бадӟым кыез адӟи.
Со ӝутскиз но вожез потыса чыскетыны кутскиз.
Мон берен лагере берытски.
Кужмо зор.
Ӵукна сиськем бере ми матысь гуртэ мыныны дасяським, отысь лодка басьтыса, шур кузя азьпала кошкыны малпаськом вал.
Та малпаммы милям ӧз быдэсмы.
Сьӧд пилемъёс вуизы.
Кыдёкын гудыри гудыртӥз.
Чилекъяны кутскиз.
Туж кужмо сильтӧл ӝутскиз.
Та минуталэсь азьло вырытэк, зӥб-зӥб сылӥсь писпуос мыд-мыд пала кужмо шонаськыны кутскизы.
Соос интыысьтызы ик ишкалсконо кадь вал.
Соослэн йылъёссы, азьлань някырскыса, нош ик берлань шонско.
Улэтӥ гинэ нюлэс вадьсытӥ пеймыт пилемъёс кошко.
Резь-куаж шуэм куара, шулам, тӧллэн жуэтэмез но пумтэм писпу модосъёслэн ӟукыртэмзы кылӥськылӥз.
Пилемъёс быдэс сьӧд луизы.
Вис карытэк чилекъяз.
Тыпак пель пыртӥ потымон куараен гудыртӥз но, зорыны кутскиз.
Кык-куинь секунд ортчыса, та зор дурен кисьтонлы пӧрмиз.
Котыр ӧръяськем вуос милям лагерьмы вылэ пальккизы.
Кӧняке минут ортчем бере, милям палаткаосмы, запасъёсмы, тӥрлыкъёсмы — ваньмыз вуын вал ини.
Кужмо зорлэн куашетэм куараеныз, милям огмылэсь огмы куарамес но кылэммы ӧз лу ни.
Тёпак пеймыт луиз.
Олокӧня час ӵоже озьы дугдылытэк зориз но, ми интыысьтымы вырӟылытэк улӥм.
Бератаз зор шӧдтэк шорысь дугдӥз но, нош ик шунды пиштыны кутскиз.
Милям лагерьмылэн тусыз шим-шим вал.
Номырмы но кӧс ӧз кыльы ни.
Дӥськут вылысьтымы ву шурысь кадь вияз.
Ӝытпал вуыны кутскиз но, ми дыртыса дасяськоно луим кӧлыны.
Лагерьмес сьӧсьёслэсь возьман понна, одно ик тыл тылскыны кулэ.
Та уж туж секыт вал, малы ке шуоно, котьма вуэн тырмиз.
Африкаын сяна, дуннелэн мукет люкетъёсаз но тропической нюлэсъёс будо на.
Ваньзы ик соос вылӥ верам нюлэс тусъемесь.
Озьы ке но, веранэз ӧвӧл, котькытын огкадесь писпуос уг будо, животнойёс но огкадесь ӧвӧл.
Тропической нюлэсъёсысь животнойёс.
Тропической нюлэслэн туж узыр будосэз, трос пӧртэм емышъёсыз но тысьёсыз сёто сион туж трос лыдъяськись но пӧртэм животнойёслы но тылобурдоослы.
Будос сионэн кӧтсэс тырись животнойёс но тылобурдоос трос бере, — сьӧсь животнойёс но асьсэлы сион капчиен шедьтыны быгато.
Тропической нюлэсын туж трос пӧйшуръёс но тылобурдоос уло.
Нош вазен соос еще но трос на вал.
Тросэз соос адямиен быдтэмын ини.
Тропической нюлэсъёсын уло: слонъёс, обезьянъёс, тигръёс, леопардъёс.
Со сяна, тропической нюлэсъёсын туж трос тыло-бурдоос уло.
Обезьянъёс — туж чырккемесь но капчиесь животнойёс, писпуос йылын уло; асьсэлэн кузесь но кырмиськыны ӝабыресэсь ки-пыдъёсынызы писпу улвайёс но модосъёс борды каньылэн кырмиськыса, писпу вылысь писпу вылэ тэтчало.
Пӧртэм емышъёсты сиыса уло.
Слон — мувыр животнойёс пӧлысь самой бадӟымез.
Пӧртэм будос, турын-куаръёсты сиыса улэ.
Ветлыны луонтэм ӵем нюлэсъёстӥ но аслаз туж бадӟым мугорыныз сюрес сайкыса кошке.
Кузь нырыныз писпу йылысь улвайёсты но емышъёсты ишка.
Бегемот — туж бадӟым животной.
Африкаын улэ бадӟымесь шуръёсын но тыосын.
Улонэзлэсь трос люкетсэ вуын ортчытэ, ву будосъёсын но тростникен кӧтсэ тырыса.
Уин мувыретӥ ветлэ.
Ачиз нокин вылэ но нападать уг кары.
Тигр — бадӟым сьӧсь пӧйшур,
ӵем нюлэсын улэ.
Солэн ӵуж, гожмо вылтырыз шунды шорын ӵужектӥсь будосъёслэн модосэнызы ог тусъем.
Леопард — сьӧсь пӧйшур.
Тигрлэсь ӧжытак пичигес, озьы ке но, сыӵе ик кужмо но чырккем: писпуэ тубе но отысен животной вылэ тэтче.
Питон — одӥгез туж бадӟымез но туж кышкытэз кый.
Животнойёсты кутылэ, соос котыре бинялске но аслаз бадӟым мугорыныз кекатыса вие.
Кутоссэ собере быдэсэн ньылэ.
Пуныез, ыжез каньылэн ньылыны быгатэ.
Попугайёс — тысь сиись, тылобурдоос.
Ӝабырскись кужмо пыдъёсынызы но, курик кадь, куасалскем кужмо нырынызы писпу улвай вылтӥ каньылэн ветло.
Нырынызы пушмульыез но пӧртэм тысьёсты каньылэн пильыло.
Тропической нюлэсъёсын будосъёс.
Кокосовой пальма — 25 метр ёрос ӝужда будӥсь писпу, улвайтэм.
Куаръёсызлэн кузьдалазы 6 метрозь вуылэ.
Емышез — пушмульыосыз быдӟалаен пичи пинал йыр быдӟаесь.
Банан — тропикысь туж важной будос.
Солэн ческыт но питательной емышъёсыз тропической странаосын улӥсьёслэн нуналлы быдэ сиськон сионзы.
Бамбук — ӝуждалаен 40–50 метр ӝужда будӥсь будос, выл тусызъя со тростниклы тупа, солэн модосэз нош трос писпуослэн модосъёссылэсь зӧк луэ.
Туж ӝог будэ.
Техникаын, туж юн но капчи материал луыса, уже кутӥське.
Ужъёс.
1. Музъем шарлэн будос картаез вылысь возьматэ тропической нюлэсъёслэсь кытын будэмзэс.
2. Со интыосты ик возьматэ полушариослэн картазы вылысь.
3. Эн вунэтэ, кыӵе будосъёс но животнойёс шедьыло тропической нюлэсын, дышетске соосты суред вылысь тодманы.
Африканской саваннаетӥ.
Трос нунал ӵоже мынэммы бере, ӝомыт сьӧд нюлэс шеромыны кутскиз.
Писпу йылъёс вискытӥ ин бам адскиз.
Синэз мальдытӥсь шунды пиштӥз.
Ӧжыт гинэ дыр ортчыса, милям азямы, мора кадь, вож турын усьтӥськиз.
Турынэн шобырскем туж бадӟым кыр интыын люкен яке огназы гинэ писпуос сыло.
Тужгес ик синэ йӧтымонэсь великан-писпуос — баобабъёс.
Котькуд таӵе писпулэн улаз трос дасо муртлэн ватскемез луоз.
Солэн модосэз сокем зӧк вал, что 10 мурт но, ваче ки кутскыса, солэсь модоссэ ӟыгыртыны мырдэм сузё (86 сур.).
Шунды чидантэм пыже.
Ми дугдӥм но, шунды пӧсь сӥятозь, баобаблэн вужераз ватским.
Ӝытпал, шутэтскыса, ми азьлане вамыштӥм.
Шунды пуксёнлань луиз.
Пӧсь ӧжыт салкымаз.
Азьланьын, син макеме сузе, азьло кадь ик турынэн шобырскем ӵошкыт инты кыстӥське.
Ми ялан возьмамы, турынысь антилопа уз поты-а, зебра ворттыса уз кошкы-а шуыса, писпу сьӧрысь жирафа уз адскы-а шуыса.
Но возьмаммы юнме луиз.
Милемды келясь негръёслэн верамзыя, та интыосын азьло дыръя туж трос уллёен уло вылэм вылӥ верам животнойёс но, соосты капчиен адӟыны луэ вылэм.
Соос али но вань на, но азьло сярысь туж ӧжыт луэмын — адями соосты троссэ быдтӥз.
Соос адямилэсь туж кышкало но, адямиез адӟо ке, кыдёкысен ик пегӟо.
Мыныны капчи но умой вал.
Ми зол вамышъямы лапег но ӵем турын шобрет вылтӥ, азьпаламы ялан вож-вож ӵошкыт инты усьтӥськемлы синмаськыса мынӥм.
Озьы ке но, ӝоген инты воштӥськыны кутскиз.
Турын пумен ӵем но ӝужыт луыны кутскиз.
Тани со кускозь ини, пельпумозь, йырлэсь но вылын.
Ваньмыз ватскиз турын борддор сьӧры.
Сюбег гинэ пичи сюрес кузя, огмы бӧрсьы огмы шуген вамышъяськом, огмес огмы ыштэмлэсь эскерыса.
Час пала мынӥм та турын коридоретӥ.
Дырын-дырын милемлы кышкыт шимес вал: а шӧдтэк шорысь оло ӵем турын пӧлын сьӧсьёс ке ватскыса уло, оло нош соос пӧлысь самой кужмоез — лев ке...
Турынлэсь пумен лапегамзэ шӧдэммы бере милемлы капчи луиз.
Кӧня ке дыр ортчыса, ми азе нош ик вӧлскиз вож турынэн ӵошкыт инты.
Тӥни кыдёкын тулкымъяськись мора кадь турын пӧлтӥ чутыръяськись, куӵо, лента кадь маке адскиз...
Тӥни со котырскиз, шонерскиз, золтӥськыны, матэктыны кутскиз.
Ог секундскын ми адӟим ини, что со груз нуллӥсь негръёс быдэс караван вылӥллям.
Сю витьтон негръёс йыр йылазы яке пельпумазы бадӟымесь бинетъёсын огзы бӧрсьы огзы вамышъяса, луд ӟазег кадь, лыкто.
Караван ми доры вуэм бере, ми тодӥм, что со кофе плантациысь кофе нуэ вылэм.
Негръёс милемлы веразы, гурт матын ини шуыса, соин ик отчы югытэн вуон понна, ми ӝоггес вамышъяны кутским.
Али дыръя но африканской саваннаостӥ носильщикъёс караванъёсын котькудлань ветло.
Лев — самой кужмоез сьӧсь.
Аслыз сион уин утча.
Зебраосты, жирафаосты, антилопаосты, озьы ик гурт пудо-животъёсты но кутылыса сие.
Зебра — турынкуар сиись животной.
Аслаз вылтырызъя валлы туж укша. Вылтыр гонэз гожмо луэмен, валлэсь пӧртэмгес луэ.
Жирафа — будос сиись животной.
Кузесь азь пыдъёсыз но кузь чыртыез солы сузькыны юртто ӝужытэсь писпуос вылысь улвайёс доры.
Сьӧсь кутэмлэсь ӝог бызьыса пегӟе.
Страусъёс — бадӟымесь, лобасьтэм, но туж ӝог бызьылыны быгатӥсь тылобурдоос.
Пӧртэм будосъёсты но будос кидысъёсты сио.
Кузесь юн кукъёсынызы туж бадӟымесь интыосты ортчыло, сион утчаса.
Антилопаос — турын-куар сиись животнойёс.
abu
Эскериськисесь.
Уллёосын уло.
Кышкыт луон дыръёсы тушмонзылэсь, тӧлпери кадь, ӝог пегӟо.
Ужъёс.
1. Шедьтэ карта вылысь, кытын интыяськемын саваннаос.
2. Вералэ, саванналэн климатэз маин пӧртэм луэ тропической нюлэслэн климатэзлэсь.
3. Тодады возе, саваннаын кыӵе животнойёс но будосъёс ӵем пумиськыло.
4. Вералэ, кызьы вошъяське саваннаослэн огъя туссы арлэн пӧртэм дыръёсаз.
Негръёслэн гуртазы нунал.
Негръёслэсь гуртсэс куддыръя кыдёкысен тодманы уг луы.
Со ӵем дыръя пуксемын луэ пунӥськись будосъёсын биниськем ӝужыт но ӵем будӥсь куак пушкын.
Адямиослэн но сьӧсьёслэн нападенизылэсь утялскон понна, гурт ӝужыт тынэн котыртӥське, пырон-потонэз нош юн капкаен ворсаське.
Пушказ тын кузя радысь сыло куроен липем котыресэсь горд сюй хижинаос.
Хижина котыртӥ лапег заборен висъямын пичиесь азбаръёс.
Гурт шоразы буш площадка кельтэмын.
Татын уин пудоос уло.
Вазь ӵукна.
Шунды ӝужамын ӧвӧл на, нош гурт пыдйылаз ини.
Котькуд хижина азьын тылскем тылъёс ӝуаны кутско.
Скалъёс бӧксо, атасъёс чоръяло, пуныос уто.
Пиосъёс, нылкышноос но пиналъёс — ваньзы ик гидкуа азьын ини.
Соослэн гольык мугоръёссы тыл азьын чиляло.
Нылкышноос сион дасяло.
Котькуд семья, ас хижина азяз, котырак пуксьыса, ӵукназэ сиське.
Пиос калык гуртын ӧжыт.
Тросэз кужмын нуэмын европейской капиталистъёслэн плантациосазы ужаны но, трос арня ӵоже ас гуртазы ӧз бертылэ на.
Шунды ӝутске.
Ваньзы ас ужзы борды кутско.
Пиосъёс пӧйшураны но чорыганы мыно.
Нылкышноос хозяйствоязы ужало: тари яке банан туё, пыжо, пӧзьто, хижиназэс но азбарзэс утялто.
Кудъёсыз нылкышноос, пу мотыга кутыса, ас гуртысьтызы кошкыло, пиналъёссэс тыбыразы ныпияса нуо.
Соослы ас лудзэс гудоно луэ, тари кизьыны понна.
Нуназе котырын чиданы луонтэм пӧсь луэ, пӧйшураны мынэм пиосъёс сянаез, соку ваньмыз хижинаосазы шутэтскыны люкасько.
Гуртын туж чус луэ, быдэс гуртын нокин но ӧвӧл кадь.
Нуназе пӧсь ӧжыт салкымам бере, гурт нош ик улӟе — дугдытэм ужзы нош ик выльдӥське.
Тани шунды пуксиз но, соку ик тёпак пеймыт луиз.
Нош ик хижинаос азьын тылъёс ӝуаны кутско.
Ӝытсэ сисько.
Нылкышноос туж бер уинозь ужало, нюлэсысь сьӧсь пӧйшуръёслэн куараоссы кылӥськытозь.
Кыӵе калыкъёс тропической поясын уло но ма соос ужало.
Трос пӧртэм калыкъёс уло тропической поясын.
Африкаын — негръёс, Австралиын — австралиецъёс, Тихой океанысь островъёсын — малаецъёс.
(Карта вылысь возьматэ, кытын уло та калыкъёс.)
Тропической природа адямилы пӧртэм сион сётыны быгатэ.
Нюлэсъёсын но саваннаосын пӧртэм емышъёс но тысьёс лыдтэм трос, тылобурдоос но туж трос уло.
Шуръёсын но тыосын чорыгъёс трос.
Тропической поясын шунды туж пӧсь шунтэ, соин ик отын улӥсьёс шуныт юртлы но шуныт дӥськутлы уг кулэясько.
Солы пумит, соослы ватсконо луэ нуназе шорын пӧсь пыжись шундылэсь.
Тропической поясын улӥсь калыклэн куэз пеймыт буё, со ӧжыт возьма тропической шундылэн ӵушкась лучъёсызлэн сутэмзылэсь.
Юртъер соос ӵем дыръя лэсьтыло улвайлэсь, куаръёслэсь но ньӧръёслэсь.
Куддыръя сое горд сюен зырало.
Дӥськут соос ноку но кадь уг нулло.
Африканской негръёс музъем ужаса уло, пӧйшурало но чорыгало.
Музъемзэс соос вашкала сямен — пу орудиосын (кукчоен яке огшоры йылсам бодыен) ужало.
Музъем ужаса улӥсь калыкъёс оседло уло, мукет сямен вераса, одӥг интыязы.
Мукетъёсыз калыкъёс пӧйшураса, чорыгаса, емыш но тысь бичаса гинэ кӧтсэс тыро.
Сыӵе калыкъёс, сион утчаса, интыысь интые кӧчылыса ветло но, уин кытчы ке сюро, отын ик кӧло.
Соослэн ялан улон юртсы ӧвӧл, кулэ дыръяз огвадеслы гинэ турынлэсь но улвайлэсь шалашъёс лэсьто.
Тропической поясысь калыклэн кыӵе улонэз.
Тропической странаосын природа узыр.
Тропической странаосын улӥсь калыклы улон капчи, эркын шуыса малпаны луэ.
Озьы-а бен, со?
Чик ӧвӧл.
Пӧсь странаосын адямиез котырак кышкытъёс котыртыса уло.
Мынӥз, шуом, негр пӧйшураны, нош луло бертоз-а — тодмо ӧвӧл.
Котыр сьӧсьёс...
Сак ке ӧд улы — адӟыса ке ӧд вуы, ӧд ке йӧтты, дыраз пегӟыны ке ӧд вуы — бырид.
Пӧйшуръёс уин юртъер котыртӥ ик ветло, минутлы быдэ эскериськыса сак улоно луэ.
Негръёс асьсэ гуртсэс ӝужыт тынэн котыртыса возьмало.
Куд-огез калыкъёс нош пӧйшуръёслэсь утиськон понна юртсэс писпуэ лэсьто.
Пудо животэз хоть эн ик ворды — сьӧсьёс быдто.
Це-це нимо кут куртчылэмен но Африкалэн куд-ог интыосаз ӵем дыръя пудо-животъёс бырыло.
Кизем ю-нянь но ялан кышкыт улын.
Кизем ю-нянез вуыны кутскыкуз возьматэк ке кылид — обезьянъёс, отчы быдэс уллё вуыса, ваньзэ быдтозы, кизьылымтэ кадь карозы.
Пӧсь странаын улӥсь адямилы котьма, чик кужымзэ понытэк, шеде шуон шонер ӧвӧл.
Пӧйшурасьёс тропической нюлэслэн бышкаськись вистэм-вожтэм писпуосыз пӧлтӥ трос часъёс ӵоже, нош куддыръя быдэс нунал но мырдэм гинэ азьлань мыныло.
Вамышлы быдэ асьсэлы сюрес кораса сузяло, нальыкъёс но выос лэсьтылыса, пӧйшурлэн пытьыетӥз лушкемен мыныса, сое улляло.
Та уж ӧвӧл-а ма?
Веранэз ӧвӧл, — уж, со вылэ ик кышкыт уж.
А куке негръёс бусызэс пу кукчоен яке йылсам бодыен бугыръяло ке, та секыт уж ӧвӧл-а ма?
Соин валче ӧвӧл вунэтоно, что котькыӵе физической уж пӧсь поясын, асьме умеренной поясын сярысь, трос пол секыт.
Нуназе шорын чидантэм сутӥсь шунды адямилэсь ӟигарзэ быдтэ, сое лябомытэ.
Омырын миллионэн лыдъямон нуллӥськись нымы-кибыос куртчылэменызы курадӟыто.
Нюр интыосын лек кезек висён лябомытэ.
Сион-юон шедьтон понна, ас улонзэс утялтон понна дугдылытэк нюръяськыса уло пӧсь поясысь калыкъёс.
Урод вооружиться кариськемын соос та нюръяськонын.
Соослэн ужаны тужгес ик кулэ луись орудиоссы но ӧвӧл, ӟеч оружиоссы но ӧвӧл.
Соослэн нокыӵе тодонлыксы но ӧвӧл.
Соослы природаен нюръяськыны секыт.
Соос быдэсак зависимо уло природалэсь.
Пӧсь странаосысь калыклэн улонэз тужгес ик секыт луыны кутскиз та берло 50–70 аръёсы, европеец-капиталистъёс отчы вуэм бере.
Англиысь, Бельгиысь но мукет государствоосысь капиталистъёс ӟеч музъемъёсты киултӥзы, дуно пӧйшуръёсты но будосъёсты, сьӧсь сямен, трос быдтӥзы.
Пӧсь странаосысь калыкез соос кужмысь ужато ас плантациосазы, чугун сюрес лэсьтоназы, кужмысь косо каучук поттыны, секыт макеосты нуллыны (96 сур.).
Дасо сюрсэн лыдъямон негръёс быризы Африкаын чугун сюрес лэсьтонын, нюлэсысь каучук поттонын, асьсэ вир сюпсисьёссы вылэ вормонтэм ужъёсты ужаменызы.
Уже мынэмлэсь пыкиськись муртъёслэн гуртъёссы тросэз куашкатэмын, сутэмын.
Негръёслэсь гуртсэс куашкатэмзы.
(Путешественниклэн верамез.)
Та вал кӧня ке ар талэсь азьвыл Африкаын, одӥг негритянской гуртын.
Та гурт интыяськемын Бельгилэн владениосаз.
Со кыстӥське шулдыр но чебер тропической нюлэс дуртӥ.
Гурт котырысь музъем вылэ африканской тари (просо) киземын вал,
сое котырто вал, кый кадь, биниськем лианаосын бадӟымесь пальмаос но мукет тропической писпуос.
Тропической нюлэсэтӥ ветлыса туж жадеменым, мон татын горшок лэсьтӥсь пересь Убанулэн хижинаяз шутэтскисько вал.
Пересь, нунал лумбыт горшок лэсьтон питранзэ бергатыса, синмаськонтэмесь гинэ посуда лэсьтэ вал.
Ваче куспазы тупаса улӥзы та негритянской гуртын.
Котыртӥсь нюлэсъёсын трос вал бананъёс но пальмаос, пӧртэм пӧйшуръёс.
Шуразы чорыгзы туж трос вал.
Сионзы быдэс арлы тырмылӥз.
Пиосъёс чорыгало но пӧйшурало вал.
Нылкышноос сельской хозяйствоязы ужазы.
Пиналъёс юртъёс котырын шудылӥзы, пукыӵен ыбылӥськыны дышетскылӥзы, пичи хижинаос лэсьтылӥзы.
Нуназе бере быдэс гурт котьку ик изьылӥз.
Озьы ик та нуналэ но вал.
Мон, хижиналэн ӧс куспаз пукыса, чильымен тамак кыскисько вал.
Котырак чус.
Шӧдтэк шорысь кытын ке кыдёкын кавалерийской гумыен шултэм куара кылӥськиз.
Мон, малпатэк, кутсконо луи ялан кускам ошиськыса ветлӥсь револьвере борды.
Ворттӥсь вал пыд куараос кылӥськизы.
Ог секунд ортчем бере, шур палась бельгийской военной конной отряд адскиз.
Та отряд шонерак лыктэ кизем бусыетӥ.
Еще секунд ортчем бере, отряд быдэсак гурт вылэ уськытскиз.
Солдатъёс туж ӝоген вал вылысьтызы васькылӥзы но, хижинаосы пырыса, арлыдооссэ но егитъёссэ пиосты кутылыса, гозыен керттылыны кутскизы.
Керттылэм муртъёслэн кыстаськемзы но кесяськемзы, кышноослэн но пиналъёслэн бӧрдэмзы но ӝуштэмзы омырез ик тырмытӥзы.
Мон валатскыса но ӧй вуы, керттылэм калыкез мон азе быдэс гурезь быдӟа люказы.
Виемъёсыз но трос лошъяськизы.
Кин гинэ пумитъяськылӥз, соосты соку ик интыязы виылӥзы.
Бызьыса пегӟыны турттӥсьёссэ гозы кыӵесэн кутылӥзы.
Бедной хижинаосты куашкатъяны кутскизы.
Одӥгез кудӟем солдат ӝуась сэрегпумен бызьыса лыктӥз Убанулэн хижина дораз но кенӝытыны турттэ вал.
Мон револьверме ӝутӥ но солэн кияз ыби.
Сэрегпумез усиз.
Пыӵал куара шоры соку ик кӧня ке солдатъёс люкаськизы но тӧдьы адямиез адӟем беразы берен кошкизы.
Гурт куашкатон кык час ёрос кыстӥськиз.
Нош тани, вань куараез ик согыса, трубач гумыеныз отбой шудӥз.
Адями кутылон быриз.
Солдатъёс керттылэм калыкез, пыдйылазы ӝутъяса, колоннае султытӥзы но, валъёссы вылэ пуксьыса, колоннаез котырак котыртӥзы.
Собере нош ик военной сигнал сётӥзы но — керттылэм негръёсын колонна вырӟиз.
Чугун сюрес лэсьтыны озьы люкаллязы ужасьёсты.
Уж.
Та юанъёслы вералэ:
1. Кыӵе калыкъёс уло тропической поясын?
2. Ма ужало тропической поясын улӥсьёс?
3. Кызьы соос уло?
Пустыняын.
Карта вылысь шедьтэ Африкалэсь север пал люкетсэ.
Татын западысен восток пала кыстӥське дуннеысь самой бадӟым пустыня — Сахара.
Трос нунал ӵоже мынэ ини милям караванмы Сахаралэн ӟырдам луо вылтӥз.
Котыр ӝужыт луо вырйылъёс люкаськемын.
Пумтэм-йылтэм луо моралэн кынмем тулкымъёсыз вылтӥ кадь ми мынӥм.
Интыен-интыен шедьылӥзы чурытэсь но бышкаськись турын куаръёс но куакъёс.
Нуназе шор матэ вуэ.
Шунды, тыл кадь ик, пыже.
Котыр шим-шим но чал-чал.
Ми шутэтскыны дугдӥм но, нуназе пӧсен ӟигартэм луыса, палаткаын кыллим.
Верблюдъёс но, сыскем сионзэс ӝомезьтыса, шутэтскизы.
Нош тани ӟырдам омырын кыӵе ке кырӟам кадь, куараос кылӥськизы.
Та куараос куд палась кылӥсько меда шуыса, мон палаткаысь потӥ.
„Луоос озьы кырӟало, — проводник шуиз, — умойлы ӧвӧл та“.
Мон валай, луоен суро сильтӧл — самум матэ вуэ шуыса.
Туж бадӟымесь луо вырйылъёс, та дырозь шып сылӥсь маос ке, улӟизы.
Йылъёссы соослэн ӵын потэм кадь луизы.
Тӧл, ӝутскыса, отысь луоез пельтэмен сыӵе со вылэм.
Пустыняысь луоос вырӟизы.
Кыдёкысь сайкыт интыос ӝом-ӝом луыны кутскизы.
Ин бам ик музъем вылэ лэзькиз кадь.
Ӝоген тузон пилемъёс омыре ӝутскизы но шундыез согизы.
Тӧл пумен кужмояз.
Йырзэс кузь лэзьыса, верблюдъёс луо вылэ нюжак выдӥзы.
Адямиос но йыр вылтӥзы шобырскыса, пельзэс ӵоксаса выдӥзы.
Котькуд палась кылӥське тӧлъя кошкись луоослэн ӝокыт кесяськемзы но бӧрдэмзы.
Бератаз, ваньмыз сураськиз но луоен сильтӧл огъя зӥр берганы кутскиз.
Самум шукыръяськиз.
Сюлэм кышкыт тэтча.
Йыр висе.
Ым но ньылон куасьмизы, ымдуръёс вир потылымон чигылӥзы.
Часлэсь кема шукыръяськиз ини луоен сильтӧл.
Нош ог час тӧлаз на ке, луоен ӝокаса, кулом кадь, потэ вал ини.
Шудмылы, самум ӝоген ортчиз.
Нош ик чагыр ин бам но ӵуж луоё ӵошкыт интыос усьтӥськизы...
Караван азьлане вамыштӥз.
Каллен мынӥз милям караванмы.
Кык нунал ӵоже адямиос чик ӧз юэ на.
Вить нунал ӵоже верблюдъёс вутэк мынӥзы.
Одӥгез верблюд кабын ӟигартэм луиз но, сое пустыняе кельтоно луим.
Мукетыз вылысь груззэ басьтоно луиз, малы ке шуоно, со пыдъёссэ мырдэм ӝутъя на вал.
Милям кабын кужыммы бырон азьын, вожатоймы кыдёкысь сьӧд точкаез адӟиз.
Ӝоген ми но сое адӟим, нош кӧня ке дыр ортчыса, тодманы кутским ӝужыт пальмаослэсь, ин вылэ суредам кадь, адскись йылъёссэс но.
Та вал оазис.
Озьы нимало пустыняысь вуо но будосо интыез.
Бератаз, милям караванмы пальмаослэн сайулазы шумпотыса вуиз но, ми адӟим вуэз, кудӥз милемды кулонлэсь мозмытоз.
Писпу выжыос дортӥ ву пичиесь шуръёсын жильыр гинэ бызе.
Верблюдъёс но адямиос, со доры мыныса, сютэм сьӧсь сямен, пумтэм юизы но юизы.
Оазисын улӥсьёсыз вылэм.
Милемды соос ӟеч мылкыдэн пумитазы.
Пиосъёс, пальмалэн векчи модос кузяз тубыса, отысь милемлы, зарни кадь, кисьмам финикъёсты куязы.
Оазисын улӥсьёс дуно мускытлыклэсь котькуд шапыксэ туж эскерыса уже куто.
Соос ошмесысь вуэз канаваостӥ лэзё писпуос доры но кизем юоссы доры.
Ми кӧтмы тырымон юим, вурем ку пуйыосамы ву басьтӥм, шутэтским но нош ик азьлань вутэм пустыняе вамыштӥм.
Адямиос пустыняез пумен киулто.
Пустыняын трос интыосаз колодчаос лэсьтыло, каналъёс гудо, отӥ гурезь шуръёсысь вуэз лэзё.
Пустыняын, кытыназ ке ву потэ, отын садъёс но бусыос кылдо.
Куд-огетӥз пустыняос вамен сюресъёс но лэсьто ини.
Али дыре нимаз (гусеничной) автомобиль но лэсьтэмын ини, со луо вылтӥ ветлыны быгатэ.
Ужъёс.
1. Полушариослэн картазы вылысь шедьтэ Сахара пустыняез.
2. Устно гинэ описать каре: пустынялэн кыӵе тусыз; оазислэн кыӵе тусыз.
Малы пустынялэн но оазислэн природазы огзылэсь огзы сокем пӧртэм луо?
Уроктэм дыръя ужан.
Открыткаосты, газетъёсысь, журналъёсысь но мукет суредъёсты люкаса, лэсьтэ альбом „Тропической поясын природа но улон“ темая.
КЕЗЬЫТ ПОЯСЪЁС.
Кезьыт поясъёсын природа.
Музъем шарлэн Северной но южной полюсъёсыз котыртӥ кыллё кезьыт поясъёс — северной но южной поясъёс.
Кезьыт поясъёсты шедьтэ глобус вылысь но полушариослэн картазы вылысь.
Соосты пусъе тӥляд горд сюез лэсьтэм музъем шар модельды вылэ.
Шунды татын, тӥ тодӥськоды ини, ноку но вылэ уг ӝутскылы.
Нуназе шорын но со татын асьме дорын пуксён азяз кадь, улын луэ.
Солэн лучъёсыз туж нялмыт усё но ляб шунто.
Ар куспын укмыс-дас толэзь ӵоже татын туж кезьыт улэ.
Северной ледовитой океан.
Северной Ледовитой океанэз шедьтэ глобус вылысь но полушариослэн картазы вылысь.
Со интыяськемын Северной полюс котыртӥ.
Северной полюс океанлэн шоразгес ик интыяськемын.
Толалтэ Северной Ледовитой океан — йӧ пустыня.
Кӧня ке толэзьёс ӵоже татын шунды чик уг адскылы, уй сылэ.
Кизилиос, толэзь, собере дырын-дырын северной сияние гинэ пеймытэз быдтыло.
Малпамтэ шорысь инмын тыл юбоос артысь-артысь пото, яке быдэс инме ваменак буко выллем пуксе, вуюись кадь, паськыт югыт сюрес.
Со котыртӥ пӧртэм тусъем лучъёс пишто но лымы пустыняез лыз, вож, ӵуж но горд тусэн ворекъято.
Полярной сияние бырем бере нош ик пеймыт луэ.
Северной Ледовитой океанын толалтэ 50°-озь кезьыт луэ.
Океан шобырскемын трос метр кыстӥськись кузьдалаем но пасьталаем туж бадӟымесь йӧ бусыосын.
Со йӧ бусыос солань-талань ветло, огзы вылэ огзы мырӟисько, пилиськыло; огзы вылэ огзы ӵашетыса, ургетыса люкасько.
Гужем вуэ ке, Северной Ледовитой океан улӟе.
Шунды кӧня ке толэзь ӵоже чик уг пуксьылы.
Йӧ шунаны кутске, йӧ бусыос тӥясько.
Йӧос вӧлско, тӥясько, пырдо, нош ик ваче мырӟиськыло.
Нош полярной гужем вакчи.
Йӧос шунаса но уг вуо, нош ик кынмыса, бадӟым йӧ бусы пӧрмыто но, океан нош ик йӧ пустынялы пӧрме.
Северной Ледовитой океанын улӥсь животнойёс.
Быдэс ар ӵоже кадь ик Северной Ледовитой океанын кезьыт сылэ.
Нош озьы ке но, улон татын но вань.
Йӧ вылын, полярной шунды шорын шунскыса, трос тюленьёс ныруло.
Тани йӧ люк сьӧрын маке но ӵужгес вырыны кутскиз — со гондыръёс. Быдэс семья — кык бадӟымесь тӧдьы гондыръёс но куинь гондыр пиос — тюленьёс доры лушкем лыкто.
Гондыръёс йӧ борды ик лаптӥськыса но кыстӥськыса каллен нюжтӥсько.
Ӧз чида одӥгез гондыр пи, шонерскиз но ньыль пыдйылаз ик тэтчиз.
Возьмаськись тюлень кеськиз но ваньмыз тюленьёс соку ик йӧ улэ зымизы.
Йӧ бусы сьӧрын паськыт ву инты адске.
Йӧ доры уяса лыктэ морж.
Со бадӟым но кужмо животной, клыкъёсыныз (вазер пиньёсыныз) шуккыса, трос дыръя гондырез но со вие.
Морж сьӧры, пизэ тыбыр вылаз поныса, мумы морж уяса лыктэ.
Соос но шунды шорын шунскыны лыкто.
Кыдёкын кинлэн ке но туж бадӟым йырыз адскиз.
Со Северной Ледовитой океанысь самой бадӟым животной — кит омырен шоканы потэм.
abu
Ваньмыз ик со мораын улӥсь трос пӧртэм животнойёс чорыгез но трос пӧртэм векчи животнойёсты сиыса уло, кудъёсыз Северной Ледовитой океанын туж трос.
Тӧдьы гондыр.
Йӧос но лымыос пӧлын улэ.
Тюленьёсты кутылэ.
Тӧдьы гонэз сое адсконтэм каре.
Уяны туж умой быгатэ, уян перепонкаё кужмоесь пыдъёсыныз полысаса уя.
Шуныт нап гонэз но кӧйыз сое кезьытлэсь утялто.
Морж.
Улонэзлэсь трос дырзэ вуын ортчытэ.
Солэн чорыг тусъем мугорыз, пыдъёсыз но быжыз уяны понна умоесь.
Шока тыэныз.
Мораысь пӧртэм векчи животнойёсты сие.
Кӧйыз сое кезьытлэсь утялтэ.
Кит.
Дунне вылын самой бадӟым животной.
Вуын улэ, мораысь пичиесь животнойёсты сие.
Шока тыэныз.
Кӧйыз сое кезьытлэсь утялтэ.
Ужъёс.
1. Вералэ, кыӵе луэ тусыз Северной Ледовитой океанлэн толалтэ но гужем.
2. Эн вунэтэ, кыӵе животнойёс уло Северной Ледовитой океанын но, соосты суредъя тодманы дыше.
Кызьы уло полярной странаосын калыкъёс.
Северной Ледовитой океанын островъёс трос.
Соос вылын быдэс ар ӵоже йӧ но лымы кылле.
Гужем куд-ог интыосын лымы шуна, изъёс вылэ ӝуй, пиштӥсь пичиесь сяськаос пото, лапегесь куакъёс музъем валлин будо.
Тӥни вань будоссы полярной островъёслэн.
Тужгес но трос со островъёс Америкалэн ярдур котыраз.
Соос пӧлын дунне вылысь самой бадӟымез остров — Гренландия.
(Шедьтэ сое полушариослэн картазы вылысь.)
Та островъёс вылын эскимосъёс уло.
Йӧос но лымыос пӧлын соослэн улонзы шуг но секыт.
Вань улонзы эскимосъёслэн сион утчан бордын ортче, озьы ке но, соос ӵем дыръя сютэм уло: чорыг ке ляб шеде, тюленьёс но моржъёс ке кошко, соку эскимосъёслы сионтэк бырон матэ вуэ.
Тюленьёс но моржъёс эскимосъёслы сион сётэм сяна, асьсэлы дӥськут но эскимосъёс тюлень но морж куосты вуро.
Даже пыж но тюлень кулэсь ик вуро.
Сӥньыс интые сӧнъёс мыно, вень интые — чорыг лыос.
Гужем улон юртэз но эскимослэн пӧйшур куослэсь ик лэсьтэмын, нош юртсэс пыкылыны понна ӵем дыръя китлэн лыосыз мыно.
Толалтэ улон юрт ожоез но изэз лэсьто вылласянь сое вуэн киськало, вылаз йӧ сӥ кынтыны понна.
Куддыръя соос лымыез но юрт лэсьто.
Липетаз йӧ юдэс пукто, со пыр югыт пыре.
Сыӵе корка пырыны понна, лымыетӥ потӥсь сюбег коридортӥ ньыльпыдъяськыса мыноно луэ.
Нансен путешественник, Гренландие экспедициен ветлыкуз, эскимосъёс доры вуылэм.
Тани кызьы со описать каре эскимосъёслэсь гужем улон юртсэс.
„Ми тюлень куэз лэсьтэм липет ултӥ йырмес мыкыртыса пырим, малы ке шуоно, пырон интыез туж лапег вал. Комнатае вуим, комната югдытэмын вал тюлень кӧен ӝуась трос лампаосын, соослэн фитильёссы (лентаоссы) ӝуез лэсьтэмын вал.
Монэ трос кузя гольык адямиос котыртӥзы, соослэн мугор вылазы кускерттонъёссы гинэ вал.
Эскимосъёслэн ымныръёссы кӧесенызы чиляло, нап кырсь сӥен шобырскемын.
Милемды пуктӥзы палаткае пыронысь занавес дорын сылӥсь ящикъёс вылэ, со инты куноослы почетной интыен лыдъяське.
Асьсэос хозяинъёсмы пуксизы берпал борддор кузя тюлень куосын шобыртэм кроватьёссы вылэ.
Эскимосъёс вань дырзэс со вылын ортчыто.
Со вылын ик соос сисько, изё; отын ик нылкышноос ужало но, улазы куасалтэм пыдъёссы вылэ пуксьыса.
Лампаоссы соослэн мур тэркыос выллем. Со лампаоссы вылын ик соос асьсэлы сион-юон пӧзьто.
Мукет эстӥськонзы ӧвӧлэн, лампаоссы соослэн уй но нунал ӝуало“.
Эскимосьёслэн пӧйшуранзы.
Мора гинэ эскимосъёсты сюдэ.
Но мораын улӥсь зверез кутон уж секыт но кышкыт.
Эскимос Коовокно вылысьтыз вылаз кыллись йӧос вылтӥ 20 километр мынӥз.
Нартаосы (дӧдьыосы) кыткем куинь пуныосыз тыпак жуммизы.
Мыныса, мыныса, со вольыт йӧ бусы доры вуиз.
Татын йӧ вылын пасьёс вал.
Со йӧ пасьёс доры тюленьёс лыктылӥзы омырен шоканы.
Коовокно корт пумо копьёзэ кутӥз но со пась доры эскериськыса, ньыльпыдъяськыса лыктыны кутскиз.
Кӧт вылаз кариськыса, самой ву дуре ик вуиз, лушкем шокаса выдӥз но вуысь тюленьлэсь потэмзэ возьманы кутскиз.
Шӧдтэк шорысь пасьын ӵуштыртэм кылӥськиз но, кырын тюленьлэн йырыз адскиз.
Коовокно, копьёеныз шонскыса, животнойлэн чыртыяз бышкалтӥз. Коовокно шонер бышкалтӥз.
Ӝоген зверь йӧ улын выремысь дугдӥз.
Копьёез гозы борды думемын вал но, эскимос тюленез, кыскыса, йӧ вылэ поттӥз.
Тюленьлэсь сӥльзэ пичи юдэс вандӥз но пуныоссэ сюдӥз.
Собере тюленьзэ нарта вылаз поныса, берен берытскиз, семьяезлы кутоссэ нуыса.
Шутэтскем пуныос ӝог бызизы.
Ӝужыт йӧлэн самой йылаз ик тубизы.
Нош отын эскимос туж юн кышкаса адӟиз, что солэн пӧйшуран интыысьтыз йӧэз ярдур бордысь ишкалскем но, сое тӧл океанэ нуыны кутскем.
Беда!
Ма кароно табере?
Быроно луэ.
Тӧл, пумен кужмо луыса, йӧэз мора шоры пумен кыдёке нуэ.
Но Коовокно ӧз быры.
Солэсь йӧзэ кыдёкысь пустынной остров доры вуттӥз.
Куинь ар ӵоже со чылкак огназ улӥз остров вылын, тюлень сӥль но гондыр сӥль сиыса.
Улыса, улыса, со пуныосыз ванен мукет остров вылэ кошкиз. Отын сое бордазы басьтӥзы пӧйшурась-промышленникъёс.
Эскимосъёслэн пӧйшуранзы туж шуген но ортчылэ.
Ӵем дыръя соос морае быро.
Ужъёс.
Вералэ, кызьы уло Гренландиын улӥсьёс — эскимосъёс: кыӵеесь соослэн юртъёссы, кыӵе дӥськутсы, мае соос сио, ма ужало соос, маин кышкыт соослэн ужзы?
Северной полюс доры.
Пӧртэм странаосысь путешественникъёс, исследовательёс кемала дырысен ик вуылыны турттылӥзы Северной полюсэ.
Одӥгъёсыз корабльёсын мынылӥзы, мукетъёсыз пуныосты кыткыса, куиньметӥосыз омыретӥ лобыса.
Средствооссы ӧвӧлэн, кышкасьтэмъёсыз самой кулэ снаряжениостэк но ӵем дыръя сюрес вылэ потылӥзы.
Соос сярысь нокин но ӧз сюлмаськылы.
Тросэз бырылӥзы йӧос пӧлы, сютэм улыса, кезьытлы чидатэк но висьылыса.
Куд-огез гинэ соос пӧлысь вуылӥзы полюсозь, нош отын нокинлы но ӧз кылды научной исследованиос ортчытъяны.
Мае огназы лэсьтыны ӧз быгатэ капиталистической странаосысь исследовательёс, сое огъя кужымен быдэстӥзы коммунистической партилэн но советской правительстволэн кивалтэм улсазы асьмелэн исследовательёсмы.
Мае 1937 арын ньыль туж бадӟымесь советской самолетъёс Советской Союзысь геройлэн О. Ю. Шмидтлэн начальствовать карем улсаз полюс доры лобыса вуизы, йӧ вылэ лэзькизы но отын поттылӥзы научной приборъёссэс, палаткаоссэс но полярной толъёнлы вань кулэ макеоссэс.
abu
Северной полюс дорын, уясь йӧ вылын, улӥзы ньыль отважной, социалистической родиналы преданной адямиос: Папанин, Кренкель, Федоров, Ширшов.
Соос татын быдэсъязы бадӟым но туж кулэлыко ужез: эскеризы куазез, йӧослэсь кудлань кошкемзэс, мора вулэсь йӧ ултӥ быземзэ, эскеризы вуын улӥсь животнойёслэсь улонзэс но.
Ас ужзэс быдэстэмзы бере ньыль геройёсты 19 феврале 1938 арын йӧ вылысь поттӥзы юри со понна Гренландской морае лэзем ледокол судноосын, нош со бере Ленинградэ вуттӥзы.
Ӝоген Москва шумпотонэн но шулдыръяськонэн пумитаз Арктикалэсь геройёссэ, кудъёсыз ушъямон умой быдэстӥзы правительстволэсь, партилэсь но солэн вождезлэсь Сталин эшлэсь косэмзэс.
Москва — Северной полюс — Америкалэн Соединенной Штатъёсыз.
Кык толэзь но ӧз ортчы на Северной полюс доры научной станция лэсьтэм нунал дырысен, нош быдэс мир тодӥз ини советской исследовательёслэн полярной природаын выль вормонъёс басьтэмзы сярысь.
Советской Союзлэн геройёсыз лётчикъёс Чкалов, Байдуков, Беляков, нош берлогес Громов, Данилин туж кужмоесь советской самолетъёсын, нокытчы но пуксьылытэк, лобӟизы Москваысен Северной полюс вамен Америкалэн Соединенной Штатъёсаз.
abu
abu
abu
Ледокол Северной Ледовитой океанлэн мораосаз.
Даже кужмо бадӟымесь пароходъёслы но полярной йӧос пӧлтӥ ортчыны шуг.
Котькуд минутэ соосты бырон вите.
Нимысьтыз лэсьтэм бадӟым пароходъёс — ледоколъёс — гинэ асьсэлы сюрес сайкыны быгато йӧ бусыостӥ.
Кужмоесь ледоколъёсмы вань асьмелэн Советской Союзамы.
Соос Северной Ледовитой океанлэн мораостӥз ветло Союзмылэн вань северной ярдуръёсыз кузя.
Тани кызьы нюръяське йӧосын асьмелэн краснознаменной „Красин“ ледоколмы.
__________
„Красин“ йӧос вискы пыриз.
Котырак лымыен шобыртэм бадӟым йӧ бусы. Со йӧ бусы котькудлань вандылӥськемын чутыръяськись сюбегесь ву каналъёсын.
Бадӟым йӧос, ӵашетыса но дыбыртыса, одӥг огзы вылэ лыктыса, вылысьтыз вылаз люкасько.
„Красин“ мынонзэ каллен каре но ужез борды кутске.
Туж бадӟым ледокол вань секытлыкеныз йӧ бусы вылэ ӝутске но йӧ массаез зӥбыса пильылэ.
Йӧос пилиськыло но суднолэн нырыз азьпалан вайясько.
__________
Ледоколъёс Северной Ледовитой океанлэн мораостӥз сюрес усьтӥзы.
Соос ас сьӧразы быдэс караван судноосты келяло.
Ма вань Южной полюс дорын.
Южной полюсэз карта вылысь шедьтэ.
Южной полюс дорын интыяськемын паськыт музъем — Антарктида, отын нокыӵе калык но уг улы: музъемез быдэс ар ӵоже лымыен но йӧэн шобырскемын.
Южной полюс доры.
Антарктидаез исследовать карисьёслы туж бадӟымесь шуг-секытъёсты адӟоно луиз.
Антарктидалэн шор вадесаз пыраны трос пол турттылӥзы.
Знаменитой норвежской путешественник Амундсен гинэ эшъёсыныз Южной полюсэ вуылӥз.
Толалтэ вал.
Ньыльдон градусъем кезьытъёс сылӥзы.
Вистэм-вожтэм ньыль толэзьем уй, март пумысен кутскыса, августозь кыстӥське.
Путешественникъёс толйизы пароходын ваем пуэз лэсьтэм хижинаын, сое тюлень куосын шобыръяса. Отын соос толзэс ортчытӥзы.
Котырак вӧлскемын вал лымыен согиськем бадӟым пустыня.
Пырак чус улӥз, лымы сильтӧллэн вузэмез гинэ сое сӧрылӥз.
Октябрьлэн нырысетӥ ӝыныяз гужем вуиз.
Антарктида нош гужем но ӧз кушты йӧ шобретсэ.
Гужемлэсь вуэмзэ возьматыса пингвинъёс вуизы.
Пустынной ярдур соослэн кесяськем куараосынызы тырмиз.
Пингвинъёс шунытгес северной островъёсысь уяса лыктӥзы но огзы бӧрсьы огзы кузь кыстӥськыса, асьсэлы пузкар лэсьтыны дышем интыосазы мынылӥзы.
Соослэн адямиосты ноку но адӟылэмзы ӧвӧл, соин ик путешественникъёс доры, одӥг но кышкатэк, матэ лыктылӥзы.
Инмын шунды пиштыны кутскем бере ик Амундсен азьлань кошкиз.
Мыныны туж шуг вал.
Лымыё сильтӧл бадӟымесь лымы люкъёс пельтэ.
Адямиос но пуныос лымые пыдес выллапалозязы выйылӥзы.
Лымы улын бадӟымесь йӧ путэтъёс ватскыса уло.
Киос, пыдъёс но ымныр кынмылӥзы.
Пуныос мырдэм кыскыса нуо сион-юонэн, палаткаен но изён меховой мешокъёсын дӧдьыосты.
Самой шундыё нуналъёсы 25° кезьыт вал.
Кӧня ке нунал ортчыса, бадӟымесь убоос кадь, кыстӥськись йӧ гурезьёс вуизы.
Пуныос но адямиос ялан гуштылӥзы йӧ путэтъёсы но отысь туж шуген, мырдэм потылӥзы.
Жуммем, восьмем, кынмем адямиос полюс пала мырдэм мынӥзы, ӥӧ вылтӥ берпум кужыменызы ӝабырскыса.
38 нунал ортчыса, Амундсен полюс доры вуиз.
Со интые Амундсен палатказэ пуктӥз но со борды норвежской флаг керттӥз.
Амундсенлэн бадӟым опытэз луэмен но экспедициез умой организовать каремен гинэ, уж умой ортчиз.
Ваньмыз умоен бертӥзы доразы.
Мукет экспедициен нош — Скотт англичанинлэн экспедициеныз — озьы ӧз луы.
Амундсен бере полюс доры вуылыса, берлань бертыкузы Скотт но солэн эшъёсыз кынмыса быризы.
Ужъёс.
1. Вералэ, кызьы путешественникъёс вуылӥзы Северной но Южной полюсъёс доры.
2. Тодады вае, кыӵе полюс котыртӥ мувыр интыяськемын, кыӵе полюс котыртӥ — океан.
3. Вералэ, арлэн кыӵе дырыз луэ Южпой полюс дорын, Северной полюс дорын гужем дыръя.
Тундра.
Северной Ледовитой океанлэн ярдуръёсаз вӧлскемын нюлэстэм туж бадӟымесь интыос — тундраос.
Гужем тундраын музъемлэн вылӥыз гинэ шуна;
50 сантиметрлэсь пыдлояз „ноку но шуналлясьтэм сӥос“ кыллё.
Писпуос тундраын будыны уг быгато, отын будо пичиесь куаро лапегесь гинэ пашмем кызьпуос, емышо куакъёс: ягмульы, морошка, голубика но нюрмульы.
Главной будос татын — ӝуй но „ягель“ лишайник; соос быдэс музъемез шобырто.
Кынмем почва пыртӥ ву пыӵаны уг быгаты, соин ик гужем тундра тыосын но нюръёсын куӵо луэ.
Европейской тундраын но азиатской тундралэн западной люкетаз ненецъёс уло.
Кызьы уло ненецъёс.
Тундраын толалтэ.
Окатетта ненецлэн семьяез тундралэн юг палаз, нюлэсъёслы матын, толйиз.
Татын пужейёс, пыд гижыосынызы лымыез бугыртыса, ӝуез, лишайникез но пинал куакъёсты шедьтылӥзы но сое сиыса улӥзы.
Пужейёс вань лишайникез сиыса быдтэм беразы, ненецъёс, асьсэлэсь ваньбурзэс нартаос (дӧдьыос) вылэ тырыса, выль интыосы кошкылӥзы.
Котырак лымыё пумтэм-йылтэм ӵошкыт инты.
Шуръёс но тыос йӧэн шобырскемын.
Потӥз Окатетта аслаз шалашысьтыз — чумысьтыз — пужейёссэ учкыны понна.
Кӧня ке вамыш палэнскиз.
Кужмо тӧл пыд йылысьтыз донге, синъёссэ ӵокса.
Окатетта маялляськыса вуиз чум дораз, но озьы ик ӧз тоды ас пужейёсызлэсь ма луэмзэс.
Чумаз пырыса, куэз вурем дэременыз синъёссэ кема ӵушылыса, ас понназ нукыртэ:
„Ма вань мынам чумам?
— Кык пуртые, куинь пулэ но одӥг пыӵалэ.
Со сяна, кык чай юон чашае.
Сиськон тусьтые одӥг вань на.
Тӥни ваньмыз.
Пужейёсы 20 гинэ кылизы на.
Троссэ кионъёс сиизы.
Колхозын умой уло.
Колхозэ пыроно!“
Тулыс.
Нош тани тулыс вуиз.
Шуръёс бызьыны кутскизы.
Окатетта сюрес вылэ дасяськыны кутскиз.
Кышнозэ косӥз чумзэ октыны-калтыны. Собере пужейёсты куинен-куинен кыткыса, дӧдьыос огзы бӧрсьы огзы вырӟизы матысь колхозэ.
Урдсытӥзы пуныос бызизы.
Лымы шуна вал ини.
Котькытын пичи шуръёс бызё.
Нюр вылысь йӧ шунаны кутскиз.
Луд ӟазегъёс, юсьёс, луд ӵӧжъёс, чайкаос лобо.
Тулысэз шӧдыса, тылобурдоос тодмо интыосазы дырто пузкар лэсьтыны, пузаны, пи вордыны понна.
Окатетта колхозэн ӵош кошкиз север пала — океан доры.
Отын адямиез но пужеез куртчылӥсь акылес чибиньёс ӧвӧл.
Гужем.
Нуналысь нуналэ шунды инмын ялан кема возиське.
Уй интые югыт инльӧль гинэ пумтэм кыстӥське.
Бератаз полярной нунал но вуиз.
Шунды чик уг пуксьылы.
Тундралэн тырмыт сяськаяськон дырыз.
Котькытын, кытчы гинэ учкиськод, пичиесь но бадӟымесь тыос шунды шорын чиляло.
Муӵъёс вылтӥ, тӧдьы кизилиос кадь, пишто морошкалэн сяськаосыз, самой ву дурын ик дыдыксинъёс лызэкто.
Трос пӧртэм яркыт сяськаос сяськаяськизы тундраын.
Шумпотыса мынэ Окатетта, пиналъёсыз но дӧдьыысенызы шумпотыса учко.
Пужейёс но шумпотыса вортто; соос дырто, паськыт пастбище вылэ океан дуре.
Отын йыр вадьсытӥ, пилем кадь, лобась но ог интыын сылыны эрик сётӥсьтэм акылес чибиньёс ӧвӧл.
Дугдылон интыосын нылкышноос чумзэс пукто но шораз тыл тылско.
Ӵын дорын гинэ, тыл котырын, чибиньёслэсь мозмытскыса, шутэтскыны луэ.
Ог 20-ё мында майыгьёсты бышкалто но соослэсь йылъёссэс огазе гозыен кертто, нош вылласянь майыгъёсты пужей куосын шобырто.
Тӥни чум дась.
Музъем вылэ кызьпу туй вӧлдыса, соосты куосын шобырто но отын валессы но, ӝӧксы но.
Кема мынӥзы ненец-колхозникъёс.
Ӵем дугдылӥзы.
Шутэтско, пужейёссэс сюдо но нош ик азьлань кошко.
Пужей — ненецъёслэн главной узырлыксы (110 сур.).
Пужейёсын герӟаськемын соослэн вань улонзы.
Пужей ненецлы вань кулэ маке сётэ.
Пужейлэн куэз сое толалтэ но, гужем но шунтэ.
Солэн шуныт куэз ненецлы валес луэ.
Пужей куэн со аслэсьтыз чумзэ липе.
Пужей куэз аслыз пыдкутчан вуре.
Изьыос, пӧзьёс, сумкаос — ваньмызлы пужейлэн куэз мынэ.
Бератаз кыдёкын адскиз океанлэн, азвесь кадь, пиштӥсь вылыз.
Чумъёс пуктӥзы.
Пужейёссэс пастухъёсын но пуныосын лэзизы пастбищае, асьсэос нош быдэс колхозэн чорыганы кутскизы.
Окатетталэн ноку но азьло дыръя чорыганлэсь доход басьтылэмез ӧй вал.
Колхоз туж трос чорыгзэ кооперативлы вузаз, котькуд колхозник но ас понназ трос запас кельтӥз на.
Сӥзьыл.
Туж ӝог ортчиз вакчи полярной гужем.
Август толэзе шунды пуксьылыны кутскиз.
Сентябрь толэзе зэмос уйёс вуизы. Кезьытъёсын ӵош ик соос нуналлы быдэ йылыны кутскизы.
Ваньмыз кошкыны дыртӥз отчы, кытын шунытгем.
Тылобурдоос лобӟизы.
Нымы-кибыос быризы.
Полярной шыръёс-пеструшкаос лымы улэ ватскизы.
Копак вошкиз Окатетталэн улонэз.
Пужейёсыз солэн табере огъя уллёын уло; соослэн лыдзы нош табере кызь ӧвӧл ни кызь вить луиз ини.
Уг кышка ни Окатетта, соосты кион сиоз шуыса, соос висьыса бырозы, шуыса.
Пужейёс понна врачебной пункт кыдёкын ик ӧвӧл.
Северной природа лек кезьыт.
Адямилэн улонэзлы со ялан кышкыт луэ.
Секыт вал улонэз татын огназ куштэм адямилэн.
Ассэ утьыны быгатӥсьтэм адями природалэсь кышка вал.
Со оске вал, природаын котькыӵе йыркуро лек духъёс уло шуыса, соос адямилы урод лэсьтозы шуыса.
Со осконъёсты ас ужазы кутылӥзы вегинъёс — шаманъёс, соос невежественной муртъёсты котькызьы пӧяллязы но йырзэс поромытылӥзы.
Нош советской власть кылдэм бере асьме Союзлэн север палаз улӥсь калыкъёслэн улонзы туж ӝог воштӥськыны кутскиз.
Советской власть сюлмаське кыдёкысь Северысь калыкъёс сярысь, со юрттэ соослы природаен нюръяськыны.
Советской Северын совхозъёс но колхозъёс, общежитиосын лэсьтэм школаос будо, кооперативъёс кылдо.
abu
Ужъёс.
1. Возьматэ карта вылысь, кытын интыяськемын тундра.
2. Возьматэ карта вылысь, кытын уло ненецъёс.
3. Вералэ, кыӵе природа тундраын.
4. Вералэ, кызьы уло ненецъёс: кыӵеесь соослэн юртъёссы? кыӵе дӥськутсы? мае соос сио?
5. Ма ужаса уло тундраын улӥсь калыкъёс?
Ма луэ соослэн главной узырлыксы?
Ма вылын соос ветло?
6. Кызьы улӥзы северын улӥсь калыкъёс вазен?
7. Ма лэсьтэ советской власть северын улӥсь калыкъёс понна?
Уроктэм дыръя ужан.
Лэсьтэ альбом таӵе темалы: „Кезьыт поясъёслэн природазы но отысь калыклэн улонэз“.
УМЕРЕННОЙ ПОЯСЪЁС.
Умеренной поясъёслэн природазы.
Музъем шарлэн умеренной поясъёсыз кык паськытэсь полосаосын кыстӥсько пӧсь но кезьыт поясъёс вискытӥ.
(Шедьтэ глобус вылысь но полушариослэн картазы вылысь северной но южной умеренной поясъёсты.)
Умеренной поясъёсын, пӧсь поясын кадь, чидантэм пӧсь но ӧвӧл, кезьыт поясын кадь, чидантэм кезьыт но ӧвӧл.
Умеренной поясъёс пӧсь но кезьыт поясъёслэсь соин пӧртэм луо, что умеренной поясъёсын ньыль ар дыръёс луо.
Нош умеренной поясъёсын но котькуд интыязы одӥг дыре одӥг кадь пӧсь яке кезьыт уг луы.
Кезьыт пояслэсь кыдёке кошкемъя но пӧсь пояс доры матэ вуэмъя климат но пумен небытгес луэ, тол но пумен вакчигес но шунытгес луэ, гужем но пумен кузьгес но пӧсьгес луэ.
Асьмеос улӥськом северной умеренной поясын.
Полярной круг дорысен тропик доры самолётэн.
Сайкыт кезьыт март нуналэ Северной Америкалэн полярной ярдуръёсыз вадьсы самолёт ӝутске но юг пала лобе.
Куинь час ортчыса, тундра кыдёке берпала кыле.
Самолёт лобе лымыен шобырскем, туж ӵем парсь зу кадь лысо писпуос вадьсытӥ.
Дауръем нюлэсъёс котькудлань пумтэм-йылтэм кыстӥсько.
Интыен-интыен соос вандылӥсько бадӟымесь тӧдьы тыосын.
Тыос бордысен котькудлань чутыръяськыса кошко шуръёс (111 сур.).
Дырын-дырын уӵерак-уӵерак адскыло пӧйшурась индеецъёслэн йылсо хижинаоссы.
Куддыръя тыос яке шуръёс котырын адскыло нюлэс дасян интыос, со дорысен кыдёкын ик ӧвӧл гуртъёс.
Дас кык час ӵоже самолёт лобе ини.
Вань со дыр куспын сюрс километрлэсь но уногес лобытозязы, лётчикъёс адӟыса кошкизы котькудьлань кошкись, пыртӥзы ортчыны луонтэм нюлэсъёсты гинэ.
Нош тани инты воштӥськыны кутске.
Нюлэстэм интыос вуыло.
Соос ялан ӵемгес но ӵемгес адскыло, бадӟымгес луо, нош нюлэс син улысь пумен ыше.
Тани нюлэс чик ӧвӧл ни.
Лётчикъёслэн син азязы лымыё гольык ӵошкыт инты.
Ӧжытак азьпалангес лымы огъя ӧвӧл ни, куӵо-куӵо гинэ кылле.
Еще азьпалангес лымы ӧвӧл ни.
Самолёт лобе турын мора вадьсытӥ.
Со — степьёс.
Сюро пудо-животъёс татын бадӟымесь табунэн ветло.
Уӵерак адскыло фермеръёслэн коркаоссы.
Самолёт улын городъёс ортчыло.
Городъёс дорысен чугун сюрес линиос кыстӥсько (112 сур.).
Самолёт азьлань но азьлань лобе.
Возьёс пумен ӧжыт луо, бусыос пумен трос шедьыло.
Тани, бератаз почти быдэс степь гыремын но вож-вож удэн шобырскемын.
Самолёт улын туж бадӟымесь бусыос кылё.
Ялан ӵем но ӵем ортчыло городъёс но гуртъёс.
Котькудлань кыстӥсько чугун сюрес линиос, соос вылтӥ ӝог бызё поездъёс.
Самолёт степьёс вадьсытӥ сюрс километрлэсь но уногес лобиз.
Нош тани выль картинаос усьтӥсько лётчикъёслэн син азязы.
Рощаос ортчо, нош собере быдэс нюлэсъёс но. Та нюлэсъёс, самолёт азьло лобем вадьсытӥ кылем нюлэсъёс кадь, чик ӧвӧл.
Таос копак куаро нюлэсъёс.
Рощаос но нюлэсъёс вискытӥ туж бадӟым интыос кыстӥсько, нырысь учкемъя отын номыр но кизьымтэ кадь, трос интыосаз музъем тулыс вуэн тудӟемын.
Тулыс туд ву ортчем бере вань та музъемъёс вылэ киземын луоз хлопок.
Нюлэсъёс но рощаос дӥсяськозы чебер, яркыт вож тулыс дӥськутэн.
А еще, азьланязгес мыныса, вазь тулыс дыр ке но нюлэсъёс пеймыталэс ӵем куаръёсын шобырскемын.
Самолёт вуиз умеренной пояслэн шуныт люкетаз.
Татын кезьытъёс чик уг луыло но, тросэз писпуос толалтэ но куаръёссэс уг уськытыло, быдэс ар вож-вож сыло.
Соин ик соосты пырак вож сылӥсь писпуос шуыса нимало.
Азьло сямен ик уӵерак адскыло фермеръёслэн коркаоссы.
Азьло сямен ик самолёт ӵем ортчылэ городъёс вадьсытӥ.
Чугун сюреслэн сетез еще ӵемгес луиз на.
Тропической пояслэн матынэз пумен трос шӧдскыны кутскиз.
Будос пумен чебергес луэ.
Городъёсын но гуртъёсын пальмаос адскыло, куддыръя пальмаосын но мукет тропической будосъёсын быдэс аллеяос адскыло.
Кыдёкын моралэн лыз вольыт вылыз адске.
Ӝоген мынонлэн пумыз.
Умеренной поясъёсын будосъёс котькытыназы ик одӥг кадь ӧвӧл.
Северной умеренной пояслэн кезьыт люкетаз быдэс Европа, Азия но Америка вамен паськыт полосаен нюлэсъёс кыстӥсько.
Юг палангес, нюлэс полосаос сьӧрын кыстӥсько туж бадӟымесь нюлэстэм интыос, отын турын будэ.
Со — степьёс.
Северной умеренной пояслэн самой юг пал шуныт люкетаз, кытын ноку но кезьыт уг луылы, будо котьку вож будосъёс.
Со будосъёс туж тупало пӧсь поясысь будосъёслы.
Южной полушарилэн умеренной поясаз но будос озьы ик туж трос пӧртэм.
Отын но вань нюлэсъёс, степьёс но котьку вож сылӥсь будосъёс.
Ужьёс.
1. Будосэз возьматӥсь карта вылысь учке, северной умеренной поясын кытыназ интыяськемын нюлэсъёс, степьёс, кытын будо котьку вож сылӥсь будосъёс.
2. СССР-лэн картаезъя но будосэз возьматӥсь картая тодэ, кыӵе будос полосаын тӥ улӥськоды.
3. Экскурсиын тодматске асьтэ котырын будӥсь будосъёсын.
Люкалэ но куасьтэ асьтэ улон интыяды тужгес ик трос вӧлмемъёссэ будосъёсты.
4. Тодады вае кызьы вошъяське куазь арлэн дыръёсызъя тӥляд улон интыяды.
Тайгаын.
Дремучой тайга трос сюрс километръёс кыстӥське.
Куд-ог интыостӥз гинэ со висъяськылэ шуръёсын но тыосын.
Дауръем кызъёс, ньылпуос, кедръёс, лыстэм пужымъёс оглом борддор кадь сыло.
Нюлэс шуръёслэн ярдуръёссы бадьпуэн, лулпуэн но шупуэн шобырскемын.
Куд-ог интыосын кызьпуослэн тӧдьы модосъёссы одӥг-ог адскыло.
Огъя усьылэмын сильтӧлын тӥям но пограм писпуос.
Пумен пыдло пыремъя, чаща пушкытӥ ветлыны шуг луэ.
Чебер тӧдьы шобретэн дӥсяськиз тайга.
Пыдын ветлон сюресъёс согиськизы, пичиесь шуръёс чалмизы.
Нюлэс шоръёсысь кыр интыосын тӧдьы лымы шобрет вылтӥ котькудлань кошкемын пужыё пичиесь пытьыос.
Чащаысь кыр чайы адскиз, пуксиз, котырак учкиз но нош ик чащае кошкиз.
Кеч тэтчыса потӥз но, мыд-мыдлань ветлыса, кутскиз уг сураны аслэсьтыз пытьызэ.
Аслаз сьӧд пильыс кадь тыбырыныз пичи соболь пиштӥз.
Ваньзы ватскизы но, дыртытэк, эскериськыса потӥз, тыл кадь, горд ӟичы.
Пытьыосты зынъяз но бызьыса кошкиз.
Нош тани ӵем чащаетӥ семьяенызы лосьёс мыно сион утчаны.
Сюро мӧйы лось — в ожаксы — азьпалазы мынэ.
Со тодэ вань кышкыт интыосты, кытчы ватскыны быгатэ солэн кышкыт тушмонэз балян.
Лось — вожак кыдёкысен шӧдэ пӧйшурасез но.
Аслэсьтыз семьязэ но ялан эскериськыса нуэ, ялан котырак учкылӥськыса, зынъяськыса, кылзӥськыса.
Пӧйшурась нс туж эскериськыса мынэ тайгаетӥ.
Соин ӵош бызе солэн умой юрттӥсез — пуныез.
Пытьыосты пӧйшурась туж умой эскере.
Книга вылысь сямен лыдӟе со лымы вылысь, кытчы кыӵе пӧйшур мынэм.
Каллен мынэ пӧйшурась, котькыӵе ӵаштыртэмез кылзӥське...
Пӧйшуръёс шӧдо сое, ватско...
Озьы ке но, пӧйшуръёслэн пӧямзы уг луы дышем мӧйы пӧйшурасез.
Аслэсьтыз пунызэ но со дышетӥз пӧйшуръёсты утчаны.
Ургетыса шер-шер утыны кутске пуны.
Пӧйшурась со доры мынэ, коньыез яке соболез адӟе, пыӵалзэ ӝутэ, ыбе но — ыбем пӧйшур лымы вылын кылле ини.
Вуиз тулыс.
Вырйылъёсын но кыр интыосын лымы шуназ.
Бадӟымъёсыз но, пичиосыз но шуръёс усьтӥськизы. Улыг интыосты огъя ву басьтӥз, тайгаысь бадӟымесь нюръёс шуназы.
Тылобурдоос вуизы но асьсэлэсь тулыс кырӟанъёссэс кырӟаны кутскизы.
Котькытын, кытчы гинэ шунды пиштыны быгатэ, турын вож-вож вожектэ.
Кыр интыостӥз но меӵ ярдуръёстӥз тайга чагыр, тӧдьы, ӵуж сяськаосын сяськаяськиз.
Вуиз гужем.
Пинал пӧйшуръёс вордскылӥзы.
Тайгаын шулдыр луиз.
Нош гужем адямилы шуг мыныны тайгаетӥ.
Пӧртэм интыостӥ трос километръёсын кыстӥсько нюръёс.
Сисьмись лӥялъёс но пограм писпуос сюресэз кенерало.
Ужъёс.
1. Карта вылысь учке, кытын интыяськемын тайга.
2. Тодады вае, кыӵе будосъёс но животнойёс ӵемгес шедьыло тайгаын.
Соосты суредъя тодманы дышетске.
Степьын.
Степьын мон тулыс вал.
Яркыт пиштӥсь тулыс шунды шунтэ вал, лымы шунаса, нюромем музъемез.
Степь шобырскемын жалем вож турынэн, яркыт сяськаосын пужыятскемын.
Сусликъёс шулало.
Турын пӧлын луд шыръёс бызьыло.
Ялан соос пыд улысь ик тэтчало вал.
Пӧртэм нымы-кибыос жуэто, тачырто, жингырто.
Тылобурдоос ӵашето.
Тюрагайёслэн кырӟамъёссы вылӥысь кылӥсько.
Степь вадьсытӥ орёл поръя, аслыз сион утчаса.
Степез мон пӧсь гужемен но адӟи.
Шунды шорын сутскем но курень луэм со.
Вож турынъёс но яркыт сяськаос ӧвӧл ни.
Кемала дырысен ӧй вал ни одӥг шапык но зор, музъем борды някырскем кӧс турынэз тузон шобыртэм.
Чус, нокин но ӧй вал отын пӧсь гужем нуналэ.
Вазь ӵукна гинэ со улӟылӥз.
Сюлмаськыса бызьыло луд шыръёс но сусликъёс, — соос. асьсэлы толалтэлы сион дасяло.
Котькуд пала, турак лобӟыло бодёноос но мукетъёсыз степьын улӥсь тылобурдоос.
Азьло сямен ик вылын инмын орёл поръя.
Степез мон толалтэ но адӟи.
Тӧдьы лымы шобретэн шобырскемын вал со.
Тылобурдоос отысь кошкемын, луд шыръёс но сусликъёс асьсэлэн гуосазы ватскемын.
Ватскемын нымы кибыос но.
Лымы шобрет улын кыллё степь будосъёслэн выжыоссы, клубеньёссы, луковицаоссы но кидысъёссы.
Дырын-дырын тӧлало лек тӧлъёс, лымыё сильтӧл ӝутскылэ, вузэ.
Нокин но соку ӧй вал степьын.
Ӵошкыт лымы вылэ кылем пытьыос гинэ возьмато, татӥ уин кионъёс но кечъёс ветлӥллям шуыса...
Адямиен исамтэосыз таӵе степьёс туж кӧс интыосы гинэ кылемын на.
Северной умеренной поясысь степьёслэн бадӟым люкетсы бусыосы пӧрмытэмын ини.
Бусыос шорын.
Ми мынӥм чугун сюресэн.
Ӵукнаысен ик кутскыса, вагон укноосысен адско вал степьёс.
Котырак одӥг писпу но ӧвӧл.
Сюреслэн кыкна палтӥз пумтэм бусыос кыстӥсько.
Чабей, зарни тусъем пумтэм-йылтэм мора кадь, тулкымъяське.
Шундыберганэн бусыос шунды шорын пыжо.
Арбуз кизем баштанъёс адскыло.
Ю-нянез октон-калтон кутскиз.
Радэн-радэн ветло турнан машинаос но аран машинаос, турнам ю-нянез ас сьӧразы кельтыса.
Интыен-интыен сыло ини бадӟымесь ю-нянь кабанъёс но, кутсаськон машинаос ужало.
Кыдёкын гуртъёс, ӝужытэсь элеваторъёс адско.
Элеваторъёс доры котькуд ласянь мыно ӵошкыт шонер сюресъёс, соос вылтӥ выль ю-нянен подводъёс но грузовикъёс кошко.
Ӝыт матэ вуэ ини, нош картина ялан одӥг кадь — котырак бусыос, бусыос, бусыос...
Ужъёс.
1. Шедьтэ карта вылысь, кытын интыяськемын степьёс.
2. Вералэ, кызьы воштӥське степьлэн тусбуез арлэн пӧртэм дыръёсаз.
3. Описать каре устно, кызьы воштӥзы степьлэсь туссэ адямиос.
Умеренной пояслэн шуныт люкетаз.
Испаниын.
Карта вылысь шедьтэ Испаниез.
Испанилэн восточной ярдуръёсыз гылтӥсько Средиземной мораен.
Татын ноку но уг луылы кезьыт тол.
Январь толэзе сыӵе шуныт луэ, кыӵе луэ май толэзе Москваын.
Ярдуръёс дорысен кыдёказ гинэ гурезьёс вылын лымы кылле.
Испаниын тросэз писпуос быдэс ар ӵоже вож сыло.
Огъя вӧлмемын оливковой рощаос.
Шонер радъёсын пуктылэмын каштанъёс но шелковицаос.
Соос вискытӥ виноград пуос ул вылысь ул вылэ потаса бинисько.
Емышо садъёсын апельсин но лимон пуос трос.
Соослэн зарни тусъемесь но ӵужесь емышъёссы сьӧдмыт вож куаро писпуос пӧлтӥ шунды шорын тыл кадь пиштыло.
Бусыосазы испанецъёс чабей, кукуруза, рис кизё.
Бакчаосысьтызы бакча сионлэсь урожайзэ арлы куинь пол басьто.
Уроктэм дыръя ужан.
Лэсьтэ альбом таӵе темалы: „Умеренной поясъёсысь природа но отысь калыклэн улонэз“.
Северной умеренной поясысь главной государствоос.
Музъем шар вылысь калыклэн трос люкетэз улэ северной умеренной поясын.
Отын почти быдэс интыяськемын Советской Социалистической Республикаослэн Союззы (СССР).
Умеренной поясын интыяськемын озьы ик дунне вылысь самой бадӟымъёсыз капиталистической странаос: Америкалэн Соединенной Штатъёсыз, Англия, Франция, Германия, Италия, Япония.
Отын ик интыяськемын туж трос калыко страна Китай, со нюръяське японской захватчикъёсын.
(Ваньзэ татын верам странаосты шедьтэ карта вылысь.)
Кызьы уже кутӥсько природалэн узырлыкъёсыз северной умеренной поясын.
Северной умеренной поясын трос лыдо улӥсь калыкъёс солэсь природной узырлыксэ вашкала дырысен ик уже куто.
Адямиос музъемез гыро, нюлэсъёсты корало, пӧйшуръёсты но тылобурдоосты кутыло, музъем ул ваньбурез копало.
Северной умеренной пояслэн природаез туж воштӥськемын.
Корам нюлэсъёс но вашкала степьёс интые будӥзы бадӟымесь городъёс но гуртъёс, сюрсэн лыдъямон заводъёс но фабрикаос, вӧлмизы бусыос, садъёс, паркъёс, котькудлань кыстӥськизы чугун сюресъёс.
Но капиталистической странаосын природалэн узырлыкез но кужымъёсыз трудящойёс киын ӧвӧл.
Самой умой музъемъёс, музъем ул ваньбуръёс, фабрикаос, заводъёс капиталистъёслэн ки улазы луо но, соос, асьсэос ужатэк но, туж узырмо.
Миллионэн лыдъяськись рабочийёс со узырлыкъёсты асьсэ кужыменызы кылдыто.
Асьсэос нош, ужам дун сяна, номыр но уг басьто. Со уждунзы асьсэлы улыны понна но мырдэм гинэ тырме.
СССР-ын чик озьы ӧвӧл.
Советской Социалистической Республикаослэн Союззы мирын одӥг гинэ страна, кытын Ленинлэн — Сталинлэн коммунистической партизылэн кивалтэм улсаз быдтэмын капиталистической строй.
Вань узырлыкъёс СССР-ын трудящойёслэн киязы луо.
Нокин но татын муртлэн трудэныз уг узырмы.
Советской Союзлэн гражданъёсыз активно участвовать каро туж бадӟым социалистической лэсьтӥськонын, кудӥз быдэс странаын вӧлмемын.
Трудящойёслэн улонзы арысь аре зажиточной луэ.
Крупной капиталистической государствоослэн правительствооссы мурт музъемъёсты таланы турттэ.
Соос нуо вир кисьтон войнаос, мукет калыкъёсты асьсэлы подчинить карон понна но соослэсь узырлыкъёссэс киултон понна.
СССР — мирын самой кужмо, самой могучей страна.
Но советской правительство мурт музъемъёсты киултыны уг тыршы но вошъятэк ортчытэ мирлэсь политиказэ.
СССР-ын улӥсь трос лыдо калыкъёс совершенно равноправноесь но коммунистической лэсьтӥськонын огзылы огзы вынъёс сямен юртто.
СССР-ын власть Советъёслы принадлежать каре, Советъёс бырйисько вань гражданъёсын, кудъёсызлы тырмемын 18 арес.
Советской Союзысь трудящойёслэн правооссы но обязанностьёссы гожтэмын Сталинской Конституциын — асьме социалистической родинамылэн основной законаз.
ВАТСАН.
Полушарие картаосты тодонэз юнматон понна ужъёс.
1. Бумагалэсь вандылэ дунне люкетъёс.
Сое тазьы лэсьтэ: пыртӥз адскись бумага листэз понэ полушариослэн картазы вылэ но со вылэ суредалэ карта вылысь дунне люкетъёсты.
Кыкназэ соосты нимазы вандэ.
Со нимаз дунне люкетъёсты тыре буям бумага лист вылэ, соосты карандашен котыртылэ но вандылэ.
Озьы дасялэ котькуд дунне люкетэз быдэн кык.
Буям бумагады ке ӧвӧл, бумагалэсь вандылэм дунне люкетъёсты буё карандашен яке буен буяны луоз.
2. Бумагалэсь вандылыса лэсьтэм дунне люкетъёсты быдӟалазыя бӧрсе тыре, соосты лякылэ бумага лист вылэ яке тетрадьёсы,
гожтэ соослэсь нимъёссэс.
3. Апликациен лэсьтэ полушарие картаосты.
а) Артэ чертить каре кык окружность.
Со понна дасялэ бумажной линейка.
Солэсь одӥг пал пумзэ, булавкаен шонер бышкалтыса, бумага листлэн шораз юнматэ.
Линейка вылады, булавка пумысен 73 мм кусып кельтыса, пась лэсьтэ. Со пасе карандаш пумдэс пуктэ но булавка котыртӥ окружность лэсьтэ.
б) Одӥгаз окружность вадьсы гожтэ „Восточной полушарие“, мукетыз вадьсы — „Западной полушарие“.
в) Котькуд окружностяды лякылэ дунне люкетъёсты.
Соосты озьы пуктылэ, кызьы соос пуко учебникын полушариослэн картазы вылын.
г) Котькуд дунне люкетлы но океанлы ним гожтэ.
Самой главной государствоослэн музъем шар вылын интыяськемзы сярысь тодонэз юнматон понна ужъёс.
4. Бумагалэсь вандылэ таӵе государствоос: СССР, США, Англия, Франция, Германия, Япония, Италия.
Сое лэсьтэ азьло лэсьтэм ужъёсады сямен ик.
Лэсьтэ сое 125 стр. чертёжъя.
Та государствоосты пӧртэм буен буялэ.
5. Бумагалэсь вандылыса лэсьтэм государствоосты, соослэн быдӟалазыя, бӧрсе тыре, лякылэ соосты бумага лист вылэ яке тетрадяды.
Соослэсь нимъёссэс гожтэ.
Апликациен лэсьтэ музъем шар вылысь самой главной государствоослэсь картаоссэс.
а) Бумага лист вылэ яке тетрадяды суредалэ Европаез но Азиез 125-тӥ стр. сётэм чертёжъя.
Соосты лэсьтэ азьло лэсьтэм ужъёсты сямен ик.
б) Суредам дунне люкетъёс вылэ интыялэ но лякылэ бумагалэсь вандылыса лэсьтэм государствоосты.
Кызьы интыяно государствоосты Европае но Азие, чертёж вылысь учке.
Америкае США-ез кызьы интыяно, асьтэос тодэ.
Валэктон.
Пыртӥз адскись бумага дасян понна, ӟустариез керосинэн яке шундыберган вӧен коттоно но соин бумагаез зырано, собере бумагаез ӵушылоно но кӧс луытозяз куасьтоно.
ОГЛАВЛЕНИЕ