{Б. В. Всесвятский (комиӧдіс Питю Ӧньӧ) @ Ботаника @ биология @ Б. В. Всесвятский. Ботаника @ 1934 @}
Б. В. ВСЕСВЯТСКИЙ
БОТАНИКА
ШӦРӦТ ШКОЛА ПОНДА ВЕЛӦТЧАН КНИГА 5–6 ВЕЛӦТЧАН ВО
Висьталіс лэдзны РСФСР Наркомпрослӧн коллегия.
АВТОРСЯНЬ.
Ботаника велӧтан книга лӧсьӧтӧма шӧрӧт школаись витӧт да кватьӧт велӧтчан воэз понда Наркомпрос программаэз сьӧрті.
Книгасӧ лӧсьӧтікӧ мекӧт ӧтлаын уджаліс В. Н. Вучетич.
Ыджыт отсӧт сетісӧ С. И. Исаев да З. Г. Сердюкова.
Б. Всесвятский.
ПЫРТАС.
1. Мый сэтшӧм биология да ботаника.
Ті пондӧтчат велӧтны ловья организммез йылісь наука — биология.
Биология кылӧн шусьӧ олӧм йылісь наука, мӧд нёжӧн, ловья организммез йылісь наука.
Ловья организмӧн лоӧ не токо быд животнӧй, но и быд быдмасыс.
Ті унаись адззывліт, кыдз тулыссӧ ыб вылын мыччисьӧ сю петас, кыдз пуэз вылын потӧ поча и мыччисьӧны перво учитик, чукыра листоккез, кӧдна сыбӧрын паськалӧны, быдмӧны.
Гожумсӧ видз вылын быдмассэз вевттисьӧны быдкодь дзоридзӧн, а арсӧ садын тырсялӧ, воӧ кӧдзысӧн берся плод.
Тулыссӧ эта кӧдзысісь петӧны виль быдмассэз.
Вот быдмассэслӧн быдӧс эна вежласьӧммес, кӧдна мунӧны гӧгӧр миян син одзын, миянлӧ зэв бытшӧма висьталӧны, быдмассэс пӧ ловья организммез.
Кӧр организмын дугдӧны мунны эна вежсьӧммес, кӧр сія дугдӧ питайтчыны, лолавны, вӧрны, сэк сія дугдӧ лоны ловьяӧн — кулӧ.
Биологиясӧ велӧтны ми кутчамӧ ботаникасянь. Ботаникаӧн шусьӧ наука, кӧда велӧтӧ быдмас аркмӧм (строеннё) да олӧм йылісь, быдкодь быдмас группаэз йылісь да сы йылісь, кысянь нія явитчисӧ.
Быдмаслісь олӧмсӧ тӧдмалӧмыс отсалас правильнӧя вежӧртны явленнёэз да висьтавны, мыйсянь нія овлӧны природаын.
Природаас нем абу сэтшӧмыс, кӧдӧ бы эз позь тӧдмавны, кӧда бы муніс гусьӧн, вӧлі бы кытшӧмкӧ сверхъестественнӧй.
Наука не токо немтӧмсьӧтӧ, вынтӧг керӧ енлӧ веритӧмсӧ, но и син одзын мыччалӧ, кытшӧм вред лоӧ обществоыс понда некытчӧ нетуян религиознӧй басниэзсянь.
Быдӧс мунӧ природа законнэз сьӧрті.
Наукаыс адззӧ, осьтӧ энӧ законнэсӧ, пешлӧ нійӧ оланын да мыччалӧ, кыдз колӧ эна законнэз сьӧрті бытшӧмсьӧтны ассиным производство, шуам, сельскӧй кӧзяйство.
Наукасӧ тӧдӧмӧн мортыс пондӧ веськӧтлыны природанас, велалӧ мӧдкодьсьӧтны природасӧ, иньдӧтны быдмассэзлісь зорамӧмсӧ сідз, кыдз сылӧ аслыс колӧ.
Торйӧн ни значеннёаӧсь лоӧны наука достиженнёэс миян социалистическӧй плановӧй кӧзяйствоын.
2. Социалистическӧй сельскӧй кӧзяйствоын ботаникалӧн значеннё.
Партия и совет правительствоыс мӧд пятилеткаӧ центральнӧй задачаӧн сувтӧтӧны: «колхоз ыббез вылын да совхоз ыббез вылын решительнӧя лэбтыны урожайность и большевистскӧя решитны засухакӧт пессьӧм йылісь
Медбы решитны энӧ зэв ыджыт задачаэсӧ, кӧдна сулалӧны социалистическӧй быдмасвӧдитӧмын, ботаника должен вайны ыджыт отсӧт.
Медбы босьтны ыджыт урожай, колӧ тӧдны, кӧр буржык кӧдзны, кытшӧм му вылӧ, уна я и кытшӧм удобреннёэз эта му вылӧ петкӧтны колан быдмассэз увтӧ, кыдз тшӧктыны кӧдзӧм быдмассэсӧ чожжыка быдмыны, воны, кыдз буржык быдмассэсӧ берегитны засухаись, кынтӧмись, гаг шогья, ёгтурун шогья.
Оз позь веськыта шуны очакыв эна зэв уна да важнӧй вопроссэзлӧ, огӧ кӧ пондӧ тӧдны быдмассэзлісь олӧм, огӧ кӧ пондӧ тӧдны, кыдз сія зорамӧ да быдмӧ, кыдз питайтчӧ, лолалӧ, кыдз йылӧ.
Тшӧка овлӧ сідз, што быдмассэз ӧтамӧдлӧ озӧ вачкисьӧ асланыс урожайӧн, чожа воӧмӧн и уна мӧдікӧн. Быдӧс этӧ неӧткодьсӧ быдмассэз олӧм коласісь колӧ тӧдны.
Колӧ тӧдны, кыдз позьӧ быдмассӧ вежны, мед сія ыджытжык урожай сетіс.
Но и эта эшӧ етша.
Социализм строитісь страна одзын сулалӧны задачаэз: кошшыны и велӧтны виль быдмассэз, кӧдна бы вермисӧ вайны польза.
Колӧ миян кӧзяйство пытшкӧ пыртны виль культураэз, урожаяжык культураэз, мед и кӧдзыс тусьыс нысянь унажык да буржык вӧлі, мед и вердасыс, кӧрымыс подалӧ пӧтӧсажык вӧлі, мед унажык ви вӧлі, кудель, каучук и уна мӧдік сырьё миян социалистическӧй промышленность понда.
Колӧ уна уджавны и асьнысӧ быдмассэсӧ вежӧм вылын, медбы нія буржык да унажык продукта сетісӧ.
Этӧ позяс судзӧтны перытжыка сэк, кӧр ми используйтам ботаника наукалісь быд достиженнёсӧ.
3. Социалистическӧй строительствоын быдмасвӧдитӧмлӧн значеннё.
Миян социалистическӧй строительствоын быдмасвӧдитӧмыс видзӧ зэв ыджыт значеннё.
Кӧдзыс кӧзяйство, кӧда миян странаын медпаськыт ыб кватитӧ, колӧ лэбтыны сэтчӧдз, мед сюыс уджаліссезлӧ не токо сёян-юан вылӧ тырмис, но мед и подавӧдитӧм понда вӧлісӧ колан вердассэз, а сідзжӧ мед и сю запас вӧлі кольӧма урожайтӧм воэз кежӧ.
Мӧд пятилеткаӧ миянлӧ колӧ кыкисьӧн вылӧжык лэбтыны лён производство да хлопок производство, мед мездӧтчыны мӧдік странаэз зависимостись и мед текстильнӧй промышленность понда асланым сырьё тырмис.
Сакара свёкла ми долженӧсь ӧктыны ӧння сьӧрті куимись унажык, медбы тырмис уджаліссезлӧ сетны ыджытжык сакар норма и колан мымда вӧлі сакарыс пищевӧй промышленность понда.
Мӧд пятилеткаӧ совхоззэз крепитан под (основа) вылын мед вӧлі лэбтӧмась быдмасвӧдитӧмын мӧдік вожжез (отрасллез): карчвӧдитӧм, плодвӧдитӧм, вердас культураэз вӧдитӧм.
Социалистическӧй быдмасвӧдитӧм лэбтытӧг оз позь вежӧртӧмӧн зорӧтны, социалистическӧй подавӧдитӧм, оз позь бытшӧмика паськӧтны кокни промышленность, да тырмӧмви сетны уджалісь отирлӧ сёян-юан да паськӧм.
МЕДОДЗЗА ГЛАВА.
ДЗОРИДЗА БЫДМАСКӦТ ӦТЛАСА ТӦДСАСЬӦМ.
1. Дзоридза быдмас да сылӧн органнэз.
Быдмассэз пытшкӧскӧт да сы олӧмкӧт тӧдсасьӧмсӧ буржык миянлӧ пондӧтны сэтшӧм быдмассэзсянь, кӧднӧ мийӧ адззывлім, кӧдна миянлӧ бытшӧма тӧдсаӧсь.
Медтӧдсаӧсь быдмассэс миянлӧ — дзоридза быдмассэз.
Босьтам, шуам, кӧть быдмас лютик либо курӧг слеп (1 рис.).
Сылісь ми сразу адззам: вуж, за, листтэз.
Быдмаслӧн эна куим торыс — медглавнӧй органнэз. Нылӧн значеннёыс быдмас олӧмын зэв ыджыт.
Муӧ пырӧмӧн вужжес сӧскӧны быдмаслӧ ва да колан питательнӧй веществоэз.
Веськыта сулалан, шонділань кыссян туруна за вылын лютиклӧн ӧшшӧны листтэз.
Медгырись листтэс чурвидзӧны ӧтмӧдӧрӧ. Нія медулын, вужжез дорсянь пизьӧтӧмась, сійӧн нійӧ сідз вуждор листтэзӧн и шуӧны.
Лиссэз аркмӧмась унапельӧса пластинкаись да оропокись. Пластинкаыс унаторйӧ янсалӧм, а оропокыс пластинка пытшкас лист жилкаэзӧ пӧрӧ.
Лиссэс кыным вылынжыка за вылын пукалӧны, сыным поснитжыкӧсь, а оропокныс нылӧн дженытжык.
А медвылісь листтэс пӧрӧмась векнитик, дженытик полоскаоккезӧ и оропоккезтӧг лякасьӧмась за бердӧ.
Эттшӧма за вылын пукалӧмӧн листтэс вылӧ ӧтмоз шонді югӧрыс усьӧ, [...].
Залӧн уджыс не ӧтік токо листтэз ас вылас видзны да нійӧ шонділань лэбтыны, сылӧн и мӧдік удж эм.
Быдмас за пытшкӧт вылӧ-улӧ лэдзчӧны-кайӧны вужжезсянь листтэзӧ да листтэзсянь вужжезӧ ва сорӧн питательнӧй веществоэз.
Сідзкӧ, вуж, за да лист позьӧ шуны питайтчан органнэзӧн.
Но быдмаслӧн эмӧсь эшӧ и мӧдік органнэз.
Лютик за вылісь ми адззам вежыник рӧма дзоридззез.
Дзоридзасьӧм бӧрын ны местӧ аркмӧны плоддэз.
Лютиклӧн нія дзулёккезлань вачкисьӧны. Дзулёк позьӧ торйӧтны кынымкӧ торйӧ. Быд тор пытшкас кӧдзыс.
Кӧдзыс тусись мӧдпыр петалас виль быдмас лютик.
Сідзкӧ, дзоридзӧн быдмасыс йылӧ, сійӧн дзоридзыс шусьӧ йылан органӧн.
2. Быдмас органнэзлӧн мӧдкодьсялӧм.
Залӧн мӧдкодьсялӧм.
Не быд быдмаслӧн ӧтмоз бура тӧдчӧны органнэс.
Мукӧдлӧн заыс сэтшӧм учӧт, што листтэс пукалӧны му бердас топ.
Эта понісь быдмасыс миян син одзын бытьтӧ кыдз бы «затӧм», а веж листоккес «розеткаӧ» паськалӧмась.
Сэтшӧм розеткасӧ ми адззам быдӧнлӧ миянлӧ тӧдса ёгтуруннэзлісь — кульчӧрс турунлісь (жила турунлісь) да бабапель турунлісь (2 рис.).
Нылӧн вонлань кайӧма токо дзоридз кок ӧтнас, а листтэс быдсӧн му бердынӧсь.
Эшӧ эсся ёнжыка мӧдкодьсялӧ заыс сэк, кӧр сія муӧ кундіссьӧ. Сэк сія нач ни вужлӧ пондӧ вачкисьны.
Эттшӧм мӧдкодьсялӧмсӧ ми адззам, шуам кӧть, картовкилісь.
Сылӧн му пытшкись заэс рӧмтӧмӧсь, листоккес чешуйкаэзӧ пӧрӧмась (3 рис.).
Настоящӧй вужлӧн эна чешуйкаэс озӧ овлӧ.
Му пытшкись заэз пизьӧтӧны не вуж бердсянь,
а главнӧй за бердсянь и конеччезаныс нылӧн аркмӧны гырись дзуллез — картовкилӧн клубеннез.
Сідз кӧ, быд торья картовкиыс — му пытшкись залӧн тор.
Сія пондіс шусьыны за клубеньӧн.
Лислӧн мӧдкодьсялӧм.
Мукӧд быдмаслӧн и листыс тӧдтӧмӧдз вермӧ мӧдкодьсявны.
Босьтам, шуам, кӧть анькытш. Сылӧн куим лист гозся, кӧдна быдӧнныс пукалӧны ӧтік оропок вылын, эмӧсь эшӧ кынымкӧ сунис кодь усок (4 рис.).
Нія отсалӧны небыт залӧ видзсьыны веськыта. Кӧбы эзӧ вӧлӧ эна усоккес, анькытш гӧридз некӧр бы эз вермы вонлань лэбны, а кыссис бы му вылӧт.
Эна усоккес сложнӧй листлӧн — мӧдкодьсялӧм листоккез.
Мукӧд кадӧ позьӧ адззыны, кыдз гоз усокись аркмӧ настоящӧй листок.
Вужлӧн мӧдкодьсялӧм.
Вуж ассис формасӧ сідз жӧ зэв ёна вермӧ вежны. А эта форма вежсьӧм сьӧрті вежсьӧ сылӧн и значеннёыс быдмас олӧмын.
Тшӧка вужыс лоӧ местаӧн, кытчӧ ӧксьӧны питательнӧй веществоэз, кӧдна шогмӧны быдмасын.
Сійӧн морковлӧн, свёклалӧн, калиглӧн вужыс мӧдік быдмас вужжез сьӧрті и мӧдкодьжык.
Эттшӧм вужжес эта кузя нельки аслыныс тодиль ним босьтӧмась — нійӧ шуӧны вужплоддэзӧн (5 рис.).
Быдмаслӧн мӧдкодьсялӧм.
Быдӧс, мый йылісь ми эта одзын баитім, миянлӧ колӧ ӧддьӧнжык тӧдны ӧтікӧ: быд быдмас пӧлӧс, кӧдӧ ми ас гӧгӧрсиным адззам, мыччалӧ быдмас органнэзлісь мӧдкодьсялӧм.
Не пыр и не быд быдмаслӧн за, лист да вуж ӧтік ассиныс уджсӧ нуӧтӧны.
А уджыс кӧ органлӧн мӧдкодьсяліс, сідзкӧ и сылӧн керӧмыс мӧдкодьсялӧ.
3. Ӧтівося, унавося да кыквося быдмассэз.
Поча.
Почаӧн шусьӧ быдмаслӧн зэв дженытик петас, кӧда мӧдпыр пӧрӧ заӧ. Сы вылын ӧтамӧд бердӧ ляпкисьӧмӧн пукалӧны поснитик, виньӧрик листоккез (6 рис.).
Быдмас за и сылӧн вожжес помасьӧны почаэзӧн.
Сідзкӧ и залӧн быдмӧмыс пондӧтчисьӧ почаэз зорамӧмсянь да быдмӧмсянь.
Тшӧка, — а пу пияннэзлӧн да куста пуэзлӧн пыр, — лист конувттэзӧ аркмӧны особӧй тӧвьян почаэз.
Тӧвьян почаэз вевдӧрсянь вевттиссьӧны кыз кышӧн. Эта кышыс берегитӧ нійӧ тӧвся кӧдзыт понісь, а кӧр, мӧдпыр тулыссӧ, вачкасӧ шоныт луннэз, кыш увтісь почаыс ныртусясьӧ, пондӧ быдмыны.
Ӧтівося быдмассэз.
Турун быдмассэз, кӧдалӧн тӧв кежӧ оз аркмӧ тӧвьян почаэз, олӧны ӧтік во.
Ны бӧрын кольӧ токо кӧдзыс.
Быдӧс эна быдмассэз пырӧны ӧтівоа быдмас группаӧ.
Эна быдмассэс то кытшӧмӧсь: ося сюэз шуам: зӧр, ид, шогді; карч: ӧгурчи, томаттэз, редис; ёгтуруннэз: урбӧж, тӧрича, куколь.
Унавося быдмассэз.
Оз я пыр эта быдмас группаӧ лютик?
За и листтэз сылӧн кӧдзыт локтан кежӧ кулӧны.
Зато кольӧны за дын бердӧ тӧвьян почаэз.
Энӧ почаэсӧ чожа позьӧ адззыны, колӧ токо му пытшкись торресӧ мыйӧнкӧ гебйышны да вуж бердісь засӧ поткӧтны доль.
Мӧдпыр тулыссӧ эна почаэзісь зорамӧны вились быдмассэз.
Этатшӧм быдмассэс, кыдз лютик, кӧдналӧн тӧв кежӧ аркмӧны тӧвьян почаэз, вермӧны овны сьӧрсьӧн-бӧрсьӧн уна во.
Сідз нійӧ унавося быдмассэзӧн и шуӧны.
Кыквося быдмассэз.
А эмӧсь эшӧ и сэтшӧм быдмассэз, кӧдна ӧтік воӧн зорамны оз вермӧ.
Ар кежӧ нылӧн аркмӧны питательнӧй веществоэз, шогмӧны тӧвьян почаэз, но му вевдӧрись заэз оз кайӧ.
За аслас листтэзӧн аркмӧ вӧлись мӧді воӧ.
Сэк быдмассэз дзоридзасьӧны, кӧдзысасьӧны и вӧлись тӧв кежӧ кулӧны.
Эттшӧм быдмассэс, шуам, сакара свёкла (7 рис.), морков, калиг, коченя капуста.
Быдӧс этатшӧм быдмассэс шусьӧны кыквося быдмассэзӧн.
Ӧзим быдмассэз.
Мӧд нёжӧн зорамӧны ӧзим быдмассэз, шуны кӧть, рудзӧг.
Ӧзим быдмассэз кӧдзӧны гожум помӧ.
Недыр мыйись ӧзимыс петалӧ.
Петас вежӧтӧ, быдмӧ и олӧ тӧв вотӧдз. Тӧв кежӧ вевттиссьӧ лымӧн и тӧвйӧ.
Мӧдпыр тулыссӧ лым сылас, муыс шоналас и ӧзим перыта кутчӧ зорамны и гожумсӧ сетӧ урожай.
4. Быдмассэзлӧн клеткаа строеннё.
Быдмассэз клеткаа строеннё йылісь вежӧртас.
Велӧтны кӧ миянлӧ быдмассэсӧ токо вевдӧрсянь, токо нылісь формасӧ — оз позь вежӧртны быдмас олӧмись уна явленнё.
Быдмаслӧн быд тор, быд орган аркмӧма зэв посни тороккезісь, кӧдна пытшкын олан процессэс и мунӧны.
Быдмассэзлісь пытшкись строеннёсӧ учёнӧйез первуйӧ адззылӧмась XVIII векӧ, кӧр вӧлі керӧм медодзза микроскоп.
Шӧрыштӧмась быдмас бердісь зэв вӧснитик шӧрӧмок да пуктӧмась сійӧ микроскоп увтӧ, син одзын пондӧма тыдавны дзик бытьтӧ мыйкӧ гӧрдззӧм прошва чужӧма.
Дзик бытьтӧ быдмас бердісь шӧрыштӧм шӧрӧмокыс аркмӧма зэв уна поснитик ячейкаэзісь. Быд ячейкалӧн эм стенкаэз пытшкас кытшӧмкӧ кизер вещество.
Энӧ поснит ячейкаэсӧ, кӧдна тыдалӧны токо микроскоп увтын, пондісӧ шуны клеткаэзӧн.
Што быдмас аркмӧм зэв посни клеткаэзісь — вӧлі кӧркӧ ӧддьӧн ыджыт осьтӧмӧн (открытиеӧн) наукаын. Эта осьтӧмыс пондіс тшӧктыны быдмас олӧм вылӧ мӧд нёж видзӧтны.
Дыр чайтӧмась, што медважнӧй колан торыс клеткаын — стенкаэз либо дыжжез, кӧдна янсӧтӧны клеткаэсӧ ӧтамӧдкӧт (8 рис.).
Но бытшӧмжыка велӧтӧм мыччаліс учёнӧйезлӧ мӧдікӧ: медколан торыс клеткаын — пытшкӧс, клетка пытшкись сӧдз вещество.
Этӧ веществосӧ первуйӧ пондісӧ шуны нильыг веществоӧн, либо протоплазмаӧн.
Што быдмас аркмӧма зэв посни клеткаэзісь, позьӧ убедитчыны аслыныт нельки сэк, кӧр киын эм ботаническӧй лупа.
Босьтны кӧ киӧ вӧснитик арбуз шӧрӧмок да видзӧтны сы вылӧ лупа пыр, миян син одзын оссясӧ клеткаэз, кӧднаись аркмӧм арбуз сьӧлӧмӧс.
abu
Сійӧ жӧ позьӧ адззыны и вотӧм томат сьӧлӧмӧсісь, кульыштны кӧ сылісь вевдӧрись кышсӧ.
Медбы адззыны клеткасӧ быд быдмас органісь — мый бы эта органыс эз вӧв: кӧть дзоридз, за, вуж, — колӧ видзӧтны зэв гырися ыждӧтан микроскоп пыр.
Ӧння микроскоп — эта наукалӧн мощнӧй орудие. Сы пыр наука видзӧтӧ и тӧдмалӧ и быдмаслісь керӧмсӧ (строеннёсӧ), и вежӧртӧ-висьталӧ быд орган торлісь олӧмсӧ. Мый кӧркӧ вӧлі вежӧрттӧм, пемыт загадки, ӧні микроскоп пыр сія лоӧ вежӧртана, висьталана.
Клеткалӧн строеннё.
Клеткакӧт тӧдсасьны буржык лоӧ, видзӧтны кӧ микроскоп пыр лук бердісь кульыштӧм плёнка торок.
Медодзза дзаркерӧмӧн жӧ и адззам: лук плёнкаыс дзик бытьтӧ сак, аркмӧма торья клеткаэзісь. Стенкаэс нылӧн топыта лякасьӧны ӧтамӧд бердӧ.
Клеткаэс эна кузьмӧсаӧсь (9 рис.).
Дыржык да бытшӧмика кӧ ӧтік клетка вылӧ видзӧтны, позяс адззыны: 1) вӧснитик, шучкӧп тыдалан клетка дыж, 2) клетка пытшкӧс — протоплазма.
Буржыка видзӧтӧмӧн, шыдӧса-шыдӧса клетка протоплазмаын пондас тыдыштны учитик, гӧгрӧса ядро.
Быд клеткаын сія эм. Протоплазма оз тырт клеткасӧ омӧн.
Ӧті-мӧділаын тыдалӧны кыдз бы поснитик полёккез либо вакуоллез, кыдз нійӧ шуӧны мӧд нёж. Вакуоллезын ваа жидкость — клетка сок.
Мукӧдпырас клетка сок зэв уна овлӧ, клеткасӧ омӧн тыртӧ, а протоплазмаыс токо дыж бердӧттяс пытшсяняс вӧснитик слойӧн лякасьӧ.
Выводдэз.
И сідз, быдмас аркмӧма органнэзісь.
Органнэз аркмӧмась клеткаэзісь.
Сійӧн, медбы вежӧртны быдмас органнэзлісь аркмӧмсӧ, вежӧртны органнэзлісь олӧмсӧ, колӧ тӧдны, мый и кыдз мунӧ клеткаэзын.
Одзланьын ті пондатӧ велӧтны быдмаслісь быдмӧм-зорамӧм.
Этӧ велӧттӧн ті пондат тӧдмавны быдмас органнэзлісь вевдӧрись и пытшкись строеннёсӧ и процессэсӧ, кӧднія ныын мунӧны.
МӦДІК ГЛАВА.
КӦДЗЫС ТУСЬ ЙЫЛІСЬ, СЫ ЧУЖӦМ ЙЫЛІСЬ ДА КӦДЗӦМ КЕЖӦ КӦДЗЫС ЛӦСЬӦТӦМ ЙЫЛІСЬ.
Дзоридза быдмаслӧн олӧмыс пондӧтчиссьӧ кӧдзыс тусь чужӧмсянь.
Кӧс тусь вермӧ чужтӧг куйлыны зэв дыр.
Мукӧд кадӧ видзӧтан кӧдзыс тусь вылӧ и он вермы висьтавны, кытшӧм сія — ловья, али кулӧм.
Но вот кӧдзыс тусь сюрис уль муӧ, шонді аслас шоныт югӧрӧн сійӧ шонтіс и друг кӧдзыс тусь пондӧ ловзьыны, мыччисьӧ петас и быдмасыс зэв чожа кутчӧ зорамны.
Кытӧн сэтӧн мый?
Мыля первося видзӧтӧмӧн бытьтӧ кыдз ловтӧм тусьыс колан условиеэзӧ сюрӧм бӧрын пондӧтчӧ ловзьыны?
Кысянь сылӧн лоис петас?
Кыдз сія зорамӧ?
Кытшӧм условиеэз колӧны, мед бытшӧмжыка кӧдзыс тусьыс петаліс?
Кӧдзыс тусь йылісь да сы чужӧм йылісь точнӧй научнӧй тӧдӧммес колӧны социалистическӧй кӧзяйствосӧ быд сознательнӧй строитісьлӧ. Кӧдзысӧн уджалӧмлӧн миян сельскӧй кӧзяйствоын зэв ыджыт значеннё.
Тулысся кӧдзӧм, кӧдзыс ӧтлаӧ чукӧртӧм да бура бытшӧма сійӧ видзӧм (хранитӧм) эм колхоззэзын да совхоззэзын урожай понда пессян уджын зэв ыджыт кампаннё.
1. Кыдз керӧма кӧдзыс тусь.
Кыдз керӧма боби тусь.
Кӧдзыс тусь керӧмкӧт буржык лоас тӧдсасьны боби тусь сьӧрті (10 рис.).
Боби тусь ыджыт и торресӧ сылісь видзӧтны лоас буржык (видзӧт 1 удж — I, 127 листбок).
Вевдӧрсянь тусьыс вевттьӧма топыт, волькыт, дӧвдалан кышӧн.
Кыш вылын ӧт ладорсяняс эм рубечок.
Эта — пуртӧс стенка бердӧ йитсян местаыс кольӧма.
Топыт кышыс боби тусьсӧ видзӧ берся умӧлись — косьмӧмись да дойдӧмись.
Кӧр ми боби тусьлісь кышсӧ кульыштам, сы увтын син вылӧ усясӧ гырись кык джын, тусьыс кыдз бы шӧриасяс.
Эна тусь джыннэс шусьӧны тусьторрезӧн.
Тусьторрез ӧтамӧдкӧт йитсьӧмась учитик телоокӧн, кӧдалісь лупа пыр позьӧ адззыны и вужок, и учитик заок, и зэв учӧт листока почаок.
Быдӧс эта ӧтлаын — вужок, заок, листока почаок да тусьторрес — лоӧ быдмас чужӧсӧн.
Кыдз керӧма шогді тусь.
Шогді тусьыс боби туськӧт унаӧн абу ӧткодь (11 рис.).
Сылӧн вӧсни дыжыс тусь бердас ӧддьӧн ёна лякасьӧм и оз кырт,
кӧть тусьыс вӧлі бы и кӧтасьӧм (видзӧт 1 — II удж, 127 листбок).
Тусь пытшкын бӧра жӧ эм вужока да лист почаа чужӧс.
Кӧр ми чужӧссӧ тусь бердісь торйӧтам, вермам адззыны килёк, кӧдӧн чужӧсыс йитсьӧ тусь бердӧ.
Эта килёкыс лоӧ тусьторӧн и шусьӧ щитокӧн.
Сідз кӧ шогді тусьлӧн быдса ӧтік тусьтор да и сія немӧн оз вачкись боби тусьторрезлань.
Мукӧд торыс шогді тусьлӧн тыртӧма чочком, пизя веществоӧн — белокӧн, либо эндоспермӧн.
Эндоспермӧ пуктӧмась питательнӧй веществоэз, кӧдна мӧдпыр тусьыс чужикӧ да петалікӧ вуджӧны щиток пыр чужӧсӧ.
Сюэзлӧн щиток — тусьторӧт вуджӧны эндоспермись питательнӧй вещество запассэс зораман чужӧсӧ (петасӧ).
Выводдэз.
Сідзкӧ боби тусьыс шогді тусьлань оз вачкись то мыйӧн: боби тусьын питательнӧй веществоэз тэчӧмӧсь тусьторрезӧ, а шогді тусьлӧн нія — эндоспермын.
Боби тусьлӧн кык тусьтор, а шогді тусьлӧн — ӧтік.
Унажык быдмаслӧн кӧдзыс тусьыс аслас керӧмӧн вачкисьӧ либо боби тусьлань (шуам: анькытш, вика, ӧгурчи, лён, тыква), либо шогді тусьлань (шуам: зӧр, рудзӧг, кукуруза).
Сы сьӧрті, кыным тусьтор кӧдзыс тусьын, ӧтік быдмассэз пондісӧ шусьыны ӧтік тусьтора быдмассэзӧн, мӧдіккез кык тусьтора быдмассэзӧн (видз. 1 удж, 128 листбок).
2. Кӧдзыс тусьлӧн состав.
Шогді пизьлӧн состав.
Шогді туссез изікӧ питательнӧй веществоэз нылӧн пӧрӧны пизьӧ.
Шогді пизь тӧдмалӧмӧн позьӧ кокнита тӧдны, кытшӧм питательнӧй веществоэз эмӧсь шогді туссезын (видз. 2 удж, 127 листбок).
Эта понда шогді пизись керӧм кӧвдас коколёк миськалӧны ваӧн.
Чочком гудыра ваыс, кӧда шогмис кӧвдас миськалӧмсянь иодӧн мичасьӧ лӧз рӧмӧ.
Эта сьӧрті ми шуам: шогді пизьын эм крахмал.
Кӧвдас миськалӧм бӧрын кольччӧм небыт, лякасян масса — клейковина, иоднас лӧз рӧмӧ оз мичась, сідз кӧ, сэтӧн крахмалыс абу ни.
Кӧвдасыс овлӧ небыт, лякасян какраз клейковинасянь.
Аслас составӧн клейковина вачкисьӧ курӧг кольть белоклань, сійӧн и шусьӧ быдмас белокӧн.
Сідзкӧ кӧвдас миськавтӧн пизись ми адззимӧ кык вещество: крахмал да клейковина — белок.
Босьтны кӧ ӧні пизь да лэдзны сійӧ эфирӧ и сетны невна сулыштны, то сыбӧрын гумага лист вылӧ эфирсӧ кисьтӧм бӧрын кольччӧ виа пятно.
Бӧра жӧ эта миянлӧ мыччалӧ, што шогді тусьын крахмался да белокся эм эшӧ и ви.
Кӧдзыс тусьлӧн питательнӧй веществоэз.
Кытшӧм жӧ питательнӧй веществоэз эмӧсь боби тусьын?
Микроскоп увтын боби тусь бердісь шӧрыштӧм вӧснит шӧрӧмок видзӧттӧн (токо мед шӧрӧмокыс вӧлі иодӧн мичӧтӧма) тыдалӧны зэв уна гӧгрӧса сьӧд-лӧз рӧма тусёккез.
Нійӧн боби тусь клеткаэз тыртӧмась. Эна крахмал туссез.
Иод мичӧтіс нійӧ лӧз рӧмӧ.
Сідзкӧ и боби тусяс шогді тусьын моз жӧ эм крахмал.
Эна гырись крахмал туссезся боби тусь клеткаэзын эмӧсь эшӧ и поснитжык тусёккез, кӧдна иодӧн лӧз рӧмӧ оз мичасьӧ.
Нія аркмӧмась белок веществоись (12 рис.).
Подсолнушко кӧдзыс тусьын да вӧр ӧрекын крахмался эм уна эшӧ и быдмас ви.
Пичкыны кӧ нійӧ гумага коласӧ, гумага вылын кольччас виа пятно.
Сідзкӧ, кӧдзыс тусьлӧн основнӧй питательнӧй веществоыс — крахмал, белок да ви.
Эна питательнӧй веществоэзӧн кӧдзыс тусьлӧн чужӧс зорамӧ медодзза луннэзӧ олікӧ.
Не быд кӧдзыс тусьын эна питательнӧй веществоэс ӧтмымдаӧн.
Боби туссезын крахмался эшӧ эм белок, кӧда аслас составӧн вачкисьӧ курӧг кольть белокланьӧ и животнӧйез яйланьӧ.
Сю кӧдзыс тусьын медунаыс крахмал.
А виа быдмас кӧдзыс тусьын медуна быдмас ви.
Кӧс тусьлӧн состав.
Кытшӧм бы кӧс кӧдзыс тусь эз вӧв, сё ни сы пытшкын крахмался, белокся да вися эм мымдакӧ ва.
Босьтны кӧ пробиркаӧ кӧдзыс туссез да шонтыны нійӧ би вылын, миян кӧс пробирка стенкаэз вылӧ пуксясӧ ва воттез.
Кӧда ваыс кӧдзыс туссез пытшкын вӧлі, би вылын быдӧс сія пӧрис парӧ.
Пар кӧдзамис и воттезӧн пуксис пробирка стенкаэз вылӧ.
Быдкодь быдмаслӧн кӧс тусьыс ас пытшкас неӧтмымдаӧн видзӧ васӧ. И ӧтік сорта быдмас кӧдзысын вермас лоны ваыс неӧтмымдаӧн.
Бытшӧмика косьтӧм кӧдзыс туссезын ва овлӧ етшажык. Етшажык ваыс и лоӧм кӧдзыс туссезын. Умӧля воӧм кӧдзыс тусьын ваыс унажык.
Пондыны кӧ кӧдзыс туссесӧ би вылын видзны дыржык, нія пондасӧ сьӧдӧтны — шомсявны. Крахмал, белок да ви ныись сотчас, и кӧдзыс туссез туйӧ медбӧрын коляс токо чепӧлёк тыр пӧим.
Эта сьӧрті позьӧ шуны: кӧс кӧдзыс туссезын кӧть кӧр овлӧ ва, сотчан органическӧй веществоэз да сотчытӧг кольччан минеральнӧй соввез (пӧим)
(видз. 2 удж, 129 листбок).
3. Кыдз чужтӧн мӧдкодьсялӧ кӧдзыс тусь.
Кӧдзыс тусьлӧн чужӧм.
Кӧдзыс тусь ловзьӧ ваӧ сюрӧм бӧрын, польдӧм бӧрын.
Тусьторрез зэв ёна юӧны ва. Ва юӧмсянь нія унаись ыждӧны, нырыштӧны пытшсянь тусь кыш вылӧ, а кыш потӧ.
Кыш потӧминӧт перво мыччисьӧ вужок, а сыбӧрын и медодзза поснитик листоккеза заок (13 рис.).
Эта томыник быдмасыс зорамӧ — чужӧсісь (видз. 3 удж, 129 листбок).
Кыным ӧддьӧнжык чужӧсыс быдмӧ, кыным нюжалӧжык петас, сыным кыктусьтора быдмаслӧн тусьторрез чинӧны асланыс объёмын, ямӧны, чукрасьӧны, а медбӧрын и дзикӧдз косьмӧны.
Босьтны кӧ боби тусь да сылісь тусьторресӧ вундыштны (чужӧссӧ кольны тусьторрезтӧг), то чужӧс миян кулас.
Ӧтік тусьтора боби тусь чужны вермӧ, токо петасыс лоӧ кыкисьӧн учӧтжык нормальнӧй петас сьӧрті (14 рис.).
Этӧ жӧ ми адззам и шогді петаслісь: эндоспермтӧм чужӧс оз петав, кулӧ.
Сідзкӧ, чужӧс, кытчӧдз эз ештӧ сылӧн аркмыны вужжез да листтэз, питайтчӧ питательнӧй веществоэзӧн, кӧдна пуктӧмӧсь кӧдзыс тусьӧ.
Кыдз петалікӧ мӧдкодьсялӧ кӧдзыс тусьлӧн состав.
Питательнӧй веществоэз, кӧдна запасӧн куйлӧны кӧдзыс тусьын — крахмал, белок, ви, ваын сывны оз вермӧ.
А петалікӧ жӧ кӧдзыс тусьлӧн состав адззӧмӧн вежсьӧ.
Эндосперм лоӧ небыт, а кӧр ми сійӧ пичкыштам — пытшсис петӧ чочком, йӧв кодь чӧскыт кӧра жидкость.
Чужан кӧдзыс туссез тӧдмалӧмӧн адззӧмась, тусяс пӧ эм особӧй вещество — диастаз.
Диастазыс тусись крахмалсӧ пӧртӧ ваын сылан сакара веществоэзӧ.
Вот мыля чужтӧн кӧдзыс тусь овлӧ чӧскыт кӧра.
Диастазлісь уджсӧ позьӧ тӧдмавны опытӧн.
Крахмал клестерӧ пуктіссьӧ чуж раствор, кӧда керсьӧ чужӧм ид тусись.
Чуж раствора клестер недыр мыйись иодӧн оз ни сэсся понды лӧзӧтны.
Вот эта сьӧрті и позяс тӧдны, што клестерын крахмал сэсся абу, быдӧс сія вуджис сакарӧ.
Чужан кӧдзыс тусьын диастазся эмӧсь эшӧ и мӧдік веществоэз.
Нія асланыс свойствоэзӧн диастазлӧ вачкисьӧны, токо не крахмал мӧдкодьсьӧтӧны, а белоккез да виэз.
Сідз вежсьӧ кӧдзыс тусьлӧн составыс чужтӧн.
Ваын сывтӧм веществоэс быдӧс мӧдкодьсялӧны, пӧрӧны ваын сылан веществоэзӧ и сійӧн быдман чужӧсыс кокнита вермӧ нійӧ сӧскыны.
4. Кытшӧм условиеэз колӧны, мед кӧдзыс тусь вермис чужны.
Ыб вылӧ кӧдзыс тусь кӧдзикӧ оз ӧткодинӧ сюр.
Мукӧд пыдынӧла кундіссьӧ, мукӧд кольӧ тырттӧг, кӧда инмӧ вааинӧ, а кӧда и дзик кӧсінӧ. Быдӧннысӧ нійӧ кытшӧвтӧ ру (воздух), влага, мусин. Кундытӧм туссез вылӧ усьӧ шонді югӧр, нійӧ шонтӧ.
Природа шӧрын эна условиеэс пыр и пыр вежсьӧны.
Сідз, кӧс тулысӧ мусиныс зэв ёна шоналӧ, влага сыын етша; кӧдзыт зэра тулысӧ бӧра ӧддьӧнӧв мусиныс вазьӧ, но зато и оз вермы шонавны.
Первося тулысӧ кӧдзыс тусь оз вермы петавны — сылӧ оз тырмы влага, а шонытыс унаӧв.
Мӧд тулысӧ кӧдзыс туссес польдыны пондасӧ, а петас сетны оз вермӧ — люзь ваа мусинын оз понды тырмыны ру и шоныт.
Мыйлӧ тусь чужикӧ колӧ ва.
Ва йиджӧ тусь пытшкӧ. Ва понісь тусь польдӧ и поткӧтӧ ассис кышсӧ.
Кыш потӧм бӧрын чужӧс пондӧ чожа быдмыны.
Эта сьӧрті лоӧ вежӧртана — тусь чужикӧ перво-наперво колӧ ва.
Эсся, ваыс тусьлӧ колӧ питательнӧй веществоэз тусь пытшкись сылӧтны.
Токо растворрезӧн нія вермӧны быдман чужӧс пытшкӧ сӧскиссьыны.
Опыттэз сьӧрті тӧдмалӧмась, што быд быдмаслӧн кӧдзысыс чужикас корӧ аслыс васӧ не ӧтмымда.
abu
Медуна ва колӧ боби быдмаслӧ, кӧдзыс тусьын кӧдналӧн уна белок.
Польдӧм бӧрын эна туссез кыкисьӧн одзза сьӧрті сьӧкытжыкӧсь лоӧны.
Крахмала кӧдзыс тусьлӧ кыкисьӧн етшажык колӧ ваыс.
А медъетша ва колӧ виа быдмас кӧдзыс тусьлӧ.
Боби быдмас кӧдзыс, а сідз жӧ и свёкла кӧдзыс, ӧгурчи кӧдзыс, тыква кӧдзыс, кӧдна чужтӧн корӧны уна ва, садиттӧн пыр колӧ кӧтӧтны.
А тулыссӧ мукӧд сюэз да карччез колӧ кӧдзны одзжык, кытчӧдз мусин вазылькья, нюдз.
Засухаӧн босьтана местаэзын миян СССР-ын пондісӧ медбӧрья воэзӧ кӧдзны осясӧ одз. Лым сыліс, му небурик шуралыштіс и кӧдзӧны ни.
Этадзи кӧдзӧмӧн кӧдзыслӧ петавны и медодзза петассӧ быдтыны эм мыйӧн — мусинын ва доволь.
Нія засуха вотӧдз ештӧны быдмыны и пыдына муӧ вужьясьны.
Мыйлӧ тусь чужикӧ колӧ шоныт.
Кӧр ми зӧр пуктам пешланӧ чужтыны, ми адззам: +5°Ц дырни нія пондӧтчӧны чужны ни.
Лажмытжык температура дырни (+1–2°Ц) зӧр туссез токо польдӧны, а чужны озӧ вермӧ.
Медлажмыт температура, кӧда дырни кӧдзыс тусь пондӧтчӧ чужны, шусьӧ минимум температураӧн (мӧд нёжӧн кӧ, медлажмыт) температураӧн.
Опыттэз сьӧрті тӧдмалӧма — мукӧд быдмаслӧн кӧдзыс тусь (рудзӧг, ид, лён) чужны пондӧтчӧны 0°+3°Ц температура дырни.
А вот лунланься быдмас кӧдзыс (ӧгурчи, тыква, рис) вермӧны чужны токо +10–14°Ц температура дырни.
Сідз, тыквалӧ медлажмыт температура +14°Ц.
Кӧр температура вылынжык +5°-ся, зӧр кӧдзыс чужӧ буржыка.
Медбура да дружнӧя зӧр кӧдзыс чужӧ +25°Ц дырни.
Температура, кӧда дырни медбура кӧдзыс чужӧ, шусьӧ оптимум температураӧн.
Лэбтыны кӧ температурасӧ + 25°Ц сайӧ, зӧр кӧдзыс петавны дугдӧ.
+30°Ц температура дырни петалӧны токо ӧті-ӧті ни.
А лэбтыны кӧ температурасӧ эшӧ и +30°Ц сайӧ, лоас кӧркӧ сэтшӧм точка, кӧда дырни зӧр кӧдзыс петавны сувтас дзикӧдз.
Эта медвылын температураыс, кӧда дырни петалӧм мунны ӧті-ӧтіӧн эшӧ вермӧ, шусьӧ максимум (медвылын) температураӧн.
Неӧткодь быдмас пӧлӧслӧн минимум, максимум да оптимум температура овлӧ неӧткодь.
Энӧ температура точкаэсӧ тӧдӧмӧн и висьталӧны одзлань, кытшӧм быдмаслӧн кытшӧм эм кӧдзан срок, мӧд нёжӧн шуны, кытшӧм быдмас кӧр колӧ кӧдзны (видз. 4 удж, 129 листбок)
Морков кӧдзыс да петрушка кӧдзыс кӧдзӧны медодз. Нія бура чужӧны и лажмыт температура дырни.
Ӧгурчи, фасоль да тыква кӧдзӧны унаӧн сёрӧнжык. Кытчӧдз муыс бытшӧмика шонавны эз ешты, энӧ быдмассэсӧ кӧдзны оз позь, нылӧн кӧдзыс пондӧтчӧ чужны +12°–14°Ц дырни.
Мыйлӧ кӧдзыс тусь чужикӧ колӧ кислород.
Анькытш кӧдзыс, кӧда пизьӧтӧм ваӧ лэдзӧма, токо польдӧ, а чужны оз вермы. Пизьӧтӧм ваын ру абу, сія пакмис ва пизьӧттӧн.
Руӧ унажыксӧ пырӧма кык газ: кислород да азот. Эсся мымдакӧ эм эшӧ и углекислӧй газ.
Медбы тӧдны, кӧда жӧ эна куим газісь кӧдзыс тусьлӧ чужикас колӧны, колӧ керны учитик опыт.
Бутылкаӧ ва бумагаӧн пуктӧны чужан анькытш кӧдзыс, вевдӧрсянь бытшӧмика тропкаӧн тупкӧны и сувтӧтӧны шонытінӧ.
Мӧдік бутылка пытшкӧ кӧ лэдзлыны ӧзтӧм сартас, сія пондас сотчыны.
Эта мыччалӧ — бутылка пытшкын эм кислород.
Ӧні 1–2 лун чулалӧм бӧрын кӧ лэдзны бутылкаӧ, кӧдаын чужан кӧдзысыс, ӧзтӧм сартас, сартасыс миян сэк жӧ дзикӧдз кусас.
Эта миянлӧ мыччалӧ — кӧдзыс туссез чужиканыс бутылкаись русӧ мӧдкодьсьӧтӧмась. Кислород ӧшӧма.
Кисьтны кӧ ӧні бутылкаӧ известя ва, ваыс гудыртчас.
А ми тӧдам — известя ва гудыртчӧ сэк, кӧр эм углекислӧй газ.
Сідзкӧ, вежӧртана лоӧ: чужикӧ кӧдзыс ас пытшкас босьтӧ кислород, а бӧр лэдзӧ углекислӧй газ.
Мӧд нёжӧн кӧ, сія, кыдз и быд ловья тор, лолалӧ.
Лолалікӧ кӧдзыс тусь эшӧ и шоналӧ.
Этӧ ми асьным адззывлім сэк, кӧр ӧррезын чуж вылӧ рудзӧг чужтӧны.
Эта шонытыс, кӧда кӧдзыс чужикӧ аркмӧ, аслас жӧ кыдзыслӧ зэв колантор: кыным шонытжык, сыным буржыка зорамӧ чужӧс.
Колӧ я кӧдзыс тусь чужикӧ югыт да мусин?
Унажык быдмас пӧлӧслӧн кӧдзыс чужӧ, кыдз мыччалӧны опыттэз, пемытінын и югытінын ӧтмоз.
Югытыс нылӧ кӧть бы век эз вӧв.
abu
Но эмӧсь сэтшӧм быдмассэз, кӧдналӧн кӧдзыс чужӧ бытшӧмжыка югыт вылын.
Сідз, ёгтурунлӧн — ошлаплӧн, зверобойлӧн, ситурунлӧн — кӧдзыс, пыдын пласт увтӧ шедӧм бӧрын чужтӧг вермӧ куйлыны быдса воэз.
Кӧркӧ мӧдпыр мӧдпӧв му бергӧттӧн сія вились сюрӧ лэбтыны пласт вевдӧрӧ, кытчӧ сидзӧ югытыс, сэк сія зэв чожа кутчӧ чужны.
А эмӧсь и сэтшӧмӧсь (фацелия турунлӧн, чернушкалӧн, сирвезлӧн), кӧдналӧн кӧдзысыс вермӧ петавны токо пемытінын.
Кӧть ми и шуам, што чужикӧ медуна быдмас пӧлӧслӧ югытыс оз ков, но тшӧтш колӧ висьтавны и то мый: кыдз токо петаслӧн мыччисисӧ веж листоккез, сідз сылӧ непременно колӧ югыт.
Веж листа быдмас югыттӧг овны оз вермы.
Кольччӧ эшӧ тӧдны, а колӧ я чужикас быдмас кӧдзыслӧ мусин.
Бӧра жӧ опыттэз миянлӧ мыччалӧны — быд быдмас кӧдзыс чужны вермӧ и песӧкын, и кирпич вылын, и пильнӧй чагын, и гумага вылын, и кудельын.
Сідзкӧ, петӧ, кытчӧдз тусьторрезын либо эндоспермын тырмӧны питательнӧй веществоэс, вермӧ зорамны и мусинтӧг либо кытшӧмкӧ мӧдік питательнӧй средатӧг.
Выводдэз.
Быдӧс висьталӧмсис быдмас кӧдзыс тусь йылісь колӧ тӧдны то мый: 1) быд чужан кӧдзыс тусьын эм ловья чужӧс, 2) чужӧс петавтӧн вермӧ питайтчыны токо тусьторрезӧ либо эндоспермӧ заптӧм питательнӧй веществоэзӧн, 3) мед кӧдзыс тусь вермис чужны, колӧ ва, шоныт да руись кислород и мед быдӧс эта вӧлі не уна и не етша, а мымда колӧ быд быдмаслӧ.
Первосянь вежӧрттӧм кыдз бытьтӧ быдмас кӧдзыслӧн чужӧмыс-петалӧмыс, а сыбӧрын и петаслӧн зорамӧмыс, а былись тӧдӧмыс, вежӧрттӧмыс сэтӧн абу нем.
Быдӧс мунӧ естественнӧй законнэз сьӧрті.
Эд чужан кӧдзыс тусь пытшкын эм ловья чужӧс.
Кытчӧдз сія ловья, сэтчӧдз и тусь вермӧ чужны, а куліс кӧ, сэк и кӧдзыс тусь лоӧ нечужан.
Этакӧт ордчӧн содтамӧ и сійӧ, што чужӧс пондӧтчӧ зорамны определённӧй условиеэз дырни.
Абу ва, кислород да шоныт, и чужӧс эз понды мӧдкодьсявны, но и оз кув, ловйӧн кольӧ.
Кӧдзыс тусьлісь олӧмсӧ позьӧ тӧдмавны сы сьӧрті, што йӧртӧтын куйлытӧн нія лолалӧны, мӧд нёжӧн, руись кислород босьтӧны и углекислӧй газ лэдзӧны.
Этӧ зэв ёна колӧ тӧдны кӧдзыс сю правильнӧя хранитӧм понда.
Медбы бур да бытшӧм, чужана вӧлі сю кӧдзыс, колӧ кӧдзыс видзны сэтшӧминын, кытчӧ оз вермы сюрны ва да шоныт, а то сія вермас тшыкны.
Но сю кӧдзыс видзанінын непременно колӧ, мед пыр муніс-локтіс сӧстӧм ру, мед пыр вӧлі кислород и эз вӧв уна углекислӧй газ. Оз кӧ ло кислород, кӧдзыс вермас пӧдны.
Тодель керӧм бур кӧдзыс видзаніннэзын бур вентиляция керсьӧ.
Бура кӧдзыс вентилируйтӧм ковсьӧ эшӧ и сійӧн, мед эз вермы кӧдзыс вылын явитчыны баг да берся бактерияэз.
Чожа, ӧтмоза зораман петаслӧ колӧ ва да шонытыс не ӧтмымдаӧн быд пӧлӧс быдмаслӧ.
Эта сьӧрті и кӧдзан кадсӧ быд пӧлӧс быдмаслісь тӧдӧмыс босьтӧ ыджыт значеннё.
Чужикӧ кӧдзысыс кислородсӧ босьтӧ унажык весь куйлӧтӧмся.
Эта сьӧрті колӧ кӧдзыс кундыны муӧ, мед кислород вӧлі унажык.
Сідзкӧ, колӧ бытшӧмжыка правильно небзьӧтны мусӧ.
Быдӧс эта висьталӧм сьӧрті бӧра жӧ лоӧ висьтавны — отир шӧрын быд суевериеыс да предрассудокыс кӧдзан дорын дзик и дзик нем вылӧ.
Медбы колхозниккезӧс да единоличниккезӧс кыдз-ненабудь да пельдӧтны социалистическӧй урожай понда пессьӧм бердісь, классовӧй враггез-кулаккез асланыс агенттэзкӧт тшӧтш: подкулачниккезкӧт, поппезкӧт, сектанттэзкӧт — мукӧдінын пешлісьлӧны эшӧ пемыт крестьянаӧс бӧбӧтлыны.
Нія модьӧны нылӧ: «урожайыс пӧ эд енсянь», «петан кӧдзны — енӧс пӧ тӧд», «крестасьӧмӧн пӧ кӧдзсянкудтӧ сивьят босьт». Повзьӧтлӧны пемыт мортӧс быдмозӧн. Еннэзӧн ыб вылӧ кайӧны, енлісь зэр корӧны, молебеннэз сэтчин сьылӧтӧны, озӧ тшӧктӧ праздник луннэзӧ уджавны.
И быдӧс эта вредительство уджыс нылӧн веськӧтӧма агротехника сьӧрті сувтӧтӧм ас када кӧдзан кад вылӧ.
Бытшӧмика, вежӧртӧмӧн колхозниккезлӧ да единоличниккезлӧ кӧдзыс петалан законнэз йылісь висьталӧмӧн отсалас нылӧ мезмыны социалистическӧй строй враг кипод увтісь.
5. Кӧдзӧм кежӧ кӧдзыс лӧсьӧтӧм.
Быд мероприятиеыс социалистическӧй быдмасвӧдитӧмын иньдӧма урожай лэбтӧм вылӧ.
Сійӧн кӧдзан кад кежӧ кӧдзыс лӧсьӧтӧмлӧн лоӧ кӧзяйствоын зэв ыджыт значеннё.
Колӧ керны сідз, мед кӧдзӧм кӧдзыссянь босьтны медыджыт урожай.
Кыдз тӧдмавны сю кӧдзыслісь ёгсялӧмсӧ да сӧстӧмсӧ.
Кӧдзысыс мукӧд кадӧ овлӧ зэв ёгтурун кӧдзыс сора.
Сідз, лунвыв районнэзын мукӧд кадӧ ёгсялӧмыс 40–50% ӧдз вашӧтӧ.
Этатшӧм ёг сора кӧдзыссӧ кӧ кӧдзны, ыб вылас ёгтурунся нем оз и кай.
Быд ёг кӧдзыс тусись кайӧ быдса ёгтурун. Ёгтуруныс сю петассӧ пӧдтӧ, муись сӧскӧ влага и пӧтӧса веществоэз.
Мукӧд кадӧ ёгтуруныс сю петассӧ пӧдтыны вермӧ дзикӧдз.
Эссянь тыдалана лоӧ, мый бурна ёгтуруныс чинтӧ урожайсӧ.
Кӧдзан вотӧдз быд сю кӧдзысісь дзикӧдз колӧ бӧрйыны ёг кӧдзыс (15, 16, 17 рис.)
Унажык ёг кӧдзыссӧ сю кӧдзысісь бӧрйӧны тодиль лӧсьӧтӧм машинаӧн — триерӧн. Триерыс сю кӧдзыссис ёг кӧдзыссӧ янсӧтӧ.
Триер — сложнӧй машина. Кӧдзыс туссесӧ сія ӧта-мӧд коласісь форма сьӧрті янсӧтӧ.
Мед бытшӧмик вежӧртны, кыдз уджалӧ триерыс, позьӧ аслыныт керны сідз:
босьтны кӧнтусь гырися гӧпока пӧлок да кисьтны сы вылӧ анькытш сорӧн кӧнтусь. Пӧлоксӧ кӧ ӧні пӧліньтат, Тіян анькытш туссес пӧв вылісь тараласӧ ордсӧ, а кӧнтусь пӧлок гӧппезӧ коляс.
Вот ті и янсӧтіт кӧнтусьсӧ анькытш коласісь.
Эта принцип сьӧрті керӧма и триер.
Токо пӧв туйӧ сылӧн пытшкас цинковӧй трубка — цилиндра пуктӧма. Пытшланьсяняс цилиндрлӧн эмӧсь гӧпоккез — ячейкаэз (18 рис.).
Быд отделеннёын эна гӧпоккес неӧткодьӧсь.
Цилиндра бергалӧ.
Пытшкас сы вылӧ киссьӧ сю кӧдзыс и быд тусь ас форма сьӧрті адззӧ аслыс ячейка. Кӧда тусь пырас не аслас ячейкаӧ, сія цилиндра бергӧтчытӧн усьӧ чожажык.
Сідз цилиндра бергалӧмӧн сютусьыс ёг бердісь и бӧрйиссьӧ.
Сютусьыс лэдзсьӧ ӧтіклаӧ, а быд чужӧма ёг тусь мӧдіклаӧ.
Мукӧд ёг тусь коласісь кӧдзыс тусьсӧ янсӧтны абу кокни.
Мукӧд ёг тусьыс и формаӧн, и сьӧкытанас, и ыжданас дзик и дзик сю тусь.
Нійӧ нельки культурнӧй быдмас «спутниккезӧн» эта сьӧрті шуӧны.
Не ӧтік сё воӧн ёгтурун лӧсяліс сю быдмассэзкӧт этадз ӧтлаын овны.
Морт воись воӧ вежӧрттӧг сійӧ бӧрйис.
Воись воӧ урожай дзимлялікӧ дзимляліс и ёгтурун. Нянь вартікӧ вартіс и ёгтурун, тӧлӧтікӧ тӧлӧтіс, а мӧдпыр кӧркӧ и кӧдзис. Эта сьӧрті ёгтурун велаліс эта сюкӧт и воны и петавны.
Етша эта — и форманас, и сьӧкытанас, и ыжданас, и нельки рӧмнас пондіс вачкисьны аслас культурнӧй сю кӧдзыслань, кӧдакӧт велаліс воны.
abu
Чередь эм сэтшӧм культурнӧй сю кӧдзыс, кӧдалӧн бы эз вӧв аслас «спутник» — ёгтурун.
Пырся «спутниккез» то кытшӧмӧсь: рудзӧглӧн — кӧстер турун; шогділӧн — плевел турун; зӧрлӧн — кульзӧр, просалӧн — мышей.
Ёгтурун кӧдзысся сю кӧдзыслӧ ӧтлаӧ сюрӧ уна му тор, галя тор, из тор, джыння тусь, шогалан тусь, идзас тылӧп тор и мукӧд.
Эта — кулӧм ёгӧн шусьӧ, сійӧ сідз жӧ колӧ быдӧс янсӧтны, медбы мӧдпыр не кайӧтны ыб вылӧ. Берся ёгыс сю кӧдзыссӧ сьӧктӧтӧ, а сідзкӧ сьӧктӧтӧ и сійӧ кыскалӧмсӧ. Сэтчӧ жӧ, ӧтлаын берся ёгкӧт муӧ сюрӧны лёк вайись грибоккез да бактерияэз, кӧдна заразитӧны быдмассэсӧ.
Весӧттӧм кӧдзысӧн кӧдзикӧ дасӧт торыс урожайлӧн ӧшӧ.
Эта сьӧрті колӧ одзжык тӧдмавны, кытшӧм кӧдзыс сюлӧн сӧстӧмыс и кытшӧм сылӧн ёгсялӧмыс.
Сю кӧдзыслісь ёгсялӧмсӧ тӧдмавны абу сьӧкыт.
50 г сю кӧдзысын кӧ ёг 5 г, то 100 г кӧдзысын сія лоас 10 г.
Сідзкӧ позьӧ шуны: эта сю кӧдзыслӧн пӧ ёгсялӧмыс 10%, а сӧстӧмыс 90%.
Кӧдзан сюын бур, бытшӧм, тыра туськӧт ӧтіаын вермӧ сюрны умӧль тырттӧм сю тусь.
Воӧм сю тусьын бура аркмӧм и чужӧс и эндосперм эта сьӧрті сія и сьӧкыт, и тыра.
Вотӧм тусьын эта быдӧс абу досповнаӧдз тырӧма, сійӧн сія кыш-кыш и эм.
Тыра, гырись, воӧм тусись аркмӧ петасыс ён, вына, а вотӧм тырттӧм тусись петас винер, кельыт. Мукӧд кадӧ тырттӧм, вотӧм кӧдзыс тусьыс дзикӧдз оз чуж (19 рис.).
Эта сьӧрті кӧдзан кад одзын колӧ кӧдзыссӧ бӧрйыны. Эмӧсь сэтшӧм тодиль бӧрьян машинаэз, кӧдна гырись тусьсӧ, тырасӧ янсӧтӧны посни дынісь, тырттӧм тусь дынісь.
abu
Эттшӧм машинаыс сю тусьсӧ бӧрйӧ сьӧкыт сьӧрті (20 рис.).
Машиналӧн («Триумф» сортировкалӧн) кык главнӧй тор: тӧвсетан (вентилятор) да решётка.
Сю тусьыс вылісянь кӧшись улӧ лэдзчытӧн сюрӧ зэв ыджыт тӧв одзӧ, кӧда аркмӧтӧ тӧвсетаныс.
Быдӧс кыш-кыш ёг-кильыс тӧв сорӧн петӧ сортировка кузов сайӧ.
Сьӧкытжык тусьыс матӧжык, озжык вермы лэбзьыны, и сюрӧ пожгез вылӧ, а кокнитжык тусьыс лэбзьӧ ылӧжык — мӧдік отделеннёӧ.
Пожжез вылын сьӧкыт сю тусь пожнассьӧ.
Гырись сьӧкыт тусьыс усьӧ ӧтілаӧ, а поснитжыкыс — мӧділаӧ. Гырисьжык тусьыс шусьӧ I сортӧн, сія мунӧ кӧдзысӧ, а поснитжыкыс — II сортӧн, сія мунӧ сёянӧ. Весӧтӧм кӧдзысӧн кӧдзӧм ыб вермӧ сетны урожай 15–20% унажык.
Кыдз тӧдмавны чужан кӧдзыс.
Сӧстӧм, сортуйтӧм сю кӧдзыс коласын вермасӧ сюрны нечужан туссез. Сідз кӧ кытшӧмкӧ процент кӧдзыс ыб вылӧ каяс весь и весь сісьмас муын.
Конешно, этшӧм кӧдзыссянь бур урожай видзчисьны сьӧкыт.
Эта сьӧрті одзжык, кӧдзтӧдз колӧ тӧдмавны, кыдз чужӧ кӧдзыс.
Эта понда босьтӧны 100 кӧдзыс тусь да чужтӧны.
14–15 лун бӧрті лыддьӧны, кыным сютусь чужисӧ да петкӧтӧны чужӧмись процент.
Чужтӧм кӧдзыс тусьыс лыддиссьӧ кулӧмӧн, непеталанӧн.
Кӧдзыслӧн качествоыс тӧдмассьӧ не токо чужӧм сьӧрті, но сы сьӧрті, чожа я кӧдзысыс петалӧ и кыдз сія — ӧтдруг я петалӧ.
Кыным дружнӧйжыка кӧдзыс туссез чужасӧ, сыным мӧдпыр ыб вылын кыдзыслӧн петасыс бытшӧмжыка каяс, друг шепьясяс да и воас.
Быд быдмас кӧдзыслӧн чужан способностьыс аслас. Ӧтіклӧн сія дыр видзсьӧ, мӧдіклӧн чожа ӧшӧ.
Сідз, шуам, мукӧд пулӧн кӧдзыс (бадьлӧн, топольлӧн, вязлӧн) лун-мӧд бӧрті нечужанаӧ ни пӧрӧ.
Зато мукӧд турунлӧн кӧдзысыс чужны вермӧ уна дас во бӧрті.
Сідз, шуам, клеверлӧн 62 во бӧрын кӧдзыс туссес вермӧны чужны.
Унажык быдмаслӧн кӧдзыс тусь вермӧ чужны 1–15 во бӧрті.
Кӧдзыслӧн чужаныс видзсьӧ сійӧ берегитӧм сьӧрті.
Кужтӧг видзӧм понісь, уль руа, шоныт, умӧля вентилируйтӧм йӧртӧтын видзикӧ, «дыр олан» кӧдзыс тусь вермӧ зэв чожа ӧштыны ассис чужансӧ.
Кыдз тӧдмавны кӧдзыслісь кӧзяйственнӧй годнось.
Ӧтік гектар вылӧ унажыксӧ кӧдзсьӧ ӧтмымдаӧн: шуам зӧрлӧн норма — 130 кг, лёнлӧн — 170 кг, мед токо кӧдзысыс вӧлі сӧстӧм да чужан.
Весӧттӧм кӧдзыс, либо лажмыт чужан процента кӧдзыс колӧ кӧдзны унажык, медбы петас мӧдпыр вӧлі сукнас нормальнӧй.
Вӧлі кӧдзӧма мед колан норма, колӧ одзлань тӧдны сю кӧдзыслісь сӧстӧмись процент да чужӧмись процент.
Этӧ тӧдӧмӧн позяс кокнита тӧдны кӧдзыслісь и кӧзяйственнӧй годность.
Шуамӧ кӧть сідз: босьтӧм зӧр кӧдзыслӧн сӧстӧмыс вӧлі 90%, а чужаныс 85%. Медбы тӧдны сылісь кӧзяйственнӧй годность, колӧ:
90 · 85 / 100 = 76,5%. Эта 76,5%-ыс и эм кӧзяйственнӧй годность босьтӧм зӧр кӧдзыслӧн.
Кӧзяйственнӧй годность тӧдӧмӧн позьӧ тӧдмавны, уна я кӧдзыс мунас 1 га вылӧ.
Кӧдзан нормаыс кӧ зӧрлӧн 130 кг, а кӧзяйственнӧй годностьыс сылӧн 76%, то гектар вылӧ ковсяс кӧдзны 130 кг-ся унажык;
босьтӧм зӧр кӧдзыслӧн годностьыс колан тыр годность сьӧрті токо 76%.
Медбы петас эз вӧв шоч, колӧ зӧр кӧдзыссӧ босьтны то кытшӧм лыддисьӧм сьӧрті:
130 кг лоӧ 76%;
130 / 76 кг лоӧ 1%;
130 ·100 / 76 = 171 кг лоас 100%. Сідзкӧ 76 % кӧзяйственнӧй годностя зӧр 1 га вылӧ колӧ кӧдзны 186 кг. Сэк вӧлись петасыс миян лоас нормальнӧй.
Мыля колӧ кӧдзны сорта кӧдзысӧн.
Мед урожай вӧлі ыджытжык, колӧ кӧдзны сорта кӧдзысӧн.
Сорта кӧдзыс быдтӧны опытнӧй сельскокӧзяйственнӧй станцияэзын. Эна станцияэзын быд районлӧ торья кӧдзыс петкӧтӧны.
Шуам, миян союзын асыв-лунланись районнэзлӧ, кытӧн дыр сулалӧ кӧс кад, зэртӧм кад, тодиль петкӧтӧмась кӧс кад дырни видзсян сорттэз, кӧдна чожа зорамӧны, кӧдна вермӧны дыр зэртӧг, влагатӧг овны, кӧдна «суховейезлісь» (дзирыт кӧс тӧввезлісь) озӧ полӧ.
Простой кӧдзысӧн светтё сулалӧ сёрӧнжык какьесь сэк, кӧр суховей пӧльтӧ, кӧр шуч кӧс кад сулалӧ.
А кӧс кадӧ влагатӧг сютусь тырсявны оз вермы — «палитчӧ,» косьмӧ, и урожай ӧшӧ.
Сорта сюэзлӧн светтёыс одзжык сулалӧ, кӧс кад вотӧдз.
Тырсялӧм тусьлӧ кӧс кадыс нем туйӧ ни, вийны оз вермы.
Ойвыв районнэзлӧ бӧра тодель петкӧтӧмась одз тырсялан сорттэз, кӧдна кӧдзытісь озӧ полӧ. Нія ойвывса дженытик гожумӧ ештӧны быдмыны и урожай сетны.
Сорта сю кӧдзыссянь урожайыс ыджытжык, тусьыс качествонас буржык да и озжык сійӧ шогӧт босьт и сельскокӧзяйственнӧй вредитель озжык тшыкӧт.
Сорта сю кӧдзыс урожай лэбтӧ 15% вылӧ, а эта быдӧс Союз пасьта содтас нянь 10 миллион тонна кыным.
Кытшӧм бур вайӧ протравитӧм кӧдзыс.
Кӧдзан кад кежӧ заптӧм кӧдзыс мукӧд кадӧ эшӧ абу быдӧсӧн годен кӧдзны, кӧть бы и вӧлі сія ёгтурун понісь весӧтӧм, кӧть бы и тусь чагыс вӧлі сыись бӧрйӧм.
Кӧдзысын вермасӧ кольны зэв посни спораэз берся грибоккезлӧн, кӧдна культурнӧй быдмаслӧ вайӧны шог, вийӧны мӧдпыр сю тусь.
Миян сю вылын уна берся шогӧт вайись грибокыс эм.
Тӧдсасям ми ныкӧт ӧтік сьӧрті, кӧда медтшӧка быдлаын овлӧ и кӧдӧ тӧдӧ быдӧн — эта сьӧд бус. Унажык сійӧн зӧр шогалӧ.
Гожумсӧ зӧр тырсялікӧ сразу син вылӧ усьӧны шогалісь роззэз.
Нылӧн розыс оз нюкыртчы улӧ, а чурвидзӧ.
Босьтан киӧ — тусьыс кыш-кыс, сылӧн важын ни пытшкас абу не эндосперм, не чужӧс, быдӧс сійӧ сьӧдбус сёйӧма.
Туссез тыртӧмӧсь сьӧдбусӧн — сьӧдбус спораэзӧн. (21 рис.).
Тӧлыс энӧ спораэсӧ паськӧтӧ ӧтмӧдӧрӧ, и сідз ӧтік розсянь заразитчӧны мукӧд здоровӧй роззэз.
Кӧр шогалісь роззэз вундісьӧны здоровӧйезкӧт ӧтлаын, варттӧн заразитчӧ и сю тусь.
Сьӧдбусӧн заразитчӧм быдмаслӧн абу сю тусь, сійӧн урожай чинӧ.
Медбы вийны сьӧдбус, кӧдзыссӧ колӧ протравитны яда растворӧн.
Протрава керсьӧ невына формалин растворись.
Невына формалин раствор вийӧ токо сьӧдбус спораэз, сю тусись чужӧсыс сысянь оз тшык.
Но босьтны кӧ вына раствор, тшыкас и чужӧс.
Колӧ сідз кӧ тӧдны, дыр я кӧтӧтны сю тусьсӧ растворын. Дыржык видзӧм сю тусь бӧра жӧ формалин растворын кулӧ, нечужанӧ пӧрӧ.
5–8 минута сю тусьсӧ растворын видзны оз ков.
abu
Кӧс протраваӧн яда порошоккезӧн кӧдзыс пизьнассьӧ вевдӧрсянь. Сыбӧрын сійӧ сорлалӧны бытшӧмика.
Бӧра жӧ кулӧны токо сьӧдбуслӧн спораэз, а тусьыс ачыс оз тшык.
Лыддьӧмась, быд воӧ миян Союзыс сьӧдбуссянь ӧштӧ аслас урожайись быдса 10-ӧт тор.
Эта сьӧрті — быд кӧдзыс мед вӧлі протравитӧма.
Мыйлӧ колӧ осяалӧм (яровизация).
Научнӧй институттэзын и опытнӧй станцияэзын миян Союзын учёнӧйез дугдывтӧг тӧдмалӧны быдмаслісь олӧм, нія дугдывтӧг кошшӧны туйез, кыдз бы бытшӧмжык да чожжык вӧлі лэбтыны урожай.
Осяалӧм эта эм ӧтік адззӧм способ, кӧда сетӧ зэв ыджыт результат.
Ми тӧдам, шогді овлӧ и осяӧн и ӧзимӧн.
Ӧзим шогді сорттэз урожаяжыкӧсь да и качествонаныс сулалӧны вылынжыка ося шогді сорттэзся.
Эта сьӧрті ӧзим шогді сорттэз вермисӧ бы вежны ося шогді сорттэз и унаӧн лэбтісӧ бы сюлісь и качество, и урожай.
Но сёжӧ уна районын ӧнӧдз кӧдзӧны унажыксӧ ося шогді.
Ӧзим шогді сорттэс лымтӧм воӧ кынмӧны.
Пондылӧмась ӧзим сорттэз кӧдзны тулыссӧ осямоз, но результат пыр аркмылӧм умӧль.
Шогді петалас, грездитас, воны оз вермы.
Вот эта сьӧрті агрономмез пыр и шуисӧ: ӧзим шогдісӧ кӧть мый пӧ кер, а сё ни ковсяс кӧдзны арсӧ ӧзимӧн. Сідз сійӧ пыр арсӧ и кӧдзисӧ.
Но вот 1929 воӧ миян советскӧй агроном Т. Д. Лысенко первуйӧ керис опыт.
Тӧлісь 1½ кыным одзжык тулысся ося кӧдзанӧн сія чужтіс ӧзим шогді кӧдзыс туссез.
Кӧр туссес польдісӧ, но эзӧ ештӧ эшӧ ныртусясьны, сія нійӧ кӧдздӧтіс 1–3°Ц ӧдз и этӧн эз сет нылӧ чужны одзлань.
Сідз сія чужтытӧг видзис нійӧ кӧдзан кад вотӧдз.
Этӧн Т. Д. Лысенко кыдз бы нійӧ тӧвйӧтіс муын ыб вылын.
Муын ыб вылын ӧзим шогді дугдӧтӧ ассис быдмӧм грездитӧм бӧрын, а Т. Д. Лысенко аслас опытӧн дугдӧтіс нійӧ быдмӧмись одзжык, кӧр тусь токо пондӧтчис чужны.
Тулыссӧ кӧдзан кад пора Т. Д. Лысенко 1½ тӧлісь видзӧм бӧрын ассис туссесӧ кӧдзис ыб вылӧ ордчӧн ося шогдікӧт.
Результат аркмис поразительнӧй.
Кӧдзӧм туссез чожа пондісӧ чужны, грездитны, светтё пыр мунісӧ и воисӧ.
Сідз Лысенко особӧя лӧсьӧтӧмӧн тшӧктіс ӧзим шогдісӧ быдмыны и урожай вайны ося шогді моз жӧ.
Вот эта кыдз бы ӧзим культураись ося культураӧ пӧртӧмыс вӧлі и шуӧма осяалӧмӧн.
Лысенко эз кольччы сулавны эта вылын.
Сія пешлісис кӧдзан кад кежӧ лӧсьӧтны этадз жӧ мукӧд ося шогді сорттэз.
И сэтӧн вӧлі аркмӧмась не етшажык интереса результаттэз.
Лысенко способ сьӧрті кӧдзан кад кежӧ лӧсьӧтӧм ося шогді кӧдзыс унаӧн одзжык пондӧма грездитны и унаӧн одзжык сія жӧ лӧсьӧтӧм ося кӧдзыс сьӧрті сетӧма урожай.
Лысенколӧн опыттэз зэв ёна интересуйтӧмась колхозниккезӧс.
1930 воӧ не ӧтік сё колхозник согласитчӧмась Лысенколісь опытсӧ оланӧ пыртны. Сідз нія асланыс ыббез вылын пешлӧмась да помӧдз разрешитісӧ осяалӧмсӧ паськыта оланӧ пыртӧм йылісь вопрос.
Осяалӧмлӧн миян Союзын зэв ыджыт значеннё.
Сю воан сроккесӧ осяалӧм пыр джендӧтӧмӧн позяс босьтны засухаа районнэзын надёжнӧйжык урожай. Сю быдмас пондас ештыны дзоридзасьны кӧс кад вотӧдз.
Этакӧт ордчӧн оссьӧ туй уна лунвыв культураэзлӧ вуджны ойвыв районнэзӧ, кытӧн нія кӧркӧ дженыт гожумӧн эзӧ бы вермӧ воӧм виӧдз лоны.
Эта эшӧ и сійӧн важнӧй, што осяалӧмыс быдман кадсӧ джендӧтӧ не ӧтік ӧзим да ося сю культураэзлісь, но и мукӧд быдмаслісь, кыдз хлопчатниклісь, соялісь, просалісь, кукурузалісь.
Ӧння кадӧ осяалӧмыс мунӧ правительство тшӧктӧм сьӧрті (постановленнё сьӧрті) быдса сё сюрс гектар миян социалистическӧй ыббез вылын и боссьӧ кыдз медвына орудиаӧн урожай лэбтӧм понда пессян уджын.
Выводдэз:
Миян совхоззэзлӧн да колхоззэзлӧн урожайыс унаӧн зависитӧ кӧдзан материал качествосянь.
Колӧ кӧдзны сорта, здоров, бӧрйӧм тыра кӧдзысӧн.
Сія бура чужас, зорамас вына петас и сетас бур качествоа ыджыт урожай.
Колӧ вӧтлыны, дзикӧдз орӧтны быдӧс, мый умӧльыс эм, кӧда соралӧ быдмаслӧ бытшӧмика зорамны: колӧ дзикӧдз вийны шогӧттэз и ёгтурун.
Эта понда и протравитӧны да весӧтӧны кӧдзыссӧ.
Медбӧрын, колӧ используйтны наукалісь быд достиженнёсӧ.
Осяалӧм пример сьӧрті позьӧ адззыны, наука босьтӧмӧн позьӧ действуйтны чужӧс вылӧ и тшӧктыны быдмассӧ чожжыка воны и вайны буржык урожай.
КУИМӦТ ГЛАВА.
ВУЖ.
КЫДЗ И МЫЙ БЫДМАС БОСЬТӦ МУСИНІСЬ.
СЕЛЬСКӦЙ КӦЗЯЙСТВОЫН МУСИН МӦДКОДЬСЬӦТӦМ.
Первося кадӧ петалӧм бӧрын ныртусь питайтчӧ аслас тусись питательнӧй веществоэзӧн.
Петасӧ пӧрӧм бӧрын кӧть чужӧс мыгӧрнас и ыждӧ, но сьӧкытаыс сылӧн чинӧ.
Да эта и вежӧртана, эд петасыс быдмикас питайтчӧ, лолалӧ, гырксис шоныт лэдзӧ.
Тусь пытшкись углерода органическӧй веществоэз торьясьӧны, ӧтлаасьӧны кислородкӧт и аркмӧ углекислӧй газ.
Сідзкӧ, тусьлӧн веществоэз мымдакӧ бырӧны, газӧн лэбзьӧны руӧ.
Сідз кыссьӧ сэтчӧдз, кытчӧдз медуна питательнӧй вещество массаыс тусись оз сӧскиссьы петасӧ.
Эта бӧрын томыник быдмаслӧ оланас локтӧ виль период.
Ӧнӧдз сія оліс аслас тусь пытшкись питательнӧй вещество запасӧн, кӧдӧ кӧркӧ вӧлі быдмасыс-мамыс заптылӧма,
а ӧні аслыс колӧ ас гӧгӧр средаись питательнӧй веществоэсӧ шедтыны, мӧд нёжӧн кӧ шуны: колӧ сылӧ аслыс лоны быльнӧй быдмасӧн.
Эта кад кежӧ петаслӧн вынсялӧны ни питайтчан органнэз: вужжез, за, листтэз.
Вужжез лэдзчисьӧны мусинӧ, за вывся листтэз кайӧны руӧ.
Томыник быдмаслӧн одзланся зорамӧм ӧнісянь кӧртассьӧ гӧгӧрись средакӧт, кӧдаын быдмасыс быдмӧ.
Кыдз быдмас питайтчӧ мусинісь питательнӧй веществоэзӧн?
Вот шӧрись вопрос, кӧдӧ ковсяс вежӧртны этӧ книга главасӧ велӧттӧн.
Эта бӧрын лоасӧ вежӧртанаӧсь и практическӧй выводдэз, кыдз буржык тшӧктыны мусинсӧ унажык да буржык урожай сетны миян совхоззэзын да колхоззэзын.
1. Мусин кыдз быдмас зорамӧмлӧ среда.
Мусинлӧн состав.
Керны кӧ ыб вылын либо видз вылын мусин разрез (вундыштны сійӧ), позяс адззыны, кыдз мусиныс тэчӧма кынымкӧ горизонтальнӧй слойись.
Составӧн и мощностьӧн эна слойез абу ӧткодьӧсь.
Вевдӧрись слойыс пемытжык рӧма — сэтӧн унажык мунӧгыль.
Сы увтісь слойес чочкомжыкӧсь, кельытжыкӧсь.
Мусин увдӧрын унажыксӧ куйлӧ сёй, песӧк либо известь. Ныись мукӧд кадӧ аркмӧ не ӧтік дас метра кыза слой.
Мусиныс аркмӧ ас увтісь керӧс породаэзісь. Токо мусинас эм эшӧ мунӧгыль, кӧда аркмӧ быдмас да мукӧд олісь сісьмӧмсянь.
Мусин увтісь керӧс породаэз (сёй, песӧк, известь) шусьӧны мам породаэзӧн.
Мам породаэз унажыксӧ овлӧны сёйись да песӧкись. Сёй да песӧк пырӧны и мусинӧ.
Мукӧд кадӧ унажык пырӧ сёй, а мукӧд кадӧ песӧк. Эта сьӧрті и мусиныс овлӧ не ӧткодь. Мусиннэз эмӧсь:
Пӧлӧс
Кыным % пырӧ песӧк
Кыным % пырӧ сёй.
Сёя .... 50-ся етшажык | 50-ся унажык
Песӧка .... 90 и унажык | 10 и етшажык
Сёйвевья .... 70–50 | 30–50
Песӧквевья .... 70–90 | 30–10
Кӧр ми гумага лист вылӧ кырым мымда мусин паськӧтам да пондам видзӧтны, миян син одзӧ лоас, што мусиныс составнас абу ӧткодь.
Мусинісь адззам и сісьмӧм быдмас торрез, и животнӧй торрез, и гырись песӧк торрез, и мукӧд мусин торрез.
Медбы бытшӧмика мусинкӧт тӧдсасьны, колӧ керны опыттэз.
Перво мусинсӧ калитӧны.
Калиттӧн мунӧгыль вещество сотчӧ и мусиныс адззӧмӧн югмӧ, сьӧд рӧмсӧ ӧштӧ.
Калитӧм бӧрын мусин позяс лэдзны дистиллируйтӧм ваа стаканӧ и буржыка сорлавны.
Сорлалӧм бӧрын перво стаканын аркмас гудыр, сыбӧрын ва невнаӧн пондас югмыны.
Стакан пыдӧсӧ перво пуксяс песӧк, а сыбӧрын вевдӧрас сёй.
Фильтруйтӧм раствор пакмӧтӧм бӧрын чашка пыдӧсӧ коляс веж рӧма порошок.
Эта сьӧрті ми тӧдам — ваын сывлӧма кытшӧмкӧ мусин тор.
Этӧ пуксьӧмсӧ исследуйтӧм бӧрын адззам, што мусинӧ пырӧны и минеральнӧй соввез.
Мусинын минеральнӧй соввез, кӧдна бы вермисӧ сывны ваын, зэв етшаӧсь.
100 г мусинын нія видзсьӧны быдса 0,1–1 г.
Но значеннёыс нылӧн быдмас олӧмын ӧддьӧн ыджыт.
Минеральнӧй соввез — основнӧй питательнӧй веществоэз, кӧднӧ быдмас босьтӧ мусинісь.
Мусинісь минеральнӧй соввез ваын сылӧны унаӧн бытшӧмжыка сэк, кӧр ваӧ кисьтӧма невна кислота.
Этӧ ми вермам утлянно тӧдны, кӧр видзӧтам мусин вытяжка да кислотаӧн шӧммӧтӧм ваа вытяжкакӧт.
Пакмӧтӧм бӧрын чашка пыдӧсӧ унажык осадок кольӧ кислотаӧн шӧммӧтӧм ваа вытяжкаись.
И сідз, мусинӧ медуна пырӧ сотчан, либо органическӧй вещество — мунӧгыль и несотчан, минеральнӧй вещество — песӧк, сёй, минеральнӧй соввез.
Токо невночка минеральнӧй веществоэз вермӧны сывны ваын и вужжез пыр сӧскиссьыны быдмас пытшкӧ.
Медунаыс жӧ ваын сывны оз вермӧ, и токо чуть унажык ваынся сылӧны кислотаэзын.
Кислотаын сылан минеральнӧй веществоэз быдмас пытшкӧ сюрӧны етша.
А кӧдна оз сылӧ не ваын, не кислотаын, сэтшӧммес и дзикӧдз быдмас пытшкӧ оз сюрӧ.
Конешно, русянь, васянь да быдмас уджсянь мусинын пыр мунӧны химическӧй процессэз. Эна процессэзсянь сывтӧм минеральнӧй веществоэз вермӧны пырны сылан веществоэзӧ.
А сідз кӧ, энӧ сывтӧм минеральнӧй веществоэсӧ ми вермам пуктыны кыдз одзланься кад кежӧ быдмас понда питательнӧй веществоа запас туйӧ.
Кӧркӧ мӧдпыра быдмас сійӧ запассӧ сё ни сӧскас аслас вужжезӧн.
Чорыт, сывтӧм мусин тор бердӧ быдмас видзсьӧ вужжезӧн, мед не пӧрны, а сулавны веськыта шонділӧ паныт.
Мусин аркмӧм.
Кулӧм быдмас торрез да животнӧй торрез мусинӧ сюрӧм бӧрын сісьмӧны. Нійӧ сісьтӧны мусинын олісь бактерияэз.
Джын ви сісьмӧм органическӧй вещество мымдакӧ сылӧ мусин ваын.
Пример туйӧ вермам босьтны, кӧс листтэзісь керӧм настой.
Босьтны кӧ кӧс листтэз да посньӧтӧмӧн сюйны нійӧ ваа бутылкаӧ, час 1–2 бӧрын ва рӧмасяс пемыт гӧрд (коричневӧй) рӧмӧ.
Аркмӧм настой пакмӧтӧм бӧрын чашка пыдӧсӧ коляс сьӧд порошок эта и эм мунӧгыль вещество.
Калитны кӧ сійӧ жара би вылын, сотчас сія и коляс неыджыт пӧим чукӧрок, мӧд нёжӧн, минеральнӧй соввез.
Этатшӧм жӧ растворрез му вывсянь йиджӧны мусинӧ. Йиджтӧн нія пырӧны песӧк торрезӧ да сёй торрезӧ, мичӧтӧны нійӧ пемыт рӧмӧ, клеитӧны тор торкӧт оча.
Органическӧй вещество сісьмӧ и муӧ шедӧм бӧрын. Медбӧрын сыись кольӧ пӧим — минеральнӧй веществоэз.
И сідз эта процессыс мунӧ быдса сюрс воэзӧн.
Тӧвсянь, васянь, ловья организммезсянь мусиныс мӧдкодьсялӧ лунісь-лун и ӧні.
Но не ӧтнаныс природа условиеэс вежӧны мусин. Сійӧ уна мӧдкодьсьӧтӧ и морт аслас берся уджалан орудиеӧн. Морт умӧль, изӧр мусин пӧртӧ бурӧ, мунӧгыля мусинӧ, морт вермӧ керны нельки мусинсӧ вились.
Этӧ позьӧ адззыны, шуам кӧть, карч вӧдитан кӧзяйствоын. Йӧрӧ назём петкӧтӧмӧн ми мукӧд кадӧ воӧн кыкӧн умӧль мусинісь керам бур, карч аркмӧтан мусин.
Мусинлӧн физическӧй свойствоэз.
Вундыштны кӧ мусинісь неыджыт кирпичок, пуктыны сійӧ гумага лист вылӧ да вылісянь чуньӧн нырыштны, кирпичокыс миян чунь увтын уна посни торйӧ пазалас.
Торрес коласын лоасӧ мукӧдыс ӧрек гырисяӧсь, мукӧдыс сю тусь гырисяӧсь, мукӧдыс зэв посниӧсь — бус кодьӧсь.
Сэтшӧм мусиннэз, кӧдна гырись-посни торйӧ пазалӧны, шусьӧны структураа мусиннэзӧн.
Но эмӧсь и структуратӧм мусиннэз, буса мусиннэз, кӧдна аркмӧмась зэв посни бус тороккезісь.
Структуратӧм мусиннэс сӧстӧм сёй да песӧк кодьӧсь.
Мусин тороккез аркмӧны сёй тороккезісь, да песӧк тороккезісь мунӧгыль йиджӧмӧн да минеральнӧй веществоэз йиджӧмӧн клеитӧмсянь.
Структуратӧм буса мусинын поснитик тороккез топ керсьӧмась ӧтамӧд бердӧ, коласаныс нылӧн шеллез зэв посниӧсь.
Структураа мусиннэзлӧн торрез коласын шеллез паськытӧсь.
Вот эна мусин торрез коласісь шеллезсянь и быд бурыс мусинлӧн; быд физическӧй свойствоыс мусинлӧн нысянь. Видзны либо ас пыр лэдзны влага да ру, шонавны либо кӧдзамны — быдӧс зависитӧ мусин торрез коласісь шеллезсянь.
Ӧтіккез, шуам, сёя мусиннэз, дыржык видзӧны ва, мӧдіккез, шуам песӧка мусиннэз, зэв кокниа сійӧ лэдзӧны;
мусин пытшкӧ ӧтіккезлӧн зэв чожа да кокниа кыссьӧ ру, а мӧдіккезӧ сія кыссьыны оз вермы;
ӧтіккез зэв бура вермӧны шонавны, мӧдіккез — умӧля.
Мусинлӧн ас пыр ва лэдзан свойство шусьӧ варудзӧтан свойствоэзӧн.
Варудзӧтан свойствоын песӧка мусинлӧн ыджытжык сёя мусинлӧнся.
Валӧн мусин пыр йиджӧмыс мунӧ перытжыка гырись структураа мусин пыр.
Кыным гырисьжык структураа мусин, сыным колассэс комоккез коласын паськытжыкӧсь, сыным ва озжык падмы ны коласын йиджтӧн.
Мусинӧ сюрӧм ва оз быдӧс йидж му пыр, а мымдакӧ сӧскиссьӧ мусинӧн.
Эта мусиныслӧн сэтшӧм ва видзан способностьыс шусьӧ влагоёмкостьӧн.
Влагоёмкость ыджытжык сэтшӧм мусинлӧн, кӧдалӧн структура коласын шеллес паськытжыкӧсь, кӧдаын унажык мунӧгыль и кӧдаын эмӧсь ва понісь польдан мукӧд торрез.
Сідз, шуам, песӧк аслас гырись шеллез пыр васӧ зэв чожа лэдзӧ. Вевдӧрись пласттэзнас сія немымда валӧ оз падмӧт.
А вот сёя мусиннэслӧн влагоёмкостьыс зэв ыджыт.
Ва падмиссьӧ и векнитик щеллезын, и польдан сёй торрезын.
Песӧка мусинӧ кӧ содтыны мунӧгыль, влагоёмкостьыс сылӧн сэк содас.
А содтыны кӧ мунӧгыль сёя мусинӧ, сэк влагоёмкостьыс сылӧн чинас.
Быдмассэзлӧ быд мусинын не ӧтмымдаӧн овлӧ ва запас.
Медбур мусинӧн ва запас сьӧрті лыддиссьӧ структураа мусин.
Гырись шеля структураа мусинын и руыс унажык и пыдынжыка сюрӧ.
Сёя мусинӧ пыдына руыс сюрны оз вермы, векнитик шеллез сылӧ пырны оз лэдзӧ. Ру запас этатшӧм мусиннэзын етша.
Руыс да ваыс мусинын ӧтамӧдвежӧнасьӧны: уна кӧ мусинын ва — етша ру, уна ру — етша ва.
Унажыксӧ ваыс вӧтлӧ русӧ.
Вот мыля ваа мусиннэзын етша овлӧ ру.
Сэтшӧм мусиннэз вылын быдмас кайӧ умӧля.
Сідзкӧ, асланыс физическӧй свойствоэзӧн структураа, мунӧгыля мусиннэз — медбур мусиннэз.
Ныӧ и ва буржыка йиджӧ, ру пыдынжыка сюрӧ, и шоналӧны асланыс сьӧд рӧм кузя буржыка. Этатшӧм мусиннэзын бактерияэзлӧ оланыс медбур и питательнӧй вещество запас ӧксьӧ уна.
Сійӧн ми и адззам — эттшӧм мусиннэз вылын быдмас пӧлӧс медӧддьӧн кайӧ.
2. Кыдз керӧма вуж.
Кыдз вуж керӧма вевдӧрсянь.
Вуж быдмӧ чужӧс вужокись.
Босьтны кӧ чужӧм анькытш тусь да вӧснитик кисточкаӧн тушӧн вуж конечоксӧ пасъявны кынымкӧ ӧтгырися тор вылӧ (шуамӧ кӧть дас миллиметрӧдз). Сыбӧрын керны влажнӧй камера да сетны сэтӧн тусьлӧ чужны досповнаӧдз, миянлӧ адззана лоас — вуж конечын юкӧм колассэс нюжалӧмась (22 рис.).
Эта опытыс (видз. 5 удж, 130 листбок) зэв бытшӧма мыччалӧ, што вужыс нюжалӧ аслас йылӧн.
Сідзкӧ, этадз быдмытӧн вуж ас гӧгӧрись мусин торрез вылӧ нырыштӧ и ӧтмӧдӧрӧ нійӧ вешталӧмӧн пырӧ сё пыдӧжык да пыдӧжык муӧ.
Аслас быдмӧм сьӧрна вуж пӧрӧ главнӧй вужӧ и пырӧ веськыта муӧ (видз. 3 удж, 127 листбок).
Сысянь ӧтмӧдӧрӧ пизьӧтӧны бокись вужжез. Бокись вужжез бердісь бӧра жӧ пизьӧтӧны вужоккез.
Нысянь эшӧ вермасӧ пизьӧтны вужоккез, и медбӧрын аркмӧны медвӧснитӧсь, кӧднӧ шуӧны вужа мочкаоккезӧн.
Аслас уна бокись вужжезӧн быдмасыс шуч разьӧ мусинсӧ, муас аркмӧ быдса вуж система.
Кыным унажык быдмаслӧн вуж заэс, кыным пыдӧжык сія лэдзчисьӧ вужжезӧн му пытшкӧ, сыным унажык вермӧ босьтны ва да питательнӧй веществоэз, сыным крепытжыка ас местаас сулалӧ быдмас.
Позьӧ быдмассӧ тшӧктыны эшӧ бытшӧмжыка паськӧтны ассис вуж система.
Карчвӧдитан уджын эм ӧтік приём, кӧдӧ шуӧны пикировкаӧн.
Пондасӧ, шуам, капуста росада либо томат росада садитны, главнӧй вужыслісь конечсӧ нетшкӧвтӧны.
Быдмас сы туйӧ аслас виль местын унажык да ёнжык бокись вужжез лэдзӧ.
Кык тусьтора быдмассэз унажыксӧ овлӧны главнӧй вужаӧсь, кӧда нылӧн зэв пыдына пырӧ мусинӧ, а боккезас зэв уна ӧтмӧдӧрӧ пизьӧтӧ бокись вужжез.
Этатшӧм вужжес шусьӧны стержневӧйезӧн.
Мӧдкодьӧм вуж система ӧтік тусьтора быдмассэзлӧн.
Нылӧн главнӧй вужыс абу.
Сія нылӧн косьмӧ, кӧр быдмасыс эшӧ овлӧ томыник.
Зато сы туйӧ пизьӧтӧ сразу кынымкӧ бокись вуж и аркмӧ быдса мочка чукӧр.
Этатшӧм вужжес сідз мочкаа вужжезӧн и шусьӧны.
Эна кык аскодь вужжез коласын уна эмӧсь эшӧ мӧдік вужжез.
Босьтны кӧть, шуам, пуэз. Унажык пулӧн бокись вужжес зэв ёна ӧтмӧдӧрӧ паськалӧмась — быдмӧмась и главнӧй вужсӧ нылісь он и адззы.
Сэтшӧм вужжес шусьӧны вожья вужжезӧн.
Сідзкӧ, мед быд вужлісь тӧдны форма, позьӧ нійӧ группируйтны куим типӧ: стержневӧй вужжез, мочкаа вужжез да вожья вужжез.
И главнӧй вуж, и бокись вужжес, и торья мочкаэз быдмӧны асланыс йылӧн — конечӧн.
Быд вуж йылын эм колпачок,
кӧда шусьӧ вуж чехликӧн.
Сійӧ позьӧ адззыны лупа пыр петаслісь.
Вуж чехликыс вуж конечсӧ видзӧ чегӧмись, жугалӧмись, кӧр сылӧ колӧ пырӧтны мусин.
Муӧ пыртӧн вевдӧрись клеткаэс чехликлӧн пыр чирйисьӧны.
Нійӧ вежӧны виль клеткаэз, кӧдна аркмӧны чехлик пытшкын.
Влажнӧй камераын петас быдмытӧн ми том вуж вылісь адззам чочкомкодь гӧноккез.
Эна гӧноккес — вуж сіэз.
Нія ӧтмӧдӧрсянь вужсӧ вевттьӧны невна вылынжыка чехлик дынсянь. Чехликсянь ны дынӧдз эм колас.
Вуж сіэз ӧддьӧн посниӧсь и керӧмнысӧ нылісь позьӧ адззыны токо микроскоп пыр.
Кӧр ми нійӧ пондам видзӧтны микроскоп пыр, миянлӧ тӧдана лоас — быд вуж сіыс эм вуж кучишоклӧн нюжалӧм клетка.
Вуж сиэс вуж вылын пукалӧны ӧддьӧн тшӧка.
Учёнӧйез лыддьӧмась, кукурузалӧн пӧ ӧтік квадрата миллиметра вылын нія 700 гӧгӧр.
А йитлыны кӧ быд сісӧ ӧтік шогді куслісь, аркмас сунис кузянас 20 км.
Вуж сіэз быдмас питайтчӧмын медколан торрез.
Нія паськӧтӧны быдмас вужлісь вевдӧр (23 рис.),
а эта сетӧ вужлӧ способность унажык муись сӧскыны ва и ванас колан питательнӧй веществоэз.
Вуж сіэз дыр озӧ олӧ. Лун-мӧд бӧрті нія кулӧны ни.
Ны туйӧ томыник вуж вевдӧрӧ аркмӧны виль сіэз.
Мӧд нёжӧн кӧ, вуж сіэз кыдз бы вӧтчӧны пыр быдман вуж бӧрсянь и асланыс туй вылын пыр сӧскӧны минеральнӧй соввез быд мусин пластісь.
И сідз быд вужись позьӧ адззыны куим тор: 1) быдман тор, кӧда вуж йылас моз;
2) сӧскан тор, кӧда невна ылынжык быдман торся;
3) за бердся тор — волькыт, чорыт, вуж сіэз сы вылын абуӧсь — сія токо сӧскӧм питательнӧй веществоэз вуджӧтӧ быдмас заӧ, эта сьӧрті и шусьӧ нуӧтан торӧн.
Кыдз вуж керӧма пытшкас.
Вуж сіэз пыр мусинісь ваыс сылӧм минеральнӧй веществоэзӧн (соввезӧн) сӧскиссьӧ вужӧ, а сысянь кайӧ быдмас заӧ.
Кӧр ми микроскоп увтын видзӧтам вӧснитика поперег шӧрыштӧм вуж (24 рис.), миян син одзӧ оссяс вуж пытшкыслӧн керӧмыс. Ми адззам вуж аркмӧм быдкодь клеткаэзісь. Формаӧн и гырисянаныс эна клеткаэс быдкодьӧсь.
Центрас вужын тыдалӧны гӧгрӧса кытшшез — эна поперег шӧрыштсьӧмас трубкаэз.
Дорланяс матӧжык куйлӧ рышкыт ӧтчужӧма клеткаэза ткань.
Шӧрас вужыслӧн аркмӧ питательнӧй веществоэз лэбтан часть.
Сэтӧн эмӧсь трубкаэз — сосуддэз, кӧдна шӧрыштӧмас тыдалӧны гырись кытшшезӧн — осьтаэзӧн.
Шӧрыштны кӧ вужсӧ доль, эна сосуддэс микроскоп увтын пондасӧ тыдавны кузь, вӧснитик трубкаоккезӧн. Пытшканыс нылӧн эмӧсь кызжыкиннэз. Мукӧд трубкалӧн эна кызжыкиннэс спираляӧсь.
Эна сосуддэс шусьӧны вануӧтан сосуддэзӧн.
Ны кузя кайӧ вылӧ быдмасӧ мусинісь сӧскиссьӧм минеральнӧй соввез сора ва.
Сосуддэз топыта ӧтамӧд бердӧ йитсьӧмӧн аркмӧтӧны сосуда пучоккез.
Рышкыт, ӧтчужӧма клеткаа тканись аркмӧ вуж кор.
Вуж кор тканьлӧн клеткаэс тыртӧмась протоплазмаӧн, а шӧрас быд клеткалӧн эм ядро.
А меддорись поснитик клеткаэзісь, кӧдна топыта керсьӧмась ӧтамӧд бердӧ, аркмӧ вужлӧн кучишок. Вуж кучишок клеткаэз мукӧдыс нюжалӧмась вуж сіэзӧ.
Кытшӧм формааӧсь овлӧны вужжез.
Вуж — быдмаслӧн питайтчан орган. Но мукӧд кадӧ уджыс сылӧн овлӧ и мӧдік.
Сідз, главнӧй вуж мукӧд кыквося быдмаслӧн пӧрӧ кыдз бы питательнӧй веществоэз видзанінӧ.
Сэк сія зэв ёна кызӧ и быд чужӧма форма аслыс вермӧ босьтны.
Пример туйӧ ми вермам босьтны вужжез миян карччезлісь: морковлісь, кушманлісь, свёклалісь, сёртнилісь, калиглісь
и мукӧд кыквося быдмаслісь.
Вӧр быдмассэз шӧрись сідз жӧ вермам адззыны эта чужӧма вужжеза быдмассэз:
босьтам кӧть — бабапель — (одуванчик), цикорий, вӧр морков — нылӧн питательнӧй веществоэзлӧн запас сідз жӧ ӧксьӧ вужжезӧ.
Мӧді воӧ эта ӧктӧм питательнӧй веществоэз запасӧн быдмас лэдзӧ ассис за, листтэз, дзоридззез.
Унавося быдмассэзлӧн мукӧд кадӧ питательнӧй веществоэс тэчсьӧны не главнӧй вужӧ, а бокиссезӧ, кӧдна пондӧтчӧны быдмыны сразу за бердсянь.
Георгинлӧн да чистяклӧн бокись вужжес питательнӧй веществоэз запасӧн пӧрӧмась клубеннезӧ (25 рис).
Клубеннезісь питательнӧй веществоэз бӧра жӧ мунӧны за, лист да дзоридз аркмӧмӧ.
Питательнӧй веществоэз запас увтісь рекмӧм сьӧрна клубеннез косьмӧны,
а виль том вужжезӧ вились ӧксьӧ питательнӧй веществоэзлӧн запас; и сідз аркмӧны виль клубеннез.
Мукӧд тропическӧй быдмаслӧн ствол бердсянь вермӧны пизьӧтны вужжез.
Нія му бердӧдз озӧ локтӧ, сійӧн руись вужжезӧн и шусьӧны (26 рис.).
Вевдӧр дыжыс нылӧн губка кодь рышкыт, зэв кокниа ас пытшкас босьтӧ и зэр ва, и руись ва ру.
Пуэзлӧн, кӧдна быдмӧны тропик увдӧрись нюр мусин вылын, мукӧд кадӧ пизьӧтӧны особӧй лолалан вужжез.
Нія муӧ пырӧм вужжез бердсянь петӧны му вевдӧрӧ и быдмӧны вонлань за моз жӧ.
Лолалан вужжез вевттисьӧмась рышкыт тканьӧн, кӧда пыр пырӧ ру и сюрӧ муӧ пырӧм вужжезлӧ.
3. Кыдз быдмассэз босьтӧны мусинісь питательнӧй веществоэз.
Кыдз мусинісь соввез сӧскиссьӧны вужӧ.
Муись летыштӧм томыник быдмаслӧн вуж бердын тыр шедӧны мусин торрез. Эна мусин торрес топа лякасьӧмась вуж сіэз бердӧ да озӧ и усьӧ.
Вуж сіэз мусин торрезісь сӧскӧны минеральнӧй веществоэз, кӧдна сылӧмась ваын.
Мӧд нёжӧн кӧ шуны, вуж сіэз асланыс вевдӧрӧн мусинісь вуж пытшкӧ сӧскӧны мусин растворрез.
Но эд вуж сілӧн вевдӧрыс — кучишокыс и микроскоп увтын сплошнӧй, осьтаоктӧм,
а кыдз нӧ растворрес сы пыр вужӧ пырӧны?
Этӧ позяс вежӧртны вуж сіись простӧй модель сьӧрті.
Эта понда колӧ босьтны коллодиум и керны сыись вӧснитик стенкаа кӧшелёк.
Сэтшӧм жӧ кӧшелёк позьӧ керны и чери гадись либо калбаса кучишокись.
Шучкӧп тыдалана кӧшелёк стенка лоас бытьтӧ вуж сілӧн стенка.
А крахмалісь керӧм клестер мед лоас бытьтӧ вуж сі клетка пытшкись вещество.
Кӧшелёк крепыта домассьӧ стекляннӧй трубочка бердӧ да лэдзсьӧ лабыник иод растворӧ. Иод раствор миян лоас бытьтӧ мусин соввезлӧн раствор.
Кынымкӧ минута бӧрын крахмалісь керӧм клестерыс кӧшелёкын лӧзӧтас.
А иод раствор стаканын коляс ӧткодь, кытшӧм вӧлі.
Сідзкӧ кӧшелёк стенка пыр муніс токо иод раствор.
Этадз жӧ и вужӧ сі стенкаэз пыр вермӧны йиджны мусин растворрез.
Опыт миянлӧ мыччаліс — кӧшелёк стенка пыр йиджӧ токо иод раствор, а крахмал эз йидж.
Сідз кӧ не быд веществоыс стенкаӧт вермӧ йиджны.
Эшӧ буржыка ми этӧ адззыламӧ, кӧр опытнымӧс невна мӧдкодьсьӧтам: кӧшелёканым кисьтам иод, а стаканӧ крахмалісь клестер.
Сэк стаканын клестер ӧддьӧн чожа мичамас лӧз рӧмӧ.
А иод ассис рӧмсӧ оз ӧшты.
Конешно, крахмал клестер бӧра жӧ кӧшелёк стенкаэз пыр йиджны эз вермы.
Сідз кӧ, ӧтік растворрез, шуам кӧть иод раствор, перепонкаэз пыр (дыж пыр) йиджны вермӧны, а мӧдіккез, кыдз крахмал, озӧ вермӧ.
Этатшӧм перепонкаэс (дыжжес), кӧдна пыр ӧтік веществоэз йиджны вермӧны, а мӧдіккез озӧ, шусьӧны джынйиджана дыжжезӧн.
А джынйиджана дыжжез пыр растворрезлӧн йиджӧмыс шусьӧ осмосӧн.
Вуж сіэзлӧн стенкаэз — джынйиджана дыж.
Минеральнӧй соввезлӧн растворрез ны пыр йиджӧны вуж клеткаэз пытшкӧ.
Клеткаэс растворрезӧн тырӧны, нырыштӧны ӧтамӧд вылӧ и растворрез сідз клеткаись клеткаӧ пичкисьӧны — вешшӧны вуж сосуддэзӧ (27 рис.) Нія сосуддэзӧт растворрес кайӧны вужсянь — быдмас заӧ.
Быдӧс эна процессэз вужын, конешно, сложнӧйжыка мунӧны миян модельынся.
Колӧ тӧдны: вуж аркмӧма ловья клеткаэзісь, а ныын эм протоплазма.
Протоплазмаыс сюрӧм растворресӧ мӧдкодьсьӧтӧ.
Сідзкӧ, растворрес вуж пыр не механическӧя просто йиджӧны, но протоплазмаын уна и мӧдкодьсялӧны.
Вужжезлӧн сылӧтан удж.
Кӧдна веществоэз озӧ вермӧ сывны ваын, ловья вужжез нійӧ вермӧны пӧртны сылан веществоэзӧ.
Этӧ позьӧ адззыны вот кытшӧм опыт сьӧрті.
Кашник пыдӧсӧ пуктӧны волькыта полируйтӧм мраморнӧй пластинка,
кашникӧ кисьтӧны му и садитӧны анькытш туссез либо кытшӧмкӧ мӧдік быдмаслісь туссесӧ.
Кӧр анькытшыс вужьясяс, вужжез локтасӧ мраморнӧй пластинка бердӧдз,
сэк, анькытш быдмӧв керӧм бӧрын, пластинкасӧ кашник пыдӧсісь кыскӧны. Миськалӧм бӧрын позяс адззыны: волькыт, полируйтӧм пластинка вевдӧр кинкӧ бытьтӧ кыдз гаг моз гежмалӧма-сёйӧма. Эта анькытш вужжезлӧн туйес пластинка вевдӧрӧ кольӧмась.
Вужжез мраморсӧ сылӧтӧмась.
Ми тӧдам, кислотасянь лакмус гумага лӧз рӧмаись лоӧ гӧрд рӧма.
Том вужжез, лӧз рӧма лакмус гумага вылӧ пуктӧм бӧрын недыр мыйись кольӧны гумага вылӧ гӧрд туйез.
Сідзкӧ, быдмас вужжезісь пичкиссьӧ кислота.
Кислота, кӧда пичкиссьӧ том вужжезісь, мусинын мукӧд несылан веществосӧ, кыдз фосфориттэз, известняккез, пӧртӧ ваын сылан веществоӧ.
Этатӧг бы нія эзӧ вермӧ быдмас пытшкӧ сӧскиссьыны, а кислотаэз увтын мӧдкодьсялӧм понісь сылӧны и сӧскиссьӧны.
Сідзкӧ вужжез вермӧны пӧртны асланыс питательнӧй веществоэзӧ, сэтшӧм минеральнӧй веществоэз, кӧдна кыдз бы запас туйӧ уна куйлӧны мусинын.
Мый вуж босьтӧ мусинісь.
Дыр наукаын вӧлі тӧдтӧм, кытшӧм веществоэз быдмас босьтӧ мусинісь.
Медбӧрья даса воэзӧ XIX векын учёнӧйез быдӧс выннысӧ пуктісӧ эта вопрос вылӧ.
И тӧдны вермисӧ токо сэк, кӧр нылӧн вӧлі керӧмась опыттэз искусственнӧй мусин вылын быдтан быдмассэзкӧт.
Искусственнӧй мусин керӧмась сӧстӧм, калитӧм песокись, колан минеральнӧй сов растворрез сэтчӧ содтӧмӧн.
Медбӧрын лоӧма тӧдана, песока мусин туйӧ пӧ позьӧ босьтны и масьтӧм пемза, стекло, дроб и медбӧрын даже дистиллируйтӧм ва.
Эна искусственнӧй средаэзын быдмас быдтӧмыс пондіс шусьыны вегетационнӧй опыттэзӧн.
Эна опыттэзӧн быдмассэз быдмисӧ быдкодь мусина условиеэзын.
Быдмас быдмӧм сьӧрті, зорамӧм сьӧрті шуисӧ, кытшӧм мусин веществоэз быдмаслӧ колӧны, медбы сія вермис буржыка воны-зорамны.
Вегетационнӧй опытын быдмас вылын лист пӧлӧс кӧ свежӧй, нюдза вежӧтана, ачыс быдмас кайӧ-зорамӧ бытшӧма, аркмӧны дзоридззез, туссез, то учёнӧйез петкӧтісӧ заключеннё: эта искусственнӧй мусинын пӧ — растворын эм быдмаслӧ быд колан питательнӧй веществоыс.
А быдмас кӧ зорамис умӧля, кельдӧтіс, йылыс сылӧн косьмис, учёнӧйез бӧра жӧ шуисӧ: эстӧн пӧ кытшӧмкӧ колан веществоэз быдмаслӧ оз тырмӧ.
Медколан питательнӧй веществоэзӧн шусьӧны сэтшӧм веществоэз, кӧднатӧг быдмас зорамны кыдз колӧ оз вермы.
Особенно интереснӧйӧсь, простӧйӧсь и зэв бура мыччаланаӧсь ваа растворрезын быдмас быдтан опыттэз.
Стекляннӧй банкаэзӧ кисьтлӧны дистиллируйтӧм ва. Сэтчӧ сылӧтӧны колан минеральнӧй соввез.
Вевдӧрсянь банка топа тупкалӧны кык осьтаа пӧлӧн.
Ӧтік осьтаас сувтӧтӧны петас. Видзӧтӧны, мед петаслӧн вужжес локтісӧ растворӧдз, а заыс вӧлі пӧлок вевдӧрын.
Мӧд осьтаас сувтӧтчисьӧ кӧстыля стекляннӧй трубкаок, кӧда пыр быд лун пульверизаторӧн пӧльтӧны ру, мед вӧлі мыйӧн вужжезлӧ лолавны (28 рис.).
Сравнитӧм могись быдтӧны быдмассэз кык банкаын. Ӧт банкаас быдтӧм понда босьтӧны нормальнӧй среда, кӧдаын эмӧсь быдӧс колан питательнӧй веществоэс, а мӧд банкаас босьтӧны растворсӧ кытшӧмкӧ ӧтік веществотӧг (29 рис.).
Энася бур эшӧ ордчӧн видзны куимӧт банка, кӧдаын бы быдмассӧ быдтӧм понда дистиллируйтӧм вася дзик нем эз вӧв.
Быдӧс быдмассэс сувтӧтчӧны ӧтік кадӧ ӧткодь югыта, температураа условиеэзӧ и мунӧ дзик ӧткодь лунісь лунӧ видзӧтлӧм.
Стекляннӧй стенка пыр быдӧс лоӧ син одзын, кыдз мунӧ быдмаслӧн быдмӧм, вужьясьӧм.
abu
Эна опыттэз сьӧрті учёнӧйез вермисӧ тӧдны не токо кытшӧм веществоэз быдмаслӧ колӧны, но и мымда нія кытшӧм быдмаслӧ колӧны.
Сідз утлянно тӧдӧма, мед быдмас нормальнӧя зорамис сылӧ колӧны: азота соввез, фосфора соввез, сера, калия соввез, магния соввез и соввез, кӧднаын эм кӧрт.
Медколан соввез эна коласісь — азота соввез, форсфора соввез да калия соввез.
Токо сэк аркмӧ бур урожай, кӧр мусинын тырмӧмӧдз эмӧсь эна соввес.
Азотлӧн коланыс зэв бытшӧма лоӧ син одзын то кытшӧм опытын.
Ӧтік банкаӧ вегетационнӧй опыт понда содтісьӧны быд колан соввез, а мӧдікӧ — тожӧ быд сов, токо селитратӧг (сов, кӧдаын эм азот).
Кыкнан банкаас садитӧны ӧтсьӧкытаэзӧ кык подсолнушко тусьӧн.
Дыр мыйись ӧт банкаас, кытӧн быд питательнӧй вещество эм, каясӧ кык зэв ён заа здоровӧй быдмас, кӧдна пондасӧ дзоридзасьны и сетасӧ кӧдзыс, а мӧд банкаас, селитратӧмас петасыс невна аслас тусись питательнӧй веществоэзӧн кайыштас да сэтчӧ и винерсялас, а медбӧрын и кельдӧтас.
Опыт сьӧрті позьӧ адззыны быдмас быдмӧмын колӧ азот.
Кӧдзан увтӧ лӧсьӧтӧм мусинын кӧ азот абу, сэтчӧ кыскалӧны тодель селитра либо аммиачнӧй соввез, кӧднаын эм азот.
Интереснӧя влияйтӧны быдмас зорамӧм вылӧ кӧрт соввез.
Вегетационнӧй опыттэзӧ кӧрт соввез пуктіссьӧны зэв етша — быдса кынымкӧ воть кизертӧм растворлісь.
Сёжӧ даже и этамымда кӧрт солыс керӧ зорамӧмсӧ быдмаслісь нормальнӧйӧн. Кӧр жӧ кӧрт солыс питательнӧй веществоэз коласын абу дзикӧдз, сэк быдмас оз кай, а кулӧ.
Опыт мыччалӧ: кукуруза, быдса питательнӧй растворын быдмись, кайӧ кыдз колӧ, бура бытшӧма, дзоридзасьӧ, воӧ.
А эстӧн жӧ ордчӧн мӧдік банкаын кукуруза, кӧрт соввезтӧм смесьын быдмӧ ӧддьӧн умӧля. Невна кайыштас, листок-мӧд учӧтикӧсь, векнитикӧсь лэдзыштас, сыбӧрын кельдӧтас да кулас дзикӧдз.
Зэв интереснӧй результат сетӧны опыттэз анькытшкӧт и мукӧд боби быдмаскӧт.
Нія мыччалісӧ, што клевер да анькытш ӧддьӧн бура вермӧны быдмыны и азоттӧм растворрезын.
Медбы этӧ опытсӧ вайӧтны помӧдз (конечӧдз), анькытш быдтасӧ быд колана минеральнӧй сов растворын токо озӧ пуктӧ азот сов.
Ӧтік банкаись растворсӧ пизьӧтасӧ (мед эз вӧлӧ бактерияэз), а мӧдік банкаӧ содтасӧ кынымкӧ воть мусин настой, кӧдаын эмӧсь анькытш клубеннезын олісь бактерияэз (30 рис.).
Эна бактерияэзлӧн эм интереснӧй особенность.
Колан азотсӧ нія аслыныс босьтӧны не минеральнӧй соввезісь, кыдз быд быдмас керӧ, а веськыта руись, кӧда сюрӧ мусинӧ, а ми тӧдам, руас азотыс уна.
Ӧт банкаас, кӧдаӧ раствор вӧлі пуктӧма пизьӧтӧмӧн, анькытш быдмис умӧля и клубенёккез вужжес вылын эзӧ аркмӧ.
А мӧд банкаас — мусин настой содтӧмас анькытш быдмис вына да кыз и вужжез вылын сылӧн аркмисӧ зэв бытшӧма клубенёккез.
Эта опытыс мыччаліс, што бобиа быдмас азот босьтӧ руись аслас бактерияэзӧн, кӧднія олӧны сылӧн вужжез вылын.
Эна вегетационнӧй опыттэзӧн ми вермам тӧдмавны, бур я миян мусин. Вермам висьтавны, кытшӧм питательнӧй веществоэз и уна я эмӧсь эта мусинын.
Эта быдӧс тӧдмассьӧ то кыдз. Босьтӧны кынымкӧ кашникӧ тӧдмалан мусин и содтіссьӧ сэтчӧ либо ӧтік, либо мӧдік сов, шуам кӧть, фосфора соввез.
Соввез содтӧм бӧрын садитӧны кӧдзыс туссез.
Быд пешланын кӧ петас чужас ӧтмоз, сэк шуӧны, мусинын пӧ фосфор соввез тырмӧны.
А тодель фосфор соввез содтӧм пешланын кӧ петас лоас буржык мӧддэзся, сэк шуӧны, мусинын пӧ фосфор соввез оз тырмӧ.
Сійӧ ыб вылӧ колӧ петкӧтны, мед урожай мӧдпыр вӧлі бур.
Ыб вылӧ петкӧтан питательнӧй соввес шусьӧны минеральнӧй удобреннёэзӧн.
Лабораторнӧй опыттэзлӧ кыдз содтӧт ордчӧн керӧны опыттэз и ыб вылын, природаса условиеэзын.
Сэтшӧм ыб вылісь опыттэс уна керсьӧны опытнӧй станцияэз вылын.
Асланыс исследованнё пыр опытнӧй станцияэз висьталӧны, кытшӧм удобреннёэз и мымда колӧ петкӧтны сія либо эта районісь ыб вылӧ.
4. Мыйлӧ мусин колӧ небзьӧтны да назьмитны.
Мыйлӧ колӧ назмитӧм.
Быд воӧ урожай босьтікӧ кыскиссьӧны ыб вылісь уна минеральнӧй веществоэз.
Эта понісь мусин воись воӧ изӧрмӧ.
Медбы питательнӧй веществоэзлӧн запас вӧлі мусинын ӧтмымда, колӧ регулярнӧя ыб вылӧ петкӧтны удобреннёэз, назьмитны ыбсӧ. Этатӧг ыджыт урожай босьтны ыб вылісь оз позь.
Быдкодь быдмас босьтӧ питательнӧй веществоэсӧ неӧтмымда и неӧткодя.
Сідз, корнеплоддэз босьтӧны калий куимисьӧн унажык, а азот кыкьямысӧн унажык сю быдмассэзся.
Боби быдмассэз мусинісь босьтӧны медуна калий да фосфор, а мусин азот нылӧ оз ков.
Боби быдмас кӧдзлӧм бӧрын мусинын азот оз чин, а содӧ.
Эта сьӧрті лоӧ шуны: медбы вӧлі ыджыт урожай, быд культура увтӧ колӧ петкӧтны не ӧткодь удобреннё: ӧтіккез увтӧ — шуам капуста увтӧ, салат увтӧ, шпинат увтӧ и мукӧд гырись кора карч увтӧ, колӧны азота соввез; мӧдіккез увтӧ — гырись плоддэз увтӧ, шуам ӧгурчи увтӧ, томаттэз увтӧ, — фосфора соввез.
Куимӧттэз увтӧ, — картовки увтӧ, свёкла увтӧ, пыш увтӧ, лён увтӧ и сю быдмассэз увтӧ — калия соввез.
abu
Эта висьталӧм сьӧрті петӧ: мед бытшӧмжыка, кужӧмӧнжык мусинісь видзны питательнӧй веществоэз, колӧ ӧтік местӧ сьӧрсьӧн-бӧрсьӧн кӧдзны культураэз, кӧдналӧ колӧны не ӧткодь удобреннёэз.
Этатшӧм сьӧрсьӧн-бӧрсьӧн кӧдзӧмыс колӧ эшӧ и сійӧн, што быдкодь быдмаслӧн аслас вуж система. Ӧтіккез питательнӧй веществоэз босьтӧны мусин вевдӧр пласттэзісь, а мӧдіккез пыдісьжык.
Сідз, шуам сю культураэз унажыксӧ вужьясьӧны вевдӧр пласттэзӧ,
а боби культураэз — люцерна, донник — мусинӧ пырӧны кык метра пыдына и пыдӧжык.
Культураэсӧ этадз питательнӧй веществоэз босьтӧм сьӧрті сьӧрсьӧн-бӧрсьӧн кӧдзӧмыс шусьӧ плодосменӧн.
1933 воӧ ыб вылӧ кӧ вӧлі кӧдзӧма картовки, то 1934 воӧ тшӧктіссьӧ кӧдзны не корнеплоддэз ни, кӧдна уна босьтӧны калия соввез, а гречика, кӧда умӧля любитӧ энӧ соввесӧ.
Кытшӧмӧсь овлӧны удобреннёэз.
Миян мусин унажыксӧ корӧ азот, фосфор да калий.
Мукӧд колан питательнӧй веществоэз тырмӧны сідз.
А мукӧд порас оз тырмы токо азот ӧтнас, либо калий, либо фосфор.
Мед мусин вӧлі вынажык, петкӧтӧны быд пӧлӧс удобреннёэз.
Удобреннё вермас лоны быдсаӧн, кӧр сыын эм быд колан питательнӧй вещество, и вермас лоны небыдсаӧн, кӧр сыын кытшӧмкӧ токо ӧтік либо кык вещество: либо азот, либо фосфор, либо калий.
Быдса удобреннё туйӧ унажык мунӧ назём.
Назём аркмӧ идзасісь, кӧдӧ пода кок увтӧ чапкӧны да пода изверженнёэзісь.
abu
Идзасыс, кыдз ми тӧдам, шогмӧ быдмасісь, а подалӧн изверженнёэс — пусьытӧм (переваритчытӧм) вердас, кӧда сідз жӧ быдмассэзсянь унажык лоӧ, да животнӧй телоись мӧдкодьсялӧм веществоэз.
Сідз ӧтлаын назёмкӧт бӧр мусинӧ сюрӧны минеральнӧй соввез, кӧдна вӧлі кыскӧмась ыб вылісь урожайӧн, а сідз жӧ органическӧй продукттэз, кӧдна лоисӧ животнӧй организм олӧмсянь — уджалӧмсянь.
Сійӧн назёмын быд колан питательнӧй веществоыс эм. Сэтӧн уна и азота веществоэз, и фосфор, и калий эм — быдӧс, мый колӧ быдмаслӧ питайтчӧм понда.
Назём не токо химическӧй составсӧ мусинлісь вежӧ, сія мӧдкодьсьӧтӧ и мусин структура: буссялӧм мусиннэз сы понісь лоӧны посни комокаӧсь — мусин торрес органическӧй веществоэзсянь, ӧтамӧд бердӧ лякасьӧны; а чорыт, сёя мусиннэз бӧра рышкытсялӧны.
Назёмся быдса удобреннёӧн жӧ шусьӧны торф да компост.
Компостыс зэв бур удобреннё. Сійӧ керӧны сідз: му сора торф чукӧрӧ кисьтлӧны помой да быдкодь ёг-мусор, быдӧс эта чукӧрын бытшӧмик сорлассьӧ, сісьмӧ и органическӧй отброссэзісь лоӧ бур удобреннё.
Ыджыт каррез гӧгӧр удобреннёӧ мунӧ берся ёг, кӧдӧ карись чукӧррезӧ петкӧтӧны.
Эм эшӧ ӧтік удобреннё пӧлӧс. Эта удобреннёыс зэв аськоддяыс, шусьӧ веж удобреннёӧн.
Ыб вылын, кытӧн мусиныс назьмиттӧм, кӧдзӧны боби культура быдмассэз. Унажыксӧ кӧдзсьӧ люпин.
Люпинлӧн зэв пыдына муӧ пырӧ вуж системаыс, уна сӧскӧ пыдын муись минеральнӧй соввез да ва,
а вужжез вылӧ аркмӧны клубенёккез, кӧднаын уна азот.
Кӧр быдмасыс каяс, сійӧ керӧны гӧр увтӧ, гӧрӧны. Муын люпин сісьмӧ и бурмӧтӧ мусинсӧ.
Сідз мусинын лоӧ мунӧгыль, бурсялӧ сылӧн структура и физическӧй свойствоэз.
Веж удобреннё бӧрын унажыксӧ кӧдзӧны ӧзим — рудзӧг.
Воись воӧ кӧ ыб вылӧ бергӧтны назёмӧн токо мукӧд минеральнӧй веществоэз, а не быдсӧн, кӧдӧ быдмассэс урожай сеттӧн мусинісь босьтӧны, то мыйкӧ дырнаись му изӧрмас.
Эд мукӧд питательнӧй веществоэз сюӧн, картовки клубеннезӧн, лёнӧн берттӧг мунӧны карӧ либо заводӧ, а сэтчин сійӧ отир видзӧ.
Органическӧй удобреннёэзся, мед босьтны бур да ыджыт урожай, колӧ мусинӧ пыртны минеральнӧй удобреннёэз.
Минеральнӧй удобреннёэсӧ куим группаӧ торйӧтӧны: азота, фосфора да калия удобреннёэз.
Азота удобреннёэзӧн лыддиссьӧ селитра да сернокислӧй аммоний.
Одзжык кӧркӧ селитрасӧ гарйӧмӧн шедтісӧ муись.
Медуна сія шедтіссис Лунланись Америкаын — Чилиын да Боливияын.
Ӧння кадӧ сійӧ искусственнӧя шедтӧны фабрикаэзын ру азотісь.
Этатшӧм заводдэз и миян СССР-ын эмӧсь.
Сернокислӧй аммоний кольӧ кыдз боковӧй продукт из шомись (каменнӧй уголись) газ да кокс шедтытӧн.
Азота удобреннёэз быдмаслӧ зэв колан тор.
Азот понісь му вылын быдмас унаӧн перытжыка быдмӧ, вежӧтӧ. За нылӧн зора, ён, листтэз здоровӧсь, гырисьӧсь, нюдзвежӧсь.
Азоттӧг жӧ быдмас кайӧ умӧля, винера, листтэз посниӧсь, кельытӧсь.
Фосфора удобреннёэз керӧны фосфориттэзісь. Фосфориттэз шедтісьӧны муись. Уна нія куйлӧны Московскӧй, Центральнӧй-сьӧдмусина (центрально-чернозёмнӧй) да Рытланись областтезын, уна нія и Уралын, Волгадорын, Казакстанын.
А медуна фосфора минераллэз — апатиттэз куйлӧны СССР Ойвылын — Кольскӧй кӧджын, Хибинын.
Фосфориттэзісь и апатиттэзісь заводдэзын шедтіссьӧ дона удобреннё — суперфосфат.
Эсся, металлургическӧй промышленностьын кӧртӧ да стальӧ чугун пӧрттӧн (а чугунын уна фосфор) аркмӧ томас-шлак. Томас-шлак тожӧ мунӧ ыб вылӧ фосфора удобреннё туйӧ.
Фосфора удобреннёэз понсянь, кӧр мусинын эмӧсь и мукӧд колан веществоэз, зэв бытшӧма аркмӧ быдмаслӧн тусь да плод.
Калия удобреннёэз сельскокӧзяйственнӧй уджӧ пырисӧ сёрӧнжык мукӧд удобреннёэзся.
СССР-ын миян калия соввез уна куйлӧны Уралын — Соликамскӧй гӧгӧр.
Эна соввез специальнӧй заводдэзын мӧдкодьсьӧтсьӧны калия удобреннёэзӧ.
Калия удобреннёэз медӧддьӧн колӧны печкана культураэзлӧ (лён, пыш), свёклалӧ, картовкилӧ, табаклӧ да карч культураэзлӧ.
Удобреннёэз коласын ыджыт значеннё ас вылас босьтӧ и пӧим.
Пӧимыс донтӧм удобреннё. Но миян совхоззэзын да колхоззэзын ӧнӧдз бытшӧмика сы вылӧ озӧ видзӧтӧ.
А эд пӧимыс лоӧ и калия, и фосфор удобреннёӧн.
Миян виль химическӧй заводдэз пондасӧ лэдзны искусственнӧй минеральнӧй удобреннёэз, кӧднаын лоасӧ быдмаслӧ куимнан колас веществоыс ӧтлаын кокнита сылан соввезӧн.
Эна искусственнӧй удобреннёэс шусьӧны комбинируйтӧм удобреннёэзӧн.
Быдӧс эна сьӧрсьӧн-бӧрсьӧн висьталӧм удобреннёэзлӧн пытшканыс эмӧсь быдмас вужжезӧ веськыта сӧскиссян веществоэз.
Эта сьӧрті и шусьӧны нія веськыт удобреннёэзӧн.
Нысся эмӧсь эшӧ удобреннёэз, кӧднія быдмас вужжезӧ веськыта сӧскиссьыны озӧ вермӧ, а мӧдкодьсьӧтӧны мусин.
Нысянь мусин веществоэс ваын несыланаэзісь пӧрӧны сыланаэзӧ.
Этӧн эна удобреннёэс кыдз бы мусинӧ содтӧны мусин бурсьӧтан веществоэз.
Этасся нія бурсьӧтӧны мусинлісь физическӧй свойствоэз.
Этнія удобреннёэс шусьӧны косвеннӧй удобреннёэзӧн.
Косвеннӧй удобреннёэс мусинлісь кислотность чинтӧны, тэрмӧтӧны органическӧй веществоэзлісь сісьмӧм и буса мусиннэз пӧртӧны комока мусиннэзӧ: Косвеннӧй удобреннёӧн лоӧ известь.
Сарскӧй Россияын минеральнӧй удобреннёэз му вылӧ етша пыртлісӧ, а крестьяна ыббез и дзикӧдз нійӧ эзӧ адззывлӧ.
Совет союзын социалистическӧй сельскӧй кӧзяйство паськалӧмсянь минеральнӧй удобреннёэз керӧм и видзӧм воись воӧ перыта быдмӧ.
А эта сьӧрын быдмӧ и содӧ колхоз да совхоз ыббез вылын урожай.
Мыйлӧ колӧ ыб небзьӧтӧм.
Удобреннёэзӧн мусинлісь химическӧй состав мӧдкодьсьӧтӧмся урожай лэбтан уджын ӧддьӧн ыджыт значеннё эм и механическӧя мусин небзьӧтан уджлӧн.
Быдкодь механическӧя мусин небзьӧтан уджӧ пырӧ: мусинлісь вевдӧр слой кыминьтӧм да мусин рышкытсьӧтӧм.
Ӧт уджыс керсьӧ гӧрӧмӧн, мӧдыс пинялӧмӧн.
Гӧрӧмсянь да пинялӧмсянь мусиныс буржыка ас пырйӧттяс пондӧ лэдзны быдмаслісь вужжез.
Эсся, и атмосфераись ру да влага буржыка муӧ сюрӧны. А ру да влага — медколан торрез и вужжезлӧ, и буркерись бактерияэзлӧ.
Эта понісь чожжыка мунӧ и мусинлӧн мӧдкодьсялӧм, чожжыка сісьмӧны органическӧй веществоэз, несылана мусин торрез пӧрӧны ваын сыланаэзӧ;
сідзкӧ мусиныслӧн составыс быдсӧн керсьӧ бытшӧмжыкӧн быдмассэз быдмӧм понда.
Мусин небзьӧтӧмсянь и ёгтурун ӧшӧ.
Умӧля да кадтӧг небзьӧтӧмсянь ыбыс тырӧ ёг-турунӧн, а ёгтурун унаӧн чинтӧ урожай.
Ёгтурункӧт медбур вермасян способ эм сьӧд пар, мӧд нёжӧн кӧ — ыб гӧрасӧ да сідз кӧдзтӧг и кольӧны.
Сьӧд парыс гожумбытӧн не ӧтпыр гӧрсьӧ и пиняссьӧ.
Мукӧд кадӧ сьӧд пар вылӧ кӧдзӧны картовки, свёкла, кукуруза. Культураэз вотӧдз мусин не ӧтпыр культиваторрезӧн гӧрсьӧ. Эта понісь сідз жӧ ёгтурун ӧшӧ, а мусин ачыс небзьӧ, бытшӧмсялӧ.
Сельскӧй кӧзяйство коллективизируйтӧм осьтӧ зэв ыджыт возможносттез мусин небзьӧтан, бурмӧтан уджын.
Пыдына тракторӧн гӧрӧм, межаэз дзимлялӧм, правильнӧй плодосмен вермасӧ пырны олӧмӧ токо гырись кӧзяйствоын.
Мусин небзьӧтан удж механизируйтӧмӧн миян эмӧсь ӧддьӧн гырись достиженнёэз: ӧткӧ удж мунӧ перытжыка, мӧдкӧ керсьӧ сія буржыка да ас кадӧ, а эта понісь и урожай содӧ.
НЁЛЬӦТ ГЛАВА.
ЛИСТ.
МЫЙ ДА КЫДЗ БЫДМАС БОСЬТӦ РУИСЬ.
ЛОЛАЛӦМ.
ПАКМӦТӦМ.
1. Веж быдмаслӧн руись питайтчӧм.
Быдмас и мусин.
Вӧлі кад, кӧр учёнӧйез думайтісӧ, быдмас пӧ ассис веществосӧ быдсӧн босьтӧ мусинісь.
Но вот куимсё во бӧрті ни кыдз голландскӧй учёнӧй-исследователь Гельмонт аслас опытӧн висьталіс, эта пӧ чайтӧмыс абу вернӧй.
Гельмонт ассис опыт керас сідз: садитас кашник муӧ бадь ув.
Му вӧлі босьтӧма кӧс и ӧшлӧмӧн.
Бадь ув киськавны пондас зэр ваӧн.
Вит во бӧрті бадь ув быдмас быдса пуӧдз.
Кӧр быдмӧм бадь пу ӧшласӧ — петас: сьӧкытанас одзза сьӧрті бадь ув содӧма 64 кг.
Муыс жӧ кашникын косьтӧм бӧрын кокнямӧма быдса 50 г.
Сідзкӧ, пу аркмӧмӧ муись минеральнӧй соввез витвоӧн мунісӧ ӧддьӧн етша.
Гельмонт пондас думайтны, быдмаслӧ быдмикӧ пӧ почти тырмӧ ӧтік ва, медбы вермис сія быдмыны.
Конешно, эта думаӧн сія керис ошибка.
Кӧбы сія ассис бадь пусӧ тожӧ косьтіс и ӧшліс, сэк бы тӧдіс: главнӧй кӧс массаыс бадь пулӧн содӧма не ӧтік васянь да мусинсянь.
Быдмаслӧн состав.
Ӧні бытшӧма ни тӧдӧны — быдмас аркмӧ не ӧтік токо ваись да минеральнӧй соввезісь.
Кӧдзыс туссез би вылын видзтӧн ми адззам, веществоныс нылӧн янсалӧ ваӧ, сотчан веществоӧ да пӧимӧ.
Сія жӧ аркмӧ быдмаскӧт, кӧр пес чапкӧны горӧ биӧ.
Пес ва сэк лэбзьӧ руӧ, а кӧс веществоыс шомсялӧ, ӧгырсялӧ и медбӧрын сотчиссьӧ.
Кольччӧ одзза босьтӧм пес сьӧрті учӧтик, кокнитик пӧим чукӧрок.
Эта сьӧрті позьӧ шуны: быдмас аркмӧма: 1) ваись, 2) пӧимись (минеральнӧй веществоэзісь) и 3) сотчан органическӧй веществоэзісь.
Вот эна сотчан веществоэс и видзӧны ас пытшканыс уна углерод.
Пу шом, например, унажыксӧ аркмӧ углеродісь.
Углерод — ва бӧрын медколан тор быдмаслӧ.
Кӧс сотчан быдмас веществоӧ джыныс мымда пырӧ углерод.
Углерод оз боссьы муись.
Этӧ докажитіс аслас историческӧй опытӧн эшӧ Гельмонт, сійӧ жӧ висьталӧны и вегетационнӧй опыттэз.
Кӧр вегетационнӧй опыттэз сувтӧтӧны, ваӧ оз пуктӧ некытшӧм веществоэз, кӧдна пытшкын бы вӧлі углерод.
Но сёжӧ, кӧть растворрезын минеральнӧй соввезся и абу нем, быдмассэз пытшкын углерод овлӧ унаӧн унажык опыт понда босьтӧм кӧдзыс туссезынся.
Кысь нӧ, сідз кӧ, эта углеродыс веж быдмассэз пытшкӧ боссьӧ?
Мыйлӧ колӧны быдмас олӧмын листтэз.
Дыр сідз жӧ учёнӧйез эзӧ вермӧ тӧдны, мыйлӧ быдмаслӧ колӧны листтэз.
Токо ХVIII век конечын швейцарскӧй учёнӧй Сенебьелӧ удаччис осьны листтэзлісь быдмаслӧ колан могсӧ.
Ваӧ лэдзӧм быдмассэзкӧт опыттэз кертӧн Сенебье адззӧма ва вевдӧрӧ лэбан дӧвдалан руа полёккез.
Босьтас Сенебье пизьӧтӧм ва — полёккез оз аркмӧ.
Босьтас пӧльтас эта ваӧ аслас тыэзісь «тшыкӧм» ру и недыр мыйись полёккез вились эмӧсь.
И кыным унажык «тшыкӧм» ру ваӧ пӧльтӧ, сыным унажык полёккез аркмӧны.
Позис думайтны, што «тшыкӧм» руыс — углекислӧй газыс ва вевдӧрӧ полёккезӧн петіс.
Сенебье ӧктіс энӧ газ полёккесӧ и исследуйтіс. Газ вӧлӧма «сӧстӧм ру» — кислород.
Эсся Сенебьелӧ син вылас усяс, што эта полёккес петӧны не ваись, а веж лист небытінісь.
Сенебье убедитчас, што быдмас югыт одзын лэдзӧ кислород токо сэк, кӧр сійӧ ваись босьтӧ углекислӧй газ.
Углекислӧй газ аркмӧ кислородісь да водородісь.
Сенебье этӧ тӧдіс.
А этӧ тӧдӧмӧн сія кужис веськыта висьтавны, мый керсьӧ быдмасын ваись босьтӧм углекислӧй газкӧт. Сенебье энӧн аслас опыттэзӧн осьтіс зэв ыджытӧ, важнӧйӧ быдмас олӧмын.
Сенебье вежӧртіс, углекислӧй газ пӧ веж лисӧ сюрӧм бӧрын, мӧдкодьсялӧ: сія торьясьӧ кислород вылӧ, кӧда дӧвдалӧна полёккезӧн петӧ ва вевдӧрӧ и кӧдӧ позьӧ ӧктыны анализ вылӧ, и углерод вылӧ, кӧда кольччӧ быдмас пытшкӧ, кӧда сотчӧ, кӧда мунӧ быдмасын виль веществоэз аркмӧмӧ мӧд нёжӧн кӧ, быдмас питайтчӧ сійӧн.
Сідз Сенебье кужис тӧдны загадка лислісь и докажитіс, веж быдмас пӧ аслыс углерод босьтӧ углекислӧй газісь.
2. Углерод босьтӧм.
Углекислӧй газсӧ магнийӧн торйӧтӧм.
Оз позь кокниа аслыт вежӧртны, што углекислӧй газын, кӧда рӧмтӧм, кӧдӧ немӧн он янсӧт рукӧт, эм углерод, мӧд нёжӧн, шом тороккез.
Но этӧ позьӧ докажитны.
Углекислӧй газлӧн эм особенность — сыын нем оз вермы сотчыны.
abu
Но металл магний сотчӧ.
Босьтны кӧ да руын ӧзтыны магний лента тор, магний ӧзъяс синнэз гусялан биӧн.
Ӧні лэдзны кӧ сійӧ углекислӧй газӧ, магний и углекислӧй газын пондас сотчыны, токо биыс лоас учӧтжык
и газ видзан банка стенкаэз вылӧ пондас пуксьыны сьӧд са.
Магнийыс углекислӧй газын сотчытӧн ӧтлаасьӧ кислород газкӧт, кӧда пырӧ углекислӧй газ составӧ,
мӧд нёжӧн кӧ магнийыс углекислӧй газлісь кислородсӧ мырддьӧ,
а янсалӧм углерод саӧн пуксьӧ банка стенкаэз вылӧ.
Кыдз быдмасыс ас пытшкас янсӧтӧ углекислӧй газ.
Мӧднёж углекислӧй газ янсалӧ аслас торрез вылӧ веж быдмас пытшкын.
Янсӧтан моментсӧ асьсӧ адззыны оз позь.
Но кыдз кислород петӧ быдмас пытшкись, позьӧ адззыны.
Эта понда кынымкӧ быдмас улок, шуамӧ кӧть элодеялісь, пуктӧны стекляннӧй воронкаӧ и воронкасӧ лэдзӧны ваа стаканӧ кытӧн уна углекислӧй газ.
Приборсӧ сыбӧрын сувтӧтӧны югытінӧ.
Мыйкӧ дырнаись (чожа) быдмас вевдӧрись пондасӧ ва вевдӧрӧ лэбны газ полёккез (31 рис.).
Газ ӧктіссьӧ стекляннӧй пробиркаӧ, а сыбӧрын пробирка пытшкӧ лэдзӧны шомӧн ӧгралан сартасок.
Сартас сэк жӧ синнэз гусялана биӧн пыкнитӧ.
Эта сьӧрті и позьӧ тӧдны — быдмас ас пытшкись лэдзӧма газ — кислород.
Сідзкӧ, ваа быдмассэз, былись, янсӧтӧны углекислӧй газ.
Янсалӧм кислород мезмӧ, а углерод кольччӧ быдмас организмӧ.
Не ӧтік ваа быдмассэз, но и му вылісь веж (зелёнӧй) быдмассэз янсӧтӧны углекислӧй газ.
Этӧ позьӧ адззыны шондіа асылӧ сувтӧтӧм опыт сьӧрті.
Пыдӧстӧм паськыт бутыльӧн вевттьӧны веж быдмаса кашник.
Бутыль голюк пыр лэдзӧны масісь огарки либо ӧзтӧм сартасок.
Огарки мыйкӧдырна сотчӧв керас и кусас.
Сідзкӧ руыс, кӧда бутыль пытшкын вӧлі, ассис кислородсӧ сотчӧм вылӧ сетіс и бутыльӧ колис токо ӧтік углекислӧй газ.
Эта бӧрын мыйкӧ дырнаись бутыльӧ бӧра лэдзӧны огарки. Огарки бӧра сотчӧв керас да кусас.
Кысь лоис бутыльын вились кислород? Тыдалӧ быдмас сійӧ ас пытшкись лэдзис. Углекислӧй газ, кӧда бутыльын аркмис масісь огарки сотчытӧн, кыссис быдмас пытшкӧ да янсаліс углеродӧ да кислородӧ. Углерод кольччис быдмас пытшкын, а мезмӧм кислород ӧксис бутыльӧ.
Кыдз веж быдмассэз руись босьтӧны пытшканыс углекислӧй газ.
Атмосфера руын углекислӧй газыс етша.
Точнӧй опыттэзӧн тӧдӧмась, 10 000 ру торӧ углекислӧй газ пырӧ быдса куим торӧн.
Первосянь кыдзкӧ лоӧ тӧдтӧм, кыдз вермӧ сымда быдмасыс зорамны сідз етша сёянӧн, кӧда рознитчӧма руын.
Наука вермӧ висьтавны и эта вопрос йылісь.
Углекислӧй газ, кыдз и быд газ, руын ӧтмымдаӧн ӧтмӧдӧрӧ паськалӧ, пырӧ быдлаӧ, кытӧн сія эшӧ абу.
Сія кыссьӧ и быдмас лист пытшкӧ. Ваись быдмаслӧн лист вевдӧрись кучишокыс вӧснитик да углекислӧй газ сы пыр веськыта быдмас пытшкӧ кыссьӧ, а му вылын быдмись быдмассэзӧ сія пырӧ векнитик щеллез пыр, кӧдна лист кучишок вылӧ аркмӧмась.
Кӧбы углекислӧй газыс листтэзын эз мӧдкодьсяв, сія бы лисӧ пырны вермис невна.
Но листӧ пырӧм бӧрын сія мӧдкодьсялӧ, янсалӧ, пӧрӧ мӧдік веществоэзӧ,
а сы местӧ пырӧ углекислӧй газлӧн мӧдік порция. Чинӧм газ местӧ бӧра пырӧ виль углекислӧй газ и сідз пыр.
Кӧбы эта углекислӧй газлӧн мӧдкодьсялӧмыс эз вӧв, лист пытшкӧ пыр кыссьыны углекислӧй газ бы эз понды.
Сідз веж быдмассэз пыр руын паськалӧм углекислӧй газісь босьтӧны углерод.
Кыдз югыт вылын листтэзын аркмӧ крахмал.
Быдмасӧ сюрӧм углерод сэк жӧ мунӧ виль унапӧла соединеннёэзӧ и пӧртӧ органическӧй веществоӧ.
Вот мыля быдмас пытшкись углерод оз позь торйӧн, сӧстӧмӧн адззыны.
Углекислӧй газ янсалӧм бӧрын веж быдмасын позьӧ адззыны веществоэз, кӧдна аркмӧмась углеродісь да ваись.
Эна веществоэс сідз углеводдэзӧн и шусьӧны.
Ны коласісь тіянлӧ тӧдса крахмал.
Сійӧ абу сьӧкыт адззыны бура югдӧтӧм быдмасӧ лисісь.
Этӧ лиссӧ перво токо колӧ спиртын кельдӧтны-чочкомтны, — и вӧлись чочкоммӧм лиссӧ лэдзны иод растворӧ.
А ми тӧдам — крахмалыс иодсянь лӧзӧтӧ.
Лист торрез, кытӧн эм крахмал, лӧзӧтасӧ.
Эта опытӧн — «иодӧн крахмал мичӧтан опытӧн» позьӧ кокниа адззыны, што крахмалыс быдмас листтэзын луннас абу ӧтмымдаӧн, кӧть листтэз и ӧтік быдмас вылын пукалӧны.
Асывсӧ одз крахмал овлӧ зэв етша.
Рыт кежӧ, лун кӧ сулаліс шондіа, крахмалыс унажык.
Крахмаллісь неӧтмымдасӧ тӧдмалӧны лист мичасьӧм сьӧрті: кыным крахмал унажык, сыным лӧзжыка лист мичасьӧ иодӧн, кыным сія етшажык, сыным лист рӧмтӧмжыка мичасьӧ.
Основнӧй условиеэз, кӧдна ковсьӧны органическӧй веществоэз аркмытӧн.
Лиссэзын крахмал аркмӧ токо югыт вылын.
Быдмас, кӧда 2–3 лун сулаліс пемытінын, аслас листтэзын оз понды видзны крахмал.
Эшӧ ёнжыка мыччалӧ крахмаллісь югыт вылын аркмӧмсӧ вот кытшӧм опыт.
Пемытінын дыр сулалӧм, крахмаллтӧм быдмас лист бердӧ ӧтмӧдӧрсянь мӧртӧны пробкаись гӧгляноккез, кыдз эта мыччалӧма рисунок вылын (32 рис.). Эта керсьӧ сы понда, мед вевттьӧм местӧ эз сюр югыт (видзӧт 6 удж, 130 листбок).
Быдмас эта бӧрын сувтӧтчӧ югыт вылӧ — ӧшын одзӧ.
Лун чулалас и пробкаӧн вевттьӧм лист быдмас бердісь вундыштӧны, а пробка босьтӧны.
Лиссӧ асьсӧ рӧмтӧмтӧны спиртын и мичӧтӧны иод растворӧн.
Унажык лист вылыс мичамас лӧз рӧмӧ, а пробка увтісь лист торыс оз мичам, сідз чочкомӧн и коляс. Сідз кӧ, кытчӧ павкис югыт, сэтчӧ аркмис крахмал, а пробка увтӧ югыт сидзны эз вермы и крахмал сэтӧн абу (32 рис.).
Вылын вӧлі висьталӧма ни — углеродсӧ быдмас босьтӧ токо ру углекислӧй газісь.
А  былись, вермас я веж лисын аркмыны крахмалыс югыт вылын, кӧр руись углекислӧй газ дзимлявны?
Мымда бы ми быдмас сэтшӧм руын югыт вылас эг видзӧ, крахмалыс веж листтэзын оз аркмы.
Углеводдэз коласӧ пырӧ и сакар.
Мукӧд быдмас, кыдз лук да салат, асланыс листтэзӧн аркмӧтӧны не крахмал, а сакар.
Углеводӧн лоӧ эшӧ и клетчатка. Клетчаткаись керӧма быдмаслӧн скелетыс — клеткаэзлӧн дыжыс.
Углеродісь лисын ва сорӧн да минеральнӧй соввез сорӧн, кӧдна кайӧны вужжезісь, аркмӧны углеводдэзся сложнӧйжык органическӧй веществоэз — белоккез.
Эна белоккезісь быдмаслӧн аркмӧмась медколан торрез — протоплазма да ядро.
Часісь часӧ, лунісь лунӧ быдмас пытшкын сьӧрна унажык и унажык ӧксьӧны органическӧй веществоэз.
Нія ӧксьӧны быдмас пытшкын руись углекислӧй газ торьясьӧмсянь.
Торьясьӧм бӧрын кислород петӧ бӧр руӧ, а углерод кольӧ быдмас пытшкӧ и мунӧ органическӧй веществоэз аркмӧмӧ.
Сідзкӧ, быдӧс питательнӧй веществоэз, кӧднӧ быдмас босьтіс мусинісь да руись, быдмас пытшкын мӧдкодьсялӧны и пӧрӧны ловья быдмас организм пытшкын составнӧй торрезӧ, мӧд нёжӧн кӧ, усваивайтчӧны.
Ловья веж быдмасӧн руись питательнӧй веществоэз босьтӧмыс и шусьӧ углерод усваивайтӧмӧн.
Углекислӧй газісь углерод усваивайтан процесс вермӧ нуны токо веж быдмас.
Некытӧн мӧдікинын, а эстӧн — веж быдмас органнэзын неорганическӧй веществоэзісь аркмӧны уна пӧвса веществоэз — органическӧйез.
Этӧн веж быдмас янсалӧ невеж быдмас дорись, ӧтӧн жӧ сія янсалӧ и животнӧйез дорись.
Углекислӧй газӧн ру бурмӧтӧм.
Специальнӧй исследованнёэз мыччалӧны: гӧгӧрись руын углекислӧй газ содтӧмсянь быдмас бытшӧмжыка аркмӧ, сія бытшӧмжыка пондӧ босьтны углерод,
чожжыка быдмӧ, зорамӧ и урожай аркмӧ вылынжык.
Тодель керӧм быдтан керкуэзын — теплицаэзын, кытӧн тодель «бурмӧтсьӧ» руыс углекислӧй газӧн, ӧгурчилӧн урожай сьӧкытанас кыкисьӧн аркмӧ унажык, а томаттэзлӧн даже куимисьӧн урожайыс содӧ,
Ру бурмӧтӧм понда мукӧд гырись теплицаэзын, кыдз опыт, тодель матын заводдэзсянь вайӧтӧны домна горрезісь петан газ.
Эта газыс перво весӧтчиссьӧ, мед умӧль газзэз колан газыскӧт сорӧн эз сюрӧ, сыбӧрын вӧлись натодель керӧм трубаэз кузя локтӧ теплицаӧ.
Ыб вылісь культураэз газируйтӧм понда трубаэз нюжлалӧны му пытшкӧт.
Трубаэзісь газ перво веськыта петӧ муӧ, а сыбӧрын кайӧ и руӧ.
Этасянь газируйтӧм мусин вылын урожай кыкисьӧн-куимисьӧн аркмӧ вылынжык газируйттӧм мусин вылісь урожайся.
Эна жӧ опыттэс мыччалӧмась, русӧ бурмӧтны пӧ колӧ углекислӧй газӧн тӧдӧм виӧдз.
Уна быдмас 1% ӧдз углекислӧй газӧн бурмӧтӧм воздухын чакнитӧ, кулӧ.
abu
А сэтӧн жӧ ордчӧн эмӧсь и сэтшӧм быдмассэз, кӧдналӧ нем туйӧ лоӧ, содтыны кӧ 10% ӧдз руын углекислӧй газсӧ, мӧд нёжӧн 300-исьӧн керны унажык.
Углекислӧй газӧн быдмассэз бурмӧтӧмыс ыджыт значеннё босьтӧ каррез гӧгӧрись карч кӧзяйствоэз понда.
Советскӧй учёнӧйез кошшӧны пыр, кыдз бы адззыны донтӧмжык способ, мед углекислӧй газӧн «бурмӧтны ру».
Мыйлӧ колӧ саддэз садитны.
Веж быдмассэз югыт вылын углекислӧй газ торйӧтӧмӧн зэв ыджыт бур керны. Нія лэдзӧны кислород, кӧда зэв бура колӧ олӧм понда животнӧйезлӧ да мортлӧ.
И быль эд, кӧбы углекислӧй газ, кӧда ӧксьӧ животнӧй организммез лолалӧмсянь, быдмассэз эз торйӧтӧ — му вылын бы овны эз туй.
Кинлӧ абу тӧдса, што вӧрын либо садын руыс сӧстӧмжык каррезын руся.
Уджалісь отир олӧмын миян одзӧ сувтӧ ыджыт задача: унажык садитны каррезын веж саддэз — ыждӧтны веж площадь.
Пемыт, буса каррез туйӧ, кӧдна миянлӧ дӧнзисӧ важ стройсянь, пондасӧ строитчисьны виль, социалистическӧй каррез — «веж каррез». Эна «веж каррезын» уджалісь отирлӧн и оланыс лоас виль, здоровӧй.
Миян Союзын ӧні быдлаын мунӧ эта уджыс. Быд карын, быд рабочӧй посёлокын нуӧтсьӧ ыджыт удж мед вежӧтны — садитны саддэз.
3. Кыдз керӧма лист.
Углекислӧй газ торьяссьӧ листтэзын.
Эта сьӧрті, медбы бытшӧмжыка вежӧртны, кыдз быдмас босьтӧ руись веществоэз, колӧ тӧдны, кытшӧм лислӧн пытшсяняс строеннёыс.
Лислӧн клеткаа строеннё.
Поперег шӧрыштӧм лист небытінісь микроскоп увтын позьӧ адззыны (33 рис.): лист клеткаэс формананыс абу ӧткодьӧсь и сулалӧны ӧтамӧд бердын пласттэзӧн.
Вевдӧрыс и увдӧрыс лислӧн вевттьӧма ӧтпӧвса кучишокӧн.
Кучишок клеткаэс шучкӧп тыдаланӧсь, рӧмтӧмӧсь.
Ны пыр шонді югӧр шуч мунӧ.
Кучишок берегитӧ лист пытшкись клеткаэсӧ тшыкӧмись, дойдӧмись, эта сьӧрті клеткаэслӧн вевдӧр стенкаэс невна кызжыкӧсь.
Быдӧс мукӧд кызаыс лислӧн аркмӧма вӧснитик стенкаа клеткаэзісь.
Эна клеткаэз пытшкын протоплазмаас уялӧны гӧгӧрса, югыт веж рӧма туссез, кӧдна шусьӧны хлорофилла туссезӧн (мӧд нёжӧн хлоропласттэз).
Нысянь веж рӧма и лоӧ листыс.
Кучишок увтісь клеткаэс кузьмӧсаӧсь, топа сулалӧны ӧтамӧд бердын.
Эта — стобья ткань.
Стобья ткань увтын куйлӧны неправильнӧй формаа клеткаэз. Нія нежык топ ӧтамӧд бердӧ локтӧны. Эна клеткаэзісь лоӧ губчатӧй ткань.
Лист небытінын шӧрас эмӧсь эшӧ кыз стенкаа рӧмтӧм клеткаэз.
Эна клеткаэс лист жилкаэзлӧн, мӧд нёжӧн кӧ, сосуда пучоккезлӧн. Сосуда пучоккес быдӧс лист небытінсӧ визялӧны.
Мый сэтшӧм ткань.
Лис пытшкын быд чужӧма клеткаыс зэв уна, но абу нія кыдз сюрӧ ӧтмӧдӧрӧ чапкассьӧмась.
Ӧтчужӧма клеткаэс топа керсьӧны ӧтамӧд бердӧ.
Сідз микроскоп увтын ми адззам: кучишок клеткаэз, стобья тканьлісь клеткаэз и губчатӧй тканьлісь клеткаэз.
Быд тканьыс асмознас аркмӧма и орган оланын нуӧтӧ ассис определённӧй удж.
Эна неӧтчужӧма и неӧткодь уджа тканнес ӧтамӧд бердӧ топа локтӧмӧн аркмӧтӧны орган — лист, кӧда ачыс эм тор быдса организмлӧн — быдмаслӧн.
Увдӧр ладорсӧ лислісь микроскоп увтын бытшӧмика видзӧтікӧ ми вермамӧ адззыны: кучишок клеткаэз коласын эмӧсь мӧдчужӧма гозъя клеткаэз.
Эна гозъя клеткаэз коласын эм шель, кӧда пыртӧ губчатӧй ткань клеткаэз коласісь гырккезӧ — пустотаэзӧ (ходдэзӧ).
Щеллес шусьӧны устьицеэзӧн, а гозъя клеткаэс, кӧдна коласӧ аркмӧм шельыс, шусьӧны тупкасян клеткаэзӧн.
Вылісянь видзӧттӧн эна тупкасян клеткаэс джыння тӧлісь чужӧмаӧсь, и пытшкись стенка доррезнаныс нія керсьӧны оча (34 рис.).
Медколан торыс лисын — небытін тканнез, кӧдна пытшкын эмӧсь хлорофилла туссез.
Кучишокыс небытінлісь тканнез вевттьӧ ӧтмӧдӧрсянь и кыдз бы берегитӧ нійӧ.
Кучишок вевдӧрсянь гозъя клеткаэз коласісь шеллез пырӧны лист пытшкӧ.
Лист небытінын тшӧка визялӧны жилкаэз, кӧдна кӧртассьӧны быдмас закӧт, а заӧт кӧртассьӧ быдмас вужкӧт.
Кытшӧм удж нуӧтӧны устьицеэз углерод босьтан уджын.
Руись углерод боссьӧ кыдз мыччалӧмась тоделя исследованнёэз, токо хлорофилла клеткаэзӧн.
Но эна клеткаэс ру бердӧдз топ павкны оз вермӧ, лист кучишок оз лэдз.
Кӧбы эзӧ вӧлӧ гозъя клеткаэз коласся шеллез-устьицеэз, — руыс лист пытшкӧ сюрны бы эз вермы.
Токо ӧтік устьицеэз пыр и вермӧ лист пытшкӧ пырны углекислӧй газ (33 рис.).
Устьицеэзісь сія клетка колассэзӧт локтӧ стобья тканьӧдз. А стобья тканьын медуна хлорофилл. Вот сэтӧн вӧлись углекислӧй газісь медбурасӧ и боссьӧ углерод.
Медбы тӧдны, быль я углекислӧй газыс лист пытшкӧ пырӧ висьталӧм туй кузя, учёнӧйез керасӧ опыт.
Босьтасӧ да устьицеэсӧ быдӧс лякасӧ вазелинӧн.
Югыт вылӧ сувтӧтӧм бӧрын лякӧм лиса быдмасыс углерод босьтны дугдӧм.
Лист вылын устьицеэз ӧддьӧн унаӧсь.
Ӧтік квадратнӧй миллиметрын нія 100 кыныма.
Сідзкӧ, квадратнӧй сантиметра пасьта лист торок вылын нія лоасӧ 10 000 кыным.
Видз вылісь турун быдмаслӧн, кӧдна любитӧны быдмыны кушиннэзын, устьицеэс лист вылын ӧтмӧдӧрсянь,
а быдмассэз, кӧдна любитӧны быдмыны вуджӧр сайын, да пуа быдмассэзлӧн устьицеэз лись вылын токо ӧтладорсянь — увланись ладорас.
Устьицеэз абу пыр ӧтмоз осьтаӧсь.
Оз кӧ тырмы быдмаслӧ ва, гозъя клеткаэз лёпмӧны
и одзись доррезнаныс асланысӧн ӧтлаасьӧны.
Устьице сэк пӧднассьӧ (35 рис.).
Но дыр кежӧ кӧ пӧднассьӧ устьице — углерод быдмас лист пытшкӧ сюрны дугдӧ, и быдмас пондӧ «тшыгьявны».
Кӧс кадӧ быдмаслӧ не ӧтік токо ва оз тырмы, сылӧ оз тырмы и углекислӧй газ, кытісь позис бы босьтны углерод.
4. Мыйлӧ колӧ крахмал аркмикӧ югыт да хлорофилл.
Микроскоп пыр позьӧма адззыны, што крахмал туссез аркмӧны именно хлорофилла туссез пытшкын и токо югыт вылын.
Хлорофилла туссез аркмӧмась рӧмтӧм белокись да веж рӧма веществоись — хлорофиллісь.
Хлорофилл бытшӧма сылӧ спиртын.
Раствор аркмӧ изумруд-веж рӧма.
Асьныс жӧ хлорофилла туссес спиртын оз сылӧ, а токо рӧмнысӧ ӧштӧны-рӧмтӧмсялӧны.
Хлорофиллӧн эм особӧй свойство — сія югытлісь чочком рӧма югӧр разьӧ.
Шонді югӧр миян синлӧ токо «чочком» рӧма.
Лэдзны кӧ сійӧ шучкӧп тыдалан стекляннӧй призма пыр, аркмас «енӧшка». А ми тӧдам енӧшка аркмӧ уна рӧмись.
Сія шусьӧ спектрӧн.
Спектра вылӧ видзӧттӧн ми адззам, кыдз сыӧ пырӧны рӧммез: гӧрд, оранжевӧй, виж, веж (зелёнӧй), голубӧй, лӧз и фиолетовӧй.
Сідзкӧ, чочком шонді югӧр аркмӧма быд рӧма югӧрись. Эна рӧма югӧррес ӧтлаасьӧны, сорласьӧны и ныись аркмӧ ӧтік чочком рӧма югӧр.
А лэдзны кӧ чочком шонді югӧрсӧ перво хлорофилл раствор пыр да вӧлись стекляннӧй призмаӧн сійӧ разьны аслас рӧма югӧррез вылӧ, позяс адззыны, што спектра петас мӧдчужӧма: кытӧн колӧ бы лоны гӧрд рӧма да виж рӧма виззезлӧ, а сідз жӧ и лӧз-рӧма да фиолетовӧй рӧма виззезлӧ, лоасӧ сьӧд виззез.
Эна югӧррес миян син одзись ӧшисӧ. Нія колісӧ хлорофилл пытшкӧ. Сідзкӧ хлорофиллыс гӧрд, виж, лӧз да фиолетовӧй югӧррез кольӧ ас пытшкас.
Шонді югӧрлӧн энергияыс (кӧр югӧрыс кутсьӧ хлорофиллӧн) кольӧ хлорофилл пытшкӧ.
Эта кольӧм энергия мунӧ руись босьтӧм углекислӧй газ торйӧтӧмӧ.
Хлорофилл пытшкӧ босьтӧм энергия кыдз бы углекислӧй газлісь торресӧ зэгӧтӧ и калькӧтӧ ӧтамӧд бердісь — лоӧ углерод да кислород.
Югыт вылісь да вуджӧр сайись быдмассэз.
Ровно бы колӧ — кыным унажык шонді югӧр усьӧ лист вылӧ, сыным ӧддьӧнжык колӧ руись боссьыны углеродлӧ, сыным аслыс быдмасыслӧ колӧ чожжыка да буржыка быдмыны, зорамны.
Именно сідз унажыксӧ и овлӧ.
Паськытінын, кушинын быдмыны любитан быдмас пӧлӧс, зэв ӧддьӧн оз радейтӧ вуджӧрӧн нійӧ сайӧвтӧм.
Босьтны кӧть примерӧ ёгтурун — свёклаувт турун да пондывны сійӧ быдтыны вуджӧр сайын. Эта ёг туруныс любитӧ паськыт югыт,
и кыным ӧддьӧнжык сы шогья пондам сайӧвтны югыт, сыным умӧльжыка, винержыка сія пондас зорамны (36 рис.).
Кӧр жӧ опыт туйӧ пондылӧмась быдтыны паськыт югытінын вуджӧр сайись быдмассэз (быдмассэз, кӧдна радейтӧны быдмыны вуджӧр сайын) эна быдмассэс зэв умӧля зорамӧмась (37 рис.).
Нылӧ паськыт югытыс умӧль. Паськыт югыт одзын быдмытӧн нія уна ӧштӧмась пытшсиныс влага, устьицеэз мыйкӧ дырнаись тупкасьӧмась, и быдмас тшыгьявны пондӧма.
Эна опыттэз сьӧрті и мӧдік наблюденнёэз сьӧрті позьӧ шуны: быд быдмас пӧлӧс шӧрын эмӧсь югыт любитан быдмассэз и вуджӧр любитан быдмассэз.
Быдмас вӧдитан уджын колӧ бытшӧма тӧдны, кытшӧм быдмаслӧ мымда колӧ югыт.
Искусственнӧя югдӧтікӧ быдмас культураэзлӧн быдмӧм.
Опыттэз сьӧрті тӧдӧмась: углеродсӧ быдмас вермӧ руись босьтны и искусственнӧй югытінін.
Ыджыт электрическӧй лампаэз увтын удайтчывлӧма быдтыны и ӧгурчиэз, и томаттэз.
Дзик шонді югыттӧг эна быдмассэзлӧн вермӧмась аркмыны плоддэз и гырисяӧн, и чӧскытаӧн ӧткодьӧсь нормальнӧй условиеэзын воӧм плоддэзкӧт.
Но этатшӧм быдмас культураыс сувтӧ ӧддьӧн донӧн.
Ойланьын, кытӧн шонді югытыс быдмаслӧ оз тырмы, электричество аслас югытӧн теплицаэзын отсалӧ шонді югытлӧ быдтыны быдмас.
abu
Бӧра жӧ опыттэз мыччалӧны, што пыд арсӧ и тӧвсӧ, кӧр шонділӧн югытыс оз тырмы, электрическӧй гырись лампаэзӧн югдӧтӧмсянь карччез унаӧн перытжыка зорамӧны и чожажыка воӧны и сетӧны ыджытжык урожай нія быдмассэз сьӧрті, кӧдӧ быдтікӧ эз вӧв содтӧма югытыс (38 рис.).
Быдӧс эна опыттэс мыччалӧны: шонділісь югытсӧ позьӧ вежны искусственнӧй югытӧн — электрическӧй югытӧн.
А эта сетӧ миянлӧ возможносттез веськӧтлыны быдмас зорамӧмӧн, вежлавны сылісь быдман срок, джендӧтны плод сетан период.
Кытшӧм зависимость лист форма коласын да югдӧтӧм коласын.
Лист вылӧ югыт усьӧмсянь быдмаслӧн лоӧ руись питайтчӧм. Унажык усьӧ югыт, унажык быдмас и питательнӧй веществоэз босьтӧ.
Югыт усьӧм сьӧрті лислӧн и форма вежсьӧ, югыт усьӧм сьӧрті листтэз и за вылын пукалӧны.
Унажыксӧ лист пластинкалӧн формаыс паськыт, ляпкӧса.
Но эта формаыс ӧткодьӧн сылӧн оз кольччы. Быд быдмаслӧн аслас лист форма.
Эта лист формалӧн вежсьӧмыс миянлӧ лоас тӧдана, пондыны кӧ видзӧтны, кытшӧм условиеэзын быдмӧ быдмас.
Вуджӧр сайын быдман быдмассэзлӧн листтэз кӧть кӧр овлӧны паськытжыкӧсь, быдсаӧсь, гырисьжыкӧсь.
Югыт вылын быдман быдмассэзлӧн листтэз векнитикӧсь, поснитжыкӧсь, лист пластинка мукӧд кадӧ уна торйӧ торьясьӧма.
Ӧтік эта сьӧрті токо позьӧ шуны — лислӧн форма абу кытшӧмкӧ случайнӧй.
Позьӧ адззыны, кӧр ӧтік быдмаслӧн, кӧда пантасьӧны не ӧтіклаын, не ӧткодь условиеэзын, пукалӧны за вылын неӧтчужӧма листтэз.
Босьтны кӧть бабапель турун (одуванчик).
Шонді вылын быдмикӧ сылӧн листтэз векнитикӧс, пыдына вундалӧм дораӧсь, пукалӧны топыта му бердын розеткаӧн.
Но вот эта жӧ бабапель туруныс быдмӧ вӧр дорын, либо садын — вуджӧрын, чужӧмыс сылӧн мӧдік.
Вуджӧр сайын быдмӧм бабапель турунлӧн листтэс унаӧн паськытжыкӧсь и гырисьжыкӧсь, доррес быдсаӧсь.
Быдӧс нія видзӧтӧны вывлань, а озӧ топыта водӧ му бердӧ.
Югыт вежлалӧмӧн позьӧ искусственнӧя петкӧтны листтэзлісь форма. Позьӧ петкӧтны сэтшӧм форма, кытшӧм быдмаслӧн и вексӧ оз овлы.
Вот кӧть босьтны примерӧн ӧтік интереснӧй опыт.
Кушиннэзын, ыб вылын быдмӧ лӧз дзоридза турун — гӧгрӧса лиса колокольчик (39 рис.).
Сылӧн листтэс кык чужӧмаӧсь.
Ӧтіккес гӧгрӧса чужӧмаӧсь, узь оропокаӧсь, пукалӧны му бердын. Мӧддэз кузьмӧсаӧсь, оропоктӧмӧсь, пукалӧны за вылын и чурвидзӧны вывлань.
Кӧр быдмассӧ керисӧ вуджӧр сайӧ, сылӧн бокись вож вылын векнит листтэз туйӧ лоисӧ сэтшӧм жӧ гӧгрӧсаӧсь и кузь оропокаӧсь, кытшӧмӧсь овлӧны нормальнӧя быдман быдмаслӧн му бердын (40 рис.).
Эта сьӧрті учёнӧйезлӧн петіс вопрос: не сійӧн я эта колокольчиклӧн му бердісь листтэс гӧгрӧсаӧсь, што эстӧн турун коласас етшажык югытыс сюрӧ.
Ӧтветсӧ эта вылӧ видзис эта жӧ колокольчик, кӧда вӧлі пемыт вӧрын адззӧма.
Лиссэс сылӧн вӧлісӧ гӧгрӧсаӧсь, кузь оропокаӧсь и пукалісӧ за вылын ӧтмӧдӧрсянь (41 рис.).
Кыдз листтэз пукалӧны за вылын.
Быд лисыс быдмас за вылын пукалӧ сідз, медбы вӧлі унажык сылӧ югытыс.
А эта вермӧ лоны сэк, кӧр листтэз за вылын пукалӧны правильнӧя.
Тшӧкжыка, шуамӧ кӧть льӧмпулӧн, листтэз пукалӧны ӧтікӧн ӧтамӧд дынсянь ӧтылына да эшӧ и винтӧн (спиральӧн) (42 рис.).
Этадз пукалікӧ листтэз ӧтмоз тшӧка быдмас засӧ вевттьӧны и ӧтамӧдныслӧ сайӧвтны югытсӧ озӧ вермӧ.
Кӧр ми пондам быдмас вылӧ видзӧтны вылісянь, этатшӧм сьӧрсьӧн-бӧрсьӧн листтэзлӧн пукалӧмыс зэв бытшӧма син одзын.
Мукӧд кадӧ листтэз пукалӧны ӧтамӧд весьтын (супротивнӧя).
Босьтамӧ кӧть клён либо вӧр звездчатка турун — нылӧн листтэс зэв правильнӧя ӧтамӧд весьтӧ керсьӧмась (43 рис.), быд лист гоз пукалӧны крест-накрест.
Увланьын нія гырисьжыкӧсь, а вывланьын поснитжыкӧсь.
Сійӧн нія озӧ вермӧ сайӧвтны ӧтамӧдныслӧ югытсӧ.
Мукӧд быдмаслӧн, кӧдна вылӧ шонді югӧрыс усьӧ ӧтладорсянь, поснитжык листтэс пукалӧны гырись листтэз коласын.
Сэк аркмӧ кыдз бы лислӧн ӧтік паськыт лист вевдӧр.
Этатшӧма листтэзлӧн пукалӧмыс шусьӧ лист мозаикаӧн. Лис мозаика ми адззам вяз пулісь (44 рис.).
Листтэзлӧн вӧрӧм (движеннё).
Листтэз ассиныс чужӧмбан ладорнысӧ пыр бергӧтӧны югытланьӧ. Нія кыдз бы югыт сьӧрӧ вӧтчӧны.
Эта аркмӧ лист оропок кӧстісьӧм понісь.
Керку саддэз вылӧ видзӧттӧн ми пыр адззам, кыдз нія асланыс виль вожжезӧн югытланьӧ, ӧшынӧ кыссьӧны (45 рис.).
Босьтны кӧ да сад бергӧтны мӧдӧр бокнас, недыр мыйись бӧра жӧ лиса вожжез сылӧн ӧшынланьӧ, югыт сьӧрӧ бергӧтчасӧ.
Эстӧн дивоыс абу нем, быдӧс тӧдана и вежӧртана.
Вуджӧр сайись ладорыс томыник вожлӧн да лист оропоклӧн быдмӧ чожжыка югытланисся,
вуджӧр сайись ладорыс югыт вылісь ладорсӧ быдмӧмнас кыдз бы одзалӧ, сійӧн лист и томыник вож и бергӧтчӧны югытланьӧ.
Выводдэз.
Быдӧс примеррес, кӧдна этчӧ пыртӧмась, миянлӧ висьталӧны: югыт понісь вежсьӧ лислӧн и форма, и положеннё.
Югдӧтан условиеэз вежӧмсянь вежсьӧ и быдмаслӧн чужӧмбан.
Неӧткодь югытсянь вежсьӧ и быдмас гӧгӧрись среда и быдмас пытшкыс.
Кӧр, шуам, югытыс чинӧ, сэк етшажык быдмас босьтӧ пытшкас углерод.
Этасянь етшажык и органическӧй веществоэз быдмас пытшкын аркмӧны.
Быдмаслӧн питайтчӧмыс умӧльсялӧ.
А етша кӧ быдмасыс питайтчӧ,
сылӧн тшыгйӧн олӧм понісь зорамӧмыс умӧля мунӧ и чужӧмыс сылӧн вежсьӧ.
5. Быдмассэзлӧн лолалӧм.
Быдмаслӧн руись питайтчӧм да лолалӧм — эна кык процесс, кӧдна быдмас пытшкын и кӧдна ӧтамӧд вылӧ озӧ вачкисьӧ.
Углерод босьтӧм понісь быдмас пытшкын аркмӧ и содӧ органическӧй вещество.
Лолалӧм понісь эта органическӧй вещество разьсьӧ: углерод — эта медколан тор органическӧй веществолӧн ӧтлаасьӧ кислородкӧт и аркмӧ углекислӧй газ.
Но, а лолалӧ я быдмас?
Углерод босьтӧмкӧт тшӧтш вермӧ я аркмыны углекислӧй газыс быдмас пытшкын, мӧд нёжӧн кӧ, вермӧ я лоны сідз, што углерод и боссьӧ быдмас пытшкӧ и бӧр сэтӧн жӧ ӧтлаасьӧ кислородкӧт?
Первӧй морт, кӧда первуйись ас одзас сувтӧтіс вопрос, вермӧ я отир да животнӧйез лолалӧмсянь «тшыкӧм» ру «бытшӧмсявны» и вились лоны лолалӧм понда бурӧн, вӧлі английскӧй учёнӧй Пристлей.
ХVIII векӧ дас воӧн одзжык знаменитӧй опыттэзся, кӧда сувтӧтіс учёнӧй Сенебье, Пристлей друг дивитіс мир пасьта учёнӧйезӧс аслас осьтӧмӧн.
Пристлей стекляннӧй колпак увтӧ лэдзис шырӧс и видзис сійӧ сэтӧн сэтчӧдз, кытчӧдз шырыс эз пӧд.
Сэк сія эта колпак увтӧ жӧ сувтӧтіс веж быдмас — мята.
Мыйкӧ дырнаись лэдзис сэтчӧ шырӧс. Шыр кольччис ловья.
Эта опытӧн Пристлей зэв бура мыччаліс, што углекислӧй газ, кӧдӧ лолавтӧн ас пытшкись лэдзӧны животнӧйез, мӧдкодьсялӧ веж быдмас уджалӧм понісь, углекислӧй газ туйӧ лоӧ кислород.
А кӧр Пристлей ассис опыт керис рытсӧ — быдмасыс углекислӧй газсӧ эз разь и эз лэдз кислородсӧ, — колпак увтӧ лэдзӧм шыр куліс и быдмас дырни.
Унаись эта бӧрын Пристлей бертліс аслас опыт дорӧ.
Мукӧд кадӧ опыт сылӧн удачнӧя петліс, мукӧд кадӧ вились эз петлы нем.
Токо кынымкӧ во бӧрті мӧдік учёнӧйлӧ удайтчис энӧ неудачаэсӧ Пристлейлісь объяснитны.
Вӧлі окончательнӧя висьталӧма, быдмас пӧ аслас веж листтэзӧн углекислӧй газсӧ вермӧ разьны токо югыт вылын.
А пемытінын быдмас токо босьтӧ кислород и лэдзӧ углекислӧй газ, мӧд нёжӧн кӧ, токо лолалӧ.
Кӧдзыс тусь чужтӧн лэдзӧ углекислӧй газ, ті эта йылісь тӧдатӧ ни.
И быдса веж быдмас лолалӧм йылісь — углекислӧй газ лэдзӧм йылісь кокни тӧдны.
Эта понда быдмас лэдзӧны паськыт стекляннӧй цилиндрӧ и вевдӧрсянь топыта пӧдналӧны, мед ру эз вермы пытшкас сюрны. Цилиндрсӧ быдмаскӧт сувтӧтӧны пемытінӧ.
Час-мӧд бӧрті цилиндр осьтӧны и пытшкас лэдзӧны ӧзтӧм масісь.
Масісь сэк жӧ кусӧ (46 рис.).
Известкаа ваӧн тӧдмалӧны: цилиндрын лоӧма углекислӧй газ.
Видно, сія сэтӧн лоӧма опыт дырни быдмасыс лолалӧмсянь.
Быдмас лолалӧ и югыт вылын.
Токо эта лолалӧмыс оз тӧдчы, сія вевттиссьӧ мӧдік процессӧн — углекислӧй газ разьсян процессӧн, мӧд нёжӧн кӧ — углерод боссян процессӧн.
Лунсӧ югыт вылын быдмас углекислӧй газ унаӧн унажык ас пытшкас босьтӧ, нежели сійӧ бӧр лэдзӧ.
Сідзкӧ югыт вылын быдмас пытшкын мунӧны кык ӧта-мӧдлӧ паныт процесс.
Ӧтыс — углерод босьтан процесс — питайтчӧм, органическӧй веществоэз керӧм.
Мӧдыс — лолалан процесс органическӧй веществоэзлӧн кислородкӧт ӧтлаасян процесс, мӧд нёжӧн кӧ, органическӧй вещество разьсьӧм.
Эна кык процессыслӧн неӧткодьыс лоас адззанажык, тшӧтшӧтны кӧ признаккесӧ нылісь эта таблицаокӧн:
Условиеэз
Процессэз
Кытшӧм газ боссьӧ
Кытшӧм газ лэдзсьӧ
Веж быдмасыс югыт вылын 1.
Углерод босьтӧм — питайтчӧм (органическӧй веществоэзлӧн ӧксьӧм).
Углекислӧй газ.
Кислород
2. Лолалӧм (органическӧй веществоэзлӧн бырӧм).
Кислород
Углекислӧй газ.
Веж быдмасыс пемытінын
Лолалӧм
Кислород
Углекислӧй газ.
Быдмаслӧн лолалӧмыс ӧткодь животнӧйез лолалӧмкӧт.
Но быдмаслӧн лолалан процессыс мунӧ унаӧн жагӧнжыка.
Пыр вӧран, ӧтмӧдӧрӧ ветлан животнӧйыс лолавтӧн органическӧй веществоэз видзӧ невнаӧн токо етшажык босьтӧммезся.
Быдмасын жӧ боссьӧ югыт вылын веществоыс 20-исьӧн унажык видзӧмысся. Но эта мунӧ токо югыт вылын.
Эта сьӧрті и позьӧ тӧдны, мыля быдмасын органическӧй веществоэзлӧн масса пыр содӧ, а оз чин.
Висьталімӧ ни, быдмасын лолалан процессыс мунӧ жагӧна, эта сьӧрті сылӧ и тодель лолалан органнэз озӧ колӧ.
abu
Лолалан процесс быдмасын мунӧ быд ловья быдмас торын.
6. Кыдз быдмас пакмӧтӧ ва.
Уна я пакмӧ ва.
Медпростӧй наблюденнё мыччалӧ — быдмасыс пыр пакмӧтӧ ва.
Колӧ миянлӧ токо стаканӧн вевттьыны кынымкӧ свежӧй, летыштӧм листок, кыдз мыйкӧ дырнаись стакан стенкаэз вазясӧ.
Эта вазьӧмыс и эм ва, кӧдӧ листтэз пакмӧтісӧ ас пытшсиныс.
И мӧдік не сложнӧй опыт сьӧрті ва пакмӧм йылісь позьӧ тӧдны.
Пробиркаӧ кисьтӧны ва. Ваӧ лэдзӧны свежӧй листок. А медбы пробирка вевдӧрӧт ваыс эз вермы пакмыны, кисьтыштӧны невна виок.
Мед мӧдпыра тӧдны, мыйви ваыс пукалӧ перво кисьтӧм бӧрын, пробирка стенка вылӧ пасйыштӧны. Эта бӧрын вӧлись видзӧтӧны, кытшӧм кадӧ уна я быдмас листок пондас пакмӧтны пробиркаись ва.
Пробирка стенка вылӧ пасйыштӧм сьӧрті да ва пукалӧм сьӧрті позяс адззыны, мый чожа быдмас листыс пакмӧтӧ ва.
Позьӧ точно тӧдны, уна я васӧ быдмасыс пакмӧтӧ.
Эта понда быдмассӧ быдтӧны кашникын, стенкаэс кӧдалӧн ас пырйӧт валӧ пакмыны оз лэдзӧ. Быдмассӧ кашниккӧт ӧтлаын сувтӧтӧны весаэз вылӧ. Керӧны сідз, мед ва эз вермы пакмыны кашникись и му вевдӧрӧт.
Сэсся весаэз лӧсьӧтӧны равновесиеӧ. Мыйкӧ дырнаись веса чашка гириэзӧн быдмаса чашкасӧ кыскас. Сідз позьӧ тӧдны точно, уна я пакмӧтіс быдмасыс ва, 1 часӧн, ойкӧлӧн и с. одз.
abu
Эна и мӧдік опыттэз сьӧрті тӧдӧмась; быдмас пӧ ӧддьӧн уна пакмӧтӧ васӧ.
Сідз: ӧтік кукуруза за гожумбытӧн пакмӧтӧ ва 200 кг кыным, мӧд нёжӧн, 17 ведра.
Сідз жӧ тӧдӧмась, уна я пакмӧтӧ васӧ зӧр. 1 га вылісь зӧр кӧдзан кадсянь воан кадӧдз пакмӧтӧ 3000 т ва, мӧд нёжӧн кӧ, 240 000 ведра.
Ми тӧдам, мый дона быдмаслӧ ва. А сэтӧн сымда сія ачыс ва пакмӧтӧ. Мыйкӧ эна явленнёэс ӧтамӧдлӧ панытасьӧны.
Однако бытшӧмика быдмас пытшкись явленнёэз велӧтӧмӧн эта панытасьӧмыс миянлӧ лоас вежӧртана.
Мыйлӧ колӧ ва пакмӧм.
Ваын, кӧда быдмас вужжезӧн сӧскиссьӧ муись, эм учитик процент минеральнӧй соввезлӧн.
Мед быдмас клеткаэзӧ пырны ӧтік грамм соввезлӧ, колӧ быдмас пырйӧт вуджӧтны быдса сюрс граммез ва.
Кыным перытжыка ва мунӧ быдмас пыр, сыным унажык быдмасӧ сюрӧны питайтчан соввез.
Бӧра жӧ точнӧй опыттэзӧн тӧдӧмась, листтэзын крахмал аркмытӧн пӧ быд 100 г углеродлӧ мунӧ 55 г кыным ва.
Но медбы быдмаслӧ содны сьӧкытнас 100 г вылӧ, колӧ пакмӧтны ва 1000-исьӧн унажык.
Эта ва пакмӧмлӧн, усегын, эм эшӧ и мӧдік значеннё быдмас олӧмын.
Жар лунӧ кӧ нетшкӧвтны быдмаслісь лист да вайӧтны сійӧ тшӧка бердӧ, тшӧкалӧ лоӧ кӧдзыткодь.
Ва пакмытӧн лист вевдӧрыс кӧдздӧтӧ.
Сідзкӧ листтэз ва пакмӧтӧмӧн оз сетӧ асьнысӧ сотны шонділӧ.
Лёпмӧм лист шонді вылын шоналӧ ӧддьӧнжык — ва сы дынӧ локтӧ етшажык.
Даже не дзикӧдз лёпмӧм лист шонді вылын шоналӧ ёнжыка, умӧля кӧ сы дынӧ локтӧ ва.
Мукӧд кадӧ быдмас вылын листтэз вермӧны сотчытӧдз шонавны. Эта понісь быдмас вермӧ дзикӧдз кувны.
Уна быдмас сотчӧ пӧдана парниккезын, кӧр парник рамаэз увтся руын ӧддьӧнӧв уна ва пар. Сэк валӧ пакмыны некытчӧ, ва парыс руас сэсся оз тӧр и пакмыны быдмас пытшкись дугдӧ.
Кыдз лӧсьӧтчӧма регулируйтны ва пакмӧм.
Муись ва сӧскиссьӧ, кыдз ми тӧдамӧ ни, быдмас вужжезӧн.
Лиссэз пыр быдмасісь ва пакмӧ.
Быдмас бура бытшӧма олӧ сэтчӧдз, кытчӧдз эна кыкнан процессыс мунӧны ӧтамӧд коласын согласнӧя.
Пондас кӧ ва пакмыны перытжыка вужжезӧн сӧскисьӧмся, сэк быдмас лёпмас: листтэз сылӧн и томыник улоккез ӧшӧтчасӧ увлань, кыдз трепиччез.
Кӧр эта мунӧ недыр, быдмас вермӧ эшӧ лӧсявны, ловзьыны, колӧ токо, мед лёпмӧминӧ локтіс виль ва.
Но мусинын кӧ ва оз тырны, олан явленнёэз быдмас пытшкын сувтӧны. Сэк быдмас быдсӧн вермас лёпмыны.
Питайтчыны быдмас и быдмыны оз понды.
А оз кӧ быдмы, плод не кӧдзыс оз аркмы.
Урожай усьӧ.
Дыр кӧ этадз пондас кыссьыны, быдмас шоналас шучкӧп, пондас косьмыны и медбӧрын кулас.
Но уна мукӧд быдмасыс кӧс кад дорӧ велӧтӧма асьсӧ, чулӧтӧ сійӧ нем туйӧ.
Зэв интереснӧй эм быдмас — молодило, кӧда быдмӧ песӧкаинын, шондіӧн сотанінын.
Листтэс эта быдмаслӧн кызӧсь, вазылькьяӧсь и ӧксьӧмась розеткаӧ.
Молодило быдмас вермас 90% кыным ва ӧштыны пытшсис и сёжӧ кольччыны ловйӧн.
Пустыняэзын эмӧсь мӧдіккез, интереснӧй чужӧма жӧ быдмассэз — кактуссэз.
Заэз нылӧн быд чужӧмаӧсь овлӧны, мукӧд кадӧ ыждананыс быдса гырись пу сувдаӧсь (47 рис.).
Но листтэз оз тӧдчӧ: нія нылӧн желёккезӧ (колючкаэзӧ) пӧрӧмась.
Зато заэс пыр овлӧны вежӧсь и быдмас босьтӧ углерод аслас за вевдӧрӧн.
Кактуссэзын эм зэв ыджыт ва запас.
Пакмӧ ваыс ӧддьӧн жагӧна и невнаӧн. Уна пакмыны валӧ некыт — ва вевдӧрыс вевттисьӧма кыз кучикӧн, а устьицеэз етшаӧсь. Эта понісь кактуссэз и быдмӧны ӧддьӧн жагӧна.
Умӧль кадсӧ чулӧтӧмыс быдмаслӧн видзсьӧ клетка протоплазмаын.
Мукӧд кадӧ невна кӧ протоплазмаись ва ӧшис, быдмас кулӧ ни.
Но этакӧт ордчӧн эмӧсь и сэтшӧм быдмассэз, протоплазма кӧдналӧн вермӧ овны и сэк, кӧр ваыс пакмӧ ӧддьӧн уна.
Пример туйӧ позьӧ босьтны кӧдзыс туссез. Кӧдзыс тусьлӧн клеткаэз вермӧны кольны дзикӧдз ватӧг.
Быдмас пӧлӧс, кӧдна вермӧны бытшӧма чулӧтны кӧс кад, шусьӧны засухоустойчивӧй быдмассэзӧн.
Но не ӧтік протоплазмаӧн кӧс кадӧ видзсьӧны быдмассэз.
Неӧтік сюрс воӧн мукӧд быдмаслӧн аркмӧмась тодель приспособленнёэз, кӧдна озӧ сетӧ валӧ уна пакмыны, кӧр мусинын сія етша.
Унажыксӧ эта овлӧ устьицеэз пӧднасьӧмсянь.
Устьицеэз асланыс оссьӧмӧн — пӧднассьӧмӧн ва пакмӧмсӧ кыдз бы регулируйтӧны.
А мукӧд кадӧ и асьныс устьицеэз овлӧны етшаӧсь либо куйлӧны нія особӧй гӧпоккезын лист вевдӧрын, кыдз например, степпезын быдмись ирис нима быдмаслӧн.
Степын быдмись уна быдмассэзлӧн, например ковыльлӧн, листтэз векнитикӧсь и вевттисьӧмась вевдӧрсянь кыз кучикӧн да эшӧ и гартчӧмась трубкаэзӧ.
Устьицеэс нылӧн куйлӧны трубка пытшкас.
Эта оз лэдз кӧс, шоналӧм рулӧ павкӧтчыны устьицеэз дорӧдз. Этасянь пакмӧмыс чинӧ.
Ва вермӧ пакмыны не ӧтік токо устьицеэзӧт.
Мукӧд быдмаслӧн, кӧдналӧн лист кучишокыс вӧсни, ваыс вермӧ шучкӧп мунны лист кучишок пыр.
Засухоустойчивӧй быдмассэзлӧн жӧ лист кучикыс овлӧ зэв кыз да эшӧ и боссьӧма тодель веществоӧн, кӧда пыр ва мунны оз вермы некыдз.
Эта эшӧ етша, — мукӧд кадӧ кучишок вевдӧрсянь вевттиссьӧ либо воск кодь веществоӧн кыдз, шуам, капусталӧн, либо гын код сиоккезӧн, кыдз, шуам, ошпель турунлӧн (коровяк) да каньлапа турунлӧн.
Медбӧрын, лист пластинка чинӧмсянь сідз жӧ ва пакмиссьӧ етшажык (видзӧт 7 удж, 130 листбок.).
Мукӧд быдмаслӧн листтэз овлӧны ӧддьӧн посниӧсь, босьтны примерӧ кӧть понуль пу.
Засухоустойчивӧй быдмассэз позьӧ тӧдны то мый сьӧрті, нылӧн му вевдӧрын органнэс посниӧсь, зато мусинын олан органнэз зэв гырисьӧсь.
Мукӧд кадӧ степпезын олан быдмассэзлӧн, босьтны кӧть степ урбӧжӧс (полыньӧс), листтэз и нежнӧйӧсь, зато вужжес сылӧн зэв пыдӧ муӧ пырӧны.
Эта бӧра жӧ отсалӧ быдмаслӧ повтӧг чулӧтны кӧть кытшӧм кӧс кад (48 рис.).
Культурнӧй засухоустойчивӧй быдмассэз коласісь позяс висьтавны виноград, кӧда быдмӧ лунланьын. Сылӧн вужжез сідз жӧ муӧ пырӧны зэв пыдына.
Кӧть и быдмозӧн быдмассэз лӧсьӧтчӧмась кӧс каддэз терпитны, но сёжӧ дыр сулалан кӧс кад вермӧ быдса ыббез вылісь вийны, сотны нійӧ. Ыджытжык вред кӧс кадсянь лоӧ миян ыббезлӧ асывлань районнэзын.
Сійӧн кӧс кад сулалана (засушливӧй) районнэзын нуӧтсьӧны быдкодь мероприятиеэз, мед пессьыны кӧс кадкӧт (засухакӧт), кӧда тшыкӧтӧ уна ыб вылісь культурнӧй быдмассэсӧ.
Ӧтік сэтшӧм пессян мераӧн лоӧ быд район понда туян засухостойчивӧй культураэз бӧрйӧм.
ВИТӦТ ГЛАВА.
ЗА.
КЫДЗ БЫДМАСЫН ВЕТЛӦНЫ И МӦДКОДЬСЯЛӦНЫ ПИТАТЕЛЬНӦЙ ВЕЩЕСТВОЭЗ.
Вуж система да лист система унажыксӧ ӧтамӧд дынсянь ылынӧсь.
Кыным вылынжыка заыс видзӧ ассис листтэсӧ, сыным унажык нія босьтӧны югыт. Зато и кузьжык туй мунӧны питательнӧй веществоэз вужжезсянь листтэзӧдз.
Эта туйыс куйлӧ за пытшкын.
За пытшкӧт жӧ мунӧны и веществоэз, кӧдна аркмӧны листтэзын.
Нія мунӧны томыник, быдман заэзӧ, лэдзчӧны и вужжезӧдз.
1. Залӧн строеннё.
Кыдз вевдӧрсяняс керӧма пу ув.
Вундыштны кӧ поперег пу ув, шуам нинпу ув, позьӧ адззыны даже рӧм сьӧрті куим слой — кор, пу да сьӧлӧмӧс (видз. 4 удж 127 листбок).
Кӧр ми увлісь корсӧ кульыштам, миян коляс чочком палкаок.
Этӧ палкаоксӧ поткӧтӧм бӧрын ми адззам: пуыс куйлӧ вевдӧрланяс, а сьӧлӧмӧсыс кыссьӧ шӧрӧттяс.
Корын бӧра жӧ тӧдчӧны куим слой.
Вевдӧрсяняс куйлӧ гӧрдӧв рӧма (бурӧй) топыт кучишок.
Сы увтын куйлӧ вежӧв рӧма вевдӧр кор — паздер, кӧдаись мӧдпыр аркмӧны кучишоклӧн виль слойез.
Медпыдын слойыс чочком рӧма — луб (нин).
Кӧр ми этӧ лубсӧ пондам паськӧтлыны чуннезӧн, позьӧ адззыны, строеннёыс сылӧн волокнистӧй.
Лублӧн и пулӧн вевдӧрыс волькыт и нильыг.
Эта овлӧ сысянь, што кор увтас, кытӧн корыс локтӧ пу бердӧ топ, эм вӧснитик ловья клеткаэзісь слой.
Стенкаэз эна клеткаэзлӧн вӧснитикӧсь и нежнӧйӧсь.
Кор кульыштікӧ эна клеткаэз жугалӧны, и мый нылӧн пытшканыс эм, быдӧс петӧ ортсӧ.
Эта слойыс шусьӧ камбийӧн, Тулыссӧ камбий овлӧ зэв вазылькья и пулӧн корыс кульсьӧ кокнита.
Кытшӧм строеннёа пу увлӧн пытшкӧсыс.
Пондыны кӧ микроскоп увтын видзӧтны вӧснитика поперег шӧрыштӧм нинпулісь томыник ув шӧрӧмок, ми адззам, кытшӧм сложнӧй строеннёыс пу ув тканнезлӧн (49 рис.).
Быд чужӧма клеткаэз коласын син вылӧ усьӧны кузь трубкаэз. Ны коласын эмӧсь паськытӧсь и эмӧсь векнитикӧсь.
Эна трубкаэс — пу сосуддэз.
Нія аркмӧмась кузьмӧса нюжалӧм клеткаэзісь, кӧдна стенкаэзнаныс ӧтамӧдкӧт йитсьӧмась, а пытшкись стенкаэзныс жугалӧмась, разьсьӧмась. Этасянь трубкаэз и аркмӧмась.
Сосуд стенкаэзлӧн мукӧдлаас эмӧсь кызіннэз, кыдз бы гӧрӧддэз.
Мукӧд сосуддэзлӧн эна кызіннэс аркмӧмась винтӧн моз, мукӧдлӧн — кытшшез моз. Винта сосуддэслӧн стенкаэс эшӧ пырӧтаӧсь. Эна пырӧттэс шусьӧны пораэзӧн. Быд пора пыртӧ мӧдік клеткаӧ.
Сосуддэз бердӧ топыта локтӧны кузьмӧса, йыла клеткаэз, стенкаэз кӧдналӧн сідз жӧ пырӧтаӧсь — порааӧсь,
шусьӧны нія пу сӧннэзӧн.
Сосуддэз и сӧннэз аркмӧмась кулӧм клеткаэзісь. Стенкаэс нылӧн пусялӧмась.
Ныись медуна пуыс и аркмӧ. Сосуддэз коласын да сӧннэз коласын эм и ловья клеткаэзісь ткань. Эта тканьыс шусьӧ основнӧй тканьӧн.
Мӧдкодь строеннёа увлӧн луб.
Перво наперво син вылӧ усьӧны ӧддьӧн кузя нюжалӧм югьялан луб сӧннэз. Луб сӧннэз — зэв кыз стенкаэза клеткаэз. Нылӧн гыркныс оз тыдав, сы кызаӧсь стенкаэс.
Луб слойын тожӧ эмӧсь кузь трубкаэз, токо строеннёныс нылӧн пу трубкаэз сьӧрті мӧдкодьжык.
Нія сідз жӧ, кыдз и пу трубкаэз, аркмӧмась ӧтамӧд коласын йитсьӧм клеткаэзісь. Но поперешнӧй стенкаэзныс нылӧн абу ӧшӧмась, а токо пырӧтаӧсь. Эта понісь эна трубкаэс вачкисьӧны пожланьӧ.
Сійӧн нійӧ и нимтӧны пожа трубкаэзӧн (50 и 51 рис.).
Пуись сӧннэз да лубись сӧннэз залӧ сетӧны чорытсӧ, крепытсӧ.
Сосуддэзӧт и пожа трубкаэзӧт ӧтмӧдӧрӧ ветлӧны заын жидкосттез.
Сосуддэз да пу сӧннэз ӧтлаасьӧмась и ныись аркмӧны сӧнъя-сосуда пучоккез. Пу сосуддэзісь да пу сӧннэзісь аркмӧ пу, а пожа трубкаэзісь да луб сӧннэзісь аркмӧ луб.
Тавося нинпу ув кӧ вундыштны шӧри, позьӧ адззыны — сӧнъя-сосуда пучоккес сылӧн куйлӧны правильнӧй кытшӧн (52 рис.).
Быд торья пучокыс тув чужӧма и ӧтмӧдӧр бокас сылӧн куйлӧ основнӧй ткань.
Основнӧй ткань сӧнъя-сосуда пучкаэз коласӧт мунӧны вӧснитик, кузь, югӧррезӧн. Эта сьӧрті нія сідз сьӧлӧмӧс югӧррезӧн и шусьӧны. Сьӧлӧмӧс югӧррез за сьӧлӧмӧссянь мунӧны ӧтӧрланьӧ.
Сӧнъя-сосуда пучока кытш адззӧмӧн янсалӧ пуа тор вылӧ и луба тор вылӧ.
Сосуда пучоккес луба кытш дорись янсалӧны рышкытжык строеннёӧн. Луба кытшыс топытжыка аркмӧм.
Микроскоп увтын видзӧттӧн ми адззам: эна кыкнан кытш коласын — пу сосуда кытш коласын да луб кытш коласын — куйлӧ слойӧн камбий.
Камбийсянь сылӧн пытш ладорся торыс шусьӧ пуӧн,
а ӧтӧр ладорся торыс корӧн.
Сідзкӧ сосуддэз кӧть кӧр куйлӧны пуын, а пожа трубкаэз — корын.
Не быд дзоридза быдмаслӧн сӧнъя-сосуда пучоккез куйлӧны ӧтмоз правильнӧй кытшшезӧн.
Ӧті быдмассэзлӧн кукурузалӧн пучкаэз паськалӧмась заас основнӧй ткань пасьта (53 рис.).
2. Мыйлӧ колӧ быдмаслӧ за.
Вылӧ лэбан ток.
Важын ни учёнӧйез тӧдӧмась, кульыштны кӧ пӧ увлісь кытшӧн пуӧдз кор да сувтӧтны эттшӧм увсӧ ваӧ — улыс оз кув.
Позьӧ думайтны — ваыс улысянь вылӧ кайӧ не кор пырйӧт, а пуӧт.
Но оз сія кай и сьӧлӧмӧсӧт.
Этӧ ми тӧдам уна примерись. Ми тӧдам мукӧд пулӧн шӧрас сьӧлӧмӧсыс сісьмӧ и аркмӧ гырк.
Эсся эмӧсь быдмассэз, шуам сюэз, кӧдналӧн сьӧлӧмӧсыс абу.
А вермам керны и асьным опыт.
Босьтам тавося нинпу ув да ӧт конечсӧ сылісь лэдзам гӧрд чернилоӧ, а мӧд конечсӧ босьтам ӧмӧ да пондам за пытшкись сӧскыны ру. Недыр мыйись заӧ вель вылына гӧрд чернилоыс каяс.
Поперег шӧрыштӧм бӧрын позяс адззыны — гӧрд чернило сӧскиссьӧма пуӧ, а не корӧ.
Поткӧтны кӧ ӧні улоксӧ доль, позяс адззыны: за сьӧлӧмӧс коласын да кор коласын тыдалӧны кык гӧрд рӧма слой (видз. 8 удж, 130 листбок).
Эна опыттэз сьӧрті лоӧ бура тӧдана, гӧрд жидкость вывлань лэбӧ токо пу сосуд трубкаэзӧт.
Ӧні миян одзӧ сувтӧ вопрос: а мыля жӧ, мыйсянь ва лэбӧ заӧт вылӧ и мукӧд кадӧ лэбӧ зэв вылына?
Эта явленнёыс сложнӧй. Сійӧ позяс вежӧртны, петкӧтам кӧ син одзӧ простӧй схемаӧн.
Абу дивоыс сэтӧн нем, кӧр ваӧ сувтӧтӧм миян орӧтӧм пу улыс пондӧ бытшӧма овны, дыр оз косьмы. Листтэзісь ваыс пакмӧ, и этасянь дозісь, кӧдаӧ сувтӧтӧма быдмасыс, за сосуддэзӧ пырӧ валӧн виль порция.
Эта лоӧ сысянь, што пакмӧмсянь лисас небытінісь пакмӧтан клеткаэзын ваыс чинӧ.
Сэк жӧ эна клеткаэзӧ — осмос закон сьӧрті — матісьжык лист жилкаэзісь сӧскисьӧ ва.
Ӧні жилкаэзас ваыс чинӧ.
Но жилкаэзӧ ваыс бӧра пырӧ за сосуддэзісь.
Сідз порция бӧрсянь порция ваыс и кыссьӧ пыр за трубкаэзӧт вылӧдз.
Сія жӧ аркмӧ, кӧр быдмас садитӧма ва мусинӧ.
Пакмӧм ва туйӧ быдмасӧ вужжез пыр муись вились сӧскиссьӧ виль ва.
Перво мусинісь растворрез боссьӧны вуж сіэзӧн. Сыбӧрын сіэз нійӧ сетӧны матісь гӧгӧр вуж клеткаэзӧ.
Эна клеткаэзісь растворрез кыдз бы пичкиссьӧны вуж сосуддэсӧ, а ны кузя лэбӧны вывлань, заӧ.
Эта процессыс быдӧс мунӧ перыта. Вуж клеткаэзӧт растворрезлӧн за сосуддэзӧдз сюрӧмыс шусьӧ быдмас пытшкын вужлӧн нырыштӧм.
Вужлісь нырыштӧмсӧ позьӧ адззыны, кӧр ми быдмассӧ вуж бердӧттяс моз орӧтам да мырок вылас резина трубкаокӧн кышалам стекляннӧй трубка (54 рис.).
Недыр мыйись стекляннӧй трубка пытшкӧ ӧксяс ва и пондас лэбны вывлань.
Мукӧд кадӧ тулыссӧ зэв уна ва петӧ, кӧр быдмасыс пуӧдз тякнитан черӧн либо сылісь ув орӧтан.
Но вужлӧн нырыштӧмыс васӧ зангӧ токо сосуддэзӧдз.
Мӧдік жӧ ва лэбтісьӧн улісянь — вужжезсянь вылӧ лоӧны листтэз — нія пыр васӧ пакмӧтӧны.
Этӧ ми буржыка вежӧртӧм могись мыччалімӧ схема, кыдз вылӧ вужжезсянь лэбӧны растворрез. Былись жӧ быдмас пытшкын эна явленнёэс мунӧны унаӧн сложнӧйжыка.
Улӧ лэдзчан ток.
Кӧр мӧдӧны быдмас бердісь быдтыны мӧдік сэтшӧм жӧ быдмас, пельдӧтӧны улок и сувтӧтӧны ваӧ.
Мыйкӧ дырнаись ваын ув конечӧ аркмӧ кызінок, а недыр мыйись эта кызінокись пизьӧтӧны чочком вужоккез.
Эна вужоккес пизьӧтӧны быдмас пытшкӧ заптӧм органическӧй веществоэзӧн.
Но кыдз эна веществоэз вылісянь, кытӧн нія аркмисӧ, улӧ вужжезӧдз лэдзчисӧ?
Кытшӧн кор кульыштӧм улоккӧт опыт миянлӧ бӧра висьталас кыдз мый керсьӧ.
Босьтны кӧ бадь ув либо тополь ув да корсӧ сылісь улын кытшӧн кульыштны и сувтӧтны конечнас ваӧ, то кор кульыштӧм вевдӧрӧ мыйкӧ дырнаись пизьӧтасӧ виль вужоккез (55 рис.).
Кытш увтын, либо нія совсем озӧ пизьӧтӧ, либо пизьӧтасӧ учитикӧсь.
Кытш вевдӧрын ув кызӧ,
а кытш увтын ув оз кыз, мый кыза первосянь вӧлі, сідз кольччӧ.
Этадз кӧ кытшӧн кульыштны кор быдса пулісь, мыйкӧ дырнаись пу кулас, косьмас, оз кӧ вермы кытш местасӧ босьтны.
Тыдалӧ, кытшӧн корсӧ кульыштӧмсянь питательнӧй соккез быдмас пытшкын улісянь вылӧ кайны вермӧны, а вылісянь органическӧй веществоэз вужжез дынӧдз сибавны озӧ вермӧ.
Эта сьӧрті позьӧ утлянно шуны: вылісянь улӧ — вужжезӧ кизертчӧм веществоэз лэдзчӧны корӧт.
Уна опыттэзӧн учёнӧйез тӧдӧмась: вылісянь, листтэзсянь кизер веществоэзлӧн улӧ лэдзчан туйыс кор лубын, а именно сылӧн пожа трубкаэз.
Кыдз быдмас пытшкын мӧдкодьсялӧны органическӧй веществоэз.
Органическӧй веществоэз, кӧдна аркмӧны быдмасас веж листтэзын руись босьтӧм углеродісь, быдмас кузя паськавтӧдз зэв ёна перво мӧдкодьсялӧны.
Клеткаись клеткаӧ вуджтӧг, ловья лист тканнезісь лэдзчан сосуда тканьӧ сюртӧг аркмӧм крахмал да белоккез пӧрӧны сылан веществоэзӧ.
Органическӧй веществоэз мунӧны медунасӧ томыник быдмас торрез питайтчӧмӧ.
Мымдакӧ мунӧ плодӧ, кӧдзысӧ, мымдакӧ ӧксьӧ запасӧн ловья тканнезын быдмас пытшкын.
Запас тэчсикӧ частӧ мунӧны дзикӧдз мӧдкодь процессэз ны сьӧрті, кӧдна йылісь вывланьын сёрнитім.
Углеводдэз да белоккез, кӧдна перво пӧрисӧ ваын сылан веществоэзӧ, а кӧр тэчсьӧны запасӧ, сылана веществоэзісь бӧр пӧрӧны ваын несылан веществоэзӧ и вӧлись бӧра быдса белокӧн да крахмалӧн тэчсьӧны запас ӧшсяніннэзӧ.
Но мукӧд кадӧ вермӧны запасӧ кольны и растворрезӧн, вот пример туйӧ босьтны кӧть сакара веществоэз луклісь.
Сідзкӧ, ми адззылім: вывлань лэбан ток — неорганическӧй соввезлӧн растворрез, кӧднӧ муись сӧскӧны вужжез, вылӧ листтэзӧ кайӧны пу сосуддэзӧт, а улӧ лэдзчан ток, кӧда аркмӧм органическӧй вещество растворрезісь, мунӧ кор кузя — луб кузя.
Аслас туй вылын эта улӧ лэдзчан ток органическӧй веществоэсӧ быдмас пасьта паськӧтӧ кӧдӧ вужжезӧ лэдзӧ, кӧдӧ запасӧ тэчӧ.
Но тулыссӧ, кӧр питательнӧй веществоэз зэв перыта да уна быдмас пытшкын ветлӧны, органическӧй веществоэзісь аркмӧм запассэз сюрӧны кайны вылӧ лэбан токкӧт ӧтлаын. Сэк нія лэбӧны неорганическӧй веществоэзкӧт ӧтлаын пу сосуддэз кузя.
Эта йылісь мийӧ тӧдам, кӧр керыштӧм местісь кыдзлӧн петӧ чӧскыт кӧра сӧк.
Но явленнёыс эта — временнӧй.
Ӧтівося быдмассэз заэзын пучоккез нюжалӧны ӧтмоз омӧн за кузя.
Нылӧн абу не кор не пу. Пожа трубкаэс да пу сосуддэс ордчӧн.
И токкес лэдзчӧны-кайӧны ӧтыс сосуддэз кузя, мӧдыс пожа трубкаэз кузя.
Кытшӧм биологическӧй значеннё му пытшкись заэзлӧн.
Быдмаслӧн зорамӧмыс оз пыр мун, а мунӧ орласьӧмӧн, периоддэзӧн.
Тулыссянь сія зэв чожа быдмӧ. Локтасӧ кӧдзыттэз, и быдмас либо кулӧ, либо дыр кежӧ — мӧді тулысӧдз дугдӧтӧ олӧмсӧ. Тӧв кежӧ кулан быдмассэз ас туяныс кольӧны зэв уна кӧдзыс.
Тӧвйись быдмассэз мӧдпыр тулысӧ, кӧр лоас шонытжык вились пондӧны овны, явитчӧны виль уввез, виль листтэз, а сыбӧрын и дзоридз.
Тулыссянь быдмаслӧн быдмӧмыс мунӧ перыта сысянь, што сылӧн запасыс готов, мӧймуся гожумӧ сія гожумбыт сійӧ заптіс. Тӧвсӧ запасыс оліс клеткаэзын, а тулыс локтіс, пондіс паськавны омӧн быдмас кузя.
Турун быдмаслӧн органическӧй веществоэза запас тӧвйӧ му увтісь заын. Муись за овлӧ быд чужӧма.
Унажыксӧ куим пӧлӧсӧ торйӧтӧны: корневище, клубень да луковица.
Корневище чужӧмнас ӧддьӧн вачкисьӧ вуж вылӧ, но вуж дорись сійӧ позьӧ тӧдны: йылас сылӧн эм почаок, а боккезас поснитик синоккез.
Эсся вевдӧрыс сылӧн овлӧ вевттьӧм чешуйкаэзӧн — лист пияннэзӧн (56 рис.).
Клубень аслас чужӧмӧн абу му вевдӧрись за кодь.
Типичнӧй клубень — картовки клубень.
И сёжӧ вуж вевдӧрись закӧт ӧткодьыс сылӧн кольӧма, и сійӧ позьӧ адззыны, керны кӧ сідз, кыдз мыччалӧма эта рисунок вылын (57 рис.).
Быд синокӧ колӧ бытшкыны спича и спичаись спичаӧ нюжӧтны сунис.
Сэк пондас тыдавны: клубень почаэс — синоккес куйлӧны клубеньын лёдззӧн-лёдззӧн, кытшлалӧны клубеньсӧ спиральӧн.
Топ сідз жӧ жӧ пукалӧны му вевдӧрись за вылын и листтэз и конувт почаэз.
Картовки клубеннезын медунаыс крахмал.
Сійӧ кокни тӧдны иодӧн.
Босьтны кизерик иод раствор да ӧтпырись вотьыштны вундыштӧм картовки вылӧ. Сэк жӧ миян син одзын картовки мичасяс сук лӧз рӧмӧ, а нето и сьӧдлӧз рӧмӧ.
Луковица (58 рис.) вачкисьӧ поча вылӧ.
Поткӧтны кӧ сійӧ шӧри доль, миян син одзын лоас тыдалана, луковицаын эм и дженытик заок, кӧда шусьӧ лук пыдӧсӧн,
а сы вылын ӧта-мӧд вылӧ керсьӧмась топ кызӧсь, чочкомӧсь чешуйкаэз.
abu
Эна чешуйкаэс пыдӧсын эмӧсь учӧтик почаоккез, кӧднаись мӧдпыр гожумсӧ пизьӧтӧны заэз.
Кӧр ми вундыштӧм луковица чешуйкаэз вылӧ вотьыштам иод, лӧз рӧмыс оз аркмы.
Сэтӧн крахмал абу, сэтӧн эмӧсь мӧдік органическӧй веществоэз, а ны коласын и сакар.
Залӧн мӧдік мӧдкодьсялӧммез.
Залӧн роль не ӧтік токо ас пыр вылӧ-улӧ питательнӧй веществоэзӧн растворрезісь токкез лэдзны.
Мӧдік эм сысся не учӧтжык роль — листтэз видзны да югытлань матӧжык лэбтыны, пукӧтны нійӧ ас вылын сідз, мед нія ӧтамӧднысӧ югыт шогья эз сайӧвтӧ.
Унажык за овлӧ веськыта сулалан и крепыт.
Но эмӧсь и сэтшӧм заэз, кӧдна зэв кузя нюжалӧны и сулавны озӧ вермӧ, сэк нія му бердӧт кыссьӧны.
Сэтшӧм засӧ ми тӧдам ӧгурчилісь, тыквалісь, озъягӧдлісь.
Мукӧд заэз вылӧ лэбӧны аслас приспособленнёэзӧн.
Шуам кӧть фасольлӧн, таглӧн за йыввес каттисьӧны мӧдік предметтэз бердӧ и сідз видзӧны веськыта сулалӧмӧн. Эна быдмассэзлӧн заыс гартчӧмӧн кайӧ. Но эмӧсь быдмассэз, кӧдналӧн заыс быд предмет бердӧ кутчисьӧ. Нійӧ сідз кутчисяна быдмассэзӧн и шуӧны.
Эна быдмассэзлӧн эмӧсь тодель усоккез (59 рис.), кӧдна аркмӧны то мӧдкодьсялӧм листтэзісь, кыдз анькытшлӧн, то заыс ачыс мӧдкодьсялӧ кыдз тыквалӧн.
Плющ быдмаслӧн вынтӧм заыс кайӧ вылына изовӧй стенаэз кузя да пуэз кузя аслас дженытик да чорыт вужоккезӧн.
КВАТЬӦТ ГЛАВА.
БЫДМАСЛӦН БЫДМӦМ И БЫДМӦМСӦ РЕГУЛИРУЙТӦМ.
1. Кыдз вывлань быдмӧ пу.
Пу почаэзлӧн строеннё и кыдз нія пукалӧны уввез вылын.
Пулӧн арсӧ листтэз киссьӧны. Мӧдпыр тулыссӧ почаэзісь потӧны виль листтэз.
Абу сэтшӧм пу не кус, кӧдналӧн бы уввез вылын эзӧ вӧлӧ почаэз.
Быд пулӧн поча аслас строеннёӧн вачкисьӧ мӧдік пу вылісь почаэз вылӧ, но чужӧмнаныс нія мукӧд кадӧ зэв ёна янсалӧны.
Почаыс форма сьӧрті, гырисяыс сьӧрті, рӧм сьӧрті кокнита позьӧ висьтавны, кытшӧм миян одзын быдмас.
Почаэз овлӧны гырисьӧсь, кыдз ясень пулӧн, ӧдва ӧдва тыдаланаӧсь, кыдз жасминлӧн либо даже дзикӧдз дзебсисьӧмӧсь кор чукыррезӧ, кыдз барбарислӧн.
Формаӧн почаэз овлӧны то гӧгрӧсаӧсь (ясеньлӧн), то кузьмӧсаӧсь, векнитикӧсь, кузьӧсь (топольлӧн).
Унажык почаэзлӧн пытшкись веж листоккез вевдӧрсянь вевттисьӧны чорыт кыш кодь чешуйкаэзӧн.
Мукӧд кадӧ эна чешуйкаэз шучкӧп вазьӧмась клей кодь лякасяна смолаӧн либо вевттисьӧмась тшӧка сиэзӧн.
Овлӧ и сідз: чешуйкаэз почаэзлӧн абуӧсь и сіэзӧн вевттисьӧны умӧля (крушина пулӧн).
Не пыр ӧткодь и пытшк строеннёыс почаэзлӧн. Мукӧд кадӧ почаэз ӧтік улок вылын и не ӧткодь строеннёаӧсь.
Ӧтіккезлӧн, шӧрӧт дженытик стерженёк вылын — кӧдаись мӧдпыр аркмас улок — пукалӧны ӧта-мӧд вылӧ ляпкисьӧмӧн вежӧв рӧма лист петассэз.
Эна — лист почаэз.
Мӧдіккезлӧн, эсся, листоккез увтӧ дзебсисьӧмась нежнӧй дзоридз петассэз.
Эна — дзоридз почаэз (видз. 5 удж 128 листбок).
Вермӧны я почаэз вевдӧрись дыжыс (оболочкаыс) да шӧбрасыс пытшкись торрез тӧвсӧ кӧдзыт шогья видзны?
Оз, умӧля видзӧ.
Миян паськӧм, животнӧйезлӧн гӧн видзӧны кӧдзыт шогья, веськытжыка висьталӧмӧн — отсалӧны видзны животнӧйлісь ассиныс шонытсӧ.
Но быдмаслӧн эта шонытыс абу.
Уввез и почаэз тӧвся кадӧ кынӧсь овлӧны шучкӧп, но озӧ кулӧ — нылӧн клетка протоплазма вермӧ паныт сулавны ыджыт кӧдзыт дырни.
Токо зэв дыр ыджыт кӧдзыт сулалікӧ мукӧд торыс быдмаслӧн, а кӧр и быдсӧн быдмас вермӧны кынмыны. Но кынмӧны унажыксӧ сэтшӧмӧсь, кӧдна абу велалӧмась кӧдзыт, суровӧй климат дорӧ.
Босьтны кӧ да почаэзлісь вевдӧрись кышсӧ, чешуйкаэсӧ кульны, почаэз зэв чожа косьмасӧ.
Сідз жӧ и томыник улок — кач кульыштӧм бӧрын косьмӧ. Не кӧдзыт шогья, а медӧддьӧнсӧ тӧвся косьтан ру шогья вевдӧр кышӧн вевттисьӧны почаэз.
Эта понда жӧ и качыс пуэз вылас.
Кытшӧм бы вӧсниӧсь эз вӧлӧ, эна вевдӧр дыжжез сёжӧ чожа и озӧ лэдзӧ кӧдзытсӧ пырны пыдӧ уввез пытшкӧ либо почаэз пытшкӧ.
А эта ӧддьӧн колан тор быдмаслӧ. Крута температура вежсьӧм понісь быдмас зэв чожа кулӧ.
Кыдз быдмӧ том улок.
Кӧр почаыс вӧрзьӧтчӧ потны (60, 2 рис.), пытшкись торрес сылӧн ыждӧны, поча вевдӧрись чешуйкаэс паськалӧны, — дженытик заок зэв чожа пондӧ нюжавны и аркмӧ томыник листоккеза томыник улок (61 рис.).
Ештас токо эта томыник улокыс бытшӧмика пӧрны улӧ, кыдз сылӧн конечас и лист конувттэзын бӧра ни аркмӧны тӧвьян почаэз.
Быдӧнныс ны коласісь виль тулысӧ этадз жӧ нюжалас томыник улӧ (62 рис.), аркмасӧ листоккез.
И сідз эта мунӧ воись воӧ, нюжалӧ улок.
Этадзи содӧмыс абу ӧткодь быд быдмаслӧн.
Зынапулӧн (бузиналӧн) ӧтівося ув мукӧдпырас быдса 2 метрӧдз нюжалӧ.
А ув пӧрись нинпулӧн ӧдва ӧдва гожумбытӧн нюжалӧ 2 см ӧдз.
Тшӧка ӧтік быдмас вылын кузяӧ быдмӧмыс быд увлӧн абу ӧткодь.
Ӧтіккез ны коласын нюжалӧны зэв чожа, нылӧн аркмӧны кузь гӧрӧдколассэз.
Мӧдіккез бӧра ны сьӧрись кольӧны, лоӧны дженытикӧсь (63 рис.).
Грушалӧн, например, ӧтӧрланись уввес зэв кузьӧсь и перыта быдмӧны, а крона пытшкись уввес, кӧдна вылын плода почаэз пукалӧны, аркмӧны дженытикӧсь.
Груша вылісь жӧ позьӧ адззыны дзикӧдз дженыт уввез, кӧдна быднёжӧн кӧстасьӧмась-виклясьӧмась, рубечасьӧмась.
Эна уввез конечаныс видзӧны кызін, кӧда шусьӧ «плодушкаӧн». Плодушка вылын бӧра жӧ эмӧсь плода почаэз (64 рис.).
abu
А дженытик уввез вылын аркмӧны мӧдпыр дзоридззез и плоддэз.
Кыдз пукалӧны пу вылын почаэз, сідз ныись виль, томыник улоккез и паськалӧны. Мукӧд кадӧ нія мунӧны ӧтамӧд бӧрсянь, а мукӧд кадӧ вилкаӧн — гозйӧн-гозйӧн.
Пӧрись пуэзлӧн унажык увтыс (заыс) овлӧ куш, увтӧм.
Позьӧ думайтны, пу заыс пӧ нюжаліс, и уввес, кӧдна кӧркӧ вӧлісӧ улын, кайисӧ, лэбисӧ закӧт вылӧ.
Но пондамӧ кӧ пу сьӧрын бытшӧмика видзӧтны, адззылам — эта абу сідз.
Пу заыс оз нюжав, а аслас йылӧн быдмӧ.
Воись воӧ пу вылын аркмӧны сё вились вились ув яруссэз.
abu
А увті пу заыс ныись кыдз бы весамӧ.
И сідз, кыдз ув йылын почаэз пукалӧны, сідз ныись и мӧдпыр увьясьӧ пу, сідз сія вывланьӧ быдмӧ.
Кыдз тӧдны кыным воа пу ув.
Ув быдмӧ токо почаись.
Вож ув вылын, кытӧн пукаліс поча, кольӧ кызін — поча туй.
Сія кыдз бы ув вылӧ кольӧ пасӧн, мед тӧдны вӧлі — то пӧ кысянь виль увыс быдмис таво.
Быд ув вылісь этатшӧм пассэсӧ позьӧ адззыны. Ны сьӧрті и тӧдмалан, кыным вося эта ув (видзӧт 6 удж 128 листбок).
2. Кыдз пу кызӧ.
Камбийлӧн роль.
Воись воӧ пу за и уввез кызӧны.
Эта кызӧмыс аркмӧ сійӧн: шоныт тулыс локтӧм бӧрын ловья клеткаэз камбийлӧн чожа пондӧны содны, йывны.
Мукӧд клеткаэз тэчсьӧны пуланьӧ, мукӧдыс корланьӧ.
Нысянь пуыс сідз и кызӧ.
abu
Поперег шӧрыштӧм куим вося нинпу улок микроскоп увтын аслас строеннёӧн невна мӧдкодьжык ӧті вося улоккӧт (65 рис.).
Ӧні пулӧн тыдалӧ куим кытш. Кытшшес ӧта мӧд вылын.
Кыдз и тавося улокын гырисьжык сосуддэс кытшын пытшланясӧсь, а поснитжыккес ӧтӧрланяс.
Эта бӧра жӧ вежӧртана тулыссянь аркмӧмась гырисьжык сосуддэз, а ар кежӧ нія сьӧрна чинӧны, лоӧны поснитжыкӧсь. Тулыссянь камбий нійӧ тэчӧма перыта, стенкаэз клеткаэзлӧн вӧснитикӧсь, а кыным матӧжык ар дынӧ, сыным камбий нійӧ тэчӧма поснитжыка, но клетка стенкаэз кызжыкӧсь, а клеткаэс асьныс ӧта-мӧд бердын топытжыкӧсь.
Эта сьӧрті тулыссӧ аркмӧм пу позьӧ простой синӧн адззыны, сія кыдз бы югытжык арся аркмӧм пуся.
Эта сьӧрті ми тӧдмалам вося кытшшез.
Корын тожӧ воа кытшшез аркмӧны, но нійӧ эстісь сьӧкытжык адззыны, нія вӧснитжыкӧсь и озӧжык тыдалӧ простой синлӧ. Корланьӧ клеткаэсӧ камбий тэчӧ етшажык.
Сійӧн, мыля быдса воӧ содӧ токо ӧтік слой, то эна слойез сьӧрті, кӧднія тыдалӧны пу шӧрӧт вундыштӧминын, позьӧ тӧдны, кыным вося пуыс.
Кыдз аркмӧ корын пробка слой.
Самӧй корас пулӧн быдмӧм сьӧрна мунӧ мӧдкодьсялӧм.
Клеткаэзлӧн слой, кӧда куйлӧ кучишок бердын, жагӧник кызӧ.
Ӧтӧр ладорись клеткаэс кулӧны и аркмӧтӧны кӧз кач — пробка слой.
Однако эта пробка аркмӧмыс мунӧ жагӧнжыка пу аркмӧмся. Пу кызӧмнас пробка слой аркмӧмсӧ одзалӧ.
Эта понісь пробка слой перво нюжалӧ, а сыбӧрын пондӧ вевдӧрсянь потласьны. Потласьӧм пробка слой чирйисьӧ, киссьӧ, сы местӧ бӧра пытшсяняс корись виль пробка петӧ.
Пулӧн за и турунлӧн за.
Дзоридза быдмассэзлӧн за овлӧ пуись аркмӧм за и турун за.
Пуись заыс турун закӧт абу ӧткодьӧсь. Эта неӧткодьыс ны коласын — пуись за воись во сьӧрна кызӧ, а турун за кызны дыр оз вермы.
Однако овлӧны и сэтшӧм быдмассэз, зааныс кӧдналӧн камбийыс клеткаэз тэчӧ дыржык коланся, сэк за сылӧн пондӧ вачкисьны пуа за вылӧ.
Сідз, шуам, подсолнушко быдмаслӧн, бур, назёма мусин вылын быдмӧмлӧн заыс мукӧд кадӧ овлӧ зэв кузь да кыз. Пешлыны сійӧ пондан, пытшкыс пуа заланьӧ вачкисьӧ.
Мый мӧдкодьыс ӧтік тусьтора быдмассэз быдмӧмын.
Ӧтік тусьтора быдмас быдмӧ мӧдкодя кык тусьтора быдмассэз сьӧрті.
Рудзӧг за вылісь либо шогді за вылісь позьӧ адззыны: йылыс быдмӧмся гӧрӧд колассэзныс нылӧн тожӧ быдмӧны, нюжалӧны.
Нылӧн эм, сідз шуана, гӧрӧд коласісь быдмӧм.
Этатшӧм быдмӧмыс эм и кык тусьтора быдмассэзлӧн, но ӧддьӧн шоча да невна нія быдмӧны.
Мӧдік особенность, кӧда ӧтік тусьтора быдмассэзӧс янсӧтӧ кык тусьтора быдмассэз бердісь, — камбий кытш нылӧн абу.
Вылынжык вӧлі висьталӧма ни, ӧтік тусьтора быдмаслӧн сосуда-свӧнъя пучоккез чапкассьӧмась ӧтмӧдӧрӧ за основнӧй ткань пытшкын.
Камбий эна пучкаэзын либо совсем абу либо эм да клеткаэс сылӧн оз йылӧ, а сідзкӧ и заыс быдмасыслӧн оз кыз.
Невна заыс эна быдмассэзлӧн кызыштӧ основнӧй ткань быдмӧмсянь.
3. Кыдз быдмассэз быдмӧны клеткаэз йылӧмсянь да быдмӧмсянь.
Быдман точка.
Медбура быдмӧ быдмасыс почаэзын, камбий слойын и вуж конечын.
Лупа пыр позьӧ ни адззыны (66 рис.), што почка конечлӧн чужӧмыс мылька (а). Боккезас тыдалӧны поснитик петассэз и нюжалӧм «соскиоккез» (б).
Улынжык эна петассэс адззӧмӧн пӧрӧны вежӧв рӧма поча листоккезӧ,
а конувттэзаныс нылӧн пукалӧны зэв поснитикӧсь почаоккез (д, э).
Кӧр ми пондам мылькок а видзӧтны уна ыждӧтана микроскоп пыр, позяс адззыны — мылькок аркмӧма зэв уна вӧсни стенкаа клеткаоккезісь.
Тулыссӧ эна клеткаэз перыта пондӧны йывны, и мылькок нюжалӧ быдмӧ.
Этӧ мылькоксӧ нимтӧны быдман точкаӧн (67 рис.).
Бокись гӧгрӧса петассэс жагӧникӧн пӧрӧны листтэзӧ, паськӧтӧны поча вевттян чешуйкаэз и мыччисьӧны вывлань. Ми шуам — поча потӧ.
Вуж сьӧрын видзӧтікӧ сідз жӧ адззӧмась быдман точка. Сія вужыслӧн бӧра жӧ мед йылас.
Чужан кӧдзыс тусьлӧн, сідзкӧ, кык быдман точка: ӧтыс — вуж йылын, мӧдыс петас йылын.
Пӧрись, быдса быдмаслӧн быдман точкаэз унаӧсь.
Быд ув почалӧн, быд вуж вожлӧн аслас быдман точка.
Кыдз клеткаэз янсалӧны-йылӧны.
Токо микроскоп увтын быдмаслісь строеннёсӧ велӧтӧм бӧрын позис тӧдны, кыдз клеткаэзлӧн мунӧ йылӧм быдман точкаэзын да камбий слойын заын, а эта сьӧрті тӧдны, мыйсянь мунӧ быдмаслӧн быдмӧм.
Быдман точкаэзлӧн тканнез аркмӧмась поснитик клеткаэзісь. Стенкаэз эна клеткаэзлӧн, кыдз и камбий клеткаэзлӧн, вӧснитикӧсь. Клетка пытшкын тыр протоплазма, а протоплазма шӧрын ыджыт ядро.
Эна клеткаэз мыйкӧ гырисяӧсь лоасӧ да ядроныс пондӧ кык торйӧ янсавны. Эта янсалӧмыс мунӧ ӧддьӧн сложнӧя.
Кыкнан ядро торыс татшкиссьӧны ӧтмӧдӧрӧ.
Мыйкӧ дырнаись шӧраныс клетка пытшкын аркмӧ торйӧтан дыж (оболочка).
Сідз ӧтік клеткаись лоӧны кык клетка. Аркмӧм клеткаэз первосянь кыкисьӧн поснитжыкӧсь мам клеткася (68 рис.).
Вились аркмӧм клеткаэз питайтчӧны быдмӧны и кӧркӧ вились янсалӧны.
Быд том клеткаыс чужӧмнас ӧткодь.
Но одзланьын быдмӧм бӧрын нылӧн форма зэв ёна вермӧ вежсьыны.
4. Ӧтӧрись условиеэз быдмассэз быдмӧмын.
Кыдз быдмӧм вылӧ влияйтӧ температура.
Быдмасвӧдитан уджын важын ни тӧдӧмась, быдмас быдмӧмын пӧ, кыдз и кӧдзыс тусись аркмытӧн, быдмас гӧгӧрись температуралӧн быдмас вылӧ эм ыджыт влияннё.
Минимум температурасянь быдмаслӧн быдмӧмыс сьӧрна содӧ. Оптимум температура дырни зэв бытшӧма быдмӧ и, медбӧрын, максимум дырни бӧра быдмӧмыс чинӧ и сыбӧрын дугдӧ совсем.
Точнӧйжык наблюденнёэзӧн тӧдӧмась, не ӧткодь температура пӧ быд быдмаслӧ быдмытӧн колӧ быдмыны пондӧтчӧм понда да нормальнӧя быдмӧм понда.
Ӧзим, шуам, пондӧтчӧ тулыссӧ ыб вылын вежӧтны, кӧр эшӧ температура лажмыт сулалӧ.
Уна одзтулысся быдмас (мать-мачика турун, вӧрдор турун и мукӧд) пондӧтчӧны быдмыны, кӧр температура сулалӧ эшӧ 0°. Мукӧд кадӧ петалӧны нія эшӧ лым увтсянь.
А вот тыква, шуам, пондӧтчӧ быдмыны, кӧр температура сувтас 12°Ц. Лажмытжык температура дырни тыква оз вермы быдмыны.
Бӧра жӧ наблюденнеэзӧн тӧдӧмась, быд быдмаслӧн пӧ аслас и оптимум температура.
Конешно этӧ оптимумсӧ колӧ быдмаслісь тӧдны, медбы кужны быдмассӧ сувтӧтны бур температура условиеэзӧ.
abu
Сідз, шуам, злаккезлӧн быдман пондӧтчисьӧ 0°-сянь, а мед аркмисӧ веж листтэз, температура колӧ 5–6°-ся не лажмытжык, дзоридзасикӧ — 15°-ся вылынжык.
Кыдз быдмӧм вылӧ влияйтӧ влажность.
Оз кӧ тырмы влага, эта бура тӧдчӧ быдмас быдмӧм вылын: быдмасыс пондӧ жагӧна либо нач дугдӧ быдмыны.
Дыр кӧ абу ваыс, зорамӧны винерик быдмассэз.
Мукӧд кадӧ мусин пытшкын ваыс оз овлы сэк, кӧр быдмасыс медбура зорамӧ, сія кадӧ этійӧ чожа позьӧ казявны.
Босьтам примерӧн, миян сю культураэзлӧн — рудзӧглӧн да шогділӧн листтэза да дзоридза заыс жагӧна зорамӧ вевдӧрися листтэз трубка пытшкын.
Токо эта бӧрын перыта пондӧ быдмыны гӧрӧддэз коласын заыс.
Этія кадӧ медуна влага колӧ быдмас тканнез понда.
Эта момент кежӧ мусиныс кӧ косьмис засухасянь, гӧрӧддэз коласын заыс оз понды чожа зорамны и этасянь вермас умӧля шогмыны нянь.
Кыдз быдмӧм вылӧ влияйтӧ югыт.
Медбы быдмас быдмис нормальнӧя, сылӧ колӧ мед доволь вӧлі органическӧй вещество, кӧда аркмӧ веж торрезын югыт вылын.
Дыр кӧ быдмас, оз адззыв югыт, пондӧ тшыгьялӧм понісь лёпмыны и быдмӧмыс сылӧн дугдӧ мунны одзлань.
Но заптӧма кӧ быдмас пытшкас питательнӧй веществоэзлӧн запас одзжык, быдмӧм сылӧн вермӧ мунны и пемытінын, токо быдмас зэв ёна уродуйтчӧ: за сылӧн ӧддьӧнӧв нюжалӧ, листтэз озӧ быдмӧ (69 рис.), поснитикӧсь да чочкомӧсь, веж рӧмыс нылӧн абу (видз. 9 удж 131 листбок).
Бӧра жӧ наблюденнёэз мыччалӧны, пемытінын быдмас нюжалӧ, быдмӧ чожажыка.
Сідз кӧ, югытыс быдмӧмсӧ кыдз бы падмӧтӧ.
abu
Кӧр быдмас мӧдік быдмассэз коласын мырддясьӧ югытӧн, сэк сылӧ эта пемытінын нюжалӧмыс ӧддьӧн дона: пемытінӧ сюрӧм быдмасыс эта способностьӧн чожажык вермӧ судзӧтны югытсӧ.
Ойсӧ быдмас чожажык быдмӧ, оз кӧ сійӧ токо падмӧт температуралӧн усьӧм (кӧдздӧтӧм).
5. Кыдз быдмаслӧн регулируйтчӧ быдмӧм и кыдз мунӧ сылӧн зорамӧм.
Зораман сроккез искусственнӧя вежӧм.
Кыдз токо арсӧ кӧдзыт кад сувтіс, унажык культурнӧй быдмассэз зорамӧмыс падмиссьӧ, быдмассэз дугдӧны быдмыны.
Карч быдмас пӧлӧсісь унажыксӧ медперво кынмӧны ӧгурчиэз, тыкваэз, томаттэз картовкилӧн лёпмӧ кор.
Но мукӧд быдмассэз карч пӧлӧсісь первося кӧдзыт понісь оз кулӧ,
например, капуста, морков, калиг.
Капуста первося пужжез бӧрын бытшӧмжыка эшӧ пондӧ каттисьны, сійӧн град вылісь сійӧ и дзимлялӧны медбӧрын ни.
Однако кӧр локтасӧ ыджыт мороззэз, сэк быд быдмаслӧ локтӧ пом, кӧть сія и эз пов кӧдзытісь.
Шоныт кадӧ, мӧд нёжӧн кӧ медбӧрья тулысся кӧдзыт луннэзсянь медодзза арся кӧдзыт луннэзӧдз вермӧ и ойвылын быдмыны уна лунвывся быдмас пӧлӧс.
Конешно, быд местын эта периодыс абу ӧткузя: ойвылын сія дженытжык, лунвылын кузьжык.
Москва областьын сія кузянас 113 лун.
Интересно сравнитны морозтӧм периодсӧ нія сроккезкӧт, кӧдна колӧны быдмассэзлӧ, медбы петасісь зорамны быдса быдмасӧдз; сетны урожай.
Лоӧ, редис карчлӧн эта срокыс быдса тӧлісся невна унажык (70 рис.).
Мӧд нёжӧн кӧ шуны, куимись гожумбытӧн сійӧ ӧтік ыб вылісь позьӧ босьтны.
Морков, сёртни да ӧгурчи ештӧны урожай вайны кӧдзыттэз вотӧдз.
Капусталӧ, тыквалӧ да томатлӧ гожся кад оз тырмы.
Москва область кодь условиеэзын нійӧ ковсьӧ град вылӧ садитны росадаӧн. Он кӧ сідз кер — воны озӧ ештӧ. Росада садитсьӧ тулысся кӧдзыт ойез чулалӧм бӧрын.
Парниккезын да теплицаэзын росада быдтӧмӧн кыдз бы нарошно быдмаслісь воан сроксӧ нюжӧтӧны. Эта понісь эна, быдмассэс урожай ештӧны вайны арся кӧдзыттэс вотӧдз.
Быдмасвӧдитан уджын морт ачыс вермӧ энӧ быдман-воан сроккесӧ быдмаслісь вежлыны. Ӧні морт велалӧма искусственнӧя колан быдмассэзлісь урожай босьтны. Босьтӧ сэк, кӧр сія колӧ уджалісь мортлӧ.
И керсьӧ эта быдӧс «вевттьӧм грунт пыр», мӧд нёжӧн кӧ шуны, теплицаэзӧн да парниккезӧн.
Медпросто керсьӧ парник.
Шонытыс парникын ӧксьӧ назём сісьмӧм понісь, кӧдӧн парник яма тыртӧны.
Мукӧд пырся парниккесӧ шонтӧны парӧн, кӧда локтӧ тодель нюжлалӧм трубаэзӧт, либо электричествоӧн.
Сложнӧйжык аслас керӧмӧн парникся — теплица. Зато сія и используйтчӧ вонас прокод. Теплицаын и тӧвсӧ позьӧ карч вӧдитны.
Гырись карч вӧдитан кӧзяйствоэзын мукӧд кадӧ стекляннӧй крышаӧн вевттиссьӧ быдса гектар пасьта и паськытжык му (71 рис.).
Сэтшӧм теплицаэзын уджалӧны вӧввезӧн, берся машинаӧн (72 рис.) шуам гӧрӧны му, кӧдзӧны, киськалӧны, дзимлялӧны урожай и мӧдік уджжез.
Парниккезын жӧ быд уджыс керсьӧ киӧн. Эта вылӧ мунӧ уна вын и кад.
Теплицаэзын позьӧ быдтыны и вылын быдмассэз, кыдз шуам, томаттэз (73 рис.). Парникын кузь быдмассэз быдтыны оз туй — местаыс мусин коласас да парник рамаэз коласас векнит, етша.
Шонтіссьӧны теплицаэз унажык сійӧн жӧ назёмӧн либо сісьман ёгӧн, кӧда ӧткызаӧн ольсассьӧ теплица джодж вылӧ, а вевдӧрсянь вевттиссьӧ муӧн.
Но эттшӧм лонтісьӧмын уна и умӧль эм. Гырись теплицаэзын шонтӧны парӧн, кыдз керкуэз жӧ.
Пара шонтӧмӧн позьӧ температура видзны кытшӧмӧ колӧ, кытшӧмӧ корӧны быдмассэз.
Югытлісь вынсӧ регулируйтӧны берся приспособленнёэзӧн. Кытшӧм югытыс быдмаслӧ колӧ, сэтшӧмӧ и сетӧны.
А кӧр тӧвся дженыт луннэзӧ шонді югӧр оз тырмы, сэк ӧзталӧны гырись электрическӧй лампаэз. Эна лампаэзӧн теплицаын кыдз бы нюжӧтӧны «лун», мымда эта колӧ.
Периода югдӧтӧм.
Искусственнӧя лун нюжӧтӧмӧн быдмас быдтытӧн учёнӧйез зэв интереснӧй тор вермӧмась осьтны.
Мукӧд быдмас, кыдз и коліс чайтны, кузь луннэзӧ, кӧр нія унажык судзӧтӧны югыт, зорамӧны и воӧны чожажык.
Шуамӧ, шпинат, Москва увдӧрын садитӧм, кытӧн май-июнь тӧлісьӧ лун кыссьӧ 17–18 час, ӧтік тӧлісь бӧрті садитӧм бӧрын дзоридз стрелка ни лэдзӧ.
Эта жӧ шпинаткӧт лоӧ, кӧр сія садитӧма теплицаӧ искусственнӧй электрическӧй югыт увтӧ.
Но опыт туйӧ босьтны кӧ да колан югытсӧ сылісь чинтыны 12 часӧдз, то воӧмыс шпинатлӧн кыссяс 3½ тӧлісьӧдз.
Сідзкӧ шпинат быдмассӧ позьӧ шуны «кузь луна» быдмасӧн.
Эттшӧмӧсь жӧ быдмассэз редис да салат.
Но медінтереснӧйыс то мыйын: эмӧсь сэтшӧм быдмассэз, кӧдна вылӧ кузь луныс влияйтӧ умӧля.
Сідз фасоль, лоас кӧ пыр 16–17 час югыт увтын, быдмӧ и зорамӧ умӧля.
А кӧр сылісь югыт лунсӧ джендӧтӧны, зорамӧмыс мунӧ унаӧн перытжыка; одзжык фасоль пондӧ дзоридзавны, одзжык сетӧ урожай.
Кыным унажык югыт сетсьӧ, сыным сія фасольлісь быдмӧмсӧ кыдз бы падмӧтӧ.
Этӧ жӧ ми адззам томаттэзлісь и соялісь. Эна быдмассэс пыдын лунвыв ладорись.
Лунвыв ладорын лун унаӧн миян гожся лунся дженытжык, быдса 12 час кузя.
Эта сьӧрті эна «дженыт луна» быдмассэс ылӧ ойланьӧ сюрӧм бӧрын, не асланыс условиеэзӧ сюрӧм бӧрын лӧсявны озӧ вермӧ.
Листтэзын нылӧн кузь лунтырӧн ӧксьӧ уна крахмал,
но ойвылісь дженыт ойӧ сія оз ешты пӧрны сылана веществоӧ и листтэзісь паськавны быдмас кузя.
Веществоэзлӧн быдмас пытшкын ветлӧмыс сорассьӧ.
Кӧр искусственнӧя пондӧмась джендӧтны лун (этӧ позьӧ керны быдмассӧ вевттьӧмӧн), соя и мукӧд дженыт луна быдмассэз пондӧмась вайны урожай и ойвылісь районнэзын.
Эта периода югыт босьтӧмыс ӧні шусьӧ фотопериодизмӧн.
Этӧ явленнёсӧ осьтӧм бӧрын позьӧ вӧдитны уна сэтшӧм быдмассэз, кӧдна кӧркӧ эта местын эзӧ бы вермӧ аркмыны. Искусственнӧя югытсӧ регулируйтӧмӧн ӧні ми вермам нысянь босьтны урожай.
Кыдз вундалӧмӧн регулируйтчӧ пулӧн быдмӧм.
Бытшӧмика пондыны кӧ видзӧтны пу крона вылӧ, позьӧ ловья уввез коласісь адззыны кӧс уввез.
Эна уввес косьмӧны сійӧн, што неӧткодь условиеэзын быд улыс пу кроналӧн олӧ.
Кӧда увлӧ быдӧс колан торыс тырмӧ, сэтшӧм улыс вына, кыз, а кӧдалӧ оз тырмы — югыт я етша сюрӧ, питательнӧй веществоэз я муись етша кайӧны, — сэтшӧм уввес косьмӧны, кулӧны.
Эта понісь, конешно, мӧдкодьсялӧ и чужӧмыс пу кроналӧн.
Формируйтчан процессыс пулӧн мунӧ ӧддьӧн жагӧна.
А мукӧд кадӧ ковсьӧ этӧ процессӧ сорласьны мортлӧ, мед пуыс чожажык зорамис, мед быдмӧмыслӧн характерыс вежсис, мед пу кайис сідз, кыдз колӧ миянлӧ.
Мукӧд увсӧ вундалӧмӧн позьӧ быдмаслісь крона лӧсьӧтны сідз, кыдз колӧ, и быд ув пондас колан мымдаӧн босьтны и югыт, и муись питательнӧй веществоэз.
Садовниккез сідз вот и керӧны. Нія пилаӧн да пуртӧн регулируйтӧны пулісь быдмӧмсӧ.
Кӧда улыс ӧддьӧнӧла кыссьӧ, нюжалӧ вывлань, сылісь йывсӧ орӧтӧны, — ув нюжавны дугдӧ, сы туйӧ пондӧны ӧддьӧнжык быдмыны бокись уввез.
А кӧр шӧрись, главнӧй ув умӧля быдмӧ, сэк бокиссеслісь йыввесӧ орлалӧны. Сэк шӧрись ув одзалӧ кайны бокись уввесӧ.
Эна приёммезӧн садовниккез пусӧ тшӧктӧны ӧтнёжажыка быдмыны, и питательнӧй веществоэз, кӧдна быдмасын эм, пуись уввез вундалӧм понісь быд орган коласын юкассьӧны ӧтмымдаӧн.
Этасянь пулӧн быдмӧмыс лоӧ правильнӧйжык, а сэтшӧм пулӧн и урожайыс ыджытжык.
Плода пу, кӧда быдмӧ крона сьӧрын видзӧттӧг, кӧдалӧн кронаыс не плода пулӧн кодь, а рос чужӧма, оз вермы вайны ыджыт урожай.
Сідз кӧ кужан киӧн вундалӧмӧн, пу крона лӧсьӧтӧмӧн ми вермам пусӧ тшӧктыны быдмыны сідз, кыдз миянлӧ колӧ.
СИЗИМӦТ ГЛАВА.
ДЗОРИДЗА БЫДМАССЭЗЛӦН ЙЫЛӦМ.
Быд дзоридза быдмас жагӧника быдмӧ, зорамӧ, лоӧ кӧркӧ быдса и, медбӧрын, дзоридзасьӧ.
Сы дзоридзись аркмӧны кӧдзыса плоддэз.
Быд кӧдзыс тусись, кӧр сія инмас буринӧ, коланінӧ, вермас зорамны быдса быдмас.
Но не пыр быдмас зорамӧ токо кӧдзыс тусись.
Сія вермӧ аркмыны и мӧд нёж.
Торьясяс кӧ быдмас бердісь кытшӧмкӧ сылӧн ӧтік тор, шуам клубень, муись за почаӧн либо луковица, то эта торыс вермас пӧрны вужа, лиса, заа быдса быдмасӧ.
Этатшӧма йылӧмыс быдмаслӧн — кӧдзыс тусьтӧг йылӧмыс — шусьӧ вегетативнӧй йылӧмӧн.
Быдмас олӧмын йылӧм видзӧ зэв ыджыт значеннё.
Кӧбы быдмассэз эз йылӧ, сэк бы быдӧс, кӧда быдмасыс эм, кӧркӧ куліс, сісьмис и сы местӧ эз коль нем.
Сэк бы му пасьта быдмасыс эз вӧв.
Сельскӧй кӧзяйствоын быдмас йылӧмыс видзӧ зэв ыджыт значеннё.
Йылӧтӧмӧн ми содтам колан быдмассэзлісь количество.
Морт, кӧда тӧдӧ быдмассэзлісь йылӧм, тӧдӧ сылісь олӧмсӧ, кӧдалӧн эм уджын опыт, сія вермӧ петкӧтны дзик виль быдмассэз, кӧдна му вылын некӧр эзӧ и вӧвлӧ, вермас петкӧтны сэтшӧм быдмас пӧлӧс, кӧда зэв колана миян социалистическӧй быдмасвидзан уджын.
I. БЫДМАССЭЗЛӦН ПОЛА ЙЫЛӦМ.
1. Дзоридзлӧн строеннёыс.
Примула дзоридзлӧн строеннё.
Первося жӧ дзаркерӧмӧн примула дзоридз вылӧ (видз. 7 удж 128 листбок) адззам: сьӧдӧввеж рӧма (темнозелёнӧй) венчик и веж бекӧрок (74 рис.).
Бекӧрок вачкисьӧ воронкаок вылӧ. Доррес бекӧроклӧн вит пиняӧсь. Эна пиннес — бекӧроклӧн листоккез.
Пукалӧ бекӧрокыс дзоридз кок йылын.
Бекӧрокись венчик невна мыччисьӧ.
Пондыны кӧ венчиксӧ видзӧтны вылісянь, сылӧн формаыс пондас вачкисьны кыдз бы ляпыт гӧглян вылӧ. Доррес гӧглянлӧн кыдз бы вундалӧмась вит торйӧ — эна лепестоккез.
Босьтны кӧ венчиксӧ чунь йыввезӧн да небурика кыскыштны, сія бекӧрокись кыссяс.
Сэк лоас адззана — увланьыс венчиклӧн дженытик трубкаок чужӧма.
Кӧр ми венчиксӧ поткӧтамӧ доль да пондамӧ видзӧтны лупа пыр, бӧра жӧ лоас тыдалана — пытшкись стенка бердас трубкаокыслӧн эмӧсь вит буса мешӧчок. Эна пыльниккез. Пыльниккез пукалӧны дженытик сіоккез вылын.
Эна пыльниккес сіоккезкӧт ӧтлаын шусьӧны тычинкаэзӧн.
Пыльниккезын тыр зэв посни бус — пыльца.
Ем йылӧн позяс ӧтік пыльник поткӧтны да лякасьӧм бусок-мӧд видзӧтны микроскоп увтын либо даже лупа пыр. Сэк лоасӧ тыдаланаӧсь торья бусоккес — пыльцаыс.
Быд бусок, кыдз мыччалӧ микроскоп увтын сійӧ велӧтӧм, аркмӧма кык клеткаись. Клеткаэз пытшкын эм протоплазма и ядро.
Дзар керам ӧні воронкаок чужӧма бекӧрок пытшкӧ.
Пыдӧсас сылӧн тыдалӧ вежыник дзулёк — завязь.
Эта и эм орган, кӧдаись мӧдпыр аркмӧ кӧдзыс туссеза плод.
Завязьсянь вылӧ мунӧ вӧснитик веськыт стобок, конечас сылӧн ӧмок. Ӧмокыс чужӧмнас булавка юрланьӧ вачкисьӧ.
Завязь, стобок да ӧмок ӧтлаын шусьӧны плодникӧн.
Кӧр ми бытшӧмика плодниксӧ огӧ видзӧтӧ, миянлӧ чайтчӧ, бытьтӧ плодникыс бекӧрок пыдӧсын пукалӧ.
Но босьтны кӧ да жагӧника бекӧроксӧ дзоридз за бердісь летыштны, лоас адззана; плодникыс пукалӧ дзоридз за конечын.
Этӧ дзоридз за конечсӧ, кӧда вылын пукалӧ плодник, шуӧны дзоридзложаӧн.
Ӧні босьтны кӧ завязь да поткӧтны сійӧ доль кык ӧтыжда торйӧ и аркмӧм шӧрӧммесӧ видзӧтны бытшӧмика лупа пыр, пондасӧ бура тыдавны завязь пытшкын поснитик, гӧгрӧса, чочкомӧсь и шучкӧп тыдалана телооккез.
Эна — кӧдзыс почаэз, мӧд нёжӧн кӧ, кӧркӧ мӧдпыр ныись аркмасӧ кӧдзыс туссез.
Медбы бытшӧмжыка дзоридзлісь керӧмсӧ тӧдны, рисуйтӧны сылісь план (диаграмма) (75 рис.).
Мӧдік быдмассэзлӧн дзоридззез.
Быдкодь быдмассэзлӧн дзоридззез керӧмӧсь не ӧтмоз. Мукӧд кадӧ нія ӧддьӧн озӧ вачкисьӧ ӧтамӧд вылӧ формаӧн, ыждаӧн, рӧмӧн, асланыс торрез куйлӧм сьӧрті.
Этасянь мортлӧ, кӧдія тӧдӧ быдмассэз, колӧ токо дзар керны и сія тӧдас, кыдз шусьӧ быдмас.
Но быдчужӧма дзоридззез видзӧтікӧ быд дзоридзлісь позьӧ адззыны нійӧ жӧ торресӧ, кытшӧмӧсь эмӧсь примулалӧн, токо мӧдкодьӧсь нія формаӧн да количествоӧн.
Вишня дзоридзлӧн особенносттез.
Кӧр ми пешлам вишня дзоридз, венчикся да векнитик бекӧрок листоккезся син вылӧ усьӧ дзоридз за вылын вежыник кызінок (76 рис.).
Ӧтік дзоридз поткӧтӧм бӧрын позьӧ адззыны, эта кызіныс бекӧрок чужӧма.
Сійӧ лыддьӧны дзоридзложаӧн, кӧда бура быдмӧма (видз. 7 удж, II).
Дзоридзложа дорын пукалӧны: вевдӧрсянь — вит бекӧроклӧн веж листоккез, ны бӧрын пыдынжык пытшланяс моз — венчиклӧн вит чочком лепесток и, медбӧрын, медпытшкас — уна кузь тычинка.
Вишнялӧн венчик лепестоккез абу йитсьӧмась ӧтамӧдкӧт, нія быдӧнныс торйӧнӧсь. Ӧтамӧд бӧрсянь нійӧ позьӧ нетшкыны дзоридзложа вылісь и дзоридзлӧн колясӧ тычинкаэз.
Дзоридз пыдӧссянь вывлань видзӧтӧ бутылкаок чужӧма плодник. Сылісь бура позьӧ адззыны завязь, стобок и ӧмок.
Завязь пытшкись, поткӧтны кӧ бӧра сійӧ доль, позьӧ лупа пыр адззыны то ӧтік, то кык кӧдзыспоча.
2. Дзоридзлӧн бусасьӧм да боссьӧм.
Яйцеклеткалӧн боссьӧм.
Ті тӧдатӧ ни — кӧдзыспочаэзісь, кӧдна пукалӧны завязь пытшкын, аркмӧны кӧдзыстуссез.
Опыттэз сьӧрті тӧдӧмась, оз кӧ пӧ плодник ӧмок вылӧ сюр тычинкаись пыльца, то кӧдзыспочаись кӧдзыс тусь оз аркмы.
Дыр вӧлі тӧдтӧм, мый лоӧ дзоридзын бусасьӧм бӧрын, кытшӧм влияннё пыльцалӧн кӧдзыспоча вылӧ. Но эта вопрос решиттӧг эз кольччы.
Учёнӧйез тӧдмалісӧ, бусокыс пӧ плодник ӧмок бердӧ лякасьӧм бӧрын кыдз бы чужӧ: сія нюжалӧ зэв вӧснитик сунис кодь трубкаокӧ (77 рис.).
Эта трубкаок пыр бусокись киссьӧ и визывтӧ-лэдзчӧ улӧ быдӧс, мый бусок пытшкас вӧлі.
Трубкаок нюжалӧ плодник стобок кузя пыр улӧдз и локтӧ кытшӧмкӧ ӧтік кӧдзыспоча бердӧдз.
Быд кӧдзыспочалӧн вевдӧрись дыж вылас эм учӧтик осьтаок — кӧдзыспыртасӧн шусьӧ.
Кӧдзыспоча пытшкын (а кӧдзыспоча кыдз и быд тор аркмӧма клеточкаэзісь) кӧдзыспыртас дынсянь неылын куйлӧ особӧй клеточка. Пытшкас сылӧн ядро, и шусьӧ яйцеклеткаӧн.
Эта яйцеклетка дынӧ и сибӧтчӧ пыльца трубкаок.
Одзлань мунан конечыс сылӧн пырӧ кӧдзыспыртас пыр кӧдзыспоча пытшкӧ и сэтӧн оссьӧ.
Сэк ӧтік ядро трубкаок пытшкись ӧтлаасьӧ яйцеклетка яйцкокӧт.
Яйцеклетка пытшкас босьтӧ виль содтӧт, босьтӧ бусок ядроись веществоэз.
Эта ядроэзлӧн ӧтлаасьӧмыс и шусьӧ боссьӧмӧн.
Сідз жӧ учёнӧйез утлянно тӧдӧмась, ӧтік пылинка пӧ боссьӧтны вермӧ токо ӧтік яйцеклетка.
Кыдз дзоридз мӧдкодьсялӧ боссьӧм бӧрын.
Яйцеклетка боссьӧм бӧрын дзоридз быдсӧн вежсьӧ.
Яйцеклетка кӧдзыспоча пытшкын пондӧ йывны.
Ӧтік яйцеклеткаись недыр мыйись аркмӧ уна виль клетка.
Эна виль, аркмӧм клеткаэзісь жагӧника пондӧ тэчсьыны ныртусь, а кӧркӧ аркмас и кӧдзыс тусь быдсӧн.
Кӧдзыспоча дыжись аркмӧ кӧдзыс дыж.
Сідз боссьӧм бӧрын кӧдзыспочаэзісь аркмӧны кӧдзыс туссез.
Мый жӧ лоӧны кӧдзыспоча боссьӧм бӧрын дзоридзлӧн ӧтӧрись торрез?
Вишнялӧн быдӧс нія лёпмӧны, кулӧны. Кольӧ ӧтнас токо завязь. Завязь мӧдпыр пӧрӧ плодӧ.
Исследуйтны кӧ вишнялісь плод, позяс адззыны кынымкӧ тор: 1) вевдӧрись слой вӧснитик кучишок кодьӧ, 2) сы увтын рышкыт, вазылькья, чӧскыт — сьӧлӧмӧс, 3) сыбӧрын чорыт — коскаок и, медбӧрын, 4) кӧдзыс тусь (78 рис.).
Кӧдзыс тусь, кӧда куйлӧ коскаок пытшкын, аркмӧма кӧдзыспочаись.
А слойес эна, кӧднӧн кӧдзыс тусь гӧгӧртчиссьӧ, аркмӧмась завязь стенкаэзісь и шусьӧны околоплодникӧн.
Керку садлісь, — примулалісь адззывны плод аркмӧм мукӧд пораӧ оз позь, он кӧ одзжык заботитчы бусасьӧм йылісь.
Но миян вӧр примулалісь, кӧдӧ мӧд нёжӧн шуӧны обыкновеннӧй баранчикӧн, тулыс помӧ плод адззыны позьӧ.
Околоплодникыс сылӧн сярӧтчанлань вачкисьӧ и вевдӧрас эм гӧгрӧса осьта. Околоплодник пытшкын куйлӧ уна кӧдзыс тусь.
Плод, кӧдалӧн околоплодникыс косьмӧ, шусьӧ коробкаокӧн (79 рис.).
Мӧд нёжӧн аркмӧ яблоня плод.
Яблок аркмӧмӧ мунӧ не токо завязь ӧтнас, но и рышкыт, кыз дзоридзложа, кӧда топыта ӧтлаасьӧма завязькӧт.
Яблок увтын абу сьӧкыт мукӧд кадӧ адззыны одзза бекӧроклісь косьмӧм листоккесӧ.
Эта сьӧрті и позьӧ шуны — яблок аркмӧм дзоридзложаись, кӧда куйлӧ кӧть кӧр бекӧрок увтын.
Быдмассэзлӧн пола йылӧм.
Токо кӧдзыспочаэз боссьӧм бӧрын завязись пондӧ аркмыны плод, а кӧдзыспочаэзісь — кӧдзыс туссез.
Медбы дзоридз боссис, колӧны кык пӧлӧс органнэз: тычинкаэз, мӧд нёжӧн кӧ айпӧв органнэз, и плодниккез — иньпӧв органнэз.
Тычинкаэз да плодниккез шусьӧны дзоридз пола органнэзӧн.
Айпӧв орган пыр да иньпӧв орган пыр быдмаслӧн йылӧм шусьӧ пола йылӧмӧн.
Кыдз пыльца нусьӧ-вайсьӧ дзоридз вылісянь дзоридз вылӧ.
Быд торья примула дзоридзын эмӧсь и тычинкаэз, эмӧсь и плодниккез.
Этатшӧм дзоридззес шусьӧны кыкпола дзоридззезӧн.
Ровно бы эна дзоридззезын боссьӧмыслӧ колӧ мунны чожа, эд тычинкаэс да плодниккес пукалӧны ордчӧн.
Однако, аслас пыльцаӧн боссьӧм плодникыс кӧдзыс оз сет.
Быд быдмас дзоридз сьӧрын видзӧтӧмӧн тӧдӧмась, этатшӧм асбоссьӧмыс оз овлы частӧ. Тычинкаэс да плодниккес тырсялӧны не ӧтік кадӧ.
Кӧр, шуам, пыльниккез воасӧ и пыльца пондас киссьыны, плодниклӧн ӧмокыс эшӧ вотӧм и пыльца сы бердӧ кутчисьны оз вермы.
А плодник ӧмок воас — пыльца бӧра тычинкаэзісь дзикӧдз киссьӧма ни.
Кин кӧть ӧтпыр адззыліс миян плода пуэзлісь дзоридзасьӧм, сія тӧдӧ, мымда ны вылын, чӧскыт дука, рӧма дзоридззез вылын пуӧ мош и берся мукӧд лэбалан гаг пӧлӧс (насекомӧйез).
Мый жӧ кыскӧ гаг пӧлӧссӧ дзоридззез вылӧ? А то мый: дзоридз пыдӧсас эм чӧскыт, ма кодь сӧк — нектар, кӧдӧ керӧны тоделя нерӧда чешуйкаэз.
Эта нектарыс, а мукӧд кадӧ и пыльца, борда гаг пӧлӧсӧс дзоридз вылӧ и кыскӧ. Эта нектарӧн нія питайтчӧны.
Но быдмас одзын долгӧ оз кольӧ, эта понда нія нуӧны-вайӧны дзоридз вылӧ пыльца. Асланыс кобӧтӧн нектар судзӧттӧн нія воӧм пыльца пытшкын путрайтчӧны. Кококкез вылӧ, борддэз вылӧ, кынӧм вылӧ, спина вылӧ — быдлаӧ нія вермӧны каттьыны дзоридз пытшкись пыльца.
Мӧдік дзоридз вылӧ лэбзясӧ да вӧлись бӧра сійӧ сэтчин кольӧны, лякӧны плодник ӧмок бердӧ.
Плодник кӧ воӧма ни, то сы ӧмок вылӧ кольччӧм пыльца пондӧтчӧ кыдз бы чужны и аркмӧ сія, мый йылісь ми баитім эта одзын.
Сідз борда гаг пӧлӧс аслыныс и асланыс пиян пӧлӧслӧ сёян-юан шедтытӧн тӧдтӧг керӧны и мӧдік удж — отсалӧны быдмаслӧ дзоридзасян кадӧ бусасьны.
Кытшӧм значеннё креста бусасьӧмлӧн.
Частӧ овлӧ сідз: ӧтік дзоридзись плодник ӧмок вылӧ сюрӧм пыльца кӧдзыспочасӧ боссьӧтны оз вермы либо боссьӧтас да кӧдзыс тусьыс оз аркмы.
А кӧр плодник ӧмок вылӧ сюрӧ пыльца мӧдік дзоридз вылісь (но мӧд дзоридзыс вӧлі сія пӧлӧсісь жӧ — сы кодь жӧ), мӧд нёжӧн кӧ шуны, аркмӧ креста бусасьӧм, сэк плод зорамӧ зэв бура и кӧдзыс туссез сыын аркмӧны унажыкӧсь и бурӧсь.
Сідзкӧ, лоӧ вежӧртана — креста бусасьӧмыс быдмас оланын зэв колан тор.
Кӧр ми бытшӧмика пондамӧ видзӧтны быдмас дзоридз аркмӧм сьӧрын вермам дивоӧ лоны — сэтшӧм китрӧя быдмас приспособитчӧ аслас дзоридзӧн креста бусасьӧм дорӧ. Эта приспособитчӧмыс сылӧн не воӧн и не дас воӧн аркмис, а уна сюрс воӧн.
80 рисунок вылісь позьӧ адззыны, кыдз ӧтік быдмаслӧн — примулалӧн токо не ӧтік кус вылісь летыштӧм дзоридззез ӧтамӧд вылӧ невна озӧ вачкисьӧ.
Ӧтік дзоридзлӧн плодник стобокыс кузьжык, тычинкаэз вевдӧрӧ петӧ, а мӧдыслӧн бӧра зэв дженыт, плодник ӧмокыс тычинкаэз увтын лоӧ. Кузь плодник стобока дзоридзлӧн тычинкаэс пукалӧны венчик трубкаок вевдӧрын, самӧй пыранінас.
Керку ӧшын вылын сад туйӧ быдман примула искусственнӧй условиеэзын быдмӧ, ми огӧ заботитчӧ сы бусасьӧм йылісь, сійӧн и ог адззылӧ некӧр сылісь плоддэз.
Сы мозӧн жӧ дзоридззез аркмӧмась и вӧр примулалӧн-баранчиклӧн.
Борда гаг, шуам балямош либо бабыв — пондас чӧскыт нектар кошшытӧн лэбавны ӧтік примула дзоридз вывсянь мӧдік дзоридз вылӧ, то кузь плодник стоба дзоридзись пыльца пондас нусьыны дженыт плодник стоба дзоридз вылӧ, а сы вывсянь бӧр первося дзоридз вылӧ.
Кокниа этӧ позяс вежӧртны, видзӧтны кӧ бытшӧмика 81 рисунок вылӧ.
Эта пыльца вежсьӧмын и эм креста бусасьӧмыс.
Мӧд нёжӧн бусасьӧны дзоридззез пиксан турунлӧн (глухая крапива) (82 рис.).
Сылӧн чочком венчикись аркмӧ кӧстісьӧм трубка. Ӧт конечыс трубкалӧн пӧрӧма шлем чужӧма «вевдӧрись тырпӧ,» а трубка увтыс конечыслӧн аркмӧтӧ мӧдік тырп «улісь тырп».
Вевдӧрись тырп увтас дзебсисьӧны нёль тычинка, а ны коласын — кык торйӧ потӧм плодник стобоклӧн ӧмок.
Нектар ӧксьӧ самӧй трубка пыдӧсӧ.
Судзӧтны сійӧ вермӧны токо кузь хобота гаг пӧлӧс (балямош).
Улісь тырпыс борда гаглӧ отсалӧ дзоридз вылын видзсьыны нектар судзӧтікӧ.
Чӧскыт нектар дынӧдз судзӧтчытӧн балямош спинанас жмитчӧ пыльниккез бердӧ и мавтчӧ пыльцаӧн.
Мӧдік сэтшӧм жӧ дзоридз вылӧ пуксьӧм бӧрын сія аслас буса спинаӧн бӧра жӧ пондас зыртчыны вылісь тырп бердӧ, а сэтӧн плодник стобоклӧн ӧмок. Балямош спина вылісь пыльца лякасяс плодник ӧмок бердӧ. Сідз балямош бусалӧ пиксан турунлісь дзоридззез.
А эмӧсь и сэтшӧм быдмассэз, дзоридззез пытшкын кӧдналӧн либо токо тычинкаэз, либо токо плодниккез.
Этатшӧм дзоридза быдмас пӧлӧсӧ пырӧ ӧгурчи быдмас. Кӧр ӧтік дзоридзын эмӧсь и тычинкаэз, и плодниккез, сэк эна дзоридззес шусьӧны кыкпола дзоридззезӧн.
А кӧр дзоридзын токо тычинкаэз либо плодниккез, сэк эна дзоридззес шусьӧны торьяпола дзоридззезӧн.
Тычинкаа дзоридззезісь плод оз аркмы.
Нійӧ «пусточветӧн» шуӧны.
Мукӧд кадӧ нійӧ шуӧны даже вреднӧйезӧн, бытьтӧ бы нія уна быдмаслісь сӧк сӧскӧны.
Эта неверно.
Кӧр кинсянь этӧ кылатӧ, висьталӧ бытшӧмика сылӧ, мыйлӧ быдмаслӧ колӧ быд дзоридз торыс, мед сія вежӧртіс тычинкаа дзоридзлісь значеннёсӧ.
Мукӧд кадӧ эттшӧм морттэс тычинкаа дзоридззесӧ нетшкӧны, мыйлӧ пӧ нійӧ весь быдмас вылын видзны. Эта понісь урожай ӧгурчилӧн вермас чинны зэв унаӧн.
Кӧбы не борда гаг пӧлӧс, плодника дзоридззезісь некӧр бы эзӧ вермӧ аркмыны плоддэз (видз. 10 удж, 131 листбок).
Граддэз вылісь культураэзлӧн эта оз овлы.
Но кӧр культура быдтӧны тодель керӧм вевта парниккезын либо теплицаэзын, борда гаг пӧлӧсӧс лоӧ вежны мортлӧ аслыс. Сэк керӧны искусственнӧй бусасьӧм.Кисточкаӧн либо мыйкӧ мӧдікӧн новйӧны дзоридз вылісь дзоридз вылӧ пыльца.
Гырись теплицаэзын бусалӧм понда тодель теплицаэз пытшкӧ пыртлӧны моша улляэз.
Борда гаг пӧлӧслӧн — бусаліссезлӧн значеннё.
Етша тӧдны, што борда гаг пӧлӧс керӧ быдмас понда ыджыт удж.
Эшӧ буржыка колӧ тӧдны, што быд быдмаслӧн эм аслас борда гаг — бусалісь.
Кузь трубкаока венчиккез вылӧ, кыдз первочветлӧн (примулалӧн) да пиксан турунлӧн, и вовлӧны кузь коботока гаггез, кӧдна пыдісь вермӧны судзӧтны нектар. Дженыт коботока гаглӧ эта дзоридз вылын керны нем, коботокыс сылӧн дзоридз пыдӧсӧдз оз судз.
Токо балямошлӧн кодь коботока гаггез вермасӧ нектар судзӧттӧн бусавны дзоридз.
Кин тіян коласісь эз номсӧтчыв чӧскыт сӧка нималан турунӧн (клеверӧн)?
Эта сӧк понда балямошшез и пуксьӧны эта дзоридз вылӧ.
Нылӧн коботокныс кузянас какьесь дзоридз трубка кузя:
этасянь главнӧй бусаліссес нималан турунлӧн — балямошшез.
Висьтасьӧны, кӧр миян европейскӧй клевер вӧлі кӧдзӧма Австралияӧ, сія кӧсӧдз абу сетӧма кӧдзыс урожай.
Токо кӧр тӧдвыланыс усяс миянісь нуны сэтчин балямошшезӧс, клевер пондас сетны кӧдзыс урожай.
Эта сьӧрті вежӧртана — сельскӧй кӧзяйствоын борда гаг пӧлӧслӧн — бусаліссезлӧн значеннёыс зэв ыджыт.
Асбусасьӧм.
Мукӧд кадӧ овлӧ и сідз: шуам, умӧль погоддя — кӧдзыт, зэр — либо колан гаг пӧлӧс абу, креста бусасьӧмлісь мунӧмсӧ соралӧ.
Сэк, конешно, быдмас дзоридз кольччас бусасьтӧм и урожай оз сет.
А вот мукӧд быдмас пӧлӧс дзоридзын мунӧ асбусасьӧм. Асбусасьӧм понісь кӧдзыс тусь сёжӧ аркмӧ.
Эмӧсь и сэтшӧм быдмассэз, кӧдна пыр боссьӧны асбусасьӧмӧн. Сэтшӧм быдмассэс, шуам: томаттэз, анькытш, тыква, а сю быдмассэз шӧрись — ид.
Мый мӧдкодьыс дзоридз строеннёын, кӧдналӧн бусасьӧмыс мунӧ борда гаггезӧн.
Тычинкаэз да плодниккез — медважнӧй торрез дзоридзын.
Токо ны пыр мунӧ быдмаслӧн пола йылӧм.
Листоккез, бекӧрок да лепестоккез венчиклӧн, кӧдна кытшӧвтӧны энӧ главнӧй органнэсӧ и вевттьӧны, кыдз бы дзебӧны ас пытшканыс нійӧ, плод аркмӧмын озӧ участвуйтӧ.
Нія шусьӧны дзоридз вевтӧсӧн либо мӧд нёж околочветникӧн.
Но гагсянь бусасян дзоридзлӧ сідз жӧ околочветникыс зэв колан тор. Сыын ӧксьӧ сакара раствор-нектар, кӧдӧ кошшытӧн борда гаг шныритӧ быдлаӧт.
Рӧма околочветник кыдз сигнал бытьтӧ борда гаглӧ: ылісянь висьталӧ, эстӧн пӧ чӧскыт маыс уна, татчӧ локтӧ.
А чӧскыт дук, кӧдӧ уна быдмаслӧн дзоридз лэдзӧ, сідзи жӧ отсалӧ гаглӧ адззыны колан чӧскыт нектара дзоридз.
Околочветник оз овлы ӧткодь мича рӧма.
Нетшкӧвтны кӧ зарни-виж рӧма путшалӧм берба бадь ліст (83 рис.), кӧр сылӧн дзирыт дзоридзасян кад, да видзӧтны бытшӧмика, позяс адззыны: путшалӧм берба аркмӧма зэв уна айпӧв дзоридзись. Нія быдӧнныс ӧксьӧмась ӧтлаӧ — ӧтік околочветник вылӧ.
Быд торья дзоридзок учӧтик и умӧля тӧдчана.
Аркмӧма вежыник чешуйкаись, а доррезӧттяс серебристӧй гӧноккез.
Эта чешуйкаыс и эм «околочветник».
Быд чешуйка дынсянь вылӧ чурвидзӧны кык кузь, вежыник сіоккез — тычинка кококкез. Йыланыс нылӧн зарни рӧма гырись пыльниккез.
Мӧдік учӧтжык чешуйка вылын позьӧ адззыны зэв учӧтик нерӧдок, кӧдаись пичкиссьӧ чӧскыт ма дука нектар.
Берба — абу ӧтік дзоридз, а быдса дзоридз чукӧр. Сэтшӧм дзоридз чукӧрсӧ шуӧны соцветиеӧн.
Но кытӧн нӧ дзоридз плодниккес?
Нія сідз жӧ ӧксьӧмась бербаӧ (84 рис.) и ныись аркмӧма иньпӧв соцветие. Иньпӧв соцветиеэз озӧ тычинкаа соцветиеэзкӧт пукалӧ ӧтлаын — ӧті пу вылын, нія дзик янынӧсь — мӧді пу вылынӧсь.
Мош лун лунӧн пуӧ эна соцветиеез вылын и ӧтмӧдӧрӧ нуӧ-вайӧ соцветие вылісь соцветие вылӧ пыльца.
Бадь дзоридзлӧн торьясьӧмыс мунӧма ылӧжык ӧгурчи дзоридз торьясьӧмся. Огурчилӧн дзоридззес кӧть и кык пӧлӧс, но кыкнанныс нія ӧті улок вылын пукалӧны — ӧтік быдмас вылын. А бадьлӧн ӧтпӧлӧс дзоридзыс ӧтік пу вылын, а мӧдыс — мӧдік пу вылын.
Этатшӧм быдмассэсӧ шуӧны кыкгорта быдмассэзӧн.
Тӧлӧн бусасян быдмассэз и нылӧн особенносттез.
Одзся одз тулыссӧ пондӧ дзоридзасьны орешник.
Сылӧн, улӧ ӧшӧтчӧм и пыльцаӧн тырӧм бербаэзісь не чӧскыт дук оз пет, не мича рӧм абу (95 рис.).
Эна дзоридззез вылӧ ӧтік борда гаг оз лок да оз пуксьы — сылӧ эта дзоридз вылын нем керны, чӧскыт нектар и воть абу.
Зато чуть павкӧтін орешник улок и пыльца быдса кымӧрок мыгӧрӧн киссьӧ дзоридзись.
Сія жӧ овлӧ и тӧла пора: пу куснясьӧм понісь пыльца дзоридзись киссьӧ и руын паськалӧ — лэбзьӧ ӧтмӧдӧрӧ.
Босьтны кӧ да берегитӧмӧн емӧн ӧтік бербаок орешниклісь чешуйкаок нетшкӧвтны, а сыбӧрын лупа пыр видзӧтны, лоас тыдалана: быд чешуйка увтын ӧшалӧны кыкьямыс тычинкакок. Йыланыс нылӧн пыльниккез. (86 рис. а).
Плодниккез орешниклӧн абу ӧксьӧмась бербаӧ, кыдз бадьлӧн.
Нія дзебсисьӧмась куимӧн-нёльӧн ӧтлаын. Особӧй гырисьжык дзоридз почаэзӧ, кӧдна ӧшалӧны ӧтік ув вылын тычинкаа бербаэзкӧт.
abu
Дзоридзасикӧ дзоридз почаэзісь ӧтӧрлань чурвидзӧны чим гӧрд рӧма плодник стобок ӧмоккез (86 рис. б). Ны вылӧ руын ветлан пыльцаыс и сюрӧ.
Сідзкӧ пыльцасӧ дзоридз вылісь дзоридз вылӧ новйӧ не гаг, а тӧв.
Тӧлӧн бусасян быдмас пӧлӧсӧ пырӧ чуть не быд пуа быдмас миян (ловпу, кыдз, тополь и мук.).
Злаккез (а ны коласӧ пырӧны и сю культураэз быдӧс) сідз жӧ бусасьӧны тӧлӧн.
Токо айпӧв дзоридззез да иньпӧв дзоридззез пукалӧны ордчӧн ӧтік соцветие вылын — шеппез вылын, либо роззэз вылын.
Тӧлӧн бусасян быд быдмаслӧн эмӧсь ӧткодь признаккез, кӧдна сьӧрті нійӧ позьӧ тӧдны: 1) дзоридз вевтӧс нылӧн посни, чешуйка чужӧма, 2) мича рӧм да чӧскыт нектар абу, 3) тычинкаэзісь киссьӧ зэв уна пыльца.
3. Искусственнӧй бусалӧмӧн виль быдмас пӧлӧс петкӧтӧм.
Помессез быдмассэз коласын.
Природаын бусасьӧмыс мунӧ унажыксӧ ӧтік вида быдмас коласын, мӧд нёжӧн кӧ быдмассэз коласын, кӧдна ӧтамӧдкӧт зэв матын родаӧсь.
Однако мукӧд пырас бусасьӧмсӧ позьӧ керны и ылын рода быдмассэз коласын; быдмассэз коласын, кӧдна ӧтамӧд дынсянь и асланыс чужӧмӧн и керӧмӧн сулалӧны вель ылын.
Том быдмас пӧлӧсыс, эта бусасьӧм понісь аркмӧмыс мукӧд кадӧ чужӧмнас вачкисьӧ кӧдакӧ быдмас вылӧ, либо босьтӧ кыкнан «аймамыслісь» признаккез.
Эта и вежӧртана лоӧ:
эд виль, том быдмасыс аркмӧ мам клеткаись — пылинкаись.
Эта быдмас свойствоӧн быдмас вӧдитіссез вермӧны петкӧтны виль быдмас пӧлӧс, кӧда природаын некӧр эшӧ эз и вӧвлы, вермӧны петкӧтны дзик виль культураэз.
Природаын этатшӧм помессес вермасӧ лоны ӧті-ӧтіӧн токо, да и нія аркмӧны случайнӧя.
abu
Ӧтік быдмас вылісь искусственнӧя мӧдік быдмас вылӧ пыльца нуӧм пондіс шусьыны быдмас скреститӧмӧн.
Помесь кокнитжыка вермӧ аркмыны сэк, кӧр скреститӧмыс мунӧ ӧтік вида быдмассэз коласын. Шуам ӧтік сорт яблоня пу вылісь пыльца нусьӧ мӧдік сорт яблоня пу вылӧ. Либо скреститчӧны кык сорта груша пуэз, черешня пуэз и мук.
Бӧрйӧны, например, кык сорт яблоня: ӧт сортыс, шуам, сетӧ плоддэз бур качествоаӧсь, но оз вермы кӧдзыт одзын сулавны — кынмӧ да урожайсӧ етша сетӧ;
эта, шуам, сорт — №1.
А мӧдыс — сорт №2, морозлісь оз пов и урожай сылӧн ыджыт, но яблоккез аркмӧны посниӧсь да и шӧмаӧсь.
Энӧ сорттэсӧ скреститӧмӧн, позьӧ надейтчыны, аркмас помесь, кӧдалӧн плодыс лоас чӧскыт, урожай ыджыт и кӧдзытлісь оз пов.
Эта помесьыс, мӧд нёжӧн гибридыс, кыдз сійӧ учёнӧйез нимтӧны, вермас ас пытшкас видзны миянлӧ колан качествоэз кыкнан сорт быдмаслісь, кӧднӧ ми скреститім.
Скрестітан приёммез.
Самӧй скреститӧмыс керсьӧ сідз.
Арсӧ, яблоня №2 дзоридз оссян одзын, пинцетӧн жагӧника осьтӧны бутон (дзоридз почасӧ) и тычинкаэсӧ быдӧннысӧ нетшкӧны, мӧд нёжӧн айпӧв дзоридз органнэсӧ дзимлялӧны — чепӧльтӧны дзоридзсӧ.
Керсьӧ эта сійӧн, мед эз аркмы мӧдпыр асбусасьӧм.
Эта бӧрын чепӧльтӧм дзоридз вылӧ кышалӧны тодель марляись вурӧм кӧшелёк, мед пыльца мӧдӧрсянь плодник вылӧ эз вермы сюрны.
Эта кӧшелёк пытшкын дзоридз олӧ лун кык, кытчӧдз плодник ӧмокыс оз во. Воӧмсӧ сылісь позьӧ тӧдны вевдӧрӧ лэбӧм лякасян жидкость сьӧрті.
Сэк кӧшелёк мам дзоридз вылісь кульыштӧны и кисточкаӧн айпӧв дзоридз вылісь — №1 яблоня вылісь вайӧны пыльца.
abu
Бусалӧм дзоридз вылӧ бӧра кышалӧны кӧшелёк, а бокас ӧшӧтӧны этикетка, кӧда вылӧ гижсьӧ, кытшӧм сорткӧт скреститӧма эта сортыс.
Гибрид петас.
Скреститӧм плод кӧдзыс кӧдзӧны, а петассэз быдтӧны; сідз аркмӧ виль признака быдмас сорт.
Гибрид петас пӧлӧс шӧрись бӧрйӧны медвынаэсӧ, медбы мӧдпыр и пу аркмис бур да вына.
А кӧр томыник пуэз пондасӧ сетны ассиныс урожай, сэк позяс вӧлись шуны, а выгоднӧй виль сортыс али не. Выгоднӧй кӧ, кольӧны кыдз виль сорт.
Мичуринлӧн виль сорттэз.
И. В. Мичуринӧс позьӧ шуны виль быдмас керисьӧн. Этӧ мортсӧ — быдмас видзисьсӧ — быдӧн тӧдӧ. Сы нимӧн шуӧны Козлов кар ЦЧО-ын — Мичуринск, кытӧн сія ӧнӧдз олӧ, сы нима эта карын эм плодовӧй станция, сідз и шусьӧ: мичуринскӧй опытнӧй плодовӧй станция.
Быдӧс вексӧ ассис Мичурин пуктіс сы вылӧ, медбы петкӧтны виль сорта быдмассэз, кӧдна бы СССР шӧрӧт полосаын плоддэз вайисӧ не умӧльжыка пыдын лунвыв вылын аркман плоддэзся.
Скреститӧм пыр, гибриддэз быдтӧмӧн, бӧрйӧмӧн да ӧті-мӧді культурнӧй быдмас приёммезӧн 55 во уджалӧм сьӧрна Мичуриныс петкӧтіс кыксёся унажык виль культура быдмас сорттэз, кӧдна коласын ӧддьӧн уна быд чужӧма плода пу сорттэз да ягӧд, кустарниккез.
Неважын эшӧ миян РСФСР шӧрӧт полосаын эз быдмы ӧтік сорт грушалӧн, плоддэз кӧдалӧн эзӧ бы полӧ кӧдзытлісь и эзӧ бы тшыкӧ тӧвсӧ, вермисӧ бы видзсьыны свежӧйӧн тулысӧдз.
Мичурин петкӧтіс замечательнӧй виль груша, кӧда вайӧ зэв бур качествоа плод, кӧда воӧ куйлікӧ и видзсьӧ тулысӧдз.
Пуыс эта грушалӧн оз пов тӧвся кӧдзытлісь.
Эта груша нимтӧма «Мичуринлӧн тӧвся Бере».
Сія петкӧтӧма Уссурийскӧй крайись кӧдзыт вылын видзсян вӧр груша зэв бур лунвылісь груша сорткӧт скреститӧмӧн. (87 рис.). Уссурийскӧй вӧр грушалӧн плоддэс поснитикӧсь, чорытӧсь нечӧскытӧсь. Зато эта грушаыс зэв бура вермӧ чулӧтны тӧвся кӧдзыт кад. А лунвылісь грушалӧн плоддэз нежнӧйӧсь, гырисьӧсь, чӧскытӧсь. Зато эта грушаыс миянлісь кӧдзыт тӧввез терпитны оз вермы — кынмӧ.
Энӧ грушаэсӧ скреститӧм бӧрын аркмас виль мичуринскӧй груша сорт. Эта виль сортын кыкнан ай-мам грушалӧн зэв дона признаккес боссьӧмась.
Уссурийскӧй грушасянь — мамыссянь виль сортӧ боссьӧма кӧдзыт тӧвлісь неполан признак; нежнӧй лунвыв сортсянь — айыссянь боссьӧма зэв чӧскыт кӧр, ыждаыс, басӧкыс.
Громаднӧй опыт, тӧдӧммез (знаннёэз), дзирыта ассис уджсӧ радейтӧм, упорство уджын отсалісӧ Мичуринлӧ керны сійӧ, мый сылӧн ӧні эм. Мичуринск кар увтын, кытӧн тӧвнас кӧдзытыс овлӧ −30°Ц ӧдз, сылӧн питомникын бурся бура олӧны и вайӧны плоддэз: виноград, абрикос, черешня, айва, шелковица, грецкӧй ӧрек и уна мукӧд пыдын лунвывса плода пуэз.
Особӧй интересаӧсь мичуринскӧй виноград сорттэз, кӧдна озӧ полӧ кӧдзытлісь. Нія тӧвйыны вермӧны шебрастӧг либо кокнитик шебрас увтын.
Но Мичуринлӧ удайтчис не токо виль сорттэз петкӧтны. Сія петкӧтіс совершенно виль вида быдмассэз, кӧдна сы вотӧдз мушар вылас некытӧн эз вӧлӧ. Сідз, например, сылӧн эм помесь вишня льӧмпукӧт, груша ребинакӧт.
Ӧнісянь виль мичуринскӧй сорттэз, медунасӧ яблоняэз, грушаэз, сливаэз чожа пондасӧ паськавны колхоззэзӧт, совхоззэзӧт СССР пасьта.
Виль сорттэз Мичуринлӧн, кӧдна озӧ полӧ кӧдзытлісь, вермасӧ вежсьыны зэв ылӧ ойвывлань, кытӧн некӧр некытшӧм фруктовӧй пу эз быдмы либо быдмисӧ донтӧмик, умӧлик сорттэз.
Ним И. В. Мичуринлӧн — медтӧдана ним Союз пасьта. Мичуринӧс ыджытсянь и учӧтӧдз быдӧн тӧдӧ, сійӧ тӧдӧ быд грамотнӧйжык крессянин, сійӧ тӧдӧ быд учёнӧй.
Сар правительство донтӧмтіс сылісь удж.
Средствоэзтӧг, отсӧгтӧг, аслас сирньылӧмӧн шедтӧм грошшез вылӧ Мичурин упорнӧя лӧсьӧтчис керны революция плодовӧй кӧзяйствоын.
Сар дырни Мичурин эз вермы ыджыт размах сетны эта уджлӧ, ассис достиженнёэсӧ эз вермы паськӧтны уджалісь отир коласӧ.
Токо совет власть вермис кыдз колӧ донӧн пуктыны сылісь удж и достиженнёэз.
Токо миян социалистическӧй кӧзяйствоын Мичуринлӧн труд адззис аслыс примененнё.
Сад, кытӧн кӧркӧ уджаліс Мичурин, быдмис ӧні ыджыт учрежденнёӧ — сы нима опытнӧй станцияӧ.
Быдса сё сюрсӧн томыник плода пу пӧлӧс воись воӧ паськалӧ эта станцияись быдӧс Союз пасьта ӧтмӧдӧрӧ.
Эстӧн, особӧй исследовательскӧй институтын, советскӧй, учёнӧйез велӧтӧны законнэз, кӧдна сьӧрті быдмас зорамӧ быдмӧ, кӧдна сьӧрті позьӧ быдмӧмнас веськӧтлыны. Велӧтӧны Мичуринлісь приёммез, кыдз сія нійӧн петкӧтӧ виль быдмас сорттэз.
Мичуринлӧ уджыс понда козьналӧма кык орден: Уджалӧмись гӧрд знамя орден и Ленин орден.
Виль сорттэз петкӧтӧмыс миян социалистическӧй строительство условиеэзын адззӧ зэв ыджыт значеннё.
Мӧд пятилетка программаӧ пыртӧма боевӧй задача — аркмӧтны виль быдмас сорттэз: сю сорттэз, карч сорттэз, сад сорттэз, техническӧй быдмас сорттэз, вердас культура сорттэз, да мед нія вӧлісӧ торьяӧсь быд районлӧ миян Союзын, и медперво засухаа районнэзлӧ.
Советскӧй научнӧй станцияэзлӧн виль сорта культура быдмас петкӧтан уджын ӧні эм ыджыт успех ни.
Сідз Саратовскӧй опытнӧй станциялӧ рудзӧг шогдікӧт скреститӧмӧн удайтчис петкӧтны быдсӧн виль быдмас — рудзӧга-шогді гибрид, кӧдалӧн тусьыс аслас качествоӧн етша мыйӧн кольӧ шогді тусь сьӧрись, но кӧда буржыка чулӧтӧ и кӧс кад и кӧдзыттэз.
Эта виль гибридыс сетӧ позьӧм кӧдзыса кӧзяйствоэзлӧ засухаа районнэзын пессьыны неблагоприятнӧй климата условиеэзӧн.
Морт, тӧдӧмӧн юрын и опытӧн киын, «ентӧг» петкӧтӧ виль быдмассэз и утлянно сэтшӧмӧсь, кӧдна колӧны сельскӧй кӧзяйстволӧ социалистическӧя сійӧ вежӧм понда.
II.
ВЕГЕТАТИВА ЙЫЛӦМ.
Ӧні тӧдсасямӧ, быд кодь вегетатива йылӧм способбезкӧт, мӧд нёжӧн кӧ шуны, му засянь, клубеннезсянь, луковицасянь, вужсянь быдмас йылӧмкӧт.
1. Вужжезсянь, мӧдкодьсялӧм засянь да листтэзсянь быдмаслӧн йылӧм.
Му засянь да вужжезсянь быдмаслӧн йылӧм.
Му за — мӧдкодьсялӧм за, кӧда олӧ муын и почаэзісь кӧдалӧн вермӧ пизьӧтны томыник быдмас.
Кӧр му заыс муын бура вожьясьӧ — паськалӧ, сэк сылӧн торья вужжез коласын связьыс ӧшӧ — аркмӧ кынымкӧ торья быдмас.
Мукӧд кадӧ быдмас йылӧ аслас вужжезӧн, кӧдна вылын аркмӧны содтӧт почаэз.
Пример туйӧ позьӧ босьтны малина.
Малина вермӧ йывны вуж бердса  заоккезӧн.
Му заэзсянь да вужжезсянь йылӧм ми адззам ёгтурун коласісь уна быдмас.
Сійӧн эна быдмассэс сэтшӧм чожа и керӧны ас увтаныс ыббез, озӧ кӧ ныкӧт кыдз колӧ пессьӧ.
Вегетатива йылӧмсӧ велӧтӧм отсалӧ миянлӧ пессьыны ёгтурун пӧлӧскӧт и вӧтлыны нійӧ социалистическӧй ыббез вылісь. Не вӧтлыны кӧ нійӧ, дзикӧдз не орӧтны, урожай унаӧн усьӧ, нія культурнӧй быдмассэсӧ вевттьӧны.
Клубеннезӧн йылӧм.
Зэв бур примерӧн клубеннезӧн йылӧмын вермас лоны картовки.
Картовки клубень эм мӧдкодьсялӧм за, кӧдаӧ тыр тэчӧма питательнӧй веществоэзлӧн запас.
Картовки за пизьӧтӧ картовки «синоккезісь» (почаэз), кӧдна пукалӧны картовки вевдӧрын.
Унажык картовки садитӧны быдсӧн либо джынӧн;
но кӧр садитан материалыс етша, то картовкилісь позьӧ садитны токо ӧтік синоккез, мед лишь ны бердын вӧлі мымдакӧ картовки сьӧлӧмӧс.
Этӧ способсӧ босьтӧны сэк, кӧр окота чожа петкӧтны кытшӧмкӧ виль картовки сорт.
Картовки сьӧрын видзӧтан уджын мед колан приёмыс — картовки кучитӧм. Кучиттӧн картовки поз гӧгӧрись муыс чукӧртчисьӧ картовки за бердӧ.
Кучитӧм понісь муын картовкилӧн унажык аркмӧны клубеннез.
Картовки клубеннезӧ питательнӧй вещество запас коласісь унажыкыс ӧксьӧ крахмал.
Природаись позьӧ адззыны и мӧдік примеррез, кӧдна сідз жӧ пондасӧ мыччавны быдмассэзлісь вегетатива йылӧм. Клубеннез эмӧсь и мӧдік быдмассэзлӧн.
Босьтны кӧть примерӧ чистяк быдмасӧс. Сылӧн муын тожӧ клубеннез эмӧсь, кӧднӧн нія йылӧны.
Но интереснӧйжыкыс чистяклӧн то мый: сылӧн эна му пытшкись клубеннезся аркмӧны эшӧ му вевдӧрись клубеннез, кӧдна пукалӧны лист конувттэзын.
Эна выводковӧй клубенёккез ыждананыс шогді тусь гырисяӧсь, гожумсӧ нія быдмас за бердісь калькалӧны и усялӧны му вылӧ, а арсӧ вужьясьӧны и ныись петӧ виль быдмас.
Быдмассэзлӧн листтэзӧн йылӧм.
Этатшӧм асчужӧма йылӧмсӧ ми адззам природаын мукӧд быдмассэз шӧрись, кӧдна любитӧны быдмыны ваа видззез вылын. Босьтны кӧть сьӧлӧмвисян турун (сердечник).
Кӧр чегана листтэз сьӧлӧмвисян турунлӧн павкӧны уль му бердӧ, сэк нылӧн пизьӧтӧны почаэз, кӧднаись бӧрынжык зорамӧны виль быдмасоккез.
Керку саддэз мукӧд кадӧ сідз жӧ листтэзсянь зорӧтӧны.
Медбура листтэзсянь зорамӧ бегония быдмас (88 рис.) — быдмас зэв басӧк, сера рӧма листтэза (видз. 11 удж, 131 листбок).
2. Кыдз быдмассэз зорӧтӧны заоккезсянь, улоккезсянь да прививкаӧн.
Кыдз быдмас зорамӧ улоккезсянь и заоккезсянь.
Бадь уввез, кӧр нія павкӧны ваа мусин бердӧ, лэдзӧны дынсиныс содтӧта вужжез, вужьясьӧны.
Этадз мукӧд быдмассӧ тшӧктӧны йывны заоккезсянь и улоккезсянь. Сідз, например, сэтӧрлісь томыник заоккесӧ либо улоккесӧ вожоккезӧн мӧрталӧны му бердӧ и недыр мыйись мӧртӧм местас заоккес вужьясьӧны.
Но искусственнӧя йылӧтны быдмас позьӧ и улоккезӧн.  Орӧтасӧ томыник улок да садитӧны муӧ. Мыйкӧдырнаись улок бӧра жӧ вужьясьӧ.
Сувтӧтны кӧ ваӧ мукӧд пу породаэзлісь да кустарниккезлісь (тополь, бадь, сэтӧр) улоккез, сэк ваӧ вӧтьӧм улок тор вылас шогмасӧ вужжез.
Этадз жӧ вужьясьны быдмас вермӧ и сэк, кӧр вундыштӧм улоккес сылӧн тулыссӧ лоасӧ мӧртӧмӧсь рышкыт нюдз муӧ.
Этадз томыник заоккезӧн зорӧтӧны сэтӧр, тополь и мукӧд керку саддэз.
Улок вундыштӧминас аркмӧ кызін, кӧда дойдӧминсӧ вочӧ, а му пытшкын садитӧм заоклӧн пизьӧтӧны вужжез (видз. 12 удж, 131 листбок).
Кыдз быдмас йылӧтӧны прививкаӧн.
Быдмас вермӧ йывны не токо заоккезсянь да улоккезсянь, но и ӧтік почаӧн. Прививка способӧн йылӧтӧм дыр сідз и керӧны.
Прививкаӧн вермӧны йывны, например, плода пуэз: яблоня, груша, слива.
Медбы тӧдсасьны эта интереснӧй йылан способкӧт, видзӧтам, кыдз быдтӧны яблонясӧ питомниккезын.
Эта понда кӧдзыс зӧр яблоняись кӧдзӧны муӧ и первося воӧ быдмӧ быдмас карандаш кыза.
Мӧд тулысӧ энӧ томыник быдмасоккесӧ садитӧны питомникӧ и гожум помын быд быдмасок бердӧ лякӧтӧны (прививайтӧны) бур сорта яблоня бердісь босьтӧм поча.
Юль тӧлісь гӧгӧр, кӧр лист конувттэзын зорамасӧ почаэз, бӧрйӧм яблоня сортлісь вундыштӧны тавося улок (89 рис.).
Лиссэз сылӧн вундассьӧны, кольӧны токо за бердісь оропоккес.
Эта бӧрын тоделя пуртӧн улок бердісь почасӧ кор сорӧн и пу сорӧн вундыштӧны (90 и 91 рис.).
Сыбӧрын улӧ вӧр яблоня быдмасок вылӧ пуртӧн керӧны креста щель. Вундыштӧм поча бур сорта яблонялісь креста шельӧ сюйыштӧны (92 рис.)
и медбы эта креста щельӧ сюйыштӧм почаокыс топжыка локтіс пу бердӧдз,
вевдӧрӧттяс каттьӧны бонӧн. И прививкалӧн пом.
Быдӧс керӧмыс аркмис кӧ бура, ар кежӧ щелльӧ садитӧм поча кутчисьӧ яблоня пу бердӧ.
Мӧдік тулысӧ привитӧм почаись зорамӧ быдса за листтэзӧн.
Вӧр яблонялӧн заыс привитӧм поча вевдӧрас вундыштсьӧ и кольсьӧ дженытик мырок, кӧда бердӧ кӧртассьӧ привитӧм почаись зорамӧм улок, мед мырок бердісь эз чайд (93 рис.).
Сэтчин одзланьын кӧркӧ кольӧм мырок вундыштсьӧ кыдз неколан тор.
Сідз вӧр яблоняоклӧн мырокыс кольччӧ токо улын.
Му вевдӧрись быд торыс бур сорта яблонялӧн зорамӧ быдса ӧтік почаокись.
Но мыля жӧ яблонясӧ, грушасӧ — быд плода пусӧ озӧ йылӧтӧ кӧдзыс тусись?
Мыжаыс (причинаыс) то мыйын: кӧдзыс тусись аркмӧм плода пуын абу быд колан качествоыс.
Сідз, шуам, босьтны кӧ кӧдзыс антоновка яблоня: сортлісь, то кӧдзыс тусись быдмӧм яблоняын антоновка сорт качествоэс озӧ лоӧ.
Эта виль пу вылын яблоккез вермасӧ аркмыны шӧмаӧсь, посниӧсь, кыдз и вӧр яблоня вылын жӧ.
Прививка пыр ми вермам зорӧтны утлянно сэтшӧм сорта яблоня, кӧда бердісь вӧлі босьтӧма привитан поча.
Быд область понда опытнӧй станцияэзлӧн керӧмась тодель списоккез, кытӧн, кытшӧм районын кытшӧм сорта плода пу позьӧ и колӧ вӧдитны.
Колан сорта плода пуэз эна районнэз понда тодель петкӧтчиссьӧны особӧй питомниккезын. Перво сідз жӧ кӧдзӧны плода пу кӧдзыс, а сыбӧрын прививкаӧн зорӧтӧны колан сорта культивируйтӧм плода пуэз.
Сар Россиясянь миянлӧ кӧркӧ колисӧ саддэз етшаӧсь да и нія вӧлі садитӧмась умӧль сорта плода пуэзӧн. Помещиккез да кулаккез, кӧдна киын вӧлісӧ эна саддэс, эзӧ бытшӧмика, кыдз колӧ, заботитчӧ виль, бур сорта плода пуэз зорӧтӧм йылісь.
Ӧні, медбы уджалісь мортӧс снабдитны плоддэзӧн, СССР пасьта совхоззэзын и колхоззэзын паськалӧны виль саддэз.
Мӧдік способа прививкаэз.
Эсся, мыччалӧм почаӧн прививкася, эмӧсь эшӧ мӧд чужӧма прививкаэз. Сідз, например, прививайтӧны быдса ув.
Сэтшӧм прививкаыс керсьӧ тулыссӧ одз, кӧр эшӧ эз оссьы поча.
Позьӧ этатшӧм прививка керны, например, вӧр яблоня ув бердӧ кытшӧмкӧ бур сорта яблоня улок. Вӧр яблоня улас эта понда бӧра жӧ керӧны щелёк и вӧлись сэтчӧ садитӧны колан сорта культурнӧй яблоня улок.
Мӧдпыр ӧтік яблоня вылын аркмасӧ и вӧр яблоккез, и бур, колан сорта яблоккез.
А позьӧ ӧтік яблоня вылас привитны не ӧтік сорт яблок.
Кыным сорт привитам, сыным сорт яблок мӧдпыр яблоня вылас и пондас аркмыны.
Прививка позьӧ керны не токо пу быдмас вылӧ, сійӧ позьӧ керны и турун быдмас вылӧ.
Интереснӧй пример туйӧ позьӧ босьтны томат привитӧм картовки кор бердӧ (94 рис.). Муын аркмӧ картовки, а кор вылас воӧны томаттэз.
Вегетатива йылӧмлӧн значеннё.
Сідзкӧ, быд вегетатива торрез пыр быдмас вермӧ йывны. Эна вегетатива торрес быдмаслӧн то кытшӧмӧсь: вуж, за и мукӧд кадӧ даже лист.
Эта способӧн быдмас йылӧмыс зэв паськыта используйтчӧ сэк, кӧр колӧ чожажыка петкӧтны кытшӧмкӧ виль сорта культурнӧй быдмас.
Сія медколана сэтшӧм сорттэзлӧ, кӧдна кӧдзысісь зорамӧм пыр озӧ сетӧ ассиныс качествоэз.
КЫКЬЯМЫСӦТ ГЛАВА.
БЫДМАС ОРГАНИЗМ КЫДЗ БЫДСА ОРГАНИЗМ.
Керамӧ итог быдӧс сы вылӧ, мый мийӧ тӧдімӧ быдмас олӧм йылісь.
1. Быдмаслӧн, сы органнэзлӧн клеточкаа строеннё.
Быдмас и сылӧн органнэз аркмӧмась клеткаэзісь.
Медглавнӧй торрес клеткаын — протоплазма и клеткалӧн ядро;
Протоплазмаын и клетка ядроын мунӧны быд олан процессэз.
Минеральнӧй соввез босьтӧм, ва босьтӧм, углерод босьтӧм, питательнӧй веществоэзлӧн мӧдкодьсялӧм, лолалӧм — ӧтік кылӧн, быд веществолӧн вежсьӧм мунӧ клеткаэзын.
Ловья клеткаэзын мунӧ то жагӧнжыка, то чожажыка протоплазмалӧн ветлӧм.
Эта ветлӧмыс протоплазмалӧн бура тыдалӧ микроскоп увтын элодея быдмас клеткаэзын (95 рис.).
Микроскоп увтын ми адззам, кыдз протоплазмаыс клетка стенкаэз дорӧт кытшлалӧ и кылӧтӧ сьӧрас хлорофилл туссез.
Протоплазматӧг и ядротӧг олӧм лоны оз вермы.
Протоплазма да ядро кулӧм бӧрын и клетка быдӧс кулӧ.
Быдмас клеткаэз ӧтамӧд дынісь абу изолируйтчӧмась. Нія топыта кӧртасьӧмась ӧтамӧдкӧт ӧтік быдса организмӧ.
Ордчӧн куйлан клеткаэзлӧн протоплазмаыс зэв вӧсни сунисоккезӧн пырӧ и йитсьӧ мӧдік клетка протоплазмакӧт. Клетка дыжын (оболочкаын) ны понда эмӧсь тодель пораэз (осьтаоккез).
Эна вӧснитик протоплазма сунисоккез пыр да джынйиджана клетка стенкаэз пыр веществоэзлӧн вешсьӧмыс и мунӧ.
Эта сьӧрті олан процессэс мунӧны согласнӧя быдсӧн быдмас организм пытшкын.
Ӧтчужӧма клеткаэзісь, кӧдна топыта видзсьӧны ӧтамӧд бердӧ, аркмӧны тканнез.
Ткань клеткаэс ӧтамӧдкӧт йитсьӧны — клеитчӧны особӧй клетка коласся веществоӧн.
Эта клетка коласісь вещество сідз жӧ участвуйтӧ клетка-клетка коласісь веществоэз вежсьӧминын.
Быд тканьлӧн быдмас олӧмын аслас роль.
Сідз, камбий клеткаэзісь да быдман точкаа клеткаэзісь аркмӧ образовательнӧй ткань.
Вевдӧрись клеткаэз лист кучишоклӧн, за кучишоклӧн, вуж кучишоклӧн аркмӧтӧны вевттян ткань.
Пу сосуддэзісь да пожа кор трубкаэзісь аркмӧ нуан-ваян ткань. Луб сӧннэзісь аркмӧ механическӧй ткань.
Тканнез коласын сідз жӧ мунӧ зэв топыт ӧтласа удж.
Например, образовательнӧй тканьын клеткаэзӧн зорамӧм да йылӧм муӧ нуан-ваян ткань отсалӧмӧн.
Тканнезісь аркмӧ быд органыс быдмаслӧн.
И органнэз коласын эм топыт связь.
Сідз, например, быдмас вужжез пыр муись сьӧскиссьӧны ва сорӧн минеральнӧй соввез, листтэзӧн руись боссьӧ углерод; углеродісь, минеральнӧй соввезісь да ваись аркмӧны органическӧй веществоэз.
Лиссэз пыр быдмасісь пакмӧ ва, кӧда сӧскиссьӧ вужжезӧн мусинісь.
Вужлӧн уджыс лист уджкӧт кӧртассьӧ за пыр.
Олан процессэз быдмас пытшкын мунӧны естественнӧй законнэз сьӧрті, кӧдна ӧтікӧсь, ӧтласаӧсь быд быдмас организмлӧ.
Быдӧс, мый кӧркӧ вӧлі тӧдтӧм, таинственнӧй, быдмас клетка осьтӧм бӧрын лоис тӧдса и висьталана (объяснитана).
И кӧркӧ, и ӧні буржуазнӧй «учёнӧйез» мырсьӧны докажитны, быдмасын пӧ олан процессэз мунӧны кытшӧмкӧ «тӧдтӧм, таинственнӧй олан вын» тшӧктӧм сьӧрті.
Эна лжеучёнӧйес мукӧд пырся локтӧны сэтчӧдз, што нія ловья быдмас гыркись чайтӧны кытшӧмкӧ особӧй быдмас лов (душа). Эта лолыс пӧ и тшӧктӧ быд олан процессӧ быдмас пытшкын мунны.
Эна сказкиэс, кӧдналӧн быльнӧй наукакӧт ӧтласаыс абу нем, токо падмӧтӧны наукалісь одзлань мунӧмсӧ.
2. Быдмаслӧн зорамӧм.
Быд быдмас клетка аркмӧ токо клеткаись жӧ.
Клетка зорамӧм понісь, клетка йылӧм понісь, мӧдкодьсялӧм понісь аркмӧны и органнэз быдса быдмас организмлӧн.
Быд унаклеткаа организм аркмӧ сідз жӧ ӧтік клеткаись.
Кӧр пыльца клеткалӧн ядроыс йитсяс яйцеклетка ядрокӧт, боссьӧм клеткаэз пондӧны янсавны-йывны.
Этадз медодзза клеткаэз быдмӧм понісь, йылӧм понісь зорамӧ чужӧса кӧдзыс тусь.
Кӧдзыс тусь мӧдкодьсявтӧг вермӧ куйлыны тӧдтӧг ӧддьӧн дыр.
Шоныт понісь да влага понісь пондӧ ныртусясьны: кӧдзыс тусись мыччисьӧ петас — томыник быдмас, кӧда зэв чожа быдмӧ зорамӧ (96, 97, 98 рис.).
Томыник быдмасоклӧн первосянь жӧ пондӧны тӧдчыны вужок и медодзза листоккез.
Перво нія зэв учитикӧсь, сыбӧрын быдмӧны.
Ӧтлаын этакӧт — лист пасьта да вуж пасьта ыждӧмкӧт содӧ быдмаслӧн и питайтчӧм;
вужжез сьӧрна унажык и унажык сӧскӧны муись минеральнӧй соввезлісь растворрез да ва, листтэз углеродісь да ваись сьӧрна унажык и унажык керӧны органическӧй веществоэз, кӧдна мунӧны быдмас питайтчӧмӧ и виль листтэз, виль вужжез и виль за быдмӧмӧ.
Кӧр, шуам, сю быдмас куститчӧ (96 рис.), мӧд нёжӧн кӧ, кӧр сылӧн зэв вынӧн мунӧ вуж-лист быдмӧм, сэк медважнӧй быдмас торрезын клеткаэз орӧтлытӧг прокод йылӧны.
Куститчан стадияыс сюлӧн оча керсьӧ (соответствуйтӧ) карч быдмассэз вылісь вуж-лист зорамӧм стадиякӧт, а унавося быдмаскӧт — за быдман стадиякӧт.
Быдмас оз зорам прокод ӧтнёжа.
Чожа сы олӧмын локтӧ мӧдік стадия.
Сідз, шуам, шогділӧн куститчан стадиа бӧрын локтӧ виль стадия — гумьясян стадия (97 рис.), мӧд нёжӧн кӧ быдмас за бура нюжалӧ и конечас, аркмӧ соцветтё (98 рис.) — шеп, шуӧны: быдмасыс пӧ шепьясьӧ. Шепьясьӧм бӧрын кӧркӧ быдмас дзоридзасьӧ, а медбӧрын и воӧ.
Эта резкӧй переломыс бытшӧмжыка тӧдчана ӧтівося быдмассэз вылын. Ны сьӧрын видзӧттӧн ми адззам, кыдз нія вегетатива органнэз быдмӧм-зорамӧм бӧрын (лиссэз, вужжез да заэз зорамӧм бӧрын) вуджӧны воан периодӧ — плод ваян периодӧ.
Нылӧн аркмӧ дзоридз, плодниккез боссьӧны пыльца клеткаэзӧн и быдмас кутӧ тырсявны-воны. Плод ваян период дырни быдмас быдмыны дугдӧ.
Кӧр быдмас вылын пондӧтчӧны аркмыны дзоридз почаэз (бутоннэз), сэк унажык питательнӧй соккез мунӧны дзоридз зорамӧм вылӧ, а сыбӧрын плод аркмӧмӧ — кӧдзыс аркмӧмӧ и воӧмӧ.
Этасянь быдмас перво винермӧ, сыбӧрын листтэз и за сылӧн кельдӧны, кулӧны, а медбӧрын кулӧ и быдсӧн ачыс быдмасыс.
Ӧтік быдмас туйӧ кольччӧны зэв уна виль, томыник быдмасоккез кӧдзысын.
Сідз мунӧ кӧдзыс туссянь кӧдзыс тусьӧдз ӧтіквося быдмассэзлӧн олӧм: зӧрлӧн, кукурузалӧн, подсолнушколӧн.
Сідз быдмас аслас олан кадын пыр вежсьӧ, мӧдкодьсялӧ.
Кӧдзыс тусись аркмӧ чожа быдман быдмас и эта чожа быдмӧм бӧрын локтӧ быдмыны дугдан период, плод аркман период; медбӧрын локтӧ кулан период.
Ӧтік важ быдмаслӧн олӧмыс вежсьӧ уна виль быдмас олӧмӧн, кӧдналӧн чужӧссэз эмӧсь кӧдзыс туссезын.
Миян кыквося быдмассэзлӧн (морковлӧн, свёклалӧн, капусталӧн, калиглӧн) чожа вужлис быдман период бӧрын мунӧ питательнӧй веществоэз заптан период: морковлӧн, калиглӧн, свёклалӧн сія ӧксьӧ вужжезӧ; коченя капусталӧн — листтэзӧ; кольраби капусталӧн — заӧ.
Эта заптӧм питательнӧй веществоэзӧн быдмас тӧвйӧ, и токо мӧдпыр — мӧді гожумӧ сылӧн пондас зорамны дзоридз, аркмыны плод.
Мукӧд унавося быдмассэз, кыдз, шуам, агава, уна во быдмӧны дзоридзасьтӧг и дзоридзасьӧны асланыс олӧм дырни токо ӧтпырись. Дзоридзасьӧм бӧрын и плод вайӧм бӧрын кулӧны.
Этӧн нія вачкисьӧны кыдз бы ӧтіквося быдмассэз вылӧ.
Мукӧд унавося быдмассэз, кыдз миян пу быдмас пӧлӧс, кӧть и дзоридзасьӧны и плод вайӧны быд воӧ, но урожайнӧй во нылӧн вежсьӧ уна воа неурожая периодӧн.
Эта периодасьӧмыс овлӧ и плода пуэзлӧн, например яблонялӧн.
Сідз мунӧ природаын.
Религиознӧй отир чайтӧны, быдмаслӧн зорамӧмыс пӧ мунӧ кытшӧмкӧ ен тшӧктӧм сьӧрті и вежны пӧ этӧ енӧн пуктӧм зорамӧмсӧ быдмаслісь оз позь некыдз.
Наука осьтӧ зорӧтан законнэз быдмаслісь и морт киӧ сетӧ природа вылӧ власть, велӧтӧ мортсӧ, кыдз колӧ веськӧтлыны быдмас зорамӧмӧн.
Ті адззылітӧ ни осьтӧммесӧ советскӧй учёнӧйезлісь, кӧдна асланыс опыттэзӧн докажитісӧ, бура позьӧ пӧ искусственнӧя тэрмӧтны быдмаслісь зорамӧмсӧ.
Температура регулируйтӧмӧн, влажность регулируйтӧмӧн, искусственнӧй удобреннёэзӧн, яровизацияӧн, югыт вын вежлалӧмӧн (фотопериодізмӧн) ми вермам быдмаслісь зорамӧмсӧ тэрмӧтны, вермам джендӧтны сылісь зораман срок, ыждӧтны урожай.
Этатӧн миян киын эмӧсь ни зэв гырись победаэз природа вылын.
И эна победаэз кытшӧмкӧ сверхъестественнӧй вынӧ религия бердісь мездӧтчытӧм отирлісь наивнӧй веруйтӧмсӧ жугдӧны дзикӧдз.
3. Быдмас и среда.
Уна примеррез сьӧрті ми убедитчим: быдмассэз зэв топыта кӧртассьӧмась ас гӧгӧрись средакӧт.
abu
abu
abu
Кӧсіннэзын быдмӧм быдмассэзлӧн листтэс овлӧны ӧддьӧн посниӧсь, векнитикӧсь, вевттисьӧмась кыз дыжӧн, масіся вевдӧраӧсь либо гӧнока вевдӧраӧсь, а вужжезныс паськыта паськалӧмась ӧтмӧдӧрӧ и пыдына пырӧны мусин пытшкӧ.
Мукӧд быдмаслӧн вежсьӧ органлӧн роль:
босьтны кӧть кактус — сылӧн заыс нуӧтӧ листтэзлісь удж, а листтэс асьныс пӧрӧмась желлезӧ..
Варадейтан быдмассэзлӧн частӧ листтэс волькытӧсь, паськыт лист пластинкааӧсь и мусинын куйлӧны матына, непыдына.
Быдмассэз, кӧдна быдмӧны вылын керӧс йыввезын и полярнӧй странаэзын, кытӧн климатыс суровӧй, ру температура пыр вежласьӧ, ӧддьӧн лажмытика кайыштӧмась да сэтчӧ и падмӧмась, кыссьӧны му вылӧт, мусинын куйлӧны кыз заэз.
Нія адззӧмӧн янсалӧны асланыс формаӧн шӧрӧт кӧдзыта странаись быдмассэзкӧт и быдмассэзкӧт, кӧдна быдмӧны тропиккез увдӧрын.
Эна факттэс бытшӧма мыччалӧны миянлӧ: быдмасыс уна-уна во бӧрті вермӧ ёна мӧдкодьсявны, кыдз шуӧны, приспособитчыны ас гӧгӧрись среда условиеэз сьӧрті.
Быдмассэз, кӧдна абу ештӧмась ас гӧгӧрись средаын приспособитчыны, унажык кӧдзыт понісь кулӧны, либо жарӧн нійӧ сотӧ, либо озӧ вермӧ воӧм виӧдз лоны и кулӧны потомство кольтӧг.
Ловйӧн кольччӧны токо нія, кӧдна ас гӧгӧрись условиеэз вежсьӧм понісь асьныс вежсисӧ либо кӧдна вермисӧ бура бытшӧма чулӧтны виль олан условиеэз.
Ловйӧн кольӧм быдмассэз сетӧны потомство. Мукӧд быдмасыс эта потомство шӧрись вермӧ ай-мамсянь босьтны (унаследуйтны) приспособляйтчан мӧдкодьсялӧмсӧ.
Сідзкӧ, токо ловйӧн кольӧм быдмассэзсянь вермӧ мунны потомство.
Сідз мунӧ природа шӧрын быдмассэз приспособляйтчӧмись естественнӧй бӧрйӧм.
Быдкодь условиеэз бердӧ приспособляйтчӧмыс мунӧ не кытшӧмкӧ ен тшӧктӧм сьӧрті, а естественнӧй законнэз сьӧрті.
Морт не токо велӧтны энӧ законнэсӧ вермӧ, но и видзны нійӧ аслас колан целлезын.
Ті тӧдатӧ ни, кыдз И. В. Мичурин петкӧтіс виль сорт плода пуэз, кӧдна не токо приспособитчӧмась ас гӧгӧрись средаын, но и донажыкӧсь, буржыкӧсь кӧзяйствоын вӧдитӧм понда.
Природа шӧрын естественнӧй бӧрйӧмыс мунӧ тӧдтӧг, стихийнӧя, морт вермӧ сійӧ нуӧтны сознательнӧя, кыдз сылӧ колӧ.
4. Мый сэтшӧм лоӧ вид, род да семейство.
Естественнӧй бӧрйӧмсянь аркмис быд кодь дзоридза быдмасыс.
Первосянь чайтчӧ: эта быд чужӧма дзоридза быдмас форма шӧрын ӧшан.
Но сёжӧ, бытшӧмика кӧ видзӧтны тулыссӧ дзоридзасян быдмассэз вылӧ, позяс адззыны, што нія унаӧн ӧтамӧд вылӧ вачкисьӧны.
Босьтны кӧть примерӧ видз вылісь веж, зарни рӧма дзоридза лютиккез. Нія быдӧнныс вачкисьӧны ӧтамӧд вылӧ,
но бытшӧмжыка кӧ пондан видзӧтны, мыйкӧ ны коласын и неӧткодь эм. Эта миянлӧ висьталӧ — видз вылын быдмӧ не ӧтік пӧлӧс лютикыс.
Мый сэтшӧм вид.
Ӧтік лютик пӧлӧслӧн заыс кыссьӧ му бердӧт, а мӧдік пӧлӧслӧн веськыт, лэбӧма вылӧ (99 рис.).
Эм ӧтік-мӧдік неӧткодьыс и вужжезын и дзоридз строеннёын.
Ботаниккез энӧ лютиккесӧ сідз кык пӧлӧс вида лютикӧ и пуктасӧ и шуӧны не ӧтік нимӧн: ӧт вид лютиксӧ шуӧны кыссян лютикӧн (заыс салӧн му бердӧт кыссьӧ), а мӧдсӧ едкӧй лютикӧн (кӧдалӧн заыс сулалӧ веськыта).
Быд быдмас вид аркмӧ быдмас чукӧрись, кӧдна асланыс признаккезӧн вачкисьӧны ӧтамӧд вылӧ.
Родственнӧй виддэз ботаникаын ӧтлаасьӧны ӧтік родӧ.
Сідз миян босьтӧм примерын лютик едкӧй да лютик кыссяна пырӧны ӧтік родӧ — лютик родӧ; нія не ӧткодь вида быдмассэз ӧтік родісь.
Эна кык лютик видся миян Союз шӧринын лыддиссьӧ быдсӧныс кыкдас вид пӧлӧс лютик.
Быдӧнныс нія и вачкисьӧны ӧтамӧд вылӧ, и уна признакӧн озӧ вачкисьӧ.
Вачкисян роддэс ӧтлаасьӧны ӧтік семействоӧ.
Сідз, например, лютик род пырӧ лютик семействоӧ.
Эта семействоӧ жӧ пырӧ лымдорчача, дзоридзыс кӧдалӧн чочком, а не веж ни, кыдз лютик рода быдмаслӧн.
Быд видлӧн, кӧдна пырӧны лютик семействоӧ, эм дзоридз строеннёын ӧткодь особенность, например быдӧнныслӧн нылӧн унаӧсь тычинкаэз.
Мукӧд кадӧ мукӧд видыс, кӧда пырӧ семействоӧ характеризуйтчӧ кытшӧмкӧ ӧтік ӧтласа свойствоӧн,
сідз, например, лютик семействоын эмӧсь уна ядовитӧй виддэз; ны коласӧ пырӧ и едкӧй лютик, кӧдалӧн листтэзас да заас эм яд.
Яблоня да груша сідз жӧ бӧра кык вида быдмас.
Но ны коласын эм уна ӧткодь, шуам кӧть дзоридз строеннёын, плод строеннёын.
Эта сьӧрті ботаниккез груша да яблоня ӧтлаалӧны ӧтік родӧ.
Вишня да слива сідз жӧ кык вида быдмас, но дзоридззезныс да плоддэзныс бӧра жӧ ӧткодьӧс. Кыкнанныслӧн нылӧн небыт, вазылькья плод, пытшкас коскаок, эта сьӧрті и пырӧны нія ӧтік родӧ.
Быдмассэз, кӧдна пырӧны эна кык родӧ, — яблоня, груша, слива, вишня — бӧра жӧ ӧтамӧд коласаныс видзӧны ӧтікӧ-мӧдікӧ ӧткодьӧ, шуны кӧть: дзоридз нылӧн быдӧнныслӧн керӧма ӧткодя, а дзоридз медважнӧй орган, кӧда сьӧрті унажыксӧ ми быдмас пӧлӧс и тӧдмалам.
Вот мыля бӧра жӧ кыкнан родыс эна быдмассэзлӧн пыртӧма ӧтік семействоӧ — розовӧй дзоридза семействоӧ.
Эта семействоӧ жӧ пырӧны малина, озъягӧд, роза пӧлӧс, жельнӧг и мукӧд.
Ботаникалӧн отрасль, кӧда быд быдмассӧ торйӧтӧ виддэз вылӧ, роддэз вылӧ да семействоэз вылӧ и нійӧ велӧтӧ — шусьӧ быдмас систематикаӧн.
Эта наукаыс ӧтлаалӧ быдмас виддэз, роддэз да семействоэз не случайнӧя вевдӧрса чужӧм приметаэз сьӧрті, а кошшисьӧ, кыдз и кыдз нія ӧння формаӧ лоӧмась, кытшӧм быдмас пӧлӧслӧ нія родственнӧйӧсь.
abu
Быдмас систематика отсалӧ миянлӧ зэв паськыт да быд чужӧма быдмас мирын не ӧшны, а быд быдмассӧ тӧдны и кужны янсӧтны сійӧ мӧдік быдмассэз дорись и видзны быд быдмаслісь богатствосӧ социалистическӧй строительство интерессэз сьӧрті.
ӦКМЫСӦТ ГЛАВА.
КУЛЬТУРНӦЙ БЫДМАССЭЗЛӦН БИОЛОГИЯ.
Социалистическӧй му-видз уджалӧм одзӧ партия чепӧстіс кык основнӧй проблема: сюэз йылісь да техническӧй культураэз йылісь.
Кӧть и бура падмӧтіс кулак, ми нянь понда вермасьӧмын босьтім решающӧй победа.
Сюэз понда пессян проблема совхоззэз да колхоззэз строитан основа вылын главнӧй торнас разрешитӧма ни.
Гырись достиженнёэз миян эмӧсь техническӧй культураэз понда пессьӧмын. Эна техническӧй культураэз сетасӧ миян зораман кокни промышленностьлӧ сырьё: хлопок, лён, сакарнӧй свёкла, подсолнушко.
Ыджыт значеннё социалистическӧй му-видз уджалӧмын эм сідз жӧ и мукӧд культурнӧй быдмас группаэзлӧн.
Карча-плода культураэзлӧн зорамӧмыс должен быдӧс уджалісь отирӧс СССР-ын, и медперво промышленнӧй центррезісь рабочӧйезӧс, снабдитны плоддэзӧн и карчӧн.
Вердас культураэзісь площаддез паськӧтӧм миянлӧ колӧ, мед вӧлі крепыт вердас база социалистическӧй подавӧдитӧм понда.
Культурнӧй быдмассэз биологиякӧт тӧдсасьӧмыс миянлӧ мыччалас, кыдз биологическӧй особенносттез используйтӧмӧн и быдмассэсӧ вежӧмӧн ми сувтӧтімӧ нійӧ социалистическӧй строительство служба вылӧ.
1. Сю злаккез.
Сю злаккез — шогді, рудзӧг, зӧр, ид, кукуруза, проса, рис — медколан культурнӧй быдмассэз.
Сю злаккез тусьӧн питайтчӧ му пасьта отир.
abu
Сю культураэзлӧн туссез богатӧсь белоккезӧн да углеводдэзӧн. А эна веществоэс медколанӧсь морт сёян-юанын. Сійӧн эна сю культураэз лоӧны медколан культураэзӧн морт олӧмын.
Шогді пизись да рудзӧг пизись аркмӧ рышкыт, небыт нянь, кӧда кокниа пусьӧ морт организмын.
Сю тусьсӧ зэв бур запасӧн видзны, бур сійӧ нуны-вайны (сравнитӧ эта сьӧрті картовки да сютусь).
Быдпӧлӧс злакыс ӧддьӧн уна; эта медыджыт да медпаськалӧм быдмас семейство. Сю злаккезся эта семействоӧ пырӧны и пода вердас злаккез — тимофеевка, пырей и мук.
Заыс злаккезлӧн пытшкас гырка и гӧрӧда; эта понісь заыс крепыт и нюкрасьтӧн оз чег — нюдз.
Злаккезлӧн листтэз векнитӧсь, кузьӧсь, асчужӧмаӧсь.
Дзоридззез злаккезлӧн ӧксьӧмась либо топыт шепӧ (шогді, рудзӧг, ид), либо розӧ (рис, проса, зӧр).
Нылӧн чӧскыт дука, мича рӧма венчик абу.
Бусасьӧмыс мунӧ тӧв пыр.
Мукӧд злаккезлӧн (шогділӧн, идлӧн, зӧрлӧн) бусасьӧмыс мунӧ аслас пыльцаӧн и эшӧ дзоридз оссьытӧдз.
Шогді.
Шогді лоӧ медколан сю злакӧн СССР-ын.
Медбур качествоа шогді аркмӧ кӧс степа климатын.
Шогді овлӧ осяовӧй да ӧзимовӧй.
Ӧзим шогді кӧдзсьӧ арсӧ, эта периодӧ жӧ сія и грездитӧ. Мӧді воӧ ӧзим шогді гумьясьӧ и шепьясьӧ.
Ося шогді кӧдзсьӧ тулыссӧ и ар кежӧдз вермӧ воны.
Шогдіыс унаӧн рудзӧгся унажык корӧ аслыс и шоныт и буржык мусин.
Сійӧн сійӧ и кӧдзӧны миян союзын медунасӧ сьӧдмусина полосаын, кытӧн гожумыс овлӧ жар.
Социалистическӧй сю кӧзяйствоын медыджыт задачаыс — вештыны шогдісӧ ылӧжык асывлань, паськытжыка кӧдзны улісь Волгадорын, Кавказын, Сибир лунланьын.
Шогді кӧдзсьӧ зэв важся каддэзсянь:
важ сооруженнёэз гарйытӧн мукӧд кадӧ адззалӧны шогді туссез.
Китайын шогді вӧдитӧмась 500 во одзті.
Рудзӧг.
Рудзӧг аслас кӧдзсян площадьӧн СССР-ын сулалӧ мӧдік местаын шогді бӧрсянь.
Сія ылынжык — ойланьынжык вежӧ шогдісӧ.
Рудзӧглӧ озжык ков шогдіыс сьӧрті шонытыс да бур муыс.
Рудзӧг унажык овлӧ ӧзимӧн, но мукӧд местаэзын эм и ося рудзӧг.
Зэв интереснӧй рудзӧг петкӧтӧм йылісь история.
Важын кӧркӧ лунвылын рудзӧг вӧлӧма шогді коласісь ёг турунӧн.
Кӧр сю вӧдитӧмыс пондӧма паськавны и ойланьын, сэк ойланись отирлӧ шогді кӧдзыскӧт сорӧн лунвылісь судзӧттӧн сюрлӧмась и рудзӧг туссез.
Мукӧд кадӧ шогді кынмылӧма и ыб вылӧ кольлывлӧма токо рудзӧг. Сідз воись воӧ мортыс рудзӧгсӧ велӧтас быдмыны аслас ойланись ыббез вылын
и сідз ёгтурунісь рудзӧг пӧрас бур сю культураӧ.
Зӧр да ид.
Зӧр да ид асланыс площадьӧн СССР-ын сулалӧны куимӧт и нёльӧт местын.
abu
Зӧр кӧдзыс да ид кӧдзыс не ӧтік пода вердасӧ мунӧны, нійӧ сёйӧ и ачыс морт
(керӧ тусь и пизь).
Ид чожа зорамӧ и воӧ (80–90 лунӧн кӧдзан кадсянь) и оз кор аслыс уна шоныт.
Сія медылӧдз ойвылын паськалӧма: сідз Ойланись крайын эта культура локтӧ топ Чочком саридз дорӧдз.
Ойланись границаыс ид культуралӧн — медбӧрья граница сю злаккез вӧдитӧмын.
Проса да кукуруза.
Проса да кукуруза — лунланись кӧс кадын олан культураэз.
За и листтэз просалӧн вевттисьӧмась гӧноккезӧн, кӧдна озӧ сетӧ уна пакмыны валӧ.
Кукуруза. Кукуруза мукӧд злаккез коласісь янсалӧ аслас кыз да кузь заӧн и паськыт листтэзӧн (100 рис.).
Дзоридззез эта злаклӧн кык пӧв:
айпӧв дзоридззезлӧн пытшканыс токо тычинкаэз, а иньпӧв дзоридззеслӧн — токо плодниккез.
Тычинкаа дзоридззез пукалӧны розӧн за йылын, а плодниккес ӧксьӧмась топыт шепӧ и пукалӧны кыз стержень вылын (початокӧн шусьӧ).
Кукуруза зэв дыр зорамӧ.
Кӧдзан кадсянь воан кадӧдз колӧ 140–150 шоныт лун.
Сійӧн кукуруза и кӧдзсьӧ токо лун вылын.
Ылынжык ойвылын (шуны кӧть, Москва областьын) сійӧ позьӧ кӧдзны токо силос вылӧ. Аслас кыз заӧн и паськыт листтэзӧн кукуруза ӧддьӧн бур тор силос вылӧ.
Кукурузалӧн вужжез пыдына пырӧны муӧ и эта понісь сія вермӧ чулӧтны сэтшӧм кӧс кад, кӧда дырни мукӧд злак культураэз сотчӧны.
В. И. Ленин тшӧктіс кукурузасӧ вӧдитны кыдз страховкаӧс тшыгья воэзӧ кӧс кад понісь.
Ӧні кукуруза зэв чожа паськалӧ колхоззэзын да совхоззэзын.
Сьӧкыт адззыны сэтшӧм мӧді злак, кӧдӧ позис бы сідз жӧ быдлаӧ видзны, кыдз кукуруза.
Медыджыт назначеннёыс кукурузалӧн — пода вердас.
Социалистическӧй подавӧдитӧмын, особенно порсьвӧдитӧмын кукуруза вежтӧм.
Не весь шуӧны: «кукуруза — копытаэз вылын порсь».
Чужаніныс кукурузалӧн — Америка.
Америкаын, кытӧн сійӧ ӧддьӧн унаӧн кӧдзӧны, керӧны сыись берся продукта.
Сідз, например: кукуруза пизись стряпайтӧны бисквиттэз, пуӧны вареннё, керӧны кампеттэз, консерваэз, крахмал, матег, сакар, телега мазь, искусственнӧй каучук.
Идзассис керӧны гумага, взрывчатӧй веществоэз, древеснӧй спирт, клей, матрассэз, пугвичаэз, строительнӧй материал, шляпаэз и уна берсясӧ.
Миян СССР-ын керӧмась ни уна фабрикаэз, кытӧн пондасӧ сідз жӧ керны кукурузаись берсясӧ.
Рис.
Рислӧн чужаніныс — тропическӧй странаэз и мир джынся унажыклӧ сія колӧ кыдз основнӧй нянь продукта.
Медуна сійӧ вӧдитӧны Китайын, Японияын, Индияын.
Миянын — СССР-ын рис быдмӧ Дальнӧй Востокын да Шӧр Азияын, а ӧні паськавны пондіс и мӧдік районнэзӧ — сідз Ойвылісь Кавказӧ и Улісь Волгадорӧ (101 рис.).
Рис культуралӧ быдмытӧн колӧ пыр свежӧй ва. Рисӧн кӧдзӧм ыббез вылӧ ва лэдзӧны тоделя канаваэз пыр.
Азиатскӧй странаэзын риса ыббез вылын удж мунӧ зэв сьӧкыт и морт здоровьелӧ сьӧкыт условиеэзын. Рис кӧдзиссез ыб вылын броддьӧны пидзӧсви ваын, удж керсьӧ киӧн.
Миян СССР-ын гырись, риса совхоззэзӧ пыртӧма машина удж. Садитӧны и дзимлялӧны риссӧ машинаӧн. Машина унаӧн кокньӧтӧ мортлісь удж эта культура вӧдитӧмын.
Неважын вӧлі нуӧтӧмась опыттэз — рис кӧдзны аэропланнэз вывсянь.
2. Боби быдмассэз.
Уна культурнӧй боби быдмаслӧн боссьӧ кыдзыс тусь, кӧдна богатӧсь овлӧны питательнӧй веществоэзӧн.
Боби быдмассэз кӧдзыс тусьын уна белок,
этӧн нія вермӧны вежны яй.
Боби быдмассэз шӧрӧ пырӧны и сэтшӧм быдмассэз, кыдз люцерна, клевер, кӧдна мунӧны пода вердасӧ.
Боби быдмассэзлӧн семейство шусьӧ сідз аслас плоддэз кузя.
Мукӧд кадӧ боби быдмассэзлӧн семейство шусьӧ эшӧ мотыльковӧй семействоӧн (мотылёк — бабылок). Эна быдмассэзлӧн зэв интереснӧя керӧма дзоридз — ылісянь видзӧтны кӧ сы вылӧ, бытьтӧ бабылок пукалӧ, а не быдмаслӧн дзоридз (102 рись.).
Боби быдмассэзлӧн особенность.
Боби быдмассэзлӧн эм замечательнӧй особенность — ны бӧрсянь быд сю культура кайӧ бура и ыджыт урожай сетӧ.
Боби быдмассэз сьӧрын мусин кыдз бы назьмитчӧ, мусинын содӧны питательнӧй веществоэз.
Пешлыны кӧ клеверлісь либо анькытшлісь вужжез, то ны вылісь ми адззам поснитик нерӧдоккез — клубенёккез.
Эна клубенёккес быдмас вужжез вылӧ явитчӧны вуж заразитчӧмсянь.
Муын эмӧсь мусин бактерияэз, нійӧн боби быдмас вужжез и заразитчӧны.
Вуж пытшкӧ сюрӧм бӧрын эна бактерияэс вуж гырксӧ сёйӧны и сы местӧ аркмӧ нерӧдок — клубенёк.
Асланыс кулӧм бӧрын эна бактерияэз быдмаслӧ кольӧны азота веществоэз, а быдмас босьтӧм бӧрын важ клубенёккес кольччӧны муӧ и назьмитӧны мусинсӧ азота удобреннёэзӧн, кӧда зэв колан тор быд быдмас олӧмын.
Сійӧн боби быдмассэс бурмӧтӧны кӧдзан ыбсӧ азотӧн.
Колан азотсӧ боби быдмассэз босьтӧны не мусинісь, кыдз мукӧд быдмас, а руись асланыс бактерияэз пыр, кӧдна олӧны быдмас вужжезын.
Соя.
Боби быдмас шӧрись интереснӧйжык быдмасыс соя.
Эта ӧтівося быдмас, вылісянь и кӧдзысӧн вачкисьӧ фасоль вылӧ (103 рис.)
Чужаніныс сылӧн — Китай.
Китайчи соя вӧдитӧны 4000 вося унажык ни.
Соя да рис — Китайын медколан сю быдмассэз.
Соя кӧдзыс тусь мӧдкодьсьӧтӧмӧн позьӧ керны зэв уна сёян-юан продукта, кӧдна пӧтӧсӧн и кӧрӧн яй оча и йӧв оча.
Сояись позьӧ керны искусственнӧй йӧв, шӧмйӧв, рись, нӧк (сливкиэз) — не весь жӧ сійӧ мукӧд кадӧ шуӧны «быдмас мӧсӧн».
Соя кӧдзыс тусь мунӧ няньӧ, печеннёӧ, кампеткиӧ, кофеӧ и уна мукӧд сёян-юан продуктаӧ.
Сояыс дона сідз жӧ виӧн, кӧдаись керсьӧ матег, олифа краситчыны.
Не етшажык значеннё сылӧн и социалистическӧй подавӧдитӧмын.
Соя турун зэв пӧтӧса, а кӧдзыс тусь нырӧс (жмыка) кукуруза сорӧн эм медбур порсь вердас.
Миян СССР-ын соя важынсянь культивируйтчис Ылын Асыввылын. Ӧті-ӧтілаись позис адззыны и лунвывса районнэзын.
Медуна кӧдзӧмӧ соя пырис медодзза пятилеткаӧ, кӧр пондісӧ оссьыны колхоззэз и совхоззэз. Ӧні туйыс эта культуралӧн социалистическӧй ыббез вылын паськыт.
3. Вужплоддэз.
Вужплоддэз пӧлӧсӧ пырӧны: свёкла (сакара, карч свёкла, вердас свёкла), морков калиг, сёртни и мукӧд карча и пода, вердаса быдмас.
abu
Вужись питательнӧй вещество запассэзлӧн роль.
Ті тӧдатӧ ни — кызамӧм вужжезӧ тыр тапкӧм питательнӧй веществоэзлӧн запас, кӧда мӧді воӧ овтӧн быдмаслӧ зэв колан тор.
Колӧ висьтавны: кызамӧм вужжез эмӧсь и вӧр быдмассэзлӧн, например, СССР пасьта быдмӧ вӧр морков, вужыс кӧдалӧн кыз жӧ, кыдз и культурнӧй морковлӧн.
Эта свойствоыс — заптыны вужжезӧ питательнӧй веществоэз и вӧлі кӧркӧ босьтӧма мортӧн, мед петкӧтны вужплода культураэз.
Ентӧдісь отир шуӧ: «быд карчлӧн вуж плодыс пӧ сетӧма мортлӧ енӧн, мед сія сійӧн питайтчис».
Кӧр ми тӧдамӧ быдмаслісь олӧм, миянлӧ адззанаӧсь лоӧны этна поп сказкиэс.
Морт ачыс петкӧтіс вужплоддэз. Эта петкӧтӧм вылӧ уна муніс сылӧн кад. Воись воӧ сія быд вужплода быдмас шӧрись бӧрйис сэтшӧм быдмассэз, кӧдна вӧлісӧ и кызжыкӧсь, и чӧскытжыкӧсь мукӧддэзся, мӧд нёжӧн кӧ шуны, морт воись воӧ нуӧтіс искусственнӧй бӧрйӧм и токо кӧркӧ дыр мыйись вермис аркмӧтны колан качествоа карч вужплода быдмассэз.
Культурнӧй свёкла пӧлӧс.
Медколана вужплод — свёкла. Культивируйтчӧ сія куим пӧлӧс:  сакара свёкла, пода вердас свёкла и сёян свёкла.
Эта пример сьӧрті позьӧ адззыны, кыдз морт лӧсьӧтӧма, мӧдкодьсьӧтӧма вӧр быдмассӧ куим пӧлӧс быдмасӧ, мед бытшӧмжыка удовлетворитны ассис потребность.
Вӧр свёкла быдмӧ миян Сьӧд саридз берег доррезӧт да Каспий саридз дорӧт.
Вужыс эта быдмаслӧн кузь, вожья, вӧснит и пу сӧнъя; сылӧн ӧння миян свёкла культураэзкӧт ӧткодьыс нем абу.
Сакара свёкла — чочком вужа, пыдына пукалана быдмас.
Сакарсӧ свёкла вужын вӧлі осьтӧма 180 во одзті ӧтік немеч-химик, а 50 во бӧрті сылӧн велӧтчись Ахард Рытвывса Европаын строитӧма первося сакар керан завод.
Эта кадӧдз сакар керлӧмась токо сакара тростникись, кӧда быдмӧ тропическӧй странаэзын. Ковлӧма тростник зэв ылісь ваявны, и сакар сувтлывлӧма зэв донӧн.
Английскӧй купеччез повзьӧмась, свёклаись керӧм сакар пӧ донтӧмтас тростникись керӧм сакар и чинтас нылісь грабитана доходдэз, кӧдна нылӧ локтӧны сакара тростникись сакар керӧм понісь. Пондӧмась Ахардлӧ вӧзйыны 600 000 франк, мед токо сія откажитчас аслас сакар пуӧмись и быд отир одзын пондас кулитны свёклаись сакар пуӧмсӧ, абу пӧ сэтісь выгодаыс нем, сакара тростниксис пӧ сакарыс бытшӧмжык да и донтӧмжык аркмӧ.
Капиталисттэз пыр готовӧсь падмӧтны наукалісь да техникалісь зорамӧмсӧ, эта зорамӧмыс кӧ адззӧмӧн чинтӧ нылісь барышшез.
Кӧр Ахард химик первуйӧ пондӧма пуны свёклаись сакар, сэкся свёкла сорттэзын сакарыс видзсьӧма быдса 5–6%.
Медбӧрья эна сё воӧн, систематическӧй отбор пыр петкӧтӧма сэтшӧм ӧння свёкла сорттэз, кӧднаын сакарыс 3-исьӧн унажык — 18%.
Медгырись успеххез сакара свёкла сорттэз бурмӧтӧмын керӧма миян СССР-ын.
Быдса воӧмӧдз сакара свёкла вужжезлӧ колӧ 165 шоныт лун.
Эта сьӧрті сакара свёкла СССР-ын быдтӧны лунланисьжык районнэзын — ЦЧО-ын да Украинаын.
Вердас свёклалӧн вужжес — зэв дона пода вердас.
Вердас свёклалісь ми донмӧтам не кӧрсӧ, а гырись урожай.
И былись вердас свёкла сорттэзлӧн аркмӧны зэв гырись урожайез;
буракӧ быдман свёкла сьӧрын видзӧтны да буржыка мусин назьмитны, ӧтік гектар вылісь позьӧ босьтны 100000 вужӧдз (озӧ лыддиссьӧ эшӧ листтэз, кӧдна мунӧны силос вылӧ).
Вужплоддэз асланыс быдман способностьӧн пырӧны пропашнӧй культураэз пӧлӧс коласӧ.
Кӧдзсьӧ свёклаыс лёдззезӧн.
Лёдззез коласын мусин небыт, рышкыт (гӧрсьӧ). Эмӧсь тодель керӧм мусин рышкӧтан культиваторрез, кӧднӧн лёдззез коласісь мусин и рышкӧтчисьӧ.
Эта рышкӧтӧм понісь бырӧ ёгтурун;
вот мыля севооборотӧ свёкла и мукӧд пропашнӧй культураэз пыртӧмыс эм медбур пессьӧм ыббез ёгсялӧмкӧт.
Миян вужплоддэз не ӧтік семействоӧ пырӧны, а унаӧ:
1 — Сёртни, турнепс, калига, редис — ӧтчужӧма дзоридзаӧсь, нёль лепестокаӧсь, кӧдна креснакрес керсьӧмась, эссянь и нимыс эта семействолӧн — «креста дзоридза» быдмассэз.
Эта семействоыс паськыт, сэтчӧ уна и турун быдмас пырӧ.
2 — Морковлӧн поснитик чочком дзоридзоккез ӧксьӧмась зонтик чужӧма дзоридз чукӧрӧ.Эссянь и быдса семействоыс нимтіссьӧ «зонтика» семействоӧн.
Вӧр турун быдмассэз шӧрись позьӧ адззыны уна быдмас пӧлӧс, кӧдна пырӧны эта семействоӧ.
3 — Свёкла аслас дзоридз керӧм сьӧрті вачкисьӧ лебеда вылӧ, сійӧн и семействоыс сылӧн «лебеда семействоӧн» шусьӧ.
4. Печкана быдмассэз.
Эта быдмас пӧлӧссянь, кытчӧ пырӧны: хлопчатник, лён, пыш Совет союзісь йӧзлӧн кӧзяйство босьтӧ зэв дона сырьё — волокно.
Эта ультоварись текстильнӧй фабрикаэзын керӧны быд чужӧма тканнез.
Печкана быдмассэз — меддона быдмас группа техническӧй культураэз коласын.
Хлопчатник.
Хлопчатник вылын, туруна быдмас (104 рис.), торьясьӧм лиса и гырись, виж дзоридза. Дзоридззес вачкисьӧны мальва быдмас дзоридззез вылӧ (хлопчатник пырӧ мальва семействоӧ).
Дзоридзись воӧны гырись плоддэз — коробочкаэз, кӧдна воӧм бӧрын потласьӧны и ныись петӧны кузь гӧна суниссэз, конечаныс кӧдналӧн кӧдзыс.
Волокно хлопчатниклӧн боссьӧ не заись, а плоддэзісь — коробочкаэзісь.
Быд волокно вачкисьӧ кузь сілань, кӧднӧн вевттиссьӧма кӧдзыс тусь.
Этатшӧм сіэз ми вермам адззыны и уна мукӧд быдмас пӧлӧслісь: бадьлісь, кульчӧрслісь, топольлісь, вӧйлісь и мук.
Быд эна быдмаслӧн эна сіэс отсалӧны кӧдзыс тусьлӧ кӧдзсьыны тӧвньылат.
Сэтшӧм жӧ биологическӧй значеннёыс хлопчатник сіэзлӧн, но, конешно, кӧдзыслӧ кӧдзсьыны озӧ сетӧ, а лоӧм кадӧ сійӧ ӧктӧны, мед мӧдпыр кӧдзны.
Хлопчатник сіэз мукӧд быдмас сіэз сьӧрті кузьжыкӧсь, нюдзжыкӧсь и ёнжыкӧсь.
Хлопчатниклӧн чужаніныс — тропическӧй странаэзын.
Сы воӧм понда колӧ кузь да шоныт гожум.
Даже чожа воан сорттэзлӧ колӧ 5–5½ тӧлісь кузя шоныт погоддя.
Миян СССР-ын основнӧй районнэс, кытӧн быдмӧ хлопчатник — Шӧрӧт Азияись республикаэз.
Жара гожумӧн нія татӧн воны ештӧны, но зэррез овлӧны етшаӧсь, а эта понсянь хлопчатник косьмӧ, васӧ ковсьӧ вайӧтны канаваэз пыр — арыккез пыр.
Ӧддьӧн ыджыт удж эна канаваэз гарйӧмын нуӧтӧма советскӧй власть дырни. Декханнэз (крестьяна — Шӧр Азия республикаэзісь) мезмисӧ эта понісь кык личкӧм бердісь: ӧткӧ сар чиновниккез личкӧм бердісь, мӧдкӧ, кулаккез-байез личкӧм бердісь.
Партиялӧн центральнӧй комитет сетіс заданнё: сідз паськӧтны хлопчатник ыббез и лэбтыны урожай, медбы быдсӧн мезмыны граница сайись хлопчатник пыртӧм дорись.
Эта пессьӧмын ми адззывтӧдз паськӧтімӧ хлопчатника ыббез.
Шӧр Азияись республикаэзын хлопчатника ыббез асланыс паськалӧмӧн чинтӧны шогдіа ыббез. Хлопчатникыс эна районнэзын лыддиссьӧ донажык культураӧн шогді культурася.
Посни единоличнӧй кӧзяйствоэзын хлопчатник вӧдитан уджыс вӧлі киа удж, мотыгаа сьӧкыт удж.
Гырись, социалистическӧй «хлопок фабрикаэз вылын» уна удж механизируйтӧма, вуджӧтӧма машина «стальнӧй пельпон» вылӧ.
Хлопока ыббез вылын ми уджалам тракторрезӧн, кӧдзам хлопок трактора кӧдзан машинаэзӧн, машинаэзӧн хлопок весӧтамӧ, небзьӧтамӧ лёдззез коласісь мусин;
даже дзимляссьӧ ыб вылісь хлопок сідз жӧ машинаэзӧн.
Хлопок культура вештӧма виль районнэзӧ, кытӧн кӧркӧ сія эз быдмывлы.
Хлопоксӧ сьӧрна ылӧжык и ылӧжык вешсьӧ ойвывланьӧ — сійӧ ӧні кӧдзӧны совхоззэзын и колхоззэзын Улісь Волгадорын, Ойланись Кавказын, Лунланись Украинаын.
Ыджыт отсӧт эта уджын сетісӧ опытнӧй станцияэз, кӧдна кужисӧ петкӧтны чожавоан хлопок сорттэз.
Эсся, ыджыт значеннё эм хлопок росада парниккезын быдтӧмын; парниккезісь хлопчатник росада садитӧны вӧлись му вылӧ.
Лён.
Кӧс заыс лёнлӧн, пышлӧн либо петшӧрлӧн (видз. 8 удж, 128 листбок) аркмӧма куим торись: 1) кучишокись; 2) за пытшк торись — пуись; 3) кучишок коласся да пу коласся торись (луб слойись).
Эта слойын луб сӧннэс и куйлӧны.
Одзжык вӧлі висьталӧма ни — слойыс, кӧда куйлӧ пу слой вылын ӧтӧр ладорсянь, шусьӧ лубӧн.
Луб слой сосуддэз пыр лэдзчӧны улӧ органическӧй веществоэзлӧн сӧккез, кӧдна аркмӧмась быдмас листтэзын.
Луб сӧннэз понсянь залӧ сетсьӧ крепытыс. Луб сӧннэз кыдз бы пыкӧттэз быдмас заын.
Вот энӧ луб сӧннэсӧ босьтӧм могись и вӧдитӧны печкана быдмас пӧлӧссӧ, кыдз лён, пыш, кенаф, канатник, кендыр.
Хлопок кӧ быдмыны вермӧ токо лунвыв шонді вылын, то лён культураыс ойвыв районнэзісь.
Лён кӧдзӧны и лунвыв ладорын, но не кудель босьтан могись, а виа кӧдзыс могись.
Лунвывса лён сортлӧн («кудряш лён» сортлӧн) заыс уна вожья, ӧтмӧдӧрӧ паськалӧма и лён вылӧ умӧль.
Бур кудель сорта лёныс лыддиссьӧ «лён-долгунец», кӧдалӧн заыс кузь, вӧснит, етша вожьясьӧма. Эта сортыс быдмӧ ойвыв районнэзын — Московскӧй, Рытланись, Ленинградскӧй да мукӧд областтезын.
Культурнӧй лёнлӧн коробкаока плоддэз озӧ асьныс оссьӧ и кӧдзысыс ачыс киссьыны оз вермы.
Эта дона качествосӧ петкӧтіс морт зэв дыр бӧрйӧмӧн — отборӧн.
Вӧр ай-мамыс лёнлӧн воӧм бӧрын кӧдзыснысӧ коробкаока плоддэзісь кисьтӧны асьныс. Нылӧн плоддэзныс оссьӧны.
Лён совхоззэзын быд лён быдтан уджыс керсьӧ тракторӧн да тоделя машинаэзӧн.
Механизируйтӧма сідзи жӧ и лён нярьялӧм, пыркӧтӧм, зуалӧм — кӧда шусьӧ, медодзза лён обработкаӧн.
Босьтӧм сӧстӧм лён волокно мунӧ текстильнӧй фабрикаэзӧ, кытӧн сыись кыйӧны берся лён тканнез.
Лёнісь жӧ керӧны и ременнез машинаэз бердӧ, автомобиллезлӧ обивкаэз и уна мукӧд торсӧ.
Пыш.
Эта — кузь, ӧтік вося быдмас. За сылӧн веськыт, листтэс йыла торьяӧсь (105 рис.).
Пыш — петшӧрлӧ родня.
Волокно сія сетӧ чорытжыкӧ лён волокнося, и шусьӧ эта волокноыс пенькаӧн.
Пенькаись кыйӧны кыз, крепыт тканнез: парусина, мешӧк дӧра.
Ыджыт значеннё пенькалӧн миян сьӧрна паськалан судоходство да черикыян промыселын, кыйӧны берся снасттез.
Пенькаись жӧ кыйӧны геззэз, канаттэз, шпагат.
Пыш кӧдзысісь — кӧнтусись аркмӧ бур ви, лён кӧдзысісь моз жӧ.
Му пасьта пышӧн кӧдзӧм ыбись ¾ усьӧ миян СССР вылӧ.
Мед вӧлі бур урожай, пыш колӧ кӧдзны пыдына небзьӧтӧм и вына мусинӧ.
Медунасӧ пыш кӧдзсьӧ сьӧдмусина полосаын.
Пыш быдмас овлӧ кык пӧлӧс.
Ӧт пӧлӧсыслӧн быдмас заыс вӧснит, йылас дзоридз рос, кысь уна киссьӧ пыльца.
Мӧд пӧлӧс быдмасыслӧн заыс кызжык, и дзоридззес пукалӧны лист конувттэзын; эна дзоридззезлӧн тычинкаэс вовсё абуӧсь, а плодниккез токо ӧтнаныс.
Сідзкӧ, пышыс кык горта быдмас (121 рис.).
Ӧтік быдмассэз вылын овлӧны токо айпӧв дзоридззез; эна быдмассэс дзоридзасьӧм бӧрын чожа кулӧны.
Мӧдік быдмассэз вылын пукалӧны токо иньпӧв дзоридззез.
Эна — медбӧрья быдмассэз вылын аркмӧны кӧдзыс туссез.
Виль печкана культураэз.
Народнӧй кӧзяйство Советскӧй союзын зорамӧ адззывтӧм капиталист мирын темппезӧн.
Важ печкан культураэз — лён, пыш, хлопок озӧ ни вермӧ тыртны быд потребностьсӧ социалистическӧй строительстволісь.
Партия тшӧктӧм сьӧрті, адззӧмась и иньдӧмась совхоз да колхоз ыббез вылӧ виль печкан быдмассэз: кенаф, кендыр, канатник.
Кенаф.
Кенаф — родня хлопок турунлӧ, кыкнанныс нія ӧтік семействоись — мальва семействоись.
Эта вылын, зорамӧм быдмас. Занас мукӧд кадӧ овлӧ 3–5 м вылына.
Волокно кенаф заись мунӧ мешӧк дӧраӧ, зэв ён канаттэзӧ да геззэзӧ.
Кенафись кыйӧм тканнез донаӧсь асланыс свойствоӧн — нія ас пырйӧттиныс озӧ лэдзӧ влага.
Кенаф миянын быдмӧ Шӧр Азияись республикаэзын, да Ойланись Кавказын.
Канат турун.
Канат туруныс кенафлӧ родня (106 рис.).
Эта быдмассӧ лунвылісь СССР-ын быдлаись позьӧ адззыны. Унажыксӧ кайӧ, кыдз ёгтурун, ӧсеккез дорӧт да ёгсялӧм местаэзӧт.
За волокноэс эта быдмаслӧн зэв бурӧсь мешӧккез вылӧ, канаттэз вылӧ да геззэз вылӧ.
Кендыр.
Кендыр — унавося быдмас. За сылӧн кузь, вӧснит, векнит, учӧтик листока.
Сія родня миян керкуын быдман садлӧ — олеандралӧ.
Кендыр быдмӧ кыдз вӧр быдмас Шӧр Азияись ыджыт ваэз кузя, Кубань ва долина кузя да Волга долина кузя.
Отир, кӧда гӧгӧр эта быдмасыс быдмӧ, важын ни донсӧ сылісь тӧдӧма — ӧктӧ сылісь заэз да ас киӧн кыйӧ геззэз, канаттэз, чериалан снасттез и мукӧд.
Фабрикаын кыйӧм тканнез кендырись аркмӧны унаӧн крепытжыкӧсь и дыржык новйиссьӧны хлопокись керӧм тканнезся.
Кендыр волокноэзлӧ колӧ мунны фабрикаэзӧ кыдз хлопоклӧ содтӧт.
Неважын кендыр листтэзісь адззӧмась уна каучук. Эта сьӧрті кендыр эшӧ донажык лоӧ миян социалистическӧй кӧзяйстволӧ.
5. Каучука быдмассэз.
Каучукыс кыдз фабрикаэз понда да заводдэз понда сырьё сулалӧ ӧтік медодзза местаын.
Каучуктӧг ӧння олан мунны оз вермы.
Автомобильӧ шинаэз, велосипедӧ шинаэз, колошиэз, плашшез, медицинскӧй да химическӧй приборрез и уна мукӧд тор керсьӧ каучукись.
Медбӧрын, миян Союз оборона понда каучукыс видзӧ зэв ыджыт значеннё.
Автомобиль лэдзан промышленность корӧ сё унажык и унажык каучук.
Ӧнӧдз каучук пыртісӧ миян Англияись да Голландияись.
Эна капиталист странаэз киын видзсьӧны тропик вӧра колонияэз, а эна вӧр пуэзісь боссьӧ каучук.
Мый жӧ сэтшӧм каучук?
Исследованнёэз мыччалӧны — каучук аркмӧ кык торись: шучкӧп тыдалана, виж рӧма кодь жидкостись, кӧдаын зэв поснитик дзуллез, кыдз ви воттез йӧлын.
Эна дзуллезын каучукыс и видзсьӧ.
Каучука быдмас пӧлӧсӧ пырӧ и керкуын быдман быдмас фикус.
Пельдӧтны кӧ фикуслісь лист либо засӧ керыштны пуртӧн, то дойдӧминісь часӧт жӧ пондас петны чочком, йӧв код сӧк.
Фикус миянӧ пыртӧма тропик вӧррезісь. Сэтчин сія ӧддьӧн гырись пуэзӧн быдмӧ, сы сӧкись каучукыс и боссьӧ.
Дойдӧминнэзісь петан сӧкыс ру вылын сукмӧ и дойдӧминсӧ кыдз бы клеитӧ, мед быдмасыс сэт эз вермы сісьмыны.
Неважын эшӧ каучук шедтісӧ токо тропик пу йӧв кодь сӧкись. Эна пуэс озӧ вермӧ терпитны нельки учӧтик морозоккез.
Ойланись Америкаын осьтісӧ эшӧ виль каучука пу — гвайюла. Эта пуыс — кустарник пу.
Быдмӧ ватӧм изъя керӧсаиннэз вылын, кытӧн кӧдзытыс вермӧ сибӧтны 15°Ц ӧдз.
Сідз кӧ эта каучука пу вермас быдмыны и умереннӧй климатын.
Шӧр Азияын кыссьӧны зэв гырись, паськыт местаэз, кӧдна асланыс климатӧн и мусинӧн ӧткодьӧсь гвайюла пу гортса муэзкӧт.
Америкаись вайӧм гвайюла кӧдзыс вӧлі садитӧма Кавказсайӧ и Шӧр Азияӧ.
Гвайюла быдмӧ, и асланым гвайюлаись ми ӧні босьтамӧ ни каучук.
Миян быдмас етша эшӧ велӧтӧма. Натьтӧ и миян быдмас коласын эмӧсь сэтшӧм быдмассэз, кӧднаись позис бы босьтны каучук.
Йӧв кодь сӧкын уна быдмаслӧн эм каучук. Эм сія и кульчӧрс быдмас йӧлын, кӧзатош быдмасын, молочайын, клён пу сӧкын и мук.
Токо эна быдмасісь каучук оз босьтіссьы, сія ныын етша да и умӧль качествоа.
Медбӧрья каддэзӧ вӧлі адззӧма уна виль, каучука быдмас.
Ны коласісь меддонаыс хондрилла быдмас (107 рис.).
Хондрилла быдмасыс лажмытик турун быдмас.
Быдмӧ хондриллаыс песӧк вылын, галя вылын и изъяинын.
Дзоридзасян кад одзӧ сія ассис листтэз вывсис чапкӧ.
Чегӧтны кӧ эта быдмаслісь улок, чегӧтӧминас быдмас пытшкись петӧ йӧв код чочком сӧк. Эта сӧкыс ру вылын чожа каттисьӧ и сьӧдӧтӧ.
Эта йӧв кодь сӧкын каучукыс и эм.
Хондрилла позьӧ ӧті-ӧтіӧн адззыны Улісь Волгадорӧт и одзлань асыв вылӧ — Монголия граница дорӧдз.
Лунвылын миян сія быдмӧ Украинаын, Крымын, Кавказын.
Медбӧрья каддэзӧ унажыкиннэзісь сійӧ пондісӧ пыр адззыны.
Неважын Шӧр Азияын, Кара-Тау керӧссэзісь, адззисӧ мӧдік каучука быдмас — тау-сагыз (108 рис.).
Тау-сагыз — унавося кустарник. Сувданас сія 50 см. Быдмӧ Кара-Тау склоннэз вылӧт.
Сылӧн кыз вуж, кузянас 2–3 м, то щеллезӧт муӧ пырӧ, то му вевдӧрӧт кыссьӧ.
Медінтереснӧйыс тау-сагызын то мый — сылӧн йӧв кодь сӧкыс кокниа пӧрӧ вӧснитик сунисӧ и чуть не быдсӧн аркмӧма каучукись.
Воись воӧ эна каучука сунисоккес лоӧны унажык и унажык и пӧрись быдмас вужжезын нія 30%-ӧдз и унажыкӧдз ӧксьӧны.
Каучук тау-сагыз быдмаслӧн зэв бур качествоа.
Ӧні миян панӧмась быдса совхоззэз, кӧдна каучука быдмассэз ӧтік токо и вӧдитӧны. Медунаыс кӧдзсьӧ тау-сагыз.
6. Виа быдмассэз.
Ви эм уна быдмас кӧдзыс тусьын. Сія тусьӧ пырӧ чужӧс понда питательнӧй веществоэзӧн.
Подсолнушко.
Подсолнушко миян медбур виа быдмас.
Подсолнушколӧн юрыс ылісянь дзик ӧтік дзоридз, а былисьсӧ зэв уна поснитик торья дзоридзись ӧксьӧма.
Этатшӧм дзоридза быдмассэс быдӧнныс пырӧны ӧтік быдмас семействоӧ — сложнӧй дзоридза семействоӧ.
Эта семействоӧ жӧ пырӧ и кульчӧрс турун, лӧзчветки турун, йӧн и уна мукӧд быдмас пӧлӧс.
Подсолнушколӧн чужан гортыс Америкаын.
Европаӧ шедӧм бӧрын сія дыр быдмис саддэзын, кыдз басӧк дзоридза декоративнӧй быдмас.
Сы кӧдзыс тусись ви пичкыны велалісӧ первуйӧ Воронежскӧй губерняын сё во кыным одзті.
Эта бӧрын подсолнушко ыббез пондісӧ чожа быдмыны.
Подсолнушко кӧдзыс воӧмӧдз колӧны уна шоныт луннэз, сійӧн сійӧ миян унажыксӧ лунвылын и вӧдитӧны.
Кыш понісь весӧтӧм тусьын 50% ӧдз ви. Сійӧ тодель ви керан заводдэзын пичкӧны.
Пичкӧм бӧрын кольччӧ ви нырӧс (жмых), кӧда ӧддьӧн пӧтӧса вердас лоӧ подалӧ.
Уна ви шедтіссьӧ и печкана быдмас тусись — лён тусись, пыш тусись, хлопчатник тусись.
7. Зелляа быдмассэз.
Уна быдмас пӧлӧс медицинаын мунӧ веськӧтны шогӧттэзсянь.
Быдмас ас гыркас видзӧ зелляа веществоэз, кӧдна шогалан организм веськӧтӧны.
Эна веськӧтчан веществоэс быдмасын ӧшшӧны либо вужжезын либо листтэзын, либо почаэзын, дзоридззезын, плоддэзын либо кӧдзысын.
Быд зелляа быдмаслісь босьтӧны зелляа вещество видзан торсӧ и сійӧ косьтӧм бӧрын вӧлись видзӧны веськӧтчан уджӧ.
Зелляа быдмассэз шӧрын эмӧсь уна яда быдмассэз, сідз: дурман, белена, юрвисян турун (болиголов), узян турун сонная одур, мӧд нёжӧн (беладонна).
Яда веществоэс нылӧн вермӧны мортӧс вийны нельки,
сідз, например, белена кӧдзыссянь уна кулӧ челядь орстӧн сёйӧм бӧрын.
Но медицинаын, эна жӧ яда веществоэз, неыджыт порцияӧн босьтӧмӧн, вермӧны бура веськӧтны шогӧттэзсянь.
Сідз, например, белена листтэзісь керсьӧ зелля, кӧда сетсьӧ мортлӧ ойтӧлӧн кыскалан шогӧт дырни и кӧр мортӧс колӧ успокоитны (сетсьӧ кыдз успокаивающӧй средство).
Косьтӧм вужжезісь и листтэзісь мӧдік зэв яда быдмаслісь — беладонналісь керӧны ӧддьӧн дона вытяжка, кӧда медицинаын видзсьӧ кыдз зубыт ланьтӧтан средство.
А кытшӧм жӧ значеннё эна яда веществоэзлӧн быдмас пытшкын и быдмас олӧмын?
Наука ӧнӧдз эта вопрос вылӧ эз вермы висьтавны бытшӧмик, но чайтӧны — мукӧд кадӧ асланыс ядӧн быдмассэз мездісьӧны животнӧйез сёйӧм шогья.
Зелляа быдмассэз шӧрись уна вӧр быдмассэзӧн быдмӧны СССР-ын.
Сідз, например, ваа видззез вылын и вӧр кушиннэз вылын тшӧка адззисьӧ валериана (109 рис.). Валериана вужжезісь керӧны спирта настойез да эфира настойез — валерьяновӧй каплиэз.
Сюэзӧт да ыббез вылӧт — шутёммез вылӧт уна быдмӧ ёгтурун быдмас — серачача турун (ромашка). Эта быдмасыс сідз жӧ дона зелляа быдмас. Сія сложнӧй дзоридза семейство быдмас шӧрись.
Вӧр турунісь зелляа быдмассэз ӧктӧмын эм ыджыт значеннё — этӧн ми уджалісь отирӧс обеспечитамӧ колан зелляӧн.
Ыджыт отсӧг эта уджын вермасӧ сетны велӧтчиссез и пионеррез, нія организуйтчӧмӧн вермасӧ уна берся зелляа быдмассӧ ӧктыны, кӧда быдмӧ матын гӧгӧр, ны горт гӧгӧр.
Эна вӧр туруна зелляа быдмассэзкӧт ордчӧн миян СССР-ын унажык и унажык зорамӧ зелляа быдмассэзлӧн культура.
abu
Эд мукӧд быдмасыс миянын оз быдмы и искусственнӧя нійӧ быдтытӧн ми сэсся огӧ пондӧ вайны нійӧ граница сайись, капиталисттэзлісь.
Культураа быдмас вӧдитікӧ ми босьтны сійӧ вермам кокнитжыка да и сійӧ зорӧтӧмас уджалӧмыс вермас мунны машина удж пыр.
А кӧр сія быдмасыс — вӧр быдмас, сійӧ колӧ кошшыны, адззыны, ӧктыны да вӧлись уджӧ лэдзны — и кад и вын мунӧ эта вылӧ унаӧн унажык культура вӧдитӧмынся.
Зелляа быдмассэз культивируйтӧмын ми асланым колӧм сьӧрті вермам содтыны нылісь зелля веществоэз, донтӧмтны зелля.
Совхоз ыббез вылын да колхоз ыббез вылын уна берся зелляа быдмассӧ быдтӧны ни, шуны кӧть, валериана, серачача турун и мук.
Миян син одзын вӧр быдмассэз пӧрӧны культумӧй быдмассэзӧ.
8. Урожай лэбтӧмын основнӧй туйез.
Висьталамӧ дженытика, кытшӧм туйез кузя мунӧ культурнӧй быдмассэзлісь урожай лэбтӧмыс совхоззэзын да колхоззэзын.
Урожай понда пессьӧм — медыджыт заданнё, кӧдӧ чепӧстіс одзланьӧ партияыс мӧд пятилеткаӧ социалистическӧй му-видз уджалӧмын.
Сельскӧй кӧзяйство механизируйтӧмлӧн значеннё.
Медважнӧй орудиеӧн вылын урожай понда пессьӧмын эм сельскӧй кӧзяйство механизируйтӧм.
Машинаэз сельскӧй кӧзяйствоын не токо кокньӧтӧны и чожмӧтӧны удж, но бурмӧтӧны и уджыслісь качествосӧ.
Оча воштыны кӧ му участок, кӧда гӧрӧма гӧрӧн, трактора плуггезӧн гӧрӧм участоккӧт, разницаыс ны коласын лоас вель ыджыт, а мӧдпыр урожай босьттӧн эта разницаыс эшӧ адззӧмӧнжык содас.
Механизируйтчӧ не ӧтік сю злаккез культивируйтӧм, механизируйтчӧ и техническӧй быдмассэз зорӧтӧм: лён, свёкла, хлопок зорӧтӧм.
Совхоз ыббез вылын да колхоз ыббез вылын уджалӧ зэв ыджыт армия машинаэзісь, тракторрезісь, механическӧй кӧдзиссезісь и дзимлялан машинаэзісь.
Урожай понда пессян уджын особенно ыджыт значеннё МТС-лӧн.
Удобреннёлӧн значеннё.
Правильнӧя му назьмитӧм, а особенно минеральнӧй удобреннёэз му вылӧ пыртӧм — урожай лэбтан уджын эм вежтӧм тор.
Мӧд пятилеткаӧ социалистическӧй ыббез вылӧ паськыт кыз шорӧн пондасӧ киссьыны дона минеральнӧй удобреннёэз: Соликамскӧй шахтаэзісь — калия удобреннё, полярнӧй заводдэзісь — Хибиныись — фосфора удобреннё, берся производство бӧрсянь кольӧм торрезісь тоделя заводдэзын мӧдкодьсьӧтӧм бӧрын — озона удобреннё и с. одз.
Быдӧс эта лэдзас совхоз ыббез вылын да колхоз ыббез вылын пӧттӧдз вердны быдмас пӧлӧс массасӧ.
Ёгтуруннэзкӧт пессьӧм.
Ёгтурункӧт пессьӧм, эна зэв лӧг враггезкӧт пессьӧм, — миян сельскӧй кӧзяйстволӧн эм медглавнӧй задача.
Ыббез ёгсялӧм понісь ми воись воӧ Советскӧй союз пасьта ӧштамӧ ¼ торся не етшажык ассиным урожай, мӧд нёжӧн кӧ шуны, уна сё сюрс вагон нянь, карч и мукӧд продукта асланым урожайись.
Социалистическӧй ыббез вылісь ёгтурун мед вӧлі вӧтлӧма.
Севооборотлӧн значеннё.
Медважнӧй средство ёгтурункӧт пессьӧмын эм правильнӧй севообороттэз пыртӧм, мӧд нёжӧн кӧ, правильнӧя сьӧрсьӧн-бӧрсьӧналӧм быдкодь культураэзлісь кӧдзсьӧм.
Севооборотӧ пропашнӧй культураэз пыртӧм, например вуджплоддэз либо картовки, кокньӧтӧ ёгтурункӧт пессьӧмсӧ.
Эшӧ ыджытжык значеннё ёгтурункӧт пессьӧмын видзӧ сӧстӧм пар, мӧд нёжӧн кӧ, сэтшӧм мусин небзьӧтӧм, кӧр кӧдзтӧм ыб неӧтпӧв гӧрӧм понісь пыр кольӧ сӧстӧм — ёгтӧм.
Сельскокӧзяйственнӧй удж аскадӧ помалӧм.
Правильнӧя мусин небзьӧттӧг, аслас колан кадӧ удж кертӧг оз вермы лоны бур урожай.
Ӧтік лунӧн сёрмӧм понісь Союз пасьта пырӧ недород 40 000 вагон нянь.
Машинаэз отсалӧны миянлӧ сельскокӧзяйственнӧй уджись план аскадӧ тыртны.
Сорта кӧдзыслӧн значеннё.
Сорта кӧдзысӧн кӧдзӧм ыб содтӧ урожай 25–30% вылӧ.
Селекционнӧй сорттэз етшажык доймӧны умӧль климатическӧй условиеэз понісь — мороззэз понісь, кӧс кад понісь, а сідз жӧ ӧддьӧнжык кужӧны вермасьны быд шогӧткӧт и вредителлезкӧт.
Зэв уна ӧні миян вежсьӧ умӧль сорта сю кӧдзыс сортовӧй кӧдзысӧн.
Гырись социалистическӧй кӧзяйстволӧн роль.
Кыдз позяс организуйтны правильнӧя пессьӧм ӧтіка кӧзяйствоын ёгтурункӧт, кытӧн ыббез вундалӧмась межаэзӧн, эна ёгтурун да вредителлез кӧдзиссезӧн?
Кӧть бы пондыліс ӧтіка кӧзяин ныкӧт пессьыны аслас долонь пасьта ыбок вылын, — быдса кымӧр мыгӧрӧн ёгтурун пӧлӧс и вредителлез ордчӧн куйлан ыббез вылісь локтісӧ бы вились сы вылӧ, и нем бы ӧтіка кӧзяин ныкӧт ӧтнас керны эз вермы.
Позьӧ я иньдыны посни ӧтка кӧзяйствоӧ одзын мунан машинаа техника?
Конешно, оз.
Тракторлӧ, комбайнлӧ, сложнӧй машинаэзлӧ некытӧн бергӧтчыны векнитик крестьянскӧй полосаэз вылын, кӧдна зэлыта жмитчӧмась межаэз коласӧ.
Гырись социалистическӧй кӧзяйство — научнӧя организуйтӧм быдмас вӧдитан уджын медбур, правильнӧй туй.
Токо гырись социалистическӧй кӧзяйствоын позьӧ быдсӧн босьтны урожай лэбтікӧ наукалісь да техникалісь достиженнёэз.
Посни крестьянскӧй кӧзяйствоын урожай вӧлі случайнӧй гӧсь.
Совхоззэзын и колхоззэзын урожайлӧ колӧ лоны пыр социалистическӧй ыббез вылын.
ДАСӦТ ГЛАВА.
БЫДМАС МИРЛӦН ОСНОВНӦЙ ГРУППАЭЗ.
Быдмас мирын ӧткодьтӧмыс.
Дзоридза быдмаскӧт тӧдмасьӧмыс оз эшӧ сет миянлӧ быдмас мирлісь быдса картина.
Быдмас пӧлӧс унаӧн ӧткодьтӧмжык тіян тӧдӧмнытся.
Эмӧсь сэтшӧм быдмассэз, кӧдналісь оз позь адззыны не за, не лист, не настоящӧй вуж.
Аслас чужӧмӧн сэтшӧм быдмасыс вермӧ вачкисьны нето шар вылӧ, нето кузь сунис вылӧ, нето быд чужӧма пластинка вылӧ.
Ыждананыс мукӧд быдмас синмӧн адззытӧм ыжда.
Адззывліт натьтӧ асьныт либо мӧдіккезсянь кывліт ва дзоридзасьӧм йылісь. Гожумсӧ юль тӧлісьӧ гӧппезын, пруддэзын, тыэзын сулалан ва вермӧ мичасьны то веж рӧмӧ, то бурӧй рӧмӧ, то мукӧд кадӧ гӧрдӧв рӧмӧ нельки.
А мыйсянь ва мичасьӧ, сідз натьтӧ эд и думыштлӧ некӧр.
Гумыштны кӧ сэтшӧм васӧ стаканӧ да югыт одзӧ сійӧ керны, тыдалӧ, кыдз ваын уялӧны зэв уна кытшӧмкӧ булавка юрся поснитжыкӧсь дзулёккез.
Мукӧд кадӧ эна дзулёккес и эсся поснитӧсь, простӧй синмӧн озӧ и тыдалӧ, позьӧ нійӧ адззыны токо микроскоп пыр.
Микроскоп пыр сійӧ видзӧтны и колӧ.
Сэк син одзын оссяс быдса виль мир быд чужӧма ловья олісись и ны шӧрын пондасӧ уявны и вежыник дзулёккез, и вӧснитик веж сунисоккез, и быдчужӧма дораӧсь пластинкаоккез.
Быдӧнныс нія быдмассэз. Ваын олӧм понда нійӧ нимтӧны вабыдмассэзӧн (водоросллезӧн).
Быдӧнлӧ тӧдса тшак.
Но не быдӧн тӧдӧ, што нянь вылын, карч вылын, назём вылын баг эм сідз жӧ тшак.
Дрожжиэз, кӧдна пуктіссьӧны нянь шӧмӧсӧ, кӧднӧн шӧммӧтӧны нянь, сідз жӧ эм тшак.
Тшак аслас чужӧмӧн немӧн дзоридза быдмас вылӧ оз вачкись, кӧть и пырӧ быдмас пӧлӧс коласӧ.
Эшӧ дивожык лоӧ, кӧр шуам, што и бактерияэз сідз жӧ быдмас пӧлӧс (110 рис.). Нія быдлаын быдса кымӧр мыгӧрӧн ӧтмӧдӧрӧ ветлӧны. Кытӧн-кытӧн токо озӧ вермӧ овны: и руын, и ваын, и мусинын, и берся торӧ вермӧны поздісьны.
Бактерияэз пыр быд пӧлӧс шогыс паськалӧ (холера, дифтерит, тиф, туберкулёз, чума),
бактерияэз сісьтӧны быдмас организм да животнӧй организм, тшыкӧтӧны быд кодь сёян-юан продукта, а мукӧд кадӧ и бур вайӧны производстволӧ (шуны кӧть рись керан производствоын, кумыс производствоын, кефир производствоын, лён кӧтӧтікӧ и с. одз.). Сідз жӧ быдкодь мусина процессэзын (уськӧтӧ тӧд вылӧ быдмасӧн муись питательнӧй веществоэз босьтӧм йылісь и боби быдмассэз йылісь).
Бактериаэз — мед посни быдмассэз: нія мукӧд кадӧ ыждананыс 0,001 мм-ся учӧтжыкӧсь и микроскоп увтын тыдалӧны токо медыджыт ыждӧтӧм пыр.
Ӧддьӧнжык дзоридза быдмассэз вылӧ вачкисьӧны папоротниккез, пистиккез да кӧчвоннез: нылӧн сідз жӧ эмӧсь и за, и листтэз, и вужжез.
Но и эна быдмассэс дзоридзасян быдмассэз дорись торьясьӧны — эна быдмассэз некӧр озӧ дзоридзасьӧ и некӧр нылӧн абу кӧдзыс тусь.
Кыдз спораа быдмассэз йылӧны.
Кыдз жӧ инӧ эна быдмассэз йылӧны?
Дыр эта вопросыс загадкаӧн вӧлі учёнӧйез одзын.
Ӧні наука тӧдӧ, быдӧс эна быдмассэз, вабыдмассэзсянь и кӧчвоньӧдз, йылӧны спораэзӧн, чужӧмнаныс кӧдна дзоридз пыльцалань вачкисьӧны.
Быдӧс этатшӧм дзоридзтӧм и кӧдзыстӧм быдмассэс, кӧдналӧн йылӧмыс мунӧ спораэз пыр, шусьӧны спораа быдмассэзӧн.
Эта быдмас группаӧ пырӧны: бактерияэз, вабыдмассэз, тшак, лишайниккез, нитш, папоротник, пистик, кӧчвонь.
Тшак спора, либо нитш спора, либо папоротник спора микроскоп пыр видзӧттӧн позьӧ адззыны: споралӧн чужӧмыс гӧгрӧса, вевдӧрсянь вевттьӧма чорыт дыжӧн, а пытшкас джынкизера жидкость (протоплазма и ядро).
Быд спора аркмӧма ӧтік ловья клеткаись.
Эта клеткаись коланінӧ, буринӧ сюрӧм бӧрын (мед сюраніныс вӧлі ва и шоныт) зорамӧ виль быдмас.
Быдмас мирлӧн кӧркӧся чужӧмыс.
Ӧні му вылын спораа быдмассэз етшажыкӧсь кӧркӧся сьӧрті.
Быдӧс вид количествоыс нылӧн ӧні ⅖-ӧт тор быд быдмас вид пӧлӧс сьӧрті.
Но не сідз вӧлі важся каддэзӧ кӧркӧ, уна миллион во одзті.
Му вӧлі вевттьӧма шуч спораа быдмас пӧлӧсӧн.
Дзоридза быдмас сэк эшӧ эз вӧв.
Вот мыля ӧння, спораа быдмас пӧлӧс видзӧ интерес; нійӧ ми велӧтам кыдз матісь родняа быдмасӧс одзза, спораа быдмассэзкӧт — ӧння дзоридза быдмаслісь ай-маммезкӧт.
Ӧння, спораа быдмассэзкӧт тӧдсасьӧмӧн и тӧдсасям, кыдз аркмис и зорамись ӧння быдмас мир, кытшӧм быдмассэз му вылын медпӧрисьӧсь, кытшӧмӧс аркмисӧ сёрӧнжык.
Эта понда ми и видзӧтам торья группаэз быдмас мирлісь.
1. Вабыдмассэз — быдмас мирлӧн медважся группа.
Ӧтіклеткаа веж вабыдмас — хламидомонада.
Учетик прудоккезын, гӧппезын «вачветитан» кадӧ валӧн рӧмыс овлӧ веж.
Босьтны кӧ сэтшӧм валісь вотёк да видзӧтны сы вылӧ микроскоп пыр, позьӧ адззыны ӧтмӧдӧрӧ уялан гӧгрӧса, веж рӧма учӧтик дзулёккез.
Эна дзулёккес — ӧтіклеткаа веж вабыдмассэз — хламидомонадаэз (111 рис.).
Сувтчыштӧм хламидомонадалісь позьӧ адззыны: вевдӧрас сылӧн шучкӧп тыдалана дыж. Дыж увтын куйлӧ протоплазма, шӧрас ядро*.
Одзись конечсяняс петӧны вӧснитик кык сунисок — жгутиккез.
Хламидомонада уйтӧн нія ӧддьӧн чожа вӧрӧны и микроскоп увтын озӧ тыдалӧ.
Эна жгутиккезӧн хламидомонада вермӧ уйны одзлань и бергавны ӧті местын.
* Хламидомонада кылыс абу роч не коми. Сія аркмӧма кык кылісь: хламида — паськӧм, мӧд нёжӧн кӧ вевттисьӧма паськӧмӧн (дыжӧн); монада — простейшӧй организм.
Хлорофилла туссез туйӧ хламидомонадалӧн быд телоыс мичасьӧма веж рӧмӧ, токо одзись конечыс рӧмтӧм.
Этӧ веж рӧмсӧ сылӧ сетӧ ӧтік ыджыт хроматофор (рӧм сетісь), чужӧмыс кӧдалӧн вачкисьӧ бекӧрланьӧ. Пыдӧсыс хроматофорлӧн кыз.
Хроматофор хламидомонада олӧмын кыдз и хлорофилл туссез дзоридза быдмасын руись босьтӧ углекислӧй газ, углеродсӧ сэтісь босьтӧ гыркас, а кислород лэдзӧ бӧр, сідз и хроматофор ваын сылӧм углекислӧй газісь босьтӧ гыркас углерод.
Бӧрас кыз пыдӧсас хроматофорлӧн тыдалӧны крахмал туссез, кӧдна аркмисӧ углерод да ва ӧтлаасьӧм понісь.
Хламидомонада аркмӧма ӧтік клеткаись.
Но эта клетка эм быдса, ӧтнаса олісь организм: сія ачыс уялӧ, ассимилируйтӧ углерод, босьтӧ минеральнӧй соввез, кӧдна сылӧмась ваын.
Эта — ӧтік клетка — организм олӧ, йылӧ, кулӧ кыдз и мукӧд быд организм.
Дзоридза быдмассэзкӧт ӧткодьыс сылӧн то мый: видзӧ веж рӧм, мӧд нёжӧн кӧ эм, пытшкас хлорофилл, сідзкӧ дзоридза быдмас моз жӧ вермӧ руись босьтны углерод.
Этӧн хламидомонада тшӧтшасьӧ и мукӧд веж рӧма быдмассэзкӧт.
Аслас чужӧмӧн да ваын уялӧмӧн сія мукӧд быдмас дорись торьяссьӧ дзикӧдз, сэтӧн сылӧн особенность.
Хламидомонадалӧн йылӧм.
Видзӧтам, кыдз хламидомонада йылӧ, а эта сьӧрті пондам тӧдны, кыдз йылӧны и мукӧд простейшӧй организммез.
Наблюденнёэз пыр тӧдӧмась: хламидомонада йылан одзын сувтӧ и жгутиккес сылӧн ӧшӧны.
Пытшкӧсыс — протоплазма да ядро торьясьӧны перво кык торйӧ, кыкнан торыс гӧгӧр аркмӧ виль дыж.
Кыкнан торыс сыбӧрын торьясьӧны бӧра жӧ кык торйӧ.
Сідз аркмӧны нёль тор.
Эна нёльнан торыс мам кышись (дыжись) петӧны и пондӧны овны ӧтнаса оланӧн, кыдз быдса хламидомонадаэз.
Этатшӧм йылан видыс шусьӧ полтӧм йылӧмӧн (а ми тӧдам, эм эшӧ пола йылӧм).
Мӧдік йылан способ унаӧн сложнӧйжык.
Сія то кытшӧм: кык хламидомонада асланыс «ныроккезӧн» кутчисьӧны ӧтамӧд бердӧ (112 рис.). Сыбӧрын клетка дыжжез нылӧн потӧны, пытшкӧсыс (протоплазма ядрокӧт) кыкнан особлӧн дыж пытшкись петӧ и йитсьӧ ӧтлаӧ. Эта бӧрын аркмӧ вевдӧраныс виль дыж.
Сідз аркмӧ покоитчан спора, кӧда вермӧ кокниа чулӧтны умӧль условиеэз: гӧппезлісь кынмӧм, ныись ва косьмӧм.
Кӧркӧ мӧдпыр, кӧр чулалас, шуам, кӧдзыт тӧв либо кӧс кад, сувтас шоныт, влажнӧй погоддя — спора пытшкӧсыс пондӧ торьясьны кынымкӧ клетка вылӧ, быд торлӧн аркмӧны жгутиккез.
Виль организммез спора дыж пытшкись петӧны и зорамӧны быдса хламидомонадаэзӧ.
Мукӧд хламидомонада виддэзлӧн торьясьӧм бӧрын аркмӧны не ӧтыжда особбез: ӧтіккес поснитикӧсь, перытӧсь, мӧдіккес гырисьӧсь — жгутиктӧмӧсь, — озӧ вӧрӧтчӧ.
Эна поснитиккес ӧтлаасьӧны гыриссезкӧт и йитсьӧны.
Поснитик особбес шусьӧны айпӧв клеткаэзӧн, гыриссес, кӧдна озӧ вермӧ вӧрны — мампӧв клеткаэзӧн, мӧд нёжӧн яйцеклеткаэзӧн.
Эта способыс, кӧр айпӧв клетка ӧтлаасьӧ мампӧв клеткакӧт шусьӧ пола йылӧмӧн.
Сідз полтӧмӧн йылӧм мунӧ ӧтік клеткаа организм торьясьӧм пыр,
пола йылӧм дырни протоплазма ӧтік организмлӧн и ядро ӧтлаасьӧ, йитсьӧ мӧдік организм пытшкӧскӧт — протоплазмакӧт да ядрокӧт.
Унаклеткаа вабыдмас — вольвокс.
А мый бы вӧлі, кӧбы хламидомонадаэз асланыс йылӧм дырни эзӧ ӧтамӧд дынісь янсалӧ, а топыта бы ӧтамӧд бердӧ лякасисӧ и колисӧ бы студень код жидкостя дзуль вылын куйлыны.
Сэк бы аркмис унаклеткаа вабыдмас, кӧда аслас чужӧмӧн и строеннёӧн пондіс бы вачкисьны вольвокс вабыдмас вылӧ. Эта вабыдмасыс — вольвоксыс сідз жӧ «ва чветитікӧ» уна пантасьӧ гӧппезын, прудоккезын и мукӧт сулалан ваа гӧппезын.
Этатшӧм дзулёккес, простой синмӧн тыдаланаэз, ыждананыс овлӧны булавка юрок гырисяӧсь.
Микроскоп увтын видзӧтікӧ позьӧ адззыны (113 рис.), эта дзулёкыс аркмӧма уна сюрс клеткаись, кӧдна чужӧмнаныс и строеннёнаныс вачкисьӧны хламидомонада вылӧ. Быд клеткаыс куйлӧ студень кодь дзуль вевдӧрын.
Быд клеткасянь ӧтӧр ладорӧ петӧ кык жгутикӧн.
Эна жгутиккезӧн ӧтамӧд веженя сынӧмӧн вольвокс ваын кыдз бы местаись местаӧ ыскӧвтӧ.
Вольвокслӧн половӧй клеткаэз, айпӧв клеткаэз да иньпӧв клеткаэз, эшӧ ӧддьӧнжык ӧтамӧд вылӧ оз вачкисьӧ хламидомонада клеткаэзся.
Иньпӧв клеткаэс гӧгрӧсаӧсь, ӧтместын видзсянаӧсь, жгутиккез нылӧн абуӧсь.
А айпӧв клеткаэс унаӧн поснитжыкӧсь иньпӧв клеткаэсся, одзаныс нылӧн кык жгутикӧн.
Шусьӧны нія жывчиккезӧн.
Эна жгутиккезӧн жывчиккес сынӧны и сибӧтчӧны иньпӧв клеткаэз дынӧ и пырӧны клетка пытшкӧ. Клетка пытшкын айпӧв клетка йитсьӧ яйцеклеткакӧт.
Ӧтіместын олісь вабыдмас — плеврококк.
Уялан вабыдмассэзся (жгутика формаэзся) тшӧка сюрӧны ӧтіместын видзсяна вабыдмассэз, кӧдналӧн жгутиккес абуӧсь.
Зыртыштны кӧ пу вылісь, заплод вылісь либо ва му вылісь (нюдз му вылісь) веж рӧмӧн вевттисьӧмсӧ да сувтӧтны микроскоп увтӧ, пондасӧ тыдавны зэв уна поснитик, ӧтіклеткаа организммез. Жгутиккез эна организммезлӧн абуӧсь, вевдӧрсянь вевттиссьӧмась кыз оболочкаӧн, пытшканыс протоплазма, ядро и веж хромотофор.
Эна ӧтіклеткаа му вывся вабыдмассэз — плеврококкез (114 рис.).
Сідзкӧ вабыдмас вермӧ не токо ваын овны, а олӧ мукӧд пӧлӧс ны шӧрись и му вылын.
Этатшӧм вӧрӧтчытӧм, кӧть и ӧтіклеткаа, ватуруныс матӧжык ни аслас чужӧмӧн сибӧтчӧ типичнӧй быдмас вылӧ.
Унаклеткаа суниса вабыдмас — улотрикс.
Эна видзӧтӧм быд вабыдмасся пруддэзын, тыэзын и берег доррезӧт тшӧка позьӧ адззыны эшӧ ӧтік вабыдмас пӧлӧс. Быд ва увтся предмет мукӧд кадас овлӧ вевттьӧма кыдз бы веж тошӧн. Пондан видзӧтны да веж сіоккес кузьӧсь, ӧт конечнаныс пукалӧны предмет вылын, мӧдныс ортсӧ летъялӧ. Мукӧд кадӧ сіэзнаныс каттисясӧ да быдса заросль аркмӧ.  Киӧ предмет босьтан — нильыг.
Эта вабыдмасыс шусьӧ улотриксӧн. Босьтны кӧ улотрикслісь сіок да видзӧтны микроскоп увтын (115 рис.), позяс адззыны то кытшӧм картина: сіок улотрикс вабыдмаслӧн аркмӧма ӧтпӧвса клеткаэзісь.
Быд клеткаись позьӧ адззыны ядро и веж рӧма хроматофор, кӧда кыдз бы йыӧн йыалӧма клеткасӧ ӧтмӧдӧрсянь.
Первося видзӧтӧмӧн эта сіокыс немӧн оз вачкись хламидомонада вабыдмас вылӧ.
Но кӧбы ті дыржык вермит и кужит сы сьӧрын видзӧтны, чайтӧмнытӧ этӧ бы вежит.
Улотрикс йылӧ кык способӧн: полтӧм способӧн да пола способӧн.
Полтӧм йылӧм дырни мукӧд клетка пытшкӧсыс кокольтчӧ коколёккезӧ, кӧдна дыжӧ аркмӧм осьта пыр петӧны ортсӧ ваӧ.
Коколёклӧн одзланяс аркмӧны нёль жгутик, кӧднӧн нія уялӧны ваын.
Этатшӧм ӧтіклеткаа организммез ӧддьӧн вачкисьӧны хламидомонада вылӧ и шусьӧны зооспораэзӧн, мӧд нёжӧн кӧ ловья (уялана) спораэзӧн.
Мыйкӧ дырнаись этатшӧм спораэс лякасьӧны асланыс одзись векнитик конечокӧн кытшӧмкӧ ва увтса предмет бердӧ.
Лякасян местаас аркмӧны вӧснитик сунисоккез, кӧдна вуж сітылӧппезлань вачкисьӧны.
Эна эшӧ абу быльнӧй вужжез, шусьӧны ризоиддэзӧн.
Ачыс жӧ клеткаыс пондӧ поперег торьясьны поперешнӧй стенкаэзӧн и жагвыв пӧрӧ унаклеткаа сунисокӧ.
Пола йылӧм дырни клетка пытшкӧс торьясьӧ уна торйӧ — дзулёккез вылӧ, кӧднаись аркмӧны кык жгутика зооспораэз (116 рис.).
Этатшӧм зооспорасӧ эшӧ сьӧкытжык хламидомонада понісь торйӧтны.
Ваын зооспораэз гозъясьӧны кыдз гозъясьӧны и хламидомонадаэз пола йылӧм дырни.
Йитсьӧм гоззэзлӧн видзсьӧ нёль жгутик, кыс и полтӧг аркмӧм зооспора.
Недыр мыйись сія жгутиккесӧ ассис ӧштӧ, вевттиссьӧ кыз дыжӧн и пӧрӧ покоитчан спораӧ.
Покоитчан период чулалӧм бӧрын спора торьясьӧ; сідз аркмӧ ӧтік спораись кынымкӧ спора. Быд спораись аркмӧны виль сунисоккез — улотрикссэз.
Сідз ӧтік местын видзсян сунис кодь унаклеткаа вабыдмас улотрикс аслас зорамӧмын чулалӧ ӧтіклеткаа уялан зооспора стадиа, кӧда ӧддьӧн вачкисьӧ аслас строеннёӧн хламидомонада вылӧ.
Эта вачкисьӧмыс мыччалӧ связь ӧтіклеткаа вабыдмассэз коласын да унаклеткаа вабыдмассэз коласын.
Саридзись унаклеткаа вабыдмассэз.
Энӧ вабыдмассэсӧ видзӧтӧм понісь вермас чайтчыны, што вабыдмассэз коласын гырись вабыдмассэс и абуӧсь, што быд вабыдмасыс токо микроскоп пыр адззана организм.
Былись кӧ вабыдмасыс уна быдпӧлӧсаыс эм.
Саридззезын быдмӧны бурӧй да багрянӧй вабыдмассэз, кӧдна асланыс размеррезӧн овлӧны унаӧн кузьжыкӧсь самӧй медкузь пуэзся — не ӧтік сё метра кузяӧсь.
Нылӧн строеннёыс унаӧн сложнӧйжык.
Мукӧд пырас нылӧн аркмӧны листтэз чужӧмаӧсь, заэз чужӧмаӧсь и вужжез чужӧмаӧсь органнэз.
Но йылӧмнаныс нія унаӧн вачкисьӧны видзӧтӧм ватуруннэз вылӧ: полтӧм йылӧмныс сідз жӧ мунӧ зооспораэз пыр; пола йылӧмныс — кык клетка йитсьӧм пыр.
Бурӧй вабыдмассэз, кӧдна олӧны миян ойвылісь саридззезын да Ылісь Асыввыв саридззезын, зэв коланаӧсь.
Погода мунӧм бӧрын нійӧ уна чапкӧ берегӧ.
Ны коласын сюрӧ вабыдмас сакара ламинария. Телоыс эта вабыдмаслӧн вачкисьӧ кузь пластинаэз вылӧ, лист чужӧма (117 рис.).
Миян советскӧй учёнӧйезлӧн исследованнёэз сьӧрті эта вабыдмасыс усегын зэв бур вердас вӧлӧма подалӧ — вӧввезлӧ, порссезлӧ, куканнезлӧ, баляэзлӧ.
Кытӧн вердас подалӧ оз тырмы, тшӧктӧма саридз гӧгӧрса отирлӧ ламинария ӧктыны вердас запасӧ.
Японияын да Китайын мукӧд вабыдмасыс, ламинария вылӧ вачкисянаэс, шусьӧны «саридз капустаӧн»; отир нійӧ ачыс сёйӧ. Ныись быд лун пуӧны пӧжӧны быдкодь сёянсӧ.
Мукӧд бурӧй вабыдмас пӧимись шедтӧны иод.
Сісьмӧм вабыдмассэз мунӧны назёмӧ.
Сідз ойвывса да асыввывса саридззезісь вабыдмассэз — зэв ыджыт богатство миян социалистическӧй кӧзяйство понда, но кытчӧдз эшӧ етша нія используйтчӧны.
Вабыдмассэз — медважся быдмассэз.
Ӧні колӧ дженытика итожитны, мый ми тӧдім вабыдмассэз йылісь.
Вабыдмассэз, кыдз и дзоридза быдмассэз, пытшканыс видзӧны хлорофилл, кӧть и не быдӧнныс нія веж рӧмаӧсь.
Но оз позь быдӧс ваын быдмись быдмассӧ шуны вабыдмасӧн.
Кукшун дзоридз, ряска, элодея, нювт турун кӧть и ваын быдман туруннэз, но сёжӧ оз позь нійӧ вабыдмассэзӧн шуны.
Быдӧс нія дзоридза турун быдмассэз, быдӧнныс нія йылӧны кӧдзыс тусьӧн и вегетатива йылӧмӧн.
Вабыдмаслӧн жӧ дзоридз абу, кӧдзыс тусьӧн сія оз йыв, а йылӧ спораэзӧн.
Спораэс нылӧн овлӧны кыкпӧв — пола спораэз и полтӧм спораэз.
Унажык ва быдмасыс йылӧ уялана спораэзӧн, кӧдна шусьӧны зооспораэзӧн.
Зооспораэз асланыс строеннёӧн вачкисьӧны ӧтік клеткаа вабыдмассэз вылӧ.
Ӧксьӧм даннӧйез сьӧрті учёнӧйез думайтӧны, медважся быдмассэс пӧ кӧркӧ вачкисьӧмась ӧтікклеткаа вабыдмассэз вылӧ, хламидомонада чужӧмаэз вылӧ.
Уна-уна воӧн вежсьӧм понісь эна вабыдмассэз лоисӧ шар чужӧмаӧсь — вольвокс типаӧсь, сунис кодьӧсь кузьӧсь, кӧдна ӧт конечнаныс пукалӧны ва увтся предмет вылын, а мӧднаныс ордса (а эмӧсь и дзикӧдз ордсаӧсь), и медбӧрын сложнӧйжык строеннёаӧсь, кыдз бурӧй вабыдмассэз, багрянӧй вабыдмассэз.
Но сёжӧ медуна вабыдмаслӧн строеннёыс вачкисьӧ одзза важся-важся ӧтікклеткаа уялан вабыдмас вылӧ (зооспора).
Чужан гортыс медодзза, важся быдмассэзлӧн — ва.
Ваын кӧркӧ важын медодзза быдмасыс чужлӧма.
Ваын нія зорамисӧ.
Ваын нія зэв гырись размеррезӧдз быдмисӧ.
Мукӧд вабыдмассэс селитчисӧ берегдоррезӧ, быдса миллион воэзӧн пондісӧ лӧсьӧтчыны овны кӧс му вылын (уськӧтӧ тӧдвылӧ плеврококкезӧс).
Вабыдмассэзсянь уна-уна миллион во бӧрті пондісӧ жагӧник аркмыны мӧдік быдмас группаэз.
2. Тшак — хлорофиллтӧм быдмас.
Тшак «мукор» — низшӧй тшаккезлӧн представитель.
Свежӧй вӧв назём кӧ пыртны керкуӧ, то мыйкӧ дырнаись сія вевттисяс миян кыдз бы черань везйӧн — чочком багӧн.
Эта багыс — тшак.
Шусьӧ мукорӧн.
Искусственнӧй условиеын, шуам вивариумын (ловья пельӧсокын) сійӧ быдтыны ӧддьӧн кокни.
Эта понда пыдын пыдӧса блидйӧ пуктіссьӧ ва песок, а вевдӧрас свежӧй вӧв назём.
Блид вевттиссьӧ стекляннӧй банкаӧн, пытшсяняс стенкаэс кӧдалӧн лякӧмась ва промокашкаӧн.
Прибор сувтӧтӧны шонытінӧ.
Промокашка быд лун вадсьӧ.
Сідз миян аркмӧ «влажнӧй камера», кӧдаын зэв кокниа вермӧны чужны тшак спораэз.
Назём вылӧ спораэз сюрӧны руись, кытӧн нія лэбалӧны зэв уна.
Тшак чожа петалас, пондас быдмыны и зорамас, и лун-мӧд бӧрын назём вылын явитчас пук кодь гӧнок — эта и эм черань вез чужӧма тшакыс — мукорыс (видз. 13 удж, 132 листбок).
Видзӧтны кӧ кусӧчок эта гӧнок шӧрись микроскоп увтын (118 рис., 1), позьӧ адззыны рӧмтӧм сунисоккез. Эна сунисоккес пытшкын некытшӧм перегородкаэз озӧ тыдалӧ.
Чалля-пелля сунис тылӧпокыс эм быд нёжӧн быдмӧм ӧтік клетка.
Эна тшак сунисоккес шусьӧны гифаэзӧн.
Гифаэзлӧн пансьӧмыс шусьӧ мицелийӧн.
Мукӧдласянь мицелий вылӧ иньдӧ сунисоккез, кӧдна йылын пукалӧны сьӧдыник юроккез (118 рис.,3).
Босьтны кӧ да этатшӧм юроксӧ предмета стеклоок вылын нырыштышны да бӧр сувтӧтны унаись ыждӧтан микроскоп увтӧ, син одзын лоас тыдалана — юрокас тыр вӧлі тапкӧма сьӧдыник спора.
Кӧр ми велӧтан тшакнымӧс оча воштам суниса вабыдмаскӧт, то сэкжӧ син вылӧ усьӧ зэв ыджыт ны коласісь ӧткодьтӧм (ӧтамӧд вылӧ вачкисьӧм).
Мукӧд суниса вабыдмасыс сідз жӧ аркмӧма ӧтік клеткаись и вачкисьӧ унавожа сунисок вылӧ.
Мыйӧн эта тшак да вабыдмас озӧ ӧтамӧд вылӧ вачкисьӧ, дак асланыс рӧмӧн. Вабыдмас веж рӧма, а тшакыс рӧмтӧм. Тшак гифаэзын — сунисоккезын абу хлорофилл.
Сідзкӧ тшак углекислӧй газісь босьтны углерод оз вермы, оз вермы керны и органическӧй веществоэз.
Питайтчӧ сія «готовӧй» органическӧй веществоэзӧн, кӧдна эмӧсь вӧв назёмын.
Мукор бура быдмӧ-зорамӧ и мӧдік органическӧй веществоэз вылын: нянь вылын, сісь плоддэз вылын, сісьман быдмас вылын и мукӧд.
Этатшӧм быдмассэс, кӧдна питайтчӧны кулӧм органическӧй веществоэзӧн шусьӧны сапрофиттэзӧн.
Мукор, кыдз и быд мукӧд тшак, йылӧ спораэзӧн.
Воӧм бӧрын сьӧдыник юроккес потласьӧны.
Ныись киссьӧны зэв уна спораэз, кӧднӧ тӧв кӧдзӧ ӧтмӧдӧрӧ зэв паськыта.
Сюрасӧ кӧ спораэз нюдз му вылӧ, назёмӧ либо сісьман быдмас торрез вылӧ, чожа пондӧны чужны, лэдзӧны мицелий и аркмӧны спораэзӧн юроккез.
Сідз тшаккез йылӧны полтӧм йылӧмӧн.
Эсся нылӧн эм и пола йылӧм, кӧр кык сунисоклӧн юроккез ӧтлаасьӧны ӧтлаӧ и аркмӧ ныись покоитчан спора. Покоитчан спора вевдӧрсянь вевттисьӧма кыз дыжӧн (118 рис., 2).
Назём баг чужӧма тшаккес уна эмӧсь, нылӧн мицелийын быдӧнныслӧн абуӧсь перегородкаэз.
Быдӧс этатшӧм тшаккес, кӧдна аркмӧмась ӧтік клеткаись, пытшкас кӧдалӧн уна ядроа протоплазма, шусьӧны низшӧй тшаккезӧн.
Эна тшаккес медуна вачкисьӧны асланыс строеннёӧн вабыдмассэз вылӧ.
Мукӧдыс ны шӧрись йылӧ сідз жӧ, кыдз и вабыдмас, зооспораэз пыр.
Шляпаа тшаккез — высшӧй тшак пӧлӧслӧн представителлез.
Быдӧнлӧ бура тӧдсаӧсь шляпаа тшаккез, например: синявка, рыжык, туйдорка, гӧрд гриб, чочком гриб, кульбук тшак и мукӧд. Быдӧнныслӧн нылӧн эм мырок, вевдӧрас шляпа — юр.
Бытшӧмика велӧтӧм бӧрын лоӧ тӧдана, усегын мый ми тшак туяс пуктам, сія токо плода тело тшаклӧн, а ачыс тшак телоыс — мицелийыс дзебӧма муӧ.
Адззӧм тшак местасӧ кӧ жагӧник гарйыштны, вевдӧр пластсис мусинсис позяс адззыны тшак мицелий.
Шляпаа тшаклӧн мицелийыс, кыдз и видзӧтӧм вылын баг тшаклӧн, черань вез вылӧ вачкисьӧ, токо сунисоккес кызжыкӧсь, и шусьӧны нія сідз жӧ — гифаэзӧн.
Баг тшаклӧн гифаэс быдӧнныс аркмӧмась ӧтік клеткаись, а шляпаа тшаклӧн нія аркмӧмась торья клеткаэзісь (119 рис.). Эна клеткаэс кузьмӧсаӧсь и кузьжык нёжнаныс ӧтлаасьӧмась ӧтамӧдкӧт.
Сідзкӧ, шляпаа тшак — унаклеткаа организм.
Мицелий вылын быдмӧны «плода телоэз» тшаклӧн.
Видзӧтны кӧ бытшӧмика шляпаа тшаклісь шляпа увтсӧ, позьӧ адззыны: ӧтіккезлӧн (рыжыклӧн, синявкалӧн, кульбук тшак пӧлӧслӧн) сія (шляпаыс) визясьӧма вӧснитик пластинкаэзӧн (120 рис.). Тшак мырок дынсянь эна пластинкаэс радиальнӧя мунӧны ӧтмӧдӧрӧ, а мукӧд тшаккезлӧн, кыдз маслениклӧн, гӧрдгриблӧн, чочком гриблӧн и мӧд. шляпа увтыс пырӧта пырӧта (121 рис.), губка чужӧма. Эна пырӧтоккес пыртӧны векнитик трубкаоккезӧ.
Босьтны кӧ тшак шляпа да увт ладорнас кыминьтны сӧстӧм гумага лист вылӧ, а вевдӧрсяняс вевттьыны стекляннӧй колпакӧн либо банкаӧн, то гумага вылӧ мыйкӧ дырнаись тшак шляпаись киссясӧ уна поснитик спораэз.
«Пластинаа» тшак шляпкаись спораэз гумага вылӧ киссясӧ лёдззезӧн-лёдззезӧн, а «пырӧта» шляпаа тшаклӧн — чукӧроккезӧ, быд шляпа пырӧток весьтын лоас чукӧрок.
Сідзкӧ пластина шляпаа, тшаклӧн спораэз аркмӧны пластина вылын (122 рис.), а пырӧта шляпаа тшаккезлӧн — векнитик трубка пытшкын, кытісь нія и воӧм бӧрын киссьӧны.
Ваа, нюдз муӧ сюрӧм бӧрын спораэз чожа чужӧны и ас гӧгӧраныс лэдзӧны мицелий.
Мицелий вермӧ сетны не ӧтік, а мукӧд кадӧ уна плода тело. Сійӧн мукӧд пырас и овлӧ сідз: ӧтік тшак кӧ адззин, пондан кошшыны гӧгӧрсис, адззан и мӧдікӧ, куимӧтӧ и с. одз.
Вот мыля тшак ӧктікӧ колӧ керны сідз, мед мусис мицелийсӧ не вӧрӧтны, не кыскыны сійӧ муись, не орӧтны.
Тшак ӧктытӧн, мыйви колӧ, тшак мыроксӧ вундыштӧны пуртӧн.
Этадз ӧктӧм понісь сы гӧгӧрӧ быдмӧ мӧді плода тело тшаклӧн и урожай оз чин, а сьӧрна содӧ.
Этӧ правилосӧ колӧ тӧдны быд мортлӧ, кӧда тшак ӧктӧ заготовка вылӧ.
Кыдз искусственнӧя вӧдитны сёян тшак — шампиньон.
Миян союзын вӧр тшакся вӧдитӧны тшаксӧ искусственно.
Тшак позьӧ быдтыны во чӧж (круглӧй во): тӧвсӧ — шоныт теплицаэзын, тулыссӧ — парниккезын, гожумсӧ — даже грунтын.
Эта понісь этӧ дона продуктасӧ позьӧ унаӧн содтыны.
Миян Союзын тшака кӧзяйство гырись рабочӧй центррезын и новостройкаэзын паськыта паськалӧма.
Искусственнӧя вӧдитӧмӧ мунӧ тшак культура шампиньон (123 рис.). Эта тшакыс чожа быдмӧ, чӧскыт, пӧтӧса и етша корӧ ас сьӧрас видзӧтӧм.
Природаын шампиньон быдмӧ унажык сьӧдмусина му вылын важ, быдмас ёг кучаэз вылын, ыб вылын, видззез вылын, мукӧд кадӧ карта вылын, ӧтік кылӧн — кытӧн пӧжсьӧм, сэтчӧ шампиньон и кайӧ.
Ӧт местаись мӧд местӧ садитікӧ шампиньонлісь мицелийсӧ босьтӧны сьӧдмусинкӧт ӧтлаын, мед мицелий сунисоккес эз орласьӧ.
Садитӧны сійӧ топӧтӧм сотчӧм вӧв назёмӧ тодель керӧм джаджжез вылӧ. Тӧвсӧ кӧ, джаджжез эна керсьӧны теплицаэз пытшкӧ (124 рис.), а тулыссӧ да гожумсӧ парниккез вылӧ.
Ӧтік тӧлісь бӧрті садитӧм бӧрсянь вевдӧрас вӧснитик слойӧн кисьтӧны му.
Теплицаэзын пыр видзсьӧ ӧткодь влажность и температура мед вӧлі +12°Ц — +15°Ц ӧдз.
Первося тӧлӧ жӧ эна условиеэзын шампиньон вайӧ бур урожай — 7–8 кг-ӧн 1 кв метра садитӧм площадь вылісь.
Шампиньон спораэз кокни чужтыны назём ваын (отварын) и топӧтӧм сотчӧм вӧв назёмын.
Паразит тшаккез.
Быдӧс эна тшаккес, кӧдныкӧт ми эстӧн тӧдсасим — сапрофиттэз, мӧд нёжӧн кӧ шуны готовӧй органическӧй веществоэзӧн питайтчан быдмассэз. Быдӧнныс миян сёян-юанӧ босьтӧны кулӧм быдмас торрез да кулӧм животнӧй торрез.
Эна сапрофита тшаккезся эмӧсь эшӧ паразит тшаккез.
Паразит тшаккез питайтчӧны готовӧй органическӧй веществоэзӧн, кӧднӧ нія сӧскӧны ловья организм клеткаэзісь. Быдмасыс, кӧда вылын нія олӧны, шусьӧ «кӧзяинӧн».
Уна паразит тшаккез коласісь эмӧсь сэтшӧмӧсь, кӧдна быдмас вылӧ селитчӧм бӧрын быдмассӧ вийны вермӧны. Ны коласын эмӧсь пӧрӧса тшаккез.
Заразитчӧм картовки, зӧр, рудзӧг, шогді ны понісь уна ӧштӧ урожай.
Правильнӧя да бытшӧма пессьыны ныкӧт позьӧ токо сэк, кӧр ми пондам бытшӧма тӧдны быд паразит тшаклісь биология.
Медпаськыта паразит тшаккес паськалӧмась то кытшӧмӧсь: картовки тшак (фитофтора), головня (сьӧдбус), сьӧдтусь (спорыння) да сіма (ржавчинаа) тшаккез.
Картовки тшак (125 рис.) аслас строеннёӧн вачкисьӧ мукор вылӧ и аркмӧма токо ӧтік чалля-вожа клеткаись.
Шогалісь быдмассӧ позьӧ тӧдны то мый сьӧрті: картовки листтэз перво вевттисьӧны бурӧй, кыдз бы сотчӧм, пятноэзӧн. Пятно вевдӧрсянь кытшӧвтчӧ чочком рӧма багӧн.
Тшак зорамӧм понісь лист косьмӧ, картовки быдмыны дугдӧ и медбӧрын частӧ кулӧ.
Тшак кӧдзсьӧ спораэзӧн, кӧдна вермӧны заразитны не ӧтік токо листтэз, но и за, и клубеннез мӧді картовки куссэзлісь.* Тшакӧн заразитчӧм клубеннезісь зорамӧны шогалан быдмассэз.
Тӧдны колӧ эшӧ сійӧ, што кулӧм картовки торрез вылын аркмӧны паразит тшаклӧн тӧвьян спораэз.
Вот мыля колӧ тшакӧн шогалан картовки кор обязательно сотны.
* Эта паразит тшакоклӧн эмӧсь и зооспораэз кыдз и вабыдмассэзлӧн.
Сьӧдбуса тшаккез (21 рис.) кутчисьӧны зӧр быдмас бердӧ, ид бердӧ да проса бердӧ.
Быдмаслӧн, кӧда заразитчӧма сьӧдбуса тшакӧн, дзоридз туяс аркмӧ поснитик сьӧдбус.
Микроскоп увтын позьӧ адззыны — эта сьӧд бусыс эм тшак спора.
Эна спораэс озӧ веськыта быдмассӧ заразитӧ.
Нія перво сюрӧны муӧ, чужӧны, лэдзӧны дженытик сунисоккез, а эна сунисоккезсянь вились ӧтмӧдӧрӧ паськалӧны спораэз.
Эна вились аркмӧм спораэз, злак вужжез вылӧ сюрӧм бӧрын, чужӧны и вермӧны заразитньы уна виль быдмасӧс.
Сьӧдбус тшаклӧн эм интереснӧй особенность: сылӧн кӧдзысыс кык поколеннёсянь.
Ӧт поколеннё кӧдзысыс — сапрофит, олӧ муын, мӧдыс — паразит, быдмӧ злаккез вылын.
Сьӧдбус тшаккӧт позьӧ пессьыны токо кӧдзыс протравливайтӧмӧн. Кӧдзыс протраваӧ боссьӧ формалин раствор. Эта раствор понісь паразит тшаклӧн спораэз вийсьӧны (уськӧтӧ тӧдвыланыт кӧдзыс тусь йылісь глава).
Сьӧдтусь (126 рис.) заразитӧ унажыксӧ рудзӧг, а сідз жӧ шогді да ид.
Арсӧ рудзӧг шепись позьӧ адззыны сьӧд рӧма туссез. Эна туссес «сьӧдтусьыс» и эм.
Аркмӧма сьӧдтусь топыта гартчӧм тшак гифаэзісь.
Сьӧдтусь бытшӧма вермӧ тӧвйыны, кӧдзытлісь сія оз пов.
Тулыссӧ ваа мусинын сьӧдтусь чужӧ, сы вылын аркмӧны уна плода телоэз, а ны юроккезын спораэз (126 рис., 2).
Рудзӧг дзоридзалан кад кежӧ спораэз воӧны, киссьӧны и тӧлӧн розьнитчӧны ӧтмӧдӧрӧ рудзӧг дзоридззез вылӧ.
Рудзӧг дзоридз вылӧ сюрӧм бӧрын нія бӧра жӧ чужӧны, асланыс гифаэзӧн, пырӧны дзоридзӧ, аркмӧ тшак.
Тшак бӧра жӧ лэдзӧ спораэз, кӧдна уялӧны сакара жидкостьын («медвянӧй росаӧн» рочӧн шуӧны).
Борда гаг пӧлӧс сакара жидкостьын номсӧтчытӧн, спораэз новйӧ дзоридз-дзоридз вылӧ.
Сідз шогӧт вермӧ зэв чожа паськавны быд ыб пасьта.
Сьӧдтусь ӧддьӧн ядовит.
Мед рудзӧг кӧдзыс ны шогья весӧтны, кисьтӧны кӧдзыссӧ сов растворӧ.
Сьӧдтусь рудзӧг тусся кокнитжык и лэбӧ раствор вевдӧрӧ. А раствор вевдӧрись позьӧ сійӧ ӧктыны.
Сьӧдтусь колӧ ӧктыны и сетны аптекаӧ.
Нія мунӧны зелляӧ.
Сіма тшак (ржавчинаа тшак) (127 рис.) вермӧ сетны шогӧт сю быдмассэзлӧ, карч быдмассэзлӧ, ягӧда да плода культураэзлӧ.
Заразитчӧм быдмас листтэз вылын явитчӧны оранжевӧй (сім рӧм чужӧмаӧсь) пятноэз либо визёккез.
Эта — сіма тшаклӧн спораэз, кӧдна понісь кокни заразитчыны и мӧдік здоров быдмассэзлӧ.
Уна сіма тшак пӧлӧсісь видзӧны кык «кӧзяинӧн».
Зорамӧмыс эна тшак пӧлӧслӧн ӧддьӧн сложнӧй.
Например нянь сіма тшак зорамӧ перво барбарис быдмас листтэз вылын (ӧтік «кӧзяин»).
Тулысся спораэз эта тшаклӧн тӧлӧн паськалӧны ӧтмӧдӧрӧ и пуксьӧны рудзӧг листтэз вылӧ (мӧдік «кӧзяин»).
Вились зорамӧм тшак рудзӧг листтэз вылын гожся спораэзӧн заразитӧ виль экземпляррез гожумбыт.
Гожум помӧ аркмӧны тӧвся спораэз, кӧдна мӧдіво тулыссӧ чужасӧ му вылын.
Тулыссӧ одз эна сапрофита тшаккезлӧн спораэз заразитасӧ барбарислісь листтэз.
Эта сьӧрті пессьыны кӧ нянь сімкӧт, колӧ перво орӧтны сійӧ барбарис листтэз вылісь.
Эна выводдэз дорӧдз наука локтіс не ӧтік воӧн, а дыр этӧ вопроссӧ велӧтӧмӧн, дыр сійӧ тӧдмалӧмӧн.
Паразит-тшаккез уна пӧлӧс.
Пессьӧмыс ныкӧт быд тшак пӧлӧскӧт торья. Кытшӧм олӧм эта тшаклӧн, сэтшӧм сыкӧт и пессьӧм.
Сідзкӧ перво колӧ велӧтны тшаклісь биологиясӧ да вӧлись кошшыны способбез сыкӧт вермасьны.
Мый бердісь тшаккез кӧркӧ пельдісӧ.
Тшаккез асланыс строеннёӧн вачкисьӧны вабыдмассэз вылӧ.
Основнӧй отличчоыс нылӧн вабыдмассэз дорись — тшаклӧн абу хлорофилл.
Эта петӧ тшак олӧмись.
Тшаккез овлӧны либо сапрафиттэзӧн, либо паразиттэзӧн. Нія босьтӧны либо готовӧй органическӧй веществоэз, кӧдна аркмӧны кулӧм быдмас да кулӧм животнӧй организммезісь, либо питайтчӧны органическӧй веществоэз ловья быдмас организмись сӧскӧмӧн, мӧд нёжӧн кӧ шуны — тшаккез питайтчӧны готовӧй органическӧй веществоэзӧн, кӧднӧ керисӧ мӧдік веж быдмассэз.
Йылӧмныс жӧ нылӧн кӧртассьӧ му вевдӧрын олӧмкӧт, а не ваын олӧмкӧт, кыдз вабыдмассэзлӧн.
Наука чайтӧ, што тшаккез кӧркӧ вабыдмассэзсянь пельдӧмась.
Мукӧд вабыдмас пӧлӧсыс, виль условиеэз бердӧ приспособитчӧмӧн, важынсянь ни зэв ёна мӧдкодьсялӧма.
Кулӧм быдмас торрез вылӧ селитчӧмӧн либо кулӧм животнӧй торрез вылӧ селитчӧмӧн нія пондісӧ босьтны готовӧй органическӧй веществоэз.
Оланнысӧ вежтӧм понісь нылӧн сьӧрна вежсис и чужӧм, эз ло хлорофилл, эз ло веж рӧм.
Высшӧй тшак пӧлӧс му вылын явитчӧма сёрӧнжык и пельдӧма низшӧй тшак пӧлӧссянь.
3. Лишайниккез — тшаклӧн вабыдмаскӧт симбиоз.
Быдчужӧма лишайникыс уна.
Вӧрын пу кач вылын, важ заплоддэз вылын, куш иззэз вылын и скалаэз вылын нето просто му вылын учитикӧсь, но аскодьӧм быдмассэз.
Эна быдмассэс — лишайниккез.
Кӧр ми ны вылӧ видзӧтам первуйӧ, син вылӧ усьӧ нылӧн быд чужӧмыс.
Адззывлывліт натьтӧ пипу кач вылісь вижӧв рӧма пластинкаэз, эта лишайник «стена» вывся золотянка» (128 рис.).
Кӧзъя вӧрын (кӧзъяинын) позьӧ адззыны кузь, тош чужӧма лишайниккез — «пройез».
Кӧс яггезын (пожумаиннэзын) сідз жӧ позьӧ адззыны чочком рӧма лажмытик кусӧккез, кӧдна кӧс кадӧ кок увтын кажӧтӧны.
Эта бӧра жӧ лишайник «кӧр нитш» (129 рис. 2). Эта лишайникӧн ойвыв районнэзын кӧррез питайтчӧны (видз. 14 удж — II, 132 листбок).
Загадкаа природа лишайниккезлӧн.
Уна лишайниккезӧс нимтӧны нитшӧн.
Кӧт первуйӧ ны вылӧ видзӧтам, бытьтӧ и быль нія нитш вылӧ вачкисьӧны.
Мукӧдсӧ ӧнӧдз «кӧр нитшӧн» да «исландскӧй нитшӧн» шуӧны, эта сьӧрті позьӧ казявны, важын кӧркӧ нитш туйӧ нійӧ и наукаын пуктӧмась.
Былись жӧ, пондамӧ кӧ бытшӧмика видзӧтны нылісь пытшкись строеннёсӧ, адззылам, эта чайтӧмыс абу правильнӧй.
Микроскоп увтын лишайниклісь шӧрӧмок видзӧттӧн ми адззам, телоыс лишайниклӧн аркмӧма рӧмтӧм, тшак сунисоккезісь.
Эна сунисоккес ӧтӧрланяс каттисьӧны ӧтамӧдкӧт зэв топыта, шӧрас жӧ — рышкытжыкӧсь.
Сідзкӧ пытшкись строеннё сьӧрті — лишайник эм тшак.
А мыля жӧ лишайник овлӧ веж рӧма?
Этатшӧм рӧмыс эд тшак гифаэзлӧн оз овлы.
Кӧр ми микроскоп увтын видзӧтам лишайник, эна рӧмтӧм сунисоккезся тыдалӧны гӧгрӧса, веж рӧма клеткаэз (130 рис.).
Дыр наука эз вермы тӧдны, а мый жӧ эна сэтшӧм клеткаэс, веж рӧмӧ мичасьӧммес.
Унажык нійӧ пуктісӧ особӧй хроматофоррез туйӧ, кӧднаын пӧ эм хлорофилл.
60-ӧт воэзӧ кольӧм столетиеӧ кык учёнӧй (Фаминцин да Баранецкий) сувтӧтісӧ замечательнӧй и ӧддьӧн простой опыт.
Нія босьтісӧ да зэв посниа лишайник крӧшитісӧ («стена золотянка») и лишайник буссӧ лэдзисӧ ваӧ.
Мыйкӧ дырнаись тшак ткань ваын сісьмис, а веж клеткаэз чожа пондісӧ быдмыны и сосуд стенкаэз вевттисӧ (видз. 14 удж, 132 листбок).
Эта опыт мыччаліс — веж рӧма клеткаэс абу лишайниклӧн ткань, быдса быдмас организммез, кӧдна нылӧ сетӧм условиеэзын вермӧны ӧтнаныс и быдмыны, и йывны.
Эна организммес усегын вӧлӧмась ӧтік клеткаа вабыдмассэз плеврококкезланьӧ вачкисянаэз.
Сідз природалӧн загадка вӧлі тӧдӧма.
Тшаклӧн да вабыдмаслӧн симбиоз.
Лишайник — тшак, но тшак не ӧтнас.
Тшак гифаэз коласын сылӧн олӧ и йылӧ вабыдмас.
Лишайникись ми адззам пример, кыдз ӧтлаын олӧны кык быдмас: тшак да вабыдмас.
Этатшӧм ӧтласа олӧмыс наукаын шусьӧ — симбиозӧн.
Кыкнан организм ӧтлаасьӧмась ӧтамӧдкӧт зэв топыта, ныись аркмӧ кыдз бы ӧтік сложнӧй организм.
Тшаклӧн гифаэз босьтӧны ва да минеральнӧй соввез, а вабыдмас босьтӧ углерод да керӧ органическӧй веществоэз.
Эсся тшак сёйӧ кулӧм вабыдмас клеткаэз, а мукӧд кадӧ и ловьяэсӧ нійӧ сӧскӧ.
И интересно, лишайник, кыдз «организм» бытшӧмжыка вермӧ быд умӧль кадсӧ чулӧтны, нежели кыкнан эна организмыс (тшакыс да вабыдмасыс) торйӧн.
Лишайник вермӧ быдінӧ селитчыны: и куш из вылӧ, и зэв вылын керӧссэз йылӧ, и жара пустыняэзӧ, и ойвылын кӧдзытіннэзын, мӧд нёжӧн кӧ: кытӧн мӧдік быдмас эз бы вермы ӧтік лун овны, сэтӧн бура бытшӧма олӧ лишайник.
4. Нитшшез — медважся му вевдӧрись быдмас группа.
«Кӧк лён» — типичнӧй лиса-заа нитш. «Кӧк лён» позьӧ адззыны быдінісь.
Кытӧн мусин нюрпӧвса, сэтӧн кӧчкаэз вылын и «кӧк лён». «Кӧк лён» быдмӧ и вӧра мусин вылын и нюрын (131 рис.).
Бытшӧмика кӧ «кӧк лён» быдмасӧс видзӧтны, позьӧ адззыны: аркмӧма сія вонлань дзӧрана заокись. За вылын пукалӧны векнитик сьӧдӧв веж рӧма листоккез.
Заоксянь муӧ пырӧны вуж сітылӧппез, кӧдна шусьӧны ризоиддэзӧн.
Нитшшез унаӧн мӧдкодьжыкӧсь вабыдмассэзся, тшакся да лишайниккезся. Нитшлӧн эм ни и за, и листтэз.
Эта сьӧрті нитш матӧжык аслас строеннёӧн сибӧтчӧ дзоридза быдмас дынӧ.
Нитш — родня вабыдмаслӧ.
Гожумсӧ «кӧк лён» за конечись позьӧ адззыны кузь вӧснитик кокок, кӧдалӧн йылас «коробочка» (132 рис.). Коробочка пытшкын поснитик спораэз.
Вылісянь «коробочка» вевттьӧма особӧй кын кодь колпачокӧн (132 рис.), кӧда берегитӧ «коробочкаын» аркман спораэз умӧль понісь, температура вежсьӧм понісь.
Спораэз воӧм бӧрын колпачок усьӧ и спораэз киссьӧны.
Ва мусинӧ сюрӧм бӧрын спораэз чужӧны и ныись аркмӧны вӧснитик чалля-пелля веж сунисоккез.
Эта шусьӧ нитш предростокӧн (133 рис.). Предросток ӧддьӧн аслас строеннёӧн вачкисьӧ веж вабыдмас вылӧ (видз. 15 удж — I, 132 листбок).
Сідзкӧ медодзза нитш зораман стадияыс мыччалӧ, што нитшыс родня вабыдмаслӧ.
Нитш кӧркӧ аркмӧма вабыдмас бердісь, кӧр мукӧд вабыдмасыс пондӧма селитчыны ваись му вевдӧрӧ, пондӧма приспособляйтчыны овны му вевдӧрись олӧм бердӧ.
Ылынжык нитшлӧн зорамӧм мунӧ сідз.
Предросток вылӧ аркмӧны учитик почаоккез, кӧднаись петӧны вертикальнӧй заоккез листоккезаӧсь.
Вылісь конеччезас нылӧн аркмӧны: ӧтіккезлӧн айпӧв органнэз, кӧдна воӧм бӧрын сетӧны айпӧв клеткаэз — жывчиккез. Нылӧн формаыс спираля, кык жгутикаӧсь конечаныс.
А мӧдік заоккезлӧн иньпӧв органнэз. Эна иньпӧв органнэзлӧн пытшканыс эмӧсь яйцеклеткаэз.
Зэрикӧ жывчиккез петӧны ордсӧ и асланыс жгутиккезӧн зэв чожа пондӧны уйны ваын.
Мукӧдыс ны коласісь локтӧны яйцеклеткаэз дынӧдз и ныкӧт ӧтлаасьӧны.
Боссьӧм яйцеклеткаись аркмӧ вӧснитик кокок, йылас кӧдалӧн аркмӧ коробочка спораэзӧн.
Боссьыны яйцеклеткаэз вермӧны токо ваын, жывчиккез асланыс чужӧмӧн вачкисьӧны мукӧд вабыдмас жывчиккезлань (например вольвокс вабыдмас жывчиккезлань).
Эта виль доказательство, кӧда мыччалӧ, што нитшлӧн предоккес вӧлӧмась вабыдмассэз, кӧдна олӧны ваын.
Сфагнум — торф керись нитш.
Быд нитш пӧлӧсісь медколан нитш миян социалистическӧй строительствоын — сфагнум нитш, кӧдӧ мукӧд кадӧ нимтӧны сідз жӧ чочком нитшӧн либо торф керись нитшӧн (134 рис.).
Зэв паськыт торфа пространствоэз миян Ойвылын, Сибирын, Уралын, Рытвыв областьын и мукӧд областтезын миян Союзын аркмӧмась торф керись нитшлӧ — сфагнумлӧ.
Торф керись нитш зэв уна вермӧ ас пытшкас сӧскыны ва.
Торфа нитш вермӧ 10–15-ись унажык аслас кӧс весся босьтны ва (видз. 15 удж — II, 132 листбок).
Сфагнумыс торфа нюр вевттьӧ омӧн кыз шебрасӧн.
Нитшлӧн заыс быдмӧ аслас йылӧн, конечӧн, а пытшкас ва увтісь торыс нитшлӧн кулӧ и мыйкӧдырнаись пондӧ сісьмыны. Но васис кислородыс досповнаӧдз сфагнум сісьтыны оз вермы.
Нитш и быдӧс мый нитш сорӧн ваӧ сюрӧ кыдз бы токо шомсялӧ, а дзикӧдз оз сісьмы. Сідз вот и аркмӧ нюринын торф.
Торф миянлӧ социалистическӧй строительствоын колӧ лонтыны завод горрез. Сія мукӧд зэв колан лонтанкӧт сулалӧ ордчӧн. Медунасӧ торфӧн лонтӧны электростанцияэз.
5. Папоротника быдмассэз — сложнӧйжык строеннёа спораа быдмассэз.
Папоротника быдмассэзлӧн строеннё.
Папоротник (сьӧктан турун), письтик да кӧчвонь вевдӧрсянь етша ӧтамӧд вылӧ вачкисьӧны.
Папоротниклӧн (сьӧктан турунлӧн) (135 рис.) листтэз кузьӧсь, чуння-чалляӧсь. Му бердсянь нія паськалӧны пучокӧн.
Чужӧмнаныс нія дзик муӧ мӧрталӧм пальмаэз.
Пистиккез (136 рис.) вачкисьӧны вежыник, винерик кӧзоккезлань.
Заоккез нылӧн мутэйӧн-мутэйӧн за вылын пукалӧны и вертикально видзӧтӧны вылӧ.
За вылісь сьӧкыта позьӧ адззыны лист почаоккез, кӧдна чешуйкаэзӧн кытшӧвтӧны засӧ ӧтмӧдӧрсянь.
Кӧчвонь (137 рис.) кыссьӧ му бердӧт. Вевдӧрыс сылӧн тшӧка вевттьӧма векнитик, ёся веж листоккезӧн.
Быдӧнныслӧн эна быдмассэзлӧн эм ни настоящӧй за. Пытшк строеннёыс залӧн вачкисьӧ дзоридза быдмассэз за вылӧ (эмӧсь сосуда пучоккез). За овлӧ и муын.
Быдӧнлӧн нылӧн эмӧсь и листтэз и настоящӧй вужжез, а не ризоиддэз.
Эна особенносттезӧн папоротниккез, пистиккез да кӧчвоннез торьясьӧны мӧдік спораа быдмассэз бердісь и пондӧны ӧддьӧнжык вачкисьны дзоридза быдмассэз вылӧ.
Эта сьӧрті нія ӧтлаасьӧны ӧтік группаӧ — папоротника быдмассэзӧ.
Дзоридзасьӧ я папоротник?
Ӧнӧдз эшӧ мукӧд деревняэзын шуӧны, папоротник пӧ дзоридзасьӧ.
Шуӧны: «Иван лун» ойӧ пӧ дзоридзсӧ сылісь позьӧ адззыны. И кин пӧ сійӧ адззас, сія пӧ босьтас «сверхъестественнӧй сила».
Эта легендаыс натьтӧ сійӧн и аркмис, што папоротник некӧр оз дзоридзась и, конешно, абутӧм дзоридзсӧ сылісь некин оз вермы адззыны.
Важынсянь ни эта кажитчис удивительнӧй, загадкаа, и эта загадка гӧгӧр аркмисӧ берся сказкиэз.
Мукӧд спораа быдмассэзкӧт тӧдсасьӧм бӧрын миянлӧ абу нем эстӧн тӧдтӧмыс. Миянлӧ вежӧртана лоӧ, мыля папоротниклісь оз позь адззыны дзоридз — сія сылӧн оз овлы некӧр, папоротник йылӧ спораэзӧн.
Папоротниклӧн йылӧм.
Пондыны кӧ папоротниклісь пешлыны лист, увтладорись сылісь позяс адззыны поснитик, бурӧй рӧма бугороккез (135 рис. 2).
Лупа пыр видзӧтӧм понісь позьӧ тӧдны: нія вачкисьӧны учитик зонтиккез вылӧ, кӧдна увтын ӧшалӧны мешӧчоккез спораэзӧн (135 рис. 3).
Лоӧм бӧрын спораэз мешӧчоккезісь киссьӧны, а ваа мусинӧ сюрӧм бӧрын чужӧны.
Быд спораись быдмӧ учитик, вежыник, сьӧлӧм формаа пластинкаок (138 рис.), кузяыс кӧдалӧн сантиметрася дженытжык.
Вевдӧрсяняс эта пластинкалӧн пизьӧтӧны вужоккез — ризоиддэз, кӧднаӧн быдмас видзсьӧ мусин бердӧ.
Эта быдмасокыс шусьӧ «заростокӧн».
Заростоклӧн увдӧрас эмӧсь поснитик бугороккез, эна сылӧн айпӧв органнэз да иньпӧв органнэз.
Айпӧв органнэзын аркмӧны жывчиккез, а иньпӧв органнэзын — яйцеклеткаэз.
Яйцеклеткаэз вермӧны боссьыны токо сэк, кӧр сэтчӧ сюрӧ ва, токо ваын уйтӧн жывчиккез вермӧны сибӧтчыны яйцеклеткаэз дынӧ.
Боссьӧм бӧрын яйцеклетка пондӧ зорамны папоротник быдмасӧ. Муын сылӧн аркмӧны настоящӧй вужжез, муись за, а му вевдӧрӧ мыччисьӧны чалля-чуння листтэз спораэзӧн. Заросток эта бӧрын кулӧ.
Сідзкӧ папоротниклӧн, кыдз и мукӧд спораа быдмаслӧн, кык пола йылӧм: полтӧм йылӧм и пола йылӧм.
Пистиклӧн да кӧчвоньлӧн особенносттез.
Ыб письтиклӧн тулыссӧ быдмӧны вижыник увтӧм заэз, заэз йылын кузьмӧса, гӧгрӧса шепоккез (136 рис.).
Бытшӧмика кӧ пондыны пешлыны этӧ шепоксӧ, позьӧ адззыны, сы вылын топыта ӧтмӧдӧрсянь пукалӧны поснитик щитоккез. Щитоккез эна дженытик кококкез вылын.
Быд щиток увтын ӧшалӧны спораа мешӧчоккез.
Гожумсӧ му заись быдмӧны виль, вежыник заэз. Эна гожся заэзлӧн спораэз абуӧсь.
Кӧчвоньлӧн за йылас аркмӧны кузь шепоккез. Нія пӧрӧмась мӧдкодьсялӧм листоккезісь.
Пытшладорас эна листоккезлӧн бӧра жӧ тыдалӧны мешӧчоккез, кытӧн воӧны спораэз (137 рис.).
Пистиклӧн да кӧчвоньлӧн зорамӧмыс вачкисьӧ папоротник зорамӧмланьӧ.
Спораись аркмӧ заросток.
Яйцеклеткаэз боссьӧны ваын.
Боссьӧм яйцеклеткаись быдмӧ спораа быдмас.
Папоротниклӧн чужан род вужыс.
Папоротниклӧн строеннёыс сложнӧйжык вылын видзӧтӧм быдмассэзлӧнся: вабыдмассэзлӧнся, тшаккезлӧнся, нитшлӧнся.
Токо эта ӧтнас фактыс, а сідз жӧ эмӧсь и мӧдік факттэз, кӧднӧ наука тӧдӧ, мыччалӧны, што папоротника быдмассэз му вылын явитчӧмась унаӧн сёрӧнжык важся вабыдмассэзся, тшакся да нитшся.
Но кӧть нылӧн неӧткодьыс одзза быдмассэзкӧт и уна, сёжӧ асланыс йылӧмӧн нія вачкисьӧны вабыдмассэз вылӧ.
Полтӧм йылӧмныс папоротника быдмаслӧн мунӧ сідз жӧ спораэз пыр, пола йылӧм пыр — аркмӧны уялана айпӧв клеткаэз — жывчиккез.
Яйцеклеткаэзлӧн боссьӧмыс мунӧ токо ва дыр.
Эта сьӧрті позьӧ чайтны: папоротника быдмассэз, кыдз и нитш, кӧркӧ петӧмась вабыдмассэзісь.
Важся му пласттэзісь учёнӧйез адззӧмась кольӧм торрез изсялӧм быдмассэзлісь. Эна адззӧм торрез сьӧрті позьӧ тӧдны: кӧркӧ вӧвлӧмась быдмассэз, кӧдна вачкисьӧмась и вабыдмассэз вылӧ, и папоротника быдмассэз вылӧ.
Этӧн дзикӧдз вӧлі утлянно висьталӧма — папоротника быдмассэз пӧ родняаӧсь вабыдмассэзкӧт.
Важся папоротникчужӧма быдмассэз, ӧння папоротниккезлӧн предоккез му вылын мыччисисӧ ӧддьӧн важся воэзӧ. Нія бура зорамисӧ и нысянь аркмылісӧ быдса гырись вӧррез, кӧднія нюжавлісӧ ӧддьӧн паськыта.
Ӧння винерик, лажмытик «кӧзоккез» пистиккез туйӧ кӧркӧ важын нюррез вевдӧрӧ быдса сьӧд вӧррезӧн лэблӧмась пуэз — каламиттэз, чужӧмнаныс кӧдна вачкисьлӧмась ӧння пистиккез вылӧ.
Сідз жӧ быдса сьӧд вӧрӧн сулалӧмась мӧдік пуэз — чешуяа пуэз. Этӧ ӧння кӧчвоннез. Кызананыс кӧчвонь пуыс вӧлӧма 2 метраӧдз да сувданас 30 метраӧдз. Эна пуэз, ӧння кӧчвонь моз жӧ кыссьӧмась му бердӧт и вачкисьӧмась нитш вылӧ.
Эна жӧ вӧррезын быдмӧмась и ӧння чужӧма папоротниккез, кӧдналӧн листтэс чукӧрӧн пукалӧмась пу йылын.
Тропик вӧррезын и ӧнӧдз этатшӧм папоротник пуэз эмӧсь. Нія етша мыйӧн чужӧмнаныс торьясьӧны одзза папоротник пуэз дорись
Эна важся папоротник пуэз сьӧрті ӧння папоротника быдмассэз винерикӧсь, умӧликӧсь, дзик бытьтӧ одзза предоккезныс вылӧ озӧ вачкисьӧ.
Кыдз аркмис изшом.
Важся папоротника вӧррез ӧння луннэзӧдз видзсисӧ токо изшомӧн.
Изшома пласттэз аркмӧмась пуись, кӧркӧся вӧррезісь. Кӧркӧся вӧррез сюрӧмась ваӧ, ваын нія кислород тырмытӧг шомсялӧмась, а сісьмыны досповнаӧдз абу вермӧмась,
и ӧні изшом гарйикӧ уна адззылӧны керӧс порода вылісь, кӧда куйлӧ изшом бердас, быдкодь отпечатоккез. Мукӧд кадӧ лист отпечаток (139 рис.) адззасӧ, мукӧд кадӧ быдса пулісь засӧ, качсӧ, вужжесӧ.
Адззалӧны и кулӧм быдмассэзлісь быдса пуэз да вужжез.
Изшомись микроскоп увтын видзӧтӧм бӧрын учёнӧйез уна адззавлӧмась одзза папоротник пуэзлісь спораэз.
Изшом аркмӧм позьӧ сідз аслыт тӧдмавны.
Ыджыт ваа каддэзӧ зэв гырись сэкся юэз одзза вӧрресӧ кырӧтлӧмась. Ваӧ пӧрласьӧм пуэз кылалӧмась и кытӧнкӧ ва пыдӧсӧ пуксьӧм бӧрын тырлывлӧмась песӧкӧн, илӧн и мукӧд наносӧн.
Тодель бактерияэз понісь нія рутӧг жагӧника сісьмӧмась.
Эна, кундӧм пуэз туйӧ, быдмывлӧмась виль пуэз, кӧдна мыйкӧ дырнаись эта смертӧн жӧ вермывлӧмась кувны.
А ӧні эта понісь ми быдлаын адззалам изшома пласттэз да шедтӧм бӧрын тӧдмалам, кытшӧм быдмассэз кӧркӧ олӧмась му вылын. Уна местісь ӧння отир адззалӧ энӧ изшома пласттэз.
Эна изшома пласттэз адззалӧм сьӧрті ми вермам шуны, што важся вӧррез ылӧ-ылӧ кыссьӧмась ойвылӧ, — Шпицбергенӧдз и Виль муӧдз пыр.
Изшом аркман эпохаӧ тыдалӧ му вылас вӧлӧма равномернӧй шоныта и влагаа климат.
Одзланся эпохаэзӧ ойвылын да Европа шӧрӧт полосаын лоӧма унаӧн кӧдзытжык. А эта кӧдзыт понісь кулӧмась пу чужӧма папоротниккез.
Тропик полосаын климат шоныт и ми адззам сэтчин ӧнӧдз тропик вӧррезын эмӧсь пу чужӧма папоротниккез.
Энӧ важся, му пласттэзӧ кундӧм папоротник пуа вӧрресӧ ми видзам асланым социалистическӧй индустрияын лонтан торӧ.
60% быд лонтан запасісь усьӧ изшом вылӧ.
Миян изшом запассэз ӧддьӧн гырисьӧсь.
Быд воӧ советскӧй учёнӧйез мырсьӧмӧн ми адззалам сьӧрна сё виль и виль изшомаиннэз.
6. Дзоридза быдмассэз — быдмас мирын сёржыкся группа.
Дзоридза быдмассэзлӧн особенносттез.
Дзоридза быдмассэз унаӧн абу ӧткодьӧсь спораа быдмассэзкӧт; даже и медсложнӧй строеннёа спораа быдмассэз, кыдз, шуам, папоротникчужӧмаэз абу ӧткодьӧсь дзоридза быдмассэзкӧт.
Дзоридза быдмассэз унаӧн бытшӧмжыка спораа быдмассэзся приспособитчӧмась овны му вылын.
Боссьӧмыс нылӧн вермӧ мунны ватӧг ни, ру пыр либо борда гаг пыр.
Эсся дзоридза быдмассэзлӧн аркмӧ кӧдзыс, а кӧдзыс тусь пытшкын эм чужӧс да питательнӧй вещество запас. Эта питательнӧй вещество запасӧн дзоридза быдмассэз первося кадӧ зорамӧм виӧдз лоӧмӧдз и быдмӧны. Кӧдзыс тусь питательнӧй вещество запасӧн петас вермӧ медодзза кадсӧ овны и умӧль условиеа оланын.
Вот мыля дзоридза быдмас медбӧрья миллион воэзӧ му вылын асланыс олан понда петісӧ победителлезӧн мукӧд быдмас пӧлӧс шӧрын.
Нія паськалісӧ быд мирса кӧсіннэз вылӧт. Кытӧн токо невна позьӧ видзсьыны, сэтчӧ нія и пырӧны, сэтӧн нія и быдмӧны.
Вылын керӧссэзын, и кӧс степпезын, и жара пустыняэзын — быдлаись позьӧ адззыны дзоридза быдмас представителлезӧс.
Медыджыт вӧр масса, видз, ыб — быдӧс аркмӧма дзоридза быдмасісь.
Уна пӧлӧс дзоридза быдмассэзӧн тырӧмась и ва пространствоэз.
Дзоридза быдмассэз зэв уна пӧлӧс.
Вайӧ уськӧтамӧ тӧдвылӧ, мымда быд рӧма дзоридзыс, мымда быд кодь формаыс ны шӧрын, мымда быд чужӧма мӧдкодьсялӧм вужыс, заыс, лисыс, кӧдна пыр быдмас приспособитчӧ аслас оланін средаӧ: кӧс оланінӧ, ва оланінӧ, кӧдзыт оланінӧ, шоныт оланінӧ, вуджӧр сайӧ и шонді сайӧ, дженыт гожум дорӧ и кузь кӧдзыт тӧв дорӧ.
Дзоридза быдмас шӧрын эмӧсь и кузь великаннэз — пуэз, и лажмытик, дженытик заа карликкез — туруннэз, а ны коласын быдса лёдз колас формаэз.
Дзоридза быдмассэз родаӧсь папоротника быдмассэзкӧт.
Дзоридза быдмассэз коласын кӧть и уна неӧткодьыс, но сёжӧ эна быдмас группаэс кӧртасьӧны ӧтамӧдкӧт быдса лёдзӧн коласа формаа быдмассэзкӧт.
Настоящӧй дзоридза быдмас пӧлӧсыс шусьӧ вевттьӧмкӧдзыса быдмассэзӧн. Нылӧн кӧдзыс тусьыс аркмӧ плодник завязьын.
Эта быдмас группаыс медуна паськалӧма быдлаӧ.
Эта дзоридз группа дынӧ матӧ локтӧны кушкӧдзыстуся быдмас пӧлӧс, кӧдна сідз жӧ, кыдз и дзоридза быдмассэз йылӧны кӧдзысӧн, токо дзоридзаныс абу не завязь, не стобок, не плодник ӧмок.
Кӧдзыс почаэс нылӧн пукалӧны вевттӧг (кушӧсь) листоккез вылын (плодыс листоккез вылын).
Эта быдмас группаӧ пырӧны миян лыса быдмассэз: кӧз, пожум, лиственица.
Быд кушкӧдзыстуся быдмасыс — пу быдмас.
Эна пу быдмассэс асланыс лысӧн, чешуйкаэзӧн да шепоккезӧн ӧддьӧнжык вевттьӧмкӧдзыса быдмассэзся вачкисьӧны папоротника быдмассэз вылӧ.
Изсялӧм быдмас торрез исследуйтӧм бӧрын учёнӧйез утлянно шуӧны, што кушкӧдзыстуся быдмассэз му вылӧ явитчӧмась одзжык вевттьӧмкӧдзыстуся быдмассэсся, но сёрӧнжык папоротника быдмассэсся.
Кулӧм формаа быдмассэз шӧрись адззалӧмась вуджана формаа быдмассэз, кӧдна сьӧрті абу сьӧкыт тӧдны, кытшӧм родняаӧсь дзоридза быдмассэз папоротника быдмассэзкӧт.
Наукаын ӧні утлянно докажитӧма, што дзоридза быдмассэз му вылӧ явитчӧмась сёрӧнжык быдӧс мукӧд группаэзся быдмас мирын и петӧмась папоротника быдмассэзісь.
7. Быдмас пӧлӧс зорамӧмлӧн история.
Эшӧ ХVIII векын унажык учёнӧйез думайтісӧ, быдмас виддэз пӧ оз вежсьӧ.
Сэк наука оліс зэв ыджыт религия влияннё увтын.
А религия висьталӧм сьӧрті петӧ сідз: быд быдмас мирсӧ пӧ кӧркӧ керлӧма ен, и быдмасыс пӧ миян луннэзӧдз локтіс вежсьытӧг, сідз и сымда, кыдз и кыным вид кӧркӧ енӧн вӧлі керӧма.
Зэв ыджыт учёнӧй ХVIII векын — К. Линней шуис: «быдмас видыс пӧ сымда, мымда кӧркӧ перво вӧлі керӧма бырлытӧм, конечтӧг олісь существо» (мӧд нёжӧн кӧ, ен).
Биологиялӧн успеххез быдсӧн пӧрӧтісӧ религиознӧй сказкиэсӧ вежсьытӧм быдмас мир йылісь.
Медыджыт значеннё видзисӧ наукаа уджжез великӧй учёнӧй Чарльз Дарвинлӧн ХIХ векӧ. Дарвин докажитіс, быдмас пӧлӧс пӧ, кыдз и мукӧд организм, ӧддьӧн дыр мыйись мӧдкодьсялӧны, сідзкӧ мӧдкодьсялӧмас нылӧн эм асланыс история.
Эта ученнёыс органическӧй мир историческӧя зорамӧм йылісь ӧння наукаын сулалӧ крепыта и некин сійӧ оз вермы пӧрӧтны.
Мулӧн кӧркӧся олӧмыс тӧдмалӧма уна ископаемӧй быдмассэз сьӧрті, кӧднӧ адззалӧны важся му пласттэзісь. Эна му пласттэс тэчсьӧмась уна миллион воэзӧн.
Ӧні миянлӧ вежӧртана лоӧ кыдз быдмас мирыс сьӧрна зорамӧма му вылын.
Быдса сё миллион во одзті кӧркӧ ваын чужисӧ медодзза быдмассэз.
Первойся быдмассэз вӧлісӧ зэв простой строеннёаӧсь — ӧтіклеткаа организммез. Вачкисисӧ нія ӧння ӧтіклеткаа вабыдмассэз вылӧ, токо эшӧ простӧйжыка вӧлі керӧмась ӧння формаэз сьӧрті.
Уна кад чулаліс, и пондіс туйны организммезлӧ овны кӧсінын.
Медодзза кӧсінын олісь быдмас группаыс вӧлі — нитш.
Нитш бӧрсянь зэв ёна йылісӧ папоротника быдмассэз — медсложнӧй быдмассэз спораа быдмассэз шӧрись.
Нія петісӧ вабыдмассэз шӧрись, токо коласа формаэс нылӧн миян дынӧдз локны эзӧ вермӧ, кулісӧ.
Важся кӧсінын олісь быдмассэз сёжӧ ваа среданысӧ кольны эзӧ вермӧ.
Ватӧг нылӧн пола йылӧм мунны эз вермы.
Папоротника быдмас сьӧрын явитчисӧ му вылӧ настоящӧй кӧсіна быдмассэз: перво кушкӧдзыса быдмассэз, а сыбӧрын и настоящӧй дзоридза (вевттьӧмкӧдзыса) быдмассэз.
Сідз ӧння быдмас мир аркмис зэв дыр мӧдкодьсялӧмӧн. Важся быдмас формаэзісь аркмисӧ вильжык, мӧдкодьжык формаэз. И эта мӧдкодьсялӧм эз мун кытшӧмкӧ сверхъестественнӧй ен вын пыр, сія муніс оланін среда дорӧ приспособитчӧм пыр.
Быдмас мирын виль виддэз аркмӧны пыр и ӧні.
Кыдз медодзза морт пондіс овны му видз уджӧн, сэксянь явитчӧны медодзза культурнӧй быдмассэз.
Морт, перво тӧдтӧг, а сыбӧрын и тӧдӧмӧн мукӧд быдмассӧ керис аслыс колана быдмасӧн, сія ачыс бӧрйис туй, кыдз буржык да чожжык быдмас пӧлӧс вежны сідз, мед быдмас лоис сылӧ полезнӧйжык.
Культурнӧй быдмассэз коласын ӧні зэв уна быд кодь вида быдмасыс.
Зэв ыджыт удж миян Союзын мунӧ вӧр быдмас пӧлӧсісь культурнӧй быдмассэз петкӧтӧмын, виль сорта кӧдзыс петкӧтӧмын. Эта уджын наука сувтӧтӧма кыдз уджалісь мортлӧ отсӧг.
Например И. В. Мичуринлӧн уджжес мыччалӧны, кытшӧм замечательнӧй результаттэз позьӧ судзӧтны, кӧр морт тӧдӧ наука.
Эна достиженнёэс бытшӧма мыччалӧны, што быдмассэз абу кынмӧм, вежсьытӧм формааӧсь, кыдз эта йылісь велӧтӧ религия.
Социалистическӧй кӧзяйствоын миян наука тӧдӧмӧн тшӧктӧны быдмаслӧ мӧдкодьсявны унаӧн чожажык, нежели сія овлӧ хищническӧй капиталистическӧй кӧзяйствоын.
СОДТӦТ.
I. ЛАБОРАТОРНӦЙ УДЖЖЕЗ.
Мӧдік глава дынӧ.
Кӧдзыс тусь йылісь, сы чужӧм йылісь да кӧдзӧм кежӧ кӧдзыс лӧсьӧтӧм йылісь.
Лабораторнӧй удж 1. (видз. 10 листбок).
Кыдз керӧма боби тусь да шогді тусь
I. Перво видзӧтӧ боби туссез вевдӧрсянь и рисуйтӧ нійӧ.
Польдӧм боби тусьлісь кышсӧ кульыштӧ да видзӧтӧ пытшкись строеннёсӧ сылісь.
Адззӧ боби тусьлісь тусьторрез, почаок и вужок. Пешлытӧн син одзын видзӧт 11 листбокись 10 рис.
Боби тусьлісь строеннёсӧ рисуйтӧ да быд тор увтӧ гижӧ сылісь нимсӧ.
II.
Пешлӧ кӧс шогді туссез, польдӧм шогді туссез, ныртусясьӧм шогді туссез и рисуйтӧ нійӧ.
Поткӧтӧ шогді тусьсӧ доль бороздаокӧт и видзӧтӧ, кыдз сылӧн керӧма пытшкыс.
Адззӧ шогді тусь пытшкись чужӧс, сылісь вужоккез, листоккез, тусьторок и эндосперм (белок). Видзӧ пешлытӧн син одзын 11 листбокись 11 рис.
Рисуйтӧ шогді тусьлісь строеннёсӧ да быд тусь тор увтӧ гижӧ сылісь нимсӧ.
Лабораторнӧй удж 2. (видз. 11 листбок).
Шогді пизьлӧн анализ
I.
Пробиркаӧ пуктӧ чепӧлёк тыр шогді пизь да пизьӧтӧ клестер аркмытӧдз.
Кӧр клестер кӧдзамас, кисьтыштӧ сэтчӧ кынымкӧ воть иод.
Кытшӧм рӧмӧ клестер мичасьӧ?
II.
Шогді пизись керӧ зэлыт кӧвдас, пуктӧ сійӧ марля вылӧ да туплялӧ ваын, кытчӧдз марля вылӧ кӧвдасісь оз коль клей кодь лякасян, нюжалан кыдз резина, масса.
Кытшӧм рӧмӧ ёдсянь мичасьӧ кӧвдас увтісь гудыртчӧм ваыс?
Эм кӧ гудыртчӧм ваын крахмал, иод понсянь сылӧ колӧ мичасьны лӧз рӧмӧ.
Ёд кисьтыштӧм бӧрын ва стаканын кӧ лӧз рӧмӧ оз мичась — крахмал абу.
Куимӧт глава дынӧ.
Вуж. Кыдз и мый быдмас босьтӧ мусинісь. Сельскӧй кӧзяйствоын мусин мӧдкодьсьӧтӧм.
Лабораторнӧй удж Дж (видз. 26 листбок);
Кыдз вуж керӧма вевдӧрсянь.
I. Кык тусьтора кӧдзыс тусь петаслісь (боби петаслісь либо анькытш петаслісь) адззӧ главнӧй вуж и бокись вужжез.
Сравнитӧ этӧ вужсӧ ӧтік тусьтора кӧдзыс тусь петас вужкӧт (шогді петаскӧт, зӧр петаскӧт и мук.).
Рисуйтӧ кыкнан вужлісь формаэсӧ.
Мыйӧн нія оз вачкисьӧ ӧтамӧд вылӧ?
II.
Шогді тусь петаслісь, кӧда быдмӧма либо влажнӧй камераын, либо муын да вужжес му шогья бытшӧмика ваын миськалӧмась, лупа пыр адззӧ вуж конечись чехлик и вуж сіэз.
abu
Витӧт глава дынӧ. За.
Кыдз быдмасын ветлӧны и мӧдкодьсялӧны питательнӧй веществоэз.
Лабораторнӧй удж 4 (видз. 53 листбок).
Залӧн строеннё.
Поперег вундыштӧм зынапу залісь да нинпу залісь адззӧ кор, пу и сьӧлӧмӧс.
Вундыштӧ засӧ доль да адззӧ энӧ жӧ торресӧ.
Рисуйтӧ, мый адззыліт поперег вундыштӧм заись и доль поткӧтӧм заись и быд за тор увдӧрӧ гижыштӧ быд торлісь ниммез-
Кватьӧт глава дынӧ.
Быдмаслӧн быдмӧм и быдмӧмсӧ регулируйтӧм.
Лабораторнӧй удж 5 (видзӧт 60 листбок)
Почалӧн строеннё.
Видзӧтӧ, кыдз вевдӧрсянь аркмӧмась почаэз: топольлӧн, зынапулӧн да сиреньлӧн.
Кульӧ нылісь чешуйкаэзнысӧ да видзӧтӧ, кытшӧм строеннёа нылӧн пытшкыс.
Мыйӧн неӧткодьӧсь эна пуэзлӧн почаэз?
Адззалӧ уввез вылісь лиса почаэз и дзоридз почаэз.
Рисуйтӧ видзӧтӧм почаэзлісь вевдӧр чужӧмсӧ да доль вундыштӧмсӧ и быд поча тор увтӧ гижыштӧ быд торлісь нимсӧ: чешуйкаэз лист пияннэз и за пияннэз, дзоридз бутоннэз.
Лабораторнӧй удж 6 (видзӧт 62 листбок).
Кыдз тӧдны, кыным вося пу ув.
I. Видзӧтӧ топольлісь либо нинпулісь ув.
Видзӧтӧ бытшӧмика, мый рӧма нылӧн корыс быд ув участок вылын.
Адззӧ лист рубеччез и во кытша кызіннэз.
Лыддьӧ, кыным во кызіннэс, да висьталӧ, кыным вося эта улыс?
II.
Вундыштӧ увсӧ быд во участокӧт,
лыддьӧ вося кытшшез и висьталӧ, кыным вося увлӧн быд участок.
Сизимӧт глава дынӧ.
Дзоридза быдмассэзлӧн йылӧм.
Лабораторнӧй удж 7 (видзӧт 70 листбок)
Кыдз керӧма примулалӧн и вишнялӧн дзоридз.
I. Ӧння нетшкӧвтӧм примула дзоридзись 71 листбокись 74 рис. сьӧрті адззӧ венчик, бекӧрок, тычинкаэз, пестик либо плодник.
Тычинкаэзлісь видзӧтӧ: пыльниккез и дженытик тычинка сіоккез, кӧдна вылын пукалӧны пыльниккез.
Плодниклісь лупа пыр видзӧтӧ: завязь, стобок, ӧмок.
Кыдз мыччалӧма завязь пытшкись (доль поткӧтӧм 72 листбок 76 рис. вылын) пондылӧ лупа пыр адззыны кӧдзыспочаэз.
Дзоридз видзӧттӧн и сылісь торресӧ адззавтӧн висьталӧ: 1) кытшӧм венчик форма и кытӧн сылӧн дзоридз пытшкӧ пыран осьта; 2) кытшӧм формаа бекӧрок; 3) кынымаӧсь тычинкаэз и кыдз нія пукалӧны; 4) мый чужӧма сылӧн плодник; 5) кыдз пукалӧны завязьын кӧдзыспочаэз.
Быдӧс этӧ рисуйтӧ асланыт тетраддез вылӧ.
Гижӧ дзоридз торрезлісь ниммезнысӧ.
II.
Вишня дзоридз вылісь адззӧ (72 листбокись 76 рис. сьӧрті) быд торсӧ сылісь и сравнитӧ нійӧ примула дзоридз торрезкӧт.
Ӧкмысӧт глава дынӧ.
Культурнӧй быдмассэзлӧн биология.
Лабораторнӧй удж 8 (видзӧт 98 листбок)
Печкана быдмас заэзлӧн строеннё.
И. Видзӧтӧ лён тылӧп (либо пыш тылӧп, либо петшӧр тылӧп), медбы тӧдны, кытшӧм торись шедтіссьӧ волокно.
Зыртыштӧ засӧ вевдӧрсянь пуртокӧн либо гыжӧн.
Эта зыртыштӧм понісь за бердісь кокниа кыртӧ за кучишок.
II.
Поткӧтӧ засӧ доль и видзӧтӧ волокноэз, кӧдна поткӧтӧминас пондӧны тыдавны.
Видзӧтӧ, кыдз керӧмась волокноэз (кыным сі тылӧпись нія аркмӧмась).
Янсӧтӧ волокноэсӧ торья сіоккез вылӧ.
III.
Янсӧтӧ заэзісь пытшкись торсӧ вевдӧрись торкӧт, мӧд нёжӧн, пусӧ кор бердісь.
Весӧтӧ волокноэсӧ гыжӧн зыртӧмӧн.
Доль поткӧтӧм залісь рисуйтӧ тетраддезӧ и пасъялӧ рисунокныт вылӧ пу, кучишок, луб волокноэз.
II.
ӦТІКӦН КЕРӦМ ПОНДА УДЖЖЕЗ.
Мӧдік глава дынӧ.
Кӧдзыс тусь йылісь, сы чужӧм йылісь да кӧдзӧм кежӧ кӧдзыс лӧсьӧтӧм йылісь.
1. удж (11 листбок дынӧ).
I. Сравнитӧ ӧтамӧд коласын кӧдзыс туссезлісь строеннёэз. Босьтӧ то кытшӧм кӧдзыс туссез: подсолнушколісь, тыквалісь, зӧрлісь, идлісь и дублісь (адззат кӧ).
Рисуйтӧ и быд кӧдзыс тор увтӧ гижӧ нылісь ниммез.
Кытшӧм быдмассэз ны шӧрись позьӧ шуны кык тусьтораэзӧн и кытшӧммезӧ ӧті тусьтораэзӧн?
II.
Кӧдзыс тусь йылісь тӧдӧммез сьӧрті решитӧ, кыдз колӧ мусинӧ садитны жёлудь и тыква кӧдзыс; ёся йывнас увдӧрӧ али тупика йывнас?
2. Удж (13 листбок дынӧ).
I. Эта таблицаись гижӧ тетраддезӧ ӧтік быдмас, кӧдалӧн кӧдзысас унажык белок; мӧдікӧ, кӧдаын унажык ви и кӧдаын унажык крахмал.
Бӧрйӧ таблицаись да гижӧ ӧтік быдмас, кӧдаын медъетша пӧим; мӧдікӧ — кӧдалӧн мед етша ва.
Кӧдзыс ним
Видзсяныс проценттэзӧн
ва
белок
ви
крахмал
пӧим
Шогді 11,9 18,2 1,6 66,6 1,7
Рудзӧг 12,8 13,2 1,7 70,4 1,9
Зӧр 12,8 10,2 5,3 68,7 3,0
Анькытш 10,8 23,3 1,9 58,3 2,7
Фасоль 11,8 23,7 2,0 59,4 3,7
Лён 8,9 22,8 34,4 29,7 4,2
Подсолнушко 6,7 26,3 44,3 19,2 3,5
II.
Эта таблица сьӧрті керӧ ӧтік кытшӧмкӧ быдмас кӧдзыс тусь составись диаграмма.
3. Удж (13 листбок дынӧ).
I. Видзӧтӧ, кыдз чужӧ кӧдзыстусь.
Эта понда садитӧ ящик муӧ 20 кӧдзыс тусьӧн анькытш да рудзӧг. Киськавлӧ пешланнытӧ.
Быд кык лун бӧрті кыскалӧ бӧр кык тусьӧн. Бытшӧмика видзӧтӧ кыскӧм туссезнытӧ да гижӧ, кыдз нія мӧдкодьсялӧмась.
Пасъялӧ, кытшӧм кад бӧрті туссез польдісӧ, тусь торрез анькытш туссезлӧн оссисӧ, кӧр мыччисисӧ вужоккез, медодзза листоккез.
II.
Куим польдӧм фасоль тусьлісь кышсӧ кульыштӧ.
Ӧтік тусь кольӧ кыкнан тусьторӧн; мӧдіклісь ӧт тусьторсӧ вундыштӧ, кыдз мыччалӧма 14 рисунок вылын (14 листбок); куимӧтлісь вундыштӧ кыкнан тусьторсӧ, кольӧ токо чужӧссӧ токо вужокӧн и почаокӧн.
Кӧдзыс туссез керӧ стакан стенкаэз бердӧ промокашка увтӧ.
Видзӧтӧ, кыдз нія 15 лунӧн пондасӧ зорамны.
Быд 5 лун бӧрті миллиметра линейкаӧн мерайтӧ заэзлісь кузясӧ.
Кӧда быдмасыс эна куим быдмас коласісь медбура зорамис?
4. Удж (15 листбок дынӧ).
I. Тӧдмалӧ, кытшӧм влияннё шонытлӧн кӧдзыс туссез чужикӧ. Босьтӧ зӧр кӧдзыс либо шогді кӧдзыс.
Эта понда куим торелкаӧ, вадӧм пильнӧй чагӧ садитӧ 20–25 кӧдзыс тусь.
Ӧтік торелкасӧ сувтӧтӧ кӧдзытінӧ, мед температураыс вӧлі 1–2° Ц; мӧдікӧ — керкуса температураӧ 12–15° Ц; куимӧтсӧ — эшӧ шонытжыкинӧ, мед температура вӧлі 20–25° Ц.
Видзӧтӧ, медбы пильнӧй чагыс пыр вӧлі вазьӧм,
но мед и уна ва торелкаын эз пукав (васӧ торелкаӧ кисьтат да рудзӧтӧ, мед ковтӧм ваыс эз пукав).
Лыддьӧ да гижлӧ быд лун, кыным кӧдзыс тусь чужӧ быд торелкаын.
10–12 лун бӧрті керӧ вывод, кытшӧм температура дырни унажык чужӧмась кӧдзыс туссез.
II.
Садитӧ фасоль кӧдзыс туссез 3 см пыдына, 10 см пыдына и 30 см пыдына; редис кӧдзыс тусь — 2 см пыдына; 10 см пыдына; 20 см пыдына.
Видзӧтӧ, кыдз мыччисьны пондас петас.
Тӧдмалӧ, кытшӧм пыдына садитӧм понісь фасоль кӧдзыс туссез и редис туссез чожжыка быдӧнся петаласӧ.
abu
abu
abu
abu
abu
abu
abu
abu
abu
abu
abu
abu
II.
Эта таблица сьӧрті гижӧ сьӧрсьӧн-бӧрсьӧн, кӧр кытшӧм быдмас кӧдзыс колӧ садитны школа йӧрӧ. Босьтӧ садитны быдмассэз: тыква, кукуруза, ид, фасоль, гормӧг.
Быдмассэзлӧн ниммез
Температура минимум.
Температура оптимум
Температура максимум
Гормӧг 0° 27° 38°
Рудзӧг 1° 25° 30°
Лён 2° 21° 28°
Ид 3° 29° 38°
Шогді 4° 25° 32°
Зӧр 5° 25° 30°
Рис 10° 30° 37°
Кукуруза 9° 33° 44°
Фасоль .... 10° 34° 46°
Тыква 14° 34° 46°
Куимӧт глава дынӧ.
Вуж. Кыдз и мый быдмас босьтӧ мусинісь. Сельскӧй кӧзяйствоын мусин мӧдкодьсьӧтӧм.
5. Удж (26 листбок дынӧ).
Видзӧтӧ, кыдз быдмӧ и зорамӧ вуж.
I. Стаканӧ невна кисьтӧ ва и промокашка коласӧ да стакан стенка коласӧ крепитӧ кыктусьтора да ӧтіктусьтора кӧдзыс туссез.
Видзӧтӧ, кыдз нылӧн пондасӧ зорамны вужжез.
Пасйӧ кӧр пизьӧтасӧ бокись вужжез да вуж сіэз.
Быдӧс видзӧтӧмнытӧ гижӧ тетраддезӧ, рисуйтӧ.
II.
Йывдӧм спича тушӧн пасъялӧ чужӧм анькытш тусь вужок вылӧ либо фасоль вужок вылӧ юкӧммез (22 рис.).
Пуктӧ петассэзнытӧ влажнӧй камераӧ, куим лун бӧрті видзӧтӧ, кытшӧм юкӧммез вежсьӧмась. Кытшӧм местаыс вужлӧн ӧддьӧнжык нюжалӧма — быдмӧма?
Нёльӧт глава дынӧ.
Лист.
Мый да кыдз быдмас босьтӧ руись.
Пакмӧтӧм.
6. Удж (39 листбок дынӧ).
Кытшӧм условиеэз дырни листтэзын аркма крахмал.
I. Керкуись сад (примула либо герань) ӧтікӧ сувтӧтӧ лунланяс ӧшын одзӧ, а мӧдікӧ — пемытінӧ (шкапӧ либо вевттьӧ коробкаӧн).
Кык-куим лун бӧрті вундыштӧ кыкнан садыслісь лисӧн, пуктӧ торья бекӧроккезӧ да спиртовка вылын пизьӧтӧ.
Сыбӧрын лэдзӧ нійӧ бӧра жӧ торйӧн спиртӧ.
Кӧр листтэз рӧмнысӧ ӧштасӧ, лэдзӧ нійӧ кизерик иод растворӧ.
Лис мичасьӧм сьӧрті висьталӧ, кӧда лисын нылӧн эм крахмал.
II.
Эта садлісь жӧ (примулалісь либо гераньлісь) пемытінын сулалӧм бӧрын пробкаокӧн вевттьӧ лист тор (кыдз мыччалӧма 32 рис. вылын);
петкӧтӧ быдмас паськыт югыт вылӧ и эта бӧрын керӧ крахмал вылӧ проба листтэзын.
7. Удж (52 листбок дынӧ).
Кыдз лист пакмӧтӧ ва.
Тӧдмалӧ и висьталӧ, влияйтӧ я ва пакмӧм вылӧ улок вывся лист количество.
Эта понда босьтӧ куим пробирка.
Кисьтӧ ныӧ ӧтвесьтӧдз ва (валісь уровеньсӧ пасъялӧ).
Ӧтік пробиркаӧ сувтӧтӧ улок, кӧда вылын мед вӧлі 4–5 лист, мӧд пробиркаӧ — 1 лиса улок, куимӧтӧ — листтӧм ув.
Куимнан пробиркаӧ улоккез колӧ сувтӧтны ӧтік быдмас бердісь и листоккес мед вӧлісӧ ӧтгырисяӧсь.
Ва вевдӧрӧ пробиркаӧ невнаӧн кисьтыштӧ виок, медбы ва эз вермы пробиркаись пакмыны ачыс.
Ва уровеньлісь чинӧмсӧ пасъявлӧ.
Кӧда пробиркаись эта куим коласісь ва унажык пакмас?
Витӧт глава дынӧ.
За.
Кыдз быдмасын ветлӧны и мӧдкодьсялӧны питательнӧй веществоэз.
8. Удж (56 листбок дынӧ).
Кыдз ва кайӧ заӧт.
Медбы тӧдны, кыт быдмас заӧт кайӧ быдмас вужжез дынсянь листтэз дынӧ ва, колӧ стаканӧ кисьтны гӧрд чернила. Содтыны унажык сэтчӧ ва, и мичасьӧм ваӧ сувтӧтны герань уввез, тополь уввез либо нинпу уввез.
Мӧді лунӧ листтэсӧ пешлӧ.
Кыт лисыслӧн мичасьӧма?
Чышкӧ уввесӧ бытшӧмик и кынымкӧлаӧт орӧтӧ шӧри.
Видзӧтӧ, кыт заыслӧн мичасьӧма.
Поткӧтӧ сьӧлӧмӧс весьтӧт быдмас улок да видзӧтӧ, кӧда торыс залӧн чернилаӧн мичасьӧма.
Кватьӧт глава дынӧ.
Быдмаслӧн быдмӧм и быдмӧмсӧ регулируйтӧм.
9. Удж (66 листбок дынӧ).
Видзӧтӧ, кыдз быдмӧ фасоль петас: 1) Кӧдна сулалӧны паськыт югыт ӧшын одзын;
2) кӧдна быдмӧны пемыт сора ӧшын вылын (ӧшынсӧ эта понда мыйӧнкӧ везтӧны либо быдмассӧ ӧшын одзись ылӧжык вештӧны;
3) дзик пемытінын зораман фасоль петас вевттьыны сьӧд гумагаись колпакӧн.
Вит лунӧн ӧтпыр зораман быдмас петаслісь колӧ мерайтны кузясӧ, мед бытшӧмжык вӧлі тӧдмавны кыдз югытыс влияйтӧ быдмас зорамӧм вылӧ.
Кытшӧм фасоль петас медбура зорамӧма?
Сизимӧт глава дынӧ.
Дзоридза быдмаслӧн йылӧм.
10. Удж (76 листбок дынӧ).
Керӧ асьныт кынымкӧ опыт, мед видзӧтны, кыдз бусасьӧны да боссьӧны дзоридззез.
I. Берба оссьӧм одзын вундыштӧ топольлісь либо бадьлісь плодник дзоридза ув. А мӧдік пу вылісь вундыштӧ тычинкаа дзоридза ув.
Сувтӧтӧ нійӧ ваӧ.
Плодника бербаэз каттьыштӧ вевдӧрсянь марляӧн (марля туйӧ позьӧ босьтны аптекаись бинт).
Кӧр плодника дзоридззез готовӧсь лоасӧ бусасьны (а этӧ позьӧ тӧдны то мый сьӧрті: плодник ӧмокыс лоас вазылькья) кульыштӧ сэк ув вылісь марля да иньпӧв дзоридззез вылӧ вайӧ кисточкаӧн пыльцасӧ айпӧв тычинкаа дзоридззез вылісь.
Эта бӧрын видзӧтӧ, кыдз пондасӧ мӧдкодьсявны боссьӧм дзоридззез и мый лоас дзоридззезкӧт, кӧдна колисӧ боссьытӧг марля увтын.
II.
Бусалӧ парникись ӧгурчи либо кытшӧмкӧ мӧдік быдмас дзоридззез теплицаись либо ловья пельӧсокись.
Ӧгурчи дзоридззез бусалӧны: нетшкӧвтӧны готовӧй, воӧм айпӧв тычинкаа дзоридзок, летыштӧны сылісь околоцветник, токо мед не изводавны тычинкаэз и энӧн тычинкаэзнас павкӧтчӧны иньпӧв дзоридз плодник бердӧ.
Ӧтік тычинкаа дзоридзӧн позьӧ бусавны кынымкӧ плодника дзоридз.
Эта бӧрын видзӧтӧ, кыдз пондас плодниклӧн завязь пӧрны ӧгурчиӧ.
Интересно опыт туйӧ мукӧд плодника дзоридззезлісь бутоннэз каттьыны марляӧн и нійӧ не вӧрӧтны.
Аркмасӧ я эна дзоридззезісь кӧдзыса плоддэз?
11. Удж (83 листбок дынӧ).
Йылӧтӧ школа лабораторияын бегония быдмас аслас листтэз понісь.
Бегония позьӧ тшӧктыны йывны даже аслас листтэз понісь.
Эта понда колӧ керны сідз: босьтны бытшӧмжык, здоровӧй лист, пуктыны сійӧ пызан вылӧ, мед увтыс вӧлі вевдӧрын и лӧчыт пуртокӧн торйӧтлыны лиссӧ сідз, мед быд торӧ сюрис участок гырись жилкаэзӧн (88 рис).
Тув чужӧма лист пластинкаэз садитӧ векнитик конеччезӧн нюдз песӧкӧ 1 см пыдына,
сэсся баночкасӧ вевдӧрсянь вевттьӧ стаканӧн и сувтӧтӧ шоныт местӧ.
Кӧр лисісь зорамас быдса быдмас, сійӧ садитӧны бур муа кашникӧ, 1 лисісь йылӧ быдса быдмас.
12. Удж (83 листбок дынӧ).
Улоккезсянь сэтӧрлӧн йылӧм.
Школа участок вылын нуӧтӧ опыт, мед йылас сэтӧр аслас улоккезсянь.
I. Бӧрйӧ сэтӧр кусісь кынымкӧ томыник (тавося либо мӧймуся) улоккез.
Кус гӧгӧрись мусӧ гарйӧ, мед вӧлі рышкыт. Вайӧтӧ бӧрйӧм улоккесӧ рышкыт му бердӧдз да крепитӧ нійӧ тодель керӧм палкаоккезӧн, мед улокыс кӧстісис моз и невна пырис муӧ.
Тыртӧ сійӧ местасӧ муӧн 7–10 см сувда.
Эна улоккезын, а именно муись конеччезын, мыйкӧ дырнаись пизьӧтасӧ вужоккез.
Адззӧ либо тулыссӧ мӧдпыр вужьясьӧм улок мамыс бердісь позяс торйӧтны и садитны кытчӧ колӧ мӧдік местӧ.
II.
Тулыссӧ готов заптӧм ӧтік вося сэтӧр улоккез бердісь вундалӧ 20–25 см кузя шатёккез и садитӧ нійӧ рышкыт бура назьмитӧм грьядок вылӧ.
Шатёккесӧ кузяныс сьӧрті ⅔ пыдынаӧдз сюйыштӧ муӧ.
Пасьтасӧ шатёк-шатёк дынӧдз босьтӧ 20–25 см.
Грядок вевдӧрӧ бур овлӧ кисьтны сӧтчӧм назём, медбы мусинісь влагаыс эз вермы уна пакмыны.
Эта колӧ сійӧн, што влага — эм медколан условие улок вужьясьӧмын.
Ар кежӧ мӧдігод шатёккезісь аркмасӧ томыник кусӧккез, кӧднӧ позяс садитны кытчӧ колӧ.
Дасӧт глава дынӧ.
Быдмас мирлӧн основнӧй группаэз.
13. Удж (112 листбок дынӧ).
Быдтӧ влажнӧй камераын баг назём вылын, чочком нянь вылын, кытшӧмкӧ карч вылын и видзӧтӧ, кыдз сія пондас зорамны.
Чапкӧ стаканӧ кынымкӧ гут либо торокан и видзӧтӧ, кыдз лун-мӧд бӧрті ны вылын пондас аркмыны баг.
Сравнитӧ аркмӧм баггесӧ ӧтамӧд коласаныс; мыйӧн нія торьясьӧны ӧтамӧд дорись?
14. Удж (118 листбок дынӧ).
I. Асланыт ловья пельӧсокын повторитӧ опыт Фаминцинлісь да Баранецкӧйлісь, кӧдна кӧркӧ осьтӧмась лишайниккезлісь загадочнӧй природа.
Эта понда ӧтік пизьӧтӧм, но кӧдзыт ваӧн тыртӧм банкаӧ крӧшитӧ поснитика лишайниклісь тело (буржык босьтны опытӧ стена золотянка лишайник, кӧдӧ унажыксӧ позьӧ адззыны пипу за вылісь).
Мӧдік банкаӧ сравнитӧм туйӧ шырӧ листтэз любӧй быдмаслісь, шуам кӧть нитшлісь.
Вевттьӧ кыкнан банкасӧ стеклоэзӧн.
Видзӧтӧ, кыдз пондас овны и зорамны тшак бердісь янсалӧм вабыдмас.
Эм кӧ микроскоп, видзӧтӧ кыдз эта вабыдмасыс йылӧ.
II.
Ӧктӧ школа биологическӧй кабинетӧ школа гӧгӧрись быд лишайниккезісь коллекция.
Ӧктӧм экземпляррез мед не ӧтнаныс вӧлісӧ, а ӧтлаын предметтэзкӧт, кӧдна вылын нія быдмӧны (из торрез, пу кор, мусин). Косьтӧм бӧрын быд экземпляр керӧ стекло увтӧ тодель керӧм коробкаоккезӧ.
15. Удж (119 листбок дынӧ).
I. Видзӧтӧ нитш зорамӧм сьӧрын. (например, «кӧк лён»).
Эта понда нитшлісь спораэз кӧдзӧ ваа торф пластинка вылӧ.
Торф пластинкасӧ перво колӧ пизьӧтны ваын, медбы вийны сыись вабыдмас спораэз, тшак спораэз, бактерияэз, кӧдна кӧть кӧр вермасӧ сюрны руись.
Кӧдзӧм бӧрын торф пластинка сувтӧтчиссьӧ влажнӧй камераӧ.
Видзӧтӧ кыдз нитш зорамӧ аслас медодзза стадияын — кыдз аркмӧ сылӧн предросток, кыдз зорамӧ почаись заок листтэзӧн (микроскоп увтын).
II.
Сувтӧтӧ опыт, кыдз торфа нитш юӧ ва.
Сфагнумлісь заок лэдзӧ стаканӧ. Стаканын мед вӧлі невна кисьтӧма ваок.
Залӧн йылыс зэв чожа кӧтасяс и пондас нюкыртчыны стакан дорын ӧтӧрӧ. Мыйкӧ дырнаись сысянь пондас вотявны ва, а эшӧ нэдыр мыйись ва пондас дзолльӧмӧн лэдзчыны. Стаканісь ваыс нитш за кузя кыдз бы капиллярнӧй трубка пырйӧт кайӧ вывлань.
III.
ГОЖУМ КЕЖӦ УДЖЖЕЗ.
Школа участок вылӧ опыта кӧдзӧммез.
Школа участок вылӧ кӧдзӧ берся культура быдмассэз, медбы буржыка тӧдсасьны ныкӧт арсӧ и велавны нійӧ тӧдмавны.
Эта понда бӧрйӧ берся сю пӧлӧс (шогді, ид, зӧр, рудзӧг), техническӧй культураэз (лён, пыш, подсолнушко, сакара свёкла) и берся виль культураэз, например соя, му груша, канатник.
Кӧдзны быдӧс позьӧ векнитик и лажмытик градоккез вылӧ; размерсӧ нылӧ позьӧ сетны то кытшӧмӧ: — 1 м пасьтаӧн да 2 м кузяӧн.
Градоккез коласын мед вӧлі кольӧмась бороздаэз — туёккез 40 см пасьтаӧсь.
Кӧдзыс колӧ кӧдзны ряддэзӧн.
Например сюэз понда градоккез вылӧ керсьӧны 3 см пыдына бороздаоккез и ряддэз коласӧ мед вӧлі кольӧмась 15 см паськыта колассэз.
Кӧдзӧм бӧрын быд градок вылӧ колӧ сувтӧтны ӧтікетка, кӧда вылӧ гижсьӧ кытшӧм сорт и кӧр садитӧма.
Колӧ чертитны кӧдзан план и эта план вылӧ пасъявны, кытчӧ кытшӧм сорт кӧдзӧма.
Организуйтӧ систематическӧя видзӧтлӧм кӧдзӧм быдмассэз сьӧрын.
Сюэз понда видзӧтлӧмсӧ колӧ гижлыны то эта форма сьӧрті:
№ сьӧрсьӧн-бӧрсьӧн
Сортлӧн ним
Кӧдзӧм
Кӧр мыччисис петас
Кӧр пондіс куститчыны
Кӧр пондіс шепьясьны
Кӧр пондіс чветитны
Кӧр тусьыс лоис йӧлын
Кӧр лоис масісь рӧма
Кӧр дзимляссис
Примечаннё.
Быд графаӧ пасъяссьӧ, кӧр кытшӧм стадиа пондӧтчис (лун и тӧлісь).
Висьталам, кыдз колӧ керны пассэз:
Кӧр пондіс куститчыны — кӧр явитчисӧ бокись заоккез.
Кӧр пондіс шепьясьны — кӧр мыччисис шеп.
Кӧр тусь лоис йӧлын — кӧр тусьсӧ пичкан, петӧ сук, йӧв кодь жидкость.
Кӧр лоис масісь рӧма — тусьыс эшӧ небыт, вермӧ кӧстісьны и чегны.
Арсӧ мӧдпыр урожай босьтӧ и лыддьӧ ыджыт я сія.
Ӧктӧм быдмассэзӧн содтӧ школаись гербарийнытӧ культурнӧй быдмассэзӧн.
Тӧдмалӧ школа участок вылӧ кӧдзӧмись результат.
Дзимлялӧм одзын пасъялӧ, кыдз влияйтӧны пужжез быд виль культура вылӧ.
Кытшӧм быдмассэз вовсё эзӧ кынмӧ медодзза пужжез понісь, кӧдна кынмыштісӧ, но не быдсӧн, кытшӧмӧсь дзикӧдз вӧлі вийӧмась.
Гижӧ кытшӧм стадияын дзимляліт быдмас: вермисӧ я нія воны?
Ӧктӧ урожай виль плода культура участок вылісь — плоддэз, кӧдзыс, заэз (волокноа быдмассэзлісь); ӧшлӧ нійӧ, перво лыддьӧ, кыным быдмас быдсӧныс и мерайтӧ площадь.
Садитӧ виль культура образеццез кашниккезӧ либо ящикӧ, медбы «коллективизация и урожай лунӧ» петкӧтны выставка вылӧ.
Культурнӧй быдмассэз велӧтӧм понда удж.
I.
Тӧдмалӧ, кытшӧм культурнӧй быдмассэз вӧдитӧны районын, кытӧн чулӧтат гожум.
Медыджыт вниманнё ассиныт вуджӧтӧ сю быдмассэз вылӧ (рудзӧг, шогді, кукуруза) и техническӧй культураэз вылӧ (лён, подсолнушко, сакара свёкла).
Кытшӧм культурнӧй быдмассэз кӧдзсьӧны тіян местаэзын унажык.
Куимись гожумсӧ пасъялӧ зораман стадияэз медважнӧй культура быдмассэзлісь тіян местаись.
Энӧ пасъялӧммесӧ керӧ июнь 10 лунӧ, юль 10 лунӧ, август 10 лунӧ.
То кытшӧм зораман стадияэз нылісь позьӧ пасъявны:
1. Петалӧм.
2. Гумьясьӧм.
3. Дзоридзасьӧм.
4 Быдмаслӧн дзоридзассис, но плоддэз эшӧ абуӧсь.
5. Плоддэз (кӧдзысыс) воис.
6. Урожай боссис.
Сакара свёкла йылісь да пода вердан свёкла йылісь колӧ пасъявны, мый гырися нылӧн вуж.
Гижлӧмнытӧ позьӧ керны эта форма сьӧрті:
Кӧр нуӧтӧма наблюденнё (лун, тӧлісь, во): 1933 во август 10 лун.
Культурнӧй быдмаслӧн ним
Зораман стадия
Наблюдайтан места
Рудзӧг
Босьтӧма ни
Сталин нима совхоз
Зӧр
Кӧдзыс тусьыс эшӧ абу воӧма; пичкыны кӧ, петӧ йӧв кодь жидкость
Сэтчин жӧ
Пода вердан свёкла
Вужжез гырися ни быдмӧмась, 6 см кызаӧсь
«Илличлӧн туй» колхоз
II.
Ӧктӧ гербарий интереснӧйжык культурнӧй быдмассэзісь (6–7 видісь).
Интереснӧйжык ӧктыны быдмассэсӧ сюэзісь, техническӧй быдмассэзісь да виль культураэзісь.
Вӧдитӧны кӧ тіян местын кытшӧмкӧ виль сю сорттэз (шуам кӧть шогді сорттэз), кӧдна вевдӧр чужӧмнаныс ӧтамӧд дорись янсалӧны, то ӧктӧ гербарийӧ быд сортсис образецӧн.
III.
Керӧ скреститӧм кык неӧткодь сорта тыкваэзын.
Опыт понда школа участок вылісь колӧ бӧрйыны сэтшӧм сорттэз, кӧдна бы янсалісӧ ӧтамӧд бердісь асланыс формаӧн, ыждаӧн, рӧмӧн и мӧдік качествоэзӧн.
Интересно бы вӧлі; например, скреститны виж «яя» тыква чочком ,,яя» тыквакӧт.
Эта понда иньпӧв дзоридзсӧ изолируйтӧны марляӧн и керӧны искусственнӧй бусалӧм.
IV.
Гижӧ сельскокӧзяйственнсй уджжез, кӧдна сьӧрын тіянлӧ ковсяс видзӧтны гожумсӧ, пасъялӧ кад и уджалан места.
Сэтӧн жӧ мыччалӧ, кытшӧм культурнӧй быдмассэзкӧт муніс эта удж и кытшӧм машинаэз пыр.
Вӧр быдмассэз велӧтӧм понда уджжез.
I. Ӧктӧ гербарий понда 10 видся не етшажык уль вӧрись быдмассэз, либо кӧсінісь быдмассэз, кушинісь быдмассэз либо торфа нюрись быдмассэз.
Старайтчӧ ӧктыны характернӧйжык быдмассэсӧ, кӧдна, шуам, пыр адззисьӧны токо уль вӧрын, либо токо паськыт кушиннэзын, либо токо торфа нюррезын.
II.
Нуӧтӧ краеведческӧй удж — кошшӧ асланыт местаэзісь каучука быдмассэз.
Быд быдмас, кӧдалӧн пытшкас эм йӧв кодь сӧк, колӧ исследуйтны.
Медбы тӧдны быдмаслісь каучук видзӧмсӧ, колӧ йӧв кодь сӧксӧ пичкыны стекло вылӧ да сетны сылӧ кынмыны. Кынмӧм бӧрын пешлыны, кыдз сія нюжалӧ.
Пондас кӧ коколёкыс резина моз нюжавны, то эта быдмасыс вермас лоны каучук видзана.
Каучук видзан быдмаслісь косьтӧ торйӧн засӧ уввезӧн, листтэзӧн, плоддэзӧн либо дзоридзӧн и вужжезӧн.
Гижӧ, кытшӧм сія быдмасыс вевдӧрсянь, кытшӧминын быдмӧ, кытісь адззӧма и уна я эта гӧгӧрын эм.
III.
Кыдз ӧктыны быдмассэсӧ гербарий вылӧ.
Гербарий вылӧ быдмас боссьӧ быдсӧн и обязательно вужӧн.
Но, конешно, гырись быдмассэзлісь — пуэзлісь, куста пуэзлісь боссьӧны токо поснитик улоккез.
Адззӧм быдмас гарйиссьӧ сідз, мед вужжезнас шедіс быдсӧн. Мусӧ вужжез бердісь бытшӧмика треситӧны и быдмас пуктіссьӧ папкаӧ гумага листтэз коласӧ.
Керӧны сідз, мед папкаын быдмассэз куйлісӧ ӧткыза пластӧн.
Эта понда быдмассэз гумага коласӧ тэчсьӧны вужжезнаныс не ӧтнёж, а быд ладорӧ. Видзӧтӧ, мед быдмаслӧн гумага листтэз коласісь не лист, не за, не вуж эз мыччись ордсӧ.
Медбы ӧктӧм быдмассэз буржыка косьмисӧ, ӧктыны нійӧ колӧ кӧс погоддя кадӧ.
Зэр бӧрын ӧктӧм быдмассэз, либо асывсӧ одз лысва вылісь ӧктӧм быдмассэз дыр озӧ косьмӧ и ассиныс естественнӧй рӧмнысӧ ӧштӧны.
Гербарий понда ӧктӧм быдмассэз неприменно колӧ этикеткаавны, мӧд нёжӧн кӧ шуны, гумагаоккез вылӧ гижӧма, кӧр, кытісь и кин быдмассэсӧ ӧктӧма.
То этикеткалӧн пример. Этатшӧм этикеткаыс быдмаскӧт пуктіссьӧ ӧтлаын.
abu
Кудымкар районісь Йӧг посад.
Лыса уль пемыт вӧр.
Юль 20 лунӧ 1933 воӧ.
С. Петров.
Чуттэзӧн мыччалӧма местаыс, кытчӧ колӧ гижны быдмаслісь нимсӧ.
Эсся этикетка вылӧ гижсьӧ, кыдз тшӧка быдмасыс пантасьӧ. Эта пасъяссьӧ кыввезӧн: «шоча» ,уна», «тшӧка».
IV.
Гербарий понда быдмассэз косьтӧм.
Косьтыны быдмассэсӧ колӧ ботаническӧй прессын либо картоновӧй папкаын.
Перво пресс-рамка вылас пуктіссьӧ газета бумага либо сера нетопыт бумага 1–5 лист кыным.
Бумага вевдӧрас пуктӧны быдмассӧ.
Быдӧс быдмасыс лӧсьӧтчиссьӧ сідз, медбы листтэс, дзоридззес, вожоккес сылӧн эз сайӧвтӧ ӧтамӧднысӧ.
Лӧсьӧтӧм быдмасыс вевттиссьӧ 3 бумага лисӧн.
Сідз жӧ тэчсьӧны и мӧдік быдмассэз.
Быд быдмас дынӧ пукиссьӧ этикетка.
Кӧр быдмассэс лоасӧ пуктӧмӧсь, то сэк вевдӧрсяняс пуктӧны бӧра пресс сетка.
Прессӧ ӧні домалӧны ременьӧн либо гезокӧн да пуктӧны пемыт, но шоныт местаӧ.
Быдмассэс косьмикӧ частӧжык колӧ вежлыны ульсалӧм бумага листтэсӧ кӧс листтэзӧн.
Медперво, косьтыны пондӧтчикӧ, (3–4 лун) бумагасӧ вежлӧны быд лун, сыбӧрын шочжыка.
Косьмӧм быдмассэсӧ прессис босьтӧны да пуктӧны торья папкаӧ.
ПЫТШКӦС.
листбок
Пыртас .... 3
1. Мый сэтшӧм биология да ботаника .... —
2. Социалистическӧй сельскӧй кӧзяйствоын ботаникалӧн значеннё .... —
3. Социалистическӧй строительствоын быдмасвӧдитӧмлӧн значеннё .... 4
Медодзза глава. Дзоридза быдмаскӧт ӧтласа тӧдсасьӧм.
1. Дзоридза быдмас да сылӧн органнэз .... 5
2. Быдмас органнэзлӧн мӧдкодьсялӧм .... 6
3. Ӧтівося, унавося да кыквося быдмассэз .... 7
4. Быдмассэзлӧн клеткаа строеннё .... 9
Мӧдік глава. Кӧдзыс тусь йылісь, сы чужӧм йылісь да кӧдзӧм кежӧ кӧдзыс лӧсьӧтӧм йылісь.
1. Кыдз керӧма кӧдзыс тусь .... 10
2. Кӧдзыс тусьлӧн состав .... 11
3. Кыдз чужтӧн мӧдкодьсялӧ кӧдзыс тусь .... 13
4. Кытшӧм условиеэз колӧны, мед кӧдзыс тусь вермис чужны .... 14
5. Кӧдзӧм кежӧ кӧдзыс лӧсьӧтӧм .... 17
Куимӧт глава. Вуж. Кыдз и мый быдмас босьтӧ мусинісь.
Сельскӧй кӧзяйствоын мусин мӧдкодьсьӧтӧм.
1. Мусин кыдз быдмас зорамӧмлӧ среда .... 23
2. Кыдз керӧма вуж .... 26
3. Кыдз быдмассэз босьтӧны мусинісь питательнӧй веществоэз .... 29
4. Мыйлӧ мусин колӧ небзьӧтны да назьмитны .... 33
Нёльӧт глава. Лис. Мый да кыдз быдмас босьтӧ руись. Лолалӧм.
Пакмӧтӧм.
1. Веж быдмаслӧн руись питайтчӧм .... 36
2. Углерод босьтӧм .... 38
3. Кыдз керӧма лист .... 41
4. Мыйлӧ колӧ крахмал аркмикӧ югыт да хлорофилл .... 43
5. Быдмассэзлӧн лолалӧм .... 48
6. Кыдз быдмас пакмӧтӧ ва .... 50
Витӧт глава. За. Кыдз быдмасын ветлӧны и мӧдкодьсялӧны питательнӧй веществоэз.
1. Залӧн строеннё .... 53
2. Мыйлӧ колӧ быдмаслӧ за .... 55
Кватьӧт глава. Быдмаслӧн быдмӧм и быдмӧмсӧ регулируйтӧм.
1. Кыдз вывлань быдмӧ пу .... 59
2. Кыдз пу кызӧ .... 62
3. Кыдз быдмассэз быдмӧны клеткаэз йылӧмсянь да быдмӧмсянь .... 63
4. Ӧтӧрись условиеэз быдмассэз быдмӧмын .... 65
5. Кыдз быдмаслӧн регулируйтчӧ быдмӧм и кыдз мунӧ сылӧн зорамӧм .... 66
Сизимӧт глава. Дзоридза быдмассэзлӧн йылӧм.
I. Быдмассэзлӧн пола йылӧм .... 70
1. Дзоридзлӧн строеннёыс .... —
2. Дзоридзлӧн бусасьӧм да боссьӧм .... 72
3. Искусственнӧй бусалӧмӧн виль быдмас пӧлӧс петкӧтӧм .... 79
II. Вегетатива йылӧм .... 82
1. Вужжезсянь, мӧдкодьсялӧм засянь да листтэзсянь быдмаслӧн йылӧм .... —
2. Кыдз быдмассэз зорӧтӧны заоккезсянь, улоккезсянь да прививкаӧн .... 83
Кыкьямысӧт глава. Быдмас организм кыдз быдса организм.
1. Быдмаслӧн, сы органнэзлӧн клеточкаа строеннё .... 86
2. Быдмаслӧн зорамӧм .... 87
3. Быдмас и среда .... 89
4. Мый сэтшӧм лоӧ вид, род да семейство .... 90
Ӧкмысӧт глава. Культурнӧй быдмассэзлӧн биология.
1. Сю злаккез .... 92
2. Боби быдмассэз .... 94
3. Вужплоддэз .... 96
4. Печкана быдмассэз ....
5. Каучука быдмассэз .... 100
6. Виа быдмассэз .... 102
7. Зелляа быдмассэз .... —
8. Урожай лэбтӧмын основнӧй туйез .... 103
Дасӧт глава. Быдмас мирлӧн основнӧй группаэз.
1. Вабыдмассэз — быдмас мирлӧн медважся группа .... 106
2. Тшак — хлорофиллтӧм быдмас .... 111
3. Лишайниккез — тшаклӧн вабыдмаскӧт симбиоз .... 117
4. Нитшшез — медважся му вевдӧрись быдмас группа .... 119
5. Папоротника быдмассэз — сложнӧйжык строеннёа спораа быдмассэз... 121
6. Дзоридза быдмассэз — быдмас мирын сёржыкся группа .... 124
7. Быдмас пӧлӧс зорамӧмлӧн история .... 125
Содтӧт.
I. Лабораторнӧй уджжез .... 127
II. Ӧтікӧн керӧм понда уджжез .... 128
III. Гожум кежӧ уджжез .... 132
1 рис.
Лютик.
2 рис.
Кульчӧрс турун (жила турун).
3 рис.
Картовкилӧн му пытшкись торрез (схема).
А — мам клубень,
Б — за,
Д — том клубеннез,
Э — му пытшкын пизьӧтӧм заэз,
Ц — вуж.
4 рис.
Анькытшлӧн за тор да лист.
5 рис.
Сакара свёкла медодзза во помын.
6 рис.
Сиреньлӧн бокись кык почаа ув.
Веськытланяс — почкаэс вундыштӧмӧсь.
7 рис.
Мӧдік во ар кежӧ лоӧм сакара свёкла.
8 рис.
Кукуруза заись клеткаэз.
(Поперег шӧрыштӧм).
abu
9 рис.
Лук бердісь кульыштӧм плёнкаын клеткаэз.
abu
abu
abu
abu
10 рис.
Боби тусь:
1 — тусьыс вевдӧрсянь;
2 — тусьыс кыштӧм;
3 — тусь, кӧдалӧн тусьторрес паськӧтӧмӧсь ӧтмӧдӧрӧ.
11 рис.
Сю тусьлӧн керӧмыс.
А — дыж,
Б — эндосперм,
Ц — чужӧс, Д — шчиток.
12 рис.
Анькытш тусьторрезісь клеткаэз.
Гырись туссес крахмаллӧн, поснитиккес белоклӧн.
13 рис.
Сідз петалӧ боби тусь.
А — вуж мыччисьӧ
Б — тусьторрез,
Ц — чужӧс поча,
Д — йыв поча.
14 рис.
Опыт, кӧда сьӧрті позьӧ адззыны тусьторрезлісь колӧмсӧ.
Шульгаланяс быдса тусьторреза боби; шӧрас — ӧтік тусьтора; веськытланяс — ¼ тусьтора.
15 рис.
Быд чужӧма ёг туссез.
abu
16 рис.
Лӧз чветкилӧн кӧдзыс.
17 рис.
Кукольлӧн кӧдзыс.
abu
18 рис.
Триер цилиндралӧн ячейкаа вевдӧр (схема).
19 рис.
Тырттӧм (4) кӧдзыслӧн петас да тыра (5) кӧдзыслӧн петас.
20 рис.
«Триумф» сортировка.
21 рис.
Зӧр (1,2) и ид (3,4) сьӧд бусӧн шогалӧны.
abu
22 рис.
Тушӧн пасъялӧм вужлӧн быдмӧм.
Шульгаланяс рисуйтӧма, кыдз йылыс юкӧма опытӧдз,
веськытланяс — юкӧммес ойкӧв чулалӧм бӧрын.
23 рис.
Шогділӧн мочкаа вужжез. Тыдалӧ, кыдз вужжес конечӧ лякасьӧмась му торрез.
24 рис.
Том вужок шӧрыштӧм поперег (микроскоп увтын).
abu
Тыдалӧны мусин торрез, кӧдна лякасьӧмась вуж сіэз бердӧ.
abu
abu
abu
abu
abu
25 рис.
Георгинлӧн вуж клубеннез.
26 рис.
Тропическӧй орхидеялӧн руись вужжез.
27 рис.
Кыдз ва сюрӧ вуж сісянь вуж сосуддэзӧдз.
28 рис.
Питательнӧй растворын быдман кукуруза.
29 рис.
Питательнӧй растворрезын гречигалӧн зорамӧм.
1 — быдмас кайӧ быдса питательнӧй смесьын,
2 — быдмас кайӧ ӧтік колан совтӧм растворын.
30 рис.
Боби быдмас вужжез вылын клубенёккез.
31 рис.
Югыт вылын элодеялӧн кислород лэдзӧм.
32 рис.
Югыт одзын крахмаллӧн аркмӧм.
Шульгаланяс — лист сайӧвтӧма ӧтілаӧт тропкаӧн. Веськытланяс — сія жӧ лисыс ёдӧ лэдзӧм бӧрын.
33 рис.
Клевер лист вундыштӧма поперег (тыдалӧ микроскоп увтын).
34 рис.
Лук быдмаслӧн лист кучишок.
Тыдалӧны устицаэз.
35 рис.
Лис устица шӧрыштӧма поперег.
1 — оссьӧм,
2 — пӧднасьӧм.
36 рис.
Свёклаувт турунлӧн не ӧткодь югытінын быдмӧм.
Шульгаланись дорас — быдса югытінын быдмӧма. Веськытланись дорас — быдмӧма ⅓ лунся югытінын.
37 рис.
Дубровник турунлӧн быдкодь югытінын быдмӧм.
Шульгаланись дорас быдмӧма паськыт югытінын. Веськытланись дорас — быдмӧма ⅓ лунся югытінын.
38 рис.
Электрическӧй лампаэз увтын ӧгурчиэзлӧн быдмӧм.
39 рис.
Гӧгрӧса лиса колокольчик.
Нормальнӧй быдмас.
40 рис.
Колокольчиклӧн вевдӧрись торыс, кӧда вылӧ вуджӧр сайӧ керӧм бӧрын быдмис гӧгрӧса лиса вож.
41 рис.
Гӧгрӧса лиса колокольчиклӧн, уль вӧрын быдмӧм.
42 рис.
Льӧмпулӧн листтэз пукалӧны за вылын винтӧн — спиральнӧя.
43 рис.
Вӧр звезчатка турунлӧн листтэз пукалӧны крес-накрес — супротивнӧя.
44 рис.
Вяз пулӧн листтэз пукалӧны мозаикаӧн.
45 рис.
Сад листтэзлӧн югытланьӧ бергӧтчӧм.
Стрелкаӧн мыччалӧма, кӧдаланьсян усьӧ югытыс.
46 рис.
Опыт, кӧда мыччалӧ быдмаслісь лолалӧм.
47 рис.
Кактуссэз пустыняын.
48 рис.
Степ урбӧжлӧн вужжез.
А — быдмаслӧн му вевдӧрись тор, Б — вужжез.
49 рис.
Доль поткӧтӧм пу ув микроскоп увтын (ӧддьӧн ыждӧтана).
К — кор; Л — луб; Км — камбий; П — пу; С — сьӧлӧмӧс.
50 рис.
Кыдз аркмӧмась пожа трубкаэз.
А — клеткаэз, кӧднаись аркмӧмась пожа трубкаэз.
Б — эна жӧ клеткаэз нюжалӧмась, стенкаэс нылӧн ӧшӧмась, поперешнӧй стенкаэзас аркмӧмась пораэз.
Ц — пожа трубка.
51 рис.
Пожа сосудлӧн поперешнӧй стенка (ӧддьӧн ыждӧтӧма).
Вылісянь видзӧтікӧ.
52 рис.
Поперег вундыштӧм тавося нинпу за.
О — сьӧлӧмӧс; С — сьӧлӧмӧс югӧррез; П — пу; К — камбий; Л — луб.
53 рис.
Кыдз куйлӧны сӧнъя-сосуда пучоккез ӧтівося быдмасын.
54 рис.
Опыт, кӧда мыччалӧ вужлісь нырыштӧм.
55 рис.
Бадь ув, кӧдалӧн вужжез пизьӧтӧмась кытшӧн кор кульыштӧм вевдӧрӧ.
56 рис.
«Соломон печат» турунлӧн корневище.
57 рис.
Кыдз куйлӧны картовки клубень вылын синоккез.
58. рис.
Обыкновеннӧй лук луковица: вевдӧрсянь да шӧри вундыштӧмӧн.
59 рис.
Тыква кодь быдмаслӧн — бриониялӧн усоккез.
60 рис.
Клён уввез.
1 — быдман увлӧн йылісь шӧрӧт поча и кык бокись поча,
2 — йылісь почаыс потӧ.
61 рис.
Клёнлӧн ув йывлісь поча ӧддьӧнжык потӧма.
Аркмӧ виль, лист колассэза улок.
62 рис.
Клёнлӧн томыник, виль лиса ув.
А — йылісь поча, Б — бокись почаэз.
63 рис.
Яблоня уввез.
1 — унавося джендамӧм плода ув, 2 — ӧтік вося быдман ув.
64 рис.
Грушалӧн «плодушка».
65 рис.
Поперег шӧрыштӧм куимвося нинпу за (микроскоп увтын).
К — кор; а — кучишок; т — тропка слой; О — камбий; Ц — пулӧн тулысся слой, шӧраныс тыдалӧны гырись сосуддэз; Л — пулӧн гожся слой.
66 рис.
Доль поткӧтӧм поча йыв.
67 рис.
Быдман точкалӧн аркмӧмыс (унаись ыждӧтан микроскоп увтын).
68 рис.
Клетка йылӧмлӧн стадияэз.
1 — Клеткаыс янсалӧм одзын;
2 — клеткалӧн ядро янсалӧ;
3 — торйӧтан дыж аркмӧ;
4 — кык том клетка.
69 рис.
Боби петассэз. Ӧтыс быдмӧ пемытінын (шульгаланисьыс), а мӧдыс югытінын (веськытланисьыс).
70 рис.
Дыр я кыссьӧ карч быдмассэзлӧн быдман-воан кад и дыр я сулалӧ гожся шоныт кад.
(Эна лыддьӧссэс босьтӧмӧсь Москва область гӧгӧрись).
71 рис.
Ыджыт, блока теплица.
72 рис.
Ыджыт, блока теплицалӧн пытшкыс.
73 рис.
Блока теплицаын быдмӧны томаттэз.
74 рис.
Примула дзоридзлӧн строеннёыс.
1 — бекӧрок;
2 — венчик;
3 — венчиклӧн трубкаок;
4 — тычинкаэз;
5 — плодник;
6 — ӧмок (венчик бӧрын тыдыштӧ).
75 рис.
Примула дзоридзлӧн диаграмма.
76 рис.
Вишня дзоридз вундыштӧма доль.
1 — тычинкаэз;
2 — ӧмок;
3 — кӧдзыспоча.
77 рис.
Доль поткӧтӧм плодник (зэв унаись ыждӧтӧм).
Шӧрас тыдалӧ кӧдзыспочаыс яйцеклеткаӧн (Я).
Кӧдзыс пыртас дорӧ сибӧтчӧ пыльца трубкалӧн конечыс.
78 рис.
Вишня плод.
1 — кучишок;
2 — рышкыт, вазылькья сьӧлӧмӧс;
3 — кӧдзыс тусь;
4 — коска, кӧда кытшӧвтӧ кӧдзыс тусьсӧ.
79 рис.
Примулалӧн баранчиклӧн плод (коробкаок).
80 рис.
Примулалӧн поткӧтӧм дзоридззез.
1 — кузь стобока;
2 — дженыт стобока; А — ӧмок; Б — тычинкаэз; Ц — завязь; К — бекӧрок.
81 рис.
Баранчиклӧн дзоридз. Мыччалӧма, кыдз балямош нійӧ бусалӧ.
82 рис.
Пиксан турунлӧн дзоридз.
А — дзоридза за;
Б — торья дзоридз;
1 — бекӧрок;
2 — венчик;
4 — плодник стобоклӧн ӧмок;
5 — тычинкалӧн пыльниккез.
83 рис.
Айпӧв бадь дзоридз — берба.
Б — торья айпӧв (тычинкаа) дзоридзок.
84 рис.
Иньпӧв бадь дзоридз.
Б — торья иньпӧв (плодника) дзоридзок.
85 рис.
Дзоридзасян ӧрешник.
86 рис.
Ӧрешник берба:
А — тычинкаа дзоридз ӧтнас,
Б — плода дзоридз ӧтнас.
87 рис.
«Мичуринлӧн тӧвся Бере» груша плоддэз да сылӧн мам плоддэз.
1 — уссурийскӧй груша плоддэз,
2 — гибрид — «Мичуринлӧн тӧвся Бере»,
3 — лунвылісь груша.
88 рис.
Бегония быдмас йылӧ лиссянь.
1 — бегониялӧн лист, вундалӧма кынымкӧ торйӧ;
2 — лист тор садитӧма банкаӧ;
3 — лист тор вужьясьӧма.
89 рис.
Яблонялӧн улок, босьтӧма прививка керӧм понда.
Веськытланяс сія жӧ улокыс, токо листтэсӧ орлалӧмась: А — поча; Б — кольӧм лист оропоккез.
90 рис.
Кыдз прививка понда вундыштсьӧ поча.
91 рис.
Вундыштӧм поча торйӧн.
1 — кольӧм лист оропок, 2 — поча.
92 рис.
Сьӧрсьӧн-бӧрсьӧна стадияэз прививкалӧн:
1 — креста шель заын,
2 — поча садитӧма креста шельӧ,
3 — бонӧн кӧрталӧм.
93 рис.
Томыник за, кӧда зорамӧма привитӧмй почаись.
94 рис.
Томат привитӧма картовки кор бердӧ.
95 рис.
Элодея лист клеткаэзын протоплазмалӧн ветлӧм.
96 рис.
Медодзза стадияэз сю быдмас зорамӧмын.
97 рис.
Сю быдмаслӧн куститчӧм.
98 рис.
Сю быдмаслӧн шепьясьӧм.
99 рис.
Едкӧй лютик (7) да кыссян лютик (2).
100 рис.
Кукуруза.
1 — быдса быдмас,
2 — початок.
101 рис.
Рис роз.
102 рис.
Анькытш дзоридзлӧн керӧмыс.
1 — вевдӧрса вид,
2 — венчик лепестоккес торйынӧсь,
3 — дзоридз поткӧтӧма доль,
4 — тычинкаэз,
5 — плодник кӧстісьӧ столбикӧн.
103 рис.
Соя кус.
Вылын шульгаланись пельӧсас — соя плоддэз.
104 рис.
Хлопчатник.
105 рис.
Пыш.
106 рис.
Канатник.
107 рис.
Хондрилла кус. Заэз вылас аркмӧмась кызіннэз.
108 рис.
Тау-сагызлӧн вуж.
109 рис.
Валериана
(шульгаланяс улын — вуж).
110 рис.
Бактерияэз.
1 — дзуля формааӧсь (коккиэз),
2 — кӧстӧм штопор формааӧсь (спириллаэз),
3 — палкаок формааӧсь (бациллаэз).
111 рис.
Хламидомонада (унаись ыждӧтӧма).
Ядро — шӧрас.
112 рис.
Пола йылӧм дырни кык хламидомонадалӧн ӧтлаасьӧм.
113 рис.
Вольвокс (ӧддьӧн унаись ыждӧтӧма).
114 рис.
Плеврококк (унаись ыждӧтӧма).
Быд стадиа плеврококклӧн.
115 рис.
Улотрикс (унаись ыждӧтӧма).
116 рис.
Пола йылӧм улотрикслӧн.
1 — клетка торрез улотрикслӧн, кӧднаын аркмӧмась зооспораэз;
2 — ӧтлаасьӧм зооспораэз;
3 — покоитчана спора.
117 рис.
Ламинарияэз.
118 рис.
Чочком баг — мукор (унаись ыждӧтӧма):
1 — юрока мицелий;
2 — покоитчан спора;
3 — юрок спораэзӧн.
119 рис.
Чочком гриблӧн доль поткӧтӧм мырок (унаись ыждӧтӧм).
120 рис.
Синявка.
121 рис.
Чочком гриб.
122 рис.
Шампиньон шляпкалӧн пластинка шӧрыштӧма поперег (бура ыждӧтӧм). а — пластинка; б — спораа клеткаэз.
123 рис.
Шампиньон плода телолӧн зорамӧмыс.
124 рись.
Шампиньон быдтан теплицалӧн пытшкӧсыс.
125 рис.
Картовки тшак (фитофтора).
1 — картовки лист фитофтора пятноэзӧн;
2 — поперег вундыштӧм картовки лист, кӧдія шогалӧ фитофтораӧн (бура ыждӧтӧм);
3 — шогалан лислӧн увтісь ладорыс (бура ыждӧтӧм).
126 рис.
Сьӧдтусь.
1 — сьӧдтусь рудзӧг шепын;
2 — чужӧм сьӧдтусь плода телоэзӧн.
127 рис.
Шогді лист сімӧн босьтӧм.
128 рис.
«Стена золотянка»
129 рис.
«Исландия нитш» (1) да «кӧр нитш» (2).
130 рис.
Доль шӧрыштӧм лишайник (унаись ыждӧтӧма).
Тыдалӧны гӧгрӧса клеткаэз, кӧднӧ каттьӧны тшак гифаэз.
131 рис.
«Кӧк лён».
132 рис.
«Кӧк лёнлӧн» «коробочкаэз». Пытшкас сэтӧн олӧны спораэз.
133 рис.
Нитшлӧн предросток.
134 рис.
Сфагнум — торф керан нитш.
135 рис.
Папоротник.
1 — быдса быдмас, 2 — лист увдӧрса бугороккез (унаись ыждӧтӧма), 3 — бугорок шӧри шӧрыштӧма (унаись ыждӧтӧма): тыдалӧны спораа мешӧчоккез.
136 рис.
Ыб пистик.
Веськытланяс — спораэза заоккез. Шульгаланяс — гожся заэз.
137 рис.
Кӧчвонь.
Спора шепа заэз; шульгаланяс спораа листок торйӧн.
138 рис.
Папоротниклӧн заросток увладӧрсянь (ыждӧтӧма).
139 рис.
Важся папоротниклӧн лист отпечаток.