{Kodko @ Выль кӧсйысьӧм @ религия @ Выль кӧсйысьӧм @ 2008 @}
Выль кӧсйысьӧм.
Матвей серти бур юӧр
1 юр.
Исус Кристослӧн ордпуыс петӧ Ӧвраамсянь, сэсся Давидсянь. Сылӧн чужанвужйыс татшӧм:
Ӧвраамлӧн чужӧма Исаак, Исааклӧн — Яков, Яковлӧн чужӧмаӧсь Иуда да сылӧн вокъясыс.
Иудалӧн чужӧмаӧсь Фарес да Зарей, налӧн мамныс вӧлӧма Фамар.
Фареслӧн чужӧма Есром, Есромлӧн — Арам, Арамлӧн — Аминадав, Аминадавлӧн — Наассон, Наассонлӧн — Салмон.
Салмонлӧн чужӧма Вооз, сылӧн мамыс вӧлӧма Ракав.
Воозлӧн чужӧма Овид, сылӧн мамыс вӧлӧма Руфа.
Овидлӧн чужӧма Ессей, Ессейлӧн чужӧма Давид ӧксы.
Давид ӧксылӧн чужӧма Соломон, сылӧн мамыс вӧлӧма Урийлӧн гӧтыр.
Соломонлӧн чужӧма Ровоам, Ровоамлӧн — Авей, Авейлӧн — Аса, Асалӧн — Иосафат, Иосафатлӧн — Иорам, Иорамлӧн — Озей.
Озейлӧн чужӧма Иоафам, Иоафамлӧн — Аказ, Аказлӧн — Езекей.
Езекейлӧн чужӧма Манассей, Манассейлӧн — Амон, Амонлӧн — Иосей.
Иосейлӧн чужӧма Иоаким, Иоакимлӧн чужӧмаӧсь Еконей да сылӧн вокъясыс. Тайӧ вӧлӧма Израиль войтырӧс Вавилон муӧ вӧтлытӧдз на.
Вавилонӧ вӧтлӧм бӧрын Еконейлӧн чужӧма Салафиль, Салафильлӧн — Зоровавель, Зоровавельлӧн — Авиуд, Авиудлӧн — Елиаким, Елиакимлӧн — Азор.
Азорлӧн чужӧма Садок, Садоклӧн — Аким, Акимлӧн — Елиуд, Елиудлӧн — Елеазар, Елеазарлӧн — Матфан, Матфанлӧн — Яков.
Яковлӧн чужис Ӧсип. Сылӧн Мария гӧтырыс чужтіс Исусӧс, кодӧс шуисны Кристосӧн.
Тадзи Ӧвраамсянь Давидӧдз ставнас вӧлі дас нёль чужанвуж.
Вавилонӧ вӧтлытӧдз Давидсянь дас нёль чужанвуж.
Вавилонӧ вӧтлӧмсянь Кристосӧдз бара дас нёль чужанвуж.
Исус Кристос чужис тадзи.
Исуслӧн Мария мамыс вӧлі кикутӧма Ӧсипкӧд. Ӧтлаасьтӧдзныс на тӧдмалісны Мариялӧн Вежа Ловсянь сьӧктӧм йылысь.
Ӧсип вӧлі веськыда олысь морт. Сійӧ эз кӧсйы йӧзӧдны Марияӧс, та вӧсна шуис гусьӧн лэдзны сійӧс.
Кор Ӧсип мӧвпаліс тадзи, Господьлӧн андел петкӧдчис сылы вӧтас да шуис: «Ӧсип, Давид пи, эн пов босьтны Мариятӧ гӧтырӧ. Сьӧлӧм улас сылӧн кагаыс Вежа Ловсянь.
Марияыд ваяс пи, пуктан Сылы Исус ним, Сійӧ мездас Ассьыс войтырсӧ мыжъяссьыныс».
Ставыс тадзи артмис, медым иніс пророк пыр Господьлӧн шуӧмыс: — Ныв сьӧктас, сэсся пи чужтас.
Эммануил ним Сылы пуктасны. Нимыс висьталӧ: миянкӧд Ен.
Садьмӧм бӧрас Ӧсип вӧчис Господьлӧн андел тшӧктӧм серти: босьтіс Марияӧс гӧтырӧ, но эз инмӧдчыв сы дінӧ.
Мария чужтіс пи, ассьыс медводдза кагасӧ, и Ӧсип пуктіс Сылы Исус ним.
2 юр.
Исус чужис Юдея муын, Виплием карын, Ирӧд ӧксы веськӧдлан кадӧ. Исуслӧн чужӧм мысти асыввылысь Ерусалим карӧ воисны кодзув тӧдысьяс. Найӧ юалісны: «Кӧні юдейяслӧн пузчужӧм ӧксыыс? Асыввылысь ми аддзылім Сылысь кодзувсӧ да локтім Сылы копыртчывны».
Тайӧс кылӧмысь Ирӧд ӧксы инас эз кут ӧшйыны, шызис тшӧтш дзоньнас Ерусалим карыс.
Ирӧд корис аркирейясӧс Индӧдӧ велӧдысьяскӧд да юаліс налысь: «Кӧні Кристос чужас?» Найӧ вочавидзисны: «Юдея муын, Виплием карын. Тадзи пророклӧн гижӧма: — Тэ, Иуда муын Виплием кар, Иудалӧн мукӧд юрнуӧдан каръясысь абу ичӧтджык. Тэнад карысь буретш юралысь петас, Менсьым ыжъясӧс, Израиль войтырӧс, Сійӧ видзны кутас».
Тӧдысьясӧс ас дінас гусьӧн корӧмӧн Ирӧд юаліс налысь кодзув петан кадсӧ. Сэсся мӧдӧдіс найӧс Виплиемӧ да шуис: «Ветлӧй, кага йывсьыс ставсӧ тӧдмалӧй. Кагасӧ аддзӧм бӧрын юӧртӧй меным, ме тшӧтш вола копыртчывны Сылы».
Ӧксылӧн шуӧм бӧрын тӧдысьяс петісны туйӧ.
Асыввылысь аддзылӧм кодзулыс кывтіс на водзвылын. Сэсся сійӧ сувтіс буретш сэтчӧ, кӧні вӧлі кагаыс.
Кодзув аддзӧмысь тӧдысьяслы лои зэв нимкодь. Керкаӧ пырӧм бӧрын найӧ аддзисны кагаӧс Мария мамыскӧд. Пидзӧс выланыс уськӧдчӧмӧн найӧ копыртчылісны кагалы да сетісны Сылы дона козинъяс: зарни, ладан да смирна.
Узиганыс Ен ӧлӧдіс тӧдысьясӧс Ирӧд дінӧ бӧр мунӧмысь, та вӧсна найӧ мӧдісны ас муаныс мӧд туйӧд.
Тӧдысьяслӧн мунӧм бӧрын Господьлӧн андел петкӧдчис Ӧсиплы вӧтас да шуис: «Чеччы, босьт кагатӧ мамыскӧд да пышйы Египет муӧ, ов сэні менам шутӧдз. Ирӧд кутас корсьны кагатӧ, мед вины Сійӧс».
Ӧсип садьмис, босьтіс кагасӧ мамыскӧд да войнас мӧдӧдчис Египет муӧ. Сэні сійӧ оліс Ирӧд кувтӧдз. Тадзи иніс пророк пыр Господьлӧн шуӧмыс: «Египет муысь Ме кори Пиӧс».
Ирӧд тӧдмаліс тӧдысьяслысь ылӧдлӧмсӧ да ёна скӧрмис таысь. Сійӧ мӧдӧдіс шыпуртаясӧс, тшӧктіс вины Виплием карысь да сы гӧгӧрысь кык арӧса да ичӧтджык став пи кагасӧ, тӧдысьяссянь тӧдмалӧм кадӧ чужӧмаясӧс.
Тадзи иніс Еремей пророклӧн шуӧмыс: — Рама карын ырзӧм-бӧрдӧм кылӧ. Ракель аслас ныв-пи вӧсна бӧрдӧ, оз кӧсйы ланьтны бӧрдӧмсьыс, ӧд найӧ абуӧсь нин.
Ирӧд кулӧм бӧрын Египет муын Господьлӧн андел петкӧдчис Ӧсиплы вӧтас да шуис: «Чеччы, босьт кагатӧ мамыскӧд да бӧр мун Израиль муӧ. Кагатӧ вины кӧсйысьяс абу нин ловъяӧсь».
Ӧсип чеччис, босьтіс кагасӧ мамыскӧд да муніс Израиль муӧ.
Сэки Юдея муын веськӧдліс Ирӧд ӧксылӧн Аркелай пиыс. Тайӧс кывлӧм бӧрын Ӧсип повзис сэтчӧ мунӧмысь. Сэки вӧтас сылы вӧлі шуӧма мунны Галилея муӧ. Сэтчӧ воӧм бӧрын Ӧсип овмӧдчис Назарет карӧ. Тадзи иніс пророкъяс пыр шуӧмыс: «Назаретсаӧн Сійӧс шуасны».
3 юр.
Сійӧ кадӧ локтіс Пыртысь Иоан да юӧртіс Юдея овтӧминын: «Бергӧдчӧй мыжъяссьыныд. Енэжвыв Юралӧмыс матын нин».
Иоан йылысь Исай пророк висьтавлӧма тадзи: — Овтӧминын кылӧ горзысьлӧн шы: «Лӧсьӧдӧй туйсӧ Господьлы, веськӧдӧй-шыльӧдӧй ордымъяс Сылы.».
Иоан новліс верблюд гӧнысь кыӧм паськӧм да коскас кучик тасма, сёйліс чирк да видзвыв ма.
Сы дінӧ локтіс уна йӧз Ерусалим карысь, Юдея му пасьталаысь да Йӧрдан ю пӧлӧнысь. Асланыс мыжъясысь висьтасьӧм бӧрын Иоан пыртіс йӧзсӧ Йӧрдан юын.
Уна фарисей да саддукей локтісны Иоан дінӧ пыртчыны. Иоан аддзис найӧс да шуис: «Вижля йылӧм. Коді туйдӧдіс тіянӧс пышйыны локтана скӧрлунысь? Олӧмнад петкӧдлӧй мыжъяссьыныд бергӧдчӧмнытӧ. Энӧ лысьтӧй мӧвпавны, мый тіян батьныд Ӧвраам. Висьтала тіянлы: тайӧ изъясысь Ен вермӧ вӧчны Ӧвраамлы ныв-писӧ.
Черыс пу вужйыс дорын нин куйлӧ. Пуыс кӧ оз вай бур вотӧс, сійӧс кералӧны да шыбитӧны биӧ.
Ме пырта тіянӧс ваӧн. Тайӧ петкӧдлас мыжъяссьыныд бергӧдчӧмнытӧ. Ме бӧрын Локтысьыс ме дорысь вынаджык, ме ог шогмы пӧрччӧдны Сылысь кӧмсӧ. Сійӧ пыртас тіянӧс Вежа Лолӧн да биӧн. Сы киын тӧлӧдчан зырйыс. Сійӧ весалас гумласӧ: шобдісӧ йӧртӧдӧ чукӧртас, кыдсӧ куслытӧм биын сотас».
Сэки Исус локтіс Галилеяысь Йӧрдан ю дорӧ, мед Иоан пыртас Сійӧс.
Иоан ӧлӧдіг шуис: «Тэ-ӧ локтан ме дінӧ? Тэныд колӧ менӧ пыртнысӧ.» Исус шуис: «Эн сувт паныд.Миянлы колӧ вӧчны веськыдлуныс серти».
Сэки Иоан пыртіс Сійӧс.
Пыртчӧм бӧрас Исус петіс васьыс. Сэки енэжыс воссис, и Исус аддзис: Енлӧн Лолыс гулю моз лэччис Сы вылӧ.
Енэжсянь кыліс гӧлӧс шы: «Тайӧ Менам муса Пиӧй, Ме нимкодяся Сыӧн».
4 юр.
Та бӧрын Лов нуӧдіс Исусӧс овтӧминӧ, медым омӧльыс ыштӧдіс Сійӧс. Нелямын лун да нелямын вой видзалӧм бӧрын Исуслӧн кынӧмыс сюммис.
Сэки Сы дінӧ локтіс ыштӧдысь да шуис: «Тэ кӧ Ен Пи, пӧрт тайӧ изъяссӧ няньӧ».
Исус воча шуис: «Гижӧма: “Оз куш няньӧн мортыд ов, а Енсянь быд шуӧм кывйӧн”».
Сэсся омӧль нуӧдіс Исусӧс вежа карӧ, сувтӧдіс Сійӧс крам вевт вылӧ да шуис: «Тэ кӧ Ен Пи, шыбитчы увлань. Ӧд гижӧма: “Аслас анделъяслы Сійӧ тшӧктӧ видзны Тэнӧ. Найӧ нуасны Тэнӧ ки выланыс, видзасны изйӧ крукасьӧмысь”».
Исус воча шуис: «Гижӧма тшӧтш: “Эн дӧзмӧд ассьыд Господь Ентӧ.”»
Омӧль бара вайӧдіс Исусӧс зэв джуджыд керӧс йылӧ да петкӧдліс Сылы таладор югыдсьыс став мусӧ, налысь мичлун-озырлунсӧ. Сэсся шуис: «Ставсӧ тайӧс сета Тэныд, копыртчылан кӧ меным».
Исус шуис сылы: «Вешйы Ме дінысь, сӧтана. Гижӧма: “Аслад Господь Енлы копрась да сӧмын Сылы кесъяв”».
Сэки омӧль эновтіс Исусӧс. Сэсся воисны анделъяс да кесъялісны Исуслы.
Кор Исус тӧдмаліс Иоанӧс дзескыдінӧ пуксьӧдӧм йылысь, муніс Галилеяӧ. Сійӧ колис Назарет карсӧ да овмӧдчис тыдорса Капернаум карӧ, Завулон да Неффалим муӧ. Тадзи иніс Исай пророклӧн шуӧмыс: — Завулон му, Неффалим му, саридз туй вылын, Йӧрдан ю сайын мукӧд войтыра Галилея му. Пемыдын олысь войтыр яр биа югыд аддзис. Кулан вуджӧр улын олысьяслы югыд кыа петіс.
Тайӧ кадсянь Исус пондіс юӧртны-висьтавлыны: «Бергӧдчӧй мыжъяссьыныд. Енэжвыв Юралӧмыс матын нин».
Галилея ты пӧлӧн мунігӧн Исус аддзис кык вокӧс: Симонӧс, кодӧс нимтісны Петырӧн, да сылысь Ӧндрей воксӧ. Найӧ вӧліны чери кыйысьяс. Кык вок буретш вӧйтасисны ты вылын. Исус шуис налы: «Локтӧй Ме бӧрся. Ме вӧча тіянысь морт кыйысьясӧс».
Кык вок дзик пыр эновтісны тывъяснысӧ да мунісны Исус бӧрся.
Исус муніс водзӧ да аддзис пыжысь мӧд кык вокӧс: Яковӧс да Иоанӧс. Зеведей батьныскӧд найӧ дзоньталісны тывъяс. Исус чукӧстіс вокъясӧс.
Найӧ дзик пыр колисны пыжсӧ, батьнысӧ да мунісны Исус бӧрся.
Исус ветлӧдліс Галилея му пасьтала. Сійӧ велӧдіс синагогаясын, висьтавліс Ен Юралӧм йылысь Евангелльӧ да бурдӧдаліс йӧзӧс быд висьӧм-доймӧмысь.
Сы йылысь юӧрыс разаліс Сирия му пасьтала. Исус дінӧ вайӧдлісны быдсикас висьысьӧс-вермытӧмӧс, пеж лолӧн кутӧмаясӧс, шыблалан висьӧмӧн висьысьясӧс, ки-коксӧ вӧрзьӧдны вермытӧмъясӧс. Сійӧ быдӧнӧс бурдӧдіс.
Исус бӧрся муніс зэв уна йӧз Галилеяысь, Даскарысь, Юдеяысь, Ерусалим карысь да Йӧрдан ю сайысь.
5 юр.
Уна йӧзӧс аддзӧм бӧрын Исус кайис керӧсӧ да пуксис. Сы дінӧ матыстчисны велӧдчысьяс.
Исус пондіс велӧдны:
«Шудаӧсь ловныслы корысьяс, ӧд налӧн эм Енэжвыв Юралӧм.
Шудаӧсь шогсьысьяс, ӧд найӧс шогсьыс пальӧдасны.
Шудаӧсь рамъяс, ӧд налы вуджас кӧсйысьӧм муыс.
Шудаӧсь веськыдлуннас пӧткӧдчыны кӧсйысьяс, ӧд найӧс пӧткӧдасны.
Шудаӧсь бур сьӧлӧмаяс, ӧд налы бур сьӧлӧмсянь вӧчасны.
Шудаӧсь сӧстӧм сьӧлӧмаяс, ӧд найӧ Енмӧс аддзасны.
Шудаӧсь йӧзӧс бурӧдысьяс, ӧд найӧс Енлӧн ныв-пиӧн шуасны.
Шудаӧсь веськыдлун вӧсна вӧтлӧмаяс, ӧд налӧн эм Енэжвыв Юралӧм.
Ті шудаӧсь, Ме вӧсна кӧ тіянӧс лёкӧдӧны, вӧтлӧны да быдногыс омӧльтӧны-суклялӧны.
Долыда нимкодясьӧй, ӧд ыджыд тырдон виччысьӧ тіянӧс енэжас. Тадзи войдӧр тшӧтш вӧтлісны пророкъясӧс».
«Ті муюгыдыслы сов.
Солыс кӧ воштас ассьыс вынсӧ, кыдзи сійӧс бӧр соланас вӧчан?
Сэки сійӧ нинӧм вылӧ оз шогмы, сійӧс сӧмын койыштӧны ветлысьяс кок улӧ.
Ті йӧзыслы югыд.
Керӧсын сулалысь кар оз вермы саявны.
Ӧзтӧм битӧ оз пуктыны доз улӧ, сійӧс пуктӧны бикок вылӧ. Сэки керкаын югыдыс быдлаӧ веськалӧ.
Тадзи мед югдӧдас тіян югыдныд, медым йӧзыс аддзасны тіянлысь бур вӧчӧмнытӧ да ошкасны енэжвыв Батьнытӧ».
«Ті чайтанныд, Ме локті бырӧдны Индӧдсӧ да пророк гижӧдъяс? Энӧ мӧвпалӧй тадзи. Ме эг лок бырӧдны, а локті олӧмӧ пӧртны.
Веськыда висьтала тіянлы: енэжыс да муыс быртӧдз да ставыс збыльмытӧдз весиг ӧти ичӧт шыпас да чуттор оз вош Индӧдысь.
Коді торкас Ен тшӧктӧмъясысь весиг ӧти ичӧттор да велӧдас тадзи вӧчны мукӧдӧс, Енэжвыв Юраланінын сійӧс медічӧтӧ пуктасны.
Коді олас тшӧктӧмъясыс серти да велӧдас тадзи овны мукӧдӧс, Енэжвыв Юраланінын сійӧс ыджыд мортӧ пуктасны.
Висьтала тіянлы: тіян веськыда олӧмныд кӧ оз ло Индӧдӧ велӧдысьяслӧн да фарисейяслӧн дорысь бурджык, Енэжвыв Юраланінӧ онӧ пырӧй».
«Ті кывлінныд, важ йӧзлы вӧлі шуӧма: “Эн ви”, и нӧшта шуӧма: “Виысьӧс мыждасны”.
Ме шуа тіянлы: коді лӧгалӧ вокыс вылӧ нинӧм абусьыс, сійӧс мыждасны.
Коді вокыслы шуас: “Тэ бӧб”, сійӧс вылыс ёрд мыждас.
Коді йӧйӧн шуас, сійӧ куслытӧм биӧ веськалас.
Сетантортӧ вайигад кӧ висьпуктанін дорын тӧд вылад усяс, мый вокыд лӧгалӧ тэ вылӧ, сэки коль висьпуктанін дорӧ сетантортӧ. Мун, водзджык бурась вокыдкӧд, сэсся лок да пукты висьпуктанінӧ сетантортӧ.
Тэнӧ мыжалыськӧд бурась ӧдйӧджык, ёрдӧ вотӧдз на. Он кӧ вӧч тадзи, сійӧ сетас тэнӧ ёрдысьлы, ёрдысь сетас тэнӧ видзысьлы, сэсся тэнӧ йӧртасны дзескыдінӧ. Веськыда висьтала тэныд: бӧръя сьӧмтӧ сеттӧдз он пет сэтысь».
«Ті кывлінныд, важ йӧзлы вӧлі шуӧма: “Гозъя олӧмтӧ эн пежав.”
Ме шуа тіянлы: ань вылӧ ыштӧмӧн видзӧдысь сьӧлӧмас гозъя олӧмсӧ пежаліс нин.
Веськыд синмыд кӧ ыштӧдӧ тэнӧ, перйы сійӧс да шыбит. Бурджык син пӧвтӧ воштыны вир-яйтӧ дзоньнас куслытӧм биӧ шыбитӧм дорысь.
Веськыд киыд кӧ ыштӧдӧ тэнӧ, керышт сійӧс да шыбит. Бурджык ки пӧвтӧ воштыны вир-яйтӧ дзоньнас куслытӧм биӧ шыбитӧм дорысь.
Нӧшта шуӧма: “Гӧтырсӧ эновтысь мед сетас сылы торйӧдчан гижӧд”.
Ме шуа тіянлы: верӧсыс кӧ эновтӧ гӧтырсӧ, а гӧтырыс оз кырсав, сійӧ сетӧ помка гӧтырыслы пежавны гозъя олӧмсӧ. Юксьӧм аньӧс гӧтырӧ босьтысь тшӧтш пежалӧ».
«Ті кывлінныд, важ йӧзлы вӧлі шуӧма: “Сетӧм кывтӧ эн торк. Господь водзын сетӧм кывтӧ кут.
” Шуа тіянлы: кыв сеттӧг ов.
Эн сет кывтӧ енэж водзын — сійӧ Енлӧн пукаланіныс.
Эн сет кывтӧ му водзын — сійӧ Енлӧн кок улыс.
Эн сет кывтӧ Ерусалим кар водзын — сійӧ ыджыд Ӧксылӧн кар.
Аслад юрӧн эн кӧсйысь, ӧд тэ весиг ӧти юрси сі он вермы пӧртны еджыдӧ либӧ сьӧдӧ.
Тіян “да”-ныд мед лоӧ сӧмын “да”, тіян “ог”-ныд мед лоӧ сӧмын “ог”, а содтӧд кывъясыс — омӧльсяньыс».
«Ті кывлінныд, вӧлі шуӧма: “Син понда син, пинь понда пинь”.
Ме шуа тіянлы: тэныд лёксӧ вӧчысьлы паныд эн сувт.
Веськыд банад кӧ кучкасны, лӧсьӧд шуйгасӧ.
Зільӧ кӧ кодкӧ ёрд пыр дӧрӧмтӧ босьтны, сет сылы тшӧтш вылыс паськӧмтӧ.
Тшӧктӧ кӧ кодкӧ мунны сыкӧд ӧти верст, мун сыкӧд кыкӧс.
Тэнсьыд корысьлы сет, водзӧсӧн босьтысьӧс эн вӧтлы».
«Ті кывлінныд, вӧлі шуӧма: “Радейт матыссатӧ да мустӧмт тэныд паныд мунысьӧс”.
Ме шуа тіянлы: радейтӧй тіянлы паныд мунысьясӧс, бурсиӧй тіянӧс ёрысьясӧс, бурсӧ вӧчӧй тіянӧс мустӧмтысьяслы, кевмысьӧй тіянӧс ӧтдортысьяс да вӧтлысьяс вӧсна. Сэки лоанныд енэжвыв Батьныдлы ныв-пиӧн. Сійӧ тшӧктӧ шондіыслы ӧтмоза шонтыны лёк да бур йӧзӧс, сетӧ зэрсӧ веськыда да лёк нога олысьяслы.
Радейтанныд кӧ тіянӧс радейтысьясӧс, мыйысь удждонсӧ виччысянныд?
Оз ӧмӧй тадзи вӧчны тшӧтш вот перйысьяс?
Ті кӧ чолӧмаланныд-сибӧданныд сӧмын вокъяснытӧ, ті ӧмӧй бурджыка вӧчанныд?
Оз ӧмӧй тадзи вӧчны тшӧтш ентӧдтӧмъяс?
Лоӧй енэжвыв Батьныд моз тырвыйӧ бурӧсь».
6 юр.
«Видзчысьӧй, тіян бур вӧчӧмныд мед оз ло йӧз водзын петкӧдлӧм могысь. Тадзи кӧ, оз ло тіянлы енэжвыв Батьныдсянь удждон.
Корысьлы кӧ сетан, эн йӧзӧд тайӧс. Тадзи вӧчӧны кык бана шаньгаяс синагогаясын да йӧзаинъясын, ӧд найӧ йӧзсянь ошкӧм виччысьӧны.
Веськыда висьтала тіянлы: найӧ босьтӧны нин ассьыныс удждонсӧ.
Корысьлы сетігад шуйга киыд мед оз тӧд веськыд киыдлысь вӧчӧмсӧ. Тэнад бур вӧчӧм йылысь мукӧдлы тӧднысӧ оз ков. Гусясӧ аддзысь Батьыд сетас тэныд аддзымӧнъя».
«Эн кевмысь кык бана шаньгаяс моз. Асьнысӧ йӧз водзын петкӧдлӧм могысь найӧ радейтӧны синагогаясын да туйвежъясын сулалӧмӧн кевмысьны.
Веськыда висьтала тіянлы: найӧ босьтӧны нин ассьыныс удждонсӧ.
Но тэ пыр аслад вежӧсӧ, ӧдзӧстӧ пӧдлав да кевмысь тыдавтӧм Батьыдлы. Гусясӧ аддзысь Батьыд сетас тэныд аддзымӧнъя.
Кевмысиганыд ентӧдтӧмъяс моз энӧ шуалӧй ковтӧмсӧ. Найӧ чайтӧны, мый уна кыв шуӧмнысла Енмыс кылас найӧс. Энӧ лоӧй на кодьӧсь. Тіян кортӧдз на Батьныд тӧдӧ тіянлы коланасӧ.
Кевмысьӧй тадзи: — Батьӧй миян, Тэ енэжъяс вылын олан.
Мед лоӧ вежаӧн Тэнад нимыд.
Мед воас Тэнад Юралӧмыд.
Мед инас Тэнад кӧсйӧмыд му вылын енэжын моз.
Сет миянлы талун кежлӧ няньнымӧс.
И прӧстит миянлысь мыжъяснымӧс, кыдзи ми прӧститам миян водзын мыжаясӧс.
Эн сет миянлы ылавны, но видз миянӧс омӧльысь.
Ӧд Тэнад Юралӧмыд, выныд да дзирдлуныд помасьлытӧм.
Аминь.
Прӧститанныд кӧ мӧдлысь мыжъяссӧ, сэки енэжвыв Батьныд прӧститас тіянӧс.
Онӧ кӧ прӧститӧй, сэки Батьныд тіянлысь мыжъяснытӧ оз прӧстит».
«Видзаліганыд энӧ лоӧй жугыльӧсь кык бана шаньгаяс моз. Найӧ ветлӧны шог чужӧмӧн видзалӧмсӧ петкӧдлӧм могысь.
Веськыда висьтала тіянлы: найӧ босьтӧны нин ассьыныс удждонсӧ.
Мӧдарӧ, видзалігад юрситӧ шыльӧд, чужӧмтӧ мыськы, йӧзыс мед оз тӧдлыны тэнсьыд видзалӧмтӧ. Видзав аслад тыдавтӧм Батьыд водзын. Гусясӧ аддзысь Батьыд сетас тэныд аддзымӧнъя».
«Энӧ чӧжӧй аслыныд озырлун му вылын. Тані воз да сім сійӧс сёйӧ, гусясьысьяс пырӧны да нуӧны ставсӧ.
Мӧдарӧ, чӧжӧй озырлунтӧ енэжӧ. Сэні воз да сім оз сёй сійӧс, гусясьысьяс оз пырны да оз нуны.
Кӧні озырлунныд, сэні лоӧ и сьӧлӧмныд.
Синмыд — вир-яйтӧ югдӧдысь.
Синмыд кӧ бур, став вир-яйыд югыдын.
Синмыд кӧ лёк, став вир-яйыд пемыдын.
Югыдыс кӧ тэ пытшкын пемыд, сэки кутшӧм ачыс пемыдыс?
Морт оз вермы кесъявны кык ыджыдлы. Ӧтисӧ кӧ радейтӧ, мӧдсӧ мустӧмтӧ. Ӧтисӧ кӧ пыдди пуктӧ, мӧдсӧ увтыртӧ.
Ті онӧ вермӧй кесъявны Енлы, кесъяланныд кӧ озырлунлы».
«Та вӧсна шуа тіянлы: энӧ майшасьӧй сёян-юан да паськӧм вӧсна.
Олӧмныд абу ӧмӧй донаджык сёян-юанысь да вир-яйныд паськӧмысь?
Видзӧдлӧй енэжвыв лэбачьяс вылӧ: найӧ оз кӧдзны, оз вундыны, оз чукӧртны йӧртӧдъясӧ, но енэжвыв Батьныд вердӧ найӧс.
Ті ӧмӧй наысь абу донаджыкӧсь?
Вермас-ӧ тіян пиысь кодкӧ зільӧмӧн-тӧждысьӧмӧн нюжӧдыштны ассьыс олан нэмсӧ?
Мыйла паськӧмныд вӧсна майшасянныд?
Видзӧдлӧй видзвыв дзоридзьяслӧн быдмӧм вылӧ: найӧ оз мырсьыны, оз печкыны.
Висьтала тіянлы: ачыс Соломон став озырлун дырйиыс эз пасьтасьлы весиг ӧти татшӧм дзоридзысь мичаджыка.
Енмыс кӧ тадзи пасьтӧдӧ видзвыв турунӧс, коді талун быдмӧ, а аски шыбитасны пачӧ, оз ӧмӧй Сійӧ пасьтӧд тіянӧс, этша эскысьяс.
Та вӧсна энӧ шуалӧй: “Мый сёйны-юны да мый пасьтавны?
” Тайӧ ставыс майшӧдлӧ ентӧдтӧмъясӧс.
Но енэжвыв Батьныд тӧдӧ, мый ставыс тайӧ колӧ тіянлы.
Медводз корсьӧй Енлысь Юралӧмсӧ да Сылысь веськыдлунсӧ, сэки тіян ставыс тайӧ лоӧ.
Энӧ майшасьӧй аскиа луныс вӧсна, аскиыс ас вӧснаыс тӧждысяс. Быд лунлы аслас тӧждыс тырмӧ».
7 юр.
«Энӧ мыждӧй, сэки тіянӧс оз мыждыны. Ӧд тіян мыждӧмныд ас выланыд бӧр воас.
Асланыд мурталӧм серти тіянлы мурталасны.
Кыдзи тэ верман вокыд синмысь ёгторсӧ аддзыны, аслад синмысь кӧ керсӧ он казяв?
Кыдзи тэ верман шуны вокыдлы: “Вай перъя синсьыд ёгторсӧ”, аслад синмад кӧ кер?
Кык бана шаньга.
Водзджык аслад синмысь керсӧ перйы, сэки вокыдлӧн синмысь ёгторсӧ верман перйыны.
Вежасӧ энӧ сетӧй понъяслы да донаторнытӧ энӧ коялӧй порсьяслы. Вӧчанныд кӧ тадзи, понъяс уськӧдчасны да косявласны тіянӧс, а порсьяс ставсӧ таляласны».
«Корӧй, и тіянлы сетасны, корсьӧй, и ті аддзанныд, игӧдчӧй, и тіянлы восьтасны.
Ӧд корысьлы сетӧны, корсьысьлы сюрӧ да игӧдчысьлы восьтӧны.
Коді тіян пӧвстысь пиыслы сетас из, корас кӧ сійӧ нянь?
Сетас-ӧ змейӧс, корас кӧ пиыс чери?
Ті лёкӧсь, а сямманныд бурсӧ сетны асланыд ныв-пилы. Дерт нин, енэжвыв Батьныд уна пӧвстӧн бурсӧ сетас Сылысь корысьяслы.
Мый кӧсъянныд, медым йӧзыс вӧчисны тіянлы, сійӧс и ті вӧчӧй налы.
Тадзи Индӧд да пророк гижӧдъяс велӧдӧны».
«Пырӧй векньыд ӧдзӧсӧд. Ӧд паськыд ӧдзӧсыс да паськыд туйыс кулӧмӧ нуӧдӧны, и унаӧн сэті мунӧны. Векньыд ӧдзӧсыс да векньыд туйыс олӧмӧ нуӧдӧны, и тайӧс аддзысьыс этша».
«Видзӧй асьнытӧ ылӧгпророкъясысь. Найӧ локтӧны тіян дінӧ ыжъяс кодьӧн, а збыльвылас найӧ горш кӧинъяс.
Вотӧсныс серти ті тӧдмаланныд найӧс.
Чукӧртлӧны ӧмӧй лежнӧг вылысь виноград да тусяпу вылысь инжир?
Бур пу вайӧ бур вотӧс, лёк пу — лёкӧс.
Бур пу оз вермы вайны лёк вотӧс, лёк пу — бур вотӧс.
Пуыс кӧ оз вай бур вотӧс, сійӧс кералӧны да шыбитӧны биӧ.
Тадзи вайӧм вотӧс сертиыс ті тӧдмаланныд ылӧгпророкъясӧс.
Оз быдӧн, коді шуӧ Меным: “Господьӧй, Господьӧй”, пыр Енэжвыв Юраланінӧ. Пырас сӧмын Менам енэжвыв Батьлӧн кӧсйӧм серти олысь.
Сійӧ лунӧ Меным унаӧн шуасны: “Господьӧй, Господьӧй, эг-ӧ Тэнад нимсянь ми пророкалӧй?
Эг-ӧ Тэнад нимӧн пеж ловъясӧс вӧтлалӧй?
Эг-ӧ Тэнад нимӧн шензьӧданаторъяс вӧчалӧй?
” Сэки Ме вочавидза налы: “Ог тӧд тіянӧс.
Мунӧй Ме дорысь, лёксӧ вӧчысьяс.”»
«Коді кылӧ Менсьым кывъясӧс да олӧ на серти, сійӧ из вылӧ керкасӧ лэптысь сюсь вежӧра морт кодь. Чорыда кӧ зэрмас, юяс ойдасны, ыджыд тӧвныр петас да керкасӧ мӧдас пӧрӧдны, тайӧ керкаыс сэки оз пӧр, ӧд сійӧс из вылӧ лэптӧма.
А коді кылӧ Менсьым кывъясӧс да оз ов на серти, сійӧ лыа вылӧ керкасӧ лэптысь вежӧртӧм морт кодь. Чорыда кӧ зэрмас, юяс ойдасны, ыджыд тӧвныр петас да керкасӧ мӧдас пӧрӧдны, тайӧ керкаыс сэки дзоньнас киссяс».
Исусӧс кывзӧм бӧрын йӧзыс ёна шензисны Сылӧн велӧдӧмысь.
Ӧд Исус велӧдіс ыджыдалысьӧ пуктӧм морт моз, эз Индӧдӧ велӧдысьяс да фарисейяс моз.
8 юр.
Кор Исус лэччис керӧсысь, уна йӧз вӧтчис Сы бӧрся.
Проказаӧн висьысь матыстчис Исус дінӧ да Сы водзӧ уськӧдчӧмӧн шуис: «Господьӧй, кӧсъян кӧ, верман менӧ сӧстӧммӧдны».
Исус нюжӧдіс кисӧ, инмӧдчыліс сы дінӧ да шуис: «Кӧсъя. Сӧстӧммы».
Висьысьлӧн дойясыс дзик пыр бырисны, да сійӧ бурдіс.
Исус шуис сылы: «Та йылысь некодлы эн висьтав. Мун, петкӧдлы асьтӧ поплы, сэсся Мӧисей тшӧктӧм серти вай вись. Тадзи тӧдмаласны тэнад бурдӧм йылысь».
Исус пырис Капернаум карӧ. Сы дінӧ локтіс шыпуртаяслӧн веськӧдлысь да корис отсавны: «Господьӧй, менам кесйӧгӧй гортам куйлӧ, ки-коксӧ вӧрзьӧдны оз вермы, вывті сьӧкыда висьӧ».
Исус шуис сылы: «Ме локта, бурдӧда сійӧс».
Веськӧдлысь воча шуис: «Господьӧй, ме ог сулав сы доныс, медым Тэ пырин менам керка вевт улӧ. Сӧмын кыв шу, и кесйӧгӧй бурдас.
Ме ачым киподувса морт, но и менам кипод улын эмӧсь шыпуртаяс. Ӧтилы шуа: “Мун”, и сійӧ мунӧ. Мӧдлы тшӧкта локны, и сійӧ локтӧ. Кесйӧглы шуа: “Вӧч тайӧс”, и сійӧ вӧчӧ».
Тайӧ мортыслӧн висьталӧмыс шензьӧдіс Исусӧс. Сійӧ шуис Ас бӧрсяыс мунысьяслы: «Веськыда висьтала тіянлы: татшӧм ыджыд эскӧмсӧ Ме весиг Израильысь эг аддзыв.
Висьтала тіянлы: унаӧн локтасны асыввылысь да рытыввылысь Енэжвыв Юраланінӧ. Найӧ ӧти пызан сайӧ пуксясны Ӧвраамкӧд, Исааккӧд да Яковкӧд. А кодлы водзысяньыс вӧлі дасьтӧма Енлысь Юраланінсӧ, найӧс шыбитасны пемыдас. Сэні лоӧ бӧрдӧм да пинь йирӧм».
Сэсся шыпуртаяслӧн веськӧдлысьлы Исус шуис: «Мун гортад. Мед лоас эскӧмыд серти».
Веськӧдлысьлӧн кесйӧгыс дзик пыр бурдіс.
Исус локтіс Петыр ордӧ. Сэні аддзис, мый Петыр гӧтырлӧн мамыс куйлӧ вольпасьын биа висьӧмӧн. Исус инмӧдчыліс висьысьлы киас, и биа висьӧмыс эновтіс сійӧс. Ань чеччис да пондіс кесъявны налы.
Рытнас Исус дінӧ вайӧдісны пеж лолӧн кутӧм уна йӧзӧс.
Исус кыв шуӧмӧн вӧтлаліс пеж ловъясӧс, бурдӧдаліс висьысьясӧс, медым иніс Исай пророклӧн шуӧмыс: — Миянлысь нёрпалӧмъяс Сійӧ босьтіс да миянлысь висьӧмъяс Сійӧ вештіс.
Ас гӧгӧрсьыс уна йӧзӧс казялӧм бӧрын Исус тшӧктіс велӧдчысьясыслы вуджны ты мӧдлапӧлӧ.
Индӧдӧ велӧдысьясысь ӧти матыстчис Сы дінӧ да шуис: «Велӧдысьӧй, ме быдлаӧ Тэ бӧрся муна».
Исус шуис сылы: «Ручьяслӧн эмӧсь пырмӧсъяс, и енэжвыв лэбачьяслӧн эмӧсь позъяс, сӧмын Морт Пилӧн шойччаніныс абу».
Исуслӧн ӧти велӧдчысь корис: «Господьӧй, лэдзлы менӧ медводз батьӧс дзебны».
Исус шуис сылы: «Лок Ме бӧрся, кулӧмаяс мед дзебасны кулӧмаяснысӧ».
Исус пуксис пыжӧ, велӧдчысьясыс Сы бӧрся.
Виччысьтӧг ты вылын кыптіс ыджыд тӧвныр, ёна гызис, да пыжыс кутіс тырны ванас. Исус вӧлі узьӧ.
Велӧдчысьяс садьмӧдісны Сійӧс шуалӧмӧн: «Господьӧй, мезды миянӧс. Вӧям.»
Исус шуис: «Мыйла ті сэтшӧм полысьӧсь, этша эскысьяс?»
Сэсся Исус чеччис, ӧлӧдіс тӧвсӧ да васӧ, и вӧвлытӧм чӧв-лӧнь пуксис.
Велӧдчысьяс чуймисны, ӧта-мӧдныслысь пондісны юасьны: «Коді Сійӧ? Весиг тӧлыс да ваыс кывзысьӧ Сылысь».
Та бӧрти Исус вуджис ты мӧдлапӧлӧ, Гергесин муӧ. Сылы воча петісны шойгу кыртаысь кык морт, пеж ловъясӧн кутӧмаяс. Найӧ вӧліны лёксьыс-лёкӧсь, та вӧсна йӧзыс полісны ветлыны тайӧ туйӧдыс.
«Мый Тэныд миянсянь колӧ, Исус, Ен Пи?
Локтін-ӧ индӧм кадысь водзджык песны миянӧс?» — горзісны найӧ.
Ылынкодь йирсис ыджыд порсь чукӧр.
Пеж ловъяс корисны Исусӧс: «Вӧтлан кӧ миянӧс, ысты порсьяс пытшкӧ».
Исус шуис налы: «Мунӧй.»
Пеж ловъяс петісны да пырисны порсьяс пытшкӧ.
А порсьяс кыр йывсянь уськӧдчисны тыӧ да ставныс пӧдісны.
Порсь видзысьяс котӧрӧн пышйисны сэтысь карӧ да висьталісны сэні аддзывлӧмтор йывсьыс, пеж ловъясӧс вӧтлӧм йылысь.
Сэки став карыс петіс Исуслы воча.
Исусӧс аддзӧм бӧрын йӧзыс корисны Сійӧс мунны налӧн муысь.
9 юр.
Исус пуксис пыжӧ, бӧр вуджис тысӧ да воис Аслас карӧ.
Сэні вайисны Сы дінӧ вольпасьын куйлысь, вӧрзьӧдчыны вермытӧм мортӧс.
Налысь эскӧмсӧ аддзӧмӧн Исус шуис висьысьлы: «Эн пов, пиӧй.
Тэнсьыд мыжъястӧ прӧститӧма».
Индӧдӧ велӧдысьясысь кодсюрӧ ас пытшканыс мӧвпалісны: «Сійӧ Енмӧс омӧльтӧ».
Налысь мӧвпъяссӧ тӧдӧмӧн Исус шуис: «Мыйла сьӧлӧманыд лэдзанныд лёк мӧвпъяссӧ?
Мый кокньыдджык шуны: “Тэнсьыд мыжъястӧ прӧститӧма” либӧ “Чеччы да ветлы”?
Ӧні ті тӧдмаланныд: Морт Пи вермӧ прӧститны мыжъяс му вылын». Сэсся шуис висьысьлы: «Чеччы, босьт вольпасьтӧ да мун гортад».
Сійӧ чеччис да муніс гортас.
Тайӧс аддзӧм бӧрын йӧзыс шензьӧмӧн ошкисны Енмӧс, ӧд та ыджда вын сетӧма мувывса йӧзлы.
Исус водзӧ муніс да аддзис вотчукӧртанінын пукалысь Матвей нима мортӧс. Исус шуис сылы: «Лок Ме бӧрся».
Сійӧ чеччис да муніс Исус бӧрся.
Исус сёйӧ вӧлі Матвей ордын, кор сэтчӧ локтісны вот перйысьяс да мукӧд мыжа йӧз. Исускӧд да Сылӧн велӧдчысьяскӧд найӧ пукалісны ӧти пызан сайын.
Тайӧс аддзисны фарисейяс да юалісны Исуслӧн велӧдчысьяслысь: «Мыйла тіян Велӧдысьныд сёйӧ-юӧ вот перйысьяскӧд да мыжа йӧзкӧд?»
Исус кыліс тайӧс да шуис налы: «Дзоньвидзалы бурдӧдысьыд оз ков, сійӧ висьысьлы колӧ. “Буралӧм тіянсянь кӧсъя, ог вись вайӧм” — мунӧй да гӧгӧрвоӧй тайӧ кывъяссӧ.
Ме локті корны Ен дінӧ мыжаясӧс, эг веськыда олысьясӧс».
Иоанлӧн велӧдчысьясыс локтісны Исус дінӧ да юалісны: «Ми уна видзалам, фарисейяс тшӧтш уна видзалӧны. Мыйла Тэнад велӧдчысьясыд оз?»
Исус вочавидзис: «Вермӧны-ӧ ёртъясыс шогавны кӧлысь вылын, кор верӧспуыс накӧд?
Воасны на сійӧ лунъясыс, кор колясны верӧспутӧг, сэки и видзаласны.
Важ паськӧмтӧ оз дӧмны выль дӧра дӧмасӧн. Тадзи кӧ вӧчан, выль дӧмас дортіыс нёйдас-косяссяс паськӧмыд, розьыс ёнджыка на ыдждас.
Выль винатӧ оз кисьтны важ кучик дозйӧ.
Тадзи кӧ вӧчан, кучик дозйыс потас, и винаыс киссяс.
Выль винатӧ кисьтӧны выль кучик дозйӧ. Сэки кыкнанныс дзонь колясны».
Исуслӧн сёрнитігкості локтіс Сы дінӧ ӧти юралысь да пидзӧс вылас уськӧдчӧмӧн корис: «Менам нылӧй муртса на куліс. Лок, пуктыв сы вылӧ китӧ, мед сійӧ ловзяс».
Исус чеччис да муніс велӧдчысьясыскӧд юралысь бӧрся.
Исус дінӧ мышсяньыс матыстчис ань да инмӧдчыліс Исуслы паськӧм дорышас. Дас кык во чӧж тайӧ аньыс висьӧма вир мунӧмӧн. Сійӧ мӧвпаліс: «Сӧмын инмӧдчыла кӧ Сылӧн паськӧмӧ, бурда».
Исус бергӧдчис, аддзис аньӧс да шуис: «Эн пов, нылӧй.
Эскӧмыд мездіс тэнӧ».
Аньыс дзик пыр бурдіс.
Юралысь керкаӧ воӧм мысти Исус аддзис пӧлянӧн ворсысьясӧс да гораа бӧрдысь йӧзӧс. Исус шуис налы: «Мунӧй татысь. Нылыс эз кув, сійӧ узьӧ».
Исус вылын пондісны серавны.
Йӧзӧс вӧтлӧм бӧрын Исус пырис нывка дінӧ да босьтіс сійӧс киӧдыс. Нывка чеччис.
Та йылысь юӧрыс разаліс сэтчӧс му пасьтала.
Сэтысь мунігӧн Исус бӧрся вӧтчисны кык синтӧм морт. Найӧ горӧдісны: «Ло бур сьӧлӧма миян дінӧ, Давид Пи.»
Исус пырис керкаӧ, синтӧмъяс Сы бӧрся.
Исус юаліс налысь: «Эсканныд-ӧ, мый Ме верма бурдӧдны тіянӧс?»
Найӧ шуисны: «Эскам, Господьӧй.»
Сэки Исус инмӧдчыліс налы синмас да шуис: «Мед лоӧ тіянлы эскӧм сертиныд».
Найӧ кутісны аддзыны.
Исус кыкнаннысӧ чорыда ӧлӧдіс: «Та йылысь некодлы энӧ висьтавлӧй».
Но керкаысь петӧм бӧрын найӧ висьтавлісны Исус йылысь сэтчӧс му пасьталаыс.
Бурдӧмаяслӧн мунӧм бӧрын Исус дінӧ вайӧдісны пеж лолӧн кутӧм сёрниттӧм мортӧс.
Исус вӧтліс сы пытшкысь пеж ловсӧ, да мортыс пондіс сёрнитны.
Йӧзыс шензисны, татшӧмторйыс пӧ Израиль муын эз на вӧвлы.
А фарисейяс шуисны, Сійӧ пӧ вӧтлалӧ пеж ловъясӧс налӧн юралысь вынӧн.
Исус ветліс-кытшовтіс став сикт-карсӧ. Сійӧ велӧдіс синагогаясын, висьтавліс Ен Юралӧм йылысь Евангелльӧ да бурдӧдаліс йӧзсӧ быд висьӧм-доймӧмысь.
Йӧз вылӧ видзӧдігӧн Исуслӧн сьӧлӧмыс нормис, ӧд найӧ вӧліны сэтшӧм мудзӧсь, эбӧстӧм-вынтӧмӧсь, видзысьтӧг кольӧм ыжъяс кодьӧсь.
Сійӧ шуис велӧдчысьясыслы: «Вунданыс уна, а вундысьыс этша. Кевмӧй вунданінын Ыджыдыслы, мед ыстас Аслас вунданінӧ уджалысьясӧс».
10 юр.
Исус корис дас кыкнан велӧдчысьсӧ да сетіс налы вын вӧтлавны пеж ловъясӧс да бурдӧдавны йӧзӧс быд висьӧм-доймӧмысь.
Дас кык апостолсӧ шуисны тадзи: Симон, кодӧс шуисны Петырӧн, сылӧн Ӧндрей вокыс, Зеведей Яков да сылӧн Иоан вокыс, Филип, Варфоломей, Фома, вот перйысь Матвей, Алфей Яков, Леввей, кодӧс шуисны Фаддейӧн, Кананит Симон да Искариот Иуда, Исусӧс вузалысь.
Тайӧ дас кыксӧ мӧдӧдігӧн Исус велӧдіс найӧс:
«Йӧз муясӧ энӧ мунӧй, Самария каръясӧ энӧ пырӧй.
Мунӧй израильса вошӧм ыжъяс дінӧ да юӧртӧй: “Енэжвыв Юралӧмыс матын нин”.
Висьысьясӧс бурдӧдалӧй, кулӧмаясӧс ловзьӧдӧй, проказаысь сӧстӧммӧдӧй, пеж ловъясӧс вӧтлалӧй.
Дон мынтытӧг босьтінныд, дон босьттӧг и сетӧй.
Туяныд энӧ босьтӧй зарни, эзысь, ыргӧн, ноп, вежан кӧм-пась да бедь. Ӧд уджалысь кынӧмпӧттӧг оз коль.
Сиктӧ-карӧ пыриганыд корсьӧй туяна-шогмана мортӧс, мунтӧдзныд олӧй сы ордын.
Керкаас пыриганыд сиӧй лӧнь олӧм.
Олысьясыс кӧ шогмӧны, бурсиӧмныд коляс налы.
Оз кӧ шогмыны, бурсиӧмныд бергӧдчас тіянлы.
Оз кӧ сибӧдны-кывзыны тіянӧс, сэки сійӧ керкасьыс либӧ карсьыс петіганыд пыркӧдӧй коксьыныд буссӧ.
Веськыда висьтала тіянлы: Мыждан лунӧ Содом да Гомора каръяслы лоас кокньыдджык сійӧ карыслы дорысь.
Ме мӧдӧда тіянӧс ыжъясӧс моз кӧинъяс пӧвстӧ. Лоӧй змей кодь сюсьӧсь да гулю кодь рамӧсь.
Видзчысьӧй йӧзысь, ӧд найӧ кыскасны тіянӧс ёрдӧ да асланыс синагогаясын нӧйтасны тіянӧс. Ме вӧсна нуӧдасны тіянӧс юралысьяс да ӧксыяс водзӧ, медым найӧ да ентӧдтӧмъяс тӧдісны Ме йылысь.
Кор нуӧдасны тіянӧс ёрдӧ, энӧ майшасьӧй, кыдзи да мый шуны, ӧд сійӧ кадас тіянлы воасны колана кывъяс. Сэки онӧ ті кутӧй сёрнитны, но Ен Батьныдлӧн Лолыс сёрнитас тіян пыр.
Вокыс воксӧ сетас вины, батьыс — писӧ.
Ныв-пи сувтасны бать-мамыслы паныд да виасны найӧс. Менам ним вӧсна унаӧн мустӧмтасны тіянӧс, но сьӧкыдсӧ помӧдз нуысь мездмас.
Ӧти карысь кӧ тіянӧс вӧтласны, пышйӧй мӧдӧ.
Веськыда висьтала тіянлы: Израильысь став карсӧ кытшовттӧдзныд на Морт Пи локтас.
Велӧдчысь абу ыджыдджык велӧдысьысь, да кесйӧг абу ыджыдджык аслас ыджыдысь. Велӧдчысьлы тырмымӧн быдмыны велӧдысьыс кодьӧдз, кесйӧглы — ыджыдыс кодьӧдз.
Керка кутысьӧс кӧ Вельзевулӧн шуасны, сылысь гортсасӧ лёкджыка на нимтасны.
Энӧ полӧй тіянӧс мустӧмтысьясысь. Став дзебӧмаыс тыдовтчас да став гусяыс йӧзасяс.
Мый Ме шуа тіянлы пемыдын, висьталӧй югыдын.
Пеляныд вашкӧдӧмасӧ юӧртӧй керка вывсянь.
Энӧ полӧй вир-яйтӧ виысьясысь, ловтӧ найӧ вины оз вермыны.
Полӧй Сыысь, коді вермӧ бырӧдны ловтӧ да вир-яйтӧ куслытӧм биын.
Оз-ӧ сӧмын ӧти урысь вузавны кык пышкайӧс?
На пиысь весиг ӧти оз усь муӧ тіян Батьлӧн шутӧг.
А тіянлысь став юрсинытӧ лыддьӧма.
Сідзкӧ, энӧ полӧй, ті ӧд донаджыкӧсь пышкайясысь».
«Коді оз яндысь Меысь йӧз водзын, сыысь Ме ог яндысь Аслам енэжвыв Бать водзын.
Коді соссяс Меысь йӧз водзын, сыысь Ме сосся Аслам енэжвыв Бать водзын.
Энӧ мӧвпалӧй, мый Ме локті вайны му вылӧ лӧнь олӧм.
Локті вайны эг лӧнь олӧм, но шыпурт.
Ме локті торйӧдны писӧ батьсьыс, нывсӧ мамсьыс, моньсӧ энькасьыс.
Мортлы паныд мунысьыс — сылӧн гортсаяс.
Кодлы бать-мамыс Ме дорысь мусаджык, Меным сійӧ оз шогмы.
Кодлы ныв-пиыс Ме дорысь мусаджык, Меным сійӧ оз шогмы.
Коді оз босьт ассьыс крестсӧ да оз мун Ме бӧрся, Меным сійӧ оз шогмы.
Ассьыс олӧмсӧ видзысь воштас сійӧс, Ме вӧсна олӧмсӧ воштысь аддзас сійӧс.
Тіянӧс сибӧдысь Менӧ сибӧдӧ, а Менӧ сибӧдысь сибӧдӧ Менӧ Мӧдӧдысьӧс.
Коді пророкӧс сибӧдас пророкӧс моз, сылы сетасны пророклы кодь удждон.
Коді веськыда олысьӧс сибӧдас веськыда олысьӧс моз, сылы сетасны веськыда олысьлы кодь удждон.
Веськыда висьтала тіянлы: коді кӧдзыд ваӧн юкталас тайӧ медічӧтъясысь ӧтиӧс Менсьым велӧдчысьӧс моз, сійӧ оз коль удждонтӧг».
11 юр.
Дас кыкнан велӧдчысьсӧ велӧдӧм-туйдӧдӧм бӧрын Исус муніс юӧртны да велӧдны мукӧд каръясӧ.
Дзескыдінын пукалігас Иоан кывліс Кристослӧн уджъяс йылысь. Сійӧ мӧдӧдіс ассьыс кык велӧдчысьсӧ юавны Исуслысь: «Тэ-ӧ сійӧ Локтысьыс? Колӧ-ӧ миянлы мӧдӧс виччысьны?»
Исус вочавидзис: «Мунӧй, висьталӧй Иоанлы, мый кыланныд да аддзанныд:
— Синтӧмъяс аддзӧны, коктӧмъяс ветлӧны, проказаысь сӧстӧммӧны, пельтӧмъяс кылӧны, кулӧмаяс ловзьӧны, коньӧръяслы Бур Юӧр висьтавлӧны. Шуда сійӧ, коді оз ылав Меысь».
Кор Иоанлӧн велӧдчысьясыс мунісны, Исус пондіс висьтавны йӧзыслы Иоан йылысь: «Мый видзӧдны ветлінныд овтӧминас?
Тӧлӧн вӧрӧдысь идзас-ӧ?
Мый видзӧдны ветлінныд?
Мича да озыр паськӧма мортӧс?
Татшӧм паськӧма йӧзыс олӧны ӧксы оланінъясын.
Кодӧс видзӧдны ветлінныд?
Пророкӧс-ӧ?
Шуа тіянлы: ті аддзылінныд пророкысь ыджыдӧс.
Сы йылысь гижӧма:
— Ыста Ассьым юӧртысьӧс Тэ водзвылын, сійӧ Тэныд туйсӧ дасьтас.
Веськыда висьтала тіянлы: му вылын чужысьясысь эз вӧвлы Пыртысь Иоанысь ыджыдджыкыс, но Енэжвыв Юраланінын медічӧтыс сы дорысь ыджыдджык.
Пыртысь Иоан лунъяссянь да ӧнӧдз Енэжвыв Юралӧмсӧ дзескӧдӧны, и паныд мунысьяс зільӧны мырддьыны сійӧс. Став пророкыс да Индӧдыс Иоанӧдз на юӧртлісны Енлӧн Юралӧм йылысь.
Кӧсъянныд кӧ тӧдны, сійӧ буретш Илля, кодлы колӧ вӧлі локны.
Кодлӧн эм пель, мед кылӧ.
Кодкӧд Ме ӧткодяла ӧнія олысьясӧс?
Найӧ изэрд вылын пукалысь челядь кодьӧсь, кодъяс ёртъясыслы шуалӧны: “Ми ворсім тіянлы пӧлянӧн, а ті энӧ йӧктӧй. Ми сьылім тіянлы бӧрдӧдчанкывъяс, а ті энӧ бӧрдӧй”.
Иоан локтіс, оз сёй, вина оз ю, шуӧны, сы пытшкын пӧ пеж лов.
Морт Пи локтіс, сёйӧ-юӧ, Сы йылысь шуӧны, рушку тыртысь да вина юысь пӧ, вот перйысьяскӧд да мыжаяскӧд ёртасьысь пӧ.
Мывкыдлунсӧ пыдди пуктӧны мывкыдлуныслӧн челядьыс».
Сэсся Исус пондіс мыжавны каръяс сыысь, мый сэтчӧс йӧзыс эз бергӧдчыны мыжъяссьыныс, ӧд тайӧ каръясас Исус вӧчис медуна шензьӧданатор.
«Курыд шог тэныд, Коразин кар.
Курыд шог тэныд, Випсаида кар.
Тир да Сидон каръясын кӧ аддзылісны тіянын кодь вӧчӧм шензьӧданаторъяссӧ, сэки эськӧ сэтчӧс олысьясыс важӧн нин бергӧдчисны мыжъяссьыныс, шогалан паськӧм пасьталісны да юрнысӧ пӧимӧн киськалісны. Висьтала тіянлы: Мыждан лунӧ Тир да Сидон каръяслы лоас кокньыдджык тіянлы дорысь.
Тэ, Капернаум кар, чайтан енэжӧдз кыпӧдчыны? Ад пыдӧсӧдз усян. Содом карын кӧ аддзылісны тіянын кодь вӧчӧм шензьӧданаторъяссӧ, сійӧ эськӧ ӧні на сулаліс. Висьтала тіянлы: Мыждан лунӧ Содом мулы лоас кокньыдджык тэныд дорысь».
Сэки Исус шуис: «Ошка Тэнӧ, Батьӧй, енэжыс да муыс вылын Ыджыдалысьӧс. Тэ дзебин тайӧс сюсь вежӧраясысь да восьтін кага коддьӧмлы.
Татшӧм вӧлі Тэнад бур кӧсйӧмыд, Батьӧй.
Батьӧй ставсӧ сетіс Меным. Сӧмын Батьыс тӧдӧ Писӧ, да сӧмын Пиыс тӧдӧ Батьсӧ, и нӧшта сійӧ, кодлы Пиыс кӧсйӧ восьтны.
Локтӧй Ме дінӧ мудзӧмаяс да сьӧкыда мырсьысьяс, Ме тіянӧс шойччӧда.
Босьтӧй Менсьым сийӧсӧс да велӧдчӧй Месянь, ӧд Ме рам да небыд сьӧлӧма. Сэки тіян ловлы сюрас шойччӧг. Ӧд Менам сийӧсӧй оз личкы, да Менам нӧбйӧй оз сьӧктӧд».
12 юр.
Шойччан лунӧ Исус мунӧ вӧлі кӧдзӧм муяс вомӧн.
Велӧдчысьяслӧн кынӧмыс кутіс сюмавны, и мунігмозныс найӧ пондісны нетшкыны шепсӧ да сёйны.
Тайӧс аддзылісны фарисейяс да шуисны Исуслы: «Видзӧдлы, мый Тэнад велӧдчысьясыд вӧчӧны. Тайӧс оз позь вӧчны шойччан лунӧ».
Исус воча шуис: «Ті ӧмӧй энӧ лыддьылӧй, мый вӧчис Давид, кор тшыгъяліс аслас йӧзкӧд?
Сійӧ пырис Ен керкаӧ да сёйис аслас йӧзкӧд Енлы вайӧм няньсӧ. Тайӧс налы вӧчнысӧ эз позь, сӧмын попъяслы позис.
Ті ӧмӧй энӧ лыддьылӧй Индӧдысь, мый шойччан лунӧ попъяс уджалӧны крамын, но шойччан лунсӧ торкалӧмысь найӧ абу мыжаӧсь.
Висьтала тіянлы: тані Сійӧ, коді крам дорысь ыджыдджык. Тӧдінныд кӧ тайӧс, мый “буралӧм тіянсянь кӧсъя, ог вись вайӧм”, сэки эськӧ энӧ мыжалӧй мыжтӧмъясӧс. Морт Пи шойччан лун вылын ыджыдыс».
Сэтысь мунӧм бӧрын Исус пырис синагогаӧ.
Сэні вӧлі косьмӧм киа морт.
Фарисейяс корсисны помка мыжавны Исусӧс да юалісны Сылысь: «Позьӧ-ӧ шойччан лунӧ бурдӧднысӧ?»
Исус вочавидзис: «Тіян ыжныд кӧ шойччан лунӧ усяс гуӧ, онӧ ӧмӧй лэптӧй сійӧс сэтысь?
Мортыс абу ӧмӧй донаджык ыжысь?
Сідзкӧ, бурсӧ позьӧ вӧчны шойччан лунӧ».
Сэсся Исус шуис висьысьлы: «Нюжӧд китӧ».
Сійӧ нюжӧдіс, и киыс пырысь-пыр бурдіс, лои мӧдыс кодь.
Сэки фарисейяс петісны да панісны сёрни Исусӧс виӧм йылысь.
Кор Исус тӧдмаліс та йылысь, муніс сэтысь.
Сы бӧрся вӧтчис уна йӧз.
Исус бурдӧдаліс висьысьясӧс да ӧлӧдіс найӧс Сы йылысь висьтавлӧмысь. Тадзи иніс Исай пророклӧн шуӧмыс:
— Тайӧ Менам бӧрйӧм кесъялысьӧй, сьӧлӧм бурӧдысьӧй да олан гажӧй.
Ме сета Сылы Ассьым Лолӧс. Сійӧ юӧртас Менсьым веськыда мыждӧмӧс быд кыла войтырлы.
Оз вензьы, оз горзы Сійӧ, ывлаысь Сійӧс он кыв.
Веськыда мыждӧмсӧ пӧрттӧдз Сійӧ идзастор оз чег да дзузган би оз кусӧд. Сы вылӧ лача пондас кутны быд кыла войтыр.
Исус дінӧ вайӧдісны пеж лолӧн кутӧмаӧс. Тайӧ мортыс вӧлі синтӧм да эз сёрнит.
Исус бурдӧдіс сійӧс, мӧдыс пондіс сёрнитны да аддзыны.
Став йӧзыс чуймисны, ӧта-мӧдныслысь юасисны: «Збыльысь-ӧ сійӧ Давид Пи?»
Тайӧс кывлісны фарисейяс да шуисны, Сійӧ пӧ вӧтлалӧ пеж ловъясӧс налӧн Вельзевул юралысь вынӧн.
Налысь мӧвпъяссӧ тӧдӧмӧн Исус шуис: «Ас муын олысьяс кӧ ас костаныс тышкасьӧны, тайӧ муыс кушмас.
Зыксьӧмӧн олысь карыд да керкаыд дыр оз сулав.
Сӧтанаыс кӧ сӧтанасӧ вӧтлӧ, сійӧ аслыс паныд тышкасьӧ. Дыр-ӧ кутчысяс сылӧн ыджыдалӧмыс?
Ме кӧ вӧтлала пеж ловъясӧс Вельзевул вынӧн, кутшӧм вынӧн, сідзкӧ, тіян йӧзыд вӧтлалӧны?
Найӧ тіянӧс мыждасны.
Ме кӧ Ен Лолӧн вӧтлала пеж ловъясӧс, сідзкӧ, Енлӧн Юралӧмыс воис тіянӧдз.
Вермас-ӧ кодкӧ пырны вына мортлӧн керкаӧ да сійӧс кӧртавтӧг босьтны сылысь эмбурсӧ? Вына мортӧс кӧрталӧм бӧрын сӧмын вермас босьтны эмбурсӧ.
Коді абу Мекӧд, сійӧ Меным паныд, коді оз чукӧрт Мекӧд, сійӧ разӧдӧ.
Та вӧсна висьтала тіянлы: мортлысь быд мыж да быд омӧльтӧм лоӧ прӧститӧма, но Вежа Лолӧс омӧльтӧм оз ло прӧститӧма.
Лёкӧдан кӧ Морт Пиӧс, лоан прӧститӧма.
Лёкӧдан кӧ Вежа Лолӧс, он ло прӧститӧма тайӧ олӧмас, весиг локтанаас».
«Бур пу вайӧ бур вотӧс, лёк пу — лёкӧс. Путӧ донъялӧны вотӧс сертиыс.
Вижля йылӧм.
Верманныд-ӧ бурсӧ висьтавны, асьныд кӧ лёкӧсь?
Ӧд мыйӧн тырӧма мортыслӧн сьӧлӧмыс, сійӧ вомсьыс и петӧ.
Бур морт аслас бур видзанінысь бурсӧ петкӧдӧ, лёк морт аслас лёк видзанінысь лёксӧ петкӧдӧ.
Шуа тіянлы: быд ковтӧм кывйысь Мыждан лунӧ ковмас кывкутны. Аслад кывъясысь мыжман, аслад кывъясысь мездман мыждӧмысь».
Сэки фарисейяс да Индӧдӧ велӧдысьяс пиысь кодсюрӧ корисны: «Велӧдысь, петкӧдлы миянлы индысьпас».
Исус воча шуис: «Лёк да пежас ылалӧм йӧз кӧсйӧны аддзывны индысьпас, но Иона пророк пасысь кындзи оз ло налы мӧдыс. Куим лун да куим вой Иона вӧлі ыджыд чери рушкуын. Тадзи Морт Пи лоӧ му пыдӧсын куим лун да куим вой.
Ниневия карын олысьяс сувтасны Мыждан лунӧ ӧнія олысьяскӧд да мыжаласны найӧс. Ӧд Ионалӧн юӧртӧм бӧрын ниневияса йӧз бергӧдчисны асланыс мыжъясысь. Тані Иона дорысь ыджыдджык.
Лунвыв муысь ӧксы-ань сувтас Мыждан лунӧ ӧнія олысьяскӧд да мыжалас найӧс. Ӧд сійӧ му помсяньыс воліс кывзыны Соломонлысь мывкыд сёрнисӧ. Тані Соломон дорысь ыджыдджык».
«Морт пытшкысь петӧм бӧрын пеж лов шӧйтӧ ватӧминъясті, корсьӧ шойччанін да оз аддзы.
Сэки шуӧ: “Бӧр муна важ оланінӧ, кытысь петі”.
Локтӧм бӧрас аддзӧ: оланінсӧ чышкӧма-пелькӧдӧма, и олысьыс сэні абу.
Сэки мунӧ да босьтӧ аскӧдыс сизим пеж лолӧс, ассьыс на лёкджыкъясӧс, сэсся ставныс найӧ овмӧдчӧны важ оланінас. Тайӧ мортыслы воддза дорсьыс нӧшта на лёкджык лоӧ.
Тадзи жӧ лоӧ ӧнія лёк йӧзлы».
Йӧзкӧд сёрнитігкостіыс локтісны Исуслӧн мамыс да вокъясыс. Найӧ сулалісны ывлаас да кӧсйисны сёрнитыштны Сыкӧд.
Ӧти морт шуис Исуслы: «Мамыд вокъясыдкӧд ывлаасӧсь, Тэкӧд кӧсйӧны сёрнитны».
Исус воча шуис: «Коді Меным мамыс?
Кодъяс Меным вокъясыс?»
Велӧдчысьяс вылас индӧмӧн шуис: «Найӧ Менам вокъясӧй да Менам мамӧй. Енэжвыв Батьлӧн кӧсйӧм серти олысь — Меным вок, чой да мам».
13 юр.
Сійӧ лунӧ керкаысь петӧм бӧрын Исус лэччис ты дорӧ да пуксис.
Зэв уна йӧз чукӧртчис Исус дінӧ, Сылы весиг ковмис пуксьыны пыжӧ, а йӧзыс сулалісны вадорас.
Исус висьталіс налы уна велӧданвисьт: «Морт кӧдзны петас. Кӧдзигас кымынкӧ кӧйдыс усяс туй бокӧ. Сэтчӧ воасны лэбачьяс да кокаласны. Кымынкӧ кӧйдыс усяс изъяинӧ. Этша муыс вӧсна ляпкыдінад найӧ ӧдйӧ чужасны.
Петас шонді, пӧжны пондас, и омӧль вужъя петасыд косьмас. Кымынкӧ кӧйдыс усяс лежнӧг пӧвстӧ. Быдмигас лежнӧгыс пӧдтас петассӧ. Мукӧд кӧйдысыс усяс бур муӧ да ваяс уна тусь: ӧтияс — сё пӧв, мӧдъяс — квайтымын пӧв, коймӧдъяс — комын пӧв.
Кодлӧн эм пель, мед кылӧ.»
Велӧдчысьяс матыстчисны Исус дінӧ да юалісны: «Мыйла Тэ сёрнитан йӧзыскӧд велӧданвисьтъясӧн?»
Исус вочавидзис: «Енэжвыв Юралӧмлысь гусяторъяссӧ тіянлы сетӧма тӧдны, а налы абу. Кодлӧн эм, сылы коланасьыс унджык на сетасны. Кодлӧн абу, сылысь бӧръясӧ босьтасны. Найӧ видзӧдӧны да оз аддзыны, кывзӧны да оз кывны и оз гӧгӧрвоны. Та вӧсна сёрнита накӧд велӧданвисьтъясӧн.
Исай пророклӧн шуӧмыс инӧ: — Пельнаныд кутанныд кывзыны да онӧ гӧгӧрвоӧй, синнаныд кутанныд видзӧдны да онӧ аддзӧй.
Чорзьӧма тайӧ войтырыслӧн сьӧлӧмыс, сьӧкыд пеляӧсь, куньса синмаӧсь. Аддзынысӧ оз зільны, кывзынысӧ оз кӧсйыны, сьӧлӧмнаныс оз гӧгӧрвоны. Мелань бергӧдчынысӧ оз кӧсйыны, медым Ме бурдӧді найӧс.
Ті шудаӧсь, ӧд тіян синныд аддзӧ да пельныд кылӧ. Веськыда висьтала тіянлы: уна пророк да веськыда олысь кӧсйисны аддзывны, мый ті аддзанныд, но эз аддзывны. Кӧсйисны кывны, мый ті кыланныд, но эз кывлыны».
«Кывзӧй, Ме гӧгӧрвоӧда тіянлы кӧдзысь йылысь велӧданвисьтӧс.
Мортыс кылӧ Енлӧн Юралӧм йылысь да оз гӧгӧрво. Сы дінӧ локтӧ омӧльыс да гусялӧ сьӧлӧмас кӧдзӧмасӧ. Тайӧс петкӧдлӧ туй бокӧ усьӧм кӧйдыс.
Изъяинӧ усьӧм кӧйдысыс петкӧдлӧ: мортыс кылӧ Кывсӧ да дзик пыр долыдпырысь босьтӧ сійӧс сьӧлӧмас, но вужъясьтӧмысла оз дыр эскы, Ен Кыв вӧсна дзескӧдігӧн-вӧтлігӧн сійӧ эновтчӧ эскӧмсьыс.
Лежнӧг пӧвстӧ усьӧм кӧйдысыс петкӧдлӧ: мортыс кылӧ Кывсӧ, но быдлунъя тӧждыс да озырмыны ыштӧмыс пӧдтӧ кӧдзӧм Кывсӧ, и сійӧ оз вай вотӧссӧ.
Бур муӧ кӧдзӧм кӧйдысыс петкӧдлӧ: мортыс кылӧ Кывсӧ, гӧгӧрвоӧ сійӧс да вайӧ вотӧс: ӧтияс — сё пӧв, мӧдъяс — квайтымын пӧв, коймӧдъяс — комын пӧв».
Исус висьталіс мӧд велӧданвисьт: «Енэжвыв Юралӧмыс татшӧм. Морт кӧдзас аслас муӧ бур кӧйдыс. Войнас узигкостіыс локтас паныд мунысь да шобді кӧйдыс костас ёг турун кӧдзас, сэсся мунас. Шобді петас, кутас шептасьны, ёг турун тшӧтш мыччысяс.
Кесйӧгъяс локтасны овмӧс кутысьныс дінӧ да шуасны: “Ыджыдӧй, эн-ӧ бур кӧйдыс тэ кӧдзлы муад?
Кытысь нӧ ёг туруныс сэтчӧ петӧма?
” Сійӧ вочавидзас: “Паныд мунысь тайӧс вӧчӧма”.
Кесйӧгъяс шуасны: “Кӧсъян кӧ, ёг турунсӧ ми нетшкам”.
Мӧдыс вочавидзас: “Оз ков. Ёг турун сорнас шобді петассӧ тшӧтш верманныд нетшыштны. Кольӧй, мед быдмасны ӧтлаын вундан кадӧдзыс.
Сэки ме тшӧкта вундысьяслы: медводз ёг турунсӧ чукӧртӧй, сэсся кольтаясӧ кӧртавлӧй да сотӧй, а шобдісӧ идралӧй менам йӧртӧдӧ”».
Мӧд велӧданвисьт Исус висьталіс налы: «Енэжвыв Юралӧмыс муӧ кӧдзӧм горчица тусь кодь. Став кӧйдыссьыс сійӧ медпосни. Сійӧ быдмӧ да лоӧ пу кодь, став пуктассьыс ыджыд, весиг енэжвыв лэбачьяс поздысьӧны вожъясас».
Исус нӧшта ӧти велӧданвисьт висьталіс: «Енэжвыв Юралӧмыс няньшом кодь. Ань гудралас сэтчӧ куим шомӧс тыр пызь, кад мысти няньыс ловзяс».
Ставсӧ тайӧс Исус висьталіс йӧзыслы велӧданвисьтъясӧн. Висьтъястӧг эз сёрнитлы накӧд, медым иніс пророклӧн шуӧмыс:
— Ме велӧданвисьтъясӧн сёрнита, му пуксьӧмсяньыс дзебӧмасӧ юӧрта.
Йӧзсӧ кольӧм бӧрын Исус пырис керкаӧ.
Сэтчӧ локтісны велӧдчысьясыс да найӧ корисны: «Гӧгӧрвоӧд миянлы ёг турун йылысь висьттӧ».
Исус висьталіс: «Бур кӧйдыссӧ кӧдзысьыс — Морт Пи. Кӧдза муыс — муюгыд. Бур кӧйдысыс — Енлӧн йӧзыс, ёг туруныс — омӧльлӧн йӧзыс. Паныд мунысьыс, ёг турунсӧ кӧдзысьыс, — омӧль. Вундан кадыс — нэм пом, вундысьясыс — анделъяс.
Кыдзи чукӧртӧм ёг турунсӧ сотӧны, тадзи лоӧ нэм помасигӧн. Морт Пи Ассьыс анделъяссӧ мӧдӧдас чукӧртны Аслас Юраланінысь став ыштӧдысьсӧ да лёк вӧчысьсӧ. Сэсся шыбитасны найӧс биӧ. Сэні лоӧ бӧрдӧм да пинь йирӧм. Веськыда олысьяс сэки Батьныс Юраланінын шонді моз кутасны югъявны.
Кодлӧн эм пель, мед кылӧ.»
«Енэжвыв Юралӧмыс муӧ дзебӧм озырлун кодь. Морт аддзас муысь озырлун да сійӧс бӧр гуалас. Нимкодьысла сійӧ мунас, вузалас ассьыс став овмӧссӧ да ньӧбас тайӧ мусӧ.
Енэжвыв Юралӧмыс татшӧм. Дона изъясӧн вузасьысь мунас корсьны мича изъяс да аддзас донасьыс-дона из. Сійӧ мунас, вузалас ассьыс став овмӧссӧ да ньӧбас тайӧ изсӧ».
«Енэжвыв Юралӧмыс саридзӧ вӧйталӧм тыв кодь. Быдсяма чериыс сэтчӧ шедас. Тывсӧ вадорӧ лэптӧм бӧрын чери кыйысьяс бур черисӧ дозйӧ чукӧртасны, лёксӧ шыблаласны.
Тадзи лоӧ нэм помасигӧн: анделъяс локтасны, торйӧдасны лёк йӧзӧс веськыда олысьясысь да биӧ шыбитасны. Сэні лоӧ бӧрдӧм да пинь йирӧм».
Исус юаліс: «Ставсӧ-ӧ гӧгӧрвоинныд?»
Велӧдчысьяс вочавидзисны: «Гӧгӧрвоим, Господь».
Исус шуис налы: «Индӧдӧ велӧдысь, коді тӧдӧ Енлысь Юралӧмсӧ, керка кутысь кодь, коді аслас видзанінысь выльсӧ и важсӧ петкӧдӧ».
Тайӧ велӧданвисьтъяссӧ висьталӧм бӧрын Исус муніс сэтысь Аслас карӧ. Сэні велӧдіс йӧзсӧ синагогаын. Кывзысьяс шензьӧмӧн шуалісны: «Кытысь Сылӧн татшӧм мывкыдлуныс да татшӧм выныс?
Абу-ӧ Сійӧ тшупсьысьлӧн пи?
Абу-ӧ Сылӧн мамыс Мария, а вокъясыс — Яков, Иосей, Симон да Иуда?
Оз-ӧ тані овны Сылӧн чойясыс?
Кытысь Сылӧн ставыс тайӧ?»
Тадзи Сійӧс ӧтдортісны.
Исус шуис налы: «Пророкӧс пыдди пуктӧны быдлаын, сӧмын ас карас да ас гортас оз».
Йӧзыслӧн эскытӧм вӧсна Исус эз вӧч сэні уна шензьӧданаторсӧ.
14 юр.
Сійӧ кадӧ Ирӧд ӧксы кыліс Исус йылысь. Аслас кесъялысьяслы Ирӧд шуис: «Тайӧ Пыртысь Иоан, сійӧ ловзьӧма, та вӧсна вермӧ вӧчны шензьӧданаторъяс».
Филип вокыслӧн Ирӧдиада гӧтырыс вӧсна Ирӧд тшӧктыліс босьтны Иоанӧс да дорӧмӧн пуксьӧдны дзескыдінӧ. Ӧд Иоан ӧлӧдліс Ирӧдӧс: «Тайӧ аньыскӧд тэныд оз позь овнытӧ».
Ирӧд кӧсйис вины Иоанӧс, сӧмын йӧзсьыс поліс, ӧд найӧ пуктісны Иоанӧс пророкӧ.
Ирӧд нимлунасигӧн Ирӧдиадалӧн нылыс йӧктіс гажӧдчысьяс водзын. Тайӧ воис Ирӧдлы сьӧлӧм вылас. Сійӧ кыв сетіс нывлы: «Сета тэныд, мый коран».
Мамыс велӧдӧм серти ныв шуис: «Вай меным тасьтіын Пыртысь Иоанлысь юрсӧ».
Ӧксы шогӧ усис. Гажӧдчысьяс водзын сетӧм кывйыс вӧсна сійӧ тшӧктіс вӧчны нывлӧн корӧм серти. Ирӧд ыстіс ассьыс йӧзсӧ дзескыдінӧ керыштны Иоанлысь юрсӧ.
Сэсся вайисны тасьтіын юрсӧ да сетісны нывлы, нылыс нуис сійӧс мамыслы.
Иоанлӧн велӧдчысьясыс локтісны шойысла да дзебисны сійӧс.
Сэсся мунісны да юӧртісны лоӧмтор йывсьыс Исуслы.
Тайӧс кылӧм бӧрын Исус ӧтнас пыжӧн мӧдіс овтӧминӧ.
Йӧзыс тӧдмалісны та йылысь да подӧн мунісны каръяссьыныс Сы бӧрся.
Пыжысь чеччигӧн Исус аддзис уна йӧзӧс. Сылӧн сьӧлӧмыс нормис на вӧсна, и Сійӧ бурдӧдіс висьысьясӧс.
Рытнас матыстчисны Исус дінӧ велӧдчысьясыс да шуисны: «Тані овтӧмин, и кадыс сёр нин.
Ысты йӧзсӧ сиктъясӧ сёянтор ньӧбны».
Исус шуис: «Оз ков налы муннысӧ. Ті сетӧй налы сёянсӧ».
Велӧдчысьяс воча шуисны: «Миян сьӧраным сӧмын вит нянь да кык чери».
Исус шуис: «Вайӧй меным татчӧ».
Сійӧ тшӧктіс йӧзыслы пуксявны муас. Ачыс босьтіс вит няньсӧ да кык черисӧ, видзӧдліс енэжӧ да Енмӧс аттьӧалӧмӧн чегис няньсӧ, сэсся сетіс велӧдчысьясыслы. Велӧдчысьяс разӧдісны йӧзыслы.
Ставныс пӧттӧдзныс сёйисны, коляссӧ дас кык куд тыр чукӧртісны.
Аньясысь да челядьысь ӧтдор сёйысьыс вӧлі вит сюрс гӧгӧр.
Та бӧрын Исус тшӧктіс велӧдчысьясыслы пуксьыны пыжӧ да вуджны Сытӧг ты мӧдлапӧлӧ. Ачыс кольччис да мӧдӧдаліс йӧзсӧ.
Йӧзӧс ыстӧм бӧрын Исус кайис керӧсӧ кевмысьны да рытсӧ сэні вӧлі ӧтнас.
Сійӧ кадӧ пыжаяс вӧліны ты шӧрасӧсь, вермасисны гыяскӧд да паныд тӧвкӧд.
Асъядорыс Исус мӧдӧдчис ва вывті велӧдчысьяс дінас.
Кор найӧ аддзисны ва вывті восьлалысь Исусӧс, повзьӧмнысла горӧдісны: «Тайӧ орт.»
Исус шуис: «Лӧньӧй, тайӧ Ме. Энӧ полӧй».
Сэки Петыр шуис: «Господьӧй, тайӧ кӧ Тэ, тшӧкты меным ва вывтіыс локны Тэ дінӧ».
Исус шуис: «Лок».
Пыжсьыс воськовтӧмӧн Петыр мӧдіс ва вывтіыс Исус дінӧ. Ыджыд тӧвнырысь Петырӧс полӧм босьтіс. Сійӧ вӧйны пондіс да горӧдіс: «Господьӧй, мезды менӧ.»
Исус дзик пыр нюжӧдіс кисӧ Петырлы, кутіс сійӧс да шуис: «Этша эскысьӧй, мыйла падъялан?»
Пыжӧ пуксиганыс тӧлыс лӧнис.
Пыжын пукалысьяс уськӧдчисны Исус водзӧ да шуисны: «Тэ збыльысь Ен Пи».
Тысӧ вуджӧм бӧрын найӧ воисны Генесарет муӧ.
Сэтчӧс йӧзыс тӧдмалісны Исусӧс да юӧртісны та йылысь матігӧгӧрас олысьяслы. Найӧ вайӧдісны Исус дінӧ став висьысьсӧ да корисны, мед висьысьяслы Исус лэдзас инмӧдчывны паськӧм дорышас. Инмӧдчылысьяс ставӧн бурдісны.
15 юр.
Сэки Ерусалимысь Исус дінӧ воисны фарисейяс Индӧдӧ велӧдысьяскӧд да шуисны Сылы: «Мыйла велӧдчысьясыд пӧрысьяслысь шуӧмсӧ торкӧны: сёйӧм водзвылас кинысӧ оз мыськавны?»
Исус воча шуис налы: «Асьныд ті мыйла кутчысянныд батьяслӧн шуӧмӧ да торканныд Енлысь тшӧктӧмсӧ?
Енмыс шуӧма: “Пыдди пукты ассьыд бать-мамтӧ”, “Омӧльтан кӧ бать-мамтӧ, тэнӧ кулӧм вылӧ мыждасны”.
А ті велӧданныд: морт кӧ бать-мамыслы сетӧм пыдди кӧсйысяс сетны Енлы, тайӧн бать-мам пыдди пуктӧмсӧ сійӧ оз торк. Батьяслӧн шуӧм вӧсна ті вештанныд Енлысь тшӧктӧмсӧ.
Кык бана шаньгаяс.
Бура шуӧма тіян йылысь Исай пророк:
— Тайӧ йӧзыс вомнас пыдди пуктӧны Менӧ, но налӧн сьӧлӧмыс ылын Меысь. Весьшӧрӧ ыдждӧдлӧны Менӧ мортсянь тшӧктӧмъясӧ велӧдігӧн».
Ас дінас йӧзӧс корӧмӧн Исус шуис: «Кывзӧй да гӧгӧрвоӧй.
Мортӧс оз пежав сійӧ, мый вомас пырӧ, а пежалӧ, мый вомсьыс петӧ».
Велӧдчысьясыс матыстчисны Исус дінӧ да шуисны: «Тӧдан-ӧ Тэ, мый фарисейяс дӧзмӧмаӧсь Тэнад сёрнияссьыд?»
Сійӧ вочавидзис: «Быдмӧгсӧ кӧ абу енэжвыв Батьӧй пуктӧма, сійӧс вужнас нетшыштасны.
Кольӧй найӧс, найӧ синтӧмъясӧс синтӧм нуӧдысьяс.
Синтӧм кӧ нуӧдӧ синтӧмӧс, кыкнанныс гуранӧ усясны».
Петыр шуис: «Гӧгӧрвоӧд миянлы висьталӧмтӧ».
Исус вочавидзис: «Весиг ті онӧ на гӧгӧрвоӧй.
Онӧ ӧмӧй вежӧртӧй: мый пырӧ вомӧ, сійӧ веськалӧ кынӧмӧ, сэсся ортсӧ петӧ.
Мый петӧ вомысь, сійӧ петӧ сьӧлӧмысь да пежалӧ мортӧс.
Буретш сьӧлӧмысь петӧны лёк мӧвпъяс, морт виӧм, гозъя олӧм пежалӧм, кырсалӧм, гусясьӧм, пӧръясьӧм да омӧльтӧм. Тайӧ пежалӧ мортсӧ.
А мыськавтӧм киӧн сёйӧмыд морттӧ оз пежав».
Сэсся Исус муніс Тир да Сидон муясӧ.
Сы дінӧ локтіс сэні олысь ханаанса ань да пондіс горзыны: «Господьӧй, Давид Пи. Ло бур сьӧлӧма ме дінӧ. Пеж лов пырӧма менам ныв пытшкӧ да чорыда песлӧдлӧ сійӧс».
Исус кыв эз шу аньлы.
Велӧдчысьясыс матыстчисны Исус дінӧ да шуисны: «Лэдз аньсӧ, сійӧ горзӧмӧн бӧрсяньным ветлӧдлӧ».
Исус шуис: «Менӧ мӧдӧдӧма сӧмын израильса вошӧм ыжъяс дінӧ».
Ань матыстчис да Исус водзӧ уськӧдчӧмӧн корис: «Господьӧй, отсав меным.»
Исус шуис: «Абу бур мырддьыны ныв-пилысь няньсӧ да шыбитны сійӧс понпиянлы».
Ань воча шуис: «Сідз, Господьӧй.
Но понъяс тшӧтш сёйӧны кӧзяиныслӧн пызан вылысь гылалӧм торпыригсӧ».
Исус шуис: «Ыджыд тэнад эскӧмыд, аньӧй. Мед лоӧ тэнад кӧсйӧм сертиыд».
Аньлӧн нылыс дзик пыр бурдіс.
Сэтысь Исус водзӧ мӧдіс. Сійӧ муніс Галилея ты пӧлӧн, сэсся кайис керӧсӧ да пуксис.
Сы дінӧ чукӧртчис уна йӧз. На пӧвстын вӧліны китӧм-коктӧмъяс, синтӧмъяс, сёрниттӧмъяс да мукӧд висьысьяс. Найӧс вайӧдісны Исус водзӧ, и Сійӧ бурдӧдаліс найӧс. Йӧзыс чуймисны, кор налӧн син водзын сёрниттӧмъяс кутісны сёрнитны, китӧмъяс бурдны, коктӧмъяс ветлыны да синтӧмъяс аддзыны. Ставӧн ошкисны Израильлысь Енмӧс.
Исус корис велӧдчысьяссӧ да шуис: «Менам сьӧлӧмӧй висьӧ тайӧ йӧзыс вӧсна. Найӧ куим лун нин танӧсь, а налӧн сёяныс абу.
Ог кӧсйы мӧдӧдны найӧс сёйтӧгыс, мед туяс дзикӧдз оз эбӧстӧммыны».
Велӧдчысьяс шуисны: «Кытысь босьтны овтӧминас сы мында няньсӧ, медым вердны та мындасӧ?»
Исус юаліс: «Уна-ӧ тіян няньныд?»
Найӧ вочавидзисны: «Сизим. Кымынкӧ посни чери на эм».
Исус тшӧктіс йӧзыслы пуксявны муас.
Ачыс босьтіс сизим няньсӧ да черисӧ, Енмӧс аттьӧалӧмӧн чегис няньсӧ да сетіс велӧдчысьясыслы, а велӧдчысьяс — йӧзыслы.
Ставӧн пӧттӧдзныс сёйисны, коляссӧ сизим куд тыр чукӧртісны. Аньясысь да челядьысь ӧтдор сёйысьыс вӧлі нёль сюрс морт.
Йӧзсӧ мӧдӧдалӧм бӧрын Исус пуксис пыжӧ да кывтіс Магдала муӧ.
16 юр.
Фарисейяс да саддукейяс локтісны Исус дінӧ да Сійӧс кыйӧм могысь корисны петкӧдлыны енэжсянь индысьпас.
Исус шуис налы: «Рытнас ті шуанныд: “Енэжыс гӧрд — аски лоӧ мича”. Асывводзнас шуанныд: “Енэжыс пемыдгӧрд — кыптас бушков”.
Кык бана шаньгаяс.
Енэжлысь чужӧмбансӧ кужанныд тӧдмавны, а кадлысь пасъяссӧ онӧ.
Лёк да пежас ылалӧм йӧз кӧсйӧны аддзывны индысьпас, но Иона пророк пасысь кындзи оз ло налы мӧдыс».
Сэсся Исус колис найӧс да муніс сэтысь.
Ты мӧдлапӧлӧ вуджиганыс велӧдчысьяс казялісны, мый вунӧдӧмаӧсь босьтны няньсӧ.
Исус шуис налы: «Видзчысьӧй фарисей да саддукей няньшомысь».
Велӧдчысьяс ас костаныс сёрнитісны: «Няньтӧ тай босьтны вунӧдім».
Тайӧс казялӧмӧн Исус шуис налы: «Этша эскысьяс. Мый нӧ сёрнитанныд нянь абутӧм йывсьыд?
Онӧ ӧмӧй гӧгӧрвоӧй? Вунӧдінныд ӧмӧй вит сюрс мортӧс вит няньӧн вердӧм йылысь? Кымын куд тыр сэки коляссӧ чукӧртінныд?
А нёль сюрс мортӧс сизим няньӧн вердігӧн, кымын куд тыр чукӧртінныд?
Кыдзи ті онӧ гӧгӧрвоӧй, эг ӧд нянь йылысь Ме тіянлы висьтав, мися, видзчысьӧй фарисей да саддукей няньшомысь.»
Сэки найӧ гӧгӧрвоисны, мый Исус тшӧктіс видзчысьны налы фарисейяслӧн да саддукейяслӧн велӧдӧмысь, эз няньшомысь.
Исус воис Филиплӧн Кесария муӧ да юаліс велӧдчысьясыслысь: «Код туйӧ йӧзыс пуктӧны Менӧ, Морт Пиӧс?»
Найӧ вочавидзисны: «Ӧтияс шуӧны, Пыртысь Иоан пӧ, мӧдъяс шуӧны, Илля пӧ, кодсюрӧ шуӧны, Еремей пӧ, а гашкӧ, нӧшта на мӧд пророк».
Исус юаліс: «Код туйӧ ті Менӧ пуктанныд?»
Симон-Петыр вочавидзис: «Тэ — Кристос, ловъя Енлӧн Пи».
Исус шуис Петырлы: «Тэ шуда, Симон, Ионалӧн пи. Ӧд тайӧс тэныд эз морт висьтав, но Менам енэжвыв Батьӧй восьтіс тэныд.
Ме шуа тэныд: Тэ — Петыр, из. Тайӧ из вылас Ме лэпта Ассьым Вичко, да сійӧс адлӧн выныс оз вермы. Ме сета тэныд Енэжвыв Юраланінысь восьтанъяс. Мый кӧрталан му вылын, сійӧ кӧрталӧма лоӧ енэжын. Мый разян му вылын, сійӧ разьӧма лоӧ енэжын».
Исус ӧлӧдіс велӧдчысьяссӧ, медым некодлы эз висьтавны, мый Сійӧ — Кристос.
Тайӧ кадсянь Исус кутіс висьтавлыны велӧдчысьясыслы, мый Сылы ковмас мунны Ерусалимӧ да уна сьӧкыд сэні нуны пӧрысьяссянь, аркирейяссянь да Индӧдӧ велӧдысьяссянь. Сійӧс виасны, но коймӧд луннас Сійӧ ловзяс.
Исусӧс бокӧ корӧмӧн Петыр шуис: «Ен мед видзас Тэнӧ, Господьӧй.
Мед оз ло тайӧ.»
Бергӧдчӧмӧн Исус шуис Петырлы: «Вешйы Ме дінысь, сӧтана.
Тэ Менӧ крукӧдан, ӧд тэнад мӧвпъясыд мортсянь, абу Енсянь».
Исус шуис велӧдчысьясыслы: «Коді кӧсйӧ мунны Ме бӧрся, мед вунӧдас асьсӧ, мед босьтас ассьыс крестсӧ да локтас Ме бӧрся.
Коді кӧсйӧ видзны ассьыс олӧмсӧ, воштас сійӧс. Ме вӧсна олӧмсӧ воштысь аддзас сійӧс.
Лоас-ӧ мортыслы бур, босьтас кӧ аслыс став муюгыдсӧ, а олӧмсӧ воштас?
Вермас-ӧ бӧр ньӧбны ассьыс олӧмсӧ?
Морт Пи локтас Батьыслӧн дзирдлунӧн Сылӧн анделъяскӧд да быдӧнлы уджъяс сертиыс мынтас.
Веськыда висьтала тіянлы: кодсюрӧ тані сулалысьяс пиысь кувтӧдзныс на аддзасны юравны локтысь Морт Пиӧс».
17 юр.
Квайт лун мысти Исус босьтіс Аскӧдыс Петырӧс да Яковӧс Иоан вокыскӧд да кайис накӧд джуджыд керӧсӧ. Велӧдчысьяс син водзын Исуслӧн мыгӧрыс вежсис: чужӧмыс пондіс шонді моз югъявны, паськӧмыс лои дзирдалана еджыд.
Сэки велӧдчысьяс аддзисны Мӧисейӧс да Илляӧс, найӧ сёрнитісны Исускӧд.
Петыр шуис Исуслы: «Господьӧй, миянлы тані лӧсьыд.
Кӧсъян кӧ, куим чом татчӧ сувтӧдам: Тэныд, Мӧисейлы да Иллялы».
Петырлӧн сёрнитігкості югыд кымӧр вевттис найӧс, кымӧрсянь кыліс гӧлӧс шы: «Тайӧ Менам муса Пиӧй, Ме нимкодяся Сыӧн. Сійӧс кывзӧй».
Тайӧс кылӧмысь велӧдчысьяс ёна повзисны, чужӧмнысӧ тупкӧмӧн уськӧдчисны муас.
Исус матыстчис, инмӧдчыліс на дінӧ да шуис: «Чеччӧй, энӧ полӧй».
Юрнысӧ лэптӧм бӧрын найӧ аддзисны сӧмын Исусӧс.
Керӧсысь лэччиганыс Исус шуис налы: «Морт Пилӧн ловзьытӧдз некодлы энӧ висьталӧй, мый аддзылінныд».
Велӧдчысьяс юалісны Исуслысь: «Мыйла Индӧдӧ велӧдысьяс шуӧны, Иллялы пӧ колӧ водзджык локны?»
Сійӧ вочавидзис: «Дерт, Иллялы колӧ водзджык локны да ставсӧ лӧсьӧдны. Висьтала тіянлы: Илля локтіс нин. Сӧмын йӧзыс сійӧс эз тӧдны, сыкӧд вӧчисны, мый кӧсйисны.
Тадзи тшӧтш Морт Пилы уна сьӧкыд насянь вичмас».
Велӧдчысьяс сэки гӧгӧрвоисны, мый Исус висьталіс налы Пыртысь Иоан йылысь.
Найӧ мӧдӧдчисны йӧз чукӧрлань. Муніганыс матыстчис Исус дінӧ морт, сійӧ пидзӧс вылас сувтӧмӧн корис: «Господьӧй, ло бур сьӧлӧма менам пи дінӧ.
Сійӧ шыблалан висьӧмӧн висьӧ, тшӧкыда биӧ-ваӧ усьлӧ, таысь сылы ёна сьӧкыд. Ме вайӧдлі сійӧс велӧдчысьяс дінад, но найӧ бурдӧднысӧ эз вермыны».
Исус шуис: «Эскытӧм-ылалӧм йӧз.
Дыр-ӧ на Меным овнысӧ тіянкӧд?
Дыр-ӧ на Меным видзӧдны тіянӧс?
Вайӧдӧй Ме дінӧ зонкасӧ».
Исус ӧлӧдіс пеж лолӧс. Сэки пеж лов петіс зонка пытшкысь, и зонка пырысьтӧм-пыр бурдіс.
Ас кежаныс кольӧм бӧрын велӧдчысьяс юалісны Исуслысь: «Мыйла ми эгӧ вермӧй вӧтлыны пеж ловсӧ?»
Исус шуис: «Онӧ эскӧй да.
Веськыда висьтала тіянлы: лоас кӧ тіян эскӧмныд горчица тусь ыджда, верманныд шуны тайӧ керӧсыслы: “Вешйы тасянь сэтчӧ” — и сійӧ вешъяс.
Тіянлы нинӧм вермытӧмыс оз ло.
Видзавтӧг да кевмысьтӧг татшӧм пеж ловъяссӧ вӧтлыны онӧ вермӧй».
Галилеяӧ локтӧм бӧрын Исус шуис велӧдчысьясыслы: «Морт Пиӧс сетасны йӧзлӧн киӧ. Сійӧс виасны, но коймӧд луннас Сійӧ ловзяс».
Велӧдчысьяс шогӧ усисны.
Исус велӧдчысьясыскӧд локтіс Капернаум карӧ. Сэні Петыр дінӧ матыстчисны крамлы вот чукӧртысьяс да юалісны: «Мынтӧ-ӧ тіян Велӧдысьныд вотсӧ?»
Петыр вочавидзис: «Мынтӧ».
Кор Петыр пырис керкаӧ, Исус дзик пыр юаліс: «Симон, тэ ногӧн, кодлысь ӧксыяс вотсӧ перйӧны: ас войтырыслысь али мукӧдлысь?»
Сійӧ вочавидзис: «Мукӧдлысь».
Исус шуис: «Сідзкӧ, ас войтырыс вотсӧ оз мынтыны. Мед оз дӧзмыны найӧ, мун ты дорас да чӧвт вугыртӧ. Медводдза шедӧм чери вомсьыс тэ аддзан эзысь сьӧм. Босьт сійӧс да мынты налы Ме пыдди и ас пыддиыд».
18 юр.
Сэки локтісны Исус дінӧ велӧдчысьясыс да юалісны Сылысь: «Коді Енэжвыв Юраланінас ыджыдджыкыс?»
Исус корис кагаӧс да на шӧрӧ сійӧс сувтӧдӧмӧн шуис: «Веськыда висьтала тіянлы: онӧ кӧ вежсьӧй да лоӧй челядь кодьӧсь, Енэжвыв Юраланінӧ онӧ пырӧй.
Тайӧ кага кодьӧ асьсӧ пуктысь лоас Енэжвыв Юраланінын ыджыдджык.
Коді Менам ним вӧсна сибӧдӧ ӧти татшӧм кагаӧс, сійӧ сибӧдӧ Менӧ».
«Коді ыштӧдас тайӧ ичӧтъясысь ӧтикӧс, Меным эскысьӧс, сылы бурджык лоӧ, сьыліас кӧ ыджыд изки ӧшӧдасны да вӧйтасны джуджыд саридзӧ.
Курыд шог муюгыдыслы ыштӧдӧмъясысь. Ыштӧдӧмъяслы колӧ локнысӧ, но курыд шог сійӧ мортлы, код пыр локтӧны ыштӧдӧмъясыс.
Ки-кокыд кӧ ыштӧдӧ тэнӧ, керышт да шыбит сійӧс.
Бурджык пырны помтӧм олӧмӧ ки пӧлаӧн либӧ кок пӧлаӧн куслытӧм биӧ тэнӧ киа-кокаӧн шыбитӧм дорысь.
Синмыд кӧ ыштӧдӧ тэнӧ, перйы да шыбит сійӧс.
Бурджык пырны помтӧм олӧмӧ син пӧлаӧн куслытӧм биӧ тэнӧ синмаӧн шыбитӧм дорысь».
«Кывзӧй, тайӧ ичӧтъясысь весиг ӧтикӧс энӧ ӧтдортӧй.
Висьтала тіянлы: енэжын налӧн анделъясныс пыр енэжвыв Батьлӧн чужӧмбан водзынӧсь.
Морт Пи локтіс корсьны да мездыны вошӧмаясӧс.
Мый ті шуанныд?
Мортлӧн кӧ сё ыжсьыс ӧти вошас, оз-ӧ сійӧ коль ӧкмысдас ӧкмыссӧ керӧсӧ да мун корсьны вошӧмасӧ?
Веськыда висьтала тіянлы: аддзас кӧ сійӧс, ёнджыка нимкодясяс ӧти вӧснаыс вошлытӧм ӧкмысдас ӧкмысыс дорысь.
Тадзи енэжвыв Батьныд оз кӧсйы, медым тайӧ ичӧтъясысь весигтӧ ӧти вошис».
«Вокыд кӧ мыж вӧчас тэныд паныд, мун да ас кежаныд янӧд сійӧс.
Кывзас кӧ тэнӧ, сійӧ тэныд вокӧн кольӧ.
Оз кӧ кывзы тэнӧ, босьт аскӧдыд ӧти-кык мортӧс, ӧд “ставсӧ колӧ подулавны кык либӧ куим мортлӧн висьталӧмӧн”.
Оз кӧ сійӧ кывзы найӧс, висьтав вичко водзын.
Весиг кӧ найӧс оз кывзы, лыддьы сійӧс ентӧдтӧмӧн, вот перйысьяс лыдӧ пукты.
Веськыда висьтала тіянлы: мый кӧрталанныд му вылын, сійӧ кӧрталӧма лоӧ енэжын. Мый разянныд му вылын, сійӧ разьӧма лоӧ енэжын.
Висьтала тіянлы: тіян пиысь кӧ кыкӧн ӧтвыв корасны мыйкӧ, енэжвыв Батьӧй сетас налы. Ӧд кӧні кыкӧн-куимӧн чукӧртчасны Менам нимӧн, сэні Ме на шӧрын лоа».
Сэки Петыр матыстчис Исус дінӧ да юаліс: «Господьӧй, меным кӧ вокӧй лёк вӧчӧ, кымынысь колӧ сійӧс прӧститнысӧ?
Сизимысь-ӧ?»
Исус вочавидзис: «Оз сизимысь, а сизимдас пӧв сизимысь.
Енэжвыв Юралӧмыс татшӧм. Ӧксы шуис артавны аслас кесйӧгъяслысь уджйӧзсӧ. Арталігас ӧксы водзӧ вайӧдісны ӧти кесйӧгӧс, кодлӧн уджйӧзыс вӧлі дас сюрс талант. Мынтынысӧ сійӧ эз вермы. Сэки ӧксы тшӧктіс вузавны тайӧ кесйӧгсӧ, сылысь гӧтырсӧ, ныв-писӧ да овмӧссӧ, медым тадзи бергӧдны уджйӧзсӧ. Кесйӧг уськӧдчис ӧксы водзӧ да пондіс корны: “Ыджыдӧй, ло бур сьӧлӧма. Ме ставсӧ тэныд мынта”.
Ӧксылӧн сьӧлӧмыс небзис. Сійӧ шуис лэдзны кесйӧгсӧ да вунӧдны уджйӧзсӧ.
Ывлаӧ петӧм бӧрын кесйӧг аддзис уджъёртсӧ. Ёртыс вӧлі уджйӧза сылы сё динар. Сійӧс джагӧдӧмӧн шуаліс: “Мынты уджйӧзтӧ.
” Ёртыс пидзӧс вылас уськӧдчӧмӧн корис: “Ло бур сьӧлӧма. Ставсӧ мынта”.
Мӧдыс эз кӧсйы виччысьнысӧ да йӧртіс ёртсӧ дзескыдінӧ уджйӧзсӧ мынтытӧдзыс.
Тайӧс аддзылӧмысь мукӧд кесйӧгыс шогӧ усисны. Найӧ мунісны ӧксы дінӧ да висьталісны сылы ставсӧ.
Ӧксы корис ас дінас сійӧ кесйӧгсӧ да шуис: “Лёк морт тэ вӧлӧмыд. Тэнад корӧм серти ме вунӧді тэнсьыд став уджйӧзтӧ. Эз ӧмӧй ков тэныд ме моз лоны бур сьӧлӧмаӧн?
” Скӧрмӧм ӧксы чорыда мыждіс кесйӧгсӧ да йӧртіс сійӧс дзескыдінӧ уджйӧзсӧ дзоньнас вештытӧдзыс.
Тадзи Менам енэжвыв Бать вӧчас тіянлы, онӧ кӧ сьӧлӧмсяньныд прӧститӧй вокнытӧ».
19 юр.
Тайӧс висьталӧм бӧрын Исус петіс Галилея муысь да муніс Йӧрдан ю мӧдлапӧлӧд Юдея муӧ.
Зэв уна йӧз вӧтчис Сы бӧрся, и Сійӧ бурдӧдаліс найӧс.
Исус дінӧ матыстчисны фарисейяс да Сійӧс кыйӧм могысь юалісны: «Быд помка вӧсна-ӧ морт вермас юксьыны гӧтырыскӧд?»
Исус вочавидзис: «Энӧ ӧмӧй лыддьылӧй, мый медводз Ен вӧчис аймортӧс да аньӧс?
Сійӧ шуис: “Та вӧсна морт кольӧ бать-мамсӧ да ӧтлаасьӧ гӧтырыскӧд, и тайӧ кыкыс лоӧны ӧти вир-яйӧн”.
Сідзкӧ, найӧ абу нин кык, а ӧти вир-яй. Мый йитӧма Енмыс, морт мед оз торйӧд».
Фарисейяс шуисны: «Мыйла нӧ Мӧисей тшӧктіс гӧтыртӧ эновтігӧн сетны сылы торйӧдчан гижӧд?»
Исус вочавидзис: «Чорыд сьӧлӧмныд вӧсна Мӧисей лэдзис тіянлы эновтны гӧтыръяснытӧ. Водзынсӧ эз вӧв тадзи.
Ме шуа тіянлы: верӧсыс кӧ эновтӧ гӧтырсӧ, а гӧтырыс оз кырсав, да гӧтрасьӧ мӧдкӧд, сійӧ гозъя олӧм пежалӧ.
Юксьӧм аньӧс гӧтырӧ босьтысь тшӧтш пежалӧ».
Велӧдчысьясыс шуисны: «Бурджык, сідзкӧ, гӧтрасьтӧг овны».
Исус шуис: «Оз быдӧн вермы тадзи овнысӧ, сӧмын кодлы тайӧс сетӧма. Уна помка вӧсна морт оз вермы гӧтрасьны: ӧтияс мам кынӧмсяньыс нин татшӧмӧсь, мӧдъясӧс вӧчисны татшӧмъясӧн, коймӧдъяс Енлы кесъялӧм вӧсна гӧтрасьтӧг олӧны.
Верман кӧ тадзи овны, ов».
Исус дінӧ вайӧдісны челядьӧс, медым Сійӧ кисӧ пуктылӧмӧн кевмысис. Велӧдчысьяс шуасисны вайӧдысьяс вылӧ.
Исус шуис: «Лэдзӧй челядьсӧ. Энӧ кутӧй найӧс Ме дінӧ локтӧмысь. Енэжвыв Юраланінсӧ ӧд на коддьӧмлы лӧсьӧдӧма».
Исус пуктыліс на вылӧ кисӧ, сэсся муніс сэтысь.
Ӧти морт локтіс Исус дінӧ да юаліс: «Бур Велӧдысьӧй, кутшӧм буртор меным колӧ вӧчны, мед менам вӧлі помтӧм олӧм?»
Исус вочавидзис: «Мыйла тэ шуан Менӧ бурӧн?
Некод абу бурыс, сӧмын Енмыс бур.
Кӧсъян кӧ пырны помтӧм олӧмӧ, ов тшӧктӧмъяс серти».
Мортыс юаліс: «Кутшӧм тшӧктӧмъяс серти?»
Исус вочавидзис: «Эн ви, гозъя олӧмтӧ эн пежав, эн гусясь, эн пӧръясь, пыдди пукты ассьыд бать-мамтӧ, радейт матыссатӧ асьтӧ моз».
Том морт шуис: «Ме ола тайӧ тшӧктӧмъяс сертиыс. Мый нӧшта оз тырмы?»
Исус шуис: «Кӧсъян кӧ тырвыйӧ бурӧн лоны, мун, овмӧстӧ вузав да сьӧмсӧ сет гӧльяслы. Сэки тэныд енэжын озырлуныс вичмас. Сэсся лок Ме бӧрся».
Тайӧ кывъяссӧ кылӧм бӧрын том морт жугыля муніс, ӧд сылӧн озырлуныс вӧлі уна.
Велӧдчысьясыслы Исус шуис: «Веськыда висьтала тіянлы: озырлы сьӧкыд пырны Енэжвыв Юраланінӧ.
Нӧшта шуа: озырлы Енлӧн Юраланінӧ пырӧм дорысь верблюдлы кокньыдджык пырны ем пысӧд».
Велӧдчысьясӧс тайӧ чуймӧдіс, и найӧ юалісны: «Коді нӧ, сідзкӧ, вермас мездмынысӧ?»
На вылӧ видзӧдлӧмӧн Исус шуис: «Мортлы тайӧ вермытӧмтор, но Енмыслы ставыс вермана».
Сэки Петыр шуис: «Ми ставсӧ эновтім да мунім Тэ бӧрся. Мый миянлы вичмас таысь?»
Исус шуис: «Веськыда висьтала тіянлы: выль олӧмын Морт Пи пуксяс дзирдлуныслӧн юралан пуклӧсӧ. Тшӧтш ті, Ме бӧрся мунысьяс, пуксянныд дас кык юралан пуклӧсӧ мыждыны израильса дас кык чужанкотырӧс.
Коді Менам ним вӧсна коляс керкасӧ, чой-воксӧ, бать-мамсӧ, гӧтырсӧ, ныв-писӧ, видз-мусӧ, сылы сё пӧвстӧн бӧр воас, нӧшта помтӧм олӧм сылы вичмас.
Воддзаясысь унаӧн лоӧны бӧръяӧн, бӧръяясысь — воддзаӧн».
20 юр.
«Енэжвыв Юралӧмыс татшӧм. Овмӧс кутысь водз асывнас мунас медавны аслас виноград йӧрӧ уджалысьясӧс. Уджалысьяскӧд сёрнитчас лунысь динар мынтыны, сэсся мӧдӧдас найӧс виноград йӧрас.
Ӧкмыс часын овмӧс кутысь петас да аддзас медасянінысь уджтӧг сулалысь йӧзӧс. Сійӧ шуас налы: “Мунӧй менам виноград йӧрӧ. Ме мынта тіянлы лӧсялан удждонсӧ”.
Найӧ мунасны.
Дас кыкын, сэсся куим часын овмӧс кутысь бара петас да воддза мозыс вӧчас.
Сэсся вит час гӧгӧрын петас да аддзас, кодсюрӧ сулалӧны на. Сійӧ юалас налысь: “Мый тані сулаланныд кузь лунтырсӧ?
” Найӧ вочавидзасны: “Миянӧс эз медавны”.
Сэки сійӧ шуас налы: “Мунӧй менам виноград йӧрӧ. Ме мынта тіянлы лӧсялан удждонсӧ”.
Рытнас овмӧс кутысь шуас уджӧн веськӧдлысьыслы: “Кор уджалысьястӧ да мынтысь налы. Бӧрынджык локтӧмаяслы мынты водзджык, сэсся воддзаясыслы”.
Вит часын локтӧмаяс босьтісны динарӧн.
Воддза локтӧмаяс мӧвпыштісны, мый унджык босьтасны, но налы тшӧтш динар мынтісны.
Удждон босьтӧм бӧрын найӧ элясясны овмӧс кутысьлы: “Ми кузь лунтыр гож водзын мырсим, а бӧрынджык локтӧмаяс сӧмын час уджалісны, да налы тэ дзик миянлы моз мынтін”.
Овмӧс кутысь на пиысь ӧтилы шуас: “Ёртӧй, ме эг пӧрйӧдлы тэнӧ.
Тэ ӧмӧй эн динарысь сёрнитчыв мекӧд?
Босьт динартӧ да мун.
Ме кӧсъя бӧрынджык локтӧмалы мынтыны тшӧтш тэныд моз.
Ог ӧмӧй ме вермы ассьым сьӧмӧс видзны ас кӧсйӧм серти?
Тэнад ӧмӧй вежыд петӧ, мый ме бур сьӧлӧма?”
Тадзи бӧръяяс лоӧны воддзаӧн, а воддзаяс — бӧръяӧн. Унаӧс корӧма, но этшаӧс бӧрйӧма».
Ерусалимӧ кайигӧн Исус корис дас кыкнан велӧдчысьсӧ да мунігмозыс висьталіс налы: «Ӧні ми мунам Ерусалимӧ. Сэні Морт Пиӧс сетасны аркирейяслы да Индӧдӧ велӧдысьяслы. Найӧ шуасны вины Сійӧс, сетасны ентӧдтӧмъяс киӧ. Найӧ сераласны Сійӧс, чорыда нӧйтасны, сэсся тувъяласны крестӧ. Но коймӧд луннас Сійӧ ловзяс».
Зеведей пиянлӧн мамыс пияныскӧд локтіс аслас корӧмӧн Исус дінӧ. Ань копыртчис Исус водзӧ.
Исус юаліс: «Мый тэ кӧсъян?»
Ань вочавидзис: «Пуксьӧд Аскӧдыд Юраланінад менсьым кыкнан пиӧс, ӧтисӧ веськыдладорад, мӧдсӧ шуйгаладорад».
Исус шуис: «Онӧ тӧдӧй, мый коранныд.
Верманныд-ӧ юны Меным лӧсьӧдӧм чашасӧ да Менам пыртчӧмӧн пыртчыны?»
Найӧ вочавидзисны: «Вермам».
Исус шуис: «Менсьым чашасӧ понданныд юны да Менам пыртчӧмӧн понданныд пыртчыны. Но мед пуксьӧдны веськыдладорам да шуйгаладорам — тайӧ абу Ме сайын. Менам Бать сэтчӧ пуксьӧдысьыс».
Кык воклӧн сёрниыс дӧзмӧдіс мукӧд дас велӧдчысьсӧ.
Исус корис велӧдчысьяссӧ да шуис: «Ті тӧданныд, мый юралысьяс ыджыдалӧны йӧз вылын, да веськӧдлысьяс кипод улас кутӧны йӧзӧс. Но ті тадзи энӧ вӧчӧй.
Кӧсъян кӧ ыджыдӧ пуксьыны — кесъяв, кӧсъян кӧ юралысьӧ пуксьыны — ло кесйӧг туйын. Ӧд Морт Пи эз лок, медым Сылы кесъялісны. Сійӧ локтіс кесъявны да сетны Ассьыс олӧмсӧ унаӧс ньӧбӧм могысь».
Ерикон карысь петіганыс Исус бӧрся вӧтчис зэв уна йӧз.
Туй дорас пукалісны кык синтӧм морт. Кор кылісны Исуслысь на дорті мунӧмсӧ, горӧдісны: «Господьӧй, Давид Пи. Ло бур сьӧлӧма миян дінӧ.»
Йӧзыс ӧлӧдісны найӧс горзӧмысь, но найӧ ёнджыка на пондісны горзыны: «Господьӧй, Давид Пи. Ло бур сьӧлӧма.»
Исус сувтіс, корис найӧс да юаліс: «Мый ті кӧсъянныд?»
Найӧ вочавидзисны: «Господьӧй, кӧсъям аддзыны».
Исуслӧн сьӧлӧмыс нормис на вӧсна. Сійӧ инмӧдчыліс налы синмас, да найӧ дзик пыр кутісны аддзыны. Сэсся кыкнанныс мунісны Исус бӧрся.
21 юр.
Ерусалимлань матыстчигӧн Исус велӧдчысьясыскӧд воис Олив керӧсын сулалысь Виффагия сикт дорӧ. Ассьыс кык велӧдчысьсӧ мӧдӧдігӧн Исус шуис: «Мунӧй тайӧ сиктас. Сэтчӧ пыриганыд аддзанныд домалӧм чаня осёлӧс. Разьӧй да вайӧдӧй найӧс Ме дінӧ. Тіянлы кӧ мыйкӧ шуасны, вочавидзӧй, мый найӧ колӧны Господьлы. Сэки тіянлы дзик пыр сетасны».
Ставыс тадзи артмис, медым иніс пророклӧн шуӧмыс:
— Висьталӧй Сион нывлы: Видзӧд, Ӧксыыд локтӧ тэ дінӧ. Сійӧ рам, пукалӧ осёл вылын, сийӧсалӧм осёллӧн чань вылын.
Велӧдчысьяс мунісны да вӧчисны Исуслӧн тшӧктӧм серти. Вайӧдісны осёлӧс чаньыскӧд да пукталісны на вылӧ паськӧмнысӧ, сэсся Исус пуксис.
Унаӧн вольсавлісны ассьыныс паськӧмнысӧ туй вылас, мукӧдыс чегъялісны пу вожъяс да тшӧтш пукталісны туй вылас. Водзас да бӧрас мунысьяс горзісны:
— Осанна. Ошкӧм Давид Пилы.
Бурсиӧма Господь нимӧн Локтысьӧс.
Ошкӧм Медвылыссалы.
Кор Исус пырис Ерусалимӧ, став карыс шызис, быдӧн юасис: «Коді тайӧ?»
Йӧзыс шуалісны: «Тайӧ Исус, Галилеяса Назарет карысь Пророк».
Исус пырис Енлӧн крамӧ да вӧтлаліс сэтысь став вузасьысь-ньӧбасьысьсӧ, пӧрлӧдліс сьӧм вежысьяслысь пызанъяссӧ да гулюӧн вузасьысьяслысь пуклӧсъяссӧ. Сійӧ шуис налы: «Гижӧма: “Менам керкаӧй кевмысян керка лоӧ”. А ті сыысь вӧчинныд лёк вӧчысьяслы дзебсянін».
Крамын матыстчисны Исус дінӧ синтӧмъяс да коктӧмъяс. Исус бурдӧдаліс найӧс.
Кор аркирейяс Индӧдӧ велӧдысьяскӧд аддзисны Сылысь шензьӧданаторъяс вӧчӧмсӧ да кылісны крамын челядьлысь горзӧм: «Ошкӧм Давид Пилы.», ёна дӧзмисны. Исуслы шуисны: «Кылан-ӧ, мый найӧ шуалӧны?»
Исус вочавидзис: «Кыла.
Ті ӧмӧй энӧ лыддьылӧй: “Тэ лӧсьӧдін, медым кагаяс да челядь ошкисны Тэнӧ”».
Сэсся Исус эновтіс найӧс, петіс карсьыс да муніс вой кежлас Вифания сиктӧ.
Асывводзнас карӧ бӧр локтігас Исуслӧн кынӧмыс пондіс сюмавны. Туй дорсьыс Сійӧ аддзис инжир пу. Матыстчис да аддзис сы вылысь сӧмын коръяссӧ. Исус шуис пуыслы: «Пыр кежлӧ вотӧстӧг колян».
Инжир пуыс пырысь-пыр косьмис.
Тайӧс аддзылісны велӧдчысьяс да чуймӧмӧн шуисны: «Мыйла пуыс татшӧм ӧдйӧ косьмис?»
Исус вочавидзис: «Веськыда висьтала тіянлы: эсканныд кӧ да онӧ майшасьӧй, сэки онӧ сӧмын тайӧс вӧчӧй. Шуанныд кӧ тайӧ керӧсыслы: “Кыпӧдчы да шыбитчы саридзас”, лоӧ тадзи. Мый коранныд эскӧмӧн кевмысигад, лоӧ тіянлы».
Исус локтіс крамӧ. Сэні велӧдігас Сы дінӧ матыстчисны аркирейяс пӧрысьяскӧд да юалісны: «Кутшӧм вынӧн Тэ ставсӧ тайӧс вӧчан?
Коді Тэнӧ пуктіс тайӧс вӧчнысӧ?»
Исус воча шуис: «Ме тшӧтш тіянлысь ӧтитор юала.
Вочавидзанныд кӧ, висьтала, кутшӧм вынӧн ставсӧ тайӧс вӧча.
Иоанлӧн пыртӧмыс кодсянь вӧлі? Енсянь али мортсянь?»
Найӧ ас костаныс сёрнитісны: «Шуам кӧ: “Енсянь”, Сійӧ миянлы шуас: “Мыйла сылы энӧ эскӧй?
” Шуам кӧ: “Мортсянь”, йӧзсьыс ковмас повны, ӧд Иоанӧс ставныс пророкӧ пуктӧны».
Найӧ вочавидзисны: «Огӧ тӧдӧй».
Сэки Исус шуис: «Сідзкӧ, Ме тшӧтш ог висьтав, кутшӧм вынӧн ставсӧ тайӧс вӧча».
«Мый ті шуанныд та йылысь?
Ӧти мортлӧн вӧлі кык пи.
Ӧти пи дінас матыстчӧмӧн сійӧ шуас: “Пиӧй, мун талун уджышт виноград йӧрын”.
Пиыс вочавидзас: “Ог кӧсйы”. Бӧрынджык вежас мӧвпсӧ да мунас.
Батьыс матыстчас мӧд пиыс дінӧ да тшӧтш тадзи шуас.
Пиыс вочавидзас: “Батьӧй, муна, дерт”, но ачыс оз мун.
Кодныс нӧ батьыслӧн кӧсйӧм сертиыс вӧчис?»
Вочавидзисны: «Воддзаыс».
Исус шуис: «Веськыда висьтала тіянлы: вот перйысьяс да кырсалысь аньяс тіян водзвылын мунӧны Енлӧн Юраланінӧ. Иоан локтіс индыны тіянлы веськыдлуныслысь туйсӧ, а ті сылы энӧ эскӧй. Вот перйысьяс да кырсалысь аньяс эскисны сылы. Ті весиг тайӧс аддзылӧм бӧрын энӧ бергӧдчӧй мыжъяссьыныд да энӧ эскӧй сылы».
«Кывзӧй мӧд велӧданвисьт.
Овмӧс кутысь пуктас аслас йӧрӧ виноград, гӧгӧрыс потшас, вотӧс ныранін кодъяс да джуджыд лэбув лэптас. Сэсся йӧрсӧ виноград быдтысьяслы кӧртымӧ сетас, ачыс мунас.
Вотӧс чукӧртан кадӧ овмӧс кутысь мӧдӧдас кесйӧгъяссӧ босьтны вотӧсысь ассьыс пайсӧ.
Виноград быдтысьяс кутасны кесйӧгъяссӧ: ӧтиӧс нӧйтасны, мӧдӧс виасны, мукӧдсӧ изъяласны.
Овмӧс кутысь мӧдӧдас мукӧд кесйӧгъясӧс, воддза сертиыс унджыкӧс. Накӧд тшӧтш сідзи вӧчасны.
Медбӧрти виноград быдтысьяс дінӧ овмӧс кутысь мӧдӧдас ассьыс писӧ, мӧвпыштас: “Менам пиысь, гашкӧ, яндысясны”.
Писӧ аддзӧм бӧрын виноград быдтысьяс шуасны ӧта-мӧдныслы: “Тайӧ мортыслы вуджас овмӧсыс. Мунам да виам сійӧс, медым овмӧсыс миянлы коляс”.
Найӧ кутасны сійӧс, петкӧдасны виноград йӧрсьыс да виасны.
Мый вӧчас овмӧс кутысь виноград быдтысьяскӧд локтӧм мыстиыс?»
Вочавидзисны: «Тайӧ лёк йӧзсӧ сійӧ лёк нога виас. Виноград йӧрсӧ кӧртымӧ сетас мукӧдлы, кодъяс индӧм кадӧ сетасны сылы вотӧсысь пайсӧ».
Исус шуис: «Энӧ ӧмӧй Гижӧдсьыс лыддьылӧй: — Изйыс, кодӧс шыбитісны керка лэптысьяс, лоис пельӧс изйӧн.
Тайӧ Господьсянь да шензяна миян синъяслы.
Та вӧсна шуа тіянлы: Енсянь Юралӧмсӧ мырддясны тіянлысь да сетасны войтырлы, коді вайӧ Ен Юралӧмлысь вотӧссӧ.
Коді усяс тайӧ изйыс вылӧ, сійӧ пасьмунас. Код вылӧ изйыс усяс, сійӧс лямӧдас».
Тайӧ велӧданвисьтъяссӧ кылӧм бӧрын аркирейяс да фарисейяс гӧгӧрвоисны, мый Исус висьталіс на йылысь. Найӧ кӧсйисны кутны Сійӧс, но полісны йӧзсьыс, ӧд йӧзыс Сійӧс пророкӧ пуктісны.
22 юр.
Исус висьталіс нӧшта ӧти велӧданвисьт:
«Енэжвыв Юралӧмыс татшӧм. Ӧксы аслас пиыслы кӧлысь вӧчас. Сійӧ ыстас ассьыс кесйӧгъяссӧ корны йӧзӧс кӧлысь вылӧ. Корӧмаяс оз кӧсйыны локнысӧ.
Ӧксы бара мӧдӧдас мукӧд кесйӧгъясӧс да тшӧктас висьтавны корӧмаяслы: “Сёян-юан менам дасьтӧма, ӧшъяс-куканьяс начкӧма, ставыс дась. Локтӧй кӧлысясьны.
” Корӧмаяс пыдди оз пуктыны корӧмсӧ: ӧтияс мунасны видз-му выланыс, мӧдъяс вузасьны. Мукӧдыс кутасны ӧксылысь кесйӧгъяссӧ да кувтӧдзыс найӧс нӧйтасны.
Ӧксы кывлас та йылысь да ёна скӧрмас. Сійӧ мӧдӧдас ассьыс шыпуртаяссӧ вины морт виысьясӧс, а карсӧ тшӧктас сотны.
Сэсся аслас кесйӧгъяслы шуас: “Кӧлысь дась. Корӧмаясыд вӧлӧмкӧ шогмытӧмӧсь. Мунӧй туйвежъясӧ да корӧй кӧлысь вылӧ быдӧнӧс”.
Кесйӧгъяс мунасны да корасны быдӧнӧс: лёкъясӧс и буръясӧс. Кӧлысь гажӧдчанін тырас.
Ӧксы пырас гажӧдчанінӧ видзӧдлыны воӧмаясӧс да аддзас мортӧс, коді абу кӧлысь паськӧма. Ӧксы юалас сылысь: “Ёртӧй, кыдзи тэ пырин татчӧ кӧлысь паськӧмтӧгыс?
” Сійӧ кыв оз шу.
Сэки ӧксы тшӧктас кесйӧгъясыслы: “Ки-коксӧ кӧрталӧмӧн шыбитӧй сійӧс пемыдас.
Сэні лоӧ бӧрдӧм да пинь йирӧм”. Шуа тіянлы: унаӧс корӧма, но этшаӧс бӧрйӧма».
Фарисейяс мунісны да ас костаныс сёрнитчисны кыйны Исусӧс сёрниас.
Найӧ мӧдӧдісны Сы дінӧ Ирӧдлысь йӧзсӧ да ассьыныс велӧдчысьяссӧ. Локтӧмаяс шуисны: «Велӧдысь, ми тӧдам, мый Тэ веськыда сёрнитан да веськыда велӧдан Енлӧн туйӧ. Тэ он пов йӧзлӧн шуасьӧмысь, он видзӧд морт вылӧ.
Висьтав, колӧ-ӧ кесарлы вот мынтыны?»
Налысь наянлунсӧ тӧдӧмӧн Исус шуис: «Кык бана шаньгаяс. Мыйла ті зілянныд кыйны Менӧ? Петкӧдлӧй Меным вот мынтан сьӧмнытӧ».
Найӧ мыччисны Сылы динар.
Исус юаліс: «Кодлӧн тані чужӧмыс-нимыс?»
Найӧ вочавидзисны: «Кесарлӧн».
Исус шуис налы: «Кесарлысь сетӧй кесарлы, а Енлысь — Енлы».
Тайӧс кылӧмысь найӧ чуймисны, сэсся колисны Исусӧс да мунісны.
Сійӧ лунӧ локтісны Исус дінӧ саддукейяс, кодъяс шуӧны, ловзьӧмыс пӧ абу. Найӧ юалісны Исуслысь: «Велӧдысь, Мӧисей шулӧма, мый “ныв-питӧм морт кӧ кулас, вокыслы колӧ босьтны сылысь гӧтырсӧ да нюжӧдны аслас вокыслысь рӧдсӧ”.
Тані миян вӧлі сизим вок.
Ыджыдыс гӧтрасис, сэсся куліс, ныв-пиыс эз коль. Гӧтырсӧ вокыс босьтіс.
Тадзи лои мӧд вокыскӧд, коймӧдыскӧд, став сизимнанныскӧд.
Медбӧрын аньыс куліс.
Ловзьӧм бӧрас кодлы сійӧ гӧтырӧн лоас, ӧд сизим верӧс сылӧн вӧлі?»
Исус вочавидзис: «Ті ылалӧмныд Гижӧдъяссӧ да Енлысь вынсӧ тӧдтӧмныдла.
Ловзьӧмаяс оз гӧтрасьны да верӧс сайӧ оз мунны.
Найӧ Енлӧн енэжвыв анделъяс кодьӧсь.
Ловзьӧм йылысь шуа — ті ӧмӧй энӧ лыддьылӧй, Енмыс ӧд шуӧма: “Ме Ӧвраамлӧн Ен, Исааклӧн Ен да Яковлӧн Ен”?
Енмыс абу кулӧмаяслӧн Ен, Сійӧ ловъяяслӧн Ен».
Йӧзыс шензисны Сылӧн велӧдӧмысь.
Фарисейяс кор кылісны, мый Исус ланьтӧдӧма саддукейясӧс, чукӧртчисны ӧтлаӧ.
На пиысь ӧти, Индӧдӧ велӧдысь, Исусӧс кыйӧм могысь юаліс: «Велӧдысь, Индӧдас кутшӧм тшӧктӧм медыджыд?»
Исус шуис: «Радейт ассьыд Господь Ентӧ став сьӧлӧмнад, став олӧмнад да став мывкыднад.
Тайӧ медыджыд да медтӧдчана тшӧктӧм.
Сы кодь мӧд тшӧктӧмыс: радейт матыссатӧ асьтӧ моз.
Тайӧ кык тшӧктӧмыс вылӧ подуласьӧ став Индӧдыс да пророк гижӧдъяс».
Исус юаліс чукӧртчӧм фарисейяслысь: «Мый шуанныд Кристос йылысь?
Кодлӧн Сійӧ пи?»
Найӧ вочавидзисны: «Давидлӧн».
Сэки Исус юаліс: «Мыйла нӧ Ловсянь сёрнитігас Давид шуӧ Сійӧс Господьӧн:
— Господь шуис менам Господьлы: “Пукав Менам веськыдладорын, кытчӧдз ог пукты Тэнад кок улӧ Тэныд паныд мунысьясӧс”.
Давид кӧ шуӧ Сійӧс Господьӧн, кыдзи нӧ Сійӧ сылы пиӧн лоӧ?»
Исуслы некод эз вермы воча кыв шуны.
Сійӧ лунсянь некод нин эз лысьт юасьны Сылысь.
23 юр.
Йӧз чукӧрлы да велӧдчысьясыслы Исус висьталіс: «Мӧисей пуклӧсӧ пуксисны Индӧдӧ велӧдысьяс да фарисейяс.
Кывзӧй найӧс да вӧчӧй ставсӧ налӧн шуӧм серти.
Сӧмын на ног энӧ олӧй: найӧ ӧтитор шуӧны, а мӧдтор вӧчӧны.
Найӧ кӧртавлӧны сьӧкыд, нуны вермытӧм нӧбъяс да пуктӧны йӧзлы пельпом вылас. Но асьныс весиг чунь помнас вӧрзьӧдны оз кӧсйыны.
Найӧ ставсӧ вӧчӧны йӧзлы петкӧдлӧм могысь: ӧшлӧны ас выланыс ыджыд кудъяс, кузьмӧдӧны паськӧм дорыш тугъяссӧ.
Найӧ радейтӧны гажӧдчанінын бурджыклаӧ пуксьыны, синагогаын водзын пукавны да йӧзаинын чолӧмалӧмъяс кывзыны. Налы сьӧлӧм вылас воӧ, ыдждӧдлӧны кӧ найӧс велӧдысьӧн.
Но ті энӧ пуксьӧй велӧдысьӧ, ӧд Велӧдысьыс тіян ӧти — Кристос, а ті ӧта-мӧдныдлы вокъяс.
Тайӧ му вылас некодӧс энӧ ыдждӧдлӧй батьӧн, ӧд Батьыс тіян ӧти — енэжъяс вылын.
Энӧ пуксьӧй туйдӧдысьӧ, ӧд Туйдӧдысьыс тіян ӧти — Кристос.
Тіян пӧвстысь ыджыдджыкыс мед лоӧ тіянлы кесъялысьӧн. Ӧд асьсӧ вылӧ пуктысьӧс лэдзасны, асьсӧ улӧ пуктысьӧс кыпӧдасны».
«Курыд шог тіянлы, Индӧдӧ велӧдысьяс да фарисейяс. Кык бана шаньгаяс. Ті Енэжвыв Юраланінысь ӧдзӧссӧ йӧз водзын пӧдлаланныд. Асьныд онӧ пырӧй да пырны кӧсйысьясӧс онӧ лэдзӧй.
Курыд шог тіянлы, Индӧдӧ велӧдысьяс да фарисейяс. Кык бана шаньгаяс. Ті дӧваяслысь керкасӧ куштанныд да асьнытӧ петкӧдлӧм могысь дыр кевмысянныд. Таысь тіянӧс чорыда мыждасны.
Курыд шог тіянлы, Индӧдӧ велӧдысьяс да фарисейяс. Кык бана шаньгаяс. Ті мусӧ да васӧ вуджанныд, медым аддзыны тіян бӧрся ӧти мунысьӧс. А сюрас кӧ, ті вӧчанныд сыысь куслытӧм биӧ мунысьӧс, кык пӧв лёкджыкӧс на ас дорсьыныд.
Курыд шог тіянлы, синтӧм нуӧдысьяс. Ті шуанныд: “Мортыс кӧ крам водзын кыв сетас, тайӧ кывсӧ позьӧ торкны. Сетас кӧ кывсӧ крамлӧн зарни водзын, таысь кывкутас”.
Синтӧмъяс да мывкыдтӧмъяс.
Мый ыджыдджык: зарниыс али зарнисӧ вежӧдысь крамыс?
Ті шуанныд: “Мортыс кӧ висьпуктанін водзын кыв сетас, тайӧ кывсӧ позьӧ торкны. Сетас кӧ кывсӧ висьпуктанінӧ вайӧмтор водзын, таысь кывкутас”.
Синтӧмъяс.
Мый ыджыдджык: вайӧмторйыс али вайӧмторсӧ вежӧдысь висьпуктаніныс?
Мортыс кӧ висьпуктанін водзын кыв сетӧ, сійӧ кыв сетӧ тшӧтш став вайӧмторйыс водзын.
Крам водзын кӧ кыв сетӧ, сійӧ кыв сетӧ тшӧтш сэні Олысьыс водзын.
Мортыс кӧ енэж водзын кыв сетӧ, сійӧ кыв сетӧ Ен пуклӧс водзын да Пукалысьыс водзын.
Курыд шог тіянлы, Индӧдӧ велӧдысьяс да фарисейяс. Кык бана шаньгаяс. Ті сетанныд исань турунысь, укропысь да тминысь дасӧд юкӧнсӧ. А Индӧдысь коланаджыкторсӧ эновтінныд: веськыда мыждӧмсӧ, буралӧмсӧ да эскӧмсӧ.
Тайӧс колӧ вӧчны да мукӧдторсӧ оз ков вунӧдны.
Синтӧм нуӧдысьяс. Номйӧс сӧдзӧданныд да верблюдӧс ньылаланныд.
Курыд шог тіянлы, Индӧдӧ велӧдысьяс да фарисейяс. Кык бана шаньгаяс. Ті тасьті-дозмуклысь ортсысӧ весаланныд, а пытшкӧсыс гусясьӧмӧн да ылӧдчӧмӧн тырӧма.
Синтӧм фарисей, медводз пытшкӧссяньыс весав тасьті-дозмуктӧ, сэки ортсысяньыс тшӧтш сӧстӧммас.
Курыд шог тіянлы, Индӧдӧ велӧдысьяс да фарисейяс. Кык бана шаньгаяс. Ті еджыдӧн мавтӧм гортъяс кодьӧсь. Ортсысяньыс сійӧ мича, а пытшкӧсас тырыс шой лы да быд пежыс.
Ортсысяньныд, видзӧдны кӧ, веськыда олысьяс кодьӧсь, а пытшкӧсныд пӧръясьӧмӧн да лёк вӧчӧмӧн тырӧма.
Курыд шог тіянлы, Индӧдӧ велӧдысьяс да фарисейяс. Кык бана шаньгаяс. Ті сувтӧданныд пророкъяс дзебанінӧ казьтылан изъяс да мичмӧданныд веськыда олысьяслысь дзебанінъяссӧ. Ті шуанныд: “Овлім кӧ ми батьяслӧн кадӧ, эгӧ эськӧ ӧтувтчӧй накӧд кисьтны пророкъяслысь вирсӧ”.
Ті асьныд висьталанныд, мый ті пророк виысьяслӧн пиян.
Тыртӧй батьясныдлысь лыдсӧ.
Змейяс. Вижля йылӧм.
Мынанныд-ӧ куслытӧм биӧ мыждӧмысь?
Ме мӧдӧда тіян дінӧ пророкъясӧс, сюсь вежӧра йӧзӧс да велӧдысьясӧс.
Ӧтиясӧс вианныд да крестӧ тувъяланныд, мӧдъясӧс синагогаын чорыда нӧйтанныд да карысь карӧ вӧтланныд.
Тадзи тіянӧс мыждасны став веськыда олысьыслӧн вирысь: веськыда олысь Авель вирсянь Варакейлӧн Закар пи вирӧдз, кодӧс ті виинныд крам да висьпуктанін костын.
Веськыда висьтала тіянлы: таысь ставсьыс мыжыс усьӧ ӧнія олысьяс вылӧ.»
«Ерусалим, Ерусалим. Пророкъясӧс виалысь да тэ дінӧ ыстӧмаясӧс изъялысь.
Кымынысь Ме кӧсйи чукӧртны тэнсьыд ныв-питӧ, кыдзи лэбач чукӧртӧ ассьыс пиянсӧ борд улас, но ті энӧ кӧсйӧй.
Со, тіян крамныд тыртӧммас.
Шуа тіянлы: онӧ аддзӧй Менӧ тайӧ кывъяссӧ шутӧдз: “Бурсиӧма Господь нимӧн Локтысьӧс”».
24 юр.
Исус петіс крамысь да мӧдӧдчис мунны. Сы дінӧ матыстчисны велӧдчысьясыс, медым петкӧдлыны Сылы крамсӧ.
Исус шуис налы: «Аддзанныд-ӧ ставсӧ тайӧс?
Веськыда висьтала тіянлы: татчӧ из вылӧ из оз коль, ставсӧ жугӧдасны».
Кор Исус вӧлі пукалӧ Олив керӧсын, Сы дінӧ локтісны велӧдчысьясыс да юалісны: «Висьтав, кор ставыс тайӧ лоас?
Мый серти ми тӧдмалам Тэнсьыд локтӧмтӧ да нэм помасьӧмсӧ?»
Исус шуис: «Видзчысьӧй, мед эз ылӧдны тіянӧс. Унаӧн Менам нимӧн локтасны да шуасны, ме пӧ Кристос, да унаӧс ылӧдасны.
Ті кыланныд тыш мунӧмъяс да тыш йылысь юӧръяс, сӧмын энӧ полӧй.
Тайӧ ставыслы колӧ лонысӧ, сӧмын тайӧ абу на пом.
Войтыр войтырлы паныд сувтас, муяс ӧта-мӧдныслы паныд кыпӧдчасны.
Уналаын лоас му вӧрӧм да тшыгъялӧм, йӧзсӧ суас кулан висьӧм. Но тайӧ ставыс чужтӧм водзвывса дойяс на.
Тіянӧс пондасны дзескӧдны да унаӧс виасны.
Менам ним вӧсна став йӧзыс мустӧмтасны тіянӧс.
Сэки унаӧн эновтчасны эскӧмсьыс, ӧта-мӧднысӧ вузаласны да мустӧмтасны.
Уна ылӧгпророк локтас, унаӧс найӧ ылӧдасны.
Лёкыс содӧм вӧсна уналӧн муслуныс кӧдзалас.
Но сьӧкыдсӧ помӧдз нуысь мездмас.
Ен Юралӧм йылысь Евангелльӧсӧ висьталасны муюгыд пасьтала, быд кыла войтырлы тӧдмӧнъя.
Сэсся воас пом».
«Кор ті аддзанныд вежаинсьыс пеж зывӧксӧ, мый йылысь Даниил пророк на висьтавліс, — лыддьысьысь мед гӧгӧрвоӧ — сэки Юдея муын олысьяс мед пышъясны керӧсъясӧ.
Коді лоас керка вылас, мед оз пыр керкаас босьтны мыйкӧ.
Коді лоас видз-му вылас, мед оз кос гортас паськӧмысла.
Сійӧ лунъясӧ ёна сьӧкыд лоӧ нӧбасьысьяслы да нёньӧдчысьяслы.
Кевмысьӧй, мед эз ковмы пышйынытӧ тӧлын либӧ шойччан лунӧ.
Сэки ыджыд шог суас йӧзсӧ, татшӧмыс му пуксьӧмсяньыс эз на вӧвлы да оз нин ло.
Енмыс кӧ тайӧ кадсӧ оз дженьдӧд, ловъя морт оз коль.
Но Аслас бӧрйӧмаяс вӧсна Сійӧ дженьдӧдас тайӧ кадсӧ.
Сэки шуасны кӧ тіянлы: “Кристос тані”, либӧ шуасны: “Кристос сэні”, энӧ эскӧй.
Ӧд ылӧгкристосъяс да ылӧгпророкъяс локтасны да пондасны вӧчны ыджыд шензьӧданаторъяс, медым ылӧдны, позяс кӧ, весиг бӧрйӧмаясӧс.
Со, Ме водзвыв висьталі тіянлы.
Тіянлы кӧ шуасны: “Сійӧ овтӧминын”, энӧ мунӧй.
Шуасны кӧ: “Сійӧ керка пытшкын”, энӧ эскӧй.
Енэжсӧ асыввывсянь рытыввылӧдз югдӧдысь чардби моз Морт Пи локтас.
Кӧні шой, сэтчӧ чукӧртчасны кутшъяс».
«Регыд тайӧ шог лунъяс бӧрын шондіыс пемдас, тӧлысьыс кусас, енэжысь кодзувъяс усясны, енэжвыв вынъяс вӧрзясны.
Сэки енэжас тыдовтчас Морт Пилӧн пас.
Мувывса став йӧзыс ырзӧмӧн бӧрддзасны, кор аддзасны кымӧръяс вылын ыджыд вынӧн да дзирдлунӧн локтысь Морт Пиӧс.
Кор кылас трубалӧн гора шыыс, Сійӧ мӧдӧдас анделъяссӧ нёльнан му вежтасас, медым чукӧртны Ассьыс бӧрйӧмаяссӧ став му пельӧссьыс.
Инжир пу вылӧ кӧ видзӧдам, аддзам: вожъясыс кӧ ловзьӧны да коръясыс потӧны, сідзкӧ, гожӧмыс матын.
Тадзи, ставсӧ тайӧс аддзигӧн тӧдӧй: сійӧ кадыс матын, ӧдзӧс дорад нин.
Веськыда висьтала тіянлы: ставыс тайӧ лоас ӧнія олысьяс дырйи на.
Енэжыс да муыс бырас, а Менам кывъясӧй оз бырны.
Сійӧ лунсӧ да сійӧ кадсӧ некод оз тӧд. Анделъяс оз тӧдны, сӧмын Батьӧй тӧдӧ.
Кыдзи вӧлі Ной лунъяс дырйи, сідзи лоӧ Морт Пи локтігӧн.
Ыджыд ойдӧм водзвылас, ковчегӧ Нойлӧн пыртӧдз йӧзыс сёйисны-юисны, гӧтрасисны да верӧс сайӧ мунісны. Кытчӧдз эз су найӧс ойдӧмыс да ваӧ пӧдӧмыс, найӧ эз вежӧртны, мый виччысьӧ найӧс. Тадзи жӧ лоас Морт Пи локтігӧн.
Сэки видз-му вылын лоасны кыкӧн: ӧтисӧ босьтасны, мӧдсӧ колясны.
Изанінын лоасны кык ань: ӧтисӧ босьтасны, мӧдсӧ колясны.
Лоӧй дасьӧсь, ӧд онӧ тӧдӧй Господьныдлысь локтан кадсӧ.
Ті тӧданныд: керка кутысь кӧ тӧдіс гусясьысьлысь локтан кадсӧ, сэки эськӧ эз узь да эз лэдз керкаас.
Лоӧй дасьӧсь, ӧд Морт Пи локтас виччысьтӧг».
«Лоӧй эскана да мывкыда кесйӧг кодьӧсь. Татшӧмсӧ ыджыдыс пуктас веськӧдлыны мукӧд кесйӧгъясӧн, медым ас кадӧ налы сёян-юан сетны.
Кесйӧгыс шуда, ыджыдыс кӧ гортас воигӧн аддзас сійӧс тадзи вӧчӧмӧн.
Веськыда висьтала тіянлы: ыджыдыс пуктас сійӧс веськӧдлыны став аслас овмӧсӧн.
Шогмытӧм кесйӧг вермас мӧвпыштны: “Ыджыдӧй дыр на оз лок”. Сійӧ пондас нӧйтны уджъёртъяссӧ да сёйны-юны кодалысьяскӧд. Но виччысьтӧм лунӧ, лӧсявтӧм кадӧ кесйӧглӧн ыджыдыс воас. Сійӧ кералас кесйӧгсӧ да шыбитас сійӧс кык бана шаньгаяс дінӧ.
Сэні лоӧ бӧрдӧм да пинь йирӧм».
25 юр.
«Енэжвыв Юралӧмыс татшӧм. Дас ныв биясӧн верӧспулы воча петасны.
Витыс вӧлі мывкыдтӧм, мӧд витыс — мывкыда.
Мывкыдтӧмъяс бинысӧ босьтасны, а выйсӧ оз.
Мывкыдаяс биысь ӧтдор вый тыра дознысӧ босьтасны.
Верӧспуыс дыр оз во, и ставныс вугыртасны да унмовсясны.
Вой шӧрнас кылас горӧдӧм: “Верӧспу локтӧ. Петӧй сылы воча.
” Нывъяс садьмасны да лӧсьӧдасны бияснысӧ.
Мывкыдтӧм нывъяс шуасны мывкыдаяслы: “Миян биным кусӧ, вайыштӧй выйнытӧ.
” Мывкыдаяс шуасны: “Огӧ. Ставнымлы выйыс оз тырмы. Мунӧй да ньӧбӧй вузалысьяслысь”.
Мывкыдтӧм нывъяслӧн выйла ветлігкості верӧспуыд воас. Нывъяс, кодъяс вӧліны дасьӧсь, пырасны сыкӧд кӧлысь вылӧ, да на бӧрся ӧдзӧссӧ йигналасны.
Сёрӧнджык мӧд витыс локтас. Найӧ пондасны вӧзйысьны: “Ыджыдӧй, ыджыдӧй, восьт миянлы.
” Сійӧ вочавидзас: “Веськыда висьтала тіянлы: ог тӧд тіянӧс”.
Лоӧй дасьӧсь, ӧд онӧ тӧдӧй Морт Пилысь локтан лунсӧ да кадсӧ».
«Ӧти морт ылі туйӧ мӧдӧдчигас корас ас дорас кесйӧгъяссӧ да коляс налы ассьыс овмӧссӧ.
Быдӧнлы сямыс-выныс серти сетас зарни сьӧм: ӧтилы вит талант, мӧдлы кык, коймӧдлы ӧти талант. Сэсся мунас.
Вит талант босьтысь пырысь-пыр сьӧмсӧ уджӧ бергӧдас да содтӧд босьтас вит талант.
Тадзи вӧчас тшӧтш мӧдыс да содтӧд босьтас кык талант.
Ӧти талант босьтысь мунас, кодъяс гу да аслас ыджыдлысь сьӧмсӧ гуалас.
Дыр мысти кесйӧгъяслӧн ыджыдыс локтас да юалас найӧс сьӧм йывсьыс.
Вит талант босьтысь содтӧд ваяс вит талант да шуас: “Ыджыдӧй, тэ меным витӧс сетлін. Видзӧдлы, нӧшта менам вит содіс”.
Ыджыдыс шуас: “Бура вӧчин. Тэ бур да эскана кесйӧг.
Ичӧтас тэ эскана вӧлін, уна вылӧ тэнӧ пукта.
Лок, ӧтлаын гажӧдчам-нимкодясям”.
Кык талант босьтысь локтас да шуас: “Ыджыдӧй, тэ меным кык талант сетлін.
Видзӧдлы, нӧшта менам кык содіс”.
Ыджыдыс шуас сылы: “Бура вӧчин. Тэ бур да эскана кесйӧг.
Ичӧтас тэ эскана вӧлін, уна вылӧ тэнӧ пукта.
Лок, ӧтлаын гажӧдчам-нимкодясям”.
Сэсся ӧти талант босьтысь локтас да шуас: “Ыджыдӧй, ме тӧда, тэ чорыд морт: вундан, кытчӧ эн кӧдзлы, да чукӧртан, кытчӧ кӧйдыссӧ эн шыбитлы. Тэысь полӧмӧйла ме муні да гуалі таланттӧ.
Со, тэнад сьӧмыд”.
Ыджыдыс шуас сылы: “Тэ шогмытӧм дыш кесйӧг.
Тэ тӧдін, мый ме вунда, кытчӧ эг кӧдзлы, да чукӧрта, кытчӧ кӧйдыссӧ эг шыбитлы.
Тэныд колӧ вӧлі менсьым талантӧс сьӧмчукӧртанінӧ пуктыны, локтӧм бӧрам эськӧ содтӧдӧн босьті.
Мырддьӧй сылысь талантсӧ да сетӧй дас талантаыслы.
Кодлӧн эм, сылы коланасьыс унджык на сетасны. Кодлӧн абу, сылысь бӧръясӧ босьтасны.
Тайӧ шогмытӧм кесйӧгсӧ шыбитӧй пемыдас. Сэні лоӧ бӧрдӧм да пинь йирӧм”».
Тайӧс висьталӧм бӧрын Исус горӧдӧмӧн шуис: «Кодлӧн эм пель, мед кылӧ.»
«Морт Пи локтас Аслас дзирдлунӧн вежа анделъяскӧд да пуксяс дзирдлуныслӧн юралан пуклӧсӧ. Сэки чукӧртчас Сы водзӧ быд кыла войтыр, да Сійӧ торйӧдас найӧс, кыдзи видзысь торйӧдӧ ыжъяссӧ кӧзаяссьыс.
Ыжъяссӧ сувтӧдас веськыдладорас, кӧзаяссӧ шуйгаладорас.
Сэки веськыдладорын сулалысьяслы Ӧксы шуас: “Локтӧй, менам Батьлӧн бурсиӧмаяс. Тіянлы вуджӧ Енлӧн Юраланіныс, кодӧс дасьтӧма тіянлы му пуксьӧмсяньыс.
Кор Менам кынӧмӧй сюмаліс, ті Менӧ вердінныд, кор горшӧй косьмис, ті Менӧ юкталінныд.
Кор Ме локті мӧд муысь, ті Менӧ керкаад сибӧдінныд, кор вӧлі пасьтӧм, ті Менӧ пасьтӧдінныд. Висигӧн ті видлалінныд Менӧ, дзескыдінын пукалігӧн волывлінныд Ме дінӧ”.
Сэки веськыда олысьяс Сылы шуасны: “Господьӧй, кор ми аддзылім Тэнӧ тшыгъялӧмӧн да вердім, горш косьмӧмӧн да юкталім?
Кор ми аддзылім Тэнӧ мӧд муысь локтысьӧн да сибӧдім, пасьтӧмӧн да пасьтӧдім?
Кор ми аддзылім Тэнӧ висьӧмӧн да видлалім, дзескыдінын пукалысьӧн да волывлім Тэ дінӧ?
” Ӧксы шуас налы: “Веськыда висьтала тіянлы: тайӧс кӧ ті вӧчинныд Менам ичӧт вокъясысь ӧтилы, сідзкӧ, вӧчинныд Меным”.
Сэсся Сійӧ шуйгаладорын сулалысьяслы шуас: “Вешйӧй Ме дінысь, ёрӧмаяс. Мунӧй омӧльыслы да сылӧн анделъяслы дасьтӧм куслытӧм биӧ. Кор Менам кынӧмӧй сюмаліс, ті Менӧ энӧ вердӧй, кор горшӧй косьмис, ті Менӧ энӧ юкталӧй.
Кор Ме локті мӧд муысь, ті Менӧ энӧ сибӧдӧй, кор вӧлі пасьтӧм, ті Менӧ энӧ пасьтӧдӧй. Висигӧн ті энӧ видлалӧй Менӧ, дзескыдінын пукалігӧн энӧ волывлӧй Ме дінӧ”.
Сэки найӧ юаласны Сылысь: “Господьӧй, кор ми аддзылім Тэнӧ тшыгъялӧмӧн, горш косьмӧмӧн, мӧд муысь локтысьӧн, пасьтӧмӧн, висьӧмӧн, дзескыдінын пукалысьӧн да эгӧ отсалӧй Тэныд?
” Сэки Сійӧ вочавидзас: “Веськыда висьтала тіянлы: тайӧс кӧ ті энӧ вӧчӧй ичӧтъяс пиысь ӧтилы, сідзкӧ, энӧ вӧчӧй Меным”.
Сэсся найӧ мунасны помтӧм мучитчӧмӧ, а веськыда олысьяс — помтӧм олӧмӧ».
26 юр.
Тайӧс ставсӧ висьталӧм бӧрын Исус шуис велӧдчысьясыслы: «Кык лун мысти, ті тӧданныд, Ыджыд лун лоӧ. Тайӧ кадӧ Морт Пиӧс вузаласны да крестӧ тувъяласны».
Аркирейяс, Индӧдӧ велӧдысьяс да пӧрысьяс чукӧртчисны Каиаф нима аркирей керкаӧ. Найӧ сёрнитчисны ылӧдлӧмӧн босьтны Исусӧс да вины.
Но шуисны, Ыджыд лунӧ пӧ оз ков, ӧд йӧзыс вермасны шызьыны.
Исус вӧлі Вифания сиктын, проказаысь бурдӧм Симон ордын. Исус дінӧ локтіс ань, сійӧ вайис вальді дозйын дона вый. Исуслӧн сёйигӧн ань кисьталіс выйсӧ Исуслы юр вылас.
Велӧдчысьяс аддзисны да пондісны шуасьны: «Мыйла, бара, лотӧ-а?
Тайӧ выйсӧ позис ыджыд донысь вузавны да сьӧмсӧ сетны гӧльяслы».
Тайӧс казялӧмӧн Исус шуис налы: «Мыйла ті шӧйӧвоштанныд аньсӧ?
Сійӧ буртор вӧчис Меным. Гӧльяс пыр лоасны тіянкӧд, а Ме тіянкӧд ог пыр ло. Выйӧн киськалӧмнас аньыс дасьтіс Менӧ дзебигкежлӧ.
Веськыда висьтала тіянлы: муюгыд пасьтала, кӧні висьталасны тайӧ Евангелльӧсӧ, сэні казьтыштасны тайӧ аньсӧ да висьталасны, мый сійӧ вӧчис».
Искариот Иуда вӧлі дас кык велӧдчысьысь ӧти. Сійӧ муніс аркирейяс дінӧ да шуис: «Мый сетанныд, вузала кӧ тіянлы Исусӧс?»
Найӧ вӧзйисны сылы комын эзысь сьӧм.
Сэксянь Иуда пондіс корсьны лӧсялан кад, медым вузавны Исусӧс.
Шомтӧм нянь сёян лунъяс дырйи медводдза лунӧ Исус дінӧ локтісны велӧдчысьясыс да юалісны: «Кӧні кӧсъян сёйны Ыджыд лунся ыжӧс? Ми мунам да дасьтам».
Исус шуис: «Мунӧй карӧ сэтшӧмтӧ морт дінӧ да висьталӧй сылы: “Велӧдысь шуис: Менам кадӧй матысмӧ. Тэ ордын велӧдчысьяскӧд пасъя Ыджыд лунсӧ”».
Велӧдчысьяс вӧчисны Исуслӧн тшӧктӧм серти, дасьтісны Ыджыд лунся сёян.
Рытнас Исус пуксис дас кыкнан велӧдчысьыскӧд сёйны.
Сёйиганыс шуис налы: «Веськыда висьтала тіянлы: тіян пиысь ӧти вузалас Менӧ».
Шогӧ усьӧмӧн быдӧн кутіс юасьны: «Ог-ӧ ме, Господьӧй?»
Исус вочавидзис: «Менӧ вузалысь Мекӧд ӧти тасьтіысь сёйӧ. Морт Пи мунӧ, кыдзи гижӧма Сы йылысь. Но курыд шог Сійӧс вузалысьлы. Бурджык сылы вӧлі, эз кӧ чужлы».
Сэки Сійӧс вузалысь Иуда шыасис: «Велӧдысьӧй, абу-ӧ ме?»
Исус вочавидзис: «Тэ шуин».
Сёйиганыс Исус босьтіс нянь, Енмӧс аттьӧалӧмӧн чегис няньсӧ да велӧдчысьяслы сетігас шуис: «Босьтӧй, сёйӧй, тайӧ Менам Яй».
Сэсся босьтіс чаша, аттьӧаліс Енмӧс да велӧдчысьяслы сетігас шуис: «Юӧй татысь быдӧн. Тайӧ Менам Вир — Выль Йитӧдлӧн Вир — киссьӧ уналысь мыжъяссӧ прӧститӧм вӧсна.
Висьтала тіянлы: ӧнісянь ог понды юны тайӧ виноград юансӧ сійӧ лунӧдз, кор понда юны тіянкӧд выльӧс Менам Батьлӧн Юраланінын».
Енлы сьылӧм бӧрын найӧ кайисны Олив керӧсӧ.
Исус шуис велӧдчысьясыслы: «Тавой ті ставныд эновтанныд Менӧ. Гижӧма: “Видзысьсӧ кувмӧн дойда, да ыжъясыс разаласны”. Ловзьӧм бӧрам Ме виччыся тіянӧс Галилеяын».
Петыр шуис: «Ставныс кӧ эновтасны Тэнӧ, ме ог».
Исус вочавидзис: «Веськыда висьтала тэныд: тавой петук чукӧсттӧдз на тэ куимысь соссян Меысь».
Петыр шуис: «Весиг кӧ кувны ковмас Тэкӧд, ог соссьы».
Тадзи шуалісны тшӧтш мукӧд велӧдчысьыс.
Сэсся Исус велӧдчысьясыскӧд локтіс Гефсиманӧ. Сійӧ шуис налы: «Пукалыштӧй тані, Ме ветла кевмысьны».
Аскӧдыс босьтіс Петырӧс да Зеведейлысь кыкнан писӧ. Исусӧс гажтӧм да шогалӧм босьтіс.
Сійӧ шуис: «Шогӧй кувмӧн топӧдӧ лолӧс. Олыштӧй тані Мекӧд да энӧ узьӧй».
Ачыс водзлань муныштіс да чужӧмнас муӧ уськӧдчӧмӧн кевмысис: «Батьӧй, позьӧ кӧ, вешты Ме дінысь тайӧ чашасӧ. Сӧмын мед лоас Тэнад кӧсйӧм серти, а оз Менам».
Исус матыстчис велӧдчысьяс дінас да аддзис: найӧ унмовсьӧмаӧсь. Петырлы шуис: «Ӧти час весиг энӧ вермӧй узьтӧг олыштны Мекӧд.
Энӧ узьӧй, кевмысьӧй, мед ыштӧдӧмыс эз вермы тіянӧс. Лолыд ӧд пыр дась, а вир-яйыд жеб».
Исус мӧдысь муніс да бара кевмысис: «Батьӧй, Ме дінысь кӧ оз позь вештыны тайӧ чашасӧ, а Меным кӧ колӧ юны сійӧс, мед лоас Тэнад кӧсйӧм серти».
Локтӧм бӧрас бара аддзис: велӧдчысьяссӧ унмыс топыда личкӧма.
Исус колис найӧс да бара муніс, воддза мозыс коймӧдысь кевмысис.
Сэсся локтіс велӧдчысьяс дінас да шуис налы: «Пыр на узянныд да шойччанныд?
Кадыс воис. Морт Пиӧс мыжаяс киӧ сетӧны. Чеччӧй, мунамӧй. Менӧ вузалысь матын нин».
Исуслӧн сёрнитігкості локтіс Иуда, дас кык велӧдчысьысь ӧти. Сыкӧд тшӧтш локтісны зоръясӧн да шыпуртъясӧн уна йӧз. Найӧс мӧдӧдӧмаӧсь аркирейяс да пӧрысьяс.
Исусӧс вузалысь шуӧма локтӧмаяслы, кодӧс пӧ окышта, Сійӧс и босьтӧй.
Иуда веськыда муніс Исус дінӧ да шуис: «Видза олан, Велӧдысьӧй», сэсся окыштіс Сійӧс.
Исус шуис сылы: «Ёртӧй, та понда-ӧ тэ локтін.»
Сэки кытшалісны да босьтісны Исусӧс.
Исускӧд вӧлысьясысь ӧти перйис шыпуртсӧ да керыштіс аркирей кесйӧглысь пельсӧ.
Исус шуис сылы: «Бӧр сюй шыпурттӧ. Шыпурт босьтысь шыпурт помысь кулас. Он ӧмӧй тӧд, Ме кӧ ӧні кора Батьӧйлысь, Сійӧ вермас мӧдӧдны уна дас сюрс анделӧс.
Кыдзи нӧ сэки Гижӧдъясыс инасны? Сэні шуӧма, тадзи колӧ лоны».
Йӧз чукӧрлы Исус шуис: «Лёк вӧчысьӧс моз зорйӧн-шыпуртӧн локтінныд босьтны Менӧ. Ме быд лун тіян крамын пукалі-велӧді, да ті энӧ босьтӧй Менӧ.
Ставыс тадзи артмис, медым инісны пророк гижӧдъяс».
Сэки велӧдчысьяс ставныс эновтісны Исусӧс да пышйисны.
Исусӧс кутысьяс вайӧдісны Сійӧс Каиаф аркирей ордӧ, кӧні вӧлі чукӧртчӧмаӧсь Индӧдӧ велӧдысьяс пӧрысьяскӧд.
Петыр бӧрӧ кольччӧмӧн вӧтчис Исус бӧрся аркирей керка дорӧдз. Пырис йӧрас да пуксис кесйӧгъяскӧд орччӧн — кӧсйис помсӧ аддзывны.
Аркирейяс, пӧрысьяс да став веськӧдлан котырыс корсисны Исуслы паныд ылӧгвисьталысьясӧс, медым сэсся мыждыны да вины Сійӧс. Уна пӧръясьысь воліс, но колана висьталысьыс эз сюр.
Бӧрынджык нӧшта кык ылӧгвисьталысь локтісны. Найӧ висьталісны: «Сійӧ шуліс, верма пӧ Енлысь крамсӧ жугӧдны, сэсся пӧ куим лунӧн сійӧс бӧр лэптыны».
Сэки аркирей сувтіс да юаліс Исуслысь: «Мый воча шуан?» Исус чӧв оліс.
Аркирей шуис: «Ловъя Ен водзын висьтав миянлы, Тэ-ӧ Кристос, Ен Пи».
Исус вочавидзис: «Тэ шуин. Висьтала тіянлы: ӧнісянь аддзанныд Морт Пиӧс, Ставсӧвермысьлӧн веськыдладорас пукалысьӧс да кымӧръяс вылын локтысьӧс».
Сэки аркирей косяліс ассьыс паськӧмсӧ да шуис: «Сійӧ Енмӧс омӧльтӧ.
Висьталысьяс миянлы оз нин ковны, ті асьныд кывлінныд Сылысь омӧльтӧмсӧ.
Мый шуанныд?»
Вочавидзисны: «Мыжа. Вины Сійӧс.»
Сэсся сьӧлалісны Исуслы чужӧмас, нӧйтісны Сійӧс да чужӧмас кучкалӧмӧн шуалісны: «Висьтав, Кристос, коді кучкис Тэнӧ?»
Петыр пукаліс йӧрас.
Ӧти кесйӧг ань матыстчис сы дінӧ да шуис: «Тэ тшӧтш галилеяса Исускӧд вӧлін».
Петыр став йӧз водзас соссис: «Ог гӧгӧрво, мый висьталан», сэсся вешйис дзиръя дорӧ.
Петырӧс казяліс мӧд ань да шуис сэні сулалысьяслы: «Тайӧ мортыс Назаретса Исускӧд вӧлі».
Петыр бара соссис, чорыда шуис: «Ме ог тӧд тайӧ Мортсӧ.»
Бӧрынджык сэні сулалысьяс матыстчисны да шуисны Петырлы: «Тэ дзик на пиысь, сёрниыд на кодь».
Петыр енмасьӧмӧн пондіс соссьыны: «Ог тӧд тайӧ Мортсӧ».
Дзик пыр кыліс петуклӧн чукӧстӧм.
Сэки Петырлы уси тӧд вылас Исуслӧн шуӧмыс: «Петук чукӧсттӧдз на тэ куимысь соссян Меысь».
Петыр петіс да курыда бӧрддзис.
27 юр.
Асывводзнас чукӧртчисны став аркирейыс пӧрысьяскӧд, сёрнитчӧмӧн найӧ воисны ӧти кывйӧ: вины Исусӧс. Сійӧс кӧрталӧмӧн нуӧдісны юралысь Понтий Пилат дінӧ да сетісны сылы.
Исусӧс мыждӧм йылысь тӧдмалӧм бӧрын Иуда, Сійӧс вузалысь, гӧгӧрвоис ассьыс мыжсӧ. Сэки бӧр нуис комын эзысь сьӧмсӧ аркирейяслы да пӧрысьяслы да шуис налы: «Ме мыж вӧчи, мыжтӧм мортӧс вузалі».
Найӧ вочавидзисны: «Миянлы нӧ мый? Ачыд ӧд тӧдін».
Иуда шыбитіс сьӧмсӧ крамас, сэсся петіс сэтысь, муніс да джагӧдчис.
Аркирейяс сьӧмсӧ чукӧртӧм бӧрын шуисны: «Оз позь тайӧ сьӧмсӧ пуктыны крамса сьӧм видзанінӧ, сійӧ вирлӧн дон».
Сёрнитчӧм бӧрын найӧ ньӧбисны гырнич вӧчысьлысь мусӧ, шуисны вӧчны сэтчӧ йӧз муысь воӧмаяслы шойна.
Та вӧсна тайӧ муыслы пуктісны “Вир му” ним, тадзи ӧнӧдз на нимтӧны. Тадзи иніс Еремей пророклӧн шуӧмыс:
— Босьтісны найӧ комын эзысь сьӧмсӧ, Израиль войтырӧн тайӧ Мортысь шуӧм донсӧ, да ньӧбисны сы вылӧ гырнич вӧчысьлысь мусӧ. Тадзи шуис меным Господь.
Исусӧс вайӧдісны юралысь водзӧ.
Юралысь юаліс: «Тэ-ӧ юдейяслӧн Ӧксыыс?»
Исус вочавидзис: «Тэ шуан».
Аркирейяс да пӧрысьяс мыжалісны Исусӧс, но Сійӧ чӧв оліс.
Пилат сэки шуис Сылы: «Тэ ӧмӧй он кыв, кымынӧн висьталӧны Тэныд паныд?»
Исус весиг воча кыв эз шу. Юралысьӧс тайӧ ёна шензьӧдіс.
Быд во Ыджыд лунӧ йӧз корӧм серти юралысь лэдзліс дзескыдінысь ӧти мортӧс.
Сэки дзескыдінын пукаліс ставлы тӧдса Варавва нима морт. Чукӧртчӧм йӧзлысь Пилат юаліс: «Кодӧс кӧсъянныд, мед ме лэдза, Варавваӧс али Исусӧс, кодӧс шуӧны Кристосӧн?»
Пилат тӧдіс, мый Исусӧс вайӧдісны вежалӧмныс понда.
Сэки Пилатлӧн гӧтырыс мӧдӧдас мыжданінӧ висьтавны верӧсыслы: «Тайӧ веськыда олысьыслы лёксӧ эн вӧч. Тавой вӧтын ме ёна шогси Сы понда».
Аркирейяс пӧрысьяскӧд ыззьӧдісны йӧзсӧ, мед корасны лэдзны Варавваӧс, а Исусӧс вины.
Пилат юаліс: «Кодӧс на пиысь шуанныд лэдзны?»
Воча шуисны: «Варавваӧс».
Пилат юаліс: «Мый шуанныд вӧчны Исускӧд, кодӧс Кристосӧн шуӧны?»
Ставныс горӧдісны: «Тувъявны.»
«Мый лёксӧ Сійӧ вӧчис?» — юаліс Пилат.
Йӧзыс гораджыка на горӧдісны: «Тувъявны Сійӧс.»
Пилат аддзис: йӧзыс оз лӧньны, мӧдарӧ, ёнджыка на шызьӧны. Сэки налӧн син водзын Пилат мыськис кисӧ да шуис: «Ме абу мыжа тайӧ веськыда олысь мортсӧ виӧмысь. Видзӧдӧй асьныд».
Став йӧзыс воча горӧдісны: «Мед Сылӧн вирыс миян вылӧ да миян челядьным вылӧ коляс».
Сэки Пилат лэдзис Варавваӧс, а Исусӧс нӧйтӧм бӧрын сетіс тувъявны.
Шыпуртаяс нуӧдісны Исусӧс юралысьлӧн керкаӧ, сэтчӧ чукӧртісны и мукӧд шыпуртаясӧс. Сэсся пӧрччӧдісны Исусӧс да пасьтӧдісны Сійӧс гӧрд кышанӧ, юрас пуктісны лежнӧгысь кыӧм юркытш, веськыд киас сетісны бедь.
Сэсся пидзӧс выланыс Сы водзӧ сувтӧмӧн шуалісны сералігтырйи: «Мед олас юдейяслӧн Ӧксы.»
Сьӧлалісны Сійӧс да кучкалісны юрас беддьӧн.
Сералӧм-лёкӧдӧм бӧраныс найӧ босьтісны Исус вылысь гӧрд кышансӧ да бӧр пасьтӧдісны Сійӧс Аслас паськӧмӧ, сэсся нуӧдісны тувъявны.
Карсьыс петіганыс налы вочаасис киринеяса Симон, сылы тшӧктісны нуны Исуслысь крестсӧ.
Сэсся воисны Голгопа керӧсӧ, нимыслӧн вежӧртасыс лоӧ “Юр лы”. Сэні Исуслы сетісны юны сӧп сора вина, но видлӧм бӧрас Сійӧ эз кут юны.
Исусӧс тувъялӧм бӧрын шыпуртаяс пудъясьӧмӧн юкисны Сылысь паськӧмсӧ.
Сэсся пуксисны видзны Сійӧс.
Юр весьтас ӧшӧдісны мыжалан пасйӧд: «Тайӧ Исус, юдейяслӧн Ӧксы».
Сыкӧд орччӧн тувъялісны кык лёк вӧчысьӧс: ӧтисӧ веськыдладорас, мӧдсӧ шуйгаладорас.
Сэті мунысьяс лёкысь видзӧдӧмӧн омӧльтісны Исусӧс: «Крам жугӧдысь да куим лунӧн сійӧс лэптысь, мезды Асьтӧ.
Тэ кӧ Ен Пи, лэччы крест вывсьыд.»
Сійӧс лёкӧдісны тшӧтш аркирейяс, Индӧдӧ велӧдысьяс, пӧрысьяс да фарисейяс: «Мукӧдӧс мездіс, а Асьсӧ мездыны оз вермы.
Сійӧ кӧ Израиль Ӧксы, мед лэччас крест вывсьыс, сэки эскам Сылы. Сійӧ Ен вылӧ лачаӧн оліс.
Мед Енмыс мездас ӧні, дона кӧ Сылы.
Шуліс ӧд, Ме пӧ Ен Пи».
Тадзи тшӧтш лёкӧдісны Исусӧс орччӧн тувъялӧм лёк вӧчысьяс.
Лун шӧр кадӧ пемдіс став му пасьталаыс, пемыдыс сулаліс куим часӧдз. Куим час гӧгӧрын Исус ыджыд шыӧн горӧдіс: «Эли, Эли, лама сабактани? Енмӧй, Енмӧй, мыйла Тэ колин Менӧ?»
Сэні сулалысьясысь кодсюрӧ шуисны, Илляӧс пӧ корӧ.
На пиысь ӧти дзик пыр котӧртіс, босьтіс губка да кӧтӧдіс шома винаӧн, сэсся бедь помӧ сатшкӧмӧн мыччис сійӧс Исуслы.
Мукӧдыс шуисны: «Энлы. Видзӧдлам, локтас оз Илля мездыны Сійӧс».
Исус ыджыд шыӧн горӧдӧм бӧрын лэдзис ловсӧ.
Сэки крамын ӧшалысь дӧраыс вывсяньыс улӧдзыс кык пельӧ косяссис. Муыс вӧрзис, из керӧсъяс потісны.
Шойгу кыртаяс воссялісны, уна вежа войтырлӧн шойыс ловзис, да найӧ петісны дзебанінъясысь. Исуслӧн ловзьӧм бӧрын найӧ пырисны вежа карӧ, унаӧн аддзылісны найӧс.
Му вӧрӧмысь да став лоӧмторсӧ аддзӧмысь Исусӧс видзысьяс веськӧдлысьныскӧд ёна повзисны да шуисны: «Тайӧ Мортыс збыльысь Ен Пи вӧлӧма».
Сэні вӧлі уна ань, кодъяс ылісянь видзӧдісны. Найӧ Галилеясянь ветлӧдлісны Исускӧд да кесъялісны Сылы.
На пӧвстын вӧліны Магдала Марья, Яковлӧн да Иосейлӧн Марья мамныс да Зеведей пиянлӧн мамныс.
Рытнас Аримафея карысь воис Ӧсип нима озыр морт, Исуслӧн велӧдчысь. Сійӧ муніс Пилат дінӧ да корис Исуслысь шойсӧ.
Пилат тшӧктіс сетны.
Ӧсип босьтіс шойсӧ, гартыштіс сӧстӧм шабді дӧраӧ да пуктіс кыртаӧ кералӧм выль дзебанінӧ. Пыранінас путкыльтіс ыджыд из, сэсся муніс.
Дзебанінлы воча пукаліс Магдала Марья мӧд Марьякӧд.
Мӧд луннас, шойччан лунӧ, аркирейяс фарисейяскӧд локтісны Пилат дінӧ да шуисны: «Ыджыдӧй, миянлы тӧд выланым усис: ловъя дырйиыс на эсійӧ пӧръясьысьыс шуліс, куим лун мысти пӧ ловзя.
Тшӧкты видзны дзебанінсӧ коймӧд лунӧдзыс. Велӧдчысьясыс вермасны локны войнас да гусявны шойсӧ, сэсся шуны йӧзыслы, Сійӧ пӧ ловзьӧма. Тайӧ бӧръя пӧръялӧмыс лоас воддзасьыс на лёкджык».
Пилат шуис: «Босьтӧй видзысьясӧс да видзӧй, колӧкӧ».
Найӧ мунісны, пасйисны пыранінысь изсӧ печатьӧн да тшӧктісны шыпуртаяслы видзны.
28 юр.
Шойччан лун бӧрын водз асывнас Магдала Марья да мӧд Марья локтісны видзӧдлыны дзебанінсӧ.
Виччысьтӧг муыс ёна вӧрзис: Господьлӧн андел лэччис енэжсяньыс. Сійӧ вештіс изсӧ пыранінсьыс да пуксис сы вылӧ. Андел югъяліс чардби моз, паськӧмыс вӧлі лым кодь еджыд. Видзысьяс кувмӧныс повзисны, найӧс дзӧрӧм босьтіс.
Андел шыасис аньяс дінӧ: «Энӧ полӧй. Ме тӧда, ті корсянныд тувъявлӧм Исусӧс.
Сійӧ тані абу. Сійӧ ловзис Аслас шуӧм серти.
Локтӧй, видзӧдлӧй Господьлысь куйланінсӧ. Мунӧй ӧдйӧджык да юӧртӧй велӧдчысьясыслы, мый Исус ловзьӧма да виччысьӧ найӧс Галилеяын, сэтысь найӧ аддзасны Сійӧс.
Татшӧм юӧр менам тіянлы».
Аньяс пырысьтӧм-пыр петісны дзебанінысь да полігтыр, но ёна нимкодясьӧмӧн, котӧртісны юӧртны та йылысь Исуслӧн велӧдчысьяслы.
Туй выланыс аньяскӧд паныдасис Исус да шуис: «Нимкодясьӧй.»
Найӧ уськӧдчисны Сы водзӧ да кутчысисны кокас.
Исус шуис: «Энӧ полӧй.
Мунӧй, висьталӧй вокъяслы, мед мунасны Галилеяӧ, сэтысь аддзасны Менӧ».
Аньяслӧн мунӧм бӧрын дзебанін видзысьясысь кодсюрӧ мунісны карас да висьталісны став лоӧмтор йывсьыс аркирейяслы.
Аркирейяс чукӧртчисны пӧрысьяскӧд, сёрнитчӧм бӧраныс сетісны шыпуртаяслы уна сьӧм да шуисны: «Висьталӧй, мый войнас тіян узигкості велӧдчысьясыс волӧмаӧсь да гусялӧмаӧсь шойсӧ.
Кывсяс кӧ тайӧ юралысьӧдз, ми сійӧс эскӧдам да тіянӧс доръям».
Шыпуртаяс босьтісны сьӧмсӧ да вӧчисны аркирейяслӧн тшӧктӧм серти.
Тайӧ юӧрыс паськаліс юдейяс пӧвстын, весиг ӧнӧдз на олӧ.
Исуслӧн тшӧктӧм серти дас ӧти велӧдчысьыс мунісны Галилеяӧ да кайисны керӧсӧ. Исусӧс аддзӧм бӧрын найӧ муӧдзыс копыртчылісны Сы водзӧ, кодсюрӧлы сьӧкыд вӧлі эскынысӧ.
Велӧдчысьяс дінӧ матыстчӧмӧн Исус шуис: «Меным сетӧма ыджыдавны енэжын да му вылын.
Мунӧй быд кыла войтыр дінӧ, вӧчӧй найӧс Менам велӧдчысьясӧн да пыртӧй найӧс Бать, Пи да Вежа Лов нимӧн. Велӧдӧй найӧс овны став Менам тшӧктӧм серти. Тӧдӧй: Ме пыр тіянкӧд нэмъяс помасьтӧдз».
Аминь.
Марк серти бур юӧр
1 юр.
Исус Кристос, Ен Пи йылысь Евангелльӧ пансьӧ, кыдзи висьталӧма пророк гижӧдъясын: — Ыста Ассьым юӧртысьӧс Тэ водзвылын, сійӧ Тэныд туйсӧ дасьтас.
Овтӧминын кылӧ горзысьлӧн шы: «Лӧсьӧдӧй туйсӧ Господьлы, веськӧдӧй-шыльӧдӧй ордымъяс Сылы.»
Локтіс Иоан. Сійӧ пыртіс йӧзӧс овтӧминын да юӧрталіс: «Бергӧдчӧй мыжъяссьыныд да пыртчӧй, медым Ен прӧститас мыжъяснытӧ».
Иоан дінӧ локтіс уна йӧз Юдея му пасьталаысь да Ерусалим карысь. Асланыс мыжъясысь висьтасьӧм бӧрын Иоан пыртіс найӧс ставнысӧ Йӧрдан юын.
Иоан новліс верблюд гӧнысь кыӧм паськӧм да коскас кучик тасма, сёйліс чирк да видзвыв ма.
Сійӧ юӧртіс: «Ме бӧрын локтӧ меысь вынаджык, ме ог шогмы копыртчыны да разьны Сылысь кӧмкот кӧвсӧ.
Ме пырті тіянӧс ваӧн, а Сійӧ пыртас тіянӧс Вежа Лолӧн».
Сійӧ лунъясӧ локтіс Галилеяса Назарет карысь Исус. Иоан пыртіс Сійӧс Йӧрдан юын.
Ваысь петігас Исус аддзис: енэжыс воссис да Сы вылӧ гулю моз лэччис Лов.
Енэжсянь кыліс гӧлӧс шы: «Тэ Менам муса Пиӧй, Ме нимкодяся Тэӧн».
Дзик пыр Лов нуӧдіс Исусӧс овтӧминӧ.
Сэні нелямын лун чӧж сӧтана ыштӧдіс Сійӧс. Исус оліс вӧрса пемӧсъяс пӧвстын, Сылы кесъялісны анделъяс.
Иоанлӧн дзескыдінӧ веськалӧм бӧрын Ен Юралӧм йылысь Евангелльӧ висьталігтыр Исус муніс Галилеяӧ. Сійӧ юӧртіс: «Воис кад. Енлӧн Юралӧмыс матын нин. Бергӧдчӧй мыжъяссьыныд да эскӧй Евангелльӧӧ».
Галилея ты пӧлӧн мунігӧн Исус аддзис Симонӧс да сылысь Ӧндрей воксӧ. Найӧ вӧліны чери кыйысьяс. Кык вок буретш вӧйтасисны ты вылын.
Исус шуис налы: «Локтӧй Ме бӧрся. Ме вӧча тіянысь морт кыйысьясӧс».
Кык вок дзик пыр эновтісны тывъяснысӧ да мунісны Исус бӧрся.
Исус муртса муныштіс да аддзис пыжысь Зеведей Яковӧс Иоан вокыскӧд. Найӧ дзоньталісны тывъяс. Исус чукӧстіс вокъясӧс.
Найӧ колисны пыжас Зеведей батьнысӧ меда йӧзкӧд да мунісны Исус бӧрся.
Воисны Капернаум карӧ. Медводдза шойччан лунӧ Исус пырис синагогаӧ да пондіс велӧдны.
Йӧзыс шензисны Сылӧн велӧдӧмысь, ӧд Сійӧ велӧдіс ыджыдалысьӧ пуктӧм морт моз, эз Индӧдӧ велӧдысьяс моз.
Синагогаын вӧлі пеж лолӧн кутӧм морт. Сійӧ горӧдіс: «Мый Тэныд колӧ миянсянь, Назаретса Исус?
Тэ локтін бырӧдны миянӧс?
Тӧда, коді Тэ. Тэ — Енлӧн Вежаыс.»
Исус ӧлӧдіс пеж лолӧс: «Ланьт. Пет сы пытшкысь».
Пеж лов песовтіс мортсӧ, лёкысь горӧдіс да петіс сы пытшкысь.
Став йӧзыс весьӧпӧрисны, ӧта-мӧдныслысь юасисны: «Мый тайӧ?
Мыйсяма выль велӧдӧм? Сылысь кывзысьӧны весиг пеж ловъяс».
Исус йылысь сёрниыс ӧдйӧ паськаліс став Галилея му пасьтала.
Синагогаысь петӧм бӧрын Исус локтіс Яковкӧд да Иоанкӧд Симон да Ӧндрей ордӧ.
Симон гӧтырлӧн мамыс куйліс биа висьӧмӧн. Та йылысь дзик пыр висьталісны Исуслы.
Исус матыстчис ань дінӧ да киӧдыс босьтӧмӧн чеччӧдіс сійӧс. Биа висьӧмыс дзик пыр эновтіс аньӧс, и сійӧ пондіс кесъявны налы.
Рытнас, шонді лэччӧм бӧрын, Исус дінӧ вайӧдісны став висьысьсӧ да пеж лолӧн кутӧмасӧ.
Став карыс чукӧртчис керка ӧдзӧс дорӧ.
Исус унаӧс бурдӧдіс быдпӧлӧс висьӧмысь да вӧтліс уна пеж лолӧс. Сійӧ эз лэдз сёрнитны пеж ловъясӧс, ӧд найӧ тӧдісны, мый Сійӧ — Кристос.
Аскинас, югдытӧдзыс на, Исус чеччис да муніс кевмысьны овтӧминӧ.
Симон да сыкӧд вӧлысьяс мунісны Исус бӧрся. Исусӧс аддзӧм бӧрын висьталісны: «Ставныс корсьӧны Тэнӧ».
Исус шуис налы: «Мунамӧй маті сиктъясӧ. Меным тшӧтш сэні колӧ висьтавлыны Бур Юӧрсӧ, ӧд та могысь Ме локті».
Сійӧ ветлӧдліс Галилея му пасьтала, висьтавліс синагогаясын Бур Юӧр да вӧтлаліс пеж ловъясӧс.
Исус дінӧ локтіс проказаӧн висьысь да Сы водзӧ пидзӧс вылас сувтӧмӧн корис: «Кӧсъян кӧ, верман менӧ сӧстӧммӧдны».
Исуслӧн сьӧлӧмыс нормис. Сійӧ нюжӧдіс кисӧ, инмӧдчыліс висьысь дінӧ да шуис: «Кӧсъя. Сӧстӧммы».
Висьысьлӧн дойясыс дзик пыр бырисны, сійӧ бурдіс.
Исус пырысьтӧм-пыр ыстіс сійӧс да чорыда ӧлӧдіс: «Та йылысь некодлы эн висьтав. Мун, петкӧдлы асьтӧ поплы, сэсся Мӧисей тшӧктӧм серти аслад сӧстӧммӧмысь вай вись. Тадзи тӧдмаласны тэнад бурдӧм йылысь».
Мунӧм бӧрас бурдӧм морт пондіс висьтавлыны лоӧмтор йывсьыс. Та вӧсна Исус эз нин вермы восьсӧн пырны карӧ. Сійӧ оліс кар саяс, овтӧминын, и Сы дінӧ быдласянь волісны йӧзыс.
2 юр.
Кымынкӧ лун мысти Исус бара локтіс Капернаумӧ.
Йӧзыс кылісны, мый Сійӧ гортас, и дзик пыр уна йӧз чукӧртчис Сы ордӧ, весиг пыранінас сулалісны.
Исус висьталіс налы Енлысь Кывсӧ.
Сэки нёльӧн вайисны вӧрзьӧдчыны вермытӧм мортӧс.
Уна йӧз вӧсна найӧ эз вермыны матыстчыны Исус дінӧ. Сэки найӧ разисны керка вевтсӧ да Исус весьтті лэдзисны висьысьӧс вольпасьнас.
Налысь эскӧмсӧ аддзӧмӧн Исус шуис висьысьлы: «Пиӧй, тэнсьыд мыжъястӧ прӧститӧма».
Сэні пукалісны Индӧдӧ велӧдысьясысь кодсюрӧ да мӧвпалісны ас кежас: «Мыйла Сійӧ Енмӧс омӧльтӧ?
Ен кындзи вермас-ӧ кодкӧ прӧститны мыжъяс?»
Исуслӧн лолыс дзик пыр тӧдіс налысь мӧвпъяссӧ. Сійӧ шуис: «Мыйла ті мӧвпаланныд тадзи?
Мый кокньыдджык шуны вӧрзьӧдчыны вермытӧмлы: “Тэнсьыд мыжъястӧ прӧститӧма” либӧ “Чеччы, босьт вольпасьтӧ да ветлы”?
Ӧні ті тӧдмаланныд: Морт Пи вермӧ прӧститны мыжъяс му вылын». Сэсся шуис висьысьлы: «Тэныд шуа: чеччы, босьт вольпасьтӧ да мун гортад».
Сійӧ дзик пыр чеччис, босьтіс вольпасьсӧ да ставныслӧн син водзын петіс. Йӧзыс шензьӧмӧн ошкисны Енмӧс да шуалісны, татшӧмсӧ пӧ ми эгӧ на аддзылӧй.
Исус бара муніс ты дорӧ. Йӧзыс ставныс локтісны Сы дінӧ, и Сійӧ велӧдіс найӧс.
Сэтысь мунігас Исус аддзис Алфей Левийӧс, сійӧ пукаліс вотчукӧртанінын. Исус шуис сылы: «Лок Ме бӧрся».
Левий чеччис да муніс Исус бӧрся.
Сэсся Исус локтіс Левий ордӧ. Сэні Исускӧд да Сылӧн велӧдчысьяскӧд сёйисны тшӧтш вот перйысьяс да мукӧд мыжа йӧз.
Унаӧн на пиысь вӧліны Исус бӧрся мунысьяс.
Индӧдӧ велӧдысьяс да фарисейяс аддзисны, мый Исус сёйӧ мыжа йӧзкӧд да вот перйысьяскӧд. Сэки юалісны Исуслӧн велӧдчысьяслысь: «Мыйла Сійӧ сёйӧ-юӧ вот перйысьяскӧд да мыжа йӧзкӧд?»
Исус кыліс тайӧс да шуис налы: «Дзоньвидзалы бурдӧдысьыд оз ков, сійӧ висьысьлы колӧ.
Ме локті корны Ен дінӧ мыжаясӧс, эг веськыда олысьясӧс».
Иоанлӧн да фарисейяслӧн велӧдчысьясыс вӧлі видзалӧны.
Йӧзыс локтісны Исус дінӧ да юалісны: «Иоанлӧн да фарисейяслӧн велӧдчысьяс видзалӧны. Мыйла Тэнад оз?»
Исус вочавидзис: «Вермӧны-ӧ видзавны кӧлысь вылын верӧспукӧд гажӧдчысь ёртъяс?
Верӧспуыс кӧ накӧд, найӧ оз вермыны видзавнысӧ. Воасны на сійӧ лунъясыс, кор колясны верӧспутӧг, сэки и видзаласны.
Важ паськӧмтӧ оз дӧмны выль дӧра дӧмасӧн. Тадзи кӧ вӧчан, выль дӧмас дортіыс нёйдас-косяссяс паськӧмыд, розьыс ёнджыка на ыдждас.
Выль винатӧ оз кисьтны важ кучик дозйӧ. Тадзи кӧ вӧчан, кучик дозйыс потас, и винаыс киссяс. Выль винатӧ кисьтӧны выль кучик дозйӧ».
Шойччан лунӧ Исус мунӧ вӧлі кӧдзӧм муяс вомӧн. Сылӧн велӧдчысьясыс мунігмозныс нетшкисны шепсӧ.
Фарисейяс шуисны Исуслы: «Видзӧдлы, мый Тэнад велӧдчысьясыд вӧчӧны. Тайӧс оз позь вӧчны шойччан лунӧ».
Исус воча шуис: «Ті ӧмӧй энӧ лыддьылӧй, мый вӧчис Давид, кор тшыгъяліс аслас йӧзкӧд да налӧн эз вӧв сёяныс?
Авиафар аркирей дырйи сійӧ пырис Ен керкаӧ, сёйис Енлы вайӧм няньсӧ да аслас йӧзлы тшӧтш сетіс. Тайӧ няньсӧ сӧмын попъяслы позис сёйны».
Сэсся Исус шуис фарисейяслы: «Шойччан лунсӧ лӧсьӧдӧма мортлы, абу мортсӧ шойччан лунлы.
Та вӧсна Морт Пи шойччан лун вылын ыджыдыс».
3 юр.
Исус бара локтіс синагогаӧ.
Сэні вӧлі косьмӧм киа морт.
Исус бӧрся сюся видзӧдісны, бурдӧдас-ӧ шойччан лунӧ, ӧд корсисны помка мыжавны Сійӧс.
Исус тшӧктіс косьмӧм киа мортлы: «Сувт шӧрас».
Сэсся юаліс мукӧдыслысь: «Мый позьӧ вӧчны шойччан лунӧ: бурсӧ али лёксӧ, мездыны мортӧс али вины сійӧс?»
Найӧ чӧв олісны.
Исус шогсис налӧн чорзьӧм сьӧлӧмныс вӧсна да чорыда видзӧдліс на вылӧ. Сэсся шуис висьысьлы: «Нюжӧд китӧ».
Сійӧ нюжӧдіс, и киыс пырысь-пыр бурдіс, лои мӧдыс кодь.
Сэки фарисейяс петісны да Ирӧдлӧн йӧзкӧд дзик пыр панісны сёрни Исусӧс виӧм йылысь.
Исус муніс велӧдчысьясыскӧд ты дорӧ.
Сы бӧрся вӧтчис унасьыс-уна йӧз Галилеяысь, Юдеяысь, Ерусалим карысь, Идумеяысь, Йӧрдан ю сайысь, Тир да Сидон каръясысь. Найӧ локтісны Исус дінӧ, ӧд кывлӧмаӧсь, мый Сійӧ вӧчӧ.
Исус тшӧктіс велӧдчысьясыслы лӧсьӧдны Сылы пыж, медым йӧзыс эз дзескӧдны Сійӧс.
Исус унаӧс бурдӧдіс сэні. Та вӧсна висьысьяс сюйсьӧмӧн сюйсисны, медым инмӧдчывны Сы дінӧ.
Исусӧс аддзигӧн пеж ловъяс уськӧдчылісны Сы водзӧ да горзісны: «Тэ Ен Пи.»
Исус чорыда ӧлӧдіс найӧс Сы йылысь висьтавлӧмысь.
Исус кайис керӧсӧ. Сійӧ корис Ас дінас, кодӧс кӧсйис, и найӧ локтісны Сы дінӧ.
Сійӧ бӧрйис дас кыкӧс лоны Сыкӧд, медым мӧдӧдны найӧс висьтавны Бур Юӧр да сетны налы вын бурдӧдавны висьысьясӧс да вӧтлавны пеж ловъясӧс. Дас кыкыс вӧліны: Симон, кодлы сетіс Петыр ним, Зеведей Яков да сылӧн Иоан вокыс, кодъяслы сетіс Воанергес ним, вуджӧдны кӧ: гым пиян, Ӧндрей, Филип, Варфоломей, Матвей, Фома, Алфей Яков, Фаддей, Кананит Симон да Искариот Иуда, Исусӧс вузалысь.
Кор найӧ бӧр локтісны гортас, бара чукӧртчисны йӧз. Исуслы да велӧдчысьясыслы эз вӧв позянлуныс весиг сёйыштнысӧ.
Та йылысь кылісны Исуслӧн матыссаясыс. Найӧ локтісны Сыла, ӧд сёрнитісны, Сійӧ пӧ абу Ас вежӧрас.
Ерусалимысь локтысь Индӧдӧ велӧдысьяс сёрнитісны, Сы пытшкын пӧ Вельзевул, вӧтлалӧ пӧ пеж ловъясӧс налӧн юралысь вынӧн.
Исус корис йӧзсӧ да висьталіс налы велӧданвисьтъясӧн:
«Вермас-ӧ сӧтана вӧтлыны сӧтанаӧс?
Ас муын олысьяс кӧ ас костаныс тышкасьӧны, сэні олӧмыс киссяс.
Зыксьӧмӧн олысь керка дыр оз сулав.
Сӧтанаыс кӧ аслыс паныд кыпӧдчӧ-тышкасьӧ, сійӧ вынсӧ воштас, сылы воас пом.
Некод оз вермы пырны вына мортлӧн керкаӧ да сійӧс кӧртавтӧг босьтны сылысь эмбурсӧ. Вына мортӧс кӧрталӧм бӧрын сӧмын вермас босьтны эмбурсӧ.
Веськыда висьтала тіянлы: мортлысь быд мыж да быд омӧльтӧм лоӧ прӧститӧма.
Коді омӧльтас Вежа Лолӧс, сылысь мыжсӧ некор оз ло прӧститӧма. Сылӧн мыжыс пыр кежлӧ кольӧ».
Исус висьталіс тайӧс, ӧд сёрнитісны, мый Сы пытшкын пеж лов.
Локтісны Исуслӧн мамыс да вокъясыс. Ывлаас сулалігӧн найӧ мӧдӧдісны корны Сійӧс.
Исус гӧгӧр пукалысь йӧз шуисны Сылы: «Мамыд да чой-вокыд ывлаасӧсь, Тэнӧ юасьӧны».
Исус воча шуис: «Коді Меным мамыс да вокыс?»
Ас гӧгӧрыс пукалысьяс вылӧ видзӧдлӧмӧн шуис: «Найӧ Менам вокъясӧй да Менам мамӧй. Ен кӧсйӧм серти олысь — Меным вок, чой да мам».
4 юр.
Исус бара велӧдіс ты дорын.
Сы дінӧ чукӧртчис зэв уна йӧз, Сылы весиг ковмис пуксьыны пыжӧ. Пыжыс сулаліс ва вылын, а йӧзыс — вадорас.
Исус висьталіс налы уна велӧданвисьт: «Кывзӧй. Морт кӧдзны петас.
Кӧдзигас кымынкӧ кӧйдыс усяс туй бокӧ. Сэтчӧ воасны лэбачьяс да кокаласны.
Кымынкӧ кӧйдыс усяс изъяинӧ. Этша муыс вӧсна ляпкыдінад найӧ ӧдйӧ чужасны.
Петас шонді, пӧжны пондас, и омӧль вужъя петасыд косьмас.
Кымынкӧ кӧйдыс усяс лежнӧг пӧвстӧ. Быдмигас лежнӧгыс пӧдтас петассӧ, и сійӧ оз вай тусьсӧ.
Мукӧд кӧйдысыс усяс бур муӧ. Петас, быдмас да ваяс уна тусь: ӧтияс — комын пӧв, мӧдъяс — квайтымын пӧв, коймӧдъяс — сё пӧв».
Сэсся Исус шуис: «Кодлӧн эм пель, мед кылӧ.»
Ас кежаныс кольӧм бӧрын дас кыкыс мукӧд велӧдчысьыскӧд пондісны юасьны Исуслысь велӧданвисьт йылысь.
Исус шуис: «Тіянлы сетӧма тӧдны Ен Юралӧмлысь гусяторъяссӧ, а мукӧдыс кылӧны та йылысь сӧмын велӧданвисьтъясысь.
— Найӧ видзӧдӧны, аддзӧны — да оз казявны, кывзӧны, кылӧны — да оз гӧгӧрвоны. Оз бергӧдчыны Енланьӧ, и налысь мыжъяссӧ оз ло прӧститӧма».
Исус шуис налы: «Энӧ ӧмӧй гӧгӧрвоӧй тайӧ велӧданвисьтсӧ?
Кыдзи нӧ мукӧд велӧданвисьтсӧ гӧгӧрвоанныд?
Кӧдзысь Ен Кыв кӧдзӧ.
Туй бокӧ усьӧм кӧйдыс петкӧдлӧ: мортыс кылӧ Кывсӧ, но дзик пыр локтӧ сӧтана да гусялӧ сьӧлӧмас кӧдзӧм Кывсӧ.
Изъяинӧ усьӧм кӧйдысыс петкӧдлӧ: мортыс кылӧ Кывсӧ да дзик пыр долыдпырысь босьтӧ сійӧс сьӧлӧмас, но вужъясьтӧмысла оз дыр эскы, Ен Кыв вӧсна дзескӧдігӧн-вӧтлігӧн сійӧ эновтчӧ эскӧмсьыс.
Лежнӧг пӧвстӧ усьӧм кӧйдысыс петкӧдлӧ: мортыс кылӧ Кывсӧ, но быдлунъя тӧждыс, озырмыны ыштӧмыс да мукӧд кӧсйӧмыс пӧдтӧ кӧдзӧм Кывсӧ, и сійӧ оз вай вотӧссӧ.
Бур муӧ кӧдзӧм кӧйдысыс петкӧдлӧ: мортыс кылӧ Кывсӧ, босьтӧ сійӧс сьӧлӧмас да вайӧ вотӧс: ӧтияс — комын пӧв, мӧдъяс — квайтымын пӧв, коймӧдъяс — сё пӧв».
Исус висьталіс: «Ӧзтӧм битӧ ӧмӧй пыртлӧны керкаӧ, мед доз улӧ пуктыны либӧ лабич улӧ сувтӧдны?
Оз ӧмӧй сійӧс бикок вылӧ пуктыны?
Став гусяыс воссяс да став дзебӧмаыс йӧзасяс.
Кодлӧн эм пель, мед кылӧ.»
Исус шуис: «Тӧд выланыд босьтӧй, мый кыланныд. Асланыд мурталӧм серти тіянлы мурталасны, нӧшта содтасны на тіянлы, кывзысьяслы.
Кодлӧн эм, сылы сетасны. Кодлӧн абу, сылысь бӧръясӧ босьтасны».
Исус шуис: «Енлӧн Юралӧмыс татшӧм. Морт кӧдзӧ кӧйдыс муӧ. Войсӧ сійӧ узьӧ, лунсӧ олӧ, а кутшӧм ногӧн няньыс чужӧ-быдмӧ, оз тӧд. Муыс ачыс быдтӧ: медводз петӧ веж турун, сэсся сійӧ шептасьӧ, а сэсся нин шепъясас артмӧны тусьяс.
Кор няньыс воас, дзик пыр сійӧ мӧдӧдӧ вундысьясӧс, ӧд вундан кадыс воис».
Исус шуис: «Мыйкӧд ӧткодялам Енлысь Юралӧмсӧ?
Кутшӧм велӧданвисьтӧн петкӧдлам сійӧс?
Сійӧ муӧ кӧдзӧм горчица тусь кодь. Став кӧйдыссьыс сійӧ медпосни.
Кӧдзӧм бӧрас быдмӧ да став пуктассьыс ыджыд лоӧ, весиг енэжвыв лэбачьяс вермӧны поздысьны гырысь вожъясыслӧн вуджӧр улӧ».
Уна татшӧм велӧданвисьтӧн Исус юӧртіс налы Енлысь Кывсӧ, мыйта найӧ вермисны гӧгӧрвоны.
Велӧданвисьтъястӧг эз сёрнитлы йӧзыскӧд, а велӧдчысьясыслы ас кежаныс гӧгӧрвоӧдліс ставсӧ.
Сійӧ лунӧ, рытнас, Исус шуис велӧдчысьясыслы: «Вуджамӧй ты мӧдлапӧлӧ».
Найӧ колисны йӧзсӧ, асьныс пуксисны пыжӧ Исус дінӧ.
Накӧд вӧліны тшӧтш мукӧд пыжаяс.
Кыптіс ыджыд тӧвныр, ёна гызис, да пыжыс кутіс тырны ванас.
Юрлӧс вылӧ нёровтчӧмӧн Исус узис пыж бӧжас.
Сійӧс садьмӧдісны да шуисны: «Велӧдысь.
Тэныд ӧмӧй веськодь, мый ми вӧям?»
Исус чеччис, ӧлӧдіс тӧвсӧ да тшӧктіс ваыслы: «Ланьт, лӧнь.»
Тӧлыс ланьтіс, и вӧвлытӧм чӧв-лӧнь пуксис.
Исус шуис велӧдчысьясыслы: «Мыйла ті сэтшӧм полысьӧсь?
Кӧні тіян эскӧмныд?»
Найӧ ыджыд полӧмӧн тырисны, ӧта-мӧдныслысь пондісны юасьны: «Коді Сійӧ? Весиг тӧлыс да ваыс кывзысьӧ Сылысь».
5 юр.
Та бӧрти найӧ вуджисны ты мӧдлапӧлӧ, Гадара муӧ.
Пыжсьыс чеччӧм бӧрын Исуслы дзик пыр паныд петіс шойнаысь пеж лолӧн кутӧм морт.
Сійӧ оліс шойгу кыртаын, сійӧс сьӧкыд вӧлі кӧртавны весиг чепъясӧн. Унаысь дорлісны сылысь ки-коксӧ, но сійӧ орйӧдлывліс чепсӧ да жугӧдліс дорӧмсӧ. Некод сійӧс лӧньӧдны эз вермы.
Лун и вой сійӧ дугдывтӧг горзіс шойгу кыртаын да керӧсъясын, дойдаліс асьсӧ изйӧн.
Сійӧ ылісянь аддзис Исусӧс, котӧрӧн локтіс да уськӧдчис Сы водзӧ, сэсся лёк горшӧн горӧдіс: «Мый Тэныд месянь колӧ, Исус, Медвылысса Енлӧн Пи?
Енмӧн кора, эн пес менӧ.»
Тадзи шуаліс, ӧд Исус тшӧктіс пеж ловлы петны морт пытшкысь.
Исус юаліс сылысь: «Мый тэнад нимыд?»
Сійӧ вочавидзис: «Легион менам нимӧй, ми ӧд унаӧнӧсь».
Сійӧ ёна корис Исусӧс, мед эз вӧтлы найӧс тайӧ муысь.
Сэні керӧс бокын йирсис ыджыд порсь чукӧр.
Пеж ловъяс корисны Исусӧс: «Лэдз миянӧс пырны порсьяс пытшкӧ».
Исус лэдзис.
Пеж ловъяс петісны да пырисны порсьяс пытшкӧ.
А порсьяс кыр йывсянь уськӧдчисны тыӧ да пӧдісны. Порсьыс вӧлі кык сюрс гӧгӧр.
Порсь видзысьяс пышйисны сэтысь, котӧрӧн мунісны карӧ да орчча сиктъясӧ висьтавны аддзывлӧмтор йывсьыс.
Йӧзыс петісны видзӧдлыны, мый лоӧма.
Найӧ локтісны Исус дінӧ да аддзисны коркӧя пеж лолӧн кутӧм мортӧс, код пытшкысь петіс дзонь легион. Сійӧ, паськӧма да ас вежӧра, пукаліс сэні. Йӧзыс ёна повзисны.
Аддзылысьяс висьталісны локтӧмаяслы, мый лоис пеж лолӧн кутӧм морткӧд да порсь чукӧркӧд.
Йӧзыс пондісны корны Исусӧс мунны налӧн муысь.
Кор Исус пуксис пыжӧ, пеж лолысь мездмӧм морт вӧзйысис мунны Сыкӧд.
Исус эз лэдз, а шуис: «Мун гортад да висьтав гортсаыдлы, мый вӧчис тэныд Господь да кутшӧм бур сьӧлӧма Сійӧ вӧлі тэ дінӧ».
Сійӧ муніс да Даскар му пасьтала пондіс висьтавны, мый сылы вӧчис Исус. Став йӧзыс шензисны.
Исус бӧр вуджис пыжӧн ты мӧдлапӧлӧ. Сы дінӧ чукӧртчис уна йӧз.
Кор Сійӧ вӧлі вадорас, локтіс Явир нима морт, синагогаса юралысь. Исусӧс аддзӧм бӧрын Явир уськӧдчис Сы водзӧ да ёна корис: «Менам нылӧй кулан выйын.
Лок, пуктыв сы вылӧ китӧ, мед бурдас да коляс ловйӧн».
Исус муніс юралыськӧд.
Уна йӧз вӧтчис Исус бӧрся да дзескӧдіс Сійӧс.
Йӧз чукӧрын вӧлі ань, сійӧ дас кык во чӧж висьӧма вир мунӧмӧн да уна сьӧкыд нуӧма бурдӧдысьяссянь. Сійӧ видзӧма ставсӧ, мый сылӧн вӧлӧма, но отсӧг пыдди сылы нӧшта на лёкджык лоӧма. Ань водзынджык нин кывлӧма Исус йылысь. Йӧз пӧвсттіыс сійӧ матыстчис Исус дінӧ мышсяньыс да инмӧдчыліс Сылы паськӧмас. Ань мӧвпаліс: «Сӧмын инмӧдчыла кӧ Сылӧн паськӧмӧ, бурда».
Вир мунӧмыс пырысьтӧм-пыр дугдіс, сійӧ ас пытшкас кыліс бурдӧмсӧ.
Исус дзик пыр казяліс, мый Сы пытшкысь петіс вын. Сійӧ бергӧдчис йӧз чукӧрлань да юаліс: «Коді инмӧдчыліс Менам паськӧмӧ?»
Велӧдчысьясыс шуисны: «Тэ аддзан, йӧзыс дзескӧдӧны Тэнӧ, и юасян, коді инмӧдчыліс Тэ дінӧ».
Исус видзӧдліс гӧгӧрбок, медым аддзыны инмӧдчылысьӧс.
Ань гӧгӧрвоис, мый сыкӧд лои. Повзьӧмысла дзӧригтыр сійӧ матыстчис да уськӧдчис Исус водзӧ, висьталіс ставсӧ веськыда.
Исус шуис аньлы: «Нылӧй, эскӧмыд мездіс тэнӧ.
Мун повтӧг да ло дзоньвидза, тэ мынін висьӧмсьыд».
Исуслӧн сёрнитігӧн локтісны синагогаса юралысьлӧн гортсяньыс да шуисны: «Нылыд кулі, эн мудзтӧд Велӧдысьсӧ».
Исус кыліс тайӧс да шуис синагогаса юралысьлы: «Эн пов, сӧмын эскы».
Сэсся босьтіс Аскӧдыс Петырӧс, Яковӧс да сылысь Иоан воксӧ, мукӧдсӧ эз лэдз локнысӧ.
Юралысь керкаӧ воӧм мысти Исус аддзис: йӧзыс шызьӧмаӧсь, сыркъялӧмӧн бӧрдӧны.
Исус пырис керкаӧ да шуис налы: «Мыйла нӧ шызьӧмныд да бӧрданныд?
Нывкаыс эз кув, сійӧ узьӧ».
Исус вылын пондісны серавны.
Сійӧ вӧтліс керкаысь ставнысӧ, босьтіс Аскӧдыс сӧмын нывкалысь бать-мамсӧ да Сыкӧд локтысьясӧс.
Исус пырис нывка дінӧ, босьтіс сійӧс киӧдыс да шуис: «Талита куми». Тайӧ лоӧ: «Нылӧй, тэныд шуа: чеччы».
Нывка дзик пыр чеччис да пондіс ветлӧдлыны; сылы вӧлі дас кык арӧс.
Аддзылысьяс ёна чуймисны.
Исус чорыда ӧлӧдіс найӧс та йылысь мукӧдлы висьтавлӧмысь, а нывкаӧс Сійӧ тшӧктіс вердны.
6 юр.
Сэтысь Исус муніс Аслас карӧ, Сылӧн велӧдчысьясыс мунісны Сы бӧрся.
Шойччан лунӧ Сійӧ велӧдіс синагогаын.
Кывзысьяс пиысь унаӧн шензьӧмӧн шуалісны: «Кытысь Сылӧн тайӧ?
Мыйсяма мывкыдлун Сылы сетӧма? Сійӧ вӧчӧ татшӧм шензьӧданаторъяс.
Абу-ӧ Сійӧ тшупсьысь? Абу-ӧ Мариялӧн пиыс, Яковлӧн, Иосейлӧн, Иудалӧн да Симонлӧн вокыс?
Оз-ӧ тані овны Сылӧн чойясыс?»
Тадзи Сійӧс ӧтдортісны.
Исус шуис налы: «Пророкӧс пыдди пуктӧны быдлаын, сӧмын ас карас, ас рӧдвужас да ас гортас оз».
Исус эз вермы сэні вӧчны шензьӧданаторъяс, сӧмын кымынкӧ висьысь вылӧ кисӧ пуктылӧмӧн бурдӧдіс найӧс.
Йӧзлӧн эскытӧмлуныс шензьӧдіс Сійӧс. Исус ветлӧдліс матігӧгӧр сиктъясӧд да велӧдіс йӧзсӧ.
Сійӧ корис дас кыкнан велӧдчысьсӧ да сетіс налы вын вӧтлавны пеж ловъясӧс. Сэсся кыкӧн-кыкӧн мӧдӧдаліс найӧс.
Исус шуис налы: «Туяныд бедь кындзи нинӧм энӧ босьтӧй, весиг нянь, ноп, сьӧм да вежан кӧм-пась».
Нӧшта Исус висьталіс: «Кутшӧм керкаӧ пыранныд, водзӧ мунтӧдзныд олӧй сэні.
Оз кӧ сибӧдны-кывзыны тіянӧс, сэтысь петіганыд пыркӧдӧй коксьыныд буссӧ. Тайӧ лоӧ найӧс ӧлӧдӧм.
Веськыда висьтала тіянлы: Мыждан лунӧ Содом да Гомора каръяслы лоас кокньыдджык сійӧ карыслы дорысь».
Велӧдчысьяс мунісны да юӧрталісны, йӧзыс мед бергӧдчисны мыжъяссьыс.
Найӧ вӧтлісны уна пеж лолӧс да выйӧн мавтӧмӧн бурдӧдісны уна висьысьӧс.
Ирӧд ӧксы кыліс Исус йылысь, ӧд тайӧ нимыс быдлаын вӧлі тӧдса. Сійӧ шуис, Пыртысь Иоан пӧ ловзьӧма, та вӧсна вермӧ вӧчны шензьӧданаторъяс.
Мукӧдыс шуалісны, тайӧ пӧ Илля, кодсюрӧ шуисны, Сійӧ пӧ пророкъясысь ӧти.
Татшӧм сёрнияс бӧрын Ирӧд шуис, тайӧ пӧ Иоан, кодлысь ме юрсӧ керышті, ловзьӧма.
Ӧд Филип вокыслӧн Ирӧдиада гӧтырыс вӧсна Ирӧд тшӧктіс босьтны Иоанӧс да дорӧмӧн пуксьӧдны дзескыдінӧ.
Ирӧдиадаӧс гӧтырӧ босьтӧмысь Иоан ӧлӧдліс Ирӧдӧс: «Вок гӧтырыдкӧд тэныд оз позь овнытӧ».
Ирӧдиада скӧраліс Иоан вылӧ да кӧсйис вины сійӧс, но эз вермы.
Ирӧд поліс Иоанысь, ӧд тӧдіс, мый Иоан веськыда олысь да вежа морт. Ирӧд дорйис Иоанӧс, унатор вӧчис сылысь кывзысьӧмӧн да окотапырысь кывзіс сійӧс.
Ирӧд чужан лунӧ Ирӧдиадалы лоис позянлун вины Иоанӧс. Тайӧ лунӧ Ирӧд котыртіс гаж юралысьяслы, тышкайӧзӧн веськӧдлысьяслы да галилеяса пыдди пуктана войтырлы. Ирӧдиадалӧн нылыс пырис да йӧктіс гажӧдчысьяс водзын. Тайӧ воис Ирӧдлы да сыкӧд пукалысьяслы сьӧлӧм вылас.
Ӧксы шуис нывлы: «Кор менсьым, мый кӧсъян, и ме сета тэныд». Ирӧд кыв сетіс: «Сета, мый сӧмын коран, весиг аслам веськӧдлан мулысь джынсӧ».
Ныв петіс да юаліс мамыслысь: «Мый эськӧ корны?»
Мамыс шуис: «Пыртысь Иоанлысь юрсӧ».
Ныв дзик пыр тэрмасьӧмӧн муніс ӧксы дінӧ да шуис: «Кӧсъя, мед дзик ӧні сетін меным тасьтіын Пыртысь Иоанлысь юрсӧ».
Ӧксы шогӧ усис, но гажӧдчысьяс водзын сетӧм кывйысь эз вермы соссьыны.
Дзик пыр сійӧ ыстіс шыпуртаӧс да тшӧктіс вайны Иоанлысь юрсӧ.
Шыпурта муніс дзескыдінӧ да керыштіс Иоанлысь юрсӧ. Сэсся вайис тасьтіын юрсӧ да сетіс нывлы, а нылыс — мамыслы.
Та йылысь кывлісны Иоанлӧн велӧдчысьясыс. Найӧ локтісны шойысла да нуисны дзебанінӧ.
Апостолъяс чукӧртчисны Исус дінӧ. Найӧ висьталісны Сылы ставсӧ, мый вӧчисны да мыйӧ велӧдісны.
Исус шуис налы: «Мунӧй овтӧминӧ да шойччыштӧй сэні». Йӧзыс век ӧтарӧ локтіс-муніс, велӧдчысьяслы весиг некор вӧлі сёйыштнысӧ.
Та вӧсна найӧ ӧтнаныс мӧдӧдчисны пыжӧн овтӧминӧ.
Йӧзыс аддзылісны налысь мунӧмсӧ да тӧдісны найӧс.
Котӧрӧн петісны каръяссьыныс да воисны сэтчӧ на дорысь водзджык.
Пыжысь чеччигӧн Исус аддзис уна йӧзӧс. Сылӧн сьӧлӧмыс нормис, ӧд найӧ вӧліны видзысьтӧг кольӧм ыжъяс кодьӧсь. Сэки Исус пондіс велӧдны найӧс, Сійӧ унатор йылысь висьталіс налы.
Сёр рытнас матыстчисны Исус дінӧ велӧдчысьясыс да шуисны: «Тані овтӧмин, и кадыс сёр нин. Ысты йӧзсӧ матігӧгӧр сикт-грездӧ сёянтор ньӧбны».
Исус воча шуис: «Ті сетӧй налы сёянсӧ».
Велӧдчысьяс шуисны: «Миянлы-ӧ колӧ ветлынысӧ? Та мындаыслы нянь вылад кыксё динар ковмас».
Исус юаліс налысь: «Уна-ӧ тіян няньныд?
Мунӧй видзӧдлӧй».
Тӧдмалӧм бӧрын найӧ висьталісны: «Вит нянь да кык чери».
Исус тшӧктіс велӧдчысьясыслы пуксьӧдавны йӧзсӧ чукӧръясӧ веж турун вылӧ.
Йӧзыс пуксялісны сёӧн да ветымынӧн.
Исус босьтіс вит няньсӧ да кык черисӧ, видзӧдліс енэжӧ да Енмӧс аттьӧалӧмӧн чегис няньсӧ, сэсся сетіс велӧдчысьясыслы. Велӧдчысьяс разӧдісны йӧзыслы.
Кык черисӧ тшӧтш юкис ставныслы.
Ставныс пӧттӧдзныс сёйисны, а нянь да чери коляссӧ дас кык куд тыр чукӧртісны.
Сёйысьыс вӧлі вит сюрс гӧгӧр морт.
Исус дзик пыр тшӧктіс велӧдчысьясыслы пуксьыны пыжӧ да вуджны Сытӧг мӧдлапӧлӧ, Випсаидаӧ. Сэккості Исус мӧдӧдаліс йӧзсӧ.
Йӧзӧс ыстӧм бӧрын Ачыс кайис керӧсӧ кевмысьны.
Рытнас пыжаяс вӧліны ты шӧрын, а Исус ӧтнас сулаліс вадорын.
Сійӧ аддзис: паныда тӧлыс вӧсна велӧдчысьяслы сьӧкыд вӧлі сыннысӧ.
Асъядорыс Исус мӧдӧдчис ва вывті велӧдчысьяс дінас да кӧсйис ордйыны найӧс.
Кор велӧдчысьяс аддзисны ва вывті восьлалысь Исусӧс, чайтісны, мый тайӧ орт, и кутісны горзыны.
Ставныс ёна повзисны.
Исус дзик пыр шыасис на дінӧ: «Лӧньӧй, тайӧ Ме. Энӧ полӧй».
Сійӧ пуксис на дінӧ пыжас. Тӧлыс лӧнис.
Велӧдчысьяс ёна шензисны. Няньӧн вердӧм шензьӧданаторйыс, буракӧ, нинӧм эз висьтав налӧн измӧм сьӧлӧмлы.
Тысӧ вуджӧм бӧрын найӧ сувтісны Генесарет муӧ.
Кор найӧ чеччисны пыжсьыс, йӧзыс дзик пыр тӧдмалісны Исусӧс. Тайӧ юӧрнас найӧ котӧрӧн кытшовтісны став матігӧгӧрсӧ да, кӧні кывсис Исус, сэтчӧ пондісны вольпасьӧн вайны висьысьясӧс.
Быдлаын, кытчӧ воліс Исус — сиктӧ, карӧ, грездӧ — эрдъяс вылӧ водтӧдавлісны висьысьясӧс да корисны Исусӧс, мед висьысьяслы лэдзас инмӧдчывны паськӧм дорышас. Сы дінӧ инмӧдчылысьяс ставӧн бурдісны.
7 юр.
Исус дінӧ локтісны фарисейяс да Ерусалимысь воӧм Индӧдӧ велӧдысьяс. Кор найӧ аддзисны, мый кодсюрӧ Сылӧн велӧдчысьясыс сёйӧны няньсӧ мыськытӧм пеж киӧн, кутісны шуасьны на вылӧ.
Юдейяс, торйӧн нин фарисейяс, кутчысисны пӧрысьяслӧн шуӧмӧ: кинысӧ мыськытӧг эз пуксьывны сёйны и вузасянінысь локтӧм бӧрын эз сёйлыны мыссьытӧг.
Нӧшта уна мукӧдторйӧ на кутчысисны: дозмук, тасьті-пӧрт да вольпась мыськалӧмӧ.
Фарисейяс да Индӧдӧ велӧдысьяс юалісны Исуслысь: «Мыйла велӧдчысьясыд оз овны пӧрысьяслӧн шуӧм серти: мыськытӧм киӧн нянь сёйӧны?»
Исус шуис налы: «Кык бана шаньгаяс. Бура шуӧма Гижӧдас тіян йылысь Исай пророк:
— Тайӧ йӧзыс вомнас пыдди пуктӧны Менӧ, но налӧн сьӧлӧмыс ылын Меысь. Весьшӧрӧ ыдждӧдлӧны Менӧ мортсянь тшӧктӧмъясӧ велӧдігӧн.
Ті эновтінныд Енлысь тшӧктӧмсӧ, кутчысянныд мортлӧн шуӧмъясӧ: тасьті-дозмук мыськалӧмӧ да уна мукӧдторйӧ на».
Исус водзӧ висьталіс: «Сюся ті вештанныд Енлысь тшӧктӧмсӧ, медым кутчысьны батьяслӧн шуӧмӧ.
Мӧисей шуӧма: “Пыдди пукты ассьыд бать-мамтӧ”.
“Омӧльтан кӧ бать-мамтӧ, тэнӧ кулӧм вылӧ мыждасны”.
А ті мӧдарӧ велӧданныд. Морт кӧ бать-мамыслы сетӧм пыдди шуас: “Корбан, Енлы тайӧс кӧсйыси”, сэки ті онӧ нин лэдзӧй вӧчны бурсӧ бать-мамыслы. Тадзи батьяслӧн шуӧмӧ кутчысьӧмӧн да велӧдӧмӧн ті вештанныд Енлысь Кывсӧ.
Уна татшӧмтор на ті вӧчанныд».
Исус бара корис йӧзсӧ да шуис налы: «Кывзӧй Менӧ ставныд да гӧгӧрвоӧй. Мортӧс оз пежав сійӧ, мый пытшкас пырӧ, а пежалӧ, мый сы пытшкысь петӧ.
Кодлӧн эм пель, мед кылӧ.»
Исус колис йӧзсӧ да пырис керкаӧ. Велӧдчысьясыс корисны Сійӧс гӧгӧрвоӧдны висьталӧмсӧ.
Сійӧ шуис налы: «Весиг ті онӧ гӧгӧрвоӧй.
Онӧ ӧмӧй вежӧртӧй: мортӧс оз вермы пежавны сійӧ, мый пытшкас пырӧ, ӧд сійӧ оз сьӧлӧмас пыр, а веськалӧ кынӧмас, сэсся ортсӧ петӧ». Тадзи Исус гӧгӧрвоӧдіс, мый став сёяныс сӧстӧм.
Водзӧ висьталіс: «Мый петӧ морт пытшкысь, сійӧ пежалӧ мортсӧ.
Буретш морт пытшкысь, сылӧн сьӧлӧмысь, петӧны лёк мӧвпъяс, гозъя олӧм пежалӧм, кырсалӧм, морт виӧм, гусясьӧм, горшасьӧм, лёк вӧчӧм, ылӧдчӧм, лэдзчысьӧм оласног, колысь син, омӧльтӧм, асьсӧ вылӧ пуктӧм да мывкыдтӧмлун. Став тайӧ лёкыс петӧ морт пытшкысь да пежалӧ сійӧс».
Сэтысь Исус муніс Тир да Сидон муясӧ. Сійӧ пырис ӧти керкаӧ да эз кӧсйы, мед кодкӧ тӧдіс та йылысь, но тӧдмалісны Сылӧн воӧм йылысь.
Кывліс Сы йылысь ӧти ань, кодлысь нывсӧ вӧлі кутӧма пеж лов. Ань локтіс да уськӧдчис Исус водзӧ.
Тайӧ аньыс вӧлі Сирияысь, финикияса, сійӧ сёрнитіс грек кывйӧн. Ань корис Исусӧс вӧтлыны ныв пытшкысь пеж ловсӧ.
Исус шуис: «Медводз мед ныв-пи пӧттӧдзныс сёясны. Абу бур мырддьыны ныв-пилысь няньсӧ да шыбитны сійӧс понпиянлы».
Ань воча шуис: «Сідз, Господьӧй.
Но понъяс тшӧтш пызан улысь сёйӧны ныв-пилысь нянь торпыригсӧ».
Исус шуис сылы: «Тадз кӧ мӧвпалан, мун, пеж лов петіс тэнад ныв пытшкысь».
Гортас локтӧм бӧрын ань аддзис: нылыс куйлӧ вольпасьын, пеж лов петӧма сы пытшкысь.
Тир да Сидон муясысь петӧм бӧрын Исус локтіс Даскар му пыр Галилея ты дорӧ.
Сы дінӧ вайӧдісны пыскыль кывъя пельтӧм мортӧс да корисны Исусӧс пуктывны кисӧ тайӧ мортыс вылӧ.
Исус нуӧдіс сійӧс йӧз дінсьыс бокӧ, пуктіс чуньяссӧ сылы пеляс да сьӧлыштӧмӧн инмӧдчис сылы кывъяс. Сэсся енэжӧ видзӧдлӧмӧн ышловзис да шуис пельтӧмлы: «Эффата.» Тайӧ лоӧ: «Воссьы.»
Дзик пыр тайӧ мортыслӧн пельыс воссис да кыв-ворыс разьсис, сійӧ пондіс ясыда сёрнитны.
Исус ӧлӧдіс йӧзсӧ та йылысь мукӧдлы висьталӧмысь.
Но кымын ёна ӧлӧдіс, сымын ёнджыка найӧ висьтавлісны.
Йӧзыс шензьӧмӧн шензисны да шуалісны: «Сійӧ уна бурсӧ вӧчӧ. Пельтӧмъяслы сетӧ кывны, кывтӧмъяслы сёрнитны».
8 юр.
Сійӧ лунъясӧ бара чукӧртчис зэв уна йӧз. Налӧн эз вӧв аскӧдныс сёяныс. Исус корис велӧдчысьяссӧ да шуис:
«Менам сьӧлӧмӧй висьӧ тайӧ йӧзыс вӧсна. Найӧ куим лун нин танӧсь, а налӧн сёяныс абу.
Сёйтӧгыс кӧ мӧдӧда найӧс гортаныс, туяс дзикӧдз эбӧстӧммасны, ӧд кодсюрӧ локтісны ылісянь».
Велӧдчысьяс шуисны: «Кытысь босьтны овтӧминас няньсӧ, медым вердны найӧс?»
Исус юаліс: «Уна-ӧ тіян няньныд?»
Найӧ вочавидзисны: «Сизим».
Исус тшӧктіс йӧзыслы пуксявны муас. Ачыс босьтіс сизим няньсӧ, Енмӧс аттьӧалӧмӧн чегис няньсӧ да сетіс велӧдчысьясыслы, а велӧдчысьяс — йӧзыслы.
Налӧн вӧлі нӧшта кымынкӧ посни чери. Бурсиӧм бӧрын Исус тшӧктіс сетавны черисӧ.
Ставӧн пӧттӧдзныс сёйисны, коляссӧ сизим куд тыр чукӧртісны.
Сёйысьыс вӧлі нёль сюрс гӧгӧр морт.
Йӧзсӧ мӧдӧдалӧм бӧрын Исус велӧдчысьясыскӧд дзик пыр пуксис пыжӧ да кывтіс Далманута муӧ.
Локтісны фарисейяс да пондісны вензьыны Исускӧд. Сійӧс кыйӧм могысь корисны петкӧдлыны енэжсянь индысьпас.
Исус сьӧкыда ышловзис да шуис: «Мыйла ӧнія олысьяслы колӧ индысьпасыс?
Веськыда висьтала тіянлы: оз ло налы индысьпасыс».
Сэсся Исус колис найӧс, бӧр пуксис пыжӧ да вуджис мӧдлапӧлӧ.
Велӧдчысьяс вунӧдісны босьтны аскӧдныс няньсӧ, а пыжас вӧлі сӧмын ӧти няньтор.
Исус шуис налы: «Видзчысьӧй фарисей да Ирӧд няньшомысь».
Велӧдчысьяс ас костаныс сёрнитісны: «Няньыс ӧд миян абу».
Тайӧс казялӧмӧн Исус шуис налы: «Мый нӧ сёрнитанныд нянь абутӧм йывсьыд?
Онӧ ӧмӧй вежӧртӧй?
Измӧма ӧмӧй сьӧлӧмныд?
Синмаӧсь да, онӧ аддзӧй?
Пеляӧсь да, онӧ кылӧй?
Вунӧдінныд ӧмӧй вит сюрс мортӧс вит няньӧн вердӧм йылысь? Кымын куд тыр сэки коляссӧ чукӧртінныд?»
Шуисны: «Дас кыкӧс».
«А нёль сюрс мортӧс сизим няньӧн вердігӧн, кымын куд тыр коляссӧ чукӧртінныд?»
Шуисны Сылы: «Сизимӧс».
Исус шуис налы: «Кыдзи ті онӧ вежӧртӧй?»
Исус воис Випсаидаӧ.
Сы дінӧ вайӧдісны синтӧмӧс да корисны инмӧдчывны сы дінӧ.
Исус босьтіс синтӧмӧс киӧдыс да петкӧдіс сиктсьыс. Синмас сьӧлыштӧм бӧрын пуктіс кисӧ сы вылӧ да юаліс: «Аддзан-ӧ мыйкӧ?»
Синтӧм видзӧдліс да шуис: «Аддза ветлӧдлысь йӧзӧс, найӧ пуяс кодьӧсь».
Исус бара пуктыліс кисӧ сылы синмас да тшӧктіс видзӧдлыны.
Синтӧм бурдіс да ставсӧ аддзис ясыда.
Исус мӧдӧдіс сійӧс гортас да шуис: «Сиктас эн пыр».
Исус муніс велӧдчысьясыскӧд Филиплӧн Кесария сиктъясӧ.
Муніганыс юаліс налысь: «Код туйӧ йӧзыс пуктӧны Менӧ?»
Найӧ вочавидзисны: «Ӧтияс шуӧны, Пыртысь Иоан пӧ, мӧдъяс шуӧны, Илля пӧ, кодсюрӧ шуӧны, пророкъясысь пӧ ӧти».
Исус юаліс: «Код туйӧ ті Менӧ пуктанныд?»
Петыр вочавидзис: «Тэ — Кристос».
Исус ӧлӧдіс найӧс, мед эз висьтавны Сы йылысь мукӧдлы.
Исус пондіс висьтавны велӧдчысьясыслы: «Морт Пилы уна сьӧкыд ковмас нуны. Пӧрысьяс, аркирейяс да Индӧдӧ велӧдысьяс пондасны вӧтлыны да виасны Сійӧс, но коймӧд луннас Сійӧ ловзяс».
Та йылысь Исус сёрнитіс восьсӧн.
Сійӧс бокӧ корӧмӧн Петыр паныд шуасьны пондіс.
Велӧдчысьяслань бергӧдчӧмӧн Исус чорыда вомаліс Петырӧс: «Вешйы Ме дінысь, сӧтана. Тэнад мӧвпъясыд мортсянь, абу Енсянь».
Исус чукӧстіс йӧзсӧ да велӧдчысьяссӧ да шуис налы: «Коді кӧсйӧ мунны Ме бӧрся, мед вунӧдас асьсӧ, мед босьтас ассьыс крестсӧ да локтас Ме бӧрся.
Коді кӧсйӧ видзны ассьыс олӧмсӧ, воштас сійӧс. Ме вӧсна да Евангелльӧ вӧсна олӧмсӧ воштысь видзас сійӧс.
Лоас-ӧ мортыслы бур, босьтас кӧ аслыс став муюгыдсӧ, а олӧмсӧ воштас?
Вермас-ӧ бӧр ньӧбны ассьыс олӧмсӧ?
Коді тайӧ мыжа да пежас ылалӧм йӧз пӧвстын яндысяс Меысь да Менам кывъясысь, сыысь яндысяс Морт Пи, кор локтас вежа анделъяскӧд Батьыслӧн дзирдлунӧн».
9 юр.
Исус шуис налы: «Веськыда висьтала тіянлы: кодсюрӧ тані сулалысьяс пиысь кувтӧдзныс на аддзасны Ен Юралӧмлысь вына локтӧмсӧ».
Квайт лун мысти Исус босьтіс Аскӧдыс Петырӧс, Яковӧс, Иоанӧс да кайис накӧд джуджыд керӧсӧ. Велӧдчысьяс син водзын Исуслӧн мыгӧрыс вежсис,
паськӧмыс лои лым кодь дзирдалана еджыд. Татшӧм еджыд дӧрасӧ му вылын он аддзы.
Велӧдчысьяс аддзисны Илляӧс да Мӧисейӧс, найӧ сёрнитісны Исускӧд.
Петыр шуис Исуслы: «Велӧдысьӧй, миянлы тані лӧсьыд, сувтӧдам куим чом: Тэныд, Мӧисейлы да Иллялы».
Петыр ачыс эз гӧгӧрво, мый висьталіс, ӧд ставныс найӧ вӧлі ёна повзьӧмаӧсь.
Сэки локтіс кымӧр да вевттис найӧс, кымӧрсянь кыліс гӧлӧс шы: «Тайӧ Менам муса Пиӧй, Сійӧс кывзӧй».
Велӧдчысьяс видзӧдлісны гӧгӧрбок да аддзисны, мый накӧд сӧмын Исус.
Керӧсысь лэччиганыс Исус ӧлӧдіс велӧдчысьяссӧ, мед эз висьтавны аддзывлӧм йывсьыс Морт Пилӧн ловзьытӧдз.
Найӧ тӧд выланыс босьтісны тайӧ кывъяссӧ да ӧта-мӧдныслысь юасисны, кыдзи гӧгӧрвоны ловзьӧмсӧ.
Велӧдчысьяс юалісны Исуслысь: «Мыйла Индӧдӧ велӧдысьяс шуӧны, Иллялы пӧ колӧ водзджык локны?»
Сійӧ вочавидзис: «Дерт, Иллялы колӧ водзджык локны да ставсӧ лӧсьӧдны.
А Морт Пи йылысь гижӧма, мый уна сьӧкыд Сылы ковмас нуны да лоны увтыртӧмаӧн.
Висьтала тіянлы: Илля локтіс нин. Сыкӧд вӧчисны, мый кӧсйисны. Тадзи вӧлі водзвыв гижӧма сы йылысь».
Исус локтіс велӧдчысьяс дінӧ да аддзис на дінысь уна йӧзӧс да накӧд вензьысь Индӧдӧ велӧдысьясӧс.
Исусӧс аддзӧм бӧрын став йӧзыс чуймисны да котӧрӧн матыстчисны чолӧмасьны Сыкӧд.
Исус юаліс Индӧдӧ велӧдысьяслысь: «Мый йылысь вензянныд?»
Йӧз пӧвстысь ӧти шуис: «Велӧдысьӧй, ме вайӧді Тэ дінӧ ассьым пиӧс. Сійӧ оз сёрнит, сы пытшкын пеж лов. Кор пеж лов топӧдӧ сійӧс, шыбитӧ муас. Сэки пиӧй пиньсӧ йирӧ, сійӧс йӧрсӧналӧ, да вомсьыс быг петӧ.
Ме кори Тэнсьыд велӧдчысьястӧ вӧтлыны пеж ловсӧ, но найӧ эз вермыны».
Исус шуис: «Эскытӧмъяс.
Дыр-ӧ на Меным овнысӧ тіянкӧд?
Дыр-ӧ на Меным видзӧдны тіянӧс?
Вайӧдӧй Ме дінӧ зонкасӧ».
Сійӧс вайӧдісны Исус дінӧ.
Исусӧс аддзӧм бӧрын пеж лов дзик пыр кутіс песлӧдлыны зонкасӧ.
Сійӧ усис муас, пондіс туплясьны, вомсьыс кутіс быг петны.
Исус юаліс зонка батьлысь: «Важысянь-ӧ тайӧ пиыдлӧн?»
Сійӧ вочавидзис: «Кагадырсяньыс.
Унаысь сійӧс пеж лов биӧ-ваӧ шыбитліс, мед вины.
Верман кӧ, отсав миянлы, ло бур сьӧлӧма».
Исус шуис сылы: «Эскан кӧ, эскысьлы ставыс вермана».
Зонкалӧн батьыс дзик пыр бӧрдӧмӧн горӧдіс: «Эска, Господьӧй.
Отсав меным эскыны.»
Исус аддзис: йӧзыс котӧрӧн чукӧртчӧны. Сэки ӧлӧдӧмӧн шуис пеж ловлы: «Кыв-вор кутысь, пельяс тупкысь пеж лов, тшӧкта тэныд: пет зонка пытшкысь да бӧрсӧ эн лысьт пырны сы пытшкӧ».
Пеж лов горӧдіс, песовтіс зонкасӧ да петіс сы пытшкысь.
Зонка куйліс шой кодь, унаӧн весиг шуисны, куліс пӧ.
Исус босьтіс зонкаӧс киӧдыс, и сійӧ чеччис.
Керкаӧ пырӧм бӧрын велӧдчысьяс ас кежаныс юалісны Исуслысь: «Мыйла ми эгӧ вермӧй вӧтлыны пеж ловсӧ?»
Исус шуис налы: «Видзавтӧг да кевмысьтӧг татшӧм пеж ловъяссӧ вӧтлыны онӧ вермӧй».
Сэтысь петӧм бӧрын найӧ мунісны Галилея пыр.
Исус эз кӧсйы, медым кодкӧ тӧдліс та йылысь.
Сэні Сійӧ велӧдіс Ассьыс велӧдчысьяссӧ. Сійӧ шуис налы: «Морт Пиӧс сетасны йӧзлӧн киӧ. Сійӧс виасны, но коймӧд луннас Сійӧ ловзяс».
Велӧдчысьяс эз гӧгӧрвоны, мый йылысь Исус висьталӧ, а юавнысӧ полісны.
Исус воис Капернаумӧ. Гортас пырӧм мысти Сійӧ юаліс велӧдчысьясыслысь: «Мый йылысь ті сёрнитінныд локтігмозныд?»
Найӧ чӧв олісны. Локтіганыс найӧ вензисны, коді на пиысь ыджыдджыкыс.
Исус пуксис, корис дас кыкнансӧ да шуис налы:
«Коді кӧсйӧ лоны медводдзаӧн, мед лоас став пиас медбӧръяӧн да быдӧнлы кесъялысьӧн».
Сійӧ босьтіс кагаӧс, сувтӧдіс на шӧрӧ да сійӧс кутыштлӧмӧн шуис: «Коді Менам ним вӧсна сибӧдӧ ӧти татшӧм кагаӧс, сійӧ сибӧдӧ Менӧ.
А Менӧ сибӧдысь сибӧдӧ Менӧ Мӧдӧдысьӧс, оз сӧмын Менӧ».
Иоан шуис: «Велӧдысьӧй, ми аддзылім мортӧс, сійӧ Тэнад нимӧн пеж ловъясӧс вӧтлалӧ.
Ми ӧлӧдім сійӧс, ӧд сійӧ абу миян пӧвстысь».
Исус шуис: «Энӧ ӧлӧдӧй сійӧс. Менам нимӧн кӧ шензьӧданаторсӧ вӧчӧ, сійӧ оз вермы пырысь-пыр омӧльтны Менӧ.
Коді абу тіянлы паныд, сійӧ тіян дор.
Веськыда висьтала тіянлы: коді юкталас тіянӧс ваӧн, сы вӧсна мый ті Кристослӧн, сійӧ оз коль удждонтӧг».
«Коді ыштӧдас тайӧ ичӧтъясысь ӧтикӧс, Меным эскысьӧс, сылы бурджык лоӧ, сьыліас кӧ ыджыд изки ӧшӧдасны да шыбитасны саридзӧ.
Киыд кӧ ыштӧдӧ тэнӧ, керышт сійӧс.
Бурджык пырны помтӧм олӧмӧ ки пӧлаӧн куслытӧм биӧ киаӧн веськалӧм дорысь. Сэні “номырыс оз кувлы да биыс оз куслы”.
Кокыд кӧ ыштӧдӧ тэнӧ, керышт сійӧс.
Бурджык пырны помтӧм олӧмӧ кок пӧлаӧн куслытӧм биӧ тэнӧ кокаӧн шыбитӧм дорысь. Сэні “номырыс оз кувлы да биыс оз куслы”.
Синмыд кӧ ыштӧдӧ тэнӧ, шыбит сійӧс.
Бурджык пырны Енлӧн Юраланінӧ син пӧлаӧн куслытӧм биӧ тэнӧ синмаӧн шыбитӧм дорысь. Сэні “номырыс оз кувлы да биыс оз куслы”.
Быдӧнӧс сӧстӧммӧдасны биӧн да солаласны висьӧс моз.
Солыд — буртор.
Но солыс кӧ лоас дуб, кыдзи сійӧс бӧр соланас вӧчан?
Тіян пытшкын мед пыр лоӧ солыс, лӧня олӧй ас костаныд».
10 юр.
Сэтысь Исус муніс Йӧрдан ю мӧдлапӧлӧд Юдея муӧ.
Сы дінӧ бара чукӧртчис уна йӧз. Сійӧ велӧдіс найӧс, кыдзи пыр вӧчліс.
Исус дінӧ матыстчисны фарисейяс да Сійӧс кыйӧм могысь юалісны: «Позьӧ-ӧ верӧслы юксьыны гӧтырыскӧд?»
Исус воча шуис: «Мый тіянлы гижӧма Мӧисей?»
Найӧ вочавидзисны: «Мӧисей лэдзис верӧслы эновтны гӧтырсӧ, сӧмын верӧсыслы колӧ вӧлі сетны гӧтырыслы торйӧдчан гижӧд».
Исус шуис налы: «Тіян чорыд сьӧлӧмныд вӧсна Мӧисей гижис тайӧ тшӧктӧмсӧ.
Му пуксьӧмсяньыс Ен вӧчис аймортӧс да аньӧс.
“Та вӧсна морт кольӧ бать-мамсӧ да ӧтлаасьӧ гӧтырыскӧд, и тайӧ кыкыс лоӧны ӧти вир-яйӧн”.
Сідзкӧ, найӧ абу нин кык, а ӧти вир-яй.
Мый йитӧма Енмыс, морт мед оз торйӧд».
Керкаӧ пырӧм бӧрын велӧдчысьяс та йылысь юалісны Исуслысь.
Исус шуис налы: «Верӧсыс кӧ эновтӧ гӧтырсӧ да гӧтрасьӧ мӧдкӧд, сійӧ гозъя олӧм пежалӧ.
Гӧтырыс кӧ юксьӧ верӧсыскӧд да мунӧ мӧд сайӧ, сійӧ тшӧтш гозъя олӧм пежалӧ».
Исус дінӧ вайӧдісны челядьӧс, медым Сійӧ инмӧдчыліс на дінӧ. Велӧдчысьяс шуасисны вайӧдысьяс вылӧ.
Исус казяліс тайӧс да чорыда шуис налы: «Лэдзӧй челядьсӧ локны Ме дінӧ. Энӧ кутӧй найӧс. Енлысь Юраланінсӧ ӧд на коддьӧмлы лӧсьӧдӧма.
Веськыда висьтала тіянлы: коді оз сибӧд Енлысь Юралӧмсӧ кага моз, сійӧ оз пыр Енлӧн Юраланінӧ».
Исус кутыштліс челядьӧс да кисӧ пуктылӧмӧн бурсиис найӧс.
Туйӧ петігас Исус дінӧ котӧрӧн локтіс ӧти морт да Исус водзӧ пидзӧс вылас сувтӧмӧн юаліс: «Бур Велӧдысьӧй, мый меным колӧ вӧчны, мед вичмис меным помтӧм олӧм?»
Исус вочавидзис: «Мыйла тэ шуан Менӧ бурӧн?
Некод абу бурыс, сӧмын Енмыс бур.
Тэ ӧд тӧдан тшӧктӧмъяссӧ: гозъя олӧмтӧ эн пежав, эн ви, эн гусясь, эн пӧръясь, эн мырддьы мукӧдлысь, пыдди пукты ассьыд бать-мамтӧ».
Сійӧ шуис: «Велӧдысьӧй, том кадсянь ме ола тайӧ тшӧктӧмъяс сертиыс».
Исус видзӧдліс сы вылӧ мусапырысь да шуис: «Ӧтитор оз тырмы тэныд: мун, вузав ставсӧ, мый тэнад эм, да сьӧмсӧ сет гӧльяслы.
Сэки тэныд енэжын озырлуныс вичмас.
Сэсся босьт кресттӧ да лок Ме бӧрся».
Исуслӧн кывъясыс шӧйӧвоштісны морттӧ. Сійӧ жугыля муніс, ӧд сылӧн озырлуныс вӧлі уна.
Исус видзӧдліс велӧдчысьясыс вылӧ да шуис налы: «Кутшӧм сьӧкыд озырлы пырны Енлӧн Юраланінӧ.»
Велӧдчысьяс чуймисны Сылӧн кывъясысь.
Исус выльысь шуис: «Челядь, кутшӧм сьӧкыд пырны Енлӧн Юраланінӧ сылы, коді озырлун вылӧ лачаӧн олӧ.
Озырлы Енлӧн Юраланінӧ пырӧм дорысь верблюдлы кокньыдджык пырны ем пысӧд».
Велӧдчысьяс ёнджыка на чуймисны, юасисны ӧта-мӧдныслысь: «Коді нӧ вермас мездмынысӧ?»
На вылӧ видзӧдлӧмӧн Исус шуис: «Мортлы тайӧ вермытӧмтор, но абу Енлы. Енмыслы ставыс вермана».
Петыр шуис Исуслы: «Ми ставсӧ эновтім да мунім Тэ бӧрся».
Исус шуис: «Веськыда висьтала тіянлы: коді Ме вӧсна да Евангелльӧ вӧсна коляс керкасӧ, чой-воксӧ, бать-мамсӧ, гӧтырсӧ, ныв-писӧ, видз-мусӧ, сылы тайӧ олӧмас на вӧтлӧмъяс дырйи керкаыс, чой-вокыс, мамыс, ныв-пиыс да видз-муыс сё пӧвстӧн бӧр воас, нӧшта локтан нэмас сылы помтӧм олӧм вичмас.
Воддзаясысь унаӧн лоӧны бӧръяӧн, бӧръяясысь — воддзаӧн».
Ерусалимӧ кайигӧн Исус муніс водзвыланыс. Велӧдчысьяс шензисны, а мукӧдыслӧн, Исус бӧрся мунысьяслӧн, вӧлі полӧм.
Исус корис Ас дінас дас кык велӧдчысьсӧ да пондіс висьтавны, мый Сійӧс виччысьӧ: «Ӧні ми мунам Ерусалимӧ.
Сэні Морт Пиӧс сетасны аркирейяслы да Индӧдӧ велӧдысьяслы. Найӧ шуасны вины Сійӧс, сетасны ентӧдтӧмъяс киӧ. Найӧ сераласны Сійӧс, сьӧлаласны да чорыда нӧйтасны, сэсся виасны.
Но коймӧд луннас Сійӧ ловзяс».
Исус дінӧ матыстчисны Зеведейлӧн Яков да Иоан пияныс. Найӧ шуисны: «Велӧдысь, миян эм корӧм Тэ дінӧ».
Исус юаліс: «Мый ті кӧсъянныд?»
Найӧ вочавидзисны: «Пуксьӧд миянӧс Аскӧдыд Юраланінад, ӧтинымӧс веськыдладорад, мӧднымӧс шуйгаладорад».
Исус шуис налы: «Онӧ тӧдӧй, мый коранныд.
Верманныд-ӧ юны Менсьым чашасӧ да Менам пыртчӧмӧн пыртчыны?»
Найӧ вочавидзисны: «Вермам».
Исус шуис: «Менсьым чашасӧ понданныд юны да Менам пыртчӧмӧн понданныд пыртчыны.
Но мед пуксьӧдны веськыдладорам да шуйгаладорам — тайӧ абу Ме сайын. Сэтчӧ пуксясны найӧ, кодлы лӧсьӧдӧма».
Яковлӧн да Иоанлӧн сёрниыс дӧзмӧдіс мукӧд дас велӧдчысьсӧ.
Исус корис велӧдчысьяссӧ да шуис: «Ті тӧданныд, мый юралысьяс ыджыдалӧны йӧз вылын, да веськӧдлысьяс кипод улас кутӧны йӧзӧс.
Но ті тадзи энӧ вӧчӧй. Кӧсъян кӧ ыджыдӧ пуксьыны — кесъяв, кӧсъян кӧ юралысьӧ пуксьыны — ло кесйӧг туйын.
Ӧд Морт Пи эз лок, медым Сылы кесъялісны. Сійӧ локтіс кесъявны да сетны Ассьыс олӧмсӧ унаӧс ньӧбӧм могысь».
Исус велӧдчысьясыскӧд воис Ерикон карӧ.
Карысь петіганыс накӧд вӧлі уна йӧз. Туй дорас пукаліс синтӧм корысь Вартимей, Тимейлӧн пиыс.
Сійӧ кыліс, Назаретса Исус пӧ локтӧ, да пондіс горӧдны: «Исус, Давид Пи. Ло бур сьӧлӧма ме дінӧ.»
Унаӧн ӧлӧдісны сійӧс горзӧмсьыс, но сійӧ ёнджыка на пондіс горзыны: «Давид Пи, ло бур сьӧлӧма.»
Исус сувтіс да шуис: «Корӧй сійӧс».
Синтӧмӧс корисны, шуисны сылы: «Эн пов, чеччы. Исус корӧ тэнӧ».
Сійӧ шыбитіс ассьыс вылыс паськӧмсӧ, чеччис да локтіс Исус дінӧ.
Исус юаліс: «Мый тэ кӧсъян?»
Синтӧм вочавидзис: «Велӧдысьӧй, кӧсъя аддзыны».
Исус шуис: «Мун, эскӧмыд мездіс тэнӧ».
Синтӧм дзик пыр кутіс аддзыны да муніс Исус бӧрся.
11 юр.
Ерусалимлань матыстчигӧн Исус велӧдчысьясыскӧд воис Олив керӧсын сулалысь Виффагия да Вифания сиктъяс дорӧ. Ассьыс кык велӧдчысьсӧ мӧдӧдігӧн Исус шуис: «Мунӧй тайӧ сиктас. Сэтчӧ пыриганыд аддзанныд домалӧм том осёлӧс, сы вылӧ некод на эз пуксьыв. Разьӧй сійӧс да вайӧдӧй татчӧ.
Юаласны кӧ, мыйла тайӧс вӧчанныд, вочавидзӧй, мый сійӧ колӧ Господьлы, и дзик пыр мӧдӧдасны осёлсӧ татчӧ».
Мӧдӧдӧмаяс мунісны, аддзисны дзиръя дорӧ домалӧм том осёлӧс да разисны сійӧс.
Кодсюрӧ сэні сулалысьяс пиысь юалісны: «Мый вӧчанныд?
Мыйла разянныд осёлсӧ?»
Велӧдчысьяс вочавидзисны, кыдзи Исус тшӧктіс.
Сэки лэдзисны босьтны осёлӧс.
Том осёлӧс вайӧдісны Исус дінӧ. Шлапкисны осёл вылӧ паськӧмнысӧ, сэсся Исус пуксис сы вылӧ.
Унаӧн вольсавлісны ассьыныс паськӧмнысӧ туй вылас, мукӧдыс чегъялісны туй бокысь пу вожъяс да тшӧтш пукталісны туй вылас.
Водзас да бӧрас мунысьяс горзісны: — Осанна.
Бурсиӧма Господь нимӧн Локтысьӧс.
Бурсиӧма Господь нимӧн миян Давид батьлысь локтан юралӧмсӧ.
Ошкӧм Медвылыссалы.
Ерусалимӧ воӧм мысти Исус пырис крамӧ.
Ставсӧ видзӧдалӧм бӧрын сёр рытнас муніс дас кыкнан велӧдчысьыскӧд Вифанияӧ.
Мӧд луннас Вифанияысь мунігас Исуслӧн кынӧмыс пондіс сюмавны. Ылысянь Сійӧ аддзис коръя инжир пу да муніс видзӧдлыны, оз-ӧ сюр сэтысь тусьтор.
Матыстчис пу дінас да аддзис сӧмын коръяссӧ, ӧд эз на во тусь гӧрддзасян кадыс.
Исус шуис пуыслы: «Ӧнісянь оз пондыны сёйны тэнсьыд вотӧстӧ».
Велӧдчысьясыс кывлісны тайӧс.
Сэсся найӧ локтісны Ерусалимӧ.
Крамӧ пырӧм бӧрын Исус пондіс вӧтлавны сэтысь вузасьысь-ньӧбасьысьясӧс. Пӧрлӧдліс сьӧм вежысьяслысь пызанъяссӧ да гулюӧн вузасьысьяслысь пуклӧсъяссӧ, эз лэдз крам пырыс нуны нинӧмтор.
Сійӧ велӧдіс найӧс шуалӧмӧн: «Абу-ӧ гижӧма, мый “Менам керкаӧй быд кыла войтырлы кевмысян керка лоӧ”?
А ті сыысь вӧчинныд лёк вӧчысьяслы дзебсянін».
Аркирейяс Индӧдӧ велӧдысьяскӧд кывлісны тайӧс да кутісны мӧвпавны, кыдзи эськӧ вины Исусӧс. Найӧ полісны Сыысь, ӧд став йӧзыс шензисны Сылӧн велӧдӧмысь.
Рытнас Исус петіс карсьыс.
Асывводзнас инжир пу дінті мунігӧн аддзисны: сійӧ вужйӧдзыс косьмӧма.
Петырлы тӧд вылас уси Исуслӧн шуӧмыс. Сійӧ шуис Исуслы: «Велӧдысьӧй, видзӧдлы. Инжир пуыд, кодӧс Тэ ёрин, косьмӧма».
Исус шуис налы: «Эскӧй Енлы. Веськыда висьтала тіянлы: шуас кӧ кодкӧ тайӧ керӧсыслы: “Кыпӧдчы да шыбитчы саридзас”, лоӧ тадзи. Сӧмын мед став сьӧлӧмнас майшасьтӧг эскас, мый шуӧмыс инас.
Та вӧсна висьтала тіянлы: мый коранныд кевмысигад, эскӧй, мый сійӧ лоӧ тіянлы, и лоӧ тадзи.
Кевмысьны сувтіганыд прӧститӧй тіян водзын мыжмӧмаӧс, медым енэжвыв Батьныд прӧститас тіянлысь мыжъястӧ.
Онӧ кӧ прӧститӧй, сэки енэжвыв Батьныд тіянлысь мыжъястӧ оз прӧстит».
Найӧ бара локтісны Ерусалимӧ.
Кор Исус ветлӧдліс крамӧд, Сы дінӧ матыстчисны аркирейяс, Индӧдӧ велӧдысьяс да пӧрысьяс. Найӧ юалісны: «Кутшӧм вынӧн Тэ ставсӧ тайӧс вӧчан?
Коді Тэнӧ пуктіс тайӧс вӧчнысӧ?»
Исус воча шуис: «Ме тшӧтш тіянлысь ӧтитор юала. Вочавидзанныд кӧ, висьтала, кутшӧм вынӧн ставсӧ тайӧс вӧча.
Иоанлӧн пыртӧмыс вӧлі Енсянь али мортсянь?
Вочавидзӧй Меным».
Найӧ ас костаныс сёрнитісны: «Шуам кӧ: “Енсянь”, Сійӧ шуас: “Мыйла сылы энӧ эскӧй?
” Шуам-ӧ: “Мортсянь”?» Но найӧ полісны йӧзсьыс, ӧд Иоанӧс ставныс збыльысь пуктісны пророкӧ.
Найӧ вочавидзисны: «Огӧ тӧдӧй».
Сэки Исус шуис: «Сідзкӧ, Ме тшӧтш ог висьтав, кутшӧм вынӧн ставсӧ тайӧс вӧча».
12 юр.
Исус кутіс висьтавны налы велӧданвисьтъясӧн: «Морт пуктас аслас йӧрӧ виноград, гӧгӧрыс потшас, вотӧс ныранін кодъяс да джуджыд лэбув лэптас. Сэсся йӧрсӧ виноград быдтысьяслы кӧртымӧ сетас, ачыс мунас.
Вотӧс чукӧртан кадӧ овмӧс кутысь мӧдӧдас кесйӧгсӧ босьтны вотӧсысь ассьыс пайсӧ.
Виноград быдтысьяс кутасны кесйӧгсӧ, нӧйтасны да вӧтласны сійӧс куш киӧн.
Овмӧс кутысь мӧд кесйӧгӧс мӧдӧдас.
Сійӧс вачкаласны изйӧн юрас, лёкысь сераласны сы вылын да вӧтласны.
Мӧдӧдас коймӧдӧс, а сійӧс виасны.
Уна мукӧдӧс на мӧдӧдас, но ӧтиясӧс нӧйтасны, мӧдъясӧс виасны.
Овмӧс кутысьлӧн нӧшта вӧлі ӧти, аслас муса пиыс. Медбӧрти виноград быдтысьяс дінӧ мӧдӧдас писӧ, мӧвпыштас: “Менам пиысь, гашкӧ, яндысясны”.
Виноград быдтысьяс шуасны ӧта-мӧдныслы: “Тайӧ мортыслы вуджас овмӧсыс. Мунам да виам сійӧс, медым овмӧсыс миянлы коляс”.
Найӧ кутасны сійӧс да виасны, шойсӧ виноград йӧр сайӧ шыбитасны.
Мый вӧчас овмӧс кутысь?
Сійӧ локтас, виноград быдтысьясӧс виас, а йӧрсӧ мукӧдлы сетас.
Энӧ ӧмӧй Гижӧдсьыс лыддьылӧй тайӧс:
— Изйыс, кодӧс шыбитісны керка лэптысьяс, лоис пельӧс изйӧн.
Тайӧ Господьсянь да шензяна миян синъяслы».
Найӧ гӧгӧрвоисны, мый велӧданвисьтыс вӧлі на йылысь. Кӧсйисны кутны Исусӧс, но полісны йӧзсьыс. Сэки эновтісны Сійӧс да мунісны.
Сэсся найӧ мӧдӧдісны Исус дінӧ Ирӧдлысь йӧзсӧ да фарисейяс пиысь кодсюрӧӧс, медым кыйны Исусӧс сёрниас.
Найӧ локтісны да шуисны Сылы: «Велӧдысь, ми тӧдам, мый Тэ веськыда сёрнитан да он пов йӧзлӧн шуасьӧмысь. Тэ он видзӧд морт вылӧ, а веськыда велӧдан Енлӧн туйӧ.
Висьтав, колӧ-ӧ кесарлы вот мынтыны?»
Исус тӧдіс, мый найӧ кык бана шаньгаяс, да шуис налы: «Мыйла ті зілянныд кыйны Менӧ?
Петкӧдлӧй Меным динартӧ».
Найӧ вайисны.
Исус юаліс: «Кодлӧн тані чужӧмыс-нимыс?»
Найӧ вочавидзисны: «Кесарлӧн».
Исус шуис налы: «Кесарлысь сетӧй кесарлы, а Енлысь — Енлы».
Исус шемӧсмӧдіс найӧс.
Исус дінӧ локтісны саддукейяс, кодъяс шуӧны, ловзьӧмыс пӧ абу.
Найӧ юалісны Исуслысь: «Велӧдысь, Мӧисей гижӧма, мый “ныв-питӧм морт кӧ кулас, вокыслы колӧ босьтны сылысь гӧтырсӧ да нюжӧдны аслас вокыслысь рӧдсӧ”.
Сизим вок вӧлі.
Ыджыдыс гӧтрасис, сэсся куліс, ныв-пиыс эз коль.
Гӧтырсӧ мӧд вокыс босьтіс, сійӧ тшӧтш ныв-питӧг куліс.
Сэсся коймӧдыс босьтіс.
Тадзи сизимнанныс гӧтрасисны да кулісны ныв-питӧг.
Медбӧрын аньыс куліс.
Ловзьӧм бӧрас кодлы сійӧ гӧтырӧн лоас, ӧд сизим верӧс сылӧн вӧлі?»
Исус вочавидзис: «Ті ылалӧмныд Гижӧдъяссӧ да Енлысь вынсӧ тӧдтӧмныдла.
Ловзьӧмаяс оз гӧтрасьны да верӧс сайӧ оз мунны. Найӧ енэжвыв анделъяс кодьӧсь.
Ловзьӧм йылысь шуа — ті ӧмӧй энӧ лыддьылӧй Мӧисей небӧгысь сотчысь лежнӧг дорын вӧвлӧмтор йылысь? Ен шуис Мӧисейлы: “Ме Ӧвраамлӧн Ен, Исааклӧн Ен да Яковлӧн Ен”.
Енмыс абу кулӧмаяслӧн Ен, Сійӧ ловъяяслӧн Ен.
Ті ёна ылалӧмныд».
Индӧдӧ велӧдысьясысь ӧти казяліс вензьӧмсӧ да кыліс Исуслысь бура вочавидзӧмсӧ. Сійӧ матыстчис Исус дінӧ да юаліс: «Став тшӧктӧм пиысь кутшӧм медыджыдыс?»
Исус вочавидзис: «Медыджыд тшӧктӧмыс: Кывзы, Израиль.
Господь, миян Ен, Сійӧ ӧти Господь.
Радейт ассьыд Господь Ентӧ став сьӧлӧмнад, став олӧмнад, став мывкыднад да став выннад. Тайӧ медыджыд тшӧктӧм.
Сы кодь мӧд тшӧктӧмыс: радейт матыссатӧ асьтӧ моз.
Тайӧ тшӧктӧмъясысь ыджыдджыкыс абу».
Индӧдӧ велӧдысь шуис Исуслы: «Тадз, Велӧдысьӧй.
Тэ веськыда висьталін, эм ӧти Ен, мӧдыс абу.
Енмӧс колӧ радейтны став сьӧлӧмнад, став мывкыднад, став олӧмнад, став выннад да матыссатӧ радейтны асьтӧ моз. Тайӧ сотӧм пемӧсъясысь да став мукӧд вись дорысь коланаджык».
Исус аддзис, мый сійӧ сюся сёрнитӧ, да шуис: «Тэ абу ылын Енлӧн Юралӧмысь».
Та бӧрын некод нин эз лысьт юасьны Исуслысь.
Крамын велӧдігӧн Исус шуис: «Мыйла нӧ Индӧдӧ велӧдысьяс шуӧны, Кристос пӧ Давид пи?
Вежа Ловсянь сёрнитігас Давид ачыс шуӧ:
— Господь шуис менам Господьлы: “Пукав Менам веськыдладорын, кытчӧдз ог пукты Тэнад кок улӧ Тэныд паныд мунысьясӧс”.
Давид шуӧ Сійӧс Господьӧн.
Кыдзи нӧ Сійӧ сылы пиӧн лоӧ?»
Унаӧн окотапырысь кывзісны Исусӧс.
Велӧдігас Сійӧ висьтавліс: «Видзчысьӧй Индӧдӧ велӧдысьясысь. Найӧ радейтӧны кузь паськӧмӧн ветлыны, йӧзаинын чолӧмалӧмъяс кывзыны, синагогаын водзын пукавны да гажӧдчанінын бурджыклаӧ пуксьыны. Найӧ куштӧны дӧваяслысь керкасӧ да асьнысӧ петкӧдлӧм могысь дыр кевмысьӧны. Но найӧс лоӧ чорыда мыждӧма».
Исус пуксис сьӧм чукӧртан кудлы паныд да видзӧдіс, кыдзи йӧзыс пуктісны сэтчӧ сьӧм.
Озыръяс уна пуктісны.
Локтіс гӧль дӧва да пуктіс кык ыргӧн сьӧм, тайӧ лоӧ ӧти ур мында.
Исус корис велӧдчысьяссӧ да шуис налы: «Веськыда висьтала тіянлы: тайӧ гӧль дӧваыс быдӧнысь унджык пуктіс.
Ставныс унасьыс чуктӧдісны, а тайӧ дӧваыс этшасьыс сетіс ставсӧ, мый сылӧн вӧлі кынӧмпӧт вылас».
13 юр.
Кор Исус вӧлі петӧ крамсьыс, ӧти велӧдчысь шуис: «Велӧдысьӧй, видзӧдлы, кутшӧм изъясысь тэчӧма керкаяссӧ.»
Исус шуис: «Аддзан тайӧ ыджыд керкаяссӧ?
Татчӧ из вылӧ из оз коль, ставсӧ жугӧдасны».
Кор Исус вӧлі пукалӧ Олив керӧсын, крамлы паныд, Петыр, Яков, Иоан да Ӧндрей ас кежаныс юалісны Сылысь: «Висьтав, кор ставыс тайӧ лоас? Мый серти ми тӧдмалам сійӧ кадсӧ?»
Исус шуис: «Видзчысьӧй, мед эз ылӧдны тіянӧс.
Унаӧн Менам нимӧн локтасны да шуасны, ме пӧ Сійӧ, да унаӧс ылӧдасны.
Кор кыланныд тыш мунӧмъяс да тыш йылысь юӧръяс, энӧ полӧй.
Тайӧ ставыслы колӧ лонысӧ, сӧмын тайӧ абу на пом.
Войтыр войтырлы паныд сувтас, муяс ӧта-мӧдныслы паныд кыпӧдчасны.
Уналаын лоас му вӧрӧм, тшыгъялӧм да шызьӧм.
Но тайӧ ставыс чужтӧм водзвывса дойяс на.
Видзӧдӧй ас бӧрсяныд. Тіянӧс кыскасны ёрдӧ да нӧйтасны синагогаясын. Ме вӧсна нуӧдасны тіянӧс юралысьяс да ӧксыяс водзӧ, медым найӧ тӧдісны Ме йылысь.
Помыс вотӧдз Евангелльӧсӧ колӧ висьтавны быд кыла войтырлы.
Кор нуӧдасны тіянӧс ёрдӧ, водзвыв энӧ майшасьӧй, мый шуны. Висьталӧй сійӧ, мый лоӧ сетӧма тіянлы сійӧ кадас, ӧд Вежа Лов пондас сёрнитны, онӧ ті.
Вокыс воксӧ сетас вины, батьыс — писӧ.
Ныв-пи сувтасны бать-мамыслы паныд да виасны найӧс.
Менам ним вӧсна унаӧн мустӧмтасны тіянӧс, но сьӧкыдсӧ помӧдз нуысь мездмас».
«Кор ті аддзанныд пеж зывӧксӧ сэтысь, кӧні сылы оз позь лоны, — та йылысь Даниил пророк на висьтавліс; лыддьысьысь мед гӧгӧрвоӧ — сэки Юдея муын олысьяс мед пышъясны керӧсъясӧ.
Коді лоас керка вылас, мед оз пыр керкаас босьтны мыйкӧ. Коді лоас видз-му вылас, мед оз кос гортас паськӧмысла.
Сійӧ лунъясӧ ёна сьӧкыд лоӧ нӧбасьысьяслы да нёньӧдчысьяслы.
Кевмысьӧй, мед эз ковмы пышйынытӧ тӧлын.
Сійӧ лунъясӧ ыджыд шог суас йӧзсӧ, татшӧмыс Енмӧн муюгыдсӧ вӧчӧмсянь эз на вӧвлы да оз нин ло.
Господь кӧ тайӧ кадсӧ эз дженьдӧд, ловъя морт эськӧ эз коль.
Но Аслас бӧрйӧмаяс вӧсна Сійӧ дженьдӧдіс тайӧ кадсӧ.
Сэки шуасны кӧ тіянлы: “Кристос тані”, либӧ шуасны: “Кристос сэні”, энӧ эскӧй.
Ӧд ылӧгкристосъяс да ылӧгпророкъяс локтасны да пондасны вӧчны шензьӧданаторъяс, медым ылӧдны, позяс кӧ, весиг бӧрйӧмаясӧс.
Видзчысьӧй наысь.
Ме тіянлы ставсӧ водзвыв висьталі».
«Сійӧ лунъясӧ, тайӧ шог бӧрас, шондіыс пемдас, тӧлысьыс кусас, енэжысь кодзувъяс усясны, енэжвыв вынъяс вӧрзясны.
Сэки аддзасны кымӧръяс вылын ыджыд вынӧн да дзирдлунӧн локтысь Морт Пиӧс.
Сійӧ мӧдӧдас анделъяссӧ нёльнан му вежтасас да чукӧртас Ассьыс бӧрйӧмаяссӧ став му пельӧссьыс.
Инжир пу вылӧ кӧ видзӧдам, аддзам: вожъясыс кӧ ловзьӧны да коръясыс потӧны, сідзкӧ, гожӧмыс матын.
Тадзи, ставсӧ тайӧс аддзигӧн тӧдӧй: сійӧ кадыс матын, ӧдзӧс дорад нин.
Веськыда висьтала тіянлы: ставыс тайӧ лоас ӧнія олысьяс дырйи на.
Енэжыс да муыс бырас, а Менам кывъясӧй оз бырны.
Сійӧ лунсӧ да сійӧ кадсӧ некод оз тӧд. Анделъяс оз тӧдны, весиг Пиыс оз тӧд, сӧмын Батьыс тӧдӧ.
Видзчысьӧй, мед энӧ унмовсьӧй, да пыр кевмысьӧй, ӧд онӧ тӧдӧй, кор сійӧ кадыс воас.
Тайӧс позьӧ ӧткодявны морткӧд, коді гортсьыс мунігӧн кольӧ ассьыс керкасӧ кесйӧгъяслы да быдӧнлы сетӧ удж, а керкасӧ видзысьлы тшӧктӧ лоны дасьӧн.
Сідзкӧ, лоӧй дасьӧсь, ӧд онӧ тӧдӧй, рытын-ӧ, вой шӧрын-ӧ, петук чуксасигӧн-ӧ, асывводзын-ӧ локтас керка кутысь. Мед эз су тіянӧс узьӧмӧн тӧдлытӧг локтӧмнас.
Мый висьтала тіянлы, висьтала быдӧнлы: лоӧй дасьӧсь».
14 юр.
Ыджыд лунӧдз, Шомтӧм нянь сёян лунъясӧдз кык лун на вӧлі.
Аркирейяс да Индӧдӧ велӧдысьяс корсисны, кыдзи эськӧ ылӧдлӧмӧн босьтны Исусӧс да вины.
Но шуисны, Ыджыд лунӧ пӧ оз ков, ӧд йӧзыс вермасны шызьыны.
Исус вӧлі Вифания сиктын, Сійӧ сёйис проказаысь бурдӧм Симон ордын. Сэтчӧ локтіс ань, сійӧ вайис вальді дозйын зэв дона нард вый. Ань жугӧдіс дозсӧ да кисьталіс выйсӧ Исуслы юр вылас.
Кодсюрӧ дӧзмӧмпырысь шуасисны ас костаныс: «Мыйла, бара, лотӧ-а?
Тайӧ выйсӧ позис вузавны куимсё динарысь донаджыка да сьӧмсӧ сетны гӧльяслы».
Тадзи найӧ шуасисны аньыс вылӧ.
Исус шуис: «Ӧвсьӧй сыысь.
Мыйла ті сійӧс шӧйӧвоштанныд?
Сійӧ буртор вӧчис Меным.
Гӧльяс пыр лоасны тіянкӧд, и ті верманныд вӧчны налы бурсӧ, кор кӧсъянныд, а Ме тіянкӧд ог пыр ло.
Тайӧ аньыс вӧчис, мый вермис: дасьтіс Менӧ дзебигкежлӧ.
Веськыда висьтала тіянлы: муюгыд пасьтала, кӧні висьталасны тайӧ Евангелльӧсӧ, сэні казьтыштасны тайӧ аньсӧ да висьталасны, мый сійӧ вӧчис».
Искариот Иуда вӧлі дас кык велӧдчысьысь ӧти. Сійӧ муніс аркирейяс дінӧ вузавны налы Исусӧс.
Тайӧс кылӧм бӧрын найӧ нимкодьпырысь кӧсйысисны сетны сылы сьӧм.
Иуда пондіс корсьны лӧсялан кад, медым вузавны Исусӧс.
Шомтӧм нянь сёян лунъяс дырйи медводдза лунӧ, кодыр начкисны Ыджыд лунся ыжӧс, велӧдчысьяс юалісны Исуслысь: «Кӧні кӧсъян сёйны Ыджыд лунся ыжӧс?
Ми мунам да дасьтам».
Кык велӧдчысьӧс мӧдӧдіг Исус шуис налы: «Мунӧй карас.
Тіянлы паныдасяс гырничын ва нуысь морт, мунӧй сы бӧрся. Кытчӧ сійӧ пырас, висьталӧй сэні керка кутысьыслы: “Велӧдысь юасьӧ, кутшӧм вежӧсын Аслас велӧдчысьяскӧд вермас сёйны Ыджыд лунся ыжӧс”.
Сійӧ петкӧдлас тіянлы вылыс судтасьыс ыджыд вежӧс, кодӧс дасьтӧма да вольсавлӧма. Сэні и лӧсьӧдӧй».
Велӧдчысьяс мунісны, воисны карас да аддзисны: ставыс лои Исуслӧн висьталӧм серти. Найӧ дасьтісны Ыджыд лунся сёян.
Рытнас Исус локтіс дас кыкнан велӧдчысьыскӧд.
Сёйиганыс шуис налы: «Веськыда висьтала тіянлы: тіян пиысь ӧти, Мекӧд тшӧтш сёйысь, вузалас Менӧ».
Шогӧ усьӧмӧн быдӧн кутіс юасьны Сылысь: «Ог-ӧ ме?»
Исус вочавидзис: «Тіян пӧвстысь, дас кыксьыс ӧти, сійӧ Мекӧд ӧти тасьтіысь сёйӧ.
Морт Пи мунӧ, кыдзи гижӧма Сы йылысь.
Но курыд шог Сійӧс вузалысьлы.
Бурджык сылы вӧлі, эз кӧ чужлы».
Сёйиганыс Исус босьтіс нянь, Енмӧс аттьӧалӧмӧн чегис няньсӧ да велӧдчысьяслы сетігас шуис: «Босьтӧй, сёйӧй, тайӧ Менам Яй».
Сэсся босьтіс чаша, аттьӧаліс Енмӧс да сетіс велӧдчысьясыслы. Ставныс юисны сэтысь.
Исус шуис налы: «Тайӧ Менам Вир — Выль Йитӧдлӧн Вир — киссьӧ уна вӧсна.
Веськыда висьтала тіянлы: Енлӧн Юраланінын выльӧс ютӧдз ог понды юны виноград юансӧ».
Енлы сьылӧм бӧрын найӧ кайисны Олив керӧсӧ.
Исус шуис велӧдчысьясыслы: «Тавой ті ставныд эновтанныд Менӧ.
Гижӧма: “Видзысьсӧ кувмӧн дойда, да ыжъясыс разаласны”.
Ловзьӧм бӧрам Ме виччыся тіянӧс Галилеяын».
Петыр шуис: «Ставныс кӧ эновтасны Тэнӧ, ме ог».
Исус вочавидзис: «Веськыда висьтала тэныд: тавой петуклӧн кыкысь чукӧсттӧдз на тэ куимысь соссян Меысь».
Петыр ёнджыка на шуаліс: «Весиг кӧ кувны ковмас Тэкӧд, ог соссьы».
Тадзи шуалісны тшӧтш мукӧд велӧдчысьыс.
Исус велӧдчысьясыскӧд локтіс Гефсиманӧ.
Сійӧ шуис налы: «Пукалыштӧй тані Менам кевмысигкості».
Аскӧдыс босьтіс Петырӧс, Яковӧс да Иоанӧс. Исусӧс полӧм да шогалӧм босьтіс.
Сійӧ шуис: «Шогӧй кувмӧн топӧдӧ лолӧс. Кольччӧй татчӧ да энӧ узьӧй».
Ачыс водзлань муныштіс да муӧ уськӧдчӧмӧн пондіс кевмысьны, медым, позис кӧ, тайӧ кадыс ордйис Сійӧс.
Сійӧ шуаліс: «Авва, Батьӧй.
Тэныд ставыс вермана.
Вешты Ме дінысь тайӧ чашасӧ. Сӧмын мед лоас Тэнад кӧсйӧм серти, а оз Менам».
Исус бӧр локтіс да аддзис: велӧдчысьясыс унмовсьӧмаӧсь. Петырлы шуис: «Симон, узян-ӧ?
Ӧти час весиг эн вермы узьтӧг олыштны.
Энӧ узьӧй, кевмысьӧй, мед ыштӧдӧмыс эз вермы тіянӧс. Лолыд ӧд пыр дась, а вир-яйыд жеб».
Исус мӧдысь муніс да воддза мозыс кевмысис.
Локтӧм бӧрас бара аддзис: велӧдчысьяссӧ унмыс топыда личкӧма. Найӧ эз тӧдны, мый вочавидзны Сылы.
Коймӧдысь локтігас Исус шуис налы: «Пыр на узянныд да шойччанныд?
Тырмас. Кадыс воис. Морт Пиӧс мыжаяс киӧ сетӧны.
Чеччӧй, мунамӧй.
Менӧ вузалысь матын нин».
Исуслӧн сёрнитігкості локтіс Иуда, дас кык велӧдчысьысь ӧти.
Сыкӧд тшӧтш локтісны зоръясӧн да шыпуртъясӧн уна йӧз. Найӧс мӧдӧдӧмаӧсь аркирейяс, Индӧдӧ велӧдысьяс да пӧрысьяс.
Исусӧс вузалысь шуӧма локтӧмаяслы, кодӧс пӧ окышта, Сійӧс босьтӧй да нуӧдӧй, син увсьыныд энӧ лэдзӧй.
Иуда веськыда муніс Исус дінӧ да шуис: «Велӧдысьӧй», сэсся окыштіс Сійӧс.
Сэки кытшалісны да босьтісны Исусӧс.
Сэні сулалысьясысь ӧти перйис шыпуртсӧ да керыштіс аркирей кесйӧглысь пельсӧ.
Исус шуис: «Лёк вӧчысьӧс моз зорйӧн-шыпуртӧн локтінныд босьтны Менӧ.
Ме быд лун тіян крамын велӧді, да ті энӧ босьтӧй Менӧ.
Тадзи инӧны Гижӧдъяс».
Сэки велӧдчысьяс ставныс эновтісны Исусӧс да пышйисны.
Ӧти зон вӧтчис Исус бӧрся, но сійӧс кутісны. Зонка нетшыштчис да пасьтӧгыс пышйис. Куш яй вылас плавгӧм дӧраыс колис шыпуртаяслӧн киӧ.
Исусӧс вайӧдісны аркирей ордӧ.
Сэтчӧ чукӧртчисны пӧрысьяс, Индӧдӧ велӧдысьяс да став аркирейыс.
Петыр бӧрӧ кольччӧмӧн вӧтчис Исус бӧрся аркирей керка дорӧдз. Пырис йӧрас да пуксис кесйӧгъяскӧд орччӧн би дорӧ шонтысьны.
Аркирейяс да став веськӧдлан котырыс корсисны Исуслы паныд висьталысьясӧс, медым сэсся мыждыны да вины Сійӧс. Но колана висьталысьыс эз сюр.
Унаӧн пӧръясьӧмӧн висьталісны Исус йылысь, но налӧн висьталӧмыс торъяліс ӧта-мӧдсьыс.
Кодсюрӧ висьталісны: «Ми кывлім: Сійӧ шуліс, жугӧда пӧ киӧн вӧчӧм тайӧ крамсӧ, сэсся пӧ куим лунӧн лэпта мӧдӧс, киӧн вӧчтӧмӧс».
Но весиг налӧн висьталӧмыс торъяліс ӧта-мӧдсьыс.
Сэки аркирей сувтіс шӧрас да юаліс Исуслысь: «Мый воча шуан?»
Исус чӧв оліс, нинӧм эз вочавидз.
Аркирей юаліс Сылысь: «Тэ-ӧ Кристос, Ошканаыслӧн Пиыс?»
Исус вочавидзис: «Ме.
И ті аддзанныд Морт Пиӧс, Ставсӧвермысьлӧн веськыдладорас пукалысьӧс да кымӧръяс вылын локтысьӧс».
Ассьыс паськӧмсӧ косяліг аркирей шуис: «Висьталысьяс миянлы оз нин ковны, ті асьныд кывлінныд, Сійӧ Енмӧс омӧльтӧ. Мый шуанныд?»
Ставныс мыжалісны Исусӧс да ӧти вомӧн шуисны вины Сійӧс.
Кодсюрӧ пондісны сьӧлавны Сылы, Сылысь чужӧмсӧ вевттьӧмӧн нӧйтісны да шуалісны: «Висьтав, Пророк, коді кучкис?»
Видзысьяс тшӧтш кучкалісны Сылы чужӧмас.
Петыр вӧлі керка йӧрас. Аркирейлӧн кесйӧгъяс пиысь ӧти ань локтіс сэтчӧ. Сійӧ аддзис би дорын шонтысьысь Петырӧс да сы вылӧ видзӧдлӧмӧн шуис: «Тэ тшӧтш Назаретса Исускӧд вӧлін».
Петыр соссис: «Ог тӧд Сійӧс. Ог гӧгӧрво, мый висьталан»,
сэсся петіс водз йӧрас.
Кыліс петуклӧн чукӧстӧм.
Аньыс бара казяліс Петырӧс да пондіс висьтавлыны сэні сулалысьяслы, тайӧ мортыс пӧ на пиысь.
Петыр бара соссис.
Бӧрынджык сэні сулалысьяс шуисны Петырлы: «Тэ дзик на пиысь.
Тэ Галилеяысь, сёрниыд на кодь».
Петыр енмасьӧмӧн пондіс соссьыны: «Ог тӧд тайӧ Мортсӧ, код йылысь висьталанныд».
Кыліс петуклӧн мӧдысь чукӧстӧм.
Сэки Петырлы уси тӧд вылас Исуслӧн шуӧмыс: «Петуклӧн кыкысь чукӧсттӧдз на тэ куимысь соссян Меысь». Петыр ырзӧмӧн бӧрддзис.
15 юр.
Асывводзнас аркирейяс, пӧрысьяс, Индӧдӧ велӧдысьяс да став веськӧдлан котырыс чукӧртчисны ӧтлаӧ. Сёрнитчӧм бӧрын Исусӧс кӧрталӧмӧн нуӧдісны Пилат дінӧ да сетісны сылы.
Пилат юаліс Исуслысь: «Тэ-ӧ юдейяслӧн Ӧксыыс?»
Исус вочавидзис: «Тэ шуан».
Аркирейяс унаторйысь мыжалісны Исусӧс.
Пилат бара юаліс Сылысь: «Он тай нӧ нинӧм шу?
Кылан, кутшӧма Тэнӧ мыжалӧны».
Исус весиг воча кыв эз шу. Пилатӧс тайӧ шензьӧдіс.
Быд во Ыджыд лунӧ йӧз корӧм серти Пилат лэдзліс дзескыдінысь ӧти мортӧс.
Сэки дзескыдінын пукалісны зык лэптысьяс. На лыдын тшӧтш вӧлі Варавва. Зык дырйиыс найӧ мортӧс виӧмаӧсь.
Чукӧртчӧм йӧз пондісны горзӧмӧн корны Пилатӧс вӧчны налы сійӧ, мый пыр вӧчлывліс.
Пилат юаліс: «Кӧсъянныд-ӧ, медым ме лэдзи тіянлы юдейяслысь Ӧксысӧ?»
Пилат тӧдіс, мый аркирейяс вайӧдісны Исусӧс вежалӧмныс понда.
Аркирейяс ыззьӧдісны йӧзсӧ, мед Исус пыдди корасны лэдзны Варавваӧс.
Пилат юаліс: «Мый шуанныд вӧчны Сыкӧд, кодӧс юдейяслӧн Ӧксыӧн нимтанныд?»
Найӧ горӧдісны: «Тувъяв Сійӧс.»
«Мый лёксӧ Сійӧ вӧчис?» — юаліс Пилат.
Йӧзыс гораджыка на горӧдісны: «Тувъяв Сійӧс.»
Йӧзлы шогмӧм могысь Пилат лэдзис Варавваӧс, а Исусӧс нӧйтӧм бӧрын сетіс тувъявны.
Шыпуртаяс нуӧдісны Исусӧс римса юралысьлӧн керка йӧрӧ, сэтчӧ чукӧртісны и мукӧд шыпуртаясӧс. Найӧ пасьтӧдісны Исусӧс пемыдгӧрд кышанӧ, юрас пуктісны лежнӧгысь кыӧм юркытш, сэсся пондісны нимӧдны Сійӧс: «Мед олас юдейяслӧн Ӧксы.»
Кучкалісны юрас беддьӧн, сьӧлалісны Сійӧс да пидзӧсчанясьӧмӧн копрасисны Сы водзын.
Сералӧм-лёкӧдӧм бӧраныс найӧ босьтісны Исус вылысь пемыдгӧрд кышансӧ да бӧр пасьтӧдісны Сійӧс Аслас паськӧмӧ, сэсся нуӧдісны тувъявны.
Исуслысь крестсӧ тшӧктісны нуны видз-му вылысь локтысь киринеяса Симонлы, Ӧльӧксанлӧн да Руфослӧн батьлы.
Исусӧс вайӧдісны Голгопа керӧсӧ, нимыслӧн вежӧртасыс лоӧ “Юр лы”.
Сэні Сылы сетісны смирна сора вина, но Сійӧ эз ю.
Исусӧс тувъялӧм бӧрын шыпуртаяс пудъясьӧмӧн юкисны Сылысь паськӧмсӧ.
Исусӧс тувъялісны ӧкмыс час асылӧ.
Юр весьтас ӧшӧдісны мыжалан пасйӧд: «Юдейяслӧн Ӧксы».
Сыкӧд орччӧн тувъялісны кык лёк вӧчысьӧс: ӧтисӧ веськыдладорас, мӧдсӧ шуйгаладорас.
Тадзи иніс Гижӧдыс: «Сійӧс пуктісны Индӧдтӧг олысьяс лыдӧ».
Сэті мунысьяс лёкысь видзӧдӧмӧн омӧльтісны Исусӧс: «Крам жугӧдысь да куим лунӧн сійӧс лэптысь, мезды Асьтӧ, лэччы крест вывсьыд».
Сійӧс лёкӧдісны тшӧтш аркирейяс да Индӧдӧ велӧдысьяс: «Мукӧдӧс мездіс, а Асьсӧ мездыны оз вермы.
Кристос, Израиль Ӧксы, мед лэччас крест вывсьыс. Аддзылам кӧ тайӧс, сэки эскам».
Исусӧс лёкӧдісны тшӧтш орччӧн тувъялӧмаяс.
Лун шӧр кадӧ пемдіс став му пасьталаыс, пемыдыс сулаліс куим часӧдз.
Куим час гӧгӧрын Исус ыджыд шыӧн горӧдіс: «Эли, Эли, ламма сабактани? Енмӧй, Енмӧй, мыйла Тэ колин Менӧ?»
Сэні сулалысьясысь кодсюрӧ шуисны, Илляӧс пӧ корӧ.
Ӧти морт котӧртіс, кӧтӧдіс шома винаӧн губка, сэсся бедь помӧ сатшкӧмӧн мыччис сійӧс Исуслы да шуис: «Энлӧй. Видзӧдлам, локтас оз Илля лэдзны Сійӧс».
Исус горӧдіс ыджыд шыӧн, сэсся лолыс петіс.
Сэки крамын ӧшалысь дӧраыс вывсяньыс улӧдзыс кык пельӧ косяссис.
Шыпуртаяслӧн веськӧдлысь сулаліс Исуслы воча. Кор сійӧ аддзис, кыдзи Исуслӧн горӧдӧм бӧрын лолыс петіс, шуис: «Тайӧ Мортыс збыльысь Ен Пи вӧлӧма».
Сэні вӧліны аньяс, кодъяс ылісянь видзӧдісны.
На пӧвстын вӧліны Магдала Марья, томджык Яковлӧн да Иосейлӧн Марья мамныс да Саломия. Галилеяын найӧ ветлывлісны Исускӧд да кесъявлісны Сылы. Нӧшта сэні вӧлі уна мукӧд ань, кодъяс локтісны Исускӧд Ерусалимӧ.
Вӧлі рыт, шойччан лунлы паныд. Аримафея карысь воис Ӧсип, веськӧдлан котырысь пыдди пуктана морт. Сійӧ виччысис Ен Юралӧмлысь воӧмсӧ. Сійӧ повтӧг муніс Пилат дінӧ да корис Исуслысь шойсӧ.
Пилат чуймис, мый Исус кулӧма нин. Сійӧ корис шыпуртаяслысь веськӧдлысьӧс да тӧдмаліс, важӧн-ӧ куліс.
Кор Пилат тӧдмаліс Исуслӧн кулӧм йылысь, лэдзис Ӧсиплы босьтны шойсӧ.
Ӧсип ньӧбис шабді дӧра, босьтіс крест вылысь шойсӧ, гартыштіс дӧраӧ да пуктіс кыртаӧ кералӧм дзебанінӧ. Пыранінас путкыльтіс из.
Магдала Марья да Иосейлӧн Марья мамыс видзӧдісны, кытчӧ дзебасны Исусӧс.
16 юр.
Шойччан лун бӧрын Магдала Марья, Яковлӧн Марья мамыс да Саломия ньӧбисны чӧскыд дука выйяс, медым мавтны Исусӧс.
Шойччан лун бӧрын водз асывнас, шонді петігӧн, найӧ мунісны дзебанінӧ, ас костаныс сёрнитісны: «Коді путкыльтас изсӧ пыранінсьыс?»
Воиганыс найӧ аддзисны: изсӧ вӧлі вештӧма. Изйыс вӧлі зэв ыджыд.
Дзебанінӧ пыриганыс найӧ аддзисны веськыдладорсьыс еджыд паськӧма пукалысь зонмӧс да ёна повзисны.
Сійӧ шуис налы: «Энӧ полӧй.
Ме тӧда, ті корсянныд тувъявлӧм Назаретса Исусӧс.
Сійӧ ловзис.
Сійӧ тані абу.
Видзӧдлӧй куйланінсӧ, татчӧ Сійӧс пуктылісны.
Мунӧй, юӧртӧй велӧдчысьясыслы, тшӧтш Петырлы: Исус виччысьӧ найӧс Галилеяын.
Сэтысь аддзасны Сійӧс, тадзи Сійӧ Ачыс висьтавліс налы».
Аньяс петісны да шӧйӧвошӧмӧн котӧртісны дзебанінысь.
Найӧс тіралӧм босьтіс. Найӧ нинӧм эз висьтавлыны, полісны да.
Шойччан лун бӧрын водз асывнас ловзьӧм Исус медводз петкӧдчис Магдала Марьялы, код пытшкысь Сійӧ вӧтліс коркӧ сизим пеж лолӧс.
Марья муніс да юӧртіс лоӧм йывсьыс Исускӧд ветлысьяслы, кодъяс ӧні шогсисны да бӧрдісны. Кор кылісны, мый Исус ловъя да Марья аддзылӧма Сійӧс, найӧ эз эскыны.
Та бӧрти Исус петкӧдчыліс мӧд мыгӧрӧн на пиысь кыклы, кодъяс вӧлі мунӧны орчча сиктӧ.
Найӧ бӧр косісны да юӧртісны мукӧдыслы, но весиг налы эз эскыны.
Медбӧрын Исус петкӧдчис дас ӧти велӧдчысьыслы, кор найӧ вӧлі сёйӧны. Сійӧ янӧдіс найӧс эскытӧмсьыс да сьӧлӧмнысӧ чорзьӧдӧмысь, ӧд найӧ эз эскыны налы, кодъяс аддзылісны Сійӧс ловзьӧм бӧрас.
Сэсся шуис налы: «Мунӧй став муюгыд пасьтала да висьталӧй Евангелльӧсӧ ставныслы.
Коді эскас да пыртчас, сійӧ мездмас.
Коді оз эскы, сійӧс лоӧ мыждӧма.
Эскысьяслӧн лоасны татшӧм индысьпасъяс: Менам нимӧн пондасны вӧтлавны пеж ловъясӧс да сёрнитны выль кывъяс вылын.
Босьтасны кӧ кианыс змейӧс да юасны кӧ мыйкӧ кулантор, таысь налы лёкыс оз ло.
Найӧ пуктасны кинысӧ висьысьяс вылӧ, да найӧ бурдасны».
Тайӧс висьталӧм бӧрын Господь кыпӧдчис енэжӧ да пуксис Ен веськыдладорӧ.
А велӧдчысьясыс мунісны да быдлаын висьтавлісны Бур Юӧр. Господь отсаліс налы да вынсьӧдіс Юӧрсӧ индысьпасъясӧн.
Аминь.
Лука серти бур юӧр
1 юр.
Дона Феофил. Унаӧн нин босьтчылісны гижны миянын вӧвлӧмторъяс йылысь. Тайӧ лоӧмторъяс йылысь миянлы юӧртісны найӧ, кодъяс ставсӧ тайӧс аддзылісны да лоисны сэсся Ен Кывлы кесъялысьясӧн. Водзысяньыс ставсӧ лючки-бура туялӧм бӧрын тшӧтш ме шуи гижны тэныд став йывсьыс сьӧрсьӧн-бӧрсьӧн. Тэныд вӧлі висьталӧма тайӧ вӧвлӧмторъяс йывсьыс, но ме кӧсъя подулалӧмӧн петкӧдлыны тэныд Бур Юӧрлысь збыльсӧ.
Ирӧд ӧксыалан лунъясӧ Юдея муын оліс Закар нима поп, сійӧ вӧлі Авей поп котырысь. Закарлӧн Елизавета гӧтырыс вӧлі Аарон чужанвужйысь.
Найӧ кыкнанныс олісны Ен водзын веськыда, ставсӧ вӧчисны Господьлӧн тшӧктӧм серти.
Челядьыс налӧн эз вӧв, ӧд Елизавета эз вермы вайны кагасӧ, и кыкнанныс вӧліны ыджыд арлыдаӧсь нин.
Воис кад Закар котырлы кесъявны Ен водзын. Попъяслӧн лӧсьӧдӧм серти пудъясисны, и Закар пырис Господьлӧн крамӧ тшынӧдны. Закарлӧн тшынӧдігкості став йӧзыс кевмысисны ортсыас. Сэки петкӧдчис Закарлы Господьлӧн андел. Сійӧ сулаліс тшынӧдчан пызан веськыдладорын.
Анделӧс аддзӧмысь Закар шӧйӧвошис, сійӧс полӧм босьтіс.
Андел шуис: «Эн пов, Закар. Енмыс кылӧма тэнсьыд кевмӧмтӧ.
Елизавета гӧтырыд чужтас тэныд пи. Пукты сылы Иоан ним. Долыд гажӧн тырас тэнад сьӧлӧмыд, да уна йӧзлы нимкодьлун ваяс сылӧн чужӧмыс. Господь водзын сійӧ лоас ыджыд мортӧн, вина-сур оз кут юны, мам кынӧмас на сійӧ тырас Вежа Лолӧн. Израиль войтырысь сійӧ унаӧс бергӧдас налӧн Господь Енлань. Сійӧ мунас Господь водзын Илля лов-вынӧн, бергӧдас батьяслысь сьӧлӧмсӧ ныв-пиланьыс, кывзысьтӧмъясӧс — веськыда олысьлӧн мывкыдлунӧ, медым дасьтыны войтырсӧ Господьлы».
Закар юаліс анделлысь: «Кыдзи ме тӧдмала тайӧс?
Ачым пӧрысь, дай гӧтырӧй абу нин том».
Андел вочавидзис: «Ме, Гавриил, сулала Ен водзын. Менӧ мӧдӧдӧма сёрнитны тэкӧд, висьтавны тайӧ Бур Юӧрсӧ тэныд. Но меным эскытӧмыдла тэ воштан кыв-вортӧ, он вермы сёрнитнытӧ менам кывъяслӧн ас кадӧ интӧдз».
Сэккості йӧзыс виччысисны Закарӧс да шензисны крамын сылӧн дыр олӧмысь.
Сэтысь петӧм бӧрын Закар эз вермы сёрнитнысӧ. Йӧзыс гӧгӧрвоисны, мый сійӧ аддзылӧма Енсянь петкӧдчылӧм. Закар сёрнитіс йӧзыскӧд пасъясӧн.
Кесъялан лунъяс бӧрын Закар локтіс гортас.
Елизавета гӧтырыс регыд пондіс нӧбасьны. Вит тӧлысь чӧж сійӧ эз петкӧдчыв йӧз син водзӧ, оліс татшӧм мӧвпъясӧн: «Господь вӧчис тайӧс. Сійӧ видзӧдліс мелань да вештіс менсьым йӧз водзын яналӧмӧс».
Квайтӧд тӧлысьнас Ен мӧдӧдіс Гавриил анделӧс Галилеяса Назарет карӧ Мария нима ныв дінӧ. Мария вӧлі кикутӧма Давид чужанвужйысь Ӧсип нима морткӧд.
Мария дінӧ пырӧм бӧрын андел шуис: «Нимкодясь, бурсиӧм аньӧй. Господь тэкӧд.»
Мария чуймис анделӧс аддзӧмысь да сылӧн кывъясысь. Сійӧ мӧвпаліс, мый водзын нӧ сылы татшӧм чолӧмалӧмыс.
Андел шуис сылы: «Эн пов, Мария, тэныд вичмис Енсянь буралӧмыс.
Тэ сьӧктан, чужтан пи да пуктан Сылы Исус ним.
Ыджыд морт Сыысь петас, Сійӧс шуасны Медвылыссалӧн Пиӧн. Господь Ен сетас Сылы Давид батьыслысь юралан пуклӧссӧ. Сійӧ кутас ыджыдавны Яков котырын нэмъяс чӧж, да Сылӧн Юралӧмлы оз ло помыс».
Мария юаліс анделлысь: «Вермас ӧмӧй тадзисӧ лоны, ме ӧд ныв на?»
Андел вочавидзис: «Вежа Лов лэччас тэ вылӧ, Медвылыссалӧн выныс вевттяс тэнӧ.
Та вӧсна тайӧ чужысьыс вежа, Сійӧс шуасны Ен Пиӧн.
Тэнад рӧдвужыд, ныв-питӧм Елизавета, пӧрысьӧ-нэмӧ квайтӧд тӧлысь нин пиӧн нӧбасьӧ.
Енлы нинӧм вермытӧмыс абу».
Сэки Мария шуис: «Ме Господьлӧн кесйӧг, мед лоас тэнад висьталӧм серти».
Сэсся андел муніс.
Кымынкӧ лун мысти Мария тэрмасьӧмӧн мӧдӧдчис керӧсвыв муӧ, Иуда карӧ. Закар керкаӧ пыригӧн сійӧ чолӧмаліс Елизаветаӧс.
Мариялӧн чолӧмалӧмысь Елизаветалӧн кынӧмас кагаыс чеччыштіс.
Елизавета тырис Вежа Лолӧн и гораа шыасис: «Бурсиӧма тэнӧ аньяс пиысь, бурсиӧма сьӧлӧмув кагатӧ.
Коді нӧ ме, мый Господьӧйлӧн мамыс локтӧ ме ордӧ?
Мыйӧн сӧмын кылі чолӧмасьӧмтӧ, кагаӧй долыда чеччыштіс кынӧмын.
Тэ шуда, эскин да, ӧд Господьлӧн тэныд шуӧмыс инас».
Мария шуис: — Ошкӧ сьӧлӧмӧй Господьӧс, нимкодясьӧ лолӧй Ен вӧсна, Мездысьӧй вӧсна, ӧд Сійӧ видзӧдліс Аслас коньӧр кесйӧглань. Ӧнісянь став чужысьыс шуас менӧ шудаӧн, ӧд татшӧм ыджыдтор вӧчис меным Вына Енмыс. Вежа Сылӧн нимыс. Нэмсянь нэмӧдз Сійӧ буралӧ Сыысь полысьяс дінӧ. Сылӧн киыс вӧчис ыджыдсьыс-ыджыд уджъяс: разӧдіс вылӧ кыпӧдчысь сьӧлӧмаясӧс, юралан пуклӧсъясысь юралысьясӧс чӧвтіс, улӧ пуктӧмаясӧс кыпӧдіс, тшыгъялысьясӧс пӧттӧдзныс вердіс, озыръясӧс куш киӧн мӧдӧдіс. Сибӧдіс Израильӧс, Ассьыс кесъялысьсӧ, да казьтыштіс миян батьяслы, Ӧвраамлы да сысянь чужысьяслы нэмъяс кежлӧ кӧсйысьӧм буралӧмсӧ.
Мария оліс Елизавета ордын тӧлысь куим, сэсся бӧр муніс гортас.
Елизаветалы воис кад чужтыны, да сійӧ чужтіс пи.
Матігӧгӧр олысьяс да рӧдвужыс тӧдмалісны Господьлысь буралӧмсӧ Елизавета дінӧ да тшӧтш нимкодясисны сыкӧд.
Кӧкъямысӧд луннас локтісны вундыштны кагасӧ да кӧсйисны сетны сылы Закар батьыслысь нимсӧ.
Мамыс шуис: «Энӧй. Пуктам сылы Иоан ним».
Сылы шуисны: «Тэнад рӧдвужын татшӧм нимаыс некод абу».
Сэсся пасъяс отсӧгӧн юалісны батьыслысь, кутшӧм ним сійӧ кӧсйӧ сетны кагаыслы.
Закар корис пӧвтор да сэтчӧ гижис: «Иоан лоӧ нимыс».
Ставныс чуймисны.
Сэки воссис Закарлӧн кыв-ворыс, да сійӧ кутіс ошкыны Енмӧс.
На гӧгӧр олысьясӧс полӧм босьтіс. Став тайӧ лоӧмтор йывсьыс сёрниыс паськаліс керӧсвыв Юдея му пасьтала.
Тайӧс кывлысьяс чуймӧмӧн юасисны: «Кодӧн лоӧ тайӧ кагаыс?»
Господьлӧн киыс збыльысь вӧлі сы вылын.
Кагалӧн Закар батьыс тырис Вежа Лолӧн да пондіс пророкавны:
— Ошка Господьӧс, Израильлысь Енмӧс. Сійӧ бергӧдчис Аслас войтырлань, дасьтіс сылы мездмӧм. Давид кесъялысьлӧн чужанвужйысь Сійӧ сетіс миянлы Вына Мездысьӧс. Тадзи важысянь Сійӧ кӧсйысьліс Аслас вежа пророкъяс пыр. Сійӧ кӧсйысис мездыны миянӧс паныд мунысьясысь, дорйыны мустӧмтысьяслӧн киысь, лоны бур сьӧлӧмаӧн миян батьяс дінӧ да кутны тӧд вылас Ассьыс вежа йитӧдсӧ, Ӧвраам батьнымлы Ассьыс сетӧм кывсӧ. Паныд мунысьяс киысь мездмӧм бӧрын ми вермам повтӧг кесъявны Сылы вежалунӧн да веськыда став олӧм чӧжным.
Тэнӧ, кагаӧй, пуктасны Медвылыссалӧн пророкӧ. Тэ мунан Господь водзын дасьтыны туйяс Сылы, юӧртны Сылӧн войтырлы мездмӧм йылысь да налысь мыжъяссӧ прӧститӧм йылысь. Миян бур сьӧлӧма Ен ыстас миянлы енэжсянь асъя кыа, сетас югыдсӧ пемыдын да кулан вуджӧр улын олысьяслы, Сійӧ веськӧдас кокнымӧс лӧньлуна туй вылӧ.
Кага быдмис да ловнас вынсяліс. Израильлы аслас петкӧдчан лунӧдз сійӧ оліс овтӧминъясын.
2 юр.
Сійӧ лунъясӧ Римын ыджыдалысь Август кесар тшӧктіс гижавны ас мусьыс став йӧзсӧ.
Тайӧ медводдза гижалӧмыс вӧлі Сирияын Квириний ыджыдалан кадӧ.
Быдӧн муніс гижасьны аслас чужан карӧ.
Ӧсип вӧлі Давид чужанвужйысь. Та вӧсна аслас Мария гӧтырпукӧд, коді вӧлі нӧбасьӧ, сійӧ муніс гижасьнысӧ Галилеяса Назарет карысь Юдея муӧ, Виплием нима Давид карӧ.
Виплиемӧ воӧм мысти Мариялы воис кад чужтыны. Сійӧ чужтіс Пи, ассьыс медводдза кагасӧ. Рузумӧ гартыштӧмӧн Мария пуктіс кагасӧ лясниӧ, ӧд туйморт керкаын налы узяніныс эз сюр.
Сэні матігӧгӧрас вӧліны ыж видзысьяс. Войнас найӧ видзисны ыжъяснысӧ видз вылын.
Виччысьтӧг на водзӧ сувтіс Господьлӧн андел. Господьлӧн дзирдлуныс югзьӧдіс ыж видзысьясӧс, да найӧ ёна повзисны.
Андел шуис налы: «Энӧ полӧй.
Ме висьтала тіянлы нимкодьсьыс-нимкодь юӧр, тайӧ ваяс ыджыд долыдлун став войтырлы. Талун Давид карын тіянлы чужис Мездысь — Господь Кристос. Лясниысь ті аддзанныд рузумӧ гартыштӧм кагаӧс — тайӧ лоӧ тіянлы пасӧн».
Виччысьтӧг анделкӧд орччӧн тыдовтчис лыдтӧм-тшӧттӧм андел чукӧр. Найӧ ошкисны Енмӧс:
— Ошкӧм Медвылысса Енлы. Му вылын лӧнь олӧм, йӧз костын бур кӧсйӧм.
Анделъяслӧн енэжӧ кайӧм бӧрын ыж видзысьяс шуисны ӧта-мӧдныслы: «Мунамӧй Виплиемӧ, видзӧдлам Господьсянь миянлы юӧртӧм лоӧмторсӧ».
Найӧ тэрмасьӧмӧн мунісны сэтчӧ да аддзисны сэтысь Марияӧс, Ӧсипӧс да лясниын куйлысь кагаӧс.
Сэсся висьталісны кага йылысь кывлӧмторсӧ.
Кывзысьясӧс шензьӧдіс ыж видзысьяслӧн висьталӧмыс.
Мария видзис тайӧ висьталӧмсӧ сьӧлӧмас да мӧвпаліс та йылысь.
Ыж видзысьяс бӧр мунісны Енмӧс ошкӧмӧн да аттьӧалӧмӧн ставсьыс, мый кывлісны да аддзылісны. Ставыс лои анделлӧн висьталӧм серти.
Кӧкъямыс лун мысти воис кад вундыштны кагаӧс. Сылы сетісны Исус ним, ӧд Мариялӧн нӧбасьтӧдз на тадзи нимтіс Сійӧс андел.
Мӧисей Индӧд серти сӧстӧммӧдчан лунӧ Исусӧс вайисны Ерусалимӧ Господь водзӧ. Ӧд Господьлӧн Индӧд серти медводдза чужысьӧс, пи кагаӧс, колӧ вӧлі сины Господьлы. Господьлӧн Индӧд серти нӧшта колӧ вӧлі вайны вись: кык гулюӧс, абу кӧ, кык гулюпиӧс.
Сэки Ерусалимын вӧлі Симеон нима вежавидзысь морт.
Сійӧ оліс веськыда да виччысис Израильӧс мездӧм.
Вежа Лов вӧлі сы вылын.
Вежа Лов водзвыв висьтавліс сылы, Господьлысь Кристосӧс аддзывтӧдз пӧ он кув.
Вежа Лов нуӧдӧмӧн Симеон локтіс крамӧ.
Кор Исуслӧн бать-мамыс пыртісны сэтчӧ кагасӧ, медым ставсӧ вӧчны Индӧд серти, Симеон босьтіс Сійӧс киас да Енмӧс ошкигтырйи шуис:
— Ыджыдӧй, Аслад шуӧмыд серти ӧні лэдзан Ассьыд кесйӧгтӧ лӧня мунны. Аслам синмӧн аддзылі став йӧзлы Тэнсьыд дасьтӧм мездӧмтӧ: ентӧдтӧмъяслы вайӧм югыдтӧ, Тэнад Израиль войтырлы восьтӧм дзирдлунтӧ.
Кага йылысь висьталӧмыс шензьӧдіс Сылысь мамсӧ да Ӧсипӧс.
Симеон бурсиис найӧс да шуис Мариялы, Исус мамлы: «Тайӧ кагаыс понда Израильын унаӧн усясны да унаӧн сувтасны. Сійӧ — Енсянь индысьпас. Унаӧн кутасны мунны Сылы паныд, и тадзи воссясны налӧн гуся мӧвпъясыс. Тэнсьыд сьӧлӧмтӧ шогыс шыпуртӧн моз бытшкас».
Сэні вӧлі Анна нима пророк, Фануил ныв, Асир чужанкотырысь. Тайӧ пӧрысь аньыс ныв кадсяньыс сизим во олӧма верӧсыскӧд, сэсся кӧкъямысдас нёль арӧсӧдз олӧма дӧваӧн. Сійӧ эз петавлы крамысь, видзалӧмӧн-кевмысьӧмӧн кесъяліс Енлы лун и вой.
Буретш тайӧ кадӧ Анна матыстчис, пондіс ошкыны Енмӧс да висьтавлыны кага йылысь ставныслы, Ерусалимын мездмӧмсӧ виччысьысьяслы.
Господьлӧн Индӧд серти ставсӧ вӧчӧм бӧрын Ӧсип да Мария бӧр мунісны Галилеяӧ, асланыс Назарет карӧ.
Кага быдмис, ловнас вынсяліс, Сылӧн мывкыдлуныс содіс. Енлӧн бурсиӧмыс вӧлі Сы вылын.
Быд во Ыджыд лун кежлӧ Исуслӧн бать-мамыс ветлісны Ерусалимӧ.
Исуслы дас кык арӧс тырӧм бӧрын найӧ мукӧд воясӧ моз бара мунісны сэтчӧ.
Ыджыд лун бӧрын Ӧсип да Исуслӧн мамыс бӧр мӧдӧдчисны гортаныс. Зонка кольччис Ерусалимӧ. Та йылысь найӧ эз тӧдны, чайтісны, мый Сійӧ мунӧ мукӧдыскӧд.
Лунтыр мунӧм бӧрын пондісны корсьны Исусӧс рӧдвуж да тӧдсаяс пӧвстысь, но эз аддзыны. Сэки бӧр косісны Ерусалимӧ корсьны Сійӧс.
Куим лун мысти найӧ аддзисны Исусӧс крамысь. Сійӧ пукаліс велӧдысьяс пӧвстын, кывзіс-юасис найӧс. Сылӧн мывкыдлуныс да вочавидзӧмъясыс шензьӧдісны кывзысьясӧс.
Исусӧс аддзӧм бӧрын бать-мамыс чуймисны.
Мамыс шуис Сылы: «Пиӧй, мыйла нӧ Тэ тадзи вӧчин?
Ми батьыдкӧд сьӧлӧм потмӧн корсим Тэнӧ».
Сійӧ шуис налы: «Мыйла ті корсинныд Менӧ?
Энӧ ӧмӧй тӧдӧй, мый Меным колӧ лоны Бать керкаын?»
Но Сылысь кывъяссӧ найӧ эз гӧгӧрвоны.
Исус бӧр локтіс бать-мамыскӧд Назаретӧ да быдторйын кывзысис налысь.
Сылӧн мамыс ставсӧ тайӧс видзис сьӧлӧмас.
Исус сӧвмис, мывкыдлуныс содіс. Сійӧ вӧлі муса Енмыслы, и йӧзыс бурӧ пуктісны Сійӧс.
3 юр.
Тайӧ вӧлі Тиверий нима кесарлӧн дас витӧд веськӧдлан воӧ. Сэки Юдея муӧн веськӧдліс Понтий Пилат. Ирӧд веськӧдліс Галилея муӧн, сылӧн Филип вокыс веськӧдліс Итурея-Траконит муясӧн, Лисаний веськӧдліс Авилинея муӧн. Аннас да Каиаф вӧліны аркирейясӧн. Тайӧ кадӧ Енсянь кыв воис Иоанлы, Закар пилы, коді оліс овтӧминын.
Йӧрдан юдорса став муӧд ветлӧдлігӧн Иоан юӧрталіс: «Бергӧдчӧй мыжъяссьыныд да пыртчӧй, медым Ен прӧститас мыжъяснытӧ». Исай пророк небӧгын тадзи гижӧма:
— Овтӧминын кылӧ горзысьлӧн шы: «Лӧсьӧдӧй туйсӧ Господьлы, веськӧдӧй-шыльӧдӧй ордымъяс Сылы.
Быд увтасін мед тырас, быд керӧс да мыльк мед ляпкалас, чукыльяс мед веськаласны, гуранъяс мед шыляласны.
Сэки ставӧн аддзасны Енлысь мездӧмсӧ».
Иоан шуаліс сы дінӧ пыртчыны воӧмаяслы: «Вижля йылӧм.
Коді туйдӧдіс тіянӧс пышйыны локтана скӧрлунысь?
Олӧмнад петкӧдлӧй мыжъяссьыныд бергӧдчӧмнытӧ. Энӧ лысьтӧй мӧвпавны, мый тіян батьныд Ӧвраам. Висьтала тіянлы: тайӧ изъясысь Ен вермӧ вӧчны Ӧвраамлы ныв-писӧ.
Черыс пу вужйыс дорын нин куйлӧ.
Пуыс кӧ оз вай бур вотӧс, сійӧс кералӧны да шыбитӧны биӧ».
Йӧзыс юасисны Иоанлысь: «Мый миянлы колӧ вӧчнысӧ?»
Сійӧ вочавидзис: «Тэнад кӧ кык дӧрӧм, ӧтисӧ сет, кодлӧн абу. Тэнад кӧ эм сёян, тшӧтш тадзи вӧч».
Пыртчыны воисны тшӧтш вот перйысьяс, найӧ юалісны: «Велӧдысь, мый миянлы колӧ вӧчнысӧ?»
Сійӧ вочавидзис налы: «Энӧ босьтӧй тіянлы тшӧктӧмасьыс унджыксӧ».
Шыпуртаяс тшӧтш юалісны сылысь: «Мый нӧ миянлы колӧ вӧчнысӧ?»
Иоан шуис налы: «Мырдысьӧн да повзьӧдлӧмӧн энӧ босьтӧй йӧзлысь сьӧм, тырмӧдчӧй асланыд удждонӧн».
Йӧзыс мӧвпалісны, абу-ӧ Иоаныс Кристос, ӧд найӧ виччысисны Кристосӧс. Иоан шуис налы: «Ме пырта тіянӧс ваӧн, но локтӧ меысь вынаджык, ме ог шогмы разьны Сылысь кӧмкот кӧвсӧ.
Сійӧ пыртас тіянӧс Вежа Лолӧн да биӧн.
Сы киын тӧлӧдчан зырйыс.
Сійӧ весалас гумласӧ: шобдісӧ йӧртӧдӧ чукӧртас, кыдсӧ куслытӧм биын сотас».
Уна ногӧн велӧдӧмӧн Иоан висьтавліс Бур Юӧрсӧ йӧзыслы.
Иоан янӧдіс Ирӧд ӧксыӧс вокыслӧн Ирӧдиада гӧтырыс вылӧ гӧтрасьӧмысь да мукӧд лёкторйысь. Таысь Ирӧд пуксьӧдіс Иоанӧс дзескыдінӧ, тадзи содтіс аслас лёк вӧчӧмъяслысь лыдсӧ.
Уна йӧз пыртчис, и тшӧтш Исус пыртчис. Пыртчӧм бӧрас Исуслӧн кевмысигӧн енэжыс воссис. Вежа Лов гулю кодьӧн лэччис Сы вылӧ. Енэжсянь кыліс гӧлӧс шы:
«Тэ Менам муса Пиӧй, Ме нимкодяся Тэӧн».
Комын арӧссянь Исус пондіс кесъявны. Йӧзыс лыддисны Сійӧс Ӧсиплӧн пиӧн. Ӧсип вӧлі Илийлӧн пи, Илий — Матфатлӧн, Матфат — Левийлӧн, Левий — Мелкийлӧн, Мелкий — Яннайлӧн, Яннай — Ӧсиплӧн, Ӧсип — Маттафейлӧн, Маттафей — Амослӧн, Амос — Наумлӧн, Наум — Еслилӧн, Если — Наггейлӧн, Наггей — Маафлӧн, Мааф — Маттафейлӧн, Маттафей — Семейлӧн, Семей — Ӧсиплӧн, Ӧсип — Иудалӧн, Иуда — Иоаннанлӧн, Иоаннан — Рисайлӧн, Рисай — Зоровавельлӧн, Зоровавель — Салафильлӧн, Салафиль — Нирийлӧн, Нирий — Мелкийлӧн, Мелкий — Аддийлӧн, Аддий — Косамлӧн, Косам — Елмодамлӧн, Елмодам — Ирлӧн, Ир — Иосейлӧн, Иосей — Елиезерлӧн, Елиезер — Иоримлӧн, Иорим — Матфатлӧн, Матфат — Левийлӧн, Левий — Симеонлӧн, Симеон — Иудалӧн, Иуда — Ӧсиплӧн, Ӧсип — Ионанлӧн, Ионан — Елиакимлӧн, Елиаким — Мелеайлӧн, Мелеай — Маинанлӧн, Маинан — Маттафайлӧн, Маттафай — Нафанлӧн, Нафан — Давидлӧн, Давид — Ессейлӧн, Ессей — Овидлӧн, Овид — Воозлӧн, Вооз — Салмонлӧн, Салмон — Наассонлӧн, Наассон — Аминадавлӧн, Аминадав — Арамлӧн, Арам — Есромлӧн, Есром — Фареслӧн, Фарес — Иудалӧн, Иуда — Яковлӧн, Яков — Исааклӧн, Исаак — Ӧвраамлӧн, Ӧвраам — Фарлӧн, Фар — Накорлӧн, Накор — Серуклӧн, Серук — Рагавлӧн, Рагав — Фалеклӧн, Фалек — Еверлӧн, Евер — Саллӧн, Сал — Каинанлӧн, Каинан — Арфаксадлӧн, Арфаксад — Симлӧн, Сим — Нойлӧн, Ной — Ламеклӧн, Ламек — Мафусаллӧн, Мафусал — Еноклӧн, Енок — Яредлӧн, Яред — Малелеиллӧн, Малелеил — Каинанлӧн, Каинан Енослӧн, Енос — Сифлӧн, Сиф — Адамлӧн, Адам — Енлӧн.
4 юр.
Исус муніс Йӧрдан ю дорысь Вежа Лолӧн тыр. Лов нуӧдіс Сійӧс овтӧминӧ.
Сэні нелямын лун чӧж омӧль ыштӧдіс Сійӧс. Став тайӧ кадсӧ Исус нинӧм эз сёй, бӧрыннас кынӧмыс сюммис.
Сэки омӧль шуис Сылы: «Тэ кӧ Ен Пи, пӧрт тайӧ изсӧ няньӧ».
Исус воча шуис: «Гижӧма: “Оз куш няньӧн мортыд ов, а Енсянь быд шуӧм кывйӧн”».
Омӧль вайӧдіс Исусӧс джуджыд керӧс йылӧ да петкӧдліс Сылы син лапнитігкості таладор югыдсьыс став мусӧ.
Сэсся шуис: «Сета Тэныд став мусӧ мичлун-озырлуннас, ӧд ставсӧ тайӧс сетӧма меным. Ме верма сетны сійӧс кодлы кӧсъя. Копыртчылан кӧ меным, ставыс тайӧ лоӧ Тэнад».
Исус вочавидзис: «Вешйы Ме дінысь, сӧтана.
Гижӧма: “Аслад Господь Енлы копрась да сӧмын Сылы кесъяв”».
Омӧль нуӧдіс Исусӧс Ерусалимӧ, сувтӧдіс Сійӧс крам вевт вылӧ да шуис: «Тэ кӧ Ен Пи, шыбитчы тасянь.
Ӧд гижӧма: “Аслас анделъяслы Сійӧ тшӧктӧ видзны Тэнӧ. Найӧ нуасны Тэнӧ ки выланыс, видзасны изйӧ крукасьӧмысь”».
Исус воча шуис: «Шуӧма: “Эн дӧзмӧд ассьыд Господь Ентӧ.”».
Быдногыс ыштӧдӧм бӧрын омӧльыс кад кежлӧ эновтіс Исусӧс.
Исус бӧр локтіс Галилеяӧ, Сійӧ вӧлі тырӧма Лов вынӧн.
Сы йылысь сёрниыс паськаліс сэтчӧс му пасьтала.
Исус велӧдіс синагогаясын, став йӧзыс ошкисны Сійӧс.
Исус локтіс Назаретӧ, кӧні Сійӧ быдмис.
Шойччан лунӧ, кыдзи пыр вӧчліс, Сійӧ муніс синагогаӧ. Сэні сувтіс лыддьыны Гижӧд.
Сылы сетісны Исай пророклысь небӧг. Исус восьтіс небӧгсӧ, корсис тайӧ кывъяссӧ да лыддис:
— Господьлӧн Лолыс Ме вылын.
Сійӧ мавтіс Менӧ висьтавны коньӧръяслы Бур Юӧр. Сійӧ мӧдӧдіс Менӧ бурдӧдны доймӧм сьӧлӧмаясӧс, юӧртны дзескӧдӧмаяслы мездлун йылысь, восьтны синтӧмъяслысь синъяссӧ, мездыны нартитӧмаясӧс, юӧртны Господьлӧн буралан кад йылысь.
Исус тупкис небӧгсӧ да сетіс синагогаса кесъялысьлы, Ачыс пуксис.
Синагогаын ставӧн сюся видзӧдісны Сы вылӧ.
Сэки Исус пондіс висьтавны налы: «Ӧні, тіян кывзігӧн, иніс тайӧ гижӧдыс».
Ставӧн ошкисны Исусӧс да шензисны Сы вомысь петӧм буралан кывъясысь да шуалісны: «Абу-ӧ Сійӧ Ӧсиплӧн пи?»
Исус шуис налы: «Ті, дерт, Меным шуанныд тайӧ кывйӧзсӧ: “Бурдӧдысь, бурдӧд Асьтӧ”, да шуанныд: “Ми кывлім Капернаум карын лоӧмтор йылысь. Вӧч сійӧс тшӧтш тані, Аслад карын”».
Исус водзӧ шуис: «Веськыда висьтала тіянлы: пророкӧс ас муас оз сибӧдны.
Збыльысь висьтала тіянлы: уна дӧва вӧлі Израильын Илля пророк дырйи. Сэки куим во да джын зэр тусь эз усьлы енэжсьыс, та вӧсна унаӧн тшыгъялісны му пасьталаыс. На пиысь весиг ӧти дінӧ эз вӧв мӧдӧдӧма Илляӧс, сӧмын Сидонса Сарепта карын олысь дӧва дінӧ. Елисей пророк дырйи Израильын унаӧн висисны проказаӧн, но сирияса Нееманысь кындзи некод эз бурд».
Тайӧс кылӧм бӧрын синагогаын ставныс пузисны. Найӧ сувтісны да вӧтлісны Исусӧс карсьыс, нуӧдісны Сійӧс кыр йылӧ, кӧні сулаліс карыс, да сэсянь кӧсйисны йӧткыштны Сійӧс увлань.
Но Исус муніс на шӧрӧд да ылыстчис.
Сэсся Исус локтіс Галилеяса Капернаум карӧ. Шойччан лунӧ Сійӧ велӧдіс сэні.
Йӧзыс шензисны Сылӧн велӧдӧмысь, ӧд Сійӧ сёрнитіс ыджыдалысьӧ пуктӧм морт моз.
Синагогаын вӧлі пеж лолӧн кутӧм морт.
Сійӧ ыджыд шыӧн горӧдіс: «Мый Тэныд колӧ миянсянь, Назаретса Исус?
Тэ локтін бырӧдны миянӧс?
Тӧда, коді Тэ. Тэ — Енлӧн Вежаыс.»
Исус ӧлӧдіс пеж лолӧс: «Ланьт. Пет сы пытшкысь».
Пеж лов шыбитіс мортсӧ синагога джодж шӧрӧ, сэсся сійӧс дойдавтӧг петіс сы пытшкысь.
Ставныс чуймисны да ӧта-мӧдныслы шуалісны: «Мый тайӧ? Сылӧн сэтшӧм вын. Весиг пеж ловъяс петӧны Сылӧн тшӧктӧмысь».
Исус йылысь сёрниыс паськаліс сэтчӧс му пасьтала.
Синагогаысь петӧм бӧрын Исус локтіс Симон ордӧ.
Симон гӧтырлӧн мамыс ёна висис биа висьӧмӧн. Исусӧс корисны отсавны сылы.
Ань дінӧ матыстчӧмӧн Исус ӧлӧдіс биа висьӧмсӧ, и биа висьӧмыс эновтіс аньӧс.
Сійӧ дзик пыр чеччис да пондіс кесъявны налы.
Шонді лэччигӧн вайӧдісны Исус дінӧ быдсикас висьысьӧс. Сійӧ бурдӧдаліс найӧс кисӧ быдӧн вылӧ пуктылӧмӧн.
Уна пытшкысь пеж ловъяс петісны да горзісны: «Тэ Кристос, Ен Пи.»
Исус ӧлӧдіс найӧс тайӧс висьтавлӧмысь, ӧд найӧ тӧдісны, мый Сійӧ — Кристос.
Асывводзнас Исус муніс сэтысь овтӧминӧ.
Йӧзыс корсисны Сійӧс да аддзӧм бӧраныс эз лэдзны Сійӧс мунны на дінысь.
Исус шуис налы: «Мукӧд каръясын Меным тшӧтш колӧ висьтавлыны Ен Юралӧм йылысь Бур Юӧрсӧ, ӧд та могысь Менӧ мӧдӧдӧма».
Сійӧ ветлӧдліс Галилея муӧд да висьтавліс Бур Юӧр синагогаясын.
5 юр.
Ӧтчыд Исус сулаліс Генесарет ты дорын. Сійӧс кытшалісны йӧз, мед кывзыны Енлысь Кывсӧ. Вадорысь Исус аддзис кык пыж. Чери кыйысьяс чеччисны пыжъясысь да мыськалісны тывъяснысӧ.
Исус пуксис Симон пыжӧ да корис сійӧс йӧткыштчыны вадорсьыс. Пыжын пукалӧмӧн Исус велӧдіс йӧзсӧ.
Велӧднысӧ помалӧм бӧрын Исус шуис Симонлы: «Сын джуджыдінас. Сэтчӧ чӧвтӧй тывъяснытӧ».
Симон воча шуис: «Велӧдысьӧй, ми войбыд мырсим, весиг ӧти чери эз шед, но Тэнад тшӧктӧм серти чӧвта».
Тывсӧ чӧвтлӧм бӧрын тыв косясьмӧн чериыс шеді.
Сэки кинас ӧвтыштісны мӧд пыжын пукалысьяслы, корисны ёртъяссӧ отсавны.
Найӧ локтісны, сэсся кыкнан пыжсӧ вӧян выйӧдзыс тыртісны чериӧн.
Тайӧс аддзӧм бӧрын Симон-Петыр уськӧдчис Исус водзӧ да шуис: «Господьӧй, мун ме дінысь. Ме мыжа морт».
Симонӧс да сыкӧд вӧлысьясӧс, тшӧтш сылысь ёртъяссӧ, Зеведейлысь Яков да Иоан пиянӧс, шемӧсмӧдіс та мында чери шедӧмыс.
Исус шуис Симонлы: «Эн пов. Ӧнісянь пондан кыйны йӧзӧс».
Пыжъяснысӧ вадорӧ кыскӧм бӧрын найӧ колисны ставсӧ да мунісны Исус бӧрся.
Ӧти карын локтіс Исус дінӧ проказаӧн висьысь, сылӧн кучикыс дзоньнас уляліс. Сійӧ кымыньӧн уськӧдчис Исус водзӧ да корис: «Господьӧй, кӧсъян кӧ, верман менӧ сӧстӧммӧдны».
Исус нюжӧдіс кисӧ, инмӧдчыліс сы дінӧ да шуис: «Кӧсъя. Сӧстӧммы».
Висьысьлӧн дойясыс дзик пыр бырисны.
Исус ӧлӧдіс сійӧс мукӧдлы та йылысь висьталӧмысь да тшӧктіс: «Мун, петкӧдлы асьтӧ поплы, сэсся Мӧисей тшӧктӧм серти аслад сӧстӧммӧмысь вай вись. Тадзи тӧдмаласны тэнад бурдӧм йылысь».
Исус йылысь сёрниыс паськаліс пыр ёнджыка.
Зэв уна йӧз воліс кывзыны Сійӧс да бурдӧдчыны.
Ачыс Исус тшӧкыда мунлывліс овтӧминӧ да сэні кевмысьліс.
Ӧтчыд Исус вӧлі велӧдӧ.
Сэні пукалісны фарисейяс да Индӧдӧ велӧдысьяс. Найӧ вӧлі локтӧмаӧсь Галилея да Юдея сиктъясысь, тшӧтш Ерусалим карысь. Исус бурдӧдаліс висьысьясӧс Господь вынӧн. Кодъяскӧ сэтчӧ вольпасьнас вайисны вӧрзьӧдчыны вермытӧм мортӧс. Найӧ кӧсйисны пыртны сійӧс керкаӧ да пуктыны Исус водзӧ. Но уна йӧз вӧсна пыртнысӧ эз вермыны. Сэки кайисны керка вылӧ, разисны вевтсӧ да сэті лэдзисны висьысьӧс вольпасьнас Исус водзӧ.
Налысь эскӧмсӧ аддзӧмӧн Исус шуис висьысьлы: «Мортӧй, тэнсьыд мыжъястӧ прӧститӧма».
Индӧдӧ велӧдысьяс да фарисейяс мӧвпалісны: «Коді тайӧ? Сійӧ Енмӧс омӧльтӧ.
Ен кындзи вермас-ӧ кодкӧ прӧститны мыжъяс?»
Налысь мӧвпъяссӧ тӧдӧмӧн Исус шуис: «Мыйла ті мӧвпаланныд тадзи?
Мый кокньыдджык шуны: “Тэнсьыд мыжъястӧ прӧститӧма” либӧ “Чеччы да ветлы”?
Ӧні ті тӧдмаланныд: Морт Пи вермӧ прӧститны мыжъяс му вылын». Сэсся шуис висьысьлы: «Тэныд шуа: чеччы, босьт вольпасьтӧ да мун гортад».
Ставныслӧн син водзын сійӧ чеччис, босьтіс вольпасьсӧ да муніс гортас Енмӧс ошкигтырйи.
Йӧзыс чуймисны да полӧмӧн тырины.
Найӧ ошкисны Енмӧс да шуалісны, талун пӧ ми вӧвлытӧмтор аддзылім.
Сэтысь мунігас Исус аддзис вотчукӧртанінысь Левий нима вот перйысьӧс. Исус шуис сылы: «Лок Ме бӧрся».
Левий чеччис, ставсӧ колис да муніс Исус бӧрся.
Сэсся Левий корис Исусӧс ас ордас гажӧдчыны. Сэтчӧ локтісны тшӧтш вот перйысьяс да мукӧд корӧмаяс. Найӧ ставныс пукалісны ӧти пызан сайын.
Фарисейяс да Индӧдӧ велӧдысьяс шуасисны Исуслӧн велӧдчысьяс вылӧ: «Мыйла ті сёянныд-юанныд вот перйысьяскӧд да мыжа йӧзкӧд?»
Исус вочавидзис налы: «Дзоньвидзалы бурдӧдысьыд оз ков, сійӧ висьысьлы колӧ.
Ме локті корны Ен дінӧ мыжаясӧс, эг веськыда олысьясӧс».
Найӧ шуисны Исуслы: «Мыйла нӧ Иоанлӧн велӧдчысьясыс тшӧкыда видзалӧны-кевмысьӧны, фарисейяслӧн велӧдчысьясыс тшӧтш, а Тэнад сёйӧны-юӧны?»
Исус вочавидзис: «Верманныд-ӧ тшӧктыны видзавны кӧлысь вылын верӧспукӧд гажӧдчысь ёртъясӧс?
Воасны на сійӧ лунъясыс, кор колясны верӧспутӧг, сэки и видзаласны».
Исус висьталіс налы велӧданвисьт: «Важ паськӧмтӧ оз дӧмны выль паськӧмысь вундӧм дӧмасӧн. Тадзи кӧ вӧчан, выльсӧ тшыкӧдан, и важас выль дӧмасыс оз туй.
Выль винатӧ оз кисьтны важ кучик дозйӧ. Тадзи кӧ вӧчан, кучик дозйыс потас, и винаыс киссяс. Выль винатӧ кисьтӧны выль кучик дозйӧ. Сэки кыкнанныс дзонь колясны.
Сулӧдӧм винатӧ юӧм бӧрын мортыс оз кӧсйы юны выль винатӧ, шуас, сулӧдӧмыс пӧ бурджык».
6 юр.
Ыджыд лун бӧрын медводдза шойччан лунӧ Исус мунӧ вӧлі кӧдзӧм муяс вомӧн. Сылӧн велӧдчысьясыс мунігмозныс нетшкисны шепсӧ да кианыс ниртӧмӧн сёйисны тусьсӧ.
Фарисейясысь кодсюрӧ шуисны: «Мый ті вӧчанныд? Тайӧс оз позь вӧчны шойччан лунӧ».
Исус воча шуис: «Ті ӧмӧй энӧ лыддьылӧй, мый вӧчис Давид, кор тшыгъяліс аслас йӧзкӧд?
Сійӧ пырис Ен керкаӧ, босьтіс Енлы вайӧм няньсӧ да сёйис, и аслас йӧзлы тшӧтш сетіс. Тайӧ няньсӧ сӧмын попъяслы позис сёйны».
Исус шуис фарисейяслы: «Морт Пи шойччан лун вылын ыджыдыс».
Мӧд шойччан лунӧ Исус пырис синагогаӧ да велӧдіс.
Сэні вӧлі морт, кодлӧн веськыд киыс вӧлі косьмӧма.
Индӧдӧ велӧдысьяс да фарисейяс сюся видзӧдісны Исус бӧрся, бурдӧдас-ӧ шойччан лунӧ, ӧд корсисны помка мыжавны Сійӧс.
Налысь мӧвпъяссӧ тӧдӧмӧн Исус шуис косьмӧм киа мортлы: «Чеччы да пет шӧрас».
Сійӧ чеччис да воськовтіс водзлань.
Исус шуис: «Вочавидзӧй, мый позьӧ вӧчны шойччан лунӧ: бурсӧ али лёксӧ, мездыны мортӧс али вины сійӧс?»
Найӧ чӧв олісны.
Исус синнас кытшовтіс ставнысӧ, сэсся шуис висьысьлы: «Нюжӧд китӧ».
Сійӧ нюжӧдіс, и киыс пырысь-пыр бурдіс, лои мӧдыс кодь.
Фарисейяс да Индӧдӧ велӧдысьяс скӧрысла пузисны, ас костаныс пондісны сёрнитны, мый вӧчны Исускӧд.
Сійӧ лунъясӧ Исус кайис керӧсӧ кевмысьны да войбыд кевмысис сэні Енмыслы.
Луннас Сійӧ корис Ассьыс велӧдчысьяссӧ да бӧрйис на пӧвстысь дас кыкӧс, кодъясӧс нимтіс апостолъясӧн. Тайӧ вӧліны: Симон, кодлы сетіс Петыр ним, сылӧн Ӧндрей вокыс, Яков, Иоан, Филип, Варфоломей, Матвей, Фома, Алфей Яков, Симон, кодӧс нимтісны Зилотӧн, Яков Иуда да Искариот Иуда, Исусӧс вузалысь.
Велӧдчысьясыскӧд керӧсысь лэччӧм бӧрын Исус сувтіс шыльыдінӧ. Сэні вӧлі чукӧртчӧмаӧсь Сылӧн уна велӧдчысь, нӧшта став Юдея муысь, Ерусалим карысь, саридздорса Тир да Сидон каръясысь унасьыс-уна йӧз. Ставныс найӧ вӧлі локтӧмаӧсь кывзыны Исусӧс да бурдӧдчыны асланыс висьӧмъясысь. Весиг пеж лолӧн кутӧмаяс бурдалісны.
Йӧз чукӧрысь быдӧн зілис инмӧдчывны Исус дінӧ, ӧд Сысянь петіс вын да тайӧ выныс бурдӧдіс быдӧнӧс.
Аслас велӧдчысьяс вылӧ видзӧдлӧмӧн Исус висьталіс:
«Шудаӧсь ті, ловныдлы корысьяс, ӧд тіян эм Енлӧн Юралӧм.
Шудаӧсь ті, ӧні тшыгъялысьяс, ӧд ті пӧтанныд.
Шудаӧсь ті, ӧні бӧрдысьяс, ӧд ті понданныд серавны.
Ті шудаӧсь, Морт Пи вӧсна кӧ йӧзыс тіянӧс мустӧмтӧны, вӧтлӧны, лёкӧдӧны да няйтӧсьтӧны тіянлысь нимнытӧ. Налӧн батьясныс тадзи вӧчлісны пророкъяслы.
Нимкодясьӧй да чеччалӧй долыда, ӧд ыджыд тырдон виччысьӧ тіянӧс енэжас.
Курыд шог тіянлы, озыръяс.
Ті курыштінныд нин аслыныд олан гажсӧ.
Курыд шог тіянлы, ӧні пӧтӧмаяс. Ті кутанныд на пыкны тшыглунсӧ.
Курыд шог тіянлы, ӧні сералысьяс. Ті понданныд на шогсьыны-бӧрдны.
Курыд шог тіянлы, став йӧзыс кӧ сёрнитӧны тіян йылысь бура.
Налӧн батьясныс тадзи вӧчлісны ылӧгпророкъяслы».
«Тіянлы, Менӧ кывзысьяслы, шуа: радейтӧй тіянлы паныд мунысьясӧс, бурсӧ вӧчӧй тіянӧс мустӧмтысьяслы, бурсиӧй тіянӧс ёрысьясӧс да кевмысьӧй тіянӧс ӧтдортысьяс вӧсна.
Чужӧмбанад кучкысьлы бергӧд тшӧтш мӧдарсӧ. Вылыс паськӧмтӧ мырддьысьлы лэдз босьтны тшӧтш дӧрӧмтӧ.
Тэнсьыд корысьлы сет, тэнсьыд босьтысьлысь бӧр эн кор.
Мый кӧсъянныд, медым йӧзыс вӧчисны тіянлы, сійӧс и ті вӧчӧй налы.
Радейтанныд кӧ тіянӧс радейтысьясӧс, мыйсяма ошкӧм тіянлы таысь?
Мыжаяс ӧд тшӧтш радейтӧны найӧс радейтысьясӧс.
Вӧчанныд кӧ бурсӧ тіянлы бур вӧчысьяслы, мыйсяма ошкӧм тіянлы таысь?
Тадзи вӧчӧны тшӧтш мыжаяс.
Водзӧсаланныд кӧ бӧр виччысьӧмӧн, мыйсяма ошкӧм тіянлы таысь?
Мыжаяс тшӧтш водзӧсалӧны мыжаяслы ставсӧ бӧр босьтӧм могысь.
Ті, мӧдарӧ, радейтӧй тіянлы паныд мунысьясӧс, вӧчӧй бурсӧ да водзӧсалӧй, но энӧ виччысьӧй бӧрсӧ.
Сэки вичмас тіянлы ыджыд тырдон. Ті лоанныд Медвылыссалы ныв-пиӧн, ӧд Сійӧ бур сьӧлӧма бурсӧ вунӧдысьяс дінӧ да лёкъяс дінӧ.
Лоӧй Батьныд моз бур сьӧлӧмаӧсь».
«Энӧ мыждӧй, сэки тіянӧс оз мыждыны. Энӧ мыжалӧй, и тіянӧс оз мыжавны.
Прӧститӧй, и тіянӧс прӧститасны.
Сетӧй, сэки тіянлы сетасны. Сетасны бур муртӧсӧн, топыда тувкӧдӧмӧн, моздор тырныд сӧвтӧмӧн. Асланыд мурталӧм серти тіянлы мурталасны».
Исус висьталіс налы нӧшта велӧданвисьт:
«Вермас-ӧ синтӧм нуӧдны синтӧмӧс?
Оз-ӧ кыкнанныс усьны гуранӧ?
Велӧдчысь абу ыджыдджык аслас велӧдысьысь.
Но сӧмын велӧдчӧм бӧрас сійӧ лоас аслас велӧдысь кодьыс.
Кыдзи тэ верман вокыд синмысь ёгторсӧ аддзыны, аслад синмысь кӧ керсӧ он казяв?
Кыдзи тэ верман шуны вокыдлы: “Вай перъя синсьыд ёгторсӧ”, аслад синмысь кӧ керсӧ он аддзы?
Кык бана шаньга.
Водзджык аслад синмысь керсӧ перйы, сэки вокыдлӧн синмысь ёгторсӧ верман перйыны».
«Бур пу оз вай лёк вотӧс, лёк пу оз вай бур вотӧс. Путӧ донъялӧны вотӧс сертиыс. Лежнӧг вылысь ӧд оз чукӧртны инжир да тусяпу вылысь виноград.
Бур морт аслас бур сьӧлӧмысь бурсӧ петкӧдӧ, лёк морт аслас лёк сьӧлӧмысь лёксӧ петкӧдӧ. Ӧд мыйӧн тырӧма мортыслӧн сьӧлӧмыс, сійӧ вомсьыс и петӧ».
«Мыйла ті шуанныд Меным: “Господьӧй, Господьӧй”, но онӧ вӧчӧй Менам висьталӧм серти?
Висьтала тіянлы, кутшӧм сійӧ мортыс, коді локтӧ Ме дінӧ, кылӧ Менсьым кывъясӧс да олӧ на серти.
Сійӧ керка лэптысь кодь, коді джуджыда кодйысяс да пуктас керка подувсӧ из вылӧ.
Ытва дырйи ойдӧм ваыс оз вермы вӧрзьӧдны тайӧ керкасӧ, ӧд сійӧс из вылӧ лэптӧма.
А коді кылӧ Менсьым кывъясӧс да оз ов на серти, сійӧ подувтӧм керка лэптысь кодь. Ытва дырйи сылӧн керкаыс дзик пыр дзоньнас киссяс».
7 юр.
Йӧзкӧд сёрнисӧ помалӧм бӧрын Исус мӧдӧдчис Капернаум карӧ.
Сэні оліс шыпуртаяслӧн веськӧдлысь, кодлӧн кесйӧгыс вӧлі кулан выйын. Веськӧдлысьлы сійӧ вӧлі зэв дона.
Исус йылысь кылӧм бӧрын веськӧдлысь мӧдӧдіс юдейяслысь пӧрысьясӧс корны Сійӧс, медым локтас да бурдӧдас кесйӧгсӧ.
Найӧ локтісны Исус дінӧ да сьӧлӧмсяньыс корисны Сійӧс: «Тайӧ бур мортыслы колӧ отсавны. Сійӧ радейтӧ войтырнымӧс. Буретш сійӧ лэптіс миянлы синагогасӧ».
Исус муніс накӧд.
Керка дорас вотӧдз на Сылы паныдасисны веськӧдлысьлӧн ёртъясыс. Сійӧ мӧдӧдӧма найӧс висьтавны: «Господьӧй, эн мудзты Асьтӧ.
Ме ог сулав сы доныс, медым Тэ пырин менам керка вевт улӧ. Ачымӧс эг лыддьы шогманаӧн локны Тэ дінӧ.
Сӧмын кыв шу, и кесйӧгӧй бурдас.
Ме ачым киподувса морт, но и менам кипод улын эмӧсь шыпуртаяс. Ӧтилы шуа: “Мун”, и сійӧ мунӧ. Мӧдлы тшӧкта локны, и сійӧ локтӧ. Кесйӧглы шуа: “Вӧч тайӧс”, и сійӧ вӧчӧ».
Исус чуймис тайӧ кывъясысь. Сэсся бӧрсяньыс мунысь йӧзлань бергӧдчӧмӧн шуис: «Висьтала тіянлы: татшӧм ыджыд эскӧмсӧ Ме весиг Израильысь эг аддзыв».
Керкаӧ пырӧм бӧраныс веськӧдлысьлӧн ёртъясыс аддзисны: кесйӧгыс вӧлі бурдӧма.
Регыд мысти Исус муніс Наин карӧ, Сыкӧд тшӧтш мунісны Сылӧн велӧдчысьяс да уна мукӧд йӧз.
Исус матыстчис карса дзиръя дорӧ. Сэтысь вӧлі петкӧдӧны кулӧм мортӧс, дӧвалысь ӧтка писӧ. Уна йӧз анькӧд тшӧтш петіс карсьыс.
Господьлӧн сьӧлӧмыс нормис дӧва вӧсна, Сійӧ шуис аньлы: «Эн бӧрд».
Сэсся матыстчис да инмӧдчис гортъяс, нуысьяс сувтісны. Исус шуис: «Зонмӧй, тэныд шуа: чеччы.»
Кулӧм морт пуксис да пондіс сёрнитны.
Сэки Исус сетіс сійӧс мамыслы.
Ставнысӧ полӧм босьтіс. Енмӧс ошкигтыр шуалісны: «Ыджыд пророк миян пӧвстын. Ен локтіс отсавны Аслас войтырлы.»
Татшӧм сёрниыс Исус йылысь паськаліс Юдея му пасьтала да быдлаын матігӧгӧрас.
Иоанлӧн велӧдчысьясыс висьталісны став йывсьыс велӧдысьныслы.
Иоан корис ас дінас на пиысь кыкӧс да мӧдӧдіс найӧс юавны Исуслысь: «Тэ-ӧ сійӧ Локтысьыс? Колӧ-ӧ миянлы мӧдӧс виччысьны?»
Исус дінӧ локтӧм бӧрын найӧ шуисны: «Пыртысь Иоан мӧдӧдіс миянӧс Тэ дінӧ юавны: “Тэ-ӧ сійӧ Локтысьыс? Колӧ-ӧ миянлы мӧдӧс виччысьны?”»
Буретш тайӧ кадӧ Исус унаӧс бурдӧдіс висьӧм-вермытӧмысь, вӧтліс пеж ловъясӧс, уна синтӧмлысь синсӧ восьтіс.
Исус вочавидзис: «Мунӧй, висьталӧй Иоанлы, мый аддзанныд да кыланныд:
— Синтӧмъяс аддзӧны, коктӧмъяс ветлӧны, проказаысь сӧстӧммӧны, пельтӧмъяс кылӧны, кулӧмаяс ловзьӧны, коньӧръяслы Бур Юӧр висьтавлӧны. Шуда сійӧ, коді оз ылав Меысь».
Кор Иоанлӧн велӧдчысьясыс мунісны, Исус пондіс висьтавны йӧзыслы Иоан йылысь:
«Мый видзӧдны ветлінныд овтӧминас?
Тӧлӧн вӧрӧдысь идзас-ӧ?
Мый видзӧдны ветлінныд?
Мича да озыр паськӧма мортӧс?
Татшӧм паськӧма да лышкыда олысь йӧзыс олӧны ӧксы оланінъясын.
Кодӧс видзӧдны ветлінныд?
Пророкӧс-ӧ?
Шуа тіянлы: ті аддзылінныд пророкысь ыджыдӧс.
Сы йылысь гижӧма:
— Ыста Ассьым юӧртысьӧс Тэ водзвылын, сійӧ Тэныд туйсӧ дасьтас.
Висьтала тіянлы: му вылын чужысь пророкъясысь эз вӧвлы Пыртысь Иоанысь ыджыдджыкыс, но Енлӧн Юраланінын медічӧтыс сы дорысь ыджыдджык.
Иоанӧс кывзӧм бӧрын став йӧзыс, весиг вот перйысьяс, эскисны Ен веськыдлунӧ да пыртчисны Иоан пыртӧмӧн. А фарисейяс Индӧдӧ велӧдысьяскӧд паныд сувтісны Ен кӧсйӧмлы да эз пыртчыны Иоан пыртӧмӧн».
Господь шуис: «Кодкӧд Ме ӧткодяла ӧнія олысьясӧс?
Код кодьӧсь найӧ?
Найӧ изэрд вылын пукалысь челядь кодьӧсь, кодъяс ӧта-мӧдныслы шуалӧны: “Ми ворсім тіянлы пӧлянӧн, а ті энӧ йӧктӧй. Ми сьылім тіянлы бӧрдӧдчанкывъяс, а ті энӧ бӧрдӧй”.
Пыртысь Иоан локтіс, нянь оз сёй, вина оз ю, ті шуанныд, сы пытшкын пӧ пеж лов.
Морт Пи локтіс, сёйӧ-юӧ, Сы йылысь шуанныд, рушку тыртысь да вина юысь пӧ, вот перйысьяскӧд да мыжаяскӧд ёртасьысь пӧ.
Мывкыдлунсӧ пыдди пуктӧны мывкыдлуныслӧн челядьыс».
Ӧти фарисей корис Исусӧс гортас сёйны. Исус пырис фарисей керкаӧ да пуксис.
Та йылысь тӧдмаліс сійӧ карас олысь мыжа ань. Сійӧ вайис вальді дозйын чӧскыд дука вый. Исуслӧн кок дорӧ копыртчӧмӧн сійӧ бӧрдіс, сылӧн синваыс визувтіс Исуслы кок вылас. Сійӧ чышкаліс Исуслысь коксӧ аслас юрсиӧн да окалігмоз мавтіс выйӧн.
Исусӧс корысь фарисей аддзис тайӧс да мӧвпыштіс: «Вӧлі кӧ тайӧ Мортыс пророк, тӧдіс эськӧ, мыйсяма ань инмӧдчӧ Сы дінӧ. Тайӧ аньыс ӧд мыжа».
Фарисейлань бергӧдчӧмӧн Исус шуис: «Симон, Ме тэныд ӧтитор кӧсъя висьтавны».
«Висьтав, Велӧдысь», — шуис мӧдыс.
Исус шуис: «Ӧти мортлы кыкӧн вӧліны уджйӧзаӧсь: ӧтиыс — витсё динар, мӧдыс — ветымын. Мынтынысӧ найӧ эз вермыны, та вӧсна тайӧ мортыс шуис вунӧдны кыкнанныслысь уджйӧзсӧ.
Висьтав, кодныс ёнджыка кутас радейтны сійӧс?»
Симон вочавидзис: «Чайта, унджык уджйӧзаыс».
Исус шуис сылы: «Тэ веськыда мӧвпалан».
Аньлань бергӧдчӧмӧн Исус шуис Симонлы: «Аддзан-ӧ тайӧ аньсӧ?
Ме локті тэ ордӧ, да тэ Меным ватор эн сет кокӧс мыськыны, а сійӧ синванас киськаліс Менсьым кокӧс да юрсинас чышкаліс.
Тэ эн окышт Менӧ, а сійӧ локтӧмсяньыс эз на дугдыв окавны кокӧс.
Тэ Менсьым юрӧс выйнад эн мавтышт, а сійӧ чӧскыд дука выйнас кокӧс мавтіс.
Висьтала тэныд, мыйла сійӧ ёна радейтӧ — уна мыж сылысь прӧститӧма. Кодлысь этша прӧститӧма, сійӧ этша радейтӧ».
Сэсся Исус шуис аньлы: «Прӧститӧма тэнсьыд мыжъястӧ».
Сыкӧд сёйысьяс сёрнитісны ас костаныс: «Коді Сійӧ, мый весиг мыжъяс прӧститӧ?»
Исус шуис аньлы: «Эскӧмыд мездіс тэнӧ. Мун повтӧг».
8 юр.
Та бӧрын Исус ветлӧдліс карысь карӧ, сиктысь сиктӧ да висьтавліс Ен Юралӧм йылысь Бур Юӧр.
Сыкӧд ветлӧдлісны дас кыкнан велӧдчысьыс да нӧшта аньяс, кодъясӧс Сійӧ бурдӧдіс висьӧмъясысь да мездіс пеж ловъясысь. Тайӧ вӧліны: Магдала Марья, код пытшкысь петіс сизим пеж лов, Иоанна — Ирӧд овмӧсӧн веськӧдлысь Кузлӧн гӧтырыс, Сусанна да мукӧдъяс. Овмӧснаныс найӧ отсасисны Исуслы.
Уна карысь локтісны йӧзыс Исус дінӧ. Сійӧ шыӧдчис на дорӧ велӧданвисьтӧн: «Морт кӧдзны петас. Кӧдзигас кымынкӧ кӧйдыс усяс туй бокӧ. Сэні найӧс таляласны, да енэжвыв лэбачьяс кокаласны.
Кымынкӧ кӧйдыс усяс изъяинӧ, но ваыс тырмытӧмла петалігмозыс найӧ косьмасны.
Кымынкӧ кӧйдыс усяс лежнӧг пӧвстӧ. Быдмигас лежнӧгыс пӧдтас петассӧ.
Мукӧд кӧйдысыс усяс бур муӧ, быдмас да ваяс тусьсӧ сё пӧвстӧн».
Тайӧс висьталӧм бӧрын Исус горӧдӧмӧн шуис: «Кодлӧн эм пель, мед кылӧ.»
Велӧдчысьяс юалісны Исуслысь, кыдзи гӧгӧрвоны тайӧ велӧданвисьтсӧ.
Исус шуис: «Тіянлы сетӧма тӧдны Ен Юралӧмлысь гусяторъяссӧ, а мукӧдыс кылӧны та йылысь велӧданвисьтъясысь: найӧ видзӧдӧны да оз аддзыны, кывзӧны да оз гӧгӧрвоны.
Тайӧ велӧданвисьтыс петкӧдлӧ: кӧйдысыс — тайӧ Ен Кыв. Туй бокӧ усьӧм кӧйдысыс петкӧдлӧ: мортыс кылӧ Кывсӧ, но сэсся локтӧ омӧльыс да гусялӧ сьӧлӧмсьыс Кывсӧ, медым мортыс эз эскы да эз мездмы.
Изъяинӧ усьӧм кӧйдысыс петкӧдлӧ: мортыс кылӧ Кывсӧ да долыдпырысь босьтӧ сійӧс сьӧлӧмас, но вужъясьтӧмысла оз дыр эскы, ыштӧдӧмъяс дырйи сійӧ кежӧ эскӧмсьыс.
Лежнӧг пӧвстӧ усьӧм кӧйдысыс петкӧдлӧ: мортыс кылӧ Кывсӧ, но быдлунъя тӧждыс, озырлуныс да лышкыда олӧмыс пӧдтӧ кӧдзӧм Кывсӧ, и сійӧ оз вай вотӧссӧ.
Бур муӧ кӧдзӧм кӧйдысыс петкӧдлӧ: мортыс кылӧ Кывсӧ, видзӧ сійӧс бур-сӧстӧм сьӧлӧмас да сьӧкыдлунсӧ венӧмӧн вайӧ вотӧс».
Тайӧс висьталӧм бӧрын Исус горӧдӧмӧн шуис: «Кодлӧн эм пель, мед кылӧ.»
«Ӧзтӧм битӧ оз вевттьывны дозйӧн да оз сувтӧдны лабич улӧ. Сійӧс пуктӧны бикок вылӧ, медым пырысьяс аддзисны югыдсӧ.
Став гусяыс воссяс да став дзебӧмаыс йӧзасяс, петас ортсӧ.
Видзӧдӧй, кыдзи кывзанныд. Кодлӧн эм, сылы сетасны. Кодлӧн абу, сылысь весиг чайтанасӧ босьтасны».
Исус дінӧ локтісны мамыс да вокъясыс, но уна йӧз вӧсна найӧ эз вермыны матыстчыны Сы дінӧ.
Исуслы висьталісны: «Мамыд вокъясыдкӧд ывлаасӧсь, Тэнӧ кӧсйӧны аддзӧдлыны».
Исус шуис: «Енлысь Кывсӧ кывзысьяс да сы серти олысьяс — Меным мам да вокъяс».
Ӧтчыд Исус Аслас велӧдчысьясыскӧд пуксис пыжӧ да шуис налы: «Вуджамӧй ты мӧдлапӧлӧ».
Найӧ мӧдӧдчисны.
Вуджиганыс Исус унмовсис.
Ты вылын кыптіс ыджыд тӧвныр, да пыжыс кутіс тырны ванас. Найӧ вӧліны вӧян выйынӧсь.
Велӧдчысьяс садьмӧдісны Исусӧс шуалӧмӧн: «Велӧдысь, Велӧдысь. Вӧям.»
Исус чеччис, ӧлӧдіс тӧвсӧ да гызьӧм васӧ. Ставыс ланьтіс, пуксис чӧв-лӧнь.
Исус шуис велӧдчысьясыслы: «Кӧні тіян эскӧмныд?»
Найӧ полӧмӧн-шензьӧмӧн ӧта-мӧдныслысь пондісны юасьны: «Коді Сійӧ? Весиг тӧлыс да ваыс кывзысьӧ Сылысь».
Та бӧрти найӧ вуджисны Галилеялы паныда Гадара муӧ.
Пыжсьыс чеччӧм бӧрын Исуслы паныдасис карсьыс пеж ловъясӧн кутӧм морт. Сійӧ пыр ветліс пасьтӧг, керкаын пыдди оліс шойгу кыртаын.
Исусӧс аддзӧм бӧрын сійӧ горзӧмӧн уськӧдчис Сы водзӧ да горӧдіс: «Мый Тэныд месянь колӧ, Исус, Медвылысса Енлӧн Пи?
Кора Тэнӧ, эн пес менӧ.»
Тадзи шуаліс, ӧд Исус тшӧктіс пеж ловлы петны морт пытшкысь. Пеж лов унаысь песлӧдлывлӧма тайӧ мортсӧ. Сійӧс кӧртавлісны чепъясӧн да видзисны дорӧмӧн, но сійӧ орйӧдлывліс кӧртӧдъяссӧ. Сэки пеж лов нуӧдлывліс сійӧс овтӧминӧ.
Исус юаліс сылысь: «Мый тэнад нимыд?»
Сійӧ вочавидзис: «Легион», ӧд сы пытшкын вӧлі уна пеж лов.
Пеж ловъяс корисны Исусӧс, мед эз ысты найӧс пыдӧстӧминӧ.
Сэні керӧсын йирсис ыджыд порсь чукӧр.
Пеж ловъяс корисны Исусӧс, мед лэдзас найӧс пырны порсьяс пытшкӧ.
Исус лэдзис.
Сэки морт пытшкысь петӧм пеж ловъяс пырисны порсьяс пытшкӧ. А порсьяс кыр йывсянь уськӧдчисны тыӧ да пӧдісны.
Порсь видзысьяс пышйисны сэтысь, котӧрӧн мунісны карӧ да орчча сиктъясӧ висьтавны аддзывлӧмтор йывсьыс.
Йӧзыс петісны видзӧдлыны лоӧмторсӧ.
Найӧ локтісны Исус дінӧ да аддзисны сійӧ мортсӧ, код пытшкысь петісны пеж ловъяс. Сійӧ, паськӧма да ас вежӧра, пукаліс Исуслӧн кок дорын. Йӧзыс ёна повзисны.
Аддзылысьяс висьталісны локтӧмаяслы, кыдзи бурдіс пеж лолӧн кутӧм мортыс.
Сэки Гадара муын олысьяс корисны Исусӧс мунны на дінысь, сэтшӧм ыджыд полӧм босьтіс найӧс.
Исус пуксис пыжӧ да бӧр мӧдӧдчис.
Пеж лолысь мездмӧм морт вӧзйысис мунны Исускӧд,
но Исус шуис сылы: «Мун гортад да висьтав, мый Енмыс вӧчис тэныд».
Сійӧ муніс да висьталіс став карыслы, мый сылы вӧчис Исус.
Ты мӧдлапӧлын Исусӧс паныдаліс уна йӧз, найӧ виччысьӧмаӧсь Сійӧс.
Сэтчӧ локтіс Явир нима морт, синагогаса юралысь.
Исус водзӧ уськӧдчӧмӧн Явир корис Сійӧс волыны сы ордӧ. Сылӧн дас кык арӧса ӧтка нылыс вӧлі кулан выйын. Исус муніс Явиркӧд.
Муніганыс йӧзыс быдласянь топӧдісны Исусӧс.
Йӧз чукӧрын вӧлі ань, сійӧ дас кык во чӧж висьӧма вир мунӧмӧн. Ассьыс став эмбурсӧ сійӧ сеталӧма бурдӧдысьяслы, но найӧ абу вермӧмаӧсь отсавны сылы. Сійӧ матыстчис Исус дінӧ мышсяньыс да инмӧдчыліс паськӧм дорышас.
Вир мунӧмыс пырысьтӧм-пыр дугдіс.
Исус юаліс: «Коді инмӧдчыліс Ме дінӧ?»
Ставӧн соссисны. Петыр да мукӧдыс шуисны: «Велӧдысь, йӧзыс быдласянь топӧдӧны Тэнӧ, а Тэ юасян, коді инмӧдчыліс Тэ дінӧ».
«Кодкӧ инмӧдчыліс Ме дінӧ. Ме кылі, мый Ме пытшкысь петіс вын», — шуис Исус.
Ань гӧгӧрвоис, мый сійӧс казялісны. Дзӧригтыр сійӧ матыстчис да уськӧдчис Исус водзӧ. Став йӧз водзас висьталіс Исуслы, мыйла инмӧдчыліс Сы дінӧ да кыдзи дзик пыр бурдіс.
Исус шуис аньлы: «Нылӧй, эскӧмыд мездіс тэнӧ. Мун повтӧг».
Исуслӧн сёрнитігӧн синагогаса юралысь дінӧ матыстчис гортсяньыс локтысь морт да висьталіс сылы: «Нылыд кулі, эн мудзтӧд Велӧдысьсӧ».
Исус кыліс тайӧс да шуис Явирлы: «Эн пов, сӧмын эскы, нылыд ловъя лоас».
Явир керка дорӧ воӧм бӧрын Исус босьтіс Аскӧдыс Петырӧс, Иоанӧс, Яковӧс да нывкалысь бать-мамсӧ, мукӧдсӧ эз лэдз пырнысӧ.
Ставныс сыркъялӧмӧн бӧрдісны кулӧм нывка вӧсна.
Исус шуис: «Энӧ бӧрдӧй, сійӧ эз кув, сійӧ узьӧ».
Исус вылын пондісны серавны, ӧд тӧдісны, мый нывкаыс куліс.
Ставнысӧ вӧтлӧм бӧрын Исус босьтіс нывкаӧс киӧдыс да гораа шуис: «Нылӧй, чеччы.»
Сэки лолыс бӧр пырис нывка пытшкӧ, да сійӧ пырысь-пыр чеччис.
Исус тшӧктіс вердны нывкаӧс.
Бать-мамыс чуймисны, но Исус ӧлӧдіс найӧс, медым эз висьтавлыны лоӧмтор йывсьыс мукӧдыслы.
9 юр.
Исус корис дас кыкнан велӧдчысьсӧ да сетіс налы вын вӧтлавны пеж ловъясӧс да бурдӧдавны йӧзӧс висьӧмъясысь. Сійӧ мӧдӧдіс найӧс юӧртны Енлӧн Юралӧм йылысь да бурдӧдавны висьысьясӧс.
Исус шуис налы: «Туяныд нинӧм энӧ босьтӧй, весиг бедь, ноп, нянь, эзысь да вежан паськӧм.
Кутшӧм керкаӧ пыранныд, водзӧ мунтӧдзныд олӧй сэні.
Оз кӧ сибӧдны тіянӧс, сэки карсьыс петіганыд пыркӧдӧй коксьыныд буссӧ. Тайӧ лоӧ найӧс ӧлӧдӧм».
Велӧдчысьяс петісны туйӧ. Найӧ ветлӧдлісны сиктысь сиктӧ, быдлаын висьтавлісны Бур Юӧр да бурдӧдалісны висьысьясӧс.
Ирӧд ӧксы кор кыліс тайӧ ставыс йылысь, шӧйӧвошис.
Ӧтияс сёрнитісны, Пыртысь Иоан пӧ ловзьӧма.
Мӧдъяс шуалісны, Илля пӧ локтӧма, кодсюрӧ шуисны, важ пророкъясысь пӧ ӧти ловзьӧма.
Ирӧд шуис: «Иоанлысь юрсӧ ме керышті.
Но коді нӧ тайӧ мортыс, мый татшӧмторъяс кыла Сы йылысь?»
Ирӧд ёна кӧсйис аддзывны Исусӧс.
Локтӧм бӧраныс апостолъяс висьталісны Исуслы, мый найӧ вӧчисны.
Исус босьтіс найӧс Аскӧдыс, медым олыштны накӧд ас кежаныс овтӧминын, коді вӧлі Випсаида карсянь матын.
Тайӧс кылӧм бӧрын йӧзыс мӧдӧдчисны Исус бӧрся.
Сійӧ сибӧдіс найӧс, сёрнитіс накӧд Енлӧн Юралӧм йылысь да бурдӧдаліс висьысьясӧс.
Луныс нёровтчис рытлань.
Сэки дас кыкнан велӧдчысьыс матыстчисны Исус дінӧ да шуисны: «Ми тані овтӧминынӧсь. Ысты йӧзсӧ вой кежлас матігӧгӧр сикт-грездӧ, мед нуръясьыштасны».
Исус шуис: «Ті сетӧй налы сёянсӧ».
Найӧ воча шуисны: «Миян сӧмын вит нянь да кык чери.
Ми ӧмӧй вермам ньӧбны та мындаыслы сёянсӧ?»
Сэні вӧлі вит сюрс гӧгӧр морт.
Исус шуис велӧдчысьясыслы: «Пуксьӧдалӧй йӧзсӧ чукӧръясӧ, морт ветымынӧн».
Найӧ тадзи и вӧчисны, пуксьӧдалісны ставнысӧ.
Исус босьтіс вит няньсӧ да кык черисӧ, видзӧдліс енэжӧ да Енмӧс аттьӧалӧмӧн чегис няньсӧ, сэсся сетіс велӧдчысьясыслы. Велӧдчысьяс разӧдісны йӧзыслы.
Ставныс пӧттӧдзныс сёйисны, коляссӧ дас кык куд тыр чукӧртісны.
Ӧтчыд Исус кевмысис йӧзтӧминын. Сыкӧд тшӧтш сэні вӧліны велӧдчысьясыс.
Исус юаліс налысь: «Код туйӧ йӧзыс пуктӧны Менӧ?»
Найӧ вочавидзисны: «Ӧтияс шуӧны, Пыртысь Иоан пӧ, мӧдъяс шуӧны, Илля пӧ, кодсюрӧ шуӧны, важ пророкъясысь пӧ ӧти ловзьӧма».
Исус юаліс: «Код туйӧ ті Менӧ пуктанныд?»
Петыр вочавидзис: «Тэ — Енлӧн Кристос».
Исус чорыда ӧлӧдіс найӧс, мед эз висьтавны та йылысь мукӧдлы. Сэсся шуис: «Морт Пилы уна сьӧкыд ковмас нуны. Пӧрысьяс, аркирейяс да Индӧдӧ велӧдысьяс пондасны вӧтлыны да виасны Сійӧс, но коймӧд луннас Сійӧ ловзяс».
Исус шуис ставныслы: «Коді кӧсйӧ мунны Ме бӧрся, мед вунӧдас асьсӧ, мед босьтас ассьыс крестсӧ да локтас Ме бӧрся.
Коді кӧсйӧ видзны ассьыс олӧмсӧ, воштас сійӧс. Ме вӧсна олӧмсӧ воштысь видзас сійӧс.
Лоас-ӧ мортыслы бур, босьтас кӧ аслыс став муюгыдсӧ, а асьсӧ бырӧдас да олӧмсӧ воштас?
Коді яндысяс Меысь да Менам кывъясысь, сыысь яндысяс Морт Пи, кор локтас Аслас дзирдлунӧн, Батьыслӧн да вежа анделъяслӧн дзирдлунӧн.
Збыльысь висьтала тіянлы: кодсюрӧ тані сулалысьяс пиысь кувтӧдзныс на аддзасны Енлысь Юралӧмсӧ».
Тайӧ сёрни бӧрас лун кӧкъямыс мысти Исус босьтіс Аскӧдыс Петырӧс, Иоанӧс, Яковӧс да кайис накӧд керӧсӧ кевмысьны.
Кевмысигас Исуслӧн чужӧмыс вежсис, паськӧмыс лои дзирдалана еджыд.
Сэки тыдовтчисны кык морт: Мӧисей да Илля. На вылын вӧлі Енлӧн дзирдлуныс. Найӧ сёрнитісны Исускӧд Сылӧн мунӧм йылысь, коді збыльмас Ерусалимын.
Петыр ёртъясыскӧд чорыда узисны. Садьмӧм бӧраныс аддзисны Исуслысь дзирдлунсӧ да Сыкӧд сулалысь кык мортӧс.
Кор тайӧ кык мортыс кутісны ылыстчыны Исусысь, Петыр шуис Исуслы: «Велӧдысьӧй, миянлы тані лӧсьыд, сувтӧдам куим чом: Тэныд, Мӧисейлы да Иллялы». Петыр ачыс эз гӧгӧрво, мый висьталіс.
Петырлӧн сёрнитігкості локтіс кымӧр да вевттис найӧс. Велӧдчысьяс ёна повзисны.
Кымӧрсянь кыліс гӧлӧс шы: «Тайӧ Менам муса Пиӧй, Сійӧс кывзӧй».
Тайӧ кывъяс бӧрас найӧ аддзисны сӧмын Исусӧс.
Велӧдчысьяс сійӧ кадас некодлы эз висьтавлыны аддзывлӧм йывсьыс, найӧ чӧв олісны та йылысь.
Аскинас керӧсысь лэччиганыс Исусӧс паныдаліс уна йӧз.
Йӧз пӧвстысь ӧти горӧдіс: «Велӧдысьӧй, кора Тэнӧ, видзӧдлы менсьым пиӧс, сійӧ менам ӧтка пи. Пеж лов топӧдлӧ сійӧс. Сэки сійӧ лёкысь горзӧ, чашйысьӧ, да вомсьыс быг петӧ. Ёна песӧм бӧрын пеж лов вӧлисти эновтӧ сійӧс.
Ме кори Тэнсьыд велӧдчысьястӧ вӧтлыны пеж ловсӧ, но найӧ эз вермыны».
Исус шуис: «Эскытӧм-ылалӧм йӧз.
Дыр-ӧ на Меным овнысӧ тіянкӧд? Дыр-ӧ на Меным видзӧдны тіянӧс?
Вайӧд татчӧ питӧ».
Кор зонка вӧлі матыстчӧ Исус дінӧ, пеж лов шыбитіс зонкаӧс муас да кутіс песлӧдлыны.
Исус ӧлӧдіс пеж лолӧс, бурдӧдіс зонкаӧс да сетіс сійӧс батьыслы.
Ставнысӧ шензьӧдіс Енлӧн ыджыд выныс.
Йӧзыс шензисны Исуслӧн уджъясысь. Сэки Сійӧ шуис велӧдчысьясыслы: «Пель саяныд сюркнялӧй Менсьым кывъясӧс: Морт Пиӧс сетасны йӧзлӧн киӧ».
Велӧдчысьяс эз тӧдны, мый йылысь Исус висьталӧ, Сылӧн кывъясыс вӧліны налы пӧдсаӧсь. Найӧ эз гӧгӧрвоны Сійӧс, а юавнысӧ полісны.
Велӧдчысьяс костын чужис вен, коді на пиысь ыджыдджыкыс.
Налысь мӧвпъяссӧ тӧдӧмӧн Исус босьтіс кагаӧс да сувтӧдіс сійӧс Аскӧдыс орччӧн. Велӧдчысьясыслы шуис: «Коді Менам ним вӧсна сибӧдӧ тайӧ кагасӧ, сійӧ сибӧдӧ Менӧ. А Менӧ сибӧдысь сибӧдӧ Менӧ Мӧдӧдысьӧс. Медся ичӧтыс тіян пиысь лоас медыджыдӧн».
Сэки Иоан шуис: «Велӧдысьӧй, ми аддзылім мортӧс, сійӧ Тэнад нимӧн пеж ловъясӧс вӧтлалӧ. Ми ӧлӧдім сійӧс, ӧд сійӧ абу миян пӧвстысь».
Исус шуис: «Энӧ ӧлӧдӧй. Коді абу тіянлы паныд, сійӧ тіян дор».
Кор матыстчис Исусӧс енэжӧ босьтан луныс, Сійӧ шуис мунны Ерусалимӧ. Водзвылас Сійӧ ыстіс юӧртысьясӧс.
Найӧ мунісны самарияса сиктӧ, медым ставсӧ лӧсьӧдны Исус локтігкежлӧ. Сэтчӧс олысьяс эз сибӧдны Исусӧс, ӧд Сійӧ вӧлі Ерусалимӧ мунысь.
Яков да Иоан — Исуслӧн велӧдчысьясыс — тайӧс кылӧм бӧрын шуисны: «Господьӧй, кӧсъян кӧ, ми би корам енэжсяньыс, мед бырӧдны найӧс? Буретш тадзи Илля вӧчліс».
Велӧдчысьяслань бергӧдчӧмӧн Исус ӧлӧдіс найӧс. Сійӧ шуис: «Ті онӧ тӧдӧй, мыйсяма лов тіян пытшкын. Морт Пи эз лок бырӧдны мортлысь олӧмсӧ, Сійӧ локтіс мездыны».
Сэсся найӧ мунісны мӧд сиктӧ.
Муніганыс ӧти морт шыасис Исус дінӧ: «Господьӧй, ме быдлаӧ Тэ бӧрся муна».
Исус шуис сылы: «Ручьяслӧн эмӧсь пырмӧсъяс, и енэжвыв лэбачьяслӧн эмӧсь позъяс, сӧмын Морт Пилӧн шойччаніныс абу».
Мӧдлы Исус шуис: «Лок Ме бӧрся».
Сійӧ воча шуис: «Господьӧй, лэдзлы менӧ медводз батьӧс дзебны».
Исус шуис сылы: «Кулӧмаяс мед дзебасны кулӧмаяснысӧ. Тэ мун да юӧрт Енлысь Юралӧмсӧ».
Нӧшта ӧти морт шуис: «Господьӧй, ме муна Тэ бӧрся, сӧмын лэдзлы менӧ колльӧдчыны гортсаяскӧд».
Сылы Исус вочавидзис: «Гӧрйӧ кутчысьысь кӧ видзӧдӧ бӧрлань, сійӧ оз шогмы пырны Енлӧн Юраланінӧ».
10 юр.
Та бӧрын Господь бӧрйис нӧшта сизимдас велӧдчысьӧс, сэсся кыкӧн-кыкӧн мӧдӧдіс найӧс сикт-каръясӧ, кытчӧ кӧсйис Ачыс ветлыны. Сійӧ шуис налы:
«Вунданыс уна, а вундысьыс этша. Кевмӧй вунданінын Ыджыдыслы, мед ыстас Аслас вунданінӧ уджалысьясӧс.
Мунӧй.
Ме мӧдӧда тіянӧс баляпиянӧс моз кӧинъяс пӧвстӧ.
Энӧ босьтӧй аскӧдныд сьӧм, ноп да кӧм. Туй выланыд энӧ сувтӧй чолӧмасьны йӧзкӧд.
Керкаӧ пыриганыд медводз шуӧй: “Лӧнь олӧм тайӧ керкаыслы.
” Сэні кӧ олӧ бур сьӧлӧма морт, бурсиӧмныд коляс сылы. Оз кӧ, бурсиӧмныд бергӧдчас тіянлы.
Кольччӧй сійӧ керкаас, сёйӧй-юӧй мый тіянлы сетасны, ӧд уджалысьыд сулалӧ удждоныс.
Энӧ вуджӧй мӧд керкаӧ.
Карӧ пыриганыд кӧ тіянӧс сибӧдасны, сёйӧй мый тіянлы сетасны. Бурдӧдалӧй сэні висьысьясӧс да юӧртӧй: “Енлӧн Юралӧмыс воис тіянӧдз”.
Оз кӧ сибӧдны карас, туйяс кузя ветлӧмӧн юӧртӧй: “Буссӧ, мый кӧласис коканым тіян карын, ми бӧр пыркӧдам тіянлы. Тӧдӧй: Енлӧн Юралӧмыс воис тіянӧдз”.
Висьтала тіянлы: Мыждан лунӧ Содом карлы лоас кокньыдджык сійӧ карыслы дорысь».
«Курыд шог тэныд, Коразин кар. Курыд шог тэныд, Випсаида кар.
Тир да Сидон каръясын кӧ аддзылісны тіянын кодь вӧчӧм шензьӧданаторъяссӧ, сэки эськӧ сэтчӧс олысьясыс важӧн нин бергӧдчисны мыжъяссьыныс, шогалан паськӧм пасьталісны да юрнысӧ пӧимӧн киськалісны. Мыждан лунӧ Тир да Сидон каръяслы лоас кокньыдджык тіянлы дорысь.
Тэ, Капернаум кар, чайтан енэжӧдз кыпӧдчыны? Ад пыдӧсӧдз усян.
Тіянӧс кывзысь Менӧ кывзӧ, тіянӧс ӧтдортысь Менӧ ӧтдортӧ, а Менӧ ӧтдортысь ӧтдортӧ Менӧ Мӧдӧдысьӧс».
Сизимдас велӧдчысь бӧр воисны нимкодясигтыр да шуисны: «Господьӧй, Тэнад нимӧн тшӧктігӧн весиг пеж ловъяс кывзысьӧны миянлысь».
Исус шуис налы: «Ме аддзылі сӧтаналысь чардби моз енэжсянь усьӧмсӧ. Со, Ме сета тіянлы вын талявны змейясӧс, скорпионъясӧс да омӧльыслысь став вынсӧ, и тіянӧс нинӧм оз дойд. Энӧ нимкодясьӧй сыысь, мый пеж ловъяс кывзысьӧны тіянлысь, а нимкодясьӧй сыысь, мый тіянлысь нимъяснытӧ гижӧма енэжас».
Сэки Исус тыри Вежа Ловсянь нимкодьлунӧн. Сійӧ шуис: «Ошка Тэнӧ, Батьӧй, енэжыс да муыс вылын Ыджыдалысьӧс. Тэ дзебин тайӧс сюсь вежӧраясысь да восьтін кага коддьӧмлы.
Татшӧм вӧлі Тэнад бур кӧсйӧмыд, Батьӧй».
Исус висьталіс велӧдчысьясыслы: «Батьӧй ставсӧ сетіс Меным.
Сӧмын Батьыс тӧдӧ, коді Пиыс, да сӧмын Пиыс тӧдӧ, коді Батьыс, и нӧшта сійӧ, кодлы Пиыс кӧсйӧ восьтны».
Сэсся велӧдчысьясыс дінӧ бергӧдчӧмӧн Исус торйӧн шуис налы: «Шудаӧсь найӧ, кодъяслӧн синмыс аддзӧ, мый ті аддзанныд. Висьтала тіянлы: уна пророк да ӧксы кӧсйисны аддзывны, мый ті аддзанныд, но эз аддзывны. Кӧсйисны кывны, мый ті кыланныд, но эз кывлыны».
Индӧдӧ велӧдысьясысь ӧти Исусӧс кыйӧм могысь юаліс: «Велӧдысь, мый меным колӧ вӧчны, мед вичмис меным помтӧм олӧм?»
Исус юаліс сылысь: «Мый гижӧма Индӧдас?
Мый сэтысь лыддян?»
Индӧдӧ велӧдысь вочавидзис: «Радейт ассьыд Господь Ентӧ став сьӧлӧмнад, став олӧмнад, став выннад, став мывкыднад да радейт матыссатӧ асьтӧ моз».
Исус шуис сылы: «Бура вочавидзин.
Вӧч тадзи, сэки кутан овны».
Асьсӧ дорйӧм могысь Индӧдӧ велӧдысь юаліс Исуслысь: «Коді меным матыссаыс?»
Исус вочавидзис тадзи:
«Ӧти морт ветлас Ерусалимысь Ерикон карӧ. Туяс сійӧ веськалас лёк вӧчысьяс киӧ. Найӧ пӧрччӧдасны сійӧс, вирӧдз нӧйтасны да колясны туй вылас кулан выйын.
Сійӧ туйӧдыс мунас поп, казялас нӧйтӧм мортӧс да туй мӧдарас вуджас.
Сы моз вӧчас тшӧтш левит: воас сэтчӧ, аддзас нӧйтӧм мортӧс да вуджас туй мӧдарас.
Сэсся локтас сэтчӧ самарияса морт. Кор аддзас нӧйтӧм мортӧс, сылӧн сьӧлӧмыс нормас. Матыстчас сы дінӧ, дойяссӧ мыськалас винаӧн, мавтас выйӧн да кӧртавлас.
Пуксьӧдас сійӧс аслас осёл вылӧ да ваяс туйморт керкаӧ, сэні тӧждысяс сы вӧсна.
Аскинас самарияса морт сетас туйморт керка кутысьлы кык динар да шуас: “Тӧждысь сы вӧсна.
Оз кӧ тырмы, локтӧм бӧрын содтӧд мынтыся”.
Тэ ногӧн, коді тайӧ куим письыс нӧйтӧм мортыслы матыссаыс?»
Индӧдӧ велӧдысь вочавидзис: «Сылы бур вӧчысьыс».
Исус шуис сылы: «Мун да тшӧтш тадзи вӧч».
Исус велӧдчысьясыскӧд муніс водзӧ да пырис ӧти сиктӧ.
Сэні Марпа нима ань корис Исусӧс гортас. Марпалӧн вӧлі Марья нима чой. Сійӧ пуксис Господь Исуслӧн кок дорӧ да кутіс кывзыны Сылысь висьталӧмсӧ.
Марпа унатор вӧсна котраліс-тӧждысис. Сэсся Исус дінӧ матыстчӧмӧн шуис: «Господьӧй, Тэныд ӧмӧй веськодь, мый чойӧй менӧ ӧтнамӧс колис тӧждысьнысӧ.
Висьтав сылы, мед отсалас меным».
Господь Исус вочавидзис: «Марпа, Марпа, тэ тӧждысян-мырсян унатор вӧсна, а коланаыс сӧмын ӧтитор.
Марья бӧрйис бурджыксӧ, и тайӧс сылысь оз мырддьыны».
11 юр.
Ӧтчыд Исус кевмысис. Кевмысьӧм бӧрас велӧдчысьяс пиысь ӧти шуис Сылы: «Господьӧй, велӧд миянӧс кевмысьны, кыдзи Иоан велӧдіс ассьыс велӧдчысьяссӧ».
Исус шуис налы: «Кевмысиганыд шуӧй: — Батьӧй миян, Тэ енэжъяс вылын олан. Мед лоӧ вежаӧн Тэнад нимыд. Мед воас Тэнад Юралӧмыд. Мед инас Тэнад кӧсйӧмыд му вылын енэжын моз. Сет миянлы быд лун кежлӧ няньнымӧс. И прӧстит миянлысь мыжъяснымӧс, ӧд ми прӧститам миян водзын мыжаясӧс. Эн сет миянлы ылавны, но видз миянӧс омӧльысь».
Исус нӧшта шуис: «Шуам, кодкӧ тіян пиысь вой шӧр кадӧ мунас ёртыс ордӧ да шуас: “Ёртӧй, водзӧсав меным няньтор. Ӧд менам ёртӧй пырис ме ордӧ туй вывсянь, да нинӧмӧн верднысӧ”.
Мӧдыс воча шуас ӧдзӧс сайсяньыс: “Эн дӧзмӧдчы. Ме йигнаси нин, и ныв-пиӧй узьӧны нин. Ог вермы чеччыны няньтӧ сетны”.
Висьтала тіянлы: сійӧ кӧ оз чеччы да оз сет сылы ёртасьӧмыс понда, вӧчас тайӧс ёртыслӧн мырдӧн корӧмыс вӧсна да сетас сылы колана мындасӧ.
Висьтала тіянлы: корӧй, и тіянлы сетасны, корсьӧй, и ті аддзанныд, игӧдчӧй, и тіянлы восьтасны.
Ӧд корысьлы сетӧны, корсьысьлы сюрӧ да игӧдчысьлы восьтӧны.
Эм-ӧ тіян пӧвстын бать, коді пиыслы сетас из, корас кӧ сійӧ нянь?
Сетас-ӧ змейӧс, корас кӧ пиыс чери?
Сетас-ӧ скорпионӧс, корас кӧ пиыс кольк?
Ті лёкӧсь, а сямманныд бурсӧ сетны асланыд ныв-пилы. Дерт нин, енэжвыв Батьныд сетас Вежа Ловсӧ Сылысь корысьяслы».
Исус вӧтліс сёрниттӧм морт пытшкысь пеж лолӧс. Пеж ловлӧн петӧм бӧрын мортыс пондіс сёрнитны.
Йӧзсӧ тайӧ шензьӧдіс, а кодсюрӧ шуисны, Сійӧ пӧ вӧтлалӧ пеж ловъясӧс налӧн Вельзевул юралысь вынӧн.
Мукӧдыс Исусӧс кыйӧм могысь корисны петкӧдлыны енэжсянь индысьпас.
Налысь мӧвпъяссӧ тӧдӧмӧн Исус шуис:
«Ас муын олысьяс кӧ ас костаныс тышкасьӧны, тайӧ муыс кушмас, да керкаясыс сэні киссясны.
Сӧтанаыс кӧ аслыс паныд тышкасьӧ, дыр-ӧ кутчысяс сылӧн ыджыдалӧмыс?
Менӧ ті мыжаланныд пеж ловъясӧс Вельзевул вынӧн вӧтлӧмысь.
Ме кӧ вӧтлала пеж ловъясӧс Вельзевул вынӧн, кутшӧм вынӧн, сідзкӧ, тіян йӧзыд вӧтлалӧны? Найӧ тіянӧс мыждасны.
Ме кӧ Ен вынӧн вӧтлала пеж ловъясӧс, сідзкӧ, Енлӧн Юралӧмыс воис тіянӧдз.
Вына морт кӧ видзӧ керкасӧ шыпуртӧн, сылӧн эмбурыс дзонь коляс.
Но сы вылӧ кӧ уськӧдчас сыысь вынаджык, дерт, вынаджыкыс вермас сійӧс, мырддяс шыпуртсӧ, мый вылӧ сійӧ лача кутіс, да юклас босьтӧм эмбурсӧ.
Коді абу Мекӧд, сійӧ Меным паныд, коді оз чукӧрт Мекӧд, сійӧ разӧдӧ».
«Морт пытшкысь петӧм бӧрын пеж лов шӧйтӧ ватӧминъясті, корсьӧ шойччанін да оз аддзы. Сэки шуӧ: “Бӧр муна важ оланінӧ, кытысь петі”. Локтӧм бӧрас аддзӧ: оланінсӧ чышкӧма-пелькӧдӧма. Сэки мунӧ да босьтӧ аскӧдыс сизим пеж лолӧс, ассьыс на лёкджыкъясӧс, сэсся ставныс найӧ овмӧдчӧны важ оланінас. Тайӧ мортыслы воддза дорсьыс нӧшта на лёкджык лоӧ».
Исуслӧн сёрнитігӧн йӧз чукӧрысь ӧти ань гораа шуис: «Шуда тэнӧ кынӧмас новлӧдлысь да морӧснас нёньӧдысь.»
Исус шуис: «Шудаӧсь Енлысь Кывсӧ кылысьяс да Ен Кыв серти олысьяс.»
Йӧзыс чукӧрмис пыр унджык и унджык. Исус висьталіс налы: «Ӧнія олысьяс — лёкас сетчӧм йӧз. Найӧ кӧсйӧны аддзывны индысьпас, но Иона пророк пасысь кындзи оз ло налы мӧдыс.
Ниневия карын олысьяслы индысьпасӧн вӧлі Иона, ӧнія олысьяслы — Морт Пи.
Лунвыв муысь ӧксы-ань сувтас Мыждан лунӧ ӧнія олысьяскӧд да мыжалас найӧс. Ӧд сійӧ му помсяньыс воліс кывзыны Соломонлысь мывкыд сёрнисӧ. Тані Соломон дорысь ыджыдджык.
Ниневия карын олысьяс сувтасны Мыждан лунӧ ӧнія олысьяскӧд да мыжаласны найӧс. Ӧд Ионалӧн юӧртӧм бӧрын ниневияса йӧз бергӧдчисны асланыс мыжъясысь.
Тані Иона дорысь ыджыдджык».
«Ӧзтӧм битӧ оз дзебны да оз пуктыны доз улӧ. Сійӧс пуктӧны бикок вылӧ, медым пырысьяс аддзисны югыдсӧ. Синмыд — вир-яйтӧ югдӧдысь. Синмыд кӧ бур, став вир-яйыд югыдын. Синмыд кӧ лёк, вир-яйыд пемыдын.
Видзӧд, мед югыдыс тэ пытшкын эз вӧв пемыд.
Тэнад кӧ став вир-яйыд югыдын, и весиг ӧти юкӧн абу пемыдын, сэки тэ ставнас пондан югъявны югдӧдысь би моз».
Кор Исус помаліс сёрнисӧ, ӧти фарисей корис Сійӧс гортас пажнайтны.
Исус локтіс фарисей ордӧ да пуксис сёйны.
Исуслӧн мыссьытӧг сёйны пуксьӧмыс шензьӧдіс фарисейӧс.
Господь шуис сылы: «Ті, фарисейяс, тасьті-дозмуклысь ортсысӧ весаланныд, а пытшкӧсныд горшлунӧн да лёкӧн тырӧма.
Вежӧртӧмъяс.
Эз-ӧ ортсысӧ вӧчысьыс вӧч тшӧтш пытшкӧссӧ?
Сетӧй корысьяслы, мый дозмук пытшкас. Сэки ставыс тіян лоӧ сӧстӧм.
Курыд шог тіянлы, фарисейяс. Ті сетанныд исань турунысь, рута корйысь да став пуктасысь дасӧд юкӧнсӧ, а веськыда мыждӧмсӧ да Енмӧс радейтӧмсӧ бокӧ вештанныд. Тайӧс колӧ вӧчны да мукӧдторсӧ оз ков вунӧдны.
Курыд шог тіянлы, фарисейяс. Ті радейтанныд синагогаын водзын пукавны да йӧзаинын чолӧмалӧмъяс кывзыны.
Курыд шог тіянлы, Индӧдӧ велӧдысьяс да фарисейяс. Кык бана шаньгаяс. Ті пасйытӧм шойгуяс кодьӧсь, йӧзыс тӧдтӧгныс ветлӧны на вывті».
Сэки Индӧдӧ велӧдысьясысь ӧти шуис Сылы: «Велӧдысь, татшӧм сёрнинад тэ дойдан тшӧтш миянӧс».
Исус воча шуис: «Курыд шог тшӧтш тіянлы, Индӧдӧ велӧдысьяс. Ті пуктанныд йӧзлы пельпом вылас нуны вермытӧм нӧбъяс, но асьныд весиг чунь помнытӧ онӧ инмӧдлӧй сэтчӧ.
Курыд шог тіянлы. Ті сувтӧданныд изъяс пророкъяслы, кодъясӧс батьясныд виисны. Тайӧн ті петкӧдланныд, мый ӧтувтчанныд батьясныдлӧн уджъясӧ: найӧ виисны пророкъясӧс, а ті сійӧ пророкъясыслы изъяс сувтӧданныд.
Та вӧсна Енлӧн мывкыдлуныс висьталӧ: “Мӧдӧда на дінӧ пророкъясӧс да апостолъясӧс. Ӧтиясӧс найӧ виасны, мӧдъясӧс вӧтласны”. Тадзи ӧнія олысьяслы ковмас мынтысьны став пророкыслӧн вирысь, кодӧс кисьтӧма му пуксьӧмсяньыс: Авель вирсянь Закар вирӧдз, кодӧс виисны висьпуктанін да крам костын.
Висьтала тіянлы: ӧнія олысьяслы ковмас мынтысьны таысь.
Курыд шог тіянлы, Индӧдӧ велӧдысьяс. Ті босьтінныд тӧдӧмлуныслысь восьтансӧ. Асьныд энӧ пырӧй и пырны кӧсйысьяслы потшинныд туйсӧ».
Исуслӧн сёрнитігӧн Индӧдӧ велӧдысьяс да фарисейяс пондісны ёна топӧдны Сійӧс юалӧмъясӧн, найӧ зілисны крукыштны Сійӧс, корсисны помка мыжавны Сійӧс.
12 юр.
Сэккості чукӧрмис уна сюрс морт, найӧ весиг дзескӧдісны ӧта-мӧднысӧ. Исус медводз шыасис велӧдчысьяс дінас: «Видзчысьӧй фарисей няньшомысь, налӧн кодь кык бана оласногысь.
Став дзебӧмаыс тыдовтчас да став гусяыс йӧзасяс.
Пемыдын шуӧмтӧ кыласны югыдын, керка пытшкын пельӧ вашкӧдӧмтӧ юӧртасны керка вывсянь».
«Висьтала тіянлы, менам ёртъясӧй: энӧ полӧй вир-яйтӧ виысьясысь, унджыксӧ найӧ сэсся вӧчны оз вермыны.
Висьтала, кодысь колӧ повнысӧ. Полӧй Сыысь, коді виӧм бӧрас вермӧ шыбитны куслытӧм биӧ. Шуа тіянлы: Сыысь полӧй.
Оз-ӧ сӧмын кык урысь вузавны вит пышкайӧс?
На пиысь весиг ӧтиӧс абу вунӧдӧма Енмыс.
А тіянлысь став юрсинытӧ лыддьӧма.
Сідзкӧ, энӧ полӧй, ті ӧд донаджыкӧсь пышкайясысь».
«Висьтала тіянлы: коді оз яндысь Меысь йӧз водзын, сыысь Морт Пи оз яндысь Енлӧн анделъяс водзын.
Коді соссяс Меысь йӧз водзын, сыысь Ме сосся Енлӧн анделъяс водзын.
Лёкӧдан кӧ Морт Пиӧс, лоан прӧститӧма.
Омӧльтан кӧ Вежа Лолӧс, он ло прӧститӧма.
Кор тіянӧс нуӧдасны синагогаясӧ да юралысь-веськӧдлысьяс водзӧ, энӧ майшасьӧй, кыдзи дорйыны асьнытӧ да мый шуны. Сійӧ кадас Вежа Лов туйдӧдас тіянӧс, мый колӧ шунысӧ».
Йӧз чукӧрысь ӧти морт шуис Исуслы: «Велӧдысь, шу вокӧйлы, мед бать-мамсянь кольӧм овмӧссӧ юкас мекӧд».
Исус шуис: «Коді сувтӧдіс Менӧ ёрдысьнас, мед тіянлысь овмӧснытӧ юкны?»
Сэсся шуис ставныслы: «Видзчысьӧй горшасьӧмысь, ӧд мортыдлӧн олӧмыс абу сылӧн ыджыд озырлун сайын».
Исус висьталіс налы велӧданвисьт:
«Озыр мортлӧн муыс бур быдтас сетас. Сійӧ мӧвпыштас: “Мый вӧчны? Быдтасӧй видзанінъясӧ оз тӧр”.
Сэсся шуас: “Косяла йӧртӧдъясӧс да вӧча гырысьджыкъясӧс, чукӧрта сэтчӧ став няньӧс да ассьым став эмбурӧс. Сэки шуа аслым: уна буртор уна во кежлӧ чӧжӧма тэнад — шойччы, сёй, ю да гажӧдчы.
”А Ен шуас сылы: “Вежӧртӧмӧй, тавой босьтасны тэнсьыд ловтӧ.
Кодлы коляс тэнад чӧжӧмаыд?”
Тадзи лоӧ быдӧнкӧд, коді аслыс чукӧртӧ озырлунсӧ, а оз Енсянь озырмӧдчы».
Исус шуис велӧдчысьясыслы: «Та вӧсна шуа тіянлы: энӧ майшасьӧй сёян да паськӧм вӧсна. Олӧмныд ӧд донаджык сёянысь да вир-яйныд паськӧмысь.
Видзӧдлӧй кырнышъяс вылӧ: найӧ оз кӧдзны, оз вундыны, налӧн абу йӧртӧдъяс, абу эмбур видзанінъяс. Енмыс вердӧ найӧс.
Кымын пӧв ті донаджыкӧсь лэбачьясысь.
Вермас-ӧ тіян пиысь кодкӧ зільӧмӧн-тӧждысьӧмӧн нюжӧдыштны ассьыс олан нэмсӧ?
Ті кӧ весиг ичӧтикторсӧ онӧ вермӧй, мыйла мукӧдторйыс вӧсна майшасянныд?
Видзӧдӧй дзоридзьяслӧн быдмӧм вылӧ: найӧ оз мырсьыны, оз печкыны. Висьтала тіянлы: ачыс Соломон став озырлун дырйиыс эз пасьтасьлы весиг ӧти татшӧм дзоридзысь мичаджыка.
Енмыс кӧ тадзи пасьтӧдӧ видзвыв турунӧс, коді талун быдмӧ, а аски шыбитасны пачӧ, оз ӧмӧй Сійӧ пасьтӧд тіянӧс, этша эскысьяс.
Энӧ корсьысьӧй, мый сёйны-юны. Энӧ майшасьӧй та вӧсна. Тайӧ ставыс майшӧдлӧ ентӧдтӧмъясӧс.
Но тіян Батьныд тӧдӧ, мый тайӧ колӧ тіянлы. Корсьӧй Енлысь Юралӧмсӧ, сэки тіян ставыс тайӧ лоӧ.
Эн пов, ичӧт чукӧр.
Ӧд тіян Батьныд шуис сетны тіянлы Юралӧм.
Вузалӧй ассьыныд овмӧстӧ, сьӧмсӧ сетӧй гӧльяслы.
Лӧсьӧдӧй аслыныд важмытӧм видзанінъяс да чӧжӧй бырлытӧм озырлун енэжӧ. Сэтчӧ гусясьысь оз пыр да сэні воз оз сёй. Кӧні озырлунныд, сэні лоӧ и сьӧлӧмныд».
«Вӧнясьӧй да ӧзтӧй бинытӧ.
Лоӧй кесйӧгъяс кодьӧсь, кодъяс виччысьӧны асланыс ыджыдлысь кӧлысь вылысь локтӧмсӧ. Воӧм бӧрас ыджыдныс тотшкӧдчас ӧдзӧсас, да найӧ пырысь-пыр восьтасны.
Кесйӧгъяс шудаӧсь, ыджыдыс кӧ гортас воигӧн аддзас, мый найӧ виччысьӧны сійӧс. Веськыда висьтала тіянлы: ыджыдыс сэки вӧнясяс, корас кесйӧгъяссӧ пызан сайӧ да ачыс пондас кесъявны налы.
Ыджыдыс кӧ воас весиг вой шӧрнас либӧ вой шӧр бӧрас да аддзас, мый кесйӧгъясыс виччысьӧны сійӧс — тайӧ кесйӧгъясыс шудаӧсь.
Ті тӧданныд: керка кутысь кӧ тӧдіс гусясьысьлысь локтан кадсӧ, сэки эськӧ эз узь да эз лэдз керкаас.
Лоӧй дасьӧсь, ӧд Морт Пи локтас виччысьтӧг».
Петыр юаліс: «Господьӧй, тайӧ велӧданвисьтсӧ висьталан миянлы али быдӧнлы?»
Господь шуис: «Лоӧй эскана да мывкыда кесйӧг кодьӧсь. Татшӧмсӧ ыджыдыс пуктас веськӧдлыны мукӧд кесйӧгъясӧн, медым ас кадӧ налы сёян-юан сетны.
Кесйӧгыс шуда, ыджыдыс кӧ гортас воигӧн аддзас сійӧс тадзи вӧчӧмӧн.
Збыльысь висьтала тіянлы: ыджыдыс пуктас сійӧс веськӧдлыны став аслас овмӧсӧн.
Но кесйӧгыс вермас мӧвпыштны: “Ыджыдӧй дыр на оз лок”. Сійӧ пондас нӧйтны мукӧд кесйӧгъясӧс, сёйны-юны да кодавны. Но виччысьтӧм лунӧ, лӧсявтӧм кадӧ кесйӧглӧн ыджыдыс воас. Сійӧ кералас кесйӧгсӧ да шыбитас сійӧс эскытӧмъяс дінӧ.
Кесйӧг кӧ тӧдӧ ыджыдыслысь кӧсйӧмсӧ да оз дасьтысь-вӧч сы ног, сійӧс чорыда нӧйтасны. А тӧдтӧг кӧ вӧчас мыжсӧ, сійӧс нӧйтасны этшаджык.
Кодлы уна сетӧма, сылысь уна корасны. Кодлы уна эскӧма, сылысь уна юаласны».
«Ме локті би вайны му вылӧ да ёна кӧсъя, медым сійӧ ӧзйис нин.
Пыртчӧмӧн колӧ Меным пыртчыны, и Ме ёна сьӧкыдала, кытчӧдз тайӧ оз ло.
Ті ног, Ме локті вайны му вылӧ лӧнь олӧм?
Эг. Ме локті торйӧдны йӧзсӧ.
Ӧнісянь ӧти керкаын вит олысь ӧта-мӧдныслы паныд сувтасны: куимыс — кыкыслы паныд, кыкыс — куимыслы.
Батьыс паныд сувтас пиыслы, пиыс — батьыслы, мамыс — нылыслы, нылыс — мамыслы, энькаыс — моньыслы, моньыс — энькаыслы».
Исус висьталіс йӧзыслы: «Рытыввывсянь кыпӧдчысь кымӧр аддзигӧн ті шуанныд: “Зэрмас”. Тайӧ тадзи. Лун тӧв кӧ петас, шуанныд: “Пӧжны кутас”. Тадзи и эм.
Кык бана шаньгаяс. Енэжлысь да мулысь чужӧмбансӧ кужанныд тӧдмавны, мыйла ӧнія кадсӧ онӧ вермӧй тӧдны?»
«Мыйла асьныд онӧ вермӧй гӧгӧрвоны, кыдзи колӧ вӧчнысӧ?
Ковмас кӧ мунны ёрдӧ, зіль бурасьны тэнӧ мыжалыськӧд ёрдӧ вотӧдз на. Он кӧ вӧч тадзи, сійӧ нуӧдас тэнӧ ёрдысь дінӧ, ёрдысь сетас тэнӧ видзысьлы, а видзысь йӧртас тэнӧ дзескыдінӧ.
Висьтала тэныд: бӧръя сьӧмтӧ сеттӧдз он пет сэтысь».
13 юр.
Сэки матыстчисны Исус дінӧ кодсюрӧ да висьталісны галилеясаясӧс крамын виӧм йылысь. Найӧс виӧмаӧсь вись вайиганыс Пилат тшӧктӧм серти, да налӧн вирыс сорласьӧма вись виркӧд.
Исус шуис: «Ті ног, найӧ вӧліны мыжаджыкӧсь мукӧд галилеясаяс дорысь, тадзи кӧ кулісны?
Эз. Шуа тіянлы: на моз ті ставныд куланныд, онӧ кӧ бергӧдчӧй мыжъяссьыныд.
Мый шуанныд дас кӧкъямысыс йылысь, кодъяс вылӧ Силоамын уси башня да лямӧдіс кувтӧдзныс? Вӧліны-ӧ найӧ мыжаджыкӧсь Ерусалимын мукӧд олысьяс дорысь?
Эз. Шуа тіянлы: на моз ті ставныд куланныд, онӧ кӧ бергӧдчӧй мыжъяссьыныд».
Исус висьталіс татшӧм велӧданвисьт: «Ӧти мортлӧн виноград йӧрас вӧлі быдмӧ инжир пу. Сійӧ локтас инжирла, но вотӧсыс оз сюр. Сэки сійӧ шуас виноград йӧрын уджалысьлы: “Куим во чӧж нин виччыся тайӧ инжир пуыслысь вотӧссӧ, но аддза, мый весьшӧрӧ. Керышт сійӧс, ӧд сӧмын муыслысь вынсӧ босьтӧ”.
Уджалысь вочавидзас: “Ыджыдӧй, коль на сійӧс тайӧ во кежлас. Ме сійӧс мудъя да мусӧ куйӧдала. Локтан вонас кӧ оз вай вотӧссӧ, сэки керыштан сійӧс”».
Шойччан лунӧ Исус велӧдіс синагогаын.
Сэні вӧлі мышкыртчӧм, веськӧдчыны вермытӧм ань. Дас кӧкъямыс во чӧж пеж лов кутӧма сійӧс тайӧ висьӧмнас.
Исус аддзис аньӧс, корис сійӧс да шуис: «Аньӧй, тэ мездмин висьӧмсьыд».
Исус пуктыліс кисӧ ань вылӧ, и сійӧ дзик пыр веськӧдчис да пондіс ошкыны Енмӧс.
Шойччан лунӧ висьысьӧс бурдӧдӧмыс скӧрмӧдіс синагогаса юралысьӧс. Сійӧ шуис йӧзыслы: «Вежонас квайт лун сетӧма уджавнысӧ, сэки локтӧй бурдӧдчынытӧ, а энӧ шойччан лунӧ».
Господь воча шуис: «Кык бана шаньга. Шойччан лунӧ онӧ ӧмӧй разьлӧй лясни дорысь ӧш-осёлнытӧ да онӧ ӧмӧй нуӧдлӧй найӧс юктавны?
Ӧвраамлысь тайӧ нывсӧ сӧтана кӧрталӧмӧн кутіс дас кӧкъямыс во чӧж. Эз ӧмӧй ков мездыны сійӧс шойччан лунӧ?»
Исуслӧн кывъясысь яналісны Сылы паныд мунысьяс. Йӧзыс, мӧдарӧ, нимкодясисны Сылӧн чуймӧдана уджъясысь.
Сэсся Исус шуис: «Кутшӧм Енлӧн Юралӧмыс?
Мыйкӧд ӧткодяла сійӧс?
Сійӧ муӧ кӧдзӧм горчица тусь кодь. Сійӧ быдмӧ да лоӧ ыджыд пу кодь, весиг енэжвыв лэбачьяс поздысьӧны вожъясас».
Исус бара шуис: «Мыйкӧд ӧткодяла Енлысь Юралӧмсӧ?
Сійӧ няньшом кодь. Ань гудралас сэтчӧ куим шомӧс тыр пызь, кад мысти няньыс ловзяс».
Исус мӧдӧдчис Ерусалимӧ. Сикт-каръяс пыр мунігӧн Сійӧ велӧдіс йӧзсӧ.
Кодкӧ юаліс Исуслысь: «Господьӧй, этшаӧн ӧмӧй мездмасны?»
Исус вочавидзис: «Став вынтӧ пуктӧй, медым пырны векньыд ӧдзӧсӧд. Висьтала тіянлы: унаӧн зілясны пырны, сӧмын оз вермыны.
Воас кад, кор керка кутысь чеччас да йигналас ӧдзӧссӧ. Ывласяньыс ӧдзӧсӧ игӧдчӧмӧн понданныд вӧзйысьны: “Ыджыдӧй, Ыджыдӧй, восьт миянлы.” Сійӧ вочавидзас: “Кодъяс ті? Ме ог тӧд тіянӧс”.
Ті шуанныд: “Ми тэкӧд ӧтлаын сёйлім-юлім. Тэ велӧдлін миян каръясын”.
Сійӧ шуас: “Висьтала тіянлы: ог тӧд тіянӧс. Кытысьӧсь ті? Мунӧй Ме дорысь, ставныд ті лёк вӧчысьяс.”
Кор ті аддзанныд Енлӧн Юраланінысь Ӧвраамӧс, Исаакӧс, Яковӧс да став пророксӧ, а асьнытӧ ортсыас шыбитӧмаӧн, сэки лоӧ бӧрдӧм да пинь йирӧм.
Асыввылысь да рытыввылысь, войвылысь да лунвылысь локталасны Енлӧн Юраланінӧ да пуксясны пызан сайӧ.
Сэки бӧръяяс лоӧны воддзаӧн, а воддзаяс — бӧръяӧн».
Сійӧ лунӧ фарисейясысь кодсюрӧ локтісны да шуисны Исуслы: «Тэныд колӧ мунны татысь, Ирӧд кӧсйӧ вины Тэнӧ».
Исус воча шуис налы: «Мунӧй, висьталӧй тайӧ ручыслы: талун да аски Ме вӧтлала пеж ловъясӧс да бурдӧда йӧзӧс, а коймӧд луннас эштӧда уджӧс. Но талун, аски да аскомысь Меным колӧ водзӧ мунны, ӧд оз овлы, медым пророкӧс виисны Ерусалимысь кындзи мӧдлаын.
Ерусалим, Ерусалим. Пророкъясӧс виалысь да тэ дінӧ ыстӧмаясӧс изъялысь.
Кымынысь Ме кӧсйи чукӧртны тэнсьыд ныв-питӧ, кыдзи лэбач чукӧртӧ ассьыс пиянсӧ борд улас, но ті энӧ кӧсйӧй.
Со, тіян крамныд тыртӧммас.
Шуа тіянлы: онӧ аддзӧй Менӧ тайӧ кывъяссӧ шутӧдз: “Бурсиӧма Господь нимӧн Локтысьӧс”».
14 юр.
Шойччан лунӧ Исус муніс фарисейяслӧн ӧти юралысь ордӧ сёйны. Сэні ставӧн сюся видзӧдісны Исус бӧрся.
Сы дінӧ локтіс ва пыкталӧмӧн висьысь морт.
Исус юаліс Индӧдӧ велӧдысьяслысь да фарисейяслысь: «Позьӧ-ӧ шойччан лунӧ бурдӧднысӧ?»
Найӧ чӧв олісны.
Исус инмӧдчылӧмӧн бурдӧдіс висьысьӧс да ыстіс сійӧс гортас.
Исус бара юаліс: «Шойччан лунӧ кӧ тіян осёлныд либӧ ӧшныд усяс юкмӧсӧ, онӧ ӧмӧй пырысь-пыр лэптӧй сійӧс сэтысь?»
Найӧ нинӧм эз вермыны воча шуны.
Исус казяліс, мый пызан сайӧ пуксигӧн корӧмаяс корсисны бурджыкинсӧ. Сэки Сійӧ шыасис на дінӧ велӧданвисьтӧн: «Корасны кӧ тэнӧ кӧлысь вылӧ, эн пуксьы бурджыкинас. Сэні вермас лоны тшӧтш кодкӧ, коді корӧмаяс пиысь пыдди пуктанаджык тэысь. Сэки кӧлысь вылӧ корысь матыстчас тэ дінӧ да шуас: “Тайӧ мортыс мед пуксяс татчӧ”. Сэки тэ яналан, ӧд тэныд ковмас вуджны пызан помас.
Кор тэ локтан кӧлысь вылӧ, пуксьы пызан помланьыс. Тэнӧ корысь кӧ матыстчас да шуас: “Ёртӧй, пуксьы матӧджык”, сэки тэ лоан корӧмаяс водзын пыдди пуктӧмаӧн.
Ӧд асьсӧ вылӧ пуктысьӧс лэдзасны, асьсӧ улӧ пуктысьӧс кыпӧдасны».
Сэсся Исус шуис Сійӧс корысьлы: «Лӧсьӧдан кӧ пызан, эн корав ёртъястӧ, вокъястӧ, рӧдвужтӧ, орччӧн озыра олысьястӧ. Ӧд найӧ сэсся коркӧ асьныс корасны тэнӧ, тадзи мынтысясны тэныд.
Мӧдарӧ, лӧсьӧдан кӧ пызан, кор гӧльясӧс, доймалӧмаясӧс, коктӧмъясӧс да синтӧмъясӧс. Тэ шуда лоан, ӧд найӧ оз вермыны мынтысьнысӧ тэныд. Тэныд лоӧ мынтӧма веськыда олысьяслӧн ловзьӧм дырйи».
Тайӧс кылӧм бӧрын сёйысьясысь ӧти шуис: «Шуда Енлӧн Юраланінын пызан сайӧ пуксьысь.»
Исус воча шуис: «Ӧти морт ыджыд пызан лӧсьӧдас да унаӧс корас. Пызан сайӧ пуксян кад матыстчигӧн сійӧ мӧдӧдас ассьыс кесйӧгсӧ висьтавны корӧмаяслы: “Локтӧй, ставыс нин дась”.
Водзвыв сёрнитчӧмӧн моз ставныс шуасны, огӧ пӧ вермӧй локнысӧ.
Ӧти шуас: “Ме му ньӧби, колӧ ветлыны видзӧдлыны сійӧс. Эн дӧзмы, ог эшты”.
Мӧд шуас: “Дас ӧш ньӧби, муна видлыны найӧс. Эн дӧзмы”.
Коймӧд шуас: “Ме гӧтраси да, ог вермы локнысӧ”.
Кесйӧг бӧр локтас да висьталас та йылысь ыджыдыслы.
Сійӧ ёна скӧрмас да шуас кесйӧгыслы: “Мун дзик пыр туйвежъясӧ да йӧзаинъясӧ, вайӧд татчӧ гӧльясӧс, доймалӧмаясӧс, коктӧмъясӧс да синтӧмъясӧс”.
Локтӧм бӧрас кесйӧг шуас: “Ыджыдӧй, тэнсьыд тшӧктӧмтӧ вӧчи, но пызан саяд эм на пуксяніныс”.
Мӧдыс вочавидзас: “Пет карсьыс, ветлы туйяс-потшӧсъяс пӧлӧн да тшӧкты локнысӧ, медым менам керкаӧй вӧлі тыр.
Висьтала тіянлы: воддза корӧмаясысь весиг ӧти морт оз видлы менсьым пызанвыв сёянӧс”.
Унаӧс корӧма, но этшаӧс бӧрйӧма». Уна йӧз муніс Исускӧд. Налань бергӧдчылӧмӧн Сійӧ шуис:
«Ме дінӧ локтысьлы кӧ бать-мамыс, гӧтырыс, ныв-пиыс, чой-вокыс да аслас олӧмыс Ме дорысь мусаджык, сійӧ оз вермы лоны Менам велӧдчысьӧн. Коді оз ну ассьыс крестсӧ да оз лок Ме бӧрся, сійӧ оз вермы лоны Менам велӧдчысьӧн.
Кодкӧ тіян пиысь кӧ мӧвпыштас ыджыд керка лэптыны, оз-ӧ сійӧ водзджык пуксьы да артышт, тырмас-ӧ сылӧн сьӧмыс керкасӧ лэптыны. Вермас артмыны, мый подувсӧ пуктас, а помавнысӧ оз вермы. Сэки пондасны серавны сійӧс: “Видзӧдлӧй, лэптынысӧ босьтчис, а помавнысӧ эз вермы.”
Ӧксылы кӧ ковмас тышӧ петны мӧд ӧксылы паныд, оз-ӧ сійӧ водзджык пуксьы да бура мӧвпышт, вермас-ӧ сійӧ дас сюрса тышкайӧзнас водзсасьны кызь сюрса тышкайӧзкӧд. Оз кӧ вермы, сійӧ мӧдӧдас сёрнитчысьясӧс паныд локтысь ӧксы дінӧ, мед бурасьны сыкӧд.
Ті кӧ онӧ кольӧй ставсӧ, мый тіян эм, онӧ вермӧй лоны Менам велӧдчысьясӧн».
«Солыд — буртор.
Но солыс кӧ воштас ассьыс вынсӧ, кыдзи сійӧс бӧр соланас вӧчан?
Сійӧс весиг оз шогмы муӧ сюйны, сӧмын кольӧ шыбитны.
Кодлӧн эм пель, мед кылӧ.»
15 юр.
Вот перйысьяс мукӧд мыжаяскӧд локтісны Исус дінӧ кывзыны Сійӧс.
Фарисейяс да Индӧдӧ велӧдысьяс шуасисны: «Сійӧ ветлӧ мыжаяскӧд, весиг ӧтлаын сёйӧ накӧд».
Сэки Исус висьталіс налы велӧданвисьт: «Мый вӧчас морт, вошас кӧ сылӧн сё ыжсьыс ӧти? Оз-ӧ сійӧ коль ӧкмысдас ӧкмыссӧ овтӧминӧ да мун корсьны вошӧмасӧ?
Аддзӧм бӧрас долыдпырысь босьтас ыжсӧ пельпом вылас. Локтас гортас, корас ёртъяссӧ, орччӧн олысьяссӧ да шуас налы: “Нимкодясьӧй. Ме аддзи ассьым вошлӧм ыжӧс”.
Висьтала тіянлы: енэжын нимкодясьӧмыс ӧти морт вӧсна, коді бергӧдчис мыжъяссьыс, лоӧ ёна ыджыдджык ӧкмысдас ӧкмыс веськыда олысь дорысь, кодъяслӧн абу коланлуныс бергӧдчыны мыжъяссьыс».
«Ань кӧ воштас дас эзысь сьӧмсьыс ӧтикӧс, оз-ӧ биасьӧмӧн сійӧ кут чышкыны джоджсӧ да корсьны вошӧмторсӧ. Аддзӧм бӧрас корас нывъёртъяссӧ, орччӧн олысь аньяссӧ да шуас налы: “Нимкодясьӧй. Ме аддзи воштылӧм сьӧмӧс”.
Висьтала тіянлы: тадзи тшӧтш нимкодясьӧны Енлӧн анделъяс мыжъяссьыс бергӧдчысь ӧти морт вӧсна».
Нӧшта Исус висьталіс: «Ӧти мортлӧн вӧлі кык пи.
Ичӧтыс шуас батьыслы: “Батьӧй, сет овмӧссьыд менсьым пайӧс”.
Батьыс юкас овмӧссӧ кыкнан пиыслы.
Кымынкӧ лун мысти ичӧт пиыс став аслас овмӧснас мунас ылі муӧ, сэні кокньыд оласногысла лотас ставсӧ.
Сэки тайӧ муас пуксяс тшыг олӧм. Тшыглуныс топӧдас сійӧс. Сійӧ медасяс сэтчӧс ӧти морт дінӧ видзны порсьяссӧ. Сійӧ дась вӧлі пӧткӧдчыны быдмӧгӧн, мый сёйлісны порсьяс, но весиг тайӧ сылы эз вичмыв.
Ас садяс воӧм бӧрын сійӧ шуас: “Батьӧлӧн меда йӧзыс пӧттӧдзныс сёйӧны, а ме тані тшыглы кула.
Чечча да муна бать дінӧ, шуа сылы: Батьӧй, ме мыжа енэжыс водзын да тэ водзын. Ме ог шогмы шусьыны тэнад пиӧн, босьт менӧ медалӧм уджалысь пыдди”.
Сійӧ чеччас да мӧдӧдчас батьыс ордӧ.
Ылісянь на батьыс аддзас писӧ, да сылӧн сьӧлӧмыс нормас. Сійӧ котӧрӧн уськӧдчас пиыслы паныд, сывйыштас да окалас писӧ.
Пиыс шуас: “Батьӧй, ме мыжа енэжыс водзын да тэ водзын. Ме ог шогмы шусьыны тэнад пиӧн”.
Батьыс тшӧктас кесйӧгъясыслы: “Вайӧй медбур паськӧмсӧ да пасьтӧдӧй менсьым пиӧс, чунькытшӧдӧй да кӧмӧдӧй сійӧс. Начкӧй тшӧгӧдӧм кукань.
Пондам сёйны-гажӧдчыны талун.
Менам пиӧй вӧлі кулӧма, а ӧні ловъя, вӧлі вошӧма, а ӧні сюрис”.
Ставныс пондасны гажӧдчыны.
Ыджыд пиыс вӧлі видз вылын. Керка дорас матыстчигӧн сійӧ кылас сьылӧм-гажӧдчӧмсӧ, чукӧстас ӧти кесйӧгӧс да юалас: “Мый тані?”
Сійӧ вочавидзас: “Тэнад вокыд бӧр локтіс. Батьыд тшӧктіс начкыны тшӧгӧдӧм куканьӧс, ӧд вокыд ловйӧн воис”.
Ыджыд пиыс ёна скӧрмас, весиг оз пыр керкаас.
Батьыс петас корны сійӧс.
Пиыс шуас батьыслы: “Кымын во ме тэныд уджала, тэнсьыд пыр кывзыся, но тэ весиг кӧзапитӧ эн сет меным, медым ёртъясӧйкӧд гажӧдчыштны.
Тэнад тайӧ пиыд лотіс став овмӧссӧ кырсалысь аньяскӧд. Ӧні локтіс, да тшӧгӧдӧм куканьӧс начкин сылы”.
Батьыс шуас: “Пиӧй, тэ ӧд пыр вӧлін мекӧд. Ставыс мый менам — тэнад. Вокыд вӧсна колӧ гажӧдчыны-нимкодясьны, ӧд сійӧ вӧлі кулӧма, а ӧні ловъя, вӧлі вошӧма, а ӧні сюрис”».
16 юр.
Исус висьталіс велӧдчысьясыслы:
«Ӧти озыр мортлӧн вӧлі овмӧс нуӧдысь. Озыр мортлы норасясны, овмӧс нуӧдысьыд пӧ куштӧ овмӧстӧ.
Сійӧ корас овмӧс нуӧдысьсӧ ас дінас да шуас сылы: “Тӧдан-ӧ, мый кывсьӧ тэ йылысь?
Петкӧдлы удж нуӧдӧмтӧ, талунсянь тэ он кут веськӧдлыны менам овмӧсӧн”.
Овмӧс нуӧдысь кутас мӧвпавны: “Ыджыдӧй вӧтлӧ менӧ. Мый вӧчны?
Му бергӧдлыны ог вермы, корысьӧдз усьны яндзим.
Со мый колӧ вӧчны, медым мукӧдыс сибӧдасны менӧ асланыс керкаӧ”.
Сійӧ корас ӧти бӧрся мӧдӧс ыджыдыслы уджйӧзаясӧс. Ӧтилысь юалас: “Уна-ӧ тэ уджйӧза?”
Сійӧ вочавидзас: “Сё пельса вый”.
Овмӧс нуӧдысь шуас: “Тані тэнад уджйӧз гижӧдыд. Пуксьы да гиж ветымынӧс”.
Сэсся мӧдлысь юалас: “Тэ уна-ӧ уджйӧза?”
Сійӧ вочавидзас: “Сё мешӧк шобді”.
Овмӧс нуӧдысь шуас: “Тані уджйӧз гижӧдыд. Гиж кӧкъямысдасӧс”.
Ыджыдыс ошкыштас пӧръялысь овмӧс нуӧдысьӧс сылӧн сюсьлунысь. Тайӧ муюгыдса пияныс ас костаныс сюсьджыкӧсь югыдыслӧн пиян дорысь.
Висьтала тіянлы: лӧсьӧдӧй аслыныд ёртъяснытӧ мувывса ылӧг озырлун отсӧгӧн, медым озырлунныд бырӧм бӧрын найӧ сибӧдасны тіянӧс бырлытӧм оланінӧ».
«Коді эскана ичӧтас, сійӧ лоӧ эскана ыджыдас. Ичӧтас ылӧдлысь ылӧдлас и ыджыдас.
Ті кӧ лёка веськӧдланныд мувывса ылӧг озырлуннас, сетасны-ӧ тіянлы збыльысь донасӧ?
Ті кӧ лёка веськӧдланныд йӧз озырлунӧн, сетасны-ӧ тіянлы ассьыныд?
Кесйӧг оз вермы кесъявны кык ыджыдлы. Ӧтисӧ кӧ радейтӧ, мӧдсӧ мустӧмтӧ. Ӧтисӧ кӧ пыдди пуктӧ, мӧдсӧ увтыртӧ.
Ті онӧ вермӧй кесъявны Енлы, кесъяланныд кӧ озырлунлы».
Тайӧс кывлісны фарисейяс. Найӧ сералісны Исусӧс, ӧд налы вӧлі муса озырлуныс.
Исус шуис налы: «Йӧз водзын ті петкӧдланныд асьнытӧ веськыда олысьясӧн, но Енмыс тӧдӧ тіянлысь сьӧлӧмнытӧ. Мый йӧзыс донъялӧны вылӧ, сійӧ Енмыслы зывӧк».
«Индӧдыс да пророкъяс вӧліны Иоанӧдз. Ӧні юӧртӧны Енлӧн Юралӧм йылысь, да быдӧн ёна зільӧ пырны сэтчӧ.
Индӧдысь ӧти чуттор вошӧм дорысь енэжыс да муыс ӧдйӧджык бырас.
Гӧтырсӧ эновтысь да мӧдкӧд гӧтрасьысь гозъя олӧм пежалӧ. Юксьӧм аньӧс гӧтырӧ босьтысь тшӧтш пежалӧ».
«Вӧлі озыр морт. Сійӧ новліс дона мича паськӧм да быд лун лышкыда гажӧдчис.
Лазар нима корысь куйліс сылӧн дзиръя дорын да виччысис, оз-ӧ вичмы сылы озыр мортлӧн пызан вывсьыс гылалӧм торпыригыс. Лазарлӧн кучикыс ставнас вӧлі лӧмӧсь, весиг понъяс волывлісны нювны лӧмсӧ.
Лазар кулі, и анделъяс нуисны сійӧс Ӧвраам дінӧ.
Куліс тшӧтш озыр морт, и сійӧс дзебисны.
Адын мучитчигӧн озыр морт лэптіс синсӧ да аддзис ылынкодь Ӧвраамӧс да сы дорысь Лазарӧс. Озыр морт горӧдіс: “Ӧвраам батьӧй, ло бур сьӧлӧма ме дінӧ. Мӧдӧд Лазарӧс, мед кӧтӧдас чунь помсӧ да кӧдзӧдас менсьым кывйӧс, ӧд ме мучитча тані би пытшкас”.
Ӧвраам шуис: “Пиукӧй, тӧд вылад уськӧд: тэ босьтін нин бурсӧ, а Лазарлы лёкыс уси.
Ӧні сійӧ сьӧлӧмсӧ бурмӧдӧ тані, а тэ мучитчан.
Таысь ӧтдор миянӧс торйӧдӧ ыджыд пыдӧстӧмин — тадзи миянсянь тіян дінӧ кӧсйысьяс вуджны оз вермыны, тшӧтш тіянсянь миян дінӧ оз вермыны вуджны”.
Сэки озыр морт шуис: “Кора тэнӧ, Ӧвраам батьӧй, мӧдӧд сійӧс менам бать керкаӧ, мед ӧлӧдас менсьым витнан вокӧс тайӧ мучитчанінас веськалӧмысь”.
Ӧвраам шуис сылы: “Налӧн эм Мӧисей да пророкъяс, мед найӧс кывзасны”.
Сійӧ шуис: “Оз кывзыны, Ӧвраам батьӧй. Но найӧ бергӧдчасны мыжъяссьыныс, локтас кӧ на дінӧ кодкӧ кулӧмаясысь”.
Сэки Ӧвраам шуис сылы: “Мӧисейӧс да пророкъясӧс кӧ оз кывзыны, найӧ оз эскыны весиг кулӧмаясысь ловзьысьлы”».
17 юр.
Исус висьталіс велӧдчысьяслы: «Ыштӧдӧмъяслы колӧ локнысӧ, но курыд шог сылы, код пыр локтӧны ыштӧдӧмъясыс.
Бурджык сылы, сьыліас кӧ ыджыд изки ӧшӧдасны да шыбитасны саридзӧ, тайӧ ичӧтъясысь ӧтикӧс ыштӧдӧм дорысь.
Видзчысьӧй таысь.
Вокыд кӧ мыж вӧчас тэныд паныд, ӧлӧд сійӧс. Ассьыс мыжмӧмсӧ кӧ восьтас, прӧстит сійӧс.
Сизимысь кӧ луннас тэ водзын мыжмас да сизимысь кӧ тэ дінӧ локтӧмӧн шуас: “Ме мыжа”, прӧстит сійӧс».
Апостолъяс шуисны Господьлы: «Содты миянлы эскӧмсӧ».
Господь шуис: «Лоас кӧ тіян эскӧмныд горчица тусь ыджда, верманныд шуны тайӧ пуыслы: “Нетшыштчы вужнад да вужъясь саридзас” — и сійӧ кывзысяс тіянлысь».
«Гӧрӧм бӧрын либӧ пемӧсъясӧс видзӧм бӧрын кӧ кесйӧгныд локтас, шуанныд-ӧ сылы: “Медводз пуксьы да сёй”.
Дерт, онӧ. Ті шуанныд: “Дасьты меным сёян-юан, вӧнясь да кесъяв меным. А меным кесъялӧм бӧрын ачыд верман сёйны-юны”.
Кесйӧг кӧ вӧчӧ тшӧктӧм серти, сэки сійӧс оз аттьӧавлыны.
Тадзи тшӧтш ті, вӧчанныд кӧ тшӧктӧм серти, вӧчӧм бӧраныд шуӧй: “Ми сӧмын кесйӧгъяс. Мый колӧ вӧлі вӧчны, ми вӧчим”».
Ерусалимӧ мунігӧн Исус муніс Самария да Галилея муяс пыр.
Ӧти сиктӧ воигӧн Сійӧс паныдалісны проказаӧн висьысь дас морт. Ылӧ сувтӧмӧн найӧ горзісны: «Исус, Велӧдысь, ло бур сьӧлӧма миян дінӧ.»
Исус видзӧдліс на вылӧ да шуис: «Мунӧй да петкӧдлӧй асьнытӧ попъяслы».
Муніганыс найӧ сӧстӧммисны.
Ассьыс бурдӧмсӧ казялӧм бӧрын ӧти косіс Енмӧс гораа ошкигтырйи. Сійӧ кымынь уськӧдчис Исус водзӧ да аттьӧаліс Сійӧс. Тайӧ мортыс вӧлі Самарияысь.
Исус юаліс: «Эз ӧмӧй даснаныс сӧстӧммыны?
Кӧнӧсь нӧ ӧкмысыс?
Тайӧ бокыса мортысь кындзи некод эз лок ошкыны Енмӧс».
Исус шуис сылы: «Чеччы да мун. Эскӧмыд мездіс тэнӧ».
Фарисейяс юалісны, корджык воас Енлӧн Юралӧмыс. Исус вочавидзис: «Енлӧн Юралӧмыс оз во тыдалана ногӧн. Он вермы шуны: “Видзӧд, сійӧ тані” либӧ “Сійӧ сэні”.
Енлӧн Юралӧмыс ӧд тіян пытшкын».
Исус шуис велӧдчысьясыслы: «Воас кад, кор ті кӧсъянныд аддзывны Морт Пилӧн лунъясысь ӧтиӧс, но онӧ аддзылӧй.
Тіянлы кӧ шуасны: “Сійӧ тані”, либӧ шуасны: “Сійӧ сэні”, энӧ мунӧй да энӧ вӧтчӧй на бӧрся. Енэж ӧтар помсяньыс мӧдарӧдзыс югнитысь чардби моз Морт Пи тыдовтчас Аслас лунӧ.
Но таӧдз Сылы ковмас нуны уна сьӧкыд да ӧтдортӧм ӧнія олысьяссянь.
Кыдзи вӧлі Ной лунъяс дырйи, сідзи лоӧ Морт Пи локтігӧн. Ковчегӧ Нойлӧн пыртӧдз йӧзыс сёйисны-юисны, гӧтрасисны да верӧс сайӧ мунісны. Сэки ыджыд ойдӧм дырйи ваыс пӧдтіс ставнысӧ.
Тадзи вӧлі тшӧтш Лот лунъясӧ: йӧзыс сёйисны-юисны, ньӧбасисны-вузасисны, кӧдзисны да керкаяс лэптісны. Содом карысь Лотлӧн петан лунӧ енэжсянь киссис тэгъя биа зэр да бырӧдіс ставнысӧ.
Тадзи лоас Морт Пилӧн петкӧдчан лунӧ.
Коді сійӧ лунӧ лоас керка вылас, мед оз пыр керкаас босьтны мыйкӧ.
Коді лоас видз-му вылас, мед оз кос гортас.
Энӧ вунӧдӧй, мый лои Лот гӧтыркӧд.
Коді зільӧ видзны ассьыс олӧмсӧ, воштас сійӧс.
Ассьыс олӧмсӧ воштысь видзас сійӧс.
Висьтала тіянлы: сійӧ войӧ ӧти вольпасьын лоасны кыкӧн: ӧтисӧ босьтасны, мӧдсӧ колясны.
Ӧтлаын пондасны изны кык ань: ӧтисӧ босьтасны, мӧдсӧ колясны.
Видз-му вылын лоасны кыкӧн: ӧтисӧ босьтасны, мӧдсӧ колясны».
«Кӧні тайӧ лоӧ, Господьӧй?» — юалісны велӧдчысьясыс.
Сійӧ вочавидзис: «Кӧні шой, сэтчӧ чукӧртчасны кутшъяс».
18 юр.
Исус висьталіс пыр кевмысьӧм йылысь велӧданвисьт: «Ӧти карын вӧлі ёрдысь, сійӧ Енсьыс эз пов да йӧзысь эз яндысь.
Сійӧ карас оліс дӧва, коді волывліс ёрдысь дінӧ да корис: “Дорйы менӧ дзескӧдысьысь”.
Ёрдысь дыр эз босьтчы дорйынысӧ.
Сэсся шуис: “Дерт, ме Енсьыс ог пов да йӧзысь ог яндысь. Но тайӧ дӧваыс дзикӧдз менӧ дӧзмӧдіс — ковмас дорйыны. Ог кӧ дорйы, бурӧн ог мын сыысь”».
Господь шуис: «Кыланныд, мый шуӧ шогмытӧм ёрдысь?
А Енмыс ӧмӧй оз дорйы Ассьыс бӧрйӧмаяссӧ, кодъяс лун и вой корӧны отсӧгсӧ Сылысь? Сёрмас ӧмӧй Сійӧ сетны отсӧгсӧ?
Висьтала тіянлы: Сійӧ регыдӧн доръяс найӧс.
Но аддзас-ӧ Морт Пи му вылысь татшӧм эскӧмсӧ локтӧм бӧрас?»
Асьнысӧ веськыда олысьӧ пуктысьяслы да мукӧдӧс увтыртысьяслы Исус висьталіс татшӧм велӧданвисьт:
«Кык морт пырисны крамӧ кевмысьны: ӧтиыс вӧлі фарисей, мӧдыс — вот перйысь.
Фарисей сувтӧмӧн кевмысис вомгорулас: “Енмӧй, аттьӧала Тэнӧ, мый ме абу мукӧдыс кодь: ог горшась, ог пӧръясь, гозъя олӧм ог пежав. Ме абу тайӧ вот перйысьыс кодь. Видзала вежоннас кыкысь, ставсьыс дасӧд юкӧнсӧ сета Енлы”.
А вот перйысь сулаліс бокын да весиг синсӧ эз лысьт лэптывны енэжланьыс, сӧмын морӧсас кучкалӧмӧн шуаліс: “Енмӧй, ло бур сьӧлӧма ме дінӧ, мыжа морт дінӧ.”
Висьтала тіянлы: Ен водзын веськыдӧн муніс гортас вот перйысь, эз фарисей.
Ӧд асьсӧ вылӧ пуктысьӧс лэдзасны, асьсӧ улӧ пуктысьӧс кыпӧдасны».
Исус дінӧ вайӧдісны посни челядьӧс, медым Сійӧ инмӧдчыліс на дінӧ. Велӧдчысьяс аддзисны тайӧс да пондісны шуасьны вайӧдысьяс вылӧ.
Исус корис челядьӧс Ас дінас да шуис: «Лэдзӧй челядьсӧ локны Ме дінӧ. Энӧ кутӧй найӧс. Енлысь Юраланінсӧ ӧд на коддьӧмлы лӧсьӧдӧма.
Веськыда висьтала тіянлы: коді оз сибӧд Енлысь Юралӧмсӧ кага моз, сійӧ оз пыр Енлӧн Юраланінӧ».
Ӧти юралысь юаліс Исуслысь: «Бур Велӧдысьӧй, мый меным колӧ вӧчны, мед вичмис меным помтӧм олӧм?»
Исус вочавидзис: «Мыйла тэ шуан Менӧ бурӧн?
Некод абу бурыс, сӧмын Енмыс бур.
Тэ ӧд тӧдан тшӧктӧмъяссӧ: гозъя олӧмтӧ эн пежав, эн ви, эн гусясь, эн пӧръясь, пыдди пукты ассьыд бать-мамтӧ».
Юралысь шуис: «Том кадсянь ме ола тайӧ тшӧктӧмъяс сертиыс».
Тайӧс кылӧм бӧрын Исус шуис сылы: «Ӧтитор оз тырмы тэныд: вузав ставсӧ, мый тэнад эм, да сьӧмсӧ сет гӧльяслы. Сэки тэныд енэжын озырлуныс вичмас. Сэсся лок Ме бӧрся».
Тайӧс кылӧм бӧрын юралысь шогӧ усис, ӧд сійӧ вӧлі зэв озыр.
Исус аддзис юралысьлысь шогӧ усьӧмсӧ, сэсся шуис: «Кутшӧм сьӧкыд озырлы пырны Енлӧн Юраланінӧ.
Озырлы Енлӧн Юраланінӧ пырӧм дорысь верблюдлы кокньыдджык мунны ем пысӧд».
Тайӧс кылысьяс юалісны: «Коді нӧ вермас мездмынысӧ?»
Исус шуис: «Мортлы вермытӧмыс — вермана Енлы».
Сэки Петыр шуис: «Ми ставсӧ эновтім да мунім Тэ бӧрся».
Исус шуис налы: «Веськыда висьтала тіянлы: коді Енлӧн Юралӧм вӧсна коляс керкасӧ, бать-мамсӧ, чой-воксӧ, гӧтырсӧ, ныв-писӧ, сылы тайӧ олӧмас на уна пӧвстӧн бӧр воас, нӧшта локтан нэмас сылы помтӧм олӧм вичмас».
Исус корис дас кыкнан велӧдчысьсӧ да шуис налы: «Ӧні ми мунам Ерусалимӧ. Сэні инас пророкъяслӧн Морт Пи йылысь став гижӧмаыс.
Сійӧс сетасны ентӧдтӧмъяс киӧ. Найӧ сераласны, увтыртасны да сьӧлаласны Сійӧс. Чорыда нӧйтасны, сэсся виасны, но коймӧд луннас Сійӧ ловзяс».
Велӧдчысьяслы тайӧ вӧлі гӧгӧрвотӧм, кывъясыс вӧліны налы пӧдсаӧсь. Найӧ эз вермыны гӧгӧрвоны Исуслысь висьталӧмсӧ.
Исус матыстчис Ерикон карлань. Туй дорас пукаліс синтӧм корысь морт. Сійӧ кыліс йӧзлысь сы дорті мунӧмсӧ да юаліс: «Мый тайӧ?»
Сылы висьталісны, Назаретса Исус пӧ локтӧ.
Сэки синтӧм горӧдіс: «Исус, Давид Пи. Ло бур сьӧлӧма ме дінӧ.»
Исус водзвылын мунысьяс ӧлӧдісны синтӧмӧс горзӧмсьыс, но сійӧ ёнджыка на пондіс горзыны: «Давид Пи, ло бур сьӧлӧма.»
Исус сувтіс да тшӧктіс вайӧдны синтӧмсӧ, сэсся юаліс сылысь: «Мый тэ кӧсъян?»
Сійӧ вочавидзис: «Господьӧй, кӧсъя аддзыны».
Исус шуис: «Аддзы. Эскӧмыд мездіс тэнӧ».
Синтӧм дзик пыр кутіс аддзыны да Енмӧс ошкигтыр муніс Исус бӧрся.
Тайӧс аддзӧм бӧрын став йӧзыс аттьӧалісны-ошкисны Енмӧс.
19 юр.
Ериконӧ воӧм бӧрын Исус муніс кар пырыс.
Сэні оліс Заккей нима озыр морт, вот перйысьяслӧн юралысьыс. Сійӧ ёна кӧсйис аддзывны Исусӧс да тӧдмавны, коді Сійӧ сэтшӧмыс.
Но ичӧт тушаыс вӧсна йӧз сайсяньыс эз вермы аддзынысӧ. Заккей котӧртіс водзӧ да кавшасис пу вылӧ, медым аддзыны Исусӧс. Буретш сійӧ туйӧдыс локтӧ вӧлі Исус.
Пу весьтӧ воигӧн Исус видзӧдліс вывлань, аддзис Заккейӧс да шуис: «Заккей, лэччы ӧдйӧджык.
Талун Меным колӧ лоны тэ ордын».
Заккей тэрмасьӧмӧн лэччис да долыдпырысь сибӧдіс Исусӧс гортас.
Тайӧс аддзылысьяс шуасисны, мыжа морт ордӧ пӧ муніс.
Заккей сувтіс да шуис: «Господьӧй, овмӧслысь джынсӧ сета гӧльяслы да кодлысь ылӧдлӧмӧн босьті, сылы нёль пӧвстӧн вешта».
Исус шуис сылы: «Талун воис мездмӧм тайӧ керкаас. Ӧд сійӧ тшӧтш Ӧвраам пи.
Морт Пи локтіс корсьны да мездыны вошӧмаӧс».
Кывзысьяслы Исус висьталіс нӧшта ӧти велӧданвисьт, ӧд Сійӧ матыстчис Ерусалимлань, и унаӧн чайтісны, мый регыд нин воас Енлӧн Юралӧмыс.
Исус висьталіс: «Ӧксы рӧдысь ӧти морт мӧдӧдчас ылі муӧ, медым сэні ӧксы ним босьтны да бӧр локны аслас муӧ ӧксыӧн. Сійӧ корас ас дорас дас кесйӧгӧс, быдӧнлы сетас зарни сьӧм да шуас: “Менам локтӧдз тайӧ сьӧмсӧ уджӧ бергӧдӧй”.
Ас войтырыслы тайӧ мортыс вӧлі мустӧм, та вӧсна бӧрсяньыс найӧ мӧдӧдасны юӧртысьясӧс висьтавны, огӧ пӧ кӧсйӧй, медым сійӧ вӧлі миян ӧксыӧн.
Ӧксыӧн локтӧм бӧрын сійӧ тшӧктас корны кесйӧгъяссӧ, кодъяслы сетліс сьӧмсӧ. Кӧсъяс тӧдмавны, уна-ӧ найӧ содтӧд босьтісны.
Ӧти локтас да шуас: “Ыджыдӧй, тэнад зарни сьӧмыд вайис содтӧд дасӧс”.
Ӧксы шуас: “Бура вӧчин. Тэ бур кесйӧг.
Ичӧтас тэ эскана вӧлін, дас карӧн веськӧдлыны кутан”.
Локтас мӧд кесйӧг да шуас: “Ыджыдӧй, тэнад зарни сьӧмыд вайис содтӧд витӧс”.
Сылы ӧксы шуас: “Вит карӧн веськӧдлыны кутан”.
Локтас коймӧд кесйӧг да шуас: “Ыджыдӧй, со, тэнад сьӧмыд, чышъянӧ гартыштӧмӧн видзи сійӧс.
Ме полі тэысь, тэ ӧд чорыд морт: босьтан, мый эн пуктывлы, да вундан, мый эн кӧдзлы”.
Ӧксы шуас сылы: “Шогмытӧм кесйӧг. Аслад кывъясыд серти ме мыжда тэнӧ.
Тэ тӧдін, мый ме чорыд морт, босьта, мый эг пуктывлы, да вунда, мый эг кӧдзлы.
Мыйла сьӧмчукӧртанінӧ эн пукты менсьым сьӧмӧс, локтӧм бӧрам эськӧ содтӧдӧн босьті?”
Ӧксы шуас сыкӧд сулалысьяслы: “Мырддьӧй сылысь сьӧмсӧ да сетӧй дас сьӧмаыслы”.
Найӧ шуасны: “Ыджыдӧй, сылӧн эм нин дас сьӧмыс”.
Ӧксы шуас: “Висьтала тіянлы: кодлӧн эм, сылы сетасны.
Кодлӧн абу, сылысь бӧръясӧ босьтасны.
Меным паныд мунысьясӧс, менам юралӧмлы паныд сувтысьясӧс вайӧдӧй татчӧ да виӧй найӧс менам син водзын”».
Тайӧс висьталӧм бӧрын Исус муніс водзӧ Ерусалимлань.
Олив керӧсын сулалысь Виффагия да Вифания сиктъяслань матыстчигӧн Исус мӧдӧдіс Ассьыс кык велӧдчысьсӧ да шуис: «Мунӧй тайӧ сиктас. Сэтысь аддзанныд домалӧм том осёлӧс, сы вылӧ некод на эз пуксьыв. Разьӧй сійӧс да вайӧдӧй татчӧ.
Юаласны кӧ, мыйла разянныд, вочавидзӧй, мый сійӧ колӧ Господьлы».
Мӧдӧдӧмаяс мунісны да аддзисны: ставыс вӧлі Исуслӧн висьталӧм серти.
Том осёлӧс разиганыс видзысьыс юаліс: «Мыйла разянныд?»
Велӧдчысьяс вочавидзисны: «Сійӧ колӧ Господьлы».
Том осёлӧс вайӧдісны Исус дінӧ. Сэсся шлапкисны осёл вылӧ паськӧмнысӧ да отсалісны Исуслы пуксьынысӧ.
Кор Сійӧ муніс осёл вылын, йӧзыс вольсавлісны паськӧмнысӧ туй вылас.
Кор Исус матыстчис Олив керӧсысь лэччанінӧ, став Сылӧн велӧдчысьыс кыпыда да гора шыӧн пондісны ошкыны Енмӧс став аддзылӧм шензьӧданаторсьыс. Найӧ шуалісны:
— Бурсиӧма Господь нимӧн локтысь Ӧксыӧс.
Лӧнь олӧм енэж вылын, ошкӧм Медвылыссалы.
Йӧз чукӧрысь фарисейясысь кодсюрӧ шуисны Исуслы: «Велӧдысь, ӧлӧд велӧдчысьястӧ.»
Исус воча шуис: «Висьтала тіянлы: найӧ кӧ ланьтасны, изъяс шыасясны».
Ерусалимлань матыстчигӧн Исус видзӧдліс кар вылас да бӧрдӧмӧн шуаліс: «Тӧдін кӧ эськӧ тэ талун, мый вайӧ тэныд лӧнь олӧмсӧ.
Ӧні тайӧ тупкыса тэнад синлы. Воас лун, кор тэныд паныд мунысьяс лэптасны тэ гӧгӧр тымӧд, кытшаласны тэнӧ да быд боксянь дзескӧдасны. Тэнӧ жугӧдасны дзоньнас, олысьястӧ виаласны — из вылӧ из оз кольны, ӧд тэ эн кӧсйы тӧдны тэ дінӧ Енлысь волӧмсӧ».
Исус пырис крамӧ да пондіс вӧтлавны сэтысь вузасьысь-ньӧбасьысьясӧс. Сійӧ шуис налы: «Гижӧма: “Менам керкаӧй — кевмысян керка”.
А ті сыысь вӧчинныд лёк вӧчысьяслы дзебсянін».
Исус быд лун велӧдіс крамын.
Аркирейяс, Индӧдӧ велӧдысьяс да веськӧдлысьяс кӧсйисны вины Сійӧс. Сӧмын эз тӧдны, кыдзи тайӧс вӧчны, ӧд став йӧзыс вешйывтӧг кывзісны Исусӧс.
20 юр.
Ӧтчыд Исус велӧдіс йӧзсӧ крамын, висьталіс налы Бур Юӧр. Аркирейяс, Индӧдӧ велӧдысьяс да пӧрысьяс матыстчисны Исус дінӧ да юалісны: «Висьтав миянлы, кутшӧм вынӧн Тэ ставсӧ тайӧс вӧчан? Коді Тэнӧ пуктіс тайӧс вӧчнысӧ?»
Исус воча шуис: «Ме тшӧтш тіянлысь ӧтитор юала. Висьталӧй Меным, Иоанлӧн пыртӧмыс вӧлі Енсянь али мортсянь?»
Найӧ ас костаныс сёрнитісны: «Шуам кӧ: “Енсянь”, Сійӧ шуас: “Мыйла сылы энӧ эскӧй?”
Шуам кӧ: “Мортсянь”, йӧзыс изъяласны миянӧс, ӧд Иоанӧс збыльысь пророкӧ пуктӧны».
Найӧ вочавидзисны: «Огӧ тӧдӧй кодсянь».
Сэки Исус шуис: «Сідзкӧ, Ме тшӧтш ог висьтав, кутшӧм вынӧн ставсӧ тайӧс вӧча».
Сэсся Исус висьталіс йӧзыслы татшӧм велӧданвисьт:
«Морт пуктас аслас йӧрӧ виноград, сэсся йӧрсӧ виноград быдтысьяслы кӧртымӧ сетас, ачыс дыр кад кежлӧ мунас. Вотӧс чукӧртан кадӧ овмӧс кутысь мӧдӧдас кесйӧгсӧ босьтны вотӧсысь ассьыс пайсӧ.
Виноград быдтысьяс нӧйтасны кесйӧгсӧ да вӧтласны сійӧс куш киӧн.
Овмӧс кутысь мӧд кесйӧгӧс мӧдӧдас.
Сійӧс тшӧтш нӧйтасны, лёкысь сераласны сы вылын да вӧтласны куш киӧн.
Мӧдӧдас нӧшта коймӧдӧс. Сійӧс вирӧдз дойдаласны да шыбитасны ортсӧ.
Сэки овмӧс кутысь шуас: “Мый вӧчны?
Мӧдӧда ассьым муса пиӧс, гашкӧ, сыысь яндысясны”.
Писӧ аддзӧм бӧрын виноград быдтысьяс пондасны сёрнитны ас костаныс: “Тайӧ мортыслы вуджас овмӧсыс. Мунам да виам сійӧс, медым овмӧсыс миянлы коляс”.
Найӧ петкӧдасны сійӧс виноград йӧрсьыс да виасны.
Мый вӧчас накӧд овмӧс кутысь?
Сійӧ локтас, виноград быдтысьясӧс виас, а йӧрсӧ мукӧдлы сетас».
Тайӧс кылысьяс шуисны: «Мед оз ло тадзи».
На вылӧ видзӧдлӧмӧн Исус шуис: «Мый йылысь висьталӧны Гижӧдас тайӧ кывъясыс:
— Изйыс, кодӧс шыбитісны керка лэптысьяс, лоис пельӧс изйӧн.
Коді усяс тайӧ изйыс вылӧ, сійӧ пасьмунас. Код вылӧ изйыс усяс, сійӧс лямӧдас».
Индӧдӧ велӧдысьяс да аркирейяс гӧгӧрвоисны, мый велӧданвисьтыс вӧлі на йылысь. Найӧ кӧсйисны босьтны Исусӧс, но полісны йӧзсьыс.
Индӧдӧ велӧдысьяс да аркирейяс помся кыйӧдісны Исусӧс. Найӧ мӧдӧдісны Сы дінӧ веськыда олысьӧ пуксьысь наян йӧзӧс, медым кыйны Сійӧс сёрниас да сетны Сійӧс юралысь киӧ.
Локтӧмаяс шуисны Исуслы: «Велӧдысь, ми тӧдам, мый Тэ веськыда сёрнитан-велӧдан. Тэ он видзӧд морт вылӧ, а веськыда велӧдан Енлӧн туйӧ. Висьтав, колӧ-ӧ кесарлы вот мынтыны?»
Налысь наянлунсӧ казялӧмӧн Исус шуис: «Мыйла ті зілянныд кыйны Менӧ?
Петкӧдлӧй Меным динартӧ. Кодлӧн сэні чужӧмыс-нимыс?»
Найӧ вочавидзисны: «Кесарлӧн».
Исус шуис налы: «Кесарлысь сетӧй кесарлы, а Енлысь — Енлы».
Тадзи найӧ эз вермыны став йӧз водзас кыйны Исусӧс. Сылӧн воча кывйысь найӧ чуймисны да ланьтісны.
Исус дінӧ локтісны саддукейяс, кодъяс шуӧны, ловзьӧмыс пӧ абу. Найӧ юалісны Исуслысь:
«Велӧдысь, Мӧисей гижӧма, мый “ныв-питӧм морт кӧ кулас, вокыслы колӧ босьтны сылысь гӧтырсӧ да нюжӧдны аслас вокыслысь рӧдсӧ”.
Сизим вок вӧлі. Ыджыдыс гӧтрасис, сэсся куліс, ныв-пиыс эз коль.
Гӧтырсӧ мӧд вокыс босьтіс, сійӧ тшӧтш ныв-питӧг куліс.
Сэсся коймӧдыс босьтіс.
Тадзи сизимнанныс кулісны ныв-питӧг.
Медбӧрын аньыс куліс.
Ловзьӧм бӧрас кодлы сійӧ гӧтырӧн лоас, ӧд сизим верӧс сылӧн вӧлі?»
Исус вочавидзис: «Тайӧ муюгыдас йӧзыс гӧтрасьӧны да верӧс сайӧ мунӧны.
А мӧдаръюгыдас веськавны да ловзьыны шогманаяс оз гӧтрасьны да верӧс сайӧ оз мунны.
Найӧ оз нин кувны, а лоӧны анделъяс кодьӧсь. Найӧ Енлӧн ныв-пи, ӧд найӧс ловзьӧдӧма.
Сотчысь лежнӧг дорын вӧвлӧмторйыс петкӧдлӧ, мый кулӧмаяс ловзьӧны. Мӧисей шуӧ Господьӧс Ӧвраамлӧн Енмӧн, Исааклӧн Енмӧн да Яковлӧн Енмӧн.
Енмыс абу кулӧмаяслӧн Ен, Сійӧ ловъяяслӧн Ен. Сылы ставыс ловъя».
Индӧдӧ велӧдысьясысь кодсюрӧ шуисны: «Велӧдысь, бура висьталін».
Водзӧ найӧ эз нин лысьтны мыйкӧ юасьны Сылысь.
Исус шуис налы: «Мыйла нӧ шуӧны, Кристос пӧ Давид пи?
Давид ачыс шуӧ Псалом небӧгын:
— Господь шуис менам Господьлы: “Пукав Менам веськыдладорын, кытчӧдз ог пукты Тэнад кок улӧ Тэныд паныд мунысьясӧс”.
Давид шуӧ Сійӧс Господьӧн.
Кыдзи нӧ Сійӧ сылы пиӧн лоӧ?»
Став йӧзыс кывзісны Исусӧс.
Сійӧ шуис велӧдчысьясыслы: «Видзчысьӧй Индӧдӧ велӧдысьясысь. Найӧ радейтӧны кузь паськӧмӧн ветлыны, йӧзаинын чолӧмалӧмъяс кывзыны, синагогаын водзын пукавны да гажӧдчанінын бурджыклаӧ пуксьыны. Найӧ куштӧны дӧваяслысь керкасӧ да асьнысӧ петкӧдлӧм могысь дыр кевмысьӧны. Но найӧс лоӧ чорыда мыждӧма».
21 юр.
Исус видзӧдліс да аддзис, кыдзи озыръяс пуктісны сьӧм чукӧртан кудйӧ сьӧм. Сэтысь аддзис тшӧтш гӧль дӧваӧс. Сійӧ пуктіс кудйӧ кык ыргӧн сьӧм.
Исус шуис: «Збыльысь висьтала тіянлы: тайӧ гӧль дӧваыс быдӧнысь унджык пуктіс.
Ставныс унасьыс чуктӧдісны Енлы, а тайӧ дӧваыс этшасьыс сетіс ставсӧ, мый сылӧн вӧлі кынӧмпӧт вылас».
Ӧткымынӧн сёрнитісны мича изъясӧн да донаторъясӧн мичмӧдӧм крам йылысь. Исус шуис: «Воас лун, татчӧ из вылӧ из оз коль, ставсӧ жугӧдасны».
Исуслысь юалісны: «Велӧдысь, кор ставыс тайӧ лоас?
Мый серти ми тӧдмалам сійӧ кадсӧ?»
Исус шуис: «Видзчысьӧй, мед эз ылӧдны тіянӧс. Унаӧн Менам нимӧн локтасны да шуасны, ме пӧ Сійӧ, кадыс пӧ воис нин. Энӧ мунӧй на бӧрся.
Кор кыланныд тышъяс да шызьӧмъяс йылысь, энӧ повзьӧй. Тадзи водзджык колӧ лонысӧ, сӧмын тайӧ абу на пом».
Сэсся Исус шуис налы: «Войтыр войтырлы паныд сувтас, муяс ӧта-мӧдныслы паныд кыпӧдчасны. Уналаын лоас му вӧрӧм да тшыгъялӧм, йӧзсӧ суас кулан висьӧм. Лоасны повзьӧдана петкӧдчӧмъяс да енэжсянь индысьпасъяс.
Но таӧдз пондасны вӧтлысьны тіян бӧрся да дзескӧдны тіянӧс, вайӧдасны синагогаясӧ мыждыны, йӧртасны дзескыдінӧ да Менам ним вӧсна нуӧдасны ӧксыяс да юралысьяс водзӧ. Тайӧ лоӧ, медым ті висьталінныд Ме йылысь.
Кутӧй тӧд выланыд: водзвыв энӧ тӧждысьӧй, мый шуны асьнытӧ дорйӧм могысь.
Ме сета тіянлы мывкыдлун сёрнитны. Мыжалысьяс оз вермыны паныд сувтны тіянлы да налы оз сюр воча кывйыс.
Бать-мамныд, вокныд, рӧдвужныд да ёртъясныд вузаласны тіянӧс, кодсюрӧӧс весиг виасны. Менам ним вӧсна унаӧн мустӧмтасны тіянӧс.
Но тӧдӧй, весиг юрси сі оз усь юр вывсьыныд. Сьӧкыдлунсӧ венӧмӧн ті мезданныд ловнытӧ».
«Кор ті аддзанныд, мый Ерусалимсӧ кытшалӧма, тӧдӧй: матыстчис сійӧс бырӧдӧмыс.
Сэки Юдея муын олысьяс мед пышъясны керӧсъясӧ.
Коді лоӧ кар пытшкас, мед петас сэтысь; коді лоӧ кар саяс, мед оз пыр сэтчӧ.
Тайӧ мынтысян лунъяс, сэки став гижӧмаыс инас.
Сійӧ лунъясӧ ёна сьӧкыд лоӧ нӧбасьысьяслы да нёньӧдчысьяслы.
Тайӧ мусӧ ыджыд шог суас, да тайӧ войтыр вылас киссяс скӧрлуныс. Ӧтияс куласны шыпурт помысь, мӧдъясӧс мырдӧн нуӧдасны йӧз муӧ. Ерусалим карсӧ индӧм кадӧдз пондасны талявны мукӧд войтыр».
«Шондіын, тӧлысьын да кодзувъясын тыдовтчасны индысьпасъяс. Саридз ыджыд шыӧн гызяс, йӧзыс му вылын шызясны да шӧйӧвошасны. Енэжвыв вынъяс вӧрзясны, сьӧкыдлунъяс суӧмысь йӧзыс повзьӧмнысла кутасны садьсӧ воштыны. Сэки аддзасны кымӧр вылын ыджыд вынӧн да дзирдлунӧн локтысь Морт Пиӧс.
Кор ставыс тайӧ пондас инны, сэки веськӧдчӧй да лэптӧй юрнытӧ, ӧд матысмӧ тіян мездмӧмныд».
Исус висьталіс налы велӧданвисьт:
«Инжир пу да мукӧд пуяс вылӧ кӧ видзӧдам, аддзам: корйыс кӧ потӧ, сідзкӧ, гожӧмыс матын.
Тадзи, ставсӧ тайӧс аддзигӧн тӧдӧй: Енлӧн Юралӧмыс матын нин.
Веськыда висьтала тіянлы: ставыс тайӧ лоас ӧнія олысьяс дырйи на. Енэжыс да муыс бырас, а Менам кывъясӧй оз бырны.
Видзчысьӧй, медым сьӧлӧмныд эз кӧртась кодалӧм-гажӧдчӧмас да олӧм тӧждас, ӧд ставыс тайӧ чорзьӧдӧ тіянлысь сьӧлӧмнытӧ.
Мед сійӧ луныс оз су тіянӧс виччысьтӧг. Ӧд кыдзи налькйӧ шедӧны, сідзи жӧ сійӧ луныс суас став мувывса олысьсӧ.
Лоӧй дасьӧсь да пыр кевмысьӧй, медым верминныд мынны ставсьыс, мый виччысьӧ тіянӧс, да сувтны Морт Пи водзӧ».
Луннас Исус велӧдіс крамын, а войяссӧ колляліс Олив керӧсын.
Йӧзыс водз асывсяньыс волісны крамӧ кывзыны Сійӧс.
22 юр.
Матыстчисны Шомтӧм нянь сёян лунъяс, мӧд ногӧн кӧ, Ыджыд лун.
Аркирейяс да Индӧдӧ велӧдысьяс корсисны, кыдзи эськӧ вины Исусӧс, сӧмын полісны йӧзсьыс.
Сӧтана пырис Искариот Иуда пытшкӧ, сійӧ вӧлі дас кык велӧдчысьысь ӧти. Иуда муніс аркирейяс да крам видзысьяслӧн веськӧдлысьяс дінӧ да сёрнитчис накӧд Исусӧс вузалӧм йылысь.
Найӧ нимкодьпырысь кӧсйысисны сетны сылы сьӧм. Иуда налы кыв сетіс, сэсся кутіс корсьны лӧсялан кад, медым вузавны Исусӧс йӧз тӧдлытӧг.
Воис Шомтӧм нянь сёян лун, кодыр колӧ вӧлі начкыны Ыджыд лунся ыжӧс.
Петырӧс Иоанкӧд мӧдӧдіг Исус шуис налы: «Мунӧй, лӧсьӧдӧй миянлы Ыджыд лунся сёян».
Найӧ юалісны: «Кытчӧ шуан лӧсьӧднысӧ?»
Исус шуис: «Карас пыриганыд тіянлы паныдасяс гырничын ва нуысь морт.
Мунӧй да пырӧй сы бӧрся керкаас. Керка кутысьыслы висьталӧй: “Велӧдысь юасьӧ, кутшӧм вежӧсын Аслас велӧдчысьяскӧд вермас сёйны Ыджыд лунся ыжӧс”.
Сійӧ петкӧдлас тіянлы вылыс судтасьыс вольсалӧм ыджыд вежӧс. Сэні и лӧсьӧдӧй».
Найӧ мунісны да аддзисны: ставыс лои Исуслӧн висьталӧм серти. Найӧ дасьтісны Ыджыд лунся сёян.
Кор воис кадыс, Исус пуксис дас кыкнан апостолыскӧд сёйны.
Сійӧ шуис налы: «Сьӧкыдсӧ нутӧдз Ме ёна кӧсйи сёйны тіянкӧд тайӧ Ыджыд лунся ыжсӧ. Висьтала тіянлы: ог нин понды сёйны тайӧ сёянсӧ сійӧ лунӧдз, кор тайӧс лоӧ пӧртӧма Енлӧн Юраланінын».
Исус босьтіс чаша да Енмӧс аттьӧалӧмӧн шуис: «Босьтӧй да юӧй татысь быдӧн.
Висьтала тіянлы: Енлӧн Юралӧмыс вотӧдз ог понды юны виноград юансӧ».
Сэсся Исус босьтіс нянь, Енмӧс аттьӧалӧмӧн чегис няньсӧ да велӧдчысьяслы сетігас шуис: «Тайӧ Менам Яй, кодӧс лоӧ сетӧма тіян вӧсна.
Вӧчӧй тайӧс Менӧ казьтывлӧм могысь».
Сёйӧм бӧрас босьтіс чаша да сійӧс сетігас шуис: «Тайӧ чашаыс — Выль Йитӧд, кӧрталӧма Менам Вирӧн, сійӧ киссьӧ тіян вӧсна.
Со, Менӧ вузалысьлӧн киыс Мекӧд ӧти пызанысь судзӧдӧ.
Дерт, Морт Пи мунӧ водзвыв лӧсьӧдӧм туйӧдыс.
Но курыд шог Сійӧс вузалысьлы.»
Сэки велӧдчысьяс пондісны юасьны ӧта-мӧдныслысь, коді тайӧ на пиысь.
Велӧдчысьяс вензисны ас костаныс, коді на пиысь ыджыдджыкыс.
Исус висьталіс налы: «Ӧксыяс ыджыдалӧны йӧз вылын, юралысьяс бур вӧчысь ним шедӧдӧны. Но ті тадзи энӧ вӧчӧй. Тіян пиысь ыджыдыс мед лоас ичӧт. Юралысь кӧ, мед лоас кесъялысьӧн.
Пызан сайын пукалысьыс али кесъялысьыс ыджыдджык?
Абу-ӧ пызан сайын пукалысьыс?
Ме тіян пӧвстын кесъялысь.
Ті энӧ эновтӧй Менӧ сьӧкыдлунъяс дырйи.
Та вӧсна Ме сета тіянлы Юралӧм, кыдзи Батьӧй сетіс Меным. Менам Юраланінын ті понданныд сёйны-юны Мекӧд ӧти пызан сайын да пуксянныд юралан пуклӧсӧ мыждыны израильса дас кык чужанкотырӧс».
Господь шуис: «Кылан, Симон.
Сӧтана корис шердйыны тіянӧс шобдіӧс моз.
Но Ме кевмыси тэ вӧсна, медым эскӧмыд эз быр. Кор тэ бергӧдчан бӧр, ёнмӧд вокъястӧ».
Петыр шуис Исуслы: «Господьӧй, Тэкӧд ме дась пуксьыны дзескыдінӧ, весиг кувны».
Исус вочавидзис: «Петыр, тэныд шуа: талун петук чукӧсттӧдз на тэ куимысь соссян, мый тӧдан Менӧ».
Исус юаліс велӧдчысьяслысь: «Кор Ме мӧдӧдлі тіянӧс сьӧмтӧг, ноптӧг да кӧмтӧг, тіянлы ӧмӧй эз тырмывлы мыйкӧ?»
Найӧ шуисны: «Ставыс вӧлі».
Исус шуис налы: «Ӧні мӧдарӧ. Сьӧмыд кӧ эм, босьт сійӧс сьӧрсьыд, тшӧтш ноптӧ босьт. Абу кӧ, вузав вылыс паськӧмтӧ да ньӧб шыпурт.
Висьтала тіянлы: Ме йылысь гижӧма: “Сійӧс пуктісны Индӧдтӧг олысьяс лыдӧ”. Тайӧ гижӧмыслы колӧ инны.
Ме йылысь став шуӧмыс ӧні инӧ».
Найӧ шуисны: «Господьӧй, тані кык шыпурт».
Исус шуис: «Тырмас».
Карысь петӧм бӧрын Исус, кыдзи пыр вӧчліс, мӧдӧдчис Олив керӧсӧ. Велӧдчысьяс мунісны Сы бӧрся.
Сэтчӧ воӧм бӧрын Исус шуис налы: «Кевмысьӧй, мед ыштӧдӧмыс эз вермы тіянӧс».
Ачыс ылыстчис наысь из шыбитӧм ылнаӧ да пидзӧс вылас сувтӧмӧн кевмысис: «Батьӧй, кӧсъян кӧ, вешты Ме дінысь тайӧ чашасӧ. Сӧмын мед лоас Тэнад кӧсйӧм серти, а оз Менам».
Сэки андел лэччис енэжсянь да ёнмӧдіс Сійӧс.
Шогыскӧд вермасигӧн Исус ёнджыка на кевмысис. Сылӧн пӧсьыс вирӧн войталіс муӧ.
Кевмысьӧм бӧрас Исус чеччис да локтіс велӧдчысьяс дінас. Аддзис: найӧ шогысла унмовсьӧмаӧсь.
Сэки шуис налы: «Мый ті узянныд?
Чеччӧй, кевмысьӧй, мед ыштӧдӧмыс эз вермы тіянӧс».
Исуслӧн сёрнитігкості сэтчӧ локтісны йӧз. Найӧс вайӧдіс Иуда, дас кык велӧдчысьысь ӧти. Сійӧ матыстчис Исус дінӧ, медым окыштны Сійӧс.
Ӧд Иуда шуӧма локтӧмаяслы, кодӧс пӧ окышта, Сійӧ — Исус.
Исус шуис сылы: «Иуда, окыштӧмнад тай вузалан Морт Пиӧс».
Исускӧд вӧлысьяс гӧгӧрвоисны, мый водзӧ лоӧ, сэсся шуисны Сылы: «Господьӧй, перйыны-ӧ шыпуртнымӧс?»
На пиысь ӧти керыштіс аркирей кесйӧглысь веськыд пельсӧ.
Исус шуис: «Тырмас. Дугдӧй.»
Кесйӧглы пеляс инмӧдчылӧмӧн Исус бурдӧдіс сійӧс.
Сэсся аркирейяслы, крам видзысьяслӧн веськӧдлысьяслы да пӧрысьяслы, кодъяс локтісны кутны Сійӧс, шуис: «Лёк вӧчысьӧс моз зорйӧн-шыпуртӧн локтінныд босьтны Менӧ.
Ме быд лун вӧлі тіянкӧд крамын, но ті энӧ лэптылӧй кинытӧ Ме вылӧ. Ӧні тіян кадыс да пемыдыслӧн ыджыдалӧмыс».
Исусӧс кутысьяс вайӧдісны Сійӧс аркирей керкаӧ.
Петыр бӧрӧ кольччӧмӧн вӧтчис на бӧрся.
Йӧр пытшкас ӧзтісны бипур, йӧзыс пуксялісны сы гӧгӧр. Петыр тшӧтш пуксис.
Ӧти кесйӧг ань аддзис Петырӧс бипур дорысь да сы вылӧ сюся видзӧдлӧмӧн шуис: «Тайӧ мортыс тшӧтш Сыкӧд вӧлі».
Петыр соссис: «Ме ог тӧд Сійӧс, дона аньӧй».
Недыр мысти мӧд морт аддзис сійӧс да шуис: «Тэ дзик на пиысь».
Петыр шуис сылы: «Абу».
Час мысти нӧшта ӧти морт эскӧдӧмӧн шуис: «Тайӧ мортыс збыльысь вӧлі Сыкӧд. Сійӧ тшӧтш Галилеяысь».
Петыр шуис: «Бур мортӧй, ог гӧгӧрво, мый висьталан».
Тайӧс шуигӧн кыліс петуклӧн чукӧстӧм.
Бергӧдчылӧмӧн Господь видзӧдліс Петыр вылӧ. Сэки Петырлы уси тӧд вылас Господьлӧн шуӧмыс: «Петук чукӧсттӧдз на тэ куимысь соссян Меысь».
Петыр петіс да курыда бӧрддзис.
Исусӧс видзысьяс сералісны-лёкӧдісны да нӧйтісны Сійӧс. Сылысь чужӧмсӧ вевттьӧмӧн найӧ кучкалісны Сылы чужӧмас да шуалісны: «Висьтав, Пророк, коді кучкис Тэнӧ?»
Сэсся ёна на омӧльтісны Сійӧс.
Асывнас чукӧртчисны пӧрысьяс, аркирейяс да Индӧдӧ велӧдысьяс. Исусӧс вайӧдісны веськӧдлан котыр водзӧ. Найӧ шуисны: «Висьтав миянлы, Тэ-ӧ Кристос?»
Исус воча шуис: «Висьтала кӧ тіянлы, ті онӧ эскӧй.
Юала кӧ, онӧ вочавидзӧй да онӧ лэдзӧй Менӧ.
Ӧнісянь Морт Пи пондас пукавны Ставсӧвермысь Ен веськыдладорын».
Ставӧн шуисны: «Сідзкӧ, Тэ Ен Пи?»
Исус вочавидзис: «Ті асьныд тайӧс шуанныд».
Сэки найӧ шуисны: «Висьталысьяс миянлы оз нин ковны, ми асьным кылім тайӧс Сы вомсянь».
23 юр.
Сэки чукӧртчӧмаяс чеччисны да нуӧдісны Исусӧс Пилат дінӧ. Найӧ мыжалӧмӧн висьталісны: «Ми аддзылім: тайӧ Мортыс шызьӧдӧ миянлысь войтырӧс, ӧлӧдӧ кесарлы вот мынтӧмысь, асьсӧ ыдждӧдлӧ ӧксыӧн да Кристосӧн».
Пилат юаліс Исуслысь: «Тэ-ӧ юдейяслӧн Ӧксыыс?»
Исус вочавидзис: «Тэ шуан».
Пилат шуис аркирейяслы да став йӧзыслы: «Ог аддзы помкасӧ, мед мыждыны тайӧ Мортсӧ».
Но найӧ ӧтарӧ мыжалісны: «Велӧдӧмнас Сійӧ шызьӧдӧ йӧзсӧ став Юдея му пасьтала. Пондіс Галилеяын, ӧні татчӧ воис».
Галилея йылысь кылӧм бӧрын Пилат юаліс: «Сійӧ ӧмӧй Галилеяысь?»
Кор тӧдмаліс, мый Исус Ирӧд веськӧдлан муысь, мӧдӧдіс Сійӧс сы дінӧ. Буретш сійӧ лунъясӧ Ирӧд вӧлі Ерусалимын.
Исусӧс аддзӧмысь Ирӧдлы нимкодь лои, ӧд сійӧ важӧн нин кӧсйис аддзывны Сійӧс. Ирӧд уна кывліс Сы йылысь да виччысис аддзывны шензьӧданатор. Ирӧд ёна юасис Исусӧс, но Сійӧ воча кыв эз шу.
Сэні сулалысь аркирейяс да Индӧдӧ велӧдысьяс ӧтарӧ мыжалісны Исусӧс.
Ирӧд аслас шыпуртаяскӧд сераліс-лёкӧдіс Исусӧс, пасьтӧдіс Сійӧс озыр паськӧмӧ да бӧр мӧдӧдіс Пилат дінӧ.
Водзынсӧ Ирӧд да Пилат лӧгалісны ӧта-мӧд вылас, но тайӧ лунсяньыс найӧ кутісны ёртасьны.
Пилат чукӧртіс аркирейясӧс, юралысьясӧс да войтырсӧ, сэсся шуис налы: «Ті вайӧдінныд тайӧ Мортсӧ ме водзӧ да мыжаланныд Сійӧс йӧзсӧ шызьӧдӧмысь.
Ме тіян дырйи юаси Сійӧс да эг аддзы мыжсӧ. Сійӧ абу мыжа, мыйысь ті Сійӧс мыжаланныд. Ме мӧдӧді Сійӧс Ирӧд дінӧ, но Ирӧд тшӧтш абу аддзӧма Сылысь мыжсӧ. Сійӧ эз вӧч сэтшӧм мыжсӧ, мыйысь эськӧ колӧ вины Сійӧс. Тшӧкта нӧйтны, сэсся лэдза».
Быд во Ыджыд лунӧ йӧз корӧм серти Пилатлы колӧ вӧлі лэдзны дзескыдінысь ӧти мортӧс.
Став йӧзыс горӧдісны: «Вины Сійӧс.
Лэдз миянлы Варавваӧс.»
Варавва пукаліс дзескыдінын карас зык лэптӧмысь да мортӧс виӧмысь.
Пилат бара шыасис йӧз дінӧ, ӧд кӧсйис мездыны Исусӧс.
Но найӧ горӧдісны: «Тувъяв. Тувъяв Сійӧс.»
Пилат коймӧдысь шыасис на дінӧ: «Мый лёксӧ Сійӧ вӧчис?
Ме ог аддзы сэтшӧм мыжсӧ, мыйысь эськӧ колӧ вины Сійӧс. Тшӧкта нӧйтны, сэсся лэдза».
Йӧзыс лёкысь горзісны, тшӧктісны тувъявны Исусӧс. Йӧзыслӧн да аркирейяслӧн горзӧмыс веніс.
Пилат шуис вӧчны на ног. Налӧн корӧм серти сійӧ лэдзис дзескыдінысь зык лэптысьӧс, коді виис тшӧтш мортӧс. Исусӧс сетіс тувъявны, тадзи могмӧдіс йӧзыслысь кӧсйӧмсӧ.
Исусӧс нуӧдігӧн паныдасис киринеяса Симон, сійӧ локтӧ вӧлі видз-му вылысь. Сы вылӧ пуктісны крестсӧ да тшӧктісны мунны Исус бӧрся.
Уна йӧз муніс Исус бӧрся. Аньяс сыркъялӧмӧн бӧрдісны Сы вӧсна.
На дінӧ бергӧдчӧмӧн Исус шуис: «Ерусалимса аньяс, энӧ бӧрдӧй Ме вӧсна.
Бӧрдӧй ас вӧснаныд да ныв-пиныд вӧсна.
Воасны лунъяс, кор шуасны: “Шудаӧсь нӧбасьлытӧмъяс, кага вайлытӧмъяс да морӧснас нёньӧдлытӧмъяс”.
Сэки шуасны керӧсъяслы: “Усьӧй миян вылӧ.”
Мылькъяслы шуасны: “Вевттьӧй миянӧс.”
Тадзи кӧ вӧчӧны веж пуыскӧд, косыскӧд мый лоас.»
Исускӧд тшӧтш вины нуӧдісны кык лёк вӧчысьӧс.
Воисны Юр лы нима керӧсӧ. Сэні тувъялісны Исусӧс да Сыкӧд орччӧн лёк вӧчысьясӧс: ӧтисӧ веськыдладорас, мӧдсӧ шуйгаладорас.
Исус кевмис: «Батьӧй, прӧстит тайӧ йӧзсӧ, ӧд найӧ оз тӧдны, мый вӧчӧны».
Шыпуртаяс пудъясьӧмӧн юкисны Исуслысь паськӧмсӧ.
Йӧзыс сулалісны да видзӧдісны.
Юралысьяс накӧд сералӧмӧн шуалісны: «Мукӧдӧс мездіс — мед Асьсӧ ӧні мездас, Сійӧ кӧ Кристос, Енлӧн бӧрйӧмаыс».
Сералісны-лёкӧдісны Исусӧс тшӧтш шыпуртаяс. Найӧ матыстчӧмӧн мыччывлісны Сылы шома вина да шуалісны: «Тэ кӧ юдейяслӧн Ӧксы, мезды Асьтӧ».
Исус юр весьтын грек, латин да еврей кывйӧн вӧлі гижӧма: «Тайӧ юдейяслӧн Ӧксы».
Крестӧ тувъялӧм лёк вӧчысьясысь ӧтиыс Исусӧс омӧльтігмоз шуаліс: «Тэ кӧ Кристос, мезды Асьтӧ да миянӧс.»
Мӧдыс ӧлӧдіс сійӧс: «Тэ ӧмӧй Енсьыс он пов? Тэнӧ ӧд Сы моз жӧ тувъялӧма.
Миянӧс веськыда мыждӧма, асланым лёк вӧчӧмъясысь, а тайӧ Мортыс лёксӧ эз вӧчлы».
Сэсся шуис Исуслы: «Господьӧй, казьтышт менӧ, кор воан Аслад Юраланінӧ.»
Исус шуис: «Веськыда висьтала тэныд: талун лоан Мекӧд райын».
Лун шӧр кадӧ пемдіс став му пасьталаыс, пемыдыс сулаліс куим часӧдз.
Шонді югыдыс быри, крамын ӧшалысь дӧраыс шӧрипельӧ косяссис.
Исус ыджыд шыӧн горӧдіс: «Батьӧй, Тэнад киӧ сета Ассьым лолӧс.»
Тайӧс шуӧм бӧрын лолыс петіс.
Ставсӧ тайӧс аддзӧм бӧрын шыпуртаяслӧн веськӧдлысь Енмӧс ошкигтырйи шуис: «Тайӧ Мортыс збыльысь веськыда олысь вӧлӧма».
Став йӧзыс, кодъяс вӧлі чукӧртчӧмаӧсь видзӧдны ыджыд ворсӧм, ставсӧ тайӧс аддзӧм бӧрын морӧсаныс кучкалігтыр пондісны мунавны.
Исуслӧн тӧдсаясыс ылісянь видзӧдісны ставсӧ тайӧс. Сэні вӧліны тшӧтш Галилеяысь Сыкӧд ветлысь аньяс.
Сэні вӧлі Юдеяысь, Аримафея карысь Ӧсип нима морт. Тайӧ бур да веськыда олысь мортыс виччысис Енлысь Юралӧмсӧ. Ӧсип вӧлі веськӧдлан котырысь, но паныд сулаліс Исусӧс виӧмлы. Сійӧ муніс Пилат дінӧ да корис Исуслысь шойсӧ.
Ӧсип босьтіс крест вылысь шойсӧ, гартыштіс дӧраӧ да пуктіс кыртаӧ кералӧм дзебанінӧ, кытчӧ некодӧс на эз дзеблыны.
Вӧлі рыт, шойччан лунлы паныд.
Ӧсипкӧд тшӧтш вӧліны Галилеяысь Исускӧд локтӧм аньяс. Найӧ аддзылісны, кыдзи пуктісны Исуслысь шойсӧ дзебанінӧ. Дзебанінысь воӧм бӧрын аньяс дасьтісны чӧскыд дука мавтасъяс, а шойччан лунӧ Индӧд серти найӧ шойччисны.
24 юр.
Шойччан лун бӧрын водз асывнас аньяс дасьтӧм мавтасъясӧн да накӧд нӧшта кодсюрӧяс локтісны дзебанінӧ. Найӧ аддзисны: изсӧ вӧлі вештӧма пыранінсьыс.
Кор пырисны пытшкас, эз аддзыны Господь Исуслысь шойсӧ.
Аньяс шӧйӧвошисны. Виччысьтӧг на водзӧ сувтісны дзирдалан паськӧма кык морт.
Повзьӧмнысла аньяс копыртісны юрнысӧ. Тайӧ кык мортыс шуисны налы: «Мый ті корсянныд ловъяӧс кулӧмаяс пӧвстысь?
Сійӧ тані абу.
Сійӧ ловзис.
Уськӧдӧй тӧд выланыд, мый Сійӧ шуліс тіянлы Галилеяын на: “Талы колӧ лоны: Морт Пиӧс сетасны мыжаяс киӧ да тувъяласны крестӧ, но коймӧд луннас Сійӧ ловзяс”».
Сэки тӧд вылас уси налы Исуслӧн висьтавлӧмыс. Дзебанінысь локтӧм бӧрын аньяс висьталісны ставсӧ тайӧс дас ӧти велӧдчысьыслы, тшӧтш мукӧдыслы.
Тайӧ аньясыс вӧліны Магдала Марья, Иоанна, Яковлӧн Марья мамыс да нӧшта мукӧд аньяс на. Аньяс юӧртісны лоӧмтор йывсьыс апостолъяслы,
но найӧ эз эскыны, чайтісны, мый лӧсьӧдлӧны.
Петыр котӧрӧн уськӧдчис дзебанінӧ. Видзӧдліс пытшкас да аддзис сӧмын дзебан дӧраяссӧ. Петыр муніс сэтысь тайӧ лоӧмторсьыс ёна шензьӧмӧн.
Сійӧ лунӧ Исуслӧн кык велӧдчысь мунісны Эммаус нима сиктӧ, коді вӧлі Ерусалимсянь дас верст ылнаын. Найӧ сёрнитісны ас костаныс став тайӧ лоӧмтор йывсьыс.
Сёрнитіганыс Ачыс Исус матыстчис да пондіс мунны накӧд.
Но найӧ эз тӧдны Сійӧс, синнысӧ вӧлі пӧртӧма.
Исус юаліс налысь: «Мый йылысь сёрнитанныд, туй йӧз?
Мыйла ті жугыльӧсь?»
На пиысь Клеоп нима вочавидзис: «Буракӧ, Тэ дзик ӧтнад Ерусалимӧ локтысьясысь он тӧд, мый сэні лои тайӧ лунъясӧ?»
Исус юаліс: «Мый лои?»
Найӧ вочавидзисны: «Лёктор лои Назаретса Исускӧд. Тайӧ Мортыс Ен водзын да йӧз водзын кывнас и уджнас вӧлі вына пророк. Аркирейясным юралысьяскӧд мыждісны сійӧс да сетісны тувъявны крестӧ.
Ми лача кутім, мый Сійӧ мездас Израильӧс. Но тайӧ абу на ставыс. Талун коймӧд лун нин лоӧмторсяньыс.
Миян пиысь кодсюрӧ аньяс чуймӧдісны миянӧс. Водз асывнас найӧ ветлӧмаӧсь дзебанінас да шойсӧ абу аддзӧмаӧсь сэтысь. Локтӧм бӧрас висьталісны, аддзылім пӧ анделъясӧс. Анделъяс шуӧмаӧсь, Исус пӧ ловъя.
Миян пиысь кодсюрӧ тшӧтш ветласны дзебанінас да аддзасны, мый аньясыд збыль вӧлӧм висьталӧны. Исустӧ сэтысь оз аддзыны».
Исус шуис налы: «Гӧгӧрвотӧмӧсь тай ті. Сьӧкыда эсканныд пророк кывъясӧ.
Эз-ӧ тайӧ сьӧкыдыс пыр ков мунны Кристослы да пырны Аслас дзирдлунӧ?»
Мӧисей да пророк небӧгъяссянь Исус пондіс гӧгӧрвоӧдны налы став Гижӧдсьыс Ас йывсьыс шуӧмсӧ.
Найӧ матыстчисны сиктлань, кытчӧ мунісны.
Исус петкӧдліс, быттьӧ кӧсйӧ водзӧ мунны.
Но найӧ эз лэдзны Сійӧс, шуалісны: «Кольччы миянкӧд. Луныс рытлань нёровтчӧ».
Исус пырис накӧд керкаӧ да кольччис сэтчӧ.
Сёйиганыс Исус босьтіс нянь, Енмӧс аттьӧалӧмӧн чегис няньсӧ да сетіс налы.
Сэки налӧн синныс воссис, и найӧ тӧдісны Сійӧс.
Тайӧ здукас Исус лои налы тыдавтӧм.
Сэки найӧ шуисны: «Эз-ӧ сьӧлӧмным ыпъяв, кор Сійӧ сёрнитіс миянкӧд туй вылын да гӧгӧрвоӧдіс миянлы Гижӧдсӧ?»
Найӧ дзик пыр чеччисны да бӧр мунісны Ерусалимӧ. Сэні аддзисны дас ӧтикнан велӧдчысьсӧ да накӧд тшӧтш мукӧдсӧ. Велӧдчысьяс шуисны воӧмаяслы: «Господьным збыльысь ловзьӧма. Сійӧ петкӧдчылӧма Симонлы».
Тайӧ кыкыс висьталісны, мый лои туйын, да кыдзи тӧдісны Исусӧс нянь чегигас.
Сёрнитіганыс Ачыс Исус сувтіс на шӧрӧ да шуис: «Лӧнь олӧм тіянлы.»
Повзьӧмнысла найӧ мӧвпыштісны, мый тайӧ орт.
Исус шуис налы: «Мый ті поланныд? Мый тіянӧс майшӧдлӧ?
Видзӧдлӧй Менам ки-кок вылӧ, тайӧ Ме Ачым.
Инмӧдчылӧй Ме дінӧ, и ті асьныд аддзанныд.
Ӧд ловлӧн лы-яйыс абу, а Менам, видзӧдлӧй, эм».
Тайӧс шуӧм бӧрын Сійӧ петкӧдліс налы Ассьыс ки-коксӧ.
Найӧ ёна шензисны, нимкодьнысла эз вермыны эскыны.
Исус юаліс налысь: «Эм-ӧ тіян мыйкӧ сёйыштны?»
Сылы сетісны пӧжалӧм чери да малязі ма.
Сійӧ босьтіс да налӧн син водзын сёйис.
Сэсся Исус шуис налы: «Кор на Ме вӧлі тіянкӧд, Ме висьтавлі, мый инас ставыс, мый гижӧма Ме йылысь Мӧисей Индӧдын, пророк гижӧдъясын да псаломъясын».
Сэки Исус восьтіс налысь вежӧрсӧ гӧгӧрвоны Гижӧдъяс.
Сійӧ шуис налы: «Тадзи гижӧма: Кристослы колӧ мунны сьӧкыдыс пыр, кувны да коймӧд луннас ловзьыны, сэсся колӧ юӧртны Сы нимӧн Ерусалимын и водзӧ быд кыла войтырлы мыжъясысь бергӧдчӧм да мыжъяс прӧститӧм йылысь.
Ті асьныд ставсӧ кывлінныд да аддзылінныд.
Ме мӧдӧда тіянлы Батьӧйлысь кӧсйысьӧмасӧ.
Ті кольччӧй Ерусалимӧ, кытчӧдз тіян вылӧ оз лэччы енэжсянь выныс».
Исус петкӧдіс велӧдчысьяссӧ Вифаниялань, сэсся кисӧ лэптӧмӧн бурсиис найӧс.
Бурсиигмозыс Сійӧ кутіс ылыстчыны наысь да кыпӧдчыны енэжӧ.
Найӧ муӧдзыс копыртчылісны Сылы, сэсся ёна нимкодясигтыр локтісны бӧр Ерусалимӧ.
Енмӧс ошкӧмӧн найӧ пыр вӧліны крамынӧсь.
Аминь.
Иоан серти бур юӧр
1 юр.
Медводз вӧлі Кыв. Кывйыс вӧлі Енкӧд. Кывйыс вӧлі Ен.
Кывйыс водзысяньыс вӧлі Енкӧд.
Ставсӧ Сы пыр вӧчӧма. Сытӧг немтор абу вӧчӧма.
Сы пытшкын вӧлі олӧм. Олӧмыс йӧзыслы вӧлі югыдӧн.
Пемыдас югдӧдӧ югыдыс, эз пӧдты сійӧс пемыдыс.
Ен мӧдӧдіс Иоан нима мортӧс.
Сійӧ локтіс висьтавны Югыдыс йылысь, медым быдӧн эскис Югыдыслы.
Ачыс сійӧ эз вӧв югыдыс, сійӧ локтіс висьтавны Югыдыс йылысь.
Збыль Югыдыс, быд мортӧс Югдӧдысь, локтіс муюгыдас.
Сійӧ вӧлі муюгыдас, Сы пыр вӧчӧма муюгыдсӧ, но муюгыдыс эз тӧд Сійӧс.
Сійӧ локтіс Ас йӧз дінас, но найӧ эз сибӧдны Сійӧс.
Сійӧс сибӧдысьяслы, Сылы эскысьяслы, Сійӧ сетіс позянлун лоны Енлӧн ныв-пиӧн. Найӧ чужисны эз вирсянь, эз морт кӧсйӧмсянь да верӧс кӧсйӧмсянь, найӧ чужисны Енсянь.
Кывйыс лоис мортӧн, Сійӧ оліс миянкӧд буралӧм-збыльнас тыр.
Ми аддзылім Сылысь дзирдлунсӧ. Сӧмын ӧтка Пиыслы вуджӧ татшӧм дзирдлуныс Батьсяньыс.
Иоан гораа юӧртліс Сы йылысь: «Тайӧ дзик сійӧ Мортыс, код йылысь ме висьтавлі, мый ме бӧрся Локтысьыс меысь ыджыдджык, ӧд Сійӧ меысь водзджык вӧлӧма».
Миянлы быдӧнлы Сы озырлунысь вичмис буралӧм вылӧ буралӧм.
Индӧдсӧ вӧлі сетӧма Мӧисей пыр, а буралӧмыс да збыльыс воис Исус Кристос пыр.
Йӧзыс Енсӧ эз аддзывлыны, сӧмын ӧтка Пиыс, Бать дінас олысьыс, восьтіс Сійӧс миянлы.
Юдейяслӧн веськӧдлысьяс мӧдӧдісны Ерусалимысь попъясӧс да левитъясӧс юавны Иоанлысь: «Коді тэ?»
Иоан соссьытӧг веськыда шуис: «Ме абу Кристос».
Сэки сылысь юалісны: «Коді нӧ тэ? Илля?»
Сійӧ шуис: «Абу».
Найӧ бара юалісны: «Пророк-ӧ тэ?»
Сійӧ вочавидзис: «Абу».
Сэки сылы шуисны: «Коді нӧ тэ?
Мый миянлы вочавидзны миянӧс мӧдӧдысьяслы? Мый шуан ас йывсьыд?»
Иоан вочавидзис налы: «Ме овтӧминын горзысьлӧн шыыс: “Веськӧдӧй-шыльӧдӧй туйсӧ Господьлы”. Тадзи коркӧ висьталіс Исай пророк».
Фарисейяссянь мӧдӧдӧмаяс юалісны Иоанлысь: «Тэ кӧ абу Кристос, абу Илля, абу пророк, мыйла, сідзкӧ, йӧзсӧ пыртан?»
Иоан вочавидзис налы: «Ме пырта сӧмын ваӧн, но тіян пӧвстын эм морт, кодӧс ті онӧ тӧдӧй.
Сійӧ ме бӧрын локтӧ, но Сійӧ меысь водзджык нин вӧлӧма.
Ме ог шогмы разьны Сылысь кӧмкот кӧвсӧ».
Тайӧ вӧлі Вифаварын, Йӧрдан ю сайын, кӧні Иоан пыртліс йӧзсӧ.
Аскинас Иоан аддзис сы дінӧ локтысь Исусӧс да шуис: «Видзӧдлӧй, тайӧ Енлӧн Баля. Сійӧ вештӧ йӧзлысь мыжъяссӧ.
Сы йылысь ме висьтавлі нин, мый ме бӧрся локтӧ Морт, коді меысь ыджыдджык, ӧд Сійӧ меысь водзджык вӧлӧма.
Сійӧс ме эг тӧдлы, но локті ваӧн пыртны, медым Израиль тӧдмаліс Сійӧс».
Иоан веськыда висьталіс: «Ме аддзылі, кыдзи енэжсянь гулю моз лэччис Лов да кольччис Сы вылӧ.
Ме эг тӧдлы Сійӧс, но ваӧн пыртны менӧ Мӧдӧдысь шуис меным: “Кор Тэ аддзан, мый код вылӧ кӧ лэччас Лов да кольччас Сы вылӧ, буретш Сійӧ кутас пыртны Вежа Лолӧн”.
Ме аддзылі тайӧс да эскӧда тіянӧс: Сійӧ — Ен Пи».
Мӧд луннас Иоан аслас кык велӧдчыськӧд бара сулаліс ю дорын.
Локтысь Исусӧс аддзигӧн сійӧ шуис: «Видзӧдлӧй, тайӧ Енлӧн Баля.»
Тайӧс кылӧм бӧрын кыкнан велӧдчысьыс мӧдӧдчисны Исус бӧрся.
Исус бергӧдчыліс, аддзис Сы бӧрся локтысьясӧс да юаліс налысь: «Мый тіянлы колӧ?»
Найӧ вочавидзисны: «Велӧдысь, кӧні Тэ олан?»
Исус шуис налы: «Локтӧй да видзӧдлӧй».
Найӧ мунісны, аддзисны Сылысь оланінсӧ да кольччисны сэтчӧ лунтыр кежлӧ.
Вӧлі нёль час гӧгӧр.
Иоанлӧн велӧдчысьяс да Исус бӧрся мунысьяс пиысь ӧтиыс вӧлі Ӧндрей, Симон-Петырлӧн вокыс.
Сійӧ медводз корсис Симон воксӧ да висьталіс сылы: «Ми аддзим Мессияӧс.» Мӧд ногӧн кӧ, тайӧ лоӧ Кристос. Ӧндрей вайӧдіс воксӧ Исус дінӧ.
Исус видзӧдліс сы вылӧ да шуис: «Тэ Симон, Ионалӧн пи. Тэнад нимыд лоас Кифа». Сылӧн вежӧртасыс — из, мӧд ногӧн кӧ — Петыр.
Аскинас Исус мӧдӧдчис Галилея муӧ. Сэтысь аддзис Филипӧс да шуис сылы: «Лок Ме бӧрся».
Ӧндрей да Петыр моз Филип вӧлі Випсаида карысь.
Филип аддзис Нафанаилӧс да шуис сылы: «Ми аддзим Сійӧс, код йылысь вӧлі висьталӧма Мӧисей Индӧдын да пророк гижӧдъясын. Тайӧ Назаретысь Исус, Ӧсиплӧн пи».
Нафанаил шуис Филиплы: «Вермас-ӧ мыйкӧ бурыс лоны Назаретысь?»
Филип вочавидзис: «Лок да ачыд видзӧдлы».
Исус аддзис Сы дінӧ локтысь Нафанаилӧс да шуис сы йылысь: «Тайӧ збыльысь израильса морт, сійӧ оз ылӧдчы».
Нафанаил юаліс Сылысь: «Кытысь Тэ тӧдан менӧ?»
Исус вочавидзис: «Филип кортӧдз на Ме аддзылі тэнӧ инжир пу улысь».
Нафанаил шуис: «Велӧдысьӧй, Тэ Ен Пи, Тэ Израиль Ӧксы.»
Исус шуис сылы: «Ме шуи, мый аддзылі тэнӧ инжир пу улысь, да та вӧсна тэ эскан. Но таысь ыджыдджыкӧс на тэ аддзан».
Сэсся содтіс: «Веськыда, веськыда висьтала тіянлы: ӧнісянь ті кутанныд аддзыны восьса енэжсӧ да Енлысь анделъяссӧ, кодъяс лэччӧны Ен Пи дінӧ да кыпӧдчӧны енэжас».
2 юр.
Кык лун мысти Галилеяса Кана карын вӧлі кӧлысь. Сэні вӧлі Исуслӧн мамыс.
Исусӧс да велӧдчысьяссӧ тшӧтш вӧлі корӧмаӧсь кӧлысь вылас.
Кор винаыс помасис, Исуслӧн мамыс шуис Сылы: «Налӧн винаыс бырӧма».
Исус вочавидзис: «Аньӧй, мый Меным таӧдз, ӧд Менам кадыс эз на во».
Мамыс шуис кесйӧгъяслы: «Ставсӧ вӧчӧй Сылӧн шуӧм серти».
Сэні вӧлі изйысь вӧчӧм квайт ва доз, быд дозйӧ ваыс вӧлі тӧрӧ сё литра гӧгӧр. Тайӧ дозъяснас юдейяс вӧдитчисны сӧстӧммӧдчӧм могысь.
Исус шуис кесйӧгъяслы: «Тыртӧй дозъяссӧ ваӧн».
Найӧ тырысӧдзыс кисьталісны васӧ дозъясас.
Сэсся шуис налы: «Ӧні гумовтӧй васӧ да мыччӧй сійӧс кӧлысь нуӧдысьлы».
Найӧ мыччисны.
Кӧлысь нуӧдысь видліс ваысь артмӧм винасӧ, но сійӧ эз тӧд, кытысь тайӧ винаыс. Та йылысь тӧдісны сӧмын ва дозъяссӧ тыртысьяс. Сэки кӧлысь нуӧдысь корис верӧспусӧ да шуис сылы: «Ставныс медводз бур винанас юктасьӧны, сэсся йӧз коддзӧм бӧрас лёкджыкнас.
А тэ ӧнӧдз бур винасӧ видзӧмыд».
Тайӧ медводдза шензьӧданаторсӧ Исус вӧчис Галилеяса Кана карын. Тадзи петкӧдліс Сійӧ Ассьыс дзирдлунсӧ, и велӧдчысьясыс кутісны эскыны Сылы.
Та бӧрти Исус мамыскӧд, вокъясыскӧд да велӧдчысьясыскӧд мунісны Капернаум карӧ.
Сэтчӧ найӧ кольччисны лун-мӧд кежлӧ.
Матыстчис юдейяслӧн Ыджыд лун, и Исус локтіс Ерусалимӧ. Сійӧ аддзис: крамын вузалӧны ӧшъясӧс, ыжъясӧс, гулюясӧс да вежлалӧны сьӧм.
Исус кӧвъясысь кыыштіс орс да кутіс вӧтлавны сійӧн крамысь вузасьысьяссӧ, тшӧтш налысь ыжъяссӧ да ӧшъяссӧ. Сійӧ пӧрлӧдліс сьӧм вежысьяслысь пызанъяссӧ да кисьталіс налысь сьӧмнысӧ.
Гулюӧн вузасьысьяслы Сійӧ шуис: «Босьтӧй найӧс татысь. Энӧ пӧртӧй Менам Батьлысь керкасӧ вузасянінӧ.»
Сэки Исуслӧн велӧдчысьяслы тӧд выланыс уси Гижӧдас висьталӧмыс: «Тэнад керка вӧсна вежӧгтӧмыс топӧдӧ Менсьым сьӧлӧмӧс».
Юдейяслӧн веськӧдлысьяс шуисны Исуслы: «Кутшӧм ногӧн Тэ эскӧдан миянӧс, мый Тэныд позьӧ тадзи вӧчнысӧ?»
Исус вочавидзис: «Жугӧдӧй тайӧ крамсӧ, и Ме куим лунӧн выльысь лэпта сійӧс».
Найӧ воча шуисны Исуслы: «Тайӧ крамсӧ лэптісны нелямын квайт во чӧж, а Тэ куим лунӧн кӧсъян лэптыны сійӧс?»
Крам йылысь сёрнитігӧн збыльвылас Исус висьталіс Аслас вир-яй йылысь.
Исуслӧн ловзьӧм бӧрын велӧдчысьясыслы усины тӧд выланыс Сылӧн кывъясыс.
Сэки найӧ эскисны Гижӧдӧ да Исуслӧн кывъясӧ.
Ерусалимын Ыджыд лун дырйи унаӧн аддзылісны Исуслысь шензьӧданаторъяс вӧчӧмсӧ да эскисны Сылы.
Но Исус эз эскы налы, ӧд Сійӧ тӧдіс найӧс ставнысӧ. Сылы эз ковны йӧз йылысь висьталысьяс, ӧд Сійӧ тӧдіс быд мортлысь сьӧлӧмсӧ.
3 юр.
Юдейяслӧн веськӧдлысьяс пӧвстын вӧлі Никодим нима фарисей.
Войнас сійӧ локтіс Исус дінӧ да шуис Сылы: «Велӧдысьӧй, ми тӧдам: Тэ Енсянь локтӧм Велӧдысь.
Ӧд Тэ моз некод оз вермы вӧчны шензьӧданаторъяссӧ, оз кӧ ло сыкӧд Ен».
Исус вочавидзис: «Веськыда, веськыда висьтала тэныд: мортыс оз вермы аддзыны Енлысь Юраланінсӧ, оз кӧ сійӧ выльысь чуж».
Никодим юаліс Сылысь: «Вермас-ӧ мортыс выльысь чужны, пӧрысь кӧ нин сійӧ?
Ӧд сійӧ оз вермы мам кынӧмас бӧр пырны да мӧдысь чужны».
Исус вочавидзис: «Веськыда, веськыда висьтала тэныд: мортыс кӧ оз чуж васянь да Ловсянь, сійӧ оз вермы пырны Енлӧн Юраланінӧ.
Вир-яйсянь чужысь эм вир-яй, а Ловсянь чужысь эм лов.
Эн шензьы, Ме кӧ висьтала, мый тіянлы колӧ выльысь чужны.
Тӧв пӧльтӧ, кӧні кӧсйӧ. Сылысь шысӧ кылан, сӧмын он тӧд, кысянь сійӧ локтӧ да кытчӧ мунӧ. Ловсянь чужыськӧд тшӧтш тадзи овлӧ».
Никодим юаліс Сылысь: «Вермас ӧмӧй тадзи лоны?»
Исус вочавидзис: «Ачыд тэ — Израиль войтырӧс велӧдысь, а тайӧс весиг он тӧд?
Веськыда, веськыда висьтала тэныд: ми сёрнитам сы йылысь, мый тӧдам, да висьталам сы йылысь, мый аддзылім, но ті миян висьталӧмӧ онӧ эскӧй.
Ме висьталі тіянлы мувывсаыс йылысь, но ті энӧ эскӧй Меным. Эсканныд-ӧ, висьтала кӧ тіянлы енэжвывсаыс йылысь?
Енэжас олысь да енэжсянь лэччӧм Морт Пиысь кындзи енэжас некод на эз кыпӧдчыв.
Кыдзи овтӧминын Мӧисей вывлань кыпӧдіс змейӧс, тадзи лоӧ кыпӧдӧма тшӧтш Морт Пиӧс, медым Сылы эскысь эз быр, а помтӧг оліс.
Ӧд Енмыслы сэтшӧм мусаӧсь йӧзыс, мый сетіс Ассьыс ӧтка писӧ, медым Сылы эскысь эз быр, а помтӧг оліс.
Енмыс мӧдӧдіс Ассьыс Писӧ муюгыдас йӧзӧс мездыны, а эз мыждыны.
Сылы эскысьӧс оз ло мыждӧма, а эскытӧмӧс мыждӧма нин, ӧд сійӧ эз эскы Енлӧн ӧтка Пилы.
Мыждӧмыс сыын, мый му вылас локтіс югыдыс, но йӧзыслы мусаджык вӧлі пемыдыс, ӧд налӧн уджъясыс лёкӧсь.
Лёксӧ вӧчысь мустӧмтӧ югыдсӧ. Сійӧ оз лок югыдас, медым сылӧн лёк уджъясыс эз йӧзасьны. Збыль серти олысь локтӧ югыдас, медым тыдовтчисны сылӧн Енсянь уджъясыс».
Та бӧрти Исус локтіс велӧдчысьясыскӧд Юдея муӧ, сэні оліс накӧд да пыртіс йӧзсӧ.
Иоан тшӧтш пыртіс йӧзсӧ Енонын, Салимсянь матын, ӧд ваыс сэні уна вӧлі. Йӧзыс волісны сэтчӧ пыртчыны.
Сэки Иоанӧс абу на вӧлі пуксьӧдӧмаӧсь дзескыдінӧ.
Ӧтчыд Иоанлӧн велӧдчысьясыс венӧ воисны юдейяскӧд сӧстӧммӧдчӧм йылысь.
Велӧдчысьясыс локтісны Иоан дінӧ да шуисны: «Велӧдысь, сійӧ Мортыс, коді вӧлі тэкӧд Йӧрдан ю мӧдлапӧлын да код йылысь тэ висьтавлін, ӧні Сійӧ тшӧтш пыртӧ. Сы дінӧ ставныс мунӧны».
Иоан вочавидзис: «Мортыс нинӧм оз вермы босьтны аслыс, оз кӧ ло сетӧма сылы енэжсянь.
Ті асьныд кывлінныд менсьым висьталӧмӧс: “Ме абу Кристос, ме сӧмын Сы водзвылын мӧдӧдӧмаыс”.
Верӧспуӧн шуӧны сійӧс, кодлӧн эм гӧтырпу. Верӧспулӧн ёртыс орччӧн сулалӧ да нимкодясьӧмӧн кывзӧ сылысь сёрнисӧ.
Ме тшӧтш тадзи нимкодяся, и менам нимкодьлунӧй помтӧм-дортӧм.
Кристослы колӧ быдмыны, а меным ичӧтмыны».
Вылісянь Локтысьыс ставсьыс вылын.
Мувывса мортсӧ вӧчӧма муысь, сійӧ сёрнитӧ мувывсаыс йылысь.
А енэжсянь Локтысьыс ставсьыс вылын. Сійӧ висьталӧ, мый аддзыліс да кывліс, но Сылысь висьталӧмсӧ йӧзыс сьӧлӧманыс оз сибӧдны.
Мортыс кӧ сибӧдӧ Сылысь кывъяссӧ, тайӧн петкӧдлӧ, мый Енмыс висьталӧ збыльсӧ. Кодӧс Енмыс мӧдӧдіс, Сійӧ Енлысь кывъяссӧ висьталӧ, ӧд Енмыс Сылы лышкыда Ловсӧ сетӧ.
Пиыс муса Батьыслы, и Батьыс ставсӧ сетіс Сы киӧ.
Коді эскӧ Пиыслы, сылӧн эм помтӧм олӧм. Коді оз эскы Пиыслы, сылӧн оз ло олӧмыс, но Енлӧн скӧрлуныс лоас сы вылын.
4 юр.
Фарисейяс кывлӧмаӧсь, Исуслӧн пӧ Иоан дорысь унджык нин велӧдчысьыс, Сійӧ пӧ унджык йӧзӧс пыртӧ. Дерт, Исус эз Ачыс пырт, а пыртісны Сылӧн велӧдчысьясыс. Кор Исус тӧдмаліс, мый фарисейяс кывлӧмаӧсь та йылысь, Сійӧ эновтіс Юдея му да бӧр муніс Галилеяӧ.
Сылы ковмис мунны Самария му пыр.
Исус воис Самария муӧ, Сикар нима карӧ. Тайӧ карсяньыс матын вӧлі му, кодӧс Яков сетлӧма Ӧсип пиыслы.
Сэні вӧлі Яковлӧн юкмӧс.
Дыр мунӧмысла Исус мудзис да пуксис шойччыштны юкмӧс дорас.
Вӧлі лун шӧр гӧгӧр.
Самарияса ань локтіс сэтчӧ вала.
Исус шыасис сы дінӧ: «Юктӧдышт Менӧ ванад».
Исуслӧн велӧдчысьясыс вӧлі мунӧмаӧсь карӧ сёян ньӧбны.
Ань шуис Исуслы: «Ачыд Тэ юдей, а коран менсьым, самарияса аньлысь, ва юны?»
Юдейяс ӧд самарияса войтыркӧд оз волысьны.
Исус вочавидзис аньлы: «Тэ кӧ тӧдін Енлысь сетӧмторсӧ да Сійӧс, коді шуӧ тэныд тайӧ кывъяссӧ: “Юктӧдышт Менӧ ванад”, тэ эськӧ ачыд корин Сылысь васӧ, и Сійӧ сетіс тэныд ловъя ва».
Ань шуис Сылы: «Господьӧй, юкмӧсыс ӧд джуджыд, мыйӧн нӧ Тэ сэтысь гумовтан? Кытысь Тэ ловъя васӧ босьтан?
Тэ ӧмӧй Яков батьным дорысь ыджыдджык? Тайӧ юкмӧссӧ сійӧ сетӧма миянлы. Татысь сійӧ ачыс юлӧма, тшӧтш сылӧн пияныс да пемӧсъясыс».
Исус вочавидзис: «Тайӧ васӧ юысьлӧн горшыс бара на косьмас. Но Ме сета ва, и коді кутас юны тайӧ васӧ, сылӧн горшыс некор оз кут косьмыны.
Ваыс, кодӧс Ме сета сылы, лоӧ сы пытшкын помтӧм олӧмӧ визувтысь дзулькйӧн».
Ань шуис Сылы: «Господьӧй, вай меным тайӧ васӧ, медым менам горшӧй эз нин косьмы. Сэки татчӧ ваысла волыны оз ковмы».
Исус шуис аньлы: «Ветлы, кор верӧстӧ да лок татчӧ».
Ань вочавидзис: «Верӧсӧй менам абу».
Исус шуис: «Тэ веськыда висьталін, мый тэнад верӧсыд абу. Тэ витысь верӧс сайын вӧлін, но сійӧ мортыс, кодкӧд тэ ӧні олан, абу верӧс тэныд. Тэ збыльсӧ висьталан».
Ань шуис Сылы: «Господьӧй, ме аддза, мый Тэ — пророк.
Миян батьяс копрасисны-кевмысисны Енмыслы тайӧ керӧсас. А ті, юдейяс, шуанныд, колӧ пӧ копрасьны Енмыслы сӧмын Ерусалимын».
Исус шуис сылы: «Аньӧй, эскы Меным, воас кад, кор ті онӧ кутӧй копрасьны Батьлы тайӧ керӧсас да Ерусалимын.
Ті, самарияса войтыр, копрасянныд Сылы, кодӧс онӧ тӧдӧй. А ми копрасям Сылы, кодӧс тӧдам, ӧд мездмӧмыс воӧ юдейяссянь.
Воас кад да воис нин, кор Батьлы збыльысь копрасьысьяс кутасны кевмысьны Сылы Ловсянь да збыльыс серти. Татшӧм кевмысьысьясӧс корсьӧ Аслыс Бать.
Енмыс эм Лов. Сідзкӧ, Енлы кевмысьысьяслы колӧ кевмысьны Ловсянь да збыльыс серти».
Ань шуис Исуслы: «Тӧда, мый локтас Мессия-Кристос.
Сійӧ локтас да, ставсӧ висьталас миянлы».
Исус шуис аньлы: «Тайӧ Ме, тэкӧд Сёрнитысьыс».
Сійӧ кадас воисны велӧдчысьясыс. Найӧ шензисны, мый Исус сёрнитӧ анькӧд.
Сӧмын некод на пиысь эз юав, мыйла да мый йылысь Сійӧ сёрнитӧ анькӧд.
Сэки ань колис ва дозсӧ, муніс карас да шуис йӧзыслы: «Локтӧй, видзӧдлӧй тайӧ Мортыс вылӧ. Сійӧ висьталіс меным ставсӧ, мый ме вӧчлі.
Абу-ӧ Сійӧ Кристос?»
Йӧзыс петісны карсьыс да локтісны Исус дінӧ.
Сэккості велӧдчысьясыс корисны Исусӧс: «Велӧдысь, лок сёйны.»
Исус шуис налы: «Менам эм сёян, код йылысь ті онӧ тӧдӧй».
Велӧдчысьясыс ас костаныс шензисны: «Эз-ӧ кодкӧ вай Сылы сёянсӧ?»
Исус шуис налы: «Менам сёянӧй — ставсӧ вӧчны Менӧ Мӧдӧдысьлӧн кӧсйӧм серти да эштӧдны Сылысь уджсӧ.
Ті шуанныд, нёль тӧлысь мысти пӧ воас вундан кад.
Висьтала тіянлы: видзӧдлӧй кӧдзӧм муяс вылӧ. Найӧ кельдӧдӧмаӧсь нин вундігкежлӧ.
Вундысь босьтӧ удждонсӧ ӧні нин, сійӧ чукӧртӧ няньсӧ помтӧм олӧмӧ.
Та вӧсна кӧдзысь да вундысь ӧтвыв нимкодясьӧны. Кывйӧз веськыда висьталӧ: “Ӧти кӧдзӧ, а мӧд вундӧ”.
Ме мӧдӧді тіянӧс вундыны му вылӧ, кытчӧ ті энӧ кӧдзлӧй. Сэні мырсисны мукӧдыс, но ті накӧд тшӧтш идраланныд быдтӧмторсӧ».
Ань шуис сійӧ карас олысьяслы: «Исус висьталіс меным ставсӧ, мый ме вӧчлі». Та вӧсна самарияса йӧз унаӧн пондісны эскыны Исуслы.
Найӧ локтісны Исус дінӧ да корисны олыштны Сійӧс на ордын.
Сійӧ кольччыліс сэтчӧ кык лун кежлӧ.
Ачыс Исус сёрнитіс накӧд, та вӧсна нӧшта на унджыкӧн эскисны Сылы.
Найӧ шуисны аньлы: «Ӧні ми эскам огӧ сӧмын тэнад висьталӧм вӧсна. Ми эскам сы понда, мый асьным кывлім Сійӧс да тӧдам: Сійӧ збыльысь муюгыдсӧ Мездысь, Кристос».
Кык лун мысти Исус муніс сэтысь Галилея муӧ.
Исус шуліс, пророкӧс пӧ ас муас оз пыдди пуктыны.
Кор Исус локтіс Галилеяӧ, сэтчӧс йӧзыс сибӧдісны Сійӧс. Ӧд найӧ тшӧтш ветлісны Ерусалимӧ Ыджыд лун кежлӧ да аддзылісны, мый Исус вӧчліс сэні.
Исус бара локтіс Галилеяса Кана карӧ, кӧні Сійӧ васӧ пӧртліс винаӧ.
Галилеяса Капернаум карын оліс ӧксылӧн отсасьысь, кодлӧн пиыс вӧлі висьӧ.
Отсасьысь кывліс, мый Исус локтӧма Юдея муысь Галилеяӧ. Сійӧ локтіс Исус дінӧ да корис Сійӧс бурдӧдны писӧ, коді вӧлі кулан выйын.
Исус шуис сылы: «Ті онӧ эскӧй, онӧ кӧ аддзылӧй индысьпасъяс да шензьӧданаторъяс.»
Ӧксылӧн отсасьысь шуис Исуслы: «Господьӧй, волы кытчӧдз пиӧй ловъя на.»
Исус шуис сылы: «Мун, тэнад пиыд бурдіс».
Ӧксылӧн отсасьысь эскис Исуслӧн кывъясӧ да муніс гортас.
Туяс сылы паныдасисны кесйӧгъясыс. Найӧ шуисны: «Тэнад пиыд бурдіс.»
Сійӧ юаліс налысь, корджык пиыслы кокньӧдіс.
Найӧ вочавидзисны: «Тӧрыт, час лунӧ, биа висьӧмыс эновтіс сійӧс».
Сэки батьыс гӧгӧрвоис, мый буретш сійӧ кадас воис бурдӧмыс, кор Исус шуис сылы: «Тэнад пиыд бурдіс». Сэки батьыс да став сылӧн гортсаыс эскисны Исуслы.
Тайӧ вӧлі мӧд шензьӧданатор, кодӧс вӧчис Исус Юдея муысь Галилеяӧ воӧм бӧрын.
5 юр.
Исус мӧдӧдчис Ерусалимӧ, сэки вӧлі юдейяслӧн гажӧдчан кад.
Ерусалимын, Ыж дзиръя дорын, вӧлі ва йӧртӧд. Юдейяс ва йӧртӧдлы сетлӧмаӧсь Вифезда ним. Ва йӧртӧд дінас вӧлі вит пыранін, найӧ вӧліны вевт улынӧсь.
Пыранінъясас куйлісны уна висьысь: синтӧмъяс, коктӧмъяс, косьмӧм ки-кокаяс. Найӧ виччысисны ва гызьӧм.
Господьлӧн анделыс корсюрӧ лэччывліс йӧртӧдӧ гызьӧдны васӧ.
Гызьӧм ваӧ медводдза пырысьыс быдпӧлӧс висьӧмысь бурдліс.
Сэні пыранінас куйліс комын кӧкъямыс во чӧж висьысь морт.
Исус тӧдіс, мый тайӧ мортыс дыр нин висьӧ. Исус аддзис сійӧс да юаліс: «Кӧсъян-ӧ тэ бурдны?»
Висьысь вочавидзис: «Господьӧй, гызьӧм ваас пырнысӧ отсалысьыс меным абу. Менам пыртӧдз кодкӧ мӧд нин удитӧ пырны».
Исус шуис сылы: «Чеччы, босьт вольпасьтӧ да ветлы».
Сійӧ дзик пыр бурдіс, босьтіс вольпасьсӧ да пондіс ветлӧдлыны.
Тайӧ вӧлі шойччан лунӧ.
Та вӧсна юдейяслӧн веськӧдлысьяс шуисны бурдӧм мортлы: «Талун шойччан лун, тэныд оз позь вольпасьтӧ нуны».
Сійӧ вочавидзис: «Бурдӧдысьӧй шуис меным: “Босьт вольпасьтӧ да ветлы”».
Сылысь юалісны: «Коді тэныд тшӧктіс босьтны вольпасьтӧ да ветлыны?»
Но бурдӧм мортыс эз тӧд, коді Сійӧ, ӧд Исус саяліс йӧз пӧвстас.
Та бӧрти Исус аддзис бурдӧм мортӧс крамысь да шуис сылы: «Ӧні тэ бурдін.
Водзӧ эн вӧч мыжсӧ, медым тэныд лёкджык эз ло».
Мортыс муніс да висьталіс юдейяслӧн веськӧдлысьяслы, мый сійӧс бурдӧдіс Исус.
Шойччан лунӧ татшӧмторсӧ вӧчӧмысь юдейяслӧн веськӧдлысьяс пондісны дзескӧдны Исусӧс да кӧсйисны вины Сійӧс.
Исус шуис налы: «Менам Батьӧй дугдывтӧг уджалӧ, и Ме уджала».
Сэки юдейяслӧн веськӧдлысьяс ёнджыка на кӧсйисны вины Исусӧс, ӧд Сійӧ торкис шойччан лунсӧ да шуис Енсӧ Аслас Батьӧн. Тадзи ӧткодяліс Асьсӧ Енкӧд.
Исус шуис налы: «Веськыда, веськыда висьтала тіянлы: Пиыс нинӧм оз вермы вӧчны Ассяньыс, оз кӧ аддзыв Батьыслысь вӧчӧмсӧ.
Ӧд мый Батьыс вӧчӧ, сійӧс тшӧтш Пиыс вӧчӧ.
Пиыс муса Батьыслы. Ставсӧ, мый вӧчӧ Батьыс, Пиыслы петкӧдлӧ. Батьыс нӧшта на ыджыдджык уджъяс Пиыслы петкӧдлас, ті весиг чуйманныд.
Батьыс ловзьӧдӧ кулӧмаясӧс да сетӧ налы олӧм. Пиыс тшӧтш сетӧ олӧм, кодлы кӧсйӧ.
Батьыс некодӧс оз мыжды. Мыждан вынсӧ Сійӧ сетіс Пиыслы, медым став йӧзыс бурӧ пуктісны Писӧ Батьсӧ моз.
Коді оз бурӧ пукты Писӧ, сійӧ оз бурӧ пукты и Батьсӧ, коді мӧдӧдіс Писӧ.
Веськыда, веськыда висьтала тіянлы: коді кывзӧ Менсьым кывъясӧс да эскӧ Менӧ Мӧдӧдысьлы, сылӧн эм помтӧм олӧм. Сійӧс оз кутны мыждыны, но кулӧмсьыс сійӧ вуджис нин олӧмас.
Веськыда, веськыда висьтала тіянлы: воас кад да воис нин, кор кулӧмаяс кыласны Ен Пилысь гӧлӧс шысӧ. Сэки Сійӧс кылысьяс ловзясны.
Батьыс сетӧ олӧм быдӧнлы, Пиыслы Сійӧ тшӧтш сетіс вын — сетны олӧм быдӧнлы.
Батьыс сетіс Пиыслы вын мыждыны, ӧд сійӧ Морт Пи.
Энӧ шензьӧй, мый воас кад, кор гуын куйлысьяс кыласны Морт Пилысь гӧлӧс шысӧ да найӧ ловзясны.
Бур вӧчысьяс кутасны овны, а лёк вӧчысьясӧс лоӧ мыждӧма.
Ме нинӧм ог вӧч Ассянь.
Ме мыжда сы серти, мый кыла Батьсянь, та вӧсна Менам мыждӧмӧй веськыд.
Ӧд Ме вӧча ог Ас кӧсйӧм серти, а Менӧ мӧдӧдысь Батьлӧн кӧсйӧм серти».
«Ме кӧ Ачым Ас йылысь висьтала, сэки Менам висьталӧмӧй абу эскана. Но Ме йылысь мӧд висьталӧ. Ме тӧда, мый сылӧн висьталӧмыс веськыд.
Ті мӧдӧдлінныд йӧзӧс Иоан дінӧ, медым тӧдмавны Ме йылысь. Сійӧ збыльсӧ висьталіс.
Дерт, меным оз ков йӧзлӧн висьталӧмыс. Ме шуа тайӧс сы могысь, медым ті мездминныд.
Иоан вӧлі яръюгыда ӧзъялысь би, сӧмын этша кад ті кӧсйинныд нимкодясьны сылӧн югӧр улын.
Но Ме йылысь висьталӧ мӧдтор, Иоан висьталӧмысь на мӧрччанаджык. Батьлӧн тшӧктӧм серти вӧчӧм уджъясӧй петкӧдлӧны, мый Менӧ Батьӧй мӧдӧдіс.
Менӧ мӧдӧдысь Батьӧй Ачыс висьталӧ Ме йылысь.
Ті Сылысь гӧлӧс шысӧ некор энӧ кывлӧй, Сылысь чужӧмсӧ энӧ аддзылӧй, Сылысь кывъяссӧ сьӧлӧманыд онӧ видзӧй, ӧд ті онӧ эскӧй Сысянь Мӧдӧдӧмалы.
Ті тӧдмаланныд-туяланныд Гижӧдъяссӧ, медым тіянлы вичмис помтӧм олӧм, а Гижӧдъясыс висьталӧны Ме йылысь.
Но ті онӧ кӧсйӧй локны Ме дінӧ, медым тіянлы вичмис олӧм.
Йӧзлӧн ошкӧмыс Меным оз ков. Ме тӧда тіянӧс: Енмыс тіянлы абу муса.
Ме локті тіян дінӧ Бать нимсянь, но ті онӧ сибӧдӧй Менӧ.
Локтас кӧ кодкӧ ас нимсяньыс, сійӧс ті сибӧданныд. Ті сибӧданныд ошкӧмсӧ ӧта-мӧдсяньныд, но ӧти Енсянь петысь ошкӧмсӧ онӧ корсьӧй. Сідзкӧ, кыдзи ті верманныд эскыны.
Энӧ мӧвпалӧй, мый Бать водзын кута мыждыны тіянӧс.
Тіянӧс мыждысьыс — Мӧисей, код вылӧ ті лача кутанныд.
Ті кӧ эсканныд Мӧисейлы, эскинныд эськӧ тшӧтш Меным, ӧд сійӧ гижис Ме йылысь.
Но сылӧн гижӧдъясӧ кӧ онӧ эскӧй, верманныд-ӧ эскыны Менам кывъясӧ?»
6 юр.
Сэсся Исус вуджис Галилея ты, мӧд ногӧн кӧ, Тиверия ты, мӧдлапӧлӧ.
Сы бӧрся муніс уна йӧз, ӧд найӧ аддзылісны, кыдзи Исус вӧчис шензьӧданаторъяс висьысьясӧс бурдӧдігӧн.
Исус кайис керӧсӧ да пуксис сэтчӧ велӧдчысьясыскӧд.
Матыстчис Ыджыд лун, юдейяслӧн гажӧдчан кад.
Исус видзӧдліс да аддзис, мый Сы дінӧ локтӧ уна йӧз.
Сійӧ шуис Филиплы: «Кытысь миянлы ньӧбны найӧс вердмӧн няньсӧ?»
Исус шуис тайӧс, медым тӧдмавны Филиплысь эскӧмсӧ.
Но Ачыс Сійӧ тӧдіс нин, мый вӧчны.
Филип вочавидзис: «Кыксё динар вылӧ ньӧбӧм няньыс этша лоӧ, весиг ичӧтиктор оз вичмы быдӧнлы».
Ӧндрей нима велӧдчысь, Симон-Петырлӧн вокыс, шуис Исуслы: «Тані ӧти зонкалӧн эм вит ид нянь да кык чери.
Тайӧ ӧмӧй тырмас та мындаыслы?»
Исус шуис: «Тшӧктӧй йӧзыслы пуксявны».
Сійӧ местаыс вӧлі туруна.
Йӧзыс пуксялісны, вӧлі вит сюрс гӧгӧр морт.
Исус босьтіс няньсӧ, аттьӧаліс Енмӧс да сетіс велӧдчысьясыслы. Велӧдчысьяс разӧдісны няньсӧ пукалысьяслы. Черисӧ тшӧтш разӧдісны быдӧнлы, коді мыйта кӧсйис.
Кор йӧзыс пӧтісны, Исус шуис велӧдчысьясыслы: «Чукӧртӧй коляссӧ, нинӧм энӧ воштӧй».
Велӧдчысьяс чукӧртісны вит ид няньысь коляссӧ да тыртісны дас кык куд.
Сэки найӧ, кодъяс аддзылісны Исуслысь шензьӧданатор вӧчӧмсӧ, шуисны: «Тайӧ збыльысь сійӧ Пророкыс, кодлы колӧ вӧлі локны муюгыдас».
Исус тӧдіс, мый йӧзыс мырдӧн кӧсйӧны пуктыны Сійӧс ӧксыӧ, та вӧсна ӧтнас бӧр кайис керӧсӧ.
Рытнас велӧдчысьясыс лэччисны ты дорӧ, пуксисны пыжӧ да мӧдӧдчисны ты мӧдлапӧлӧ, Капернаум карӧ.
Пемдіс нин, но Исус пыр на эз лок на дінӧ.
Пӧльтіс ыджыд тӧв, тыыс ёна гызис.
Нёль-ӧ-вит верст сынӧм бӧрын велӧдчысьясыс аддзисны Исусӧс: Сійӧ ва вывті матыстчис налӧн пыж дінӧ. Найӧ ёна повзисны.
Исус шуис: «Энӧ полӧй, тайӧ Ме».
Найӧ кӧсйисны босьтны Исусӧс пыжас, но пыжыс пырысь-пыр матыстчис мӧдлапӧлас, кытчӧ найӧ кывтісны.
Мӧд луннас, ты дорын сулалігӧн йӧзыслы тӧд выланыс уси, мый тӧрыт тані вӧлі сӧмын ӧти пыж, и тайӧ пыжнас велӧдчысьясыс вуджисны ӧтнаныс, Исус эз вӧв накӧд.
Тиверия карсянь локтісны пыжаяс да сувтісны сэтчӧ, кӧні Енмӧс аттьӧалӧмӧн Господь водзынджык вердіс йӧзсӧ.
Кор йӧзыс аддзисны, мый Исус да велӧдчысьясыс абуӧсь сэні, найӧ пуксисны пыжъясӧ да вуджисны Капернаумӧ корсьны Исусӧс.
Найӧ аддзисны Исусӧс ты мӧдлапӧвсьыс да юалісны Сылысь: «Велӧдысь, Тэ нӧ кор татчӧ вуджин?»
Исус вочавидзис: «Веськыда, веськыда висьтала тіянлы: ті корсянныд Менӧ онӧ шензьӧданаторъяс аддзылӧм вӧсна, а сы понда, мый пӧттӧдзныд няньсӧ сёйинныд.
Энӧ тӧждысьӧй бырана сёян вӧсна, а тӧждысьӧй помтӧм олӧмсӧ сетысь сёян вӧсна. Тайӧ сёянсӧ сетас тіянлы Морт Пи, кодӧс пасйӧма Ачыс Ен Бать».
Йӧзыс юалісны Исуслысь: «Мый миянлы вӧчны, медым уджъясным вӧліны шогманаӧсь Енмыслы?»
Исус вочавидзис: «Эскӧй Енсянь Мӧдӧдӧмалы. Тайӧ шогмана Енмыслы».
Найӧ шуисны Исуслы: «Кутшӧм шензьӧданатор Тэ вӧчан, медым сійӧс аддзылӧм бӧрын ми эским Тэныд?
Мый Тэ вӧчан?
Миян батьяс овтӧминын сёйисны манна. Та йылысь висьталӧ Гижӧдыс: “Енэжсянь Сійӧ сетіс налы сёйны нянь”».
Исус шуис налы: «Веськыда, веськыда висьтала тіянлы: эз Мӧисей сет тіянлы няньсӧ енэжсянь, но Менам Батьӧй сетӧ тіянлы збыль няньсӧ енэжсянь.
Енлӧн няньыс лэччӧ енэжсянь да сетӧ йӧзыслы олӧм».
Найӧ шуисны Исуслы: «Господьӧй, татшӧм няньсӧ пыр сет миянлы».
Исус шуис: «Ме олӧмыслӧн нянь.
Ме дінӧ локтысь некор оз кут тшыгъявны, Меным эскысьлӧн горшыс некор оз кут косьмыны.
Тіянлы Ме висьтавлі нин: ті аддзылінныд Менӧ, сӧмын онӧ эскӧй.
Быдӧн, кодӧс сетӧ Меным Бать, локтас Ме дінӧ.
Ме дінӧ локтысьӧс ог вӧтлы.
Ме ӧд лэччи енэжсянь эг Ас кӧсйӧм серти вӧчны, но лэччи, медым вӧчны Менӧ мӧдӧдысь Батьлӧн кӧсйӧм серти.
Менӧ мӧдӧдысь Батьӧй кӧсйӧ, медым Меным сетӧмаясысь весиг ӧтикӧс эг вошты да ставнысӧ найӧс ловзьӧді медбӧръя лунӧ.
Менӧ Мӧдӧдысьӧй кӧсйӧ, медым быдӧнлы, коді аддзӧ Писӧ да эскӧ Сылы, вичмис помтӧм олӧм. Медбӧръя лунӧ Ме ловзьӧда найӧс».
Юдейяс дӧзмисны, мый Исус шуис: «Ме енэжсянь лэччӧм нянь».
Найӧ сёрнитісны: «Абу-ӧ тайӧ Исус, Ӧсиплӧн пи? Ми ӧд тӧдам Сылысь бать-мамсӧ.
Мыйла нӧ Сійӧ шуӧ, Ме пӧ лэччи енэжсянь?»
Исус шуис налы: «Энӧ шуасьӧй ас костаныд.
Некод оз вермы локны Ме дінӧ, оз кӧ вайӧд сійӧс Менӧ мӧдӧдысь Батьӧй. Ме дінӧ локтысьӧс Ме ловзьӧда медбӧръя лунӧ.
Пророкъяслӧн гижӧма: “Енмыс быдӧнӧс велӧдас”.
Быдӧн, коді кывзӧ Батьӧс да Сысянь велӧдчӧ, локтӧ Ме дінӧ.
Йӧзыс эз аддзывлыны Батьӧс, сӧмын Енсянь Локтысь аддзыліс Батьӧс.
Веськыда, веськыда висьтала тіянлы: Меным эскысьлӧн эм помтӧм олӧм.
Ме олӧмыслӧн нянь.
Тіян батьясныд овтӧминын сёйлісны манна, но найӧ кулісны.
А енэжсянь лэччӧм няньсӧ сёйысь оз кув.
Ме енэжсянь лэччӧм ловъя нянь, тайӧ няньсӧ сёйысь помтӧг олӧ.
Няньыс, кодӧс Ме сета, — тайӧ Менам Яй. Ме сета сійӧс йӧзыслӧн олӧм вӧсна».
Сэки юдейяс пондісны вензьыны ас костаныс: «Кыдзи Сійӧ вермас сетны Ассьыс Яйсӧ сёйны миянлы?»
Исус шуис налы: «Веськыда, веськыда висьтала тіянлы: онӧ кӧ сёйӧй Морт Пилысь Яйсӧ да юӧй Сылысь Вирсӧ, тіян пытшкын олӧмыс оз ло.
Менсьым Яйӧс сёйысь да Менсьым Вирӧс юысь помтӧг олӧ, и сійӧс Ме ловзьӧда медбӧръя лунӧ.
Менам Яйӧй ӧд збыльысь сёян, Менам Вирӧй ӧд збыльысь юан.
Менсьым Яйӧс сёйысь да Менсьым Вирӧс юысь олӧ Ме пытшкын, а Ме — сы пытшкын.
Менӧ мӧдӧдіс ловъя Бать, Меным олӧмыс вичмис Батьсянь. Тадзи Месянь олӧмыс вичмас Менӧ сёйысьлы.
Тайӧ енэжсянь лэччӧм нянь, тайӧ мӧдсикас сёян.
Тіян батьясныд сёйисны манна да кулісны, а тайӧ няньсӧ сёйысь помтӧг олӧ».
Исус висьталіс тайӧс Капернаумын, синагогаын велӧдігӧн.
Исуслысь висьталӧмсӧ кывзігӧн велӧдчысьяс пӧвстысь унаӧн шуасисны: «Кутшӧм гӧгӧрвотӧмторъяс Сійӧ висьталӧ.
Коді вермас кывзыны тайӧс?»
Исус тӧдіс, мый велӧдчысьясыс шуасьӧны, да шуис налы: «Тіянӧс ӧмӧй дӧзмӧдӧ Менам висьталӧмӧй?
Мый эськӧ шуанныд, аддзанныд кӧ Морт Пилысь кыпӧдчӧмсӧ сэтчӧ, кӧні Сійӧ вӧлі водзынджык?
Сӧмын Лов вермӧ ловзьӧдны, а вир-яй тайӧс вӧчны оз вермы.
Менам кывъясӧй сетӧны тіянлы Лов да олӧм.
Но кодсюрӧ тіян пиысь оз эскыны».
Исус водзвыв тӧдіс, коді оз эскы Сылы да коді вузалас Сійӧс.
Исус водзӧ сёрнитіс: «Та понда Ме висьтавлі тіянлы, мый некод оз вермы Ме дінӧ локнысӧ, оз кӧ ло тайӧ Батьсянь».
Та бӧрти уна велӧдчысь эновтісны Сійӧс, эз нин ветлӧдлыны Сыкӧд.
Сэки Исус юаліс дас кык велӧдчысьыслысь: «Гашкӧ, ті тшӧтш кӧсъянныд эновтны Менӧ?»
Симон-Петыр вочавидзис: «Господьӧй, код дінӧ миянлы муннысӧ?
Ӧд Тэнад кывъясыд сетӧны помтӧм олӧмсӧ.
Ми эскам да тӧдам: Тэ — Кристос, ловъя Енлӧн Пи».
Исус шуис налы: «Эг ӧмӧй Ме бӧрйы тіянӧс дас кыкнаннытӧ?
Но тіян пиысь ӧтиыс — сӧтана».
Тайӧс шуигӧн Исус кутіс тӧд вылас Иудаӧс, Симон-Искариот пиӧс. Сійӧ вӧлі дас кыксьыс ӧтиыс, коді сэсся вузалас Исусӧс.
7 юр.
Та бӧрти Исус ветлӧдліс Галилеяті. Юдея муӧд Сійӧ эз кӧсйы ветлӧдлыны, ӧд юдейяслӧн веськӧдлысьяс кӧсйисны вины Сійӧс.
Матыстчис юдейяслӧн гажӧдчан кад, чомъяс вӧчан лунъяс.
Исуслӧн вокъясыс шуисны Сылы: «Эн кольччы татчӧ, мун Юдея муӧ, медым велӧдчысьясыд тшӧтш аддзисны Тэнсьыд уджъястӧ.
Ӧд мортыс кӧ кӧсйӧ, медым тӧдісны сы йылысь, сійӧ оз кут дзебны ассьыс уджъяссӧ.
Тэ сы ыджда уджъяс вӧчан, сідзкӧ, петкӧдчы йӧзыслы».
Исуслӧн вокъясыс эз эскыны Сылы.
Исус шуис налы: «Менам кадӧй эз на во, а тіянлы быд кад лӧсялӧ.
Тіянӧс йӧзыс оз мустӧмтны, а Менӧ мустӧмтӧны, ӧд Ме висьтала, мый налӧн уджъясыс лёкӧсь.
Ті мунӧй гажӧдчанінас, а Ме ог на мун, ӧд Менам кадӧй эз на во».
Тайӧс шуӧм бӧрын Исус кольччис Галилеяӧ,
но кор вокъясыс мунісны гажӧдчанінӧ, Исус тшӧтш муніс сэтчӧ гусьӧн.
Юдейяслӧн веськӧдлысьяс корсисны Исусӧс гажӧдчанінысь да юасисны: «Кӧні Сійӧ?»
Йӧз пӧвстын унаӧн вензисны Сы йылысь.
Ӧтияс сёрнитісны, Сійӧ пӧ бур, мӧдъяс шуисны, Сійӧ пӧ ылӧдлӧ йӧзсӧ.
Но йӧзыс сёрнитісны Исус йылысь гусьӧн, ӧд найӧ полісны юдейяслӧн веськӧдлысьясысь.
Гажӧдчан кад шӧрас Исус пырис крамӧ да кутіс велӧдны.
Юдейяслӧн веськӧдлысьяс шензисны: «Кытысь Сійӧ велӧдчытӧгыс тӧдӧ Гижӧдъяссӧ?»
Исус вочавидзис: «Менам велӧдӧмӧй абу Месянь, но Менӧ Мӧдӧдысьсянь.
Коді кӧсйӧ вӧчны Ен кӧсйӧм серти, сійӧ тӧдмалас, Енсянь-ӧ тайӧ велӧдӧмыс, либӧ Ассянь Ме висьтала.
Коді ассяньыс висьталӧ, сійӧ аслыс ошкӧмсӧ корсьӧ.
Коді тӧждысьӧ, медым ошкӧмыс вичмис Сійӧс Мӧдӧдысьлы, Сійӧ збыльсӧ висьталӧ да оз ылӧдчы.
Эз-ӧ Мӧисей сет тіянлы Индӧдсӧ?
Но некод тіян пиысь оз ов Индӧд сертиыс.
Сідзкӧ, мыйла кӧсъянныд Менӧ винысӧ?»
Йӧзыс шуисны: «Пеж лов Тэ пытшкын.
Коді кӧсйӧ Тэнӧ винысӧ?»
Исус вочавидзис: «Ме вӧчи ӧтитор, да ті ставныд шензянныд.
Мӧисей тшӧктіс тіянлы вундыштчыны. Дерт, тайӧ тшӧктӧмыс абу Мӧисейсянь, а батьяссяньныд. Ті весиг шойччан лунӧ вундыштанныд мортсӧ.
Ті кӧ вундыштанныд мортсӧ шойччан лунӧ, медым энӧ торкӧй Мӧисейлысь Индӧдсӧ, сідзкӧ, мыйла Ме вылӧ скӧраланныд, Ме кӧ дзоньнас мортсӧ бурдӧді шойччан лунӧ?
Энӧ мыждӧй чужӧм вылӧ видзӧдӧмӧн, а мыждӧй веськыда».
Кодсюрӧ ерусалимсаяс пӧвстысь сёрнитісны: «Абу-ӧ тайӧ сійӧ Мортыс, кодӧс вины кӧсйӧны?
Сійӧ сёрнитӧ восьсӧн, и некод весиг оз ӧлӧд Сійӧс. Гашкӧ, веськӧдлысьяс збыльысь Сійӧс Кристос туйӧ пуктӧны?
Ми тӧдам, кытысь тайӧ Мортыс.
А кор локтас Кристос, некод оз кут тӧдны, кытысь Сійӧ».
Крамын велӧдігӧн Исус гораа шуис: «Ті тӧданныд Менӧ, и тӧданныд, кытысь Ме.
Ме локті эг Ассянь. Менӧ мӧдӧдіс Сійӧ, коді эм Збыльыс, сӧмын Сійӧс ті онӧ тӧдӧй.
А Ме тӧда Сійӧс, ӧд Сы дорысь локті, Сійӧ мӧдӧдіс Менӧ».
Сэки кӧсйисны кутны Исусӧс, но некод эз лысьт инмӧдчыны Сы дінӧ, ӧд Сылӧн кадыс эз на во.
Йӧзыс унаӧн эскисны Исуслы. Найӧ сёрнитісны: «Кор локтас Кристос, Сійӧ ӧмӧй тайӧ Мортыс дорысь унджык шензьӧданаторсӧ вӧчас?»
Кор фарисейяс кылісны Исус йылысь татшӧм сёрнисӧ, аркирейяскӧд ӧтвыв найӧ мӧдӧдісны крам видзысьясӧс кутны Исусӧс.
Исус шуис налы: «Ме ог нин дыр ло тіянкӧд, регыд муна Менӧ Мӧдӧдысь дінӧ.
Ті кутанныд корсьны Менӧ, но онӧ аддзӧй.
Кӧні Ме лоа, сэтчӧ ті онӧ вермӧй локнысӧ».
Юдейяслӧн веськӧдлысьяс ас костаныс сёрнитісны: «Кытчӧ Сійӧ кӧсйӧ мунны, мый огӧ вермӧй аддзыны Сійӧс?
Оз-ӧ кӧсйы мунны миян йӧз дінӧ, кодъяс олӧны грекъяс пӧвстын? Оз-ӧ кӧсйы грек войтырӧс велӧдны?
Кыдзи гӧгӧрвоны Сылысь кывъяссӧ: “Ті кутанныд корсьны Менӧ, но онӧ аддзӧй.
Кӧні Ме лоа, сэтчӧ ті онӧ вермӧй локнысӧ”?»
Бӧръя медыджыд гажӧдчан лунӧ Исус сувтіс да гораа шуис: «Кодлӧн горшыс косьмӧ, мед локтӧ Ме дінӧ да юӧ.
Коді эскӧ Меным, сылӧн пытшкӧсысь визувтасны ловъя валӧн юяс. Тадзи висьталӧ Гижӧдыс».
Исус висьталіс тайӧс Лов йылысь, кодӧс сибӧдасны Сылы эскысьяс.
Ӧд Вежа Ловсӧ эз на вӧв сетӧма налы, Исуслӧн дзирдлуныс эз на воссьы да.
Тайӧ кывъяссӧ кылӧм бӧрын йӧз пӧвстысь унаӧн шуалісны: «Сійӧ збыльысь пророк».
Ӧтияс шуисны: «Тайӧ Кристос».
Мӧдъяс сёрнитісны: «Локтас ӧмӧй Кристос Галилеяысь?
Оз ӧмӧй висьтав Гижӧдыс, мый Кристос петас Давид вужйысь, Виплием карысь, Давид чужанінысь?»
Тадзи йӧзыс кутісны вензьыны Сы йылысь.
Кодсюрӧ кӧсйисны кутны Исусӧс, но некод эз лысьт инмӧдчыны Сы дінӧ.
Исусӧс кутны мӧдӧдлӧмаяс бӧр локтісны аркирейяс да фарисейяс дінӧ. Найӧ юалісны: «Мыйла ті энӧ вайӧдӧй Сійӧс?»
Мӧдӧдлӧмаяс вочавидзисны: «Тайӧ Мортыс моз ӧнӧдз на некод эз сёрнитлы».
Фарисейяс шуисны налы: «Гашкӧ, тіянӧс тшӧтш ылӧдліс да?
Эскӧ-ӧ Сылы кодкӧ веськӧдлысьяс да фарисейяс пӧвстысь?
Но йӧзыс оз тӧдны Индӧдсӧ, найӧс ставнысӧ ёрӧма».
Никодим нима фарисей, коді войнас воліс Исус дінӧ, шуис аркирейяслы да фарисейяслы: «Миян Индӧд серти позьӧ ӧмӧй мыждыны мортсӧ, оз кӧ медводз кывзыны сійӧс да тӧдмавны, мый сійӧ вӧчис?»
Сылы вочавидзисны: «Гашкӧ, тэ тшӧтш Галилеяысь?
Лыддьы Гижӧдсӧ да тэ аддзан, мый Галилеяысь пророкыд оз лок».
Сэки ставныс муналісны гортаныс.
8 юр.
Исус кайис Олив керӧсӧ.
Асывводзнас Сійӧ бара локтіс крамӧ. Сы гӧгӧр чукӧртчис уна йӧз.
Исус пуксис да кутіс велӧдны найӧс.
Индӧдӧ велӧдысьяс да фарисейяс вайӧдісны Исус дінӧ аньӧс, кодӧс вӧлі кутӧмаӧсь гозъя олӧм пежалӧмысь. Йӧз водзӧ сійӧс сувтӧдӧмӧн найӧ шуисны Исуслы:
«Велӧдысь, тайӧ аньсӧ кутӧма гозъя олӧм пежалӧмысь. Мӧисей Индӧдас тшӧктӧма вины татшӧмъяссӧ изъясӧн.
Мый Тэ шуан?»
Найӧ шуалісны тадзи, медым кыйны да мыжавны Исусӧс.
Но Исус эз кывзы найӧс, а улӧ копыртчӧмӧн чуньнас кутіс гижны муас.
Найӧ водзӧ дӧзмӧдісны Исусӧс юасьӧмъяснас. Сэки Сійӧ веськӧдчис да шуис налы: «Тіян пӧвстысь мыжтӧмыс медводз мед лыяс аньсӧ изнас».
Сэсся копыртчис да бара кутіс гижны муас.
Исуслысь кывъяссӧ кылӧм бӧрын йӧзыс кутісны разӧдчыны сьӧрсьӧн-бӧрсьӧн, ӧд налӧн сьӧлӧмыс мыждіс найӧс. Медводз мунісны пӧрысьджыкъяс, сэсся мукӧдыс.
Колис сӧмын Исус, и Сы водзын сулалысь ань.
Исус веськӧдчис да аддзис сӧмын аньӧс. Сійӧ юаліс: «Аньӧй, кӧнӧсь тэнӧ мыждысьясыд?
Мыждіс-ӧ кодкӧ тэнӧ?»
Ань вочавидзис: «Эз, Господьӧй.»
Исус шуис сылы: «Ме тшӧтш ог мыжды.
Мун да водзӧ мыжтӧ эн нин вӧч».
Исус бара сёрнитіс йӧзыскӧд. Сійӧ шуис: «Ме йӧзыслы югыдыс.
Ме бӧрся мунысь оз кут ветлыны пемыдас, сылӧн лоӧ олӧмыслӧн югыдыс».
Фарисейяс шуисны: «Тэ Ачыд Ас йывсьыд висьталан, та вӧсна Тэнад висьталӧмыд абу эскана».
Исус вочавидзис: «Ме кӧ висьтала Ас йылысь, Менам висьталӧмӧй веськыд, ӧд Ме тӧда, кытысь локті да кытчӧ муна.
А ті онӧ тӧдӧй, кытысь Ме локті да кытчӧ муна.
Ті мыжданныд мортсӧ йӧзыс моз. Ме некодӧс ог мыжды.
А мыжда кӧ, мыжда веськыда, ӧд Ме абу ӧтнам. Мекӧд Менӧ мӧдӧдысь Батьӧй.
Тіян Индӧдын гижӧма, мый кык мортлӧн висьталӧмыс эскӧдана.
Ме Ачым висьтала Ас йылысь. Ме йылысь висьталӧ тшӧтш Менӧ мӧдӧдысь Батьӧй».
Сэки юалісны Исуслысь: «Кӧні Тэнад Батьыд?»
Исус вочавидзис: «Ті онӧ тӧдӧй Менӧ и онӧ тӧдӧй Менсьым Батьӧс.
Ті кӧ эськӧ тӧдінныд Менӧ, сэки тӧдінныд тшӧтш Менсьым Батьӧс».
Тайӧ кывъяссӧ Исус висьталіс крамын велӧдігӧн, сьӧм чукӧртан куд дорын.
Сійӧс некод эз кут, ӧд Сылӧн кадыс эз на во.
Исус бара висьталіс йӧзыслы: «Ме регыд муна.
Ті кутанныд корсьны Менӧ, но мыж пытшканыд куланныд.
Кытчӧ Ме муна, сэтчӧ ті онӧ вермӧй локнысӧ».
Юдейяслӧн веськӧдлысьяс шензисны: «Гашкӧ, Сійӧ кӧсйӧ вины Асьсӧ, ӧд шуалӧ, кытчӧ пӧ Ме муна, сэтчӧ ті онӧ вермӧй локнысӧ».
Исус шуис налы: «Ті улісянь, а Ме вылісянь.
Ті тайӧ муюгыдсьыс, а Ме абу тайӧ муюгыдсьыс.
Ме шуи тіянлы: ті куланныд мыж пытшканыд.
Онӧ кӧ эскӧй, мый Ме збыльысь Сійӧ, кодӧн шуа Ачымӧс, куланныд мыж пытшканыд».
Найӧ юалісны: «Коді нӧ Тэ?»
Исус вочавидзис: «Ме — Сійӧ, кодӧн шулі Ачымӧс водзысяньыс.
Ме унатор на верма висьтавны тіян йылысь, унаторйысь мыждыны тіянӧс.
Но Ме юӧрта муюгыдыслы сӧмын сійӧ, мый кывлі Менӧ Мӧдӧдыссянь, ӧд Сійӧ збыльсӧ висьталӧ».
Найӧ эз гӧгӧрвоны, мый Исус висьталӧ Батьыс йылысь.
Исус шуис налы: «Морт Пиӧс кыпӧдӧм бӧрын ті тӧдмаланныд: Ме збыльысь Сійӧ, кодӧн шуа Ачымӧс. Ме нинӧм ог вӧч Ассянь, Ме висьтала сӧмын сійӧ, мыйӧ велӧдіс Менӧ Батьӧй.
Менӧ Мӧдӧдысьӧй Мекӧд.
Батьӧй эз коль Менӧ ӧтнамӧс, ӧд Ме ставсӧ вӧча Сылӧн кӧсйӧм серти».
Тайӧ висьталӧмсӧ кывзігӧн унаӧн эскисны Исуслы.
Сэки Исус шуис Сылы эскысь юдейяслы: «Менам кывъяс серти кӧ оланныд, ті збыльысь Менам велӧдчысьяс.
Ті тӧдмаланныд збыльсӧ, и збыльыс мездас тіянӧс».
Найӧ вочавидзисны: «Ми Ӧвраамсянь чужысьяс, некор эгӧ вӧлӧй кесйӧг туйынӧсь.
Сідзкӧ, мыйла Тэ шуан, мый ми мездмам?»
Исус вочавидзис: «Веськыда, веськыда висьтала тіянлы: мыжсӧ вӧчысь — мыжыслӧн кесйӧг.
Кесйӧг оз вермы кольччыны керкаас пыр кежлӧ, а пиыс олӧ сэні помтӧг.
Пиыс кӧ мездас тіянӧс, ті збыльысь мездманныд.
Ме тӧда: ті Ӧвраамсянь чужысьяс, но кӧсъянныд вины Менӧ, ӧд тіян сьӧлӧмӧ оз тӧрны Менам кывъясӧй.
Ме висьтала сы йылысь, мый аддзылі Аслам Бать ордысь.
А ті вӧчанныд сы серти, мый аддзылінныд асланыд бать ордысь».
Найӧ вочавидзисны: «Миян батьным Ӧвраам».
Исус шуис налы: «Ті кӧ Ӧвраамлӧн ныв-пи, вӧчинныд эськӧ Ӧвраам ног.
Ме висьталі тіянлы Енсянь кывлӧм збыльсӧ, а ті кӧсъянныд вины Менӧ.
Ӧвраам тадзи эз вӧчлы.
Ті вӧчанныд батьныд ног».
Юдейяс шуисны Исуслы: «Ми абу чуркаяс.
Миян эм ӧти Бать, тайӧ Ен».
Исус шуис: «Енмыс кӧ тіянлы Бать, Ме эськӧ муса вӧлі тіянлы, ӧд Ме Енсянь локті.
Ме эг Ассянь лок, Енмыс мӧдӧдіс Менӧ.
Мыйла ті онӧ гӧгӧрвоӧй Менсьым висьталӧмӧс?
Ті онӧ гӧгӧрвоӧй, ӧд онӧ сибӧдӧй Менсьым кывъясӧс.
Омӧльыс — тіян батьныд.
Ті ставсӧ кӧсъянныд вӧчны сы моз.
Сійӧ водзысяньыс вӧлі морт виысь. Збыльсьыс сійӧ ылын, збыльыс сы пытшкын абу.
Кор сійӧ ылӧдлӧ, висьталӧ ассяньыс, ӧд сійӧ ылӧдчысь, ылӧгыслӧн бать.
Ті онӧ эскӧй Меным, ӧд Ме збыльсӧ висьтала.
Коді тіян пиысь вермас мыждыны Менӧ лёк вӧчӧмысь?
Ме кӧ збыльсӧ висьтала, мыйла онӧ эскӧй Меным?
Коді Енсянь, сійӧ кывзӧ Енлысь кывъяссӧ.
А ті онӧ кывзӧй, ӧд ті абу Енсянь».
Юдейяс шуисны Исуслы: «Ми веськыда висьталам: Тэ Самарияысь, Тэ пытшкын пеж лов».
Исус вочавидзис: «Ме пытшкын пеж лолыс абу.
Ме бурӧ пукта Ассьым Батьӧс, но ті Менӧ омӧльтанныд.
Ме ог корсь Аслым ошкӧмсӧ. Эм Сійӧ, коді сетас Меным ошкӧмсӧ. Сійӧ — веськыда Мыждысьыс.
Веськыда, веськыда висьтала тіянлы: Менам кывъяс серти олысь некор оз кув».
Юдейяс шуисны Исуслы: «Ӧні ми тӧдам, мый Тэ пытшкын пеж лов.
Ӧвраам куліс, пророкъяс кулісны, а Тэ шуан: “Менам кывъяс серти олысь некор оз кув”.
Тэ ӧмӧй Ӧвраам батьным дорысь ыджыдджык? Сійӧ куліс, пророкъяс тшӧтш кулісны.
Тэ нӧ Асьтӧ код туйӧ пуктан?»
Исус вочавидзис: «Ме кӧ ошка Ачымӧс, Менам ошкӧмӧй нинӧм дон оз сулав.
Менӧ ошкӧ Менам Батьӧй, код йылысь ті шуанныд, мый Сійӧ тіян Ен.
Ті онӧ тӧдӧй Сійӧс, а Ме тӧда Сійӧс.
Ме кӧ шуа, мый ог тӧд Сійӧс, сэки лоа тіян кодь пӧръясьысьӧн.
Но Ме тӧда Сійӧс да ола Сылӧн кывъясыс серти.
Тіян Ӧвраам батьныд нимкодьпырысь виччысис Менсьым локтан лунӧс. Сійӧ аддзис тайӧ лунсӧ да ёна нимкодясис».
Юдейяс шуисны Исуслы: «Тэ аддзылін Ӧвраамӧс? Тэныд ӧд ветымын арӧсыс на абу».
Исус шуис налы: «Веськыда, веськыда висьтала тіянлы: Ӧвраам чужтӧдз на Ме вӧлі».
Сэки найӧ босьтісны изъяс да кӧсйисны лыйлыны Исусӧс, но Исус саймовтчӧмӧн петіс крамсьыс да муніс сэтысь.
9 юр.
Мунігмозыс Исус аддзис чужӧмсяньыс синтӧм мортӧс.
Велӧдчысьяс юалісны Исуслысь: «Велӧдысь, кодлӧн мыж вӧсна сійӧ синтӧмӧн чужӧма? Ачыс-ӧ сійӧ мыжа, бать-мамыс-ӧ?»
Исус вочавидзис: «Сійӧ абу мыжа, бать-мамыс тшӧтш абу мыжаӧсь. Сійӧ синтӧм, медым сы пыр петкӧдчасны Енлӧн уджъясыс.
Ӧні, лунъюгыднас, Меным колӧ вӧчны Менӧ Мӧдӧдысьлысь уджъяссӧ.
Пуксяс вой, сэки некод оз вермы уджавны.
Му вылын олігӧн Ме йӧзыслы югыдыс».
Тайӧс шуӧм бӧрын Исус сьӧлыштіс муас, сьӧлыштӧмсьыс вӧчис ляти да синтӧм мортлысь синсӧ мавтіс лятинас.
Сэсся шуис: «Мун да мыссьы Силоам ва йӧртӧдын». Силоам нимыс, вуджӧдны кӧ: мӧдӧдӧма.
Синтӧм морт муніс, мыссис да кутіс аддзыны.
Сыкӧд орччӧн олысьяс да сійӧс синтӧмӧн аддзылысьяс шензисны: «Абу-ӧ тайӧ сійӧ мортыс, коді пукаліс да сьӧм корис?»
Ӧтияс шуалісны: «Тайӧ дзик сійӧ мортыс», мӧдъяс шуалісны: «Абу, тайӧ сӧмын сы вылӧ мунӧ».
Ачыс сійӧ висьталіс: «Тайӧ ме».
Сэки юалісны сылысь: «Кыдзи нӧ тэ аддзыны кутін?»
Сійӧ вочавидзис: «Исус нима морт вӧчис ляти, мавтіс сійӧн менсьым синмӧс да шуис: “Мун да мыссьы Силоам ва йӧртӧдын”.
Ме муні да мысси, ӧні аддза».
Сэки юалісны сылысь: «Кӧні тэнӧ Бурдӧдысьыд?»
Мӧдыс вочавидзис: «Ог тӧд».
Мортӧс, коді водзынджык эз аддзы, нуӧдісны фарисейяс дінӧ.
Тайӧ вӧлі шойччан лунӧ, кор Исус вӧчис ляти да бурдӧдіс синтӧмӧс.
Фарисейяс тшӧтш юалісны синтӧм мортлысь, кыдзи сійӧ кутіс аддзыны.
Сійӧ вочавидзис: «Исус пуктіс син вылам ляти, сэсся ме мысси да куті аддзыны».
Сэки фарисейяс пӧвстысь кодсюрӧ шуисны: «Тайӧ Бурдӧдысьыс абу Енсянь, ӧд Сійӧ торкӧ тшӧктӧмсӧ — уджалӧ шойччан лунӧ».
Мукӧдыс сёрнитісны: «Вермас ӧмӧй мыжа морт вӧчны татшӧм шензьӧданаторъяссӧ?»
Тадзи лыбис на костын вен.
Синтӧм мортлысь бара юалісны: «Тэ шуан, мый Сійӧ бурдӧдіс тэнсьыд синтӧ? Коді Сійӧ тэ ногӧн?»
Морт вочавидзис: «Пророк».
Юдейяслӧн веськӧдлысьяс эз эскыны, мый тайӧ мортыс вӧлі синтӧм да пондіс аддзыны. Сэки найӧ корисны сылысь бать-мамсӧ да юалісны налысь: «Тайӧ тіян пиныд? Ті шуанныд, сійӧ пӧ чужӧмсяньыс синтӧм.
Кыдзи нӧ сійӧ аддзӧ ӧні?»
Бать-мамыс вочавидзисны: «Ми тӧдам: тайӧ миян пиным. Сійӧ чужис синтӧмӧн, но кыдзи кутіс аддзыны да коді бурдӧдіс сійӧс, тайӧс ми огӧ тӧдӧй.
Юалӧй сылысь, ӧд сійӧ тыр арлыда нин, вермас ачыс вочавидзны».
Бать-мамыс шуисны тадзи, ӧд найӧ полісны юдейяслӧн веськӧдлысьясысь.
Веськӧдлысьяс водзджык нин сёрнитчисны, мый быдӧнӧс, коді Исусӧс пуктӧ Кристос туйӧ, вӧтласны синагогаысь.
Та вӧсна бать-мамыс шуисны: «Юалӧй сылысь, ӧд сійӧ тыр арлыда нин».
Сэсся мӧдысь корисны сійӧ мортсӧ, коді вӧлі синтӧм, да шуисны сылы: «Кӧсйысь Ен водзын, мый збыльсӧ висьталан. Ми тӧдам: тэнӧ Бурдӧдысьыс — мыжа морт».
Сійӧ вочавидзис: «Мыжа-ӧ Сійӧ, ме ог тӧд.
Но ӧтитор тӧда: ме вӧлі синтӧм, а ӧні аддза».
Сылысь выльысь юалісны: «Мый Сійӧ вӧчис тэныд?
Кыдзи Сійӧ бурдӧдіс тэнӧ?»
Мортыс вочавидзис: «Ме тіянлы висьталі нин, сӧмын ті энӧ кывзӧй.
Мый нӧшта кӧсъянныд кывны месянь?
Гашкӧ, ті тшӧтш кӧсъянныд лоны Сылӧн велӧдчысьясӧн?»
Юдейяслӧн веськӧдлысьяс кутісны видны тайӧ мортсӧ да шуисны сылы: «Тэ Сылӧн велӧдчысь, а ми — Мӧисейлӧн.
Ми тӧдам, мый Ачыс Енмыс сёрнитіс Мӧисейкӧд. А кытысь тайӧ Мортыс, ми огӧ тӧдӧй».
Бурдӧм морт вочавидзис: «Тайӧ ёна шензьӧдӧ. Сійӧ бурдӧдіс менсьым синмӧс, а ті онӧ тӧдӧй, кытысь Сійӧ.
Ми тӧдам, мый Ен оз кывзы мыжаясӧс.
Но коді бурӧ пуктӧ Енсӧ да олӧ Сылӧн кӧсйӧм серти, Енмыс кывзӧ сійӧс.
Му пуксьӧмсяньыс эз на вӧв татшӧмыс, мый чужӧмсяньыс синтӧмӧс кодкӧ бурдӧдіс.
Менӧ Бурдӧдысьыс кӧ эз вӧв Енсянь, нинӧм эськӧ вӧчны эз вермы».
Сылы вочавидзисны: «Тэ дзоньнас мыж пытшкын чужӧмыд, а лысьтан миянӧс велӧдны.»
Сэсся вӧтлісны сійӧс.
Исус кывліс бурдӧдӧм мортӧс вӧтлӧм йылысь, корсис сійӧс да шуис: «Эскан-ӧ тэ Ен Пилы?»
Мӧдыс вочавидзис: «Господьӧй, коді нӧ Сійӧ? Висьтав, медым ме верми эскыны».
Исус шуис: «Тэ аддзылін Сійӧс, Сійӧ сёрнитӧ тэкӧд».
Бурдӧм мортыс шуис: «Эска, Господьӧй.»
Сэсся копыртчыліс Сылы.
Исус шуис: «Ме локті муюгыдас мыждыны, медым синтӧмъяс аддзисны да аддзысьяс синтӧммисны».
Тайӧс кылӧм бӧрын ӧткымын фарисей, кодъяс вӧліны Исус дінын, юалісны Сылысь: «Гашкӧ, ми тшӧтш синтӧмӧсь да?»
Исус вочавидзис: «Вӧлінныд кӧ ті синтӧмӧсь, сэки эськӧ энӧ мыжмӧй.
Но ті шуанныд, аддзам пӧ. Сідзкӧ, мыжныд ас выланыд кольӧ».
10 юр.
«Веськыда, веськыда висьтала тіянлы: коді пырӧ ыж йӧрӧ оз ӧдзӧсӧд, а мӧдлаті, сійӧ — гусясьысь да лёк вӧчысь.
Ӧдзӧсӧд пырысьыс — ыж видзысь,
сылы йӧр видзысь восьтӧ ӧдзӧссӧ. Ыжъяс кывзӧны ыж видзысьлысь гӧлӧс шысӧ.
Сійӧ чуксалӧ ыжъяссӧ нимъяснас да петкӧдӧ найӧс йӧр ортсыӧ.
Ыжъяссӧ лэдзалӧм бӧрын сійӧ мунӧ водзвыланыс. Ыжъясыс локтӧны бӧрсяньыс, ӧд найӧ тӧдӧны сылысь гӧлӧс шысӧ. А тӧдтӧм бӧрся ыжъяс оз мунны. Найӧ пышйӧны сыысь, ӧд найӧ оз тӧдны сылысь гӧлӧс шысӧ».
Исус висьталіс фарисейяслы тайӧ велӧданвисьтсӧ, сӧмын найӧ эз гӧгӧрвоны, мый йылысь сёрнитіс Исус.
Сэки Исус водзӧ висьталіс налы:
«Веськыда, веськыда висьтала тіянлы: Ме — ыжъяслы ӧдзӧсыс.
Меӧдз волысьяс — ставныс гусясьысьяс да лёк вӧчысьяс.
Ыжъяс эз кывзыны найӧс.
Ме — ӧдзӧсыс.
Меӧд пырысьыс мездмас. Сійӧ пырас, петас да йирсянін аддзас.
Гусясьысь локтӧ сӧмын гусявны, вины да бырӧдны.
А Ме локті сетны олӧм, тырвыйӧ олӧм.
Ме — ыжъяслы бур видзысь.
Бур видзысь сетӧ ассьыс олӧмсӧ ыжъясыс вӧсна.
Меда морт оз ассьыс ыжъяссӧ видз. Кор аддзӧ локтысь кӧинӧс, сійӧ эновтӧ ыжъяссӧ да пышйӧ.
Сэки кӧин косявлӧ ыжъяссӧ, да найӧ разалӧны.
Меда морт пышйӧ, ӧд сійӧс сӧмын медалӧма, сылы веськодь, мый лоӧ ыжъясыскӧд.
Ме — ыжъяслы бур видзысь.
Ассьым ыжъясӧс Ме тӧда, и Менам ыжъясӧй тӧдӧны Менӧ.
Кыдзи Батьӧй тӧдӧ Менӧ, сідзи Ме тӧда Батьӧс.
Ассьым олӧмӧс Ме сета ыжъясӧй вӧсна.
Тайӧ йӧрас кындзи Менам эмӧсь мукӧд ыжъяс, Меным тшӧтш колӧ вайӧдны найӧс.
Найӧ кыласны Менсьым гӧлӧс шыӧс, сэки лоас ӧти чукӧр да ӧти видзысь.
Батьӧйлы Ме муса, ӧд Ме сета Ассьым олӧмӧс, медым бӧр босьтны сійӧс.
Менсьым олӧмӧс некод оз вермы мырддьыны, Ме Ачым сета сійӧс.
Ме верма сетны сійӧс, и верма бӧр босьтны.
Тадзи тшӧктіс вӧчны Менам Батьӧй».
Тайӧ кывъясысь юдейяс венӧ воисны.
Унаӧн на пӧвстысь шуалісны: «Сійӧс пеж лов кутӧма, Сійӧ йӧйталӧ.
Мыйла Сійӧс кывзанныд?»
Мукӧдыс шуалісны: «Пеж лолӧн кутӧм морт оз вермы тадзи сёрнитны.
Вермас ӧмӧй пеж лов синтӧмъясӧс бурдӧдны?»
Вӧлі тӧв. Ерусалимын вӧлі гажӧдчан кад — крам вежӧдӧмсӧ казьтылӧм.
Исус ветлӧдліс крамдорса Соломон йӧрӧд.
Сэки юдейяс кытшалісны Исусӧс да шуисны: «Тэ дыр на кутан миянӧс бӧбйӧдлыны?
Тэ кӧ Кристос, веськыда висьтав миянлы».
Исус вочавидзис: «Ме висьталі нин тіянлы, но ті онӧ эскӧй.
Менам уджъясӧй, кодъясӧс Ме вӧча Бать нимсянь, висьталӧны Ме йылысь.
Но ті онӧ эскӧй, ӧд ті абу Менам ыжъяс. Тайӧс Ме висьтавлі нин тіянлы.
Менам ыжъясӧй кывзӧны Менсьым гӧлӧс шыӧс, и найӧс Ме тӧда. Найӧ локтӧны Ме бӧрся.
Ме сета налы помтӧм олӧм, и найӧ некор оз бырны.
Некод оз мырддьы найӧс Менам киысь.
Менам Батьӧй, коді сетіс Меным найӧс, ставсьыс медыджыд.
Некод оз вермы мырддьыны найӧс Менам Батьлӧн киысь.
Ме да Бать — ми ӧти».
Сэки юдейяс босьтісны изъяс, медым лыйлыны Исусӧс.
Сійӧ шуис налы: «Батьлӧн тшӧктӧм серти уна бур удж Ме вӧчи тіян пӧвстын. Кутшӧм уджысь нӧ кӧсъянныд изъявны Менӧ?»
Юдейяс вочавидзисны: «Огӧ бур уджысь Тэнӧ изъялӧй, изъялам Енмӧс омӧльтӧмысь. Тэ морт, а Енмӧ пуксян».
Исус вочавидзис: «Абу-ӧ гижӧма тіян Индӧдын, мый “Ме шуи: ті — енъяс”?
Гижӧдыс оз вежсьы. Енмыс кӧ шуис енъясӧн найӧс, кодъяслы сетіс Ассьыс Кывсӧ, сідзкӧ, мыйла ті шуанныд Менӧ Енмӧс омӧльтысьӧн, Ме кӧ шуа ачымӧс Ен Пиӧн? Ӧд Менӧ Батьӧй вежӧдіс да мӧдӧдіс муюгыдас.
Ме кӧ ог вӧч Батьлысь уджъяссӧ, энӧ эскӧй Меным.
А вӧча кӧ, эскӧй кӧть Менам уджъясӧ, Меным онӧ эскӧй да. Сэки ті тӧдмаланныд да эсканныд, мый Батьӧй Ме пытшкын, а Ме — Сы пытшкын».
Сэки юдейяс бара кӧсйисны кутны Исусӧс, но Сійӧ эз сетчы налы. Исус бара вуджис Йӧрдан ю мӧдлапӧлӧ, кӧні Иоан пыртліс йӧзсӧ, да кольччис сэтчӧ.
Сы дінӧ локтіс уна йӧз. Найӧ шуалісны: Иоан шензьӧданаторсӧ эз вӧчлы, но ставыс, мый Иоан висьтавліс тайӧ Мортыс йылысь — тайӧ збыль.
Сэні унаӧн эскисны Исуслы.
11 юр.
Вифания сиктын оліс Лазар нима морт, сійӧ висис. Сэні олісны тшӧтш Лазарлӧн Марья да Марпа чойясыс.
Буретш тайӧ Марьяыс бӧрынджык мавтас Господьӧс чӧскыд дука выйӧн да чышкалас Сылысь коксӧ аслас юрсиӧн. Висьысь Лазар вӧлі Марьялӧн вокыс.
Чойяс мӧдӧдісны мортӧс висьтавны Исуслы: «Господьӧй, Тэнад муса ёртыд висьӧ».
Тайӧс кылӧм бӧрын Исус шуис: «Тайӧ висьӧмыс абу кулӧм вылӧ, но Енмӧс ошкӧм вылӧ. Та пыр воссяс Ен Пилӧн дзирдлуныс».
Лазар, Марпа да сылӧн чойыс вӧліны мусаӧсь Исуслы.
Кор Исус тӧдмаліс Лазарлӧн висьӧм йылысь, Сійӧ кольччыліс на кык лун кежлӧ сэтчӧ, кӧні вӧлі.
Сэсся шуис велӧдчысьясыслы: «Бӧр мунамӧй Юдеяӧ».
Велӧдчысьясыс шуисны Исуслы: «Велӧдысь, Юдея муын сӧмын на кӧсйисны вины Тэнӧ изъясӧн, а Тэ бара нин мунан сэтчӧ?»
Исус вочавидзис: «Лунын ӧмӧй абу дас кык час?
Луннас ветлысь оз крукась, ӧд сійӧ аддзӧ тайӧ мувывса югыдсӧ.
Войнас ветлысь крукасьӧ, ӧд сылӧн югыдыс абу».
Тайӧс шуӧм бӧрын Исус содтіс: «Миян Лазар ёртным унмовсьӧма.
Ме муна сійӧс садьмӧдны».
Велӧдчысьясыс шуисны Сылы: «Господьӧй, унмовсьӧма кӧ, бурдас».
Исус сёрнитіс Лазарлӧн кулӧм йылысь, а велӧдчысьясыс мӧвпалісны, мый Исус сёрнитӧ узьӧм йылысь.
Сэки Исус веськыда шуис налы: «Лазар кулӧма.
Ме нимкодяся тіян вӧсна, мый эг вӧв сэні, ӧд ӧні ті понданныд эскыны. Локтӧй, мунамӧй сы дінӧ».
Сэки Фома, кодӧс шуисны Двӧйнипӧлӧн, шуис мукӧд велӧдчысьыслы: «Мунам да Сыкӧд ӧтлаын кулам».
Локтӧм бӧрас Исуслы висьталісны, Лазарӧс пӧ нёль лун сайын нин дзебисны.
Вифания сикт вӧлі Ерусалимсянь матын, кык-куим верст ылнаын.
Уна йӧз вӧлі локтӧмаӧсь Марпа да Марья ордӧ, медым пальӧдны кулӧм вок вӧснаыс налысь шогсӧ.
Марпа кыліс Исуслӧн локтӧм йылысь да петіс Сылы воча.
Марья пукаліс гортас.
Марпа шуис Исуслы: «Господьӧй, вӧлін кӧ Тэ тані, менам вокӧй эськӧ эз кув.
Но весиг ӧні тӧда: мый коран Енмыслысь, Сійӧ сетас Тэныд».
Исус вочавидзис: «Ловзяс тэнад вокыд».
Марпа шуис Сылы: «Тӧда, сійӧ ловзяс медбӧръя лунӧ, кор ловзясны кулӧмаяс».
Исус шуис: «Ме — Ловзьӧдысьыс да Олӧмыс.
Меным эскысь весиг кулӧм бӧрас кутас овны.
Быдӧн, коді олігас эскӧ Меным, некор оз кув.
Эскан-ӧ таӧ?»
Марпа шуис: «Эска, Господьӧй.
Ме эска, мый Тэ — Кристос, Ен Пи, кодлы колӧ вӧлі локны муюгыдас».
Тайӧс шуӧм бӧрын Марпа муніс Марья чойыс дінӧ да гусьӧн висьталіс сылы: «Велӧдысьным тані, тэнӧ корӧ».
Тайӧс кылӧм мысти Марья дзик пыр чеччис да муніс Исус дінӧ.
Исус абу на вӧлі пырӧма сиктас. Сійӧ вӧлі сэні, кӧні паныдасис Марпакӧд.
Йӧзыс, кодъяс вӧліны Марьякӧд керкаын да пальӧдісны сылысь шогсӧ, аддзисны Марьялысь тэрмасьӧмӧн мӧдӧдчӧмсӧ да петісны сы бӧрся. Найӧ чайтісны, мый сійӧ мунӧ дзебанінӧ бӧрдны.
Кор Марья локтіс Исус дінӧ да аддзис Сійӧс, уськӧдчис Сы водзӧ да шуис: «Господьӧй, вӧлін кӧ Тэ тані, вокӧй эськӧ эз кув».
Марьялысь да сыкӧд локтысь йӧзлысь бӧрдӧмсӧ аддзӧмысь Исуслӧн сьӧлӧмыс нормис. Сійӧ сьӧкыда ышловзис да юаліс: «Кытчӧ ті пуктінныд сійӧс?»
Сылы вочавидзисны: «Господьӧй, лок видзӧдлы».
Исуслӧн синваыс петіс.
Сэки йӧзыс сёрнитісны: «Видзӧдлӧй, кутшӧм муса вӧлӧм Сылы Лазарыс».
Ӧткымынӧн шуисны: «Сійӧ бурдӧдіс синтӧмӧс. Эз ӧмӧй Сійӧ вермы видзны Лазарӧс кулӧмысь?»
Исус локтіс дзебанінас нормӧм сьӧлӧмӧн.
Дзебаніныс вӧлі кырта горсйын, а пыранінсӧ вӧлі тупкӧма изйӧн.
Исус шуис: «Вештӧй изсӧ».
Марпа, кулӧм мортлӧн чойыс, шуис: «Господьӧй, сійӧ дуксьӧма нин, ӧд нёльӧд лун нин дзебанінын».
Исус шуис Марпалы: «Эг ӧмӧй тэныд шулы, мый эскан кӧ, аддзан Енлысь дзирдлунсӧ?»
Сэки вештісны изсӧ дзебанінысь, кӧні куйліс кулӧм Лазар.
Енэжӧ видзӧдлӧмӧн Исус шуис: «Батьӧй, Ме аттьӧала Тэнӧ, мый кылін Менӧ.
Ме тӧда: Тэ пыр кылан Менӧ. Тайӧс Ме шуи тані сулалысь йӧзыс вӧсна, медым найӧ эскисны, мый Тэ Менӧ мӧдӧдін».
Тайӧс шуӧм бӧрын Исус гораа шыасис: «Лазар, пет сэтысь.»
Кулӧм Лазар петіс. Сылысь ки-коксӧ вӧлі гартлӧма дзебан дӧраясӧн, чужӧмсӧ гартыштӧма чышъянӧн.
Исус шуис: «Разьӧй дӧраяссӧ, мед мунас».
Унаӧн, кодъяс волісны Марья дінӧ да аддзылісны, мый Исус вӧчис, пондісны эскыны Исуслы.
Мукӧдыс мунісны фарисейяс дінӧ да висьталісны налы, мый Исус вӧчис.
Аркирейяс да фарисейяс чукӧртісны веськӧдлан котыр да сёрнитісны: «Мый миянлы вӧчны?
Тайӧ Мортыс уна шензьӧданатор вӧчӧ.
Лэдзам кӧ Сылы водзӧ тадзи вӧчны, ставныс кутасны эскыны Сылы.
Сэки локтасны римсаяс да бырӧдасны миянлысь вежаиннымӧс да войтырнымӧс».
Каиаф нима морт, коді сійӧ вонас аркиреяліс, шуис налы: «Ті нинӧм онӧ вежӧртӧй. Ті ӧмӧй онӧ гӧгӧрвоӧй, мый миянлы лоӧ бурджык, ӧти морт кӧ кулас войтыр вӧсна, дзоньнас войтырыс бырӧм дорысь».
Тайӧ кывъяссӧ сійӧ шуис эз ассяньыс. Тайӧ вонас сійӧ аркиреяліс, та вӧсна водзвыв висьталіс, мый Исус кулас войтырыс вӧсна. Кулас оз сӧмын тайӧ войтырыс вӧсна, но медым ӧтлаӧ чукӧртны Енлысь разалӧм ныв-писӧ.
Тайӧ лунсяньыс найӧ шуисны вины Исусӧс.
Та вӧсна Исус эз нин ветлы восьсӧн Юдея муӧд.
Сійӧ муніс сэтысь овтӧминланьӧ, Ефраим карӧ, да кольччис сэтчӧ велӧдчысьясыскӧд.
Матыстчис юдейяслӧн Ыджыд лун. Сиктъясысь унаӧн локтісны Ерусалимӧ, медым сӧстӧммӧдчыны Ыджыд лун водзвылын.
Найӧ корсисны Исусӧс, крамын сулаліганыс сёрнитісны ӧта-мӧдныскӧд: «Кыдзи ті чайтанныд, локтас оз Сійӧ татчӧ Ыджыд лун кежлӧ?»
Аркирейяс да фарисейяс водзвыв тшӧктісны йӧзыслы: аддзас кӧ кодкӧ Исусӧс, мед юӧртас та йылысь, медым кутны Исусӧс.
12 юр.
Ыджыд лунысь квайт лун водзджык Исус воис Вифания сиктӧ, кӧні оліс Лазар. Буретш сійӧс Исус ловзьӧдіс.
Сэні Исуслы лӧсьӧдісны рытъя сёян. Марпа кесъяліс.
Исускӧд сёйысьяс пӧвстын вӧлі и Лазар.
Марья босьтіс литра джын зэв дона нард вый да мавтіс Исуслысь коксӧ, сэсся чышкаліс найӧс юрсинас.
Керкаас ӧвтіс чӧскыд дукӧн.
Велӧдчысьяс пӧвстын вӧлі Иуда, Симон-Искариотлӧн пиыс, коді сэсся вузалас Исусӧс. Сійӧ шуис: «Мыйла тайӧ выйсӧ эз вузавны куимсё динарысь? Сьӧмсӧ эськӧ позис сетавны гӧльяслы».
Дерт, Иуда эз тӧждысь гӧльяс вӧсна. Сійӧ шуис тадзи, ачыс вӧлі гусясьысь да.
Сы ордын вӧлі ӧтувъя сьӧм куд, кытысь сійӧ босьтлывліс аслыс.
Исус шуис: «Ӧвсьӧй сыысь.
Сійӧ видзис тайӧ выйсӧ Менӧ дзебигкежлӧ.
Гӧльяс пыр лоасны тіянкӧд, а Ме ог пыр ло».
Йӧзыс унаӧн тӧдмалісны Исуслӧн Вифания сиктӧ воӧм йылысь. Найӧ локтісны сэтчӧ эз сӧмын Исус понда, но медым аддзывны тшӧтш Лазарӧс, кодӧс Исус ловзьӧдіс кулӧмысь.
Аркирейяс шуисны вины тшӧтш Лазарӧс.
Ӧд Лазар вӧсна йӧзыс унаӧн ӧтдортчисны наысь да кутісны эскыны Исуслы.
Мӧд луннас гажӧдчанінӧ чукӧртчӧм йӧз кылісны, мый Исус локтӧ Ерусалимӧ. Пальма росъяс босьтӧмӧн найӧ петісны Исуслы воча да горзісны:
— Осанна.
Бурсиӧма Господь нимӧн Локтысьӧс, Израиль Ӧксыӧс.
Исус аддзис том осёлӧс да пуксис сы вылӧ. Ӧд тадзи гижӧма:
— Эн пов, Сион ныв.
Видзӧд, Ӧксыыд локтӧ осёл чань вылын пукалӧмӧн.
Сэки велӧдчысьясыс эз на гӧгӧрвоны тайӧс.
Но Исуслӧн дзирдлуныс воссьӧм бӧрын налы уси тӧд выланыс, мый тадзи вӧлі гижӧма Сы йылысь, и тадзи найӧ паныдалісны Сійӧс.
Найӧ, кодъяс вӧліны Исускӧд, кор Сійӧ чукӧстіс Лазарӧс дзебанінысь да ловзьӧдіс сійӧс, висьталісны йӧзыслы тайӧ шензьӧданатор йывсьыс.
Та вӧсна йӧзыс чукӧрӧн петісны Исуслы воча.
Фарисейяс сёрнитісны ас костаныс: «Аддзанныд-ӧ, ми нинӧм огӧ вермӧй вӧчны.
Став йӧзыс мунӧны Сы бӧрся».
Гажӧдчан кад дырйи Енлы юрбитны локтіс тшӧтш кымынкӧ грек.
Найӧ матыстчисны Филип дінӧ, коді вӧлі Галилеяса Випсаидаысь, да корисны: «Ыджыдӧй, ми кӧсъям аддзывны Исусӧс».
Филип муніс да висьталіс та йылысь Ӧндрейлы.
Сэсся Ӧндрей Филипкӧд висьталісны та йылысь Исуслы.
Исус шуис налы:
«Воис кад — воссьыны Морт Пилӧн дзирдлунлы.
Веськыда, веськыда висьтала тіянлы: шобді тусь кӧ муӧ усьӧм бӧрас оз кув, сэки ӧтнас кольӧ.
Кулас кӧ, уна тусь ваяс.
Тэныд кӧ муса олӧмыд, воштан сійӧс. Мустӧмтан кӧ ассьыд олӧмтӧ тайӧ муюгыдас, видзан сійӧс помтӧм олӧмӧ.
Меным кесъялысь мед локтӧ Ме бӧрся.
Кӧні Ме лоа, сэні тшӧтш лоӧ Менам кесъялысьӧй.
И Меным кесъялысьӧс Батьӧй бурӧ пуктас.
Ӧні Менам сьӧлӧмӧй ёна майшасьӧ.
Мый Меным шуны?
Батьӧй, мезды Менӧ тайӧ кадсьыс.
Но дзик тайӧ кад кежлас Ме локті.
Батьӧй, восьт Аслад нимлысь дзирдлунсӧ.»
Сэки енэжсянь кыліс гӧлӧс шы: «Ме восьті нин да нӧшта на восьта».
Сэні сулалысь йӧзыс тайӧс кылӧм бӧрын шуалісны: «Тайӧ гым».
Мӧдъяс шуалісны: «Андел Сыкӧд сёрнитіс».
Исус шуис: «Тайӧ висьталӧмыс эз вӧв Меным, а тіянлы.
Ӧні тайӧ муюгыдсӧ лоӧ мыждӧма.
Ӧні тайӧ муюгыдас ыджыдалысьсӧ лоӧ вӧтлӧма.
Му вылысь Менӧ кыпӧдӧм бӧрын Ме ставнысӧ Ас дінӧ сибӧда».
Тайӧ висьталӧмнас Сійӧ гӧгӧрвоӧдіс, кутшӧм ногӧн Сійӧ кулас.
Йӧзыс шуисны Сылы: «Ми тӧдам Индӧдысь, мый Кристос помтӧг олӧ.
Сідзкӧ, мыйла Тэ шуан, Морт Пиӧс пӧ кыпӧдасны?
Коді сійӧ Морт Пиыс?»
Сэки Исус шуис налы: «Этшаник кад югыдыс лоас на тіянкӧд.
Сідзкӧ, ветлӧй югыдыс дырйи, медым пемыдыс эз пӧдты тіянӧс. Ӧд пемыдас ветлысь оз тӧд, кытчӧ мунӧ.
Кытчӧдз югыдыс тіянкӧд, эскӧй югыдыслы. Сэки лоанныд югыдыслӧн ныв-пиӧн».
Тайӧс висьталӧм бӧрын Исус ылыстчис на дінысь да саяліс.
Сы мында шензьӧданатор Исус вӧчис йӧзыс водзын, но найӧ эз эскыны Сылы. Тадзи инісны Исай пророклӧн кывъясыс:
— Господьӧй, коді эскис миянсянь кывлӧмас?
Кодлы петкӧдчис Господьлӧн вына киыс?
Найӧ эз вермыны эскыны, кыдзи висьтавліс на йылысь Исай:
— Енмыс тупкис налысь синнысӧ, чорзьӧдіс налысь сьӧлӧмнысӧ, медым эз аддзыны синнаныс, эз гӧгӧрвоны сьӧлӧмнаныс да эз бергӧдчыны Мелань, медым Ме бурдӧді найӧс.
Исай шуис тайӧ кывъяссӧ Исуслысь дзирдлунсӧ аддзылігас, да висьталіс Сы йылысь.
Веськӧдлысьяс пӧвстысь унаӧн эскисны Исуслы.
Сӧмын фарисейясысь полӧмнысла найӧ эз лысьтны висьтавны та йылысь веськыда, медым эз вӧтлыны найӧс синагогаысь. Ӧд Енлӧн ошкӧм дорысь налы мусаджык вӧлі йӧзлӧн ошкӧмыс.
Исус гораа шыасис: «Меным эскысь оз Меным эскы, а Менӧ Мӧдӧдысьлы.
Менӧ аддзысь аддзӧ Менӧ Мӧдӧдысьӧс.
Ме — югыдыс. Ме локті му вылӧ, медым Меным эскысь эз коль пемыдас.
Менсьым кывъясӧс кылысь кӧ оз эскы, Ме сійӧс ог мыжды. Ме ӧд локті муюгыдсӧ мездыны, а эг мыждыны.
Коді оз сибӧд Менӧ да оз босьт Менсьым кывъясӧс, сылӧн эм аслас мыждысь: Менам висьталӧм кывйӧй медбӧръя лунӧ мыждас сійӧс.
Ме висьталі эг Ассянь.
Менӧ мӧдӧдысь Батьӧй Ачыс велӧдіс Менӧ, мый шуны да юӧртны.
Ме тӧда: Сылӧн тшӧктӧмыс вайӧ помтӧм олӧм.
Сідзкӧ, Менам висьталӧмӧй — Батьлӧн шуӧм серти висьталӧм».
13 юр.
Тайӧ вӧлі Ыджыд лун водзвылын. Исус тӧдіс, мый Сылы воис кад мунны тайӧ муюгыдсьыс Батьыс дінӧ. Исуслы вӧлі мусаӧсь найӧ, кодъяс эскисны Сылы, Сійӧ помӧдз петкӧдліс налы Ассьыс муслунсӧ.
Рытнас найӧ чукӧртчисны сёйны. Омӧльыс вӧлі ышӧдӧма нин Иудаӧс, Симон-Искариот пиӧс, вузавны Исусӧс.
Исус тӧдіс, мый Батьыс ставсӧ сетіс Сы киӧ, и мый Сійӧ локтіс Енсянь да бӧр Сы дінӧ мунӧ. Сёйигас Исус чеччис, пӧрччис вылыс паськӧмсӧ да вӧнясис ки чышкӧдӧн.
Кисьтіс дозйӧ ва да кутіс мыськавны велӧдчысьяслысь кокнысӧ, а вӧнялӧм чышкӧднас чышкаліс найӧс.
Исус матыстчис Симон-Петыр дінӧ. Петыр шуис: «Господьӧй, Тэ-ӧ менсьым кокӧс мыськан?»
Исус вочавидзис: «Тэ ӧні он на гӧгӧрво, мый Ме вӧча, но бӧрынджык гӧгӧрвоан».
Петыр шуис Сылы: «Некор он мыськав менсьым кокӧс.»
Исус воча шуис: «Ог кӧ мыськав тэнӧ, он ло Мекӧд».
Симон-Петыр шуис Сылы: «Господьӧй, мыськы тшӧтш менсьым киӧс да юрӧс, эн сӧмын кокӧс.»
Исус вочавидзис: «Мыськалӧмалысь колӧ мыськавны сӧмын коксӧ, ӧд дзоньнассӧ сійӧ сӧстӧм нин.
Ті сӧстӧмӧсь нин, сӧмын абу ставныд».
Исус тӧдіс, коді Сійӧс вузалас, та вӧсна шуис, абу пӧ ставныд сӧстӧмӧсь.
Налысь кокнысӧ мыськалӧм бӧрын Исус пасьтасис да бара пуксис сёйны. Сійӧ шуис велӧдчысьясыслы: «Гӧгӧрвоанныд-ӧ, мый Ме ӧні вӧчи?
Ті шуанныд Менӧ Велӧдысьӧн да Господьӧн.
Ті веськыда шуанныд, Ме буретш сійӧ.
Ме кӧ, тіян Господь да Велӧдысь, мыськалі тіянлысь кокнытӧ, сідзкӧ, тіянлы тшӧтш колӧ мыськавны ӧта-мӧдныдлысь кокнытӧ.
Тадзи Ме вӧчи, медым ті вӧчинныд Ме моз.
Веськыда, веськыда висьтала тіянлы: кесйӧг абу ыджыдджык аслас ыджыдысь, да мӧдӧдӧм морт абу ыджыдджык сійӧс мӧдӧдысьысь.
Тайӧс кӧ тӧданныд да та серти оланныд, ті шудаӧсь.
Ме ог висьтав ставныд йылысь, ӧд Ассьым бӧрйӧмаясӧс Ме тӧда.
Но Гижӧдыслы колӧ инны: “Мекӧд сёйысьыс мунас Меным паныд”.
Ме водзвыв висьтала тайӧс, медым лоӧм бӧрас ті эскинныд, мый Ме збыльысь Сійӧ, кодӧн шуа Ачымӧс.
Веськыда, веськыда висьтала тіянлы: коді сибӧдӧ Месянь мӧдӧдӧмаӧс, сійӧ сибӧдӧ Менӧ. А Менӧ сибӧдысь сибӧдӧ Менӧ Мӧдӧдысьӧс».
Тайӧс висьталӧм бӧрын Исуслӧн нормис сьӧлӧмыс.
Сійӧ шуис: «Веськыда, веськыда висьтала тіянлы: тіян пиысь ӧти вузалас Менӧ».
Сэки велӧдчысьясыс видзӧдлісны ӧта-мӧдныс вылӧ. Найӧ эз гӧгӧрвоны, код йылысь Сійӧ сёрнитӧ.
Велӧдчысьяс пиысь ӧти, коді вӧлі муса Исуслы, нёровтчӧмӧн пукаліс Исус бердын.
Симон-Петыр довкнитіс сылы, юав пӧ Исуслысь, код йылысь Сійӧ сёрнитӧ.
Исуслы морӧс бердас топӧдчӧмӧн велӧдчысьыс шуис: «Господьӧй, коді нӧ сійӧ?»
Исус вочавидзис: «Сійӧ мортыслы Ме сета кӧтӧдӧм нянь тор».
Исус кӧтӧдіс нянь тор да сетіс сійӧс Симон-Искариот Иудалы.
Тайӧ нянь тор бӧрас Иуда пытшкӧ пырис сӧтана.
Исус шуис Иудалы: «Мый кӧсъян вӧчны, вӧч ӧдйӧджык».
Сёйысьяс пӧвстысь некод эз гӧгӧрво, мыйла Исус шуис тадзи.
Кодсюрӧ чайтісны, мый Исус тшӧктіс ньӧбны коланаторсӧ Ыджыд лун кежлӧ либӧ сетны мыйкӧ гӧльяслы. Ӧд сьӧм кудйыс вӧлі Иуда ордын.
Нянь торсӧ босьтӧм бӧрын Иуда дзик пыр петіс ывлаӧ.
Вӧлі вой.
Иудалӧн петӧм бӧрын Исус шуис: «Ӧні воссис Морт Пилӧн дзирдлуныс, а Пиыс пыр воссис Енлӧн дзирдлуныс.
Енлӧн дзирдлуныс кӧ воссис Пиыс пыр, сэки Енмыс Ас пытшкас восьтас Пиыслысь дзирдлунсӧ. Тайӧ лоӧ регыд нин.
Челядь, Меным этша нин колис овны тіянкӧд,
сэсся кутанныд корсьны Менӧ. Ӧні висьтала тіянлы сійӧ, мый коркӧ висьтавлі мукӧдыслы: кытчӧ Ме муна, сэтчӧ ті онӧ вермӧй локнысӧ.
Выль тшӧктӧм сета тіянлы: радейтӧй ӧта-мӧднытӧ.
Кыдзи Ме радейта тіянӧс, сідзи ті радейтӧй ӧта-мӧднытӧ.
Радейтанныд кӧ ӧта-мӧднытӧ, сэки быдӧн аддзас, мый ті — Менам велӧдчысьяс».
Симон-Петыр юаліс: «Господьӧй, кытчӧ Тэ мунан?»
Исус вочавидзис: «Кытчӧ Ме муна, сэтчӧ тэ ӧні он вермы муннысӧ.
Локтан Ме бӧрся бӧрынджык».
Петыр шуис: «Господьӧй, мыйла ӧні ог вермы Тэ бӧрся муннысӧ?
Ме ассьым олӧмӧс сета Тэ вӧсна.»
Исус вочавидзис: «Тэ шуан, мый ассьыд олӧмтӧ сетан Ме вӧсна.
Веськыда, веськыда висьтала тэныд: петук чукӧсттӧдз на тэ куимысь соссян Меысь».
14 юр.
«Мед оз майшась тіян сьӧлӧмныд.
Эскӧй Енлы да эскӧй Меным.
Менам Бать керкаын вежӧсыс уна.
Эз кӧ вӧв сідзи, Ме эськӧ эг шу: муна дасьтыны тіянлы оланін.
Ме дасьта оланін да бӧр локта босьтны тіянӧс Ас дінӧ, медым ті вӧлінныд Мекӧд.
Ті тӧданныд, кытчӧ Ме муна, туйсӧ тшӧтш тӧданныд».
Фома шуис Сылы: «Господьӧй, ми огӧ тӧдӧй, кытчӧ Тэ мунан.
Кыдзи нӧ ми вермам туйсӧ тӧдны?»
Исус шуис сылы: «Ме — туйыс, збыльыс да олӧмыс.
Бать дінӧ позьӧ локны сӧмын Ме пыр, мӧд туйыс абу.
Ті кӧ тӧданныд Менӧ, тӧданныд тшӧтш Менсьым Батьӧс.
Ӧні ті тӧданныд Сійӧс, весиг аддзылінныд Сійӧс».
Филип шуис Сылы: «Господьӧй, петкӧдлы миянлы Батьтӧ. Унджыксӧ ми огӧ кӧсйӧй».
Исус вочавидзис: «Он ӧмӧй тӧд Менӧ, Филип, Ме ӧд сы дыра нин ола тіянкӧд?
Менӧ аддзылысь и Батьӧс аддзыліс.
Мыйла тэ шуан, петкӧдлы пӧ миянлы Батьтӧ?
Ме — Бать пытшкын, а Бать — Ме пытшкын. Эскан-ӧ таӧ?
Сійӧ кывъяссӧ, мый висьтала тіянлы, ог Ассянь висьтав.
Тайӧ Ме пытшкын олысь Батьӧй вӧчӧ уджъяссӧ.
Эскӧй Менам кывъясӧ: Ме — Бать пытшкын, а Бать — Ме пытшкын. Онӧ кӧ эскӧй таӧ, эскӧй Меным уджъясӧй серти.
Веськыда, веськыда висьтала тіянлы: Меным эскысь кутас вӧчны Ме кодь жӧ уджъяс, весиг наысь ыджыдджыкӧс на, ӧд Ме муна Батьӧй дінӧ.
Мый коранныд Батьлысь Менам нимӧн, сійӧс Ме вӧча, медым Батьлӧн дзирдлуныс воссис Пиыс пыр.
Мый коранныд Менам нимӧн, сійӧс Ме вӧча».
«Ме кӧ муса тіянлы, олӧй Менам тшӧктӧмъяс серти.
Ме кора Батьлысь, и Бать сетас тіянлы мӧд Дорйысьӧс.
Сійӧ пыр лоас тіянкӧд. Тайӧ Дорйысьыс — Збыльыслӧн Лолыс. Муюгыдыс оз аддзы да оз тӧд Сійӧс, та вӧсна оз вермы сибӧдны.
Ті тӧданныд Сійӧс, ӧд Сійӧ тіянкӧд да тіян пытшкын.
Ӧтнанытӧ ог коль тіянӧс, Ме бӧр локта тіян дінӧ.
Регыд муюгыдыс оз нин аддзы Менӧ, а ті кутанныд аддзыны Менӧ. Ме ола, та вӧсна ті тшӧтш кутанныд овны.
Сійӧ лунӧ ті тӧдмаланныд, мый Ме — Бать пытшкын, ті — Ме пытшкынӧсь, а Ме — тіян пытшкын.
Коді видзӧ сьӧлӧмас Менсьым тшӧктӧмъясӧс да олӧ на серти, сійӧ радейтӧ Менӧ.
Коді Менӧ радейтӧ, сійӧс Менам Батьӧй радейтӧ.
Ме сійӧс тшӧтш радейта да восся сылы».
Мӧд Иуда, абу Искариот, шуис Исуслы: «Господьӧй, мыйла Тэ кӧсъян воссьыны миянлы, а он муюгыдыслы?»
Исус вочавидзис:
«Коді радейтӧ Менӧ, сійӧ олӧ Менам кывъяс серти.
Менам Батьӧй радейтӧ сійӧс.
Ми локтам Батькӧд да овмӧдчам сы дінӧ.
Коді оз радейт Менӧ, сійӧ оз ов Менам кывъяс серти.
Сійӧ кывъясыс, мый ті кыланныд, абу Месянь, найӧ — Менӧ мӧдӧдысь Батьсянь.
Тайӧс висьталі тіянлы, кор Ме ӧні тіянкӧд на.
Менам Батьӧй мӧдӧдас Менам ним кузя Дорйысьӧс — Вежа Лолӧс. Сійӧ велӧдас тіянӧс быдторйӧ да казьтыштас тіянлы ставсӧ, мый Ме висьтавлі тіянлы.
Лӧньлун коля тіянлы. Ассьым лӧньлунӧс сета тіянлы, сійӧ абу муюгыдыслӧн лӧньлун кодь.
Энӧ майшасьӧй да энӧ полӧй.
Ті ӧд кывлінныд Менсьым кывъясӧс: “Ме муна да бӧр локта тіян дінӧ”.
Ме кӧ муса тіянлы, ті эськӧ нимкодясинныд Бать дінӧ Менам мунӧмысь, ӧд Батьӧй Меысь ыджыдджык.
Ме водзвыв висьтала тайӧс, медым лоӧм бӧрас ті эскинныд Меным.
Ог нин уна сёрнит тіянкӧд, ӧд тайӧ муюгыдас ыджыдалысьыс локтӧ нин. Ме вылын сійӧ ыджыдавны оз вермы.
Но медым муюгыдыс тӧдіс, мый Бать Меным муса, ставсӧ вӧча Батьлӧн тшӧктӧм серти.
Чеччӧй, мунамӧй татысь».
15 юр.
«Ме — збыль виноград пуыс, Менам Батьӧй — виноград быдтысьыс.
Вотӧс вайтӧм увъяссӧ Сійӧ кералӧ, а вотӧс вайысь увсӧ Сійӧ весалӧ, медым вайис унджык вотӧс на.
Ті сӧстӧмӧсь нин, ӧд Менам кывъясӧй весалісны тіянӧс.
Лоӧй Ме пытшкын, и Ме лоа тіян пытшкын.
Увйыс кӧ абу йитчӧма пуыскӧд, ачыс сійӧ оз вермы вайны вотӧссӧ.
Ті тшӧтш онӧ вермӧй вайны вотӧссӧ, онӧ кӧ лоӧй Ме пытшкын.
Ме — пуыс, ті — увъясыс.
Коді олӧ Ме пытшкын, а Ме сы пытшкын, сійӧ вайӧ уна вотӧс.
Ӧд Метӧг ті нинӧм онӧ вермӧй вӧчнысӧ.
Коді оз ло Ме пытшкын, увйӧс моз сійӧс шыбитасны ортсӧ. А косьмӧм увъяссӧ чукӧртӧны да шыбитӧны биӧ.
Лоанныд кӧ Ме пытшкын, да Менам кывъясӧй кӧ лоӧны тіян пытшкын, сэки корӧй, мый кӧсъянныд, и лоас тіянлы.
Ті кӧ ваянныд уна вотӧс да лоанныд Менам велӧдчысьясӧн, сэки воссяс Батьлӧн дзирдлуныс.
Батьлы Ме ёна муса, ті Меным тшӧтш ёна мусаӧсь.
Сідзкӧ, олӧй Менам муслун пытшкын.
Ме ставсӧ вӧча Батьлӧн тшӧктӧм серти да ола Сылӧн муслун пытшкын. Ті кӧ вӧчанныд Менам тшӧктӧм серти, сэки тшӧтш кутанныд овны Менам муслун пытшкын.
Тайӧс Ме висьталі тіянлы, медым Менам нимкодьлунӧй вуджис тіянлы да тыртіс сьӧлӧмнытӧ.
Менам тшӧктӧмӧй татшӧм: радейтӧй ӧта-мӧднытӧ, кыдзи Ме радейта тіянӧс.
Мортыс кӧ сетас олӧмсӧ ёртыс вӧсна, таысь ыджыдджык муслуныс абу.
Оланныд кӧ Менам тшӧктӧм серти, ті — Менам ёртъяс.
Ме ог нин шу тіянӧс кесйӧгъясӧн.
Ӧд кесйӧг оз тӧд, мый ыджыдыс вӧчӧ.
Ме шуа тіянӧс ёртъясӧн, ӧд Ме висьталі тіянлы ставсӧ, мый кывлі Батьсянь.
Энӧ ті Менӧ бӧрйӧй.
Ме бӧрйи тіянӧс да мӧдӧді, медым вайинныд бырлытӧм вотӧс. Тадзи кӧ вӧчанныд, Батьӧй сетас тіянлы ставсӧ, мый коранныд Сылысь Менам нимӧн.
Ме тшӧкта тіянлы: радейтӧй ӧта-мӧднытӧ».
«Муюгыдыс кӧ мустӧмтӧ тіянӧс, тӧдӧй: тіянысь водзджык на сійӧ мустӧмтіс Менӧ.
Ті кӧ вӧлінныд муюгыдсьыс, сэки эськӧ мусаӧсь вӧлінныд муюгыдыслы.
Но ті абу муюгыдсьыс, ӧд Ме бӧрйи тіянӧс сэтысь, сійӧн муюгыдыс мустӧмтӧ тіянӧс.
Кутӧй тӧд выланыд Менсьым кывъясӧс: кесйӧг абу ыджыдджык аслас ыджыдысь.
Менӧ кӧ вӧтлісны, вӧтласны тшӧтш тіянӧс.
Менсьым кывъясӧс кӧ кывзісны, кывзасны тшӧтш тіянлысь.
Ставсӧ тайӧс найӧ вӧчасны Менам ним вӧсна, ӧд найӧ оз тӧдны Менӧ Мӧдӧдысьӧс.
Эг кӧ Ме лок да сёрнит накӧд, найӧ эськӧ эз вӧвны мыжаӧсь.
Ӧні найӧ оз вермыны шуны, мый абу мыжаӧсь.
Менӧ мустӧмтысь Менсьым Батьӧс тшӧтш мустӧмтӧ.
Ме кӧ эг вӧч налӧн син водзын сійӧ уджъяссӧ, кодъясӧс некод эз вӧчлы, сэки эськӧ найӧ эз вӧвны мыжаӧсь.
Ӧні найӧ аддзылісны Менсьым уджъясӧс, но Менӧ да Менсьым Батьӧс мустӧмтӧны.
Тадзи инӧ налӧн Индӧдын гижӧмаыс: “Мустӧмтӧны Менӧ весьшӧрӧ”.
Ме мӧдӧда тіянлы Батьсянь Дорйысьӧс, Сійӧ — Збыльыслӧн Лолыс. Сійӧ локтас Батьсянь да висьталас Ме йылысь.
Ті тшӧтш кутанныд висьтавны Ме йылысь, ӧд ті водзысяньыс Мекӧд».
16 юр.
«Тайӧс висьталі тіянлы, медым ті энӧ эновтчӧй эскӧмысь.
Тіянӧс вӧтласны синагогаысь.
Весиг воас сэтшӧм кад, кор тіянӧс виысьяс кутасны чайтны, мый татшӧм ногӧн найӧ кесъялӧны Енмыслы.
Найӧ вӧчасны тадзи, ӧд Батьӧс да Менӧ найӧ оз тӧдны.
Тайӧс Ме висьталі тіянлы, медым сійӧ кадыс воигӧн ті тӧд выланыд уськӧдінныд Менсьым кывъясӧс.
Водзынсӧ тайӧс эг висьтавлы тіянлы, ӧд Ме вӧлі тіянкӧд».
«Ӧні муна Менӧ Мӧдӧдысь дінӧ.
Но некод тіян пиысь оз юав Менсьым, кытчӧ Ме муна.
Ӧд Менам висьталӧмысь тіян сьӧлӧмныд тырис шогӧн.
Ме висьтала тіянлы збыльсӧ: бурджык лоӧ, Ме кӧ муна.
Ӧд ог кӧ мун, сэки Дорйысь оз лок тіян дінӧ, а муна кӧ, мӧдӧда Сійӧс тіян дінӧ. Дорйысьыс локтас да эрдӧдас муюгыдыслысь ылалӧмсӧ — Сійӧ висьталас налы мыж йылысь, веськыдлун йылысь да мыждӧм йылысь.
Мыжыс сыын, мый оз эскыны Меным.
Веськыдлуныс сыын, мый Ме муна Батьӧй дінӧ да ті онӧ нин аддзӧй Менӧ.
Мыждӧмыс сыын, мый тайӧ муюгыдас ыджыдалысьсӧ мыждӧма нин.
Унатор на верма висьтавны тіянлы, но ӧні ті онӧ вермӧй ставсӧ тӧрӧдны.
Збыльыслӧн Лолыс локтас да велӧдас тіянӧс збыляс.
Сійӧ оз Ассяньыс кут висьтавны, а висьталас кывлӧмсӧ да юӧртас тіянлы водзӧ лоанасӧ.
Сійӧ нимӧдас Менӧ, ӧд Месянь кывлӧмсӧ тіянлы юӧртас.
Ставыс, мый Батьлӧн, тшӧтш Менам.
Сійӧн Ме шуи, мый Месянь кывлӧмсӧ тіянлы юӧртас».
«Регыд ті онӧ аддзӧй Менӧ, сэсся регыд бара аддзанныд Менӧ, ӧд Ме муна Бать дінӧ».
Велӧдчысьяс пиысь кодсюрӧ сёрнитісны ӧта-мӧдныскӧд: «Мыйла Сійӧ шуӧ: “Регыд ті онӧ аддзӧй Менӧ, сэсся регыд бара аддзанныд Менӧ?” Мыйла Сійӧ висьталӧ, Ме пӧ муна Бать дінӧ?» Найӧ шензисны: «Кыдзи гӧгӧрвоны Сылысь кывъяссӧ, кор шуӧ, регыд пӧ?
Ми огӧ гӧгӧрвоӧй Сылысь висьталӧмсӧ».
Исус тӧдіс, мый йылысь велӧдчысьясыс кӧсйӧны юавны Сылысь, да шуис налы:
«Сы йылысь-ӧ ті сёрнитанныд ӧта-мӧдныдкӧд, мый Ме кӧсйи висьтавны тайӧ кывъяснас: “Регыд ті онӧ аддзӧй Менӧ, сэсся регыд бара аддзанныд Менӧ”?
Веськыда, веськыда висьтала тіянлы: ті кутанныд сыркъялӧмӧн бӧрдны, а муюгыдыс кутас нимкодясьны. Ті шогӧ усянныд, но тіян шогныд бергӧдчас нимкодьлунӧ.
Кага вайысь ань шогсьӧ, кор воас кад чужтыны.
Но чужтӧм бӧрас сылӧн шогыс вунӧ нимкодьысла, ӧд муюгыдас морт чужис.
Ӧні ті тшӧтш шогсянныд, но Ме бара аддзыся тіянкӧд. Сэки тіян сьӧлӧмныд тырас нимкодьлунӧн, и тіянлысь нимкодьлунтӧ некод оз мырддьы.
Сійӧ лунӧ ті нинӧм нин онӧ юалӧй Менсьым.
Веськыда, веськыда висьтала тіянлы: Бать сетас тіянлы ставсӧ, мый коранныд Сылысь Менам нимӧн.
Ӧнӧдз ті нинӧм энӧ корлӧй Менам нимӧн.
Корӧй, и лоӧ сетӧма тіянлы. Сэки тіян нимкодьлунныд лоӧ помтӧм-дортӧм.
Ме висьтавлі тіянлы велӧданвисьтъясӧн.
Но воас кад, кор ог нин кут тадзи сёрнитны. Сэки веськыда висьтала тіянлы Бать йылысь.
Сійӧ лунӧ ті асьныд кутанныд корны Батьлысь Менам нимӧн. Меным абу нин колана кевмысьны Батьлы тіян вӧсна.
Ті асьныд мусаӧсь Батьлы, ӧд ті радейтанныд Менӧ да эсканныд, мый Ме локті Енсянь.
Ме локті муюгыдас Бать дінсянь. Ӧні Ме коля муюгыдсӧ да бӧр муна Бать дінӧ».
Велӧдчысьясыс шуисны Исуслы: «Ӧні Тэ веськыда висьталан, он нин сёрнит велӧданвисьтъясӧн.
Ӧні ми аддзам, мый Тэ тӧдан ставсӧ.
Миян юавтӧдз на Тэ тӧдан нин, мый вочавидзны. Та вӧсна эскам: Тэ локтін Енсянь».
Исус шуис: «Ӧні ті эсканныд?
Воас кад да воис нин, кор ті ставныд разаланныд, Менӧ ӧтнамӧс колянныд.
Но Ме абу ӧтнам, ӧд Мекӧд Батьӧй.
Тайӧс висьталі тіянлы, медым тіян вӧлі лӧньлун Ме пытшкын.
Муюгыдас лоӧ сьӧкыд тіянлы, но энӧ полӧй, ӧд Ме верми муюгыдсӧ».
17 юр.
Тайӧс висьталӧм бӧрын Исус видзӧдліс енэжас да шуис: «Батьӧй, воис кад восьтны Пиыдлысь дзирдлунсӧ, медым Пиыд вермис восьтны Тэнсьыд дзирдлунтӧ. Тэ индін Питӧ ыджыдавны быдӧн вылын. Сійӧ сетас помтӧм олӧм быдӧнлы, кодӧс Тэ сетін Сылы.
Помтӧм олӧмыс — тайӧ тӧдны Тэнӧ, ӧти збыль Енмӧс, да Тэӧн мӧдӧдӧм Исус Кристосӧс.
Му вылас олігӧн Ме восьті Тэнсьыд дзирдлунтӧ да вӧчи Меным сетӧм уджтӧ.
Батьӧй, ӧні сет Меным сійӧ жӧ дзирдлунсӧ, кутшӧм вӧлі Менам дзирдлунӧй му пуксьытӧдзыс на, кор Ме вӧлі Тэкӧд.
Ме восьті Тэнсьыд нимтӧ йӧзыслы, кодъясӧс Тэ сетін Меным муюгыдсьыс.
Найӧ — Тэнадӧсь, Тэ Меным сетін найӧс.
Найӧ видзисны Тэнсьыд Кывтӧ.
Ӧні найӧ гӧгӧрвоӧны: ставыс, мый Тэ сетін Меным, тайӧ — Тэсянь. Ме висьталі налы Тэнсьыд кывъястӧ. Найӧ сибӧдісны тайӧ кывъяссӧ да збыльысь тӧдӧны, мый Ме Тэсянь локті. Найӧ эскӧны, мый Тэ Менӧ мӧдӧдін.
Ме кевмыся на вӧсна.
Ог став йӧзыс вӧсна кевмысь, кевмыся сӧмын Меным сетӧмаясыд вӧсна, ӧд найӧ Тэнадӧсь.
Ставыс, мый Менам, сійӧ Тэнад, а мый Тэнад — сійӧ Менам. Менам дзирдлунӧй воссяс на пыр.
Ме абу нин муюгыдас, но найӧ муюгыдасӧсь на. Ме Тэ дінӧ локта.
Вежа Батьӧй, видз Меным сетӧмаясӧс Аслад нимӧн, медым найӧ вӧліны Миян моз ӧтвыв.
Накӧд муюгыдас олігӧн Ме видзи найӧс, Меным сетӧмаясӧс, Тэнад нимӧн.
Ме видзи найӧс, да некод эз вош на пиысь сы кындзи, кодлы колӧ вӧлі вошнысӧ. Тадзи иніс Гижӧдыс.
Ӧні локта Тэ дінӧ.
Ме висьтала тайӧс муюгыдас олігӧн на, медым Менам нимкодьлунӧй тыртіс налысь сьӧлӧмнысӧ.
Ме висьталі налы Тэнсьыд кывтӧ.
Муюгыдыс мустӧмтӧ найӧс, ӧд найӧ Ме моз абу тайӧ муюгыдсьыс.
Ог кевмы босьтны найӧс муюгыдсьыс, кевма видзны найӧс омӧльысь.
Найӧ Ме моз абу тайӧ муюгыдсьыс.
Вежӧд найӧс збыльыд пыр.
Збыльыс — тайӧ Тэнад кывйыд.
Тэ мӧдӧдін Менӧ муюгыдас.
Тэ моз жӧ Ме мӧдӧді найӧс муюгыдас. На вӧсна Ме сета Тэныд Ачымӧс, медым збыльыс вежӧдіс найӧс.
Кевмыся ог сӧмын на вӧсна, кевмыся тшӧтш мукӧдыс вӧсна, кодъяс эскӧны Меным налӧн висьталӧм пыр. Кевмыся, мед найӧ ставныс лоасны ӧтвыв. Кыдзи Тэ, Батьӧй, Ме пытшкын, а Ме — Тэ пытшкын, тадзи мед найӧ лоасны ӧтвыв Миян пытшкын. Сэки муюгыдыс эскас, мый Тэ Менӧ мӧдӧдін.
Меным сетӧм дзирдлунтӧ Ме сеті тшӧтш налы, медым найӧ вӧліны Миян моз ӧтвыв.
Ме кӧ на пытшкын, а Тэ — Ме пытшкын, сэки найӧ ставныс лоасны ӧтвыв.
Тадзи муюгыдыс тӧдмалас, мый Тэ Менӧ мӧдӧдін, и найӧ мусаӧсь Тэныд, кыдзи Ме муса Тэныд.
Батьӧй, Ме кӧсъя, медым Меным сетӧмаясыд лоасны сэні, кӧні Ме лоа, да аддзасны Менсьым дзирдлунӧс, кодӧс Тэ сетін Меным. Ӧд Ме муса вӧлі Тэныд му пуксьытӧдзыс на.
Веськыда вӧчысь Батьӧй, муюгыдыс оз тӧд Тэнӧ, а Ме тӧда Тэнӧ. Ӧні Тэнад сетӧмаясыд тшӧтш тӧдӧны, мый Тэ Менӧ мӧдӧдін.
Ме велӧді найӧс тӧдны Тэнсьыд нимтӧ да нӧшта на велӧда, медым Ме вӧлі на пытшкын, да медым на пытшкын вӧлі сэтшӧм муслун, кутшӧм Тэнад муслуныд Ме дінӧ».
18 юр.
Тайӧс шуӧм бӧрын Исус муніс велӧдчысьясыскӧд Кедрон ю сайӧ да пырис накӧд сад йӧрӧ.
Найӧ унаысь чукӧртчылісны сэтчӧ, сійӧн тайӧ йӧрсӧ тӧдіс тшӧтш Иуда, Исусӧс вузалысь.
Иуда вайӧдіс сэтчӧ шыпуртаясӧс да крам видзысьясӧс, кодъясӧс мӧдӧдісны аркирейяс да фарисейяс. Найӧ локтісны пӧнаръясӧн, биясӧн да шыпуртъясӧн.
Исус тӧдіс нин, мый лоӧ Сыкӧд, да воча петіс налы. Сійӧ юаліс: «Кодӧс ті корсянныд?»
Сылы вочавидзисны: «Назаретса Исусӧс».
Исус шуис: «Тайӧ Ме».
Накӧд орччӧн сулаліс тшӧтш Иуда, Исусӧс вузалысь.
Кор Исус шуис: «Тайӧ Ме», шыпуртаяс бӧрыньтчисны да усисны муас.
Исус бара юаліс: «Кодӧс ті корсянныд?»
Найӧ вочавидзисны: «Назаретса Исусӧс».
Исус шуис налы: «Ме висьталі нин тіянлы, тайӧ Ме.
Менӧ кӧ корсянныд, лэдзӧй мукӧдсӧ мунны». Исус шуис тадзи, медым инісны Сылӧн кывъясыс: «Меным сетӧмаясысь весиг ӧтикӧс эг вошты».
Симон-Петырлӧн вӧлі шыпурт. Сійӧ кыскис шыпуртсӧ да керыштіс аркирей кесйӧглысь веськыд пельсӧ.
Кесйӧглӧн нимыс вӧлі Малк.
Исус шуис Петырлы: «Бӧр пукты шыпурттӧ пуртӧсас.
Ог ӧмӧй Ме ю сійӧ чашасӧ, кодӧс сетіс Меным Батьӧй?»
Сэки шыпуртаяс, налӧн веськӧдлысьыс да крам видзысьяс босьтісны Исусӧс.
Сійӧс кӧрталӧмӧн нуӧдісны медводз Аннас дінӧ, Каиаф гӧтырлӧн бать дінӧ. Сійӧ вонас Каиаф аркиреяліс.
Буретш сійӧ шуліс юдейяслӧн веськӧдлысьяслы, бурджык пӧ ӧти мортлы кувны войтырыс вӧсна.
Симон-Петыр да нӧшта ӧти велӧдчысь мунісны Исус бӧрся.
Аркирейлы тӧдса вӧлі тайӧ велӧдчысьыс, та вӧсна сійӧ пырис Исускӧд аркирей йӧр пытшкӧ.
Петыр сулаліс йӧр ортсыас, дзиръя дорас.
Аркирейлы тӧдса велӧдчысьыс петіс, сёрнитыштіс дзиръя восьталысь анькӧд да вайӧдіс Петырӧс йӧр пытшкас.
Сэки аньыс юаліс Петырлысь: «Абу-ӧ тэ тшӧтш тайӧ Мортыслӧн велӧдчысь?»
Петыр шуис: «Абу».
Кӧдзыд вӧлі, та вӧсна кесйӧгъяс да крам видзысьяс пестісны бипур да сы гӧгӧр сулалӧмӧн шонтысисны.
Петыр тшӧтш сулаліс накӧд да шонтысис.
Аркирей юаліс Исуслысь Сылӧн велӧдӧмыс да велӧдчысьясыс йылысь.
Исус вочавидзис: «Ме ставсӧ висьтавлі восьсӧн.
Ме велӧді йӧзсӧ синагогаясын да крамын, кӧні найӧ пыр чукӧртчывлӧны. Ме нинӧм эг висьтавлы гусьӧн.
Мыйла тэ Менсьым юасян?
Юав Менӧ кывзысьяслысь, мый Ме висьтавлі налы.
Найӧ тӧдӧны Менсьым висьтавлӧмӧс».
Кор Исус шуис тайӧс, орччӧн сулалысь видзысьыс кучкис Сылы чужӧмас да шуис: «Тадзи тэ сёрнитан аркирейкӧд?»
Исус вочавидзис: «Шуи кӧ мыйкӧ лёка, висьтав, мый лёксӧ шуи. Шуи кӧ веськыда, мыйла Менӧ нӧйтан?»
Исусӧс кӧртавлӧмӧн Аннас мӧдӧдіс Сійӧс Каиаф аркирей дінӧ.
Симон-Петыр сулаліс бипур дорын да шонтысис.
Сылысь юалісны: «Абу-ӧ тэ тшӧтш Сылӧн велӧдчысь?»
Сійӧ соссис: «Абу».
Сэні вӧлі аркирейлӧн кесйӧг. Тайӧ кесйӧгыс вӧлі рӧдвуж сылы, кодлысь пельсӧ Петыр керыштіс. Сійӧ юаліс Петырлысь: «Эн-ӧ тэ вӧв Сыкӧд тшӧтш сад йӧрас?»
Петыр бара соссис.
Дзик пыр кыліс петуклӧн чукӧстӧм.
Асывводзнас Каиафсянь Исусӧс нуӧдісны римса юралысьлӧн керкаӧ.
Юдейяслӧн веськӧдлысьяс эз пырны керка пытшкас, медым эз пежасьны да вермисны сёйны Ыджыд лунся сёян.
Пилат петіс на дінӧ да шуис: «Мыйысь ті мыжаланныд тайӧ Мортсӧ?»
Найӧ вочавидзисны: «Эз кӧ вӧв Сійӧ лёк вӧчысь, ми эськӧ эгӧ вайӧдӧй Сійӧс тэ дінӧ».
Пилат шуис налы: «Босьтӧй Сійӧс да мыждӧй асланыд Индӧд серти».
Юдейяслӧн веськӧдлысьяс шуисны сылы: «Миянлы оз позь мыждыны мортӧс кулӧм вылӧ».
Тадзи инісны Исуслӧн кывъясыс, кутшӧм ногӧн Сійӧ кулас.
Пилат бара пырис керкаӧ, корис ас дінас Исусӧс да юаліс: «Тэ-ӧ юдейяслӧн Ӧксыыс?»
Исус воча шуис: «Ачыд-ӧ тэ тадзи мӧвпалан, либӧ мукӧдыс тадзи шуӧны Ме йылысь?»
Пилат шуис: «Ме ӧд абу юдей.
Тэнад войтырыд да аркирейяс сетісны Тэнӧ менам киӧ. Мый Тэ вӧчин?»
Исус вочавидзис: «Менам Юралӧмӧй абу тайӧ муюгыдсьыс.
Вӧлі кӧ тадзи, Менам кесъялысьясӧй эськӧ тышкасисны Ме вӧсна, медым эг шед веськӧдлысьяслӧн киӧ.
Но Менам Юралӧмӧй абу татысь».
Пилат шуис Сылы: «Сідзкӧ, Тэ Ӧксы?»
Исус вочавидзис: «Тэ ачыд шуан, мый Ме Ӧксы.
Ме чужи да локті муюгыдас, медым висьтавны збыль йывсьыс.
Коді збыльыслӧн, сійӧ кывзӧ Менсьым кывъясӧс».
Пилат юаліс: «Мый сійӧ збыльыс?»
Тайӧс шуӧм бӧрын Пилат петіс юдейяс дінӧ да шуис налы: «Ме некутшӧм мыж Сылысь ог аддзы.
Тіян кӧсйӧм серти Ыджыд лун водзвылын быд во ме лэдза дзескыдінысь ӧти мортӧс.
Кӧсъянныд-ӧ, медым ме лэдзи тіянлы юдейяслысь Ӧксысӧ?»
Сэки ставныс горӧдісны: «Эн Сійӧс, а Варавваӧс лэдз.»
Варавва вӧлі лёк вӧчысь.
19 юр.
Сэки Пилат тшӧктіс чорыда нӧйтны Исусӧс.
Шыпуртаяс пуктісны Исуслы юрас лежнӧгысь кыӧм юркытш, пасьтӧдісны Сійӧс пемыдгӧрд паськӧмӧ да шуалісны: «Мед олас юдейяслӧн Ӧксы.»
Сэсся кучкалісны чужӧмас.
Пилат бара петіс йӧзыс дінӧ да шуис: «Ме петкӧда Сійӧс тіян дінӧ, медым тӧдінныд: ме некутшӧм мыж Сылысь ог аддзы».
Исус петіс пемыдгӧрд паськӧма, юр вылас вӧлі лежнӧгысь юркытш.
Пилат шуис йӧзыслы: «Со, тайӧ Мортыс».
Исусӧс аддзигӧн аркирейяс да крам видзысьяс горӧдісны: «Тувъяв. Тувъяв Сійӧс.»
Пилат шуис налы: «Ті асьныд босьтӧй да тувъялӧй Сійӧс.
Ме некутшӧм мыж Сылысь ог аддзы».
Найӧ вочавидзисны: «Миян эм Индӧд.
Индӧдным серти Сылы колӧ кувны, ӧд Асьсӧ Сійӧ Ен Пиӧн шуӧ».
Тайӧс кылӧм мысти Пилат ёнджыка на повзис.
Сійӧ пырис керкаас да юаліс Исуслысь: «Тэ кытысь?»
Исус сылы нинӧм эз вочавидз.
Пилат шуис: «Он кӧсйы сёрнитны мекӧд?
Он ӧмӧй Тэ тӧд, мый ме верма тувъявны Тэнӧ, верма и мездыны?»
Исус вочавидзис: «Тэ эськӧ нинӧм эн вермы вӧчны Мекӧд, эз кӧ вӧв сетӧма тэныд вылісянь.
Та вӧсна Менӧ вузалысь ёнджыка на мыжа».
Та бӧрти Пилат ёнджыка на кӧсйис лэдзны Исусӧс,
но юдейяс горзісны: «Сійӧс кӧ лэдзан, кесарлы тэ абу ёрт.
Ӧд коді пуктӧ асьсӧ ӧксыӧ, сійӧ паныд мунӧ кесарлы».
Тайӧс кылӧм бӧрын Пилат петкӧдіс Исусӧс ывлаӧ, ачыс пуксис мыждан пуклӧсӧ, коді сулаліс Изэрд вылын. Юдейяс тайӧ Изэрдсӧ шуисны Гаввафаӧн.
Тайӧ вӧлі Ыджыд лунлы паныд, лун шӧрнас.
Пилат шуис юдейяслы: «Со, тіян Ӧксыныд.»
Найӧ горӧдісны: «Босьт, тувъяв Сійӧс.»
Пилат юаліс: «Тіянлысь Ӧксытӧ тувъяла?»
Аркирейяс вочавидзисны: «Кесарысь кындзи миян ӧксыыс абу».
Сэки Пилат сетіс Исусӧс тувъявны крестӧ.
Исусӧс нуӧдісны сэтысь.
Крестсӧ нуигтыр Исус кайис Юр лы нима керӧсӧ, юдейяс тайӧ керӧссӧ шуисны Голгопаӧн. Сэні Сійӧс тувъялісны крестӧ. Сыкӧд орччӧн ӧтар-мӧдарсяньыс тувъялісны кык мортӧс, а шӧракостаныс — Исусӧс.
Пӧвтор вылӧ Пилат тшӧктіс гижны: «Назаретса Исус, юдейяслӧн Ӧксы». Гижӧдсӧ ӧшӧдісны крестас.
Тайӧ гижӧдсӧ унаӧн лыддисны, ӧд Исусӧс тувъяланіныс вӧлі карсянь матын. Гижӧдсӧ вӧлі гижӧма еврей, грек да латин кывйӧн.
Аркирейяс шуисны Пилатлы: «Эн гиж: “Юдейяслӧн Ӧксы”. Гиж, мый Сійӧ шуліс: “Ме — юдейяслӧн Ӧксы”».
Пилат вочавидзис: «Мый гижи, сійӧс гижӧма нин».
Исусӧс тувъялӧм бӧрын шыпуртаяс босьтісны Сылысь паськӧмсӧ да юкисны нёль пельӧ, быдӧнлы вичмис ӧти тор. Босьтісны тшӧтш дӧрӧмсӧ. Дӧрӧмыс вӧлі вурыстӧм, дзоньнас кыӧма.
Найӧ шуисны ӧта-мӧдныслы: «Огӧ косявлӧй дӧрӧмсӧ, вай пудъясям, кодлы сійӧ вичмас».
Тадзи иніс Гижӧдыс:
— Юкисны ас костаныс Менсьым паськӧмӧс, пудъясисны Менам дӧрӧм вӧсна.
Тадзи вӧчисны шыпуртаяс.
Крест дорын сулалісны Исуслӧн мамыс, мамыслӧн чойыс, Клопаслӧн Марья нима гӧтырыс да Магдала Марья.
Сэні сулалысь мамсӧ да муса велӧдчысьсӧ аддзигӧн Исус шуис мамыслы: «Аньӧй, тайӧ тэнад пиыд».
Сэсся шуис велӧдчысьыслы: «Тайӧ тэнад мамыд».
Сэксянь тайӧ велӧдчысьыс босьтіс Марияӧс ас дінас.
Исус тӧдіс, мый ставсӧ нин вӧчӧма. Сійӧ шуис: «Горшӧй косьмӧ». Тадзи иніс Гижӧдыс.
Сэні сулаліс шома вина тыра доз.
Шыпуртаяс кӧтӧдісны винаӧн губка, сэсся иссоп бедь помӧ сатшкӧмӧн матыстісны сійӧс Исуслы вомдорас.
Винасӧ видлӧм бӧрын Исус шуис: «Ставсӧ вӧчӧма.»
Сэсся нёровтіс юрсӧ да лэдзис ловсӧ.
Ставыс тайӧ вӧлі Ыджыд лунлы паныд лунӧ. Юдейяслӧн веськӧдлысьяс эз кӧсйыны, медым шойясыс колисны крестын ӧшавны шойччан лун кежлӧ, ӧд матыстчис Ыджыд лун. Та вӧсна корисны Пилатӧс, медым тшӧктіс чегъявны тувъялӧмаяслысь кокчӧр лыяссӧ да лэдзны найӧс крест вылысь.
Шыпуртаяс локтісны да чегъялісны Исускӧд орччӧн тувъялӧмаяслысь кокчӧр лыяссӧ.
Исус дінӧ матыстчӧм бӧрын найӧ аддзисны, мый Сійӧ кулӧма нин. Та вӧсна кокчӧр лыяссӧ Сылысь эз чегъявны.
Шыпуртаяс пиысь ӧти бытшкис Исуслы шынас ордлы костас, сэтысь чепӧсйис вир да ва.
Тайӧс аддзылысь висьталӧ та йылысь, медым ті эскинныд. Ӧд сылӧн висьталӧмыс веськыд. Сійӧ тӧдӧ, мый висьталӧ збыльсӧ.
Ставыс артмис Гижӧдыс серти: «Сылысь лысӧ оз ло чегъялӧма».
Мӧдлаын тшӧтш гижӧма: «Кутасны видзӧдны Сы вылӧ, кодӧс бытшкасны».
Аримафея карысь Ӧсип вӧлі Исуслӧн гуся велӧдчысь, ӧд сійӧ поліс юдейяслӧн веськӧдлысьясысь. Сійӧ муніс Пилат дінӧ да корис Исуслысь шойсӧ.
Пилат тшӧктіс босьтны.
Ӧсип муніс да босьтіс Исуслысь шойсӧ.
Сэтчӧ локтіс тшӧтш Никодим, коді водзынджык воліс Исус дінӧ войнас.
Сійӧ вайис комын кило кымын смирнаысь да алоэысь вӧчӧм мавтас.
Найӧ босьтісны Исуслысь шойсӧ да гартыштісны сійӧс дзебан дӧраӧ, кодӧс вӧлі кӧтӧдӧма чӧскыд дука мавтасӧн. Тадзи дзеблісны юдейяс кулӧмаясӧс.
Исусӧс тувъяланінсянь матын вӧлі сад йӧр, сэні вӧлі выль дзебанін. Сэтчӧ некодӧс на эз дзеблыны.
Матыстчис юдейяслӧн шойччан лун, та вӧсна Исуслысь шойсӧ пуктісны тайӧ дзебанінас, ӧд дзебаніныс вӧлі матын.
20 юр.
Шойччан лун бӧрын асъя рӧмыдас Магдала Марья локтіс дзебанінӧ.
Сійӧ аддзис: изсӧ вӧлі вештӧма пыранінсьыс.
Сэки котӧртіс Симон-Петыр дінӧ да мӧд велӧдчысь дінӧ, коді вӧлі муса Исуслы, да шуис налы:
«Господьтӧ нуӧмаӧсь дзебанінсьыс, но огӧ тӧдӧй, кытчӧ Сійӧс пуктӧмаӧсь».
Петыр мӧд велӧдчыськӧд мӧдӧдчисны дзебанінас.
Найӧ кыкнанныс котӧртісны.
Мӧд велӧдчысьыс котӧртіс Петырысь тэрыбджыка да водзджык воис дзебанін дорас.
Сійӧ копыртчис да аддзис дзебан дӧраяссӧ, но пытшкас эз пыр.
Сы бӧрся локтіс Симон-Петыр, пырис дзебанінас да аддзис сэтысь дзебан дӧраяссӧ. Юрсӧ гартыштан чышъянсӧ вӧлі тубыртӧма, да куйліс мӧдлаын, дӧраясысь торйӧн.
Дзебанінас пырис тшӧтш мӧд велӧдчысьыс, коді водзджык воис. Сійӧ аддзис тайӧс да эскис.
Ӧд найӧ эз на гӧгӧрвоны Гижӧдсьыс, мый Исус ловзяс.
Сэсся велӧдчысьяс бӧр мунісны гортаныс.
Марья бӧрдігтыр сулаліс дзебанін дорас.
Бӧрдігмозыс сійӧ копыртчӧмӧн видзӧдліс дзебанін пытшкас да аддзис сэтысь еджыд паськӧма кык анделӧс. Ӧтиыс пукаліс шой вӧвлӧминас юрладорас, а мӧдыс — кокладорас.
Найӧ юалісны: «Аньӧй, мыйла тэ бӧрдан?»
Марья вочавидзис: «Нуӧмаӧсь менсьым Господьӧс, и ог тӧд, кытчӧ Сійӧс пуктӧмаӧсь».
Тайӧс шуӧм бӧрын Марья бергӧдчис бӧрланьыс да аддзис сулалысь Исусӧс, сӧмын эз тӧд Сійӧс.
Исус юаліс: «Аньӧй, мыйла тэ бӧрдан?
Кодӧс корсян?»
Марья чайтіс, мый сыкӧд сёрнитӧ сад йӧрын уджалысь, да шуис сылы: «Ыджыдӧй, тэ кӧ петкӧдін Сійӧс, висьтав, кытчӧ пуктін.
Ме босьта Сійӧс».
Исус шуис: «Марья.»
Марья бергӧдчис да шуис: «Раввуни.» Тайӧ лоӧ: «Велӧдысьӧй.»
Исус шуис сылы: «Эн инмӧдчы Ме дінӧ, Ме ӧд эг на кыпӧдчы Батьӧй дінӧ.
Мун Менам вокъяс дінӧ да висьтав налы: Ме кыпӧдча Аслам Батьӧй да тіян Батьныд дінӧ, Аслам Енмӧй да тіян Енныд дінӧ».
Магдала Марья муніс да юӧртіс велӧдчысьяслы, мый аддзыліс Господьӧс, да висьталіс налы Исуслысь кывъяссӧ.
Шойччан лун бӧрын рытнас велӧдчысьяс чукӧртчисны ӧтлаӧ. Найӧ полісны юдейяслӧн веськӧдлысьясысь да йигналісны ӧдзӧсъяссӧ. Виччысьтӧг локтіс Исус, сувтіс на шӧрӧ да шуис: «Лӧнь олӧм тіянлы.»
Тайӧс шуӧм бӧрын Сійӧ петкӧдліс налы Ассьыс кисӧ да ордлыяссӧ.
Господьӧс аддзигӧн велӧдчысьяс долыдмисны.
Исус шуис налы мӧдысь: «Лӧнь олӧм тіянлы.
Кыдзи Бать мӧдӧдіс Менӧ, сідзи Ме мӧдӧда тіянӧс».
Тайӧс шуӧм бӧрын Сійӧ пӧльыштіс налань да шуис: «Сибӧдӧй Вежа Лолӧс.
Кодлысь мыжъяссӧ прӧститанныд, сійӧс лоӧ прӧститӧма. Кодлысь онӧ прӧститӧй, сы вылӧ мыжыс коляс».
Исус волігӧн дас кыксьыс ӧти, Двӧйнипӧв Фома, эз вӧв накӧд.
Мукӧд велӧдчысьыс висьталісны сылы: «Ми аддзылім Господьӧс».
Фома воча шуис: «Ог кӧ аддзыв кисьыс кӧрттув дойяссӧ да ог пуктыв сэтчӧ чуньӧс, да ог кӧ пуктыв ассьым киӧс сылы ордлыас, ог эскы».
Вежон мысти велӧдчысьясыс бара вӧліны керкаынӧсь, Фома тшӧтш вӧлі накӧд.
Ӧдзӧсъясыс вӧліны йиганаӧсь. Исус сувтіс на шӧрӧ да шуис: «Лӧнь олӧм тіянлы.»
Сэсся шуис Фомалы: «Нюжӧдлы чуньтӧ да видзӧдлы Менсьым киӧс.
Нюжӧдлы китӧ да пуктыв Менам ордлыӧ.
Эн ло эскытӧмӧн, но ло эскысьӧн».
Фома вочавидзис: «Господьӧй, менам Енмӧй.»
Исус шуис сылы: «Тэ эскан, Менӧ аддзылін да.
Шудаӧсь найӧ, кодъяс оз аддзыны, но эскӧны.»
Исус вӧчис велӧдчысьясыс дырйи уна мукӧд шензьӧданатор. На йылысь абу гижӧма тайӧ небӧгас.
Тайӧс гижӧма, медым ті эскинныд, мый Исус эм Кристос, Ен Пи. Эсканныд кӧ, Сылӧн нимыс пыр тіянлы вичмас олӧм.
21 юр.
Та бӧрти Исус петкӧдчис велӧдчысьясыслы Тиверия ты дорын.
Сійӧ петкӧдчис тадзи.
Симон-Петыр, Двӧйнипӧв Фома, Галилеяса Канаысь Нафанаил, Зеведейлӧн пияныс да нӧшта кык велӧдчысь вӧліны ӧтлаынӧсь.
Симон-Петыр шуис: «Ме муна чери кыйны».
Сылы шуисны: «Ми тшӧтш тэкӧд мунам».
Найӧ дзик пыр пуксисны пыжӧ да петісны ва вылӧ.
Сійӧ войнас налы нинӧм эз шед.
Водз асывнас Исус сулаліс вадорас.
Велӧдчысьясыс эз тӧдны Сійӧс.
Исус юаліс налысь: «Ёртъясӧй, шедіс-ӧ тіянлы чериныд?»
Исус шуис: «Чӧвтӧй тывнытӧ пыж веськыдладорас, сэки шедас».
Найӧ чӧвтісны. Чериыс шедіс сэтшӧм уна, весиг васьыс тывсӧ эз вермыны кыскыны.
Сэки велӧдчысьыс, коді вӧлі муса Исуслы, шуис Петырлы: «Тайӧ Господь».
Симон-Петыр сэки вӧлі пӧрччысьӧма. Кор кыліс, мый тайӧ Господь, сійӧ ӧдйӧ пасьтасис да чеччыштіс ваас.
Мукӧд велӧдчысьыс локтісны пыжнас да кыскисны чери тыра тывсӧ. Найӧ вӧліны матынӧсь вадорсяньыс, воськов кыксё сайын.
Вадорас матыстчӧм бӧрын ӧгыръяс вылысь аддзисны чери, орччӧн вӧлі нянь.
Исус шуис налы: «Вайыштӧй кыйӧм черинытӧ».
Симон-Петыр муніс да кыскис му вылас тывсӧ. Сэні тырыс вӧлі гырысь чери. Чериыс вӧлі сё ветымын куим, но тывйыс эз косяссьы.
Исус шуис налы: «Локтӧй, сёйӧй».
Велӧдчысьясыс эз лысьтны юавны Сылысь: «Коді Тэ?» Найӧ тӧдісны, мый Сійӧ Господь.
Исус локтіс, босьтіс нянь да сетіс сійӧс велӧдчысьясыслы, сетіс тшӧтш черисӧ.
Тайӧ вӧлі коймӧдысь нин, кор Исус петкӧдчис Аслас велӧдчысьяслы ловзьӧм бӧрас.
Сёйӧм бӧраныс Исус шуис Симон-Петырлы: «Симон, Ионалӧн пи, мусаджык-ӧ Ме тэныд налы дорысь?»
Петыр шуис Сылы: «Мусаджык, Господьӧй.
Тэ тӧдан, мый Тэ меным муса».
Исус шуис сылы: «Йирсьӧд Менсьым баляясӧс».
Сэсся мӧдысь юаліс Петырлысь: «Симон, Ионалӧн пи, муса-ӧ Ме тэныд?»
Петыр шуис Сылы: «Муса, Господьӧй.
Тэ тӧдан, мый Тэ меным муса».
Исус шуис сылы: «Видз Менсьым ыжъясӧс».
Сэсся коймӧдысь юаліс: «Симон, Ионалӧн пи, муса-ӧ Ме тэныд?»
Петыр шогӧ усис, мый Исус коймӧдысь юаліс сылысь: «Муса-ӧ Ме тэныд?»
Сійӧ вочавидзис: «Господьӧй, Тэ ставсӧ тӧдан.
Тэ тӧдан, мый Тэ меным муса».
Исус шуис сылы: «Йирсьӧд Менсьым ыжъясӧс.
Веськыда, веськыда висьтала тэныд: том дырйиыд тэ ачыд вӧнясьлін да ветлін, кытчӧ кӧсйин.
Пӧрысьмӧм бӧрад нюжӧдан китӧ, сэки мӧд тэнӧ вӧньӧдас да нуӧдас, кытчӧ он кӧсйы».
Тайӧс висьталӧмнас Исус сетіс тӧдны, кутшӧм ногӧн ковмас кувны Петырлы да нимӧдны Енмӧс.
Сэсся шуис Петырлы: «Лок Ме бӧрся».
Петыр бергӧдчис бӧрланьыс да аддзис: на бӧрся локтіс сійӧ велӧдчысьыс, коді вӧлі муса Исуслы. Рытъя сёйигӧн Исуслы морӧс бердас топӧдчӧмӧн буретш сійӧ юавліс: «Господьӧй, коді нӧ Тэнӧ вузалас?»
Сійӧс аддзигӧн Петыр юаліс Исуслысь: «Господьӧй, а сійӧс мый виччысьӧ?»
Исус шуис Петырлы: «Ме кӧ кӧсъя, медым сійӧ оліс Менам локтӧдз, мый тэ майшасян та вӧсна?
Тэ лок Ме бӧрся».
Та вӧсна эскысьяс пӧвстын паськаліс сёрни, мый тайӧ велӧдчысьыс оз кув.
Исус эз шу Петырлы, мый тайӧ велӧдчысьыс оз кув. Сійӧ шуис сӧмын: «Ме кӧ кӧсъя, медым сійӧ оліс Менам локтӧдз, мый тэ майшасян та вӧсна?»
Буретш сійӧ велӧдчысьыс висьталӧ та йылысь да гижис тайӧс. Ми тӧдам, мый сылӧн висьталӧмыс веськыд.
Уна мукӧдтор на вӧчис Исус.
Но гижны кӧ та йылысь ставсӧ, сэки, ме чайта, муюгыдас эськӧ эз тӧр та мында небӧгыс.
Аминь.
Апостолъяслӧн уджъяс
1 юр.
Воддза небӧгас, дона Феофил, ме гижи тэныд ставсӧ, мый Исус вӧчис да мыйӧ велӧдіс водзысяньыс сійӧ лунӧдзыс, кор кыпӧдчис енэжӧ. Кыпӧдчытӧдзыс на Сійӧ Вежа Ловсянь сетіс Аслас бӧрйӧм апостолъяслы тшӧктӧмъяс. Сьӧкыда кулӧм бӧрас Сійӧ уна эскӧданторйӧн петкӧдліс налы, мый Сійӧ ловзис. Нелямын лун чӧж Сійӧ петкӧдчывліс да висьтавліс Енлӧн Юралӧм йылысь.
Апостолъяскӧд ӧтлаын сёйигӧн Исус шуис: «Ерусалимысь энӧ мунӧй.
Виччысьӧй Батьлысь кӧсйысьӧмасӧ, мый йылысь Ме висьтавлі тіянлы.
Иоан пыртіс ваӧн, но кымынкӧ лун мысти тіянӧс лоӧ пыртӧма Вежа Лолӧн».
Чукӧртчӧмаяс юалісны Исуслысь: «Господьӧй, он-ӧ тайӧ кадӧ Тэ бӧр сувтӧд Израильлы юралӧмсӧ?»
Сійӧ вочавидзис: «Абу тіян мог тӧдны кадъяс йылысь, Бать индӧ кадъяссӧ.
Но кор лэччас тіян вылӧ Вежа Лов, тіянлы лоӧ сетӧма вын.
Сэки понданныд висьтавлыны Ме йылысь Ерусалимын, став Юдеяын, Самарияын да став му пасьталаыс».
Тайӧс висьталӧм бӧрын налӧн син водзын Исус кыпӧдчис енэжӧ, да кымӧрыс вевттис Сійӧс.
Найӧ синнысӧ эз лэдзлыны енэжысь, пыр видзӧдісны Сылысь ылыстчӧмсӧ. Виччысьтӧг на водзӧ сувтісны еджыд паськӧма кык морт.
Найӧ шуисны: «Галилея войтыр, мый ті сулаланныд да видзӧданныд енэжас?
Ті асланыд синмӧн аддзылінныд Исуслысь енэжӧ кыпӧдчӧмсӧ, тадзикӧн Сійӧ бӧр локтас».
Сэсся найӧ бӧр мунісны Ерусалимӧ Олив керӧсысь, тайӧ керӧсыс вӧлі верст ылнаын Ерусалимсянь.
Локтӧм бӧраныс найӧ пырисны керкаӧ да кольччисны сэні вылыс судтаас. Тайӧ вӧліны: Петыр, Яков, Иоан, Ӧндрей, Филип, Фома, Варфоломей, Матвей, Алфей Яков, Симон Зилот да Яков Иуда.
Найӧ ставныс аньяскӧд, Исуслӧн вокъяскӧд да Сылӧн Мария мамыскӧд ӧти сьӧлӧмӧн дугдывтӧг кевмысисны.
Сійӧ лунъясӧ чукӧртчис сё кызь гӧгӧр велӧдчысь. На шӧрӧ сувтӧмӧн Петыр шуис: «Вокъясӧй, Гижӧдыслы колӧ вӧлі инны. Ӧд Давид пыр на Вежа Лов висьтавліс Иуда йылысь, коді вайӧдіс Исус дінӧ Сійӧс босьтысьясӧс.
Иуда вӧлі миян пиысь ӧти, сійӧс миянӧс моз тшӧтш вӧлі бӧрйӧма кесъявны.
Лёк уджсьыс босьтӧм сьӧм вылас сійӧ ньӧбис му. Сэні лёк ногӧн уси, кынӧмыс поті, весиг гырк пытшкӧсыс ортсӧ петіс.
Та йылысь тӧдмаліс став Ерусалимыс.
Та вӧсна муыслы сетісны Акелдама ним, мый лоӧ: вир му.
Псалом небӧгын гижӧма: “Сылӧн оланіныс мед кушмас, мед оз ло сэні олысьыс”.
Нӧшта гижӧма: “Сылысь кесъялӧмсӧ мед босьтас мӧд”.
Та вӧсна миянлы колӧ бӧрйыны ӧтиӧс на пиысь, кодъяс вӧліны миянкӧд да Господь Исускӧд Иоанлӧн пыртӧмсянь Исуслӧн енэжӧ кыпӧдчытӧдзыс. Мед тайӧ мортыс сэсся миянкӧд тшӧтш висьталас Исуслӧн ловзьӧм йылысь».
Сэки вӧзйисны кыкӧс: Ӧсип-Варсаваӧс, кодӧс шуисны Юстӧн, да Матфийӧс.
Кевмысиганыс шуисны: «Господьӧй, Тэ быдӧнлысь тӧдан сьӧлӧм.
Инды тайӧ кык пытшсьыс Ассьыд бӧрйӧматӧ, медым сійӧ тшӧтш кесъяліс да вӧчис апостоллысь уджсӧ, ӧд Иуда кежис таысь да муніс сэтчӧ, кӧні сылы колӧ лонысӧ».
Сэсся пудъясисны на вӧсна.
Пудйыс уси Матфийлы, сійӧс и индісны дас кыкӧд апостолнас.
2 юр.
Воис Ветымынӧд лун. Найӧ ставныс вӧліны ӧтлаынӧсь да ӧти сьӧлӧмаӧсь.
Виччысьтӧг енэжсянь кыліс ыджыд тӧвнырлӧн кодь шы. Шыыс тыртіс ставнас керкасӧ, кӧні найӧ пукалісны.
Найӧ аддзисны ыпъялысь би кывъяс. Тайӧ би кывъясыс торъялісны да лэччисны быдӧн вылӧ.
Сэки ставныс найӧ тырисны Вежа Лолӧн да пондісны сёрнитны мукӧд кывъяс вылын, кыдзи Лов сетіс налы висьтавнысӧ.
Тайӧ кадӧ Ерусалимын вӧліны му пасьталаысь воӧм вежавидзысь юдейяс.
Тайӧ шыыс вылӧ чукӧртчис уна йӧз. Найӧс шемӧс босьтіс, ӧд быдӧн кыліс ас кыв вылас сёрни.
Ставныс шензьӧмӧн шензисны да ас костаныс шуалісны: «Абу-ӧ сёрнитысьясыс ставныс Галилеяысьӧсь?
Быдӧн тай нӧ ми кылам ас чужан кывнымӧс?
Ми ӧд уналаысь воим: Парфияысь, Мидияысь, Еламысь, Месопотамияысь, Юдеяысь, Каппадокияысь, Понтысь, Асияысь, Фригияысь, Памфилияысь, Египетысь, Римысь да Ливияса Киринея бердысь. Кодсюрӧ миян пӧвстысь чужӧмсяньныс юдейяс, а кодсюрӧ юдей эскӧмӧ бергӧдчӧмаяс. Нӧшта эмӧсь тані Критысь да Аравияысь локтысьяс.
Быдӧн тай нӧ ми асланым кыв вылын Енлӧн ыджыд уджъяс йылысь кылам».
Ставныс шензисны да шӧйӧвошӧмӧн ӧта-мӧдныслысь юасисны: «Мый нӧ тайӧ?»
А мукӧдыс сералісны, юмов винаысь пӧ коддзӧмаӧсь.
Петыр дас ӧтиыскӧд сувтӧмӧн гораа шыасис:
«Юдей войтыр да Ерусалимын мукӧд олысьяс.
Кывзӧй менӧ да тӧд выланыд босьтӧй менсьым висьталӧмӧс.
Найӧ абу юӧмаӧсь, кыдзи ті чайтанныд, ӧд кадыс ӧкмыс час асыв.
Та йылысь Иоиль пророк на висьтавліс:
— Бӧръя лунъясӧ, — висьталӧ Ен, — кисьта Ассьым Лолӧс быд морт вылӧ. Тіян пиянныд да нывъясныд пондасны пророкавны,
зонъясныд кутасны аддзывны Енсянь петкӧдчылӧмъяс,
а олӧмаяс пондасны вӧтавны збыльмана вӧтъяс.
Сійӧ лунъясӧ кисьта Ассьым Лолӧс Аслам кесйӧгъяс да кесйӧг аньяс вылӧ, найӧ пондасны пророкавны.
Енэжсянь петкӧдла шензьӧданаторъяс, му вылын — индысьпасъяс: вир, би да тшын.
Шондіыс пемдас, тӧлысьыс вирӧн ойдас Господьлӧн ыджыд да югыд луныс вотӧдз.
И быдӧн, коді шыасяс Господь нимӧ, мездмас.
Израиль войтыр, кывзӧй.
Назаретса Исусӧс сувтӧдіс тіянлы Ачыс Енмыс. Сійӧ петкӧдліс тайӧс тіянлы шензьӧданаторъясӧн да индысьпасъясӧн, кодъясӧс вӧчис тіян пӧвстын Исус пыр. Тайӧс ті асьныд тӧданныд. Енлӧн шуӧм серти Сійӧс вӧлі сетӧма тіян киӧ. Индӧдтӧг олысьяс киӧн ті Сійӧс тувъялінныд-виинныд.
Но Енмыс ловзьӧдіс Сійӧс да мездіс кулӧмыслӧн вын улысь, ӧд кулӧмыс эз вермы Сійӧс кутны.
Давид висьтавліс Сы йылысь:
— Господь быд кадӧ менам син водзын, Сійӧ менам веськыдладорын, медым ме эг лигышмун.
Та вӧсна сьӧлӧмӧйлы долыд, кывйӧй нимкодясьӧ, да менам вир-яйӧй шойччӧ лача кутӧмас.
Ӧд Тэ он коль менсьым лолӧс адӧ, он сет Аслад вежалы аддзывны сісьмӧмсӧ.
Тэ петкӧдлін меным олӧмыслысь туйсӧ, Аслад чужӧмбан водзын Тэ тыртан менӧ нимкодьлунӧн.
Вокъясӧй.
Кӧсъя веськыда висьтавны тіянлы Давид айным йылысь. Сійӧ куліс да сійӧс гуалісны, сылӧн гуыс ӧнія лунӧдз на эм миян.
Давид вӧлі пророкӧн. Енмыс сылы кыв сетӧмӧн кӧсйысис, мый пуксьӧдас Давидлӧн юралан пуклӧсӧ сысянь чужысьӧс — Кристосӧс. Давид тӧдіс тайӧс, ӧд сійӧ сэки нин аддзис Кристослысь ловзьӧмсӧ. Та йылысь сійӧ висьталіс, мый Кристослӧн лолыс оз коль адӧ да Сылӧн шойыс оз аддзыв сісьмӧмсӧ.
Дзик тайӧ Исусӧс Енмыс ловзьӧдіс, и ми ставным тайӧс аддзылім.
Енмыс кыпӧдіс Сійӧс да пуксьӧдіс веськыдладорас. Батьсяньыс Сійӧ босьтіс кӧсйысьӧм Вежа Лолӧс да кисьтіс миян вылӧ, кыдзи ті ӧні аддзанныд да кыланныд.
Давид эз кыпӧдчы енэжас, сійӧ сӧмын висьталіс:
— Господь шуис менам Господьлы:
“Пукав Менам веськыдладорын, кытчӧдз ог пукты Тэнад кок улӧ Тэныд паныд мунысьясӧс”.
Бура тӧдӧй ставныд, Израиль войтыр: Ен пуктіс Господьӧн да Кристосӧн тайӧ Исусӧс, кодӧс ті тувъялінныд».
Петырлӧн кывъясыс вӧрзьӧдісны йӧзыслысь сьӧлӧмсӧ.
Найӧ шуисны Петырлы да мукӧд апостолъяслы: «Вокъяс, мый миянлы вӧчнысӧ?»
Петыр шуис налы: «Бергӧдчӧй мыжъяссьыныд да пыртчӧй Исус Кристос нимӧн, медым Ен прӧститас мыжъяснытӧ.
Сэки Ен сетас тіянлы Вежа Лолӧс.
Ӧд тайӧс кӧсйысьӧма тіянлы, тіян ныв-пилы да став ылісаыслы — дзик быдӧнлы, кодӧс корас Господь, миян Ен».
Тадзи унатор на Петыр висьталіс да ышӧдӧмӧн шуаліс: «Мездысьӧй тайӧ нэмса тшыксьӧм йӧзысь, мед эз су тіянӧс мыждӧмыс».
Унаӧн долыдпырысь сибӧдісны сьӧлӧманыс Петырлысь кывъяссӧ да пыртчисны. Сійӧ лунӧ ӧтувтчис эскысьяс дінӧ куим сюрс гӧгӧр морт.
Эскысьяс став сьӧлӧмнас кутчысисны апостолъяслӧн велӧдӧмӧ. Найӧ пыр ӧтлаын чукӧртчывлісны, чегисны нянь да кевмысисны.
Йӧз пӧвстын паськаліс полӧм.
Енмыс уна шензьӧданатор да индысьпас петкӧдліс апостолъяс пыр Ерусалимын.
Эскысьяс олісны ӧти сьӧлӧмӧн, налӧн ставыс вӧлі ӧтувъя.
Найӧ вузавлісны ассьыныс овмӧс-эмбурнысӧ да сьӧмсӧ юклісны быдӧнлы колана мында.
Быд лун найӧ ӧти сьӧлӧмӧн чукӧртчывлісны крамӧ, а гортаныс чегисны нянь, сёйисны нимкодьпырысь да восьса сьӧлӧмӧн. Найӧ ставсьыс ошкисны Енмӧс. Йӧзыс найӧс бурӧ пуктісны,
а Господь быд лун содтіс Вичкоӧ мездмӧмаясӧс.
3 юр.
Ӧтчыд кевмысян кадӧ куим часын Петыр да Иоан мунісны крамӧ.
Сэні вӧлі чужӧмсяньыс коктӧм морт. Сійӧс быд лун вайлісны крамӧ да пуксьӧдлісны сідз шусяна “Мича ӧдзӧс” дорӧ, медым сійӧ корис пырысьяслысь.
Сійӧ аддзис Петыр да Иоанлысь крамӧ пырӧмсӧ да пондіс корны налысь.
Петыр да Иоан сюся видзӧдлісны сы вылӧ, сэсся Петыр шуис: «Видзӧдлы миян вылӧ».
Сійӧ синсӧ лэптіс на вылӧ да виччысис, оз-ӧ сетны мыйкӧ.
Петыр шуис: «Эзысь-зарни менам абу, но мый эм, сета тэныд.
Назаретса Исус Кристос нимӧн чеччы да ветлӧдлы».
Петыр босьтіс сійӧс веськыд киӧдыс да лэптіс.
Дзик пыр вынсялісны сылӧн кокъясыс да пидзӧсъясыс. Сійӧ чеччыштігмоз сувтіс да кутіс ветлӧдлыны, сэсся пырис накӧд крамӧ. Сэні чеччалӧмӧн ветлӧдліс да ошкис Енмӧс.
Став йӧзыс аддзылісны сылысь ветлӧдлӧмсӧ да Енмӧс ошкӧмсӧ.
Йӧзыс тӧдісны сійӧс, мый тайӧ сійӧ корысьыс, коді пукавліс крамын “Мича ӧдзӧс” дорын. Тайӧ лоӧмторйыс ёна шензьӧдіс йӧзсӧ, да найӧс полӧм босьтіс.
Бурдысь эз вешйыв Петыр да Иоан дінысь.
Йӧзыс шензигтыр чукӧртчисны на дінӧ Соломон йӧрӧ.
Петыр аддзис тайӧс да шуис йӧзыслы: «Израиль войтыр, мый ті шензьӧмӧн видзӧданныд миян вылӧ? Чайтанныд, ми ас вынӧн тайӧс вӧчим да миян вежавидзӧм понда сійӧ ветлӧдлӧ?
Ӧвраамлӧн, Исааклӧн да Яковлӧн Ен, миян батьяслӧн Ен, восьтіс Исус Пиыслысь дзирдлунсӧ. Ті вузалінныд да соссинныд Исусысь Пилат водзын, Пилат ӧд кӧсйис лэдзны Сійӧс.
Ті соссинныд Вежаысь да Веськыда Олысьысь, коринныд лэдзны морт виысьӧс.
Ті олӧм Сетысьӧс виинныд,
но Енмыс ловзьӧдіс Сійӧс. Тайӧс ми аддзылім да висьталам та йылысь.
Исуслӧн нимыс да Сылӧн нимӧ эскӧмыс ёнмӧдіс тайӧ мортсӧ, кодӧс ті ӧні аддзанныд да бура тӧданныд. Исус сетіс сылы эскӧм, и тайӧ эскӧмыс бурдӧдіс сійӧс тіян син водзын.
Ме тӧда, вокъяс, ті асланыд веськӧдлысьяс моз вӧчинныд тайӧс гӧгӧрвотӧг.
Енмыс водзвыв висьталіс Аслас пророкъяс пыр Кристослӧн сьӧкыд нуӧмыс йылысь. И тайӧ иніс.
Бергӧдчӧй мыжъяссьыныд Енлань, медым Сійӧ вештас тіянлысь мыжъяснытӧ. Сэки Господь сетас тіянлы ловнытӧ выльмӧдан кад, да мӧдӧдас тіянлы водзвыв бӧрйӧм Исус Кристосӧс. Енмыс босьтіс Сійӧс енэжас, и Сійӧ лоӧ сэні, кытчӧдз ставсӧ оз ло лӧсьӧдӧма воддза мозыс. Та йылысь важысянь Енмыс висьтавліс Аслас вежа пророкъяс пыр.
Мӧисей шулӧма батьяслы: “Господь, тіян Ен, менӧ моз сувтӧдас асланыд вокъяс пӧвстысь Пророкӧс.
Кывзысьӧй Сылысь быдторйын, мый шуас.
Коді оз кывзысь тайӧ Пророкыслысь, сійӧс бырӧдасны Ас войтырыс пӧвстысь”.
Самуил да сы бӧрти став мукӧд пророкыс тшӧтш водзвыв висьтавлісны тайӧ лунъясыс йылысь.
Ті пророкъяслӧн ныв-пи, тіянлы вуджӧ йитӧдыс, кодӧс Ен кӧрталіс тіян батьяскӧд, кор шуис Ӧвраамлы: “Тэсянь чужысь пыр вуджас бурсиӧмыс му вылын быд войтырлы”.
Ен ловзьӧдіс Ассьыс Писӧ, Исусӧс, да мӧдӧдіс Сійӧс медводз тіян дінӧ, медым лёксьыс бергӧдчӧм бӧраныд бурсины тіянӧс».
4 юр.
Кор Петыр да Иоан сёрнитісны йӧзыскӧд, на дінӧ матыстчисны попъяс, крам видзысьяслӧн веськӧдлысьыс да саддукейяс. Найӧ скӧралісны, мый апостолъяс велӧдӧны йӧзсӧ да висьтавлӧны, Исус пӧ ловзис, и кулӧмаяс пӧ тшӧтш ловзясны.
Сэки найӧ босьтісны Петырӧс да Иоанӧс да йӧртісны асылӧдзыс дзескыдінӧ, ӧд вӧлі рыт нин.
А кывзысьяс пӧвстысь унаӧн эскисны да вокъяслӧн лыдыс содіс вит сюрсӧдз.
Мӧд луннас чукӧртчисны Ерусалимӧ юдейяслӧн веськӧдлысьяс, пӧрысьяс да Индӧдӧ велӧдысьяс. Сэні вӧліны тшӧтш Аннас аркирей, Каиаф, Иоан, Ӧльӧксандр да аркирей рӧдвужысь мукӧдъяс.
Найӧ сувтӧдісны апостолъясӧс шӧрас да юалісны: «Кутшӧм вынӧн да код нимӧн ті тайӧс вӧчинныд?»
Сэки Петыр, коді вӧлі тырӧма Вежа Лолӧн, шуис налы: «Войтырлӧн веськӧдлысьяс да Израильлӧн пӧрысьяс.
Миянлысь кӧ талун ті коранныд воча кыв, мый ми бурдӧдім висьысь мортӧс да сылы бур вӧчим, кывзӧй да тӧдӧй, ті да став Израиль войтыр: ми вӧчим тайӧс Назаретса Исус Кристос нимӧн. Бурсӧ вӧчим Исуслӧн вын отсӧгӧн, и тайӧ мортыс сулалӧ тіян водзын дзоньвидза. Ті тувъялінныд Сійӧс крестӧ, но Енмыс ловзьӧдіс.
Сійӧ — из, кодӧс ті, керка лэптысьяс, шыбитінныд. Но тайӧ изйыс лоис пельӧс изйӧн. И абу мӧд Мездысьыс, да абу сетӧма йӧзлы енэж улас мӧд нимсӧ, код пыр миянлы позьӧ мездмыны».
Кор йӧзыс аддзисны Петыр да Иоанлысь повтӧмлунсӧ да казялісны, мый найӧ велӧдчытӧм йӧз, ёна шензисны.
Гӧгӧрвоисны, мый найӧ вӧлӧмаӧсь Исускӧд.
Но накӧд сулалысь бурдӧм мортӧс аддзигӧн нинӧм паныд шуны эз вермыны.
Сэсся тшӧктісны петавны найӧс, асьныс пондісны сёрнитны ас костаныс: «Мый кутам вӧчны тайӧ йӧзыскӧд?
Ӧд став Ерусалимыс тӧдӧ налысь шензьӧданатор вӧчӧмсӧ, ми огӧ вермӧй соссьыны таысь.
Медым юӧрыс водзӧ эз паськав войтырным пӧвстын, чорыда ӧлӧдам найӧс, медым эз висьтавлыны Исус йылысь».
Сэсся бӧр корисны апостолъясӧс да тшӧктісны, мед дугдасны висьтавлыны да велӧдны Исус йылысь.
Петыр да Иоан воча шуисны налы: «Мӧвпыштлӧй асьныд, бур-ӧ тайӧ Ен водзын, ми кӧ Енмӧс дорысь ёнджыка кутам кывзыны тіянӧс.
Ми огӧ вермӧй чӧв овны сы йылысь, мый аддзылім да кывлім».
Чорыда чирыштӧм бӧрын веськӧдлан котыр лэдзис апостолъясӧс. Йӧз вӧснаыс эз вермыны мыждыны найӧс, ӧд ставныс ошкисны Енмӧс тайӧ лоӧмторсьыс.
Шензяна ногӧн бурдӧм мортлы вӧлі нелямын сайӧ арӧс.
Дзескыдінысь петӧм бӧрын Петыр да Иоан мунісны вокъясныс дінӧ. Сэні найӧ висьталісны аркирейяслӧн да пӧрысьяслӧн ӧлӧдӧм йылысь.
Найӧс кывзӧм бӧрын ставныс ӧтвылысь шыасисны Ен дінӧ: «Енмӧй, Ыджыдӧй, Тэ вӧчин енэжсӧ и мусӧ, васӧ да ставсӧ, мый сэні эм.
Миян Давид батьным пыр, Тэнад кесъялысь пыр, Тэ Вежа Ловнад шуин:
— Мыйысь скӧралӧны ентӧдтӧмъяс, мыйла мӧвпалӧны ковтӧмторсӧ войтыръяс?
Юралысьяс ӧтувтчӧны, мувывса ӧксыяс сувтӧны Господьлы да Сылӧн Кристослы паныд.
Тайӧ карас Ирӧд да Понтий Пилат збыльысь ӧтувтчисны ентӧдтӧмъяскӧд да Израиль войтыркӧд, сувтісны Тэнад Мавтыштӧмалы, Тэнад вежа Исус Пиыдлы паныд. Найӧ олӧмӧ пӧртісны Тэнсьыд водзвыв шуӧмтӧ да вына лӧсьӧдӧмтӧ.
Ӧні, Господьӧй, видзӧдлы налӧн повзьӧдлӧм вылӧ, отсав Аслад кесйӧгъяслы повтӧг висьтавны Тэнсьыд кывтӧ. Нюжӧд китӧ, медым висьысьяс Тэнад вежа Исус Пи нимӧн бурдасны, шензьӧданаторъяс да индысьпасъяс тыдовтчасны».
Кевмысьӧм бӧрас чукӧртчанінын муыс вӧрзис. Ставныс тырины Вежа Лолӧн да повтӧг пондісны висьтавны Енлысь Кывсӧ.
Эскысьяс ставныс вӧліны ӧти лолаӧсь да ӧти сьӧлӧмаӧсь.
Некод ассьыс эмбурсӧ эз лыддьы асласӧн, ставыс налӧн вӧлі ӧтувъя.
Апостолъяс ыджыд вынӧн висьтавлісны Господь Исус Кристослӧн ловзьӧм йылысь.
Енлӧн ыджыд буралӧмыс вӧлі ставныс вылын. Налы ставыс вӧлі тырмана.
Кодлӧн вӧлі керка, видз-му, найӧ вузалісны, да сьӧмсӧ вайисны апостолъяслы, а найӧ быдӧнлы юклісны тырмымӧн.
Ёсей, Кипрын чужлӧм левит, кодӧс апостолъяс шуисны Варнава нимӧн, мый лоӧ: бурӧдысь, тшӧтш вузаліс ассьыс видз-мусӧ да вайис сьӧмсӧ апостолъяслы.
5 юр.
Ананий нима морт Сапфира гӧтырыскӧд вузаліс овмӧссӧ. Босьтӧм сьӧмсьыс Ананий мыйтакӧ торйӧдіс аслыс, гӧтырыс тшӧтш тӧдіс та йылысь. Коляссӧ Ананий вайис апостолъяслы.
Петыр шуис сылы: «Ананий, мыйла тэ лэдзин сӧтанаыслы ыджыдавны сьӧлӧмад? Вузалӧм муыдлысь донсӧ дзебӧмнад тэ пӧръялін Вежа Лолӧс.
Эз ӧмӧй ас киад вӧв овмӧсыд да босьтӧм сьӧмыд?
Мыйла тэ лэдзин тайӧ лёк уджсӧ сьӧлӧмад?
Тэ эн мортӧс пӧръяв, тэ пӧръялін Енмӧс».
Тайӧс кылӧм бӧрын Ананий усис да сылӧн лолыс петіс.
Та йылысь кывлысьясӧс ставнысӧ ыджыд полӧм босьтіс.
Том йӧз пасьтӧдісны Ананийӧс дзебан паськӧмӧн, сэсся петкӧдісны да гуалісны сійӧс.
Час куим мысти локтіс Ананийлӧн гӧтырыс, дерт, лоӧмтор йывсьыс сійӧ нинӧм эз тӧд.
Петыр юаліс сылысь: «Висьтав меным, та донысь-ӧ мутӧ вузалінныд?»
Сійӧ шуис: «Та донысь».
Петыр шуис: «Мыйла нӧ сёрнитчӧмныд пӧрйӧдлыны Господьлысь Ловсӧ?
Кылан-ӧ ӧдзӧс сайысь кок шыяссӧ? Тэнсьыд верӧстӧ гуалысьяс локтӧны, ӧні тэнӧ тшӧтш петкӧдасны».
Дзик пыр Сапфира усис Петыр кок дорӧ да сылӧн лолыс петіс.
Пырысьяс аддзисны сійӧс кулӧмаӧн, сэки петкӧдісны да гуалісны сійӧс верӧсыскӧд орччӧн.
Ыджыд полӧм босьтіс став эскысьясӧс да быдӧнӧс, коді та йылысь кывліс.
Уна шензьӧданатор индысьпасъясӧн вӧчисны апостолъяс йӧз пӧвстын.
Эскысьяс ӧти сьӧлӧмӧн чукӧртчывлісны Соломон йӧрӧ.
Йӧзыс полісны ӧтувтчыны накӧд, но ошкисны найӧс.
Тадзи Господьлы эскысьяслӧн лыдыс пыр содіс, на пӧвстын вӧліны айулов и аньяс. Йӧзыс петкӧдлісны висьысьясӧс вольпасьнас ывлаӧ да водтӧдавлісны туй бокӧ, медым мунігас Петырлӧн вуджӧрыс веськаліс на вылӧ.
Уна йӧз воліс Ерусалимӧ матігӧгӧр каръясысь. Найӧ вайӧдлісны висьысьясӧс да пеж лолӧн кутӧмаясӧс. И ставныс найӧ бурдісны.
Аркирейлӧн да сы дор сулалысь саддукейяслӧн чужис ыджыд лӧглун апостолъяс дінӧ. Найӧ босьтісны апостолъясӧс да йӧртісны дзескыдінӧ.
Войнас Господьлӧн андел восьтіс дзескыдінысь ӧдзӧсъяссӧ да петкӧдіс найӧс сэтысь. Сійӧ шуис налы: «Мунӧй крамӧ да висьталӧй йӧзыслы тайӧ выль олӧм йывсьыс ставсӧ».
Апостолъяс кывзысисны да асывводзнас мунісны крамӧ, сэні пондісны велӧдны.
Сійӧ кадас аркирей аслас йӧзкӧд корис веськӧдлан котыр да Израиль войтырлысь пӧрысьясӧс, сэсся найӧ тшӧктісны вайӧдны дзескыдінысь апостолъясӧс.
Дзескыдінӧ воӧм мысти мӧдӧдӧмаяс эз аддзыны найӧс. Найӧ бӧр локтісны да юӧртісны: «Ми асланым синмӧн аддзылім, дзескыдінсӧ вӧлі бура йигналӧма, и ӧдзӧс водзас сулалісны видзысьяс. Но кор ми восьтім, некодӧс эгӧ аддзӧй сэтысь».
Тайӧс кылӧмысь крам видзысьяслӧн веськӧдлысь да аркирейяс шай-паймунісны, кыдзи пӧ тайӧ вермис лоны.
Сэки локтіс ӧти морт да висьталіс, дзескыдінӧ йӧртӧмаясыд пӧ крамынӧсь, йӧзсӧ велӧдӧны.
Крам видзысьяслӧн веськӧдлысь муніс аслас йӧзкӧд да вайӧдіс апостолъясӧс. Но найӧс эз вӧрӧдны, йӧзсьыс полісны, ӧд найӧс асьнысӧ вермисны изъявны.
Апостолъясӧс вайӧдісны да сувтӧдісны веськӧдлан котыр водзӧ.
Аркирей юаліс налысь: «Ми ӧмӧй эгӧ чорыда ӧлӧдлӧй тіянӧс тайӧ нимнас велӧдӧмысь?
Став Ерусалимсӧ шызьӧдінныд асланыд велӧдӧмӧн, нӧшта миянӧс мыжданныд сійӧ Мортсӧ виӧмысь».
Петыр да мукӧд апостолъяс вочавидзисны: «Мортыслы ёнджыка колӧ кывзыны Енмӧс, а оз мортӧс.
Миян батьяслӧн Ен ловзьӧдіс Исусӧс, кодӧс ті ӧшӧдінныд пу вылӧ да виинныд.
Ен пуксьӧдіс Сійӧс Аслас веськыдладорӧ Юрнуӧдысьӧн да Мездысьӧн, медым Израиль вермис бергӧдчыны мыжъяссьыс да босьтны прӧститӧмсӧ.
Ми тӧдам тайӧс, та вӧсна и висьталам. Висьталӧ та йылысь тшӧтш Вежа Лов, кодӧс Енмыс сетӧ Сылысь кывзысьысьяслы».
Тайӧс кылӧм бӧрын став веськӧдлан котырыс пузис скӧрысла, найӧ дасьӧсь вӧліны вины апостолъясӧс.
Сэки сувтіс веськӧдлан котырысь Гамалиил нима фарисей, Индӧдӧ велӧдысь, кодӧс пыдди пуктісны став йӧзыс.
Сійӧ тшӧктіс кад кежлӧ петкӧдны сэтысь апостолъясӧс.
Сэсся шуис веськӧдлан котырлы: «Израиль войтыр.
Энӧ тэрмасьӧй тайӧ йӧзыскӧд мыйкӧ вӧчны.
Та водзвылын, эз на ёна важӧн, кыпӧдчыліс Февдас, асьсӧ сійӧ зэв ыджыдӧн лыддис. Сы бӧрся муніс нёльсё гӧгӧр морт.
Но сійӧс виӧм бӧрын сы бӧрся мунысьяс ставныс разалісны-вошисны.
Та бӧрти вӧлі йӧз лыд пасъялӧм, буретш сэки кыпӧдчис Галилеяысь Иуда. Ас бӧрсяыс сійӧ бура уна йӧзӧс кыскис.
Но сійӧ куліс, и сы бӧрся мунысьяс ставныс разалісны.
Ӧні кӧсъя шуны тіянлы: ӧвсьӧй тайӧ йӧзсьыс, лэдзӧй найӧс.
Мортсянь кӧ тайӧ уджыс, сійӧ киссяс, а Енсянь кӧ, ті онӧ вермӧй кисьтнысӧ.
Видзчысьӧй, мед энӧ лоӧй Енлы паныд мунысьясӧн».
Веськӧдлан котыр кывзысис Гамалииллысь. Сэки корисны апостолъясӧс да чорыда ӧлӧдісны, медым эз висьтавлыны Исус йылысь, сэсся нӧйтӧм бӧрын лэдзисны найӧс.
Веськӧдлан котыр дорысь апостолъяс мунісны долыдпырысь, ӧд Господь Исуслӧн ним вӧсна найӧ шогмисны увтыртӧм туйӧ.
Быд лун крамын да гортъясаныс найӧ велӧдісны да висьтавлісны Исус Кристос йылысь Бур Юӧр.
6 юр.
Велӧдчысьяслӧн лыдыс лунысь-лун содіс. Грек кывйӧн сёрнитысь юдейяс пондісны шуасьны сэтчӧс олысь юдейяс вылӧ, мыйла пӧ быдлунъя коланатор юклігӧн ӧтдортанныд миянлысь дӧваясӧс.
Сэки дас кык апостол корисны став велӧдчысьсӧ да шуисны налы: «Миянлы абу бур кольны Енлысь Кывсӧ да сёян-юан вӧсна тӧждысьны.
Та вӧсна, вокъяс, бӧрйӧй ас пӧвстсьыныд сизим мортӧс, кодъяс мывкыдаӧсь да тырӧмаӧсь Вежа Лолӧн.
Найӧс пуктам тайӧ уджсӧ вӧчны.
Асьным ми водзӧ пондам кевмысьны да висьтавлыны Енлысь Кывсӧ».
Тайӧ вӧзйӧмыс ставныслы воис сьӧлӧм вылас.
Бӧрйисны Степанӧс, сійӧ вӧлі зумыд эскӧма да тырӧма Вежа Лолӧн. Нӧшта бӧрйисны Филипӧс, Прокорӧс, Никанорӧс, Тимонӧс, Парменӧс да Антиокияысь Николайӧс, коді вӧлі бергӧдчӧма юдей эскӧмӧ.
Найӧс сувтӧдісны апостолъяс водзӧ. Апостолъяс на вылӧ кинысӧ пуктылӧмӧн кевмысисны на вӧсна.
Енлӧн Кывйыс паськаліс да велӧдчысьяслӧн лыдыс Ерусалимын ёна содіс, весиг попъяс унаӧн кутісны эскыны.
Степан вӧлі тырӧма Енсянь вынӧн да эскӧмӧн, сійӧ вӧчис йӧз пӧвстын ыджыд шензьӧданаторъяс.
Киринеяысь да Александрияысь сідз шусяна вӧвлӧм кесйӧгъяслӧн синагогаысь кодсюрӧ, нӧшта Киликияысь да Асияысь кодсюрӧ панісны вен Степанкӧд. Степан сёрнитіс ыджыд мывкыдлунӧн да Лов вынӧн, та вӧсна эз вермыны венны сійӧс.
Сэки найӧ кодсюрӧӧс ыззьӧдісны висьтавны, мый сійӧ лёка сёрнитӧ Мӧисей да Ен йылысь, мый найӧ тайӧс асьныс кывлісны.
Тадзи найӧ кыпӧдісны йӧзсӧ, пӧрысьясӧс да Индӧдӧ велӧдысьясӧс Степанлы паныд. Сэсся босьтісны сійӧс да вайӧдісны веськӧдлан котыр водзӧ.
Сэтчӧ корисны ылӧгвисьталысьясӧс. Найӧ шуисны: «Тайӧ мортыс век омӧльтӧ миянлысь вежаинӧс да Индӧдӧс.
Ми асьным кывлім, кыдзи сійӧ шуліс, Назаретса Исус пӧ жугӧдас тайӧ вежаинсӧ да вежас Мӧисейӧн важысянь лӧсьӧдӧм оласногсӧ».
Веськӧдлан котырын пукалысьяс синсӧ вештывтӧг видзӧдісны Степан вылӧ, сылӧн чужӧмыс вӧлі анделлӧн кодь.
7 юр.
Сэки аркирей юаліс: «Тайӧ тадз?»
Степан шуис: «Вокъясӧй да батьясӧй, кывзӧй.
Дзирдлуныслӧн Ен петкӧдчыліс Ӧвраам батьнымлы Месопотамияын, Харранӧ мунтӧдзыс на. Ен шуис сылы: “Коль ассьыд чужан мутӧ, ассьыд рӧдвужтӧ да бать керкатӧ. Ме инда тэныд му — сэтчӧ мун”.
Сэки Ӧвраам петіс Калдея муысь да овмӧдчис Харранӧ.
Батьыс кулӧм бӧрын Ен вайӧдіс сэтысь Ӧвраамӧс тайӧ муас, кӧні ті ӧні оланныд.
Енмыс эз сет Ӧвраамлы татысь весиг кок пыдӧс пасьта му. Но кор Ӧвраам вӧлі ныв-питӧм на, Енмыс кӧсйысис сетны сылы да сысянь чужысьяслы мусӧ.
Ен шуис сылы: “Тэсянь чужысьяс овмӧдчасны йӧз муӧ. Найӧс пондасны видзны кесйӧг туйын да дзескӧдны нёльсё во чӧж.
Но Ме мыжда сійӧ войтырсӧ, коді нартитӧ найӧс.
Та бӧрти найӧ петасны сэтысь да пондасны кесъявны Меным тайӧ муас”.
Ен кӧрталіс Ӧвраамкӧд йитӧд, кодӧс вынсьӧдіс вундыштчӧмӧн.
Ӧвраамлӧн чужис Исаак, кӧкъямысӧд луннас Ӧвраам вундыштіс сійӧс.
Исаак вундыштіс Яковӧс, а Яков вундыштіс ассьыс дас кыкнан писӧ, миянлысь айяснымӧс.
Найӧ вежалісны Ӧсиплы, та вӧсна вузалісны сійӧс Египетӧ.
Но Енмыс вӧлі сыкӧд да дорйис сійӧс быд сьӧкыдыс дырйи.
Енмыс сетіс сылы ыджыд мывкыдлун, та вӧсна сійӧ сьӧлӧм вылас воис фараонлы, египетса ӧксылы. Фараон весиг пуктіс сійӧс веськӧдлыны Египетӧн да аслас став овмӧсӧн.
Тшыгъялӧм да ыджыд шог сэки суис став Египетсӧ да Ханаан мусӧ.
Миян батьяслы нинӧм вӧлі сёйнысӧ.
Кор Яков кыліс, мый Египетын эм нянь, мӧдӧдіс сэтчӧ миянлысь батьяснымӧс. Тайӧ вӧлі налӧн Египетӧ медводдза ветлӧм.
Мӧдысь ветліганыс Ӧсип восьтіс асьсӧ вокъясыслы. Тадзи фараон тӧдмаліс Ӧсиплысь рӧдвужсӧ.
Ӧсип мӧдӧдіс корны ассьыс Яков батьсӧ да став рӧдвужсӧ, ставнас вӧлі сизимдас вит морт.
Тадзи Яков вуджис Египетӧ, сэні сійӧ куліс, батьясным тшӧтш сэні кулісны.
Сэсся вайисны найӧс Сикемӧ да гуалісны. Гусӧ Ӧвраам ньӧблӧма эзысь вылӧ Сикемын олысь Еммор пиянлысь.
Египетын войтырным ӧтарӧ содіс. Матысмис сійӧ кадыс, мый йылысь Енмыс кыв сетӧмӧн кӧсйысьліс Ӧвраамлы. Сэки юралысьӧ пуксис выль ӧксы, коді Ӧсип йылысь нинӧм эз тӧд.
Сійӧ наяна пӧрйӧдліс миянлысь войтырнымӧс, дзескӧдіс батьяснымӧс, тшӧктіс налы эновтны ассьыныс пузчужӧм кагаяссӧ, медым найӧ эз кольны ловйӧн.
Сійӧ кадӧ чужис Мӧисей. Ен син водзын сійӧ вӧлі зэв мича.
Куим тӧлысь чӧж сійӧс быдтісны бать керкаас.
Кор вӧлі кольӧма Мӧисейӧс, фараонлӧн нылыс босьтіс сійӧс да быдтіс пи пыдди.
Мӧисейӧс велӧдісны египетса став мывкыдлунӧ, сійӧ вӧлі вына сёрнинас да уджъяснас.
Нелямын арӧс тыригас Мӧисейлӧн чужис кӧсйӧм видлыны ассьыс войтырсӧ, Израиль пиянӧс.
Кор Мӧисей аддзис, мый ӧтиӧс на пиысь чорыда нӧйтӧны, уськӧдчис дорйыны да водзӧс перйӧм могысь виис египетсаӧс.
Мӧисей чайтіс, вокъясыс гӧгӧрвоасны, мый Енмыс кӧсйӧ мездыны найӧс сы пыр, но найӧ тайӧс эз гӧгӧрвоны.
Мӧд луннас Мӧисей аддзис: кык израильса ӧта-мӧдныскӧд тышкасьӧны. Мӧисей кӧсйис, медым найӧ бурасисны да шуис налы: “Кывзӧй, ті ӧд вокъяс.
Мыйла нӧ ӧта-мӧднытӧ увтыртанныд?”
Тышсӧ панысь тойыштіс Мӧисейӧс да шуис: “Коді тэнӧ пуктіс миян вылын ыджыдалысьнас да мыждысьнас?
Гашкӧ, тӧрытъя египетсаӧс моз тэ тшӧтш кӧсъян вины менӧ?”
Тайӧ шуӧмсьыс Мӧисей пышйис Египетысь да овмӧдчис Мадиам муӧ, сэні сылӧн чужис кык пи.
Нелямын во мысти овтӧминын, Синай керӧс дорын, ӧзъялысь лежнӧг пытшкын петкӧдчис Мӧисейлы Господьлӧн андел.
Аддзӧмторйыс шемӧсмӧдіс Мӧисейӧс.
Лежнӧг дорӧ матыстчигӧн сійӧ кыліс Господьлысь гӧлӧс шысӧ: “Ме тэнад батьяслӧн Ен, Ӧвраамлӧн Ен, Исааклӧн Ен да Яковлӧн Ен”.
Мӧисейӧс тіралӧм босьтіс, сійӧ эз лысьт весиг видзӧдлынысӧ.
Господь шуис сылы: “Пӧрччы кӧмтӧ, ӧд муыс, кӧні тэ сулалан, вежа.
Ме аддза Аслам войтырлысь Египетын сьӧкыдалӧмсӧ да кыла налысь ойзӧмсӧ.
Ме лэччи мездыны найӧс.
Ӧні мун, Ме мӧдӧда тэнӧ Египетӧ”.
Ен мӧдӧдіс Мӧисейӧс, но Израиль пиян ӧтдортісны сійӧс, шуисны, коді пӧ тэнӧ пуктіс ыджыдалысьнас да мыждысьнас.
Енмыс пуктіс сійӧс ыджыдалысьнас да мездысьнас. Вӧчис тайӧс андел пыр, коді петкӧдчис сылы лежнӧг пытшкын.
Мӧисей петкӧдіс найӧс Египетысь. Уна шензьӧданатор да индысьпас сійӧ вӧчис Египет муын, Гӧрд саридзын да нелямын во чӧж овтӧминын.
Ӧд буретш Мӧисей висьтавліс Израиль пиянлы: “Господь, тіян Ен, менӧ моз сувтӧдас тіянлы асланыд вокъяс пӧвстысь Пророкӧс.
Кывзӧй Сійӧс”.
Ӧд Мӧисей, коді вӧлі овтӧминын миян батьяскӧд да кодкӧд сёрнитіс андел Синай керӧсын, босьтіс Енсянь ловъя кывъяссӧ, медым висьтавны миянлы. Но миян батьяс эз кӧсйыны кывзынысӧ, ӧтдортісны сійӧс да сьӧлӧмнысӧ бӧр бергӧдісны Египетлань. Ааронлы шуисны: “Вӧч миянлы енъясӧс, кодъяс мунасны миян водзвылын. Ми огӧ тӧдӧй, мый лои Мӧисейкӧд, миянӧс Египетысь петкӧдысьнымкӧд”.
Сэки найӧ вӧчисны ӧшпиӧс, вайисны тайӧ идолыслы вись да нимкодясисны киӧн вӧчӧмторныс водзын.
Енмыс бергӧдчис на дінысь да эновтіс найӧс юрбитны тӧлысь-кодзувъяслы. Та йылысь гижӧма пророкъяслӧн небӧгын:
— Израиль войтыр.
Нелямын во чӧжнас вайлінныд-ӧ ті Меным овтӧминас начкӧм пемӧсъясӧс да мукӧд висьяс?
Ті новлӧдлінныд Молоклысь чомсӧ Ремфан енлысь кодзувсӧ. Ас киӧн вӧчинныд тайӧ серпасъяссӧ да юрбитінныд налы.
Та вӧсна Ме вӧтла тіянӧс Вавилонысь на ылӧджык.
Овтӧминын миян батьяслӧн вӧлі Висьталан скиния. Ен петкӧдліс Мӧисейлы скиниялысь серпассӧ да тшӧктіс вӧчны дзик жӧ сідзи.
Миян батьяс колисны скиниясӧ асланыс пиянлы. Сэсся Исус Навинкӧд найӧ пыртісны сійӧс йӧз муӧ. Ачыс Енмыс вӧтліс сэтчӧс олысьяссӧ.
Скинияыс вӧлі сэні Давид лунъясӧдз.
Давид воис Енлы сьӧлӧм вылас. Сійӧ кевмысис, медым вермис вӧчны Яковлӧн Енлы оланін.
Но Енлы керкасӧ лэптіс Соломон.
А Медвылысса оз ов киӧн вӧчӧм крамын.
Пророк висьталӧ:
— Енэжыс Менам пукаланін, муыс Менам кокув.
Кутшӧм керка ті вӧчанныд Меным? Кӧні лӧсьӧданныд Меным шойччанінсӧ? — шуӧ Господь.
Эг-ӧ Аслам киӧн Ме вӧч тайӧс ставсӧ?
Асныралысьяс, тіян сьӧлӧмныд оз тӧд Енсӧ да тіян пельныд оз кыв Сійӧс.
Асланыд батьяс моз ті пыр паныд мунанныд Вежа Ловлы.
Эз вӧв пророк, кодӧс эськӧ эз вӧтлыны тіян батьяс.
Найӧ виисны пророкъясӧс, кодъяс висьталісны Веськыда Олысьлӧн локтӧм йылысь. Тайӧ Веськыда Олысьсӧ ті вузалінныд да виинныд. Анделъяс вайисны тіянлы Индӧдсӧ, но ті энӧ олӧй сы серти».
Тайӧс кывзігӧн веськӧдлан котырӧ чукӧртчӧмаяс пузисны скӧрысла, пондісны пиньнысӧ йирны.
Вежа Лолӧн тырӧм Степан видзӧдліс енэжӧ. Сійӧ аддзис Енлысь дзирдлунсӧ да Сы веськыдладорын сулалысь Исусӧс. Степан шуис: «Ме аддза восьса енэж да Ен веськыдладорын сулалысь Морт Пиӧс».
Сэки чукӧртчысьяс пельнысӧ тупкӧмӧн лёк горшӧн пондісны равзыны, ставныс уськӧдчисны Степан вылӧ. Сэсся петкӧдісны сійӧс кар сайӧ да пондісны изъявны.
Изъялысьяс пукталісны вылыс паськӧмнысӧ Савл нима том мортлӧн кок дорӧ. Изъялігӧн Степан кевмысис: «Исусӧй, Господьӧй, босьт менсьым лолӧс».
Сэсся пидзӧс вылас усьӧмӧн гораа горӧдіс: «Господьӧй, эн мыжды найӧс таысь».
Тайӧс шуӧм бӧрын Степанлӧн лолыс петіс.
8 юр.
Степанӧс виӧмсӧ Савл лыддис буртор вӧчӧмӧн.
Сійӧ лунсянь Ерусалимын ёна кутісны вӧтлыны эскысьясӧс.
Апостолъясысь кындзи ставныс найӧ разӧдчисны Юдея да Самария пасьтала.
Вежавидзысь йӧз гуалісны Степанӧс, ыджыд бӧрдӧмӧн колльӧдісны сійӧс.
Савл жӧ зілис бырӧдны эскысьясӧс, ветліс керкаысь керкаӧ да мырдысьӧн йӧрталіс айуловӧс да аньясӧс дзескыдінӧ.
Разӧдчӧм эскысьяс ветлӧдлісны да висьтавлісны Бур Юӧр.
Самарияын Филип локтіс ӧти карӧ да сэні висьтавліс Кристос йылысь.
Кор йӧзыс кылісны Филиплысь висьталӧмсӧ, да аддзисны шензьӧданаторъяс вӧчӧмсӧ, пондісны сюся кывзыны сійӧс.
Уна пытшкысь лёкысь горзӧмӧн петісны пеж ловъяс, унаӧн вӧрзьӧдчыны вермытӧмъяс да чотысьяс бурдісны.
Став карыс ёна нимкодясис.
Тайӧ карас оліс Симон нима морт. Аслас туналӧмӧн сійӧ шензьӧдліс Самарияын олысьясӧс. Асьсӧ сійӧ ыджыд мортӧ пуктіс.
Быдӧн ичӧтсянь гырысьӧдз сюся кывзіс сійӧс, сы йылысь шуисны: «Сійӧ — Енлӧн ыджыд выныс».
Йӧзыс кывзісны сійӧс, ӧд дыр кад чӧж сійӧ шензьӧдіс найӧс тунасьӧмнас.
Но кор кылісны Енлӧн Юралӧм йылысь да Исус Кристос йылысь Бур Юӧр, эскисны Филиплы, сэсся айулов да аньяс ставныс пыртчисны.
Ачыс Симон тшӧтш эскис. Пыртчӧм бӧрас сійӧ эз вешйыв Филип дінысь, ёна шензис ыджыд вынӧн вӧчӧм шензьӧданаторъяс вылӧ.
Ерусалимын апостолъяс кор кылісны, мый Самарияын сибӧдӧмаӧсь Енлысь Кывсӧ, мӧдӧдісны сэтчӧ Петырӧс да Иоанӧс. Самарияӧ воӧм бӧрын найӧ кевмысисны, медым эскысьяс сибӧдасны Вежа Лолӧс.
На вылӧ абу на вӧлі лэччӧма Вежа Лолыс, найӧс сӧмын пыртӧма вӧлі Господь Исус нимӧн.
Апостолъяс пуктылісны на вылӧ кинысӧ, сэки Вежа Лов лэччис на вылӧ.
Симон аддзис, мый апостолъяслӧн ки пуктылӧм пыр эскысьяс тырӧны Вежа Лолӧн, сэки вайис апостолъяслы сьӧм да шуис: «Сетӧй меным татшӧм вынсӧ, медым менам ки пуктылӧм пыр тшӧтш тырисны Вежа Лолӧн».
Петыр шуис сылы: «Тэнад эзысьыд мед сісьмас тэкӧд тшӧтш. Тэ мӧвпыштін ньӧбны Енмыслысь козинсӧ.
Тэныд весиг гыж ыджда пай оз вичмы таысь, ӧд тэнад сьӧлӧмыд абу веськыд Ен водзас.
Бергӧдчы аслад лёк вӧчӧмысь да кевмысь Енлы, гашкӧ, Сійӧ прӧститас тэнсьыд лёк мӧвптӧ.
Ме аддза, тэ курыд сӧптӧн тырӧмыд, лёкыс кӧрталӧма тэнӧ».
Симон воча шуис: «Кевмысьӧй ме вӧсна Господьлы, медым эз су менӧ тіян шуӧмныд».
Господь йылысь да Сылысь велӧдӧмсӧ висьталӧм бӧрын апостолъяс бӧр мунісны Ерусалимӧ. Мунігмозыс висьтавлісны Евангелльӧ Самария сиктъясын.
Господьлӧн андел шуис Филиплы: «Лун шӧр кадӧ чеччы да мун Ерусалимысь Газаӧ мунан эновтӧм туй вылӧ».
Филип чеччис да петіс туйӧ.
Сійӧ кадас сэті муніс эфиопияса ыджыд чина морт, евнук, коді вӧлі эфиопияса кандакиялӧн — ӧксы-аньлӧн — став овмӧснас веськӧдлысьӧн. Сійӧ вӧлі волӧма Ерусалимӧ юрбитны. Ӧні бӧр муніс гортланьыс. Евнук пукаліс тарантасын да лыддис Исай пророклысь гижӧд.
Вежа Лов шуис Филиплы: «Матыстчы тарантас дорас да мун орччӧн».
Филип котӧрӧн матыстчис да кыліс, тарантасын пукалысь лыддис Исай пророклысь гижӧд.
Филип юаліс: «Гӧгӧрвоан-ӧ, мый лыддян?»
Мӧдыс шуис: «Кыдзи нӧ верма гӧгӧрвонысӧ, гӧгӧрвоӧдысьыс кӧ абу?»
Сійӧ корис Филипӧс пуксьыны орччӧн.
Гижӧдсьыс сійӧ лыддис татшӧм кывъяс:
— Сійӧс вайӧдісны начкыны ыжӧс моз. Шы лэдзлытӧм баля моз Сійӧ эз восьтлы шырысь водзын Ассьыс вомсӧ.
Сійӧс вӧлі увтыртӧма, да мыждӧма абу веськыд ёрд водзын.
Коді висьталас Сысянь водзӧ чужысьяс йылысь, мувывса олӧмсӧ кӧ Сылысь орӧдасны?
Евнук шуис Филиплы: «Висьтав, код йылысь пророкыс шуӧма тайӧс?
Ас йывсьыс али мӧд йылысь?»
Сэки Филип тайӧ гижӧдсяньыс пондіс висьтавны сылы Исус йылысь Бур Юӧрсӧ.
Сэккості найӧ воисны вадорӧ, евнук шуис: «Со ваыс.
Мый менӧ кутӧ пыртчӧмысь?»
Филип шуис сылы: «Став сьӧлӧмсяньыд кӧ эскан, позьӧ».
Евнук вочавидзис: «Эска, мый Исус Кристос — Ен Пи».
Сэсся тшӧктіс сувтӧдны тарантассӧ да найӧ кыкнанныс пырисны ваӧ. Филип пыртіс сійӧс.
Ваысь петӧм бӧрын Вежа Лов лэччис евнук вылӧ.
А Господьлӧн андел босьтіс Филипӧс, и евнук эз нин аддзы сійӧс. Евнук долыдпырысь муніс водзӧ аслас туйӧд.
Бӧрынджык Филипӧс аддзисны Азот карын. Кесарияӧ мунігӧн сійӧ быд карын висьтавліс Бур Юӧр.
9 юр.
Савл скӧрысла пыр на пуис Господьлӧн велӧдчысьяс вылӧ, зілис бырӧдны найӧс. Сійӧ локтіс аркирей дінӧ да корис сысянь эскӧдан гижӧд Дамаск синагогаясӧ, медым Исус велӧдӧмӧ кутчысьысь айуловӧс да аньясӧс позис кӧртавны да вайӧдны Ерусалимӧ.
Дамаскӧ матыстчигӧн туй вылас Савлӧс виччысьтӧг кытшаліс енэжсяньыс югыд.
Сійӧ уси муас да кыліс гӧлӧс шы: «Савл, Савл, мыйла вӧтлан Менӧ?»
Сійӧ юаліс: «Коді Тэ, Господьӧй?»
Господь шуис сылы: «Ме — Исус, кодӧс тэ вӧтлан.
Сьӧкыд тэныд мунны ёсь зорлы паныд».
Савлӧс полӧм босьтіс, тіралӧмӧн сійӧ юаліс: «Господьӧй, мый кӧсъян, мед ме вӧчи?»
Господь шуис сылы: «Чеччы да мун карас.
Сэні висьталасны, мый тэныд колӧ вӧчнысӧ».
Савлкӧд ӧтлаын локтысьяс шӧйӧвошӧмӧн сулалісны: найӧ кылісны сёрни, а висьталысьсӧ эз аддзыны.
Савл чеччис муысь, восьтіс синсӧ, но нинӧм эз аддзы.
Киӧдыс кутӧмӧн сійӧс вайӧдісны Дамаскӧ.
Куим лун чӧж сійӧ нинӧм эз аддзы да оліс сёйтӧг-ютӧг.
Дамаскын оліс Ананий нима велӧдчысь.
Господь петкӧдчис сылы да шуис: «Ананий.»
Сійӧ вочавидзис: «Тані ме, Господьӧй».
Господь шуис сылы: «Чеччы да мун Веськыд нима туй вылӧ. Юав Иуда керкаысь Тарсын чужлӧм Савл нима мортӧс.
Ӧні сійӧ кевмысьӧ. Сійӧ аддзыліс Енсянь петкӧдчылӧм, мый Ананий нима морт локтас, пуктылас сы вылӧ кисӧ, да сійӧ кутас аддзыны».
Ананий вочавидзис: «Господьӧй, ме унасянь кывлі тайӧ мортыс йылысь, мыйта лёк сійӧ вӧчис Тэнад вежа войтырлы Ерусалимын.
Сылӧн эм аркирейяссянь гижӧд, та вӧсна вермас босьтны быдӧнӧс, коді шыасьӧ Тэнад нимӧ».
Господь шуис: «Мун. Ме бӧрйи сійӧс кесъявны Меным, юӧртны Менсьым нимӧс мукӧд войтырлы да ӧксыяслы, тшӧтш Израиль войтырлы.
Ме петкӧдла сылы, мыйта сьӧкыд ковмас нуны сылы Менам ним вӧсна».
Ананий муніс, пырис Иуда керкаӧ да Савл вылӧ кисӧ пуктӧмӧн шуис: «Савл вокӧй.
Менӧ мӧдӧдіс тэ дінӧ Господь Исус, коді петкӧдчис тэныд туй вылын. Сійӧ мӧдӧдіс менӧ, медым тэ бара кутін аддзыны да тырин Вежа Лолӧн».
Пырысь-пыр Савл синъясысь быттьӧ чери сьӧм усис, да сійӧ пондіс аддзыны.
Сэсся дзик пыр чеччис да пыртчис. Та бӧрын сёйыштіс да ёнмис.
Кымынкӧ лун Савл оліс Дамаскын велӧдчысьяскӧд.
Савл дзик пыр пондіс юӧртны-висьтавны синагогаясын, мый Исус — сійӧ Ен Пи.
Кывзысьяс ёна шензисны: «Эз-ӧ тайӧ мортыс бырӧдав Ерусалимын Исус нимӧ шыасьысьясӧс?
Эз-ӧ сійӧ лок татчӧ, медым босьтны найӧс да нуӧдны аркирейяс водзӧ?»
Савл лунысь-лун висьталіс вынаджыка да эскӧдіс, мый Исус — сійӧ Кристос. Тайӧн весьӧпӧртіс Дамаскын олысь юдейясӧс.
Кад мысти юдейяс сёрнитчисны вины Савлӧс.
Тайӧ кывсис Савллы.
Юдейяс лун и вой кыйӧдчисны карса дзиръя дорын, медым вины сійӧс.
Войнас велӧдчысьяс пуксьӧдісны Савлӧс ыджыд чуманӧ да лэдзисны карса стен бердӧд.
Ерусалимӧ воӧм бӧрын Савл зілис ӧтувтчыны велӧдчысьяскӧд.
Но найӧ ставныс полісны сыысь, эз эскыны, мый сійӧ тшӧтш велӧдчысь.
Сэки Варнава отсаліс Савллы, вайӧдіс сійӧс апостолъяс дінӧ да висьталіс налы, мый Савл аддзылӧма Господьӧс, да Господь сёрнитӧма сыкӧд. Нӧшта висьталіс, кыдзи Савл Дамаскын повтӧг юӧртӧма Исус йылысь.
Та бӧрти Савл оліс да ветлӧдліс накӧд Ерусалимын да повтӧг висьтавліс Господь Исус йылысь.
Сійӧ сёрнитліс грек кывйӧн сёрнитысь юдейяскӧд да вензьывліс накӧд, а найӧ пыр кӧсйисны вины сійӧс.
Тайӧс тӧдмалӧм бӧрын вокъяс нуӧдісны Савлӧс Кесарияӧ, сэсянь мӧдӧдісны Тарсӧ.
Став Юдея, Галилея да Самария пасьтала вичкояс олісны лӧня. Найӧ олісны Господьысь полӧмӧн да лунысь-лун ёнмисны.
Вежа Лов ышӧдӧм улын вичкоясын эскысьяслӧн лыдыс содіс.
Вичкояс кытшовтігӧн Петыр локтіс Лиддаын олысь вежа войтыр дінӧ.
Сэтысь сійӧ аддзис Эней нима мортӧс, коді кӧкъямыс во нин куйлӧма чеччывтӧг.
Петыр шуис сылы: «Эней, Исус Кристос бурдӧдӧ тэнӧ.
Чеччы да лӧсьӧд вольпасьтӧ».
Сійӧ дзик пыр чеччис.
Лиддаын да Саронын олысьяс ставныс аддзылісны тайӧс да бергӧдчисны Господьлань.
Иоппияын оліс Тавита ань, сылӧн нимыс лоӧ: серна. Сійӧ тшӧтш вӧлі велӧдчысьяс лыдын.
Уна бур сійӧ вӧчис йӧзыслы, отсасис гӧльяслы.
Сійӧ лунъясӧ Тавита висьмис да куліс.
Сійӧс мыськалісны да пуктісны вылыс вежӧсас.
Велӧдчысьяс кор кылісны, мый Петыр Лиддаын, Иоппияысь неылын, мӧдӧдісны кык мортӧс корны Петырӧс, мед сійӧ дзик пыр локтас на дінӧ.
Петыр чеччис да локтіс накӧд.
Воӧм мыстиыс Петырӧс нуӧдісны вылыс вежӧсас.
Дӧваяс кытшалісны сійӧс да бӧрдӧмсорӧн петкӧдлісны Тавита киӧн вурӧм дӧрӧм-паськӧмъяс.
Петыр тшӧктіс петны ставныслы, ачыс пидзӧс вылас сувтӧмӧн кутіс кевмысьны. Сэсся шойланьыс бергӧдчӧмӧн шуис: «Тавита, чеччы.»
Тавита восьтіс синсӧ, видзӧдліс Петыр вылӧ да пуксис.
Петыр мыччис сылы кисӧ да отсаліс чеччыны. Сэсся корис дӧваясӧс да мукӧд эскысьясӧс, да сувтӧдіс на водзӧ ловъя Тавиваӧс.
Та йылысь кывсис став Иоппия пасьтала, и унаӧн сэки эскисны Господьлы.
Петыр дыркодь на оліс Иоппияын кучик вӧчысь Симон ордын.
10 юр.
Кесарияын оліс Корнилий нима морт. Сійӧ веськӧдліс италияса сё шыпурта чукӧрӧн. Сійӧ вӧлі вежавидзысь морт, ачыс да сылӧн гортсаыс олісны Енмысь полӧмӧн, сійӧ отсасис гӧль юдейяслы да пыр кевмысис Енлы.
Луннас куим часын сійӧ вемӧсӧн аддзис Енлысь анделӧс, коді пырис сы дінӧ да шыасис: «Корнилий.»
Повзигтыр андел вылӧ видзӧдӧмӧн Корнилий шуис: «Мый, Ыджыдӧй?»
Андел шуис сылы: «Енмыс кылӧма тэнсьыд кевмысьӧмтӧ да аддзӧма гӧльяслы отсасьӧмтӧ.
Дзик пыр мӧдӧд йӧзтӧ Иоппияӧ Симонла, кодӧс шуӧны Петырӧн.
Ӧні сійӧ кучик вӧчысь Симон ордын, сылӧн керкаыс сулалӧ саридз дорас.
Сійӧ висьталас тэныд юӧр, код пыр мездман тэ и став тэнад гортсаыд».
Андел мунӧм бӧрын Корнилий корис ассьыс кык кесйӧгсӧ да вежавидзӧмӧн олысь шыпуртаӧс. Висьталіс налы ставсӧ да мӧдӧдіс Иоппияӧ.
Мӧд луннас найӧ вӧлі матыстчӧны карланьыс. Буретш сэки, лун шӧр кадӧ, Петыр кайис керка вылас кевмысьны.
Петырлӧн кынӧмыс кутіс сюмавны, сійӧ кӧсйис сёйны.
Кор сёянсӧ дасьтісны на, Петыр быттьӧ ас садьсьыс петіс да аддзис: восьса енэжсяньыс сы дінӧ лэччис паськыд дӧра сяма. Нёльнан пельӧсӧдыс кутӧмӧн сійӧс лэдзисны му вылӧ.
Сэні вӧліны мувывса быдпӧлӧс нёль кока пемӧсъяс, веглясьысьяс да енэжвыв лэбачьяс.
Сэки Петыр кыліс гӧлӧс шы: «Чеччы, Петыр, начкы да сёй».
Петыр шуис: «Ог, Господьӧй. Ме некор эг сёйлы нинӧм шогмытӧмсӧ да пежсӧ».
Сэсся бара кыліс: «Енмыс мый весалӧма, эн лыддьы сійӧс пежӧн».
Тадзи вӧлі куимысь, сэсся дӧрасӧ бӧр кыпӧдісны енэжас.
Петыр шӧйӧвошӧмӧн мӧвпаліс, мый эськӧ лоӧ тайӧ аддзывлӧмторйыс. Сійӧ кадас Корнилийлӧн мӧдӧдӧмаяс Симонлысь керкасӧ аддзӧм бӧрын сувтісны потшӧс дорас да гораа юалісны: «Тані-ӧ Симоныс, кодӧс шуӧны Петырӧн?»
Кор Петыр мӧвпаліс на аддзывлӧм йывсьыс, Лов шуис сылы: «Тэнӧ корсьӧны куимӧн.
Лэччы да майшасьтӧг мун накӧд, ӧд найӧс Ме мӧдӧді».
Петыр лэччис воӧмаяс дінӧ да шуис: «Ме сійӧ мортыс, кодӧс ті корсянныд. Мый могӧн локтінныд?»
Найӧ висьталісны: «Миянӧс мӧдӧдіс Корнилий, сёӧн веськӧдлысьным. Сійӧ веськыда олысь да Енмысь полысь морт, юдей войтыр пыдди пуктӧ сійӧс.
Вежа андел тшӧктӧма сылы корны тэнӧ гортас, мед кывзыны тэнсьыд висьталӧмтӧ».
Петыр корис найӧс керкаас, вердіс-юкталіс, сэсся мӧд луннас петіс накӧд туйӧ. Сыкӧд тшӧтш мунісны Иоппияысь кодсюрӧ вокъяс.
Лун мысти воисны Кесарияӧ.
Корнилий виччысис найӧс. Сійӧ вӧлі корӧма ассьыс рӧдвужсӧ да матысса ёртъяссӧ.
Пыриганыс Корнилий воча петіс Петырлы да копыртчылӧмӧн уськӧдчис сы водзӧ.
Петыр сійӧс лэптігмоз шуис: «Чеччы, ме ӧд морт жӧ».
Сэсся сыкӧд сёрнитігтырйи пырис керкаӧ да аддзис керка тыр йӧзӧс.
Петыр шуис налы: «Ті тӧданныд, мый юдейяслы оз позь ӧтувтчыны да волысьны мукӧд войтыркӧд.
Но Ен меным петкӧдліс, мед ме некодӧс эг пукты шогмытӧмӧ да пеж туйӧ.
Та вӧсна ме кывшутӧг локті тіян дінӧ.
Кӧсъя тӧдны, мый могӧн ті коринныд менӧ?»
Корнилий висьталіс: «Куим лун сайын дзик тайӧ кадас куим часын ме видзалӧмӧн кевмыси гортын. Сэки сувтіс ме водзӧ дзирдалан паськӧма морт да шуис, Корнилий, Енмыс пӧ кылӧма тэнсьыд кевмысьӧмтӧ да аддзӧма гӧльяслы отсасьӧмтӧ.
Мӧдӧд пӧ йӧзтӧ Иоппияӧ корны Симонӧс, кодӧс шуӧны Петырӧн.
Ӧні пӧ сійӧ кучик вӧчысь Симон керкаын, а керкаыс пӧ саридз дорас.
Сійӧ пӧ локтас да висьталас тэныд ставсӧ.
Сэки ме дзик пыр мӧдӧді тэ дінӧ ассьым йӧзӧс. Тэ бура вӧчин, мый локтін.
Ми ставным ӧні Ен водзынӧсь да дасьӧсь кывзыны ставсӧ, мый Енмыс тшӧктіс висьтавны тэныд».
Петыр шуис: «Ме збыльысь ӧні гӧгӧрвоа, мый Енмыслы став йӧзыс ӧткодьӧсь. Быд войтыр пӧвстысь Сійӧ сибӧдӧ найӧс, кодъяс олӧны веськыда да Сыысь полӧмӧн.
Сійӧ мӧдӧдіс Израиль войтырлы Ассьыс кывсӧ, лӧньлун йылысь Бур Юӧрсӧ, кодӧс вайис Исус Кристос.
Сійӧ ставныслы Господь.
Ті тӧданныд, мый вӧлі Галилеяын, сэсся став Юдея пасьтала сійӧ пыртчӧм бӧрын, мый йылысь висьтавліс Иоан.
Ен мавтыштіс Назаретса Исусӧс Вежа Лолӧн да вынӧн. Исус быдлаті ветлӧдліс, уна бур вӧчис йӧзыслы, бурдӧдаліс да мездіс йӧзсӧ омӧльыслӧн киысь. Енмыс вӧлі Сыкӧд.
Ми асланым синмӧн аддзылім ставсӧ, мый Сійӧ вӧчис Юдея муын да Ерусалимын. Сійӧс пу вылӧ ӧшӧдӧмӧн виисны.
Но Енмыс ловзьӧдіс Сійӧс коймӧд луннас да сетіс Сылы петкӧдчывны, но эз став йӧзыслы, а миянлы, кодъясӧс Енмыс водзысяньыс бӧрйис висьтавны та йылысь.
Сійӧ тшӧктіс миянлы, кодъяс ӧтлаын сёйим-юим Сыкӧд ловзьӧм бӧрас, юӧртны йӧзыслы да висьтавны, мый Ен пуктіс Сійӧс ловъяяслы да кулӧмаяслы Мыждысьӧн.
Сы йылысь став пророкыс висьталӧ, мый быдӧнлысь, коді эскӧ Сылы, лоӧ прӧститӧма мыжъяссӧ Сы нимӧн».
Петырлӧн сёрнитігӧн Вежа Лов лэччис ставныс вылӧ, кодъяс сэні кывзісны.
Петыркӧд локтӧм эскысь юдейяс чуймисны, мый Вежа Ловсӧ сетӧма тшӧтш ентӧдтӧмъяслы.
Ӧд асланыс пельӧн найӧ кылісны ентӧдтӧмъяслысь мукӧд кывъяс вылын сёрнитӧмсӧ да Енмӧс ошкӧмсӧ.
Сэки Петыр шуис: «Вермас-ӧ кодкӧ кутны найӧс пыртчӧмысь, налы кӧ миянлы моз тшӧтш сетӧма Вежа Ловсӧ?»
Сэсся Петыр тшӧктіс налы пыртчыны Исус Кристос нимӧн.
А найӧ корисны Петырӧс олыштны на ордын нӧшта кымынкӧ лун.
11 юр.
Апостолъяслы да мукӧд вокъяслы Юдеяын кывсис, мый ентӧдтӧмъяс сибӧдӧмаӧсь Енлысь Кывсӧ.
Кор Петыр локтіс Ерусалимӧ, вундыштчӧмаяс вомалісны сійӧс, шуисны: «Тэ ветлӧмыд вундыштчытӧмъяс дінӧ да весиг ӧтлаын сёйӧмыд накӧд».
Сэки Петыр пондіс висьтавны налы ставсӧ сьӧрсьӧн-бӧрсьӧн:
«Ме вӧлі Иоппия карын. Сэні кевмысигӧн быттьӧ ас садьысь петі да аддзи Енсянь петкӧдчылӧм:
енэжсяньыс лэччис паськыд дӧра сяма, нёльнан пельӧсӧдыс кутӧмӧн сійӧс лэдзисны ме водзӧ.
Ме видзӧдлі да аддзи сэтысь мувывса нёль кока пемӧсъясӧс, веглясьысьясӧс да енэжвыв лэбачьясӧс.
Сэки ме кылі гӧлӧс шы: “Чеччы, Петыр, начкы да сёй”.
Ме шуи: “Ог, Господьӧй. Ме некор эг босьтлы вомӧ нинӧм шогмытӧмсӧ да пежсӧ”.
Сэсся енэжсяньыс ме бара кылі: “Енмыс мый весалӧма, эн лыддьы сійӧс пежӧн”.
Тадзи вӧлі куимысь, сэсся ставсӧ бӧр кыпӧдісны енэжас.
Буретш сійӧ каднас куим морт сувтісны керка дорӧ, кӧні ме вӧлі. Найӧс вӧлӧмкӧ Кесариясянь мӧдӧдӧмаӧсь ме дінӧ.
Лов шуис меным, мед ме майшасьтӧг муні накӧд.
Мекӧд тшӧтш мунісны тайӧ квайт вокыс. Кор ми локтім сійӧ мортыс ордӧ, сійӧ висьталіс миянлы, мый аддзылӧма анделӧс. Андел сувтӧма керка шӧрас да шуӧма сылы, мӧдӧд пӧ йӧзтӧ Иоппияӧ Симонла, кодӧс шуӧны Петырӧн.
Сійӧ пӧ висьталас тэныд юӧр, код пыр мездман тэ да став тэнад гортсаыд.
И кор ме куті сёрнитны, на вылӧ лэччис Вежа Лов, кыдзи водзынсӧ миян вылӧ.
Сэки тӧд вылӧ меным уси Господьлӧн шуӧмыс: “Иоан пыртіс ваӧн, но тіянӧс лоӧ пыртӧма Вежа Лолӧн”.
Енмыс кӧ миянлы моз и налы сетіс тайӧ козинсӧ, кор найӧ эскисны Господь Исус Кристослы, сідзкӧ, коді ме сэтшӧмыс, медым паныд сувтны Енмыслы?»
Тайӧс кылӧм бӧрын найӧ лӧнисны да ошкисны Енмӧс шуалӧмӧн: «Тыдалӧ, Енмыс ентӧдтӧмъяслы тшӧтш сетӧма бергӧдчыны мыжъяссьыс, мед и налӧн вӧлі олӧм».
Степанӧс виӧм бӧрын дзескӧдӧм вӧсна разалӧмаяс мунісны Финикияӧдз, Кипрӧдз да Антиокияӧдз.
Енлысь Кывсӧ юдейяслы кындзи найӧ некодлы эз висьтавлыны.
На пӧвстын тшӧтш вӧліны Кипрысь да Киринеяысь кодсюрӧ. Антиокияӧ локтӧм бӧраныс найӧ висьтавлісны грекъяслы Господь Исус йылысь Бур Юӧр.
Господь вӧлі накӧд, та вӧсна унаӧн эскисны да бергӧдчисны Господь дінӧ.
Та йылысь кывсис Ерусалимын эскысьяслы.
Сэки найӧ мӧдӧдісны Антиокияӧ Варнаваӧс.
Воӧм бӧрас Варнава аддзис, мый сэні Енлӧн буралӧмыс да ёна нимкодясис. Сійӧ ышӧдіс быдӧнӧс кутчысьны став сьӧлӧмнас Господьӧ.
Варнава вӧлі бур морт, сійӧ вӧлі тырӧма Вежа Лолӧн да эскӧмӧн.
Унаӧн сэки бергӧдчисны Господь дінӧ.
Сэсся Варнава муніс Тарсӧ корсьны Савлӧс и аддзӧм бӧрас локтіс сыкӧд Антиокияӧ.
Во чӧж найӧ чукӧртчывлісны сэні эскысьяскӧд да велӧдісны бура уна йӧзӧс.
Антиокияын велӧдчысьясӧс медводдзаысь шуисны Кристос войтырӧн.
Сійӧ лунъясӧ Антиокияӧ локтісны Ерусалимысь пророкъяс.
На пиысь Агав нима пророк Ловсянь водзвыв висьталіс, ыджыд тшыгъялӧм пӧ лоӧ став му пасьтала. Клавдий кесар дырйи тадзи и лои.
Велӧдчысьяс шуисны отсавны Юдеяын олысь вокъяслы, коді мыйта вермас. Тадзи и вӧчисны: Варнавакӧд да Савлкӧд мӧдӧдісны вичкоса юрнуӧдысьяслы сьӧм.
12 юр.
Тайӧ кадӧ Ирӧд ӧксы пондіс ёна дзескӧдны вичкоысь кодсюрӧӧс. Сійӧ тшӧктіс вины Иоанлысь Яков воксӧ.
Ирӧд аддзис, мый тайӧ сьӧлӧм вылас воис юдейяслы, сэки тшӧктіс босьтны тшӧтш Петырӧс. Сэки буретш пасйисны Шомтӧм нянь сёян лунъяс. Петырӧс босьтісны да пуксьӧдісны дзескыдінӧ.
Шыпуртаяслы тшӧктісны видзны сійӧс нёльӧн-нёльӧн да нёльысь вежласьӧмӧн. Ирӧд шуис Ыджыд лун бӧрын петкӧдны сійӧс йӧз водзӧ.
Петырӧс видзисны дзескыдінын, а вичко дугдывтӧг кевмысис сы вӧсна Енлы.
Петкӧдан лунлы паныда войӧ Петыр узис кык шыпурта костын. Сійӧс вӧлі дорӧма кык чептӧн, нӧшта дзескыдін ӧдзӧс дорын сулалісны видзысьяс.
Виччысьтӧг Господьлӧн андел сувтіс сы водзӧ и гӧгӧр югдіс.
Петырлы инмӧдчиг андел садьмӧдіс сійӧс да шуис: «Чеччы ӧдйӧджык».
Петырлӧн киыс дзик пыр мыніс чепъясысь.
Андел шуис: «Вӧняв костӧ да кӧмась».
Петыр кывзысис.
Сэсся андел шуис: «Пасьтав вылыс паськӧмтӧ да лок ме бӧрся».
Петыр муніс андел бӧрся, но чайтіс, мый ставыс тайӧ абу збыль, а сӧмын Енсянь петкӧдчылӧм.
Воддза да мӧд видзысьяс дінті мунӧм бӧрын найӧ воисны карсьыс петан кӧрт ӧдзӧс дорӧ. Ӧдзӧсыс ачыс воссис, да найӧ петісны. Туй вывті мунігӧн андел виччысьтӧг вошис.
Сэки Петыр воис ас садяс да шуис: «Ӧні ме збыльысь тӧда, мый Господь мӧдӧдіс Ассьыс анделсӧ, мед мездыны менӧ Ирӧд киысь да юдей войтырлӧн лӧсьӧдӧм лёкторъясысь».
Тайӧс гӧгӧрвоӧм бӧрын Петыр мӧдӧдчис Иоанлӧн Марья мамыс ордӧ. Тайӧ Иоансӧ шуисны Маркӧн. Сэні вель унаӧн вӧлі чукӧртчӧмаӧсь кевмысьны.
Петыр игӧдчис ӧдзӧсас. Рода нима кесйӧг ань петіс восьтнысӧ. Петырлысь гӧлӧссӧ кылӧм бӧрын сійӧ нимкодьысла весиг вунӧдіс восьтны ӧдзӧссӧ, котӧрӧн бӧр пырис да висьталіс, ӧдзӧс саяс пӧ Петыр сулалӧ.
Ставныс шуисны: «Ас вежӧрад-ӧ тэ?»
Но сійӧ пыр ассьыс долис.
Сэки найӧ шуисны: «Гашкӧ, тайӧ Петырлӧн анделыс?»
А Петыр пыр на игӧдчис.
Кор восьтісны да аддзисны сійӧс, ёна чуймисны.
Петыр сетіс кинас пас, медым ланьтісны ставныс.
Сэки висьталіс налы, кыдзи Господь петкӧдіс сійӧс дзескыдінысь. Сэсся шуис: «Юӧртӧй та йылысь Яковлы да мукӧд вокъяслы».
Та бӧрын петіс на дінысь да муніс мӧдлаӧ.
Асывнас Петырлӧн вошӧмысь шыпуртаяс ёна шызисны.
Ирӧд корсис Петырӧс, но ставыс вӧлі весьшӧрӧ. Видзысьясӧс юасьӧм бӧрын сійӧ тшӧктіс вины найӧс.
Сэсся Ирӧд муніс Юдеяысь Кесарияӧ да кольччис сэтчӧ.
Ирӧд вӧлі скӧрмӧма Тирын да Сидонын олысьяс вылӧ.
Найӧ ӧтвыв сёрнитчӧмӧн локтісны Ирӧд дінӧ бурасьӧм могысь, ӧд ӧксылӧн муыс вердіс найӧс. Найӧ эскӧдісны Властӧс, ӧксы керкаӧн веськӧдлысьӧс, мед сувтас на дор.
Индӧм лунӧ Ирӧд пасьталіс ӧксы паськӧм, пуксис юралан пуклӧсӧ да пондіс сёрнитны.
Йӧзыс гораа шуалісны, тайӧ пӧ Ен сёрнитӧ, оз морт.
Сэки Господьлӧн андел чорыда дойдіс Ирӧдӧс, ӧд Енлы пыдди сійӧ аслыс босьтіс ошкӧмсӧ.
Сійӧс ловъявывсьыс сёйисны номыръяс.
А Енлӧн Кывйыс ёна паськаліс.
Варнава да Савл вайӧм сьӧмсӧ сетісны вичколы, сэсся бӧр мунісны Ерусалимысь Антиокияӧ. Аскӧдныс найӧ босьтісны тшӧтш Иоанӧс, кодӧс шуисны Маркӧн.
13 юр.
Антиокия вичкоын вӧліны кодсюрӧ пророкъяс да велӧдысьяс: Варнава, Симеон, кодӧс шуисны Нигерӧн, Киринеяысь Луций, Манаил, сійӧ тшӧтш быдмылӧма Ирӧд ӧксыкӧд, да Савл.
Кор найӧ видзалӧмӧн кесъялісны Господьлы, Вежа Лов шуис: «Торйӧдӧй Меным Варнаваӧс да Савлӧс, Ме кори найӧс торъя удж вӧчны».
Сэсся видзалӧм да кевмысьӧм бӧрын найӧ пуктылісны кинысӧ на вылӧ да мӧдӧдісны найӧс.
Тадзи Варнава да Савл, Вежа Лолӧн мӧдӧдӧмаяс, локтісны Селевкияӧ.
Сэсянь кывтісны Кипрӧ.
Сэтчӧ воӧм бӧрын Саламинӧ сувтліганыс висьтавлісны Енлысь Кывсӧ синагогаясын.
Накӧд тшӧтш вӧлі Иоан, коді отсасис налы.
Дісӧ кытшовтігӧн воисны Пафӧ, сэні налы паныдасис Варисус нима сэтчӧс тун да ылӧгпророк, ачыс сійӧ вӧлі юдей. Сійӧ оліс діӧн веськӧдлысь Сергий Павел ордын. Веськӧдлысьыс вӧлі сюсь вежӧра морт.
Сійӧ кӧсйис кывны Енлысь Кывсӧ, та вӧсна корис Варнаваӧс да Савлӧс ас ордас.
Елим тун — тадзи Варисусӧс нимтісны грек кывйӧн — паныд сувтіс локтысьяслы. Сійӧ эз кӧсйы, мед діӧн веськӧдлысьыс эскис.
Савл, мӧд ногӧн Павел, Вежа Лолӧн тырӧмӧн веськыда сылы синмас видзӧдӧмӧн шуис: «Тэ, омӧльыслӧн пи, быд бурыслы паныд мунысь, тырӧмыд быдпӧлӧс лёкнас да пӧръясьӧмнас.
Чайтан, и водзӧ верман пӧръясьӧмнад чукльӧдлыны Господьлысь веськыд туйсӧ?
Господьлӧн киыс ӧні тэ вылын: тэ синтӧмман да индӧм кадӧдз он кут аддзыны шонді югӧрсӧ».
Дзик пыр сылӧн синмыс пемдіс.
Сійӧ пондіс бергавны ӧтарӧ-мӧдарӧ, корсьны нуӧдысьӧс.
Діӧн веськӧдлысь кор аддзис тайӧ лоӧмторсӧ, шензис Господьлӧн велӧдӧмысь да кутіс эскыны.
Пафысь Павел мукӧдыскӧд тшӧтш кывтіс Памфилияӧ, Пергия карӧ.
Сэні Иоан колис найӧс да бӧр косіс Ерусалимӧ.
А найӧ Пергиясянь мунісны Писидияса Антиокия карӧ. Шойччан лунӧ найӧ пырисны синагогаӧ да пуксисны.
Индӧд да пророк гижӧдъяс лыддьӧм бӧрын синагогаса юралысьяс ыстісны кодсюрӧӧс юавны, эм-ӧ вокъяслӧн ышӧдана кыв йӧзыслы. Эм кӧ, мед висьталасны.
Сэки Павел сувтіс, сетіс кинас пас да шуис: «Израиль войтыр да Енмысь полысьяс, кывзӧй:
Израиль войтырлӧн Ен бӧрйис миянлысь батьяснымӧс, рӧдмӧдіс тайӧ войтырсӧ Египет муын да вына кинас петкӧдіс найӧс сэтысь.
Нелямын во чӧж Сійӧ вердіс найӧс овтӧминын.
Сэсся бырӧдіс Ханаан муысь сизим пӧлӧс войтырӧс да налысь муяссӧ юкліс миян батьяслы.
Ставыс тайӧ кыссис матӧ нёльсё ветымын во. Та бӧрти сетіс налы ёрдысьясӧс Самуил пророкӧдз.
Сэсся найӧ корисны ӧксыӧс, сэки Енмыс сетіс налы Саулӧс, Вениамин чужанкотырысь Кислысь писӧ.
Сійӧ веськӧдліс нелямын во чӧж.
Саулӧс вештӧм бӧрын сувтӧдіс налы ӧксыӧн Давидӧс. Сы йылысь шуӧма: “Ме аддзи Давидӧс, Ессейлысь писӧ, сійӧ Меным сьӧлӧм серти. Сійӧ пӧртас олӧмӧ Менсьым став кӧсйӧмӧс”.
Сылӧн кӧйдыссянь Ен сетіс Израильлы кӧсйысьӧм Мездысьӧс, Исусӧс.
Сылӧн локтӧм водзвылын Иоан юӧртіс став Израиль войтырлы, мед бергӧдчасны мыжъяссьыныс да пыртчасны.
Олан туй помасигас Иоан висьтавліс: “Ме абу сійӧ, код туйӧ ті менӧ пуктанныд.
Сійӧ локтӧ ме бӧрся, и ме ог шогмы пӧрччӧдны Сылысь кӧмсӧ”.
Вокъясӧй, Ӧвраам пиянӧй да Енмысь полысьяс.
Тіянлы мӧдӧдӧма тайӧ мездан кывсӧ.
Ерусалимын олысьяс да налӧн веськӧдлысьяс эз тӧдны Сійӧс, босьтісны да мыждісны. Тадзи инісны пророкъяслӧн кывъяс, кодъясӧс лыддьӧны быд шойччан лунӧ. Налы эз сюр мыжыс, мед вины Сійӧс. Сэки корисны Пилатӧс, мед сійӧ тшӧктас винысӧ.
Найӧ вӧчисны ставсӧ, мый гижӧма Сы йылысь. Сэсся лэдзисны Сійӧс крест вывсьыс да пуктісны дзебанінӧ.
Но Енмыс ловзьӧдіс Сійӧс.
Уна лун чӧж Сійӧ петкӧдчывліс налы, кодъяс Сыкӧд тшӧтш локтісны Галилеясянь Ерусалимӧдз. Ӧні найӧ висьтавлӧны Сы йылысь Израиль войтырлы.
Ми висьталам тіянлы Бур Юӧр, мый батьяслы сетӧм кӧсйысьӧмсӧ Ен пӧртіс олӧмӧ миянлы, налӧн ныв-пилы, Исусӧс ловзьӧдӧм пыр. Мӧд псаломын гижӧма:
— Тэ Менам Пи, Ме ӧні чужті Тэнӧ.
Енмыс ловзьӧдіс Исусӧс, и Сійӧ оз нин бӧр бергӧдчы сісьмӧмас. Шуӧма:
— Ме пӧрта олӧманыд Давидлы сетӧм вежа да вежсьывтӧм кӧсйысьӧмӧс.
Мӧдлаын шуӧма:
— Тэ аслад Вежалы он сет аддзывны сісьмӧмсӧ.
Давид аслас кадӧ пӧртіс олӧмас Енлысь кӧсйӧмсӧ. Сэсся сійӧ куліс, да сійӧс гуалісны батьяскӧд орччӧн. Давидным аддзыліс сісьмӧмсӧ, а Сійӧ, кодӧс Ен ловзьӧдіс, эз аддзыв сісьмӧмсӧ.
Тӧдӧй, вокъяс: Исус пыр Енмыс юӧртӧ тіянлы, мый прӧститӧма тіянлысь мыжъяснытӧ.
Сы пыр быд эскысь лоӧ веськыдӧн да мездмас ставсьыс, мыйысь эз вермы мездмыны Мӧисейлӧн Индӧд пыр.
Видзчысьӧй, медым эз су тіянӧс пророкъяслӧн шуӧмыс:
— Видзӧдӧй, сералысьяс, да шензьӧй, тіянӧс лоӧ бырӧдӧма.
Тіян лунъясӧ Ме вӧча сэтшӧмтор, та йылысь кӧ висьталасны тіянлы, ті онӧ эскӧй».
Синагогаысь петігӧн ентӧдтӧмъяс корисны Павелӧс да Варнаваӧс нӧшта висьтавны та йылысь локтан шойччан лунӧ.
Синагогаысь разӧдчигӧн юдейяс да юдей эскӧмӧ бергӧдчысьяс пиысь унаӧн мунісны Павел да Варнава бӧрся. Апостолъяс сёрнитісны накӧд да ышӧдісны, медым кутчысясны Енлӧн буралӧмас.
Локтан шойччан лунӧ пӧшти став карыс чукӧртчис кывзыны Енлысь Кывсӧ.
Кор юдейяс аддзисны уна йӧзӧс, тырины лӧглунӧн. Найӧ пондісны паныд шуасьны да омӧльтны Павеллысь велӧдӧмсӧ.
Сэки Павел да Варнава повтӧг шуисны: «Медводз тіянлы шуӧма кывны Енлысь Кывсӧ.
Но ті кӧ онӧ сибӧдӧй тайӧс да лыддянныд асьнытӧ шогмытӧмӧн, мед пырны помтӧм олӧмӧ, ми мунам ентӧдтӧмъяс дінӧ.
Тадзи Ачыс Господь висьтавліс:
— Ме сувтӧді Тэнӧ ентӧдтӧмъяслы югыдӧн, став му пасьтала олысьяслы Мездысьӧн».
Тайӧс кылӧм бӧрын ентӧдтӧмъяс пондісны нимкодясьны да ошкыны Господьӧс Сылӧн Кывйысь.
Эскисны ставныс, кодъяслы шуӧма пырны помтӧм олӧмӧ.
Господьлӧн кывйыс паськаліс сэтчӧс му пасьтала.
Юдейяс жӧ паныд ыззьӧдісны Енсьыс полысь да пыдди пуктана аньясӧс да карӧн веськӧдлысьясӧс.
Найӧ пондісны дзескӧдны Павелӧс да Варнаваӧс, сэсся вӧтлісны асланыс муысь.
Апостолъяс пыркӧдісны коксьыныс буссӧ сэні да мунісны Иконияӧ.
Антиокияын жӧ велӧдчысьяс тырины нимкодьлунӧн да Вежа Лолӧн.
14 юр.
Иконияын Павел да Варнава мунісны синагогаӧ да висьталісны сэні Енлысь Кывсӧ. Юдейяс да грекъяс пиысь сэки унаӧн эскисны.
Юдейяс, кодъяс эз эскыны, паныд кыпӧдісны ентӧдтӧмъясӧс, кӧдзисны налы сьӧлӧманыс скӧралӧм вокъяс вылӧ.
Вокъяс дыркодь олісны сэні да повтӧг висьтавлісны Господь йылысь. Господь вӧчис на пыр шензьӧданаторъяс да петкӧдліс индысьпасъяс, тайӧн вынсьӧдіс Аслас буралӧм йылысь висьталӧмсӧ.
Йӧзыс карас юксисны кык пельӧ: ӧтияс вӧліны юдейяс дор, мӧдъяс — апостолъяс дор.
Ентӧдтӧмъяс да юдейяс асланыс веськӧдлысьяскӧд шуисны уськӧдчыны Павел да Варнава вылӧ да изъявны найӧс.
Та йылысь тӧдмалӧм бӧрын апостолъяс пышйисны Ликаонияӧ. Сэні Листра да Дервия каръясын, тшӧтш матігӧгӧрас, висьтавлісны Бур Юӧр.
Листраын оліс кокнас висьысь морт, чужӧмсяньыс сійӧ абу на сувтлӧма кок вылас. Сійӧ пукаліс да кывзіс Павеллысь висьталӧмсӧ.
Павел видзӧдліс сы вылӧ да аддзис, мый сылӧн эм эскӧм бурднысӧ. Сэки Павел гораа шуис: «Господь Исус Кристос нимӧн шуа тэныд: “Сувт кок вылад.”»
Сійӧ дзик пыр чеччыштіс да пондіс ветлӧдлыны.
Тайӧс аддзӧм бӧрын йӧзыс асланыс Ликаония кыв вылын пондісны гораа шуавны, енъяс пӧ морт кодьӧн лэччисны миян дінӧ.
Варнаваӧс шуисны Зевсӧн, а Павелӧс Гермесӧн, ӧд ёнджыкасӧ сійӧ сёрнитіс.
Зевс енлы налӧн юрбитаніныс сулаліс карӧ пыранінас. Сэки Зевслӧн тун вайис сикӧтшъяс да вайӧдіс дзиръя дорӧ ӧшъясӧс, кӧсйис йӧзыскӧд ӧтлаын вись вайны апостолъяслы.
Тайӧс кылӧм бӧрын апостолъяс, Варнава да Павел, косялісны паськӧмнысӧ да котӧрӧн уськӧдчисны йӧз чукӧр пытшкӧ, пондісны гораа шуавны: «Мый ті вӧчанныд?
Ми ӧд тіян кодь жӧ мортъяс. Ми вайим Бур Юӧр тіянлы, медым ті бергӧдчинныд ковтӧм енъяссьыныд ловъя Ен дінӧ, коді вӧчис енэжсӧ, мусӧ, васӧ да ставсӧ, мый сэні эм. Воддза кадъясӧ Сійӧ быд войтырлы лэдзис ветлыны асланыс туйясӧд. Но бур вӧчӧмнас Сійӧ век казьтывліс да казьтывлӧ Ас йывсьыс: ыстӧ миянлы енэжсяньыс зэр, сетӧ ас кадӧ вотӧс-быдтас, пӧткӧдӧ миянӧс да гажӧдӧ миянлысь сьӧлӧм».
Тадзи висьталӧмнас найӧ ӧдва ӧлӧдісны йӧзсӧ налы вись вайӧмысь да мӧдӧдісны гортаныс.
Павел да Варнава кольччисны Листраӧ да велӧдісны сэні йӧзсӧ.
Антиокияысь да Иконияысь локтісны сэтчӧ кодсюрӧ юдейяс.
Кор апостолъяс повтӧг бурвисьтавлісны, юдейяс эскӧдісны йӧзсӧ, мед найӧ ылыстчасны апостолъясысь.
Юдейяс шуисны: «Налӧн висьталӧмныс абу збыль, найӧ сӧмын пӧръясьӧны».
Тадзи найӧ кыпӧдісны йӧзсӧ апостолъяслы паныд, йӧзыс изъялісны Павелӧс да кыскисны кар саяс, чайтісны, мый кулӧма нин.
Но кор велӧдчысьяс чукӧртчисны Павел гӧгӧр, сійӧ чеччис да бӧр локтіс карас.
Сэсся мӧд луннас Варнавакӧд Павел муніс Дервияӧ.
Дервияын Павел да Варнава висьтавлісны Евангелльӧ став карыслы, бура уна велӧдчысь сэні лои.
Сэсся бӧрсӧ локтісны Листра, Икония да Антиокия пыр. Сэні найӧ ёнмӧдісны сэтчӧс велӧдчысьясӧс да тшӧктісны зумыда кутчысьны эскӧмас. Казьтыштісны, мый уна сьӧкыд пыр ковмас мунны, мед пырны Енлӧн Юраланінӧ.
Быд вичкоын ки пуктылӧмӧн индісны юрнуӧдысьясӧс. Сэсся кевмысьӧм да видзалӧм бӧрын сетісны эскысьясӧс Господь киӧ, кодлы найӧ и эскисны.
Сэсся Писидия пыр мунісны Памфилияӧ.
Сэні Пергия карын Господьлысь кывсӧ висьталӧм бӧрын мунісны Атталияӧ.
Сэсянь кывтісны Антиокияӧ, ӧд буретш тані найӧс вӧлі сетӧма Енлӧн буралан киӧ, мед вӧчны Енлысь уджсӧ, кодӧс помӧдз вайӧдісны.
Воӧм бӧраныс найӧ чукӧртісны эскысьясӧс да висьталісны ставсӧ, мый вӧчис на пыр Енмыс, да кыдзи Сійӧ восьтіс ентӧдтӧмъяслы эскӧмас ӧдзӧссӧ.
Сэсся дыркодь на олісны найӧ сэтчӧс велӧдчысьяскӧд.
15 юр.
Юдеяысь локтысьясысь кодсюрӧ велӧдісны вокъясӧс, онӧ кӧ пӧ вундыштчӧй Мӧисей Индӧд серти, онӧ мездмӧй.
Павел да Варнава паныд сувтісны налы да дыр вензисны накӧд. Сэки шуисны мӧдӧдны Павелӧс, Варнаваӧс да ас йӧзсьыс кодсюрӧӧс апостолъяс да юрнуӧдысьяс дінӧ Ерусалимӧ, медым тайӧ сёрнинас воны ӧти кывйӧ.
Вичкосянь мӧдӧдӧмаяс, Финикияті да Самарияті мунігӧн, висьтавлісны Ен дінӧ ентӧдтӧмъяслӧн бергӧдчӧм йылысь. Тайӧ юӧрсӧ кылӧмысь сэтчӧс вокъяс ставныс ёна нимкодясисны.
Ерусалимын апостолъяс да юрнуӧдысьяс став вичконас сибӧдісны воӧмаясӧс. Локтысьяс висьталісны ставсӧ, мый вӧчис на пыр Енмыс.
Сэки кодсюрӧ эскысьяс, кодъяс кутчысисны фарисейяслӧн велӧдӧмӧ, шуисны, мый ентӧдтӧмъяслы колӧ вундыштчыны да овны Мӧисей Индӧд серти.
Сэки апостолъяс юрнуӧдысьяскӧд чукӧртчисны, медым сёрнитны та йылысь.
Дыр вензьӧм бӧрын Петыр сувтіс да шуис налы: «Вокъяс, ті тӧданныд, мый Енмыс водзысяньыс бӧрйис менӧ миян пӧвстысь, медым менам вомсянь ентӧдтӧмъяс кылісны Евангелльӧсӧ да эскисны.
Сьӧлӧмтӧдысь Ен сетіс налы миянлы моз Вежа Ловсӧ, тайӧн петкӧдліс, мый Сійӧ сибӧдӧ найӧс.
Сылӧн син водзын миян да на костын абу некутшӧм торъялӧм, эскӧм понданыс Сійӧ весаліс налысь сьӧлӧмнысӧ.
Мыйла нӧ ті ӧні дӧзмӧданныд Енсӧ, кӧсъянныд сийӧсавны велӧдчысьясӧс? Тайӧ сийӧссӧ миян батьяс дай ми эгӧ вермӧй новлӧдлынысӧ.
Но ми эскам: Господь Исус Кристослӧн буралӧмсянь ми мездмам на моз».
Сэсся ставныс ланьтӧмӧн кывзісны Варнаваӧс да Павелӧс. А найӧ висьталісны, кыдзи Енмыс ентӧдтӧмъяс пӧвстын вӧчис на пыр шензьӧданаторъяс да петкӧдліс индысьпасъяс.
Налӧн сёрнитӧм бӧрын шыасис Яков: «Вокъяс, кывзӧй менӧ.
Симон висьталіс миянлы, мый Енмыс медводдзаысь бергӧдіс чужӧмбансӧ ентӧдтӧмъяслань, медым на пӧвстысь торйӧдны Аслыс войтырӧс.
Тадзи висьталӧны тшӧтш пророклӧн кывъясыс, ӧд гижӧма:
— Сэсся Ме бӧр бергӧдча да выльысь сувтӧда Давидлысь киссьӧм керкасӧ. Жугласьӧмасӧ лӧсьӧда, да выльпӧв сійӧс лэпта. Сэки кутасны корсьны Господьӧс мукӧд йӧз да быд войтыр, кодӧс Ме шуа Асламӧн.
Тадзи висьталӧ Господь, ставсӧ тайӧс Вӧчысь.
Нэмъяс пуксьытӧдзыс на Сійӧ тӧдіс став Ассьыс уджъяссӧ. Та вӧсна ме чайта, оз ков сьӧктӧдны Енлань бергӧдчӧм ентӧдтӧмъясӧс. Сӧмын колӧ гижны налы, медым видзасны асьнысӧ идоллы вайӧм пеж сёянысь, кырсалӧмысь, джагалӧм пемӧс яй сёйӧмысь да вир юӧмысь, нӧшта, мед оз вӧчны мукӧдыслы сійӧ, мый оз кӧсйыны аслыныс.
Мӧисейлысь Индӧдсӧ ӧд важысянь висьталӧны быд карын да быд шойччан лунӧ лыддьӧны синагогаын».
Сэки апостолъяс да юрнуӧдысьяс став вичкоыскӧд шуисны бӧрйыны ас пӧвстсьыныс вокъясӧс да мӧдӧдны найӧс Павелкӧд да Варнавакӧд Антиокияӧ. Бӧрйисны пыдди пуктана вокъясӧс: Иудаӧс, кодӧс шуисны Варсаваӧн, да Силаӧс. Накӧд ыстісны татшӧм гижӧд:
«Ми, апостолъяс, юрнуӧдысьяс да вокъяс, чолӧмалам тіянӧс, Антиокияын, Сирияын да Киликияын ентӧдтӧмъясысь бергӧдчӧм вокъясӧс.
Ми кывлім, мый кодсюрӧ миян йӧз шӧйӧвоштӧны тіянӧс асланыс велӧдӧмӧн, шуӧны, колӧ пӧ вундыштчыны да кутчысьны Индӧдӧ. Тадзи велӧднысӧ ми эгӧ тшӧктылӧй налы. Та вӧсна ми ӧтвылысь бӧрйим да шуим мӧдӧдны тіян дінӧ миян муса Варнавакӧд да Павелкӧд кодсюрӧӧс. Павел да Варнава вокъяс дасьӧсь олӧмнысӧ сетны миян Господь Исус Кристос вӧсна.
Накӧд ми мӧдӧдам Иудаӧс да Силаӧс, найӧ ставсӧ висьталасны.
Вежа Лов да ми тшӧтш огӧ кӧсйӧй сьӧктӧдны тіянӧс, тшӧктам вӧчны сӧмын коланасӧ.
Ми корам: видзӧй асьнытӧ идоллы вайӧм сёянысь, вир юӧмысь, джагалӧм пемӧс яй сёйӧмысь да кырсалӧмысь, и нӧшта: энӧ вӧчӧй мукӧдлы сійӧ, мый онӧ кӧсйӧй аслыныд.
Тайӧ тшӧктӧмъяс сертиыс кӧ оланныд, бур лоас.
Олӧй бура.»
Мӧдӧдӧмаяс мунісны Антиокияӧ. Сэні чукӧртісны эскысьясӧс да сетісны гижӧднысӧ.
Лыддьӧм бӧраныс эскысьяс ёна долыдмисны нимкодь юӧрысь.
Иуда да Сила вӧліны пророкъясӧн, найӧ ёна ышӧдісны да ёнмӧдісны вокъясӧс.
Мыйтакӧ кад олыштӧм бӧрын вокъяс бӧр мӧдӧдісны найӧс лӧнь сьӧлӧмӧн апостолъяс дінӧ.
Но Сила шуис кольччывны на сэтчӧ,
сэки Иуда ӧтнас муніс Ерусалимӧ.
Павел да Варнава олісны Антиокияын, велӧдісны да мукӧдыскӧд тшӧтш юӧртісны Господьлысь кывсӧ.
Кутшӧмкӧ кад мысти Павел шуис Варнавалы: «Мунам выльысь кытшовтам сійӧ каръяссӧ, кӧні ми висьтавлім Господьлысь кывсӧ, тӧдмалам, кыдзи олӧны миян вокъяс».
Варнава кӧсйис босьтны аскӧдыс Иоанӧс, кодӧс шуисны Маркӧн.
Но Павел паныд сувтіс, ӧд Марк коркӧ эновтіс найӧс Памфилияын, эз мун накӧд водзӧ ӧтвылысь вӧчны уджсӧ, мый вылӧ найӧс вӧлі мӧдӧдӧма.
Павел да Варнава весиг вензьӧмӧдз воисны да тадзикӧн торйӧдчисны.
Варнава босьтіс аскӧдыс Маркӧс да кывтіс сыкӧд Кипрӧ.
А вокъяс сетісны Павелӧс Енлӧн буралан киӧ. Сійӧ босьтіс аскӧдыс Силаӧс да муніс Сирия да Киликия муясӧ. Сэні ветлӧдліс да ёнмӧдіс вичкояс.
16 юр.
Павел воис Дервияӧдз, сэсся и Листраӧдз.
Сэні оліс Тимофей нима велӧдчысь. Мамыс сылӧн вӧлі юдей, эскысь ань, батьыс вӧлі грек. Листраын да Иконияын вокъяс бура сёрнитісны Тимофей йылысь.
Павел шуис босьтны Тимофейӧс аскӧдыс да вундыштіс сійӧс сэтчӧс юдейяс понда, ӧд найӧ тӧдісны, мый Тимофейлӧн батьыс грек.
Каръясті ветлігӧн найӧ висьтавлісны эскысьяслы апостолъяслысь да юрнуӧдысьяслысь Ерусалимын шуӧм тшӧктӧмъяссӧ да тшӧктісны овны на серти.
Вичкояс ёнмисны эскӧмас, эскысьяслӧн лыдыс лунысь-лун содіс.
Асияын Вежа Лов эз сет налы висьтавны Кывсӧ, та вӧсна найӧ мунісны Мисияӧ Фригия да Галатия муяс пыр.
Мисиясянь найӧ кӧсйисны мунны Вифинияӧ, но Вежа Лов эз лэдз.
Сэки Мисия пыр найӧ мунісны Троадаӧ.
Войнас Павел аддзылас Енсянь петкӧдчылӧм: македонияса морт сулалӧ сы водзын да корӧ, лок пӧ Македонияӧ да отсав миянлы.
Тайӧ петкӧдчылӧм бӧрас ми дзик пыр шуим мунны сэтчӧ. Ми гӧгӧрвоим: Господьным корӧ миянӧс висьтавны сэні Бур Юӧр.
Троадаысь ми кывтім веськыда Самофракияӧ, мӧд луннас Неапольӧ, сэсянь мунім Филипӧ.
Македониялӧн сэтчӧс юкӧнын тайӧ медводдза кар, сэтчӧ коркӧ овмӧдчылӧмаӧсь Римысь локтысьяс.
Сэні ми вӧлім кымынкӧ лун.
Шойччан лунӧ ми петім кар саяс да лэччим ю дорӧ, буретш сэтчӧ чукӧртчывлісны кевмысьны. Ми пуксим сэтчӧ локтысь аньяс дорӧ да пондім сёрнитны накӧд.
Сэні вӧлі Фиатираысь пурпур дӧраӧн вузасьысь Лидия нима ань, сійӧ оліс Енсьыс полӧмӧн.
Господь восьтіс сылысь сьӧлӧмсӧ сибӧдны Павеллысь кывъяссӧ, да сійӧ став гортсаыскӧд пыртчис.
Сэсся шуис миянлы: «Ті кӧ лыддянныд менӧ Господьлы эскысьӧн, пырӧй менам керкаӧ да олӧй ме ордын».
Сійӧ корӧмӧн корис миянӧс ас дорас.
Ӧтчыд кевмысьны муніганым паныдасис миянлы ӧти кесйӧг ань, код пытшкын вӧлі тунасян лов. Туналӧмнас сійӧ уна сьӧм вайис аслас ыджыдъяслы.
Тайӧ аньыс вӧтчис Павел да миян бӧрся да горзӧмӧн шуаліс: «Тайӧ йӧзыс Медвылысса Енлӧн кесйӧгъяс. Найӧ юӧртӧны миянлы, кыдзи мездмынысӧ».
Тадзи сійӧ вӧчис уна лун чӧж.
Павел скӧрмис таысь, сэсся ань дінӧ бергӧдчӧмӧн шуис тунасян ловлы: «Тшӧкта тэныд Исус Кристос нимӧн, пет сы пытшкысь».
И сійӧ дзик пыр петіс.
Кесйӧг аньлӧн ыджыдъяс аддзисны, мый воштісны озырмӧдчанторнысӧ, сэки босьтісны Павелӧс да Силаӧс да нуӧдісны йӧзаинӧ юралысьяс водзӧ.
Вайӧдісны юралысьяс дінӧ да пондісны мыжавны: «Тайӧ юдей йӧзыс шызьӧдӧны карнымӧс, велӧдӧны йӧзсӧ овны мӧд ног. Но миянлы, римса войтырлы, оз позь на ног овнысӧ».
Сэки йӧзыс накӧд тшӧтш сувтісны Павеллы да Силалы паныд. Юралысьяс тшӧктісны кучкавны найӧс бедьясӧн. Сэки нетшыштісны на вылысь паськӧмнысӧ да бура дыр кучкалӧм бӧрын шыбитісны найӧс дзескыдінӧ. Видзысьлы тшӧктісны, мед синсӧ оз лэдзлы на вылысь.
Пуксьӧдӧмаясӧс видзысь йӧртіс найӧс медпыдіас да топӧдіс кокъяснысӧ тшемилӧ костӧ.
Вой шӧр кадӧ Павел да Сила сьылісны да кевмысисны Енлы.
Мукӧд пукалысьяс кывзісны найӧс.
Тӧдлытӧг лои ыджыд му вӧрӧм, дзескыдінлӧн подулыс вӧрзис,
ӧдзӧсъяс воссисны, пукалысьяслӧн ки-коксьыныс кӧртӧдъяс разьсисны.
Пуксьӧдӧмаясӧс видзысь садьмис да аддзис, мый ӧдзӧсъяс восьсаӧсь. Сэки перйис шыпуртсӧ да кӧсйис вины асьсӧ, чайтіс, мый пышйӧмаӧсь ставныс.
Павел горӧдіс: «Нинӧм эн вӧч аскӧдыд. Ми ставным танӧсь».
Видзысь корис би, котӧрӧн пырис Павел да Сила дінӧ да тіралӧмӧн уськӧдчис на водзӧ. Сэсся петкӧдіс найӧс ортсӧ да шуис:
«Бур йӧзӧй, мый меным вӧчны, мед мездмыны?»
Найӧ воча шуисны: «Эскы Господь Исус Кристослы, сэки мездман тэ да став тэнад гортсаыд».
Сэсся вокъяс висьталісны сылы да сылӧн гортсаыслы Господьлысь кывъяссӧ.
Сійӧ войнас видзысь петкӧдіс вокъясӧс дзескыдінысь да мыськаліс налысь дойяссӧ, сэсся гортсаыскӧд дзик пыр пыртчис.
Сэсся вайӧдіс найӧс гортас да лӧсьӧдіс налы пызан. Аслас гортсакӧд сійӧ долыда нимкодясис, мый эскис Енлы.
Асывнас юралысьяс мӧдӧдісны отсасьысьяснысӧ висьтавны, мед лэдзасны пуксьӧдӧмаясӧс дзескыдінысь.
Видзысь висьталіс та йылысь Павеллы: «Юралысьяс тшӧктісны лэдзны тіянӧс.
Верманныд петны да мунны лӧня».
Павел шуис юралысьяслӧн отсасьысьяслы: «Миянӧс, римса йӧзӧс, найӧ мыждытӧг став йӧз водзас нӧйтісны да шыбитісны дзескыдінӧ, а ӧні кӧсйӧны гусьӧн лэдзны.
Огӧ петӧй. Мед асьныс локтасны да петкӧдасны миянӧс татысь».
Мӧдӧдӧмаяс висьталісны Павеллысь кывъяссӧ юралысьяслы. Юралысьяс повзисны, кор кылісны, мый найӧ римсаяс.
Сэсся локтісны да корисны налысь прӧща, а дзескыдінысь петкӧдігӧн корисны найӧс эновтны карнысӧ.
Дзескыдінысь петӧм бӧрын Павел да Сила мунісны Лидия ордӧ, сэні аддзысисны вокъяскӧд. Найӧс ышӧдӧм бӧрын мунісны карсьыс.
17 юр.
Павел да Сила мунісны Амфиполь да Аполония пыр Фессалоникаӧ. Сэні вӧлі юдейяслӧн синагога.
Павел, кыдзи и век, муніс сэтчӧ да куим шойччан лун дорвыв сёрнитіс йӧзыскӧд. Вежа Гижӧдъяс вылӧ подуласьӧмӧн гӧгӧрвоӧдіс да эскӧдіс найӧс, мый Кристослы колӧ вӧлі сьӧкыдсӧ нуны да ловзьыны. Павел шуис: «Тайӧ Кристосыс — Исус, Сы йылысь ме и висьтала тіянлы».
Кодсюрӧ на пиысь эскисны да ӧтувтчисны Павелкӧд да Силакӧд. Эскисны тшӧтш Енсьыс полысь грекъяс пиысь да тӧдчана аньяс пиысь унаӧн.
А юдейяс, кодъяс эз эскыны, тырины лӧглунӧн. Найӧ босьтісны аскӧдныс изэрд вылын весьшӧрӧ бовъялысь айуловӧс, чукӧртісны уна йӧзӧс да пондісны шызьӧдны карсӧ. Сэсся локтісны Ясон керкаӧ, корсисны сэтысь Павелӧс да Силаӧс, мед петкӧдны найӧс йӧз водзӧ, но эз аддзыны.
Сэки босьтісны Ясонӧс, нӧшта кодсюрӧ вокъясӧс да вайӧдісны карӧн веськӧдлысьяс дінӧ. Налы горзігтыр висьталісны: «Тайӧ йӧзыс, став муюгыдсӧ гудыртысьясыс, миянӧдз воисны. Ясон овмӧдӧма найӧс ас ордас. Найӧ ставныс торкалӧны кесарлысь тшӧктӧмъяссӧ, ӧксынас шуӧны мӧдӧс — Исусӧс».
Тайӧс кылӧмысь йӧзыс да карӧн веськӧдлысьяс шӧйӧвошисны.
Сэсся Ясонлы да мукӧд вокъяслы тшӧктісны вештысьны лэдзӧмсьыс, сӧмын та бӧрын лэдзисны.
Вокъяс сійӧ жӧ войнас мӧдӧдісны Павелӧс да Силаӧс Верияӧ. Сэтчӧ воӧм мысти Павел да Сила мунісны синагогаӧ.
Фессалоникасаяс дорысь татчӧс юдейяс вӧліны восьса сьӧлӧмаӧсь.
Найӧ сибӧдісны Кывсӧ став сьӧлӧмнас, быд лун лыддьысисны, видзӧдісны Гижӧдъясысь, збыльысь-ӧ ставыс тадз.
На пиысь унаӧн бергӧдчисны эскӧмас, эскисны тшӧтш грек войтырса айулов да пыдди пуктана аньяс пиысь унаӧн.
Кор Фессалоникаын юдейяс кылісны, мый Павел Верияын висьтавлӧ Енлысь Кывсӧ, локтісны сэтчӧ да пондісны шызьӧдны сэтчӧс йӧзсӧ.
Сэки вокъяс дзик пыр ыстісны Павелӧс саридз дорӧ, а Сила да Тимофей кольччисны карас.
Вокъяс колльӧдісны Павелӧс Афинӧдз да бӧр бергӧдчисны. Павел корис найӧс висьтавны, мед Сила да Тимофей кыдз позьӧ ӧдйӧджык локтасны сы дінӧ.
Павел виччысис вокъясӧс Афинын. Тайӧ карыс вӧлі тырӧма идолъясӧн. Кор Павел аддзис тайӧс, сійӧ ловнас пузис.
Синагогаын Павел ёна сёрнитіс юдейяскӧд да Енсьыс полысь мукӧд войтыркӧд. Быд лун сійӧ сёрнитіс йӧзыскӧд ывла вылын.
Кодсюрӧ философъяс, эпикура да стоика велӧдӧмӧ кутчысьысьяс, вензисны Павелкӧд.
Ӧтияс шуалісны, сійӧ пӧ нинӧм абусӧ сӧрӧ.
Мӧдъяс шуалісны, кутшӧмкӧ пӧ тӧдтӧм енъяс йылысь висьталӧ. Павел жӧ висьталіс налы Исус йылысь да кулӧмысь ловзьӧм йылысь.
Сэки босьтісны да вайӧдісны Павелӧс Ареопагӧ.
Сэні пондісны юасьны: «Вермам-ӧ ми тӧдны, мыйсяма выль велӧдӧм тэ висьталан?
Мыйкӧ тешкодьтор тэ тэчан миян пельясӧ.
Кӧсъям тӧдны, мый тайӧ».
Афинын олысьяс да сэтчӧ локтысь йӧз каднысӧ ёнджыка коллявлісны сёрнитӧмъясӧн, ёна радейтісны кывзыны мыйкӧ выльтор.
Павел сувтіс Ареопаг шӧрӧ да шуис: «Афинса войтыр.
Став сертиыс ме аддза, мый ті ёна юрбитысь йӧз.
Ветлӧдлігӧн ме видзӧдалі тіянлысь юрбитанінъястӧ да аддзи “тӧдтӧм енлы” гижӧда висьпуктанін.
Буретш тайӧ тӧдтӧм Ен йывсьыс, кодлы ті юрбитанныд, ме и висьтала.
Муюгыдсӧ да ставсӧ вӧчысь Ен, енэжыслӧн да муыслӧн Господь, оз ов киӧн вӧчӧм крамъясын. Сылы оз ков мортсянь отсӧг, Сылӧн ставыс эм. Сійӧ Ачыс сетӧ быдӧнлы олӧм, ловшы да ставсӧ.
Ӧти вирсянь Сійӧ вӧчис став мувывса йӧзсӧ да овмӧдіс найӧс му пасьтала, торйӧдіс налы муяс да индіс налысь олан кадъяс, мед найӧ корсисны Енсӧ, гашкӧ, кималасӧн корсьӧмӧн аддзасны Сійӧс, ӧд Сійӧ абу ылын миянысь быдӧнысь.
Сыӧн ми олам, Сысянь лолалам да Сы улын ветлам. Тіян гижысьяс кодсюрӧ весиг шулӧмаӧсь: “Ми ставным Сысянь чужысьяс”.
Ми кӧ Енсянь чужысьяс, миянлы оз ков ӧткодявны Енсӧ зарни, эзысь либӧ изйысь вӧчӧмторъяскӧд, мый мӧвпыштӧма ачыс мортыс да вӧчӧма аслас кужысь киясӧн.
Енмыс дыр кад чӧж терпитіс йӧзлысь гӧгӧрвотӧмлунсӧ. Ӧні Сійӧ тшӧктӧ быдлаын да быдӧнлы бергӧдчыны мыжъяссьыс.
Ӧд Сійӧ индіс лун, кор пондас веськыда мыждыны став муюгыдсӧ водзвыв индӧм Морт пыр, да вынсьӧдіс Ассьыс шуӧмсӧ быдӧнлы тӧдмӧн, кор ловзьӧдіс Сійӧс».
Кулӧмысь ловзьӧм йылысь кылӧм бӧрын ӧтияс пондісны серавны, мӧдъяс шуисны, та йылысь пӧ коркӧ мӧдысь тэнӧ кывзам.
Сэки Павел муніс на дінысь.
Кодсюрӧ эскисны да ӧтувтчисны Павелкӧд.
Тайӧ вӧліны Ареопагысь Дионисий, Дамарь нима ань да мукӧдъяс.
18 юр.
Сэсся Афинысь Павел муніс Коринфӧ.
Сэні паныдасис Акил нима юдейкӧд, коді чужлӧма Понтын, да сылӧн Прискилла гӧтырыскӧд. Найӧ регыд на вӧлі локтӧмаӧсь Италияысь, сы вӧсна мый Клавдий кесар тшӧктӧма став юдейыслы эновтны Рим.
Павел муніс на ордӧ да кольччис сэтчӧ, мед тшӧтш уджавны накӧд, ӧд сійӧ на моз жӧ вурис дӧрачомъяс.
Быд шойччан лунӧ Павел сёрнитіс синагогаын, ышӧдіс юдейясӧс да грекъясӧс эскыны.
Кор Сила да Тимофей локтісны Македонияысь, Павел ловнас кыліс, мый колӧ висьтавны юдейяслы, мый Исус — сійӧ Кристос.
Юдейяс сувтісны Павеллы паныд, пондісны омӧльтны сійӧс. Сэки Павел паськӧмсӧ пыркнитӧмӧн шуис:
«Тіян вирныд ас выланыд кольӧ, а ме сӧстӧм. Ӧні ме муна ентӧдтӧмъяс дінӧ».
Сэсся Павел муніс Юст ордӧ, сійӧ вӧлі Енсьыс полысь морт. Сылӧн керкаыс сулаліс синагогакӧд орччӧн.
Синагогаса юралысь Крисп став гортсаыскӧд эскис Господьлы.
Нӧшта унаӧн на Коринфын Павелӧс кывзӧм бӧрын тшӧтш эскисны да пыртчисны.
Войнас Господь петкӧдчис Павеллы да шуис: «Эн пов, водзӧ висьтав.
Ме тэкӧд, тэныд некод оз вӧч лёксӧ. Тайӧ карас Менам уна йӧз».
Павел кольччис сэтчӧ во да джын кежлӧ, велӧдіс да висьталіс йӧзыслы Енлысь Кывсӧ.
Кор Акайяын пуксис веськӧдлыны Галлион, юдейяс сёрнитчисны босьтны Павелӧс. Найӧ вайӧдісны Павелӧс ёрдӧ. Сэні шуисны, тайӧ мортыс пӧ велӧдӧ йӧзсӧ юрбитны Енлы оз Индӧд сертиным.
Павел кӧсйис шыасьны, но сэки Галлион шуис юдейяслы:
«Юдейяс. Вӧлі кӧ сёрниыс кутшӧмкӧ лёктор вӧчӧм йылысь, ме эськӧ тіянӧс кывзі.
А кор ті вензянныд кывъяс, нимъяс да асланыд Индӧд йылысь, ме тані абу ёрдысь. Асьныд сёрнитчӧй».
Сэсся вӧтліс найӧс ёрдысь.
Сэки грекъяс ставныс уськӧдчисны синагогаса юралысь Сосфен вылӧ да ёрд водзын чорыда нӧйтісны сійӧс, а Галлион весигтӧ эз видзӧдлы на вылӧ.
Павел бура дыр на оліс Коринфын. Сэсся вокъяскӧд колльӧдчӧм бӧрын кывтіс Прискилла да Акилкӧд Сирияӧ. Кенкреяын сійӧ шырис юрсӧ, ӧд сылӧн вӧлі Ен водзын кӧсйысьӧм.
Ефесӧ воӧм бӧрын Павел янсӧдчис Акилкӧд да Прискиллакӧд. Ачыс муніс синагогаӧ да сёрнитіс сэні юдейяскӧд.
Найӧ корисны Павелӧс олыштны на ордын дырджык на, но сійӧ эз кӧсйысь. Колльӧдчигас Павел шуис: «Меным быть колӧ лоны Ерусалимын гажӧдчан лунъяс дырйи.
Но Ен кӧ сетас, ме бара на вола тіян дінӧ».
Павел кывтіс Ефесысь Кесарияӧ, сэсянь муніс Ерусалимӧ да аддзысьліс сэні эскысьяскӧд, а сэсся нин муніс Антиокияӧ.
Сэні олыштӧм бӧрын бара петіс туйӧ, кытшовтіс Галатия да Фригия муяс, ёнмӧдіс сэні велӧдчысьясӧс.
Ефесӧ сэки локтіс Аполос нима юдей, ачыс чужлӧма Александрияын. Аполос кужис мичаа сёрнитны да зэв бура тӧдіс Гижӧдъяс.
Сійӧ сибӧдіс “Господь туй” йылысь велӧдӧмсӧ да сьӧлӧмсяньыс висьтавліс-велӧдіс Господь йылысь ставсӧ веськыда. Но ачыс тӧдіс сӧмын Иоанлысь пыртӧмсӧ.
Сійӧ повтӧг сёрнитіс синагогаын.
Акил да Прискилла сійӧс кывзӧм бӧрын корисны ас ордас да стӧчджыка висьталісны сылы Господьлӧн туй йылысь.
Кор Аполос мӧдӧдчис мунны Акайяӧ, вокъяс ышӧдісны сійӧс да гижисны сэтчӧс велӧдчысьяслы, медым сибӧдасны сійӧс. Акайяын Аполос Ен буралӧмсянь ёна отсаліс эскысьяслы. Став йӧз водзас сійӧ кужис венны юдейясӧс. Гижӧдъяс вылӧ мыджсьӧмӧн эскӧдіс найӧс, мый Исус — сійӧ Кристос.
19 юр.
Кор Аполос вӧлі Коринфын на, Павел вуджис керӧсвыв муяс пыр да локтіс Ефесӧ.
Сэтысь аддзис кодсюрӧ велӧдчысьясӧс да юаліс налысь: «Сибӧдінныд-ӧ ті Вежа Лолӧс эскӧм бӧраныд?»
Найӧ шуисны: «Ми весиг эгӧ на кывлӧй Вежа Лов йылысь».
Павел юаліс налысь: «Кутшӧм пыртчӧмӧн нӧ ті пыртчинныд?»
Найӧ вочавидзисны: «Иоан пыртчӧмӧн».
Павел шуис: «Иоан пыртіс найӧс, кодъяс бергӧдчисны мыжъяссьыныс, да висьталіс, медым эскасны сы бӧрся Локтысьлы, Исус Кристослы».
Тайӧс кылӧм бӧрын найӧ пыртчисны Господь Исус нимӧн.
Кор Павел пуктіс кисӧ на вылӧ, сэки лэччис на вылӧ Вежа Лов.
Найӧ пондісны сёрнитны мукӧд кывъяс вылын да пророкавны.
Ставныс найӧ вӧліны морт дас кык.
Куим тӧлысь чӧж Павел ветлӧдліс синагогаӧ да повтӧг сёрнитіс сэні, эскӧдӧмӧн висьтавліс Енлӧн Юралӧм йылысь.
Но эскӧм пыдди кодсюрӧ чорзьӧдчисны да став йӧз водзас омӧльтісны “Господь туй” йылысь велӧдӧмсӧ. Сэки Павел эновтіс тайӧ йӧзсӧ да велӧдчысьясыскӧд муніс на дорысь. Тайӧ кадсяньыс сійӧ быд лун сёрнитіс-велӧдіс Тиранлӧн велӧданінын.
Кык во чӧж Павел велӧдіс сэні. Тадзи Асияын став олысьыс, юдейяс и грекъяс, кылісны Господь Исус йылысь бурвисьталӧмсӧ.
Павел пыр Енмыс вӧчис уна шензьӧданатор. Павеллысь юр чышъянсӧ да мукӧд паськӧмсӧ пуктывлісны висьысьяс вылӧ, и найӧ дзик пыр бурдлісны да пеж ловъяс петалісны на пытшкысь.
Весиг ветлысь-мунысь юдей тунъяс пиысь кодсюрӧ пондісны вӧтлавны пеж ловъясӧс Господь Исус нимӧн. Шуалісны: «Пет. Тшӧктам Исус нимӧн, кодӧс висьталӧ Павел».
Тадзи тшӧтш вӧчисны юдейяслӧн Скева аркирейлӧн сизимнан пиыс.
Но пеж лов воча шуис: «Исусӧс бура тӧда, Павелӧс тшӧтш тӧда, а ті кодъяс?»
Сэсся пеж лолӧн кутӧм морт уськӧдчис на вылӧ ыджыд вынӧн да вирӧдз чашйис найӧс. Дзик пасьтӧгныс налы ковмис пышйыны сійӧ керкасьыс.
Та йылысь тӧдмалісны Ефесын ставныс, юдейяс и грекъяс.
Ыджыд полӧм босьтіс ставнысӧ, найӧ пондісны ошкыны Господь Исуслысь нимсӧ.
Унаӧн эскӧм бӧраныс волісны да висьтасисны асланыс лёк уджъясысь.
Тшыкӧдчысьяс пиысь унаӧн вайисны небӧгъяснысӧ да став йӧз водзас сотісны.
Небӧгъяслӧн доныс, артыштісны да, ветымын сюрс эзысь лои.
Тадзи ыджыд вынӧн паськаліс да зумыда вужъясис Господьлӧн кывйыс.
Тайӧ лоӧмторъяс бӧрын Павел кыліс ловнас, мый сылы колӧ мунны Македония да Акайя пыр Ерусалимӧ. Сэсся шуис Ерусалим бӧрын ветлыны Римӧ.
Тимофейӧс да Ерастӧс, ассьыс отсасьысьясӧс, сійӧ мӧдӧдіс Македонияӧ, ачыс кольччыліс на Асияӧ.
Сійӧ кадӧ “Господь туй” йылысь велӧдӧм понда ыджыд зык кыптіс. Ефесын оліс эзысьӧн вӧчасьысь Димитрий. Сійӧ вӧчаліс эзысьысь Артемида крам серпаса киӧн вӧчӧмторъяс да аслас уджалысьяслы бура мынтысис. Сійӧ чукӧртіс ассьыс уджалысьяссӧ, корис нӧшта мукӧд вӧчасьысьясӧс да шуис:
«Ёртъяс, ті тӧданныд, мый тайӧ уджыс вайӧ миянлы уна сьӧм.
Ті асьныд аддзанныд да кыланныд, мый вӧчӧ тайӧ Павелыс. Сійӧ висьтавлӧ, киӧн вӧчӧмторъясыд пӧ абу енъяс, и уна йӧзӧс нин эскӧдіс Ефесын да став Асияын.
Мыйкӧ колӧ вӧчны миянлы. Артемида енлысь крамсӧ кӧ кутасны нинӧм туйӧ пуктыны, миян уджным лоас ковтӧм. Миян ыджыд енным, кодӧс ыдждӧдлӧ став Асия да став муюгыдыс, вермас воштыны нималӧмсӧ».
Тайӧс кылӧм бӧрын чукӧртчысьяс тырины скӧрлунӧн да пондісны горзыны: «Ефесса Артемида — медыджыдыс.»
Карыс ставнас шызис.
Йӧзыс котӧртісны ывлавыв театрӧ да вайӧдісны сэтчӧ македонияса Гайӧс да Аристаркӧс, Павелкӧд локтысьясӧс.
Павел тшӧтш кӧсйис мунны сэтчӧ, но велӧдчысьяс эз лэдзны сійӧс.
Весиг асияса веськӧдлысьясысь кодсюрӧ, Павеллӧн ёртъясыс, мӧдӧдісны висьтавны, мед сійӧ весиг оз петкӧдчыв сэні.
Чукӧртчӧм йӧз ставныс вӧлі ёна шызьӧмаӧсь: ӧтияс горзісны ӧтитор, мӧдъяс — мӧдтор. Унджыкыс весиг эз тӧд, мыйла и локтісны.
Сэні вӧліны тшӧтш юдейяс. Найӧ мырдӧн тшӧктісны Ӧльӧксандрлы петны йӧз водзӧ.
Ӧльӧксандр сетіс кинас пас, мед ланьтасны, да кӧсйис нин сёрнитны.
Но кор йӧзыс тӧдмалісны, мый сійӧ юдей, ӧти вомӧн горӧдісны да кык час чӧж ӧтарӧ горзісны: «Ефесса Артемида — медыджыдыс.»
Йӧзсӧ ӧлӧдӧм бӧрын карса кывкутысь шыасис: «Ефесса войтыр.
Быдӧн тӧдӧ, мый Ефес кар видзӧ-дӧзьӧритӧ ыджыд Артемида енлысь крамсӧ да енэжсянь усьӧм сылысь изсерпассӧ.
Таысь некод оз вермы соссьыны. Та вӧсна лӧньӧй, энӧ лоӧй юртӧм петукъяс кодьӧсь.
Мыйла тайӧ кыксӧ вайӧдінныд? Найӧ эз гусясьны Артемида крамын, эз омӧльтны тіянлысь ентӧ.
Димитрийлӧн да сылӧн вӧчасьысьяслӧн кӧ эм норасьӧм кодкӧ вылӧ, мед шыасясны ёрдӧ да веськӧдлысьяс дінӧ, мед на водзын норасясны ӧта-мӧдныс вылӧ.
Тіян кӧ эм кутшӧмкӧ мӧд помка, сэки чукӧртасны йӧзӧс да видлаласны миян индӧд серти.
Тайӧ шызьӧмсӧ лэптӧмысь миянӧс ставнымӧс ӧні вермасны мыждыны. Миянлы весиг нинӧмӧн дорйысьнысӧ, ӧд помкаыс некутшӧм абу».
Сёрнитӧм бӧрас карса кывкутысь тшӧктіс разӧдчыны йӧзыслы.
20 юр.
Шызьӧм помасьӧм бӧрын Павел чукӧртіс велӧдчысьяссӧ да ышӧдіс найӧс. Сэсся кольӧдчӧм бӧрын мӧдӧдчис Македонияӧ.
Мунігас быдлаын ышӧдіс-ёнмӧдіс эскысьясӧс. Сэсся локтіс Грецияӧ да оліс сэні куим тӧлысь.
Павел кӧсйӧ нин вӧлі кывтны Сирияӧ, но кор тӧдмаліс, мый юдейяс сёрнитчӧмаӧсь вины сійӧс, бӧрсӧ шуис мунны Македония пыр.
Асияӧдз Павелӧс колльӧдісны Верияысь Пирлӧн Сосипатр пиыс, Фессалоникаысь Аристарк да Секунд, Дервияысь Гай, Тимофей да Асияысь Тихик Трӧпимкӧд.
Найӧ водзджык мунісны Троадаӧ да виччысисны миянӧс сэні.
Ми Шомтӧм нянь сёян лунъяс бӧрын петім Филип карысь да вит лунӧн воӧдчим на дінӧ Троадаӧ. Сэні олім вежон чӧж.
Вежонса медводдза лунӧ сэтчӧс велӧдчысьяс чукӧртчисны нянь чегны. Павеллы аскинас колӧ вӧлі петны туйӧ, та вӧсна сійӧ дыркодь сёрнитіс накӧд. Сёрниыс нюжаліс вой шӧрӧдз.
Вылі судтаас, кӧні ми пукалім, бура уна би ӧзйис.
Ӧшинь вылас пукаліс Евтик нима том морт. Павеллӧн дыр сёрнитӧмысь сійӧ чорыда унмовсис да ун йывсьыс усис коймӧд судтасяньыс. Муысь лэптігӧн аддзисны, мый сійӧ кулӧма.
Павел лэччис, водіс том морт вылӧ, шымыртіс сійӧс да шуис: «Энӧ шогсьӧй, лолыс сылӧн абу петӧма».
Сэсся Павел бӧр кайис вылі судтаас. Нянь чегӧм бӧрын сійӧ сёйыштіс да бура дыр на, югдытӧдзыс, сёрнитіс велӧдчысьяскӧд, сэсся муніс.
А том мортӧс ёна нимкодясьӧмӧн колльӧдісны гортас дзоньвидзаӧн.
Сэсся ми пуксим корабль вылӧ да кывтім Ассӧ, медым босьтны сэтысь Павелӧс.
Сійӧ ачыс тадзи тшӧктіс, шуис, мый локтас сэтчӧ подӧн.
Ассын аддзысьӧм бӧрын ми босьтім Павелӧс да кывтім Митилинаӧ.
Сэсянь мӧдӧдчим бара водзӧ. Лун мысти ми кывтім нин Киос дінті. Сэсся мӧд луннас ми вуджим Самосӧ, кысянь мунім Трогилияӧ. Нӧшта лун мысти воим Милитӧ. Ми кывтім Ефесӧ сувтлытӧг, тадзи Павел шуис, мед Асияын эз ковмы воштыны кадсӧ. Сійӧ ёна тэрмасис, мед эськӧ Ветымынӧд лун кежлӧ воӧдчыны Ерусалимӧ.
Милитсянь Павел ыстіс юӧр, мед корны Ефесысь вичкоса юрнуӧдысьясӧс. Ефесысь воӧмаяслы сійӧ шуис:
«Ті асьныд тӧданныд, медводдза лунсяньыс Асияӧ воӧмсянь ме пыр вӧлі тіянкӧд. Ме кесъялі Господьлы рам сьӧлӧмӧн да синва сорӧн, кор ёна сьӧкыдалі юдейяссянь.
Йӧз водзын да тіян гортъясын велӧдігӧн ме висьталі тіянлы став коланасӧ. Висьталі юдейяслы и грекъяслы, мед бергӧдчасны мыжъяссьыныс Ен дінӧ да эскасны миян Господь Исус Кристослы.
Ӧні Лов нуӧдӧм серти ме муна Ерусалимӧ. Мый менӧ виччысьӧ сэні, ме ог тӧд.
Тӧда сӧмын, Вежа Лов быд карын эскӧдӧ, мый дзескыдін да сьӧкыдлунъяс виччысьӧны менӧ.
Ме нинӧм вылӧ ог видзӧд, меным олӧмӧй абу дона.
Сӧмын кӧсъя долыд сьӧлӧмӧн помӧдз мунны лӧсьӧдӧм туйӧдыс да помавны кесъялӧмӧс, Господь Исуслысь тшӧктӧмсӧ — висьтавны Енлӧн буралӧм йылысь Евангелльӧсӧ.
Ӧні ме тӧда: ті, кодъяс пӧвстын ме олі да висьтавлі Енлӧн Юралӧм йылысь, онӧ нин аддзылӧй менсьым чужӧмӧс.
Та вӧсна талун шуа тіянлы: кодкӧ вошас кӧ туй вывсьыс, ме абу мыжа.
Ме ӧд ланьтлытӧг висьтавлі тіянлы Енлысь став кӧсйӧмсӧ.
Тӧждысьӧй ас вӧснаныд да став чукӧрыс вӧсна. Ӧд Вежа Лов пуктіс тіянӧс, мед видзны Господь Енлысь Вичкосӧ. На вӧсна Сійӧ мынтысис Аслас Вирӧн.
Ме тӧда: менам мунӧм бӧрын пырасны тіян пӧвстӧ горш кӧинъяс да пондасны усьласьны чукӧрныд вылӧ.
Весиг тіян пӧвстысь петасны йӧз, кодъяс пондасны мӧдарӧ велӧдны да кыскыны ас бӧрсяыс велӧдчысьясӧс.
Та вӧсна лоӧй дасьӧсь да энӧ вунӧдӧй, кыдзи ме куим во чӧж лун и вой синва сорӧн дугдывтӧг велӧді быдӧнӧс тіянӧс.
Ӧні, вокъяс, коля тіянӧс Енкӧд да Сылӧн буралан кывйыскӧд. Тайӧ кывйыс вермӧ ёнмӧдны тіянӧс да сетны тіянлы кӧсйысьӧмасӧ, мый вичмас став вежа войтырлы.
Ме некодсянь эг виччысь эзысь-зарни либӧ кӧм-пась.
Ті асьныд тӧданныд: ме ас киясӧн уджалі, медым аслам да тшӧтш ёртъяслӧн вӧлі став коланаыс.
Ме быдторйын петкӧдлі тіянлы, мый татшӧм ногӧн — уджалӧмӧн да Господь Исуслысь кывъяссӧ тӧд вылын кутӧмӧн — колӧ тӧждысьны вынтӧмъяс вӧсна.
Сійӧ Ачыс шуліс: “Босьтӧм дорысь бурджык сетны”».
Тайӧс шуӧм бӧрын Павел сувтіс пидзӧс вылас да ставныскӧд кевмысис.
Ставныс кутісны бӧрдны да Павеллы сьылі вылас уськӧдчӧмӧн окавны сійӧс. Торъя нин шогсисны Павеллӧн шуӧм кывъясысь, мый найӧ оз нин аддзывны сійӧс.
Сэсся колльӧдісны Павелӧс корабль вылӧ.
21 юр.
Янсӧдчӧм бӧрын ми веськыда кывтім Косӧ, мӧд луннас Родосӧ, сэсся Патараӧ. Сэні ми аддзим Финикияӧ мунысь корабль, пуксим сы вылӧ да кывтім водзӧ.
Ми кывтім Кипр дінті, сійӧ коли шуйгавылас. Сэсся воим Сирияӧ да сувтім Тирӧ, кӧні колӧ вӧлі ректыны корабльсӧ.
Сэні ми корсим велӧдчысьясӧс да олім на дінын вежон.
Найӧ Вежа Ловсянь ышӧдӧмӧн висьталісны Павеллы, медым сійӧ эз мун Ерусалимӧ.
Вежон мысти ми бара петім туйӧ.
Ставныс гӧтыръясныскӧд да челядьныскӧд колльӧдісны миянӧс кар сайӧдзыс.
Сэні вадорас ми сувтім пидзӧсъяс вылӧ да кевмысим.
Янсӧдчӧм бӧрын ми сӧлім корабль вылӧ, а колльӧдысьяс мунісны гортаныс.
Тирсянь ми кывтім Птолемаидаӧ, тані помасис миян кывтӧмным. Сэні аддзысим вокъяскӧд да кольччим на ордӧ ӧти лун кежлӧ.
Аскинас ми, Павелкӧд ветлысьяс, мунім сыкӧд Кесарияӧ. Сэні пырим буръюӧртысь Филип ордӧ да кольччим сэтчӧ. Филипӧс вӧлі бӧрйӧма Ерусалимын сизим отсасьысь лыдӧ.
Сылӧн вӧлі нёль ныв, ставныс найӧ пророкалісны.
Уна лун ми вӧлім на дінын.
Сійӧ кадӧ локтіс Юдеяысь Агав нима пророк. Кор сійӧ пырис миян дінӧ, босьтіс Павеллысь тасмасӧ да кӧрталіс ассьыс ки-коксӧ, сэсся шуис: «Тадзи висьталӧ Вежа Лов: тайӧ тасма новлысьсӧ юдейяс тадзи жӧ кӧрталасны Ерусалимын да сетасны ентӧдтӧмъяс киӧ».
Тайӧс кылӧм бӧрын сэтчӧс эскысьяскӧд ми ставным корим, медым Павел эз мун Ерусалимӧ.
Павел воча шуис: «Мый ті бӧрданныд, менсьым сьӧлӧмӧс дойдаланныд?
Ме дась лоны кӧрталӧмаӧн, весиг дась кувны Ерусалимын Господь Исус ним вӧсна».
Павелӧс кутны ми эгӧ вермӧй, сэки лӧнь сьӧлӧмӧн шуим: «Мед лоас Господьлӧн кӧсйӧм серти».
Та бӧрын ми лӧсьӧдчим туйӧ да мӧдӧдчим Ерусалимӧ.
Колльӧдігмоз миянкӧд тшӧтш мунісны Кесарияысь кодсюрӧ велӧдчысьяс. Найӧ вайӧдісны миянӧс кипрса Мнасон дінӧ, медым сувтны сы ордӧ. Мнасон важысянь нин вӧлі велӧдчысьяс лыдын.
Кор ми воим Ерусалимӧ, вокъяс нимкодя сибӧдісны миянӧс.
Аскинас ми Павелкӧд мунім Яков дінӧ, кытчӧ локтісны тшӧтш вичкоса юрнуӧдысьяс.
Найӧс чолӧмалӧм бӧрын Павел сьӧрсьӧн-бӧрсьӧн висьтавліс ставсӧ, мый Енмыс вӧчис ентӧдтӧмъяс пӧвстын сылӧн кесъялӧм пыр.
Павелӧс кывзӧм бӧрын юрнуӧдысьяс ошкисны Енмӧс, сэсся шуисны: «Тӧдан, вокӧй, юдейяс дас сюрсъясӧн бергӧдчисны эскӧмас, и ставныс найӧ кутчысьӧны Индӧдӧ.
Тэ йылысь найӧ кывлӧмаӧсь, тэ пӧ ентӧдтӧмъяс пӧвстын олысь юдейясӧс велӧдан эновтчыны Мӧисей Индӧдысь, ӧлӧдан найӧс пияннысӧ вундыштӧмысь да батьяслӧн оласногӧ кутчысьӧмысь.
Мый нӧ кутам вӧчны?
Збыльысь ӧд йӧзыд чукӧртчасны, кор тӧдмаласны тэнсьыд локтӧмтӧ.
Вӧч, кыдзи ми шуам.
Миян пӧвстын эм нёль морт, кодъяс кыв сетӧмаӧсь Ен водзын.
Босьт найӧс аскӧдыд да сӧстӧммӧдчы накӧд. Мынтысь на вӧсна, мед шырасны юрнысӧ. Сэки ставныс тӧдмаласны, мый тэ кутчысян Индӧдӧ, да тэ йылысь кывлӧмторйыс абу збыль.
А эскӧмӧ бергӧдчӧм ентӧдтӧмъяслы ми гижлім, мед видзасны асьнысӧ идоллы вайӧм сёянысь, вир юӧмысь, джагалӧм пемӧс яй сёйӧмысь да кырсалӧмысь. Мукӧд тшӧктӧмас налы оз ков кутчысьны».
Сэки Павел босьтіс аскӧдыс тайӧ йӧзсӧ да мӧд луннас сӧстӧммӧдчис накӧд. Сэсся муніс крамӧ да висьталіс, кор помасясны налӧн сӧстӧммӧдчан лунъясыс да кор лоӧ вайӧма быдӧн вӧсна вись.
Сизимӧд луннас, сӧстӧммӧдчӧм помасигӧн Асияысь воӧм юдейяс аддзисны Павелӧс крамысь. Найӧ шызьӧдісны став йӧзсӧ да Павелӧс босьтігӧн горзісны: «Израиль войтыр, отсалӧй босьтны тайӧ мортсӧ.
Сійӧ быдлаын велӧдӧ-сёрнитӧ миян войтырлы паныд, Индӧдлы паныд да тайӧ вежаиныслы паныд.
Весиг грекъясӧс вайӧдӧма татчӧ, пежалӧ вежаинсӧ».
Та водзвылын найӧ аддзылӧмаӧсь карсьыс Павелӧс Ефесысь воӧм Трӧпимкӧд. Найӧ чайтісны, мый Павел сыкӧд локтіс крамӧ.
Став карыс шызис, йӧзыс локтӧмӧн локтіс.
Павелӧс босьтісны да кыскисны крамсьыс ортсӧ, ӧдзӧсъяссӧ дзик пыр йигналісны.
Павелӧс кӧсйисны нин вины, но буретш сэки сюрсӧн веськӧдлысьлы кывсис, мый став Ерусалимыс шызьӧма.
Сійӧ дзик пыр босьтіс аскӧдыс шыпуртаясӧс, сёӧн веськӧдлысьясӧс да тэрмасьӧмӧн локтіс чукӧртчӧминӧ.
Кор йӧзыс аддзисны сюрсӧн веськӧдлысьӧс шыпуртаяскӧд, дугдісны нӧйтны Павелӧс.
Сюрсӧн веськӧдлысь матыстчис Павел дінӧ, сэсся тшӧктіс босьтны сійӧс да дорны чепъясӧн. Ачыс юасис, коді сійӧ да мый сійӧ вӧчис.
Ӧтияс ӧтитор горзісны, мӧдъяс — мӧдтор.
Йӧзлӧн горзӧмысь сюрсӧн веськӧдлысь нинӧм эз гӧгӧрво, та вӧсна тшӧктіс нуӧдны Павелӧс изкарӧ.
Содйӧд кайигӧн йӧзлӧн дзескӧдӧм вӧсна шыпуртаяслы ковмис нуны Павелӧс ки выланыс.
Йӧзыс вӧтчисны на бӧрся да горзісны: «Вины сійӧс.»
Изкарӧ пыригӧн Павел шуис сюрсӧн веськӧдлысьлы: «Позьӧ-ӧ меным сёрнитны тэкӧд?»
Мӧдыс шуис: «Тэ грек кыв тӧдан?
Абу-ӧ тэ сійӧ египетсаыс, неважӧн тай зык лэптіс да петкӧдіс овтӧминӧ нёль сюрс лёк вӧчысьӧс?»
Павел шуис: «Ме юдей, Киликияын нималана Тарс карысь.
Кора, лэдз меным кыв шуны йӧзыслы».
Павеллы лэдзисны сёрнитны. Павел сулаліс сод вылас, кисӧ лэптылӧмӧн корис лӧньны.
Кор йӧзыс ланьтісны, сійӧ пондіс сёрнитны накӧд еврей кыв вылын:
22 юр.
«Вокъясӧй да батьясӧй, кывзӧй. Ачымӧс дорйӧм могысь ме кӧсъя мыйкӧ шуны тіянлы».
Кор найӧ кылісны Павеллысь еврей кыв вылын шыасьӧмсӧ, чӧв ланьтісны.
Павел шуис: «Ме ачым юдей, чужи Киликияын Тарс карын, но быдми тайӧ карас. Гамалиил дорын менӧ велӧдісны батьяслӧн Индӧдӧ да тіян моз ме чорыда сулалі Ен дор.
Ме весиг виавмӧн вӧтлывлі “Господь туйӧд” мунысьясӧс, айуловӧс да аньясӧс кӧртавлӧмӧн пуксьӧдавлі дзескыдінӧ. Та йылысь вермас висьтавны ачыс аркирей пӧрысьяскӧд. Насянь менам вӧлі гижӧд Дамаскын олысь вокъяслы. Тайӧ гижӧднас ме муні сэтчӧ, медым кутавны Исуслы эскысьясӧс да вайӧдны найӧс Ерусалимӧ мыждыны.
Дамаскӧ воигӧн лун шӧр кадӧ виччысьтӧг енэжсяньыс кытшаліс менӧ югыд.
Ме уси муас да кылі шыасьӧм: “Савл, Савл, мыйла вӧтлан Менӧ?”
Ме юалі: “Коді Тэ, Господьӧй?”
Сійӧ шуис меным: “Ме Назаретса Исус, кодӧс тэ вӧтлан”.
Мекӧд локтысьяс кор аддзӧмаӧсь югыдсӧ, ёна повзьӧмаӧсь, а ме дінӧ шыасьӧмсӧ найӧ абу кывлӧмаӧсь.
Ме шуи: “Господьӧй, мый Тэ шуан меным вӧчны?”
Господь шуис: “Чеччы да мун Дамаскӧ, сэні висьталасны, мый тэныд вӧчнысӧ”.
Дзирдалана югыдсьыс менам синмӧй пемдіс. Та вӧсна мекӧд локтысьяс киӧд кутӧмӧн нуӧдісны менӧ Дамаскӧ.
Сэні ме дінӧ локтіс Ананий нима вежавидзысь да Индӧд серти олысь морт. Дамаскын олысь юдейяс пыдди пуктісны сійӧс. Ме дінӧ матыстчӧмӧн сійӧ шуис: “Савл вок. Мед аддзас тэнад синмыд.”
И ме дзик пыр аддзи сійӧс.
Сійӧ шуис меным: “Миян батьяслӧн Ен бӧрйӧма тэнӧ, медым тэ тӧдін Сылысь кӧсйӧмсӧ, аддзин Веськыда Олысьсӧ да кылін Сы вомсянь шуӧмсӧ. Та вӧсна тэ кутан юӧртны Сы йылысь став йӧзыслы, висьталан, мый тэ аддзылін да кывлін.
А ӧні эн нюжмась, чеччы да пыртчы. Господь нимӧ шыасьӧмӧн лэдз мыськавны ассьыд мыжъястӧ”. Сэсся ме бӧр локті Ерусалимӧ. Крамын кевмысигӧн ме быттьӧ ас садьысь петі да аддзи Господьӧс. Сійӧ шуис, тэрмасьӧмӧн пӧ пет Ерусалимысь, тані пӧ оз сибӧдны Ме йылысь тэнсьыд висьталӧмтӧ.
Ме шуи: “Господьӧй, найӧ ӧд тӧдӧны, мый ме ветлӧдлі синагогаысь синагогаӧ, пуксьӧдавлі Тэныд эскысьясӧс дзескыдінӧ да чорыда нӧйтлі найӧс. Тэ йылысь висьталысь Степанӧс виигӧн ме ачым вӧлі сэні, видзи виысьяслысь паськӧмсӧ да лыдди виӧмсӧ бурторйӧн”.
Господь шуис меным: “Мун, Ме мӧдӧда тэнӧ ылӧ ентӧдтӧмъяс дінӧ”».
Тайӧ кывъясӧдз кывзісны Павелӧс, сэсся пондісны горзыны: «Татшӧмсӧ колӧ бырӧдны му вывсьыс.
Сійӧс оз позь ловйӧн кольны.»
Йӧзыс ӧтарӧ горзісны, шенасисны паськӧмнаныс да коялісны кок увсьыныс буссӧ вывлань.
Сэки сюрсӧн веськӧдлысь тшӧктіс пыртны Павелӧс изкарӧ да нӧйтны орсӧн. Сэні кӧсйис тӧдмавны, мыйысь юдейяс татшӧмасӧ горзӧны сы вылӧ.
Кор Павелӧс кӧртавлісны тасмаясӧн, сійӧ шуис сёӧн веськӧдлысьлы: «Тіянлы ӧмӧй позьӧ мыждытӧгыс нӧйтны римса мортӧс?»
Тайӧс кылӧм бӧрын сёӧн веськӧдлысь матыстчис сюрсӧн веськӧдлысь дінӧ да шуис: «Тэ збыльысь кӧсъян нӧйтны тайӧ мортсӧ?
Сійӧ ӧд римса».
Сюрсӧн веськӧдлысь матыстчис Павел дінӧ да юаліс: «Висьтав, тэ римса?»
Павел вочавидзис: «Да».
Веськӧдлысь содтіс: «Ме ыджыд дон мынті, мед лоны римсаӧн».
Павел шуис сылы: «А ме чужи нин римсаӧн».
Сэки нӧйтысьяс дзик пыр вешйисны Павел дінысь.
А сюрсӧн веськӧдлысь кор тӧдмаліс, мый Павел римса, ёна повзис, мый кӧртавліс римсаӧс.
Сюрсӧн веськӧдлысь кӧсйис збыльысь тӧдмавны, мыйысь юдейяс мыжалӧны Павелӧс. Та вӧсна аскинас тшӧктіс разьны Павеллысь кӧртӧдъяссӧ да чукӧртны аркирейясӧс да став веськӧдлан котырсӧ. Сэсся петкӧдіс Павелӧс на водзӧ.
23 юр.
Павел сюся видзӧдліс веськӧдлан котыр вылӧ да шуис: «Вокъяс.
Тайӧ лунӧдзыс ме пыр олі Ен водзын сӧстӧм сьӧлӧмӧн».
Сэки Ананий нима аркирей тшӧктіс Павел дінын сулалысьӧс кучкыны сылы вомас.
Павел шуис сылы: «Тэнӧ Енмыс пондас нӧйтны, еджыдӧн мавтӧм стен.
Тэ пуксин мыждыны менӧ Индӧд серти, но ачыд Индӧдыслы паныд мунан, тшӧктан нӧйтны менӧ».
Сэні сулалысьяс шуисны Павеллы: «Енлысь аркирейӧс лёкӧдан?»
Павел воча шуис: «Ме эг тӧд, вокъяс, мый сійӧ аркирей.
Дерт, гижӧма: “Эн лёкӧд ас войтырлысь юралысьӧс”».
Веськӧдлан котырын вӧліны саддукейяс да фарисейяс. Тайӧс казялӧм бӧрын Павел гораа шыасис: «Вокъяс.
Ме ачым фарисей, фарисейлӧн пи.
Менӧ мыждӧны, кулӧмысь ловзьӧмӧ эска да».
Тайӧс кылӧм бӧрын фарисейяс да саддукейяс вензьыны пондісны, тадзи чукӧртчӧмаяс юксисны кык пельӧ.
Ӧд саддукейяс шуӧны, мый ловзьӧмыс абу, весиг анделъяс и ловъяс абуӧсь, а фарисейяс шуӧны, ставыс пӧ тайӧ эм.
Вензьысьяс лёкысь горзыны пондісны.
Сэки фарисейяс лыдысь Индӧдӧ велӧдысьяс сувтісны да шуисны: «Тайӧ мортыслысь ми нинӧм лёксӧ огӧ аддзӧй.
Гашкӧ, збыльысь сыкӧд сёрнитіс Лов либӧ андел. Вайӧ, огӧ пондӧй паныд мунны Енмыслы».
Но вензьӧмыс ӧтарӧ ӧддзис, сюрсӧн веськӧдлысь весиг повзис, мый косявласны Павелӧс. Та вӧсна тшӧктіс шыпуртаяслы босьтны Павелӧс веськӧдлан котыр водзысь да нуӧдны изкарӧ.
Сійӧ войнас Господь сувтіс Павел водзӧ да шуис: «Эн пов, Павел. Ӧні тэ Ерусалимын висьталін Ме йылысь, тадзи тэныд ковмас висьтавны тшӧтш Римын».
Асывнас юдейяс пӧвстысь кодсюрӧ ас костаныс сёрнитчӧмӧн сетісны кыв, мый Павелӧс витӧдз оз кутны сёйны ни юны.
Тадзи шуисны вӧчны нелямын сайӧ морт.
Найӧ локтісны аркирейяс да пӧрысьяс дінӧ да шуисны: «Ми кыв сетім Ен водзын: Павелӧс витӧдз воманым дзик нинӧм огӧ босьтӧй.
Ӧні тіянлы веськӧдлан котыркӧд колӧ юӧртны сюрсӧн веськӧдлысьлы, медым сійӧ аски вайӧдас Павелӧс тіян дінӧ. Шуӧй, мый ті кӧсъянныд бурджыка тӧдмавны, мыйысь сійӧс мыжалӧны.
А ми вайӧдігас виям Павелӧс».
Та йылысь кывліс Павел чойлӧн пиыс. Сійӧ муніс изкарӧ, пырис Павел дорӧ да ставсӧ висьталіс.
Сэки Павел корис сёӧн веськӧдлысьӧс да шуис: «Тайӧ том мортсӧ колӧ нуӧдны сюрсӧн веськӧдлысь дінӧ, сійӧ мыйкӧ кӧсйӧ висьтавны сылы».
Сёӧн веськӧдлысь вайӧдіс том мортӧс сюрсӧн веськӧдлысь дінӧ да шуис: «Миянын пукалысь Павел корис вайӧдны тайӧ том мортсӧ тэ дінӧ, сійӧ кӧсйӧ мыйкӧ висьтавны».
Сюрсӧн веськӧдлысь босьтіс том мортӧс киӧдыс, сэсся бокӧ вешйӧмӧн юаліс сылысь: «Мый тэ кӧсъян висьтавны?»
Сійӧ шуис: «Юдейяс сёрнитчӧмаӧсь корны тэнӧ, медым тэ аски вайӧдін Павелӧс веськӧдлан котыр водзӧ. Найӧ ылӧдласны, кӧсъям пӧ бурджыка тӧдмавны, мыйысь Павелыс мыжа.
Тэ найӧс эн кывзы.
На чукӧрысь нелямын сайӧ морт кыйӧдӧмӧн лӧсьӧдчӧны вины Павелӧс. Найӧ кыв сетӧмаӧсь, мый сійӧс витӧдз оз кутны сёйны ни юны.
Найӧ ӧні дасьӧсь нин, виччысьӧны сӧмын тэнсьыд шуӧмтӧ».
Сюрсӧн веськӧдлысь лэдзис том мортӧс да ӧлӧдіс: «Некодлы эн висьтав, мый тэ меным юӧртін тайӧс».
Сюрсӧн веськӧдлысь корис сёӧн веськӧдлысьясысь кыкӧс да шуис: «Дасьтӧй кыксё пода шыпуртаӧс, сизимдас верзьӧмаӧс да кыксё шы новлӧдлысьӧс. Ӧкмыс час рытын лоӧй дасьӧсь мӧдӧдчыны Кесарияӧ.
Павеллы тшӧтш дасьтӧй вӧвъяссӧ да лючки-бура вайӧдӧй сійӧс Феликс юралысь дінӧ».
Сюрсӧн веськӧдлысь мӧдӧдіс накӧд татшӧм гижӧд: «Пыдди пуктана Феликс юралысьӧс чолӧмалӧ Клавдий Лисий.
Юӧрта: тайӧ мортсӧ босьтісны юдейяс да кӧсйисны вины сійӧс. Кор ме тӧдмалі, мый сійӧ римса, муні шыпуртаяскӧд да мырдди сійӧс на киысь.
Нӧшта кӧсйи тӧдмавны, мыйысь сійӧс мыжалӧны. Тайӧ могнас нуӧді сійӧс налӧн веськӧдлан котыр водзӧ. Тӧдмалі да, вӧлӧмкӧ, мыжалӧны сійӧс асланыс Индӧд понда вензяна видзӧдласъясысь. Ме ог аддзы сылысь мыжсӧ, мыйысь эськӧ колӧ сійӧс пуксьӧдны дзескыдінӧ да вины.
Сэсся кывсис меӧдз, мый юдейяс кыйӧдӧмӧн лӧсьӧдчӧны вины тайӧ мортсӧ. Та вӧсна дзик пыр мӧдӧді сійӧс тэ дінӧ. Мыжалысьяслы тшӧкті тэ водзын висьтавны, мыйысь найӧ мыжалӧны сійӧс.
Ло дзоньвидза.»
Тшӧктӧм серти шыпуртаяс босьтісны Павелӧс да нуӧдісны войнас Антипатридаӧ.
Асьныс мӧд луннас бӧр локтісны изкарӧ, а Павелӧс верзьӧмаяскӧд мӧдӧдісны водзӧ.
Кесарияӧ воысьяс вайӧдісны Павелӧс сэтчӧс юралысь дінӧ да сетісны сылы гижӧдсӧ.
Сійӧс лыддьӧм бӧрын юралысь юаліс Павеллысь, кытысь сійӧ. Кор тӧдмаліс, мый Павел Киликияысь, шуис: «Кор локтасны тэнӧ мыжалысьяс, сэки кывза тэнӧ».
Сэсся тшӧктіс нуӧдны Павелӧс Ирӧдлӧн дзескыдінӧ.
24 юр.
Вит лун мысти локтісны Ананий аркирей да пӧрысьяс. Накӧд тшӧтш локтіс Тертул нима налӧн дорйысь. Локтысьяс асланыс мыжалӧмъясӧн шыӧдчисны юралысь дінӧ.
Павелӧс вайӧдӧм бӧрын Тертул сувтіс мыжавны:
«Пыдди пуктана Феликс. Быд кадӧ да быдлаын ми бур ногӧн казьтылам тэнӧ. Ми уджйӧзаӧсь тэныд миян лӧньлуна олӧмысь, тэнад тӧждысьӧмысь да войтырлысь олӧмсӧ бурмӧдӧмысь.
Ог кӧсйы ёна сьӧктӧдны тэнӧ, кора сӧмын лоны бур сьӧлӧмаӧн да дженьыдика кывзыштны миянӧс.
Ми аддзылім: тайӧ мортыс пежалӧ гӧгӧр да став му пасьтала шызьӧдӧ юдей войтырӧс. Сійӧ назаретса велӧдӧмӧ кутчысьысьяслӧн веськӧдлысь. Сійӧ кӧсйис пежавны крамнымӧс, таысь ми и босьтім сійӧс да кӧсйим мыждыны Индӧдным серти.
Но локтіс сюрсӧн веськӧдлысь Лисий шыпуртаяскӧд да мырддьӧмӧн-мырддис сійӧс миян киысь, сэсся мӧдӧдіс тэ дінӧ. Тшӧтш миянлы, сійӧс мыжалысьяслы, тшӧктіс локны татчӧ.
Тэ верман ачыд бура тӧдмавны ставсӧ, мыйысь ми мыжалам сійӧс».
Юдейяс сэні тшӧтш шуисны, дзик тадзи пӧ ставыс вӧлі.
Кор Феликс сетіс кыв Павеллы, Павел воча шуис: «Ме тӧда, тэ уна во чӧж нин веськыда мыждан тайӧ муын олысьясӧс. Та вӧсна меным кокньыд тані дорйысьнысӧ.
Тэ верман ачыд тӧдмавны, мый дас кык лун сайын ме локті Ерусалимӧ, мед юрбитны Енлы.
Найӧ эз вермыны аддзывнысӧ, мед ме крамын вензи, синагогаын либӧ карын шызьӧді йӧзсӧ, та вӧсна оз вермыны подулавны ассьыныс мыжалӧмъяссӧ.
Но веськыда висьтала тэныд: ме кутчыся тайӧ велӧдӧмас, мый найӧ шуӧны пӧръясьӧмӧн, тадзи кесъяла миян батьяслӧн Енлы. Ме эска ставас, мый гижӧма Индӧдын да пророк гижӧдъясын. Тані пукалысь юдейяс моз ме тшӧтш лача кута Ен вылӧ, эска, мый лоӧ ловзьӧмыс, ловзясны веськыда олысьяс и лёк нога олысьяс. Менӧ мыжалысьяс ӧд тшӧтш тайӧс виччысьӧны.
Ме век зіля овны Ен водзын да йӧз водзын сӧстӧм сьӧлӧмӧн.
Уна во бӧрын ме локті Ерусалимӧ, медым ас войтырлы сетны чукӧртӧм сьӧм да вайны Енлы вись.
Менӧ аддзылісны крамысь сӧстӧммӧдчӧм бӧрын. Йӧз чукӧрыс да шызьӧмыс сэні матӧ эз вӧв.
Сэні вӧліны Асияысь кодсюрӧ юдейяс. Налы эськӧ колӧ вӧлі сувтны тэ водзӧ да мыжавны менӧ, дерт, вӧлі кӧ мыйысь?
Тайӧ йӧзыс мед асьныс висьталасны, кутшӧм мыж найӧ аддзисны менсьым, кор ме сулалі веськӧдлан котыр водзын. Ме сэні шуи налы: “Ті талун мыжаланныд менӧ сыысь, мый ме эска кулӧмаяслӧн ловзьӧмӧ”. Гашкӧ, тайӧ шуӧмсьыс ме мыжми на водзын».
Феликс бура тӧдіс “Господь туй” йылысь велӧдӧмсӧ. Ставсӧ кывзӧм бӧрын сёрнисӧ тупкис да шуис: «Кор сюрсӧн веськӧдлысь Лисий локтас, сэки шуа бӧръя кывсӧ».
Сёӧн веськӧдлысьлы тшӧктіс нуӧдны Павелӧс дзескыдінӧ да видзны сійӧс дзескӧдтӧг, лэдзны ёртъясыслы видлавны сійӧс да тӧждысьны сы вӧсна.
Кымынкӧ лун мысти Феликс локтіс Друзилла гӧтырыскӧд. Сылӧн гӧтырыс вӧлі юдей войтырысь. Феликс тшӧктіс вайӧдны Павелӧс, медым кывзыны Исус Кристослы эскӧм йылысь.
Но кор Павел висьталіс веськыда олӧм, асьтӧ кутӧм да локтана мыждӧм йылысь, Феликсӧс полӧм босьтіс. Сійӧ шуис: «Ӧні мун. Кад кӧ лоӧ, корла на».
Сійӧ виччысис Павелсянь, гашкӧ, сетас сьӧм, мед лэдзасны сійӧс.
Та вӧсна тшӧкыда корлывліс Павелӧс да сёрнитліс сыкӧд.
Кык во мысти Феликс пыдди юралысьӧ пуксис Порций Фест.
И медым шогмыны юдейяслы, Феликс колис Павелӧс дзескыдінӧ.
25 юр.
Юралысьӧ пуксьӧмсянь куим лун мысти Фест муніс Кесарияысь Ерусалимӧ.
Сэні аркирей да юдейяслӧн веськӧдлысьяс норасисны Павел вылӧ да корисны, мед Фест вӧчас налы буртор: тшӧктас вайӧдны Павелӧс Ерусалимӧ.
Ас костаныс найӧ сёрнитчисны, мый кыйӧдасны Павелӧс да вайӧдігас виасны.
Фест вочавидзис: «Павелӧс видзӧны Кесарияын, ме ачым сэтчӧ регыд муна.
Тіян пиысь тӧдчанаджыкъясыс мед мунасны мекӧд.
Сійӧ мортыс сайын кӧ збыльысь мыйкӧ эм, мед мыжаласны».
Лун кӧкъямыс-дас мысти Фест бӧр муніс Кесарияӧ.
Мӧд луннас пуксис ёрдӧ да тшӧктіс вайӧдны Павелӧс.
Кор сійӧс вайӧдісны, Ерусалимысь воӧм юдейяс Павелӧс кытшалӧмӧн пондісны чорыда мыжавны сійӧс унаторйысь, но подулавнысӧ эз вермыны.
Павел асьсӧ дорйӧм могысь шуис: «Ме некутшӧм мыж эг вӧч юдей Индӧдлы, крамлы да кесарлы паныд».
Мед бурӧн кольны юдейяс водзын, Фест шуис Павеллы:
«Кӧсъян-ӧ мунны Ерусалимӧ, мед сэні менам ёрд водзӧ сувтны?»
Павел шуис: «Ме сулала кесар ёрд водзын, тані колӧ менӧ мыждынысӧ.
Юдейяслы ме нинӧм лёксӧ эг вӧч, тэ ачыд тайӧс бура тӧдан.
Но ме кӧ мыжа вимӧн, ме дась кувны.
Абу кӧ мыжа, мыйысь тайӧ йӧзыс мыжалӧны менӧ, сідзкӧ, некод оз вермы сетны менӧ налы.
Ме кора кесарлысь мыждӧм».
Сэки аслас отсасьысьяскӧд сёрнитчӧм бӧрын Фест шуис: «Тэ корин кесарлысь мыждӧм, сідзкӧ, сувтан кесар водзӧ».
Кымынкӧ лун мысти локтісны Кесарияӧ Агриппа ӧксы да Вереника, мед чолӧмавны Фестӧс.
Найӧ олісны сы ордын уна кодь лун. Сэки Фест висьталіс ӧксылы Павел йылысь: «Тані пукалӧ морт, сійӧс Феликс кольӧма дзескыдінӧ. Ерусалимӧ ветлігӧн юдейяслӧн аркирейяс да пӧрысьяс норасисны меным сы вылӧ, корисны мыждыны сійӧс.
Ме шуи налы, мый римсаяс оз сетны вины мортӧс, кытчӧдз сійӧс оз сувтӧдны мыжалысьяс водзӧ, медым мортыс вермис паныд дорйысьны.
Кор найӧ локтісны татчӧ, ме дзик пыр мӧд луннас пукси ёрдӧ да тшӧкті вайӧдны тайӧ мортсӧ.
Мыжалысьяс сувтісны гӧгӧрыс. Ме виччыси, гашкӧ, кутшӧмкӧ лёкторйысь пондасны мыжавны, но тайӧс ме эг кыв насянь.
Найӧ вензисны асланыс эскӧм кузя да кутшӧмкӧ кувлӧм Исус понда. Но Павеллӧн висьталӧм серти, Сійӧ ловъя.
Та кузя ме эг вермы некодарӧ нинӧм шуны. Та вӧсна юалі Павеллысь, оз-ӧ сійӧ кӧсйы мунны Ерусалимӧ, медым сэні сувтны ёрд водзӧ.
Но Павел корис, мед сійӧс нуӧдасны кесар дінӧ. Сэтчӧ нуӧдтӧдз ме тшӧкті видзны сійӧс дзескыдінын».
Агриппа шуис Фестлы: «Ме тшӧтш кӧсъя кывзыштны тайӧ мортсӧ».
«Аски кывзыштан», — вочавидзис Фест.
Аскинас Агриппа да Вереника локтісны мичаа вӧччӧмӧн. Найӧ пырисны чукӧртчанінӧ сюрсӧн веськӧдлысьяскӧд да карса тӧдчана йӧзкӧд. Фест тшӧктіс вайӧдны Павелӧс,
сэсся шыасис: «Агриппа ӧксы да ставныд локтысьяс.
Ті асьныд аддзанныд тайӧ мортсӧ. Ерусалимын да тані юдейяс норасисны меным сы вылӧ, ӧти вомӧн горзісны, колӧ пӧ вины сійӧс.
Но ме эг аддзи мыжсӧ, мыйысь эськӧ позис вины сійӧс.
Сылӧн корӧм серти ме шуи мӧдӧдны сійӧс кесар дінӧ.
Меным весиг нинӧм гижнысӧ ыджыднымлы, та вӧсна вайӧді сійӧс тіян водзӧ. Торйӧн нин, Агриппа ӧксы, тэ водзӧ, медым тэнад донъялӧм бӧрын вӧлі, мый гижнысӧ.
Ме чайта, мывкыдтӧг лоӧ вӧчӧма, мӧдӧдам кӧ пуксьӧдӧм мортӧс мыжсӧ индытӧг».
26 юр.
Агриппа шуис Павеллы: «Тэ верман сёрнитны ас кузяыд».
Павел кисӧ лэптылӧм бӧрын заводитіс дорйысяна сёрнисӧ:
«Агриппа ӧксы.
Ме шуда, мый талун верма дорйысьны тэ водзын юдейяслӧн став мыжалӧмысь. Тэ ӧд бура тӧдан юдей войтырлысь оласногсӧ да налысь вензяна видзӧдлассӧ.
Та вӧсна кора тэнӧ терпитӧмӧн кывзыштны менӧ.
Менсьым олӧмӧс тӧдӧ став юдейыс, ӧд ме том кадсянь олі ас войтыр пӧвстын Ерусалимын.
Найӧ важысянь тӧдӧны менӧ. Ме вӧлі кутчысьӧма фарисейяслӧн чорыд велӧдӧмӧ да оласногӧ. Та йылысь, кӧсъясны кӧ, асьныс вермасны висьтавны.
Ӧні ме сулала ёрд водзын, сы вӧсна мый кута лача кӧсйысьӧмас, кодӧс Енмыс сетіс миян батьяслы. Тайӧ кӧсйысьӧмыслысь збыльмӧмсӧ лача кутӧмӧн виччысьӧны миян войтырлӧн дас кыкнан чужанкотырыс, лун и вой юрбитӧны Енлы.
Та вылӧ лача кутӧмысь и мыжалӧны менӧ юдейяс, Агриппа ӧксы.
Мыйла ті онӧ эскӧй, мый Енмыс вермӧ ловзьӧдны кулӧмаясӧс?
Ме ачым коркӧ быдногыс паныд муні Назаретса Исус нимлы. Чайті, тадзи и колӧ.
Тадзи вӧчлі Ерусалимын: ме босьті аркирейяссянь гижӧд да вежа войтырӧс унаӧс пуксьӧдалі дзескыдінӧ, ме вӧлі найӧс виӧм дор.
Ме унаысь чорыда нӧйтлі найӧс синагогаясын, медым найӧ омӧльтісны Исусӧс. Ме вӧлі тырӧма скӧрлунӧн, вӧтлыси на бӧрся весиг мукӧд каръясӧдз.
Та могӧн аркирейяс нимсянь ме муні Дамаскӧ. Лун шӧр кадӧ, кор ме вӧлі туйын на, аддзи, ӧксыӧй, енэжсяньыс лэччис югыд, сійӧ вӧлі шонді югӧрысь на яр.
Тайӧ югыдыс кытшаліс менӧ да мекӧд мунысьясӧс да ставным ми усим муас. Сэки ме кылі еврей кыв вылын ме дінӧ шыасьӧм: “Савл, Савл, мыйла вӧтлан Менӧ?
Сьӧкыд тэныд мунны ёсь зорлы паныд”.
Ме юалі: “Коді Тэ, Господьӧй?”
Сійӧ шуис: “Ме — Исус, кодӧс тэ вӧтлан.
Ӧні чеччы да сувт кок вылад.
Ме петкӧдчи тэныд, мед тэ кесъялін Меным да висьталін, мый тэ аддзылін да мый на Ме восьта тэныд. Ме видза тэнӧ аслад войтырысь да ентӧдтӧмъясысь, кодъяс дінӧ ӧні мӧдӧда тэнӧ, мед восьтны налысь синсӧ да бергӧдны найӧс пемыдсьыс югыдӧ, сӧтана кипод улысь Ен дінӧ, медым Меным эскӧмӧн найӧ босьтасны мыжъясысь прӧститӧмсӧ да вежа войтырлы Енсянь вичмӧдӧмасӧ”.
Та вӧсна, Агриппа ӧксы, ме эг кут паныд мунны енэжсянь петкӧдчылӧмлы.
Медводз Дамаскын да Ерусалимын, сэсся став Юдея му пасьтала, сэсся нин ентӧдтӧмъяслы висьтавлі, мед бергӧдчасны мыжъяссьыныс Енлань да олӧмнас петкӧдласны тайӧс.
Таысь юдейяс и босьтісны менӧ крамын да кӧсйисны вины.
Но Енмыс пыр на отсаліс меным тайӧ лунӧдзыс, та вӧсна ме ӧнӧдз сулала да висьтала быдӧнлы: прӧстӧй и чина йӧзлы. Висьтала сӧмын сійӧ, мый йылысь водзвыв висьтавлісны Мӧисей да пророкъяс. Найӧ висьталісны, мый Кристос сьӧкыда кулас и лоас медводдза Ловзьысьӧн, медым восьтны югыдсӧ юдей войтырлы да ентӧдтӧмъяслы».
Кор Павел тадзи дорйысис, Фест гораа шуис: «Тэ дзикӧдз йӧймӧмыд, Павел.
Ыджыд тӧдӧмлуныд вӧсна вежӧртӧ воштӧмыд».
Павел шуис: «Ме эг йӧймы, пыдди пуктана Фест.
Ме бур мывкыдсянь висьтала збыльсӧ.
Та йылысь бура тӧдӧ ачыс ӧксы, та вӧсна ме восьсӧн сёрнита сы водзын.
Эска, тайӧ сылы абу гусятор, ӧд ставыс тайӧ эз гусьӧн вӧчсьы, кӧнкӧ пельӧс сайын.
Эскан-ӧ, Агриппа ӧксы, пророкъяслы?
Тӧда, мый эскан».
Агриппа шуис Павеллы: «Зэв тай ӧдйӧ кӧсъян вӧчны менӧ Кристослы эскысьӧн».
«Ӧдйӧ ли, ог ли», — шуис Павел, — «но кевма Енлы, мед тэ да ставныс тані менӧ кывзысьяс лоинныд ме кодьӧсь, сӧмын тайӧ чепъястӧгыс».
Кор Павел помаліс сёрнисӧ, ӧксы чеччис, сы бӧрся тшӧтш чеччисны Фест юралысь, Вереника да мукӧдыс.
Муніганыс найӧ сёрнитісны ас костаныс: «Тайӧ мортыс абу мыжа, мед вины сійӧс либӧ видзны дзескыдінын».
Агриппа шуис Фестлы: «Позьӧ эськӧ вӧлі лэдзны сійӧс, эз кӧ кор кесарлысь мыждӧмсӧ».
27 юр.
Кор шуӧма вӧлі кывтны Италияӧ, Павелӧс да мукӧд пукалысьясӧс сетісны кесар полкын Юлий нима сёӧн веськӧдлысьлы.
Ми сӧлім Адрамитияысь кывтысь корабль вылӧ, сійӧ лӧсьӧдчис кывтны Асия муясті.
Миянкӧд тшӧтш вӧлі Фессалоникаысь македонияса Аристарк.
Мӧд луннас ми сувтім Сидонӧ.
Юлий вӧлі бур сьӧлӧма Павел дінӧ, лэдзис сылы ветлыны ёртъяс дінас да босьтны став коланаторсӧ туйӧ.
Сидонысь петӧм бӧрын паныда тӧлыс вӧсна миянлы ковмис кывтны Кипрӧ. Киликия да Памфилияті кывтігӧн ми вуджим саридзсӧ да воим Ликияӧ, Мира карӧ.
Сэні сёӧн веськӧдлысь аддзис Александрияысь Италияӧ кывтысь корабль да пуксьӧдіс миянӧс сы вылӧ.
Ми кывтім ньӧжйӧ уна лун чӧж, ӧдва воим Книд карӧдз. Паныда тӧлыс эз лэдз кывтны водзӧ, та вӧсна Салмонаті кытшовтӧмӧн пондім кывтны Крит пӧлӧн.
Вадор пӧлӧныс кывтӧмӧн ми сьӧкыдпырысь воӧдчим сідз шусяна “Бур Сувтанінӧ”. Тасянь матын вӧлі Ласея кар.
Уна кад ми сэні воштім, весиг Видзалан лун нин коли бӧрӧ, и татшӧм тӧланас водзӧ кывтны эз позь. Сэки Павел шыасис: «Войтырӧй, ме аддза, водзӧ кывтны лоас вывті сьӧкыд, вермам воштыны груз тыра корабльнымӧс, весиг ассьыным олӧмнымӧс».
Но сёӧн веськӧдлысь Павеллы дорысь ёнджыка эскис корабльвывса ыджыдыслы да корабль нуӧдысьлы.
Тӧвйыны тайӧ сувтанінас эз позь, та вӧсна унаӧн шуисны кывтны татысь, кыдзкӧ воӧдчыны Финик карӧдз да тӧвйыны сэні. Тайӧ критса ӧзыныс видзӧдіс рытыв-лунвывлань да рытыв-войвывлань.
Пӧльыштіс лун тӧв. Чайтісны, мый кывтӧмыс артмас, та вӧсна мӧдӧдчисны Крит пӧлӧн.
Регыд мысти асыв-войвывсянь кыпӧдчис ыджыд тӧвныр, сійӧ пӧльтіс ді вывсянь.
Корабль эз вермы водзсасьны тӧвныркӧд. Тӧвныр нетшыштіс да пондіс новлӧдлыны корабльнымӧс гыяс вывті.
Клавда ді весьтті кывтігӧн ми кыдзкӧ вермим видзны корабльлысь пыжсӧ.
Пыжсӧ лэптісны корабль вылӧ, а корабльсӧ кӧртавлісны гезъясӧн.
Тӧвдӧрасӧ лэдзисны, полісны, мед оз шыбит миянӧс ляпкыдінӧ. Тадзи ёна на новлӧдліс миянӧс.
Тӧвнырлӧн ланьтӧмыс эз на тыдав, та вӧсна мӧд луннас пондісны ректыны корабльсӧ саридзӧ. Коймӧд луннас шыблалім корабль вылысь весиг став кӧрта кӧлуйсӧ.
Уна лун чӧж эз петкӧдчыв шонді да эз тыдавны кодзувъяс, тӧвнырлӧн помыс эз тыдав. Миян воши став лача ловйӧн кольны.
Ми дыр кад олім сёйтӧг. Сэки Павел сувтіс на шӧрӧ да шуис: «Войтырӧй, колӧ вӧлі кывзыны менӧ да эз ков петны Критысь, сэки эськӧ эз су тіянӧс тайӧ сьӧкыдыс да лёкторйыс.
А ӧні кора, энӧ шогсьӧй. Тіян пиысь весиг ӧти ловъя лов оз вош, сӧмын корабльнымӧс воштам.
Тайӧ войнас петкӧдчыліс меным андел, сійӧс мӧдӧдіс Ен, кодлы ме сеті ачымӧс да кодлы ме кесъяла. Андел шуис: “Эн пов, Павел.
Тэныд ковмас на сувтны кесар водзӧ. Тэ вӧсна Енмыс тшӧтш видзас тэкӧд кывтысьясӧс”.
Энӧ шогсьӧй, войтыр. Ме эска Енмыслы да тӧда, анделлӧн шуӧмыс инас.
Миянӧс шыбитас кутшӧмкӧ ді вылӧ».
Дас нёль лун нин миянӧс новлӧдліс Адрия саридзті.
Вой шӧр гӧгӧрын корабльвывса уджалысьяс казялісны, мый кутшӧмкӧ му дінӧ матыстчам.
Видлісны джудждасӧ да, кызь сыв джуджда лои.
Муныштӧм бӧрын бара видлісны, дас вит сывйӧдз вӧлі ляпкалӧма.
Полісны изъяинӧ тшукӧмысь. Та вӧсна лэдзисны бӧжладорсяньыс нёль якӧр да ёна кевмисны, мед эськӧ югдытӧдзыс вермисны кутчысьны.
Но корабльвывса уджалысьяс шуисны пышйыны. Пондісны лэдзны корабль вылысь пыжсӧ саридзӧ, быттьӧ нӧшта кӧсйӧны чӧвтны якӧръяс нырладорсяньыс.
Сэки Павел шуис сёӧн веськӧдлысьлы да шыпуртаяслы: «Найӧ кӧ оз лоны корабль вылас, ті онӧ кольӧй ловйӧн».
Сэки шыпуртаяс керыштісны пыжлысь гезъяссӧ да пыжыс уси саридзӧ.
Асъядорыс Павел тшӧктіс ставныслы сёйыштны: «Ті дас нёль лун нин майшасьӧмныдла нинӧм энӧ сёйлӧй.
Колӧ сёйыштны, мед ловйӧн колинныд.
Тіян пиысь некодлӧн весиг юрси сі оз усь юр вывсьыныд».
Тайӧс шуӧм бӧрын босьтіс нянь, ставныслӧн син водзын Енмӧс аттьӧалӧмӧн чегис да пондіс сёйны.
Ставныс долыдмисны да тшӧтш пондісны сёйны.
Корабль вылас ми вӧлім кыксё сизимдас квайт морт.
Пӧттӧдзныс сёйӧм бӧрын пондісны шыблавны саридзӧ шобді мешӧкъяснысӧ, мед кокньӧдны корабльсӧ.
Кор дзикӧдз югдіс, тыдовтчис алькӧса куръя, муыс вӧлі тӧдтӧм. Шуисны пырны куръяас.
Якӧръяссӧ орйӧдлісны да вӧйтісны саридзӧ, личӧдісны веськӧдлан пелысъяслысь гезъяссӧ да тӧв ньылыдыс зэвтісны ичӧт тӧвдӧра. Тадзи ми сетчим вадорланьыс.
Сэсся веськалім ляпкыдінӧ да корабльным сибдіс.
Нырнас сатшис да некодарӧ эз вӧр, а бӧжыс гыяслӧн лёкысь швачкӧдӧмысь пондіс чуктавны-жугласьны.
Шыпуртаяс кӧсйисны нин вины пукалысьясӧс, медым вартчиганыс некод эз пышйы.
Но медым видзны Павеллысь олӧмсӧ сёӧн веськӧдлысь ӧлӧдіс шыпуртаясӧс тайӧ уджсьыс. Сійӧ медводз тшӧктіс шыбитчыны ваӧ вартчыны кужысьяслы да уйны вадорас.
Мукӧдыслы тшӧктіс воӧдчыны пӧвъяс отсӧгӧн либӧ кодлы мый сюрас корабль вывсьыс.
Тадзи ставныс петісны му вылӧ.
28 юр.
Ваысь петӧм бӧрын тӧдмалісны, вӧлӧмакӧ, Мальта ді.
Сэтчӧс олысьяс бура сибӧдісны миянӧс. Найӧ пестісны бипур да корисны миянӧс шонтысьны зэрысь-кӧдзыдысь.
Павел чукӧртіс росъяс да пуктіс бипур вылӧ. Сэки жара сотчысь биысь чепӧсйис змей да шашаритчис Павеллы киас.
Сэтчӧс олысьяс аддзисны Павел ки вылысь ӧшалысь змейӧс да шуалісны ӧта-мӧдныслы: «Тыдалӧ, сійӧ морт виысь, вӧйӧмысь кӧ мездмӧм бӧрын Водзӧсперйысьыс кӧсйӧ босьтны сылысь олӧмсӧ».
Но Павел кисӧ пыркнитӧмӧн шыбитіс змейӧс биӧ да сылы некутшӧм лёк эз ло.
Йӧзыс чайтісны, мый Павеллӧн киыс пыктас либӧ сійӧ шойӧн усяс му вылас.
Дыркодь виччысисны, мый лоӧ. Но кор аддзисны, мый сыкӧд нинӧм лёкыс эз ло, вежисны мӧвпнысӧ да шуалісны, сійӧ пӧ ен.
Сэні матын вӧлі діӧн веськӧдлысь Публийлӧн оланіныс.
Сійӧ нимкодьпырысь сибӧдіс миянӧс ас ордас да куим лун чӧж бура вердіс-юкталіс.
Сійӧ кадас Публийлӧн батьыс куйліс биа висьӧмӧн да кынӧм висьӧмӧн.
Павел пырис сы дінӧ, кевмысис да сы вылӧ кисӧ пуктылӧмӧн бурдӧдіс сійӧс.
Тайӧ лоӧмторйыс бӧрын ді вылысь тшӧтш мукӧд висьысьяс пондісны локны, и ставныс бурдісны.
Найӧ быдногыс аттьӧалісны миянӧс, муніганым весиг сетісны миянлы став коланаторсӧ.
Куим тӧлысь мысти Диоскур нима александрияса корабль вылын ми мӧдӧдчим водзӧ. Тайӧ корабльыс тӧвйис ді вылын. Ми воим Сиракузаӧ, сэні олім куим лун.
Сэтысь кывтӧм бӧрын воим Ригияӧ.
Лун мысти петіс лун тӧв, и мӧд луннас нин ми воим Путеолӧ. Сэтысь ми аддзим вокъясӧс, найӧ корисны миянӧс олыштны на ордын вежон. Та бӧрын сэсся мунім Римӧ.
Сэні вокъяс кывлӧмаӧсь миян локтӧм йылысь. Найӧ воча локтісны миянлы, ӧтияс Аппия вузасянінӧдз, мӧдъяс — “Куим шойччан керка” нима сиктӧдз.
Найӧс аддзӧм бӧрын Павел долыдмис да аттьӧаліс Енмӧс.
Римӧ воӧм мысти сёӧн веськӧдлысь сетіс пукалысьясӧс тышкайӧзӧн веськӧдлысьлы.
А Павеллы лэдзисны овны торйӧн сійӧс видзысь шыпуртакӧд.
Куим лун мысти Павел корис юдейяслысь веськӧдлысьясӧс. Кор найӧ чукӧртчисны, Павел шыасис на дінӧ: «Вокъяс, ме нинӧм эг вӧч ас войтырлы паныдсӧ да эг торк батьяслысь оласногсӧ. Но менӧ пуксьӧдісны Ерусалимын дзескыдінӧ да сетісны римсаяслы.
Найӧ кывзісны менӧ да эз аддзыны мыжсӧ, мед позис вины менӧ. Кӧсйисны весиг лэдзны, но юдейяс паныд сувтісны талы. Та вӧсна меным ковмис корны кесарлысь мыждӧм. Дерт, эг сы вӧсна, медым мыжавны мыйыськӧ ассьым войтырӧс.
Та понда ме и кӧсйи аддзӧдчывны да сёрнитыштны тіянкӧд, ӧд ме пукала сійӧ Мортыс вӧсна, код вылӧ Израиль кутӧ лачасӧ».
Юдейяслӧн веськӧдлысьяс шуисны: «Миянлы нинӧм эз гижлыны Юдеясянь, весиг вокъяс воліганыс нинӧм эз юӧртны да нинӧм лёксӧ эз висьтавлыны тэ йылысь.
Ми кӧсъям кывны, мый тэ ачыд мӧвпалан.
Ми тӧдам, мый тайӧ велӧдӧмыслы быдлаын паныд сувтӧны».
Урчитӧм лунӧ локтіс Павел ордӧ зэв уна йӧз.
Павел асывсяньыс рытӧдзыс висьтавліс налы Енлӧн Юралӧм йылысь. Мӧисей Индӧд да пророк гижӧдъяс вылӧ мыджсьӧмӧн эскӧдіс найӧс Исус йылысь.
Ӧтияс эскисны, мӧдъяс эз эскыны.
Тадзи найӧ ас костаныс эз вермыны воны ӧти кывйӧ. Муналігас Павел шуис налы татшӧм кывъяс: «Бура шулӧма Вежа Лов миян батьяслы Исай пророк пыр:
— Мун да висьтав тайӧ войтырыслы:
Пельнаныд кутанныд кывзыны да онӧ гӧгӧрвоӧй, синнаныд кутанныд видзӧдны да онӧ аддзӧй.
Чорзьӧма тайӧ войтырыслӧн сьӧлӧмыс, сьӧкыд пеляӧсь, куньса синмаӧсь. Аддзынысӧ оз зільны, кывзынысӧ оз кӧсйыны, сьӧлӧмнаныс оз гӧгӧрвоны. Мелань бергӧдчынысӧ оз кӧсйыны, медым Ме бурдӧді найӧс.
Тӧдӧй, Ен мӧдӧдӧма мездмӧмсӧ ентӧдтӧмъяслы, найӧ и кыласны».
Тайӧс кылӧм бӧрын юдейяс мунісны ас костаныс ёна вензьӧмӧн.
Аслас нянь-сов вылын Павел оліс сэні кык во чӧж да сибӧдліс ас дорас быдӧнӧс. Сійӧ повтӧг да восьсӧн висьтавліс волысьяслы Енлӧн Юралӧм йылысь да велӧдіс Господь Исус Кристос йылысь.
Апостол Яковлӧн мӧдӧдӧм гижӧд
1 юр.
Гижӧ Яков, Енлӧн да Господь Исус Кристослӧн кесйӧг. Чолӧмала дас кык чужанкотырӧс, кодъяс разалӧмаӧсь став му пасьталаыс.
Вокъяс, долыда нимкодясьӧй, кор тіянлы ковмас нуны быдпӧлӧс сьӧкыдсӧ. Ті ӧд тӧданныд: эскӧмӧн кӧ нуанныд сьӧкыдсӧ, ті лоанныд зумыдӧсь.
А зумыдлуныс мед вайӧдас ассьыс уджсӧ тіян пытшкын помӧдз, медым ті вӧлінныд дзоньнас тыр-бурӧсь, да тіян эз вӧв некутшӧм тырмытӧмтор.
Тіян пиысь кӧ кодлыкӧ оз тырмы мывкыдлуныс, мед корӧ Енмыслысь, и сылы лоӧ сетӧма. Ӧд Енмыс быдӧнлы сетӧ лышкыда да шуасьтӧг.
Сӧмын корӧй эскӧмӧн да майшасьтӧг. Ӧд майшасьысь морт — саридзвывса гы кодь, кодӧс кыпӧдӧ тӧвнырыс да новлӧдлӧ ӧтарӧ-мӧдарӧ.
Мортыс кӧ кык ногӧн мӧвпалӧ ӧтитор йывсьыс, сійӧ нинӧм оз вӧч зумыдпырысь.
Татшӧм мортыс мед оз чайт босьтны мыйкӧ Енсяньыс.
Гӧль вок мед ошйысьӧ вылӧ пуктӧмнас. Озыр вок мед ошйысьӧ улӧ пуктӧмнас, ӧд сійӧ турунвывса дзоридз моз бырас.
Шонді петас, пӧжас да косьтас турунсӧ. Дзоридзыс сылӧн усьӧ и мичлуныс бырӧ.
Дзик тадзи кусӧ озыр мортлӧн мырсян-пессян олӧмыс.
Шуда сійӧ, коді вермӧ венны ыштӧдӧмсӧ, ӧд та бӧрти сылы лоӧ сетӧма Олӧмыслысь юркытш. Тайӧ юркытшсӧ Господь кӧсйысис сетны Сійӧс радейтысьяслы.
Ыштӧдӧм дырйи некод мед оз шу: «Енмыс менӧ ыштӧдӧ». Ӧд лёк вылас Енсӧ некод оз вермы ыштӧдны, и Ачыс Енмыс некодӧс оз ыштӧд.
Но быд мортӧс ыштӧдӧ сылӧн лёк кӧсйӧмыс, ӧд сійӧ ылӧдлӧ мортсӧ да кыскӧ сійӧс лёкас.
Лёк кӧсйӧмыс содӧ-быдмӧ да чужтӧ мыж, а вӧчӧм мыжыс чужтӧ кулӧм.
Муса вокъяс, некодлы энӧ сетӧй асьнытӧ ылӧдлыны.
Быдпӧлӧс бурсетӧмыс да тыр-бур козиныс воӧ вылісянь, югыдыслӧн Батьсянь. Сійӧ некор оз вежсьыв, Сылӧн югыдыс некор оз кус.
Ас кӧсйӧм сертиыс Сійӧ чужтіс миянӧс Збыльыслӧн Кывнас, медым Сылӧн вӧчӧмторъясысь ми вӧлім медводдзаясӧн.
Муса вокъяс, быдӧн мед лоӧ тэрыб кывзыны, но ньӧжмыд сёрнитны да скӧрмыны.
Ӧд мортлӧн скӧралӧмыс оз вай Ен нога веськыд олӧмсӧ.
Та вӧсна эновтчӧй быдпӧлӧс пежсьыс да лёк вӧчӧмысь, рам сьӧлӧмӧн сибӧдӧй тіянлы висьталӧм Кывсӧ, ӧд сійӧ вына мездыны тіянлысь ловнытӧ.
Энӧ лоӧй сӧмын кывзысьясӧн, но Кывйыс серти олысьясӧн. Ӧд куш кывзӧмнад сӧмын ылӧдланныд асьнытӧ.
Коді кылӧ Енлысь Кывсӧ, но оз ов сы серти, сійӧ рӧмпӧштанӧ чужӧмсӧ видзӧдысь кодь.
Сійӧ видзӧдлас ас вылас, а вешйӧм бӧрас дзик пыр вунӧдас чужӧмсӧ.
Но коді видзӧдӧ мездлунсӧ сетысь тыр-бур Индӧд вылӧ да олӧ сы серти, сійӧс лоӧ бурсиӧма уджъясыс пыр. Ӧд сійӧ оз вунӧд кывлӧмасӧ, но олӧ сы серти.
Кодкӧ тіян пиысь кӧ лыддьӧ асьсӧ вежавидзысьӧн, но быдлаӧ вомсӧ восьтӧ, сійӧ ылӧдлӧ асьсӧ. Татшӧм мортыслӧн вежавидзӧмыс нинӧм оз сулав.
Мортыс кӧ тӧждысьӧ батьтӧм-мамтӧм челядь вӧсна да дӧваяс вӧсна налӧн сьӧкыд нуигӧн, да видзӧ асьсӧ тайӧ мувывса пежсьыс, — тайӧ эм Ен Бать водзын сӧстӧм да пежасьтӧм вежавидзӧм.
2 юр.
Вокъяс, ті эсканныд Исус Кристослы, миян дзирдлуна Господьлы. Сідзкӧ, энӧ торйӧдӧй йӧзсӧ чужӧм вылӧ видзӧдӧмӧн.
Шуам, тіян чукӧртчанінӧ пырас озыр паськӧма, зарни чунькытша морт, пырас тшӧтш омӧлик паськӧма гӧль морт, и озыр паськӧмыс вылӧ видзӧдӧмӧн ті шуанныд сылы: «Пуксьы татчӧ, тані бурджык местаыс», а гӧль мортлы шуанныд: «Тэ сэтчӧ сувт» либӧ «Татчӧ пуксьы, менам кок дорӧ». Но тадзи вӧчигӧн ті юкланныд йӧзсӧ бурджык да лёкджык вылӧ да лоанныд лёк нога мыждысьясӧн.
Кывзӧй, муса вокъяс. Енмыс бӧрйис тайӧ муюгыдсьыс гӧльясӧс, медым озырмӧдны найӧс эскӧмӧн да вичмӧдны налы Юраланінсӧ, кодӧс Енмыс кӧсйысис сетны Сійӧс радейтысьяслы.
Но ті увтыртанныд гӧльясӧс.
Оз ӧмӧй озыръяс дзескӧдны тіянӧс да кыскыны тіянӧс ёрдӧ?
Оз ӧмӧй озыръяс лёкӧдны бур нимнытӧ, кодӧс сетӧма тіянлы?
Ті кӧ збыльысь оланныд Гижӧдыслӧн медыджыд Индӧд серти: «Радейт матыссатӧ асьтӧ моз», — бура вӧчанныд.
Но ті кӧ торйӧданныд йӧзсӧ чужӧм вылӧ видзӧдӧмӧн, сэки мыж вӧчанныд, тіянӧс мыждасны Индӧдсӧ торкалысьӧс моз.
Коді олӧ Индӧдыс серти, но торкӧ Индӧдсьыс кӧть ӧти тшӧктӧм, сійӧ лоӧ дзоньнас Индӧдсӧ торкалысьӧн.
Коді шуис: «Гозъя олӧмтӧ эн пежав», Сійӧ тшӧтш шуис: «Эн ви». Та вӧсна, гозъя олӧмтӧ кӧ он пежав, но виан кодӧскӧ, — лоан Индӧдсӧ торкалысьӧн.
Сідзкӧ, олӧй да сёрнитӧй на моз, кодъясӧс кутасны мыждыны мездлунсӧ сетысь индӧд серти.
Ӧд бурсьӧлӧмлун ёна ыджыдджык мыждӧм дорысь. Но коді оз ло бур сьӧлӧма мӧд дінӧ, сійӧс лоӧ мыждӧма бур сьӧлӧмтӧг.
Вокъяс, коді шуӧ «ме эска», а уджъясыс сылӧн абуӧсь, мый нӧ таысь бурыс?
Вермас-ӧ татшӧм эскӧмыс мездыны сійӧс?
Шуам, кутшӧмкӧ чойлӧн либӧ воклӧн кӧ абу колана паськӧмыс, весиг лун кежлӧ сёяныс, а тіян пиысь кодкӧ шуас сылы: «Мун лӧнь сьӧлӧмӧн, шонтысь да пӧткӧдчы», но ачыс оз сет сылы коланаторсӧ олӧм вылӧ, мый таысь бурыс?
Тайӧс позьӧ шуны тшӧтш эскӧм йылысь: мортыслӧн уджъясыс кӧ абуӧсь, сылӧн эскӧмыс кулӧма.
Дерт, кодкӧ вермас шуны: «Ӧтилӧн эм эскӧм, а мӧдлӧн — уджъяс».
Сылы тадзи вочавидза: «Петкӧдлы ассьыд эскӧмтӧ уджъястӧгыд, а ме петкӧдла ассьым эскӧмӧс уджъясын».
Тэ эскан: Енмыс ӧти, тэ бура вӧчан.
Весиг пеж ловъяс тадзи эскӧны да тіралӧны полӧмнысла.
Но кӧсъян-ӧ тӧдны, мывкыдтӧм мортӧй, мый уджъястӧм эскӧмыд — кулӧм эскӧм.
Миян батьным, Ӧвраам, вайис Исаакӧс, ассьыс писӧ, висьпуктанінӧ. Эз-ӧ тадзи вӧчигӧн сійӧ ло Ен водзын веськыдӧн?
Тэ аддзан, мый сылӧн эскӧмыс вӧлі йитчӧма уджъяскӧд, а уджыс пыр сылӧн эскӧмыс лои тыр-бурӧн.
Тадзи инісны Гижӧдысь кывъясыс: «Ӧвраам эскис Енлы, та вӧсна Енмыс шуис сійӧс веськыдӧн». Та вӧсна сійӧс шуӧма Енлӧн ёртӧн.
Ті аддзанныд, мый мортыс лоӧ веськыдӧн оз сӧмын эскӧмыс пыр, но и уджъясыс пыр.
Тадзи вӧлі тшӧтш Раавкӧд, кырсалысь анькӧд. Сійӧ сибӧдіс гортас израильса кыйӧдчысьясӧс да отсаліс налы пышйыны мӧд туйӧд. Тайӧ бур вӧчӧмыс вӧсна Енмыс лыддис сійӧс веськыдӧн.
Кыдзи вир-яйыс ловтӧг кулӧма, тадзи эскӧмыс уджъястӧг кулӧма.
3 юр.
Вокъяс, энӧ унаӧн зільӧй лоны велӧдысьясӧн. Ті ӧд тӧданныд, мый миянӧс, велӧдысьясӧс, кутасны чорыдджыка на мыждыны мукӧдыс дорысь.
Ми ставным унаторйын мыжмам.
Коді оз мыжмы сёрнинас, сійӧ тыр-бур морт да вермӧ дзоньнас кутны ассьыс вир-яйсӧ.
Ми кӧртвомалам вӧлӧс, медым сійӧ кывзысис миянлысь. Тадзи ми веськӧдлам сылӧн став вир-яйнас.
Босьтны кӧ корабльяс, найӧ сэтшӧм ыджыдӧсь, найӧс новлӧдлӧ ыджыд тӧвныр, но ичӧтик руль отсӧгӧн бӧжалысьыс веськӧдлӧ корабльнас кытчӧ кӧсйӧ. Тадзи артмӧ и кывнымкӧд: миян вир-яйын кывным — ичӧтик юкӧн, но сійӧ вермӧ ошйысьны ыджыд уджъясӧн.
Ичӧтик би вермӧ бырӧдны уна вӧр.
Миян кывным — тайӧ би. Миян вир-яйын сійӧ — лёк чукӧртанін, сійӧ пежалӧ дзоньнас вир-яйнымӧс. Ад бисянь ӧзйӧмӧн сійӧ сотӧ миянлысь став олӧмнымӧс.
Мортыс вермӧ лӧньӧдны быдпӧлӧс олысьӧс: пемӧсӧс, лэбачӧс, нюглясьысьӧс да саридзын уялысьӧс. Мортыс найӧс лӧньӧдӧма нин, а кывсӧ лӧньӧдны некод оз вермы. Лёкыс вӧсна кывсӧ лӧньӧдны он вермы, сійӧ тырӧма виана ядӧн.
Кывйӧн ми ошкам Ен Батьӧс, кывйӧн и ёрам Ен нога вӧчӧм мортӧс.
Ӧти вомысь петӧ ошкӧм и ёрӧм.
Вокъяс, тадзи оз вермы лоны.
Вермас ӧмӧй ӧти визувтанінысь петны юмов да курыд ва?
Вокъяс, инжир пу оз вермы вайны выя вотӧс, либӧ виноград пу — инжир вотӧс.
Ӧти визувтанінысь оз вермы петны сола да юмов ва.
Эм-ӧ тіян пӧвстын мывкыда да сюсь вежӧра морт? Эм кӧ, сійӧ мед петкӧдлас ассьыс мывкыдлунсӧ рам сьӧлӧмыс да бур оласногыс пыр.
Но тіян сьӧлӧмын кӧ эм курыд вежалӧм да асьтӧ радейтӧм, сідзкӧ, энӧ ошйысьӧй да асланыд ылӧгӧн энӧ вевттьӧй збыльсӧ.
Ӧд татшӧм мывкыдыс — абу вылісянь сетӧм мывкыд, сійӧ — мувывса, мортсянь да пеж ловъяссянь.
Кӧні вежалӧм да сӧмын асьтӧ радейтӧм, сэні кывзысьтӧмлун да быдпӧлӧс лёкыс.
Но вылісянь сетӧм мывкыдлуныс — медвойдӧр сӧстӧм, сэсся лӧнь, рам, кывзысьысь, тырӧма буралӧмӧн да бур уджъясӧн. Сійӧ оз торйӧд мортсӧ чужӧм вылӧ видзӧдӧмӧн, сійӧ ставсӧ вӧчӧ сьӧлӧмсяньыс.
Лӧньлунсӧ вайысьяс кӧдзӧны лӧньлунлысь кӧйдыс, а тайӧ кӧйдысыс вайӧ веськыда олӧмыслысь вотӧс.
4 юр.
Кытысь артмӧ тіян пӧвстын лёксьӧмыс да вензьӧмыс?
Оз-ӧ чужны найӧ тіян ыштӧмъяссянь, кодъяс дугдывтӧг ыпъялӧны-тышкасьӧны тіян вир-яйын?
Ті ыштанныд мый вылӧ кӧ, но нинӧм онӧ босьтӧй.
Ті виаланныд да вежаланныд, но тіянлы нинӧм оз вичмы.
Ті вензянныд да лёксянныд, но тіян нинӧм абу, ӧд ті онӧ корӧй.
А коранныд кӧ, тіянлы оз ло сетӧма, ӧд ті онӧ бур вылӧ корӧй. Ті кӧсъянныд могмӧдны сӧмын ассьыныд ыштӧмтӧ.
Енсӧ эновтысьяс, ті ӧмӧй онӧ тӧдӧй, мый мувывсакӧд ӧтувтчысь — Енлы паныд мунӧ?
Сідзкӧ, коді кӧсйӧ ӧтувтчыны мувывсакӧд, сійӧ Енлы паныд мунӧ.
Гашкӧ, ті чайтанныд, мый Гижӧдыс весьшӧрӧ висьталӧ: «вежӧгтӧмӧн радейтӧ лолыс, коді олӧ миян пытшкын».
Но Енлӧн буралӧмыс миян дінӧ ёна ыджыдджык.
Ӧд Гижӧдыс висьталӧ:
— Вылӧ кыпӧдчысьяслы Енмыс паныд мунӧ, а рамъяс дінӧ Сійӧ буралӧ.
Сідзкӧ, сетчӧй Енмыслы, паныд сувтӧй омӧльыслы, и сійӧ пышъяс тіян дінысь.
Матыстчӧй Ен дінас, и Сійӧ матыстчас тіян дінӧ.
Мыськӧй кинытӧ, мыж вӧчысьяс. Кык бана шаньгаяс, сӧстӧммӧдӧй сьӧлӧмнытӧ.
Шогсьӧй, сыркъялӧй да бӧрдӧй.
Тіян серамныд мед пӧрас бӧрдӧмӧ, а гажӧдчӧмныд — шогсьӧмӧ.
Раммӧдчӧй Господь водзын, и Сійӧ кыпӧдас тіянӧс.
Вокъяс, энӧ лёкӧдӧй ӧта-мӧднытӧ.
Лёкӧдӧ кӧ кодкӧ либӧ мыждӧ ассьыс воксӧ, сійӧ паныд мунӧ Индӧдыслы да мыждӧ Индӧдсӧ.
Но тэ кӧ мыждан Индӧдсӧ, сідзкӧ, тэ абу Индӧд серти олысь, а мыждысь.
Но Индӧдсӧ Сетысьыс да Мыждысьыс — ӧти. Сійӧ вермӧ мездыны и бырӧдны.
А тэ коді сэтшӧмыс, медым мӧдсӧ мыждыны?
Ӧні висьтала тіянлы, тадзи шуысьяслы: «Талун-аски ми мӧдӧдчам сэтшӧмтӧ карӧ да олам сэні во чӧж. Сэні кутам вузасьны да озырмӧдчыны».
Но ті весиг онӧ тӧдӧй, мый ваяс тіянлы аскиа луныс.
Ӧд тіян олӧмныд ру кодь, петкӧдчылас дженьыдик кад кежлӧ, а сэсся бырас.
Бурджык тайӧ кывъясыс пыдди шуны тіянлы: «Шогмана кӧ Господьлы да ловъяӧсь лоам, вӧчам сійӧ либӧ тайӧ». А ті сӧмын вылӧ кыпӧдчанныд да ошйысянныд аснаныд.
Но став тайӧ ошйысьӧмыс — лёктор.
Сідзкӧ, коді тӧдӧ, мый колӧ бурсӧ вӧчны, но оз вӧч, сійӧ мыжмӧ.
5 юр.
Ӧні висьтала тіянлы, озыръяс: сыркъялӧмӧн бӧрдӧй ыджыд шогъясысь, кодъяс суасны тіянӧс.
Тіян озырлунныд сісьмӧма, паськӧмнытӧ воз сёйӧма.
Тіян зарниныд да эзысьныд сімӧма. Тайӧ сімыс кутас висьтавны тіян мыжлун йылысь. Сійӧ би моз сотас тіянлысь вир-яйнытӧ.
Тайӧ бӧръя кадас ті чукӧртінныд аслыныд озырлунсӧ.
Со, кылӧ горзӧмыс тіян му вылын уджалысьяслӧн, кодъяслы ті энӧ мынтысьӧй. Ӧні найӧ гораа горзӧны, и налӧн горзӧмыс воис Господь Саваоф пельясӧдз.
Ті олінныд тайӧ му вылас лышкыда да быдторнас чӧсмасинныд. Ті тшӧгӧдінныд асьнытӧ, кыдзи пемӧсъясӧс тшӧгӧдӧны весиг начкысян лунӧ.
Ті мыждінныд да виинныд веськыда олысьӧс, сійӧ оз нин водзсась тіянлы.
Вокъяс, терпитӧмӧн виччысьӧй Господьлысь локтӧмсӧ.
Видзӧдлӧй, кутшӧм терпитӧмӧн виччысьӧ му вӧдитысь, медым босьтны мулысь дона быдтассӧ. Сійӧ виччысьӧ арся да тувсов зэръяс.
Ті тшӧтш дыр терпитӧй да лоӧй зумыдӧсь, ӧд Господьлӧн локтӧмыс матын нин.
Вокъяс, энӧ мыжалӧй ӧта-мӧднытӧ, медым Енмыс эз мыжды тіянӧс.
Ӧд Мыждысьыс сулалӧ нин ӧдзӧс дорын.
Вокъяс, видзӧдӧй пророкъяс вылӧ, кодъяс сёрнитісны Господь нимсянь. Найӧ терпитӧмӧн нуисны сьӧкыдсӧ.
Ми лыддям шудаӧн найӧс, кодъяс зумыда сулалісны помӧдз.
Ті, дерт, кывлінныд Иовлӧн зумыдлун йылысь да тӧданныд, мый Господь дасьтіс сылы.
Ӧд Господь мелі да бур сьӧлӧма.
Вокъясӧй, медвойдӧр кора тіянӧс, энӧ кӧсйысьӧй ни енэжӧн, ни муӧн, ни мукӧдторйӧн.
Тіян “да”-ныд мед лоӧ сӧмын “да”, тіян “ог”-ныд мед лоӧ сӧмын “ог”. Сэки тіянӧс оз мыждыны.
Тіян пиысь кӧ кодкӧ сьӧкыдалӧ, мед кевмысьӧ.
Нимкодясьӧ кӧ, мед сьылӧ Енмӧс ошкана сьыланкывъяс.
Висьӧ кӧ кодкӧ, мед корӧ вичкоса юрнуӧдысьясӧс. Найӧ мавтыштасны висьысьӧс выйӧн Господь нимсянь да кевмысясны сы вӧсна.
Сэки эскӧмӧн кевмысьӧмыс отсалас висьысьлы, и Господь бурдӧдас сійӧс.
А вӧчис кӧ сійӧ мыжъяс, сылысь мыжъяссӧ лоӧ прӧститӧма.
Висьталӧй ӧта-мӧд водзаныд ассьыныд мыжъястӧ да кевмысьӧй ӧта-мӧд вӧснаныд, медым бурдінныд.
Ӧд веськыда олысьлӧн кевмысьӧмыс вына, сійӧ вермӧ вӧчны унатор.
Илля вӧлі миян кодь морт. Сійӧ сьӧлӧмсяньыс кевмысис, медым эз зэр, и му вылас эз вӧв зэрыс куим во да джын.
Сэсся бара кевмысис, и енэжсяньыс киссис зэр. Сэки муыс сетіс быдтас.
Вокъяс, тіян пиысь кӧ кодкӧ кежас збыльсьыс, а мӧд морт бӧр бергӧдас сійӧс збыляс, тӧдӧй, мый мыжа мортӧс ылӧг туй вылысь бергӧдысь мездӧ сійӧс кулӧмысь да вевттьӧ сылысь уна мыж.
Апостол Петырлӧн медводдза мӧдӧдӧм гижӧд
1 юр.
Гижӧ Петыр, Исус Кристослӧн апостол. Чолӧмала йӧз муын олысьясӧс, Понтӧ, Галатияӧ, Каппадокияӧ, Асияӧ да Вифинияӧ разалӧм войтырӧс. Ен Бать водзысяньыс бӧрйӧма да вежӧдӧма тіянӧс Аслас Ловнас, медым ті кывзысинныд Исус Кристослысь да сӧстӧмминныд Сылӧн Вирнас.
Буралӧмыс да лӧньлуныс мед содас тіянлы.
Ошкӧм Енлы, миян Господь Исус Кристослӧн Батьлы. Ыджыд буралӧмыс вӧсна Исус Кристосӧс ловзьӧдӧм пыр Енмыс сетіс миянлы выль олӧм. Та вӧсна ми кутам ловъя лача босьтны сӧстӧм, сісьмытӧм да бырлытӧм озырлун, кодӧс видзӧма тіянлы енэжын. Эскӧмныд пыр Енлӧн выныс видзӧ тіянӧс мездмӧм вылӧ, и тайӧ мездмӧмыс воссяс бӧръя кадас.
Сідзкӧ, нимкодясьӧй, весиг ковмас кӧ ӧні шогсьыштны быдпӧлӧс сьӧкыд нуӧмысь. Зарниыс тӧдмавсьӧ биӧн. Тіян эскӧмныд, коді бырана зарниысь донаджык, тӧдмавсьӧ сьӧкыдлунъяс дырйи, медым Исус Кристос локтігӧн вичмис тіянлы ошкӧм, нимӧдӧм да дзирдлун. Кристосӧс ті энӧ аддзылӧй, но Сійӧ муса тіянлы. Ті онӧ на аддзӧй Сійӧс, но эсканныд Сылы. Тіян сьӧлӧмныд тырӧма ыджыдсьыс-ыджыд нимкодьлунӧн, та йылысь он вермы весиг висьтавнысӧ. Ӧд эскӧмныдлӧн медшӧр могыс — воӧдчыны мездмӧмас.
Пророкъяс пыдісянь тӧдмалісны-туялісны тайӧ мездмӧмсӧ. Найӧ водзвыв висьтавлісны тіянлы дасьтӧм буралӧм йылысь. Найӧ кӧсйисны тӧдмавны, кутшӧм кад вылӧ да мый вылӧ индіс на пытшкын олысь Кристослӧн Лолыс, кор Сійӧ водзвыв висьтавліс Кристослӧн сьӧкыдалӧмыс да Сійӧс виччысьысь дзирдлуныс йылысь.
Енмыс восьтіс пророкъяслы, мый тайӧс юӧртігӧн найӧ кесъялісны миянлы, а эз аслыныс. Ӧні тайӧс юӧртісны найӧ, кодъяс висьталісны тіянлы Бур Юӧрсӧ енэжсянь мӧдӧдӧм Вежа Лов вынӧн. Весиг анделъяс кӧсйӧны тӧдны тайӧ гусяторсӧ.
Сідзкӧ, лоӧй дасьӧсь да олӧй садь вежӧрӧн. Кутӧй зумыд лача Енлӧн буралӧм вылӧ, коді вичмас тіянлы Исус Кристос локтігӧн.
Лоӧй кывзысьысь челядь кодьӧн. Збыльсӧ тӧдтӧдз тіянӧн веськӧдлісны асланыд кӧсйӧмъясныд, но ӧні энӧ лэдзӧй налы веськӧдлыны аснаныд. Тіянӧс Корысьыс вежа. Сы моз лоӧй вежаӧсь быдторйын.
Гижӧма: «Лоӧй вежаӧсь, ӧд Ме вежа».
Ті кӧ шуанныд Батьӧн Сійӧс, коді чужӧм вылӧ видзӧдтӧг мыждӧ быдӧнӧс уджъясыс серти, сідзкӧ, олӧй тайӧ му вылас Енсьыс полӧмӧн. Ті ӧд тӧданныд, мый тіянӧс ньӧбӧма абу бырана эзысь да зарни вылӧ, медым мездыны тіянӧс весьшӧрӧ олӧмысь, коді вуджис тіянлы батьяссяньныд. Тіянӧс ньӧбӧма Кристослӧн дона Вир вылӧ. Сійӧ вӧлі тыр-бур да сӧстӧм Баля. Енмыс бӧрйис Сійӧс му пуксьытӧдзыс на да мӧдӧдіс тіян вӧсна бӧръя кадас. Сы пыр ті эсканныд Енмыслы, коді ловзьӧдіс Сійӧс да сетіс Сылы дзирдлунсӧ, медым ті эскинныд да кутінныд лача Енмыс вылӧ.
Лов отсӧгӧн збыльыслысь кывзысьӧмӧн ті сӧстӧмминныд, медым восьса сьӧлӧмӧн верминныд радейтны мукӧд эскысьӧс. Сідзкӧ, сьӧлӧмсяньныд радейтӧй ӧта-мӧднытӧ. Ті выльысь чужинныд энӧ сісьмана кӧйдыссянь, а сісьмытӧмсянь — Енлӧн ловъя да бырлытӧм Кывсянь.
Гижӧдыс висьталӧ: — Мортыс — турун кодь, сылӧн мичлуныс — дзоридз кодь.
Турун косьмӧ, дзоридз усьӧ,
а Господьлӧн Кывйыс помтӧг олӧ.
Тайӧ Кывйыс — Бур Юӧр, кодӧс висьталӧма тіянлы.
2 юр.
Ӧвсьӧй быдсяма лёк вӧчӧмысь, ылӧдчӧмысь, вежалӧмысь, суклясьӧмысь да энӧ лоӧй кык бана шаньгаясӧн. Зільӧй пӧткӧдчыны Ен Кывйӧн, кыдзи пузчужӧм кагаяс пӧткӧдчӧны йӧлӧн, медым сы отсӧгӧн быдминныд да лоинныд мездмӧмаӧсь.
Ті ӧд тӧданныд: Господь бур сьӧлӧма.
Сійӧ — ловъя из, Енмыслы зэв дона. Йӧзыс Сійӧс ӧтдортісны, но Енмыс бӧрйис Сійӧс. Локтӧй Сы дінӧ да вайӧй асьнытӧ ловъя из пыдди, медым Ен вӧчас тіянысь Аслас Ловлы оланін. Сэки лоанныд вежа кесъялысьясӧн да кутанныд вайны Ловсянь вись, коді шогмана Енмыслы Исус Кристос пыр.
Гижӧдыс висьталӧ:
— Сионӧ Ме пукта пельӧс из. Сійӧ — дона из, кодӧс Ме бӧрйи. Сылы эскысь оз янав.
Сідзкӧ, тіянлы, эскысьяслы, Сійӧ дона из. А эскытӧмъяслы — тайӧ изйыс, кодӧс шыбитісны керка лэптысьяс, лоис пельӧс изйӧн. Тайӧ изъяс найӧ крукасьӧны да усьӧны. Найӧ крукасьӧны, ӧд Ен Кывйыслысь оз кывзысьны. Тадзи налы шуӧма лоны.
Но ті — бӧрйӧм йӧз, Ӧксылӧн вежа кесъялысьяс. Ті — вежа войтыр, Енлӧн йӧз. Сійӧ бӧрйис тіянӧс, медым висьтавлінныд Сылӧн тыр-бурыс йылысь. Енмыс корис тіянӧс пемыдсьыс Аслас шензьӧдана югыдӧ.
Водзынсӧ ті энӧ вӧлӧй Ен войтырӧн, ӧні ті — Ен войтыр.
Водзынсӧ олінныд Енлӧн бурсетӧмтӧг, ӧні ті босьтінныд сійӧс.
Мусаяс, тайӧ му вылас ті ветлысь-мунысьяс кодьӧсь. Ёна кора тіянӧс: энӧ кывзысьӧй асланыд вир-яйлӧн лёк кӧсйӧмъяслысь, ӧд найӧ тышкасьӧны тіян ловкӧд. Ентӧдтӧмъяс пӧвстын олӧй бур ногӧн. Сэки найӧ, кодъяс лёкӧдӧны тіянӧс лёк вӧчысьясӧс моз, аддзасны бур вӧчӧмнытӧ да ошкасны Енсӧ Сылӧн локтігас.
Господьӧс пыдди пуктӧмӧн кывзысьӧй мортӧн индӧм быдпӧлӧс веськӧдлысьяслысь: ӧксылысь, ӧд сійӧ став вылас ыджыдыс, юралысьяслысь, ӧд ӧксы найӧс пуктӧма мыждыны лёк вӧчысьясӧс да ошкыны бур вӧчысьясӧс. Енмыс кӧсйӧ, медым ті бур вӧчӧмнаныд тупкинныд мывкыдтӧм йӧзлысь вомсӧ. Тіянлы сетӧма мездлун, сӧмын мездлунныд мед оз ло вевттьӧдӧн лёк вӧчӧмныдлы, но олӧй Енлӧн кесйӧгъяс моз.
Быдӧнӧс пыдди пуктӧй, вокъясӧс радейтӧй, Енсьыс полӧй, ӧксыӧс бурӧ пуктӧй.
Кесйӧгъяс, Енсьыс полӧмӧн кывзысьӧй асланыд ыджыдъяслысь. Кывзысьӧй энӧ сӧмын буръяслысь да рамъяслысь, а тшӧтш скӧръяслысь.
Мортыс кӧ кутӧ тӧд вылас Енлысь кӧсйӧмсӧ да нуӧ сьӧкыдсӧ лёксӧ вӧчтӧг — тайӧ шогмана Енмыслы.
Тіянӧс кӧ нӧйтӧны мыж вӧчӧмысь да терпитанныд тайӧс, сэки мыйысь тіянӧс ошкынысӧ?
Но ті кӧ сьӧкыдаланныд бурсӧ вӧчигӧн да терпитанныд тайӧс — тайӧ шогмана Енмыслы.
Дзик та вылӧ тіянӧс корӧма, ӧд Кристос нуис сьӧкыдсӧ тіян вӧсна. Тадзи Сійӧ петкӧдліс, медым ті олінныд Сы моз.
— Мыжсӧ Сійӧ эз вӧчлы, Сійӧ некор эз пӧръясьлы.
Сійӧс лёкӧдігӧн Сійӧ воча эз лёкӧд.
Сьӧкыдсӧ нуигӧн эз кӧсйысь мынтысьны лёк вӧчӧмӧн, а ставсӧ сетіс веськыда Мыждысьлы.
Миянлысь мыжъяснымӧс Аслас вир-яйын Сійӧ кыпӧдіс крест вылӧ, медым ми дугдім вӧчны мыжсӧ да олім веськыда. Сылӧн дойясӧн ті бурдінныд.
Ті вӧлінныд вошӧм ыжъяс кодьӧсь, но ӧні бергӧдчинныд тіянӧс Видзысь да тіян вӧсна Тӧждысьысь дінӧ.
3 юр.
Гӧтыръяс, кывзысьӧй асланыд верӧсъяслысь. Сэки верӧсъяс, кодъяс оз эскыны Енлӧн Кывлы, тіян олӧм вылӧ видзӧдӧмӧн висьтавтӧг-велӧдтӧг кутасны эскыны. Ӧд найӧ аддзасны тіянлысь сӧстӧм да Енсьыс полана оласногнытӧ.
Энӧ тӧждысьӧй мичмӧдны асьнытӧ ортсысанас: юрсинытӧ баситӧмӧн, зарни ӧшлӧмӧн да дона паськӧмӧн. Тіян мичлунныд мед лоӧ пытшкӧсса: рам да лӧнь сьӧлӧм. Тайӧ мичлуныс бырлытӧм, сійӧ дона Енмыслы.
Тадзи асланыс верӧсъяслысь кывзысьӧмӧн важӧн мичмӧдлісны асьнысӧ вежа аньяс, Ен вылӧ лача кутысьяс.
Сарра кывзысис Ӧвраамлысь да шуис сійӧс аслас ыджыдӧн.
Ті кӧ вӧчанныд бурсӧ нинӧмысь повтӧг, сідзкӧ, ті — Сарралӧн нывъяс.
Верӧсъяс, пыдди пуктӧй ассьыныд гӧтыръястӧ, олӧй накӧд бур мывкыдӧн. Дерт, найӧ тіян дорысь жебджыкӧсь, но налы тшӧтш вичмӧ Енсянь буралӧмыс да олӧмыс. Тадзи кӧ вӧчанныд, кевмысиганыд оз ло мытшӧдыс.
Медбӧрти кӧсъя шуны тіянлы: олӧй ӧти сьӧлӧмӧн да ӧти лолӧн, радейтӧй ӧта-мӧднытӧ, лоӧй меліӧсь да рамӧсь.
Лёк вӧчӧмысь энӧ мынтысьӧй лёкӧн да омӧльтӧмысь омӧльтӧмӧн.
Мӧдарӧ, бурсиӧй, ӧд ті тӧданныд, мый та вылӧ корӧма тіянӧс. Сэки тіянлы вичмас бурсиӧмыс.
— Кодлы муса олӧмыс, коді кӧсйӧ аддзыны шуда лунъяс, сійӧ мед видзас ассьыс кывсӧ лёк сёрниысь да вомсӧ ылӧдчӧмысь, мед ылыстчас лёксьыс да вӧчас бурсӧ, корсяс лӧньлунсӧ да кутчысяс сэтчӧ.
Ӧд Господь видзӧдӧ веськыда вӧчысьяс вылӧ да кылӧ налысь кевмӧмсӧ, а лёк вӧчысьяслы Господь паныд мунӧ, медым бырӧдны найӧс му вывсьыс.
Коді вӧчас тіянлы лёксӧ, ті кӧ сьӧлӧмсяньныд вӧчанныд бурсӧ?
Ті кӧ нуанныд сьӧкыдсӧ веськыда олӧм вӧснаныд, сідзкӧ, ті шудаӧсь.
Энӧ полӧй некодысь да энӧ майшасьӧй нинӧмысь.
Господь Енмӧс медвылӧ пуктӧй сьӧлӧманыд.
Юалас кӧ кодкӧ лачаныд йылысь, пыр лоӧй дасьӧсь вочавидзны сылы. Вочавидзӧй рам сьӧлӧмӧн да Енсьыс полӧмӧн.
Олӧй сідзи, мед сьӧлӧмныд эз мыжды тіянӧс. Сэки найӧ, кодъяс лёкӧдӧны тіянӧс лёк вӧчысьясӧс моз Кристоскӧд бур нога олӧмысь, яналасны асланыс кывъясысь.
Енмыс кӧ кӧсйӧ, мед ми нуим сьӧкыдсӧ, бурджык сьӧкыдавны бур вӧчӧмысь лёк вӧчӧм дорысь.
Кристос ӧтчыдысь нуис сьӧкыдсӧ миян мыжъяс вӧсна, медым вайӧдны миянӧс Ен дінӧ. Сійӧ, веськыда олысь, куліс лёк нога олысьяс вӧсна. Сылысь вир-яйсӧ вӧлі виӧма, но ловсӧ вӧлі ловзьӧдӧма. Ловнас Сійӧ муніс пемыдінын олысь ловъяс дінӧ да висьталіс налы юӧрсӧ. Тайӧ ловъясыс эз кывзысьны Енмыслысь, но Сійӧ дыр виччысис налысь кывзысьӧмсӧ Нойлӧн ковчег вӧчигдырйи. Сэні этшаӧн, сӧмын кӧкъямыс морт, мездмисны ва пыр.
Тайӧ лоӧмторйыс индӧ миян пыртчӧм вылӧ, сы пыр ми мездмам Исус Кристослӧн ловзьӧм вӧсна. Пыртчӧмыс — абу вир-яй вылысь няйт мыськӧм, но Ен водзын сӧстӧм сьӧлӧмӧн кӧсйысьӧм. Кристос кыпӧдчис енэжас да пуксис Ен веськыдладорӧ, Кристослысь кывзысьӧны анделъяс, енэжвыв ыджыдалысьяс да вынъяс.
4 юр.
Кристос вир-яйнас нуис сьӧкыдсӧ миян вӧсна. Сідзкӧ, ті тшӧтш лоӧй дасьӧсь нуны сьӧкыдсӧ, медым коляс кадсӧ тайӧ му вылас олінныд Ен кӧсйӧм серти, энӧ нин асланыд кӧсйӧм серти. Ӧд вир-яйнас сьӧкыдалысь ылыстчӧ мыж вӧчӧмысь.
Водзынсӧ ті вӧчинныд ентӧдтӧмъяс моз: олінныд лэдзчысьӧмӧн да лёк кӧсйӧмныд серти, кырсалінныд, кодалінныд-гажӧдчинныд да юрбитінныд зывӧк идолъяслы. Тырмас нин тадзи овнытӧ.
Ӧні ентӧдтӧмъяс шензьӧны, ӧд ті онӧ нин олӧй на моз лэдзчысьӧмӧн. Та вӧсна найӧ лёкӧдӧны тіянӧс.
Но налы ковмас вочавидзны Сылы, коді регыд кутас мыждыны ловъяясӧс да кулӧмаясӧс.
Дзик та могысь вӧлі висьталӧма Бур Юӧрсӧ тшӧтш кулӧмаяслы. Дерт, вир-яйнас найӧс лоӧ мыждӧма став йӧзсӧ моз. Но Бур Юӧрсӧ налы вӧлі висьталӧма, медым ловнас найӧ олісны Ен ногӧн.
Регыд ставыслы воас пом.
Сідзкӧ, олӧй бур мывкыдӧн да садь вежӧрӧн, медым верминныд кевмысьны.
Сьӧлӧмсяньныд радейтӧй ӧта-мӧднытӧ, ӧд муслуныс вевттьӧ уна мыж.
Сибӧдӧй ӧта-мӧднытӧ шуасьтӧг.
Енмыслӧн сетӧмторйыс унапӧлӧс. Сійӧ быдӧнлы козьналіс сетӧмторсӧ, медым ті кесъялінныд ӧта-мӧдныдлы. Сідзкӧ, бур ногӧн вӧдитчӧй Енсянь сетӧмторнас.
Коді висьталӧ, мед висьталӧ Енсянь.
Коді кесъялӧ, мед кесъялӧ Ен вынӧн. Сэки быдторйын лоӧ ошкӧмыс Енлы Исус Кристос пыр. Сылы ошкӧмыс, Сылӧн ыджыдалӧмыс нэмъяс чӧж.
Аминь.
Мусаяс, тіянлы кӧ паныдасьӧны топӧдан сьӧкыдлунъяс, тайӧ мед оз шензьӧд тіянӧс. Ӧд сьӧкыдлуныс паныдасьӧ, медым тӧдмавны тіянӧс. Мӧдарӧ, нимкодясьӧй, ӧд ті тшӧтш нуанныд Кристослысь сьӧкыдсӧ. Сэки Кристослӧн дзирдлуныс воссигӧн ті кутанныд ёна нимкодясьны.
Тіянӧс кӧ лёкӧдӧны Кристос ним вӧсна, ті шудаӧсь.
Ӧд Енлӧн дзирдлуна Лолыс тіянкӧд.
Йӧзыс омӧльтӧны Сійӧс, а ті ошканныд.
Сӧмын тіян пиысь некод мед оз сьӧкыдав морт виӧмысь либӧ гусясьӧмысь, лёк вӧчӧмысь либӧ суклясьӧмысь.
Но сьӧкыдалӧ кӧ кодкӧ Кристослы эскӧмысь, мед оз яндысь. Мӧдарӧ, мед ошкӧ Енсӧ таысь.
Мыждан кадыс матын нин. Медводз Енмыс кутас мыждыны Ассьыс войтырсӧ. Сідзкӧ, медводз кӧ кутас мыждыны миянӧс, сэки мый виччысьӧ найӧс, кодъяс оз кывзысьны Енлӧн Евангелльӧлысь?
— Веськыда олысь кӧ ӧдва мездмӧ, мый виччысьӧ Ентӧг олысьӧс да мыжаӧс?
Сідзкӧ, Ен кӧсйӧм серти сьӧкыдсӧ нуысьяс, сетӧй асьнытӧ дзоньнас эскана Ставсӧвӧчысьлы да водзӧ вӧчӧй бурсӧ.
5 юр.
Ӧні ме шыася вичкоса юрнуӧдысьяс дінӧ, ӧд ачым ме тшӧтш вичкоса юрнуӧдысь. Ме аддзылі Кристослысь сьӧкыдалӧмсӧ, да меным тшӧтш вичмас дзирдлуныс, коді воссяс Сылӧн локтігас. Ме ёна кора тіянӧс: видзӧй тіянлы сетӧм Енлысь йӧз чукӧрсӧ. Тӧждысьӧй на вӧсна нимкодьпырысь да Енлы шогмана ногӧн, энӧ мырдӧнпырысь. Вӧчӧй тайӧс сьӧлӧмсяньныд, а энӧ аслыныд мыйкӧ куралӧм могысь. Энӧ ыджыдалӧй Енлӧн йӧз чукӧр вылын, но асланыд оласногӧн петкӧдлӧй налы, кыдзи колӧ овны.
Медыджыд Видзысьыс локтас да козьналас тіянлы дзирдалан юркытш, коді оз сісьмы.
Томджыкъяс, кывзысьӧй вичкоса юрнуӧдысьяслысь.
Ставныд кывзысьӧй ӧта-мӧдныдлысь да лоӧй рам сьӧлӧмаӧсь.
Ӧд вылӧ кыпӧдчысьяслы Енмыс паныд мунӧ, а рамъяс дінӧ Сійӧ буралӧ.
Сідзкӧ, сетчӧй Енлӧн вына кипод улӧ, и ас кадӧ Сійӧ кыпӧдас тіянӧс.
Ассьыныд став тӧжд-могтӧ вайӧй Сылы, ӧд Сійӧ тӧждысьӧ тіян вӧсна.
Олӧй садь вежӧрӧн да пыр лоӧй дасьӧсь. Ӧд тіянлы паныд мунысьыс, омӧльыс, ветлӧ равзысь лев моз да корсьысьӧ, кодӧс эськӧ ньылыштны.
Сувтӧй сылы паныд зумыд эскӧмӧн. Тӧдӧй, мый став му пасьталаыс вокъясныд тшӧтш тіян моз нуӧны сьӧкыдсӧ. Тіянлы этша нин колис сьӧкыдавны.
Та бӧрти буралӧмнас озыр Ен, коді корис тіянӧс Исус Кристос пыр Аслас бырлытӧм дзирдлунӧ, мед ёнмӧдас да зумыдмӧдас тіянӧс да вӧчас тыр-буръясӧн.
Сылы ошкӧмыс, Сылӧн ыджыдалӧмыс нэмъяс чӧж.
Аминь.
Силуан отсӧгӧн ме гижи тіянлы тайӧ дженьыдик гижӧдсӧ. Сійӧс ме лыддя эскана вокӧн. Кӧсъя эскӧдны да ышӧдны тіянӧс: кутчысьӧй Енлӧн збыль буралӧмас, кодӧс сетӧма тіянлы.
Тіянӧс чолӧмалӧ вавилонса вичко. Енмыс бӧрйӧма сійӧс тіянӧс моз. Тіянӧс чолӧмалӧ тшӧтш Марк пиӧй.
Чолӧмалӧй ӧта-мӧднытӧ мусапырысь окыштӧмӧн.
Лӧнь олӧм ставныдлы, кодъяс Исус Кристос пытшкынӧсь.
Аминь.
Апостол Петырлӧн мӧд мӧдӧдӧм гижӧд
1 юр.
Гижӧ Симон-Петыр, Исус Кристослӧн кесйӧг да апостол. Чолӧмала тіянӧс, миян моз сьӧлӧманыд эскӧмсӧ босьтысьясӧс. Тайӧ донаторсӧ ми босьтім Исус Кристослӧн, миян Ен Мездысьнымлӧн веськыдлун вӧсна.
Буралӧмыс да лӧньлуныс мед содас тіянлы Енмӧс да Исус Кристос Господьнымӧс тӧдмалігӧн.
Ми тӧдмалім Сійӧс, коді корис миянӧс Аслас дзирдлунӧ да тыр-бурӧ. Сылӧн Ен вынсянь сетӧма миянлы став коланасӧ, медым ми олім вежавидзӧмӧн. Миянлы сетӧма зэв дона да ыджыд кӧсйысьӧмъяс, медым на отсӧгӧн ті верминныд ылыстчыны мувывса пежалана ыштӧмъясысь, да медым тіян пытшкын вӧлі енмалуныс. Та могысь зільӧй петкӧдлыны эскӧманыд бур вӧчӧм, бур вӧчӧманыд — тӧдӧмлун, тӧдӧмлунаныд — асьтӧ кутӧм, асьтӧ кутӧманыд — зумыдлун, зумыдлунаныд — вежавидзӧм, вежавидзӧманыд — воктӧ радейтӧм, воктӧ радейтӧманыд — муслун.
Тайӧ кӧ тіян эм да содӧ, сідзкӧ, Исус Кристос Господьнымӧс тіян тӧдмалӧмныд оз ло весьшӧрӧ да ті онӧ кольӧй вотӧстӧг.
Кодлӧн тайӧ абу, сійӧ синтӧм, нинӧм оз аддзы, сійӧ вунӧдӧма, мый сійӧс мыськалӧма важ мыжъяссьыс.
Вокъяс, тіянӧс корӧма-бӧрйӧма. Сідзкӧ, тӧждысьӧй, мед тайӧ лунысь-лун зумыдмас тіян пытшкын. Тадзи вӧчиганыд некор онӧ крукасьӧй. Сэки ті восьса ӧдзӧсӧд верманныд пырны миян Мездысь Господь Исус Кристослӧн помтӧм Юраланінӧ.
Та вӧсна ме быдпӧрйӧ кута казьтывны тіянлы та йылысь, кӧть эськӧ ті тӧданныд да зумыда сулаланныд тіянлы висьталӧм збыляс.
Тайӧ вир-яй чомъяс олігӧн ме лыддя коланаӧн садьмӧдны тіянӧс аслам казьтылӧмъясӧн. Тӧда, меным регыд ковмас кольны чомйӧс. Тайӧс восьтіс меным Исус Кристос Господьным.
Кута тӧждысьны, медым менам мунӧм бӧрын ставсӧ тайӧс пыр кутінныд тӧд выланыд.
Ми висьталім тіянлы миян Господь Исус Кристослӧн выныс да локтӧмыс йылысь. Тайӧ абу кутшӧмкӧ лӧсьӧдӧм мойд, ми ӧд асланым синмӧн аддзылім Сылысь ыджыд вынсӧ.
Ен Батьыс сетіс Сылы нимӧдӧмсӧ да дзирдлунсӧ, кор Вылысса дзирдлунсяньыс кыліс гӧлӧс шы: «Тайӧ Менам муса Пиӧй, Ме нимкодяся Сыӧн».
Тайӧ шуӧмсӧ ми кылім енэжсянь, кор вӧлім Исускӧд вежа керӧсын.
Нӧшта на, миян эм пророкъяслӧн веськыд кыв.
Ті бура вӧчанныд, кутчысянныд кӧ тайӧ кывъяс, ӧд сійӧ кыдзи пемыдінын ӧзйысь би. Сійӧ югдӧдас лунъюгыд пуксьытӧдзыс да сьӧлӧманыд асъя кодзув мыччысьтӧдзыс. Тӧдӧй, пророк гижӧдсӧ ачыс мортыс оз вермы гӧгӧрвоӧдны.
Ӧд пророк юӧрсӧ некор абу вӧлі висьталӧма мортлӧн кӧсйӧмсянь. Сійӧс висьтавлісны Вежа Лов ышӧдӧмсянь Енлӧн вежа йӧз.
2 юр.
Израиль войтыр пӧвстын вӧліны ылӧгпророкъяс, тадзи тіян пӧвстын тшӧтш лоасны ылӧгвелӧдысьяс. Найӧ ваясны тіянлы бырӧдан ылӧгвелӧдӧмъяс, весиг соссясны Ыджыдысь, коді ньӧбис найӧс. Тадзи найӧ кӧлаласны ас выланыс виччысьтӧм бырӧдӧмсӧ.
Унаӧн на вылӧ видзӧдӧмӧн пондасны овны лэдзчысьӧм оласногӧн. Татшӧмъясыс вӧсна збыль туйыс лоӧ серам туйын.
Медым курыштны мыйкӧ аслыныс, найӧ тывйыштасны тіянӧс мудер сёрнинаныс.
Но налы мыждӧмыс важӧн нин дась, найӧс бырӧдӧмыс матын нин.
Енмыс мыжӧ усьӧм анделъясӧс эз видз, шыбитіс найӧс пемыд адӧ да дорис Мыждан лунӧдз. Эз видз Сійӧ и Ентӧг олысьясӧн тырӧм воддза муюгыдсӧ — бырӧдіс ыджыд ваӧн.
Колис ловъяӧн сӧмын кӧкъямысӧс, ӧтиыс на пиысь вӧлі веськыдлун йылысь юӧртысь Ной. Ен мыждіс Содом да Гомора каръяс, биӧн бырӧдіс пӧимӧдз. Тайӧн петкӧдліс, мый жӧ виччысьӧ водзӧ Ентӧг олысьясӧс. Но веськыда олысь Лотӧс Енмыс мездіс. Лот ёна сьӧкыдаліс Ентӧг олысьяслӧн лэдзчысьӧм оласногысь. Быд лун тайӧ веськыда олысьыслӧн лолыс горзіс сы гӧгӧр олысь йӧзлысь лёк вӧчӧмсӧ аддзӧмысь-кылӧмысь. Господь тӧдӧ, кыдзи мездыны вежавидзысьӧс сьӧкыдалӧмсьыс, а лёк вӧчысьӧс Сійӧ видзӧ, мед чорыда мыждыны сійӧс Мыждан лунӧ. Торъя нин тайӧ инмӧ вир-яйлӧн лёкколӧмнас пежасьӧмаяслы да Енлысь Юралӧмсӧ мустӧмтысьяслы. Найӧ яндысьтӧмӧсь, асныраӧсь да оз повны лёкӧдны енэжвывса вынъясӧс. Анделъяс ёна вынаджыкӧсь да ёнджыкӧсь на дорысь, но найӧ оз мыжавны да оз лёкӧдны татшӧмъяссӧ Ен водзын.
Тайӧ йӧзыс асьныс оз гӧгӧрвоны, кодӧс лёкӧдӧны. Найӧ вӧрын шӧйтысь вежӧртӧм пемӧсъяс кодьӧсь, кодъясӧс лӧсьӧдӧма кыйӧм-виӧм вылӧ. Пемӧсъясӧс моз найӧс и лоӧ бырӧдӧма.
Лёк вӧчӧмсьыныс найӧ босьтасны водзӧс. Найӧ радейтӧны гажӧдчыны лунъюгыднас, яндысьтӧг пукалӧны тіянкӧд ӧти пызан сайын да пӧръясьӧмнас пежалӧны ставсӧ. Тайӧ налӧн чӧсмасянторйыс.
Налӧн синныс пыр ӧзъялӧ нывбабаяс вылӧ, найӧ оз пӧтлыны мыжсӧ вӧчӧмсьыс, ылӧдлӧны жеб эскысьясӧс.
Сьӧлӧмныс налӧн тырӧма горшлунӧн, найӧ ёрӧмыслӧн пиян.
Найӧ кежисны веськыд туйсьыс да ылалісны. Найӧ мунӧны Восорлӧн Валаам пиыс кок туйӧд, кодлы лёк ногӧн шедӧдны озырлунсӧ вӧлі сьӧлӧм сертиыс. Но сійӧс янӧдӧма вӧлі лёктор вӧчӧмсьыс: осёл, кывтӧм пемӧс, шыасис морт моз да ӧлӧдіс пророкӧс йӧйталӧмсьыс.
Тайӧ ылӧгвелӧдысьясыс косьмӧм юкмӧс да тӧвнырӧн новлӧдлан кымӧръяс кодьӧсь. Татшӧмъясыслы век кежлӧ дасьтӧма сап сьӧд пемыдін.
Тшап да ковтӧм сёрнинаныс найӧ ӧзтӧны вир-яйлысь лёкколӧмсӧ да зільӧны кыскыны лэдзчысьӧм оласногӧ найӧс, кодъяс муртса на мынӧмаӧсь ылалӧмаясысь.
Ылӧгвелӧдысьяс кӧсйысьӧны сетны налы мездлун, кӧть асьныс найӧ пежыслӧн кесйӧгъяс.
Ӧд коді мортсӧ вермӧма, сылӧн сійӧ и кесйӧг.
Мездысь Исус Кристос Господьнымӧс тӧдмалӧм бӧрын кӧ мувывса пежсьыс ылыстчысьяс бара бергӧдчӧны важас, да лёкыс кӧ вермӧ найӧс, сэки татшӧмъясыслы воддза дорсьыс ёна лёкджык лоӧ.
Бурджык эськӧ вӧлі, найӧ кӧ эз тӧдлыны веськыдлуныслысь туйсӧ. Ӧд найӧ тӧдісны тайӧс, но бӧр бергӧдчисны налы сетӧм вежа тшӧктӧмысь.
Татшӧмъясыслы бура лӧсялӧ тайӧ шусьӧгыс: «Пон бергӧдчӧ аслас вос дорӧ», да нӧшта: «Мыськӧм порсь бӧр мунӧ туплясьны няйтӧ».
3 юр.
Донаясӧй, тайӧ менам мӧд гижӧд нин тіянлы. Кыкнан гижӧдас аслам казьтылӧмъясӧн зіли ышӧдны тіянӧс мӧвпавны сӧстӧма. Кутӧй тӧд выланыд вежа пророкъяслысь важысянь шуӧмсӧ да Мездысь Господьлысь апостолъяс пыр сетӧм тшӧктӧмсӧ.
Тӧдӧй, бӧръя кадӧ локтасны тіянӧс серам туйӧ пуктысьяс, асланыс лёк кӧсйӧмӧ сетчӧмаяс. Найӧ пондасны шуны: «Кӧні нӧ сійӧ Локтысьыс, коді кӧсйысьліс тай?
Ӧд миян батьяс кулісны нин, но ставыс коли важ мозыс: му пуксьӧмсяньыс нинӧм эз вежсьы».
Тадзи мӧвпалысьяс быттьӧ оз тӧдны, мый Ен Кывйӧн артмӧдӧма енэжсӧ да мусӧ, вӧчӧма ваысь да ва отсӧгӧн, и сэкся муюгыдсӧ вӧлі бырӧдӧма ваӧн.
Ӧнія енэжсӧ да мусӧ сійӧ жӧ Кывйыс кутӧ да видзӧ биӧн бырӧдӧм вылӧ. Тайӧ лоӧ Мыждан лунӧ, кор Ентӧг олысьясӧс лоӧ бырӧдӧма.
Мусаясӧй, кутӧй тӧд выланыд: Господьлӧн ӧти луныс сюрс во кодь, сюрс воыс — ӧти лун кодь.
Кодсюрӧ чайтӧны, мый Господьным нюжмасьӧ олӧмӧ пӧртны кӧсйысьӧмсӧ, но Сійӧ оз нюжмась, а терпитӧ миянӧс. Сійӧ оз кӧсйы, мед кодкӧ вошис, но кӧсйӧ, мед быдӧн бергӧдчис мыжъяссьыс.
Господьлӧн луныс воас виччысьтӧг, войся гусясьысь моз. Сэки енэжыс ыджыд шыӧн бырас, став ентыкӧлаыс ыпъялана биысь киссяс, а муыс да ставыс, мый сы вылын, сотчас.
Ставыс кӧ тадзи киссяс, сэки кутшӧм вежаӧн да веськыдӧн колӧ лоны тіянлы. Ті ӧд ёна кӧсъянныд да виччысянныд, мед ӧдйӧджык нин воас Енлӧн луныс. Сійӧ лунӧ енэжыс ыпъялан биысь сотчас да киссяс, доналӧм ентыкӧлаыс сылас.
Но Енлӧн кӧсйысьӧмыс серти ми виччысям выль енэж да выль му, кӧні кутас ыджыдавны веськыдлун.
Сідзкӧ, мусаясӧй, тайӧс виччысиганыд тӧждысьӧй, медым сувтны Ен водзӧ сӧстӧмӧн да мыжтӧмӧн, мед тіян сьӧлӧмын вӧлі лӧньлун.
Енлысь терпитӧмсӧ лыддьӧй аслыныд мездмӧмӧн. Та йылысь гижліс тіянлы Ен вежӧра дона Павел вокным. Татшӧмторъяссӧ сійӧ висьталӧ быд гижӧдын. Мыйсюрӧ сэтысь сьӧкыд гӧгӧрвонысӧ. Та вӧсна унаӧн ичӧт мывкыднысла да жеб эскӧмнысла сылысь гижӧдъяссӧ мукӧд Гижӧдсӧ моз бергӧдӧны мӧдарӧ. Тадзи кӧлалӧны ас выланыс бырӧдӧмсӧ.
Та вӧсна, мусаясӧй, водзвыв тайӧс тӧдӧмӧн видзчысьӧй, медым энӧ шедӧй Ентӧг олысьяслӧн ылӧдӧмӧ да энӧ усьӧй зумыд подув вывсьыс. Быдмӧй буралӧмас да миян Мездысь Исус Кристос Господьнымӧс тӧдмалӧмас.
Сылы ошкӧмыс ӧні да нэмъяс чӧж.
Аминь.
Апостол Иоанлӧн медводдза мӧдӧдӧм гижӧд
1 юр.
Ми висьталам сы йылысь, мый вӧлі водзысяньыс, мый кывлім, мый аддзылім ас синмӧн, мый видзӧдалім да мый видлалім ас киӧн — ми висьталам олӧмыслӧн Кыв йылысь. Олӧмыс петкӧдчис, да ми аддзылім Сійӧс. Ӧні висьталам Сы йылысь, юӧртам тіянлы помтӧм Олӧмыс йылысь. Сійӧ вӧлі Батьыскӧд, ӧні Сійӧс восьтӧма миянлы. Аддзывлӧм-кывлӧмыс йылысь висьталам тіянлы, мед эськӧ ті вӧлінныд миянкӧд ӧтув. А ми ӧтувъяӧсь Батьыскӧд да Сылӧн Исус Кристос Пиыскӧд.
Ми гижам та йылысь, медым ті верминныд тырвыйӧ нимкодясьны.
Енмыс эм югыд, Сы пытшкын пемыдыс абу. Тайӧ юӧрсӧ ми кывлім Ен Писянь, ӧні юӧртам сійӧс тіянлы.
Шуам кӧ: “Ми ӧтув Сыкӧд”, а асьным ветлам пемыдас, сідзкӧ, пӧръясям да огӧ олӧй збыльыс серти.
Сы моз кӧ югыдас ветлам, сэки миян эм ӧта-мӧдкӧд ӧтувтчӧм, сэки Исус Кристос Ен Пилӧн Вирыс сӧстӧммӧдӧ миянӧс быдпӧлӧс мыжысь.
Шуам кӧ: “Миян мыжыс абу”, ми пӧрйӧдлам асьнымӧс, и збыльыс абу миян пытшкын.
Ми кӧ висьталам мыжнымӧс, сэки веськыд да эскана Ен прӧститӧ миянлысь мыжсӧ да весалӧ миянӧс быд лёкысь.
Шуам кӧ: “Ми эгӧ вӧчӧй мыжсӧ”, петкӧдлам Енсӧ пӧръясьысьӧн, да Сылӧн кывйыс оз ов миян пытшкын.
2 юр.
Менам челядь.
Гижа тайӧс тіянлы, медым ті энӧ вӧчӧй мыжсӧ.
А мыжмас кӧ кодкӧ, тӧдӧй: Бать водзын миян эм веськыд Дорйысь — Исус Кристос.
Сійӧ — миян мыжъясысь вештысян вись, и абу сӧмын миян, а став муюгыдыслӧн мыжъясысь.
Олам кӧ Сылӧн тшӧктӧмъяс серти, тайӧн петкӧдлам, мый ми тӧдам Сійӧс.
Коді шуӧ: “Ме тӧда Сійӧс”, но тшӧктӧмъяссӧ Сылысь торкӧ, сійӧ пӧръясьӧ, да сы пытшкын збыльыс абу.
Коді олӧ Сылӧн Кывйыс серти, сы пытшкын збыльысь Енлӧн муслуныс воӧма тыр-бурӧдз. Та серти тӧдам, мый ми Сы пытшкынӧсь.
Коді шуӧ: “Ме Сы пытшкын”, сылы колӧ овны Сы моз.
Мусаяс, гижа тіянлы ог выль, а важ тшӧктӧм. Сійӧс ті тӧданныд водзысяньыс нин.
Тайӧ кывсӧ, важ тшӧктӧмсӧ, ті кывлінныд водзынджык нин.
Збыльвылас, ме гижа выль тшӧктӧм. Сійӧ збыльмӧ Кристос пытшкын да тіян пытшкын, ӧд пемыдыс вешйӧ, а збыль югыдыс югдӧдӧ нин.
Коді шуӧ: “Ме ветла югыдас”, а воксӧ ассьыс мустӧмтӧ, сійӧ пемыдас на.
Воксӧ радейтысь ветлӧ югыдас, да сы пытшкын крукӧдыс абу.
Воксӧ мустӧмтысь ветлӧ пемыдас, сійӧ оз тӧд, кытчӧ мунӧ, ӧд пемыдыс тупкӧма сылысь синсӧ.
Челядь, тіянлы гижа, ӧд Кристос ним вӧсна прӧститӧма мыжнытӧ.
Батьяс, тіянлы гижа, ӧд ті тӧданныд Водзысянь Олысьсӧ.
Том войтыр, тіянлы гижа, ӧд ті верминныд омӧльсӧ.
Челядь, тіянлы гижа, ӧд ті тӧданныд Ен Батьӧс.
Гижи тіянлы, батьяс, ӧд ті Водзысянь Олысьсӧ тӧданныд.
Гижи тіянлы, том войтыр, ӧд ті ёнӧсь, Енлӧн Кывйыс олӧ тіян пытшкын да ті верминныд омӧльсӧ.
Энӧ радейтӧй муюгыдсӧ да мый сэні эм. Кодлы муса муюгыдыс, сылы Батьыс абу муса.
Ӧд тайӧ муюгыдас ыджыдалӧ вир-яйлӧн кӧсйӧм, синъяслы колӧм да ыкшаасьӧм. Тайӧ абу Батьсянь, ставыс тайӧ муюгыдыслӧн.
Муюгыдыс став аслас колӧм-кӧсйӧмнас бырас, а Ен кӧсйӧм серти олысь пондас овны помтӧг.
Челядь, ӧні бӧръя кад.
Ті кывлінныд, антикрист пӧ локтас.
Ӧні уна антикрист нин петкӧдчис. Та серти тӧдам, мый бӧръя кад пуксис.
Найӧ петісны миян пӧвстысь, но найӧ эз вӧвны миянкӧд ӧтув.
Вӧліны кӧ миянкӧд ӧтув, кольччисны эськӧ миянкӧд.
Но налӧн петӧмыс висьталӧ, мый найӧ абу миянкӧд.
А тіянӧс мавтыштӧма Вежаыс, да ті тӧданныд ставсӧ.
Ме гижа тіянлы ог сы вӧсна, мый ті онӧ тӧдӧй збыльсӧ, мӧдарӧ, ті сійӧс тӧданныд да. Ті ӧд тӧданныд: збыльсяньыс ылӧгыс оз лок.
Коді нӧ ылӧдчысьыс? Абу-ӧ сійӧ, коді шуӧ, Исус пӧ абу Кристос.
Татшӧмыс антикрист. Сійӧ соссьӧ Батьсьыс да Письыс.
Коді соссьӧ Письыс, сылӧн абу и Батьыс.
Коді сибӧдӧ Писӧ, сылӧн и Батьыс эм.
Сідзкӧ, мый ті кывлінныд водзысяньыс, сійӧ мед олас тіян пытшкын.
Тайӧ кӧ лоӧ тіян пытшкын, сэки Пиыс да Батьыс пытшкын лоанныд.
Сійӧ кӧсйысис сетны миянлы помтӧм олӧм.
Вылынджык ме гижи тіянӧс ылӧдысьяс йылысь.
Но тіян эм Вежасянь мавтыштӧм. Та вӧсна абу колана, мед кодкӧ велӧдіс тіянӧс.
Ӧд мавтыштӧмыс велӧдӧ тіянӧс быдторйӧ, висьталӧ збыльсӧ да оз пӧръясь. Сідзкӧ, олӧй велӧдӧм сертиыс.
Челядь, лоӧй Сы пытшкынӧсь, медым Сылӧн локтігӧн ми вӧлім повтӧмӧсь, мед эз вӧв яндзим миянлы сувтны Сы водзӧ.
Ті кӧ тӧданныд, мый Сійӧ веськыд, тӧдӧй: веськыда вӧчысь Сысянь чужӧма.
3 юр.
Видзӧдӧй, кутшӧм мусаӧсь ми Батьлы: Сійӧ сетіс миянлы шусьыны да лоны Енлӧн ныв-пиӧн.
Муюгыдсаыс оз тӧд миянӧс, Сійӧс оз тӧд да.
Мусаясӧй, ӧні ми Енлӧн ныв-пи.
Кодӧн лоам, тайӧ эз на воссьы.
Тӧдам сӧмын, кор воссяс, лоам Сы кодьӧсь, ӧд сэки аддзам Сійӧс сэтшӧмӧн, кутшӧм Сійӧ эм.
Сы вылӧ татшӧм лача кутысь сӧстӧммӧдӧ асьсӧ, мед лоны Сы кодь сӧстӧмӧн.
Мыжсӧ вӧчысь мунӧ Индӧдлы паныд, ӧд мыжыс — тайӧ Индӧдлы паныд мунӧм.
Ті тӧданныд, мый Кристос локтіс босьтны миянлысь мыжъяс.
Сы пытшкын мыжыс абу.
Сы пытшкын олысь мыжсӧ оз вӧч, а мыжсӧ вӧчысь эз аддзыв да оз тӧд Сійӧс.
Челядь, энӧ сетӧй ылӧдны тіянӧс некодлы.
Веськыда вӧчысь — сійӧ Кристос кодь веськыд.
А мыжсӧ вӧчысь — омӧльсянь, ӧд омӧльыс водзысянь мыжсӧ вӧчӧ.
Та вӧсна Ен Пи и локтіс, мед жугӧдны омӧльыслысь уджъяссӧ.
Енсянь чужысь мыжсӧ оз вӧч, сы пытшкӧ бур кӧйдыс вужъясьӧма.
Татшӧмыс мыжсӧ вӧчны оз вермы, ӧд сійӧ Енсянь чужӧма.
Коді оз веськыда вӧч, да коді мустӧмтӧ воксӧ, сійӧ абу Енсянь. Та серти тӧдмалам Енлысь ныв-писӧ да омӧльлысь йылӧмсӧ.
Миянлы колӧ радейтны ӧта-мӧдӧс. Тайӧ юӧрсӧ ті кывлінныд водзысяньыс. Огӧ лоӧй Каин кодьӧсь, ӧд сійӧ вӧлі омӧльсяньыс, да виис ассьыс воксӧ.
Мыйла виис?
Каинлӧн уджъясыс вӧліны лёкӧсь, а вокыслӧн — веськыдӧсь.
Энӧ шензьӧй, вокъясӧй, муюгыдсаыс кӧ мустӧмтӧ тіянӧс.
Ми тӧдам: ми вуджим кулӧмсьыс олӧмӧ, ӧд радейтам вокъяснымӧс.
Коді оз радейт воксӧ — кольӧ кулӧмас.
Воксӧ мустӧмтысь — сійӧ морт виысь.
Ті тӧданныд, мый морт виысь пытшкын помтӧм олӧмыс абу.
А муслунсӧ ми тӧдмалім сы серти, мый Кристос сетіс Ассьыс олӧмсӧ миян вӧсна.
Сідзкӧ, миянлы тшӧтш колӧ сетны олӧмнымӧс вокъясным вӧсна.
Мортыс кӧ вокыслысь гӧльлунсӧ аддзигӧн чорзьӧдӧ сьӧлӧмсӧ да оз отсав сылы, кӧть сылӧн аслас ставыс эм, вермас-ӧ татшӧм морт пытшкас лоны Енлӧн муслуныс?
Челядьӧй, кутам радейтны ӧта-мӧднымӧс огӧ кывъясӧн да сёрниӧн, но збыль сертиыс да уджъясӧн.
Та серти тӧдмалам, мый ми збыльыслӧн. Сьӧлӧм кӧ мыждӧ миянӧс, ми вермам лӧньӧдны сьӧлӧмнымӧс Ен водзын. Енмыс ӧд ыджыдджык миян сьӧлӧмысь, Сійӧ ставсӧ тӧдӧ.
Мусаясӧй, сьӧлӧмным кӧ оз мыжды миянӧс, ми вермам повтӧг локны Ен водзӧ. Сэки мый корам, босьтам Сысянь, ӧд олам Сылӧн тшӧктӧмъяс серти да вӧчам Сылы шогманасӧ.
А Сійӧ тшӧктіс, медым ми эским Сылӧн Пилы, Исус Кристослы, да тшӧктӧмыс серти радейтім ӧта-мӧдӧс.
Коді кутчысьӧ Сылӧн тшӧктӧмъясӧ, сійӧ олӧ Кристос пытшкын, а Кристос — сы пытшкын.
А мый Сійӧ миян пытшкын, тӧдам Ловсяньыс, кодӧс Сійӧ сетіс миянлы.
4 юр.
Мусаясӧй, энӧ эскӧй быд ловлы, тӧдмалӧй, Енсянь-ӧ сійӧ. Ӧд уна ылӧгпророк ӧні муюгыдас.
Енсянь-ӧ лолыс, тӧдмаланныд тадзи: висьталӧ кӧ лолыс, мый Исус Кристос локтіс вир-яйын, сійӧ Енсянь. Оз кӧ висьтав, мый Исус Кристос локтіс вир-яйын, сійӧ абу Енсянь, сійӧ антикристсянь. Тайӧ — антикристлӧн лолыс, код йылысь ті кывлінныд, мый сійӧ локтас, и ӧні сійӧ муюгыдас нин.
Челядь, ті Енсянь. Ті верминныд ылӧгпророкъясӧс, ӧд тіян пытшкын Олысьыс ёна ыджыдджык муюгыдсасьыс.
Найӧ муюгыдсьыс, та вӧсна и сёрнитӧны муюгыдсаыс моз, и муюгыдыс кывзӧ найӧс.
А ми Енсянь.
Енсӧ тӧдысь кывзӧ миянӧс, а коді абу Енсянь, сійӧ оз кывзы миянӧс.
Та серти тӧдмалам збыльыслысь ловсӧ да ылӧгыслысь ловсӧ.
Мусаясӧй, кутам радейтны ӧта-мӧднымӧс, ӧд муслуныс Енсянь.
Коді радейтӧ, сійӧ Енсянь чужӧма да тӧдӧ Енсӧ.
Коді оз радейт, сійӧ оз тӧд Енсӧ, ӧд Енмыс эм муслун.
Енмыс мӧдӧдіс тайӧ муюгыдас Ассьыс ӧтка Писӧ, медым Сы пыр сетны миянлы олӧм.
Тадзи Сійӧ петкӧдліс миян дінӧ Ассьыс муслунсӧ. Муслуныс абу сыын, мый Енмыс вӧлі муса миянлы, но — сыын, мый ми вӧлім мусаӧсь Сылы. Сійӧ сетіс Ассьыс Писӧ вись пыдди, мед вештысьны миян мыжъясысь.
Мусаясӧй, Енмыс кӧ татшӧма радейтіс миянӧс, миянлы тшӧтш колӧ радейтны ӧта-мӧдӧс.
Енсӧ некод некор эз аддзыв.
Ӧта-мӧдӧс кӧ радейтам, сідзкӧ, Енмыс миян пытшкын да Сылӧн муслуныс тыр-бурӧдз воис сьӧлӧманым.
Ен сетіс миянлы Ассьыс Ловсӧ. Та серти тӧдам, мый ми Сы пытшкынӧсь, а Сійӧ миян пытшкын.
Батьыс мӧдӧдіс Писӧ мездыны муюгыдсӧ. Ми ас синмӧн аддзылім тайӧс, и ӧні висьталам та йылысь.
Коді шуӧ Исусӧс Ен Пиӧн, Енмыс сы пытшкын, а сійӧ Ен пытшкын.
Ми тӧдмалім Енлысь миян дінӧ муслунсӧ да эским Сылӧн муслунас.
Енмыс эм муслун. Коді олӧ муслун пытшкас, сійӧ Ен пытшкын, а Енмыс сы пытшкын.
Сідзкӧ, муслуныс тыр-бурӧдз воӧма миян пытшкын. Та вӧсна вермам повтӧг сувтны Мыждан лунӧ, ӧд ми тайӧ муюгыдас Кристос кодьӧсь.
Муслунас абу полӧмыс, ӧд тыр-бур муслуныс вӧтлӧ полӧмсӧ.
Полӧмас олӧ мыждӧм, та вӧсна полысьлӧн муслуныс абу на тыр-бур.
Кутамӧй радейтны Енмӧс, ӧд медводз Сійӧ радейтіс миянӧс.
Коді шуӧ: “Ме Енсӧ радейта”, а воксӧ ассьыс мустӧмтӧ, сійӧ пӧръясьӧ.
Оз кӧ радейт воксӧ, кодӧс аддзӧ, вермас-ӧ радейтны Енсӧ, кодӧс оз аддзы?
Миян эм Енсянь тшӧктӧм: «Енмӧс радейтысь, радейт тшӧтш воктӧ ассьыд».
5 юр.
Эскам кӧ, мый Исус — сійӧ Кристос, ми Енсянь чужӧмаӧсь. Муса кӧ миянлы Чужтысьыс, муса и Сысянь чужысьыс.
Радейтам кӧ Енсӧ да олам Сылӧн тшӧктӧмъяс серти, та серти тӧдам, мый ми Ен челядьӧс тшӧтш радейтам.
Тшӧктӧмъяс серти олӧмыс — тайӧ Енсӧ радейтӧм, а Сылӧн тшӧктӧмъясыс абу сьӧкыдӧсь.
Ӧд Енсянь чужысь вермӧ муюгыдсӧ.
Тайӧ вермӧмыс — миян эскӧм, кодӧн муюгыдсӧ вермӧма.
Коді нӧ вермӧ муюгыдсӧ? Сійӧ, коді эскӧ, мый Исус — Енлӧн Пи.
Исус Кристос локтіс ваӧн, вирӧн да Лолӧн, эз сӧмын ваӧн, но ваӧн да вирӧн.
Та йылысь Лов висьталӧ, ӧд Лолыс эм збыльыс.
Енэжас эм куим висьталысь: Бать, Кыв да Вежа Лов.
Тайӧ куимыс ӧти.
Му вылас тшӧтш куим висьталысь: Лов, ва да вир.
Тайӧ куимыс висьталӧ ӧтитор йылысь.
Ми сибӧдам мортлысь висьталӧмсӧ, но Енлӧн висьталӧмыс ёна ыджыдджык, ӧд сійӧс Ачыс Енмыс висьталӧ. Сійӧ висьталӧ Аслас Пи йылысь.
Коді эскӧ Ен Пилы, сылӧн сьӧлӧмас эм тайӧ висьталӧмыс.
Коді оз эскы Енмыслы, пуктӧ Сійӧс пӧръясьысь туйӧ, ӧд тайӧ мортыс оз эскы Пи йывсьыс Енлӧн висьталӧмыслы.
А висьталӧмыс татшӧм: Ен сетӧма миянлы помтӧм олӧм, и тайӧ олӧмыс Пиыс пытшкын.
Кодлӧн эм Пиыс, сылӧн эм олӧмыс.
Кодлӧн абу Ен Пиыс, сылӧн олӧмыс абу.
Тайӧс гижи тіянлы, Ен Пи нимӧ эскысьяслы, мед ті тӧдінныд, мый Ен Пилы эскӧмныд вӧсна тіян эм помтӧм олӧм.
Ми вермам повтӧг локны Ен водзӧ, ми ӧд тӧдам: корӧмным кӧ лӧсялӧ Сылӧн кӧсйӧмлы, Сійӧ кылӧ миянӧс.
А тӧдам кӧ, мый Сійӧ кылӧ миянлысь быд корӧм, тӧдам тшӧтш, мый Сійӧ сетас корӧмасӧ.
Кор аддзан, мый вокыд мыжӧ усьӧма, но мыжыс оз вайӧд кулӧмӧ, кевмысь сы вӧсна. Ен сетас сылы олӧм, дерт, мыжыс кӧ оз кулӧмӧ вайӧд.
Эм кулӧмӧ вайӧдысь мыж, но ме ог кор кевмысьны татшӧм мыжсӧ вӧчысь вӧсна.
Быд лёк вӧчӧм эм мыж, но оз став мыжыс вайӧд кулӧмӧ.
Ми тӧдам: Енсянь чужысьяс мыжсӧ оз вӧчны.
Енсянь чужысь видзӧ асьсӧ, да омӧльыс оз вермы инмӧдчыны сы дінӧ.
Тӧдам, мый ми Енсянь, а став муюгыдыс омӧльыслӧн кипод улын.
Нӧшта тӧдам, мый Ен Пи локтіс да сетіс миянлы мывкыдлун, мед ми тӧдім збыль Енсӧ. И ми олам тайӧ збыльыс пытшкын, Исус Кристос Пиыс пытшкын.
Сійӧ эм збыль Енмыс да помтӧм олӧмыс.
Челядь, видзӧй асьнытӧ идолъясысь.
Аминь.
Апостол Иоанлӧн мӧд мӧдӧдӧм гижӧд
1 юр.
Ме, пӧрысь морт, гижа Енмӧн бӧрйӧм аньлы да сылӧн челядьлы. Ті меным збыльысь мусаӧсь. Мусаӧсь абу сӧмын меным, но быдӧнлы, коді тӧдӧ збыльсӧ. Ті меным мусаӧсь збыльыс вӧсна, ӧд сійӧ олӧ миян пытшкын да лоӧ миянкӧд нэмъяс чӧж.
Бурсетӧм, буралӧм да лӧнь олӧм тіянлы, збыляс да муслунас кутчысьысьяслы, Ен Батьсянь да Господь Исус Кристоссянь — Батьыслӧн Писянь.
Меным лои зэв нимкодь, кор аддзи, мый тэнад челядь пиысь кодсюрӧ ветлӧны збыляс, Батьлӧн тшӧктӧмыс серти.
Ӧні менам татшӧм корӧм, дона аньӧй, медым ми радейтім ӧта-мӧднымӧс. Тайӧ тшӧктӧмыс абу выль, сійӧ миян водзысяньыс нин вӧлі.
Радейтны, сідзкӧ, овны Ен тшӧктӧмъяс серти.
Дзик тайӧ тшӧктӧмсӧ ті кывлінныд водзысяньыс, сы серти и колӧ овны.
Ӧні муюгыдас уна ылӧдысьыс. Найӧ оз эскыны, мый Исус Кристос локтіс вир-яйын. Татшӧм мортыс — ылӧдысь да антикрист.
Видзӧдӧй ас бӧрсяныд, медым ми эгӧ воштӧй сійӧ, мый вӧсна миян уджалӧма, мед эськӧ ми вермим босьтны удждонсӧ дзоньнас.
Коді торкӧ Кристослысь велӧдӧмсӧ да оз кутчысь сэтчӧ, сыкӧд Енмыс абу.
Коді кутчысьӧ Кристослӧн велӧдӧмас, сыкӧд Батьыс и Пиыс.
Тіян дінӧ локтысь кӧ вайӧ мӧд велӧдӧм, энӧ сибӧдӧй сійӧс керка помад, весиг энӧ чолӧмасьӧй сыкӧд.
Сыкӧд чолӧмасьысь ӧтувтчӧ сылӧн лёк уджъясӧ.
Унатор на эм гижнысӧ тіянлы, но ӧні ог кут ставсӧ гижны кабала вылӧ чернилаӧн.
Чайта, артмас волыны тіян дінӧ да воча пуксьӧмӧн сёрнитны, медым ті верминныд тырвыйӧ нимкодясьны.
Чолӧм тэныд ыстӧны бӧрйӧм чойыдлӧн челядьыс.
Аминь.
Апостол Иоанлӧн коймӧд мӧдӧдӧм гижӧд
1 юр.
Ме, пӧрысь морт, гижа муса Гайлы. Сійӧ меным збыльысь муса.
Муса вокӧй, ме тӧда: ловнад тэ ён. Кевмыся, мед вир-яйнад тшӧтш вӧлін ён, да ставыс тэнад вӧлі бур.
Меным лои зэв нимкодь, кор вокъяс локтісны да висьталісны, тэ пӧ кутчысян збыляс да олан сы серти.
Меным вывті нимкодь кывны, мый менам челядь ветлӧны збыляс.
Муса вокӧй, вокъяс да локтысьяс вӧсна тэнад тӧждысьӧмыд петкӧдлӧ, мый тэ эскана морт.
Вичко водзын вокъяс висьталісны тэнад муслун йылысь.
Бур лоӧ, тэ кӧ Енмыслы колана ногӧн дасьтан да мӧдӧдан найӧс. Найӧ Кристос ним вӧсна петісны туяс, нинӧм эз босьтны ентӧдтӧмъяслысь.
Миянлы колӧ сибӧдны татшӧмъяссӧ, ӧд тадзи вӧчигӧн ми накӧд ӧтвыв кесъялам збыльыслы.
Ме гижлі вичкоас, но сэні асьсӧ ыджыдӧ пуктысь Диотреф оз кывзы миянӧс.
Та вӧсна, кор ме локта, казьтышта сылы уджъясыс йылысь: сійӧ ӧд паськӧдӧ миян йылысь лёк сёрни. Но тайӧ этша на, сійӧ вокъясӧс оз сибӧд, тшӧтш мукӧдыслы оз лэдз тайӧс вӧчны. А сибӧдны кӧсйысьясӧс весиг вӧтлӧ вичкосьыс.
Муса вокӧй, видзӧд бурсӧ вӧчысь вылӧ, а эн лёксӧ вӧчысь вылӧ.
Бурсӧ вӧчысь — сійӧ Енсянь, лёксӧ вӧчысь эз аддзыв Енсӧ.
Димитрий йылысь ставныс бура сёрнитӧны. Сы йылысь ачыс збыльыс висьталӧ, ми тшӧтш тадзи висьталам. Тэ ӧд тӧдан: миян висьталӧмыс збыль.
Унатор на эм гижнысӧ, но чернилаа перӧӧн ӧні ог кут тайӧс вӧчнысӧ. Чайта, регыд аддзысьлам тэкӧд да воча пуксьӧмӧн сёрнитам.
Лӧнь олӧм тэныд.
Чолӧм ыстӧны ёртъясыд.
Висьтав чолӧм миян ёртъяслы быдӧнлы торйӧн.
Аминь.
Апостол Иудалӧн мӧдӧдӧм гижӧд
1 юр.
Гижӧ Иуда, Исус Кристослӧн кесйӧг, Яковлӧн вок. Чолӧмала тіянӧс, Енмӧн корӧмаясӧс. Ен Бать вежӧдіс тіянӧс, да Исус Кристос видзӧ тіянӧс. Буралӧм, лӧньлун да муслун мед уна пӧвстӧн содас тіянлы.
Мусаяс, ме ёна кӧсйи гижны тіянлы миян ӧтувъя мездмӧм йылысь, но лыдди коланаӧн водзджык туйдӧдны тіянӧс, медым ті вӧлінныд дасьӧсь дорйыны ассьыныд эскӧмнытӧ. Тайӧ эскӧмсӧ Енмыс сетіс вежа войтырлы ӧтчыд да пыр кежлӧ.
Тіян пӧвстӧ наяна сюйсисны Ентӧг олысьяс. Татшӧм йӧзыслы важӧн нин дасьтӧма мыждӧмсӧ. Миян Енлысь буралӧмсӧ найӧ бергӧдӧны лэдзчысьӧм оласногӧ. Найӧ соссьӧны ӧти Ен Ыджыдысь да миян Господь Исус Кристосысь.
Ті, дерт, та йылысь тӧданныд нин, но кӧсъя казьтыштны тіянлы: Енмыс мездіс Ассьыс войтырсӧ Египет муысь, но бӧрыннас на пӧвстысь бырӧдіс эскытӧмъясӧс. Анделъясӧс, кодъяс эз донъявны Енсянь сетӧм ыджыдалан вынсӧ да эновтісны енэжвывса оланінсӧ, Енмыс помтӧг видзӧ сап пемыдас чепъясын ыджыд Мыждан лун кежлӧ.
Тадзи лои тшӧтш Содомын, Гомораын да на гӧгӧр каръясын олысьяскӧд. Тайӧ анделъясыс моз найӧ кырсалісны да сетчисны зывӧк оласногӧ, та вӧсна тайӧ олысьяссӧ вӧлі сотӧма куслытӧм биын. Тайӧ висьталӧ миянлы Енлӧн мыждӧм йылысь. Дзик тадзи лоӧ тайӧ Ентӧг олысьясыскӧд. Найӧ ылӧдлӧны тіянӧс асланыс вӧтъясӧн, пежалӧны ассьыныс вир-яйнысӧ, нинӧм туйӧ пуктӧны юралысьясӧс да лёкӧдӧны енэжвывса юралысь-веськӧдлысьясӧс.
Кор Микаил архангел вензис омӧлькӧд Мӧисей шой йылысь, сійӧ эз лысьт лёкӧдны-мыждыны омӧльӧс.
Сӧмын шуис: «Господь мед ӧлӧдас тэнӧ».
Тайӧ йӧзыс лёкӧдӧны сійӧ, мый асьныс оз гӧгӧрвоны, а мый вежӧртӧм пемӧсъяс моз кылӧны асланыс вир-яйын, сійӧ кыскӧ найӧс бырӧдӧмӧ.
Курыд шог налы. Найӧ мунӧны Каин туйӧд, горшасьӧны сьӧм вылӧ, Валаам моз ылалӧмаӧсь. Корей моз найӧ паныд мунӧны, та вӧсна Корейӧс моз найӧс лоӧ бырӧдӧма.
Чукӧртчиганыд татшӧм йӧзыс овлӧны тіянлы крукӧдӧн. Кор ті мусапырысь чукӧртчанныд ӧтвыв сёйны, найӧ яндысьтӧг тшӧгӧдӧны асьнысӧ да тӧждысьӧны сӧмын ас вӧснаныс.
Найӧ — тӧвнырӧн новлӧдлан ватӧм кымӧръяс, вотӧс вайтӧм арся пуяс, вужнас нетшыштӧмаяс, кык пӧв кулӧмаяс. Найӧ — саридзвывса гыяс, кодъяс лёкысь быгзьӧны асланыс янӧдан уджъясӧн. Найӧ — ылалӧм кодзувъяс, кодъяслы век кежлӧ дасьтӧма сап пемыдсӧ.
Тайӧ йӧзыс йылысь водзвыв висьтавліс Енок, Адамсянь сизимӧд чужанвужйысь петысь: «Со, локтӧ Господь Аслас лыдтӧм-тшӧттӧм вежа анделъяскӧд, медым мыждыны став йӧзсӧ. Сійӧ мыждӧ став Ентӧг олысьяссӧ налӧн лёк уджъясысь да янӧдӧ мыж вӧчысьясӧс, кодъяс шуасисны Ен вылӧ лёкӧдан кывъясӧн».
Тайӧ йӧзыс век шуасьӧны да элясьӧны. Найӧ кывзысьӧны асланыс лёк кӧсйӧмлысь, паныд мунӧны Ен Индӧдлы да олӧны лёк нога. Найӧ тшапа сёрнитӧны да ошкӧны мукӧдсӧ, медым аслыныс мыйкӧ курыштны.
Но ті, мусаяс, энӧ вунӧдӧй миян Господь Исус Кристослӧн апостолъяслысь водзвыв висьталӧмсӧ.
Найӧ шулісны тіянлы, мый бӧръя кадас лоӧны сэтшӧм йӧз, кодъяс быдтор вылын сералӧны да олӧны асланыс лёк кӧсйӧмлысь кывзысьӧмӧн. Татшӧм йӧзыс вайӧны тіян костӧ юксьӧм.
Найӧ олӧны вир-яй сертиныс, Енлӧн Лолыс на пытшкын абу.
Но ті, мусаяс, ёнмӧдӧй асьнытӧ вежа эскӧмнаныд, кевмысьӧй Вежа Лов нуӧдӧм улын. Видзӧй асьнытӧ Ен муслунас. Виччысьӧй сійӧ кадсӧ, кор миян Господь Исус Кристос Аслас буралӧмнас вайӧдас миянӧс помтӧм олӧмӧ.
Ӧтияс дінӧ лоӧй бур сьӧлӧмаӧсь, сюся видзӧдӧмӧн, а мукӧдсӧ мездӧй повзьӧдлӧмӧн, перйӧй найӧс би пытшсьыс. Янӧдӧй найӧс повзьӧдлӧмӧн, зывӧктӧй весиг паськӧмнысӧ, коді пежасьӧма налӧн вир-яйысь.
Енмыс вына видзны тіянӧс усьӧмысь да вайӧдны тіянӧс Аслас дзирдлунӧ нимкодясьысь да сӧстӧм войтырӧн. Ыджыд мывкыда ӧти Енмыс мездіс миянӧс Исус Кристос Господьным пыр. Сылы ошкӧм-нимӧдӧмыс, Сылӧн выныс-ыджыдалӧмыс му пуксьытӧдз, ӧні да нэмъяс чӧж.
Аминь.
Апостол Павеллӧн Римӧ мӧдӧдӧм гижӧд
1 юр.
Гижӧ Павел, Исус Кристослӧн кесйӧг, Енмӧн корӧм апостол. Менӧ бӧрйӧма висьтавлыны Енлысь Бур Юӧрсӧ. Тайӧ Юӧрыс йылысь Енмыс важысянь кӧсйысьӧма Аслас пророкъяс пыр вежа Гижӧдъясын. Бур Юӧрас висьтавсьӧ Сылӧн Пи йылысь, коді чужис мортӧн да вӧлі Давид чужанвужйысь. Кулӧмысь ловзьӧмнас Сійӧ воссис Вына Ен Пиӧн да Ловсянь вежаӧн. Сійӧ — Исус Кристос, миян Господь. Сы пыр ми босьтім бурсетӧмсӧ: апостолавны Кристос ним вӧсна, медым вайӧдны быд кыла войтырӧс эскӧмас да Енлы кывзысьӧмас. Тайӧ войтыр лыдӧ пыранныд тшӧтш ті, Исус Кристосӧн корӧмаяс. Ставныдлы, Римын олысьяслы, буралӧм да лӧнь олӧм Ен Батьнымсянь да Господь Исус Кристоссянь. Енмыслы ті мусаӧсь, ті Сылӧн корӧм вежа войтыр.
Медводз, Исус Кристос нимӧн аттьӧала Енмӧс ставсьыныд, ӧд тіян эскӧм йылысь висьталӧны став му пасьталаыс.
Енмыс аддзӧ, мый ме став сьӧлӧмӧн кесъяла Сылы, висьтала Пиыс йылысь Бур Юӧр да пыр казьтывла тіянӧс кевмысигъясӧн. Быдпӧрйӧ кевма Енлы, медым коркӧ верми волыны тіян дінӧ, но тайӧ мед Сылӧн кӧсйӧм серти вӧлі. Ёна кӧсъя аддзӧдчывны тіянкӧд да юксьыштны Ловсянь бурсетӧмӧн, медым ёнмӧдны тіянӧс. Тадзи ми ышӧдам ӧта-мӧдӧс эскӧмнаным: ме — тіянӧс, а ті — менӧ.
Вокъяс, тӧдӧй: ме унаысь лӧсьӧдчывлі волыны тіян дінӧ, но пыр кутшӧмкӧ мытшӧдъяс паныдасьӧны. Мукӧд войтыр пӧвстын моз тшӧтш тіянын ме кӧсъя аддзыны бурвисьталӧмлысь вотӧссӧ.
Ме уджйӧза грекъяслы и варваръяслы, вежӧраяслы и вежӧртӧмъяслы.
Ёна кӧсъя висьтавны Бур Юӧрсӧ тшӧтш тіянлы, Римын олысьяслы.
Ме ог яндысь висьтавлыны Кристослысь Бур Юӧрсӧ, ӧд сійӧ Енлӧн выныс, мездӧ быд эскысьӧс: медводз юдейясӧс, сэсся грекъясӧс.
Бур Юӧрыс восьтӧ Енлысь веськыдлунсӧ эскӧмсянь да эскӧм пыр. Гижӧма: «Веськыда олысь эскӧмнас пондас овны».
Йӧзлӧн Ентӧг олӧм да лёк вӧчӧм вылӧ лэччӧ енэжсянь Енлӧн скӧрлуныс, ӧд найӧ лёк вӧчӧмнас пӧдтӧны збыльсӧ.
Найӧ тӧдӧны Ен йылысь тӧдны позянасӧ, ӧд тайӧс налы Енмыс восьтіс.
Му пуксьӧмсяньыс Енлӧн став вӧчӧмторйысь позьӧ аддзыны тыдавтӧмсӧ: Енлысь помтӧм вынсӧ да Сылысь енмалунсӧ. Та вӧсна налы дорйысьнысӧ нинӧмӧн.
Но Енсӧ тӧдігӧн найӧ эз пуктыны Сійӧс Ен туйӧ да эз аттьӧавны Сійӧс, мӧвпалісны ковтӧмсӧ да налӧн вежӧрыс пемдіс. Асьнысӧ мывкыдаӧн шуигӧн вежӧртӧмъясӧ пӧрины. Пыр олысь Енмӧс нимӧдӧм пыдди пондісны юрбитны быранаыслы: морт, лэбач, пемӧс да веглясьысь сяма вӧчӧмторъяслы. Та вӧсна Енмыс колис найӧс асланыс лёкколӧмӧ. Ыштӧмнаныс найӧ пежалісны ассьыныс вир-яйсӧ.
Енлысь збыльсӧ бергӧдісны пӧръясьӧмӧ, юрбитісны вӧчӧмторъяслы, а эз Ставсӧвӧчысьлы. Ошкӧм Сылы нэмъяс чӧж. Аминь.
Та вӧсна Ен эновтіс найӧс янӧдана ыштӧмас. Найӧ пондісны овны мӧдарӧ: нывбаба пондіс узьлыны нывбабакӧд, айулов эновтчис нывбабакӧд узьлӧмысь, ӧзйис лёкколӧмӧн ӧта-мӧд дінас да пондіс вӧчны быдпӧлӧс зывӧксӧ. Асланыс ылалӧмысь найӧ босьтӧны нин лӧсялана водзӧссӧ.
Найӧ эз лыддьыны коланаӧн тӧдны Енсӧ, та вӧсна Ен колис найӧс торксьӧм вежӧрас вӧчны ковтӧмторсӧ. Найӧ тырӧмаӧсь быдпӧлӧс ылӧгнас да лёкнас. Кырсалӧны, горшасьӧны, лӧгалӧны, вежалӧны, виӧны, вензьӧны, пӧръясьӧны да лёксьӧны. Найӧ лёк сёрниаӧсь, удтысьӧны, Енсӧ мустӧмтӧны, мукӧдӧс дӧзмӧдӧны, асьнысӧ вылӧ пуктӧны да ошйысьӧны. Найӧ зільӧсь лёксӧ вӧчны, бать-мамныслысь оз кывзысьны, найӧ мывкыдтӧмӧсь, кывсӧ оз кутны, оз бурасьны, кын сьӧлӧмаӧсь да чорыдӧсь.
Найӧ тӧдӧны Енлысь веськыда мыждӧмсӧ, мый татшӧмтор вӧчысьӧс виччысьӧ кулӧм.
Но та вылӧ видзӧдтӧг найӧ вӧчӧны лёксӧ, весиг ошкӧны тадзи вӧчысьясӧс.
2 юр.
Тӧд, мортӧй, мӧдӧс мыждігӧн тэныд оз сюр дорйысян кывйыд. Мӧдӧс мыждӧмнад ачыд мыжман, ӧд ачыд тшӧтш сы моз вӧчан.
Ми тӧдам, мый Енмыс веськыда мыждӧ тадзи вӧчысьясӧс.
Мортӧй, тэ чайтан, тадзи вӧчысьӧс мыждӧмнад пышъян Енлӧн мыждӧмысь? Ачыд ӧд сійӧ жӧ вӧчан.
Гашкӧ, тэ нинӧм туйӧ пуктан Енлысь ыджыд бурлунсӧ, мелілунсӧ да терпитӧмсӧ? Он ӧмӧй гӧгӧрво, мый Енлӧн бурлуныс вайӧдӧ тэнӧ мыжъяссьыд бергӧдчӧмӧ.
Но чорыд сьӧлӧмыд вӧсна тэ он кӧсйы бергӧдчыны мыжъяссьыд, тадзи ас вылад чукӧртан Енлысь скӧрлунсӧ. Сійӧ киссяс тэ вылӧ Скӧралан лунӧ Енмыслӧн веськыда мыждігӧн. Сэки Енмыс быдӧнлы мынтас уджыс серти.
Помтӧм олӧм налы, кодъяс бур вӧчӧмнас мудзлытӧг корсьӧны бырлытӧмсӧ, дзирдлунсӧ да нимӧдӧмсӧ.
Асьсӧ сӧмын радейтысьясӧс да збыляс пыдди ылӧгас сетчысьясӧс виччысьӧ чорыд скӧрлун.
Ыджыд шог да сьӧкыдалӧм быдӧнлы, коді вӧчӧ лёксӧ: медводз юдейлы, сэсся греклы.
Мӧдарӧ, дзирдлун, нимӧдӧм да лӧньлун быдӧнлы, коді вӧчӧ бурсӧ: медводз юдейлы, сэсся греклы.
Енмыс оз видзӧд чужӧм вылӧ.
Мыжсӧ кӧ вӧчӧма Индӧдсӧ тӧдтӧг, Индӧдтӧгыс и бырӧдасны.
Вӧчӧма кӧ мыжсӧ Индӧдсӧ тӧдӧмӧн, Индӧд сертиыс и мыждасны. Ен водзын веськыдӧсь абу Индӧдсӧ кывлысьяс, а сы серти олысьяс. Мукӧд войтырлӧн Индӧдыс абу, но Индӧд нога вӧчӧмыс тыдалӧ налӧн оласногысь. Найӧ асьныс аслыныс индӧдыс.
Тайӧ петкӧдлӧ, мый Индӧдсӧ гижӧма налӧн сьӧлӧмас. Буретш та йылысь и висьталӧ налӧн сьӧлӧмыс да мӧвпъясыс, найӧ либӧ мыждӧны, либӧ дорйӧны найӧс. Но воас лун, кор Исус Кристос пыр Ен кутас мыждыны мортлысь гусяторъяссӧ. Та йылысь ме висьтавлі нин буръюӧртігӧн.
Со, тэ шусян юдейӧн, кутчысян Индӧдас да ошйысян Енмӧн. Индӧдсьыс тэ тӧдмалін Сылысь кӧсйӧмсӧ да велӧдчин торйӧдны медбурсӧ. Индӧдас гижӧм збыльсӧ тӧдӧмнад тэ лыддян асьтӧ синтӧмъясӧс нуӧдысьӧн, пемыдас олысьяслы югыдӧн, вежӧртӧмъясӧс туйдӧдысьӧн да гӧгӧрвотӧмъясӧс велӧдысьӧн. Мӧдӧс велӧдан, а асьтӧ он велӧд?
Тэ висьталан: «Гусясьны оз позь», ачыд гусясян.
Шуан: «Гозъя олӧмтӧ эн пежав», ачыд пежалан.
Идолъясӧс мустӧмтан, ачыд налысь крамсӧ куштан.
Ошйысян Индӧднас, ачыд сійӧс торкалӧмнад Енсӧ нинӧмӧ пуктан.
Гижӧма: «Тіян вӧсна ентӧдтӧмъяс омӧльтӧны Енлысь нимсӧ».
Вундыштчӧмыд бур, олан кӧ Индӧдыс серти.
Он кӧ ов Индӧдыс серти, сэки тэнад вундыштчӧмыд нинӧм.
Вундыштчытӧм кӧ олӧ Индӧд сертиыс, оз-ӧ сійӧс лыддьыны вундыштчӧмаӧн?
Индӧд серти олысь, коді абу вундыштчӧма, кутас мыждыны тэнӧ, вундыштчӧмаӧс да Индӧд тӧдысьӧс, ӧд тэ торкалан Индӧдсӧ.
Юдейыд абу сійӧ, коді чужӧма юдейӧн, да вундыштчӧмыд абу яй вылад вундыштӧм пас.
Юдейыд сійӧ, коді сьӧлӧмнас юдей. Вундыштӧм пассӧ пуктӧма сылы сьӧлӧмас абу Индӧд серти, сійӧс Лов пуктӧма. Татшӧмыслы ошкӧмыс лоӧ Енсянь, а оз мортсянь.
3 юр.
Мый бурыс, тэ кӧ юдей? Мый сетӧ вундыштчӧмыс?
Унатор сетӧ, да быд боксянь бур. Медводз, налы вӧлі сетӧма Ен Кывсӧ.
На пӧвстысь кӧ кодсюрӧ эз эскыны, налӧн эскытӧмысь ӧмӧй бырӧ Енлӧн эсканлуныс?
Дерт, оз.
Енмыс эскана, а мортыс пӧръясьысь.
Гижӧма: — Шуӧмыд Тэнад веськыд. Аслад ёрд вылын Тэ верман.
Миян лёк вӧчӧм кӧ восьтӧ Енлысь веськыдлунсӧ, сэки мый миянлы шуны?
Енмыс ӧмӧй абу веськыд, кисьтӧ кӧ миян вылӧ Ассьыс скӧрлунсӧ?
Тадзи мортыс мӧвпалӧ.
Дерт, тайӧ абу тадз.
Енмыс кӧ оз ло веськыд, вермас-ӧ Сійӧ мыждыны муюгыдсӧ?
Менам ылалӧмысь кӧ тыдовтчӧ Енлӧн збыльыс да Сійӧс ошкӧмыс содӧ, сідзкӧ, мыйла менӧ мыждынысӧ мыжаӧс моз?
Гашкӧ, пондам вӧчны лёксӧ, мед вӧлі бур? Кодсюрӧ омӧльтӧны миянӧс да шуӧны, мый ми тадзи велӧдам.
Татшӧмъяссӧ виччысьӧ веськыда мыждӧм.
Сідзкӧ, ми, юдейяс, бурджыкӧсь ӧмӧй мыйӧнкӧ?
Нинӧмӧн абу.
Ме водзынджык нин висьтавлі: юдейяс, кӧть грекъяс — ставныс мыжыслӧн кипод улынӧсь.
Гижӧма:
— Веськыда олысьыс весиг ӧти абу, абу гӧгӧрвоысьыс, некод оз корсь Енсӧ.
Ставныс кежӧмаӧсь, ӧтитӧг шогмытӧмӧсь, бурсӧ вӧчысьыс весиг абу.
Горшныс налӧн восьса гу, кыв вылас налӧн сӧмын пӧръясьӧм, льӧб выланыс змей яд.
Вомныс курдӧма ёрччӧмысь, кокныс тэрыб вир кисьтны, ветлан туйыс налӧн — бырӧдӧм да пикӧ воштӧм.
Найӧ оз тӧдны бурасян туйсӧ, налӧн абу Енсьыс полӧмыс.
Ми тӧдам, мый Индӧдыс висьталӧ Индӧд улын олысьяслы.
Та вӧсна некод оз вермы мыйкӧ паныд шуны, ӧд став муюгыдыс Ен мыждӧм улын. Индӧд серти уджъяс некодӧс оз вӧчны Ен водзас веськыдӧн.
Индӧдыс сӧмын восьтӧ мыжсӧ.
Ӧні Индӧд вылӧ видзӧдтӧг воссис Енлӧн веськыдлуныс. Та йылысь висьталӧ Индӧдыс да пророк гижӧдъяс. Исус Кристослы эскӧм пыр сетӧма веськыдлунсӧ быд эскысьлы, Енмыс некодӧс оз торйӧд.
Ӧд ставныс мыжмисны да олӧны Ен дзирдлунтӧг. Но Сылӧн буралӧмсянь, дон мынтытӧг найӧ лоӧны веськыдӧн, ӧд Исус Кристос став пыддиыс вештысис. Енмыс сетіс Кристосӧс бурасян вись пыдди, Сылӧн Вирыс мездӧ быдӧнӧс эскӧм пырыс. Терпитӧмнас Ен петкӧдліс Ассьыс веськыдлунсӧ: прӧститіс йӧзлысь важся мыжъяссӧ. Ӧні Енмыс петкӧдлӧ Ассьыс веськыдлунсӧ сыын, мый Сійӧ Ачыс веськыд да вӧчӧ веськыдӧн Исуслы эскысьясӧс.
Сюрас-ӧ миян ошйысянторйыс?
Оз. Сійӧс бырӧдӧма.
Мыйӧн?
Индӧд серти уджъясӧн?
Абу. Эскӧмӧн.
Ми аддзам, мый мортсӧ веськыднас вӧчӧ эскӧмыс, а оз Индӧд серти уджъясыс.
Енмыс ӧмӧй сӧмын юдейяслӧн Ен, абу-ӧ тшӧтш мукӧд войтырлӧн?
Дерт, тшӧтш мукӧд войтырлӧн. Енмыс ӧти. Сійӧ вундыштчӧмаӧс и вундыштчытӧмӧс вӧчӧ веськыдӧн эскӧм пырыс.
Сідзкӧ, мый артмӧ? Эскӧмнаным ми бырӧдам Индӧдсӧ?
Огӧ.
Мӧдарӧ, вынсьӧдам.
4 юр.
Мый шуам Ӧвраам батьным йылысь? Мый сійӧ босьтіс олігас на?
Ӧвраамӧс кӧ вӧлі шуӧма веськыдӧн уджъясыс серти, сэки сійӧ вермис тайӧн ошйысьны, сӧмын эз Ен водзын.
Гижӧдас мый висьталӧма?
«Ӧвраам эскис Енлы, та вӧсна Енмыс шуис сійӧс веськыдӧн».
Уджалысьлы ӧд удждонсӧ оз козьнавны, а уджсьыс мынтӧны.
Мортыс кӧ уджъястӧг эскӧ Енмыслы, коді Ентӧг олысьӧс вӧчӧ веськыдӧн, сэки сылысь эскӧмсӧ Енмыс лыддьӧ веськыдлунӧн.
Тадзи Давид лыддьӧ шудаӧн сійӧс, кодӧс уджъястӧгыс Енмыс шуӧ веськыдӧн:
— Шудаӧсь найӧ, кодъяслысь вунӧдӧма став лёк вӧчӧмсӧ да вевттьӧма мыжъяссӧ.
Шуда сійӧ, кодлы Господь оз казьтышт мыжсӧ.
Шудаӧн шуӧмыс сӧмын вундыштчӧмаяслы али вундыштчытӧмъяслы тшӧтш лӧсялӧ?
Ми висьталам: «Ӧвраамӧс вӧлі шуӧма веськыдӧн эскӧм вӧснаыс».
Кор шуӧма?
Вундыштчытӧдзыс либӧ вундыштчӧм бӧрас?
Вундыштчытӧдзыс.
Вундыштӧм пасыс Ӧвраамлы висьталіс, мый сійӧ вундыштчытӧдзыс на эскис, та вӧсна лои веськыдӧн. Тадзи Ӧвраам лои батьӧн став вундыштчытӧм эскысьыслы, медым и найӧ эскӧм пырыс вермисны лоны веськыдӧн. Сійӧ бать тшӧтш вундыштчӧмаяслы, кодъяс эз сӧмын вундыштчыны, но Ӧвраам батьным моз ветлӧны эскӧмыслӧн туйӧд, кыті ветліс сійӧ вундыштчытӧдзыс на.
Ен кӧсйысис сетны Ӧвраамлы да сысянь чужысьяслы муюгыдсӧ. Кӧсйысис сылы эз Индӧд серти олӧм вӧснаыс, но эскӧм вӧснаыс сійӧ лои веськыдӧн да.
Кӧсйысьӧмасӧ кӧ позис босьтны сӧмын Индӧд отсӧгӧн, сэки эскӧмыс ковтӧм да кӧсйысьӧмыс вынтӧм.
А Индӧдсӧ торкалӧмысь лэччӧ Енлӧн скӧрлун. Эз кӧ вӧв Индӧдыс, эз вӧв и Индӧдсӧ торкалӧмыс.
Кӧсйысьӧмыс подуласьӧ эскӧм вылӧ, медым сійӧ вӧлі бурсетӧмӧн. Тадзи кӧсйысьӧмыс вына Ӧвраамсянь став чужысьыслы, абу сӧмын Индӧд улын олысьяслы, но и Ӧвраам моз эскысьяслы. Ӧвраам — ставнымлы бать. Гижӧма: «Ме пукті тэнӧ уна войтырлы батьӧн». Сійӧ Ен водзын миянлы бать. Ӧвраам эскис Енлы, кулӧмаӧс Ловзьӧдысьлы да вӧвлытӧмторсӧ олӧмӧ Пӧртысьлы.
Ӧвраамлӧн эз нин вӧв некутшӧм лача, но сійӧ эскис, мый лоас уна войтырлы на батьӧн, да та дырйи эз вошты лачасӧ. Шуӧма вӧлі: «Унасьыс унаӧн тэсянь чужасны.»
Ӧвраам эз лигышмун эскӧмас, мед кӧть и матӧ сё арӧсалӧн вир-яйыс ёна нин вӧлі пӧрысьмӧма, и Сарра гӧтырыслӧн гырк пытшкӧсыс вӧлі нин шоймӧма.
Ӧвраам эз вошты эскӧмсӧ, но падъявтӧг эскис Енлӧн кӧсйысьӧмӧ да ошкис Енмӧс. Эскӧмыс ёнмӧдіс сійӧс. Ӧвраам зумыда эскис, мый Енмыс вына пӧртны олӧмӧ Ассьыс кӧсйысьӧмсӧ.
Та вӧсна сійӧс шуӧма веськыдӧн.
“Сійӧс шуӧма веськыдӧн” кывъяссӧ гижӧма абу сӧмын Ӧвраам йылысь, тшӧтш миян йылысь.
Ен шуас веськыда олысьясӧн тшӧтш миянӧс, эскам кӧ Сылы, Исус Господьнымӧс Ловзьӧдысьлы. Енмыс сетіс миян мыжъяс вӧсна Кристосӧс да ловзьӧдіс Сійӧс, медым ми вӧлім веськыдӧсь.
5 юр.
Тадзи, эскӧмным вӧсна миянӧс шуӧма веськыдӧн да Исус Кристос Господьным пыр миян эм Енкӧд бурасьӧм. Эскӧмным пыр Кристос восьтіс миянлы Ен буралӧмӧ ӧдзӧссӧ. Буралӧмас олігӧн ми лача кутӧмӧн нимкодясям, ӧд лоам Енлӧн дзирдлунас.
Сьӧкыдсӧ нуигӧн тшӧтш нимкодясям, ӧд тӧдам: сьӧкыдсӧ нуӧмыс чужтӧ зумыдлун, зумыдлуныс — сьӧкыдсӧ венӧм, сьӧкыдсӧ венӧмыс — лача. А лачаыс миян абу весьшӧрӧ, ӧд Ен сетіс миянлы Вежа Ловсӧ да Сы пыр кисьтіс сьӧлӧманым Ассьыс муслунсӧ.
Кор на ми вӧлім жебӧсь, индӧм кадӧ Кристос куліс ми коддьӧм Ентӧг олысьяс вӧсна.
Ӧдвакӧ, кодкӧ сетас олӧмсӧ веськыда вӧчысь вӧсна. Гашкӧ, бурсӧ вӧчысь вӧсна и вермас на сетны олӧмсӧ.
Но кор ми олім мыжас на, Кристос куліс миян вӧсна. Тайӧн Енмыс петкӧдліс миян дінӧ Ассьыс муслунсӧ.
Ӧні Кристослӧн Вирыс пыр миянӧс шуӧма веськыдӧн, сідзкӧ, дерт нин, Кристос пыр ми мынам локтана скӧрлунысь.
Ми кӧ, Енмыслы коркӧя паныд мунысьяс, бурасим Сыкӧд Пиыслӧн кулӧм пыр, дерт нин, ӧні ми, бурасьӧмаяс, мездмам Кристослӧн олӧм пыр.
Но тайӧ абу на ставыс. Ми нимкодясям нӧшта Енмӧн, ӧд Исус Кристос Господьным пыр миян эм Енкӧд бурасьӧм.
Ӧти морт пыр муюгыдас пырис мыжыс, мыжнас — кулӧмыс. Тадзи кулӧмыс вуджис быд морт вылӧ, ӧд ставныс мыжмисны.
Дерт, Индӧдсӧ сеттӧдз мыжыс вӧлі нин муюгыдас, но Индӧдтӧгыс мыж вӧчӧмыс оз лыддьыссьы мыжӧн.
Кулӧмыс ыджыдаліс Адамсянь Мӧисейӧдз. Ыджыдаліс весиг на вылын, кодъяс эз вӧчны Адам моз мыжсӧ. Адам вӧлі Локтысьыслӧн пертас.
Бурсетӧмыс ӧд абу мыж вӧчӧмыс кодь.
Ӧти мортлӧн мыжыс кӧ вайис ставныслы кулӧм, дерт нин, ӧти морт пыр, Исус Кристос пыр, дзик ставныслы да уна пӧвстӧн вичмас Енлӧн буралӧмыс да бурсетӧмыс.
Бурсетӧмсӧ оз позь ӧткодявны ӧтилӧн мыж вӧчӧмкӧд.
Ӧд ӧтилӧн мыж вӧчӧм вӧсна локтіс мыждӧм, а уналӧн мыж вӧчӧм вӧсна сетӧма буралӧм. Буралӧмыс вӧчӧ мортсӧ веськыдӧн.
Ӧтилӧн мыж вӧчӧм вӧсна кӧ пондіс ыджыдавны кулӧм, сэки, дерт нин, ӧти морт пыр, Исус Кристос пыр, Енсянь ыджыд буралӧмсӧ да веськыдлунсӧ босьтысьяс пондасны ыджыдавны олӧмас.
Ӧтилӧн мыж вӧчӧм вӧсна кӧ мыждӧма став мувывса йӧзсӧ, тадзи ӧтилӧн веськыда вӧчӧм вӧсна став йӧзсӧ шуӧма веськыдӧн да сетӧма налы олӧм.
Ӧтилӧн кывзысьтӧм вӧсна кӧ ставӧн лоисны мыжаӧсь, тадзи ӧтилӧн кывзысьӧм вӧсна ставӧн лоасны веськыдӧсь.
Индӧдсӧ сетӧма, медым петкӧдлыны, кутшӧм уна мыж вӧчӧмыс.
Кӧні мыж вӧчӧмыс уна, сэні ёнджыка на петкӧдчӧ буралӧмыс. Кыдзи мыжыс ыджыдаліс да кыскис кулӧмас, тадзи буралӧмыс тшӧтш пондас ыджыдавны веськыдлуннас да вайӧдас миянӧс Исус Кристос Господьным пыр помтӧм олӧмас.
6 юр.
Мый нӧ шуам?
Пондам-ӧ водзӧ овны мыжас, медым буралӧмыс содіс?
Дерт, огӧ.
Ми кулім мыжыслы, позьӧ ӧмӧй водзӧ овны мыжас?
Онӧ ӧмӧй тӧдӧй, мый ми ставным пыртчиганым йитчим Кристоскӧд да Сылӧн кулӧмкӧд?
Пыртчӧмнаным ми кулім Кристоскӧд да миянӧс вӧлі гуалӧма Сыкӧд. Но Батьыслӧн дзирдлунӧн Кристосӧс вӧлі ловзьӧдӧма, та вӧсна, ми тшӧтш вермам овны выль олӧмӧн.
Ми кӧ йитчим Сылӧн кулӧмкӧд, сідзкӧ, йитчам тшӧтш Сылӧн ловзьӧмкӧд. Ми тӧдам: миянлысь важ мортсӧ тувъялӧма Кристоскӧд, медым тайӧ мыжа вир-яйыс эз нин ыджыдав, и ми эгӧ нин вӧлӧй мыжыслӧн кипод улынӧсь. Ӧд коді куліс, сійӧ мыніс мыжыслӧн кипод улысь.
Ми кӧ кулім Кристоскӧд, эскам, мый пондам и овны Сыкӧд. Ми тӧдам: ловзьӧм бӧрас Кристос оз нин кув, ӧд кулӧмыс Сы вылын оз нин ыджыдав.
Сійӧ куліс мыжыслы ӧтчыдысь да пыр кежлӧ.
Ӧні Сійӧ ловъя да олӧ Енмыслы.
Тадзи ті, миян Господь Исус Кристос пытшкын олысьяс, лыддьӧй асьнытӧ мыжыслы кулӧмаӧн, а Енмыслы ловъяӧн.
Энӧ лэдзӧй мыжсӧ ыджыдавны тіян кулана вир-яйын да ыштӧдны тіянӧс аслас лёк кӧсйӧмъясӧн.
Вир-яйныдлысь весиг ӧти юкӧн энӧ сетӧй мыжыслы лёксӧ вӧчӧм вылӧ. Ӧні ті — кулӧмысь ловзьӧмаяс. Сідзкӧ, сетӧй асьнытӧ да вир-яйныдлысь быд юкӧн Енмыслы, мед вӧчны веськыд уджъяс.
Мыжыс оз вермы ыджыдавны тіян вылын, ӧд ті буралӧм улынӧсь, абу Индӧд улынӧсь.
Мый артмӧ?
Ми кӧ абу Индӧд улынӧсь, а буралӧм улынӧсь, пондам-ӧ вӧчны лёксӧ?
Огӧ.
Ті ӧмӧй онӧ тӧдӧй: кодлы ті сетанныд асьнытӧ кесъявны, сылӧн ті и кесйӧгъяс. Кывзысянныд кӧ мыжыслысь — куланныд, Енмыслысь кӧ кывзысянныд — веськыдӧн лоанныд.
Ошкӧм Енлы, ӧд коркӧ ті вӧлінныд мыжыслӧн кесйӧгъяс, ӧні кывзысьӧмӧн став сьӧлӧмнад кутчысянныд тіянлы висьталӧм велӧдӧмас.
Мыжысь мынӧм бӧраныд ті лоинныд веськыдлуныслӧн кесйӧгъяс.
Ме сёрнита тіянкӧд быдлунъя олӧмсьыс босьтӧм кывъясӧн, медым ті верминныд гӧгӧрвоны менӧ.
Водзын кӧ ті вир-яйныдлысь быд юкӧн сетінныд пежыслы вӧчны лёк уджъяс, ӧні быд юкӧн сетӧй веськыдлуныслы вӧчны вежа уджъяс.
Мыжыслы кесъяліганыд ті энӧ вермӧй кесъявны веськыдлуныслы.
Кутшӧм вотӧс ті сэки чукӧртінныд?
Ӧні сыысь весиг аслыныд яндзим, ӧд сійӧ вайӧ кулӧм.
Ті мынінныд мыжсьыс, ӧні ті Енлӧн кесйӧгъяс. Тіян вотӧсныд — вежалун, и тайӧ вайӧдас тіянӧс помтӧм олӧмӧ.
Мыжыс ӧд мынтысьӧ кулӧмӧн, а Енмыс — помтӧм олӧмӧн миян Мездысь Исус Кристос пыр.
7 юр.
Вокъяс, висьтала тіянлы, Индӧдсӧ тӧдысьяслы. Ті бура тӧданныд, мый Индӧдыс вына морт вылын ловъя дырйиыс.
Верӧс сайӧ петӧм аньӧс Индӧдыс кӧрталӧ ловъя верӧсыскӧд.
Верӧсыс кӧ кулӧ, сійӧ мынӧ кӧрталан Индӧдсьыс.
Ловъя верӧс дырйиыс кӧ петас мӧд сайӧ, лоӧ гозъя олӧмсӧ пежалысьӧн.
Верӧсыс кӧ кулӧ, сійӧ мынӧ гозъя олӧм индӧдсьыс. Сэки петас кӧ мӧд сайӧ, оз ло гозъя олӧмсӧ пежалысьӧн.
Тадзи тшӧтш тіянкӧд, вокъясӧй: Кристос вир-яйӧ йитчӧмнаныд ті кулінныд Индӧдыслы да лоинныд Мӧдыслӧн, кулӧмаясысь Ловзьысьыслӧн, медым вайны Енлы вотӧс.
Тшыкӧм вир-яйын оліганым лёк кӧсйӧмыс ыджыдаліс миян пытшкын Индӧдыс отсӧгӧн, сэки ми вайим вотӧс кулӧмыслы.
Ӧні ми кулім Индӧдыслы, мынім сылӧн став кӧртӧдысь. Ми кесъялам Енмыслы выль ногӧн, Лов серти, а огӧ важ мозыс, Индӧдлӧн шыпас серти.
Мый шуам татчӧ?
Индӧдыс ӧмӧй мыжыс?
Дерт, абу.
Индӧдыс восьтіс меным мыжсӧ.
Индӧдыс кӧ эз висьтав: «Эн ышты», ме эськӧ эг и гӧгӧрволы ыштӧмсӧ.
Тадзи мыжыс Индӧдысь тшӧктӧмсӧ босьтӧмӧн кыпӧдіс ме пытшкын быдпӧлӧс ыштӧмсӧ.
Мыжыс ӧд Индӧдтӧгыс кулӧма.
Водзынсӧ ме олі Индӧдсӧ тӧдтӧг, но Индӧдысь тшӧктӧмсӧ кор кылі, сэки мыжыс ловзис, а ме кулі.
Тадзи олӧмсӧ сетысь Индӧдыс вайис меным кулӧм. Индӧдлӧн тшӧктӧмыс пыр мыжыс кежӧдіс менӧ да виис сы отсӧгӧн.
Но Индӧдыс вежа, тшӧктӧмыс тшӧтш вежа, веськыд да бур.
Сідзкӧ, бурыс вайис меным кулӧмсӧ?
Эз. Мыжыс вайис. Сійӧ веськӧдіс бурсӧ, мед вины менӧ. Тадзи мыжыс восьтіс ачыс асьсӧ, и тшӧктӧмыс пыр ми аддзим мыжсӧ лёксьыс-лёкӧн.
Ми тӧдам: Индӧдыс Ловсянь, а менӧ, тшыкӧм вир-яйын олысьӧс, вузалӧма мыжыслы.
Ачым ог гӧгӧрво, мый вӧча: кӧсъянасӧ ог вӧч, а мустӧмсӧ вӧча.
Вӧча кӧ сійӧ, мый ог кӧсйы, сэки гӧгӧрвоа, мый Индӧдыс бур вылӧ. Збыльвылас, ог ме тайӧс вӧч, но ме пытшкын олысь мыжыс вӧчӧ.
Тӧда, мый ме пытшкын, менам тшыкӧм вир-яйын, бурыс абу. Бурсӧ вӧчны кӧсйӧмыс эм, но сійӧ оз артмы.
Бурсӧ кӧсъя да, ог вӧч, лёксӧ ог кӧсйы да, вӧча.
Ме кӧ вӧча кӧсйытӧмсӧ, сідзкӧ, сійӧс ог нин ме вӧч, но ме пытшкын олысь мыжыс вӧчӧ.
Казяла ас пытшкысь татшӧм индӧд: кӧсъя кӧ вӧчны бурсӧ, менам артмӧ лёкыс.
Менам пытшкӧсса мортыс нимкодьпырысь сибӧдӧ Енлысь Индӧдсӧ, но вир-яйысь ме аддза мӧдпӧлӧс индӧд. Сійӧ паныд сувтӧ пытшкӧсса индӧдлы да кӧрталӧ менӧ вир-яйын олысь мыжыслӧн индӧдӧн.
Коньӧр ме морт.
Коді мездас менӧ тайӧ кулана вир-яйсьыс?
Аттьӧала Енмӧс миян Господь Исус Кристосысь.
Тадзи менам пытшкӧсса мортыс кывзысьӧ Ен Индӧдлысь, а тшыкӧм вир-яйыс — мыжыслӧн индӧдлысь.
8 юр.
Сідзкӧ, ӧні абу некутшӧм мыждӧм Исус Кристос пытшкын олысьяслы, кодъяс олӧны Лов серти, а оз вир-яй серти. Ӧд Ловлӧн индӧдыс, коді сетӧ олӧм Исус Кристос пытшкын, мездіс менӧ мыжыслӧн да кулӧмыслӧн индӧдысь.
Ен вӧчис сійӧ, мый эз вӧв вермана Индӧдыслы, ӧд мортлӧн тшыкӧм вир-яй вӧсна Индӧдыс вӧлі вынтӧм. Миян мыжъяс вӧсна Енмыс мӧдӧдіс Ассьыс Писӧ мыжа морт кодьӧн. Тадзи морт вир-яйын Сійӧ мыждіс мортлысь мыжсӧ, медым Индӧдас висьталӧм веськыдлуныс збыльмис миян пытшкын, кодъясӧн веськӧдлӧ Лолыс, а оз вир-яйыс.
Вир-яй серти олысьлӧн — тшыкӧм мӧвпъяс, а Лов серти олысьлӧн — Ловсянь мӧвпъяс.
Вир-яйсянь мӧвпалӧмыд вайӧ кулӧм, а Ловсянь мӧвпалӧмыд сетӧ олӧм да лӧньлун. Вир-яйсянь мӧвпалӧмыд эм Енлы паныд мунӧм.
Татшӧм мортыс оз сетчы Ен Индӧдлы, да и оз вермы.
Вир-яй серти олысьяс Енмыслы оз шогмыны.
Тіян пытшкын кӧ збыльысь олӧ Енлӧн Лолыс, сідзкӧ, ті Лов веськӧдлӧм улынӧсь, абу вир-яйлӧн ыджыдалӧм улынӧсь.
Код пытшкын абу Кристослӧн Лолыс, сійӧ абу Сылӧн.
Кристос кӧ тіян пытшкын, сэки ловныд олӧ веськыдлуныс вӧсна, кӧть вир-яйныд кулӧма мыжыс вӧсна.
Тіян пытшкын кӧ олӧ Енлӧн Лолыс, коді ловзьӧдіс Исусӧс кулӧмысь, сідзкӧ, Кристосӧс Ловзьӧдысь ловзьӧдас тшӧтш тіянлысь кулана вир-яйтӧ сійӧ Ловнас, коді олӧ тіян пытшкын.
Вокъяс, сідзкӧ, ми абу уджйӧзаӧсь тшыкӧм вир-яйлы, и миянлы оз ков овны сы ног.
Оланныд кӧ вир-яй серти, куланныд, а Ен Лолӧн кӧ вианныд тшыкӧм уджъяснытӧ, понданныд овны.
Кодъясӧс нуӧдӧ Енлӧн Лолыс, найӧ Енлӧн ныв-пи.
Ті ӧд энӧ сибӧдӧй нартитысь лолӧс, медым бара овны полӧм улын, мӧдарӧ, ті сибӧдінныд тіянӧс ныв-пиӧ босьтысь Лолӧс. Тайӧ Лолӧн ми шыасям: «Авва, Батьӧй.»
Ачыс Лолыс висьталӧ миян ловлы, мый ми Енлӧн ныв-пи.
Ми кӧ Енмыслӧн ныв-пи, сідзкӧ, Кристоскӧд босьтам Енсянь вичмӧдӧмасӧ. Сыкӧд ӧтвыв кӧ сьӧкыдсӧ нуам, ӧтвыв Сыкӧд и дзирдлунас лоам.
Ме тадзи мӧвпала: ӧнія сьӧкыд нуӧмсӧ кӧ ӧткодявны сійӧ дзирдлуныскӧд, мый воссяс миянлы, тайӧ сьӧкыд нуӧмыс нинӧм оз сулав.
Енлӧн став вӧчӧмторйыс ёна виччысьӧ Ен ныв-пилысь воссьӧмсӧ. Ӧд став вӧчӧмторйыс эз ас кӧсйӧмсяньыс веськав сісьмӧм-бырӧм улӧ. Тадзи вӧлі шуӧма Енмыслӧн. Сідзкӧ, эм лача, мый став вӧчӧмторйыс мынас сісьмана-бырана кутӧдысь да воас Ен ныв-пилӧн мездлунӧ да дзирдлунӧ.
Ми тӧдам: став вӧчӧмторйыс ӧнӧдз на сьӧкыда ружтӧ-ойзӧ кага вайӧм дырйи моз.
Да оз сӧмын найӧ, тшӧтш ми, кодъяслӧн эм Енсянь Лолыс, тайӧ медводдза сетӧмторйыс, ружтӧмӧн-ойзӧмӧн виччысям Енлӧн ныв-пиӧн лоӧмсӧ, вир-яйнымӧс мездӧмсӧ.
Дерт, ми мездмӧмаӧсь нин лача кутӧмным пыр.
Но лачаыд кӧ збыльмӧма, сэки сійӧ абу нин лача.
Кутӧны ӧмӧй лачасӧ аддзана-лоӧма вылас?
Ми кӧ лача кутам аддзытӧм вылас, сэки виччысям терпитӧмӧн.
Жеблун дырйиным Лолыс отсалӧ миянлы.
Ми весиг огӧ тӧдӧй мый йылысь да кыдзи колӧ кевмысьнысӧ.
Сэки Ачыс Лолыс ышлолалӧмӧн кывъяс шутӧг кевмысьӧ миян вӧсна.
Енмыс ставсӧ аддзӧ миян сьӧлӧмысь да тӧдӧ Лолыслысь мӧвпъяссӧ. Ӧд Енлӧн кӧсйӧм серти Лолыс корӧ-кевмӧ вежа войтыр вӧсна.
Ми тӧдам, мый Енсӧ радейтысьяслы, Сылӧн шуӧм сертиыс корӧмаяслы, Сійӧ ставсӧ бергӧдӧ бур вылӧ.
Сідзкӧ, кодъясӧс Енмыс водзысяньыс тӧдіс, найӧс и лӧсьӧдіс лоны Аслас Пи кодьӧн, медым Пиыс вӧлі медводдза чужысьӧн уна вок пӧвстын.
Кодъясӧс Сійӧ водзысяньыс лӧсьӧдіс, найӧс и корис, кодъясӧс корис, найӧс и вӧчис веськыдӧн, кодъясӧс вӧчис веськыдӧн, найӧс и мичмӧдіс Аслас дзирдлунӧн.
Мый та вылӧ шуам?
Енмыс кӧ миян дор, коді миянлы паныд?
Ӧд Енмыс Ассьыс Писӧ эз жалит, а сетіс Сійӧс ставным вӧсна. Сыкӧд тшӧтш оз ӧмӧй сет миянлы и став мукӧдторсӧ?
Коді вермас мыжавны Енлысь бӧрйӧмаяссӧ?
Сӧмын Енмыс. Но Сійӧ шуӧ миянӧс веськыдӧн.
Коді вермас мыждыны найӧс?
Сӧмын Кристос. Но Сійӧ куліс, ловзис да ӧні Ен веськыдладорын кевмысьӧ миян вӧсна.
Мый вермас торйӧдны миянӧс Енлӧн муслунысь? Гашкӧ, шог, дзескӧдӧм, вӧтлӧм? Гашкӧ, тшыгъялӧм, кӧм-пасьтӧг кольӧм? Гашкӧ, неминуча суӧм, шыпуртысь кулӧм?
Гижӧма: «Тэ вӧсна быд лун миянӧс виӧны, лыддьӧны начкыны дасьтӧм ыжъясӧн».
Но став тайӧ сьӧкыдлун дырйиыс миянӧс Радейтысь сетӧ миянлы тырвыйӧ вермӧм.
Ме тӧда: кулӧмыс ни олӧмыс, анделъяс ни енэжвыв юралысьяс да вынъяс, ӧніяыс ни локтанаыс, пыдтаыс ни судтаыс, — некутшӧм вӧчӧмтор оз вермы торйӧдны миянӧс Ен муслунысь, мый восьтӧма миянлы Исус Кристос Господьным пыр.
9 юр.
Кристос водзын шуа: ме висьтала збыльсӧ, сьӧлӧмӧй Вежа Ловкӧд оз сетны меным пӧръявны. Менам сьӧлӧмӧй ёна шогсьӧ да дугдывтӧг бӧрдӧ ас войтырса вокъясӧй вӧсна.
Ме весиг дась лоны на вӧсна ёрӧмаӧн, Кристосысь торйӧдӧмаӧн. Израиль войтырӧс ӧд шуӧма Ен пиянӧн, восьтӧма налы Ен дзирдлунсӧ, кӧрталӧма накӧд йитӧдъяс, сетӧма налы Индӧд, сувтӧдӧма найӧс Енлы кесъявны, налы уна кӧсйысьӧма, и налӧн эмӧсь батьяс. Тайӧ войтырысь петіс Кристос, Сійӧ чужис морт кодьӧн. Сійӧ став вылас медыджыд Ен. Ошкӧм Сылы нэмъяс чӧж. Аминь.
Енмыслӧн кывйыс эз вожав. Ӧд абу став израильсаыс Израильлӧн, Ӧвраамсянь чужысьяс абу ставныс Ӧвраамлӧн ныв-пи. Вӧлі шуӧма: «Исааксянь чужысьясӧс шуасны тэнад ныв-пиӧн».
Сідзкӧ, Енлӧн ныв-пиыс абу мортсянь, но Ен кӧсйысьӧмсянь чужысьяс.
А кӧсйысьӧмыс вӧлі татшӧм: «Дзик тайӧ кадас бӧр локта, да Сарралӧн чужас пи».
Тадзи вӧлі тшӧтш Ревеккакӧд. Сійӧ сьӧктіс Исаак батьнымсянь кык пиӧн.
Пияныслӧн чужтӧдз на, бурсӧ-лёксӧ налӧн вӧчтӧдз на, Енмыс шуис Ревеккалы: «Ыджыдджыкыс пондас кесъявны ичӧтджыкыслы». Енмыс тайӧн петкӧдліс, мый бӧрйӧмыс Сы сайын. Сійӧ бӧрйӧ оз мортлӧн уджъяс серти, но Аслас лӧсьӧдӧм да корӧм сертиыс. Гижӧма: «Яков Меным муса, а Исавӧс Ме мустӧмті».
Мый шуам?
Енмыс оз веськыда вӧч?
Дзик веськыда.
Мӧисейлы Енмыс шуӧ: «Код дінӧ кӧ лоа бур сьӧлӧма, код дінӧ кӧ небзьӧда сьӧлӧмӧс».
Тадзи ставыс Енлӧн буралӧм сайын, абу мортлӧн кӧсйӧм-зільӧм сайын.
Гижӧдас шуӧма фараонлы: «Ме пукті тэнӧ, мед петкӧдлыны тэ вылын Ассьым вынӧс, медым Менсьым нимӧс тӧдісны став му пасьталаыс».
Тадзи Енмыс код дінӧ кӧ бур сьӧлӧма, а кодӧс кӧ Сійӧ чорзьӧдӧ.
Гашкӧ, тэ юалан: «Мыйысь нӧ Енмыс, сідзкӧ, мыжалӧ?
Вермас-ӧ кодкӧ паныд сувтны Енмыслӧн кӧсйӧмлы?»
Мортӧй, коді тэ сэтшӧмыс, мый Енкӧд вензян?
Вӧчӧмторйыс ӧмӧй вермас шуны вӧчысьыслы: «Мыйла тэ менӧ татшӧмнас вӧчин?»
Гырнич вӧчалысь абу ӧмӧй вына сёй вылас? Оз-ӧ сійӧ ӧти лятисьыс вермы вӧчны быд лунӧ вӧдитчан и торъя лунъясӧ вӧдитчан доз?
Тадзи Енмыс кӧсйӧ петкӧдлыны Ассьыс скӧрлунсӧ да вынсӧ. Ыджыд терпитӧмыс вӧсна Сійӧ видзӧ на бырӧдны шуӧм “скӧрлуныслысь дозъяссӧ”, медым петкӧдлыны Ассьыс помасьлытӧм дзирдлунсӧ “буралӧмыслӧн дозъяс” вылын, кодъясӧс дасьтӧма дзирдавны. “Буралӧмыслӧн дозъясыс” — тайӧ ми, ӧд Ен корис миянӧс. Корис эз сӧмын юдейясӧс, но тшӧтш мукӧд войтырӧс.
Осия небӧгын Сійӧ висьталӧ:
— Кодъяс эз вӧвны Менам войтырӧн, шуа Асламӧн, мустӧмӧс шуа мусаӧн.
Кӧні шуӧма вӧлі: «Ті абу Менам войтыр», сэні шуасны найӧс ловъя Енлӧн ныв-пиӧн.
Израиль йылысь Исай тадзи висьталӧ:
— Израиль войтырлӧн лыдыс кӧ лоас весигтӧ саридздор лыа мында, мездмас сӧмын колясыс.
Регыд Господь эштӧдас му вылын веськыда вӧчӧмсӧ, Ассьыс шуӧмсӧ пӧртас олӧмӧ.
Исай водзвыв висьтавліс:
— Господь Саваоф кӧ эз коль миянлы чужан кӧйдыссӧ, ми эськӧ бырим Содом моз да вӧлім Гомора кодьӧсь.
Сідзкӧ, мый артмӧ?
Мукӧд войтыр эз корсьлыны веськыдлунсӧ, да босьтісны сійӧс. Найӧ босьтісны веськыдлунсӧ эскӧмныс пыр.
Израиль, мӧдарӧ, Индӧд отсӧгӧн корсис веськыдлунсӧ, да тайӧ эз ло сылы.
Мыйла?
Веськыдлунсӧ сійӧ зілис шедӧдны Индӧд серти уджъяснас, эз эскӧмнас.
Тадзи сійӧ изйӧ крукасис. Та йылысь гижӧма:
— Ме пукта Сионӧ из, унаӧн сэтчӧ крукасясны да унаӧн сы вылӧ усясны.
Но Сылы эскысь оз янав.
10 юр.
Вокъяс, ме сьӧлӧмсянь кора да кевмыся Енлы Израильлӧн мездмӧм вӧсна.
Ме тӧда: налӧн сьӧлӧмыс ӧзъялӧ Енмыслы, но налы оз тырмы гӧгӧрвоӧмлуныс.
Найӧ оз гӧгӧрвоны Енмыслысь веськыдлунсӧ да зільӧны сувтӧдны ассьыныс веськыдлун. Та вӧсна найӧ эз сетчыны Ен веськыдлунлы. Кристос — Индӧдыслӧн пом. Сідзкӧ, быдӧн, коді эскӧ Сылы, лоӧ веськыдӧн.
Индӧд серти веськыдлун йылысь Мӧисей гижӧ: «Индӧд серти олысь Индӧднас пондас овны».
Эскӧмсянь веськыдлуныс висьталӧ: «Эн мӧвпав сьӧлӧмад: “Коді каяс енэжӧ?”» — мед лэччӧдны Кристосӧс.
«Либӧ: “Коді лэччас пыдӧстӧминӧ?”» — мед кыпӧдны Кристосӧс кулӧмысь.
Гижӧдыс мый висьталӧ?
— Матын тэныд кывйыс, тэнад вомын да тэнад сьӧлӧмын.
Тайӧ эскӧмыслӧн кыв, мый йылысь ми висьталам. Ӧд вомнад кӧ висьталан Исусӧс Господьӧн да сьӧлӧмнад кӧ эскан, мый Енмыс ловзьӧдіс Сійӧс кулӧмысь, мездман. Сьӧлӧмнад эскӧмыд вӧчӧ веськыдӧн, вомнад висьталӧмыд — мездӧ.
Гижӧдыс висьталӧ: «Сылы эскысь оз янав».
Юдейяс да грекъяс костын торъялӧмыс абу. Быдӧнлӧн ӧти Господь. Сійӧ лышкыда сетӧ быдӧнлы, коді шыасьӧ Сы дінӧ.
Ӧд быдӧн, коді шыасяс Господь нимӧ, мездмас.
Кыдзи нӧ шыасясны Господь дінӧ, оз кӧ эскыны Сылы?
Кыдзи нӧ эскасны, эз кӧ кывлыны Сы йылысь?
Кыдзи нӧ кывласны, абу кӧ висьталысьыс?
Кыдзи нӧ висьталасны, абу кӧ мӧдӧдӧма висьтавнысӧ?
Гижӧма: «Майбырӧсь кокъясыс лӧнь олӧм да бур юӧр вайысьлӧн».
Но эз ставныс кывзыны Бур Юӧрсӧ.
Исай шуӧ: «Господьӧй, коді нӧ эскис миян висьталӧмӧ?»
Эскӧмыс ӧд кылӧмсянь, а кылӧмыс Ен Кывсянь.
Юала: «Найӧ ӧмӧй эз кывлыны?»
Кывлісны, дерт.
— Став му пасьталаыс кыліс налӧн висьталӧм шыыс, став му пельӧсӧдзыс воис налӧн кывйыс.
Нӧшта юала: «Израиль ӧмӧй эз гӧгӧрво?»
Ӧд Мӧисей пыр на Енмыс шуліс:
— Ме кыпӧда тіян пытшкын вежалӧм сійӧ войтыр дінӧ, кодӧс оз позь шуны войтырӧн. Дӧзмӧда тіянӧс вежӧртӧм йӧз пыр.
Исай повтӧг висьталӧ Енлысь шуӧмсӧ:
— Менӧ аддзисны найӧ, кодъяс эз корсьлыны Менӧ, восьті Ачымӧс налы, кодъяс эз юасьлыны Ме йылысь.
Израиль йылысь Енмыс тадзи шуӧ:
— Ме лунтыр сулалі кывзысьтӧм да асныра войтырлы киӧс нюжӧдӧмӧн.
11 юр.
Юала: «Енмыс ӧмӧй эновтіс Ассьыс йӧзсӧ?»
Дерт, эз.
Ме ачым израильса, Ӧвраам чужанвужйысь, Вениамин чужанкотырысь.
Енмыс эз эновт Ассьыс водзвыв бӧрйӧм войтырсӧ.
Онӧ ӧмӧй тӧдӧй, мый висьталӧма Гижӧдас Илля йылысь?
Сійӧ норасьӧ Енлы Израиль вылӧ: «Господьӧй, Тэнсьыд пророкъястӧ виисны, висьпуктанінъястӧ жугӧдісны.
Ме ӧтнамӧн коли, тшӧтш менам олӧм вылӧ ыштӧны».
Мый сылы Енмыс воча шуӧ?
«Ме коли Аслым сизим сюрс мортӧс. Найӧ эз пидзӧсчанясьны Ваал водзӧ».
Тадзи и ӧні: Енмыс буралӧмыс кузя видзӧма коляссӧ, Ассьыс бӧрйӧмаясӧс.
Бӧрйӧма буралӧмыс вӧсна, абу мортлӧн уджъяс серти.
Бӧрйӧма кӧ вӧлі уджъяс серти, сэки эськӧ буралӧмыс эз вӧв буралӧмӧн.
Сідзкӧ, мый артмӧ?
Израиль эз аддзы, мый корсис, сӧмын бӧрйӧмаяс аддзисны. Мукӧдыс чорзьӧдчисны, ӧд гижӧма:
— Енмыс сетіс налы чорзьӧм лов. Налӧн синныс куньса, пельныс тупкыса, и ӧнӧдз на тадз.
Давид висьталӧ:
— Мед чӧсмасян пызанныс лоӧ налы тывйӧ дзугсьӧмӧн, налькйӧ шедӧмӧн, изйӧ крукасьӧмӧн. Тайӧ лоӧ налы водзӧс пыдди. Синмыс налӧн мед бердас, аддзыны оз кут, сюрса лыыс мед кусыньтчас пыр кежлӧ.
Сідзкӧ, юала: «Найӧ ӧмӧй усьмӧныс крукасисны?»
Эз.
Налӧн крукасьӧмыс вайис мездмӧм мукӧд войтырлы. Та вӧсна на пытшкын кыптіс мукӧд войтыр дінӧ вежалӧм.
Налӧн крукасьӧмыс кӧ вайис озырлун муюгыдыслы да Енсьыс кежӧмыс кӧ озырмӧдіс мукӧд войтырӧс, сэки мыйта озырлун ваяс став Израильлӧн Ен дінӧ бергӧдчӧмыс?
Тіянлы, мукӧд войтырлы, висьтала:
менӧ сувтӧдӧма апостолавны тіянлы, и ме ошйыся аслам кесъялӧмӧн.
Гашкӧ, верма кыпӧдны ас войтыр пытшкын веж петӧмсӧ да отсавны мездмыны кодсюрӧлы.
Найӧс ӧтдортӧмыс кӧ вайис бурасьӧм муюгыдыслы, сэки мый ваяс найӧс сибӧдӧмыс? Оз-ӧ кулӧмысь ловзьӧм?
Медводдза пӧжасыс кӧ вежа, сідзкӧ, кӧтасыс ставнас вежа.
Пулӧн вужйыс кӧ вежа, вожъясыс тшӧтш вежаӧсь. Быдтӧм вый пуысь кӧ ӧткымын вож чегисны, а тэнӧ, вӧрса вый пу вожӧс, йитісны чегӧминас, да тэ мукӧд вожыскӧд ӧти вужсянь кутін босьтны быдман вынсӧ, сэки эн ошйысь мукӧд вожыс водзын.
А кӧсъян кӧ ошйысьны, тӧд: он тэ кут вужсӧ, а вужйыс — тэнӧ.
Гашкӧ, тэ шуан: «Менӧ йитӧм могысь вожъяссӧ чегисны».
Тайӧ тадз.
Найӧс чегисны эскытӧмысла, а тэ кутчысян эскӧмнад. Асьтӧ вылӧ эн пукты, но полӧмпырысь ов.
Енмыс кӧ эз жалит быдтӧм вый пулысь вожъяссӧ, жалитас-ӧ тэнӧ?
Тӧд: Енмыс бур сьӧлӧма, но вермӧ лоны и чорыдӧн. Чорыд усьӧмаяс дінӧ, бур сьӧлӧма тэ дінӧ, сӧмын кутчысян кӧ Сылӧн бурлунӧ. Он кӧ, тэнӧ тшӧтш керыштасны.
Юдейяс кӧ оз кольччыны эскытӧмлунас, найӧс лоӧ йитӧма. Енмыс вына бӧр йитны найӧс.
Тэнӧ ӧд керыштӧма вӧлі вӧрса пуысь да йитӧма быдтӧм пуыс дінӧ. А быдтӧм пу вожлы ёна кокньыдджык бӧр йитчыны мам пуыс дінӧ.
Вокъяс, мед ті энӧ мӧвпалӧй ас мывкыдсяньныд, висьтала тіянлы тайӧ гусяторсӧ: Израиль войтырысь сӧмын кутшӧмкӧ юкӧн чорзьӧдчис. Налӧн чорзьӧдчӧмыс кыссяс сэтчӧдз, кытчӧдз оз мездмы мукӧд войтырыс колана лыдӧдз. Сэки став Израиль мездмас.
Ӧд гижӧма:
— Сионсянь локтас Мездысь, Сійӧ бырӧдас Яков чужанвужйысь Ентӧг олӧмсӧ.
Ме босьта налысь мыжъяссӧ, тайӧ лоӧ Менам йитӧд накӧд.
Найӧ эз сибӧдны Бур Юӧрсӧ, Енлы паныд мунісны. Тайӧ лои тіян вӧсна. Но найӧ бӧрйӧм войтыр, и Енмыс радейтӧ найӧс батьясныс вӧсна.
Енмыс Ассьыс корӧмаяссӧ оз вунӧд, Сійӧ бӧр оз босьт сетӧмасӧ.
Коркӧ ті, мукӧд войтыр, энӧ кывзысьӧй Енмыслысь, но Израильлӧн кывзысьтӧмлун вӧсна Енмыс вӧлі бур сьӧлӧма тіян дінӧ. Ӧні найӧ оз кывзысьны, медым тіян дінӧ моз Сійӧ вӧлі бур сьӧлӧма тшӧтш на дінӧ.
Енмыс ставнысӧ кӧрталіс кывзысьтӧмлуннас, медым ставныс дінӧ лоны бур сьӧлӧмаӧн.
Енлӧн озырлуныс пыдӧстӧм, Сылӧн мывкыдлуныс да тӧдӧмлуныс шымыртны вермытӧм.
Шуӧм кывйыс вежӧрӧ тӧрӧдтӧм, туйыс Сылӧн туявтӧм.
Коді вермас тӧдны Господьлысь мӧвпъяссӧ?
Коді вермас Сійӧс туйдӧдны?
Кодлы Сійӧ уджйӧза, медым мынтысьны?
Ӧд ставыс Сысянь, Сы пыр да Сылы.
Ошкӧм Сылы нэмъяс чӧж. Аминь.
12 юр.
Вокъяс, Енлӧн ыджыд буралӧмыс вӧсна кора тіянӧс: сетӧй асьнытӧ Енлы ловъя, вежа да шогмана вись пыдди. Тайӧ лоӧ бур мывкыда кесъялӧм Енмыслы. Энӧ вужъясьӧй тайӧ мувывса оласногас. Лэдзӧй Енмыслы вежны тіянӧс, выльмӧдны вежӧрнытӧ, медым тӧдны тіянлы Сылысь кӧсйӧмсӧ: мый колана, шогмана да тыр-бур.
Енсянь меным бурсетӧм вӧсна висьтала тіянлы быдӧнлы: энӧ мӧвпалӧй ас йывсьыныд вывті, коланасьыс унджык, но мӧвпалӧй ышнясьтӧг, Енмӧн сетӧм эскӧм сертиныд.
Кыдзи ӧти вир-яйлӧн эм уна юкӧн, и быд юкӧн вӧчӧ ассьыс удж, тадзи Кристос пытшкын ставным ми ӧтлаынсӧ — ӧти вир-яй, а торйӧнсӧ — ӧта-мӧдлы юкӧн.
Енмыс Аслас буралӧмнас быдӧнлы миянлы сетӧма торъя бурсетӧм: пророкавны кӧ — пророкав эскӧм сертиыд, кесъявны кӧ — кесъяв, велӧдны кӧ — велӧд, ышӧдны кӧ — ышӧд, сетны кӧ — сет сьӧлӧмсяньыд, веськӧдлыны кӧ — веськӧдлы тӧждысьӧмӧн, бур вӧчны кӧ — вӧч долыд сьӧлӧмӧн.
Радейтӧй восьса сьӧлӧмӧн, ылыстчӧй лёксьыс да кутчысьӧй бурас. Радейтӧй ӧта-мӧднытӧ чой-вокӧс моз, пуктӧй ӧта-мӧднытӧ ассьыд вылӧджык. Тӧждысиганыд энӧ дышмӧй, ловнад ӧзъялӧй, Енмыслы кесъялӧй. Лачанытӧ кутӧй нимкодьпырысь, шогъястӧ нуӧй терпитӧмӧн, дугдывтӧг кевмысьӧй. Вежа войтырлы отсалӧй абутӧмлун дырйиныс, сибӧдӧй ветлысь-мунысьясӧс, бурсиӧй тіянӧс вӧтлысьясӧс, бурсиӧй найӧс, а энӧ ёрӧй.
Нимкодясьысьяскӧд нимкодясьӧй, бӧрдысьяскӧд бӧрдӧй.
Ас костаныд лоӧй ӧти сьӧлӧмаӧсь, энӧ лыддьӧй асьнытӧ бурджыкӧн, коньӧръясӧс энӧ ӧтдортӧй да сюсьӧ энӧ пуксьӧй.
Лёк вӧчӧмысь лёкӧн энӧ мынтысьӧй, йӧзыс водзын ставсӧ зільӧй вӧчны веськыда. Верманныд кӧ, олӧй лӧня ставныскӧд.
Мусаяс, энӧ перйӧй водзӧс ас вӧснаныд, сетӧй тайӧс вӧчны Енлӧн скӧрлунлы.
Ӧд гижӧма: «Ме мынтыся, Ме перъя водзӧссӧ», — висьталӧ Господь.
«Тэныд паныд мунысь кӧ тшыгъялӧ, верд сійӧс, горшыс кӧ косьмӧ, юктав сійӧс.
Тадзи тэ чукӧртан сылы юр вылас биа ӧгыръяс».
Эн сет лёкыслы вермыны тэнӧ, но вермы лёксӧ бурнас.
13 юр.
Быдӧн мед кывзысьӧ аслас юралысьыслысь, ӧд юралӧмсӧ Ен лӧсьӧдӧма, и юралысьсӧ тшӧтш Ен пуктӧма.
Юралысьлы паныд сувтысь паныд сувтӧ Енмыслӧн лӧсьӧдӧмлы.
Тадзи вӧчысь кӧлалӧ ас вылас мыждӧм.
Юралысьясысь полӧны лёктор вӧчигӧн, а оз бурсӧ вӧчигӧн.
Кӧсъян кӧ наысь повтӧг овны, вӧч веськыда, сэки лоӧ насянь ошкӧмыс.
Юралысь — сійӧ Енлӧн кесйӧг, сійӧс пуктӧма тэныд бур вылӧ.
Вӧчан кӧ лёксӧ, пов.
Оз ӧд весьшӧрӧ сійӧ новлӧдлы шыпурт.
Сійӧ Енлӧн кесйӧг, вермӧ чорыда дойдны лёк вӧчысьӧс.
Сідзкӧ, кутам кывзысьны юралысьяслысь огӧ мыждӧмысь полӧм вӧсна, но сьӧлӧмным висьталӧм серти.
Тайӧ уджыс налӧн Енлы кесъялӧм, та вӧсна ті мынтанныд налы вотсӧ.
Сідзкӧ, сетӧй быдӧнлы коланасӧ: кодлы вот сетны — сылы вот сетӧй, кодлы руга — сылы руга, кодысь колӧ повны — сыысь полӧй, кодӧс колӧ пыдди пуктыны — сійӧс пыдди пуктӧй.
Энӧ кольӧй некодлы уджйӧзаӧн, ӧта-мӧдтӧ радейтӧм кындзи.
Ӧд мӧдӧс радейтӧмнад тэ тырвыйӧ пӧртан олӧмӧ Индӧдсӧ.
Тайӧ тшӧктӧмъяссӧ: «Гозъя олӧмтӧ эн пежав», «Эн ви», «Эн гусясь», «Эн пӧръясь», «Эн ышты» да став мукӧд тшӧктӧмсӧ шымыртӧма ӧти тшӧктӧмӧ: «Радейт матыссатӧ асьтӧ моз».
Муслуныс оз вай лёксӧ матыссаыдлы.
Муслуныс — тайӧ Индӧдсӧ тырвыйӧ олӧмӧ пӧртӧм.
Тадзи вӧчӧй, ті ӧд тӧданныд, мый воис нин кад садьмыны миянлы.
Мездмӧмыс ӧні ёна нин матын сэкъя дорысь, кор ми сӧмын на пондім эскыны.
Войыс кольӧ, луныс матыстчӧ.
Сідзкӧ, шыбитам пемыдыслысь уджъяссӧ да пасьтасям югыдыслӧн вермасянторйӧ.
Лунъюгыдын моз пондам овны бур ногӧн. Огӧ сетчӧй гажӧдчӧмӧ да кодалӧмӧ, гозъя олӧм пежалӧмӧ да лэдзчысьӧм оласногӧ, вензьӧмӧ да вежалӧмӧ.
Мед тіян паськӧмӧн лоӧ Исус Кристос Господьным. Вир-яйныд вӧсна тӧждысьӧмсӧ энӧ бергӧдӧй сылысь лёк кӧсйӧмсӧ могмӧдӧмӧ.
14 юр.
Жеб эскысьӧс сибӧдӧй, энӧ вензьӧй, сылӧн видзӧдласыс кӧ торъялӧ.
Ӧти эскӧ, мый позьӧ сёйны быдтор, а мӧдыс, жеб эскысьыс, сёйӧ сӧмын быдмӧг.
Быдтор сёйысь, эн увтырт быдмӧг сёйысьӧс, и тэ, быдмӧг сёйысь, эн мыжав быдтор сёйысьӧс. Енмыс ӧд кыкнаннытӧ сибӧдӧ.
Коді тэ сэтшӧмыс, мый йӧз кесйӧгӧс мыжалан?
Сулалӧ-ӧ, усьӧма-ӧ сійӧ, сылӧн Ыджыдыс тӧдӧ.
Сійӧ кутас сулавны, ӧд Енмыс вына сувтӧдны сійӧс.
Кодкӧ торйӧдӧ лунъяс, а кодлыкӧ став луныс ӧткодь.
Быдӧн вӧч аслад гӧгӧрвоӧмлун серти.
Лунъяс торйӧдысь — Господь понда найӧс торйӧдӧ, коді оз торйӧд — Господь понда оз торйӧд.
Быдтор сёйысь — Господь понда сёйӧ да Енсӧ аттьӧалӧ, коді оз сёй быдторсӧ — Господь понда оз сёй да тшӧтш Енсӧ аттьӧалӧ.
Ӧд некод миян пиысь оз ов да оз кув ас пондаыс.
Та вӧсна, олам кӧ — Енлы олам, кулам кӧ — Енлы кулам.
Ловъяӧсь-ӧ, кулӧмаӧсь-ӧ — ми Енмыслӧн.
Кристос ӧд куліс, ловзис да олӧ, медым ыджыдавны кулӧмаяс да ловъяяс вылын.
Мый тэ мыжалан воктӧ?
Мыйла нинӧм туйӧ пуктан сійӧс?
Ставным ӧд сувтам Кристослӧн ёрд водзӧ.
Гижӧма:
— Ме ловъя, висьталӧ Господь, — Ме водзӧ пидзӧсчанясяс быд морт, да быд вомсянь кыптас ошкӧм Енлы.
Тадзи быдӧн ас вӧснаыс кывкутас Ен водзын.
Водзӧ огӧ кутӧй мыжавны ӧта-мӧдӧс.
Мӧдарӧ, видзӧдӧй, мед эськӧ энӧ крукӧдӧй да уськӧдӧй вокнытӧ.
Ме бура тӧда да эска Господь Исуслы, мый, збыльвылас, нинӧм абу пежа.
Сӧмын сылы лоӧ пежа, коді лыддьӧ мыйкӧ пежаӧн.
Тэ кӧ шогӧ уськӧдан воктӧ сёян вӧсна, сідзкӧ, тэ он вӧч мусапырысь.
Эн жугӧд сійӧс аслад сёянӧн, ӧд сы вӧсна куліс Кристос.
Энӧ лэдзӧй серамвыв лэптыны сійӧ, мый ті лыддянныд бурӧн.
Ӧд Енлӧн Юралӧмыс абу сёйӧм да юӧм, тайӧ Вежа Ловсянь веськыдлун, лӧньлун да нимкодьлун.
Кристослы тадзи кесъялысь шогмана Енмыслы да пыдди пуктана йӧзӧн.
Зілямӧй овны лӧня ӧта-мӧдӧс ёнмӧдӧмӧн.
Сёян вӧсна эн жугӧд Енлысь уджсӧ.
Ставыс сӧстӧм, но мортыслы лёк, крукӧдӧ кӧ аслас сёянӧн мӧдсӧ.
Бурджык, он кӧ сёй яй, он ю вина, он вӧч нинӧм сэтшӧмсӧ, мыйӧ вокыд крукасьӧ да усьӧ.
Тэнад эм эскӧм?
Видз сійӧс сьӧлӧмад Ен водзын.
Шуда сійӧ, коді оз мыжав асьсӧ сыысь, мый бӧрйӧ.
Майшасьӧмӧн сёйысь мыжмӧ, ӧд сійӧ эскытӧг вӧчӧ.
А эскытӧг вӧчӧмыд эм мыж.
Ошкӧм Сылы, коді сетӧ тіянлы зумыда кутчысьны меӧн висьталӧм Бур Юӧрӧ, Исус Кристослӧн велӧдӧмӧ. Сэні висьталӧма важысянь дзебӧм гусяторсӧ. Тайӧ Бур Юӧрсӧ ӧні восьтӧма пророк гижӧдъяс пыр да помтӧг олысь Енлӧн тшӧктӧмыс серти висьталӧма быд кыла войтырлы, медым вайӧдны найӧс кывзысьӧмас да эскӧмас. Дзик ӧти ыджыд мывкыда Енлы ошкӧмыс Исус Кристос пыр нэмъяс чӧж.
Аминь.
15 юр.
Миянлы, вынаяслы, колӧ лоны бур сьӧлӧмаӧн вынтӧмъяс дінӧ налӧн вермытӧмлун дырйи, оз ков мӧвпавны куш ас йывсьыным.
Быдӧнлы колӧ мӧвпавны матыссалы бур вӧчӧм йылысь, сійӧс ёнмӧдӧм могысь.
Ӧд Кристос эз Ас йывсьыс мӧвпав. Гижӧма: «Тэнӧ омӧльтысьяслӧн лёкӧдӧмыс уси Ме вылӧ».
Став воддза гижӧдсӧ вӧлі гижӧма миянӧс велӧдӧм да бурӧдӧм могысь, медым Гижӧд пырыс ми вермим ёнмыны да зумыд лача кутны.
Бурӧдӧмсӧ да зумыдлунсӧ сетысь Ен мед сетас тіянлы ӧти сьӧлӧм. Ӧд Исус Кристос велӧдӧ, мед ті ӧти лолӧн да ӧти вомӧн ошкинныд Енсӧ, миян Господь Исус Кристослысь Батьсӧ.
Сідзкӧ, сибӧдӧй ӧта-мӧднытӧ Кристос сибыдлунӧн, медым ошкыссис Енмыс.
Ме тадзи гӧгӧрвоа: Исус Кристос локтіс кесъявны юдейяслы, медым збыльмӧдны батьяслы кӧсйысьӧмсӧ да петкӧдлыны, мый Енмыс кутӧ Ассьыс кывсӧ. Кристос локтіс кесъявны тшӧтш мукӧд войтырлы, мед и найӧ вермисны ошкыны Енсӧ на дінӧ буралӧмысь.
Та йылысь гижӧма:
— Таысь ме кута нимӧдны Тэнӧ мукӧд войтыр пӧвстын, понда сьылӧмъясӧн ошкыны Тэнсьыд нимтӧ.
Нӧшта гижӧма:
— Нимкодясьӧй, мукӧд войтыр, Сылӧн войтыркӧд.
И нӧшта на:
— Ошкӧй Господьӧс, быд кыла войтыр. Нимӧдӧй Сійӧс, став мувывса йӧз.
Исай висьталӧ:
— Ессей вужсянь петас вож.
Сійӧ кутас веськӧдлыны быд войтырӧн, найӧ Сы вылӧ лача кутны пондасны.
Лачасӧ сетысь Ен мед тыртас тіянӧс нимкодьлунӧн да лӧньлунӧн эскӧманыд, медым Вежа Лов вынӧн ті зумыда сулалінныд лача кутӧмас.
Вокъяс, ме тӧда, тіян бурлуныс да тӧдӧмлуныс тырвыйӧ, ті верманныд туйдӧдны ӧта-мӧднытӧ.
Но тіянлы казьтыштӧм могысь ме мыйсюрӧ гижи повтӧг. Тадзи вӧчи, ӧд Енмыс Аслас буралӧмнас корис менӧ кесъявны Исус Кристослы ентӧдтӧмъяс пӧвстын. Менӧ сувтӧдӧма вӧчны вежа удж: висьтавны Енлысь Бур Юӧрсӧ да вайны ентӧдтӧмъясӧс Ен водзӧ шогмана да Вежа Лолӧн вежӧдӧм вись пыдди.
Исус Кристос пытшкын ме верма ошйысьны Енлы кесъялӧмӧн. Лысьта висьтавны сӧмын сы йылысь, мый Кристос вӧчис ме пыр, медым вайӧдны ентӧдтӧмъясӧс Енлысь кывзысьӧмас. Сійӧ вӧчис тайӧс Енмыслӧн Лов вынӧн менам сёрниӧй да уджӧй пыр, индысьпасъяс да шензьӧданаторъяс пыр. Ерусалимсянь да водзӧ ме паськӧді Кристос йылысь Бур Юӧрсӧ, весиг Иллирикӧдз вои.
Мед эз ло вӧчӧма мукӧдлӧн подув вылын, ме зіли висьтавны Бур Юӧрсӧ сэні, кӧні Кристос нимсӧ эз на кывлыны.
Та йылысь гижӧма:
— Кодъяслы эз висьтавлыны Сы йылысь, найӧ аддзасны, кодъяс эз на кывлыны, найӧ тӧдмаласны.
Тайӧ уджыс унаысь кутіс менӧ тіян дінӧ волӧмысь.
Ӧні менам помалӧма тані уджсӧ. Гашкӧ, уна вося кӧсйӧмӧй волыны тіян дінӧ сэсся збыльмас. Испанияӧ мунігӧн пырала тіян дінӧ.
Ёна кӧсъя аддзысьлыны тіянкӧд, медым кӧть этшаник вермим ӧтлаын нимкодясьыштны. Лача кута, мый сэсся отсаланныд меным водзӧ туйӧ петны.
Ӧні ме мӧдӧдча Ерусалимӧ кесъявны вежа войтырлы. Македонияса да акайяса эскысьяс шуисны сетны кутшӧмсюрӧ отсӧг ерусалимса гӧль эскысьяслы.
Тадзи шуисны вӧчны, ӧд найӧ уджйӧзаӧсь юдейяслы: юдейяс пыр налы вичмис енэжвывса бурсиӧмыс.
Сідзкӧ, налы тшӧтш колӧ отсавны вежа войтырлы налӧн быдлунъя олӧмын.
Тайӧ отсӧгсӧ нуӧм бӧрын вӧлисти муна Испанияӧ. Сэтчӧ мунігмоз кежала тіян дінӧ. Ме тӧда: ме локта тіян дінӧ Кристос Бур Юӧрсянь тыр бурсиӧмӧн.
Вокъяс, миян Господь Исус Кристос нимӧн да Вежа Ловсянь муслунӧн кора тіянӧс: ӧтвывтчӧй менам тышъясӧ да кевмысьӧй ме вӧсна Енмыслы, медым эг веськав Юдеяын эскытӧмъяс киӧ, да вайӧм отсӧгыс мед шогмас ерусалимса вежа войтырлы. Ен кӧ сетас, нимкодьпырысь локта тіян дінӧ да шойччышта тіян ордын.
Лӧньлунсӧ сетысь Ен ставныдкӧд тіянкӧд. Аминь.
16 юр.
Ме тӧдмӧда тіянӧс Фива чойкӧд. Сійӧ Кенкреяын вичкоса отсасьысь.
Сибӧдӧй сійӧс Господь нимсянь, кыдзи лӧсялӧ вежа войтырлы, ковмас кӧ, отсыштӧй сылы. Ачыс сійӧ уналы отсаліс, тшӧтш меным.
Висьталӧй чолӧм Прискиллалы да Акиллы. Найӧ мекӧд ӧтвыв кесъялӧны Исус Кристослы. Найӧ вӧліны дасьӧсь олӧмнысӧ сетны ме вӧсна. Да ог сӧмын ӧтнам ме аттьӧав найӧс, тшӧтш мукӧд войтырса вичкояс. Чолӧм тшӧтш на ордын чукӧртчысь эскысьяслы.
Чолӧм менам муса Епенетлы, Акайяын сійӧ медводз эскис Кристослы.
Чолӧм Мариамлы, сійӧ уна уджаліс-отсасис миянлы.
Чолӧм менам ас войтырсалы: Андрониклы да Юниялы, накӧд ме пукавлі дзескыдінын. Найӧ пыдди пуктана йӧз апостолъяс пӧвстын, и найӧ меысь водз эскисны Кристослы.
Чолӧм Амплийлы, сійӧ менам муса вок.
Чолӧм Урбанлы, сійӧ миян моз тшӧтш кесъялӧ Кристослы. Чолӧм муса Стакий ёртлы.
Чолӧм Апелеслы. Сійӧ Кристос вӧсна уна сьӧкыд пыр муніс.
Чолӧм Аристовуллӧн гортсалы.
Чолӧм менам Иродион рӧдвужлы.
Висьталӧй чолӧм Наркислӧн гортсаяс пиысь налы, кодъяс эскӧны Господьлы.
Чолӧм тшӧтш мӧдӧда Енлысь уджсӧ вӧчысьяслы: Трифеналы да Трифосалы.
Чолӧм муса Персида чойлы, сійӧ ёна уджаліс Господьлы.
Чолӧм Руфослы, Господьӧн бӧрйӧмалы, да сылӧн мамыслы, ӧд сійӧ меным тшӧтш мам кодь.
Чолӧм Асинкритлы, Флегонтлы, Ермлы, Патровлы, Ермийлы да накӧд уджалысь вокъяслы.
Чолӧм Филологлы да Юлиялы, Нирейлы да сылӧн чойыслы, Олимпанлы да накӧд сэні став вежа войтырлы.
Чолӧмалӧй ӧта-мӧднытӧ вежа окыштӧмӧн.
Кристослӧн быд вичкосянь тіянлы чолӧм.
Вокъяс, кора тіянӧс, видзчысьӧй наысь, кодъяс пыртӧны вичкоад вензьӧмъяс, да кежӧдӧны эскӧмсьыс. Ылыстчӧй татшӧмъяссьыс.
Татшӧм йӧзыс кесъялӧны оз Исус Кристос Господьнымлы, но асланыс рушкулы. Мича сёрнинас найӧ кокньыда ылӧдлӧны восьса сьӧлӧмаясӧс.
Тіян кывзысяна олӧмныд быдӧнлы бура тӧдса.
Таысь меным нимкодь. Кӧсъя, мед эськӧ ті вӧлінныд тэрыбӧсь бурыс вылӧ, но ньӧжмыдӧсь лёкыс вылӧ.
Лӧньлунсӧ сетысь Ен регыд песовтас сӧтанасӧ тіян кокъяс улӧ.
Миян Господь Исус Кристослӧн буралӧмыс тіянкӧд.
Аминь.
Тіянлы ыстӧны чолӧм менам Тимофей уджъёртӧй да ас войтырысь Луций, Ясон да Сосипатр вокъяс.
Чолӧмала тіянӧс тшӧтш ме, Тертий, тайӧ гижӧдсӧ гижысь.
Чолӧм Гайсянь. Сійӧ сибӧдӧ ас ордас став эскысьсӧ, тшӧтш и менӧ.
Тіянлы ыстӧны чолӧм Кварт вок да карса сьӧм видзысь Ераст.
Миян Господь Исус Кристослӧн буралӧмыс ставныдкӧд тіянкӧд.
Аминь.
Апостол Павеллӧн Коринфӧ медводдза мӧдӧдӧм гижӧд
1 юр.
Гижӧ Павел, Енлӧн корӧм-кӧсйӧм серти Исус Кристослӧн апостол. Сосфен воккӧд ми чолӧмалам тіянӧс, коринфса Ен вичкоӧс. Исус Кристос пыр Енмыс вежӧдіс тіянӧс да корис лоны Аслас вежа войтырӧн. Ми чолӧмалам быдӧнӧс, коді быдлаын миян моз шыасьӧ Исус Кристос Господьным нимӧ. Буралӧм да лӧнь олӧм тіянлы миян Ен Батьсянь да Господь Исус Кристоссянь.
Быд кадӧ ошка ассьым Енмӧс тіян дінӧ Сылӧн буралӧмысь. Тайӧ буралӧмсӧ Сійӧ петкӧдліс Исус Кристос пыр. Сы пыр Енмыс озырмӧдіс тіянӧс быдторнас, ті кужанныд бура сёрнитны, тіян эм быдпӧлӧс тӧдӧмлун. Кристос йылысь висьталӧмыс зумыда вужъясис тіян сьӧлӧмӧ, та вӧсна миян Господь Исус Кристослысь локтӧмсӧ виччысигӧн ті озырӧсь быдпӧлӧс бурсетӧмнас. Енмыс ёнмӧдас тіянӧс зумыда сулавны помӧдз, медым миян Господь Исус Кристослӧн лунӧ ті вӧлінныд сӧстӧмӧсь.
Енмыс эскана, Сійӧ корис ӧтувтчыны тіянӧс Аслас Пиыскӧд — миян Господь Исус Кристоскӧд.
Вокъяс, кора тіянӧс миян Господь Исус Кристос нимӧн: ас костаныд энӧ юксьӧй, олӧй ӧти мӧвпъясӧн, ӧти видзӧдласӧн да ӧти могӧн.
Вокъяс, Клоялӧн гортсасянь ме кывлі, ті пӧ вензянныд ӧта-мӧдныдкӧд.
Ме сёрнита сы йылысь, мый ті быдӧн ас йывсьыныд шуанныд: «Ме — Павеллӧн», «ме — Аполослӧн», «ме — Кифалӧн», а «ме — Кристослӧн».
Гашкӧ, Кристосӧс вӧлі юклӧма?
Гашкӧ, Павелӧс вӧлі тувъялӧма тіян вӧсна?
Гашкӧ, Павел нимӧн ті пыртчинныд?
Ошка Енмӧс, Крисп да Гай кындзи некодӧс эг пырт тіян пиысь. Сідзкӧ, некод оз вермы шуны, мый ме пырті кодӧскӧ аслам нимӧн.
Нӧшта Степанӧс пырті да сылысь гортсасӧ, сэсся пырті-ӧ кодӧскӧ — ог тӧд.
Ӧд Кристос мӧдӧдіс менӧ эз пыртны, а висьтавлыны Ассьыс Бур Юӧрсӧ. Тайӧ Юӧрсӧ ме висьтала ог мывкыд кывъясӧн, медым Кристослӧн крестыс эз вошты ассьыс вынсӧ.
Ӧд вошӧмаяслы крест йылысь висьталӧмыс — йӧйталӧм, а миянлы, мездмӧмаяслы — Енлӧн выныс.
Гижӧма: «Мывкыда йӧзлысь мывкыдлунсӧ бырӧда, вежӧра йӧзлысь вежӧрлунсӧ ӧтдорта».
Коді нӧ мывкыда йӧзыс?
Коді велӧдчӧмаыс?
Коді нӧ тайӧ му вылас вежӧра йӧзыс?
Эз-ӧ тайӧ мувывса мывкыдлунсӧ Енмыс йӧйталӧмӧ бергӧд?
Енмыс Ассьыс мывкыдлунсӧ петкӧдліс мувывса йӧзлы, но йӧзыс асланыс мывкыдлунӧн Енсӧ эз гӧгӧрвоны. Сэки Енмыс мӧвпыштіс мездыны найӧс, кодъяс эскӧны миян висьталӧмлы. Тайӧ висьталӧмсӧ йӧзыс шуӧны йӧйталӧмӧн.
Юдейяс корӧны вӧчны шензьӧданаторъяс, грекъяс — петкӧдлыны мывкыдлун, а ми висьталам тувъялӧм Кристос йылысь. Юдейяс крукасьӧны тайӧ висьталӧмас, а грекъяс лыддьӧны тайӧс йӧйталӧмӧн. Но Енлӧн корӧмаяслы, юдейяслы да грекъяслы, Кристос — Енлӧн выныс да мывкыдлуныс.
Ӧд Енлӧн “мывкыдтӧмлуныс” ёна ыджыдджык морт мывкыдысь, да Енлӧн “жеблуныс” ёна вынаджык морт вынысь.
Вокъяс, видзӧдлӧй ас выланыд, кутшӧмӧсь ті, Енлӧн корӧмаяс. Морт видзӧдлас серти этша тіян пӧвстын мывкыдаыс, этша юралысьыс да бур рӧдысь петысьыс. Но Енмыс бӧрйис тайӧ муюгыдсьыс мывкыдтӧмсӧ, медым янӧдны мывкыдасӧ, бӧрйис жебсӧ, медым янӧдны вынасӧ, бӧрйис тайӧ муюгыдсьыс медся шогмытӧмсӧ, коньӧрсӧ да увтыртӧмсӧ, медым нинӧм туйӧ пуктыны нималанасӧ, медым Ен водзын некод эз ошйысь аснас.
Енмыс йитіс тіянӧс Исус Кристоскӧд, коді лои миянлы мывкыдлуннас. Сы пыр Енмыс мездіс миянӧс, вӧчис веськыдӧн да вежа войтырӧн. Ӧд гижӧма: «Ошйысьысь мед ошйысьӧ Господьӧн».
2 юр.
Вокъяс, кор ме волі тіян дінӧ висьтавны Енсянь юӧр, сэки сёрниті тіянкӧд эг мича да мывкыд кывъясӧн. Ме мӧвпышті, мый тіянын олігӧн кӧсъя тӧдны сӧмын Исус Кристосӧс — тувъялӧм Кристосӧс. Тіян дінӧ ме локті жебӧн да полысьӧн, сьӧлӧмӧй ёна тіраліс.
Ме висьтавлі тіянлы да сёрниті тіянкӧд эг аслам мывкыдлунсянь, эг эскӧдан кывъясӧн, но менам кывъясын вӧлі Ловлӧн выныс. Ме сёрниті тадзи, медым тіян эскӧмныд подуласис Енлӧн вын вылӧ, а эз мортлӧн мывкыдлун вылӧ.
Мывкыдлун йылысь ми висьталам зумыда эскысьяслы. Ми висьталам огӧ тайӧ муюгыдас олысьяслӧн да юралысьяслӧн мывкыдлун йылысь, ӧд тайӧ юралысьяссӧ лоӧ бырӧдӧма. Ми висьталам Енлӧн гуся мывкыдлуныс йылысь, кодӧс быдӧнысь вӧлі дзебӧма. Но олӧм пуксьытӧдзыс на Енмыс вӧлі мӧвпыштӧма, мый Сылӧн мывкыдлуныс ваяс миянлы дзирдлун. Тайӧ муюгыдас юралысьяс пӧвстысь некод эз тӧд Енлӧн мывкыдлуныс йылысь.
Тӧдісны кӧ, найӧ эськӧ эз тувъявны дзирдлуна Господьӧс.
Ӧд гижӧма:
— Эз аддзывлы син, эз кывлы пель, весиг юрас мортлы эз волы, мый Енмыс дасьтӧма Сійӧс радейтысьяслы.
Енмыс восьтіс тайӧс миянлы Аслас Ловнас, ӧд Лолыс ставсӧ тӧдӧ. Сійӧ тӧдӧ Енлысь став пыдта-судтасӧ.
Вермас-ӧ кодкӧ тӧдны мортлысь мӧвпъяссӧ сылӧн лолыс кындзи?
Тадзи Енлысь мӧвпъяссӧ некод оз тӧд Енлӧн Лолыс кындзи.
Ми сибӧдім эгӧ тайӧ муюгыдсалысь ловсӧ, а Енлысь Ловсӧ, медым вермим тӧдны Енлысь сетӧмторъяссӧ. Ми висьталам та йылысь огӧ асланым мывкыдлунсянь, огӧ ас кывъясӧн, а Вежа Ловсянь сетӧм кывъясӧн. Ловсянь висьталӧмсӧ ми гӧгӧрвоӧдам Лов отсӧгӧн. Морт пытшкас кӧ абу Енлӧн Лолыс, сійӧ оз вермы сибӧдны Ловсянь висьталӧмсӧ да лыддьӧ тайӧс йӧйталӧмӧн.
Мортыс оз вермы гӧгӧрвоны висьталӧмсӧ, ӧд тайӧс позьӧ донъявны сӧмын Енлӧн Лолыс отсӧгӧн.
Морт пытшкас кӧ эм Енлӧн Лолыс, татшӧм мортыс вермӧ донъявны быдтор, а сійӧс донъявны некод оз вермы.
— Коді гӧгӧрвоас Господьлысь мывкыдсӧ? Коді вермас туйдӧдны Сійӧс?
Но миян пытшкын Кристослӧн мывкыдыс.
3 юр.
Вокъяс, ме эг вермы сёрнитны тіянкӧд Лов серти олысьяскӧд моз. Ме сёрниті тіянкӧд вир-яй серти олысьяскӧд моз, ӧд ті быттьӧ век на кагаяс Кристослы эскӧмын.
Ме верді тіянӧс йӧлӧн, а эг чорыд сёянӧн, ӧд ті энӧ на вермӧй сёйны чорыдсӧ. Ті ӧнӧдз онӧ вермӧй сёйны сійӧс, ӧд ті вир-яй серти на оланныд.
Тіян костын пыр на овлӧ вежалӧм, вензьӧм да юксьӧм. Сідзкӧ, ті вир-яй серти на оланныд, ті пыр на тайӧ муюгыдсаыс кодьӧсь.
Ӧти шуӧ: «Ме — Павеллӧн», мӧд шуӧ: «ме — Аполослӧн». Тадзи кӧ сёрнитанныд, сідзкӧ, ті дзик на тайӧ муюгыдсаыс кодьӧсь.
Коді нӧ Павелыс?
Коді Аполосыс?
Найӧ сӧмын кесъялысьяс, кодъяс пыр ті эскинныд Кристослы. На пиысь быдӧн Господьсянь сетӧм удж вӧчис.
Ме кӧдзи, Аполос киськаліс, а быдтіс Енмыс.
Сідзкӧ, кӧдзысьыс да киськалысьыс нинӧм, ӧд быдтысьыс — Енмыс.
Кӧдзысьыс да киськалысьыс ӧти удж вӧчӧны, но быдӧн на пиысь удждонсӧ уджыс серти босьтас.
Ми — Енкӧд ӧтвыв уджалысьяс, а ті — Сылӧн кӧдзӧм муыс, Сылӧн тэчасыс.
Енлӧн бурсетӧмыс вӧсна ме лои бур тэчысьӧн да пукті подувсӧ, а мӧд лэптӧ сы вылӧ.
Но быдӧн мед видзӧдӧ аслас удж бӧрся.
Подувсӧ пуктӧма нин, тайӧ — Исус Кристос. Тайӧ подулыс кындзи мӧд подув некод оз вермы пуктыны.
Тайӧ подув вылас мортыс вермӧ лэптыны тэчассӧ зарниысь, эзысьысь, дона изйысь, пуысь, турунысь либӧ идзасысь, но уджыс быдӧнлӧн ас кадӧ тыдовтчас.
Тайӧс Мыждан луныс петкӧдлас, ӧд сійӧ биӧн локтас. Сэки биыс быдӧнлысь уджсӧ тӧдмалас.
Кодлӧн вӧчӧмторйыс кутас зумыда сулавны, сійӧ ассьыс удждонсӧ босьтас.
А сотчас кӧ, сэки удждонсӧ воштас.
Дерт, асьсӧ сійӧс лоӧ мездӧма, быттьӧ биысь перъясны.
Ті ӧмӧй онӧ тӧдӧй: ті — Енлӧн оланін, Енлӧн Лолыс олӧ тіян пытшкын.
Коді жугӧдас Енлысь оланінсӧ, Енмыс сійӧс асьсӧ жугӧдас.
Ӧд ті — Енлӧн оланін, а Енлӧн оланіныс вежа.
Асьнытӧ энӧ ылӧдлӧй.
Тайӧ муюгыдас кӧ лыддьӧ кодкӧ асьсӧ мывкыдаӧн, медводз сійӧ мед лоӧ мывкыдтӧмӧн. Сэки сійӧ збыльысь лоӧ мывкыда.
Ӧд Ен син водзын тайӧ му вылас олысьяслӧн мывкыдлуныс — йӧйталӧм.
Гижӧма: «Енмыс кыйӧ мывкыдаясӧс асланыс наянлунӧ».
Нӧшта гижӧма:
— Господь тӧдӧ мывкыда йӧзлысь мӧвпъяссӧ, налӧн мӧвпъясыс ковтӧмӧсь.
Сідзкӧ, некод мед оз ошйысь мортӧн, ӧд ставыс тіян: Павел-ӧ, Аполос-ӧ, Кифа-ӧ, муюгыдыс-ӧ, олӧмыс-ӧ, кулӧмыс-ӧ, ӧніяыс-ӧ, локтанаыс-ӧ — ставыс тайӧ тіян.
Ті — Кристослӧн, а Кристос — Енлӧн.
4 юр.
Сідзкӧ, лыддьӧй миянӧс Кристослы кесъялысьясӧн, кодъяс кывкутӧны Енлӧн гусяторъяс вӧсна.
Сӧмын татшӧм кывкутысьяслы колӧ лоны эсканаӧн.
Дерт, меным дзик веськодь, ті-ӧ менӧ мыжданныд, йӧзыс-ӧ.
Ме весиг ачым ачымӧс ог мыжды.
Сьӧлӧмӧй оз мыжды менӧ, но тайӧ оз на висьтав менам веськыдлун йылысь.
Ӧд менӧ мыждысьыс — Господь.
Та вӧсна Господь локтӧдз, кадысь водз, некодӧс энӧ мыждӧй. Сійӧ югдӧдас пемыдас дзебӧмасӧ да восьтас мортлысь мӧвпъяссӧ. Сэки быдӧнлы вичмас Енсянь ошкӧмыс.
Вокъяс, ставсӧ тайӧс ме серпасалӧмӧн висьталі тіянлы ас йылысь да Аполос йылысь, медым миян вылӧ видзӧдӧмӧн ті велӧдчинныд гӧгӧрвоны тайӧ кывъяссӧ: «Кутчысьӧй Гижӧдас». Сэки ті онӧ кутӧй ышнясьны, ӧтиӧс вылӧ кыпӧдны, а мӧдӧс увтыртны.
Тэ ӧмӧй бурджык мукӧдсьыс?
Енлӧн сетӧмыс кындзи тэнад ӧмӧй эм мыйкӧ аслад?
Абу кӧ, сідзкӧ, мыйла ошйысян, мый ставыс тэнад.
Тіян ставыс эм, ті ёна нин озырминныд. Ӧні ті — ӧксыяс, а ми — некод.
Дерт, ме ёна кӧсъя, медым ті збыльысь вӧлінныд ӧксыясӧн. Сэки эськӧ тіянкӧд ӧтвыв вермим ӧксыавны.
Но ме чайта, Енмыс пуктіс миянӧс, апостолъясӧс, медбӧръя лыдас, быттьӧ кулӧм вылӧ мыждӧмаясӧс. Ӧд муюгыдас быд олысьлы — анделъяслы и йӧзыслы — ми лоим видзӧданторйӧн.
Кристос вӧсна ми йӧйӧсь, а ті Кристос пытшкын мывкыдаӧсь.
Ми жебӧсь, а ті вынаӧсь.
Миянӧс лёкӧдӧны, а тіянӧс ошкӧны.
Ми ӧнӧдз сёйтӧг-ютӧг олам да лёкиник паськӧмӧн ветлам. Миянӧс нӧйтӧны, ми пыр туйынӧсь. Кок йылысь усьтӧдз уджалам, ас ки помысь кынӧмпӧт перъям.
Миянӧс лёкӧдӧны, а ми бурсиам, миянӧс вӧтлӧны, а ми терпитам.
Миянӧс омӧльтӧны, а ми бур ногӧн сёрнитам.
Тайӧ му вылас олысьяслы ми ёг пыдди, найӧ ӧнӧдз лыддьӧны миянӧс шыбласӧн.
Гижа тайӧс тіянӧс туйдӧдӧм могысь, а ог янӧдӧм могысь, ӧд ті менам муса ныв-пи.
Дерт, тіян вермас лоны Кристос йылысь уна сюрс велӧдысь, но батьыс сӧмын ӧти, ӧд Бур Юӧрсӧ тіянлы ме висьтавлі. Тадзи чужті тіянӧс Исус Кристослы эскысьясӧн.
Сідзкӧ, кора тіянӧс: видзӧдӧй ме вылӧ, ӧд ме видзӧда Кристос вылӧ.
Ме мӧдӧді тіян дінӧ Тимофейӧс. Господь пытшкын сійӧ менам муса пи да эскана кесъялысь. Сійӧ казьтыштас тіянлы Кристоскӧд менам ӧтувъя олӧм йылысь. Та йылысь ме велӧда быдлаын, быд вичкоын.
Ӧткымынӧн тіян пиысь кутісны вывтіасьны, чайтӧны, мый ог лок тіян дінӧ.
Но Енмыс кӧ сетас, регыд локта да тӧдмала тайӧ йӧзыслысь вынсӧ, ог кут налӧн сёрни вылӧ видзӧдны.
Ӧд Енлӧн Юралӧмыс абу кывъясын, а вынын.
Сідзкӧ, мыйӧн локны тіян дінӧ: беддьӧн али рам сьӧлӧмӧн да муслунӧн? Мый бӧръянныд?
5 юр.
Ме кывлі, ӧткымынӧн пӧ тіян пӧвстысь кырсалӧны, и сідзи, мый татшӧмыс оз овлы весиг ентӧдтӧмъяс пӧвстын. Кодкӧ пӧ тіян пиысь узьлӧ весиг батьыслӧн гӧтырыскӧд.
Оз ӧмӧй тіянлы ков шогсьыны та вӧсна да вӧтлыны ас дорсьыныд тайӧ мортсӧ? А ті пыр на ышнясянныд.
Дерт, вир-яйӧн ме абу тіянкӧд, но ловнам тіянкӧд. Ме быттьӧ ачым вӧлі тіянкӧд да мӧвпышті, мый вӧчны тайӧ мортыскӧд. Кор ті чукӧртчанныд миян Господь Исус Кристос нимӧн, ловнам лоа тіянкӧд, миян Господь Исус Кристослӧн выныс тшӧтш лоӧ тіянкӧд. Сэки тайӧ мортсӧ сетӧй сӧтана киӧ вир-яйсӧ жугӧдӧм вылӧ, мед лолыс сылӧн мездмас миян Господь Исус Кристослӧн лунӧ.
Тіянлы нинӧмӧн ошйысьнысӧ.
Ті ӧмӧй онӧ тӧдӧй, мый этшаник няньшом шоммӧдӧ дзоньнас кӧтассӧ.
Сідзкӧ, весалӧй ас пытшсьыныд няньшомнытӧ, медым лоинныд выль кӧтасӧн. Дерт, тіян пытшкын шоммӧданторйыс абу нин, ӧд Кристосӧс, Ыджыд лунся Балянымӧс, вайӧма нин вись пыдди миян вӧсна.
Сідзкӧ, огӧ кутӧй пасйыны Ыджыд лунсӧ важ няньшомӧн: лёклунӧн да наянлунӧн. Кутам пасйыны сійӧс шомтӧм няньӧн: сӧстӧмлунӧн да збыльӧн.
Водзынджык ме тіянлы гижлі нин: энӧ кутӧй некутшӧм йитӧд кырсалысьяскӧд. Ме ог сёрнит тайӧ мувывса кырсалысьяс, горшасьысьяс, гусясьысьяс да идоллы юрбитысьяс йылысь. Сэки эськӧ ковмис эновтны тіянлы тайӧ муюгыдсӧ.
Но ме сёрнита сэтшӧм морт йылысь, коді шуӧ асьсӧ эскысьӧн, но ачыс кырсалӧ, горшасьӧ, суклясьӧ, гусясьӧ, кодалӧ да идоллы юрбитӧ — татшӧмыскӧд энӧ кутӧй некутшӧм йитӧд. Весиг энӧ сёйӧй сыкӧд ӧтлаын.
Меным ӧмӧй мыждыны вичкоысь ортсысасӧ?
Енмыс найӧс мыждас.
А вичкосаӧс — тіянлы мыждыны.
«Вӧтлӧй ас дінсьыныд лёк оласногаӧс».
6 юр.
Ті кӧ мыйыськӧ вензянныд ӧта-мӧдныдкӧд, сэки кыдзи лысьтанныд шыасьны мувывса мыждысьяс дінӧ? Оз ӧмӧй вежа войтыр дінӧ ков шыасьны?
Ті ӧмӧй онӧ тӧдӧй, мый вежа войтыр кутас мыждыны муюгыдсасӧ?
Кутанныд кӧ мыждыны муюгыдсасӧ, мыйла тайӧ ичӧтикторъясыс кузя онӧ вермӧй ӧти кывйӧ воны?
Ті ӧмӧй онӧ тӧдӧй: ми весиг анделъясӧс кутам мыждыны? Сідзкӧ, дерт нин, быдлунъя могъяс кузя вермам ӧти кывйӧ воны.
Кор ті вензянныд ӧта-мӧдныдкӧд быдлунъя могъяс йылысь, сэки ті шыасянныд на дінӧ, кодъяс абу вичкосаяс.
Шуа тайӧс тіянӧс янӧдӧм могысь. Оз ӧмӧй тіян пӧвстысь сюр мывкыда морт, коді эськӧ бурӧдіс эскысьясӧс ӧта-мӧдныскӧд?
Мӧдарӧ, ті ӧта-мӧднытӧ мыжданныд да шыасянныд та могысь эскытӧмъяс дінӧ.
Ті кӧ мыжданныд ӧта-мӧднытӧ, тайӧн сӧмын янӧданныд асьнытӧ.
Оз-ӧ бурджык ло, кутасны кӧ вӧчны тіянлы лёксӧ да мырддявны тіянлысь?
Но ті асьныд лёка вӧчанныд да мырддяланныд мукӧдлысь, весиг эскысьяслысь.
Ті ӧмӧй онӧ тӧдӧй, мый лёксӧ вӧчысьяслы оз вичмы Енлӧн Юраланіныс.
Энӧ ылӧдлӧй асьнытӧ. Ӧд кырсалысьлы, идоллы юрбитысьлы, гозъя олӧм пежалысьлы, пеж оласногалы, ӧта-мӧдныскӧд узьлысь айуловлы, гусясьысьлы, горшасьысьлы, кодалысьлы, суклясьысьлы да мырддялысьлы — некодлы оз вичмы Енлӧн Юраланіныс.
Кодсюрӧ тіян пӧвстысь тшӧтш вӧлінныд татшӧмӧсь.
Но миян Господь Исус Кристос нимӧн да Ен Лов вынӧн ті лоинныд сӧстӧмӧсь, вежаӧсь да веськыдӧсь.
«Меным ставсӧ позьӧ», но абу ставыс бур вылӧ.
«Меным ставсӧ позьӧ», но ме ог лэдз, медым мыйкӧ ыджыдаліс ме вылын.
Сёяныс — кынӧмлы, а кынӧмыс — сёянлы.
Но Енмыс бырӧдас ӧтисӧ и мӧдсӧ.
Вир-яйыс абу кырсалӧм вылӧ, сійӧ — Господьлы, а Господь — вир-яйлы.
Енмыс ловзьӧдіс Господьӧс, Аслас вынӧн Енмыс ловзьӧдас тшӧтш миянӧс.
Ті ӧмӧй онӧ тӧдӧй, мый тіян вир-яйныд — Кристос вир-яйлӧн юкӧн?
Сідзкӧ, верма ӧмӧй Кристослысь юкӧнсӧ кырсалысь анькӧд йитны?
Ен мед видзас.
Ті ӧд тӧданныд, мый кырсалысь анькӧд ӧтувтчысь лоӧ сыкӧд ӧти вир-яйӧн.
Гижӧма: «Кыкыс лоӧны ӧти вир-яйӧн».
А Господькӧд ӧтувтчысь лоӧ Сыкӧд ӧти лола.
Сідзкӧ, энӧ кырсалӧй.
Мукӧд мыжсӧ вӧчысь оз аслас вир-яйлы паныд вӧч, а кырсалысь аслас вир-яйлы паныд мыж вӧчӧ.
Ті ӧмӧй онӧ тӧдӧй, мый тіян вир-яйныд — Вежа Ловлӧн крамыс, Сійӧ олӧ тіян пытшкын. Тайӧ Ловсӧ Енмыс сетіс тіянлы, ӧні ті абу нин асланыдӧсь.
Енмыс ньӧбис тіянӧс ыджыд дон вылӧ.
Сідзкӧ, ошкӧй Енсӧ вир-яйнад и ловнад, ӧд ставыс Сылӧн.
7 юр.
Ті меным гижлінныд да юалінныд гӧтрасьӧм йылысь. Та вылӧ вочавидза тадзи: дерт, тайӧ бур, мортыс кӧ оз гӧтрась,
но медым некод эз кырсав, быд мортлӧн мед лоӧ аслас гӧтыр да быд аньлӧн — аслас верӧс.
Вольпасьын верӧс сет асьтӧ гӧтырлы, а гӧтыр сет асьтӧ верӧслы.
Абу гӧтыр аслас вир-яй вылын ыджыдыс, а верӧс.
Абу верӧс аслас вир-яй вылын ыджыдыс, а гӧтыр.
Энӧ ылыстчӧй ӧта-мӧдсьыныд, а ылыстчанныд кӧ, вӧчӧй тайӧс сёрнитчӧмӧн, сӧмын кутшӧмкӧ кад кежлӧ, медым ёнджыка на верминныд видзавны да кевмысьны.
Сэсся бӧр ӧтлаын лоӧй, медым сӧтана эз ыштӧд тіянӧс кутчысьтӧм вӧснаныд.
Дерт, тайӧ абу тшӧктӧм, но ті верманныд тадзи вӧчны.
Ме кӧсйи эськӧ, медым быдӧн оліс ме моз.
Но Енмыс быдӧнлы вичмӧдӧ торъя бурсетӧм: ӧтилы — сэтшӧмӧс, мӧдлы — татшӧмӧс.
Гӧтыртӧмъяслы да дӧваяслы тадзи висьтала: бурджык тіянлы ме моз ӧткӧн овны,
но онӧ кӧ вермӧй кутны асьнытӧ, гӧтрасьӧй либӧ верӧс сайӧ петӧй.
Ӧд бурджык гӧтрасьны либӧ верӧс сайӧ петны, медым лёкколӧмыс эз ыджыдав тіян вылын.
Гозйӧн олысьяслы тадзи висьтала: гӧтыр мед оз юксьы аслас верӧскӧд. Тайӧ абу менам тшӧктӧм, а Господьлӧн. А юксяс кӧ, мед ӧтнасӧн олӧ либӧ бӧр бурасьӧ верӧсыскӧд. Верӧс мед тшӧтш оз юксьы аслас гӧтыркӧд.
Мукӧдыслы висьтала ме, оз Господь: кутшӧмкӧ эскысьлӧн кӧ гӧтырыс оз эскы, но кӧсйӧ овны верӧсыскӧд, тайӧ эскысьыс мед оз юксьы аслас гӧтыркӧд.
Тайӧс висьтала тшӧтш эскысь аньлы: сылӧн верӧсыс кӧ оз эскы, но кӧсйӧ овны сыкӧд, тайӧ аньыс мед оз юксьы аслас верӧскӧд.
Тадзи эскысь гӧтырыс пыр Енмыс вежӧдӧ эскытӧм верӧссӧ, и мӧдарӧ, эскысь верӧсыс пыр вежӧдӧ эскытӧм гӧтырсӧ.
Эз кӧ вӧв тадзи, тіян ныв-пиныд эськӧ вӧліны пежӧсь, но ӧні найӧ вежаӧсь.
Эскытӧм верӧс либӧ эскытӧм гӧтыр кӧ кӧсйӧ юксьыны, мед юксьӧ.
Сэки эскысь верӧсӧс либӧ эскысь гӧтырӧс нинӧм оз кут, ӧд Енмыс тшӧктіс овны миянлы лӧня.
Гӧтыр, тэ ӧмӧй верман тӧдны, мый мездан ассьыд верӧстӧ, а тэ, верӧс, ассьыд гӧтыртӧ?
Быдӧн тіян пиысь мед олӧ Енлӧн шуӧм серти да лоӧ сэтшӧмӧн, кутшӧмӧн вӧлі Господьлӧн коригас.
Тадзи ме велӧда быд вичкоын.
Енлӧн коригас кӧ вӧлі вундыштӧма кодӧскӧ, сійӧ мед оз дзеб тайӧс.
Эз кӧ вӧв вундыштӧма — мед оз вундыштчы. Вундыштӧмыс нинӧм, и вундыштчытӧмыс нинӧм, но медшӧр могыс — овны Енлӧн тшӧктӧм серти.
Быдӧн мед лоӧ сэтшӧмӧн, кутшӧмӧн вӧлі Енлӧн коригас.
Енлӧн коригас кӧ вӧлін кесйӧгӧн, эн майшась, но позьӧ кӧ мездмыны, бурджыксӧ бӧрйи.
Ӧд Господьлӧн коригас кӧ мортыс кесйӧгӧн вӧлі, ӧні сійӧ Господьлӧн мездлуна морт.
А мездлуна кӧ вӧлі, ӧні сійӧ Кристослӧн кесйӧг.
Енмыс ньӧбис тіянӧс ыджыд дон вылӧ, сідзкӧ, энӧ лоӧй мортлӧн кесйӧгӧн.
Вокъяс, быдӧн лоӧй Ен водзын сэтшӧмӧн, кутшӧмӧн вӧлінныд Енлӧн коригас.
Ӧні висьтала верӧс сайӧ мунтӧмъяслы. Тайӧ абу Господьлӧн тшӧктӧм, ме висьтала ассьым видзӧдласӧс. Ӧд Господьлӧн буралӧмыс кузя меным позьӧ эскыны.
Ме чайта, тайӧ сьӧкыд кадас мортлы бурджык ӧткӧн кольччыны.
Тэ кӧ гӧтыра — эн юксьы.
Гӧтыртӧм кӧ — эн гӧтрась.
Дерт, гӧтрасян кӧ, он мыжмы.
Ныв кӧ петас верӧс сайӧ, тшӧтш оз ло мыжа.
Но гозъя олӧмас виччысьӧ тіянӧс уна сьӧкыдлун, да таысь кӧсъя видзны тіянӧс.
Вокъяс, кӧсъя шуны тіянлы, мый кадыс коли этша нин.
Та вӧсна гӧтыра морт мед олӧ гӧтыртӧм моз, бӧрдысь — бӧрдтӧм моз, гажӧдчысь — гажӧдчытӧм моз, а ньӧбасьысь — быттьӧ нинӧм эз ньӧб. Тайӧ мувывса озырлуннас вӧдитчысь мед олӧ сідзи, быттьӧ сылӧн нинӧм абу.
Ӧд став тайӧ мувывсаыс регыд бырас.
Кӧсъя, медым ті нинӧм вӧсна энӧ тӧждысьӧй.
Гӧтыртӧм морт тӧждысьӧ Господьлӧн уджъяс вӧсна, медым Господьлы шогмыны, а гӧтыра морт тӧждысьӧ быдлунъя могъяс вӧсна, медым гӧтырыслы шогмыны.
Верӧс сайӧ петӧм да верӧстӧм ань ӧта-мӧдсьыс тшӧтш торъялӧны.
Верӧстӧм ань тӧждысьӧ Господьлӧн уджъяс вӧсна, медым вир-яйнас да ловнас Сы водзын вежаӧн лоны.
А верӧс сайӧ петӧм ань тӧждысьӧ быдлунъя могъяс вӧсна, медым верӧсыслы шогмыны.
Ме висьтала тайӧс тіянлы бур вылӧ. Ме ог кӧсйы тіянӧс нинӧмӧн сьӧктӧдны. Кӧсъя, медым ті олінныд шогмана ногӧн да некытчӧ ылавтӧг сьӧлӧмсяньныд кесъялінныд Господьлы.
Шуам, мортыслӧн эм гӧтырпу. Сійӧ оз гӧтрась сы вылӧ, но асьсӧ кутны оз вермы, да лыддьӧ тайӧс лёкторйӧн, сійӧ мед ас кӧсйӧм сертиыс вӧчӧ, мед гӧтрасьӧ, тайӧ абу мыж.
Но мортыс кӧ зумыда кутӧ ассьыс кывсӧ — вермӧ кутны асьсӧ да шуис овны гӧтрасьтӧг, сійӧ бура вӧчӧ.
Та вӧсна, мортыс кӧ гӧтрасьӧ — бура вӧчӧ, а оз кӧ — нӧшта на бурджыка.
Индӧд серти гӧтыр кӧртасьӧма верӧсыскӧд, кытчӧдз верӧсыс ловъя.
Кулӧ кӧ верӧсыс, гӧтыр вермӧ петны верӧс сайӧ, код сайӧ кӧсйӧ, сӧмын верӧсыс мед Господьлы эскис.
Но бурджык лоӧ, оз кӧ пет верӧс сайӧ.
Чайта, Енлӧн Лолыс эм и ме пытшкын, сійӧн тадзи шуа.
8 юр.
Ӧні кӧсъя сёрнитыштны идоллы вайӧм сёян йылысь. Дерт, ми быдӧн тӧдам та йылысь.
Но тӧдӧмлуныс вайӧдӧ ышнясьӧмӧдз, а муслуныс ёнмӧдӧ.
Мортыс кӧ чайтӧ, мый сійӧ тӧдӧ мыйкӧ, збыльвылас сійӧ нинӧм на оз тӧд.
Но Енмыс кӧ муса мортыслы, Енмыс сійӧс тӧдӧ.
Ӧні висьтышта идоллы вайӧм сёян йылысь. Ми тӧдам, мый идолыс збыльвылас абу, эм сӧмын ӧти Ен.
Дерт, енэжас да му вылас эмӧсь сідз шусяна “енъяс”. Ӧд татшӧм “енмыс” да “ыджыдалысьыс” зэв уна, но миян эм сӧмын ӧти Ен Бать. Сійӧ сетӧ олӧм быдӧнлы, Сылы ми олам. Миян эм сӧмын ӧти Господь — Исус Кристос. Сы пыр вӧчӧма ставсӧ, и Сы пыр сетӧма миянлы олӧм.
Но оз быдӧн тӧд та йылысь. Ӧткымынӧн вӧліны ёна велалӧмаӧсь сёйны идоллы вайӧм яй. Та вӧсна ӧні, яй сёйигӧн, найӧ лыддьӧны сійӧс идоллы вайӧм сёянӧн, и налӧн сьӧлӧмыс мыждӧ найӧс, ӧд найӧ жебӧсь на.
Но сёяныс оз матыст миянӧс Ен дінӧ.
Ӧд ми кӧ огӧ сёйӧй — нинӧм огӧ воштӧй, а сёям кӧ — тайӧ нинӧм оз содты миянлы.
Дерт, ті верманныд сёйны ставсӧ, но видзчысьӧй, медым энӧ лоӧй крукӧдӧн жеб эскысьяслы.
Ӧд жеб эскысь кӧ аддзас, мый тэ тӧдӧмӧн сёян идоллы вайӧм сёян, сэки сійӧ тшӧтш кутас сёйны татшӧм сёянсӧ, весиг сылӧн сьӧлӧмыс кӧ мыждӧ сійӧс.
И тэнад тӧдӧмлун вӧсна вошас тайӧ жеб эскысьыс, тэнад вокыд, код вӧсна куліс Кристос.
Тадзи ті дойданныд жеб вокныдлысь сьӧлӧмсӧ да вӧчанныд мыж сылы паныд. Сідзкӧ, ті вӧчанныд мыж Кристослы паныд.
Та вӧсна менам сёянӧй кӧ уськӧдӧ вокӧс, ме некор ог кут сёйны яй, медым менам вокӧй эз усь.
9 юр.
Ме ӧмӧй абу апостол?
Ме ӧмӧй кӧртасьӧма мыйӧнкӧ?
Ме ӧмӧй эг аддзыв Исус Кристосӧс, миянлысь Господьӧс?
Ті — Господь пытшкынӧсь. Тайӧ ӧмӧй абу менам уджлӧн вотӧсыс?
Гашкӧ, мукӧдыслы ме абу апостол, но тіянлы апостол.
Ті — Господь пытшкынӧсь, и тайӧ висьталӧ, мый ме збыльысь апостол.
Менӧ мыждысьяс водзын ме тадзи дорйыся.
Гашкӧ, миянлы оз позь сёйны-юнысӧ?
Гашкӧ, миянлы оз позь босьтны аскӧд эскысь гӧтырӧс? Ӧд тадзи вӧчӧны мукӧд апостолыс: Господьлӧн вокъяс да Кифа.
Гашкӧ, сӧмын меным да Варнавалы колӧ уджавнысӧ, медым аслыным кынӧмпӧт перйыны?
Шыпурта морт ӧмӧй ас тшӧт весьтас олӧ?
Виноград быдтысь ӧмӧй оз виноград вотӧссӧ сёй?
Пемӧс видзысь ӧмӧй оз пемӧслысь йӧвсӧ ю?
Тадзи мӧвпалӧны оз сӧмын йӧзыс, тадзи висьталӧ тшӧтш Индӧдыс.
Мӧисейлӧн Индӧдас гижӧма: «Вартысь ӧшлысь вомсӧ эн тупкы».
Енмыс ӧмӧй ӧш вӧсна тӧждысьӧ?
Абу ӧмӧй тайӧс миянлы висьталӧма?
Ӧд миянлы гижӧма: «Гӧрысь да вартысь уджалӧны лачаӧн, медым босьтны ассьыныс пай».
Ми кӧдзам тіян сьӧлӧмӧ Ловсянь кӧйдыс. Гашкӧ, тіянлы вывті сьӧкыд, вичмӧданныд кӧ миянлы быдлунъя олӧм вылӧ?
Ӧд мукӧдыслы кӧ ті вичмӧданныд, сідзкӧ, ми ёнджыка на вермам та вылӧ лача кутны.
Но ми нинӧм эгӧ корлӧй тіянлысь. Мӧдарӧ, ми нуам став сьӧкыдсӧ, медым эгӧ вӧлӧй крукӧдӧн Кристослӧн Бур Юӧрлы.
Ті ӧд тӧданныд, мый крамын кесъялысьяс пӧткӧдӧны асьнысӧ крамӧ вайӧмторйӧн, а висьпуктанінын кесъялысьяс босьтӧны аслыныс пай висьпуктанінӧ вайӧмторйысь.
Евангелльӧ висьталысьяслы Господь тшӧтш тадзи тшӧктіс вӧчны: пӧткӧдчыны Бур Юӧр висьталӧм помысь.
Но ме некор тадзи эг вӧчлы.
Ме гижа та йылысь ог аслым мыйкӧ босьтӧм могысь, ӧд бурджык кувны тадзи вӧчӧм дорысь. Но тайӧн ошйысьӧмысь некод оз вермы дугӧдны менӧ.
Ме кӧ висьтавла Бур Юӧр, меным нинӧмӧн ошйысьнысӧ, ӧд тайӧс меным Енмыс тшӧктіс вӧчны.
Курыд шог меным, ог кӧ висьтавлы сійӧс.
Ме кӧ висьтавла Бур Юӧрсӧ ас кӧсйӧм серти, сэки меным удждон лоӧ.
Ог кӧ ас кӧсйӧм серти, сэки индӧм удж вӧча.
Сідзкӧ, кутшӧм менам удждонӧй?
Удждонӧй менам — висьтавлыны Кристос йылысь Бур Юӧрсӧ дон босьттӧг. Дерт, ме верма Бур Юӧр висьтавлӧмысь дон босьтны, но ог кӧсйы тадзи вӧчны.
Ме некодлы абу кесйӧг, но лои кесйӧгӧн быдӧнлы, медым унджык йӧзӧс вайӧдны Кристос дінӧ.
Юдейяскӧд ме куті ачымӧс юдей моз, медым вайӧдны найӧс Кристос дінӧ.
Индӧд серти олысьяскӧд куті ачымӧс на моз, медым вайӧдны найӧс Кристос дінӧ.
Индӧдтӧг олысьяскӧд куті ачымӧс тшӧтш на моз, медым вайӧдны найӧс Кристос дінӧ. Дерт, ме абу Индӧдтӧг олысь, ӧд ме ола Кристослӧн индӧд серти.
Жеб эскысьяскӧд куті ачымӧс тшӧтш на моз, медым вайӧдны найӧс Кристос дінӧ.
Ме вӧчи став позянасӧ, медым эськӧ кымынкӧ мортӧс верми мездыны.
Ставсӧ тайӧс вӧча Евангелльӧ вӧсна, мед меным тшӧтш вичмис сылӧн бурсиӧмыс.
Ті ӧмӧй онӧ тӧдӧй, мый панласигӧн котӧртӧны унаӧн, но тырдоныс вичмӧ сӧмын ӧтилы.
Сідзкӧ, котӧртӧй, медым тайӧ тырдоныс вичмис тіянлы.
Быд панласьысь ёна зільӧ да кутӧ асьсӧ киас, медым котӧртӧм бӧрас сылы вичмис юркытш. Но тайӧ юркытшыс сісьмана. Ми кутам асьнымӧс киын, медым миянлы вичмис сісьмытӧм юркытш.
Та вӧсна некытчӧ кежтӧг котӧрта помӧдз да тышкася ог весьшӧрӧ, менам быд вартӧм веськалӧ коланаинӧ. Ме топӧда ассьым вир-яйӧс да тшӧкта сійӧс кывзысьны, медым мукӧдлы Бур Юӧр висьтавлігӧн ачым вӧлі шогманаӧн.
10 юр.
Вокъяс, кӧсъя казьтыштны тіянлы, мый миян батьяс ставныс ветлісны кымӧр улын да вуджисны саридз вомӧн.
Найӧ ставныс пыртчисны кымӧрын да саридзын да лоисны Мӧисей бӧрся мунысьясӧн.
Найӧ ставныс пӧткӧдчисны ӧти сёянӧн — Ловсянь сёянӧн, ставныс юисны ӧти ва — Ловсянь ва.
Ӧд найӧ юисны Ловсянь сетӧм изйысь, коді ветлӧдліс накӧд.
Тайӧ изйыс вӧлі Кристос.
Но унджыкыс на пиысь эз шогмыны Енмыслы да кулісны овтӧминын.
Ставыс тайӧ велӧдӧ миянӧс, медым миян сьӧлӧмын эз вӧв кӧсйӧм — на моз вӧчны лёксӧ.
Энӧ юрбитӧй идолъяслы, кыдзи вӧчисны кодсюрӧ миян батьяс пӧвстысь. Гижӧдыс висьталӧ: «Йӧзыс сёйисны-юисны, сэсся кутісны ворсны».
Энӧ кырсалӧй, кыдзи вӧчисны кодсюрӧ миян батьяс пӧвстысь.
Сэки ӧти лунӧ куліс на пиысь кызь куим сюрс морт.
Энӧ дӧзмӧдӧй Кристосӧс, кыдзи дӧзмӧдісны кодсюрӧ миян батьяс пӧвстысь, сэсся найӧ кулісны змейяс помысь.
Энӧ шуасьӧй, кыдзи шуасисны кодсюрӧ миян батьяс пӧвстысь. Сэсся Андел-Бырӧдысь виис найӧс.
Ставыс тайӧ вӧлі накӧд, медым ӧлӧдны йӧзсӧ.
Тайӧс гижӧма, медым велӧдны миянӧс, бӧръя кадас олысьясӧс.
Сідзкӧ, чайтан кӧ, мый зумыда сулалан — видзчысь усьӧмысь.
Тіянӧс кӧ суис сьӧкыдлун, тайӧ быд морткӧд вермӧ лоны.
Но Енмыс эскана, Сійӧ оз сет сьӧкыдсӧ вынысь унджык нуны.
Мӧдарӧ, сьӧкыдлун дырйи Сійӧ индас тіянлы петан туй, да ті венанныд сьӧкыдсӧ.
Сідзкӧ, мусаяс, энӧ юрбитӧй идолъяслы.
Ме сёрнита тіянкӧд мывкыда йӧзкӧд моз.
Ӧні ті асьныд мӧвпалӧй, мый йылысь висьтала тіянлы.
Ми бурсиам чашасӧ да чегъялам няньсӧ. Оз-ӧ тайӧ чашаыс йит миянӧс Кристос Виркӧд?
Оз-ӧ тайӧ няньыс йит миянӧс Кристос Вир-яйкӧд?
Няньыс ӧти. Ми тшӧтш ӧти вир-яй, ӧд ми ставным тайӧ ӧти няньсӧ сёям, кӧть ми унаӧн.
Видзӧдлӧй Израиль войтыр вылӧ: найӧ сёйӧны крамӧ вайӧм вись. Тадзи вӧчигӧн оз-ӧ найӧ висьпуктанінкӧд ӧтувтчыны?
Сідзкӧ, мый кӧсъя шуны тайӧн?
Гашкӧ, идолыс либӧ идоллы вайӧм висьыс мыйӧнкӧ тӧдчана?
Абу. Кор ентӧдтӧмъяс вайӧны вись, найӧ вайӧны пеж ловъяслы, а оз Енлы.
Но ме ог кӧсйы, медым ті ӧтувтчинныд пеж ловъяскӧд.
Ті онӧ вермӧй ӧтпырйӧ юны Господьлӧн чашаысь да пеж ловъяслӧн чашаысь.
Ті онӧ вермӧй ӧтпырйӧ сёйны Господькӧд да пеж ловъяскӧд.
Гашкӧ, Господьӧс кӧсъям дӧзмӧдны?
Ми ӧмӧй вынаджыкӧсь Сыысь?
«Меным ставсӧ позьӧ», но абу ставыс бур вылӧ.
«Меным ставсӧ позьӧ», но оз ставыс велӧд бур вылӧ.
Энӧ тӧждысьӧй сӧмын ас вӧснаныд, быдӧн тӧждысьӧй вӧчны бурсӧ мӧд мортлы.
Ті кӧ ньӧбанныд вузасьысьлысь яй, сёйӧй сійӧс повтӧг. Нинӧм энӧ юасьӧй, медым тіян сьӧлӧмныд эз мыжды тіянӧс.
Ӧд муыс, и ставыс, мый эм сы вылын — Господьлӧн.
Эскытӧмъяс пиысь кӧ кодкӧ корас тіянӧс, да ті мунанныд сы ордӧ, сёйӧй сэні ставсӧ. Нинӧм энӧ юасьӧй сёяныс йылысь, медым тіян сьӧлӧмныд эз мыжды тіянӧс.
Но висьталасны кӧ тіянлы: «Тайӧ сёянсӧ вӧлі вайӧма идоллы вись пыдди», сэки энӧ сёйӧй тайӧ сёянсӧ висьталысьыс вӧсна, медым сылӧн сьӧлӧмыс эз мыжды сійӧс.
Ӧд муыс, и ставыс, мый эм сы вылын — Господьлӧн.
Ме сёрнита ог тіян, а мӧд мортлӧн сьӧлӧм мыждӧм йылысь.
Ме нинӧмӧн абу кӧртасьӧма, сідзкӧ, мӧд мортлӧн сьӧлӧмыс оз вермы мыждыны менӧ.
Ме кӧ аттьӧала Енсӧ, сідзкӧ, мыйла менӧ мыждынысӧ, ӧд ме аттьӧала Енсӧ сёянысь?
Та вӧсна сёянныд-ӧ, юанныд-ӧ али нӧшта мыйкӧ вӧчанныд — ставсӧ вӧчӧй Енмӧс ошкӧм могысь.
Энӧ лоӧй крукӧдӧн некодлы: ни юдейяслы, ни грекъяслы, ни Енлӧн Вичколы. Олӧй ме моз, ӧд ме быдторйын зіля шогмыны быдӧнлы. Ме ог тӧждысь ас вӧсна, а тӧждыся мукӧдыс вӧсна, мед найӧ мездмисны.
11 юр.
Видзӧдӧй ме вылӧ, ӧд ме видзӧда Кристос вылӧ.
Вокъяс, ошка тіянӧс, ӧд ті нинӧм абу вунӧдӧмныд менам висьтавлӧмысь. Ті ставсӧ вӧчанныд менам велӧдӧм серти.
Кӧсъя, мед ті тӧдінныд, мый быд верӧслы юрыс — Кристос, гӧтырлы юрыс — верӧс, а Кристослы юрыс — Ен.
Айлов кӧ кевмысьӧ либӧ пророкалӧ юрсӧ вевттьӧмӧн, сійӧ ассьыс юрсӧ янӧдӧ.
Ань кӧ кевмысьӧ либӧ пророкалӧ юрсӧ вевттьытӧг, сійӧ тшӧтш ассьыс юрсӧ янӧдӧ. Ӧд сійӧ нинӧмӧн оз торъяв куш юра аньысь.
Та вӧсна ань кӧ оз вевттьы ассьыс юрсӧ, мед шырсьӧ.
А яндзим кӧ сылы лоны шырӧмаӧн либӧ куш юраӧн, мед вевттьысьӧ.
Айловлы оз ков вевттьыны юрсӧ. Ӧд сійӧ Енлӧн пертасыс. Сійӧ Енмыслы ошкӧм вайӧ, а гӧтыр — верӧслы.
Эз айлов артмы аньсянь, но ань — айловсянь.
Абу айловӧс вӧчӧма аньлы, но аньӧс — айловлы.
Та вӧсна аньлы колӧ вевттьыны юрсӧ. Тайӧ лоӧ пасӧн, мый сы вылын эм ыджыдалан вын, медым тӧдісны та йылысь анделъяс.
Но Господь пытшкын айлов оз вермы лоны аньтӧг, и ань — айловтӧг.
Ӧд ань артмис айловсянь, айлов чужӧ аньсянь, но ставыс Енсянь.
Асьныд мӧвпыштлӧй, бур-ӧ тайӧ, ань кӧ кевмысьӧ Енмыслы юрсӧ вевттьытӧг?
Оз ӧмӧй олӧмыс петкӧдлы, мый айловӧс кузь юрсиыс янӧдӧ, а аньӧс — мичмӧдӧ. Ӧд юрсисӧ аньлы сетӧма вевттьӧд пыдди.
Кӧсйӧ кӧ кодкӧ вензьыны та йылысь, сылы тадзи шуа: ни миянын, ни Енлӧн мукӧд вичкоясын мӧд нога велӧдӧмыс абу.
Таысь кындзи нӧшта шуа тіянлы: меным нинӧмысь тіянӧс ошкынысӧ, ӧд тіян чукӧртчӧмныд бурыс дорысь унджык лёксӧ вайӧ.
Ӧти-кӧ, ме кывлі, мый вичкоӧ чукӧртчигӧн тіян костын овлӧны вензьӧмъяс. Ме мыйтакӧ эска татчӧ.
Дерт, тіян костын коланаӧсь торъя мӧвпалӧмъясыс, медым тӧдмавны, коді тіян пиысь шогмана Енмыслы.
Но кор ті чукӧртчанныд ӧтвыв сёйны, тайӧс оз позь шуны Господьлӧн рытйӧмӧн.
Ӧд быдӧн тіян пиысь тэрмасьӧ сёйны ассьыс сёянсӧ. Тадзи кодкӧ тшыгйӧн кольӧ, а кодкӧ коддзӧма нин.
Ті ӧмӧй онӧ вермӧй гортаныд сёйны-юнысӧ?
Мыйла нӧ нинӧм туйӧ пуктанныд Енлысь Вичкосӧ да увтыртанныд гӧльясӧс?
Мый меным шуны тіянлы?
Гашкӧ, ошкыны тіянӧс?
Ог кут.
Ме висьтавлі нин тіянлы, мый Ачыс Господь меным висьталіс. Господь Исус, Сійӧс вузалан войӧ, босьтіс нянь, Енмӧс аттьӧалӧмӧн чегис няньсӧ да шуис: «Босьтӧй, сёйӧй, тайӧ Менам Яй, чегъялӧма тіян вӧсна. Вӧчӧй тайӧс Менӧ казьтывлӧм могысь».
Сёйӧм бӧрас босьтіс тшӧтш чаша да шуис: «Тайӧ чашаыс — Выль Йитӧд, кӧрталӧма Менам Вирӧн. Быдпӧрйӧ, тайӧ чашасьыс юигӧн, казьтывлӧй Менӧ».
Тадзи быдпӧрйӧ, сёянныд-ӧ тайӧ няньсӧ, юанныд-ӧ тайӧ чашасьыс, ті висьтавланныд Господьлӧн кулӧм йылысь, кытчӧдз оз лок Сійӧ.
Сідзкӧ, коді шогмытӧма сёйӧ Господьлысь няньсӧ да юӧ Сылӧн чашаысь, сійӧ Господьлӧн Яйлы да Вирлы паныд мыж вӧчӧ.
Та вӧсна, быдӧн мед асьсӧ тӧдмалӧ, сэсся сёйӧ тайӧ няньсӧ да юӧ тайӧ чашасьыс.
Ӧд мортыс кӧ сёйӧ да юӧ шогмытӧма, Господьлӧн Вир-яй йылысь мӧвпавтӧг, тайӧс сійӧ вӧчӧ асьсӧ мыждӧм вылӧ.
Та вӧсна унаӧн тіян пӧвстысь жебӧсь, унаӧн висьӧны да унаӧн нин кулісны.
Ми кӧ водзвыв тӧдмалам асьнымӧс, сэки Господь оз кут мыждыны миянӧс.
А мыждӧ кӧ, миянӧс бур вылӧ велӧдӧ, медым тайӧ муюгыдсаыскӧд ӧтвыв эгӧ веськалӧй мыждӧм улӧ.
Та вӧсна вокъяс, кор ті чукӧртчанныд сёйны, виччысьӧй ӧта-мӧднытӧ.
А тшыг кӧ кодкӧ, мед гортас сёйӧ, сэки тіян чукӧртчӧмныд оз ло мыждӧм вылӧ.
Мукӧдторсӧ висьтала тіянӧ локтӧм бӧрын.
12 юр.
Вокъяс, кӧсъя, мед ті тӧдінныд Ловсянь сетӧмторъяс йылысь.
Кор ті вӧлінныд ентӧдтӧмъясӧн на, тіянӧс ёна кыскис сёрниттӧм идолъяс дінӧ. Ті асьныд тӧданныд та йылысь.
Та вӧсна висьтала тіянлы: морт пытшкас кӧ эм Енлӧн Лолыс, сійӧ некор оз кут ёрны Исусӧс.
И мӧдарӧ, некод оз вермы шуны Исусӧс Господьӧн, абу кӧ сы пытшкын Вежа Лов.
Сетӧмторйыс унапӧлӧс, но Лолыс ӧти.
Кесъялӧмыс унапӧлӧс, но Господь ӧти.
Вӧчанногыс унапӧлӧс, но быдӧн пытшкын ставсӧ вӧчӧ ӧти Ен.
Сійӧ сетӧ Ловлы быдӧн пыр петкӧдчыны ас ногыс, ӧта-мӧдлы бур вылӧ.
Ӧтилы Лолыс сетӧ мывкыд кывъяс, мӧдлы — тӧдӧмлун, мед юксьыны мукӧдкӧд, кодлыкӧ Лолыс сетӧ эскӧм, кодлыкӧ — сямлун бурдӧдны. Мукӧдыслы Лолыс сетӧ вын вӧчны шензьӧданаторъяс, кодлыкӧ — пророкавны, кодлыкӧ — сямлун тӧдмавны быдпӧлӧс ловсӧ. Мукӧдыслы Лолыс сетӧ сямлун сёрнитны мукӧд кывъяс вылын, а кодлыкӧ — гӧгӧрвоӧдны тайӧ сёрнисӧ.
Ставсӧ тайӧс вӧчӧ ӧти Лов. Ас кӧсйӧм сертиыс Сійӧ быдӧнлы торйӧн юклӧ тайӧ сетӧмторъяссӧ.
Босьтны кӧ мортлысь вир-яйсӧ, сійӧ артмӧма уна юкӧнысь, но ӧтвылысь найӧ артмӧдӧны ӧти вир-яй. Тайӧс позьӧ шуны тшӧтш Кристос йылысь.
Ӧд ми: юдейяс и грекъяс, кесйӧгъяс и мездлуна йӧз — ставным пыртчим ӧти Лов отсӧгӧн ӧти вир-яйӧ, ставным юим ӧти Ловсянь.
Мортлӧн вир-яйыс артмӧма уна юкӧнысь, абу ӧтиысь.
Шуас кӧ кок: «Ме абу ки, сідзкӧ, ме абу вир-яйлӧн юкӧн». Сійӧ ӧмӧй абу тайӧ вир-яйлӧн юкӧныс?
Шуас кӧ пель: «Ме абу син, сідзкӧ, ме абу вир-яйлӧн юкӧн». Сійӧ ӧмӧй абу тайӧ вир-яйлӧн юкӧныс?
Вир-яйлӧн кӧ эм сӧмын син, сэки мыйӧн кутас кывзыны?
Вир-яйлӧн кӧ эм сӧмын пель, сэки мыйӧн кутас исавны?
Но Енмыс Ас кӧсйӧм сертиыс быд юкӧн пуктіс вир-яяс коланаинӧ.
Ӧд быд юкӧн кӧ вӧлі сӧмын ӧтипӧлӧс, сэки эськӧ вир-яйыс эз артмы.
Та вӧсна юкӧныс уна, а вир-яйыс ӧти.
Син оз вермы шуны килы: «Тэ меным ковтӧм».
Юр оз вермы шуны коклы: «Тэ меным ковтӧм».
Мӧдарӧ, вир-яйлӧн жебджык юкӧнъясыс ёнджыка на коланаӧсь. Вир-яйлысь ӧткымын юкӧнсӧ ми огӧ ёна донъялӧй, но найӧс бура вевттям. Ми зілям бура вевттьыны миянӧс янӧдысь юкӧнъяссӧ, а мичаджык юкӧныслы вевттьӧдыс абу колана.
Но Енмыс вир-яйсӧ тадзи лӧсьӧдӧма: Сійӧ ёнджыка на донъялӧ сійӧ юкӧнсӧ, кодӧс ми огӧ ёна донъялӧй, медым вир-яй пытшкын эз вӧвны вензьӧмъяс.
Сэки быд юкӧн кутас ӧтмоза тӧждысьны ӧта-мӧд вӧснаыс.
Та вӧсна, сьӧкыдалӧ кӧ вир-яйлӧн ӧти юкӧн, сыкӧд тшӧтш сьӧкыдалӧ мукӧд юкӧныс.
Но ошкӧны кӧ вир-яйлысь ӧти юкӧн, сыкӧд тшӧтш нимкодясьӧ мукӧд юкӧныс.
Ӧтвылысь ті лоанныд Кристослӧн вир-яйӧн, а торйӧнсӧ — Сылӧн юкӧнъясӧн.
Вичкоын Енмыс медводз сувтӧдіс апостолъясӧс, сэсся пророкъясӧс, сэсся велӧдысьясӧс.
Мукӧдыслы Енмыс сетіс вын вӧчны шензьӧданаторъяс, мукӧдыслы — сямлун бурдӧдны, кодлыкӧ — отсасьны йӧзыслы, кодлыкӧ — веськӧдлыны, а кодлыкӧ — сёрнитны мукӧд кывъяс вылын.
Гашкӧ, ми быдӧн апостол?
Гашкӧ, быдӧн пророк либӧ велӧдысь?
Гашкӧ, быдӧн вӧчам шензьӧданаторъяс?
Гашкӧ, быдӧн вермам бурдӧдны?
Гашкӧ, быдӧн сёрнитам мукӧд кывъяс вылын да вермам сійӧс гӧгӧрвоӧдны?
Сідзкӧ, зільӧй босьтны Ловсянь медбур сетӧмторсӧ. Ӧні ме петкӧдла тіянлы медбур туйсӧ.
13 юр.
Ме кӧ сёрнита морт кывйӧн, весиг анделъяслӧн кывйӧн, а муслуныс кӧ ме пытшкын абу, сідзкӧ, ме троньгысь ыргӧн да брунгысь жыннян.
Ме кӧ пророкала да тӧда став гусяторсӧ, менам кӧ эм быдпӧлӧс тӧдӧмлун да зумыд эскӧм, верма весиг керӧсъяс вештавны, а муслуныс кӧ ме пытшкын абу, сідзкӧ, ме нинӧм.
Ме кӧ разӧда став ассьым эмбурӧс да сета ассьым вир-яйӧс сотны, а муслуныс кӧ ме пытшкын абу, тайӧ меным нинӧм оз сет.
Муслуныс дыр терпитӧ, мелі сьӧлӧма, оз вежав, оз ошйысь, оз вылӧ кыпӧдчы, оз вӧч шогмытӧма, аслыс нинӧм оз курав, оз дӧзмы, оз казьтыв лёксӧ, оз нимкодясь лёкыслы, нимкодясьӧ збыльыслы. Муслуныс ставсӧ вевттьӧ, быд кадӧ эскӧ да лача кутӧ, ставсӧ венӧ.
Муслуныс некор оз бырлы. Пророкъяс дугдасны висьтавлыны, йӧзыс дугдасны сёрнитны мукӧд кывъяс вылын, и тӧдӧмлуныс бырӧ,
ӧд миян тӧдӧмлуныс абу тырвыйӧ, пророкалӧмыс тшӧтш абу тырвыйӧ.
Но тырвыйӧлуныс воас да, сэки ставыс, мый абу тырвыйӧ, бырас.
Ичӧт дырйи ме сёрниті, вежӧрті да мӧвпалі кага моз.
А верстямми да, коли ассьым кага оласногӧс.
Ӧні ми аддзам Енсӧ ылӧсас, чусмӧм рӧмпӧштанысь моз, а бӧрыннас воча синмӧн аддзысям Енмыскӧд.
Ӧні сӧмын мыйтакӧ тӧда Енмыс йылысь, а бӧрыннас кута тырвыйӧ тӧдны Сы йылысь, кыдзи Енмыс тырвыйӧ тӧдӧ ме йылысь.
Ӧні кольӧ куимтор: эскӧм, лача да муслун. Но муслуныс на пиысь медыджыд.
14 юр.
Зільӧй кутчысьны муслунас, тӧждысьӧй босьтны Ловсянь сетӧмторъяссӧ, торйӧн нин, медым верминныд пророкавны.
Коді сёрнитӧ мукӧд кывъяс вылын, сійӧ сёрнитӧ Енмыскӧд, а оз йӧзкӧд. Сійӧс некод оз гӧгӧрво, ӧд сійӧ висьтавлӧ гусяторсӧ Лов вынӧн. А пророкалысь висьтавлӧ йӧзыслы. Сійӧ ёнмӧдӧ, ышӧдӧ да бурӧдӧ найӧс.
Мукӧд кывъяс вылын сёрнитысь ёнмӧдӧ сӧмын асьсӧ, а пророкалысь ёнмӧдӧ вичкосӧ.
Ме кӧсъя, медым ті быдӧн сёрнитінныд мукӧд кывъяс вылын.
Но вӧлі эськӧ бурджык, ті кӧ пророкалінныд.
Ӧд пророкалысь ыджыдджык мукӧд кывъяс вылын сёрнитысь дорысь. Но мукӧд кывъяс вылын сёрнитысь кӧ вермӧ гӧгӧрвоӧдны ассьыс висьталӧмсӧ, и тайӧ ёнмӧдӧ вичкосӧ, сэки сійӧ оз ло ичӧтджык пророкалысь дорысь.
Вокъяс, ме кӧ локта тіян дінӧ да кута сёрнитны мукӧд кывъяс вылын, но ог вай тіянлы Енсянь восьтӧм да тӧдӧмлун, ог пророкав да велӧд тіянӧс, — тайӧ нинӧм оз сет тіянлы.
Шуам, босьтны кӧ ворсанторъяс: пӧлян либӧ арфа, да налӧн ворсігӧн кӧ кылӧ ӧткодь шы, сэки вермам-ӧ тӧдмавны, мыйӧн ворсӧны?
А труба кӧ сетӧ гӧгӧрвотӧм шы, сэки коді дасьтысяс тыш кежлӧ?
Тадзи артмӧ тшӧтш тіянкӧд: ті кӧ кутанныд сёрнитны гӧгӧрвотӧм кывйӧн, сэки коді гӧгӧрвоас тіянӧс?
Тіян сёрниныд лоӧ весьшӧрӧ.
Му вылас сёрнитӧны унапӧлӧс кывйӧн, но быд кыв позьӧ гӧгӧрвоны.
А ме кӧ ог гӧгӧрво сёрнитысьлысь висьталӧмсӧ, сэки ме сылы локтысь морт кодь, сійӧ меным тшӧтш.
Ті ёна кӧсъянныд босьтны Ловсянь сетӧмторъяс, сідзкӧ, тӧждысьӧй унджык босьтны сетӧмторсӧ, медым найӧ ёнмӧдісны вичко.
Та вӧсна мукӧд кывъяс вылын сёрнитысьлы колӧ кевмысьны, медым сійӧ вермис гӧгӧрвоӧдны ассьыс висьталӧмсӧ.
Ӧд ме кӧ кевмыся мукӧд кывйӧн, сэки кевмысьӧ сӧмын лолӧй, а вежӧрӧй нинӧм оз гӧгӧрво.
Сідзкӧ, мый меным вӧчны?
Кута кевмысьны лолӧн, кута кевмысьны тшӧтш вежӧрӧн.
Кута сьывны лолӧн, кута сьывны тшӧтш вежӧрӧн.
Тэ кӧ кутан ошкыны Енсӧ сӧмын ловнад, сэки орччӧн сулалысь морт гӧгӧрвотӧгыс вермас ӧмӧй шуны “аминь” тэнад ошкӧм вылӧ?
Ӧд сійӧ оз гӧгӧрво тэнсьыд висьталӧмтӧ.
Гашкӧ, тэ бура ошкан, но мӧд мортлы тайӧ нинӧм оз сет.
Ошка Енмӧс, ме быдӧн дорысь на ёнджыка сёрнита мукӧд кывъяс вылын.
Но мукӧдсӧ туйдӧдӧм могысь бурджык лоӧ, шуа кӧ вичкоын вит гӧгӧрвоана кыв уна сюрс гӧгӧрвотӧм кыв дорысь.
Вокъяс, энӧ мӧвпалӧй челядь моз, мӧвпалӧй верстьӧ моз. Но лёксӧ вӧчны лоӧй кага кодьӧсь.
Индӧдас гижӧма:
— Кута сёрнитны тайӧ войтырыскӧд мукӧд кывъяс вылын, кута висьтавны налы локтысь йӧз вомӧн, но весиг сэки найӧ оз кывзыны Менӧ. Тадзи висьталӧ Господь.
Сідзкӧ, мукӧд кывъяс вылын сёрнитӧмыс — тайӧ эскытӧмъяслы пас, абу эскысьяслы.
А пророкалӧмыс — эскысьяслы пас, абу эскытӧмъяслы.
Ті кӧ ставныд ӧтвыв чукӧртчанныд вичкоӧ, да быдӧн кутас сёрнитны мукӧд кывъяс вылын, и сэтчӧ пырасны тӧдтӧм йӧз да эскытӧмъяс, сэки найӧ шуасны, ті пӧ йӧйталанныд.
Но ті кӧ быдӧн пророкаланныд, да пырас тіян дінӧ эскытӧм либӧ тӧдтӧм морт, сэки Енмыс быдӧн пыр янӧдас да мыждас сійӧс, сэки сылӧн гуся мӧвпъясыс воссясны.
Тайӧ мортыс кымынь уськӧдчӧмӧн копыртчылас Енлы да шуас: «Енмыс збыльысь тіянкӧд.»
Вокъяс, мый нӧшта шуны тіянлы?
Ӧтлаӧ чукӧртчигӧн быдӧн тіян пиысь вермӧ вӧчны мыйкӧ: кодкӧ сьылӧ, кодкӧ велӧдӧ, кодлӧнкӧ эм Енсянь восьтӧм, кодкӧ сёрнитӧ мукӧд кывъяс вылын, кодкӧ гӧгӧрвоӧдӧ сійӧс. Но ставыс мед лоӧ вичко ёнмӧдӧм могысь.
Эмӧсь кӧ тіян пӧвстын мукӧд кывъяс вылын сёрнитысьяс, мед сёрнитӧны кыкӧн либӧ уна вылӧ куимӧн. Найӧ мед сёрнитӧны сьӧрсьӧн-бӧрсьӧн, а кодкӧ мед гӧгӧрвоӧдӧ налысь сёрнисӧ.
Абу кӧ гӧгӧрвоӧдысьыс, сідзкӧ, вичкоын мукӧд кывъяс вылын мед оз сёрнитны, а сёрнитӧны ас кежас да Енмыскӧд.
Пророкъяс пиысь мед тшӧтш висьтавлӧны кыкӧн либӧ куимӧн, а мукӧдыс мед донъялӧны налысь висьталӧмсӧ.
Пукалысьяс пӧвстысь кӧ кодлыкӧ лоӧ Енсянь восьтӧм, сэки воддза висьталысьыс мед дугдас сёрнитнысӧ.
Ті быдӧн верманныд пророкавны сьӧрсьӧн-бӧрсьӧн, медым быдӧнӧс мыйӧкӧ велӧдны-ышӧдны.
Пророкъяс вермӧны веськӧдлыны Ловсянь сетӧм сёрнинас. Ӧд Енмыс абу торкалысь Ен, Сійӧ — лӧньлунсӧ сетысь Ен.
Ен войтырлӧн вичкоясын тадзи лӧсьӧдӧма:
вичкоӧ чукӧртчигӧн аньясныд мед чӧла пукалӧны, налы оз позь сёрнитны. Ӧд Индӧдыс велӧдӧ найӧс кывзысьны.
Найӧ кӧ кӧсйӧны тӧдмавны мыйкӧ, та йылысь мед юалӧны гортаныс асланыс верӧслысь.
Ӧд аньяслы абу лӧсьыд вичкоын сёрнитны.
Гашкӧ, чайтанныд, Енлӧн Кывйыс тіянсянь петіс?
Гашкӧ, сӧмын тіянӧдз воис?
Коді лыддьӧ асьсӧ пророкӧн либӧ Лов серти олысьӧн, сійӧ мед тӧдӧ, мый тайӧ велӧдӧмыс — Енлӧн тшӧктӧм.
Коді оз кӧсйы гӧгӧрвоны тайӧс, мед оз гӧгӧрво.
Вокъяс, тӧждысьӧй, медым ті верминныд пророкавны, но энӧ ӧлӧдӧй мукӧд кывъяс вылын сёрнитӧмысь. Ӧд ставсӧ колӧ вӧчны бура да колана ногӧн.
15 юр.
Вокъяс, ӧні казьтышта тіянлы Евангелльӧ йылысь, кодӧс висьтавлі нин тіянлы. Ті сибӧдінныд сійӧс да зумыда кутчысянныд сэтчӧ. Тайӧ Евангелльӧыс пыр ті мездманныд, кутанныд кӧ зумыда кутчысьны менам висьтавлӧмӧ. Онӧ кӧ, тіян эскӧмныд весьшӧрӧ.
Ме висьтавлі тіянлы медколанаторсӧ, мый ачым босьті сьӧлӧмӧ: Гижӧдыс серти Кристос куліс миян мыжъяс вӧсна. Сійӧс вӧлі гуалӧма, но коймӧд луннас Енмыс ловзьӧдіс Сійӧс. Тадзи висьталӧма Гижӧдас. Сійӧ петкӧдчис Кифалы, сэсся дас кык велӧдчысьыслы, сэсся ӧтпырйӧ петкӧдчис витсёысь унджык воклы. На пиысь унджыкыс ловъяӧсь на, ӧткымынӧн мӧдар югыдас нин вуджисны. Та бӧрти Исус петкӧдчис Яковлы, сэсся став апостолыслы. Медбӧрти петкӧдчис меным, апостолъяс пиысь медічӧтыслы. Ӧд на пӧвстын ме медшогмытӧмыс.
Ме ог шогмы весиг шусьыны апостолӧн, Енлысь Вичкосӧ вӧтлі да.
Но Енлӧн буралӧмыс вӧсна ме сэтшӧм, кутшӧм эм.
Сылӧн буралӧмыс ме дінӧ эз вӧв весьшӧрӧ, ӧд ме уджалі мукӧд апостол дорысь ёнджыка на.
Дерт, ме эг ачым уджав, а ме пытшкын олысь Енлӧн буралӧмыс уджаліс.
Та вӧсна оз ков торйӧдны, коді висьтавлӧ тіянлы юӧрсӧ: ме либӧ найӧ, ӧд ми быдӧн ӧти юӧр висьтавлам. И тайӧ юӧрас ті эскинныд.
Ми висьтавлам ловзьӧм Кристос йылысь. Сідзкӧ, мыйла тіян пиысь ӧткымынӧн шуӧны, кулӧмаяс пӧ оз ловзьыны?
Ӧд кулӧмаяс кӧ оз ловзьыны, сідзкӧ, Кристос тшӧтш эз ловзьы.
Кристос кӧ эз ловзьы, сідзкӧ, миян висьтавлӧмыс весьшӧрӧ, и тіян эскӧмныд тшӧтш весьшӧрӧ.
Сідзкӧ, ми лоам Ен йылысь ылӧгсӧ висьталысьясӧн, ӧд ми висьтавлам, мый Енмыс ловзьӧдіс Кристосӧс. Но ті кӧ шуанныд, кулӧмаяс пӧ оз ловзьыны, сідзкӧ, Енмыс эз ловзьӧд Кристосӧс.
Ӧд кулӧмаяс кӧ оз ловзьыны, сідзкӧ, Кристос тшӧтш эз ловзьы.
Но Кристос кӧ эз ловзьы, сідзкӧ, ті эсканныд весьшӧрӧ, и тіян мыжъясныд пыр на тіян вылын.
Сідзкӧ, Кристослы эскысьяс, кодъяс кулісны нин, пыр кежлӧ вошисны.
Ми кӧ Кристос вылӧ лача кутам сӧмын тайӧ мувывса олӧмас, сідзкӧ, ми став йӧзсьыс на коньӧрӧсь.
Но Кристос ловзис кулӧмысь, Сійӧ медводдзаӧн ловзис кулӧмаяс пӧвстысь.
Кулӧмыс мортсянь лоис, кулӧмысь ловзьӧмыс тшӧтш мортсянь лоис.
Адамсянь лоис став йӧзлы кулӧмыс, Кристоссянь лоӧ став йӧзлы ловзьӧмыс. Но быдӧн ас кадӧ ловзяс: медводз ловзис Кристос, сэсся Сылӧн локтігас ловзясны Кристослӧн войтырыс.
Кор Кристос бырӧдас быдпӧлӧс ыджыдалысьясӧс, веськӧдлысьясӧс да вынаясӧс, сэки Ассьыс ыджыдалан вынсӧ сетас Ен Батьыслы. Та бӧрти лоӧ пом.
Ӧд Енмыс шуис ыджыдавны Кристослы сэтчӧдз, кытчӧдз Енмыс оз пукты Сы кок улӧ став паныд мунысьсӧ.
Медбӧръя паныд мунысьыс — кулӧм, и сійӧс лоӧ бырӧдӧма. Ӧд «Енмыс ставсӧ пуктіс Сы кок улӧ».
Кӧть шуӧма “ставсӧ пуктіс”, но Ачыс Енмыс оз пыр тайӧ “став” лыдас. Ӧд Ачыс Сійӧ ставсӧ пуктіс Кристос кок улӧ.
Кор Енмыс ставсӧ сетас Кристос кипод улӧ, сэки Ачыс Пиыс сетас Ассьыс ыджыдалан вынсӧ Енмыслы, коді ставсӧ пуктіс Сы кок улӧ. Тадзи Енмыс кутас ыджыдавны быдӧн вылын да быдлаын.
Мыйла йӧзыс кулӧмаяс пыдди пыртчӧны?
Ӧд кулӧмаяс кӧ оз ловзьыны, сідзкӧ, мыйла на пыдди пыртчынысӧ?
Сідзкӧ, мыйла быд кадӧ ми паныдасям кулӧмыскӧд?
Вокъяс, ме быд лун кулан выйын — тайӧ збыль, кыдзи збыль и сійӧ, мый ме ошйыся тіянӧн Исус Кристос Господьным водзын.
Ме кӧ мӧвпалі тайӧ мувывса йӧзыс моз, Ефес карын эськӧ эг кут тышкасьны зверъяскӧд, ӧд тайӧ меным нинӧм оз сет. Кулӧмаяс кӧ оз ловзьыны,
сідзкӧ, «кутам сёйны-юны, ӧд аски кулам.»
Видзчысьӧй, мед некод оз ылӧдлы тіянӧс. «Ӧд лёк оласногаяс тшыкӧдӧны бур оласногаӧс».
Пальӧдчӧй да олӧй бур ногӧн, дугдӧй вӧчны мыжсӧ.
Ӧд ӧткымынӧн тіян пӧвстысь оз тӧдны Енсӧ, ме шуа тайӧс тіянӧс янӧдӧм могысь.
Кодкӧ вермас юавны: кыдзи нӧ ловзяс кулӧм мортыс?
Кутшӧм лоӧ сылӧн вир-яйыс?
Вежӧртӧмӧй.
Кӧйдысыс кӧ оз кув, сэки нинӧм оз ловзьы.
Кӧдзигад тэ он асьсӧ быдтассӧ кӧдз, а сӧмын кӧйдыссӧ. Тайӧ вермас лоны шобділӧн либӧ кутшӧмкӧ мӧд быдмӧглӧн кӧйдыс.
Сэсся Енмыс Ас кӧсйӧм сертиыс сетӧ тайӧ кӧйдысыслы аслыспӧлӧс паськӧм. Быдпӧлӧс кӧйдыслы Сійӧ сетӧ аслыспӧлӧс паськӧм.
Быд ловъя олысьлӧн аслыспӧлӧс вир-яй. Шуам, мортлӧн вир-яйыс торъялӧ пемӧсысь, черилӧн — лэбачысь.
Эмӧсь енэжвывсаторъяс, эмӧсь и мувывсаторъяс, но налӧн вир-яйыс торъялӧ ӧта-мӧдсьыныс.
Енэжвывсалӧн дзирдлуныс ӧтипӧлӧс, а мувывсалӧн — мӧдпӧлӧс.
Шонді ӧти ногӧн дзирдалӧ, тӧлысь да кодзувъяс — мӧд ногӧн, но быд кодзув ас ногыс дзирдалӧ.
Тадзи артмӧ тшӧтш кулӧмаяслӧн ловзигӧн: гуавсьӧ сісьмана вир-яй, ловзьӧ сісьмытӧм.
Гуавсьӧ мисьтӧм вир-яй, ловзьӧ дзирдалана,
гуавсьӧ жеб вир-яй, ловзьӧ вына вир-яй.
Гуавсьӧ мувывса вир-яй, ловзьӧ енэжвывса.
Эм кӧ мувывса вир-яй, эм и енэжвывса.
Гижӧдыс висьталӧ: «Медводдза мортыс, Адам, лоис ловъя олысьӧн», а мӧд Адамыс лоис олӧмсӧ сетысь Лолӧн.
Медводдза олысьыс вӧлі мувывса, эз енэжвывса, сэсся енэжвывсаыс локтіс.
Медводдза мортыс вӧлі мувывса, сійӧс вӧлі муысь вӧчӧма.
Мӧд мортыс — Господь, коді локтіс енэжсянь.
Сідзкӧ, мувывса олысьяс ӧткодьӧсь муысь вӧчӧмторйыскӧд. А енэжвывса олысьяс ӧткодьӧсь енэжсянь Локтысьыскӧд.
Ӧні ми ӧткодьӧсь муысь вӧчӧмторйыскӧд, коркӧ лоам ӧткодьӧсь енэжсянь Локтысьыскӧд.
Вокъяс, кӧсъя висьтавны тіянлы, мый тайӧ мувывса вир-яйлы оз вичмы Енлӧн Юраланіныс, ӧд тайӧ вир-яйыс сісьмана.
Висьтала тіянлы гусятор: ми огӧ ставным кулӧй, но ставным вежсям. Тайӧ лоӧ зэв ӧдйӧ, син лапнитігкості, трубалӧн бӧръя букӧстігӧн.
Труба букӧстас, и кулӧмаяс ловзясны сісьмытӧмӧн, а ми — вежсям.
Ӧд тайӧ сісьмана вир-яйлы колӧ вежсьыны сісьмытӧмӧ, да кулана вир-яйлы — кувлытӧмӧ.
Кор тайӧ сісьмана вир-яйыс вежсяс сісьмытӧмӧ да кулана вир-яйыс — кувлытӧмӧ, сэки инасны Гижӧдысь кывъясыс:
— Кулӧмсӧ бырӧдӧма, вермӧма пыр кежлӧ.
Кулӧм, кӧні тэнад чушканыд?
Ад, кӧні тэнад вермӧмыд?
Кулӧмыслӧн чушканыс — мыж, а вынсӧ мыжыслы сетӧ Индӧд.
Ошкӧм Енлы. Миян Господь Исус Кристос пыр Сійӧ сетӧ миянлы вермӧм.
Муса вокъяс, сулалӧй зумыда да вӧрзьывтӧг. Быд кадӧ кесъялӧй Господьлы сьӧлӧмсяньныд. Тӧдӧй, мый ті кесъяланныд Господьлы онӧ весьшӧрӧ.
16 юр.
Ӧні сёрнитышта вежа войтырлы сьӧм чукӧртӧм йылысь. Та йылысь ме висьтавлі нин галатияса вичкоясын.
Сідзкӧ, вӧчӧй менам висьталӧм серти: вежонса медводдза лунӧ быдӧн торйӧдӧй сьӧмнытӧ мыйта верманныд да видзӧй сійӧс ас орданыд. Сэки менам локтігкежлӧ тіян лоӧ чукӧртӧма нин.
Бӧрйӧй ас пӧвстсьыныд некымын мортӧс. Кор воа тіянӧ, сета налы эскӧдан гижӧд да мӧдӧда найӧс Ерусалимӧ, медым нуны сэтчӧ чукӧртӧм сьӧмнытӧ.
Ковмас кӧ аслым сэтчӧ муннысӧ, накӧд тшӧтш муна.
Македония кытшовтӧм бӧрын локта тіян дінӧ, ӧд ме бӧрсӧ кӧсъя локны Македония пыр.
Гашкӧ, мыйтакӧ олышта тіян дінын, гашкӧ, тӧвъя весиг. Сэсся водзӧ менӧ мӧдӧданныд.
Ме ог кӧсйы аддзӧдчывны тіянкӧд сӧмын мунігмоз. Ен кӧ сетас, кӧсъя дырджык олыштны тіян дінын.
Ефес карӧ ме кольчча Ветымынӧд лунӧдз. Ӧд Енмыс меным паськыда восьтіс ӧдзӧсъяс уджавны. Дерт, паныд мунысьыс уна жӧ.
Локтас кӧ тіян дінӧ Тимофей, тӧждысьӧй сы вӧсна, медым сылы нинӧмысь эз ковмы майшасьны, ӧд сійӧ ме моз кесъялӧ Господьлы.
Энӧ увтыртӧй сійӧс. Отсалӧй сылы лӧнь сьӧлӧмӧн бӧр локны ме дінӧ. Тані мукӧд вокъяскӧд ме виччыся сійӧс.
Ме ёна кори Аполос вокӧс, медым вокъяскӧд тшӧтш муніс тіян дінӧ, но ӧні оз на кӧсйы. Вермыны кутас да, локтас.
Лоӧй дасьӧсь да зумыда эскӧй. Лоӧй вынаӧсь да повтӧмӧсь.
Ставсӧ вӧчӧй мусапырысь.
Вокъяс, ті тӧданныд, мый Степан да сылӧн гортсаыс лоины Акайяын медводдза эскысьясӧн. Найӧ сетісны асьнысӧ кесъявны вежа войтырлы. Кора тіянӧс: кывзысьӧй налысь, тшӧтш накӧд ӧтвыв уджалысьяслысь да кесъялысьяслысь.
Степан, Фортунат да Акаик воисны татчӧ. Меным зэв нимкодь таысь, ӧд найӧ ӧні тіян пыдди. Найӧ кыпӧдісны менсьым лолӧс, тшӧтш тіянлысь.
Вылӧ пуктӧй татшӧм йӧзсӧ.
Тіянлы ыстӧны чолӧм асияса вичкояс. Господь нимӧн сьӧлӧмсяньныс чолӧмалӧны тіянӧс Акил, Прискилла да на ордӧ чукӧртчысьяс.
Тіянлы ыстӧны чолӧм став вокъяс.
Чолӧмалӧй ӧта-мӧднытӧ вежа окыштӧмӧн.
Ме, Павел, аслам киӧн гижа тіянлы чолӧмӧс.
Коді оз радейт Господь Исус Кристосӧс, сійӧс лоӧ ёрӧма. Маран-афа.
Миян Господь Исус Кристослӧн буралӧмыс тіянкӧд. Менам муслунӧй ставныдкӧд, кодъяс Исус Кристос пытшкынӧсь.
Аминь.
Апостол Павеллӧн Коринфӧ мӧд мӧдӧдӧм гижӧд
1 юр.
Гижӧ Павел, Ен кӧсйӧм серти Исус Кристослӧн апостол. Тимофей воккӧд ми чолӧмалам тіянӧс, коринфса вичкоӧс, да Акайя пасьтала став вежа войтырӧс.
Буралӧм да лӧнь олӧм тіянлы Ен Батьнымсянь да миян Господь Исус Кристоссянь.
Ошкӧм Енлы, миян Господь Исус Кристослӧн Батьлы. Сійӧ — бур сьӧлӧма Бать да быдторйын бурӧдысь Ен. Сійӧ бурӧдӧ миянӧс быд шог дырйи, медым ми тшӧтш вермим бурӧдны шогӧ усьӧмаясӧс Енсянь бурӧдӧмӧн.
Ми уна нуам Кристослысь сьӧкыдсӧ, но та дырйи ми уна и босьтам Кристоссянь бурӧдӧмсӧ.
Ми кӧ сьӧкыдалам — тіянӧс бурӧдӧм да мездмӧм вылӧ. А мездмӧмныд лоӧ тырвыйӧ сэки, кор миян моз венанныд сьӧкыдлунсӧ.
Та вӧсна ми кутам тіян вылӧ зумыд лача.
Енмыс кӧ бурӧдӧ миянӧс — тіянлы тшӧтш вичмӧ бурӧдӧмыс да мездмӧмыс. Ми тӧдам, ті кӧ миян моз нуанныд сьӧкыдсӧ, сідзкӧ, миянлы моз тіянлы тшӧтш вичмас бурӧдӧмыс.
Вокъяс, ми кӧсъям, мед ті тӧдінныд, кутшӧм сьӧкыдлунъяс суисны миянӧс Асияын. Миянлы вӧлі сэтшӧм сьӧкыд, эгӧ чайтӧй весиг ловйӧн кольны.
Асьнымӧс лыддим нин кулӧмаясӧн, эз вӧв некутшӧм лача ас выланым, сӧмын Ен вылӧ, кулӧмаясӧс Ловзьӧдысь вылӧ. Сійӧ видзис миянӧс кулӧмысь да водзӧ на видзас. Ті кӧ отсаланныд миянлы кевмысьӧмъяснаныд, ми лача кутам, мый Енмыс нӧшта на видзас. Сэки унаӧн кутасны ошкыны Енсӧ миян дінӧ буралӧмысь.
Ми ошйысям, мый тайӧ муюгыдас олысьяскӧд, торйӧн нин тіянкӧд, вӧлім восьсаӧсь да веськыдӧсь, олім Енлысь кывзысьӧмӧн. Та вӧсна миян сьӧлӧмным оз мыжды миянӧс. Ми ӧд эгӧ асланым мывкыд серти олӧй, миянӧн веськӧдліс Енлӧн буралӧмыс.
Ми гижам тіянлы сӧмын сійӧ, мый лыддянныд да гӧгӧрвоанныд. Кута лача, ті понданныд тырвыйӧ гӧгӧрвоны миянӧс. Дерт, ті мыйтакӧ ӧні гӧгӧрвоанныд нин миянӧс. Сідзкӧ, миян Господь Исус Кристослӧн лунӧ ми вермам ӧтмоза ошйысьны ӧта-мӧдӧн.
Татчӧ зумыда эскӧмӧн ме водзынджык нин кӧсйи волыны тіян дінӧ, медым Енлӧн буралӧмыс кыкысь вичмис тіянлы. Ме ӧд кӧсйи кежавны тіян дінӧ Македонияӧ мунігӧн, тшӧтш бӧрсӧ локтігӧн.
Сэсся ті эськӧ водзӧ мӧдӧдінныд менӧ Юдеяӧ.
Гашкӧ, тадзи мӧвпалігӧн ме кокньыд мывкыда вӧлі?
Гашкӧ, чайтанныд, тайӧ кӧсйӧмыс менам ассянь вӧлі? Гашкӧ, менам ӧтпырйӧ артмӧ “сідз” и “абу сідз”?
Ен тӧдӧ, мый тайӧ збыль: ме некор эг шулы ӧтпырйӧ “сідз” и “абу сідз”.
Силуанкӧд да Тимофейкӧд ми висьтавлім тіянлы Ен Пи йылысь — Исус Кристос йылысь. Сійӧ некор эз шулы ӧтпырйӧ “сідз” и “абу сідз”. Сы пытшкын ставыс вӧлі “сідз”. Енлӧн став кӧсйысьӧмыс збыльмис Исус Кристос пыр. Та вӧсна Енмӧс ошкӧмӧн ми шуам Сылы Исус Кристос пыр “Аминь”.
Енмыс, коді топыда йитӧ миянӧс да тіянӧс Кристос пытшкын, мавтыштіс миянӧс: Сійӧ пасйис миянӧс да мӧдӧдіс миян пытшкӧ Ассьыс Ловсӧ, коді эскӧдӧ миянӧс, мый Енлӧн став кӧсйысьӧмыс збыльмас.
Ме висьтала тайӧс Ен водзын: сӧмын тіянӧс жалитӧм вӧсна ме ӧнӧдз эг волы Коринфӧ. Ми огӧ кӧсйӧй веськӧдлыны тіян эскӧмӧн, сӧмын кӧсъям отсавны тіянлы, мед ті верминныд нимкодясьны. Ӧд ми тӧдам, мый тіян эскӧмныд зумыд.
2 юр.
Ме ог кӧсйы бара шогӧдны тіянӧс. Та вӧсна шуи аслым, мый ӧні ог на лок тіян дінӧ.
Ӧд ме кӧ шогӧда тіянӧс, коді менӧ гажӧдас? Оз-ӧ сійӧ, кодӧс ме шогӧді.
Дзик та йылысь ме гижлі тіянлы, медым тіянӧ воа да, меным эз ковмы шогсьыны сійӧ йӧзыс вӧсна, код вӧсна колӧ нимкодясьны.
Ӧд ме тӧда, меным кӧ нимкодь, долыд тшӧтш ставныдлы тіянлы.
Воддза гижӧдсӧ ме гижи тіянлы ёна шогсьӧмӧн, сьӧлӧм дойӧн да кыз синваӧн. Ме гижи сійӧс эг тіянӧс шогӧдӧм понда, но медым ті гӧгӧрвоинныд, кутшӧм ті мусаӧсь меным.
Кодкӧ шогӧдіс кӧ менӧ, сійӧ эз сӧмын менӧ шогӧд. Содтавтӧг шуа, сійӧ шогӧдіс мыйтакӧ тшӧтш ставнытӧ тіянӧс.
Сэтшӧмыслы тырмана нин тіянсянь мыждӧмыс. Бурджык, ті кӧ прӧститанныд да бурӧданныд сійӧс, медым ёна шогсьӧмысла дзикӧдз эз нюкыртчы.
Та вӧсна кора тіянӧс: петкӧдлӧй сы дінӧ ассьыныд муслунтӧ.
Сійӧ гижӧдсӧ ме гижлі тіянлы, медым тӧдмавны, быдторйын-ӧ ті кывзысянныд.
Ті кӧ прӧститанныд кодӧскӧ, ме тшӧтш.
Ме ӧд прӧстита сійӧс Кристос водзын, эм кӧ мыйысь прӧститнысӧ. Ме вӧча тайӧс тіян вӧсна, медым сӧтана эз ылӧдлы миянӧс, ми ӧд тӧдам сылысь наян мӧвпъяссӧ.
Кор локті Троада карӧ висьтавлыны Кристос йылысь Бур Юӧрсӧ, Господь восьтіс меным ӧдзӧс сэні уджавны. Но сьӧлӧмӧй ёна майшасис, Тит вокӧс сэтысь эг аддзы да. Сэки ме янсӧдчи сэтчӧс йӧзкӧд да мӧдӧдчи Македонияӧ.
Ошкӧм Енлы. Кристос пыр Сійӧ быд кадӧ сетӧ миянлы вермӧм да миян пыр быдлаын паськӧдӧ Кристос йылысь чӧскыд дука тӧдӧмлунсӧ.
Енмыслы ми — Кристослӧн чӧскыд дука ӧвтанторъяс. Тайӧ дуксӧ тӧдӧны мездмӧмаяс и вошӧмаяс. Ӧтияслы тайӧ дукыс вайӧ кулӧм, а мӧдъяслы — олӧм.
Но коді шогмас та вылӧ?
Мукӧдыс моз ми огӧ висьтавлӧй Енлысь Кывсӧ дон вылӧ. Ми висьтавлам сійӧс Ен водзын веськыда, ӧд ми — Кристослӧн кесъялысьяс да Енсянь мӧдӧдӧмаяс.
3 юр.
Гашкӧ, миянлы выльысь тӧдмасьны тіянкӧд?
Гашкӧ, мукӧдыслы моз миянлы тшӧтш колӧ вайны тіянлы эскӧдан гижӧдсӧ? Гашкӧ, асьныд сійӧс сетанныд?
Миян эскӧдан гижӧдыс — ті. Тайӧ гижӧдсӧ гижӧма миян сьӧлӧмӧ, сійӧс тӧдӧны да лыддьӧны став йӧзыс.
Быдӧнлы тыдалана, мый ті — Кристослӧн гижӧдыс. Сійӧс гижӧма Ен Лолӧн, абу чернилаӧн, гижӧма морт сьӧлӧмӧ, абу шыльӧдӧм из вылӧ. Татшӧм гижӧднас ті лоинныд миян кесъялӧм пыр.
Татшӧм зумыд лача ми кутам Ен вылӧ Кристос пыр. Ми лыддям, мый асьным ми нинӧм вылӧ огӧ туйӧй, нинӧм огӧ сяммӧй вӧчнысӧ, но Енмыс сетӧ миянлы сямлунсӧ.
Сійӧ сетіс миянлы сямлун кесъявны Выль Йитӧдлы, кӧні веськӧдлӧ Лов, а оз шыпаса Индӧд. Ӧд шыпаса Индӧдыс вайӧ кулӧм, а Лолыс сетӧ олӧм.
Индӧдсӧ вӧлі гижӧма шыльӧдӧм из вылӧ. Тайӧ Индӧдсӧ Мӧисейлы сетігӧн Енмыслӧн дзирдлуныс сэтшӧма югдӧдіс Мӧисейлысь чужӧмсӧ, мый Израиль войтыр весиг эз вермыны видзӧдны сы вылӧ. Но тайӧ дзирдлуныс вӧлі сӧмын регыдъя. Сідзкӧ, кулӧмӧ вайӧдысь Индӧдлы кесъялӧмыс кӧ вӧлі сэтшӧм дзирдалана, сэки кымын пӧв дзирдаланаджык Ловлы кесъялӧмыс?
Мыждана Индӧдлы кесъялӧмыс кӧ вӧлі дзирдалана, сэки кымын пӧв дзирдаланаджык веськыдлуныслы кесъялӧмыс.
Та вӧсна ӧнія дзирдлуныс вевттьӧ воддзасӧ.
Сідзкӧ, воддзаыс, быранаыс кӧ вӧлі сэтшӧм дзирдалана, сэки кымын пӧв дзирдаланаджык ӧніяыс, бырлытӧмыс.
Та вылӧ лача кутӧмӧн ми сёрнитам повтӧг. Ми огӧ вӧчӧй Мӧисей моз. Сійӧ тупкыліс ассьыс чужӧмсӧ вевттьӧдӧн, медым Израиль войтыр эз аддзы дзирдлуныслысь бырӧмсӧ.
Налӧн пемдӧма вежӧрныс. Важ Йитӧд йылысь Гижӧдсӧ лыддигӧн на вылын ӧнӧдз куйлӧ тайӧ вевттьӧдыс, ӧд сійӧс вештӧ сӧмын Кристос.
Мӧисейлысь Индӧдсӧ лыддигӧн вевттьӧдыс ӧнӧдз на куйлӧ сьӧлӧм выланыс.
Но мортыс кӧ бергӧдчӧ Господь дінӧ, сэки вевттьӧдыс босьтсьӧ.
Господь эм Лов.
Кӧні Господьлӧн Лолыс, сэні мездлун.
Ми ставным чужӧмнымӧс вевттьытӧг видзӧдам Господьлӧн дзирдлун вылӧ да рӧмпӧштанысь моз аддзам Сылысь дзирдлунсӧ. Сы вылӧ видзӧдӧмӧн ми лунысь-лун вежсям да кутам дзирдавны Сы моз жӧ. Татшӧмнас вӧчӧ миянӧс Господьлӧн Лолыс.
4 юр.
Аслас буралӧмыс кузя Енмыс сетіс миянлы тайӧ кесъялӧмсӧ, та вӧсна ми огӧ ӧшӧдӧй юрнымӧс.
Ми огӧ вӧчӧй гусясӧ да янӧданасӧ, огӧ ылӧдчӧй, Енлысь Кывсӧ висьтавлам торкавтӧг. Ми восьсӧн висьталам збыльсӧ да быдӧнлы сетам донъявны асьнымӧс Ен водзын.
Кодлыкӧ тупкыса кӧ миян буръюӧртӧмыс, сійӧ тупкыса вошӧмаяслы. Найӧ оз эскыны, ӧд тайӧ муюгыдас ыджыдалысь омӧльыс пемдӧдӧма налысь вежӧрсӧ, мед найӧ эз аддзыны Бур Юӧрлысь югыдсӧ, коді восьтӧ Кристослысь дзирдлунсӧ, а Кристос — Енлӧн пертасыс.
Ми огӧ ас йылысь висьтавлӧй, а висьтавлам Исус Кристос йылысь, мый Сійӧ — Господь.
Сійӧ мӧдӧдіс миянӧс кесъявны тіянлы. Енмыс, коді тшӧктіс пемыдас ӧзйыны югыдыслы, югдӧдіс миянлысь сьӧлӧмнымӧс, медым ми вермим аддзыны Енлысь дзирдлунсӧ Исус Кристос чужӧмбанысь.
Тайӧ озырлунсӧ ми новлӧдлам ас пытшканым, кыдзи сёй дозъясын, медым петкӧдлыны, мый тайӧ ыджыдсьыс-ыджыд выныс Енмыслӧн, а абу миян.
Миянӧс быд боксянь топӧдӧны, но йӧршитны оз вермыны.
Ми шӧйӧвошлам, но лачанымӧс огӧ воштӧй.
Миянӧс вӧтлӧны, но Енмыс оз эновт миянӧс.
Миянӧс омӧльтӧны, но бырӧдны оз вермыны.
Асланым вир-яйын ми пыр новлӧдлам Господь Исуслысь кулӧмсӧ, медым миян вир-яйын тыдовтчис тшӧтш Сылӧн олӧмыс.
Ми ловъяӧсь, но быд кадӧ кулан выйынӧсь Исус вӧсна, медым миян кулана вир-яйын тыдовтчис Сылӧн олӧмыс. Тадзи кулӧмыс вӧчӧ ассьыс уджсӧ миян пытшкын, а олӧмыс — тіянын.
Гижӧдыс висьталӧ: «Ме эски, та вӧсна и висьталі». Миян пытшкын тайӧ жӧ эскан лолыс. Ми тшӧтш эскам, та вӧсна и висьталам. Ми тӧдам, мый Господь Исусӧс Ловзьӧдысь Исус пыр ловзьӧдас тшӧтш миянӧс да сувтӧдас тіянкӧд Ас водзас.
Став сьӧкыдсӧ ми нуам тіян вӧсна, медым Енлӧн буралӧмыс содіс да вичмис уналы на. Сэки унаӧн кутасны аттьӧавны да ошкыны Енсӧ.
Та вӧсна ми огӧ ӧшӧдӧй юрнымӧс.
Кӧть миян ортсысаыс, вир-яйным, сісьмӧ, но пытшкӧссаыс лунысь-лун выльмӧ.
Миян сьӧкыдалӧмыс кокньыд, сӧмын регыдъя, но таысь вичмас миянлы помтӧм-дортӧм да бырлытӧм дзирдлун. Ми видзӧдам тыдавтӧмыс вылӧ, огӧ тыдаланаыс вылӧ.
Ӧд тыдавтӧмыс бырлытӧм, а тыдаланаыс бырана.
5 юр.
Ми тӧдам: тайӧ мувывса чомйыс, миян вир-яйным, кӧ киссяс, Енмыс сетас миянлы енэжас оланін — киӧн вӧчтӧмӧс, бырлытӧмӧс.
Ӧні ми сьӧкыда ышлолалам, ӧд ёна кӧсъям овмӧдчыны енэжвыв оланінӧ да пасьтавны выльсӧ.
Сэки ми огӧ лоӧй пасьтӧмӧсь.
Тайӧ вир-яй чомъяс олігӧн ми сьӧкыда ышлолалам, ӧд огӧ кӧсйӧй пӧрччысьны, но кӧсъям пасьтавны выльсӧ, медым олӧмыс вевттис куланасӧ.
Дзик та вылӧ Енмыс дасьтіс миянӧс да сетіс миянлы Ассьыс Ловсӧ.
Тайӧ Лолыс эскӧдӧ миянӧс, мый Енлӧн став кӧсйысьӧмыс збыльмас. Сійӧн ми пыр повтӧмӧсь, кӧть тӧдам, мый тайӧ вир-яяс олігӧн ми ылынӧсь Господьысь. Ӧд ми олам эскӧмӧн, огӧ аддзананас. Та вӧсна ми збыльысь повтӧмӧсь. Ми кӧсъям ӧдйӧджык петны тайӧ вир-яйсьыс да овмӧдчыны гортӧ, Господь дінӧ.
Та вӧсна, олам-ӧ Сы дінын али огӧ на, сьӧлӧмсянь зілям шогмыны Господьлы.
Ӧд миянлы быдӧнлы ковмас сувтны Кристослӧн ёрд водзӧ. Сэки быдӧнӧс лоӧ мыждӧма уджъясыс серти: бурсӧ али лёксӧ мортыс вӧчис вир-яйын олігас.
Ми тӧдам, мый сэтшӧм Господьысь полӧмыс, та вӧсна зілям эскӧдны тшӧтш мукӧдсӧ. Енмыслы ми восьсаӧсь, чайтам, тіян сьӧлӧмлы тшӧтш восьсаӧсь.
Ми огӧ кӧсйӧй выльысь петкӧдлыны асьнымӧс тіян водзын, сӧмын сетам тіянлы позянлун ошйысьны миянӧн, мед ті верминныд вочавидзны налы, коді ошйысьӧ мыйӧнкӧ ортсысанас, а оз пытшкӧссанас.
Ми кӧ ас вежӧрынӧсь — тайӧ тіянлы, абу кӧ — Енмыслы.
Миянӧн веськӧдлӧ Кристослӧн муслуныс, сійӧн тадзи мӧвпалам, мый ӧти кӧ куліс ставныс вӧсна, сідзкӧ, ставныс кулісны.
Кристос куліс ставныс понда, медым олысьяс эз нин ас вӧснаныс овны, но олісны на понда Кулысь да Ловзьысь вӧсна.
Ӧнісянь ми некодӧс огӧ донъялӧй морт видзӧдлас серти.
Водзын кӧ Кристосӧс донъялім морт видзӧдлас серти, ӧні огӧ.
Сідзкӧ, коді Кристос пытшкын — сійӧ выль олысь.
Важыс кольӧма, ӧні ставыс выль.
Ставыс Енсянь. Исус Кристос пыр Енмыс бурӧдіс миянӧс Аскӧдыс да мӧдӧдіс миянӧс висьтавлыны бурасьӧмыс йылысь. Исус Кристос пыр Енмыс бурӧдіс Аскӧдыс став йӧзсӧ да оз нин лыддьы найӧс мыжаӧн. Енмыс сетіс миянлы бурасьӧмыс йылысь кывсӧ.
Сідзкӧ, ми — Кристослӧн мӧдӧдӧмаяс, и Ачыс Енмыс шыасьӧ миян пыр йӧзыс дінӧ.
Кристос нимӧн ми корам: бурасьӧй Енмыскӧд.
Кристослӧн эз вӧв некутшӧм мыж, но Енмыс пуктіс Сы вылӧ миянлысь мыжъяснымӧс, медым Сы пыр ми лоим Ен водзын веськыдӧн.
6 юр.
Ми, Енкӧд ӧтвыв уджалысьяс, корам тіянӧс: сибӧдӧй Енлысь буралӧмсӧ, мед сійӧ эз ло весьшӧрӧ.
Ӧд Енмыс висьталӧ:
— Ме кылі тэнӧ бур кадӧ, отсалі тэныд мездман лунӧ.
Со ӧні бур кадыс, со ӧні мездман луныс.
Ми некодлы огӧ сетӧй помка шуасьны миян вылӧ, медым эз ло лёкӧдӧма кесъялӧмнымӧс.
Мӧдарӧ, ми быдторйын петкӧдлам асьнымӧс Енлӧн кесъялысьясӧн: ми нуам сьӧкыдсӧ, шогсӧ, дзескӧдӧмсӧ. Ми зумыдӧсь, кор миянӧс нӧйтӧны, пуксьӧдӧны дзескыдінӧ, вӧтлӧны, кор ми уджалам ныр вылӧ усьтӧдз, видзалам, коллялам узьтӧм войяс. Ми олам сӧстӧма. Миян эм тӧдӧмлун, терпитӧм, бурлун. Миянӧн веськӧдлӧ Вежа Лов да сьӧлӧмсянь муслун. Ми висьталам збыльсӧ, ставсӧ вӧчам Ен вынӧн. Миян вермасянторным — веськыдлун. Сійӧн вермасям и водзсасям. Ми дасьӧсь сибӧдны ошкӧмсӧ и янӧдӧмсӧ, нимӧдӧмсӧ и лёкӧдӧмсӧ. Миянӧс лыддьӧны пӧръясьысьясӧн, но ми веськыда сёрнитам.
Ми огӧ нималӧй, но миянӧс ставныс тӧдӧны.
Миянӧс лыддьӧны кулӧмаясӧн, но ми ловъяӧсь.
Миянӧс нӧйтӧны, но огӧ кулӧй.
Миянӧс шогӧ вӧйтӧны, а ми пыр нимкодясям.
Ми гӧльӧсь, но унаӧс озырмӧдам.
Миян нинӧм абу, но ставыс эм.
Коринфсаяс, ми сёрнитам тіянкӧд веськыда, миян сьӧлӧмным восьса тіянлы.
Ми восьтім тіянлы сьӧлӧмнымӧс, но тіян сьӧлӧмныд тупкыса миянлы.
Ме шуа тіянлы аслам ныв-пилы моз: воча восьтӧй сьӧлӧмнытӧ миянлы.
Энӧ сюйӧй юрнытӧ ӧти сийӧс улӧ эскытӧмъяскӧд. Вермас ӧмӧй йитны мыйкӧ веськыдлунсӧ лёкыскӧд?
Эм-ӧ ӧткодьлуныс югыдыслӧн пемыдыскӧд?
Вермас ӧмӧй воны ӧти кывйӧ Кристос Велиаркӧд?
Мый вермас йитны эскысьӧс эскытӧмкӧд?
Вермасны ӧмӧй сулавны идолъяс Енлӧн крамын?
Ӧд ті — ловъя Енлӧн крамыс.
Енмыс шуӧ:
— Овмӧдча на пытшкӧ да понда ветлыны накӧд.
Ме лоа налӧн Енмӧн, а найӧ — Менам войтырӧн.
Сідзкӧ:
— Петӧй на пӧвстысь да ылыстчӧй наысь, — висьталӧ Господь.
— Энӧ инмӧдчӧй пежас, сэки Ме сибӧда тіянӧс.
Ме лоа тіянлы Батьӧн, а ті — Меным ныв-пиӧн, — висьталӧ Господь, Ставсӧкутысь.
7 юр.
Мусаяс, со мыйта кӧсйысьӧм Енмыс сетӧма миянлы. Сідзкӧ, весалам ассьыным вир-яйнымӧс да ловнымӧс став пежсьыс. Кутам овны Енсьыс полӧмӧн, Сылӧн вежалуныс мед тырвыйӧ лоӧ миян пытшкын.
Восьтӧй миянлы сьӧлӧмнытӧ,
ӧд ми некодӧс эгӧ дӧзмӧдӧй, некодлы лёксӧ эгӧ вӧчӧй, некод помысь эгӧ озырмӧдчӧй.
Тайӧс висьтала ог тіянӧс мыждӧм могысь.
Ӧд водзынджык тіянлы шулі нин: ті миян сьӧлӧмынӧсь, ми дасьӧсь овны и кувны тіянкӧд ӧтвылысь.
Ме ёна эска тіянлы да ошйыся тіянӧн.
Шогъяс вылӧ видзӧдтӧг ме ёна нимкодяся, ӧд ті ёна бурӧданныд менӧ.
Македонияӧ воӧм бӧрын миян эз вӧв некутшӧм шойччӧг. Миянлы быд боксянь вӧлі сьӧкыд: ортсысянь — усьласисны, а пытшкӧсаным вӧлі полӧм.
Но Енмыс, ловнас усьӧмаясӧс Ышӧдысь, ышӧдіс миянӧс Тит воӧмӧн, и эз сӧмын тайӧн. Миян ловным кыпаліс тшӧтш сыысь, мый ті ышӧдӧмныд Титӧс. Сійӧ висьталіс миянлы, ті пӧ ёна гажтӧмтчанныд меысь, ёна шогсянныд да доръянныд менӧ. Таысь меным нӧшта на нимкодь лои.
Дерт, менам сьӧлӧмӧй нормыліс, мый аслам гижӧдӧн шогӧ уськӧді тіянӧс. Но ӧні ог нин шогсьы, ӧд ме аддза, мый гижӧдыс шогӧдліс тіянӧс сӧмын кад кежлӧ.
Ме нимкодяся ог тіян шогӧ усьлӧм понда, а нимкодяся сы понда, мый тіян шогсьӧмныд бергӧдіс тіянӧс мыжъяссьыныд.
Тайӧ шогсьӧмыс вӧлі Ен кӧсйӧм серти, сідзкӧ, нинӧм лёксӧ ми эгӧ вӧчӧй тіянлы.
Ӧд Ен кӧсйӧм серти шогсьӧмыс бергӧдӧ мыжъясысь, а тасянь — мездмӧмыс. Сідзкӧ, та йылысь жалитны оз ков. А мувывса шогъясыс вайӧдӧны кулӧмӧдз.
Видзӧдлӧй, мый вайис тіянлы Ен кӧсйӧм серти шогсьӧмыс: кутшӧма ті зілянныд петкӧдлыны ассьыныд мыжтӧмлуннытӧ, дӧзманныд лёк вӧчысь вылӧ да поланныд лёк вӧчӧмысь. Кутшӧма ті гажтӧмтчанныд миянысь, ловнаныд ыпъяланныд да кӧсъянныд мыждыны лёк вӧчысьӧс.
Ті быд боксянь петкӧдлінныд ассьыныд сӧстӧмлуннытӧ.
Ме гижи тіянлы эг сы вӧсна, коді вӧчис лёксӧ либӧ кодлы вӧчисны лёксӧ, а гижи тіянлы, медым ті гӧгӧрвоинныд Ен водзын, кутшӧма ми тӧждысям тіян вӧсна.
Сідзкӧ, тіян долыдлунныд долыдмӧдіс и миянӧс.
Но нӧшта на долыд лоис Титлӧн нимкодясьӧмысь, ӧд сылӧн сьӧлӧмыс оз нин майшась тіян вӧсна.
Ме ошйысьлі Тит водзын тіянӧн, да меным абу яндзим таысь. Ми ставсӧ висьтавлім тіянлы веськыда, и Тит водзын миян ошйысьӧмным тшӧтш вӧлі веськыд.
Ӧні, тіянӧс казьтылігӧн, сылӧн сьӧлӧмас ёнджыка на содӧ тіян дінӧ муслуныс, ӧд ті ёна кывзысьӧмныд сылысь, полӧмӧн да пыдди пуктӧмӧн сибӧдӧмныд сійӧс.
Меным нимкодь, мый быдторйын верма тіян вылӧ лача кутны.
8 юр.
Вокъяс, ми кӧсъям, мед ті тӧдінныд Енлысь ыджыд буралӧмсӧ македонияса вичкояс дінӧ.
Налы ёна сьӧкыд, но та вылӧ видзӧдтӧг найӧ ёна нимкодясьӧны.
Найӧ вывті гӧльӧсь, но та дырйи найӧ зэв лышкыдӧсь.
Ме тӧда: найӧ сетӧны мыйтӧм вермӧны, весиг верманасьыс унджык на.
Найӧ ёна корисны миянӧс босьтны насянь сетӧмторсӧ, медым отсавны вежа войтырлы.
Найӧ сетісны ёна унджык миян виччысьӧм дорысь. Ен кӧсйӧм серти найӧ сиисны асьнысӧ медводз Господьлы, сэсся миянлы.
Та вӧсна ми корим Титӧс водзӧ вӧчны тайӧ бур уджсӧ тіян пӧвстын да вайӧдны сійӧс помӧдз.
Ті озырӧсь быдторнас: эскӧмӧн, сёрнитны кужӧмӧн, тӧдӧмлунӧн, зільӧмӧн, миян дінӧ муслунӧн. Сідзкӧ, лоӧй лышкыдӧсь тшӧтш отсӧг сетігӧн. Тайӧ абу тшӧктӧм.
Ме висьтала тіянлы мукӧдыслӧн зільӧм йылысь, медым тӧдмавны, сьӧлӧмсянь-ӧ ті радейтанныд йӧзсӧ.
Ті тӧданныд миян Господь Исус Кристослысь буралӧмсӧ. Сійӧ вӧлі озыр, но гӧльмис тіян вӧсна, медым Аслас гӧльлунӧн озырмӧдны тіянӧс.
Ме туйдӧда тіянӧс, ӧд тайӧ тіянлы бур вылӧ. Ті кольӧм воӧ нин кутінныд вӧчны тайӧ уджсӧ, и вӧчинныд сійӧс окотапырысь.
Ті ёна кӧсйинныд вӧчны тайӧ уджсӧ, сідзкӧ, вӧчӧй сійӧс позянлун сертиныд да вайӧдӧй сійӧс помӧдзыс.
Мортыс кӧ сетӧ сьӧлӧмсяньыс, сылысь сетӧмторсӧ донъялӧны эмлуныс серти, а оз абутӧмлуныс серти.
Ме ог кӧсйы сьӧктӧдны тіянӧс, медым мукӧдыслы вӧлі кокньыдджык, но кӧсъя, медым быдӧнлы вӧлі ӧтмоза.
Ӧні тіян озырлунныд вевттяс налысь тырмытӧмсӧ, а мӧдысь налӧн озырлунныс вевттяс тіянлысь тырмытӧмсӧ. Тадзи быдӧнлы лоӧ ӧтмоза.
Гижӧдыс висьталӧ:
Уна чукӧртысьлӧн эз вӧв вывтіыс, этша чукӧртысьлӧн эз вӧв тырмытӧмыс.
Ошкӧм Енлы. Сійӧ пуктӧма Тит сьӧлӧмӧ тіян вӧсна ме кодь жӧ тӧждысьӧм.
Тит мунӧ тіян дінӧ оз сӧмын менам корӧм вӧсна. Сійӧ ёна тӧждысьӧ тіян вӧсна, та понда сійӧ мунӧ ас кӧсйӧм сертиыс.
Сыкӧд ми мӧдӧдам нӧшта ӧти вокӧс. Быд вичко ёна ошкӧ сійӧс Бур Юӧр висьтавлӧмысь. Вичкояс бӧрйисны тайӧ воксӧ ветлыны миянкӧд, медым чукӧртны сетӧмтор. Тайӧ уджсӧ ми вӧчам Господьӧс ошкӧм могысь. Тайӧн петкӧдлам, мый ми дасьӧсь отсасьны тіян моз. Ми огӧ кӧсйӧй, медым тайӧ уна сетӧмторсӧ чукӧртігӧн кодкӧ шуасис миян вылӧ.
Ми ставсӧ зілям вӧчны веськыда огӧ сӧмын Господь водзын, тшӧтш йӧзыс водзын.
Тит да тайӧ вокыскӧд ми мӧдӧдам нӧшта ӧтиӧс. Ассьыс зільӧмсӧ сійӧ петкӧдліс унаысь да унаторйын. Сійӧ кутӧ тіян вылӧ ыджыд лача, та вӧсна ӧні ёнджыка на зільӧ отсасьны тіянлы.
Шуны кӧ Тит йылысь, сійӧ — менам уджъёрт, сыкӧд ӧтвыв ми кесъялам тіянлы.
Мукӧд вокъяссӧ мӧдӧдісны вичкояс. Налӧн олӧмыс вайӧ Кристослы ошкӧм.
Сідзкӧ, петкӧдлӧй на дінӧ ассьыныд муслунтӧ. Сэки быд вичко аддзас, мый ми ошйысям тіянӧн огӧ весьшӧрӧ.
9 юр.
Чайта, меным оз ков гижны тіянлы, мед отсасинныд вежа войтырлы. Ме тӧда тіянлысь зільӧмтӧ. Македонияса водзын ме ошйыси, мый ті, акайяса, дасьӧсь сетны отсӧг кольӧм восянь нин.
Тіян сьӧлӧмсянь тӧждысьӧмныд унаӧс ышӧдіс та вылӧ.
Ме мӧдӧда тіян дінӧ вокъясӧс, медым тіянӧн ошйысьӧмӧй эз ло весьшӧрӧ. Ме тіянлы шулі нин: лоӧй дасьӧсь. Ӧд мекӧд тшӧтш локтасны кӧ Македонияысь эскысьяс, а ті абу на дасьӧсь, миянлы юр яндзим лоӧ, ог нин шу тіян йылысь. Ми ӧд ёна ошйысим тіянӧн.
Та вӧсна лыдди коланаӧн водзвыв мӧдӧдны тіян дінӧ вокъясӧс, медым чукӧртны кӧсйысьӧм сетӧмторнытӧ. Сэки тайӧ лоӧ ас кадӧ дасьтӧм да сьӧлӧмсянь сетӧмтор, а оз мырдӧн перйӧмтор.
Тӧдӧй: этша кӧдзысь — этша вундас, уна кӧдзысь — уна вундас.
Быдӧн сетӧй сьӧлӧм тшӧктӧм сертиныд: энӧ мырдӧн, энӧ шогпырысь.
Ӧд долыда сетысь муса Енмыслы.
Енмыс вына озырмӧдны тіянӧс быдпӧлӧс сетӧмторнас, медым быд кадӧ да быдторйын тіян вӧлі став коланаыс, да нӧшта на верминныд вӧчны быдпӧлӧс бур уджсӧ.
Гижӧдыс висьталӧ:
— Сійӧ лышкыда сеталіс гӧльяслы, Сылӧн веськыда вӧчӧмыс некор оз вун.
Кӧдзысьлы кӧйдыссӧ Сетысьыс да няньӧн Пӧткӧдысьыс сетӧ кӧйдыссӧ тшӧтш тіянлы. Сійӧ быдтӧ тіянлысь пуктастӧ да уна пӧв содтӧ тіян веськыда олӧмлысь вотӧссӧ, медым ті вӧлінныд озырӧсь быдторнас да верминныд лышкыда юксьыны быдӧнкӧд. Сэки йӧзыс кутасны аттьӧавны Енсӧ миян отсӧгысь.
Ми отсалам вежа войтырлы огӧ сӧмын налӧн гӧльлун вӧсна. Ми отсалам, медым унаӧн аттьӧалісны Енсӧ.
Тіянлысь бур вӧчӧмнытӧ аддзигӧн вежа войтыр кутас ошкыны Енсӧ, ӧд ті кывзысьӧмӧн оланныд Кристослӧн Евангелльӧ серти, мый висьтавланныд. Найӧ ошкӧны Енсӧ, ӧд ті лышкыда юксянныд накӧд, тшӧтш мукӧдыскӧд. Найӧ кевмысьӧны тіян вӧсна да ёна кӧсйӧны аддзысьлыны тіянкӧд, ӧд тіян пытшкын сы ыджда Енлӧн буралӧмыс.
Ошкӧм Енлы шуны вермытӧм сетӧмторсьыс.
10 юр.
Ӧткымынӧн ме йылысь шуӧны, мый миян дінын сійӧ рам, а ылын кӧ — чорыд. Но ме, Павел, шыася тіян дінӧ Кристос бурлунӧн да мелілунӧн.
Кора тіянӧс: кывзӧй менӧ, мед тіянӧ локтігӧн меным эз ковмы чорзьӧдчыны. Дерт, ӧткымынкӧд ковмас чорыда сёрнитны, ӧд найӧ шуӧны, мый ми олам тайӧ муюгыдсаыс моз.
Кӧть ми олам тайӧ муюгыдас, но вермасям огӧ муюгыдсаыс моз.
Миян вермасянторным абу мортсянь, а Енсянь, сыын эм Енлӧн выныс. Ми жугӧдам сійӧн чорыд мытшӧдъяс, ковтӧм мӧвпъяс, да став кыпӧдчӧмсӧ, мый паныд сувтӧ Енсӧ тӧдмалӧмлы. Ми топӧдам быдпӧлӧс мӧвпъяс, медым найӧ кывзысисны Кристослысь. Ми дасьӧсь мыждыны быдпӧлӧс кывзысьтӧмлунысь, но сӧмын сэки, кор ті асьныд кутанныд тырвыйӧ кывзысьны.
Видзӧдлӧй ас выланыд: коді зумыда эскӧ, мый сійӧ Кристослӧн, мед тӧдӧ: ми тшӧтш Кристослӧн.
Меным оз ло яндзим, кута кӧ ошйысьны миянлы сетӧм ыджыдалан вынӧн. Ӧд Господь сетіс тайӧ вынсӧ тіянӧс ёнмӧдӧм вылӧ, а эз жугӧдӧм вылӧ.
Ме ог кӧсйы, мед ті мӧвпалінныд, быттьӧ аслам гижӧдъясӧн повзьӧдла тіянӧс.
Ӧд кодсюрӧ шуӧны: «Гижӧдъясас сійӧ чорыд да вына, а миян дінын — жеб, да сёрниыс сылӧн вынтӧм». Татшӧмыс мед тӧдӧ: кутшӧмӧсь ми гижӧдын, сэтшӧмӧсь и тіян дінын.
Ми огӧ лысьтӧй орччӧдны асьнымӧс либӧ ӧткодявны асьнымӧс вывтіасьысьяскӧд.
Ӧд найӧ видзӧдӧны сӧмын ас выланыс да донъялӧны асьнысӧ ас сертиныс. Тадзи вӧчигӧн найӧ петкӧдлӧны ассьыныс мывкыдтӧмлунсӧ.
Ми огӧ ошйысьӧй этш тӧдтӧг. Ошйысям сӧмын сійӧн, мый Енмыс шуис вӧчны миянлы. Сійӧ тшӧктіс уджавны тшӧтш тіян пӧвстын.
Ми огӧ торкалӧй Енлысь шуӧмсӧ. Ми кӧ эськӧ эгӧ локтӧй тіян дінӧ, артмис торкалӧм, но ми локтім тіян дінӧ Кристослӧн Бур Юӧрнас.
Ми огӧ ошйысьӧй этш тӧдтӧг, огӧ ошйысьӧй мукӧдлӧн уджъясӧн, но лача кутам, кор тіян эскӧмныд ёнмас, сэки миян уджыс ёнджыка на паськалас тіян пӧвстын. Сэки ми водзӧ мунам висьтавлыны Евангелльӧсӧ, огӧ кутӧй мукӧдлӧн уджъясӧн ошйысьны.
Ӧд шуӧма: «Ошйысьысь мед ошйысьӧ Господьӧн.»
Шогмана абу сійӧ, коді асьсӧ ошкӧ, а кодӧс ошкӧ Господь.
11 юр.
Кора тіянӧс, терпитыштӧй менсьым мывкыдтӧмлунӧс.
Чайта, ті терпитыштанныд менӧ,
ӧд ме тӧждыся тіян вӧсна Енлӧн тӧждысьӧмӧн. Ме кӧсйыси сетны тіянӧс дзик ӧти верӧспулы — Кристослы. Кӧсъя, мед ті сувтінныд Сы водзӧ сӧстӧм нылӧн.
Коркӧ змей наяна ылӧдліс Еваӧс. Ме пола, мый ті сы моз жӧ ылаланныд да воштанныд ассьыныд восьса йитӧднытӧ Кристоскӧд.
Ӧд тіян дінӧ кӧ локтас кодкӧ да кутас висьтавлыны мӧд Исус йылысь, код йылысь ми эгӧ висьтавлӧй, либӧ мӧд лов йылысь, кодӧс ті энӧ сибӧдлӧй, либӧ мӧдпӧлӧс бур юӧр, кодӧс энӧ босьтлӧй, сэки ті кокньыда терпитанныд сійӧс.
Чайта, ме нинӧмӧн абу лёкджык тайӧ “ыджыд апостолъясысь”.
Гашкӧ, ме ог сяммы мичаа сёрнитны, но тӧдӧмлунӧй менам тырмымӧн.
Тайӧс ме петкӧдлі тіянлы унаысь да уна ногӧн.
Медым тіянӧс вылӧ пуктыны, ме улӧ пукті ачымӧс. Гашкӧ, ме мыжа таысь, мый Енлысь Евангелльӧсӧ висьтавлі тіянлы дон босьттӧг?
Мед кесъявны тіянлы, мукӧд вичкояслысь ме босьтлі сьӧм, позьӧ шуны, куштылі найӧс. Кӧть меным эз вӧв ставыс тырмана, тіянын олігӧн ме некодӧс эг сьӧктӧдлы. Ӧд став коланаторсӧ меным сетісны Македонияысь локтӧм вокъяс. Ме некор эг сьӧктӧдлы, и ог кут сьӧктӧдны тіянӧс.
Ме пытшкын Кристослӧн збыльыс. Та вӧсна верма шуны, мый менсьым ошйысьӧмӧс став Акайя пасьтала некод оз вермы мырддьынысӧ.
Мыйла ог кӧсйы сьӧктӧдны тіянӧс?
Гашкӧ, чайтанныд, ог радейт тіянӧс?
Енмыс тӧдӧ, ті меным мусаӧсь.
Но кыдзи вӧча ӧні, сідзи и водзӧ кута вӧчны. Ме ог сет некутшӧм помка налы, кодъяс ошйысьӧны, мый найӧ кесъялӧны Енмыслы миян моз.
Тайӧ ылӧгапостолъясыс сӧмын пӧръясьӧны, шуӧны асьнысӧ Кристослӧн апостолъясӧн.
Но тайӧ абу шензьӧданатор, ӧд ачыс сӧтана петкӧдлӧ асьсӧ югыдыслӧн анделӧн. Сідзкӧ, нинӧмла шензьынысӧ, сылӧн кесйӧгъясыс кӧ петкӧдлӧны асьнысӧ веськыда вӧчысьясӧн.
Но налӧн помыс лоӧ уджныс серти.
Нӧшта висьтала тіянлы: энӧ лыддьӧй менӧ йӧйӧн.
А лыддянныд кӧ, сибӧдӧй менӧ татшӧмнас, мед ме верми на мыйтакӧ ошйысьны.
Дерт, тайӧ абу Енсянь, но ме кута ошйысьны тіян водзын мывкыдтӧм морт моз.
Тайӧ муюгыдас олысьяс унаӧн ошйысьӧны, сідзкӧ, ме тшӧтш ошйыся.
Ӧд ті, мывкыда йӧз, кокньыда терпитанныд мывкыдтӧмъясӧс.
Ті терпитанныд, кор кесйӧдлӧны тіянӧс, мырддялӧны да куралӧны тіянлысь, ыджыдалӧны тіян вылын да кучкалӧны чужӧманыд.
Меным зэв яндзим, эгӧ лысьтӧй тадзи вӧчнысӧ да.
Кодкӧ лысьтӧ кӧ ошйысьны мыйӧнкӧ, шуа мывкыдтӧм морт моз: ме тшӧтш ошйыся.
Найӧ юдейяс? Ме тшӧтш.
Израиль войтыр? Ме тшӧтш.
Ӧвраамсянь чужысьяс? Ме тшӧтш.
Кристослӧн кесъялысьяс? Гашкӧ, менӧ лыддянныд дзик йӧйӧн, но висьтала тіянлы: ме кесъялі Кристослы наысь ёнджыка на.
Уджалі ныр вылӧ усьтӧдз, менӧ ёна нӧйтлісны, на дорысь унджыкысь вӧлі дзескыдінын, унаысь кулан выйын.
Юдейяс вит пӧрйӧ нӧйтлісны менӧ орсӧн комын ӧкмысысь вартӧмӧн, римсаяс куимысь кучкавлісны беддьӧн, ӧтчыдысь изъялісны.
Куимысь веськавлі корабль вӧйигӧн, лун да вой вӧлі саридзын.
Ме пыр туйын. Менӧ унаысь сулісны виччысьтӧмторъяс ю вылын, каръясын, овтӧминъясын, саридз вылын. Меным унаысь ковмис видзчысьны лёк вӧчысьясысь, ас йӧзысь, мукӧд войтырысь да ылӧгвокъясысь. Ме сьӧкыда уджавлі, кок йылысь усьтӧдз, тшӧкыда коллявлі узьтӧм войяс, овлі сёйтӧг-ютӧг, унаысь видзавлі да пасьтӧг кынмавлі.
Став тайӧ сьӧкыдлунъясыс кындзи меным быд лун лоӧ сибӧдны ас дінӧ уна йӧзӧс, тӧждысьны быд вичко вӧсна.
Лигышмунӧма кӧ кодкӧ, ме тшӧтш.
Усьӧма кӧ кодкӧ, менам сьӧлӧмӧй ёна висьӧ сы вӧсна.
Колана кӧ меным ошйысьны мыйӧнкӧ, кута ошйысьны аслам жеблунӧн.
Енмыс, миян Господь Исус Кристослӧн Бать, тӧдӧ: ме ог пӧръясь. Ошкӧм Сылы нэмъяс чӧж.
Дамаск карын Арета ӧксылӧн му юкӧнӧн веськӧдлысь тшӧктіс видзны карсьыс став петанінсӧ, медым кутны менӧ, но ыджыд чуманын менӧ лэдзисны ӧшиньӧд стен бердӧдыс. Тадзи ме мыні сы киысь.
12 юр.
Тайӧ, дерт, нинӧм оз содты меным, но ме водзӧ кута ошйысьны. Ӧні ме висьтала Господьсянь восьтӧм-аддзылӧм йылысь.
Тӧда ӧти мортӧс, Кристослы эскысьӧс, кодӧс дас нёль во сайын вӧлі кыпӧдӧма коймӧд енэжас. Вир-яйын-ӧ вӧлі сійӧ, лолын-ӧ, ме ог тӧд, Ен тӧдӧ.
Ме тӧда: тайӧ мортсӧ вӧлі кыпӧдӧма райӧ. Сэні сійӧ кывлӧма шуны вермытӧм кывъяс, тайӧс оз позь висьтавнысӧ. Вир-яйын-ӧ вӧлі сійӧ, лолын-ӧ, ме ог тӧд, Ен тӧдӧ.
Татшӧм мортнас кута ошйысьны, но ог аснам. А ошйыся кӧ, сӧмын аслам вынтӧмлунӧн.
Дерт, ме ог ло мывкыдтӧмӧн, кута кӧ ошйысьны, ме ӧд збыльсӧ висьтала.
Но ме ог кут ошйысьны, медым кодкӧ эз мӧвпав ме йылысь унджык сыысь, мый аддзӧ ме пытшкысь либӧ кылӧ месянь.
Медым тайӧ ыджыд восьтӧмъясысь эг вылӧ кыпӧдчы, менам вир-яйӧ сетӧма чушкысьӧс — сӧтаналысь анделсӧ. Сійӧ дойдалӧ менӧ, оз сет вылӧ кыпӧдчынысӧ.
Ме куимысь кори Господьӧс, медым мездіс сыысь,
но Сійӧ шуис: «Тырмана тэныд Менам буралӧмӧй, ӧд Менам вынӧй медъёна тыдовтчӧ вынтӧмлун дырйи».
Та вӧсна нимкодьпырысь ошйыся аслам вынтӧмлунӧн, медым Кристослӧн выныс тыдаліс ме пыр.
Ме нимкодяся вынтӧмлун дырйи, менӧ лёкӧдігӧн, дзескӧдігӧн, вӧтлігӧн да Кристос вӧсна сьӧкыдсӧ нуигӧн.
Ӧд кор ме вынтӧм, сэки ён.
Тіян водзын ошйысигӧн ме вӧлі мывкыдтӧм морт кодь, ті ӧд асьныд менӧ вайӧдінныд та выйӧдзыс.
Дерт, ме нинӧм кодь, но тіянлы аслыныд колӧ вӧлі ошкыны менӧ, ме ӧд нинӧмӧн абу лёкджык “ыджыд апостолъясысь”.
Ме мудзлытӧг вӧчи тіян водзын индысьпасъяс, шензьӧданаторъяс да ыджыд уджъяс. Ставыс тайӧ петкӧдлӧ, мый ме збыльысь апостол.
Мый тіянлы оз тырмы? Ӧд мукӧд вичколы моз ме сеті тіянлы ставсӧ. Гашкӧ, сӧмын эг сьӧктӧд тіянӧс?
Энӧ мыждӧй менӧ таысь.
Ӧні коймӧдысь нин мӧдӧдча тіян дінӧ, но ме ог кӧсйы сьӧктӧдны тіянӧс. Меным ӧд тіянсянь нинӧм оз ков, ті асьныд меным коланаӧсь.
Оз ныв-пиыс чукӧртны эмбурсӧ бать-мамыслы, а мӧдарӧ, бать-мамыс — ныв-пиыслы.
Тіян вӧсна ме нимкодьпырысь сета ассьым ставсӧ, весиг ачымӧс. Ті менӧ омӧля радейтанныд, гашкӧ, тіянӧс вывті ёна радейта да?
Ме некор эг сьӧктӧдлі тіянӧс, тайӧ тадзи. Гашкӧ, ті лыддянныд менӧ пӧръясьысьӧн да наян мортӧн?
Гашкӧ, ме аслым мыйкӧ курышті тіян дінӧ мӧдӧдӧмаяс пыр?
Ме кори Титӧс мунны тіян дінӧ, сыкӧд тшӧтш мӧдӧді ӧти вокӧс.
Гашкӧ, Тит мыйкӧ аслыс курыштіс?
Ми ӧмӧй сыкӧд абу ӧти лолаӧсь?
Эг ӧмӧй ӧти туй талялӧй?
Гашкӧ, чайтанныд, ми дорйысям тіян водзын? Огӧ.
Ми сёрнитам Ен водзын кыдзи Кристослы кесъялысьяс. Мусаяс, ми ставсӧ тайӧс висьталам тіянӧс ёнмӧдӧм могысь.
Ме пола, мый тіянӧ воа да, аддза тіянӧс сэтшӧмӧн, кутшӧмӧн ог кӧсйы аддзынысӧ. Сідзкӧ, ті тшӧтш аддзанныд менӧ сэтшӧмӧн, кутшӧмӧн онӧ кӧсйӧй аддзынысӧ. Ме пола аддзыны тіян костысь зыксьӧм, вежалӧм, скӧралӧм, асьтӧ радейтӧм, удтысьӧм, суклясьӧм, вылӧ кыпӧдчӧм да кывзысьтӧмлун. Ме ог кӧсйы, медым тіянӧ выльысь локтігӧн Енмыс янӧдіс менӧ тіян понда. Сэки меным ковмас бӧрдны уна мыж вӧчысь вӧсна, кодъяс ӧнӧдз на эз бергӧдчыны пеж вӧчӧмысь, кырсалӧмысь да лэдзчысьӧм оласногысь.
13 юр.
Ме коймӧдысь нин мӧдӧдча тіян дінӧ.
Гижӧдыс висьталӧ: «Ставсӧ колӧ подулавны кык либӧ куим мортлӧн висьталӧмӧн».
Водзынсӧ волігӧн ме ӧлӧдлі нин мыжсӧ вӧчысьясӧс. Ӧні, кор тіянысь ылын, нӧшта на гижа налы, тшӧтш мукӧдыслы: выльысь локтігӧн ог жалит тіянӧс.
Ті кӧсъянныд тӧдны, збыльысь-ӧ Кристос сёрнитӧ ме пыр.
Сійӧ абу вынтӧм тіян водзын, Ассьыс вынсӧ Сійӧ петкӧдлӧ тіян пӧвстын.
Крестӧ тувъялігӧн Сійӧ вӧлі вынтӧм, ӧні Ен вынӧн Сійӧ ловъя.
Ми Кристос пытшкынӧсь, сідзкӧ, ми тшӧтш вынтӧмӧсь, но Сыкӧд олам Ен вынӧн, медым кесъявны тіянлы.
Тӧдмалӧй асьнытӧ, эм-ӧ тіян эскӧмныд?
Видзӧдлӧй сьӧлӧманыд.
Ті ӧмӧй онӧ тӧдӧй, мый Исус Кристос тіян пытшкын.
Абу кӧ тадз, сідзкӧ, ті абу найӧ, кодъясӧн колӧ лоны тіянлы.
Но ме чайта, мый ті тӧданныд: ми найӧ, кодъясӧн колӧ лоны миянлы.
Ми кевмам Енлы, медым ті энӧ вӧчӧй некутшӧм лёктор. Ми огӧ кевмӧй сы могысь, медым петкӧдлыны асьнымӧс сэтшӧмӧн, кутшӧмӧн колӧ лонысӧ, но кевмам, медым ті вӧчинныд бурсӧ весиг сэки, ми кӧ абу сэтшӧмӧсь, кутшӧмӧн колӧ лоны миянлы.
Ми нинӧм огӧ вермӧй вӧчны збыльыслы паныд, ми сулалам збыльыс дор.
Ми нимкодясям, ті кӧ вынаӧсь, а ми вынтӧмӧсь.
Дзик та вӧсна кевмысям, мед ті быдторйын вежсинныд бурланьыс.
Ставсӧ тайӧс водзвыв гижа, мед тіянӧ воа да, эз ковмы петкӧдлыны тіянлы ассьым чорыдлунӧс да ыджыдалан вынӧс. Ӧд Енмыс сетіс тайӧ вынсӧ тіянӧс ёнмӧдӧм вылӧ, а эз жугӧдӧм вылӧ.
Вокъяс, нӧшта висьтала тіянлы: нимкодясьӧй, вежсьӧй бурланьыс, сибӧдӧй менсьым ышӧдана кывъясӧс, олӧй лӧня да ӧти сьӧлӧмӧн. Сэки муслунсӧ да лӧньлунсӧ сетысь Ен лоас тіянкӧд.
Чолӧмалӧй ӧта-мӧднытӧ вежа окыштӧмӧн.
Тіянлы ыстӧ чолӧм став вежа войтырыс.
Миян Господь Исус Кристослӧн буралӧмыс, Ен Батьлӧн муслуныс да Вежа Ловлӧн ӧтувтӧмыс ставныдкӧд тіянкӧд.
Аминь.
Апостол Павеллӧн Галатияӧ мӧдӧдӧм гижӧд
1 юр.
Гижӧ Павел, Исус Кристосӧн да Сійӧс ловзьӧдысь Ен Батьӧн пуктӧм апостол. Эз морт менӧ пукты, да абу йӧзлӧн кӧсйӧм серти тайӧ. Вокъяскӧд ми ставӧн чолӧмалам галатияса вичкояс.
Буралӧм да лӧнь олӧм тіянлы Ен Батьсянь да миян Господь Исус Кристоссянь. Ен Батьнымлӧн кӧсйӧмыс серти Кристос сетіс Асьсӧ миян мыжъяс вӧсна, медым мездыны миянӧс лёкнас тырӧм муюгыдсьыс.
Ошкӧм Сылы нэмъяс чӧж.
Аминь.
Ме шензя: ті сэтшӧм ӧдйӧ кежинныд Сыысь, коді Кристослӧн буралӧмнас корис тіянӧс. Кутшӧм тэрыба ті сибӧданныд мӧдпӧлӧс юӧрсӧ. Збыльвылас кӧ, мӧд бур юӧрыс абу, эмӧсь сӧмын тіянӧс шӧйӧвоштысьяс. Найӧ зільӧны мӧдарӧ бергӧдны Кристос йылысь Бур Юӧрсӧ.
Но весиг кӧ ми либӧ енэжсянь андел пондам висьтавны мӧд нога, огӧ сійӧ Бур Юӧрсӧ, мый водзынсӧ тіянлы висьтавлім — мед лоӧ ёрӧма.
Водзынсӧ ми шулім нин, ӧні нӧшта шуа: пондас кӧ кодкӧ висьтавны оз сійӧ Бур Юӧрсӧ, мый ті миянсянь сибӧдінныд, мед лоӧ ёрӧма сійӧс.
Йӧзсянь-ӧ, Енсянь-ӧ виччыся ме ошкӧмсӧ?
Йӧзлы ӧмӧй зіля шогмынысӧ?
Ме кӧ зіли шогмыны йӧзлы, сэки эськӧ эг вӧв Кристослӧн кесйӧг.
Вокъяс, тӧдӧй: меӧн висьталӧм Евангелльӧыс абу мортсянь. Эг мортсянь ме сійӧс босьт, эз морт менӧ велӧд, но ачыс Исус Кристос восьтіс меным сійӧс.
Ті, дерт, кывлінныд, мый водзынсӧ ме юдей эскӧм дор вӧлі, ёна вӧтлі Енлысь Вичкосӧ да зіли бырӧдны сійӧс. Юдей эскӧмын ме пановті тшӧтшъяясӧс, ме вӧлі чорыда кутчысьӧма батьяслӧн шуӧмӧ.
Но Енмыс менӧ мам кынӧмсянь нин бӧрйӧма да Аслас буралӧмнас корӧма. Сійӧ восьтіс меным Ассьыс Писӧ, медым ме висьтавлі Сы йылысь Бур Юӧрсӧ ентӧдтӧмъяслы. Сэки ме эг кут корсьны мортсянь туйдӧдӧм, весиг эг мун Ерусалимӧ меӧдз на пуктӧм апостолъяс дінӧ. Ме муні Аравияӧ, сэсянь бӧр локті Дамаскӧ.
Сӧмын куим во мысти ветлі Ерусалимӧ тӧдмасьны Петыркӧд, кык вежон олі сы ордын.
Мукӧд апостолсӧ ме эг аддзыв Господьлысь Яков воксӧ кындзи.
Ен водзын шуа: мый гижа тіянлы, ставыс збыль.
Сэсся ме муні Сирия да Киликия муясӧ.
Юдеяын Кристослӧн вичкояс менӧ весиг эз на аддзывны. Сӧмын кывлӧмаӧсь ме йылысь, миянӧс пӧ вӧтлысь, эскӧмсӧ бырӧдысь ӧні ачыс ышӧдӧ эскыны. Найӧ аттьӧалісны да ошкисны Енсӧ меысь.
2 юр.
Дас нёль во мысти Варнавакӧд ме бара ветлі Ерусалимӧ, аскӧд тшӧтш босьті Титӧс.
Муні сэтчӧ Енлӧн восьтӧмыс серти. Сэні ме сёрниті вичкоса пыдди пуктана йӧзкӧд да тӧдмӧді найӧс ентӧдтӧмъяслы висьталӧм Бур Юӧрӧн, мед кывны, мый ог весьшӧрӧ уджав.
Весиг мекӧд локтысь Титӧс, кӧть сійӧ грек войтырысь, найӧ эз тшӧктыны вундыштчыны. Тайӧс ёна кӧсйисны ылӧгвокъяс. Найӧ сибӧдчисны миян дінӧ кыйӧдчысьяс моз, мед тӧдмавны, мыйсяма мездлун миян эм Исус Кристоссянь. Найӧ зілисны бӧр сюйны миянӧс Индӧд улӧ. Но ми весиг ӧти здук кежлӧ эгӧ сетчылӧй налы, медым Бур Юӧрлӧн збыльыс коли торкавтӧг тіянын.
Вичкоса пыдди пуктана йӧз — налӧн нималӧм-тӧдчанлун вылӧ ме ог видзӧд, Ен водзын ми ставным ӧткодьӧсь — эз лыддьыны коланаӧн мыйкӧ содтыны меӧн висьталӧм Бур Юӧр дінӧ.
Найӧ аддзисны, мый менӧ Петырӧс моз Енмыс сувтӧдӧма буръюӧртнысӧ: Петырӧс — юдейяслы, менӧ — мукӧд войтырлы. Енмыс Петырлы сетіс вын апостолавны юдейяс пӧвстын, меным — мукӧд войтыр пӧвстын. Яков, Петыр да Иоан, кодъясӧс лыддисны зумыд сюръяясӧн, гӧгӧрвоисны, мый менӧ Енмыс корӧма. Сэки миянлы Варнавакӧд кинысӧ сетісны, медым вӧчны ӧтувъя удж. Сёрнитчим, мый найӧ мунасны юдейяс дінӧ, ми — мукӧд войтыр дінӧ. Сӧмын найӧ корисны, медым ми эгӧ вунӧдӧй ерусалимса гӧль эскысьясӧс. Ме пыр зіля тӧждысьны на вӧсна.
Петырлӧн Антиокияӧ волігас ме став дырйиыс паныд сувті сылы, ӧд сійӧ эз веськыда ов.
Яковсянь мӧдӧдӧмаяс вотӧдз Петыр ӧтлаын сёйис мукӧд войтырсакӧд, а Яковлӧн йӧз локтӧм бӧрын сійӧ пондіс сайласьны да ӧтдортчыны. Ӧд сійӧ поліс вундыштчӧм дор сулалысьясысь.
Сы моз тшӧтш вӧчисны мукӧд юдейяс, весиг Варнава вӧлі ылалӧма на моз.
Ме аддзи, мый найӧ оз овны Евангелльӧлӧн збыльыс серти. Сэки ставныс дырйи шуи Петырлы: «Тэ, юдей, ачыд кӧ олан мукӧд войтыр моз, а он юдей ног, мыйла мукӧд войтырсӧ тшӧктан кутчысьны юдей оласногӧ?»
Ми чужӧмсяньным юдейяс, абу мыжа ентӧдтӧмъяс.
Ми тӧдам, мый мортсӧ веськыднас вӧчӧ Исус Кристослы эскӧм, а оз Индӧд серти уджъясыс. Ми эским Исус Кристослы, медым вӧлім веськыдӧсь Кристослы эскӧмӧн, а эгӧ Индӧд серти уджъясӧн.
Ӧд Индӧд серти уджъяс некодӧс оз вӧчны Ен водзас веськыдӧн.
Кристослӧн веськыдлунӧ нырччиганым кӧ ми мыжмам Индӧдыс водзын, сідзкӧ, Кристос ӧмӧй мыжаыс?
Абу.
Ме кӧ выльысь лӧсьӧда мый жугӧдлі, ме, сідзкӧ, Индӧд торкысь.
Мед овны Енкӧд, Индӧдыс пыр ме кулі Индӧдыслы.
Менӧ тувъялӧма Кристоскӧд. Ӧні ог нин ме ов, но ме пытшкын олӧ Кристос.
Ме кӧ ола тайӧ вир-яяс на, ола Ен Пилы эскӧмӧн. Сійӧ сетіс Асьсӧ ме вӧсна, ӧд ме Сылы муса.
Енлысь буралӧмсӧ ме ог ӧтдорт.
Ӧд веськыдлунсӧ кӧ вермим босьтны Индӧдыс пыр, сідзкӧ, Кристос весьшӧрӧ куліс.
3 юр.
Ті, галатиясаяс, дзикӧдз вежӧртӧ воштӧмныд.
Коді тіянлысь синнытӧ пӧртіс, медым энӧ кывзысьӧй збыльыслысь? Ӧд тіян син водзын, позьӧ шуны, вӧлі тувъялӧма Исус Кристосӧс.
Ӧтитор кӧсъя юавны: Индӧд серти уджъясӧн али кывлӧм Бур Юӧрӧ эскӧмӧн ті сибӧдінныд Вежа Ловсӧ?
Сы выйӧдз-ӧ ті вежӧртӧмӧсь? Лов вынӧн панінныд, ас вынӧн помаланныд?
Ті ӧмӧй весьшӧрӧ нуинныд сы мында сьӧкыдсӧ?
Дерт, энӧ весьшӧрӧ.
Енмыс ӧмӧй Индӧд серти уджъясныд вӧсна сетӧ Вежа Ловсӧ да вӧчӧ тіян пӧвстын шензьӧданаторъяссӧ? Оз ӧмӧй кывлӧм Бур Юӧрӧ эскӧмныд вӧсна?
Ӧвраам эскис Енлы, та вӧсна Енмыс шуис сійӧс веськыдӧн.
Тӧдӧй: эскысьяс — найӧ Ӧвраамлӧн ныв-пи.
Гижӧдас водзвыв висьталӧма, мый эскӧмныс вӧсна Ен шуас веськыдӧн быд войтырӧс. Медводз Ӧвраамлы вӧлі юӧртӧма: «Тэ пыр вуджас бурсиӧмыс быд войтырлы».
Тадзи эскысь Ӧвраамкӧд бурсиӧма быд эскысьӧс.
А Индӧдӧ кутчысьысьяс ёрӧм улынӧсь.
Ӧд гижӧма: «Ёрӧма быдӧнӧс, коді оз ов став тшӧктӧмыс серти, мый гижӧма Индӧд небӧгӧ».
Индӧд пыр мортыс оз ло веськыднас Ен водзын — тайӧ гӧгӧрвоана. Ӧд «веськыда олысь эскӧмнас пондас овны».
Индӧдыс оз подулась эскӧм вылӧ.
Гижӧма: «Индӧд серти олысь Индӧднас пондас овны».
Кристос ньӧбис миянӧс Индӧдыслӧн ёрӧм улысь. Сійӧс лои ёрӧма миян пыдди.
Ӧд гижӧма: «Ёрӧма быдӧнӧс, коді ӧшалӧ пу вылын».
Тадзи лои, медым Ӧвраамлы кӧсйысьӧм бурсиӧмыс вуджис быд войтырлы Исус Кристос пыр, да медым кӧсйысьӧм Ловсӧ ми сибӧдім эскӧмӧн.
Вокъяс, весигтӧ олӧмас тадзи: мортыс кӧ кольӧ ас бӧрсяыс вынсьӧдӧм кӧсйысян гижӧд, сэки некод оз вермы торкны гижӧмасӧ да мыйкӧ содтыны сэтчӧ.
Кӧсйысьӧмсӧ вӧлі сетӧма Ӧвраамлы да сысянь чужысьлы.
Абу шуӧма “чужысьяслы”, шуӧма “тэсянь чужысьлы”. Тайӧ шуӧма Кристос йылысь.
Ме кӧсъя шуны: нёльсё комын во бӧрын петӧм Индӧдыс оз вермы бокӧ вештыны Кристос йылысь Енлысь кӧсйысьӧмсӧ да бырӧдны сійӧс.
Индӧд пыр кӧ вуджӧ вичмӧдӧмаыс, сэки сійӧ оз ло кӧсйысьӧм пыр.
Ӧвраамлы Енмыс сетіс вичмӧдӧмасӧ кӧсйысьӧм пыр.
Мыйла, сідзкӧ, колӧ Индӧдыс?
Сійӧс сетӧма вӧлі бӧрынджык йӧзыслӧн мыж вӧчӧм вӧсна, да сійӧ вӧлі вына кӧсйысьӧм серти чужысьлӧн локтӧдз. Индӧдсӧ сетӧма анделъяс пыр да шӧракостас сулалысьлӧн киӧн.
Но ӧти дырйи шӧракостас сулалысьыс оз овлы, а Енмыс — ӧти.
Индӧдыс ӧмӧй паныд Ен кӧсйысьӧмлы?
Абу.
Индӧдыс кӧ вермис сетны олӧм, сэки веськыдлунсӧ эськӧ босьтім Индӧдыс пыр.
Гижӧдыс йӧртіс ставнысӧ мыж улас. Та вӧсна кӧсйысьӧмасӧ эскысьяс вермасны босьтны Исус Кристослы эскӧм пыр.
Эскан кадыс вотӧдз ми вӧлім Индӧдлӧн синъялӧм улынӧсь, вӧлім кӧртӧдынӧсь эскӧм воссьытӧдзыс.
Тадзи Индӧдыс быдтіс-видзис миянӧс Кристос локтӧдз, медым эскӧмным пыр ми лоим веськыдӧсь.
Кор воис эскан кадыс, ми мынім видзысьлӧн синъялӧмысь.
Исус Кристослы эскӧм пыр ті ставныд — Енлӧн ныв-пи.
Ті пыртчинныд Кристосӧ, сідзкӧ, тіян паськӧмӧн лои Кристос.
Юдей-ӧ, грек-ӧ, кесйӧг-ӧ, мездлуна морт-ӧ, айлов-ӧ, ань-ӧ — Исус Кристос пытшкын торъялӧмыс абу.
Ті кӧ Кристослӧн, сідзкӧ, Ӧвраамсянь чужысьяс да кӧсйысьӧмасӧ босьтысьяс.
4 юр.
Нӧшта висьтала: пиыс, кодлы вуджӧ бать овмӧсыс, ичӧт арлыднас нинӧмӧн оз торъяв кесйӧгысь, кӧть сійӧ став вылас нин ыджыд. Батьыслӧн урчитӧм кадӧдз керканас веськӧдлӧны мукӧдъяс, ачыс пиыс кага видзысь киын.
Кодыр ми вӧлім кага кодьӧсь, вӧлім муюгыд вынъяслӧн кабыр улынӧсь.
Кор воис урчитӧм кадыс, Енмыс мӧдӧдіс Ассьыс Писӧ, кодӧс ань чужтіс. Ен Пи оліс Индӧд улын, медым ньӧбны Индӧд улын олысьясӧс, босьтны миянӧс ныв-пи пыдди.
Ӧні ті Енмыслӧн ныв-пи. Та вӧсна Ен сетіс сьӧлӧманыд Пиыслысь Ловсӧ. Тайӧ Лолыс шыасьӧ: «Авва, Батьӧй.»
Сідзкӧ, ті абу нин кесйӧгъяс, ті — ныв-пи.
Ныв-пи кӧ, сідзкӧ, Исус Кристос пыр Енсянь вичмӧдӧмасӧ босьтысьяс.
Кор ті энӧ на тӧдӧй Енсӧ, вӧлінныд мукӧд енъяслӧн кипод улынӧсь. Збыльвылас, найӧ абу енъяс.
Но ӧні ті тӧданныд Енсӧ, бурджык шуны, Енмыс тӧдӧ тіянӧс. Сідзкӧ, мыйла ті бӧр бергӧдчанныд муюгыдса ковтӧм жеб вынъяс дінӧ да важ мозыс бара кӧртасянныд сэтчӧ?
Кутчысянныд торъя лунъясӧ, тӧлысьясӧ, воясӧ да кадъясӧ.
Пола тіян вӧсна, весьшӧрӧ, буракӧ, менам мырсьӧма-уджалӧма.
Вокъяс, кора тіянӧс, лоӧй ме кодь, ӧд ме тіян кодь жӧ.
Ті менӧ нинӧмӧн энӧ дӧзмӧдӧй.
Тӧданныд, мый тіян дінӧ волігӧн ме висьми, но тайӧ сетіс позянлун медводдзаысь висьтавны тіянлы Бур Юӧрсӧ. Висьӧмӧй вылӧ видзӧдтӧг ті сибӧдінныд менӧ, энӧ кедзовтӧй да энӧ эновтӧй. Сибӧдінныд Ен анделӧс моз, Исус Кристосӧс моз.
Кутшӧм шудаӧсь ті сэки вӧлінныд.
А ӧні мый лои? Тіян йылысь верма шуны: позис кӧ, ті ассьыныд синтӧ эськӧ перйинныд да сетінныд меным.
Збыльсӧ висьталӧм вӧсна ме ӧмӧй тіянлы паныд мунысьӧн лои?
Кодсюрӧ оз бур могысь тӧждысьны тіян вӧсна. Найӧ кӧсйӧны янсӧдны миянӧс, медым ті тӧждысинныд на вӧсна.
Тӧждысьӧмыд бур, вӧчанныд кӧ тайӧс пыр, онӧ сӧмын ме дырйи.
Челядь, меным бара лоӧ сьӧкыда чужтыны тіянӧс, кытчӧдз Кристос оз тыдовтчы тіян олӧмын.
Кӧсйи эськӧ ӧні лоны тіян дінын, мед тӧдны, кутшӧм ногӧн сёрнитны тіянкӧд. Ме ог гӧгӧрво тіянӧс.
Висьталӧй меным, Индӧд улын овны кӧсйысьяс, гӧгӧрвоанныд-ӧ ті, мый висьталӧ Индӧдыс?
Сэні гижӧма, мый Ӧвраамлӧн вӧлі кык пи: ӧтисӧ чужтіс кесйӧгыс, мӧдсӧ — гӧтырыс.
Кесйӧглӧн пиыс чужис морт кӧсйӧмсянь, гӧтырыслӧн — Енлӧн кӧсйысьӧм серти.
Тайӧ висьталӧ кык йитӧд йылысь.
Ӧти йитӧдсӧ вӧлі кӧрталӧма Синай керӧсын — тайӧ Агар, сылӧн ныв-пиыс кесйӧгъяс.
Агарыс индӧ Аравияын Синай керӧс вылӧ да лӧсялӧ ӧнія Ерусалимлы. Сійӧ аслас челядькӧд кесйӧг туйын.
Енэжвыв Ерусалимыс — мездлуна кар, сійӧ миян ставнымлӧн мам.
Гижӧма:
— Нимкодясь, сьӧктыны вермытӧм да кага вайлытӧм.
Гораа нимкодясь, долыда гажӧдчы, чужтан дойсӧ тӧдлытӧм.
Ӧд эновтӧмаыслӧн ныв-пиыс ёна уна, унджык верӧсыскӧд олысьлӧн дорысь.
Вокъяс, ми Исаак моз кӧсйысьӧм серти чужысь ныв-пи.
Сэки вир-яй кӧсйӧмсянь чужысьыс вӧтліс Ловсянь чужысьсӧ. Тадзи тшӧтш ӧні.
Гижӧдыс мый висьталӧ?
Вӧтлы кесйӧг мамсӧ пиыскӧд, медым кесйӧг пиыслы тшӧтш эз вудж гӧтыр пилы кольӧм овмӧсыс.
Вокъяс, ми абу кесйӧглӧн ныв-пи, ми — гӧтырыслӧн.
5 юр.
Кристос мездіс миянӧс. Сідзкӧ, зумыда сулалӧй сетӧм мездлунас да энӧ бара пырӧй сийӧс улӧ.
Ме, Павел, шуа тіянлы: вундыштчанныд кӧ, Кристос тіянлы абу колана.
Нӧшта шуа: вундыштчӧмалы колӧ овны Индӧдлӧн став тшӧктӧмыс серти.
Ті корсинныд веськыдлунсӧ Индӧдӧ кутчысьӧмӧн да колинныд Кристостӧг, вешйинныд буралӧмсьыс бокӧ.
Но миянлы эскӧмным пыр Енлӧн Лолыс сетіс лача воӧдчыны веськыдлунас.
Тэ кӧ Исус Кристос пытшкын, вундыштчӧмыд-ӧ, абу-ӧ вундыштчӧмыд, тайӧ нинӧм оз сет. Колана сӧмын муслуна эскӧм.
Ті бура мунінныд.
Коді нӧ падмӧдіс тіянӧс збыльыслысь кывзысьӧмысь?
Тайӧ абу Сысянь, коді корис тіянӧс.
Этшаник няньшом шоммӧдӧ дзоньнас кӧтассӧ.
Господь вылӧ лача кутӧмӧн эска, мый онӧ кутӧй мӧвпавны мӧд ног.
Тіянӧс падмӧдысьясӧс Енмыс мыждас.
Вокъяс, ме кӧ ӧні важ мозыс на сулалі вундыштчӧм дор, менӧ нинӧмысь вӧлі вӧтлынысӧ.
Сэки эськӧ крестыс некодлы эз ло мытшӧдӧн.
Тіянӧс падмӧдысьяс, колӧ кӧ, мед кодзасны асьнысӧ.
Вокъяс, тіянӧс корӧма мездлунас. Сӧмын мездлунсӧ энӧ бергӧдӧй вир-яйлысь кӧсйӧмсӧ могмӧдӧмӧ, но мусапырысь кесъялӧй ӧта-мӧдныдлы.
Ӧд став Индӧдсӧ шымыртӧма ӧти шуӧмӧ: «Радейт матыссатӧ асьтӧ моз».
Ті кӧ йиранныд-пуранныд ӧта-мӧднытӧ, видзчысьӧй, мед ӧта-мӧдтӧ дзикӧдз энӧ бырӧдӧй.
Висьтала тіянлы: олӧй Лов серти, сэки вир-яйлысь кӧсйӧмсӧ онӧ могмӧдӧй.
Ӧд вир-яй кӧсйӧ, мый Лов оз кӧсйы, а Лов кӧсйӧ, мый вир-яй оз кӧсйы.
Найӧ паныд сувтӧны ӧта-мӧдныслы. Та вӧсна ті онӧ вермӧй вӧчны кӧсъянасӧ.
Тіянӧн кӧ Лов веськӧдлӧ, сідзкӧ, ті абу Индӧдыс улынӧсь.
Вир-яйлӧн уджыс тӧдса: гозъя олӧм пежалӧм, кырсалӧм, пеж вӧчӧм, лэдзчысьӧм оласног, идоллы юрбитӧм, тшыкӧдчӧм, лӧгалӧм, пинясьӧм, вежӧгтӧм, скӧралӧм, асьтӧ радейтӧм, юксьӧм, ылӧгвелӧдӧм, вежалӧм, виӧм, кодалӧм-гажӧдчӧм да мукӧд шогмытӧмтор на.
Водзынсӧ висьтавлі нин, ӧні нӧшта висьтала: татшӧмторсӧ вӧчысьлы Енлӧн Юраланіныс оз вичмы.
Ловлӧн вотӧсыс — муслун, нимкодьлун, лӧньлун, терпитӧм, мелілун, бурлун, эскӧм, рамлун, асьтӧ кутӧм.
Таысь Индӧдыс оз мыжды.
Кодъяс Кристослӧн, найӧ тувъялісны вир-яйсӧ став сылӧн лёк кӧсйӧмнас.
Олам кӧ Лов серти, Ловлысь кӧсйӧмсӧ вӧчам.
Огӧ пондӧй вывтіасьны, ӧта-мӧдӧс дӧзмӧдны да ӧта-мӧдлы вежавны.
6 юр.
Вокъяс, кодкӧ кӧ мыжмас, ті, Лов серти олысьяс, веськӧдӧй сэтшӧмсӧ рам сьӧлӧмӧн. Видзӧдӧй ас бӧрсяныд, мед асьныд энӧ шедӧй ылӧгас.
Нуӧй ӧта-мӧдныдлысь сьӧкыдсӧ, тадзи пӧртанныд олӧмӧ Кристослысь тшӧктӧмсӧ.
Ас йывсьыс вывтіа мӧвпалысь, коді збыльвылас нинӧм, ылӧдлӧ ачыс асьсӧ.
Видзӧдлы аслад уджъяс вылӧ, сэки мукӧд водзын кыпӧдчытӧг верман донъявны асьтӧ.
Ӧд быдӧн нуӧ ассьыс нӧб.
Ен Кывйӧн туйдӧдӧмаыс мед юксяс быд бурнас туйдӧдысьыскӧд.
Асьнытӧ энӧ ылӧдлӧй — Енмыс серам туйын оз ло.
Мортыд мый кӧдзас, сійӧс и вундас.
Кӧдзас кӧ вир-яяс, вундас сысянь кулӧм. Лолас кӧ кӧдзас, вундас Ловсянь помтӧм олӧм.
Бурсӧ вӧчигӧн огӧ сетчӧй мудзӧмас, ӧд ас кадӧ вундам, огӧ кӧ лэдзӧй кинымӧс.
Эм кӧ на позянлун, вӧчамӧй бурсӧ быдӧнлы, торъя нин эскысь чой-воклы.
Гижа тіянлы аслам киӧн, ті аддзанныд менсьым гырысь шыпасъяссӧ.
Найӧ, кодъяс кӧсйӧны шогмыны йӧзлы, тшӧктӧны тіянӧс вундыштчыны сӧмын сы могысь, медым найӧс эз вӧтлыны Кристос крест вӧсна. Ӧд вундыштчӧмаяс асьныс оз овны Индӧд сертиыс. Тіян вундыштчӧмныд налы сӧмын помка ошйысьны.
Ме ог кӧсйы ошйысьны нинӧмӧн, сӧмын миян Господь Исус Кристослӧн крестӧн. Сэні тувъялӧма муюгыдсӧ меным да менӧ — муюгыдыслы.
Тэ кӧ Исус Кристос пытшкын, вундыштчӧмыд-ӧ, абу-ӧ вундыштчӧмыд, тайӧ нинӧм оз сет. Колӧ, мед тэ выль морт вӧлін.
Буралӧм да лӧньлун тайӧс тӧд выланыс кутысьяслы да Енлӧн Израильлы.
Водзӧ энӧ сьӧктӧдӧй менӧ, ӧд вир-яйын ме нуа Господь Исуслысь дойяссӧ.
Вокъяс, миян Господь Исус Кристослӧн буралӧмыс тіянкӧд.
Аминь.
Апостол Павеллӧн Ефесӧ мӧдӧдӧм гижӧд
1 юр.
Гижӧ Павел, Ен кӧсйӧм серти Исус Кристослӧн апостол. Чолӧмала тіянӧс, Ефес карын олысьясӧс, Исус Кристослы эскысь вежа войтырӧс.
Буралӧм да лӧнь олӧм тіянлы Ен Батьнымсянь да миян Господь Исус Кристоссянь.
Ошкӧм Енлы, миян Господь Исус Кристослӧн Батьлы. Сійӧ бурсиӧма миянӧс Кристос пыр Ловсянь быдпӧлӧс бурсиӧмнас, мый эм енэжас.
Сійӧ бӧрйӧма миянӧс Кристос пытшкын му пуксьытӧдзыс на, медым вӧлім Сы водзын вежаӧсь да сӧстӧмӧсь. Ми ёна мусаӧсь Енмыслы. Та вӧсна, Исус Кристос пыр Енмыс водзвыв шуис босьтны миянӧс Аслыс ныв-пи пыдди. Татшӧм Енмыслӧн бур кӧсйӧмыс. Сідзкӧ, ошкамӧй Енсӧ дзирдлуна буралӧмсьыс, кодӧс Сійӧ козьналіс миянлы Аслас муса Пиыс пыр. Кристос ньӧбис миянӧс Вирыс вылӧ да прӧститіс мыжъяснымӧс. Сэтшӧм ыджыд Енмыслӧн буралӧмыс. Енмыс лышкыда козьналіс миянлы мывкыдлунсӧ да гӧгӧрвоӧмлунсӧ. Бур кӧсйӧмыс вӧсна Сійӧ восьтіс миянлы Ассьыс гусяторсӧ — водзвыв мӧвпыштӧмсӧ. Тайӧ гусяторсӧ Сійӧ восьтіс миянлы Кристос пыр, медым колана кадӧ ӧтувтны став енэжвывсасӧ да мувывсасӧ Кристос веськӧдлӧм улӧ.
Кристос пыр ми лоим Ен войтырӧн, тадзи водзвыв вӧлі мӧвпыштӧма Енмыслӧн. Ӧд Сійӧ ставсӧ вӧчӧ Ас кӧсйӧм сертиыс. Енмыс бӧрйис миянӧс, Кристос вылӧ медводдзаясӧн лача кутысьясӧс, медым миян олӧм пыр ошкыссис Сылӧн дзирдлуныс.
Кор ті кылінныд збыльсӧ, тіянӧс мездӧм йылысь Бур Юӧрсӧ, ті тшӧтш кутінныд эскыны Кристослы. Сэки Енмыс пасйис тіянӧс кӧсйысьӧм Вежа Лолӧн. Тайӧ Лолыс эскӧдӧ миянӧс, мый миянлы вичмас Енлӧн кӧсйысьӧмыс, кор Сійӧ дзикӧдз мездас Ассьыс йӧзсӧ.
Сідзкӧ, ошкам Енсӧ Сылӧн дзирдлунысь. Ме кывлі, мый ті эсканныд Господь Исуслы да радейтанныд став вежа войтырсӧ. Та вӧсна дугдывтӧг аттьӧала Енсӧ тіянысь да казьтывла тіянӧс аслам кевмысьӧмъясын. Ме кора, мед миян Господь Исус Кристослӧн Ен, дзирдлуныслӧн Бать, сетас тіянлы мывкыдлуныслысь да восьтӧмыслысь Ловсӧ, медым ті верминныд тӧдны Сійӧс. Сійӧ мед югдӧдас тіянлысь сьӧлӧмнытӧ, медым ті гӧгӧрвоинныд, кутшӧм лачаӧ Сійӧ корӧма тіянӧс, кутшӧм ыджыд озырлун вичмӧ вежа войтырлы, да кутшӧм ыджыд Сылӧн вермана выныс, коді уджалӧ миян пытшкын, Сылы эскысьясын. Тайӧ жӧ вынсӧ Енмыс петкӧдліс Кристос пыр, кор ловзьӧдіс Сійӧс кулӧмысь да пуксьӧдіс енэжас, Ас веськыдладорас, медся вылӧ: быдпӧлӧс юралысь-веськӧдлысьясысь, вынаяс-ыджыдалысьясысь да быд нимысь тайӧ нэмас и локтанаас. Енмыс ставсӧ пуктіс Кристос кок улӧ да индіс Сійӧс медыджыдӧн, Вичколы юрӧн. Вичкоыс — Кристослӧн Вир-яйыс да Сылӧн тырвыйӧлуныс, Сійӧ тыртӧ Аснас ставсӧ.
2 юр.
Енмыс ловзьӧдіс тіянӧс, мыжъясныд да лёк вӧчӧмныд вӧсна кулӧмаясӧс. Ӧд водзынсӧ ті олінныд тайӧ муюгыдсаыс моз, енэж улас ыджыдалысь антуслысь кывзысьӧмӧн. Тайӧ пеж лолыс ӧнӧдз на веськӧдлӧ кывзысьтӧмъясӧн. Коркӧ ми ставным вӧлім на кодьӧсь: олім шогмытӧма, вир-яйлӧн кӧсйӧм серти. Татшӧм оласногысь миянӧс мукӧдсӧ моз виччысис Енлӧн скӧрлуныс. Но буралӧмнас озыр Ен петкӧдліс Ассьыс ыджыд муслунсӧ миян дінӧ. Миянӧс, лёк вӧчӧм вӧсна кулӧмаясӧс, Сійӧ ловзьӧдіс Кристоскӧд тшӧтш. Сылӧн буралӧмыс мездіс тіянӧс. Сійӧ ловзьӧдіс миянӧс Исус Кристоскӧд да пуксьӧдіс Сыкӧд енэжас, медым локтан нэмъясӧ олысьяслы петкӧдлыны Исус Кристос пыр миян дінӧ Ассьыс помтӧм-дортӧм буралӧмсӧ да бурлунсӧ.
Ӧд Енмыслӧн буралӧмыс мездіс тіянӧс эскӧмныд пыр. Мездмӧмыс абу тіянсянь, сійӧ Енсянь козин. Бур вӧчӧмыд оз мезды, медым некод эз ошйысь тайӧн.
Ми — Енлӧн вӧчӧмторъяс. Сійӧ ӧтувтӧма миянӧс Исус Кристоскӧд, медым ми вӧчим бур уджъяс, кодъясӧс Енмыс водзвыв нин вӧлі дасьтӧма миянлы. Кристос ӧтувтӧ став эскысьсӧ
Кутӧй тӧд выланыд, мый ті чужӧмсяньныд вӧлінныд ентӧдтӧмъясӧн да вундыштчытӧмъясӧн. Тадзи нимтылісны тіянӧс юдейяс, вундыштчӧмаяс, кодъясӧс вӧлі морт вундыштӧ. Сэки ті олінныд Кристостӧг, энӧ вӧлӧй Израиль войтырӧн. Енма-тіа костын йитӧдыс эз вӧв, тіянлы эз вичмыв Сылӧн кӧсйысьӧмыс, ті олінныд тайӧ муюгыдас Енсӧ тӧдтӧг да лачатӧг.
Коркӧ ті вӧлінныд ылынӧсь Енсьыс, ӧні ті — Кристоскӧд олысьяс.
Сылӧн Вирыс матыстіс тіянӧс Ен дінас. Кристос — миянлы бурасян йитӧдыс. Сійӧ ӧтувтіс юдейясӧс да мукӧд войтырӧс ӧти войтырӧ да жугӧдіс шӧракостсьыс мытшӧдсӧ, тадзи Аслас Вир-яйнас бырӧдіс на костысь лёксьӧмсӧ. Сійӧ пуктіс пом Индӧдлы да сэтчӧ пырысь быд тшӧктӧмлы да велӧдӧмлы, медым юдейясӧс да мукӧд войтырӧс бурӧдны ӧта-мӧдныскӧд. Сійӧ йитіс найӧс Аскӧдыс да вӧчис наысь ӧти выль олысьӧс. Крест вылын кувлӧмнас Сійӧ бырӧдіс лёксьӧмсӧ. Тадзи ӧти вир-яйын Кристос бурӧдіс Енмыскӧд кыкнан войтырсӧ.
Сійӧ локтіс юӧртны бурасьӧм йылысь тіянлы, кодъяс вӧлінныд ылынӧсь Енсьыс, и налы, кодъяс матынӧсь Ен дінас. Та вӧсна ми быдӧн, юдейяс да мукӧд войтыр, Кристос пыр вермам локны Бать дінӧ, ӧд миянӧс ставнымӧс йитӧ ӧти Лов.
Сідзкӧ, ті абу нин бокысаяс да кыськӧ локтысьяс, ті — ас йӧз вежа войтырлы да ныв-пи Енмыслы. Тіянӧс сувтӧдӧма сійӧ подув вылас, мый пуктісны апостолъяс да пророкъяс. Тайӧ тэчасас пельӧс изйыс — Ачыс Исус Кристос. Сійӧ йитӧ Аснас став тэчассӧ, тадзи тэчасыс кыптӧ да лоӧ Господьлӧн вежа крамӧн. Ті — Кристос пытшкынӧсь. Сідзкӧ, Ен Лов отсӧгӧн ті тшӧтш лоанныд Енмыслы оланінӧн.
3 юр.
Та вӧсна ме, Павел, Исус Кристослӧн кесъялысь, пукала дзескыдінын тіян вӧсна, мукӧд войтыр вӧсна.
Дерт, ті кывлінныд нин, мый буралӧмыс кузя Енмыс сетіс меным удж — кесъявны тіянлы. Восьтӧмыс пыр Енмыс сетіс меным тӧдны Ассьыс гусяторсӧ. Та йылысь ме вылынджык дженьыдика гижи нин. Тайӧ гижӧдсӧ лыддигӧн ті верманныд тӧдмавны, кутшӧм бура ме гӧгӧрвоа Кристослысь гусяторсӧ. Водзын олысьяс эз тӧдлыны тайӧ гусяторйыс йылысь. Ӧні Вежа Лов восьтіс сійӧс Кристослӧн апостолъяслы да пророкъяслы. Тайӧ гусяторйыс татшӧм: мукӧд войтыр юдейяс моз тшӧтш босьтасны Енсянь вичмӧдӧмасӧ, ӧд Бур Юӧр кылӧм бӧрын найӧ ӧтувтчисны Исус Кристоскӧд. Сідзкӧ, найӧ — ӧти вир-яйлӧн юкӧнъяс, налы тшӧтш вичмӧ Енлӧн кӧсйысьӧмыс. Енлӧн бурсетӧмыс да выныс отсӧгӧн ме лои тайӧ Бур Юӧрыслы кесъялысьӧн.
Меным, став вежа войтыр пиысь медся тӧдчытӧмыслы, уси шуд висьтавлыны мукӧд войтырлы Кристослӧн помтӧм-дортӧм озырлун йылысь Бур Юӧрсӧ да восьтны быдӧнлы Енмыслысь водзвыв мӧвпыштӧм гусяторсӧ. Енмыс, коді вӧчис ставсӧ Исус Кристос пыр, видзис тайӧ гусяторсӧ Ас пытшкас нэмъяс пуксьытӧдзыс на, медым Вичкоыс пыр ӧні петкӧдлыны енэжвывса ыджыдалысь-веськӧдлысьяслы Ассьыс уна ногӧн петкӧдчысь мывкыдлунсӧ. Тадзи нэмъяс пуксьытӧдз на лӧсьӧдӧм-мӧвпыштӧмсӧ Енмыс пӧртіс олӧмӧ миян Господь Исус Кристос пыр. Ми — Кристос пытшкынӧсь, Сылы эскӧм пыр ми повтӧг-майшасьтӧг вермам локны Ен дінӧ.
Вокъяс, кора тіянӧс: энӧ ӧшӧдӧй юрнытӧ, кор ме сьӧкыдала тіян вӧсна. Ӧд та пыр вичмӧ тіянлы ошкӧмыс.
Ме сувта пидзӧс вылӧ, миян Господь Исус Кристослӧн Бать водзӧ. Сійӧ сетӧ ним быд чужанкотырлы енэжас и му вылас. Ме кора, мед дзирдлуннас озыр Ен Аслас Ловнас да выннас ёнмӧдас тіянлысь пытшкӧсса морттӧ, да эскӧмныд пыр Кристос овмӧдчас тіян сьӧлӧмӧ. Ме кевма, медым муслуныс вужъясяс тіян сьӧлӧмӧ да лоас тіянлы подулӧн. Сэки став вежа войтыркӧд ӧтвыв верманныд шымыртны Кристос муслунлысь кузьта-пасьтасӧ, пыдта-судтасӧ, да гӧгӧрвоны Сылысь вежӧрӧ тӧртӧм муслунсӧ. Сэки тіян пытшкын лоӧ Енлӧн став тыр-бурыс. Ошкӧм Енлы.
Аслас вынӧн, коді уджалӧ миян пытшкын, Сійӧ вӧчӧ ёна унджык миян корӧмъяс да мӧвпалӧмъяс дорысь. Ошкӧм Сылы Вичкоын, коді Исус Кристос пытшкын, быд кадӧ олысь йӧзсянь нэмъяс чӧж.
Аминь.
4 юр.
Ме, Господьлы кесъялӧм вӧсна дзескыдінын пукалысь, кора тіянӧс: олӧй сідзи, кыдзи колӧ овны Енлӧн корӧмаяслы. Пыр лоӧй меліӧсь, рамӧсь, терпитӧмӧн да мусапырысь бурӧ пуктӧй ӧта-мӧднытӧ. Зільӧй видзны Ловсянь сетӧм ӧтувъялуннытӧ да тіянӧс йитысь лӧньлуннытӧ.
Вир-яйыс ӧти, Лолыс ӧти, лачаыс, кытчӧ тіянӧс корӧма, тшӧтш ӧти.
Господьыс ӧти, эскӧмыс ӧти, и пыртчӧмыс ӧти. Енмыс ӧти, Сійӧ быдӧнлы Бать. Сійӧ веськӧдлӧ ставнас, уджалӧ ставыс пыр да олӧ ставным пытшкын.
Кристос Ас кӧсйӧм сертиыс миянлы быдӧнлы лышкыда козьналіс бурсетӧмсӧ.
Ӧд Гижӧдыс висьталӧ:
— Сійӧ кыпӧдчис вылісьыс-вылӧ, босьтіс Аскӧдыс кӧрталӧмаясӧс, йӧзлы сеталіс козинъяс.
Мый лоӧ “кыпӧдчӧмыс”? Оз-ӧ сійӧ, мый водзынджык Сійӧ лэччыліс му пыдӧсӧдзыс.
А лэччыліс кӧ, сідзкӧ, кыпӧдчис став енэжсьыс вылӧ, медым тыртны Аснас ставсӧ.
Ӧтиясӧс Сійӧ сувтӧдіс апостолъясӧн, мӧдъясӧс — пророкъясӧн, коймӧдъясӧс — буръюӧртысьясӧн, нёльӧдъясӧс — вичкоса веськӧдлысьясӧн, витӧдъясӧс — велӧдысьясӧн, медым дасьтыны вежа войтырӧс кесъявны да сӧвмӧдны Кристослысь Вир-яйсӧ. Сэки ми ставным воам ӧти эскӧмӧ, кутам тӧдны Ен Пиӧс, быдмам да воӧдчам Кристослӧн тыр арлыдӧдз да Сылӧн тырвыйӧлунӧдз.
Сідзкӧ, миянлы оз нин ков ылавны кагаяс моз быдпӧлӧс тӧвйыв велӧдӧмӧ. Ӧд татшӧм велӧдӧмыс петӧ наян да ылӧдчысь йӧзсянь. Мӧдарӧ, збыляс да муслунас кутчысьӧмӧн, кутам пыр быдмыны да воӧдчыны Кристосӧдз, ӧд Сійӧ — юрыс. Сійӧ йитӧ вир-яйлысь став юкӧнсӧ ӧтиӧ, тадзи артмӧ ӧти вир-яй. Юкӧнъясыс топыда йитчӧмаӧсь ӧта-мӧдныскӧд, и быд юкӧн вӧчӧ ассьыс удж. Тадзи муслуныс отсӧгӧн ставнас вир-яйыс быдмӧ-сӧвмӧ.
Та вӧсна, ме ёна кора тіянӧс Господь нимӧн: водзӧ энӧ нин олӧй ентӧдтӧмъяс моз. Налӧн мӧвпъясыс ковтӧмӧсь, вежӧрныс пемдӧма, найӧ ылынӧсь Ен нога олӧмсьыс, ӧд налӧн чорзьӧма сьӧлӧмныс, да Енсӧ найӧ оз тӧдны.
Найӧ воштӧмаӧсь яндзимнысӧ, лэдзчысьӧмаӧсь олӧмсьыс да быдпӧлӧс пежсӧ вӧчӧны пӧтлытӧг.
Но тіянӧс эз тадзи велӧдны Кристос йылысь, медым ті олінныд татшӧм ногӧн.
Ті кывлінныд Сы йылысь, тіянӧс велӧдісны сійӧ збыльыс серти, мый эм Исусын. Тіянӧс велӧдісны: эновтӧй важ оласногтӧ да ыштана лёк кӧсйӧмъястӧ, ӧд найӧ тшыкӧдӧны тіянӧс. Выльмӧдчӧй ловнаныд да вежӧрнаныд. Вежсьӧй Ен нога выль мортӧ, кутчысьӧй збыляс, веськыдлунас да вежалунас.
Сідзкӧ, дугдӧй пӧръясьнытӧ да сёрнитӧй ӧта-мӧдныдкӧд веськыда, ӧд ми — ӧта-мӧдлы юкӧнъяс.
Скӧраліганыд энӧ мыжмӧй: бурасьӧй ӧта-мӧдныдкӧд шонді пуксьытӧдзыс на.
Энӧ сетӧй омӧльыслы кутчысянін.
Гусясьысь — водзӧ эн гусясь. Бурджык, уджав да вӧч аслад киӧн коланасӧ, медым вермин чуктӧдны сэтысь корысьяслы.
Некутшӧм пеж кыв мед оз пет тіян вомысь, а сӧмын бурыс. Ӧд тайӧ ёнмӧдӧ йӧзыслысь эскӧмсӧ да вайӧ налы нимкодьлун.
Энӧ шогӧдӧй Ен Вежа Лолӧс, кодӧн пасйӧма тіянӧс мездана лун кежлӧ.
Пыр кежлӧ ӧвсьӧй дӧзмӧмысь, лёксьӧм-скӧралӧмысь, зыксьӧм-суклясьӧмысь да быдсяма лёк вӧчӧмысь.
Ӧта-мӧдныд дінӧ лоӧй бур сьӧлӧмаӧсь да меліӧсь. Енмыс Кристос пыр прӧститіс тіянӧс, сідзкӧ, ті тшӧтш прӧститӧй ӧта-мӧднытӧ.
5 юр.
Ті — Енлӧн муса ныв-пи, сідзкӧ, олӧй Сы вылӧ видзӧдӧмӧн. Кристослы ми мусаӧсь, ті тшӧтш лоӧй мусаӧсь ӧта-мӧдныдлы. Кристос сетіс Ассьыс олӧмсӧ миян вӧсна да вайис Асьсӧ Енлы чӧскыд дука вись пыдди. Ті — вежа войтыр.
Сідзкӧ, некутшӧм кырсалӧм, пеж оласног да горшасьӧм мед эз вӧв тіян пӧвстын. Весиг энӧ сёрнитӧй та йылысь.
Ковтӧм сёрнияс, пеж кывъяс да мисьтӧм шмоньяс мед эз петны тіян вомысь. Мӧдарӧ, аттьӧалӧй Енсӧ.
Тӧдӧй, мый ни ӧти кырсалысьлы, пеж оласногалы да горшасьысьлы, коді копрасьӧ озырлунлы Енмыслы пыдди, — Кристослӧн да Енлӧн Юраланіныс оз вичмы.
Некод мед оз ылӧдлы тіянӧс ковтӧм сёрниясӧн, ӧд таысь кывзысьтӧмъясӧс суас Енлӧн скӧрлуныс.
Татшӧмъясыскӧд энӧ ӧтувтчӧй.
Коркӧ ті вӧлінныд пемыдӧн, ӧні ті Господь пытшкынӧсь да лоинныд югыднас.
Сідзкӧ, олӧй югыдыслӧн ныв-пи моз. Ӧд Ловлӧн вотӧсыс — бурлун, веськыдлун да збыльлун.
Зільӧй тӧдмавны Енмыслы шогманасӧ. Энӧ ӧтувтчӧй пемыдас олысьяслӧн ковтӧм уджъясӧ, мӧдарӧ, янӧдӧй найӧс.
Ӧд яндзим весиг висьтавнысӧ налӧн гуся уджъяс йылысь.
Но югыдас став гусяыс тыдовтчӧ, ӧд югыдыс ставсӧ восьтӧ.
Сійӧн и шуӧма:
— Садьмы, узьысь, ловзьы кулӧмысь, и тэнӧ югдӧдас Кристос.
Сідзкӧ, сюся видзӧдӧй ас бӧрсяныд: олӧй мывкыдаяс моз, а энӧ вежӧртӧмъяс моз. Энӧ коллялӧй каднытӧ весьшӧрӧ, ӧд тайӧ лунъясыс тырӧмаӧсь лёкнас.
Энӧ лоӧй мывкыдтӧмӧн, а тӧдмалӧй Енлысь кӧсйӧмсӧ.
Энӧ коддзӧдчӧй винаӧн, ӧд тасянь овлӧ олӧмас лэдзчысьӧмыс.
Мӧдарӧ, сетӧй Ловлы тыртны асьнытӧ. Сьылӧй ӧтвылысь псаломъяс, Енмӧс ошкана сьыланкывъяс да бурсьылӧмъяс. Сьылӧй Господьлы да ошкӧй Сійӧс став сьӧлӧмсяньныд. Быд кадӧ ставсьыс аттьӧалӧй Ен Батьӧс миян Господь Исус Кристос нимӧн. Енсьыс полӧмӧн кывзысьӧй ӧта-мӧдныдлысь.
Гӧтыръяс, кывзысьӧй асланыд верӧсъяслысь Господьлысь моз. Ӧд гӧтырлы юрыс — верӧс, кыдзи Вичколы юрыс — Кристос. Вичколы — Сійӧ Мездысь, а Вичкоыс — Сылӧн вир-яйыс.
Кыдзи Вичкоыс кывзысьӧ Кристослысь, сідзи гӧтыръяс быдторйын кывзысьӧй асланыд верӧсъяслысь.
Верӧсъяс, радейтӧй ассьыныд гӧтыртӧ, кыдзи Кристос радейтӧ Вичкосӧ. Ӧд Кристос сетіс Ассьыс олӧмсӧ Вичкоыс вӧсна, медым вежӧдны сійӧс. Сійӧ сӧстӧммӧдіс Вичкосӧ ваӧн да кывнас, медым сувтӧдны сійӧс Ас водзас быд боксянь мичаӧн: сӧстӧмӧн, вежаӧн, медым сылӧн эз вӧв некутшӧм няйттор, чукыр да тырмытӧмтор.
Верӧсъяс, радейтӧй ассьыныд гӧтырнытӧ вир-яйтӧ моз, ӧд гӧтырсӧ радейтысь — асьсӧ радейтӧ.
Некод оз мустӧмт ассьыс вир-яйсӧ, мӧдарӧ, шонтӧ-пӧткӧдӧ сійӧс, кыдзи Господь тӧждысьӧ Аслас Вичкоыс вӧсна. Ӧд ми — Сы вир-яйлӧн юкӧнъяс.
Гижӧдыс висьталӧ: «Та вӧсна морт кольӧ бать-мамсӧ да ӧтлаасьӧ гӧтырыскӧд, и тайӧ кыкыс лоӧны ӧти вир-яйӧн».
Тайӧ — ыджыд гусятор.
Ме висьтала тайӧс Кристос да Вичко йылысь.
Сідзкӧ, быдӧн мед радейтӧ гӧтырсӧ асьсӧ моз, а гӧтыр мед пыдди пуктӧ верӧссӧ.
6 юр.
Челядь, кывзысьӧй бать-мамныдлысь Господь вӧсна, ӧд тайӧ лоӧ веськыд Сы водзын.
«Пыдди пукты ассьыд бать-мамтӧ» — тайӧ медводдза тшӧктӧм, кытчӧ пырӧ татшӧм кӧсйысьӧм: «сэки ставыс тэнад лоӧ бур да олӧмыд кузь нэма».
Батьяс, энӧ дӧзмӧдӧй ассьыныд челядьтӧ, но быдтӧй-велӧдӧй найӧс Господьлӧн кӧсйӧм серти.
Кесйӧгъяс, кывзысьӧй асланыд мувывса ыджыдъяслысь Кристослысь моз. Кесъялӧй налы восьса сьӧлӧмӧн, полігтырйи да пыдди пуктӧмӧн. Энӧ вӧчӧй тадзи асьнытӧ йӧз водзын ошкӧм-петкӧдлӧм могысь, но Кристослӧн кесйӧгъяс моз кывзысьӧй Енмыслысь став сьӧлӧмсяньныд. Кесъялӧй налы нимкодьпырысь Господьлы моз, а энӧ йӧзлы моз. Тӧдӧй, мый быдӧн, кесйӧг кӧть мездлуна морт, босьтас Господьсянь удждонсӧ бур вӧчӧмыс серти.
Ыджыдъяс, ті тшӧтш бура кутӧй асьнытӧ асланыд кесйӧгъяскӧд: энӧ лоӧй чорыдӧсь накӧд. Тӧдӧй, мый тіян вылын, и на вылын ӧти Ыджыдыс енэжас. Сійӧ оз видзӧд морт чужӧм вылӧ.
Нӧшта вокъясӧй, ёнмӧдӧй асьнытӧ Господькӧд ӧтувъя олӧмас Сылӧн вермана выннас.
Пасьталӧй Енсянь став вермасянторсӧ. Сэки ті верманныд сувтны омӧльыслӧн наяна лёк вӧчӧмъяслы паныд. Ӧд миян тышыс абу мортлы паныд, ми тышкасям енэжувса юралысь-ыджыдалысь пеж ловъяскӧд да тайӧ мувывса пемыд олӧмнас веськӧдлысь ловъяскӧд.
Та вӧсна, босьтӧй Енсянь став вермасянторсӧ. Сэки тышкасиганыд верманныд водзсасьны лёкыслы паныд да петанныд вермысьясӧн. Сулалӧй зумыда.
Вӧнясьӧй збыльнас да пасьтасьӧй веськыдлуныслӧн кӧрт кышӧдӧ. Кӧмкотасьӧй да лоӧй дасьӧсь висьтавлыны лӧньлун йылысь Бур Юӧрсӧ. Та кындзи, топыда кутӧй кианыд эскӧмлысь сайӧдсӧ, кодӧн ті верманныд кусӧдны омӧльлысь став донӧдӧм ньӧвъяссӧ. Нӧшта босьтӧй юр вевттьӧд пыдди мездмӧмсӧ да Ловлысь шыпуртсӧ — Енлысь Кывсӧ.
Вӧчӧй тайӧс кевмӧмъясӧн да корӧмъясӧн, быд кадӧ кевмысьӧй Лов нуӧдӧм улын. Лоӧй дасьӧсь да зільӧй дугдывтӧг кевмысьны став вежа войтыр вӧсна. Кевмысьӧй тшӧтш ме вӧсна, медым сёрнитігӧн Енмыс сетіс меным колана кывъяс повтӧг висьтавлыны Бур Юӧрлысь гусяторсӧ. Енмыс мӧдӧдіс менӧ висьтавлыны Бур Юӧрсӧ, та понда ӧні дзескыдінын. Кевмысьӧй ме вӧсна, медым висьтавлі сійӧс повтӧг да колана ногӧн.
Медым ті тӧдінныд менам олӧм-вылӧм йылысь, ставсӧ тіянлы висьталас Тихик. Сійӧ — менам муса вок, Господьлӧн эскана кесъялысь. Ме мӧдӧда сійӧс тіян дінӧ, медым висьталас миян олӧм йылысь да ышӧдас тіянӧс.
Вокъяс, сиа тіянлы лӧнь олӧм, муслун да эскӧм Ен Батьсянь да Господь Исус Кристоссянь.
Енлӧн буралӧмыс быдӧнкӧд, коді радейтӧ миян Господь Исус Кристосӧс бырлытӧм муслунӧн.
Аминь.
Апостол Павеллӧн Филипӧ мӧдӧдӧм гижӧд
1 юр.
Павел да Тимофей, Исус Кристослӧн кесйӧгъяс, чолӧмалӧны Филип карын олысь да Исус Кристослы эскысь став вежа войтырӧс, вичкоса веськӧдлысьясӧс да отсасьысьясӧс. Буралӧм да лӧнь олӧм тіянлы Ен Батьнымсянь да Господь Исус Кристоссянь.
Тіян йылысь казьтывлігӧн быдпӧрйӧ аттьӧала ассьым Енмӧс да нимкодьпырысь кевмыся ставныд вӧсна. Ӧд ті медводдза лунсяньыс да ӧнӧдз на отсаланныд меным паськӧдны Бур Юӧрсӧ. Енмыс панӧма нин бур уджсӧ тіян пытшкын, и ме эска, мый Исус Кристослӧн локтан лунӧдз Сійӧ вайӧдас уджсӧ помӧдз. Дерт, меным тадзи и колӧ мӧвпавны тіян йылысь, ӧд ті менам сьӧлӧмынӧсь. Пукала-ӧ ме дзескыдінын, доръя-ӧ Бур Юӧрсӧ али висьтавла сійӧс эскӧдӧмӧн, ті ставныд мекӧд ӧтвыв босьтанныд Енсянь бурсетӧмсӧ.
Ен тӧдӧ, ме ёна радейта тіянӧс Исус Кристослӧн муслунӧн.
Ме кевмыся, мед тіян муслунныд ёнджыка на содас да сетас тіянлы быдпӧлӧс тӧдӧмлунсӧ да мывкыдлунсӧ, медым верминныд тӧдмавны медбурсӧ. Сэки Кристослӧн лунӧ ті лоанныд сӧстӧмӧсь да мыжтӧмӧсь да кутанныд вайны веськыда олӧмыслысь вотӧссӧ Енсӧ ошкӧм да аттьӧалӧм могысь. Тайӧ уджсӧ кутас вӧчны тіян пытшкын Исус Кристос.
Вокъяс, кӧсъя, мед ті тӧдінныд, мый мекӧд лоӧмторъясыс ёнджыка на отсалісны меным висьтавлыны Бур Юӧрсӧ. Кристос вӧсна ме ӧні дзескыдінын. Та йылысь тӧдӧны ставныс: кесарлысь керка видзысьяс, тшӧтш мукӧдыс. Унджыксӧ вокъяс пиысь ышӧдіс менам дзескыдінын пукалӧмӧй, да найӧ ёнджыка на повтӧг кутісны висьтавлыны Ен Кывсӧ.
Кодсюрӧ висьтавлӧны Кристос йылысь вежалӧмныс понда, мед вензьыны миянкӧд, а мукӧдыс висьтавлӧны сьӧлӧмсяньныс.
Кодсюрӧ висьтавлӧны Кристос йылысь оз сьӧлӧмсяньныс, а асьнысӧ петкӧдлӧм могысь. Тадзи найӧ кӧсйӧны сьӧктӧдны менӧ дзескыдінын пукалігӧн.
Мукӧдыс висьтавлӧны муслунныс вӧсна, ӧд найӧ тӧдӧны, мый Енмыс сувтӧдіс менӧ дорйыны Сылысь Бур Юӧрсӧ.
Наянпырысь-ӧ, восьса сьӧлӧмӧн-ӧ найӧ висьтавлӧны Кристос йылысь, меным веськодь. Мед сӧмын висьтавласны-а. Ме и таысь нимкодяся да водзӧ кута нимкодясьны, ӧд ме тӧда, мый тіян кевмысьӧмъясныд да Исус Кристослӧн Лолыс отсаласны меным мездмыны. Лача кута, мый меным нинӧмысь лоӧ яндысьнысӧ, но воддза мозыс лоа повтӧмӧн да кута водзӧ вайны Кристослы ошкӧмсӧ аслам вир-яйын олӧмӧн али кулӧмӧн.
Ӧд менам олӧмӧй — Кристос, а кулӧмӧй — вермӧм.
Кута кӧ водзӧ вир-яйын овны, унатор на верма вӧчны. Мый бӧрйыны — ог тӧд.
Кӧсъя ӧтисӧ и мӧдсӧ: кӧсъя ӧдйӧджык мунны тайӧ муюгыдсьыс да лоны Кристоскӧд, ӧд тайӧ ёна бурджык, но олышта кӧ на тайӧ му вылас, тіянлы бурджык.
Ме зумыда эска таӧ, та вӧсна тӧда: ме кольчча на му вылас да лоа ставныдкӧд, ёнмӧда тіянлысь эскӧмнытӧ, медым сы пыр верминныд нимкодясьны. Сэки, тіян дінӧ выльысь локтігӧн, Исус Кристос пытшкын ті верманныд ёнджыка на ошйысьны меӧн.
Сӧмын олӧй шогмана ногӧн, Кристослӧн Евангелльӧыс серти. Ме ог тӧд, верма-ӧ локны тіян дінӧ али ог вермы, аддза-ӧ тіянӧс али ог аддзы, но кӧсъя кывны, мый ті оланныд ӧти лолӧн да ӧтвылысь тышкасянныд Бур Юӧр да эскӧм вӧсна. Энӧ полӧй тіянлы паныд мунысьясысь, ӧд тіян повтӧмлунныд — налы пас кулӧм вылӧ, а тіянлы — мездмӧм вылӧ.
Ставыс тайӧ Енсянь. Ӧд Енмыс сетіс тіянлы эз сӧмын Кристослы эскыны, тшӧтш Сы понда сьӧкыдсӧ нуны да ме моз вермасьны. Ті аддзылінныд, кыдзи ме водзынсӧ вермаси да ӧнӧдз на вермася. Тайӧс ті тӧданныд.
2 юр.
Кристоскӧд олӧмыс кӧ ышӧдӧ тіянӧс, Сылӧн муслуныс кӧ бурӧдӧ тіянӧс, Енлӧн Лолыс кӧ ӧтвывтӧ тіянӧс, да ті кӧ меліӧсь да бур сьӧлӧмаӧсь ӧта-мӧдныд дінӧ, сідзкӧ, отсалӧй меным ёнджыка на нимкодясьны: радейтӧй ӧта-мӧднытӧ ӧтмоза, олӧй ӧти сьӧлӧмӧн да ӧти мӧвпъясӧн, тіян костын мед лоӧ ӧтувъялун. Нинӧм энӧ вӧчӧй асьнытӧ петкӧдлӧм могысь да вылӧ кыпӧдчӧм могысь. Быдӧн мед рам сьӧлӧмӧн пуктӧ мӧдсӧ ассьыс вылӧджык
да тӧждысьӧ оз сӧмын ас вӧснаыс, тшӧтш мукӧдыс вӧсна.
Мӧвпалӧй да вӧчӧй Исус Кристос моз. Сійӧ вӧлі дзик Енмыс кодь, но эз кутчысь тайӧ ӧткодьлунас.
Асьсӧ Сійӧ увтыртіс да кесйӧг туйӧ пуктіс. Чужис морт кодьӧн да морт вир-яйын оліс.
Асьсӧ Сійӧ улӧ пуктіс да кывзысис весиг кувтӧдзыс, крест вылын кувтӧдзыс.
Та вӧсна Енмыс кыпӧдіс Сійӧс ставсьыс медвылӧ да сетіс Сылы ним — став нимсьыс медыджыдӧс, медым Исус ним водзын копыртчис енэжас, му вылас да му пыдӧсас быд олысь, да Ен Батьӧс ошкӧм могысь быд морт шуис: «Исус Кристос эм Господь».
Мусаяс, кор ме вӧлі тіян дінын, ті пыр кывзысинныд менсьым. Сідзкӧ, ӧні, кор абу тіянкӧд, ёнджыка на кывзысьӧй да тӧждысьӧй асланыд мездмӧм вӧсна полӧмӧн да тіралӧмӧн. Ӧд Ачыс Енмыс уджалӧ тіян пытшкын, медым ті кӧсйинныд вӧчны да вӧчинныд Сылӧн бур кӧсйӧмыс серти.
Ставсӧ вӧчӧй шуасьтӧг да зыксьытӧг, медым ті вӧлінныд Енлӧн сӧстӧм, мыжтӧм да пежасьтӧм челядьӧн. Сэки тайӧ тшыксьӧм да пежасьӧм йӧз пӧвстас ті лоанныд дзирдалысь кодзувъяс кодьӧсь. Кутчысьӧй Олӧмыслӧн Кывйӧ, сэки Кристослӧн лунӧ ме верма ошйысьны, мый эг весьшӧрӧ уджав да мырсьы тіян пӧвстын.
Весиг ковмас кӧ кисьтны ассьым вирӧс да вайны ачымӧс вись пыдди тіян эскӧмныд вӧсна, тіянкӧд ӧтвыв кута нимкодясьны.
Сідзкӧ, ті тшӧтш нимкодясьӧй, мекӧд ӧтвыв нимкодясьӧй.
Господь Исус вылӧ лача кутӧмӧн чайта регыдъя кадӧ мӧдӧдны тіян дінӧ Тимофейӧс. Сійӧ висьталас меным тіян олӧм-вылӧм йылысь да ёнмӧдас менӧ.
Тимофей сьӧлӧмсяньыс тӧждысьӧ тіян вӧсна, мӧдыс сы кодьыс абу. Ӧд ставныс сӧмын ас вӧснаныс тӧждысьӧны, оз Исус Кристослы кесъялӧм вӧсна.
Ті тӧданныд Тимофейлысь зільӧмсӧ. Бур Юӧр висьтавлігӧн сійӧ отсасис меным пи моз.
Лача кута дзик пыр мӧдӧдны сійӧс тіян дінӧ, кор тӧдмала, мый лоӧ мекӧд водзӧ.
Эска Господьлы, мый регыд ме тшӧтш локта тіян дінӧ.
Но медводз лыддя коланаӧн мӧдӧдны тіян дінӧ Епафродит вокӧс, мекӧд ӧтвыв уджалысьӧс да отсасьысьӧс. Ті мӧдӧдлінныд сійӧс, медым сетны меным колана отсӧг. Сійӧ ёна гажтӧмтчӧ тіян вӧсна да шогсьӧ, мый ті тӧданныд сылӧн висьӧм йылысь.
Епафродит ёна висис да вӧлі кулан выйын, но Енмыс вӧлі бур сьӧлӧма сы дінӧ, и эз сӧмын сы дінӧ, тшӧтш ме дінӧ, медым менам шогӧй эз сод.
Та вӧсна ӧдйӧджык мӧдӧда сійӧс тіян дінӧ, медым бара верминныд аддзысьны сыкӧд да нимкодясьны. Сэки ме этшаджык кута шогсьыны.
Сибӧдӧй Епафродитӧс нимкодьпырысь, ӧд сійӧ кесъялӧ Господьлы. Татшӧм йӧзсӧ вылӧ донъялӧй. Кристослы кесъялігӧн сійӧ ӧдва эз кув, ӧдва эз вошты ассьыс олӧмсӧ да отсасис меным, кор ті энӧ вермӧй отсасьнысӧ.
3 юр.
Нӧшта вокъясӧй, нимкодясьӧй Господь пытшкын.
Та йылысь меным абу сьӧкыд казьтывлыны тіянлы, ӧд тайӧ видзас тіянӧс лёкысь.
Видзчысьӧй “понъясысь”, ӧд тайӧ лёк вӧчысьясыс тшӧктӧны вундыштчыны. Збыль вундыштчӧмаясыс — тайӧ ми, ӧд ми кесъялам Енлы Сылӧн Лов нуӧдӧм улын. Ми ошйысям Исус Кристосӧн, огӧ ас выланым лача кутӧй, кӧть ме эськӧ верми ас вылӧ лача кутны.
Кодкӧ мӧвпалӧ кӧ ас вылас лача кутны, мукӧд дорсьыс ме ёнджыка на верма тадзи вӧчны. Ӧд менӧ вундыштӧма кӧкъямысӧд лунӧ, петі Израиль войтырысь, Вениамин чужанкотырысь. Бать-мамӧй — юдейяс, Индӧд серти ме — фарисей. Ен вӧсна тӧждысьӧмӧй петкӧдчис сыын, мый вӧтлі Енлысь Вичкосӧ. Индӧд серти ме вӧлі веськыдӧн да мыжтӧмӧн.
Водзынсӧ ставсӧ тайӧс лыдди медколанаӧн, ӧні Кристос вӧсна лыддя нинӧмӧн.
Ставсӧ тайӧс пукта нинӧм туйӧ, ӧд Исус Кристосӧс, ассьым Господьӧс, тӧдӧм дорысь нинӧм абу ыджыдджыкыс. Кристос вӧсна эновті ставсӧ, ставсӧ лыддя ёгӧн, медым ме озырми Кристосӧн да лои Сы пытшкын веськыдӧн эг Индӧд серти уджъясӧй вӧсна, а Кристослы эскӧм вӧсна. Ӧд веськыдлунсӧ Енмыс сетӧ мортлы сӧмын Кристослы эскӧм пыр. Кӧсъя тӧдны Кристосӧс да Сійӧс ловзьӧдысь вынсӧ, кӧсъя тшӧтш юкны Сылысь сьӧкыдалӧмсӧ да кувны Сы моз, медым верми ловзьыны кулӧмысь.
Ме ог шу, мый вои нин тыр-бурас, но зіля воны тыр-бурас, ӧд татчӧ менӧ корис Исус Кристос.
Вокъяс, ме ог шу, мый вои нин тыр-бурас, но важсӧ вунӧдӧмӧн зіля мунны водзӧ да воны помӧдз, мед босьтны тырдонсӧ — енэжвывса олӧм, кытчӧ Енмыс корӧма миянӧс Исус Кристос пыр.
Сідзкӧ, коді миян пиысь лыддьӧ асьсӧ тыр-бурас воысьӧн, сійӧ мед мӧвпалӧ миян моз.
А мӧвпаланныд кӧ мӧд ногӧн, Енмыс восьтас тайӧс тіянлы.
Но мыйӧдз воим нин, кутам водзӧ тадзи мӧвпавны да овны.
Вокъяс, видзӧдӧй ме вылӧ да велӧдчӧй овны на моз, кодъяс олӧны миян моз.
Ӧд Кристослӧн крестлы унаӧн паныд мунӧны. Та йылысь висьтавлі нин тіянлы, ӧні нӧшта на синва сорӧн казьтышта.
Налӧн помыс — кулӧм, налӧн енмыс — рушкуныс, найӧ ошйысьӧны асланыс янӧдан уджъясӧн. Найӧ мӧвпалӧны сӧмын мувывсаыс йылысь.
Но миян оланінным енэжас. Сэсянь виччысям Мездысьӧс — миян Господь Исус Кристосӧс. Енмыс сетіс Сылы вын веськӧдлыны ставнас. Тайӧ выннас Кристос вежас миянлысь кулана вир-яйнымӧс да сетас миян вир-яйлы Ассьыс дзирдлунсӧ.
4 юр.
Муса вокъясӧй, ме ёна гажтӧмтча тіянысь. Ті — менам нимкодьлунӧй да ошйысян юркытшӧй. Мусаяс, зумыда кутчысьӧй Господькӧд ӧтувъя олӧмас.
Кора Еводияӧс да Синтикияӧс: воӧй ӧти кывйӧ, ӧд ті Господьлӧн.
Кора тэнӧ, менам збыль уджъёртӧй: отсав тайӧ аньясыслы. Кор ме висьтавлі Бур Юӧрсӧ, найӧ пыр вӧліны мекӧд, кыдзи и Климент да мукӧд уджалысьяс, кодъяслысь нимъяссӧ гижӧма Олӧмыслӧн небӧгӧ.
Дугдывтӧг нимкодясьӧй Господь пытшкын. Нӧшта шуа: нимкодясьӧй.
Тіян рамлунныд мед тыдалас быдӧнлы.
Господь матын нин.
Нинӧм вӧсна энӧ майшасьӧй. Енсӧ аттьӧалӧмӧн да Сылы кевмысьӧмӧн вайӧй Сы водзӧ став ассьыныд корӧм-кӧсйӧмнытӧ. Сэки вежӧрӧ тӧртӧм Енлӧн лӧньлуныс видзас тіянлысь сьӧлӧмнытӧ да мӧвпъяснытӧ Исус Кристос пытшкын.
Вокъяс, нӧшта кора тіянӧс: мӧвпалӧй сӧмын збыльыс, шогманаыс, веськыдыс, сӧстӧмыс, бурыс, мичаыс, ошканаыс да нимкодьыс йылысь.
Вӧчӧй сійӧ, мый ті кывлінныд, мыйӧ велӧдчинныд, мый тӧдмалінныд да месянь босьтінныд. Сэки лӧньлуныслӧн Ен лоӧ тіянкӧд.
Господь водзын ме ёна нимкодяся, ӧд ті бара кутінныд тӧждысьны ме вӧсна.
Дерт, ті век кӧсйинныд тӧждысьны ме вӧсна, но водзынсӧ тіян эз вӧв позянлуныс.
Висьтала тайӧс ог сы понда, быттьӧ меным мыйкӧ оз тырмы, ӧд ме велалі овны сійӧн, мый эм.
Кужа овны гӧля, кужа овны и лышкыда.
Ставсӧ видлі да тӧдлі: пӧтлунсӧ и тшыглунсӧ, лышкыда олӧмсӧ и гӧльлунсӧ.
Ставсӧ верма менӧ ёнмӧдысь Исус Кристоскӧд.
Дерт, ті бура вӧчинныд, мый ті юкинныд менсьым сьӧкыдлунӧс.
Филипса эскысьяс, ті ӧд тӧданныд, мый Македонияысь мунӧм бӧрын, Бур Юӧрсӧ висьтавлыны заводитігӧн, весиг ӧти вичко эз отсав меным сьӧмӧн. Сӧмын ті отсалінныд.
Весиг Фессалоникаӧ гоз-мӧдысь мӧдӧдлінныд меным олӧм вылӧ.
Дерт, ме ог виччысь тіянсянь сетӧмторсӧ, сӧмын кӧсъя, медым тіян сетӧмторныд уна пӧвстӧн бӧр бергӧдчис тіянлы.
Епафродит сетіс тіянлысь мӧдӧдӧмторнытӧ, ӧні ставыс эм. Эм став коланаыс, весиг коланасьыс унджык на. Тіян сетӧмторныд — Енлы шогмана чӧскыд дука вись, Сылы сьӧлӧм сертиыс.
Менам Енмӧй мед сетас тіянлы Исус Кристос пыр Аслас дзирдлуна озырлунысь став коланаторсӧ.
Ен Батьнымлы ошкӧм нэмъяс чӧж.
Аминь.
Чолӧмалӧй Исус Кристослы став эскысьсӧ.
Мекӧд олысь вокъяс ыстӧны тіянлы чолӧм.
Нӧшта ыстӧны чолӧм став вежа войтырыс, торъя нин, кесар керкаысь кесйӧгъяс.
Господь Исус Кристослӧн буралӧмыс ставныдкӧд тіянкӧд.
Аминь.
Апостол Павеллӧн Колосӧ мӧдӧдӧм гижӧд
1 юр.
Гижӧ Павел, Ен кӧсйӧм серти Исус Кристослӧн апостол. Тимофей воккӧд ми чолӧмалам колосса вежа войтырӧс, Исус Кристослы эскысь вокъясӧс.
Буралӧм да лӧнь олӧм тіянлы Ен Батьнымсянь да Господь Исус Кристоссянь.
Тіян вӧсна кевмысигъясӧн ми пыр аттьӧалам Енмӧс, миян Господь Исус Кристослысь Батьсӧ. Ми кывлім Кристослы тіян эскӧм йылысь да став вежа войтыр дінӧ муслунныд йылысь. Тайӧ тіян эм, ӧд ті оланныд енэжас дасьтӧмаыс вылӧ лачаӧн. Лача йывсьыс ті кывлінныд нин, кор тіянӧдз воис Бур Юӧрлӧн збыль кывйыс. Тайӧ кывйыс паськалӧ став му пасьталаыс да вайӧ вотӧс. Ӧні сійӧ паськалӧ да вайӧ вотӧссӧ тшӧтш тіян пӧвстын. Бур Юӧрсӧ кылӧм бӧрын ті збыльысь гӧгӧрвоинныд Енлысь буралӧмсӧ. Ті кылінныд тайӧс миян муса Епафрас уджъёртсянь, коді уджалӧ тіян пӧвстын. Сійӧ — Кристослӧн эскана кесъялысь. Епафрас висьталіс миянлы Ловсянь чужӧм муслунныд йылысь.
Ставсӧ тайӧс кылӧмсянь ми дугдывтӧг кевмысям тіян вӧсна. Кевмам, медым тіян вӧлі Ловсянь мывкыдлун да гӧгӧрвоӧм, медым ті бура тӧдінныд Енлысь кӧсйӧмсӧ. Кевмысям, мед эськӧ тіян олӧмын ошкыссис Господь, медым ті быдторйын шогминныд Сылы, бурсӧ вӧчӧмӧн вайинныд вотӧс да быдминныд Енсӧ тӧдмалӧмас. Енмыс мед ёнмӧдас да вынсьӧдас тіянӧс дзирдлуна выннас, медым ті быдторйын вӧлінныд зумыдӧсь да терпитӧмӧн нуинныд быдпӧлӧс сьӧкыдсӧ. Долыда ошкӧй Ен Батьӧс, ӧд Сійӧ вӧчис миянӧс шогманаясӧн, медым ми тшӧтш вермим босьтны Югыдінас вежа войтырлы вичмӧдӧмасӧ. Сійӧ мездіс миянӧс пемыдыслӧн вын улысь да пыртіс муса Пиыслӧн Юраланінӧ. Ӧд Пиыслӧн Вирӧн миянӧс мездӧма да мыжъяснымӧс прӧститӧма. Сійӧ тыдавтӧм Енмыслӧн пертас, чужӧма став вӧчӧмторсьыс медводз.
Сы пыр вӧчӧма став енэжвывсасӧ да мувывсасӧ, аддзанасӧ да аддзытӧмсӧ: юралӧм-ӧ, ыджыдалӧм-ӧ, веськӧдлӧм-ӧ, вынъяс-ӧ, — ставсӧ вӧчӧма Сы пыр да Сылы.
Сійӧ ставсьыс Медводдзаыс, Сы вылын кутчысьӧ ставыс.
Сійӧ вир-яйыслӧн, Вичколӧн, Юрыс.
Сійӧ эм Панасыс. Сійӧ кулӧмаясысь медводдза Ловзьысь, медым быдторйын лоны медводдзаӧн. Тадзи Енмыс лӧсьӧдіс, медым Пиыс пытшкын оліс став тыр-бурыс, медым Сы пыр сетны бурасьӧм, да Сылӧн крествывса Вирнас бурӧдны Аскӧдыс мувывсасӧ да енэжвывсасӧ.
Коркӧ ті вӧлінныд Енмыслы паныд мунысьяс, лёк вӧчӧмныд вӧсна Сыысь ылынӧсь. Ӧні Сійӧ бурӧдіс тіянӧс Аскӧдыс Кристос Вир-яйын, Сылӧн кулӧмыс пыр, медым сувтӧдны тіянӧс Ас водзас вежаӧн, сӧстӧмӧн да мыжтӧмӧн. Сӧмын тіянлы колӧ вӧрзьывтӧг сулавны эскӧмас да зумыда кутны лача Бур Юӧрас. Бур Юӧрсӧ ті кывлінныд, сійӧс юӧртӧма енэж улын став олысьыслы. Ме, Павел, лои тайӧ Бур Юӧрыслы кесъялысьӧн.
Ӧні ме нимкодяся тіян вӧсна сьӧкыдалігӧн. Кристослӧн Вир-яйыс вӧсна, Сылӧн Вичко вӧсна, аслам вир-яйын сьӧкыдсӧ нуигӧн ме тырта Кристос шогъяслысь лыдсӧ. Енмыс пуктіс менӧ кесъявны вичкоыслы, сетіс меным удж: тырвыйӧ юӧртны тіянлы Ен Кывсӧ. Сылӧн Кывйыс нэмсӧ вӧлі мувывса чужысьяслы гусяторйӧн, ӧні сійӧс восьтӧма Сылӧн вежа войтырлы. Енмыс кӧсйис, мед найӧ тӧдісны, кутшӧм ыджыд озырлун вайӧ тайӧ гусяторйыс быд войтырлы. Гусяторйыс — тайӧ Кристос тіян пытшкын, локтана дзирдлуныс вылӧ лачаныд. Сы йылысь ми висьтавлам быдӧнлы, велӧдам-туйдӧдам став мывкыдлунӧн, медым сувтӧдны быдӧнӧс Ен водзӧ Кристос пытшкын сӧвмӧмаясӧн. Та могысь ме уджала да вермася ме пытшкын олысь Кристос вынӧн.
2 юр.
Кӧсъя, мед ті тӧдінныд, кутшӧм ыджыд тыш мунӧ менам тіян вӧсна да лаодикияса вӧсна, тшӧтш на вӧсна, кодъяс менӧ весиг эз на аддзывны. Ме вермася, медым налӧн муслунӧн ӧтувтӧм сьӧлӧманыс вӧлі повтӧмлун, медым найӧ вӧліны озырӧсь тырвыйӧ тӧдӧмлунӧн. Сэки найӧ вермасны гӧгӧрвоны Ен Батьлысь гусяторсӧ — Кристосӧс. Сы пытшкын мывкыдлуныслӧн да тӧдӧмлуныслӧн став озырлуныс.
Висьтала тайӧс, медым некод эз кежӧд тіянӧс аслас эскӧдана сёрниӧн.
Кӧть ме вир-яйӧн абу тіянкӧд, но лолӧн тіянкӧд. Меным зэв нимкодь аддзыны, мый ті оланныд ӧти сьӧлӧмӧн да зумыда эсканныд Кристослы.
Ті кӧ сибӧдінныд Господь Исус Кристосӧс, сідзкӧ, олӧй Сы пытшкын. Быдмӧй-сӧвмӧй Сы пытшкӧ вужъясьӧмӧн, ёнмӧй эскӧмас, кыдзи тіянӧс велӧдӧма. Сьӧлӧмныд мед век вӧлі тыр аттьӧалӧмнас.
Видзчысьӧй, мед кодкӧ эз тывйышт тіянӧс мувывса мывкыдлуннас да ылӧг сёрнинас. Найӧ подуласьӧны мортлӧн велӧдӧм вылӧ да муюгыд вынъяс вылӧ, а оз Кристос вылӧ.
Кристосын, Сылӧн морт вир-яйын, тыдовтчис Енлӧн став тырвыйӧлуныс. Кристос пытшкын тіян тшӧтш эм тырвыйӧлуныс. Сійӧ быд ыджыдалысьлы да быдпӧлӧс вынъяслы Юр.
Сы пытшкын тіянӧс вундыштӧма, но вундыштӧма абу морт киӧн. Кристослӧн вундыштӧмыс мездіс тіянӧс мыжа тшыкӧм вир-яйысь. Пыртчиганыд тіянӧс гуалӧма Кристоскӧд, да Сійӧс Ловзьӧдысьыслӧн вынӧ эскӧмныд пыр тіянӧс ловзьӧдӧма Сыкӧд. Тіянӧс, вундыштчытӧмныд да мыжъясныд вӧсна кулӧмаясӧс, Енмыс ловзьӧдіс Кристоскӧд. Сійӧ прӧститіс миянлысь став лёк вӧчӧмнымӧс, вуштыштіс мыжалан гижӧдсӧ став тшӧктӧмъяснас, кодъяс сьӧктӧдісны миянӧс, бырӧдіс сійӧс крестӧ тувъялӧмӧн. Сійӧ песовтіс ыджыдалысьясӧс да вынаясӧс, шыбитіс найӧс яналӧмас да вермис Кристос пыр.
Сідзкӧ, некод мед оз мыжав тіянӧс сёян-юанысь, вежа лунъясысь, тӧлысь чужӧм пасйӧмысь да шойччан лунӧ кутчысьӧмысь, ӧд ставыс тайӧ сӧмын локтанаыслӧн вуджӧр, а збыльыс — Кристос.
Некод мед оз ылӧд тіянӧс аслас рамлунӧн, анделъяслы юрбитӧмӧн да ылӧг аддзылӧмъяснас ошйысьӧмӧн. Морт вежӧрнаныс мӧвпалігӧн найӧ вылӧ пуктӧны асьнысӧ. Тайӧ йӧзыс абу йитчӧмаӧсь Юрыскӧд. Юрыс ӧд веськӧдлӧ став вир-яйнас, кӧні быд юкӧн йитӧма-тэчӧма сӧн-лутш отсӧгӧн. Тадзи вир-яйыс быдмӧ-сӧвмӧ Ен ногӧн.
Ті кӧ кулінныд Кристоскӧд, мынінныд муюгыд вынъясысь, сідзкӧ, мыйла мувывсаяс моз кутчысянныд тайӧ шуӧмъясас: “эн инмӧдчы”, “эн сёй”, “эн вӧрзьӧд”?
Тайӧ сӧмын мортсянь тшӧктӧм-велӧдӧм, шуӧма быранаторъяс йылысь. Ылӧг вежавидзӧмнас, рамлуннас, вир-яйсӧ тшыгйӧдӧмнас найӧ петкӧдлӧны асьнысӧ мывкыдаӧн. Но тайӧ оз отсав вермыны вир-яйлысь колӧм-кӧсйӧмсӧ.
3 юр.
Ті кӧ ловзинныд Кристоскӧд, корсьӧй енэжвывсасӧ. Ӧд енэжас, Ен веськыдладорын, пукалӧ Кристос. Мӧвпалӧй енэжвывсаыс йылысь, а энӧ мувывсаыс йылысь.
Ті ӧд кулінныд, да тіянлысь олӧмнытӧ дзебӧма Кристоскӧд Ен пытшкӧ.
Тіян олӧмыс — Кристос. Кор Сійӧ локтас, Сыкӧд тшӧтш и ті тыдовтчанныд Сылӧн дзирдлунас.
Та вӧсна бырӧдӧй ас пытшсьыныд мувывсасӧ: кырсалӧм, пеж оласног, лёкколӧм, лёк вылӧ ыштӧм, горшасьӧм — ставыс тайӧ идоллы юрбитӧм. Таысь кывзысьтӧм йӧз вылӧ лэччӧ Енлӧн скӧрлуныс. Коркӧ ті асьныд татшӧмӧсь вӧлінныд да тадзи олінныд.
Ӧні шыбитӧй ставсӧ тайӧс: скӧралӧм, лёксьӧм, лӧгалӧм, омӧльтӧм, пеж сёрни.
Энӧ пӧръясьӧй, ті ӧд пӧрччинныд важ мортсӧ став сылӧн уджнас да пасьтасинныд выль мортӧ, коді выльмӧ Ставсӧвӧчысьӧс тӧдмалӧмнас да лоӧ Сы кодь. Грек-ӧ, юдей-ӧ, вундыштчӧма-ӧ, абу-ӧ вундыштчӧма, варвар-ӧ, скиф-ӧ, кесйӧг-ӧ, мездлуна морт-ӧ — торъялӧмыс абу. Ставыс да ставас Кристос.
Сідзкӧ, лоӧй бур сьӧлӧмаӧсь, меліӧсь, авъяӧсь да рамӧсь, терпитӧй ӧта-мӧднытӧ. Ті ӧд Енлӧн бӧрйӧмаяс, вежаяс да Сылӧн мусаяс. Дӧзмытӧг сибӧдӧй ӧта-мӧднытӧ. Эм кӧ код вылӧ норасьӧм, прӧститӧй сійӧс. Кристос ӧд тіянӧс прӧститіс, ті тшӧтш Сы моз прӧститӧй.
Медыджыдтор — кутчысьӧй муслунас, ӧд муслуныс ставсӧ йитӧ да вайӧдӧ тыр-бурӧдз.
Тіян сьӧлӧмын мед ыджыдалас Енлӧн лӧньлуныс, кытчӧ корӧма тіянӧс, ті ӧд ӧти вир-яйынӧсь. Быд кадӧ ошкӧй Енмӧс.
Кристослӧн кывйыс мед озыра овмӧдчас тіян пытшкӧ.
Велӧдӧй-туйдӧдӧй ӧта-мӧднытӧ став мывкыдлуннас. Господьӧс аттьӧалӧмӧн сьӧлӧмсяньныд сьылӧй псаломъяс, ошкана сьыланкывъяс да бурсьылӧмъяс.
Кывйӧн-ӧ, уджӧн-ӧ мыйкӧ вӧчанныд, ставсӧ вӧчӧй Господь Исус Кристос нимӧн да ошкӧй Сы пыр Ен Батьӧс.
Гӧтыръяс, кывзысьӧй верӧсныдлысь, ӧд тадзи лӧсялӧ вӧчны Господь войтырлы.
Верӧсъяс, радейтӧй гӧтырнытӧ, энӧ лоӧй накӧд чорыдӧсь.
Челядь, быдторйын кывзысьӧй бать-мамныдлысь, ӧд Господьлы нимкодь таысь.
Батьяс, энӧ дӧзмӧдӧй ныв-пинытӧ, медым найӧ эз жугыльмыны.
Кесйӧгъяс, быдторйын кывзысьӧй асланыд мувывса ыджыдъяслысь. Кесъялӧй налы восьса сьӧлӧмӧн да Енмысь полӧмӧн, а энӧ йӧз водзын асьнытӧ петкӧдлӧм могысь.
Ставсӧ вӧчӧй сьӧлӧмсяньныд Господьлы моз, энӧ мортлы моз. Тӧдӧй, тіянлы вичмас Господьсянь тырдон, ӧд ті кесъяланныд Кристослы, асланыд Господьлы.
А лёксӧ вӧчысь аслас уджъяс серти босьтас, ӧд Енмыс оз видзӧд морт чужӧм вылӧ.
4 юр.
Ыджыдъяс, лоӧй веськыдӧсь кесйӧгныдкӧд, быдӧнӧс сибӧдӧй ӧтмоза. Тӧдӧй, енэжас тіян вылын тшӧтш эм Ыджыдыс.
Дугдывтӧг кевмысьӧй. Вӧчӧй тайӧс садьмӧдчӧмӧн да Енмӧс аттьӧалӧмӧн.
Кевмысьӧй тшӧтш миян вӧсна, Енмыс мед восьтас миянлы ӧдзӧсъяс висьтавны Кристос йылысь гусяторсӧ. Дзик та вӧсна ме и пукала дзескыдінын. Кевмысьӧй, медым ме верми восьтны гусяторсӧ да колана ногӧн висьтавны сійӧс.
Лоӧй мывкыдаӧсь эскытӧмъяскӧд, эм кӧ позянлун, сёрнитӧй накӧд быд кадӧ.
Сёрнитӧй бур сьӧлӧмӧн, сёрниныд мед век вӧлі солыштӧма, сэки быдӧнлы кужанныд вочавидзны колана ногӧн.
Ме йылысь ставсӧ тіянлы висьталас муса Тихик вок, миян уджъёртным, сійӧ — Господьлӧн эскана кесъялысь. Мӧдӧда сійӧс тіян дінӧ, медым тӧдмавны олӧм-вылӧмныд йылысь, нӧшта ышӧдны тіянӧс. Сыкӧд тшӧтш мӧдӧда миян муса да эскана Ӧнисим вокӧс, сійӧ ӧд тіянысь петіс.
Найӧ висьталасны ставсӧ, мый миян вӧчсьӧ тані.
Чолӧм тіянлы Аристарксянь, сійӧ мекӧд ӧтлаын пукалӧ дзескыдінын. Чолӧм ыстӧ тшӧтш Варнавалӧн Марк нима воча вокыс. Тіянлы ме гижлі сы йылысь, мися, локтас кӧ, сибӧдӧй сійӧс. Чолӧм Исуссянь, кодӧс нимтӧны Юстӧн.
Вундыштчӧмаяс пиысь сӧмын найӧ мекӧд уджалӧны Енлӧн Юралӧм вӧсна. Найӧ ёна отсасьӧны меным.
Чолӧм ыстӧ тіян Епафрас, Исус Кристослӧн кесйӧг. Кевмысигас сійӧ пыр тышын тіян вӧсна, мед эськӧ ті век сулалінныд зумыда да быдторйын тӧдінныд Енлысь кӧсйӧмсӧ.
Висьтала тіянлы, сійӧ ёна уджалӧ-шогсьӧ тіян вӧсна, тшӧтш лаодикияса да иерапольса вӧсна.
Чолӧм ыстӧны миян дона бурдӧдысь Лука да Димас.
Чолӧм висьталӧй лаодикияса вокъяслы, тшӧтш Нимфалы да сы ордын чукӧртчысь эскысьяслы.
Тайӧ гижӧдсӧ лыддьӧм бӧраныд тӧждысьӧй, медым Лаодикия вичкоын сійӧс тшӧтш лыддясны. А ті лыддьӧй Лаодикияӧ мӧдӧдӧм гижӧдсӧ.
Аркиплы висьталӧй, мед бура уджалас да помӧдз вайӧдас Енсянь сетӧм уджсӧ.
Ме, Павел, аслам киӧн гижа тіянлы чолӧмӧс.
Тӧд выланыд кутӧй менсьым дзескыдінын пукалӧмӧс.
Енлӧн буралӧмыс ставныдкӧд тіянкӧд.
Аминь.
Апостол Павеллӧн Фессалоникаӧ медводдза мӧдӧдӧм гижӧд
1 юр.
Павел, Силуан да Тимофей чолӧмалӧны тіянӧс, Ен Батьлысь да Господь Исус Кристослысь фессалоникаса вичкоӧс.
Буралӧм да лӧнь олӧм тіянлы Ен Батьнымсянь да Господь Исус Кристоссянь.
Быд кадӧ ошкам Енмӧс тіянысь быдӧнысь да казьтывлам тіянӧс кевмысигъяс дырйи. Ен Батьным водзын ми век казьтывлам тіянӧс, ӧд тіян эскӧмныд петкӧдчис уджъясын, а муслунныд — сьӧлӧмсянь вӧчӧмъясын, ті кутанныд зумыд лача миян Господь Исус Кристос вылӧ. Вокъяс, ті мусаӧсь Енмыслы. Ми тӧдам, Сійӧ бӧрйис тіянӧс. Ми висьтавлім тіянлы Бур Юӧрсӧ ыджыд эскӧмлунӧн. Висьтавлім эгӧ сӧмын кывйӧн, сійӧ воссис тшӧтш Вежа Лов вынсянь вӧчӧмторъясын. Ті бура тӧданныд, кыдзи ми кутім асьнымӧс тіянын олігӧн да отсасим тіянлы.
Уна сьӧкыдлун вылӧ видзӧдтӧг ті сибӧдінныд Бур Юӧрсӧ Вежа Ловсянь нимкодьлунӧн да кутінныд вӧчны миян моз да Господь моз. Тадзи ті лоинныд Македонияын да Акайяын став эскысьыслы бурсӧ петкӧдлысьясӧн.
Ен Кывсӧ ті паськӧдінныд энӧ сӧмын Македонияын да Акайяын, тіян эскӧм йылысь тӧдӧны быдлаын. Сідзкӧ, та йылысь миянлы абу нин колана висьтавлыны.
Миянлы быдлаын висьтавлӧны, кыдзи ті сибӧдінныд миянӧс, бергӧдчинныд идолъясысь да кутінныд кесъявны збыль да ловъя Енлы. Ті кутінныд виччысьны енэжсянь Енлысь Писӧ — Исусӧс, кодӧс Енмыс ловзьӧдіс кулӧмысь. Сійӧ мездас миянӧс локтана скӧрлунысь.
2 юр.
Вокъяс, ті асьныд тӧданныд, мый ми волім тіян дінӧ эгӧ весьшӧрӧ.
Ті тӧданныд, мый таысь водзджык Филип карын ми уна сьӧкыд нуим, миянӧс ёна лёкӧдісны да нӧйтісны. Но та вылӧ видзӧдтӧг, Ен отсӧгӧн, восьсӧн да повтӧг висьтавлім тіянлы Сылысь Бур Юӧрсӧ.
Ӧд миян велӧдӧмын эз вӧвны наян да пеж мӧвпъяс, ми некодӧс эгӧ кӧсйӧй ылӧдлыны.
Енмыс водзвыв тӧдмаліс миянӧс да лыддис шогманаясӧн висьтавлыны Сылысь Бур Юӧрсӧ, та вӧсна и висьтавлам. Ми зілям шогмыны Енмыслы, а огӧ йӧзыслы, ӧд Сійӧ тӧдӧ миянлысь сьӧлӧмнымӧс.
Ми некор эгӧ сёрнитлӧй мавтан кывъясӧн, ті тӧданныд тайӧс. Нинӧм эгӧ вӧчӧй горшасьӧмӧн, Ен тӧдӧ.
Ми эгӧ виччысьӧй ошкӧмсӧ йӧзсянь, тіянсянь либӧ мукӧдсянь.
Ми, Кристослӧн апостолъяс, вермим эськӧ локны тіян дінӧ юрнымӧс чатӧртӧмӧн, но ми вӧлім меліӧсь тіянкӧд да тӧждысим тіян вӧсна, кыдзи мам тӧждысьӧ аслас кагаыс вӧсна.
Ми ёна радейтам тіянӧс, та вӧсна вӧлім дасьӧсь юксьыны тіянкӧд Енлӧн Бур Юӧрнас, весиг сетны ассьыным олӧмнымӧс. Ӧд ті сэтшӧм мусаӧсь миянлы.
Вокъяс, ті тӧданныд, Енлысь Бур Юӧрсӧ висьтавлігӧн ми уджалім кок йылысь усьтӧдз. Мырсим лун и вой, ӧд тіян пӧвстысь некодӧс эгӧ кӧсйӧй сьӧктӧднысӧ.
Ті тӧданныд, и Енмыс тӧдӧ, мый тіян дінын, эскысьяс пӧвстын олігӧн, ми ставсӧ вӧчим веськыда да вежавидзӧмӧн, миянӧс нинӧмысь вӧлі мыждынысӧ. Тіянлы быдӧнлы ми вӧлім бать пыдди, ті асьныд тайӧс тӧданныд. Ми туйдӧдім-ышӧдім тіянӧс да корим овны Ен ногӧн. Ӧд Енмыс корис тіянӧс Аслас Юраланінӧ да дзирдлунӧ.
Дугдывтӧг ошкам Енмӧс, ӧд миян висьталӧм бӧрын ті сибӧдінныд Енлысь Кывсӧ сьӧлӧманыд. Ті сибӧдінныд сійӧс энӧ мортлысь висьталӧмсӧ моз, а Енлысь Кывсӧ моз. Тайӧ збыльысь Енлӧн Кыв, сійӧ вына тіян пытшкын, эскысьясын.
Вокъяс, мый вӧлі Юдеяын Исус Кристослы эскысь Ен вичкояскӧд, тайӧ лои тшӧтш тіянкӧд. Найӧ уна сьӧкыд нуисны юдейяссянь, а ті — ас войтырсянь. Господь Исусӧс да Сылысь пророкъяссӧ юдейяс виисны, а миянӧс вӧтлісны. Найӧ дӧзмӧдӧны Енсӧ да став йӧзыслы паныд мунӧны. Найӧ оз лэдзны миянлы бурвисьтавлыны мукӧд войтырлы, медым найӧ мездмисны. Тадзи найӧ содтӧны ассьыныс мыжъяссӧ. Но Енлӧн скӧрлуныс суис нин найӧс.
Вокъяс, ми янсавлім тіянкӧд дженьыдик кад кежлӧ, но сьӧлӧмӧн пыр вӧлім тіянкӧд. Ми ёна гажтӧмтчим тіянысь да ёнджыка на кӧсйим аддзысьлыны тіянкӧд.
Ми ёна кӧсйим волыны тіян дінӧ. Ме, Павел, эг ӧтчыдысь мӧдӧдчыв тіян дінӧ, но сӧтана тупкис туйнымӧс.
Миян Господь Исус Кристос локтігӧн ог ӧмӧй тіянӧн кутӧй ошйысьны Сы водзын?
Абу-ӧ ті миян лачаыс, нимкодьлуныс да ошйысян юркытшыс?
Ӧд ті — миян ошйысянторйыс да нимкодьлуныс.
3 юр.
Миянлы вӧлі вывті сьӧкыд тіянкӧд янсалӧмысь. Та вӧсна ми шуим, мый асьным кольччам Афин карӧ, а Тимофей вокнымӧс мӧдӧдам тіян дінӧ. Сійӧ миянкӧд ӧтвыв кесъялӧ Енмыслы да отсалӧ висьтавлыны Кристослысь Бур Юӧрсӧ. Ми мӧдӧдім сійӧс тіян дінӧ, медым ышӧдны тіянӧс да ёнмӧдны эскӧмнытӧ, медым сьӧкыдсӧ нуигӧн тіян пӧвстысь некод эз усь. Ӧд ті асьныд тӧданныд, мый миянлы ковмас нуны сьӧкыдсӧ.
Тіянӧ волігӧн ми висьтавлім нин, мый ковмас нуны сьӧкыдсӧ. Ті тӧданныд: дзик тадзи и лоис.
Та вӧсна, водзӧ эг нин вермы виччысьнысӧ да мӧдӧді тіян дінӧ Тимофейӧс, медым тӧдмавны тіян эскӧмныд йылысь, эз-ӧ ылӧдлы тіянӧс омӧльыс, эз-ӧ ло весьшӧрӧ миян уджным.
Тимофей сӧмын на воис тіян дінысь да вайис тіян эскӧмныд да муслунныд йылысь нимкодь юӧр, ті пӧ век бур ногӧн казьтывланныд миянӧс да миян моз ёна кӧсъянныд аддзысьлыны миянкӧд. Та вӧсна, вокъяс, став тайӧ сьӧкыдсӧ нуигӧн да миянӧс вӧтлігӧн тіян эскӧмныд ышӧдіс миянӧс.
Ӧні миян сьӧлӧмын лӧнь, ӧд ті зумыда кутчысянныд Господь дінӧ.
Ми ёна аттьӧалам Енсӧ тіянысь, ӧд ті сетанныд миянлы позянлун ёна нимкодясьны Ен водзын. Ми лун и вой сьӧлӧмсянь кевмысям, медым аддзысьлыны тіянкӧд да сетны тіян эскӧмлы тырмытӧмсӧ.
Ачыс Енмыс, миян Бать, да миян Господь Исус Кристос мед веськӧдасны миянлысь туйнымӧс тіян дінӧ.
Господь мед уна пӧв содтас ӧта-мӧдныд дінӧ да став йӧзыс дінӧ муслуннытӧ. Тіян муслунныд мед лоӧ сэтшӧм жӧ вына, кутшӧм вына тіян дінӧ миян муслунным. Господь мед ёнмӧдас сьӧлӧмнытӧ, медым ті вӧлінныд вежаӧсь да сӧстӧмӧсь Ен Батьным водзын, кор миян Господь Исус Кристос локтас став Аслас вежа войтыркӧд.
Аминь.
4 юр.
Вокъяс, тіянлы висьтавлім нин, медым олінныд Ен водзын шогмана ногӧн. Дерт, ті дзик тадзи и оланныд. Но Исус Кристос нимӧн ышӧдам да корам тіянӧс: олӧй нӧшта на бурджыка. Ті ӧд тӧданныд, кутшӧм тшӧктӧмъяс ми сетім тіянлы Господь Исуссянь.
Енмыс кӧсйӧ, медым ті вӧлінныд вежаӧсь да видзинныд асьнытӧ кырсалӧмысь.
Тіян пиысь быдӧн мед видзӧ ассьыс вир-яйсӧ вежаӧн да шогмана ногӧн, медым ентӧдтӧмъяс моз некод оз сетчы ыпъялан лёкколӧмас, ӧд Енсӧ найӧ оз тӧдны.
Эскысь мед оз вӧч лёксӧ мӧд эскысьлы, оз ылӧдлы сійӧс, ӧд Господь мыждас таысь. Та йылысь висьтавлім нин тіянлы да ӧлӧдлім тіянӧс.
Ӧд Енмыс корис миянӧс овны вежа оласногӧн, а эз пеж оласногӧн.
Сідзкӧ, тайӧ тшӧктӧмсӧ ӧтдортысь оз мортӧс ӧтдорт, а Енсӧ, коді сетіс миянлы Ассьыс Вежа Ловсӧ.
Эскысьяс дінӧ муслун йылысь абу колана гижны тіянлы, ӧд Ачыс Енмыс велӧдіс тіянӧс радейтны ӧта-мӧднытӧ. Ті збыльысь радейтанныд Македония пасьтала став эскысьсӧ.
Вокъяс, корам тіянӧс: радейтӧй ӧта-мӧднытӧ нӧшта на ёнджыка. Зільӧй овны лӧня. Быдӧн мед вӧчӧ ассьыс удж, ас ки помысь шедӧдӧ олӧм вылас. Тадзи ми велӧдлім тіянӧс. Сэки эскытӧмъяс тшӧтш кутасны пыдди пуктыны тіянӧс, тіян ставыс лоӧ тырмымӧн.
Вокъяс, кӧсъя, мед ті тӧдінныд, мый лоӧ кулӧмаяскӧд. Сэки эскытӧмъяс моз онӧ кутӧй шогсьыны кулӧмаяс йылысь, ӧд эскытӧмъяслӧн лачаныс абу.
Ми кӧ эскам, мый Исус куліс и ловзис, сідзкӧ, Исускӧд Енмыс вайӧдас Ас дінас тшӧтш найӧс, коді эскис Исуслы, но куліс нин.
Ӧні висьталам тіянлы Господьлысь кывъяссӧ: ми, кодъяс ловъяӧсь на Господь локтӧдз, огӧ пановтӧй кулӧмаясӧс. Кор кылас чукӧстӧм шы, кор шыасяс архангел да кылас Енлӧн труба шыыс, Ачыс Господь лэччас енэжсяньыс. Сэки медводз ловзясны кулӧмаяс, кодъяс эскисны Кристослы. Сэсся миянӧс, ловъяясӧс, накӧд тшӧтш лоӧ кыпӧдӧма кымӧръяс вылын сынӧдас, медым аддзысьны сэні Господькӧд. Тадзи пыр лоам Господькӧд.
Сідзкӧ, ышӧдӧй ӧта-мӧднытӧ тайӧ кывъяснас.
5 юр.
Вокъяс, урчитӧм кад йывсьыс абу колана гижны тіянлы. Ті ӧд асьныд бура тӧданныд, мый Господьлӧн луныс войся гусясьысь моз воас.
Кор йӧзыс кутасны шуавны: «Гӧгӧр лӧнь, повнысӧ нинӧмысь», сэки тӧдлытӧг суас найӧс кулӧм, кыдзи тӧдлытӧг суӧ кага чужтысьӧс дой. Сэки некод оз вермы пышйынысӧ.
Вокъяс, ті онӧ пемыдас олӧй. Сідзкӧ, сійӧ луныс оз лок тіян дінӧ гусясьысь моз тӧдлытӧг.
Ӧд быдӧн ті — луныслӧн да югыдыслӧн ныв-пи.
Ми абу пемыдыслӧн, абу войыслӧн ныв-пи.
Сідзкӧ, мукӧдыс моз огӧ кутӧй узьны. Садьмӧдчам да кутам овны садь вежӧрӧн.
Ӧд узьысьяс войнас узьӧны, да юысьяс войнас кодалӧны.
Ми — луныслӧн ныв-пи. Сідзкӧ, кутам овны садь вежӧрӧн. Пасьталам ас выланым муслуныслысь да эскӧмыслысь кӧрт кышӧдсӧ, а юр вевттьӧд пыдди босьтам мездмӧм вылӧ лачасӧ. Ӧд Енмыс бӧрйис миянӧс эз сы могысь, медым Сылӧн скӧрлуныс суис миянӧс, но сы могысь, медым Исус Кристос Господьным пыр ми босьтім мездмӧмсӧ. Кристос куліс миян вӧсна, медым ми, ловъяӧсь али кулӧмаӧсь, олім Сыкӧд.
Сідзкӧ, ӧнія моз водзӧ ышӧдӧй да ёнмӧдӧй ӧта-мӧднытӧ.
Вокъяс, корам тіянӧс: пыдди пуктӧй тіян пӧвстын уджалысьясӧс, Господькӧд ӧтувъя олӧмас тіянӧс туйдӧдысьясӧс да тіянӧн веськӧдлысьясӧс. Вылӧ пуктӧй татшӧм йӧзсӧ, радейтӧй найӧс налӧн уджысь.
Ас костаныд олӧй лӧня.
Вокъяс, корам тіянӧс: дышъясӧс туйдӧдӧй, полысьясӧс ышӧдӧй, жебъясӧс кутыштӧй, быдӧнӧс терпитӧй.
Видзчысьӧй, мед некод лёксьыс эз мынтысь лёкӧн.
Мӧдарӧ, зільӧй вӧчны бурсӧ ӧта-мӧдныдлы да став йӧзыслы.
Пыр нимкодясьӧй.
Дугдывтӧг кевмысьӧй.
Ставсьыс аттьӧалӧй Енсӧ, ӧд татшӧмъясӧн Енмыс кӧсйӧ аддзыны тіянӧс, Исус Кристослы эскысьясӧс.
Ловлысь ыпъялӧмсӧ энӧ кусӧдӧй.
Пророкъяслысь висьталӧмсӧ энӧ ӧтдортӧй.
Ставсӧ тӧдмалӧй, бурас кутчысьӧй.
Ылыстчӧй быдпӧлӧс лёксьыс.
Лӧньлуныслӧн Ен мед Ачыс тырвыйӧ вежӧдас тіянӧс да видзас тіянлысь ловнытӧ, олӧмнытӧ да вир-яйнытӧ сӧстӧмӧн миян Господь Исус Кристос локтігкежлӧ.
Сійӧ, коді корис тіянӧс, эскана. Сідзкӧ, вӧчас шуӧм сертиыс.
Вокъяс, кевмысьӧй миян вӧсна.
Став вокъясӧс чолӧмалӧй вежа окыштӧмӧн.
Кора тіянӧс Господь нимӧн: лыддьӧй тайӧ гижӧдсӧ став вежа вокъяслы.
Миян Господь Исус Кристослӧн буралӧмыс тіянкӧд.
Аминь.
Апостол Павеллӧн Фессалоникаӧ мӧд мӧдӧдӧм гижӧд
1 юр.
Павел, Силуан да Тимофей чолӧмалӧны тіянӧс, миян Ен Батьлысь да Господь Исус Кристослысь фессалоникаса вичкоӧс.
Буралӧм да лӧнь олӧм тіянлы Ен Батьнымсянь да Господь Исус Кристоссянь.
Вокъяс, миянлы век колӧ ошкыны Енсӧ тіянысь, ӧд тіян эскӧмныд лунысь-лун ёнмӧ да ӧта-мӧд костаныд муслунныд ёнджыка на содӧ. Та вӧсна ми ошйысям тіянӧн Ен вичкоясын, ӧд быдпӧлӧс сьӧкыдсӧ нуигӧн да тіянӧс вӧтлігӧн ті зумыда эсканныд. Енмыс лыддьӧ тіянӧс шогманаясӧн пырны Аслас Юраланінӧ, ӧд дзик та понда ті нуанныд сьӧкыдсӧ. Таын тыдалӧ Енлӧн веськыдлуныс. Енмыс веськыда вӧчӧ: тіянӧс дзескӧдысьяслы Сійӧ мынтысьӧ дзескӧдӧмӧн.
А тіянлы да миянлы, сьӧкыдсӧ нуысьяслы, Енмыс сетас шойччӧг, кор Господь Исус Аслас вына анделъяскӧд лэччас енэжсянь ыпъялан би пытшкын да мыждас найӧс, кодъяс оз тӧдны Енсӧ да оз кывзыны миян Господь Исус Кристослысь Бур Юӧрсӧ. Найӧс лоӧ мыждӧма пыр кежлӧ кулӧм вылӧ, торйӧдӧма Господьысь, Сылӧн дзирдлунысь да вынысь. Тайӧ лоӧ сійӧ лунӧ, кор Господь локтас. Сэки Сылӧн став вежа войтырыс кутас ошкыны Господьӧс да став эскысьыс кутас шензьыны Сы вылӧ. Ті тшӧтш лоанныд на лыдын, ӧд ті эскинныд миян висьталӧмӧ.
Та вӧсна, дугдывтӧг кевмысям тіян вӧсна, медым Енным лыддяс тіянӧс шогманаясӧн лоны Аслас корӧмаяс лыдын, медым Аслас вынӧн Сійӧ ёнмӧдас тіянлысь бур кӧсйӧмнытӧ да эскӧмныд пыр отсалас помӧдз вайӧдны бур уджъяснытӧ. Сэки миян Господь Исус Кристослӧн нимыс ошкыссяс тіян пыр, а ті — Сы пыр, миян Ен да Господь Исус Кристослӧн буралӧмыс кузя.
2 юр.
Ӧні гижам тіянлы миян Господь Исус Кристослӧн локтӧм йылысь да Сы дінӧ миян чукӧртчӧм йылысь. Вокъяс, корам тіянӧс: энӧ майшасьӧй некутшӧм гижӧдысь либӧ кодлӧнкӧ сёрниысь, быттьӧ сійӧ Ловсянь висьталӧ, мый Кристослӧн луныс воис нин. Энӧ полӧй, весиг висьталасны кӧ тіянлы, мый тайӧс ми гижим.
Энӧ сетӧй асьнытӧ ылӧдлыны некодлы, ӧд сійӧ луныс воас сӧмын сэки, кор йӧзыс кежасны Енсьыс. Сэки локтас мыжыслӧн морт, кулӧмыслӧн пи, Енлы паныд мунысь. Сійӧ пуктас асьсӧ ставсьыс вылӧ, мый йӧзыс Енмӧн лыддьӧны да шуӧны вежаӧн. Сійӧ пуксяс Енлӧн крамӧ быттьӧ Ен да кутас шуны асьсӧ Енмӧн.
Тіянӧ волігӧн ме висьтавлі нин та йылысь, ті ӧмӧй вунӧдінныд?
Ӧні ті тӧданныд, мый кутӧ паныд мунысьӧс кадысь водз воссьӧмысь.
Ен Индӧдлы паныд мунысь вӧчӧ нин ассьыс гуся уджъяссӧ. Кор лоӧ босьтӧма сылӧн туй вылысь сійӧс кутысьӧс,
сэки паныд мунысь воссяс. Но Господь Исус локтігас виас сійӧс Аслас лолыштӧмнас да бырӧдас сійӧс Аслас дзирдлуннас. Паныд мунысьыс локтас сӧтанасянь. Ыджыд вынӧн сійӧ кутас петкӧдлыны индысьпасъяс да вӧчны ылӧг шензьӧданаторъяс. Сійӧ быдногыс кутас ылӧдлыны найӧс, кодъяс мунӧны кулӧмас. Ӧд найӧ мустӧмтісны мездана збыльсӧ.
Та вӧсна Енмыс лэдзас ылӧдлыны найӧс, медым найӧ эскисны ылӧгыслы. Тадзи лоӧ мыждӧма быдӧнӧс, коді радейтӧ ылӧгсӧ да оз эскы збыльыслы.
Вокъяс, миянлы дугдывтӧг колӧ ошкыны Енсӧ тіянысь. Ті ёна мусаӧсь Господьлы, ӧд Енмыс водзысяньыс бӧрйис тіянӧс мездмӧм вылӧ. Тайӧ мездмӧмсӧ Сійӧ сетӧ тіянлы Ловлӧн вежӧдӧмыс пыр да збыльыслы эскӧмныд пыр. Ми висьтавлім тіянлы Бур Юӧрсӧ, код пыр Енмыс корис тіянӧс мездмӧмас, мед миян Господь Исус Кристослӧн дзирдлуныс вичмис тіянлы.
Сідзкӧ, вокъяс, зумыда сулалӧй да кутчысьӧй сэтчӧ, мыйӧ велӧдім тіянӧс да мый гижим тіянлы.
Ен Батьнымлы ми ёна мусаӧсь. Буралӧмыс вӧсна Сійӧ сетіс миянлы пыр кежлӧ бурӧдӧм да зумыд лача. Ачыс Исус Кристос Господьным да Ен Батьным мед бурӧдасны тіянлысь сьӧлӧмнытӧ да ышӧдасны тіянӧс бур уджъяс вылӧ да бур сёрни вылӧ.
3 юр.
Вокъяс, медбӧрти корам тіянӧс: кевмысьӧй миян вӧсна, мед Господьлӧн Кывйыс ӧдйӧ паськалас, медым йӧзыс тіян моз сибӧдасны сійӧс пыдди пуктӧмӧн. Нӧшта кевмысьӧй, мед Ен видзас миянӧс шогмытӧм да лёк йӧзысь, ӧд оз быдӧн эскы.
Но Господь эскана, Сійӧ ёнмӧдас тіянӧс да видзас омӧльысь.
Господь эскӧдӧ миянӧс, мый ті вӧчанныд нин миян тшӧктӧм серти да водзӧ на сідзи кутанныд вӧчны.
Ачыс Господь мед веськӧдас тіянлысь сьӧлӧмнытӧ Енлӧн муслунас да Кристослӧн зумыдлунас.
Вокъяс, миян Господь Исус Кристос нимӧн тшӧктам тіянлы: ылыстчӧй эскысь вокысь, коді весь олӧ да оз ов миян велӧдӧм серти. Ті ӧд асьныд тӧданныд, мый тіянлы колӧ овны миян моз.
Тіян дінын ми весь эгӧ олӧй, некодлысь дась нянь эгӧ сёйӧй. Лун и вой пӧсь петтӧдз уджалім, ӧд некодӧс тіян пӧвстысь эгӧ кӧсйӧй сьӧктӧднысӧ. Дерт, ми вермим весь овны, но тадзи эгӧ вӧчӧй. Ми кӧсйим, мед ті видзӧдінныд миян вылӧ да олінныд миян моз.
Ӧд тіянӧ волігӧн ми шулім нин: «Коді оз кӧсйы уджавны, сійӧ мед оз сёй».
Миянлы кывсис, тіян пӧвстысь пӧ ӧткымынӧн весьшӧрӧ кадсӧ коллялӧны. Найӧ оз уджавны да нырсӧ быдлаӧ сюйӧны.
Татшӧм йӧзсӧ миян Господь Исус Кристос нимӧн корам да ышӧдам: уджалӧй рам сьӧлӧмӧн да ас ки помысь шедӧдӧй аслыныд кынӧмпӧттӧ.
Вокъяс, бурсӧ вӧчигӧн энӧ лигышмунӧй.
Коді оз вӧч тайӧ гижӧдас висьталӧм серти, сійӧс кутӧй тӧд выланыд. Татшӧм мортыскӧд энӧ кутӧй некутшӧм йитӧд. Тадзи ті янӧданныд сійӧс.
Сӧмын энӧ лыддьӧй сійӧс паныд мунысьӧн, а туйдӧдӧй сійӧс вокӧс моз.
Ачыс Господь, лӧньлунсӧ Сетысь, мед быд кадӧ да быдторйын сетас тіянлы лӧньлунсӧ.
Господь мед лоас ставныдкӧд тіянкӧд.
Ме, Павел, аслам киӧн гижа тіянлы чолӧмӧс, коді лоӧ пасӧн, мый гижӧдыс месянь.
Ме гижа тадзи быд гижӧдын: миян Господь Исус Кристослӧн буралӧмыс ставныдкӧд тіянкӧд.
Аминь.
Апостол Павеллӧн Тимофейлы медводдза мӧдӧдӧм гижӧд
1 юр.
Гижӧ Павел, Исус Кристослӧн апостол. Миянӧс мездысь Ен да Господь Исус Кристос, код вылӧ ми кутам лача, индісны менӧ апостолӧн. Тимофей, эскӧмыд вӧсна тэ меным збыльысь пи кодь.
Бурсетӧм, буралӧм да лӧнь олӧм тэныд Ен Батьнымсянь да миян Господь Исус Кристоссянь.
Македонияӧ мӧдӧдчигӧн ме кори тэнӧ олыштны Ефесын кодсюрӧӧс ӧлӧдӧм могысь, медым найӧ эз велӧдны ылӧгас, эз кутчысьны мойдъясӧ да дугдісны корсьысьны, коді кутшӧм чужанвужйысь петіс. Ӧд тасянь сӧмын вензьӧм артмӧ Енлы кесъялӧм пыдди.
Енмыслы позьӧ кесъявны сӧмын эскӧмӧн. Миян ӧлӧдӧмлӧн медшӧр могыс — радейтӧм. Сійӧ петӧ сӧстӧм да мыжтӧм сьӧлӧмсянь да восьса сьӧлӧмӧн эскӧмсянь. Кодсюрӧ кежисны таысь да сетчисны ковтӧм сёрниясӧ. Найӧ пуктӧны асьнысӧ Индӧдӧ велӧдысьясӧ, но асьныс оз гӧгӧрвоны, мый висьталӧны да мыйӧ велӧдӧны.
Ми тӧдам: Индӧдыс бур, вӧдитчыны кӧ сыӧн бур ногӧн. Гӧгӧрвоам, мый Индӧдсӧ лӧсьӧдӧма абу веськыда олысьлы, а сійӧс торкалысьлы да кывзысьтӧмлы, Ентӧг олысьлы да мыж вӧчысьлы, эскытӧмлы да Енмӧс омӧльтысьлы, бать-мам вылӧ ки лэптысьлы да морт виысьлы, кырсалысьлы да ӧта-мӧдыскӧд узьлысь айуловлы, мортӧн вузасьысьлы, пӧръясьысьлы, ылӧгвисьталысьлы да быдӧнлы, коді паныд мунӧ веськыд велӧдӧмлы. Ӧд тадзи висьталӧ ошкана Енлӧн дзирдлун йылысь Бур Юӧрыс, и тайӧ Юӧрсӧ висьтавлыны Енмыс мӧдӧдіс менӧ.
Ме аттьӧала миянлысь Господь Исус Кристосӧс, ӧд Сійӧ ёнмӧдіс менӧ да лыддис менӧ шогманаӧн кесъявны Сылы. Водзынсӧ ме омӧльті Кристосӧс, вӧтлі-дзескӧді Сылы эскысьясӧс да лёк вӧчи налы. Но Кристос вӧлі бур сьӧлӧма ме дінӧ, ӧд тадзисӧ ме вӧчи гӧгӧрвотӧмла да эскытӧмла.
Миян Господь озыра тыртіс менӧ Аслас буралӧмнас. Исус Кристос пыр Сійӧ сетіс меным эскӧм да муслун.
Мый ӧні висьтала тіянлы — тайӧ эскана, сійӧс шогмӧ сибӧдны сьӧлӧманыд. Исус Кристос локтіс муюгыдас, медым мездыны мыжаясӧс, и на пиысь ме медся мыжаыс. Енмыс вӧлі бур сьӧлӧма ме дінӧ.
Ӧд ме пыр, медся мыжаыслӧн олӧм пыр, Исус Кристос петкӧдліс Ассьыс терпитӧмсӧ налы, кодъяс эскасны Сылы да босьтасны помтӧм олӧмсӧ.
Енмыс пыр олысь, Сійӧ ыджыдалӧ помтӧг. Ыджыд мывкыда тыдавтӧм ӧти Енлы ошкӧм-нимӧдӧмыс нэмъяс чӧж.
Аминь.
Тимофей, муса пиӧй, кутчысь пророкъяслӧн тэ йылысь висьталӧмас да вермась бур тышкасьысь моз. Видз эскӧмтӧ да ов сідзи, мед сьӧлӧмыд эз мыжды тэнӧ. Ӧд кодсюрӧ вунӧдісны тайӧс, и налӧн эскӧмыс пасьмуніс. Татшӧмӧсь Именей Ӧльӧксанкӧд. Найӧс ме сеті сӧтана киӧ, медым дугдісны омӧльтны Енсӧ.
2 юр.
Медводз кора тіянӧс: кевмысьӧй Енмыслы, шыасьӧй Сы дінӧ корӧм-кевмӧмӧн да аттьӧалӧмӧн став йӧзыс вӧсна. Кевмысьӧй юралысьяс да ыджыдалысьяс вӧсна, медым ми олім лӧня да зыксьытӧг, вежавидзӧмӧн да шогмана ногӧн. Ӧд тайӧ бур да шогмӧ Енмыслы, миян Мездысьлы. Сійӧ кӧсйӧ, медым став йӧзыс мездмисны да тӧдісны збыльсӧ.
Енмыс ӧти. Ен да морт костын сулалысьыс тшӧтш ӧти: Морт, Исус Кристос. Сійӧ сетіс Асьсӧ, медым ньӧбны став йӧзсӧ.
Тайӧ петкӧдлӧ, мый мездана кадыс воис нин. Енмыс сувтӧдіс менӧ, медым юӧртны та йылысь. Кристос водзын ме збыльысь висьтала, ог пӧръясь: менӧ индӧма апостолӧн да ентӧдтӧмъясӧс збыляс-эскӧмас велӧдысьӧн.
Ме кӧсъя, медым айулов быдлаын кевмысисны кинысӧ кыпӧдӧмӧн, сӧстӧм сьӧлӧмӧн, лӧгавтӧг да майшасьтӧг.
Кӧсъя, медым аньяс пасьтасисны лючки-бура, мичмӧдісны асьнысӧ рамлунӧн да вежавидзӧмӧн, а эз юрсинысӧ баситӧмӧн, зарни-жемчуг ӧшлӧмӧн да дона паськӧмӧн. Найӧ мед мичмӧдасны асьнысӧ бур уджъясӧн. Тадзи колӧ вӧчны Ен водзын вежавидзысь аньяслы.
Аньяс мед чӧла да кывзысьӧмӧн велӧдчасны.
Аньлы ог лэдз велӧдны айловӧс либӧ ыджыдавны сы вылын, ань мед чӧв олӧ.
Ӧд водзджык вӧлі вӧчӧма Адамӧс, сэсся Еваӧс.
Эз Адам ылав, но ань ыштӧмыс вӧсна ылаліс да мыж вӧчис.
Но ань мездмас кага чужтӧм пыр, кутчысяс кӧ эскӧмас, муслунас, вежавидзӧмас да бур оласногас.
3 юр.
Тайӧ збыль: коді кӧсйӧ вичкоӧн веськӧдлыны, сійӧ бур удж кӧсйӧ вӧчны.
Вичкоӧн веськӧдлыны вермӧ сӧстӧм оласнога, ӧти гӧтыра, садь да сюсь вежӧра, бур оласнога морт. Ветлысь-мунысьӧс сибӧдӧ, кужӧ велӧдны, оз ю, оз тышкась, аслыс оз курав, рам сьӧлӧма, оз пинясь, сьӧм вылӧ оз горшась, бура веськӧдлӧ аслас гортнас. Сылӧн ныв-пиыс кывзысьӧны сылысь да пыдди пуктӧны сійӧс.
Ӧд сійӧ кӧ оз сяммы веськӧдлыны гортнас, вермас-ӧ тӧждысьны Енлӧн Вичкоыс вӧсна?
Вичкоса веськӧдлысьнас оз вермы лоны морт, коді сӧмын на бергӧдчис Ен дінӧ. Ӧд сійӧ вермас вылӧ кыпӧдчыны да омӧльыс моз веськалас мыждӧм улӧ.
Зэв колана, медым вичкоысь ӧтдор мукӧдыс тшӧтш пыдди пуктісны сійӧс. Сэки лёк сёрниыс сы йылысь оз паськав, да сійӧ оз шед омӧльлӧн налькйӧ.
Вичкоса отсасьысьяс мед лоасны мывкыдаӧсь, сёрнитасны веськыда, оз кодавны, аслыныс оз куравны, кутчысясны эскӧмлӧн гусяторйӧ да видзасны сьӧлӧмнысӧ сӧстӧмӧн.
Найӧс колӧ водзвыв тӧдмавны, сэсся, шогманаӧсь кӧ, мед кесъялӧны.
Аньяс мед тшӧтш лоасны мывкыдаӧсь, садь вежӧраӧсь, быдторйын эсканаӧсь да оз суклясьны.
Вичкоса отсасьысь мед вӧлі ӧти гӧтыра, бура веськӧдліс гортнас да ныв-пинас.
Ӧд бура кесъялысьӧс вылӧ донъяласны, сійӧ кутас повтӧг висьтавлыны Исус Кристослы эскӧм йылысь.
Лача кута, мый регыд локта тэ дінӧ. Гижа тайӧс, медым, падма кӧ, тэ тӧдін, кыдзи кутны асьтӧ Ен керкаын, ловъя Енлӧн Вичкоын. Ӧд Вичкоыс — збыльыслӧн сюръяыс да подулыс.
Кывшутӧг, миян эскӧмлӧн гусяторйыс ыджыд:
Енмыс восьтіс Асьсӧ вир-яйын, Лолыс петкӧдліс Сылысь веськыдлунсӧ, Сійӧс аддзылісны анделъяс, Сы йылысь юӧртісны мукӧд войтырлы, Сылы эскисны муюгыдас, Сійӧ кыпӧдчис дзирдлунас.
4 юр.
Лов веськыда висьталӧ, мый бӧръя кадас кодсюрӧ кежасны эскӧмысь. Найӧ пондасны кывзыны ылӧдчысь ловъясӧс да кутчысясны пеж ловъяслӧн велӧдӧмӧ. Татшӧм велӧдӧмыс петӧ пӧръясьысьяссянь, кык бана шаньгаяссянь, кодъяс воштӧмаӧсь яндзимнысӧ. Найӧ оз лэдзны гӧтрасьны да сёйны сійӧ, мый Енмыс вӧчис. Но Енмыс вӧчис сёянсӧ, медым эскысьяс, збыльсӧ тӧдысьяс, сёйисны сійӧс Енсӧ аттьӧалӧмӧн.
Ӧд Енмыслӧн став вӧчӧмторйыс бур. Сёян кӧ аттьӧалӧмӧн, сэки нинӧмысь повнысӧ. Ӧд кевмысьӧм да Енлӧн Кывйыс вежӧдӧны сійӧс.
Туйдӧд тадзи вокъястӧ, сэки тэ лоан Исус Кристослӧн бур кесъялысьӧн. Ӧд тэ пӧткӧдан асьтӧ эскӧмлӧн кывъясӧн да бур велӧдӧмӧн, мый серти олан.
Ылӧг да ковтӧм мойдъясысь ылыстчы, велӧдчы овны вежавидзӧмӧн. Ӧд вир-яйтӧ ёнмӧдӧмысь бурыс этша, а вежавидзана олӧмысь — уна. Сійӧ сетӧ лача ӧнія да локтана олӧм вылӧ.
Тайӧ висьталӧмыс эскана, сійӧс шогмӧ сибӧдны сьӧлӧмад.
Ми ёна мырсям да нуам лёкӧдӧмсӧ, ӧд лачанымӧс кутам ловъя Ен вылӧ. Сійӧ — быдӧнлы Мездысь, торйӧн нин эскысьяслы.
Туйдӧд-велӧд татчӧ.
Некод мед оз увтырт тэнӧ томлун вӧснаыд.
Тэнад сёрниыд, оласногыд, муслуныд, сьӧлӧмыд, эскӧмыд да сӧстӧмлуныд мед лоӧ шогмана, мед эскысьяс вермисны овны тэ моз.
Менам локтӧдз лыддьы Енлысь Кывсӧ да туйдӧд-велӧд йӧзсӧ.
Видз Енсянь сетӧмторсӧ, кодӧс вӧлі сетӧма тэныд пророклӧн висьталӧмыс пыр вичкоса юрнуӧдысьяслӧн ки пуктылігӧн.
Тӧждысь та вӧсна, ставсӧ вӧч сьӧлӧмсяньыд, сэки быдӧн аддзас тэнсьыд вермӧмтӧ.
Видзӧд ас бӧрсяыд: кыдзи олан да мыйӧ велӧдан.
Вӧч тайӧс дугдывтӧг, ӧд тадзи вӧчигӧн тэ асьтӧ мездан, тшӧтш тэнӧ кывзысьясӧс.
5 юр.
Пӧрысьясӧс чорыда эн ӧлӧд, туйдӧд найӧс батьтӧ моз, томджыкъясӧс — воктӧ моз. Олӧма аньясӧс туйдӧд мамтӧ моз, томджыкъясӧс велӧд сӧстӧм сьӧлӧмӧн чойтӧ моз.
Тӧждысь ӧткӧн олысь дӧваяс вӧсна.
Эм кӧ дӧвалӧн ныв-пи либӧ налӧн ныв-пи, найӧ мед вежавидзӧмӧн тӧждысясны гортсаыс вӧсна да бурӧн мынтысясны бать-мамыслы да пӧль-пӧчыслы. Ӧд тайӧ шогмӧ Енмыслы.
Дзик ӧткӧн олысь дӧва лача кутӧ Ен вылӧ да лун и вой кевмысьӧ Енмыслы.
А лышкыда олысь — ловъявывсьыс кулӧма.
Туйдӧд тадзи дӧваясӧс, медым найӧ олісны сӧстӧма.
Коді оз тӧждысь матыссаыс вӧсна, торйӧн нин гортсаыс вӧсна, сійӧ эновтӧма эскӧмсӧ да эскытӧм дорысь лёкджык на.
Дӧва лыдӧ позьӧ пыртны сӧмын квайтымын арӧсаӧс да сыысь ыджыдджык арлыда аньӧс, вӧлӧма кӧ сійӧ ӧтчыдысь верӧс сайын, да тӧдӧны сійӧс бур уджъясыс серти: бур ногӧн быдтӧма-велӧдӧма ныв-писӧ, сибӧдӧма ветлысь-мунысьӧс, мыськалӧма вежа войтырлысь кокнысӧ, отсалӧма сьӧкыдалысьяслы да вӧчӧма быд бурсӧ.
Томджыкъясӧс эн пырт дӧваяс лыдӧ. Кор найӧ сетчӧны ыштӧмас, сэки ылыстчӧны Кристосысь да тэрмасьӧны петны верӧс сайӧ.
Найӧ мыжмӧны, ӧд найӧ ӧтдортчӧны эскӧмысь. Керкаысь керкаӧ ветлігӧн найӧ весьшӧрӧ кад коллялӧны, суклясьӧны, быдлаӧ сюйсьӧны да паськӧдӧны ковтӧм сёрнияс.
Та вӧсна кӧсъя, медым том дӧваяс петісны верӧс сайӧ, кага чужтісны да тӧждысисны гортныс вӧсна. Сэки найӧ оз сетны помкасӧ паныд мунысьяслы омӧльтны эскысьясӧс.
Ӧд кодсюрӧ кежисны веськыд туй вывсьыс да мунӧны сӧтана бӧрся.
Эскысьлӧн кӧ матыссаяс пӧвстас эм дӧва, сылы колӧ тӧждысьны дӧваыс вӧсна, оз ков Вичкосӧ сьӧктӧдны. Сэки Вичкоыс вермас тӧждысьны збыль дӧваяс вӧсна.
Вичкоса юрнуӧдысьясӧс, кодъяс бура уджалӧны, колӧ вылӧ донъявны, торйӧн нин Ен Кыв висьталысьясӧс да велӧдысьясӧс. Налы колӧ бура мынтысьны.
Ӧд Гижӧдыс висьталӧ: «Вартысь ӧшлысь вомсӧ эн тупкы» и «Уджалысьлы колӧ мынтыны уджыс серти».
Вичкоса юрнуӧдысьӧс кӧ мыждӧны мыйыськӧ, тайӧ мыждӧмсӧ эн кывзы, оз кӧ сійӧс вынсьӧдны кык-куим аддзылысь-висьталысь.
Мыж вӧчысьӧс янӧд ставныс водзын, медым мукӧдыс тшӧтш полісны мыжсӧ вӧчны.
Кора тэнӧ Ен водзын, Господь Исус Кристос водзын да бӧрйӧм анделъяс водзын: кутчысь тайӧ туйдӧдӧмъясас. Нинӧм эн вӧч ассяньыд, чужӧм вылӧ видзӧдӧмӧн.
Эн тэрмась ки пуктывны кодкӧ вылӧ, медым эн мыжмы сылӧн мыж вӧчӧм вӧсна.
Видз асьтӧ сӧстӧма.
Гырк висьӧмыд да тшӧкыда нёрпалӧмыд вӧсна ваысь ӧтдор юышт тшӧтш винатор.
Ӧтияслӧн мыжыс тыдалӧ, и найӧс мыждӧны нин. Мӧдъяслӧн мыжыс воссяс бӧрыннас.
Бур уджъясыд тшӧтш тыдалӧны, а оз на кӧ, бӧрыннас воссясны.
6 юр.
Сийӧсувса кесйӧгъяс, быдторйын пыдди пуктӧй ыджыдъяснытӧ, медым эз вӧв лёкӧдӧма Енлысь нимсӧ да Сылысь велӧдӧмсӧ.
Кесйӧглӧн ыджыдыс кӧ эскысь, и эскӧм сертиныс найӧ вокъяс, кесйӧг мед оз пукты ыджыдсӧ нинӧм туйӧ.
Мӧдарӧ, мед ёнджыка на кесъялӧ ыджыдыслы, ӧд сійӧ кесъялӧ муса эскысь мортлы.
Тадзи велӧд-туйдӧд.
Коді велӧдӧ мӧдторйӧ да оз кутчысь миян Господь Исус Кристослӧн веськыд кывъясас да велӧдӧмас, мый вайӧдӧ вежавидзана оласногӧ, татшӧм мортыс вылӧ пуктӧ асьсӧ да нинӧм оз гӧгӧрво. Сійӧ пыр кӧсйӧ вензьыны да зыксьыны. А тасянь артмӧ вежалӧм, пинясьӧм, лёкӧдӧм, гусьӧн мыждӧм да помтӧм вензьӧм на костын, кодъяслӧн пемдӧма вежӧрыс. Найӧ кежӧмаӧсь збыльсьыс да вежавидзана оласногыс пыр кӧсйӧны озырмыны сьӧмӧн.
Татшӧмъяссьыс ылыстчы.
Вежавидзӧмыс збыльысь озырмӧдӧ найӧс, кодъяс олӧны нинӧм вылӧ шуасьтӧг.
Ӧд ми нинӧм эгӧ вайӧй тайӧ муюгыдас, и нинӧм огӧ нуӧй татысь.
Эм кӧ сёян-юан да кӧм-пась, сідзкӧ, тырмӧдчам таӧн.
Озырмыны кӧсйысьяс сетчӧны ыштӧмас да шедӧны налькйӧ, сетчӧны быдпӧлӧс мывкыдтӧмлунас да лёк кӧсйӧмас, кодъяс бырӧдӧны йӧзсӧ да вайӧдӧны найӧс кулӧмӧ.
Ӧд став лёкыслӧн вужйыс — сьӧм радейтӧм. Сьӧм бӧрся вӧтлысигӧн кодсюрӧ кежисны эскӧмысь да кӧлалісны ас выланыс уна шог.
Но тэ, Ен мортӧй, ылыстчы таысь. Кутчысь веськыдлунас, вежавидзана оласногас, эскӧмас, муслунас, зумыдлунас да рамлунас.
Зумыда вермась эскӧмыд вӧсна, кутчысь помтӧм олӧмас, кытчӧ Енмыс корис тэнӧ. Ӧд уна йӧз водзын тэ восьсӧн висьтасин аслад эскӧм йылысь.
Ставыслы олӧм сетысь Ен водзын да Исус Кристос водзын, коді восьсӧн висьталіс збыльсӧ Понтий Пилатлы, ме кора тэнӧ: миян Господь Исус Кристос локтӧдз ставсӧ вӧч менам тшӧктӧм серти, сӧстӧма да веськыда. Кристослысь локтӧмсӧ ас кадӧ восьтас миянлы ошкана Ен. Сійӧ — ӧти вына Веськӧдлысь, ӧксыяслӧн Ӧксы, ыджыдъяслӧн Ыджыдыс. Сійӧ ӧтнас кувлытӧм, олӧ югыдас, кытчӧ матыстчыны он вермы. Морт Сійӧс эз аддзыв, и аддзыны оз вермы.
Сійӧс нимӧдӧмыс, Сылӧн ыджыдалӧмыс помтӧм.
Аминь.
Тайӧ нэмас озыра олысьясӧс велӧд, медым найӧ эз вылӧ кыпӧдчыны, эз кутны лачанысӧ бырана озырлун вылӧ, а ловъя Ен вылӧ. Ӧд Сійӧ лышкыда сетӧ миянлы ставсӧ, медым ми вермим овны нимкодясьӧмӧн. Велӧд озыръясӧс, медым вӧчисны бурсӧ, озырмисны бур уджъясӧн, вӧліны лышкыдӧсь да юксисны мукӧдкӧд. Тадзи вӧчигӧн найӧ чукӧртӧны аслыныс озырлун — зумыд подув локтанаыслы, медым налы вичмис помтӧм олӧм.
Тимофей, видз тэныд сетӧмасӧ. Эн кывзы йӧзыслысь ковтӧм сёрнияс да вензьӧмъяс, кодъяс петӧны ылӧг тӧдӧмлунсянь. Ӧд кодсюрӧ кутчысисны татшӧм тӧдӧмлунас да кежисны эскӧмысь.
Енлӧн буралӧмыс тэкӧд.
Аминь.
Апостол Павеллӧн Тимофейлы мӧд мӧдӧдӧм гижӧд
1 юр.
Гижӧ Павел, Ен кӧсйӧм серти Исус Кристослӧн апостол. Менӧ мӧдӧдӧма висьтавны кӧсйысьӧм пыр сетӧм олӧм йылысь. Тайӧ олӧмыс Исус Кристос пытшкын.
Бурсетӧм, буралӧм да лӧнь олӧм тэныд, муса Тимофей пиӧй, Ен Батьсянь да миян Господь Исус Кристоссянь.
Лун и вой аслам кевмысьӧмъясын ме пыр казьтывла тэнӧ да ошка Енмӧс, ме кесъяла Сылы батьясным моз сӧстӧм сьӧлӧмӧн. Тэнад синваыд оз вунлы менам. Та вӧсна ёна кӧсъя аддзӧдчывны тэкӧд, медым тырны нимкодьлунӧн. Казьтывла тэнсьыд сьӧлӧмсянь эскӧмтӧ. Тадзи эскылісны тэнад Лоида пӧчыд да Евника мамыд. Тӧда, тэ тшӧтш на моз эскан.
Та вӧсна, казьтышта тэныд: эн кусӧд Енсянь сетӧмторлысь бисӧ. Тайӧ сетӧмторсӧ тэ сибӧдін менам ки пуктылӧм пыр.
Енмыс ӧд сетіс миянлы эз полӧмыслысь лов, а выныслысь, муслуныслысь да бур мывкыдыслысь лов.
Сідзкӧ, эн яндысь висьтавлыны Господьным йылысь. Эн яндысь и меысь, Кристос вӧсна дзескыдінӧ йӧртӧмаысь.
Мӧдарӧ, Ен вынӧн тэ тшӧтш ну Бур Юӧр вӧсна сьӧкыдсӧ. Енмыс ӧд мездіс миянӧс да корис вежа олӧмас эз миян уджъясным вӧсна, а Аслас шуӧмыс да буралӧмыс вӧсна, кодӧс Сійӧ сетӧма миянлы олӧм пуксьытӧдзыс на Исус Кристос пытшкын. Ӧні миян Мездысь Исус Кристослӧн локтӧмыс восьтіс буралӧмсӧ. Кристос бырӧдіс кулӧмсӧ да Бур Юӧр пыр восьтіс олӧмсӧ да бырлытӧмсӧ. Та вылӧ менӧ и пуктӧма, медым висьтавлыны Бур Юӧрсӧ, апостолавны да велӧдны мукӧд войтырӧс.
Дзик та вӧсна ме ӧні сьӧкыдсӧ нуа да ог яндысь таысь, ӧд ме тӧда, кодлы ме эска.
Тӧда, Сійӧ вына видзны меным сетӧмасӧ Аслас локтан лунӧдз.
Кутчысь месянь кывлӧм веськыд велӧдӧмас Исус Кристоссянь босьтӧм эскӧмнад да муслуннад.
Видз тэныд сетӧм бурсӧ Вежа Лов отсӧгӧн, коді олӧ сьӧлӧманым.
Тэ тӧдан, Асияын ставныс эновтісны менӧ, весиг Фигел Ермогенкӧд.
Господь мед лоас бур сьӧлӧма Ӧнисифорлӧн гортса дінӧ, ӧд сійӧ унаысь ышӧдліс менӧ да эз яндысьлы менам пукалӧмысь. Римӧ волігас сійӧ быдлаысь корсис менӧ да аддзис.
Мед Господь лоас бур сьӧлӧма сы дінӧ Аслас локтан лунӧ. Мыйтӧм сійӧ отсасис меным Ефесын, тэ бурджыка тӧдан.
2 юр.
Ёнмӧдчы, муса пиӧй, Исус Кристослӧн буралӧмнас. Ставсӧ, мый тэ кывлін месянь уна йӧз дырйи, юксьы эскана йӧзкӧд, кодъяс сяммасны велӧдны мукӧдӧс.
Исус Кристослӧн бур тышкасьысь моз ло дась нуны сьӧкыдсӧ.
Шыпурта морт кольӧ быдлунъя тӧждъяссӧ, медым шогмыны веськӧдлысьыслы.
Панласьысь кӧ торкас ордйысянногсӧ, сылы оз шед вермысьлӧн нимыс.
Быдтасысь пайсӧ медводз босьтӧ сьӧкыд удж вӧчысь.
Вежӧрт, мый висьтала.
Господь мед отсалас тэныд ставсӧ гӧгӧрвоны.
Кут тӧд вылад Исус Кристосӧс, Давид вужйысь Чужысьӧс да кулӧмысь Ловзьысьӧс. Тадзи висьталӧ меӧн юӧртӧм Бур Юӧрыс. Тайӧ юӧр вӧснаыс ме и нуа сьӧкыдсӧ. Менӧ дорисны лёк вӧчысьӧс моз, но Енлысь Кывсӧ абу дорӧма.
Та вӧсна ме муна став сьӧкыд пырыс. Вӧча тайӧс Енлӧн бӧрйӧмаяс вӧсна, медым найӧ тшӧтш босьтісны Исус Кристоссянь мездмӧмсӧ да помасьлытӧм дзирдлунсӧ.
Тайӧ кывйыс эскана:
— Ми кӧ кулім Сыкӧд, Сыкӧд пондам овны.
Мунам кӧ сьӧкыдыс пыр, Сыкӧд пондам ыджыдавны.
Соссям кӧ Сыысь, Сійӧ соссяс миянысь.
Ми кӧ эновтам Сійӧс, Сійӧ оз эновт миянӧс, ӧд Ачыс Ассьыс соссьыны оз вермы.
Казьтыв тайӧс да Господь водзын ӧлӧд кывъяс понда венӧ пырӧмысь. Ӧд тайӧ бурсӧ оз вай, сӧмын виӧ кывзысьясӧс.
Тӧждысь шогмыны Енлы, аслад уджысь эн яндысь, збыльсӧ висьтав веськыда.
Ковтӧм сёрниысь ылыстчы, ӧд татшӧмъясыс лунысь-лун пондасны ёнджыка сетчыны Ентӧг олӧмас. Налӧн велӧдӧмыс рак висьӧм моз паськалӧ.
Именей да Филит тшӧтш на лыдынӧсь. Найӧ кежисны збыльсьыс, висьталӧны, ловзьӧмыс пӧ вӧлі нин. Татшӧм сёрнинас найӧ жугӧдӧны кодсюрӧлысь эскӧмсӧ.
Но Енмӧн пуктӧм подулыс вӧрзьывтӧм. Сэтчӧ пасйӧма: «Господь тӧдӧ Ассьыс йӧзсӧ», нӧшта пасйӧма: «Господьлысь нимсӧ висьталысь мед эновтчас лёксьыс».
Ыджыд керкаад абу сӧмын зарни да эзысь дозъяс, эмӧсь и пу да сёй дозъяс.
Ӧтияснас вӧдитчӧны торъя лунъясӧ, мӧдъяснас — быд лун.
Коді весалӧма асьсӧ став пежсьыс, сійӧ зарни да эзысь доз кодь: вежа, ыджыдыслы ёна колана да бур уджъяс вылӧ шогмана.
Ылыстчы томдырся ыштӧмъясысь. Ен дінӧ сьӧлӧмсяньыс шыасьысьяскӧд кутчысь веськыдлунас, эскӧмас, муслунас да лӧньлунас.
Ковтӧм да мывкыдтӧм вензьӧмъясысь ылыстчы. Тӧд, тайӧ вайӧдӧ зыксьӧмӧдз.
Господьлӧн кесйӧг оз вензьы, мӧдарӧ, сійӧ быдӧнкӧд мелі, кужӧ велӧдны да оз дӧзмы. Сійӧ рам сьӧлӧмӧн туйдӧдӧ паныд мунысьясӧс, гашкӧ, Енмыс сетас налы позянлун бергӧдчыны мыжъяссьыныс да тӧдмавны збыльсӧ. Сэки найӧ казяласны да мынасны омӧльыслӧн налькйысь, ӧд омӧльыс кыйӧма найӧс, медым веськӧдлыны.
3 юр.
Тӧд, бӧръя лунъясӧ пуксяс сьӧкыд кад.
Йӧзыс пондасны радейтны сӧмын асьнысӧ, ыштыны сьӧм вылӧ, пондасны ошйысьны, асьнысӧ вылӧ пуктыны, Енсӧ омӧльтны, бать-мамсӧ оз кутны кывзыны. Найӧ ӧдйӧ вунӧдӧны бурсӧ, эскытӧмӧсь, чорыд сьӧлӧмаӧсь, оз бурасьны, суклясьӧны, асьнысӧ оз кутны, скӧрӧсь, бурсӧ мустӧмтӧны, ӧта-мӧдсӧ вузалӧны, этшсӧ оз тӧдны да тшапӧсь. Енмыс дорысь налы мусаджык лышкыда олӧмыс. Ортсысяньыс видзӧдны кӧ, найӧ кутчысьӧны вежавидзӧмӧ, но, збыльвылас, найӧ оз эскыны Енмыслӧн вынӧ.
Татшӧмъяссьыс ылыстчы.
Кодсюрӧ на пӧвстысь наяна пырӧны керкаясӧ да кыскӧны асланьыс коньӧр аньясӧс, кодъяс оз вермыны мынтӧдчыны асланыс мыжъясысь да кокньыда сетчӧны асланыс кӧсйӧмъясӧ. Найӧ ӧтарӧ велӧдчӧны, но збыльыс налы оз пуксьы вежӧрас.
Кыдзи коркӧ Янний да Ямврий паныд сувтісны Мӧисейлы, ӧні тайӧ йӧзыс паныд сувтӧны збыльыслы. Налӧн вежӧрыс торксьӧма да эскӧмыс абу шогмана.
Но найӧ оз кутны дыр нимавны, Мӧисейлы паныд сувтысьяслӧн моз налӧн йӧйталӧмыс тыдовтчас.
Тэ став сьӧлӧмнад йитчин менам велӧдӧмӧ, менам олӧмӧ да менам могъясӧ. Мекӧд тшӧтш тэ эскин, терпитін, радейтін да зумыда сулалін, кор менӧ суисны Антиокияын, Иконияын да Листраын вӧтлӧмъяс да сьӧкыдлунъяс. Ме муні сэки ыджыд вӧтлӧмъяс пыр, и Господь ставсьыс менӧ мездіс.
Быдӧнӧс, коді кӧсйӧ овны вежа олӧмӧн Исус Кристос пытшкын, пондасны вӧтлыны.
А лёк да пӧръясьысь йӧзлӧн лёк вӧчӧмыс кутас содны. Найӧ унаӧс ылӧдасны, асьныс тшӧтш ылаласны.
А тэ зумыда кутчысь сэтчӧ, мыйӧ тэнӧ велӧдӧма да мыйӧ тэ эскин. Тэ ӧд тӧдан, коді велӧдіс тэнӧ.
Тэ ичӧтсяньыд тӧдан вежа Гижӧдъяс. Гижӧдыс сетӧ мывкыдлун, медым Исус Кристослы эскӧмӧн тэ вермин мездмыны.
Ставнас Гижӧдыс Ен Ловсянь да вайӧ сӧмын бур. Сійӧ велӧдӧ, янӧдӧ, вежӧ да туйдӧдӧ веськыд олӧмас, медым Енлӧн морт вӧлі тыр-бур да вӧлі дась вӧчны быдпӧлӧс бур уджсӧ.
4 юр.
Ен водзын да Господь Исус Кристос водзын, коді кутас мыждыны ловъяясӧс да кулӧмаясӧс, Сылысь локтӧмсӧ да Юралӧмсӧ тӧд вылын кутӧмӧн кора тэнӧ: ло дась висьтавны Енлысь Кывсӧ лӧсялан и лӧсявтӧм кадӧ. Бур велӧдысь моз терпитӧмӧн янӧд, ӧлӧд да туйдӧд.
Ӧд воас кад, веськыд велӧдӧмсӧ оз пондыны кывзыны. Бӧръясны аслыныс сьӧлӧм сертиыс велӧдысьясӧс, медым найӧс кывзыны. Пельнысӧ тупкасны збыльыслы да бергӧдчасны мойдъяслань.
Но мед тэнад вежӧрыд лоӧ ясыд быдторйын, сьӧкыд нуигъясад кутчысь, висьтавлы Бур Юӧрсӧ да кесъяв помӧдз.
Ӧні ме Ен водзӧ вайӧм вись кодь, воис кад меным мунны.
Ме бура вермаси, помӧдзыс котӧрті, эскӧмӧс видзи.
Ӧні менӧ виччысьӧ веськыдлуныслӧн юркытш. Веськыда мыждысь Господь Аслас лунӧ сетас сійӧс меным да быдӧнлы, коді став сьӧлӧмнас виччысьӧ Сылысь локтӧмсӧ.
Тэрмась локны ме дінӧ регыдъя кадӧ.
Димас колис менӧ да муніс Фессалоникаӧ. Сылы тайӧ мувывса олӧмыс мусаджык вӧлӧма. Крискент муніс Галатияӧ, Тит — Далматияӧ, ӧтнас Лука мекӧд.
Босьт аскӧдыд Маркӧс, сійӧ бур отсасьысь менам уджын.
Тихикӧс ме мӧдӧді Ефесӧ.
Локтігад вай менсьым кышанӧс, сійӧс ме коли Троадӧ Карп ордӧ. Босьт нӧшта менсьым небӧгъясӧс, торйӧн нин кучик вылӧ гижӧмасӧ.
Уна лёк меным вӧчис кузнеч Ӧльӧксан.
Господь Ачыс мед перъяс сылысь водзӧссӧ став уджсьыс.
Видзчысь сыысь. Сійӧ ёна паныд муніс миян велӧдӧмлы.
Ёрдын медводдза дорйысигӧн некод эз сувт ме дор, ставныс эновтісны менӧ.
Мед оз ло лыддьӧма тайӧс налы мыжӧн.
Ачыс Господь вӧлі ме дор. Сійӧ ёнмӧдіс менӧ, медым ме верми тырвыйӧ буръюӧртны, медым став кыла войтырыс кылісны тайӧ Бур Юӧрсӧ. Господь мездіс менӧ весиг лев вомысь.
Тӧда, Сійӧ видзас менӧ став лёксьыс, мездас да вайӧдас Аслас енэжвыв Юраланінӧ. Ошкӧм Сылы нэмъяс чӧж.
Аминь.
Висьтав чолӧм Прискиллалы да Акиллы, тшӧтш Ӧнисифорлӧн гортсалы.
Ераст кольччис Коринфӧ, Трӧпимӧс ме кольӧді Милитӧ, висьмис да.
Вермӧдчы локны тӧлӧдзыс.
Тэныд ыстӧны чолӧм Еввул, Пуд, Лин, Клавдия да став вокъяс.
Господь Исус Кристос тэкӧд.
Енлӧн буралӧмыс тіянкӧд.
Аминь.
Апостол Павеллӧн Титлы мӧдӧдӧм гижӧд
1 юр.
Гижӧ Павел, Енлӧн кесйӧг да Исус Кристослӧн апостол. Менӧ мӧдӧдӧма, мед отсавны Енлӧн бӧрйӧмаяслы эскыны да тӧдны збыльсӧ, медым эськӧ найӧ вермисны овны вежавидзӧмӧн да помтӧм олӧм вылӧ лачаӧн. Помтӧм олӧмсӧ Ен кӧсйысис му пуксьытӧдзыс на, и Ассьыс кывсӧ Сійӧ оз веж. Ас кадӧ Сійӧ сетіс тӧдны кывсӧ бурвисьталӧм пыр, та вылӧ менӧ и сувтӧдіс. Тайӧ вӧлі Ен Мездысьнымлӧн тшӧктӧм. Чолӧмала тэнӧ, Тит. Ӧтувъя эскӧманым тэ меным збыльысь пи кодь.
Бурсетӧм, буралӧм да лӧнь олӧм тэныд Ен Батьсянь да миян Мездысь Исус Кристос Господьсянь.
Ме коли тэнӧ Критӧ, мед тэ эштӧдін сэні помавтӧмторсӧ да быд карын индін вичкоса юрнуӧдысьясӧс, кыдзи тай ме тэныд тшӧктылі. Юрнуӧдысь мед вӧлі бур оласнога, ӧти гӧтыра, ныв-пиыс мед эскисны, быдторйын кывзысисны да лэдзчысьӧмӧн эз овны, на йылысь мед эз кыв лёк сёрни.
Вичкоса веськӧдлысьӧн вермӧ лоны сӧмын бур оласнога морт, ӧд сылы сетӧма вӧчны Енлысь удж. Мед сійӧ эз вӧв асныра, эз вӧв дӧзмысь, эз ю, эз усьлась мукӧд вылӧ, аслыс эз курав, ветлысь-мунысьӧс мед сибӧдіс, бурсӧ радейтіс, вӧлі сюсь вежӧра, быдторйын веськыд, вежавидзысь да кужис асьсӧ кутны. Сійӧ мед вӧлі зумыда кутчысьӧма велӧдӧмыслӧн збыль кывъясӧ, кужис веськыд велӧдӧмнас туйдӧдны мукӧдӧс да вермис янӧдны паныд мунысьӧс.
Ӧд унаӧн аснырасьӧны, ковтӧмсӧ сёрнитӧны да мукӧдсӧ пӧрйӧдлӧны, и унджыкыс найӧ вундыштчӧмаяс пӧвстысь. Татшӧмъясыслысь колӧ тупкыны вомсӧ.
Яндысьтӧм горшлунныс вӧсна найӧ асланыс велӧдӧмӧн шӧйӧвоштӧны дзонь керкаяс, мыйӧ оз ков велӧдӧны.
Налӧн асланыс гижысьыс весиг шулӧма:
— Критсаяс — пӧръясьысьяс, скӧр понъяс, горш кӧинъяс да дыш руньӧяс.
Веськыда шуӧма.
Та вӧсна чорыда янӧд татшӧм йӧзсӧ, медым налӧн эскӧмыс вӧлі веськыд. Найӧ мед оз кывзыны юдейяслысь мойдъяссӧ да йӧзлысь ас лӧсьӧдӧм тшӧктӧмъяссӧ. Татшӧм йӧзыс ӧд кежӧмаӧсь збыльсьыс.
Сӧстӧмлы ставыс сӧстӧм, а пежасьӧмалы да эскытӧмлы нинӧм абу сӧстӧм. Налӧн пежасьӧма вежӧрыс, весиг сьӧлӧмыс.
Найӧ шуӧны, тӧдам пӧ Енсӧ, но уджыс налӧн мӧдтор йылысь висьталӧ. Найӧ мустӧмӧсь, кывзысьтӧмӧсь и бурсӧ вӧчны оз сяммыны.
2 юр.
Тэ висьтавлы веськыд велӧдӧмыслы лӧсяланасӧ. Олӧма айуловӧс велӧд лоны авъяӧн, садь да сюсь вежӧраӧн. Мед найӧ топыда кутчысясны эскӧмас, муслунас да зумыдлунас. Олӧма аньяс мед оласны вежавидзӧмӧн, оз суклясьны, вина оз юны, туйдӧдасны томджыкъясӧс бурас, велӧдасны найӧс радейтны верӧснысӧ да ныв-писӧ, медым эськӧ том аньяс вӧліны сюсь вежӧраӧсь, сӧстӧм сьӧлӧмаӧсь, шаньӧсь, мед тӧждысясны гортныс вӧсна да кывзысясны верӧсныслысь. Сэки Ен Кывсӧ оз ло омӧльтӧма.
Зонъясӧс тшӧтш велӧд лоны сюсь вежӧраӧн.
Вӧч быд бурсӧ, мед мукӧдыс тэ вылӧ видзӧдӧмӧн тшӧтш велаласны татчӧ. Велӧд сӧстӧм сьӧлӧмӧн, вежавидзӧмӧн да Кывсӧ торкавтӧг. Сёрнит веськыда да тырвыйӧ эскӧд, медым паныд мунысь яналас да оз вермы шуны миян йылысь нинӧм лёксӧ.
Кесйӧгъяс мед быдторйын кывзысясны асланыс ыджыдныслысь, зілясны кывшутӧг шогмыны сылы. Мед оз гусясьны, мӧдарӧ, быдторйын мед петкӧдласны, мый налы позьӧ тырвыйӧ эскыны. Сэки на пыр пыдди пуктӧма лоӧ Ен Мездысьнымлысь велӧдӧмсӧ.
Енмыс петкӧдліс Ассьыс буралӧмсӧ, медым став йӧзсӧ мездыны. Буралӧмыс велӧдӧ миянӧс, мед ми эновтчим Ентӧг олӧмсьыс да быдпӧлӧс мувывса ыштӧмсьыс, вӧлім сюсь вежӧраӧсь тайӧ нэмас, олім веськыда да вежавидзӧмӧн, виччысим вына Енлысь да миян Мездысь Исус Кристослысь дзирдлуна воссьӧмсӧ да шуда лачанымлысь збыльмӧмсӧ. Кристос сетіс Асьсӧ миян вӧсна, медым мездыны миянӧс быд лёксьыс, сӧстӧммӧдны миянӧс да торйӧдны Аслыс войтырӧс, коді сьӧлӧмсяньыс пондас вӧчны бурсӧ.
Тадзи велӧд, ышӧд да янӧд тэныд сетӧм вынӧн. Эн сет асьтӧ некодлы увтыртны.
3 юр.
Казьтыв эскысьяслы, медым кывзысясны юралысьяслысь да пуктӧм йӧзлысь, пыдди пуктасны налысь веськӧдлӧмсӧ да лоасны дасьӧсь вӧчны быд бурсӧ. Мед оз омӧльтны некодӧс, зыкӧ оз пырны, лоасны шаньӧсь да быдӧнкӧд рамӧсь.
Ми ӧд асьным коркӧ вӧлім вежӧртӧмӧсь да кывзысьтӧмӧсь, вошӧмаӧсь олӧмас, сетчӧмаӧсь ыштӧмас да быдпӧлӧс ковтӧм гажӧдчӧмас. Олім лёк пытшкас, вежалім, вӧлім мустӧмӧсь, да мукӧдсӧ тшӧтш мустӧмтім.
Но Ен Мездысьным петкӧдліс миян дінӧ Ассьыс бурлунсӧ да муслунсӧ. Сійӧ мездіс миянӧс. Мездіс эз веськыд уджъясным серти, но Аслас буралӧмыс вӧсна. Ен мыськаліс миянӧс да сетіс миянлы выльысь чужны. Сійӧ выльмӧдіс миянӧс Вежа Ловнас. Исус Кристос Мездысьным пыр Сійӧ лышкыда кисьтіс миян пытшкӧ Вежа Ловсӧ, медым Сылӧн буралӧмсянь ми лоим веськыдӧсь да миянлы вичмис помтӧм олӧм. Тайӧ и эм миян лачаным.
Тайӧ кывъясыс эсканаӧсь. Ме кӧсъя, мед тэ тӧдчӧдӧмӧн пыр казьтылін тайӧс, медым Енлы эскысьяс тӧждысисны бурсӧ вӧчны. Тайӧ бур да йӧзыслы колана.
Тӧлктӧм вензяна сёрниысь, ордпу да Индӧд кузя зыксьӧм-пинясьӧмысь ылыстчы. Ставыс тайӧ ковтӧмтор да весьшӧрӧ.
Ылӧгас кежӧдысьӧс ӧтчыд да мӧдысь ӧлӧдӧм бӧрын эновт. Тӧд, татшӧм мортыс тшыкӧма, мыж вӧчӧмнас сійӧ ачыс асьсӧ мыждӧм улас сюйӧ.
Артемӧс либӧ Тихикӧс кор мӧдӧда тэ дінӧ, тэрмась волыны ме дінӧ Никопольӧ. Сэні тай шуи тӧвйынысӧ.
Отсав петны туйӧ оланпас тӧдысь Зинейлы да Аполослы, медым налы ставыс вӧлі судзсяна-тырмана.
Миян эскысьяс мед тшӧтш велӧдчасны бурсӧ вӧчны, сетны колана отсӧг, сэки найӧ вотӧстӧг оз кольны.
Чолӧм тэныд ыстӧны тані ставныс.
Висьтав чолӧм миянӧс радейтысь эскысь чой-воклы.
Енлӧн буралӧмыс ставныдкӧд тіянкӧд.
Аминь.
Апостол Павеллӧн Филимонлы мӧдӧдӧм гижӧд
1 юр.
Гижӧ Павел. Исус Кристос вӧсна ме пукала дзескыдінын. Тимофей воккӧд ми чолӧмалам муса Филимон уджъёртнымӧс. Чолӧмалам дона Апфия чойӧс да миянкӧд ӧтвыв вермасьысь Аркип ёртӧс да сы ордын чукӧртчысь эскысьясӧс.
Буралӧм да лӧнь олӧм тіянлы Ен Батьнымсянь да Господь Исус Кристоссянь.
Кевмысигам пыр казьтывла тэнӧ да аттьӧала Енмӧс. Ме кывлі Исус Господьлы тэнад эскӧм йылысь да став вежа войтыр дінӧ муслуныд йылысь. Кевмыся, медым миян ӧтувъя эскӧмным отсалас тэныд тӧдны быд бурсӧ, кодӧс сетӧма тіянлы Исус Кристос пытшкын.
Вокӧй, тэнад муслуныд ёна долыдмӧдӧ да ышӧдӧ миянӧс, ӧд тэ лӧньӧдан вежа войтырлысь сьӧлӧмсӧ.
Ме, дерт, верма Кристос нимӧн тшӧктыны тэныд вӧчны коланасӧ, но муслунӧй вӧсна шыася тэ дінӧ корӧмӧн. Ме, пӧрысь Павел, Исус Кристос вӧсна пукалысь, кора тэнӧ Ӧнисим пиӧй вӧсна. Сійӧс ме чужті тані дзескыдінын. Коркӧ сійӧ ковтӧм вӧлі тэныд, ӧні ёна колана тэныд да меным.
Ме бӧр мӧдӧда сійӧс тэ дінӧ.
Сибӧд сійӧс сьӧлӧм бердысь чуктӧдӧмторйӧс моз.
Кӧсйи сійӧс кольӧдны ас дінӧ, мед тэ пыдди отсасьыштас меным Бур Юӧр вӧсна пукалігӧн.
Но тэнад шутӧг нинӧм ог кӧсйы вӧчны, мед эськӧ тэ бурсӧ вӧчин ас кӧсйӧмӧн, а эн мырдӧн.
Гашкӧ, и колӧ вӧлі сылы кад кежлӧ тэкӧд янсӧдчывнысӧ, медым сэсся тэ сибӧдін сійӧс пыр кежлӧ. Сибӧдін эн нин кесйӧгӧс моз, но кесйӧгысь донаджыкӧс — муса вокӧс моз. Меным сійӧ ёна муса. Но тэныд сійӧ, кыдзи ас морт да нӧшта Господьсянь вок, ёна мусаджык на.
Тэ кӧ шуан менӧ аслад вокӧн, сибӧд сійӧс менӧ моз.
Тэнӧ кӧ сійӧ мыйӧнкӧ дойдіс-дӧзмӧдіс либӧ уджйӧза тэныд, ӧшӧд ставсӧ ме вылӧ.
Ме, Павел, аслам киӧн пасъя: «Ме мынтыся».
Шуны кӧ, тэ ачыд став олӧмнад меным уджйӧза.
Вокӧй, Господь нимсянь вӧч меным тайӧ бурторсӧ, лӧньӧд менсьым сьӧлӧмӧс Господь вӧсна.
Ме эска, тэ кывзысян, та вӧсна и гижа. Тӧда, тэ вӧчан унджык на менам корӧм дорысь.
Нӧшта кора, корсьлы меным оланін.
Лача кута, тіян кевмысьӧм отсӧгӧн Енмыс бӧр вайӧдас менӧ тіян дінӧ.
Чолӧм Епафрассянь, сійӧ мекӧд пукалӧ Кристос вӧсна. Марк, Аристарк, Димас да Лука, менам уджъёртъяс, тшӧтш ыстӧны чолӧм.
Миян Господь Исус Кристослӧн буралӧмыс тіянкӧд.
Аминь.
Апостол Павеллӧн еврейяслы мӧдӧдӧм гижӧд
1 юр.
Енмыс важысянь унаысь да уна ногӧн шыасьліс миян батьяс дінӧ пророкъяс пыр. Тайӧ бӧръя кадас Сійӧ шыасьліс миян дінӧ Пиыс пыр. Енмыс сетіс Сылы ставсӧ, Сы пыр вӧчис ентыкӧласӧ.
Пиыс — Енлӧн яръюгыд дзирдлуныс, Сылӧн пертасыс. Сійӧ ставсӧ кутӧ Аслас вына кывнас. Аслас Вирнас Сійӧ мыськаліс миянлысь мыжъяснымӧс, пуксис Вына Енлӧн веськыдладорӧ енэжас да лои анделъясысь вылынджык на. Сылӧн нимыс ёна тӧдчанаджык налӧн нимысь.
Ӧд ни ӧти анделлы Енмыс эз шулы:
— Тэ — Менам Пи, талун Ме лои Тэнад Батьӧн.
Ни ӧти андел йылысь Енмыс эз шулы:
— Ме лоа Сылӧн Батьӧн, Сійӧ — Менам Пиӧн.
Муюгыдас Ассьыс медводдза Чужысьсӧ пыртігӧн Енмыс шуӧ:
— Копыртчылӧй Сылы ставныд, Енлӧн анделъяс.
Анделъяс йылысь Енмыс висьталӧ:
— Ассьыс анделъяссӧ Енмыс вӧчӧ тӧвнырӧн, Ассьыс кесъялысьяссӧ — ыпъялан биӧн.
Пиыс йылысь Енмыс тадзи висьталӧ:
— Енмӧй, Тэнад юралан пуклӧсыд нэмъяс чӧж.
Тэнад веськӧдлан беддьыд — веськыдлун.
Веськыдлуныс Тэныд муса, а лёксӧ Тэ мустӧмтан.
Та вӧсна, Енмӧй, Тэнад Енмыд мавтыштіс Тэнӧ нимкодьлунӧн мукӧд дорысь ёнджыка на.
Нӧшта Енмыс шуӧ:
— Господьӧй, медводз Тэ вӧчин мусӧ, енэжыс тшӧтш Тэнад вӧчӧмтор, найӧ бырасны, а Тэ помтӧг олан. Ставыс тайӧ паськӧм моз важмас. Кӧлуйӧс моз Тэ гартыштан найӧс, да найӧ вежсясны, а Тэ некор он вежсьы. Тэнад олан лунъяслы помыс оз ло.
Некутшӧм анделлы Енмыс эз шулы:
— Пукав Менам веськыдладорын, кытчӧдз ог пукты Тэнад кок улӧ Тэныд паныд мунысьясӧс.
Анделъяс — тайӧ кесъялысь ловъяс. Енмыс мӧдӧдӧ найӧс кесъявны налы, кодъяслы вичмас мездмӧмыс.
2 юр.
Та вӧсна, миянлы ёнджыка на колӧ кутчысьны кывлӧмаыс дінӧ, медым эгӧ ылалӧй.
Ӧд анделъяс пыр висьталӧм юӧрыс кӧ вӧлі вына, да быд кывзысьтӧмлунысь да лёк вӧчӧмысь кӧ мыждылісны веськыда, сідзкӧ, мынам-ӧ ми мыждӧмсьыс, кутам кӧ нинӧм туйӧ пуктыны тайӧ ыджыдторсӧ — мездмӧмсӧ? Тайӧ мездмӧмыс йылысь медводз висьталіс Господь, сэсся Сысянь кылысьяс эскӧдісны миянӧс, мый тайӧ висьталӧмыс збыль. Тайӧ висьталӧмсӧ Енмыс ёнмӧдіс тадзи: висьталысьяс пыр Сійӧ петкӧдліс индысьпасъяс, вӧчис шензьӧданаторъяс да быдпӧлӧс ыджыд уджъяс, Ас кӧсйӧм сертиыс Сійӧ юкліс Вежа Ловсянь сетӧмторъяс.
Енмыс эз сет анделъяслы веськӧдлыны локтана муюгыднас, мый йылысь ми сёрнитам.
Кодкӧ гижлӧма та йылысь:
— Мортыс — коді сэтшӧмыс, мый Тэ казьтывлан сійӧс?
Мортлӧн пиыс — коді сэтшӧмыс, мый Тэ тӧждысян сы вӧсна?
Сӧмын дженьыд кад кежлӧ Тэ пуктін мортсӧ анделъяс дорысь улӧджык, мичмӧдін сійӧс дзирдлунӧн да нимӧдӧмӧн, сувтӧдін сійӧс веськӧдлыны Аслад вӧчӧмторнад. Тэ ставсӧ пуктін сы кок улӧ.
Енмыс ставсӧ сетіс морт кипод улӧ, сылы нинӧм эз коль сеттӧмыс.
Дерт, ӧні оз на тыдав, мый ставсӧ нин сетӧма морт кипод улӧ.
Но ми аддзам Исусӧс, кодӧс дженьыд кад кежлӧ вӧлі улӧджык пуктӧма анделъяс дорысь. Енлӧн буралӧмыс вӧсна Сійӧ куліс став йӧзыс понда. Тайӧ сьӧкыда кулӧм вӧснаыс Исусӧс ӧні мичмӧдӧма дзирдлунӧн да нимӧдӧмӧн.
Енмыс, Ставсӧвӧчысь да Ставсӧкутысь, уна ныв-пиӧс кӧсйӧ вайӧдны Аслас дзирдлунӧ. Та вӧсна Исуслы, мездмӧмас Нуӧдысьлы, Енмыс лэдзис нуны сьӧкыдсӧ, медым Сы пыр помӧдз вайӧдны Ассьыс мӧвпыштӧмсӧ.
Вежӧдысьыс да вежа войтырыс — ӧти Батьсянь.
Та вӧсна Исус оз яндысь шуны вежа войтырӧс Аслас вокъясӧн. Сійӧ шуӧ:
— Ме висьтала Тэ йылысь Аслам вокъяслы, нимӧда Тэнӧ вичко водзын.
Нӧшта шуӧ:
— Ме кута лача Ен вылӧ,
да содтӧ:
— Со, Ме да ныв-пи, кодъясӧс сетіс Меным Ен.
Тайӧ ныв-пиыслӧн эм вир-яй. Та вӧсна Кристос тшӧтш лоис на кодьӧн, медым кувлӧмнас бырӧдны омӧльӧс, кулӧмыс вылын ыджыдалысьӧс, да мездыны кулӧмысь полысьясӧс. Ӧд став олӧм чӧжныс найӧ вӧліны полӧмыслӧн кӧртӧд улынӧсь.
Кристос тӧждысьӧ Ӧвраамсянь чужысьяс вӧсна, а оз анделъяс вӧсна.
Кристослы ковмис лоны морт кодьӧн, Аслас вокъяс кодьӧн, медым лоны Сылы бур сьӧлӧма да Енлысь кывзысьысь Аркирейӧн, да медым босьтны Ас вылас йӧзлысь мыжъяссӧ.
Кристос Ачыс нуис сьӧкыдсӧ да ыштӧдӧмсӧ, та вӧсна вермӧ отсавны ыштӧдӧмаяслы.
3 юр.
Вокъяс, ме шыася тіян дінӧ, вежа войтыр да Енлӧн корӧмаяс дінӧ: видзӧдӧй Исус Кристос вылӧ. Сійӧ — Енсянь Локтысь, Аркирей, Сылы ми эскам. Енмыс сувтӧдіс Сійӧс Аркирейӧн. Сійӧ кесъяліс Енмыслы кывзысьӧмӧн, кыдзи Мӧисей «быд кадӧ кывзысьӧмӧн кесъяліс Ен керкаын».
Керка вӧчысьсӧ ёнджыка ошкӧны керкасӧ дорысь. Тадзи Исусӧс ёнджыка шогмӧ ошкыны Мӧисейӧс дорысь. Быд керкалӧн эм аслас вӧчысь, но Ставсӧвӧчысьыс — Ен.
Мӧисей «кывзысьӧмӧн кесъяліс Ен керкаын», но сійӧ вӧлі сӧмын кесъялысь. Аслас олӧмнас сійӧ водзвыв петкӧдліс, мый Енмыс кӧсйис висьтавны бӧрынджык. Ен керкаын Пиыс — Кристос, Сійӧ кывкутӧмӧн веськӧдлӧ ставнас Ен керканас. Ен керкаыс — тайӧ ми, лоам кӧ повтӧмӧсь да помӧдз кутам зумыда кутчысьны лачаас, мыйӧн ошйысям.
Вежа Лов висьталӧ:
— Талун, Енлысь гӧлӧс шысӧ кылігӧн, энӧ чорзьӧдӧй сьӧлӧмнытӧ, кыдзи ті вӧчинныд овтӧминын: кыпӧдчинныд Меным паныд да дӧзмӧдінныд Менӧ. Сэні тіян батьясныд нелямын во чӧж аддзылісны Менсьым уджъясӧс, да ыштӧдісны-дӧзмӧдісны Менӧ.
Сэки Ме дӧзми на вылӧ да шуи: «Найӧ пыр ылалӧмаӧсь», Менам туйӧд оз ветлыны.
Та вӧсна Ме дӧзми на вылӧ да сеті кыв: «Найӧ оз пырны Менам шойччанінӧ».
Вокъяс, видзчысьӧй, тіян пиысь мед некод эз вӧв эскытӧмӧн, эз ов лёк мӧвпъясӧн, медым энӧ кежӧй ловъя Енсьыс.
Быд лун ышӧдӧй ӧта-мӧднытӧ, кытчӧдз позьӧ на шуны “талун”, мед тіян пиысь некодлӧн эз чорзьы сьӧлӧмыс мыжлӧн ылӧдлӧм вӧсна.
Ми кӧ водзысяньыс моз помӧдз кутам эскыны зумыда, сэки миянлы тшӧтш вичмас Кристослӧн озырлуныс.
Та йылысь шуӧма:
— Талун, Енлысь гӧлӧс шысӧ кылігӧн, энӧ чорзьӧдӧй сьӧлӧмнытӧ, кыдзи ті вӧчинныд Меным паныд сувтігӧн.
Ӧд Енлысь гӧлӧс шысӧ кылысьяс пиысь кодсюрӧ паныд сувтісны Енмыслы, но эз ставныс, кодъяс петісны Мӧисейкӧд Египетысь.
Код вылӧ нӧ Енмыс скӧраліс нелямын во чӧжсӧ?
Эз-ӧ мыж вӧчысьяс вылӧ, кодъяслӧн лыясыс колины овтӧминӧ?
Кодлы нӧ Енмыс кыв сетіс, мый найӧ оз пырны Сылӧн шойччанінӧ? Эз-ӧ кывзысьтӧмъяслы?
Ми аддзам, мый эскытӧм вӧснаныс найӧ эз пырны Ен шойччанінӧ.
4 юр.
Енлӧн кӧсйысьӧмыс, мый ми вермам пырны Сылӧн шойччанінӧ, ӧнӧдз на вына. Сідзкӧ, кутам тӧждысьны, мед тіян пиысь некод эз сёрмы пырны Ен шойччанінӧ.
Египетысь петысьяслы вӧлі висьталӧма Бур Юӧрсӧ миянлы моз, но тайӧ нинӧм эз сет налы, ӧд найӧ эз эскыны тайӧ юӧрыслы да эз сибӧдны сійӧс сьӧлӧманыс.
Ми эским тайӧ юӧрыслы, сідзкӧ, пырам Ен шойччанінӧ.
Тайӧ шойччанін йывсьыс шуӧма:
— Ме скӧрми тайӧ йӧзыс вылӧ да сеті кыв: «Найӧ оз пырны Менам шойччанінӧ».
Енмыс шуис тадзи, кӧть муюгыдсӧ вӧчӧм бӧрын Сылӧн дасьтӧма нин вӧлі шойччанінсӧ.
Ӧд сизимӧд лун йывсьыс Гижӧдыс тадзи висьталӧ: «Сизимӧд луннас Енмыс шойччис став Аслас уджъясысь».
Но вылынджыксӧ вӧлі шуӧма нин: «Найӧ оз пырны Менам шойччанінӧ».
Но кодсюрӧ пырасны на Ен шойччанінӧ. А найӧ, кодъяслы медводз вӧлі висьталӧма Ен шойччанін йывсьыс, эз пырны сэтчӧ кывзысьтӧмлун вӧснаныс. Та вӧсна Енмыс индіс торъя лун — “талун”, ӧд уна во мысти Давид казьтыштіс Енлысь водзынджык шуӧм кывъяссӧ:
— Талун, Енлысь гӧлӧс шысӧ кылігӧн, энӧ чорзьӧдӧй сьӧлӧмнытӧ.
Исус Навин кӧ вермис сетны шойччӧг Египетысь петысьяслы, Енмыс эськӧ эз нин казьтыв кутшӧмкӧ мӧд шойччӧг йылысь.
Сідзкӧ, Ен войтырлӧн шойччӧгыс водзын на.
Ӧд мортыс кӧ пырӧма нин Ен шойччанінӧ, сійӧ Енмыс моз шойччӧ аслас уджъясысь.
Сідзкӧ, кутам зільны пырны Ен шойччанінӧ, медым тайӧ кывзысьтӧм йӧзыс моз эгӧ кольӧй Ен шойччанінӧ пыртӧг.
Енлӧн Кывйыс ловъя да вына. Сійӧ ёсьджык на кыкнанладорсяньыс лэчтӧм шыпуртысь.
Сійӧ пыдӧдз мӧрччӧ, торйӧдӧ мортлысь ловсӧ да олӧмсӧ, лысӧ да вемсӧ, восьтӧ мортлысь сьӧлӧмпытшса мӧвпъяссӧ да кӧсйӧмсӧ.
Енсьыс некод оз дзебсьы, Сылы ставыс восьса, ставыс тыдалана. Сылы ставсьыс сетам воча кыв.
Миян эм ыджыд Аркирей — Исус, Енлӧн Пи, коді муніс став енэжыс пыр. Сідзкӧ, зумыда кутчысям эскӧмас.
Миян эм Аркирей, коді бура гӧгӧрвоӧ миянӧс жеблун дырйи. Миянӧс моз Сійӧс быдторйын вӧлі ыштӧдӧма, но мыжсӧ Сійӧ эз вӧчлы.
Та вӧсна ми повтӧг матыстчам бур сьӧлӧма Енлӧн юралан пуклӧс дінӧ, медым колана кадӧ босьтны Енсянь буралӧмсӧ да бурсетӧмсӧ отсӧг вылӧ.
5 юр.
Быд аркирейӧс бӧрйӧны йӧз пӧвстысь да сувтӧдӧны кесъявны Енлы, медым вайны висьяс да сетӧмторъяс йӧзлӧн мыжъяс вӧсна. Татшӧм аркирейыс вермӧ гӧгӧрвоны мывкыдтӧмъясӧс да ылалӧмаясӧс, ӧд ачыс сійӧ на кодь жӧ вынтӧм. Та вӧсна сылы колӧ вайны вись оз сӧмын йӧзлӧн мыжъяс вӧсна, тшӧтш аслас мыжъяс вӧсна.
Морт оз вермы ачыс асьсӧ индыны аркирейӧн, тайӧс вермӧ вӧчны сӧмын Ен. Сійӧ сувтӧдіс Ааронӧс аркирейӧн.
Тадзи и Кристос: эз Ачыс Асьсӧ сувтӧд тайӧ ошкана уджыс вылӧ — лоны Аркирейӧн. Енмыс индіс Сійӧс да шуис Сылы:
— Тэ — Менам Пи, талун Ме лои Тэнад Батьӧн.
Мӧдлаын Енмыс нӧшта висьталӧ: — Мелкиседек моз Тэ пыр кежлӧ Аркирей.
Му вылын олігӧн Исус кыз синваӧн да гораа бӧрдӧмӧн корис-кевмысис Сылы, коді вермис мездыны Сійӧс кулӧмысь.
Ен кыліс Сылысь кевмӧмсӧ, ӧд Исус кывзысис Сылысь. Исус — Енлӧн Пи, но сьӧкыдсӧ нуигӧн Сійӧ велӧдчис кывзысьны. Сійӧ помӧдз вайӧдіс Енлысь мӧвпыштӧмсӧ да пыр кежлӧ лои мездмӧмсӧ Сетысьӧн быдӧнлы, коді кывзысьӧ Сылысь. Мелкиседекӧс моз Енмыс индіс Исусӧс Аркирейӧн.
Та йылысь эськӧ уна на позьӧ висьтавны, но сьӧкыд висьтавнысӧ, ӧд ті онӧ кӧсйӧй кывзынысӧ.
Видзӧдлыны кӧ кадыс вылӧ, тіянлы важӧн нин колӧ лоны велӧдысьясӧн, но миянлы выльысь лоӧ висьтавны тіянлы Енлысь Кывсӧ водзысяньыс.
Тіянӧс пыр на колӧ вердны йӧлӧн, а оз чорыд сёянӧн. Ӧд йӧлӧн пӧткӧдчысь — кага на, сійӧ оз на гӧгӧрво веськыдлун йылысь велӧдӧмсӧ. Но тыр арлыдаяслы колӧ пӧткӧдчыны чорыд сёянӧн, ӧд найӧ вермӧны нин торйӧдны бурсӧ да лёксӧ.
6 юр.
Сідзкӧ, огӧ кольччӧй Кристослӧн велӧдӧмын медводдза воськовъясас, но кутам быдмыны-верстяммыны тыр арлыдаӧдз. Миянлы абу нин колана выльысь велӧдны тіянӧс лёк уджъясысь бергӧдчӧм да Енлы эскӧм йылысь, пыртчӧм да ки пуктылӧм йылысь, кулӧмысь ловзьӧм да пыр кежлӧ мыждӧм йылысь.
Ен кӧ сетас, мунам водзӧ.
Найӧ, кодъяс тӧдлісны нин Бур Юӧрлысь югыдсӧ, босьтісны Енсянь сетӧмторсӧ, сибӧдісны сьӧлӧмас Вежа Лолӧс, тӧдмалісны Ен Кывлысь бурсӧ да аддзылісны локтана нэмлысь вынсӧ, а сэсся бӧр кежисны Кристосысь — татшӧм йӧзсӧ он нин вермы бергӧдны Ен дінӧ. Ӧд найӧ выльысь тувъялӧны Ен Пиӧс да пуктӧны Сійӧс серам туйӧ.
Зэрӧн унаысь кӧтӧдлӧм му кӧ вайӧ му вӧдитысьлы бур быдтас — Енмыс тайӧ мусӧ бурсиӧ. Муыс кӧ быдтӧ сӧмын йӧн да ёг турун — татшӧм муыс шогмытӧм, сійӧс лоӧ ёрӧма да сотӧма.
Мусаяс, кӧть ми тадзи шуам, но лача кутам, мый ті — бур муыс, ті кутчысянныд мездмӧмас.
Енмыс — веськыд, Сійӧ оз вунӧд тіянлысь уджъяснытӧ да Сылӧн нимыс дінӧ муслуннытӧ. Ӧд тайӧ муслунсӧ ті петкӧдлінныд вежа войтырлы кесъялігӧн.
Ми кӧсъям, медым ті помӧдз тадзи вӧчинныд, сэки тіян лачаныд збыльмас. Энӧ дышӧдчӧй, но лоӧй на кодьӧсь, кодъяс эскӧмӧн да терпитӧмӧн босьтӧны Енсянь кӧсйысьӧмасӧ.
Ӧвраамлы кӧсйысигӧн Енмыс Аслас нимӧн кӧсйысис, ӧд Сылӧн нимысь ыджыдджыкыс абу. Енмыс кӧсйысис: «Ме тэнӧ озыра бурсиа да сета тэныд уна чужысьӧс».
Тадзи Ӧвраам терпитӧмыс пыр босьтіс Енсянь кӧсйысьӧмасӧ.
Кыв сетігӧн йӧзыс кӧсйысьӧны мыйӧнкӧ ас дорсьыс ыджыдджыкӧн. Тайӧ кыв сетӧмыс вынсьӧдӧ налысь шуӧмсӧ да пуктӧ пом став вензьӧмлы.
Та вӧсна Ассьыс кӧсйысьӧмсӧ Енмыс вынсьӧдіс кыв сетӧмӧн, медым Сысянь кӧсйысьӧмсӧ босьтысьяслы бурджыка петкӧдлыны, мый Сылӧн мӧвпъясыс вежсьывлытӧмӧсь. Тайӧ кыкторйыс: Енлӧн кӧсйысьӧмыс да кыв сетӧмыс — вежсьывлытӧмӧсь, ӧд Енмыс оз вермы ылӧдлыны. Тайӧ кыкторйыс ышӧдӧ миянӧс да отсалӧ кутчысьны сетӧм лачаас. Миян олӧмын тайӧ лачаыс зумыд якӧр кодь, сійӧ видзӧ миянӧс да отсалӧ пырны миянлы крамын ӧшалысь дӧра сайӧ, Вежасьыс-вежаинӧ. Миянысь водзджык сэтчӧ пырис Исус да восьтіс миянлы туй. Мелкиседек моз Сійӧ пыр кежлӧ лоис Аркирейӧн.
7 юр.
Мелкиседек вӧлі Салим карса ӧксы да Медвылысса Енлӧн Аркирей. Сійӧ бурсиис Ӧвраамӧс сыкӧд паныдасигӧн, кор Ӧвраам локтӧ вӧлі ӧксыясӧс вермӧм бӧрын. Ӧвраам торйӧдіс Мелкиседеклы тышын шедӧдӧмысь дасӧд юкӧнсӧ. Мелкиседек нимлӧн вежӧртасыс — «веськыдлуныслӧн ӧксы». Сійӧ вӧлі Салим карса ӧксы, та вӧсна нӧшта сійӧс шуӧны «лӧньлуныслӧн ӧксы». Мелкиседеклӧн эз вӧв бать-мамыс, эз вӧв чужанвужйыс. Сійӧ эз чужлы ни эз кувлы. Ен Пи моз сійӧ пыр кежлӧ Аркирей.
Аддзанныд, кутшӧм сійӧ ыджыд. Ӧд ачыс Ӧвраам, миян айным, сетіс сылы дасӧд юкӧнсӧ, тышын шедӧдӧмысь медбурсӧ.
Левий чужанвужйысь бӧрйӧм попъяслы Индӧд серти колӧ вӧлі босьтны йӧзлӧн эмбурысь дасӧд юкӧнсӧ. Тайӧ юкӧнсӧ найӧ босьтлісны асланыс вокъяслысь, Ӧвраамсянь чужысьяслысь.
Мелкиседек эз вӧв Левий чужанвужйысь, но сійӧ босьтіс Ӧвраамсянь дасӧд юкӧнсӧ. Сійӧ бурсиис Ӧвраамӧс, кодлӧн вӧлі нин Енсянь кӧсйысьӧмыс.
Кывшутӧг, тайӧ тадзи: ыджыдджык бурсиӧ ичӧтджыкӧс.
Дасӧд юкӧн босьтысь попъяс кулӧны, а Мелкиседек йылысь гижӧма, мый Сійӧ ловъя.
Позьӧ шуны, мый ачыс Левий, дасӧд юкӧнсӧ босьтысь, Ӧвраам пыр сетіс дасӧд юкӧнсӧ Мелкиседеклы.
Ӧд Ӧвраамлӧн Мелкиседеккӧд паныдасигӧн Левий вӧлі нин Ӧвраам айыс пытшкын.
Левий чужанвужйысь попъяслӧн кесъялӧм йылысь вӧлі гижӧма Индӧдас. Тайӧ попъяслӧн кесъялӧм пыр кӧ вӧлі позьӧ воны тыр-бурас, сэки эськӧ эз вӧв колана локны мӧд Аркирейлы, коді Мелкиседек кодь, абу Аарон кодь.
Попъяслӧн кесъяланногыс кӧ вежсьӧ, сідзкӧ, Индӧдсӧ тшӧтш колӧ вежны.
Но Сійӧ, код йылысь тані висьталӧма, вӧлі мӧд чужанкотырысь. На пиысь некод эз кесъявлы висьпуктанін дорын.
Ми тӧдам, мый миян Господь петіс Иуда чужанкотырысь. Но Мӧисей нинӧм эз висьтав тайӧ чужанкотыр йывсьыс, мый сэтысь петасны попъяс.
Тайӧ бурджыка на лои гӧгӧрвоана, кор локтіс мӧд Аркирей, Мелкиседек кодь. Сійӧ лоис Аркирейӧн эз морт чужанвужйысь, эз Индӧд тшӧктӧм серти, Сійӧ лоис Аркирейӧн помтӧм олӧмлӧн вынсянь.
Ӧд Гижӧдыс висьталӧ Сы йылысь:
— Мелкиседек моз Тэ пыр кежлӧ Аркирей.
Тадзи воддза тшӧктӧмсӧ вынтӧмлуныс да ковтӧмлуныс вӧсна лои бырӧдӧма. Ӧд Индӧдыс нинӧм эз вермы вайӧдны тыр-бурӧдз.
Та вӧсна, миянлы сетӧма лача, коді ёна бурджык Индӧдыс дорысь. Тайӧ лачаыс отсӧгӧн ми матыстчам Ен дінӧ.
Тайӧ лачасӧ вӧлі вынсьӧдӧма Енлӧн кыв сетӧмӧн. Левий чужанвужйысь попъясӧс сувтӧдігӧн эз вӧв некутшӧм кыв сетӧм, а Исусӧс Аркирейӧн сувтӧдігӧн Енмыс кыв сетіс. Сійӧ шуис:
— Господь кыв сетіс да оз веж сійӧс.
Мелкиседек моз Тэ пыр кежлӧ Аркирей. Тайӧ кывъясыс висьталӧны, кутшӧм вына сійӧ йитӧдыс, кодӧс кӧрталӧма Исус пыр.
Водзынсӧ вӧлі уна поп, ӧд кулӧм вӧснаныс найӧ эз вермыны дыр кесъявны. Но Исус — Помтӧг Олысь, Сійӧ пыр кежлӧ Аркирей. Та вӧсна Сійӧ быд кадӧ вермӧ мездыны Сы пыр Ен дінӧ локтысьясӧс. Сійӧ — Помтӧг Олысь, Сійӧ пыр кевмысьӧ на вӧсна.
Дзик татшӧм аркирей колӧ миянлы: вежа, сӧстӧм да мыжтӧм, кодӧс торйӧдӧма мыжа йӧзысь да кыпӧдӧма енэжсьыс вылӧджык на. Мукӧд аркирейлы моз Сылы абу колана быд лун вись вайны медводз аслас мыжъяс вӧсна, сэсся йӧзлӧн мыжъяс вӧсна. Ӧд Сійӧ вайис нин Асьсӧ вись пыдди ӧтчыдысь да пыр кежлӧ.
Индӧд серти аркирейӧн вермис лоны морт, кодлӧн эмӧсь тырмытӧмторъяс. Но Индӧдыс бӧрын Енмыс сетіс кыв да сувтӧдіс Аркирейӧн Писӧ. Сійӧ — тыр-бур Аркирей пыр кежлӧ.
8 юр.
Миян висьталӧмлӧн медшӧр мӧвпыс татшӧм: миян эм Аркирей, коді пукалӧ енэжын, Вына Енлӧн пуклӧс веськыдладорын да кесъялӧ енэжвывса вежаинын, Енлӧн збыль скинияын. Тайӧ скиниясӧ сувтӧдіс Господь, а эз морт.
Быд аркирейӧс сувтӧдӧны сы могысь, медым вайны вись да сетӧмтор Енмыслы.
Сідзкӧ, миян Аркирейлы, Исуслы, тшӧтш колӧ вӧлі вись вайны Енмыслы.
Сійӧ кӧ кольччис му вылас, сэки эськӧ эз вӧв аркирейӧн, ӧд тані эмӧсь нин Индӧд серти вись вайысьяс. Найӧ кесъялӧны крамын, кодӧс вӧчӧма енэжвывсаӧс моз. Крамыс — енэжвывса скиниялӧн вуджӧрыс, сылӧн серпасыс. Та вӧсна, мувывса скиниясӧ вӧчтӧдз на Енмыс висьталіс Мӧисейлы: «Видзӧд да ставсӧ вӧч дзик сідзи, кыдзи петкӧдлі тэныд керӧс вылын».
Мукӧд аркирейлы дорысь Исуслы вӧлі сетӧма ёна бурджык кесъялӧм. Сійӧ йитӧдыс, кодӧс кӧрталӧма Исус пыр, тшӧтш ёна бурджык, ӧд тайӧ йитӧдыс подуласьӧ бурджык кӧсйысьӧм вылӧ.
Воддза йитӧдыс кӧ вӧлі тырвыйӧ бур, сэки эськӧ мӧд йитӧдыс эз ковмы.
Но Енмыс аддзис йӧзлысь кывзысьтӧмлунсӧ, та вӧсна шуис налы:
— Со, матысмӧны лунъяс, кор Ме кӧртала Израиль да Иуда войтыркӧд выль йитӧд, — висьталӧ Господь.
Тайӧ йитӧдыс абу сэтшӧм, кутшӧмӧс Ме кӧрталі налӧн батьяскӧд, кор петкӧді найӧс Египет муысь киӧдныс кутӧмӧн. Найӧ торкисны Мекӧд йитӧдсӧ, та вӧсна Ме бергӧдчи наысь, — висьталӧ Господь.
Сійӧ лунъяс бӧрас Ме кӧртала Израиль войтыркӧд татшӧм йитӧд: пукта Ассьым Индӧдӧс налӧн вежӧрӧ да гижа налӧн сьӧлӧмӧ.
Ме лоа налы Енмӧн, а найӧ — Менам войтырӧн, — висьталӧ Господь.
Сэки некод оз кут велӧдны матыссасӧ, вокыс оз понды велӧдны воксӧ: «Тӧдмав Господьӧс.»
Ӧд быдӧн, ичӧтсянь ыджыдӧдз, пондас тӧдны Менӧ. Ме прӧстита налысь мыжъяссӧ, некор ог казьтыв налысь лёк вӧчӧмсӧ.
Тайӧ йитӧдсӧ Енмыс шуис Выль Йитӧдӧн. Тадзи Енмыс петкӧдліс, мый воддза йитӧдыс важмис. А ставыс, мый важмӧма да ковтӧм, регыд бырӧ.
9 юр.
Важ Йитӧдас вӧлі сетӧма Енлы кесъялӧм да мувывса скиния йылысь индӧдъяс. Мувывса скиниясӧ вӧлі вӧчӧма тадзи: скиния воддза вежӧсас вӧлі бикок, пызан да сы вылын Енлы вайӧм няньяс. Тайӧ вежӧсыс шусис “Вежаин”.
Скиниялысь мӧд вежӧссӧ вӧлі торйӧдӧма ӧшӧдӧм дӧраӧн. Тайӧ вежӧсыс шусис “Вежасьыс-вежаин”. Сэні вӧліны зарниӧн эжӧм тшынӧдчан пызан да Йитӧдлӧн куд. Тайӧ кудсӧ вӧлі быд боксянь эжӧма зарниӧн. Куд пытшкас вӧліны манна тыра зарни доз, Ааронлӧн дзоридзалысь бедь да Йитӧдлӧн изпӧвъяс. Куд вевт вылас сулалісны херувимъяс, Ен дзирдлуна анделъяс. Налӧн бордъясыс вевттисны куд вевтсӧ — мыж лэдзанінсӧ.
Но унасӧ та йылысь ӧні огӧ кутӧй сёрнитны.
Тадзи вӧлі лӧсьӧдӧма скиниясӧ. Скиния воддза вежӧсас быд лун пыравлісны попъяс кесъявны Енлы.
Мӧд вежӧсас сӧмын ӧтчыдысь вонас пырліс аркирей. Аскӧдыс сійӧ вайліс вир аслас мыжъяс вӧсна да йӧзлӧн тӧдтӧг вӧчӧм мыжъяс вӧсна.
Тайӧн Вежа Лов петкӧдлӧ, мый кытчӧдз сулалӧ скиниялӧн воддза вежӧсыс, Вежасьыс-вежаинӧ туйыс тупкыса на.
Ставыс тайӧ висьталӧ талунъя лун йылысь, мый Енлы вайӧм вись да сетӧмтор оз вермы тырвыйӧ сӧстӧммӧдны йӧзлысь сьӧлӧмсӧ. Ӧд став тайӧ вайӧмторйыс вӧлі йитчӧма сӧмын вир-яйкӧд: сёян-юанкӧд да мыссьӧмкӧд. Татшӧм кесъялӧмсӧ Енмыс лӧсьӧдіс сӧмын кад кежлӧ, выль кесъяланногсӧ лӧсьӧдтӧдз.
Кор локтіс Кристос, бурсӧ Вайысь Аркирей, Сійӧ кутіс кесъявны ёна бурджык да ыджыдджык скинияын, кодӧс вӧчӧма абу киӧн, абу мувывса ног. Кристос пырис Вежасьыс-вежаинӧ эз кӧза вирӧн, эз ӧшпи вирӧн, а Аслас Вирӧн. Тадзи Сійӧ ӧтчыдысь да пыр кежлӧ мездіс миянӧс мыжъясысь.
Ӧшпи вирӧн, кӧза вирӧн да сотӧм куканьлӧн пӧимӧн кӧ резлісны пежасьӧмаясӧс, медым сӧстӧммӧдны налысь вир-яйсӧ, сідзкӧ, кымын пӧв ёнджыка сӧстӧммӧдӧ Кристослӧн Вирыс. Вежа Лов вынӧн Кристос вайис Асьсӧ Енлы сӧстӧм вись пыдди. Та вӧсна Сылӧн Вирыс мыськалӧ миянлысь сьӧлӧмнымӧс кулӧмӧ вайӧдысь лёк вӧчӧмъясысь, медым ми вермим кесъявны збыль да ловъя Енлы.
Сійӧн Кристос лои Енма-морта костын Выль Йитӧд Кӧрталысьӧн. Аслас кулӧмӧн Кристос мездіс йӧзсӧ воддза йитӧд дырйи вӧчӧм мыжъясысь, медым Енлӧн корӧмаяслы пыр кежлӧ вичмис Енсянь кӧсйысьӧмыс.
Мортыс кӧ кольӧ ас бӧрсяыс кӧсйысян гижӧд, сійӧ лоӧ вына сӧмын мортыслӧн кулӧм бӧрын. Ӧд мортыс кӧ ловъя на, гижӧдыс вынтӧм. Сійӧ лоӧ вына сӧмын мортыслӧн кулӧм бӧрын.
Та вӧсна воддза йитӧдсӧ вӧлі вынсьӧдӧма вирӧн.
Мӧисей висьталіс йӧзыслы Индӧдысь став тшӧктӧмсӧ. Сэсся босьтіс ӧшпиянлысь да кӧзаяслысь ваӧн соралӧм вир, югыдгӧрд вурун, иссоп бедь да резіс тайӧн медводз Индӧд небӧгсӧ, сэсся став йӧзсӧ. Сійӧ шуис: «Тайӧ вирыс — йитӧдлӧн вир, Енмыс тшӧктіс видзны тайӧ йитӧдсӧ».
Сэсся Мӧисей резіс вирнас тшӧтш скиниясӧ да став кесъялан кӧлуй-дозмуксӧ.
Индӧд серти ставыс сӧстӧммӧ сӧмын вирӧн, вир кисьттӧг оз вермы лоны мыжсӧ прӧститӧмыс.
Сідзкӧ, мувывсасӧ, кодӧс вӧчӧма енэжвывсаӧс моз, колӧ вӧлі сӧстӧммӧдны татшӧм ногӧн. А енэжвывсаыслы колана бурджык вись.
Ӧд Кристос пырис эз киӧн вӧчӧм скинияӧ, кодӧс вӧлі вӧчӧма збыль скиния серти. Сійӧ пырис дзик енэжас, медым сувтны Ен водзӧ миян пыдди да дорйыны миянӧс. Сійӧ пырис енэжас эз сы могысь, медым выльысь вайны Асьсӧ вись пыдди. Ӧд тадзи вӧчӧ аркирей: сійӧ воысь-во пырӧ Вежасьыс-вежаинӧ пемӧс вирӧн. Кристос кӧ вӧчис тадзи, му пуксьӧмсяньыс эськӧ унаысь нин ковмыліс Сылы кувны. Но бӧръя кадӧ Сійӧ сӧмын ӧтчыдысь вайис Асьсӧ вись пыдди мыж бырӧдӧм могысь.
Мортыслы шуӧма кувны ӧтчыдысь, сэсся лоӧ мыждӧм. Тадзи Кристос ӧтчыдысь вайис Асьсӧ вись пыдди, медым бырӧдны мыжсӧ став йӧзыслысь. Мӧдысь Сійӧ локтас оз мыж бырӧдӧм могысь, а медым мездыны найӧс, кодъяс виччысьӧны Сійӧс.
10 юр.
Индӧдыс — сӧмын локтана бурыслӧн вуджӧрыс, абу ачыс бурыс. Та вӧсна Индӧдыс некор оз вермы вӧчны тыр-бурӧн Ен водзӧ локтысьясӧс, кодъяс воысь-во вайӧны ӧтипӧлӧс вись.
Индӧдыс кӧ вермис вӧчны найӧс тыр-бурӧн, найӧ эськӧ дугдісны вайны висьсӧ. Ӧд висьсӧ ӧтчыдысь вайӧмнас найӧ эськӧ сӧстӧммисны пыр кежлӧ, да налӧн сьӧлӧмыс эз мыжды найӧс.
Но быд во вайӧм висьыс казьтывлӧ мыж йылысь. Ӧд ӧшпилӧн да кӧзалӧн вирыс оз вермы бырӧдны мортлысь мыжъяссӧ.
Та вӧсна муюгыдас локтігӧн Кристос шуӧ:
— Вись да ваянтор Тэныд оз ков, Тэ дасьтін Меным вир-яй.
Сотӧм пемӧс да мыж вӧсна вись абу шогмана Тэныд.
Сэки Ме шуи: «Со, Ме локті, Енмӧй, збыльмӧдны Тэнсьыд кӧсйӧмтӧ. Тадзи водзысяньыс вӧлі висьталӧма Ме йылысь небӧгас».
Висьсӧ вайӧны Индӧд серти, но Кристос шуӧ: «Вись да ваянтор, сотӧм пемӧс да мыж вӧсна вись Тэныд оз ков, тайӧ абу шогмана Тэныд».
Сэсся содтӧ: «Со, Ме локті, Енмӧй, збыльмӧдны Тэнсьыд кӧсйӧмтӧ».
Тадзи Кристос бырӧдіс воддзасӧ — вись вайӧмсӧ, да вежис сійӧс мӧдӧн — Ен кӧсйӧмӧн.
Ен кӧсйӧм серти ми лоим вежаӧсь, ӧд Кристос вайис Ассьыс вир-яйсӧ вись пыдди ӧтчыдысь да пыр кежлӧ.
Крамын кесъялігӧн попъяс быд лун вайӧны ӧтипӧлӧс вись. Но тайӧ висьыс оз вермы бырӧдны мортлысь мыжъяссӧ.
Кристос вайис мыж вӧсна висьсӧ ӧтчыдысь да пуксис Ен веськыдладорӧ пыр кежлӧ. Ӧні Сійӧ виччысьӧ сійӧ кадсӧ, кор Енмыс пуктас Сы кок улӧ паныд мунысьяссӧ.
Висьсӧ ӧтчыдысь вайӧмнас Кристос вӧчис вежа войтырӧс тыр-бурӧн пыр кежлӧ.
Та йылысь висьталӧ миянлы Вежа Лов:
— Сійӧ лунъяс бӧрас Ме кӧртала накӧд татшӧм йитӧд, — висьталӧ Господь.
Ассьым Индӧдӧс Ме пукта налӧн сьӧлӧмӧ, да гижа налӧн вежӧрӧ. Налысь мыжъяссӧ да лёк вӧчӧмсӧ водзӧ ог нин казьтыв.
Сідзкӧ, мыжъяссӧ кӧ прӧститӧма, сэки висьсӧ вайны оз нин ков.
Вокъяс, Исус Кристослӧн Вирӧн ми вермам повтӧг пырны Вежасьыс-вежаинӧ, ӧд Сійӧ восьтіс миянлы выль туй, олӧмас нуӧдысь туй. Тайӧ туйыс вайӧдӧ миянӧс Вежасьыс-вежаинӧ ӧшӧдӧм дӧра пыр — Кристослӧн вир-яйыс пыр. Миян эм ыджыд Аркирей, Сійӧ кывкутӧмӧн веськӧдлӧ ставнас Ен керканас. Сідзкӧ, локтам Ен водзӧ восьса сьӧлӧмӧн да зумыд эскӧмӧн, ӧд миян сьӧлӧмным сӧстӧм да мыжтӧм, миянлысь вир-яйнымӧс мыськалӧма сӧстӧм ваӧн. Ми висьталам, мый миян эм лача. Сідзкӧ, зумыда кутчысям тайӧ лачаас, ӧд миянлы Кӧсйысьысьыс эскана.
Кутам тӧждысьны ӧта-мӧдным вӧсна, ышӧдны ӧта-мӧдӧс муслун да бур уджъяс вылӧ.
Кодсюрӧ дугӧдчӧмаӧсь ӧтвыв чукӧртчӧмысь, но ми тадзи огӧ вӧчӧй.
Мӧдарӧ, кутам ёнджыка на ышӧдны ӧта-мӧднымӧс, ӧд Господьлӧн луныс матын нин.
Ми кӧ тӧдам збыльсӧ, но тӧдӧмӧн мыж вӧчам, сэки некутшӧм вись оз вешты миянлысь мыжнымӧс. Сӧмын ыджыд полӧмӧн ковмас виччысьны мыждӧмсӧ да яр бисӧ, коді бырӧдас Енлы паныд мунысьясӧс.
Мӧисейлысь Индӧдсӧ торкысьӧс кӧ кык либӧ куим мортлӧн висьталӧм серти нем жалиттӧг мыждылісны кулӧм вылӧ, сідзкӧ, кымын пӧв чорыдджыка лоӧ мыждӧма сійӧс, коді талялӧ Енлысь Писӧ, оз лыддьы вежаӧн Енкӧд йитысь да эскысьӧс вежӧдысь Вирсӧ, да нӧшта лёкӧдӧ Ловсӧ, коді восьтӧ Енлысь буралӧмсӧ.
Ми тӧдам тайӧ кывъяссӧ Шуысьӧс:
— Ме — водзӧс Перйысьыс, Ме мынтыся ставсьыс, — шуӧ Господь.
Нӧшта содтӧ:
— Господь кутас мыждыны Ассьыс войтырсӧ.
Ёна повзьӧдлӧ веськавны ловъя Енлӧн киӧ.
Видзӧдлӧй бӧрвыланыд: Бур Юӧрлысь югыдсӧ тӧдмалӧм бӧрын ті верминныд мунны уна сьӧкыд да тыш пыр. Тіянӧс вӧтлігӧн-лёкӧдігӧн ті унаысь вӧлінныд серам туйынӧсь. Тіян моз сьӧкыдсӧ нуысьяскӧд ті вӧлінныд орччӧн. Кор ме пукалі дзескыдінын, ті нуинныд сьӧкыдсӧ мекӧд ӧтвыв. Тіянлысь эмбуртӧ мырддялігӧн ті нимкодясинныд, ӧд ті тӧдінныд, мый енэжас тіян эм ёна бурджык да бырлытӧм эмбур.
Сідзкӧ, лоӧй повтӧмӧсь. Ӧд таысь тіянлы вичмас ыджыд тырдон.
Тіянлы колӧ зумыдлун, медым верминныд збыльмӧдны Енлысь тшӧктӧмсӧ да босьтны Сысянь кӧсйысьӧмасӧ.
Ӧд гижӧма: — Регыд, вывті регыд, и Локтысьыс нюжмасьтӧг воас.
Веськыда олысь эскӧмнас кутас овны, а кежас кӧ Меысь, Меным сійӧ оз шогмы.
Но ми абу на пӧвстысь, коді Енсьыс кежӧ да кулӧ. Ми на пӧвстысь, коді эскӧ да босьтӧ мездмӧмсӧ.
11 юр.
Эскӧмыс — виччысянторлӧн збыльмӧм да аддзытӧмсӧ аддзӧм.
Миян батьяс эскисны, та вӧсна найӧ шогмисны Енлы.
Эскӧмӧн ми гӧгӧрвоам, мый ентыкӧлаыс артмӧма Ен Кывйӧн. Тадзи аддзытӧмсьыс лои аддзанаыс.
Эскӧмӧн Авель вайис Енлы бурджык вись Каин дорысь. Авельлӧн эскӧм вӧсна Енмыс сибӧдіс сылысь висьсӧ да лыддис сійӧс веськыдӧн. Эскӧмнас Авель весиг кулӧм бӧрас сёрнитӧ.
Эскӧмыс вӧсна Енокӧс вӧлі кыпӧдӧма енэжас кулӧмсӧ тӧдлытӧг: «Сійӧ эз ло, ӧд Енмыс кыпӧдіс сійӧс енэжас».
Кыпӧдтӧдзыс на Еноклы вӧлі шуӧма, мый «сійӧ шогмана Енмыслы».
Эскытӧгыд Енмыслы он шогмы.
Ӧд Ен дінӧ локтысьлы колӧ эскыны, мый Енмыс эм, да Сійӧс корсьысьлы Енмыс сетӧ тырдон.
Эскӧмыс вӧсна Нойлы вӧлі водзвыв сетӧма тӧдны аддзытӧмсӧ. Сійӧ кывзысис Енмыслысь да вӧчис ковчег, медым мездыны ассьыс гортсасӧ.
Эскӧмнас сійӧ мыждіс муюгыдсӧ, эскӧмыс вӧсна сылы вичмис Енсянь веськыдлун.
Эскӧмыс вӧсна Ӧвраам кывзысис Енмыслысь да муніс кӧсйысьӧм муӧ. Сійӧ эз тӧд, кытчӧ мунӧ, но муніс.
Эскӧмӧн Ӧвраам овмӧдчис кӧсйысьӧм муӧ да локтысь моз оліс сэні чомъясын. Сы моз олісны чомъясын Исаак да Яков, кодъяслы тшӧтш вӧлі сетӧма Енлысь кӧсйысьӧмсӧ.
Ӧвраам виччысис зумыд подула кар, кодӧс Серпасалысьыс да Вӧчысьыс — Ачыс Енмыс.
Сарра эз вермы вайны кага, но эскӧмыс вӧсна сійӧ пондіс нӧбасьны, да ыджыд арлыдыс вылӧ видзӧдтӧг чужтіс кага. Ӧд сійӧ тӧдіс, мый сылы Кӧсйысьысьыс — эскана.
Та вӧсна ӧти мортсянь, Ӧвраамсянь, коді вӧлі пӧрысь нин, чужис сы мында олысь. Тайӧ лыдсӧ позьӧ ӧткодявны лыдтӧм-тшӧттӧм енэжвывса кодзувъяскӧд да саридздорса лыакӧд.
Став тайӧ йӧзыс эз удитны босьтны Енсянь кӧсйысьӧмасӧ, но найӧ помӧдз видзисны эскӧмсӧ. Найӧ сӧмын ылісянь аддзылісны Енсянь кӧсйысьӧмасӧ да нимкодясисны сыӧн. Ас йывсьыныс найӧ шуалісны, ми пӧ тайӧ му вылас ветлысь-мунысьяс.
Тадзи шуӧмнас найӧ петкӧдлісны, мый корсьӧны чужан мунысӧ.
Найӧ кӧ мӧвпалісны чужан муныс йылысь, кытысь петісны, эськӧ бӧр на вермисны бергӧдчыны сэтчӧ.
Но найӧ кӧсйисны овмӧдчыны бурджык чужан муӧ — енэжӧ.
Та вӧсна Енмыс оз яндысь шуны Асьсӧ налӧн Енмӧн, ӧд Сійӧ дасьтіс налы кар.
Эскӧмӧн Ӧвраам вайис вись пыдди Исаакӧс, кор Енмыс кӧсйис тӧдмавны сылысь эскӧмсӧ. Ӧвраам дась вӧлі сетны вись пыдди ассьыс ӧтка писӧ, кодӧс Енмыс сылы кӧсйысьліс. Исаак йылысь вӧлі шуӧма: «Исааксянь паськалас тэнад чужанвужйыд».
Ӧвраам эскис, мый Енмыс вына ловзьӧдны весиг кулӧмысь. Дзик тадзи и артмис. Исаакӧс вӧлі бӧр сетӧма Ӧвраамлы, быттьӧ сійӧ ловзис кулӧмысь.
Эскӧмӧн Исаак бурсиис Яковӧс да Исавӧс водзӧ олӧмас.
Эскӧмӧн Яков бурсиис кулігас Ӧсиплысь пиянсӧ да бедь вылас мыджсьӧмӧн копыртчыліс Енмыслы.
Эскӧмӧн Ӧсип кулӧм водзвылас висьталіс пияныслы Израиль войтырлӧн Египетысь петӧм йылысь да тшӧктіс петкӧдны налы ассьыс лыяссӧ.
Эскӧмӧн Мӧисейлӧн бать-мамыс дзеблалісны сійӧс чужӧм бӧрас куим тӧлысь чӧж. Найӧ аддзисны, мый кагаыс зэв мича, да эз повзьыны весиг ӧксылӧн тшӧктӧмысь.
Эскӧмӧн Мӧисей быдмӧм бӧрас дугдіс шуны асьсӧ фараон нывлӧн пиӧн. Сійӧ лыддис, мый бурджык Ен войтыркӧд нуны сьӧкыдсӧ, дженьыдик кадся мыжа олӧм дорысь. Кристос вӧсна лёкӧдӧмсӧ Мӧисей лыддис ыджыдджык озырлунӧн египетса став озырлун дорысь.
Ӧд сійӧ тӧдіс, мый сылы лоӧ сетӧма тырдон.
Эскӧмӧн Мӧисей петіс Египетысь, эз повзьы ӧксылӧн скӧрлунысь. Сійӧ вӧлі зумыд, ӧд видзӧдіс Тыдавтӧмыс вылӧ.
Эскӧмӧн Мӧисей тшӧктіс пасйыны Израиль войтырлы Ыджыд лун да мавтыштны ӧдзӧс куричьяссӧ вирӧн, медым Андел-Бырӧдысь эз ви Израиль войтырлысь медводдза чужысьяссӧ.
Эскӧмӧн Израиль войтыр вуджис Гӧрд саридз вомӧн. Найӧ мунісны сэті косінті моз. Египетсаяс тшӧтш на моз кӧсйисны вуджны, но ставныс вӧйисны.
Эскӧм пыр киссисны Ерикон карса стенъяс сійӧс сизим лун кытшовтӧм бӧрын.
Эскӧмыс вӧсна Раав, кырсалысь ань, эз кув эскытӧмъяскӧд ӧтвыв, ӧд сійӧ бур сьӧлӧмӧн сибӧдіс израильса кыйӧдчысьясӧс.
Мый нӧшта содтыны татчӧ?
Кадыс меным оз тырмы висьтавны Гедеон, Варак, Самсон, Еффай, Давид, Самуил да мукӧд пророк йылысь. Эскӧмӧн найӧ тышкасьӧм бӧрын босьтісны йӧз муяс, ставсӧ вӧчисны веськыда, сибӧдісны Енсянь кӧсйысьӧмасӧ, лӧньӧдісны левъясӧс, кусӧдісны яр би, видзисны асьнысӧ шыпуртысь, вынтӧммиганыс найӧ ёнмылісны, тышын вӧліны вынаӧсь, йӧз муысь воысь тышкасьысьясӧс бӧр вӧтлісны асланыс муысь, ӧткымын аньлысь матыссасӧ ловзьӧдісны кулӧмысь. Тайӧ йӧз пӧвстысь мукӧдсӧ вӧлі дойдалӧма кувтӧдзыс, ӧд найӧ эз кӧсйыны босьтны мортсянь вӧзйӧм мездлунсӧ, но кӧсйисны босьтны бурджыксӧ — ловзьӧмсӧ. На пиысь мукӧдсӧ нӧйтісны орсӧн, лёкӧдісны, да чептӧн дорӧмӧн видзисны дзескыдінын. Мукӧдсӧ изъялісны, быдногыс дойдалісны, пилитісны шӧрипӧв да виисны шыпуртӧн. Найӧ ветлісны кӧза да ыж ку паськӧмӧн, пыкисны гӧльлун, найӧс нӧйтісны да вӧтлісны. Муюгыдыс эз сулав тайӧ йӧзыс дон, кодъяслы ковмис овны овтӧминын да керӧсын, кырта горсйын да му потасын.
Эскӧмныс вӧсна став тайӧ йӧзыс вӧліны шогманаӧсь Енмыслы, но некод на пиысь эз босьт Енлысь кӧсйысьӧмасӧ, ӧд Енмыс дасьтӧма миянлы ёна бурджыктор. Та вӧсна найӧ сӧмын миянкӧд ӧтвыв воасны тыр-бурас.
12 юр.
Ті аддзанныд: миян гӧгӧр сы мында эскӧм йылысь висьталысьыс. Сідзкӧ, эновтам ставсӧ, мый сьӧктӧдӧ миянӧс, да мыжсӧ, мый крукӧдӧ миянӧс. Кутам помӧдз зумыда котӧртны миянлы индӧм туйӧд да видзӧдны Исус вылӧ. Сійӧ — миянлы эскӧмсӧ Сетысьыс да тырвыйӧ эскӧмас Вайӧдысьыс. Локтана нимкодьлун понда Сійӧ нуис крест вылын дойсӧ, нинӧм туйӧ пуктіс лёкӧдӧмсӧ да пуксис Ен пуклӧс веськыдладорӧ.
Сідзкӧ, мӧвпалӧй Сы йылысь, коді нуис сы мында лёкӧдӧм мыжа йӧзсянь, медым энӧ жебмӧй да ловнаныд энӧ усьӧй.
Ті энӧ на вирӧдз тышкасьӧй мыжыслы паныд. Ті дзикӧдз вунӧдӧмныд Енсянь ышӧдӧмсӧ, ӧд Сійӧ ышӧдӧ тіянӧс пиянӧс моз:
— Пиӧй менам.
Господьсянь чирыштӧмсӧ эн увтырт, тэнӧ янӧдігӧн ловнад эн усь.
Коді Енмыслы муса, сійӧс чирыштӧ, кодӧс пи туйӧ пуктӧ, сійӧс нӧйтӧ.
Ті кӧ сибӧданныд Енсянь чирыштӧмсӧ, сідзкӧ, Енмыс лыддьӧ тіянӧс Аслас пиянӧн.
Сюрас-ӧ сэтшӧм пи, кодӧс эськӧ батьыс эз чирыштлы?
Тіянӧс кӧ эз чирыштлыны мукӧд челядьӧс моз, сідзкӧ, ті бокысаяс, абу ас ныв-пи.
Мувывса батьяс миянӧс ставнымӧс чирыштлісны, но ми пыдди пуктім найӧс. Сідзкӧ, кымын пӧв ёнджыка на колӧ кывзысьны енэжвыв Батьлысь, медым вермим овны?
Мувывса батьяс чирыштлісны миянӧс ас кӧсйӧм сертиныс регыдик кад кежлӧ, а Енмыс чирыштӧ миянӧс бур вылӧ, медым вӧлім Сы кодь вежаӧсь.
Дерт, быдпӧлӧс чирыштӧм вайӧ шогсьӧм, а оз нимкодьлун.
Но бӧрыннас татшӧм чирыштӧмыс вайӧ мортлы бур вотӧс: лӧньлун да веськыдлун.
Сідзкӧ, ёнмӧдӧй лигышмунӧм кинытӧ да жебмӧм кокнытӧ. Ветлӧй шыльыд туйӧд, медым чотысь кокныд эз музгыльтчы, а бурдіс.
Тӧждысьӧй быдӧнкӧд овны лӧня, лоӧй вежаӧсь, ӧд вежалунтӧг некод оз аддзы Господьӧс.
Видзчысьӧй, мед тіян пӧвстысь некод эз вошты Енлысь буралӧмсӧ. Некутшӧм курыд вуж мед оз вужъясь тіян пӧвстӧ, оз вай тіянлы лёксӧ да оз пежав некодӧс. Тіян пӧвстын мед оз ло ни ӧти кырсалысь да Исав моз Енсьыс кежысь. Ӧти шыд тасьті вылӧ сійӧ вежис ассьыс медводдза чужысьлысь нимсӧ.
Ті ӧд тӧданныд, мый бӧрыннас Исав ёна корис батьсяньыс бурсиӧмсӧ, но сылысь корӧмсӧ вӧлі ӧтдортӧма. Исав бӧрдӧмӧн корис та йылысь, но эз нин вермы вежны батьыслысь мӧвпъяссӧ.
Ті матыстчинныд энӧ мувывса ыпъялысь керӧс дінӧ, паныдасинныд энӧ бушковкӧд да сап пемыдыскӧд, локтінныд энӧ труба шы улӧ да гора сёрни шы улӧ. Тайӧ шысӧ кылӧм бӧрын йӧзыс корисны Енсӧ, медым дугдіс накӧд сёрнитны. Ӧд найӧ эз вермыны кывзыны татшӧм тшӧктӧмсӧ: «Весиг пемӧс кӧ инмӧдчас тайӧ керӧсас, сійӧс лоӧ виӧма изъясӧн либӧ ньӧвйӧн».
Тайӧ аддзывлӧмторйыс вӧлі сэтшӧм повзьӧдана, весиг ачыс Мӧисей шуис: «Менӧ дзӧрӧдӧ полӧмӧйла».
Мӧдарӧ, ті матыстчинныд Сион керӧс дінӧ да ловъя Енлӧн карыс, енэжвыв Ерусалим, дінӧ. Ті локтінныд лыдтӧм-тшӧттӧм анделъяс дінӧ да гажӧдчысь йӧз чукӧр дінӧ. Найӧ — Енлӧн медводдза чужысьяс, налысь нимъяссӧ гижӧма енэжас. Ті матыстчинныд став йӧзсӧ мыждысь Ен дінӧ да тыр-бурас воӧм веськыда олысьяслӧн ловъяс дінӧ. Ті матыстчинныд Выль Йитӧдсӧ Кӧрталысь Исус дінӧ да Сылӧн сӧстӧммӧдысь Вир дінӧ. Сылӧн Вирыс бурджыксӧ висьталӧ Авельлӧн вирыс дорысь.
Видзчысьӧй, медым энӧ бергӧдчӧй тіянлы Висьталысьысь.
Енмыс сёрнитіс му вылас Израиль войтыркӧд, но найӧ бергӧдчисны Енсьыс. Та вӧсна найӧс вӧлі мыждӧма. Сідзкӧ, миянӧс ёнджыка на лоӧ мыждӧма, огӧ кӧ кывзӧй енэжсянь Висьталысьӧс. Сэки Енлӧн гора сёрниыс вӧрзьӧдліс мусӧ, но ӧні Сійӧ кӧсйысис:
— Нӧшта ӧтчыдысь вӧрзьӧда мусӧ, ог сӧмын мусӧ, вӧрзьӧда тшӧтш енэжсӧ.
“Нӧшта ӧтчыдысь” шуӧмыс висьталӧ, мый став вӧчӧмторсьыс вӧрзянаыс бырас, коляс сӧмын вӧрзьывтӧмыс.
Миянлы сетӧма вӧрзьывтӧм Юраланін. Сідзкӧ, аттьӧалам Енсӧ да кесъялам Сылы шогмана ногӧн, Сыысь полӧмӧн да вежавидзӧмӧн. Ӧд миян Енным — ставсӧ сотысь би.
13 юр.
Тіян костын мед пыр лоӧ муслун.
Энӧ вунӧдӧй сибӧдны ветлысь-мунысьясӧс. Ӧд тадзи вӧчигӧн ӧткымынӧн сибӧдісны анделъясӧс, весиг асьныс та йылысь эз тӧдны.
Тӧждысьӧй дзескыдінын пукалысьяс вӧсна, быттьӧ ті на моз пукаланныд дзескыдінын. Энӧ вунӧдӧй найӧс, кодъясӧс нӧйтӧны, ті ӧд асьныд тӧданныд, мый сэтшӧм дойыс.
Гозъя олӧмныд мед быдӧнлӧн лоӧ сӧстӧм, да вольпасьныд пежасьтӧм. Ӧд кырсалысьӧс да гозъя олӧм пежалысьӧс мыждас Ен.
Сьӧм вылӧ энӧ горшасьӧй, тырмӧдӧй сійӧ, мый эм.
Ӧд Ачыс Енмыс шуис:
— Ог коль тэнӧ, ог эновт тэнӧ.
Та вӧсна, ми повтӧг шуам: — Господь — менам отсӧгыс, меным нинӧмысь повнысӧ. Мый вӧчас меным морт?
Энӧ вунӧдӧй ассьыныд веськӧдлысьяснытӧ, ӧд найӧ висьтавлісны тіянлы Ен Кывсӧ. Видзӧдӧй налӧн олӧм пом вылӧ да эскӧй на моз.
Исус Кристос тӧрыт, талун да нэмъяс чӧж Сійӧ жӧ.
Энӧ лэдзӧй кежӧдны асьнытӧ быдпӧлӧс ылӧгвелӧдӧмас.
Бурджык, ті кӧ ёнмӧданныд сьӧлӧмнытӧ Енлӧн буралӧмӧн, а онӧ сёян-юан йылысь велӧдӧмӧн. Ӧд татшӧм велӧдӧмыс сы серти олысьяслы нинӧм бурсӧ оз сет.
Миян эм сэтшӧм висьпуктанін, кытчӧ вайӧм висьсӧ оз позь сёйны скинияын кесъялысьяслы.
Пемӧсъяслысь вирсӧ аркирей пыртӧ Вежасьыс-вежаинӧ, тайӧ вирыс эм йӧзлӧн мыжъяс вӧсна вайӧм вись. А пемӧсъяслысь шойсӧ сотӧны кар ортсыас. Исус тшӧтш куліс кар ортсыас, медым Аслас Вирӧн вежӧдны йӧзсӧ.
Сідзкӧ, петам Исус дінӧ кар ортсыас да Сы моз нуам лёкӧдӧмсӧ.
Ӧд пыр кежлӧ олӧм вылӧ миянлы абу тані карыс, ми виччысям выль кар.
Сідзкӧ, Исус пыр кутам дугдывтӧг вайны Енлы аттьӧалана вись, асланым вомӧн кутам ошкыны Сылысь нимсӧ.
Энӧ вунӧдӧй вӧчны бурсӧ, юксьӧй сійӧн, мый эм. Ӧд татшӧм висьыс шогмана Енмыслы.
Кывзысьӧй вичкоса веськӧдлысьяслысь, кывзӧй найӧс, ӧд найӧ дугдывтӧг тӧждысьӧны тіян вӧсна. Налы ковмас вочавидзны Ен водзын тіян вӧсна. Кывзысьӧй налысь, медым тайӧ уджсӧ найӧ вӧчисны долыдпырысь, а эз ышлолалӧмӧн. Ӧд таысь тіянлы бурыс оз ло.
Кевмысьӧй миян вӧсна.
Ми тӧдам, мый миян сьӧлӧмным оз мыжды миянӧс, ӧд ми ставсӧ кӧсъям вӧчны веськыда.
Торйӧн кора кевмысьны, медым ме ӧдйӧджык бӧр верми локны тіян дінӧ.
Лӧньлунсӧ сетысь Ен бырлытӧм йитӧдлӧн Вирӧн ловзьӧдіс кулӧмысь миян Господь Исус Кристосӧс, ыжъяслысь вына Видзысьсӧ. Енмыс мед дасьтас тіянӧс быдпӧлӧс бур удж вылӧ, медым збыльмӧдны Ассьыс кӧсйӧмсӧ, да Исус Кристос пыр мед вӧчас тіян пытшкын Аслыс шогманасӧ.
Енлы ошкӧм нэмъяс чӧж.
Аминь.
Вокъяс, кора тіянӧс: терпитӧмӧн сибӧдӧй менсьым ышӧдана кывъясӧс, ӧд ме гижи тіянлы дженьыдика.
Кӧсъя, мед ті тӧдінныд: Тимофей вокным петӧма дзескыдінысь. Регыд кӧ воас, сыкӧд ӧтвыв локтам тіян дінӧ.
Висьталӧй чолӧм вичкоса веськӧдлысьяслы да став вежа войтырлы.
Тіянлы ыстӧны чолӧм италияса эскысьяс.
Енлӧн буралӧмыс ставныдкӧд тіянкӧд.
Аминь.
Иоанлы восьтӧм
1 юр.
Тайӧ гижӧдыс — Исус Кристослы Енсянь восьтӧм. Енмыс восьтіс тайӧс, медым петкӧдлыны Аслас кесйӧгъяслы, мый колӧ лоны регыдъя кадӧ.
Кристос мӧдӧдіс Ассьыс анделсӧ, медым висьтавны тайӧс Аслас кесйӧглы — Иоанлы. Ӧні Иоан аслас висьталӧмӧн эскӧдӧ Енлысь Кывсӧ, Исус Кристослысь висьталӧмсӧ да ставсӧ, мый аддзыліс.
Шуда сійӧ, коді лыддьӧ да кывзӧ тайӧ водзвыв висьталӧмыслысь кывъяссӧ да олӧ на серти.
Ӧд кадыс матын нин.
Иоан чолӧмалӧ асияса сизим вичкоӧс: буралӧм да лӧнь олӧм тіянлы Сысянь, Коді эм, вӧлі да локтас, тшӧтш Сылӧн пуклӧс водзын олысь сизим ловсянь да Исус Кристоссянь. Сійӧ — эскана Висьталысь, Сійӧ медводдзаӧн ловзис кулӧмысь да юралӧ мувывса ӧксыяс вылын.
Сылы ми ёна мусаӧсь. Аслас Вирӧн Сійӧ мыськаліс миянӧс мыжъясысь, пуктіс миянӧс ӧксыясӧ да вежа кесъялысьясӧ Енмыслы, Аслас Батьлы. Сылы ошкӧмыс, Сылӧн ыджыдалӧмыс нэмъяс чӧж. Аминь.
— Со, Сійӧ локтӧ кымӧръяс вылын, Сійӧс аддзас быд син. Сійӧс аддзасны тшӧтш найӧ, кодъяс бытшкисны Сійӧс. Сэки Сы водзын ырзӧмӧн бӧрддзас мувывса быд кыла войтыр.
Тайӧ тадзи. Аминь.
«Ме — Альфа и Омега, Панасыс и Помыс», — шуӧ Господь. Сійӧ эм, вӧлі и локтас, Сійӧ — Ставсӧкутысьыс.
Ме, Иоан, тіян вокныд, тіянкӧд ӧтвыв нуа сьӧкыдсӧ. Тіянлы моз меным тшӧтш вичмӧ Енлӧн Юралӧмыс да Исус Кристоссянь зумыдлуныс. Ен Кыв вӧсна да Исус Кристос йылысь висьталӧм вӧсна ме вӧлі Патмос ді вылын.
Господьлӧн лунӧ ме вӧлі тырӧма Лолӧн. Сэки мыш сайсянь ме кылі гора шы, тайӧ вӧлі труба шы кодь. Сійӧ шуис: «Ме — Альфа и Омега, Медводдзаыс и Медбӧръяыс. Сійӧ, мый аддзан, гиж да мӧдӧд асияса вичкоясӧ: Ефесӧ, Смирнаӧ, Пергамӧ, Фиатираӧ, Сардисӧ, Филадельфияӧ да Лаодикияӧ».
Ме бергӧдчи видзӧдлыны мекӧд сёрнитысь вылӧ да аддзи сизим зарни бикок. Сизим бикок пӧвстас быттьӧ Морт Пи сулаліс. Сійӧ вӧлі кузь паськӧма да морӧс весьтӧдыс вӧлі вӧнясьӧма зарни вӧньӧн. Сылӧн юрыс да юрсиыс вӧліны дзик еджыдӧсь, быттьӧ еджыд вурун, быттьӧ лым, а синъясыс ыпъялісны би моз. Сылӧн кокъясыс дзирдалісны пачын донӧдӧм ыргӧн моз, а гӧлӧс шыыс Сылӧн вӧлі бузгысь ва шы кодь.
Веськыд киас Сійӧ кутіс сизим кодзув, а Сылӧн вомысь петіс кыкнанладорсяньыс лэчтӧм ёсь шыпурт. Сылӧн чужӧмыс дзирдаліс яръюгыд шонді моз.
Сійӧс аддзӧм бӧрын ме уси Сы кок улӧ да вӧлі кулӧм морт кодь.
Но Сійӧ пуктіс ме вылӧ веськыд кисӧ да шуис:
«Эн пов, Ме — Медводдзаыс и Медбӧръяыс. Ме ловъя.
Ме вӧлі кулӧма, но ӧні ловъя нэмъяс чӧж. Аминь.
Менам киын адысь да кулӧмысь восьтаныс.
Сідзкӧ, гиж, мый аддзылін, мый эм да мый лоӧ бӧрыннас.
Тэ аддзылін сизим кодзув, кодъяс вӧліны Менам веськыд киын, да сизим зарни бикок. Налӧн гусяторйыс татшӧм: сизим кодзулыс — тайӧ сизим вичколӧн анделъяс, а сизим бикокыс, кодъясӧс тэ аддзылін, — тайӧ сизим вичко».
2 юр.
«Ефес вичкоса анделлы тадзи гиж:
— Со мый висьталӧ Сійӧ, коді кутӧ веськыд киас сизим кодзув да ветлӧдлӧ сизим зарни бикок пӧвстӧд.
Ме тӧда тэнсьыд уджъястӧ, мырсьӧмтӧ да зумыдлунтӧ. Тӧда, тэ он терпит лёк йӧзӧс. Тэ тӧдмалін найӧс, кодъяс нимтӧны асьнысӧ апостолъясӧн, но збыльвылас найӧ абу апостолъяс. Тэ аддзин, мый найӧ — пӧръясьысьяс. Тэ уна нуин сьӧкыдсӧ, но сулалан зумыда. Менам ним вӧсна тэ ёна уджалін, но эн лигышмун.
Но тэныд паныд кӧсъя шуны со мый: тэ эновтін ассьыд медводдза муслунтӧ.
Сідзкӧ, мӧвпышт, кысянь тэ усин, бергӧдчы да вӧч ассьыд медводдза уджъястӧ.
Он кӧ бергӧдчы, регыд локта тэ дінӧ да вешта тэнсьыд бикоктӧ места вывсьыс.
Но ӧтитор тэ вӧчан бура: тэ мустӧмтан николаитъяслысь уджъяссӧ. Налысь уджъяссӧ Ме тшӧтш мустӧмта.
Кодлӧн эм пель, мед кылӧ, мый Лов висьталӧ вичкояслы.
Вермысьлы Ме сета сёйны вотӧс Олӧмыслӧн пуысь, коді сулалӧ Енлӧн рай шӧрын».
«Смирна вичкоса анделлы тадзи гиж:
— Со мый висьталӧ тіянлы Медводдзаыс и Медбӧръяыс, коді вӧлі кулӧма, но ӧні ловъя.
Ме тӧда тэнсьыд уджъястӧ, сьӧкыдалӧмтӧ да гӧльлунтӧ, но тэ — озыр. Тӧда, кыдзи тэнӧ лёкӧдӧны асьнысӧ юдейӧн шуысьяс, но найӧ абу юдейяс, найӧ — сӧтана йӧз чукӧр.
Некутшӧм локтана сьӧкыдысь эн пов.
Ӧткымынӧс тіян пиысь омӧльыс йӧршитас дзескыдінӧ, медым тӧдмавны тіянӧс. Сэки дас лун чӧж ті кутанныд сьӧкыдавны.
Но тэ помӧдзыс ло эскана, и Ме сета тэныд Олӧмыслысь юркытш.
Кодлӧн эм пель, мед кылӧ, мый Лов висьталӧ вичкояслы.
Вермысьлы мӧд кулӧмыс нинӧм оз вӧч».
«Пергам вичкоса анделлы тадзи гиж:
— Со мый висьталӧ тіянлы Сійӧ, кодлӧн эм кыкнанладорсяньыс лэчтӧм ёсь шыпурт.
Ме тӧда тэнсьыд уджъястӧ. Тэ олан сэні, кӧні сӧтаналӧн юралан пуклӧсыс, но тэ зумыда кутчысян Менам нимӧ. Тэ эн соссьы Меным эскӧмысь весиг сэки, кор тіянын, сӧтана оланінын, виисны Антипаӧс — Менсьым эскана висьталысьӧс.
Но Менам эм мыйсюрӧ тэныд паныд: тіян пӧвстын эмӧсь найӧ, кодъяс кутчысьӧны Валаамлӧн велӧдӧмӧ. Сійӧ велӧдіс Валакӧс кежӧдны Израиль войтырӧс ылӧгас, медым найӧ сёйисны идоллы вайӧм сёян да кырсалісны.
Тіян пӧвстын эмӧсь тшӧтш найӧ, кодъяс кутчысьӧны николаитъяслӧн велӧдӧмӧ. Татшӧм велӧдӧмсӧ Ме мустӧмта.
Бергӧдчы таысь.
Он кӧ бергӧдчы, регыд локта тэ дінӧ да тышкася накӧд Менам вомысь петысь шыпуртӧн.
Кодлӧн эм пель, мед кылӧ, мый Лов висьталӧ вичкояслы.
Вермысьлы Ме сета сёйны дзебӧм манна, сета сылы еджыд из, код вылын лоӧ гижӧма вермысьлысь выль нимсӧ. Тайӧ нимсӧ кутас тӧдны сӧмын тайӧ изсӧ босьтысьыс».
«Фиатира вичкоса анделлы тадзи гиж:
— Со мый висьталӧ Ен Пи, кодлӧн синъясыс ыпъялӧны би моз, а кокъясыс дзирдалӧны донӧдӧм ыргӧн моз.
Ме тӧда тэнсьыд уджъястӧ, муслунтӧ, кесъялӧмтӧ, эскӧмтӧ да зумыдлунтӧ. Тӧда, мый воддзаыс дорысь тэ ӧні ёнджыка на уджалан.
Но Менам эм мыйсюрӧ тэныд паныд: тэ лэдзан Езавель аньлы, асьсӧ пророкӧн шуысьлы, велӧдны да кежӧдны ылӧгас Менсьым кесйӧгъясӧс. Тайӧ аньыс велӧдӧ найӧс кырсавны да сёйны идоллы вайӧм сёян.
Ме сеті сылы кад бергӧдчыны кырсалӧмсьыс, но сійӧ эз бергӧдчы.
Со, ме топӧда сійӧс сьӧкыд висьӧмӧн, а сыкӧд кырсалысьяслы ме мӧдӧда уна сьӧкыдлун, оз кӧ найӧ бергӧдчыны асланыс уджъясысь.
Езавельлӧн челядьлы Ме мӧдӧда кулӧм. Сэки быд вичко кутас тӧдны, мый Ме — сьӧлӧм пытшкӧс да мӧвпъяс Тӧдысь, Ме быдӧнлы мынтыся уджъясныд серти.
Тіянлы да фиатираса мукӧд олысьяслы, кодъяс эз сетчыны Езавельлӧн велӧдӧмӧ да эз пырӧдчыны сідз шусяна “сӧтаналӧн гуся велӧдӧмӧ”, висьтала со мый: ме ог сьӧктӧд тіянӧс мукӧд тшӧктӧмъясӧн.
Шуа сӧмын: видзӧй Менам локтӧдз сійӧ, мый тіян эм нин.
Вермысьлы, коді помӧдз вӧчас Менам тшӧктӧм серти, Ме сета вын ыджыдавны быд войтыр вылын. Сійӧ кутас видзны найӧс кӧрт беддьӧн да сёй дозъясӧс моз сійӧ жуглас найӧс торпыригӧдз сійӧ жӧ выннас, кутшӧм вын Меным сетіс Батьӧй. Вермысьлы Ме сета асъя кодзув.
Кодлӧн эм пель, мед кылӧ, мый Лов висьталӧ вичкояслы».
3 юр.
«Сардис вичкоса анделлы тадзи гиж:
— Со мый висьталӧ Сійӧ, кодлӧн эм Енлӧн сизим лолыс да сизим кодзув.
Ме тӧда тэнсьыд уджъястӧ. Тэнӧ лыддьӧны ловъяӧн, но тэ кулӧмыд.
Садьмӧдчы да ёнмӧд сійӧ, мый тэнад эм, но мый кулан выйын нин. Ме ӧд аддза, мый тэнад уджъясыд Менам Ен водзын абу тыр-бурӧсь.
Эн вунӧд сійӧ, мый кывлін да сибӧдін. Видз сійӧс сьӧлӧмад да бергӧдчы мыжъяссьыд.
Он кӧ садьмӧдчы, локта тэ дінӧ гусясьысь моз тӧдлытӧг. Тэ весиг он тӧдлы, кутшӧм кадӧ локта тэ дінӧ.
Дерт, Сардис карын тэнад эм кымынкӧ морт, кодъяс видзисны ассьыныс паськӧмнысӧ пежасьӧмысь. Найӧ кутасны ветлыны Мекӧд еджыд паськӧмаӧсь, ӧд найӧ шогмӧны та вылӧ.
Вермысь пасьтасяс еджыд паськӧмӧ, и сылысь нимсӧ ог вушты Олӧмыслӧн небӧгысь. Аслам Бать водзын да Енлӧн анделъяс водзын Ме висьтала, мый сійӧ — Менам.
Кодлӧн эм пель, мед кылӧ, мый Лов висьталӧ вичкояслы».
«Филадельфия вичкоса анделлы тадзи гиж: — Со мый висьталӧ Вежаыс да Збыльыс, код ордын Давидлӧн восьтаныс. Сійӧ восьтӧ, и некод оз вермы тупкыны. Сійӧ тупкӧ, и некод оз вермы восьтны. Сійӧ висьталӧ:
“Ме тӧда тэнсьыд уджъястӧ. Со, Ме восьті тэ водзын ӧдзӧс, и некод оз вермы тупкыны сійӧс.
Дерт, тэ жеб, но видзин Менсьым кывъясӧс да эн соссьы Менам нимысь.
Со, Ме сета тэныд сӧтана йӧз чукӧрысь найӧс, кодъяс шуӧны асьнысӧ юдейясӧн, но найӧ абу юдейяс, а пӧръясьысьяс. Ме вӧча тадзи: найӧ локтасны да уськӧдчасны тэнад кок улӧ. Сэки тӧдмаласны, мый тэ — Меным муса.
Ме тшӧкті тэныд зумыда сулавны, и тэ видзин Менсьым тшӧктӧмӧс. Та вӧсна видза тэнӧ локтана сьӧкыд кадас. Тайӧ кадыс лоӧ став му пасьталаыс, медым тӧдмавны мувывса олысьясӧс.
Регыд Ме локта. Бура видз сійӧ, мый тэнад эм, медым некод эз мырддьы тэнсьыд юркытштӧ.
Вермысьӧс Ме сувтӧда зумыд сюръя пыдди Менам Енлӧн крамын, сійӧ пыр лоас сэні.
Ме гижа сы вылӧ Менам Енлысь нимсӧ, Ассьым выль нимӧс да Менам Ен карлысь нимсӧ. Тайӧ карыс — выль Ерусалим, коді лэччас енэжсяньыс, Менам Енсянь”.
Кодлӧн эм пель, мед кылӧ, мый Лов висьталӧ вичкояслы».
«Лаодикия вичкоса анделлы тадзи гиж:
— Со мый висьталӧ Аминь, эскана да збыль Висьталысь, Енлӧн став вӧчӧмторлы Подулыс.
Ме тӧда тэнсьыд уджъястӧ. Тэ абу пӧсь ни абу кӧдзыд.
Вӧлін кӧ эськӧ пӧсьӧн либӧ кӧдзыдӧн.
Но тэ абу пӧсь ни абу кӧдзыд, тэ муртса дэбыд. Та вӧсна быликта тэнӧ Аслам вомысь.
Тэ шуан: “Ме озыр. Ме ёна нин озырми, менам ставыс эм”.
Но тэ ӧмӧй он гӧгӧрво, мый тэ — коньӧрсьыс-коньӧр, шудтӧм, гӧль, синтӧм да пасьтӧм.
Ме туйдӧда тэнӧ. Ньӧб Менсьым зарни, биын весалӧмаӧс, да озырмы. Ньӧб Менсьым еджыд паськӧм, медым вермин вевттьысьны, медым эз тыдав тэнӧ янӧдан пасьтӧм вир-яйыд. Ньӧб Менсьым мавтантор да мавт сійӧн синтӧ, медым аддзин.
Коді муса Меным, сійӧс ме янӧда-чирышта.
Сідзкӧ, сьӧлӧмсяньыд зіль бергӧдчыны мыжъяссьыд.
Со, Ме сулала ӧдзӧс дорад да игӧдча.
Коді кылас Менсьым гӧлӧс шыӧс да восьтас Меным, пыра сы ордӧ да кутам ӧтвыв сёйны.
Ме лои Вермысьӧн да пукси Аслам Батькӧд орччӧн Сылӧн пуклӧсӧ. Сідзкӧ, вермысьӧс ме тшӧтш пуксьӧда Аскӧд орччӧн Менам пуклӧсӧ.
Кодлӧн эм пель, мед кылӧ, мый Лов висьталӧ вичкояслы».
4 юр.
Сэсся ме видзӧдлі енэжас да аддзи сэтысь восьса ӧдзӧс. Сэсянь ме кылі гӧлӧс шы, сійӧ вӧлі труба шы кодь. Тайӧ гӧлӧс шысӧ ме водзынджык кывлі нин. Сійӧ шуис меным: «Кыпӧдчы татчӧ. Ме петкӧдла тэныд, мый лоӧ та бӧрти».
Дзик пыр ме тыри Лолӧн да аддзи енэжсьыс пуклӧс да сы вылын Пукалысьӧс. Сылӧн чужӧмыс дзирдаліс дона изъяс моз, яшма да сердолик моз. А пуклӧс весьтас югъяліс изумруд рӧма ӧшкамӧшка.
Пуклӧс гӧгӧрыс вӧлі нӧшта на кызь нёль пуклӧс. Сэні пукалісны кызь нёль пӧрысь. Найӧ вӧліны еджыд паськӧмаӧсь, а юр выланыс вӧліны зарни юркытшъяс.
Пуклӧс дінас чардаліс-гымаліс, да кылісны гора шыяс. Пуклӧс водзас ӧзйис сизим би, тайӧ Енлӧн сизим лолыс. Пуклӧс водзас вӧлі стеклӧысь саридз, сійӧ югъяліс крусталь моз. Пуклӧс водзас да сы гӧгӧрыс вӧлі нёль енэжвыв олысь. Водзладорсяньыс да бӧрладорсяньыс найӧ дзоньнас вӧлі тырӧмаӧсь синъясӧн.
Ӧтиыс на пиысь вӧлі лев кодь, мӧдыс — ӧшпи кодь, коймӧдыс вӧлі быттьӧ морт чужӧма, а нёльӧдыс вӧлі лэбысь кутш кодь.
Быдӧн на пиысь вӧлі квайт бордъя, а налӧн борд ортсыыс да пытшкӧсыс вӧлі тырӧмаӧсь синъясӧн.
Лун и вой найӧ дугдывтӧг шуалӧны:
— Вежа, вежа, вежа Господь Ен, Ставсӧкутысь, Коді вӧлі, эм и локтас.
Кор енэжвыв олысьяс ошкӧны-нимӧдӧны да аттьӧалӧны пуклӧс вылын Пукалысьӧс, Помтӧг Олысьӧс, сэки кызь нёль пӧрысьыс уськӧдчӧны пуклӧс вылын Пукалысь водзӧ да копыртчылӧны Помтӧг Олысьлы. Ассьыныс юркытшсӧ пуклӧс водзӧ пуктӧмӧн найӧ шуалӧны:
— Господьӧй. Тэ шогман сибӧдны ошкӧм-нимӧдӧмсӧ да вынсӧ, ӧд Тэ вӧчин ставсӧ. Тэнад кӧсйӧм серти вӧчӧма ставсӧ, да ставыс олӧ.
5 юр.
Юралан пуклӧс вылын Пукалысьлӧн веськыд киысь ме аддзи гартӧм гижӧд. Сэтчӧ вӧлі гижӧма ӧтарсяньыс и мӧдарсяньыс, да пуктӧма сы вылӧ сизим печать.
Нӧшта ме аддзи вына анделӧс, сійӧ гораа юаліс: «Коді шогмас разьны тайӧ гартӧм гижӧдсӧ да жугӧдны печатьяссӧ?»
Но енэжас, му вылас да му пыдӧсас некод эз вермы разьны тайӧ гижӧдсӧ либӧ видзӧдлыны сэтчӧ.
Ме ёна бӧрді, ӧд некод эз сюр шогманаыс разьны тайӧ гижӧдсӧ либӧ видзӧдлыны сэтчӧ.
Сэки пӧрысьяс пиысь ӧти шуис меным: «Эн бӧрд.
Со, Лев, Иуда чужанкотырысь, Давид чужанвужйысь. Сійӧ — Вермысь, Сійӧ разяс тайӧ гижӧдсӧ да жугӧдас сизимнан печатьсӧ».
Сэсся ме видзӧдлі да аддзи Баляӧс. Сійӧ сулаліс юралан пуклӧс водзын, нёль енэжвыв олысь да пӧрысьяс шӧрын. Балясӧ вӧлі быттьӧ начкӧма. Сылӧн вӧлі сизим сюр да сизим син. Сизим синмыс — тайӧ Енлӧн сизим лолыс, кодъясӧс мӧдӧдӧма став му пасьталаыс.
Баляыс матыстчис пуклӧс вылын Пукалысь дінӧ да босьтіс Сылӧн веськыд киысь гартӧм гижӧдсӧ.
Гижӧдсӧ босьтӧм бӧрын нёль енэжвыв олысьыс да кызь нёль пӧрысьыс уськӧдчисны Баля водзӧ. Быдӧн на пиысь киас кутіс арфа да ладан тыра зарни доз. Ладан тшыныс — тайӧ вежа войтырлӧн кевмысьӧмъясыс.
Найӧ сьылісны выль сьыланкыв:
— Тэ шогман босьтны гартӧм гижӧдсӧ да жугӧдны печатьсӧ, ӧд Тэнӧ вӧлі начкӧма. Вирыд вылӧ Тэ ньӧбин миянӧс Енмыслы быд чужанвужйысь да чужанкотырысь, быд кыла йӧз пытшкысь да войтырысь. Тэ пуктін миянӧс ӧксыясӧ да вежа кесъялысьясӧ миян Енлы. Ми кутам ыджыдавны му вылас.
Ме видзӧдлі да кылі уна анделлысь гӧлӧс шысӧ. Найӧ кытшалісны Енлысь пуклӧссӧ, нёль енэжвыв олысьӧс да пӧрысьясӧс. Анделъяслӧн лыдыс вӧлі лыдтӧм-тшӧттӧм — сё миллионъясӧн. Найӧ гораа шуалісны:
— Начкӧм Баляыс шогмана сибӧдны вынсӧ, озырлунсӧ, мывкыдлунсӧ, ёнлунсӧ, ошкӧм-нимӧдӧмсӧ да дзирдлунсӧ.
Ме кылі, мый став олысьыс енэжас, му вылас, му пыдӧсас да саридзас шуалісны:
— Юралан пуклӧс вылын Пукалысь лыда Балялы ошкӧм-нимӧдӧмыс, дзирдлуныс да ыджыдалӧмыс нэмъяс чӧж.
Сэки енэжвыв нёль олысьыс шуисны: «Аминь.»
А кызь нёль пӧрысьыс уськӧдчисны да копыртчылісны Помтӧг Олысьлы.
6 юр.
Ме аддзи: Баля жугӧдіс сизим печать пиысь медводдзасӧ. Сэсся ме кылі гым кодь гора шы: «Лок да видзӧд.» Тайӧс шуис нёль енэжвыв олысь пӧвстысь ӧтиыс.
Ме видзӧдлі да аддзи еджыд вӧлӧс, а сы вылын верзьӧма пукаліс. Сылӧн киас вӧлі ньӧввуж, сылы вӧлі сетӧма юркытш.
Сійӧ муніс вермысь моз, да бара на вӧлі дась вермыны.
Кор Баля жугӧдіс мӧд печатьсӧ, ме кылі мӧд енэжвыв олысьлысь шуӧмсӧ: «Лок да видзӧд.»
Сэки петіс мӧд вӧв, сійӧ вӧлі би гӧрд рӧма.
Сы вылын пукалысьлы вӧлі сетӧма вын — босьтны му вылысь лӧньлунсӧ, медым йӧзыс виалісны ӧта-мӧднысӧ.
Сылы вӧлі сетӧма ыджыд шыпурт.
Кор Баля жугӧдіс коймӧд печатьсӧ, ме кылі коймӧд енэжвыв олысьлысь шуӧмсӧ: «Лок да видзӧд.»
Ме видзӧдлі да аддзи сьӧд вӧлӧс. Сы вылын пукалысьлӧн киас вӧлі вески.
Сэсся нёль енэжвыв олысь шӧрысь ме кылі кодлыськӧ гӧлӧс шысӧ. Сійӧ шуис: «Ӧти хиникс шобдіысь — ӧти динар. Куим хиникс идйысь — тшӧтш сы мында.
Но выйсӧ да винасӧ эн тшыкӧд.»
Кор Баля жугӧдіс нёльӧд печатьсӧ, ме кылі нёльӧд олысьлысь шуӧмсӧ: «Лок да видзӧд.»
Ме видзӧдлі да аддзи быгалӧм рӧма вӧлӧс да сы вылын пукалысьӧс, кодлӧн нимыс — Кулӧм.
Сы бӧрся вӧтчис ачыс Адыс.
Налы вӧлі сетӧма ыджыдалан вын мулӧн нёльӧд юкӧныс вылын: виавны йӧзсӧ шыпуртӧн да тшыгйӧдӧмӧн, кулан висьӧмъясӧн да зверъяс отсӧгӧн.
Кор Баля жугӧдіс витӧд печатьсӧ, висьпуктанін улысь ме аддзи ловъяссӧ налысь, кодъясӧс вӧлі виӧма Ен Кыв вӧсна да Ен йылысь висьталӧм вӧсна.
Найӧ гораа горӧдісны: «Вежа да збыль Ыджыдӧй. Кор нин Тэ мыждан мувывса олысьясӧс да перъян налысь водзӧссӧ миян вир вӧсна?»
Сэки быдӧнлы налы сетісны еджыд паськӧм да тшӧктісны на виччысьыштны, кытчӧдз оз тыр на моз виӧмаяслӧн лыдыс — налӧн вокъяслӧн да ӧтвыв уджалысьяслӧн лыдыс.
Кор Баля жугӧдіс квайтӧд печатьсӧ, ме аддзи: муыс кутіс ёна вӧрны, шондіыс пемдіс да лои сьӧд дӧра кодь, а тӧлысьыс лои вир гӧрд рӧма.
Енэжсьыс кодзувъясыс усины му вылӧ инжир вотӧс моз, кор найӧ гылалӧны пу вывсьыс ён тӧвнырысь.
Енэжыс гартыштчис тубрасӧ да саяліс, а керӧсъяс да діяс вешйисны асланыс местаысь.
Мувывса ӧксыяс, юралысьяс, озыръяс, тышкайӧзӧн веськӧдлысьяс, ыджыдалысьяс, кесйӧгъяс да мездлуна йӧз, — ставныс дзебсисны кырта горсъясӧ да керӧс потасъясӧ. Керӧсъяслы да кырталы найӧ шуалісны:
«Усьӧй миян вылӧ да дзебӧй миянӧс юралан пуклӧс вылын Пукалысьлӧн синъясысь да Балялӧн скӧрлунысь.
Ӧд Сылӧн ыджыд Скӧралан луныс воис нин. Коді вермас Сылы паныд сувтны?»
7 юр.
Та бӧрти ме аддзи нёль анделӧс. Найӧ сулалісны мулӧн нёльнан пельӧсас да кутісны мулысь нёльнан тӧвнырсӧ, медым тӧлыс эз пӧльт му вылӧ, саридз вылӧ да некутшӧм пу вылӧ.
Сэсся ме аддзи нӧшта ӧти анделӧс. Сійӧ кыпӧдчис асыввывсянь, а киас кутіс ловъя Енлысь пас пуктансӧ.
Сійӧ гораа шыасис нёль андел дінӧ, кодъяслы вӧлі сетӧма вын вӧчны лёксӧ мулы да саридзлы. Андел шуис: «Энӧ вӧчӧй лёксӧ мулы, саридзлы да пуяслы, кытчӧдз огӧ пуктӧй плешканыс пас миян Енлӧн кесйӧгъяслы».
Сэсся ме кылі пасйӧмаяслысь лыдсӧ.
Тайӧ лыдыс вӧлі сё нелямын нёль сюрс морт. Найӧ вӧліны Израиль войтырлӧн быд чужанкотырысь:
Иуда чужанкотырысь — дас кык сюрс морт,
Рувим чужанкотырысь — дас кык сюрс,
Гад чужанкотырысь — дас кык сюрс,
Асир чужанкотырысь — дас кык сюрс,
Неффалим чужанкотырысь — дас кык сюрс,
Манассей чужанкотырысь — дас кык сюрс,
Симеон чужанкотырысь — дас кык сюрс,
Левий чужанкотырысь — дас кык сюрс,
Иссакар чужанкотырысь — дас кык сюрс,
Завулон чужанкотырысь — дас кык сюрс,
Ӧсип чужанкотырысь — дас кык сюрс
да Вениамин чужанкотырысь — дас кык сюрс морт.
Сэсся ме видзӧдлі да аддзи: юралан пуклӧс водзын да Баля водзын сулаліс лыдтӧм-тшӧттӧм йӧз чукӧр. Найӧ вӧліны быд чужанвужйысь да чужанкотырысь, быд кыла йӧз пытшкысь да войтырысь. Найӧ вӧліны еджыд паськӧмаӧсь, а кианыс кутісны пальма росъяс
да гораа горзісны:
— Мездмӧмыс — миян Енсянь — юралан пуклӧс вылын Пукалыссянь да Балясянь.
Сэки став анделыс, кодъяс кытшалісны юралан пуклӧссӧ, пӧрысьясӧс да нёль енэжвыв олысьсӧ, кымынь уськӧдчисны пуклӧс водзӧ да копыртчылісны Енмыслы. Найӧ шуалісны:
— Аминь.
Дзирдлуныс да мывкыдлуныс, выныс да ёнлуныс, ошкӧм-нимӧдӧмыс да аттьӧалӧмыс миян Енлы нэмъяс чӧж.
Аминь.
Сэки пӧрысьяс пӧвстысь ӧти юаліс менсьым: «Тайӧ еджыд паськӧмаясыс — найӧ кодъяс? Кытысь найӧ локтісны?»
«Ыджыдӧй, тэ ачыд тӧдан», — вочавидзи ме.
Сэки сійӧ шуис меным:
— Тайӧ йӧзыс мунісны уна сьӧкыд пыр.
Найӧ мыськисны ассьыныс паськӧмсӧ Баля Вирӧн, да налӧн паськӧмыс лои еджыд.
Та вӧсна найӧ сулалӧны Ен пуклӧс водзын да лун и вой кесъялӧны Енмыслы Сылӧн крамын.
Пуклӧс вылын Пукалысьыс пыр лоӧ накӧд да видзӧ найӧс.
Найӧ оз нин кутны тшыгъявны, налӧн оз косьмы горшыс, найӧс оз пӧж шондіыс да оз сот гожйыс.
Ӧд Баляыс, пуклӧс водзын Сулалысьыс, кутас видзны найӧс, Сійӧ вайӧдас найӧс ловъя ва визувтанінӧ, да Енмыс чышкас налысь став синвасӧ.
8 юр.
Кор Баля жугӧдіс сизимӧд печатьсӧ, енэжас час джын мында кежлӧ лои чӧв-лӧнь.
Ме аддзи Ен водзын сулалысь сизим анделӧс, налы вӧлі сетӧма сизим труба.
Сэсся матыстчис нӧшта ӧти андел да сувтіс тшынӧдчан пызан водзӧ. Киас сійӧ кутіс зарни тшынӧдчан доз.
Сылы вӧлі сетӧма уна ладан, медым тшынӧдны сійӧс став вежа войтырлӧн кевмысьӧмъяснас зарни тшынӧдчан пызан вылын, коді сулаліс юралан пуклӧс водзын.
Сэки андел киысь кыптіс Енмыслы вежа войтырлӧн кевмысьӧмъяснас ладан тшын.
Сэсся андел босьтіс тшынӧдчан доз, пуктіс сэтчӧ висьпуктанінысь бисӧ да шыбитіс сійӧс му вылӧ.
Сэні кылісны гора шыяс, чардаліс-гымаліс, да муыс вӧрис.
Сэки сизимнан анделыс, кодъяслӧн вӧлі сизим труба, дасьтысисны трубитны.
Кор трубитіс медводдза анделыс, му вылӧ киссис вир сора биа шер.
Сэки сотчис пуяслӧн коймӧд юкӧныс да став веж туруныс.
Кор трубитіс мӧд анделыс, быттьӧ ыджыд сотчысь керӧс уси саридзас, да саридзлӧн коймӧд юкӧныс пӧри вирӧ. Сэки саридзын олысьяслӧн коймӧд юкӧныс куліс, да корабльяслӧн коймӧд юкӧныс вӧйис.
Кор трубитіс коймӧд анделыс, енэжсьыс уси ыджыд кодзув, коді ыпъяліс яръюгыд би моз. Сійӧ уси юяслӧн коймӧд юкӧныс вылӧ да ва петанінъясӧ.
Тайӧ кодзулыслӧн нимыс Курыд турун.
Ваыслӧн коймӧд юкӧныс лои зэв курыд, та вӧсна уна йӧз кулісны.
Кор трубитіс нёльӧд анделыс, шонділӧн, тӧлысьлӧн да кодзувъяслӧн коймӧд юкӧныс кусіс, налӧн коймӧд юкӧныс пемдіс. Та вӧсна луныслӧн да войыслӧн коймӧд юкӧныс вӧлі пемыд.
Сэсся ме аддзи енэж шӧрӧдыс лэбысь анделӧс. Сійӧ гораа горзіс: «Шог, шог, шог тіянлы, мувывса олысьяслы, мукӧд куим анделлӧн трубитӧмысь, ӧд найӧ регыд нин пондасны трубитны.»
9 юр.
Кор трубитіс витӧд анделыс, ме аддзи: енэжсянь му вылӧ усис кодзув. Сылы вӧлі сетӧма пыдӧстӧминысь восьтансӧ.
Кор сійӧ восьтіс пыдӧстӧминсӧ, сэтысь ыджыд пачысь моз пуркнитіс тшын.
Тайӧ тшынсьыс пемдіс шондіыс и сынӧдыс.
Тшын пытшсьыс петіс му вылӧ саранча чукӧр. Налы вӧлі сетӧма мувывса скорпионъяслӧн кодь вын.
Налы вӧлі шуӧма, медым эз вӧчны некутшӧм лёктор турунлы, быдмӧглы либӧ пулы, сӧмын йӧзыслы, кодъяслӧн плешкас абу Енлӧн пасыс.
Саранчаяслы вӧлі шуӧма, медым найӧ эз виавны йӧзӧс, сӧмын мучитісны найӧс вит тӧлысь чӧж.
Налысь мучитӧмсӧ позьӧ ӧткодявны скорпионлӧн чушкӧмкӧд.
Сійӧ лунъясӧ йӧзыс кутасны корсьны кулӧмсӧ, но оз аддзыны сійӧс, кӧсъясны кувны, но кулӧмыс пышъяс наысь.
Саранчаясыс вӧліны тышӧ петысь вӧвъяс кодьӧсь.
Юр выланыс налӧн вӧлі зарни юркытш сяма, а чужӧмыс налӧн вӧлі мортлӧн кодь.
Налӧн вӧлі аньлӧн кодь юрси, а налӧн пиньясыс вӧліны левлӧн пиньяс кодьӧсь.
На вылын вӧлі кышӧд, быттьӧ кӧртысь дорӧма. Налӧн бордъясыс швачкисны сэтшӧм гораа, быттьӧ зэв уна телегаа вӧв чукӧр котӧртіс тышӧ.
Налӧн бӧжъясыс вӧліны скорпионлӧн кодьӧсь, а бӧжъясас вӧліны чушканъяс.
Налӧн вӧлі вын вӧчны йӧзыслы лёксӧ вит тӧлысь чӧж.
Налӧн ӧксынас вӧлі пыдӧстӧминысь андел.
Сылӧн нимыс еврей ногӧн лоӧ Авадон, а грек ногӧн — Аполион.
Ӧти шог муніс, сы бӧрся нӧшта кык шог локтӧ.
Кор трубитіс квайтӧд анделыс, ме кылі гӧлӧс шы. Сійӧ кыліс зарни висьпуктанінлӧн нёль сюрсянь. Тайӧ висьпуктаніныс сулаліс Ен водзын. Тайӧ гӧлӧс шыыс шуис квайтӧд анделыслы, кодлӧн вӧлі труба:
«Мезды нёльнан анделсӧ, кодъясӧс кӧрталӧма ыджыд Евфрат ю дорӧ».
Сэки нёльнан анделсӧ вӧлі мездӧма. Найӧс вӧлі дасьтӧма тайӧ часыс, луныс, тӧлысьыс да воыс кежлӧ, медым вины йӧзыслысь коймӧд юкӧнсӧ.
Тайӧ анделъясыслӧн вӧлі кыксё миллион тышка морт вӧвъяснас.
Тайӧ лыдсӧ ме ачым кывлі.
Тайӧ вӧвъяссӧ да тышкайӧзсӧ ме аддзылі вемӧсӧн. Найӧ вӧліны татшӧмӧсь: верзьӧмаяс вылын вӧліны би гӧрд, пемыдлӧз да кольквиж рӧма кӧрт кышӧдъяс. Вӧвъяслӧн юрныс вӧлі левъяслӧн юр кодьӧсь, налӧн вомысь петіс би, тшын да сера.
Тайӧ куим бырӧданторсьыс: биысь, тшынысь да сераысь, кодъяс петісны вӧвъяслӧн вомысь, куліс йӧзлӧн коймӧд юкӧныс.
Вӧвъяслӧн выныс вӧлі налӧн вомас да бӧжас.
Налӧн бӧжъясыс вӧліны змей кодьӧсь, ӧд бӧжъясыс вӧліны юраӧсь. Тайӧ юрнас найӧ чушкисны.
Мукӧд йӧзыс, кодъяс колины ловйӧн тайӧ бырӧданторъяссьыс, эз бергӧдчыны асланыс лёк уджъясысь. Найӧ важ мозыс копрасисны мутияслы да зарниысь, эзысьысь, ыргӧнысь, изйысь да пуысь вӧчӧм идолъяслы, кодъяс оз вермыны аддзыны, кывны ни ветлыны.
Найӧ эз бергӧдчыны морт виӧмысь, тшыкӧдчӧмысь, кырсалӧмысь да гусясьӧмысь.
10 юр.
Ме аддзи нӧшта ӧти вына анделӧс, коді лэччис енэжсяньыс. Сійӧс кытшаліс кымӧрыс, сы юр весьтын вӧлі ӧшкамӧшка. Сылӧн чужӧмыс вӧлі шонді кодь, а кокъясыс вӧліны биа сюръяяс кодьӧсь. Киас сійӧ кутіс неыджыд восьса гижӧд.
Веськыд кокнас сійӧ сувтіс саридз вылӧ, а шуйганас — му вылӧ, сэсся горӧдіс ыджыд шыӧн, быттьӧ лев равӧстіс.
Сылӧн горӧдӧм бӧрын сизим гым кутісны гораа сёрнитны.
Сизим гым сёрнитӧм бӧрын ме кӧсйи гижны налысь сёрнисӧ, но енэжсяньыс ме кылі гӧлӧс шы. Сійӧ шуис меным:
«Сизим гымлысь сёрнисӧ эн гиж, дзеб сійӧс».
Сэки андел, кодӧс ме аддзылі саридз да му вылын ӧтпырйӧ сулалысьӧн, лэптіс веськыд кисӧ енэжланьыс да кӧсйысис Помтӧг Олысьӧн, коді вӧчис енэжсӧ да сэні олысьясӧс, мусӧ да сы вылын олысьясӧс, саридзсӧ да сы пытшкын олысьясӧс. Сійӧ сетіс кыв: «Кадыс оз нин ло. Но сійӧ лунӧ, кор кылас сизимӧд анделлӧн трубитӧм шыыс, сэки збыльмас Енлӧн гуся мӧвпыштӧмыс, мый йылысь Енмыс водзвыв висьталіс пророкъяслы — Аслас кесйӧгъяслы».
Сэсся енэжсяньыс бара кыліс гӧлӧс шы, кодӧс ме кывлі нин. Сійӧ шуис меным: «Мун андел дінӧ, коді сулалӧ саридз да му вылын, да босьт сылӧн киысь восьса гижӧдсӧ».
Ме матыстчи андел дінӧ да кори сылысь гижӧдсӧ.
Сійӧ шуис меным: «Босьт да сёй тайӧ гижӧдсӧ.
Сійӧ лоӧ юмов ма кодь вом пытшкад, но гырк пытшкад лоӧ курыд».
Андел киысь ме босьті гижӧдсӧ да сёйи.
Менам вомын сійӧ вӧлі юмов ма кодь.
Но бӧрыннас менам гырк пытшкӧй ёна курдіс сыысь.
Сэсся андел шуис меным: «Тэныд бара на ковмас водзвыв висьтавлыны, мый лоӧ уна войтыркӧд да чужанкотыркӧд, уна йӧзкӧд да ӧксыяскӧд».
11 юр.
Меным сетісны кузь мурталан бедь да шуисны: «Мун да муртав Енлысь крамсӧ, висьпуктанінсӧ да лыддьы крамас юрбитысьяслысь лыдсӧ.
Крамлысь ортсы йӧрсӧ эн муртав, сійӧс оз ков муртавны, ӧд сійӧс сетӧма ентӧдтӧмъяслы.
Найӧ кутасны талявны вежа карсӧ нелямын кык тӧлысь чӧж.
Ме мӧдӧда Ассьым кык висьталысьӧс. Чорыд дукӧсӧ пасьтасьӧмӧн найӧ кутасны пророкавны сюрс кыксё квайтымын лун чӧж».
Тайӧ висьталысьясыс — кык выя пу да кык бикок, кодъяс сулалӧны став мунас веськӧдлысь Ен водзын.
Кодкӧ кӧсъяс кӧ налы лёк вӧчны, на вомысь петас би да ньылыштас налы паныд мунысьясӧс.
Тадзи быдӧнӧс, налы лёк вӧчысьясӧс, лоӧ бырӧдӧма.
Налӧн эм вын тупкыны енэжсӧ, медым налӧн висьтавлігӧн эз зэр. Налӧн эм вын пӧртны васӧ вирӧ да тшыкӧдны мусӧ быдпӧлӧс бырӧданторнас, кор сӧмын кӧсъясны.
Кор найӧ дугдасны висьтавлыны, сэки пыдӧстӧминысь петас звер да кутас тышкасьны накӧд. Зверыс вермас найӧс да виас. Налӧн шойясыс кутасны куйлыны ыджыд карлӧн туй вылас. Тайӧ карсӧ позьӧ ӧткодявны Содомкӧд да Египеткӧд, ӧд тайӧ карас вӧлі тувъялӧма налысь Господьӧс.
Быд кыла йӧз пытшкысь да войтырысь, быд чужанвужйысь да чужанкотырысь унаӧн кутасны видзӧдны налӧн шойяс вылӧ куим лун да джын, но оз лэдзны гуавны найӧс.
Мувывса йӧзыс кутасны нимкодясьны да гажӧдчыны, весиг козьналасны ӧта-мӧдныслы козинъяс, ӧд тайӧ кык висьталысьыс ёна мучитісны найӧс.
Но куим лун да джын мысти Енмыс пӧльыштіс тайӧ кык висьталысьыс пытшкӧ олӧмыслысь ловсӧ, да найӧ чеччисны.
Сэки на вылӧ видзӧдысьяс ёна повзисны.
Висьталысьяс кылісны енэжсяньыс гора шы. Сійӧ шуис налы: «Кыпӧдчӧй татчӧ.»
Сэки найӧ кыпӧдчисны енэжас кымӧр вылын, а налы паныд мунысьяс видзӧдісны на вылӧ.
Дзик пыр муыс кутіс ёна вӧрны, да карыслӧн дасӧд юкӧныс киссис. Му вӧригас куліс сизим сюрс морт, а мукӧдыс ёна повзисны да ошкисны енэжвывса Енмӧс.
Мӧд шогыс помасис, но матысмӧ нин коймӧд шог.
Сизимӧд анделыс трубитіс, и енэжас кылісны гора шыяс. Найӧ шуалісны:
— Став муюгыдыс лои миян Господьлӧн да Сылӧн Мавтыштӧмалӧн юраланінӧн. Сійӧ кутас юравны нэмъяс чӧж.
Сэки кызь нёль пӧрысьыс, кодъяс пукалісны Ен водзын юралан пуклӧсъяс вылын, кымынь уськӧдчӧмӧн копыртчылісны Енмыслы. Найӧ шуалісны:
— Господьӧй Енмӧй, Ставсӧкутысьӧй. Ми аттьӧалам Тэнӧ. Тэ эм, вӧлін и лоан. Тэ босьтін ыджыдалан вынсӧ Аслад киӧ, кутін веськӧдлыны ставнас.
Ентӧдтӧмъяс ёна скӧралісны, но ӧні воис Тэнад скӧрлуныд. Воис кад мыждыны кулӧмаясӧс да сетны тырдон Тэнад кесйӧгъяслы — пророкъяслы да вежа войтырлы, да Тэнад нимысь полысьяслы — ичӧтъяслы и гырысьяслы. Воис кад бырӧдны найӧс, кодъяс тшыкӧдісны мусӧ.
Енэжас воссис Енлӧн крамыс, и сэтысь тыдовтчис Йитӧдлӧн куд. Сэки кутіс чардавны-гымавны, кылісны гора шыяс, муыс кутіс вӧрны, да киссис гырысь шер.
12 юр.
Сэсся енэжсьыс ме аддзи ыджыд индысьпас.
Ань вӧлі гартыштчӧма шондіӧн.
Сылӧн кок улас вӧлі тӧлысь, а юр вылас — дас кык кодзулысь юркытш.
Сійӧ вӧлі кынӧма, да ёна горзіс чужтан дойсьыс.
Сэсся енэжас лои мӧд индысьпас. Ме аддзи би гӧрд рӧма ыджыд гундырӧс. Сійӧ вӧлі сизим юра да дас сюра, а быд юр вылын вӧлі юркытш.
Бӧжнас сійӧ чышкыштіс енэжсьыс кодзувъяслысь коймӧд юкӧнсӧ да шыбитіс найӧс му вылӧ.
Сэсся гундыр сувтіс чужтысь аньлы воча, медым чужтӧм бӧрас сёйны сылысь пузчужӧм кагасӧ.
Ань чужтіс пиӧс, тайӧ кагаыс кутас веськӧдлыны кӧрт беддьӧн став йӧзнас.
Аньлысь кагасӧ вӧлі кыпӧдӧма Ен дінӧ, Сылӧн юралан пуклӧс дінӧ.
Ачыс аньыс пышйис овтӧминӧ. Сэні Енмыс дасьтӧма вӧлі оланін, медым вердны тайӧ аньсӧ сюрс кыксё квайтымын лун чӧж.
Сэсся енэжас пансис тыш.
Микаил аслас анделъяскӧд тышкасис гундырлы паныд, а гундыр аслас анделъяскӧд — налы паныд. Но гундырӧс вӧлі вермӧма, и сылы да сылӧн анделъяслы эз ло местаыс енэжас.
Ыджыд гундырӧс, важ змейӧс, вӧлі шыбитӧма му вылӧ. Сылӧн нимыс — омӧль да сӧтана. Сійӧ ылӧдлӧ муюгыдас став олысьсӧ. Сыкӧд тшӧтш вӧлі шыбитӧма му вылас сылысь анделъяссӧ.
Сэки ме кылі енэжсянь гора шы:
— Ӧні воис мездмӧмыс, выныс, миян Енлӧн юралӧмыс да Сылӧн Мавтыштӧмалӧн ыджыдалӧмыс. Ӧд енэжсьыс шыбитӧма мыждысьӧс. Лун и вой сійӧ мыждіс вокъяснымӧс миян Ен водзын.
Миян вокъяс вермисны мыждысьӧс Балялӧн Вирӧн да збыльсӧ висьталӧмӧн. Найӧ дасьӧсь вӧлі сетны ассьыныс олӧмнысӧ да эз повны кулӧмысь.
Сідзкӧ, енэжыс да став сэні олысьыс, нимкодясьӧй.
Но курыд шог тіянлы, му вылын да саридзын олысьяслы, ӧд тіян дінӧ лэччис омӧльыс. Сійӧ тырӧма ыджыд скӧрлунӧн, ӧд сійӧ тӧдӧ, мый сылӧн кадыс этша нин.
Кор гундыр аддзис, мый сійӧс шыбитӧма му вылӧ, сійӧ кутіс вӧтлысьны пи чужтысь ань бӧрся.
Аньлы вӧлі сетӧма ыджыд кутшлысь кык борд, медым сійӧ лэбзис змейысь овтӧминӧ, сылы дасьтӧминӧ. Сэні кутасны вердны сійӧс куим во да джын.
Аньӧс вӧтӧдігӧн змей быликтіс аслас вомысь ю мында ва, медым кылӧдны аньӧс,
но муыс отсаліс аньлы. Муыс воссис да ньылыштіс гундыр вомысь петӧм юсӧ.
Гундыр ёна скӧрмис ань вылӧ да муніс тышкасьны сылӧн мукӧд челядькӧд, кодъяс олӧны Ен тшӧктӧм серти да кутчысьӧны Исус Кристослӧн висьталӧмӧ.
13 юр.
Сэсся ме сувті саридз дорӧ да аддзи саридзысь петӧм зверӧс. Сійӧ вӧлі сизим юра да дас сюра.
Быд сюрын вӧлі ӧти юркытш, а юръясас вӧлі гижалӧма Енмӧс лёкӧдана нимъяс.
Зверыс, кодӧс ме аддзылі, вӧлі леопард кодь.
Сылӧн кокъясыс вӧліны ошлӧн кодьӧсь, а вомыс — левлӧн кодь.
Гундыр сетіс сылы ассьыс вынйӧрсӧ, юралан пуклӧссӧ да ыджыдалан вынсӧ.
Ме аддзи: зверлӧн ӧти юрыс вӧлі кувмӧн доймӧма, но тайӧ кулан дойыс бурдіс.
Став мувывса йӧзыс таысь ёна шензисны да вӧтчисны звер бӧрся.
Найӧ копыртчылісны гундырлы, коді сетіс зверлы ыджыдалан вынсӧ.
Сэсся найӧ копыртчылісны зверлы да шуалісны:
— Кодӧс позьӧ ӧткодявны тайӧ зверыскӧд?
Коді вермас тышкасьны сыкӧд?
Зверлы вӧлі сетӧма позянлун тшапа сёрнитны да омӧльтны Енмӧс лёкӧдана кывъясӧн. Сылы вӧлі сетӧма вын вӧчны тадзи нелямын кык тӧлысь чӧж.
Сійӧ паськӧдіс вомсӧ да кутіс лёкӧдны Енмӧс, Сылысь нимсӧ, оланінсӧ да енэжвыв олысьясӧс.
Сылы вӧлі сетӧма вын тышкасьны вежа войтыркӧд да вермыны найӧс.
Сылӧн вӧлі вын ыджыдавны быдпӧлӧс чужанвуж да чужанкотыр вылын, быд кыла йӧз да быд войтыр вылын.
Сылы копыртчыласны мувывса став йӧзыс, кодъяслысь нимсӧ му пуксьӧмсяньыс абу гижӧма начкӧм Балялӧн небӧгӧ — Олӧмыслӧн небӧгӧ.
Кодлӧн эм пель, мед кылӧ тайӧ кывъяссӧ:
Коді мӧд мортсӧ дзескыдінӧ пуксьӧдас, ачыс сэтчӧ веськалас.
Коді шыпуртӧн виас, ачыс шыпуртсянь кулас.
Татшӧм кадас вежа войтырлы колӧ зумыдлун да эскӧм.
Сэсся ме аддзи мӧд зверӧс, коді петіс му пытшкысь.
Сылӧн вӧлі балялӧн кодь кык сюр, но сёрнитіс сійӧ гундыр моз.
Сійӧ ставсӧ вӧчӧ воддза зверыслӧн син водзын, сылӧн ыджыдалан выннас. Став мусӧ да сэні олысьясӧс сійӧ тшӧктӧ копрасьны воддза зверыслы, кодлӧн бурдіс кулан дойыс.
Сійӧ вӧчӧ ыджыд шензьӧданаторъяс: йӧз син водзын сійӧ енэжсяньыс уськӧдӧ би му вылӧ.
Став шензьӧданаторсӧ сійӧ вӧчӧ воддза зверыслӧн син водзын. Тайӧ шензьӧданаторъяснас сійӧ ылӧдлӧ мувывса йӧзсӧ. Сійӧ тшӧктӧ йӧзыслы вӧчны воддза зверыслысь серпассӧ. Тайӧ зверсӧ вӧлі дойдӧма шыпуртӧн, но сійӧ ловзис.
Мӧд зверыслы вӧлі сетӧма вын: ловзьӧдны воддза зверыслысь серпассӧ, медым тайӧ серпасыс сёрнитіс да тшӧктіс виавны быдӧнӧс, коді оз копыртчыв тайӧ серпасыслы.
Сійӧ тшӧктӧ быдӧнлы — ичӧтлы и гырысьлы, озырлы и гӧльлы, мездлуна мортлы и кесйӧглы — пуктыны пас налӧн веськыд киас либӧ плешкас. Сэки некод оз вермы ньӧбны ни вузавны, оз кӧ ло сылӧн тайӧ пасыс: зверлӧн нимыс либӧ сы нимлӧн лыдпасыс.
Тані колӧ мывкыдлун.
Кодлӧн эм вежӧр, сійӧ мед гӧгӧрвоӧ звер нимлысь лыдпассӧ, ӧд тайӧ мортлӧн лыдпасыс.
Тайӧ лыдпасыс — квайтсё квайтымын квайт.
14 юр.
Сэсся ме видзӧдлі да аддзи: Сион керӧс вылын сулалісны Баля да Сыкӧд орччӧн сё нелямын нёль сюрс морт. Налӧн плешканыс вӧлі гижӧма Сылӧн Батьлысь нимсӧ.
Ме кылі енэжсяньыс шы. Сійӧ вӧлі уна валӧн бузгысь шы кодь да чорыд гым шы кодь. Сійӧ юргис, быттьӧ арфаӧн ворсісны.
Тайӧ йӧзыс сьылісны выль сьыланкыв юралан пуклӧс водзын, нёль енэжвыв олысь да пӧрысьяс водзын.
Тайӧ сьыланкывсӧ некод эз куж сьывнысӧ. Сійӧс сьылісны сӧмын сё нелямын нёль сюрс морт, кодъясӧс ньӧбӧма му вывсьыс.
Тайӧ йӧзыс эз пежавны асьнысӧ аньяскӧд узьлӧмӧн, найӧ сӧстӧмӧсь.
Найӧ мунӧны Баля бӧрся быдлаӧ, кытчӧ Сійӧ мунӧ.
Найӧс ньӧбӧма мувывса йӧз пӧвстысь, найӧ — медводдза вайӧмтор Енмыслы да Балялы. Налӧн вомысь некор эз петлыны пӧръясян кывъяс, Ен пуклӧс водзын найӧ мыжтӧмӧсь.
Сэсся ме аддзи нӧшта ӧти анделӧс, коді лэбис енэж шӧрӧдыс. Сылӧн вӧлі помасьлытӧм Евангелльӧ, медым висьтавлыны сійӧс мувывса олысьяслы: быд чужанвужлы да чужанкотырлы, быд кыла йӧзлы да войтырлы.
Сійӧ гораа шуаліс: «Полӧй Енсьыс да ошкӧй Сійӧс.
Ӧд воис Сылӧн Мыждан луныс. Копыртчылӧй Сылы, коді вӧчис енэжсӧ да мусӧ, саридзсӧ да ва петанінъяссӧ.»
Воддза анделыс бӧрся лэбис мӧд андел да горзіс: «Киссис, киссис Вавилон, ыджыд кар, ӧд сылӧн кырсалӧм понда став йӧзыслы ковмис юны Ен скӧрлуна вина».
Кык андел бӧрся лэбис нӧшта ӧти андел. Сійӧ гораа шуаліс:
«Коді копыртчылас зверлы да сылӧн серпаслы да сетас пуктыны зверлысь пассӧ плешкас либӧ ки вылас, сійӧ кутас юны Ен скӧрлуна вина, соравтӧм вина, кодӧс сулӧдӧма Ен скӧрлуна чашаын. Сійӧ кутас мучитчыны биын да сотчысь сераын вежа анделъяс водзын да Баля водзын. Найӧс мучитан билӧн тшыныс кутас кыпӧдчыны нэмъяс чӧж. Найӧ, кодъяс копыртчыласны зверлы да сылӧн серпаслы да сетасны пасйыны асьнысӧ сылӧн нимӧн, оз кутны тӧдны шойччӧгсӧ лунын ни войын.
Сідзкӧ, вежа войтырлы — Ен тшӧктӧм серти олысьяслы да Исуслы эскысьяслы — колӧ лоны зумыдӧн».
Сэсся ме кылі енэжсянь гӧлӧс шы. Сійӧ шуис меным:
«Гиж тайӧс: “Шудаӧсь найӧ, кодъяс ӧнісянь куласны Господьлы эскӧмӧн.
Тайӧ тадзи, — шуӧ Лов.
Найӧ кутасны шойччыны асланыс сьӧкыд уджъясысь, ӧд налӧн уджъясыс мунӧны на бӧрся”».
Ме видзӧдлі да аддзи еджыд кымӧр, а сы вылын кодкӧ Морт Пи кодь пукаліс.
Сылӧн юр вылас вӧлі зарни юркытш, а киас — лэчыд чарла.
Сэсся крамсьыс петіс ӧти андел да гораа горӧдіс кымӧр вылын Пукалысьлы:
«Босьт ассьыд чарлатӧ да вунды, ӧд вундан кадыс воис нин. Му вылын кӧдзасыс воӧма».
Кымӧр вылын Пукалысь шыбитіс ассьыс чарласӧ му вылӧ, и кӧдзасыс лои вундӧма.
Енэжвыв крамысь петіс мӧд андел, сылӧн тшӧтш вӧлі лэчыд чарла.
Сэсся висьпуктанінсянь петіс нӧшта ӧти андел, сылӧн вӧлі вын би вылын. Сійӧ гораа горӧдіс лэчыд чарлаа анделлы: «Босьт лэчыд чарлатӧ да вунды му вылысь виноград розъяссӧ, ӧд сылӧн вотӧсыс кисьмӧма нин».
Андел шыбитіс ассьыс чарласӧ му вылӧ да вундіс му вылысь виноград розъяссӧ. Сійӧ шыбитіс найӧс ыджыд гуӧ, Ен скӧрлуна пычкан гуӧ.
Виноград вотӧссӧ вӧлі талялӧма кар ортсыас, пычкан гуын. Сэтысь вирыс петіс ортсӧ да визувтіс сюрс квайтсё стадий ылнаӧдз, а джуджтаыс сылӧн вӧлі вӧв домӧдз.
15 юр.
Сэсся енэжсьыс ме нӧшта на аддзи шензьӧдана да ыджыд индысьпас. Ме аддзи сизим анделӧс, кодъяслӧн вӧлі бӧръя сизим бырӧданторйыс. Тайӧ бырӧданторъяснас помасис Енлӧн скӧрлуныс.
Ме аддзи саридз, сійӧ вӧлі стеклӧ кодь да пӧртмасис биӧн. Стеклӧ саридз дорас сулалісны найӧ, кодъяс тышкасисны зверкӧд, сылӧн серпасыскӧд да сы нимлӧн лыдпасыскӧд да петісны вермысьясӧн. Найӧ кутісны кианыс Енлысь арфаяссӧ да сьылісны Ен кесйӧг Мӧисейлысь да Балялысь сьыланкывсӧ:
— Господьӧй Енмӧй, Ставсӧкутысьӧй. Тэнад уджъясыд ыджыдӧсь да шензьӧданаӧсь,
Тэнад туйясыд веськыдӧсь да збыльӧсь. Тэ — Ӧксыыс вежа войтырлы.
Господьӧй, сюрас-ӧ сэтшӧм морт, коді оз повзьы Тэысь да оз ошкы Тэнсьыд нимтӧ?
Ӧд Тэ ӧтнадӧн — вежаыс.
Быд войтырысь локтасны да копыртчыласны Тэныд, ӧд воссис Тэнад веськыда мыждӧмыд.
Сэсся ме видзӧдлі да аддзи: енэжас воссис крам — Енлӧн скинияыс.
Крамысь петісны сизим андел, кодъяслӧн вӧлі сизим бырӧданторйыс. Найӧ вӧлі пасьтасьӧмаӧсь сӧстӧм да лым еджыд шабді паськӧмӧ, а морӧс весьтӧдыс вӧлі вӧнясьӧмаӧсь зарни вӧньӧн.
Нёль енэжвыв олысь пӧвстысь ӧтиыс сетіс сизим анделлы сизим зарни чаша. Тайӧ чашаяссӧ вӧлі тыртӧма Помтӧг Олысь Енлӧн скӧрлунӧн.
Енлӧн дзирдлунысь да Сылӧн вынысь крамыс тырис тшынӧн. Крамас некод эз вермы пырнысӧ, кытчӧдз эз помась сизим анделлӧн сизим бырӧданторйӧн удж вӧчӧмыс.
16 юр.
Сэсся крамсьыс ме кылі гора гӧлӧс шы. Сійӧ шуис сизим анделлы:
«Мунӧй да кисьтӧй Ен скӧрлуна сизим чашасӧ му вылӧ».
Медводдза анделыс петіс да кисьтіс ассьыс чашасӧ му вылӧ.
Сэки найӧ, кодъяс новлӧдлісны зверлысь пассӧ да копрасисны сылӧн серпаслы, вевттьысисны чорыд орзьӧм дойясӧн.
Мӧд анделыс кисьтіс ассьыс чашасӧ саридзӧ.
Сэки саридзыс лои кулӧм мортлӧн вирыс кодь, да саридзын став олысьыс куліс.
Коймӧд анделыс кисьтіс ассьыс чашасӧ юясӧ да ва петанінъясӧ, и ваыс пӧри вирӧ.
Сэсся ме кылі ваяслӧн анделлысь шуӧмсӧ:
— Господьӧй, Тэ вӧлін и эм, Тэ веськыд да вежа, Тэ ӧд веськыда мыждан.
Йӧзыс кисьтісны вежа войтырлысь да пророкъяслысь вирсӧ, та вӧсна Тэ юктӧдан найӧс вирӧн. Тэ мынтысян налы уджъясныс серти.
Ме кылі висьпуктанінсянь мӧд гӧлӧс шы. Сійӧ шуис:
— Господьӧй Енмӧй, Ставсӧкутысьӧй, Тэнад мыждӧмыд збыль да веськыд.
Нёльӧд анделыс кисьтіс ассьыс чашасӧ шонді вылӧ, и шондіыслы вӧлі сетӧма вын сотны йӧзсӧ биӧн.
Ёна пӧжӧмысла йӧзыс сотчисны да лёкӧдісны Енлысь нимсӧ, ӧд Сійӧ веськӧдліс тайӧ бырӧданторъяснас. Но йӧзыс эз бергӧдчыны Енлань да эз ошкыны Сійӧс.
Витӧд анделыс кисьтіс ассьыс чашасӧ зверлӧн юралан пуклӧс вылӧ, и зверлӧн юраланінын лои пемыд. Чорыд дойяссьыс йӧзыс курччалісны ассьыныс кывсӧ да лёкӧдісны енэжвыв Енмӧс тайӧ дойяссьыс да мучитчӧмсьыс, но асланыс лёк уджъясысь эз бергӧдчыны.
Квайтӧд анделыс кисьтіс ассьыс чашасӧ ыджыд Евфрат юӧ, и ваыс сэтысь косьмис. Тадзи вӧлі дасьтӧма туйсӧ асыввывсянь локтысь ӧксыяслы.
Сэсся ме аддзи: гундыр вомысь, звер вомысь да ылӧгпророк вомысь петісны куим пеж лов, найӧ вӧліны жаба кодьӧсь.
Тайӧ — мутияслӧн ловъясыс, кодъяс вӧчисны шензьӧданаторъяс.
Найӧ мунісны мувывса став ӧксыыс дінӧ, медым чукӧртны найӧс Ставсӧкутысь Енлӧн ыджыд лунся тыш вылӧ.
«Со, Ме локта гусясьысь моз.
Шуда сійӧ, коді оз узь да видзӧ ассьыс паськӧмсӧ, медым эз коль пасьтӧг да некод эз янӧд сійӧс».
Пеж ловъяс чукӧртісны мувывса ӧксыясӧс ӧти местаӧ. Тайӧ местаыс шусьӧ еврей ногӧн Армагеддон.
Сизимӧд анделыс кисьтіс ассьыс чашасӧ сынӧдас.
Сэки енэжвыв крамысь, юралан пуклӧс дінысь, кыліс гора гӧлӧс шы: «Ставсӧ вӧчӧма.»
Сэсся кутіс чардавны-гымавны, кылісны гора шыяс, да муыс кутіс ёна вӧрны. Олӧм пуксьӧмсяньыс та ыджда му вӧрӧмыс некор на эз вӧвлы.
Сэки Вавилон, ыджыд кар, киссис куим пельӧ, и мукӧд войтырлӧн каръясыс тшӧтш киссисны.
Енмыс ставсӧ кутіс тӧд вылас тайӧ ыджыд карыс йылысь да сетіс сылы юны вина чашасӧ, коді вӧлі тырӧма Сылӧн скӧрлунӧн.
Став діыс вошис, а керӧсъяс бырисны.
Йӧзыс вылӧ енэжсянь киссис зэв гырысь, комын кило сьӧкта шер.
Йӧзыс лёкӧдісны Енсӧ тайӧ шерсьыс, ӧд тайӧ бырӧданторйыс вайис налы уна сьӧкыдлун.
17 юр.
Ме дінӧ матыстчис андел. Сійӧ вӧлі на пӧвстысь, кодъяслӧн вӧлі сизим чаша. Сійӧ шуис меным: «Лок татчӧ, ме петкӧдла тэныд, кутшӧм мыждӧм виччысьӧ уна вадорын пукалысь аньӧс, коді ёна кырсаліс.
Мувывса ӧксыяс кырсалісны сыкӧд, а мувывса олысьяс винаысь моз коддзисны сылӧн кырсалӧмысь».
Сэсся ме вӧлі тырӧма Лолӧн, и андел вайӧдіс менӧ овтӧминӧ.
Сэтысь ме аддзи аньӧс, коді пукаліс чим гӧрд рӧма звер вылын.
Сылӧн вӧлі сизим юр да дас сюр. Тайӧ зверсӧ вӧлі дзоньнас гижалӧма Енмӧс лёкӧдана кывъясӧн. Аньыс вӧлі пасьтасьӧма пурпур рӧма да чим гӧрд рӧма паськӧмӧ. Сы вылын югъялісны зарниысь, дона изъясысь да жемчугысь мичмӧданторъяс. Киас сійӧ кутіс зарни доз, коді вӧлі тырӧма сылӧн кырсалӧмысь зывӧкнас да пежнас.
Плешкас сылӧн вӧлі гижӧма гуся вежӧртаса ним: «Ыджыд Вавилон — мувывса став зывӧкыслӧн да кырсалысьяслӧн мам».
Ме аддзи: аньыс вӧлі коддзӧма вежа войтырлӧн да Исус йылысь висьталысьяслӧн вир юӧмысь. Сійӧс аддзӧм бӧрын ме ёна шензи.
Андел шуис меным: «Мый тэ шензян?
Ме висьтала тэныд гусятор тайӧ аньыс йылысь да сійӧс новлӧдлысь зверыс йылысь, кодлӧн эм сизим юр да дас сюр.
Зверыс, кодӧс тэ аддзылін, коркӧ вӧлі, но ӧні абу. Сійӧ петас пыдӧстӧминысь, но сійӧс лоӧ бырӧдӧма.
Сэки мувывса олысьяс, кодъяслысь нимсӧ му пуксьӧмсяньыс абу гижӧма Олӧмыслӧн небӧгӧ, зверсӧ аддзигӧн кутасны шензьыны. Ӧд сійӧ вӧлі, но ӧні абу, и бара лоас.
Тані колӧ гӧгӧрвоӧмлун да мывкыдлун.
Сизим юрыс — тайӧ сизим мыльк, кодъяс вылын пукалӧ аньыс. Сизим юрыс индӧны сизим ӧксы вылӧ: витыс на пиысь кулісны нин, ӧтиыс веськӧдлӧ, а бӧръяыс эз на лок. Кор сійӧ локтас, оз кут дыр веськӧдлыны.
Зверыс, коді вӧлі, но ӧні абу, — кӧкъямысӧд ӧксы, сійӧ тшӧтш тайӧ сизим ӧксыыс пӧвстысь, сійӧс лоӧ бырӧдӧма.
Дас сюрыс, кодӧс тэ аддзылін, — тайӧ дас ӧксы. Налы абу на сетӧма ыджыдалан вынсӧ, но зверыскӧд тшӧтш налы лоӧ сетӧма ыджыдалан вынсӧ сӧмын недыр кад кежлӧ.
Налӧн ставныслӧн ӧти мог, та вӧсна став ассьыныс вынйӧрсӧ да ыджыдалан вынсӧ найӧ сетасны зверыслы.
Найӧ кутасны тышкасьны Балякӧд, но Баля вермас найӧс.
Ӧд Сійӧ — ыджыдъяслӧн Ыджыдыс да ӧксыяслӧн Ӧксыыс. Сыкӧд тшӧтш лоӧны Сылӧн корӧмаясыс, бӧрйӧмаясыс да эскана йӧз».
Сэсся андел шуис меным: «Ваыс, кодӧс тэ аддзылін да кӧні пукалӧ кырсалысь аньыс, — тайӧ мувывса йӧз да быдпӧлӧс войтыр, быд чужанкотыр да быд кыла йӧз.
Зверыслӧн дас сюрыс, кодъясӧс тэ аддзылін, мустӧмтасны кырсалысь аньӧс. Найӧ мырддясны сылысь ставсӧ да пӧрччӧдасны сы вылысь став паськӧмсӧ, сёясны сылысь вир-яйсӧ да сотасны би пытшкын.
Ӧд Енмыс пуктіс налӧн сьӧлӧмӧ, мед вӧчны Сылӧн кӧсйӧм серти да ӧти кывйӧ воӧмӧн сетны зверыслы ассьыныс ыджыдалан вынсӧ сэтчӧдз, кытчӧдз оз инны Енлӧн кывъясыс.
Аньыс, кодӧс тэ аддзылін, — тайӧ ыджыд кар, сійӧ ыджыдалӧ мувывса став ӧксыяс вылын».
18 юр.
Сэсся ме аддзи: енэжсянь лэччис нӧшта ӧти андел. Сылӧн вӧлі ыджыд вын, и муыс ставнас югдіс сылӧн дзирдлунысь.
Андел зэв гораа горӧдіс:
— Киссис, киссис ыджыд Вавилон. Сійӧ лоис оланінӧн мутияслы да быдпӧлӧс пеж лолыслы, лоис позйӧн быдпӧлӧс пеж да зывӧк лэбачыслы. Аслас кырсалӧм вӧсна сійӧ юктӧдіс став йӧзсӧ Ен скӧрлуна винаӧн. Мувывса ӧксыяс кырсалісны сыкӧд, а вузасьысьяс озырмисны сылӧн лышкыдлунысь.
Сэсся ме кылі енэжысь мӧд гӧлӧс шы. Сійӧ шуис:
— Войтырӧй Менам, петӧй тайӧ карсьыс, медым энӧ ӧтувтчӧй сылӧн мыж вӧчӧмас, медым сійӧс моз эз су тіянӧс бырӧданторйыс. Ӧд сылӧн мыжъясыс кыптісны енэжӧдзыс. Енмыс кутӧ тӧд вылас став сылысь лёк вӧчӧмсӧ.
Мынтысьӧй сылы сійӧн жӧ, мыйӧн мынтысис тіянлы. Мынтысьӧй сылӧн уджъясысь кык пӧв унджык на.
Сылӧн чашаӧ, кытысь сійӧ юкталіс тіянӧс, дасьтӧй сылы винасӧ кык пӧв курыдджыкӧс на.
Мӧдӧдӧй сылы шогсӧ да мучитчӧмсӧ сы мында, мыйта сійӧ курыштіс аслыс озырлунсӧ да ошкӧмсӧ.
Ӧд сійӧ ошйысьӧ ас йывсьыс:
«Ме пукала юралан пуклӧс вылын ӧксы-ань моз. Ме абу дӧва, ме некор ог тӧдлы шогсӧ.»
Та вӧсна, став бырӧданторйыс: кулӧмыс, шогыс да тшыгъялӧмыс суас сійӧс ӧти лунӧ. Сійӧс сотасны биын, ӧд Господь Ен, сійӧс Мыждысьыс, — вына.
Кор мувывса ӧксыяс аддзасны сылысь сотчӧмсӧ да тшынсӧ, кутасны сыркъялӧмӧн бӧрдны сы вӧсна. Ӧд найӧ кырсалісны да лышкыда гажӧдчисны сыкӧд. Найӧ повзясны сылӧн мучитчӧмысь да ылыстчасны сыысь и кутасны шуавны:
— Шог, шог тэныд Вавилон, ыджыд да вына кар.
Ӧти здукӧн суис тэнӧ мыждӧмыс.
Став му пасьтала вузасьысьяс кутасны бӧрдны да шогсьыны сы понда, ӧд налысь вузӧссӧ некод оз кут босьтны. Оз босьтны налысь зарнисӧ, эзысьсӧ, дона изъяс да жемчугъяс, шабді да шӧвк дӧраяс, пурпур да чим гӧрд рӧма дӧраяс. Оз босьтны налысь чӧскыд дука пуяс, слӧн лыысь, дона пуысь, ыргӧнысь, кӧртысь да мраморысь вӧчӧмторъяс. Некод оз босьт налысь корица, ладан, чӧскыд дука вый да миро, вина да вый, пызь да шобді, ыжъясӧс, мӧсъясӧс да вӧвъясӧс, телегаяс, кесйӧгъясӧс да мукӧд йӧзсӧ.
— Став тэнад сьӧлӧм бурмӧданторйыд быри, став тэнад озырлуныд да мичлуныд воши, тайӧ тэнад некор нин оз ло.
Найӧ, кодъяс вузасисны тайӧн ставнас да озырмисны сы помысь, ёна повзясны Вавилон карлӧн мучитчӧмысь да ылыстчасны сыысь. Найӧ кутасны бӧрдны да шогсьыны:
— Шог, шог тэныд, ыджыд кар. Тэ вӧлі пасьтасьӧмыд шабді дӧраӧ, пурпур да чим гӧрд рӧма паськӧмӧ. Тэнӧ вӧлі мичмӧдӧма зарниӧн, дона изъясӧн да жемчугӧн. Но став тайӧ озырлуныс ӧти здукӧн быри.
Сэки саридз вылын кывтысьяс, корабльӧн веськӧдлысьяс, налы отсасьысьяс да вузасьысьяс — ставныс ылыстчисны тайӧ карсьыс. Найӧ видзӧдісны сотчысь карлӧн тшыныс вылӧ да горзісны: «Позяс ӧмӧй ӧткодявны тайӧ ыджыд карсӧ кутшӧмкӧ мӧд каркӧд?»
Найӧ коялісны юрсӧ пӧимӧн, бӧрдісны да шогсисны:
— Шог, шог тэныд, ыджыд кар. Аслад озырлунӧн тэ озырмӧдін ставнысӧ, саридз вылын кывтысьясӧс. Ӧти здукӧн тэ воштін ставсӧ.
— Нимкодясь, енэжыс. Нимкодясьӧй, вежа апостолъяс да пророкъяс. Енмыс мыждіс тайӧ карсӧ тіянлы лёк вӧчӧмысь.
Сэсся вына андел босьтіс изки кодь ыджыд из да шыбитіс сійӧс саридзас. Сійӧ шуис:
— Дзик тадзи лоӧ шыбитӧма Вавилонӧс, ыджыд карӧс, сійӧ вошас пыр кежлӧ.
Тэнад туй вылын некор оз кут кывны сьылӧм шы, пӧлян да труба шы, некод оз кут ворсны арфаӧн.
Некор оз кут уджавны тані киподтуя морт, некор оз кут кывны тані изки шы.
Некор оз кут ӧзйыны тані би, некор оз кут кывны верӧспулӧн да гӧтырпулӧн гӧлӧс шыныс.
Тэнад вузасьысьяс ыджыдалісны тайӧ му вылас. Аслад тшыкӧдчӧмӧн тэ кыскин став йӧзсӧ ылӧгас.
Тайӧ карас вӧлі кисьтӧма вирсӧ пророкъяслысь, вежа войтырлысь, да став йӧзыслысь, кодъясӧс вӧлі виӧма му вылас.
19 юр.
Та бӧрти ме кылі енэжсьыс гора шы, быттьӧ ыджыд йӧз чукӧр ызгис-сёрнитіс. Найӧ шуалісны: — Аллилуйя.
Мездмӧмыс, дзирдлуныс, нималӧмыс да выныс — миян Господьлӧн.
Сылӧн мыждӧмыс збыль да веськыд. Енмыс мыждіс ыджыд карӧс, кырсалысь аньӧс, ӧд сійӧ пежаліс ставнас мусӧ аслас пеж оласногӧн. Енмыс перйис водзӧссӧ тайӧ аньыслысь Аслас кесйӧгъяслӧн вирысь.
Сэки бара шуалісны: — Аллилуйя.
Сылӧн тшыныс кутас кыпӧдчыны нэмъяс чӧж.
Та бӧрти кызь нёль пӧрысьыс да нёльнан енэжвыв олысьыс кымынь уськӧдчӧмӧн копыртчылісны юралан пуклӧс вылын пукалысь Енлы да шуисны: — Аминь. Аллилуйя.
Сэсся Ен пуклӧссянь кыліс гӧлӧс шы:
— Ошкӧй миян Енмӧс ставныд: Сылӧн кесйӧгъяс да Сыысь полысьяс, ичӧтъяс и гырысьяс.
Сэсся ме кылі шы, быттьӧ ыджыд йӧз чукӧр ызгис-сёрнитіс, быттьӧ уна шор бузгис-визувтіс, быттьӧ чорыда гымаліс. Найӧ шуалісны: — Аллилуйя.
Господь, Ставсӧкутысь Ен, ӧні лоис Юралысьӧн.
Кутам нимкодясьны да гажӧдчыны, кутам ошкыны Енмӧс.
Ӧд Баля ӧні гӧтрасьӧ, Сылӧн гӧтырпуыс дась нин:
сійӧ пасьтасьӧма сӧстӧм да югъялан шабді паськӧмӧ. Шабді паськӧмыс — тайӧ вежа войтырлӧн веськыд уджъясыс.
Сэсся андел шуис меным: «Гиж: “Шудаӧсь найӧ, кодъясӧс корӧма Балялӧн кӧлысь вылӧ.”»
Сэсся содтіс: «Тайӧ Енлӧн збыль кывъясыс».
Ме уськӧдчи андел кок дорӧ, медым копыртчывны сылы, но сійӧ шуис меным: «Эн вӧч тайӧс.
Ӧд ме кесъяла Енмыслы, кыдзи тэ да тэнад вокъясыд, кодъяс висьтавлӧны Исус йылысь.
Енмыслы копыртчыв.
Ӧд Исус йылысь висьталысьяс сёрнитӧны пророкалан Ловсянь».
Енэжыс воссис менам син водзын, и сэтысь ме аддзи еджыд вӧлӧс да сы вылын Пукалысьӧс. Сылӧн нимыс Эскана да Збыль, Сійӧ тышкасьӧ да мыждӧ веськыда.
Сылӧн синъясыс ыпъялісны биӧн, а юр вылас вӧлі уна юркытш.
Пукалысь вылӧ вӧлі гижӧма Сылысь нимсӧ, и тайӧ нимсӧ Сыысь кындзи некод эз тӧд.
Сы вылын вӧлі вирӧсь паськӧм, и нимыс Сылӧн — Ен Кыв.
Сы бӧрся еджыд вӧвъяс вылын мунісны енэжвывса тышка котыръяс, найӧ вӧлі пасьтасьӧмаӧсь еджыд да сӧстӧм шабді паськӧмӧ.
Вӧв вылын Пукалысьлӧн вомысь петіс ёсь шыпурт, медым сійӧн бытшкыны мувывса йӧзӧс.
Сійӧ кутас веськӧдлыны наӧн кӧрт беддьӧн да пычкас Ставсӧкутысь Енлысь скӧрлуна винасӧ пычкан гуын.
Сылӧн паськӧмас да лядьвеяс гижӧма ним: “Ӧксыяслӧн Ӧксы, ыджыдъяслӧн Ыджыд”.
Сэсся ме аддзи шонді вылын сулалысь анделӧс.
Сійӧ гораа горӧдіс став лэбачыслы, кодъяс лэбисны енэж шӧрӧдыс: «Локтӧй-чукӧртчӧй Енлӧн ыджыд гаж вылӧ. Ті кутанныд сёйны шойяссӧ ӧксыяслысь, тышкайӧзӧн веськӧдлысьяслысь, юралысьяслысь, вӧвъяслысь, верзьӧмаяслысь да став йӧзыслысь: мездлуна йӧзлысь и кесйӧгъяслысь, ичӧтлысь и гырысьлысь».
Сэсся ме аддзи зверӧс, мувывса ӧксыясӧс да налысь тышка котыръяссӧ. Найӧ вӧлі чукӧртчӧмаӧсь, медым тышкасьны вӧв вылын Пукалыськӧд да Сылӧн тышка котырыскӧд.
Зверӧс да ылӧгпророкӧс вӧлі кутӧма. Ылӧгпророкыс вӧчліс шензьӧданаторъяс звер нимсянь. Тадзи сійӧ ылӧдліс найӧс, кодъяс сетісны пуктыны аслыныс зверлысь пассӧ, и найӧс, кодъяс копрасисны сылӧн серпаслы. Зверӧс да ылӧгпророкӧс — кыкнаннысӧ ловйӧн вӧлі шыбитӧма биӧн да сераӧн сотчысь тыӧ, а мукӧдсӧ вӧлі виӧма шыпуртӧн. Тайӧ шыпуртыс петіс вӧв вылын Пукалысьлӧн вомысь. И став лэбачыс сэсся пӧткӧдчисны виӧмаяслӧн шойясӧн.
20 юр.
Ме аддзи анделӧс, коді лэччис енэжсянь. Киас сійӧ кутіс пыдӧстӧминысь восьтансӧ да ыджыд чеп.
Сійӧ тшапнитіс гундырӧс, важ змейӧс, да дорис сійӧс сюрс во кежлӧ. Тайӧ гундырыс — омӧль да сӧтана. Андел шыбитіс сійӧс пыдӧстӧминӧ да йигналіс сэтчӧ. А петанінас пуктіс печать, медым гундыр эз пет да эз ылӧдлы йӧзсӧ, кытчӧдз оз помась сюрс воыс. Та бӧрти сійӧс лоӧ лэдзӧма дженьыд кад кежлӧ.
Сэсся ме аддзи юралан пуклӧсъяс. Сэні пукалысьяслы вӧлі сетӧма мыждан вын. Ме аддзи ловъяссӧ налысь, кодъяслысь юрсӧ керыштісны Исус йылысь висьталӧм вӧсна да Ен Кыв вӧсна. Найӧ эз копыртчывны зверлы да сылӧн серпаслы, эз сетны пуктыны зверлысь пассӧ плешканыс да кианыс.
Найӧ ловзисны да юралісны Кристоскӧд сюрс во чӧж.
А мукӧд кулӧмаясыс эз ловзьыны, кытчӧдз эз помась сюрс воыс.
Тайӧ — кулӧмаясӧс медводдза ловзьӧдӧм.
Шудаӧсь да вежаӧсь найӧ, кодъяс ловзясны медводдза ловзьӧдігӧн.
Мӧд кулӧмыслӧн выныс оз нин ло на вылын. Найӧ лоӧны Енлӧн да Кристослӧн вежа кесъялысьясӧн, найӧ кутасны ыджыдавны Кристоскӧд сюрс во чӧж.
Сюрс во помасьӧм бӧрын сӧтанаӧс лоӧ лэдзӧма аслас пыдӧстӧминысь. Сійӧ мунас мулӧн нёльнан пельӧсас ылӧдлыны йӧзӧс, Гог да Магог войтырӧс, да чукӧртны найӧс тыш вылӧ.
Налӧн лыдыс лоӧ саридздорса лыа мында.
Найӧ паськӧдчасны став му пасьтала да кытшаласны вежа войтырлысь оланінсӧ да Енлысь муса карсӧ.
Но енэжсяньыс, Енсянь, усяс би да бырӧдас найӧс.
Сэки омӧльӧс, коді ылӧдліс найӧс, лоӧ шыбитӧма биӧн да сераӧн сотчысь тыӧ. Сэтчӧ вӧлі шыбитӧма тшӧтш зверӧс да ылӧгпророкӧс. Найӧ кутасны мучитчыны лун и вой, нэмъяс чӧж.
Сэсся ме аддзи ыджыд да еджыд юралан пуклӧс да сы вылын Пукалысьӧс. Енэжыс да муыс пышйисны Сылӧн син водзысь, налы некытчӧ вӧлі дзебсьынысӧ.
Ме аддзи кулӧмаясӧс: гырысьясӧс да ичӧтъясӧс, найӧ сулалісны Ен водзын. Сэні вӧліны восьса небӧгъяс. Сэсся восьтісны нӧшта ӧти небӧг — Олӧмыслысь небӧг.
Кулӧмаясӧс мыждісны налӧн уджъясныс серти, мый вӧлі гижӧма небӧгъясас.
Сэки саридзыс, кулӧмыс да адыс сетісны ассьыныс кулӧмаяссӧ, и быдӧнӧс найӧс вӧлі мыждӧма уджъясныс серти.
Кулӧмсӧ да адсӧ вӧлі шыбитӧма биа тыӧ.
Тайӧ мӧд кулӧм.
Быдӧнӧс, кодлысь нимсӧ эз вӧв гижӧма Олӧмыслӧн небӧгӧ, вӧлі шыбитӧма биа тыӧ.
21 юр.
Сэсся ме аддзи выль енэж да выль му. Медводдза енэжыс да муыс бырины, и саридзыс эз нин вӧв.
Ме, Иоан, аддзи вежа кар — выль Ерусалим. Сійӧ лэччис енэжсяньыс, Енсянь. Сійӧс вӧлі мичмӧдӧма, быттьӧ гӧтырпуӧс верӧспуыслы.
Ме кылі енэжсянь гора шы. Сійӧ шуис:
— Со, мувывса йӧз пӧвстын Енлӧн оланін. Енмыс кутас овны накӧд, найӧ лоӧны Сылӧн войтырӧн. Ачыс Енмыс лоас накӧд, да лоӧ налӧн Енмӧн,
Сійӧ чышкас налысь став синвасӧ.
Кулӧмыс оз нин ло, оз ло шогсьӧм, бӧрдӧм ни висьӧм, ӧд важыс кольӧма.
Юралан пуклӧс вылын Пукалысь шуис: «Видзӧд, Ме ставсӧ вӧча выльӧс.»
Сэсся содтіс: «Гиж тайӧс, ӧд тайӧ кывъясыс веськыдӧсь да збыльӧсь».
Сійӧ шуис меным: «Ставсӧ вӧчӧма.
Ме — Альфа и Омега, Панасыс и Помыс.
Кодлӧн косьмӧ горшыс, сійӧс дон босьттӧг юктӧда ваӧн, коді петӧ ловъя ва визувтанінысь.
Вермысьлы Ме сета тайӧс ставсӧ. Ме лоа сылы Енмӧн, а сійӧ — Меным пиӧн.
Полысьясӧс, эскытӧмъясӧс, зывӧк оласногаясӧс, морт виысьясӧс, кырсалысьясӧс, тшыкӧдчысьясӧс, идоллы юрбитысьясӧс да став ылӧдчысьсӧ лоӧ шыбитӧма биӧн да сераӧн сотчысь тыӧ.
Тайӧ мӧд кулӧм».
Ме дінӧ матыстчис андел. Сійӧ вӧлі сизим андел пӧвстысь, кодъяслӧн вӧлі сизим чаша сизим бӧръя бырӧданторнас. Андел шуис меным:
«Лок татчӧ, ме петкӧдла тэныд Балялысь гӧтырпусӧ, коді лоас Сылы гӧтырӧн».
Ме вӧлі тырӧма Лолӧн, и андел вайӧдіс менӧ ыджыд да джуджыд керӧс вылӧ да петкӧдліс меным ыджыд кар — вежа Ерусалим, коді лэччис енэжсяньыс, Енсянь.
Сійӧ югъяліс Ен дзирдлунӧн
да дзирдаліс дона из моз, югъялысь яшма моз.
Карсӧ кытшаліс кыз да джуджыд стен. Сэні вӧлі дас кык дзиръя, на дорын сулалісны дас кык андел.
Дзиръяяс вылас вӧлі гижӧма израильса дас кык чужанкотырлысь нимъяссӧ. Куим дзиръяыс видзӧдісны асыввылӧ, куимыс — войвылӧ, куимыс — лунвылӧ да куимыс — рытыввылӧ.
Карыслӧн стеныс подуласис дас кык из вылӧ, а изъяс вылас вӧлі гижӧма Балялӧн дас кык апостоллысь нимъяссӧ.
Мекӧд сёрнитысь анделлӧн вӧлі зарни бедь, медым муртавны карсӧ, сылысь дзиръяяссӧ да стенсӧ.
Карыс вӧлі нёль пельӧса, сылӧн кузьтаыс да пасьтаыс вӧлі ӧткодь.
Андел мурталіс карсӧ бедьнас, и карлӧн кузьтаыс лои дас кык сюрс стадий.
А карыслӧн судта-пасьтаыс вӧлі ӧткодь карыслӧн кузьтакӧд.
Сэсся андел мурталіс карлысь стенсӧ, кыдзи мувывса йӧз мурталӧны, да стенлӧн джуджтаыс лои сё нелямын нёль гырддза.
Карлысь стенсӧ вӧлі вӧчӧма яшмаысь, а асьсӧ карсӧ — сӧстӧм зарниысь, сійӧ югъяліс стеклӧ моз.
Стеныслысь подув изъяссӧ вӧлі мичмӧдӧма быдпӧлӧс дона изъясӧн.
Медводдза подув изйыс вӧлі яшмаысь, мӧдыс — сапфирысь, коймӧдыс — халцедонысь, нёльӧдыс — изумрудысь, витӧдыс — сардониксысь, квайтӧдыс — сердоликысь, сизимӧдыс — хризолитысь, кӧкъямысӧдыс — бериллысь, ӧкмысӧдыс — топазысь, дасӧдыс — хризопразысь, дас ӧтиӧдыс — гиацинтысь, дас кыкӧдыс — аметистысь.
Дас кыкнан дзиръясӧ вӧлі вӧчӧма дас кык жемчугысь, быд дзиръя — ӧти жемчугысь.
Карыслӧн паськыд туйыс вӧлі сӧстӧм зарниысь, сійӧ югъяліс стеклӧ моз.
Крамсӧ тайӧ карсьыс ме эг аддзыв, ӧд крамыс сэні — Ставсӧкутысь Господь Ен да Баля.
Карыслы оз ков шонді ни тӧлысь югзьӧдӧм вылӧ, ӧд Енлӧн дзирдлуныс югзьӧдӧ сійӧс, а Баля — сылӧн биыс.
Быд кыла войтырысь мездмӧмаяс кутасны овны сылӧн югыдас. Мувывса ӧксыяс ваясны тайӧ карас ассьыныс ошйысянторсӧ да нимӧданторсӧ.
Карыслӧн дзиръяясыс лоӧны пыр восьсаӧсь, ӧд войыс сэні оз ло.
Сэтчӧ быд войтырысь лоӧ вайӧма ошйысянторсӧ да нимӧданторсӧ.
Нинӧм пежыс оз пыр тайӧ карас, некутшӧм пӧръясьысь да зывӧксӧ вӧчысь оз пыр сэтчӧ. Сэтчӧ пырасны сӧмын найӧ, кодъяслысь нимсӧ гижӧма Балялӧн небӧгӧ — Олӧмыслӧн небӧгӧ.
22 юр.
Сэсся андел петкӧдліс меным ю, сэні визувтіс сӧстӧм ловъя ва. Сійӧ вӧлі крусталь кодь югыд. Ваыс петіс Енлӧн да Балялӧн юралан пуклӧссянь.
Карлӧн паськыд туй шӧрас, ю ӧтар-мӧдар бокас, быдмис Олӧмыслӧн пу, коді вайӧ вотӧссӧ быд тӧлысь, вонас — дас кыкысь. Сылӧн коръясыс бурдӧдӧны йӧзӧс.
Нинӧм ёрӧмаыс оз ло тайӧ карас.
Сэні лоӧ Енлӧн да Балялӧн юралан пуклӧсыс, и Сылӧн кесйӧгъясыс кутасны кесъявны Сылы.
Найӧ аддзасны Енлысь чужӧмбансӧ, да Сылысь нимсӧ гижасны налӧн плешканыс.
Войыс сэні оз ло. Налы оз нин ков бисянь либӧ шондісянь югыдыс, ӧд налӧн югзьӧдысьнас лоас Господь Ен.
Найӧ кутасны ыджыдавны нэмъяс чӧж.
Андел шуис меным: «Тайӧ кывъясыс веськыдӧсь да збыльӧсь.
Вежа пророкъяслӧн Господь Ен мӧдӧдіс Ассьыс анделсӧ, медым петкӧдлыны Аслас кесйӧгъяслы, мый колӧ лоны регыдъя кадӧ».
«Со, Ме регыд локта. Шуда сійӧ, коді олӧ тайӧ небӧгас водзвыв висьталӧмыс серти.»
Ме, Иоан, ставсӧ тайӧс кывлі да аддзылі.
А кывлӧм да аддзылӧм бӧрас ме уськӧдчи муас, медым копыртчывны анделлы, коді петкӧдліс меным ставсӧ тайӧс.
Но андел шуис меным: «Эн вӧч тайӧс, ӧд ме кесъяла Енмыслы тэ моз да тэнад вокъясыд — пророкъяс моз, да на моз, кодъяс олӧны тайӧ небӧгас гижӧм серти.
Енмыслы копыртчыв.»
Сэсся содтіс: «Эн тупкы печатьӧн тайӧ небӧгас водзвыв висьталӧмасӧ, ӧд кадыс матын нин».
Лёксӧ вӧчысь мед водзӧ вӧчас лёксӧ, пеж оласнога мед водзӧ на вӧчас пежсӧ, веськыда олысь мед водзӧ вӧчас веськыда, а вежа морт мед водзӧ на вежаммас.
«Со, Ме регыд локта да вая Аскӧд удждон, медым быдӧнлы мынтысьны сылӧн уджъясыс серти.
Ме — Альфа и Омега, Панасыс и Помыс, Медводдзаыс и Медбӧръяыс».
Шудаӧсь найӧ, кодъяс олӧны Енлӧн тшӧктӧм серти, ӧд Енмыс сетас налы пӧткӧдчыны Олӧмыслӧн пуысь да пырны тайӧ карас дзиръяӧдыс.
А понъяс, тшыкӧдчысьяс, кырсалысьяс, мортвиысьяс, идоллы юрбитысьяс, ылӧгсӧ радейтысьяс да пӧръясьысьяс колясны кар ортсыас.
«Ме, Исус, мӧдӧді Ассьым анделӧс висьтавны тайӧс тіянлы вичкоясын.
Ме — Давид чужанвужйысь да чужанкотырысь, Ме — асъя югыд кодзулыс».
Лов да гӧтырпу шуӧны: «Лок.»
Тайӧс кылысь мед тшӧтш шуӧ: «Лок.»
Кодлӧн косьмӧ горшыс, мед локтӧ. Коді кӧсйӧ юны, мед босьтӧ ловъя васӧ дон мынтытӧг.
Ме эскӧда быдӧнӧс, коді кылӧ тайӧ небӧгсьыс водзвыв висьталӧмасӧ: коді содтас мыйкӧ тайӧ кывъясыс дінӧ, Енмыс мӧдӧдас сылы бырӧданторъяс, мый йылысь гижӧма тайӧ небӧгас.
Коді чинтас мыйкӧ тайӧ небӧгас водзвыв висьталӧмсьыс, Енмыс босьтас сылысь пайсӧ Олӧмыслӧн небӧгысь, вежа карысь да сыысь, мый йылысь гижӧма тайӧ небӧгас.
Тайӧ кывъяссӧ Висьталысьыс шуӧ: «Ме регыд локта, тайӧ тадзи.»
Аминь.
Лок, Господьӧй Исусӧй.
Миян Господь Исус Кристослӧн буралӧмыс ставныдкӧд тіянкӧд.
Аминь.