{Еврей йӧз (комиӧдіс Kodko) @ Олӧм @ религ. гижӧд @ Библия @ 2021 @ Лб. .}
ВАЖ ЙИТӦД
Моисейлӧн медводдза небӧг.
ОЛӦМ
Медводз Ен вӧчис енэж да му.
Муыс вӧлі мыгӧртӧм да куш, пыдӧстӧм йир весьтын вӧлі пемыд, и Енлӧн Лов шлывъяліс ва весьтын.
Ен шуис: «Мед лоас югыд».
И лои югыд.
Ен аддзис, мый югыдыс бур, да торйӧдіс сійӧс пемыдысь.
Ен нимтіс югыдсӧ лунӧн, а пемыдсӧ — войӧн.
Вӧлі рыт, вӧлі асыв — медводдза лун.
Ен шуис: «Мед лоас енэжвевт да торйӧдас васӧ».
[И лои тадз.]
Ен вӧчис енэжвевт да торйӧдіс улыс васӧ вылыс ваысь.
И лои тадз.
Ен нимтіс енэжвевтсӧ енэжӧн.
[Ен аддзис, мый тайӧ бур.]
Вӧлі рыт, вӧлі асыв — мӧд лун.
Ен шуис: «Енэжувса ваыс мед чукӧрмас ӧтилаӧ, да тыдовтчас косін».
И лои тадз.
[Енэжувса ваыс чукӧрмис аслас местаӧ, и тыдовтчис косін.]
Ен нимтіс косінсӧ муӧн, а чукӧрмӧм васӧ — саридзӧн.
Ен аддзис, мый тайӧ бур.
Ен шуис: «Муыс мед быдтас быдсяма пусӧ да веж быдмӧгсӧ, кодъяс пондасны вайны ассьыныс кӧйдыс-вотӧс».
И лои тадз.
Муыс быдтіс быдсяма пусӧ да веж быдмӧгсӧ, и найӧ пондісны вайны ассьыныс кӧйдыс-вотӧс.
Ен аддзис, мый тайӧ бур.
Вӧлі рыт, вӧлі асыв — коймӧд лун.
Ен шуис: «Енэжвевтын мед лоасны югдӧданторъяс. Найӧ мед [югдӧдасны мусӧ,] торйӧдасны лунсӧ войысь, петкӧдласны лунъяс, вояс да кадъяс
и югдӧдасны мусӧ енэжвевтсянь».
И лои тадз.
Ен вӧчис кодзувъяс да кык гырысь югдӧдантор — ыджыдджыксӧ, медым веськӧдлыны лунӧн, ичӧтджыксӧ, медым веськӧдлыны войӧн.
Ен пуктіс найӧс енэжвевтӧ югдӧдны мусӧ, веськӧдлыны лунӧн да войӧн, торйӧдны югыдсӧ пемыдысь.
Ен аддзис, мый тайӧ бур.
Вӧлі рыт, вӧлі асыв — нёльӧд лун.
Ен шуис: «Ваыс мед тырас ловъя олысьясӧн.
Лэбачьяс мед лэбаласны му весьтӧд, енэжвевттіыс».
[И лои тадз.]
Ен вӧчис быдсикас черисӧ да ваын олысь-уялысьсӧ, а сідзжӧ быдсикас лэбач-пӧткасӧ.
Ен аддзис, мый тайӧ бур.
Ен бурсиис найӧс шуалӧмӧн: «Чужтысьӧй-рӧдмӧй да олӧй саридзын, а лэбачьяс мед рӧдмасны му вылын».
Вӧлі рыт, вӧлі асыв — витӧд лун.
Ен шуис: «Муыс мед чужтас быдсикас ловъя олысьӧс: мувыв пемӧсъясӧс да гаг-веглясьысьясӧс».
И лои тадз.
Ен вӧчис быдсяма мувыв пемӧссӧ да гаг-веглясьысьсӧ.
Ен аддзис, мый тайӧ бур.
Ен шуис: «Вӧчамӧй мортӧс Миян кодьӧн да Миян ногаӧн.
Сійӧ мед ыджыдалас саридзса черияс да енэжвыв лэбачьяс вылын, мувыв пемӧсъяс вылын, мувыв гаг-веглясьысьяс вылын да став муыс вылын».
Ен вӧчис мортӧс Ас кодьнас.
Аймортӧс да аньӧс Ен кодьӧн вӧчис.
Ен бурсиис найӧс шуалӧмӧн: «Чужтысьӧй-рӧдмӧй, овмӧдӧй мусӧ да видзӧй сійӧс, ыджыдалӧй саридзса черияс да енэжвыв лэбачьяс вылын, [мувыв пемӧсъяс вылын, став муыс да] му вылас став котралысь-веглясьысь вылын».
Ен шуис: «Ме сета тіянлы став кӧйдыса-вотӧса быдмӧгсӧ да пусӧ.
Тайӧ лоӧ тіянлы сёянӧн.
А став мувывса пемӧслы да енэжвыв лэбачлы, котралысь-веглясьысьлы сёянӧн лоӧ веж турун».
И лои тадз.
Ен видзӧдліс Аслас вӧчӧмторъяс вылӧ и аддзис, мый ставыс вывті бур.
Вӧлі рыт, вӧлі асыв — квайтӧд лун.
Тадзи вӧлі вӧчӧма енэжсӧ, мусӧ да ставсӧ, мый сэні эм.
Став Ассьыс уджсӧ помалӧм бӧрын Ен шойччис сизимӧд луннас.
Ен бурсиис сизимӧд лунсӧ да вежӧдіс сійӧс, ӧд сэки шойччис став Аслас уджысь.
Тадзи вӧлі вӧчӧма енэжсӧ да мусӧ.
Кор Господь Ен вӧчис енэжсӧ да мусӧ, пуыс да туруныс эз на вӧв му вылас, ӧд Господь Ен эз на кисьт зэрсӧ му вылӧ, да эз на вӧв мортыс, мед вӧдитны мусӧ. Зэр пыдди мусянь кыпӧдчыліс ру да юкталіс му веркӧссӧ.
Господь Ен вӧчис муысь мортӧс, пӧльыштіс сылы ныр-вомас олӧмыслысь ловсӧ, и морт лоис ловъя олысьӧн.
Асыввылӧ, Эдэм муӧ, Господь Ен пуктіс сад йӧр да овмӧдіс сэтчӧ мортӧс, кодӧс вӧчис.
Господь Ен быдтіс-петкӧдіс муысь быдсяма пусӧ — синтӧ гажӧданасӧ и бур вотӧс вайысьсӧ. Нӧшта пуктіс сад йӧр шӧрӧ олӧмыслысь пу да бурсӧ и лёксӧ тӧдмалан пу.
Эдэм муысь визувтіс ю, сійӧ юкталіс сад йӧр, и водзӧ юыс вожаліс нёль пельӧ.
Ӧти юыслӧн нимыс Писон, сійӧ кытшолӧн визувтӧ Хавила муӧд, кӧні эм зарни.
Сэтчӧс зарниыс бур, пуясысь петӧ чӧскыд дука сир, эм тшӧтш оникс из.
Мӧд юыслӧн нимыс Гихон, сійӧ кытшолӧн визувтӧ Куш муӧд.
Коймӧд юыслӧн нимыс Тигр, сійӧ визувтӧ Ассур дорті.
Нёльӧдыс — Ефрат ю.
Господь Ен овмӧдіс мортӧс Эдэм мулӧн сад йӧрӧ, медым дӧзьӧритны сійӧс.
Господь Ен шуис: «Быд пуысь тэ верман сёйны вотӧссӧ, сӧмын бурсӧ и лёксӧ тӧдмалан пуысь эн сёй.
Сёян кӧ, сійӧ жӧ лунӧ кулан».
Господь Ен шуис: «Абу бур овны мортлы ӧтнаслы.
Вӧчамӧй сылы лӧсялана отсасьысьӧс».
Господь Ен вӧчис муысь став мувывса пемӧссӧ да енэжвыв лэбачсӧ, вайӧдіс найӧс морт водзӧ да видзӧдіс, кыдзи сійӧ кутас нимтыны быд ловъя олысьӧс.
Кыдзи морт нимтіс быд ловъя олысьӧс, сэтшӧм ним и лои налы.
Морт сеталіс нимъяс вӧрса да гортса став пемӧслы, став енэжвыв лэбачлы.
Но мортлы лӧсялана отсасьысьыс эз на вӧв.
Сэки Господь Ен унмовськӧдіс мортӧс.
Кор мортыс чорыда узис, Ен босьтіс сылысь ӧти ордлы, а босьтӧминсӧ тупкис яйӧн.
Босьтӧм ордлыысь Господь Ен вӧчис аньӧс да вайӧдіс сійӧс морт дінӧ.
Морт шуис: «Со тайӧ менам лы бердысь босьтӧм лы, менам вир-яйысь босьтӧм вир-яй.
Сійӧ кутас шусьыны аньӧн, ӧд сійӧс босьтӧма аймортысь.*
Та вӧсна морт кольӧ бать-мамсӧ да ӧтлаасьӧ гӧтырыскӧд, и тайӧ кыкыс лоӧ ӧти вир-яй».
Кыкнанныс, Адам да сылӧн гӧтырыс, вӧліны пасьтӧмӧсь, но эз яндысьны ӧта-мӧдсьыныс.
Господь Енмӧн вӧчӧм став пемӧсысь змей вӧлі медся мудер.
Змей юаліс аньлысь: «Збыльысь-ӧ Ен шуис, энӧ пӧ сёйӧй сад йӧрын быдмысь некутшӧм пуысь?»
Ань вочавидзис змейлы: «Пуясысь вотӧссӧ миянлы позьӧ сёйны, сӧмын сад шӧрын сулалысь пу йылысь Ен шуис: “Энӧ сёйӧй сэтысь вотӧссӧ, весиг энӧ инмӧдчӧй сы дінӧ, медым энӧ кулӧй”».
«Ті онӧ кулӧй, — шуис змей. — Но Ен тӧдӧ: сійӧ лунӧ, кор сёянныд вотӧссӧ, воссяс тіян синныд. Ті лоанныд Ен кодьӧн, кутанныд тӧдны бурсӧ и лёксӧ».
Ань аддзис, мый вотӧсыс чӧскыд, пуыс синтӧ гажӧдӧ да кыскӧ ас дорас, ӧд сетӧ тӧдӧмлун.
Ань нетшыштіс вотӧссӧ да сёйис,
сэсся сетіс верӧсыслы, и сійӧ тшӧтш сёйис.
Сэки налӧн кыкнанныслӧн воссисны синъясыс, и найӧ гӧгӧрвоисны, мый пасьтӧмӧсь. Найӧ кӧрталісны косканыс инжир пу коръясысь вевттьӧд.
Рытгорувнас найӧ кылісны, кыдзи Господь Ен ветлӧдліс сад йӧрын.
Адам гӧтырыскӧд дзебсис пуяс сайӧ Господь Енлӧн чужӧмбанысь.
Господь Ен шыасис Адам дінӧ: «Кӧні тэ?»
Сійӧ вочавидзис: «Ме дзебси. Кылі, кыдзи Тэ ветлӧдлан сад йӧрын, и повзи, ӧд ме пасьтӧм».
Ен шуис: «Коді тэныд висьталіс, мый тэ пасьтӧм?
Эн-ӧ тэ сёй сійӧ пуысь, кытысь Ме ӧлӧді тэнӧ сёйнысӧ?»
Адам шуис: «Гӧтырӧй, кодӧс Тэ сетін меным, мыччис меным вотӧссӧ, и ме сёйи».
Господь Ен юаліс аньлысь: «Мыйла тэ тайӧс вӧчин?»
Сійӧ шуис: «Змей ылӧдліс менӧ, и ме сёйи».
Господь Ен шуис змейлы: «Тайӧс вӧчӧмысь лоан ёрӧма став мувыв пемӧсыс пӧвстын.
Тэ кутан кыскасьны кынӧм вылад да став олӧм чӧжыд кутан сёйны мусӧ.
Тэ да ань костӧ, тэсянь чужысь да аньсянь чужысь костӧ пукта лӧгалӧм:
сійӧ пасьвартас юртӧ, а тэ сылы коклябӧрас чушкан».
Аньлы Ен шуис: «Тэнсьыд нӧбасьӧмтӧ Ме вӧча сьӧкыдӧн, ныв-питӧ кутан чужтыны дойяс пыр.
Тэнӧ кутас кыскыны верӧсыд дінӧ, а сійӧ тэ вылын кутас ыджыдавны».
Адамлы Ен шуис: «Тэ вӧсна лоӧ ёрӧма мусӧ, ӧд тэ кывзысин гӧтырыдлысь да сёйин сійӧ пуысь, код йылысь Ме шулі тэныд: “Эн сёй сэтысь”.
Та вӧсна мырсьӧмӧн пондан перйыны кынӧмпӧттӧ нэм чӧжыд.
Муыс кутас быдтыны йӧн да ёг турун, но сійӧ жӧ муыс кутас сетны тэныд сёян.
Пӧсь петтӧдзыд пондан уджавны няньыд вӧсна. Сэсся бӧр бергӧдчан муӧ, кытысь босьтӧма тэнӧ.
Муысь вӧчӧма тэнӧ, муӧ бӧр и бергӧдчан».
Гӧтырыслы Адам пуктіс Ева ним, ӧд сійӧ лои став олысьыслы мамӧн.*
Господь Ен вӧчис Адамлы да гӧтырыслы кучик паськӧм да пасьтӧдіс найӧс.
Господь Ен шуис: «Ӧні морт лои Миян кодь — тӧдӧ бурсӧ и лёксӧ.
Мед эськӧ сійӧ эз босьт да эз сёй олӧмыслӧн пуысь вотӧссӧ. Босьтас кӧ да сёяс, кутас помтӧг овны».
Та вӧсна Господь Ен вӧтліс мортӧс Эдэм сад йӧрысь да тшӧктіс вӧдитны му, мыйысь сійӧс вӧлі вӧчӧма.
Мортӧс вӧтлӧм бӧрын Ен сувтӧдіс Эдэм сад йӧр асыввылӧ херувимъясӧс да бергалысь биа шыпурт, медым видзны туйсӧ олӧмыслӧн пу дінӧ.
Адам узис Ева гӧтырыскӧд.
Ева кынӧмасис, чужтіс Каинӧс да шуис: «Господь сетіс чужтыны меным пиӧс».
Ева нӧшта чужтіс Авельӧс, Каинлы вокӧс.
Авель видзис ыжъясӧс, а Каин му вӧдитіс.
Кад мысти Каин вайис Господьлы козин пыдди му вылысь быдтӧмторъяссӧ.
Авель вайис медводдза чужӧм баляясӧс да налысь госсӧ.
Господь сибӧдіс Авельӧс да сылысь козинсӧ. Каинӧс да сылысь козинсӧ эз сибӧд.
Каин скӧрмис да зумыштчис.
Господь [Ен] юаліс Каинлысь: «Мыйла тэ скӧрмин? Мыйла зумыштчин?
Вӧчан кӧ бурсӧ, лэпты юртӧ.
А он кӧ вӧч бурсӧ, со, ӧдзӧс дорад мыжыс кыйӧдчӧ.
Сійӧ кыскӧ тэнӧ ас дорас, но тэ ыджыдав сы вылын».
Каин корис Авель воксӧ аскӧдыс ыб вылӧ.
И кор найӧ вӧліны сэні, Каин уськӧдчис Авель вокыс вылӧ да виис сійӧс.
Господь [Ен] юаліс Каинлысь: «Кӧні тэнад Авель вокыд?»
Мӧдыс вочавидзис: «Ог тӧд.
Ме сы бӧрся ог видзӧд».
Господь шуис сылы: «Мый тэ вӧчин?
Вокыдлӧн вирыс горзӧ Ме дінӧ му вывсянь.
Ӧнісянь ёрӧма тэнӧ да вӧтлӧма аслад му вылысь, ӧд тайӧ муыс восьтіс вомсӧ да ньылыштіс вирсӧ вокыдлысь, кодӧс тэ виин.
Тэ кутан вӧдитны мутӧ, но сійӧ оз сет тэныд нянь.
Тэнӧ лоӧ вӧтлӧма, и тэ лоан му вылын шӧйтысьӧн».
Каин шуис Господьлы: «Чорыда менӧ мыждӧма, тайӧс ме ог вермы нунысӧ.
Ӧні Тэ вӧтлан менӧ тайӧ мусьыс. Тэ вештан менӧ Аслад чужӧмбан водзысь, ме кута шӧйтны-ветлӧдлыны му вывті.
И коді паныдасяс мекӧд, виас менӧ».
Господь [Ен] сэки шуис: «Каинӧс виысьлысь водзӧссӧ сизим пӧвстӧн лоӧ перйӧма».
Господь [Ен] пуктіс Каинлы пас, медым сыкӧд паныдасьысь эз ви сійӧс.
Каин мӧдӧдчис Господьлӧн чужӧмбан водзысь Нод муӧ, Эдэмсянь асыввылӧ, да овмӧдчис сэтчӧ.
Каин узис гӧтырыскӧд.
Гӧтырыс кынӧмасис да чужтіс Енокӧс.
Сэсся Каин лэптіс кар да сетіс карыслы пиыслысь нимсӧ — Енок.
Еноклӧн чужис Ирад, Ирадлӧн — Мехияэл, Мехияэллӧн — Метушаэл, Метушаэллӧн — Ламек.
Ламек босьтіс аслыс кык гӧтырӧс: ӧтиыс вӧлі Ада, мӧдыс — Цилла.
Ада чужтіс Явалӧс. Сысянь петісны ыж-мӧс видзысьяс, кодъяс олісны чомъясын.
Яваллӧн вокыс вӧлі Ювал. Сысянь петісны гуслиӧн да пӧлянӧн ворсысьяс.
Цилла чужтіс Тувал-Каинӧс. Сійӧ лои ыргӧнысь да кӧртысь дорччысьӧн.
Тувал-Каинлӧн вӧлі Наама нима чой.
Ламек шыасис аслас гӧтыръяс дінӧ: «Ада да Цилла, кывзӧй менӧ!
Ті, Ламеклӧн гӧтыръяс, кывзӧй, мый ме висьтала.
Менӧ кӧ айморт дойдас, виа сійӧс. Кучкас кӧ меным зон, и сійӧс виа.
Каинысь кӧ сизим пӧвстӧн водзӧссӧ перйисны, Ламекысь сизимдас пӧвстӧн сизимысь перъясны».
Адам бара узис гӧтырыскӧд. Гӧтырыс чужтіс пиӧс да пуктіс сылы Сиф ним. Ева шуис: «Авель пыдди, кодӧс виис Каин, Енмыс сетіс меным тайӧ кагасӧ».
Сифлӧн чужис пи. Сиф пуктіс сылы Енос ним.
Тайӧ кадсянь кутісны шыасьны Ен дінӧ Господь нимӧн.
Адамсянь чужысьяс йылысь.
Ен вӧчис мортӧс Ас кодьнас. Аймортӧс да аньӧс вӧчис, бурсиис найӧс да шуис мортӧн.
Адамлы вӧлі сё комын* арӧс, кор сылӧн чужис сы кодь пи. Адам пуктіс сылы Сиф ним.
Сиф чужӧмсянь Адам оліс кӧкъямыссё во. Сылӧн чужисны на пиян да нывъяс.
Адам оліс ӧкмыссё комын арӧсӧдз, сэсся куліс.
Сифлы вӧлі сё вит арӧс, кор сылӧн чужис Енос.
Енос чужӧмсянь Сиф оліс кӧкъямыссё сизим во. Сылӧн чужисны на пиян да нывъяс.
Сиф оліс ӧкмыссё дас кык арӧсӧдз, сэсся куліс.
Енослы вӧлі [сё] ӧкмысдас арӧс, кор сылӧн чужис Кенан.
Кенан чужӧмсянь Енос оліс кӧкъямыссё дас вит во. Сылӧн чужисны на пиян да нывъяс.
Став олан лунъясыс Енослӧн лои ӧкмыссё вит во, сэсся сійӧ куліс.
Кенанлы вӧлі [сё] сизимдас арӧс, кор сылӧн чужис Махалалел.
Махалалел чужӧмсянь Кенан оліс кӧкъямыссё нелямын во. Сылӧн чужисны на пиян да нывъяс.
Кенан оліс ӧкмыссё дас арӧсӧдз, сэсся куліс.
Махалалеллы вӧлі [сё] квайтымын вит арӧс, кор сылӧн чужис Яред.
Яред чужӧмсянь Махалалел оліс кӧкъямыссё комын во. Сылӧн чужисны на пиян да нывъяс.
Махалалел оліс кӧкъямыссё ӧкмысдас вит арӧсӧдз, сэсся куліс.
Яредлы вӧлі сё квайтымын кык арӧс, кор сылӧн чужис Енок.
Енок чужӧмсянь Яред оліс кӧкъямыссё во. Сылӧн чужисны на пиян да нывъяс.
Яред оліс ӧкмыссё квайтымын кык арӧсӧдз, сэсся куліс.
Еноклы вӧлі [сё] квайтымын вит арӧс, кор сылӧн чужис Метушал.
Метушал чужӧмсянь Енок оліс Ен водзын куимсё во. Сылӧн чужисны на пиян да нывъяс.
Енок оліс куимсё квайтымын вит арӧсӧдз.
Енок кывзысис Енлысь став олӧм чӧжыс.
Сэсся сійӧ эз ло, ӧд Енмыс босьтіс сійӧс Ас дінас.
Метушаллы вӧлі сё кӧкъямысдас сизим арӧс, кор сылӧн чужис Ламек.
Ламек чужӧмсянь Метушал оліс сизимсё кӧкъямысдас кык во. Сылӧн чужисны на пиян да нывъяс.
Метушал оліс ӧкмыссё квайтымын ӧкмыс арӧсӧдз, сэсся куліс.
Ламеклы вӧлі сё кӧкъямысдас кык арӧс, кор сылӧн чужис пи. Сійӧ пуктіс пиыслы Ной ним шуалӧмӧн: «Сійӧ бурӧдас миянӧс, кор ми шогпырысь кутам вӧдитны Господьӧн ёрӧм му».
Ной чужӧмсянь Ламек оліс витсё ӧкмысдас вит во. Сылӧн чужисны на пиян да нывъяс.
Ламек оліс сизимсё сизимдас сизим арӧсӧдз, сэсся куліс.
Нойлы вӧлі витсё арӧс, кор сылӧн чужисны Сим, Хам да Яфет пиян.
Кор йӧзыс содісны му вылын да налӧн чужисны нывъяс, сэки Ен пиян аддзисны, мый нывъяс мичаӧсь, да бӧрйысьӧмӧн кутісны босьтны найӧс гӧтырӧ.
Господь [Ен] шуис: «Менам лолалӧмӧй морт пытшкын оз пыр ло, ӧд мортыс сӧмын вир-яй.
Сылӧн олан кадыс мед лоӧ сё кызь во».
Сійӧ кадас да бӧрынджык му вылын олісны ыджыд тушаа йӧз.
Найӧс чужтылісны мувывса йӧзлӧн нывъяс Ен пиянлы.
Тайӧ йӧзыс вӧліны ёнӧсь да нималанаӧсь.
Кор Господь [Ен] аддзис, мый мувывса йӧзлӧн олӧмыс тшыкӧма, и мый налӧн мӧвпъясыс да сьӧлӧм кӧсйӧмъясыс пыр лёкӧсь,
сэки жалитіс, мый вӧчис мортӧс му вылын. Господьлӧн сьӧлӧмыс ёна шогсис.
И шуис Господь: «Бырӧда му вылысь мортӧс, кодӧс Ме вӧчи. Бырӧда йӧзӧс и ыж-мӧскӧс, гаг-веглясьысьясӧс и енэжвыв лэбачьясӧс. Бурджык, эг кӧ вӧчлы найӧс».
Господьлы шогманаӧн вӧлі сӧмын Ной.
Ной да сысянь чужысьяс йылысь. Сійӧ кадас сӧмын Ной оліс веськыда да кывзысис Енлысь.
Сійӧ вӧлі сӧстӧм сьӧлӧма морт.
Сылӧн чужис куим пи: Сим, Хам да Яфет.
Енлӧн син водзын вӧлі тшыкӧма му вылас олӧмыс, муыс вӧлі тырӧма виалӧм-дзескӧдӧмӧн.
[Господь] Ен видзӧдліс му вылӧ да аддзис, мый муыс тшыкӧма, быдӧн пежалӧма ассьыс олӧмсӧ.
[Господь] Ен шуис Нойлы: «Ме бырӧда став йӧзсӧ, ӧд муыс на вӧсна тырӧма виалӧм-дзескӧдӧмӧн.
Ме дзикӧдз бырӧда найӧс му вылысь.
Тэ вӧч аслыд гофер пуысь ковчег, сэні вӧч жыръяс да сирав ковчегсӧ пытшкӧссяньыс и ортсысяньыс.
Кузьтанас ковчегыс мед лоас куимсё гырддза, пасьтанас — ветымын гырддза, а джуджданас — комын гырддза.
Стенмас, дзик выліас, вӧч гырддза пасьта розь, бокас — ӧдзӧс.
Вӧч улыс, мӧд да коймӧд судтаяс.
Ме ойдӧда мусӧ, тадзи бырӧда енэж улысь став ловъя олысьсӧ.
Му вылын ставыс кулас.
Но тэкӧд Ме кӧртала йитӧд. Тэныд да пияныдлы, гӧтырыдлы да моньясыдлы колӧ пырны ковчегӧ.
Пырт ковчегӧ быд пемӧсысь гозйӧн, айӧс да эньӧс. Найӧ мед тэкӧд тшӧтш ловйӧн колясны.
Быдсикас лэбач, ыж-мӧс да гаг-веглясьысь аслас пӧлыскӧд мед пырасны сэтчӧ. Тадзи найӧ тшӧтш ловйӧн колясны.
Аслыд да пемӧсъяслы босьт быдпӧлӧс сёянсӧ, мед вӧлі мый сёйны».
Ной вӧчис ставсӧ сідзи, кыдзи тшӧктіс сылы [Господь] Ен.
Господь [Ен] шуис Нойлы: «Пыр аслад котырыдкӧд ковчегӧ, ӧд Ме аддзи, мый ӧнія олысьяс пӧвстысь тэ ӧтнад олан веськыда Ме водзын.
Босьт ставсикас сӧстӧм пемӧссӧ сизим гозйӧн, айӧс да эньӧс, а пеж пемӧссӧ — ӧти гозйӧн, айӧс да эньӧс.
Енэжвыв [сӧстӧм] лэбачсӧ босьт тшӧтш сизим гозйӧн, айӧс да эньӧс, [пеж лэбачсӧ — ӧти гозйӧн, айӧс да эньӧс]. Тадзи пемӧс-лэбачыс оз бырны му вылысь.
Сизим лун мысти нелямын лун да вой Ме кута кисьтны му вылӧ зэр. Тадзи бырӧда му вылысь Меӧн вӧчӧм став ловъя олысьсӧ».
Ной вӧчис ставсӧ, мый Господь [Ен] тшӧктіс сылы.
Нойлы вӧлі квайтсё арӧс, кор муыс ойдіс.
Гӧтырыскӧд, пияныскӧд да моньясыскӧд Ной пырис ковчегӧ, медым дзебсьыны ойдан ваысь.
[Сӧстӧм да пеж лэбачысь,] сӧстӧм да пеж пемӧсысь, став веглясьысьысь гозйӧн, ай да энь, пырисны Ной дінӧ ковчегӧ, кыдзи Ен тшӧктіс Нойлы.
Сизим лун мысти муыс кутіс ойдыны.
Кор Нойлы вӧлі квайтсё арӧс, во заводитчӧмсянь мӧд тӧлысьлӧн дас сизимӧд* лунӧ воссисны пыдӧстӧм йирлӧн ва петанінъяс да енэжвыв ӧшиньяс.
Нелямын лун да нелямын вой му вылӧ киссис зэр.
Сійӧ лунӧ, кор кутіс ойдӧмӧн ойдыны, Ной пырис ковчегӧ аслас Сим, Хам да Яфет пияныскӧд, гӧтырыскӧд да куимнан моньыскӧд.
Накӧд пырис быдсикас мувыв пемӧсыс да гаг-веглясьысьыс, тшӧтш быдсикас лэбачыс да мукӧд бордаыс.
Ной дінӧ ковчегӧ став ловъя олысьыс пырисны гозйӧн, ай да энь, кыдзи Енмыс сылы тшӧктіс.
Нойлӧн пырӧм бӧрти Господь [Ен] тупкис ковчег ӧдзӧссӧ.
Нелямын лун [да вой] чӧж ваыс ӧтарӧ содіс да кыпӧдіс ковчегсӧ му вылысь.
Ковчег кывтіс ва вывті, а ваыс му вылын содӧмӧн содіс.
Ваыс сэтшӧма туис, мый весиг джуджыд керӧсъяс веськалісны ва улӧ.
Дас вит гырддза судта вӧлі ваыс джуджыд керӧсъяс весьтын.
Му вылӧ эз коль ни ӧти ловъя олысь. Бырисны лэбачьяс, мувыв пемӧсъяс да гаг-веглясьысьяс. Бырис тшӧтш став йӧзыс.
Му вылын став лолалысьыс куліс.
Йӧзӧс, пемӧсъясӧс, гаг-веглясьысьясӧс да енэжвыв лэбачьясӧс — став ловъя олысьсӧ лои бырӧдӧма му вылысь.
Ловйӧн колины сӧмын Ной да найӧ, кодъяс пырисны сыкӧд ковчегӧ.
Сё ветымын лун чӧж ваыс содіс му вылын.
Ен эз вунӧд Нойӧс да сыкӧд ковчегын кывтысь мувыв пемӧсъясӧс [лэбачьясӧс да гаг-веглясьысьясӧс].
Ен тшӧктіс кыпӧдчыны му вылын тӧвлы, и ваыс сувтіс.
Тупкысисны йирлӧн ва петанінъяс, пӧдласисны енэжвыв ӧшиньяс, и дугдіс зэрны.
Сё ветымын лун мысти ваыс вочасӧн кутіс ямны.
Сизимӧд тӧлысьлӧн дас сизимӧд лунӧ ковчег сувтіс Арарат керӧсъясӧ.
Ваыс чиніс и чиніс.
Дасӧд тӧлысьлӧн медводдза лунӧ мыччысисны керӧс йывъяс.
Нелямын лун мысти Ной восьтіс ковчеглысь ӧшинь розьсӧ да лэдзис кырнышӧс [мед тӧдмавны, ямис эз ваыс]. Быд пӧрйӧ лэбалӧм бӧрас кырныш бӧр волывліс ковчегӧ, кытчӧдз муыс эз косьмы.
Бӧрынджык Ной лэдзис гулюӧс, мед тӧдмавны, тыдовтчис эз муыс. Но гулю эз аддзы аслыс пуксянінсӧ да бӧр локтіс Ной дінӧ ковчегӧ, ӧд муыс вӧлі ставнас ва улын на.
Ной нюжӧдіс кисӧ да пыртіс гулюӧс ковчегӧ.
Сизим лун мысти бара лэдзис гулюӧс ковчегысь.
Рытнас гулю бӧр локтіс, и вомас сылӧн вӧлі веж олив кор. Тадзи Ной тӧдмаліс, мый ваыс ямӧма му вылын.
Сизим лун бӧрын Ной бара лэдзис гулюӧс, и сійӧ бӧрсӧ эз нин лок.
Кор Нойлы вӧлі квайтсё ӧти арӧс, тайӧ воас медводдза тӧлысьлӧн медводдза лунӧ муыс эз нин вӧв ва улын.
Ной восьтіс ковчег вевтсӧ да аддзис, мый му веркӧсыс кос.
Мӧд тӧлысьлӧн кызь сизимӧд лунӧ муыс вӧлі дзикӧдз косьмӧма.
[Господь] Ен шуис Нойлы:
«Пет ковчегсьыс гӧтырыдкӧд, пияныдкӧд да моньясыдкӧд.
Петкӧд аскӧдыд став пемӧссӧ, кодъяс тэкӧд, быд ловъя олысьсӧ — лэбачьясӧс, ыж-мӧскӧс, мувыв гаг-веглясьысьясӧс.
Мед найӧ чужтысясны-рӧдмасны да паськӧдчасны му вылын».
Ной петіс ковчегысь пияныскӧд, гӧтырыскӧд да моньясыскӧд.
Быдсикас пемӧсыс, лэбачыс, да гаг-веглясьысьыс — мувывса став ловъя олысьыс сьӧрсьӧн-бӧрсьӧн петісны ковчегысь.
Ной вӧчис Господьлы висьпуктанін.
Босьтіс сӧстӧм пемӧсъясӧс да сӧстӧм лэбачьясӧс да висьпуктанін вылын вайис найӧс сотан вись пыдди.
Висьпуктанінсянь чӧскыд ӧвтӧмнас лолалігӧн Господь [Ен] шуис Аслыс: «Ог кут сэсся ёрны мусӧ морт вӧсна. Мортлӧн мӧвпъясыс томсяньыс тырӧмаӧсь лёкнас,
но водзӧ Ме ог кут бырӧдны став ловъя олысьсӧ, кыдзи Ме вӧчи.
Кытчӧдз кутас сулавны муыс, лоӧ кӧдзӧм да вундӧм, кӧдзыд да шоныд, гожӧм да тӧв, лун да вой».
Ен бурсиис Нойӧс да сылысь пиянсӧ: «Чужтысьӧй-рӧдмӧй, овмӧдӧй мусӧ [да видзӧй сійӧс].
Мед став вӧрса [да гортса] пемӧсыс, став енэжвыв лэбачыс, му вылас став котралысь-веглясьысьыс да став саридзса чериыс поласны-тіраласны тіянысь — Ме сета найӧс тіян киӧ.
Став пемӧссӧ сета тіянлы сёян пыдди, кыдзи водзынджык сеті тіянлы веж быдмӧгъяс.
Сӧмын энӧ сёйӧй яй, кӧні эм вир, ӧд вирын — олӧмыс.
Тіян вир вӧсна — олӧмнытӧ мырддьӧм вӧсна — Ме водзӧс перъя сылысь, коді кисьтас вирнытӧ, пемӧс-ӧ сійӧ либӧ морт.
Коді кисьтас мортлысь вир, сылысь вирсӧ тшӧтш кисьтасны, ӧд мортсӧ вӧчӧма Ен кодьӧн.
Чужтысьӧй-рӧдмӧй да паськӧдчӧй му вылас».
Ен шуис Нойлы да пияныслы:
«Ме кӧртала йитӧд тіянкӧд да тіянсянь чужысьяскӧд, му вылын став ловъя олысьыскӧд, кодъяс петісны тіянкӧд ковчегысь: лэбачьяскӧд да мувыв пемӧсъяскӧд.
Ме кӧртала тіянкӧд йитӧд да кӧсйыся, мый ойдӧмнас водзӧ ог кут бырӧдны ловъя олысьясӧс ни мусӧ».
[Господь] Ен шуис: «Ме кӧртала тіянкӧд да став ловъя олысьыскӧд нэмъяс кежлӧ йитӧд.
Тайӧ йитӧдыслы лоӧ татшӧм пас: кымӧръясӧ Ме пукта Ассьым ӧшкамӧшка.
Сійӧ лоас Ме да мувыв олысьяс костын кӧрталӧм йитӧдлӧн пасӧн.
Кор Ме чукӧрта му весьтӧ кымӧръяс, и кымӧръясын мыччысяс [Менам] ӧшкамӧшка, сэки Ме уськӧда тӧд вылӧ Ассьым йитӧдӧс, мый Ме кӧрталі тіянкӧд да став ловъя олысьыскӧд.
Сэсся став олӧмсӧ бырӧдысь ойдӧмыс оз нин ло.
Кор кымӧръясын мыччысяс [Менам] ӧшкамӧшка, Ме видзӧдла сы вылӧ да уськӧда тӧд вылӧ Ме да мувывса став ловъя олысьыс костын нэмъяс кежлӧ кӧрталӧм йитӧдӧс».
Ен шуис Нойлы: «Тайӧ лоӧ Ме да мувывса став олысьыс костын кӧрталӧм йитӧдлӧн пасӧн».
Нойлӧн пияныс, кодъяс петісны ковчегысь: Сим, Хам да Яфет.
Хам вӧлі Ханаанлӧн бать.
Куимнанныс найӧ Нойлӧн пиян, насянь рӧдмис став йӧзыс.
Ной вӧдитіс му. Сійӧ вӧлі медводдза морт, коді пуктіс виноград.
Ӧтчыд сійӧ вина юӧм бӧрас коддзис да пасьтӧгыс куйліс аслас чомйын.
Сійӧс пасьтӧгыс аддзис Хам пиыс, Ханаанлӧн батьыс, да висьталіс та йылысь вокъясыслы.
Сим да Яфет пуктісны пельпом выланыс паськӧм да мышнас бергӧдчӧмӧн пырисны вевттьыны батьсӧ.
Найӧ эз видзӧдны батьыс вылӧ да эз аддзывны сійӧс пасьтӧгыс.
Ас садяс воӧм бӧрын Ной тӧдмаліс, мый вӧчис медічӧт пиыс, да шуис: «Ёрӧма Ханаанӧс, сійӧ лоас кесйӧгӧн вокъясыслӧн кесйӧгъяслы».
Сэсся шуис: «Ошкӧм Господьлы, Симлӧн Енлы!
Ханаан мед лоас кесйӧгӧн Симлы.
А Яфетлысь рӧдсӧ Ен мед паськӧдас Сим рӧдлӧн оланінӧдз.
И налы кыкнанныслы мед кесъялас Ханаан».
Ва ойдлӧмсянь Ной оліс на куимсё ветымын во.
Ставнас Ной оліс ӧкмыссё ветымын арӧсӧдз, сэсся куліс.
Ойдлӧм бӧрын Симлӧн, Хамлӧн да Яфетлӧн, Ной пиянлӧн, чужисны ныв-пи.
Яфетлӧн вӧліны Гомер, Магог, Мадай, Яван, [Элис,] Тувал, Мешек да Фирас пиян.
Гомерлӧн вӧліны Аскеназ, Рифат да Тогарма пиян.
Яванлӧн вӧліны Элиш да Фарсис пиян, сысянь петісны тшӧтш киттимсаяс да доданейяс.
Насянь рӧдмисны дівывса да саридздорса войтыръяс. Быд войтыр овмӧдчис аслас муӧ чужанвуж да кыв сертиныс.
Хамлӧн вӧліны Куш, Мицраим, Фут да Ханаан пиян.
Кушлӧн вӧліны Севей, Хавил, Савтай, Рамай да Савтек пиян.
Рамайлӧн вӧліны Шевей да Дедан пиян.
Кушлӧн чужис Нимрод.
Му вылын сійӧ вӧлі медводдза вына юралысь.
Господь [Ен] водзын сійӧ вӧлі ён кыйсьысь. Та вӧсна и шулӧны, Господь водзын пӧ ён кыйсьысь, Нимрод кодь жӧ.
Медводдза каръясӧн сылӧн юралӧм улын вӧліны Вавилон, Эрек, Аккад да Калне. Тайӧ каръясыс вӧліны Сеннар муын.
Сэтысь Нимрод вуджис Ассурӧ, лэптіс Ниневия, Реховот-Ир да Калах каръяс.
Ниневия да ыджыд Калах кар костӧ лэптіс Ресен кар.
Мицраим рӧдысь петісны лудъяс, анамъяс, лехавъяс, нафтухъяс, патрусъяс, каслухъяс да кафторъяс. Каслухъяссянь петісны филистимсаяс.
Ханаанлӧн чужис Сидон, медводдза пиыс, сэсся чужис Хет. Ханаан рӧдысь петісны тшӧтш евуссаяс, аморейяс, гергесейяс, хивейяс, аркейяс, синейяс, арвадейяс, чемарейяс да хаматъяс.
Бӧрынджык ханаанса чужанкотыръяс разалісны. Ханаансаяслӧн муыс вӧлі паськӧдчӧма Сидонсянь Герарлань, Газаӧдз, сэсянь водзӧ — Содомлань, Гоморалань, Адмалань да Севоимлань, Лашаӧдз.
Тайӧ ставныс — Хамсянь чужысьяс асланыс чужанкотыр, кыв, му да войтыр сертиныс.
Симлӧн, Яфетлӧн ыджыд вокыслӧн, тшӧтш вӧліны пиян. им лои Эверсянь чужысьяслӧн батьӧн.
Симлӧн вӧліны Элам, Ассур, Арфаксад, Луд, Арам [да Кенан] пиян.
Арамлӧн вӧліны Уц, Хул, Гефер да Маш пиян.
Арфаксадлӧн чужис [Кенан, Кенанлӧн чужис] Шелах, Шелахлӧн чужис Эвер.
Эверлӧн чужис кык пи.
Ӧтисӧ нимтісны Пелегӧн, ӧд сылӧн чужан кадӧ йӧзыс разалісны му пасьтала.
Мӧдсӧ, сылысь воксӧ, шуисны Иоктанӧн.
Иоктанлӧн чужисны Алмодад, Шалеф, Хацармавет, Ерах, Адорам, Узал, Диклай, Овал, Авимаэл, Шевей, Офир, Хавил да Иовав.
Ставныс найӧ Иоктанлӧн пиян.
Налӧн оланінъясыс вӧліны Мешасянь Сефарӧдз, асыввыв керӧсӧдз.
Тайӧ ставныс — Симсянь чужысьяс асланыс чужанкотыр, кыв, му да войтыр сертиныс.
Тайӧ ставныс — Ной пиянсянь чужысьяс асланыс чужанкотыр да войтыр сертиныс.
Ойдлӧм бӧрын насянь паськалісны войтыръяс став му пасьтала.
Став му пасьтала вӧлі дзик ӧти кыв да ӧти сёрнисикас.
Асыввылысь петӧм бӧрын йӧзыс аддзисны Сеннар муысь паськыдін да овмӧдчисны сэтчӧ.
Ӧта-мӧдныслы шуисны: «Вӧчамӧй сёйысь биын сотӧмӧн кирпич».
Тадзи из пыдди кутісны вӧдитчыны кирпичӧн, а кориз* пыдди — сьӧд сирӧн.
Найӧ шуисны: «Лэптамӧй аслыным кар да башня, джуджданас мед лоӧ енэжӧдз. Тадзи нимӧдам асьнымӧс да став му пасьталаыс огӧ разалӧй».
Господь лэччис видзӧдлыны лэптан карсӧ да башнясӧ.
Сійӧ шуис: «Тайӧ йӧзыс — ӧти войтыр, налӧн ӧти кыв.
Мый нӧ кутісны вӧчны! Найӧ кӧ босьтчисны, вайӧдасны помӧдз!
Вай лэччам да сорлалам налысь кывсӧ, медым дугдасны гӧгӧрвоны ӧта-мӧднысӧ».
И разӧдіс найӧс Господь сэтысянь став му пасьталаыс.
Тадзи найӧ дугдісны лэптыны карсӧ [да башнясӧ].
Карыслы сетӧма Вавилон ним, ӧд сэні Господь сорлаліс йӧзлысь кывсӧ да сэтысянь разӧдіс найӧс став му пасьтала.
Симсянь чужысьяс йылысь. Симлы вӧлі сё арӧс, кор сылӧн чужис Арфаксад. Тайӧ лои ыджыд ойдлӧм бӧрын кык во мысти.
Арфаксад чужӧмсянь Сим оліс витсё во. Сылӧн чужисны на пиян да нывъяс. [Сэсся сійӧ куліс.]
Арфаксадлы вӧлі [сё] комын вит арӧс, кор сылӧн чужис [Кенан.
Кенан чужӧмсянь Арфаксад оліс куимсё комын во, сылӧн чужисны на пиян да нывъяс. Сэсся сійӧ куліс.
Кенанлы вӧлі сё комын арӧс, кор сылӧн чужис] Шелах.
Шелах чужӧмсянь Арфаксад оліс нёльсё куим во.* Сылӧн чужисны на пиян да нывъяс. [Сэсся сійӧ куліс.]
Шелахлы вӧлі [сё] комын арӧс, кор сылӧн чужис Эвер.
Эвер чужӧмсянь Шелах оліс нёльсё куим* во. Сылӧн чужисны на пиян да нывъяс. [Сэсся сійӧ куліс.]
Эверлы вӧлі [сё] комын нёль арӧс, кор сылӧн чужис Пелег.
Пелег чужӧмсянь Эвер оліс нёльсё комын во. Сылӧн чужисны на пиян да нывъяс. [Сэсся сійӧ куліс.]
Пелеглы вӧлі [сё] комын арӧс, кор сылӧн чужис Рагав.
Рагав чужӧмсянь Пелег оліс кыксё ӧкмыс во. Сылӧн чужисны на пиян да нывъяс. [Сэсся сійӧ куліс.]
Рагавлы вӧлі [сё] комын кык арӧс, кор сылӧн чужис Серуг.
Серуг чужӧмсянь Рагав оліс кыксё сизим во. Сылӧн чужисны на пиян да нывъяс. [Сэсся сійӧ куліс.]
Серуглы вӧлі [сё] комын арӧс, кор сылӧн чужис Нахор.
Нахор чужӧмсянь Серуг оліс кыксё во. Сылӧн чужисны на пиян да нывъяс. [Сэсся сійӧ куліс.]
Нахорлы вӧлі кызь ӧкмыс арӧс, кор сылӧн чужис Терах.
Терах чужӧмсянь Нахор оліс сё дас ӧкмыс во. Сылӧн чужисны на пиян да нывъяс. [Сэсся сійӧ куліс.]
Терахлы вӧлі сизимдас арӧс, кор сылӧн чужисны Ӧврам, Нахор да Харан.
Терахсянь чужысьяс йылысь. Терахлӧн чужисны Ӧврам, Нахор да Харан.
Харанлӧн чужис Лот.
Харан куліс аслас Терах батьыс дырйи на Ур карын, аслас Калдея чужан муын.
Ӧврам да Нахор гӧтрасисны.
Ӧврамлӧн гӧтырыс вӧлі Сара, а Нахорлӧн — Милка, Харанлӧн нылыс. Харан вӧлі Милкалӧн да Искалӧн бать.
Саралӧн эз вӧв ныв-пиыс, эз вермы сьӧктынысӧ да.
Терах босьтіс аскӧдыс Ӧврам писӧ, Харан пиыслысь Лот писӧ да Сара моньсӧ, Ӧврамлысь гӧтырсӧ. Калдея Урысь найӧ мӧдӧдчисны Ханаан мулань.
Но кор воисны Харанӧ, сувтісны сэтчӧ.
[Харанын] Терах оліс кыксё вит арӧсӧдз. Сійӧ куліс Харанын.
Господь шуис Ӧврамлы: «Коль ассьыд мутӧ, рӧдвужтӧ да бать керкатӧ. Ме инда тэныд му — сэтчӧ мун.
Ме сета тэсянь чужны унасьыс-уна войтырлы, бурсиа да нимӧда тэнӧ, и тэ лоан мукӧдлы бурсиӧмӧн!
Тэнӧ бурсиысьӧс Ме бурсиа, тэнӧ ёрысьӧс Ме ёра.
Тэ пыр вуджас бурсиӧмыс быд войтырлы».
Ӧврам мӧдӧдчис туйӧ, кыдзи тшӧктіс сылы Господь.
Сыкӧд тшӧтш муніс Лот.
Ӧврамлы вӧлі сизимдас вит арӧс, кор сійӧ петіс Харанысь.
Ӧврам босьтіс Сара гӧтырсӧ, вокыслысь Лот писӧ, став эмбурсӧ, йӧзӧс, кодъяс кесъялісны налы Харанын, да мӧдӧдчис Ханаан муӧ.
Ханаанӧ воӧм бӧрын Ӧврам кытшовтіс тайӧ мусӧ да матыстчис Сикемлань. Сійӧ сувтіс Морэ нима тупу дорӧ.
Сэки тайӧ муас оліс ханаан войтыр.
Сэні Ӧврамлы петкӧдчис Господь да шуис: «Тайӧ мусӧ Ме сета тэсянь чужысьяслы».
Ӧврам сувтӧдіс висьпуктанін Господьлы, коді петкӧдчис сылы.
Сэтысянь Ӧврам мӧдӧдчис керӧслань, Вефильсянь асыввылӧ.
Сэні сувтӧдіс ассьыс чомсӧ сідз, мый Вефиль вӧлі рытыввылын, а Гай — асыввылын.
Сэсся вӧчис Господьлы висьпуктанін да шыасис Господь дінӧ.
Та бӧрын Ӧврам чеччис да мӧдӧдчис Негев муӧ.
Тайӧ муас йӧзыс кутісны ёна тшыгъявны, та вӧсна Ӧврам муніс овны Египетӧ.
Египетӧ матыстчигӧн сійӧ шуис Сара гӧтырыслы: «Тэ мича ань.
Кор египетсаяс аддзасны тэнӧ да тӧдмаласны, мый тэ менам гӧтыр, виасны менӧ, а тэнӧ ловйӧн колясны.
Висьтав, мый тэ менам чой. аысь меным бур лоас, и тадзи тэ видзан менсьым олӧмӧс».
Ӧврам воис Египетӧ. Египетсаяс аддзисны, мый Сара зэв мича ань.
Фараонлӧн ыджыд чина йӧзыс тшӧтш аддзылісны Сараӧс да ошкисны сійӧс фараонлы.
Сараӧс вайӧдісны фараон керкаӧ.
Сара вӧсна фараон вӧлі бур сьӧлӧма Ӧврам дінӧ.
Сійӧ сетіс Ӧврамлы ыжъясӧс, мӧсъясӧс, осёлъясӧс, верблюдъясӧс, кесйӧг айуловӧс да аньясӧс.
Но Господь ыстіс чорыд висьӧм фараонлы да сылӧн йӧзлы Ӧврамлӧн Сара гӧтыр вӧсна.
Фараон корис Ӧврамӧс да шуис: «Мый тэ вӧчин мекӧд?
Мыйла тэ эн висьтав, мый сійӧ тэнад гӧтыр?
Мыйла шуин сійӧс аслад чойӧн?
Ме сійӧс аслым гӧтырӧ босьті.
Ӧні бӧр босьт ассьыд гӧтыртӧ да мун».
Фараонлӧн тшӧктӧм серти сылӧн йӧзыс ыстісны Ӧврамӧс да сылысь гӧтырсӧ Египетысь налӧн став эмбурнас. [Ыстісны тшӧтш Лотӧс.]
Ӧврам босьтіс ставсӧ, мый сылӧн вӧлі, сэсся гӧтырыскӧд да Лоткӧд Египетысь мӧдӧдчис Негев муӧ.
Ӧврам ёна озырмис, сылӧн вӧлі уна ыж-мӧс да эзысь-зарни.
Негевысь сійӧ муніс бӧр Вефильлань. Сэні, Вефиль да Гай костын, коркӧ сулавліс нин сылӧн чомйыс. Ӧврам локтіс аслас водзынджык вӧчлӧм висьпуктанін дорӧ да шыасис Господь дінӧ.
Лот ветлӧдліс Ӧврамкӧд. Сылӧн тшӧтш вӧлі уна ыж-мӧс да аслас чомъяс.
Ыджыд овмӧс-эмбурныс вӧсна налы лои дзескыд ӧтвыв овнысӧ.
Ӧврамлӧн да Лотлӧн ыж-мӧс видзысьясыс кутісны зыксьыны ӧта-мӧдныскӧд.
Сійӧ кадас тайӧ муас нӧшта олісны ханаансаяс да перезейяс.
Ӧврам шуис Лотлы: «Ми ӧд рӧдвуж тэкӧд. Мыйла миянлы да миян ыж-мӧс видзысьяслы зыксьынысӧ?
Вай торйӧдчам. Став муыс тэ водзын.
Тэ кӧ мунан шуйгавылӧ, ме муна веськыдвылӧ, а мунан кӧ веськыдвылӧ, ме муна шуйгавылӧ».
Лот аддзис, мый Йӧрдан ковтыс Цоар карӧдз вӧлі Господьлӧн сад йӧр кодь да уна ваа Египет му кодь. Тайӧ вӧлі Господьӧн Содом да Гомора каръяс бырӧдтӧдз на.
Лот бӧрйис Йӧрдан ковтыс да веськӧдчис асыввылӧ.
Тадзи найӧ Ӧврамкӧд торъялісны ӧта-мӧдсьыныс.
Ӧврам кольччис Ханаан муӧ, а Лот кутіс овны Йӧрдан ковтыс каръяс дорын. Чомъяснас ветлӧдлігӧн Лот воис Содом карӧдз.
Содомын олысьяс вӧліны зэв лёкӧсь, найӧ уна мыж вӧчисны Господьлы паныд.
Лотлӧн мунӧм бӧрын Господь шуис Ӧврамлы: «Видзӧдлы войвылӧ и лунвылӧ, асыввылӧ и рытыввылӧ.
Тайӧ мусӧ, мый тэ аддзан, Ме сета тэныд да тэсянь чужысьяслы пыр кежлӧ. Тэсянь чужысьыс лыа чир мында лоас.
Вермас кӧ кодкӧ артавны лыа чирсӧ, вермас артавны и тэсянь чужысьсӧ.
Чеччы, кытшовт тайӧ мусӧ кузьтанас и пасьтанас, ӧд сійӧс Ме сета тэныд [да тэсянь чужысьяслы пыр кежлӧ]».
Ӧврам чомъяснас вешйис Хевронӧ, Мамре тупу раскӧ.
Сэтчӧ сувтӧдіс Господьлы висьпуктанін.
Сійӧ кадас сеннарса Амрафел ӧксы, элласарса Ариок ӧксы, эламса Кедорлаомер ӧксы да гоимса Тидал ӧксы петісны тышӧ содомса Бер ӧксылы, гомораса Бирша ӧксылы, адмаса Шинав ӧксылы, севоимса Шемевер ӧксылы да беласа, мӧд ногӧн цоарса, ӧксылы паныд.
Тайӧ вит ӧксыыс чукӧртчисны асланыс тышкайӧзкӧд Сиддим ковтысӧ, ӧні сэні Сола саридз.
Дас кык во чӧж найӧ олісны Кедорлаомер кипод улын, а дас коймӧд вонас кыпӧдчисны сылы паныд.
Дас нёльӧд вонас Кедорлаомер ӧксы да сыкӧд ӧтувтчӧм ӧксыяс локтісны да пасьвартісны рефаясӧс Аштерот-Карнаимын, зузъясӧс Гамын, эмиясӧс Шаве-Киръятаимын, хориясӧс Сеир керӧсвыв муын Эл-Паранӧдз, овтӧмин дорӧдз.
Сэтысь найӧ локтісны Эн-Мишпатӧ, ӧнія Кадешӧ, да пасьвартісны став амалик войтырӧс да Хацацон-Тамарын олысь аморей войтырӧс.
Сэки содомса, гомораса, адмаса, севоимса да беласа, мӧд ногӧн цоарса, ӧксыяс петісны тышӧ Сиддим ковтысын эламса Кедорлаомер ӧксылы, гоимса Тидал ӧксылы, сеннарса Амрафел ӧксылы да элласарса Ариок ӧксылы паныд. Нёль ӧксы тышкасисны витлы паныд.
Сиддим ковтысын вӧлі уна сир гу.
Содомса да гомораса ӧксыяс пышйиганыс усьласисны сир гуясӧ, а мукӧдыс пышйисны керӧсъясӧ.
Вермысьяс босьтісны Содомысь да Гомораысь став овмӧс-эмбурсӧ да сёянсӧ, сэсся мунісны.
Босьтісны тшӧтш став эмбурнас Ӧврам воклысь Лот писӧ, коді оліс Содомын.
Пышйӧмаяс пӧвстысь ӧти морт локтіс еврей Ӧврам дінӧ. Ӧврам сэки оліс Мамре нима аморейлӧн тупу раскын. Мамре вӧлі Эшколлӧн да Анерлӧн вокыс. Найӧ вӧлі кӧрталӧмаӧсь йитӧд Ӧврамкӧд.
Ӧврам мыйӧн тӧдмаліс Лотӧс пленӧ босьтӧм йылысь, чукӧртіс куимсё дас кӧкъямыс кесйӧгӧс, кодъяс чужлісны сы ордын, да Лотӧс босьтысьяс бӧрся вӧтчис Данӧдз.
Войнас сійӧ юкліс ассьыс тышкайӧзсӧ чукӧръяс вылӧ, уськӧдчис Лотӧс пленӧ босьтысьяс вылӧ да пасьвартіс найӧс. Ловйӧн кольысьясӧс вӧтӧдісны Дамаск войвывладорса Ховаӧдз.
Ӧврам мездіс вокыслысь Лот писӧ, аньясӧс да Лотлысь став йӧзсӧ, бӧр мырддис вӧрӧг киысь Лотлысь став эмбурсӧ.
Кедорлаомерӧс да сыкӧд вӧлысь куим ӧксыӧс пасьвартӧм бӧрын Ӧврам бӧр бергӧдчис. Содомса ӧксы локтіс Шаве ковтысӧ, ӧнія Ӧксы ковтысӧ, медым вочаавны Ӧврамӧс.
Салим карса Мелкиседек ӧксы, Медвылысса Енлы кесъялысь поп, петкӧдіс Ӧврамлы нянь да вина.
Ӧврамӧс бурсиӧмӧн Мелкиседек шуис: «Мед бурсиас тэнӧ Медвылысса Ен, коді вӧчис енэжсӧ да мусӧ.
Ошкӧм Медвылысса Енлы, коді сетіс вӧрӧгтӧ тэнад киӧ».
Ӧврам сетіс Мелкиседеклы тышын став шедӧдӧмсьыс дасӧд юкӧнсӧ.
Содомса ӧксы шуис Ӧврамлы: «Вай меным ассьым йӧзӧс, а эмбурсӧ аслыд босьт».
Но Ӧврам шуис содомса ӧксылы: «Лэпта киӧс Господьлань, енэжсӧ да мусӧ вӧчысь Медвылысса Енлань, да кыв сета, мый кӧмкот кӧв ни весиг сунис тэнсьыд ог босьт, медым тэ эн шу: “Ме озырмӧді Ӧврамӧс”.
Меным оз ков нинӧм, тырмана сійӧ, мыйӧн менам йӧз пӧткӧдчисны.
Анер, Эшкол да Мамре, меным отсасьысьяс, мед босьтасны ассьыныс пайнысӧ».
Тайӧ лоӧмторъясыс бӧрын Ӧврамлы петкӧдчис Господь да шуис: «Эн пов, Ӧврам, Ме — тэнад сайӧдыд.
Тэныд вичмас ыджыд тырдон».*
Ӧврам шуис: «Господьӧй Ыджыдӧй! Мый Тэ сетан меным? Менам ныв-пиӧй абу, овмӧсӧн веськӧдлӧ Дамаскысь Элизер».
Ӧврам нӧшта шуис: «Менам став овмӧсӧй вичмас сылы, ӧд Тэ эн сет меным пи».
Господь шуис сылы: «Оз кесйӧгыдлы, а тэсянь чужысьлы вичмас тэнад овмӧсыд».
Господь петкӧдіс Ӧврамӧс ывлаӧ да шуис: «Видзӧдлы енэжас да лыддьы кодзувъяссӧ, верман кӧ.
Та мында жӧ лоас тэсянь чужысьыс».
Ӧврам эскис Господьлы, та вӧсна Господь шуис сійӧс веськыдӧн.
Господь шуис Ӧврамлы: «Ме Господь, коді петкӧдіс тэнӧ Калдея Урысь, медым сетны тайӧ мусӧ тэныд».
Ӧврам шуис: «Господьӧй Ыджыдӧй! Мый серти ме тӧдмала, мый тайӧ муыс менам лоӧ?»
Господь шуис сылы: «Вай Меным куим арӧса куканьӧс, куим арӧса кӧзаӧс, куим арӧса межӧс, гулюӧс да гулюпиӧс».
Ӧврам босьтіс найӧс ставнысӧ, керыштіс шӧрипӧв да пуктіс ӧта-мӧдныслы воча, а лэбачьяссӧ эз керышт.
Шойяс вылӧ уськӧдчис кырныш-варыш чукӧр, но Ӧврам вӧтлаліс найӧс.
Шонді лэччигӧн Ӧврам чорыда унмовсис. Ыджыд полӧм сійӧс топӧдіс, сап пемыд вевттис сійӧс.
Господь шуис Ӧврамлы: «Тӧд, тэсянь чужысьяс овмӧдчасны йӧз муӧ. Нёльсё во чӧж найӧ лоӧны сэні кесйӧг туйынӧсь да нартитӧм улынӧсь. Но найӧс нартитысь войтырӧс Ме мыжда.
Та бӧрти тэсянь чужысьясыд петасны сэтысь [да локтасны татчӧ] ыджыд озырлунӧн. Тэ вуджан аслад батьяс дінӧ лӧнь сьӧлӧмӧн да шудаӧн. Ыджыд арлыдаӧн дзебасны тэнӧ.
Сӧмын нёльӧд чужанвужйын тэсянь чужысьяс бӧр локтасны татчӧ, ӧд аморейяслӧн мыж лыдыс эз на тыр».
Шонді пуксьӧм бӧрын лои сап пемыд. Шӧрипӧв керыштӧм пемӧсъяс костті пачысь моз пуркнитіс тшын да мунісны ыпъялысь би кывъяс.
Тайӧ лунӧ Господь кӧрталіс Ӧврамкӧд йитӧд. Господь шуис: «Египет юсянь ыджыд Ефрат юӧдз Ме сета тэсянь чужысьяслы тайӧ мусӧ, кӧні олӧны кенейяс, кенезейяс, кедмонейяс, хеттейяс, перезейяс, рефаяс, аморейяс, ханаансаяс, [хивейяс,] гергесейяс да евуссаяс».
Ӧврамлӧн Сара гӧтырыс эз вермы сьӧктыны.
Саралӧн вӧлі Агар нима египетса кесйӧг ань.
Сара шуис Ӧврамлы: «Господь оз сет меным челядьӧс.
Босьт менсьым кесйӧг аньӧс, гашкӧ, сійӧ чужтас меным пи».
Ӧврам кывзысис гӧтырыслысь.
Сара сетіс Агарӧс аслас верӧслы гӧтыр пыдди. Тайӧ лои Ӧврамлӧн Ханаан муӧ овмӧдчӧмсянь дас во мысти.
Ӧврам узис Агаркӧд, и Агар кынӧмасис.
Кынӧмасьӧм бӧрас сійӧ кутіс нинӧмӧ пуктыны Сараӧс, ассьыс ыджыдсӧ.
Сара шуис Ӧврамлы: «Тэ мыжа менӧ увтыртӧмысь.
Ме сеті кесйӧг аньӧс тэныд, а сійӧ кынӧмасьӧм бӧрас кутіс нинӧмӧ пуктыны менӧ.
Господь мед лоас ёрдысьӧн тэа-меа костын».
Ӧврам шуис Саралы: «Тэнад кесйӧгыд аслад киын, мый кӧсъян, сійӧс и вӧч».
Сара кутіс дзескӧдны Агарӧс, и сійӧ пышйис.
Господьлӧн андел аддзис Агарӧс овтӧминса ва петанін дорысь, Шурӧ мунан туй вылысь, да юаліс:
«Агар, Саралӧн кесйӧг ань, кытысь тэ локтан да кытчӧ мунан?»
Сійӧ вочавидзис: «Ме пышъя аслам Сара ыджыдысь».
Господьлӧн андел шуис сылы: «Бӧр бергӧдчы аслад ыджыд дінад да кывзысь сылысь.
Ме содтӧмӧн содта тэсянь чужысьясӧс, найӧ лоӧны сы мында, мый некод лыддьынысӧ оз вермы.
Тэ ӧні кынӧма. Тэ чужтан пиӧс да пуктан сылы Измаил ним, ӧд тэнад шоглун дырйи Господь кыліс тэнӧ.*
Йӧз пӧвстын тэнад пиыд лоас вӧлявывса осёл кодь, сійӧ лэптас кисӧ быдӧн вылӧ, и сы вылӧ быдӧн кисӧ лэптас.
Сійӧ овны кутас вокъясыскӧд зыксьӧмӧн».
Агар шуис сыкӧд сёрнитысь Господьлы: «Тэ — Эл-Рои, менӧ аддзысь Ен»,
ӧд мӧвпыштіс, аслам синмӧн пӧ збыльысь аддзылі Сійӧс, коді аддзӧ менӧ.
Та вӧсна ва петаніныс шусьӧ Бер-Лахай-Рои.*
Сійӧ сулалӧ Кадеш да Беред костын.
Агар чужтіс Ӧврамлы пи.
Ӧврам пуктіс аслас пиыслы Измаил ним.
Ӧврамлы вӧлі кӧкъямысдас квайт арӧс, кор Агар чужтіс сылы Измаилӧс.
Ӧврамлы вӧлі ӧкмысдас ӧкмыс арӧс, кор Господь петкӧдчис сылы да шуис: «Ме — Ставсӧвермысь Ен, ов Ме водзын сӧстӧма.
Ме кӧртала тэкӧд йитӧд да сета тэсянь чужны унасьыс-уна войтырлы».
Ӧврам кымынь уськӧдчис муас, а Ен шуис:
«Ӧні Ме кӧртала тэкӧд йитӧд. Тэ лоан уна войтырлы бать. Нимыд тэнад лоас оз Ӧврам, но Ӧвраам, ӧд Ме вӧча тэнӧ войтыръяслы батьӧн.
Тэсянь чужысьыс унасьыс-уна лоӧ, тэсянь петасны войтыръяс да ӧксыяс.
Ме кӧртала тэкӧд да тэсянь чужысьяскӧд нэмъяс кежлӧ йитӧд, Ме лоа тэнад да тэсянь чужысьяслӧн Енмӧн.
Тэныд да тэсянь чужысьяслы Ме сета тайӧ мусӧ, кӧні тэ ӧні локтысь морт моз олан. Ханаан мусӧ ставнас сета тэсянь чужысьяслы нэмъяс кежлӧ да лоа налӧн Енмӧн».
Ен шуис Ӧвраамлы: «Тэныд да тэсянь чужысьяслы Ме тшӧкта видзны тайӧ йитӧдсӧ, мый Ме кӧрталі тіянкӧд. Чужанвуж бӧрся чужанвуж мед видзасны сійӧс.
Менам йитӧдӧй тіянкӧд да тіянсянь чужысьяскӧд мед вӧлі вына, тіянлы колӧ вундыштны став айуловнытӧ. 
Вундыштӧй аймортлысь чильган йывсьыс кучикторсӧ. Тайӧ лоӧ Ме да тіян костын кӧрталӧм йитӧдлӧн пасӧн.
Чужӧмсянь кӧкъямысӧд лунӧ тіян мед лоӧ вундыштӧма быд пиӧс. Вундыштӧй быдӧнӧс, коді чужас тіян ордын, и кодӧс ньӧбанныд мукӧд войтыр пӧвстысь.
Мед лоӧ вундыштӧма тіян ордын чужысьӧс и эзысь вылӧ ньӧбӧмаӧс. Тадзи Менам тіянкӧд пыр кежлӧ кӧрталӧм йитӧдсӧ лоӧ пасйӧма тіян вир-яйӧ.
Кодлысь [кӧкъямысӧд лунӧ] оз ло вундыштӧма чильган йывсьыс кучикторсӧ, сійӧс мед лоӧ ӧтдортӧма аслас войтыр пӧвстысь, ӧд сійӧ торкӧ Менсьым йитӧдӧс, мый Ме кӧрталі тіянкӧд».
Ен шуис Ӧвраамлы: «Сара гӧтыртӧ эн нин Сараӧн шу, а шу Сарраӧн.
Ме бурсиа сійӧс да сета сылы чужтыны тэныд пиӧс.
Бурсиа Сарраӧс, и сысянь чужасны войтыръяс да войтыръяслӧн ӧксыяс».
Ӧвраам кымынь уськӧдчис муас, но ас кежас серӧктіс: «Вермас-ӧ сё арӧсалӧн пи чужны, а ӧкмысдас арӧса Сарра кага вайны?»
Ӧвраам шуис Енлы: «Измаилӧс видз да бурси!»
Ен шуис: «Тэнад Сарра гӧтырыд чужтас тэныд пи, пуктан сылы Исаак* ним.
Ме кӧртала сыкӧд да сысянь чужысьяскӧд нэмъяс кежлӧ йитӧд [и Ме лоа сылӧн да сысянь чужысьяслӧн Енмӧн].
Измаил йылысь тэнсьыд корӧмтӧ Ме кылі.
Ме бурсиа сійӧс да сета сылы зэв уна чужысьӧс.
Сійӧ лоас дас кык ӧксылы да унасьыс-уна войтырлы бать.
Но йитӧдсӧ кӧртала Исааккӧд, кодӧс локтан воӧ тайӧ каднас чужтас тэныд Сарра».
Ен дугдіс сёрнитны Ӧвраамкӧд да вешйис сы дорысь.
Дзик сійӧ лунӧ Ӧвраам вундыштіс Измаил писӧ да аслас керкаын олысь став айуловсӧ, кодъяс сы ордын чужисны, и кодъясӧс ньӧбис эзысь вылӧ. Сійӧ вӧчис ставсӧ Енлӧн тшӧктӧм серти.
Ӧвраамлы вӧлі ӧкмысдас ӧкмыс арӧс, кор сійӧс вӧлі вундыштӧма, а Измаил пиыслы — дас куим арӧс.
Ӧти лунӧ вундыштчисны Ӧвраам да Измаил пиыс, тшӧтш Ӧвраам ордын олысь став айуловыс, кодъяс сы ордын чужисны и кодъясӧс вӧлі ньӧбӧма мукӧд войтыр пӧвстысь.
Господь петкӧдчис Ӧвраамлы Мамре тупу раскын, кор лунся пӧжигӧн сійӧ пукаліс чом пыранінас.
Ӧвраам лэптіс юрсӧ да аддзис неылын сулалысь куим мортӧс.
Сійӧ котӧртіс на дінӧ да муӧдзыс копыртчӧмӧн шуис: «Ыджыдӧй, ме кӧ лои шогмана Тэныд, пырав Аслад кесйӧгыд дінӧ.
Тіянлы ваясны ва да мыськасны кокнытӧ, сэсся верманныд шойччыштны тайӧ пу улас. Ме вая тіянлы нянь. Нуръясянныд да, сэсся верманныд водзӧ мунны асланыд кесйӧг дінысь».
Найӧ шуисны сылы: «Вӧч, кыдзи шуин».
Тэрмасьӧмӧн Ӧвраам пырис Сарра ордӧ да шуис: «Босьт куим куд тыр медбур пызь да ӧдйӧджык пӧжав шомтӧм нянь».
Ӧвраам котӧртіс пемӧс чукӧрыс дінӧ, босьтіс медбур ӧшписӧ да сетіс кесйӧгыслы, мед сійӧ ӧдйӧджык дасьтас сёян.
Сэсся босьтіс вый, йӧв, пражитӧм яй да пуктіс локтысьяс водзӧ. Сёйиганыс Ӧвраам сулаліс на дорын пу улас.
«Кӧні Сарра гӧтырыд?» — юалісны сылысь.
Сійӧ вочавидзис: «Чомйын».
Ӧти на пиысь шуис: «Дзик тайӧ кадас во мысти ме бара вола тэ ордӧ. Сэки Сарра гӧтырыдлӧн лоас пи».
Сарра вӧлі сёрнитысьлӧн мыш саяс, чомйысь петанін дорын, и кыліс тайӧс.
Ӧвраам Сарракӧд вӧліны пӧрысьӧсь нин, ыджыд арлыдаӧсь, и Сарралӧн эз нин вӧв тӧлыссяыс.
Сарра ас пытшкас серӧктӧмӧн шуис: «Меным ӧмӧй пӧрысьӧ-нэмӧ долыдлунсӧ на тӧдлыны? И верӧсӧй нин пӧрысь».
Господь юаліс Ӧвраамлысь: «Мыйла Сарраыд [ас пытшкас] серӧктіс да шуис, збыльысь ӧмӧй верма чужтыны пӧрысьӧ-нэмӧ?
Но эм-ӧ мыйкӧ Господьлы вермытӧмыс?
Индӧм кадӧ во мысти Ме бара вола тэ ордӧ. Сэки Сарраыдлӧн лоас пи».
Сарра повзьӧмысла шуис: «Ме эг серав».
Но Господь шуис: «Тэ серӧктін».
Ӧвраам дінӧ локтысьяс чеччисны да мӧдӧдчисны водзӧ мунны Содомлань [да Гоморалань]. Ӧвраам колльӧдіс найӧс.
Господь шуис: «Дзеба ӧмӧй Ӧвраамысь [Аслам кесйӧгысь], мый кӧсъя вӧчны?
Ӧвраамсянь збыльысь чужас ыджыд да ён войтыр. Сы пыр вуджас бурсиӧмыс быд войтырлы. Ӧвраамӧс Ме бӧрйи висьтавны аслас пиянлы да сысянь чужысьяслы, мед ветласны Господь туйӧд, оласны веськыда да мыждасны збыльыс серти.
Сэки Ме, Господь, вӧча ставсӧ, мый кӧсйыси Ӧвраамлы».
Господь шуис: «Содомсянь да Гоморасянь ыджыд горзӧм кылӧ, сэні олысьясыс вывті уна мыж вӧчисны.
Лэчча да видзӧдла, збыльысь-ӧ найӧ олӧны Меӧдз воӧм шуасьӧм серти».
Кык локтысьыс мунісны Содомӧ, а Господь кольччис сёрнитны Ӧвраамкӧд.
Ӧвраам матыстчис да юаліс Господьлысь: «Веськыда олысьӧс Тэ ӧмӧй мыжаяскӧд ӧтвылысь бырӧдан? [Веськыда олысьӧс ӧмӧй виччысьӧ сійӧ жӧ, мый и мыжаӧс?]
Гашкӧ, сюрас сэні карас ветымын веськыда олысь?
На ради ӧмӧй Тэ он бурсьӧлӧмтчы, а бырӧдан карсӧ?
Оз вермы лоны сідзи, мый Тэ веськыда олысьӧс бырӧдан мыжаяскӧд, и веськыда олыськӧд лоас сійӧ жӧ, мый мыжакӧд.
Тайӧ абу Тэсянь!
Став мусӧ мыждысь оз ӧмӧй мыжды веськыда?»
Господь шуис: «Ме кӧ аддза Содомысь ветымын веськыда олысьӧс, на ради ог бырӧд карсӧ».
Ӧвраам шуис воча: «Ме — бус да пӧим, но лысьті шыасьны Тэ дінӧ, Господьӧй.
Гашкӧ, ветымынӧдз оз тырмы вит морт, и на вӧсна Тэ бырӧдан став карсӧ?»
Господь шуис: «Ог бырӧд, сюрас кӧ сэні нелямын вит веськыда олысь».
Ӧвраам водзӧ сёрнитіс Сыкӧд: «А сюрас кӧ сэні нелямын морт?»
Господь шуис: «Ог бырӧд карсӧ, сюрас кӧ сэні нелямыныс».
Ӧвраам шуис: «Эн дӧзмы, Господьӧй, мый ме бара на кӧсъя юавны. А сюрас кӧ сэні комын морт?»
Господь шуис: «Ог бырӧд, сюрас кӧ сэні комыныс».
Ӧвраам шуис: «Господьӧй, ме нӧшта кӧсъя шыасьны Тэ дінӧ. Гашкӧ, кызь морт сэні сюрас?»
Господь шуис: «Ог бырӧд, сюрас кӧ сэні кызьыс».
Ӧвраам шуис: «Эн дӧзмы, Господьӧй, мый ме нӧшта ӧтчыдысь юала. Гашкӧ, сюрас сэні сӧмын дас морт?»
Господь шуис: «Ог бырӧд, сюрас кӧ дасыс».
Тайӧс шуӧм бӧрын Господь муніс Ӧвраам дінысь.
Ӧвраам бӧр бергӧдчис аслас оланінӧ.
Рытнас тайӧ кык анделыс локтісны Содомӧ. Карса дзиръя дорын пукаліс Лот.
Сійӧ аддзис локтысьясӧс да чеччис найӧс вочаавны. Муӧдзыс копыртчӧмӧн шыасис на дінӧ:
«Пыдди пуктанаяс, ме тіян кесйӧг. Локтӧй ме ордӧ. Мыськанныд кокнытӧ, узянныд, а асывнас мунанныд водзӧ».
Но найӧ шуисны: «Огӧ, ми ывлаын узям».
Лот ёна корис, и найӧ мунісны сыкӧд.
Лот дасьтіс сёян, пӧжаліс шомтӧм нянь да вердіс найӧс.
Локтысьяслӧн узьны водтӧдз Содом карса айулов, том и пӧрысь, кытшалісны Лотлысь керкасӧ. Найӧ горзісны Лотлы: 
«Кӧнӧсь найӧ, кодъяс локтісны тэ ордӧ войколӧн? Вайӧд найӧс миян дінӧ, ми кӧсъям узьны накӧд».
Лот петіс на дінӧ, ас бӧрсяыс тупкис ӧдзӧссӧ да шыасис: «Вокъяс, энӧ вӧчӧй налы лёксӧ.
Менам эм кык ныв, найӧ абу на верӧс сайынӧсь.
Петкӧда найӧс тіянлы. Мый кӧсъянныд, сійӧс и вӧчӧй накӧд. Но энӧ лысьтӧй вӧрӧдны менам керка вевт улӧ локтысьясӧс!»
Найӧ шуисны: «Вешйы!
Тэ, локтӧм морт, кӧсъян ыджыдавны тані!
Ӧні ми тэныд аслыд лёкджыка на вӧчам!»
Найӧ уськӧдчисны Лот вылӧ да кӧсйисны жугӧдны ӧдзӧссӧ.
Но анделъяс кыскыштісны Лотӧс керкаас, а ӧдзӧссӧ йигналісны.
Ывлаын сулалысь пӧрысь да том йӧзлысь найӧ пемдӧдісны синнысӧ. Некод эз аддзы керкаӧ пыранінсӧ, кӧть мудзтӧдзыс корсис.
Кык локтысьыс шуисны Лотлы: «Эм кӧ тэнад зять, ныв-пи да нӧшта кодкӧ тані карас, петкӧд найӧс татысь, ӧд ми бырӧдам тайӧ карсӧ. Ыджыд горзӧм кыптӧ Господьӧдз татчӧс олысьяс вылӧ, сійӧн Господь ыстіс миянӧс бырӧдны карсӧ».
Лот петіс да шуис аслас зятьпуяслы: «Петӧй тайӧ карсьыс, ӧд Господь бырӧдас сійӧс».
Но найӧ эз эскыны сылы.
Водз асывнас анделъяс кутісны тэрмӧдлыны Лотӧс: «Чеччы, босьт гӧтыртӧ, кыкнан нывтӧ да пет карсьыс, мед онӧ кулӧй мукӧдлӧн мыжъяс вӧсна».
Но Лот ньӧжмасис. Сэки анделъяс Господьлӧн буралӧмыс вӧсна босьтісны киӧдныс Лотӧс, гӧтырсӧ, кыкнан нывсӧ да петкӧдісны найӧс кар сайӧ.
«Пышйы керӧсӧ — видз ассьыд олӧмтӧ. Мунігад ковтысӧ эн сувт, бӧрвылад эн видзӧд, мед он кув», — шуис ӧти анделыс Лотлы.
Но Лот шуис: «Ыджыдӧй, тэ зэв шань да бур сьӧлӧма ме дінӧ, аслад кесйӧгыд дінӧ. Тэ мездін менсьым олӧмӧс.
Но ме пола, мый кулӧмыс суӧдас менӧ керӧсӧ вотӧдз на.
Со, матынджык эм ичӧтик кар, кытчӧ ме верма котӧртны. Лэдз меным сэтчӧ пышйыны, сэки ме ловйӧн коля [тэ вӧсна]».
Андел шуис сылы: «Пышйы сэтчӧ, тэ вӧсна ме видза сійӧ карсӧ.
Ӧдйӧджык котӧрт сэтчӧ, ӧд ме нинӧм ог вермы вӧчны, кытчӧдз тэ он во сэтчӧ».
Тайӧ карыслӧн нимыс Цоар*, ӧд Лот тадзи шуис.
Шондіыс вӧлі вылын нин, кор Лот воис Цоарӧ.
Сэки Господь кисьтіс енэжсянь Содом да Гомора вылӧ тэгъя-биа* зэр, Сійӧ бырӧдіс кыкнан карсӧ да дзоньнас ковтыссӧ, став карса олысьсӧ да быдмӧг-пусӧ.
Лотлӧн гӧтырыс видзӧдліс бӧрвылас да пӧри сов сюръяӧ.
Ӧвраам чеччис водз асывнас да муніс сэтчӧ, кӧні сійӧ сулавліс Господь водзын. Видзӧдліс Содом да Гомора каръяслань, став ковтыс вылӧ да аддзис, мый ломтысьысь пачысь моз муысь кыптӧ тшын.
Ковтысысь каръяссӧ бырӧдігӧн Ен эз вунӧд Ӧвраамӧс, и отсаліс Лотлы петны бырӧдан карысь, кӧні сійӧ оліс.
Цоарысь Лот муніс кыкнан нылыскӧд керӧсӧ. Сійӧ поліс овны тайӧ карас, та вӧсна овмӧдчис нывъясыскӧд кырта горсйӧ.*
Ыджыдджык чойыс шуис ичӧтджыкыслы: «Батьным миян пӧрысьмис. Тані абу мортыс, коді эськӧ босьтіс миянӧс гӧтырӧ, кыдзи вӧчӧны став му пасьтала.
Юктӧдам винаӧн батьнымӧс да узям сыкӧд, тадзи асланым батьсянь чужтам кага».
Найӧ юкталісны винаӧн батьнысӧ,
и сійӧ войнас ыджыдджык нылыс узис батьыскӧд.
Батьыс эз и тӧдлы, кор нылыс водіс да кор чеччис.
Мӧд луннас ыджыдджык чойыс шуис ичӧтджыкыслы: «Тӧрыт ме узи батькӧд.
Тавой сійӧс бара юктӧдам винаӧн, и тэ узян сыкӧд, тадзи батьнымсянь чужтам кага».
Найӧ бара юкталісны винаӧн батьнысӧ, и сійӧ войнас ичӧтджык нылыс узис батьыскӧд.
Батьыс эз и тӧдлы, кор нылыс водіс да кор чеччис.
Тадзи Лотлӧн кыкнан нылыс кынӧмасисны асланыс батьсянь.
Ыджыдджыкыс чужтіс пиӧс да пуктіс Моав ним [шуис, менам батьсянь пӧ сійӧ]. Сысянь чужис моав войтыр.
Ичӧтджыкыс сідзжӧ чужтіс пиӧс да пуктіс Бен-Амми ним [шуис, сійӧ пӧ менам рӧдлӧн пи]. Сысянь чужис ӧнія аммон войтыр.
Ӧвраам мӧдӧдчис лунвывлань, овмӧдчис Кадеш да Шур костӧ, а сэсся мыйтакӧ оліс Герар карын.
Ӧвраам ассьыс Сарра гӧтырсӧ шуис чойӧн.
[Ӧд сійӧ поліс шуны гӧтырнас, мед сэтчӧс карса олысьяс эз вины сы вӧсна Ӧвраамӧс.]
Авимелек, Герар карса ӧксы, тшӧктіс аслас йӧзлы вайӧдны Сарраӧс ас ордас.
Войнас Ен петкӧдчис Авимелеклы да шыасис сы дінӧ вӧтас: «Тэ кулан ань вӧсна, кодӧс босьтін аслыд, ӧд сылӧн эм верӧс».
Но Авимелек эз на инмӧдчыв Сарра дінӧ, та вӧсна шуис: «Господьӧй, бырӧдан ӧмӧй мыжтӧм войтырӧс?
Ӧд тайӧ мортыс аньсӧ шуис чойӧн, а аньыс сійӧс — вокӧн.
Менам сьӧлӧмӧй да киӧй сӧстӧм».
Ен шуис сылы вӧтас: «Ме тӧда, тэнад сьӧлӧмыд сӧстӧм. Та вӧсна Ме видзи тэнӧ мыж вӧчӧмысь, эг лэдз инмӧдчывны ань дінӧ.
Ӧні гӧтырсӧ бӧр сет верӧсыслы, ӧд сійӧ пророк. Сійӧ кевмысяс тэ вӧсна, и тэ ловйӧн колян.
А он кӧ сет, тэ гортсаыдкӧд кулан».
Авимелек чеччис водз, корис кесйӧгъяссӧ да висьталіс налы ставсӧ.
Найӧ ёна повзисны.
Авимелек корис Ӧвраамӧс да шуис: «Мый тэ вӧчин миянкӧд?
Мыйӧн ме мыжа тэ водзын, мый татшӧм сьӧкыд мыжӧ тэ кыскин менӧ да менсьым войтырӧс?
Тадзи ӧмӧй позьӧ вӧчны?»
Авимелек нӧшта юаліс: «Тадзисӧ вӧчигӧн тэ эськӧ мый кӧсйин?»
Ӧвраам шуис: «Ме чайті, мый татчӧс йӧзыс оз повны Енсьыс да гӧтыр вӧсна вермасны вины менӧ.
Збыльвылас кӧ, сійӧ менам чой и эм, батьӧйлӧн ныв, сӧмын мӧд мамсянь.
Ӧні сійӧ менам гӧтыр.
Кор Ен тшӧктіс меным петны бать керкаысь да ветлыны муясӧд, ме кори гӧтырӧс вӧчны меным буртор — шуны менӧ аслас вокӧн быдлаын, кытчӧ ми воам».
Авимелек козьналіс Ӧвраамлы [сюрс сикель эзысь,] ыжъясӧс, мӧсъясӧс, кесйӧг айуловӧс да аньясӧс.
Бӧр сетіс сылы Сарраӧс да шуис: «Менам муӧй тэ водзын.
Овмӧдчы, кытчӧ кӧсъян».
А Сарралы шуис: «Вокыдлы ме сеті сюрс сикель эзысь.
Тайӧ козиныс став тэнад матыссалы висьталӧ, мый тэ абу мыжа».
Ӧвраам кевмысис Енлы, и Ен бурдӧдіс Авимелекӧс, сылысь гӧтырсӧ да кесйӧг аньяссӧ. Найӧ бара вермисны чужтыны.
Ӧд Ӧвраамлӧн Сарра гӧтыр вӧсна Господь вӧчліс сідз, мый Авимелек керкаын аньясыс эз вермыны кынӧмасьнысӧ.
Господь эз вунӧд Сарраӧс.
Ассьыс кӧсйысьӧмсӧ Сійӧ збыльмӧдіс.
Сарра кынӧмасис да индӧм кадӧ пӧрысьмӧм Ӧвраамлы чужтіс пиӧс.
Ӧвраам пуктіс пиыслы Исаак ним.
Кӧкъямысӧд луннас Ӧвраам вундыштіс Исааклысь чильган йывсьыс кучикторсӧ, кыдзи тшӧктыліс сылы Ен.
Ӧвраамлы вӧлі сё арӧс, кор сылӧн чужис Исаак.
Сарра шуис: «Нимкодьтор вӧчис меным Ен.
Коді кылас ме йылысь, тшӧтш кутас нимкодясьны мекӧд».
Сэсся содтіс: «Коді эськӧ вермис шуны Ӧвраамлы, мый Сарра кутас нёньӧдны кага?
Но пӧрысьӧ-нэмӧ ме чужті сылы пиӧс».
Кага быдмис, сійӧс дугӧдісны морӧсысь.
Тайӧ лунӧ Ӧвраам лӧсьӧдіс ыджыд гаж.
Сарра аддзис, мый египетса Агарлӧн пиыс, кодӧс сійӧ чужтіс Ӧвраамлы, сералӧ [сылӧн Исаак пиыс вылын]. Сарра шуис Ӧвраамлы: «Вӧтлы тайӧ кесйӧг аньсӧ пиыскӧд. Тэнад овмӧсыд мед оз вудж сылӧн пилы, а вуджас сӧмын менам Исаак пилы».
Измаил пиыс вӧсна Ӧвраам шогӧ усис.
Но Ен шуис сылы: «Зонка вӧснаыд да кесйӧг ань вӧснаыд эн шогсьы.
Вӧч сідзи, кыдзи тшӧктас тэныд Сарра, ӧд Исааксянь чужысьясӧс шуасны тэнад ныв-пиӧн.
Кесйӧг писяньыд Ме тшӧтш сета чужны [уна лыда] войтырлы, ӧд сійӧ тэсянь чужысь».
Ӧвраам чеччис водз асывнас, босьтіс нянь да кучик дозйын ва, ӧшӧдіс нопсӧ Агарлы пельпом вылас да ыстіс сійӧс пиыскӧд.
Агар муніс да вошис Бер-Шева овтӧминын.
Кор кучик дозсьыс бырис ваыс, сійӧ пу улӧ колис ассьыс писӧ.
Ачыс вешйис бокӧ, ньӧввуж лыян ылнаӧ, ӧд эз кӧсйы аддзыны пиыслысь кулӧмсӧ.
Агар пуксис да пондіс ырзӧмӧн бӧрдны.
Енмыс кыліс зонкалысь ымзӧмсӧ.
Енлӧн андел шыасис Агар дінӧ енэжсянь: «Агар, мый тэкӧд? Эн пов, Енмыс кыліс зонкалысь бӧрдӧмсӧ сэтысянь, кытчӧ тэ сійӧс колин.
Чеччы, босьт зонкатӧ киӧдыс да отсав сылы. Ме сета сысянь чужны уна лыда войтырлы».
Ен восьтіс Агарлысь синсӧ, и сійӧ аддзис ва юкмӧс. Матыстчис сэтчӧ, гумовтіс кучик дозйӧ ва да юкталіс зонкасӧ.
Енмыс пыр вӧлі зонкакӧд. Сійӧ быдмис да оліс овтӧминын, лои ньӧввужйысь лыйсьысьӧн.
Кор Измаил оліс Паран овтӧминын, мамыс вайӧдіс сылы гӧтырсӧ Египет муысь.
Сійӧ кадас Авимелек [Ахузаткӧд, коді колльӧдіс Авимелеклысь гӧтырпусӧ кӧлысь дырйи,] да тышкайӧзӧн веськӧдлысь Пикол шуисны Ӧвраамлы: «Тэкӧд Ен, Сійӧ быдторйын отсалӧ тэныд.
Ӧні Ен водзын меным кыв сет, мый он ӧтдорт менӧ, менсьым челядьӧс да месянь чужысьясӧс.
Кыдзи ме бурногӧн олі тэкӧд, сідзи и тэ бурногӧн ов мекӧд тэнӧ сибӧдысь муын».
«Кыв сета», — шуис Ӧвраам, а сэсся кутіс норасьны Авимелеклы, мый Авимелеклӧн кесйӧгъясыс мырддисны юкмӧссӧ.
Авимелек шуис: «Ме ог тӧд, коді тайӧс вӧчис. Тэ меным эн висьтавлы, ме ӧнӧдз та йылысь эг кывлы».
Ӧвраам козьналіс ыжъясӧс да мӧсъясӧс Авимелеклы, и найӧ кӧрталісны йитӧд.
Сэсся Ӧвраам торйӧдіс чукӧрсьыс сизим ыжӧс.
Авимелек юаліс: «Мыйла тэ торйӧдін тайӧ сизим ыжсӧ?»
Ӧвраам шуис: «Босьт тайӧ сизим ыжсӧ. Тайӧ лоӧ пасӧн, мый юкмӧсыс менам, ӧд ме кодйи сійӧс».
Та вӧсна нимтіс местасӧ Бер-Шеваӧн*, ӧд тані кыв сетісны ӧта-мӧдныслы.
Бер-Шеваын йитӧд кӧрталӧм бӧрын Авимелек [Ахузаткӧд, коді колльӧдіс Авимелеклысь гӧтырпусӧ кӧлысь дырйи,] да тышкайӧзӧн веськӧдлысь Пикол бӧр мунісны Филистим муӧ.
Бер-Шеваын Ӧвраам пуктіс тамариск пу да шыасис Господь нимӧ, пыр олысь Ен дінӧ.
Ӧвраам оліс Филистим муын уна во чӧж на.
Тайӧ лоӧмторъясыс бӧрын Ӧвраамӧс тӧдмалӧм могысь Ен шыасис: «Ӧвраам!»
Ӧвраам вочавидзис: «Ме тані».
Ен шуис: «Босьт Исаактӧ, радейтана ӧтка питӧ, да мун Мориа муӧ. Сэні керӧс вылын, кутшӧмӧс инда тэныд, вай сійӧс Меным сотан вись пыдди».
Ӧвраам чеччис водз, босьтіс осёлсӧ, кык кесйӧгӧс да Исаак писӧ.
Сэсся поткӧдліс пес, медым вайны сотан вись, да мӧдӧдчис сэтчӧ, кытчӧ тшӧктіс сылы Ен.
Коймӧд луннас Ӧвраам ылісянь на аддзис сійӧ местасӧ.
Кесйӧгъясыслы Ӧвраам шуис: «Кольччӧй татчӧ, видзӧдӧй осёл бӧрся, а ми пикӧд ветлам да копыртчылам Енлы, сэсся бӧр локтам».
Ӧвраам босьтіс пессӧ да пуктіс Исааклы пельпом вылас.
Ачыс босьтіс бива, пурт да мӧдӧдчис Исааккӧд.
Исаак шыасис Ӧвраам дінӧ: «Батьӧй!»
«Мый нӧ, пиӧй?» — юаліс Ӧвраам.
Мӧдыс воча юаліс: «Миян эм бива, пес, а кытысь ми босьтам сотан вись пыдди баляӧс?»
Ӧвраам шуис: «Пиӧй, Енмыс аддзас Аслыс сотан вись пыдди балясӧ».
Найӧ кыкнанныс мунісны водзӧ.
Воисны местаӧдз, кытчӧ тшӧктіс мунны Ен.
Ӧвраам сувтӧдіс висьпуктанін, пукталіс сэтчӧ пессӧ. Сэсся кӧрталіс Исаак писӧ да пуктіс пес вылӧ вись пыдди.
Ӧвраам босьтіс пурт да лэптіс кисӧ, медым сатшкыны писӧ.
Но Господьлӧн андел шыасис енэжсянь: «Ӧвраам, Ӧвраам!»
«Ме тані», — вочавидзис Ӧвраам.
Андел шуис: «Эн лэпты китӧ пиыд вылӧ, эн вӧрӧд сійӧс. Ӧні ме тӧда, мый тэ полан Енмысь. Тэ вӧлін дась весиг ассьыд ӧтка питӧ сетны Енлы».
Ӧвраам бергӧдчис да аддзис межӧс. Сійӧ вӧлі сюрнас сибдӧма увъясӧ.
Ӧвраам матыстчис да босьтіс межсӧ, вайис сійӧс сотан вись пыдди. Эз пиыс, а тайӧ межыс лои сотан висьнас.
Тайӧ местасӧ Ӧвраам нимтіс Яхве-ире, мый лоӧ “Господь аддзӧ”.
Ӧнӧдз на шуӧны, мый Господьлӧн керӧс вылын ставыс тыдовтчас.
Господьлӧн андел мӧдысь шыасис Ӧвраам дінӧ енэжсянь:
«Тэ вӧлін дась сетны Меным ассьыд ӧтка питӧ. Та вӧсна Ме Ачым тэныд кыв сета, — висьталӧ Господь, — мый озыра бурсиа тэнӧ да сета тэныд уна чужысьӧс.
Найӧ лоасны сы мында, мыйта енэжас кодзулыс да саридз дорын лыаыс.
Найӧ босьтасны вӧрӧглысь каръяссӧ.
Сыысь, мый тэ кывзысин Менсьым, тэсянь чужысьяс пыр вуджас бурсиӧмыс быд войтырлы».
Ӧвраам бӧр локтіс кесйӧгъяс дінас, и найӧ мӧдӧдчисны Бер-Шеваӧ, кӧні олісны.
Тайӧ лоӧмторйыс бӧрын Ӧвраамлы юӧртісны, мый Милка, Нахор вокыслӧн гӧтырыс, чужтӧма пиянӧс: Уцӧс, медводдза писӧ, Бузӧс, Кемуэлӧс, Арамлысь батьсӧ, Кеседӧс, Хазоӧс, Пилдашӧс, Идлафӧс да Бетуэлӧс.
Бетуэллӧн чужис Ревекка.
Тайӧ кӧкъямыснан писӧ Ӧвраамлӧн Нахор воклы чужтіс Милка.
Нахорлӧн Реума нима кесйӧг-гӧтырыс чужтіс Тевахӧс, Гахамӧс, Тахашӧс да Маакӧс.
Сарра оліс сё кызь сизим арӧсӧдз.
Сійӧ куліс Ханаан муын, [ковтысса] Киръят-Арбаын, тайӧ ӧнія Хеврон кар.
Ӧвраам бӧрдіс-шогсис Сарра вӧсна.
Сэсся шой дінысь чеччӧм бӧрын муніс хеттейяс дорӧ. «Ме локтысь морт, абу тіян войтырысь, — шыасис на дінӧ Ӧвраам.
— Вузалӧй меным му, медым дзебны гӧтырлысь шойсӧ».
Хеттейяс шуисны Ӧвраамлы:
«Кывзы миянӧс, ыджыдӧй.
Енмыс пуктӧма тэнӧ ӧксыӧ миян пӧвстӧ.
Босьт миянлысь медбур дзебанінсӧ.
Быдӧн лэдзас тэныд дзебны гӧтыртӧ аслас дзебанінӧ».
Ӧвраам чеччис да копыртчыліс сэтчӧс муын олысь хеттейяслы.
Сійӧ шуис: «Лэдзанныд кӧ меным дзебны гӧтырӧс, кывзӧй менӧ.
Корӧй Цохарлӧн Ефрон пилысь, мед вузалас меным аслас му помысь Макпела кырта горссӧ. Мыйта корас, сы мында и мынта сылы тіян дырйи. Сэки тайӧ кырта горсйыс лоӧ менам рӧдлы дзебанінӧн».
Ефрон пукаліс карса дзиръя дорын чукӧртчӧм хеттейяс пӧвстын. Став йӧзыс водзын сійӧ вочавидзис Ӧвраамлы:
«Кывзы, ыджыдӧй, ме сета тэныд тайӧ мусӧ кырта горснас. Аслам войтыр дырйи шуа, мый козьнала сійӧс тэныд. Дзеб ассьыд гӧтыртӧ сэтчӧ».
Ӧвраам копыртчыліс хеттейяслы да шуис Ефронлы став йӧз дырйиыс: «Кывзы менӧ, босьт тайӧ эзысьсӧ. Ме мынтыся мусьыд, медым дзебны сэтчӧ гӧтырӧс».
Ефрон вочавидзис Ӧвраамлы:
«Ыджыдӧй, кывзы менӧ.
Муыслӧн доныс нёльсё сикель эзысь — тэа-меалы мый тайӧ?
Дзеб гӧтыртӧ».
Тайӧс кылӧм бӧрын Ӧвраам торйӧдіс нёльсё сикель сьӧкта эзысь — татшӧм дон вӧлі лӧсьӧдӧма вузасьысьяс костын.
Тадзи Макпелаысь Мамре дорысь Ефронлӧн муыс кырта горснас да пуяснас вуджис Ӧвраамлы. Тайӧс аддзылісны хеттейяс, кодъяс вӧліны карса дзиръя дорын.
Ӧвраам дзебис ассьыс Сарра гӧтырсӧ кырта горсйӧ, мый вӧлі Макпела му вылын. Дзебаніныс вӧлі Ханаан муын Мамре дорын, ӧнія Хеврон дорын.
Тадзи тайӧ муыс да кырта горсйыс хеттейяссянь вуджисны Ӧвраамлы, и сэтчӧ кутісны дзебны кулӧмаясӧс.
Ӧвраам пӧрысьмис, вӧлі ыджыд арлыда нин.
Господь быд ногыс бурсиис сійӧс.
Овмӧснас веськӧдлысь кесйӧгыслы Ӧвраам шуис: «Менам лядьвейӧ китӧ пуктӧмӧн кыв сет Господь водзын, енэжыслӧн да муыслӧн Ен водзын, мый Исаак пиӧйлы гӧтырсӧ тэ он вай ханаан войтырысь, кодъяс пӧвстын ме ола, но мунан менам чужанінӧ рӧдвужӧй дінӧ да сэтысь ваян пиӧйлы гӧтырсӧ».
Кесйӧг шуис сылы: «Аньыс кӧ оз кӧсйы локны мекӧд ылі муӧ, нуны-ӧ сэки питӧ сійӧ муас, кытысь тэ петін?»
Ӧвраам шуис сылы: «Эн ну сэтчӧ пиӧс!
Господь, енэжыслӧн [да муыслӧн] Ен, коді петкӧдіс менӧ бать керкаысь да чужан муысь, коді сёрнитіс мекӧд да кыв сетіс, мый тайӧ мусӧ сетас [меным да] месянь чужысьяслы, мӧдӧдас Ассьыс анделсӧ тэ водзын, и тэ сэтысь ваян Исаак пиӧйлы гӧтырсӧ.
Но аньыс кӧ оз кӧсйы локны тэкӧд, сэки тэ мынан тайӧ кыв сетӧмсьыс.
Сӧмын пиӧс сэтчӧ эн нуӧд».
Кесйӧг пуктыліс кисӧ Ӧвраам ыджыдыслӧн лядьвеяс да кыв сетіс сылы.
Кесйӧг босьтіс Ӧвраам ыджыдыслӧн верблюд чукӧрысь дас верблюдӧс да сылӧн озырлунысь быдсикас донаторсӧ, сэсся мӧдӧдчис Месопотамияӧ, Нахорлӧн карӧ.
Рытгорувнас сувтӧдіс верблюдъяссӧ кар ортсыас, ва юкмӧс дорӧ, буретш сійӧ кадас, кор аньяс волывлісны ва гумлавны. «Господьӧй, менам Ӧвраам ыджыдлӧн Енмӧй! — кевмысис кесйӧг. — Ло бур сьӧлӧма менам Ӧвраам ыджыдӧй дінӧ да лӧсьӧд талун тадзи.
Со татчӧ, юкмӧс дорӧ, кӧні ме сулала, локтӧны карса нывъяс ва гумлавны.
Ме кора ӧти нывлысь, мед доровтас гырнич дозсӧ да сетас васӧ юыштны. Шуас кӧ сійӧ: “Ю, ме верблюдъястӧ [пӧттӧдзныс] юктала”, сідзкӧ, тайӧ дзик сійӧ нылыс, кодӧс Тэ индін Аслад Исаак кесйӧглы.
Та серти ме тӧдмала, мый Тэ бур сьӧлӧма Ӧвраам ыджыдӧй дінӧ».
Кесйӧглӧн кевмысигкості локтіс Ревекка, Бетуэллӧн нылыс. Бетуэл вӧлі Нахорлӧн да Милкалӧн пи, а Нахор вӧлі Ӧвраамлӧн вок.
Ревеккалӧн пельпом вылас вӧлі гырнич доз.
Ревекка вӧлі зэв мича, сійӧ вӧлі ныв на.
Сійӧ лэччис юкмӧс дорӧ, тыртіс гырнич дозсӧ ваӧн да мӧдӧдчис кайны.
Кесйӧг котӧрӧн петіс сылы воча да шуис: «Нылӧй, вай меным юыштны гырнич дозсьыд ватӧ».
Ныв вочавидзис: «Ю, ыджыдӧй».
Сэсся лэдзис пельпом вывсьыс гырнич дозсӧ киас да юкталіс кесйӧгӧс.
Та бӧрын шуис: «Ме гумлала на верблюдъясыдлы васӧ да пӧттӧдзныс юктала найӧс».
Ныв пырысьтӧм-пыр кисьтіс гырнич дозйысь васӧ ворйӧ да котӧртіс бара на юкмӧс дорӧ. Тадзи сійӧ гумлаліс васӧ став верблюдыслы.
Кесйӧг чӧв оліс да шензьӧмӧн видзӧдіс ныв вылӧ. Кӧсйис гӧгӧрвоны, бурсиис-ӧ Господь сылысь локтӧмсӧ.
Кор верблюдъяс дугдісны юнысӧ, кесйӧг босьтіс зарни ныркытш, кык зарни сойкытш да сетіс нывлы. Ныркытш вӧлі сикель джын сьӧкта, а сойкытшъяс — дас сикель сьӧкта.
Кесйӧг юаліс: «Кодлӧн тэ лоан? Верма-ӧ ме аслам йӧзкӧд батьыд ордӧ пырны, медым узьмӧдчыны?»
Ныв вочавидзис: «Ме — Бетуэллӧн нылыс, а Бетуэл — Милкалӧн да Нахорлӧн пи».
Нӧшта шуис: «Миян эм пемӧсъяслы уна идзас да сёян, эм узянін и тіянлы».
Кесйӧг муӧдзыс копыртчӧмӧн юрбитіс Господьлы: «Ошкӧм Господьлы, менам Ӧвраам ыджыдлӧн Енлы! Сійӧ вӧлі бур сьӧлӧма, вӧчис менам ыджыдлы Аслас шуӧм серти и вайӧдіс менӧ ыджыдӧйлӧн вок керкаӧ».
Ныв котӧртіс гортас мамыс дінӧ да висьталіс ставныслы лоӧмтор йылысь.
Кор Ревеккалӧн Лаван вокыс аддзис чойыслӧн киысь ныркытш да сойкытшъяс и кыліс, мый шуӧма Ревеккалы локтӧм морт, Лаван котӧрӧн петіс юкмӧс дорӧ. Сэні верблюдъяс дінас сулаліс Ӧвраамлӧн кесйӧгыс.
Лаван шуис: «Лок, мунам миянӧ, Господьлӧн бурсиӧмаыс.
Тэныд эм местаыс керкаын, и верблюдъясыдлы эм шойччаніныс».
Кесйӧг пырис керкаӧ.
Лаван лэдзаліс верблюдъясӧс, вердіс найӧс да вольсаліс налы идзас. Локтысьяслы вайис ва мыськыны кокнысӧ.
Кор налы вайисны сёян, Ӧвраамлӧн кесйӧг шуис, сёйтӧдз пӧ кӧсъя висьтавны, кутшӧм могӧн локті.
Сійӧс корисны висьтавны.
Сійӧ шуис: «Ме Ӧвраамлӧн кесйӧг.
Господь ёна бурсиис менсьым ыджыдӧс да сетіс сылы уна озырлун: ыжъясӧс да мӧсъясӧс, эзысь да зарни, кесйӧг айуловӧс да аньясӧс, верблюдъясӧс да осёлъясӧс.
Сарра, менам ыджыдлӧн гӧтырыс, пӧрысь арлыдаӧн нин чужтіс сылы пиӧс. Пиыслы менам ыджыдӧй сетіс став ассьыс озырлунсӧ.
Ыджыдӧй тшӧктіс меным кыв сетны, мый сылӧн пиыслы гӧтырсӧ ме ог вай матігӧгӧр олысь ханаансаяс пӧвстысь, а муна сылӧн бать керкаӧ рӧдвуж дінас да сэтысь вая пиыслы гӧтырсӧ.
Ме шуи аслам ыджыдлы: “А оз кӧ аньыс мун мекӧд?”
Та вылӧ сійӧ шуис меным: “Господь [Ен], кодлӧн кӧсйӧм серти ме ола, мӧдӧдас Ассьыс анделсӧ да бурсиас тэнсьыд туйтӧ, и тэ ваян пиӧйлы гӧтырсӧ менам рӧдвуж пӧвстысь, бать керкаысь.
Но менам рӧдвужӧй кӧ оз сетны нывсӧ, кор тэ ветлан на дінӧ, сэки тэ мынан кыв сетӧмсьыд”.
Талун юкмӧс дорӧ воигӧн ме шуи: “Господьӧй, менам Ӧвраам ыджыдлӧн Енмӧй!
Тэ кӧ бурсиан менсьым туйӧс, мед лоас тадзи. Ӧні ме сулала юкмӧс дорын [кытчӧ карса нывъяс локтӧны ва гумлавны]. Кор татчӧ локтас ныв, медым гумлавны ва, ме кора сылӧн гырнич дозйысь васӧ юыштны. Шуас кӧ сійӧ: ’Ю, ме верблюдъясыдлы на гумлала’, сідзкӧ, тайӧ дзик сійӧ аньыс, кодӧс Господь индіс менам ыджыдлӧн Исаак пиыслы. 
[Та серти ме тӧдмала, мый Тэ бур сьӧлӧма Ӧвраам ыджыдӧй дінӧ.]”
Тадзи менам кевмысигкості локтіс Ревекка, пельпом вылас сылӧн вӧлі гырнич доз. Сійӧ лэччис юкмӧс дорӧ да гумовтіс ва.
Ме кори юыштны васӧ.
Сійӧ пырысьтӧм-пыр лэдзис гырнич дозсӧ да шуис: “Ю, ме верблюдъястӧ на юктала”. 
Ме юи. Сэсся сійӧ менсьым верблюдъясӧс на юкталіс.
Ме юалі: “Кодлӧн тэ лоан?” 
Сійӧ шуис: “Ме — Бетуэллӧн нылыс, а Бетуэл — Нахорлӧн да Милкалӧн пи”. 
Та бӧрын ме сеті Ревеккалы ныркытш да сойкытш.
Ме муӧдзыс копыртчӧмӧн юрбиті Господьлы. Ме ошки Господьӧс, менам Ӧвраам ыджыдлысь Енсӧ, коді веськыд туйӧд вайӧдіс менӧ, медым ыджыдӧйлӧн вокыслысь нывсӧ босьтны пиыслы гӧтырӧ.
Ӧні тіян сайын, лоанныд-ӧ бур сьӧлӧмаӧн менам ыджыдӧй дінӧ да вӧчанныд-ӧ сылӧн корӧм серти.
Висьталӧй меным, сэки ме кута тӧдны, мый меным вӧчны».
Лаван да Бетуэл вочавидзисны: «Тайӧ Господьсянь.
Мый ми тані вермам шуны?
Со Ревекка тэ водзын, босьт сійӧс аскӧдыд.
Мед лоас тэнад ыджыдлӧн пилы гӧтырӧн, кыдзи шуис Господь».
Тайӧс кылӧм бӧрын Ӧвраамлӧн кесйӧг копыртчыліс Господьлы муӧдзыс.
Кесйӧг перйис паськӧм, эзысь да зарни мичмӧдчанторъяс да сетіс Ревеккалы.
Сетіс дона козинъяс тшӧтш Ревеккалӧн вокыслы да мамыслы.
Сэсся локтӧм йӧз сёйисны-юисны да водісны шойччыны.
Асывнас Ӧвраамлӧн кесйӧг шуис: «Лэдзӧй менӧ мунны аслам ыджыдӧй дінӧ».
Ревеккалӧн вокыс да мамыс шуисны: «Мед олыштас на миянкӧд нывным лун дас, а сэсся мунанныд».
Но кесйӧг шуис: «Энӧ кутӧй менӧ.
Господь бурсиис менсьым туйӧс, лэдзӧй менӧ аслам ыджыдӧй дінӧ».
Найӧ шуисны: «Корам нывнымӧс да юалам, мый сійӧ шуас».
Чукӧстісны Ревеккаӧс да юалісны сылысь: «Мунан-ӧ тайӧ мортыскӧд?»
Сійӧ вочавидзис: «Муна».
Ревеккаӧс да сылысь вердысь-видзысьсӧ, тшӧтш Ӧвраамлысь кесйӧгсӧ да сыкӧд локтысьясӧс колльӧдісны туйӧ.
Ревеккаӧс бурсиисны татшӧм кывъясӧн: 
«Чойӧ, мед чужасны тэсянь сюрсъяс! Тэсянь чужысьяс мед босьтасны найӧс мустӧмтысьяслысь каръяссӧ!»
Ревекка да сылӧн кесйӧг аньясыс пуксисны верблюдъяс вылӧ да мӧдӧдчисны Ӧвраамлӧн кесйӧг бӧрся.
Исаак локтіс Бер-Лахай-Роисянь, сэки сійӧ оліс Негев муын.
Рытнас Исаак петіс видз-му вылӧ мӧвпалыштны. Кор видзӧдліс гӧгӧр, аддзис локтысь верблюдъясӧс.
Ревекка аддзис Исаакӧс, лэччис верблюд вылысь да юаліс кесйӧглысь: «Коді тайӧ миянлы воча локтысьыс?»
Кесйӧг вочавидзис: «Тайӧ менам ыджыдӧй».
Сэки Ревекка вевттис чужӧмсӧ.
Кесйӧг висьталіс Исааклы став лоӧмтор йылысь.
Исаак пыртіс Ревеккаӧс аслас Сарра мамыслӧн чомйӧ. Ревекка лои сылы гӧтырӧн. Исаак радейтіс Ревеккаӧс, тадзи сійӧ вунӧдіс мам вӧсна шогсӧ.
Ӧвраам выль пӧв гӧтрасис.
Сылӧн Кетура нима гӧтырыс чужтіс сылы Зимранӧс, Иокшанӧс, Меданӧс, Мадианӧс, Ишбакӧс да Шуахӧс.
Иокшанлӧн чужисны Шевей [да Теман] да Дедан пиян. 
[Деданлӧн чужисны Рагуил да Навдеил.] Дедан рӧдысь петісны ашшурейяс, летушейяс да леуммейяс.
Мадианлӧн вӧліны Эфай, Эфер, Енок, Авид да Эльдаг пиян.
Ставныс найӧ вӧліны Кетуралӧн пиянсянь чужысьяс.
Ӧвраам ставсӧ, мый сылӧн вӧлі, колис аслас Исаак пиыслы.
Олігас на сійӧ сеталіс козинъяс кесйӧг-гӧтыръясыслӧн пияныслы да ыстіс найӧс Исаак пи дорсьыс ылӧджык, асыввыв муясӧ.
Ӧвраам оліс сё сизимдас вит арӧсӧдз.
Сійӧ куліс пӧрысь кадӧ, олӧмнас пӧтӧмаӧн вуджис батьясыс дінӧ.
Исаак да Измаил пияныс дзебисны сійӧс Макпела кырта горсйӧ. Дзебаніныс вӧлі Мамре дорын, хеттей Цохар Ефронлӧн му вылын. Тайӧ мусӧ [кырта горснас] Ӧвраам вӧлі ньӧбӧма хеттейяслысь.
Сэтчӧ дзебӧма Ӧвраамӧс да сылысь Сарра гӧтырсӧ.
Ӧвраам кулӧм бӧрын Ен бурсиис сылысь Исаак писӧ.
Исаак оліс Бер-Лахай-Рои дорын.
Измаилсянь чужысьяс йылысь. Измаил вӧлі Ӧвраамлӧн пи, кодӧс чужтіс Агар, Сарралӧн египетса кесйӧг аньыс.
Измаил пиянлӧн нимъясныс чужан во сертиныс: Измаиллӧн медводдза пиыс вӧлі Невайот, нӧшта сылӧн вӧліны Кедар, Адбел, Мивсам, Мишмай, Думай, Массай, Хадад, Темай, Етур, Нафиш да Кедмай пиян.
Тайӧ Измаиллӧн пияныс, дас кык чужанкотырлӧн ӧксыяс. На серти нимтісны тшӧтш налысь оланінъяссӧ.
Измаил оліс сё комын сизим арӧсӧдз.
Сэсся куліс да вуджис батьясыс дінӧ.
Измаилсянь чужысьяслӧн оланіныс вӧлі Хавиласянь Шурӧдз. Шур вӧлі Египетсянь асыввылын Ассурлань.
Найӧ олісны ӧта-мӧдныскӧд зыксьӧмӧн.
Исааклӧн рӧд йылысь.
Ӧвраамлӧн чужис Исаак.
Исааклы вӧлі нелямын арӧс, кор сійӧ босьтіс гӧтырӧ Бетуэллысь Ревекка нывсӧ, Лаванлысь чойсӧ. Найӧ вӧліны Месопотамияын олысь арамейяс.
Исаак кевмысис Господьлы гӧтырыс вӧсна, ӧд гӧтырыс эз вермы сьӧктынысӧ.
Господь кыліс сійӧс, и Ревекка кынӧмасис.
Пияныс кынӧмас кутісны дзескӧдны ӧта-мӧдсӧ. Ревекка шуис: «Мый бара менӧ виччысьӧ-а?»
Сійӧ муніс юасьны Господьлысь.
Господь висьталіс: — Кык войтыр тэ пытшкын, кык чужанкотыр кынӧмсьыд петас.
Ӧтиыс лоӧ вынаджык мӧдсьыс, ыджыдджыкыс кутас кесъявны ичӧтджыкыслы.
Воис кад чужтыны. Ревеккалӧн чужис кык пи.
Медводдза чужысьлӧн кучикыс вӧлі гӧрд да ставнас гӧна.
Сылы пуктісны Исав ним.
Мӧдыс петіс Исав вокыслы коклябӧрас кутчысьӧмӧн.
Сылы пуктісны Яков ним.
Исааклы вӧлі квайтымын арӧс, кор найӧ чужисны.
Пияныс быдмисны. Исав лои бур вӧралысьӧн. Сійӧ ветлӧдліс кыйсьыны, а рам сьӧлӧма Яковлы кажитчис гортас овны.
Исаак радейтіс сёйны пӧтка яй, та вӧсна сылы мусаджык вӧлі Исав, а Ревеккалы мусаджык вӧлі Яков.
Ӧтчыд Яков пуис сёян.
Исав локтіс кыйсянінысь ёна мудзӧмаӧн.
Исав шуис Яковлы: «Ме ёна мудзи. Вай меным сёйыштны этайӧ гӧрдов пуӧмторсӧ».
Та вӧсна Исавӧс нимтісны Эдомӧн.*
Но Яков шуис: «Вузав меным ассьыд медводдза чужысьлысь нимтӧ».
«Ме куланвыйын, — вочавидзис Исав.
— Мый меным тайӧ медводдза чужысьлӧн нимсьыс?»
Яков шуис: «Медводз кыв сет меным».
Исав кыв сетіс, тадзи вузаліс Яковлы ассьыс медводдза чужысьлысь нимсӧ.
Яков сетіс Исавлы нянь да чечевица шыд.
Сійӧ сёйис-юис, чеччис да муніс, медводдза чужысьлӧн нимыс сылы вӧлі веськодь.
Му вылын йӧзыс Ӧвраам кадӧ моз бара кутісны тшыгъявны.
Исаак мӧдӧдчис Герарӧ филистимса Авимелек ӧксы дінӧ.
Господь петкӧдчис Исааклы да шуис: «Эн мун Египетӧ, а ов сійӧ муас, кӧні Ме тшӧкта.
Кольччы татчӧ. Ме бурсиа тэнӧ да лоа тэкӧд. Тэныд да тэсянь чужысьяслы сета ставнас тайӧ мусӧ, збыльмӧда Ӧвраам батьыдлы сетӧм кывйӧс.
Тэсянь чужысьяс лоӧны енэжвыв кодзувъяс мында.
Ме содта налысь лыдсӧ да сета налы став тайӧ мусӧ. На пыр бурсиӧмыс вуджас мувывса быд войтырлы, ӧд Ӧвраам [батьыд] кывзысис Менсьым да оліс Менам индӧд-тшӧктӧмъяс серти».
Исаак овмӧдчис Герарӧ.
Кор сэтчӧс олысьяс юалісны Исааклысь Ревекка йылысь, сійӧ шуис, тайӧ пӧ менам чой.
Исаак поліс, мый сійӧс виасны Ревекка гӧтырыс вӧсна, ӧд сылӧн гӧтырыс вӧлі зэв мича. Та вӧсна Ревеккаӧс эз шу гӧтырнас.
Колис уна кад. Филистимса Авимелек ӧксы аддзис ӧшиньӧдыс, кыдзи Исаак окасис аслас Ревекка гӧтыркӧд.
Авимелек корис Исаакӧс да шуис: «Ревеккаыд тай гӧтыр тэнад!
Мыйла тэ сійӧс аслад чойӧн шуин?»
Исаак вочавидзис: «Ме чайті, мый сы понда менӧ вермасны вины».
Авимелек шуис: «Мый тэ миянкӧд вӧчин!
Менам войтырысь ӧти морт муртса эз узь сыкӧд, тадзи тэ вӧсна ми эськӧ ставным мыжмим».
Авимелек йӧзӧдіс войтырыслы тшӧктӧм, мый виӧма лоӧ сійӧс, коді инмӧдчас Исаак да сылӧн гӧтырыс дінӧ.
Исаак кӧдзис му да босьтіс сійӧ вонас няньсӧ сё пӧвстӧн.
Тадзи бурсиис сійӧс Господь.
Сійӧ ёна озырмис, лои зэв озыр мортӧн.
Сылӧн вӧліны ыжъяс, мӧсъяс да уна кесйӧг, мый вӧсна филистимсаяс кутісны вежавны сылы.
Весиг Ӧвраам бать дырйиыс на кесйӧгъясӧн кодйылӧм юкмӧсъяссӧ филистимсаяс тупкалісны-тырталісны муӧн.
Исааклы Авимелек шуис: «Ылыстчы миян дорысь, ӧд тэ лоин миянысь вынаджык».
Исаак муніс сэтысь, чомъяснас сувтіс Герар ковтысӧ да овмӧдчис сэтчӧ.
Сэні вӧліны Ӧвраам батьыс дырйи на кодйылӧм юкмӧсъяс. Но Ӧвраамлӧн кулӧм бӧрас филистимсаяс тырталісны найӧс. Исаак выльысь кодйис тайӧ юкмӧсъяссӧ да нимтіс найӧс сідзи жӧ, кыдзи нимтыліс сылӧн батьыс.
Ковтысын кодйысиганыс Исааклӧн кесйӧгъясыс аддзисны ва петанін.
Но герарса ыж-мӧс видзысьяс вензисны Исааклӧн ыж-мӧс видзысьяскӧд, шуалісны, ваыс пӧ миян.
Исаак пуктіс юкмӧслы Эсек ним, ӧд вензисны сэні.
[Кор Исаак сэтысь муніс,] Исааклӧн кесйӧгъясыс кодйисны мӧд юкмӧс, мый йылысь бара на вензисны.
Та вӧсна Исаак пуктіс юкмӧслы Ситна* ним.
Сэсся муніс сэтысь да кодйис выль юкмӧс, мый йылысь найӧ эз нин вензьыны. Исаак пуктіс юкмӧслы Реховот* ним, ӧд шуис, Господь пӧ сетіс миянлы паськыд места, и ми рӧдмам тайӧ му вылас.
Сэтысь Исаак мӧдӧдчис Бер-Шеваӧ.
Сэні войнас сылы петкӧдчис Господь да шуис: «Ме Ӧвраамлӧн, тэнад батьлӧн, Ен.
Эн пов, ӧд Ме тэкӧд.
Менам Ӧвраам кесйӧг вӧсна Ме бурсиа тэнӧ да содта тэсянь чужысьясӧс».
Исаак сувтӧдіс висьпуктанін да шыасис Господь дінӧ.
Сэсся паськӧдіс сэтчӧ чом, а кесйӧгъясыс кодйисны юкмӧс.
Герарысь Исаак дінӧ локтіс Авимелек. Сыкӧд тшӧтш локтісны Ахузат ёртыс да тышкайӧзӧн веськӧдлысь Пикол.
Исаак шуис налы: «Мыйла ті локтінныд ме дінӧ? Ті ӧд вӧтлінныд менӧ ас дорсьыныд, кор лӧгныд петіс».
Найӧ шуисны: «Тэкӧд збыльысь Господь! Ми кӧсъям сёрнитчыны тэкӧд. Сет миянлы кыв, мый он вӧч миянлы некутшӧм лёк. Ӧд ми эгӧ вӧрзьӧдӧй тэнӧ, а вӧчим сӧмын бур, лэдзим тэнӧ лӧня мунны.
Тэ — Господьлӧн бурсиӧмаыс».
Исаак лӧсьӧдіс налы гаж, кӧні найӧ сёйисны-юисны.
Водз асывнас найӧ ӧта-мӧдныслы кыв сетісны, сэсся лӧня торйӧдчисны.
Тайӧ луннас Исааклӧн кесйӧгъясыс юкмӧс кодйӧм бӧрын локтісны да шуисны, аддзим пӧ ва.
Исаак пуктіс юкмӧслы Шива* ним.
Та вӧсна ӧнӧдз тайӧ карыслӧн нимыс Бер-Шева.
Исавлы вӧлі нелямын арӧс, кор сійӧ босьтіс гӧтырӧ кык аньӧс: хеттей Берлысь Егудита нывсӧ да хеттей Элонлысь Васемата нывсӧ.
Тайӧ аньясыс вайисны Исааклы да Ревеккалы уна шог.
Исаак пӧрысьмис да синтӧммис. Ӧтчыд сійӧ корис ыджыдджык писӧ ас дорас да шуис: «Пиукӧй!»
Исав вочавидзис: «Мый, батьӧй?»
Исаак шуис: «Ме пӧрысьми.
Дыр-ӧ меным колис овны, ог тӧд.
Босьт ассьыд кыйсянторъястӧ, ньӧввужтӧ да ньӧвъястӧ да ветлы пӧтка кыйны. Дасьты менсьым радейтана сёянӧс. Ме сёя, а сэсся бурсиа тэнӧ кулӧм водзвылын».
Ревекка кывліс Исааклысь Исав пиыскӧд сёрнитӧмсӧ.
Исав муніс пӧтка кыйны.
Ревекка висьталіс [ичӧтджык] Яков пиыслы: «Ме кывлі батьыдлысь Исавкӧд сёрнитӧмсӧ.
Батьыд тшӧктіс сылы пӧтка кыйны да сёян дасьтыны.
Кӧсйысис, мый сёйӧм бӧрас Господь водзын бурсиас Исавӧс.
Ӧні, менам пиӧй, кывзы менӧ. Вӧч, мый тшӧкта тэныд.
Мун да пемӧс чукӧрысь бӧрйы кык бур кӧзапиӧс.
Ме дасьта наысь батьыдлы радейтана сёянсӧ.
Сэсся тэ нуан сійӧс батьыдлы, а сійӧ сёйыштас да бурсиас тэнӧ кулӧм водзвылас».
Яков шуис мамыслы: «Исав воклӧн кучикыс гӧна, а менам — шыльыд.
Батьӧй кӧ малыштас менӧ да гӧгӧрвоас, мый ме ылӧдлі сійӧс, сэки ме ёрӧм улӧ веськала, и бурсиӧмыс оз ло меным».
Мамыс шуис сылы: «Ме вылын мед лоас тайӧ ёрӧмыс, пиӧй. 
Тэ сӧмын кывзысь. Мун да вай меным, мый кори».
Яков муніс да вайис мамыслы кӧзапиянӧс.
Мамыс вӧчис батьныслысь радейтана сёянсӧ.
Сэсся Ревекка босьтіс аслас видзанінысь ыджыдджык Исав пиыслысь медбур паськӧмсӧ да пасьтӧдіс ичӧтджык Яков писӧ.
Сылысь кисӧ да голясӧ гартыштіс кӧза куӧн.
Сэсся сетіс Яковлы киас яй да нянь.
Яков пырис батьыс ордӧ да шуис: «Батьӧй».
Батьыс вочавидзис: «Коді тэ, пиӧй?»
Яков шуис батьыслы: «Ме Исав, тэнад медводдза чужысьыд.
Ме вӧчи, мый тэ тшӧктін.
Чеччы, сёйышт пӧтка яй, а сэсся бурсиан менӧ».
Исаак юаліс: «Кыдзи тэ, пиӧй, та ӧдйӧнсӧ кыйин?»
Яков вочавидзис: «Господь, тэнад Енмыд, отсаліс меным».
Исаак шуис Яковлы: «Тэ-ӧ менам Исав пиӧй? Матыстчы, ме малышта тэнӧ».
Яков матыстчис Исаак батьыс дінӧ, и мӧдыс малыштіс сійӧс да шуис: «Гӧлӧсыс тай Яковлӧн, а киыс Исавлӧн».
Батьыс эз тӧд, мый тайӧ Яков, ӧд киыс вӧлі Исавлӧн кодь гӧна.
Сійӧ кӧсйис нин бурсины, но юаліс: «Тэ-ӧ менам Исав пиӧй?»
Яков вочавидзис: «Ме».
Исаак шуис: «Вай меным пӧтка яйтӧ, пиӧй. Ме сёя, сэсся бурсиа тэнӧ».
Яков сетіс батьыслы, и сійӧ сёйис.
Вайис на сылы вина, и сійӧ юис.
Исаак шуис: «Пиӧй, матыстчы ме дінӧ да окышт менӧ».
Яков матыстчис да окыштіс батьсӧ.
Сэки Исаак кыліс паськӧм дуксӧ да бурсиис шуалӧмӧн: 
— Менам пи дорысь ӧвтӧ Господьӧн бурсиӧм видзьясӧн.
Енмыс мед сетас тэныд енэжса лысва, мувыв вотӧс, уна нянь да вина.
Войтыръяс мед кесъяласны тэныд, чужанкотыръяс мед копыртчасны тэныд.
Вокъясыд вылын ло ыджыдӧн, мамыдлӧн пияныс мед копыртчасны тэныд.
Тэнӧ ёрысьясӧс лоӧ ёрӧма, тэнӧ бурсиысьясӧс лоӧ бурсиӧма!
Исаак сӧмын на бурсиис Яковӧс, да Яков петіс аслас батьыс ордысь, кыйсянінысь локтіс Исав вокыс.
Исав дасьтіс сёян, вайис батьыслы да шуис: 
«Чеччы, батьӧй, сёйышт пӧтка яйтӧ, а сэсся бурсиан менӧ».
Батьыс юаліс: «Коді тэ?»
Исав вочавидзис: «Ме тэнад Исав пиыд, медводдза чужысьыд».
Исаакӧс повзьӧмысла дзӧрӧм босьтіс, сійӧ шуис: «А коді нӧ тэӧдз вайис меным пӧтка яйсӧ? Ме сёйи да бурсии сійӧс!
Сійӧ и лоӧ бурсиӧманас».
Батьыслысь кывъяссӧ кылӧм бӧрын Исав ырзӧмӧн бӧрддзис да гораа горӧдіс. Сэсся корис: «Батьӧй, бурси тшӧтш менӧ!»
Но батьыс шуис: «Вокыд локтіс да ылӧдлӧмӧн босьтіс тэнсьыд бурсиӧмтӧ».
Исав шуис: «Абу весьшӧрӧ сійӧ Яков нима — кык пӧрйӧ конйыштіс менӧ.
Медводдза чужысь нимӧс босьтіс, и бурсиӧмӧс босьтіс».
Исав юаліс на батьыслысь: «Меным ӧмӧй тэ эн коль бурсиӧмсӧ?»
Исаак вочавидзис: «Ме пукті сійӧс тэ вылын ыджыднас. Вокъяссӧ сеті сылы кесйӧгӧ.
Сеті нянь да вина.
Мый ме верма сетны тэныд, пиӧй?»
Но Исав шуис: «Батьӧй, тэнад ӧмӧй сӧмын ӧти бурсиӧм?
Бурси тшӧтш менӧ, батьӧй!» 
[Исаак чӧв оліс.] Исав ыджыд гӧлӧсӧн бӧрддзис.
Сэк Исаак батьыс шыасис: 
— Бур вотӧса муяс ылын лоӧны тэнад оланінысь, енэжса лысваыс оз кут кӧтӧдны сійӧс.
Шыпурт помысь тэ кутан овны, аслад вокыдлы кутан кесъявны.
Но воас кад, тэ сылы паныд кыпӧдчан, голя вывсьыд сылысь сийӧссӧ шыбитан.
Батьыслӧн бурсиӧм вӧсна Исав кутіс мустӧмтны Яков воксӧ.
Исав мӧвпыштіс: «Матысмӧны батьным вӧсна бӧрдан лунъяс. Сэки ме виа Яков вокӧс».
Ревеккалы висьталісны Исавлысь кывъяссӧ.
Сійӧ корис Яковӧс, ичӧтджык писӧ, да шуис сылы: «Исав вокыд кӧсйӧ вины тэнӧ.
Кывзы менӧ, пиӧй.
Чеччы да пышйы [Месопотамияӧ] Лаван вокӧй ордӧ Харанӧ.
Олышт сэні мыйтакӧ, кытчӧдз вокыдлӧн ярлуныс оз кус, кытчӧдз сійӧ оз дугды скӧравны тэ вылӧ да оз вунӧд, мый тэ вӧчин сылы.
Сэсся ме бӧр кора тэнӧ сэтысь.
Мыйла меным кыкнаннытӧ воштыны ӧти лунӧ!»
А Исаак верӧсыслы Ревекка шуис: «Тайӧ хеттей аньясыс вӧсна меным мустӧммис олӧмыс.
Нӧшта кӧ Яков босьтас гӧтырӧ хеттей аньӧс, весиг ог кӧсйы овнысӧ!»
Исаак корис Яковӧс, бурсиис да шуис: «Ханаанса нылӧс аслыд гӧтырӧ эн босьт.
Мун Месопотамияӧ, мамыдлӧн Бетуэл батьыс дінӧ да сэтысь мамыдлӧн Лаван вок нывъяс пӧвстысь ӧтиӧс босьт гӧтырӧ.
Мед бурсиас тэнӧ Ставсӧвермысь Ен! Мед Сійӧ сетас тэныд зэв уна чужысьӧс! Тэ лоан унасьыс-уна войтырлы бать. Мед Сійӧ бурсиас тэнӧ да тэсянь чужысьясӧс менам Ӧвраам батьлӧн бурсиӧмӧн, медым тэныд вуджас муыс, кӧні тэ олан локтысь морт моз, ӧд тайӧ мусӧ Ен сетіс Ӧвраамлы».
Исаак ыстіс Яковӧс, и сійӧ мӧдӧдчис Месопотамияӧ арамей Бетуэллӧн Лаван пиыс дінӧ. Лаван вӧлі Ревеккалӧн вокыс, Яковлӧн да Исавлӧн чожныс.
Исав тӧдмаліс, мый Исаак бурсиӧма Яковӧс да бурсиӧмӧн мӧдӧдӧма сійӧс Месопотамияӧ, мед сэтчӧс нылӧс босьтас аслыс гӧтырӧ, а оз ханаанса нылӧс.
Исав аддзис, мый Яков кывзысис бать-мамыслысь да муніс Месопотамияӧ.
Сэки гӧгӧрвоис, мый ханаанса нывъяс Исаак батьыслы абу сьӧлӧм сертиыс.
Та вӧсна Исав муніс Измаил дінӧ да нӧшта гӧтырӧ босьтіс Махалатаӧс, Ӧвраамлӧн Измаил пилысь нывсӧ, Невайотлысь чойсӧ.
Яков петіс Бер-Шеваысь да мӧдӧдчис Харанӧ.
Шонді пуксьӧм бӧрын сувтіс шойччыны, 
босьтіс из, пуктіс юр улас да водіс.
Узигас Яков вӧтасис, мый му вылын сулаліс сод. Содйыс судзис енэжӧдз, сэті лэччисны-кайисны Енлӧн анделъяс.
Господь сулаліс сэні да шуис: «Ме Господь, тэнад Ӧвраам батьлӧн Ен да Исааклӧн Ен.
[Эн пов.] 
Мусӧ, кӧні тэ куйлан, Ме сета тэныд да тэсянь чужысьяслы.
Тэсянь чужысьыс лоӧ лыа чир мында.
Тэ паськӧдчан рытыввылӧ и асыввылӧ, войвылӧ и лунвылӧ.
Тэ да тэсянь чужысьяс пыр бурсиӧмыс вуджас быд войтырлы.
Ме лоа тэкӧд.
Ме видза тэнӧ быдлаын, кытчӧ тэ мунан, да бӧр вайӧда тэнӧ тайӧ муас. Ме ог коль тэнӧ, а вӧча сійӧ, мый кӧсйыси тэныд».
Яков садьмис да шуис: «Збыльысь Господь тані, а ме эг тӧд!»
Полӧм босьтіс сійӧс, и сійӧ шуис: «Кутшӧм повзьӧдана тайӧ местаыс.
Тайӧ збыльысь Ен керка, енэжӧ пыранін».
Асывводзнас Яков босьтіс изсӧ, мый вылын юрсӧ пуктӧмӧн узис, сувтӧдіс сійӧс вежа пас пыдди да кисьтіс сы вылӧ олив вый.
Тайӧ местасӧ Яков нимтіс Вефильӧн, а таӧдз нимыс вӧлі Луз.
Яков кыв сетіс: «Лоас кӧ мекӧд [Господь] Ен да видзас менӧ туйын, сетас меным нянь да паськӧм, и ме кӧ лӧнь сьӧлӧмӧн бӧр локта бать керкаӧ, сэки Господь лоас менам Енмӧн. Тайӧ изйыс лоас [меным] Ен керкаӧн.
И ставсьыс, мый Тэ сетан меным, ме сета Тэныд дасӧд юкӧнсӧ».
Яков мӧдӧдчис асыввывса войтырлӧн муясӧ 
[арамей Бетуэллӧн Лаван пиыс дінӧ, коді вӧлі Ревеккалӧн вокыс, Яковлӧн да Исавлӧн чожныс].
Мунігас аддзис видз-му вылысь юкмӧс, кӧні юктавлісны ыжъясӧс. Юкмӧс гӧгӧрыс куйліс куим ыж чукӧр.
Юкмӧссӧ вӧлі тупкӧма ыджыд изйӧн.
Кор сэтчӧ чукӧртлісны став ыжсӧ, ыж видзысьяс вештылісны изсӧ юкмӧс вомсьыс да юктавлісны ыжъяссӧ, а сэсся изнас бӧр тупкылісны юкмӧс вомсӧ.
Яков юаліс ыж видзысьяслысь: «Вокъяс, ті кытысьӧсь?»
Найӧ шуисны: «Харанысь».
«Тӧданныд-ӧ ті Нахорлысь Лаван писӧ?» — юаліс Яков.
Найӧ шуисны: «Тӧдам».
«Дзоньвидза-ӧ сійӧ?» — юаліс Яков.
Найӧ шуисны: «Дзоньвидза.
Со, сылӧн Ракель нылыс ыжъяссӧ вайӧдӧ».
Яков шуис: «Водз на вайӧдны ыжъястӧ.
Юкталӧй да йирсьӧдӧй на».
Найӧ шуисны: «Огӧ вермӧй юктавнысӧ, кытчӧдз став ыжыс оз чукӧрмы. Юкмӧс вылысь изсӧ вештасны, кор став ыжыс чукӧрмас, и сэки ми юкталам».
Сёрнитігкостіныс Ракель вайӧдіс ыжъясӧс, ӧд сійӧ видзис батьыслысь ыжъяссӧ.
Кор Яков аддзис Ракельӧс, мамыслӧн Лаван воклысь нывсӧ, да Лаванлысь ыжъяссӧ, матыстчис да вештіс юкмӧс вомысь изсӧ, сэсся юкталіс Лаванлысь ыжъяссӧ.
Яков окыштіс Ракельӧс да бӧрддзис.
Яков висьталіс, мый сійӧ — Ревеккалӧн пи, Ракельлӧн батьыслы рӧдвуж.
Ракель котӧртіс висьтавны тайӧс батьыслы.
Лаван мыйӧн кыліс чойыслӧн Яков пи йывсьыс, котӧртіс сы дінӧ, кутліс-окаліс сійӧс, сэсся вайӧдіс гортас.
Яков висьталіс сылы ставсӧ.
Лаван шуис сылы: «Збыльысь, ми тэкӧд ӧти лыысь да ӧти яйысь, тэ менам рӧдвуж!»
Яков оліс Лаван ордын тӧлысь чӧж.
Лаван шуис сылы: «Тэ менам рӧдвуж, но ме тэнӧ удждонтӧг ог уджӧд.
Висьтав, кутшӧм удждон кӧсъян».
Лаванлӧн вӧлі кык ныв: ыджыдджыкыс — Лия, ичӧтджыкыс — Ракель.
Лия вӧлі слаб синма, а Ракель чужӧмнас и мыгӧрнас вӧлі мича.
Яковлы мусмис Ракель. Та вӧсна Яков шуис Лаванлы: «Тэнад ичӧтджык Ракель ныв вӧсна ме кута уджавны тэныд сизим во».
Лаван шуис: «Мӧд сайӧ дорысь бурджык тэ сайӧ нылӧс сетны.
Ов ме ордын».
Яков кесъяліс Ракель вӧсна сизим во.
Воясыс лэбыштісны, быттьӧ лун-мӧд коли, ӧд сылы сэтшӧм муса вӧлі Ракель.
Яков шуис Лаванлы: «Сет меным гӧтырӧс, медым сыкӧд ӧтлаын овны, ӧд кадыс воис нин».
Лаван чукӧртіс став йӧзсӧ да лӧсьӧдіс гаж.
Рыт пемыднас Лаван вайӧдіс Яков дінӧ ассьыс Лия нывсӧ, и Яков узис сыкӧд.
Лаван ассьыс Зелфа кесйӧг аньсӧ сетіс Лиялы.
Асывнас Яков аддзис, вӧлӧмкӧ, узьӧма Лиякӧд.
Яков шуис Лаванлы: «Мый тэ вӧчин мекӧд!
Эг-ӧ ме Ракель вӧсна кесъяв тэныд?
Мыйла тэ ылӧдлін менӧ?»
Лаван шуис: «Ми ыджыд чойсьыс водзджык ичӧтджыксӧ верӧс сайӧ огӧ сетӧй.
Тайӧ вежонсӧ такӧд ов, сэсся сетам тэныд мӧдсӧ, но кутан кесъявны меным нӧшта сизим во».
Вежон чӧж Яков оліс Лиякӧд.
Сэсся Лаван сетіс Ракель нывсӧ Яков сайӧ.
Ассьыс Валла кесйӧг аньсӧ Лаван сетіс Ракельлы.
Яков узис Ракелькӧд. Сійӧ радейтіс Ракельӧс Лия дорысь ёнджыка да кесъяліс Лаванлы нӧшта на сизим во.
Господь [Ен] аддзис, мый Лия эз вӧв радейтана, да сетіс сылы сьӧктыны, а Ракель эз вермы сьӧктынысӧ.
Лия нӧбасис да чужтіс [Яковлы] пиӧс, пуктіс сылы Рувим ним, ӧд шуис: 
«Господь аддзис менсьым шогсьӧмӧс [да сетіс меным пи]. Ӧні верӧсӧй кутас радейтны менӧ».
Лия бара нӧбасис да чужтіс [Яковлы мӧд] пиӧс, сэк шуис: «Господь кыліс, мый ме абу муса верӧслы, да сетіс меным тайӧ писӧ».
Сійӧ пуктіс пиыслы Симеон ним.
Лия бара нӧбасис да чужтіс пиӧс, сэк шуис: «Ӧні ляскысяс верӧсӧй ме дінӧ, ӧд ме чужті сылы куим пиӧс».
Та вӧсна сійӧ пуктіс пиыслы Левий ним.
Сэсся Лия нӧшта на нӧбасис да чужтіс пиӧс, сэк шуис: «Ӧні ме ошка Господьӧс».
Та вӧсна сійӧ пуктіс пиыслы Иуда ним.
Сэсся эз нин чужты ныв-пиӧс.
Ракель гӧгӧрвоис, мый оз вермы чужтыны Яковлы кага. Та вӧсна кутіс вежавны аслас чойыслы.
Яковлы сійӧ шуис: «Сет меным челядь, а он кӧ — ме кула».
Яков скӧрмис Ракель вылӧ да шуис сылы: «Ме ӧмӧй Ен, коді оз сет тэныд кынӧмасьнысӧ?»
Ракель шуис: «Босьт менсьым Валла кесйӧг аньӧс да узь сыкӧд.
Сійӧ мед чужтас, а кагаыслы мамнас ме лоа».
Ракель сетіс Валлаӧс Яковлы гӧтырӧ, и Яков узис сыкӧд.
Валла кынӧмасис да чужтіс Яковлы пиӧс.
Ракель шуис: «Енмыс ме дор, кыліс менӧ да сетіс меным пиӧс».
Та вӧсна сійӧ пуктіс пиыслы Дан ним.
Ракельлӧн Валла кесйӧг аньыс нӧшта кынӧмасис да чужтіс Яковлы мӧд пиӧс.
Сэки Ракель шуис: «Ёна вермаси ме аслам чойкӧд да верми».
Сійӧ пуктіс пиыслы Неффалим ним.
Лия гӧгӧрвоис, мый дугдіс чужтынысӧ, та вӧсна ассьыс Зелфа кесйӧг аньсӧ сетіс гӧтырӧ Яковлы [и Яков узис сыкӧд].
Зелфа чужтіс Яковлы пиӧс.
Сэк Лия шуис: «Майбырӧй!» 
да пуктіс пиыслы Гад ним.
Сэсся Лиялӧн Зелфа кесйӧг аньыс чужтіс Яковлы мӧд пиӧс.
Лия шуис: «Ме шуда! И шудаӧн кутасны шуны менӧ аньяс».
Сійӧ пуктіс пиыслы Асир ним.
Шобді вундан кадӧ Рувим аддзис видз-му вылысь мандрагораяс да вайис Лия мамыслы.
Сэки Ракель шуис Лия чойыслы: «Вай меным пиыдлысь мандрагораястӧ».
Но Лия шуис сылы: «Этша на тэныд, мый мырддин менсьым верӧсӧс! Нӧшта на пиӧйлысь мандрагораяссӧ мырддян!»
Ракель шуис: «Пиыдлӧн мандрагораясысь Яков мед тэкӧд узяс тайӧ войсӧ».
Рытнас Яков локтіс видз-му вылысь.
Лия петіс сылы воча да шуис: «Лок ме дінӧ, ӧд ме ньӧби тэнӧ пиӧйлӧн мандрагораясысь».
Яков узис сыкӧд тайӧ войсӧ.
Ен кыліс Лияӧс — сійӧ кынӧмасис да чужтіс Яковлы витӧд пиӧс.
Сэк Лия шуис: «Енмыс меным водзӧс сетіс сыысь, мый ме сеті ассьым кесйӧг аньӧс верӧслы».
Сійӧ пуктіс пиыслы Иссакар ним [нимыслӧн вежӧртасыс “водзӧс сетӧм”].
Лия нӧшта кынӧмасис да чужтіс Яковлы квайтӧд пиӧс.
Лия шуис: «Енмыс сетіс меным вывті бур козин.
Менам верӧсӧй ӧні ме ордын кутас овны, ӧд ме квайт пиӧс сылы чужті».
Сійӧ пуктіс пиыслы Завулон ним.
Сэсся Лия чужтіс нылӧс да пуктіс сылы Дина ним.
Енмыс эз вунӧд Ракельӧс, кыліс сійӧс да сетіс сьӧктыны сылы.
Ракель кынӧмасис, чужтіс [Яковлы] пиӧс да шуис: «Енмыс вештіс ме вылысь яналӧмӧс».
Сійӧ пуктіс пиыслы Ӧсип ним да шуис: «Мед Господь сетас на меным мӧд пиӧс».
Ракель чужтіс Ӧсипӧс. Та бӧрын Яков шуис Лаванлы: «Лэдз менӧ, ме муна гортӧ, аслам муӧ.
Сет меным гӧтыръясӧс да челядьӧс, ӧд на вӧсна ме кесъялі тэныд. Тэ тӧдан, мый ме тэныд бура кесъялі».
Лаван шуис сылы: «Ло бур сьӧлӧма, кывзы менӧ! Ӧні ме тӧда, мый тэ вӧсна Господь бурсиис менӧ.
Висьтав ачыд, кутшӧм дон тэныд мынтыны?»
Яков шуис сылы: «Тэ тӧдан, кыдзи ме кесъялі тэныд, да кутшӧмӧсь лоины пемӧсъясыд ме дырйи.
Меӧдз тэнад пемӧсыд этша вӧлі, а ме локті да, унасьыс-уна лои!
Менам локтӧмсянь Господь ёна бурсиис тэнӧ.
А кор нӧ ме кута уджавны аслам гортсалы?»
Лаван юаліс: «Кыдзи мынтысьны тэныд, висьтав?»
Яков шуис: «Оз ков мынтысьны.
Но ӧтитор кӧ вӧчан, ме кута водзӧ видзны тэнсьыд ыжъястӧ.
Талун ме кытшовта ыжъястӧ да кӧзаястӧ.
Ме торйӧда на пӧвстысь став чутӧсь, сера да сьӧд ыжсӧ, тшӧтш став чутӧсь да сера кӧзасӧ.
Водзӧвылӧ татшӧмъясыс лоасны меным удждон пыдди.
Ме кӧ ылӧдла тэнӧ, регыд мысти тэ ачыд казялан. Локтан кӧ видзӧдлыны менсьым ыж-кӧзаӧс да аддзан кӧ ме ордысь сертӧм-чуттӧм кӧзаясӧс либӧ сьӧд ыжъяс кындзи мӧд сера ыжъясӧс, сідзкӧ, найӧс тэнсьыд вӧлі гусялӧма».
Лаван шуис: «Бур, мед лоас тэ ног».
Сійӧ лунӧ Лаван торйӧдіс ай да энь кӧзаяссӧ, кодъяслӧн вуруныс мыйтакӧ вӧлі еджыд сера либӧ чутъяса, торйӧдіс тшӧтш став сьӧд ыжсӧ. Став торйӧдӧм кӧза-ыжсӧ сетіс видзны аслас пияныслы.
Сійӧ тшӧктіс вештыны тайӧ ыж чукӧрсӧ Яков дінысь куим лун мунан ылнаӧдз.
А Яков кольччис видзны Лаванлысь мукӧд ыжсӧ.
Оржы, миндаль да платан пуясысь Яков перйис уль ньӧр да вундаліс кырсьсӧ сідз, мый ньӧрйыс лои еджыд визьяса. Визя ньӧръяссӧ пукталіс пемӧсъяслы юан воръясӧ, медым ыжъяс да кӧзаяс васӧ юиганыс видзӧдісны ньӧръяс вылӧ.
Юкталанінын найӧ тырсялісны. Пемӧсъяс, кодъяс ньӧръяс вылӧ видзӧдігӧн тырсялісны, чужтісны сера, чута да пегана пиянӧс. Татшӧм кӧзапиянсӧ да баляпиянсӧ Яков торйӧдавліс аслыс. Ыжъяссӧ сувтӧдлывліс Лаванлӧн сера да сьӧд пемӧсъяслы воча.
Тадзи Яков чукӧртіс аслыс ыжъясӧс да кӧзаясӧс, видзис найӧс Лаванлӧн пемӧсъясысь торйӧн.
Быд пӧрйӧ, кор нӧйччисны ён пемӧсъяс, Яков пуктыліс на водзӧ юан воръясас визя ньӧръяс, медым найӧ тырсяласны ньӧръяс вылӧ видзӧдӧмӧн.
Кор нӧйччисны жебиник пемӧсъяс, сэки ньӧръяссӧ эз пуктывлы.
Татшӧм ногӧн жеб пемӧсыс веськавліс Лаванлы, а ёныс — Яковлы.
Тадзи Яков лои вывті озырӧн.
Сылӧн лои уна ыж [да мӧс], тшӧтш верблюдъяс да осёлъяс, кесйӧг аньяс да кесйӧгъяс.
Яков кыліс Лаван пиянлысь сёрнисӧ, Яков пӧ ставсӧ босьтіс батьнымлысь да сы овмӧссянь пӧ озырмӧдчис.
Лаванлӧн чужӧм сертиыс Яков казяліс, мый Лаван кутіс мустӧмтны сійӧс.
Сэки Господь шуис сылы: «Бӧр бергӧдчы батьясыдлӧн муӧ, аслад чужанінад.
Ме лоа тэкӧд».
Яков тшӧктіс корны Ракельӧс да Лияӧс видз вылӧ, ыжъяс йирсянінӧ. Налы шуис: «Батьныдлӧн чужӧм сертиыс ме казялі, мый сійӧ кутіс мустӧмтны менӧ.
Но менам батьӧйлӧн Енмыс мекӧд.
Ті ӧд асьныд тӧданныд, мый ме став вынӧн кесъялі тіян батьныдлы. А сійӧ кымынысь пӧрйӧдліс менӧ, дасысь удждонӧс вежліс.
Но Енмыс эз лэдз сылы меным лёксӧ вӧчны.
Кор батьныд шуис, мый чутӧсь ыжъяс лоасны меным удждонӧн, сэки ставныс чужтісны чутӧсь пиянӧс.
А кор шуис, мый сера ыжъяс лоасны меным удждонӧн, сэки ставныс чужтісны сера пиянӧс.
Ен мырддис пемӧсъяссӧ батьныдлысь да сетіс меным.
Ӧтчыд пемӧсъяслӧн тырсялан кадӧ ме аддзи вӧтӧн, мый сера, чутӧсь да паса ай кӧзаяс да межъяс чеччалӧны энь кӧзаяс да ыжъяс вылӧ.
Енлӧн андел шуис меным вӧтын: “Яков!” 
Ме вочавидзи: “Ме тані”.
Сійӧ шуис: “Видзӧдлы: став ай кӧзаыс да межыс, кодъяс чеччалӧні энь кӧзаяс да ыжъяс вылӧ, сераӧсь, чутӧсьӧсь да пасаӧсь. Ме ӧд аддзи, мый Лаван тэныд вӧчис.
Ме Ен, коді петкӧдчи тэныд Вефильын. Сэні тэ кисьтін вый вежа из вылӧ да кыв сетін Меным.
Ӧні тэ чеччы, пет тайӧ мусьыс да бӧр мун аслад чужанінӧ. 
[Ме лоа тэкӧд.]”»
Ракель да Лия шуисны Яковлы воча: «Миян абу некутшӧм пай бать керкаын. Батьным кулӧм бӧрын нинӧм оз вудж миянлы.
Ми сылы бокыса кодьӧсь.
Сійӧ ас вылас видзис ставсӧ, мый миянӧс вузалӧмысь чуктіс сылы.
Став озырлуныс, мый Ен мырддис миян батьнымлысь, ӧні миян да миян челядьлӧн.
Сідзкӧ, мый тшӧктӧ тэныд Ен, сійӧс и вӧч».
Яков пуксьӧдіс челядьсӧ да гӧтыръяссӧ верблюдъяс вылӧ, босьтіс аскӧдыс став озырлунсӧ да став ыж-мӧссӧ, мый сійӧ нажӧвитіс Месопотамияын, и мӧдӧдчис Ханаан муӧ Исаак батьыс дінӧ.
Кор Лаван вӧлі ыж шыранінын, Ракель гусяліс сылысь гортса бӧлбанъяссӧ.
Нинӧм висьтавтӧг Яков пышйис арамей Лаван дорысь став эмбурнас.
Вуджис ю да мӧдӧдчис Галаад керӧсвыв мулань.
Коймӧд луннас Лаванлы висьталісны Яковлӧн мунӧм йылысь.
Сэки Лаван чукӧртіс [пиянсӧ да] ассьыс рӧдвужсӧ да вӧтчис Яков бӧрся. Сизимӧд луннас Галаад керӧсвыв муын вӧтӧдіс сійӧс.
Войнас узигас арамей Лаванлы петкӧдчис Ен. Сійӧ шуис: «Эн вид Яковӧс».
Лаван суӧдіс Яковӧс.
Ассьыс чомъяссӧ Яков вӧлі зэвтӧма керӧс вылӧ. Лаван рӧдвужыскӧд тшӧтш зэвтісны чомъяснысӧ Галаад керӧсвыв муӧ.
Лаван шуис Яковлы: «Мый тэ вӧчин!
Тэ ылӧдлін менӧ! Тышын шедӧдӧмаясӧс моз тэ пышйӧдін менсьым нывъясӧс.
Мыйла тэ пышйин? Мунін гусьӧн, нинӧм эн висьтав?
Ме эськӧ колльӧді тэнӧ гажа сьыланкывъясӧн, тимпанӧн да гуслиӧн.
Тэ эн лэдз весиг окыштны ассьым нывъясӧс да налысь ныв-писӧ.
Тэ мывкыдтӧма вӧчин.
Ме верми тіянлы лёк вӧчны, но тӧрыт войнас тіян батьныдлӧн Ен шуис меным: “Эн вид Яковӧс”.
Тэ мунін, ӧд ёна гажтӧмтчин бать керкасьыд, но мыйла тэ гусялін менсьым енъясӧс?»
Яков вочавидзис Лаванлы: «Ме полі тэысь, мый мырддян ассьыд нывъястӧ [да ставсӧ, мый менам эм].
Сійӧ, код ордысь аддзан енъястӧ, ловйӧн оз коль.
Миян рӧдвуж дырйи видзӧдав, мый эм ме ордын. Сюрас кӧ мыйкӧ тэнад, бӧр босьт аслыд».
[Но сійӧ нинӧм эз аддзы.] 
Яков эз тӧд, мый Ракель гусяліс идолъяссӧ.
Лаван корсьысис Яков чомйысь, Лия чомйысь, кык кесйӧг аньлӧн чомйысь, но эз аддзы.
Та дырйи Ракель босьтіс гортса бӧлбанъяссӧ да дзебис верблюдлӧн ӧныр* улӧ, а ачыс пуксис сэтчӧ. Лия ордысь петӧм бӧрын Лаван пырис Ракель чомйӧ, корсьысис гӧгӧр, но эз аддзы.
Ракель шуис аслас батьыслы: «Эн скӧрмы, ыджыдӧй, мый ог вермы сувтны тэ водзӧ. Менам ӧні сійӧ, мый аньяслӧн овлӧ быд тӧлысьӧ».
Лаван корсис [чом пасьталаысь], но эз аддзы гортса бӧлбанъяссӧ.
Яков скӧрмис да пондіс мыжавны Лаванӧс: 
«Мыйӧн ме тэ водзын мыжа? Кутшӧм лёктор тэныд вӧчи, мый тэ вӧтӧдін менӧ?
Тэ видзӧдалін менсьым став кӧлуйсӧ, и аддзин эн мыйкӧ?
Вай петкӧдлы менам гортсаясӧй да аслад гортсаясыд водзын, мед найӧ шуасны, коді мыжа.
Ме кызь во олі тэ ордын.
Тэнад ыжъясыд да кӧзаясыд эз чӧвтчывлыны.
Тэнсьыд межъястӧ ме эг сёйлы.
Косявлӧм пемӧсӧс ме эг вайлы тэныд, ӧд тэ лыддин сійӧс менам воштӧмторйӧн.
Ме мынтысьлі тэныд вошӧм пемӧсысь, лунын кӧть войын сійӧ вошліс.
Лунся жарас ме пӧжси, а войся кӧдзыдсьыс кынмавлі, унпӧтӧй меным эз шедлы.
Тадзи вӧлі кызь во чӧж тэ ордын олігӧн.
Ме кесъялі тэныд дас нёль во кыкнан нылыд вӧсна да квайт во пемӧсъясыд вӧсна, а тэ дасысь удждонӧс вежлін.
Эз кӧ вӧв мекӧд батьӧйлӧн Енмыс, Ӧвраамлӧн Енмыс, кодысь тшӧтш Исаак полӧ, тэ эськӧ ыстін менӧ куш киӧн.
Енмыс аддзис менсьым мырсьӧмӧс да сьӧкыдалӧмӧс, та вӧсна дорйис менӧ войнас».
Лаван вочавидзис Яковлы: «Тайӧ нывъясыс ӧд менам, налӧн челядьыс и пемӧсъясыс менам. Ставыс, мый тэнад син водзын — менам. Но мый ме верма вӧчны нывъяскӧд да налӧн челядькӧд, кодъясӧс найӧ чужтісны?
Ӧні тэа-меа кӧрталам йитӧд».
[Сэк Яков шуис сылы: «Миянкӧд тані некод абу.
Но тӧд, Енмыс кылӧ тэа-меаӧс».]
Яков босьтіс из да пуктіс сійӧс казьтыланпас пыдди.
Яков шуис рӧдвужыслы: «Чукӧртӧй изъяс».
Найӧ чукӧртісны да вӧчисны мыльк. Сэсся ӧтлаын сёйисны-юисны мыльк бокас. 
[Лаван шуис Яковлы: «Талун тайӧ мылькйыс сулалӧ тані морт пыдди да кылӧ сёрнитчӧмнымӧс».]
Лаван нимтіс мыльксӧ Егар-Сагадутаӧн, а Яков нимтіс Галаадӧн.
Лаван шуис: «Талун тайӧ мылькйыс [да казьтылан изйыс, мый ме сувтӧді,] морт пыдди кылӧ сёрнитчӧмнымӧс».
Сійӧн тайӧ местасӧ нимтӧны Галаад, и тшӧтш Миспа, ӧд Лаван шуис: «Мед видзӧдас Господь кыкнанным бӧрся, кор ми ылыстчам ӧта-мӧднымысь.
Тэ кӧ менам нывъяскӧд кутан лёкнога овны либӧ наысь ӧтдор босьтан гӧтыръясӧс, Ен аддзӧ тайӧс. Весиг кӧ некод оз аддзы да оз висьтав та йылысь, но Енмыс аддзӧ.
Со, тайӧ мыльксӧ да тайӧ казьтылан изсӧ ме пукті тэа-меа костӧ.
Тайӧ мылькйыс да казьтылан изйыс морт пыдди кылісны миянлысь сёрнитчӧмнымӧс. Найӧ кутасны миянлы казьтывны, медым на бокиті ми эгӧ вуджӧй ӧта-мӧд дінӧ лёк мӧвпъясӧн.
Миян костын ёрдысьыс Ӧвраамлӧн да Нахорлӧн Ен, налӧн батьлӧн Ен».
Яков кыв сетіс Ен водзын, кодысь поліс сылӧн Исаак батьыс.
Яков начкис керӧс вылын пемӧсӧс, вайис сійӧс вись пыдди да корис ставнысӧ сёйны.
Сёйӧм-юӧм бӧрын найӧ кольччисны керӧс вылӧ узьны.
Лаван чеччис водз асывнас, окыштіс ассьыс нывъяссӧ да налысь ныв-писӧ, бурсиис найӧс, сэсся бӧр муніс аслас оланінӧ.
Яков водзӧ муніс аслас туйӧд. 
[Сійӧ видзӧдліс да аддзис Енлысь тышкакотырсӧ.] 
Сійӧс паныдалісны Енлӧн анделъяс.
Найӧс аддзигӧн Яков шуис: «Тайӧ Енлӧн тышкакотырыс».
Та вӧсна нимтіс тайӧ местасӧ Маханаимӧн.
Яковлӧн Исав вокыс оліс Эдомын, Сеир керӧсвыв муын. Яков ыстіс юӧртысьясӧс вокыс дінӧ, тшӧктіс висьтавны сылы: «Исав ыджыдӧй, ме — тэнад Яков кесйӧгыд, ме дыр олі Лаван ордын.
Ӧні менам эмӧсь ӧшъяс, осёлъяс да ыжъяс, кесйӧгъяс да кесйӧг аньяс.
Ме ысті юӧртысьясӧс тэ дінӧ, медым тэ вӧлін бур сьӧлӧма ме дінӧ».
Юӧр нуысьяс бӧр локтісны Яков дінӧ да шуисны: «Ми ветлім тэнад Исав вокыд дінӧ.
Сійӧ ачыс локтӧ тэнӧ вочаавны, и сыкӧд локтӧ нёльсё морт».
Яков ёна повзис да шӧйӧвошис.
Ассьыс йӧзсӧ, ыжъяссӧ, мӧсъяссӧ да верблюдъяссӧ сійӧ юкис кык пельӧ, ӧд мӧвпаліс: 
«Исав кӧ уськӧдчас ӧти чукӧрыс вылӧ да пасьвартас сійӧс, мӧд чукӧрыс вермас пышйыны да ловйӧн кольны».
Яков кевмысис: «Господьӧй, Ӧвраам батьлӧн Ен да Исаак батьлӧн Ен! Тэ тшӧктін меным бергӧдчыны аслам муӧ, аслам чужанінӧ, и кӧсйысин бур вӧчны меным.
Тэнад буралӧмыд ыджыд, Тэ уна бурсӧ вӧчин меным, Аслад кесйӧглы. Ме ог сулав та доныс! Йӧрдан ю вуджигӧн менам вӧлі сӧмын бедь, а ӧні, бӧрсӧ локтігӧн, меным ковмис ыджыд овмӧсӧс кык пельӧ юкны.
Мезды менӧ Исав вокысь! Ме пола, мый сійӧ локтас да виас менӧ, виас тшӧтш менсьым челядьӧс мамъясыскӧд.
Тэ шуин, мый Тэ бур вӧчан меным, и кӧсйысин, мый месянь чужысьыс лоас саридздор лыа мында — сы мында, мый некод оз вермы найӧс лыддьынысӧ».
Войсӧ Яков узис сэні.
Асывнас сійӧ лӧсьӧдіс Исав вокыслы козинъяс: кыксё кӧзаӧс, кызь ай кӧзаӧс, кыксё ыжӧс, кызь межӧс, комын лысьтан верблюдӧс пияныскӧд, нелямын мӧскӧс, дас ӧшкӧс, кызь энь да дас ай осёлӧс.
Быд пемӧс чукӧр дінӧ сувтӧдіс кесйӧгӧс да тшӧктіс мунны водзвылас, ӧта-мӧдсьыс торйӧн.
Медводзын мунысьыслы тшӧктіс: «Менам Исав вокӧй кор паныдасяс тэкӧд да юалас, кодлӧн тэ, кытчӧ мунан да кодлӧн тайӧ пемӧсъясыс, сэк шу: 
“Тэнад Яков кесйӧглӧн.
Сійӧ ыстӧ козин тэныд, аслас Исав ыджыдлы.
Ачыс Яков локтӧ миян бӧрся”».
Тадзи шуны тшӧктіс быдӧнлы, коді пемӧсъясӧс вӧтлігас паныдасяс Исавкӧд. Нӧшта тшӧктіс шуны, мый сылӧн Яков кесйӧгыс на бӧрся локтӧ.
Ӧд Яков кӧсйис ас водзвылас ыстӧм козиннас небзьӧдны Исавлысь сьӧлӧмсӧ. Яков чайтіс, мый тадзи Исав сибӧдас сійӧс.
Сійӧ ыстіс козинъяссӧ водзвылас, а ачыс узьмӧдчис сувтанінас.
Войнас Яков чеччис, босьтіс кыкнан гӧтырсӧ, кыкнан кесйӧг аньсӧ, дас ӧтикнан писӧ да келӧмӧн вуджис Явок ю.
Йӧзсӧ колльӧдӧм бӧрын тшӧктіс вуджӧдны ю сайӧ став ассьыс ыж-мӧссӧ да эмбурсӧ.
Яков кольччис ӧтнас.
Войнас Кодкӧ локтіс да кыа петтӧдз вермасис Яковкӧд.
Кор аддзис, мый оз вермы Яковӧс, вартіс сылы лядьвеяс. Тадзи вермасигас дойдіс Яковлысь лядьвей сӧнсӧ.
Сэсся шуис Яковлы: «Лэдз Менӧ, ӧд кыа нин петӧ».
Яков шуис: «Ог лэдз, кытчӧдз он бурси менӧ».
Мӧдыс юаліс: «Мый тэнад нимыд?» 
«Яков», — вочавидзис Яков.
Мӧдыс шуис: «Ӧнісянь тэнад нимыд оз ло Яков, а Израиль, ӧд тэ вермасин Енкӧд да йӧзкӧд, и вермин».
Яков шуис: «Висьтав Ассьыд нимтӧ!»
Сійӧ вочавидзис: «Мыйла тэ юасян Менсьым нимӧс? [Сійӧ шензьӧдана.]»
Сэсся бурсиис Яковӧс сэні.
Яков шуис: «Аслам синмӧн Енмӧс аддзылі и ловйӧн коли». Та вӧсна нимтіс тайӧ местасӧ Пенуэлӧн.
Кыпӧдчис шонді. Яков муніс Пенуэлсянь чотігтырйи.
Израиль войтыр ӧнӧдз оз сёйны лядьвей сӧнсӧ, ӧд Вермасьысь вартіс сэтчӧ Яковлы.
Яков видзӧдліс да аддзис: со локтӧ Исав [вокыс] нёльсё морткӧд.
Ассьыс ныв-писӧ мамъясныскӧд Яков юкис нёль пельӧ.
Медводдзаясӧн мунны сувтӧдіс кесйӧг аньясӧс пияныскӧд, на бӧрся Лияӧс ныв-пиыскӧд, а Ракельӧс да Ӧсипӧс сувтӧдіс медбӧрӧ.
Ачыс муніс ставсьыс медводзын. Вокыс дінӧ матыстчигӧн муӧдзыс копыртчыліс сылы сизимысь.
Исав котӧртіс сылы воча, кутліс сійӧс, топӧдіс морӧс бердас да окаліс. Найӧ кыкнанныс бӧрдісны.
Аньясӧс да челядьӧс аддзӧм бӧрын Исав юаліс: «Кодъяс тайӧ тэнад?»
Яков вочавидзис: «Менам челядьӧй, кодъясӧс Ен сетіс меным, тэнад кесйӧглы».
Сэки матыстчисны кесйӧг аньяс асланыс челядькӧд да копыртчылісны Исавлы.
Сэсся матыстчис Лия аслас челядьыскӧд да тшӧтш копыртчыліс.
На бӧрся матыстчисны да копыртчылісны Ӧсип да Ракель.
Исав юаліс: «Чукӧр бӧрся чукӧр меным воча локтісны пемӧсъясыд. Мыйла тэ ыстін найӧс?»
Яков шуис: «Медым тэ вӧлін бур сьӧлӧма ме дінӧ, ыджыдӧй».
Исав шуис: «Вокӧй, аслыд коль. Менам ставыс эм».
«Ог, — шуис Яков. — Ло бур сьӧлӧма ме дінӧ да сибӧд менсьым козинӧс. Ме локті тэ водзӧ, кыдзи Ен водзӧ локтӧны, и тэ бура сибӧдін менӧ.
Босьт менсьым козинӧс. Енмыс меным уна сетіс, менам ставыс эм».
Яков ёна корис Исавӧс босьтны козинъяссӧ, и сійӧ босьтіс. Исав шуис: «Мӧдӧдчамӧй.
Ме водзвылад муна».
Яков шуис сылы: «Ыджыдӧй, тэ тӧдан, мый челядьӧй нэриникӧсь. А ыжъясӧй да мӧсъясӧй вайсялӧм бӧраныс лысьтанаӧсь. Лунтыр кӧ тэрмӧдлӧмӧн вӧтлан найӧс, ставныс куласны.
Ыджыдӧй, тэ миян водзын мун, а ме, тэнад кесйӧг, тэ бӧрся ньӧжйӧник вӧтча, кыдзи менам ыж-мӧскӧй да ныв-пиӧй вермасны муннысӧ. Сэсся локта Сеир керӧсвыв муӧ тэ дінӧ, ыджыдӧй».
Исав шуис: «Коля тэ дінӧ ассьым некымын мортӧс».
Яков шуис: «Оз ков!
Меным тырмана, мый тэ бур сьӧлӧма ме дінӧ, ыджыдӧй!»
Сійӧ жӧ лунӧ Исав мӧдӧдчис аслас туйӧд Сеир керӧсвыв муӧ.
Яков мӧдӧдчис Суккотӧ. Сэтчӧ воӧм бӧрын лэптіс аслыс керка, а ыж-мӧскыслы вӧчаліс лэбувъяс.
Та вӧсна нимтіс тайӧ местасӧ Суккотӧн.
Месопотамияысь бура воӧдчӧм бӧрын Яков локтіс Ханаан муӧ, Сикем карӧ, да сувтӧдіс чомсӧ кар бокӧ.
Сикем вокъяслысь, Хамор пиянлысь, сійӧ ньӧбис эзысь вылӧ видз-му да сувтӧдіс сэтчӧ ассьыс чомсӧ.
Яков лэптіс сэтчӧ тшӧтш висьпуктанін да шыасис Израильлӧн Господь Ен дінӧ.
Ӧтчыд Яковлӧн да Лиялӧн Дина нылыс муніс аддзысьны сикемса нывъяскӧд.
Динаӧс аддзис Хаморлӧн Сикем пиыс. Хамор вӧлі Ханаан муын олысь хивей войтырлӧн ӧксы. Сикем мырдӧн босьтіс Динаӧс да узис сыкӧд.
Сикемӧс кутіс кыскыны Яковлӧн Дина нылыс дінӧ. Дина лои муса Сикемлы, и сійӧ зілис бурасьны Динакӧд.
Хамор батьыслы Сикем шуис: «Корав тайӧ нывсӧ меным гӧтырӧ».
Яковлы висьталісны, мый Хаморлӧн пиыс янӧдӧма сылысь Дина нывсӧ. Но сійӧ нинӧм эз кут вӧчны, а виччысис, кор пияныс локтасны ыж-мӧс йирсьӧданінысь.
Сикемлӧн Хамор батьыс локтіс Яков дінӧ сёрнитны.
Тайӧ кадас видз вылысь локтісны Яковлӧн пияныс. Найӧ кылісны лоӧмтор йылысь да ёна скӧрмисны, ӧд Яковлысь нывсӧ мырдӧналӧмнас — тайӧ шогмытӧмторсӧ вӧчӧмнас — Сикем янӧдіс Израильӧс.
Хамор кутіс сёрнитны: «Сикем пиӧй радейтӧ нывнытӧ.
Сетӧй сійӧс пиӧйлы гӧтырӧ.
Рӧдвужасьӧй миянкӧд, нывъястӧ миян пиян сайӧ сетӧй, а миянлысь нывъяснымӧс мед тіян пиянныд босьтасны гӧтырӧ.
Олӧй миян пӧвстын.
Тайӧ [паськыд] муыс тіян водзын, ветлӧдлӧй сэті, босьтӧй аслыныд муяс да овмӧдчӧй сэтчӧ».
Сикем шуис Диналӧн батьыслы да вокъясыслы: «Лоӧй бур сьӧлӧмаӧсь ме дінӧ, и ме сета тіянлы ставсӧ, мый коранныд.
Урчитӧй медыджыд дон да козинъяс.
Ме сета, мый коранныд, сӧмын сетӧй меным гӧтырӧ тайӧ нывсӧ».
Дина чойнысӧ янӧдӧмысь Яковлӧн пиян наяна вочавидзисны Сикемлы да сылӧн Хамор батьыслы.
Шуисны [Диналӧн Симеон да Левий вокъясыс, Лиялӧн пияныс]: «Огӧ вермӧй сетны чойнымӧс вундыштчытӧм морт сайӧ, ӧд тайӧ миянӧс янӧдӧ.
Ті кӧ лоанныд миян кодьӧсь, миян моз вундыштанныд став айуловнытӧ, сэки ми воам ӧти кывйӧ тіянкӧд [да кутам овны тіянкӧд].
Сэки кутам сетны тіян сайӧ нывъяснымӧс да ас саяным босьтны тіянлысь нывъяснытӧ. Кутам овны тіянкӧд да лоам ӧти войтырӧн.
А онӧ кӧ кывзысьӧй да онӧ вундыштчӧй, ми босьтам чойнымӧс да мунам».
Татшӧм вӧзйӧмыс кажитчис Хаморлы да сылӧн Сикем пиыслы.
Том зон пырысьтӧм-пыр кӧсйысис, ӧд сылы муса вӧлі Яковлӧн нылыс.
Сикем вӧлі бать керкаас медся пыдди пуктанаӧн.
Хамор батьыскӧд сійӧ муніс карса дзиръя дорӧ. Сэні найӧ сёрнитісны карса олысьяскӧд да шуисны:
«Тайӧ йӧзыс миянкӧд вӧліны бурӧсь.
Мед овмӧдчасны миян муӧ да ветлӧдласны сэті, ӧд муным паськыд.
Налысь нывъяссӧ ми кутам босьтны гӧтырӧ, а нывъяснымӧс кутам сетны налӧн пиян сайӧ.
Найӧ кӧсйысисны овны миян пӧвстын да лоны ӧти войтырӧн, миян кӧ став айуловыс на моз вундыштчас. Ми кӧ вӧчам на ног, найӧ кутасны овны миянкӧд.
Налӧн ыж-мӧсныс да эмбурныс тшӧтш лоӧ миян».
Тыр арлыда став айуловыс кывзысисны Хаморлысь да Сикем пиыслысь да вундыштчисны.
Коймӧд луннас, кор ставныс куйлісны эбӧстӧг, Яковлӧн Симеон да Левий пияныс, Диналӧн вокъясыс, босьтісны шыпуртнысӧ, повтӧг пырисны карас да виалісны став айуловсӧ.
Хаморӧс да Сикем писӧ бытшкисны шыпуртӧн.
Динаӧс босьтісны Сикем керкаысь да петісны карсьыс.
Сэсся Яковлӧн пияныс бӧр локтісны да петкӧдісны карсьыс став озырлунсӧ. Тадзи найӧ вӧчисны Дина чойнысӧ янӧдӧм вӧсна.
Найӧ босьтісны ыж-мӧс, осёлъяс да ставсӧ, мый вӧлі карас да видз-му вылас.
Босьтісны став озырлунсӧ, тшӧтш челядьӧс да аньясӧс. Петкӧдісны-нуисны ставсӧ, мый вӧлі [карас да] керкаясас.
Яков шуис Симеонлы да Левийлы: «Ті шогӧ уськӧдінныд менӧ. Ті вӧчинныд менӧ мустӧмӧн татчӧс олысьяслы, ханаансаяслы да перезейяслы.
Ми ӧд этшаӧнӧсь.
Найӧ кӧ чукӧртчасны миянлы паныд, сэки пасьвартасны миянӧс, бырӧдасны менӧ и гортсаӧс».
Симеон да Левий вочавидзисны: «Мыйла найӧ чойнымкӧд тадзи вӧчисны? Сійӧ ӧд абу асьсӧ вузавлысь ань!»
Ен шуис Яковлы: «Чеччы, мун Вефильӧ да овмӧдчы сэтчӧ. Сувтӧд Меным висьпуктанін, ӧд Ме петкӧдчи тэныд, кор тэ пышйин Исав воксьыд».
Яков шуис гортсаыслы да аслас йӧзлы: «Эновтчӧй мукӧд енъясысь! Сӧстӧммӧдчӧй да вежӧй паськӧмнытӧ.
Мунам Вефильӧ.
Сэні ме сувтӧда висьпуктанін Енлы, коді кыліс менӧ сьӧкыд кадӧ да пыр вӧлі мекӧд [и видзис менӧ] ветліг-мунігъясӧ».
Йӧзыс ваялісны вӧчӧм енъяссӧ да пельсьыныс перъялӧм исерганысӧ Яковлы. Ставсӧ тайӧс Яков гуаліс сикемдорса тупу улӧ. 
[Эз висьтав некодлы, и весиг ӧніӧдз оз тӧдны, кӧні тайӧ ставыс.]
Найӧ [петісны Сикемысь,] мӧдӧдчисны туйӧ.
Матігӧгӧр каръясын олысьясӧс ыджыд полӧм босьтіс Енмысь, та вӧсна Яковлысь пиянсӧ эз вӧтӧдны.
Яков аслас йӧзыскӧд воис ханаанса Лузӧ, мӧд ногӧн кӧ, Вефильӧ. Сэтчӧ лэптіс висьпуктанін да нимтіс тайӧ местасӧ Эл-Бетэльӧн. Ӧд сэні Исав воксьыс пышйигас сылы петкӧдчис Ен.
Ревеккалӧн Девора вердысь-видзысьыс кувсис, и сійӧс гуалісны Вефиль дорын тупу улӧ. Тупусӧ Яков нимтіс Бӧрдан тупуӧн.
Месопотамияысь локтӧм бӧрын [Лузын] Яковлы бара петкӧдчис Ен да бурсиис сійӧс.
Ен шуис сылы: «Тэнад нимыд Яков, но талунсянь он Яковӧн кут шусьыны, а тэнад нимыд лоӧ Израиль».
Тадзи Ен пуктіс сылы Израиль ним.
Нӧшта Ен шуис сылы: — Ме — Ставсӧвермысь Ен.
Рӧдмы-чужтысь, тэсянь петасны войтыръяс, тэсянь чужасны ӧксыяс.
Мусӧ, мый Ме кӧсйыси сетны Ӧвраамлы да Исааклы, Ме сета тэныд да тэсянь чужысьяслы.
Ен кыпӧдчис сэтысь, кӧні сёрнитіс Яковкӧд. 
Яков сувтӧдіс сэтчӧ из, кисьтіс из вылас вина вись да олив вый. Енкӧд сёрнитанінсӧ Яков нимтіс Вефильӧн.
Сэсся найӧ мунісны Вефильысь.
[Эдер башня сайӧ Яков сувтӧдіс чомсӧ.] 
Епрафаӧ вотӧдз туй костас Ракель кутіс сьӧкыда чужтыны.
Ракельлӧн мырсигӧн гӧгиньыс шуис сылы: «Эн пов, тэнад бара на пи».
Кор Ракель вӧлі куланвыйын, сійӧ пуктіс пиыслы Бенони ним.
Но батьыс сійӧс Веняминӧн* шуис.
Ракель куліс. Сійӧс дзебисны Виплием-Епрафаӧ мунан туй бокӧ.
Ракельлӧн гу вылӧ Яков пуктіс казьтылан из.
Сійӧ ӧнӧдз сэні сулалӧ.
Израиль* муніс сэтысь да паськӧдіс ассьыс чомсӧ Эдер башня сайӧ.
Тайӧ муас Израильлӧн олігӧн Рувим узис батьыслӧн Валла кесйӧг-гӧтыркӧд.
Та йылысь кыліс Израиль [да скӧрмис]. 
Яковлӧн вӧлі дас кык пи.
Лиялӧн пияныс вӧліны Рувим, Симеон, Левий, Иуда, Иссакар да Завулон. Рувим вӧлі Яковлӧн медводдза пиыс.
Ракельлӧн пияныс вӧліны Ӧсип да Венямин.
Ракельлӧн Валла кесйӧг аньыс чужтіс Дан да Неффалим пиянӧс.
Лиялӧн Зелфа кесйӧг аньыс чужтіс Гад да Асир пиянӧс.
Яковлӧн став тайӧ пияныс чужисны Месопотамияын.
Яков локтіс аслас Исаак бать дінӧ Мамреӧ, тайӧ Киръят-Арбаын, ӧнія Хеврон карын [Ханаан муын]. Сэні коркӧ оліс Ӧвраам, сэсся оліс Исаак.
Исаак оліс сё кӧкъямысдас арӧсӧдз.
Сійӧ куліс пӧрысь кадӧ, олӧмнас пӧтӧмаӧн вуджис батьясыс дінӧ.
Исав да Яков пияныс дзебисны сійӧс.
Исавлӧн рӧд йылысь. Исавлӧн мӧд нимыс — Эдом.
Сійӧ босьтіс гӧтырӧ ханаанса нывъясысь Адаӧс да Охоливамаӧс. Ада вӧлі хеттей Элонлӧн нылыс, а Охоливама — хивей Цивеонлӧн Ан пилӧн нылыс. Исав нӧшта босьтіс гӧтырӧ Измаиллысь Васемата нывсӧ, Невайотлысь чойсӧ.
Исавлы Ада чужтіс Элифазӧс, Васемата чужтіс Регуэлӧс. Охоливама чужтіс Еушӧс, Яламӧс да Корейӧс.
Тайӧ Исавлӧн пияныс, кодъяс чужисны Ханаан муын.
Исав босьтіс гӧтыръяссӧ, ныв-писӧ, гортсьыс став йӧзсӧ, став ыж-мӧссӧ, став овмӧссӧ, мый нажӧвитіс Ханаан муын, да мӧдӧдчис Яков вок дінсьыс мӧд муӧ. Вокъяслӧн овмӧсныс вӧлі зэв ыджыд, та вӧсна ӧтлаын овны лои дзескыд. Ыж-мӧсныс эз нин тӧрны налӧн оланінас.
Исав, мӧд ногӧн кӧ, Эдом, овмӧдчис Сеир керӧсвыв муӧ.
Исав — Сеир керӧсвыв муын олысь эдом войтырлӧн бать.
Исав пиянлӧн нимъясыс: Элифаз — Исавлӧн Ада гӧтырлӧн пиыс, Регуэл — Исавлӧн Васемата гӧтырлӧн пиыс.
Элифазлӧн пияныс: Теман, Омар, Цефо, Гатам да Кеназ.
Элифазлӧн Тимна нима кесйӧг-гӧтырыс чужтіс сылы Амаликӧс.
Тайӧ вӧліны Исавлӧн Ада гӧтырсянь чужысьяс.
Регуэллӧн вӧліны Нахат, Зерах, Шаммей да Миззай пиян.
Тайӧ вӧліны Исавлӧн Васемата гӧтырсянь чужысьяс.
Исавлӧн Охоливама гӧтырыс, Цивеон Анлӧн нылыс, чужтіс сылы Еуш, Ялам да Корей пиянӧс.
Исавсянь чужысьяс йылысь. 
Исавлӧн медводдза пиыс вӧлі Элифаз. Элифазсянь Эдом муын чужисны Теманлӧн, Омарлӧн, Цефолӧн, Кеназлӧн, Корейлӧн, Гатамлӧн да Амаликлӧн чужанкотыръяс.
Тайӧ вӧліны Исавлӧн Ада гӧтырсянь чужысьяс.
Исавлӧн Регуэл писянь Эдом муын чужисны Нахатлӧн, Зерахлӧн, Шаммейлӧн да Миззайлӧн чужанкотыръяс.
Тайӧ вӧліны Исавлӧн Васемата гӧтырсянь чужысьяс.
Исавлӧн Охоливама гӧтырсянь, Ан нывсянь, чужисны Еушлӧн, Яламлӧн да Корейлӧн чужанкотыръяс.
Тайӧ Исавлӧн, мӧд ногӧн кӧ, Эдомлӧн, пияныс да эдомса чужанкотыръяслӧн юралысьяс.
Со, хори войтырысь Сеирлӧн пияныс, кодъяс олісны Эдом муын: Лотан, Шовал, Цивеон, Ан, Дишон, Эцер да Дишан. 
Тайӧ хори чужанкотыръяслӧн юралысьяс, Сеирсянь чужысьяс.
Лотанлӧн вӧліны Хори да Геман пиян.
Лотанлӧн вӧлі Тимна нима чой.
Шоваллӧн вӧліны Алван, Манахат, Эвал, Шефо да Онам пиян.
Цивеонлӧн вӧліны Аей да Ан пиян.
Буретш тайӧ Аныс аслас Цивеон батьыслысь осёлъяссӧ видзигӧн овтӧминысь аддзис пӧсь ва петанінъяс.
Анлӧн вӧлі Дишон пи да Охоливама ныв.
Дишонлӧн вӧліны Хемдан, Эшбан, Итран да Керан пиян.
Эцерлӧн вӧліны Билган, Заван [да Укам] да Акан пиян.
Дишанлӧн вӧліны Уц да Аран пиян.
Сеир муын хори чужанкотыръяслӧн юралысьяс: Лотан, Шовал, Цивеон, Ан, Дишон, Эцер да Дишан.
Израиль войтырлӧн ӧксыясӧдз Эдом муын вӧліны нин ӧксыяс. Медводдза ӧксыӧн Эдом муын вӧлі Веорлӧн Белай пиыс, коді юраліс Дингава карын.
Сэсся Белай кулӧм бӧрын кутіс ӧксыавны Восораысь Зерахлӧн Иовав пиыс.
Иовав кулӧм бӧрын пуксис ӧксыавны Теман муысь Хушам.
Хушам кулӧм бӧрын пуксис ӧксыавны Бедадлӧн Хадад пиыс, коді Моав ласта вылын вермис мадиансаясӧс.
Сійӧ юраліс Авит карын.
Хадад кулӧм бӧрын пуксис ӧксыавны Масрекаысь Самла.
Самла кулӧм бӧрын пуксис ӧксыавны юбердса Реховотысь Саул.
Саул кулӧм бӧрын пуксис ӧксыавны Акборлӧн Баал-Ханан пиыс.
Баал-Ханан кулӧм бӧрын пуксис ӧксыавны Хадад [Варадлӧн пиыс]. 
Сійӧ ӧксыаліс Пау карын.
Сылӧн гӧтырыс вӧлі Матредлӧн Мегетавель нылыс, а Матред вӧлі Мезагавлӧн нылыс.
Чужанкотыр да оланін серти Исавсянь чужысьяслӧн нимъясыс: Тимней, Алвей, Етет, Охоливам, Элай, Пинон, Кеназ, Теман, Мивсар, Магдиэл да Ирам.
Тайӧ эдомса чужанкотыръяслӧн юралысьяс оланін сертиныс.
Исав вӧлі эдом войтырлӧн бать.
Яков оліс Ханаан муын, кӧні коркӧ сылӧн батьыс оліс локтысь морт моз.
Яков да сысянь чужысьяс йылысь.
Кор Ӧсиплы вӧлі дас сизим арӧс, сійӧ видзис [батьыслысь] ыжъяссӧ ӧтлаын вокъясыскӧд, Валлалӧн да Зелфалӧн пиянкӧд. Валла да Зелфа вӧліны батьыслӧн гӧтыръяс.
Вокъясыслӧн лёк вӧчӧм йылысь Ӧсип висьтавліс батьныслы.
Израиль радейтіс Ӧсипӧс мукӧд пиянсьыс ёнджыка, ӧд сійӧ чужис сылӧн пӧрысь кадӧ. Батьыс козьналіс Ӧсиплы уна рӧма кузь дӧрӧм.
Вокъяс аддзисны, мый батьныслы Ӧсип мусаджык на дорысь, да кутісны мустӧмтны сійӧс, весиг лӧгпырысь сёрнитісны сыкӧд.
Ӧсип аддзыліс вӧт да висьталіс сійӧс вокъясыслы.
Таысь найӧ ёнджыка на кутісны мустӧмтны сійӧс.
«Кывзӧй, — висьталіс налы Ӧсип. — Ме вӧтаси, ми быттьӧ кӧртавлам кольтаяс вундӧм му вылын.
Сэсся менам кольтаӧй сувтіс, а тіян кольтаясныд сувталісны гӧгӧрыс да копыртчылісны менам кольталы».
Вокъяс шуисны: «Тэ ӧмӧй лоан миян ӧксыӧн?
Збыль ӧмӧй тэ кутан ыджыдавны миян вылын?»
Ӧсиплӧн вӧтъясысь да сёрниысь найӧ нӧшта на ёнджыка пондісны мустӧмтны сійӧс.
Ӧсип бара вӧталіс да висьталіс [батьыслы да] вокъясыслы: «Ме нӧшта аддзылі вӧт. Шонді, тӧлысь да дас ӧти кодзув копыртчылісны меным».
Кор сійӧ висьталіс тайӧс батьыслы да вокъясыслы, батьыс видыштіс сійӧс: «Мыйсяма вӧтъяс тэ вӧталан?
Меным, мамыдлы да вокъясыдлы ӧмӧй ковмас локны да муӧдз копыртчыны тэныд?»
Вокъяс лӧгалісны Ӧсип вылӧ, а батьыс сьӧлӧмас босьтіс сылысь висьталӧмсӧ.
Ӧтчыд Ӧсиплӧн вокъясыс мунісны Сикемӧ йирсьӧдны батьныслысь ыжъяссӧ.
Израиль шуис Ӧсиплы: «Вокъясыд Сикемын йирсьӧдӧны ыжъясӧс.
Ветлы на дінӧ».
«Ветла», — вочавидзис батьыслы Ӧсип.
Израиль шуис сылы: «Мун да видзӧдлы, дзоньвидзаӧсь-ӧ тэнад вокъясыд да ставыс-ӧ бур ыжъяскӧд. Сэсся лок да висьтав меным».
Ӧсип мӧдӧдчис Хеврон ковтыссянь да воис Сикемӧ.
Кор Ӧсип кытшлаліс видзьяс вывті, сійӧс аддзис кутшӧмкӧ морт да юаліс: «Мый тэ корсян?»
Ӧсип шуис: «Ме корся ассьым вокъясӧс.
Висьтав, кӧні найӧ йирсьӧдӧны ыжъяссӧ?»
Сійӧ вочавидзис: «Найӧ татысь мунісны. Ме кывлі налысь сёрнисӧ, найӧ кӧсйисны мунны Дотанӧ».
Ӧсип муніс вокъясыс бӧрся да аддзис найӧс Дотанысь.
Вокъяс ылісянь аддзисны Ӧсипӧс да кутісны ӧта-мӧдныскӧд сёрнитны сійӧс виӧм йылысь.
Ӧта-мӧдныслы шуисны: «Со локтӧ вӧтъяс вӧталысьыд!
Мунамӧй, виам сійӧс да шыбитам юкмӧсӧ. Гортаным висьталам, мый лёк звер сійӧс косявліс.
Сэки видзӧдлам, инасны оз сылӧн вӧтъясыс».
Та йылысь кыліс Рувим вокыс да Ӧсипӧс мездӧм могысь шуис: «Огӧ виӧй. Энӧ кисьтӧй вир.
Шыбитӧй сійӧс овтӧминса косьмӧм юкмӧсӧ, но энӧ виӧй».
Тадзи шуис, ӧд кӧсйис мездыны Ӧсипӧс налӧн киысь да бӧр мӧдӧдны батьыс дінӧ.
Кор Ӧсип матыстчис вокъясыс дінӧ, найӧ пӧрччӧдісны сы вылысь батьӧн козьналӧм дӧрӧмсӧ. Сэсся шыбитісны Ӧсипӧс юкмӧсӧ.
Юкмӧсыс вӧлі куш, ваыс сэні эз вӧв.
Сёйны пуксиганыс вокъяс аддзисны, мый налань локтӧны верблюдъяс. Тайӧ измаил войтыр нуисны Галаадсянь Египетӧ чӧскыд дука сиръяс, мавтасъяс да ладан.
Иуда сэк шуис вокъясыслы: «Мый бурыс миянлы сыысь, ми кӧ вокнымӧс виам, а вир кисьтӧмсӧ гусьӧн видзны кутам?
Вай вузаламӧй Ӧсипӧс тайӧ локтысьясыслы. Мыйла миянлы мыжмыны вир кисьтӧмысь? Ӧд ми ӧти вирсянь, и сійӧ миян вок».
Вокъяс кывзысисны Иудалысь. Кор мадианса вузасьысьяс матыстчисны Ӧсиплӧн вокъяс дінӧ, найӧ кыскисны Ӧсипӧс юкмӧсысь да вузалісны сійӧс кызь сикель эзысьысь.
Ӧсипӧс нуисны Египетӧ.
Кор Рувим локтіс юкмӧс дорӧ да аддзис, мый Ӧсип вокыс абу сэні, косяліс ассьыс паськӧмсӧ.* Сэсся муніс вокъясыс дінӧ да шуис: «Зонмыд абу! Мый меным вӧчны?»
Ӧсиплысь дӧрӧмсӧ вокъяс вирӧсьтісны начкӧм кӧза вирӧн да вайисны батьыслы. Найӧ шуисны: «Ми аддзим тайӧ дӧрӧмсӧ.
Видзӧдлы, пиыдлӧн-ӧ сійӧ?»
Сійӧ тӧдіс да шуис: «Тайӧ ӧд пиӧйлӧн дӧрӧмыс!
Лёк звер тай сійӧс сёйӧма!
Збыльысь тай Ӧсипӧс чашйӧма!»
Яков косяліс паськӧмсӧ да гартыштіс коскас чорыд дӧра. Уна лун чӧж сійӧ бӧрдіс пиыс вӧсна.
Ныв-пиыс чукӧртчисны бурӧдны сійӧс, но сійӧ эз сибӧд бурӧдӧмсӧ, а шуис: «Шог сьӧлӧмӧн ме вуджа кулӧмаяслӧн оланінӧ пиӧй дінӧ».
Тадзи бӧрдіс батьыс Ӧсип вӧсна.
Египетын мадиансаяс вузалісны Ӧсипӧс фараонлӧн ыджыд чина мортлы — Потифарлы, фараонӧс видзысьясӧн веськӧдлысьлы.
Сійӧ кадас Иуда торйӧдчис аслас вокъясысь да овмӧдчис Адулламӧ Хир нима морт дінӧ.
Иуда аддзис сэтысь Шуай нима ханаанса мортлысь нылӧс, босьтіс сійӧс гӧтырӧ да узис сыкӧд.
Гӧтырыс кынӧмасис да чужтіс пиӧс.
Иуда пуктіс пиыслы Ир ним.
Ань бара кынӧмасис да чужтіс пиӧс, пуктіс сылы Онан ним.
Нӧшта чужтіс пиӧс да пуктіс сылы Шелай ним.
Иуда сэк вӧлі Кезивын, кор пиыс чужис.
Ирлы, аслас медводдза пилы, Иуда бӧрйис Фамар нима гӧтырӧс.
Ир эз вӧв шогмана Господьлы, и Господь бырӧдіс сійӧс.
Иуда шуис Онанлы: «Босьт вокыдлысь дӧвасӧ гӧтырӧ. Узь сыкӧд, мед тэсянь чужас вокыдлы пи».
Онан тӧдіс, мый пиыс оз сылӧн ло. Та вӧсна вок гӧтырыскӧд узигӧн сійӧ кисьтліс кӧйдыссӧ му вылӧ, медым эз ло вокыслы пиыс.
Господьлӧн син водзын тайӧ вӧлі лёк вӧчӧмӧн, и та вӧсна Онан куліс.
Господь бырӧдіс сійӧс.
Иуда шуис Фамар моньыслы: «Мун овны дӧваӧн бать керкаад да виччысь Шелай пиӧйлысь быдмӧмсӧ».
Шуис тадзи, ӧд поліс, мый Шелай вокъясыс моз кулас.
Фамар бӧр муніс овны бать ордас.
Дыр кад мысти куліс Иудалӧн гӧтырыс, Шуайлӧн нылыс.
Бӧрдан лунъяс бӧрын Иуда мӧдӧдчис адулламса Хир ёртыскӧд Тимнаӧ, кӧні шырисны сылысь ыжъяссӧ.
Фамарлы висьталісны, тэнад айкаыд пӧ локтӧ Тимнаӧ шырны ассьыс ыжъяссӧ.
Сэки Фамар пӧрччис дӧва паськӧмсӧ, вевттис чужӧмсӧ да гартыштчис дӧраӧн. Сэсся муніс Тимнаӧ мунан туйӧд Энаим сиктлань да пуксис сэтчӧс дзиръя дорӧ.
Фамар тӧдіс, мый Шелай быдмӧма нин, но гӧтырӧ мыйлакӧ сійӧс пыр на эз босьтны.
Иуда аддзис Фамарӧс, но эз тӧд, чайтіс сійӧс кырсалысь аньӧн, чужӧмсӧ вӧлі тупкӧма да.
Иуда матыстчис ань дінӧ да шуис: «Ме кӧсъя тэкӧд талун узьны».
Ӧд эз тӧд ассьыс моньсӧ.
Мӧдыс юаліс: «Узя кӧ тэкӧд, мый сетан меным?»
Иуда вочавидзис: «Ме мӧдӧда тэныд аслам пемӧс чукӧрысь кӧзапиӧс».
Ань шуис: «Сет меным водзӧсӧн мыйкӧ, кытчӧдз он мӧдӧд».
Иуда юаліс: «Мый тэныд сетны водзӧсӧн?»
Ань шуис: «Ассьыд печатьтӧ, мый кӧв йылын, да ассьыд бедьтӧ, мый киад».
Иуда сетіс да узис анькӧд, и ань кынӧмасис.
Фамар чеччис да муніс, пӧрччис дӧрасӧ да бӧр пасьталіс дӧва паськӧмсӧ.
Иуда аслас адулламса ёртыслы тшӧктіс нуны аньлы кӧзапиӧс да бӧр босьтны аньлысь сійӧ, мый кольліс. Но аньӧс сійӧ эз аддзы да кутіс юасьны сэтчӧс олысьяслысь: «Кӧні нӧ кырсалысь аньыс, коді пукаліс Энаим сиктса туй бокын?»
Сылы вочавидзисны: «Некутшӧм кырсалысь ань тані эз вӧвлы».
Хир бӧр локтіс Иуда дінӧ да шуис: «Ме эг аддзы сійӧс.
Сэтчӧс олысьяс шуисны, эз пӧ вӧвлы тані некутшӧм кырсалысь ань».
Иуда шуис: «Мед аслыс кольӧдӧ менсьым печатьӧс да беддьӧс. Сӧмын мед миянӧс серамвыв эз лэптыны.
Ме ӧд мӧдӧдлі кӧзапи, а тэ эн аддзы аньсӧ».
Коли тӧлысь куим. Иудалы висьталісны, мый сылӧн Фамар моньыс кырсалӧма да кынӧмасьӧма.
Иуда шуис: «Петкӧдӧй сійӧс да сотӧй».
Но кор сійӧс петкӧдісны сотны, сійӧ тшӧктіс висьтавны аслас айкалы: «Ме кынӧма сійӧ мортсянь, кодлӧн тайӧ печатьыс, кӧвйыс да беддьыс.
Тӧдмав, кодлӧн тайӧ».
Иуда тӧдіс да шуис: «Сійӧ ме дорысь веськыда вӧчис, ӧд ме эг сет сійӧс Шелай пиӧйлы».
Сэсся Иуда эз нин узьлы Фамаркӧд.
Чужтігас тыдовтчис, мый Фамарлӧн кык кага.
Медводз мыччысис ӧтиыслӧн киыс.
Гӧгиньыс кӧрталіс сылы киас гӧрд сунис да шуис: «Тайӧыс петіс медводдзаӧн».
Но кагаыс кисӧ бӧр кыскис, да сы пыдди петіс сылӧн вокыс.
Гӧгиньыс шуис: «Кыдзи тэ вермин писькӧдчынысӧ?»
Та вӧсна сылы Парес ним пуктісны.
Сэсся петіс гӧрд суниса вокыс.
Сылы Зерах ним пуктісны.
Измаил войтырысь вузасьысьяс вайӧдісны Ӧсипӧс Египетӧ. Сэні сійӧс ньӧбис египетса Потифар, фараонлӧн ыджыд чина морт, фараонӧс видзысьясӧн веськӧдлысь.
Господь вӧлі Ӧсипкӧд, та вӧсна сылӧн ставыс артмис.
Ӧсип оліс аслас ыджыдыслӧн керкаын, и ыджыдыс аддзис, мый Господь Ӧсипкӧд да бурсиӧ сылысь став уджсӧ.
Ӧсип бура кесъяліс ыджыдыслы, та вӧсна воис сылы сьӧлӧм вылас.
Ыджыдыс пуктіс сійӧс веськӧдлыны аслас керкаӧн да став эмбурсӧ сетіс сы киӧ.
Сійӧ кадсяньыс Господь бурсиис египетсалысь керкасӧ Ӧсип вӧсна. Господьлӧн бурсиӧм улын вӧлі ставыс: керка-йӧрыс и видз-муыс.
Ыджыдыс сетіс ставсӧ Ӧсип киӧ, сылы аслыс коли сӧмын сёйны-юны.
Чужӧм-мыгӧрнас Ӧсип вӧлі мича.
Потифар ыджыдлӧн гӧтырыс чӧвтіс синсӧ Ӧсип вылӧ. Сійӧ шуис Ӧсиплы: «Узь мекӧд».
Но Ӧсип эз сетчы, а шуис сылы: «Менам ыджыдӧй ставсӧ, мый сылӧн эм, сетіс менам киӧ, и сылы аслас керкаын нинӧм вӧсна тӧждысьны оз ков.
Меысь ыджыдыс тайӧ керкаас абу.
Ставыс менам киын — тэысь кындзи, ӧд тэ сылӧн гӧтыр.
Ме ог кӧсйы вӧчны тайӧ ыджыд лёкторсӧ да мыжсӧ Енлы паныд».
Быд лун ань корис Ӧсипӧс узьны сыкӧд, но Ӧсип эз кывзысь сылысь. Ӧтчыд, кор Ӧсип пырис керкаӧ уджавны, ыджыдыслӧн гӧтырыс кындзи сэні некод эз вӧв.
Ань шашаритчис Ӧсиплы паськӧмас да шуис: «Вод мекӧд».
Но Ӧсип котӧрӧн петіс сэтысь, а паськӧмыс аньлы киас колис.
Ань аддзис, мый Ӧсиплӧн паськӧмыс сылӧн киас, а Ӧсип пышйӧма. Ань чукӧстіс кесйӧгъяссӧ: «Видзӧдлӧй, верӧсӧй босьтіс еврейӧс, а ӧні сійӧ тешитчӧ миян вылын.
Сійӧ локтіс ме дінӧ, кӧсйис узьны мекӧд, но ме куті горзыны, и сійӧ менам горзӧмысь котӧрӧн пышйис, весиг ассьыс паськӧмсӧ колис».
Верӧсыс локтӧдз ань видзис ас ордас Ӧсиплысь паськӧмсӧ.
Сэсся висьталіс верӧсыслы: «Еврей кесйӧгыд, кодӧс тэ вайӧдін миян ордӧ, воліс менӧ янӧдны. [Шуис меным, вода пӧ тэкӧд.] Но кор ме куті горзыны, сійӧ пышйис, весиг ассьыс паськӧмсӧ колис».
Ӧсиплӧн ыджыдыс кор кыліс, мый Ӧсип вӧчӧма сылӧн гӧтырыслы, пузис лёкысла.
Сійӧ пуксьӧдіс Ӧсипӧс дзескыдінӧ. Тайӧ дзескыдінас пуксьӧдлісны ӧксы керкаысь йӧзӧс.
Ӧсип пукаліс дзескыдінын, но Господь вӧлі сыкӧд. Господь вӧлі бур сьӧлӧма Ӧсип дінӧ, та вӧсна дзескыдінса юралысьлы Ӧсип воис сьӧлӧм вылас.
Юралысь пуктіс Ӧсипӧс видзӧдны пукалысьяс бӧрся да кывкутны дзескыдінын став удж вӧснаыс.
Дзескыдінса юралысь эз тӧждысь нинӧм вӧсна, мый вӧлі сетӧма Ӧсип киӧ, ӧд Господь вӧлі Ӧсипкӧд да бурсиис сылысь став уджсӧ.
Кад мысти асланыс ыджыд водзын мыжмисны египетса ӧксылӧн медыджыд вина кисьталысь да медыджыд нянь пӧжалысь.
Фараон, египетса ӧксы, скӧрмис на вылӧ да тшӧктіс йӧртны дзескыдінӧ, кӧні пукаліс Ӧсип. Тайӧ дзескыдіныс вӧлі фараонӧс видзысьясӧн веськӧдлысьлӧн керка помын.
Фараонӧс видзысьясӧн веськӧдлысь пуктіс Ӧсипӧс кесъявны налы.
Мыйтакӧ кад кольӧм бӧрын египетса ӧксылӧн вина кисьталысь да нянь пӧжалысь вӧт вӧталісны. Ӧти войӧ кыкнанныслӧн вӧлі аслыспӧлӧс вӧт.
Асывводзнас Ӧсип локтіс на дінӧ да аддзис, мый найӧ шӧйӧвошӧмаӧсь.
«Мыйкӧ ті талун шог чужӧмаӧсь?» — юаліс Ӧсип фараонлӧн ыджыд чинаяслысь, кодъяс пукалісны ыджыдыслӧн керка помын дзескыдінас.
Найӧ вочавидзисны: «Ми вӧт вӧталім, а гӧгӧрвоӧдысьыс абу».
Ӧсип шуис налы: «Енмыс гӧгӧрвоӧдас вӧтъяснытӧ.
Висьталӧй меным».
Вина кисьталысь висьталіс ассьыс вӧтсӧ: «Ме вӧталі виноград пу, куим вожаӧс.
Коръясыс потісны, сэсся пуыс дзоридзаліс, та бӧрын гӧрддзасис да кисьмис вотӧсыс.
Киын менам вӧлі фараонлӧн юан доз.
Ме чукӧрті вотӧссӧ, пычки фараонлӧн юан дозйӧ да сеті сылы киас».
Ӧсип шуис сылы: «Тайӧс колӧ гӧгӧрвоны тадзи.
Куим вожыс — тайӧ куим лун.
Куим лун мысти фараон кыпӧдас тэнӧ да босьтас важ удж вылад. Тэ сетан сылы киас юан дозсӧ, тадзи важ мозыс кутан кисьтавны сылы вина.
Эн вунӧд менӧ, кор тэныд бур лоӧ. Гарышт ме йылысь фараонлы. Отсав меным петны татысь. Менӧ ӧд гусялісны еврейяслӧн муысь.
Тані олігӧн ме эг вӧч сэтшӧм лёксӧ, мыйысь колӧ йӧршитны дзескыдінӧ».
Нянь пӧжалысь аддзис, мый Ӧсип бура гӧгӧрвоӧдіс вӧтсӧ, да шуис сылы: «Ме тшӧтш вӧтаси, быттьӧ менам юр вылын вӧлі куим нянь куд.
Медвылысса кудъяс вӧлі фараонлы дасьтӧм быдсяма пӧжасыс, но сэтысь ставсӧ кокалісны лэбачьяс».
Ӧсип вочавидзис: «Тайӧс колӧ гӧгӧрвоны тадзи.
Куим кудйыс — тайӧ куим лун.
Куим лун мысти фараон кыпӧдас тшӧтш тэнӧ — ӧшӧдас пу вылӧ. И лэбачьяс кокаласны тэнӧ».
Куим лун мысти аслас чужан лунӧ фараон лӧсьӧдіс гаж став чина йӧзыслы. Сылы тӧд вылас усины медыджыд вина кисьталысьыс да нянь пӧжалысьыс.
Фараон босьтіс медыджыд вина кисьталысьӧс важ удж вылас, и сійӧ бара сетлывліс фараонлы киас юан доз. Медыджыд нянь пӧжалысьӧс фараон ӧшӧдіс пу вылӧ. Ставыс лои дзик сідзи, кыдзи Ӧсип гӧгӧрвоӧдіс налы вӧтъяссӧ.
Но медыджыд вина кисьталысь вунӧдіс Ӧсипӧс.
Коли кык во. Фараон вӧтасис, быттьӧ сійӧ сулалӧ Нил ю дорын.
Юысь петісны ён да вердаса сизим мӧс, сэсся кутісны йирсьыны вадорын.
На бӧрся юысь петісны омӧлик да коньӧр сизим мӧс, сэсся сувтісны орччӧн вердаса мӧсъяскӧд.
Тайӧ омӧлик да коньӧр мӧсъясыс сёйисны ён да вердаса сизимнан мӧссӧ.
Фараон садьмис, но бара унмовсис да мӧдысь вӧтасис.
Ӧти за вылын быдмисны гырысь туся сизим бур шеп.
Быдмисны тшӧтш косьмӧм да асыв тӧлӧн кельдӧдӧм сизим шеп.
Кос шепъясыс ньылыштісны гырысь туся шепъяссӧ.
Фараон садьмис да гӧгӧрвоис, мый тайӧ вӧт.
Асывнас фараон пондіс майшасьны. Сійӧ корис египетса тӧдысьясӧс да мывкыда йӧзӧс и висьталіс налы ассьыс вӧтсӧ.
Но некод эз куж гӧгӧрвоӧдны фараонлысь вӧтсӧ.
Сэки медыджыд вина кисьталысь шуис фараонлы: «Ӧні меным тӧд вылӧ уси аслам мыжӧй.
Фараон вӧлі скӧрмӧма аслас кесйӧгъяс вылӧ, та вӧсна пуксьӧдіс менӧ да медыджыд нянь пӧжалысьӧс дзескыдінӧ, фараонӧс видзысьясӧн веськӧдлысьлӧн керкаӧ.
Ӧти войӧ ми кыкнанным вӧталім аслыспӧлӧс вӧт.
Дзескыдінын миянкӧд пукаліс том еврей, фараонӧс видзысьясӧн веськӧдлысьлӧн кесйӧг.
Ми висьталім сылы вӧтнымӧс, и сійӧ гӧгӧрвоӧдіс найӧс.
Кыдзи сійӧ висьталіс миянлы, сідзи и лоис. Ме локті важ удж вылӧ, а нянь пӧжалысьӧс ӧшӧдісны».
Фараон мӧдӧдіс Ӧсипла.
Сійӧс пырысьтӧм-пыр вайӧдісны дзескыдінысь.
Ӧсип шырсис, вежсис да локтіс фараон дінӧ.
Фараон шуис Ӧсиплы: «Некод оз вермы гӧгӧрвоӧдны менсьым вӧтӧс, а тэ йылысь ме кывлі, мый тэ кужан».
Ӧсип вочавидзис фараонлы: «Ог ме тайӧс вӧч, а Енмыс.
Сійӧ гӧгӧрвоӧдас фараонлы бур вылӧ».
Фараон висьталіс Ӧсиплы: «Ме вӧтаси, быттьӧ сулала Нил ю дорын.
Юысь петісны ён да вердаса сизим мӧс, найӧ кутісны йирсьыны вадорын.
На бӧрся юысь петісны косьмӧм, омӧлик да коньӧрсьыс-коньӧр сизим мӧс.
На кодь омӧлик мӧсъяссӧ ме эг аддзывлы став Египет пасьталаысь.
Тайӧ омӧлик да коньӧр мӧсъясыс сёйисны вердаса сизимнан мӧссӧ.
Но сёйӧм бӧраныс нинӧм эз тӧдчы. Мӧсъяс кутшӧм омӧликӧсь вӧліны, сэтшӧмӧн и колисны.
Сэсся ме садьми.
Мӧдысь вӧтаси, быттьӧ ӧти за вылын быдмисны гырысь туся сизим бур шеп.
На бӧрся быдмисны омӧль, косьмӧм да асыв тӧлӧн кельдӧдӧм сизим шеп.
Кос шепъясыс ньылыштісны бур шепъяссӧ.
Ме висьталі тайӧс тӧдысьяслы, но некод эз куж гӧгӧрвоӧднысӧ».
Ӧсип шуис фараонлы: «Фараонлӧн кыкнан вӧтыс висьталӧны ӧтитор йылысь. Енмыс юӧртіс фараонлы, мый кутас вӧчны.
Вердаса сизим мӧскыс — сизим во.
И сизим бур шептыс — тшӧтш сизим во. 
Вӧтъяслӧн вежӧртасыс ӧти.
Сизим косьмӧм да омӧлик мӧскыс, кодъяс петісны вердаса мӧсъяс бӧрся, тайӧ — сизим во. Косьмӧм да асыв тӧлӧн кельдӧдӧм сизим шептыс — сизим тшыгъялан во.
Енмыс петкӧдліс фараонлы, мый кутас вӧчны. Та йылысь ме висьталі нин.
Став Египет му пасьтала пуксьӧ сизим пӧтӧса во.
Но та бӧрын Египет муын пуксяс сизим тшыгъялан во, сэтшӧм вояс, мый весиг вунасны пӧтӧса воясыс. Тшыгъялӧмыс куштас тайӧ мусӧ, лоӧ сэтшӧм сьӧкыд, мый воддза пӧтӧса воясыс быттьӧ эз и вӧвны.
А мый фараон кыкысь вӧтасис, сідзкӧ, Енмыс збыльысь тадзи шуӧма, и регыдӧн Сійӧ ставсӧ збыльмӧдас.
Ӧні фараон мед корсяс вежӧра да мывкыда мортӧс да пуктас сійӧс веськӧдлыны став Египет муӧн.
Фараон мед индас йӧзӧс, кодъяс сизим пӧтӧса во чӧжнас чукӧртасны мувывса став быдтасысь витӧд пайсӧ.
Локтана бур воясас мед чукӧртасны каръясӧ быдсикас сёянсӧ да сетасны тӧдны та йылысь фараонлы.
Чукӧртӧм няньыс ковмас, кор Египет муӧ пуксяс сизим тшыгъялан во. Сэки египетсаяс тшыгнысла оз кувны».
Ӧсиплӧн вӧзйӧмыс кажитчис фараонлы да сылӧн чина йӧзлы.
Фараон шуис налы: «Сюрас-ӧ миянлы Ӧсип кодь мортыс, ӧд сы пытшкын Енлӧн Лов?»
Ӧсиплы фараон шуис: «Енмыс ставсӧ тайӧс восьтіс тэныд. Сідзкӧ, тэысь вежӧра да мывкыда мортыс абу.
Тэ лоан менам керка вылын ыджыднас, тэнсьыд кутас кывзысьны менам войтырӧй.
Но юралан пуклӧсыс менам, и ме тэысь ыджыдджык.
Ме пукта тэнӧ веськӧдлыны став Египет муӧн».
Фараон пӧрччис ассьыс чунькытшсӧ да чунькытшӧдіс Ӧсипӧс.
Сэсся сетіс сылы шабді паськӧм, сьыліас ӧшӧдіс зарни сикӧтш.
Фараон торйӧдіс Ӧсиплы ыджыд чина мортӧс новлӧдлан тарантас. Тшӧктіс, мед Ӧсиплӧн мунігас водзвылас горзасны: «Копыртчылӧй!»
Тадзи фараон сувтӧдіс сійӧс веськӧдлыны став Египетӧн.
Фараон шуис Ӧсиплы: «Ме фараон.
Но тэнад тшӧктытӧг Египет муын мед некод весиг жель оз бергӧд».
Фараон пуктіс Ӧсиплы Цафнат-Панеах ним, сетіс сылы гӧтырӧ Асенатаӧс, Он карысь Поти-Пер поплысь нывсӧ.
Ӧсип лӧсьӧдчис кытшовтны ставнас Египет мусӧ.
Ӧсиплы вӧлі комын арӧс, кор сійӧ кутіс кесъявны фараонлы, египетса ӧксылы.
Фараон дінысь петӧм бӧрын Ӧсип кытшовтіс ставнас Египет мусӧ.
Сизим пӧтӧса во чӧжнас муыс сетіс зэв уна нянь.
Сизим во чӧжнас Ӧсип чукӧртіс быдпӧлӧс няньсӧ, мый быдмис Египет муын. Няньсӧ Ӧсип чукӧртіс каръясӧ матігӧгӧрса видз-муяс вывсьыс.
Няньыс вӧлі унасьыс-уна, саридздор лыа мында.
Ӧсип весиг дугдіс артавнысӧ, ӧд воштіс лыдсӧ.
Тшыгъялӧм пуксьытӧдз Ӧсиплӧн чужисны кык пи, кодъясӧс сылы чужтіс Асената, Он карысь Поти-Пер поплӧн нылыс.
Медводдза пиыслы Ӧсип пуктіс Манассей ним, ӧд шуис, Енмыс пӧ сетіс вунӧдны ассьым шоглунӧс да бать керкаӧс.
Мӧдыслы пуктіс Ефрем ним, ӧд шуис, Енмыс пӧ вӧчис менӧ вотӧса пуӧн тайӧ муас, кӧні ме сьӧкыдалі.
Египет муын сизим пӧтӧса воыс коли бӧрӧ. Пуксис сизим тшыгъялан во, кыдзи висьтавліс Ӧсип.
Египетын вӧлі нянь, а мукӧд муясын вӧлі тшыгъялӧм.
Кор египетсаяс тшӧтш пондісны тшыгъявны, найӧ локтісны корны фараонлысь нянь.
Сэки фараон шуис налы: «Мунӧй Ӧсип дінӧ да вӧчӧй, мый сійӧ тшӧктас».
Кор став Египет муын йӧзыс тшыгъялісны, Ӧсип восьтіс йӧртӧдъяссӧ да кутіс вузавлыны нянь.
А тшыгъялӧмыс ӧтарӧ содіс.
Мукӧд муясысь тшӧтш волывлісны Египетӧдз, медым Ӧсип дорысь ньӧбны нянь, ӧд быдлаын йӧзыс ёна тшыгъялісны.
Кор Яков кыліс, мый Египетын эм нянь, сійӧ шуис пияныслы: «Мый видзӧданныд ӧта-мӧд выланыд?
Ме кывлі, мый Египетын эм нянь.
Ветлӧй сэтчӧ няньла, медым тшыгнымла эгӧ кулӧй».
Ӧсиплӧн даснан вокыс мӧдӧдчисны Египетӧ няньла. Но Ӧсиплысь Венямин воксӧ Яков эз лэдз вокъясыскӧд, чайтіс, мый сыкӧд лёктор вермас лоны.
Мукӧд йӧзкӧд ӧтлаын Израильлӧн пиян локтісны Египетӧ ньӧбны нянь, ӧд Ханаан муын став йӧзыс тшыгъялісны.
Египет муӧн сэки веськӧдліс Ӧсип, и няньнас сійӧ вузасис ачыс.
Ӧсиплӧн вокъясыс локтісны да муӧдзыс копыртчисны сылы.
Ӧсип тӧдіс найӧс, но эз петкӧдлы, мый тӧдӧ. Сійӧ скӧра юаліс налысь: «Кытысь ті локтінныд?»
Найӧ вочавидзисны: «Ханаан муысь нянь ньӧбны».
Ӧсип тӧдіс ассьыс вокъяссӧ, а найӧ эз тӧдны сійӧс.
Ӧсиплы тӧд вылас усины вокъяс йылысь вӧтъясыс, и сійӧ шуис налы: «Ті кыйӧдчысьяс. Ті локтінныд видзӧдавны, кытысянь тайӧ му вылас позьӧ уськӧдчыны».
Найӧ шуисны сылы: «Эгӧ, ыджыдӧй.
Ми, тэнад кесйӧгъяс, локтім сёян ньӧбны.
Ми ставным ӧти батьлӧн пиян, и ми огӧ ылӧдлӧй.
Ми абу кыйӧдчысьяс».
Ӧсип шуис налы: «Абу тадз, ті локтінныд видзӧдавны, кытысянь тайӧ му вылас позьӧ уськӧдчыны».
Найӧ шуисны: «Ми, тэнад кесйӧгъяс, локтім Ханаан муысь. Ми ставным ӧти батьлӧн пиян, дас кык вок вӧлім. Медічӧтыс кольччис батьнымкӧд, а ӧти вок абу нин ловъя».
Ӧсип налы шуис: «Ті кыйӧдчысьяс. Тіянӧс лоӧ тӧдмалӧма.
Кӧсйыся фараон олӧмӧн, мый ті онӧ петӧй татысь, кытчӧдз оз лок тіян медічӧт вокныд.
Тіян пиысь ӧти мед мунас да вайӧдас вокнытӧ, а мукӧдсӧ налӧн локтӧдз йӧршитӧмӧн видза.
Сэки тыдовтчас, висьталінныд-ӧ збыльсӧ.
Энӧ кӧ, сідзкӧ, ті — збыльысь кыйӧдчысьяс».
Ӧсип йӧршитіс вокъяссӧ куим лун кежлӧ.
Коймӧд луннас Ӧсип шуис налы: «Вӧчӧй, мый ме тшӧкта, сэки ловйӧн колянныд, ӧд ме пола Енсьыс.
Ті кӧ веськыд йӧз, тіян пӧвстысь мед кодкӧ кольччас дзескыдінӧ, а мукӧдыс мед нуасны гортаныс тшыгъялысьяслы нянь.
Но медічӧт вокнытӧ вайӧдӧй ме дінӧ. И онӧ кӧ ылӧдлӧй, ловйӧн колянныд».
Вокъяс кӧсйысисны.
«Збыльысь, вокнымлы лёк вӧчӧмысь ми мыжаӧсь! — сёрнитісны найӧ.
— Ми ӧд аддзылім сылысь сьӧкыдалӧмсӧ да кылім сылысь корӧмсӧ, но эгӧ лэдзӧй сійӧс.
Сійӧн и суис миянӧс тайӧ сьӧкыдлуныс».
Рувим шуис налы: «Эг ӧмӧй шулы тіянлы, мед зонмыслы лёксӧ энӧ вӧчӧй?
Но ті энӧ кывзысьӧй.
Ӧні сылӧн вирысь ми водзӧс мынтам».
Найӧ эз тӧдны, мый Ӧсип гӧгӧрвоӧ налысь сёрнисӧ.
Ӧд Ӧсиплӧн вӧлі аслас вуджӧдчысь.
Ӧсип вешйис на дінысь да бӧрддзис.
Сэсся бӧр локтіс да водзӧ сёрнитіс накӧд. Ӧсип босьтіс Симеонӧс да тшӧктіс вокъяслӧн син водзын кӧртавны сійӧс.
Ӧсип тшӧктіс тыртны вокъяслысь мешӧкъяссӧ няньӧн, а няньысь мынтысян сьӧмсӧ тшӧктіс бӧр пуктыны налӧн мешӧкъясӧ. Нӧшта тшӧктіс сетны туяныс сёян.
Тадзи вӧлі вӧчӧма.
Вокъяс пуктісны нянь мешӧкъяссӧ осёлъяс выланыс да петісны туйӧ.
Вой кежлӧ сувтліганыс вокъяс пӧвстысь ӧти восьтіс мешӧксӧ, мед вердыштны осёлсӧ, да аддзис мешӧк вомсьыс ассьыс сьӧмсӧ. Вокъясыслы шуис: 
«Видзӧдӧй, менам сьӧмӧй мешӧкын!»
Найӧ шай-паймунісны, полӧмпырысь юасисны ӧта-мӧдныслысь: «Мый нӧ вӧчис миянкӧд Енмыс?»
Вокъяс локтісны Ханаан муӧ асланыс Яков бать дінас да висьталісны став лоӧмтор йывсьыс. Найӧ шуисны:
«Сэтчӧс муын ыджыдалысьыс сёрнитіс миянкӧд скӧра. Сійӧ чайтіс, мый ми кыйӧдчысьяс.
Ми шуим сылы, мый ми веськыд йӧз, ми абу кыйӧдчысьяс.
Ми дас кык вок, ӧти батьлӧн пиян, но ӧти абу нин ловъя, и медічӧтыс ӧні батькӧд Ханаан муын.
Сэтчӧс муын ыджыдалысьыс сэк шуис: “Со кыдзи ме тӧдмала, веськыда-ӧ ті висьталанныд.
Ӧти вокӧс ме дінӧ кольӧй, а мукӧдыс мед босьтасны нянь да мунасны, ӧд тіян гортсаясныд тшыгъялӧны. Но медічӧт вокнытӧ вайӧдӧй ме дінӧ.
Тадзи кута тӧдны, мый ті абу кыйӧдчысьяс, а веськыд йӧз.
Сэсся бӧр сета вокнытӧ, и ті верманныд кынӧмпӧт перйыны тайӧ муас”».
Мешӧкъяснысӧ ректігӧн вокъяс аддзисны сэтысь ассьыныс сьӧмнысӧ да ёна повзисны. Яков батьныс тшӧтш повзис.
Сійӧ шуис налы: «Ті воштінныд менсьым пиянӧс!
Ӧсипӧй абу, Симеонӧй абу, и Веняминӧс босьтны кӧсъянныд! Став сьӧкыдыс ме вылӧ усьӧ!»
Рувим шуис батьыслы: «Ог кӧ бӧр вайӧд Веняминӧс тэ дінӧ, верман вины менсьым кык пиӧс.
Сет Веняминӧс менам киӧ, и ме бӧр вайӧда сійӧс тэ дінӧ».
Яков шуис: «Оз мун менам пиӧй тіянкӧд.
Сылӧн вокыс куліс, и сійӧ ӧтнасӧн менам колис.
Туяс кӧ сыкӧд мыйкӧ лоӧ, ті менӧ, пӧрысь мортӧс, шогӧ вӧйтанныд да кулӧмаяс дінӧ мӧдӧданныд».
Тшыгъялӧм содіс му вылын.
Египетысь вайӧм няньыс бырис. Сэки батьныс шуис пияныслы: «Ветлӧй бара сёянтӧ ньӧбны».
Иуда шуис сылы: «Сійӧ мортыс чорыда шуис миянлы, воктӧгныд пӧ ме водзӧ энӧ петкӧдчӧй.
Вокнымӧс кӧ лэдзан миянкӧд, ветлам да ньӧбам тэныд сёян. А он кӧ, ми огӧ мунӧй. Ӧд сійӧ мортыс шуис, воктӧгныд пӧ ме водзӧ энӧ петкӧдчӧй».
Израиль шуис: «Мыйла висьталінныд сійӧ мортыслы, мый тіян нӧшта вок эм? Тайӧн лёк вӧчинныд меным».
Найӧ шуисны: «Сійӧ мортыс юасис миян йылысь да рӧдвужным йылысь. Сійӧ юаліс, ловъя-ӧ батьным, эм-ӧ миян нӧшта вокъяс.
Ми висьталім сылы тіян йылысь.
Кытысь нӧ ми тӧдім, мый тшӧктас вайӧдны Веняминӧс».
Иуда шуис аслас Израиль батьлы: «Лэдз сійӧс мекӧд, и ми мӧдӧдчам туйӧ. Сэки тшыгъялӧм понда некод оз кув, ми ставным и миян челядьным ловйӧн колям.
Ме кывкута Венямин вӧсна. 
И ог кӧ бӧр вайӧд сійӧс тэ дінӧ, нэм кежлӧ тэ водзын мыжаӧн коля. Менсьым верман водзӧс перйыны.
Эгӧ кӧ ньӧжмасьӧй, кыкысь нин позис ветлыны».
Израиль батьныс шуис налы: «Но мый сэсся вӧчан?
Сідзкӧ, босьтӧй да нуӧй тайӧ мортыслы миян муысь козинъяс: мавтасъяс, ма, чӧскыд дука сиръяс, ладан, фисташ да миндаль кольтусьяс.
Сьӧмтӧ босьтӧй воддза дорсьыс кык пӧв унджык, медым мешӧкъясаныд пуктӧм сьӧмсӧ бӧр верминныд сетны.
Гашкӧ, тіянлы тӧдлытӧг пуктісны.
Босьтӧй вокнытӧ аскӧдныд да ветлӧй сійӧ мортыс дінӧ.
Ставсӧвермысь Ен мед сетас сійӧ мортыслы бур сьӧлӧм, мед лэдзас Симеонӧс да Веняминӧс бӧр локны тіянкӧд. А меным кӧ шуӧма лоны челядьтӧг, мед лоӧ сідзи».
Вокъяс босьтісны козинъяс да воддза дорысь кык пӧв унджык сьӧм. Найӧ мӧдӧдчисны Египетӧ, аскӧдныс босьтісны тшӧтш Веняминӧс. Локтісны Ӧсип дінӧ.
Ӧсип мыйӧн аддзис Венямин воксӧ, шуис аслас керка кутысьлы:* «Тайӧ йӧзсӧ пырт гортӧ. Начкы пемӧс да дасьты сёян — найӧ кутасны пажнайтны мекӧд».
Керка кутысь вӧчис сідзи, кыдзи тшӧктіс Ӧсип.
Ӧсип ордӧ мунігӧн вокъяс повзьӧмнысла ӧта-мӧдныслы шуалісны: «Мешӧкъясаным бӧр пуктӧм сьӧм вӧсна пыртісны миянӧс татчӧ. Найӧ уськӧдчасны миян вылӧ, мырддясны осёлъяснымӧс, а миянӧс босьтасны кесйӧг туйӧ».
Вокъяс матыстчисны керка кутысь дінӧ да шуисны: «Ыджыдӧй, вермам-ӧ шыасьны тэ дінӧ? Ми волім нин водзынджык сёян ньӧбны. Бӧрсӧ мунігӧн ми сувтім узьмӧдчыны, восьтім мешӧкъяснымӧс да аддзим быд мешӧк вомысь сьӧм. Сы мында, мыйта ми мынтысьлім няньысь. А ӧні ми сійӧ сьӧмсӧ бӧр кӧсъям сетны.
Сёян ньӧбӧм вылӧ миян эм на сьӧмыс. Ми огӧ тӧдӧй, коді пуктіс сьӧмсӧ мешӧкъясаным».
Керка кутысь шуис: «Лӧньӧй, энӧ полӧй.
Тіян да батьныдлӧн Ен пуктіс сьӧмсӧ тіян мешӧкъясӧ.
А няньысь мынтысьӧм сьӧмнытӧ меным сетісны нин».
Сэсся керка кутысь вайӧдіс на дінӧ Симеонӧс.
Керка кутысь пыртіс вокъясӧс Ӧсиплӧн керкаӧ да вайис налы ва, медым мыськыны кокнысӧ, нӧшта вердіс налысь осёлъяссӧ.
Пажын кежлӧ Ӧсипӧс виччысигмозныс вокъяс перъялісны ассьыныс козинъяссӧ. Найӧ тӧдісны нин, мый кутасны сёйны сэні.
Кор Ӧсип локтіс, вокъяс сетісны сылы козинъяс да муӧдзыс копыртчисны.
Сійӧ чолӧмасис накӧд да юаліс: «Дзоньвидза-ӧ тіян пӧрысь батьныд, код йылысь ті сэки висьтавлінныд?
Ловъя-ӧ на?»
Найӧ вочавидзисны: «Тэнад кесйӧгыд, миян батьным, ловъя и дзоньвидза».
[Ӧсип шуис: «Енмӧн бурсиӧма сійӧ».] 
Найӧ пидзӧсчанясисны да копыртчылісны сылы.
Ӧсип видзӧдліс Венямин вокыс вылӧ, аслас мамыслӧн пи вылӧ, да юаліс: «Тайӧ тіян медічӧт вокныд, код йылысь ті висьтавлінныд меным?»
Веняминлы сійӧ шуис: «Пиӧй, Енлӧн буралӧмыс мед лоас тэкӧд!»
Ӧсиплӧн сьӧлӧмас ыпнитіс муслун вокыс дінӧ. Йӧз водзас сійӧ муртса эз бӧрддзы, та вӧсна ӧдйӧ петіс мӧд жырйӧ да бӧрдіс сэні.
Сэсся мыськис чужӧмсӧ да локтіс бӧр. Бӧрддзӧмысь кутчысьӧмӧн шуис: «Вайӧй сёянсӧ».
Сёянсӧ вайисны торйӧн сылы, торйӧн вокъясыслы да торйӧн египетсаяслы, кодъяс сёйисны сы ордын, ӧд египетсаяс оз сёйны еврейяскӧд, мыйла лыддьӧны найӧс пежӧн.
Вокъясӧс пуксьӧдалісны Ӧсиплы воча медыджыдсяньыс медічӧтӧдзыс. Найӧ шензьӧмӧн видзӧдісны ӧта-мӧд выланыс.
Ӧсип тшӧктіс сетны налы сёянсӧ аслас пызан вылысь, а Веняминлы мукӧд сертиыс — вит пӧв унджык.
Вокъяс юисны да гажӧдчисны Ӧсипкӧд ӧтвылысь.
Ӧсип аслас керка кутысьлы тшӧктіс: «Тырт тайӧ йӧзыслысь мешӧкъяссӧ сёянӧн, мыйта вермасны нуны. Быдӧнлы мешӧк вомас пукты сылысь сьӧмсӧ. Менсьым эзысь дозмукӧс пукты медічӧтыслӧн мешӧк вомас ӧтлаын нянь ньӧбан сьӧмыскӧд».
Керка кутысь вӧчис Ӧсиплӧн тшӧктӧм серти.
Водз асывнас вокъяслы лэдзисны босьтны осёлъяснысӧ да мунны гортаныс.
Найӧ петісны карысь. Кор найӧ вӧліны неылын на, Ӧсип шуис керка кутысьлы: «Мун суӧд тайӧ йӧзсӧ да шу налы: “Мыйла ті бурсьыс мынтысинныд лёкӧн? 
[Мыйла гусялінныд эзысь дозмуксӧ?]
Тайӧ дозмуксьыс юӧ менам ыджыдӧй, тшӧтш тунасьӧ сы отсӧгӧн.
Ті лёктор вӧчинныд”».
Керка кутысь суӧдіс да шуис налы, кыдзи Ӧсип тшӧктіс.
Найӧ воча шуисны: «Ыджыдӧй, мыйла тэ тадзи шуан?
Ми, тэнад кесйӧгъяс, эгӧ вермӧй татшӧмторсӧ вӧчны.
Ӧд сьӧмсӧ, мый ми аддзим мешӧк вомъясысь, Ханаан мусянь бӧр вайим тэныд. Ми эгӧ вермӧй гусявны тэнад ыджыдлӧн керкасьыс эзысь-зарни.
Кодлысь аддзан дозмуксӧ, сійӧс верман вины. А ми, ыджыдӧй, ставным кесйӧг туйӧ тэныд лоам».
«Бур, — шуис сійӧ.
— Мед лоас тадзи.
Но меным кесйӧгнас лоас сӧмын сійӧ, кодлысь аддза дозмуксӧ. Мукӧдсӧ ог мыжды».
Вокъяс ӧдйӧ лэдзисны мешӧкъяснысӧ му вылӧ да восьталісны найӧс.
Керка кутысь шобис вокъяслысь мешӧкъяссӧ — ыджыд воксяньыс ичӧтӧдзыс.
Дозмукыс сюри Венямин мешӧкысь.
Вокъяс косялісны паськӧмнысӧ, нуанторнысӧ пуктісны осёлъяс вылӧ да бӧр бергӧдчисны карас.
Вокъясыскӧд Иуда локтіс Ӧсип керкаӧ. Ӧсип виччысис найӧс. Найӧ кымынь уськӧдчисны сы водзӧ.
Ӧсип шуис налы: «Мый ті вӧчинныд?
Эн ӧмӧй гӧгӧрвоӧй, мый ме ставсӧ верма тӧдмавны?»
Иуда шуис: «Мый миянлы шунысӧ тэныд, ыджыдӧй? Дзик нинӧм, и дорйысьнысӧ некыдз.
Енмыс аддзӧ миянлысь мыжсӧ.
Ыджыдӧй, ми — тэнад кесйӧгъяс. Тэныд кутас кесъявны оз сӧмын сійӧ, код ордысь сюри тэнад дозмукыд, но сыкӧд тшӧтш ми ставным кутам кесъявны».
Но Ӧсип шуис: «Тадзи оз ло!
Код ордысь сюри менам дозмукӧй, сӧмын сійӧ лоас менам кесйӧгӧн. А ті лӧнь сьӧлӧмӧн мунӧй батьныд дінӧ».
Иуда матыстчис Ӧсип дінӧ да шуис: «Ыджыдӧй, лэдз меным висьтавны тэныд. Эн дӧзмы ме вылӧ, тэ ӧд фараон кодь.
Ыджыдӧй, тэ ачыд юасин миянлысь, эм-ӧ миян бать либӧ вок.
Ми висьталім тэныд, ыджыдӧй, мый миян эм пӧрысь бать. Пӧрысь кадӧ сылӧн чужис медічӧт пи. Пиыс аслас мамсянь ӧтнас коли, кор сылӧн вокыс куліс. Батьным ёна радейтӧ сійӧс.
Тэ тшӧктін вайӧдны сійӧс тэ дінӧ.
Ми шуим тэныд, ыджыдӧй, мый зонмыс оз вермы кольны батьсӧ, ӧд коляс кӧ, батьным кулас.
Но тэ шуин миянлы, аслад кесйӧгъяслы, медічӧт воктӧгныд пӧ ме водзӧ энӧ локтӧй.
Кор ми локтім батьным дінӧ, тэнад кесйӧгыд дінӧ, висьталім сылы, мый тэ шуин, ыджыдӧй.
Бӧрынджык батьным бара тшӧктіс ветлыны сёян ньӧбны.
Но ми шуим сылы, мый огӧ мунӧй медічӧт воктӧгным, ӧд сытӧг миянлы оз позь локны тэ водзӧ.
Сэк батьным, тэнад кесйӧгыд, шуис: “Ті тӧданныд, мый менам гӧтырӧй чужтіс меным кык пиӧс.
Ӧтиыс вошис, и ӧнӧдз эг аддзы сійӧс. Чайта, збыльысь звер сійӧс косявлӧма.
Босьтанныд кӧ менсьым нӧшта тайӧ писӧ, и сыкӧд мыйкӧ лоӧ, ті менӧ, пӧрысь мортӧс, шогӧ вӧйтанныд да кулӧмаяс дінӧ мӧдӧданныд”.
Ӧні кӧ ме муна батьӧй дінӧ, тэнад кесйӧгыд дінӧ, да сылӧн радейтана пиыс кӧ оз ло миянкӧд, батьӧй кулас.
Тадзи ми, тэнад кесйӧгъяс, мӧдӧдам шогӧ усьӧм батьнымӧс, тэнсьыд пӧрысь кесйӧгтӧ, кулӧмаяс дінӧ.
Да и ме, тэнад кесйӧг, батьлы кӧсйыси кывкутны зонмыс вӧсна — шуи сылы, мый нэм кежлӧ коля мыжаӧн сы водзын, ог кӧ бӧр вайӧд зонмӧс сы дінӧ.
Кора, лэдз менӧ, тэнсьыд кесйӧгтӧ, зонмыс пыдди лоны кесйӧгӧн тэ ордын, ыджыдӧй, а зонмыс мед мунас вокъясыскӧд.
Сытӧг кыдзи ме муна батьӧй дінӧ?
Верма ӧмӧй видзӧдны батьӧйлысь шогӧ усьӧмсӧ?»
Ӧсип эз вермы сэсся кутчысьны да горӧдіс аслас кесйӧгъяслы: «Петӧй ставныд!»
Ас кежаныс кольӧм бӧрын Ӧсип висьтасис вокъясыслы, коді сійӧ.
Сэсся гораа бӧрддзис. Египетсаяс кылісны сылысь бӧрдӧмсӧ, и та йылысь юӧрыс воис фараон керкаӧдз.
«Ме — Ӧсип», — шуис сійӧ вокъясыслы да юаліс: «Ловъя-ӧ менам батьӧй?»
Но вокъясыс шӧйӧвошӧмнысла эз вермыны нинӧм вочавидзны.
Ӧсип корис вокъяссӧ матыстчыны, и найӧ матыстчисны.
Сійӧ шуис: «Ме тіян Ӧсип вокныд, кодӧс ті вузалінныд Египетӧ.
Но ӧні энӧ шогсьӧй да энӧ йирӧй асьнытӧ, мый вузалінныд менӧ. Тіянысь водзджык менӧ мӧдӧдіс татчӧ Ен, медым видзны олӧмнытӧ.
Му вылын мӧд во нин сулалӧ тшыг кад, но вит во чӧж на оз кутны кӧдзны-вундыны.
Енмыс мӧдӧдіс менӧ татчӧ тіянысь водзджык, медым кольны рӧднытӧ му вылас, видзны олӧмнытӧ да мездыны тіянӧс.
Энӧ ті менӧ мӧдӧдӧй татчӧ, а Енмыс. Сійӧ пуктіс менӧ фараонлы туйдӧдысьӧн, сетіс менам кипод улӧ фараонлысь керкасӧ да ставнас Египет мусӧ.
Тэрмасьӧй мунны менам бать дінӧ. Висьталӧй сылы, тадзи пӧ шуӧ тэнад пиыд: “Енмыс пуктіс менӧ став Египет вылын ыджыдӧн.
Лок ме дінӧ. Эн нюжмась.
Босьт ыж-мӧстӧ да став эмбуртӧ. Лок пияныдкӧд да налӧн пиянкӧд. Тэ верман овмӧдчыны месянь матӧ Гошен муӧ.
Сэні ме верда тіянӧс, и аслад котырыдкӧд тэ он пӧр корысьӧ. Ӧд тшыг кад кыссяс вит во чӧж на”.
Видзӧдӧй, тайӧ ме сёрнита тіянкӧд. Венямин вокӧй, тайӧ ме!
Висьталӧй менам батьлы, кыдзи ме нимала Египетын. Висьталӧй ставсӧ, мый аддзылінныд, да ӧдйӧджык вайӧдӧй татчӧ менсьым батьӧс».
Ӧсип кутліс Веняминӧс да бӧрддзис.
Венямин тшӧтш бӧрдіс сійӧс кутлігас.
Сэсся бӧрдігтырйи Ӧсип окаліс мукӧд вокъяссӧ, та бӧрын найӧ пондісны сёрнитны.
Ӧсиплӧн вокъяс локтӧм йылысь юӧрыс воис фараонӧдз.
Фараонлы да сылӧн йӧзыслы вӧлі нимкодь таысь.
Фараон шуис Ӧсиплы: «Висьтав вокъясыдлы, мед нӧбъяласны осёлъяснысӧ [няньӧн] да мунасны Ханаан муӧ.
Мед босьтасны ассьыныс батьнысӧ да котырныскӧд локтасны ме дінӧ.
Ме сета налы Египет муысь медбурсӧ*, и найӧ кутасны овны выя муын.
Тшӧкты налы босьтны Египет муысь тарантасъяс, медым вайӧдны челядьнысӧ, гӧтыръяснысӧ да батьнытӧ.
Мед оз шогсьыны овмӧсныс вӧсна, мый колясны сэтчӧ, ӧд Египетын ме налы сета медбурсӧ».
Израильлӧн пияныс тадзи и вӧчисны.
Фараонлӧн тшӧктӧм серти Ӧсип сетіс налы тарантасъяс. Сетіс налы туяныс сёян и быдӧнлы вежан паськӧм, а Веняминлы сетіс куимсё сикель эзысь да вит вежан паськӧм.
Батьыслы мӧдӧдіс египетса медбур козинъяс, пуктіс найӧс дас осёл вылӧ. Нӧшта мӧдӧдіс нянь да туйӧ босьтан сёян, пуктіс найӧс дас энь осёл вылӧ.
Ӧсип лэдзис вокъяссӧ шуалӧмӧн: «Туяныд энӧ пинясьӧй».
И найӧ мунісны. Египет муысь вокъяс воисны Яков батьныс дінӧ Ханаан муӧ. Яковлы висьталісны, Ӧсип пиыд пӧ ловъя да ӧні веськӧдлӧ став Египет муӧн.
Но Яков эз эскы налы, вӧлі кын сьӧлӧма.
Найӧ висьталісны батьныслы ставсӧ, мый Ӧсип висьталіс налы. Кор Яков аддзис тарантасъяссӧ да кыліс, мый найӧс Ӧсип мӧдӧдӧма, медым вайӧдны сійӧс Египетӧ, вӧлисти ловзьыштіс. Сійӧ шуис: «Ӧсип пиӧй ловъя! Тайӧ ставыс, мый меным колӧ.
Ветла да кувтӧдз аддзысьла на сыкӧд».
Израиль чукӧртіс став ассьыс эмбурсӧ да мӧдӧдчис туйӧ. Бер-Шеваӧ воӧм бӧрын вайис висьяс аслас Исаак батьыслӧн Енлы.
Войнас Ен чукӧстіс Израильӧс: «Яков, Яков!»
Яков вочавидзис: «Ме тані».
Ен шуис: «Ме — Ен, тэнад батьлӧн Ен.
Эн пов мунны Египетӧ. Сэні Ме сета тэсянь чужны унасьыс-уна войтырлы.
Ме Ачым муна тэкӧд сэтчӧ, и Ачым бӧр петкӧда тэнӧ сэтысь.
Тэнсьыд синтӧ аслас киӧн тупкас Ӧсип».
Яков водзӧ мӧдӧдчис Бер-Шеваысь.
Израильлӧн пияныс нуисны батьнысӧ, челядьнысӧ да гӧтыръяснысӧ фараонӧн сетӧм тарантасъясӧн.
Босьтісны тшӧтш ыж-мӧснысӧ да эмбурсӧ, мый чукӧрмис налӧн Ханаанын. Тадзи Яков став аслас рӧдыскӧд локтіс Египетӧ.
Ассьыс ныв-писӧ да налысь челядьсӧ — став ассьыс рӧдсӧ вайӧдіс аскӧдыс.
Египетӧ локтӧм Израиль пиянлӧн нимъясыс татшӧмӧсь.
Рувим — Яковлӧн медводдза чужысьыс.
Рувимлӧн пияныс: Енок, Паллу, Хецрон да Карми.
Симеонлӧн пияныс: Емуэл, Ямин, Огад, Якин, Цохар да ханаанса аньлӧн Саул пи.
Левийлӧн пияныс: Гирсон, Кааф да Мерари.
Иудалӧн пияныс: Ир, Онан, Шелай, Парес да Зерах.
Но Ир да Онан кулісны Ханаан муын.
Пареслӧн пияныс: Хецрон да Хамул.
Иссакарлӧн пияныс: Тол, Пув, Иов да Шимрон.
Завулонлӧн пияныс: Серед, Элон да Яхлеэл.
Тайӧ Яковлӧн да Лиялӧн пияныс, нӧшта пияныслӧн пияныс — ставнас комын куим морт. Лия чужтіс пиянсӧ да Дина нывсӧ Месопотамияын.
Гадлӧн пияныс: Цифион, Хагги, Шуни, Эцбон, Эри, Ароди да Арели.
Асирлӧн пияныс: Имнай, Ишвай, Ишви да Берий. Налӧн вӧлі Серах нима чой.
Берийлӧн пияныс: Хевер да Малкиэл.
Тайӧ Яковлӧн да Зелфалӧн ныв-пиыс, нӧшта ныв-пиыслӧн пияныс — ставнас дас квайт морт. Зелфа вӧлі кесйӧг аньӧн, кодӧс Лаван сетіс Лия нылыслы.
Ракельлӧн, Яков гӧтырлӧн, пияныс: Ӧсип да Венямин.
Ӧсиплӧн Египет муын чужисны Манассей да Ефрем, кодъясӧс сылы чужтіс Асената, Он карысь Поти-Пер поплӧн нылыс.
Веняминлӧн пияныс: Белай, Бекер, Ашбел, [Белайлӧн пияныс:] Гер, Нааман, Эхи, Рош, Муппим, Хуппим да Ард.
Тайӧ Яковлӧн да Ракельлӧн пияныс, нӧшта пияныслӧн пияныс — ставнас дас нёль морт.
Данлӧн пиыс вӧлі Хушим.
Неффалимлӧн пияныс: Яхцеэл, Гуни, Ецер да Шиллем.
Тайӧ Яковлӧн да Валлалӧн пияныс, нӧшта пияныслӧн пияныс — ставнас сизим морт. Валла вӧлі кесйӧг аньӧн, кодӧс Лаван сетіс Ракель нылыслы.
Яковсянь чужысьыс, кодъяс локтісны сыкӧд Египетӧ, ставнас вӧлі квайтымын квайт морт.
Нӧшта сыкӧд локтісны пияныслӧн гӧтыръяс. Египетын Ӧсиплӧн чужис кык пи.
Тадзи Яков рӧдысь сизимдас [вит] морт овмӧдчисны Египетӧ.
Яков ыстіс водзвылас Иудаӧс Ӧсип дінӧ. Иуда петкӧдліс Гошен муӧ туйсӧ, и тадзи найӧ локтісны сэтчӧ.
Ӧсип аслас тарантасӧн воча петіс Израиль батьыслы. Батьыскӧд аддзысигӧн кутліс-топӧдліс сійӧс, дыр бӧрдіс сылӧн сывъяс.
Израиль шуис Ӧсиплы: «Но ӧні сэсся верма кувны, ӧд аддзылі тэнӧ. Тэ ловъя!»
Ӧсип шуис вокъясыслы да батьыслӧн став котырлы: «Ме муна юӧрта фараонлы, мый менам вокъяс да батьлӧн котырыс Ханаан муысь воисны ме дорӧ.
Шуа сылы, мый ті ыж-мӧс видзысьяс, и аскӧдныд татчӧ вайинныд ыж-мӧснытӧ да эмбурнытӧ.
Фараон кӧ корас тіянӧс ас ордас да юалас уджныд йылысь, висьталӧй, мый ті, сылӧн кесйӧгъяс, том кадсянь батьясныд моз ыж-мӧс видзанныд. Сэки сійӧ кольӧдас тіянӧс Гошен муӧ, ӧд египетсаяс ыж видзысьӧс лыддьӧны пежӧн».
Ӧсип локтіс да юӧртіс фараонлы: «Батьӧй вокъяскӧд ӧні Гошен муынӧсь. Найӧ асланыс ыжъяснас, мӧсъяснас да став эмбурнас локтісны Ханаан муысь».
Ӧсип вайӧдіс фараон водзӧ вокъяс пӧвстысь витӧс.
Фараон юаліс: «Кутшӧм удж ті вӧчанныд?»
Найӧ вочавидзисны: «Ми, тэнад кесйӧгъяс, батьясным моз ыж видзысьяс.
Ми локтім овны тайӧ муас, ӧд ыж-мӧснымлы йирсяніныс эз ло. Ханаан муын ёна тшыгъялӧны.
Лэдз миянлы овмӧдчыны Гошен муӧ».
Фараон шуис Ӧсиплы: «Тэнад батьыд да вокъясыд локтісны тэ дінӧ.
Египет муыс ставнас тэ водзын, медбур местаас овмӧд батьтӧ да вокъястӧ.
Мед оласны Гошен муын.
И сюрас кӧ на пӧвстысь тӧлка йӧз, пукты найӧс веськӧдлыны менам ыж-мӧс видзысьясӧн».
Ӧсип вайӧдіс Яков батьсӧ фараон водзӧ, и Яков бурсиис фараонӧс.
Фараон юаліс Яковлысь: «Кымын арӧс тэныд?»
Яков вочавидзис: «Сё комын во ме ола-ветлӧдла му вылас. 
Тайӧ абу на дыр. Менам батьяс дырджык на олісны. А менам олан лунъясӧй дженьыдӧсь да шогӧн тырӧмаӧсь».
Фараонӧс бурсиӧм бӧрын Яков петіс сы дінысь.
Фараонлӧн тшӧктӧм серти Ӧсип овмӧдіс ассьыс батьсӧ да вокъяссӧ Египетӧ, сетіс налы медбур мусӧ, Рамсес му.
Ӧсип могмӧдіс няньӧн ассьыс батьсӧ, вокъяссӧ да налысь котыръяссӧ. Быд котырлы няньсӧ сетіс челядь лыд серти.
Быдлаын ёна тшыгъялісны, ӧд му вылын эз вӧв няньыс. Египет да Ханаан муясын тшыгъялӧмыс уськӧдіс йӧзсӧ кок йывсьыныс.
Нянь вузалӧм помысь Ӧсип чукӧртіс став эзысьсӧ Египет да Ханаан муясысь фараонлӧн керкаӧ.
Египет да Ханаан муясысь эзысьыс быри.
Египетсаяс локтісны Ӧсип дорӧ да шуисны: «Эзысьным миян абу, но сет миянлы нянь! Эн лэдз миянлы кувнысӧ».
Ӧсип шуис: «Эзысьныд кӧ тіян быри, вайӧй меным ыж-мӧснытӧ, и ме сета тіянлы нянь».
И найӧ вайисны ыж-мӧснысӧ Ӧсиплы.
Вӧвъяс, ыжъяс, мӧсъяс да осёлъяс тшӧт весьтӧ Ӧсип сеталіс налы нянь.
Во чӧж вердіс найӧс.
Но тайӧ воыс коли, и египетсаяс бара локтісны Ӧсип дорӧ да шуисны:
«Ыджыдӧй, огӧ дзебӧй тэысь, мый эзысьным миян абу, и став ыж-мӧснымӧс ми тэныд вайим.
Миян нинӧм эз коль тэныд сетнысӧ асланым олӧм да муяс кындзи.
Мыйла миянлы кувнысӧ тэнад син водзын? Мыйла миян муяслы эндынысӧ?
Ньӧб миянӧс да миянлысь муяснымӧс, а та пыдди сет миянлы нянь. Асланым муяснаным ми лоам кесйӧг туйынӧсь фараонлы. А тэ сет миянлы кӧйдыс, медым ми ловйӧн колим да эгӧ кулӧй, и медым муясным эз эндыны».
Ӧсип ньӧбис фараонлы Египетысь став мусӧ. Ӧд египетсаяс ставныс ӧтитӧг вузалісны ассьыныс муяснысӧ, медым венны тшыгъялӧм.
Тадзи став муыс вуджис фараон киӧ.
Став Египет му пасьтала войтырыс лоины кесйӧг туйынӧсь.
Сӧмын попъяслысь мусӧ Ӧсип эз ньӧб, ӧд налы фараон мынтіс удждон, и та помысь найӧ вермисны овны-пӧткӧдчыны.
Та вӧсна налы эз ковмы вузавны ассьыныс муяснысӧ.
Ӧсип шуис египетсаяслы: «Ӧні ме ньӧби тіянӧс да тіянлысь муяснытӧ фараонлы.
Ме сета тіянлы кӧйдыс, а ті кӧдзӧй муяснытӧ.
Но кор кутанныд вундыны, витӧд пайсӧ вайӧй фараонлы. Витсьыс нёльсӧ кольӧй кӧйдыс вылӧ и челядьныдкӧд да гортсаясныдкӧд сёйӧм вылӧ».
Найӧ шуисны: «Тэ видзин олӧмнымӧс. Тэ бур сьӧлӧма миян дінӧ, ыджыдным.
Талунсянь лоам кесйӧг туйынӧсь фараонлы».
Фараонлы витӧд пай сетӧм йылысь тшӧктӧмыс, мый лӧсьӧдіс Ӧсип, ӧнӧдз вына Египет муын. Сӧмын попъяслӧн муыс эз вудж фараонлы.
Израильсаяс олісны Египетын, Гошен муын, мый вӧлі сетӧма налы. Сэні найӧ чужтысисны да ёна рӧдмисны-паськалісны.
Дас сизим во на оліс Яков Египет муын, сё нелямын сизим арӧсӧдз.
Израильлы воис кад кувны, и сійӧ корис Ӧсип писӧ да шуис сылы: «Ло бур сьӧлӧма ме дінӧ. Менам лядьвейӧ китӧ пуктӧмӧн кыв сет, мый он гуав менӧ Египетӧ. 
Кор ме вуджа аслам батьяс дінӧ, ну менсьым шойӧс Египетысь да гуав батьяслӧн дзебанінӧ».
Ӧсип шуис: «Вӧча тэнад корӧм серти».
«Кыв сет», — шуис Яков.
Ӧсип кыв сетіс.
Израиль юрбитіс Енлы вольпасяс.
Кад мысти Ӧсип тӧдмаліс батьыслӧн висьмӧм йылысь.
Сійӧ босьтіс аскӧдыс Манассей да Ефрем пиянсӧ [да муніс Яков дінӧ].
Яковлы висьталісны, Ӧсип пиыд пӧ локтӧ тэ дорӧ.
Израиль чукӧртіс став вынсӧ да пуксис вольпась вылас.
Яков шуис Ӧсиплы: «Ставсӧвермысь Ен петкӧдчис меным Ханаанса Лузын да бурсиис менӧ. Сійӧ шуис: “Ме сета тэныд уна чужысьӧс. Тэ лоан войтыръяслы батьӧн. Тэсянь чужысьяслы Ме сета тайӧ мусӧ нэмъяс кежлӧ”.
Тэнад кыкнан пиыд, Ефремыд да Манассейыд, кодъяс чужисны Египетын менам тэ дорӧ локтӧдз, Рувим да Симеон моз лоӧны менам пиянӧн.
Тэнад пияныдлы, кодъяс чужасны на, Ефрем да Манассей вокъяс ним улын му пайыс вичмас.
Месопотамияысь мунӧм бӧрын Епрафаӧ вотӧдз Ракельӧй [тэнад мамыд] куліс Ханаан муын. Сэні ме дзеби сійӧс туй бокас». Епрафаӧс ӧні нимтӧны Виплиемӧн.
Ӧсиплӧн пиян вылӧ видзӧдігӧн Израиль юаліс: «Кодъяс найӧ?»
Ӧсип вочавидзис: «Тайӧ менам пиянӧй, кодъясӧс Ен сетіс тані».
Яков шуис: «Вайӧд, ме бурсиа найӧс».
Пӧрысьлун вӧснаыс Израиль эз бура аддзы.
Ӧсип вайӧдіс пиянсӧ батьыс дінӧ. Израиль окаліс, кутліс найӧс да шуис: «Эг нин чайт ме тэнӧ аддзывны, Ӧсипӧй, но Енмыс и пиянтӧ на петкӧдліс».
Ӧсип вештіс найӧс батьыслӧн пидзӧс дорысь да копыртчыліс батьыслы муӧдзыс.
Сэсся Ӧсип кыкнан писӧ матыстӧдіс батьыс дорӧ, Ефремӧс веськыд кинас — Израильлы шуйгаладорас, а Манассейӧс шуйга кинас — Израильлы веськыдладорас.
Но Израиль нюжӧдіс веськыд кисӧ да пуктіс Ефремлы, ичӧтджыкыслы, юр вылас, а шуйга кисӧ пуктіс Манассейлы, медводдза чужысьыслы, юр вылас. Сійӧ тӧдӧмӧн тадзи вӧчис. 
Сэсся бурсиис Ӧсипӧс да шуис: 
— Енмыс, кодлысь кывзысисны менам Ӧвраам да Исаак батьясӧй, чужӧмсянь да ӧнӧдз видзис менӧ. Андел, коді мездіс менӧ быдпӧлӧс лёкысь, мед бурсиас тайӧ зонъяссӧ.
На пыр мед нималас менам нимӧй, тшӧтш Ӧвраам да Исаак батьяслӧн нимъясыс. Насянь мед уна чужысь лоас му вылын.
Ӧсип аддзис, кыдзи батьыс веськыд кисӧ пуктіс Ефремлы юр вылас, да жугыльтчис.
Сійӧ босьтіс батьыслысь кисӧ Ефрем юр вылысь да кӧсйис пуктыны Манассейлы юр вылас. Ӧсип шуис батьыслы: «Абу тадзи, батьӧй. Со этайӧ медводдза чужысьыс.
Сы вылӧ пукты китӧ».
Но батьыс шуис сылы паныд: «Тӧда, пиӧй, тӧда.
Сысянь тшӧтш чужас войтыр, и сійӧ лоас ыджыдӧн.
Но ичӧтджык вокыс лоас ыджыдджык, и сысянь чужас унасьыс-уна войтыр».
Сійӧ лунӧ Яков бурсиис найӧс тадзи: «Тіян нимъясӧн Израиль войтыр кутас ӧта-мӧдсӧ бурсины. Найӧ шуасны: “Ефремлы да Манассейлы моз мед Енмыс вӧчас тэныд”».
Тадзи Ефремӧс кыпӧдіс Манассейысь вылӧджык.
Израиль шуис Ӧсиплы: «Ме регыд кула, но Енмыс лоӧ тіянкӧд. Сійӧ бӧр вайӧдас тіянӧс батьясныдлӧн муӧ.
Вокъясыдлы дорысь ме тэныд унджык сета — аслам шыпуртӧн да ньӧввужйӧн аморейяслысь босьтӧм му».
Яков корис ассьыс пиянсӧ да шуис: — Чукӧртчӧй, ме висьтала, мый виччысьӧ тіянӧс быдӧнӧс.
Яковлӧн пиян, локтӧй да кывзӧй, Израиль батьнытӧ кывзӧй.
Рувим, менам медводдза чужысьӧй, тэ — менам ёнлунӧй, менам вынлӧн медводдза вотӧс. Тэнӧ медвылӧ кыпӧдӧма, тэныд медуна вынйӧрсӧ сетӧма.
Тэ бузгысь ва кодь, тэ медводдза чужысьлысь нимтӧ воштін, ӧд тэ батьыд вольпасьӧ водін, менсьым вольпасьӧс пежалін.
Симеон да Левий — вокъяс, налӧн шыпуртыс виалӧ-дойдалӧ.
Менам сьӧлӧмӧй оз йитчы накӧд, ог кӧсйы лоны налӧн чукӧрас, ӧд скӧрйывсьыс найӧ виисны мортӧс, тешитчигмоз вундалісны ӧшлысь сӧнъяссӧ.
Ёрӧма налысь скӧрлунсӧ, ӧд сійӧ вывті чорыд, ёрӧма налысь ярлунсӧ, ӧд сійӧ звер кодь лёк.
Яков пиян пӧвстӧ найӧс шыблала, Израиль чужанкотыръясӧ разӧда.
Иуда, тэнӧ ошкасны вокъясыд, тэныд копыртчасны батьыдлӧн пияныс, ӧд тэнад киыд вӧрӧгыдлӧн сьылідзир вылас.
Иуда, тэ — том лев, пиӧй, тэ — кыйсьӧм бӧрын кыпӧдчысь лев, тэ лев моз водан да куйлан. Коді лысьтас садьмӧдны тэнӧ?
Иуда киын пыр лоӧ юралан беддьыс, сылӧн кок бердын — ыджыдалан беддьыс, кытчӧдз оз лок Бурӧдысь, кодлысь кывзысьӧны войтыръяс.
Виноград бердӧ сійӧ кӧрталӧ ассьыс том осёлсӧ, медбур виноград вожйӧ — осёл чаньсӧ.
Винаын мыськалӧ ассьыс кӧлуйсӧ, виноград розъяслӧн вирнас — паськӧмсӧ.
Синмыс югъялӧ винаысь, пиньясыс йӧлысь на еджыдӧсь.
Завулон кутас овны саридз бокын, корабльяса ӧзын дорын, сійӧ паськӧдчас Сидонӧдз.
Иссакар — крепыд осёл, нӧбъяс бокын куйлӧ.
Сійӧ казяліс, мый шойччаніныс бур, мый муыс лӧсьыд. Та вӧсна лӧсьӧдіс пельпомсӧ нӧбъяс новлӧдлыны, кутіс уджавны кесйӧг моз.
Дан лоас ёрдысьӧн аслас войтырлы, израильса чужанкотыръяс пӧвстын ӧтиӧн.
Сійӧ лоӧ туйбокса змейӧн, туйвывса аспидӧн, коді чушкӧ вӧлӧс кокас, и верзьӧма гатш усьӧ му вылас.
Господьӧй, мезды, ме виччыся отсӧг Тэсянь!
Гад вылӧ уськӧдчасны мырддялысь-пазӧдысьяс, но сійӧ вӧтӧдас найӧс, тувччас налы коклябӧрас.
Асирлӧн няньыс лоӧ вывті пӧтӧса, ӧксылы кодь сёянӧн кутас йӧзӧс вердны.
Неффалим — ыджыд пу, мича вожъясӧн паськӧдчӧма.
Ӧсип — ю весьтын быдмысь вотӧса пулӧн вож, быдмӧ-кыпӧдчӧ стен пӧлӧн.
Лӧгалісны сы вылӧ лыйсьысьяс, дзескӧдісны, лыйлісны сійӧс, но ньӧввужйыс сылӧн эз личавлы, ки сӧнъясыс колины крепыдӧсь, ӧд сылы отсаліс Яковлӧн вына Ен, сійӧс Видзысьыс, Израильлӧн зумыд Изйыс.
Сійӧ — батьыдлӧн Ен, коді отсалас тэныд, Сійӧ — Ставсӧвермысь, коді бурсиас тэнӧ. Бурсиас енэжвывса бурсиӧмӧн, мупыдӧсса бурсиӧмӧн, морӧс йӧв да мам кынӧм бурсиӧмӧн, батьыдлӧн бурсиӧмӧн. Тайӧ нэмӧвӧйся изъяслӧн бурсиӧмысь вынаджык, нэмӧвӧйся керӧсъяслӧн лышкыдлунысь бурджык.
Став тайӧ бурсиӧмыс мед вевттяс Ӧсипӧс, ӧд сійӧс бӧрйӧма вокъяс пӧвстысь.
Венямин — горш кӧин, асывнас кутас сёйны шедӧдӧмторсӧ, рытнас — юклыны кыйӧмторсӧ.
Тайӧ — Израильлӧн дас кыкнан чужанкотырыс.
Пиянсӧ бурсиигас батьныс висьталіс ставсӧ тайӧс.
Сійӧ быдӧнӧс бурсиис торйӧн.
Яков шуис пияныслы: «Ме вуджа аслам батьяс дінӧ.
Дзебӧй менӧ накӧд орччӧн кырта горсйӧ, мый хеттей Ефронлӧн му вылас. Тайӧ горсйыс Ханаан муын, Макпела му вылын Мамре дорын. Хеттей Ефронлысь тайӧ мусӧ ньӧбис Ӧвраам, медым сэтчӧ дзебны кулӧмаясӧс.
Сэтчӧ дзебӧма Ӧвраамӧс да сылысь Сарра гӧтырсӧ, дзебӧма Исаакӧс да сылысь Ревекка гӧтырсӧ.
Сэтчӧ ме дзеби Лияӧс.
Тайӧ мусӧ да сэтчӧс кырта горссӧ ньӧбӧма хеттейяслысь».
Пияныслы тайӧс висьталӧм бӧрын Яков водіс вольпасяс да куліс — вуджис батьясыс дінӧ.
Ӧсип уськӧдчис батьыс дінӧ, окаліс сійӧс да бӧрдіс сы вӧсна.
Ӧсип тшӧктіс аслас кесйӧг бурдӧдысьяслы бальзамируйтны Израиль батьыслысь шойсӧ.
Бурдӧдысьяс тадзи и вӧчисны.
Нелямын лун чӧж колана ногӧн бальзамируйтісны шойсӧ. Египетсаяс бӧрдісны Израиль вӧсна сизимдас лун.
Бӧрдан лунъяс кольӧм бӧрын Ӧсип шуис фараонлӧн чина йӧзлы: «Лоӧй бур сьӧлӧмаӧсь, висьталӧй фараонлы, мый кулігас батьӧй тшӧктіс гуавны сійӧс Ханаан муӧ аслыс водзвыв лӧсьӧдӧм дзебанінӧ. Ме кыв сеті сылы. Та вӧсна корӧй фараонӧс, мед сійӧ лэдзас менӧ мунны да дзебны ассьым батьӧс. Сэсся ме бӧр локта».
[Ӧсиплысь кывъяссӧ висьталісны фараонлы.]
Фараон шуис: «Мун да дзеб ассьыд батьтӧ, кыдзи тэ кыв сетӧмӧн кӧсйысин сылы».
Ӧсип муніс дзебны ассьыс батьсӧ.
Сыкӧд мунісны фараонлӧн ыджыд чинаяс, сылӧн керкаысь да Египет муысь юрнуӧдысьяс. Мунісны сыкӧд тшӧтш став сылӧн гортсаыс, вокъясыс да батьыслӧн гортсаясыс.
Гошен муӧ колисны сӧмын ассьыныс челядьсӧ да ыж-мӧснысӧ.
Мунысьыс вӧлі вывті уна. Мунісны и тарантасъяс, и верзьӧмаяс.
Йӧрдан ю сайӧ Горен-Атадӧдз воӧм бӧрын пондісны гораа сыркъялӧмӧн бӧрдны.
Сизим лун чӧж бӧрдісны Ӧсиплӧн бать вӧсна.
Ханаан муын олысьяс аддзисны Горен-Атадын бӧрдӧмсӧ да шуисны: «Кутшӧм ёна шогалӧны-бӧрдӧны египетсаяс!»
Та вӧсна тайӧ местасӧ, мый Йӧрдан сайын, шуӧны Авел-Мицраим.
Яковлӧн пияныс ставсӧ вӧчисны батьныслӧн тшӧктӧм серти.
Нуисны сылысь шойсӧ Ханаан муӧ да дзебисны кырта горсйӧ, коді Макпела му вылын Мамре дорын. Тайӧ мусӧ да кырта горссӧ Ӧвраам ньӧбліс хеттей Ефронлысь, медым сэтчӧ дзебны кулӧмаясӧс.
Батьсӧ дзебӧм бӧрын Ӧсип бӧр локтіс Египетӧ вокъясыскӧд да ставныскӧд, кодъяс ветлісны дзебны батьсӧ.
Батьныс кулӧм бӧрын Ӧсиплӧн вокъясыс мӧвпалісны, мый Ӧсип кутас лӧгавны на вылӧ да став лёк вӧчӧмсьыныс налысь водзӧс перъяс.
Та вӧсна Ӧсип дінӧ ыстісны мортӧс. Сійӧ шуис Ӧсиплы: «Кулӧм водзас батьыд тшӧктіс висьтавны тэныд, мед тэ прӧститан миянлысь мыжнымӧс да лёк вӧчӧмнымӧс.
Ӧні прӧстит миянӧс, батьыдлӧн Енлысь кесйӧгъяссӧ».
Ӧсип бӧрдіс тайӧ кывъяссӧ кывзігас.
Локтісны и асьныс вокъясыс да уськӧдчисны Ӧсип водзӧ шуалігмоз: «Ми — тэнад кесйӧгъяс!»
Ӧсип шуис: «Энӧ полӧй. Ме ӧд абу Ен.
Ті мӧвпалінныд лёк вӧчны меным, но Енмыс тайӧс бергӧдіс бур вылӧ, медым видзны уна йӧзлысь олӧмсӧ.
Энӧ полӧй. Ме кута вердны тіянӧс да тіянлысь челядьнытӧ».
Тадзи лӧньӧдіс найӧс, бурӧдіс налысь сьӧлӧмнысӧ.
Тадзи Ӧсип да батьыслӧн рӧдыс овмӧдчисны Египетӧ.
Ӧсип оліс сё дас арӧсӧдз.
Ефремлысь ныв-писӧ Ӧсип коймӧд чужанвужйӧдзыс на аддзыліс. Манассейлӧн Макир пилысь пиянсӧ босьтіс аслыс пиян пыдди.
Ӧсип шуис аслас вокъяслы: «Ме регыд кула, но Енмыс волас тіянла да петкӧдас тіянӧс тайӧ мусьыс сійӧ муас, мый кыв сетӧмӧн кӧсйысьліс Ӧвраамлы, Исааклы да Яковлы».
Ӧсип шуис Израиль пиянлы: «Кыв сетӧй, мый петкӧданныд менсьым лыясӧс Египетысь, кор Енмыс волас тіянла».
Ӧсип куліс сё дас арӧсаӧн.
Сылысь шойсӧ бальзамируйтісны да пуктісны Египетын гортйӧ.
{Еврей йӧз (комиӧдіс Kodko) @ Петӧм @ религ. гижӧд @ Библия @ 2021 @ Лб. .}
Мӧисейлӧн мӧд небӧг
ПЕТӦМ
Со нимъясыс Израиль пиянлӧн, кодъяс асланыс котырнаныс да Яков* батьныскӧд локтісны Египет муӧ.
Тайӧ вӧліны: Рувим, Симеон, Левий, Иуда, Иссакар, Завулон да Венямин, Дан да Неффалим, Гад да Асир.
Яковсянь чужысьыс ставнас вӧлі сизимдас [вит] морт. Ӧсип сэки оліс нин Египетын.
Ӧсип куліс, вокъясыс кулісны, на кодь арлыдаыс некод эз коль.
Израиль войтырлӧн чужис зэв уна ныв-пи. Тадзи войтырыс ёна содіс да паськаліс став му пасьталаыс.
Египетын юралысьӧ пуксис выль ӧксы, коді Ӧсип йылысь нинӧм эз тӧд. Аслас войтырлы ӧксы шуис: «Израиль войтыр миян дорысь лои уна лыда да ён.
Медым найӧ водзӧ оз рӧдмыны, колӧ миянлы мыйкӧ вӧчны.
Ӧд пансяс кӧ тыш, найӧ вермасны ӧтувтчыны миян вӧрӧгкӧд, уськӧдчыны миян вылӧ да петны миян муысь».
Египетсаяс сувтӧдісны израильсаяслӧн удж бӧрся видзӧдысьясӧс, медым сьӧкыд уджнас топӧдны найӧс.
Израильсаяс лэптісны фараонлы Питом да Рамсес каръяс, медым сэні видзны нянь. [Лэптісны тшӧтш Он кар, мӧд ногӧн кӧ, Илиополь.]
Кымын ёнджыка топӧдісны Израиль войтырӧс, сымын ёнджыка найӧ рӧдмисны-паськалісны. Египетсаясӧс таысь полӧм босьтіс, и найӧ чорыдджыка на пондісны уджӧдны Израиль войтырӧс. Курыд синва сора лои олӧмыс Израиль войтырлӧн. Найӧс ёна нартитісны, тшӧктісны вӧчны быдпӧлӧс сьӧкыд уджсӧ: талявны сёй, вӧчавны кирпич, уджавны видз-му вылын.
Еврейяслӧн гӧгиньяслы, кодъясӧс шуисны Шипра да Пуа, египетса ӧксы тшӧктіс:
«Кор кутанныд отсавны еврей аньяслы чужтыны, видзӧдӧй, коді чужас. Чужас кӧ пи, виӧй сійӧс, а ныв кӧ, ловйӧн кольӧй».
Гӧгиньяс полісны Енмысь, та вӧсна эз кутны кывзыны египетса ӧксыӧс, пи кагаясӧс найӧ ловйӧн кольлісны.
Египетса ӧксы корис гӧгиньясӧс да юаліс налысь: «Мыйла ті ловйӧн колянныд пи кагаяссӧ?»
Гӧгиньяс шуисны фараонлы: «Еврей аньяс абу египетса аньяс кодьӧсь.
Найӧ ёнӧсь, миян локтӧдз каганысӧ чужтӧны нин».
Енмыс бурӧн мынтысис гӧгиньяслы таысь. Войтырыс рӧдмис да вӧлі ён вына.
Сыысь, мый гӧгиньяс полісны Енмысь, Енмыс бурсиис найӧс челядьӧн.
Аслас войтырлы фараон тшӧктіс: «Еврейяслысь став пузчужӧм пи кагасӧ шыблалӧй Нил юӧ, а нывъяссӧ ловйӧн кольӧй».
Левий чужанкотырысь ӧти морт гӧтрасис аслас чужанкотырысь нывкӧд.
Гӧтырыс сылӧн кынӧмасис да чужтіс пиӧс. Кагаыс вӧлі зэв мичаник, и мамыс куим тӧлысь чӧж дзеблаліс сійӧс.
Но кор дзеблавнысӧ эз нин вермы, босьтіс юсьпӧлянысь кыӧм куд, мавтіс кудсӧ медводз сьӧд сирӧн, а сэсся пу сирӧн. Кагасӧ пуктіс кудйӧ, нуис кудсӧ Нил ю бокӧ да лэдзис ваӧ эжӧр пиӧ. Кагаыслӧн чойыс кольччис неылӧ, медым видзӧдны, мый лоас вокыскӧд.
Ю дорӧ локтіс фараонлӧн нылыс. Сійӧ кутіс мыссьыны, а сылӧн кесйӧг аньясыс ветлӧдлісны ю пӧлӧнті.
Фараон ныв аддзис эжӧр пиысь куд да тшӧктіс кесйӧг аньыслы судзӧдны сійӧс.
Кудсӧ восьтӧм бӧрас аддзис сэтысь кагаӧс.
Кагаыс бӧрдіс.
Фараон нывлӧн нормис сьӧлӧмыс, и сійӧ шуис: «Тайӧ кагаыс еврейяслӧн».
Кагалӧн чойыс юаліс фараон нывлысь: «Гашкӧ, ме ветла да кора тэныд еврей аньӧс, мед сійӧ нёньӧдас тайӧ кагасӧ?»
«Ветлы», — шуис сылы фараон ныв.
Кагалӧн чойыс ветліс да вайӧдіс мамсӧ.
Фараон ныв шуис кагалӧн мамыслы: «Босьт тайӧ кагасӧ да верд сійӧс, а ме мынтыся тэныд».
Ань босьтіс кагасӧ, медым вердны-нёньӧдны сійӧс.
Кага быдмыштіс, и мамыс вайӧдіс сійӧс фараон ныв дінӧ, коді босьтіс сійӧс аслыс пи пыдди. Фараон ныв пуктіс сылы Мӧисей ним, шуис, ме пӧ ваысь лэпті сійӧс.
Коли кад. Мӧисей верстяммис. Ӧтчыд сійӧ локтіс еврей вокъяс дінӧ да аддзис налысь сьӧкыда уджалӧмсӧ.
Мӧисейлы син улас уси, кыдзи египетса морт нӧйтӧ еврейӧс.
Мӧисей видзӧдліс, аддзӧ-ӧ кодкӧ сійӧс, и кор гӧгӧрвоис, мый некод оз аддзы, виис египетсаӧс, а шойсӧ лыаӧн тыртіс.
Мӧд луннас Мӧисей бара локтіс еврей вокъяс дінӧ да аддзис, кыдзи кык еврей тышкасьӧны ӧта-мӧдыскӧд.
Тышсӧ панысьлы Мӧисей шуис: «Мыйла тэ нӧйтан ассьыд матыссатӧ?»
Сійӧ вочавидзис: «Коді тэнӧ пуктіс миян вылын ыджыдалысьнас да миянӧс мыждысьнас?
Гашкӧ, [тӧрытъя] египетсаӧс моз тэ тшӧтш кӧсъян вины менӧ?»
Мӧисей повзис. Сійӧ мӧвпыштіс: «Тыдалӧ, тӧдмалісны, мый ме вӧчи».
Фараонлы кывсис, мый вӧчис Мӧисей. Сійӧ кӧсйис вины Мӧисейӧс, но Мӧисей пышйис Мадиан муӧ. Сэтчӧ воӧм бӧрын сійӧ пуксис юкмӧс дорӧ.
Сэтчӧ локтісны мадианса поплӧн сизимнан нылыс [кодъяс видзисны Иофор батьныслысь ыжъяссӧ]. 
Найӧ гумлалісны юкмӧсысь ва да тыртісны воръяссӧ, кытысь юисны батьныслӧн ыжъясыс.
Но локтісны ыж видзысьяс да вӧтлісны найӧс.
Сэки Мӧисей чеччис дорйыны нывъясӧс [сійӧ гумлаліс налы юкмӧсысь васӧ] да юкталіс налысь ыжъяссӧ.
Кор нывъяс локтісны Регуэл* батьныс дінӧ, сійӧ юаліс: «Талун нӧ мый сэтшӧм водз локтінныд?»
Найӧ вочавидзисны: «Кутшӧмкӧ египетса морт дорйис миянӧс ыж видзысьясысь, весиг гумлаліс миянлы ва да ыжъяснымӧс юкталіс».
«Кӧні сійӧ? — юаліс батьыс.
— Мыйла колинныд сійӧс?
Мунӧй корӧй сійӧс сёйны».
Мӧисейлы кажитчис овны мадианса морт ордын.
Иофор сетіс ассьыс Сеппора нывсӧ Мӧисейлы гӧтыр пыдди.
Сеппора [кынӧмасис да] чужтіс пиӧс. Мӧисей пуктіс пиыслы Гершом ним, ӧд шуис: «Йӧз муын ме лои локтысь мортӧн».
[Сеппора нӧшта кынӧмасис да чужтіс мӧд пиӧс. Мӧисей пуктіс сылы Элизер ним, ӧд шуис: «Батьӧйлӧн Енмыс отсаліс меным да мездіс менӧ фараон киысь».]
Уна во коли. Египетса ӧксы куліс.
Израиль пиян ойзӧмӧн ойзісны сьӧкыд уджысь. Налӧн горзӧмыс воис Енмӧдз.
Ен кыліс ойзӧмсӧ налысь да уськӧдіс тӧд вылас Ассьыс йитӧдсӧ, мый Сійӧ кӧрталіс Ӧвраамкӧд, Исааккӧд да Яковкӧд.
Ен бергӧдіс Ассьыс чужӧмбансӧ Израиль пиянлань.
Мӧисей видзис тесьтыслысь, мадианса Иофор поплысь, ыжъяссӧ.
Ӧтчыд овтӧминын Мӧисей нуӧдіс ыжъяссӧ зэв ылӧ да воис Енлӧн Хорив керӧс дорӧдз.
Сэні ӧзъялысь лежнӧг пытшкын сылы петкӧдчис Господьлӧн андел.
Мӧисей аддзис, мый лежнӧгыс ыпъялӧ биӧн, но оз сотчы.
«Муна видзӧдла тайӧ ыджыд шензьӧданаторйыс вылӧ, мыйла нӧ лежнӧгыс оз сотчы», — шуис сійӧ.
Господь аддзис Мӧисейлысь матыстчӧмсӧ да ӧзъялысь лежнӧг пытшсянь шыасис сы дінӧ: «Мӧисей, Мӧисей!»
Сійӧ вочавидзис: «[Господьӧй!] Ме тані».
Ен шуис: «Водзӧ эн воськовт!
Пӧрччы кӧмтӧ, ӧд муыс, кӧні тэ сулалан, вежа».
Ен нӧшта шуис: «Ме тэнад батьлӧн Ен, Ӧвраамлӧн Ен, Исааклӧн Ен да Яковлӧн Ен».
Мӧисей тупкис чужӧмсӧ, ӧд поліс видзӧдны Ен вылӧ.
Господь шуис Мӧисейлы: «Ме аддзи, кыдзи сьӧкыдалӧ Менам войтырӧй Египетын. Ме кылі, кыдзи ойзӧны найӧ уджӧдысьяслӧн нартитӧмысь.
Налысь шогсӧ Ме тӧда. Та вӧсна Ме локті мездыны найӧс египетсаяслӧн кипод улысь. Ме петкӧда найӧс сійӧ мусьыс да нуӧда бур паськыд муӧ, кӧні визувтӧ йӧв да ма, — ханаансаяслӧн, хеттейяслӧн, аморейяслӧн, перезейяслӧн, [гергесейяслӧн,] хивейяслӧн да евуссаяслӧн муӧ.
Израиль войтырлӧн горзӧмыс воис Меӧдз. Ме аддза, кыдзи египетсаяс топӧдӧны найӧс.
Ме ыста тэнӧ фараон дінӧ [египетса ӧксы дінӧ]. 
Мун, петкӧд Египетысь Менсьым войтырӧс, Израиль пиянӧс!»
Мӧисей шуис Енлы: «Коді ме сэтшӧмыс, медым мунны фараон дінӧ [египетса ӧксы дінӧ] да петкӧдны Египетысь Израиль войтырӧс?»
Ен шуис: «Ме лоа тэкӧд. Со тэныд пас, мый Ме мӧдӧді тэнӧ.
Кор тэ петкӧдан Менсьым войтырӧс Египетысь, ті юрбитанныд Енлы тайӧ керӧс вылас».
Мӧисей шуис Енлы: «Ме муна Израиль пиян дінӧ да шуа налы, мый налӧн батьяслӧн Ен ыстіс менӧ на дінӧ.
А кор найӧ юаласны менсьым, кыдзи нӧ Сылӧн нимыс, сэки мый меным вочавидзны налы?»
Ен шуис Мӧисейлы: «Ме Сійӧ, коді эм.
Висьтав Израиль пиянлы, мый тэнӧ мӧдӧдіс Сійӧ, кодлӧн нимыс “Ме эм”».
Ен нӧшта шуис Мӧисейлы: «Висьтав Израиль пиянлы, мый Господь, налӧн батьяслӧн Ен, Ӧвраамлӧн Ен, Исааклӧн Ен да Яковлӧн Ен, мӧдӧдіс тэнӧ на дінӧ.
Чужысьяссянь чужысьясӧдз Менӧ кутасны шуны Господьӧн. Тайӧ Менам нимӧй пыр кежлӧ.
Мун, чукӧрт Израиль войтырлысь юрнуӧдысьяссӧ да шу налы, мый Господь, налӧн батьяслӧн Ен, Ӧвраамлӧн, Исааклӧн да Яковлӧн Ен, петкӧдчис тэныд да висьталіс: “Ме видзӧді тіян бӧрся да аддзи, кыдзи ті оланныд Египетын.
Ме шуи, мый Ме мезда тіянӧс египетсаяслӧн дзескӧдӧмысь да петкӧда ханаансаяслӧн, хеттейяслӧн, аморейяслӧн, перезейяслӧн, [гергесейяслӧн,] хивейяслӧн да евуссаяслӧн муӧ, кӧні визувтӧ йӧв да ма”.
Израильса юрнуӧдысьяс кывзасны тэнӧ да мунасны тэкӧд [фараон дінӧ]. Кор локтанныд египетса ӧксы дінӧ, шуӧй сылы: “Господь, еврейяслӧн Ен, корис миянӧс.
Лэдз миянӧс овтӧминӧ куим лун мунан ылнаӧ. Сэні ми вись ваям Господьлы, асланым Енлы”.
Ме тӧда, мый [фараон] египетса ӧксы оз кут лэдзны тіянӧс, кытчӧдз Менам вына киӧй оз инмӧдчы сылы.
Ме лэпта киӧс да мыжда Египетӧс шензьӧданаторъяс вӧчӧм пыр.
Сӧмын та бӧрын фараон лэдзас тіянӧс.
Ме небзьӧда египетсаяслысь сьӧлӧмсӧ тіян дінӧ.
Ті петанныд сэтысь, и петанныд онӧ куш киӧн.
Быд ань мед корас орччӧн олысь да ас ордас олысь аньяслысь эзысь, зарни да паськӧм. Наӧн мичмӧдӧй ныв-пинытӧ. Тадзи ті петкӧданныд египетсалысь озырлунсӧ».
Но Мӧисей вочавидзис: «Оз кӧ эскыны, оз кывзыны менӧ, а шуасны, эз пӧ петкӧдчыв тэныд Господь? 
[Сэки мый ме шуа налы?]»
Господь юаліс Мӧисейлысь: «Мый тэнад киын?»
Сійӧ вочавидзис: «Бедь».
Господь шуис: «Шыбит сійӧс му вылӧ».
Мӧисей шыбитіс бедьсӧ му вылӧ, и беддьыс пӧри змейӧ. Мӧисей котӧрӧн вешйис сы дорысь.
Господь шуис Мӧисейлы: «Нюжӧд китӧ да босьт сійӧс бӧжӧдыс».
Мӧисей нюжӧдіс кисӧ да босьтіс змейӧс [бӧжӧдыс]. 
Сылӧн киас змей бӧр лои беддьӧн.
Господь шуис: «Вӧч тайӧс, мед найӧ эскасны, мый збыльысь тэныд петкӧдчис Господь, налӧн батьяслӧн Ен — Ӧвраамлӧн Ен, Исааклӧн Ен да Яковлӧн Ен».
Господь нӧшта шуис сылы: «Сюй китӧ питшӧгад».
Мӧисей сюйис кисӧ питшӧгас, а кор бӧр перйис, сылӧн киыс лои проказаысь лым кодь еджыд.
Господь шуис: «Китӧ бӧр сюй питшӧгад».
Мӧисей бара сюйис кисӧ питшӧгас.
Сэсся перйис кисӧ, и киыс бӧр лои вир-яйыс кодь сӧстӧм.
Господь шуис: «Оз кӧ эскыны тэныд да медводдза индысьпасыслы, сідзкӧ, мӧд индысьпасыслы эскасны.
А кыкнан индысьпасыслы кӧ оз эскыны да оз кывзыны тэнсьыд кывъястӧ, сэки гумовт Нил юысь васӧ да койышт му вылӧ, и ваыс сэні пӧрас вирӧ».
«Ыджыдӧй, — шыасис Мӧисей Господь дінӧ, — ме абу кыв-вора и некор татшӧмнас эг вӧв. Весиг ӧні, кор Тэ сёрнитан мекӧд, Аслад кесйӧгкӧд, ме сьӧкыда да мыкталӧмӧн сёрнита».
Господь вочавидзис Мӧисейлы: «Коді вӧчис мортлысь вомсӧ?
Коді вӧчӧ мортӧс кывтӧмӧн либӧ пельтӧмӧн, синмаӧн либӧ синтӧмӧн?
Ог-ӧ Ме, Господь [Ен]?
Мун, Ме лоа тэкӧд. Ме сета тэныд, мый шуны».
Мӧисей корис: «Господьӧй, ысты кодӧскӧ мӧдӧс».
Господь скӧрмис Мӧисей вылӧ да шуис: «Тэнад эм Аарон вок, Левий чужанкотырысь.
Ме тӧда, мый сійӧ кужас [тэ пыдди] сёрнитны. Сійӧ локтӧ нин тэ дінӧ. Тэнӧ аддзас да, сьӧлӧмыс пондас нимкодясьны.
Тэ висьтав сылы Менсьым кывъясӧс, пукті вомас, мый шуны. Ме лоа тіянкӧд, кор ті кутанныд сёрнитны, да велӧда, мый колӧ вӧчны.
Аарон кутас тэ пыдди сёрнитны йӧзыскӧд.
Тадзи сійӧ лоӧ тэнад вомӧн, а тэ кутан висьтавны сылы Ен пыдди.
Босьт аслад киӧ [змейӧ пӧртлӧм] бедьтӧ. Сы отсӧгӧн тэ кутан вӧчны индысьпасъяс».
Мӧисей локтіс Иофор тесьт дінӧ да шуис сылы: «Лэдз меным бӧр мунны Египетӧ вокъяс дінӧ, медым тӧдмавны, ловъяӧсь-ӧ найӧ».
Иофор шуис Мӧисейлы: «Мун лӧнь сьӧлӧмӧн».
[Кад мысти куліс египетса ӧксы.]
Мадиан муын Господь шуис Мӧисейлы: «Мун бӧр Египетӧ. Кодъяс кӧсйисны вины тэнӧ, найӧ абу нин ловъяӧсь».
Мӧисей пуксьӧдіс гӧтырсӧ да пиянсӧ осёлъяс вылӧ, медым мӧдӧдчыны Египет муӧ.
Енлысь бедьсӧ Мӧисей босьтіс киас.
Господь шуис Мӧисейлы: «Кор тэ воан Египетӧ, вӧч сэні фараон водзын став шензьӧданаторсӧ, мый Ме тшӧкті тэныд вӧчны. Ме чорзьӧда фараонлысь сьӧлӧмсӧ, и сійӧ оз лэдз Израиль войтырӧс.
Сэки шу фараонлы, мый Господь [еврейяслӧн Ен] тадзи висьталӧ: Израиль — Менам пи, Менам медводдза чужысь.
Тшӧкта тэныд: лэдз Менсьым пиӧс юрбитны Меным.
А он кӧ лэдз, Ме виа тэнсьыд медводдза чужысь питӧ».
Войнас, кор Мӧисей аслас котырыскӧд туйын шойччис, Господь локтіс Мӧисей дінӧ да кӧсйис вины сійӧс.
Сэки Сеппора босьтіс ёсь из да вундыштіс пиыслысь чильган йывсьыс кучикторсӧ, сэсся инмӧдчыліс сыӧн Мӧисейлы коквож костас шуӧмӧн: «Вир пыр тэ меным верӧспу».
Та бӧрын Господь вешйис Мӧисей дінысь.
Сеппоралӧн “вир пыр верӧспу” кывъясыс висьталӧны вундыштчӧм йылысь.
Господь шуис Ааронлы: «Мун Мӧисейлы воча овтӧминӧ».
Аарон петіс туйӧ. Енлӧн керӧс горулын сійӧ паныдасис Мӧисейкӧд да окыштіс сійӧс.
Мӧисей висьталіс Ааронлы ставсӧ, мый шуис Господь, кыдзи мӧдӧдіс сійӧс да кутшӧм индысьпасъяс сылы тшӧктіс вӧчны.
Египетӧ локтӧм бӧрын Мӧисей да Аарон чукӧртісны Израиль войтырлысь юрнуӧдысьясӧс. Аарон висьталіс налы ставсӧ, мый Господь шуис Мӧисейлы.
Войтырыслӧн син водзын Мӧисей петкӧдліс индысьпасъяс. Войтырыс эскис.
Кор найӧ кылісны, мый Господь волӧма Израиль войтыр дінӧ да аддзӧма налысь сьӧкыдалӧмсӧ, муӧдзыс копыртчӧмӧн юрбитісны Господьлы.
Мӧисей да Аарон локтісны фараон дінӧ да шуисны сылы: «Господь, Израильлӧн Ен, тадзи висьталӧ: “Лэдз Менсьым войтырӧс мунны овтӧминӧ, медым найӧ пасъясны Меным сиӧм гаж”».
Но фараон вочавидзис: «Коді сійӧ Господьыс, медым ме кывзыси Сылысь да лэдзи Израиль войтырӧс?
Ме ог тӧд Господьӧс, и Израиль войтырӧс ме ог лэдз».
Найӧ шуисны сылы: «Еврейяслӧн Ен корис миянӧс.
Лэдз миянӧс овтӧминӧ куим лун мунан ылнаӧ. Сэні ми вись ваям Господьлы, асланым Енлы, медым Сійӧ эз бырӧд миянӧс пӧрӧс висьӧмӧн либӧ шыпуртӧн».
Египетса ӧксы шуис налы: «Мӧисей да Аарон, мыйла ті падмӧданныд войтырӧс уджысь?
Мунӧй [ставныд], уджалӧй!»
«Вывті уна войтырӧс ті кӧсъянныд торкны уджысь», — содтіс фараон.
Израиль войтырӧс уджӧдысь-нартитысьяслы да удж бӧрся видзӧдысьяслы фараон сійӧ жӧ луннас шуис:
«Дугдӧй сетны тайӧ войтырыслы кирпич вӧчалӧм вылӧ идзассӧ, кыдзи водзын сетлінныд. Найӧ мед асьныс кутасны ветлӧдлыны да чукӧртны идзассӧ. А кирпичсӧ мед вӧчаласны воддза мындаыс.
Дышнысла найӧ шуалӧны, мунам пӧ асланым Енлы вись вайны.
Содтӧй налы уджсӧ! Мед уджалӧны да ылӧг сёрнияс оз кывзыны».
Уджӧдысь-нартитысьяс да удж бӧрся видзӧдысьяс шуисны Израиль войтырлы: «Фараон шуис, мый оз кут сетны тіянлы идзас.
Мунӧй асьныд корсялӧй идзассӧ, кытысь кӧсъянныд, а кирпичсӧ вӧчӧй воддза мындаыс».
Израиль войтыр пондіс ветлӧдлыны Египет му пасьтала да чукӧртны идзас.
Уджӧдысь-нартитысьяс ӧтарӧ чиршӧдлісны найӧс да шуалісны: «Быд лун вӧчӧй кирпичсӧ сы мында, мыйта вӧчлінныд водзынсӧ, кор тіянлы вӧлі сетӧны идзассӧ».
Фараонлӧн уджӧдысь-нартитысьяс нӧйтісны израильсаясӧс, кодъясӧс вӧлі пуктӧмаӧсь видзӧдны удж бӧрся. Уджӧдысь-нартитысьяс юасисны удж бӧрся видзӧдысьяслысь: «Мыйла кирпичсӧ воддза мындаыс ни тӧрыт, ни талун энӧ вӧчӧй?»
Удж бӧрся видзӧдысь израильсаяс локтісны фараон дінӧ да юалісны: «Мыйла тэ миянкӧд, аслад кесйӧгъяскӧд, тадзи вӧчан?
Идзассӧ миянлы оз сетны, а кирпичсӧ тшӧктӧны вӧчны.
Миянӧс, тэнсьыд кесйӧгъястӧ, нӧйтӧны.
Тэнад войтырыд мыжмӧ таысь».
Но фараон вочавидзис налы: «Ті дзикӧдз дышминныд, та вӧсна кӧсъянныд мунны да вайны Господьлы вись.
Мунӧй, уджалӧй!
Идзассӧ тіянлы оз сетны, но кирпичсӧ урчитӧм мында вӧчӧй».
Удж бӧрся видзӧдысь израильсаяс кор кылісны, мый кирпичсӧ быд лун колӧ вӧчны сы мында, мыйта вӧчлісны водзынджык, сэки гӧгӧрвоисны, кутшӧм сьӧкыд олӧм найӧс виччысьӧ.
Фараон дінысь петӧм бӧрын найӧ матыстчисны Мӧисей да Аарон дінӧ, кодъяс виччысисны найӧс. Найӧ шуисны Мӧисейлы да Ааронлы: «Господь мед аддзас, мый ті вӧчинныд, да мыждас тіянӧс. Тіян вӧсна фараон да сылӧн йӧзыс кутісны мустӧмтны миянӧс. Ті сетінныд налы шыпурт, медым миянӧс вины».
«Ыджыдӧй, — шыасис Мӧисей Господь дінӧ, — мыйла Тэ сэтшӧма сьӧктӧдін войтырсӧ? Мыйла Тэ менӧ мӧдӧдін?
Сійӧ кадсяньыс, кор ме муні фараон дінӧ сёрнитны Тэнад нимсянь, фараон кутіс чорыдджыка на дзескӧдны войтырӧс.
Мыйла Тэ эн мезды Ассьыд войтыртӧ!»
Господь шуис Мӧисейлы: «Ӧні тэ аддзан, мый Ме вӧча фараонлы.
Ме лэпта киӧс сы вылӧ, и сійӧ лэдзас Менсьым войтырӧс, весиг вӧтлас найӧс аслас муысь».
Ен шуис Мӧисейлы: «Ме — Господь.
”Ставсӧвермысь Ен” ним улын Ме петкӧдчи Ӧвраамлы, Исааклы да Яковлы, но “Господь” ним улын Ме налы эг воссьыв.
Ме кӧрталі накӧд йитӧд, кӧсйыси сетны налы Ханаан му, кӧні найӧ вӧліны ветлысь-мунысьяс.
Ме кылі, кыдзи ойзӧны Израиль пиян египетсалӧн нартитӧм улын, да тӧд вылӧ уськӧді Ассьым йитӧдӧс.
Висьтав Израиль пиянлы: Ме — Господь. Ме чорыда мыжда Египет войтырӧс, а тіянӧс петкӧда налӧн нартитӧм улысь. Ме нюжӧда киӧс да мезда тіянӧс.
Ті лоанныд Менам войтырӧн, а Ме — тіян Енмӧн. Ті тӧдмаланныд, мый Ме — Господь, тіян Енныд, коді петкӧдіс тіянӧс египетсалӧн нартитӧм улысь.
Ме нуӧда тіянӧс муӧ, мый киӧс лэптӧмӧн кӧсйыси сетны Ӧвраамлы, Исааклы да Яковлы. Ме сета сійӧс тіянлы, ӧд Ме — Господь».
Мӧисей висьталіс тайӧ кывъяссӧ Израиль пиянлы, но шогалӧм да сьӧкыд удж вӧснаныс найӧ эз кывзыны сійӧс.
Господь тшӧктіс Мӧисейлы:
«Мун фараон дінӧ, египетса ӧксы дінӧ, да шу, мед лэдзас Израиль пиянӧс мунны аслас муысь».
Мӧисей та вылӧ шуис Господьлы: «Израиль пиян кӧ эз кывзыны менӧ, кывзас-ӧ менӧ фараон?
Ме ог куж сёрнитны».
Господь тшӧктіс Мӧисейлы да Ааронлы мунны Израиль пиян дінӧ да фараон, египетса ӧксы, дінӧ, медым петкӧдны Израиль пиянӧс Египетысь.
Тані лыддьӧдлӧма Израиль чужанкотыръяслысь рӧдкутысьяссӧ. Израильлӧн медводдза пиыс вӧлі Рувим. Рувимлӧн пияныс: Енок, Паллу, Хецрон да Карми. Насянь паськаліс Рувимлӧн рӧдыс.
Симеонлӧн пияныс: Емуэл, Ямин, Огад, Якин, Цохар да ханаанса аньлӧн Саул пи. Насянь паськаліс Симеонлӧн рӧдыс.
Левий пиянлӧн нимъясныс чужан во сертиныс: Гирсон, Кааф да Мерари.
Левий оліс сё комын сизим арӧсӧдз.
Гирсонлӧн пияныс: Ливни да Шимей асланыс рӧдъяскӧд.
Каафлӧн пияныс: Амрам, Ицгар, Хеврон да Узиэл.
Кааф оліс сё комын куим арӧсӧдз.
Мерарилӧн пияныс: Махли да Муши.
Татшӧм вӧлі Левийлӧн рӧдыс.
Амрам босьтіс гӧтырӧ ассьыс Иокеведа тьӧтсӧ, коді чужтіс сылы Ааронӧс да Мӧисейӧс [да налысь Мирьям чойсӧ]. 
Амрам оліс сё комын сизим арӧсӧдз.
Ицгарлӧн пияныс: Корей, Нефег да Зикри.
Узиэллӧн пияныс: Мисаэл, Элцафан да Ситри.
Аарон босьтіс гӧтырӧ Элишеваӧс, Аминадавлысь нывсӧ, Наашонлысь чойсӧ. Элишева чужтіс сылы Надавӧс, Авиудӧс, Элазарӧс да Итамарӧс.
Корейлӧн пияныс: Асир, Элкан да Авиасаф. Насянь паськаліс Корейлӧн рӧдыс.
Ааронлӧн Элазар пиыс босьтіс гӧтырӧ Футиэллӧн нывъяс пиысь ӧтиӧс, коді чужтіс сылы Пинесӧс.
Тайӧ вӧліны Левий чужанкотырлӧн рӧдкутысьяс асланыс рӧд сертиныс.
Мӧисейлы да Ааронлы Господь тшӧктіс петкӧдны Израиль пиянӧс Египет муысь тышкайӧзӧс моз.
Та могысь Мӧисей да Аарон мунісны сёрнитны фараонкӧд, египетса ӧксыкӧд.
Египет муын Господь шуис Мӧисейлы: 
«Ме — Господь. Висьтав фараонлы, египетса ӧксылы, ставсӧ, мый Ме висьтала тэныд».
А Мӧисей шуис Господьлы: «Ме ог куж сёрнитны, дай кывзас-ӧ менӧ фараон?»
Господь шуис Мӧисейлы: «Ме пукті тэнӧ фараонлы Ен пыдди, а Аарон вокыд лоас тэнад пророкӧн.
Тэ висьтав Аарон вокыдлы ставсӧ, мый Ме тшӧкта тэныд, а сійӧ висьталас фараонлы, медым фараон лэдзас Израиль пиянӧс мунны аслас муысь.
Но Ме чорзьӧда фараонлысь сьӧлӧмсӧ и петкӧдла Египет муын уна индысьпас да шензьӧданатор.
Фараон оз кывзы тіянӧс. Сэки Ме лэпта киӧс Египет му вылӧ да чорыда мыжда сійӧс, а Израиль войтырӧс, Ассьым тышкайӧзӧс, Ме петкӧда сэтысь.
Кор Ме лэпта киӧс Египет вылӧ да петкӧда сэтысь Израиль пиянӧс, сэки египетсаяс тӧдмаласны, мый Ме — Господь».
Мӧисей да Аарон вӧчисны Господьлӧн тшӧктӧм серти.
Мӧисейлы вӧлі кӧкъямысдас арӧс, а сылӧн Аарон воклы — кӧкъямысдас куим, кор найӧ сёрнитісны фараонкӧд.
Господь шуис Мӧисейлы да Ааронлы:
«Фараон кӧ тшӧктас тіянлы петкӧдлыны шензьӧданатор [либӧ индысьпас], шу Аарон вокыдлы, мед шыбитас бедьсӧ фараон водзӧ [да сылӧн йӧз водзӧ му вылас], и беддьыс пӧрас змейӧ».
Мӧисей да Аарон локтісны фараон [да сылӧн йӧзыс] дінӧ да ставсӧ вӧчисны сідзи, кыдзи тшӧктіс налы Господь.
Аарон шыбитіс бедьсӧ фараон да сылӧн йӧзыс водзӧ, и беддьыс пӧри змейӧ.
Фараон корис египетса тӧдысьясӧс да тунъясӧс.
Асланыс кимӧститчӧмӧн найӧ вӧчисны тадзи жӧ.
Быдӧн на пиысь шыбитіс ассьыс бедьсӧ, и бедьясныс пӧрины змейясӧ, но Ааронлӧн беддьыс ньылыштіс найӧс.
Фараонлӧн сьӧлӧмыс чорзис, сійӧ эз кут кывзыны Мӧисейӧс да Ааронӧс. Та йылысь [налы] водзвыв висьтавліс Господь.
Господь шуис Мӧисейлы: «Фараонлӧн сьӧлӧмыс пыксьӧ, сійӧ оз кӧсйы лэдзны войтырӧс.
Аски асывнас мун фараон дінӧ. Сійӧ лэччас Нил ю дорӧ. Сэні сувт сылы воча. Змейӧ пӧрлӧм бедьтӧ босьт киад да шу фараонлы: 
Господь, еврейяслӧн Ен, мӧдӧдіс менӧ висьтавны тэныд, мед тэ лэдзан Сылысь войтырсӧ овтӧминӧ юрбитны Сылы.
Тэ эн кывзысь, та вӧсна Господь тадзи висьталӧ: ӧні тэ тӧдмалан, мый Ме — Господь. Тайӧ бедьнас ме вачка Нил юлӧн ва веркӧсас, и ваыс пӧрас вирӧ. Юын чериыс кулас, ваыс дуксяс. Египетсаяслы зывӧк лоӧ сэтысь васӧ юны».
Господь шуис Мӧисейлы: «Тшӧкты Аарон вокыдлы босьтны киас бедьсӧ да нюжӧдны сійӧс египетса ваяслань — юяс, шоръяс, тыяс да быдсикас ва видзанінъяслань. Египет пасьтала ваыс лоӧ вирӧн, тадзи лоӧ весиг пуысь да изйысь вӧчӧм дозъясын».
Мӧисей да Аарон вӧчисны Господьлӧн тшӧктӧм серти.
Аарон лэптіс бедьсӧ, фараон да сылӧн йӧзыс син водзын вачкис Нил юӧ, и ваыс пӧри вирӧ. Юын чериыс куліс, а ваыс лои лёк дука. Египетсаяс эз вермыны юны сэтысь васӧ.
Египет му пасьтала вӧлі вир.
Египетса тунъяс кимӧститчӧмӧн вӧчисны сійӧ жӧ, мый вӧчисны Мӧисей да Аарон.
Фараонлӧн сьӧлӧмыс чорзис, сійӧ эз кут кывзыны Мӧисейӧс да Ааронӧс. Та йылысь водзвыв висьтавліс Господь.
Фараон бергӧдчис да пырис аслас керкаӧ.
Сылы вӧлі веськодь.
Египетсаяс Нил ю гӧгӧр кодйисны юкмӧсъяс, корсисны юан ва, ӧд юсьыс васӧ эз шогмы юнысӧ.
Коли сизим лун сэксянь, кор Нил юысь васӧ Господь пӧртіс вирӧ.
Господь шуис Мӧисейлы: «Мун фараон дінӧ да висьтав сылы, мый Господь тадзи висьталӧ: лэдз Менсьым войтырӧс, медым найӧ юрбитасны Меным.
Он кӧ лэдз, Ме мӧдӧда став тэнад му вылӧ жабаясӧс.
Нил юыд тырас жабаясӧн, найӧ петасны сэтысь да пырасны керкаад, узьланінад, каясны вольпась вылад. Тэныд кесъялысь йӧзлӧн да став войтырыдлӧн керкаясыс тырасны жабаясӧн. Жабаяс лоӧны весиг пач пытшканыд да нянь шомӧсаныд. Найӧ чеччаласны тэ вылӧ, тэныд кесъялысь йӧз да став войтырыд вылӧ».
Господь шуис Мӧисейлы: «Тшӧкты Аарон вокыдлы босьтны киас бедьсӧ да нюжӧдны сійӧс юяслань, писькӧдӧм шоръяслань да ва гӧпъяслань. Тадзи сійӧ петкӧдас жабаясӧс Египет му вылӧ».
Аарон нюжӧдіс кисӧ египетса ваяслань [да петкӧдіс сэтысь жабаясӧс].
Жабаяс петісны да вевттисны ставнас Египет мусӧ.
Египетса тунъяс кимӧститчӧмнас тшӧтш петкӧдісны Египет му вылӧ жабаясӧс.
Фараон корис Мӧисейӧс Ааронкӧд да шуис налы: «Кевмысьӧй Господьлы, мед Сійӧ вештас ме дінысь да менам войтыр дінысь жабаясӧс. Сэсся ме лэдза Израиль войтырӧс мунны, медым Господьлы вайны вись».
Мӧисей вочавидзис фараонлы: «Ачыд инды меным кадсӧ, кор кевмысьны тэ вӧсна, тэныд кесъялысь йӧз да став войтырыд вӧсна, медым тэ [войтырыдкӧд] да тіян керкаясныд мынінныд жабаясысь, и найӧ колисны сӧмын Нил юын».
Фараон вочавидзис: «Аски».
Мӧисей шуис: «Лоас тэнад шуӧм серти. Сэки тэ тӧдмалан, мый Господь Енным кодь мӧдыс абу.
Жабаяс вешъясны тэнад керкаясысь [да видз-му вылысь], тэныд кесъялысь йӧз да став войтырыд дінысь, найӧ колясны сӧмын Нил юын».
Мӧисей да Аарон петісны фараон керкаысь. Мӧисей шыасис Господь дінӧ, мед Сійӧ мездас фараонӧс жабаясысь.
Господь вӧчис Мӧисейлӧн корӧм серти, и жабаяс кулалісны керкаясын, йӧръясын да видз-му вылын.
Быдлаын йӧзыс чукӧртісны жаба шойяс. Му пасьтала сулаліс лёк дук.
Кор фараон аддзис, мый мынісны жабаясысь, сійӧ чорзьӧдіс сьӧлӧмсӧ, эз кут кывзыны Мӧисейӧс да Ааронӧс. Та йылысь водзвыв висьтавліс Господь.
Господь шуис Мӧисейлы: «Тшӧкты Ааронлы нюжӧдны бедьсӧ да вачкыны муас, сэки став Египет му пасьтала мувыв бусыс пӧрас гебйӧ. [Войтыр вылӧ, ыж-мӧс вылӧ да фараон вылӧ сатшкысясны гебъяс. Фараонлӧн да сылӧн йӧзыслӧн керканыс тырас гебйӧн.]»
Найӧ тадзи и вӧчисны.
Аарон нюжӧдіс кисӧ бедьнас да вачкис мувыв бусас, сэки петісны гебъяс да сатшкысисны йӧз да ыж-мӧс вылӧ.
Египет му пасьтала мувыв бусыс пӧри гебйӧ.
Тунъяс кимӧститчӧмнас тшӧтш кӧсйисны тадзи вӧчны, но налӧн эз артмы.
Кор гебйыс сапкысьӧма вӧлі йӧз да ыж-мӧс вылӧ, тунъяс шуисны фараонлы: «Тайӧс вӧчис Ен».
Но фараонлӧн сьӧлӧмыс чорзис, сійӧ эз кут кывзыны найӧс. Та йылысь водзвыв висьтавліс Господь.
Господь шуис Мӧисейлы: «Аски чеччы водз да мун ю дорӧ. Сэні фараонкӧд паныдасигӧн шу сылы, мый Господь тадзи висьталӧ: лэдз Менсьым войтырӧс, медым [овтӧминын] найӧ юрбитасны Меным.
Он кӧ лэдз Менсьым войтырӧс, Ме мӧдӧда лӧдз-гут тэ вылӧ, тэныд кесъялысь йӧз да став войтырыд вылӧ. Египетсалӧн став керкаыс да муыс тырас лӧдз-гутӧн.
Сійӧ лунӧ Ме торйӧда Гошен му, кӧні олӧ Менам войтырӧй. Сэні лӧдз-гутыс оз ло. Сэки тэ тӧдмалан, мый став му пасьталаыс Ме — Господь [Енмыс].
Ме торйӧда Ассьым войтырӧс тэнад войтырысь.
Аски лоас тайӧ индысьпасыс [му вылын]».
Господь тадзи и вӧчис. Лыдтӧм-тшӧттӧм лӧдз-гут тыртіс фараонлысь керкасӧ, сылӧн йӧзлысь керкаяссӧ да став Египет мусӧ. Лӧдз-гут вӧсна Египет му вылӧ локтіс бырӧдӧм.
Фараон корис Мӧисейӧс Ааронкӧд да шуис налы: «Мунӧй да вайӧй тайӧ муас [Господьлы] асланыд Енлы висьнытӧ».
Но Мӧисей шуис: «Ми огӧ вермӧй, ӧд египетсаяслы зывӧк миян Господь Енлы вись вайӧмыс. Налӧн син водзын кӧ ми кутам вӧчны тайӧс, найӧ миянӧс изъяласны.
Ми кӧсъям мунны овтӧминӧ куим лун мунан ылнаӧ да сэні вайны Господьлы, асланым Енлы, сэтшӧм вись, кутшӧмӧс Сійӧ тшӧктас».
Фараон шуис: «Ме лэдза тіянӧс овтӧминӧ вись вайны Господьлы, тіян Енлы, сӧмын ылӧ энӧ мунӧй.
Кевмысьӧй ме вӧсна [Господьлы]».
Мӧисей шуис: «Тэ дінысь петӧм бӧрын ме кевмыся Господьлы [Енлы]. Аски тэ, фараон, тэныд кесъялысь йӧз да став войтырыд мынанныд лӧдз-гутысь. Но тэ, фараон, водзӧ эн ылӧдлы, а лэдз Израиль войтырӧс мунны, медым Господьлы вайны вись».
Мӧисей петіс фараон дінысь да кевмысис Господьлы.
Господь вӧчис Мӧисейлӧн корӧм серти — мездіс лӧдз-гутысь фараонӧс, сылы кесъялысь йӧзсӧ да став войтырсӧ. Египетын лӧдз-гут эз коль.
Но фараон бара чорзьӧдіс сьӧлӧмсӧ да эз лэдз Израиль войтырӧс.
Господь шуис Мӧисейлы: «Мун фараон дінӧ да висьтав сылы, мый Господь, еврейяслӧн Ен, тадзи висьталӧ: лэдз Менсьым войтырӧс, медым найӧ юрбитасны Меным.
Он кӧ лэдз Менсьым войтырӧс да водзӧ кӧ кутан пыксьыны, Господьлӧн киыс бырӧдас видз-му вывсьыд пемӧсъястӧ. Вӧвъястӧ, осёлъястӧ, верблюдъястӧ, мӧсъястӧ да ыжъястӧ суас пӧрӧс висьӧм.
Господь торйӧдас израильсаяслысь ыж-мӧссӧ египетсаяслӧн ыж-мӧскысь, и израильсаяслӧн весиг ӧти пемӧс оз кув».
Господь урчитіс кад. Сійӧ шуис, аски пӧ Египет муын вӧча тайӧс.
Мӧд луннас Господь тадзи и вӧчис. Египетсалӧн став пемӧсыс куліс, а Израиль войтырлӧн эз кувны.
Фараон тшӧктіс тӧдмавны, збыльысь-ӧ Израиль войтырлӧн весиг ӧти пемӧс эз кув.
Тайӧс тӧдмалӧм бӧрын фараон чорзьӧдіс сьӧлӧмсӧ да эз лэдз Израиль войтырӧс.
Мӧисейлы да Ааронлы Господь шуис: «Босьтӧй пачысь китыр пӧим. Мӧисей мед койыштас пӧимсӧ сынӧдас фараон [да сылы кесъялысь йӧз] син водзын.
Сэки пӧимыс бусӧн кыптас Египет му пасьтала. Йӧз да ыж-мӧс орзяласны-мылльӧссясны».
Мӧисей да Аарон босьтісны пачысь пӧим да локтісны фараон водзӧ.
Мӧисей койыштіс пӧимсӧ сынӧдас, и йӧз да ыж-мӧс орзялісны-мылльӧссисны.
Тунъяс эз вермыны паныд сувтны Мӧисейлы, ӧд став египетса моз найӧ тшӧтш вӧліны орзьӧмаӧсь-мылльӧссьӧмаӧсь.
Господь чорзьӧдіс фараонлысь сьӧлӧмсӧ, и сійӧ эз кут кывзыны Мӧисейӧс да Ааронӧс.
Та йылысь Господь водзвыв висьтавліс Мӧисейлы. Господь шуис Мӧисейлы: «Аски чеччы водз, мун фараон дінӧ да висьтав сылы, мый Господь, еврейяслӧн Ен, тадзи висьталӧ: лэдз Менсьым войтырӧс, медым найӧ юрбитасны Меным.
Ӧні Ме мӧдӧда став бырӧданторсӧ тэ вылӧ, тэныд кесъялысь йӧз да став войтырыд вылӧ, медым тэ гӧгӧрвоин, мый став му пасьтала Ме кодь мӧдыс абу.
Ме эськӧ верми лэптыны киӧс тэ вылӧ да мӧдӧдны пӧрӧс висьӧм войтырыд вылӧ — бырӧдны тіянӧс му вывсьыс, но Ме тэнӧ ловйӧн коля.
Тадзи Ме петкӧдла тэныд Ассьым вынӧс, медым Менсьым нимӧс тӧдісны став му пасьталаыс.
Тэ век на паныд кыпӧдчан Менам войтырлы, он лэдз сійӧс. Аски тайӧ кадас Египет вылӧ Ме кисьта зэв чорыд шер. Татшӧм шерыс ӧнӧдз на эз вӧвлы Египет муын.
Тшӧкты пыртны лэбулӧ ыж-мӧстӧ да ставсӧ видз-му вывсьыд. Видз-му вылӧ кольччӧм йӧзыс да ыж-мӧскыс веськаласны шер улӧ да куласны».
Фараонлӧн йӧзыс, кодъяс повзисны Господьлӧн кывйысь, пырысьтӧм-пыр йӧрталісны ыж-мӧснысӧ лэбулӧ, а кесйӧгъясныслы тшӧктісны пырны керкаӧ.
Но кодлы веськодь вӧлі Господьлӧн кывйыс, сійӧ колис ассьыс кесйӧгъяссӧ да ыж-мӧссӧ видз-му вылӧ.
Господь шуис Мӧисейлы: «Лэпты китӧ енэжланьыс, сэки став Египет му вылӧ, йӧз вылӧ, ыж-мӧс вылӧ и быдмӧг-турун вылӧ киссяс шер».
Мӧисей лэптіс бедьсӧ енэжлань, и Господь мӧдӧдіс став Египет му вылӧ чардби, гым да шер.
Чардаліс, му вылӧ киссис шер. Татшӧм чорыд шерыс египетса войтырлӧн эз на вӧвлы.
Египет муын шерыс жугліс-бырӧдіс ставсӧ, мый вӧлі видз-му вылын: йӧзӧс, ыж-мӧскӧс, быдмӧг-турунсӧ да пуяссӧ.
Сӧмын Гошен муын, кӧні олісны Израиль войтыр, эз вӧв шерыс.
Фараон корис Мӧисейӧс да Ааронӧс, сэсся шуис налы: «Ӧні ме мыж вӧчи.
Господь веськыд, а ме да менам войтырӧй — мыжаӧсь.
Кевмысьӧй [ме вӧсна] Господьлы, мед дугӧдас гымсӧ да шерсӧ [да чардбисӧ му вылын]. Сэсся ме лэдза тіянӧс, водзӧ ог нин кут».
Мӧисей вочавидзис сылы: «Кор ме пета карсьыс, лэпта киӧс Господьлань [енэжӧ]. Сэки дугдас гымавнысӧ, шерыс [и зэрыс] дугдас, медым тэ тӧдін, мый муыс Господьлӧн.
Но ме аддза, мый тэ да тэнад йӧзыд онӧ полӧй Господь Енмысь».
Шабді да ид лои жугӧдӧма шерӧн, ӧд идйыс вӧлі шептасьӧма нин, а шабдіыс дзоридзаліс на.
Но шобді да полба* быдмыны на колины, найӧ сёрӧнджык воӧны да.
Мӧисей муніс фараон дінысь, петіс карсьыс да лэптіс кисӧ Господьлань. Гым да шер дугдісны. Зэрыс дугдіс киссьыны му вылӧ.
Фараон кор аддзис, мый дугдіс зэрны-гымавны, дугдіс усьны шер, сэки сійӧ бара на важ мозыс мыж вӧчис.
Ачыс сійӧ и сылӧн йӧзыс чорзьӧдісны сьӧлӧмнысӧ. Фараон эз лэдз Израиль пиянӧс аслас [да сылы кесъялысь йӧзлӧн] чорыд сьӧлӧм вӧсна. Та йылысь Господь водзвыв висьтавліс Мӧисей пыр.
Господь шуис Мӧисейлы: «Мун фараон дінӧ. Ме чорзьӧді фараонлысь да сылӧн йӧзлысь сьӧлӧмнысӧ. Ме петкӧдла налы индысьпасъяс, медым аслад пияныдлы да налӧн пияныслы тэ висьталін, кутшӧм ногӧн Ме янӧді египетсаясӧс да кутшӧм индысьпасъяс петкӧдлі налы. Сэки ті тӧдмаланныд, мый Ме — Господь».
Мӧисей Ааронкӧд локтісны фараон дінӧ да шуисны сылы: «Господь, еврейяслӧн Ен, тадзи висьталӧ: “Дыр-ӧ на тэ он раммӧдчы Ме водзын?
Лэдз Менсьым войтырӧс, медым найӧ юрбитасны Меным.
А он кӧ лэдз Менсьым войтырӧс, аски [тайӧ кадас] тэнад му вылӧ Ме ыста саранча.
Найӧ вевттясны мутӧ, муыд весиг оз кут тыдавны. 
Шер бӧрся кольӧм веж быдмӧгтӧ да видз-му вывсьыд пуястӧ найӧ сёясны. Тэнад керкаыд, тэныд кесъялысь йӧзлӧн да став войтырыдлӧн керкаясыс тырасны саранчаӧн. Мыйта ті оланныд тайӧ муас, ни ті, ни тіян батьясныд татшӧмторсӧ эз на аддзывны”».
Сэсся Мӧисей бергӧдчис да петіс фараон дінысь.
Фараонлӧн йӧзыс шуисны сылы: «Дыр-ӧ на миянлы сьӧкыдавны тайӧ мортыс понда?
Лэдз тайӧ войтырсӧ, мед мунасны да юрбитасны Господьлы, асланыс Енлы.
Он ӧмӧй аддзы, мый Египетным быранвыйын?»
Мӧисейӧс да Ааронӧс вайӧдісны фараон дінӧ. Фараон шуис налы: «Мунӧй, юрбитӧй Господьлы, асланыд Енлы.
Но кодъяс мунасны юрбитнысӧ?»
Мӧисей вочавидзис: «Ми мунам ставным, том и пӧрысь, ныв-пиным и ыж-мӧсным. Тайӧ ӧд Господьлы [миян Енлы] сиӧм гаж».
Фараон шуис налы: «Мед лоас тадзи. Господь тіянкӧд.
Тіянӧс ме лэдза, но челядьнытӧ ог.
Ті мӧвпаланныд лёк вӧчны.
Сӧмын айуловныд мед мунасны да юрбитасны Господьлы, кыдзи ті и коринныд».
Сэсся Мӧисейӧс да Ааронӧс вӧтлісны фараон дінысь.
Господь шуис Мӧисейлы: «Лэпты китӧ Египет му вылӧ, мед саранча уськӧдчас Египет му вылӧ да сёяс сэтысь став быдмӧг-турунсӧ [да пу вылысь став тусь-вотӧссӧ] — ставсӧ, мый коли шер бӧрся».
Мӧисей лэптіс бедьсӧ Египет вылӧ, и Господь кыпӧдіс асыв тӧв. Тӧлыс шувгис лунтыр, шувгис войбыд, и мӧд асывнас вайис саранчаӧс.
Египет вылӧ уськӧдчис саранча да вевттис ставнас мусӧ. Та мындаыс некор на эз вӧвлы, и некор сэсся оз ло.
Муыс эз тыдав сьӧдысла, сэтшӧм уна вӧлі саранчаыс. Найӧ сёйисны му вылысь став быдмӧг-турунсӧ, пуяс вылысь став тусь-вотӧссӧ, мый кольлі шер бӧрся. Египет му пасьтала эз коль веж корйыс ни пу вылын, ни му вылын.
Мӧисейлы да Ааронлы тшӧктісны ӧдйӧджык локны фараон дінӧ. Сійӧ шуис налы: «Ме мыжа Господь Енныд водзын да тіян водзын.
Бара на прӧститӧй менсьым мыжӧс да кевмысьӧй Господьлы, асланыд Енлы, медым Сійӧ вештас ме дінысь тайӧ курыд шогсӧ».
Мӧисей петіс фараон дінысь да кевмысис Господьлы.
Рытыввывсянь Господь кыпӧдіс ён тӧвныр, и тӧлыс лэбӧдіс саранчаӧс Гӧрд саридзӧ. Египет му пасьтала весиг ӧти саранча эз коль.
Но Господь чорзьӧдіс фараонлысь сьӧлӧмсӧ, и фараон эз лэдз Израиль пиянӧс.
Господь шуис Мӧисейлы: «Лэпты китӧ енэжланьыс, и Египет му вылӧ лэччас сап пемыд, киӧн видлавны позяна пемыд».
Мӧисей лэптіс кисӧ енэжланьыс, и пуксис сап пемыд. Тадзи вӧлі куим лун чӧж Египет муын.
Куим лун чӧж ӧта-мӧдсӧ некод эз аддзы, некод эз чеччы места вывсьыс.
А Израиль войтырлӧн оланінас вӧлі югыд.
Фараон корис Мӧисейӧс [Ааронкӧд] да шуис: «Мунӧй, юрбитӧй Господьлы [асланыд Енлы]. Челядьныд мед тіянкӧд мунасны, а ыж-мӧстӧ кольӧй».
Но Мӧисей вочавидзис: «[Огӧ!] Тэныд колӧ лэдзны тшӧтш миянлысь ыж-мӧснымӧс, медым ми вермим вайны Господьлы, асланым Енлы, сотан висьяс да мукӧд висьяс.
Миян ыж-мӧсным дзик ӧтитӧг мунасны миянкӧд.
На пӧвстысь ми вись ваям Господьлы, асланым Енлы.
Ӧд кытчӧдз ми огӧ воӧй колана местаӧдз, огӧ тӧдӧй, кутшӧм вись ковмас вайны Господьлы [миян Енлы]».
Но Господь чорзьӧдіс фараонлысь сьӧлӧмсӧ, и фараон эз кӧсйы лэдзны Израиль войтырӧс.
Фараон шуис Мӧисейлы: «Мун ме дінысь!
Син водзӧ эн петкӧдчы.
Тӧд, мый сійӧ лунӧ, кор локтан ме дінӧ, тэ кулан».
Мӧисей шуис: «Кыдзи тэ шуин, сідзи и лоас.
Тэнӧ ме сэсся ог нин аддзыв».
Господь шуис Мӧисейлы: «Нӧшта ӧти бырӧдантор Ме мӧдӧда фараон да Египет вылӧ.
Та бӧрын фараон лэдзас тіянӧс, сійӧ вӧтлӧмӧн вӧтлас тіянӧс.
Войтырыдлы [гусьӧн] висьтав, медым айулов да аньяс корасны эзысь-зарни [да паськӧм] орччӧн олысьяслысь».
Господь небзьӧдіс египетсалысь сьӧлӧмсӧ Израиль войтыр дінӧ [и египетсаяс сетісны налы корӧмторъяссӧ]. Мӧисейӧс ӧд пыдди пуктісны Египет муын [фараон,] фараонлы кесъялысь йӧз и став войтырыс.
Мӧисей шуис фараонлы: «Господь тадзи висьталӧ: “Войшӧрнас Ме муна Египет пыр. Сэки Египет муын кулас быд медводдза чужысь, ыджыдалысь фараонлӧн-ӧ сійӧ либӧ изки бердын уджалысь кесйӧг аньлӧн. Весиг ыж-мӧслӧн став медводдза чужысьыс кулас.
Египет пасьтала кутас кывны сэтшӧм ыджыд бӧрдӧм, кутшӧм эз на вӧвлы, и водзӧ сэсся оз ло.
Но Израиль войтыр вылӧ ни налӧн ыж-мӧс вылӧ весиг пон оз лысьт увтыштны, медым ті тӧдінныд, мый Господь торйӧдіс Израиль войтырӧс египетсаысь”.
Став тэнад йӧзыд локтасны меным копыртчыны да корасны менӧ петны татысь войтырӧйкӧд.
Сэки ме пета».
И Мӧисей муніс фараон дінысь скӧрмӧмӧн.
Господь шуис Мӧисейлы: «Фараон оз кывзы тіянӧс. Та вӧсна Менам шензьӧданаторъяслӧн [да Менам индысьпасъяслӧн] лыдыс содас Египет муын».
Мӧисей да Аарон вӧчисны став тайӧ [индысьпассӧ да] шензьӧданаторсӧ фараон водзын, но Господь чорзьӧдіс фараонлысь сьӧлӧмсӧ. Фараон эз лэдз Израиль пиянӧс аслас муысь.
Египетын Господь шуис Мӧисейлы да Ааронлы:
«Тайӧ тӧлысьыс мед лоас тіянлы волӧн медводдза тӧлысьӧн. 
Став Израиль войтырлы висьталӧй: тайӧ тӧлысьнас дасӧд лунӧ быд котыр мед торйӧдас аслыс ӧти баляӧс.
Котырыс кӧ этша лыда, и та вӧсна найӧ дзоньнас балясӧ сёйны оз вермыны, сэки мед ӧтувтчӧны орччӧн олысьяскӧд. Артыштӧй, коді мыйта сёяс.
Босьтны колӧ дзоньвидза арӧса баляӧс, сійӧ мед вӧлі межпи либӧ кӧзапи. Тайӧ тӧлысьнас дас нёльӧд лунӧдзыс видзӧй балясӧ ас орданыд. Рытнас став Израиль войтыр мед начкас балянысӧ. Сэсся мед босьтасны сылысь вирсӧ да мавтасны ӧдзӧслысь кыкнанбок куричсӧ да вылыс куричсӧ сійӧ керкасьыс, кӧні кутасны сёйны яйсӧ.
Войнас мед сёясны би вылын пражитӧм яйсӧ шомтӧм няньӧн да курыд турунъясӧн.
Энӧ сёйӧй яйсӧ, сійӧ кӧ лоӧ улькодь. Энӧ пуӧй яйсӧ ваын. Пражитӧй балясӧ юр-кокнас да пытшкӧснас би вылын.
[Балялысь лысӧ энӧ чегъялӧй.] Асылӧдзыс нинӧм энӧ кольӧй, а коляс кӧ, сотӧй биын.
Вӧнясьӧй да кӧмасьӧй. Босьтӧй кианыд бедьнытӧ да тэрмасьӧмӧн сёйӧй балясӧ. Тайӧ Господьлы сиӧм Ыджыд лун.
Дзик тайӧ войӧ Ме муна Египет муӧд да виа тайӧ муысь быд медводдза чужысьӧс йӧз пӧвстысь и ыж-мӧс пӧвстысь. Тадзи Ме мыжда египетса став енсӧ, ӧд Ме — Господь.
Тіян керкаясын паснас лоӧ вир. Ме аддза вирсӧ да бокиті муна. Ме мыжда Египет му, но тіянӧс бырӧдӧмыс оз су.
Тайӧ луныс Господьлы сиӧм гаж. Казьтылӧмӧн пасйӧй сійӧс. Тайӧ тшӧктӧмыс тіянлы нэмъяс кежлӧ чужысьяссянь чужысьясӧдз.
Сизим лун чӧж сёйӧй шомтӧм нянь.
Медводдза лунӧ петкӧдӧй няньшомсӧ керкасьыныд. Ӧд медводдза лунсяньыс сизимӧд лунӧдз коді кутас сёйны шоммӧдӧм нянь, сійӧс лоӧ бырӧдӧма Израиль войтыр пӧвстысь.
Медводдза лунӧ да сизимӧд лунӧ тіян мед лоӧ вежа чукӧртчӧм.* Некутшӧм удж энӧ вӧчӧй тайӧ лунъясӧ, сӧмын сёян позьӧ лӧсьӧдны.
Пасйӧй Шомтӧм нянь сёян лунъяс, ӧд тайӧ лунӧ тышкайӧзӧс моз Ме петкӧді тіянӧс Египетысь. Чужысьяссянь чужысьясӧдз пасйӧй тайӧ лунсӧ. Тайӧ тшӧктӧмыс тіянлы нэмъяс кежлӧ.
Медводдза тӧлысьлӧн дас нёльӧд лун рытсянь кызь ӧтиӧд лун рытӧдз сёйӧй шомтӧм нянь.
Тіян керкаясын сизим лун чӧж мед оз ло няньшомыс. Коді кутас сёйны шоммӧдӧм нянь, сійӧс лоӧ бырӧдӧма Израиль войтыр пӧвстысь, йӧз муысь локтысь-ӧ сійӧ либӧ вужвойтырысь.
Энӧ сёйӧй шоммӧдӧм нянь.
Кӧть кӧні ті кутанныд овны, сёйӧй сӧмын шомтӧм нянь».
Мӧисей корис Израиль войтырлысь став юрнуӧдысьсӧ да шуис налы: «Быд котыр мед бӧръяс да начкас ыджыдлунся баля.
Сэсся босьтӧй китыр иссоп турун, кӧтӧдӧй дозйӧ чукӧртӧм вирнас да мавтӧй ӧдзӧсныдлысь вылыс куричсӧ да кыкнанбок куричсӧ.
Тіян пӧвстысь асылӧдзыс мед некод оз пет керкасьыс ӧдзӧс саяс.
Господь мунас Египет муӧд да виалас египетсаясӧс, но кор ӧдзӧс куричьясысь аддзас вир, Сійӧ мунас бокиті — оз лэдз бырӧдысьлы пырны тіян керкаясӧ да вины тіянӧс.
Тайӧ тшӧктӧмыс мед лоӧ тіянлы да тіян пиянлы нэмъяс кежлӧ.
Кор воанныд сійӧ муас, мый Господь Аслас кӧсйысьӧм серти сетас тіянлы, кутчысьӧй тайӧ тшӧктӧмас.
И кор тіян челядьныд юаласны, мыйла ті тадзи вӧчанныд, вочавидзӧй налы: Господьлы тайӧ ыджыдлунся вись. Господь кор виаліс египетсаясӧс, Сійӧ муніс Израиль войтырлӧн керкаяс бокиті да ловйӧн колис миянлысь котыръясӧс».
Тайӧс кылӧм бӧрын Израиль войтыр муӧдзыс копыртчӧмӧн юрбитіс Господьлы.
Сэсся найӧ мунісны да вӧчисны ставсӧ сідзи, кыдзи Господь тшӧктіс Мӧисейлы да Ааронлы.
Войшӧр кадӧ Господь виис медводдза чужысьясӧс Египет муысь — юралысь фараонлӧн медводдза чужысьсянь да дзескыдінын пукалысьлӧн медводдза чужысьӧдз ставныс кулісны. Весиг ыж-мӧслӧн став медводдза чужысьыс куліс.
Войнас фараон садьмис, тшӧтш сылы кесъялысь йӧз да став египетса войтырыс садьмисны.
Египетын [став му пасьталаыс] сулаліс ыджыд бӧрдӧм, ӧд эз вӧв керка, кӧні эськӧ эз вӧв кулӧмаыс.
Войнас фараон корис Мӧисейӧс Ааронкӧд да шуис налы: «Петӧй менам войтыр пӧвстысь ті да став Израиль войтырныд! Мунӧй, юрбитӧй Господьлы [асланыд Енлы], кыдзи ті и коринныд.
Босьтӧй аскӧдныд ыж-мӧснытӧ, кыдзи ті шулінныд.
Мунӧй да бурсиӧй менӧ!»
Египетсаяс тшӧктісны Израиль войтырлы ӧдйӧджык петны Египет муысь.
Найӧ шуалісны, ставным пӧ ми кулам.
Няньыс шоммытӧдз на израильсаяс гартыштісны нянь шомӧснысӧ паськӧмас да босьтісны пельпом выланыс.
Мӧисейлӧн тшӧктӧм серти израильсаяс корисны египетсаяслысь паськӧм да эзысь-зарниысь вӧчӧм дозмук-кӧлуй.
Господь небзьӧдіс египетсалысь сьӧлӧмсӧ Израиль войтыр дінӧ, и египетсаяс сетісны налы став корӧмторсӧ.
Тадзи Израиль войтыр петкӧдіс египетсалысь озырлунсӧ. Израиль войтыр петіс Рамсесысь да мӧдӧдчис Суккотӧ. Аньясӧс да ныв-писӧ артавтӧг пода мортыс вӧлі квайтсё сюрс гӧгӧр. Накӧд тшӧтш муніс уна мукӧд войтыр. Мунісны унасьыс-уна ыж-мӧс.
Египетысь петкӧдӧм кӧтасысь израильсаяс пӧжалісны шомтӧм нянь, ӧд сійӧ эз на удит шоммынысӧ, кор найӧс тэрмӧдлӧмӧн вӧтлісны Египет муысь. Найӧ эз слӧймыны весиг дасьтыны сёян, мед босьтны туяныс.
Израиль пиян [да налӧн батьясныс] олісны Египетын [да Ханаан муын] нёльсё комын во чӧж.
Нёльсё комын во тыран лунӧ войнас Господьлӧн став войтырыс тышкайӧз моз петіс Египетысь.
Тайӧ войнас Господь петкӧдіс Египет муысь Израиль пиянӧс да видзис найӧс. Та вӧсна чужысьяссянь чужысьясӧдз израильсаяслы колӧ пасйыны тайӧ войсӧ да узьтӧг овны Господь водзын.
Господь шуис Мӧисейлы да Ааронлы: «Ыджыдлунся баля йылысь тшӧктӧмыс татшӧм. Оз позь сёйны сійӧс йӧз муысь локтысьяслы.
Но вермас сёйны эзысь вылӧ ньӧбӧм кесйӧг, вундыштчӧма кӧ сійӧ.
Оз позь сёйны налы, кодъяс йӧз муысь локтісны тіян пӧвстӧ овны либӧ уджавны.
Яйсӧ колӧ сёйны сійӧ керкаас, кӧні сійӧс дасьтӧма. Яйсӧ ортсӧ энӧ петкӧдӧй, [асылӧдзыс нинӧм энӧ кольӧй да] лысӧ энӧ чегъялӧй.
Израиль войтырысь дзик быдӧнлы колӧ тайӧс вӧчны.
Овмӧдчас кӧ тэ ордӧ йӧз муысь локтысь да кӧсъяс пасйыны Господьлы сиӧм Ыджыд лун, медводз сылӧн котырысь став айуловсӧ колӧ вундыштны. Сӧмын та бӧрын йӧз муысь локтысьыс вермас пасйыны Ыджыд лун, ӧд сійӧ лоӧ тіянлы ас морт кодь. Но вундыштчытӧм морт мед оз сёй ыджыдлунся баляӧс.
Вужвойтырлы да йӧз муысь локтысьяслы индӧдыс ӧти».
Израиль пиян вӧчисны ставсӧ сідзи, кыдзи Господь тшӧктіс Мӧисейлы да Ааронлы.
Дзик сійӧ лунӧ Господь петкӧдіс Египетысь Израиль пиянӧс тышкайӧзӧс моз.
Господь шуис Мӧисейлы:
«Став медводдза ай чужысьсӧ вежӧд-торйӧд Меным. Израиль войтыр пӧвстысь медводдза чужысьыс и ыж-мӧс пӧвстысь медводдза чужысьыс лоӧны Менам».
Мӧисей шуис войтырыслы: «Энӧ вунӧдӧй сійӧ лунсӧ, кор Господь вына кинас петкӧдіс тіянӧс Египетысь, и ті мынінныд нартитӧм улысь. Тайӧ лунӧ энӧ сёйӧй шоммӧдӧм нянь.
Талун, авив* тӧлысьӧ, ті петанныд.
Господь [тіян Енныд] кыв сетӧмӧн кӧсйысис тіян батьяслы, мый сетас тіянлы ханаансаяслысь, хеттейяслысь, аморейяслысь, хивейяслысь да евуссаяслысь [и гергесейяслысь да перезейяслысь] мусӧ, кӧні визувтӧ йӧв да ма. Кор Сійӧ вайӧдас тіянӧс сэтчӧ, сэки тайӧ тӧлысяс ті вӧчӧй тшӧктӧмыс серти.
Сизим лун чӧж сёйӧй шомтӧм нянь, а сизимӧд луныс — Господьлы сиӧм гаж.
Сизим лун чӧж колӧ сёйны шомтӧм нянь. Сэки тіян оланінын мед оз ло шоммӧдӧм нянь да няньшом.
Сійӧ лунӧ аслад пиыдлы шу, мый тадзи тэ казьтылан Господь Енлысь тэныд вӧчӧмторсӧ, кор тэ петін Египетысь.
Тайӧ тшӧктӧмыс мед лоӧ ки вылад да плешкад пуктӧм пас кодь, медым тэ эн вунӧд Господьлысь Индӧдсӧ, ӧд Господь [Ен] вына кинас петкӧдіс тэнӧ Египетысь.
Воысь воӧ урчитӧм кадӧ вӧч тайӧ тшӧктӧм сертиыс.
Кор Господь [тіян Енныд] пыртас тіянӧс Ханаан муӧ да сетас сійӧс тіянлы, кыдзи кыв сетӧмӧн кӧсйысис тіянлы да тіян батьяслы, сэки став медводдза чужысь писӧ торйӧд Господьлы.
Весиг ыж-мӧслысь став медводдза ай чужысьсӧ вай Господьлы. Медводдза чужысь осёлпиысь вештысь баляпиӧн, а он кӧ кӧсйы вештысьны, песовт осёлпилысь сьылісӧ.* 
Тшӧтш аслад медводдза чужысь пиысь вештысь.
Тэнад пиыд кӧ юалас, мыйла тэ тадзи вӧчан, висьтав сылы: “Аслас вына кинас Господь петкӧдіс миянӧс Египет муысь нартитӧм улысь.
Кор фараон пыксис да эз лэдз миянӧс, Господь виис Египетысь став медводдза чужысьсӧ йӧз пӧвстысь и ыж-мӧс пӧвстысь. Та вӧсна ыж-мӧслысь став медводдза ай чужысьсӧ ме вая Господьлы вись пыдди, а аслам медводдза чужысь пиысь ме вештыся”.
Мед тайӧ тшӧктӧмыс лоас ки вылад да плешкад пуктӧм пас кодь, ӧд Господь Аслас вына кинас петкӧдіс миянӧс Египет муысь».
Кор фараон лэдзис Израиль войтырӧс, Енмыс эз нуӧд найӧс филистимсаяслӧн му пыр, кӧть тайӧ вӧлі медся дженьыд туйыс.
Ен мӧвпыштіс, мый Израиль войтыр вермас бӧр бергӧдчыны Египетӧ, на вылӧ кӧ уськӧдчасны филистимсаяс.
Та вӧсна Ен нуӧдіс войтырсӧ Гӧрд саридзлань кытшола туйӧд, овтӧминті.
Израиль войтыр петіс Египет муысь тышкайӧз моз чукӧръясӧн.
Мӧисей босьтіс аскӧдыс Ӧсиплысь лыяссӧ, ӧд Израиль пиянлысь Ӧсип вӧлі босьтӧма кыв. Сійӧ шулӧма: «Кор Енмыс локтас тіянла, татысь петіганыд босьтӧй аскӧдныд менсьым лыясӧс».
Суккотысь муныштӧм бӧрын Израиль войтыр сувтіс Этамӧ, овтӧмин бокӧ.
Луннас Господь муніс на водзвылын кымӧр сюръя пытшкын, медым индыны туйсӧ, а войнас — би сюръя пытшкын, медым югзьӧдны туйсӧ. Тадзи найӧ вермисны мунны луннас и войнас.
Луннас кымӧр сюръя да войнас би сюръя эз вешйывны на водзысь.
Господь шуис Мӧисейлы:
«Висьтав Израиль пиянлы, мед бергӧдчасны да сувтӧдасны чомъяссӧ Мигдол да саридз костӧ Пи-Хахирот дорӧ, Ваал-Цефонсянь матӧ. Саридз бокас мед паськӧдасны чомъяснысӧ.
Фараон [аслас войтырлы] шуас, мый Израиль пиян шӧйтӧны-ветлӧны овтӧминӧд, и туйсӧ оз аддзыны.
Ме чорзьӧда фараонлысь сьӧлӧмсӧ, и сійӧ уськӧдчас вӧтчыны израильсаяс бӧрся. Но Ме петкӧдла Ассьым вынӧс сы пыр, мый Ме вӧча фараонкӧд да сылӧн став тышкайӧзкӧд.
Египетса йӧз тӧдмаласны, мый Ме — Господь».
Израиль войтыр вӧчис Господьлӧн тшӧктӧм серти.
Египетса ӧксылы висьталісны, Израиль войтыр пӧ пышйис.
Сэки фараон да сылӧн йӧзыс ыззисны вӧтӧдны израильсаясӧс. Найӧ шуисны: «Мый нӧ ми вӧчим?
Мыйла нӧ лэдзим Израиль войтырӧс? Коді ӧні кутас уджавны миянлы?»
Фараон доддяліс ассьыс тарантассӧ да чукӧртіс тышкайӧзсӧ.
Аскӧдыс сійӧ босьтіс став тарантассӧ тышкайӧзыскӧд. Тайӧ лыдас вӧлі квайтсё медбур тарантас.
Господь чорзьӧдіс фараонлысь, египетса ӧксылысь, сьӧлӧмсӧ [да сылӧн киподувса йӧзлысь сьӧлӧмнысӧ]. Фараон уськӧдчис вӧтӧдны Израиль пиянӧс, а Израиль пиян Господьлӧн нуӧдӧм улын мунісны водзӧ.
Фараон аслас вӧла-тарантаса тышкайӧзкӧд вӧтчис на бӧрся да суӧдіс найӧс, кор найӧ сувтісны саридз бокӧ, Пи-Хахирот дорӧ, Ваал-Цефонсянь матын.
Фараон матыстчис. Израильсаяс кор аддзисны, мый египетсаяс вӧтӧдӧны найӧс, ёна повзисны да бӧрдӧмӧн шыасисны Господь дінӧ. Мӧисейлы найӧ шуисны: «Египетын ӧмӧй некытчӧ вӧлі гуавны миянӧс? Та вӧсна овтӧминӧдз вайӧдін миянӧс кувнысӧ? Мый тэ вӧчин миянкӧд? Мыйла тэ петкӧдін миянӧс Египетысь?
Ми ӧд Египетын на тшӧктім тэныд кольны миянӧс.
Шулім, мый кӧсъям водзӧ уджавны египетсаяслы. Ӧд овтӧминын кулӧм дорысь бурджык кесйӧг туйын овны».
Мӧисей шуис войтырыслы: «Энӧ полӧй. Сулалӧй да видзӧдӧй, кыдзи Господь талун мездас тіянӧс. Египетса йӧзӧс, кодъясӧс ті ӧні аддзанныд, сэсся онӧ нин аддзылӧй. 
Ачыс Господь кутас тышкасьны тіян пыдди, а ті чӧв олӧй!»
Господь шуис Мӧисейлы: «Мый тэ кевмысян Меным?
Тшӧкты Израиль пиянлы водзӧ мунны. Лэпты бедьтӧ, нюжӧд китӧ саридзлань, мед саридзыс шӧри потас. Сэки Израиль пиян мунасны саридз шӧрӧдыс косінті.
Ме чорзьӧда [фараонлысь да] египетсаяслысь сьӧлӧмнысӧ, и найӧ вӧтчасны тіян бӧрся.
Но Ме петкӧдла Ассьым вынӧс сы пыр, мый Ме вӧча фараонкӧд да сылӧн став вӧла-тарантаса тышкайӧзкӧд.
Египетса йӧз тӧдмаласны, мый Ме — Господь, кор Ме петкӧдла Ассьым вынӧс сы пыр, мый лоас фараонкӧд да сылӧн вӧла-тарантаса тышкайӧзкӧд».
Енлӧн андел, коді муніс Израиль пиян водзвылын, сувтіс на бӧрвылӧ.
Водзын мунысь кымӧр сюръяыс кутіс мунны бӧрвыланыс.
Тадзи кымӧр сюръяыс лои египетса йӧз да Израиль войтыр костын. Кымӧр сюръяыс египетсалы вӧлі сьӧд пемыдӧн, а израильсалы сійӧ войбыд югдӧдіс. Тадзи кык войтыр эз вермыны матыстчыны ӧта-мӧд дінас.
Мӧисей нюжӧдіс кисӧ саридзлань, и Господь войбыд йӧткис васӧ ён асыв тӧлӧн. Ваыс вешйис ӧтарӧ-мӧдарӧ, и тыдовтчис саридз пыдӧсыс.
Израиль пиян мӧдӧдчисны саридз шӧрӧд косінтіыс. Налӧн веськыдладорсянь и шуйгаладорсянь ваыс сулаліс стен моз.
Египетсаяс, фараонлӧн став вӧла-тарантаса тышкайӧзыс, вӧтчисны израильсаяс бӧрся да воисны саридз шӧрӧдз.
Кыа петтӧдз Господь видзӧдліс би да кымӧр сюръя пытшсяньыс египетса тышкайӧз вылӧ да шӧйӧвоштіс найӧс.
Господь вӧчис сідзи, мый тарантасысь гӧгыльясыс усьласисны, и египетсаяс ӧдва вермисны муннысӧ.
«Колӧ пышйыны Израиль войтырысь, — шуисны найӧ, — ӧд Ачыс Господь на пыдди тышкасьӧ Египеткӧд».
Господь шуис Мӧисейлы: «Нюжӧд китӧ саридзланьыс, мед ваыс бӧр бергӧдчас да пӧдтас египетсалысь вӧла-тарантаса тышкайӧзсӧ».
Мӧисей нюжӧдіс кисӧ саридзлань, и асъядорыс ваыс бӧр кутіс визувтны важ мозыс.
Египетсаяс пышйисны ва паныдыс.
Тадзи Господь вӧйтіс саридз шӧрӧ египетсаӧс.
Ваыс бӧр бергӧдчис да вевттис фараонлысь вӧла-тарантаса тышкайӧзсӧ. Израильсаяс бӧрся саридз пыдӧсті вӧтчысьясысь весиг ӧти морт ловйӧн эз коль.
А Израиль пиян мунісны саридз шӧрӧд косінті. Налӧн веськыдладорсянь и шуйгаладорсянь ваыс сулаліс стен моз.
Сійӧ лунӧ Господь мездіс Израиль войтырӧс египетса кипод улысь. Кор израильсаяс аддзисны саридз дорысь египетсалысь шойяссӧ, найӧ гӧгӧрвоисны, мый Ачыс Господь вына кинас вӧчис тайӧс египетсакӧд. Израиль войтырӧс босьтіс Господьысь полӧм. Найӧ эскисны Господьлы да Сылӧн Мӧисей кесйӧглы.
Сэки Мӧисей да Израиль войтыр сьылісны Господьлы сьыланкыв.
Сьыла Господьлы, ӧд Сійӧ ыджыд.
Вӧвъясӧс да верзьӧмаясӧс Сійӧ саридзын пӧдтіс!
Господь — менам выныс да сьыланкывйыс, Сійӧ мездіс менӧ.
Сійӧ — менам Ен, ме нимӧда Сійӧс, Сійӧ — батьӧйлӧн Ен, медвылӧ кыпӧда Сійӧс.
Господь — тышын Вермысь, Сылӧн нимыс — Господь!
Фараонлысь тарантасъяссӧ да тышкайӧзсӧ Сійӧ пӧдтіс саридзын, тышкайӧзӧн медбур веськӧдлысьяс вӧйисны Гӧрд саридзӧ.
Вабергач ньылыштіс найӧс, из моз найӧ лэччисны ва пыдӧсӧдз.
Господьӧй, Тэнад веськыд киыд ошкана да вына, Тэнад веськыд киыд, Господьӧй, пасьвартіс паныд сувтысьӧс.
Паныд кыпӧдчысьясӧс Тэ уськӧдін шензьӧдана выннад, скӧрлуныд ӧзйис да идзасӧс моз найӧс сотіс.
Тэ пӧльыштін, и ваыс шӧри потіс. Визувтысь ваыс стен моз сувтіс, саридз шӧрын пыдӧстӧм ваыс едмис.*
«Суӧда, — шуис вӧтӧдысь, — тшапнита да юкла кыйдӧсӧс, тадзи бурмӧда сьӧлӧмӧс. Перъя шыпуртӧс да ставнысӧ сутшкала».
Тэ пӧльыштін, и саридзыс вевттис найӧс, свинеч моз найӧ вӧйисны джуджыд ваӧ.
Господьӧй, енъяс пӧвстын Тэ кодьыс абу! Тэ кодь мӧдыс абу!
Аслад вежалуннад Тэ нималан, Тэ — повзьӧдана да ошкана, вӧчан шензьӧданаторъяс.
Тэ лэптін веськыд китӧ, и муыс ньылыштіс найӧс.
Аслад буралӧмнад Тэ нуӧдін войтыртӧ, кодӧс Тэ мездін, Аслад вынӧн Тэ нуӧдан найӧс вежа оланінад.
Войтыръяс повзисны, кор кылісны та йылысь, Филистим муын олысьяс полӧмнысла дзӧрисны.
Эдомса юралысьяс шӧйӧвошисны, моавса ыджыдалысьяс тіралісны, Ханаан муын олысьяс шогӧ усисны.
Мед дзӧрӧны-полӧны найӧ!
Тэнад вына киыд из сюръяӧ пӧртлӧ найӧс, кытчӧдз Тэнад войтырыд оз мун на дінті, войтырыд, кодӧс Тэ ньӧбин Аслыд.
Тэ вайӧдан да овмӧдан войтыртӧ Аслад керӧс вылӧ, мый Тэ, Господьӧй, вӧчин Аслыд оланінӧн, кытчӧ Тэ, Ыджыдӧй, Аслад киӧн кыпӧдін вежаин.
Господь юралӧ нэмъяс чӧж!
Кор фараонлӧн вӧла-тарантаса тышкайӧзыс воисны саридз шӧрӧдз, Господь бергӧдіс гыяссӧ на вылӧ. А Израиль пиян мунісны саридз шӧрӧд косінті.
Мирьям пророк, Ааронлӧн чойыс, босьтіс тимпан, сы бӧрся мукӧд аньыс тимпанӧн тшӧтш петісны сьывны-йӧктыны.
Мирьям сьыліс: «Сьылӧй Господьлы, ӧд Сійӧ ыджыд! Вӧвъясӧс да верзьӧмаясӧс Сійӧ саридзын пӧдтіс».
Гӧрд саридзсянь Мӧисей нуӧдіс Израиль войтырӧс Шур овтӧминӧ.
Куим лун мунісны овтӧминті, и некӧн эз вӧв ваыс. 
Воисны Мараӧ, но сэні васӧ курыд вӧснаыс юны эз шогмы. Та вӧсна и нимтӧмаӧсь местасӧ Мараӧн.*
Войтырыс кутіс шуасьны Мӧисей вылӧ: «Кытысь миянлы юнысӧ?»
Мӧисей шыасис Господь дінӧ. Господь индіс сылы путор. Тайӧ путорсӧ сійӧ шыбитіс ваӧ, и ваыс лои юмов.
Мараын Енмыс сетіс войтырыслы индӧд-тшӧктӧмъяс, сэні тӧдмаліс найӧс.
Ен шуис: «Ті кӧ кутанныд кывзыны асланыд Господь Енлысь гӧлӧс шысӧ да вӧчны Сы водзын шогманасӧ, кутанныд кӧ кывзыны Сылысь индӧд-тшӧктӧмъяссӧ да овны на серти, Ме ог мӧдӧд тіян вылӧ весиг ӧти висьӧм, кутшӧмӧс мӧдӧдлі Египет вылӧ, ӧд Ме — Господь [тіян Енныд], тіянӧс Бурдӧдысь».
Израиль пиян воисны Элимӧ.
Сэні вӧлі дас кык ва петанін да сизимдас финик пу. Сэтчӧ ва дорас найӧ сувтӧдісны чомъяснысӧ.
Элимысь мӧдӧдчӧм бӧрын став Израиль войтыр воис Син овтӧминӧ. Тайӧ овтӧминыс куйліс Элим да Синай костын. Египетысь петӧмсянь мӧд тӧлысьлӧн дас витӧд лунӧ воисны сэтчӧ.
Овтӧминын Израиль войтыр кутіс ропкыны Мӧисей да Аарон вылӧ. «Бурджык миянлы вӧлі кувны Египет муын Господьлӧн ки помысь, — шуасисны Израиль пиян. — Сэні миян вӧліны яй тыра пӧртъяс, и няньсӧ ми пӧттӧдз сёйлім.
А ӧні ті вайӧдінныд татчӧ овтӧминас, медым став тайӧ войтырыс тшыгйысла куліс».
Господь шуис Мӧисейлы: «Ме сета тіянлы енэжсянь нянь, зэр моз кисьта сійӧс. Войтырыд мед быд лун петас чукӧртны няньсӧ, кодлы мыйта колӧ лун кежлӧ. Тадзи Ме тӧдмала, кутасны-ӧ найӧ овны Менам Индӧд серти.
Квайтӧд луннас чукӧртӧм няньысь дасьтанныд кык пӧв унджык сёян мукӧд лунъясӧ чукӧртӧм дорысь».
Мӧисей да Аарон шуисны Израиль войтырлы: «Рытнас ті тӧдмаланныд, мый Господь петкӧдіс тіянӧс Египет муысь, а асывнас ті аддзанныд Господьлысь дзирдлунсӧ. Ӧд Господь кыліс, кыдзи ті ропканныд Сы вылӧ. А ми нӧ кодъяс? Миян вылӧ мый ропканныд?»
Мӧисей водзӧ шуис: «Рытнас Господь сетас тіянлы сёйны яй, а асывнас сетас нянь, и ті пӧттӧдзныд сёянныд. Ӧд Господь кыліс, кыдзи ті ропканныд Сы вылӧ. А ми нӧ кодъяс? Ті ӧд он миян вылӧ ропкӧй, а Господь вылӧ».
Мӧисей шуис Ааронлы: «Висьтав Израиль войтырлы, мед найӧ сувтасны Господь водзӧ, ӧд Господь кыліс налысь ропкӧмсӧ».
Кор Аарон висьталіс Израиль войтырлы, найӧ бергӧдчисны овтӧминлань, кӧні кымӧр пытшкын петкӧдчис Господьлӧн дзирдлуныс.
Господь шуис Мӧисейлы:
«Ме кылі Израиль пиянлысь ропкӧмсӧ.
Висьтав налы тадзи: рытнас ті кутанныд сёйны яй, а асывнас ті пӧттӧдзныд сёянныд нянь. Сэки ті тӧдмаланныд, мый Ме — Господь, тіян Енныд».
Рытнас Израиль войтырлӧн чомъяс дінӧ жбыр пуксялісны квайтпалич пӧткаяс, найӧ вевттисны сувтанінсӧ.
А асывнас лысвааліс. Лысва косьмӧм бӧрас овтӧмин веркӧсӧ коли пуж кодь шыдӧс.
Израиль пиян кор аддзисны тайӧс, пондісны юасьны ӧта-мӧдныслысь: «Мый нӧ тайӧ?»
Ӧд найӧ эз тӧдны, мый тайӧ.
Мӧисей шуис налы: «Тайӧ нянь. Господь сетӧ сійӧс тіянлы сёйны.
Со мый тшӧктіс Господь: “Чукӧртӧй няньсӧ чомйын олысьяслӧн лыд серти, мыйта найӧ сёясны.
Чукӧртӧй морт вылӧ ӧти омер”».*
Израиль пиян тадзи и вӧчисны. Кодкӧ чукӧртіс унджык, а кодкӧ — этшаджык.
Но мурталігӧн казявлісны, мый уна чукӧртысьлӧн эз вӧв вывтіыс, этша чукӧртысьлӧн эз вӧв тырмытӧмыс. Быдӧн, вӧлӧм, чукӧртӧма колана мында.
Мӧисей шуис: «Чукӧртӧмсьыныд асылӧдзыс нинӧм энӧ кольӧй».
Но ӧткымынӧн эз кывзысьны Мӧисейлысь, а чукӧртӧмсьыныс мыйтакӧ колисны асылӧдзыс. Но сэні чужисны номыръяс, и ставыс дуксис.
Сэки Мӧисей скӧрмис войтырыс вылӧ.
Водз асывнас быдӧн чукӧртліс, мыйта коліс.
Мыйӧн шондіыс кутліс пӧжны, чукӧрттӧг кольӧмаыс сывліс.
Квайтӧд луннас чукӧртлісны няньсӧ кык пӧв унджык, быд морт вылӧ кык омер.
Войтырлӧн юралысьяс локтісны Мӧисей дінӧ висьтавны та йылысь.
Сійӧ вочавидзис: «Господь висьталіс, мый аски шойччан лун — Господьлӧн вежа шойччан лун.
Талун пӧжалӧй, мый кӧсъянныд пӧжавны, да пуӧй, мый кӧсъянныд пуны, а мый онӧ сёйӧй, кольӧй аски кежлӧ».
Мый эз сёйны, колисны мӧд лун кежлас, кыдзи тшӧктіс Мӧисей. Шойччан лун кежлӧ кольӧм сёяныс эз дуксьы, эз номырзьы.
Мӧисей шуис: «Сёйӧй талун кежлӧ кольӧм сёянсӧ, ӧд талун Господьлы сиӧм шойччан лун, и му вылысь няньсӧ ті онӧ аддзӧй.
Квайт лун чукӧртӧй, а сизимӧд луныс — шойччан лун, сэки няньыс оз ло».
Сизимӧд луннас ӧткымынӧн петісны чукӧртнысӧ, но нинӧм эз аддзыны.
Сэки Господь шуис Мӧисейлы: «Дыр-ӧ на ті кутанныд торкны Менсьым индӧд-тшӧктӧмъясӧс?
Видзӧдӧй, Господь сетіс тіянлы шойччан лун, та вӧсна квайтӧд лунӧ Сійӧ сетӧ тіянлы няньсӧ кык лун кежлӧ. Сизимӧд лунӧ мед некод оз пет аслас оланінысь».
Сизимӧд луннас войтырыс шойччис.
Израильсаяс шуисны тайӧ няньсӧ маннаӧн.* 
Манна вӧлі еджыд, кориандр тусь кодь, кӧрнас маа сӧчӧн кодь.
Мӧисей шуис: «Со мый тшӧктіс Господь. Ӧти омер мында маннасӧ видзӧй тіянсянь чужысьяслы, медым найӧ аддзисны, кутшӧм няньӧн Господь вердіс тіянӧс овтӧминын Египет муысь петкӧдӧм бӧрын».
Мӧисей шуис Ааронлы: «Босьт [зарни] дозмук, пукты сэтчӧ ӧти омер мында маннасӧ, медым Господь водзын видзны сійӧс миян бӧрся чужысьяслы».
Аарон пуктіс маннасӧ Йитӧд куд водзӧ, медым видзны сійӧс, кыдзи Господь тшӧктіс Мӧисейлы.
Израиль пиян сёйисны маннасӧ нелямын во чӧж, кытчӧдз эз воны Ханаан му дорӧдз, кӧні олісны йӧз.
Омер вӧлі ефалӧн дасӧд юкӧныс.
Израиль пиян петісны Син овтӧминысь Господьлӧн тшӧктӧм серти. Туй костаныс найӧ сувтісны чомъяснас Рефидимӧ. Сэні налы эз вӧв юан ваыс.
Войтырыс шуасис Мӧисей вылӧ, корис ва.
Мӧисей шуис: «Мыйла ті шуасянныд ме вылӧ?
Мыйла дӧзмӧданныд Господьӧс?»
Но войтырыслӧн ёна косьмис горшныс. Найӧ ӧтарӧ шуасисны Мӧисей вылӧ: «Мыйла тэ петкӧдін миянӧс Египетысь, медым ми, челядьным да ыж-мӧсным кулім ватӧгыс?»
Мӧисей шыасис Господь дінӧ: «Мый меным вӧчны тайӧ войтырыскӧд?
Регыд менӧ изъяласны».
Господь шуис Мӧисейлы: «Мун войтырыд водзын, тэкӧд мед мунасны некымын израильса юрнуӧдысь. Киад босьт бедьтӧ, мыйӧн тэ вачкин Нил ю ва веркӧсӧ.
Хорив изкырта* вылын Ме сувта тэ водзӧ. Тэ вачкан изкыртаӧ, и сэтысь ыльӧбтас ва. Тайӧ васӧ мед юас войтырыд».
Мӧисей вӧчис тадзи израильса юрнуӧдысьяслӧн син водзын.
Татчӧсінлы Мӧисей сетіс Масса да Мерива ним, ӧд Израиль пиян дӧзмӧдісны Господьӧс да шуасисны: «Миянкӧд-ӧ Господь али абу?»
Рефидимӧ локтісны амаликъяс да уськӧдчисны Израиль войтыр вылӧ.
Мӧисей шуис Исуслы: «Бӧрйы [вына] айуловӧс да петӧй амаликъяслы паныд тышӧ.
Аски ме сувта керӧс йылӧ, и Енлӧн беддьыс лоӧ киам».
Исус кывзысис Мӧисейлысь да муніс тышкасьны амаликъяскӧд, а Мӧисей, Аарон да Хур кайисны керӧс йылӧ.
Кор Мӧисейлӧн киыс вӧлі лэптӧма, сэки вермывліс Израиль, а кор сійӧ кисӧ лэдзліс, вермывлісны амаликъяс.
Но Мӧисейлӧн киыс дзикӧдз жуяліс. Сэки Аарон да Хур вайисны сылы из, медым сійӧ пуксис из вылас. Мӧисей пуксис, а Аарон да Хур лэптісны сылысь кисӧ, ӧтиыс кутіс ӧтар кисӧ, а мӧдыс — мӧдарсӧ.
Мӧисейлӧн киыс шонді пуксьытӧдзыс пыр вӧлі лэптӧма.
Та вӧсна Исус шыпуртӧн вермис амалик войтырӧс.
Господь шуис Мӧисейлы: «Гиж тайӧс небӧгӧ, медым эз вун, да висьтав Исуслы, мый Ме бырӧда амаликъясӧс да вушта амалик нимсӧ енэж улысь».
Мӧисей вӧчис висьпуктанін [Господьлы] да нимтіс сійӧс Яхве-нисси.*
Мӧисей шуис: «Юралан пуклӧсын Господь кыв сетіс, мый Сійӧ тышкасьӧ амаликъяскӧд быд кадӧ, чужысьяссянь чужысьясӧдз».
Мадианса Иофор поплы, Мӧисейлӧн тесьтыслы, кывсис, мый Енмыс вӧчӧма Мӧисейлы да Аслас Израиль войтырлы, мый Господь петкӧдӧма Израиль войтырӧс Египетысь. Иофор босьтіс аскӧдыс Мӧисейлысь Сеппора гӧтырсӧ, кодӧс Мӧисей коркӧ бӧр бергӧдліс тесьтыс дінӧ. Иофор босьтіс аскӧдыс тшӧтш Мӧисейлысь кыкнан писӧ. Ӧтиыслӧн нимыс вӧлі Гершом, ӧд Мӧисей шулӧма, йӧз муын пӧ ме лои локтысь мортӧн, а мӧдыслӧн — Элизер, ӧд Мӧисей шулӧма, батьӧйлӧн Енмыс пӧ отсаліс меным да мездіс менӧ фараон шыпуртысь.
Мӧисейлӧн Иофор тесьтыс, гӧтырыс да пияныс локтісны Мӧисей дінӧ овтӧминӧ. Мӧисейлӧн чомйыс сулаліс Енлӧн керӧс бокын, и Иофор мӧдӧдіс висьтавны Мӧисейлы: «Тэнад Иофор тесьтыд, тэнад гӧтырыд да пияныд локтӧны тэ дінӧ».
Мӧисей воча петіс аслас тесьтыслы, копыртчыліс сылы да окыштіс сійӧс, сэсся ӧта-мӧдыскӧд чолӧмасьӧм бӧрын найӧ пырисны чомйӧ.
Мӧисей висьталіс тесьтыслы ставсӧ, мый Господь вӧчис фараонлы да Египетлы Израиль вӧсна. Висьталіс, кутшӧм сьӧкыдлунъяс вӧліны налӧн туяныс, да кыдзи Господь мездіс найӧс [фараон да египетса киысь].
Иофор нимкодясис став бурсьыс, мый Господь вӧчис Израиль войтырлы, кор мездіс найӧс египетсаясысь [да фараон киысь]. Иофор шуис: «Ошкӧм Господьлы, коді мездіс тіянӧс египетсаясысь да фараон киысь. Ӧні ме тӧда, мый Господь став енсьыс ыджыд, ӧд Израиль войтырӧс Сійӧ мездіс вылӧ кыпӧдчысь египетсаяслӧн кипод улысь».
Мӧисейлӧн Иофор тесьтыс вайис Енлы сотан да мукӧд висьяс.
Аарон да став израильса юрнуӧдысьяс локтісны да Мӧисейлӧн тесьтыскӧд сёйисны Ен водзын.
Мӧд луннас Мӧисей видлаліс израильсаяслысь вензьӧмъяссӧ, вӧлі ёрдысьӧн. Асывводзсянь рытӧдз сы дінӧ волывлісны йӧз.
Мӧисейлӧн Иофор тесьтыс аддзис тайӧс да шуис: «Мый нӧ тэ вӧчан! Мыйла тэ войтыртӧ ӧтнад кывзан? Асывсянь рытӧдз тэ водзӧ локтӧны йӧз».
Мӧисей висьталіс тесьтыслы: «Войтырыс локтӧ ме дінӧ юасьны Енлысь кӧсйӧмсӧ.
Асланыс вензьӧмъясӧн найӧ локтӧны ме дінӧ. Ме ёрдысь на костын. Ме тӧдмӧда найӧс Енлӧн индӧд-тшӧктӧмъясӧн».
«Тайӧ абу бур, — шуис Мӧисейлӧн тесьтыс. — Тадзи тэ мудзтӧдан асьтӧ, мудзтӧдан тшӧтш войтыртӧ. Ӧтнад тэ он вермы татшӧм сьӧкыд уджсӧ вӧчны.
Кывзы менӧ.
Лэдз меным туйдӧдны тэнӧ, и Енмыс лоас тэкӧд. Войтырыд вӧсна сувт Ен водзӧ да висьтав Сылы налысь могъяссӧ.
Велӧд найӧс [Енлӧн] индӧд-тшӧктӧмъясӧ, инды налы [Сылысь] туйсӧ, кыті мунны, да висьтав ставсӧ, мый колӧ вӧчны.
Бӧрйы войтыр пӧвстысь тӧлка йӧзӧс, кодъяс полӧны Енмысь. Найӧ мед вӧліны веськыдӧсь, эз горшасьны. Пукты ӧтиясӧс веськӧдлыны сюрс мортӧн, мӧдъясӧс — сё мортӧн, коймӧдъясӧс — ветымын мортӧн, нёльӧдъясӧс — дас мортӧн. [Пукты тшӧтш гижӧдӧ велӧдысьясӧс.]
Веськӧдлысьясыд мед лоӧны ёрдысьясӧн. Ыджыд могъясӧн найӧ мед локтасны тэ дінӧ, а ичӧтторъяссӧ мед асьныс видлаласны. Тэнад уджыд лоӧ кокньыдджык, кор найӧ юкасны сійӧс тэкӧд.
Тэ кӧ тадзи вӧчан Енлӧн тшӧктӧм серти, сэки тэ кок йывсьыд он усь, и йӧзыд лӧнь сьӧлӧмӧн гортаныс разӧдчасны».
Мӧисей кывзысис тесьтыслысь да вӧчис сылӧн шуӧм серти.
Мӧисей бӧрйис Израиль войтыр пӧвстысь тӧлка йӧзӧс да пуктіс найӧс веськӧдлыны сюрс мортӧн, сё мортӧн, ветымын мортӧн да дас мортӧн. [Пуктіс тшӧтш гижӧдӧ велӧдысьясӧс.] Найӧ вӧліны войтырлы ёрдысьясӧн, видлалісны ичӧт могъяс. А сьӧкыд могъясӧн войтыр локтіс Мӧисей дінӧ.
Мӧисей колльӧдіс тесьтсӧ, и мӧдыс муніс аслас муӧ.
Египет муысь петӧм бӧрын коймӧд тӧлысьлӧн медводдза лунӧ Израиль пиян Рефидимысь мунӧм бӧрын воисны Синай овтӧминӧ. 
Найӧ паськӧдчисны чомъяснас керӧс бокӧ.
Мӧисей кайис [керӧс вылӧ] Ен дінӧ. Господь шыасис керӧссянь да шуис Мӧисейлы: «Висьтав Яков рӧдлы, юӧрт Израиль пиянлы: 
ті аддзылінныд, мый Ме вӧчи египетсакӧд. Кутш бордъяс вылын моз Ме лэбӧді тіянӧс, вайӧді Ас дінӧ.
Ті кӧ кутанныд кывзысьны Менсьым да оланныд йитӧд серти, мый Ме кӧрталі тіянкӧд, сэки войтыръяс пӧвстысь ті лоанныд Менам войтырӧн. Муыс ӧд ставнас Менам. Ті лоанныд Менам попъясӧн да вежа войтырӧн.
Висьтав тайӧ кывъяссӧ Израиль пиянлы».
Керӧс вылысь лэччӧм бӧрас Мӧисей чукӧртіс войтырыслысь юрнуӧдысьясӧс да висьталіс налы став тайӧ кывъяссӧ, мый висьталіс сылы Господь.
Став войтырыс ӧти вомӧн шуис: «Ставсӧ, мый тшӧктіс Господь, ми кутам вӧчны [да кутам кывзысьны]».
Мӧисей муніс висьтавны тайӧс Господьлы.
Господь шуис Мӧисейлы: «Ме локта тэ дінӧ сук кымӧр пытшкын да кута сёрнитны тэкӧд, медым войтырыд кылас да водзӧ кутас эскыны тэныд».
Сы бӧрын, кор Мӧисей висьталіс Господьлы войтырыслысь кывъяссӧ, Господь шуис сылы: «Мун войтырыд дінӧ, вежӧд найӧс талун да аски.
Найӧ мед мыськаласны паськӧмнысӧ, дасьтысясны коймӧд лун кежлӧ, ӧд коймӧд луннас став войтырлӧн син водзын Господь лэччас Синай керӧс вылӧ.
Керӧс гӧгӧрыс нуӧд визь да йӧзыслы шу, мед оз кайны керӧс вылӧ, оз инмӧдчывны керӧс горулас.
Быдӧнӧс, коді инмӧдчас керӧсас, лоӧ виӧма. Морт-ӧ, пемӧс-ӧ инмӧдчылас, ловйӧн сійӧс энӧ кольӧй. Кинад сійӧс энӧ виӧй, но изъялӧй либӧ лыйӧй ньӧввужйӧн.
Кор кылас буксан шы, [кор кымӧрыс вешъяс керӧс весьтысь,] сэки войтырыс вермас кайны керӧсӧ».
Мӧисей лэччис войтырыс дінӧ да вежӧдіс найӧс, и найӧ мыськалісны паськӧмнысӧ.
Мӧисей шуис войтырыслы: «Дасьтысьӧй коймӧд лун кежлӧ, гӧтырныдкӧд энӧ узьӧй».
Коймӧд луннас водз асывсянь гымаліс-чардаліс, Синай керӧс вевттьысис сук кымӧрӧн, кыліс горасьыс-гора буксан шы.
Чомъяс дінын став войтырыс полӧмысла тіраліс.
Мӧисей нуӧдіс войтырсӧ сувтанінысь аддзысьны Енкӧд. Йӧзыс локтісны керӧс горулӧ.
Синай керӧс ставнас тшыналіс, ӧд Господь лэччис сэтчӧ биӧн.
Керӧсыс ёна вӧрис, и пачысь моз сэтысь кайис тшын.
Буксан шы гораммис и гораммис.
Мӧисей сёрнитіс, а Ен вочавидзис сылы гӧлӧс шыӧн.
Синай керӧс вылӧ лэччӧм бӧрын Господь корис Мӧисейӧс кайны сэтчӧ. Мӧисей кайис.
Господь шуис Мӧисейлы: «Лэччы да ӧлӧд войтыртӧ, мед оз матыстчыны Ме дінӧ. Матыстчасны кӧ, сэки унаӧн куласны.
А попъяслы, кодъяс кӧсйӧны матыстчыны Господь [Ен] дінӧ, колӧ вежӧдны-сӧстӧммӧдны асьнысӧ, медым Господь эз бырӧд найӧс».
Мӧисей шуис Господьлы: «Войтырыс оз кай Синай керӧс вылӧ, Тэ ӧд чорыда ӧлӧдін миянӧс, тшӧктін керӧс гӧгӧрыс визь нуӧдны да вежӧдны керӧссӧ».
Господь шуис сылы: «Ӧні лэччы, а бӧрсӧ кай Ааронкӧд.
Попъяс да войтырыд мед оз кайны Ме дінӧ, медым Ме эг бырӧд найӧс».
Мӧисей лэччис войтырыс дінӧ да висьталіс налы тайӧс.
Ен висьталіс [Мӧисейлы] тайӧ кывъяссӧ:
«Ме — Господь, тэнад Енмыд. Ме петкӧді тэнӧ Египет муысь нартитӧм улысь.
Эн юрбит мукӧд енъяслы Меысь ӧтдор.
Эн вӧч аслыд бӧлбанӧс да идолӧ пуктӧм могысь эн серпасав сійӧс, мый эм енэжас, му вылас да муысь улынджык ваас.
Эн копрась да эн юрбит налы, ӧд Ме, Господь, тэнад Ен — вежӧгтысь Ен. Батьныслӧн мыж вӧсна Ме водзӧс перъя Менӧ мустӧмтысь челядьыслысь коймӧд да нёльӧд чужанвужйӧдз. А налы, кодъяс радейтӧны Менӧ да олӧны Менам тшӧктӧмъяс серти, Ме петкӧдла Ассьым буралӧмӧс сюрс чужанвужйӧдз.
Аслад Господь Енлысь нимсӧ весьшӧрӧ эн шуав, ӧд Господь оз коль мыждытӧг сійӧс, коді весьшӧрӧ шуалӧ Сылысь нимсӧ.
Эн вунӧд шойччан лунтӧ. Сійӧ мед лоас тэныд вежа.
Квайт лун уджав, вӧч ассьыд уджъястӧ, а сизимӧд луныс шойччан лун, торйӧд сійӧс Господьлы, аслад Енлы. Тайӧ лунӧ тэ, тэнад ныв-пиыд, кесйӧгыд, кесйӧг аньыд, [тэнад ӧшкыд, осёлыд,] ыж-мӧскыд да йӧз муысь локтысьыд, коді олӧ тэ ордын, некутшӧм удж энӧ вӧчӧй.
Ӧд квайт лун чӧж Господь вӧчис енэжсӧ, мусӧ, саридзсӧ да ставсӧ, мый сэні эм, а сизимӧд луннас Сійӧ шойччис.
Та вӧсна Господь бурсиис шойччан лун да вежӧдіс сійӧс.
Пыдди пукты ассьыд бать-мамтӧ, медым [тэныд вӧлі бур да] олӧмыд вӧлі кузь нэма сійӧ муас, мый Господь, тэнад Енмыд, сетас тэныд.
Эн ви.
Гозъякост олӧм эн пежав.
Эн гусясь.
Матыссаыд йылысь ылӧгсӧ эн висьтав.
Эн ышты матыссаыдлӧн керкаыс да гӧтырыс вылӧ, [муыс вылӧ,] кесйӧгыс да кесйӧг аньыс вылӧ, ӧшкыс да осёлыс вылӧ [сылӧн ыж-мӧскыс вылӧ]. Эн ышты нинӧм вылӧ, мый сылӧн эм».
Став войтырыс аддзис гымалӧм-чардалӧм да тшынасьысь керӧс, кыліс буксан шы.
Тайӧс аддзӧмысь найӧ бӧрыньтчӧмӧн сувтісны ылӧджык.
Найӧ шуисны Мӧисейлы: «Тэ сёрнит миянкӧд, а ми кутам кывзыны. Енмыс мед оз сёрнит миянкӧд, медым ми эгӧ кулӧй».
Мӧисей шуис войтырыслы: «Энӧ полӧй.
Енмыс локтіс [тіян дінӧ], медым тӧдмавны тіянӧс, медым ті полінныд Сыысь да энӧ вӧчӧй мыж».
Войтырыс сулаліс ылынкодь, а Мӧисей матыстчис сьӧд кымӧрлань, кӧні вӧлі Ен.
Господь шуис Мӧисейлы: «Висьтав [Яков рӧдлы, шу] Израиль пиянлы: ті аддзылінныд, кыдзи Ме енэжсянь сёрниті тіянкӧд.
Энӧ вӧчӧй аслыныд эзысь да зарни енъясӧс.
Вӧчӧй муысь Меным висьпуктанін да вайӧй сэні сотан да бурасян вись пыдди ыж-мӧс.
Быд местаын, кӧні Ме восьта Ассьым нимӧс, Ме локта тіян дінӧ да бурсиа тіянӧс.
Но кутанныд кӧ вӧчны Меным висьпуктанін изйысь, энӧ вӧчӧй сійӧс кералӧм изйысь, ӧд изсӧ вундаліганыд пежаланныд сійӧс.
Висьпуктанінӧ содйӧд энӧ кайӧй, медым восьлаліганыд эз тыдовтчы куш яйныд».
«Висьтав Израиль войтырлы тайӧ тшӧктӧмъяссӧ.
Ньӧбан кӧ тэ еврей кесйӧгӧс, сійӧ мед уджалас тэныд квайт во чӧж, а сизимӧд вонас лэдз сійӧс вӧля вылӧ дон босьттӧг.
Кесйӧгыд кӧ ӧтнас вӧлі, мед мунас ӧтнасӧн, а вӧлі кӧ гӧтыра, лэдз гӧтырыскӧд.
Ыджыдыс кӧ сійӧс гӧтрӧдас, и гӧтырыс чужтас ныв-пиӧс, сэки гӧтырыс челядьыскӧд мед кольччасны уджавны ыджыдыслы, а ачыс кесйӧгыс мед мунас ӧтнасӧн.
Но кесйӧгыс кӧ шуас, мый радейтӧ ыджыдсӧ, гӧтырсӧ да челядьсӧ, и оз кӧсйы петны вӧля вылӧ, сэки ыджыдыс мед вайӧдас сійӧс Ен водзӧ, сувтӧдас ӧдзӧс либӧ ӧдзӧс курич бердӧ да пельсӧ розьӧдас шылаӧн. Та бӧрын тайӧ кесйӧгыс кольӧ сы ордӧ пыр кежлӧ.
Морт кӧ вузалас ассьыс нывсӧ кесйӧг туйӧ, нылыс оз вермы кесйӧг айулов моз вӧля вылӧ петны.
Кесйӧг ань кӧ оз ло шогмана аслас ыджыдлы, коді кӧсйис босьтны сійӧс кесйӧг-гӧтырӧ, сэки ыджыдыс мед вузалас сійӧс сэтшӧм мортлы, коді лэдзас сійӧс вӧля вылӧ.
Мукӧд войтырлы мед оз вузав ӧтдортӧм аньӧс.
Но ыджыдыс кӧ кесйӧг аньӧс сетас аслас пи сайӧ, аньыс мед лоас сылы ныв туйӧ.
Ыджыдыс кӧ босьтас аслыс мӧд гӧтырӧс, воддза гӧтырсӧ сылы сідзжӧ колӧ вердны, пасьтӧдны да сыкӧд узьлыны.
Тайӧ куимторсӧ кӧ оз кут вӧчны воддза гӧтырыслы, аньыс мед мунас сы ордысь дон мынтытӧг».
«Коді вачкас мортӧс кувмӧныс, сійӧс асьсӧ мед виасны.
Но сійӧ кӧ эз кӧсйы вины мортсӧ, а Енмыс лэдзис тадзи лоны, сэки мед пышъяс, кытчӧ Ме инда.
Но тӧдӧмӧн кӧ виис ассьыс матыссасӧ [да пышйис висьпуктанін дорӧ], весиг Менам висьпуктанін дорысь колӧ босьтны сійӧс да вины.
Коді вачкас батьсӧ либӧ мамсӧ, сійӧс мед виасны.
[Израиль пиян пӧвстысь] мортӧс гусялысьӧс да [кесйӧг туйӧ] вузалысьӧс либӧ ас дінас видзысьӧс мед виасны.
Коді лёкӧдас бать-мамсӧ, сійӧс мед виасны.
Кык мортлӧн вензигӧн кӧ ӧтиыс мӧдсӧ вачкас изйӧн либӧ кабырнас, и мӧдыс оз кув, а доймас вольпасьын куйлымӧн, но бӧрынджык чеччас да кутас ветлӧдлыны беддьӧн, сійӧс вачкысьӧс мед оз мыждыны.
Сӧмын мед мынтысяс мӧдыслы уджавны вермытӧмсьыс да бурдӧдчӧмсьыс.
Коді беддьӧн вачкас кесйӧгсӧ либӧ кесйӧг аньсӧ кувмӧныс, сійӧс мед мыждасны.
Но кесйӧгыс кӧ олас на лун-мӧд, сэки вачкысьӧс мед оз мыждыны, ӧд кесйӧгыс — сылӧн.
Зык-вен дырйи кӧ морт вачкас кынӧма аньӧс, и кагаыс петас, но кага воштӧмысь ӧтдор аньлӧн мукӧдлаті оз доймав, таысь мыжаыс мед вештысяс, мыйта шуас аньлӧн верӧсыс либӧ ёрдысь.
Ань кӧ кулас либӧ сылӧн кӧ мукӧдлаті доймалас, мыжаыс мед сетас олӧмысь олӧм, синмысь син, пиньысь пинь, киысь ки, кокысь кок. Сотчӧмысь мед мынтысяс сотчӧмӧн, дойысь — дойӧн.
Коді ассьыс кесйӧгсӧ либӧ кесйӧг аньсӧ вачкас синмас, и кесйӧгыс кольӧ синпӧла, мед лэдзас сійӧс вӧля вылӧ син вӧснаыс.
Коді аслас кесйӧглысь либӧ кесйӧг аньлысь жугӧдас пиньсӧ, мед лэдзас сійӧс вӧля вылӧ пинь вӧснаыс».
«Айловӧс либӧ аньӧс кувмӧныс люкалысь ӧшкӧс изъялӧй. Сылысь яйсӧ энӧ сёйӧй.
Кӧзяиныс абу мыжа.
Но ӧшкыс кӧ важысянь нин вӧлӧма люкасьысь, и кӧзяинӧс ӧлӧдӧма, а сійӧ эз видзӧд ӧш бӧрсяыс, сэки айловӧс либӧ аньӧс кувмӧныс люкалысь ӧшкӧс изъялӧй, а кӧзяинсӧ виӧй.
Кӧзяинлы кӧ тшӧктасны вештысьны аслас олӧмысь, сійӧ мед вештысяс, мыйта шуасны.
Зонкаӧс либӧ нывкаӧс кувмӧныс люкалысь ӧшлы тшӧтш тайӧ индӧдыс серти вӧчӧй.
Ӧшкыс кӧ кувмӧныс люкалас кесйӧгӧс либӧ кесйӧг аньӧс, сэки ӧшлӧн кӧзяиныс мед вештас кесйӧглӧн ыджыдыслы комын сикель эзысь, а ӧшсӧ изъялӧй.
Ӧш либӧ осёл кӧ усяс кодйӧм либӧ восьсӧн кольӧм юкмӧсӧ, сэки юкмӧссӧ кодйысьыс либӧ восьсӧн кольысьыс мед эзысьӧн вештысяс пемӧслӧн кӧзяинлы, а пемӧс шойсӧ коляс аслыс.
Ӧшкыс кӧ кувмӧн люкалас орчча олысьлысь ӧшсӧ, мед ӧшъяслӧн кӧзяинъяс вузаласны ловъя ӧшсӧ да юкасны сьӧмсӧ, а кулӧм ӧшлысь яйсӧ мед тшӧтш юкасны.
Тӧдісны кӧ, мый ӧшкыс важысянь нин вӧлӧма люкасьысь, но сылӧн кӧзяиныс [тӧдӧмӧн] эз видзӧд сы бӧрся, сэки кӧзяиныс мед кулӧм ӧшкысь вештысяс орчча олысьыслы ӧшкӧн, а шойсӧ мед аслыс босьтас».
«Коді гусялас ӧшкӧс либӧ ыжӧс да начкас либӧ вузалас сійӧс, мед сетас ӧти ӧш пыдди вит ӧшкӧс, а ӧти ыж пыдди нёль ыжӧс.
Коді суас керка помсьыс гусясьысьӧс да кувмӧныс вачкас сійӧс, морт виӧмысь оз ло мыжа.
Но тайӧ кӧ вӧлі шонді петӧм бӧрын, морт виысь лоӧ мыжа.
Гусясьысь мед вештысьӧ, а вештысьнысӧ кӧ оз вермы, сэки сійӧс асьсӧ мед вузаласны кесйӧг туйӧ. Тадзи сійӧ вештысяс гусясьӧмсьыс.
Кор [гусясьысьӧс кутасны и] гусялӧм ӧшкӧс, осёлӧс либӧ ыжӧс аддзасны ловйӧн, сэки гусясьысьлы колӧ кык пӧвстӧн вештысьны наысь.
Коді ассьыс ыж-мӧссӧ лэдзас йирсьыны йӧз му вылӧ либӧ виноград йӧрӧ, сылы колӧ мынтысьны [аслас му вылын быдтӧм няньӧн либӧ виноград вотӧсӧн, а пемӧсыс кӧ мусӧ ставнас талялас, мед мынтысяс] аслас му вылын быдтӧм медбур няньӧн либӧ медбур виноград вотӧсӧн.
Биыс кӧ вуджас йӧн вылӧ, сотас зорӧдъяс, быдман нянь да видз-му, бисӧ пестысь мед вештысяс ставсьыс.
Морт кӧ аслас матыссалы сетас видзны сьӧм либӧ кӧлуй, но сетӧмторсӧ петкӧдасны матыссаыслӧн керкаысь, и гусясьысьӧс кутасны, сэки гусясьысьыс мед кык пӧвстӧн вештысяс.
Гусясьысьыс кӧ оз сюр, сетӧмторсӧ видзысьыс мед локтас ёрдысь водзӧ да кыв сетас, мый эз гусясь.
Вензяна эмбур йылысь, ӧш, осёл, ыж, паськӧм либӧ кутшӧмкӧ воштӧмтор йылысь кӧ кодкӧ шуас, мый тайӧ сылӧн, сэки кыкнан мортсӧ колӧ кывзыны Ен водзын. Кодӧс Енмыс мыждас, сійӧ мед вештысяс мӧдыслы кык пӧвстӧн.
Морт кӧ матыссаыслы сетас видзны осёлӧс, ӧшкӧс, ыжӧс либӧ нӧшта кутшӧмкӧ пемӧсӧс, но пемӧсыс кулас либӧ доймалас, либӧ гусяласны сійӧс, и некод тайӧс оз аддзыв, сэки Господь водзын кыв сетӧмыс петкӧдлас, мый пемӧс видзны босьтысь абу мыжа матыссаыс водзын. Сэки пемӧслӧн кӧзяинлы колӧ сибӧдны тайӧ кыв сетӧмсӧ, и мӧдыслы вештысьны оз ков.
Но пемӧссӧ кӧ гусяласны сылӧн йӧрысь, сэки мед вештысяс пемӧслӧн кӧзяинлы.
Звер кӧ косявлас пемӧссӧ, сылысь шойсӧ мед петкӧдлас пемӧслӧн кӧзяинлы. Зверӧн косявлӧм пемӧс вӧсна сылы вештысьнысӧ оз ков.
Морт кӧ водзӧсӧн босьтас матыссаыслысь пемӧс, и пемӧсыс доймалас либӧ кулас, но тайӧ оз ло пемӧслӧн кӧзяин дырйи, сэки водзӧсӧн босьтысь мед вештысяс.
Тайӧ кӧ лоӧ пемӧслӧн кӧзяин дырйи, сэки вештысьнысӧ оз ков.
Но пемӧссӧ кӧ вӧлі кӧртымӧ босьтӧма, мед вештас кӧртым донсӧ».
«Коді ылӧдлӧмӧн узяс нывкӧд, кодӧс абу кӧсйысьӧма сетны гӧтырӧ, сійӧ мед вештысяс гӧтырпуысь да босьтас нывсӧ гӧтырӧ.
Но нылыслӧн батьыс кӧ оз сет нывсӧ, ылӧдлысь мед вештысяс [ныв батьлы] гӧтырпулысь донсӧ.
Тунасьысь аньӧс ловйӧн эн коль.
Быдӧнӧс, коді узьлӧ пемӧскӧд, колӧ вины.
Коді вайӧ вись мукӧд енъяслы Господьлы кындзи, сійӧс мед лоӧ бырӧдӧма.
Энӧ дзескӧдӧй-кедзовтӧй йӧз муысь локтысьӧс, ӧд ті асьныд вӧлінныд локтысьясӧн Египет муын.
Дӧваясӧс да батьтӧм-мамтӧмъясӧс энӧ дзескӧдӧй.
Кутанныд кӧ дзескӧдны, найӧ шыасясны Ме дінӧ, и Ме кыла налысь ойзӧмсӧ. Сэки ӧзъяс Менам скӧрлунӧй, и Ме виа тіянӧс шыпуртӧн. Тіян гӧтыръясныд лоасны дӧваясӧн, челядьныд колясны бать-мамтӧг.
Менам войтырысь гӧль мортлы кӧ уджйӧзӧн сетан сьӧм, бӧрсӧ сылысь содтӧдӧн эн босьт.
Уджйӧзӧн сетӧмсьыд кӧ босьтан матыссаыдлысь паськӧмсӧ, шонді пуксьытӧдзыс сылы паськӧмсӧ бӧр сет. Ӧд узьнысӧ водігӧн сылы нинӧмӧн лоӧ шебрасьнысӧ. Сійӧ шыасяс Ме дінӧ, и Ме кыла сійӧс, Ме ӧд бур сьӧлӧма.
Эн омӧльт Енмӧс, эн ёр ас войтырыдлысь юралысьтӧ.
Энӧ ньӧжмасьӧй вайны Меным асланыд гумла вывсьыд да виноград пычканінсьыд медводдза босьтӧмторъяснытӧ.
Сетӧй Меным медводдза пинытӧ.
Вайӧй ыж-мӧсныдлысь [да осёлъясныдлысь] медводдза чужысьӧс. Сизим лун видзӧй сійӧс мам дінас, а кӧкъямысӧд луннас вайӧй сійӧс Меным.
Лоӧй Менам вежа войтырӧн.
Энӧ сёйӧй зверӧн косявлӧм пемӧслысь яйсӧ, шыбитӧй сійӧс понъяслы.
Эн паськӧд ылӧг сёрнияс. Ёрд водзын лёк вӧчысьлы пӧръялӧмнад эн отсав.
Унджыкыс моз лёк уджъяс эн вӧч. Ёрд водзын сёрнит веськыда, а эн сувт унджыкыс дор.
Гӧль мортӧс ёрд водзын подулавтӧг эн дорйы.
Аддзан кӧ тэнӧ мустӧмтысьлысь ӧшсӧ либӧ осёлсӧ, вайӧд сылысь пемӧссӧ гортӧдзыс.
Аддзан кӧ тэнӧ мустӧмтысьлысь осёлсӧ, мый сьӧкыд нӧб вӧсна усьӧма кок йывсьыс, эн эновт сійӧс.
Отсав кӧзяиныслы разявны осёл вылысь нӧбсӧ.
Гӧль мортлысь вензьӧмсӧ видлалігӧн ло веськыд ёрдысьӧн. Эн ылӧдчы.
Мыжтӧмӧс да веськыда олысьӧс кулӧм вылӧ эн мыжды, ӧд ылӧдчысьӧс Ме мыжда.
Эн босьт козин, ӧд козин босьтӧмыс синтӧммӧдӧ синмаӧс, и сійӧ мыждӧ веськыда вӧчысьӧс.
Эн [ӧтдорт да эн] дзескӧд йӧз муысь локтысьӧс. Ті ӧд асьныд тӧдлінныд татшӧм олӧмсӧ, кор локтысьясӧн вӧлінныд Египет муын».
«Квайт во чӧж кӧдз мутӧ да чукӧрт быдтастӧ, а сизимӧд вонас мутӧ шойччӧд. Сэтысь мед сёясны тэнад войтыр пӧвстысь гӧльяс, а мый коляс — вӧрса пемӧсъяс.
Тадзикӧн тшӧтш виноград да олив пуястӧ вӧдит.
Квайт лун уджав, а сизимӧд луннас шойччы. Тэнад ӧшкыд да осёлыд мед шойччасны. Кесйӧг аньыдлӧн пиыс да йӧз муысь локтысь мед тшӧтш шойччасны.
Кутчысьӧй став Менам тшӧктӧмӧ. Мукӧд енъяслысь нимъяссӧ энӧ казьтывлӧй, налӧн нимыс мед оз пет тіян вомысь».
«Куимысь вонас пасйӧй Меным сиӧм гаж.
Менам тшӧктӧм серти индӧм кадӧ авив тӧлысьӧ сизим лун чӧж пасйӧй Шомтӧм нянь сёян лунъяс. Сёйӧй сэки шомтӧм нянь. Ӧд авив тӧлысьӧ ті петінныд Египетысь.
Энӧ локтӧй Ме водзӧ куш киӧн.
Пасйӧй Нянь вундан гаж, кор му вывсьыд вунданныд медводдза няньнытӧ. Пасйӧй во помын Чомӧр гаж, кор быдтас-вотӧснытӧ чукӧртанныд.
Куимысь вонас став айуловныд мед локтасны Господь Ыджыдыс водзӧ.
[Кор Ме вӧтла тіян водзысь мукӧд войтыръясӧс да паськӧда оланіннытӧ,] Меным вись пыдди вир вайигӧн энӧ вайӧй шома нянь. Меным вайӧм гаждырся висьлысь госсӧ асылӧдзыс энӧ кольӧй.
Аслад му вылысь медводдза быдтасысь медбурсӧ вай аслад Господь Енлӧн керкаӧ.
Эн пу кӧзапиӧс мамыслӧн йӧв пиын».
«Ме ыста тіян водзвылын Ассьым анделӧс. Сійӧ мед видзас тіянӧс туяныд да нуӧдас Меӧн дасьтӧм местаӧ.
Видзчысьӧй сыысь да кывзысьӧй сылысь.
Энӧ дӧзмӧдӧй сійӧс, ӧд сійӧ тіянлы тайӧс оз прӧстит. Менам нимӧй олӧ сы пытшкын.
[Ті кӧ кутанныд кывзысьны Менсьым да вӧчны ставсӧ, мый тшӧкта тіянлы, видзанныд кӧ йитӧдӧс, мый Ме кӧрталі тіянкӧд, сэки ті став войтыръяс пӧвстысь лоанныд Менам бӧрйӧм войтырӧн, ӧд муыс ставнас Менам.
Ме — Ӧксыыс, а ті лоанныд Ӧксылӧн поп рӧднас да вежа войтырнас.
Тайӧс висьтав Израиль пиянлы.] 
Ті кӧ кутанныд кывзысьны да вӧчны ставсӧ, мый Ме тшӧкта, сэки тіянӧс мустӧмтысьясӧс да дзескӧдысьясӧс Ме кута мустӧмтны-дзескӧдны.
Кор Менам анделӧй мунас тіян водзын да нуӧдас тіянӧс аморейяс, хеттейяс, перезейяс, ханаансаяс, [гергесейяс,] хивейяс да евуссаяс дінӧ, сэки Ме бырӧда найӧс [тіян водзысь]. Энӧ копрасьӧй-юрбитӧй налӧн енъяслы, энӧ олӧй на моз. Бырӧдӧй налысь енъяссӧ, жуглӧй налысь юрбитан изъяссӧ.
Кесъялӧй Меным, асланыд Господь Енлы, и Ме бурсиа няньнытӧ [винанытӧ] да ванытӧ, вешта тіян пӧвстысь висьӧмъяс.
Кадысь водз чужтысьыс да нӧбасьны вермытӧмыс тіян муын оз лоны, и олан лунъяснытӧ Ме ог дженьдӧд.
Тіян водзвылын Ме ыста полӧм, шӧйӧвошта войтыръясӧс, кодъяс дінӧ ті матыстчанныд. Ме разӧда тіян водзысь вӧрӧгнытӧ.
Ме мӧдӧда гырысь зіясӧс, найӧ вӧтласны тіян водзысь [аморей,] хивей, [евус,] ханаан да хеттей войтыръясӧс.
Но ог вӧтлы найӧс ӧти воӧн, медым муыс эз овтӧммы, эз рӧдмыны сэні зверъяс да эз усьласьны тіян вылӧ.
Вочасӧн вӧтлала найӧс тіян гӧгӧрысь, кытчӧдз ті онӧ содӧй да онӧ босьтӧй аслыныд мусӧ.
Ме сета тіянлы му Гӧрд саридзсянь Филистим саридзӧдз* да овтӧминсянь [ыджыд Ефрат] юӧдз. Тайӧ муысь олысьяссӧ Ме сета тіян киӧ, и ті вӧтланныд найӧс.
[Энӧ ӧтувтчӧй накӧд да] энӧ кӧрталӧй йитӧд накӧд да налӧн енъяскӧд.
Тіян муын тайӧ войтыръясыс мед оз овны, ӧд найӧ кыскасны тіянӧс мыж вӧчны Меным паныд.
Кутанныд кӧ юрбитны налӧн енъяслы, шеданныд налькйӧ».
Господь шуис Мӧисейлы: «Кай Ме дінӧ. Тэкӧд тшӧтш мед локтасны Аарон, Надав, Авиуд да Израильлӧн сизимдаснан юрнуӧдысьыс. Ылысянь копыртчылӧй.
Тэ, Мӧисей, ӧтнад матыстчы Ме дінӧ. Мукӧдыс мед оз матыстчыны, и войтырыс мед керӧс вылӧ оз кай».
Мӧисей локтіс войтырыс дінӧ да висьталіс налы Господьлысь кывъяссӧ да тшӧктӧмъяссӧ.
Войтырыс ӧти вомӧн шуис: «Ми вӧчам ставсӧ, мый тшӧктіс Господь. [Кутам кывзысьны.]»
Мӧисей гижис Господьлысь кывъяссӧ. Водз асывнас чеччӧм бӧрас сійӧ вӧчис керӧс горулӧ висьпуктанін. Висьпуктанінкӧд орччӧн сувтӧдіс Израиль чужанкотыръяслӧн лыд серти дас кык вежа из.
Израильса том войтырӧс мӧдӧдіс вайны сотан висьяс да начкыны ӧшъясӧс, медым бурасян вись вайны Господьлы.
Ӧшъяслысь вирсӧ Мӧисей юкис кык пельӧ: ӧти джынсӧ кисьталіс тасьтіясӧ, а мӧд джыннас резіс висьпуктанін.
Сэсся босьтіс Йитӧд небӧг да лыддис сійӧс войтырыслы. Найӧ шуисны: «Ми вӧчам ставсӧ, мый тшӧктіс Господь. Кутам кывзысьны».
Мӧисей босьтіс чукӧртӧм вирсӧ да резіс сыӧн войтырсӧ. Сійӧ шуис: «Тайӧ вирыс — йитӧдлӧн вир. Господь кӧрталіс тіянкӧд йитӧд. Тайӧ йитӧдыс подуласьӧ Сылӧн тшӧктӧмъясыс вылӧ».
Сэсся Мӧисей да Аарон, Надав да Авиуд Израильлӧн сизимдас юрнуӧдыськӧд кайисны керӧсӧ. Сэні найӧ аддзисны Израильлысь Енсӧ.* 
Сылӧн кок улыс вӧлі сапфир кодь, дзик енэжыс кодь югыд.
Израильлӧн юрнуӧдысьяс аддзылісны Енмӧс*, но Сійӧ эз лэпты кисӧ на вылӧ. Сэні найӧ сёйисны-юисны.
Господь шуис Мӧисейлы: «Кай Ме дінӧ керӧс вылӧ да виччысь тані.
Ме сета тэныд изпӧвъяс, кытчӧ Ме гижи Индӧд да тшӧктӧмъяс, медым велӧдны войтырӧс».
Мӧисей мӧдӧдчис Исус кесъялысьыскӧд Енлӧн керӧс вылӧ. Юрнуӧдысьяслы шуис: «Виччысьӧй тані, кытчӧдз ми огӧ бӧр локтӧй.
Аарон да Хур кольччасны тіянкӧд.
Кодлӧн кутшӧм мог лоӧ, мед шыасясны на дорӧ».
Мӧисей кайис Синай керӧс вылӧ. Керӧссӧ вевттис кымӧр. Енлӧн дзирдлуныс лэччис сэтчӧ.
Квайт лун чӧж керӧсыс вӧлі кымӧр вевттьӧд улын. Сизимӧд луннас Господь шыасис Мӧисей дінӧ кымӧр пытшсяньыс.
Израиль пиян аддзылісны Господьлысь дзирдлунсӧ. Дзирдлуныс вӧлі керӧс вылын сотысь би кодь.
Мӧисей воськовтіс кымӧр пытшкас и кайис керӧс йылӧ.
Сэні сійӧ вӧлі нелямын лун да нелямын вой.
Господь шуис Мӧисейлы:
«Висьтав Израиль войтырлы, мед ваясны Меным козинъяс.
Сибӧдӧй быдӧнлысь ас кӧсйӧм серти вайӧм козинъяссӧ: зарни, эзысь, ыргӧн, гӧрдовлӧз, пемыдгӧрд да югыдгӧрд вурун шӧртъяс, вӧсни шабді, кӧза вурун, гӧрд рӧма меж кучикъяс, лӧз рӧма кучикъяс*, акация пу, би дозйӧ кисьтан олив вый, ӧвтанторъяс, мыйысь вӧчӧны мавтыштан вый да тшынӧдчанторъяс, оникс из да мукӧд дона изъяс, медым наӧн мичмӧдны ефод* да морӧсводз.*
Израиль пиян мед вӧчасны Меным вежаин, и Ме кута овны на пӧвстын.
Вежа чомсӧ да сэтчӧ колана дозмук-кӧлуйсӧ вӧчӧй сідзи, кыдзи Ме петкӧдла тэныд».
«Вӧч акация пуысь куд: кузьтанас кык да джын гырддза, пасьтанас гырддза да джын, судтанас гырддза да джын.
Пытшкӧссяньыс да ортсысяньыс эж сійӧс весалӧм зарниӧн.
Куд гӧгӧрыс вылытіыс вӧч [серлӧдлӧм] зарни дорыш.
Кисьт зарниысь нёль кольча да йит найӧс кудлӧн нёльнан улі пельӧсас: кыксӧ — ӧтар бокас, а мӧд кыксӧ — мӧдар бокас.
Вӧч акация пуысь потшъяс да эж найӧс зарниӧн.
Потшъяссӧ сюй кудлӧн кыкнанбокса кольчаясӧ, медым на отсӧгӧн позис новлӧдлыны кудсӧ.
Потшъясыс мед пыр лоасны кудлӧн кольчаясас, энӧ перйӧй найӧс сэтысь.
Ме сета тэныд изпӧвъяс, пукты найӧс тайӧ кудъяс.
Вӧч весалӧм зарниысь кудйыслы вевт: кузьтанас кык да джын гырддза, пасьтанас гырддза да джын.
Вевт помъясӧ дор кык зарни херувимӧс. 
Ӧти херувимыс мед лоас вевт ӧтар помас, мӧдыс — мӧдар помас.
Вевтыскӧд найӧ мед лоасны ӧтторъяӧсь.
Вывлань шевкнитчӧм бордъяснас херувимъяс мед тупкасны куд вевтсӧ да воча сулалӧмӧн видзӧдасны вевт вылас.
Кор Ме сета тэныд изпӧвъяс, пукты изпӧвъяссӧ кудъяс да тупкы сійӧс вевтнас.
Йитӧд кудлӧн вевт вывтсянь, куд вылын сулалысь кык херувим костысь, Ме кута шыасьны тэ дінӧ, кута сетны Израиль пиянлы тшӧктӧмъяс тэ пыр».
«Вӧч акация пуысь пызан: кузьтанас кык гырддза, пасьтанас ӧти гырддза, судтанас гырддза да джын. Эж пызансӧ весалӧм зарниӧн да гӧгӧрыс вӧч [серлӧдлӧм] зарни дорыш.
Вӧч пызанлы ки пыдӧс судта дор, а сылысь дорышсӧ вӧч зарниысь.
Вӧч нёль зарни кольча да йит найӧс пызанлӧн нёльнан пельӧсас кокъяс бердас.
Кольчаясыс мед лоӧны пызан дор бердас, медым сэтчӧ позис сюйны потшъяс да новлӧдлыны пызансӧ.
Потшъяссӧ вӧч акация пуысь да эж [весалӧм] зарниӧн.
Вӧч весалӧм зарниысь тасьтіяс, дозмукъяс, кисьтан вись дозъяс да кӧшъяс.
Пызан вылас тэныд колӧ пыр пуктыны Ме водзӧ вежа нянь».
«Весалӧм зарниысь серлӧдлӧмӧн дор бикок. 
Сылӧн заыс, вожъясыс, чашаясыс, чаша подъясыс да дзоридзьясыс мед лоӧны ӧтторъяӧсь.
Квайт вожсьыс куимыс мед каяс ӧтарсяньыс, а мӧд куимыс — мӧдарсяньыс.
Вож вылас мед лоӧ куим чаша, найӧ мед лоӧны миндаль дзоридз сяма, подъяса да коръяса. Тадзи мед лоӧ квайтнан вож вылас.
Бикок за вылас мед лоӧ нёль чаша, найӧ мед лоасны миндаль дзоридз сяма, подъяса да коръяса.
Бикоклӧн медводдза кык вож улас мед лоӧ чаша под, мӧд кык вож улас — чаша под, коймӧд кык вож улас — чаша под. [Бикок вылын мед лоасны миндальлӧн восьса дзоридз кодь нёль чаша.]
Чаша подъясыс да вожъясыс бикокыскӧд мед лоӧны ӧтторъяӧсь, сійӧс ставнас колӧ серлӧдлӧмӧн дорны весалӧм зарниысь.
Вӧч сизим би доз, пукты найӧс бикок вылас, медым сетасны югыд.
Вӧч петельлы* чепӧлясӧ да пӧим воръяссӧ весалӧм зарниысь.
Бикок да сылы став коланаторсӧ мед вӧчасны талант* мында весалӧм зарниысь.
Ставсӧ вӧч дзик сідзи, кыдзи вӧлі петкӧдлӧма тэныд керӧс вылын».
«Вежа чомсӧ вӧч дас дӧраысь. Кы найӧс путшкӧм шабді шӧртысь да гӧрдовлӧз, пемыдгӧрд да югыдгӧрд вурун шӧртъясысь. Дӧраяссӧ мичмӧд херувим серпасъясӧн.
Кузьтанас дӧраыс мед вӧлі кызь кӧкъямыс гырддза, а пасьтанас — нёль гырддза. Даснан дӧраыс мед вӧліны ӧтыдждаӧсь.
Вит дӧрасӧ йит ӧта-мӧдыскӧд, мӧд витсӧ тшӧтш йит ӧта-мӧдыскӧд.
Тайӧ кык ыджыд дӧрасӧ йитӧм могысь вӧч гӧрдовлӧз рӧма пекляяс. 
Кыкнан йитан дӧра помас вӧч ӧта-мӧдныслы воча ветымын пекля.
Вӧч ветымын зарни пысӧд да на отсӧгӧн йитлы дӧраяссӧ, мед вежа чомйыс лоӧ ӧтторъя.
Кы кӧза вурунысь дас ӧти дӧра, медым вӧчны вежа чом вевттьӧд. Кузьтанас дӧраыс мед вӧлі комын гырддза, а пасьтанас — нёль гырддза. 
Дас ӧтикнан дӧраыс мед вӧліны ӧтыдждаӧсь.
Вит дӧрасӧ йит ӧта-мӧдыскӧд, и квайт дӧрасӧ йит ӧта-мӧдыскӧд.
Квайтӧд дӧрасӧ кыкпӧвстав. Сійӧ кутас ӧшавны вежа чом пыранінын.
Вӧч ветымын пекля кык ыджыд дӧра помъясас, медым йитны найӧс. 
Вӧч ветымын ыргӧн пысӧд да сюй найӧс пекляясас, мед вежа чом вевттьӧдыс лоӧ ӧтторъя. Вежа чом мышладорас мед кутас ӧшавны вевттьӧдлӧн бӧръя юкӧн джынйыс.
Дӧраяслӧн кузьтаног вевттьӧдыс мед ӧшалас улысса дӧраысь гырддзаӧн кузьджыка вежа чомлӧн ӧтар-мӧдар бокас.
Нӧшта вӧч вежа чомлы кык вевттьӧд: ӧтисӧ гӧрд рӧма меж кучикысь, а сы вылӧ мӧдсӧ лӧз рӧма кучикысь.
Вежа чом сувтӧдӧм могысь вӧч акация пуысь брусъяс.
Брускыс кузьтанас мед вӧлі дас гырддза, пасьтанас — гырддза да джын.
Быд брус помӧ лӧсав ӧта-мӧдыслы орчча кык тув. 
Татшӧмӧн вӧч вежа чомлысь став бруссӧ. Вежа чомлысь лунвывладор стенсӧ сувтӧдӧм могысь вӧч кызь брус. Брусъяслы вӧч нелямын эзысь подув: быд бруслы кык подув, быд тувлы ӧти подув.
Вежа чомлысь войвывладор стенсӧ сувтӧдӧм могысь тшӧтш вӧч кызь брус да налы нелямын эзысь подув: быд бруслы кык подув [быд тувлы ӧти подув].
Вежа чомлысь рытыввывладор стенсӧ сувтӧдӧм могысь вӧч квайт брус. Вежа чом рытыввывладор кыкнан пельӧсас вӧч кык брус.
Йит брусъяссӧ увсяньыс да вывсяньыс. Вывсяньыс йит кольча бердӧ. Тадзи вӧч кыкнан пельӧсас.
Ставнас лоӧ кӧкъямыс брус да налы дас квайт эзысь подув: быд бруслы кык подув [быд тувлы ӧти подув].
Акация пуысь вӧч йитан потшъяс: витӧс вежа чомлӧн ӧтарбокса брусъяслы, витӧс вежа чомлӧн мӧдарбокса брусъяслы, витӧс вежа чом мышладор брусъяслы рытыввывсяньыс.
Медшӧр йитан потшкыс мед мунас вежа чомлӧн ӧтар помсянь мӧдар помӧдзыс да йитас брусъяссӧ шӧрӧдыс.
Брусъяссӧ да найӧс йитан потшъяссӧ эж зарниӧн, потш сюян кольчаяссӧ вӧч зарниысь.
Вежа чомсӧ сувтӧд, кыдзи петкӧдлӧма вӧлі тэныд керӧс вылын.
Ӧшӧдан дӧрасӧ кы гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь, мичмӧд сійӧс херувим серпасъясӧн.
Ӧшӧд дӧрасӧ зарни пысӧдъяснас акация пуысь вӧчӧм нёль сюръя вылӧ. Эж сюръяяссӧ зарниӧн да сывдӧмӧн вӧч налы нёль эзысь подув.
Дӧрасӧ ӧшӧдӧм бӧрын Йитӧд кудсӧ пырт дӧра саяс.
Тайӧ ӧшӧдӧм дӧраыс кутас торйӧдны Вежаинсӧ Вежасьыс-вежаинысь.
Вежасьыс-вежаинас пукты Йитӧд куд вылӧ вевт. Пызансӧ сувтӧд ӧшӧдӧм дӧра водзӧ, а сылы воча — бикок.
Бикокыс мед сулалас вежа чомлӧн лунвывладорас, а пызаныс — войвывладорас.
Серлӧдлӧмӧн кы гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь дӧра. Ӧшӧд сійӧс вежа чом пыранінӧ.
Дӧрасӧ ӧшӧдӧм могысь вӧч акация пуысь вит сюръя да эж найӧс зарниӧн. Сюръяяслы кисьт вит ыргӧн подув. Дӧра пысӧдъяссӧ вӧч зарниысь».
«Вӧч акация пуысь висьпуктанін. Сійӧ мед вӧлі нёль пельӧса, кузьтанас и пасьтанас — вит гырддза, судтанас — куим гырддза.
Нёльнан пельӧсас вӧч сюръяс. Висьпуктанінкӧд найӧ мед лоӧны ӧтторъяӧсь.
Эж ставсӧ ыргӧнӧн.
Вӧч пӧим воръяс, пӧим куралан зыръяс, вир резан тасьтіяс, яй бергӧдлан вилаяс, ӧгыр пӧртъяс.
Ставсӧ тайӧс вӧч ыргӧнысь.
Висьпуктанін пытшкас вӧч ыргӧн радз.* Радз нёльнан пельӧсас вӧч ыргӧн кольча.
Висьпуктанін доргӧгӧрас йит радзсӧ улісяньыс. Раддзыс мед лоӧ висьпуктанін джынйӧдзыс.
Висьпуктанінлы вӧч акация пуысь потшъяс да эж найӧс ыргӧнӧн.
Тайӧ потшъяссӧ колӧ сюйны висьпуктанінлӧн кыкнанладор кольчаясас, медым позьӧ новлӧдлыны сійӧс.
Асьсӧ висьпуктанінсӧ вӧч пӧвйысь, сылӧн пытшкӧсыс мед вӧлі куш. Кыдзи петкӧдлӧма вӧлі тэныд керӧс вылын, сідзи и вӧчӧй сійӧс».
«Вежа чом гӧгӧрыс вӧч йӧр. Путшкӧм шабді шӧртысь кы сё гырддза кузьта дӧра, медым ӧшӧдны сійӧс йӧр пӧлӧн лунвывладорас.
Дӧрасӧ ӧшӧдӧм могысь вӧч кызь сюръя. Сюръяяслы вӧч кызь ыргӧн подув, эзысь пысӧдъяс да йитвежъяс.
Йӧр войвывладорас ӧшӧдӧм могысь кы сё гырддза кузьта дӧра, вӧч кызь сюръя да налы кызь ыргӧн подув.
Сюръя пысӧдъяссӧ да йитвежъяссӧ вӧч эзысьысь. [Подувъяссӧ эж эзысьӧн.]
Йӧр рытывладорас ӧшӧдӧм могысь кы ветымын гырддза кузьта дӧра, вӧч дас сюръя да налы дас подув.
Йӧр асывладор пасьтаыс мед лоӧ ветымын гырддза. 
[Дӧраяслы колӧ дас сюръя и дас подув.]
Пыранін ӧтарладорас ӧшӧдӧм могысь кы дас вит гырддза кузьта дӧра, вӧч куим сюръя да сюръяяслы куим подув.
Тадзи жӧ пыранін мӧдарладорас ӧшӧдӧм могысь кы дас вит гырддза кузьта дӧра, вӧч куим сюръя да сюръяяслы куим подув.
Серлӧдлӧмӧн кы гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь кызь гырддза кузьта дӧра. Ӧшӧд сійӧс йӧр пыранінӧ.
Дӧрасӧ ӧшӧдӧм могысь вӧч нёль сюръя да налы нёль подув.
Йӧр сюръяяслы йитвежъяссӧ да пысӧдъяссӧ вӧч эзысьысь, а подувъяссӧ вӧч ыргӧнысь.
Йӧрыс кузьтанас мед вӧлі сё гырддза, пасьтанас — ветымын гырддза. Путшкӧм шабді шӧртысь кыӧм дӧраяс судтанас мед лоӧны вит гырддза.
Сюръяяслы подувъясыс мед лоӧны ыргӧнысь.
Став дозмук-кӧлуйсӧ, мый колӧ вежа чомйын кесъялӧм могысь, вежа чом майӧгъяссӧ да йӧр дӧраяс зэвтан майӧгъяссӧ вӧч ыргӧнысь».
«Тшӧкты Израиль пиянлы вайны тэныд оливысь пычкӧм сӧстӧм вый, медым би дозъясысь выйыс эз бырлы.
Ааронлы да сылӧн пияныслы рытсяньыс асылӧдзыс колӧ видзӧдны би дозъяс бӧрся. Биыс мед ӧзъялас Господь водзын вежа чомйын, ӧшӧдӧм дӧра водзын, мый сайын сулалӧ Йитӧд куд.
Тайӧ тшӧктӧмыс лоӧ Израиль пиянлы нэмъяс кежлӧ чужысьяссянь чужысьясӧдз».
«Израиль пиян пӧвстысь кор ас дінад Аарон воктӧ пияныскӧд. Аарон да сылӧн Надав, Авиуд, Элазар да Итамар пияныс мед кесъяласны Меным попъясӧн.
Аарон вокыдлы лӧсьӧд вежа паськӧм сійӧс нимӧдӧм-мичмӧдӧм да вежӧдӧм могысь, ӧд сылы колӧ кесъявны Меным попӧн.
Вӧчасьны кужысьяслы, кодъяслы Ме сеті мывкыдлун [да сюсьлун], тшӧкты вурны Ааронлы [вежа] паськӧм.
Мед вӧчасны морӧсводз, ефод, риза*, серлӧдлӧм кузь дӧрӧм, юркӧртӧд да вӧнь.
Мед вӧчасны Аарон вокыдлы да сылӧн пиянлы тайӧ вежа паськӧмсӧ, медым найӧ попъясӧн кесъяласны Меным.
Вежа паськӧм вурӧм могысь мед босьтасны зарни, гӧрдовлӧз, пемыдгӧрд да югыдгӧрд вурун шӧртъяс да вӧсни шабді шӧрт. Зарни сунисысь, гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь мед серлӧдлӧмӧн кыасны ефод.
Ефодӧ кыкнан пельпомас мед вӧчасны кӧрталана кык ластавич.
Ачыс ефодыс да сы дінӧ вӧньыс кыанногнас мед вӧліны ӧткодьӧсь. Вӧньсӧ мед кыасны ефодӧс моз сійӧ жӧ [весалӧм] зарни сунисысь, гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь.
Босьт кык оникс из да вундалӧмӧн гиж на вылӧ Израиль пиянлысь нимъяссӧ медыджыдсяньыс медічӧтӧдзыс. Квайтӧс гиж ӧтар из вылас, а мӧд квайтсӧ — мӧдар из вылас.
Из вундалысь моз гиж нимъяссӧ изъяс вылас.
Сэсся доргӧгӧрав изъяссӧ зарниӧн да йит ефодлӧн ластавичьяс вылӧ. Изъясыс лоасны казьтыланпасӧн.
Аарон кутас новлӧдлыны Израиль пиянлысь нимъяссӧ пельпом вылас Господь водзын.
[Весалӧм] зарниысь вӧч изъяслы кык дорыш.
Нӧшта весалӧм зарниысь вӧч кык вӧсни чеп, гартышт найӧс кӧв моз да йит кык дорыш бердас [ластавич водзладорсяньыс].
Вӧч веськыда мыждӧмсӧ петкӧдлан морӧсводз.
Серлӧдлӧмӧн кы сійӧс ефодӧс моз зарниысь, гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь.
Сійӧ мед вӧлі кыкпӧвсталӧм дӧраысь, нёль пельӧса, весьт кузьта да весьт пасьта.
Сы вылӧ нёль визьӧн йитлы дона изъяс.
Медводдза визяс пукты рубин, топаз да изумруд, мӧд визяс — карбункул, сапфир да алмаз, коймӧд визяс — яхонт, агат да аметист, нёльӧд визяс — хризолит, оникс да яшма изъяс.
Став изсӧ доргӧгӧрав зарниӧн.
Израиль пиянлӧн дас кык ним серти изйыс мед лоӧ дас кык.
Быд из вылӧ колӧ вундалӧмӧн гижны ӧти чужанкотырлысь нимсӧ [Израиль пиянлӧн чужан во сертиыс].
Весалӧм зарниысь кӧв моз гартлӧмӧн вӧч морӧсводзлы чепъяс.
Вӧч кык зарни кольча да пысав морӧсводзлӧн вылыс пельӧсъясас.
Быд кольчаӧ сюй зарниысь вӧчӧм чепсӧ, а чеп помъяссӧ йит водзладорсянь ефод ластавичьяс вылӧ пуктӧм кыкнан зарни дорышӧ.
Нӧшта вӧч кык зарни кольча да йит найӧс морӧсводз улі пельӧсъясас гугладорсяньыс, кӧні морӧсводз инмӧ ефодӧ.
Сідзжӧ вӧч кык зарни кольча да йит найӧс водзладорсянь ефодлӧн кыкнан ластавич бердас, улісяньыс вурыс дінас, вӧнь весьттіыс.
Морӧсводз кольчаяссӧ йит ефод кольчаяскӧд гӧрдовлӧз вурун шӧртӧн, медым морӧсводзыс вӧлі вӧньсьыс вылынджык да вӧлі бура йитӧма ефод бердӧ.
Вежаинӧ пыригӧн Аарон сьӧлӧм бердас Господьлы казьтыланпас пыдди мед новлӧдлас Израиль пиянлысь нимъяссӧ веськыда мыждӧм петкӧдлан морӧсводзас. [Кыӧм чепъяссӧ йит морӧсводз кыкнан помас.
Зарни дорышъяссӧ пукты кыкнан ластавич вылӧ водзладорсяньыс.]
Веськыда мыждӧмсӧ петкӧдлан морӧсводзӧ сюй урим да туммим.* Тадзи найӧ лоасны Ааронлӧн сьӧлӧм бердас, кор сійӧ [вежаинӧ пыригӧн] локтас Господь водзӧ.
Господь водзӧ локтігӧн моросводзсӧ Аарон мед пыр кутас новлӧдлыны сьӧлӧм бердас. Морӧсводзыс петкӧдлӧ Израиль пиянлы веськыда мыждӧмсӧ.
Гӧрдовлӧз вурунысь кы риза, медым новлыны сійӧс ефодкӧд.
Ризасӧ мед пасьталасны юр вывсянь.
Сылысь сьылігӧгӧрсӧ вур тышкайӧз паськӧм моз, медым оз резьды.
Риза бӧждорӧ вӧч гӧрдовлӧз, пемыдгӧрд да югыдгӧрд вурунысь [да путшкӧм шабдіысь] гранат кодь сяръяс, [татшӧм жӧ сяръяс да] на костӧ тіньганъяс вӧч зарниысь бӧждор гӧгӧрыс.
Ризалӧн бӧждор гӧгӧрыс сьӧрсьӧн-бӧрсьӧн ӧшӧд зарни тіньган, сэсся сяр и бара зарни тіньган.
Тайӧ ризасӧ Аарон мед пасьталас кесъялігас, медым Господь водзӧ вежаинӧ пыригӧн да вежаинысь петігӧн кылас тіньган шы, и Аарон оз кув.
Весалӧм зарниысь вӧч пӧвтор да вундалӧмӧн гиж сэтчӧ “вежӧдӧма-торйӧдӧма Господьлы”. Кӧртав сійӧс гӧрдовлӧз кӧвйӧн юркӧртӧдас, медым сійӧ лоӧ Ааронлӧн плеш вылас.
Тадзи Аарон босьтӧ ас вылас Израиль пиянлысь мыж, найӧ кӧ вежа сетӧмторъяссӧ вайигӧн кутшӧмкӧ ногӧн торкӧны Индӧдсӧ.
Тайӧ зарни пӧвторйыс мед пыр лоас Ааронлӧн плеш вылас, медым Израиль пиянлӧн сетӧмторъясыс вӧліны шогманаӧсь Господьлы.
Дӧрӧмсӧ да юркӧртӧдсӧ кы вӧсни шабді шӧртысь, а вӧньсӧ кы серлӧдлӧмӧн.
Аарон пиянӧс нимӧдӧм да мичмӧдӧм могысь кы налы дӧрӧмъяс, вӧньяс да юрвевттьӧдъяс. Пасьтӧд Аарон воктӧ да сылысь пиянсӧ татшӧм паськӧмнас, мавтышт найӧс вежа выйӧн, пукты попъясӧ да вежӧд найӧс, сэки найӧ вермасны попъясӧн кесъявны Меным.
Шабді дӧраысь вур налы улыс гачьяс, медым налӧн куш яйыс коссяньыс пидзӧсӧдзыс вӧлі тупкӧма. Аарон да сылӧн пияныс мед новласны тайӧ паськӧмсӧ вежа чомйӧ пыригӧн либӧ висьпуктанін дорӧ матыстчигӧн, медым вежаинын кесъялігӧн найӧ эз кыскыны ас выланыс мыж да эз кувны. 
Ааронлы да сысянь чужысьяслы тайӧ тшӧктӧмыс лоӧ пыр кежлӧ».
«Ааронӧс да сылысь пиянсӧ вежӧд, медым найӧ кесъялісны Меным попъясӧн. Бӧрйы ӧшкӧс да дзоньвидза кык межӧс. Босьт медбур шобді пызьысь пӧжасъяс: шомтӧм нянь, выйӧн гудралӧм шомтӧм нянь да выйӧн мавтӧм шомтӧм сӧчӧн. Пукты ставсӧ ӧти кудйӧ да вай Ме водзӧ. Нӧшта вайӧд ӧшкӧс да кык межӧс.
Ааронӧс пияныскӧд вайӧд вежа чом пыранін водзӧ да мыссьӧд найӧс ваӧн.
Босьт [вежа] паськӧм, дӧрӧмӧд Ааронӧс да пасьтӧд ризасӧ, ефодсӧ да морӧсводзсӧ. Ефод вывтіыс вӧньӧд.
Юр вылас пукты юркӧртӧд. Юркӧртӧдас пысав вежа мичмӧдчанторсӧ.
Сэсся босьт мавтыштан вый да кисьт Ааронлы юр вылас. Тадзи тэ мавтыштан сійӧс.
Вайӧд тшӧтш Ааронлысь пиянсӧ да дӧрӧмӧд найӧс.
Сэсся вӧньӧд Ааронӧс да сылысь пиянсӧ, юр выланыс пукты юрвевттьӧд. Аарон да сылӧн пияныс пыр кежлӧ лоӧны попъясӧн.
Пукты найӧс кесъявны.
Вайӧд ӧшкӧс вежа чом водзӧ. Аарон да сылӧн пияныс мед пуктыласны кинысӧ ӧшлы юр вылас [Господь водзын вежа чом пыранін дорын].
Ӧшсӧ начкы Господь водзын вежа чом пыранін дорын.
Чуньтӧ кӧтӧд ӧш вирнас да мавтышт висьпуктанінлысь сюръяссӧ, а коляс вирсӧ койышт висьпуктанін улӧ.
Сэсся босьт ӧшпилысь пытшкӧс госсӧ, мус вывсьыс госа юкӧнсӧ, кыкнан вӧрксӧ госнас да сот висьпуктанін вылын.
А ӧшлысь яйсӧ, кучиксӧ да сювсӧ сот чомъяс сайын. Тайӧ лоӧ мыжысь вись.
Сэсся босьт межӧс, и Аарон пияныскӧд мед пуктыласны кинысӧ межлы юр вылас.
Начкы межсӧ да рез сылӧн вирнас висьпуктанінсӧ быд боксянь.
Сэсся керав межсӧ, мыськав сылысь пытшкӧссӧ да кокъяссӧ, пукты найӧс яйторъясыс да юрыс вылӧ.
Став межсӧ сот висьпуктанін вылын.
Тайӧ лоӧ Господьлы сотан вись, Господьлы чӧскыд ӧвтантор.
Сэсся босьт мӧд межӧс, и Аарон пияныскӧд мед пуктыласны кинысӧ межлы юр вылас.
Начкы межсӧ, босьт сылысь вирсӧ да мавтышт Ааронлысь да пияныслысь веськыд пельтугнысӧ, веськыд кисьыс певнысӧ да веськыд коксьыс ыджыд чуньнысӧ.
Сэсся вирнас рез висьпуктанінсӧ быд боксянь.
Босьт висьпуктанін вылысь вир, босьт мавтыштан вый да рез наӧн Ааронӧс, сылысь пиянсӧ да налысь паськӧмнысӧ. Тадзи Аарон, сылӧн пияныс да налӧн паськӧмныс лоӧны вежаӧсь.
Босьт межлысь бӧждор госсӧ, пытшкӧс госсӧ, мус вывсьыс госа юкӧнсӧ, кыкнан вӧрксӧ госнас да веськыдладор задвыв яйсӧ, ӧд тайӧ межыс — попӧ сувтӧдан вись. Господь водзӧ пуктӧм шомтӧм нянь тыра кудйысь босьт ӧти гӧгрӧс нянь, выйӧн гудралӧм нянь да сӧчӧн. Сет ставсӧ тайӧс Ааронлы да сылӧн пияныслы кианыс, вай ставсӧ Господь водзын пыркӧдан вись пыдди.
Сэсся босьт тайӧс налӧн киысь да сот висьпуктанін вылын сотан виськӧд. Тайӧ Господьлы чӧскыд ӧвтантор, Господьлы сотан вись.
Босьт попӧ сувтӧдан вись пыдди ваян межлысь морӧсвыв яйсӧ да вай сійӧс Господь водзын пыркӧдан вись пыдди. Ааронлӧн тайӧ пайыс лоӧ тэныд.
Вежӧд межыслысь морӧсвыв яйсӧ, мый колӧ вайны пыркӧдан вись пыдди, да задвыв яйсӧ, мый колӧ вайны кыпӧдлан вись пыдди. Межыслӧн тайӧ юкӧнъясыс лоӧны Ааронлы да сылӧн пиянлы. Тайӧ лоӧ Израиль пиянсянь пыр кежлӧ Ааронлы да сылӧн пияныслы торйӧдан юкӧн.
Бурасян вись вайигӧн Израиль пиян мед торйӧдасны тайӧ юкӧнсӧ козин пыдди Господьлы.
Ааронлӧн вежа паськӧмыс вуджас сылӧн пияныслы. Паськӧмсӧ мед пасьталас сійӧ, кодӧс мавтыштасны кесъявны аркирейӧн.
Сійӧ мед новлӧ паськӧмсӧ сизим лун чӧж, кор Аарон бӧрся пондас кесъявны [ыджыд] попӧн вежа чомйын.
Попӧ сувтӧдан вись пыдди вайӧм межлысь яйсӧ пу вежаинын.
Аарон да пияныс мед сёясны межыслысь яйсӧ да кудйысь няньсӧ вежа чом пыранін дорын. Налы колӧ сёйны тайӧ висьсӧ, ӧд сійӧс вайӧма налысь мыжсӧ вештӧм могысь.
Тадзи найӧс лоӧ вежӧдӧма, и найӧ вермасны кесъявны попъясӧн. Тайӧ — вежатор, бокысалы сійӧс сёйнысӧ оз позь.
Попӧ сувтӧдан вись пыдди вайӧм яйсӧ либӧ няньсӧ асылӧдзыс кӧ ставнас оз сёйны, сэки коляссӧ сот биын. Тайӧ — вежатор, мӧд луннас некодлы сійӧс сёйнысӧ оз позь.
Ааронлы да сылӧн пиянлы вӧч ставсӧ сідзи, кыдзи Ме тшӧкті тэныд.
Найӧс попӧ сувтӧдан лунъясыс мед мунасны сизим лун чӧж.
Мыж вештӧм могысь быд лун начкы ӧшкӧс. Вай сійӧс висьпуктанін вылын мыжысь вись пыдди. Тадзи сӧстӧммӧдан висьпуктанінсӧ. И вежӧдӧм могысь мавтышт сійӧс.
Сизим лун чӧж сӧстӧммӧд висьпуктанінсӧ да вежӧд сійӧс, и висьпуктаніныс лоӧ вежасьыс-вежа. Ставыс, мый инмас висьпуктанінӧ, лоӧ вежа».
«Быд лун вай висьпуктанін вылын [дзоньвидза] арӧса кык баляӧс вись пыдди.
Ӧти балясӧ вай асывнас, мӧдсӧ — рытнас. Ӧти баляыскӧд вай пычкӧм олив выйӧн гудралӧм шобді пызь. Пызьыс мед вӧлі ефалӧн дасӧд юкӧныс, а выйыс мед вӧлі гинлӧн нёльӧд пайыс. Кисьтан вись пыдди вай вина — гинлысь нёльӧд пайсӧ.
Мӧд балясӧ вай рытнас нянь виськӧд да вина виськӧд асъя мозыс жӧ. Вай сійӧс Господьлы чӧскыда ӧвтан вись пыдди.
Тайӧ сотан висьсӧ чужысьяссянь чужысьясӧдз пыр колӧ вайны Господь водзӧ вежа чом пыранін дорын. Вежа чомсянь Ме, Господь, кута шыасьны тіян дінӧ, кута сёрнитны тэкӧд.
Вежа чомсянь Ме кута шыасьны Израиль пиян дінӧ. Менам дзирдлунысь тайӧ чомйыс лоӧ вежа.
Ме вежӧда вежа чомсӧ да висьпуктанінсӧ, вежӧда тшӧтш Ааронӧс да сылысь пиянсӧ, медым найӧ попъясӧн кесъяласны Меным.
Ме кута овны Израиль пиян пӧвстын да лоа налӧн Енмӧн. Сэки найӧ тӧдмаласны, мый Ме — Господь, налӧн Ен, и Ме петкӧді найӧс Египет муысь, медым овны на пӧвстын.
Ме — Господь, налӧн Енмыс».
«Вӧч акация пуысь висьпуктанін, медым сэні тшынӧдны чӧскыд ӧвтанторъяс. Висьпуктаніныс мед лоӧ нёль пельӧса, кузьтанас и пасьтанас — ӧти гырддза, а судтанас — кык гырддза.
Сюръясыс висьпуктанінкӧд мед лоӧны ӧтторъяӧсь.
Висьпуктанінлысь вывсӧ, бокъяссӧ да сюръяссӧ эж весалӧм зарниӧн.
Доргӧгӧрыс вӧч зарни дорыш.
Дорыш улас кыкнанладор бокас йит кык зарни кольча, медым кольчаясас позис сюйны потшъяс да новлӧдлыны висьпуктанінсӧ.
Потшъяссӧ вӧч акация пуысь да эж зарниӧн.
Висьпуктанінсӧ сувтӧд Вежаинӧ ӧшӧдан дӧра водзӧ, а дӧра саяс лоӧ Йитӧд куд. Йитӧд кудлӧн вевт вывсянь Ме кута шыасьны тэ дінӧ.
Висьпуктанін вылас Аарон мед тшынӧдас чӧскыд ӧвтанторъяс.
Сійӧ мед тшынӧдчас сэні быд асыв, кор кутас локны видзӧдны би дозъяс бӧрся.
Мед тшынӧдчас тшӧтш быд рыт, кор кутас локны би ӧзтыны. Тадзи Господь водзын колӧ тшынӧдчыны чужысьяссянь чужысьясӧдз.
Висьпуктанін вылын мӧдторъяс энӧ тшынӧдӧй. Энӧ вайӧй сэні сотан вись, нянь вись либӧ вина вись.
Ӧтчыдысь вонас Аарон мед сӧстӧммӧдас висьпуктанінлысь сюръяссӧ.
Мыжысь висьлӧн вирнас сійӧ ӧтчыдысь вонас мед сӧстӧммӧдас висьпуктанінсӧ. Тадзи колӧ вӧчны чужысьяссянь чужысьясӧдз.
Тайӧ висьпуктаніныс лоӧ вежасьыс-вежа, сійӧ — Господьлӧн».
Господь шуис Мӧисейлы:
«Израиль пиянлысь лыдсӧ арталігад мед быдӧн ас пондаыс вештысяс Господьлы. Сэки найӧс оз ло бырӧдӧма арталӧм вӧсна.
Быдӧн, кодӧс лоӧ арталӧма войтырӧс гижалігӧн, мед вайӧ сикель джын вежаинса сикель серти.
Ӧти сикельын — кызь гера. Сикель джынйыс — Господьлы вайӧмтор.
Быдӧн, кодӧс лоӧ арталӧма войтырӧс гижалігӧн — кызь арӧса да ыджыдджык арлыда айулов — мед ас пондаыс вайӧ тайӧ козинсӧ Господьлы.
Ас понданыс вештысигӧн озыръяс мед оз вайны Господьлы сикель джынйысь унджык, и гӧльяс мед оз вайны сикель джынйысь этшаджык.
Босьт Израиль пиянлысь ас понданыс вештысян эзысьсӧ да вӧдитчы сыӧн вежа чомйын кесъялӧм могысь.
Израиль пиянлы тайӧ лоӧ Господь водзын казьтыланпасӧн, мый найӧс ньӧбӧма».
Господь шуис Мӧисейлы:
«Вӧч ыргӧнысь мыссян доз да сылысь коксӧ. Пукты сійӧс вежа чом да висьпуктанін костӧ, кисьт сэтчӧ ва.
Аарон да сылӧн пияныс мед мыськасны сэні ки-кокнысӧ.
Вежа чомйӧ пыртӧдз найӧ мед мыссясны, а оз кӧ мыссьыны, куласны.
Господьлы вись вайигӧн, кор локтасны висьпуктанін дорӧ, найӧ мед мыськасны ки-кокнысӧ, а оз кӧ мыськыны, куласны.
Тайӧ тшӧктӧмыс лоӧ Ааронлы да сысянь чужысьяслы пыр кежлӧ».
Господь шуис Мӧисейлы:
«Босьт медчӧскыд ӧвтанторъяс: витсё сикель кизьӧр смирна, сыысь кык пӧв этшаджык чӧскыда ӧвтысь корица, тшӧтш кыксё ветымын сикель чӧскыд дука турун, витсё сикель кассия, — ставсӧ вежаинса сикель серти — да гин мында олив вый.
Мавтас вӧчысь моз ставсӧ тайӧс сорлалӧмӧн дасьты мавтыштан вежа вый. 
Мавтышт тайӧ выйнас вежа чом, Йитӧд куд, пызан да сылы став коланаторсӧ, бикок да сылы став коланаторсӧ, тшынӧдчан висьпуктанін, сотан висьлы висьпуктанін да сэтчӧ дозмук-кӧлуй, мыссян доз да сылысь коксӧ.
Вежӧд найӧс, и найӧ лоӧны вежасьыс-вежаӧсь. Ставыс, мый инмас наӧ, лоӧ вежа.
Ааронӧс да сылысь пиянсӧ тшӧтш мавтышт да вежӧд, медым найӧ попъясӧн кесъяласны Меным.
Висьтав Израиль пиянлы, мый чужысьяссянь чужысьясӧдз тайӧ лоӧ Менам мавтыштан вежа вый.
Тайӧ выйнас оз позь мавтыштны бокыса йӧзӧс. Татшӧм выйсӧ аслыныд энӧ вӧчӧй, ӧд сійӧ вежа. Тіянлы сійӧ мед лоӧ вежа вый.
Коді вӧчас татшӧм выйсӧ либӧ мавтыштас бокысаӧс, сійӧс лоӧ бырӧдӧма аслас войтыр пӧвстысь».
Господь тшӧктіс Мӧисейлы: «Босьт ӧтмындаӧн чӧскыд ӧвтанторъяс — стакти, оних да халван, тшӧтш ладан сир. Мавтас вӧчысь моз вӧч наысь чӧскыд дука тшынӧдчантор. Вӧч солалӧмӧн, сӧстӧмӧс да вежаӧс. Торйӧд сэтысь мыйтакӧ, нирт сійӧс да пукты вежа чомйӧ Йитӧд куд водзӧ. Вежа чомсянь Ме кута шыасьны тэ дінӧ. Тайӧ тшынӧдчанторйыс лоӧ тіянлы вежасьыс-вежа.
Татшӧм тшынӧдчанторсӧ энӧ вӧчӧй аслыныд. Сійӧ мед лоӧ тіянлы вежа, ӧд торйӧдӧма Господьлы.
Коді вӧчас аслыс татшӧм тшынӧдчанторсӧ, сійӧс лоӧ бырӧдӧма аслас войтыр пӧвстысь».
Господь шуис Мӧисейлы:
«Тӧд, мый Ме бӧрйи Иуда чужанкотырысь Хур Урилысь Безалел писӧ.
Ме тырті Безалелӧс Аслам Лолӧн, сеті сылы мывкыдлун, вежӧр, тӧдӧмлун да кужӧмлун вӧчны быдпӧлӧс уджсӧ. Сійӧ кужӧ вӧчасьны зарниысь, эзысьысь да ыргӧнысь. [Кужӧ кыны кельыдлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь.] Кужӧ вундавны да доргӧгӧравны из, вундасьны пуысь да вӧчны быдсикас кипом уджсӧ.
Ме сеті сылы отсӧг вылӧ Дан чужанкотырысь Ахисамаклысь Оголиав писӧ. Став киподтуя йӧзлы Ме сеті мывкыдлун, медым найӧ кужисны вӧчны ставсӧ, мый Ме тшӧкті тэныд.
Найӧ мед вӧчасны вежа чом, Йитӧд куд да сылы вевт, вежа чомйӧ колана дозмук-кӧлуй, пызан да сылы став коланаторсӧ, весалӧм зарниысь бикок да сылы став коланаторсӧ, тшынӧдчан висьпуктанін, сотан висьлы висьпуктанін да сэтчӧ дозмук-кӧлуй, мыссян доз да сылы кок, Аарон поплы вежа паськӧм да сылӧн пиянлы попӧн кесъялан паськӧм, мавтыштан вый да чӧскыд дука тшынӧдчантор, мый колӧ вежаинӧ. Ставсӧ мед вӧчасны сідзи, кыдзи Ме тшӧкті тэныд».
Господь тшӧктіс Мӧисейлы:
«Висьтав Израиль пиянлы, мед видзасны Менсьым шойччан лунӧс. Шойччан лун лоӧ пасӧн Ме да тіян костын чужысьяссянь чужысьясӧдз. Та серти ті тӧдмаланныд, мый Ме — Господь, тіянӧс Вежӧдысь.
Энӧ торкӧй шойччан лунсӧ, ӧд тайӧ луныс тіянлы вежа. Коді пежалас шойччан лун, сійӧс колӧ вины.
Коді тайӧ лунӧ кутас уджавны, сійӧс лоӧ бырӧдӧма аслас войтыр пӧвстысь.
Квайт лун уджалӧй, а сизимӧд луныс — шойччан лун, сиӧма Господьлы. Быдӧнӧс, коді кутас уджавны шойччан лунӧ, колӧ вины.
Израиль пиян мед видзасны шойччан лунсӧ чужысьяссянь чужысьясӧдз. Тайӧ нэмъяс кежлӧ кӧрталӧм йитӧд.
Шойччан лун лоӧ пасӧн Ме да Израиль костын нэмъяс кежлӧ. Ӧд квайт лун чӧж Господь вӧчис енэжсӧ да мусӧ, а сизимӧд луннас шойччис».
Синай керӧсын Мӧисейкӧд сёрнитӧм бӧрын Ен сетіс сылы йитӧдлысь кык изпӧв, кытчӧ Аслас киӧн гижис кывъяссӧ.
Войтырыс аддзис, мый Мӧисей дыр эз кут лэччыны керӧс вылысь. Найӧ локтісны Аарон дінӧ, кытшалісны сійӧс да шуисны: «Вӧч миянлы енмӧс, код бӧрся ми вермам мунны. Ӧд ми огӧ тӧдӧй, мый лоис Мӧисейкӧд, сійӧ мортыскӧд, коді петкӧдіс миянӧс Египетысь».
Аарон налы шуис: «Босьтӧй гӧтыръясныдлысь да ныв-пиныдлысь зарни исергаяссӧ да вайӧй меным».
Став йӧзыс перъялісны пельсьыныс зарни исергаяснысӧ да вайисны Ааронлы.
Сійӧ босьтіс ставсӧ, сывдіс да вӧчис-мольӧдіс ӧшкӧс.
Йӧзыс шуисны: «Израиль, тайӧ тэнад ен, сійӧ петкӧдіс тэнӧ Египет муысь!»
Тайӧс аддзӧм бӧрын Аарон сувтӧдіс ӧш водзӧ висьпуктанін да горӧдіс: «Аски Господь водзын гаж!»
Мӧд луннас найӧ чеччисны водз да вайисны сотан да бурасян висьяс. Войтырыс сёйис-юис, сэсся чеччис гажӧдчыны-ворсны.
Господь шуис Мӧисейлы: «Лэччы ӧдйӧджык, ӧд тэнад войтырыд, кодӧс тэ петкӧдін Египет муысь, шогмытӧма кутіс овны.
Найӧ ӧдйӧ кежисны Менам туйысь, вунӧдісны Менсьым тшӧктӧмъясӧс. Найӧ вӧчисны аслыныс ӧшкӧс да копыртчисны сылы, вайисны сылы висьяс да шуисны: “Израиль, тайӧ тэнад ен, сійӧ петкӧдіс тэнӧ Египет муысь!”»
Господь шуис Мӧисейлы: «Ме аддза, кутшӧм асныра тайӧ войтырыс.
Ӧні коль Менӧ. Ме кисьта на вылӧ Ассьым скӧрлунӧс да бырӧда найӧс, а тэсянь сета чужны унасьыс-уна войтырлы».
Но Мӧисей кевмысьӧмӧн шыасис аслас Господь Ен дінӧ: «Господьӧй, эн ӧзты Ассьыд скӧрлунтӧ Аслад войтырыд вылӧ, кодӧс Тэ ыджыд вынйӧрӧн да вына киӧн петкӧдін Египет муысь. Ӧд египетсаяс кутасны шуны, Енмыс пӧ петкӧдіс найӧс, медым керӧсъяс вылын вины найӧс да бырӧдны му вылысь.
Дугды скӧравнытӧ, Господьӧй, эн бырӧд Ассьыд войтыртӧ.
Эн вунӧд Ассьыд Ӧвраам, Исаак да Израиль [Яков] кесйӧгъястӧ. Тэ ӧд Ачыд кыв сетӧмӧн шуин налы: “Ме сета тіянлы уна чужысьӧс, найӧ лоӧны енэжвыв кодзувъяс мында. А муыс, мый Ме кӧсйыси сетны тіянсянь чужысьяслы, лоас налӧн пыр кежлӧ”».
Господь вежис Ассьыс шуӧмсӧ — эз мӧдӧд лёксӧ Аслас войтыр вылӧ.
Мӧисей бергӧдчис да лэччис керӧс вылысь.
Сылӧн киас вӧлі йитӧдлӧн кык изпӧв, кытчӧ ӧтарсяньыс и мӧдарсяньыс вӧлі гижӧма кывъяс.
Изпӧвъяссӧ вӧчис Ачыс Ен, Сійӧ вундалӧмӧн гижис сэтчӧ Ассьыс кывъяссӧ.
Нав Исус кыліс войтырлысь горзӧмсӧ да шуис Мӧисейлы: «Чомъяс дорын тышкасьӧны».
Мӧисей вочавидзис: «Тайӧ абу вермӧм йылысь ызгӧм шы, абу пасьвартӧм вӧсна бӧрдӧм.
Ме кыла сьылӧм-гажӧдчӧм».
Чомъяс дорӧ матыстчигӧн Мӧисей аддзис зарни ӧшкӧс. Йӧзыс вӧлі сьылӧны-йӧктӧны. Мӧисей ёна скӧрмис, шыбитіс кисьыс изпӧвъяссӧ, и керӧс горулын найӧ пасьмунісны-жугалісны. Сійӧ босьтіс киӧн вӧчӧм ӧшнысӧ да сотіс биын. Ниртіс сійӧс пызьӧдз да койыштіс ваӧ, а васӧ тшӧктіс юны Израиль пиянлы.
Мӧисей юаліс Ааронлысь: «Тайӧ войтырыс кутшӧм лёк вӧчис тэныд, мый татшӧм ыджыд мыжӧ тэ уськӧдін найӧс?»
Аарон вочавидзис: «Эн дӧзмы, ыджыдӧй!
Тэ ӧд тӧдан, мый тайӧ войтырыс ӧдйӧ сетчӧ лёкас.
Найӧ шуисны меным: “Вӧч миянлы енмӧс, код бӧрся ми вермам мунны.
Ӧд ми огӧ тӧдӧй, мый лоис Мӧисейкӧд, сійӧ мортыскӧд, коді петкӧдіс миянӧс Египетысь”.
Сэки ме шуи налы: “Кодлӧн эм зарни, пӧрччӧй”. 
Найӧ [пӧрччисны да] вайисны меным зарнисӧ.
Ме шыбиті зарнисӧ биӧ, и артмис тайӧ ӧшкыс».
Мӧисей аддзис, мый войтырыс этшсӧ оз тӧд. Аарон вӧсна вӧрӧглӧн лои помка янӧдны Израиль войтырӧс.
Чомъяс сулаланінӧ пыранін дорын Мӧисей горӧдіс: «Коді Господьлӧн, мед локтас ме дінӧ!»
Сы дінӧ локтісны Левий чужанкотырысь пиян.
Мӧисей шуис налы: «Господь, Израильлӧн Ен, тадзи висьталӧ: “Вӧнялӧй косканыд ассьыныд шыпуртнытӧ, мунӧй чомъяс сулаланінӧд помсянь помӧдзыс да виӧй быдӧнӧс, кодкӧд паныдасянныд, весиг вокнытӧ, ёртнытӧ да матыссанытӧ”».
Левий пиян вӧчисны Мӧисейлӧн тшӧктӧм серти. Куим сюрс гӧгӧр мортӧс вӧлі виӧма сійӧ лунӧ.
Мӧисей шуис Левий пиянлы: «Талун сетӧй асьнытӧ кесъявны Господьлы, медым Сійӧ бурсиас тіянӧс. Ӧд ті вештінныд дон — быдӧн тіян пиысь виис писӧ да воксӧ».
Мӧд луннас Мӧисей шуис войтырыслы: «Ті вӧчинныд ыджыд мыж.
Ме кая керӧс вылӧ Господь дінӧ, гашкӧ, верма вештыны тіянлысь мыжнытӧ».
Мӧисей бӧр локтіс Господь дінӧ да шуис: «[Господьӧй,] тайӧ войтырыс ыджыд мыж вӧчис. Найӧ зарниысь вӧчисны аслыныс енмӧс.
Прӧстит налысь мыжсӧ, а он кӧ, вушты менсьым нимӧс Аслад небӧгысь».
Господь шуис Мӧисейлы: «Аслам небӧгысь Ме вушта нимсӧ сылысь, коді мыж вӧчис Меным паныд.
Мун [лэччы] да нуӧд войтыртӧ сэтчӧ, кытчӧ Ме тшӧкті.
Менам андел мунас тэ водзын. А мыждан лунӧ Ме мыжда найӧс мыжсьыныс».
Господь мыждіс войтырсӧ ӧш вӧсна, кодӧс вӧчисны найӧ Ааронкӧд.
Господь шуис Мӧисейлы: «Войтырыдкӧд, кодӧс тэ петкӧдін Египет муысь, мун сійӧ муас, мый Ӧвраамлы, Исааклы да Яковлы кыв сетӧмӧн Ме кӧсйыси сетны насянь чужысьяслы.
Ме мӧдӧда [Ассьым] анделӧс тэ водзын, вӧтла ханаансаясӧс, аморейясӧс, хеттейясӧс, перезейясӧс, [гергесейясӧс,] хивейясӧс да евуссаясӧс. Сійӧ нуӧдас тіянӧс муӧ, кӧні визувтӧ йӧв да ма.
Ачым Ме ог мун тіянкӧд, медым туяныд Ме эг ви тіянӧс асныралӧм вӧснаныд».
Тайӧ чорыд кывъяссӧ кылӧм бӧрын войтырыс кутіс бӧрдны. Найӧ пӧрччисны ас вывсьыныс мичмӧдчанторъяссӧ.
Господь шуис Мӧисейлы: «Висьтав Израиль пиянлы: ті асныра войтыр.
Ме кӧ муна тіянкӧд, ӧти здукӧн виа тіянӧс.
Пӧрччӧй ас вывсьыныд мичмӧдчанторъястӧ.
Ме видзӧдла, мый вӧчны тіянкӧд».
Израильсаяс пӧрччисны ас вывсьыныс мичмӧдчанторъяссӧ Хорив керӧс бокын.
Израиль войтырлӧн сувтанін сайӧ, налӧн чомъясысь ылӧджык, Мӧисей сувтӧдіс чом да нимтіс сійӧс паныдасян чомйӧн.
Чом дорас ветлывлісны Господьӧс корсьысьяс.
Кор Мӧисей восьлаліс паныдасян чомлань, израильсаяс асланыс чомъяс дорын сулалӧмӧн видзӧдісны Мӧисей бӧрся, кытчӧдз сійӧ эз пыр чомйӧ.
Чомйӧ пырӧм бӧрас лэччыліс кымӧр сюръя да сувтліс чом пыранін водзӧ. Чомйын Господь сёрнитіс Мӧисейкӧд.
Став войтырыс аддзис паныдасян чом пыранін дорын сулалысь кымӧр сюръясӧ.
Найӧ копыртчисны муӧдз асланыс чомъяс дорын.
Господь сёрнитіс Мӧисейкӧд воча чужӧмӧн, кыдзи морт сёрнитӧ аслас ёрткӧд.
Сэсся Мӧисей бӧр локтіс йӧз дорӧ, а Навлӧн Исус пиыс, Мӧисейлы отсасьысь том морт, эз вешйыв паныдасян чом дорысь.
Мӧисей шуис Господьлы: «Тэ тшӧктін меным нуӧдны тайӧ войтырсӧ, но эн висьтав, кодӧс Тэ мӧдӧдан меным отсасьны. Тэ шулін меным, мый тӧдан менӧ да лоан бур сьӧлӧма ме дінӧ.
Тэ кӧ бур сьӧлӧма ме дінӧ, петкӧдлы меным Ассьыд туйтӧ, медым ме тӧді Тэнӧ да вӧчи Тэныд шогманасӧ.
Ӧд тайӧ йӧзыс — Тэнад войтырыд».
Господь шуис сылы: «Ме Ачым муна [тэ водзын] да пырта тэнӧ лӧньлунӧ».
Мӧисей шуис Господьлы: «Тэ кӧ он мун [миянкӧд], сідзкӧ, эн петкӧд миянӧс татысь. Мый серти ми тӧдмалам, мый Тэ бур сьӧлӧма ме дінӧ да Аслад войтырыд дінӧ?
Ог-ӧ сы серти, мый Тэ миянкӧд мунан?
Ӧд сэки тыдовтчас, мый Тэ торйӧдін менӧ да Ассьыд войтыртӧ став мукӧд войтырсьыс».
Господь шуис Мӧисейлы: «Ме вӧча, мый тэ коран, ӧд Ме бур сьӧлӧма тэ дінӧ да тӧда тэнӧ».
Мӧисей шуис: «Петкӧдлы меным Ассьыд дзирдлунтӧ».
Господь вочавидзис Мӧисейлы: «Ме муна Аслам дзирдлунӧн тэ водзын да юӧрта тэныд, мый Менам нимӧй — Господь. Код дінӧ кӧсъя бурсьӧлӧмтчыны, бурсьӧлӧмтча. Код дінӧ кӧсъя буравны, бурала».
Сэсся Господь шуис: «Тэ он вермы видзӧдны Менам чужӧмбан вылӧ. Ме вылӧ видзӧдлӧм бӧрын мортыс оз вермы ловйӧн кольны».
Господь шуис: «Сувт татчӧ, Ме бокӧ, изкырта вылас.
Кор Менам дзирдлунӧй кутас мунны тэ дінті, Ме дзеба тэнӧ кырта потасӧ да вевття Аслам киӧн. А мунӧм бӧрти Ме вешта Ассьым киӧс. Сэки тэ аддзан Менӧ бӧрвывсянь, а чужӧмӧс он аддзыв».
Господь шуис Мӧисейлы: «Вӧч кык изпӧв, воддза кодьӧс. [И кай Ме дінӧ керӧс вылӧ.] Изпӧвъяс вылас Ме гижа кывъяссӧ воддза изпӧвъясысь, мый тэ жугӧдін.
Асывводз кежлӧ тэ ло дась. Асывнас кай Синай керӧс вылӧ да сувт сэні Ме водзӧ.
Тэкӧд мед некод оз лок. Некод мед оз кай керӧсӧ, весиг ыж-мӧс мед оз йирсьыны керӧс горулас».
Мӧисей вӧчис кык изпӧв, воддза кодьӧс, да водз асывнас кайис Синай керӧс вылӧ, кыдзи тшӧктіс сылы Господь.
Киас сійӧ нуис кык изпӧв.
Господь лэччис Мӧисей дінӧ кымӧр пытшкын да юӧртіс, мый Сылӧн нимыс — Господь.
Господь муніс Мӧисей водзті да шуис: «Ме, Господь — мелі да бур сьӧлӧма, дыр терпитысь, буралысь да эскана* Ен. Ме видза [веськыдлунсӧ да восьта] буралӧмсӧ сюрс чужанвужйӧдз, прӧстита лёк вӧчӧм да мыж, но мыжаӧс ог коль мыждытӧг. Батьяслӧн мыж вӧсна Ме водзӧс перъя челядьныслысь да водзӧ чужысьяслысь коймӧд да нёльӧд чужанвужйӧдз».
Мӧисей дзик пыр муӧдзыс копыртчӧмӧн юрбитіс Енлы.
Сійӧ шуис: «Ыджыдӧй, Тэ кӧ бур сьӧлӧма ме дінӧ, лок да мун миянкӧд водзӧ.
Збыльысь, тайӧ войтырыс асныра.
Прӧстит миянлысь мыжнымӧс да лёк вӧчӧмнымӧс. Вӧч миянӧс Аслад войтырӧн».
Господь шуис Мӧисейлы: «Ме кӧртала тіянкӧд йитӧд. Тэнад войтырлӧн син водзын Ме вӧча шензьӧданаторъяс, татшӧмторйыс эз на вӧв му пасьтала некутшӧм войтыр пӧвстын.
Менсьым повзьӧдана уджъясӧс аддзас став войтырыд.
Олӧй сы серти, мый ӧні тшӧкта тіянлы. Ме вӧтла тіян водзысь аморейясӧс, ханаансаясӧс, хеттейясӧс, перезейясӧс, [гергесейясӧс,] хивейясӧс да евуссаясӧс.
Видзӧдӧй, медым сійӧ муын, кытчӧ ті овмӧдчанныд, энӧ кӧрталӧй йитӧд сэні олысьяскӧд. Кӧрталанныд кӧ, налькйӧ шеданныд.
Налысь висьпуктанінъяссӧ жуглӧй, юрбитан изъяссӧ пасьвартӧй, юрбитан пуяссӧ кералӧй [да бӧлбанъяссӧ биын сотӧй]. Господьысь ӧтдор мукӧд енъяслы энӧ копрасьӧй, ӧд Господь — вежӧгтысь Ен.
Энӧ кӧрталӧй йитӧд сійӧ муас олысьяскӧд. Найӧ кырсалысь ань моз сетчӧны асланыс енъяслы, вайӧны налы висьяс да корӧны тіянӧс сёйны, и ті сёянныд налысь висьсӧ.
Налысь нывъяссӧ пияныдлы гӧтырӧ энӧ босьтӧй [и ассьыныд нывъястӧ налӧн пиян сайӧ энӧ сетӧй]. Ті кӧ кутанныд босьтны налысь нывъяссӧ пияныдлы гӧтырӧ, сэки найӧ кыскасны пияннытӧ ас бӧрсяныс, и пиянныд кырсалысьяс моз сетчасны налӧн енъяслы.
Энӧ сывдӧй аслыныд бӧлбанъясӧс.
Пасйы Шомтӧм нянь сёян лунъяс. Сизим лун чӧж сёй шомтӧм нянь индӧм кадӧ авив тӧлысьӧ, кыдзи Ме тшӧкті тэныд, ӧд авив тӧлысьӧ тэ петін Египетысь.
Мам кынӧмысь быд медводдза чужысь пи лоӧ Менам. Тшӧтш медводдза чужысь ӧшкыд да межыд лоӧ Менам.
Медводдза чужысь осёлпиысь вештысь баляпиӧн, а он кӧ кӧсйы вештысьны, песовт осёлпилысь сьылісӧ.* 
Тшӧтш аслад медводдза чужысь пиысь вештысь.
Ме водзӧ куш киӧн мед некод оз лок.
Квайт лун уджав, а сизимӧд луннас шойччы.
Пасйы шойччан лун весиг гӧра-кӧдза кадӧ и вундан кадӧ.
Пасйӧй Ветымынӧд лунся гаж, кор кутанныд идравны-вундыны шобді. А во помын пасйӧй Чомӧр гаж, кор понданныд чукӧртны быдтас-вотӧснытӧ.
Куимысь вонас став айуловныд мед локтасны Господь Ыджыдыс водзӧ, Израильлӧн Ен водзӧ. Ме вӧтла тіян водзысь войтыръясӧс да паськӧда мунытӧ. Некод оз кут мырддьыны мунытӧ, кутанныд кӧ куимысь вонас локны Господь Енныд водзӧ.
Меным вись пыдди вир вайигӧн энӧ вайӧй шома нянь. Ыджыдлунся висьысь асылӧдзыс нинӧм энӧ кольӧй.
Аслад му вылысь медводдза быдтасысь медбурсӧ вай аслад Господь Енлӧн керкаӧ.
Эн пу кӧзапиӧс мамыслӧн йӧв пиын».
Господь шуис Мӧисейлы: «Гиж аслыд тайӧ кывъяссӧ. Тайӧ кывъяснас Ме кӧртала тэкӧд да Израилькӧд йитӧд».
Мӧисей вӧлі керӧс вылын Господь дорын нелямын лун да нелямын вой, нянь эз сёйлы ни ва эз юлы.
Сійӧ гижис изпӧвъяс вылӧ йитӧдлысь кывъяссӧ — дас тшӧктӧм.
Мӧисей лэччис Синай керӧс вылысь йитӧдлысь кык изпӧв киас кутӧмӧн. Сійӧ эз тӧд, мый Господькӧд сёрнитӧм бӧрын сылӧн чужӧмыс дзирдаліс.
Но Аарон да Израиль пиян аддзисны, мый Мӧисейлӧн чужӧмыс дзирдалӧ, и найӧ повзисны матыстчыны сы дінӧ.
Мӧисей корис найӧс. Аарон да войтырлӧн юралысьяс матыстчисны, и Мӧисей сёрнитіс накӧд.
Сэсся матыстчисны Израиль пиян. Мӧисей висьталіс налы ставсӧ, мый тшӧктіс Господь Синай керӧс вылын.
Сёрнитӧм бӧрын Мӧисей тупкис ассьыс чужӧмсӧ вевттьӧдӧн.
Быд пӧрйӧ, кор сійӧ ветліс Господь дінӧ сёрнитны, чужӧм вывсьыс вевттьӧдсӧ босьтліс.
Господь дінысь локтӧм бӧрас сійӧ висьтавліс Израиль пиянлы ставсӧ, мый тшӧктыліс сылы Господь.
Израиль пиян аддзывлісны, кыдзи дзирдаліс Мӧисейлӧн чужӧмыс. Та вӧсна Мӧисей вевттьыліс ассьыс чужӧмсӧ сійӧ кадӧдзыс, кор бара мунліс сёрнитны Господькӧд.
Мӧисей чукӧртіс Израиль войтырӧс да шуис налы: «Господь со мый тшӧктіс.
Квайт лун уджалӧй, а сизимӧд луныс мед лоӧ тіянлы вежа. Тайӧ луныс шойччан лун, сиӧма Господьлы. Тайӧ лунӧ коді кутас уджавны, сійӧс лоӧ виӧма.
Шойччан лунӧ оланінаныд энӧ пестӧй би. 
[Ме — Господь.]»
Мӧисей шуис Израиль войтырлы: «Господь со мый тшӧктіс.
Вайӧй Господьлы козинъяс. Быдӧн, коді кӧсйӧ сетны козин, мед ваяс Господьлы зарни, эзысь, ыргӧн, гӧрдовлӧз, пемыдгӧрд да югыдгӧрд вурун шӧртъяс, [путшкӧм] вӧсни шабді, кӧза вурун, гӧрд рӧма меж кучикъяс, лӧз рӧма кучикъяс, акация пу, би дозйӧ кисьтан олив вый, ӧвтанторъяс, мыйысь вӧчӧны мавтыштан вый да тшынӧдчанторъяс, оникс из да мукӧд дона изъяс, медым наӧн мичмӧдны ефод да морӧсводз.
Тіян пӧвстысь вӧчасьны кужысьяс мед локтасны да вӧчасны, мый тшӧктіс Господь: 
вежа чом, сылы дӧраяс да вылыс вевттьӧд, пысӧдъяс да брусъяс, йитан потшъяс, сюръяяс да подувъяс, Йитӧд куд, сійӧс новлӧдлан потшъяс, сылы вевт да ӧшӧдан дӧра, [йӧр тупкан дӧраяс да сэтчӧ сюръяяс, смарагда изъяс, фимиам да мавтыштан вый,] пызан, сылы потшъяс, став коланаторсӧ да вежа нянь, бикок да сылы коланаторсӧ, би дозъяс да сэтчӧ кисьтан вый, тшынӧдчан висьпуктанін да сійӧс новлӧдлан потшъяс, мавтыштан вый, чӧскыд дука тшынӧдчанторъяс, вежа чом пыранінӧ ӧшӧдан дӧра, сотан висьлы висьпуктанін, сылы ыргӧн радз, потшъяс да став коланаторсӧ, мыссян доз да сылы кок, йӧр тупкан дӧраяс, сюръяяс да подувъяс, йӧр пыранінӧ ӧшӧдан дӧра, вежа чом зэвтан майӧгъяс, йӧр гӧгӧр ӧшӧдан дӧралы майӧгъяс да гезъяс, вежаинын кесъялан паськӧм — Аарон поплы вежа паськӧм да сылӧн пияныслы попӧн кесъялан паськӧм».
Израиль войтыр муніс Мӧисей дінысь.
Сэсся бӧр локтісны да вайисны, мый сьӧлӧмсяньныс кӧсйисны сетны Господьлы, медым вӧчны вежа чом, лӧсьӧдны сэні кесъялӧм да вурны вежа паськӧм.
Локтісны айулов и аньяс, найӧ сьӧлӧмсяньныс вайисны исергаяс, чунькытшъяс, сикӧтшъяс да мукӧд зарни мичмӧдчантор. Быдӧн, коді кӧсйис, вайис Господьлы зарни.
А кодлӧн вӧлі гӧрдовлӧз, пемыдгӧрд да югыдгӧрд вурун, вӧсни шабді, кӧза вурун, гӧрд рӧма меж кучикъяс да лӧз рӧма кучикъяс, вайис Господьлы.
Господьлы козин пыдди вайисны тшӧтш эзысь да ыргӧн.
Кодлӧн вӧлі акация пу, вайис сійӧс вежа чом вӧчӧм могысь.
Кужысь аньяс печкисны да вайисны гӧрдовлӧз, пемыдгӧрд да югыдгӧрд вурун шӧртъяс да вӧсни шабді шӧрт.
Аньяс, кодъяслӧн вӧлі кӧсйӧм да кужанлун, печкисны кӧза вурун.
Войтырлӧн юралысьяс вайисны оникс из да мукӧд дона изъяс, медым наӧн мичмӧдны ефод да морӧсводз, а сідзжӧ ӧвтанторъяс да олив вый, медым кисьтны би дозъясӧ, вӧчны мавтыштан вый да тшынӧдчанторъяс.
Израильса айулов да аньяс сьӧлӧмсяньныс вайисны ассьыныс козинъяссӧ, медым вӧчны ставсӧ, мый Господь тшӧктіс Мӧисейлы. Быдӧн ас кӧсйӧм сертиыс вайис Господьлы козинсӧ.
Мӧисей шуис Израиль пиянлы: «Тӧдӧй, мый Господь бӧрйис Иуда чужанкотырысь Хур Урилысь Безалел писӧ. Господь тыртіс Безалелӧс Аслас Лолӧн, сетіс сылы мывкыдлун, вежӧр, тӧдӧмлун да кужӧмлун вӧчны быдпӧлӧс уджсӧ. Сійӧ кужӧ вӧчасьны зарниысь, эзысьысь да ыргӧнысь, кужӧ вундавны да доргӧгӧравны из, вундасьны пуысь да вӧчны быдсикас серпаса уджсӧ.
Господь сетіс сылы да Дан чужанкотырысь Ахисамаклӧн Оголиав пилы мукӧдӧс велӧдан сямлун.
Господь сетіс налы мывкыдлун, медым найӧ [вежаин вӧчигӧн] кужисны вундасьны, серлӧдлӧмӧн кыны дӧра, серпасъясӧн мичмӧдны гӧрдовлӧз пемыдгӧрд, югыдгӧрд да вӧсни шабді шӧртъясысь кыӧм дӧраяс — вӧчны ставсӧ, мый кужӧны вӧчны киподтуя йӧз.
Безалел, Оголиав да вӧчасьны кужысьяс пиысь мукӧдыс, кодъяслы Господь сетіс мывкыдлун да вежӧр, медым вӧчасны Господьлӧн тшӧктӧм серти ставсӧ, мый колӧ вежаинын кесъялӧмлы».
Мӧисей корис Безалелӧс, Оголиавӧс да мукӧд вӧчасьны кужысьӧс, кодъяслӧн вӧлі Господьсянь мывкыдлун да сьӧлӧмсянь уджавны кӧсйӧм.
Мӧисей сетіс налы став вайӧмторсӧ, мый Израиль пиян чукӧртісны вежаин вӧчӧм могысь.
Быд асыв йӧзыс вайисны Мӧисейлы козинъяс ас кӧсйӧм сертиныс.
Сэки киподтуя йӧз, кодъяс вӧчисны вежаинсӧ, локтісны Мӧисей дінӧ висьтавны, мый йӧзыс вайӧны коланасьыс унджык, медым Господьлӧн тшӧктӧм серти вӧчны вежаин.
Мӧисей тшӧктіс юӧртны чомъяс дорын, медым айулов и аньяс оз нин вайны козинъяссӧ.
И йӧзыс дугдісны вайны, ӧд коланасьыс унджык вӧлі чукӧртӧма.
Киподтуя йӧз вӧчисны вежа чомсӧ дас дӧраысь. Дӧраяссӧ найӧ кыисны путшкӧм шабді шӧртысь да гӧрдовлӧз, пемыдгӧрд да югыдгӧрд вурун шӧртъясысь, мичмӧдісны херувим серпасъясӧн.
Кузьтанас дӧраыс вӧлі кызь кӧкъямыс гырддза, а пасьтанас — нёль гырддза. Даснан дӧраыс вӧліны ӧтыдждаӧсь.
Вит дӧрасӧ йитісны ӧта-мӧдыскӧд, мӧд витсӧ тшӧтш йитісны ӧта-мӧдыскӧд.
Тайӧ кык ыджыд дӧрасӧ йитӧм могысь вӧчисны гӧрдовлӧз рӧма пекляяс. Кыкнан йитан дӧра помас вӧчисны ӧта-мӧдныслы воча ветымын пекля. Вӧчисны ветымын зарни пысӧд да на отсӧгӧн йитлісны дӧраяссӧ. Тадзи вежа чомйыс лоис ӧтторъя.
Сэсся кыисны кӧза вурунысь дас ӧти дӧра, медым вӧчны вежа чом вевттьӧд.
Кузьтанас дӧраыс вӧлі комын гырддза, а пасьтанас — нёль гырддза. Дас ӧтикнан дӧраыс вӧліны ӧтыдждаӧсь.
Вит дӧрасӧ йитісны ӧта-мӧдыскӧд, и квайт дӧрасӧ йитісны ӧта-мӧдыскӧд.
Кык ыджыд дӧра помъясас вӧчисны ветымын пекля, медым йитны дӧраяссӧ. Медым вежа чом вевттьӧдыс вӧлі ӧтторъя, вӧчисны ветымын ыргӧн пысӧд.
Нӧшта вӧчисны вежа чомлы кык вевттьӧд: ӧтисӧ гӧрд рӧма меж кучикысь, а сы вылӧ мӧдсӧ лӧз рӧма кучикысь.
Вежа чом сувтӧдӧм могысь вӧчисны акация пуысь брусъяс.
Брускыс кузьтанас вӧлі дас гырддза, пасьтанас — гырддза да джын.
Быд брус помӧ вӧлі лӧсалӧма кык орчча тув. Татшӧмӧн вӧчисны вежа чомлысь став бруссӧ. 
Вежа чомлысь лунвывладор стенсӧ сувтӧдӧм могысь вӧчисны кызь брус. Брусъяслы вӧчисны нелямын эзысь подув: быд бруслы кык подув, быд тувлы ӧти подув.
Вежа чомлысь войвывладор стенсӧ сувтӧдӧм могысь тшӧтш вӧчисны кызь брус да налы нелямын эзысь подув: быд бруслы кык подув.
Вежа чомлысь рытыввывладор стенсӧ сувтӧдӧм могысь вӧчисны квайт брус. Вежа чом рытыввывладор кыкнан пельӧсас вӧчисны кык брус.
Брусъяссӧ йитісны увсяньыс да вывсяньыс. Вывсяньыс йитісны кольча бердӧ. Тадзи вӧчисны кыкнан пельӧсас.
Ставнас вӧлі кӧкъямыс брус да налы дас квайт эзысь подув: быд бруслы кык подув.
Акация пуысь вӧчисны йитан потшъяс: витӧс вежа чомлӧн ӧтарбокса брусъяслы, витӧс вежа чомлӧн мӧдарбокса брусъяслы, витӧс вежа чом мышладор брусъяслы рытыввывсяньыс.
Медшӧр йитан потшкыс муніс вежа чомлӧн ӧтар помсянь мӧдар помӧдзыс да йитіс брусъяссӧ шӧрӧдыс.
Брусъяссӧ да найӧс йитан потшъяссӧ эжисны зарниӧн, потш сюян кольчаяссӧ вӧчисны зарниысь.
Ӧшӧдан дӧрасӧ кыисны гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь, сійӧс мичмӧдісны херувим серпасъясӧн.
Зарни пысӧдъяснас дӧрасӧ ӧшӧдӧм могысь акация пуысь вӧчисны нёль сюръя. Сюръяяссӧ эжисны зарниӧн да налы сывдӧмӧн вӧчисны нёль эзысь подув.
Гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь серлӧдлӧмӧн кыисны вежа чом пыранінӧ ӧшӧдан дӧра. Дӧрасӧ пысӧдъяснас ӧшӧдӧм могысь вӧчисны вит сюръя.
Сюръя йывъяссӧ да йитвежъяссӧ эжисны зарниӧн. Сюръяяслы вӧчисны вит ыргӧн подув.
Безалел вӧчис акация пуысь куд: кузьтанас кык да джын гырддза, пасьтанас гырддза да джын, судтанас гырддза да джын.
Пытшкӧссяньыс да ортсысяньыс эжис сійӧс весалӧм зарниӧн. Куд гӧгӧрыс вӧчис зарни дорыш.
Зарниысь кисьтіс нёль кольча да йитіс найӧс кудлӧн нёльнан улі пельӧсас: кыксӧ — ӧтар бокас, а мӧд кыксӧ — мӧдар бокас.
Акация пуысь вӧчис потшъяс да эжис найӧс зарниӧн.
Потшъяссӧ сюйис кудлӧн кыкнанбокса кольчаясӧ, медым на отсӧгӧн позис новлӧдлыны кудсӧ.
Весалӧм зарниысь вӧчис кудйыслы вевт: кузьтанас кык да джын гырддза, пасьтанас гырддза да джын.
Вевт помъясӧ дорис кык зарни херувимӧс. Ӧти херувимыс вӧлі вевт ӧтар помас, мӧдыс — мӧдар помас. Вевтыскӧд найӧ вӧліны ӧтторъяӧсь.
Вывлань шевкнитчӧм бордъяснас херувимъяс тупкисны куд вевтсӧ да воча сулалӧмӧн видзӧдісны вевт вылас.
Акация пуысь Безалел вӧчис пызан: кузьтанас кык гырддза, пасьтанас ӧти гырддза, судтанас гырддза да джын. Пызансӧ эжис весалӧм зарниӧн да гӧгӧрыс вӧчис зарни дорыш.
Пызанлы вӧчис ки пыдӧс судта дор, а сылысь дорышсӧ вӧчис зарниысь.
Вӧчис нёль зарни кольча да йитіс найӧс пызанлӧн нёльнан пельӧсас кокъяс бердас.
Кольчаясыс вӧліны пызан дор бердас, медым сэтчӧ позис сюйны потшъяс да новлӧдлыны пызансӧ. Потшъяссӧ вӧчис акация пуысь да эжис зарниӧн.
Весалӧм зарниысь вӧчис тасьтіяс, дозмукъяс, кӧшъяс да кисьтан вись дозъяс. Ставсӧ тайӧс пуктывлісны пызан вылас.
Весалӧм зарниысь Безалел серлӧдлӧмӧн дорис бикок.
Сылӧн заыс, вожъясыс, чашаясыс, чаша подъясыс да дзоридзьясыс вӧліны ӧтторъяӧсь.
Квайт вожсьыс куимыс кайис ӧтар боксяньыс, а мӧд куимыс — мӧдарсяньыс.
Вож вылас вӧлі куим чаша, найӧ вӧліны миндаль дзоридз сяма, подъяса да коръяса. Тадзи вӧлі квайтнан вож вылас.
Бикок за вылас вӧлі нёль чаша, найӧ вӧліны миндаль дзоридз сяма, подъяса да коръяса.
Бикоклӧн медводдза кык вож улас вӧлі чаша под, мӧд кык вож улас — чаша под, коймӧд кык вож улас — чаша под.
Чаша подъясыс да вожъясыс бикокыскӧд вӧліны ӧтторъяӧсь, сійӧс ставнас вӧлі серлӧдлӧмӧн дорӧма весалӧм зарниысь.
Вӧчис сизим би доз. Петельлы чепӧлясӧ да пӧим воръяссӧ вӧчис весалӧм зарниысь.
Бикок да сылы став коланаторсӧ вӧчис талант мында весалӧм зарниысь.
Акация пуысь Безалел вӧчис тшынӧдчан висьпуктанін. Сійӧ вӧлі нёль пельӧса, кузьтанас и пасьтанас — ӧти гырддза, а судтанас — кык гырддза.
Сюръясыс висьпуктанінкӧд вӧліны ӧтторъяӧсь.
Висьпуктанінлысь вывсӧ, бокъяссӧ да сюръяссӧ эжис весалӧм зарниӧн. Доргӧгӧрыс вӧчис зарни дорыш.
Дорыш улас кыкнанладор бокас йитіс кык зарни кольча, медым кольчаясас позис сюйны потшъяс да новлӧдлыны висьпуктанінсӧ.
Потшъяссӧ вӧчис акация пуысь да эжис зарниӧн.
Мавтас вӧчысь моз дасьтіс мавтыштан вежа вый да чӧскыд дука сӧстӧм тшынӧдчантор.
Безалел вӧчис акация пуысь сотан висьлы висьпуктанін. Сійӧ вӧлі нёль пельӧса, кузьтанас и пасьтанас — вит гырддза, судтанас — куим гырддза.
Нёльнан пельӧсас вӧчис сюръяс. Висьпуктанінкӧд найӧ вӧліны ӧтторъяӧсь. Эжис ставсӧ ыргӧнӧн.
Висьпуктанінлы вӧчис став дозмук-кӧлуйсӧ: пӧим воръяс, пӧим куралан зыръяс, вир резан тасьтіяс, яй бергӧдлан вилаяс, ӧгыр пӧртъяс.
Ставсӧ тайӧс вӧчис ыргӧнысь.
Висьпуктанін пытшкас вӧчис ыргӧн радз. Висьпуктанін доргӧгӧрас йитіс радзсӧ улісяньыс. Раддзыс вӧлі висьпуктанін джынйӧдзыс. Радз нёльнан пельӧсас вӧчис кольча, медым сэтчӧ позис сюйны потш.
Потшъяссӧ вӧчис акация пуысь, эжис найӧс ыргӧнӧн да сюйис висьпуктанінлӧн кыкнанладор кольчаясас, медым позис новлӧдлыны сійӧс.
Асьсӧ висьпуктанінсӧ вӧлі вӧчӧма пӧвйысь, сылӧн пытшкӧсыс вӧлі куш.
Безалел вӧчис ыргӧн рӧмпӧштанъясысь мыссян доз да сылысь коксӧ. Рӧмпӧштанъяссӧ сетісны вежа чом пыранінын кесъялысь аньяс.
Безалел вӧчис йӧр. Путшкӧм шабді шӧртысь сійӧ кыис сё гырддза кузьта дӧра, медым ӧшӧдны сійӧс йӧр пӧлӧн лунвывладорас.
Дӧрасӧ ӧшӧдӧм могысь вӧчисны кызь сюръя. Сюръяяслы вӧчисны кызь ыргӧн подув, эзысь пысӧдъяс да йитвежъяс.
Йӧр войвывладорас ӧшӧдӧм могысь кыисны сё гырддза кузьта дӧра, вӧчисны кызь сюръя да налы кызь ыргӧн подув.
Сюръя пысӧдъяссӧ да йитвежъяссӧ вӧчисны эзысьысь.
Йӧр рытывладорас ӧшӧдӧм могысь кыисны ветымын гырддза кузьта дӧра, вӧчисны дас сюръя да налы дас подув.
Сюръя пысӧдъяссӧ да йитвежъяссӧ вӧчисны эзысьысь.
Йӧр асывладор пасьтаыс вӧлі ветымын гырддза.
Пыранін ӧтарладорас ӧшӧдӧм могысь кыисны дас вит гырддза кузьта дӧра, вӧчисны куим сюръя да сюръяяслы куим подув.
Тадзи жӧ пыранін мӧдарладорас ӧшӧдӧм могысь кыисны дас вит гырддза кузьта дӧра, вӧчисны куим сюръя да сюръяяслы куим подув.
Ставнас йӧр тупкан дӧрасӧ кыисны путшкӧм шабді шӧртысь. Сюръя подувъясыс вӧліны ыргӧнысь, сюръя пысӧдъясыс да йитвежъясыс — эзысьысь, а сюръя йывъяссӧ вӧлі эжӧма эзысьӧн. Йӧр сюръяяссӧ йитлісны эзысь йитвежъясӧн.
Йӧр пыранінӧ ӧшӧдан дӧрасӧ вӧлі серлӧдлӧмӧн кыӧма гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь. Пасьтанас вӧлі кызь гырддза, а судтанас йӧр гӧгӧр ӧшӧдан дӧра моз — вит гырддза. Медым йӧр пыранінӧ ӧшӧдны дӧра, вӧлі вӧчӧма нёль сюръя да сюръяяслы нёль ыргӧн подув. Сюръя йывъяссӧ вӧлі эжӧма эзысьӧн. Дӧра пысӧдъяс да йитвежъяс вӧліны эзысьысь.
Вежа чом майӧгъяс да йӧр дӧраяс зэвтан майӧгъяс вӧліны ыргӧнысь.
Мӧисейлӧн тшӧктӧм серти Аарон поплӧн Итамар пи веськӧдлӧм улын левитъяс* гижисны ставсӧ, мыйысь вӧлі вӧчӧма йитӧдлысь вежа чомсӧ. Иуда чужанкотырысь Хур Урилӧн Безалел пиыс вӧчис ставсӧ, мый Господь тшӧктіс Мӧисейлы.
Безалелкӧд вӧчасис тшӧтш Оголиав. Сійӧ вӧлі Дан чужанкотырысь, Ахисамаклӧн пиыс, пуысь вӧчасьысь да кысьысь. Сійӧ кужис мичмӧдны серпасъясӧн гӧрдовлӧз, пемыдгӧрд да югыдгӧрд вурун шӧртъясысь да вӧсни шабді шӧртысь кыӧм дӧраяс.
Вежаин да сэтчӧ став коланаторсӧ вӧчӧм вылӧ зарниыс муніс кызь ӧкмыс талант да сизимсё комын сикель вежаинса сикель серти. Тайӧ зарнисӧ вӧлі вайӧма Господьлы козин пыдди.
Йӧзӧс арталігӧн чукӧртісны сё талант да сюрс сизимсё сизимдас вит сикель эзысь вежаинса сикель серти.
Кызь арӧса да ыджыдджык арлыда айуловысь, кодъясӧс вӧлі арталӧма-гижалӧма, быдӧн мынтіс сикель джын вежаинса сикель серти. Налӧн лыдыс вӧлі квайтсё куим сюрс витсё ветымын морт.
Сё талант эзысь муніс вежаинлы да ӧшӧдан дӧралы подувъяс кисьтӧм вылӧ.
Сё талант эзысьысь вӧлі вӧчӧма сё подув, ӧти подув вылӧ муніс ӧти талант.
Сюрс сизимсё сизимдас вит сикель эзысьысь вӧлі вӧчӧма сюръяяслы пысӧдъяс да йитвежъяс, эжӧма сюръя йывъяссӧ.
Господьлы козин пыдди вайӧм ыргӧнлӧн сьӧктаыс вӧлі сизимдас талант да кык сюрс нёльсё сикель.
Сыысь вӧчисны вежа чом пыранінӧ сюръяяслы подувъяс, ыргӧн висьпуктанін, сылы ыргӧн радз да дозмук-кӧлуй, йӧр сюръяяслы подувъяс, йӧр пыранін сюръяяслы подувъяс, вежа чомлы да йӧр гӧгӧр ӧшӧдан дӧралы майӧгъяс.
Вежаинын кесъялан паськӧмсӧ вӧчисны гӧрдовлӧз, пемыдгӧрд да югыдгӧрд вурун шӧртъясысь.
Ааронлы вежа паськӧмсӧ лӧсьӧдісны, кыдзи Господь тшӧктіс Мӧисейлы.
Зарниысь, гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь кыисны ефод.
Зарнисӧ медводз плавкӧстісны, а сэсся вундалісны сунис моз, медым серлӧдлӧмӧн кыны сійӧс гӧрдовлӧз, пемыдгӧрд да югыдгӧрд вурун шӧртъяс да вӧсни шабді шӧртъяс костӧ.
Ефодӧ кыкнан пельпомас вӧчисны кӧрталана кык ластавич.
Ачыс ефодыс да сы дінӧ вӧньыс кыанногнас вӧліны ӧткодьӧсь. Вӧньсӧ кыисны ефодӧс моз сійӧ жӧ зарни сунисысь, гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь, кыдзи Господь тшӧктіс Мӧисейлы.
Дасьтісны оникс изъяс да доргӧгӧралісны найӧс зарниӧн. Из вундалысь моз гижисны Израиль пиянлысь нимъяссӧ изъяс вылас.
Изъяссӧ йитісны ефодлӧн ластавичьяс вылӧ, медым лоины Израиль пиянлы казьтыланпасӧн, кыдзи Господь тшӧктіс Мӧисейлы.
Зарниысь, гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь ефодӧс моз серлӧдлӧмӧн кыисны морӧсводз.
Сійӧ вӧлі кыкпӧвсталӧм дӧраысь, нёль пельӧса, весьт кузьта да весьт пасьта.
Сы вылӧ нёль визьӧн йитлісны дона изъяс.
Медводдза визяс вӧліны рубин, топаз да изумруд, мӧд визяс — карбункул, сапфир да алмаз, коймӧд визяс — яхонт, агат да аметист, нёльӧд визяс — хризолит, оникс да яшма изъяс.
Став изсӧ вӧлі доргӧгӧралӧма зарниӧн.
Израиль пиянлӧн дас кык ним серти изйыс вӧлі дас кык. Быд из вылӧ вӧлі вундалӧмӧн гижӧма ӧти чужанкотырлысь нимсӧ.
Весалӧм зарниысь кӧв моз гартлӧмӧн вӧчисны морӧсводзлы чепъяс.
Нӧшта вӧчисны кык зарни дорыш да кык зарни кольча. Кольчаяссӧ пысалісны морӧсводзлӧн вылыс пельӧсъясас. 
Быд кольчаӧ сюйисны зарниысь вӧчӧм чепсӧ, а чеп помъяссӧ йитісны водзладорсянь ефод ластавичьяс вылӧ пуктӧм кыкнан зарни дорышӧ.
Нӧшта вӧчисны кык зарни кольча да йитісны найӧс морӧсводз улі пельӧсъясас гугладорсяньыс, кӧні морӧсводз инмӧ ефодӧ.
Сідзжӧ вӧчисны кык зарни кольча да йитісны найӧс водзладорсянь ефодлӧн кыкнан ластавич бердас, улісяньыс вурыс дінас, вӧнь весьттіыс.
Морӧсводз кольчаяссӧ йитісны ефод кольчаяскӧд гӧрдовлӧз вурун шӧртӧн, медым морӧсводзыс вӧлі вӧньсьыс вылынджык да вӧлі бура йитӧма ефод бердӧ. Тадзи Господь тшӧктіс Мӧисейлы.
Гӧрдовлӧз вурунысь кыисны риза, медым новлыны сійӧс ефодкӧд. Ризасӧ пасьталісны юр вывсянь. Сылысь сьылігӧгӧрсӧ вӧлі вурӧма тышкайӧз паськӧм моз, медым эз резьды.
Риза бӧждорӧ вӧчисны гӧрдовлӧз, пемыдгӧрд да югыдгӧрд вурунысь гранат кодь сяръяс.
Весалӧм зарниысь вӧчисны тіньганъяс да ӧшлісны найӧс бӧждор гӧгӧрыс гранат кодь сяръяс костӧ.
Ризалӧн бӧждор гӧгӧрыс сьӧрсьӧн-бӧрсьӧн ӧшалісны тіньган, сэсся сяр и бара тіньган. Тайӧ ризасӧ колӧ вӧлі пасьтавны кесъялігӧн, кыдзи Господь тшӧктіс Мӧисейлы.
Ааронлы да сылӧн пиянлы кыисны вӧсни шабді шӧртысь дӧрӧмъяс, юркӧртӧд да юрвевттьӧдъяс, а путшкӧм шабді шӧртысь кыисны улыс гачьяс. Путшкӧм шабді шӧртысь да гӧрдовлӧз, пемыдгӧрд да югыдгӧрд вурун шӧртъясысь серлӧдлӧмӧн кыисны вӧнь, кыдзи Господь тшӧктіс Мӧисейлы.
Весалӧм зарниысь вӧчисны пӧвтор — вежа мичмӧдчантор. Вундалӧмӧн гижисны сэтчӧ “вежӧдӧма-торйӧдӧма Господьлы”.
Сэсся кӧрталісны сійӧс гӧрдовлӧз кӧвйӧн юркӧртӧдас, кыдзи Господь тшӧктіс Мӧисейлы.
Тадзи вӧлі помалӧма вежа чом вӧчан уджъяс.
Израиль пиян вӧчисны ставсӧ, кыдзи Господь тшӧктіс Мӧисейлы.
Найӧ вайисны Мӧисейлы вежа чом и сэтчӧ став коланаторсӧ: дӧраяс, пысӧдъяс, брусъяс, йитан потшъяс, сюръяяс да подувъяс, гӧрд рӧма меж кучикысь вевттьӧд, лӧз рӧма кучикысь вевттьӧд, ӧшӧдан дӧра, Йитӧд куд, сылысь потшъяссӧ да вевтсӧ, пызан, сылы став коланаторсӧ да вежа нянь, весалӧм зарниысь вӧчӧм бикок, сы вылӧ пуктана би дозъяс став коланаторнас да сэтчӧ кисьтан вый, зарни висьпуктанін, мавтыштан вый, чӧскыд дука тшынӧдчанторъяс, вежа чом пыранінӧ ӧшӧдан дӧра, ыргӧн висьпуктанін, сылы ыргӧн радз, потшъяс да став коланаторсӧ, мыссян доз да сылы кок, йӧр тупкан дӧраяс, сюръяяс да подувъяс, йӧр пыранінӧ ӧшӧдан дӧра, гезъяс, майӧгъяс да став дозмук-кӧлуйсӧ, мый колӧ вежа чомйын кесъялӧм могысь, тшӧтш вежаинын кесъялан паськӧм — Аарон поплы вежа паськӧм да сылӧн пияныслы попӧн кесъялан паськӧм.
Израиль пиян ставсӧ вӧчисны сідзи, кыдзи Господь тшӧктіс Мӧисейлы.
Мӧисей аддзис, мый став уджсӧ найӧ вӧчӧмаӧсь Господьлӧн тшӧктӧм серти.
И Мӧисей бурсиис найӧс.
Господь шуис Мӧисейлы:
«Медводдза тӧлысьлӧн медводдза лунӧ сувтӧд вежа чом. Пырт Йитӧд кудсӧ вежа чомйӧ да ӧшӧд куд водзӧ дӧра.
Пырт сэтчӧ пызан да пуктав сы вылӧ став коланаторсӧ. Пырт бикок да пуктав сы вылӧ би дозъяссӧ.
Йитӧд куд водзӧ пукты зарниысь вӧчӧм тшынӧдчан висьпуктанін. Вежа чом пыранінӧ ӧшӧд дӧра.
Вежа чом пыранін водзӧ сувтӧд сотан висьлы висьпуктанін.
Вежа чом да висьпуктанін костӧ сувтӧд мыссян доз, кисьт сэтчӧ ва.
Йӧрсӧ тупкы дӧраясӧн, йӧр пыранінӧ тшӧтш ӧшӧд дӧра.
Босьт мавтыштан вый да мавтышт вежа чомсӧ да ставсӧ, мый сэні эм. Тадзи тэ вежӧдан вежа чомсӧ да став дозмук-кӧлуйсӧ, и ставыс лоӧ вежа.
Мавтышт сотан висьлы висьпуктанінсӧ да став дозмук-кӧлуйсӧ. Тадзи тэ вежӧдан висьпуктанінсӧ, и сійӧ лоӧ вежасьыс-вежа.
Мавтышт мыссян доз да сылысь коксӧ. Тадзи тэ вежӧдан найӧс.
Вайӧд Ааронӧс да сылысь пиянсӧ вежа чом пыранінӧ да мыссьӧд найӧс ваӧн. Пасьтӧд Ааронӧс вежа паськӧмӧн да мавтышт сійӧс. Тадзи тэ вежӧдан сійӧс, медым попӧн кесъялас Меным.
Дӧрӧмӧд Ааронлысь пиянсӧ. Сэсся батьнысӧ моз мавтышт найӧс, медым найӧ попъясӧн кесъяласны Меным. Тайӧ мавтыштӧмыс петкӧдлӧ, мый найӧс индӧма кесъявны попъясӧн нэмъяс кежлӧ чужысьяссянь чужысьясӧдз».
Мӧисей ставсӧ вӧчис Господьлӧн тшӧктӧм серти.
Мӧд вонас [Египетысь петӧм бӧрын], тӧлысьлӧн медводдза лунӧ лои сувтӧдӧма вежа чом.
Мӧисей сувтӧдіс вежа чомсӧ тадзи: пукталіс подувъяс, на вылӧ сувтӧдаліс брусъяс, йитліс найӧс потшъяс отсӧгӧн, сэсся сувтӧдаліс сюръяяс. Мӧисей вевттис вежа чомсӧ, а выліас нӧшта вевттьӧд шлапнитіс, кыдзи Господь тшӧктіс сылы.
Мӧисей пуктіс кудйӧ Индӧд изпӧвъяс. Кудлӧн кольчаясӧ сюйис потшъяс да куд вылӧ пуктіс вевтсӧ.
Сэсся пыртіс Йитӧд кудсӧ вежа чомйӧ да куд водзӧ ӧшӧдіс дӧра, медым сайӧдны сійӧс. Тадзи Господь тшӧктіс Мӧисейлы.
Вежа чомйӧ войвывладорас, ӧшӧдӧм дӧра водзӧ, Мӧисей пуктіс пызан, а Господь водзӧ пызан вылӧ — вежа нянь, кыдзи Господь тшӧктіс сылы.
Вежа чомйӧ лунвывладорас, пызаныслы воча, сувтӧдіс бикок. Сылысь би дозъяссӧ Мӧисей пуктіс Господь водзӧ, кыдзи Господь тшӧктіс сылы.
Вежа чомйӧ ӧшӧдӧм дӧра водзӧ Мӧисей сувтӧдіс зарни висьпуктанін, сэсся тшынӧдіс сэні чӧскыд ӧвтантор, кыдзи Господь тшӧктіс сылы.
Вежа чом пыранінӧ Мӧисей ӧшӧдіс дӧра, а пыранін водзӧ сувтӧдіс сотан висьлы висьпуктанін да вайис сэні сотан висьяс да нянь висьяс, кыдзи Господь тшӧктіс сылы.
Вежа чом да висьпуктанін костӧ Мӧисей сувтӧдіс мыссян доз, сэтчӧ кисьтіс ва, мед мыссьыны. Мӧисей, Аарон да сылӧн пияныс мыськавлісны сэні ки-кокнысӧ.
Вежа чомйӧ пыригӧн либӧ [кесъявны] висьпуктанін дорӧ матыстчигӧн найӧ мыссисны, кыдзи Господь тшӧктіс Мӧисейлы.
Вежа чом да висьпуктанін гӧгӧр Мӧисей вӧчис йӧр, а йӧр пыранінӧ ӧшӧдіс дӧра.
Тадзи помаліс уджсӧ.
Сэки вежа чомсӧ вевттис кымӧр. Господьлӧн дзирдлуныс тыртіс вежа чомсӧ.
Мӧисей эз вермы пырны вежа чомйӧ, ӧд вежа чомсӧ вӧлі вевттьӧма кымӧр. Господьлӧн дзирдлуныс тыртіс вежа чомсӧ.
Кор кымӧрыс кыпӧдчыліс вежа чом весьтысь, Израиль пиян петлісны туйӧ. Тадзи пыр вӧлі налӧн ветлігчӧжныс.
Кымӧрыс кӧ эз кыпӧдчыв, сэки найӧ эз мӧдӧдчывлыны, а виччысисны кымӧрлысь кыпӧдчӧмсӧ. Став Израиль войтыр аддзыліс, мый луннас Господьлӧн кымӧрыс сулаліс вежа чом весьтын, а войнас кымӧр пытшкас ӧзйис би. Тадзи пыр вӧлі налӧн ветлігчӧжныс.
{Еврей йӧз (комиӧдіс Kodko) @ Левит @ религ. гижӧд @ Библия @ 2021 @ Лб. .}
Мӧисейлӧн коймӧд небӧг
ЛЕВИТ
Господь шыасис Мӧисей дінӧ вежа чомсянь да тшӧктіс висьтавны Израиль пиянлы: «Коді кутас вайны Господьлы вись, мед ваяс ӧшкӧс, ыжӧс либӧ кӧзаӧс.
Сотан висьнас кӧ лоӧ гырысь пемӧс, вись вайысь мед вайӧдас дзоньвидза ӧшкӧс вежа чом пыранін дорӧ. Тадзи вись вайысь лоӧ шогмана Господьлы.
Вись вайысь мед пуктылас кисӧ ӧшлы юр вылас, сэки Господь сибӧдас сылысь висьсӧ, и сылысь мыжсӧ лоӧ вештӧма.
Сійӧ мед начкас ӧшсӧ Господь водзын.
А попъяс, Ааронсянь чужысьяс, мед ваясны ӧшлысь вирсӧ да резасны вежа чом пыранін дорысь висьпуктанінсӧ быд боксянь.
Вись вайысь мед куляс ӧшлысь кучиксӧ да кералас-юклас тушасӧ.
Попъяс, Ааронсянь чужысьяс, мед пестасны висьпуктанін вылӧ би да пукталасны сэтчӧ пес, сэсся сотчысь пес вылас мед пукталасны ӧшлысь яйсӧ, юрсӧ да госсӧ.
Ӧшлысь ты-муссӧ да кокъяссӧ колӧ мыськавны ваӧн, а сэсся поп мед сотас ставсӧ висьпуктанін вылын. Тайӧ лоӧ сотан вись, Господьлы чӧскыд ӧвтантор.
Сотан висьнас кӧ лоӧ ыж либӧ кӧза, вись вайысь мед ваяс дзоньвидза ай пемӧсӧс да [сылы юр вылас кисӧ пуктылӧм бӧрын] мед начкас сійӧс Господь водзын висьпуктанін войвывладорын. Попъяс, Ааронсянь чужысьяс, мед вирнас резасны висьпуктанінсӧ быд боксянь.
Тушасӧ колӧ керавны-юклыны, юрсӧ да госсӧ торйӧдны, сэсся поп мед пуктас ставсӧ висьпуктанінӧ сотчысь пес вылӧ. Ты-муссӧ да кокъяссӧ колӧ мыськавны ваӧн, а сэсся поп мед сотас ставсӧ висьпуктанін вылын. Тайӧ лоӧ сотан вись, Господьлы чӧскыд ӧвтантор.
Господьлы сотан висьнас кӧ лоӧ лэбач, вись вайысь мед ваяс гулюӧс либӧ гулюпиӧс.
Поп мед ваяс гулюӧс висьпуктанін дорӧ да песовтас сылысь юрсӧ, а вирсӧ мед пычкас висьпуктанін бердӧ. Сэсся гулюсӧ сотас висьпуктанін вылын.
Гулюлысь перйӧм чульсӧ* да куштӧм гӧнсӧ мед шыбитас висьпуктанін асывладорӧ, кытчӧ чукӧртӧны пӧим.
Гулюӧс бордъясӧдыс кутӧмӧн мед вожӧдас, но оз торйӧд кык пельӧ, сэсся мед пуктас сійӧс висьпуктанінӧ сотчысь пес вылӧ. Тайӧ лоӧ сотан вись, Господьлы чӧскыд ӧвтантор».
«Коді кутас вайны Господьлы нянь вись, мед ваяс шобді пызь. Пызяс мед кисьтас олив вый да пызь вылас пуктас ладан.* Сэсся пызьсӧ мед ваяс попъяслы, Ааронсянь чужысьяслы. Олив выйӧн гудралӧм пызьсьыс поп мед босьтас китыр пызь став ладаннас да сотас сійӧс висьпуктанін вылын.
Тайӧ лоӧ казьтылан вись, Господьлы чӧскыд ӧвтантор.
А нянь висьлӧн колясыс мед лоӧ Ааронлы да сысянь чужысьяслы. Господьлы вайӧм висьлӧн тайӧ юкӧныс — вежасьыс-вежатор.
Нянь вись пыдди кӧ ваянныд пачын пӧжалӧм нянь, вайӧй шобді пызьысь выйӧн гудралӧм шомтӧм нянь либӧ выйӧн мавтӧм шомтӧм сӧчӧн.
Кӧрт лист вылын пӧжалан нянь висьсӧ дасьтӧй выйӧн гудралӧм шобді пызьысь шоммӧдтӧг.
Няньсӧ чегъялӧй торпыригӧдз да киськалӧй олив выйӧн. Тайӧ лоӧ [Господьлы] нянь вись.
Нянь вись пыдди кӧ ваянныд рачын пӧжалӧм нянь, дасьтӧй сійӧс шобді пызьысь олив вый сорӧн. Тадзи дасьтӧм нянь висьнытӧ вайӧй Господьлы.
Сетӧй сійӧс поплы, а поп мед ваяс висьпуктанін дорӧ.
Сэсся поп мед босьтас тайӧ нянь висьсьыс юкӧн да сотас сійӧс висьпуктанін вылын. Тайӧ лоӧ казьтылан вись, Господьлы чӧскыд ӧвтантор.
А нянь висьлӧн колясыс мед лоӧ Ааронлы да сысянь чужысьяслы. Господьлы вайӧм висьлӧн тайӧ юкӧныс — вежасьыс-вежатор.
Господьлы ваян нянь висьнытӧ пӧжалӧй шоммӧдтӧг. Господьлы вись пыдди оз позь сотны няньшом да ма.
Господьлы найӧс верманныд вайны медводдза быдтаснытӧ моз, но висьпуктанін вылын чӧскыда ӧвтан вись пыдди сотнысӧ оз позь.
Став нянь висьнытӧ солалӧй, солавтӧм вись энӧ вайӧй, ӧд солыс петкӧдлӧ тіян Енлысь йитӧдсӧ, мый сійӧ кӧрталіс тіянкӧд. Та вӧсна [Господьлы, асланыд Енлы] став вайӧмторнытӧ солалӧй.
Кӧсъян кӧ аслад медводдза идралӧм няньысь вайны Господьлы нянь висьтӧ, вай би вылын косьтӧм бӧрын нырӧм тусь. Тусь вылас кисьт олив вый да пуктав сы вылӧ ладан. Тайӧ лоӧ нянь вись.
Поп мед босьтас мыйтакӧ нырӧм тусь да олив вый, тшӧтш став ладансӧ, да сотас казьтылан вись пыдди Господьлы».
«Бурасян вись пыдди кӧ кодкӧ вайӧ ӧшкӧс либӧ мӧскӧс, мед вайӧдас дзоньвидзаӧс да сувтӧдас сійӧс Господь водзӧ. Мед пуктылас кисӧ пемӧслы юр вылас, а сэсся мед начкас сійӧс вежа чом пыранін дорын.
Та бӧрын попъяс, Ааронсянь чужысьяс, мед вирнас резасны висьпуктанінсӧ быд боксянь.
Вись вайысь мед ваяс Господьлы ӧшлысь либӧ мӧслысь пытшкӧс госсӧ, кыкнан вӧрксӧ госнас да мус вывсьыс госа юкӧнсӧ.
Ставсӧ тайӧс мед лоӧ перъялӧма вӧркъяснас.
Ааронсянь чужысьяс мед сотасны тайӧс висьпуктанінын сотчысь пес вылын сотан виськӧд ӧтлаын. Тайӧ лоӧ Господьлы чӧскыда ӧвтан вись.
Господьлы бурасян вись пыдди кӧ кодкӧ вайӧ ыж либӧ кӧза, айӧс либӧ эньӧс, мед ваяс дзоньвидзаӧс.
Вайӧ кӧ ыжӧс, мед сувтӧдас сійӧс Господь водзӧ. Мед пуктылас кисӧ ыжлы юр вылас, а сэсся мед начкас сійӧс вежа чом пыранін дорын. Та бӧрын Ааронсянь чужысьяс мед вирнас резасны висьпуктанінсӧ быд боксянь.
Вись вайысь мед ваяс Господьлы ыжлысь став госсӧ: сюрсалы бердсьыс бӧждор госсӧ, ты-мус вывсьыс пытшкӧс госсӧ, кыкнан вӧрксӧ госнас да мус вывсьыс госа юкӧнсӧ.
Ставсӧ тайӧс мед лоӧ перъялӧма вӧркъяснас.
Поп мед сотас тайӧс висьпуктанін вылын.
Тайӧ лоӧ Господьлы сотан вись.
Вись пыдди кӧ вайӧ кӧзаӧс, мед сувтӧдас сійӧс Господь водзӧ. Мед пуктылас кисӧ кӧзалы юр вылас, а сэсся мед начкас сійӧс вежа чом пыранін дорын. Та бӧрын Ааронсянь чужысьяс мед вирнас резасны висьпуктанінсӧ быд боксянь.
Вись вайысь мед ваяс Господьлы кӧзалысь ты-мус вывсьыс пытшкӧс госсӧ, кыкнан вӧрксӧ госнас да мус вывсьыс госа юкӧнсӧ.
Ставсӧ тайӧс мед лоӧ перъялӧма вӧркъяснас. Поп мед сотас тайӧс висьпуктанін вылын. Тайӧ лоӧ чӧскыда ӧвтысь сотан вись.
Став госсӧ колӧ сотны Господьлы.
Тайӧ тшӧктӧмыс лоӧ тіянлы нэмъяс кежлӧ чужысьяссянь чужысьясӧдз.
Быдлаын кутчысьӧй тайӧ тшӧктӧмас: гос да вир энӧ сёйӧй».
Господь тшӧктіс Мӧисейлы висьтавны Израиль пиянлы: 
«Коді тӧдлытӧг мыж вӧчӧмнас торкас Господьлысь тшӧктӧмсӧ и вӧчас сійӧ, мый вӧчнысӧ оз позь, мед ваяс вись.
Мавтыштӧм поп кӧ мыж вӧчас, и сылӧн мыж вӧчӧмысь лоӧ мыжа став войтырыс, сэки сійӧ ас вӧснаыс мед ваяс Господьлы мыжысь вись пыдди дзоньвидза ӧшкӧс. Ӧшсӧ мед сувтӧдас Господь водзӧ вежа чом пыранін дорӧ. Мед пуктылас кисӧ ӧшлы юр вылас, а сэсся мед начкас сійӧс Господь водзын.
Мавтыштӧм [да вежӧдӧм] поп мед босьтас ӧшлысь вирсӧ да пыртас вежа чомйӧ. Сэсся вирнас мед кӧтӧдас ассьыс чуньсӧ да сизимысь резыштас Господь водзын Вежаинын, Вежасьыс-вежаинлӧн дӧра водзын.
Поп мед мавтас тайӧ вирнас Господь водзын вежа чомйын сулалысь тшынӧдчан висьпуктанінлысь сюръяссӧ, а коляс вирсӧ мед кисьтас вежа чом пыранін дорын сулалысь висьпуктанін улӧ.
Поп мед перъялас мыжысь вись пыдди вайӧм ӧшлысь став госсӧ: ты-мус вывсьыс пытшкӧс госсӧ, кыкнан вӧрксӧ госнас да мус вывсьыс госа юкӧнсӧ. Ставсӧ тайӧс мед лоӧ перъялӧма вӧркъяснас.
Мед ставсӧ перъялас сідзи, кыдзи перъялӧны ӧшлысь госсӧ бурасян вись пыдди вайигӧн.
Сэсся поп мед сотас ставсӧ висьпуктанін вылын.
Ӧшлысь кучиксӧ, яйсӧ, юрсӧ, кокъяссӧ, ты-муссӧ да сювсӧ мед петкӧдас чомъяс сайӧ сӧстӧминӧ, кытчӧ петкӧдӧны пӧим. Сэні пӧим кояланінас пес вылӧ пукталӧмӧн ставсӧ мед сотас.
Израиль войтыр кӧ тӧдлытӧг мыж вӧчӧмнас торкас Господьлысь тшӧктӧмсӧ и вӧчас сійӧ, мый вӧчнысӧ оз позь, лоӧ мыжа. Мыж вӧчӧм йылысь тӧдмалӧм бӧрын войтырлы колӧ вайны мыжысь вись пыдди ӧшкӧс. Ӧшсӧ мед вайӧдасны вежа чом водзӧ.
Сэсся войтырлӧн юрнуӧдысьяс мед пуктыласны кинысӧ ӧшлы юр вылас да начкасны ӧшсӧ Господь водзын.
Мавтыштӧм поп мед пыртас ӧшлысь вирсӧ вежа чомйӧ, сэсся вирнас мед кӧтӧдас ассьыс чуньсӧ да сизимысь резыштас Господь водзын, Вежасьыс-вежаинлӧн дӧра водзын. Мед мавтас тайӧ вирнас Господь водзын вежа чомйын сулалысь [тшынӧдчан] висьпуктанінлысь сюръяссӧ, а коляс вирсӧ мед кисьтас вежа чом пыранін дорын сулалысь висьпуктанін улӧ.
Ӧшлысь став госсӧ мед перъялас да сотас висьпуктанін вылын.
Ставсӧ мед вӧчас сідзи, кыдзи вӧчӧны ӧшкӧс мыжысь вись пыдди вайигӧн.
Тадзи поп вештас войтырлысь мыжсӧ, и найӧс лоӧ прӧститӧма.
Начкӧм ӧшсӧ мед петкӧдас чомъяс сайӧ да сотас, кыдзи таӧдз вӧлі тшӧктӧма сотны ӧшсӧ.
Тайӧ лоӧ мыжысь вись, сійӧс колӧ вайны войтырлӧн мыж вӧсна.
Юралысь кӧ тӧдлытӧг мыж вӧчӧмнас торкас аслас Господь Енлысь тшӧктӧмсӧ и вӧчас сійӧ, мый вӧчнысӧ оз позь, лоӧ мыжа. Мыж вӧчӧм йылысь тӧдмалӧм бӧрын сылы колӧ вайны вись пыдди дзоньвидза ай кӧзаӧс. Мед пуктылас кисӧ кӧзалы юр вылас, а сэсся мед начкас сійӧс сэні, кӧні Господь водзын начкӧны сотан вись. Тайӧ лоӧ мыжысь вись.
Поп мед кӧтӧдас чуньсӧ вись вирнас да мавтас висьпуктанінлысь сюръяссӧ, а коляс вирсӧ мед кисьтас висьпуктанін улӧ.
Став госсӧ мед сотас висьпуктанін вылын, кыдзи сотӧны бурасян висьлысь госсӧ. Тадзи поп вештас юралысьлысь мыжсӧ, и сійӧс лоӧ прӧститӧма.
Войтыр пӧвстысь кӧ кодкӧ тӧдлытӧг мыж вӧчӧмнас торкас Господьлысь тшӧктӧмсӧ и вӧчас сійӧ, мый вӧчнысӧ оз позь, лоӧ мыжа. Мыж вӧчӧм йылысь тӧдмалӧм бӧрын сылы колӧ вайны вись пыдди дзоньвидза энь кӧзаӧс. Мед пуктылас кисӧ кӧзалы юр вылас, а сэсся мед начкас сійӧс мыжысь вись пыдди сэні, кӧні начкӧны сотан вись.
Поп мед кӧтӧдас чуньсӧ вись вирнас да мавтас висьпуктанінлысь сюръяссӧ, а коляс вирсӧ мед кисьтас висьпуктанін улӧ.
Мед перъялас кӧзалысь став госсӧ бурасян висьлысь госсӧ моз да сотас висьпуктанін вылын. Тайӧ лоӧ Господьлы чӧскыда ӧвтан вись.
Тадзи поп вештас вись вайысьлысь мыжсӧ, и сійӧс лоӧ прӧститӧма.
А коді кӧсъяс вайны мыжысь вись пыдди баляӧс, мед ваяс дзоньвидза энь баляӧс. Мед пуктылас кисӧ балялы юр вылас, а сэсся мед начкас сійӧс мыжысь вись пыдди сэні, кӧні начкӧны сотан вись.
Поп мед кӧтӧдас чуньсӧ вись вирнас да мавтас висьпуктанінлысь сюръяссӧ, а коляс вирсӧ мед кисьтас висьпуктанін улӧ.
Мед перъялас балялысь став госсӧ бурасян вись пыдди вайӧм ыжлысь госсӧ моз да сотас висьпуктанін вылын Господьлы сотан виськӧд.
Тадзи поп вештас вись вайысьлысь мыжсӧ, и сійӧс лоӧ прӧститӧма.
Мортыс кӧ тӧдӧ кодӧскӧ ёрӧм йылысь, но ёрд водзын оз висьтав та йылысь, сійӧ лоӧ мыжа.
Мортыс кӧ тӧдлытӧг инмӧдчылӧ мыйкӧ пеж дінӧ, пеж пемӧслӧн шой дінӧ, пеж ыж-мӧслӧн шой дінӧ либӧ пеж гаглӧн шой дінӧ, сійӧ лоӧ пеж да мыжа.
Коді тӧдлытӧг инмӧдчылӧ мортлӧн пежыс* дінӧ, мый вӧсна лоӧ пежӧн, и та йылысь тӧдмалӧ бӧрынджык, сійӧ лоӧ мыжа.
Коді мӧвпышттӧг кыв сетӧмӧн кӧсйысьӧ вӧчны лёктор либӧ буртор, и оз гӧгӧрво, мый кӧсйысьӧ, но гӧгӧрвоӧ бӧрынджык, сійӧ лоӧ мыжа.
Коді лои мыжа татшӧмторсӧ вӧчӧмысь, сійӧ мед висьтасяс мыж вӧчӧмсьыс. Аслас мыжысь мед ваяс Господьлы мыж вештан вись пыдди ыжӧс либӧ энь кӧзаӧс. Поп мед вештас сылысь мыжсӧ.
Коді гӧльлун вӧсна оз вермы вайны ыжӧс, мед ваяс Господьлы мыж вештӧм могысь кык гулюӧс либӧ кык гулюпиӧс, ӧтисӧ мыжысь вись пыдди, мӧдсӧ сотан вись пыдди.
Найӧс мед ваяс поплы. Поп медводз мед песовтас мыжысь вись пыдди ваян гулюлысь голясӧ, но юрсӧ мед оз орӧд.
Мыжысь висьлӧн вирнас поп мед резас висьпуктанінлысь боксӧ, а коляс вирсӧ мед пычкас висьпуктанін улӧ. Тайӧ лоӧ мыжысь вись.
Мӧд лэбачсӧ мед ваяс сотан вись пыдди, кыдзи тшӧктӧма.
Тадзи поп вештас вись вайысьлысь мыжсӧ, и сійӧс лоӧ прӧститӧма.
Коді гӧльлун вӧсна оз вермы вайны кык гулюӧс либӧ кык гулюпиӧс, аслас мыжысь вись пыдди мед ваяс шобді пызь — ефалысь дасӧд юкӧнсӧ.
Пызяс мед оз кисьт олив вый, пызь вылӧ мед оз пукты ладан, ӧд тайӧ мыжысь вись.
Пызьсӧ мед ваяс поплы, а поп мед босьтас китыр пызь да сотас сійӧс висьпуктанін вылын Господьлы казьтылан вись пыдди. Вайӧм шобді пызьыс лоӧ мыжысь вись.
Тадзи поп вештас вись вайысьлысь мыжсӧ, и сійӧс лоӧ прӧститӧма.
Коляс висьыс нянь вись моз вичмӧ поплы».
Господь шуис Мӧисейлы:
«Коді тӧдлытӧг Господьлӧн вежаторлы паныд мыж вӧчас, сійӧ лоӧ мыжа. Та вӧсна мед ваяс Господьлы мыж вештан вись пыдди аслас ыж чукӧрысь дзоньвидза межӧс.
Мыж вештан висьлысь донсӧ тэныд колӧ индыны эзысьӧн вежаинса сикель серти. Господьлӧн вежаторлы паныд мыж вӧчӧмысь морт мед мынтас поплы индӧм донсӧ сы дінӧ витӧд пай содтӧмӧн. Поп мед ваяс межӧс мыж вештан вись пыдди, тадзи вештас мыжа мортлысь мыжсӧ, и сійӧс лоӧ прӧститӧма.
Коді тӧдлытӧг мыж вӧчӧмнас торкас Господьлысь тшӧктӧмсӧ и вӧчас сійӧ, мый вӧчнысӧ оз позь, лоӧ мыжа, сылы колӧ кывкутны аслас мыж вӧсна. Мыж вештан вись пыдди мед вайӧдас поп дінӧ дзоньвидза межӧс. Висьлысь донсӧ тэныд колӧ индыны. Поп мед вештас тӧдлытӧг мыж вӧчысьлысь мыжсӧ, и сійӧс лоӧ прӧститӧма.
Тайӧ мыж вештан вись, кор мортыс мыжмӧ Господь водзын».
Господь шуис Мӧисейлы:
«Мортыс мыж вӧчӧ Господьлы паныд, сійӧ кӧ соссяс, мый матыссаыс сылы мыйкӧ сетліс видзӧм могысь, сійӧ кӧ мыйкӧ гусялас либӧ мырддяс матыссаыслысь, а сідзжӧ, сійӧ кӧ соссяс, мый аддзис матыссаыслысь воштӧмторсӧ, либӧ сійӧ кӧ мыж вӧчас, но ылӧдлӧмӧн кыв сетас, мый тадзи эз вӧч. Татшӧм мыжсӧ вӧчысь лоӧ мыжа. Сылы колӧ бӧр сетны, мый гусяліс, мырддис либӧ босьтліс ас ордас видзны. Колӧ бӧр сетны, кодлыськӧ воштӧмторсӧ кӧ аддзис. Колӧ бӧр сетны сійӧ, мый йылысь ылӧдлӧмӧн кыв сетліс.
Мыж вештан вись ваян лунӧ сылы колӧ вештысьны мортлы, кодлӧн вӧлі эмбурыс. Доныс дінӧ колӧ содтыны витӧд пай.
Господьлы мыж вештан вись пыдди мед вайӧдас поп дінӧ аслас ыж чукӧрысь дзоньвидза межӧс. Висьлысь донсӧ тэныд колӧ индыны.
Господь водзын поп вештас мыжа мортлысь мыжсӧ, и ставсӧ, мыйын сійӧ вӧлі мыжа, лоӧ прӧститӧма».
Господь шуис Мӧисейлы:
«Висьтав Ааронлы да сылӧн пияныслы сотан вись йылысь тайӧ индӧдсӧ. Сотан висьыс мед войбыд сотчас висьпуктанін вылын асылӧдзыс, висьпуктанінса биыс мед куслытӧг ӧзъялас.
Асывнас поп мед пасьталас шабді дӧра паськӧм да улыс шабді гач, сэсся чукӧртас сотан вись вайӧм бӧрын висьысь кольӧм пӧимсӧ да койыштас сійӧс висьпуктанін бокӧ.
Та бӧрын мед вежас паськӧмсӧ да петкӧдас пӧимсӧ чомъяс сайӧ сӧстӧминӧ.
Висьпуктанін вылын биыс мед ӧзъялас куслытӧг.
Быд асыв поплы колӧ содтавны сэтчӧ пессӧ, пуктавны сотчысь пес вылӧ сотан вись да сыкӧд тшӧтш сотны бурасян висьлысь госсӧ.
Висьпуктанінса биыс мед куслытӧг ӧзъялас».
«Нянь вись йылысь индӧдыс татшӧм. Нянь висьсӧ мед ваясны [попъяс] Ааронсянь чужысьяс висьпуктанін дорӧ Господь водзӧ.
Тайӧ вайӧмторсьыс поп мед босьтас китыр пызь да олив вый, тшӧтш став ладансӧ, да сотас сійӧс висьпуктанін вылын. Тайӧ лоӧ казьтылан вись, Господьлы чӧскыд ӧвтантор.
А нянь висьлысь коляссӧ мед пӧжаласны шоммӧдтӧг. Аарон да сылӧн пияныс мед сёясны няньсӧ вежаинын, вежа чом йӧрын.
Няньсӧ шоммӧдӧмӧн пӧжавны оз позь.
Аслам висьысь тайӧ пайсӧ Ме инді Ааронлы да сысянь чужысьяслы.
Мыжысь вись да мыж вештан вись моз тайӧ пайыс вежасьыс-вежатор.
Ааронсянь чужысь став айуловыс вермасны сёйны сійӧс.
Господьлы вайӧм висьясысь тайӧ пайсӧ индӧма налы нэмъяс кежлӧ чужысьяссянь чужысьясӧдз.
Ставыс, мый инмылас тайӧ вежасьыс-вежаторъяс дінӧ, лоӧ вежа».
Господь шуис Мӧисейлы:
«Аарон да сысянь чужысьяс найӧс мавтыштан лунсянь мед ваясны Господьлы быдлунся нянь вись пыдди шобді пызь — ефалысь дасӧд юкӧнсӧ. Джынсӧ мед ваясны асывнас, а мӧд джынсӧ — рытнас.
Тайӧ пызьысь колӧ вый сорӧн кӧтны нянь да пӧжавны выялӧм кӧрт лист вылын.
Пӧжалӧм няньсӧ колӧ нянь вись моз чегъявны торпыригӧдз да вайны Господьлы чӧскыда ӧвтан вись пыдди.
Тайӧ нянь висьсӧ мед ваяс мавтыштӧм поп, кодӧс Ааронсянь чужысьяс пӧвстысь пуктасны кесъявны аркирейӧн Аарон пыдди.
Тайӧ нянь висьыс нэмъяс чӧж лоӧ Господьлы, сійӧс колӧ ставнас сотны.
Поплысь нянь висьсӧ колӧ ставнас сотны, сёйнысӧ сійӧс оз позь».
Господь шуис Мӧисейлы:
«Висьтав Ааронлы да сылӧн пияныслы мыжысь вись йылысь тайӧ индӧдсӧ. Мыжысь висьсӧ колӧ начкыны Господь водзын сэні, кӧні начкӧны сотан вись.
Мыжысь вись — вежасьыс-вежатор.
Поплы, коді вайӧ мыжысь висьсӧ, колӧ сёйны сійӧс вежаинын, вежа чом йӧрын.
Ставыс, мый инмылас вись яйыс дінӧ, лоӧ вежа.
Вирыс кӧ резсяс поплӧн паськӧмӧ, паськӧмсӧ колӧ мыськавны вежаинын.
Гырнич дозсӧ, кӧні пуӧма яйсӧ, колӧ жугӧдны.
А пуӧма кӧ вӧлі ыргӧн дозйын, дозсӧ колӧ гирскыны да мыськавны ваӧн.
Поп рӧдысь став айуловыс вермӧ сёйны мыжысь вись яйсӧ. Тайӧ — [Господьлӧн] вежасьыс-вежатор.
Оз позь сёйны мыжысь вись, кодлысь вирсӧ пыртӧны вежа чомйӧ мыж вештӧм могысь.
Висьсӧ колӧ сотны биын».
«Мыж вештан вись йылысь индӧдыс татшӧм. Тайӧ висьыс — вежасьыс-вежатор.
Сійӧс колӧ начкыны сэні, кӧні начкӧны сотан вись. Сылӧн вирнас колӧ резны висьпуктанінсӧ быд боксянь.
Вись пыдди колӧ вайны пемӧслысь став госсӧ: бӧждор госсӧ, ты-мус вывсьыс пытшкӧс госсӧ, кыкнан вӧрксӧ госнас да мус вывсьыс госа юкӧнсӧ.
Ставсӧ тайӧс мед лоӧ перъялӧма вӧркъяснас.
Поп мед сотас тайӧс висьпуктанін вылын Господьлы вись пыдди. Тайӧ лоӧ мыж вештан вись.
Поп рӧдысь став айуловыс вермӧ сёйны мыж вештан висьлысь яйсӧ.
Сӧмын колӧ сёйны сійӧс вежаинын, ӧд сійӧ — вежасьыс-вежатор.
Мыжысь вись да мыж вештан вись йылысь индӧдыс ӧти. Вись яйыс вичмӧ поплы, коді вештас мыжа мортлысь мыжсӧ. 
Пемӧслӧн кульӧм кучикыс вичмӧ сотан вись вайысь поплы.
Став нянь висьыс, мый пӧжалӧма пачын, рачын либӧ кӧрт лист вылын, вичмӧ вись вайысь поплы.
Мукӧд нянь висьыс, олив выяыс и выйтӧмыс, ӧтмындаӧн вичмӧ Ааронсянь чужысьяслы».
«Господьлы ваян бурасян вись йылысь индӧдыс татшӧм.
Аттьӧалана вись вайысь мед ваяс висьыскӧд выйӧн гудралӧм шомтӧм нянь, выйӧн мавтӧм шомтӧм сӧчӧн да шобді пызьысь выйӧн гудралӧм нянь.
Шомтӧм няньысь ӧтдор аттьӧалана вись вайысь вермас вайны тшӧтш шоммӧдӧм нянь.
Быдсикас няньысь ӧтиӧс вись вайысь мед вайӧ Господьлы, и сійӧ вичмӧ поплы, коді резӧ бурасян вись вирнас.
Аттьӧалӧм могысь вайӧм бурасян висьлысь яйсӧ колӧ сёйны вись ваян лунӧ, асылӧдзыс сійӧс кольны оз позь.
Кыв сетан вись либӧ ас кӧсйӧм серти вайӧм вись колӧ сёйны сійӧ жӧ лунӧ, но коляс кӧ мыйкӧ, сійӧс позьӧ сёйны мӧд луннас на. Коймӧд лунся яйсӧ колӧ сотны биын.
Коймӧд луннас кӧ сёянныд бурасян висьлысь яйсӧ, висьныд оз ло шогмана.
Вись вайысьлы бурыс оз ло. Тайӧ яйыс лоӧ пеж, и коді сёяс сійӧс, лоӧ мыжа.
Яйыс кӧ инмылас мыйкӧ пеж дінӧ, сёйнысӧ сійӧс оз позь. Сійӧс колӧ сотны биын.
Бурасян висьлысь яйсӧ позьӧ сёйны быдӧнлы, коді сӧстӧм.
А коді пеж, но сёяс Господьлы вайӧм бурасян висьлысь яйсӧ, сійӧс лоӧ бырӧдӧма аслас войтыр пӧвстысь.
Коді инмӧдчылас мыйкӧ пеж дінӧ — мортлӧн пеж дінӧ, пеж пемӧс дінӧ либӧ пеж нюглясьысь дінӧ — и сёяс Господьлы вайӧм бурасян висьлысь яйсӧ, сійӧс лоӧ бырӧдӧма аслас войтыр пӧвстысь».
Господь шуис Мӧисейлы:
«Тшӧкты Израиль пиянлы, мед оз сёйны ӧш-мӧслысь да ыж-кӧзалысь госсӧ.
Кулӧм либӧ зверӧн косявлӧм пемӧс госнас вермасны вӧдитчыны овмӧсын, но сёйны сійӧс оз позь.
Коді сёяс Господьлы вись пыдди вайӧм пемӧслысь госсӧ, сійӧс лоӧ бырӧдӧма аслас войтыр пӧвстысь.
Кӧть кӧні ті кутанныд овны, лэбачлысь ни пемӧслысь вирсӧ энӧ сёйӧй.
Вир сёйысьӧс лоӧ бырӧдӧма аслас войтыр пӧвстысь».
Господь шуис Мӧисейлы:
«Висьтав Израиль пиянлы, мый бурасян вись вайысьлы колӧ сетны Господьлы висьсьыс пай.
Аслас киӧн сылы колӧ вайны Господьлы вись пыдди пемӧслысь госсӧ да морӧсвыв яйсӧ [да мус вывсьыс госа юкӧнсӧ]. Морӧсвыв яйсӧ мед ваяс Господь водзын пыркӧдан вись пыдди, а госсӧ поп мед сотас висьпуктанін вылын. Морӧсвыв яйыс вичмӧ Ааронлы да сысянь чужысьяслы.
Бурасян вись пыдди вайӧм пемӧслысь веськыдладор задвыв яйсӧ сетӧй поплы.
Коді Ааронсянь чужысьяс пӧвстысь висьпуктанін вылын вайӧ вись пыдди бурасян висьлысь вирсӧ да госсӧ, сылы вичмӧ веськыдладор задвыв яйыс.
Ӧд Израиль пиянлӧн бурасян висьысь пыркӧдан вись пыдди вайӧм морӧсвыв яйсӧ да кыпӧдлан вись пыдди вайӧм задвыв яйсӧ Ме инді Аарон поплы да сысянь чужысьяслы нэмъяс кежлӧ.
Господьлы вайӧм висьлӧн тайӧ юкӧнъясыс вичмӧны Ааронлы да сысянь чужысьяслы сійӧ лунсяньыс, кор найӧс пуктасны попъясӧн кесъявны Господьлы. Сійӧ лунсяньыс, кор Ааронсянь чужысьясӧс мавтыштасны попъясӧ, Израиль пиян мед сетасны налы тайӧ пайсӧ.
Тадзи Господь индіс нэмъяс кежлӧ чужысьяссянь чужысьясӧдз».
Тайӧ вӧлі сотан вись, нянь вись, мыжысь вись, мыж вештан вись, попӧ сувтӧдан вись да бурасян вись йылысь индӧд. Синай овтӧминын Господь тшӧктіс Израиль пиянлы, мед ваясны Сылы висьяс. Ставсӧ тайӧс Господь висьталіс Мӧисейлы Синай керӧсын.
Господь шуис Мӧисейлы:
«Босьт аскӧдыд Ааронӧс да сылысь пиянсӧ, налысь попӧн кесъялан паськӧмсӧ, мавтыштан вый, мыжысь вись пыдди ваян ӧшкӧс, кык межӧс да куд тыр шомтӧм нянь. Чукӧрт став войтырсӧ вежа чом пыранін дорӧ».
Мӧисей вӧчис Господьлӧн тшӧктӧм серти. Кор став войтырыс чукӧртчис вежа чом пыранін дорӧ, Мӧисей шыасис на дінӧ: «Тадзи тшӧктіс вӧчны Господь».
Мӧисей вайӧдіс Ааронӧс пияныскӧд да мыссьӧдіс найӧс ваӧн.
Ааронӧс дӧрӧмӧдіс да вӧньӧдіс, пасьтӧдіс риза да ефод, ефод вывтіыс вӧньӧдіс. Сэсся пасьтӧдіс морӧсводз*, морӧсводзас сюйис урим да туммим.* Юр вылас пуктіс юркӧртӧд. Юркӧртӧд водзладорас пысаліс шыльӧдӧм зарни пӧвтор — вежа мичмӧдчантор. Тадзи Господь тшӧктіс Мӧисейлы.
Сэсся Мӧисей босьтіс мавтыштан вый да мавтыштіс вежа чомсӧ да ставсӧ, мый сэні вӧлі. Тадзи вежӧдіс ставсӧ.
Висьпуктанінсӧ сизимысь резіс выйӧн, мавтыштіс сійӧс да став дозмук-кӧлуйсӧ, тшӧтш мыссян дозсӧ да сылысь коксӧ. Тадзи вежӧдіс найӧс.
Ааронлы юр вылас Мӧисей кисьтіс мавтыштан вый. Тадзи мавтыштіс да вежӧдіс сійӧс.
Сэсся вайӧдіс Ааронлысь пиянсӧ, дӧрӧмӧдіс да вӧньӧдіс найӧс, юр выланыс пуктіс юрвевттьӧд. Тадзи Господь тшӧктіс Мӧисейлы.
Мыжысь вись вайӧм могысь Мӧисей вайӧдіс ӧшкӧс. Аарон да сылӧн пияныс пуктылісны кинысӧ ӧшлы юр вылас.
Мӧисей начкис ӧшсӧ, сэсся чуньсӧ кӧтӧдіс ӧш вирнас да мавтыштіс висьпуктанінлысь сюръяссӧ быд боксянь, медым сӧстӧммӧдны висьпуктанінсӧ. Коляс вирсӧ койыштіс висьпуктанін улӧ. Тадзи Мӧисей вежӧдіс-сӧстӧммӧдіс висьпуктанінсӧ.
Сэсся Мӧисей босьтіс ӧшпилысь пытшкӧс госсӧ, мус вывсьыс госа юкӧнсӧ, кыкнан вӧрксӧ госнас да сотіс висьпуктанін вылын.
А ӧшлысь яйсӧ, кучиксӧ да сювсӧ сотіс чомъяс сайын. Тадзи Господь тшӧктіс Мӧисейлы.
Сотан вись вайӧм могысь Мӧисей вайӧдіс межӧс. Аарон да сылӧн пияныс пуктылісны кинысӧ межлы юр вылас.
Мӧисей начкис межсӧ да резіс сылӧн вирнас висьпуктанінсӧ быд боксянь.
Сэсся кераліс межсӧ да сотіс юрсӧ, яйторъяссӧ да госсӧ. Межлысь пытшкӧссӧ да кокъяссӧ ваӧн мыськалӧм бӧрын сотіс став межсӧ висьпуктанін вылын. Тайӧ вӧлі сотан вись, Господьлы чӧскыд ӧвтантор. Тадзи Господь тшӧктіс Мӧисейлы.
Попӧ сувтӧдан вись вайӧм могысь Мӧисей вайӧдіс мӧд межӧс. Аарон пияныскӧд пуктылісны кинысӧ межлы юр вылас.
Сэсся Мӧисей начкис межсӧ, босьтіс сылысь вирсӧ да мавтыштіс Ааронлысь веськыд пельтугсӧ, веськыд кисьыс певсӧ да веськыд коксьыс ыджыд чуньсӧ.
Мӧисей вайӧдіс Ааронлысь пиянсӧ да мавтыштіс вирнас веськыд пельтугнысӧ, веськыд кисьыс певнысӧ да веськыд коксьыс ыджыд чуньнысӧ. Сэсся вирнас резіс висьпуктанінсӧ быд боксянь.
Мӧисей босьтіс межлысь бӧждор госсӧ, пытшкӧс госсӧ, мус вывсьыс госа юкӧнсӧ, кыкнан вӧрксӧ госнас да веськыдладор задвыв яйсӧ.
Господь водзӧ пуктӧм шомтӧм нянь тыра кудйысь Мӧисей босьтіс ӧти гӧгрӧс нянь, выйӧн гудралӧм нянь да сӧчӧн, пуктіс найӧс меж гос вылӧ да веськыдладор задвыв яй вылӧ.
Ставсӧ тайӧс Мӧисей сетіс Ааронлы да сылӧн пияныслы кианыс, а найӧ вайисны ставсӧ Господь водзын пыркӧдан вись пыдди.
Сэсся Мӧисей босьтіс тайӧс налӧн киысь да сотіс висьпуктанін вылын сотан виськӧд. Тайӧ вӧлі попӧ сувтӧдан вись, Господьлы чӧскыд ӧвтантор.
Мӧисей босьтіс межлысь морӧсвыв яйсӧ да вайис сійӧс Господь водзын пыркӧдан вись пыдди. Тайӧ вӧлі попӧ сувтӧдан вись пыдди вайӧм межысь Мӧисейлӧн пайыс. Тадзи Господь тшӧктіс Мӧисейлы.
Сэсся Мӧисей босьтіс мавтыштан вый да висьпуктанін вылысь вир, резіс Ааронӧс, сылысь пиянсӧ да налысь паськӧмнысӧ.
Тадзи сійӧ вежӧдіс Ааронӧс, сылысь пиянсӧ да налысь паськӧмнысӧ.
Мӧисей шуис Ааронлы да сылӧн пияныслы: «Пуӧй яйсӧ вежа чом пыранін дорын. Сэні сёйӧй яйсӧ да кудйысь няньсӧ, мый вайӧма попӧ сувтӧдан виськӧд. Меным вӧлі тшӧктӧма, медым Аарон пияныскӧд сёясны тайӧ висьсӧ.
Яй да нянь коляссӧ сотӧй биын.
Сизим лун чӧж энӧ ылыстчӧй вежа чом пыранін дорысь, ӧд тіянӧс попӧ сувтӧдан лунъясыс мунӧны сизим лун чӧж.
Талун мый вӧлі вӧчӧма, Господь тшӧктіс вӧчны мыжнытӧ вештӧм могысь.
Сизим лун чӧж, лун и вой, олӧй вежа чом пыранін дорын да ставсӧ вӧчӧй Господьлӧн тшӧктӧмъяс серти, медым ті энӧ кулӧй. Тадзи меным тшӧктӧма [Господь Ен]».
Аарон пияныскӧд вӧчисны ставсӧ, кыдзи Господь тшӧктіс Мӧисей пыр.
Кӧкъямысӧд луннас Мӧисей чукӧстіс Ааронӧс, сылысь пиянсӧ да израильса юрнуӧдысьясӧс. Ааронлы сійӧ шуис: «Мыжысь вись пыдди вайӧд дзоньвидза ӧшпиӧс, сотан вись пыдди — дзоньвидза межӧс. Сувтӧд найӧс Господь водзӧ.
Израиль пиянлы висьтав, мед вайӧдасны мыжысь вись пыдди ай кӧзаӧс, а сотан вись пыдди — арӧса да дзоньвидза [межӧс,] ӧшкӧс да баляӧс. Бурасян вись пыдди мед вайӧдасны Господь водзӧ ӧшкӧс да межӧс, нӧшта мед ваясны выйӧн гудралӧм нянь вись. Талун Господь петкӧдчас тіянлы».
Израиль пиян вайисны вежа чом водзӧ ставсӧ, мый тшӧктіс Мӧисей. Став войтырыс локтіс да сувтіс Господь водзӧ.
Мӧисей шыасис: «Господь тадзи тшӧктіс вӧчны, медым тіянлы петкӧдчас Господьлӧн дзирдлуныс».
Ааронлы Мӧисей шуис: «Матыстчы висьпуктанін дорӧ да вай мыжысь висьтӧ да сотан висьтӧ, медым вештыны ассьыд мыжтӧ да войтырлысь мыжсӧ. Сэсся вай войтырлысь висьсӧ, медым вештыны налысь мыжсӧ, кыдзи тшӧктіс Господь».
Аарон матыстчис висьпуктанін дорӧ, начкис ӧшпиӧс, медым мыжысь вись вайны ас вӧснаыс.
Ааронлӧн пияныс сетісны сылы висьлысь вирсӧ. Чуньсӧ вирӧн кӧтӧдлӧм бӧрын сійӧ мавтыштіс висьпуктанінлысь сюръяссӧ. Коляс вирсӧ койыштіс висьпуктанін улӧ. Мыжысь висьлысь госсӧ, вӧркъяссӧ да мус вывсьыс госа юкӧнсӧ сотіс висьпуктанін вылын. Тадзи Господь тшӧктіс Мӧисейлы.
Яйсӧ да кучиксӧ сотіс биын чомъяс сайын.
Сэсся Аарон начкис сотан вись. Сылӧн пияныс мыччисны сылы висьлысь вирсӧ.
Вирнас сійӧ резіс висьпуктанінсӧ быд боксянь.
Ааронлӧн пияныс мыччисны сылы висьлысь юрсӧ да кералӧм яйсӧ, и сійӧ сотіс ставсӧ висьпуктанін вылын. Сійӧ мыськаліс висьлысь пытшкӧссӧ да кокъяссӧ, сотіс найӧс сотан виськӧд висьпуктанін вылын.
Аарон вайис войтырлысь висьсӧ. Сійӧ босьтіс войтырлӧн мыжысь вись пыдди вайӧм ай кӧзаӧс, начкис сійӧс да воддза вись мозыс вайис мыжысь вись пыдди. Сэсся вайӧдіс мӧд пемӧсӧс да вайис сотан вись пыдди, кыдзи тшӧктӧма.
Асъя сотан висьысь ӧтдор вайис нянь вись. Нянь висьысь китыр пызь сотіс висьпуктанін вылын.
Аарон начкис ӧшкӧс да межӧс, кодъясӧс войтырыс вайис бурасян вись пыдди.
Ааронлӧн пияныс мыччисны сылы вирсӧ, и сійӧ резіс висьпуктанінсӧ быд боксянь.
Пияныс мыччисны и ӧшлысь госсӧ, межлысь бӧждор госсӧ, пытшкӧс госсӧ, вӧркъяссӧ да мус вывсьыс госа юкӧнсӧ. Госсӧ пуктісны морӧсвыв яй вылӧ, та бӧрын Аарон сотіс госсӧ висьпуктанін вылын.
Морӧсвыв яйсӧ да веськыдладор задвыв яйсӧ Аарон вайис Господь водзын пыркӧдан вись пыдди, кыдзи тшӧктіс Мӧисей.
Аарон лэптіс ассьыс кисӧ войтырлань да бурсиис найӧс. Мыжысь вись, сотан вись да бурасян вись вайӧм бӧрын Аарон лэччис да Мӧисейкӧд пырис вежа чомйӧ. Сэсся сэтысь петӧм бӧрын найӧ бурсиисны войтырсӧ.
Сэки Господьлӧн дзирдлуныс петкӧдчис став войтырлы.
Господьсянь петіс би да сотіс висьпуктанін вылысь сотан висьсӧ да госсӧ.
Тайӧс аддзӧм бӧрын войтырыс нимкодьысла горӧдіс да кымынь уськӧдчис муӧ.
Ааронлӧн Надав да Авиуд пияныс босьтісны ассьыныс ӧгыр дознысӧ да пуктісны сэтчӧ ӧгыр, а ӧгыр вылас — чӧскыд ӧвтанторъяс. Тадзи найӧ вайисны Господь водзӧ мӧд би, мый Господь эз тшӧкты вайнысӧ.
Сэки петіс Господьсянь би да сотіс найӧс, и найӧ кулісны Господь чужӧмбан водзын.
Мӧисей шуис Ааронлы: «Господь ӧд та йылысь висьталіс, кор шуис: “Ассьым вежалунӧс Ме петкӧдла Ас бердын кесъялысьяс пыр, Ассьым дзирдлунӧс петкӧдла войтырлы”».
Аарон чӧв оліс.
Мӧисей корис Мисаэлӧс да Элцафанӧс, Ааронлӧн Узиэл дядьыслысь пиянсӧ, да шуис налы: «Локтӧй да петкӧдӧй вокъясныдлысь шойяссӧ вежаин ортсыӧ, чомъяс сайӧ».
Найӧ локтісны да шойяссӧ паськӧмӧдыс босьтӧмӧн петкӧдісны чомъяс сайӧ, кыдзи тшӧктіс Мӧисей.
Ааронлы, сылӧн Элазар да Итамар пиянлы Мӧисей шуис: «Паськӧмнытӧ энӧ косялӧй, юрнытӧ вевттьӧй, медым ті энӧ кулӧй, и став войтырыс мед эз веськав Енлӧн скӧрлун улӧ.
Но тіян вокъясныд, став Израиль войтыр, мед бӧрдасны на вӧсна, кодъясӧс Господь сотіс. Энӧ вешйӧй вежа чом пыранін дорысь, медым энӧ кулӧй, ӧд тіянӧс мавтыштӧма Господьлӧн вежа выйӧн».
Найӧ кывзысисны Мӧисейлысь.
Господь шуис Ааронлы:
«Вина-сур юӧм бӧрын энӧ пырӧй вежа чомйӧ [да энӧ матыстчӧй висьпуктанін дорӧ], медым энӧ кулӧй.
Тайӧ тшӧктӧмыс тіянлы нэмъяс кежлӧ чужысьяссянь чужысьясӧдз. Кужӧй торйӧдны, мый вежа, а мый абу вежа, мый пеж, а мый сӧстӧм. Велӧдӧй Израиль пиянӧс став тшӧктӧмас, мый Господь висьталіс налы Мӧисей пыр».
Мӧисей висьталіс Ааронлы да сылӧн ловйӧн кольӧм Элазар да Итамар пияныслы: «Босьтӧй Господьлы вайӧм нянь висьлысь коляссӧ, пӧжалӧй сійӧс шоммӧдтӧг да сёйӧй висьпуктанін дорын, ӧд тайӧ — вежасьыс-вежатор.
Сёйӧй сійӧс вежаинын, ӧд тайӧ Господьлы вайӧм висьлӧн юкӧн, мый вичмӧ тэныд да тэсянь чужысьяслы. Тадзи тшӧктіс меным Господь.
Пыркӧдан вись пыдди вайӧм морӧсвыв яйсӧ да кыпӧдлан вись пыдди вайӧм задвыв яйсӧ сёйӧй ныв-пиныдкӧд сӧстӧминын, ӧд Израиль пиянлӧн бурасян висьлысь тайӧ юкӧнъяссӧ Господь индіс тэныд да тэсянь чужысьяслы.
Задвыв яйсӧ да морӧсвыв яйсӧ сотан госыскӧд вайӧй Господь водзын пыркӧдан вись пыдди. Тайӧ юкӧнъясыс вичмӧны тэныд да тэсянь чужысьяслы нэмъяс чӧж, кыдзи тшӧктіс Господь».
Мӧисей корсис мыжысь вись пыдди вайӧм ай кӧзасӧ. Но, вӧлӧмкӧ, сійӧс сотӧмаӧсь нин.
Мӧисей скӧрмис Ааронлӧн ловйӧн кольӧм Элазар да Итамар пияныс вылӧ да шуис налы:
«Мыйла ті энӧ сёйӧй мыжысь висьсӧ? Сійӧс колӧ вӧлі сёйны вежаинын, ӧд сійӧ — вежасьыс-вежатор. Господь индӧма сійӧс тіянлы, медым босьтінныд-вештінныд войтырлысь мыжсӧ Господь водзын.
Тайӧ висьлысь вирсӧ абу вӧлі пыртӧма вежаинӧ. Тіянлы колӧ вӧлі сёйны сылысь яйсӧ вежаинын, кыдзи ме тшӧкті тіянлы».
Аарон шуис Мӧисейлы: «Талун найӧ вайисны Господь водзӧ мыжысь висьнысӧ да сотан висьнысӧ. Менӧ суис шог, и Господьлы ӧмӧй шогмана вӧлі, ме кӧ сёйи талун мыжысь висьсӧ?»
Мӧисей кывзіс да сибӧдіс Ааронлысь кывъяссӧ.
Господь шуис Мӧисейлы да Ааронлы:
«Висьталӧй Израиль пиянлы, кутшӧм пемӧсъяс налы позьӧ сёйнысӧ.
Му вылын олысь пемӧсӧс, кодлӧн гыжйыс вожа да коді рӧмидзтӧ, позьӧ сёйны.
Но оз позь сёйны рӧмидзтысь пемӧсӧс, кодлӧн гыжйыс абу вожа. Оз позь сёйны вожа гыжъя пемӧсӧс, коді оз рӧмидзты. Энӧ сёйӧй верблюдӧс. Сійӧ рӧмидзтӧ, но сылӧн гыжйыс абу вожа. Сійӧ тіянлы пеж.
Энӧ сёйӧй даманӧс. Сійӧ рӧмидзтӧ, но сійӧ абу вожа гыжъя. Сійӧ тіянлы пеж. Энӧ сёйӧй кӧчӧс. Сійӧ рӧмидзтӧ, но сійӧ абу вожа гыжъя. Сійӧ тіянлы пеж.
Энӧ сёйӧй порсьӧс. Сылӧн гыжйыс вожа, но сійӧ оз рӧмидзты. Сійӧ тіянлы пеж.
Тайӧ пемӧсъяслысь яйсӧ энӧ сёйӧй да налӧн шой дінӧ энӧ инмӧдчӧй, ӧд найӧ тіянлы пежӧсь.
Ты-юын да саридзын олысь-уялысьяс пиысь сёйӧй сэтшӧмӧс, кодлӧн эм борд да сьӧм.
Но кодлӧн абу бордйыс да сьӧмыс, сійӧ тіянлы зывӧк. Сылысь яйсӧ энӧ сёйӧй, сылӧн шойыс мед лоӧ тіянлы зывӧк.
Ваын олысь, кодлӧн абу бордйыс да сьӧмыс, тіянлы зывӧк.
Зывӧктӧй да энӧ сёйӧй татшӧм лэбачьясӧс: кутшӧс, грифӧс да саридзкутшӧс, сӧкӧл-варышӧс, кырныш-ракаӧс, страусӧс, сюзьӧс да каляӧс, бугуйӧс, бакланӧс да ибисӧс, ва курӧгӧс*, пеликанӧс да чери варышӧс, аистӧс, быдсикас цапляӧс, крукыль ныра сизьӧс да нярбордъя шырӧс.
Бордъя да нёль кока посни лэбалысьяс тіянлы зывӧкӧсь.
Нёль кока бордъяяс пӧвстысь сёйӧй сӧмын найӧс, кодъяс кузь кокчӧраӧсь да вермӧны чеччавны му вывтіыс.
Сідзкӧ, быдсикас саранчаӧс, тирганӧс* да чиркӧс верманныд сёйны.
А мукӧд бордъя да нёль кока посни лэбалысьыс тіянлы зывӧкӧсь.
Ті лоанныд пежӧсь, инмӧдчанныд кӧ пеж пемӧслӧн шойӧ. Инмӧдчысь рытӧдзыс лоӧ пеж.
Пеж пемӧслысь шойсӧ нуысь-петкӧдысь мед мыськалас паськӧмсӧ, сійӧ рытӧдзыс лоӧ пеж.
Пемӧсъяс, кодъяслӧн гыжйыс абу вожа да кодъяс оз рӧмидзтыны, тіянлы пежӧсь. Коді инмӧдчас на дінӧ, сійӧ [рытӧдзыс] лоӧ пеж.
Нёль кока пемӧсъяс пӧвстысь лапаяс вылын ветлӧдлысьяс тіянлы пежӧсь. Коді инмӧдчас налӧн шойӧ, сійӧ рытӧдзыс лоӧ пеж.
Налысь шойсӧ нуысь-петкӧдысь мед мыськалас паськӧмсӧ, сійӧ рытӧдзыс лоӧ пеж. Татшӧм пемӧсъясыс тіянлы пежӧсь.
Му вывті котралысь-веглясьысьяс пӧвстысь тіянлы лоӧны пежӧсь: тулан, шыр, быдсикас лёкгагйыс, геккон, варан, сцинк да хамелеон. Найӧ тіянлы пежӧсь.
Коді инмӧдчас налӧн шойӧ, сійӧ рытӧдзыс лоӧ пеж.
Татшӧм котралысь-веглясьысьлӧн шойыс кӧ усяс пуысь вӧчӧм дозмук-кӧлуй вылӧ, паськӧм вылӧ, кучик вылӧ либӧ чорыд дӧра вылӧ, сэки татшӧм кӧлуйыс лоӧ пеж. Сійӧс колӧ видзыштны ваын. Рытӧдзыс сійӧ лоӧ пеж, а сэсся лоӧ сӧстӧм.
Татшӧм котралысь-веглясьысь кӧ усяс гырнич дозйӧ, сэки доз пытшкас мый вӧлі, лоӧ пеж. Тайӧ дозмуксӧ колӧ жугӧдны.
Татшӧм дозмукысь кӧ ваыс инмас сёянӧ, сёяныс лоӧ [тіянлы] пеж. Сідзжӧ юанторйыс татшӧм дозмукас лоӧ пеж.
Ставыс, мый вылӧ усьӧ татшӧм шойыс, лоӧ пеж. Пачсӧ да горсӧ, мый вылӧ усьӧ татшӧм шойыс, колӧ жугӧдны, ӧд найӧ тіянлы пежӧсь.
Ва петанінын либӧ юкмӧсын ваыс кольӧ сӧстӧм, но коді инмӧдчас ваын куйлысь шой дінӧ, лоӧ пеж.
Шойыс кӧ усяс кӧдзан кӧйдыс вылӧ, кӧйдысыс кольӧ сӧстӧм.
Но усяс кӧ ваӧн кӧтӧдӧм кӧйдыс вылӧ, сійӧ лоӧ тіянлы пеж.
Кулас кӧ пемӧс, кодӧс тіянлы позьӧ сёйны, и сылӧн шой дінӧ кодкӧ кӧ инмӧдчас, сійӧ рытӧдзыс лоӧ пеж.
Коді сёяс татшӧм яйсӧ либӧ нуас-петкӧдас шойсӧ, сылы колӧ мыськавны паськӧмсӧ, сійӧ рытӧдзыс лоӧ пеж.
Му вывті котралысь-веглясьысьяс тіянлы зывӧкӧсь, найӧс тіянлы сёйнысӧ оз позь.
Кынӧм вылас кыскасьысьясӧс, нёль кока да уна кока котралысьясӧс энӧ сёйӧй, ӧд найӧ зывӧкӧсь.
Энӧ пежалӧй асьнытӧ на вӧсна, энӧ лоӧй пежӧсь на пыр. Ме — Господь, тіян Енныд. Вежӧдӧй-сӧстӧммӧдӧй асьнытӧ, лоӧй вежаӧсь, ӧд Ме [Господь, тіян Енныд] — вежа.
Энӧ пежалӧй асьнытӧ му вывті котралысь-веглясьысьяс вӧсна. Ӧд Ме — Господь. Ме петкӧді тіянӧс Египет муысь, медым лоны тіян Енмӧн.
Сідзкӧ, лоӧй вежаӧсь, ӧд Ме — вежа».
Тайӧ индӧдыс пемӧсъяс, лэбачьяс, ваын олысь-уялысьяс да му вывті котралысь-веглясьысьяс йылысь, медым торйӧдны сӧстӧмсӧ пежсьыс да торйӧдны, кутшӧм пемӧсӧс позьӧ сёйны, а кутшӧмӧс оз.
Господь тшӧктіс Мӧисейлы висьтавны Израиль пиянлы: «Ань кӧ кынӧмасяс да чужтас пи кагаӧс, сизим лун чӧж аньыс лоӧ пеж, кыдзи и тӧлысся мунігӧн.
Кӧкъямысӧд луннас кагасӧ колӧ вундыштны.
Вир мунӧмысь ань мед сӧстӧммӧдчас комын куим лун чӧж.
Сылы оз позь инмӧдчыны вежаторйӧ, оз позь локны вежаинӧ, кытчӧдз оз помасьны сӧстӧммӧдчан лунъясыс.
Ань кӧ чужтас ныв кагаӧс, кык вежон чӧж аньыс лоӧ пеж, кыдзи и тӧлысся мунігӧн. Та бӧрын квайтымын квайт лун чӧж лоӧ сылӧн вир мунӧмысь сӧстӧммӧдчан лунъяс.
Писӧ либӧ нывсӧ чужтӧм бӧрын да сӧстӧммӧдчан лунъясыс помасьӧм бӧрын ань мед ваяс поплы вежа чом пыранін дорӧ сотан вись пыдди арӧса баляӧс да мыжысь вись пыдди гулюпиӧс либӧ гулюӧс.
Поп ваяс Господь водзӧ тайӧ висьяссӧ, медым вештыны аньлысь мыжсӧ. Та бӧрын ань лоӧ сӧстӧм вир мунӧмсьыс.
Тайӧ индӧдыс ань йылысь, коді чужтӧ пиӧс либӧ нылӧс.
Аньыс кӧ гӧльлун вӧснаыс оз вермы вайны баляӧс, мед ваяс кык гулюӧс либӧ кык гулюпиӧс, ӧтисӧ сотан вись пыдди, мӧдсӧ мыжысь вись пыдди. Поп мед вештас аньлысь мыжсӧ, и ань лоӧ сӧстӧм».
Господь шуис Мӧисейлы да Ааронлы:
«Кодлӧн кучик вылас лоӧ пыкӧс, карс либӧ чут, мый серти позьӧ чайтны, мый мортыслӧн проказа, сійӧс колӧ вайӧдны Аарон поп дінӧ либӧ Аарон рӧдысь мукӧд поп дінӧ.
Поп мед видзӧдлас кучиксӧ, кӧні эм пыкӧс, карс либӧ чут. Ловгӧныс кӧ едждӧма, и дойыс яйӧдзыс пырӧма, тайӧ проказа.
Поп мед шуас висьысьӧс пежӧн.
Кучик вылас кӧ эм еджыд чут, но сійӧ абу яйӧдзыс пырӧма, и ловгӧныс абу едждӧма, поп мед йӧршитлас висьысьӧс сизим лун кежлӧ.
Сизимӧд луннас поп мед бара видзӧдлас висьысьӧс. Чутыс кӧ абу вежсьӧма да абу паськалӧма, поп мед йӧршитлас висьысьӧс нӧшта сизим лун кежлӧ.
Сизимӧд луннас поп мед бара видзӧдлас висьысьӧс. Чутыс кӧ оз тӧдчы да абу паськалӧма, поп мед шуас висьысьӧс сӧстӧмӧн. Тайӧ абу пеж висьӧм. Висьысь мед мыськалас паськӧмсӧ, и сэсся лоӧ сӧстӧм.
Висьысьлӧн поплы петкӧдчылӧм бӧрын да поплӧн сійӧс сӧстӧмӧн шуӧм бӧрын чутыс кӧ кутас паськавны, висьысь мед выльысь петкӧдчылас поплы.
Поп кӧ аддзас, мый чутыс паськалӧма, мед шуас висьысьӧс пежӧн. Тайӧ проказа.
Мортӧс, коді висьмӧ проказаӧн, колӧ нуӧдны поп дінӧ.
Видзӧдлӧм бӧрас кӧ поп аддзас, мый кучик вылас еджыд пыкӧс, кӧні тыдовтчӧ вируля яй, и ловгӧныс едждӧма, сідзкӧ, висьысьлӧн кучик вылас важся проказа.
Поп мед шуас сійӧс пежӧн да йӧршитас, ӧд сійӧ пеж.
Аддзас кӧ поп, мый проказаыс вевттьӧма висьысьӧс юр вывсяньыс кок улӧдзыс да паськалӧма став вир-яй пасьталаыс, сэки тайӧ мортсӧ мед шуас сӧстӧмӧн. Ӧд коді ставнас едждӧма, сійӧ сӧстӧм.
Но сійӧ лунсяньыс, кор мортыслӧн кучик вылас воссьӧ вируля яйыс, сійӧ лоӧ пеж. Кор поп аддзас вируля яйсӧ, мед шуас висьысьӧс пежӧн, ӧд вируля яйыс пеж. Тайӧ проказа.
Но вируля яйыс кӧ бара едждас, висьысь мед выльысь локтас поп дінӧ.
Видзӧдлӧм бӧрас кӧ поп аддзас, мый дойыс едждӧма, мед шуас мортӧс сӧстӧмӧн.
Сійӧ сӧстӧм.
Мортлӧн кучик вылас кӧ лоӧ орзьӧм мыль, и мылльыс письтас-бурдас, но сы местаӧ лоӧ еджыд пыкӧс либӧ гӧрдов-еджгов чут, висьысь мед петкӧдчас поплы.
Видзӧдлӧм бӧрас кӧ поп аддзас, мый дойыс яйӧдзыс пырӧма, и ловгӧныс едждӧма, мед шуас висьысьӧс пежӧн. Тайӧ проказа. Сійӧ петӧма мыль местаӧ.
Поп кӧ аддзас, мый ловгӧныс сэні абу едждӧма, и дойыс абу яйӧдзыс пырӧма, а муртса тӧдчӧ, мед йӧршитлас висьысьӧс сизим лун кежлӧ.
Чутыс кӧ кутас паськавны, поп мед шуас висьысьӧс пежӧн. Тайӧ проказа.
Чутыс кӧ абу вежсьӧма да абу паськалӧма, тайӧ орзьылӧм мыльлӧн дой. Поп мед шуас мортӧс сӧстӧмӧн.
Сотчас кӧ кодлӧнкӧ кучикыс, и бурдӧминас лоӧ гӧрдов-еджгов чут либӧ еджыд чут, поп мед видзӧдлас сійӧс. Чутвывса ловгӧныс кӧ едждӧма, и чутыс яйӧдзыс пырӧма, сідзкӧ, сотчӧминас паськалӧма проказа.
Поп мед шуас висьысьӧс пежӧн. Тайӧ проказа.
Поп кӧ аддзас, мый чутвывса ловгӧныс абу едждӧма, и чутыс абу яйӧдзыс пырӧма, а муртса тӧдчӧ, мед йӧршитлас висьысьӧс сизим лун кежлӧ.
Сизимӧд луннас поп мед бара видзӧдлас сійӧс. Чутыс кӧ паськалӧма, поп мед шуас висьысьӧс пежӧн. Тайӧ проказа.
Чутыс кӧ абу вежсьӧма да абу паськалӧма, а муртса тӧдчӧ, пыкӧсыс лоӧма сотчӧмсянь.
Поп мед шуас висьысьӧс сӧстӧмӧн, ӧд сылӧн сотчӧмбӧрса дой.
Айловлӧн либӧ аньлӧн юр кучикас либӧ тшӧкаас кӧ мыччысяс карс, поп мед видзӧдлас карссӧ. Карсыс кӧ яйӧдзыс пырӧма, и юрсиыс либӧ тошгӧныс сэні вижов да вӧсни, поп мед шуас висьысьӧс пежӧн, ӧд сылӧн юр кучикас либӧ тшӧкаас проказа.
Поп кӧ аддзас, мый карсыс абу яйӧдзыс пырӧма, но сьӧд юрсиыс сэні абу, мед йӧршитлас висьысьӧс сизим лун кежлӧ.
Сизимӧд луннас поп мед бара видзӧдлас висьысьӧс. Карсыс кӧ абу паськалӧма, вижов юрсиыс кӧ сэні абу, и карсыс кӧ абу яйӧдзыс пырӧма, висьысь мед кушӧдз шырас юрсисӧ да бритас тошсӧ лӧмӧссьӧминсӧ вӧрӧдтӧг. Поп мед йӧршитлас висьысьӧс нӧшта сизим лун кежлӧ.
Сизимӧд луннас поп мед бара видзӧдлас висьысьӧс. Карсыс кӧ абу паськалӧма да абу яйӧдзыс пырӧма, поп мед шуас висьысьӧс сӧстӧмӧн.
Мортыс мед мыськалас паськӧмсӧ, и сэсся лоӧ сӧстӧм.
Висьысьӧс сӧстӧмӧн шуӧм бӧрын кӧ карсыс кутас паськавны кучик вылас, поп мед выльысь видзӧдлас сійӧс. Карсыс кӧ паськалӧма, поплы оз нин ков корсьны вижов юрси, ӧд висьысьыс пеж.
Но карсыс кӧ абу вежсьӧма, и сэні быдмӧ сьӧд юрси, сідзкӧ, висьысьыс бурдіс, сійӧ сӧстӧм.
Поп мед шуас сійӧс сӧстӧмӧн.
Айловлӧн либӧ аньлӧн кучик вылас кӧ тыдовтчасны еджыд чутъяс, поп мед видзӧдлас сійӧс. Чутъясыс кӧ еджгов-кельыдӧсь, сідзкӧ, тайӧ абу пеж висьӧм, висьысьыс сӧстӧм.
Кушмӧм юр пыдӧса морт сӧстӧм.
Кодлӧн юрыс плешсяньыс кушмӧма, сійӧ тшӧтш сӧстӧм.
Но кушмӧм юр пыдӧсас либӧ плешкас кӧ мыччысьӧма еджыд либӧ гӧрдов чут, вермас лоны, мый тайӧ проказа.
Поп мед видзӧдлас сійӧс. Кушмӧм юрас либӧ плешкас кӧ лоӧма еджыд либӧ гӧрдов пыкӧс, мый вир-яйвывса проказа кодь, сідзкӧ, мортыслӧн проказа, сійӧ пеж.
Поп мед шуас сійӧс пежӧн, ӧд юр вылас сылӧн проказа.
Проказаӧн висьысьлы колӧ новлыны косялӧм паськӧм да вевттьыны ныр-вомсӧ, а юрсӧ оз ков вевттьыны. Сійӧ мед горзӧ: “Пеж, пеж!”
Кытчӧдз мортыс висьӧ проказаӧн, сійӧ пеж.
Сылы колӧ овны торйӧн, чомъяс сайын.
Проказа вермас лоны вурун либӧ шабді паськӧм вылын, шабді либӧ вурун шӧрт вылын либӧ наысь кыӧм дӧра вылын, кучик вылын либӧ кучикысь вӧчӧмтор вылын. Турунвиж либӧ гӧрдов чутыс кӧ лоӧ паськӧм вылын, шӧрт-дӧра вылын, кучик вылын либӧ кучикысь вӧчӧмтор вылын, сійӧс колӧ петкӧдлыны поплы, ӧд вермас лоны, мый тайӧ проказа.
Поп мед видзӧдлас чутсӧ да сизим лун кежлӧ торйӧдас пежасьӧм кӧлуйсӧ.
Сизимӧд луннас поп мед бара видзӧдлас кӧлуйсӧ. Паськӧм вылас, шӧрт-дӧра вылас, кучик вылас либӧ кучикысь вӧчӧмтор вылас кӧ чутыс паськалӧма, сідзкӧ, кӧлуйыс пеж, тайӧ — проказа.
Поп мед сотас лёк проказаӧн пежасьӧм кӧлуйсӧ: паськӧмсӧ, вурун либӧ шабді шӧрт-дӧрасӧ да кучикысь вӧчӧмторсӧ.
Поп кӧ аддзас, мый чутыс абу паськалӧма паськӧм вылас, шӧрт-дӧра вылас либӧ кучикысь вӧчӧмтор вылас, мед тшӧктас мыськавны пежасьӧм кӧлуйсӧ да мӧд сизим лун кежлӧ мед торйӧдас сійӧс.
Мыськӧм бӧрти кӧ поп аддзас, мый чутыс абу вежсьӧма и абу паськалӧма, сідзкӧ, тайӧ кӧлуйыс пеж. Сійӧс колӧ сотны, гугас кӧть банас мыччысьӧма чутыс.
Кӧлуйсӧ мыськалӧм бӧрти кӧ поп аддзас, мый чутыс бырыштӧма, мед орӧдас-косялыштас пежасьӧм паськӧмысь, кучикысь либӧ шӧрт-дӧраысь чут мыччысянінсӧ.
Паськӧм вылын, шӧрт-дӧра вылын либӧ кучикысь вӧчӧмтор вылын кӧ бара лоӧ проказа, сійӧс колӧ сотны.
Паськӧм, шӧрт-дӧра либӧ кучикысь вӧчӧмтор мыськалӧм бӧрын кӧ чутыс бырас, мед нӧшта ӧтчыдысь мыськасны кӧлуйсӧ, и сійӧ лоӧ сӧстӧм».
Тайӧ индӧдыс проказа йылысь, мый мыччысьӧ вурун либӧ шабді паськӧм вылын, шӧрт-дӧра вылын либӧ кучикысь вӧчӧмтор вылын. Тайӧ индӧдыс серти кӧлуйсӧ колӧ шуны сӧстӧмӧн либӧ пежӧн.
Господь шуис Мӧисейлы:
«Тайӧ индӧдыс проказаысь бурдӧм морт йылысь да сылӧн сӧстӧммӧдчан лун йылысь. Мортсӧ колӧ вайӧдны поп дінӧ.
Поп мед петас чомъяс сайӧ, медым видзӧдлыны мортӧс. Мортыс кӧ бурдӧма проказаысь, сійӧс сӧстӧммӧдӧм могысь мед тшӧктас вайны кык ловъя сӧстӧм лэбачӧс, сус путор, югыдгӧрд шӧрт да иссоп турун. Ӧти лэбачсӧ поп мед тшӧктас начкыны гырнич доз весьтын, кытчӧ гумовтӧма визувтанінысь ва.
Ловъя лэбачсӧ, сус путорсӧ, югыдгӧрд шӧртсӧ да иссоп турунсӧ поп мед сюйлас начкӧм лэбачлӧн вирӧ. Сэсся проказаысь сӧстӧммӧдчысь мортӧс поп мед сизимысь резас вирӧсь ванас да шуас сӧстӧмӧн, а ловъя лэбачсӧ лэдзас лэбавны.
Сӧстӧммӧдчысь мед мыськалас паськӧмсӧ, шырсяс-бритчас да мыссяс. Та бӧрти сійӧ лоӧ сӧстӧм и вермас бӧр локны войтыр пӧвстӧ. Но аслас чомйӧ сизим лун чӧж мед оз на пыр.
Сизимӧд луннас мед бара кушӧдз шырас юрсӧ, тошсӧ да синкымсӧ, тшӧтш став ловгӧнсӧ. Мед мыськалас паськӧмсӧ да ачыс тшӧтш мыссяс. Та бӧрын сійӧ лоӧ сӧстӧм.
Кӧкъямысӧд луннас проказаысь бурдӧм морт мед босьтас дзоньвидза [арӧса] кык межӧс да дзоньвидза арӧса ыжӧс. Нянь вись пыдди мед босьтас выйӧн гудралӧм шобді пызь да олив вый. Ефа мында пызьсӧ мед юкас дас пельӧ и сэтысь мед босьтас куимсӧ. А выйсӧ мед босьтас ӧти лог мында.*
Поп мед сувтӧдас сӧстӧммӧдчыны локтӧм мортӧс вайӧмторнас Господь водзӧ вежа чом пыранін дорӧ.
Поп мед босьтас ӧти межсӧ да ваяс сійӧс мыж вештан вись пыдди. Нӧшта мед босьтас олив выйсӧ да ваяс мыж вештан виськӧд Господь водзын пыркӧдан вись пыдди.
Поп мед начкас межсӧ сэні, кӧні начкӧны мыжысь вись да сотан вись. Мыж вештан висьыс лоӧ поплы, кыдзи и мыжысь вись. Тайӧ — вежасьыс-вежатор.
Поп мед босьтас мыж вештан висьлысь вирсӧ да мавтыштас сӧстӧммӧдчысь мортлысь веськыд пельтугсӧ, веськыд кисьыс певсӧ да веськыд коксьыс ыджыд чуньсӧ.
Аслас шуйга ки пыдӧсас поп мед кисьтас вайӧм олив вый, а веськыд кисьыс чуньсӧ выйнас кӧтӧдлӧмӧн сизимысь мед резас Господь водзын. 
Ки пыдӧсас кольӧм выйнас поп мед мавтыштас сӧстӧммӧдчысь мортлысь веськыд пельтугсӧ, веськыд кисьыс певсӧ да веськыд коксьыс ыджыд чуньсӧ — ставсӧ, мый вӧлі мавтыштӧма мыж вештан вись вирӧн.
Коляс выйсӧ ки пыдӧссьыс мед кисьтас сӧстӧммӧдчысьлы юр вылас. Тадзи поп вештас сылысь мыжсӧ Господь водзын.
Сэсся поп мед ваяс мыжысь вись, медым пежсьыс сӧстӧммӧдчысь мортлысь вештыны мыжсӧ.
Та бӧрын поп мед начкас сотан висьӧс да сотас сійӧс нянь виськӧд висьпуктанін вылын. Тадзи поп вештас мортлысь мыжсӧ, и сійӧ лоӧ сӧстӧм.
Сӧстӧммӧдчысь кӧ гӧльлун вӧснаыс оз вермы вайны та мында вайӧмторсӧ, сійӧ мед ваяс мыж вештӧм могысь ӧти межӧс, кодӧс пыркӧдӧмӧн вайӧны мыж вештан вись пыдди. Нянь вись пыдди мед ваяс выйӧн гудралӧм шобді пызь — ефалысь дасӧд юкӧнсӧ. Нӧшта мед ваяс ӧти лог мында олив вый, кык гулюӧс либӧ кык гулюпиӧс, кутшӧмӧс вермас вайны. Ӧтиыс мед лоӧ мыжысь вись, а мӧдыс — сотан вись.
Кӧкъямысӧд луннас тайӧ висьяснас сійӧ мед локтас поп дінӧ вежа чом пыранін дорӧ, медым сӧстӧммӧдчыны Господь водзын.
Поп мед босьтас мыж вештан вись пыдди вайӧм межӧс, олив выйсӧ да ваяс найӧс Господь водзын пыркӧдан вись пыдди.
Поп мед начкас мыж вештан вись пыдди вайӧм межӧс, босьтас сылысь вирсӧ да мавтыштас сӧстӧммӧдчысь мортлысь веськыд пельтугсӧ, веськыд кисьыс певсӧ да веськыд коксьыс ыджыд чуньсӧ.
Аслас шуйга ки пыдӧсас поп мед кисьтас олив вый, а веськыд кисьыс чуньсӧ выйнас кӧтӧдлӧмӧн сизимысь мед резас Господь водзын.
Ки пыдӧсас кольӧм выйнас поп мед мавтыштас сӧстӧммӧдчысь мортлысь веськыд пельтугсӧ, веськыд кисьыс певсӧ да веськыд коксьыс ыджыд чуньсӧ — ставсӧ, мый вӧлі мавтыштӧма мыж вештан вись вирӧн.
Коляс выйсӧ ки пыдӧссьыс мед кисьтас сӧстӧммӧдчысьлы юр вылас, медым вештыны сылысь мыжсӧ Господь водзын.
Сэсся поп мед ваяс вись пыдди гулюясӧс либӧ гулюпиянӧс, мый сӧстӧммӧдчысь вермас вайны. Ӧтисӧ поп мед ваяс мыжысь вись пыдди, а мӧдсӧ — сотан вись пыдди нянь виськӧд.
Тадзи поп вештас сӧстӧммӧдчысь мортлысь мыжсӧ Господь водзын».
Тайӧ индӧдыс проказаысь бурдӧм гӧль мортӧс сӧстӧммӧдӧм йылысь.
Господь шуис Мӧисейлы да Ааронлы:
«Кор овмӧдчанныд Ханаан муӧ, мый Ме сета тіянлы, и Ме ыста кутшӧмкӧ керка вылӧ проказа, сэки сійӧ, кодлӧн тайӧ керкаыс, мед мунас поп дінӧ да шуас: “Менам керкаын мыйкӧ проказа кодь мыччысьӧма”.
Поп мед тшӧктас петкӧдны керкаысь став кӧлуйсӧ. Оз кӧ петкӧдны, керкаын ставыс вермас лоны пеж.
Сэсся поп мед локтас видзӧдлыны керкасӧ.
Сійӧ кӧ аддзас керка стенмысь турунвиж либӧ гӧрдов чутъяс, и найӧ кӧ пыдӧдз пырӧмаӧсь, мед петас керкасьыс да тупкас керкасӧ сизим лун кежлӧ.
Сизимӧд луннас поп мед бара локтас видзӧдлыны. Чутъясыс кӧ паськалӧмаӧсь стенмас, мед тшӧктас перъявны пежасьӧм изъяссӧ да шыбитны кар сайӧ пежинӧ.
Керкапытшса стенсӧ мед гирскасны да став гирскӧмасӧ мед шыбитасны кар сайӧ пежинӧ.
Мед пуктасны выль изъяс сэтчӧ, кытысь перйисны пежасьӧм изъяссӧ, а стенсӧ мед мавтасны выль гудрасӧн.
Изъяссӧ перъялӧм, стенсӧ гирскӧм да мавтӧм бӧрын кӧ чутъясыс выльысь мыччысясны, поп мед бара локтас да видзӧдлас керкасӧ. Чутъясыс кӧ паськалӧмаӧсь, сідзкӧ, тайӧ лёк проказа, и керкаыс пеж.
Керкасӧ колӧ жугӧдны, а изъяссӧ, путоръяссӧ да стен гудрассӧ колӧ шыбитны кар сайӧ пежинӧ.
Керка тупкылӧм бӧрас кӧ кодкӧ сэтчӧ пыралас, сійӧ рытӧдзыс лоӧ пеж.
Коді узяс либӧ сёяс тайӧ керкаас, сійӧ мед мыськалас паськӧмсӧ [и сійӧ рытӧдзыс лоӧ пеж].
Кор поп локтас видзӧдлыны керкасӧ да аддзас кӧ, мый стенсӧ выльысь мавтӧм бӧрын чутъясыс абу паськалӧмаӧсь, сійӧ мед шуас керкасӧ сӧстӧмӧн, ӧд керкаын проказаыс абу.
Керкасӧ сӧстӧммӧдӧм могысь поп мед босьтас кык лэбачӧс, сус путор, югыдгӧрд шӧрт да иссоп турун. Ӧти лэбачсӧ мед начкас гырнич доз весьтын, кытчӧ гумовтӧма визувтанінысь ва.
Сус путорсӧ, иссоп турунсӧ, югыдгӧрд шӧртсӧ да ловъя лэбачсӧ поп мед сюйлас ваӧ, кытчӧ войталіс начкӧм лэбачлӧн вирыс. Вирӧсь ванас поп мед сизимысь резас керкасӧ.
Лэбач вирӧсь ваӧн, ловъя лэбачӧн, сус путорйӧн, иссоп турунӧн да югыдгӧрд шӧртӧн керкасӧ сӧстӧммӧдӧм бӧрын поп мед лэдзас ловъя лэбачсӧ кар сайӧ видз вылӧ. Тадзи поп сӧстӧммӧдас керкасӧ, и керкаыс лоӧ сӧстӧм».
Тайӧ индӧдыс проказа да карс йылысь, паськӧм вылын да керка пытшкын проказа йылысь, пыкӧс, лӧмӧссьӧмин да чутъяс йылысь, медым тӧдны, мый пеж, а мый сӧстӧм.
Татшӧм индӧд проказа йылысь.
Господь шуис Мӧисейлы да Ааронлы:
«Висьталӧй Израиль пиянлы: айловлӧн кудзасян йывсьыс кӧ петӧ лёквиялӧм, сійӧ пеж.
Тайӧ индӧдыс лёквиялӧм вӧсна пежӧн лоӧм йылысь. Мортыс лоӧ пеж, сылӧн вир-яйысь кӧ петӧ лёквиялӧм либӧ оз пет, но чукӧрмӧ вир-яяс.
Сылӧн куйланіныс да пукаланіныс лоӧ пеж.
Сылӧн куйланінӧ инмӧдчысьлы колӧ мыськавны паськӧмсӧ да аслыс тшӧтш мыссьыны. Рытӧдзыс сійӧ лоӧ пеж.
Коді пуксяс сэтчӧ, кӧні пукаліс лёквиялӧмӧн висьысь, сылы колӧ мыськавны паськӧмсӧ да аслыс тшӧтш мыссьыны. Рытӧдзыс сійӧ лоӧ пеж.
Висьысь дінӧ инмӧдчысьлы колӧ мыськавны паськӧмсӧ да аслыс тшӧтш мыссьыны. Рытӧдзыс сійӧ лоӧ пеж.
Сьӧлыштас кӧ висьысь сӧстӧм мортлы, мортыс рытӧдзыс лоӧ пеж, сылы колӧ мыськавны паськӧмсӧ да аслыс тшӧтш мыссьыны.
Тарантасыс, кӧні пукаліс висьысь, [рытӧдзыс] лоӧ пеж.
Быдӧн, коді инмӧдчылас кӧлуйӧ, мый вылын пукаліс висьысь, рытӧдзыс лоӧ пеж.
Коді нуас-петкӧдас татшӧм кӧлуйсӧ, сылы колӧ мыськавны паськӧмсӧ да аслыс тшӧтш мыссьыны. Рытӧдзыс сійӧ лоӧ пеж.
Лёквиялӧмӧн висьысь айлов кӧ кисӧ мыськытӧг инмӧдчылас кодкӧ дінӧ, мӧдыс мед мыськалас паськӧмсӧ да ачыс тшӧтш мыссяс. Рытӧдзыс сійӧ лоӧ пеж.
Висьысь кӧ инмӧдчылас гырнич дозйӧ, дозсӧ колӧ жугӧдны, а дозмукыс кӧ пуысь, сійӧс колӧ мыськыны ваӧн [и дозмукыс лоӧ сӧстӧм].
Кор айлов бурдас лёквиялӧмсьыс, бурдӧмсяньыс сизим лун мысти сійӧ мед мыськалас паськӧмсӧ, мыссяс визувтан ваын, и сійӧ лоӧ сӧстӧм.
Кӧкъямысӧд луннас мед босьтас кык гулюӧс либӧ кык гулюпиӧс да локтас Господь водзӧ вежа чом пыранін дорӧ. Сэні мед сетас найӧс поплы.
Ӧтисӧ поп мед ваяс мыжысь вись пыдди, а мӧдсӧ — сотан вись пыдди. Тадзи поп вештас сылысь мыжсӧ Господь водзын да сӧстӧммӧдас сійӧс лёквиялӧмсьыс.
Айловлӧн кӧ петас кӧйдысыс, сылы колӧ ставнас мыссьыны. Рытӧдзыс сійӧ лоӧ пеж.
Паськӧмсӧ да пемӧс кучикысь вӧчӧмторсӧ, кытчӧ петас кӧйдысыс, колӧ мыськавны. Рытӧдзыс сійӧ лоӧ пеж.
Айловлӧн кӧ петас кӧйдысыс, кор узьлӧ анькӧд, налы кыкнанныслы колӧ мыссьыны. Рытӧдзыс найӧ лоӧны пежӧсь.
Аслас тӧлысся дырйи ань сизим лун чӧж лоӧ пеж. Коді инмӧдчас сы дінӧ, рытӧдзыс лоӧ пеж.
Ставыс, мый вылын ань тӧлысся дырйиыс куйлӧ да пукалӧ, лоӧ пеж.
Аньлӧн куйланінӧ инмӧдчысьлы колӧ мыськавны паськӧмсӧ да аслыс тшӧтш мыссьыны. Рытӧдзыс сійӧ лоӧ пеж.
Быдӧн, коді инмӧдчылас кӧлуйӧ, мый вылын пукаліс ань, мед мыськалас паськӧмсӧ да ачыс тшӧтш мыссяс. Рытӧдзыс сійӧ лоӧ пеж.
Коді инмӧдчылас кӧлуйӧ, мый куйлӧ аньлӧн вольпасяс либӧ пуклӧсас, рытӧдзыс лоӧ пеж.
Айлов кӧ узяс анькӧд сылӧн тӧлысся дырйиыс, аньлӧн пеж вӧснаыс тшӧтш лоӧ пеж.
Сизим лун чӧж айлов да сылӧн куйланіныс лоӧны пежӧсь.
Аньлӧн кӧ абу тӧлысся, а вирыс уна лун чӧж мунӧ либӧ сылӧн сӧстӧммӧдчан кадыс нюжалӧ тӧлысся дорысь дырджык, вир мунігас сійӧ тӧлысся дырйиыс моз лоӧ пеж.
Сылӧн куйланіныс да пукаланіныс тшӧтш лоӧны пежӧсь.
Быдӧн, коді инмӧдчылас сылӧн куйланінас либӧ пукаланінас, лоӧ пеж. Сылы колӧ мыськавны паськӧмсӧ да аслыс тшӧтш мыссьыны. Рытӧдзыс сійӧ лоӧ пеж.
Кор вир мунӧмыс помасяс, ань мед лыддьӧ сизим лун, та бӧрти сійӧ лоӧ сӧстӧм.
Кӧкъямысӧд луннас ань мед босьтас кык гулюӧс либӧ кык гулюпиӧс да локтас вежа чом пыранін дорӧ. Сэні мед сетас найӧс поплы.
Ӧтисӧ поп мед ваяс мыжысь вись пыдди, а мӧдсӧ — сотан вись пыдди. Тадзи поп вештас аньлысь мыжсӧ Господь водзын да сӧстӧммӧдас сійӧс вир мунан пежсьыс.
Велӧдӧй Израиль войтырӧс видзчысьны пежысь, медым эз кувны Менсьым оланінӧс пежалӧм вӧсна».
Тайӧ индӧдыс айлов йылысь, коді лёквиялӧм либӧ кӧйдыс петӧм вӧснаыс лоӧ пеж. Нӧшта тайӧ индӧдыс аньлӧн тӧлысся мунӧм йылысь, айловлӧн да аньлӧн лёквиялӧм йылысь да айлов йылысь, коді узьӧ анькӧд сылӧн пеж дырйиыс.
Ааронлӧн кыкнан пиыс кулӧм бӧрын Господь сёрнитіс Мӧисейкӧд. Найӧ кулісны сы понда, мый локтісны Господь водзӧ [мӧд биӧн]. Господь шуис Мӧисейлы: «Висьтав Аарон вокыдлы, мый сылы оз позь быд кадӧ пырны Вежаинын ӧшалысь дӧра сайӧ, Йитӧд куд водзӧ [мыж лэдзанін водзӧ], медым сійӧ эз кув. Ӧд Йитӧд куд вевт весьтас Ме кута петкӧдчыны кымӧр пытшкын.
Вежаинӧ пыригӧн Аарон мед вайӧдас мыжысь вись пыдди ӧшкӧс да сотан вись пыдди межӧс.
Сійӧ мед пасьталас вежа шабді дӧрӧм да улыс шабді гач, кӧрталас коскас шабді вӧнь да вевттяс юрсӧ шабді юркӧртӧднас. Тайӧ вежа паськӧмсӧ мед пасьталас мыссьӧм бӧрас.
Израиль войтыр мед ваяс сылы кык ай кӧзаӧс мыжысь вись пыдди да ӧти межӧс сотан вись пыдди.
Сэсся Аарон ас вӧснаыс мед ваяс мыжысь вись пыдди ӧшкӧс, тадзи вештас ассьыс да гортсаясыслысь мыжсӧ.
Кык ай кӧзасӧ мед босьтас да сувтӧдас Господь водзӧ, вежа чом пыранін дорӧ.
Ай кӧзаяссӧ сійӧ мед торйӧдас пудъясьӧмӧн: ӧтисӧ мед ваясны Господьлы вись пыдди, мӧдсӧ мед нуӧдасны овтӧминӧ.
Господьлы веськалӧм ай кӧзасӧ Аарон мед ваяс мыжысь вись пыдди, а мӧдсӧ мед сувтӧдас ловйӧн Господь водзӧ. Мыж вештӧм могысь мед пуктасны мыжъяссӧ кӧза вылас да вӧтласны овтӧминӧ. [Тайӧ кӧзаыс ас вылас нуас Израиль пиянлысь мыжъяссӧ овтӧминӧ.]
Аарон мед начкас ӧшкӧс да ваяс сійӧс мыжысь вись пыдди ас вӧснаыс, медым вештыны ассьыс да гортсаясыслысь мыжсӧ.
Господь водзысь висьпуктанінысь мед босьтас тшынӧдчан доз тыр ӧгыр да кык китыр ниртӧм чӧскыд дука тшынӧдчантор.
Мед пыртас найӧс Вежаинын ӧшалысь дӧра сайӧ. Тшынӧдчанторсӧ Аарон мед пуктас Господь водзӧ би вылӧ. Сэки тшыныс вевттяс Йитӧд кудлысь вевтсӧ, и Аарон оз кув.
Сэсся мед босьтас ӧш вир да чуньсӧ кӧтӧдлӧмӧн резас вевт вывсӧ, а вевт водзсӧ мед резас сизимысь.
Войтырлӧн мыжысь вись пыдди Аарон мед начкас ай кӧзаӧс. Вирсӧ мед пыртас Вежаинын ӧшалысь дӧра сайӧ да ӧш вирӧн моз мед резас Йитӧд кудлысь вевт вывсӧ да вевт водзсӧ. Татшӧм ногӧн сійӧ сӧстӧммӧдас Вежасьыс-вежаинсӧ Израиль пиянлӧн пежсьыс да мыжсьыс.
Израиль пиян пӧвстын сулалысь вежа чомсӧ мед ставнас сӧстӧммӧдас налӧн пежсьыс.
Мед некод оз ло вежа чомйын, кор Аарон пырас сэтчӧ, медым вештыны ассьыс, гортсаясыслысь да Израиль войтырлысь мыжсӧ. Кытчӧдз сійӧ оз пет вежа чомйысь, сэтчӧ мед некод оз пыр.
Вежа чомйысь петӧм бӧрын Аарон мед сувтас Господь водзын сулалысь висьпуктанін дорӧ да сӧстӧммӧдас сійӧс. Ӧш вирӧн да кӧза вирӧн мед мавтас висьпуктанінлысь сюръяссӧ быд боксянь. Вирнас мед кӧтӧдас чуньсӧ да сизимысь резас висьпуктанінсӧ. Тадзи сӧстӧммӧдас сійӧс Израиль пиянлӧн пежсьыс да вежӧдас сійӧс.
Вежасьыс-вежаинсӧ да ставнас вежа чомсӧ, висьпуктанінсӧ [да попъясӧс] сӧстӧммӧдӧм бӧрын Аарон мед вайӧдас ловъя ай кӧзаӧс, пуктылас кыкнан кисӧ сылы юр вылас да висьтасяс Израиль пиянлӧн став мыжсьыс да лёк вӧчӧмсьыс. Тадзи Аарон пуктас налысь мыжъяссӧ кӧзалы юр вылас. Сэсся мед тшӧктас торъя мортлы нуӧдны кӧзасӧ овтӧминӧ.
Израиль войтырлысь став мыжсӧ тайӧ кӧзаыс нуас ас вылас овтӧминӧ.
Кӧзасӧ вӧтлӧм бӧрын Аарон мед пырас вежа чомйӧ, пӧрччас шабді паськӧмсӧ, мый пасьтавліс вежаинӧ пырӧм водзвылын, да коляс сэтчӧ. Вежаинас мед мыссяс ваӧн да бӧр пасьталас ассьыс паськӧмсӧ. Вежа чомйысь петӧм бӧрын ас вӧснаыс да войтырыс вӧсна мед ваяс сотан вись. Тадзи вештас ассьыс да войтырлысь мыжсӧ [тшӧтш гортсаясыслысь да попъяслысь мыжсӧ].
Мыжысь висьлысь госсӧ мед сотас висьпуктанін вылын.
Овтӧминӧ кӧзаӧс нуӧдысьыс мед мыськалас паськӧмсӧ да ачыс тшӧтш мыссяс, сӧмын та бӧрын вермас локны йӧз дінӧ чомъясӧ.
Мыжысь вись пыдди вайӧм ӧшсӧ да ай кӧзасӧ, кодъяслысь вирсӧ вӧлі пыртӧма вежаинӧ сійӧс сӧстӧммӧдӧм могысь, мед нуасны чомъяс сайӧ. Кучикнас, яйнас да сювнас найӧс мед сотасны биын.
Сотысьыс мед мыськалас паськӧмсӧ да ачыс тшӧтш мыссяс, сӧмын та бӧрын вермас локны йӧз дінӧ чомъясӧ.
Сизимӧд тӧлысьлӧн дасӧд лунӧ раммӧдчӧй-видзалӧй, некутшӧм удж энӧ вӧчӧй, ни вужвойтыр, ни йӧз муысь локтысьяс. Олӧй тайӧ тшӧктӧмыс серти нэмъяс чӧж. Тайӧ лунӧ став мыжнытӧ лоӧ вештӧма, медым ті вӧлінныд Господь водзын сӧстӧмӧсь. Сэки тіян шойччан лун, кор тіянлы колӧ раммӧдчыны-видзавны. Тайӧ тшӧктӧмсӧ сетӧма тіянлы нэмъяс кежлӧ.
Мыжнытӧ мед вештас поп, кодӧс мавтыштӧма да пуктӧма кесъявны аслас батьыс бӧрся. Сійӧ мед пасьталас вежа шабді паськӧмсӧ, сэсся мед сӧстӧммӧдас Вежасьыс-вежаинсӧ, ставнас вежа чомсӧ да висьпуктанінсӧ, вештас попъяслысь да став войтырыслысь мыжсӧ.
Олӧй тайӧ тшӧктӧмыс серти нэмъяс чӧж. Ӧтчыдысь вонас поп мед вештас Израиль войтырлысь став мыжсӧ».
Аарон вӧчис сідзи, кыдзи Господь тшӧктіс Мӧисейлы.
Господь шуис Мӧисейлы:
«Висьтав Ааронлы, сылӧн пияныслы да Израиль войтырлы Господьлысь тшӧктӧмсӧ.
Израиль войтыр пӧвстысь [либӧ на ордӧ овмӧдчысьяс пӧвстысь] кӧ кодкӧ начкас ӧшкӧс, ыжӧс либӧ кӧзаӧс чомъяс дорын либӧ чомъяс сайын, а оз вайӧд сійӧс вежа чом пыранін дорӧ, [медым вайны сотан вись либӧ бурасян вись пыдди, мый лоӧ Господьлы шогмана чӧскыд ӧвтантор,] медым Господьлӧн оланін водзын вайны сійӧс Господьлы вись пыдди, сэки тайӧ мортыс лоӧ мыжа вир кисьтӧмысь. Сійӧс лоӧ бырӧдӧма аслас войтыр пӧвстысь.
Тайӧс тшӧктӧма сы могысь, медым Израиль пиян эз нин начкыны пемӧсъяссӧ бокын, а вайӧдісны найӧс Господь водзӧ вежа чом пыранін дорӧ поплы, и сэні начкисны Господьлы бурасян вись пыдди.
Вежа чом пыранін дорысь Господьлысь висьпуктанінсӧ поп мед резас пемӧс вирӧн, а госсӧ мед сотас Господьлы чӧскыда ӧвтан вись пыдди. Израильсаяс мед дугдасны вайны висьнысӧ овтӧминса мутияслы, кодъяслы сетчисны кырсалысь ань моз.
Тайӧ тшӧктӧмыс лоӧ налы нэмъяс кежлӧ чужысьяссянь чужысьясӧдз.
Нӧшта висьтав, мый Израиль войтыр пӧвстысь либӧ йӧз муысь локтысьяс пӧвстысь кӧ кодкӧ ваяс сотан вись либӧ мукӧд вись, но оз вайӧд пемӧссӧ вежа чом пыранін дорӧ, медым вайны Господьлы вись пыдди, сэки тайӧ мортсӧ лоӧ бырӧдӧма аслас войтыр пӧвстысь».
«Израиль войтыр пӧвстысь либӧ йӧз муысь локтысьяс пӧвстысь кӧ кодкӧ сёяс вир, Ме паныд сувта сылы да бырӧда сійӧс войтыр пӧвстысь, ӧд быд ловъя олысьлӧн олӧмыс сылӧн вирас. Мыжнытӧ вештӧм могысь Ме тшӧкті тіянлы вир вайны висьпуктанін вылӧ, ӧд вирын олӧм, и сійӧ вештӧ мыжнытӧ.
Та вӧсна Ме ӧлӧді Израиль пиянӧс, медым на пӧвстысь либӧ йӧз муысь локтысьяс пӧвстысь некод эз сёй вир.
Израиль пиян пӧвстысь либӧ йӧз муысь локтысьяс пӧвстысь кӧ кодкӧ кыяс пемӧсӧс либӧ лэбачӧс, кутшӧмӧс позьӧ сёйны, кыйдӧсыслысь вирсӧ лэдзӧм бӧрын мед тыртас муӧн. Быд ловъя олысьлӧн олӧмыс сылӧн вирас.
Ме ӧлӧді Израиль пиянӧс, медым эз сёйны некутшӧм вир, ӧд быд ловъя олысьлӧн олӧмыс сылӧн вирас. Вир сёйысьӧс лоӧ бырӧдӧма.
Вужвойтыр пӧвстысь либӧ йӧз муысь локтысьяс пӧвстысь кӧ кодкӧ сёяс шой либӧ косявлӧм пемӧслысь яй, сійӧ мед мыськалас паськӧмсӧ да ачыс тшӧтш мыссяс. Рытӧдзыс сійӧ лоӧ пеж, а сэсся лоӧ сӧстӧм.
А оз кӧ мыськав ассьыс паськӧмсӧ да оз мыссьы, лоӧ мыжа».
Господь шуис Мӧисейлы:
«Висьтав Израиль пиянлы: Ме — Господь, тіян Енныд.
Энӧ вӧчӧй Египет муын олысьяс моз, кодъяс пӧвстын ті олінныд. Ме нуӧда тіянӧс Ханаан муӧ, но энӧ вӧчӧй сэні олысьяс моз, энӧ олӧй налӧн оласног серти.
Олӧй Менам индӧд-тшӧктӧмъяс серти.
Ме — Господь, тіян Енныд.
Кутчысьӧй Менам индӧд-тшӧктӧмъясӧ. На серти олысь наӧн пондас овны.
Ме — Господь [тіян Енныд].
Тіян пӧвстысь некод мед оз узьлы рӧдвуж аньыскӧд.
Ме — Господь.
Батьтӧ эн янӧд, мамыдкӧд эн узьлы гӧтыркӧд моз.
Батьтӧ эн янӧд, сылӧн гӧтыркӧд эн узьлы.
Эн узьлы чойыдкӧд, батьыдлӧн нылыскӧд либӧ мамыдлӧн нылыскӧд, чужӧма-ӧ сійӧ ӧти керкаын тэкӧд либӧ абу.
Эн узьлы пиыдлӧн либӧ нылыдлӧн нывкӧд, медым асьтӧ эн янӧд.
Эн узьлы батьыд гӧтырлӧн нывкӧд, коді чужис тэнад батьсянь, ӧд сійӧ тэнад чой.
Эн узьлы батьыдлӧн чойыскӧд, ӧд сійӧ батьыдлӧн рӧдвуж.
Эн узьлы мамыдлӧн чойыскӧд, ӧд сійӧ мамыдлӧн рӧдвуж.
Батьыдлысь воксӧ эн янӧд, сылӧн гӧтыркӧд эн узьлы, ӧд сійӧ тэнад тьӧтка.
Эн узьлы моньыдкӧд, ӧд сійӧ пиыдлӧн гӧтыр.
Воктӧ эн янӧд, вокыдлӧн гӧтырыскӧд эн узьлы.
Узян кӧ кутшӧмкӧ анькӧд, эн узьлы сылӧн нывкӧд, пиыслӧн нывкӧд либӧ нылыслӧн нывкӧд, ӧд найӧ аньыдлӧн рӧдысь.
Тадзи вӧчӧмыс — зывӧк.
Ловъя гӧтырыдлысь чойсӧ эн босьт гӧтырӧ да эн узьлы сыкӧд.
Эн узьлы гӧтырыдкӧд сылӧн тӧлысся дырйиыс, ӧд сэки сійӧ абу сӧстӧм.
Мӧдлӧн гӧтыркӧд эн узьлы, эн пежав асьтӧ.
Ныв-питӧ эн вай вись пыдди Молок идоллы, эн янӧд аслад Енлысь нимсӧ.
Ме — Господь.
Айловкӧд эн узьлы анькӧд моз. Тадзи вӧчӧмыс — зывӧк.
Пемӧскӧд эн узьлы анькӧд моз, эн пежав асьтӧ.
Ань мед оз узьлы пемӧскӧд айловкӧд моз. Тадзи вӧчӧмыс — зывӧк.
Тадзи вӧчӧмнаныд асьнытӧ энӧ пежалӧй, ӧд тадзи вӧчигӧн асьнысӧ пежалісны войтыръяс, кодъясӧс Ме вӧтла тіян водзысь.
На вӧсна муыс пежасис. Ме мыжді мусӧ сэні олысьяслӧн мыжныс вӧсна, и муыс быликтіс найӧс.
Но ті олӧй Менам индӧд-тшӧктӧмъяс серти, энӧ вӧчӧй тайӧ зывӧкторъяссӧ, ни вужвойтыр, ни йӧз муысь локтысьяс. Став тайӧ зывӧкторсӧ вӧчисны тіянӧдз олысьяс. Та вӧсна муыс лои пеж.
Энӧ пежалӧй мусӧ, ӧд и тіянӧс муыс вермас быликтыны, кыдзи быликтіс тіянӧдз сэні олысь войтыръясӧс.
Татшӧм зывӧкторсӧ вӧчысьӧс лоӧ бырӧдӧма аслас войтыр пӧвстысь.
Олӧй Менам тшӧктӧмъяс серти, а энӧ тіянӧдз олысьяслӧн зывӧк оласног серти. Энӧ пежалӧй асьнытӧ налӧн кодь оласногӧн.
Ме — Господь, тіян Енныд».
Господь шуис Мӧисейлы:
«Висьтав став Израиль войтырлы: лоӧй вежаӧсь, ӧд Ме вежа. Ме — Господь, тіян Енныд.
Пыдди пуктӧй бать-мамнытӧ. Видзӧй Менсьым шойччан лунӧс.
Ме — Господь, тіян Енныд.
Энӧ юрбитӧй идолъяслы, энӧ сывдӧй-вӧчӧй аслыныд бӧлбанъясӧс.
Ме — Господь, тіян Енныд.
Господьлы бурасян висьнытӧ вайигӧн видзӧдӧй, медым вӧлінныд шогманаӧсь.
Тіянлы колӧ сёйны вайӧм висьнытӧ сійӧ жӧ лунӧ, но коляс кӧ мыйкӧ, сійӧс позьӧ сёйны мӧд луннас на. Коймӧд лунся яйсӧ колӧ сотны биын.
Сёянныд кӧ сійӧс коймӧд луннас, висьныд оз ло шогмана, тайӧ — пеж яй.
Коді сёяс татшӧм яйсӧ, лоӧ мыжа, ӧд Господьлысь вежаторсӧ пежаліс. Сійӧс лоӧ бырӧдӧма аслас войтыр пӧвстысь.
Няньнытӧ вундігӧн му бокъяссӧ кольӧй вундытӧг. Вундӧм дырйи усьласьӧм шепсӧ энӧ чукӧртӧй. Виноград вотӧснытӧ энӧ кушӧдз ӧктӧй и му вылас гылалӧмасӧ энӧ босьталӧй.
Гӧльяслы да йӧз муысь локтысьяслы чукӧртны кольӧй.
Ме — Господь, тіян Енныд.
Энӧ гусясьӧй да энӧ пӧръясьӧй, ӧта-мӧднытӧ энӧ ылӧдлӧй.
Менам нимӧн пӧръясьӧмӧн энӧ сетӧй кывнытӧ, медым энӧ янӧдӧй Менсьым нимӧс.
Ме — Господь, тіян Енныд.
Некодӧс эн дзескӧд, некодлысь эн мырддяв.
Медалӧм* мортлысь удждонсӧ ас дінад асылӧдзыс эн кут.
Пельтӧм морт вылын эн серав, синтӧмлы кок улас эн пукты крукасянтор.
Аслад [Господь] Енмысь пов.
Ме — Господь [тіян Енныд].
Ёрд вылын ло веськыд.
Мыжды веськыда, эн видзӧд чужӧм вылӧ. Гӧль и озыр морт мед лоӧны тэныд ӧткодьӧсь.
Аслад войтыр пӧвстын ылӧг сёрни эн паськӧд. Эн вешйы бокӧ, тэнсьыд матыссатӧ кӧ кодкӧ мыждӧ кулӧм вылӧ.
Ме — Господь [тіян Енныд].
Эн мустӧмт матыссатӧ, а ӧлӧд сійӧс, медым сыкӧд ӧтвылысь мыж улас эн шед.
Водзӧс эн перйы да эн скӧрав аслад войтырысь морт вылӧ, но радейт матыссатӧ асьтӧ моз.
Ме — Господь [тіян Енныд].
Менам тшӧктӧмъяс серти ов.
Пемӧстӧ мӧд сикас пемӧскӧд эн нӧйччӧд.
Мутӧ кык сикас кӧйдысӧн эн кӧдз.
Кык сикас шӧртысь — вурунысь да шабдіысь — сорлалӧмӧн кыӧм кӧлуй эн пасьтав.
Узяс кӧ кодкӧ кесйӧг анькӧд, кодӧс кӧсйысьӧма мӧдлы, но сыысь абу на вештысьӧма либӧ сійӧс абу на лэдзӧма вӧля вылӧ, сэки найӧс кыкнаннысӧ колӧ мыждыны, но оз ков вины, ӧд аньыс кесйӧг туйын на.
Тайӧ айловыс мед вайӧдас Господьлы мыж вештан вись пыдди межӧс вежа чом пыранін дорӧ.
Поп мед ваяс межсӧ мыж вештан вись пыдди. Тадзи вештас мортлысь мыжсӧ Господь водзын, и сійӧс лоӧ прӧститӧма.
Кор воанныд асланыд муӧ [мый Господь Ен сетас тіянлы] да пуктанныд кутшӧмкӧ вотӧс вайысь пу, куим во чӧж сылысь вотӧссӧ лыддьӧй пежӧн, энӧ сёйӧй сійӧс.
Нёльӧд вонас став вотӧссӧ вайӧй Господьлы, тайӧ лоӧ гаждырся вежа сетӧмторйӧн.
Витӧд вонас верманныд сёйны вотӧссӧ. Тадзи ті кутанныд чукӧртны унасьыс-уна вотӧс.
Ме — Господь, тіян Енныд.
Энӧ сёйӧй яйсӧ вирнас.
Энӧ тунасьӧй, энӧ кимӧститчӧй.
Кӧсичадор юрсинытӧ энӧ шырӧй. Тоштӧ энӧ тшӧтшӧдӧй.
Кулӧм морт вӧсна энӧ вундалӧй вир-яйнытӧ, кучик выланыд энӧ гижасьӧй-серпасасьӧй.
Ме — Господь [тіян Енныд].
Эн янӧд ассьыд нывтӧ, эн лэдз сылы кырсавны, медым муыс эз пежась да эз тыр зывӧкнас.
Видзӧй Менсьым шойччан лунӧс, пыдди пуктӧй Менсьым вежаинӧс.
Ме — Господь.
Кулӧмаӧс корысь да туналысь дінӧ энӧ шыасьӧй, насянь асьнытӧ энӧ пежалӧй.
Ме — Господь, тіян Енныд.
Пыдди пукты пӧрысь мортӧс, чеччы сы водзын. Пов аслад [Господь] Енмысь.
Ме — Господь [тіян Енныд].
Йӧз муысь локтысьӧс энӧ дзескӧдӧй.
Йӧз муысь локтысьясӧс, кодъяс олӧны тіян пӧвстын, лыддьӧй вужвойтырӧн.
Радейтӧй найӧс асьнытӧ моз.
Ӧд Египетын ті асьныд вӧлінныд локтысь войтырӧн.
Ме — Господь, тіян Енныд.
Ёрд вылын ло веськыд. Мурталігӧн-веситігӧн тшӧтш ло веськыд.
Вескиыд мед стӧча веситас. Гираыд, ефаыд да гиныд мед оз пӧрйӧдлыны.
Ме — Господь, тіян Енныд. Ме петкӧді тіянӧс Египет муысь.
Кутчысьӧй Менам индӧд-тшӧктӧмъясӧ, олӧй на серти.
Ме — Господь [тіян Енныд]».
Господь шуис Мӧисейлы:
«Висьтав Израиль пиянлы: мед виасны мортӧс, коді сетас ныв-писӧ Молок идоллы. Израиль войтыр мед изъялас тайӧ мортсӧ, Израиль войтырысь-ӧ сійӧ либӧ йӧз муысь локтысь.
Тайӧ мортыслы Ме паныд сувта, бырӧда сійӧс войтыр пӧвстысь сы понда, мый ассьыс кагасӧ Молок идоллы сетіс. Тайӧн сійӧ Менсьым вежаинӧс пежаліс да Менсьым вежа нимӧс янӧдіс.
Израиль войтыр кӧ тӧдӧ, мый кодкӧ ассьыс писӧ либӧ нывсӧ Молок идоллы сетіс, но оз ви тадзи вӧчысьӧс, сэки тадзи вӧчысьлы да сылӧн рӧдвужлы Ме паныд сувта. Ме бырӧда войтыр пӧвстысь быдӧнӧс, коді кырсалысь ань моз сетчӧ Молок идоллы.
Коді шыасяс кулӧмаӧс корысь либӧ туналысь дінӧ да кырсалысь ань моз мунас на бӧрся, сылы Ме паныд сувта да бырӧда сійӧс войтыр пӧвстысь.
Вежӧдӧй-сӧстӧммӧдӧй асьнытӧ, лоӧй вежаӧсь, ӧд Ме — Господь, тіян Енныд. [Ме вежа.]
Олӧй Менам тшӧктӧмъяс серти, ӧд Ме — Господь, тіянӧс Вежӧдысь.
Коді лёкӧдас бать-мамсӧ, сійӧс мед виасны.
Бать-мамсӧ лёкӧдысь ачыс лоӧ мыжа аслас кулӧмысь.
Узяс кӧ кодкӧ мӧдлӧн гӧтыркӧд, найӧ кыкнанныс гозъякост олӧм пежалӧны. Найӧс колӧ вины.
Коді узяс батьыслӧн гӧтырыскӧд, сійӧ янӧдӧ батьсӧ. Найӧс кыкнаннысӧ колӧ вины, найӧ асьныс лоӧны мыжаӧсь асланыс кулӧмысь.
Узяс кӧ кодкӧ моньыскӧд, найӧс кыкнаннысӧ колӧ вины. Найӧ зывӧктор вӧчӧны, и найӧ асьныс лоӧны мыжаӧсь асланыс кулӧмысь.
Айлов, коді айловкӧд узяс анькӧд моз, зывӧктор вӧчӧ. Найӧс кыкнаннысӧ колӧ вины, найӧ асьныс лоӧны мыжаӧсь асланыс кулӧмысь.
Коді гӧтырӧ босьтас аньӧс да сылысь мамсӧ, сійӧ зывӧктор вӧчӧ.
Найӧс куимнаннысӧ колӧ биын сотны, медым тіян пӧвстын эз вӧв пеж вӧчӧмыс.
Айловӧс пемӧскӧд узьӧмысь колӧ вины, пемӧссӧ тшӧтш колӧ вины.
Аньӧс пемӧскӧд узьӧмысь колӧ вины, пемӧссӧ тшӧтш колӧ вины. Мед найӧс виасны, найӧ асьныс лоӧны мыжаӧсь асланыс кулӧмысь.
Босьтас кӧ кодкӧ гӧтырӧ чойсӧ, батьыслысь нывсӧ либӧ мамыслысь нывсӧ да узяс сыкӧд, тайӧ яндысьтӧмтор. Найӧс мед бырӧдасны войтыр пӧвстысь.
Чойыскӧд узьӧмысь мортыс лоӧ мыжа.
Айлов кӧ узяс анькӧд сылӧн тӧлысся дырйиыс да аддзылас сылысь вир мунӧмсӧ, и тӧлысся дырйис кӧ аньыс ачыс лэдзас айловӧс ас дінас, сэки кыкнаннысӧ мед бырӧдасны войтыр пӧвстысь.
Мамыдлӧн чойкӧд да батьыдлӧн чойкӧд эн узьлы. Коді тадзи вӧчӧ, сійӧ ассьыс рӧдвужсӧ янӧдӧ. Найӧ кыкнанныс лоӧны мыжаӧсь.
Коді узяс тьӧткаыскӧд, сійӧ дядьсӧ янӧдӧ.
Найӧ кыкнанныс лоӧны мыжаӧсь да куласны ныв-питӧг.
Коді гӧтырӧ босьтас вокыслысь гӧтырсӧ, сійӧ пеж вӧчӧ, ӧд воксӧ янӧдӧ. Налӧн оз ло ныв-пиыс.
Кутчысьӧй Менам индӧд-тшӧктӧмъясӧ, олӧй на серти, сэки муыс, кытчӧ тіянӧс нуӧда, оз быликты тіянӧс.
Энӧ олӧй войтыръяс моз, кодъясӧс Ме вӧтла тіян водзысь.
Найӧ вӧчӧны став тайӧ зывӧкторсӧ, та вӧсна Ме мустӧмта найӧс. А тіянлы Ме шуи, мый ті босьтанныд налысь мусӧ. Ме сета тіянлы му, кӧні визувтӧ йӧв да ма.
Ме — Господь, тіян Енныд. Ме торйӧді тіянӧс мукӧд войтыръясысь.
Ті тшӧтш торйӧдӧй сӧстӧм пемӧсӧс пеж пемӧсысь, сӧстӧм лэбачӧс пеж лэбачысь. Энӧ пежалӧй асьнытӧ сэтшӧм пемӧс-лэбач да му вывті котралысь-веглясьысь вӧсна, кутшӧмӧс Ме шуи пежӧн.
Лоӧй вежаӧсь Ме водзын, ӧд Ме вежа. Ме — Господь [тіян Енныд]. Ме торйӧді тіянӧс мукӧд войтыръясысь, медым ті вӧлінныд Менам.
Кулӧмаӧс корысьӧс да тунасьысьӧс колӧ вины, ань-ӧ сійӧ либӧ айлов. Сійӧс мед изъяласны, сійӧ ачыс лоӧ мыжа аслас кулӧмысь».
Господь шуис Мӧисейлы: «Висьтав попъяслы, Аарон пиянлы, медым аслас рӧдвужысь кулӧм морт дінӧ инмӧдчӧмӧн эз пежавны асьнысӧ.
Поплы асьсӧ пежавны позьӧ сӧмын бать-мамыс вӧсна, ныв-пиыс вӧсна, вокыс вӧсна да чойыс вӧсна, коді оліс сыкӧд и эз вӧв верӧс сайын. Сӧмын на вӧсна вермас асьсӧ пежавны.
Но мукӧд рӧдвуж вӧсна асьсӧ мед оз пежав.
Поп мед юрсисӧ оз шыр, тошсӧ оз тшӧтшӧд, вир-яйсӧ оз вундав.
Аслас Ен водзын поп мед лоас вежа. Мед оз янӧд аслас Енлысь нимсӧ, ӧд сійӧ вись вайӧ Господьлы, нянь — аслас Енлы. Та вӧсна сылы колӧ лоны вежаӧн.
Поп мед оз босьт гӧтырӧ кырсалысь аньӧс, айловкӧд узьлӧм либӧ верӧсӧн эновтӧм аньӧс, ӧд сылы колӧ лоны аслас [Господь] Ен водзын вежаӧн.
Вежавидзӧмӧн пыдди пуктӧй попӧс, ӧд сійӧ вись вайӧ [Господьлы] тіян Енлы. Поп мед лоас тіянлы вежа, ӧд Ме вежа. Ме — Господь, тіянӧс Вежӧдысь.
Поплӧн нылыс кӧ пежалас асьсӧ кырсалӧмӧн, сійӧ янӧдас батьсӧ.
Нывсӧ колӧ сотны.
Вокъясыс пӧвстысь медыджыд попӧ пуктӧм морт, кодлы юр вылас кисьтӧма мавтыштан вый да коді новлӧ вежа паськӧм, мед оз ветлӧдлы юрсӧ тупкытӧг да ас вывсьыс паськӧмсӧ мед оз косяв.*
Сылы оз позь матыстчыны кулӧм морт дінӧ, весиг кӧ тайӧ сылӧн батьыс либӧ мамыс — асьсӧ сылы пежавны оз позь.
Кулӧм морт вӧсна мед оз пет вежаинысь, медым эз пежав аслас Енлысь вежаинсӧ, ӧд сійӧс вежӧдӧма Енлӧн мавтыштан выйӧн.
Ме — Господь.
Сійӧ мед гӧтрасьӧ [ас войтырысь] ныв вылӧ.
Дӧваӧс либӧ верӧсӧн эновтӧм аньӧс, айловкӧд узьлӧм либӧ кырсалысь аньӧс сылы оз позь босьтны гӧтырӧ.
Сылы колӧ босьтны ас войтырсьыс нылӧс, медым эз пежав ассьыс водзӧ чужысьяссӧ. Ме — Господь [Ен], сійӧс Вежӧдысь».
Господь шуис Мӧисейлы:
«Висьтав Ааронлы, мый сысянь чужысьяс пӧвстысь морт, кодлӧн вир-яяс эм тырмытӧмтор, мед оз матыстчы вись вайны аслас Енлы.
Оз вермы вись вайны морт, кодлӧн вир-яяс эм тырмытӧмтор, сійӧ кӧ синтӧм, чотысь, урӧс чужӧмбана, чегӧм ки-кока, гӧрба, висьлӧс, чусмӧм синма, лӧмӧсь, карсӧсь либӧ тобоньыс кӧ сылӧн доймӧма.
Аарон попсянь чужысь, кодлӧн вир-яяс эм тырмытӧмтор, мед оз матыстчы вись вайны Господьлы.
Вир-яйын тырмытӧмтор вӧсна сылы оз позь матыстчыны, медым вись вайны аслас Енлы.
Но сылы позьӧ сёйны Енлы вись пыдди вайӧм вежатор да вежасьыс-вежатор.
Но аслас тырмытӧмтор вӧсна сылы оз позь пырны Вежаинӧ либӧ матыстчыны висьпуктанін дорӧ, медым эз пежав Менсьым вежаинӧс. Ме — Господь, попъясӧс Вежӧдысь».
Мӧисей висьталіс тайӧс Ааронлы, сылӧн пияныслы да став Израиль пиянлы.
Господь шуис Мӧисейлы:
«Висьтав Ааронлы да сылӧн пияныслы, медым бура тӧждысясны вежа вайӧмторъяс вӧсна, мый Израиль пиян торйӧдӧны Меным. Менсьым вежа нимӧс мед оз янӧдны.
Ме — Господь.
Висьтав налы, мый быдӧнӧс, коді насянь чужысьяс пӧвстысь пежӧн матыстчас Израиль пиянлӧн вежа вайӧмторъяс дінӧ, лоӧ ӧтдортӧма Ме дінысь.
Ме — Господь [тіян Енныд].
Ааронсянь чужысьясысь кӧ кодкӧ висьӧ проказаӧн либӧ лёквиялӧмӧн, сылы оз позь сёйны вежа вайӧмторъяс, кытчӧдз оз ло сӧстӧм.
Айлов, кодлӧн кӧйдысыс петас либӧ коді инмӧдчылас шойсянь пежасьӧмтор дінӧ, пеж котралысь-веглясьысь дінӧ либӧ морт дінӧ, кодсянь пеж лоӧ, кӧть кутшӧм пежтор тайӧ эз вӧв, рытӧдзыс лоӧ пеж. Вежа вайӧмтор сійӧ мед оз сёй, кытчӧдз ставнас оз мыссьы.
Шонді лэччӧм бӧрын да сӧстӧммӧдчӧм бӧрын сійӧ вермас сёйны вежа вайӧмторсӧ, ӧд тайӧ сылӧн сёяныс.
Шой да косявлӧм пемӧсӧс сылы оз позь сёйны, медым насянь эз пежав асьсӧ.
Ме — Господь.
Попъяс мед кутчысясны Менам тшӧктӧмъясӧ. А оз кӧ, найӧ лоӧны мыжаӧсь да куласны.
Ме — Господь [Ен], найӧс Вежӧдысь.
Бокыса мортлы вежа вайӧмторъяс сёйны оз позь.
Поп ордӧ овмӧдчӧм либӧ медалӧм морт мед оз сёйны вежа вайӧмторъяс.
Но поп кӧ ньӧбас аслыс кесйӧгӧс, сійӧ вермас сёйны вежа вайӧмторъяс.
Поп ордын чужысь тшӧтш вермас сёйны сійӧ жӧ, мый сёйӧ поп.
Поплӧн нылыс кӧ петас верӧс сайӧ, но оз поп сайӧ, нывлы оз нин позь сёйны вежа вайӧмторъяс.
Сійӧ кӧ коляс дӧваӧн либӧ верӧсыс эновтас сійӧс, и ныв-пиыс сылӧн абу, и сійӧ кӧ бӧр овмӧдчас чужан керкаас, сэки мед сёяс сійӧ жӧ, мый сёйӧ батьыс.
Но бокыса морт мед оз сёй вежа вайӧмторъяс.
Коді тӧдлытӧг сёяс вежа вайӧмторсӧ, сійӧ мед мынтас поплы вайӧмторлысь донсӧ сы дінӧ витӧд пай содтӧмӧн.
Попъяс асьныс мед оз пежавны вежа вайӧмторъяссӧ, мый сиӧны Господьлы Израиль пиян. Попъяс мед оз торкны вежа вайӧмторъяс сёйӧм йылысь тшӧктӧмсӧ, медым Израиль войтыр эз мыжмы, ӧд Ме — Господь, вайӧмторъяссӧ Вежӧдысь».
Господь шуис Мӧисейлы:
«Висьтав Ааронлы, сылӧн пияныслы да став Израиль пиянлы тайӧ тшӧктӧмсӧ. Коді Израиль войтыр пӧвстысь либӧ йӧз муысь локтысьяс пӧвстысь кӧсъяс вайны Господьлы кыв сетан вись либӧ ас кӧсйӧм серти ваян вись, медым сотны сійӧс, мед ваяс дзоньвидза ӧшкӧс, межӧс либӧ ай кӧзаӧс. Сэки лоанныд Господьлы шогманаӧсь.
Энӧ вайӧй Господьлы вись пыдди пемӧсӧс, кодлӧн эм кутшӧмкӧ тырмытӧмтор. А ваянныд кӧ, ті онӧ лоӧй шогманаӧсь Господьлы.
Коді кутас вайны Господьлы бурасян вись ӧш-мӧс либӧ ыж-кӧза пӧвстысь, лоӧ-ӧ тайӧ висьыс кыв сетан вись либӧ ас кӧсйӧм серти ваян вись [либӧ гаждырся вись], сійӧ мед ваяс дзоньвидза пемӧсӧс, кодлӧн абу некутшӧм тырмытӧмтор. Татшӧм висьыс лоӧ шогмана Господьлы.
Энӧ вайӧй Господьлы вись пыдди синтӧм, чегӧм кока, доймӧм, висьлӧс, йӧгӧсь либӧ лӧмӧсь пемӧсӧс. Татшӧмӧс висьпуктанін вылын Господьлы энӧ сотӧй.
Пемӧсӧс, кодлӧн кокъясыс туша сертиыс вывті кузьӧсь либӧ дженьыдӧсь, ас кӧсйӧм серти ваян вись пыдди позьӧ вайны, а кыв сетан вись пыдди кӧ татшӧмсӧ ваянныд, висьныд оз ло шогмана Господьлы.
Пемӧсӧс, кодлӧн тобоньыс доймӧма, лямалӧма, орӧма либӧ вундӧма, Господьлы вись пыдди энӧ вайӧй.
Асланыд муын татшӧмторсӧ энӧ вӧчӧй. Доймӧм пемӧсӧс либӧ пемӧсӧс, кодлӧн эм тырмытӧмтор, мукӧд войтырлысь энӧ ньӧбӧй, медым вись пыдди вайны асланыд Енлы. А ваянныд кӧ, ті онӧ лоӧй шогманаӧсь Господьлы».
Господь шуис Мӧисейлы:
«Куканьӧс, баляпиӧс да кӧзапиӧс чужӧм бӧрас видзӧй мам дорас сизим лун, а кӧкъямысӧд лунсяньыс найӧс позьӧ вайны Господьлы вись пыдди.
Мӧскӧс, ыжӧс либӧ кӧзаӧс ӧти лунӧ пияныскӧд энӧ начкӧй.
Кор ваянныд Господьлы аттьӧалана вись, вайӧй сійӧс сідзи, медым ті вӧлінныд шогманаӧсь Господьлы.
Вись пыдди вайӧм пемӧслысь яйсӧ сійӧ жӧ лунӧ сёйӧй, асылӧдзыс энӧ кольӧй.
Ме — Господь.
Кутчысьӧй Менам тшӧктӧмъясӧ да олӧй на серти.
Ме — Господь.
Энӧ янӧдӧй Менсьым вежа нимӧс, медым Израиль пиян пӧвстын Ме вӧлі вежавидзана.
Ме — Господь, тіянӧс Вежӧдысь. Ме петкӧді тіянӧс Египетысь, медым лоны тіян Енмӧн.
Ме — Господь».
Господь шуис Мӧисейлы:
«Висьтав Израиль пиянлы, кутшӧм лунъяс налы колӧ торйӧдны Господьлы. Менам вежа гажӧдчан лунъясӧ налӧн мед лоӧ вежа чукӧртчӧм.
Квайт лун уджалӧй, а сизимӧд луныс мед лоӧ шойччан лун. Сэки тіян мед лоас вежа чукӧртчӧм, некутшӧм удж энӧ вӧчӧй.
Тайӧ луныс мед лоӧ Господьлы сиӧм шойччан лун быдлаын, кӧні кутанныд овны».
«Господьлы сиӧм гажӧдчан лунъясӧ тіян мед лоӧ вежа чукӧртчӧм.
Медводдза тӧлысьлӧн дас нёльӧд лун рытсянь мӧд рытӧдз Господьлы сиӧм Ыджыд лун, а дас витӧд лунсянь Шомтӧм нянь сёян лунъяс — Господьлы сиӧм гаж.
Сэки сизим лун чӧж сёйӧй шомтӧм нянь.
Медводдза гажӧдчан лунӧ тіян мед лоӧ вежа чукӧртчӧм.
Некутшӧм удж сэки энӧ вӧчӧй.
Сизим лун чӧж вайӧй Господьлы висьяс, и сизимӧд луннас тіян мед лоӧ вежа чукӧртчӧм.
Некутшӧм удж сэки энӧ вӧчӧй».
Господь тшӧктіс Мӧисейлы висьтавны Израиль пиянлы: 
«Кор ті овмӧдчанныд сійӧ муас, мый Ме сета тіянлы, да вунданныд сэні нянь, вайӧй медводдза кольтанытӧ поплы. Сизимлунся вежа гажлӧн мӧд луннас поп мед ваяс медводдза кольтасӧ Господь водзын пыркӧдан вись пыдди, медым ті вӧлінныд шогманаӧсь Господьлы.
Кольта ваян лунӧ вайӧй Господьлы сотан вись пыдди дзоньвидза арӧса баляӧс. Сыкӧд тшӧтш нянь вись пыдди вайӧй олив выйӧн гудралӧм шобді пызь — ефа мында пызьсӧ юкӧй дас пельӧ и сэтысь вайӧй кыксӧ. Тайӧ лоӧ Господьлы чӧскыда ӧвтан вись. Кисьтан вись пыдди вайӧй вина — гинлысь нёльӧд пайсӧ.
Асланыд Енлы висьнытӧ ваян лунӧдз энӧ сёйӧй выль пызьысь пӧжалӧм нянь, пражитӧм ни уль тусь. Тайӧ тшӧктӧмыс тіянлы нэмъяс кежлӧ чужысьяссянь чужысьясӧдз быдлаын, кӧні ті кутанныд овны».
«Вежа гажӧдчан лунсянь, кор пыркӧдан вись пыдди ваянныд медводдза кольта, лыддьӧй сизим вежон. Сизимӧд шойччан лун бӧрын, ветымынӧд лунӧ, вайӧй нянь вись пыдди Господьлы медводдза вундӧм няньнытӧ.
Быдласянь, кӧні ті оланныд, пыркӧдан вись пыдди вайӧй кык нянь. Няньсӧ кӧтӧй шобді пызьысь — ефа мында пызьсӧ юкӧй дас пельӧ и сэтысь босьтӧй кыксӧ. Шоммӧдӧм бӧрын пӧжалӧй няньсӧ. Тайӧ тіян медводдза быдтасысь Господьлы козин.
Няньыскӧд тшӧтш вайӧй Господьлы сотан вись пыдди арӧса сизим дзоньвидза баляӧс, ӧшкӧс да [дзоньвидза] кык межӧс, нӧшта вайӧй нянь вись да вина вись, мый колӧ вайны сотан виськӧд. Ставыс тайӧ лоӧ Господьлы чӧскыда ӧвтан вись.
[Медводдза вундӧм нянькӧд] тшӧтш вайӧй мыжысь вись пыдди ай кӧзаӧс да бурасян вись пыдди арӧса кык баляӧс.
Поп мед ваяс кык балясӧ медводдза вундӧм нянькӧд Господь водзын пыркӧдан вись пыдди. Тайӧ Господьлы сиӧм вежатор, мый вичмӧ поплы [коді кесъялӧ вись вайигӧн].
Сійӧ лунӧ тіян мед лоӧ вежа чукӧртчӧм. Некутшӧм удж сэки энӧ вӧчӧй. Тайӧ тшӧктӧмыс тіянлы нэмъяс кежлӧ чужысьяссянь чужысьясӧдз быдлаын, кӧні ті кутанныд овны.
Няньнытӧ вундігӧн му бокъяссӧ кольӧй вундытӧг.
Вундӧм дырйи усьласьӧм шепсӧ энӧ чукӧртӧй. Гӧльяслы да йӧз муысь локтысьяслы чукӧртны кольӧй.
Ме — Господь, тіян Енныд».
Господь шуис Мӧисейлы:
«Висьтав Израиль пиянлы: сизимӧд тӧлысьлӧн медводдза луныс лоӧ тіянлы шойччан лун. Сэки буксӧй буксанӧн, медым юӧртны, мый тіян лоас вежа чукӧртчӧм.
Господьлы вись вайӧмысь ӧтдор некутшӧм удж энӧ вӧчӧй».
Господь шуис Мӧисейлы:
«Сизимӧд тӧлысьлӧн дасӧд луныс — Мыж вештан лун. Сэки тіян мед лоас вежа чукӧртчӧм.
Раммӧдчӧй-видзалӧй да вись вайӧй Господьлы.
Некутшӧм удж энӧ вӧчӧй, ӧд тайӧ луныс — Мыж вештан лун, кор мыжнытӧ вештасны Господь Енныд водзын.
Коді оз раммӧдчы-видзав тайӧ лунӧ, сійӧс лоӧ бырӧдӧма аслас войтыр пӧвстысь.
Коді кутас уджавны тайӧ лунӧ, сійӧс Ме бырӧда войтыр пӧвстысь.
Энӧ вӧчӧй сэки некутшӧм удж. Тайӧ тшӧктӧмыс тіянлы нэмъяс кежлӧ чужысьяссянь чужысьясӧдз быдлаын, кӧні ті кутанныд овны.
Тайӧ мед лоӧ тіянлы шойччан лун. Тайӧ лунӧ тіянлы колӧ раммӧдчыны-видзавны.
Тӧлысьлӧн ӧкмысӧд лун рытсяньыс дасӧд лун рытӧдзыс тіян мед лоӧ шойччӧг».
Господь шуис Мӧисейлы:
«Висьтав Израиль пиянлы: сизимӧд тӧлысьлӧн дас витӧд лунсянь тіян лоӧны Чом вӧчан лунъяс — Господьлы сиӧм сизим лун.
Гажлӧн медводдза луннас тіян мед лоӧ вежа чукӧртчӧм. Некутшӧм удж сэки энӧ вӧчӧй.
Сизим лун чӧж вайӧй Господьлы вись, а кӧкъямысӧд луннас тіян мед лоӧ вежа чукӧртчӧм, сэки тшӧтш вайӧй Господьлы вись. Некутшӧм удж энӧ вӧчӧй.
Лыддьӧдлӧм лунъясыс — Господьлы сиӧм гажӧдчан лунъяс. Сэки тіян мед лоас вежа чукӧртчӧм, медым вайны Господьлы висьяс: сотан вись, нянь вись, начкан вись да вина вись. Быд вись колӧ вайны индӧм лунӧ. Таысь ӧтдор тіянлы колӧ чукӧртчыны Господьлы сиӧм шойччан лунъясӧ да вайны Господьлы козинъяс, кыв сетан висьяс да ас кӧсйӧм серти ваян висьяс.
Сизимӧд тӧлысьлӧн дас витӧд лунсянь, быдтаснытӧ чукӧртӧм бӧрын, тіян мед лоӧ Господьлы сиӧм гаж. Гажӧдчӧй сизим лун чӧж. Гажлӧн медводдза да кӧкъямысӧд лунъясӧ тіян мед лоӧ шойччӧг.
Гажлӧн медводдза луннас босьтӧй мича пу вожъяс, пальма вожъяс да паськыд коръя пу вожъяс, юдорса бадьяс да гажӧдчӧй Господь Енныд водзын сизим лун чӧж.
Господьлы сиӧм тайӧ гажсӧ пасйӧй воысь-во сизим лун чӧж. Тайӧ тшӧктӧмыс тіянлы нэмъяс кежлӧ чужысьяссянь чужысьясӧдз.
Гажӧдчӧй сизимӧд тӧлысьнас.
Олӧй сизим лун чӧж чомъясын.
Израиль муын олысь став вужвойтырыс тайӧ лунъясӧ мед оласны чомъясын. Тіянсянь чужысьяс та пыр мед тӧдмаласны, мый Ме овмӧді Израиль пиянӧс чомъясӧ, кор петкӧді найӧс Египет муысь.
Ме — Господь, тіян Енныд».
Тадзи Мӧисей висьталіс Израиль пиянлы Господьлы сиӧм гажӧдчан лунъяс йылысь.
Господь шуис Мӧисейлы:
«Тшӧкты Израиль пиянлы вайны тэныд оливысь пычкӧм сӧстӧм вый, медым би дозъясысь выйыс эз бырлы.
Ааронлы [да сылӧн пияныслы] рытсяньыс асылӧдзыс колӧ видзӧдны би дозъяс бӧрся. Биыс мед ӧзъялас Господь водзын вежа чомйын, ӧшӧдӧм дӧра водзын, мый сайын сулалӧ Йитӧд куд. Тайӧ тшӧктӧмыс лоӧ тіянлы нэмъяс кежлӧ чужысьяссянь чужысьясӧдз.
Би дозъяссӧ мед пукталӧны весалӧм зарниысь вӧчӧм бикок вылӧ, мый сулалӧ Господь водзын.
Босьт ефа мында шобді пызьсӧ, юк дас пельӧ и сэтысь босьт кыксӧ .Таысь пӧжав дас кык нянь.
Господь водзӧ весалӧм зарниысь вӧчӧм пызан вылӧ пукты няньсӧ квайтӧн-квайтӧн кык визьӧ.
Нянь вылас пукты сӧстӧм ладан [да сов]. Тайӧ лоӧ казьтылан вись, Господьлы сотан вись.
Быд шойччан лунӧ Израиль пиян нимсянь колӧ пуктыны няньсӧ Господь водзӧ. Тайӧ лоӧ нэмъяс кежлӧ кӧрталӧм йитӧд.
Тайӧ няньсӧ Ааронлы да сысянь чужысьяслы колӧ сёйны вежаинын, ӧд тайӧ — вежасьыс-вежатор, Господьлы ваян висьясысь налы пыр кежлӧ сетӧм пай».
Израиль войтыр пӧвстын вӧлі морт, кодлӧн мамыс вӧлі израильса, Дан чужанкотырысь Диврилӧн Шеломит нылыс, а батьыс — египетса. Чомъяс дорын сійӧ тышкасис ӧти израильсакӧд, омӧльтіс-лёкӧдіс Господьлысь нимсӧ, и сійӧс вайӧдісны Мӧисей дінӧ.
Сійӧс йӧршитісны да видзисны дзескыдінын, кытчӧдз Господь эз шу, мый сыкӧд вӧчны.
Господь шуис Мӧисейлы:
«Петкӧд тайӧ омӧльтысьсӧ чомъяс сайӧ. Найӧ, кодъяс кывлісны сылысь омӧльтӧмсӧ, мед пуктыласны кинысӧ сылы юр вылас. Сэсся став войтырыс мед изъялас сійӧс.
Израиль пиянлы висьтав, мый ассьыс Енсӧ омӧльтысь лоӧ мыжа.
Господьлысь нимсӧ омӧльтысьӧс колӧ вины. Став войтырыс мед изъялас сійӧс. Вужвойтырысь либӧ йӧз муысь локтысьяс пӧвстысь коді кутас омӧльтны Господьлысь нимсӧ, сійӧс мед виасны.
Коді мортӧс виас, сійӧс асьсӧ мед виасны.
А ыж-мӧс виӧмысь мед вештысяс татшӧм жӧ пемӧсӧн.
Коді дойдас мӧд мортӧс, сылы аслыс мед вӧчасны сійӧ жӧ: чегӧмысь чегӧм, синмысь син, пиньысь пинь.
Кыдзи сійӧ дойдаліс мӧдсӧ, сылы сідзи жӧ мед вӧчасны.
Коді пемӧсӧс виас, мед вештысяс сыысь, а коді мортӧс виас, сійӧс асьсӧ мед виасны.
Ӧткодя мыждӧй мортӧс, вужвойтырысь-ӧ сійӧ либӧ йӧз муысь локтысь.
Ме — Господь, тіян Енныд».
Мӧисей висьталіс тайӧс Израиль пиянлы.
Омӧльтысьӧс петкӧдісны чомъяс сайӧ да изъялісны. Израиль пиян вӧчисны сідзи, кыдзи Господь тшӧктіс Мӧисейлы.
Синай керӧсын Господь тшӧктіс Мӧисейлы висьтавны Израиль пиянлы: 
«Кор ті овмӧдчанныд сійӧ муас, мый Ме сета тіянлы, быд сизимӧд воӧ шойччӧдӧй мусӧ, Господьсянь сетӧй муыслы шойччӧг.
Квайт во чӧж кӧдзӧй мунытӧ, квайт во чӧж вундалӧй виноград вожъяснытӧ да чукӧртӧй вотӧссӧ. Но сизимӧд вонас муыслӧн мед лоӧ Господьлы сиӧм шойччан во. Сэки мунытӧ энӧ кӧдзӧй, виноград вожъяснытӧ энӧ вундалӧй.
Няньсӧ, мый ачыс быдмас, энӧ вундӧй. Вундавтӧм вожъясысь виноградсӧ энӧ чукӧртӧй.
Муыс мед шойччас во гӧгӧр чӧж.
Мулӧн шойччан воӧ мый ачыс быдмас, лоӧ сёянӧн тіянлы, кесйӧгъясныдлы, меда йӧзныдлы да йӧз муысь локтысьяслы.
Ыж-мӧсныд да мукӧд пемӧсныд мед тшӧтш сёясны сійӧ, мый ачыс быдмас».
«Сизим шойччан во мысти, кор коляс сизимысь сизим во, мӧд ногӧн кӧ, нелямын ӧкмыс во, сизимӧд тӧлысьлӧн дасӧд лунӧ — Мыж вештан лунӧ — буксӧй буксанӧн став му пасьтала.
Ветымынӧд воыс мед лоӧ тіянлы вежа, сійӧ тшупӧда во.
Сэки тіян муын став олысьыслы юӧртӧй мездлун йылысь. Быдӧн мед бӧр босьтӧ ассьыс мусӧ, бӧр локтӧ аслас чужанкотырыс дінӧ.
Ветымынӧд воыс тіян мед лоӧ тшупӧда во. Сэки энӧ кӧдзӧй. Няньсӧ, мый ачыс быдмас, энӧ вундӧй. Вундавтӧм вожъясысь виноградсӧ энӧ чукӧртӧй. Тайӧ тшупӧда воыс мед лоӧ тіянлы вежа.
Сёйӧй сӧмын сійӧ, мый ачыс быдмас.
Тшупӧда воӧ быдӧн мед бӧр локтӧ да босьтӧ ассьыс мусӧ.
Аслад войтырысь мортлы мутӧ вузалігӧн либӧ сылысь мусӧ ньӧбигӧн ӧта-мӧднытӧ энӧ пӧръялӧй.
Мутӧ ньӧбигӧн либӧ вузалігӧн мынтысь вояс арталӧмӧн. Кымын во кольӧ тшупӧда воӧдз, сійӧ воясысь колӧ мынтыны. Тшупӧда воӧдз кӧ нянь чукӧртан воыс уна на, унджык мынты, а этша кӧ, этшаджык мынты. Вузалысь мед артыштӧ му донсӧ нянь вундан вояслӧн лыд серти.
Энӧ пӧръялӧй ӧта-мӧднытӧ.
Полӧй асланыд Енмысь, ӧд Ме — Господь, тіян Енныд.
Кутчысьӧй Менам индӧд-тшӧктӧмъясӧ, олӧй на серти, и ті кутанныд повтӧг овны асланыд муын.
Муыс кутас сетны быдтас, тіян сёянныд пӧтмӧн лоӧ, и ті кутанныд повтӧг овны.
Ті юаланныд: “Мый нӧ кутам сёйны сизимӧд вонас, огӧ кӧ кӧдзӧй да чукӧртӧй быдтаснымӧс?”
Но тӧдӧй: Ме бурсиа тіянӧс, и квайтӧд вонас муыс сетас быдтассӧ куим во кежлӧ.
Кӧкъямысӧд вонас кутанныд кӧдзны, а сёйны кутанныд важ быдтаснытӧ на.
Ӧкмысӧд вонас, кытчӧдз оз кисьмы да оз во выль быдтасыс, тіян лоӧ на важ сёяныс».
«Мунытӧ пыр кежлӧ энӧ вузалӧй, ӧд сійӧ Менам, а ті сэні йӧз муысь локтысьяс, Менам муӧ овмӧдчысьяс.
Лэдзӧй мортыслы бӧр ньӧбны вузалӧм мусӧ.
Тіян пӧвстысь кӧ кодкӧ гӧльлун вӧснаыс вузалас ассьыс мусӧ, сылӧн медматысса рӧдвужыс мед бӧр ньӧбас тайӧ мусӧ.
Сылӧн кӧ абу матысса рӧдвужыс, коді эськӧ вермис ньӧбны тайӧ мусӧ, но бӧрынджык кӧ сійӧ ачыс вермас бӧр ньӧбны ассьыс мусӧ, сэки мед артыштас муыслысь донсӧ сы серти, кымын во коли мусӧ вузалан восяньыс. И кодлы вузавліс мусӧ, мед вештысяс сійӧ воясысь, мыйта коли тшупӧда воӧдз. Та бӧрын сійӧ мед бӧр локтас да босьтас ассьыс мусӧ.
А оз кӧ вермы вештысьнысӧ, сэки вузалӧм муыс мед кольӧ ньӧбысь киӧ тшупӧда воӧдз на. Тшупӧда вонас ньӧбысь мед бӧр сетас мусӧ, а вузалысь мед бӧр босьтас ассьыс мусӧ.
Вузалас кӧ кодкӧ стенмӧн кытшалӧм карысь керкасӧ, вузалан лунсянь во чӧж сылӧн эм позянлун бӧр ньӧбны ассьыс керкасӧ.
Во чӧжнас кӧ карысь керкасӧ бӧр оз ньӧб, сідзкӧ, керкаыс кольӧ пыр кежлӧ ньӧбысьлы. Тшупӧда воӧ керкаыс вузалысьлы бӧр оз вудж.
Но стенмӧн кытшавтӧм сиктысь морт вермас ассьыс керкасӧ бӧр ньӧбны мусӧ моз. А оз кӧ ньӧб, тшупӧда воӧ керкаыс бӧр вуджас сылы.
Левитъяслӧн пыр эм позянлун бӧр ньӧбны асланыс каръясысь керканысӧ.
Левитъяс пӧвстысь кӧ кодкӧ керкасӧ бӧр оз ньӧб, сэки карысь вузалӧм керкаыс тшупӧда воӧ бӧр вуджас сылы, ӧд левитъяслӧн каръясысь налы вичмӧдӧма керкаяссӧ Израиль пиянлы юклӧм му моз.
Левитъяслӧн кар бердысь видзьяс вузавны оз позь, ӧд найӧс сетӧма левитъяслы пыр кежлӧ».
«Тэнад войтырысь кӧ кодкӧ гӧльмас да оз вермы тӧждысьны ас вӧснаыс, отсав сылы. Сійӧ мед тэ ордын олас йӧз муысь локтысь морт моз.
Аслыд мыйкӧ чуктӧдӧм могысь содтӧдӧн сылысь эн босьт. Аслад Енмысь пов, и аслад войтырысь мортлы лэдз ас ордад овны. [Ме — Господь.] Сетан кӧ сылы уджйӧзӧн сьӧм, бӧрсӧ содтӧдӧн эн босьт. Сетан кӧ сылы нянь, сетӧм дорсьыд унджык эн босьт.
Ме — Господь, тіян Енныд. Ме петкӧді тіянӧс Египет муысь, медым сетны тіянлы Ханаан му да лоны тіян Енмӧн.
Тэнад войтырысь кӧ кодкӧ гӧльмас и вузалас асьсӧ тэныд, эн уджӧд сійӧс кесйӧгӧс моз.
Тэ ордын сійӧ мед олас меда морт либӧ йӧз муысь локтысь моз.
Тшупӧда воӧдз мед уджалас тэ ордын, а сэсся ныв-пиыскӧд мед мунас рӧдвуж дінас, бать рӧдыслӧн муас, да овмӧдчас сэтчӧ. Израиль войтыр — Менам кесйӧгъяс, кодъясӧс Ме петкӧді Египет муысь, та вӧсна найӧс кесйӧг туйӧ вузавны оз позь.
Энӧ лоӧй чорыдӧсь накӧд, полӧй асланыд Енмысь.
Кесйӧгъясӧс ньӧбӧй тіянкӧд орччӧн олысь войтыръяс пӧвстысь.
Йӧз муысь локтысьяслысь ныв-писӧ, кодъяс чужисны тіян муын, сідзжӧ верманныд ньӧбны, и найӧ лоӧны тіян. Найӧс ті верманныд кольны асланыд ныв-пилы, верманныд видзны кесйӧгъясӧс моз, а вокъяснытӧ, Израиль пиянӧс, онӧ вермӧй.
Энӧ лоӧй чорыдӧсь вокъясныд дінӧ.
Йӧз муысь локтысь кӧ озырмас, а тэнад войтырысь морт кӧ гӧльмас и вузалас асьсӧ сылы либӧ сысянь чужысьлы кесйӧг туйӧ, сэки вузалӧм мортӧс позьӧ ньӧбӧмӧн мездыны.
Вокъясыс пиысь мед кодкӧ ньӧбас сійӧс. А оз кӧ ньӧб, батьыслӧн вокыс, бать вокыслӧн пиыс либӧ сылӧн рӧдысь кодкӧ мед ньӧбас сійӧс.
А ачыс кӧ вермас, мед ас вӧснаыс вештысяс.
Сійӧ ачыс да сійӧс кесйӧг туйӧ ньӧбысьыс мед арталасны вояс сійӧс вузалан восянь тшупӧда воӧдз. Асьсӧ вузалан донысь сылы колӧ бӧр сетны юкӧнсӧ, мый арталасны медалӧм мортлӧн удждон серти.
Тшупӧда воӧдзыс кӧ дыр на, сійӧ мед мынтысяс мездӧмсьыс вояс серти, мыйта кольӧ на.
Тшупӧда воыс кӧ матын нин, сійӧ мед арталас да мынтысяс вояс серти, мыйта кольӧ на.
Асьсӧ вузалӧм морт мед лоӧ ыджыдыслы став вояс чӧжыс медалӧм мортӧн.
Энӧ лэдзӧй, медым ыджыдыс сыкӧд вӧлі чорыд.
Оз кӧ ло мынтысьӧма вузалӧм мортысь, тшупӧда воӧ сійӧс ныв-пиыскӧд колӧ лэдзны вӧля вылӧ, ӧд Израиль пиян — Менам кесйӧгъяс.
Ме петкӧді найӧс Египет муысь.
Ме — Господь, тіян Енныд».
«Энӧ вӧчӧй бӧлбанъясӧс, энӧ сувтӧдӧй из сюръяяс да серпасалӧм изъяс, медым налы юрбитны. Ме — Господь, тіян Енныд.
Видзӧй Менсьым шойччан лунӧс, пыдди пуктӧй Менсьым вежаинӧс. Ме — Господь.
Кутчысянныд кӧ Менам индӧд-тшӧктӧмъясӧ да оланныд кӧ на серти, сэки Ме ас кадӧ мӧдӧда тіянлы зэр, и муыс сетас быдтас, пуясыс сетасны вотӧс.
Ті кутанныд нянь вартны виноград чукӧрттӧдз, а виноград чукӧртӧмныд нюжалас кӧдзан кадӧдз. Ті кутанныд пӧттӧдз сёйны да повтӧг овны асланыд муын.
Тіян муӧ Ме вая лӧнь олӧм. Воданныд узьны, и тіянӧс некод оз повзьӧд. Тіян муысь Ме ылыста зверъясӧс, сэні оз лоны тышъяс.
Ті кутанныд вӧтлыны вӧрӧгъяснытӧ, найӧ куласны тіян шыпурт помысь.
Тіян пӧвстысь витыс вӧтлас сёӧс, а сёыс вӧтлас дас сюрсӧс. Вӧрӧгъясныд куласны тіян шыпурт помысь.
Ме бергӧдча тіянлань [да бурсиа тіянӧс]. Ме сета тіянлы чужтысьны-рӧдмыны. Тіянкӧд кӧрталӧм йитӧдӧс Ме збыльмӧда.
Колян вося сёянныд оз быр, сійӧс весиг ковмас шыблавны.
Ме ог кут зывӧктыны тіянӧс, Ассьым оланінӧс сувтӧда тіян шӧрӧ.
Ме кута ветлӧдлыны тіян пӧвстын да лоа тіян Енмӧн, а ті — Менам войтырӧн.
Ме — Господь, тіян Енныд. Ме петкӧді тіянӧс Египет муысь, медым ті энӧ олӧй кесйӧг туйын. Ме мезді тіянӧс сийӧс улысь, медым ті веськӧдчӧмӧн ветлӧдлінныд».
«Онӧ кӧ кывзӧй Менӧ да онӧ олӧй став индӧдыс серти, мустӧмтанныд-зывӧктанныд кӧ Менсьым индӧд-тшӧктӧмъясӧс, Менам тшӧктӧмъяс серти кӧ онӧ олӧй, а торканныд Менсьым йитӧдӧс, тӧдӧй, мый Ме сэки тіянкӧд вӧча. Ме мӧдӧда тіян вылӧ полӧм, вир-яй косьмӧм да биа висьӧм, мый вӧсна тіян синныд пемдас и ловныд нюкыртчас. Ті весьшӧрӧ кутанныд кӧдзны, ӧд вӧрӧг сёяс няньнытӧ.
Ме тіянлы паныд сувта. Вӧрӧгныд вермас тіянӧс, мустӧмтысьныд кутас ыджыдавны тіян вылын. Ті котӧрӧн пышъянныд, кӧть вӧтӧдысьыс оз ло.
Весиг та бӧрын кӧ ті онӧ кутӧй кывзысьны Менсьым, Ме сизим пӧвстӧн мыжда тіянӧс мыжъяссьыныд. Тіянлысь пыксьӧм-асныралӧмнытӧ Ме песовта. Вӧча сідзи, мый тіян весьтын енэжыс кӧрт кодь лоӧ, а муныд — ыргӧн кодь.
Весьшӧрӧ вынтӧ пуктанныд, ӧд муныд оз сет быдтассӧ, пуясныд оз сетны тіянлы вотӧссӧ.
Весиг та бӧрын кӧ ті Меным паныд сувтанныд да онӧ кутӧй кывзысьны Менсьым, Ме сизим пӧвстӧн мыжда тіянӧс мыжъяссьыныд.
Мӧдӧда тіян вылӧ зверъясӧс, и найӧ гусявласны ныв-пинытӧ да косявласны ыж-мӧснытӧ. Ті кутанныд чинӧмӧн чинны, и тіян туйяс вывті ветлысь-мунысьыс оз ло.
Весиг та бӧрын кӧ онӧ кутӧй кывзысьны да Меным паныд сувтанныд, Ме тшӧтш [скӧрмӧмӧн] тіянлы паныд сувта, сизим пӧвстӧн мыжда тіянӧс мыжъяссьыныд. Йитӧд торкӧмысь Ме вайӧда тіян вылӧ вӧрӧгӧс. Татшӧм ногӧн тіянлысь водзӧс перъя.
Дзебсянныд кӧ асланыд каръясӧ, Ме мӧдӧда тіян вылӧ пӧрӧс висьӧм, сета тіянӧс вӧрӧг киӧ.
Ме мырддя тіянлысь няньнытӧ.
Ӧти пач дорын дас ань кутасны пӧжасьны, няньсӧ веситӧмӧн кутасны юклыны.
Ті кутанныд сёйны, но онӧ пӧтӧй.
Весиг та бӧрын кӧ онӧ кутӧй кывзысьны да Меным паныд сувтанныд, Ме скӧрмӧмӧн тіянлы паныд сувта да сизим пӧвстӧн мыжда тіянӧс мыжъяссьыныд. Ныв-пиныдлысь яйсӧ ті сёйны кутанныд.
Вись ваян мылькъяснытӧ Ме бырӧда, тшынӧдчан висьпуктанінъястӧ жугла, шойяснытӧ шыблала жуглӧм бӧлбанъясныд вылӧ. Ті лоанныд Меным зывӧкӧсь.
Каръяснытӧ Ме пасьварта, вежаинъяснытӧ бырӧда, чӧскыда ӧвтан висьяснытӧ ог сибӧд.
Ме кушта тіянлысь мунытӧ. Вӧрӧгныд весьӧпӧрас, кор локтас сэтчӧ овмӧдчыны.
Ме разӧда тіянӧс войтыръяс пӧвстӧ, бӧрсяньныд вӧтча шыпуртӧн. Тіян муныд овтӧммас, каръясныд киссясны.
Сэки муныд вермас шойччыны, аслас шойччытӧм воясысь водзӧс босьтны.
Ті кутанныд овны вӧрӧгныдлӧн муын, а тіян муныд кутас шойччыны, сійӧ водзӧс босьтас аслас шойччытӧм воясысь.
Кор ті онӧ кутӧй овны асланыд муын, тіян муныд шойччас сійӧ воясысь, кор сэні олігӧн ті муыслы шойччӧгсӧ энӧ сетлӧй.
Тіян пӧвстысь ловйӧн кольӧмаяс кутасны овны вӧрӧглӧн муын. Сэні Ме тіян сьӧлӧмӧ пукта полӧм. Коръяслӧн кышакылӧмысь ті пышъянныд шыпуртысь моз да усянныд, кӧть вӧтӧдысьыс оз ло. Ті пышъянныд шыпуртысь моз да конъясянныд ӧта-мӧданыд, кӧть вӧтӧдысьыс оз ло. Вӧрӧгкӧд водзсасьнытӧ онӧ вермӧй.
Ті куланныд мукӧд войтыръяс пӧвстын, тіянӧс ньылыштас вӧрӧгныдлӧн муыс.
Тіян пӧвстысь ловйӧн кольӧмаяс асланыс да батьясныслӧн мыж вӧсна косьмасны-сісьмасны вӧрӧг муын.
Но найӧ висьтасясны асланыс да батьясныслӧн мыжысь, Меным паныд сувтӧмысь да Менӧ эновтӧмысь, мый вӧсна Ме [скӧрмӧмӧн] налы паныд сувті, вӧтлі найӧс вӧрӧг муӧ.
Сэні найӧ мынтысясны мыжсьыныс, и налӧн вундыштчытӧм сьӧлӧмныс* раммас Ме водзын.
Сэки Ме тӧд вылӧ уськӧда Яковкӧд кӧрталӧм йитӧдӧс, Исааккӧд кӧрталӧм йитӧдӧс да Ӧвраамкӧд кӧрталӧм йитӧдӧс, казьтышта налӧн муыс йылысь.
Кор налӧн эновтӧм да кушмӧм муыс кутас шойччыны, сійӧ водзӧс босьтас аслас шойччытӧмысь. Найӧ мынтысясны мыжсьыныс, мый мустӧмтісны-зывӧктісны Менсьым индӧд-тшӧктӧмъясӧс. Но весиг сэки, кор найӧ лоасны вӧрӧгныслӧн муын, Ме ог мустӧмт-зывӧкты найӧс. Ме найӧс ог бырӧд, накӧд кӧрталӧм йитӧдӧс ог торк, ӧд Ме — Господь, налӧн Ен.
На ради Ме тӧд вылӧ уськӧда Ассьым йитӧдӧс, мый кӧрталі налӧн батьяскӧд, кодъясӧс мукӧд войтыръяслӧн син водзын петкӧді Египет муысь, медым лоны налӧн Енмӧн.
Ме — Господь».
Тайӧ индӧд-тшӧктӧмъяссӧ Господь сетіс Мӧисей пыр Израиль пиянлы Синай керӧсын.
Господь шуис Мӧисейлы:
«Висьтав Израиль пиянлы: коді кыв сетӧмӧн мыйкӧ сиӧ Господьлы, сійӧ вермас мынтысьӧмӧн бӧр босьтны сиӧмторсӧ. А сиӧма кӧ мортӧс Господьлы, донсӧ инды тадзи: кызь арӧссянь квайтымын арӧсӧдз айловысь вештысян доныс мед лоӧ ветымын сикель эзысь вежаинса сикель серти, а аньысь — комын сикель.
Вит арӧссянь кызь арӧсӧдз зонмысь вештысян доныс мед лоӧ кызь сикель эзысь, а нылысь — дас сикель.
Тӧлысьсянь вит арӧсӧдз пи кагаысь вештысян доныс мед лоӧ вит сикель эзысь, а нылысь — куим сикель.
Квайтымын арӧса да ыджыдджык арлыда айловысь вештысян доныс мед лоӧ дас вит сикель эзысь, а аньысь — дас сикель.
Кыв сетысь кӧ гӧльлун вӧснаыс оз вермы мынтысьны, сідзкӧ, мед ваяс кыв сетӧмӧн сиӧм мортӧс поп дінӧ. Поп мед донъялас сійӧс да индас вештысян донсӧ сы серти, мыйта вермас мынтынысӧ кыв сетысьыс.
Кыв сетӧмӧн кӧ Господьлы сиӧма пемӧсӧс, кодӧс позьӧ вайны вись пыдди Господьлы, тайӧ вайӧмторйыс лоӧ вежаторйӧн. Мӧд пемӧсӧн сійӧс вежны оз позь.
Оз позь вежны бурсӧ лёк вылӧ, лёксӧ бур вылӧ.
Но кыв сетысь кӧ сиӧм пемӧссӧ вежас мӧдӧн, сэки кыкнан пемӧсыс лоӧны вежаторйӧн.
Кыв сетан пемӧсыс кӧ пеж пемӧс, кодӧс оз позь вайны вись пыдди Господьлы, сэки сійӧс колӧ вайӧдны поп дінӧ. Поп видзӧдлас, бур-ӧ сійӧ, да индас донсӧ. Кыдзи поп донъялас, сэтшӧм доныс и лоӧ.
Мортыс кӧ сиӧм пемӧссӧ кӧсъяс бӧр ньӧбны, сэки индӧм доныс дінӧ мед содтас пемӧс доныслысь витӧд пайсӧ.
Коді ассьыс керкасӧ сиас Господьлы, мед шыасяс поп дінӧ. Поп мед донъялас керкасӧ сы серти, бур-ӧ сійӧ. Кыдзи поп донъялас, сэтшӧм доныс и лоӧ.
Мортыс кӧ сиӧм керкасӧ кӧсъяс бӧр ньӧбны, сэки индӧм доныс дінӧ мед содтас керка доныслысь витӧд пайсӧ. Та бӧрын керкаыс бара лоӧ сылӧн.
Коді Господьлы сиас рӧдвуж овмӧссьыс мусӧ, сійӧ мед шуас муыслы донсӧ сы серти, мыйта сэтчӧ позьӧ кӧдзны. Муысь, кытчӧ позьӧ кӧдзны хомер мында ид, доныс мед лоӧ ветымын сикель эзысь.
Мортыс кӧ сиас ассьыс мусӧ тшупӧда воӧ, доныс кольӧ сэтшӧм жӧ, мыйта вӧлі индӧма.
Сиас кӧ мусӧ тшупӧда во кольӧм бӧрын, поплы колӧ артавны муыслысь донсӧ сы серти, кымын во кольӧ локтана тшупӧда воӧдз. Доныс сэки чинтыссьӧ.
Мортыс кӧ сиӧм мусӧ кӧсъяс бӧр ньӧбны, сэки арталӧм доныс дінӧ мед содтас му доныслысь витӧд пайсӧ да бӧр ньӧбас сійӧс, и муыс бара лоӧ сылӧн.
Но сиӧм мусӧ кӧ бӧр оз ньӧб, а вузалас мӧдлы, сэки тайӧ мусӧ бӧр ньӧбны некор оз позь.
Тшупӧда воӧ татшӧм муыс вуджӧ Господьлы да лоӧ вежаторйӧн, кыдзи Господьлы ёрӧм улын* сиӧм му.
Муыс сэки вуджӧ поплы да лоӧ сылӧн.
Морт кӧ ньӧблӧм мусӧ, мый оз пыр сылӧн рӧдвуж овмӧсӧ, шуас сины Господьлы, но кӧсъяс бӧр ньӧбны сійӧс, сэки поп мед арталас муыслысь донсӧ сы серти, кымын во кольӧ тшупӧда воӧдз. Мортыс мед мынтас поплы муыслысь донсӧ сійӧ жӧ лунӧ. Тайӧ доныс — Господьлӧн вежатор.
А тшупӧда воӧ муыс бӧр вуджас сылы, кодлӧн рӧдвуж овмӧсысь вӧлі ньӧбӧма.
Став донсӧ колӧ артавны вежаинса сикель серти. Ӧти сикельын — кызь гера.
Ыж-мӧслысь медводдза чужысьӧс Господьлы сины оз позь, ӧд сійӧ сідзи нин Господьлӧн. Мӧслӧн да ыж-кӧзалӧн медводдза чужысьыс — Господьлӧн.
А медводдза чужысьыс кӧ пеж пемӧслӧн, сійӧс колӧ бӧр ньӧбны, и индӧм доныс дінӧ колӧ содтыны пемӧс доныслысь витӧд пайсӧ.
Пемӧссӧ кӧ оз ло бӧр ньӧбӧма, сійӧс колӧ вузавны индӧм донысь.
Мортӧс, пемӧсӧс либӧ рӧдвуж овмӧсысь муяс Господьлы ёрӧм улын сиӧм бӧрын вузавны либӧ бӧр ньӧбны оз позь. Мый сиӧма ёрӧм улын — тайӧ Господьлӧн вежасьыс-вежатор. Оз позь бӧр ньӧбны мортӧс, сійӧс кӧ вӧлі ёрӧм улын сиӧма Господьлы. Сійӧс мед виасны.
Муӧн сетӧм быдтасысь да пуясӧн сетӧм вотӧсысь дасӧд юкӧныс лоӧ Господьлӧн. Тайӧ — Господьлӧн вежатор.
Коді кӧсйӧ бӧр ньӧбны ассьыс дасӧд юкӧнсӧ, мед содтас сылӧн доныс дінӧ витӧд пайсӧ.
Ыж-мӧссӧ арталігӧн пемӧс кутысь мед сиас Господьлы быд дасӧд пемӧссӧ.
Оз ков торйӧдны бур пемӧсӧс лёксьыс, оз ков вежлавны сиӧм пемӧссӧ мӧдӧн.
Вежас кӧ сиӧм пемӧссӧ мӧдӧн, кыкнан пемӧсыс лоӧны вежаторйӧн, и найӧс бӧр ньӧбнысӧ оз позь».
Тайӧ тшӧктӧмъяссӧ Господь сетіс Мӧисей пыр Израиль пиянлы Синай керӧсын.
{Еврей йӧз (комиӧдіс Kodko) @ Лыд @ религ. гижӧд @ Библия @ 2021 @ Лб. .}
Мӧисейлӧн нёльӧд небӧг
ЛЫД
Синай овтӧминын, вежа чомйын, Господь сёрнитіс Мӧисейкӧд. Тайӧ вӧлі Египетысь петӧм бӧрын мӧд вонас, мӧд тӧлысьлӧн медводдза лунӧ. Господь шуис:
«Арталӧй израильса став айуловсӧ да гижалӧй нимъяснас чужанкотыр да рӧд сертиныс.
Ааронкӧд ӧтвыв арталӧй кызь арӧса да ыджыдджык арлыда израильса айуловӧс, кодъяс вермӧны петны тышӧ. Гижалӧй найӧс тышкакотыръяс серти.
Тіянлы мед отсасясны чужанкотыръяслӧн рӧдкутысьяс, быд чужанкотырысь ӧти морт:
Рувим чужанкотырысь Шедеурлӧн Элицур пиыс, Симеон чужанкотырысь Цуришаддайлӧн Шелумиэл пиыс, Иуда чужанкотырысь Аминадавлӧн Наашон пиыс, Иссакар чужанкотырысь Цуарлӧн Нафанаил пиыс, Завулон чужанкотырысь Хелонлӧн Элиав пиыс, Ӧсиплӧн Ефрем чужанкотырысь Аммиудлӧн Элишам пиыс, Манассей чужанкотырысь Педацурлӧн Гамалиэл пиыс, Венямин чужанкотырысь Гидеонилӧн Авидан пиыс, Дан чужанкотырысь Аммишаддайлӧн Ахиэзер пиыс, Асир чужанкотырысь Окранлӧн Пагиэл пиыс, Гад чужанкотырысь Регуэллӧн Эльясат пиыс, Неффалим чужанкотырысь Энанлӧн Ахир пиыс.
Тайӧ бӧрйӧм айуловыс — чужанкотыръяслӧн юралысьяс да израильса тышкакотыръясӧн веськӧдлысьяс».
Мӧисей да Аарон босьтісны аскӧдныс тайӧ лыддьӧдлӧм йӧзсӧ да мӧд тӧлысьлӧн медводдза лунӧ чукӧртісны став войтырсӧ.
Арталӧма-гижалӧма вӧлі кызь арӧса да ыджыдджык арлыда айуловӧс чужанкотыр да рӧд сертиныс. Мӧисей арталіс-гижаліс израильса айуловӧс Синай овтӧминын, кыдзи Господь тшӧктіс сылы.
Израильлӧн медводдза чужысь Рувим чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс. Рувим чужанкотырын вӧлі нелямын квайт сюрс витсё морт.
Симеон чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс. Симеон чужанкотырын вӧлі ветымын ӧкмыс сюрс куимсё морт.
Гад чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс. Гад чужанкотырын вӧлі нелямын вит сюрс квайтсё ветымын морт.
Иуда чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс. Иуда чужанкотырын вӧлі сизимдас нёль сюрс квайтсё морт.
Иссакар чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс. Иссакар чужанкотырын вӧлі ветымын нёль сюрс нёльсё морт.
Завулон чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс. Завулон чужанкотырын вӧлі ветымын сизим сюрс нёльсё морт.
Гижалӧма вӧлі Ӧсип пиянлысь чужысьяссӧ. Ефрем чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс. Ефрем чужанкотырын вӧлі нелямын сюрс витсё морт.
Манассей чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс. Манассей чужанкотырын вӧлі комын кык сюрс кыксё морт.
Венямин чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс. Венямин чужанкотырын вӧлі комын вит сюрс нёльсё морт.
Дан чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс. Дан чужанкотырын вӧлі квайтымын кык сюрс сизимсё морт.
Асир чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс. Асир чужанкотырын вӧлі нелямын ӧти сюрс витсё морт.
Неффалим чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс. Неффалим чужанкотырын вӧлі ветымын куим сюрс нёльсё морт.
Та мында мортӧс арталісны Мӧисей, Аарон да израильса чужанкотыръяслӧн дас кык юралысьыс.
Кызь арӧса да ыджыдджык арлыда Израиль пиянӧс, кодъяс вермисны петны тышӧ, вӧлі гижалӧма рӧд сертиныс. Ставнас вӧлі арталӧма квайтсё куим сюрс витсё ветымын мортӧс.
Левий чужанкотырӧс эз артавны, ӧд Господь вӧлі шуӧма Мӧисейлы:
«Левий чужанкотырысь айуловӧс эн артав, Израиль пиян лыдӧ найӧс эн пырт.
Левитъяслы тшӧкты тӧждысьны вежа чом вӧсна да вежаинса став дозмук-кӧлуй вӧсна.
Найӧ мед новлӧдласны вежа чомсӧ да вежаинса став дозмук-кӧлуйсӧ. Найӧ мед кесъяласны вежа чомйын, и ассьыныс чомъяссӧ мед сувтӧдасны вежа чом гӧгӧр.
Левитъяс мед разясны вежа чомсӧ, кор сійӧс ковмас вуджӧдны. А Израиль войтырлӧн выль местаӧ локтӧм бӧрын левитъяс мед бара сувтӧдасны сійӧс.
Бокыса морт кӧ матыстчас вежа чом дорӧ, сійӧс лоӧ виӧма.
Израиль пиян мед сувтӧдасны чомъяснысӧ тышкакотыръяс моз асланыс дӧрапас улӧ.
А левитъяс ассьыныс чомъяссӧ мед сувтӧдасны вежа чом гӧгӧр, медым Израиль войтырӧс эз су Господьлӧн скӧрлуныс. Левитъяс мед видзӧдасны вежа чом бӧрся».
Израиль пиян ставсӧ вӧчисны сідзи, кыдзи Господь тшӧктіс Мӧисейлы.
Господь шуис Мӧисейлы да Ааронлы:
«Израиль пиян пӧвстысь быдӧн мед сувтӧдас чомсӧ аслас чужанкотырлӧн дӧрапас улӧ да аслас рӧдыслӧн пас улӧ.
Чомъяснас мед паськӧдчасны вежа чом гӧгӧрыс.
Вежа чомсянь асыввылӧ аслас дӧрапас улӧ чомъяссӧ мед паськӧдас Иуда чужанкотыр аслас тышкайӧзнас. Иуда чужанкотырлӧн юралысьыс — Аминадавлӧн Наашон пиыс. Сылӧн вӧлі сизимдас нёль сюрс квайтсё тышкаморт.
Иуда чужанкотыркӧд орччӧн чомъяссӧ мед паськӧдас Иссакар чужанкотыр. Налӧн юралысьыс — Цуарлӧн Нафанаил пиыс. Сылӧн вӧлі ветымын нёль сюрс нёльсё тышкаморт.
Асыввылӧ чомъяссӧ мед паськӧдас тшӧтш Завулон чужанкотыр. Налӧн юралысьыс — Хелонлӧн Элиав пиыс. Сылӧн вӧлі ветымын сизим сюрс нёльсё тышкаморт.
Ставнас Иуда чужанкотыр улын вӧлі сё кӧкъямысдас квайт сюрс нёльсё тышкаморт.
Найӧ мед петасны туйӧ медводдзаясӧн.
Вежа чомсянь лунвылӧ аслас дӧрапас улӧ чомъяссӧ мед паськӧдас Рувим чужанкотыр аслас тышкайӧзнас. Рувим чужанкотырлӧн юралысьыс — Шедеурлӧн Элицур пиыс. Сылӧн вӧлі нелямын квайт сюрс витсё тышкаморт.
Рувим чужанкотыркӧд орччӧн чомъяссӧ мед паськӧдас Симеон чужанкотыр. Налӧн юралысьыс — Цуришаддайлӧн Шелумиэл пиыс. Сылӧн вӧлі ветымын ӧкмыс сюрс куимсё тышкаморт.
Лунвылӧ чомъяссӧ мед паськӧдас тшӧтш Гад чужанкотыр. Налӧн юралысьыс — Регуэллӧн Эльясат пиыс. Сылӧн вӧлі нелямын вит сюрс квайтсё ветымын тышкаморт.
Ставнас Рувим чужанкотыр улын вӧлі сё ветымын ӧти сюрс нёльсё ветымын тышкаморт.
Найӧ мед петасны туйӧ мӧдӧн.
Левитъяс асланыс котыръясӧн туйӧ петіганыс мед сувтасны чужанкотыръяс шӧракостӧ да нуасны вежа чомсӧ.
Кыдзи чужанкотыръяс чомъяснас паськӧдчӧны сувтанінын, сідзи найӧ сьӧрсьӧн-бӧрсьӧн мед петасны туйӧ асланыс дӧрапас улын.
Вежа чомсянь рытыввылӧ аслас дӧрапас улӧ чомъяссӧ мед паськӧдас Ефрем чужанкотыр аслас тышкайӧзнас. Ефрем чужанкотырлӧн юралысьыс — Аммиудлӧн Элишам пиыс. Сылӧн вӧлі нелямын сюрс витсё тышкаморт.
Ефрем чужанкотыркӧд орччӧн чомъяссӧ мед паськӧдас Манассей чужанкотыр. Налӧн юралысьыс — Педацурлӧн Гамалиэл пиыс. Сылӧн вӧлі комын кык сюрс кыксё тышкаморт.
Рытыввылӧ чомъяссӧ мед паськӧдас тшӧтш Венямин чужанкотыр. Налӧн юралысьыс — Гидеонилӧн Авидан пиыс. Сылӧн вӧлі комын вит сюрс нёльсё тышкаморт.
Ставнас Ефрем чужанкотыр улын вӧлі сё кӧкъямыс сюрс сё тышкаморт.
Найӧ мед петасны туйӧ коймӧдӧн.
Вежа чомсянь войвылӧ аслас дӧрапас улӧ чомъяссӧ мед паськӧдас Дан чужанкотыр аслас тышкайӧзнас. Дан чужанкотырлӧн юралысьыс — Аммишаддайлӧн Ахиэзер пиыс. Сылӧн вӧлі квайтымын кык сюрс сизимсё тышкаморт.
Дан чужанкотыркӧд орччӧн чомъяссӧ мед паськӧдас Асир чужанкотыр. Налӧн юралысьыс — Окранлӧн Пагиэл пиыс. Сылӧн вӧлі нелямын ӧти сюрс витсё тышкаморт.
Войвылӧ чомъяссӧ мед паськӧдас тшӧтш Неффалим чужанкотыр. Налӧн юралысьыс — Энанлӧн Ахир пиыс. Сылӧн вӧлі ветымын куим сюрс нёльсё тышкаморт.
Ставнас Дан чужанкотыр улын вӧлі сё ветымын сизим сюрс квайтсё тышкаморт.
Найӧ мед петасны туйӧ асланыс дӧрапас улын медбӧръяӧн».
Израиль пиянӧс вӧлі арталӧма налӧн котыр сертиныс.
Став тышкайӧзыслӧн лыдыс вӧлі квайтсё куим сюрс витсё ветымын морт.
Левитъясӧс Израиль пиянкӧд эз артавны, ӧд тадзи Господь тшӧктіс Мӧисейлы.
Израиль пиян ставсӧ вӧчисны сідзи, кыдзи Господь тшӧктіс Мӧисейлы. Чомъяснысӧ найӧ сувтӧдлісны асланыс дӧрапас улӧ, а туйӧ петіганыс быдӧн муніс аслас чужанкотырыскӧд да рӧдыскӧд.
Со Ааронлӧн да Мӧисейлӧн рӧдъясыс сійӧ кадас, кор Господь сёрнитіс Мӧисейкӧд Синай керӧсын. Аарон пиянлӧн нимъясыс: Надав, медводдза чужысьыс, сэсся Авиуд, Элазар да Итамар.
Найӧс вӧлі мавтыштӧма да сувтӧдӧма кесъявны попъясӧн.
Но Господь водзӧ мӧд би вайӧм вӧсна Надав да Авиуд кулісны Господь водзын Синай овтӧминын. Налӧн эз вӧв ныв-пиыс.
Аарон батьныс веськӧдлӧм улын Элазар да Итамар водзӧ кесъялісны попъясӧн.
Господь шуис Мӧисейлы:
«Левийлысь чужанкотырсӧ сувтӧд Аарон поп веськӧдлӧм улӧ. Найӧ мед отсасясны сылы.
Найӧ мед кесъяласны Аарон да став войтырыс пыдди вежа чом бердын.
Найӧ мед видзасны вежаинса став дозмук-кӧлуйсӧ да кесъяласны вежа чом бердын Израиль пиян пыдди.
Левитъяс мед кесъяласны Ааронлӧн да пияныслӧн веськӧдлӧм улын, ӧд Израиль пиян пӧвстысь найӧс сувтӧдӧма отсасьны Ааронлы.
Ааронлы пияныскӧд тшӧкты [видзӧдны вежа чом бӧрся да] кесъявны попъясӧн. [Найӧ мед видзӧдасны ставыс бӧрся, мый эм висьпуктанін гӧгӧр да Вежаинын ӧшалысь дӧра сайын.] 
Но бокыса морт кӧ матыстчас вежа чом дорӧ, сійӧс лоӧ виӧма».
Господь шуис Мӧисейлы:
«Израиль пиян пӧвстысь Ме торйӧді Аслым левитъясӧс. Израильса аньяслӧн медводдза чужысь пиян пыдди левитъяс лоӧны Менам, ӧд став медводдза чужысьыс — Менам.
Сійӧ лунӧ, кор Ме бырӧді египетса став медводдза чужысьсӧ, Ме вежӧді-торйӧді Аслым Израиль войтырлысь став медводдза ай чужысьсӧ: йӧзӧс и ыж-мӧскӧс.
Найӧ — Менам.
Ме — Господь».
Синай овтӧминын Господь шуис Мӧисейлы:
«Гижав Левий чужанкотырысь тӧлысьысь ыджыдджык арлыда став айуловсӧ рӧд да котыр сертиныс».
Господьлӧн тшӧктӧм серти Мӧисей [Ааронкӧд] гижаліс найӧс.
Левий пиянлӧн нимъясыс: Гирсон, Кааф да Мерари.
Гирсонлӧн пияныс да насянь петысь рӧдъясыс: Ливни да Шимей.
Каафлӧн пияныс да насянь петысь рӧдъясыс: Амрам, Ицгар, Хеврон да Узиэл.
Мерарилӧн пияныс да насянь петысь рӧдъясыс: Махли да Муши.
Ставыс тайӧ — Левий чужанкотырысь рӧдъяс.
Гирсонсянь петӧны Ливнилӧн да Шимейлӧн рӧдъясыс.
Лыддьӧм-арталӧм бӧрын тӧлысьысь ыджыдджык арлыда айуловлӧн лыдыс вӧлі сизим сюрс витсё морт.
Гирсонлӧн рӧдъяслы ассьыныс чомъяснысӧ колӧ вӧлі сувтӧдны вежа чом сайӧ рытыввылӧ.
Гирсонсянь чужысьясӧн веськӧдліс Лаэллӧн Эльясат пиыс.
Найӧ кывкутісны вежа чом вӧсна, сылӧн вевттьӧд да пыранінас ӧшалысь дӧра вӧсна, вежа чом йӧр да висьпуктанін тупкан дӧраяс вӧсна, йӧр пыранінын ӧшалысь дӧра вӧсна да дӧра йитлан гезъяс вӧсна, тӧждысисны вежа чом разялӧм-сувтӧдӧм вӧсна.
Каафсянь петӧны Амрамлӧн, Ицгарлӧн, Хевронлӧн да Узиэллӧн рӧдъясыс.
Лыддьӧм-арталӧм бӧрын тӧлысьысь ыджыдджык арлыда айуловлӧн лыдыс вӧлі кӧкъямыс сюрс квайтсё морт. Найӧ кывкутісны вежаин вӧсна.
Каафлӧн рӧдъяслы ассьыныс чомъяснысӧ колӧ вӧлі сувтӧдны вежа чомсянь лунвывладорӧ.
Каафсянь чужысьясӧн веськӧдліс Узиэллӧн Элицафан пиыс.
Найӧ кывкутісны-тӧждысисны Йитӧд куд вӧсна, пызан, бикок да висьпуктанінъяс вӧсна, кесъялан вежа дозмук-кӧлуй вӧсна да Вежаинын ӧшалысь дӧра вӧсна.
Левитъяслӧн веськӧдлысьяс бӧрся видзӧдіс Аарон поплӧн Элазар пиыс.
Сылӧн веськӧдлӧм улын вӧліны йӧз, кодъяс кывкутісны вежаин вӧсна.
Мерарисянь петӧны Махлилӧн да Мушилӧн рӧдъясыс.
Лыддьӧм-арталӧм бӧрын тӧлысьысь ыджыдджык арлыда айуловлӧн лыдыс вӧлі квайт сюрс кыксё морт.
Мерарисянь чужысьясӧн веськӧдліс Абихайллӧн Цуриэл пиыс.
Ассьыныс чомъяснысӧ налы колӧ вӧлі сувтӧдны вежа чомсянь войвывладорӧ.
Найӧ кывкутісны вежа чомлӧн брусъяс, потшъяс, сюръяяс, подувъяс да кӧлуй вӧсна, йӧр сюръяяс да налӧн подувъяс, майӧгъяс да гезъяс вӧсна, тӧждысисны вежа чом разялӧм-сувтӧдӧм вӧсна.
Вежа чом водзӧ асыввылӧ сувтӧдісны чомъяссӧ Мӧисей да Аарон пияныскӧд, кодъяс Израиль пиян пыдди кывкутісны вежаин вӧсна.
Вежа чом дорӧ матыстчысь бокыса мортӧс колӧ вӧлі вины.
Господьлӧн тшӧктӧм серти Мӧисей да Аарон арталісны-гижалісны Левий чужанкотырысь тӧлысьысь ыджыдджык арлыда айуловӧс рӧдныс серти. Левитъяслӧн лыдыс вӧлі кызь кык сюрс морт.
Господь тшӧктіс Мӧисейлы: «Артав-гижав Израиль войтырысь тӧлысьысь ыджыдджык арлыда медводдза чужысь айуловсӧ.
Торйӧд Меным левитъясӧс Израиль войтырлӧн став медводдза ай чужысьыс пыдди. Левитъяслысь ыж-мӧссӧ торйӧд Меным Израиль войтырлӧн медводдза чужысь ыж-мӧскыс пыдди. Ме — Господь».
Мӧисей арталіс-гижаліс Израиль пиян пӧвстысь став медводдза чужысьсӧ, кыдзи тшӧктіс сылы Господь.
Тӧлысьысь ыджыдджык арлыда медводдза чужысь айуловлӧн лыдыс вӧлі кызь кык сюрс кыксё сизимдас куим морт.
Господь шуис Мӧисейлы:
«Торйӧд Меным левитъясӧс Израиль войтырлӧн став медводдза ай чужысьыс пыдди. Левитъяслысь ыж-мӧссӧ торйӧд Меным Израиль войтырлӧн медводдза чужысь ыж-мӧскыс пыдди.
Левитъясыс мед лоасны Менам.
Ме — Господь.
Сы вӧсна, мый левитъяс дорысь Израиль войтырлӧн медводдза чужысьыс кыксё сизимдас куим морт вылӧ унджык, наысь колӧ мынтысьны, быдӧнысь — вит сикель эзысь вежаинса сикель серти. Ӧти сикельын — кызь гера. Тайӧ эзысьсӧ сет Ааронлы да сылӧн пияныслы».
Сыысь, мый израильса медводдза чужысьясыс вӧліны левитъясысь унджык, Мӧисей чукӧртіс сюрс куимсё квайтымын вит сикель эзысь вежаинса сикель серти. Мӧисей сетіс эзысьсӧ Ааронлы да сылӧн пияныслы, кыдзи тшӧктіс сылы Господь.
Господь шуис Мӧисейлы да Ааронлы:
«Гижав Левий чужанкотырысь Каафлысь пиянсӧ рӧд да котыр сертиныс, комын арӧссянь ветымын арӧсӧдз найӧс, кодъяс вермасны уджавны вежа чомйын.
Кааф пиян мед кывкутасны вежа чомйын вежасьыс-вежаторъяс вӧсна.
Израиль войтырлӧн туйӧ петтӧдзыс Аарон пияныскӧд мед пырасны вежа чомйӧ, босьтасны ӧшӧдӧм дӧрасӧ да вевттясны сыӧн Йитӧд кудсӧ.
Йитӧд кудсӧ нӧшта мед вевттясны лӧз рӧма кучик вевттьӧдӧн, а сэсся тупкасны гӧрдовлӧз вурун вевттьӧдӧн. Куд кольчаясас мед сюясны потшъяссӧ.
Вежа няньлы пызансӧ мед вевттясны гӧрдовлӧз вурун дӧраӧн, сэсся сы вылӧ мед пукталасны дозмукъяс, тасьтіяс, кӧшъяс да вина вись ваян дозъяс. Вежа няньыс мед пыр лоас пызан вылас.
Ставсӧ тайӧс мед вевттясны югыдгӧрд дӧраӧн, а дӧрасӧ — лӧз рӧма кучик вевттьӧдӧн. Сэсся пызан кольчаясас мед сюясны потшъяссӧ.
Аарон пияныскӧд мед босьтасны гӧрдовлӧз вурун дӧра да вевттясны сыӧн бикоксӧ да сылысь би дозъяссӧ, чепӧлясӧ, пӧим ворсӧ да вый дозъяссӧ. Бикоксӧ став кӧлуйнас мед гартыштасны лӧз рӧма кучик вевттьӧдӧ да пуктасны новлӧдлан потш вылӧ.
Зарни висьпуктанінсӧ мед вевттясны гӧрдовлӧз вурун дӧраӧн, а дӧрасӧ — лӧз рӧма кучик вевттьӧдӧн. Сэсся висьпуктанін кольчаясас мед сюясны потшъяссӧ.
Вежаинса став кесъялан дозмук-кӧлуйсӧ мед гартыштасны гӧрдовлӧз вурун дӧраӧ да вевттясны лӧз рӧма кучик вевттьӧдӧн, сэсся пуктасны новлӧдлан потш вылӧ.
Висьпуктанінсӧ пӧимысь весалӧм бӧрын мед вевттясны пемыдгӧрд дӧраӧн.
Сэсся сы вылӧ мед пукталасны висьпуктанінса став дозмук-кӧлуйсӧ: ӧгыр пӧртъяс, яй бергӧдлан вилаяс, пӧим куралан зыръяс да вир резан тасьтіяс. Ставсӧ тайӧс мед вевттясны лӧз рӧма кучик вевттьӧдӧн. Сэсся висьпуктанін кольчаясас мед сюясны потшъяссӧ. 
[Мед босьтасны пемыдгӧрд дӧра да вевттясны сыӧн мыссян доз да сылысь коксӧ, нӧшта мед вевттясны ставсӧ лӧз рӧма кучик вевттьӧдӧн да пуктасны новлӧдлан потшыс вылӧ.]
Израиль войтырлӧн туйӧ петтӧдзыс Аарон пияныскӧд мед вевттяласны став вежа дозмук-кӧлуйсӧ. Сӧмын та бӧрын вермасны матыстчыны Кааф пиян, медым нуны вежа дозмук-кӧлуйсӧ.
Найӧ кӧ инмӧдчасны вевттьытӧм вежа дозмук-кӧлуй дінӧ, куласны.
Вежа чомйын кесъялан дозмук-кӧлуйсӧ колӧ новлӧдлыны Кааф пиянлы.
Аарон поплӧн Элазар пиыс мед кывкутас би дозйӧ кисьтан вый да чӧскыд дука тшынӧдчантор вӧсна, быдлунся нянь вись да мавтыштан вый вӧсна. Сійӧ мед кывкутас вежа чом вӧсна да вежаинса став дозмук-кӧлуй вӧсна».
Господь шуис Мӧисейлы да Ааронлы:
«Видзӧдӧй, медым Кааф рӧдыс эз быр левитъяс лыдысь. Аарон да сылӧн пияныс мед индасны Кааф пиянлы, кодлы мый колӧ вӧчны да мый новлӧдлыны.
Вежасьыс-вежаинлань матыстчигӧн Кааф рӧдыс медым эз кув, а ловйӧн колис, найӧ мед оз матыстчыны да оз видзӧдны, кыдзи вевттялӧны вежа дозмук-кӧлуйсӧ. Ӧд найӧ кӧ аддзыласны вежа дозмук-кӧлуйсӧ, куласны».
Господь шуис Мӧисейлы:
«Гижав тшӧтш Гирсонлысь пиянсӧ рӧд да котыр сертиныс, комын арӧссянь ветымын арӧсӧдз найӧс, кодъяс вермасны уджавны вежа чомйын.
Со мый колӧ вӧчны да новлӧдлыны Гирсон рӧдлы.
Найӧ мед новлӧдласны вежа чомлысь дӧраяссӧ, вевттьӧдсӧ, лӧз рӧма кучикысь вӧчӧм вылысса вевттьӧдсӧ, вежа чом пыранінӧ ӧшӧдан дӧрасӧ, висьпуктанін да вежа чом йӧр тупкан дӧраяссӧ, йӧр пыранінӧ ӧшӧдан дӧрасӧ, дӧраяслысь гезъяссӧ да став кӧлуйсӧ. Найӧ мед тӧждысясны вежа чом разялӧм-сувтӧдӧм вӧсна.
Ааронлӧн да пияныслӧн тшӧктӧм серти Гирсон пиян мед кесъяласны да тӧждысясны вежаинса став кӧлуйыс вӧсна, мый налы колӧ новлӧдлыны. Татшӧм удж индӧма Гирсон рӧдъяслы. На бӧрся мед видзӧдас Аарон поплӧн Итамар пиыс.
Гижав Мерарилысь пиянсӧ рӧд да котыр сертиныс, комын арӧссянь ветымын арӧсӧдз найӧс, кодъяс вермасны уджавны вежа чомйын.
Налӧн уджныс — новлӧдлыны вежа чомлысь брусъяссӧ да потшъяссӧ, сюръяяссӧ да налысь подувъяссӧ, йӧр гӧгӧр сувтӧдан сюръяяс да налысь подувъяссӧ, майӧгъяссӧ, гезъяссӧ да став кӧлуйсӧ. Найӧ мед тӧждысясны вежа чом разялӧм-сувтӧдӧм вӧсна.
Индӧй, кодлы мый колӧ новлӧдлыны.
Татшӧм удж индӧма Мерари рӧдъяслы. На бӧрся мед видзӧдас Аарон поплӧн Итамар пиыс».
Мӧисей, Аарон да войтырлӧн юралысьясыс арталісны-гижалісны Каафлысь пиянсӧ рӧд да котыр сертиныс, комын арӧссянь ветымын арӧсӧдз найӧс, кодъяс вермисны уджавны вежа чомйын.
Налӧн лыдыс вӧлі кык сюрс сизимсё ветымын морт.
Та мында айулов кесъяліс вежа чомйын Кааф рӧдысь. Мӧисей да Аарон арталісны-гижалісны найӧс, кыдзи Господь тшӧктіс Мӧисей пыр.
Гирсонлысь пиянсӧ вӧлі арталӧма-гижалӧма рӧд да котыр сертиныс, комын арӧссянь ветымын арӧсӧдз найӧс, кодъяс вермисны уджавны вежа чомйын.
Налӧн лыдыс вӧлі кык сюрс квайтсё комын морт.
Та мында айулов кесъяліс вежа чомйын Гирсон рӧдысь. Господьлӧн тшӧктӧм серти найӧс арталісны-гижалісны Мӧисей да Аарон.
Мерарилысь пиянсӧ вӧлі арталӧма-гижалӧма рӧд да котыр сертиныс, комын арӧссянь ветымын арӧсӧдз найӧс, кодъяс вермисны уджавны вежа чомйын.
Налӧн лыдыс вӧлі куим сюрс кыксё морт. Та мында айулов кесъяліс вежа чомйын Мерари рӧдысь. Мӧисей да Аарон арталісны-гижалісны найӧс, кыдзи Господь тшӧктіс Мӧисей пыр.
Мӧисей, Аарон да израильса юралысьяс арталісны-гижалісны левитъясӧс рӧд да котыр сертиныс, комын арӧссянь ветымын арӧсӧдз найӧс, кодъяс вермисны кесъявны вежа чомйын да новлӧдлыны вежаинса дозмук-кӧлуйсӧ.
Налӧн лыдыс вӧлі кӧкъямыс сюрс витсё кӧкъямысдас морт.
Господьлӧн тшӧктӧм серти Мӧисей быдӧнлы индіс, кодлы мый вӧчны да кутшӧм кӧлуй новлӧдлыны. Левитъясӧс вӧлі арталӧма-гижалӧма, кыдзи Господь тшӧктіс Мӧисейлы.
Господь шуис Мӧисейлы:
«Израиль пиянлы тшӧкты вӧтлыны сувтанінысь быдӧнӧс, коді висьмӧ проказаӧн, кодлӧн вир-яяс эм лёквиялӧм либӧ коді шой дінӧ инмӧдчылӧм вӧсна лоӧ пеж. Татшӧм айловӧс либӧ аньӧс вӧтлӧй сувтанін сайӧ, медым эз пежав оланінсӧ, кӧні Ме ола тіян пӧвстын».
Израиль пиян вӧтлісны татшӧм йӧзсӧ сувтанін сайӧ.
Найӧ вӧчисны сідзи, кыдзи Господь тшӧктіс Мӧисейлы.
Господь шуис Мӧисейлы:
«Висьтав Израиль пиянлы: айлов либӧ ань кӧ лёк вӧчас мӧд мортлы, и тадзи Господь водзын лоӧ мыжа. Аслас мыж вӧчӧм йылысь сійӧ мед висьтасяс, и кодлы паныд мыжсӧ вӧчис, сылы мед вештысяс. Вештысян дон дінӧ мед содтас доныслысь витӧд пайсӧ.
Но кулӧма кӧ нин сійӧ мортыс, кодлы паныд мыжсӧ вӧчис, и сылӧн кӧ абу матысса рӧдвужыс, и та вӧсна вештысьнысӧ некодлы, сэки мед вештысьӧ Господьлы.
Тайӧ вештысян доныс лоӧ поплы. Поплы тшӧтш лоӧ меж, кодӧс колӧ вайны вись пыдди. Тадзи поп вештас мыж вӧчысьлысь мыжсӧ.
Израиль пиянлӧн став вежа вайӧмторйыс лоӧ поплы. 
Ставсӧ, мый вайӧны поплы, кольӧ сылы».
Господь шуис Мӧисейлы:
«Висьтав Израиль пиянлы: гӧтырыс кӧ узяс мӧд айловкӧд, и тадзи пежалас асьсӧ да гозъякост олӧмсӧ, но аддзылысь ни эрдӧдысь оз ло, и верӧсыс оз тӧдмав, пежаліс-ӧ гӧтырыс асьсӧ али эз, но кутас вежӧгтыны гӧтырсӧ, сэки верӧсыс мед вайӧдас гӧтырсӧ поп дінӧ. Гӧтырыс вӧсна вись пыдди мед ваяс ид пызь — ефалысь дасӧд юкӧнсӧ. Но пызяс мед оз кисьт олив вый, оз пукты сэтчӧ ладан, ӧд тайӧ вежӧгтӧмысь вайӧм нянь вись, казьтылан вайӧмтор, мый висьталӧ индӧд торкӧм йылысь.
Поп мед сувтӧдас сы дінӧ вайӧдӧм аньсӧ Господь водзӧ, кисьтас гырнич дозйӧ вежа ва, и ваас мед шыбитас вежа чом джоджсьыс босьтӧм мутор.
Господь водзӧ аньӧс сувтӧдӧм бӧрын поп мед пӧрччӧдас аньлысь юрвевттьӧдсӧ да сетас сылы киас кутны казьтылан вайӧмторсӧ — вежӧгтӧмысь вайӧм нянь висьсӧ. Поп мед босьтас киас ёрӧмсӧ вайысь курыд ва да тшӧктас аньлы кыв сетны, мый сійӧ кутас збыльсӧ висьтавны.
Поп шуас аньлы: “Эз кӧ узь тэкӧд мӧд морт, и тэ эн пӧръяв верӧстӧ да асьтӧ эн пежав, ёрӧмсӧ вайысь курыд ва юӧмысь тэныд лёкыс оз ло.
Но тэ кӧ пӧръялін верӧстӧ да пежалін асьтӧ, кор тэкӧд узис мӧд морт, — аньлӧн кыв сетӧм бӧрын поп мед водзӧ шуас, — Господь мед вӧчас тэкӧд сідзи, мый тэ лоан ёрӧм улын аслад войтыр пӧвстын. Тэнад гырк пытшкӧсыд мед нёпмунас да кынӧмыд мед пыктас, кор ёрӧмсӧ вайысь ваыс пырас пытшкӧсад”. 
Ань мед шуас: “Аминь, мед лоас тадзи”.
Поп мед гижас ёран кывъяссӧ да гижӧдсӧ мыськас курыд ваас.
Та бӧрын поп мед тшӧктас аньлы юны курыд васӧ, медым ёрӧмсӧ вайысь ваыс визувтас ань пытшкӧ.
Поп мед босьтас ань киысь вежӧгтӧмысь вайӧм нянь висьсӧ да Господь водзын пыркӧдӧмӧн нуас сійӧс висьпуктанінӧ.
Поп мед босьтас вайӧм нянь висьысь китыр пызь да сотас сійӧс казьтылан вись пыдди висьпуктанін вылын.
Та бӧрын мед юкталас аньсӧ. Ань кӧ пежаліс асьсӧ да пӧръяліс верӧссӧ, сэки ёрӧмсӧ вайысь курыд ваыс кутас сьӧкыда мучитны сійӧс. Аньлӧн кынӧмыс пыктас да гырк пытшкӧсыс нёпмунас. Аслас войтыр пӧвстын аньыс лоӧ ёрӧмаӧн.
Но ань кӧ эз пежав асьсӧ, и сійӧ кӧ сӧстӧм, сыкӧд нинӧм лёкыс оз ло, и сійӧ кутас вермыны кынӧмасьнысӧ.
Тайӧ индӧдыс вежӧгтӧм йылысь, гӧтыр кӧ узяс мӧд айловкӧд да пежалас асьсӧ, либӧ верӧс кӧ кутас вежӧгтыны ассьыс гӧтырсӧ. Сэки верӧсыс мед вайӧдас гӧтырсӧ Господь водзӧ, и поп ставсӧ вӧчас тайӧ индӧдыс серти. Верӧсыс абу мыжа, гӧтырыс ачыс кывкутас аслас мыж вӧсна».
Господь шуис Мӧисейлы:
«Висьтав Израиль пиянлы: айлов либӧ ань кӧ кыв сетас, мый сиас асьсӧ Господьлы — лоас назорейӧн, сэки сылы оз позь юны вина-сур да виноградысь юантор. Сылы оз позь сёйны нинӧм, мый кӧтӧдӧма винаысь вӧчӧм уксусӧн. Оз позь сёйны косьтӧм да выль воӧм виноград вотӧс.
Назореялан кад чӧжыс сылы оз позь сёйны [да юны] виноград вотӧсысь вӧчӧмтор, оз позь сёйны весиг тусьсӧ ни кучиксӧ.
Кад чӧжыс, мый кежлӧ кыв сетіс Господь водзын назореявнысӧ, сійӧ мед оз шырсьы.
Сійӧ вежа, юрсиыс мед быдмӧ.
Назореялан кад чӧжыс, мый кежлӧ сиис асьсӧ Господьлы, сылы оз позь матыстчыны шой дінӧ.
Весиг батьыс либӧ мамыс, вокыс либӧ чойыс кӧ кулас, сылы оз позь пежавны асьсӧ. Ӧд сылӧн юр вылын Енлы асьсӧ сетан пас.
Назореялан кад чӧжыс сійӧ вежа, торйӧдӧма Господьлы.
Виччысьтӧг кӧ назорейкӧд орччӧн кодкӧ кувсяс, и та вӧсна пежасяс назорейлӧн юрсиыс, сэки сійӧ мед сӧстӧммӧдчан лунӧ, мӧд ногӧн кӧ, пежасьӧмсянь сизимӧд лунӧ, юрсисӧ шырас. А кӧкъямысӧд луннас мед ваяс поплы кык гулюӧс либӧ кык гулюпиӧс вежа чом пыранін дорӧ.
Ӧти гулюсӧ поп мед ваяс мыжысь вись пыдди, а мӧдсӧ — сотан вись пыдди. Тадзи поп вештас сылысь мыжсӧ, сӧстӧммӧдас сійӧс шойӧ инмӧдчылӧм вӧсна пежасьӧмсьыс. Тайӧ лунӧ назорей выльысь вежӧдас ассьыс юрсӧ.
Аслас кыв сетӧм серти сылы колӧ выльысь сины асьсӧ Господьлы назореялан лунъясыс кежлӧ. Мыж вештан вись пыдди сылы колӧ вайны арӧса межӧс.
Пежасьӧм вӧсна сылӧн назореялан лунъясыс, мый вӧліны таӧдз, оз лыддьыссьыны.
Назореялан кад йылысь индӧдыс татшӧм. Кор назореялан лунъясыс помасясны, назорейӧс колӧ вайӧдны вежа чом пыранін дорӧ. Сійӧ мед ваяс Господьлы сотан вись пыдди дзоньвидза арӧса межӧс, мыжысь вись пыдди дзоньвидза арӧса ыжӧс да бурасян вись пыдди дзоньвидза межӧс, тшӧтш нянь вись да вина вись, мый колӧ вайны тайӧ висьясыскӧд. Нӧшта куд тыр мед ваяс шобді пызьысь пӧжалӧм шомтӧм нянь, олив выйӧн гудралӧм нянь да олив выйӧн мавтӧм шомтӧм сӧчӧн.
Тайӧ вайӧмторъяссӧ поп мед ваяс Господь водзӧ. Висьпуктанін вылын мед ваяс мыжысь вись да сотан вись.
Бурасян вись пыдди мед ваяс Господьлы меж да сыкӧд тшӧтш куд тыр шомтӧм нянь. Нӧшта мед ваяс нянь вись да вина вись.
Назорей мед шырас вежа чом пыранін дорын ассьыс юрсисӧ — назореялан пассӧ, сэсся мед шыбитас биӧ, кӧні сотӧны бурасян вись.
Та бӧрын поп мед босьтас кудсьыс ӧти шомтӧм нянь да ӧти шомтӧм сӧчӧн да пуктас межлӧн пуӧм пуліпомкӧд назорейлы киас.
Ставсӧ тайӧс поп мед ваяс Господь водзын пыркӧдан вись пыдди. Тайӧ вежаторйыс вичмас поплы задвыв яйкӧд да пыркӧдӧмӧн вайӧм морӧсвыв яйкӧд.
Та бӧрти назорейлы позьӧ юны вина.
Тайӧ индӧдыс назорей йылысь, назореялӧмысь Господьлы ваян висьяс йылысь да нӧшта висьяс йылысь, мыйта назорей вермас вайны.
Сылы колӧ ставсӧ вӧчны аслас кыв сетӧмыс серти да назореялӧм йылысь индӧдыс серти».
Господь шуис Мӧисейлы:
«Висьтав Ааронлы да сылӧн пияныслы, мый Израиль войтырӧс бурсиигӧн колӧ шуны татшӧм кывъяс:
Господь мед бурсиас тэнӧ да видзас тэнӧ!
Господь мед видзӧдлас тэ вылӧ югыд чужӧмбаннас да бурсьӧлӧмтчас тэ дінӧ!
Господь мед бергӧдас Ассьыс чужӧмбансӧ тэлань да сетас тэныд лӧнь олӧм!
Тадзи Менам нимсянь Аарон да сылӧн пияныс мед бурсиасны Израиль войтырӧс, и Ме [Господь] бурсиа найӧс».
Вежа чом сувтӧдӧм бӧрын Мӧисей мавтыштіс да вежӧдіс вежа чомсӧ да вежаинса став дозмук-кӧлуйсӧ, тшӧтш висьпуктанінсӧ став дозмук-кӧлуйнас. Та бӧрын локтісны Израильлӧн юралысьяс*, рӧдкутысьяс да чужанкотыръяслӧн юралысьяс, кодъяс арталісны-гижалісны йӧзӧс. Юралысьяс вайисны Господь водзӧ квайт тарантас да дас кык ӧшкӧс, быдӧнсянь вӧлі ӧти ӧш, а кык юралысьсянь — ӧти тарантас. Ставсӧ тайӧс сувтӧдісны вежа чом водзӧ.
Господь шуис Мӧисейлы:
«Сибӧд налысь козинъяссӧ, ӧд ставыс тайӧ ковмас левитъяслы, медым кесъявны вежа чом бердын.
Сет вайӧмторъяссӧ налы сы серти, коді кутшӧм удж вӧчӧ».
Мӧисей босьтіс тарантасъяссӧ да ӧшъяссӧ, сэсся сетіс найӧс левитъяслы, сы серти, коді кутшӧм удж вӧчӧ. Гирсон пиянлы сетіс кык тарантас да нёль ӧшкӧс, а Мерари пиянлы — нёль тарантас да кӧкъямыс ӧшкӧс. Налӧн кесъялӧм бӧрся видзӧдіс Аарон поплӧн Итамар пиыс.
Кааф пиянлы тарантасъяссӧ да ӧшъяссӧ эз сет, ӧд налы колӧ вӧлі новлӧдлыны вежа дозмук-кӧлуйсӧ асланыс пельпом вылын.
Сійӧ лунӧ, кор висьпуктанінсӧ вӧлі мавтыштӧма, юралысьяс вайисны висьпуктанін водзӧ козинъяс сійӧс вежӧдӧм могысь.
Господь шуис Мӧисейлы: «Висьпуктанін вежӧдӧм могысь козинсӧ быд юралысь мед ваяс торъя лунӧ».
Медводдза луннас аслас вайӧмторъясӧн локтіс Иуда чужанкотырысь Аминадавлӧн Наашон пиыс.
Сійӧ вайис козин пыдди эзысь тасьті да эзысь дозмук. Вежаинса сикель серти тасьтілӧн сьӧктаыс вӧлі сё комын сикель, дозмуклӧн — сизимдас сикель. Тасьті да дозмук тырыс вӧлі олив выйӧн гудралӧм шобді пызь, мый сійӧ вайис нянь вись пыдди. Нӧшта сійӧ вайис дас сикель сьӧкта зарни кӧш, кытчӧ вӧлі пуктӧма чӧскыд дука тшынӧдчантор. Сотан вись пыдди вайис ӧшкӧс, межӧс да арӧса баляӧс, мыжысь вись пыдди вайис ай кӧзаӧс, бурасян вись пыдди — кык ӧшкӧс, вит межӧс, вит ай кӧзаӧс да арӧса вит баляӧс.
Ставсӧ тайӧс вайис Аминадавлӧн Наашон пиыс.
Мӧд луннас аслас вайӧмторъясӧн локтіс Цуарлӧн Нафанаил пиыс, Иссакар чужанкотырлӧн юралысьыс.
Сійӧ вайис козин пыдди эзысь тасьті да эзысь дозмук. Вежаинса сикель серти тасьтілӧн сьӧктаыс вӧлі сё комын сикель, дозмуклӧн — сизимдас сикель. Тасьті да дозмук тырыс вӧлі олив выйӧн гудралӧм шобді пызь, мый сійӧ вайис нянь вись пыдди. Нӧшта сійӧ вайис дас сикель сьӧкта зарни кӧш, кытчӧ вӧлі пуктӧма чӧскыд дука тшынӧдчантор. Сотан вись пыдди вайис ӧшкӧс, межӧс да арӧса баляӧс, мыжысь вись пыдди вайис ай кӧзаӧс, бурасян вись пыдди — кык ӧшкӧс, вит межӧс, вит ай кӧзаӧс да арӧса вит баляӧс.
Ставсӧ тайӧс вайис Цуарлӧн Нафанаил пиыс.
Коймӧд луннас аслас вайӧмторъясӧн локтіс Хелонлӧн Элиав пиыс, Завулон чужанкотырлӧн юралысьыс.
Сійӧ вайис козин пыдди эзысь тасьті да эзысь дозмук. Вежаинса сикель серти тасьтілӧн сьӧктаыс вӧлі сё комын сикель, дозмуклӧн — сизимдас сикель. Тасьті да дозмук тырыс вӧлі олив выйӧн гудралӧм шобді пызь, мый сійӧ вайис нянь вись пыдди. Нӧшта сійӧ вайис дас сикель сьӧкта зарни кӧш, кытчӧ вӧлі пуктӧма чӧскыд дука тшынӧдчантор. Сотан вись пыдди вайис ӧшкӧс, межӧс да арӧса баляӧс, мыжысь вись пыдди вайис ай кӧзаӧс, бурасян вись пыдди — кык ӧшкӧс, вит межӧс, вит ай кӧзаӧс да арӧса вит баляӧс.
Ставсӧ тайӧс вайис Хелонлӧн Элиав пиыс.
Нёльӧд луннас локтіс Шедеурлӧн Элицур пиыс, Рувим чужанкотырлӧн юралысьыс.
Сійӧ вайис козин пыдди эзысь тасьті да эзысь дозмук. Вежаинса сикель серти тасьтілӧн сьӧктаыс вӧлі сё комын сикель, дозмуклӧн — сизимдас сикель. Тасьті да дозмук тырыс вӧлі олив выйӧн гудралӧм шобді пызь, мый сійӧ вайис нянь вись пыдди. Нӧшта сійӧ вайис дас сикель сьӧкта зарни кӧш, кытчӧ вӧлі пуктӧма чӧскыд дука тшынӧдчантор. Сотан вись пыдди вайис ӧшкӧс, межӧс да арӧса баляӧс, мыжысь вись пыдди вайис ай кӧзаӧс, бурасян вись пыдди — кык ӧшкӧс, вит межӧс, вит ай кӧзаӧс да арӧса вит баляӧс.
Ставсӧ тайӧс вайис Шедеурлӧн Элицур пиыс.
Витӧд луннас локтіс Цуришаддайлӧн Шелумиэл пиыс, Симеон чужанкотырлӧн юралысьыс.
Сійӧ вайис козин пыдди эзысь тасьті да эзысь дозмук. Вежаинса сикель серти тасьтілӧн сьӧктаыс вӧлі сё комын сикель, дозмуклӧн — сизимдас сикель. Тасьті да дозмук тырыс вӧлі олив выйӧн гудралӧм шобді пызь, мый сійӧ вайис нянь вись пыдди. Нӧшта сійӧ вайис дас сикель сьӧкта зарни кӧш, кытчӧ вӧлі пуктӧма чӧскыд дука тшынӧдчантор. Сотан вись пыдди вайис ӧшкӧс, межӧс да арӧса баляӧс, мыжысь вись пыдди вайис ай кӧзаӧс, бурасян вись пыдди — кык ӧшкӧс, вит межӧс, вит ай кӧзаӧс да арӧса вит баляӧс.
Ставсӧ тайӧс вайис Цуришаддайлӧн Шелумиэл пиыс.
Квайтӧд луннас локтіс Регуэллӧн Эльясат пиыс, Гад чужанкотырлӧн юралысьыс.
Сійӧ вайис козин пыдди эзысь тасьті да эзысь дозмук. Вежаинса сикель серти тасьтілӧн сьӧктаыс вӧлі сё комын сикель, дозмуклӧн — сизимдас сикель. Тасьті да дозмук тырыс вӧлі олив выйӧн гудралӧм шобді пызь, мый сійӧ вайис нянь вись пыдди. Нӧшта сійӧ вайис дас сикель сьӧкта зарни кӧш, кытчӧ вӧлі пуктӧма чӧскыд дука тшынӧдчантор. Сотан вись пыдди вайис ӧшкӧс, межӧс да арӧса баляӧс, мыжысь вись пыдди вайис ай кӧзаӧс, бурасян вись пыдди — кык ӧшкӧс, вит межӧс, вит ай кӧзаӧс да арӧса вит баляӧс.
Ставсӧ тайӧс вайис Регуэллӧн Эльясат пиыс.
Сизимӧд луннас локтіс Аммиудлӧн Элишам пиыс, Ефрем чужанкотырлӧн юралысьыс.
Сійӧ вайис козин пыдди эзысь тасьті да эзысь дозмук. Вежаинса сикель серти тасьтілӧн сьӧктаыс вӧлі сё комын сикель, дозмуклӧн — сизимдас сикель. Тасьті да дозмук тырыс вӧлі олив выйӧн гудралӧм шобді пызь, мый сійӧ вайис нянь вись пыдди. Нӧшта сійӧ вайис дас сикель сьӧкта зарни кӧш, кытчӧ вӧлі пуктӧма чӧскыд дука тшынӧдчантор. Сотан вись пыдди вайис ӧшкӧс, межӧс да арӧса баляӧс, мыжысь вись пыдди вайис ай кӧзаӧс, бурасян вись пыдди — кык ӧшкӧс, вит межӧс, вит ай кӧзаӧс да арӧса вит баляӧс.
Ставсӧ тайӧс вайис Аммиудлӧн Элишам пиыс.
Кӧкъямысӧд луннас локтіс Педацурлӧн Гамалиэл пиыс, Манассей чужанкотырлӧн юралысьыс.
Сійӧ вайис козин пыдди эзысь тасьті да эзысь дозмук. Вежаинса сикель серти тасьтілӧн сьӧктаыс вӧлі сё комын сикель, дозмуклӧн — сизимдас сикель. Тасьті да дозмук тырыс вӧлі олив выйӧн гудралӧм шобді пызь, мый сійӧ вайис нянь вись пыдди. Нӧшта сійӧ вайис дас сикель сьӧкта зарни кӧш, кытчӧ вӧлі пуктӧма чӧскыд дука тшынӧдчантор. Сотан вись пыдди вайис ӧшкӧс, межӧс да арӧса баляӧс, мыжысь вись пыдди вайис ай кӧзаӧс, бурасян вись пыдди — кык ӧшкӧс, вит межӧс, вит ай кӧзаӧс да арӧса вит баляӧс.
Ставсӧ тайӧс вайис Педацурлӧн Гамалиэл пиыс.
Ӧкмысӧд луннас локтіс Гидеонилӧн Авидан пиыс, Венямин чужанкотырлӧн юралысьыс.
Сійӧ вайис козин пыдди эзысь тасьті да эзысь дозмук. Вежаинса сикель серти тасьтілӧн сьӧктаыс вӧлі сё комын сикель, дозмуклӧн — сизимдас сикель. Тасьті да дозмук тырыс вӧлі олив выйӧн гудралӧм шобді пызь, мый сійӧ вайис нянь вись пыдди. Нӧшта сійӧ вайис дас сикель сьӧкта зарни кӧш, кытчӧ вӧлі пуктӧма чӧскыд дука тшынӧдчантор. Сотан вись пыдди вайис ӧшкӧс, межӧс да арӧса баляӧс, мыжысь вись пыдди вайис ай кӧзаӧс, бурасян вись пыдди — кык ӧшкӧс, вит межӧс, вит ай кӧзаӧс да арӧса вит баляӧс.
Ставсӧ тайӧс вайис Гидеонилӧн Авидан пиыс.
Дасӧд луннас локтіс Аммишаддайлӧн Ахиэзер пиыс, Дан чужанкотырлӧн юралысьыс.
Сійӧ вайис козин пыдди эзысь тасьті да эзысь дозмук. Вежаинса сикель серти тасьтілӧн сьӧктаыс вӧлі сё комын сикель, дозмуклӧн — сизимдас сикель. Тасьті да дозмук тырыс вӧлі олив выйӧн гудралӧм шобді пызь, мый сійӧ вайис нянь вись пыдди. Нӧшта сійӧ вайис дас сикель сьӧкта зарни кӧш, кытчӧ вӧлі пуктӧма чӧскыд дука тшынӧдчантор. Сотан вись пыдди вайис ӧшкӧс, межӧс да арӧса баляӧс, мыжысь вись пыдди вайис ай кӧзаӧс, бурасян вись пыдди — кык ӧшкӧс, вит межӧс, вит ай кӧзаӧс да арӧса вит баляӧс.
Ставсӧ тайӧс вайис Аммишаддайлӧн Ахиэзер пиыс.
Дас ӧтиӧд луннас локтіс Окранлӧн Пагиэл пиыс, Асир чужанкотырлӧн юралысьыс.
Сійӧ вайис козин пыдди эзысь тасьті да эзысь дозмук. Вежаинса сикель серти тасьтілӧн сьӧктаыс вӧлі сё комын сикель, дозмуклӧн — сизимдас сикель. Тасьті да дозмук тырыс вӧлі олив выйӧн гудралӧм шобді пызь, мый сійӧ вайис нянь вись пыдди. Нӧшта сійӧ вайис дас сикель сьӧкта зарни кӧш, кытчӧ вӧлі пуктӧма чӧскыд дука тшынӧдчантор. Сотан вись пыдди вайис ӧшкӧс, межӧс да арӧса баляӧс, мыжысь вись пыдди вайис ай кӧзаӧс, бурасян вись пыдди — кык ӧшкӧс, вит межӧс, вит ай кӧзаӧс да арӧса вит баляӧс.
Ставсӧ тайӧс вайис Окранлӧн Пагиэл пиыс.
Дас кыкӧд луннас локтіс Энанлӧн Ахир пиыс, Неффалим чужанкотырлӧн юралысьыс.
Сійӧ вайис козин пыдди эзысь тасьті да эзысь дозмук. Вежаинса сикель серти тасьтілӧн сьӧктаыс вӧлі сё комын сикель, дозмуклӧн — сизимдас сикель. Тасьті да дозмук тырыс вӧлі олив выйӧн гудралӧм шобді пызь, мый сійӧ вайис нянь вись пыдди. Нӧшта сійӧ вайис дас сикель сьӧкта зарни кӧш, кытчӧ вӧлі пуктӧма чӧскыд дука тшынӧдчантор. Сотан вись пыдди вайис ӧшкӧс, межӧс да арӧса баляӧс, мыжысь вись пыдди вайис ай кӧзаӧс, бурасян вись пыдди — кык ӧшкӧс, вит межӧс, вит ай кӧзаӧс да арӧса вит баляӧс.
Ставсӧ тайӧс вайис Энанлӧн Ахир пиыс.
Висьпуктанін мавтыштан лунӧ сійӧс вежӧдӧм могысь Израиль войтырлӧн юралысьясыс вайисны дас кык эзысь тасьті, дас кык эзысь дозмук, дас кык зарни кӧш.
Быд эзысь тасьті сьӧктанас вӧлі сё комын сикель, быд дозмук — сизимдас сикель. Вежаинса сикель серти ставнас эзысьыс вӧлі кык сюрс нёльсё сикель.
Чӧскыд дука тшынӧдчантор тыра зарни кӧшыс вӧлі дас кык. Вежаинса сикель серти быд зарни кӧшлӧн сьӧктаыс вӧлі дас сикель, ставнас — сё кызь сикель.
Сотан вись пыдди вӧлі вайӧма дас кык ӧшкӧс, дас кык межӧс, арӧса дас кык баляӧс да накӧд ӧтлаын ваян нянь вись. Мыжысь вись пыдди вӧлі вайӧма дас кык ай кӧзаӧс. Бурасян вись пыдди вӧлі вайӧма кызь нёль ӧшкӧс, квайтымын межӧс, [арӧса] квайтымын ай кӧзаӧс да [дзоньвидза] арӧса квайтымын баляӧс.
Висьпуктанін мавтыштӧм бӧрын ставсӧ тайӧс вайисны висьпуктанін вежӧдӧм могысь.
Кор Мӧисей пыравліс вежа чомйӧ сёрнитны Господькӧд, сійӧ кывліс гӧлӧс шы Йитӧд куд вевт вывсянь кык херувим костысь. Тадзи Господь сёрнитіс Мӧисейкӧд.
Господь шуис Мӧисейлы:
«Тшӧкты Ааронлы пуктавны бикок вылӧ би дозъяссӧ сідз, мый сизимнан дозсянь югӧрыс усяс бикок водзвылӧ».
Аарон тадзи и вӧчис. Сійӧ пукталіс би дозъяссӧ сідз, мый югӧрыс усис бикок водзвылас, кыдзи Господь тшӧктіс Мӧисейлы.
Засяньыс дзоридзьясӧдзыс бикоксӧ вӧлі дорӧма зарниысь серлӧдлӧмӧн.
Бикоксӧ вӧлі вӧчӧма сідзи, кыдзи Господь петкӧдліс Мӧисейлы.
Господь шуис Мӧисейлы:
«Израиль пиян пӧвстысь торйӧд левитъясӧс да сӧстӧммӧд найӧс.
Рез найӧс сӧстӧммӧдчан ваӧн мыжысь сӧстӧммӧдӧм могысь. Найӧ мед шырасны юрсисӧ, тошсӧ, быдлаысь ловгӧнсӧ да мыськаласны паськӧмнысӧ. Та бӧрын найӧ лоӧны сӧстӧмӧсь.
Найӧ мед вайӧдасны ӧшкӧс, и ӧшкӧд мед ваясны олив выйӧн гудралӧм шобді пызь, мый лоӧ нянь вись пыдди. А тэ вайӧд мӧд ӧшкӧс, сійӧ лоӧ мыжысь вись пыдди.
Сувтӧд левитъясӧс вежа чом водзӧ и чукӧрт сэтчӧ Израиль войтырӧс.
Левитъясӧс Господь водзӧ сувтӧдӧм бӧрын Израиль пиян мед пуктыласны кинысӧ на вылӧ.
Аарон мед сиас левитъясӧс Господьлы Израиль пиянсянь вайӧм козинӧс моз, медым левитъяс кесъяласны Господьлы.
Левитъяс мед пуктыласны кинысӧ ӧшъяслы юр выланыс. Сэсся вай ӧшъясӧс Господьлы вись пыдди, ӧтисӧ — мыжысь вись пыдди, мӧдсӧ — сотан вись пыдди. Тадзи лоӧ вештӧма левитъяслысь мыжсӧ.
Сувтӧд левитъясӧс Аарон да сылӧн пияныс водзӧ да си найӧс Господьлы.
Тадзи тэ торйӧдан левитъясӧс Израиль пиян пӧвстысь, и найӧ лоӧны Менам.
Та бӧрын левитъяс мед кесъяласны вежа чом бердын, ӧд тэ сӧстӧммӧдін найӧс да сиин Меным.
Найӧс козьналӧма Меным Израиль войтырлӧн медводдза чужысь пиян пыдди.
Израильса аньяслӧн медводдза чужысь пиян пыдди Ме инді левитъясӧс кесъявны Меным.
Израиль пиянлӧн да налӧн ыж-мӧслӧн медводдза чужысьясыс лоӧны Менам. Ме вежӧді-торйӧді найӧс Аслым сійӧ лунӧ, кор Египет муын вии став медводдза чужысьсӧ.
Ме босьта левитъясӧс Израиль войтырлӧн медводдза чужысь пиян пыдди да сета найӧс Ааронлы да сылӧн пияныслы. Левитъяс мед кесъяласны вежа чомйын Израиль пиян пыдди налысь мыжсӧ вештӧм могысь. Тадзи вежа чом дорӧ матыстчиганыс Израиль пиянӧс оз су бырӧдӧмыс».
Мӧисей, Аарон да став Израиль войтырыс вӧчисны сідзи, кыдзи Господь тшӧктіс Мӧисейлы левитъяс йылысь.
Левитъяс сӧстӧммӧдчисны да мыськалісны паськӧмнысӧ. Аарон сиис найӧс Господьлы да вештіс налысь мыжсӧ, медым сӧстӧммӧдны найӧс.
Та бӧрын левитъяс пондісны кесъявны вежа чомйын Ааронлӧн да пияныслӧн веськӧдлӧм улын.
Ставсӧ вӧлі вӧчӧма сідзи, кыдзи Господь тшӧктіс Мӧисейлы левитъяс йылысь.
Господь шуис Мӧисейлы:
«Тайӧ индӧдыс левитъяс йылысь. Кызь вит арӧса да ыджыдджык арлыда левитъяс мед уджаласны вежа чом бердын. А ветымын арӧс тырӧм бӧрын мед дугдасны кесъявнысӧ.
Найӧ вермасны отсасьны вокъясыслы видзны вежа чомсӧ, но кесъявнысӧ налы оз позь.
Тадзи тэ лӧсьӧд левитъяслысь кесъялӧмсӧ».
Египетысь петӧм бӧрын мӧд вонас медводдза тӧлысьӧ Синай овтӧминын Господь шуис Мӧисейлы:
«Израиль пиян мед пасъясны Ыджыд лунсӧ индӧм кадӧ.
Пасйӧй сійӧс тайӧ тӧлысьнас дас нёльӧд лун рытсянь мӧд рытӧдз. Ставсӧ вӧчӧй Ыджыд лун йылысь индӧд-тшӧктӧмъяс серти».
Мӧисей тшӧктіс Израиль пиянлы пасйыны Ыджыд лун.
Медводдза тӧлысьлӧн дас нёльӧд лун рытсянь мӧд рытӧдз Синай овтӧминын найӧ пасйисны Ыджыд лун. Ставсӧ вӧчисны сідзи, кыдзи Господь тшӧктіс Мӧисейлы.
Израиль войтыр пӧвстын вӧліны йӧз, кодъяс морт шой дінӧ инмӧдчылӧм вӧсна вӧліны пежӧсь и индӧм лунӧ эз вермыны пасйыны Ыджыд лунсӧ.
Найӧ локтісны Мӧисей да Аарон дінӧ да шуисны: «Морт шой дінӧ инмӧдчылӧмысь ми лоим пежӧсь.
Миянлы ӧмӧй оз позь индӧм кадӧ Израиль войтыркӧд вись вайны Господьлы?»
Мӧисей налы шуис: «Виччысьӧй. Ме ветла юавны Господьлысь, мый Сійӧ шуас тіян йылысь».
Господь шуис Мӧисейлы:
«Висьтав Израиль пиянлы: коді тіян пӧвстысь либӧ тіянсянь чужысьясысь пежасяс шой дінӧ инмӧдчылӧм вӧсна либӧ коді лоас ылі туйын, сійӧ мед тшӧтш пасйӧ Господьлы сиӧм Ыджыд лун.
Мед пасъясны сійӧс мӧд тӧлысьлӧн дас нёльӧд лун рытсянь мӧд рытӧдз. Мед сёясны ыджыдлунся баляӧс шомтӧм няньӧн да курыд турунъясӧн.
Яйсӧ асылӧдзыс мед оз кольны, и лысӧ мед оз чегъявны.
Ставсӧ мед вӧчӧны сідзи, кыдзи тшӧктӧма Ыджыд лун йылысь.
Коді сӧстӧм да абу [ылі] туйын, но Ыджыд лунсӧ оз пасйы да индӧм кадӧ оз вай Господьлы висьсӧ, сійӧс лоӧ бырӧдӧма аслас войтыр пӧвстысь. Сійӧ мыжа.
Овмӧдчас кӧ тіян ордӧ йӧз муысь локтысь, сылы тшӧтш колӧ пасйыны Господьлы сиӧм Ыджыд лун, кыдзи тшӧктӧма-индӧма Ыджыд лун йылысь.
Вужвойтырлы да йӧз муысь локтысьяслы тшӧктӧмыс ӧти».
Сійӧ лунӧ, кор вӧлі сувтӧдӧма вежа чомсӧ, сійӧс вевттис кымӧр. Рытсяньыс асылӧдзыс вежа чом весьтын ӧзъяліс мыйкӧ би сяма.
Тадзи пыр вӧлі: [луннас] вежа чомсӧ вевттис кымӧр, а войнас ӧзъяліс мыйкӧ би сяма.
Кор кымӧрыс кыпӧдчыліс вежа чом весьтысь, Израиль пиян петлісны туйӧ. А кор кымӧрыс сувтліс, Израиль пиян тшӧтш сувтлісны чомъяснаныс.
Господьлӧн тшӧктӧм серти Израиль пиян мӧдӧдчылісны туйӧ, и Господьлӧн тшӧктӧм серти сувтлісны. Сійӧ кад чӧжыс, кор кымӧрыс сулаліс вежа чом весьтын, найӧ тшӧтш сулалісны.
Кымӧрыс кӧ дыр сулаліс вежа чом весьтын, Израиль пиян Господьлысь кывзысьӧмӧн тшӧтш сулалісны.
Кымӧрыс кӧ сӧмын кымынкӧ лун сулаліс вежа чом весьтын, сэки Господьлӧн тшӧктӧм серти войтырыс сувтліс, а сэсся Господьлӧн тшӧктӧм серти мӧдӧдчыліс туйӧ.
Кымӧрыс кӧ рытсяньыс асылӧдзыс сулаліс да асывнас кыпӧдчыліс, войтырыс мӧдӧдчыліс туйӧ.
Сулаліс кӧ лун да вой, а сэсся кыпӧдчыліс, войтырыс тшӧтш мӧдӧдчыліс туйӧ.
Кымӧрыс кӧ вежа чом весьтын сулавліс кык лун, тӧлысь либӧ дырджык, сэки Израиль пиян туйӧ эз петлыны.
Мыйӧн кыпӧдчыліс кымӧрыс, сэки войтырыс мӧдӧдчыліс туйӧ.
Господьлӧн тшӧктӧм серти войтырыс сувтліс и Господьлӧн тшӧктӧм серти мӧдӧдчыліс туйӧ. Найӧ кывзысисны Господьлысь, вӧчисны, кыдзи Господь тшӧктіс Мӧисейлы.
Господь шуис Мӧисейлы:
«Дор кык эзысь труба. На отсӧгӧн тэ кутан чуксавны войтырӧс, медым чукӧртчыны да петны туйӧ.
Кор кыкнан трубаыс лэдзас шысӧ, сэки став войтырыс мед чукӧртчас тэ дінӧ вежа чом пыранін дорӧ.
Кор сӧмын ӧти труба лэдзас шысӧ, сэки тэ дінӧ мед чукӧртчасны Израиль чужанкотыръяслӧн рӧдкутысьяс.
Войтырӧс кыпӧдан тутӧстӧм бӧрын асыввылӧ паськӧдчӧм чужанкотыръяс мед петасны туйӧ.
Мӧдысь тутӧстӧм бӧрын лунвылӧ паськӧдчӧм чужанкотыръяс мед петасны туйӧ. 
[Коймӧдысь тутӧстӧм бӧрын рытыввылӧ паськӧдчӧм чужанкотыръяс мед петасны туйӧ, и нёльӧдысь тутӧстӧм бӧрын войвылӧ паськӧдчӧм чужанкотыръяс мед петасны туйӧ.] 
Тутсӧмыс мед юргас туйӧ мӧдӧдчигчӧжныс.
Тшӧтш тутсӧй трубаясӧ, кор колӧ чукӧртны войтырӧс, но тутсӧй энӧ войтырӧс кыпӧдан шыӧн.
Трубаясӧ мед тутсасны попъяс, Ааронлӧн пияныс. Тайӧ тшӧктӧмыс тіянлы нэмъяс кежлӧ чужысьяссянь чужысьясӧдз.
Кор тіян муын вӧрӧг уськӧдчас тіян вылӧ, и ті петанныд тышӧ, тутсӧй трубаясӧ, и Господь, тіян Енныд, тӧд вылас уськӧдас тіянӧс да мездас тіянӧс вӧрӧг киысь.
Кор гажӧдчан лунъяс дырйи да выль тӧлысь пасйигӧн ваянныд сотан да бурасян висьяс, тутсӧй трубаясӧ, и тіян Енныд тӧд вылас уськӧдас тіянӧс.
Ме — Господь, тіян Енныд».
Мӧд вонас мӧд тӧлысьлӧн кызьӧд лунӧ кымӧрыс кыпӧдчис вежа чом весьтысь, и Израиль пиян мӧдӧдчисны котыръясӧн Синай овтӧминысь. Кымӧрыс сувтіс Паран овтӧминӧ.
Тадзи найӧ медводдзаысь петісны туйӧ Господьлӧн тшӧктӧм серти, кыдзи вӧлі висьталӧма Мӧисей пыр.
Медводдзаӧн асланыс дӧрапас улын тышкайӧз моз петісны туйӧ Иуда чужанкотыр да сыкӧд орччӧн сувтлӧм чужанкотыръяс.
Иуда чужанкотырӧс нуӧдіс Аминадавлӧн Наашон пиыс.
Иссакар чужанкотырӧс нуӧдіс Цуарлӧн Нафанаил пиыс.
Завулон чужанкотырӧс нуӧдіс Хелонлӧн Элиав пиыс.
Сэсся вежа чом разьӧм бӧрын петісны туйӧ Гирсон пиян да Мерари пиян, кодъяс нуисны вежа чомсӧ.
На бӧрся асланыс дӧрапас улын тышкайӧз моз петісны туйӧ Рувим чужанкотыр да сыкӧд орччӧн сувтлӧм чужанкотыръяс.
Рувим чужанкотырӧс нуӧдіс Шедеурлӧн Элицур пиыс.
Симеон чужанкотырӧс нуӧдіс Цуришаддайлӧн Шелумиэл пиыс.
Гад чужанкотырӧс нуӧдіс Регуэллӧн Эльясат пиыс.
Сэсся петісны туйӧ Кааф пиян, кодъяс новлӧдлісны вежаинса дозмук-кӧлуй.
Налӧн вотӧдз вежа чомсӧ колӧ вӧлі сувтӧдны нин.
На бӧрся асланыс дӧрапас улын тышкайӧз моз петісны туйӧ Ефрем чужанкотыр да сыкӧд орччӧн сувтлӧм чужанкотыръяс.
Ефрем чужанкотырӧс нуӧдіс Аммиудлӧн Элишам пиыс.
Манассей чужанкотырӧс нуӧдіс Педацурлӧн Гамалиэл пиыс.
Венямин чужанкотырӧс нуӧдіс Гидеонилӧн Авидан пиыс.
Медбӧръяӧн асланыс дӧрапас улын тышкайӧз моз петісны туйӧ Дан чужанкотыр да сыкӧд орччӧн сувтлӧм чужанкотыръяс.
Дан чужанкотырӧс нуӧдіс Аммишаддайлӧн Ахиэзер пиыс.
Асир чужанкотырӧс нуӧдіс Окранлӧн Пагиэл пиыс.
Неффалим чужанкотырӧс нуӧдіс Энанлӧн Ахир пиыс.
Тадзи Израиль пиян тышкайӧз моз петлісны туйӧ.
Мӧисей шуис Ховавлы, мадианса Регуэл тесьтыслӧн пилы: «Ми мӧдӧдчам сійӧ муас, мый Господь кӧсйысис сетны миянлы.
Мунам миянкӧд, ми кутам тӧждысьны, мый тэныд бур лоас, ӧд Господь кӧсйысис Израильлы бур вӧчны».
Но Ховав вочавидзис: «Ме ог мун.
Ме муна аслам муӧ, аслам чужанінӧ».
«Эн эновт миянӧс! — корис Мӧисей. — Тэ тӧдан, кытчӧ чомъясӧн сувтлыны овтӧминын. Нуӧд миянӧс!
Тэ кӧ мунан миянкӧд, ми юксям тэкӧд сійӧ бурнас, мый сетас миянлы Господь».
Господьлӧн керӧс дорысь мӧдӧдчӧм бӧрын Израиль войтыр мунісны куим лун чӧж. Господьлысь Йитӧд кудсӧ найӧ нуисны водзвыланыс, медым сійӧ петкӧдлас шойччанін.
Луннас сувтанінысь мӧдӧдчигӧн Господьлӧн кымӧрыс вӧлі на весьтын.
Кор Йитӧд кудсӧ босьтлісны нуны, Мӧисей горӧдліс: «Господьӧй, кыпӧдчы! Тэныд паныд сувтысьяс мед разаласны, Тэнӧ мустӧмтысьяс мед пышъясны Тэнад син водзысь!»
Кор Йитӧд кудйыс сувтліс, Мӧисей шуліс: «Господьӧй, бӧр лок лыдтӧм-тшӧттӧм Израиль пияныд дінӧ!»
Войтырыс кутіс ропкыны.
Господь кыліс тайӧс да ёна скӧрмис. Сувтанін помын ыпнитіс Господьлӧн би, биыс кутіс бырӧдны сувтанінсӧ.
Войтырыс шыасис Мӧисей дінӧ.
Мӧисей кевмысис Господьлы, и биыс кусіс.
Израиль войтыр пӧвстын Господьлӧн биыс ӧзйылӧм вӧсна тайӧ местаыслы сетісны Тавера* ним.
Мукӧд войтырысь йӧз, кодъяс олісны Израиль войтыр пӧвстын, кутісны пӧтлытӧг горшасьны.
Израиль пиян накӧд ӧтвылысь бӧрдісны-шуалісны: «Яй кӧ эськӧ сёйыштны.
Египетын миянлы дон босьттӧг чери сетлісны, сэні ми сёйлім ӧгуреч, дыня, лук турун, лук да чеснӧк.
Тані ми дзикӧдз эбӧстӧммам.
Манна кындзи миян сёяныс абу!»
Маннаыс вӧлі кориандр тусь кодь. Сылӧн рӧмыс вӧлі тшынӧдчан сирлӧн кодь.
Йӧзыс ветлӧдлісны да чукӧртісны маннасӧ, изісны сійӧс изкиӧн либӧ тойисны гырйын, сэсся пуисны пӧртйын либӧ пӧжалісны сӧчӧнъяс.
Сылӧн кӧрыс вӧлі олив выя сӧчӧнлӧн кодь.
Войнас маннаыс усьлывліс чомъяс гӧгӧр лысвакӧд ӧттшӧтш.
Мӧисей кыліс, кыдзи быд чом дорын бӧрдісны йӧзыс.
Господь ёна скӧрмис, а Мӧисей шогсис.
Мӧисей шыасис Господь дінӧ: «Мыйла Тэ пикӧ воштін менӧ, Ассьыд кесйӧгтӧ? Мый вӧсна Тэ он бурсьӧлӧмтчы ме дінӧ? Мыйла Тэ тайӧ войтырыс вӧсна та ыджда сьӧкыдсӧ ме вылӧ пуктін?
Ме ӧмӧй новлӧдлі найӧс кынӧмын, ме ӧмӧй чужті найӧс? Мыйла Тэ пуктін менӧ кага видзысьӧ, пуктін моздорын новлӧдлыны тайӧ войтырсӧ? Мыйла Тэ тшӧктін менӧ нуны найӧс муӧ, мый йылысь кыв сетін налӧн батьяслы?
Кытысь ме босьта яйсӧ став тайӧ войтырыслы?
Найӧ бӧрдӧмӧн корӧны менсьым яй.
Ме ог вермы ӧтнамӧн нуны тайӧ войтырыс вӧсна сьӧкыдсӧ, тайӧ меным вывті сьӧкыд.
Татшӧм олӧм дорысь бурджык лоӧ, виан кӧ менӧ. Ло бур сьӧлӧма да ви менӧ, медым помасяс менам шогӧй!»
Господь шуис Мӧисейлы: «Чукӧрт Ме дінӧ израильса юрнуӧдысьяс пӧвстысь сизимдас мортӧс, кодъяс йылысь тэ тӧдан, мый найӧ бура видзӧдӧны войтыр бӧрся. Вайӧд найӧс вежа чом дорӧ.
Ме лэчча да кута сёрнитны сэні тэкӧд. Тэ вылысь Ловсӧ Ме юкла да пукта тшӧтш на вылӧ. Сэки найӧ тэкӧд ӧтвылысь пондасны нуны войтыр вӧсна сьӧкыдсӧ, а он нин тэ ӧтнад.
Войтырыдлы тшӧкты вежӧдны-сӧстӧммӧдны асьнысӧ аски кежлӧ, ӧд аски кутанныд сёйны яй.
Ті Господь водзын бӧрдінныд-шуалінныд: “Яй кӧ эськӧ сёйыштны. Египетын миянлы вӧлі бурджык”. Та вӧсна Господь сетас тіянлы яй, и ті сёянныд.
Кутанныд сёйны он ӧти, он кык, он вит, он дас и он кызь лун, а тӧлысь чӧж, кытчӧдз тіянӧс оз кут вукӧдны, и вомсьыныд яйыс бӧр оз кут петны. Тадзи лоӧ сыысь, мый ті мустӧмтінныд Господьӧс, коді олӧ тіян пӧвстын, да сыысь, мый ті Господь водзын бӧрдінныд-шуалінныд, мыйла нӧ ми петім Египетысь».
Мӧисей шуис: «Тайӧ войтыр пӧвстын квайтсё сюрс пода морт, а Тэ шуан, тӧлысь кежлӧ пӧ яй сета.
Тырмас ӧмӧй та мындаыслы, весиг кӧ став ыж-мӧссӧ начкам либӧ саридзсьыс став черисӧ кыям?»
Господь шуис Мӧисейлы: «Менам киӧй ӧмӧй оз вермы отсавны?
Талун тэ аддзан, инас-ӧ Менам кывйӧй».
Мӧисей петіс войтырыс дінӧ да висьталіс Господьлысь кывъяссӧ. Войтырлӧн юрнуӧдысьяс пӧвстысь чукӧртіс сизимдас мортӧс да тшӧктіс налы сувтны вежа чом гӧгӧр.
Господь лэччис кымӧр пытшкын да сёрнитіс Мӧисейкӧд, сэсся Мӧисей вылысь Ловсӧ юкис да сетіс сизимдаснан юрнуӧдысьыслы.
Кор Лолыс лэччис юрнуӧдысьяс вылӧ, найӧ кутісны пророкавны. Но бӧрынджык найӧ эз нин пророкавны.
Сизимдас юрнуӧдысь пӧвстысь кыкӧн, Элдад да Медад, вӧліны асланыс чомъяс дорын, но Лолыс лэччис тшӧтш на вылӧ, и найӧ кутісны пророкавны. Найӧ вӧліны тшӧтш бӧрйӧмаяс, сӧмын вежа чом дорӧ эз петавны.
Мӧисей дорӧ котӧртіс зон да шуис: «Элдад да Медад пророкалӧны асланыс чомъяс дорын».
Навлӧн Исус пиыс, коді том кадсяньыс отсасис Мӧисейлы, шуис: «Мӧисей ыджыдӧй, ӧлӧд найӧс».
Но Мӧисей шуис сылы: «Ме вӧсна-ӧ тэ тӧждысян?
Ме эськӧ кӧсйи, медым Господь став Аслас войтыр вылӧ мӧдӧдіс Ассьыс Ловсӧ, и ставныс вӧліны пророкъясӧн!»
Сэсся Мӧисей да израильса юрнуӧдысьяс бӧр мунісны асланыс чомъяс дорӧ.
Господь кыпӧдіс тӧвныр, и саридзсянь тӧвнырыс вайис квайтпалич пӧткаясӧс. Пӧткаясыс пуксялісны чомъяс гӧгӧр кык гырддза судта. Чомъяссянь лунтыр мунан ылнаӧдз быдлаын вӧлі пӧтка.
Войтырыс босьтчис чукӧртны квайтпалич пӧткаяс. Чукӧртісны лунтыр, войбыд да нӧшта на мӧд луннас.
Быдӧн чукӧртіс дас ыджыд мешӧк да унджык на.
Чомъяс гӧгӧр быдлаын косьтісны пӧтка яй.
Сёйиганыс, кор яйыс вӧлі воманыс на, ӧзйис Господьлӧн скӧрлуныс. Господь чорыда мыждіс войтырсӧ — унаӧн висьмисны да кулісны.
Та вӧсна тайӧ местасӧ шуисны Киврот-Хаттаава*, ӧд сэтчӧ дзебисны горшасьысь йӧзӧс.
Киврот-Хаттаавасянь войтыр мӧдӧдчис Хацеротӧ. Сэтчӧ найӧ паськӧдісны чомъяснысӧ.
Мирьям да Аарон шуасисны Мӧисей вылӧ эфиопияса гӧтырыс вӧсна. Найӧ шуисны: «Господь ӧмӧй сӧмын Мӧисейкӧд сёрнитӧ, а миянкӧд оз?»
Налысь сёрнисӧ кыліс Господь.
Му вылын олысь став йӧзсьыс Мӧисей вӧлі рамсьыс-рам мортӧн.
Виччысьтӧг Господь шуис Мӧисейлы, Ааронлы да Мирьямлы: «Куимнанныд локтӧй вежа чом дорӧ».
Найӧ локтісны.
Господь лэччис кымӧр сюръя пытшкын да сувтіс вежа чом пыранін дорӧ. Сійӧ корис Ааронӧс да Мирьямӧс, и найӧ матыстчисны.
Господь шуис: «Кывзӧй Менсьым кывъясӧс.
Эм кӧ тіян пӧвстын Менам пророк, сылы Ме восся петкӧдчылӧм пыр да сёрнита сыкӧд вӧтас.
Но Аслам Мӧисей кесйӧгкӧд ог сідзи сёрнит, ӧд сійӧ кывзысьӧмӧн кесъялӧ Менам керкаын.
Ме сёрнита сыкӧд ог нӧдкывъяс пыр, а воча чужӧмӧн да восьсӧн, и сійӧ аддзӧ Менсьым пертасӧс.* 
Кыдзи ті лысьтанныд шуасьны Менам Мӧисей кесйӧг вылӧ?»
Господь скӧрмӧмӧн муніс на дінысь.
Кор кымӧрыс вешйис вежа чом весьтысь, Мирьямлӧн вир-яйыс ставнас вевттьысис лым кодь еджыд проказаӧн.
Аарон бергӧдчис Мирьямлань да аддзис, мый сійӧ вевттьысьӧма проказаӧн.
Аарон шуис Мӧисейлы: «Ыджыдӧй, ми мыжмим. Эн мыжды миянӧс! Ми мывкыдтӧма вӧчим.
Эн лэдз, медым Мирьям коли пузчужӧм кага шой кодь, коді мам кынӧмсьыс петігас джынвыйӧ сісьмӧма нин».
Мӧисей шыасис Господь дінӧ: «Енмӧй, кора Тэнӧ, бурдӧд сійӧс!»
Господь вочавидзис Мӧисейлы: «Батьыс кӧ сьӧлыштіс сылы чужӧмас, сійӧ эськӧ сизим лун чӧж вӧлі янӧдӧм улын.
Сідзкӧ, вӧтлӧй сійӧс чомъяс сайӧ сизим лун кежлӧ, а сэсся мед бӧр локтас».
Мирьям оліс чомъяс сайын сизим лун чӧж. Кытчӧдз Мирьям бӧр эз лок, Израиль войтыр эз мӧдӧдчы туйӧ.
Сэсся войтырыс петіс Хацеротысь да сувтіс Паран овтӧминӧ.
Господь шуис Мӧисейлы:
«Мӧдӧд чужанкотыръяслысь юралысьяссӧ видзӧдавны Ханаан му. Тайӧ мусӧ Ме сета Израиль пиянлы».
Господьлӧн тшӧктӧм серти Мӧисей мӧдӧдіс найӧс Паран овтӧминсянь. Ставныс найӧ вӧліны Израиль войтырлӧн юралысьясыс.
Тайӧ вӧліны: Рувим чужанкотырысь Заккурлӧн Шаммуй пиыс, Симеон чужанкотырысь Хорилӧн Шафат пиыс, Иуда чужанкотырысь Ефуннилӧн Калев пиыс, Иссакар чужанкотырысь Ӧсиплӧн Игал пиыс, Ефрем чужанкотырысь Навлӧн Осий пиыс, Венямин чужанкотырысь Рафулӧн Палти пиыс, Завулон чужанкотырысь Содилӧн Гаддиэл пиыс, Ӧсип Манассей чужанкотырысь Сусилӧн Гадди пиыс, Дан чужанкотырысь Гемаллилӧн Аммиэл пиыс, Асир чужанкотырысь Микаиллӧн Сетур пиыс, Неффалим чужанкотырысь Вофсилӧн Нахби пиыс, Гад чужанкотырысь Макилӧн Геуэл пиыс.
Тайӧ айуловсӧ Мӧисей мӧдӧдіс видзӧдавны Ханаан му.
Навлысь Осий писӧ Мӧисей нимтіс Исусӧн.
Тайӧ йӧзсӧ [Паран овтӧминсянь] Ханаан му видзӧдлыны мӧдӧдігӧн Мӧисей шуис налы: «Мунӧй Негев му пыр да кайӧй керӧсвыв муӧ. Видзӧдалӧй, кутшӧмджык сійӧ. Тӧдмалӧй, вына-ӧ сэтчӧс войтырыс, уна лыда али этша лыда сійӧ.
Видзӧдалӧй, кутшӧм сэні муыс, бур али лёк.
Олӧны-ӧ йӧзыс сиктъясын али изкаръясын?*
Вына-ӧ муыс, сетӧ-ӧ сійӧ бур быдтас? Быдмӧны-ӧ сэні пуяс? Лоӧй повтӧмӧсь, вайӧй сэтысь вотӧс».
Сэки вӧлі виноград кисьман кад.
Найӧ мунісны да видзӧдалісны Ханаан му Цин овтӧминсянь Реховӧдз, Лево-Хаматсянь матын.
Найӧ мунісны Негев муӧ, сэсся воисны Хеврон карӧ, кӧні олісны Ахиман, Шешай да Талмай — Енаксянь чужысьяс. Хеврон карсӧ вӧлі лэптӧма египетса Цоан карысь сизим воӧн водзджык.
Эшкол ковтысӧ воӧм бӧрын видзӧдалысьяс вундісны сэтысь ыджыд виноград роз. Тайӧ розсӧ ковмис кыклы нуны зіб вылӧ ӧшӧдӧмӧн.
Нӧшта босьтісны гранат да инжир.
Тайӧ ковтыссӧ шуисны Эшколӧн*, ӧд Израиль пиян вундісны сэтысь виноград роз.
Нелямын лун чӧж мусӧ видзӧдалӧм бӧрын найӧ бӧр локтісны Кадешӧ, Паран овтӧминӧ, Мӧисей, Аарон да став Израиль войтыр дінӧ. Найӧ висьтасисны, мый аддзылісны, да петкӧдлісны вайӧм вотӧссӧ.
Мӧисейлы найӧ шуисны: «Ми ветлім сійӧ муас, кытчӧ миянӧс мӧдӧдлін.
Сэні дзик збыльысь визувтӧ йӧв да ма. Со кутшӧм вотӧс вайим!
Но сэтчӧс войтырыс ён, и найӧ олӧны зэв ыджыд изкаръясын. Ми аддзылім весиг Енаксянь чужысьясӧс.
Негев муын олӧны амаликъяс, керӧсвыв муын олӧны хеттейяс, [хивейяс,] евуссаяс да аморейяс, а саридз бокын да Йӧрдан ю бокын олӧны ханаансаяс».
Калев лӧньӧдіс Мӧисейлы паныд горзысьясӧс. «Мунам да босьтам тайӧ мусӧ! — шуис сійӧ. — Ми вермам найӧс!»
Но Калевкӧд Ханаан муӧ ветлысьяс мӧдарӧ сёрнитісны: «Ми огӧ вермӧй тайӧ войтырыслы паныд тышкасьны. Найӧ миянысь ёнджыкӧсь!»
Тадзи Израиль пиян пӧвстын найӧ паськӧдісны лёк сёрни муыс йылысь, кытчӧ ветлісны. Найӧ шуисны: «Муыс, кытчӧ ми ветлім, ньылыштас сэтчӧ овмӧдчысьясӧс. Став йӧзыс, кодъясӧс ми сэтысь аддзылім, вӧліны ыджыдӧсь.
Аддзылім сэтысь весиг Енаксянь чужысьясӧс, зэв ыджыд тушаа йӧзӧс.
Асьнымӧс ми аддзим чирк кодьӧн, и сэтшӧмӧсь жӧ вӧлім налӧн син водзын».
Став войтырыс кутіс гораа ырзӧмӧн бӧрдны. Найӧ войбыд бӧрдісны.
Став Израиль войтырыс шуасис Мӧисей да Аарон вылӧ: «Бурджык, ми кӧ кулім Египетын! Бурджык, ми кӧ кулам тайӧ овтӧминас!
Мыйла Господь нуӧдӧ миянӧс Ханаан муӧ? Сэні ми шыпурт помысь кулам, а гӧтыръясным да ныв-пиным шедасны вӧрӧг киӧ!
Гашкӧ, бурджык бӧр бергӧдчыны Египетӧ?»
Йӧзыс ӧта-мӧдныслы кутісны шуавны: «Бӧръям аслыным выль веськӧдлысьӧс да бӧр бергӧдчам Египетӧ!»
Мӧисей да Аарон кымынь уськӧдчисны муӧ став Израиль войтыр водзӧ.
Навлӧн Исус пиыс да Ефуннилӧн Калев пиыс, кодъяс мукӧдыскӧд ветлісны видзӧдлыны Ханаан му, косялісны паськӧмнысӧ да шуисны став Израиль войтырлы: «Муыс, кытчӧ ми ветлім, бурсьыс-бур.
Ми кӧ лоам Господьлы шогманаӧсь, Сійӧ вайӧдас миянӧс сэтчӧ да сетас миянлы тайӧ мусӧ, кӧні визувтӧ йӧв да ма.
Энӧ кыпӧдчӧй Господьлы паныд! И сэтчӧс войтырысь энӧ полӧй!
Няньӧс моз ми ньылыштам найӧс! Дорйысьыс налӧн абу, а миянкӧд Господь.
Энӧ полӧй наысь!»
Войтырыс кӧсйис изъявны Исусӧс да Калевӧс, но Господьлӧн дзирдлуныс [кымӧрӧн] петкӧдчис вежа чомйын став Израиль пиянлӧн син водзын.
Господь шуис Мӧисейлы: «Дыр-ӧ на тайӧ войтырыс нинӧмӧ пуктӧ Менӧ?
Ме вӧчи уна шензьӧданатор на пӧвстын, но найӧ пыр на оз эскыны Меным.
Ме мӧдӧда на вылӧ пӧрӧс висьӧм да бырӧда найӧс, а тэсянь [да батьыд рӧдсянь] сета чужны ыджыдджык да вынаджык войтырлы».
Но Мӧисей шуис Господьлы: «Та йылысь кыласны египетсаяс, кодъяс пӧвстысь Тэ Аслад вынӧн петкӧдін Ассьыд войтыртӧ. Найӧ висьталасны та йылысь татчӧс олысьяслы, кодъяс кывлісны нин, мый Тэ, Господьӧй, олан Аслад войтырыд пӧвстын да аддзана ногӧн петкӧдчылан сылы. Найӧ кывлісны, мый Тэнад кымӧрыд сулалӧ войтырыд весьтын, и мый Тэ мунан сы водзвылын луннас кымӧр сюръя пытшкын, а войнас би сюръя пытшкын.
Тэ кӧ ӧтитӧг бырӧдан Ассьыд войтыртӧ, сэки войтыръяс, кодъяс кывлісны Тэ йылысь, шуасны:
”Господь эз вермы нуӧдны Ассьыс войтырсӧ сійӧ муас, мый йылысь кыв сетіс налы. Господь бырӧдіс найӧс овтӧминын”.
Мед лоӧ ошкӧма Господьлысь вынсӧ! Тэ Ачыд шуин:
”Ме, Господь — дыр терпитысь, буралысь [да эскана]. Ме прӧстита лёк вӧчӧм да мыж, но мыжаӧс ог коль мыждытӧг. Батьяслӧн мыж вӧсна Ме водзӧс перъя челядьныслысь коймӧд да нёльӧд чужанвужйӧдз”.
Господьӧй, Аслад ыджыд буралӧмыд вӧсна прӧстит тайӧ войтырыслысь мыжсӧ, кыдзи Тэ пыр прӧститлін найӧс Египетысь петӧмсянь да ӧнӧдз!»
Господь шуис Мӧисейлы: «Ме прӧстита найӧс тэнад корӧм серти.
[Аслам пыр олысь нимӧн,] Аслам олӧмӧн да дзирдлунӧн, мыйӧн тырӧма ставнас муыс, Ме кӧсйыся, мый найӧ, кодъяс аддзылісны Менсьым дзирдлунӧс да Менсьым шензьӧданаторъясӧс, мый Ме вӧчи Египетын да овтӧминын, но эз кывзысьны Менсьым да дасӧдысь нин дӧзмӧдісны Менӧ, оз аддзывны сійӧ мусӧ, мый йылысь Ме кыв сеті налӧн батьяслы. 
[Сійӧ мусӧ сета налӧн ныв-пиыслы, кодъяс ӧні тані Мекӧд, но оз на нинӧм вежӧртны, оз тӧдны бурсӧ ни лёксӧ.] Быдӧн, коді нинӧмӧ пуктіс Менӧ, оз аддзыв кӧсйысьӧм мусӧ.
Но Менам Калев кесйӧг пытшкын мӧд лов, и сійӧ став сьӧлӧмсяньыс кывзысьӧ Менсьым. Та вӧсна Ме вайӧда Калевӧс сійӧ муас, кытчӧ ветліс, и сысянь чужысьяс босьтасны аслыныс кӧсйысьӧм мусӧ.
Ковтысын олӧны амаликъяс да ханаансаяс.
Аски бӧр бергӧдчӧй, мунӧй овтӧминӧ Гӧрд саридзлань».
Господь шуис Мӧисейлы да Ааронлы:
«Дыр-ӧ на лёкнас тырӧм тайӧ войтырыс кутас шуасьны Ме вылӧ?
Ме кыла Израиль пиянлысь Ме вылӧ ропкӧмсӧ.
Висьтав налы: Ме кыв сетӧмӧн кӧсйыся Аслам олӧмӧн, — висьталӧ Господь, — мый Ме вӧча тіянлы сійӧс, мый йылысь ті сёрнитінныд.
Ті, Ме вылӧ ропкысьяс пӧвстысь кызь арӧса да ыджыдджык арлыда айулов, кодъясӧс вӧлі арталӧма-гижалӧма, куланныд тайӧ овтӧминас. Ті онӧ пырӧй сійӧ муас, кытчӧ Ме киӧс лэптӧмӧн кӧсйысьлі овмӧдны тіянӧс. Сэтчӧ пырасны сӧмын Ефуннилӧн Калев пиыс да Навлӧн Исус пиыс.
Ныв-пинытӧ, код йылысь ті шулінныд, шедасны пӧ вӧрӧг киӧ, Ме пырта сэтчӧ. Найӧ босьтасны аслыныс сійӧ мусӧ, мый ті ӧтдортінныд. Ті куланныд тайӧ овтӧминас.
Тіян пиянныд кутасны ыж-мӧс видзны овтӧминын нелямын во чӧж. Сыысь, мый ті эновтінныд Менӧ, налы ковмас нуны мыждӧмсӧ, кытчӧдз медбӧръяыс тіян пӧвстысь оз кув овтӧминын.
Нелямын лун чӧж ті видзӧдалінныд мусӧ, и нелямын во чӧж ті понданныд нуны мыждӧмсӧ — ӧти лун пыдди ӧти во. Тадзи ті тӧдмаланныд, кутшӧм лоӧ олӧмныд, кор Ме эновта тіянӧс.
Тадзи шуа Ме, Господь, и тадзи вӧча тайӧ шогмытӧм войтырыслы, Меным паныд кыпӧдчысьяслы. Тайӧ овтӧминас найӧ куласны, тані воас налы пом».
Найӧ, кодъясӧс Мӧисей мӧдӧдліс видзӧдавны Ханаан му, локтӧм бӧраныс кыпӧдісны войтырсӧ Мӧисейлы паныд, ӧд паськӧдісны сійӧ му йывсьыс лёк сёрни. Та вӧсна найӧ кулісны — Господь бырӧдіс найӧс.
На пӧвстысь, кодъяс ветлісны видзӧдавны Ханаан му, ловйӧн колины сӧмын Навлӧн Исус пиыс да Ефуннилӧн Калев пиыс.
Мӧисей висьталіс Израиль пиянлы Господьлысь кывъяссӧ. Войтырсӧ курыд шог босьтіс.
Асывводзнас найӧ мӧдӧдчисны кайны керӧсвыв муӧ. Найӧ шуалісны: «Ми мыж вӧчим, но ми мунам сэтчӧ, кытчӧ тшӧктіс миянлы Господь».
Мӧисей шуис: «Мыйла ті онӧ кывзысьӧй Господьлысь?
Тіян нинӧм оз артмы.
Энӧ мунӧй, ӧд Господь оз ло тіянкӧд! Мунанныд кӧ, вӧрӧгныд вермас тіянӧс.
Сэні тіянӧс виччысьӧны амаликъяс да ханаансаяс. Налӧн шыпурт помысь ті усянныд, ӧд бергӧдчинныд Господьысь, и Господь оз ло тіянкӧд».
Но найӧ асныралісны да мӧдӧдчисны кайны керӧсвыв муӧ.
А Мӧисей кольччис сувтанінӧ, кӧні вӧлі Господьлӧн Йитӧд кудйыс.
Керӧсвыв муын олысь амаликъяс да ханаансаяс уськӧдчисны израильсаяс вылӧ, пасьвартісны найӧс да вӧтӧдісны Хормаӧдз. [Ловйӧн кольӧмаяс бӧр бергӧдчисны асланыс чомъясӧ.]
Господь тшӧктіс Мӧисейлы висьтавны Израиль пиянлы: 
«Кор ті воанныд сійӧ муас, мый Ме сета тіянлы, да ваянныд Господьлы чӧскыда ӧвтысь сотан вись либӧ начкан вись пыдди ӧшкӧс либӧ ыжӧс, лоӧ-ӧ тайӧ висьыс кыв сетан вись либӧ ас кӧсйӧм серти ваян вись либӧ гаждырся вись, сэки тшӧтш вайӧй Господьлы нянь вись пыдди олив выйӧн гудралӧм шобді пызь. Пызьыс мед вӧлі ефалӧн дасӧд юкӧныс, а выйыс мед вӧлі гинлӧн нёльӧд пайыс.
Нӧшта вайӧй кисьтан вись пыдди вина — гинлысь нёльӧд пайсӧ быд балякӧд, мый ваянныд [Господьлы чӧскыда ӧвтысь] сотан вись либӧ начкан вись пыдди.
А межкӧд вайӧй нянь вись пыдди олив выйӧн гудралӧм шобді пызь. Та могысь ефа мында пызьсӧ юкӧй дас пельӧ и сэтысь босьтӧй кыксӧ, а выйсӧ босьтӧй гинлысь коймӧд пайсӧ.
Нӧшта кисьтан вись пыдди вайӧй вина — гинлысь коймӧд пайсӧ. Став тайӧ вайӧмторйыс — Господьлы чӧскыд ӧвтантор.
Ваянныд кӧ Господьлы ӧшкӧс сотан вись пыдди либӧ мукӧд вись пыдди, медым збыльмӧдны кыв сетӧмнытӧ либӧ вайны бурасян вись, сыкӧд ӧтлаын вайӧй нянь вись пыдди олив выйӧн гудралӧм шобді пызь. Та могысь ефа мында пызьсӧ юкӧй дас пельӧ и сэтысь босьтӧй куимсӧ, а выйсӧ босьтӧй гин джын мында.
Кисьтан вись пыдди вайӧй гин джын вина. Став тайӧ вайӧмторйыс — Господьлы чӧскыд ӧвтантор.
Вӧчӧй тадзи быд виськӧд, ваянныд-ӧ вись пыдди ӧшкӧс, межӧс, ыжпиӧс либӧ кӧзапиӧс.
Висьяслӧн лыд серти вайӧй нянь висьсӧ да вина висьсӧ.
Тадзи вужвойтырысь быдӧн мед вайӧ Господьлы чӧскыда ӧвтан вись.
А йӧз муысь локтысь кӧ кӧсъяс вайны висьсӧ, сылы ставсӧ колӧ вӧчны тіян моз.
Тіянлы, Господьлӧн войтырлы, да йӧз муысь локтысьяслы тшӧктӧмыс ӧти нэмъяс кежлӧ чужысьяссянь чужысьясӧдз. Господь водзын ті да йӧз муысь локтысьяс — ӧткодьӧсь.
Тіянлы да йӧз муысь локтысьяслы индӧд-тшӧктӧмыс ӧти».
Господь тшӧктіс Мӧисейлы висьтавны Израиль пиянлы: 
«Кор воанныд сійӧ муас, кытчӧ Ме нуӧда тіянӧс, да кутанныд сёйны сэні быдтӧм нянь, вайӧй Господьлы козин пыдди выль быдтасысь медводдза пӧжалӧм нянь.
Вайӧй сійӧс гумла вылысь ваян козинӧс моз.
Медводдза пӧжасысь козинсӧ вайӧй Господьлы чужысьяссянь чужысьясӧдз.
Ті кӧ тӧдлытӧг торканныд да онӧ вӧчӧй тайӧ тшӧктӧмъясыс серти, мый Господь висьталіс Мӧисейлы и сетіс тіянлы да тіянсянь чужысьяслы Мӧисей пыр, и войтырыс та вӧсна тӧдлытӧг мыжмас, сэки войтырыс мед ваяс [дзоньвидза] ӧшкӧс Господьлы чӧскыда ӧвтысь сотан вись пыдди. Ӧшкӧд мед ваяс нянь вись да вина вись тшӧктӧм серти. Нӧшта мыжысь вись пыдди мед ваяс ай кӧзаӧс.
Поп мед вештас став Израиль войтырлысь мыжсӧ, и найӧс лоӧ прӧститӧма. Ӧд мыжсӧ вӧлі вӧчӧма тӧдлытӧг, но войтырыс вайис Господьлы висьсӧ, тшӧтш вайис тӧдлытӧг Господьлы паныд мыж вӧчӧмысь вись.
Став Израиль войтырлысь да йӧз муысь локтысьяслысь мыжсӧ лоӧ прӧститӧма, ӧд тӧдлытӧг мыж вӧчӧмысь ставныс лоины мыжаӧсь.
Ӧти морт кӧ тӧдлытӧг мыж вӧчас, мыжысь вись пыдди мед ваяс арӧса кӧзаӧс.
Поп мед вештас Господьлы паныд тӧдлытӧг мыж вӧчысьлысь мыжсӧ, и сійӧс лоӧ прӧститӧма.
Ӧти Индӧд быдӧнлы, коді тӧдлытӧг мыж вӧчӧ, Израиль войтырысь-ӧ сійӧ либӧ йӧз муысь локтысь.
Вужвойтырысь либӧ йӧз муысь локтысьясысь кӧ кодкӧ тӧдӧмӧн мыж вӧчӧ, сійӧ омӧльтӧ Господьӧс. Сійӧс лоӧ бырӧдӧма аслас войтыр пӧвстысь, ӧд сійӧ мустӧмтіс Господьлысь кывсӧ да торкис Сылысь тшӧктӧмсӧ.
Тайӧ мортсӧ лоӧ бырӧдӧма, мыжыс кольӧ сы вылӧ».
Кор Израиль пиян вӧліны овтӧминын, аддзисны мортӧс, коді шойччан лунӧ чукӧртіс пес.
Пес чукӧртысьӧс аддзысьяс вайӧдісны сійӧс Мӧисей, Аарон да став Израиль войтыр дінӧ.
Сійӧс видзисны йӧршитӧмӧн, ӧд эз на вӧв шуӧма, мый сыкӧд вӧчнысӧ.
Господь шуис Мӧисейлы: «Тайӧ мортсӧ колӧ вины.
Став войтырыс мед изъялас сійӧс чомъяс сайын».
Войтырыс петкӧдіс сійӧс чомъяс сайӧ да кувтӧдзыс изъяліс, кыдзи Господь тшӧктіс Мӧисейлы.
Господь тшӧктіс Мӧисейлы висьтавны Израиль пиянлы: 
«Вӧчӧй аслыныд паськӧм дорышӧ тугъяс, кытчӧ сюянныд гӧрдовлӧз вурун шӧрт. Тадзи вӧчӧй чужысьяссянь чужысьясӧдз.
Тайӧ тугъясыс тіянлы сы могысь, медым на вылӧ видзӧдігӧн ті тӧд выланыд уськӧдінныд Господьлысь став тшӧктӧмсӧ да олінныд на серти. Сэки тіян сьӧлӧм кӧсйӧмныд да синлы колӧмныд оз кежӧд тіянӧс Меысь, и ті онӧ эновтӧй Менӧ. Энӧ вунӧдӧй Менсьым тшӧктӧмъясӧс, олӧй на серти, медым ті вӧлінныд Енлы вежӧдӧм-торйӧдӧм войтырӧн.
Ме — Господь, тіян Енныд. Ме петкӧді тіянӧс Египетысь, медым лоны тіян Енмӧн. Ме — Господь, тіян Енныд».
Левий рӧдысь Кааф Ицгарлӧн Корей пиыс, Рувим рӧдысь Элиавлӧн Датан да Авирам пияныс да Пелетлӧн Он пиыс кыпӧдчисны Мӧисейлы паныд. Накӧд вӧліны израильса кыксё ветымын веськӧдлысь, войтырлӧн тӧдчана йӧз.
Найӧ чукӧртчисны Мӧисей да Аарон дінӧ да шуисны: «Тырмас тіянлы!
Став войтырыс вежа, и на пӧвстын Господь.
Мыйла ті асьнытӧ ыджыдавны пуктанныд Господьлӧн войтырыс вылын?»
Тайӧс кылӧм бӧрын Мӧисей кымынь уськӧдчис муас. Сэсся Корейлы да сылӧн йӧзыслы шуис: «Аски Господь петкӧдлас, коді вежа, коді Сылӧн, да кодлы Сійӧ лэдзӧ матыстчыны Ас дінас.
Кодӧс Господь бӧръяс, сійӧс и лэдзас матыстчыны Ас дінас.
Тэ, Корей, аслад йӧзыдкӧд аски со мый вӧчӧй: босьтӧй тшынӧдчан дозъяс, пуктӧй сэтчӧ биа ӧгыр да тшынӧдчантор, вайӧй Господь водзӧ.
Кодӧс Господь бӧръяс, сійӧ и вежа.
Тырмас тіянлы, Левий пиян!»
Корейлы Мӧисей нӧшта шуис: «Левий пиян, кывзӧй!
Тіянлы ӧмӧй этша на сійӧ, мый Израильлӧн Ен торйӧдіс тіянӧс Израиль войтыр пӧвстысь да матыстіс Ас дінас, медым ті кесъялінныд Господьлӧн вежа чом бердын да [Господьлӧн] войтырлы?
Енмыс матыстіс Ас дінас тэнӧ да тэнсьыд вокъястӧ, Левий пиянӧс, но ті нӧшта на попъясӧн кӧсъянныд лоны!
Тэ аслад йӧзкӧд кыпӧдчин Господьлы паныд.
Ті ӧд онӧ Аарон вылӧ, а Господь вылӧ ропканныд».
Мӧисей тшӧктіс корны Элиавлысь Датан да Авирам пиянсӧ.
Но найӧ вочавидзисны: «Ми огӧ локтӧй.
Этша на тэныд сійӧ, мый тэ петкӧдін миянӧс муысь, кӧні визувтӧ йӧв да ма, мед ми тані, овтӧминас, кулім?
А ӧні кӧсъян нӧшта ыджыдавны миян вылын!
Тэ ӧмӧй вайӧдін миянӧс муӧ, кӧні визувтӧ йӧв да ма? Тэ ӧмӧй сетін миянлы видз-муяс да виноград йӧръяс?
Чайтан, мый йӧзыс синтӧмӧсь?
Ми огӧ локтӧй!»
Мӧисей ёна скӧрмис да шуис Господьлы: «Налысь вайӧмторъяссӧ эн сибӧд.
Ме весиг ӧти осёлӧс эг босьтлы налысь, на пӧвстысь некодлы лёксӧ эг вӧчлы».
Корейлы Мӧисей шуис: «Аски лок аслад йӧзыдкӧд Господь водзӧ. Аарон тшӧтш локтас.
Быдӧн мед босьтас ассьыс тшынӧдчан дозсӧ, пуктас сэтчӧ тшынӧдчантор да ваяс Господь водзӧ. Тадзи ваянныд кыксё ветымын тшынӧдчан доз, тшӧтш тэ да Аарон ваянныд дознытӧ».
Быдӧн босьтіс ассьыс тшынӧдчан дозсӧ, пуктіс сэтчӧ биа ӧгыр да тшынӧдчантор. Сэсся ставныс сувтісны вежа чом пыранін дорӧ.
Сэні вӧліны тшӧтш Мӧисей да Аарон.
Корей чукӧртіс вежа чом пыранін дорӧ став войтырсӧ, медым Мӧисейлы да Ааронлы паныд кыпӧдны найӧс.
Сэки став войтырыс аддзис Господьлысь дзирдлунсӧ.
Господь шуис Мӧисейлы да Ааронлы:
«Петӧй тайӧ войтырыс пӧвстысь! Найӧс ставнысӧ Ме бырӧда ӧти здукӧн».
Но Мӧисей да Аарон кымынь уськӧдчисны муас да шуисны: «Енмӧй, Тэ став ловъя олысьыслӧн Ен!
Тэ ӧмӧй став войтырыс вылӧ скӧрман ӧти мортлӧн мыж вӧсна?»
Господь шуис Мӧисейлы:
«Войтырлы тшӧкты вешйыны Корей, Датан да Авирам чомъяс дорысь».
Мӧисей муніс Датан да Авирам дінӧ, сы бӧрся мунісны тшӧтш израильса юрнуӧдысьяс.
Войтырыслы Мӧисей шуис: «Вешйӧй тайӧ мыжа йӧзыслӧн чомъяс дорысь, налӧн эмбур-кӧлуй дінӧ энӧ инмӧдчӧй. Онӧ кӧ кывзысьӧй, налӧн мыжъяс вӧсна [накӧд ӧтвылысь] куланныд».
Войтырыс вешйис Корей, Датан да Авирам чомъяс дорысь, а Датан да Авирам петісны чомъяссьыныс да сувтісны пыранін дораныс гӧтыръясныскӧд, пиянныскӧд да ичӧт кагаясныскӧд.
Мӧисей шуис войтырыслы: «Ӧні ті тӧдмаланныд, мый Господь мӧдӧдіс менӧ. Ставсӧ, мый ме вӧчи, эг аслам кӧсйӧм серти вӧч.
Найӧ кӧ куласны, кыдзи став йӧзыс кулӧны, и найӧс кӧ суас сэтшӧм мыждӧм, кутшӧм суӧ став йӧзсӧ, сідзкӧ, эз Господь менӧ мӧдӧд.
Но Господь кӧ вӧчас вӧвлытӧмтор, и муыс воссяс да ньылыштас найӧс [налысь чомъяснысӧ] да ставсӧ, мый налӧн эм, и найӧ ловйӧн мунасны пыдӧстӧминӧ, сэки ті тӧдмаланныд, мый тайӧ йӧзыс нинӧмӧ пуктісны Господьӧс».
Мӧисей сӧмын дугдіс сёрнитнысӧ, и тайӧ йӧзыслӧн кок улын муыс воссис.
Муыс восьтіс вомсӧ и ньылыштіс Корейлысь став йӧзсӧ чомъяснас да эмбурнас.
Найӧ ловйӧн веськалісны пыдӧстӧминӧ ставнас, мый налӧн вӧлі. Муыс вевттис найӧс, и найӧ бырисны войтыр пӧвстысь.
Налӧн горзӧмысь матын сулалысь израильсаяс пышйисны сэтысь, ӧд повзисны, мый муыс ньылыштас тшӧтш найӧс.
Господьсянь петіс би да сотіс тайӧ кыксё ветымын айуловсӧ, кодъяс вайисны тшынӧдчантор.
Господь шуис Мӧисейлы:
«Аарон поплӧн Элазар пилы тшӧкты чукӧртны биӧн сотӧм айуловлысь [ыргӧнысь вӧчӧм] тшынӧдчан дозъяссӧ да шыбитны сэтысь биа ӧгырсӧ, ӧд тшынӧдчан дозъясыс вежаӧсь. Тшынӧдчан дозъяссӧ налысь, кодъяс кулісны асланыс мыж вӧсна, мед лямӧдасны листъясӧ. Наӧн мед эжасны висьпуктанін, ӧд дозъясыс лоины вежаӧсь, кор найӧс вайисны Господь водзӧ.
Лямӧдӧм дозъясыс мед лоӧны ӧлӧданпасӧн Израиль пиянлы».
Элазар поп чукӧртіс биӧн сотӧм айуловлысь ыргӧнысь вӧчӧм тшынӧдчан дозъяссӧ. Тайӧ дозъяссӧ лямӧдісны, сэсся эжисны висьпуктанін, кыдзи Господь тшӧктіс Мӧисей пыр. Лямӧдӧм дозъясыс лоины Израиль пиянлы ӧлӧданпасӧн, медым Ааронсянь чужысьяс кындзи некод эз тшынӧд чӧскыд ӧвтанторъяс Господь водзын, и эз ло сідзи, кыдзи лои Корейкӧд да сылӧн йӧзыскӧд.
Мӧд луннас став Израиль войтыр шуасис Мӧисей да Аарон вылӧ: «Ті виинныд Господьлысь войтырсӧ!»
Кор войтырыс чукӧртчис Мӧисей да Аарон дінӧ, найӧ бергӧдчисны вежа чомлань да аддзисны, кыдзи чомсӧ вевттис кымӧр, и сэні петкӧдчис Господьлӧн дзирдлуныс.
Мӧисей да Аарон матыстчисны вежа чом дорӧ.
Господь шуис Мӧисейлы [да Ааронлы]:
«Вешйӧй тайӧ войтырыс дінысь! Найӧс ставнысӧ Ме бырӧда ӧти здукӧн».
Но Мӧисей да Аарон кымынь уськӧдчисны муас.
Мӧисей шуис Ааронлы: «Босьт тшынӧдчан доз да пукты сэтчӧ висьпуктанінысь ӧгырсӧ, пукты тшӧтш тшынӧдчантор да тэрмасьӧмӧн ну дозсӧ войтыр дінӧ. Вешты налысь мыжсӧ, ӧд Господь скӧрмис, и бырӧдӧмыс заводитчис нин».
Мӧисейлӧн тшӧктӧм серти Аарон босьтіс тшынӧдчан доз да котӧртіс войтыр пӧвстӧ, а войтырӧс бырӧдӧмыс вӧлі заводитчӧма нин.
Аарон пуктіс чӧскыд дука тшынӧдчанторсӧ ӧгыр вылӧ да вештіс войтырлысь мыжсӧ.
Сійӧ сувтіс кулӧмаяс да ловъяяс костӧ, и бырӧдӧмыс помасис.
Корейлӧн мыж вӧсна кулӧмаясысь ӧтдор вӧлі бырӧдӧма дас нёль сюрс сизимсё мортӧс.
Кор бырӧдӧмыс помасис, Аарон бӧр локтіс Мӧисей дінӧ вежа чом пыранін дорӧ.
Господь шуис Мӧисейлы:
«Висьтав Израиль пиянлы, мед быд чужанкотырысь юралысь ваяс тэныд бедь, ставнас дас кыкӧс. Быд бедь вылӧ гиж чужанкотырлӧн юралысьлысь нимсӧ.
Левий бедь вылӧ гиж Ааронлысь нимсӧ. Быд чужанкотырлӧн юралысьлы колӧ вайны ӧти бедь.
Бедьяссӧ пукты вежа чомйӧ Йитӧд куд водзӧ. Сэтысянь Ме кута шыасьны тіян дінӧ.
Кодӧс Ме бӧръя, сылӧн беддьыс кутас дзоридзавны.
Ме вӧча тадзи, медым тіян вылӧ ропкысь Израиль пиян тупкисны вомнысӧ».
Мӧисей висьталіс та йылысь Израиль пиянлы, и быд чужанкотырысь юралысь вайис сылы бедь, ставнас дас кыкӧс. Бедьяс пӧвстын вӧлі тшӧтш Ааронлӧн беддьыс.
Мӧисей пуктіс бедьяссӧ вежа чомйӧ Господь водзӧ.
Мӧд луннас Мӧисей пырис [Ааронкӧд] вежа чомйӧ да аддзис, мый Левий чужанкотырысь Ааронлӧн беддьыс дзоридзалӧ. Беддьыс гаръялӧма, а гаръяссьыс мыччысьӧма дзоридз да вотӧсалӧма миндаль.
Господь водзысь Мӧисей петкӧдіс бедьяссӧ Израиль пиянлы.
Бедьяссӧ видзӧдалӧм бӧрын быдӧн босьтіс ассьыс бедьсӧ.
Господь шуис Мӧисейлы: «Ааронлысь бедьсӧ бӧр пукты Йитӧд куд водзӧ. Беддьыс лоӧ кывзысьтӧм йӧзлы пасӧн, медым найӧ эз ропкыны Ме вылӧ и та вӧсна эз кувны».
Мӧисей ставсӧ вӧчис Господьлӧн тшӧктӧм серти.
Израиль пиян шуисны Мӧисейлы: «Ми кулам, ми ставным кулам!
Быдӧн, коді матыстчас Господьлӧн вежа чом дорӧ, кулас. Ми ӧмӧй ставным кулам?»
Господь шуис Ааронлы: «Тэ, пияныд да батьыдлӧн рӧдыс нуанныд мыжсӧ, вежаин йылысь тшӧктӧмъяссӧ кӧ лоӧ торкӧма.
А попъясӧн кесъялӧм йылысь тшӧктӧмъяссӧ кӧ лоӧ торкӧма, сэки мыжсӧ нуан тэ пияныдкӧд.
Левий рӧдысь вокъястӧ босьт кесъявны, медым найӧ отсасьӧны тэныд вежа чом водзын пияныдкӧд кесъялігӧн. 
Левитъяс мед отсасясны тэныд да вӧчасны вежа чом бердын став уджсӧ.
Но найӧ мед оз инмӧдчыны вежа дозмук-кӧлуйӧ да висьпуктанінӧ. Инмӧдчасны кӧ, куласны, и ті накӧд тшӧтш куланныд.
Найӧ мед тэкӧд уджаласны вежа чом бердын.
Но бокыса йӧзлы вежа чом дорӧ матыстчыны оз позь.
Тіянӧс пуктӧма тӧждысьны вежаин да висьпуктанін вӧсна, медым водзӧвылӧ Менам скӧрлунӧй эз су Израиль пиянӧс.
Левит вокъяснытӧ Ме Ачым торйӧді Израиль пиян пӧвстысь да сеті тіянлы, медым найӧ кесъялісны Меным вежа чом бердын.
А тэ да тэнад пияныд кесъялӧй попъясӧн висьпуктанін дорын да Вежаинын ӧшалысь дӧра сайын.
Попъясӧн кесъялӧмыс — Месянь козин тіянлы. Но бокыса морт кӧ матыстчас вежа чом дорӧ, сійӧс лоӧ виӧма».
Господь шуис Ааронлы: «Ме пукта тэнӧ кывкутны Меным вайӧмторъяс вӧсна.
Став вежа вайӧмторсьыс, мый Израиль пиян вайӧны Меным, Ме сета тэныд да тэнад пиянлы пай. Тайӧ тшӧктӧмыс нэмъяс кежлӧ.
Вежасьыс-вежаторйысь тэныд вичмӧ ставыс, мый оз сотны. Меным вайӧм нянь висьысь, мыжысь висьысь да мыж вештан висьысь вежасьыс-вежаторйыс лоӧ тэныд да пияныдлы.
Сёйӧй сійӧс вежаинын, ӧд сійӧ вежа.
Сӧмын тіян айулов вермасны сёйны сійӧс.
Тэныд да ныв-пиыдлы вичмӧ Израиль пиянлӧн пыркӧдан вись. 
Тайӧ тшӧктӧмыс нэмъяс кежлӧ. Тэнад котырысь быдӧн, коді сӧстӧм, вермас сёйны сійӧс.
Ме сета тэныд медбур олив вый, медбур вина да нянь тусь — ставсӧ, мый Израиль пиян вайӧны Меным асланыс медводдза босьтӧмторйысь.
Налӧн му вылысь медводдза быдтасыс, мый вайӧны Господьлы, лоӧ тэнад.
Тэнад котырысь быдӧн, коді сӧстӧм, вермас сёйны сійӧс.
Ставыс, мый Израиль муын сиӧма* Господьлы, лоӧ тэнад.
Мортлӧн либӧ пемӧслӧн медводдза чужысьыс, кодӧс вайӧны Господьлы, лоӧ тэнад.
Но мортлысь медводдза чужысьсӧ колӧ бӧр ньӧбны, и пеж пемӧслысь медводдза чужысьсӧ колӧ бӧр ньӧбны.
Медводдза чужысь пи кагаӧс, кор сылы тырас тӧлысь, колӧ бӧр ньӧбны индӧм донысь. Босьт сыысь вит сикель эзысь вежаинса сикель серти. Ӧти сикельын — кызь гера.
Но мӧслысь, ыжлысь да кӧзалысь медводдза чужысьясӧс оз ков бӧр ньӧбны, ӧд найӧ вежаӧсь.
Налӧн вирӧн тэныд колӧ резны висьпуктанін, а госсӧ сотны вись пыдди. Тайӧ — Господьлы чӧскыд ӧвтантор.
Налӧн яйыс кольӧ тэныд, кыдзи кольӧ тэныд пыркӧдан вись пыдди вайӧм морӧсвыв яй да веськыдладор задвыв яй.
Став вежа вайӧмторсӧ, мый Израиль пиян вайӧны Меным, Ме сета тэныд да тэнад ныв-пилы. Тайӧ тшӧктӧмыс нэмъяс кежлӧ.
Тэныд да тэсянь чужысьяслы тайӧс кӧсйысьӧма нэмъяс кежлӧ, и тайӧ Господь водзын кӧрталӧм вежсьывлытӧм йитӧд* кодь».
Господь шуис Ааронлы: «Израиль муысь пайсӧ тэныд оз ло сетӧма.
Ме — тэнад пайыс да тэнад юкӧныс.
Му пыдди Ме сета Левий пиянлы дасӧд юкӧнсӧ ставсьыс, мый лоӧ быдтӧма Израиль муын. Тадзи вежа чом бердын кесъялӧмысь налӧн лоӧ удждон.
Вежа чом дорӧ Израиль пиянлы матыстчыны оз позь, медым найӧ эз мыжмыны да эз кувны.
Сӧмын левитъяс мед кесъяласны вежа чом бердын да нуасны мыжнысӧ, торкасны кӧ вежаин йылысь тшӧктӧмъяссӧ.
Тайӧ тшӧктӧмыс тіянлы нэмъяс кежлӧ чужысьяссянь чужысьясӧдз.
Израиль пиян пӧвстын левитъяслы муыс оз ло.
Му пыдди Ме сета налы дасӧд юкӧнсӧ сыысь, мый Израиль пиян вайӧны Меным. Та вӧсна Ме шуи левитъяслы, мый Израиль пиян пӧвстын налы муыс оз вичмы».
Господь тшӧктіс Мӧисейлы висьтавны левитъяслы: 
«Кор ті кутанныд босьтны Израиль пиянсянь дасӧд юкӧнсӧ, мый Ме инді тіянлы, дасӧд юкӧнсьыс ті тшӧтш торйӧдӧй дасӧд юкӧнсӧ Господьлы. Тайӧ дасӧд юкӧныс лоӧ тіян сетӧмторйӧн, кыдзи гумла вылысь ваян тусь да виноград пычкан гуысь вайӧмтор лоӧны Израиль пиянлӧн сетӧмторйӧн.
Тадзи став дасӧд юкӧнсьыс, мый Израиль пиян вайӧны тіянлы, ті тшӧтш ваянныд дасӧд юкӧннытӧ Господьлы. Сетӧй сійӧс Аарон поплы.
Быдторйысь, мый вайӧны тіянлы, медбурсӧ да вежасӧ торйӧдӧй Господьлы.
Медбурсӧ сетӧмныд лоӧ Израиль пиянлӧн гумла вылысь да виноград пычкан гуысь вайӧмтор кодь.
А мый тіянлы коляс, сійӧс ті асланыд котыръяскӧд верманныд сёйны, кӧні кӧсъянныд. Тайӧ лоӧ тіян удждонныд вежа чомйын кесъялӧмысь.
Ті кӧ сетанныд Господьлы медбурсӧ сыысь, мый вайӧны Израиль пиян, ті онӧ пежалӧй налысь вежа вайӧмторъяссӧ, онӧ лоӧй мыжаӧсь да онӧ кулӧй».
Господь шуис Мӧисейлы да Ааронлы:
«Тайӧ тшӧктӧмыс Господьсянь.
Висьтав Израиль пиянлы, мед вайӧдасны тэ дінӧ дзоньвидза гӧрд мӧскӧс, кодлӧн абу некутшӧм тырмытӧмтор да коді сийӧс улын эз на вӧвлы.
Мӧссӧ вайӧдӧй Элазар поп дінӧ. Сійӧ мед петкӧдас мӧссӧ чомъяс сайӧ [сӧстӧминӧ]. Сэні мӧссӧ мед начкасны Элазар поп дырйи.
Элазар поп мед чуньсӧ кӧтӧдлас мӧс вирнас да резыштас вежа чомлань сизимысь.
Мӧссӧ мед сотасны кучикнас, яйнас, вирнас да сювнас Элазар поплӧн син водзын.
Сійӧ мед босьтас сус путор, иссоп турун, югыдгӧрд вурун шӧрт да шыбитас сотчысь мӧс вылӧ.
Элазар поп мед мыськалас паськӧмсӧ, ачыс мыссяс, та бӧрын вермас бӧр локны чомъяс дорӧ. Рытӧдзыс сійӧ лоӧ пеж.
Мӧскӧс сотысь мед тшӧтш мыськалас паськӧмсӧ да ачыс мыссяс. Рытӧдзыс сійӧ лоӧ пеж.
Но сӧстӧм морт мед чукӧртас сотӧм мӧслысь пӧимсӧ да нуас чомъяс сайӧ сӧстӧминӧ. Пӧимсӧ колӧ видзны, медым сы отсӧгӧн Израиль войтырлы позис вӧчны сӧстӧммӧдчан ва. Тайӧ мӧскыс — мыжысь вись.
Пӧим чукӧртысь мед мыськалас паськӧмсӧ. Рытӧдзыс сійӧ лоӧ пеж.
Израиль пиянлы да йӧз муысь локтысьяслы тайӧ тшӧктӧмыс нэмъяс кежлӧ.
Коді инмӧдчылас мортлӧн шойыс дінӧ, сійӧ сизим лун чӧж лоӧ пеж.
Коймӧд луннас да сизимӧд луннас сылы колӧ сӧстӧммӧдчыны сӧстӧммӧдчан ванас, и сійӧ лоӧ сӧстӧм.
Но оз кӧ сӧстӧммӧдчы коймӧд луннас да сизимӧд луннас, сійӧ оз ло сӧстӧм.
Коді инмӧдчылас мортлӧн шойыс дінӧ да оз сӧстӧммӧдчы, сійӧ пежалӧ Господьлысь оланінсӧ. Тайӧ мортсӧ лоӧ бырӧдӧма Израиль войтыр пӧвстысь, ӧд сійӧс абу вӧлі резӧма сӧстӧммӧдчан ваӧн. Сійӧ пеж, пежасьӧмыс кольӧ сы вылӧ.
Тайӧ индӧдыс сы йылысь, коді пыралӧ чомйӧ либӧ лоӧ чомйын, кӧні кулӧм морт. Сизим лун чӧж сійӧ лоӧ пеж.
Восьса либӧ бура тупкытӧм дозмук лоӧ пеж.
Быдӧн, коді ывлаын инмӧдчылас шыпурт помысь кулӧм либӧ мӧд ногӧн кулӧм морт дінӧ, морт шойлӧн лыясӧ либӧ шой дзебанінӧ, сизим лун чӧж лоӧ пеж.
Сійӧс сӧстӧммӧдӧм могысь колӧ босьтны мыжысь висьлысь пӧимсӧ, пуктыны сійӧс дозйӧ да кисьтны сэтчӧ визувтанінысь босьтӧм ва.
Сӧстӧм морт мед босьтас иссоп турун, кӧтӧдас турунсӧ тайӧ ваас да резас чомсӧ, кӧні вӧлі кулӧм морт, сэтысь став эмбур-кӧлуйсӧ да став йӧзсӧ, кодъяс вӧліны чомйын. Тадзи жӧ мед резасны мортӧс, коді инмӧдчылас морт шойлӧн лыясӧ, кулӧм либӧ виӧм морт дінӧ либӧ шой дзебанінӧ.
Сӧстӧм морт мед коймӧд луннас да сизимӧд луннас резас пеж мортӧс, тадзи сизимӧд луннас сӧстӧммӧдас сійӧс.
Сӧстӧммӧдӧм мортыс мед мыськалас ассьыс паськӧмсӧ, и ачыс мыссяс. Тайӧ рытсяньыс сійӧ лоӧ сӧстӧм.
Но пежасьӧм морт кӧ оз сӧстӧммӧдчы, сійӧс лоӧ бырӧдӧма войтыр пӧвстысь, ӧд сійӧ пежалӧ Господьлысь вежаинсӧ.
Сійӧ пеж, ӧд сӧстӧммӧдчан ванас сійӧс абу вӧлі резӧма.
Тайӧ тшӧктӧмыс тіянлы нэмъяс кежлӧ.
Сӧстӧммӧдчан ваӧн резысь мед тшӧтш мыськалас ассьыс паськӧмсӧ.
Сӧстӧммӧдчан ваӧ инмӧдчылысь рытӧдзыс лоӧ пеж.
Ставыс, кытчӧ пеж морт инмӧдчылас, лоӧ пеж.
Коді инмӧдчылас пежасьӧмтор дінӧ, сійӧ рытӧдзыс лоӧ пеж».
Медводдза тӧлысьнас Израиль войтыр воис Цин овтӧминӧ. Найӧ сувтісны Кадешӧ. Сэні куліс Мирьям, и сійӧс дзебисны сэтчӧ.
Войтырыслы эз вӧв ваыс. Найӧ паныд кыпӧдчисны Мӧисейлы да Ааронлы, шуасисны Мӧисей вылӧ: «Бурджык эськӧ вӧлі, ми кӧ тшӧтш кулім, кор вокъясным кулісны Господь водзын!
Мыйла ті вайӧдінныд Господьлысь войтырсӧ тайӧ овтӧминас? Кӧсъянныд, медым ми да ыж-мӧсным тані кулім?
Мыйла ті петкӧдінныд миянӧс Египетысь? Ті вайӧдінныд миянӧс тайӧ шогмытӧм муас, кӧні оз быдмы нянь! Тані оз быдмы инжир, ни виноград, ни гранат пуяс. Весиг юан ваыс абу!»
Мӧисей да Аарон колисны войтырсӧ да мунісны вежа чом пыранін дорӧ. Сэні найӧ кымынь уськӧдчисны муас, и Господьлӧн дзирдлуныс петкӧдчис налы.
Господь шуис Мӧисейлы:
«Босьт вежа чомйысь бедьсӧ. Аарон вокыдкӧд чукӧртӧй войтырсӧ. Налӧн син водзын изкыртаыслы шуӧй, медым сетас ва. Изкыртаысь ыльӧбтас ва. Тадзи тэ юкталан войтырсӧ да налысь ыж-мӧссӧ».
Господьлӧн тшӧктӧм серти Мӧисей босьтіс Господь водзӧ пуктӧм бедьсӧ.
Сэсся Мӧисей Ааронкӧд чукӧртісны изкырта дінӧ войтырсӧ. Мӧисей шуис: «Кывзӧй, паныд кыпӧдчысьяс! Миянлы ӧмӧй тайӧ изкыртасьыс перйыны тіянлы васӧ?»
Мӧисей кыпӧдіс кисӧ да кыкысь вачкис бедьнас изкыртаӧ, и сэтысь ыльӧбтіс ва. Войтырыс да налӧн ыж-мӧсныс пӧттӧдзныс юисны.
Но Господь шуис Мӧисейлы да Ааронлы: «Ті энӧ эскӧй Меным, энӧ лыддьӧй Менӧ вежаӧн. Израиль пиян водзын ті торкинныд Менсьым шуӧмӧс. Та вӧсна тайӧ войтырсӧ ті онӧ пыртӧй сійӧ муас, мый Ме сета налы».
Ва петанінсӧ нимтісны Мериваӧн.* Сэні Израиль пиян вензисны Господькӧд, и Господь петкӧдліс налы Ассьыс вежалунсӧ.
Кадешсянь Мӧисей ыстіс ӧткымын мортӧс эдомса ӧксы дінӧ висьтавны: «Тадзи висьталӧ тэнад Израиль вокыд. Тэ тӧдан, мыйта сьӧкыдсӧ ковмис нуны миянлы.
Батьясным локтісны Египетӧ, и сэні ми дыр кад олім. Египетсаяс нартитісны миянӧс да миянлысь батьяснымӧс.
Но кор ми шыасим Господь дінӧ, Сійӧ кыліс миянӧс да мӧдӧдіс анделсӧ, медым петкӧдны миянӧс Египетысь.
Ӧні ми сулалам Кадеш карын, кысянь заводитчӧ тэнад муыд.
Лэдз миянӧс мунны тэнад муӧд. Ми огӧ талялӧй видз-муястӧ да виноград йӧръястӧ, огӧ юӧй юкмӧсъясысь ватӧ.
Ми мунам Ӧксыяслӧн туйӧд, огӧ кежӧй сэтысь веськыдвылӧ ни шуйгавылӧ, кытчӧдз огӧ петӧй тэнад муысь».
Эдомсаяс вочавидзисны: «Миян муӧд ті онӧ мунӧй! Татчӧ кӧ локтанныд, ми тіянӧс шыпуртӧн паныдалам!»
Израиль пиян шуисны: «Ми мунам шӧр туйӧдыс. А кутам кӧ юны ватӧ да ыж-мӧснымӧс юктавны, ми мынтысям.
Миянлы нинӧм оз ков, сӧмын лэдзӧй миянлы водзӧ мунны».
Но эдомсаяс вочавидзисны: «Миян муӧд ті онӧ мунӧй!»
Найӧ мӧдӧдісны уна лыда да вына тышкайӧзӧс израильсаяслы паныд.
Тадзи эдомсаяс эз лэдзны Израиль войтырлы мунны налӧн муӧд. Израильсаяс мӧдӧдчисны мӧд туйӧд.
Кадешысь мунӧм бӧрын Израиль войтыр матыстчис Ор керӧс бокӧ.
Эдом му сайын, Ор керӧс бокын Господь шуис Мӧисейлы да Ааронлы:
«Мерива ва петанінын ті энӧ кывзысьӧй Менсьым. Та вӧсна Аарон оз пыр сійӧ муас, мый Ме сета Израиль пиянлы. Сылы кад воис вуджны батьясыс дінӧ.
Босьт аскӧдыд Аарон воктӧ да сылысь Элазар писӧ и [став войтырыс водзын] кай накӧд Ор керӧс вылӧ.
Пӧрччӧд Ааронлысь вежа паськӧмсӧ да пасьтӧд сыӧн Элазар писӧ. Аарон кулас да вуджас батьясыс дінӧ».
Мӧисей вӧчис Господьлӧн тшӧктӧм серти.
Став войтырлӧн син водзын Мӧисей, Аарон да Элазар кайисны Ор керӧс вылӧ. Сэні Мӧисей пӧрччӧдіс Ааронлысь вежа паськӧмсӧ да пасьтӧдіс сылысь Элазар писӧ.
Аарон куліс керӧс вылын, а Мӧисей Элазаркӧд лэччисны сэтысь.
Ааронлӧн кулӧм йылысь тӧдмалӧм бӧрын Израиль войтыр бӧрдіс сы вӧсна комын лун чӧж.
Арад карлӧн ханаанса ӧксыыс, коді оліс Негев муын, кор кыліс, мый Израиль войтыр локтӧ Атарим туйӧд, уськӧдчис на вылӧ да некымын мортӧс босьтіс пленӧ.
Израиль войтыр кыв сетіс Господьлы: «Тэ кӧ сетан миян киӧ тайӧ войтырсӧ, ми дзикӧдз бырӧдам [найӧс да] налысь каръяссӧ».
Господь кыліс Израиль войтырлысь шыасьӧмсӧ да сетіс ханаансаясӧс налӧн киӧ. Израильсаяс дзикӧдз бырӧдісны сэтчӧс ханаансаясӧс да налысь каръяссӧ. Тайӧ местасӧ нимтісны Хормаӧн.*
Ор керӧссянь Израиль войтыр муніс Гӧрд саридзлань, эз пыр Эдом муӧ.
Туяс войтырыс мудзис. Найӧ ропкисны Ен вылӧ да Мӧисей вылӧ, шуасисны: «Мыйла ті петкӧдінныд миянӧс Египетысь, медым овтӧминас ми кулім? Нянь ни ва тані абу! Миянлы мустӧммис тайӧ шогмытӧм сёяныс!»
Господь мӧдӧдіс Израиль войтыр вылӧ чушкысь змейясӧс. Налӧн чушкалӧмысь унаӧн кулісны.
Сэки войтырыс локтіс Мӧисей дінӧ да шуис: «Ми мыжмим, кор шуасим Господь вылӧ да тэ вылӧ.
Кевмысь Господьлы, медым Сійӧ ылыстас миян дінысь змейяссӧ».
Мӧисей кевмысис Господьлы войтырыс вӧсна.
Господь шуис Мӧисейлы: «Вӧч [ыргӧн] змейӧс да кыпӧд сійӧс майӧг йылӧ. Чушкӧм морт кӧ видзӧдлас змей вылӧ, ловйӧн коляс».
Мӧисей вӧчис ыргӧн змейӧс да кыпӧдіс сійӧс майӧг йылӧ. Кор змейӧн чушкӧм морт видзӧдліс ыргӧн змей вылӧ, ловйӧн кольліс.
Израиль пиян мӧдӧдчисны водзӧ, сэсся сувтісны Овотӧ.
Овотсянь мунісны овтӧминӧ да сувтісны Ийе-Аваримӧ, Моавсянь асыввылӧ.
Сэсянь мӧдӧдчисны водзӧ да сувтісны Заред ковтысӧ.
Заред ковтыссянь водзӧ мунісны да сувтісны овтӧминӧ, Арнон ю мӧдлапӧлӧ, аморейяслӧн му бокӧ. Моав му вӧлі паськӧдчӧма Арнон юӧдз, юыс торйӧдіс моавсаясӧс да аморейясӧс.
Та вӧсна Господьлӧн тышъяс йылысь небӧгын гижӧма:
«Суфаса Вагев кар да Арнон ю ковтыс, мый нюжӧдчӧ Ар сиктӧдз да мунӧ Моав му пӧлӧн».
Сэтысянь израильсаяс мунісны Бер юкмӧс дорӧ.
Сэні Господь шуис Мӧисейлы: «Чукӧрт войтырсӧ, Ме сета налы ва».
Сэки Израиль пиян сьылісны татшӧм сьылан: — Юкмӧсӧй, ло ва тыра! Сьылӧй юкмӧсыс йылысь! Сійӧс кодйисны юралысьяс, войтырлӧн веськӧдлысьяс, кодйисны асланыс юралан бедьясӧн.
Овтӧминысь израильсаяс мӧдӧдчисны Маттанаӧ. Маттанаысь мунісны Нагалиэлӧ, а Нагалиэлысь — Вамотӧ. Вамотысь локтісны Моав муӧ, ковтысӧ, мый паськӧдчӧма овтӧминлань видзӧдысь Фасга керӧс бокӧ.
Израильсаяс ыстісны йӧзӧс аморейяслӧн Сигон ӧксы дінӧ, медым [бурпырысь] висьтавны:
«Лэдз миянӧс мунны тэнад муӧд.
Ми [мунам туй кузяыс,] огӧ талялӧй видз-муястӧ да виноград йӧръястӧ, огӧ юӧй [тэнад] юкмӧсъясысь ватӧ. Ми мунам Ӧксыяслӧн туйӧд, кытчӧдз огӧ петӧй тэнад муысь».
Но Сигон эз лэдз Израиль войтырлы мунны аслас муӧд.
Сійӧ чукӧртіс ассьыс войтырсӧ да мӧдӧдчис овтӧминӧ. Яхацӧ воӧм бӧрын сійӧ петіс тышӧ Израильлы паныд.
Израиль вермис Сигонӧс, босьтіс сылысь мусӧ Арнон юсянь Явок юӧдз, кысянь заводитчис аммон войтырлӧн муыс. Аммон войтыр бура видзис ассьыс мудорсӧ.
Израиль войтыр босьтіс аморейяслысь став карсӧ да овмӧдчис тайӧ каръясас, тшӧтш Хешбон карӧ да сыгӧгӧрса сиктъясӧ.
Хешбон вӧлі аморей Сигон ӧксылӧн кар. Сигон водзынджык тышкасьліс моавса ӧксыкӧд да босьтіс сылысь став мусӧ Арнон юӧдз.
Та вӧсна мойдысь-сьылысьяс шулӧмаӧсь: — Локтӧй Хешбонӧ, лэптӧй-сувтӧдӧй Сигонлысь карсӧ.
Сигонлӧн Хешбон карысь ыпнитіс-петіс би, ньылыштіс Ар-Моав, сотіс найӧс, кодъяс ыджыдалісны Арнон мылькъяс вылын.
Курыд шог тэныд, Моав!
Тэнӧ, Кемош идоллӧн войтыр, лоӧ бырӧдӧма.
Тэнад пияныд пышйисны, тэнсьыд нывъястӧ аморейяслӧн Сигон ӧксы нуӧдіс пленӧ.
Но ми лыйлім аморейясӧс ньӧвъясӧн, Хешбон карсянь Дивон карӧдз ставнысӧ виалім, Медева кардорса Нофаӧдз ставнысӧ бырӧдім.
Тадзи Израиль войтыр овмӧдчис аморейяслӧн муӧ.
Мӧисей мӧдӧдіс видзӧдлыны Язер кар. Израильсаяс босьтісны [карсӧ да] сыгӧгӧрса сиктъяссӧ, вӧтлісны сэтысь аморейясӧс.
Та бӧрын израильсаяс кежисны Васан муӧ нуӧдысь туй вылӧ.
Эдрей кар дорын васанса Ог ӧксы аслас тышкайӧзкӧд петіс тышӧ израильсаяслы паныд.
Господь шуис Мӧисейлы: 
«Эн пов сыысь. Тэнад киӧ Ме сета сійӧс, сылысь войтырсӧ да мусӧ. Пасьварт сійӧс, кыдзи тэ пасьвартін аморей войтырлысь Сигон ӧксысӧ, коді юраліс Хешбонын».
Израильсаяс пасьвартісны Ог ӧксыӧс, сылысь пиянсӧ да тышкайӧзсӧ, некод ловйӧн эз коль. Израильсаяс босьтісны Оглысь мусӧ.
Израиль пиян мунісны водзӧ да сувтісны Моав ласта вылӧ Йӧрдан ю бокӧ, Ерикон карлы воча.
Сеппорлӧн Валак пиыс тӧдмаліс, мый вӧчисны израильсаяс аморейяскӧд.
Та вӧсна моавсаяс полісны унасьыс-уна лыда Израиль войтырысь.
Найӧ шуисны мадианса юрнуӧдысьяслы: «Тайӧ уна лыда Израиль войтырыс ньылыштас татысь ставнымӧс, кыдзи ӧшъяс сёйӧны став веж турунсӧ видз вылысь!»
Сійӧ кадас Моав муын ӧксыаліс Сеппорлӧн Валак пиыс.
Валак мӧдӧдіс юӧртысьясӧс аслас войтыр дінӧ Петор карӧ, Ефрат ю дорӧ. Сійӧ тшӧктіс юӧртысьяслы мунны Веорлӧн Валаам пиыс дінӧ да висьтавны сылы: «Египетысь локтіс уна лыда войтыр да вевттис став мусӧ. Найӧ паськӧдчисны менам му бокӧ.
Кора тэнӧ, волы да ёр тайӧ войтырсӧ, ӧд сійӧ ме дорысь ёнджык. Гашкӧ, сэсся ме верма пасьвартны да вӧтлыны найӧс татысь.
Ме тӧда: кодӧс тэ бурсиан, сійӧс лоӧ бурсиӧма, а кодӧс тэ ёран, сійӧс лоӧ ёрӧма».
Моавса да мадианса юрнуӧдысьяс локтісны Валаам дінӧ, медым мынтысьны сылы ёрӧмысь. Найӧ висьталісны сылы Валаклысь кывъяссӧ.
Валаам шуис: «Кольччӧй ме ордӧ вой кежлас, а асывнас ме висьтала, мый шуас меным Господь».
Моавса юрнуӧдысьяс кольччисны Валаам ордӧ.
Ен локтіс Валаам дінӧ да юаліс: «Кодъяс тайӧ йӧзыс тэ ордын?»
Валаам шуис Енлы: «Тайӧ йӧзсӧ ме дінӧ мӧдӧма Сеппорлӧн Валак пиыс, моавса ӧксы. Найӧ висьталісны, Египетысь пӧ локтіс уна лыда войтыр да вевттис став мусӧ. [Найӧ паськӧдчисны пӧ Валаклӧн му бокӧ.] Валак корӧ менӧ локны да ёрны тайӧ войтырсӧ.
Сійӧ чайтӧ, мый ёрӧм бӧрын сійӧ вермас уськӧдчыны да вӧтлыны найӧс аслас му бокысь».
Ен вочавидзис Валаамлы: «Эн мун накӧд. Эн ёр Египетысь локтӧм войтырӧс, ӧд сійӧ бурсиӧм войтыр».
Асывводзнас Валаам чеччис да шуис Валаклӧн йӧзлы: «Мунӧй асланыд муӧ. Господь оз лэдз менӧ мунны тіянкӧд».
Моавса юрнуӧдысьяс бӧр локтісны Валак дінӧ да висьталісны, Валаам пӧ эз лок миянкӧд.
Валак бара мӧдӧдіс юралысьясӧс, но воддзаяс дорсьыс на унджыкӧс да ёнджыка пыдди пуктанаясӧс.
Найӧ локтісны Валаам дінӧ да шуисны: «Сеппорлӧн Валак пиыс висьталӧ, волы пӧ ме дінӧ, эн пыксьы.
Ме пӧ бурӧ пукта тэнӧ да вӧча ставсӧ, мый кӧсъян.
Волы пӧ да ёр Египетысь локтӧм войтырӧс».
Валаам вочавидзис Валаклӧн йӧзлы: «Валак кӧ сетас меным весиг керка тыр зарни-эзысь, аслам Господь Енлысь тшӧктӧмсӧ ме ог торк, нинӧм ог вӧч ас кӧсйӧм серти.
Кольччӧй ме ордӧ узьны, а асывнас ме висьтала, мый талун шуас меным Господь».
Войнас Ен локтіс Валаам дінӧ да шуис сылы: «Тайӧ йӧзыс кӧ локтісны тэнӧ корны, чеччы да мун накӧд.
Но вӧч сӧмын сійӧ, мый Ме тэныд тшӧкта».
Асывводзнас Валаам чеччис, сийӧсаліс осёлсӧ да петіс туйӧ моавса юралысьяскӧд. 
Валаам пуксис осёл вылас, и сыкӧд мунісны сылӧн кык кесйӧгыс. Ен скӧрмис, мый Валаам петіс туйӧ. Туй вылас Валаамлы паныд сувтіс Господьлӧн андел.
Осёл аддзис, мый туй вылын сулалӧ Господьлӧн анделыс перйӧм шыпуртӧн, да вешйис видз-му вылӧ.
Валаам кутіс кучкавны осёлсӧ, медым бӧр бергӧдны сійӧс туй вылӧ.
Господьлӧн андел сувтіс виноград йӧркостса векни туй вылӧ, кӧні ӧтар-мӧдар пӧлӧныс вӧлі стен.
Господьлысь анделсӧ аддзӧм бӧрын осёлыс ляскысис стен бердӧ да топӧдіс Валаамлысь коксӧ.
Валаам бара пондіс кучкавны осёлсӧ.
Господьлӧн андел муніс водзӧджык да сувтіс сэтшӧм векньыдінӧ, мый осёлыс эз вермы воськовтны веськыдвылӧ ни шуйгавылӧ.
Осёл аддзис Господьлысь анделсӧ да водіс, а Валаам пукаліс сы вылын.
Валаам ёна скӧрмис да бедьнас пондіс кучкавны осёлӧс.
Сэки Господь сетіс осёллы сёрнитны морт моз. Осёл шыасис Валаам дінӧ: «Мый ме тэныд вӧчи? Тэ коймӧдысь нин менӧ кучкалан».
Валаам шуис осёлыслы: «Тэ менӧ йӧй туйӧ пуктін.
Вӧлі кӧ менам шыпурт, ме эськӧ дзик ӧні вии тэнӧ!»
Осёл шуис Валаамлы: «Ме ӧд тэнад осёл, и тэ ме вылын пыр ветлӧдлан. Ме ӧмӧй коркӧ вӧчлі тэныд тадзисӧ?»
Валаам вочавидзис: «Эн».
Господь восьтіс Валаамлысь синсӧ, и сійӧ аддзис, мый туй вылын сулалӧ Господьлӧн анделыс перйӧм шыпуртӧн. Валаам копыртчис да кымынь уськӧдчис муӧ.
Господьлӧн андел юаліс сылысь: «Мыйла тэ куимысьсӧ нӧйтін осёлтӧ?
Ме локті сувтӧдны тэнӧ, ӧд тэнад туйыд абу шогмана Меным.
Осёлыд аддзис Менӧ да куимысь нин кежліс туй бокӧ.
Сійӧ кӧ эз кеж, Ме эськӧ вии тэнӧ, а сійӧс ловйӧн коли».
Валаам шуис Господьлӧн анделлы: «Ме мыжа. Ме эг тӧд, мый Тэ сулалан менам туй вылын.
Тэ кӧ он кӧсйы, мед ме муні, ме бӧр бергӧдча».
Господьлӧн андел вочавидзис: «Мун тайӧ йӧзыскӧд. Но висьтав сӧмын сійӧ, мый Ме висьтала тэныд».
Валаам муніс Валаклӧн киподувса юралысьяскӧд.
Кор Валаклы кывсис, мый Валаам петӧма туйӧ, сійӧ локтіс паныдавны Валаамӧс Арнон ю бокын сулалысь моавса карӧ, кӧні помасис сылӧн муыс.
Валак юаліс Валаамлысь: «Мыйла тэ эн лок, кор ме медводдзаысьсӧ мӧдӧдлі тэла ассьым йӧзӧс?
Ме ӧмӧй ог куж пыдди пуктӧмӧн сибӧдны тэнӧ?»
Валаам вочавидзис: «Со, ме локті. Но мый ме верма шуны?
Мый Енмыс сетас шуны, сійӧс и кута висьтавны».
Валаам муніс Валаккӧд Киръят-Хуцотӧ.
Валак начкис ӧшъясӧс да ыжъясӧс, корис сёйны Валаамӧс да сыкӧд локтӧм юралысьясӧс.
Мӧд асывнас Валак босьтіс аскӧдыс Валаамӧс. Найӧ кайисны Вамот-Ваал керӧс вылӧ, кысянь Валаамлы тыдалісны Израиль войтырлӧн медматысса чомъясыс.
Валаам шуис Валаклы: «Вӧч меным татчӧ сизим висьпуктанін да вайӧд меным сизим ӧшкӧс да сизим межӧс».
Валак вӧчис, кыдзи тшӧктіс Валаам. И найӧ кыкнанныс, Валак да Валаам, быд висьпуктанін вылын вайисны вись пыдди ӧшкӧс да межӧс.
Валаам шуис Валаклы: «Кольччы аслад сотан вись дорӧ, а ме муна.
Гашкӧ, Господь петас меным воча. Сэсся ме висьтала тэныд, мый Сійӧ восьтас».
[Валак кольччис аслас сотан вись дорӧ, а] Валаам кайис изкырта вылӧ [юасьны Енлысь].
Ен аддзысис сэні Валаамкӧд. Валаам шуис Сылы: «Ме лэпті сизим висьпуктанін, быд висьпуктанін вылын вись пыдди вайи ӧшкӧс да межӧс».
Господь тшӧктіс Валаамлы бӧр мунны Валак дінӧ да висьтавны сійӧ, мый сетіс сылы шуны.
Локтӧм бӧрас Валаам аддзис, мый Валак сулалӧ аслас сотан вись дорын моавса юралысьяскӧд.
[Енлӧн Лов вӧлі Валаам вылын.]
Валаам шуис татшӧм кывъяс: — Арамысь, асыввывса керӧсъясысь, менӧ вайӧдіс Валак, моавса ӧксы. Шуис, лок пӧ да ёр Яковӧс, лёкӧд Израиль войтырӧс.
Но кыдзи ме верма ёрны сійӧс, кодӧс Енмыс оз ёр?
Кыдзи ме верма лёкӧдны сійӧс, кодӧс Господь оз лёкӧд?
Изкырта вывсянь ме аддза найӧс, керӧс вывсянь видзӧда на вылӧ. Со, тайӧ войтырыс олӧ торйӧн, асьсӧ мукӧд войтыръяс лыдӧ оз пырт.
Коді вермас артавны Яковсянь чужысьясӧс, лыддьыны Израильлысь лыдтӧм-тшӧттӧм войтырсӧ?
Веськыда олысьяс моз мед ме кула, олӧм помӧй мед лоас налӧн кодь!
Валак шуис Валаамлы: «Мый тэ мекӧд вӧчан?
Ме кори тэнӧ ёрны меным паныд сувтысьясӧс, а тэ бурсиин найӧс!»
Валаам вочавидзис: «Мый Господь сетӧ меным, сійӧс ме и висьтала».
Валак шуис Валаамлы: «Лок мунам мӧдлаӧ, сэтысянь тэныд бурджыка тыдалас войтырыс. Но ставнысӧ он аддзы, сӧмын медматысса чомъяссӧ.
Ёр найӧс».
Валак нуӧдіс Валаамӧс Фасга керӧс йылӧ, кысянь ылӧдз тыдаліс. Сэні лэптіс сизим висьпуктанін да быд висьпуктанін вылын вайис вись пыдди ӧшкӧс да межӧс.
Валаам шуис Валаклы: «Сулышт тані аслад сотан вись дорын, а ме ветла аддзысьны Енкӧд».
Господь аддзысис Валаамкӧд, тшӧктіс сылы бӧр мунны Валак дінӧ да висьтавны сійӧ, мый сетіс сылы шуны.
Локтӧм бӧрас Валаам аддзис, мый Валак сулалӧ аслас сотан вись дорын моавса юралысьяскӧд.
Валак юаліс: «Мый шуис Господь?»
Валаам шуис татшӧм кывъяс: — Чеччы, Валак, да кывзы, сюся кывзы менӧ, Сеппорлӧн пи!
Енмыс абу морт, оз ылӧдчы. Сійӧ абу морт, кывсӧ оз вежлав.
Мый шуас, сійӧс и вӧчас.
Мый кӧсйысяс, сійӧс и збыльмӧдас.
Меным тшӧктӧма бурсины. Енмыс кӧ бурсиис, ме вежнысӧ ог вермы.
Яковлӧн шогыс абу, Израильлӧн ставыс бур.
Господь, налӧн Енмыс, накӧд, ӧксыӧс моз найӧ паныдалӧны Сійӧс.
Ен петкӧдіс найӧс Египетысь, налӧн вынйӧрыс ӧшлӧн кодь.
Яков рӧдлы паныд туналӧмыс оз ин, Израиль войтырлы паныд тшыкӧдӧмыс оз во.
Ас кадӧ шуасны Яков-Израиль йылысь: «Со мый вӧчӧ Енмыс!»
Израиль войтыр сувтӧ лев моз, лев моз чеччӧ да оз вод, кытчӧдз оз сёй кыйдӧссӧ, оз ю виӧмалысь вирсӧ.
Валак шуис Валаамлы: «Он кӧ вермы ёрны Израиль войтырӧс, эн и бурси найӧс!»
Но Валаам вочавидзис: «Эг ӧмӧй ме тэныд шулы, мый кута вӧчны сійӧ, мый тшӧктас меным Господь?»
Валак шуис Валаамлы: «Лок мунам, ме нуӧда тэнӧ мӧдлаӧ.
Гашкӧ, Енмыслы лоӧ шогмана, мед тэ сэтысянь ёран Израиль войтырӧс».
Валак нуӧдіс Валаамӧс Пеор керӧс йылӧ. Тайӧ керӧсыс видзӧдіс овтӧминлань.
Валаам шуис Валаклы: «Вӧч меным татчӧ сизим висьпуктанін да вайӧд меным сизим ӧшкӧс да сизим межӧс».
Валак вӧчис, кыдзи тшӧктіс сылы Валаам, сэсся быд висьпуктанін вылын вайис вись пыдди ӧшкӧс да межӧс.
Валаам казяліс, мый Израильӧс бурсиӧмыс шогмана Господьлы, и сійӧ воддза мозыс эз нин мун тунасьны. Сійӧ видзӧдліс овтӧминлань и аддзис Израиль войтырӧс, коді чомъяснас вӧлі паськӧдчӧма чужанкотыръясыс серти. Енлӧн Лов лэччис Валаам вылӧ, и сійӧ шуис татшӧм кывъяс: — Тадзи висьталӧ Веорлӧн Валаам пи, морт, кодлӧн синмыс восьса, коді кылӧ Енлысь кывъяссӧ, аддзӧ Ставсӧвермысьсянь петкӧдчылӧмъяс, кымынь усьлӧ да восьса синмӧн аддзӧ.
Кутшӧм мичаӧсь тіян чомъясныд, Яковсянь чужысьяс, тіян оланінъясныд, Израиль войтыр!
Чомъясныд паськӧдчӧны ковтысъяс моз, юбокса сад йӧръяс моз, Господьӧн пуктӧм алоэ пуяс моз, вадорса сус пуяс моз.
Тіян пельсаясысь ваыс оз бырлы, пуктӧм кӧйдыснытӧ юкталас ва. Тіян ӧксыныд лоӧ Агагысь ыджыдджык, сылысь юралӧмсӧ лоӧ вылӧ кыпӧдӧма.
Енмыс петкӧдіс тіянӧс Египетысь, тіян вынйӧрныд ӧшлӧн кодь. Тіянӧс мустӧмтысь войтыръясӧс ті ньылыштанныд, налысь лыяссӧ чегъяланныд, ньӧвйысь лыйлӧмӧн найӧс бырӧданныд.
Ті воданныд да куйланныд левъяс моз. Коді лысьтас чеччӧдны тіянӧс?
Тіянӧс бурсиысьясӧс лоӧ бурсиӧма, тіянӧс ёрысьясӧс — ёрӧма.
Валак скӧрмис Валаам вылӧ, кинас швачкӧмӧн шуис: «Ме кори тэнӧ ёрны ассьым вӧрӧгӧс, а тэ куимысь нин бурсиин найӧс!
Мун, кытысь локтін!
Ме кӧсйи бурӧ пуктыны тэнӧ, но Господь эз лэдз».
Валаам шуис Валаклы: «Ме дінӧ волӧм йӧзыдлы ме висьталі нин, мый Валак кӧ сетас меным весиг керка тыр зарни-эзысь, Господьлысь тшӧктӧмсӧ ме ог торк, ас кӧсйӧм серти бурсӧ ни лёксӧ ог вӧч. Мый Господь тшӧктас, сійӧс и кута висьтавны.
Со, ме муна аслам войтыр дінӧ.
Ӧні тэ кывзы, и ме висьтала, мый Израиль войтыр вӧчас тэнад войтырлы локтана кадӧ».
И Валаам шуис татшӧм кывъяс: — Тадзи висьталӧ Веорлӧн Валаам пи, морт, кодлӧн синмыс восьса, кодлы Медвылыссаыс сетӧ тӧдӧмлун, коді кылӧ Енлысь кывъяссӧ, аддзӧ Ставсӧвермысьсянь петкӧдчылӧмъяс, кымынь усьлӧ да восьса синмӧн аддзӧ.
Аддза Сійӧс, но ог на ӧні, видзӧда Сы вылӧ, но абу на матын.
Яковсянь чужысьяс пӧвстысь кыпӧдчас кодзув, Израиль войтыр пӧвстысь кыптас юралан бедь. Сійӧ пасьвартас моавса юралысьясӧс, бырӧдас Сифсянь чужысьясӧс.
Эдомӧс лоӧ вермӧма, Сеир керӧсвыв муӧс вӧрӧг босьтас аслас кипод улӧ. Израиль петкӧдлас ассьыс вынсӧ.
Яков рӧдысь петас юралысь, сійӧ бырӧдас вӧрӧглӧн карысь коляс войтырсӧ.
Валаам аддзис амаликъясӧс да шуис татшӧм кывъяс: — Войтыръяс пӧвстын амалик войтыр медводдзаыс, но сійӧс виччысьӧ дзикӧдз бырӧдӧм!
Валаам аддзис кеней войтырӧс да шуис татшӧм кывъяс: — Тэнад оланіныд зумыд, тэ поздысьӧмыд изкырта вылӧ.
Но Каин, тэнӧ лоӧ куштӧма, регыд Ассур босьтас тэнӧ пленӧ.
Валаам [аддзис Огӧс да] шуис татшӧм кывъяс: — Курыд шог! Кор Енмыс мӧдӧдас тайӧ лёксӧ, коді сэки ловйӧн коляс?
Киттимсянь локтасны корабльяс, вермасны Ассурӧс, вермасны Эверӧс, но и найӧс асьнысӧ лоӧ дзикӧдз бырӧдӧма.
Сэсся Валаам мӧдӧдчис да бӧр муніс аслас оланінӧ, а Валак муніс аслас туйӧд.
Ситтим ковтысын олігӧн израильсаяс кутісны кырсавны моавса нывъяскӧд. Моавса нывъяс корлывлісны израильса айуловӧс сёйны асланыс енъяслы вайӧм висьяс. Найӧ сёйлісны да юрбитлісны моавсаяслӧн енъяслы.
Израиль войтыр сьӧлӧмнас сирасис Ваал-Пеор идол дінӧ, и Господь скӧрмис таысь на вылӧ.
Господь шуис Мӧисейлы: «Чукӧрт войтырлысь веськӧдлысьяссӧ да ставныслы аддзымӧнъя Ме водзын ӧшӧд найӧс пу вылӧ. Та бӧрын Менам скӧрлунӧй вешъяс Израиль войтыр дінысь».
Мӧисей висьталіс израильса ёрдысьяслы: «Виӧй быдӧнӧс, коді сьӧлӧмнас сирасис Ваал-Пеор идол дінӧ».
Кор Мӧисей да став Израиль войтыр бӧрдісны вежа чом пыранін водзын, найӧ аддзисны, кыдзи израильса морт локтӧ вокъясыс дінӧ мадианса анькӧд. Сэки Пинес, Аарон поплӧн Элазар пиыслӧн пиыс, петіс войтыр чукӧрысь да босьтіс киас шы. Пинес муніс тайӧ израильса морт бӧрсяыс, пырис сылӧн чомйӧ, сатшкис сійӧс да мадианса аньӧс кынӧмас. Та бӧрын Израиль пиянӧс бырӧдӧмыс лӧнис.
Бырӧдӧмаяслӧн лыдыс вӧлі кызь нёль сюрс морт.
Господь шуис Мӧисейлы:
«Пинес, Аарон поплӧн Элазар пиыслӧн пиыс, вештіс Израиль пиян вылысь Менсьым скӧрлунӧс. Ме пыдди сійӧ водзӧс перйис, медым вежӧгтігӧн Ме эг бырӧд Израиль войтырӧс.
Висьтав Пинеслы, мый Ме кӧртала сыкӧд йитӧд да сета сылы став бурсӧ. Тайӧ йитӧд сертиыс сылы да сысянь чужысьяслы нэмъяс кежлӧ шуӧма кесъявны попъясӧн. Ӧд сійӧ петкӧдліс аслас Ен вӧсна вежӧгтӧмсӧ, и тадзи вештіс Израиль пиянлысь мыжсӧ».
Мадианса анькӧд виӧм израильса морт вӧлі Зимри, Симеон чужанкотырысь Салу юралысьлӧн пиыс.
Виӧм мадианса аньӧс шуисны Козби, сылӧн батьыс вӧлі Цур, мадианса чужанкотырлӧн юралысь.
Господь шуис Мӧисейлы:
«Уськӧдчӧй мадиансаяс вылӧ да виалӧй найӧс. Ӧд вӧрӧг моз найӧ ылӧдлісны тіянӧс, наяна ышӧдісны юрбитны асланыс Пеор идоллы. Тайӧс вӧчисны мадианса юралысьлӧн Козби ныв отсӧгӧн. Пинес виис тайӧ аньсӧ, кор Пеор идоллы юрбитӧм вӧсна Израиль войтырӧс суис бырӧдӧм».
Войтырӧс бырӧдӧм бӧрын Господь шуис Мӧисейлы да Аарон поплӧн Элазар пиыслы:
«Арталӧй кызь арӧса да ыджыдджык арлыда израильса айуловӧс, кодъяс вермӧны петны тышӧ. Гижалӧй найӧс рӧд сертиныс».
Кор Израиль войтыр вӧлі Моав ласта вылын Йӧрдан ю бокын, Ериконлы воча, Мӧисей да Элазар поп шуисны:
«Арталӧй кызь арӧса да ыджыдджык арлыда айуловӧс, кыдзи Господь тшӧктіс Мӧисейлы да Израиль пиянлы, кодъяс петісны Египет муысь».
Рувим вӧлі Израильлӧн медводдза чужысьыс.
Рувимсянь чужисны Енок да сылӧн рӧдыс, Паллу да сылӧн рӧдыс, Хецрон да сылӧн рӧдыс, Карми да сылӧн рӧдыс.
Тайӧ — Рувим чужанкотырлӧн рӧдъяс.
Арталӧм-гижалӧм айуловлӧн лыдыс вӧлі нелямын куим сюрс сизимсё комын морт.
Паллулӧн вӧлі Элиав пи.
Элиавлӧн вӧліны Немуэл, Датан да Авирам пиян.
Буретш Датан да Авирам, войтырлӧн тӧдчана йӧз, Корейлӧн йӧзкӧд Мӧисейлы да Ааронлы пыксигӧн кыпӧдчисны Господьлы паныд.
Сэки воссис муыс да ньылыштіс Датанӧс, Авирамӧс да Корейӧс.
Корейкӧд ӧтувтчысь йӧзыс кулісны, би ньылыштіс кыксё ветымын мортӧс. Найӧ лоисны мукӧдыслы ӧлӧданпасӧн.
Но Корейлӧн пияныс эз кувны.
Симеонсянь чужисны Немуэл да сылӧн рӧдыс, Ямин да сылӧн рӧдыс, Якин да сылӧн рӧдыс, Зерах да сылӧн рӧдыс, Саул да сылӧн рӧдыс.
Тайӧ — Симеон чужанкотырлӧн рӧдъяс. Арталӧм-гижалӧм айуловлӧн лыдыс вӧлі кызь кык сюрс кыксё морт.
Гадсянь чужисны Цефон да сылӧн рӧдыс, Хагги да сылӧн рӧдыс, Шуни да сылӧн рӧдыс, Озни да сылӧн рӧдыс, Эри да сылӧн рӧдыс, Арод да сылӧн рӧдыс, Арели да сылӧн рӧдыс.
Тайӧ — Гад чужанкотырлӧн рӧдъяс. Арталӧм-гижалӧм айуловлӧн лыдыс вӧлі нелямын сюрс витсё морт.
Иудалӧн Ир да Онан пияныс кулісны Ханаан муын.
Иудасянь чужисны Шелай да сылӧн рӧдыс, Парес да сылӧн рӧдыс, Зерах да сылӧн рӧдыс.
Парессянь чужисны Хецрон да сылӧн рӧдыс, Хамул да сылӧн рӧдыс.
Тайӧ — Иуда чужанкотырлӧн рӧдъяс. Арталӧм-гижалӧм айуловлӧн лыдыс вӧлі сизимдас квайт сюрс витсё морт.
Иссакарсянь чужисны Тол да сылӧн рӧдыс, Пув да сылӧн рӧдыс, Яшув да сылӧн рӧдыс, Шимрон да сылӧн рӧдыс.
Тайӧ — Иссакар чужанкотырлӧн рӧдъяс. Арталӧм-гижалӧм айуловлӧн лыдыс вӧлі квайтымын нёль сюрс куимсё морт.
Завулонсянь чужисны Серед да сылӧн рӧдыс, Элон да сылӧн рӧдыс, Яхлеэл да сылӧн рӧдыс.
Тайӧ — Завулон чужанкотырлӧн рӧдъяс. Арталӧм-гижалӧм айуловлӧн лыдыс вӧлі квайтымын сюрс витсё морт.
Ӧсиплӧн вӧліны Манассей да Ефрем пиян.
Манассейсянь чужисны Макир да сылӧн рӧдыс.
Макирсянь чужисны Галаад да сылӧн рӧдыс.
Галаадсянь чужисны Езер да сылӧн рӧдыс, Хелек да сылӧн рӧдыс, Асриэл да сылӧн рӧдыс, Шекем да сылӧн рӧдыс, Шемид да сылӧн рӧдыс, Хефер да сылӧн рӧдыс.
Хеферлӧн Салпаад пилӧн эз вӧв пияныс, вӧліны сӧмын Махла, Ноа, Хогла, Милка да Тирза нывъяс.
Тайӧ — Манассей чужанкотырлӧн рӧдъяс.
Арталӧм-гижалӧм айуловлӧн лыдыс вӧлі ветымын кык сюрс сизимсё морт.
Ефремсянь чужисны Шутелах да сылӧн рӧдыс, Бекер да сылӧн рӧдыс, Тахан да сылӧн рӧдыс.
Шутелахсянь чужисны Эран да сылӧн рӧдыс.
Тайӧ — Ефрем чужанкотырлӧн рӧдъяс. Арталӧм-гижалӧм айуловлӧн лыдыс вӧлі комын кык сюрс витсё морт.
Тайӧ — Ӧсипсянь чужысьяс асланыс рӧд сертиныс.
Веняминсянь чужисны Белай да сылӧн рӧдыс, Ашбел да сылӧн рӧдыс, Ахирам да сылӧн рӧдыс, Шефуфам да сылӧн рӧдыс, Хуфам да сылӧн рӧдыс.
Белайсянь чужисны Ард да сылӧн рӧдыс, Нааман да сылӧн рӧдыс.
Тайӧ — Венямин чужанкотырлӧн рӧдъяс.
Арталӧм-гижалӧм айуловлӧн лыдыс вӧлі нелямын вит сюрс квайтсё морт.
Дансянь чужисны Шухам да сылӧн рӧдыс.
Тайӧ — Дан чужанкотырлӧн рӧдыс.
Шухам рӧдысь арталӧм-гижалӧм айуловлӧн лыдыс вӧлі квайтымын нёль сюрс нёльсё морт.
Асирсянь чужисны Имнай да сылӧн рӧдыс, Ишви да сылӧн рӧдыс, Берий да сылӧн рӧдыс.
Берийсянь чужисны Хевер да сылӧн рӧдыс, Малкиэл да сылӧн рӧдыс.
Асирлысь нывсӧ шуисны Серах.
Тайӧ — Асир чужанкотырлӧн рӧдъяс. Арталӧм-гижалӧм айуловлӧн лыдыс вӧлі ветымын куим сюрс нёльсё морт.
Неффалимсянь чужисны Яхцеэл да сылӧн рӧдыс, Гуни да сылӧн рӧдыс, Ецер да сылӧн рӧдыс, Шиллем да сылӧн рӧдыс.
Тайӧ — Неффалим чужанкотырлӧн рӧдъяс.
Арталӧм-гижалӧм айуловлӧн лыдыс вӧлі нелямын вит сюрс нёльсё морт.
Арталӧм-гижалӧм Израиль пиянлӧн лыдыс вӧлі квайтсё ӧти сюрс сизимсё комын морт.
Господь шуис Мӧисейлы:
«Юклы мусӧ чужанкотыръяслы морт лыд серти.
Кутшӧм чужанкотырын йӧзыс унджык, сэтшӧм чужанкотырлы сет ыджыдджык му, а кутшӧм чужанкотырын йӧзыс этшаджык, сэтшӧм чужанкотырлы сет ичӧтджык му. Быд чужанкотырлы юклы мусӧ арталӧм-гижалӧм морт лыд серти.
Юклы мусӧ пудъясьӧмӧн, чужанкотыръяслӧн бать ним серти.
Ыджыд да ичӧт чужанкотыръяслы мусӧ колӧ юклыны пудъясьӧмӧн».
Арталӧм-гижалӧм Левий пиян лыдын вӧліны Гирсонлӧн, Каафлӧн да Мерарилӧн рӧдъяс.
Левий чужанкотырӧ пырисны Ливнилӧн, Хевронлӧн, Махлилӧн, Мушилӧн да Корейлӧн рӧдъяс.
Каафсянь чужысь Амрамлысь гӧтырсӧ шуисны Иокеведа. Сійӧ вӧлі Левийлӧн ныв, коді чужис Египетын. Иокеведа чужтіс Амрамлы Ааронӧс, Мӧисейӧс да налысь Мирьям чойсӧ.
Ааронлӧн чужисны Надав да Авиуд, Элазар да Итамар, но Надав да Авиуд кулісны, кор [Синай овтӧминын] вайисны Господь водзӧ мӧд би.
Арталӧма-гижалӧма вӧлі кызь куим сюрс левитӧс. На лыдӧ пырисны тӧлысьысь ыджыдджык арлыда айулов.
Мукӧд Израиль пиянкӧд ӧтвыв левитъясӧс эз артавны-гижавны, ӧд мукӧд Израиль пиян пӧвстын налы мусӧ эз вӧв сетӧма.
Мӧисей да Элазар поп арталісны-гижалісны Израиль пиянӧс Моав ласта вылын Йӧрдан ю бокын, Ериконлы воча.
На лыдын эз нин вӧвны Израиль пиян, кодъясӧс Мӧисей да Аарон поп арталісны-гижалісны Синай овтӧминын.
Ӧд Господь вӧлі шуӧма налы, мый куласны овтӧминын. Ефуннилӧн Калев пи да Навлӧн Исус пи кындзи наысь некод ловйӧн эз коль.
Манассей чужанкотырысь Салпаадлӧн вӧліны Махла, Ноа, Хогла, Милка да Тирза нывъяс. Салпаад вӧлі Хеферлӧн пи, Хефер — Галаадлӧн, Галаад — Макирлӧн, Макир — Манассейлӧн, Манассей — Ӧсиплӧн.
Нывъяс локтісны вежа чом пыранін дорӧ да сувтісны Мӧисей, Элазар поп, юралысьяс да став войтыр водзӧ. Нывъяс шуисны:
«Миян батьным куліс овтӧминын. Сійӧ куліс аслас мыж вӧсна, эз ӧтувтчы Корейкӧд, эз вӧв Господьлы паныд кыпӧдчысьяс лыдын. Батьлӧн эз вӧвны пияныс.
Колӧ ӧмӧй та вӧсна вуштыны батьнымлысь нимсӧ чужанкотырным пӧвстысь?
Батьнымлӧн вокъяслы моз сет миянлы му».
Мӧисей висьталіс налысь могсӧ Господьлы.
Господь шуис Мӧисейлы:
«Салпаадлӧн нывъясыс веськыда висьталӧны.
Батьныслӧн вокъяслы моз сет тшӧтш нывъясыслы му. Налы мед вичмас батьныслӧн му юкӧныс.
Висьтав Израиль пиянлы: мортлӧн кӧ оз ло пиыс, кулӧм бӧрас сылӧн муыс мед вуджас нывъясыслы, а нылыс кӧ оз ло, муыс мед вуджас вокъясыслы, а вокыс кӧ оз ло, муыс мед вуджас батьыслӧн вокъяслы.
А батьыслӧн кӧ вокъясыс абуӧсь, муыс мед вуджас чужанкотырысь медматысса рӧдвужыслы.
Тайӧ шуӧмыс лоӧ Израиль пиянлы индӧдӧн, ӧд тадзи Господь тшӧктіс Мӧисейлы».
Господь шуис Мӧисейлы: «Кай Аварим керӧсъяс вылӧ [Нево керӧс вылӧ, мый Йӧрдан ю таладорын] да видзӧдлы [Ханаан] му. Сійӧ мусӧ Ме сета Израиль пиянлы.
Сійӧс аддзылӧм бӧрын тэ вуджан батьясыд дінӧ, кыдзи [Ор керӧс вылын] Аарон вокыд вуджис батьясныд дінӧ.
Ӧд Цин овтӧминын, кӧні ропкис войтырыд, ті энӧ кывзысьӧй Менсьым, энӧ лыддьӧй Менӧ вежаӧн. Войтырыд водзын ті торкинныд Менсьым шуӧмӧс».
Тайӧ вӧлі Кадешын, Мерива ва петанін дорын. Мӧисей шуис Господьлы:
«Господьӧй, Тэ став ловъя олысьыслӧн Ен!
Инды тайӧ войтырыслы веськӧдлысьӧс, коді мунас на водзвылын да нуӧдас найӧс, медым Господьлӧн войтырыс эз вӧвны видзысьтӧг кольӧм ыжъяс кодьӧсь».
Господь шуис Мӧисейлы: «Менам Лолӧй Навлӧн Исус пи пытшкын. Пуктыв сы вылӧ китӧ. Сэсся нуӧд сійӧс Элазар поп дінӧ да став войтырыс водзын пукты сійӧс веськӧдлысьӧ. Аслад ыджыдалан вынысь сет сылы вын, медым Израиль войтыр кывзысяс сылысь.
Нав Исус кутас шыасьны Элазар поп дінӧ, а поп кутас юасьны Господьлысь урим* пыр.
Господьлӧн шуӧм серти войтырыскӧд сійӧ кутас петны тышӧ, и Господьлӧн шуӧм серти бӧр локны тыш вылысь».
Мӧисей вӧчис Господьлӧн тшӧктӧм серти. Сійӧ вайӧдіс Исусӧс Элазар поп да став войтырыс водзӧ и пуктыліс сы вылӧ кисӧ. Тадзи Господьлӧн тшӧктӧм серти Мӧисей пуктіс Нав Исусӧс веськӧдлыны Израиль войтырӧн.
Господь шуис Мӧисейлы:
«Висьтав Израиль пиянлы: ас кадӧ вайӧй Меным чӧскыда ӧвтан висьяс, Менсьым няньӧс. 
Быд лун вайӧй дзоньвидза арӧса кык баляӧс сотан вись пыдди.
Ӧти балясӧ вайӧй асывнас, мӧдсӧ — рытнас.
Нянь вись пыдди вайӧй пычкӧм олив выйӧн гудралӧм шобді пызь. Пызьыс мед вӧлі ефалӧн дасӧд юкӧныс, а выйыс мед вӧлі гинлӧн нёльӧд пайыс.
Тайӧ быдлунся сотан висьсӧ вайӧй Синай керӧсын моз. Тайӧ лоӧ Господьлы чӧскыда ӧвтан вись.
Ӧти баляыскӧд вайӧй кисьтан вись пыдди вина — гинлысь нёльӧд пайсӧ. Вежаинын вайӧй сійӧс кисьтан вись пыдди Господьлы.
Мӧд балясӧ вайӧй рытнас нянь виськӧд да вина виськӧд асъя мозыс жӧ. Вайӧй сійӧс Господьлы чӧскыда ӧвтан вись пыдди.
Шойччан лунӧ вайӧй вись пыдди дзоньвидза арӧса кык баляӧс. Накӧд ӧтлаын вайӧй нянь вись пыдди пычкӧм олив выйӧн гудралӧм шобді пызь — ефа мында пызьсӧ юкӧй дас пельӧ и сэтысь вайӧй кыксӧ. Нӧшта вайӧй кисьтан вись пыдди вина.
Тайӧ сотан висьсӧ вайӧй быд шойччан лунӧ быдлунся сотан висьысь да вина висьысь ӧтдор.
Выль тӧлысь чужигӧн вайӧй Господьлы сотан вись пыдди дзоньвидза кык ӧшкӧс, ӧти межӧс да арӧса сизим баляӧс. Накӧд ӧтлаын вайӧй нянь вись пыдди олив выйӧн гудралӧм шобді пызь. Ефа мында пызьсӧ юкӧй дас пельӧ, сэтысь вайӧй куимсӧ быд ӧшкӧд, кыксӧ межкӧд, а быд балякӧд вайӧй ефалысь дасӧд юкӧнсӧ.
Тайӧ — сотан вись, Господьлы чӧскыд ӧвтантор.
Кисьтан вись пыдди вайӧй быд ӧшкӧд гин джын вина, межкӧд — гинлысь коймӧд пайсӧ, быд балякӧд — гинлысь нёльӧд пайсӧ.
Во гӧгӧр чӧж быд выль тӧлысь чужигӧн вайӧй татшӧм сотан висьсӧ.
Мыжысь вись пыдди вайӧй Господьлы ӧти ай кӧзаӧс.
Вайӧй сійӧс да сыкӧд кисьтан вина висьсӧ быдлунся сотан висьысь ӧтдор.
Медводдза тӧлысьлӧн дас нёльӧд лунӧ Господьлы сиӧм Ыджыд лун, а дас витӧд лунсянь сизим лун чӧж гаж, кор колӧ сёйны шомтӧм нянь.
Медводдза гажӧдчан лунӧ тіян мед лоӧ вежа чукӧртчӧм.
Некутшӧм удж сэки энӧ вӧчӧй.
Вайӧй Господьлы сотан вись пыдди кык ӧшкӧс, ӧти межӧс да арӧса сизим баляӧс.
Ставныс найӧ мед вӧліны дзоньвидзаӧсь.
Накӧд ӧтлаын нянь вись пыдди вайӧй олив выйӧн гудралӧм шобді пызь. Ефа мында пызьсӧ юкӧй дас пельӧ, сэтысь вайӧй куимсӧ быд ӧшкӧд, кыксӧ межкӧд, а быд балякӧд вайӧй ефалысь дасӧд юкӧнсӧ. Мыжысь вись пыдди вайӧй ай кӧзаӧс, медым вештыны мыжнытӧ.
Быд асыв вайӧй тайӧ висьяссӧ быдлунся сотан висьысь ӧтдор.
Сизимнан лун чӧжыс тадзи вӧчӧй.
Тайӧ лоӧ Господьлы чӧскыда ӧвтан нянь вись.
Вайӧй сійӧс да сыкӧд кисьтан вина висьсӧ быдлунся сотан висьысь ӧтдор.
Сизимӧд луннас тіян мед лоӧ вежа чукӧртчӧм.
Некутшӧм удж сэки энӧ вӧчӧй.
Кор пасъянныд Ветымынӧд лунся гаж да ваянныд медводдза вундӧм няньысь Господьлы вись, тіян мед лоӧ вежа чукӧртчӧм.
Некутшӧм удж сэки энӧ вӧчӧй.
Господьлы чӧскыда ӧвтысь сотан вись пыдди вайӧй [дзоньвидза] кык ӧшкӧс, ӧти межӧс да арӧса сизим баляӧс. Накӧд ӧтлаын нянь вись пыдди вайӧй олив выйӧн гудралӧм шобді пызь. Ефа мында пызьсӧ юкӧй дас пельӧ, сэтысь вайӧй куимсӧ быд ӧшкӧд, кыксӧ межкӧд, а быд балякӧд вайӧй ефалысь дасӧд юкӧнсӧ. Вайӧй [мыжысь] вись пыдди ай кӧзаӧс, медым вештыны мыжнытӧ.
Тайӧ висьяссӧ да накӧд кисьтан висьяссӧ вайӧй [Меным] быдлунся сотан висьысь да нянь висьысь ӧтдор.
Вись пыдди вайӧм пемӧсныд мед вӧлі дзоньвидза.
Сизимӧд тӧлысьлӧн медводдза лунӧ тіян мед лоӧ вежа чукӧртчӧм.
Некутшӧм удж сэки энӧ вӧчӧй.
Сійӧ лунӧ буксӧй буксанӧн.
Господьлы чӧскыда ӧвтысь сотан вись пыдди вайӧй дзоньвидза ӧшкӧс, межӧс да арӧса сизим баляӧс. Накӧд ӧтлаын нянь вись пыдди вайӧй олив выйӧн гудралӧм шобді пызь. Ефа мында пызьсӧ юкӧй дас пельӧ, сэтысь вайӧй куимсӧ быд ӧшкӧд, кыксӧ межкӧд, а быд балякӧд вайӧй ефалысь дасӧд юкӧнсӧ. Мыжысь вись пыдди вайӧй ай кӧзаӧс, медым вештыны мыжнытӧ. Ставсӧ тайӧс вайӧй Господьлы чӧскыда ӧвтан вись пыдди сотан висьысь, нянь висьысь да вина висьысь ӧтдор, мый ваянныд быд лунӧ да выль тӧлысь чужигӧн.
Сизимӧд тӧлысьлӧн дасӧд лунӧ тіян мед лоӧ вежа чукӧртчӧм. Сэки раммӧдчӧй-видзалӧй, некутшӧм удж энӧ вӧчӧй.
Господьлы чӧскыда ӧвтысь сотан вись пыдди вайӧй ӧшкӧс, межӧс да арӧса сизим баляӧс, найӧ мед вӧліны дзоньвидзаӧсь.
Накӧд ӧтлаын нянь вись пыдди вайӧй олив выйӧн гудралӧм шобді пызь. Ефа мында пызьсӧ юкӧй дас пельӧ, сэтысь вайӧй куимсӧ быд ӧшкӧд, кыксӧ межкӧд, а быд балякӧд вайӧй ефалысь дасӧд юкӧнсӧ. Мыж вештан висьысь ӧтдор да быдлунся сотан висьысь, нянь висьысь да вина висьысь ӧтдор [мый ваянныд Господьлы чӧскыда ӧвтан вись пыдди], нӧшта вайӧй мыжысь вись пыдди ай кӧзаӧс.
Сизимӧд тӧлысьлӧн дас витӧд лунӧ тіян мед лоӧ вежа чукӧртчӧм.
Некутшӧм удж сэки энӧ вӧчӧй. Сизим лун чӧж пасйӧй Господьлы сиӧм гаж.
Тайӧ гажыслӧн медводдза луннас вайӧй Господьлы чӧскыда ӧвтысь сотан вись пыдди дзоньвидза дас куим ӧшкӧс, кык межӧс да арӧса дас нёль баляӧс.
Накӧд ӧтлаын нянь вись пыдди вайӧй олив выйӧн гудралӧм шобді пызь. Ефа мында пызьсӧ юкӧй дас пельӧ, сэтысь вайӧй куимсӧ быд ӧшкӧд, кыксӧ межкӧд, а быд балякӧд вайӧй ефалысь дасӧд юкӧнсӧ. Мыжысь вись пыдди вайӧй ай кӧзаӧс. Тайӧ висьяссӧ вайӧй быдлунся сотан висьысь, нянь висьысь да вина висьысь ӧтдор.
Мӧд луннас вайӧй дзоньвидза дас кык ӧшкӧс, кык межӧс да арӧса дас нёль баляӧс. Ӧш, меж да баля лыд серти накӧд ӧтлаын вайӧй колана мында нянь вись да вина вись, кыдзи тшӧктӧма. Мыжысь вись пыдди вайӧй ай кӧзаӧс. Тайӧ висьяссӧ вайӧй быдлунся сотан висьысь, нянь висьысь да вина висьысь ӧтдор.
Коймӧд луннас вайӧй дзоньвидза дас ӧти ӧшкӧс, кык межӧс да арӧса дас нёль баляӧс. Ӧш, меж да баля лыд серти накӧд ӧтлаын вайӧй колана мында нянь вись да вина вись, кыдзи тшӧктӧма. Мыжысь вись пыдди вайӧй ай кӧзаӧс. Тайӧ висьяссӧ вайӧй быдлунся сотан висьысь, нянь висьысь да вина висьысь ӧтдор.
Нёльӧд луннас вайӧй дзоньвидза дас ӧшкӧс, кык межӧс да арӧса дас нёль баляӧс. Ӧш, меж да баля лыд серти накӧд ӧтлаын вайӧй колана мында нянь вись да вина вись, кыдзи тшӧктӧма. Мыжысь вись пыдди вайӧй ай кӧзаӧс. Тайӧ висьяссӧ вайӧй быдлунся сотан висьысь, нянь висьысь да вина висьысь ӧтдор.
Витӧд луннас вайӧй дзоньвидза ӧкмыс ӧшкӧс, кык межӧс да арӧса дас нёль баляӧс. Ӧш, меж да баля лыд серти накӧд ӧтлаын вайӧй колана мында нянь вись да вина вись, кыдзи тшӧктӧма. Мыжысь вись пыдди вайӧй ай кӧзаӧс. Тайӧ висьяссӧ вайӧй быдлунся сотан висьысь, нянь висьысь да вина висьысь ӧтдор.
Квайтӧд луннас вайӧй дзоньвидза кӧкъямыс ӧшкӧс, кык межӧс да арӧса дас нёль баляӧс. Ӧш, меж да баля лыд серти накӧд ӧтлаын вайӧй колана мында нянь вись да вина вись, кыдзи тшӧктӧма. Мыжысь вись пыдди вайӧй ай кӧзаӧс. Тайӧ висьяссӧ вайӧй быдлунся сотан висьысь, нянь висьысь да вина висьысь ӧтдор.
Сизимӧд луннас вайӧй дзоньвидза сизим ӧшкӧс, кык межӧс да арӧса дас нёль баляӧс. Ӧш, меж да баля лыд серти накӧд ӧтлаын вайӧй колана мында нянь вись да вина вись, кыдзи тшӧктӧма. Мыжысь вись пыдди вайӧй ай кӧзаӧс. Тайӧ висьяссӧ вайӧй быдлунся сотан висьысь, нянь висьысь да вина висьысь ӧтдор.
Кӧкъямысӧд луннас тіян мед лоӧ вежа чукӧртчӧм.
Некутшӧм удж сэки энӧ вӧчӧй.
Господьлы чӧскыда ӧвтысь сотан вись пыдди вайӧй дзоньвидза ӧшкӧс, межӧс да арӧса сизим баляӧс. Ӧш, меж да баля лыд серти накӧд ӧтлаын вайӧй колана мында нянь вись да вина вись, кыдзи тшӧктӧма. Мыжысь вись пыдди вайӧй ай кӧзаӧс. Тайӧ висьяссӧ вайӧй быдлунся сотан висьысь, нянь висьысь да вина висьысь ӧтдор.
Тайӧ висьяссӧ вайӧй Господьлы гажӧдчан лунъясныд дырйи сыысь ӧтдор, мый ваянныд сотан вись, нянь вись, вина вись да бурасян вись пыдди, лоӧ-ӧ висьныд кыв сетан вись либӧ ас кӧсйӧм серти ваян вись».
Мӧисей висьталіс Израиль пиянлы ставсӧ, мый тшӧктіс сылы Господь.
Израильса чужанкотыръяслӧн юралысьяслы Мӧисей шуис: «Со мый тшӧктӧ Господь.
Коді кыв сетӧмӧн мыйкӧ кӧсйысяс Господьлы либӧ кӧсйысяс мыйыськӧ кутчысьны, сійӧ мед кывсӧ оз вудж, но мый шуис, мед вӧчас.
Бать ордас олігӧн на кӧ том ныв кыв сетӧмӧн мыйкӧ кӧсйысяс Господьлы либӧ кӧсйысяс мыйыськӧ кутчысьны, и батьыс та йылысь тӧдмалас, но нинӧм оз шу, сэки нывлӧн кыв сетӧмыс да кутчысьны кӧсйысьӧмыс кольӧ вына.
Но та йылысь тӧдмалӧм бӧрын кӧ батьыс ӧлӧдас нывсӧ, сэки нывлӧн кыв сетӧмыс да кутчысьны кӧсйысьӧмыс вынсӧ воштӧ. Господь прӧститас нылӧс, ӧд сійӧс батьыс ӧлӧдіс.
Ныв кӧ петас верӧс сайӧ, но таӧдз сылӧн вӧлі кыв сетӧма либӧ мӧвпышттӧг кӧсйысьӧма, и верӧсыс та йылысь тӧдмалас, но нинӧм оз шу, сэки нывдырся кыв сетӧмыс да кутчысьны кӧсйысьӧмыс кольӧ вына.
Но та йылысь тӧдмалӧм бӧрын кӧ верӧсыс ӧлӧдас гӧтырсӧ, сэки нывдырся кыв сетӧмыс да мӧвпышттӧг кутчысьны кӧсйысьӧмыс вынсӧ воштӧ. Господь прӧститас аньӧс.
Дӧвалӧн либӧ эновтӧм аньлӧн кыв сетӧмыс да мыйыськӧ кутчысьны кӧсйысьӧмыс кольӧ вына.
Верӧса ань кӧ кыв сетас либӧ кыв сетӧмӧн кӧсйысяс мыйыськӧ кутчысьны, и верӧсыс та йылысь тӧдмалас, но нинӧм оз шу да оз ӧлӧд сійӧс, сэки аньлӧн кыв сетӧмыс да кутчысьны кӧсйысьӧмыс кольӧ вына.
Но та йылысь тӧдмалӧм бӧрын кӧ верӧсыс ӧлӧдас гӧтырсӧ, сэки аньлӧн кыв сетӧмыс да кутчысьны кӧсйысьӧмыс вынсӧ воштӧ. Господь прӧститас аньӧс.
Верӧсыс вермас вынсьӧдны либӧ дугӧдны гӧтырлысь раммӧдчӧм-видзалӧм йылысь кыв сетӧмсӧ да кӧсйысьӧмсӧ.
Верӧсыс кӧ сылы лунтырӧн нинӧм оз шу, сідзкӧ, вынсьӧдас сылысь кыв сетӧмсӧ да кӧсйысьӧмсӧ. Чӧв олӧмнас верӧсыс вынсьӧдас гӧтырлысь кӧсйысьӧмсӧ.
Верӧсыс кӧ сёрӧнджык дугӧдас гӧтырлысь кӧсйысьӧмсӧ, сэки ачыс нуас гӧтырыслысь мыжсӧ».
Тайӧ тшӧктӧмъяссӧ Господь сетіс Мӧисейлы верӧс да гӧтыр йылысь, а сідзжӧ бать да том ныв йылысь, коді олӧ батьыс ордын.
Господь шуис Мӧисейлы:
«Израиль пиян вӧсна водзӧс перйы мадиансаяслысь. Та бӧрын тэ вуджан батьясыд дінӧ».
Мӧисей висьталіс войтырлы: «Тіян айуловныд босьтасны шыпуртнысӧ да петасны тышӧ. Господь вӧсна мед водзӧс перъясны мадиансаяслысь.
Израильса быд чужанкотырысь мӧдӧдӧй тышӧ сюрс тышкамортӧс».
Израильлӧн уна сюрс тышкайӧзысь торйӧдісны дас кык сюрс шыпуртаӧс — быд чужанкотырысь сюрс мортӧс.
Мӧисей мӧдӧдіс найӧс тыш вылӧ. Накӧд тшӧтш мӧдӧдіс [Ааронлӧн] Элазар поплысь Пинес писӧ. Аскӧдыс Пинес босьтіс вежаинса дозмук-кӧлуй да тутсан трубаяс.
Израильсаяс уськӧдчисны мадиансаяс вылӧ, кыдзи Господь тшӧктіс Мӧисейлы, да виисны став айуловсӧ.
Виӧмаяс пӧвстын вӧлі вит мадианса ӧксы: Эви, Рекем, Цур, Хур да Ревай. Израильсаяс виисны шыпуртӧн тшӧтш Веорлысь Валаам писӧ.
Мадиансаяслысь гӧтыръяссӧ да челядьсӧ израильсаяс босьтісны пленӧ, босьтісны тшӧтш налысь ыж-мӧссӧ да эмбур-кӧлуйсӧ, а налысь кар-сиктнысӧ сотісны.
Мырддьӧм эмбурсӧ, йӧзсӧ да ыж-мӧссӧ босьтісны аскӧдныс да вайисны Мӧисей дінӧ, Элазар поп да Израиль войтыр дінӧ, кодъяс чомъяснас вӧлі паськӧдчӧмаӧсь Моав ласта вылын Йӧрдан ю бокын, Ериконлы воча.
Мӧисей, Элазар поп да войтырлӧн став юралысьыс петісны сувтанін сайӧ, медым паныдавны тышкайӧзӧс.
Мӧисей скӧрмис сюрс да сё тышкамортӧн веськӧдлысьяс вылӧ, кодъяс воисны тышысь. Сійӧ шуис налы: «Мыйла ті аньяссӧ ловйӧн колинныд?
Валаамлӧн туйдӧдӧм серти найӧ кежӧдісны Израиль пиянӧс Господьысь, бергӧдісны найӧс юрбитны Пеорлы. Та вӧсна Господьлысь войтырсӧ суис бырӧдӧм.
Сідзкӧ, виӧй став зонпоснисӧ. Виӧй тшӧтш аньясӧс, кодъяс узьлісны айуловкӧд.
А нывъяссӧ, кодъяс эз на узьлыны, ловйӧн кольӧй да босьтӧй аслыныд.
Асьныд ті сизим лун чӧж олӧй чомъяс сайын.
Быдӧнлы, коді виис мортӧс либӧ инмӧдчыліс шой дінӧ, колӧ коймӧд луннас да сизимӧд луннас сӧстӧммӧдчыны. Тайӧ тшӧктӧмыс тіянлы и пленӧ босьтӧм йӧзныдлы.
Сӧстӧммӧдӧй паськӧмнытӧ да ставсӧ, мый вӧчӧма кучикысь, кӧза вурунысь да пуысь».
Элазар поп шуис тышӧ ветлысьяслы: «Тайӧ тшӧктӧмсӧ Господь сетіс Мӧисейлы.
Зарни, эзысь, ыргӧн, кӧрт, озысь* да свинеч — ставсӧ, мый позьӧ нуӧдны би пыр, сӧстӧммӧдӧм могысь нуӧдӧй би пыр. Нӧшта найӧс колӧ сӧстӧммӧдны ваӧн.
А мый оз позь нуӧдны би пыр, сӧстӧммӧдӧй ваӧн.
Сизимӧд луннас мыськалӧй паськӧмнытӧ, и лоанныд сӧстӧмӧсь, та бӧрын верманныд пырны чомъясӧ».
Господь шуис Мӧисейлы:
«Элазар попкӧд да рӧдкутысьяскӧд ӧтвылысь лыддьӧй, уна-ӧ мортӧс босьтінныд пленӧ да уна-ӧ ыж-мӧскӧс вайӧдінныд.
Тышӧ ветлысьяс да тышӧ ветлытӧм войтыр костын шӧри юк шедӧдӧмторсӧ.
Тышӧ ветлысьяслысь босьт Господьлы сетан юкӧнсӧ. Быд витсё мортысь босьт ӧтиӧс, быд витсё ӧш-мӧскысь — ӧтиӧс, быд витсё осёлысь — ӧтиӧс, быд витсё ыж-кӧзаысь — ӧтиӧс.
Сет найӧс Элазар поплы. Тайӧ Господьлы козин.
Шедӧдӧмторлысь мӧд джынсӧ колӧ сетны тышӧ ветлытӧм Израиль войтырлы. Быд ветымын мортысь босьт ӧтиӧс, быд ветымын ӧш-мӧскысь — ӧтиӧс, быд ветымын осёлысь — ӧтиӧс, быд ветымын ыж-кӧзаысь — ӧтиӧс да сет левитъяслы, Господьлӧн вежа чом бердын кесъялысьяслы».
Мӧисей да Элазар поп вӧчисны, кыдзи Господь тшӧктіс Мӧисейлы.
Тышӧ ветлысьяслӧн асланыс мырддялӧмторйысь ӧтдор вӧлі квайтсё сизимдас вит сюрс ыж-кӧза, сизимдас кык сюрс ӧш-мӧс, квайтымын ӧти сюрс осёл, комын кык сюрс ныв, кодъяс эз узьлыны айуловкӧд.
Тышӧ ветлысьяслӧн пайыс, шедӧдӧмторлӧн джынйыс, вӧлі куимсё комын сизим сюрс витсё ыж-кӧза. На пӧвстысь Господьлы сетан юкӧныс вӧлі квайтсё сизимдас вит.
Тышӧ ветлысьяслы вичмис комын квайт сюрс ӧш-мӧс, на пӧвстысь сизимдас кыкыс — Господьлы.
Тышӧ ветлысьяслы вичмис комын сюрс витсё осёл, на пӧвстысь квайтымын ӧтиыс — Господьлы.
Тышӧ ветлысьяслы вичмис дас квайт сюрс морт, на пӧвстысь комын кыкыс — Господьлы.
Господьлысь юкӧнсӧ Мӧисей сетіс Элазар поплы, кыдзи Господь тшӧктіс Мӧисейлы.
Шедӧдӧмторлӧн джынйыс, мый Мӧисей юкис Израиль войтырлы, вӧлі куимсё комын сизим сюрс витсё ыж-кӧза, комын квайт сюрс ӧш-мӧс, комын сюрс витсё осёл, дас квайт сюрс морт.
Израиль войтырлы вичмӧдӧм быд ветымын мортысь да ветымын ыж-мӧскысь Мӧисей босьтіс ӧтиӧс да сетіс левитъяслы, Господьлӧн вежа чом бердын кесъялысьяслы, кыдзи Господь тшӧктіс Мӧисейлы.
Мӧисей дорӧ локтісны сюрс да сё тышкамортӧн веськӧдлысьяс да шуисны: «Ми, тэнад кесйӧгъяс, арталім асланым киподувса тышкайӧзӧс. На пӧвстысь некод эз усь тышын.
Господь водзын мыжнымӧс вештӧм могысь ми сетам Господьлы тышын шедӧдӧм зарни чепъяс, сойкытшъяс, чунькытшъяс, исергаяс да сикӧтшъяс».
Мӧисей да Элазар поп босьтісны налысь зарни мичмӧдчанторъяссӧ.
Сюрсӧн да сёӧн веськӧдлысьяс вайисны Господьлы козин пыдди дас квайт сюрс сизимсё ветымын сикель сьӧкта зарни.
А налӧн киподувса тышкайӧзыс колисны аслыныс сійӧс, мый асьныс мырддялісны.
Сюрсӧн да сёӧн веськӧдлысьяслысь босьтӧм зарнисӧ Мӧисей да Элазар поп вайисны вежа чомйӧ, медым зарниыс вӧлі Израиль пиян йылысь Господьлы казьтыланпасӧн.
Рувим да Гад пиянлӧн вӧлі зэв уна ыж-мӧс.
Найӧ аддзисны, мый Язер да Галаад муясын эмӧсь бур йирсянінъяс.
Найӧ локтісны Мӧисей дінӧ, Элазар поп да войтырлӧн юралысьяс дінӧ да шуисны:
«Господь пасьвартіс Атарот, Дивон, Язер, Нимра, Хешбон, Эляле, Севам, Нево да Веон каръяс, и мусӧ сетіс Израиль войтырлы. Сэтчӧс йирсянінъясыс бурӧсь, а миян, тэнад кесйӧгъяслӧн, уна ыж-мӧсным.
Ло бур сьӧлӧма да сет тайӧ мусӧ миянлы, аслад кесйӧгъяслы.
Эн вуджӧд миянӧс Йӧрдан ю сайӧ».
Мӧисей шуис Гад да Рувим пиянлы: «Тіян вокъясныд мунасны тышӧ, а ті татчӧ кольччанныд?
Мыйла ті падмӧданныд Израиль пиянӧс Господьӧн сетӧм муӧ вуджӧмысь?
Тадзи вӧчлісны тшӧтш тіян батьясныд, кор ме мӧдӧді найӧс Кадеш-Варнисянь видзӧдлыны кӧсйысьӧм мусӧ.
Эшкол ковтысӧ ветлӧм да мусӧ видзӧдалӧм бӧрын найӧ кутісны падмӧдны Израиль пиянӧс Господьӧн сетӧм муӧ мунӧмысь.
Сійӧ лунӧ Господь скӧрмис да кыв сетӧмӧн шуис:
”Египетысь петӧм йӧзыс, кызь арӧса да ыджыдджык арлыда айулов, [кодъяс тӧдӧны бурсӧ и лёксӧ,] оз аддзыны мусӧ, мый йылысь Ме кыв сеті Ӧвраамлы, Исааклы да Яковлы. Ӧд тайӧ йӧзыс эз кывзысьны Менсьым. Сійӧ мусӧ аддзасны сӧмын Кенез рӧдысь Ефуннилӧн Калев пиыс да Навлӧн Исус пиыс, ӧд найӧ кывзысисны Господьлысь”.
Господь скӧрмис Израиль войтыр вылӧ да нелямын во чӧж нуӧдіс найӧс овтӧминті, кытчӧдз эз кувны ставныс, кодъяс вӧчисны Господь водзын шогмытӧмсӧ.
И ӧні ті, мыж вӧчысьяслӧн йылӧм, батьясныд моз кыпӧдчинныд паныд, медым Господьлӧн скӧрлуныс ёнджыка на ыпнитіс Израиль вылӧ!
Ті кӧ бергӧдчанныд Господьысь, Сійӧ бара войтырсӧ коляс овтӧминӧ, и тіян понда став тайӧ войтырыс бырас».
Гад да Рувим пиян матыстчисны Мӧисей дінӧ да шуисны: «Ми вӧчам татчӧ йӧръяс асланым ыжъяслы, кыпӧдам каръяс асланым челядьлы, а асьным ми босьтам шыпуртнымӧс, медводдзаясӧн петам тышӧ да отсалам Израиль пиянлы воны налӧн муӧ.
Но челядьным мед кольччасны татчӧ да оласны изкаръясын, медым татчӧс олысьяс эз вӧрӧдны найӧс.
Бӧрсӧ ми огӧ локтӧй, кытчӧдз Израиль пиян пӧвстысь быдӧн оз босьт ассьыс му юкӧнсӧ.
Йӧрдан ю сайысь ми огӧ босьтӧй накӧд мусӧ, ӧд миян му юкӧныс тані, Йӧрдан юсянь асыввылын».
Мӧисей вочавидзис налы: «Ті кӧ вӧчанныд сідзи, кыдзи шуинныд, да Господь водзын босьтанныд шыпуртнытӧ, медым петны тышӧ, сэсся ставныд мунанныд Йӧрдан ю сайӧ да Господь водзын тышкасянныд, кытчӧдз Господь оз пасьварт вӧрӧгсӧ Ас водзвывсьыс, и сійӧ муыс лоӧ Господьлӧн кипод улын, сэки ті верманныд бӧр бергӧдчыны и онӧ лоӧй Господь водзын да Израиль водзын мыжаӧсь. Господь водзын тайӧ муыс лоӧ тіян.
Но онӧ кӧ тадзи вӧчӧй, Господьлы паныд мыж вӧчанныд и мыж вӧснаныд асьныд кывкутанныд.
Сідзкӧ, кыпӧдӧй аслыныд да ныв-пиныдлы каръяс, лӧсьӧдӧй ыжъясныдлы йӧръяс, но вӧчӧй и сійӧ, мый кӧсйысинныд».
Гад да Рувим пиян шуисны Мӧисейлы: «Ми, тэнад кесйӧгъяс, вӧчам ыджыднымлӧн тшӧктӧм серти.
Миян ныв-пиным, гӧтыръясным да став ыж-мӧсным кольччасны татчӧ, Галаад каръясӧ. А ми, тэнад кесйӧгъяс, Господь водзын босьтам шыпуртнымӧс да петам тышӧ, кыдзи тэ, миян ыджыдным, тшӧктан».
Мӧисей шуис Элазар поплы, Нав Исуслы да израильса чужанкотыръяслӧн юралысьяслы: «Гад да Рувим пиян кӧ Господь водзын босьтасны шыпуртнысӧ, медым петны тышӧ, да мунасны тіянкӧд Йӧрдан ю сайӧ, и ті кӧ босьтанныд аслыныд Ханаан му, сэки сетӧй налы Галаад мусӧ.
Но найӧ кӧ [Господь водзын] оз босьтны шыпуртнысӧ да оз петны тіянкӧд тышӧ, [сэки Ханаан муӧ ас водзвыланыд вуджӧдӧй налысь эмбур-кӧлуйсӧ, гӧтыръяссӧ да ыж-мӧссӧ,] налы тіянлы моз муыс вичмас Ханаан муысь».
Гад да Рувим пиян шуисны: «Кыдзи Господь тшӧктіс миянлы, тэнад кесйӧгъяслы, ми сідзи и вӧчам.
Господь водзын ми босьтам шыпуртнымӧс, медым петны тышӧ, да мунам Ханаан муӧ, но муыс мед вичмас миянлы Йӧрдан ю таладорысь».
Сэки Мӧисей сетіс Гад да Рувим чужанкотыръяслы, а сідзжӧ Ӧсип Манассейлӧн джын чужанкотырлы аморейяслӧн Сигон ӧксылысь мусӧ да васанса Ог ӧксылысь мусӧ сэтчӧс каръяснас да нагӧгӧрса муяснас.
Гад пиян выльысь лэптісны Дивон, Атарот, Ароэр, Атрот-Шофан, Язер, Иогбега, Бет-Нимра да Бет-Харан изкаръяс да ыжъясыслы йӧръяс.
Рувим пиян выльысь лэптісны Хешбон, Эляле, Киръятаим да Сивма каръяс, нӧшта Нево да Ваал-Меон каръяс, кодъяслысь нимъяссӧ вежисны.
Манассейлӧн Макир писянь чужысьяс пырисны Галаад муӧ, босьтісны сійӧс да вӧтлісны сэтысь аморейясӧс.
Мӧисей сетіс Галаад му Макирсянь чужысьяслы, и найӧ овмӧдчисны сэтчӧ.
Манассей чужанкотырысь Яир рӧд босьтіс галаадса сиктъяс да нимтіс найӧс Яирлӧн сиктъясӧн.
Манассей чужанкотырысь Новах босьтіс Кенат кар да сыгӧгӧрса сиктъяс, нимтіс карсӧ аслас Новах нимӧн.
Израиль пиянлӧн вӧліны татшӧм сувтланінъяс, кор найӧ Мӧисей да Аарон веськӧдлӧм улын тышкайӧз моз петісны Египет муысь.
Овтӧминті мунӧм дырйи Мӧисей гижаліс налысь сувтланінъяссӧ Господьлӧн тшӧктӧм серти.
Медводдза тӧлысьлӧн дас витӧд лунӧ, Ыджыд лун бӧрти мӧд лунӧ, Израиль пиян петісны Рамсес карысь.
Египетсаяслӧн син водзын найӧ мӧдӧдчисны туйӧ Господьлӧн нуӧдӧм улын.
Египетсаяс сэки гуалісны ассьыныс медводдза чужысьяссӧ, кодъясӧс Господь виис. Татшӧм ногӧн Господь мыждіс египетса енъясӧс.
Рамсес карысь мунӧм бӧрын Израиль пиян сувтісны чомъяснаныс Суккотӧ.
Суккотсянь мӧдӧдчисны водзӧ да сувтісны Этамӧ, овтӧмин бокӧ.
Этамысь мунӧм бӧрын бергӧдчисны Пи-Хахиротлань, мый Ваал-Цефон весьтын, да сувтісны чомъяснаныс Мигдол дорӧ.
Хахиротысь петӧм бӧрын вуджисны саридз да воисны овтӧминӧ. Этам овтӧминӧд мунісны куим лун, сэсся сувтісны чомъяснаныс Мараӧ.
Мараысь мунісны Элимӧ, кӧні вӧлі дас кык юкмӧс да сизимдас финик пу, да сувтісны сэтчӧ.
Элимысь мунӧм бӧрын сувтісны Гӧрд саридз бокӧ.
Гӧрд саридз дорсянь мӧдӧдчисны Син овтӧминӧ да сувтісны сэтчӧ.
Син овтӧминысь мунӧм бӧрын сувтісны Дофкаӧ.
Дофкаысь мунӧм бӧрын сувтісны Алушӧ.
Алушысь мунӧм бӧрын сувтісны Рефидимӧ. Сэні эз вӧв войтырыслы юан ваыс.
Рефидимысь найӧ мунісны Синай овтӧминӧ да сувтісны сэтчӧ.
Синай овтӧминысь мунӧм бӧрын сувтісны Киврот-Хаттааваӧ.
Киврот-Хаттааваысь мунӧм бӧрын сувтісны Хацеротӧ.
Хацеротысь мунӧм бӧрын сувтісны Ритмаӧ.
Ритмаысь мунӧм бӧрын сувтісны Риммон-Паресӧ.
Риммон-Паресысь мунӧм бӧрын сувтісны Ливнаӧ.
Ливнаысь мунӧм бӧрын сувтісны Риссаӧ.
Риссаысь мунӧм бӧрын сувтісны Кегелатаӧ.
Кегелатаысь мунӧм бӧрын сувтісны Шефер керӧс бокӧ.
Шефер керӧс дорысь мунӧм бӧрын сувтісны Харадаӧ.
Харадаысь мунӧм бӧрын сувтісны Макелотӧ.
Макелотысь мунӧм бӧрын сувтісны Тахатӧ.
Тахатысь мунӧм бӧрын сувтісны Тарахӧ.
Тарахысь мунӧм бӧрын сувтісны Миткаӧ.
Миткаысь мунӧм бӧрын сувтісны Хашмонаӧ.
Хашмонаысь мунӧм бӧрын сувтісны Мосеротӧ.
Мосеротысь мунӧм бӧрын сувтісны Бене-Яаканӧ.
Бене-Яаканысь мунӧм бӧрын сувтісны Хор-Хагидгадӧ.
Хор-Хагидгадысь мунӧм бӧрын сувтісны Иотватаӧ.
Иотватаысь мунӧм бӧрын сувтісны Авронаӧ.
Авронаысь мунӧм бӧрын сувтісны Эцион-Геверӧ.
Эцион-Геверысь мунӧм бӧрын сувтісны Цин овтӧминӧ, [сэтысь мунӧм бӧрын сувтісны Паран овтӧминӧ,] Кадешӧ.
Кадешысь мунӧм бӧрын сувтісны Ор керӧс бокӧ, Эдом мусянь матын.
Господьлӧн тшӧктӧм серти Аарон поп кыпӧдчис Ор керӧс вылӧ, сэні сійӧ куліс. Тайӧ вӧлі Израиль пиянлӧн Египетысь петӧмсянь нелямынӧд вонас, витӧд тӧлысьлӧн медводдза лунӧ.
Аарон вӧлі сё кызь куим арӧса, кор сійӧ куліс Ор керӧс вылын.
Арад карлӧн ханаанса ӧксыыс, коді оліс Негев муын, Ханаанын, кыліс Израиль пиянлӧн локтӧм йылысь.
Ор керӧс дорысь мунӧм бӧрын Израиль пиян сувтісны чомъяснаныс Салмонаӧ.
Салмонаысь мунӧм бӧрын сувтісны Пунонӧ.
Пунонысь мунӧм бӧрын сувтісны Овотӧ.
Овотысь мунӧм бӧрын сувтісны Ийе-Аваримӧ, Моав мусянь матын.
Ийимысь мунӧм бӧрын сувтісны Дивон-Гадӧ.
Дивон-Гадысь мунӧм бӧрын сувтісны Алмон-Дивлатаимӧ.
Алмон-Дивлатаимысь мунӧм бӧрын сувтісны Аварим керӧсъяс вылӧ, Нево керӧс бокӧ.
Аварим керӧсъяс вылысь мунӧм бӧрын сувтісны Моав ласта вылӧ Йӧрдан ю дорӧ, Ериконлы воча.
Моав ласта вылын найӧ паськӧдчисны чомъяснаныс Йӧрдан ю пӧлӧн Бет-Ешимотсянь Авел-Ситтимӧдз.
Моав ласта вылын Йӧрдан ю бокын, Ериконлы воча, Господь тшӧктіс Мӧисейлы висьтавны Израиль пиянлы: «Кор ті вуджанныд Йӧрдан ю вомӧн Ханаан муӧ, вӧтлӧй сэтысь став олысьсӧ. Жуглӧй налысь серпасалӧм изъяссӧ, сывдӧмӧн вӧчӧм бӧлбанъяссӧ да вись ваян мылькъяссӧ.
Босьтӧй сійӧ мусӧ аслыныд да овмӧдчӧй сэтчӧ, ӧд тіянлы Ме сета сійӧс.
Пудъясьӧмӧн юклӧй мусӧ чужанкотыръясныдлы. Кутшӧм чужанкотырын йӧзыс унджык, сэтшӧм чужанкотырлы сетӧй ыджыдджык му, а кутшӧм чужанкотырын йӧзыс этшаджык, сэтшӧм чужанкотырлы сетӧй ичӧтджык му. 
Пудъясьӧм серти кодлы кытысь усьӧ муыс, сэні и лоӧ сылӧн пайыс.
Сэтчӧс олысьяссӧ кӧ ті онӧ вӧтлӧй, найӧ лоӧны тіянлы синтӧ сутшкысьясӧн да боктӧ бытшкысьясӧн. Найӧ дзескӧдасны тіянӧс муын, кӧні ті кутанныд овны. И мый Ме шуи вӧчны накӧд, вӧча тіянкӧд».
Господь тшӧктіс Мӧисейлы висьтавны Израиль пиянлы: «Кор ті пыранныд Ханаан муӧ, сійӧ лоӧ тіян. Мудорыс нюжӧдчас тадзи.
Лунвыв мудорыс мунас Цин овтӧминсянь Эдом му бокті. Асыввылын сійӧ заводитчас Сола саридз лунвывладорсянь, бергӧдчас Акравим ыблань да мунас Цин овтӧминӧд, кытшовтас лунвывсянь Кадеш-Варни, сэсянь мунас Хацар-Аддарӧ да водзӧ Ацмонӧ.
Ацмонсянь мудорыс нюжӧдчас Египет мудорса шорті саридз дорӧдз.
Рытыввыв мудорнас лоӧ Ыджыд саридз. Войвыв мудорыс заводитчас Ыджыд саридз дорсянь да мунас Ор керӧсӧдз, а Ор керӧссянь — Лево-Хаматӧ да водзӧ Цедадӧдз.
Сэтысянь мудорыс нюжӧдчас Зифронӧдз да воас Хацар-Энанӧдз. Тайӧ лоӧ тіян войвыв мудорныд.
Асыввыв мудорныд мед лоӧ Хацар-Энансянь Шефамӧдз, Шефамсянь сійӧ лэччас Ривлаӧдз, Айнсянь асыввылӧ, и сэсся водзӧ мунас Киннерет ты* дорӧдз сылӧн асыввывладорсяньыс.
Водзӧ мудорыс нюжӧдчас Йӧрдан ю пӧлӧн Сола саридз дорӧдз.
Тайӧ тіян муныд да мудоръясныд».
Мӧисей тшӧктіс Израиль пиянлы: «Тайӧ мусӧ юклӧй пудъясьӧмӧн. Господь тшӧктіс сетны сійӧс ӧкмыс чужанкотырлы да [Манассейлӧн] джын чужанкотырлы.
Ӧд Рувим да Гад чужанкотыръяс да Манассейлӧн джын чужанкотырыс босьтісны нин ассьыныс пайсӧ. Найӧ босьтісны мунысӧ Йӧрдан ю да Ерикон кар асыввылысь».
Господь шуис Мӧисейлы:
«Элазар поп да Навлӧн Исус пиыс кутасны юклыны тіян костын тайӧ мусӧ.
Нӧшта быд чужанкотырысь сувтӧдӧй ӧти юралысьӧс юклыны му:
Иуда чужанкотырысь Ефуннилысь Калев писӧ, Симеон чужанкотырысь Аммиудлысь Самуил писӧ, Венямин чужанкотырысь Кислонлысь Элидад писӧ, Дан чужанкотырысь Иоглилысь Букки писӧ, Ӧсипсянь чужысьясысь Манассей чужанкотырысь Эфодлысь Ханниэл писӧ, Ефрем чужанкотырысь Шифтанлысь Кемуэл писӧ, Завулон чужанкотырысь Парнаклысь Элицафан писӧ, Иссакар чужанкотырысь Аззанлысь Палтиэл писӧ, Асир чужанкотырысь Шеломилысь Ахиуд писӧ, Неффалим чужанкотырысь Аммиудлысь Педаэл писӧ».
Тайӧ юралысьяслы Господь тшӧктіс юклыны Ханаан мусӧ Израиль пиян костын.
Моав ласта вылын Йӧрдан ю бокын, Ериконлы воча, Господь шуис Мӧисейлы:
«Тшӧкты Израиль пиянлы, медым асланыс муысь сетасны левитъяслы олан каръяс да нагӧгӧрса видзьяс.
Каръясас найӧ кутасны овны, а видзьясыс лоӧны налӧн ыж-мӧслы йирсянінӧн.
Левитъяслы сетан видзьясыс мед нюжӧдчасны карса стен бердсянь [кык] сюрс гырддза ылна.
Карсянь асыввылын мурталӧй кык сюрс гырддза, лунвылын — кык сюрс гырддза, рытыввылын — кык сюрс гырддза, войвылын — кык сюрс гырддза, а шӧрас мед лоӧ карыс. Тайӧ карбердса видзьясыс левитъяслы.
Левитъяслы сетан каръяс пӧвстысь квайт карыс мед лоасны каръясӧн, кытчӧ лэдзанныд морт виысьяслы пышйыны.
Тайӧ каръясысь ӧтдор сетӧй левитъяслы нӧшта нелямын кык кар.
Ставнас левитъяслы сетӧй нелямын кӧкъямыс кар да нагӧгӧрса видзьяс.
Кор Израиль пиянлӧн муысь кутанныд сетны левитъяслы каръяс, сэки ыджыдджык чужанкотыръяслысь босьтӧй унджыкӧс, а ичӧтджыкъяслысь — этшаджыкӧс.
Быд чужанкотыр мед сетас левитъяслы каръяс аслас мулӧн ыджда серти».
Господь тшӧктіс Мӧисейлы висьтавны Израиль пиянлы: «Кор ті вуджанныд Йӧрдан ю да пыранныд Ханаан муӧ, бӧрйӧй аслыныд каръяс, кытчӧ вермас пышйыны быдӧн, коді мӧвпышттӧг виас мортӧс.
Татшӧм карас виысь вермас пышйыны водзӧс перйысь мортысь, медым войтыр водзын мыждытӧг эз вӧв виӧма.
Тіян мед лоӧ квайт кар, кытчӧ вермас пышйыны морт виысь.
Куимсӧ торйӧдӧй Йӧрдан ю таладорысь, а мӧд куимсӧ — Ханаан муысь.
Тайӧ квайтнан карас вермасны пышйыны Израиль пиян, йӧз муысь локтысьяс да тіян ордӧ овмӧдчысьяс, мӧвпышттӧг кӧ виасны мортӧс.
Коді вачкас мӧд мортӧс кувмӧныс кӧртысь вӧчӧмторйӧн, сійӧ лоӧ морт виысьӧн, а морт виысьӧс колӧ вины.
Коді вачкас мӧд мортӧс кувмӧныс изйӧн, сійӧ лоӧ морт виысьӧн, а морт виысьӧс колӧ вины.
Коді вачкас мӧд мортӧс кувмӧныс пуысь вӧчӧмторйӧн, сійӧ лоӧ морт виысьӧн, а морт виысьӧс колӧ вины.
Вир кисьтӧм вӧсна водзӧс перйысь вермас вины морт виысьӧс сыкӧд паныдасигӧн.
Коді скӧрйывсьыс йӧткыштас мортӧс либӧ тӧдӧмӧн мыйӧнкӧ лыяс, и мӧдыс кулас, либӧ коді скӧрпырысь кинас вачкас, и мӧдыс кулас, сійӧс колӧ вины, ӧд сійӧ морт виысь.
Вир кисьтӧм вӧсна водзӧс перйысь вермас вины морт виысьӧс сыкӧд паныдасигӧн.
Морт кӧ мӧвпышттӧг, оз лӧгпырысь, йӧткыштас мӧд мортӧс, либӧ мыйӧнкӧ лыйигас веськалас мӧд мортлы, либӧ мӧвпышттӧг уськӧдас из мӧд морт вылӧ, и сійӧ кулас, но морт виысь кӧ эз мустӧмтлы сійӧс да эз кӧсйыв лёксӧ сылы, сэки морт виысь да водзӧс перйысь костын венсӧ колӧ видлавны войтыр водзын тайӧ тшӧктӧмыс серти.
Войтырыс мед доръяс морт виысьӧс водзӧс перйысьлӧн киысь да бӧр вайӧдас карӧ, кытчӧ сійӧ коркӧ пышйыліс. Сійӧ мед олас сэні вежа выйӧн мавтыштӧм аркирейлӧн кувтӧдз.
А морт виысь кӧ петас карсьыс, кытчӧ пышйыліс, и водзӧс перйысь кӧ паныдалас сійӧс кар сайын да виас, сэки водзӧс перйысь оз ло мыжа вир кисьтӧмсьыс. Аркирей кувтӧдз морт виысьлы колӧ овны карас, кытчӧ сійӧ коркӧ пышйыліс. Сӧмын аркирейлӧн кулӧм бӧрын морт виысьлы позьӧ бӧр локны аслас муӧ.
Чужысьяссянь чужысьясӧдз быдлаын олӧй тайӧ индӧд-тшӧктӧмъясыс серти.
Морт виысьӧс вины позьӧ сӧмын сэки, кор эмӧсь аддзылысь-висьталысьяс.
Ӧтилӧн висьталӧмыс абу тырмана, медым вины морт виысьӧс.
Энӧ босьтӧй вештысян донсӧ морт виысьлысь, кодӧс мыждӧма, ӧд сійӧс колӧ вины.
Энӧ босьтӧй вештысян донсӧ морт виысьлысь, коді аркирейлӧн кувтӧдзыс кӧсйӧ петны карысь, кытчӧ пышйыліс, да бӧр мунны аслас муӧ.
Энӧ пежалӧй мунытӧ, кӧні ті кутанныд овны.
Вир пежалӧ мусӧ, и муыс вермӧ сӧстӧммыны сӧмын вир кисьтысьлӧн вирӧн.
Энӧ пежалӧй мунытӧ, кӧні Ме ола.
Ӧд Ме, Господь, ола тіян пӧвстын».
Ӧсип Манассей чужанкотырысь Галаад рӧдысь рӧдкутысьяс локтісны Мӧисей [да Элазар поп] дінӧ да Израиль войтырлӧн рӧдкутысьяс дінӧ. Галаад вӧлі Макирлӧн пи, Макир — Манассейлӧн. Локтысьяс шуисны: «Господь тшӧктіс тэныд, миян ыджыднымлы, пудъясьӧмӧн юклыны Израиль пиянлы му. Господь тшӧктіс тэныд сетны Салпаад вокнымлысь мусӧ сылӧн нывъясыслы.
Но найӧ кӧ петасны верӧс сайӧ Израиль войтырлӧн мӧд чужанкотырысь морт сайӧ, сэки чужанкотырнымлӧн муысь юкӧныс вуджас мӧд чужанкотырлы, а миянлы пудъясьӧмӧн вичмӧм муыс чинас.
И Израиль пиянлӧн тшупӧда воӧ татшӧм муыс вуджас чужанкотырлы, кытысь аньлӧн верӧсыс. Тадзи лоӧ босьтӧма му юкӧнсӧ миян чужанкотырлысь».
Господьлӧн тшӧктӧм серти Мӧисей шуис Израиль пиянлы: «Ӧсипсянь чужысьяс веськыда висьталӧны.
Со мый висьталӧ Господь Салпаадлӧн нывъяс йылысь. Найӧ вермасны петны верӧс сайӧ код сайӧ кӧсъясны, сӧмын верӧсъясыс мед вӧліны налӧн чужанкотырысь. Сэки ӧти израильса чужанкотырлӧн муыс оз вудж мӧд чужанкотырлы.
Израиль пиян пӧвстысь быдӧн мед кутчысяс аслас чужанкотырлӧн муӧ.
Израильса нывлы кӧ вуджас батьыслӧн муыс, нывлы колӧ петны верӧс сайӧ аслас чужанкотырысь морт сайӧ. Татшӧм ногӧн Израиль войтыр пӧвстысь быдӧн видзас аслас батьяссянь вуджӧм мусӧ. Сідзкӧ, муыс мед оз вудж ӧти чужанкотырсянь мӧд чужанкотырлы.
Израильса быд чужанкотыр мед видзӧ ассьыс мусӧ».
Салпаадлӧн нывъясыс вӧчисны, кыдзи Господь тшӧктіс Мӧисейлы.
Махла, Тирза, Хогла, Милка да Ноа петісны верӧс сайӧ асланыс дядьяслӧн пияныс сайӧ.
Верӧсъясныс вӧліны Ӧсип Манассей чужанкотырысь. Тадзи нывъяслӧн муыс коли батьныслӧн чужанкотырас.
Тайӧ индӧд-тшӧктӧмъяссӧ Господь сетіс Израиль пиянлы Мӧисей пыр Моав ласта вылын Йӧрдан ю бокын, Ериконлы воча.
{Еврей йӧз (комиӧдіс Kodko) @ Индӧд @ религ. гижӧд @ Библия @ 2021 @ Лб. .}
Мӧисейлӧн витӧд небӧг
ИНДӦД
Мӧисей сёрнитіс став Израиль войтыркӧд, кор найӧ вӧліны Йӧрдан ю сайын овтӧминын, Суфлы паныда ковтысын, Паран кар да Тофел, Лаван, Хацерот да Дизахав каръяс костын. Дас ӧти лун колӧ вӧлі мунны Сеир керӧсвыв муӧд Хорив керӧссянь Кадеш-Варниӧдз.
Египетысь петӧмсянь нелямынӧд воӧ, дас ӧтиӧд тӧлысьлӧн медводдза лунӧ, Мӧисей висьталіс Израиль пиянлы ставсӧ, мый Господь тшӧктіс.
Таӧдз Мӧисей пасьвартіс Сигон да Ог ӧксыясӧс. Аморейяслӧн Сигон ӧксы юраліс Хешбон карын, а васанса Ог ӧксы — Аштарот да Эдрей каръясын. Йӧрдан сайын, Моав муын, Мӧисей велӧдіс войтырӧс Индӧдӧ. Сійӧ шуис:
«Хорив керӧсын Господь, миян Енным, шуис: “Тырмас тіянлы тайӧ керӧс бокас овнысӧ.
Мунӧй Ханаан муӧ — аморейяслӧн керӧсвыв муӧ да накӧд орччӧн олысь войтыръяс дінӧ, кодъяс олӧны Йӧрдан ковтысын, керӧсвыв муын, рытыввылын керӧсбердса муын, Негев муын да саридздор муын. Овмӧдчӧй налӧн муӧ да Ливанӧ, паськӧдчӧй весиг ыджыд Ефрат ю дорӧдз.
Тайӧ мусӧ Ме сета тіянлы. Ме, Господь, кыв сетӧмӧн кӧсйыси сетны сійӧс тіян батьяслы — Ӧвраамлы, Исааклы, Яковлы да насянь чужысьяслы. Мунӧй да босьтӧй сійӧс”.
Сэки ме тіянлы шуи: “Меным ӧтнамлы сьӧкыд нуӧдны тіянӧс.
Господь, тіян Енныд, содтіс тіянӧс, и ті лоинныд енэжвыв кодзувъяс мында.
Господь, тіян батьяслӧн Ен, мед сюрс пӧвстӧн содтас тіянлысь лыднытӧ да бурсиас тіянӧс, кыдзи Сійӧ кӧсйысис тіянлы.
Но ме ӧтнам ог вермы нуны тіянлысь сьӧкыдлунъястӧ, тӧжд-могъястӧ да зык-вензьӧмъястӧ.
Бӧрйӧй быд чужанкотырысь мывкыд да сюсь вежӧра йӧзӧс, и ме пукта найӧс веськӧдлыны тіянӧн”.
Ті меным вочавидзинныд, мый буртор вӧзйи.
Ме чукӧрті тіян чужанкотыръясысь мывкыд да [сюсь] вежӧра йӧзӧс и пукті найӧс веськӧдлыны сюрс мортӧн, сё мортӧн, ветымын мортӧн да дас мортӧн. Быд чужанкотырӧ нӧшта пукті кывкутысь йӧзӧс.
Тіян ёрдысьяслы ме тшӧкті: “Кывзӧй вокъяснытӧ да мыждӧй найӧс веськыда, кор вокъяс костын либӧ израильса морт да йӧз муысь локтысь костын кыптас зык-вен.
Ёрд вылын ӧткодя кывзӧй тӧдчана да абу тӧдчана мортӧс. Энӧ полӧй мортысь, ӧд мыждӧмыс Енсянь.
А могыс кӧ тіянлы сьӧкыд, локтӧй ме дорӧ, и ме ачым видлала сійӧс”.
Сійӧ кадас ме висьталі тіянлы ставсӧ, мый тіянлы колӧ вӧчны.
Хорив керӧссянь ми мӧдӧдчим водзӧ, мунім паськыд да повзьӧдана овтӧминӧд. Сійӧс ті аддзылінныд, кор ми мунім аморейяслӧн керӧсвыв мулань асланым Господь Енлӧн тшӧктӧм серти. Сэсся ми воим Кадеш-Варниӧ.
Сэні ме тіянлы шуи: “Ми воим аморейяслӧн керӧсвыв муӧ, мый Господь, миян Енным, сетас миянлы.
Господь, тіян Енныд, сетас тіянлы тайӧ мусӧ. Мунӧй да босьтӧй сійӧс аслыныд, кыдзи Господь, тіян батьяслӧн Ен, тшӧктіс тіянлы. Энӧ полӧй да энӧ тіралӧй!”
Но ті ставныд локтінныд ме дінӧ да шуинныд: “Мӧдӧдамӧй водзвыланым йӧзӧс, кодъяс ветласны тӧдмавны мусӧ да висьталасны, кутшӧм туйӧд миянлы мунны да кутшӧм каръясӧ пырны”.
Ме шуи, мый тайӧ бур. Сэки ме бӧрйи тіян пӧвстысь дас кык мортӧс, быд чужанкотырысь ӧтиӧс.
Найӧ мунісны, кайисны керӧсвыв муӧ да сэтысянь воисны Эшкол ковтысӧ.
Мусӧ видзӧдалӧм бӧрын найӧ вайисны миянлы сэтчӧс вотӧссӧ. Найӧ юӧртісны, мый муыс, кодӧс сетӧ миянлы Господь, миян Енным, бур.
Но ті энӧ кӧсйӧй муннысӧ, ті пыксинныд асланыд Господь Енлӧн тшӧктӧмлы. Асланыд чомъясын ті ропкинныд: “Господь мустӧмтӧ миянӧс. Сійӧ петкӧдіс миянӧс Египет муысь, медым сетны миянӧс аморейяслӧн киӧ да бырӧдны миянӧс.
Кытчӧ миянлы муннысӧ?
Ми повзим, кор вокъясным висьталісны, сэні пӧ йӧзыс миян дорысь унджыкӧсь да ёнӧсь, и налӧн ыджыд изкаръясыс пӧ зурасьӧны енэжӧдз. Висьталісны, весиг енак войтырӧс пӧ аддзылім”.
Сэки ме шуи тіянлы: “Энӧ полӧй наысь да энӧ тіралӧй.
Господь, тіян Енныд, мунӧ тіян водзвылын.
Сійӧ вермасьӧ тіян пыдди. Асланыд синмӧн ті аддзылінныд, мый Сійӧ вӧчис тіянлы Египетын. Овтӧминын ті аддзылінныд, мый Господь, тіян Енныд, нуис тіянӧс ки вылас, кыдзи бать нуӧ ассьыс писӧ. Татчӧ вотӧдзныд Сійӧ пыр нуис тіянӧс ки вылас”.
Но ті энӧ эскӧй Господьлы, асланыд Енлы, коді муніс тіян водзвылын, медым корсьны тіянлы сувтланінъяс. Войнас Сійӧ муніс би сюръя пытшкын, а луннас — кымӧр сюръя пытшкын. Татшӧм ногӧн Сійӧ индыліс тіянлы туйсӧ.
Кор Господь [Ен] кыліс тіянлысь кывъястӧ, Сійӧ скӧрмис да кыв сетӧмӧн шуис:
”Ӧнія олысьясысь, тайӧ шогмытӧм йӧзысь, некод оз аддзы бур мусӧ, мый Ме кыв сетӧмӧн кӧсйыси сетны тіян батьяслы.
Сійӧ мусӧ аддзас сӧмын Ефуннилӧн Калев пиыс, ӧд сійӧ кывзысис Менсьым. Сылы да сысянь чужысьяслы Ме, Господь, сета мусӧ, кытчӧ сійӧ кокнас тувччыліс”.
Тіян вӧсна Господь скӧрмис тшӧтш ме вылӧ да шуис: “Тэ он пыр сійӧ муас, но Навлӧн Исус пиыс, коді отсасьӧ тэныд, пырас сэтчӧ.
Ышӧд сійӧс, ӧд сылы ковмас пыртны Израиль войтырӧс налы сетӧм муӧ.
Тайӧ муас пырасны тіян ныв-пиныд, кодъяс оз на кужны торйӧдны бурсӧ лёксьыс. На йылысь ті шулінныд, мый шедасны вӧрӧг киӧ, но налы Ме сета Ханаан му, и найӧ босьтасны сійӧс аслыныс.
А ті бӧр бергӧдчӧй да мунӧй овтӧминӧ Гӧрд саридзлань”.
Сэки ті шуинныд меным: “Ми мыж вӧчим Господьлы [миян Енлы] паныд. Ми мунам да тышкасям, кыдзи тшӧктіс миянлы Господь, миян Енным”. 
Ті босьтінныд шыпуртъяснытӧ да зэв кокньыда кӧсйинныд кайны керӧсвыв муӧ.
Сэки Господь тшӧктіс висьтавны тіянлы: “Энӧ мунӧй да энӧ петӧй тышӧ, ӧд Ме ог ло тіянкӧд! Мунанныд кӧ, вӧрӧгныд вермас тіянӧс”.
Ме висьталі тайӧс тіянлы, но ті энӧ кывзысьӧй, а пыксинныд Господьлӧн тшӧктӧмлы. Ті асныралінныд да мӧдӧдчинныд кайны керӧсвыв муӧ, кӧні олісны аморейяс.
Но зі чукӧр моз найӧ уськӧдчисны тіян вылӧ, пасьвартісны тіянӧс Сеир керӧсвыв муын да вӧтӧдісны Хормаӧдз.
Локтӧм бӧраныд ті бӧрдінныд Господь водзын, но Господь эз кыв и эз кывзы тіянӧс.
Та вӧсна тіянлы ковмис кольччыны Кадешӧ дыр кежлӧ».
«Ми бӧр бергӧдчим да мунім овтӧминӧд Гӧрд саридзлань, кыдзи меным тшӧктіс Господь. Ми дыр мунім Сеир керӧсвыв му дінті.
Господь шуис меным:
”Тырмас тіянлы ветлӧдлыны тайӧ керӧсъяс дінтіыс, веськӧдчӧй войвывлань.
Войтырыдлы висьтав: ті кутанныд мунны Сеир керӧсвыв муӧд, кӧні олӧны Исав пиян, тіян вокъясныд. Найӧ повзясны тіянысь, но видзчысьӧй, энӧ панӧй накӧд тыш. Налӧн муысь Ме тіянлы весиг кок пыдӧс пасьта му ог сет. Ӧд Сеир керӧсвыв мусӧ Ме сеті Исавлы.
Аслыныд сёянтӧ ньӧбӧй налысь, эзысьӧн мынтысьӧй налы тшӧтш юан ваысь.
Господь, тіян Енныд, бурсиис тіянлысь уджнытӧ, видзис тіянӧс тайӧ паськыд [да повзьӧдана] овтӧминтіыс ветліганыд.
Нелямын во чӧж Господь, тіян Енныд, вӧлі тіянкӧд, и тіян ставыс вӧлі тырмана”.
Ми мунім Сеир керӧсвыв муын олысь Исав пиян дінті, миян вокъяс дінті. Восьлалім Арава туйӧд, мый нуӧдӧ Элатсянь да Эцион-Геверсянь. Сэсся ми кежим Моав овтӧминлань.
Господь шуис меным: “Энӧ зыксьӧй моавса войтыркӧд, энӧ панӧй накӧд тыш.
Налӧн муысь Ме тіянлы нинӧм ог сет. Ӧд Ар-Моавсӧ Ме сеті Лотсянь чужысьяслы”.
Войдӧр сэні оліс уна лыда эми войтыр, найӧ вӧліны Енаксянь чужысьяс кодь ёнӧсь да ыджыд тушааӧсь. Енаксянь чужысьясӧс моз найӧс лыддьӧны рефа войтырӧн, а моавсаяс шуӧны найӧс эми войтырӧн.
Войдӧр Сеир керӧсвыв муын олісны хорияс, но Исавсянь чужысьяс вӧтлісны-бырӧдісны найӧс да овмӧдчисны налӧн муӧ. Исавсянь чужысьяс босьтісны хорияслысь мусӧ, кыдзи Израиль войтыр босьтіс аслыс Господьӧн сылы сетӧм му.
Господь тшӧктіс миянлы вуджны Заред ковтыс.
Ми тадзи и вӧчим.
Сійӧ кадсяньыс, кор ми мунім Кадеш-Варниысь, да сійӧ кадӧдзыс, кор ми вуджим Заред ковтыс, коли комын кӧкъямыс во. Тайӧ кадӧ Израиль войтыр пӧвстысь кулісны ставныс, кодъяс вӧліны тышкайӧз лыдын, кор ми петім Египетысь.
Кыдзи кыв сетӧмӧн шуис Господь [Ен], сідзи Сійӧ лэптіс на вылӧ кисӧ да бырӧдіс ставнысӧ.
Кор войтыр пӧвстысь став тышкайӧзыс кулісны, Господь шуис меным:
”Ӧні ті мунанныд Моав муӧд Ар кар бокті. Кор матыстчанныд аммон войтыр дінӧ, накӧд энӧ зыксьӧй да тышсӧ энӧ панӧй. Налӧн муысь Ме тіянлы нинӧм ог сет, ӧд тайӧ мусӧ Ме сеті Лотсянь чужысьяслы”.
Тайӧ мусӧ лыддисны тшӧтш рефа войтырлӧн муӧн, ӧд войдӧр найӧ олісны сэні.
Аммон войтыр шуис найӧс замзум войтырӧн.
Тайӧ вӧлі уна лыда войтыр, найӧ вӧліны Енаксянь чужысьяс кодь ёнӧсь да ыджыд тушааӧсь, но Господь бырӧдіс найӧс аммон войтыр водзысь. Аммон войтыр вӧтліс найӧс да овмӧдчис налӧн муӧ. Господь тадзи жӧ вӧчис Исав пиянлы, бырӧдіс на водзысь хориясӧс. Исав пиян босьтісны Сеир керӧсвыв му да овмӧдчисны сэтчӧ. Найӧ ӧнӧдз олӧны сэні.
Аввейяс олісны Газаӧдз паськӧдчӧм сиктъясын, но Кафторысь петӧм войтыр бырӧдіс найӧс да овмӧдчис налӧн муӧ».
«Господь шуис: “Чеччӧй, мӧдӧдчӧй да вуджӧй Арнон ю сайӧ.
Ме сета тіян киӧ Сигонӧс, хешбонса аморей ӧксыӧс, да сылысь мусӧ.
Петӧй тышӧ да босьтӧй сылысь мусӧ.
Талунсянь енэжувса войтыръяс пӧвстын Ме понда кӧдзны полӧм-тіралӧм.
Кодъяс кыласны тіян йылысь, повзясны тіянысь да весьӧпӧрасны”.
Кедемот овтӧминсянь ме мӧдӧді йӧзӧс хешбонса Сигон ӧксы дінӧ, медым бурпырысь висьтавны:
”Лэдз миянӧс мунны тэнад муӧд.
Ми мунам туй кузяыс, веськыдвылӧ ни шуйгавылӧ огӧ кежӧй.
Ми ньӧбам тэнсьыд сёян, эзысьӧн мынтысям тэныд тшӧтш юан ваысь, сӧмын лэдз миянӧс мунны тэнад муӧд. Сеир керӧсвыв муын олысь Исав пиян да Арын олысь моавсаяс лэдзисны миянлы мунны. Ми мунам Йӧрдан ю сайӧ, муӧ, мый Господь, миян Енным, сетас миянлы”.
Но хешбонса Сигон ӧксы эз лэдз миянӧс мунны аслас муӧд, ӧд Господь, тіян Енныд, чорзьӧдіс Сигонлысь сьӧлӧмсӧ, медым сетны сійӧс тіян киӧ. Тадзи ставыс артмис.
Господь шуис меным: “Видзӧд, Ме сета тіян киӧ Сигонӧс [хешбонса аморей ӧксыӧс] да сылысь мусӧ.
Босьтӧй сійӧс аслыныд да овмӧдчӧй сэтчӧ”.
Яхацӧ воӧм бӧрын Сигон ӧксы став аслас тышкайӧзыскӧд петіс тышӧ миянлы паныд.
Но Господь, миян Енным, сетіс сійӧс миян киӧ. Ми пасьвартім сійӧс, сылысь пиянсӧ да став войтырсӧ. Ми босьтім сылысь став карсӧ. Ми дзикӧдз бырӧдім налысь каръяссӧ, айуловӧс, аньясӧс да челядьӧс. Некодӧс ловйӧн эгӧ кольӧй.
Аслыным ми босьтім сӧмын налысь ыж-мӧссӧ да каръясысь петкӧдӧм эмбур-кӧлуйсӧ.
Ковтысын сулалысь карсянь да Арнон ю бокын сулалысь Ароэр карсянь Галаад керӧсвыв муӧдз став карсӧ ми босьтім аслыным. Господь, миян Енным, ставсӧ сетіс миян киӧ.
Но миян Господь Енлӧн тшӧктӧм серти ми эгӧ пырӧй аммон войтырлӧн муӧ, Явок юдорса муӧ да керӧсвывса каръясӧ». 
«Ми кежим Васан муӧ нуӧдысь туй вылӧ. Эдрей кар дорын васанса Ог ӧксы аслас тышкайӧзкӧд петіс тышӧ миянлы паныд.
Господь шуис меным: “Эн пов сыысь. Тэнад киӧ Ме сета сійӧс, сылысь войтырсӧ да мусӧ. Пасьварт сійӧс, кыдзи тэ пасьвартін аморей войтырлысь Сигон ӧксысӧ, коді юраліс Хешбонын”.
Господь, миян Енным, сетіс миян киӧ тшӧтш васанса Ог ӧксыӧс да сылысь тышкайӧзсӧ.
Ми пасьвартім найӧс, некод ловйӧн эз коль.
Сійӧ кадас ми босьтім сылысь став карсӧ.
Ог ӧксылӧн Аргов муысь став квайтымыннан васанса карыс лоины миян.
Тайӧ изкаръяссӧ кытшалісны джуджыд стенъяс, сэні вӧліны таса-игана дзиръяяс. Ми босьтім тшӧтш уна сикт.
Ми дзикӧдз бырӧдім налысь каръяссӧ, айуловӧс, аньясӧс да челядьӧс, кыдзи вӧчим хешбонса Сигон ӧксылы.
А став ыж-мӧссӧ да каръясысь эмбур-кӧлуйсӧ ми босьтім аслыным.
Сійӧ кадас ми босьтім аморейяслӧн кык ӧксылысь мусӧ Йӧрдан ю таладорысь, Арнон юсянь Ермон керӧсӧдз. Сидонсаяс Ермонсӧ шуӧны Сирионӧн, а аморейяс — Сенирӧн. Галаад да Васан муясысь ми босьтім вывтасінса став карсӧ Салка да Эдрей каръясӧдз, кодъяс вӧліны Ог ӧксылӧн каръяс Васанын.
Васанса Ог ӧксы вӧлі рефа войтырысь медбӧръя морт.
Сылӧн кӧртысь вӧчӧм гортйыс куйлӧ аммон войтырлӧн Равва карын. Сылӧн гортйыс ӧкмыс гырддза кузьта, нёль гырддза пасьта».
«Сэки ми босьтім Арнон ю бокын сулалысь Ароэр карсянь войвылӧ паськӧдчӧм му.
Тайӧ мусӧ да Галаад керӧсвыв му джынсӧ сэтчӧс каръяснас ме сеті Рувим да Гад чужанкотыръяслы.
Галаад мулысь мӧд джынсӧ да Васан му — Ог ӧксылысь Аргов мусӧ — ме сеті Манассейлӧн джын чужанкотырлы.
Васан мусӧ шулісны тшӧтш рефа войтырлӧн муӧн.
Манассей чужанкотырысь Яир босьтіс Аргов му Гешур да Маака муяс дорӧдз да сетіс Васан мулы ассьыс нимсӧ. Ӧнӧдз сэтчӧс сиктъяссӧ шуӧны Яирлӧн сиктъясӧн.
Макирлы ме сеті Галаад му, а Рувим да Гад чужанкотыръяслы сеті мусӧ Галаад му бокті визувтысь Явок юсянь Арнон юӧдз. Асыввылын налӧн муыс паськӧдчӧ аммон войтырлӧн муӧдз. Нӧшта налы сеті Йӧрдан ковтыс асывладорсӧ Киннерет тысянь Сола саридзӧдз, асыввылын Фасга керӧсӧдз.
Тайӧ чужанкотыръяслы ме шуи: “Господь, тіян Енныд, сетіс тіянлы тайӧ мусӧ.
Быдӧн, коді вермӧ петны тышӧ, мед босьтас шыпуртсӧ да мунас аслас вокъяс, Израиль пиян, водзвылын.
Тіян гӧтыръясныд, ныв-пиныд да ыж-мӧсныд мед кольччасны тіянлы сетӧм каръясӧ. Ме тӧда, мый тіян уна ыж-мӧс. Кор Господь [Ен] тіянлы моз сетас вокъясныдлы лӧня овны, и найӧ босьтасны Йӧрдан сайысь мусӧ, мый Господь, тіян Енныд, сетас налы, сэки ті бӧр локтӧй сійӧ муас, мый ме сеті тіянлы”.
Сійӧ кадас ме шуи Исуслы: “Аслад синмӧн тэ аддзылін, мый вӧчис тайӧ кык ӧксыыслы Господь, тіян Енныд.
Тадзи Господь вӧчас ӧксылы быд муын, кытчӧ тэ кокнад сувтан.
Энӧ полӧй наысь. Господь, тіян Енныд, Ачыс тышкасьӧ тіян пыдди”».
«Сійӧ кадас ме кевмыси Господьлы:
”Господьӧй Ыджыдӧй! Тэ петкӧдлін меным, Аслад кесйӧглы, Ассьыд ыджыд вынтӧ, вына китӧ [да ён сойтӧ]. 
Эм-ӧ енэжас либӧ му вылас мӧд енмыс, коді эськӧ Тэ моз вермис вӧчны ыджыд да вына уджъяс?
Ыджыдӧй, лэдз меным вуджны Йӧрдан ю да видзӧдлыны сэтчӧс бур мусӧ — мича керӧсвыв му да Ливан”.
Но Господь тіян вӧсна скӧраліс ме вылӧ да эз кывзы менӧ. Сійӧ шуис: “Тырмас! Водзӧ эн сёрнит Мекӧд та йылысь.
Кыпӧдчы Фасга керӧс вылӧ да видзӧдлы рытыввылӧ, войвылӧ, лунвылӧ да асыввылӧ, но Йӧрдан ю сайӧ тэ он вудж.
Туйдӧд-велӧд Исусӧс, ышӧд-ёнмӧд сійӧс, ӧд сылы ковмас нуӧдны тайӧ войтырсӧ Йӧрдан ю сайӧ да юклыны налы [став] мусӧ, мый тэ Фасга керӧс вывсянь аддзылан”.
Та бӧрын ми сувтім ковтысӧ Бет-Пеорлы воча».
«Израиль войтыр, кывзӧй индӧд-тшӧктӧмъяс, мыйӧ [талун] велӧда тіянӧс. Кутчысьӧй наӧ, медым ті олінныд [чужтысинныд-рӧдминныд] да босьтінныд аслыныд сійӧ мусӧ, мый Господь, тіян батьяслӧн Ен, сетӧ тіянлы.
Тайӧ тшӧктӧмъясыс дінӧ, мый ме [талун] висьтала тіянлы, нинӧм энӧ содтӧй да сэтысь нинӧм энӧ чинтӧй.
Олӧй асланыд Господь Енлӧн тшӧктӧмъяс серти.
Асланыд синмӧн ті аддзылінныд [ставсӧ], мый вӧчис Господь, тіян Енныд, Ваал-Пеорлы юрбитанінын. Сійӧ бырӧдіс тіян пӧвстысь быдӧнӧс, коді юрбитіс Ваал-Пеорлы.
А ті, кодъяс кутчысинныд Господь Енныд дінӧ, ӧніӧдз ловъяӧсь.
Ме велӧді тіянӧс индӧд-тшӧктӧмъясӧ, кыдзи тшӧктіс меным Господь, менам Енмӧй. Олӧй на серти сійӧ муас, кытчӧ ті мунанныд, медым босьтны сійӧс аслыныд.
Видзӧй тшӧктӧмъяссӧ да олӧй на серти, сэки мукӧд войтыръяс аддзасны, кутшӧм ті мывкыдӧсь да сюсьӧсь. И кор найӧ кыласны тайӧ тшӧктӧмъясыс йылысь, сэки шуасны: “Кутшӧм мывкыд да сюсь тайӧ вына войтырыс!” 
Эм-ӧ сэтшӧм вына войтырыс, кодлӧн енмыс эськӧ вӧлі матын, кыдзи матын миян дінӧ Господь, миян Енным, кор ми шыасям Сы дінӧ?
Эм-ӧ нӧшта сэтшӧм вына войтырыс, кодлӧн индӧд-тшӧктӧмъясыс веськыдӧсь, кыдзи тайӧ Индӧдыс, мый талун ме юӧрта тіянлы?
Сюся видзӧдӧй ас бӧрсяныд, видзӧй сьӧлӧмнытӧ. Энӧ вунӧдӧй, мый аддзылінныд асланыд синмӧн, видзӧй сійӧс сьӧлӧманыд став олан лунъяс чӧжныд да висьталӧй сы йылысь асланыд ныв-пилы да налӧн ныв-пиыслы. Висьталӧй налы сійӧ луныс йылысь, кор ті [чукӧртчинныд да] сулалінныд Господь Енныд водзын Хорив керӧс дорын. Сэні Господь шуис меным: “Чукӧрт войтырсӧ Ме дінӧ, Ме висьтала налы Ассьым кывъясӧс. Му вылын став олан лунъяс чӧжныс найӧ мед поласны Меысь да мед велӧдасны ассьыныс ныв-пинысӧ тадзи овны”.
Ті матыстчинныд да сувтінныд керӧс дорӧ, а керӧсыс енэжӧдз ыпъяліс биӧн. Вӧлі пемыдсьыс-пемыд, сап пемыд.
[Керӧсвывса] би пытшсянь тіянкӧд сёрнитіс Господь.
Ті кылінныд Сылысь кывъяссӧ, но энӧ аддзылӧй Сійӧс. 
Господь юӧртіс тіянлы Ассьыс йитӧдсӧ. Сійӧ гижис кык изпӧв вылӧ дас тшӧктӧм, мый серти тіянлы колӧ овны.
Господь тшӧктіс меным велӧдны тіянӧс тайӧ индӧд-тшӧктӧмъясас, медым ті олінныд на серти сійӧ муас, кытчӧ ті мунанныд сійӧс босьтӧм могысь. 
Кор Господь Хорив керӧсын сёрнитіс тіянкӧд би пытшсянь, ті Сійӧс энӧ аддзылӧй. Сідзкӧ, ас бӧрсяныд сюся видзӧдӧй, медым энӧ сетчӧй пежас да энӧ вӧчӧй аслыныд некутшӧм бӧлбан, энӧ серпасалӧй идолӧс, кӧні петкӧдлӧма айловӧс либӧ аньӧс, мувывса пемӧсӧс либӧ енэжвывса лэбачӧс, му вывті котралысь-веглясьысьӧс либӧ ваын уялысь чериӧс.
Кор ті видзӧдланныд енэжас да аддзанныд шондісӧ, тӧлысьсӧ да кодзувъяссӧ — став енэжвыв вынсӧ, энӧ ылалӧй, энӧ юрбитӧй-кесъялӧй налы. Господь, тіян Енныд, лэдзис мукӧд войтыръяслы юрбитны налы.
А тіянӧс Господь [Ен] петкӧдіс Египетысь, биа пачысь, медым ті вӧлінныд Сылӧн войтырӧн, и тайӧ ӧніӧдз тадзи.
Господь скӧрмис ме вылӧ тіян вӧсна да кыв сетӧмӧн шуис, мый ме ог вудж Йӧрдан ю сайӧ да ог пыр сійӧ бур муас, мый Господь, тіян Енныд, сетас тіянлы пыр кежлӧ.
Ме кула тані, ог вудж Йӧрдан ю сайӧ, а ті вуджанныд да босьтанныд аслыныд сійӧ бур мусӧ.
Видзчысьӧй, медым энӧ вунӧдӧй асланыд Господь Енлысь йитӧдсӧ, мый Сійӧ кӧрталіс тіянкӧд, да энӧ вӧчӧй аслыныд некутшӧм бӧлбанӧс да серпасалӧм идолӧс. Та йылысь ӧлӧдіс тіянӧс Господь, тіян Енныд.
Ӧд Господь, тіян Енныд, ставсӧ сотысь би. Сійӧ — вежӧгтысь Ен!
Сійӧ муас олігӧн, кор тіян чужасны ныв-пи, и налӧн чужасны челядь, видзчысьӧй, медым энӧ сетчӧй пежас да энӧ вӧчӧй некутшӧм бӧлбанӧс либӧ серпасалӧм идолӧс. Татшӧм шогмытӧмсӧ кӧ вӧчанныд Господь Енныд водзын, ті дӧзмӧданныд Сійӧс. Талун енэжыс да муыс водзын шуа, мый татшӧмсӧ вӧчӧм вӧсна ті регыдъя кадӧн быранныд сійӧ му вывсьыс, кодӧс босьтны вуджанныд Йӧрдан ю сайӧ.
Ті онӧ дыр кутӧй сэні овны, тіянӧс лоӧ бырӧдӧма.
Господь разӧдас тіянӧс мукӧд войтыръяс пӧвстӧ. Сэні, кытчӧ Господь вӧтлас тіянӧс, ті лоанныд этша лыдаӧсь.
Сэні ті кутанныд кесъявны мукӧд енъяслы, пуысь да изйысь киӧн вӧчӧмторъяслы, кодъяс оз аддзыны, оз кывны да оз сёйны.
Но сэні кӧ кутанныд корсьны Господьӧс, ассьыныд Ентӧ, ті аддзанныд Сійӧс, сӧмын кутанныд кӧ корсьны став сьӧлӧмнад да став олӧмнад.
Шогыс да сьӧкыдалӧмыс суӧм бӧрын ті бӧр бергӧдчанныд Господь Енныд дінӧ да кутанныд кывзысьны Сылысь.
Ӧд Господь, тіян Енныд — [бур да] мелі сьӧлӧма Ен.
Сійӧ оз эновт да оз бырӧд тіянӧс. Сійӧ оз вунӧд, мый тіян батьяскӧд кыв сетӧмӧн кӧрталіс йитӧд.
Юасьӧй воддза кадыс йылысь, мый вӧлі сійӧ лунсяньыс, кор Ен вӧчис мортӧс му вылас. Артмис-ӧ сійӧ кадсяньыс енэж улас татшӧм ыджыдторйыс, мый вӧлі миян дырйи? Кывліс-ӧ кодкӧ татшӧмтор йылысь?
Кывліс-ӧ кутшӧмкӧ войтыр тіян моз [ловъя] Енлысь би пытшсянь сёрнисӧ да ловйӧн колис?
Некутшӧм ен эз торйӧд аслыс войтыр мукӧд войтыр пӧвстысь чорыд мыждӧмъясӧн, шензьӧданаторъяс да индысьпасъяс вӧчӧмӧн, тыш отсӧгӧн, вына кисӧ да ён сойсӧ лэптӧмӧн, ыджыдсьыс-ыджыд повзьӧданаторъяс вӧчӧмӧн. Но Египетын ті аддзылінныд, мый тадзи вӧчис Господь, тіян Енныд.
Тіянлы сетӧма тайӧс аддзывны, медым ті тӧдінныд, мый Господь эм Ен, и Сыысь кындзи мӧдыс абу.
Енэжсянь Сійӧ сетіс тіянлы кывны гӧлӧс шысӧ, медым велӧдны тіянӧс. Му вылын сійӧ петкӧдліс тіянлы Ассьыс ыджыд бисӧ, и ті кылінныд Сылысь кывъяссӧ би пытшсянь.
Господьлы вӧліны мусаӧсь тіян батьясныд, та вӧсна Сійӧ бӧрйис тіянӧс, насянь чужысьясӧс. Сійӧ Ачыс петкӧдіс тіянӧс Египетысь Аслас ыджыд выннас. Сійӧ вӧтліс тіян водзысь войтыръясӧс, кодъяс вӧліны тіянысь унджыкӧнӧсь да вынаджыкӧсь. Сійӧ пыртіс тіянӧс налӧн муӧ да сетіс налысь мусӧ тіянлы, кыдзи ӧні артмӧ.
Тӧдӧй да гӧгӧрвоӧй, мый Господь [тіян Енныд] эм енэжас и му вылас Ен, и [Сыысь кындзи] мӧдыс абу.
Кывзысьӧй да олӧй Сылӧн индӧд-тшӧктӧмъяс серти, мый талун висьтала тіянлы, медым тіянлы да тіянсянь чужысьяслы вӧлі бур, и медым ті дыр олінныд сійӧ муас, мый Господь, тіян Енныд, сетас тіянлы пыр кежлӧ».
Сэсся Мӧисей торйӧдіс куим кар Йӧрдан ю асыввылысь, медым быдӧн, коді мӧвпышттӧг виас ассьыс матыссасӧ, код вылӧ эз лӧгавлы, вермис пышйыны сэтчӧ да ловйӧн кольны.
Со тайӧ каръясыс: Рувим чужанкотырлӧн муын овтӧминса вывтасінын сулалысь Бецер кар, Гад чужанкотырлӧн Галаад муын Рамот кар, Манассей чужанкотырлӧн Васан муын Голан кар.
Мӧисей юӧртіс Израиль пиянлы Индӧд.
Сійӧ висьталіс налы индӧд-тшӧктӧмъяссӧ Египетысь петӧм бӧрын [овтӧминын], Йӧрдан сайын, Бет-Пеорлы воча ковтысын, аморейяслӧн Сигон ӧксылӧн муын. Сигон юраліс Хешбон карын, но сійӧс пасьвартісны Мӧисей да Израиль пиян Египетысь петӧм бӧрын.
Найӧ босьтісны аслыныс сылысь мусӧ да тшӧтш васанса Ог ӧксылысь мусӧ. Аморейяслӧн тайӧ кык ӧксыыслӧн муясыс куйлісны Йӧрдан асыввылын. Тайӧ муыс заводитчис Арнон ю бокын сулалысь Ароэр карсянь да нюжӧдчис Сирион керӧсӧдз, мӧд ногӧн кӧ, Ермон керӧсӧдз. Сэтчӧ пырис тшӧтш асыввыв Йӧрдан ковтыс Сола саридзӧдз да асыввылын Фасга керӧсӧдз.
Мӧисей чукӧртіс став Израиль войтырсӧ да шуис: «Кывзы, Израиль! Талун ме висьтала тіянлы индӧд-тшӧктӧмъяс. Велӧдӧй найӧс да олӧй на серти.
Господь, миян Енным, кӧрталіс миянкӧд йитӧд Хорив керӧсын.
Эз миян батьяскӧд кӧртав тайӧ йитӧдсӧ Господь, а миянкӧд, кодъяс ӧні танӧсь.
Господь сёрнитіс тіянкӧд воча чужӧмӧн керӧсвывса би пытшсянь.
Сэки ме сулалі Господь да тіян костын, медым Сылысь кывъяссӧ висьтавны тіянлы. Ті полінныд биысь да керӧс вылӧ энӧ кыпӧдчӧй.
Господь шуис:
”Ме — Господь, тэнад Енмыд. Ме петкӧді тэнӧ Египет муысь нартитӧм улысь.
Эн юрбит мукӧд енъяслы Меысь ӧтдор.
Эн вӧч аслыд бӧлбанӧс да идолӧ пуктӧм могысь эн серпасав сійӧс, мый эм енэжас, му вылас да муысь улынджык ваас. Эн копрась да эн юрбит налы, ӧд Ме, Господь, тэнад Ен — вежӧгтысь Ен.
Батьныслӧн мыж вӧсна Ме водзӧс перъя Менӧ мустӧмтысь челядьыслысь коймӧд да нёльӧд чужанвужйӧдз. А налы, кодъяс радейтӧны Менӧ да олӧны Менам тшӧктӧмъяс серти, Ме петкӧдла Ассьым буралӧмӧс сюрс чужанвужйӧдз.
Аслад Господь Енлысь нимсӧ весьшӧрӧ эн шуав, ӧд Господь оз коль мыждытӧг сійӧс, коді весьшӧрӧ шуалӧ Сылысь нимсӧ.
Видз шойччан лунтӧ. Сійӧ мед лоас тэныд вежа, кыдзи Господь, тэнад Енмыд, тшӧктіс тэныд.
Квайт лун уджав, вӧч ассьыд уджъястӧ, а сизимӧд луныс шойччан лун, торйӧд сійӧс Господьлы, аслад Енлы.
Тайӧ лунӧ тэ, тэнад ныв-пиыд, кесйӧгыд, кесйӧг аньыд, тэнад ӧшкыд, осёлыд, став ыж-мӧскыд да йӧз муысь локтысьыд, коді олӧ тэ ордын, некутшӧм удж энӧ вӧчӧй. Тэнад кесйӧгыд, кесйӧг аньыд [да осёлыд] мед тэ моз шойччасны.
Эн вунӧд, мый Египетын тэ ачыд вӧлін кесйӧг туйын, но Господь, тэнад Енмыд, петкӧдіс тэнӧ сэтысь Ассьыс вына кисӧ да ён сойсӧ лэптӧмӧн. Та вӧсна Господь, тэнад Енмыд, тшӧктіс видзны шойччан лунсӧ [мед сійӧ лоас тэныд вежа].
Пыдди пукты ассьыд бать-мамтӧ, кыдзи тшӧктіс тэныд Господь, тэнад Енмыд, медым олӧмыд вӧлі кузь нэма да тэныд вӧлі бур сійӧ муас, мый Господь, тэнад Енмыд, сетас тэныд.
Эн ви.
Гозъякост олӧм эн пежав.
Эн гусясь.
Матыссаыд йылысь ылӧгсӧ эн висьтав.
Эн ышты матыссаыдлӧн гӧтырыс вылӧ, керкаыс да муыс вылӧ, кесйӧгыс да кесйӧг аньыс вылӧ, ӧшкыс да осёлыс вылӧ [сылӧн ыж-мӧскыс вылӧ]. Эн ышты нинӧм вылӧ, мый сылӧн эм”.
Тайӧ кывъяссӧ Господь гораа висьталіс тіянлы ставныдлы керӧс вывсянь, би да сьӧд кымӧр [да бушков] пытшсянь. Сэсся та дінӧ нинӧм эз содты. Тайӧ кывъяссӧ Сійӧ гижис кык изпӧв вылӧ да сетіс меным.
Кор керӧсыс ыпъяліс биӧн, и ті кылінныд пемыд пытшкысь гӧлӧс шы, сэки тіян юрнуӧдысьясныд да чужанкотыръяслӧн юралысьясныд матыстчисны ме дінӧ да шуисны: “Господь, миян Енным, петкӧдліс миянлы Ассьыс дзирдлунсӧ да ыджыд вынсӧ. Ми кылім Сылысь гӧлӧс шысӧ би пытшсянь.
Талун ми тӧдмалім, мый Енмыс сёрнитӧ морткӧд, и мортыс ловйӧн кольӧ.
А ӧні мыйла миянлы кувнысӧ?
Ӧд тайӧ ыджыд биыс сотас-ньылыштас миянӧс.
Ми кулам, нӧшта кӧ ӧтчыдысь кылам миян Господь Енлысь гӧлӧс шысӧ. Кывліс-ӧ кодкӧ миян моз би пытшсянь сёрнитысь ловъя Енлысь гӧлӧс шысӧ, и ловйӧн колис?
Тэ мун да кывзы, мый шуас тэныд Господь, миян Енным, сэсся висьтав миянлы, мый йылысь Сійӧ висьталас тэныд. Ми кутам кывзыны да Сылӧн тшӧктӧм-шуӧм серти овны”.
Господь кыліс тіянлысь кывъястӧ, кор ті сёрнитінныд мекӧд. Сійӧ шуис меным: “Ме кылі тайӧ войтырыслысь кывъяссӧ.
Ставсӧ, мый найӧ тэныд шуисны, бур.
Найӧ кӧ став олан лунъяс чӧжыс сьӧлӧмсяньныс кывзысисны Менсьым да олісны став Менам тшӧктӧм серти, сэки эськӧ налы да насянь чужысьяслы нэмъяс чӧж вӧлі бур.
Мун висьтав налы, мед бӧр бергӧдчасны асланыс чомъясӧ.
А тэ кольччы татчӧ Мекӧд. Ме висьтала тэныд став индӧд-тшӧктӧмсӧ, мыйӧ тэ сэсся велӧдан найӧс. Мед на серти оласны сійӧ муас, мый Ме сета налы”.
Видзчысьӧй, ставсӧ вӧчӧй сідзи, кыдзи тшӧктӧ Господь, тіян Енныд.
Энӧ кежӧй веськыдвылӧ ни шуйгавылӧ.
Олӧй сідзи, кыдзи тшӧктӧ Господь, тіян Енныд, медым тіянлы вӧлі бур и ті дыр олінныд сійӧ муас, мый босьтанныд аслыныд».
«Господь, тіян Енныд, тшӧктіс велӧдны тіянӧс индӧд-тшӧктӧмъясӧ, медым ті олінныд на серти сійӧ муас, кытчӧ ті мунанныд сійӧс босьтӧм могысь.
Полӧй Господьысь, асланыд Енмысь, ті, тіян ныв-пиныд да налӧн ныв-пиыс. Став олӧм чӧжныд олӧй Сылӧн индӧд-тшӧктӧмъяс серти, мый ме [талун] висьтала тіянлы. Сэки тіян олӧмныд лоӧ кузь нэма.
Кывзы, Израиль! Олӧй тайӧ тшӧктӧмъясыс серти, медым тіянлы вӧлі бур да медым сійӧ муас, кӧні визувтӧ йӧв да ма, ті чужинныд-рӧдминныд, кыдзи висьталіс* тіянлы Господь, тіян батьяслӧн Ен. 
[Господь Ен сетіс Израиль пиянлы тайӧ индӧд-тшӧктӧмъяссӧ овтӧминын Египетысь петӧм бӧрын.]
Кывзы, Израиль! Господь, миян Енным, эм ӧти Господь.
Радейт Господьӧс, ассьыд Ентӧ, став сьӧлӧмнад, став олӧмнад да став выннад.
Тайӧ кывъясыс, мый ме висьтала талун тэныд, мед лоӧны сьӧлӧмад.
Велӧд наӧ ныв-питӧ. Висьтав гортад и туйын, висьтав водігад и чеччигад.
Пас пыдди кӧртав найӧс сояд да плешкад. Гиж кывъяссӧ ӧдзӧс куричад да дзиръяад.
Господь, тіян Енныд, нуӧдас тіянӧс сійӧ муас, мый йылысь кыв сетіс тіян батьяслы — Ӧвраамлы, Исааклы да Яковлы. Сійӧ сетас тіянлы ыджыд да бур каръяс, мый ті энӧ кыпӧдлӧй, эмбур тыра керкаяс, кытчӧ эмбурсӧ ті асьныд энӧ лӧсьӧдлӧй, юкмӧсъяс, мый ті энӧ кодйылӧй, виноград да олив пу йӧръяс, кытчӧ пусӧ ті асьныд энӧ пуктылӧй. Кор ті пӧттӧдзныд сёянныд, видзчысьӧй, медым [сьӧлӧмныд эз ылав да] ті энӧ вунӧдӧй Господьӧс, коді петкӧдіс тіянӧс Египет муысь нартитӧм улысь.
Полӧй Господьысь, асланыд Енмысь, Сылы [ӧтнаслы] кесъялӧй, [Сы дінӧ кутчысьӧй да] Сылӧн нимӧн кӧсйысьӧй.
Мукӧд енъяслы, тіян гӧгӧр олысь войтыръяслӧн енъяслы, энӧ юрбитӧй, медым тіян Господь Енлӧн скӧрлуныс оз ыпнит тіян вылӧ, да медым Енмыс оз бырӧд тіянӧс му вывсьыс. Ӧд Господь, тіян Енныд, коді олӧ тіян пӧвстын, вежӧгтысь Ен.
Энӧ дӧзмӧдӧй Господьӧс, ассьыныд Ентӧ, кыдзи дӧзмӧдінныд Сійӧс Массаын.
Олӧй асланыд Господь Енлӧн индӧд-тшӧктӧмъяс серти.
Вӧчӧй Господь [асланыд Ен] водзын бурсӧ да шогманасӧ, медым тіян ставыс артмис, и медым ті мунінныд да босьтінныд аслыныд бур мусӧ, мый йылысь Господь кыв сетіс тіян батьяслы. Сійӧ вӧтлас тіян водзысь став вӧрӧгнытӧ, кыдзи и шуліс.
Локтана кадӧ пиыд юалас тэнсьыд: “Мыйла Господь, миян Енным, сетіс тайӧ индӧд-тшӧктӧмъяссӧ?”
Сэки вочавидз сылы тадзи: “Ми вӧлім Египетын фараонлӧн нартитӧм улынӧсь, но Господь [Ен] Аслас вына кинас [да ён сойнас] петкӧдіс миянӧс сэтысь. Миян син водзын Господь [Ен] вӧчис ыджыд шензьӧданаторъяс да индысьпасъяс, дойдаліс египетсаясӧс, фараонӧс, сылысь гортсасӧ [да тышкайӧзсӧ].
А миянӧс Сійӧ петкӧдіс сэтысь, медым вайӧдны сійӧ муас, мый йылысь кыв сетіс миян батьяслы.
Господь тшӧктіс миянлы кутчысьны став тайӧ индӧд-тшӧктӧмас да повны Господьысь, миян Енмысь, медым став олан лунъясным чӧж миянлы вӧлі бур да медым ми вӧлім ловъяӧсь, кыдзи ӧні.
Господь шуас миянӧс веськыдӧн, ми кӧ кутам овны Господь Енным водзын став тайӧ индӧд-тшӧктӧмыс серти сідзи, кыдзи Сійӧ миянлы тшӧктіс”».
«Кор Господь, тіян Енныд, вайӧдас тіянӧс сійӧ муас, кытчӧ ті мунанныд сійӧс босьтӧм могысь, сэки Сійӧ вӧтлас тіян водзысь сизим войтырӧс — хеттейясӧс, гергесейясӧс, аморейясӧс, ханаансаясӧс, перезейясӧс, хивейясӧс да евуссаясӧс. Тайӧ войтыръясыс уна лыдаӧсь, тіян дорысь ёнджыкӧсь. Но Господь, тіян Енныд, сетас найӧс тіян киӧ, и ті пасьвартанныд найӧс. Дзикӧдз бырӧдӧй найӧс. Энӧ кӧрталӧй накӧд йитӧд, энӧ лоӧй бур сьӧлӧмаӧсь на дінӧ.
Энӧ рӧдвужасьӧй накӧд: ассьыныд нывъястӧ налӧн пиян сайӧ энӧ сетӧй и налысь нывъяссӧ пияныдлы гӧтырӧ энӧ босьтӧй.
Найӧ кежӧдасны пияннытӧ Господь дінысь, и пиянныд кутасны юрбитны мукӧд енъяслы. Таысь Господьлӧн скӧрлуныс ыпнитас тіян вылӧ, и Сійӧ регыдъя кадӧн бырӧдас тіянӧс.
Со мый колӧ вӧчны: жуглӧй налысь висьпуктанінъяссӧ, пасьвартӧй юрбитан изъяссӧ, кералӧй юрбитан пуяссӧ да биын сотӧй бӧлбанъяссӧ.
Ӧд ті — Господь Енлӧн вежа войтырыс. Господь, тіян Енныд, бӧрйис тіянӧс мувывса войтыръяс пӧвстысь, медым ті вӧлінныд Сылӧн войтырӧн.
Господь бӧрйис да сибӧдіс тіянӧс эз лыдныд серти, ӧд ті войтыръяс пӧвстын этшаӧнӧсь. Господь бӧрйис тіянӧс сы вӧсна, мый радейтӧ тіянӧс да вӧчӧ тіян батьяслы кыв сетӧмыс серти. Та вӧсна Господь вына кинас [да ён сойнас] мездіс тіянӧс фараонлӧн, египетса ӧксылӧн, нартитӧм улысь.
Тӧдӧй, мый Господь, тіян Енныд, эм Ен. Сійӧ эскана Ен. Сійӧ видзӧ [Ассьыс] йитӧдсӧ сюрс чужанвужйӧдз. Сійӧ оз босьт Ассьыс буралӧмсӧ на дінысь, кодъяс радейтӧны Сійӧс да олӧны Сылӧн тшӧктӧмъяс серти.
Но Сійӧ мынтысьӧ налы, кодъяс Сійӧс мустӧмтӧны, да тэрмасьӧ бырӧдны найӧс.
Олӧй Сылӧн индӧд-тшӧктӧмъяс серти, мый талун висьтала тіянлы.
Ті кӧ кутанныд кывзысьны да овны тайӧ тшӧктӧмъясыс серти, сэки Господь, тіян Енныд, тіянкӧд кӧрталӧм йитӧдсӧ оз торк да оз босьт Ассьыс буралӧмсӧ, мый йылысь кыв сетіс тіян батьяслы. Сійӧ пондас радейтны тіянӧс да бурсины тіянӧс, сетас тіянлы уна ныв-пи. Сійӧ бурсиас тіянсянь чужысьясӧс, тіянлысь мувыв быдтастӧ, няньтӧ, винатӧ, олив выйтӧ да ыж-мӧстӧ сійӧ муас, мый тіян батьяслы кыв сетӧмӧн кӧсйысис сетны тіянлы.
Господь бурсиас тіянӧс мукӧд войтыръяс дорысь ёнджыка.
Тіян пӧвстын оз ло ныв-питӧм айловыс да сьӧктыны вермытӧм аньыс, ыж-мӧсныд пӧвстын оз ло тырсявтӧмыс.
Господь [тіян Енныд] ылыстас тіян дінысь висьӧмъяс, мый ті [аддзылінныд да] тӧдмалінныд Египетын. Сійӧ ыстас висьӧмъяссӧ на вылӧ, кодъяс мустӧмтӧны тіянӧс.
Ті бырӧданныд войтыръясӧс, кодъясӧс Господь, тіян Енныд, сетас тіян киӧ. 
Сьӧлӧмнаныд на дінӧ энӧ нормӧй да налӧн енъяслы энӧ юрбитӧй, медым энӧ шедӧй налькйӧ.
Гашкӧ, ті чайтанныд, мый тайӧ войтыръясыс сэтшӧм уна лыдаӧсь, мый ті онӧ вермӧй босьтны налысь мусӧ?
Энӧ полӧй наысь! Энӧ вунӧдӧй, мый вӧчис Господь, тіян Енныд, фараонлы да став Египетлы. Тайӧ чорыда мыждӧмсӧ, [ыджыд] индысьпасъяссӧ да шензьӧданаторъяссӧ ті асланыд синмӧн аддзылінныд. Энӧ вунӧдӧй, кыдзи Господь, тіян Енныд, петкӧдіс тіянӧс Египетысь Ассьыс вына кисӧ да ён сойсӧ лэптӧмӧн.
Войтыръяслы, кодъясысь ті поланныд, Господь, тіян Енныд, вӧчас сійӧ жӧ, мый вӧчис египетсаяслы.
Господь, тіян Енныд, мӧдӧдас на вылӧ гырысь зіясӧс, кытчӧдз оз кувны медбӧръя йӧзыс, кодъяс дзебсьӧны тіянысь.
Энӧ полӧй наысь, ӧд тіянкӧд Господь, тіян Енныд. Сійӧ ыджыд да повзьӧдана Ен.
Господь, тіян Енныд, кутас вочасӧн вӧтлыны тіян водзысь войтыръясӧс.
Ті онӧ вермӧй бырӧдны найӧс регыдъя кадӧн, медым [муыс эз овтӧммы, и] звер лыдыс эз сод.
Господь, тіян Енныд, сетас войтыръясӧс тіян киӧ, вайӧдас найӧс ыджыд шызьӧмӧдз, мый вӧсна найӧ бырасны.
Налысь ӧксыяссӧ Господь сетас тіян киӧ, и ті вуштыштанныд налысь нимъяссӧ енэж улысь. Некод оз вермы паныд сувтны, ті ставнысӧ бырӧданныд.
Сотӧй налысь бӧлбанъяссӧ да энӧ ыштӧй тайӧ бӧлбанъяссӧ эжӧм зарни-эзысь вылӧ. Нинӧм энӧ босьтӧй аслыныд, медым энӧ шедӧй налькйӧ, ӧд тайӧ Господьлы, тіян Енлы, зывӧк.
Зывӧкторсӧ энӧ пыртӧй асланыд керкаясӧ, медым зывӧкторсӧ моз тіянӧс эз бырӧдны.
Мустӧмтӧй-зывӧктӧй идолъясӧс, найӧс колӧ дзикӧдз бырӧдны».
«Олӧй став тшӧктӧмыс серти, мый талун висьтала тіянлы. Сэки ті кутанныд овны да чужтысьны-рӧдмыны, верманныд мунны да босьтны аслыныд сійӧ [бур] мусӧ, мый йылысь Господь [Ен] кыв сетіс тіян батьяслы.
Энӧ вунӧдӧй, кыдзи нелямын во чӧж Господь, тіян Енныд, нуӧдіс тіянӧс овтӧминӧд, медым раммӧдны тіянлысь сьӧлӧмнытӧ да тӧдмавны тіянӧс, тіянлысь сьӧлӧмпытшса мӧвпнытӧ, кутанныд-ӧ овны Сылӧн тшӧктӧмъяс серти.
Сійӧ раммӧдіс тіянӧс — сетіс тіянлы тшыгъявны, сэсся вердіс маннаӧн. Татшӧм сёянсӧ ті и тіян батьясныд энӧ тӧдлӧй. Тадзи Сійӧ кӧсйис петкӧдлыны тіянлы, мый оз куш няньӧн мортыд ов, а Господьсянь быд шуӧм кывйӧн.
Став тайӧ нелямын во чӧжыс тіян паськӧмныд эз важмывлы, и кокныд эз пыктавлы.
Тӧдӧй, мый Господь, тіян Енныд, велӧдӧ тіянӧс, кыдзи бать велӧдӧ писӧ.
Энӧ торкалӧй Асланыд Господь Енлысь тшӧктӧмъяссӧ, олӧй Сылысь кывзысьӧмӧн да Сыысь полӧмӧн.
Господь, тіян Енныд, вайӧдас тіянӧс бур муӧ, кӧні визувтӧны юяс, кӧні ковтыс-керӧсысь петӧны ваяс, кӧні визувтӧ ма, кӧні быдмӧны шобді да ид, виноград да инжир, гранат да олив пуяс. Сэні ті онӧ кутӧй овны тшыг нисьӧ пӧт, тіян ставыс лоӧ тырмана. Сэтчӧс изкыртаысь перъянныд кӧрт, керӧсъясысь — ыргӧн.
Кор ті пӧттӧдзныд сёянныд, ошкӧй Господьӧс, ассьыныд Ентӧ, тайӧ бур мусьыс, мый Сійӧ сетіс тіянлы.
Видзчысьӧй, медым энӧ вунӧдӧй Господьӧс, ассьыныд Ентӧ. Олӧй Сылӧн индӧд-тшӧктӧмъяс серти, мый талун висьтала тіянлы.
Кор ті пӧттӧдзныд сёянныд, кор кыпӧданныд бур керкаяс да кутанныд сэні овны, кор тіян лоӧ уна ыж-мӧс, уна эзысь-зарни да уна овмӧс-эмбур, видзчысьӧй, медым асьнытӧ вылӧ энӧ пуктӧй да энӧ вунӧдӧй Господьӧс, ассьыныд Ентӧ, ӧд Сійӧ петкӧдіс тіянӧс Египет муысь нартитӧм улысь.
Нуӧдіс тіянӧс ыджыд да повзьӧдана овтӧминӧд, яда змейяс да скорпионъяс пӧвстӧд, косінті да ватӧминті, петкӧдіс тіянлы изкыртаысь ва. Овтӧминын Сійӧ вердіс тіянӧс маннаӧн, мый [ті энӧ тӧдлӧй и] батьясныд эз тӧдлыны. Тадзи Сійӧ раммӧдіс да тӧдмаліс тіянӧс, но бӧрынджык бурсӧ вӧчис тіянлы. Энӧ мӧвпалӧй, мый ті асланыд вынӧн да ас киӧн озырлуннытӧ лӧсьӧдінныд. Энӧ вунӧдӧй Господьӧс, ассьыныд Ентӧ. Сійӧ сетӧ тіянлы вын озырмыны, медым талун збыльмӧдны Ассьыс йитӧдсӧ, мый Сійӧ кыв сетӧмӧн кӧрталіс тіян батьяскӧд.
Ті кӧ вунӧданныд Господьӧс, ассьыныд Ентӧ да понданныд кесъявны-юрбитны мукӧд енъяслы, сэки ті быранныд. Талун [енэжыс и муыс водзын] кыв сета, мый ті быранныд.
Онӧ кӧ кутӧй кывзысьны Господьлысь, асланыд Енлысь, ті быранныд сійӧ войтыръясыс моз, кодъясӧс Господь [Ен] бырӧдӧ тіян водзысь».
«Кывзы, Израиль! Ӧні ті вуджанныд Йӧрдан ю сайӧ, медым босьтны мусӧ войтыръяслысь, кодъяс тіян дорысь вынаӧсь да уна лыдаӧсь, кодъяслӧн ыджыд каръясыс сулалӧны зумыда да зурасьӧны енэжӧдз. Сэні олӧ енак войтыр, найӧ ыджыд тушааӧсь, уна лыдаӧсь да ёнӧсь. Ті ӧд кывлінныд, мый йӧзыс шуалӧны на йылысь, енак войтырлы паныд пӧ некод оз вермы сувтны.
Талун ті тӧдмаланныд, мый Господь, тіян Енныд, мунӧ тіян водзвылын, кыдзи ставсӧ сотысь би.
Сійӧ пасьвартас енак войтырӧс да сетас тіян киӧ. Ті босьтанныд налысь мусӧ да регыдъя кадӧн бырӧданныд найӧс.
Тадзи висьталіс тіянлы Господь. Кор Господь, тіян Енныд, вӧтлас найӧс тіян водзысь, энӧ мӧвпалӧй, мый тіян веськыдлунныд вӧсна Господь вайӧдіс тіянӧс татчӧ, медым ті босьтінныд тайӧ [бур] мусӧ. Ӧд тайӧ войтыръяслӧн пеж олӧм вӧсна Господь вӧтлӧ найӧс тіян водзысь.
Ті мунанныд босьтны налысь мусӧ онӧ асланыд веськыдлун вӧсна да сӧстӧм сьӧлӧмныд вӧсна, но Господь, тіян Енныд, вӧтлӧ найӧс тіян водзысь налӧн пеж олӧм вӧсна. Тадзи Господь збыльмӧдӧ Ӧвраамлы, Исааклы да Яковлы, тіян батьяслы, сетӧм кывсӧ.
[Ӧні] тӧдӧй, мый Господь, тіян Енныд, оз тіян веськыдлун вӧсна сет тайӧ бур мусӧ, ӧд ті асныра войтыр».
«Энӧ вунӧдӧй, кыдзи овтӧминын ті скӧрмӧдлінныд Господьӧс, ассьыныд Ентӧ. Египет муысь петан лунсянь да татчӧ вотӧдз ті пыр пыксинныд Господьлы.
Хорив керӧс дорын ті скӧрмӧдінныд Господьӧс. Господь сэтшӧма скӧрмис тіян вылӧ, мый кӧсйис дзикӧдз бырӧдны тіянӧс. Ме кайи керӧс вылӧ, медым босьтны Господь да тіян костын кӧрталӧм йитӧдлысь изпӧвъяс. Керӧс вылын ме вӧлі нелямын лун да нелямын вой, нянь эг сёйлы ни ва эг юлы. Господь сетіс меным кык изпӧв, кытчӧ Аслас киӧн Сійӧ вӧлі гижӧма ставсӧ, мый висьтавліс нин тіянлы керӧсвывса би пытшсянь тіян ӧтлаын чукӧртчигӧн.
Нелямын лун да нелямын вой кольӧм бӧрын Господь сетіс меным йитӧдлысь изпӧвъяс. Господь шуис меным: “Лэччы татысь ӧдйӧджык, ӧд тэнад войтырыд, кодӧс тэ петкӧдін Египетысь, сетчис пежас.
Найӧ ӧдйӧ кежисны Менам туйысь, вунӧдісны Менсьым тшӧктӧмъясӧс.
Найӧ вӧчисны аслыныс бӧлбанӧс”.
Господь нӧшта шуис: “[Ме унаысь шулі тэныд:] Ме аддза, кутшӧм асныра тайӧ войтырыс.
Эн кут Менӧ найӧс бырӧдӧмысь. Ме вушта енэж улысь налысь нимсӧ. А тэсянь сета чужны на дорысь ыджыд да вына войтырлы”.
Ме бергӧдчи да лэччи керӧс вылысь. Керӧсыс ыпъяліс-ӧзъяліс биӧн, кор ме лэччи йитӧдлысь кык изпӧвсӧ киын кутӧмӧн.
Ме аддзи тіянлысь сывдӧм бӧлбан-ӧшкӧс. Сійӧс вӧчӧмнаныд ті асланыд Господь Енлы паныд мыж вӧчинныд. Ті ӧдйӧ кежинныд Господьлӧн туйысь, вунӧдінныд Сылысь тшӧктӧмъяссӧ.
Сэки ме шыбиті кисьым кыкнан изпӧвсӧ, и найӧ пасьмунісны-жугалісны тіян син водзын.
Сэсся ме [мӧдысь] кымынь уськӧдчи Господь водзӧ. Нелямын лун да нелямын вой, кыдзи и водзынсӧ, нянь эг сёйлы ни ва эг юлы тіян мыжныд вӧсна. Ті вӧчинныд Господь [асланыд Ен] водзын шогмытӧмсӧ, тадзи скӧрмӧдінныд Господьӧс.
Ме полі Господьлӧн скӧрмӧмысь, ӧд Сійӧ вӧлі сэтшӧм скӧр, мый дась вӧлі бырӧдны тіянӧс.
Но и та пӧрйӧ Сійӧ кывзіс менӧ.
Господь ёна скӧрмис Аарон вылӧ, кӧсйис бырӧдны сійӧс, но ме кевмыси тшӧтш Аарон вӧсна.
Ті мыжминныд, мый вӧчинныд ӧшкӧс. Ме босьті тайӧ ӧшсӧ да соті биын, сэсся пызьӧдз ныри да койышті керӧс вывсянь визувтысь шорӧ.
Тшӧтш Тавераын, Массаын да Киврот-Хаттааваын ті скӧрмӧдінныд Господьӧс [ассьыныд Ентӧ].
А кор Господь, тіян Енныд, мӧдӧдіс тіянӧс Кадеш-Варниысь да тшӧктіс мунны да босьтны мусӧ, мый Сійӧ сетас тіянлы, ті пыксинныд Сылӧн тшӧктӧмлы, энӧ эскӧй Сылы да энӧ кывзысьӧй Сылысь.
Мыйта тӧда тіянӧс, ті пыр кыпӧдчинныд Господьлы паныд.
Ме кымынь уськӧдчи Господь водзӧ да кевмыси нелямын лун да нелямын вой, ӧд Сійӧ шуис, мый бырӧдас тіянӧс.
Ме кевмыси Господьлы: “Господьӧй Ыджыдӧй, [енъяслӧн Ӧксы,] эн бырӧд Ассьыд войтыртӧ. Ӧд Тэ мездін найӧс Аслад ыджыд вынӧн, петкӧдін Египетысь вына кинад [да ён сойнад].
Эн вунӧд Ассьыд Ӧвраам, Исаак да Яков кесйӧгъястӧ [кодъяслы Тэ Ачыд кыв сетін]. 
Эн видзӧд тайӧ войтырыслӧн асныралӧм, лёк вӧчӧм да мыж вылӧ, медым сійӧ муас, кытысь Тэ петкӧдін миянӧс, йӧзыс эз шуны, мый Господь эз вермы вайӧдны найӧс кӧсйысьӧм муӧ, Сійӧ мустӧмтіс найӧс, та вӧсна нуӧдіс овтӧминӧ, медым бырӧдны.
Но ӧд тайӧ войтырыс — Тэнад войтырыд, кодӧс Тэ петкӧдін Египет муысь Аслад ыджыд выннад да Ассьыд вына китӧ лэптӧмӧн”».
«Сійӧ кадас Господь шуис меным: “Вӧч кык изпӧв, воддза кодьӧс, да кай Ме дінӧ керӧс вылӧ. Нӧшта вӧч пуысь куд.
Изпӧвъяс вылас Ме гижа кывъяссӧ воддза изпӧвъясысь, мый тэ жугӧдін.
А тэ пукты найӧс кудйӧ”.
Ме вӧчи куд акация пуысь да кык изпӧв, воддза кодьӧс. Сэсся кыкнан изпӧвсӧ киын кутӧмӧн кайи керӧс вылӧ.
Изпӧвъяс вылас Господь гижис дас тшӧктӧм, мый вӧлі гижӧма воддзаясас. Тайӧ тшӧктӧмъяссӧ Господь висьталіс тіянлы керӧсвывса би пытшсянь тіян ӧтлаын чукӧртчигӧн. Изпӧвъяссӧ Господь сетіс меным.
Ме бӧр лэччи керӧс вылысь да Господьлӧн тшӧктӧм серти пукті изпӧвъяссӧ кудйӧ, мый ме вӧчи.
Берот-Бене-Яаканысь Израиль пиян мӧдӧдчисны Мосераӧ.
Сэні куліс Аарон, и сійӧс дзебисны сэтчӧ. Сылӧн Элазар пиыс лои сы пыдди попӧн.
Сэтысянь ми мӧдӧдчим Гудгодаӧ, а Гудгодаысь Иотватаӧ, кӧні бузгӧ-визувтӧ уна ва.
Сійӧ кадас Господь торйӧдіс Левий чужанкотырӧс, медым найӧ новлӧдлісны Господьлысь Йитӧд кудсӧ, кесъялісны Господь водзын [кевмысисны] да бурсиисны Сылӧн нимӧн. И тайӧ ӧніӧдз тадзи.
Та вӧсна Левий чужанкотырлы вокъясыс пӧвстын мусӧ абу сетӧма. Налӧн пайыс — Господь, кыдзи шуис Господь, тіян Енныд.
Керӧс вылын ме вӧлі воддза мозыс нелямын лун да нелямын вой.
Господь и та пӧрйӧ кывзіс менӧ, Сійӧ эз кӧсйы бырӧдны тіянӧс.
Господь шуис меным: “Мун нуӧд войтыртӧ.
Налы колӧ мунны да босьтны аслыныс сійӧ мусӧ, мый Ме кыв сетӧмӧн кӧсйыси сетны налӧн батьяслы”».
«Израиль, мый виччысьӧ тіянсянь Господь, тіян Енныд?
Виччысьӧ, медым ті полінныд Господьысь, асланыд Енмысь, ветлінныд Сылӧн туйясӧд, радейтінныд Сійӧс да кесъялінныд Сылы став сьӧлӧмнад да став олӧмнад. Господь [тіян Енныд] виччысьӧ, медым ті олінныд Сылӧн индӧд-тшӧктӧмъяс серти, мый талун висьтала тіянлы. Сэки тіянлы лоӧ бур.
Енэжыс да енэжвывса енэжъясыс, муыс да ставыс, мый сэні эм — Господьлӧн, тіян Енлӧн.
Но Господь сӧмын тіянлысь батьяснытӧ радейтіс-сибӧдіс. Тіянӧс, насянь чужысьясӧс, Сійӧ бӧрйис войтыръяс пӧвстысь, и тайӧ ӧніӧдз тадзи.
Вундыштӧй ассьыныд сьӧлӧмнытӧ да водзӧ энӧ асныралӧй.
Ӧд Господь, тіян Енныд, — енъяслӧн Ен да ыджыдъяслӧн Ыджыдыс. Сійӧ ыджыд, вына да повзьӧдана, Сійӧ оз видзӧд чужӧм вылӧ, козинъяс оз босьт. Сійӧ дорйӧ батьтӧм-мамтӧмъясӧс да дӧваясӧс, радейтӧ йӧз муысь локтысьясӧс, вердӧ да пасьтӧдӧ найӧс.
Ті тшӧтш радейтӧй йӧз муысь локтысьясӧс, ӧд ті асьныд вӧлінныд локтысьясӧн Египет муын.
Полӧй Господьысь, асланыд Енмысь, Сылы [ӧтнаслы] кесъялӧй, Сы дінӧ кутчысьӧй да Сылӧн нимӧн кӧсйысьӧй.
Господьӧс ошкӧй, ӧд Сійӧ — тіян Енныд, коді вӧчис тіянлы ыджыд да повзьӧдана уджъяс. Тайӧ уджъяссӧ ті асланыд синмӧн аддзылінныд.
Египетӧ локтігӧн тіян батьяслӧн лыдыс вӧлі сизимдас [вит] морт, а ӧні Господь, тіян Енныд, содтіс тіянӧс, и ті лоинныд енэжвыв кодзувъяс мында».
«Радейтӧй Господьӧс, ассьыныд Ентӧ, да олӧй Сылӧн индӧд-тшӧктӧмъяс серти став олан лунъяс чӧжныд.
Ныв-пиныд эз тӧдлыны да эз аддзывны тіян Господь Енлысь мыждӧмсӧ, эз аддзывны Сылысь ыджыд вынйӧрсӧ, Сылысь вына кисӧ да ён сойсӧ, Сылысь индысьпасъяссӧ да уджъяссӧ, мый Сійӧ вӧчис Египетын фараонлы, египетса ӧксылы, да став сылӧн муыслы. Ныв-пиныд эз аддзывны, кыдзи Господь пӧдтіс Гӧрд саридзын египетса тышкайӧзӧс вӧвъяснас да тарантасъяснас, кор египетсаяс вӧтчисны тіян бӧрся. Господь [Ен] бырӧдіс найӧс, и тайӧ тадзи.
Ныв-пиныд эз аддзывны, мый Господь вӧчис тіянлы овтӧминын татчӧ вотӧдзныд, мый Сійӧ вӧчис Рувим чужанкотырысь Элиавлӧн Датан да Авирам пиянлы, кор Израиль войтырлӧн син водзын муыс воссис да ньылыштіс найӧс, налысь гортсасӧ, чомъяссӧ да став эмбурсӧ.
А ті асланыд синмӧн аддзылінныд Господьлысь ыджыд уджъяссӧ.
Олӧй став [Сылӧн] тшӧктӧмыс серти, мый талун висьтала тіянлы. Сэки ті лоанныд ёнӧсь, мунанныд [Йӧрдан ю сайӧ] да босьтанныд аслыныд мусӧ, кӧні визувтӧ йӧв да ма. Ті кутанныд дыр овны сійӧ муас, мый Господь кыв сетӧмӧн кӧсйысис сетны тіян батьяслы да насянь чужысьяслы.
Муыс, кытчӧ ті мунанныд сійӧс босьтӧм могысь, абу египетса му кодь, кытысь ті петінныд. Сэні муястӧ кӧдзӧм бӧрад ті киськавлінныд найӧс, кыдзи киськавлӧны град йӧр.
Сійӧ муыс, кытчӧ ті овмӧдчанныд, керӧсъяса да ковтысъяса, и енэжсяньыс сійӧс киськалӧ зэр. Сійӧ муыс вӧсна тӧждысьӧ Господь, тіян Енныд. Сійӧ видзӧдӧ муыс бӧрся во гӧгӧр чӧж.
Ті кӧ кутанныд овны Сылӧн тшӧктӧмъяс серти, мый талун висьтала тіянлы, кутанныд радейтны Господьӧс, ассьыныд Ентӧ, кутанныд кесъявны Сылы став сьӧлӧмнад да став олӧмнад, сэки Господь ас кадӧ сетас арся да тувсовъя зэр, и ті чукӧртанныд нянь, вина да олив вый.
Ті кутанныд пӧттӧдзныд сёйны. Тіян видзьяс вылын Сійӧ быдтас ыж-мӧскыдлы турун.
Видзчысьӧй, медым сьӧлӧмныд эз ылав. Веськыд туйсьыс энӧ кежӧй, мукӧд енъяслы энӧ кесъялӧй да энӧ юрбитӧй.
Тадзи кӧ вӧчанныд, сэки Господьлӧн скӧрлуныс ыпнитас тіян вылӧ, и Сійӧ тупкас енэжсӧ, оз сет зэрсӧ. Муыс оз сет быдтассӧ, и ті регыдъя кадӧн быранныд сійӧ бур му вывсьыс, мый Господь сетас тіянлы.
Менам кывъясӧй мед лоӧны сьӧлӧманыд да вежӧраныд. Пас пыдди кӧрталӧй найӧс сояныд да плешканыд.
Велӧдӧй наӧ ныв-пинытӧ. Висьталӧй гортаныд и туйын, висьталӧй водіганыд и чеччиганыд.
Гижӧй кывъяссӧ ӧдзӧс куричад да дзиръяад, медым ті да ныв-пиныд дыр олінныд сійӧ муас, мый Господь кыв сетӧмӧн кӧсйысис сетны тіян батьяслы пыр кежлӧ, кытчӧдз му весьтын лоӧ енэж.
Кутанныд кӧ овны тіянлы сетӧм тшӧктӧмъяс серти, радейтны Господьӧс, ассьыныд Ентӧ, ветлыны Сылӧн туйясӧд да кутчысьны Сы дінӧ, сэки Господь вӧтлас тіян водзысь войтыръясӧс, кодъяс тіян дорысь вынаӧсь да уна лыдаӧсь, и ті босьтанныд аслыныд налысь мусӧ.
Муыс, кытчӧ ті сувтанныд кокнад, лоӧ тіян.
Овтӧминсянь Ливанӧдз, Ефрат юсянь рытыввыв саридзӧдз муыс лоӧ тіян.
Некод оз вермы тіянлы паныд сувтны, ӧд Господь, тіян Енныд, кӧдзас тіянысь полӧм-тіралӧм быдлаын, кытчӧ ті сувтанныд кокнад. Та йылысь Сійӧ висьтавліс тіянлы.
Талун ме вӧзъя тіянлы бурсиӧм и ёрӧм.
Бурсиӧмыс лоӧ тіянлы, ті кӧ кутанныд овны асланыд Господь Енлӧн индӧд-тшӧктӧмъяс серти, мый талун висьтала тіянлы. Ёрӧмыс лоӧ тіянлы, ті кӧ онӧ кутӧй овны асланыд Господь Енлӧн индӧд-тшӧктӧмъяс серти, кежанныд кӧ туйсьыс, кытчӧ ме веськӧда тіянӧс талун, да мунанныд тіянлы тӧдтӧм енъяс бӧрся.
Кор Господь, тіян Енныд, пыртас тіянӧс сійӧ муас, кытчӧ ті мунанныд сійӧс босьтӧм могысь, сэки Гаризим керӧс вылын шу бурсиӧм, а Эвал керӧс вылын — ёрӧм.
Тайӧ керӧсъясыс сулалӧны ковтысын олысь ханаансаяслӧн муын, Йӧрдан сайын рытыввылын, Галгал бокын, кысянь матын быдмӧ Морэ нима тупу рас.
Ӧні ті вуджанныд Йӧрдан ю сайӧ, медым босьтны аслыныд му, мый Господь, тіян Енныд, сетас тіянлы [пыр кежлӧ]. Ті босьтанныд сійӧс аслыныд да кутанныд сэні овны.
Сідзкӧ, кывзысьӧмӧн олӧй [Сылӧн] став индӧд-тшӧктӧмыс серти, мый талун висьтала тіянлы».
«Тайӧ индӧд-тшӧктӧмъяссӧ тіянлы колӧ тӧдны да на серти овны сійӧ муас, мый Господь, тіян батьяслӧн Ен, сетас тіянлы. Став олан лунъяс чӧжныд олӧй на серти сійӧ муас, мый босьтанныд аслыныд.
Бырӧдӧй став юрбитанінъяссӧ, кӧні войтыръяс, кодъяслысь мусӧ ті босьтанныд, кесъялісны асланыс енъяслы джуджыд керӧс-мылькъяс вылын да пашкыра быдмысь пуяс улын.
Налысь висьпуктанінъяссӧ бырӧдӧй, юрбитан изъяссӧ пасьвартӧй, юрбитан пуяссӧ сотӧй да бӧлбанъяссӧ жуглӧй, медым дзикӧдз вушъяс налӧн енъяслӧн нимыс.
Господьлы, асланыд Енлы, кесъялігӧн на моз энӧ вӧчӧй.
Господь, тіян Енныд, бӧръяс Аслас нимлы оланін ӧти чужанкотырлӧн муын. Сэтчӧ мунӧй да вайӧй ассьыныд сотан висьястӧ да мукӧд висьястӧ, мувыв быдтасысь дасӧд юкӧнтӧ да вайӧмторъястӧ, кыв сетан висьястӧ, ас кӧсйӧм серти ваян висьястӧ [бурасян висьястӧ] да ыж-мӧсныдлысь медводдза чужысьяссӧ.
Сэні ас котырныдкӧд сёйӧй висьнытӧ Господь Енныд водзын. Нимкодясьӧй сыысь, мый удж помысь перйинныд аслыныд, ӧд Господь, тіян Енныд, бурсиис тіянӧс.
Сійӧ муас энӧ олӧй сідзи, кыдзи ӧні ми тані олам, ӧд тані быдӧн вӧчӧ сійӧ, мый чайтӧ веськыдӧн.
Ті энӧ на воӧй шойччанінӧ — сійӧ муас, мый Господь, тіян Енныд, сетас тіянлы.
Ті вуджанныд Йӧрдан ю сайӧ да овмӧдчанныд сійӧ муас, мый Господь, тіян Енныд, сетас тіянлы пыр кежлӧ. Сійӧ сетас тіянлы лӧнь олӧм, тіян гӧгӧр олысь вӧрӧгъясысь видзас. Ті кутанныд сэні повтӧг овны. Кутшӧм места Господь, тіян Енныд, бӧръяс Аслас нимлы оланінӧн, сэтчӧ вайӧй ставсӧ, мый ме [талун] тшӧкта тіянлы: сотан висьястӧ да мукӧд висьястӧ, мувыв быдтасысь дасӧд юкӧнтӧ, вайӧмторъястӧ да кыв сетан медбур висьнытӧ, мый кӧсйысинныд Господьлы [асланыд Енлы].
Гажӧдчӧй Господь Енныд водзын ныв-пиныдкӧд, кесйӧгъясныдкӧд, а сідзжӧ левитъяскӧд, кодъяс олӧны тіян карын, ӧд налӧн абу му юкӧныс тіян пӧвстын.
Видзчысьӧй, энӧ вайӧй сотан висьнытӧ, кӧні веськалӧ.
Кутшӧм чужанкотырлӧн муын Господь [тіян Енныд] бӧръяс места, сэні вайӧй сотан висьяснытӧ. Сэні вӧчӧй ставсӧ, мый ме [талун] тшӧкта.
Кор Господь бурсиас тіянӧс да сетас тіянлы ыж-мӧскӧс, сэки ті верманныд асланыд кӧсйӧм серти начкыны да сёйны ыж-мӧснытӧ быдлаын, кӧні оланныд. И сӧстӧм, и пежасьӧм морт вермас сёйны тайӧ яйсӧ газель да кӧр яй моз.
Вирсӧ сӧмын энӧ сёйӧй, ва моз койыштӧй сійӧс му вылӧ.
Асланыд оланінъясын тіянлы оз позь сёйны дасӧд юкӧнсӧ, мый торйӧданныд няньысь, винаысь да олив выйысь, а сідзжӧ оз позь сёйны ыж-мӧсныдлысь медводдза чужысьсӧ, кыв сетан висьяснытӧ, ас кӧсйӧм серти ваян висьяснытӧ да вайӧмторъяснытӧ.
Сёйӧй висьнытӧ Господь Енныд водзын Сылӧн бӧрйӧм местаын. Тіянкӧд ӧтлаын мед сёясны ныв-пиныд, кесйӧгъясныд, а сідзжӧ тіян карын олысь левитъяс [да йӧз муысь локтысьяс]. Нимкодясьӧй Господь Енныд водзын быдтор вӧсна, мый удж помысь перйинныд аслыныд.
Асланыд му вылын олан лунъяс чӧжныд энӧ вунӧдӧй тӧждысьны левитъяс вӧсна.
Господь, тіян Енныд, ыдждӧдас-паськӧдас оланіннытӧ, кыдзи Сійӧ Ачыс висьталіс. Кор кӧсъян сёйны яй, сёй, мыйта кӧсъян.
Тэсянь кӧ ылын лоӧ сійӧ местаыс, мый Господь, тэнад Енмыд, бӧръяс Аслас нимлы оланінӧн, сэки Господьӧн [тэнад Енмӧн] сетӧм ыж-мӧскыд пӧвстысь начкы пемӧстӧ, кыдзи ме тшӧкті. Аслад оланінын тэ верман сёйны, мыйта кӧсъян.
Сёй тайӧ яйсӧ газель да кӧр яй моз.
Яйсӧ вермас сёйны [тэ ордын] и сӧстӧм, и пежасьӧм морт.
Эн сёй вирсӧ, ӧд вирын — олӧмыс. Та вӧсна яйсӧ вирнас эн сёй.
Вирсӧ эн сёй, но ва моз койышт сійӧс му вылӧ.
Эн сёй вир, а вӧч Господь [аслад Ен] водзын [бурсӧ да] шогманасӧ, медым тэныд да тэсянь чужысьяслы вӧлі бур [нэмъяс чӧж].
Вайӧй вежа вайӧмторъяснытӧ да кыв сетан висьяснытӧ сійӧ местаас, мый бӧръяс Господь [тіян Енныд, медым сэні ті шыасинныд Сы дінӧ].
Сотан висьлысь яйсӧ да вирсӧ сотӧй асланыд Господь Енлӧн висьпуктанін вылын.
Мукӧд висьяслысь вирсӧ кисьтӧй асланыд Господь Енлӧн висьпуктанін вылӧ, а яйсӧ сёйӧй.
Кывзӧй да олӧй тайӧ кывъясыс серти, мый висьтала тіянлы. Вӧчанныд кӧ Господь Енныд водзын бурсӧ да шогманасӧ, тіянлы да тіянсянь чужысьяслы лоӧ бур нэмъяс чӧж».
«Господь, тіян Енныд, бырӧдас тіян водзысь войтыръясӧс, кодъяслӧн муас ті мунанныд, медым босьтны сійӧс аслыныд. Кор босьтанныд налысь мусӧ да овмӧдчанныд сэтчӧ, видзчысьӧй, мед найӧс бырӧдӧм бӧрын ті энӧ шедӧй налькйӧ да энӧ олӧй на моз. Энӧ юасьӧй тайӧ войтыръяслӧн енъяс йылысь, энӧ юалӧй, кыдзи найӧ кесъялісны асланыс енъяслы, да энӧ вӧчӧй на моз.
Господьлы, асланыд Енлы, кесъялігӧн на моз энӧ вӧчӧй. Асланыс енъяслы кесъялігӧн найӧ ӧд вӧчӧны сійӧ, мый зывӧктӧ-мустӧмтӧ Господь. Найӧ весиг ассьыныс ныв-писӧ сотӧны асланыс енъяслы.
Вӧчӧй сійӧс, мый ме тшӧкта тіянлы, нинӧм энӧ содтӧй сэтчӧ да нинӧм энӧ чинтӧй сэтысь».
«Тіян пӧвстысь кӧ сувтас пророк либӧ вӧтъяс аддзылысь, коді висьталас индысьпас либӧ шензьӧданатор йылысь, мый сэсся збыльмас, и сійӧ ышӧдас тіянӧс мунны тӧдтӧм енъяс бӧрся да кесъявны налы, но ті сылысь кывъяссӧ энӧ кывзӧй.
Ӧд тадзи Господь, тіян Енныд, кӧсйӧ тӧдмавны, радейтанныд-ӧ ті Господьӧс, ассьыныд Ентӧ, став сьӧлӧмнад да став олӧмнад.
Асланыд Господь Ен бӧрся мунӧй да Сыысь полӧй. Сылӧн тшӧктӧмъяс серти олӧй, Сылысь кывзысьӧй, Сылы кесъялӧй да Сы дінӧ кутчысьӧй.
А пророкӧс да вӧтъяс аддзылысьӧс колӧ вины, мыйла сійӧ ышӧдіс тіянӧс паныд кыпӧдчыны Господьлы, тіян Енлы, коді петкӧдіс тіянӧс Египетысь да мездіс нартитӧм улысь. Бырӧдӧй лёксӧ ас пӧвстсьыныд, ӧд татшӧм мортыс кежӧдӧ тіянӧс туйысь, кыті Господь, тіян Енныд, тшӧктіс тіянлы муннысӧ.
Тэнӧ кӧ вокыд, [батьыдлӧн пиыс либӧ] мамыдлӧн пиыс, аслад пиыд либӧ нылыд, радейтана гӧтырыд либӧ меддона ёртыд гусьӧн корас мунны сыкӧд да кесъявны мукӧд енъяслы, кодъясӧс ті да тіян батьясныд онӧ тӧдӧй, и кодъяслы юрбитӧны тіян гӧгӧр матын либӧ ылын олысь войтыръяс ӧтар му помсянь мӧдар му помӧдзыс, сэки эн кӧсйысь да эн кывзы сійӧс.
Эн нормы сьӧлӧмнад сы дінӧ, эн жалит, эн дорйы, а ви сійӧс.
Тэ лый сійӧс изнас медводдзаӧн, а тэ бӧрся — войтырыд.
Сійӧ кежӧдӧ тіянӧс Господьысь, тіян Енмысь, коді петкӧдіс тіянӧс Египетысь нартитӧм улысь.
Таысь сійӧс колӧ изъявны кувтӧдзыс. Став Израиль войтыр мед кылас та йылысь да кутас повны, сэсся некод тіян пӧвстысь оз кут вӧчны татшӧм лёкторсӧ.
Ті кӧ кыланныд, мый кутшӧмкӧ карын, кодӧс Господь, тіян Енныд, сетас тіянлы, шогмытӧм йӧз кежӧдӧны карса олысьясӧс юрбитны тӧдтӧм енъяслы, сэки бура тӧдмалӧй та йылысь.
И тіян пӧвстын кӧ вӧлі вӧчӧма татшӧм зывӧксӧ, сэки виӧй шыпуртӧн тайӧ карсьыс став олысьсӧ. Дзикӧдз бырӧдӧй карсӧ да ставсӧ, мый сэні эм, весиг ыж-мӧссӧ шыпуртӧн виалӧй.
Став эмбурсӧ чукӧртӧй карса изэрд* вылӧ, а сэсся сотӧй карсӧ Господьлы, асланыд Енлы, ваян висьӧс моз. Карсӧ мед некор оз ло выльысь лэптӧма, сэні мед некод оз кут овны.
Господьлы сиӧмторъясысь тіян киӧ мед нинӧм оз веськав. Сӧмын ставсӧ бырӧдӧм бӧрын Господь дугдас скӧравны, бурсьӧлӧмтчас да жалитас тіянӧс, сетас тіянлы уна ныв-пиӧс, кыдзи [висьталіс тіянлы да] кыв сетӧмӧн кӧсйысис тіян батьяслы. Тадзи лоӧ, ті кӧ кутанныд кывзысьны Господьлысь, асланыд Енлысь, овны став Сылӧн тшӧктӧмыс серти, мый талун висьтала тіянлы, и вӧчны Господь Енныд водзын [бурсӧ да] шогманасӧ».
«Ті — Господь Енлӧн ныв-пиыс.
Кулӧм морт вӧсна шогсигӧн энӧ вундалӧй вир-яйнытӧ да энӧ шырӧй плеш водзсьыд юрсинытӧ.
Ӧд ті — Господь Енлӧн вежа войтырыс. Господь бӧрйис тіянӧс мувывса войтыръяс пӧвстысь, медым ті вӧлінныд Сылӧн войтырӧн.
Энӧ сёйӧй нинӧм зывӧксӧ.
Тіянлы позьӧ сёйны ӧш-мӧскӧс, ыж-кӧзаӧс, кӧрӧс, газельӧс, косуляӧс, вӧлявывса кӧзаӧс да ӧшкӧс, антилопаӧс да керӧсвыв межӧс.
Пемӧсӧс, кодлӧн гыжйыс вожа да коді рӧмидзтӧ, позьӧ сёйны. 
Но оз позь сёйны рӧмидзтысь пемӧсӧс, кодлӧн гыжйыс абу вожа. Оз позь сёйны вожа гыжъя пемӧсӧс, коді оз рӧмидзты. Энӧ сёйӧй верблюдӧс, кӧчӧс да даманӧс. Найӧ рӧмидзтӧны, но абу вожа гыжъяӧсь. Найӧ тіянлы пежӧсь.
Энӧ сёйӧй порсьӧс. Сылӧн гыжйыс вожа, но сійӧ оз рӧмидзты. Сійӧ тіянлы пеж.
Тайӧ пемӧсъяслысь яйсӧ энӧ сёйӧй да налӧн шой дінӧ энӧ инмӧдчӧй.
Ваын олысь-уялысьяс пиысь сёйӧй сэтшӧмӧс, кодлӧн эм борд да сьӧм.
Но кодлӧн абу бордйыс да сьӧмыс, сійӧс энӧ сёйӧй. Сійӧ тіянлы пеж.
Сӧстӧм лэбач-пӧтка позьӧ сёйны.
Энӧ сёйӧй татшӧм лэбачьясӧс: кутшӧс, грифӧс да саридзкутшӧс, сӧкӧл-варышӧс, кырныш-ракаӧс, страусӧс, сюзьӧс да каляӧс, бугуйӧс, ибисӧс да ва курӧгӧс, пеликанӧс, чери варышӧс да бакланӧс, аистӧс, быдсикас цапляӧс, крукыль ныра сизьӧс да нярбордъя шырӧс.
Посни лэбалысьяс* тіянлы пежӧсь. Найӧс энӧ сёйӧй.
Сӧстӧм лэбалысьясӧс ті верманныд сёйны.
Энӧ сёйӧй пемӧс-лэбачлысь шойсӧ.
Сетӧй сійӧс либӧ вузалӧй йӧз муысь локтысьяслы, кодъяс олӧны тіян каръясын. Ті — Господь Енлӧн вежа войтырыс.
Эн пу кӧзапиӧс мамыслӧн йӧв пиын».
«Быд во торйӧд дасӧд юкӧнсӧ сыысь, мый быдмӧ тэнад му вылын. 
Няньсьыд, винасьыд да олив выйсьыд дасӧд юкӧнсӧ, тшӧтш ыж-мӧскыдлысь медводдза чужысьсӧ, сёй аслад Господь Ен водзын сійӧ местаас, мый Сійӧ бӧръяс Аслас нимлы оланінӧн. Тадзи тэ велӧдчан повны Господьысь, аслад Енмысь, став олан лунъяс чӧжыд.
Но тэсянь кӧ ылын лоӧ сійӧ местаыс, мый Господь, тэнад Енмыд, бӧръяс Аслас нимлы оланінӧн, и та вӧсна ассьыд дасӧд юкӧнтӧ он вермы нуны сэтчӧ, ӧд Господь бурсиӧ тэнӧ, сэки веж сійӧс эзысь вылӧ да эзысьнас мун сійӧ местаас, мый бӧръяс Господь, тэнад Енмыд.
Сэні эзысь вылӧ ньӧб ӧшъясӧс, ыжъясӧс да вина-сур — ставсӧ, мый кӧсъян.
Сэсся аслад Господь Ен водзын сёй-ю да гажӧдчы аслад котыркӧд ӧтвылысь.
Левитӧс, коді олӧ тэнад карын, эн вунӧд, ӧд сылӧн абу му юкӧныс, а тэнад эм.
Быд куим во мысти торйӧд вогӧгӧрся быдтассьыд дасӧд юкӧнсӧ да чукӧрт сійӧс аслад оланінын, медым левитъяс, кодъяслӧн абу му юкӧныс, а сідзжӧ йӧз муысь локтысьяс, батьтӧм-мамтӧмъяс да дӧваяс, кодъяс олӧны тэнад карын, вермисны локны да пӧттӧдзныс сёйны. Сэки Господь, тэнад Енмыд, бурсиас тэнӧ быд уджын».
«Быд сизимӧд воыс тіян мед лоӧ уджйӧз киритан во.
Уджйӧзӧн сетысь аслас матыссаыслысь уджйӧзсӧ мед киритас-вунӧдас да мынтысьны оз кор. Ӧд Господьлӧн [тіян Енлӧн] тшӧктӧм серти тіян лоӧ уджйӧз киритан во.
Йӧз муысь локтысьлысь уджйӧзнытӧ перйӧй, а вокныдлысь энӧ.
Сійӧ муас, мый Господь, тіян Енныд, пыр кежлӧ сетас тіянлы, Господь озыра бурсиас тіянӧс. Тіян пӧвстын оз лоны гӧльяс, сӧмын понданныд кӧ сьӧлӧмсяньныд кывзысьны Господьлысь, асланыд Енлысь, да овны став тайӧ тшӧктӧмыс серти, мый талун висьтала тіянлы.
Кор Господь, тіян Енныд, бурсиас тіянӧс, кыдзи Сійӧ кӧсйысис, ті верманныд уна войтырлы уджйӧзӧн сетны, но водзӧсӧн онӧ кутӧй босьтны.
Ті кутанныд ыджыдавны войтыръяс вылын, но тіян вылын найӧ оз кутны ыджыдавны.
Сійӧ муас, мый Господь, тіян Енныд, сетас тіянлы, войтыр пӧвстаныд кӧ карын либӧ сиктын лоӧ гӧль морт, сэки энӧ чорзьӧдӧй сьӧлӧмнытӧ, энӧ кольӧй вокнытӧ отсӧгтӧг. Мед тэнад киыд лоӧ сетана киӧн, уджды сылы сы мында, мыйта сылы колӧ.
Видзчысь, сьӧлӧмад эн лэдз шогмытӧм мӧвп, мый сизимӧд воыс, уджйӧз киритан воыс, матыстчӧ нин, и та вӧсна гӧль вокыдлы нинӧм он сет.
Тэ кӧ он ло бур сьӧлӧма сы дінӧ, сійӧ кутас норасьны тэ вылӧ Господьлы, и тэ вылын лоӧ [ыджыд] мыж.
Сет сылы лышкыда [и уджйӧзӧн сет, мыйта корӧ да мыйта сылы колӧ]. Сетігад сьӧлӧмыд мед оз шогсьы, ӧд гӧль воклы сетӧмсьыд Господь, тэнад Енмыд, бурсиас тэнӧ быд уджын.
Тіян муын гӧль йӧзыс пыр лоасны, та вӧсна ме тшӧкта тіянлы лышкыда сетны гӧльяслы да коньӧръяслы, асланыд вокъяслы».
«Тэнад еврей войтырысь кӧ айлов либӧ ань вузалас асьсӧ тэныд кесйӧг туйӧ, сійӧ мед уджалас тэ ордын квайт во чӧж, а сизимӧд вонас лэдз сійӧс вӧля вылӧ.
Но куш киӧн эн лэдз сійӧс. Сет сылы сьӧлӧмсяньыд аслад ыж-кӧза чукӧрсьыд, гумла вывсьыд, виноград пычканінсьыд пай. Ставсьыс, мыйӧн бурсиас тэнӧ Господь, тэнад Енмыд, чуктӧд сылы.
Тӧд, мый тэ [тшӧтш] вӧлін кесйӧг туйын Египет муын, и Господь, тэнад Енмыд, мездіс тэнӧ нартитӧм улысь. Та вӧсна талун ме тшӧкта тэныд тадзисӧ вӧчны.
Но кесйӧгыд кӧ шуас, мый оз кӧсйы мунны тэ ордысь, ӧд сійӧ радейтӧ тэнӧ да тэнсьыд гортсатӧ, и сылы тэ ордын бур, сэки босьт шыла да розьӧд сылысь пельсӧ ӧдзӧс бердад.
Тадзи сійӧ пыр кежлӧ лоӧ тэнад кесйӧгӧн.
Кесйӧг анькӧд тшӧтш тадзи вӧч.
Тэныд кӧ сьӧкыд лэдзны кесйӧгтӧ, мӧвпышт, мый квайт во чӧж сійӧ кесъяліс тэныд, и тайӧ кадас сійӧ сулаліс тэныд сӧмын джынсӧ сыысь, мый эськӧ ковмис мынтыны медалӧм мортлы.
Господь, тэнад Енмыд, бурсиас тэнӧ быд уджын».
«Ыж-мӧсныдлысь став медводдза ай чужысьсӧ вежӧдӧй-торйӧдӧй Господьлы, асланыд Енлы. Энӧ уджӧдӧй медводдза чужысь ӧшкӧс. Энӧ шырӧй ыж-кӧзалысь медводдза чужысьсӧ.
Господьлӧн [тіян Енлӧн] бӧрйӧм местаын быд во сёйӧй найӧс став котырнаныд Господь Енныд водзын.
Но пемӧсныд кӧ абу дзоньвидза, сійӧ кӧ чотысь, синтӧм либӧ сылӧн кӧ эм мӧдпӧлӧс ыджыд тырмытӧмтор, татшӧмсӧ Господьлы, асланыд Енлы, энӧ вайӧй.
Татшӧм пемӧслысь яйсӧ сёйӧй асланыд оланінын газель да кӧр яй моз. Яйсӧ вермас сёйны и сӧстӧм, и пежасьӧм морт.
Вирсӧ сӧмын энӧ сёйӧй, ва моз койыштӧй сійӧс му вылӧ».
«Авив тӧлысьӧ тіян мед лоӧ Господьлы, тіян Енлы, сиӧм ыджыдлунся гаж, ӧд авив тӧлысьӧ Господь, тіян Енныд, петкӧдіс тіянӧс войнас Египетысь.
Вайӧй Господьлы, асланыд Енлы, ыджыдлунся вись пыдди ыж-кӧзаӧс да ӧш-мӧскӧс. Начкӧй висьсӧ сійӧ местаас, мый Господь бӧръяс Аслас нимлы оланінӧн.
Тайӧ висьыскӧд энӧ сёйӧй шоммӧдӧм нянь.
Сизим лун чӧж сёйӧй шомтӧм нянь, шогдырся няньнытӧ, ӧд ті тэрмасьӧмӧн петінныд Египет муысь. Тадзи став олӧм чӧжныд ті кутанныд казьтывны Египетысь петан лунтӧ.
Сизим лун чӧж тіян муын мед оз ло няньшом. Медводдза лунӧ рытнас вись пыдди вайӧм пемӧслысь яйсӧ асылӧдзыс энӧ кольӧй.
Быд карын, мый Господь, тіян Енныд, сетас тіянлы, оз позь начкыны ыджыдлунся висьсӧ, а позьӧ начкыны сӧмын сійӧ местаас, мый Господь, тіян Енныд, бӧръяс Аслас нимлы оланінӧн. Начкӧй ыджыдлунся висьтӧ рытнас шонді пуксигӧн, дзик сійӧ кадас, кор ті петінныд Египетысь.
Дасьтӧй да сёйӧй яйсӧ сійӧ местаас, мый бӧръяс Господь, тіян Енныд. Асывнас бӧр мунӧй гортаныд.
Квайт лун чӧж сёйӧй шомтӧм нянь. Сизимӧд луннас тіян мед лоӧ Господьлы, тіян Енлы, сиӧм вежа чукӧртчӧм.
Сэки энӧ уджалӧй».
«Сійӧ лунсяньыс, кор понданныд чарлаӧн вундыны няньнытӧ, лыддьӧй сизим вежон.
Сэки пасйӧй Господьлы, асланыд Енлы, сиӧм Ветымынӧд лунся гаж да вайӧй ас кӧсйӧм серти висьяс. Быдӧн мед ваяс аслас Господь Енлӧн бурсиӧмыс серти.
Гажӧдчӧй Господь Енныд водзын сійӧ местаас, мый Господь бӧръяс Аслас нимлы оланінӧн. Гажӧдчӧй ныв-пиныдкӧд, кесйӧгъясныдкӧд, тіян карын олысь левитъяскӧд, йӧз муысь локтысьяскӧд, батьтӧм-мамтӧмъяскӧд да дӧваяскӧд, кодъяс олӧны тіян пӧвстын.
Энӧ вунӧдӧй, мый ті асьныд вӧлінныд Египетын кесйӧг туйынӧсь. Кывзысьӧмӧн олӧй тайӧ тшӧктӧмъясыс серти».
«Сизим лун чӧж пасйӧй Чом вӧчан лунъяс, кор помаланныд гумлавыв уджъястӧ да виноград пычкӧмтӧ.
Гажӧдчӧй ныв-пиныдкӧд, кесйӧгъясныдкӧд, левитъяскӧд, йӧз муысь локтысьяскӧд, батьтӧм-мамтӧмъяскӧд да дӧваяскӧд, кодъяс олӧны тіян карын.
Сизим лун чӧж пасйӧй Господьлы, асланыд Енлы, сиӧм гаж сійӧ местаас, мый Господь бӧръяс [медым сэні ті шыасинныд Сы дінӧ]. 
Господь, тіян Енныд, бурсиас тіянлысь быдтаснытӧ да уджнытӧ, та вӧсна сьӧлӧмсяньныд нимкодясьӧй.
Куимысь вонас став айуловныд мед локтасны Господь Енныд водзӧ сійӧ местаас, мый Господь бӧръяс. Сэні пасйӧй Шомтӧм нянь сёян лунъяс, Ветымынӧд лунся гаж да Чом вӧчан лунъяс.
Господь водзӧ куш киӧн мед некод оз лок, но быдӧн мед ваяс козин сы серти, мыйӧн бурсиас сійӧс Господь, тіян Енныд».
«Быд карын, мый Господь, тіян Енныд, сетас тіянлы, индӧй чужанкотыръяслы ёрдысьясӧс да веськӧдлысьясӧс. Найӧ мед веськыда мыждасны войтырӧс.
Веськыда мыждӧмсӧ энӧ торкӧй, чужӧм вылӧ энӧ видзӧдӧй, козинъяс энӧ босьтӧй. Ӧд козин босьтӧмыс синтӧммӧдӧ мывкыда мортӧс, и сійӧ мыждӧ веськыда вӧчысьӧс.
Корсьӧй веськыдлунсӧ, сӧмын веськыдлунсӧ, сэки ті кутанныд овны, и ті босьтанныд аслыныд сійӧ мусӧ, мый Господь, тіян Енныд, сетас тіянлы».
«Господьлы, асланыд Енлы, кыпӧдӧм висьпуктанінкӧд орччӧн энӧ сувтӧдӧй юрбитан пуяс. Энӧ сувтӧдӧй юрбитан изъяс, ӧд Господь, тіян Енныд, мустӧмтӧ тайӧс».
«Господьлы, асланыд Енлы, вись пыдди энӧ вайӧй висьлӧс-доймӧм ӧшкӧс либӧ ыжӧс, ӧд Господьлы, тіян Енлы, тайӧ зывӧк.
Господьӧн, тіян Енмӧн, сетӧм карын кӧ айлов либӧ ань вӧчас Господь Енныд водзын шогмытӧмсӧ — торкас йитӧдсӧ, мый Сійӧ кӧрталіс тіянкӧд, кутас кесъявны-юрбитны мукӧд енъяслы, шонділы, тӧлысьлы да кодзувъяслы, мыйысь Господь ӧлӧдіс тіянӧс — и ті кыланныд та йылысь, сэки бура тӧдмалӧй та йылысь.
И Израильын кӧ вӧлі вӧчӧма татшӧм зывӧксӧ, сэки сійӧс вӧчысь айловӧс либӧ аньӧс вайӧдӧй карса дзиръя дорӧ да изъялӧй кувтӧдзыс.
Зывӧксӧ вӧчысьӧс колӧ вины кык либӧ куим аддзылысь-висьталысьлӧн кывъяс серти, а ӧти мортлӧн кывъяс серти вины оз позь.
Медводз мед изнас лыйӧны аддзылысь-висьталысьяс, а на бӧрын — мукӧдыс.
Бырӧдӧй лёксӧ ас пӧвстсьыныд».
«Асланыд карын кор ті кутанныд видлавны виӧм, вензьӧм либӧ дойдӧм йылысь могъяс, и тіянлы лоӧ сьӧкыд веськыда мыждыны, сэки мунӧй сійӧ местаас, мый Господь, тіян Енныд, бӧръяс [медым сэні ті шыасинныд Сы дінӧ].
Матыстчӧй сэні поп-левитъяс дінӧ да сійӧ кадас уджалысь ёрдысь дінӧ и юалӧй налысь. Найӧ висьталасны, кыдзи колӧ веськыда мыждыны.
Ставсӧ вӧчӧй сы серти, мый найӧ тшӧктасны тіянлы сійӧ местаас, мый бӧръяс Господь [тіян Енныд, медым сэні ті шыасинныд Сы дінӧ]. 
Ставсӧ вӧчӧй налӧн туйдӧдӧм серти, Индӧд серти, мыйӧ найӧ велӧдасны тіянӧс. Энӧ вешйӧй веськыдвылӧ ни шуйгавылӧ веськыда мыждӧмысь.
Но коді кутас ышнясьны да оз кывзысь поплысь, коді кесъялӧ сэні Господь Енныд водзын, либӧ оз кывзысь [сійӧ кадас уджалысь] ёрдысьлысь, сійӧс колӧ вины. Бырӧдӧй Израильысь лёксӧ.
Кор став войтырыс кылас та йылысь, найӧ кутасны повны, и некод тадзи вӧчнысӧ оз лысьт».
«Кор ті локтанныд сійӧ муас, мый Господь, тіян Енныд, сетас тіянлы, босьтанныд сійӧс аслыныд да овмӧдчанныд сэтчӧ, и кӧсъянныд, медым тіян гӧгӧр олысь войтыръяслӧн моз тіян тшӧтш вӧлі ӧксы, сэки ӧксыӧ пуктӧй мортӧс, кодӧс бӧръяс Господь, тіян Енныд.
Сійӧ мед лоӧ тіян войтыр пӧвстысь, а оз мукӧд войтыр пӧвстысь.
Ӧксыныд мед оз лӧсьӧд уна вӧв да оз мӧдӧд ассьыс йӧзсӧ Египетӧ, медым ньӧбны сэтысь вӧвъясӧс. Ӧд Господь шуис тіянлы, сэтчӧ пӧ бӧрсӧ энӧ бергӧдчӧй.
Ӧксылӧн мед оз ло уна гӧтыр, ӧд та вӧсна сылӧн сьӧлӧмыс кежас Господьысь. Сылы оз ков чукӧртны унасьыс-уна эзысь-зарни.
Ӧксыӧ пуксьӧм бӧрас сійӧ мед аслыс гижас Индӧдсӧ сійӧ небӧгсьыс, мый видзӧны поп-левитъяс. Гижӧмасӧ мед видзас ас ордас да лыддяс став олан лунъяс чӧжыс. Сэки сійӧ велалас повны Господьысь, аслас Енмысь, да овны Индӧд да тшӧктӧмъяс серти.
Аслас вокъясысь вылӧджык мед асьсӧ оз пукты, Индӧдысь веськыдвылӧ ни шуйгавылӧ мед оз кеж. Сэки сійӧ да сысянь чужысьяс кутасны дыр юравны Израильын».
«Поп-левитъяслы, Левий чужанкотырлы, абу сетӧма Израильын му юкӧнсӧ. Найӧ мед сёясны Господьлы вайӧм висьяс.
Левий чужанкотырлы вокъясыс пӧвстын мусӧ абу сетӧма. Налӧн пайыс — Господь, кыдзи Сійӧ кӧсйысис налы.
Ыж-мӧскӧс вись пыдди вайигӧн Израиль войтыр мед сетас висьлысь пуліпомсӧ, черлысӧ да гырксӧ поплы.
Сетӧй поплы тшӧтш медводдза вундӧм нянь, выль вина да олив вый, а сідзжӧ нигӧн вурун. Ӧд Господь, тіян Енныд, чужанкотыръясныд пӧвстысь бӧрйис Левийӧс да сысянь чужысьясӧс, медым найӧ став олан лунъяс чӧжныс кесъялісны Господьлы [тіян Енлы, да бурсиисны Господь нимӧн].
Израильса кутшӧмкӧ карын олысь левит кӧ кӧсъяс, вермас овмӧдчыны Господьлӧн бӧрйӧм местаӧ. Господь водзын кесъялысь левит вокъясыс моз сійӧ мед кесъялас Господьлы, аслас Енлы. Сылы мед ӧтмоза сетасны сёян, весиг кӧ сылӧн эм мыйкӧ батьыслысь эмбурсӧ вузалӧмысь».
«Кор ті локтанныд сійӧ муас, мый Господь, тіян Енныд, сетас тіянлы, сэтчӧс войтыръяс моз зывӧксӧ энӧ вӧчӧй.
Некод тіян пӧвстысь мед оз сот ассьыс писӧ либӧ нывсӧ вись пыдди. Тіян пӧвстын мед оз ло тунасьысь, кимӧститчысь, тшыкӧдчысь, нимкыв лыддьысь, ловъяс дінӧ шыасьысь да кулӧмаӧс корысь.
Быдӧн, коді тадзи вӧчӧ, зывӧк Господьлы.
Татшӧм зывӧксӧ вӧчӧмысь Господь, тіян Енныд, вӧтлас сэтчӧс войтыръяссӧ тіян водзысь. Лоӧй Господь Енныд водзын сӧстӧмӧсь. Ті босьтанныд аслыныд мусӧ войтыръяслысь, кодъяс кывзӧны кимӧститчысьясӧс да тунасьысьясӧс. А тіянлы Господь, тіян Енныд, оз лэдз на моз вӧчны».
«Господь, тіян Енныд, сувтӧдас вокъяс пӧвстсьыныд ме кодь пророкӧс тіянлы. Сійӧс кывзӧй. Тадзи збыльмас сійӧ, мый ті коринныд Господьлысь, асланыд Енлысь, кор войтырыс чукӧртчис Хорив керӧс бокын. Ті ӧд шуинныд: “Водзӧ ми огӧ вермӧй кывзыны асланым Господь Енлысь гӧлӧс шысӧ да видзӧдны тайӧ ыджыд би вылас. Ми полам, мый кулам”.
Сэки Господь шуис меным: “Найӧ веськыда висьталӧны.
Ме сувтӧда налӧн вокъяс пӧвстысь тэ кодь пророкӧс налы да пукта Ассьым кывъясӧс сылӧн вомӧ. Сійӧ висьталас налы ставсӧ, мый Ме тшӧкта сылы.
Коді оз кывзы Менсьым кывъясӧс, мый тайӧ пророкыс висьталас Менам нимсянь, сійӧс Ме мыжда.
Но коді Менам нимсянь висьталас, мый Ме эг тшӧкты висьтавны, либӧ висьталас мукӧд ен нимсянь, татшӧм пророкӧс мед виасны”.
Ті верманныд юавны асланыд сьӧлӧмын, кыдзи тӧдмавны, Господь-ӧ висьталӧ.
Тӧдӧй, Господь нимсянь пророклӧн висьталӧмыс кӧ оз збыльмы, сідзкӧ, эз Господь висьтав, а пророк шуис тайӧс асьсӧ кыпӧдӧм могысь. Энӧ полӧй сыысь».
«Господь, тіян Енныд, бырӧдас войтыръясӧс, кодъяслысь мусӧ сетас тіянлы. Кор ті босьтанныд налысь мусӧ да овмӧдчанныд налӧн каръясӧ да налӧн керкаясӧ, сэки торйӧдӧй куим кар сійӧ муас, мый Господь, тіян Енныд, сетас тіянлы.
Мусӧ, мый Господь, тіян Енныд, сетас тіянлы, юкӧй куим пельӧ, медым торйӧдӧм каръясас вермас пышйыны быдӧн, коді виас мортӧс. Нюжӧдӧй каръясӧдзыс туйяс.
Мортыс кӧ оз лӧгав матыссаыс вылӧ, а мӧвпышттӧг виас сійӧс, вермас пышйыны татшӧм карас да ловйӧн кольны.
Шуам, кык морт мунасны вӧрӧ пес керавны. Пусӧ кералігӧн кӧ ӧтиыслӧн черыс мынас черпусьыс да веськалас мӧдыслы, и сійӧ кулас, сэки виысьыс вермас пышйыны татшӧм карас да ловйӧн кольны. Татшӧм карӧдзыс кӧ туйыс лоӧ кузь, водзӧс перйысь вермас суӧдны пышйысьӧс да скӧрйывсьыс вины сійӧс. Но пышйысь мортӧс оз ков вины, ӧд сійӧ эз мустӧмтлы виӧмаӧс.
Та вӧсна ме тшӧкта тіянлы торйӧдны аслыныд куим кар.
Господь, тіян Енныд, ыдждӧдас-паськӧдас тіянлысь мутӧ, кыдзи кыв сетӧмӧн кӧсйысис тіян батьяслы. Кӧсйысьӧм мусӧ Сійӧ сетас тіянлы, кутанныд кӧ овны став тшӧктӧмыс серти, мый талун висьтала тіянлы, кутанныд кӧ радейтны Господьӧс, ассьыныд Ентӧ, да ветлыны Сылӧн туйясӧд став олӧм чӧжныд. Кор Господь ыдждӧдас-паськӧдас мунытӧ, тайӧ куим карсьыс ӧтдор нӧшта верманныд торйӧдны куим кар. Энӧ кисьтӧй мыжтӧмлысь вирсӧ сійӧ муас, мый Господь, тіян Енныд, сетас тіянлы. Кисьтанныд кӧ мыжтӧмлысь вирсӧ, мыжыс лоӧ тіян вылын.
Но морт кӧ лӧгалӧм вӧсна кыйӧдас да виас матыссасӧ, а сэсся пышъяс татшӧм карас, сэки сылӧн карысь юрнуӧдысьяс мед мӧдӧдасны ассьыныс йӧзсӧ морт виысьла. Найӧ мед бӧр вайӧдасны морт виысьӧс да сетасны сійӧс водзӧс перйысьлӧн киӧ, ӧд виысьлы колӧ кувны.
Сы дінӧ сьӧлӧмнаныд энӧ нормӧй.
Тадзи ті вештанныд мыжтӧм вирсӧ Израиль вылысь, и тіянлы лоӧ бур».
«Кор ті босьтанныд аслыныд мусӧ, мый Господь, тіян Енныд, сетас тіянлы, да тіянлы вичмас му юкӧныс, му юкӧнъяс костӧ сувтӧдӧм пасъяс энӧ вештӧй.
Ӧти мортлӧн висьталӧмыс абу тырмана, медым мыждыны мортӧс лёк либӧ мыж вӧчӧмысь. Ставсӧ колӧ подулавны кык либӧ куим мортлӧн висьталӧмӧн.
Ылӧг висьталысь кӧ мыжалас кодӧскӧ лёк вӧчӧмысь, сэки кыкнанныслы колӧ локны Господь водзӧ, сувтны попъяс да ёрдысьяс водзӧ, кодъяс сійӧ кадас уджалӧны.
Ставсӧ бура тӧдмалӧм бӧрын кӧ ёрдысьяс казяласны, мый мыжалысь висьталӧ вок йывсьыс ылӧгсӧ, сэки мыжалысьлы вӧчӧй сійӧ, мый кӧсйис вӧчны вокыслы.
Бырӧдӧй лёксӧ ас пӧвстсьыныд.
Мукӧдыс кор кыласны та йылысь, повзясны да дугдасны вӧчны татшӧм лёкторсӧ.
Энӧ нормӧй сьӧлӧмнаныд лёк вӧчысь дінӧ. Олӧмысь перйы олӧм, синмысь — син, пиньысь — пинь, киысь — ки, кокысь — кок.
[Кыдзи сійӧ дойдаліс ассьыс матыссасӧ, сылы сідзи жӧ мед вӧчасны.]»
«Кор ті петанныд тышӧ да аддзанныд, мый вӧрӧглӧн вӧв-тарантасыс да тышкайӧзыс унджык тіян дорысь, энӧ полӧй, ӧд тіянкӧд Господь, тіян Енныд, коді петкӧдіс тіянӧс Египет муысь.
Тышӧ петтӧдзныд войтыр водзын мед сёрнитас поп. Сійӧ мед шуас: “Кывзы, Израиль!
Талун ті петанныд тышӧ вӧрӧгныдлы паныд. Энӧ полӧй-тіралӧй наысь да энӧ майшасьӧй! Ӧд Господь, тіян Енныд, тышӧ петас тіянкӧд ӧтвылысь, медым тіян пыдди тышкасьны вӧрӧгныдкӧд да сетны тіянлы вермӧм”.
Веськӧдлысьяс мед шуасны войтырлы: “Тіян пиысь кӧ кодкӧ лэптіс выль керка, но сэтчӧ эз на овмӧдчы, мед бӧр бергӧдчас гортас. Сійӧ вермас тышын усьны, а сылӧн керкаӧ мӧд овмӧдчас.
Тіян пиысь кӧ кодкӧ лӧсьӧдіс виноград йӧр, но вотӧссӧ эз на чукӧртлы, мед бӧр бергӧдчас гортас. Сійӧ вермас тышын усьны, а сылӧн виноград йӧрысь вотӧссӧ мӧд чукӧртас.
Тіян пиысь кӧ кодкӧ кикутӧма*, но эз на гӧтрась, мед бӧр бергӧдчас гортас. Сійӧ вермас тышын усьны, а сылӧн гӧтырпуыс мӧдлы гӧтырӧн лоас”.
Веськӧдлысьяс нӧшта мед шуасны: “Тіян пиысь кӧ кодкӧ полӧ, сьӧлӧмнас майшасьӧ, мед бӧр бергӧдчас гортас, ӧд сылӧн полӧмыс вермас вуджны мукӧдыслы”.
Войтыр водзын сёрнитӧм бӧрын веськӧдлысьяс мед индасны тышкайӧзлы юралысьясӧс.
Кар вылӧ уськӧдчытӧдзныд корӧй сэтчӧс олысьясӧс тыштӧг сетчыны.
Найӧ кӧ сетчасны да восьтасны карса дзиръянысӧ, уджӧдӧй найӧс вот мынтӧм могысь.
Но оз кӧ сетчыны, а кӧсъясны тышкасьны, сэки карсӧ босьтӧй кытшӧ. Кор Господь, тіян Енныд, сетас найӧс тіян киӧ, виалӧй шыпуртӧн сэтысь став айуловсӧ.
Но аньясӧс, челядьӧс, пемӧсъясӧс да карсьыс ставсӧ босьтӧй аслыныд. Вӧдитчӧй вӧрӧгныдлысь босьтӧмторнас, мый Господь, тіян Енныд, сетіс тіянлы.
Тадзи вӧчӧй тіянсянь ылын каръяскӧд. 
А татчӧс войтыръяслӧн каръясысь, мый Господь, тіян Енныд, сетас тіянлы, некодӧс ловйӧн энӧ кольӧй. Дзикӧдз бырӧдӧй хеттейясӧс, аморейясӧс, ханаансаясӧс, перезейясӧс, хивейясӧс, евуссаясӧс, [гергесейясӧс,] кыдзи тшӧктіс тіянлы Господь, тіян Енныд. Но онӧ кӧ бырӧдӧй найӧс, найӧ велӧдасны тіянӧс быдпӧлӧс зывӧкторйӧ, мый найӧ вӧчӧны асланыс енъяслы юрбитігӧн. Тадзи ті асланыд Господь Енлы паныд мыж вӧчанныд.
Дыр кад кӧ тіянлы ковмас кытшавны кутшӧмкӧ кар, медым уськӧдчыны сы вылӧ да босьтны сійӧс, карлӧн матігӧгӧрсьыс вотӧса пуяссӧ энӧ кералӧй, найӧ вердасны тіянӧс. Пуясыд ӧд абу йӧз, найӧс оз ков бырӧдны.
Но вотӧс вайтӧм пуяссӧ верманныд керавны да карсӧ босьтӧм могысь вӧчавны содъяс, кытчӧдз карыс оз ло тіян».
«Сійӧ муас, мый Господь, тіян Енныд, сетас тіянлы, тэ кӧ аддзан видз-му вылысь мортлысь шойсӧ, и некод оз тӧд, коді сійӧс виис, сэки юрнуӧдысьяс да ёрдысьяс мед локтасны сэтчӧ да артыштасны туйсӧ матігӧгӧрса каръясӧдз.
Кутшӧм кар лоӧ медматын, сэтчӧс карса юрнуӧдысьяс мед босьтасны том мӧскӧс, кодӧс эз на уджӧдлыны да эз на сийӧсавлыны. Юрнуӧдысьяс мед вайӧдасны мӧссӧ гӧрлытӧм-кӧдзлытӧм ковтысӧ, кӧні визувтӧ шор. Сэні мӧскыслысь сьылісӧ мед песовтасны.
Сэтчӧ мед локтасны попъяс, Левийсянь чужысьяс, кодъясӧс Господь, тіян Енныд, бӧрйис, медым найӧ кесъялісны Сылы да бурсиисны Сылӧн нимӧн. Ӧд быдсикас вензьӧм да дойдӧм колӧ видлавны, сэсся мыждыны попъяслӧн шуӧм серти.
Медматысса карсянь локтӧм юрнуӧдысьяс мед мыськаласны кинысӧ мӧс [юр] весьтын, кодлысь сьылісӧ песовтісны ковтысын. Найӧ мед шуасны: “Миян киным тайӧ кулӧм мортыслысь вирсӧ эз кисьт, миян синным эз аддзыв, мый лои.
Господьӧй, вешты Аслад Израиль войтырлысь мыжсӧ. Тайӧ мыжтӧм мортлӧн вир вӧснаыс эн мыжды Ассьыд Израиль войтыртӧ, кодӧс Тэ мездін [Египет муысь]”. 
Татшӧм ногӧн израильсаяслысь мыжсӧ, мый вӧчисны вир кисьтӧмӧн, лоӧ вештӧма.
Вӧчанныд кӧ Господь [тіян Ен] водзын [бурсӧ да] шогманасӧ, ті вештанныд ас вывсьыныд мыжтӧмлысь вирсӧ».
«Кор петанныд тышӧ вӧрӧгныдлы паныд, и Господь, тіян Енныд, сетас вӧрӧгнытӧ тіян киӧ, сэки пленӧ босьтӧмаяс пӧвстысь кӧ аддзан мича аньӧс, кодӧс кӧсъян босьтны гӧтырӧ, вайӧд сійӧс гортад. Аньыс мед кушӧдз шырас юрсӧ, тшӧтшӧдас гыжсӧ да пӧрччас плендырся паськӧмсӧ. Тэнад керкаын олігас тӧлысь чӧж мед бӧрдас аслас бать-мам вӧснаыс.
Сӧмын та бӧрын тэ верман узьны сыкӧд. Тэ лоан сылы верӧсӧн, а сійӧ — тэныд гӧтырӧн.
Но сійӧ кӧ мустӧммас тэныд, лэдз сылы мунны, кытчӧ кӧсйӧ. Эн вузав сійӧс ни эн видз кесйӧг туйӧ, ӧд тэ янӧдін сійӧс.
Мортлӧн кӧ лоӧ кык гӧтыр, ӧтиыс муса, а мӧдыс мустӧм, и кыкнанныс чужтасны сылы пиянӧс, но медводдзаӧн чужас мустӧм гӧтырыслӧн пиыс, сэки эмбур юкигас сылы оз позь муса гӧтырыслӧн пиыслы сетны медводдза чужысьлысь пай.
Сылы быть колӧ шуны медводдза чужысьнас мустӧм гӧтырыслысь писӧ да аслас эмбурысь вичмӧдны сылы кыкпӧвста пай. Ӧд тайӧ пиыс — выныслӧн медводдза вотӧсыс, сылы вичмӧ медводдза чужысьлӧн ним.
Асныра да паныд кыпӧдчысь пиӧс, коді оз кывзы бать-мамыслысь ӧлӧдӧмсӧ да оз сибӧд налысь чирыштӧмсӧ, бать-мамыс мед кутасны да вайӧдасны карса дзиръя дорӧ юрнуӧдысьяс дінӧ да шуасны: “Миян пиным асныралӧ, этшсӧ оз тӧд да миянлысь оз кывзысь. Сӧмын сёйӧ-юӧ да кодалӧ”.
Карса олысьяс мед изъяласны сійӧс кувтӧдзыс.
Бырӧдӧй лёксӧ ас пӧвстсьыныд. Став Израиль войтыр мед кылас та йылысь да кутас повны.
Кор мыж вӧчӧмысь мортлы ковмас мынтысьны олӧмнас, и сійӧс ӧшӧдасны пу вылӧ, сылысь шойсӧ сэтчӧ энӧ кольӧй вой кежлас, а дзебӧй сійӧ жӧ луннас. Ен водзын ёрӧма быдӧнӧс, кодӧс ӧшӧдӧма [пу вылӧ]. Энӧ пежалӧй мунытӧ, мый Господь, тіян Енныд, сетас тіянлы.
Тэ кӧ аддзан кодлыськӧ вошӧм ӧшкӧс либӧ ыжӧс, эн чорзьӧд сьӧлӧмтӧ, вайӧд сійӧс кӧзяиныслы.
Но он кӧ тӧд, кодлӧн пемӧсыс, либӧ нуӧднысӧ ылӧдз, видзышт пемӧссӧ ас ордад. Кор кӧзяиныс кутас корсьны и локтас тэ дінӧ, сет сылы пемӧссӧ.
Тшӧтш тадзи вӧч, вошас кӧ кодлӧнкӧ осёлыс либӧ паськӧмыс. Кӧть кутшӧм воштӧмтор аддзан, эн мун бокиті.
Аддзан кӧ, мый вокыдлӧн осёлыс либӧ ӧшкыс усьӧма кок йывсьыс да куйлӧ туй бокын, эн мун бокиті, а отсав вокыдлы сувтӧдны пемӧссӧ.
Аньлы оз позь пасьтавны айловлысь паськӧмсӧ, а айловлы оз позь пасьтавны аньлысь паськӧмсӧ. Быдӧн, коді тадзи вӧчӧ, зывӧк Господьлы, тіян Енлы.
Туй вывті мунігӧн кӧ аддзан пу вылысь либӧ му вылысь лэбач поз, и позъяс кӧ эмӧсь лэбачпиян либӧ кольк чукӧр мамныскӧд, сэки мамсӧ пияныскӧд эн босьт.
Мамсӧ лэдз, а пиянсӧ верман босьтны. Тадзи кӧ вӧчан, тэныд бур лоӧ, и олӧмыд лоӧ кузь нэма.
Выль керка лэптігӧн керка вевт вылад гӧгӧрыс вӧч стен, медым некод оз усь тэнад керка вевт вывсянь, и тэ он ло мыжа вир кисьтӧмысь.
Виноград йӧрад эн пукты мӧд сикас быдмӧг. Пуктан кӧ, воӧм быдтассӧ ни виноград вотӧссӧ тэныд сёйны оз позь.
Ӧшкӧс да осёлӧс ӧтлаӧ сийӧсалӧмӧн эн гӧр.
Кык сикас шӧртысь — вурунысь да шабдіысь — сорлалӧмӧн кыӧм паськӧм эн новлы.
Вевттьӧдад, мый шлапнитан мыш вылад, нёльнан пельӧсас вӧч тугъяс».
«Морт кӧ гӧтрасяс, а гӧтырыскӧд узьӧм бӧрын кутас мустӧмтны да мыжавны сійӧс, паськӧдны лёк сёрни, мый сыкӧд узигӧн казялӧма, мый сійӧ абу нин ныв вӧлӧма, сэки гӧтырыслӧн бать-мамыс мед ваясны карса дзиръя дорӧ юрнуӧдысьяслы эскӧдантор — вирӧсь узьлан кӧлуй.
Батьыс мед шуас: “Ме сеті ассьым нылӧс тайӧ мортыс сайӧ, а ӧні сійӧ мустӧмтӧ нылӧс. Мыжалӧ, мый сійӧ эз нин вӧв ныв. 
Но менам эм эскӧдантор, мый сійӧ ныв на вӧлі”. 
Сэсся карса юрнуӧдысьяслы мед петкӧдлас вирӧсь кӧлуй.
Карса юрнуӧдысьяс мед мыждасны нывлысь верӧссӧ, тшӧктасны мынтыны сё сикель эзысь да сетасны эзысьсӧ нывлӧн батьыслы. Ӧд израильса ныв йылысь сійӧ мортыс паськӧдіс ылӧг сёрни.
Аньыс мед кольччас верӧс ордас, а верӧсыслы став олӧм чӧжыс эновтны сійӧс оз позь.
Но верӧсыс кӧ збыльсӧ висьталіс, мый ань эз вӧв ныв, сэки аньсӧ мед вайӧдасны бать керка ӧдзӧс дорас, и карса айулов мед изъяласны сійӧс кувтӧдзыс. Ӧд бать керкаын олігас сійӧ кырсалӧмнас шогмытӧмтор вӧчис Израильын.
Бырӧдӧй лёксӧ ас пӧвстсьыныд.
Айловӧс кӧ суасны мӧдлӧн гӧтыркӧд узигӧн, кыкнаннысӧ колӧ вины.
Бырӧдӧй Израильысь лёксӧ.
Карын кӧ айлов паныдалас нылӧс, коді кикутӧма мӧдкӧд, и узяс сыкӧд, тіянлы колӧ кыкнаннысӧ вайӧдны карса дзиръя дорӧ да кувтӧдзныс изъявны — нывсӧ сыысь, мый эз горзы, ӧд карын позьӧ вӧлі корны отсӧг, а айловсӧ сыысь, мый янӧдіс матыссаыслысь гӧтырсӧ.
Бырӧдӧй лёксӧ ас пӧвстсьыныд.
Видз-му вылын кӧ айлов паныдасяс нывкӧд, коді кикутӧма мӧдкӧд, да мырдӧналӧмӧн узяс сыкӧд, айловсӧ колӧ вины ӧтнассӧ. Нывлы нинӧм энӧ вӧчӧй, сійӧ эз вӧч мыжсӧ, мыйысь колӧ мынтысьны олӧмнас. Тайӧ лоӧ сійӧ жӧ, кор морт уськӧдчӧ мӧд морт вылӧ да виӧ сійӧс.
Ӧд айлов паныдасис кикутӧма нывкӧд видз-му вылын, и весиг кӧ ныв горзіс, отсӧг вылӧ некод эз вермы локнысӧ.
Айлов кӧ паныдасяс нывкӧд, коді абу кикутӧма, да мырдӧналӧмӧн узяс сыкӧд, и найӧс кыкнаннысӧ суасны, сэки айлов мед мынтысяс нывлӧн батьыслы ветымын сикель эзысь да босьтас нылӧс гӧтырӧ, ӧд янӧдіс сійӧс.
Став олӧм чӧжыс сылы гӧтырсӧ эновтны оз позь.
Оз позь босьтны гӧтырӧ батьлысь гӧтырсӧ либӧ узьлыны сыкӧд».
«Айловлӧн кӧ тобоньыс лязалӧма-доймӧма либӧ чильгансӧ вундӧма, сійӧ оз вермы лоны Господь войтырлӧн чукӧртчӧмын.
Господь войтырлӧн чукӧртчӧмын оз вермы лоны кырсалӧмсянь чужӧм пи, весиг дасӧд чужанвужйӧдз сысянь чужысьяс.
Аммон да моав войтыръясысь некод оз вермы лоны Господь войтырлӧн чукӧртчӧмын, весиг дасӧд чужанвужйӧдз насянь чужысьяс. Ӧд Египетысь петӧм бӧраныд, кор ті матыстчинныд на дінӧ, найӧ эз вочаавны тіянӧс ваӧн да няньӧн, а мӧдарӧ, медалісны месопотамияса Петор карысь Веорлысь Валаам писӧ, мед ёрны тіянӧс.
Но Господь, тіян Енныд, эз кӧсйы кывзыны Валаамӧс. Господь, тіян Енныд, радейтӧ тіянӧс, та вӧсна Валаамлысь ёрӧмсӧ бергӧдіс бурсиӧмӧ.
Аммон да Моав войтыръяслы некор энӧ вӧчӧй бурсӧ да энӧ отсасьӧй налы.
Но энӧ мустӧмтӧй эдомсаясӧс, ӧд найӧ тіянлы вокъяс.
Энӧ мустӧмтӧй египетсаясӧс, ӧд налӧн муын ті вӧлінныд локтысь йӧзӧн.
Налӧн пияныс коймӧд чужанвужсянь вермасны лоны Господь войтырлӧн чукӧртчӧмын».
«Кор петанныд тышӧ вӧрӧгныдлы паныд, видзчысьӧй быд пежсьыс.
Кодлӧн войнас петас кӧйдысыс, и сійӧ лоӧ пеж, сылы колӧ петны чомъяс сайӧ да кольччыны сэтчӧ. Рытнас сійӧ мед мыссяс, а шонді лэччигӧн вермас бӧр локны тышкайӧзлӧн сувтанінӧ.
Чомъяс сайӧ тіянлы колӧ лӧсьӧдны асмогасянін.
Шыпурт кындзи тіянлы колӧ новлӧдлыны тэльӧб*, медым чомъяс сайӧ ветліганыд верминныд кодйыны гуран да асмогасьӧм бӧрын тыртны сійӧс.
Ӧд Господь, тіян Енныд, ветлӧ тіян чомъяс костӧд, мездӧ тіянӧс да сетӧ тіян киӧ вӧрӧгнытӧ. Та вӧсна тіян сувтанінныд мед лоӧ вежа, медым Господь эз аддзы тіян пӧвстысь зывӧксӧ да эз вешйы тіян дінысь».
«Кесйӧгӧс, коді пышйис аслас ыджыдыс дорысь тіян дінӧ, ыджыдыслы энӧ сетӧй.
Сійӧ мед олас тіян пӧвстын кутшӧм карын кӧсъяс овны.
Энӧ дзескӧдӧй сійӧс.
Израильса аньяс да айулов мед оз кырсавны, тадзи вӧчӧмнас мед оз сины асьнысӧ мукӧд енъяслы.
Энӧ вайӧй асланыд Господь Енлӧн керкаӧ кырсалӧм помысь босьтӧм сьӧм, медым збыльмӧдны кыв сетӧмнытӧ, ӧд кырсалысьяс зывӧкӧсь Господьлы, тіян Енлы.
Кор ас войтырысь мортлы сетанныд уджйӧзӧн сьӧм, сёян-юан либӧ мукӧдтор, бӧрсӧ сылысь содтӧдӧн энӧ босьтӧй.
Йӧз муысь локтысьлысь верманныд содтӧдӧн босьтны, но ас войтыр мортлысь энӧ, медым Господь, тіян Енныд, бурсиас тіянӧс быд уджын сійӧ муас, кытчӧ ті мунанныд сійӧс босьтӧм могысь.
Аслад Господь Енлы кӧ кыв сетан, вӧч ньӧжмасьтӧг, ӧд Господь, тэнад Енмыд, виччысьӧ, мый тэ кыв сетӧмтӧ збыльмӧдан, а он кӧ, тэ мыжа лоан.
Но он кӧ кывтӧ сет, тэ он ло мыжа.
Вӧч, мый шуан да мый йылысь ас кӧсйӧм серти кыв сетан Господьлы, аслад Енлы.
Кор пыран матыссаыдлӧн виноград йӧрас, виноград вотӧссӧ верман пӧттӧдзыд сёйны, но аслад дозйӧ эн чукӧрт.
Кор локтан матыссаыдлӧн вундан му вылас, верман нетшкыны шепсӧ кинад, но чарлаӧн эн вунды».
«Верӧс кӧ гӧтрасьӧм бӧрас казялас гӧтырыслысь кутшӧмкӧ мисьтӧмтор да кутас мустӧмтны гӧтырсӧ, сійӧ вермас гижны торйӧдчан гижӧд, сетны гижӧдсӧ гӧтырыслы да вӧтлыны сійӧс керкасьыс. Аньыс кӧ верӧс керкасьыс мунӧм бӧрын петас мӧд сайӧ, и мӧдыс кӧ тшӧтш кутас мустӧмтны аньсӧ, гижас торйӧдчан гижӧд, сетас аньлы да вӧтлас сійӧс керкасьыс либӧ кулас, сэки воддза верӧсыс оз вермы сійӧс выльысь босьтны гӧтырӧ, ӧд аньыс лои пеж. Господьлы [тіян Енлы] тайӧ зывӧк. Мыж вӧчӧмнаныд энӧ пежалӧй мусӧ, мый Господь, тіян Енныд, сетас тіянлы.
Айловлы гӧтрасьӧм бӧрас оз ков дзик пыр мунны тыш вылӧ либӧ босьтны кывкутӧм мыйкӧ вӧсна.
Во чӧж сійӧ мед олас гортас да гӧтырыслы ваяс нимкодьлун».
«Уджйӧзӧн сетӧмысь оз позь босьтны мортыслысь изки, ӧд изки помысь сійӧ перйӧ аслыс кынӧмпӧт, и изки босьтӧмыс лоӧ сылысь олӧм босьтӧм кодь.
Коді гусялас мортӧс аслас Израиль войтыр пӧвстысь да видзас сійӧс кесйӧг туйӧ либӧ вузалас, сійӧс колӧ вины.
Бырӧдӧй лёксӧ ас пӧвстсьыныд.
Проказа висьӧм дырйи ставсӧ вӧчӧй [Индӧд серти], кыдзи велӧдасны тіянӧс поп-левитъяс.
Ставсӧ вӧчӧй сідзи, кыдзи ме тшӧкті налы.
Энӧ вунӧдӧй, мый вӧчис Господь, тіян Енныд, Мирьямлы туйын Египетысь петӧм бӧраныд.
Кор матыссаыдлы мыйкӧ удждан, эн пыр сылӧн керкаас, медым уджйӧзӧн сетӧмсьыд мыйкӧ босьтны сылысь. Виччысь ывлаас, медым сійӧ ачыс петкӧдас, мый вермас сетны уджйӧз босьтӧмсьыс.
Сійӧ кӧ гӧль, узьны водтӧдзыд бӧр сет сылысь босьтӧмторсӧ.
Шонді пуксьытӧдзыс бӧр сет сылы паськӧмсӧ, медым аслас паськӧмӧн водас узьнысӧ да бурсиас тэнӧ. Сэки тэ лоан аслад Господь Ен водзын веськыдӧн.
Эн дзескӧд тэ дінӧ уджавны медасьӧм гӧльӧс да коньӧрӧс, аслад войтырысь-ӧ сійӧ либӧ йӧз муысь локтысь.
Вештысь сылы шонді пуксьытӧдзыс сійӧ жӧ лунӧ, ӧд гӧльлун вӧснаыс сійӧ виччысьӧ ассьыс удждонсӧ.
Он кӧ вӧч тадзи, сійӧ шыасяс Господь дінӧ, норасяс тэ вылӧ, и тэ мыжа лоан.
Пиыслӧн мыж вӧсна батьсӧ оз ков вины, и батьыслӧн мыж вӧсна писӧ оз ков вины.
Быдӧнӧс аслас мыж вӧсна мед лоӧ мыждӧма кулӧм вылӧ.
Йӧз муысь локтысьлысь да батьтӧм-мамтӧмлысь [да дӧвалысь] могъяссӧ видлалігӧн лоӧй веськыдӧсь. Дӧвалысь паськӧмсӧ уджйӧзӧн сетӧмсьыныд энӧ босьтӧй.
Энӧ вунӧдӧй, мый ті асьныд вӧлінныд кесйӧг туйынӧсь Египетын, и Господь, тіян Енныд, мездіс тіянӧс сэтысь. Та вӧсна тшӧкта тіянлы тадзи вӧчны.
Няньтӧ вундіганыд кӧ му вылӧ вунӧданныд кольта, энӧ бергӧдчӧй сыла.
Мед сійӧ вичмас йӧз муысь локтысьлы, [гӧльлы,] батьтӧм-мамтӧмлы либӧ дӧвалы. Сэки Господь, тіян Енныд, бурсиас тіянӧс быд уджын.
Олив путӧ пыркӧдӧм бӧрын мый коляс пу вылас, энӧ чукӧртӧй. Мед сійӧ вичмас йӧз муысь локтысьлы, батьтӧм-мамтӧмлы да дӧвалы. 
[Энӧ вунӧдӧй, мый ті асьныд вӧлінныд кесйӧг туйынӧсь Египетын. Та вӧсна тшӧкта тіянлы тадзи вӧчны.]
Виноградтӧ чукӧртӧм бӧрын кольӧм вотӧсыс мед вичмас йӧз муысь локтысьлы, батьтӧм-мамтӧмлы да дӧвалы.
Энӧ вунӧдӧй, мый ті асьныд вӧлінныд кесйӧг туйынӧсь Египетын. Та вӧсна тшӧкта тіянлы тадзи вӧчны.
Локтасны кӧ ёрд водзӧ кык вензьысь, сэні мед веськыда мыждасны. Мыжтӧмӧс мед шуасны мыжтӧмӧн, а мыжаӧс мед мыждасны.
Мыжаӧс кӧ шуӧма нӧйтны, ёрдысь мед тшӧктас сылы водны му вылӧ. Ёрдысь водзын сылы мед кучкасны сы мындаысь, мыйта колӧ кучкыны мыж сертиыс.
Кучкыны позьӧ нелямынысь, но унджыкысьсӧ оз позь, медым чорыда кучкалӧмӧн воктӧ эз ло вывті ёна янӧдӧма.
Вартысь ӧшкӧс сёйӧмысь эн кут.
Ӧтувъя овмӧс нуӧдысь вокъяс пӧвстысь кӧ кулас ӧти вокыс, кодлӧн абу пиыс, сылӧн гӧтырлы бокыса морт сайӧ мунны оз позь. Сійӧс мед босьтас гӧтырӧ кулӧм мортлӧн вокыс. Медводдза писӧ, кодӧс тайӧ гӧтырыс чужтас, мед лыддясны кулӧм воклӧн пиӧн, медым сылӧн нимыс эз быр Израиль войтыр пӧвстысь.
Но кулӧм мортлӧн вокыс кӧ оз кӧсйы босьтны дӧваӧс гӧтырӧ, дӧваыс мед локтас карса дзиръя дорӧ да шуас юрнуӧдысьяслы, мый кулӧм верӧсыслӧн вокыс оз кӧсйы босьтны сійӧс гӧтырӧ, медым видзны вокыслысь нимсӧ Израильын.
Карса юрнуӧдысьяс мед корасны сійӧ мортсӧ да сёрнитасны сыкӧд. Но мортыс кӧ шуас, мый оз босьт вокыслысь дӧвасӧ гӧтырӧ, дӧваыс мед матыстчас сы дінӧ да юрнуӧдысьяс дырйи пӧрччӧдас сылысь ӧтар коксьыс кӧмсӧ, сьӧлыштас чужӧмас да шуас: “Тадзи вӧчӧны [израильса] мортлы, коді оз кӧсйы нюжӧдны вокыслысь рӧдсӧ”.
Израильын сылысь рӧдсӧ кутасны нимтыны кӧмтӧм рӧдӧн.
Кык айловлӧн тышкасигӧн кӧ локтас ӧтиыслӧн гӧтырыс да верӧссӧ дорйигас кутчысяс мӧд айловлӧн коквожкостас, тайӧ гӧтырыслысь керыштӧй кисӧ. Энӧ нормӧй сьӧлӧмнаныд сы дінӧ.
Тіян нопйын мед оз ло кык сикас гира, сьӧкыдджык да кокньыдджык.
Тіян керкаын мед оз ло кык сикас ефа доз, ыджыдджык да ичӧтджык.
Гираныд да ефа дозныд мед лоӧны стӧчӧсь да веськыдӧсь, медым олӧмныд вӧлі кузь нэма сійӧ муас, мый Господь, тіян Енныд, сетас тіянлы.
Господьлы, тіян Енлы, зывӧк быдӧн, коді тадзи ылӧдчӧ.
Энӧ вунӧдӧй, мый тіянлы вӧчис амалик войтыр, кор ті петінныд Египетысь.
Найӧ эз повны Енмысь. Ті вӧлінныд мудзӧмаӧсь да вынтӧмӧсь, но тіянӧс паныдалігӧн найӧ уськӧдчисны тіян вылӧ бӧрсяньныд да виалісны бӧрӧ кольччӧмаясӧс.
Та вӧсна вуштӧй енэж улысь амалик войтырлысь нимсӧ, кор Господь, тіян Енныд, сетас тіянлы лӧнь олӧм да быд боксянь видзас тіянӧс вӧрӧгъясысь сійӧ муас, мый Господь, тіян Енныд, сетас тіянлы.
Энӧ вунӧдӧй тайӧс!»
«Кор ті локтанныд сійӧ муас, мый Господь, тіян Енныд, сетас тіянлы, босьтанныд сійӧс аслыныд да овмӧдчанныд сэтчӧ, сэки став быдтасысь чуктӧдӧй медводдза босьтӧмторнытӧ. Пукты медводдза босьтӧмтортӧ кудйӧ да мун сійӧ местаас, мый Господь, тэнад Енмыд, бӧръяс Аслас нимлы оланінӧн.
Матыстчы сійӧ кадас кесъялысь поп дінӧ да шу: “Талун ме висьтася тэнад Господь Ен водзын, мый ме локті тайӧ муас, кодӧс Господь батьяснымлы кыв сетӧмӧн кӧсйысис сетны миянлы”.
Поп мед босьтас тэнад киысь кудсӧ да пуктас сійӧс тэнад Господь Енлӧн висьпуктанін водзӧ.
И тэ аслад Господь Ен водзын шу: “Батьӧй вӧлі арамса ветлысь-мунысь. Сійӧ локтіс Египетӧ да овмӧдчис сэтчӧ этшаник йӧзкӧд. Сысянь чужис уна лыда, ыджыд да ён войтыр.
Египетсаяс нартитісны да дзескӧдісны миянӧс, тшӧктісны миянлы вӧчны сьӧкыд уджъяс.
Но ми шыасим отсӧгла Господь дінӧ, миян батьяслӧн Ен дінӧ, и Господь кыліс миянӧс. Сійӧ аддзис миянлысь шогнымӧс, мырсьӧмнымӧс да миянӧс дзескӧдӧмсӧ.
Господь петкӧдіс миянӧс Египетысь [Аслас ыджыд вынйӧрнас,] Ассьыс вына кисӧ да ён сойсӧ лэптӧмӧн, чорыда повзьӧдлӧмӧн, шензьӧданаторъяс да индысьпасъяс вӧчӧмӧн. Сійӧ вайӧдіс миянӧс татчӧ, сетіс миянлы тайӧ мусӧ, кӧні визувтӧ йӧв да ма.
Со ме вайи медводдза быдтас тайӧ муысь, мый Тэ, Господьӧй, сетін меным [муысь, кӧні визувтӧ йӧв да ма]”. 
Сэсся вайӧмтортӧ пукты аслад Господь Ен водзӧ да копыртчы Сы водзӧ. Нимкодясь став бурторнас, мый сетіс тэныд да тэнад котырыдлы Господь, тэнад Енмыд. Левитъяс да йӧз муысь локтысьяс тэкӧд ӧтвылысь мед нимкодясясны.
Быд коймӧд вонас торйӧд мувыв быдтассьыд дасӧд юкӧнсӧ да сет левитлы, йӧз муысь локтысьлы, батьтӧм-мамтӧмлы да дӧвалы, медым найӧ тіян кар-сиктъясын пӧттӧдзныс сёясны. Тайӧс вӧчӧм бӧрын висьтав Господьлы, аслад Енлы: “Ме нуи аслам керкаысь вежатор да сеті левитлы, йӧз муысь локтысьлы, батьтӧм-мамтӧмлы да дӧвалы Тэнад тшӧктӧмыд серти. Ме эг вунӧд да эг торк Тэнсьыд тшӧктӧмъястӧ.
Бӧрдан лунъясӧ ме эг сёй вежаторсӧ, эг инмӧдчыв сы дінӧ, кор ачым вӧлі пеж, да эг вайлы кулӧмаяслы.
Ме кывзыси Господьлысь, аслам Енлысь. Вӧчи ставсӧ Тэнад тшӧктӧм серти.
Видзӧдлы Аслад вежа оланінсянь, енэжсяньыд, да бурси Ассьыд Израиль войтыртӧ да тайӧ мусӧ, кӧні визувтӧ йӧв да ма, мусӧ, мый Тэ сетін миянлы, кыдзи кыв сетӧмӧн кӧсйысин миян батьяслы”.
Талун Господь, тіян Енныд, тшӧктӧ тіянлы овны тайӧ индӧд-тшӧктӧмыс серти. Став сьӧлӧмнаныд да став олӧмнаныд кутчысьӧй наӧ.
Талун ті висьталінныд, мый Господь лоӧ тіян Енмӧн, мый ті кутанныд ветлыны Сылӧн туйясӧд, овны Сылӧн индӧд-тшӧктӧмъяс серти да кывзысьны Сылысь.
Талун Господь юӧртіс тіянлы, мый Сылӧн кӧсйысьӧм серти ті лоанныд Сылӧн войтырӧн, кутанныд кӧ овны став Сылӧн тшӧктӧмыс серти. Сійӧ вӧчис войтыръясӧс, но наысь вылӧ кӧсйысис кыпӧдны тіянӧс, медым ті ошкинныд, пыдди пуктінныд да нимӧдінныд Сійӧс. Сэки ті лоанныд асланыд Господь Енлӧн вежа войтырӧн, кыдзи Сійӧ кӧсйысис».
Мӧисей израильса юрнуӧдысьяскӧд тшӧктіс войтырыслы: «Олӧй став тшӧктӧмыс серти, мый талун висьтала тіянлы.
Йӧрдан ю сайӧ вуджӧм бӧрын, кор пыранныд сійӧ муас, мый Господь, тіян Енныд, сетас тіянлы, сувтӧдӧй сэні аслыныд ыджыд изъяс да мавтӧй найӧс еджыд коризӧн.
Тайӧ изъяс вылас гижӧй Индӧд кывъяссӧ, кор вуджанныд Йӧрдан ю сайӧ да пыранныд сійӧ муас, мый Господь, тіян Енныд, сетас тіянлы, муас, кӧні визувтӧ йӧв да ма. Тайӧ мусӧ тіянлы кӧсйысис сетны Господь, тіян батьяслӧн Ен.
Йӧрдан ю сайӧ вуджӧм бӧраныд сувтӧдӧй тайӧ изъяссӧ менам тшӧктӧм серти Эвал керӧс вылӧ да мавтӧй найӧс коризӧн.
Сувтӧдӧй сэні Господьлы, асланыд Енлы, изъясысь висьпуктанін.
Вӧчӧй сійӧс керавтӧм изъясысь. Висьпуктанінсӧ вӧчӧм бӧрын вайӧй сэні сотан висьяс Господьлы, асланыд Енлы. Сэні вайӧй тшӧтш бурасян висьнытӧ, сёйӧй сійӧс, [пӧткӧдчӧй да] нимкодясьӧй Господь Енныд водзын.
Индӧд кывъяссӧ гижӧй изъяс вылас стӧча да ясыда».
Мӧисей да поп-левитъяс висьталісны став Израиль войтырлы: «Кывзы, Израиль! Чӧв олӧй! Талун ті лоинныд Господь Енлӧн войтырӧн.
Кывзысьӧй Господьлысь, асланыд Енлысь, олӧй Сылӧн став индӧд-тшӧктӧмыс серти, мый талун висьтала тіянлы».
Сійӧ жӧ лунӧ Мӧисей тшӧктіс войтырыслы:
«Йӧрдан ю сайӧ вуджӧм бӧраныд Симеон, Левий, Иуда, Иссакар, Ӧсип да Венямин чужанкотыръяс мед сувтасны Гаризим керӧс вылӧ да бурсиасны Израиль войтырӧс.
А Рувим, Гад, Асир, Завулон, Дан да Неффалим чужанкотыръяс мед сувтасны Эвал керӧс вылӧ да ёрасны.
Левитъяс мед гораа юӧртасны Израиль войтырлы:
”Ёрӧм улӧ веськалӧ быдӧн, коді сывдӧмӧн либӧ мӧд ногӧн вӧчӧ бӧлбанӧс — Господьлы зывӧкторйӧс — да гусяинын юрбитӧ сылы”. 
И став войтырыс мед шуас: “Мед лоӧ тадзи!”
”Ёрӧм улӧ веськалӧ быдӧн, коді увтыртӧ батьсӧ либӧ мамсӧ”. 
И став войтырыс мед шуас: “Мед лоӧ тадзи!”
”Ёрӧм улӧ веськалӧ быдӧн, коді орчча му вылӧ вештӧ ассьыс мудор пассӧ”.
И став войтырыс мед шуас: “Мед лоӧ тадзи!”
”Ёрӧм улӧ веськалӧ быдӧн, коді синтӧмӧс туй вылысь кежӧдӧ”. 
И став войтырыс мед шуас: “Мед лоӧ тадзи!”
”Ёрӧм улӧ веськалӧ быдӧн, коді йӧз муысь локтысьлысь, батьтӧм-мамтӧмлысь да дӧвалысь могъяссӧ оз веськыда видлав”. 
И став войтырыс мед шуас: “Мед лоӧ тадзи!”
”Ёрӧм улӧ веськалӧ быдӧн, коді узьӧ батьыслӧн гӧтырыскӧд, ӧд тадзи вӧчӧмнас янӧдӧ батьсӧ”. 
И став войтырыс мед шуас: “Мед лоӧ тадзи!”
”Ёрӧм улӧ веськалӧ быдӧн, коді узьӧ пемӧскӧд”. 
И став войтырыс мед шуас: “Мед лоӧ тадзи!”
”Ёрӧм улӧ веськалӧ быдӧн, коді узьӧ чойыскӧд, батьыслӧн либӧ мамыслӧн нылыскӧд”. 
И став войтырыс мед шуас: “Мед лоӧ тадзи!”
”Ёрӧм улӧ веськалӧ быдӧн, коді узьӧ гӧтырыслӧн мамыскӧд”. 
И став войтырыс мед шуас: “Мед лоӧ тадзи!” 
[”Ёрӧм улӧ веськалӧ быдӧн, коді узьӧ гӧтырыслӧн чойыскӧд”. 
И став войтырыс мед шуас: “Мед лоӧ тадзи!”]
”Ёрӧм улӧ веськалӧ быдӧн, коді гусьӧн виӧ матыссасӧ”. 
И став войтырыс мед шуас: “Мед лоӧ тадзи!”
”Ёрӧм улӧ веськалӧ быдӧн, коді босьтӧ козин, медым вины мыжтӧмӧс”. 
И став войтырыс мед шуас: “Мед лоӧ тадзи!”
”Ёрӧм улӧ веськалӧ быдӧн, коді оз ов тайӧ Индӧдыс серти”. 
И став войтырыс мед шуас: “Мед лоӧ тадзи!”»
«[Йӧрдан ю сайӧ, Господьӧн, тіян Енмӧн, сетӧм муӧ вуджӧм бӧрын] ті кӧ кутанныд кывзысьны Господьлысь, асланыд Енлысь, да овны Сылӧн став тшӧктӧмыс серти, мый талун висьтала тіянлы, сэки Господь, тіян Енныд, кыпӧдас тіянӧс мувывса став мукӧд войтырысь медвылӧ.
Став тайӧ бурсиӧмыс локтас тіян вылӧ, кутанныд кӧ кывзысьны Господьлысь, асланыд Енлысь.
Бурсиӧма тэнӧ карын да видз-му вылын.
Бурсиӧма тэнсьыд ныв-питӧ, мувыв быдтас-вотӧстӧ, мӧсъясыдлысь куканьяссӧ да ыжъясыдлысь баляяссӧ.
Бурсиӧма тэнсьыд нянь йӧртӧдтӧ да нянь шомӧстӧ.
Бурсиӧма тэнӧ гортад локтігӧн и гортсьыд мунігӧн.
Господь сетас тіянлы вермыны вӧрӧгнытӧ, кодъяс сувтасны тіянлы паныд.
Найӧ локтасны ӧти туйӧд, а пышъясны тіянысь сизимлаӧд.
Господь бурсиас тіянӧс да тіянлысь нянь йӧртӧднытӧ.
Господь, тіян Енныд, бурсиас тіянӧс быд уджын сійӧ муас, мый сетас тіянлы.
Господь [тіян Енныд] вӧчас тіянӧс Аслас вежа войтырӧн, ті кӧ кутанныд овны асланыд Господь Енлӧн тшӧктӧмъяс серти да ветлыны Сылӧн туйясӧд. Ӧд та йылысь Сійӧ кыв сетіс тіянлы [да батьясныдлы].
Мувывса войтыръяс аддзасны, мый ті Господьлӧн [тіян Енлӧн] войтыр, да кутасны повны тіянысь.
Господь [тіян Енныд] быдторйын озырмӧдас тіянӧс. Тіян лоӧ уна ныв-пи, ыж-мӧс да мувыв быдтас-вотӧс сійӧ муас, мый Господь батьясныдлы кыв сетӧмӧн кӧсйысис сетны тіянлы.
Господь восьтас тіянлы Ассьыс енэжвывса озырлун видзанінсӧ, медым ас кадӧ мӧдӧдны тіян му вылӧ зэр да бурсины тіянлысь став уджнытӧ. Ті верманныд уна войтырлы уджйӧзӧн сетны, но водзӧсӧн онӧ кутӧй босьтны. [Ті кутанныд ыджыдавны войтыръяс вылын, но тіян вылын найӧ оз кутны ыджыдавны.]
Господь [тіян Енныд] вӧчас тіянӧс юрӧн, а оз бӧжӧн. Тіянӧс вылӧ кыпӧдасны, а оз увтыртны, кутанныд кӧ кывзысьны Господьлысь, асланыд Енлысь, да овны Сылӧн тшӧктӧмъяс серти, мый талун висьтала тіянлы, да онӧ кӧ кежӧй веськыдвылӧ ни шуйгавылӧ тайӧ тшӧктӧмъяссьыс, мый талун висьтала тіянлы. Энӧ юрбитӧй-кесъялӧй мукӧд енъяслы».
«Став тайӧ ёрӧмыс локтас тіян вылӧ, онӧ кӧ кутӧй кывзысьны Господьлысь, асланыд Енлысь, да овны Сылӧн став индӧд-тшӧктӧмыс серти, мый талун висьтала тіянлы.
Ёрӧма тэнӧ карын да видз-му вылын.
Ёрӧма тэнсьыд нянь йӧртӧдтӧ да нянь шомӧстӧ.
Ёрӧма тэнсьыд ныв-питӧ, мувыв быдтас-вотӧстӧ, мӧсъясыдлысь куканьяссӧ да ыжъясыдлысь баляяссӧ.
Ёрӧма тэнӧ гортад локтігӧн и гортсьыд мунігӧн.
Господь мӧдӧдас тіян вылӧ ёрӧм, шызьӧм да шӧйӧвошӧм быдторйын, кытчӧдз тіянӧс оз ло бырӧдӧма. Ті куланныд лёк вӧчӧмныд вӧсна, ӧд эновтінныд Господьӧс.
Господь мӧдӧдас тіян вылӧ пӧрӧс висьӧм, и ті быранныд сійӧ му вывсьыс, кытчӧ ті мунанныд сійӧс босьтӧм могысь.
Господь мӧдӧдас тіян вылӧ вир-яй косьмӧм, биа висьӧм да кынтан висьӧм. Сійӧ мӧдӧдас кос жар, сотысь тӧвруӧн да висьӧмӧн бырӧдас тіян видз-му вылысь няньнытӧ. Став тайӧ шогыс суас тіянӧс, кытчӧдз онӧ кулӧй-бырӧй.
Енэжыс юр весьтаныд лоӧ ыргӧн вевт кодь, муыс кок уланыд — кӧрт кодь.
Зэр пыдди Господь ыстас тіян му вылӧ бус. Енэжсянь тіян вылӧ киссяс бус, [кытчӧдз Господь оз бырӧд тіянӧс, и] кытчӧдз ті онӧ кулӧй.
Господь сетас вӧрӧгныдлы вермыны тіянӧс.
Налы паныд ті мунанныд ӧти туйӧд, а пышъянныд наысь сизимлаӧд. Став войтыръяс повзясны сыысь, мый лоӧ тіянкӧд.
Шойяснытӧ кутасны сёйны кутшъяс да зверъяс, и некод найӧс оз вӧтлав.
Египетсаяс вылӧ моз Господь мӧдӧдас тіян вылӧ орзьӧм мыльяс, пыкӧс, лӧмӧссьӧм да лудӧм, и наысь ті онӧ бурдӧй.
Господь синтӧммӧдас да йӧймӧдас-дурмӧдас тіянӧс.
Луншӧрнас ті кутанныд ветлӧдлыны кималасӧн, кыдзи синтӧм ветлӧдлӧ пемыдас. Тіян нинӧм оз кут артмыны. Лунысь-лун тіянӧс кутасны увтыртны да дзескӧдны, и тіянӧс некод оз дорйы.
Тэ кикутан, но гӧтырпуыдкӧд мӧд узяс.
Лэптан керка, но сэтчӧ он овмӧдчы.
Виноград пуктан, но вотӧссӧ сэтысь он босьт.
Тэнсьыд ӧштӧ син водзад начкасны, но яйсӧ он сёй.
Осёлтӧ мырддясны да бӧрсӧ оз сетны.
Ыжъястӧ вӧрӧгыд босьтас, но тэнӧ некод оз дорйы.
Ныв-пиыд шедас мукӧд войтырлӧн киӧ, и тэ нинӧм он вермы вӧчны. Найӧс лунысь-лун виччысьӧмысь синмыд чусмас.
Тӧдтӧм войтыр кутас сёйны тэнсьыд мувыв быдтас-вотӧстӧ, сёяс ставсӧ, мый чукӧртін.
Став олӧм чӧжныд ті лоанныд дзескӧдӧм да нартитӧм улынӧсь.
Ставсӧ тайӧс аддзӧмысь воштанныд вежӧрнытӧ.
Орзьӧм мыльяс петаласны пидзӧс да кокчӧр выланыд, юр пыдӧссяньныд кок чунь йылӧдзныд ті мылльӧссянныд. Татшӧм висьӧмӧн Господь дойдас тіянӧс, и ті онӧ бурдӧй.
Тіянӧс да ӧксынытӧ, кодӧс пуктанныд юравны, Господь нуӧдас войтыр дінӧ, кодӧс ті ни тіян батьясныд онӧ тӧдӧй. Сэні ті понданныд кесъявны мукӧд енъяслы, пуысь да изйысь вӧчӧмторъяслы.
Став войтыръяс, кодъяс пӧвстӧ Господь [Ен] вӧтлас тіянӧс, повзясны сыысь, мый лоӧ тіянкӧд. Найӧ лӧсьӧдласны тіян йылысь шусьӧгъяс, серамвыв лэптасны тіянӧс.
Ті уна кӧдзанныд, но этша вунданныд, ӧд пуктаснытӧ сёяс саранча.
Пуктанныд да быдтанныд виноград пуяс, но винасӧ онӧ юӧй, весиг вотӧссӧ онӧ чукӧртӧй, ӧд винограднытӧ номыр сёяс.
Став му пасьтала олив пуясныд кутасны быдмыны, но выйнас ті онӧ мавтчӧй, ӧд вотӧсыс гылалас.
Тіян чужасны ныв-пи, но тіян ордын оз кутны овны, ӧд найӧс нуӧдасны пленӧ.
Пуяснытӧ да мувыв быдтас-вотӧснытӧ сёяс саранча.
Йӧз муысь локтысьяс пондасны ыджыдавны тіян вылын, а ті пыр улӧджык и улӧджык усянныд.
Найӧ кутасны тіянлы уджйӧзӧн сетны, а ті налы онӧ вермӧй.
Найӧ лоӧны юрӧн, а ті лоанныд бӧжӧн.
Став тайӧ ёрӧмыс локтас тіян вылӧ да вӧтчас тіян бӧрся, кытчӧдз оз ло бырӧдӧма тіянӧс, ӧд ті энӧ кывзысьӧй Господьлысь, асланыд Енлысь, да энӧ олӧй Сылӧн индӧд-тшӧктӧмъяс серти.
Тайӧ ёрӧмыс лоӧ индысьпасӧн тіян пӧвстын да тіянсянь чужысьяс пӧвстын нэмъяс чӧж.
Кор тіян ставыс вӧлі тырмана, ті энӧ кесъялӧй Господьлы, асланыд Енлы, нимкодьпырысь да гажӧдчӧмӧн. Та вӧсна ті кутанныд кесъявны Господьӧн [тіян Енмӧн] ыстӧм вӧрӧгныдлы тшыгъяліганыд да горш косьмиганыд. Ті пасьтӧг колянныд, тіян нинӧм оз ло.
Господь сийӧсалас тіянӧс кӧрт сийӧсӧн, кытчӧдз оз бырӧд тіянӧс.
Ылісянь, му помсянь Господь вайӧдас войтырӧс, кодлысь кывсӧ ті онӧ гӧгӧрвоӧй. Кутшъяс моз найӧ уськӧдчасны тіян вылӧ. Тайӧ яндысьтӧм войтырыс оз пыдди пукты пӧрысьясӧс да оз жалит томуловӧс.
Найӧ сёясны ыж-мӧснытӧ да мувыв быдтас-вотӧснытӧ, кытчӧдз оз бырӧдны тіянӧс. Найӧ оз кольны тіянлы нянь, вина ни олив вый, куканьясӧс, баляясӧс ни кӧзапиянӧс. Тадзи найӧ бырӧдасны тіянӧс.
Сійӧ муас, мый Господь, тіян Енныд, сетас тіянлы, найӧ кытшаласны тіянлысь каръяснытӧ да кисьтасны джуджыд ён стенъяснытӧ, мый вылӧ ті лачанытӧ кутанныд.
Кор вӧрӧгныд дзескӧдас тіянӧс да кытшалас тіянлысь каръяснытӧ, ті кутанныд сёйны Господьӧн, тіян Енмӧн, тіянлы сетӧм ныв-пиныдлысь яйсӧ.
Весиг небыд сьӧлӧма да лелькуйтӧм айлов кутас лӧгпырысь видзӧдны аслас вокыс вылӧ, аслас гӧтырыс вылӧ да ныв-пиыс вылӧ, кодъяс лоӧны ловъяӧсь на. Сійӧ оз сет налы кулӧм ныв-пиыслысь яйсӧ, но ачыс сёяс, ӧд мӧд сёяныс сылӧн оз ло, кор вӧрӧгныд дзескӧдас тіянӧс да кытшалас тіянлысь каръяснытӧ.
Весиг небыд сьӧлӧма да лелькуйтӧм ань, коді кокнас му вылӧ эз тувччыв, кутас лӧгпырысь видзӧдны аслас верӧсыс вылӧ да ныв-пиыс вылӧ, оз сет налы кага чужтӧм бӧрся няйтсӧ да пузчужӧм кагасӧ, ӧд сійӧ тшыгъялігас кутас ачыс гусьӧн сёйны найӧс, кор вӧрӧгныд дзескӧдас тіянӧс да кытшалас тіянлысь каръяснытӧ.
Онӧ кӧ кутӧй овны тайӧ Индӧдлӧн став кывъясыс серти, мый гижӧма тайӧ небӧгас, да онӧ кутӧй повны асланыд Господь Енлӧн пыдди пуктана да повзьӧдана нимысь, сэки Господь дойдас тіянӧс да тіянсянь чужысьясӧс дугдывлытӧм бырӧданторъясӧн да бурдлытӧм лёк висьӧмъясӧн.
Сійӧ мӧдӧдас тіян вылӧ египетса став [лёк] висьӧмъяссӧ, мыйысь ті полінныд, и найӧ ляксясны тіян бердӧ.
Кытчӧдз онӧ бырӧй, Господь кутас мӧдӧдны тіян вылӧ быдсяма висьӧмсӧ да шогсӧ, [мый гижӧма и] мый весиг абу гижӧма тайӧ Индӧд небӧгас.
Ті вӧлінныд енэжвыв кодзувъяс мында, но этшаӧн колянныд, ӧд ті энӧ кывзысьӧй Господьлысь, асланыд Енлысь.
Кыдзи Господь нимкодясис, кор вӧчис тіянлы бурсӧ да содтіс тіянӧс, сідзи жӧ Сійӧ кутас нимкодясьны, кор бырӧдас тіянӧс.
Вужнаныд тіянӧс лоӧ нетшыштӧма сійӧ мусьыс, кытчӧ ті мунанныд сійӧс босьтӧм могысь. Господь [тіян Енныд] разӧдас тіянӧс мукӧд войтыръяс пӧвстӧ, му ӧтар помсянь мӧдар помӧдзыс. Сэні ті кутанныд юрбитны пуысь да изйысь вӧчӧмторъяслы, мукӧд енъяслы, кодъясӧс ті ни тіян батьясныд энӧ тӧдлӧй.
Тайӧ войтыръяс пӧвстын тіянлы оз ло лӧньлуныс, оз ло кокныдлы шойччӧгыс. Господь вӧчас сідз, мый сьӧлӧмныд пондас тіравны, синныд пемдас и ловныд нюкыртчас.
Кулӧмыс лоӧ матын, ті лун и вой кутанныд тіравны олӧмныд вӧсна, ӧд онӧ тӧдӧй, ловйӧн-ӧ колянныд.
Сьӧлӧмныд тырас полӧмӧн сыысь, мый аддзанныд. Асывнас кутанныд шуны, ӧдйӧджык пӧ мед рытыс воас, а рытнас — ӧдйӧджык пӧ мед асылыс воас.
Господь бӧр бергӧдас тіянӧс Египетӧ корабльяс вылын сійӧ туйӧдыс, мый йылысь ме шулі тіянлы, мый некор сэсся онӧ аддзылӧй сійӧс.
Сэні ті ставныд, айулов и аньяс, кутанныд вӧзйыны вӧрӧглы, медым босьтас тіянӧс кесйӧг туйӧ, но некод оз ньӧб тіянӧс».
Моав муын Господь тшӧктіс Мӧисейлы содтыны тайӧ кывъяссӧ сійӧ йитӧд дорас, мый Господь кӧрталіс Израиль пиянкӧд Хорив керӧсын.
Мӧисей чукӧртіс став Израиль войтырсӧ да шуис налы: «Ті асьныд аддзылінныд, мый Господь вӧчис Египетын фараонлы, сылӧн кесйӧгъяслы да став муыслы.
Асланыд синмӧн ті аддзылінныд чорыда мыждӧмсӧ, ыджыд шензьӧданаторъяссӧ да индысьпасъяссӧ [Сылысь вына кисӧ да ён сойсӧ].
Но талунӧдз Господь [Ен] эз сет тіянлы гӧгӧрвоысь сьӧлӧм, аддзысь син да кылысь пель.
Нелямын во чӧж Сійӧ нуӧдіс тіянӧс овтӧминӧд, и тіян паськӧмныд эз важмыв да кӧмныд эз киссьыв.
Сэні ті энӧ сёйӧй нянь, энӧ юӧй вина-сур. Тадзи вӧлі, медым ті тӧдінныд, мый Господь — тіян Ен.
Кор ми локтім татчӧ, хешбонса Сигон ӧксы да васанса Ог ӧксы уськӧдчисны миян вылӧ, но ми пасьвартім найӧс.
Босьтім налысь мусӧ да сетім сійӧс Рувим да Гад чужанкотыръяслы да Манассейлӧн джын чужанкотырлы.
Олӧй тайӧ йитӧдлӧн кывъясыс серти, сэки тіян ставыс артмас.
Талун ті ставныд сулаланныд Господь Енныд водзын, ті — чужанкотыръяслӧн юралысьяс, юрнуӧдысьяс, [ёрдысьяс,] веськӧдлысьяс, став израильса айулов, тіян челядьныд, гӧтыръясныд, йӧз муысь локтысьяс, кодъяс тіянлы пес кералӧны да ва ваялӧны. Ті локтінныд татчӧ, медым Господь, тіян Енныд, кыв сетӧмӧн кӧрталас тіянкӧд йитӧд. Талун Сійӧ шуӧ тіянӧс Аслас войтырӧн, а Асьсӧ шуӧ тіян Енмӧн, кыдзи Сійӧ висьталіс тіянлы да мый йылысь кыв сетліс Ӧвраам, Исаак да Яков батьясныдлы.
Тайӧ йитӧдсӧ, мый вынсьӧдӧма кыв сетӧмӧн, Енмыс кӧрталӧ оз сӧмын тіянкӧд, кодъяс талун сулаланныд Господь Енным водзын, а тшӧтш миян бӧрся чужысьяскӧд.
Ті тӧданныд, мый ми олім Египетын да мунім войтыръяслӧн муясӧд. Ті аддзылінныд налысь пуысь, изйысь, эзысьысь да зарниысь вӧчӧм зывӧк бӧлбанъяссӧ.
Но тіян пӧвстын мед оз лоны сэтшӧм айуловыс да аньыс, рӧдыс да чужанкотырыс, коді эськӧ кежис Господьысь, миян Енмысь, да кутіс юрбитны тайӧ войтыръяслӧн енъяслы.
Мед оз ло тіян пӧвстын сэтшӧм мортыс, кодсянь петӧ яд да курыд зелля. Йитӧд йылысь кыв сетӧмсӧ кылӧм бӧрын татшӧм мортыс мӧвпалӧ: “Менам ставыс лоӧ бур. Ола, кыдзи кӧсъя”. 
Татшӧм мортыс вӧсна бырӧдӧмыс локтас став войтырыс вылӧ.
Господь оз прӧстит татшӧм мортсӧ, а ӧзъяс скӧрлунӧн да кисьтас сы вылӧ Ассьыс ярлунсӧ. Сы вылӧ усяс [тайӧ йитӧдсӧ торкӧмысь] став ёрӧмыс, мый гижӧма тайӧ [Индӧд] небӧгас. Господь вуштас енэж улысь сылысь нимсӧ.
Господь торйӧдас сійӧс Израиль чужанкотыръяс пӧвстысь, медым бырӧдны сійӧс став ёрӧмыс серти, мый гижӧма тайӧ Индӧд небӧгас.
Тіян бӧрся чужысь ныв-пиныд да ылі муысь локтысьяс аддзасны, кутшӧм шогъяс да висьӧмъяс Господь мӧдӧдӧма тайӧ муӧ. Муыс ставнас сотчас, сэні лоӧ сӧмын тэг да сов, весиг турун оз кут быдмыны. Сэні нинӧм он вермы кӧдзны-быдтыны. Сійӧ лоӧ Содом да Гомора, Адма да Севоим каръяс кодь. Тайӧ каръяссӧ Господь бырӧдіс ыджыд скӧрлунӧн.
Сэки войтыръяс юаласны: “Мый вӧсна Господь тадзи вӧчис тайӧ муыслы?
Мыйла Сійӧ та выйӧдз скӧрмис?”
Налы вочавидзасны: “Тайӧ лои сы вӧсна, мый найӧ кежисны Господьлӧн йитӧдсьыс. Тайӧ йитӧдсӧ Господь, батьясныслӧн Енмыс, кӧрталіс накӧд, кор петкӧдіс найӧс Египетысь. Найӧ пондісны кесъявны да юрбитны мукӧд енъяслы, кодъясӧс эз тӧдлыны, кодъясӧс Господь налы эз индывлы.
Господь скӧрмис тайӧ муыс вылӧ да кисьтіс сы вылӧ [йитӧд торкӧмысь] ёрӧмсӧ, мый гижӧма тайӧ [Индӧд] небӧгас. Дӧзмӧмӧн, скӧралӧмӧн да ыджыд лӧглунӧн Господь нетшыштіс найӧс асланыс муысь да шыбитіс мӧд муӧ, кӧні найӧ ӧні на олӧны”.
Гусяторйыс миян Господь Енлӧн киын, а восьтӧмсӧ сетӧма миянлы да миян ныв-пилы нэмъяс кежлӧ, медым ми олім тайӧ Индӧдлӧн став кывъясыс серти».
«Кор тіянлы инас бурсиӧмыс и ёрӧмыс, мый ме вӧзъя тіянлы, и кор ті сьӧлӧмнад гӧгӧрвоанныд тайӧс мукӧд войтыръяс пӧвстын, кытчӧ разӧдас тіянӧс Господь, тіян Енныд, да ті ныв-пиныдкӧд бӧр бергӧдчанныд Господьлань, асланыд Енлань, да кутанныд став сьӧлӧмнад да став олӧмнад кывзысьны Сылысь, кыдзи ме тшӧкта талун тіянлы, сэки Господь, тіян Енныд, бурсьӧлӧмтчас тіян дінӧ да вайӧдас тіянӧс пленысь. Господь, тіян Енныд, чукӧртас тіянӧс мукӧд войтыръяс пӧвстысь, кытчӧ разӧдліс тіянӧс.
Весиг му помсянь Господь, тіян Енныд, чукӧртас тіянӧс да вайӧдас батьясныдлӧн муӧ, и ті бара босьтанныд сійӧс аслыныд. Сійӧ вӧчас тіянлы бурсӧ, батьясныдлы дорысь тіянлы унджык чужысьӧс сетас.
Господь, тіян Енныд, вундыштас тіянлысь да тіянсянь чужысьяслысь сьӧлӧмсӧ, медым ті радейтінныд Господьӧс, ассьыныд Ентӧ, став сьӧлӧмнад да став олӧмнад.
Сэки ті кутанныд овны, и Господь, тіян Енныд, став ёрӧмсӧ бергӧдас тіян вӧрӧгныд вылӧ да тіянӧс мустӧмтысьяс вылӧ, кодъяс тіянӧс дзескӧдісны. Ті бӧр бергӧдчанныд Господьлань [асланыд Енлань], кутанныд кывзысьны Сылысь да овны Сылӧн став тшӧктӧмыс серти, мый талун висьтала тіянлы.
Господь, тіян Енныд, сетас тіянлы унасьыс-уна бурсӧ: уна ныв-пи, уна ыж-мӧс да уна мувыв быдтас-вотӧс. Тіян ставыс артмас.
Господь [тіян Енныд] кутас бара нимкодясьны тіян вӧсна да тіян бур олӧмныд вӧсна, кыдзи Сійӧ нимкодясис батьясныд вӧсна. Тадзи лоӧ, ті кӧ кутанныд кывзысьны Господьлысь, асланыд Енлысь, овны Сылӧн индӧд-тшӧктӧмъяс серти, мый гижӧма тайӧ Индӧд небӧгас, да бергӧдчанныд кӧ став сьӧлӧмнад да став олӧмнад Господьлань, асланыд Енлань.
Тайӧ индӧд-тшӧктӧмыс, мый ме талун сета тіянлы, абу сьӧкыд да абу ылын.
Индӧдыс абу енэжас, сідзкӧ, эн шу: “Коді эськӧ кыпӧдчас енэжас да ваяс миянлы сійӧс, медым ми кылім да олім сы серти?”
Индӧдыс абу саридз сайын, сідзкӧ, эн шу: “Коді ветлас саридз сайӧ да ваяс миянлы сійӧс, медым ми кылім да олім сы серти?”
Ӧд матын тэ дінӧ тайӧ кывйыс, тэнад вомын да тэнад сьӧлӧмын, медым овны сы серти.
Талун ме пукті тіян водзӧ олӧмсӧ да бурсӧ, кулӧмсӧ да лёксӧ.
Кутанныд кӧ кывзыны асланыд Господь Енлысь тшӧктӧмъяссӧ, мый талун висьтала тіянлы, кутанныд кӧ радейтны Господьӧс, ассьыныд Ентӧ, ветлыны Сылӧн туйясӧд да овны Сылӧн индӧд-тшӧктӧмъяс серти, сэки ті кутанныд овны да чужтысьны-рӧдмыны. Господь, тіян Енныд, бурсиас тіянӧс сійӧ муас, кытчӧ ті мунанныд сійӧс босьтӧм могысь.
Но сьӧлӧмныд кӧ бергӧдчас Господьысь, и ті онӧ кутӧй кывзысьны Сылысь, сетчанныд ылӧгас, кутанныд юрбитны мукӧд енъяслы да кесъявны налы, тіянӧс лоӧ бырӧдӧма. Тайӧс висьтала тіянлы талун. Ті дырсӧ онӧ олӧй сійӧ муас, [мый Господь, тіян Енныд, сетас тіянлы,] кытчӧ ті вуджанныд Йӧрдан ю сайӧ, медым босьтны сійӧс аслыныд.
Талун енэжыс да муыс водзын вӧзъя тіянлы олӧм и кулӧм, бурсиӧм и ёрӧм.
Бӧрйӧй олӧмсӧ, медым ті да тіянсянь чужысьяс олінныд да радейтінныд Господьӧс, ассьыныд Ентӧ, кывзысинныд Сылысь да кутчысинныд Сы дінӧ.
Сэки ті кутанныд дыр овны сійӧ муас, мый Господь [Ен] кыв сетӧмӧн кӧсйысис сетны тіян батьяслы — Ӧвраамлы, Исааклы да Яковлы».
Мӧисей муніс да висьталіс тайӧ кывъяссӧ Израиль войтырлы: «Меным сё кызь арӧс. Ме ог нин вермы водзӧ нуӧдны тіянӧс. Господь шуис, мый ме Йӧрдан ю сайӧ ог вудж.
Господь, тіян Енныд, Ачыс мунас тіян водзвылын.
Сійӧ бырӧдас войтыръясӧс тіян водзысь, и ті босьтанныд налысь мусӧ.
Тіянӧс нуӧдас Исус, кыдзи висьтавліс Господь.
И тайӧ войтыръясыслы Господь вӧчас сійӧ жӧ, мый вӧчис Сигонлы да Оглы, [Йӧрдан ю таладорын олысь] аморейяслӧн ӧксыяслы, кор бырӧдіс найӧс да налысь мусӧ.
Господь сетас найӧс тіян киӧ. Вӧчӧй налы, кыдзи ме тшӧкті тіянлы.
Лоӧй зумыдӧсь да повтӧмӧсь! Энӧ полӧй наысь, ӧд Господь, тіян Енныд, Ачыс мунас тіянкӧд. Сійӧ оз коль да оз эновт тіянӧс».
Мӧисей корис Исусӧс да став Израиль войтыр водзын шуис сылы: «Ло зумыд да повтӧм! Тэ нуӧдан тайӧ войтырсӧ сійӧ муас, мый Господь кыв сетӧмӧн кӧсйысис сетны налӧн батьяслы, да юклан сійӧс налы. 
Господь Ачыс мунас тэ водзвылын. Сійӧ лоас тэкӧд, оз эновт тэнӧ да оз коль тэнӧ. Эн пов да эн тірав!»
Мӧисей гижис да сетіс тайӧ Индӧдсӧ Израиль войтырлӧн юрнуӧдысьяслы да попъяслы, Левий пиянлы, кодъяс новлӧдлісны Господьлысь Йитӧд кудсӧ.
Мӧисей тшӧктіс налы: «Быд сизимӧд воӧ, уджйӧз киритан воӧ, Чом вӧчан лунъяс пасйигӧн, кор став Израиль войтырыс локтас Господь Енныд водзӧ сійӧ местаас, мый бӧръяс Господь, сэки гораа лыддьӧй тайӧ Индӧдсӧ налы.
Чукӧртӧй войтырнытӧ: айуловӧс да аньясӧс, ныв-пинытӧ да тіян каръясын олысь йӧз муысь локтысьясӧс, мед найӧ кывзасны да велӧдчасны повны Господьысь, тіян Енмысь, да овны тайӧ Индӧдыслӧн кывъясыс серти.
Тадзи водзӧ чужысьяс, кодъяс оз тӧдны Индӧдсӧ, кывзасны да велӧдчасны повны Господьысь, тіян Енмысь, став олан лунъяс чӧжныс сійӧ муас, кытчӧ ті ӧні вуджанныд Йӧрдан ю сайӧ, медым босьтны сійӧс аслыныд».
Господь шуис Мӧисейлы: «Регыд тэ кулан.
Чукӧст Исусӧс, сэсся сувтӧй сыкӧд вежа чом [пыранін] дорӧ. Сэні Ме сета сылы тшӧктӧмъяс».
Мӧисей Исускӧд локтісны да сувтісны вежа чом [пыранін] дорӧ.
Господь локтіс вежа чом пыранін дорӧ кымӧр сюръя пытшкын.
Господь шуис Мӧисейлы: «Регыд тэ вуджан батьясыд дінӧ. А тайӧ войтырыс эновтас Менӧ сійӧ муас, кытчӧ пырас. Кырсалысь ань моз найӧ сетчасны мукӧд енъяслы да торкасны йитӧдӧс, мый Ме кӧрталі накӧд.
Сійӧ лунӧ Ме скӧрма на вылӧ да эновта найӧс. Ме тупка Ассьым чужӧмбанӧс наысь, и уна шог да сьӧкыдлун суас найӧс. Сійӧ лунӧ найӧ шуасны, мый шогъясыс суисны найӧс сы вӧсна, мый [Господь] налӧн Енныс абу накӧд.
Ме тупка наысь Ассьым чужӧмбанӧс налӧн мыж вӧчӧм вӧсна, ӧд найӧ бергӧдчисны мукӧд енъяслань.
Сідзкӧ, гижӧй аслыныд тайӧ сьыланкывсӧ да велӧдӧй сьывны Израиль пиянӧс. Тайӧ сьыланкывйыс серти Ме мыжда найӧс, найӧ кӧ оз кывзысьны Менсьым.
Ме вайӧда найӧс [бур] муӧ, мый йылысь кыв сеті налӧн батьяслы, муӧ, кӧні визувтӧ йӧв да ма. Сэні найӧ кутасны пӧттӧдзныс сёйны да тшӧгасны. Та бӧрын найӧ бергӧдчасны мукӧд енъяслань да кутасны юрбитны налы. А Менӧ найӧ эновтасны да торкасны йитӧдӧс, мый Ме кӧрталі накӧд.
Кор Израиль войтырӧс суасны шогъяс да сьӧкыдлунъяс, сэки тайӧ сьыланкывйыс петкӧдлас, мый найӧ мыжаӧсь. [Найӧ да] насянь чужысьяс мед оз вунӧдны тайӧ сьыланкывсӧ.
Ме тӧда Израиль войтырлысь мӧвпъяссӧ, кӧть Ме эг на вайӧд найӧс сійӧ [бур] муас, мый йылысь кыв сеті [налӧн батьяслы]».
Сійӧ лунӧ Мӧисей гижис сьыланкывсӧ да велӧдіс сьывны Израиль пиянӧс.
Господь тшӧктіс Навлӧн Исус пилы: «Ло зумыд да повтӧм, ӧд тэныд ковмас нуӧдны Израиль пиянӧс сійӧ муас, мый йылысь Ме кыв сеті налы. Ме лоа тэкӧд».
Мӧисей гижис тайӧ Индӧдсӧ ставнас небӧгӧ, сэсся Господьлысь Йитӧд куд новлӧдлысь левитъяслы тшӧктіс:
«Босьтӧй тайӧ Индӧд небӧгсӧ да пуктӧй сійӧс асланыд Господь Енлӧн Йитӧд кудкӧд орччӧн, медым Индӧдыс серти тіянӧс лыддьыны мыжаӧн.
Ме тӧда тіянлысь асныралӧмнытӧ да паныд кыпӧдчӧмнытӧ. Весиг ӧні, кор ме ловъя на, ті онӧ кывзысьӧй Господьлысь.
А мый лоӧ менам кулӧм бӧрын?
Чукӧртӧй ме дінӧ чужанкотыръяслысь юрнуӧдысьясӧс [ёрдысьясӧс] да веськӧдлысьясӧс. Енэжыс да муыс водзын ме висьтала налы тайӧ кывъяссӧ.
Ме тӧда, мый менам кулӧм бӧрын ті сетчанныд лёкас, кежанныд туйсьыс, кытчӧ ме веськӧді тіянӧс. Локтана кадӧ тіянӧс суасны шогъяс, ӧд ті кутанныд вӧчны Господь [Ен] водзын шогмытӧмсӧ. Асланыд уджъясӧн ті дӧзмӧданныд Господьӧс».
Став Израиль войтыр чукӧртчис кывзыны Мӧисейӧс. И Мӧисей сьыліс налы водзысяньыс помӧдзыс тайӧ сьыланкывсӧ.
— Кывзы, енэжыс, мый ме висьтала, 
кывзы, муыс, менсьым кывъясӧс.
Велӧдӧмӧй зэр моз киссьӧ, сёрниӧй лысва моз усьӧ, быдмӧгӧс моз юкталӧ, турунӧс моз киськалӧ.
Ошка Господьлысь нимсӧ.
Ошкӧй-нимӧдӧй миянлысь Енмӧс!
Сійӧ — зумыд изйыс, 
Сылӧн уджъясыс тыр-бурӧсь, Сылӧн туйясыс веськыдӧсь.
Сійӧ — эскана Ен, Сы пытшкын ылӧгыс абу, Сійӧ — веськыда вӧчысь Ен.
Но тайӧ войтырыс мыж вӧчӧ Господьлы паныд, асланыс мыж вӧсна найӧ абу нин Сылӧн ныв-пи, найӧ — ылӧдчысьяс, пежас вӧйӧмаяс.
Тадзи ӧмӧй тэ, мывкыдтӧм да вежӧртӧм войтыр, мынтысян Господьлы?
Абу-ӧ Сійӧ тіян Бать, тіянӧс Вӧчысьыс? Сійӧ тіянӧс вӧчис да ёнмӧдіс.
Энӧ вунӧдӧй кольӧм лунъястӧ, казьтылӧй важ олӧм йылысь.
Юасьӧй батьясныдлысь, и найӧ гӧгӧрвоӧдасны, юалӧй олӧма йӧзлысь, и найӧ висьталасны.
Кор Медвылыссаыс юкліс войтыръяслы му, кор разӧдіс-овмӧдіс йӧзсӧ му пасьтала, Сійӧ индіс мудоръяс Израиль пиян лыд серти.
Израиль войтыр — Господьлӧн юкӧныс, Яковсянь чужысьяс — Сылӧн пайыс.
Сійӧ аддзис тайӧ войтырсӧ овтӧминысь, куш да шуштӧм пельӧсысь, тӧждысис на вӧсна, дорйис найӧс, синмӧс моз видзис.
Кыдзи кутш видзӧ позсӧ, лэбалӧ пияныс весьтті, сідзи Господь видзис Ассьыс войтырсӧ, бордъяссӧ шевкнитӧмӧн новлӧдліс найӧс. Господь ӧтнасӧн новлӧдліс найӧс, мӧд енмыс Сыкӧд эз вӧв.
Сійӧ кыпӧдіс найӧс керӧсъяс вылӧ, вердіс мувыв быдтасӧн, изкыртаысь визувтысь маӧн, изъяинын быдмысь олив пуяслӧн выйӧн, мӧс выйӧн да кӧза йӧлӧн, тшӧгӧдӧм баляпиянӧн, кӧзаясӧн да васанса межъясӧн, вердіс медбур шобдіӧн. Найӧ юисны вина — виноград тусьлысь вирсӧ.
[Яков сёйис,] Ешурун* тшӧгис да лои асныра, тшӧгис, кызіс да госсяліс.
Сійӧ эновтіс Енсӧ, ассьыс Вӧчысьсӧ, мустӧмтіс ассьыс вына Мездысьсӧ.
Мукӧд енъяслы юрбитӧмнас Израиль войтыр скӧрмӧдіс Сійӧс, зывӧкторъяснас дӧзмӧдіс Сійӧс.
Найӧ вайисны висьяссӧ эз Енлы, а пеж ловъяслы, тӧдтӧм выль енъяслы, орччӧн олысь войтыръяслӧн енъяслы, кодъясӧс батъясныс эз тӧдлыны.
Найӧ вунӧдісны Дорйысьӧс, коді чужтіс найӧс, вунӧдісны Енмӧс, коді вӧчис найӧс.
Господь аддзис тайӧс [да ёна скӧрмис], скӧрмис Аслас ныв-пиыс вылӧ да ӧтдортіс найӧс. — Тупка Ассьым чужӧмбанӧс наысь, — шуис Сійӧ. — Тӧда, кутшӧм лоӧ налӧн помыс.
Найӧ — ылӧгас вӧйӧм йӧз, ныв-пи, кодъяслы он вермы эскыны.
Ылӧг енъяслы юрбитӧмнас найӧ кыпӧдісны Ме пытшкын вежӧгтӧм, идолъяснас дӧзмӧдісны Менӧ. Та вӧсна Ме кыпӧда на пытшкын вежӧгтӧм войтыр пыр, кодӧс оз позь шуны войтырӧн, дӧзмӧда найӧс вежӧртӧм войтыр пыр.
Менам скӧрлунысь ӧзйис би, пыдӧстӧминӧдз сійӧ сотӧ ставсӧ. Мусӧ ньылыштӧ став быдтас-вотӧснас, керӧсъяс чишкалӧ подулӧдзыс.
Ме ыста на вылӧ шогъяс, Ассьым ньӧвъясӧс на вылӧ лэдза.
Тшыгъялӧмысь найӧ нюкыртчасны, кулана висьӧм виас найӧс, пӧрӧс висьӧм бырӧдас.
Ме ыста на вылӧ ёсь пиня зверъясӧс да яда змейясӧс.
Коді лоӧ ывлаын, кулас шыпурт помысь, коді лоӧ гортас, весьӧпӧрас. Виӧма лоӧ ныв-зонмӧс, пузчужӧм кагаӧс и дзор юраӧс.
Ме кӧсйи бырӧдны найӧс, вуштыны йӧз пӧвстысь на йылысь казьтылӧмсӧ, но вӧрӧглӧн лёкӧдӧм вӧсна ог вӧч тайӧс, медым мустӧмтысь ылӧдлӧмӧн эз шу: «Миян киным ён. Эз Господь тайӧс вӧч».
Израиль — вежӧртӧм войтыр, найӧ нинӧм оз гӧгӧрвоны.
Вӧліны кӧ мывкыдаӧсь, эськӧ казялісны тайӧс, эськӧ гӧгӧрвоисны, мый найӧс виччысьӧ.
Кыдзи нӧ ӧти мортыс сюрсӧс вермис вӧтлыны, а кыкӧн — дас сюрсӧс, эз кӧ Дорйысьныс вузав найӧс, эз кӧ Господь сет найӧс вӧрӧг киӧ.
Вӧрӧглӧн дорйысьыс абу миян Дорйысь кодь, тайӧс гӧгӧрвоӧ весиг вӧрӧгным.
Вӧрӧглӧн виноград пуыс Содомысь, Гомора му вылын быдмӧма.
Налӧн виноград тусьыс ядӧн тырӧма, налӧн розйыс курыд, винаыс — змей яд, кулан зелля.
Со мый Ме ордын дзебӧма, Менам йӧртӧдъясӧ пуктӧма, Ме мынтыся, Ме перъя водзӧссӧ сійӧ лунӧ, кор налӧн кокныс лигышмунас.
Ӧд найӧс бырӧдан луныс матын, регыд збыльмас налы дасьтӧмаыс.
Господь доръяс Ассьыс войтырсӧ, Сійӧ лоӧ бур сьӧлӧма Аслас кесйӧгъяс дінӧ, кор аддзас, мый налӧн выныс эз ло, мый ичӧтсянь ыджыдӧдз некод эз коль.
Сэки Господь шуас: — Кӧні налӧн енъясыс, кӧні изйыс, код вылӧ найӧ лачасӧ кутісны? Кӧні енъясыс, кодъяс сёйисны тіян висьяслысь госсӧ, юисны вина висьнытӧ?
Найӧ мед чеччасны да отсаласны тіянлы, найӧ мед видзасны тіянӧс.
Видзӧдӧй, тайӧ — Ме, Ме — Енмыс, Меысь кындзи мӧд Енмыс абу. Ме виа и олӧм сета, Ме дойдала и бурдӧда. Менам киысь некод оз мезды.
Ме кыпӧда киӧс енэжланьыс, [веськыд киӧс лэптӧмӧн] шуа: Ме — пыр олысь Ен, чардби моз сявкйысь шыпуртӧс Ме ёсьта, Аслам киӧн Ме мыжда, Меным паныд сувтысьяслысь водзӧс перъя, Менӧ мустӧмтысьяслы мынтыся.
Ньӧвъясӧс вирӧн юктӧда, виӧмаяслӧн да пленӧ босьтӧмаяслӧн вирнас. Шыпуртӧй яй ньылыштас, сёяс вӧрӧг юралысьяслысь юрнысӧ.
[Нимкодясьӧй, енэжъяс, Господькӧд ӧтвылысь, Енлӧн став анделыс, копыртчылӧй Сылы!] 
Нимкодясьӧй, войтыръяс, Сылӧн войтыркӧд [ёнмӧдчӧй, Енлӧн пиян]! 
Сійӧ водзӧс перъяс Сылы паныд сувтысьяслысь, мынтысяс налы Аслас кесъялысьяслысь вирсӧ кисьтӧмысь [мынтысяс Сійӧс мустӧмтысьяслы]. Господь сӧстӧммӧдас Ассьыс мусӧ, вештас войтырыслысь мыжсӧ.
[Сійӧ лунӧ Мӧисей гижис тайӧ сьыланкывсӧ да велӧдіс сьывны Израиль пиянӧс.] 
Мӧисей локтіс войтырыс дінӧ да сьыліс тайӧ сьыланкывсӧ Навлӧн Исус пикӧд.
Та бӧрын Израиль войтырлы шуис: «Босьтӧй сьӧлӧманыд кывъяссӧ, мый талун висьтала тіянлы. Тшӧктӧй асланыд ныв-пилы овны тайӧ Индӧдыс серти.
Тіянлы тайӧ абу куш кывъяс, ӧд тайӧ кывъясас тіян олӧмныд. Кутчысянныд кӧ тайӧ Индӧдас, ті дыр кутанныд овны сійӧ муас, кытчӧ ті вуджанныд Йӧрдан ю сайӧ, медым босьтны сійӧс аслыныд».
Сійӧ жӧ лунӧ Господь шуис Мӧисейлы:
«Кыпӧдчы Аварим керӧсъяс вылӧ, Моав муын Ериконлы паныда Нево керӧс вылӧ да видзӧдлы Ханаан му, мый Ме сета Израиль пиянлы.
Тэ кыпӧдчан керӧс вылас да сэні кулан, вуджан аслад батьясыд дінӧ. Тадзи жӧ тэнад Аарон вокыд куліс да вуджис батьясыс дінӧ Ор керӧс вылын. Тайӧ тіянлы сыысь, мый ті Меным паныд мыж вӧчинныд Израиль пиян водзын Мерива ва петанін дорын Кадешын, Цин овтӧминын, кор ті Израиль пиян водзын энӧ пыдди пуктӧй Менӧ, ассьыныд вежа Ентӧ.
Мусӧ, мый Ме сета Израиль пиянлы, тэ аддзылан, но сэтчӧ тэ он пыр».
Со тайӧ бурсиӧмнас Мӧисей, Енлӧн морт, бурсиис Израиль пиянӧс кулӧм водзвылас:
— Синай керӧссянь Господь лэччис, Сеир керӧсвыв му весьтын шонді моз петіс, Паран керӧс вылын петкӧдчис.
Сійӧ локтіс лыдтӧм-тшӧттӧм вежаяскӧд, Сылӧн веськыдвылас ыпъяліс-ӧзъяліс би.
Збыльысь Сійӧ радейтӧ Ассьыс войтырсӧ, став вежа войтырыс Сылӧн киын. Сылӧн кок дорын найӧ велӧдчӧны Сылӧн кывъясӧ.
Мӧисей сетіс миянлы Индӧд, козьналіс сійӧс Яков котырлы.
Кор юралысьяс да Израильлӧн чужанкотыръяс чукӧртчисны, Ешурунлы ыджыдӧ пуксис ӧксы.
Мед олас Рувим чужанкотыр, мед оз кувны Рувимсянь чужысьяс, [Симеон] чужанкотырыс мед уна лыда лоӧ.
Иуда чужанкотыр йылысь Мӧисей шуис: — Господьӧй, кыв Иудалысь гӧлӧс шысӧ, бӧр вайӧд сійӧс аслас войтырыс дінӧ.
Аслас киӧн сійӧ дорйысьӧ, Тэ отсав сылы вӧрӧгыскӧд вермасигас.
Левий чужанкотыр йылысь Мӧисей шуис: — Туммимтӧ да уримтӧ Тэ сетін Аслад эскана кесъялысьлы, Тэ тӧдмалін сійӧс Массаын, вензин сыкӧд Мерива ва петанін дорын. Сійӧ шуис, мый оз тӧд бать-мамсӧ, вокъяссӧ ӧтдортіс, пиянсӧ оз тӧд, ӧд кутчысьӧ Тэнад кывъясӧ, видзӧ Тэнсьыд йитӧдтӧ.
Яковӧс велӧдӧ Тэнад тшӧктӧмъясӧ, Израильӧс — Тэнад Индӧдӧ. Тэ водзын тшынӧдӧ чӧскыд ӧвтантор, висьпуктанін вылын сотӧ Тэныд висьяс.
Господьӧй, бурси сійӧс, сет сылы вын, сылӧн уджъясыс мед шогмасны Тэныд. Сылы паныд кыпӧдчысьясӧс жугӧд, сійӧс мустӧмтысьясӧс пасьварт, медым некор оз сувтны.
Венямин чужанкотыр йылысь Мӧисей шуис: — Господьлӧн мусаыс олӧ повтӧг, Господь видзӧ сійӧс быд лун, Аслас морӧс бердас сійӧс шойччӧдӧ.
Ӧсип рӧд йылысь Мӧисей шуис: — Господь мед бурсиас сылысь мусӧ енэжвывса медбур козинъясӧн, лысваӧн да мупытшса ваӧн, медбурнас, мый шонді югӧр улын быдмӧ, мый быд тӧлысьӧ петӧ-быдмӧ, медбурнас, мый кисьмӧ важ керӧсъяс вылын, сӧвмӧ нэмӧвӧйся ыбъяс вылын, мулӧн медбур сетӧмторъяснас да ставнас, мый сэні эм.
Сійӧ, коді петкӧдчис ӧзъялысь лежнӧгын, мед бурсиас Ӧсипӧс, вокъяс пӧвстысь бӧрйӧмаӧс.
Ӧсиплӧн выныс медводдза чужысь ӧшлӧн кодь, сылӧн сюръясыс вӧлявывса ӧшлӧн кодьӧсь, наӧн люкалӧ войтыръясӧс, вӧтлӧ найӧс му помӧдзыс. Татшӧмӧсь Ефрем чужанкотырлӧн лыдтӧм-тшӧттӧм йӧзыс, Манассей чужанкотырлӧн уна сюрс йӧзыс.
Завулон чужанкотыр йылысь Мӧисей шуис: — Нимкодясь, Завулон, аслад ветлан-мунан туйясыд вылын, нимкодясь, Иссакар, аслад чомъясын.
Найӧ чукӧстӧны войтыръясӧс керӧс вылӧ, сэні вайӧны колана висьяс. Найӧ олӧны саридзса озырлун помысь, чукӧртӧны лыаӧ дзебӧмасӧ.
Гад чужанкотыр йылысь Мӧисей шуис: — Ошкӧм Сылы, коді Гадлысь мусӧ паськӧдӧ!
Гад олӧ лев моз, чашйӧ вӧрӧглысь сойсӧ да юрсӧ.
Аслыс сійӧ бӧрйис медбур му, сылы сетӧма юралысьлысь пай. Войтырлӧн юралысьяскӧд сійӧ локтіс, Господьлӧн веськыд кӧсйӧм серти вӧчис, Господьлысь веськыда мыждӧмсӧ Израильын збыльмӧдіс.
Дан чужанкотыр йылысь Мӧисей шуис: — Дан — том лев, Васан ыб вывсянь чеччыштӧ.
Неффалим чужанкотыр йылысь Мӧисей шуис: — Неффалимлы унасьыс-уна бурыс вичмӧ, Господь озыра бурсиӧ сійӧс, рытыввыв да лунвыв му сійӧ босьтӧ аслыс.
Асир чужанкотыр йылысь Мӧисей шуис: — Бурсиӧма Асирӧс аслас вокъясысь ёнджыка. Вокъясыс мед радейтӧны сійӧс, сылӧн олив пуясыс мед уна выя лоасны.
Кӧртысь да ыргӧнысь сылӧн иганыс, став олан лунъяс чӧжыс сійӧ лоӧ вына.
Ешурунлӧн Ен кодь мӧдыс абу. Верзьӧма моз Сійӧ локтӧ енэжӧд, юралысь моз — кымӧръяс вывті, медым отсавны тэныд.
Тэнад сайӧдчаніныд — пыр олысь Ен, Сылӧн киыс новлӧдлӧ тэнӧ.
Сійӧ вӧтлас тэ водзысь вӧрӧгтӧ, тшӧктас бырӧдны сійӧс.
Израиль повтӧг олӧ, Яковсянь чужысьяс лӧня олӧны сійӧ муас, кӧні быдмӧ уна нянь да визувтӧ вина, кытчӧ енэжсянь лысва лэччӧ.
Израиль, тэ шуда, тэ кодь мӧд войтырыс абу, тэ — Господьӧн мездӧм войтыр. Сійӧ — сайӧдыс, мый видзӧ тэнӧ, шыпуртыс, мый тышын вермӧ.
Вӧрӧгыд кутас леститчыны тэ водзын, а тэ кокнад сы вылӧ тувччан.
Мӧисей кайис Моав ласта вывсянь Нево керӧсвывса Фасга йылӧдз, мый Ериконлы воча. Сэтысянь Господь петкӧдліс сылы став мусӧ Галаадсянь Данӧдз, ставнас Неффалим, Ефрем да Манассей муяс, став Иуда му рытыввыв саридзӧдз, Негев му да став ковтыссӧ Ериконсянь, мӧд ногӧн кӧ, Пальма карсянь, Цоарӧдз.
Господь шуис сылы: «Тайӧ му йылысь Ме кыв сетлі Ӧвраамлы, Исааклы да Яковлы, мый сета сійӧс насянь чужысьяслы.
Ме петкӧдлі сійӧс тэныд, но сэтчӧ тэ он пыр».
Мӧисей, Господьлӧн кесйӧг, куліс Моав муын, кыдзи шуис Господь.
Господь дзебис сійӧс Бет-Пеорлы воча ковтысӧ Моав муын, и весиг ӧнӧдз некод оз тӧд, кӧні сылӧн дзебаніныс.
Мӧисейлы вӧлі сё кызь арӧс, кор сійӧ куліс.
Но синмыс сылӧн вӧлі бур, выныс сылӧн эз чинлы.
Израиль пиян бӧрдісны Мӧисей вӧсна Моав ласта вылын [Йӧрдан ю дорын, Ериконсянь матын] комын лун чӧж, кытчӧдз эз помасьны Мӧисей вӧсна бӧрдан лунъясыс.
Навлӧн Исус пиыс вӧлі тырӧма мывкыдлуныслӧн лолӧн, ӧд Мӧисей пуктыліс сы вылӧ кисӧ. Израиль пиян кывзысисны Исуслысь да ставсӧ вӧчисны сідзи, кыдзи Господь тшӧктіс Мӧисейлы.
Тайӧ кадсяньыс Израиль войтыр пӧвстын эз вӧв Мӧисей кодь пророкыс. Господь сёрнитліс сыкӧд воча чужӧмӧн. Господь мӧдӧдіс сійӧс Египетӧ вӧчны индысьпасъяс да шензьӧданаторъяс фараон водзын, сылӧн кесйӧгъясыс водзын да став Египет пасьтала. Мӧисей моз татшӧмторъяссӧ сэсся некод эз вӧчлы. Вына киыс отсӧгӧн Мӧисей петкӧдліс ыджыд да повзьӧдана уджъяс став Израиль войтырлӧн син водзын.
{Еврей йӧз (комиӧдіс Kodko) @ Нав Исус @ религ. гижӧд @ Библия @ 2021 @ Лб. .}
НАВ ИСУС
Кор Мӧисей, Господьлӧн кесйӧг, куліс, Господь шуис Навлӧн Исус пилы, Мӧисейлӧн отсасьысьлы:
«Менам Мӧисей кесйӧгӧй куліс.
Ӧні тэ вуджӧд Израиль войтырӧс Йӧрдан ю сайӧ сійӧ муас, мый Ме сета налы.
Кытчӧ сувтас тіян кокныд, сійӧ мусӧ Ме сета тіянлы, кыдзи Ме кӧсйыси Мӧисейлы.
Овтӧминсянь Ливанӧдз да ыджыд Ефрат юсянь рытыввыв Ыджыд саридзӧдз хеттейяслӧн став муыс лоӧ тіян.
Тэныд паныд сувтны некод оз вермы став тэнад олан лунъяс чӧжыд.
Ме лоа тэкӧд, кыдзи вӧлі Мӧисейкӧд. Ог эновт да ог коль тэнӧ.
Ло зумыд да повтӧм!
Тэ юклан Израиль войтырлы мусӧ, мый Ме кыв сетӧмӧн кӧсйыси сетны налӧн батьяслы.
Ло зумыд да повтӧм! Ов став Индӧдыс серти, кыдзи тшӧктіс тэныд Мӧисей, Менам кесйӧгӧй.
Эн кеж Индӧдысь веськыдвылӧ ни шуйгавылӧ. Сэки тэнад ставыс артмас.
Тайӧ Индӧд небӧгысь кывъясыс мед пыр лоӧны тэнад вомын.
Лун и вой велӧдчы, медым ставсӧ вӧчны стӧча, мый сэні гижӧма. Сэки тэнад ставыс артмас.
Ме тшӧкта тэныд: ло зумыд да повтӧм! Эн тірав да эн пов, ӧд Господь, тэнад Енмыд, лоӧ тэкӧд быдлаын, кытчӧ тэ мунан».
Исус тшӧктіс войтырӧн веськӧдлысьяслы кытшовтны чомъяссӧ да висьтавны войтырыслы: «Дасьтӧй сёян, ӧд куим лун мысти ті вуджанныд Йӧрдан ю сайӧ, медым босьтны аслыныд му, мый Господь, тіян [батьяслӧн] Ен, сетас тіянлы пыр кежлӧ».
Рувим да Гад чужанкотыръяслы да Манассейлӧн джын чужанкотырлы Исус шуис:
«Энӧ вунӧдӧй, мый тшӧктіс тіянлы Мӧисей, Господьлӧн кесйӧг. Сійӧ ӧд шуис, мый Господь, тіян Енныд, сетас тіянлы тайӧ мусӧ, кӧні ті кутанныд лӧня овны.
Ӧні тіян гӧтырныд, ныв-пиныд да ыж-мӧсныд мед кольччасны тайӧ муас, мый Мӧисей сетіс тіянлы Йӧрдан таладорысь.
А ті, кодъяс верманныд петны тышӧ, босьтӧй шыпуртнытӧ, да вокъясныд водзвылын вуджӧй Йӧрдан ю сайӧ. Отсалӧй вокъясныдлы, кытчӧдз Господь, тіян Енныд, оз сет налы сійӧ мусӧ, кӧні найӧ кутасны тіян моз лӧня овны.
Кор найӧ босьтасны аслыныс сійӧ мусӧ, ті верманныд бӧр локны асланыд муӧ, мый Мӧисей, Господьлӧн кесйӧг, сетіс тіянлы Йӧрдан ю таладорысь, асыввыв муысь».
Найӧ вочавидзисны Исуслы: «Ми вӧчам ставсӧ, мый тшӧктан. Кытчӧ миянӧс мӧдӧдан, сэтчӧ ми и мунам.
Ми кутам кывзысьны тэнсьыд, кыдзи кывзысим Мӧисейлысь. Сӧмын мед Господь, тэнад Енмыд, лоас тэкӧд, кыдзи Сійӧ вӧлі Мӧисейкӧд.
Мед лоӧ виӧма быдӧнӧс, коді кыпӧдчас тэныд паныд да оз кывзы тэнсьыд тшӧктӧмтӧ.
Ло зумыд да повтӧм!»
Ситтимсянь Навлӧн Исус пиыс гусьӧн мӧдӧдіс кык кыйӧдчысьӧс. Налы шуис: «Ветлӧй тӧдмавны Ханаан мусӧ да Ерикон карсӧ».
Найӧ* мунісны [Ериконӧ] да пырисны керкаӧ, кӧні оліс Раав нима кырсалысь ань. Найӧ узьмӧдчисны сы ордӧ.
Ерикон карса ӧксыӧдз воис юӧр, тайӧ войнас пӧ Израиль пиян пӧвстысь кодсюрӧ локтісны тӧдмавны мутӧ.
Ериконса ӧксы мӧдӧдіс ассьыс йӧзсӧ Раав дінӧ да тшӧктіс шуны сылы: «Петкӧд тэ ордӧ [войнас] локтысьясӧс, ӧд найӧ локтӧмаӧсь тӧдмавны тайӧ мусӧ».
Но Раав дзебис сы ордӧ локтӧм кык мортӧс, а ӧксыӧн мӧдӧдӧм йӧзыслы шуис: «Збыльысь, ме ордӧ волісны кык морт, но кытысь найӧ, ме ог тӧд.
Рытгорувнас, дзиръя пӧдлалан кадӧ, найӧ петісны ме ордысь, но кытчӧ мунісны, ме ог тӧд.
Тэрмасьӧй, гашкӧ, суӧданныд на найӧс».
Збыльвылас ань нуӧдіс кыйӧдчысьясӧс керка вевт вылас да дзебис найӧс шабді кольтаяс улӧ.
Ӧксылӧн йӧзыс уськӧдчисны вӧтӧдны кыйӧдчысьясӧс Йӧрдан ю дорӧ нуӧдысь туйӧд да воисны ю вуджанінӧдз.
Карысь налӧн петӧм бӧрын карса дзиръясӧ пӧдлалісны.
Кыйӧдчысьяслӧн узьны водтӧдз Раав кайис на дінӧ керка вевт вылас да шуис: «Ме тӧда, мый тайӧ мусӧ Господь сетіс тіянлы. Ми ставӧн полам тіянысь. Тайӧ муас став олысьыс дзӧрӧ-тіралӧ тіянысь.
Ми кывлім, кыдзи Господь [Ен] тіян водзын косьтӧма Гӧрд саридзсӧ, кор ті петӧмныд Египетысь. Ми кывлім, мый ті вӧчӧмныд Йӧрдан ю сайын олысь аморейяслӧн Сигон да Ог ӧксыяскӧд. 
Ті бырӧдӧмныд найӧс, и тайӧс кылӧм бӧрын миянӧс полӧм босьтіс. Ӧні миян пӧвстысь некод оз лысьт сувтны тіянлы паныд, ӧд Господь, тіян Енныд, эм енэжас и му вылас ыджыдалысь Ен.
Господь [асланыд Ен] водзын кыв сетӧй меным, мый лоанныд бур сьӧлӧмаӧсь батьӧйлӧн рӧдыс дінӧ, кыдзи ме вӧлі бур сьӧлӧма тіян дінӧ. Сетӧй меным эскӧдан пас, мый ловйӧн колянныд бать-мамӧс, чой-вокӧс да налысь котырнысӧ».
Кыйӧдчысьяс шуисны сылы: «Вӧчам корӧмыд серти, а огӧ кӧ вӧчӧй, мед ми кулам тіян пыдди. Но миян йылысь некодлы энӧ висьталӧй.
И кор Господь сетас миянлы тайӧ мусӧ, сэки ми лоам бур сьӧлӧмаӧсь тэ дінӧ да ассьыным кывнымӧс кутам».
Раав отсаліс кыйӧдчысьяслы ӧшиньӧд лэччыны гез кузя, ӧд сылӧн керкаыс вӧлі карса стен бердас.
Сійӧ шуис налы: «Мунӧй керӧсвыв муӧ, медым энӧ паныдасьӧй тіянӧс вӧтӧдысьяскӧд. Сэні куим лун чӧж дзебсясьӧй, кытчӧдз тіянӧс корсьысьяс бӧр оз мунны.
Сэсся верманныд водзӧ мунны асланыд туйӧд».
Найӧ шуисны Раавлы: «Тэ кӧ ачыд он вӧч сідзи, кыдзи ми тшӧктам, ми кыв сетӧмнымӧс огӧ кутӧй.
Миян локтігкежлӧ кӧртав тайӧ югыдгӧрд кӧвсӧ ӧшиняд, кыті миянлы отсалін лэччыны. Тэнад бать-мамыд, вокъясыд да батьыдлӧн став рӧдыс мед локтасны тэ ордӧ.
Коді петас тэнад керкаысь ывлаӧ, ачыс лоӧ мыжа аслас кулӧмысь, а ми мынам тэныд кыв сетӧмысь.
Но миян войтырысь кӧ кодкӧ кыпӧдас кисӧ тэнад керкаын олысь вылӧ, сэки ми лоам мыжаӧсь сылӧн кулӧмысь.
Миян йылысь кӧ тэ кодлыкӧ висьталан [либӧ кодкӧ кисӧ лэптас миян вылӧ], сэки ми мынам тэныд кыв сетӧмысь».
Раав вочавидзис: «Мед лоас тіян шуӧм серти».
Сэсся янсӧдчис накӧд. Налӧн мунӧм бӧраныс Раав кӧрталіс ӧшиняс югыдгӧрд кӧв.
Кыйӧдчысьяс мунісны керӧсвыв муӧ, сэні дзебсясисны куим лун чӧж, кытчӧдз найӧс вӧтӧдысьяс бӧр эз мунны.
Вӧтӧдысьяс корсисны найӧс туй пӧлӧнысь, но эз аддзыны.
Керӧсвыв муысь лэччӧм бӧраныс кыйӧдчысьяс вуджисны Йӧрдан ю да локтісны Навлӧн Исус пи дінӧ. Найӧ висьталісны сылы ставсӧ, мый накӧд вӧлі.
«Господь [миян Енным] сетіс миян киӧ сійӧ мусӧ, — шуисны найӧ Исуслы. — Сэтчӧс олысьяс ставныс ёна полӧны миянысь».
Водз асывнас Исус да став Израиль войтыр мӧдӧдчисны Ситтимысь да воисны Йӧрдан ю дорӧ, но эз вуджны сійӧс.
Куим лун мысти веськӧдлысьяс кытшовтісны войтырсӧ да тшӧктісны: «Кор аддзанныд, мый поп-левитъяс кутасны нуны тіян Господь Енлысь Йитӧд кудсӧ, сэки ті куд бӧрсяыс тшӧтш мӧдӧдчӧй.
Тадзи ті кутанныд тӧдны мунан туйсӧ, ӧд сійӧ туйӧдыс ті энӧ на ветлӧй. Куд да тіян костын мед лоас кык сюрс гырддза кымын коласт, таысь матӧджык Йитӧд куд дорӧ энӧ матыстчӧй».
Исус шуис войтырыслы: «Вежӧдӧй-сӧстӧммӧдӧй асьнытӧ [асывводз кежлас], ӧд аски Господь тіян пӧвстын вӧчас шензьӧданаторъяс».
А попъяслы шуис: «Босьтӧй [Господьлысь] Йитӧд кудсӧ да мунӧй войтырыс водзвылын».
Попъяс босьтісны [Господьлысь] Йитӧд кудсӧ да мунісны войтырыс водзвылын.
Господь шуис Исуслы: «Талун Ме нимӧда тэнӧ став Израиль войтыр водзын. Найӧ тӧдмаласны, мый Ме тэкӧд, кыдзи вӧлі и Мӧисейкӧд.
Тшӧкты Йитӧд куд нуысь попъяслы сувтны, кор сӧмын налӧн кокныс тувччас Йӧрдан юӧ».
Исус шуис Израиль пиянлы: «Матыстчӧй да кывзӧй асланыд Господь Енлысь кывсӧ».
Сэсся шуис: «Ӧні ті тӧдмаланныд, мый тіян пӧвстын ловъя Ен, коді вӧтлас тіян водзысь ханаансаясӧс, хеттейясӧс, хивейясӧс, перезейясӧс, гергесейясӧс, аморейясӧс да евуссаясӧс.
Со, став му пасьтала ыджыдалысь Господьлӧн Йитӧд кудйыс вуджас Йӧрдан ю вомӧн тіян водзвылын.
Торйӧдӧй дас кык мортӧс, Израильлӧн быд чужанкотырысь ӧтиӧс.
Став му пасьтала ыджыдалысь Господьлысь Йитӧд куд нуысь попъяс кор тувччасны Йӧрдан юӧ, сэки ваыс дугдас визувтны да сувтас стенӧн».
Израиль войтыр мӧдӧдчис Йӧрдан юлань, медым вуджны сійӧс. Попъяс нуисны [Господьлысь] Йитӧд кудсӧ войтырыс водзвылын. Вӧлі нянь вундан кад. Йӧрдан ю сэки ойдлӧ. Но кор [Господьлысь Йитӧд] куд нуысь попъяс тувччисны Йӧрдан юӧ, ваыс дугдіс визувтны да сувтіс стенӧн ылӧ, Адам кар дорӧ, мый Цартан карсянь матын.
А визувтысь ваыс лэччис ковтысса Сола саридзӧ да бырис.
Войтырыс вуджис Йӧрдан юсӧ Ерикон кар весьтӧд.
Господьлысь Йитӧд куд нуысь попъяс сулалісны Йӧрдан ю шӧрын косінас, кытчӧдз Израиль пиян эз вуджны Йӧрдан юсӧ косінті.
Кор став войтырыс вуджис Йӧрдан ю вомӧн, Господь шуис Исуслы:
«Бӧрйӧй войтыр пӧвстсьыныд дас кык мортӧс, быд чужанкотырысь ӧтиӧс. Тшӧктӧй налы Йӧрдан ю шӧрысь, кӧні сулалӧны попъяс, босьтны дас кык из. Тайӧ изъяссӧ мед найӧ аскӧдныс нуасны да пуктасны сэтчӧ, кытчӧ тавой узьмӧдчасны».
Исус бӧрйис Израиль пиян пӧвстысь дас кык мортӧс, быд чужанкотырысь ӧтиӧс. Сійӧ корис найӧс да шуис: «Мунӧй асланыд Господь Енлӧн куд дорӧ Йӧрдан ю шӧрӧ да босьтӧй сэтысь Израиль чужанкотыръяслӧн лыд серти дас кык из. Быдӧн мед ваяс пельпом вылас ӧти из. Тайӧ изъясыс мед [пыр] лоӧны тіянлы казьтыланпасӧн.
Воас кад, кор тіян пиянныд юаласны: “Мыйла тайӧ изъясыс?” Сэки ті висьталӧй налы: “Тайӧ изъясыс казьтывлӧны сы йылысь, мый [став му пасьтала ыджыдалысь] Господьлӧн Йитӧд куд водзын Йӧрдан юын ваыс шӧри потіс. Йӧрдан ю вомӧн кудсӧ вуджӧдігӧн ваыс вешйис”. 
Тайӧ изъясыс лоӧны Израиль пиянлы пыр кежлӧ казьтыланпасӧн».
Израиль пиян ставсӧ вӧчисны Исуслӧн тшӧктӧм серти. Израиль пиянлӧн чужанкотыр лыд серти Йӧрдан шӧрысь босьтісны дас кык из, кыдзи Господь висьталіс Исуслы. Изъяссӧ нуисны узьмӧдчанінӧ да пуктісны сэтчӧ.
Нӧшта дас кык из Исус сувтӧдіс Йӧрдан ю шӧрӧ, кӧні сулалісны [Господьлысь] Йитӧд куд нуысь попъяс.
Ӧнӧдз тайӧ изъясыс сэнӧсь.
[Господьлысь] Йитӧд куд нуысь попъяс сулалісны Йӧрдан ю шӧрын, кытчӧдз эз вӧв вӧчӧма ставсӧ, мый Господь тшӧктіс Исус пыр войтырыслы. Исус вӧчис ставсӧ сідзи, кыдзи тшӧктіс Мӧисей.
Войтырыс тэрмасьӧмӧн вуджис юсӧ.
Став войтырыслӧн вуджӧм бӧрын Господьлысь [Йитӧд] куд нуысь попъяс вуджисны да бара сувтісны мунны войтырыс водзвылын.
Рувим да Гад чужанкотыръясысь да Манассейлӧн джын чужанкотырысь тышкайӧз мунісны Израиль пиян водзвылын, кыдзи тшӧктыліс налы Мӧисей.
Нелямын сюрс гӧгӧр тышкаморт восьлалісны Господьлӧн куд водзвылын Ерикон ковтыслань, медым петны тышӧ.
Тайӧ лунӧ Господь нимӧдіс Исусӧс став Израильлӧн син водзын. Мӧисейӧс моз войтырыс пыдди пуктіс Исусӧс став сылӧн олан лунъяс чӧжыс.
Господь шуис Исуслы:
«Тшӧкты Йитӧд куд нуысь попъяслы петны Йӧрдан юысь».
Исус тшӧктіс попъяслы петны Йӧрдан юысь.
Господьлысь Йитӧд куд нуысь попъяс петісны Йӧрдан юысь. Налӧн кокныс сӧмын тувччис Йӧрдан ю берегас, юын ваыс важ мозыс кутіс ёна визувтны.
Медводдза тӧлысьлӧн дасӧд лунӧ Израиль войтыр вуджис Йӧрдан ю да сувтіс Галгалӧ. Сэтчӧ, Ериконсянь асыввылӧ, найӧ сувтӧдісны чомъяснысӧ.
Йӧрдан юысь босьтӧм дас кык изсӧ Исус сувтӧдіс Галгалӧ. Израиль войтырлы сійӧ шуис: «Воас кад, кор тіян пиянныд юаласны: “Мыйла тайӧ изъясыс?” Сэки ті висьталӧй налы, мый Израиль войтыр вуджис Йӧрдан юсӧ косінті, ӧд Господь, тіян Енныд, косьтіс Йӧрдан ю тіян водзысь, кытчӧдз ставныд энӧ вуджӧй сійӧс. Тадзи Господь, тіян Енныд, вӧчис тшӧтш Гӧрд саридзкӧд. Сійӧ косьтіс саридзсӧ миян водзысь, кытчӧдз ми эгӧ вуджӧй сійӧс. Господь вӧчис тадзи, медым му вылын олысь войтыръяс тӧдмалісны, мый Сылӧн киыс вына, и медым ті став олан лунъяс чӧжныд полінныд Господьысь, асланыд Енмысь».
Йӧрдан ю рытыввылын олысь аморейяслӧн ӧксыяс да саридз бокын олысь ханаанса ӧксыяс кывлісны, мый Господь [Ен] косьтӧма Йӧрдан ю, и Израиль пиян вуджӧмаӧсь сійӧс. Таысь ӧксыясӧс полӧм босьтіс, Израиль пиянлы паныд сувтны найӧ эз лысьтны.
Сійӧ кадас Господь шуис Исуслы: «Вӧч изйысь [ёсь] пуртъяс да мӧдысь вундышт Израиль пиянӧс».
Исус вӧчис изйысь [ёсь] пуртъяс да вундыштіс Израиль пиянӧс. Сійӧ местасӧ нимтісны Вундыштчан ыбӧн.
[Египетысь петӧм бӧрын овтӧминті мунігкості чужӧм Израиль пиян вӧліны вундыштчытӧмӧсь.] Исус вундыштіс став айуловсӧ, ӧд Египетысь петӧм бӧрын ставныс, кодъяс вермисны петны тышӧ, овтӧминын кулалісны.
Египетысь петӧм став айуловсӧ вӧлі вундыштӧма, а овтӧминті мунігкості чужысьясӧс — абу.
Ӧд Израиль войтыр нелямын [кык] во чӧж ветлӧдліс овтӧминті. [Та вӧсна унаӧс абу на вӧлі вундыштӧма.] Египетысь петӧм израильса тышкайӧз эз нин вӧвны ловъяӧсь, ӧд найӧ эз кывзысьны Господьлысь. Господь кыв сетӧмӧн шуліс налы, мый найӧ оз аддзыны мусӧ, кӧні визувтӧ йӧв да ма, мусӧ, мый налӧн батьяслы кыв сетӧмӧн Господь кӧсйысис сетны миянлы. На пыдди Господь сувтӧдіс налысь пиянсӧ.
Исус вундыштіс налысь пиянсӧ, ӧд найӧ чужисны овтӧминын да вӧліны вундыштчытӧмӧсь на.
Мыйӧн ставнысӧ вӧлі вундыштӧма, найӧ асланыс чомъясын виччысисны бурдӧм.
Господь шуис Исуслы: «Египетын яналӧмнытӧ талун Ме вешті тіян вылысь».
Та вӧсна тайӧ местаыс ӧнӧдз шусьӧ Галгал.*
Сійӧ тӧлысьӧ, кор Израиль пиян сувтісны Галгалӧ, дас нёльӧд лунӧ рытнас найӧ сёйисны ыджыдлунся баляӧс Ерикон ковтысын.
Ыджыд лун бӧрся мӧд луннас сёйисны Ханаан мулысь быдтас: шомтӧм сӧчӧн да пражитӧм тусь.
Мувывса быдтас сёйӧм бӧрын Израиль пиянлӧн маннаыс эз нин вӧв. Тайӧ восяньыс найӧ пондісны сёйны Ханаан мулысь быдтассӧ.
Ерикон кар дорын Исус аддзис ас водзас сулалысь мортӧс. Сійӧ вӧлі перйӧма шыпуртсӧ.
Исус матыстчис сы дінӧ да юаліс: «Тэ миян дор али миянлы паныд?»
Сійӧ вочавидзис: «Абу.
Ме — Господьлӧн тышкакотырӧн веськӧдлысь. Та вӧсна ме тані».
Исус кымынь уськӧдчис муас да копыртчӧмӧн юаліс: «Ыджыдӧй, мый висьталан меным, аслад кесйӧглы?»
Господьлӧн тышкакотырӧн веськӧдлысь шуис Исуслы: «Пӧрччы кӧмтӧ, ӧд тайӧ местаыс, кӧні тэ сулалан, вежа».
Исус кывзысис.
Ерикон карса дзиръяяс видзисны йигналӧмӧн, ӧд йӧзыс полісны Израиль пиянысь. Некод эз вермы петны карсьыс, и некод эз вермы пырны карас.
Господь шуис Исуслы: «Ме сета тэнад киӧ Ерикон кар, сэтчӧс ӧксыӧс да сылысь вына тышкайӧзсӧ.
Аслад став тышкайӧзкӧд ӧтчыдысь луннас кытшовтӧй кар гӧгӧрыс.
Тадзи вӧчӧй квайт лун чӧж.
Йитӧд куд водзвылын мед мунасны сизим поп. Быдӧн мед босьтас буксан.
Сизимӧд луннас кар гӧгӧрыс кытшовтӧй сизимысь, а попъяс мед буксасны буксанӧн.
Кор ті кыланныд буксан шы, став войтырыс мед гораа горӧдас. Сэки карса стенмыс подулӧдзыс киссяс. Быдӧн мед [уськӧдчӧмӧн] пырас карас сэтысянь, кӧні сулалӧ».
Навлӧн Исус пиыс корис [израильса] попъясӧс да шуис налы: «Босьтӧй да нуӧй Йитӧд кудсӧ.
Сизим поп мед мунасны буксанъясӧн Господьлӧн куд водзвылас».
Сэсся Исус шуис [попъяслы, медым найӧ висьталасны] войтырыслы: «Мунӧй да кытшовтӧй кар гӧгӧрыс.
Шыпуртаяс мед мунасны Господьлӧн куд водзвылас».
Кор Исус ставсӧ висьталіс войтырыслы, сизим поп буксанъясӧн мӧдӧдчисны мунны Господьлӧн куд водзвылас. Муніганыс попъяс буксісны буксанӧн. Господьлысь Йитӧд кудсӧ нуисны на бӧрся.
Шыпуртаяс мунісны буксанӧн буксысь попъяс водзвылын, а [Господьлӧн Йитӧд] куд бӧрся мунісны мукӧд тышкайӧз. Мунігчӧжныс дугдывтӧг буксісны буксанӧн.
Войтырыслы Исус тшӧктіс: «Энӧ горзӧй! Тіянсянь мед весиг шы оз кыв, вомсьыныд мед кыв оз пет, кытчӧдз ме ог тшӧкты тіянлы горӧдны. Сэки горзӧй!»
Господьлысь [Йитӧд] кудсӧ ӧтчыдысь кытшовтӧдісны кар гӧгӧрыс.
Вой кежлас ставныс бӧр локтісны асланыс чомъясӧ.
Мӧд луннас Исус чеччис водз асывнас. Попъяс бара босьтісны нуны Господьлысь [Йитӧд] кудсӧ.
Господьлӧн куд водзвылас мунісны сизим поп да буксісны буксанӧн.
Попъяс водзвылын мунісны шыпуртаяс, а Господьлӧн [Йитӧд] куд бӧрся мунісны мукӧд тышкайӧз. Мунігчӧжныс дугдывтӧг буксісны буксанӧн.
Медводдза луннас моз мӧд луннас тшӧтш кытшовтісны карсӧ ӧтчыдысь. Та бӧрын локтісны асланыс чомъясӧ.
Тадзи вӧчисны квайт лун чӧж.
Но сизимӧд луннас чеччисны кыа петігӧн да кытшовтісны кар гӧгӧрыс сизимысь.
Сӧмын тайӧ лунӧ карсӧ кытшовтісны сизимысь.
Кар гӧгӧрыс сизимӧдысь кытшовтігӧн да попъяслӧн буксанӧн буксігӧн Исус тшӧктіс войтырыслы: «Горӧдӧй! Господь сетіс тіянлы карсӧ.
Карсӧ да ставсӧ, мый сэні эм, сиӧма Господьлы [Саваофлы]. 
Сӧмын Раавӧс, кырсалысь аньӧс, да быдӧнӧс, коді лоӧ сылӧн керкаын, ловйӧн кольӧй, ӧд сійӧ дзебис миянлысь кыйӧдчысьясӧс.
Видзчысьӧй, Господьлы сиӧмаысь нинӧм энӧ босьтӧй аслыныд. Босьтанныд кӧ, веськаланныд бырӧдӧм улӧ, и шогыс да бырӧдӧмыс суас став Израиль войтырӧс.
Став эзысь-зарнисӧ, ыргӧн да кӧрта кӧлуйсӧ колӧ вежӧдны-торйӧдны Господьлы да вайны Сылы озырлун видзанінӧ».
Попъяс букӧстісны буксанӧн.
И кор Израиль войтыр кыліс тайӧ шысӧ, найӧ кутісны гораа горзыны. Карса стенмыс подулӧдзыс киссис. Войтырыс пырис карас сэтысянь, кӧні коді сулаліс. Карсӧ вӧлі босьтӧма.
Найӧ дзикӧдз бырӧдісны карсьыс став айуловсӧ и аньсӧ, томӧс и пӧрысьӧс. Бырӧдісны тшӧтш налысь ыж-мӧссӧ да осёлъяссӧ. Найӧс ставнысӧ виалісны шыпуртӧн.
Тайӧ муас кыйӧдчыны волысь кык мортлы Исус шуис: «Мунӧй кырсалысь аньлӧн керкаӧ да кыв сетӧм сертиныд петкӧдӧй сійӧс да став сылысь гортсасӧ».
Кыйӧдчыны волысь том зонъяс мунісны [Раавлӧн керкаӧ] да петкӧдісны Раавӧс, сылысь бать-мамсӧ, вокъяссӧ, став гортсасӧ да рӧдвужсӧ. Найӧс нуӧдісны Израильлӧн чомъясысь ылӧджык.
Карсӧ да ставсӧ, мый сэні вӧлі, израильсаяс сотісны.
Сӧмын эзысь-зарни, ыргӧн да кӧрта кӧлуй вайисны Господьлы озырлун видзанінӧ.
Раавӧс, кырсалысь аньӧс, сылысь став гортсасӧ да батьыслысь рӧдсӧ Исус ловйӧн колис. Раавлӧн рӧдыс ӧнӧдз олӧ израильсаяс пӧвстын, ӧд сійӧ дзебліс ас ордас Ерикон карӧ кыйӧдчыны волысьясӧс, кодъясӧс мӧдӧдліс Исус.
Ерикон кар бырӧдӧм бӧрын Исус кыв сетӧмӧн шуис: «Господь водзын ёрӧма сійӧс, коді выльысь лэптас Ерикон кар.
Карыслы подув пуктӧм вӧсна сійӧ воштас медводдза писӧ, а карса дзиръя сувтӧдӧм вӧсна — медічӧт писӧ.
[Карыслы подув пуктӧм вӧсна Вефильысь Азан воштіс ассьыс медводдза писӧ, Авирамӧс, а карса дзиръя сувтӧдӧм вӧсна сійӧ воштіс медічӧт писӧ.]»
Исус нималіс став му пасьталаыс, ӧд Господь вӧлі сыкӧд.
Но Израиль пиян торкисны Господьлы сиӧмтор йылысь тшӧктӧмсӧ [да сиӧмторйысь босьтісны аслыныс]. 
Акан, коді вӧлі Иуда чужанкотырысь Зерах Завдий Кармилӧн пи, Господьлы сиӧмторйысь мыйкӧ вӧлі босьтӧма аслыс. Та вӧсна Господьлӧн скӧрлуныс ӧзйис Израиль пиян вылӧ.
Исус мӧдӧдіс ассьыс йӧзсӧ Ериконысь Гайӧ. Гай кар вӧлі Бет-Авенсянь матын, Вефильсянь асыввылын. Исус тшӧктіс налы: «Мунӧй видзӧдалӧй мусӧ».
Найӧ ветлісны видзӧдавны Гай кар.
Локтӧм бӧраныс найӧ шуисны Исуслы: «Став тышкайӧзлы сэтчӧ оз ков мунны, а сӧмын кык-ӧ-куим сюрс мортлы. Найӧ пасьвартасны Гай кар.
Оз ков мудзтӧдны став тышкайӧзсӧ, ӧд сэні олысьыс абу уна».
Тышӧ петісны куим сюрс гӧгӧр морт, но найӧ пышйисны Гайын олысьясысь.
Гайын олысьяс вӧтӧдісны найӧс карса дзиръя дорсяньыс Севаримӧдз, а сэні керӧсысь лэччиганыс виисны комын квайт израильса мортӧс.
Израильсаяс дзикӧдз ловнас усисны.
Исус косяліс паськӧмсӧ да кымынь уськӧдчис муас Господьлӧн куд водзӧ. Тадзи рытӧдзыс куйліс израильса юрнуӧдысьяскӧд. Юрнысӧ найӧ ставныс коялісны муӧн.
«Господьӧй Ыджыдӧй! Мыйла Тэ вуджӧдін тайӧ войтырсӧ Йӧрдан ю вомӧн? Медым сетны миянӧс аморейяслӧн киӧ? — юасис Исус.
— Бурджык, ми кӧ кольччим Йӧрдан ю сайӧ да олім сэні!
Господьӧй, мый ме верма ӧні шуны, кор израильса тышкайӧз бергӧдчисны мышкӧн вӧрӧглы да пышйисны?
Кор ханаансаяс да тайӧ муас мукӧд олысьыс кыласны та йылысь, найӧ кытшаласны миянӧс да вуштасны нимнымӧс войтыръяс пӧвстысь.
Мый Тэ вӧчан, медым дорйыны Ассьыд ыджыд нимтӧ?»
Господь шуис Исуслы: «Чеччы! Мыйла тэ уськӧдчин чужӧм вылад?
Израиль войтыр мыж вӧчис. Найӧ торкисны йитӧдӧс, мый Ме кӧрталі накӧд.
Меным сиӧмторйысь аслыныс юкӧн босьтісны. Тадзи найӧ гусясисны да гусялӧмторсӧ асланыс кӧлуй улас дзебисны.
Израиль пиян мышкӧн бергӧдчисны вӧрӧглы да пышйисны. Найӧ эз вермыны вӧрӧгӧс, ӧд веськалісны ёрӧм улӧ.
Ёрӧм улӧ веськалӧмаӧс кӧ онӧ бырӧдӧй ас пӧвстсьыныд, Ме тіянкӧд ог ло.
Чеччы! Вежӧд войтыртӧ да висьтав налы, мед асывводз кежлас вежӧдасны-сӧстӧммӧдасны асьнысӧ, ӧд Господь, Израильлӧн Ен, тадзи висьталӧ: Израиль войтыр, тіян пӧвстын эмӧсь ёрӧм улӧ веськалӧмаяс.
Кытчӧдз онӧ бырӧдӧй найӧс ас пӧвстсьыныд, вӧрӧгнытӧ онӧ вермӧй.
Аски асывнас матыстчӧй ме дінӧ чужанкотыр сертиныд.
Чужанкотыр, код вылӧ индас Господь, мед матыстчас рӧд бӧрся рӧд.
Рӧд, код вылӧ индас Господь, мед матыстчас котыр бӧрся котыр.
Котыр, код вылӧ индас Господь, мед матыстчас морт бӧрся морт.
Кор лоӧ аддзӧма Господьлы сиӧмтор босьтысь мортӧс, сотӧй биын сійӧс да ставсӧ, мый сылӧн эм. Ӧд сійӧ шогмытӧмтор вӧчис Израильын да торкис Господьлысь йитӧдсӧ, мый Сійӧ кӧрталіс тіянкӧд».
Мӧд луннас Исус чеччис водз, тшӧктіс Израиль войтырлы матыстчыны чужанкотыр сертиныс. Вӧлі индӧма Иуда чужанкотыр вылӧ.
Сэсся Исус тшӧктіс матыстчыны Иуда чужанкотырлӧн рӧдъяслы. Вӧлі индӧма Зерах рӧд вылӧ.
Исус тшӧктіс матыстчыны Зерах рӧдлы котыр сертиныс. Вӧлі индӧма Завдий [котыр] вылӧ.
Исус тшӧктіс матыстчыны Завдий котырысь айуловлы. Вӧлі индӧма Акан вылӧ. Сійӧ вӧлі Иуда чужанкотырысь Зерах Завдийлӧн Карми нима пилӧн пиыс.
Исус шуис Аканлы: «Пыдди пукты Израильлысь Господь Енсӧ да висьтась Сы водзын аслад мыжысь. Висьтав меным, мый тэ вӧчин, нинӧм эн дзеб».
Акан шуис Исуслы: «Збыльысь, ме вӧчи мыжсӧ Израильлӧн Господь Енлы паныд. Со мый вӧчи.
Тышын шедӧдӧмтор пӧвстысь ме аддзи сеннарсаяслысь мича паськӧм, кыксё сикель мында эзысь да зарни ёкмыль, мый сьӧктанас вӧлі ветымын сикель.
Ме ышті та вылӧ, босьті да дзеби чом улӧ, муас. Эзысьсӧ пыдӧджык дзебӧма».
Исус мӧдӧдіс йӧзӧс Аканлӧн чомйӧ. Найӧ котӧрӧн мунісны сэтчӧ да аддзисны ставсӧ, мый вӧлі дзебӧма чомъяс. Эзысьыс вӧлі медпыдын.
Найӧ вайисны ставсӧ Исуслы да Израиль пиянлы, пуктісны Господь водзӧ. 
Израиль войтыркӧд Исус петкӧдіс Акор ковтысӧ Зерахлысь Акан писӧ, Господьлы сиӧмторйысь босьтӧм паськӧмсӧ, эзысьсӧ да зарни ёкмыльсӧ, тшӧтш сылысь ныв-писӧ, ыж-мӧссӧ, осёлъяссӧ да чомсӧ — дзик ставсӧ, мый сылӧн вӧлі.
Исус шуис: «Сыысь, мый тэ вайин миянлы шог, Господь вайӧ талун шогсӧ тэныд».
Израильсаяс изъялісны Аканӧс да сылысь котырсӧ, сэсся сотісны да тыртісны изъясӧн. Ӧнӧдз на тайӧ ыджыд из чукӧрыс сулалӧ сійӧ местаас, мый шуӧны Акор ковтысӧн сэні лоӧмтор вӧсна. Аканлӧн кулӧм бӧрын Господьлӧн скӧрлуныс лӧнис.
Господь шуис Исуслы: «Эн пов да эн тірав.
Босьт аскӧдыд тышӧ петны вермысьясӧс да мун Гайӧ.
Ме сета тэнад киӧ сэтчӧс ӧксыӧс да сылысь войтырсӧ, карсӧ да ставнас мусӧ.
Вӧч Гай карыскӧд да сэтчӧс ӧксыкӧд сійӧ, мый вӧчин Ерикон каркӧд да сэтчӧс ӧксыкӧд. Но сэтысь ті верманныд босьтны аслыныд тышын шедӧдӧм эмбур да ыж-мӧскӧс.
Кар саяс сувтӧд кыйӧдчысьясӧс».
Исус став аслас тышкайӧзкӧд дасьтысис уськӧдчыны Гай кар вылӧ. Сійӧ бӧрйис комын сюрс медбур тышкамортӧс да войнас мӧдӧдіс найӧс. Сійӧ тшӧктіс налы: «Мунӧй кар саяс да сувтӧй кыйӧдчыны.
Лоӧй дасьӧсь!
Мукӧдыскӧд ме матыстча кар дорас.
Гайын олысьяс воддза мозыс уськӧдчасны миян вылӧ, а ми пышъям наысь.
Найӧ вӧтчасны миян бӧрся, и ми нуӧдам найӧс кар дорсьыс ылӧджык.
Найӧ чайтасны, мый ми воддза мозыс наысь пышъям.
Миян пышйигӧн ті петанныд кыйӧдчанінсьыд да босьтанныд карсӧ. Господь, тіян Енныд, сетас сійӧс тіян киӧ.
Карсӧ босьтӧм бӧрын сотӧй сійӧс Господьлӧн шуӧм серти.
Тайӧ менам тшӧктӧм тіянлы».
Исус тшӧктіс мунны налы. Найӧ сувтісны кыйӧдчыны Вефиль да Гай костӧ, Гайсянь рытыввылӧ.
Исус тайӧ войсӧ узис тышкайӧзыс пӧвстын.
Водз асывнас Исус кытшовтіс тышкайӧзсӧ, сэсся израильса юрнуӧдысьяскӧд сувтіс тышкайӧз водзвылӧ, и найӧ мӧдӧдчисны Гайлань.
Исус тышкайӧзыскӧд матыстчис карлань [асыввывсяньыс, а кыйӧдчаніныс вӧлі кар рытыввылын]. Найӧ сувтісны Гай кар войвывладорӧ. Карсьыс найӧс торйӧдіс ковтыс.
Гайсянь рытыввылӧ, Вефиль да Гай костӧ, Исус пуксьӧдіс кыйӧдчыны вит сюрс мортӧс.
Тадзи медшӧр тышкайӧзыс сулаліс войвылын, а ӧти котырыс — рытыввылын.
Войнас Исус петіс ковтыс шӧрас.
Кор гайса ӧксы водз асывнас аддзис израильсаясӧс, сійӧ дзик пыр петіс став аслас тышкайӧзкӧд индӧм местаӧ Йӧрдан ковтыслань, медым уськӧдчыны израильсаяс вылӧ.
Сійӧ эз тӧд, мый кар сайын эмӧсь кыйӧдчысьяс.
Исус аслас йӧзкӧд пышйис овтӧминлань, татшӧм ногӧн кӧсйис петкӧдлыны, быттьӧ вермисны сійӧс.
Гай карса став айуловсӧ чукӧстісны, медым вӧтӧдны израильсаясӧс. Исус бӧрся вӧтчигӧн найӧ ылыстчисны карсьыс.
Гайын да Вефильын эз вӧв сэтшӧм мортыс, коді эськӧ эз вӧтӧд израильсаясӧс.
Израильсаясӧс вӧтӧдігкості карныс вӧлі восьса.
Сэки Господь шуис Исуслы: «Лэптӧм шытӧ веськӧд Гайлань, ӧд Ме сета сійӧс тэнад киӧ. [Тэнад кыйӧдчысьясыд мед дзик пыр петасны кыйӧдчанінсьыс.]» 
Исус лэптіс шысӧ карлань.
Кыйӧдчысьясыс мыйӧн аддзисны Исуслысь ки лэптӧмсӧ, уськӧдчисны кар вылӧ, босьтісны сійӧс да дзик пыр сотісны.
Гайса айулов видзӧдлісны карлань да аддзисны, мый карныс сотчӧ, енэжӧ пуркйӧ тшын.
Налы некытчӧ вӧлі муннысӧ, ӧд овтӧминлань пышйысь израильсаяс бергӧдчисны налы паныд.
Исус да израильса тышкайӧз кор аддзисны, мый кыйӧдчысьяс босьтісны карсӧ, и мый сэтысь тшын кайӧ, найӧ бӧр бергӧдчисны, медым уськӧдчыны гайса айулов вылӧ.
Карсӧ сотӧм бӧрын израильса кыйӧдчысьяс тшӧтш уськӧдчисны гайса айулов вылӧ. Тадзи израильсаяс кыкнанладорсяньыс топӧдісны найӧс да виалісны ставнысӧ.
Некод ловйӧн эз коль, некод эз вермы пышйыны.
Сӧмын гайса ӧксыӧс босьтісны ловйӧн да вайӧдісны Исус дінӧ.
Гайса айуловӧс овтӧминын шыпуртӧн виалӧм бӧрын израильсаяс бергӧдчисны Гай карӧ да сэтысь виалісны шыпуртӧн быдӧнӧс. 
Сійӧ лунӧ Гайысь вӧлі виӧма став олысьсӧ — дас кык сюрс айловӧс да аньӧс.
Исус эз лэдз кисьыс лэптӧм шысӧ, кытчӧдз израильсаяс эз бырӧдны Гайысь став олысьсӧ.
Ыж-мӧссӧ да шедӧдӧм эмбурсӧ израильсаяс босьтісны аслыныс, кыдзи Господь тшӧктіс Исуслы.
Гай карсӧ Исус сотіс. Тайӧ карыс пыр кежлӧ овтӧмӧн колис, ӧнӧдз сійӧ татшӧм.
Гайса ӧксыӧс Исус ӧшӧдіс пу вылӧ, сійӧ ӧшаліс сэні рытӧдзыс.
Шонді лэччӧм бӧрын Исуслӧн тшӧктӧм серти шойсӧ лэдзисны сэтысь, шыбитісны карса дзиръя дорӧ да тыртісны изъясӧн. Ӧнӧдз на сэні эм ыджыд из чукӧрыс.
Эвал керӧс вылӧ Исус лэптіс висьпуктанін Господьлы, Израильлӧн Енлы. Висьпуктанінсӧ вӧчис керавтӧм-шыльӧдтӧм изъясысь, кыдзи Мӧисей, Господьлӧн кесйӧг, тшӧктіс Израиль пиянлы. Та йылысь гижӧма Мӧисейлӧн Индӧд небӧгӧ. 
Тайӧ висьпуктанін вылас Израиль войтыр вайисны Господьлы сотан да бурасян висьяс.
Израиль войтырлӧн син водзын Исус гижис изъяс вылас Мӧисейлысь Индӧдсӧ.
Став Израиль войтыр да йӧз муысь локтысьяс, войтырлӧн юрнуӧдысьяс, веськӧдлысьяс да ёрдысьяс сувтісны Господьлӧн Йитӧд куд кыкнанладорас, а на водзын сулалісны Левий чужанкотырысь куд новлӧдлысь попъяс. Войтырлӧн ӧтар джынйыс видзӧдіс Гаризим керӧслань, а мӧд джынйыс видзӧдіс Эвал керӧслань. Тадзи Мӧисей, Господьлӧн кесйӧг, коркӧ тшӧктіс бурсины Израиль войтырӧс.
Та бӧрын Исус лыддис Индӧдысь бурсиӧмсӧ да ёрӧмсӧ — ставсӧ, мый вӧлі гижӧма Индӧд небӧгас.
Кор Исус ставсӧ лыддис Израиль войтырлы, сійӧс кывзісны айулов, аньяс да челядь, тшӧтш на пӧвстын олысь йӧз муысь локтысьяс. Ставсьыс, мый Мӧисей тшӧктіс, весиг ӧти кыв эз коль лыддьытӧг.
Тайӧ лоӧмторъяс йывсьыс тӧдмалісны [аморейяслӧн] став ӧксыыс, кодъяс олісны Йӧрдан ю рытыввыв муын: керӧсвыв муын, керӧсбердса муын, Ыджыд саридз пӧлӧн да Ливан дорын. Тайӧ вӧліны хеттейяс, аморейяс, [гергесейяс,] ханаансаяс, перезейяс, хивейяс да евуссаяс. Ставныс найӧ ӧтувтчисны, медым петны тышӧ Исуслы да Израильлы паныд.
Но кор Гаваон карса олысьяс тӧдмалісны, мый Исус вӧчис Ерикон да Гай каръяслы, шуисны ылӧдлыны израильсаясӧс. Ӧткымын морт мӧдӧдчисны туйӧ, босьтісны важмӧм мешӧкъясӧ сёян, а косясьлӧм-дӧмлӧм кучик дозъясӧ босьтісны вина да пуктісны ставсӧ осёлъяс вылӧ.
Асьныс кӧмалісны дӧмлӧм кӧмъяс, пасьталісны киссьӧм паськӧм, туяныс босьтісны кос да чирйыссьӧм нянь.
Найӧ локтісны Исус дінӧ Галгалӧ, кӧні сулалісны израильсаяслӧн чомъяс, сэсся шуисны Исуслы да израильсаяслы: «Ми локтім тіян дінӧ ылі муысь.
Кӧрталӧй миянкӧд йитӧд».
Израильсаяс шуисны локтӧм хивейяслы: «Гашкӧ, ті миянкӧд орччӧн оланныд?
Ми огӧ вермӧй тіянкӧд йитӧд кӧртавны».
Найӧ вочавидзисны: «Ми — тэнад кесйӧгъяс».
Исус юаліс налысь: «Кодъяс ті? Кытысь локтінныд?»
Найӧ вочавидзисны: «Ми, тэнад кесйӧгъяс, локтім зэв ылі муысь. Ми кывлім тіян Господь Енлӧн выныс йылысь.
Кывлім, мый Сійӧ вӧчис Египетын да аморейяслӧн кык ӧксылы Йӧрдан сайын, хешбонса Сигон ӧксылы да васанса Ог ӧксылы, коді оліс Аштаротын [да Эдрейын].
Та вӧсна миян юрнуӧдысьяс да став олысьыс тшӧктісны миянлы: “Босьтӧй туйӧ сёян да петӧй налы воча. Шуӧй налы, ми пӧ тіян кесйӧгъяс, корам, кӧрталӧй миянкӧд йитӧд”.
Со миян няньным, гортысь петіганым сійӧ пӧсь на вӧлі, а ӧні косьмӧма да чирйыссьӧма.
Вина тыра кучик дозъясным выльӧсь вӧліны, а ӧні со косясьлӧмаӧсь.
Кузь туй вӧсна миян паськӧмным дзикӧдз киссьӧма».
Господьлысь юасьтӧг израильсаяс видлісны локтысьяслысь няньсӧ.
Исус кӧрталіс накӧд йитӧд, кӧсйысис, мый найӧс ловйӧн коляс да оз пет тышӧ налы паныд.
Израильса юралысьяс кыв сетісны налы.
Куим лун мысти израильсаяс тӧдмалісны, мый йӧзыс, кодъяскӧд найӧ кӧрталісны йитӧд, олӧны насянь матын.
Сэки Израиль пиян петісны туйӧ да куим лун мысти воисны налӧн Гаваон, Кефира, Берот да Киръят-Ярим каръясӧдз.
[Исус да] Израиль пиян эз уськӧдчыны на вылӧ, ӧд Израиль войтырлӧн юралысьясыс вӧлі кыв сетӧмаӧсь налы Израильлӧн Господь Ен водзын.
Став Израиль войтыр кутіс шуасьны юралысьяс вылӧ, но найӧ шуисны: «Израильлӧн Господь Ен водзын ми кыв сетім налы, та вӧсна огӧ вермӧй вӧрзьӧдны найӧс.
Ловйӧн колям найӧс, медым кыв сетӧм торкӧмысь эз су миянӧс Енлӧн скӧрлуныс».
Юралысьяс тшӧктісны ловйӧн кольны найӧс, и найӧ лоины Израиль войтырлы пес кералысьясӧн да ва ваялысьясӧн.
Йӧзлы, кодъяс волісны Галгалӧ, Исус шуис: «Мыйла ті ылӧдлінныд миянӧс? Шуинныд, мый зэв ылын оланныд, а вӧлӧмкӧ, миянсянь матынӧсь.
Та вӧсна ёрӧма тіянӧс.
Нэмсӧ кутанныд кесйӧг туйын овны, кутанныд керавны пес да ваявны ва [меным да] менам Енлӧн керкаӧ!»
Найӧ шуисны Исуслы: «Миянлы, тэнад кесйӧгъяслы, юӧртісны, мый Господь, тіян Енныд, тшӧктӧма Аслас Мӧисей кесйӧглы, сетны тіянлы став тайӧ мусӧ да бырӧдны [миянӧс да] тайӧ муас олысьяссӧ.
Ми ёна полім, мый ті бырӧданныд миянӧс, та вӧсна тадзи вӧчим.
Ӧні ми тэнад киынӧсь. Вӧч миянкӧд сійӧ, мый чайтан бурӧн да веськыдӧн».
Исус эз сет хивейясӧс Израиль пиян киӧ, эз лэдз вины найӧс.
Тайӧ лунсяньыс Исус уджӧдіс [гаваонса олысь] хивейясӧс, налы ковмис керавны пес да ваявны ва Израиль войтырлы, а сідзжӧ Господьлӧн висьпуктанінӧ. Сійӧ местаас, мый бӧрйӧма Господь, найӧ ӧнӧдз вӧчӧны тайӧ уджсӧ.
Ерусалимса Адони-Седек ӧксылы кывсис, мый Исус босьтӧма да дзикӧдз бырӧдӧма Гай карсӧ да сэтчӧс ӧксыӧс, кыдзи бырӧдӧма Ерикон карсӧ да сэтчӧс ӧксыӧс. Нӧшта кывсис, мый гаваонса олысьяс кӧрталӧмаӧсь йитӧд [Исускӧд да] израильсаяскӧд да кольччӧмаӧсь овны на пӧвстӧ. Адони-Седек ёна повзис, ӧд Гаваон кар вӧлі ӧксыяслӧн юралан каръяс кодь ыджыд. Сійӧ вӧлі Гай карысь на ыджыд, и сэтчӧс айуловыс вӧліны вына тышкасьысьяс.
Та вӧсна ерусалимса Адони-Седек ӧксы мӧдӧдаліс ассьыс йӧзсӧ хевронса Гогам ӧксы дінӧ, ярмутса Фирам ӧксы дінӧ, лакишса Яфий ӧксы дінӧ да эглонса Девир ӧксы дінӧ висьтавны:
«Локтӧй ме дінӧ, отсалӧй пасьвартны Гаваон кар, ӧд сэтчӧс олысьяс кӧрталӧмаӧсь йитӧд Исускӧд да Израиль пиянкӧд».
Аморейяслӧн витнан ӧксыыс — ерусалимса, хевронса, ярмутса, лакишса да эглонса ӧксыяс — асланыс тышкайӧзкӧд чукӧртчисны Гаваон кар дорӧ, медым уськӧдчыны сы вылӧ.
Гаваонса олысьяс мӧдӧдісны мортӧс Исус дінӧ Галгалӧ, кӧні сулалісны израильсаяслӧн чомъясыс, медым шуны: «Ми — тэнад кесйӧгъяс.
Эн коль миянӧс, лок ӧдйӧджык миянлы отсӧг вылӧ.
Мезды миянӧс, ӧд керӧсвыв муын олысь аморейяслӧн став ӧксыыс чукӧртчисны, медым уськӧдчыны миян вылӧ».
Тайӧс кылӧм бӧрын Исус мӧдӧдчис Галгалысь аслас тышкайӧзкӧд, код пӧвстын вӧліны медбур тышкасьысьяс.
Господь шуис Исуслы: «Эн пов аморейясысь, Ме сета найӧс тэнад киӧ. На пӧвстысь некод оз вермы водзсасьны тэкӧд».
Галгалысь петӧм бӧрын Исус муніс войбыд. Сійӧ уськӧдчис аморейяс вылӧ буретш сэки, кор найӧ эз виччысьны тайӧс.
Господь шӧйӧвоштіс аморейясӧс израильса тышкайӧзлӧн син водзын. Гаваон дорын израильсаяс пасьвартісны аморейясӧс. Сэсся Бет-Хоронӧ кайысь туйӧд Азека да Македа каръясӧдз вӧтчисны пышйысьяс бӧрся да бырӧдісны найӧс.
Кор найӧ израильса тышкайӧзысь пышйигӧн лэччисны Бет-Хорон керӧс вылысь, Господь шыблаліс на вылӧ енэжсянь гырысь йиа шер. Тадзи вӧлі Азека карӧдз став туй чӧжныс, и унаӧн кулісны.
Унджыкыс кулісны эз израильсаяслӧн шыпурт помысь, а гырысь йиа шер улӧ веськалӧмысь.
Сійӧ лунӧ, кор Господь [Ен] сетіс аморейясӧс Израиль пиянлӧн киӧ, Исус шыасис Господь дінӧ израильсаяс водзын. Сійӧ шуис: — Шонді, сувт Гаваон весьтӧ! Тӧлысь, сулав Аялон ковтыс весьтын!
Шондіыс сувтіс, и тӧлысьыс сулаліс, кытчӧдз Израиль войтыр эз перйы водзӧс вӧрӧглысь.
Тадзи гижӧма Веськыда олысьлӧн небӧгын. Шондіыс лунтыр сулаліс енэж шӧрас, эз тэрмась лэччыны рытыввылӧ.
Татшӧм луныс, кор Господь тадзи вӧчис мортлӧн корӧм серти, таӧдз ни та бӧрын эз вӧвлы.
Ачыс Господь тышкасис Израиль вӧсна.
Та бӧрын Исус да став израильса тышкайӧзыс бӧр локтісны Галгалӧ асланыс чомъясӧ.
А витнан ӧксыыс пышйисны Македаӧ да дзебсисны кырта горсйӧ.
Кор Исусӧдз воис юӧр, мый витнан ӧксыыс сюрӧмаӧсь, и мый найӧ дзебсясьӧны Македа кырта горсйын, сійӧ шуис: «Кырта горс вомсӧ тупкӧй ыджыд изъясӧн да сувтӧдӧй видзысьясӧс.
А ті водзӧ вӧтӧдӧй вӧрӧгтӧ. Виалӧй ставнысӧ, энӧ лэдзӧй налы пышйыны асланыс каръясӧ. Господь, тіян Енныд, сетас найӧс тіян киӧ».
Исус да Израиль пиян дзикӧдз пасьвартісны вӧрӧгӧс. Коли сӧмын лыда морт, кодъяс вермисны пышйыны асланыс изкаръясӧ. Став израильса тышкайӧзыс дзоньвидзаӧн бӧр локтісны Македаӧ сувтӧдӧм чомъясӧ Исус дінӧ. Израиль пиян вылӧ некод эз лысьт весиг вомсӧ восьтны.
Исус шуис: «Кырта горсйысь витнан ӧксысӧ вайӧдӧй ме дінӧ».
Вӧчисны Исуслӧн тшӧктӧм серти, петкӧдісны кырта горсйысь ерусалимса, хевронса, ярмутса, лакишса да эглонса ӧксыясӧс.
Ӧксыясӧс вайӧдӧм бӧрын Исус чукӧртіс Израиль войтырӧс да шуис тышкайӧзӧн веськӧдлысьяслы, кодъяс ветлісны сыкӧд тышӧ: «Матыстчӧй, тувччӧй кокнаныд ӧксыяслы голя выланыс».
Найӧ сідзи и вӧчисны.
Исус шуис аслас йӧзлы: «Энӧ полӧй да энӧ тіралӧй! Лоӧй зумыдӧсь да повтӧмӧсь!
Господь тадзи вӧчас став вӧрӧгныдкӧд, кодъяскӧд кутанныд тышкасьны».
Сэсся Исус виис ӧксыясӧс да ӧшӧдіс шойяссӧ вит пу вылӧ.
Сэні найӧ ӧшалісны рытӧдзыс.
Шонді пуксигӧн Исус тшӧктіс лэдзны шойяссӧ пуяс вылысь да шыбитны кырта горсйӧ, кӧні ӧксыясыс дзебсясисны. Кырта горс пыранінсӧ тупкисны ыджыд изъясӧн. Тайӧ изъясыс ӧнӧдз сэнӧсь.
Тайӧ лунӧ Исус босьтіс Македа кар, шыпуртӧн виис сэтчӧс олысьясӧс да налысь ӧксысӧ. Дзикӧдз бырӧдіс став ловъя олысьсӧ. Некод ловйӧн эз коль [и эз пышйы]. 
Македаса ӧксылы Исус вӧчис ериконса ӧксылы моз.
Македа карысь Исус мӧдӧдчис израильса тышкайӧзкӧд Ливна карӧ да уськӧдчис сы вылӧ.
Господь сетіс Ливна кар да сэтчӧс ӧксыӧс израильсаяслӧн киӧ [и найӧ босьтісны сійӧс аслыныс]. Исус бырӧдіс карсӧ да виис шыпуртӧн сэтчӧс став ловъя олысьсӧ. Некод ловйӧн эз коль [и эз пышйы]. Ливнаса ӧксылы Исус вӧчис ериконса ӧксылы моз.
Ливна карысь Исус мӧдӧдчис израильса тышкайӧзкӧд Лакиш карӧ. Найӧ сувтісны карыслы воча да уськӧдчисны сы вылӧ.
Мӧд луннас Господь сетіс Лакиш кар израильсаяслӧн киӧ. Ливна карӧс моз найӧ босьтісны Лакиш кар, бырӧдісны сійӧс да виисны шыпуртӧн сэтчӧс став ловъя олысьсӧ.
Тыш дырйи Лакиш карлы отсӧг вылӧ локтіс гезерса Хорам ӧксы.
Но Исус вермис сійӧс да сылысь войтырсӧ [шыпуртӧн], ставнысӧ ӧтитӧг виис. Некод ловйӧн эз коль [и эз пышйы].
Лакиш карысь Исус мӧдӧдчис израильса тышкайӧзкӧд Эглон карӧ. Найӧ сувтісны карыслы воча да уськӧдчисны сы вылӧ.
[Господь сетіс Эглон карӧс израильсаяслӧн киӧ.] Сійӧ жӧ лунӧ найӧ босьтісны карсӧ да виисны шыпуртӧн сэтчӧс став ловъя олысьсӧ. Лакиш карӧс моз найӧ дзикӧдз бырӧдісны Эглон кар.
Эглон карысь Исус мӧдӧдчис израильса тышкайӧзкӧд Хеврон карӧ да уськӧдчис сы вылӧ.
Найӧ босьтісны Хеврон кар да бырӧдісны сійӧс, виисны шыпуртӧн сэтчӧс олысьясӧс да налысь ӧксысӧ, бырӧдісны сэтчӧс став кар-сиктсӧ да став ловъя олысьсӧ.
Эглон карӧс моз Исус дзикӧдз бырӧдіс Хеврон кар да сэтчӧс став ловъя олысьсӧ.
Сэсся Исус израильса тышкайӧзкӧд бергӧдчис Девир карлань да уськӧдчис сы вылӧ.
Найӧ босьтісны Девир кар да сэтчӧс став кар-сиктсӧ. Виалісны шыпуртӧн ӧксыӧс да сэтчӧс став ловъя олысьсӧ.
Хеврон да Ливна каръясӧс да сэтчӧс ӧксыясӧс моз Исус дзикӧдз бырӧдіс Девир кар да сэтчӧс ӧксыӧс.
Исус босьтіс керӧсвыв му, Негев му, нӧшта рытыввыв да асыввыв керӧсбердса муяс, виис сэтчӧс ӧксыясӧс да олысьясӧс. Исус дзикӧдз бырӧдіс став ловъя олысьсӧ, кыдзи тшӧктіс Господь, Израильлӧн Ен.
Исус босьтіс Кадеш-Варнисянь Газаӧдз став мусӧ да Гаваонӧдз Гошен му.
Ӧтчыдысь уськӧдчӧмӧн сійӧ пасьвартіс тайӧ муяссӧ да налысь ӧксыяссӧ, ӧд Господь, Израильлӧн Ен, тышкасис Израиль вӧсна.
Сэсся Исус аслас тышкайӧзкӧд бӧр локтіс Галгалӧ сувтӧдӧм чомъясӧ.
Та йылысь кылӧм бӧрын хацорса Явин ӧксы мӧдӧдіс ассьыс йӧзсӧ мадонса Иовав ӧксы дінӧ, шимронса да аксафса ӧксыяс дінӧ, нӧшта ӧксыяс дінӧ, кодъяс олісны войвыв керӧсъяс вылын, Йӧрдан ковтысын Киннерет тысянь лунвылын, керӧсбердса муын да рытыввыв Нафат-Дор муын. Явин ӧксы ыстіс ассьыс йӧзсӧ тшӧтш асыввылын да саридз бокын олысь ханаансаяс дінӧ, керӧсвыв муын олысь аморейяс, хеттейяс, перезейяс да евуссаяс дінӧ, тшӧтш хивейяс дінӧ, кодъяс олісны Ермон бокын Миспа муын.
Став тайӧ ӧксыыс асланыс тышкайӧзкӧд петісны тышӧ. Найӧ вӧліны саридздор лыа мында, и налӧн вӧлі унасьыс-уна вӧв да тарантас.
Чукӧртчӧм бӧрын ӧксыяс сувтісны Мером ты дорӧ, медым уськӧдчыны Израиль вылӧ.
Господь шуис Исуслы: «Эн пов наысь. Аски тайӧ кадас Ме сета израильса тышкайӧзлы пасьвартны найӧс.
Вӧвъясныслысь кок сӧнсӧ вундав, а тарантасъяссӧ сот».
Исус да сылӧн тышкайӧзыс локтісны Мером ты дорӧ да виччысьтӧг уськӧдчисны вӧрӧгныс вылӧ.
Господь сетіс найӧс Израиль киӧ. Израильсаяс вермисны тышын да вӧтӧдісны найӧс войвылын ыджыд Сидон карӧдз да Мисрефот-Маимӧдз, а асыввылын Мицфе ковтысӧдз. Ставнысӧ виалісны. Некод ловйӧн эз коль [и эз пышйы].
Исус вӧчис Господьлӧн тшӧктӧм серти — вӧрӧглӧн вӧвъясыслысь кок сӧнсӧ вундаліс, а тарантасъяссӧ сотіс.
Бӧрсӧ локтігас Исус босьтіс Хацор кар да виис шыпуртӧн хацорса ӧксыӧс. Таӧдз Хацор кар вӧлі сэтчӧс ӧксыяслӧн каръясысь медтӧдчанаыс.
Виисны шыпуртӧн тшӧтш сэтчӧс олысьясӧс, дзикӧдз бырӧдісны став ловъя олысьсӧ.
Хацор карсӧ Исус сотіс.
Исус босьтіс тшӧтш мукӧд ӧксыяслысь каръяссӧ, виис шыпуртӧн став ӧксысӧ да сэтчӧс олысьясӧс. Сійӧ дзикӧдз бырӧдіс ставнысӧ, кыдзи тшӧктіс Мӧисей, Господьлӧн кесйӧг.
Но налысь керӧсвывса каръяссӧ израильсаяс эз сотны. Исус сотіс сӧмын Хацор кар.
Тайӧ каръясысь шедӧдӧмторсӧ да ыж-мӧссӧ Израиль пиян босьтісны аслыныс.
А став йӧзсӧ виалісны шыпуртӧн, ловъя морт эз коль.
Кыдзи Господь тшӧктіс Аслас Мӧисей кесйӧглы, сідзи Мӧисей тшӧктіс Исуслы. Исус нинӧм эз торк сыысь, мый Господь тшӧктіс Мӧисейлы.
Исус босьтіс тайӧ муяссӧ: керӧсвыв му, Негев да Гошен муяс, керӧсбердса му, Йӧрдан ковтыс, Израиль керӧсъяс да на бердысь му. Босьтӧм муяс нюжӧдчисны Сеир керӧсвыв му дорын сулалысь Халак керӧссянь Ваал-Гад карӧдз, мый сулалӧ Ермон керӧс бердын Ливан ковтысын. Став сэтчӧс ӧксысӧ Исус босьтіс пленӧ да виис.
Тайӧ ӧксыясыскӧд Исус вермасис дыр кад чӧж.
Гаваон карын олысь хивейяс кындзи некод эз кӧртав йитӧд Израиль пиянкӧд. Став мукӧд карсӧ израильсаяс босьтісны тышӧн.
Ӧд Господь чорзьӧдіс тайӧ войтыръяслысь сьӧлӧмсӧ да ышӧдіс найӧс уськӧдчыны Израиль войтыр вылӧ, медым израильсаяс жалиттӧг дзикӧдз бырӧдісны найӧс, кыдзи Господь тшӧктіс Мӧисейлы.
Тайӧ кадас Исус петіс енак войтырлы паныд тышӧ да пасьвартіс найӧс керӧсвывса Хеврон, Девир да Анав каръясын, Иуда да Израиль керӧсвыв муясын.
Исус дзикӧдз бырӧдіс найӧс да налысь каръяссӧ.
Израиль муын эз коль енак войтырысь ни ӧти морт, найӧ колисны сӧмын Газаын, Гефын да Азотын.
Тадзи Исус босьтіс ставнас мусӧ, кыдзи Господь висьталіс Мӧисейлы. Исус юкліс мусӧ Израильлӧн чужанкотыръяслы.
Тышъяс бӧрын тайӧ муас пуксис лӧнь кад.
Израиль пиян босьтісны аслыныс Йӧрдан ю сайысь став асыввыв ковтыссӧ, мый нюжӧдчӧ Арнон юсянь Ермон керӧсӧдз. Найӧ виисны сэтчӧс ӧксыясӧс.
Аморейяслӧн Сигон ӧксы оліс Хешбонын. Сылӧн кипод улын вӧлі Галаад мулӧн джынйыс, мый лунвылын заводитчис Арнон ю бокын сулалысь Ароэр карсянь да Арнон ковтыс шӧрсянь. Войвылын сылӧн муыс нюжӧдчис Явок юӧдз, а асыввылын — аммон войтырлӧн муӧдз. Сылӧн муас пырис тшӧтш асыввыв Йӧрдан ковтыс Киннерет тысянь Сола саридзӧдз, Бет-Ешимот карӧдз да Фасга керӧс дорӧдз.
Васанса Ог ӧксы вӧлі рефа войтырысь медбӧръя морт. Сылӧн юркаръяснас вӧліны Аштарот да Эдрей каръяс. Сылӧн кипод улын вӧліны Ермон керӧс, Салка кар, ставнас Васан му гешурсаяслӧн да маакасаяслӧн оланінӧдз, тшӧтш Галаад мулӧн джыныс хешбонса Сигон ӧксылӧн муӧдз.
Мӧисей, Господьлӧн кесйӧг, да Израиль пиян пасьвартісны тайӧ ӧксыяссӧ.
Мӧисей сетіс тайӧ муяссӧ Рувим да Гад чужанкотыръяслы да Манассейлӧн джын чужанкотырлы.
Исус да Израиль пиян пасьвартісны ӧксыясӧс Йӧрдан ю рытыввыв муысь [аморейяслӧн муысь]. Налӧн муясыс нюжӧдчисны Ливан ковтысын сулалысь Ваал-Гад карсянь Сеир керӧсвыв му дорын сулалысь Халак керӧсӧдз. Тайӧ муяссӧ Исус юкліс Израиль чужанкотыръяслы, сетіс быд чужанкотырлы индӧм му юкӧн. Юклӧм муас пырисны керӧсвыв му, рытыввыв да асыввыв керӧсбердса муяс, Йӧрдан ковтыс, овтӧмин да Негев му. Тайӧ муясын олісны хеттейяс, аморейяс, ханаансаяс, перезейяс, хивейяс да евуссаяс.
Пасьвартӧм ӧксыяслӧн каръясыс: Ерикон, Вефильсянь матын сулалысь Гай кар, Ерусалим, Хеврон, Ярмут, Лакиш, Эглон, Гезер, Девир, Гедер, Хорма, Арад, Ливна, Адуллам, Македа, Вефиль, Таппуах, Хефер, Афек, Шарон, Мадон, Хацор, Шимрон-Мерон, Аксаф, Танак, Мегиддо, Кедеш, Кармил керӧсбердса Иокнеам кар, Нафат-Дор бердын Дор кар, Галилеяын Гоим кар да Тирза кар.
Ставнас пасьвартісны комын ӧти ӧксыӧс.
Исус вӧлі ыджыд арлыда нин. Господь шуис сылы: «Тэ пӧрысьмин, а Израиль войтырлы уна му на колӧ босьтны аслыныс: филистимсаяслысь да гешурсаяслысь муяс, мый пырӧны Ханаан муӧ да паськӧдчӧны Египет мудорын визувтысь Шихор юсянь войвылӧ Экрон карӧдз. Тайӧ му вылас ыджыдалӧны филистимса вит юралысь: газаса, азотса, аскалонса, гефса да экронса юралысьяс. Сэні ыджыдалӧны тшӧтш аввейяс, кодъяс олӧны лунвылын.
Ханаан муӧ пырӧ тшӧтш му сидонсаяслӧн Меарасянь Афекӧдз, аморейяслӧн оланінӧдз, тшӧтш [филистимсаяслӧн] Гевал му да асыввыв Ливан му Ермон керӧс бокын сулалысь Ваал-Гад карсянь Лево-Хаматӧдз.
Ме вӧтла Израиль пиян водзысь керӧсвыв муын олысь сидонсаясӧс Ливансянь Мисрефот-Маимӧдз.
Юк тайӧ муяссӧ Израиль войтырлы, кыдзи Ме тшӧкті тэныд.
Юк мусӧ ӧкмыс чужанкотырлы да Манассейлӧн джын чужанкотырлы [рытыввылысь мусӧ Йӧрдан юсянь Ыджыд саридзӧдз сет налы]».
Рувим да Гад чужанкотыръяслы да Манассейлӧн джын чужанкотырлы Мӧисей, Господьлӧн кесйӧг, сетіс му Йӧрдан ю асыввылысь. Лунвылын налӧн муыс заводитчӧ Арнон ю бокын сулалысь Ароэр карсянь да Арнон ковтыс шӧрын сулалысь карсянь.
Налӧн муас пырӧны Медева вывтасін Дивон карӧдз, аморейяслӧн Хешбонын юралысь Сигон ӧксылӧн каръяс аммон войтырлӧн оланінӧдз, нӧшта Галаад, Гешур да Маака муяс, Ермон керӧс да став Васан му Салка карӧдз. Васан муыс вӧлі Ог ӧксылӧн, коді юраліс Аштарот да Эдрей каръясын.
Сійӧ вӧлі рефа войтырысь медбӧръя морт. Мӧисей вермис тайӧ войтырсӧ да босьтіс налысь мусӧ.
Но израильсаяс эз вӧтлыны гешурсаясӧс да маакасаясӧс [да ханаансаясӧс], и гешурсаяс да маакасаяс ӧнӧдз олӧны израильсаяс пӧвстын.
Сӧмын Левий чужанкотырлы Мӧисей эз сет мусӧ. Налӧн пайыс — висьяс, мый Израиль войтыр вайӧ Господьлы, аслас Енлы. Тадзи лӧсьӧдіс Господь.
[Йӧрдан сайысь, Ериконлы воча Моав ласта вылысь Мӧисей юкліс му Израиль чужанкотыръяслы тадзи:]
Рувим чужанкотырлӧн рӧдъяслы Мӧисей сетіс му Арнон ю бокын сулалысь Ароэр карсянь да Арнон ковтыс шӧрын сулалысь карсянь войвылӧ, тшӧтш Медева вывтасін, Хешбон да сы гӧгӧрысь вывтасінса каръяс — Дивон, Вамот-Ваал, Бет-Ваал-Меон, Яхац, Кедемот, Мефат, Киръятаим, Сивма да Церет-Шахар, мый сулалӧ ковтысса керӧс вылын. Мӧисей сетіс Рувим чужанкотырлы тшӧтш Бет-Пеор да Бет-Ешимот каръяс, Фасга керӧс, мукӧд вывтасінса каръяс да аморейяслӧн Сигон ӧксылысь став мусӧ. Сигон ӧксы юраліс Хешбонын. Мӧисей пасьвартіс Сигонӧс да сылысь киподувса мадианса ӧксыясӧс. Тайӧ вӧліны Эви, Рекем, Цур, Хур да Ревай, кодъяс олісны Сигон ӧксылӧн муын.
Израиль пиян виисны тшӧтш Веорлысь Валаам писӧ, коді вӧлі тунасьысь.
Рытыввылын Рувим чужанкотырлӧн мудорнас вӧлі Йӧрдан ю.
Став тайӧ мусӧ сэтчӧс кар-сиктъяснас вичмӧдӧма Рувим чужанкотырлӧн рӧдъяслы.
Гад чужанкотырлӧн рӧдъяслы Мӧисей сетіс Язер кар, Галаадысь став карсӧ да аммон войтырлысь джын мусӧ Ароэр карӧдз, мый сулалӧ Равва карсянь матын. Гад чужанкотырлӧн муыс нюжӧдчис Хешбон карсянь Рамат-Мицфе да Бетоним каръясӧдз, Маханаим карсянь Девирӧдз. Йӧрдан ковтысысь налӧн муас пырисны Бет-Харам, Бет-Нимра, Суккот да Цафон каръяс, хешбонса Сигон ӧксылӧн коляс му.
Рытыввыв мудорнас вӧлі Йӧрдан ю Киннерет тыӧдз.
Став тайӧ мусӧ сэтчӧс кар-сиктъяснас вичмӧдӧма Гад чужанкотырлӧн рӧдъяслы.
Манассей джын чужанкотырлӧн рӧдъяслы Мӧисей сетіс му Маханаим карсянь войвылӧ.
Сэтчӧ пырисны Васан му, кӧні юравліс Ог ӧксы, да сэтчӧс муысь Яирлӧн квайтымын сикт.
Галаад мулысь джынсӧ да Ог ӧксылысь васанса Аштарот да Эдрей каръяссӧ вӧлі сетӧма Манассейлӧн Макир пиыслӧн джын рӧдлы.
Тайӧ муяссӧ Мӧисей юкліс Йӧрдан асыввылысь, Ериконлы воча Моав ласта вылысь.
Но Левий чужанкотырлы Мӧисей мусӧ эз сет. Налӧн пайыс — Господь, Израильлӧн Ен, кыдзи Сійӧ Ачыс шуис налы.
Израиль пиянлы Ханаан муысь вичмисны татшӧм муяс. Мусӧ налы юклісны Элазар поп, Навлӧн Исус пиыс да Израиль чужанкотыръяслӧн рӧдкутысьяс.
Мусӧ юклісны пудъясьӧмӧн ӧкмыс чужанкотырлы да [Манассейлӧн] джын чужанкотырлы, кыдзи Господь тшӧктіс Мӧисей пыр. Кык чужанкотырлы да [Манассейлӧн] джын чужанкотырлы Мӧисей сетіс мусӧ Йӧрдан асыввылысь. Левитъяслы мусӧ эз сет.
Ӧсип пиянсянь петісны Манассейлӧн да Ефремлӧн чужанкотыръяс.
Левитъяслы торйӧдісны олан каръяс да на гӧгӧрысь ыж-мӧсныслы видзьяс, а му эз сетны.
Израиль пиян юклісны мусӧ, кыдзи Господь тшӧктіс Мӧисейлы.
Галгалын Иудасянь чужысьяс локтісны Исус дінӧ.
Кенез рӧдысь Ефуннилӧн Калев пиыс шуис сылы: «Тэ ӧд тӧдан, мый висьталіс Господь тэа-меа йылысь Кадеш-Варниын Мӧисейлы, Енлӧн мортлы.
Ме сэки вӧлі нелямын арӧса, кор Мӧисей, Господьлӧн кесйӧг, Кадеш-Варнисянь мӧдӧдліс менӧ видзӧдавны тайӧ мусӧ. Ме ветлі да локтӧм бӧрын сылы ставсӧ веськыда висьталі.
Мекӧд ӧтлаын ветлысь вокъясӧй асланыс висьталӧмӧн повзьӧдісны войтырсӧ. Но ме кывзыси аслам Господь Енлысь.
Мӧисей сэки меным кыв сетӧмӧн шуис: “Муыс, кытчӧ сувтліс тэнад кокыд, пыр кежлӧ лоӧ сетӧма тэныд да тэсянь чужысьяслы, ӧд тэ кывзысин Господьлысь, менам Енлысь”.
Аслас шуӧм серти Господь менӧ ловйӧн колис.
Нелямын вит во сайын Израиль войтырлӧн овтӧминті ветлӧдлігӧн Господь шуліс тадзи Мӧисейлы.
Ӧні меным кӧкъямысдас вит арӧс, но ме сэкъя кодь на ён, кор менӧ мӧдӧдліс Мӧисей. Ме важ кодьыс на вына да верма ветлыны тышӧ.
Сет меным керӧсвыв мусӧ, мый йылысь сэки висьтавліс Господь.
Тэ ачыд кывлін, мый сэні ыджыд да зумыд каръясын олӧ енак войтыр.
Господь кӧ лоӧ мекӧд, ме вӧтла найӧс, кыдзи шуис Господь».
Исус бурсиис Ефуннилысь Калев писӧ да сетіс сылы Хеврон кар.
Кенез рӧдысь Ефуннилӧн Калев пи кывзысис Господьлысь, Израильлӧн Енлысь, та вӧсна сылы сетӧма Хеврон кар, и ӧнӧдз сійӧ Калев рӧдлӧн.
Водзынджыксӧ Хевронлӧн нимыс вӧлі Киръят-Арба, ӧд Арба нима морт вӧлі енак войтыр пӧвстын ыджыд морт.
Тышъяс бӧрын тайӧ муас пуксис лӧнь кад.
Пудъясьӧм бӧрын Иуда чужанкотырлӧн рӧдъяслы вичмис лунвылысь му. Муыс нюжӧдчӧ Эдом муӧдз да Цин овтӧминӧдз.
Налӧн лунвыв мудорныс заводитчӧ Сола саридз лунвывладорсянь, мунӧ лунвылӧ Акравим ыблань, сэсянь — Цин овтӧминӧ, кытшовтӧ Кадеш-Варни лунвывладорсяньыс да мунӧ Хецрон дорті Аддарӧ, кытысянь [Кадеш рытыввывладорсяньыс] бергӧдчӧ Каркалань. Сэсся мудорныс мунӧ Ацмонӧ, сэсянь Египет мудорса шорӧдз и помасьӧ Ыджыд саридз дорын.
Тайӧ налӧн лунвыв мудорныс.
Асыввыв мудорнас лоӧ Сола саридз Йӧрдан ю вомӧдз.
Войвыв мудорыс заводитчӧ Сола саридз дорсянь, Йӧрдан ю вомсянь, мунӧ Бет-Хоглаӧ, кытшовтӧ Бет-Арава войвывладорсяньыс да воӧ Рувимлӧн Боган пи серти нимтӧм из дорӧдз.
Акор ковтыссянь налӧн войвыв мудорныс мунӧ Девирӧ, сэсянь бергӧдчӧ войвылӧ Галгаллань, мый сёртас лунвывладорын сулалысь Адуммим керӧс весьтын.
Мудорыс водзӧ мунӧ Шемеш ва петанін дорӧ, а сэсянь Рогель ва петанін дорӧ.
Водзӧ войвыв мудорныс мунӧ Бен-Хинном ковтысӧд Евус, мӧд ногӧн кӧ, Ерусалим, лунвывладорті да кыпӧдчӧ керӧс йылӧ, мый сулалӧ Хинном ковтыссянь рытыввылын, Рефаим ковтыслӧн войвывладор помын.
Керӧс йывсянь мудорыс веськӧдчӧ Нефтоах ва петанінлань да Ефрон керӧсвыв каръяслань, сэсянь бергӧдчӧ Баалалань, мӧд ногӧн кӧ, Киръят-Яримлань.
Бааласянь мудорыс бергӧдчӧ рытыввылӧ Сеир керӧслань, мунӧ Бет-Шемешӧ Ярим керӧс, мӧд ногӧн кӧ, Кесалон керӧс, войвывладорті и водзӧ мунӧ Тимнаӧ.
Сэсянь мудорыс мунӧ Экрон войвывладорті да бергӧдчӧ Шикаронлань, сэсся вуджӧ Баала керӧс вомӧн, воӧ Явнеэлӧ да помасьӧ Ыджыд саридз дорын.
Ыджыд саридзыс лоӧ рытыввыв мудорнас.
Татшӧм му вичмис Иуда чужанкотырлӧн рӧдъяслы.
Господьлӧн тшӧктӧм серти Исус сетіс Ефуннилӧн Калев пилы Иуда чужанкотырлӧн муысь енак войтырлӧн Арба батьлысь Киръят-Арба карсӧ, мӧд ногӧн кӧ, Хеврон карсӧ.
Калев вӧтліс сэтысь Шешайӧс, Ахиманӧс да Талмайӧс — Енаксянь чужысьясӧс.
Хевронсянь Калев петіс тышӧ девирса олысьяслы паныд. Водзынджык Девир карлӧн нимыс вӧлі Киръят-Сефер.
Калев шуис: «Коді пасьвартас Киръят-Сефер кар, сы сайӧ ме сета ассьым Акса нылӧс».
Карсӧ босьтіс Кеназлӧн [медічӧт] Отниэл пиыс. Кеназ вӧлі Калевлӧн вокыс. Калев ассьыс Акса нывсӧ сетіс Отниэл сайӧ.
Кор Аксалы воис кад мунны гортсьыс, сылы шуисны, мед корас батьыслысь видз-му. Акса чеччис осёл вывсьыс, и Калев батьыс юаліс сылысь: «Мый тэ кӧсъян?»
Акса шуис батьыслы: «Бурси менӧ.
Тэ сетін меным Негевысь кос му, сет меным тшӧтш ва петанінъяс».
Калев сетіс сылы Хеврон кар дорысь вылысса и улысса ва петанінъяс.
Иуда чужанкотырлӧн рӧдъяслы вичмӧдӧма татшӧм му.
Негевысь Эдом дорысь налы вичмисны Кавцел, Эдер, Ягур, Кина, Димона, Адада, Кедеш, Хацор, Итнан, Зиф, Телем, Баалот, Хацор-Хадатта, Кериот-Хецрон, мӧд ногӧн кӧ, Хацор, Амам, Шема, Молада, Хацар-Гадда, Хешмон, Бет-Пелет, Хацар-Шуал, Бер-Шева да нагӧгӧрса сиктъяс, Баала, Ийим, Эцем, Элтолад, Кесил, Хорма, Сиклаг, Мадмана, Сансана, Леваот, Шилхим, Айн да Риммон каръяс. Ставнас Негевысь налы вичмис кызь ӧкмыс кар да нагӧгӧрса сиктъяс.
Керӧсбердса муысь Иуда чужанкотырлы вичмисны Эштаол, Цора, Ашна, Заноах, Эн-Ганним, Таппуах, Энам, Ярмут, Адуллам, [Немра,] Соко, Азека, Шаараим, Адитаим, Гедера да Гедеротаим каръяс — дас нёль кар да нагӧгӧрса сиктъяс.
Сэтысь налы вичмисны тшӧтш Ценан, Хадаша, Мигдал-Гад, Дилеан, Мицфе, Иоктеэл, Лакиш, Боцкат, Эглон, Каббон, Лахмас, Китлиш, Гедерот, Бет-Дагон, Наама да Македа каръяс — дас квайт кар да нагӧгӧрса сиктъяс.
Нӧшта вичмисны Ливна, Этер, Ашан, Иптах, Ашна, Нецив, Кейла, Акзив да Мареша каръяс [да Эдом] — ӧкмыс кар да нагӧгӧрса сиктъяс.
Иуда чужанкотырлы вичмисны Экрон кар да сыгӧгӧрса сиктъяс, Экронсянь Ыджыд саридзӧдз став муыс, мый паськӧдчӧма Азот кар гӧгӧр, да сэтчӧс сиктъяс, Азот да Газа каръяс да нагӧгӧрса сиктъяс Египет мудорса шорӧдз да Ыджыд саридзӧдз.
Керӧсвыв муысь Иуда чужанкотырлы вичмисны Шамир, Яттир, Соко, Данна, Киръят-Санна, мӧд ногӧн кӧ, Девир, Анав, Эштемоа, Аним, Гошен, Холон да Гило каръяс — дас ӧти кар да нагӧгӧрса сиктъяс.
Сэтысь налы вичмисны тшӧтш Арав, Рума, Эшан, Янум, Бет-Таппуах, Афека, Хумта, Киръят-Арба, мӧд ногӧн кӧ, Хеврон, да Циор каръяс — ӧкмыс кар да нагӧгӧрса сиктъяс.
Нӧшта вичмисны Маон, Кармил, Зиф, Ютта, Изреель, Иокдам, Заноах, Каин, Гива да Тимна каръяс — дас кар да нагӧгӧрса сиктъяс.
Нӧшта вичмисны Халхул, Бет-Цур, Гедор, Маарат, Бет-Анот да Элтекон каръяс — квайт кар да нагӧгӧрса сиктъяс. 
[Вичмисны Текоя, Епрафа, мӧд ногӧн кӧ, Виплием, Фагор, Этам, Кулон, Татами, Сорес, Карем, Галлим, Вефир да Манохо каръяс — дас ӧти кар да нагӧгӧрса сиктъяс.]
Иуда чужанкотырлы вичмисны Киръят-Ваал, мӧд ногӧн кӧ, Киръят-Ярим да Равва каръяс — кык кар да нагӧгӧрса сиктъяс.
Овтӧминысь налы вичмисны Бет-Арава, Миддин, Секака, Нившан, Ир-Мелах да Эн-Геди каръяс — квайт кар да нагӧгӧрса сиктъяс.
Ерусалимын олысь евуссаясӧс Иуда чужанкотыр эз вермы вӧтлынысӧ, та вӧсна евуссаяс ӧнӧдз олӧны Иуда чужанкотыркӧд Ерусалимын.
Пудъясьӧм бӧрын Ӧсипсянь чужысьяслы вичмис му, мый заводитчӧ Йӧрдан юсянь, Ериконсянь матын, кӧні асыввылын ва петанінъяс. Сэтысянь налӧн мудорыс мунӧ овтӧминӧд да кыпӧдчӧ керӧсъяс вылӧ Вефильӧ.
Вефильсянь мудорыс мунӧ Лузӧдз, сэсся — аркияслӧн оланін дорті Атаротӧдз. Сэсянь мудорыс лэччӧ рытыввылӧ яфлетъяслӧн оланін дорті Улыс Бет-Хоронӧдз да Гезерӧдз и помасьӧ Ыджыд саридз дорын.
Татшӧм му вичмис Ӧсипсянь чужысьяслы, Манассей да Ефрем чужанкотыръяслы.
Ефрем чужанкотырлӧн рӧдъяслы вичмӧдӧма татшӧм му. Налӧн лунвыв мудорыс заводитчӧ асыввылын Атарот-Аддар карсянь, сэсянь мунӧ Вылыс Бет-Хоронӧдз [да Газараӧдз], водзӧ Ыджыд саридз дорӧдз. Войвыв мудорнас лоӧ Микметат кар. Сэсянь мудорыс бергӧдчӧ асыввылӧ Таанат-Шилолань, кытшовтӧ сійӧс асыввывладорсяньыс да мунӧ Янох карӧдз.
Янохсянь мудорыс лэччӧ Атаротӧ да Наараӧ, мунӧ Ерикон дорті да воӧ Йӧрдан юӧдз.
Таппуахсянь войвыв мудорыс мунӧ рытыввылӧ Кана юӧд да помасьӧ Ыджыд саридз дорын.
Татшӧм му вичмӧдӧма Ефрем чужанкотырлӧн рӧдъяслы.
Налы нӧшта на торйӧдӧма каръяс да нагӧгӧрса сиктъяс Манассей чужанкотырлӧн муысь.
Ефремсянь чужысьяс эз вӧтлыны Гезерын олысь ханаансаясӧс, та вӧсна ӧнӧдз ханаансаяс олӧны Ефрем чужанкотыр пӧвстын да уджалӧмнас мынтӧны налы вот. 
[Бӧрынджык фараон, египетса ӧксы, босьтіс Гезер кар да сотіс сійӧс. Сэтысь виалісны ханаансаясӧс, перезейясӧс да мукӧд олысьясӧс. Фараон сетіс карсӧ аслас нывлы козин пыдди.]
Водзӧ пудйыс уси Манассей чужанкотырлы.
Манассей вӧлі Ӧсиплӧн медводдза пиыс, а Манассейлӧн медводдза пиыс вӧлі Макир, вына тышкасьысь да Галаадлӧн батьыс. Макирлы вӧлі водзынджык вичмӧдӧма Галаад да Васан муяс.
Ӧні му вичмис тшӧтш Манассей чужанкотырлӧн мукӧд рӧдъяслы: Авиэзер, Хелек, Асриэл, Шекем, Хефер да Шемид рӧдъяслы.
Тайӧ вӧліны Манассейлӧн, Ӧсип пилӧн, пияныс да налӧн рӧдъясыс.
Манассей чужанкотырысь Салпаадлӧн эз вӧв пияныс. Салпаад вӧлі Хеферлӧн пи, Хефер — Галаадлӧн, Галаад — Макирлӧн, Макир — Манассейлӧн.
Салпаадлӧн вӧліны сӧмын Махла, Ноа, Хогла, Милка да Тирза нывъяс.
Нывъяс локтісны Элазар поп дінӧ, Навлӧн Исус пи да юралысьяс дінӧ да шуисны: «Господь тшӧктіс Мӧисейлы сетны миянлы му юкӧн, кыдзи миян рӧдысь айуловлы».
Салпаадлӧн нывъяслы вӧлі сетӧма му батьныслӧн вокъяслы моз, кыдзи тшӧктіс Господь.
Йӧрдан сайысь вичмӧм Галаад да Васан муясысь кындзи Манассей чужанкотырлы вӧлі сетӧма нӧшта дас му юкӧн.
Ӧд Манассей чужанкотырысь нывъяслы вичмӧдӧма му пиянлы моз. Галаад му вӧлі сетӧма Манассей чужанкотырысь мукӧдыслы.
Манассей чужанкотырлӧн муыс паськӧдчӧ Асир чужанкотырлӧн мусянь Микметат карӧдз, мый сулалӧ Сикемлы воча.
Сэсянь мудорыс мунӧ лунвылӧ Таппуах ва петанінӧдз.
Таппуах му вичмис Манассей чужанкотырлы, а налӧн му помын сулалысь Таппуах кар вичмис Ефрем чужанкотырлы.
Таппуахсянь Манассей чужанкотырлӧн мудорыс лэччӧ лунвылӧ Кана юӧдз.
Сэтчӧс каръясыс Манассей чужанкотырлӧн муысь вичмисны Ефрем чужанкотырлы.
Манассей чужанкотырлӧн мудорыс мунӧ ю войвывладорті да помасьӧ Ыджыд саридз дорын.
Ефрем чужанкотырлӧн муыс ю лунвывладорас, а Манассей чужанкотырлӧн — ю войвывладорас.
Налӧн муясыс помасьӧны Ыджыд саридз дорын.
Войвылын Манассей чужанкотырлӧн муыс нюжӧдчӧ Асир чужанкотырлӧн муӧдз, а асыввылын — Иссакар чужанкотырлӧн муӧдз.
Иссакар да Асир чужанкотыръяслӧн муясысь Манассей чужанкотырлы вичмис Бет-Шеан, Ивлеам, Дор, Эн-Дор, Танак да Мегиддо каръяс, нагӧгӧрса сиктъяс да Нафет муысь коймӧд юкӧныс [сиктъяснас].
Манассейсянь чужысьяс эз вермыны босьтны аслыныд тайӧ каръяссӧ, та вӧсна ханаансаяс кольччисны овны тайӧ муас.
Бӧрынджык, кор Израиль пиян вынсялісны, найӧ уджӧдісны ханаансаясӧс вот мынтӧм могысь, но эз вӧтлыны.
Ӧсипсянь чужысьяс шуисны Исуслы: «Мыйла тэ миянлы сетін сӧмын ӧти му юкӧн? Ми уна лыдаӧсь, ӧд Господь бурсиис миянӧс».
Исус вочавидзис налы: «Ті кӧ уна лыдаӧсь, мунӧй да кералӧй вӧрсӧ перезейяслӧн да рефаяслӧн муысь. Овмӧдчӧй сэтчӧ, тіянлы кӧ Ефрем керӧсвыв муын дзескыд».
Ӧсипсянь чужысьяс шуисны: «Тайӧ керӧсвыв муас миянлы дзескыд. Но ковтысын олӧны ханаансаяс, и налӧн эмӧсь тышӧ ветлан тарантасъяс Бет-Шеанын, сыгӧгӧрса сиктъясын да Изреель ковтысын».
Но Исус вочавидзис Ӧсипсянь чужысьяслы, Ефрем да Манассей чужанкотыръяслы: «Ті уна лыдаӧсь да вынаӧсь.
Тіянлы оз сӧмын ӧти му юкӧн вичмы, вичмас тшӧтш керӧсвыв муыс.
Ті пӧрӧданныд сэтысь вӧрсӧ, и муыс помсянь помӧдзыс тіян лоӧ.
Ті вӧтланныд [да верманныд] ханаансаясӧс, мед кӧ найӧ ёнӧсь, и налӧн эмӧсь тышӧ ветлан тарантасъяс».
Став Израиль войтыр чукӧртчис Силомӧ да сувтӧдіс вежа чом. Муыс вӧлі израильсаяслӧн киын, но сизим чужанкотырлы мусӧ абу на вӧлі юкӧма.
Исус шуис Израиль пиянлы: «Дыр-ӧ на ті кутанныд нюжмасьны да онӧ мунӧй босьтны аслыныд му, мый Господь, тіян батьяслӧн Ен, сетіс тіянлы?
Торйӧдӧй быд чужанкотырысь куим мортӧс, и ме мӧдӧда найӧс видзӧдавны мусӧ. Найӧ мед кытшовтасны мусӧ да гижаласны сы йылысь ставсӧ, медым сэсся юклыны сійӧс. Та бӧрын мед локтасны ме дінӧ.
Налы колӧ юкны му сизим пельӧ.
Иуда чужанкотыр мед кольччас аслас лунвыв муӧ, и Ӧсипсянь чужысьяс мед кольччасны асланыс войвыв муӧ.
А коляс мусӧ юклӧй сизим пельӧ да гижалӧй сы йылысь ставсӧ, сэсся локтӧй ме дінӧ. Ме пудъяла сійӧс тіянлы Господь Енным водзын.
Левитъяслы тіян пӧвстын муыс оз ло, ӧд налӧн пайыс — кесъявны Господьлы попъясӧн.
Гад да Рувим чужанкотыръяс да Манассейлӧн джын чужанкотырыс босьтісны нин му Йӧрдан асыввылысь. Налы сійӧс сетіс Мӧисей, Господьлӧн кесйӧг».
Му видзӧдалысьяс мӧдӧдчисны мунны.
Исус тшӧктіс налы гижавны муыс йылысь. Сійӧ шуис: «Мунӧй, кытшовтӧй тайӧ мусӧ да гижалӧй сы йылысь ставсӧ, сэсся бӧр локтӧй ме дінӧ.
Тані, Силомын, ме пудъяла сійӧс тіянлы Господь водзын».
Найӧ кытшовтісны мусӧ, [видзӧдалісны да] гижалісны муыс да каръясыс йылысь, юкисны мусӧ сизим пельӧ. Сэсся локтісны Исус дінӧ Силомӧ чомъяс дорӧ.
Силомын Исус пудъяліс мусӧ Господь водзын да юкліс сійӧс Израиль чужанкотыръяслы.
Медводдза пудйыс уси Венямин чужанкотырлӧн рӧдъяслы.
Налы вичмис му Иуда чужанкотыр да Ӧсип пиянлӧн чужанкотыръяс костысь.
Венямин чужанкотырлӧн войвыв мудорыс заводитчӧ Йӧрдан ю дорсянь, мунӧ Ерикон кар бокті войвывладорсяньыс, сэсся кыпӧдчӧ рытыввылӧ керӧсвыв муӧ да помасьӧ Бет-Авен овтӧминын.
Сэсянь мудорыс мунӧ Луз карӧ, мӧд ногӧн кӧ, Вефильӧ, кытшовтӧ сійӧс лунвывладорсяньыс да лэччӧ Атарот-Аддар карӧдз, Улыс Бет-Хоронсянь лунвылын сулалысь керӧс дорӧдз.
Тайӧ керӧссянь мудорыс бергӧдчӧ лунвылӧ. Рытыввыв мудорыс помасьӧ Иуда чужанкотырлӧн Киръят-Ваал кар дорын, мӧд ногӧн кӧ, Киръят-Ярим кар дорын.
Киръят-Яримсянь лунвыв мудорыс мунӧ Сола саридзлань Нефтоах ва петанінӧдз.
Сэсянь мудорыс лэччӧ керӧс горулӧдз, мый сулалӧ Бен-Хинном ковтыслы воча, Рефаим ковтыссянь войвылын. Водзӧ мудорыс лэччӧ Бен-Хинном ковтысӧд Евус лунвывладорті да воӧ Рогель ва петанінӧдз.
Сэсянь мудорыс бергӧдчӧ войвылӧ, мунӧ Шемеш ва петанінлань да водзӧ Гелилотлань, мый Адуммим керӧслы воча, сэсянь лэччӧ Рувимлӧн Боган пи серти нимтӧм из дорӧдз.
Водзӧ мудорыс мунӧ Йӧрдан ковтыс бокті войвылӧ, сэсся бӧр лэччӧ Йӧрдан ковтысӧ.
Сэсянь мудорыс мунӧ Бет-Хогла кар войвывладортіыс да помасьӧ Сола саридзлӧн войвыв куръя дорын, кытчӧ усьӧ Йӧрдан ю. 
Татшӧм Венямин чужанкотырлӧн лунвыв мудорыс, а асыввыв мудорыс лоӧ Йӧрдан ю.
Тадзи мудорыс кытшовтӧ Венямин чужанкотырлы вичмӧдӧм мусӧ.
Венямин чужанкотырлӧн рӧдъяслы вичмисны Ерикон, Бет-Хогла, Эмек-Кециц, Бет-Арава, Цемараим, Вефиль, Аввим, Фара, Офра, Кефар-Аммони, Офни да Гева каръяс — дас кык кар да нагӧгӧрса сиктъяс.
Нӧшта вичмисны Гаваон, Рама, Берот, Мицфе, Кефира, Моца, Рекем, Ирпиэл, Тарала, Цела, Элеф да Евус, мӧд ногӧн кӧ, Ерусалим, Гива да Киръят каръяс — дас нёль кар да нагӧгӧрса сиктъяс.
Татшӧм му вичмӧдӧма Венямин чужанкотырлӧн рӧдъяслы.
Мӧд пудйыс уси Симеон чужанкотырлӧн рӧдъяслы.
Налы вичмис му юкӧн Иуда чужанкотырлӧн муысь.
Налы вичмӧдӧма Бер-Шева, Шема, Молада, Хацар-Шуал, Вала, Эцем, Элтолад, Бетул, Хорма, Сиклаг, Бет-Маркавот, Хацар-Суса, Бет-Леваот да Шарухен каръяс — дас куим кар да нагӧгӧрса сиктъяс.
Нӧшта вичмӧдӧма Айн, Риммон, Этер да Ашан каръяс — нёль кар да нагӧгӧрса сиктъяс Баалат-Берӧдз, мӧд ногӧн кӧ, лунвыв Рамаӧдз.
Татшӧм му вичмӧдӧма Симеон чужанкотырлӧн рӧдъяслы.
Мусӧ налы торйӧдӧма Иуда чужанкотырлӧн муысь, ӧд тайӧ муыс вӧлі вывті ыджыд.
Коймӧд пудйыс уси Завулон чужанкотырлӧн рӧдъяслы. Налы вичмӧдӧм муыс паськӧдчӧ Сарид карӧдз.
Сарид карсянь рытыввывлань мудорыс мунӧ Марала карӧ, воӧ Дабешетӧдз да Иокнеамлы паныда юӧдз.
Сарид карсянь асыввывлань, шонді петанінлань, мудорыс мунӧ Кислот-Тавор кар, водзӧ мунӧ Даврат карӧ, а сэсся кыпӧдчӧ Яфия карӧ.
Сэсянь мудорыс мунӧ асыввылӧ Гат-Хеферӧ, водзӧ Эт-Кацинӧ, сэсся мунӧ Риммонӧдз да бергӧдчӧ Неалань.
Сэсянь войвыв мудорыс мунӧ Ханнатонлань да помасьӧ Иптах-Эл ковтысын.
Завулон чужанкотырлы вичмисны Каттат, Нахалал, Шимрон, Идеала да Виплием каръяс. Ставнас налы вичмисны дас кык кар да нагӧгӧрса сиктъяс.
Татшӧм му сэтчӧс каръясӧн да нагӧгӧрса сиктъясӧн вичмӧдӧма Завулон чужанкотырлӧн рӧдъяслы.
Нёльӧд пудйыс уси Иссакар чужанкотырлӧн рӧдъяслы.
Налы вичмисны Изреель, Кесуллот, Шунем, Хафараим, Шион, Анахарат, Раввит, Кишион, Эвец, Ремет, Эн-Ганним, Эн-Хадда да Бет-Пацец каръяс.
Мудорыс мунӧ Тавор, Шагацим да Бет-Шемеш каръяс дорті да помасьӧ Йӧрдан ю дорын. Ставнас налы вичмисны дас квайт кар да нагӧгӧрса сиктъяс.
Татшӧм му сэтчӧс каръясӧн да нагӧгӧрса сиктъясӧн вичмӧдӧма Иссакар чужанкотырлӧн рӧдъяслы.
Витӧд пудйыс уси Асир чужанкотырлӧн рӧдъяслы.
Налы вичмисны Хелкат, Хали, Бетен, Аксаф, Аламелек, Амад да Мишал каръяс.
Рытыввылын налӧн муыс нюжӧдчӧ Кармил керӧсӧдз да Шихор-Ливнат дорӧдз.
Асыввылын мудорыс мунӧ Бет-Дагонӧ, воӧ Завулон чужанкотырлӧн му дорӧдз, водзӧ мунӧ Иптах-Эл ковтыс войвывладорӧдз [да воӧ Асафаӧ]. Налы вичмисны Бет-Эмек да Нейэл каръяс, войвылысь Кавул кар, тшӧтш Эврон, Рехов, Хаммон да Кана каръяс. Мудорыс мунӧ ыджыд Сидон карӧдз, сэсянь бергӧдчӧ да воӧ Рама карӧ, водзӧ мунӧ да воӧ Тир изкарӧ, бара бергӧдчӧ да мунӧ Хоса карӧ. Мудорыс помасьӧ Ыджыд саридз дорын.
Нӧшта налы вичмисны Акзив, Умма, Афек да Рехов каръяс. Ставнас налы вичмисны кызь кык кар да нагӧгӧрса сиктъяс.
Татшӧм му сэтчӧс каръясӧн да нагӧгӧрса сиктъясӧн вичмӧдӧма Асир чужанкотырлӧн рӧдъяслы.
Квайтӧд пудйыс уси Неффалим чужанкотырлӧн рӧдъяслы.
Налӧн мудорыс заводитчӧ Хелефсянь, цананнимса тупу рассянь, мунӧ Адами-Некевӧ, сэсянь Явнеэлӧ да Лаккумӧ и помасьӧ Йӧрдан ю дорын.
Рытыввыв мудорыс мунӧ Азнот-Таворӧ, а сэтысянь — Хукокӧ. Лунвылын Неффалим чужанкотырлӧн муыс нюжӧдчӧ Завулон чужанкотырлӧн муӧдз, рытыввылын — Асир чужанкотырлӧн муӧдз, а асыввылын — Йӧрдан юбокса Иуда карӧдз.
Неффалим чужанкотырлы вичмисны татшӧм изкаръяс: Циддим, Цер, Хаммат, Раккат, Киннерет, Адама, Рама, Хацор, Кедеш, Эдрей, Эн-Хацор, Иреон, Мигдал-Эл, Хорем, Бет-Анат да Бет-Шемеш. Ставнас налы вичмисны дас ӧкмыс кар да нагӧгӧрса сиктъяс.
Татшӧм му сэтчӧс каръясӧн да нагӧгӧрса сиктъясӧн вичмӧдӧма Неффалим чужанкотырлӧн рӧдъяслы.
Сизимӧд пудйыс уси Дан чужанкотырлӧн рӧдъяслы.
Налы вичмисны Цора, Эштаол, Ир-Шемеш, Шаалабин, Аялон, Итла, Элон, Тимна, Экрон, Элтеке, Гиббетон, Баалат, Ехуд, Бене-Берак, Гат-Риммон, Ме-Яркон да Ракон каръяс, а сідзжӧ Иоппия да сыгӧгӧрса сиктъяс.
Но Дансянь чужысьяс воштісны ассьыныс мусӧ.
Найӧ петісны тышӧ, уськӧдчисны Лешем кар вылӧ да виалісны шыпуртӧн сэтчӧс олысьясӧс. Найӧ босьтісны карсӧ аслыныс да овмӧдчисны сэтчӧ. Лешем карлы сетісны асланыс батьлысь Дан ним. 
[Аморейяс кольччисны овны Еломӧ да Саламинӧ. Но найӧс вермис Ефрем чужанкотыр, и аморейяс кутісны вот мынтӧм могысь уджавны Ефрем чужанкотырлы.]
Татшӧм му сэтчӧс каръясӧн да нагӧгӧрса сиктъясӧн вичмӧдӧма Дан чужанкотырлӧн рӧдъяслы. 
[Дансянь чужысьяс эз бырӧдны аморейясӧс, кодъяс дзескӧдісны найӧс керӧс вылын. Аморейяс эз сетны налы петны ковтысӧ, мырддисны налысь мусӧ.]
Му юклӧм бӧрын Израиль пиян сетісны Навлӧн Исус пилы Ефрем керӧсвыв муысь Тимнат-Серах кар, мый сійӧ ачыс корис. Тадзи вӧчисны Господьлӧн тшӧктӧм серти.
Исус дзоньталіс-лэптіс тайӧ карсӧ да овмӧдчис сэтчӧ.
Элазар поп, Навлӧн Исус пиыс да Израиль чужанкотыръяслӧн рӧдкутысьяс пудъясьӧмӧн юклісны ставнас мусӧ Господь водзын Силомын, вежа чом пыранін дорын.
Господь шуис Исуслы:
«Висьтав Израиль пиянлы, мед торйӧдасны аслыныс каръяс, кытчӧ вермас пышйыны морт виысь. Та йылысь Ме висьтавлі тіянлы Мӧисей пыр. Быдӧн, коді мӧвпышттӧг виас мортӧс, вермас пышйыны татшӧм карас водзӧс перйысь мортысь [медым морт виысьӧс войтыр водзын мыждытӧг эз вины].
Коді пышъяс татшӧм карас, мед сувтас кар дзиръя дорӧ да висьтасяс карса юрнуӧдысьяслы, мый сійӧ вӧчис.
Сэсся сійӧс лэдзасны карас да сетасны оланін.
Вир кисьтӧм вӧсна вӧтӧдысь морт кӧ локтас сэтчӧ, морт виысьӧс мед оз сетны сы киӧ. Ӧд сійӧ мӧвпышттӧг виис, эз лӧгав ни эз мустӧмт мортӧс, кодӧс виис.
Мед морт виысь олас тайӧ карас, кытчӧдз оз сувт ёрд водзӧ да кытчӧдз оз кув сійӧ кадас кесъялысь аркирей.
Сӧмын та бӧрын морт виысьлы позьӧ бӧр локны гортас аслас карӧ, кытысь сійӧ пышйис».
Галилеяысь, Неффалим керӧсвыв муысь, торйӧдісны Кедеш кар, Ефрем керӧсвыв муысь — Сикем кар да Иуда керӧсвыв муысь — Киръят-Арба кар, мӧд ногӧн кӧ, Хеврон кар, медым сэтчӧ вермас пышйыны морт виысь.
А Йӧрдан ю сайысь, Ерикон кар асыввылысь, торйӧдісны татшӧм каръяс: Рувим чужанкотырлӧн муысь овтӧминса вывтасінын сулалысь Бецер кар, Гад чужанкотырлӧн Галаад муысь Рамот кар да Манассей чужанкотырлӧн Васан муысь Голан кар.
Тайӧ каръясас вермис пышйыны быдӧн, коді мӧвпышттӧг виис мортӧс, Израиль пиян пӧвстысь-ӧ либӧ йӧз муысь локтысьяс пӧвстысь-ӧ сійӧ. Тадзи сійӧ вермис пышйыны водзӧс перйысь мортысь, медым сійӧс войтыр водзын мыждытӧг эз вины.
Левий чужанкотырлӧн рӧдкутысьяс локтісны Элазар поп дінӧ, Навлӧн Исус пи да Израиль чужанкотыръяслӧн рӧдкутысьяс дінӧ. Силомын, Ханаан муын, найӧ шуисны: «Мӧисей пыр Господь тшӧктіс сетны миянлы олан каръяс да на гӧгӧрысь ыж-мӧснымлы видзьяс».
Господьлӧн тшӧктӧм серти Израиль пиян торйӧдісны левитъяслы асланыс муысь каръяс да нагӧгӧрса видзьяс.
Медводдза пудйыс уси Каафсянь петысь рӧдъяслы.
Пудъясьӧм бӧрын Левий чужанкотырысь Аарон поплӧн рӧдлы вичмис дас куим кар Иуда, Симеон да Венямин чужанкотыръяслӧн муысь.
А Каафсянь петысь мукӧд рӧдъяслы вичмис дас кар Ефрем да Дан чужанкотыръяслӧн муысь да Манассей джын чужанкотырлӧн муысь.
Пудъясьӧм бӧрын Гирсонсянь петысь рӧдъяслы вичмис дас куим кар Иссакар, Асир да Неффалим чужанкотыръяслӧн муысь да Манассей джын чужанкотырлӧн Васан муысь.
Мерарисянь петысь рӧдъяслы вичмис дас кык кар Рувим, Гад да Завулон чужанкотыръяслӧн муысь.
Израиль пиян пудъясьӧмӧн вичмӧдісны левитъяслы каръяс да нагӧгӧрса видзьяс, кыдзи Господь тшӧктіс Мӧисей пыр.
Иуда да Симеон чужанкотыръяслӧн муысь левитъяслы вичмисны татшӧм каръяс. Медводдза пудйыс уси Левий чужанкотырысь Каафсянь петысь Ааронлӧн рӧдлы. Налы вичмисны Иуда керӧсвыв муысь енак войтырлӧн Арба батьлӧн Киръят-Арба кар, мӧд ногӧн кӧ, Хеврон кар да сыгӧгӧрса видзьяс.
Но каргӧгӧрса сиктъяссӧ да кӧдзан муяссӧ сетісны Ефуннилӧн Калев пилы.
Аарон поплӧн рӧдлы сетісны Хеврон кар, кытчӧ вермас пышйыны морт виысь, да сыгӧгӧрса видзьяс. Налы сетісны тшӧтш Ливна кар да сыгӧгӧрса видзьяс, Яттир да Эштемоа каръяс да нагӧгӧрса видзьяс, Холон да Девир каръяс да нагӧгӧрса видзьяс, Айн, Ютта да Бет-Шемеш каръяс да нагӧгӧрса видзьяс. Тайӧ ӧкмыс карыс Аарон рӧдлы вичмис кык чужанкотырлӧн муысь.
Венямин чужанкотырлӧн муысь Ааронлӧн рӧдлы вичмисны Гаваон да Гева каръяс да нагӧгӧрса видзьяс, Анатот да Алмон каръяс да нагӧгӧрса видзьяс — ставнас нёль кар.
Ставнас Аарон рӧдысь попъяслы вичмис дас куим кар да нагӧгӧрса видзьяс.
Каафсянь петысь мукӧд левитъяслы пудъясьӧм бӧрын вичмисны каръяс Ефрем чужанкотырлӧн муысь.
Налы сетісны Ефрем керӧсвыв муысь Сикем кар, кытчӧ вермас пышйыны морт виысь, да сыгӧгӧрса видзьяс. Налы сетісны тшӧтш Гезер кар да сыгӧгӧрса видзьяс, Кивцаим да Бет-Хорон каръяс да нагӧгӧрса видзьяс — ставнас нёль кар.
Дан чужанкотырлӧн муысь налы вичмисны Элтеке да Гиббетон каръяс да нагӧгӧрса видзьяс, Аялон да Гат-Риммон каръяс да нагӧгӧрса видзьяс — ставнас нёль кар.
Манассей джын чужанкотырлӧн муысь налы вичмис кык кар: Танак да Гат-Риммон каръяс да нагӧгӧрса видзьяс.
Ставнас налы вичмис дас кар да нагӧгӧрса видзьяс.
Левий чужанкотырысь Гирсонсянь петысь рӧдъяслы вичмис Манассей джын чужанкотырлӧн муысь кык кар: Васан муысь Голан кар, кытчӧ вермас пышйыны морт виысь, да Беештера кар да нагӧгӧрса видзьяс.
Иссакар чужанкотырлӧн муысь налы вичмисны Кишион да Даврат каръяс да нагӧгӧрса видзьяс, Ярмут да Эн-Ганним каръяс да нагӧгӧрса видзьяс — ставнас нёль кар.
Асир чужанкотырлӧн муысь налы вичмисны Мишал да Авдон каръяс да нагӧгӧрса видзьяс, Хелкат да Рехов каръяс да нагӧгӧрса видзьяс — ставнас нёль кар.
Неффалим чужанкотырлӧн муысь налы вичмис куим кар: Галилеяысь Кедеш кар, кытчӧ вермас пышйыны морт виысь, да сыгӧгӧрса видзьяс, тшӧтш Хаммот-Дор да Картан каръяс да нагӧгӧрса видзьяс.
Ставнас Гирсонсянь петысь рӧдъяслы вичмис дас куим кар да нагӧгӧрса видзьяс.
Мерарисянь петысь левитъяслы вичмисны Завулон чужанкотырлӧн муысь Иокнеам да Карта каръяс да нагӧгӧрса видзьяс, Димна да Нахалал каръяс да нагӧгӧрса видзьяс — ставнас нёль кар.
[Йӧрдан ю сайысь, Ерикон кар весьтысь,] Рувим чужанкотырлӧн муысь налы вичмис Бецер кар да сыгӧгӧрса видзьяс. [Бецер кар, кытчӧ вермис пышйыны морт виысь, сулаліс Мисор овтӧминын.] Нӧшта вичмисны Яхац кар да сыгӧгӧрса видзьяс, Кедемот да Мефат каръяс да нагӧгӧрса видзьяс — ставнас нёль кар.
Гад чужанкотырлӧн Галаад муысь налы вичмис Рамот кар, кытчӧ вермас пышйыны морт виысь, да сыгӧгӧрса видзьяс. Налы вичмисны тшӧтш да Маханаим кар да сыгӧгӧрса видзьяс, Хешбон да Язер каръяс да нагӧгӧрса видзьяс — ставнас нёль кар.
Тадзи Мерарисянь петысь левитъяслы пудъясьӧм бӧрын вичмис дас кык кар.
Ставнас Израиль пиянлӧн муысь левитъяслы вӧлі сетӧма нелямын кӧкъямыс кар да нагӧгӧрса видзьяс.
Каръяссӧ вӧлі сетӧма нагӧгӧрса видзьяснас. 
[Кор Исус помаліс юклыны му, Израиль пиян сетісны Исуслы Ефрем керӧсвыв муысь Тимнат-Серах кар, мый сійӧ ачыс корис. Тадзи вӧчисны Господьлӧн тшӧктӧм серти. Исус дзоньталіс-лэптіс карсӧ да овмӧдчис сэтчӧ.
Карас Исус вайис изйысь вӧчӧм пуртъяссӧ, мыйӧн сійӧ вундыштіс Израиль пиянӧс, кодъяс чужисны войтырлӧн овтӧминті мунігӧн, ӧд овтӧминас найӧс эз на вӧв вундыштӧма.]
Татшӧм ногӧн Господь сетіс Израиль войтырлы ставнас мусӧ, мый кыв сетӧмӧн кӧсйысис сетны налӧн батьяслы. Израильсаяс босьтісны аслыныс тайӧ мусӧ да овмӧдчисны сэтчӧ.
Господь быд боксянь видзис найӧс да сетіс лӧнь олӧм, кыдзи кыв сетӧмӧн кӧсйысис налӧн батьяслы. Вӧрӧгъяс эз вермыны найӧс, ӧд став вӧрӧгсӧ Господь сетіс налӧн киӧ.
Ставыс, мый Господь кӧсйысис Израиль войтырлы, иніс.
Нинӧм эз коль збыльмытӧг.
Исус чукӧртіс Рувим да Гад чужанкотыръясӧс да Манассейлысь джын чужанкотырсӧ и шуис налы:
«Ті вӧчинныд ставсӧ, мый тшӧктіс тіянлы Мӧисей, Господьлӧн кесйӧг. Менсьым ті тшӧтш кывзысинныд.
Став тайӧ кад чӧжыс ті энӧ кольӧй вокъяснытӧ, тайӧ лунӧдз вӧчинныд, кыдзи тшӧктіс тіянлы Господь, тіян Енныд.
Ӧні Господь, тіян Енныд, Аслас кӧсйысьӧм серти сетіс вокъясныдлы лӧнь олӧм.
Та вӧсна ті верманныд бӧр мунны асланыд оланінӧ, асланыд муӧ, мый Йӧрдан ю сайысь сетіс тіянлы Мӧисей, Господьлӧн кесйӧг.
Сӧмын олӧй Индӧд серти, мый тіянлы юӧртіс Мӧисей, Господьлӧн кесйӧг. Радейтӧй Господьӧс, ассьыныд Ентӧ, ветлӧй Сылӧн туйясӧд, олӧй Сылӧн тшӧктӧмъяс серти, кутчысьӧй Сы дінӧ да кесъялӧй Сылы став сьӧлӧмнад да став олӧмнад».
Исус бурсиис найӧс да лэдзис мунны. И найӧ муналісны асланыс оланінъясӧ.
Манассейлӧн джын чужанкотырлы Мӧисей сетіс мусӧ Васанысь, а мӧд джыныслы мусӧ Исус сетіс Йӧрдан ю рытыввылысь вокъясыскӧд орччӧн.
Кор Исус бурсиӧмӧн лэдзис мунысьясӧс, сійӧ шуис налы: «Ыджыд озырлунӧн ті мунанныд асланыд гортӧ. Ӧні тіян эм унасьыс-уна ыж-мӧс, эзысь-зарни, кӧрт-ыргӧн да паськӧм.
Вӧрӧглысь тышын босьтӧм эмбурнас юксьӧй вокъясныдкӧд».
Рувим да Гад чужанкотыръяс да Манассейлӧн джын чужанкотырыс петісны Израиль войтыр дінысь Силомысь, Ханаан муысь. Найӧ мунісны гортаныс Галаад муӧ, мый найӧ босьтісны аслыныс, кыдзи Господь тшӧктіс Мӧисей пыр.
Рувим да Гад чужанкотыръяс да Манассейлӧн джын чужанкотырыс воисны Йӧрдан ю дорӧ. Сэтчӧ, Ханаан муӧ, найӧ лэптісны ыджыд висьпуктанін.
Мукӧд Израиль пиянлы кывсис, мый Рувим да Гад чужанкотыръяс да Манассейлӧн джын чужанкотырыс Ханаан муын израильсаяслӧн оланінӧ Йӧрдан ю бокӧ лэптӧмаӧсь висьпуктанін.
Сэки Израиль пиян чукӧртчисны Силомӧ, медым петны тышӧ.
Найӧ мӧдӧдісны Рувим да Гад чужанкотыръяс да Манассейлӧн джын чужанкотырыс дінӧ Галаад муӧ Элазар поплысь Пинес писӧ. Сыкӧд мӧдӧдісны дас юралысьӧс, быд чужанкотырысь ӧтиӧс.
Ставныс найӧ вӧліны рӧдкутысьяс.
Найӧ воисны Рувим да Гад чужанкотыръяс да Манассейлӧн джын чужанкотырыс дінӧ Галаад муӧ да шуисны налы:
«Господьлӧн став войтырыс юасьӧ, мыйла ті эновтінныд [Господьӧс] Израильлысь Енсӧ. Ті бергӧдчинныд Господьысь [Израильлӧн Енмысь], кор вӧчинныд аслыныд висьпуктанін. Тадзи ті кыпӧдчинныд Господьлы паныд.
Этша на ӧмӧй сійӧ мыжыс, мый ми Пеор идоллы юрбитім?* Та вӧсна Господьлысь войтырсӧ суис бырӧдӧм. Ӧнія лунӧдз ми эгӧ сӧстӧммӧй тайӧ мыжсьыс.
Талун ті бергӧдчинныд Господьысь да кыпӧдчинныд Сылы паныд, а аски Господь скӧрмас став Израиль войтыр вылӧ.
Ті кӧ чайтанныд, мый муыс, кытчӧ ті овмӧдчинныд, пеж, сідзкӧ, вуджӧй Господьлӧн муӧ, кӧні сулалӧ Господьлӧн вежа чомйыс, да миян пӧвстысь босьтӧй аслыныд му юкӧнсӧ. Но энӧ кыпӧдчӧй Господьлы да миянлы паныд. Миян Господь Енлӧн висьпуктанінысь ӧтдор энӧ лӧсьӧдӧй аслыныд мӧд висьпуктанін.
Ӧд кор Зерахлӧн Акан пиыс торкис Господьлы сиӧмтор йылысь тшӧктӧм, сэки став Израиль войтыр вылӧ лэччис Господьлӧн скӧрлуныс.
Аслас мыж вӧсна эз ӧтнас Акан кув».
Рувим да Гад чужанкотыръяс да Манассейлӧн джын чужанкотырыс вочавидзисны израильса рӧдкутысьяслы:
«Господь — енъяслӧн Ен! Господь, енъяслӧн Ен тӧдӧ, и Израиль мед тӧдас.
Ми кӧ Господьлы паныд кыпӧдчам да эновтам Сійӧс, мед Сійӧ талун бырӧдас миянӧс.
Господь мед Ачыс водзӧс перъяс миянлысь, ми кӧ кежим Сыысь да вӧчим висьпуктанінсӧ сотан вись, нянь вись да бурасян вись вайӧм могысь.
Ми лэптім висьпуктанінсӧ, ӧд полам, мый тіянсянь чужысьяс коркӧ шуасны миянсянь чужысьяслы: “Мый тіянлы колӧ Господьсянь, Израильлӧн Енсянь!
Йӧрдан юӧн Господь торйӧдіс миянӧс Рувим да Гад чужанкотыръясысь. Господь абу тіян Ен”. 
Татшӧм кывъяс вӧсна вермас лоны, мый миянсянь чужысьяс дугдасны пыдди пуктыны Господьӧс.
Дзик та вӧсна ми шуим лэптыны висьпуктанін, а эгӧ сы могысь, медым вайны сэні сотан висьяс да мукӧд висьяс. Мед тайӧ висьпуктаніныс лоӧ пасӧн миян да тіян костын, тшӧтш миянсянь да тіянсянь чужысьяс костын сы йылысь, мый ми кесъялам Господьлы да сӧмын Сы водзӧ ваям сотан висьяс, бурасян висьяс да мукӧд висьяс. Сэки тіянсянь чужысьяс оз шуны миянсянь чужысьяслы, Господь пӧ абу тіян Ен.
Ми шуим, мый тайӧ кывъяссӧ кӧ локтана кадӧ шуасны миянлы да миянсянь чужысьяслы, сэки ми вочавидзам: “Видзӧдӧй, со Господьлӧн висьпуктанін сямаӧс вӧчӧма. Сійӧс лэптісны миян батьяс, эз сотан вись да мукӧд вись вайӧм могысь, но медым тіян да миян костын [да миянсянь чужысьяс костын] сійӧ вӧлі пасӧн”.
Мед эськӧ оз ло сідзи, мый ми кыпӧдчам Господьлы паныд, кежам Сыысь да асланым Господь Енлӧн вежа чом водзын сулалысь висьпуктанінысь ӧтдор сувтӧдам мӧд висьпуктанін, кӧні кутам вайны сотан висьяс, нянь висьяс да мукӧд висьяс».
Пинес поп, сыкӧд локтысь войтырлӧн юралысьяс да израильса рӧдкутысьяс кор кылісны Рувимсянь, Гадсянь да Манассейсянь чужысьяслысь кывъяссӧ, шуисны, бур пӧ.
Пинес поп, Элазарлӧн пиыс, шуис Рувимсянь, Гадсянь да Манассейсянь чужысьяслы: «Талун ми тӧдмалім, мый Господь миянкӧд, и ті энӧ эновтӧй Господьӧс.
Сідзкӧ, Господь оз кут мыждыны Израиль войтырӧс».
Пинес поп да юралысьяс бӧр локтісны Ханаан муӧ Галаад муысь, Рувим да Гад чужанкотыръяс дінысь [да Манассейлӧн джын чужанкотыр дінысь], да вайисны Израиль пиянлы юӧр.
Израиль пиянлы тайӧ вӧлі бур. Найӧ ошкисны Енмӧс, а эз петны тышӧ, медым бырӧдны Рувим да Гад чужанкотыръяслысь [да Манассейлӧн джын чужанкотырлысь] каръяссӧ.
Рувим да Гад чужанкотыръяс [да Манассейлӧн джын чужанкотырыс] висьпуктанінсӧ нимтісны Эдӧн, ӧд шуисны, мый тайӧ висьпуктаніныс лои миян костын пасӧн сы йылысь, мый Господь эм Ен.
Дыр кад чӧж Господь [Ен] сетіс Израиль войтырлы лӧня овны да видзис найӧс вӧрӧгысь. Кор Исус вӧлі ыджыд арлыда нин, сійӧ чукӧртіс Израиль войтырӧс, юрнуӧдысьясӧс, юралысьясӧс, ёрдысьясӧс да веськӧдлысьясӧс. Исус шуис налы: «Ме ёна нин пӧрысьми.
Ті аддзылінныд ставсӧ, мый Господь, тіян Енныд, вӧчис тайӧ муас олысь войтыръяслы. Господь, тіян Енныд, Ачыс тышкасис тіян вӧсна.
Ме пудъясьӧмӧн юклі тіян чужанкотыръяслы мусӧ, мый босьтім тані олысь войтыръяслысь да сійӧ войтыръяслысь, кодъясӧс ме бырӧді Йӧрдан ю рытыввывсянь Ыджыд саридзӧдз.
Господь, тіян Енныд, Ачыс вӧтлас тіян пӧвстӧ кольӧм войтыръясӧс [кытчӧдз найӧ оз бырны.
Господь мӧдӧдас зверъясӧс на вылӧ, кытчӧдз тіян водзысь оз бырӧд найӧс да налысь ӧксыяссӧ]. Сійӧ бырӧдас найӧс тіян водзысь, и налӧн муыс вичмас тіянлы, кыдзи кӧсйысис тіянлы Господь, тіян Енныд.
Лоӧй зумыдӧсь да кутчысьӧй став тшӧктӧмас, мый гижӧма Мӧисейлӧн Индӧд небӧгын, энӧ кежӧй сэтысь веськыдвылӧ ни шуйгавылӧ.
Энӧ сорласьӧй тіян пӧвстын олысь войтыръяскӧд. Энӧ казьтывлӧй налӧн енъяслысь нимъяссӧ да энӧ сетӧй кывнытӧ на водзын, энӧ кесъялӧй да энӧ юрбитӧй налӧн енъяслы. Кутчысьӧй Господь Енныд дінӧ, кыдзи вӧчинныд талунъя лунӧдз.
Господь вӧтліс тіян водзысь ён да уна лыда войтыръясӧс. Некод эз вермы паныд сувтны тіянлы.
Тіян ӧти морт вӧтлас сюрс мортӧс, ӧд Ачыс Господь, тіян Енныд, вермасьӧ тіян вӧсна, кыдзи и кӧсйысис тіянлы.
Сідзкӧ, став сьӧлӧмсяньныд радейтӧй Господьӧс, ассьыныд Ентӧ.
Но кежанныд кӧ Сыысь да ӧтувтчанныд тіян пӧвстӧ кольӧм войтыръяскӧд, кутанныд рӧдвужасьны да сорласьны накӧд, сэки тӧдӧй, мый Господь, тіян Енныд, оз кут вӧтлыны тіян водзысь тайӧ войтыръяссӧ. Найӧ лоӧны тіянлы лэчкӧн да тывйӧн, тіянлысь мышкутӧ нӧйтысь орсӧн* да синманыд пырысь ёгӧн, кытчӧдз онӧ бырӧй тайӧ бур му вывсьыс, мый сетіс тіянлы Господь, тіян Енныд.
Меным воис кад мунны сэтчӧ, кытчӧ мунӧ мувывса быд олысь.
Ас пытшканыд, асланыд сьӧлӧманыд, ті тӧданныд, мый Господь Енныдлӧн тіянлы кӧсйысьӧм кывйысь нинӧм збыльмытӧг эз коль, ставыс иніс.
Кыдзи збыльмис тіянлы Господь Енныдлӧн быд бурсиӧмыс, сідзи Сійӧ збыльмӧдас став ёрӧмсӧ, кытчӧдз оз бырӧд тіянӧс тайӧ бур му вывсьыс, мый сетіс тіянлы.
Ті кӧ торканныд асланыд Господь Енлысь йитӧдсӧ, мый Сійӧ кӧрталіс тіянкӧд, да кутанныд кесъявны-юрбитны мукӧд енъяслы, сэки Господьлӧн скӧрлуныс ӧзъяс тіян вылӧ, и регыдъя кадӧн ті быранныд тайӧ бур му вывсьыс, мый Господь сетіс тіянлы».
Исус чукӧртіс Израильлысь став чужанкотырсӧ Сикемӧ, корис юрнуӧдысьясӧс, юралысьясӧс, ёрдысьясӧс да веськӧдлысьясӧс. Найӧ ставныс сувтісны [Господь] Ен водзӧ.
Став войтырыслы Исус шуис: «Господь, Израильлӧн Ен, тадзи висьталӧ: “Важӧн тіян батьясныд олісны Ефрат ю сайын, сэні оліс тшӧтш Терах, Ӧвраамлӧн да Нахорлӧн батьыс. Найӧ кесъялісны мукӧд енъяслы, но Ме петкӧді Ӧвраам батьнытӧ сэтысь, новлӧдлі сійӧс став Ханаан муӧд. Ме сеті сысянь чужны уна войтырлы. Сеті сылы Исаакӧс, Исааклы — Яковӧс да Исавӧс.
Исавлы Ме вичмӧді Сеир керӧсвыв му, а Яков пияныскӧд вуджисны Египетӧ. [Сэні найӧ лоины уна лыда, ыджыд да ён войтырӧн. Египетсаяс пондісны найӧс дзескӧдны.]
Ме сувтӧді Мӧисейӧс да Ааронӧс, дойді Египетӧс да петкӧді сэтысь тіянӧс.
Ме петкӧді батьяснытӧ Египетысь, и найӧ локтісны Гӧрд саридз дорӧдз.
Египетсаяс тарантасъясӧн да верзьӧмаясӧн вӧтчисны на бӧрся сэтчӧдз.
Сэки батьясныд шыасисны отсӧгла Ме дінӧ, и Ме торйӧді найӧс египетсаясысь [кымӧрӧн да] пемыдӧн. Ме кыпӧді-бузниті саридз гыяс египетсаяс вылӧ да пӧдті найӧс.
Асланыд синмӧн ті аддзылінныд ставсӧ, мый Ме вӧчи Египетын.
Та бӧрын дыр кад чӧж ті олінныд овтӧминын.
Сэтысь Ме вайӧді тіянӧс аморейяслӧн муӧ, Йӧрдан ю сайӧ.
Найӧ уськӧдчисны тіян вылӧ, но Ме сеті найӧс тіян киӧ. Ме бырӧді найӧс тіян водзысь, и ті босьтінныд налысь мусӧ.
Моавса Валак ӧксы, Сеппорлӧн пиыс, петіс тышӧ Израильлы паныд. Сійӧ корис Веорлысь Валаам писӧ ёрны тіянӧс.
Но Ме эг кут кывзыны Валаамӧс, и сійӧ бурсиис тіянӧс. Тадзи Ме мезді тіянӧс Валаклӧн киысь.
Ті вуджинныд Йӧрдан ю да локтінныд Ерикон кар дорӧ.
Ериконса олысьяс, аморейяс, перезейяс, ханаансаяс, хеттейяс, гергесейяс, хивейяс да евуссаяс тышӧ петісны тіянлы паныд, но найӧс Ме сеті тіян киӧ.
Эз тіян шыпуртныд, эз тіян ньӧввужныд вӧтлы аморейяслысь кык ӧксыӧс тіян водзвылысь, а Меӧн мӧдӧдӧм гырысь зіяс.
Ме сеті тіянлы му да каръяс. Ті энӧ мырсьӧй тайӧ муас, энӧ кыпӧдлӧй каръяссӧ, кӧні ті ӧні оланныд.
Ті энӧ пуктылӧй виноград да олив пуяс, но ӧні ті сёянныд сэтысь вотӧссӧ”.
Сідзкӧ, полӧй Господьысь да кесъялӧй Сылы сӧстӧм сьӧлӧмӧн да веськыда.
Эновтчӧй енъясысь, кодъяслы кесъялісны батьясныд Ефрат ю сайын да Египетын. Кесъялӧй сӧмын Господьлы.
Но ті кӧ онӧ кӧсйӧй кесъявны Господьлы, бӧрйӧй талун, кутанныд-ӧ кесъявны енъяслы, кодъяслы батьясныд юрбитісны Ефрат ю сайын, либӧ аморейяслӧн енъяслы налӧн му вылын, кӧні ті ӧні оланныд.
А ме аслам гортсакӧд кутам кесъявны Господьлы [ӧд Сійӧ вежа]».
Войтырыс вочавидзис: «Ми огӧ кежӧй Господьысь! Мукӧд енъяслы кесъявны огӧ кутӧй.
Ӧд Господь — миян Ен. Сійӧ петкӧдіс миянӧс да батьяснымӧс Египет муысь нартитӧм улысь. Миян син водзын Сійӧ вӧчис ыджыд индысьпасъяс, видзис миянӧс ветлан туйясын, дорйис войтыръясысь, кодъяслысь мусӧ ми вуджим.
Господь вӧтліс миян водзысь став войтыръяссӧ, тшӧтш аморейясӧс, кодъяс олісны тайӧ муас.
Ми тшӧтш кутам кесъявны Господьлы, ӧд Сійӧ — миян Ен».
Исус шуис войтырыслы: «Ті онӧ вермӧй кесъявны Господьлы, ӧд Сійӧ — вежа Ен, Сійӧ — вежӧгтысь Ен. Господь оз терпит тіянлысь лёк вӧчӧмъяснытӧ да мыжъяснытӧ.
Ті кӧ эновтанныд Господьӧс да кутанныд кесъявны мукӧд енъяслы, Сійӧ лэдзас лёксӧ тіян олӧмӧ да бырӧдас тіянӧс, мед кӧ весиг водзынсӧ Сійӧ бур вӧчис тіянлы».
Войтырыс вочавидзис Исуслы: «Ми кутам кесъявны Господьлы».
Исус шуис: «Ті асьныд бӧрйинныд Господьӧс да кӧсйысинныд кесъявны Сылы».
Найӧ вочавидзисны: «Да, ми асьным тадзи шуим».
Исус шуис: «Сідзкӧ, эновтчӧй мукӧд енъясысь да став сьӧлӧмсяньныд бергӧдчӧй Израильлӧн Господь Ен дінӧ».
Войтырыс шуис Исуслы: «Кутам кесъявны Господьлы, асланым Енлы, да кывзысьны Сылысь».
Сійӧ лунӧ Господь нимсянь Исус кӧрталіс войтыркӧд йитӧд. Сэні, Сикемын [Господьлӧн, Израиль Енлӧн, вежа чом водзын] сійӧ сетіс налы индӧд-тшӧктӧмъяс.
Исус гижис тайӧ тшӧктӧмъяссӧ Енлӧн Индӧд небӧгӧ. Сэсся босьтіс ыджыд из да пуктіс сійӧс Господьлӧн вежаинӧ тупу улӧ.
Исус шуис войтырыслы: «[Локтан кадӧ] тайӧ изйыс казьтылас, мый ті мыжаӧсь, ті кӧ соссянныд [Господьысь,] асланыд Енмысь. Ӧд тайӧ изйыс кывліс Господьлысь став кывсӧ, мый Сійӧ висьталіс миянлы [талун]».
Исус лэдзис войтырсӧ, и быдӧн муніс аслас муӧ.
Тайӧ лоӧмторъяс бӧрын Навлӧн Исус пиыс, Господьлӧн кесйӧг, кувсис. Сылы вӧлі сё дас арӧс.
Сійӧс дзебисны аслас муӧ, Ефрем керӧсвывса Тимнат-Серахӧ, Гааш керӧссянь войвылӧ. 
[Шойыскӧд орччӧн дзебанінас пуктісны изйысь вӧчӧм пуртъяссӧ, мыйӧн Господьлӧн тшӧктӧм серти Исус вундыштіс Израиль пиянӧс Галгалын Египетысь петкӧдӧм бӧрын.
Ӧнӧдз пуртъясыс сэнӧсь.]
Израиль войтыр кесъяліс Господьлы Нав Исус дырйи да сы бӧрын олысь юрнуӧдысьяс дырйи, кодъяс аддзылісны Господьлысь Израильлы вӧчӧм уджъяссӧ.
Ӧсиплысь лыяссӧ, мый израильсаяс петкӧдісны Египетысь, найӧ дзебисны Сикемӧ, му юкӧнӧ, мый Яков ньӧбис Хамор пиянлысь эзысь вылӧ. Хамор вӧлі Сикемлӧн бать. Тайӧ му юкӧныс пырис Ӧсипсянь чужысьяслы вичмӧдӧм муас.
[Та бӧрын] Элазар [аркирей], Ааронлӧн пиыс, куліс. Сійӧс дзебисны Гива карӧ, сылӧн Пинес пиыслы Ефрем керӧсвыв муысь сетӧм карӧ.
[Сійӧ лунӧ Израиль пиян босьтісны Енлысь кудсӧ да новлӧдлісны аскӧдныс. Пинес вӧлі Элазар батьыс бӧрся попӧн, сійӧ кесъяліс кувтӧдзыс. Сійӧс дзебӧма аслас Гива карӧ.
Израиль пиян быдӧн муніс аслас оланінӧ, аслас карӧ.
Кад мысти Израиль пиян пондісны кесъявны Астарталы, Астаротлы да матігӧгӧрса войтыръяслӧн мукӧд енъяслы.
Та вӧсна Господь сетіс найӧс моавса Эглон ӧксы киӧ. Дас кӧкъямыс во чӧж сійӧ ыджыдаліс на вылын.]
{Еврей йӧз (комиӧдіс Kodko) @ Ёрдысьяс @ религ. гижӧд @ Библия @ 2021 @ Лб. .}
ЁРДЫСЬЯС
Исуслӧн кулӧм бӧрын Израиль пиян юасисны Господьлысь: «Коді миян пӧвстысь медводдзаӧн петас ханаансаяслы паныд тышӧ?»
Господь вочавидзис: «Иуда чужанкотыр петас.
Сы киӧ Ме сета мусӧ».
Иудасянь чужысьяс шуисны Симеонсянь чужысьяслы: «Петӧй миянкӧд ӧтвылысь тышӧ, медым босьтны ханаансаяслысь миянлы вичмӧдӧм му.
А сэсся ми тшӧтш тіянкӧд мунам, медым босьтны ханаансаяслысь тіянлы вичмӧдӧм му».
Симеонсянь чужысьяс мунісны Иудасянь чужысьяскӧд.
Иудасянь чужысьяс петісны тышӧ. Господь сетіс ханаансаясӧс да перезейясӧс налӧн киӧ. Везекын найӧ пасьвартісны дас сюрс мортӧс.
Сэні найӧ паныдасисны везекса ӧксыкӧд да тышкасисны сыкӧд, пасьвартісны ханаансаясӧс да перезейясӧс.
Но везекса ӧксы пышйис. Сійӧс вӧтӧдісны, кутісны да керыштісны ки-коксьыс певъяссӧ.
Везекса ӧксы шуис: «Сизимдас ӧксылысь ки-коксьыс певсӧ ме керыштлі, и найӧ менам пызан улысь торпыригсӧ чукӧртлісны.
Ӧні Енмыс менсьым водзӧс перйис».
Сійӧс вайӧдісны Ерусалимӧ, сэні сійӧ куліс.
Иудасянь чужысьяс уськӧдчисны Ерусалим вылӧ да босьтісны сійӧс. Сэтчӧс олысьяссӧ виисны шыпуртӧн, а карсӧ сотісны.
Та бӧрын Иудасянь чужысьяс уськӧдчисны ханаансаяс вылӧ, кодъяс олісны керӧсвыв муын, Негевын да керӧсбердса муын.
Сэсся найӧ уськӧдчисны ханаансаяс вылӧ, кодъяс олісны Хеврон карын. Водзынджык Хеврон карлӧн нимыс вӧлі Киръят-Арба. Иудасянь чужысьяс пасьвартісны [енак войтырысь] Шешайӧс, Ахиманӧс да Талмайӧс.
Хевронсянь найӧ петісны тышӧ девирса олысьяслы паныд.
Водзынджык Девир карлӧн нимыс вӧлі Киръят-Сефер.
Калев шуис: «Коді пасьвартас Киръят-Сефер кар, сы сайӧ ме сета ассьым Акса нылӧс».
Карсӧ босьтіс Кеназлӧн Отниэл пиыс. Кеназ вӧлі Калевлӧн ичӧт вокыс. Калев ассьыс Акса нывсӧ сетіс Отниэл сайӧ.
Кор Аксалы воис кад мунны гортсьыс, сылы шуисны, мед корас батьыслысь видз-му. Акса чеччис осёл вывсьыс, и Калев батьыс юаліс сылысь: «Мый тэ кӧсъян?»
Акса шуис батьыслы: «Бурси менӧ.
Тэ сетін меным Негевысь кос му, сет меным тшӧтш ва петанінъяс».
[Сылӧн корӧм серти] Калев сетіс сылы Хеврон кар дорысь вылысса и улысса ва петанінъяс.
Кенейяс*, Мӧисей тесьтсянь чужысьяс, петісны Иудасянь чужысьяскӧд Пальма карсянь Иуда овтӧминӧ, мый паськӧдчӧма Арад карсянь лунвылӧ. Найӧ овмӧдчисны сэтчӧс войтыр пӧвстӧ.
Иуда да Симеон чужанкотыръяс петісны Цефат карын олысь ханаансаяслы паныд тышӧ да дзикӧдз бырӧдісны найӧс. Тайӧ карсӧ нимтісны Хормаӧн.*
Иуда чужанкотыр босьтіс нӧшта Газа, Аскалон да Экрон каръяс нагӧгӧрса муясӧн [да Азот кар сыгӧгӧрса муӧн].
Господь вӧлі Иуда чужанкотыркӧд. Найӧ босьтісны керӧсвыв му, но ковтысын олысьясӧс эз вермыны вӧтлыны, ӧд налӧн вӧліны кӧрт тарантасъяс.
Калевлы сетісны Хеврон кар, кыдзи шуліс Мӧисей. [Хеврон дорысь сылы нӧшта вичмӧдісны енак войтырлысь куим кар.] Калев вӧтліс сэтысь енак войтырлысь куим рӧд.
Венямин чужанкотыр эз вӧтлы Ерусалимын олысь евуссаясӧс. Найӧ ӧнӧдз олӧны Ерусалимын Венямин чужанкотыр пӧвстын.
Господь вӧлі Ӧсипсянь чужысьяскӧд, кор найӧ петісны босьтны Вефиль.
Найӧ [сувтісны да] гусьӧн видзӧдалісны Вефиль кар. Тайӧ карыслӧн воддза нимыс вӧлі Луз.
Видзӧдалысьяс аддзисны карсьыс петысь мортӧс. Найӧ [кутісны сійӧс да] шуисны сылы: «Петкӧдлы миянлы, кыті пырны карас. Ми бурӧн мынтысям тэныд».
Сійӧ петкӧдліс налы, кыті пырны карас. Ӧсипсянь чужысьяс виалісны шыпуртӧн карса олысьясӧс, а тайӧ мортсӧ да сылысь рӧдсӧ ловйӧн колисны.
Тайӧ мортыс муніс хеттейяслӧн муӧ, кыпӧдіс сэні кар да сетіс карыслы Луз ним.
Тайӧ карыс ӧнӧдз тадзи шусьӧ.
Манассей чужанкотыр эз вермы босьтны Бет-Шеан карсӧ [мӧд ногӧн кӧ, Скифополь карсӧ,] да сыгӧгӧрса сиктъяссӧ, Танак, Дор, Ивлеам да Мегиддо каръяссӧ да нагӧгӧрса сиктъяссӧ.
Та вӧсна ханаансаяс кольччисны овны тайӧ муас.
Бӧрынджык, кор Израиль войтыр вынсяліс, найӧ уджӧдісны ханаансаясӧс вот мынтӧм могысь, но эз вӧтлыны найӧс.
Ефрем чужанкотыр эз вӧтлы Гезерын олысь ханаансаясӧс.
Ханаансаяс кольччисны овны на пӧвстӧ Гезерӧ [да мынтісны налы вот].
Завулон чужанкотыр эз вӧтлы Китрон да Нахалол каръясысь ханаансаясӧс, а уджӧдіс найӧс вот мынтӧм могысь. Тадзи ханаансаяс кольччисны овны Завулон чужанкотыр пӧвстӧ.
Асир чужанкотыр эз вӧтлы олысьяссӧ Акко карысь, [а уджӧдіс найӧс вот мынтӧм могысь. Эз вӧтлы олысьяссӧ Дор,] Сидон, Ахлав, Акзив, Хелва, Афек да Рехов каръясысь.
Асирсянь чужысьяс овмӧдчисны сэтчӧс муын олысь ханаансаяс пӧвстӧ, ӧд эз вермыны вӧтлыны найӧс.
Неффалим чужанкотыр сідзжӧ эз вӧтлы Бет-Шемеш да Бет-Анат каръясысь олысьяссӧ, а овмӧдчис сэтчӧс муын олысь ханаансаяс пӧвстӧ.
Бет-Шемешын да Бет-Анатын олысьясӧс Неффалим чужанкотыр уджӧдіс вот мынтӧм могысь.
Дан чужанкотырӧс аморейяс дзескӧдісны, вӧтлісны керӧсвыв муӧ, эз лэдзны лэччыны ковтысӧ.
Аморейяс кольччисны овны Херес нима керӧс вылӧ, [кӧні олісны ошъяс да ручьяс,] тшӧтш Аялон да Шаалвим каръясӧ.
Но Ӧсипсянь чужысьяс вермисны аморейясӧс да уджӧдісны найӧс вот мынтӧм могысь.
Аморейяс олісны Акравим ыб дорсянь Селаӧдз да нӧшта водзӧ на.
Господьлӧн андел Галгалсянь локтіс Бокимӧ [да Вефильӧ Израиль войтыр дінӧ] да шуис: «[Господь тадзи висьталӧ:] Ме петкӧді тіянӧс Египетысь да вайӧді муӧ, мый йылысь кыв сетӧмӧн кӧсйыси тіян батьяслы [мый сета тіянлы]. Ме шуи: “Ассьым йитӧдӧс, мый кӧрталі тіянкӧд, некор ог торк.
Сӧмын энӧ ӧтувтчӧй сійӧ муас олысьяскӧд, [энӧ юрбитӧй налӧн енъяслы, налысь бӧлбанъяссӧ бырӧдӧй,] налысь висьпуктанінъяссӧ жуглӧй”. 
Но ті энӧ кывзысьӧй Менсьым.
Мыйла ті тадзисӧ вӧчинныд?
Та вӧсна Ме шуа, мый ог вӧтлы тіян дінысь тайӧ муас олысьясӧс [кодъясӧс Ме кӧсйи вӧтлынысӧ]. Найӧ кутасны дзескӧдны тіянӧс, а налӧн енъясыс лоӧны тіянлы налькйӧн».
Кор Господьлӧн андел висьталіс тайӧс Израиль войтырлы, ставныс гораа бӧрддзисны.
Та вӧсна израильсаяс нимтісны тайӧ местасӧ Бокимӧн.* 
Сэні найӧ вайисны Господьлы вись.
Исус лэдзис Израиль войтырӧс, и быдӧн муніс [аслас гортӧ] сылы вичмӧдӧм муас, медым босьтны сійӧс аслыс. Войтырыс кесъяліс Господьлы Нав Исус дырйи да сы бӧрын олысь юрнуӧдысьяс дырйи, кодъяс аддзылісны Господьлысь Израильлы вӧчӧм ыджыд уджъяссӧ.
Навлӧн Исус пиыс, Господьлӧн кесйӧг, куліс, кор сылы вӧлі сё дас арӧс. Сійӧс дзебисны аслас муӧ, Ефрем керӧсвывса Тимнат-Херес карӧ, Гааш керӧссянь войвылӧ.
Нав Исус дырйи олысьяс вуджисны батьясныс дінӧ. На бӧрын быдмӧм войтырыс эз тӧд Господьӧс да уджъяссӧ, мый Сійӧ вӧчис Израиль войтырлы. Израиль пиян кутісны вӧчны Господь водзын шогмытӧмсӧ. Найӧ пондісны юрбитны Ваал идолъяслы.
Найӧ эновтісны Господьӧс, батьясныслысь Енсӧ, коді петкӧдіс найӧс Египетысь. Найӧ пондісны юрбитны на гӧгӧр олысь войтыръяслӧн енъяслы. Тадзи скӧрмӧдісны Господьӧс.
Найӧ эновтісны Господьӧс да кутісны кесъявны Ваал да Астарта идолъяслы.
Господь ёна скӧрмис Израиль войтыр вылӧ, сетіс найӧс мырддялысьяс киӧ да на гӧгӧр олысь вӧрӧг киӧ. Израиль войтыр эз нин вермы водзсасьны налы паныд.
Кор израильсаяс петлісны тышӧ, Господь кыпӧдліс кисӧ налы паныд, и найӧс пасьвартлісны, кыдзи налы кыв сетӧмӧн шуліс Господь.
Израиль войтырлы вӧлі вывті сьӧкыд.
Господь сувтӧдліс Израиль войтырлы ёрдысьясӧс, кодъяс мездылісны найӧс мырддялысьяслӧн киысь.
Но и ёрдысьясӧс Израиль войтыр эз кывзы, кырсалысь ань моз сетчис мукӧд енъяслы да юрбитіс налы. [Тадзи скӧрмӧдіс Господьӧс.] Батьяслӧн туй вылысь найӧ ӧдйӧ кежисны. Налӧн батьясныс олісны Господьлӧн тшӧктӧмъяс серти, а тайӧяс — эз.
Господь сувтӧдліс налы ёрдысьясӧс, и Ачыс вӧлі быд ёрдыськӧд. Господь мездывліс войтырсӧ вӧрӧг киысь ёрдысьлӧн олан кад чӧжыс. Ӧд Господьлӧн сьӧлӧмыс нормывліс войтырыслысь дзескӧдӧм вӧсна ойзӧмсӧ кылігӧн.
Но ёрдысьлӧн кулӧм бӧрын войтырыс бара вӧчис лёксӧ батьяс дорысь унджык на. Найӧ юрбитісны-копрасисны мукӧд енъяслы да кесъялісны налы, эз эновтчыны асланыс лёк уджъясысь да эз дугдыны асныралӧмысь.
Господь скӧрмис Израиль войтыр вылӧ да шуис: «Сыысь, мый тайӧ войтырыс торкис Менсьым йитӧдӧс, мый Ме кӧрталі налӧн батьяскӧд, да дугдіс кывзысьны Менсьым, Ме ог кут вӧтлыны на водзысь войтыръясӧс, кодъяс колисны тайӧ муас Нав Исуслӧн кулӧм бӧрын. Тайӧ войтыръясыс отсӧгӧн Ме тӧдмала Израиль войтырӧс. Тӧдмала, кутасны-ӧ найӧ кывзысьны Менсьым да ветлыны Менам туйӧд батьясныс моз».
Та вӧсна Господь колис тайӧ войтыръяссӧ асланыс оланінӧ, эз вӧтлы найӧс регыдъя кадӧн да эз сет найӧс Исус киӧ.
Со кутшӧм войтыръясӧс ловйӧн колис Господь, медым на отсӧгӧн тӧдмавны израильсаясӧс, кодъяс Ханаан му босьтігӧн эз аддзывны тыш. Татшӧм ногӧн Господь велӧдіс тыш аддзывтӧм Израиль пиянӧс тышкасьны.
Ханаан муӧ вӧлі кольӧма филистимса вит юралысьӧс да ливанса керӧсъяс вылын Ваал-Ермон керӧссянь Лево-Хаматӧдз олысь ханаансаясӧс, сидонсаясӧс да хивейясӧс.
Найӧс вӧлі кольӧма, медым тӧдмавны, олас-ӧ Израиль войтыр Господьлӧн тшӧктӧмъясыс серти, кутшӧмъясӧс вӧлі сетӧма Мӧисей пыр налӧн батьяслы на.
Израиль пиян олісны ханаансаяс, хеттейяс, аморейяс, перезейяс, [гергесейяс,] хивейяс да евуссаяс пӧвстын. Налысь нывъяссӧ израильсаяс босьтлісны гӧтырӧ, и ассьыныс нывъяссӧ сетлісны налӧн пиян сайӧ, весиг пондісны кесъявны налӧн енъяслы.
Израиль пиян вӧчисны Господь водзын шогмытӧмсӧ. Найӧ вунӧдісны Господьӧс, ассьыныс Енсӧ, да пондісны юрбитны Ваал да Астарта идолъяслы.
Господь скӧрмис Израиль войтыр вылӧ. Сійӧ сетіс найӧс Месопотамияысь Кушан-Ришатаим ӧксы киӧ. Израиль пиян кесъялісны Кушан-Ришатаимлы кӧкъямыс во чӧж.
Но Израиль пиян шыасисны Господь дінӧ, и Господь сувтӧдіс Израиль пиянлы мездысьӧс, Кеназлысь Отниэл писӧ. Кеназ вӧлі Калевлӧн ичӧт вокыс.
Господьлӧн Лолыс вӧлі Отниэл вылын. Сійӧ вӧлі ёрдысь и Израиль войтырӧн веськӧдлысь.
Отниэл петіс тышӧ, и Господь сетіс сылӧн киӧ Месопотамияысь Кушан-Ришатаим ӧксыӧс. Тадзи Кушан-Ришатаим шедіс Отниэллӧн кипод улӧ.
Нелямын во чӧж Израиль муын эз вӧвны тышъяс.
Сэсся Кеназлӧн Отниэл пиыс куліс.
Израиль пиян бара кутісны вӧчны Господь водзын шогмытӧмсӧ. Та вӧсна Господь кыпӧдіс моавса Эглон ӧксыӧс Израиль войтырлы паныд.
Эглон чукӧртіс аммон да амалик войтырӧс да уськӧдчис Израиль вылӧ. Найӧ босьтісны Пальма кар.
Израиль пиян кесъялісны моавса Эглон ӧксылы дас кӧкъямыс во чӧж.
Но Израиль пиян шыасисны Господь дінӧ, и Господь сувтӧдіс Израиль пиянлы мездысьӧс, Венямин чужанкотырысь Герлысь Эхуд писӧ. Сійӧ вӧлі шуйгун.
Израиль пиян мӧдӧдісны Эхудӧс моавса Эглон ӧксы дінӧ мынтыны вот.
Эхуд вӧчис аслыс гырддза кузьта кыкнанладорсяньыс лэчтӧм шыпурт, ӧшӧдіс сійӧс веськыдладор бокас да дзебис паськӧм улас. Сійӧ локтіс моавса Эглон ӧксы дінӧ да сетіс сылы мынтан вотсӧ.
Эглон вӧлі зэв тшӧг.
Вотсӧ сетӧм бӧрын Эхуд колльӧдіс ассьыс йӧзсӧ, кодъяс отсалісны вайны вотсӧ. Галгалын сулалысь бӧлбанъяс дорсянь Эхуд бӧр бергӧдчис Эглон дінӧ да шуис: «Ӧксыӧй, ме кӧсъя тэкӧд гусьӧн сёрнитны».
Эглон тшӧктіс кесйӧгъясыслы петны. Ставныс петісны.
Эглон пукаліс аслас торъя жырйын, кытчӧ ветлывліс ыркӧдчыны.
Эхуд матыстчис сы дінӧ да шуис: «[Ӧксыӧй,] менам эм тэныд Енсянь кыв».
Эглон чеччис пуклӧссьыс [да сувтіс Эхуд водзӧ].
Сэки Эхуд шуйга кинас перйис веськыдладор бокас ӧшалысь шыпуртсӧ да сатшкис сылы кынӧмас. Шыпуртыс воропнас и ставнас пырис сылӧн тшӧг кынӧмас да колис сэтчӧ, ӧд Эхуд эз перйы ассьыс шыпуртсӧ. Эглонлӧн гырк пытшкӧсыс ортсӧ петіс.
Эхуд петіс жырйысь да ас бӧрсяыс ӧдзӧссӧ йигналіс.
Эхудлӧн мунӧм бӧрын локтісны Эглонлӧн кесйӧгъясыс да аддзисны, мый ӧдзӧсыс игана. Найӧ мӧвпыштісны, ӧксыным пӧ асмогасьӧ.
Найӧ дыр виччысисны, но ӧксы эз пет. Сэки найӧ босьтісны ключ да восьтісны игансӧ, пырисны жырйӧ да аддзисны, мый ӧксыныс куйлӧ джоджас. Сійӧ вӧлі кулӧма нин.
Кесйӧгъяслӧн ньӧжмасьӧм вӧсна Эхуд вермис пышйыны [ӧд сы йылысь эз мӧвпыштны]. Эхуд муніс бӧлбанъяс дорті да пышйис Сейра карӧ.
[Израиль муӧ] Ефрем керӧсвыв муӧ локтӧм бӧрас Эхуд букӧстіс буксанӧн. Израиль пиян сыкӧд ӧтвылысь лэччисны сэтысь, и сійӧ муніс на водзвылын.
Эхуд шуис налы: «Локтӧй ме бӧрся, ӧд Господь [Ен] сетіс тіян киӧ моавсаясӧс, тіянлысь вӧрӧгнытӧ».
Найӧ мунісны сы бӧрся да босьтісны Йӧрдан ю вомӧн Моавӧ вуджанін, и некодлы эз лэдзны сэті вуджнысӧ.
Израильсаяс виисны дас сюрс гӧгӧр моавсаӧс, кодъяс вӧліны ёнӧсь да вынаӧсь. Некод эз вермы пышйыны.
Сійӧ лунӧ израильсаяс вермисны моавсаясӧс. Кӧкъямысдас во чӧж Израиль муын эз вӧвны тышъяс. 
[Эхуд кувтӧдзыс вӧлі Израиль войтырлы ёрдысьӧн.]
Эхуд бӧрся ёрдысьӧн вӧлі Шамгар, Анатлӧн пиыс. Ӧшъясӧс вӧтлан ёсь зорйӧн сійӧ виис квайтсё филистимсаӧс.
Сійӧ тшӧтш мездіс Израиль войтырӧс.
Эхудлӧн кулӧм бӧрын Израиль пиян бара кутісны вӧчны Господь водзын шогмытӧмсӧ.
Господь сетіс найӧс Хацорын юралысь ханаанса Явин ӧксы киӧ.
Сылӧн тышкайӧзнас веськӧдліс Сисар, коді оліс Харошет-Гоим карын.
Сылӧн вӧлі ӧкмыссё кӧрт тарантас. Кызь во чӧж Сисар чорыда дзескӧдіс Израиль пиянӧс, та вӧсна найӧ бӧрдӧмӧн шыасисны Господь дінӧ.
Сійӧ кадас Израиль войтырлы ёрдысьӧн вӧлі Девора нима ань, пророк, Лаппидотлӧн гӧтырыс.
Девора пукаліс Рама да Вефиль костын пальма улын, Ефрем керӧсвыв муын. Пальмасӧ шуисны Деворалӧн пальмаӧн.
Сэтчӧ Израиль пиян волісны асланыс могъясӧн, медым Девора шуис ассьыс веськыда мыждӧм.
Девора мӧдӧдіс корны Авиноамлысь Варак писӧ Кедеш карысь, Неффалим чужанкотырлӧн муысь. Сійӧ шуис Вараклы: «Господь, Израильлӧн Ен, тшӧктӧ тэныд: “Мун кай Тавор керӧс вылӧ. Босьт аскӧдыд Неффалим да Завулон чужанкотыръяс пӧвстысь дас сюрс мортӧс.
Ме вайӧда Явин ӧксылӧн тышкайӧзнас веськӧдлысь Сисарӧс, сылысь тарантасъяссӧ да тышкайӧзсӧ Кишон ю дорӧ да сета сійӧс тэнад киӧ”».
Варак вочавидзис Деворалы: «Тэ кӧ лоан мекӧд, ме муна, а он кӧ, ог мун.
[Ӧд ме ог тӧд лунсӧ, кор Господь мӧдӧдас анделсӧ мекӧд мунны.]»
Девора шуис сылы: «Ме муна тэкӧд.
Но тӧд, мый тышӧ ветлӧмысь ошкӧмыс оз ло тэныд, ӧд Господь сетас Сисарӧс ань киӧ».
Девора мӧдӧдчис Вараккӧд ӧтлаын Кедешӧ.
Варак чукӧртіс Кедешӧ Завулон да Неффалим чужанкотыръясӧс. Сы бӧрся муніс дас сюрс морт, Девора тшӧтш муніс сыкӧд.
Сійӧ кадас Хевер нима морт вӧлі торйӧдчӧма аслас кеней войтырысь, Ховавсянь чужысьясысь, Мӧисей тесьтлӧн рӧдвужысь. Сылӧн чомйыс сулаліс Кедешсянь матын цананнимса тупу рас дорын.
Сисарлы висьталісны, Авиноамлӧн Варак пиыс пӧ кайӧма Тавор керӧс вылӧ.
Сисар чукӧртіс ассьыс тышкайӧзсӧ да ӧкмыссё кӧрт тарантассӧ. Аслас став тышкайӧзыскӧд сійӧ петіс Харошет-Гоим карысь Кишон ю дорӧ.
Сэки Девора шуис Вараклы: «Пет тышӧ! Талун Господь сетас Сисарӧс тэнад киӧ.
Ачыс Господь мунас тэ водзвылын».
Варак лэччис Тавор керӧсысь, сы бӧрся лэччис дас сюрс морт.
Господь вӧчис сідзи, мый Вараклӧн шыпуртысь Сисар да сылӧн став тышкайӧзыс шӧйӧвошисны. Сисар лэччис тарантассьыс да котӧрӧн кутіс пышйыны.
Варак вӧтӧдіс сылысь тарантасъяссӧ да тышкайӧзсӧ Харошет-Гоим карӧдз. Сисарлӧн став тышкайӧзыс кулісны шыпурт помысь, некод ловйӧн эз коль.
Сисар котӧртіс кеней войтырысь Хеверлӧн Яэль нима гӧтырыслӧн чом дорӧ, ӧд хацорса Явин ӧксы да Хеверлӧн рӧдыс ёртасисны.
Яэль петіс паныдавны Сисарӧс да шуис сылы: «Лок пыр, ыджыдӧй! Эн пов!»
Сисар пырис Яэль ордӧ чомъяс. Яэль вевттис сійӧс [аслас] шебрасӧн.
Сисар шуис сылы: «Горшӧй косьмӧ. Вай меным ва юыштны».
Яэль разис кучик дозсӧ да сетіс сылы йӧв, сэсся бӧр вевттис сійӧс.
Сисар шуис сылы: «Сувт чом пыранінас. Израильсаяс кӧ локтасны да юаласны, эм-ӧ кодкӧ тані, тэ шу, мый абу».
Сисар вӧлі мудзӧма да унмовсис. Сэккості Яэль, Хеверлӧн гӧтырыс, босьтіс нӧш да чом зэвтан майӧг, сэсся гусьӧникӧн матыстчис Сисар дінӧ да сатшкис-тувъяліс майӧгсӧ кӧсичаас. Майӧгыс муніс юр пырыс да сатшис муас.
Тадзи Сисар кувсис.
Кор Сисар бӧрся вӧтчысь Варак локтіс сэтчӧ, Яэль петіс сылы воча да шуис: «Лок пыр, ме петкӧдла тэныд мортӧс, кодӧс тэ корсян».
Сійӧ пырис да аддзис кулӧм Сисарӧс. Сылӧн юрас вӧлі сатшкӧм майӧг.
Сійӧ лунӧ [Господь] Ен сетіс израильсаяслы вермыны ханаанса Явин ӧксыӧс.
Израиль пиян ёнджыка и ёнджыка дзескӧдісны ханаанса Явин ӧксыӧс, кытчӧдз дзикӧдз эз бырӧдны сійӧс.
Сійӧ лунӧ Девора да Авиноамлӧн Варак пиыс сьылісны тайӧ сьыланкывсӧ:
— Израильӧс нуӧдысьяс кыпӧдчисны, и войтырыс на бӧрся тышӧ петіс.
Ошкӧй Господьӧс!
Ӧксыяс, кывзӧй! Юралысьяс, кывзӧй! Ме кута сьывны Господьлы, кута ошкыны Господьӧс, Израильлысь Енсӧ!
Господьӧй, Сеир керӧсвыв муысь Тэнад лэччигӧн, Эдомсянь Тэнад восьлалігӧн, муыс дзӧрис, енэжсянь кымӧръяс кисьтісны зэр.
Господь водзын керӧсъяс дзӧрисны, Израильлӧн Господь Ен водзын весиг Синай керӧс вӧрис.
Анатлӧн Шамгар пиыслӧн олігӧн, Яэльлӧн олан лунъясӧ туйяс вӧліны кушӧсь, йӧзыс корсисны кытшола туйяс.
Израильын эз ло юралысьыс. Но сэки Израиль войтырлы мам пыдди сувтіс Девора.
Войтырыс вӧлі бӧрйӧма выль енъясӧс, та вӧсна дзиръя дорӧдз вӧрӧг локтіс.
Израильын вӧлі нелямын сюрс тышкаморт, но сайӧдыс-шыпуртыс налӧн эз вӧв.
Менам сьӧлӧмӧй израильса веськӧдлысьяс дор, на бӧрся тышӧ петысьяс дор.
Ошкӧй Господьӧс!
Сьылӧй ті, еджыд осёлъяс вылын ветлысьяс, сьылӧй ті, небыд вольӧсъяс вылын пукалысьяс, сьылӧй ті, туйяс вывті подӧн ветлысьяс!
Юкмӧс дорын ыжъясӧс юкталысьяс сьылӧны Господьлӧн вермӧм йылысь, ошкӧны израильса юралысьясӧс.
Господьлӧн войтырыс дзиръя дорӧ локтӧма.
Сувт гажӧдчыны, Девора, сьыв сьыланкыв!
Чеччы, Варак, Авиноамлӧн пиыс, нуӧд йӧзӧс, кодъясӧс босьтін пленӧ.
Ловйӧн кольӧмаяс локтісны веськӧдлысьяс дінӧ, Господьлӧн тышкайӧзыс чукӧртчис ме дінӧ.
Ефрем чужанкотырысь локтісны амалик войтырлӧн муӧ овмӧдчӧмаяс, на бӧрся локтіс Веняминлӧн тышкакотырыс.
Макир рӧдысь локтісны веськӧдлысьяс, Завулон чужанкотырысь локтісны юралан бедь кианыс кутысьяс.
Иссакар чужанкотырысь веськӧдлысьяс вӧліны Деворакӧд, найӧ уськӧдчисны ковтысӧ Вараккӧд, а Рувим чужанкотыр падъялӧ.
Рувим чужанкотыр, мыйла тэ пукалан ыж видзысьяс пӧвстын, кывзан ыжъяслысь баксӧмсӧ?
Рувим чужанкотыр падъялӧ.
Галаадын олысьяс кольччисны Йӧрдан ю сайӧ, Дан чужанкотыр йӧз пыжъяс дорын пукалӧ.
Асир чужанкотыр олӧ саридз бокын, кольччис ӧзын дорӧ.
А Завулон чужанкотыр вӧлі дась олӧмсӧ сетны, сы моз тшӧтш Неффалим чужанкотыр, кор керӧсъяс вылын пансис тыш.
Ӧксыяс локтісны вермасьны, Танакын, мегиддоса ваяс дорын, тышкасисны, но ханаанса ӧксыяслы эзысь эз вичмы.
Енэжсянь кодзувъяс петісны вермасьны, вылісянь найӧ уськӧдчисны Сисар вылӧ.
Нэмӧвӧйся ю, Кишон ю, кылӧдіс вӧрӧгӧс.
Эн пов петны тышӧ, сьӧлӧмӧй!
Вӧвъяслӧн рӧдтӧм шы кылӧ — вына вӧвъяс пышйӧны.
«Ёрӧй Мероз карӧс, — шуӧ Господьлӧн андел. — Ёрӧй, сетӧй ёрӧм улӧ сэтчӧс олысьяссӧ. Ӧд найӧ эз локны Господьлы отсӧг вылӧ, налӧн тышкайӧзыс эз локны отсавны Господьлы».
Бурсиӧма аньяс пӧвстысь Яэльӧс, кеней войтырысь Хеверлысь гӧтырсӧ, чомйын олысь аньяс пиысь сійӧс бурсиӧма.
Сисар ва корис, а Яэль йӧв сетіс, мича дозйын нӧгыля йӧв мыччис.
Шуйга киас Яэль майӧг босьтіс, а веськыдас — нӧш.
Сисарлы юрас дітшкис, кӧсичаас сатшкис-тувъяліс.
Сисар усис Яэль кок дорӧ, тімбыльтчис да куліс.
Сисар усис Яэль кок дорӧ, тімбыльтчис, и сэтчӧ колис.
Сисарлӧн мамыс ӧшиньӧд кыйӧдӧ, ӧшинь тас сайын бӧрдӧ-шуалӧ: «Кӧні бара пиӧйлӧн тарантасыс? Мыйла та дыра тарантас шыыс оз кыв?»
Сыкӧд олысь мывкыд аньяс вочавидзӧны, и ачыс аслыс сійӧ дольӧ: «Гашкӧ, тышын шедӧдӧмасӧ юклӧ, быд тышкамортлы ӧти ли кык нылӧс сетӧ. Сисар босьтӧ аслыс уна рӧма паськӧм, серлӧдлӧмӧн кыӧм чышъян пӧрччӧдӧ пленӧ босьтӧмалысь».
Господьӧй, тадзи мед бырасны Тэнӧ мустӧмтысьяс.
Но Господьӧс радейтысьяс мед лоасны шонді кодьӧсь, аслас вынӧн кыпӧдчысь шонді кодьӧсь.
Та бӧрын нелямын во чӧж Израиль муын эз вӧвны тышъяс.
Израиль пиян бара вӧчисны Господь водзын шогмытӧмсӧ. Таысь Господь сетіс найӧс мадиансаяс киӧ сизим во кежлӧ.
Мадиансаяс чорыда дзескӧдісны Израиль войтырӧс. Наысь дзебсясьӧм могысь Израиль пиян вӧчалісны керӧсъяс вылӧ, керӧс потасъясӧ да кырта горсъясӧ сайӧдчанінъяс.
Израильсаяслӧн сӧмын на кӧдзӧм муяс вылӧ вӧлі локтӧны мадиансаяс, амалик войтыр да накӧд асыввылын олысь войтыръяс, сувтӧдӧны сэтчӧ ассьыныс чомъяснысӧ, нырӧны-талялӧны да куштӧны налысь мувыв быдтассӧ весиг Газа кар дорӧдз. Найӧ кольлісны Израиль войтырӧс сёянтӧг, мырддьывлісны налысь ыжъяссӧ, ӧшъяссӧ да осёлъяссӧ.
Вӧрӧг волывліс аслас ыж-мӧскӧн да чомъясӧн саранча чукӧръяс моз.
Найӧ асьныс да налӧн верблюдъясыс вӧліны сы мында, мый весиг он вермы лыддьынысӧ. Найӧ локтісны да куштісны Израиль му.
Мадиансаяс понда Израиль войтыр дзикӧдз гӧльмис. Сэки Израиль пиян шыасисны Господь дінӧ.
Кор Израиль пиян мадиансаяс вӧсна шыасисны Господь дінӧ, Господь мӧдӧдіс налы пророкӧс. Пророк шуис: «Господь, Израильлӧн Ен, тадзи висьталӧ: “Ме петкӧді тіянӧс Египетысь нартитӧм улысь.
Ме мезді тіянӧс египетсаяслӧн да тіянӧс дзескӧдысьяслӧн кипод улысь. Ме вӧтлі вӧрӧгнытӧ тіян водзысь да сеті налысь мусӧ тіянлы. Ме шуи тіянлы, мый Ме — Господь, тіян Енныд, энӧ юрбитӧй аморейяслӧн енъяслы. Но налӧн муас оліганыд ті энӧ кывзӧй Менӧ”».
Господьлӧн андел локтіс Офраӧ да пуксис Авиэзер рӧдысь Йоаслӧн тупу улӧ.
Тайӧ кадас Гедеон, Йоаслӧн пиыс, виноград пычкан гуын вартіс шобді. Сэтчӧ сайӧдчис мадиансаясысь, медым найӧ эз тӧдмавны нянь йылысь. Господьлӧн андел петкӧдчис Гедеонлы да шуис: «Господь тэкӧд, вына тышкамортӧй!»
Гедеон вочавидзис: «Ыджыдӧй, миянкӧд кӧ Господь, сідзкӧ, мыйла миянӧс шогъясыс суисны?
Кӧні Сылӧн шензьӧданаторъясыс, мый йылысь висьтавлісны батьясным? Найӧ висьтавлісны миянлы, кыдзи Господь петкӧдӧма миянӧс Египетысь.
Но ӧні Господь эновтӧма миянӧс, сетӧма мадианса киӧ».
Гедеон вылӧ видзӧдлӧмӧн Господь шуис: «Тэнад эм вын. Мун да мезды Израильӧс мадианса киысь.
Ме мӧдӧда тэнӧ».
Гедеон шуис Сылы: «Господьӧй, кыдзи нӧ ме мезда Израильӧс?
Менам рӧдӧй ӧд абу тӧдчана Манассей чужанкотырын, и бать рӧдын ме медічӧтыс».
Господь шуис сылы: «Ме лоа тэкӧд! Ӧти мортӧс моз тэ пасьвартан мадиансаясӧс».
Гедеон шуис Сылы: «Ме кӧ шогмана Тэныд, сет тӧдны, мый Тэ Ачыд сёрнитан мекӧд.
Эн на мун, виччысьлы менӧ тані, ме вая Тэныд козин».
Сійӧ вочавидзис: «Ме виччысьла».
Гедеон муніс, начкис кӧзапиӧс да дасьтіс сёян. Ефа мында пызьысь пӧжаліс шомтӧм нянь.
Дасьтӧм яйсӧ пуктіс кудйӧ, шыд васӧ кисьтіс гырничӧ да вайис Господьлӧн анделлы тупу улӧ.
Енлӧн андел шуис Гедеонлы: «Пукты яйсӧ да няньсӧ тайӧ из вылас да шыднас киськав».
Гедеон сідзи и вӧчис.
Господьлӧн андел нюжӧдіс бедьсӧ, мый вӧлі киас, да бедь йывнас инмӧдчис яйӧ да шомтӧм няньӧ.
Сэки изйысь ыпнитіс би да ньылыштіс яйсӧ няньыскӧд.
Та бӧрын Господьлӧн андел муніс Гедеон дінысь.
Гедеон гӧгӧрвоис, мый тайӧ вӧлі Господьлӧн андел, да шуис: «Господьӧй Ыджыдӧй! Курыд шог меным!
Ме ӧд аслам синмӧн аддзылі Господьлысь анделсӧ».
Но Господь вочавидзис сылы: «Лӧнь, эн пов! Тэ он кув».
Гедеон вӧчис сэні Господьлы висьпуктанін да нимтіс сійӧс “Яхве-шалом”.
Висьпуктаніныс ӧнӧдз сулалӧ Офраын, Авиэзер рӧдлӧн му вылас.
Сійӧ войнас Господь шуис Гедеонлы: «Босьт батьыдлӧн пемӧс чукӧрысь сизим арӧса медбур ӧшкӧс. Жугӧд батьыд ордысь Вааллысь висьпуктанінсӧ да керав орччӧн сулалысь юрбитан пусӧ. Вӧч тайӧ керӧс вылас висьпуктанін Господьлы, аслад Енлы [коді петкӧдчис тэныд]. Ставсӧ вӧч колана ногӧн. Кералӧм юрбитан пусӧ сот пес пыдди висьпуктанін вылас, а ӧшсӧ вай сотан вись пыдди».
Аслас кесйӧгъяс пиысь Гедеон босьтіс аскӧдыс дас мортӧс да вӧчис Господьлӧн тшӧктӧм серти.
Сійӧ поліс батьыслӧн рӧдысь да карса олысьясысь, та вӧсна ставсӧ тайӧс вӧчис войнас.
Асывнас карса олысьяс чеччисны да аддзисны, мый Вааллысь висьпуктанінсӧ жугӧдӧма, орччӧн сулалысь юрбитан пусӧ кералӧма и выль висьпуктанін вылын сотан вись пыдди вайӧма ӧшкӧс.
Найӧ юасисны ӧта-мӧдныслысь: «Коді тайӧс вӧчис?»
Корсисны-юасисны да тӧдмалісны, вӧлӧмкӧ, тайӧс вӧчӧма Йоаслӧн Гедеон пиыс.
Карса олысьяс шуисны Йоаслы: «Вайӧд питӧ миян дінӧ!
Сылы ковмас кувны, ӧд сійӧ жугӧдӧма Вааллысь висьпуктанінсӧ да кералӧма орччӧн сулалысь юрбитан пусӧ».
Но Йоас шуис налы: «Ті кӧсъянныд дорйыны Ваалӧс? Кӧсъянныд сылы отсавны?
Коді кутас дорйыны Ваалӧс, сійӧс асылӧдзыс мед виасны.
Ваал кӧ ен, мед ачыс асьсӧ дорйӧ, ӧд Гедеон жугӧдӧма сылысь висьпуктанінсӧ».
Сійӧ лунӧ Гедеонлы сетісны Ероваал ним, ӧд батьыс сы йылысь шуис: «Ваал мед ачыс асьсӧ дорйӧ, ӧд Гедеон жугӧдӧма сылысь висьпуктанінсӧ».
Мадиансаяс, амалик войтыр да асыввылын олысь войтыр чукӧртчисны, вуджисны Йӧрдан ю да сувтісны Изреель ковтысӧ.
Сэки Господьлӧн Лолыс лэччис Гедеон вылӧ.
Гедеон букӧстіс буксанӧн да чукӧртіс Авиэзерлысь рӧдсӧ ас дінас.
Гедеон мӧдӧдіс юӧртысьясӧс Манассей, Асир, Завулон да Неффалим чужанкотыръяс дінӧ, и найӧ ставныс мунісны сы бӧрся.
Гедеон шыасис Ен дінӧ: «Петкӧдлы, мый Тэ мездан Израильӧс менам киӧн, кыдзи и кӧсйысин. Со, ме пукта гумла вылӧ шырӧм вурун. Лысваыс кӧ сӧмын вурунсӧ кӧтӧдас, а муыс лоӧ кос, сэки ме кута тӧдны, мый Тэ менам киӧн мездан Израильӧс Аслад кӧсйысьӧмыд серти».
Сідзи и лоис. Асывнас Гедеон чеччис водз, босьтіс вурунсӧ да пыдзыртіс сэтысь лысвасӧ тасьті тыр.
Гедеон шуис Енлы: «Эн дӧзмы ме вылӧ, ме кӧ нӧшта ӧтчыдысь шыася Тэ дінӧ. Петкӧдлы меным вурун пыр Ассьыд кӧсйӧмтӧ. Вуруныс мед лоас кос, а лысваыс мед кӧтӧдас сы гӧгӧр мусӧ».
Войнас Енмыс сідзи и вӧчис. Вуруныс вӧлі кос, а сы гӧгӧр му вылас куйліс лысва.
Водз асывнас Гедеон, мӧд ногӧн кӧ, Ероваал, да став сылӧн тышкайӧзыс ӧтвылысь сувтісны Харод ва петанін бокӧ.
Мадиансаяс сулалісны войвывладорас, ковтысын, Морэ нима керӧс дорын.
Господь шуис Гедеонлы: «Тэнад йӧзыд вывті уна. Ме кӧ сета мадиансаясӧс налӧн киӧ, Израиль войтыр кутас ышнясьны Ме водзын да шуны, ми пӧ асьным мездім асьнымӧс.
Юӧрт войтырыдлы: коді полӧ-тіралӧ, мед лэччӧ Галаад керӧс вылысь, мед бӧр бергӧдчӧ».
Сэки кызь кык сюрс морт бӧр бергӧдчисны, а дас сюрсыс кольччисны.
Господь шуис Гедеонлы: «Уна на йӧзыд тэнад.
Нуӧд найӧс ва дорӧ, сэні Ме бӧръя, коді тэкӧд ӧтвылысь тышӧ петас.
Код йылысь Ме шуа: “Тайӧ мунас тэкӧд”, сійӧ мед мунас, а код йылысь шуа: “Тайӧ оз мун тэкӧд”, сійӧ мед оз мун».
Гедеон вайӧдіс став тышкайӧзсӧ ва дорӧ, и Господь шуис сылы: «Быдӧнӧс, коді кутас лакны васӧ пон моз, торйӧд наысь, кодъяс кутасны юны васӧ пидзӧсчанясьӧмӧн».
Куимсё морт асланыс соддзысь лакисны васӧ пон моз, а мукӧдыс юисны васӧ пидзӧсчанясьӧмӧн.
Господь шуис Гедеонлы: «Васӧ лакысь куимсё морт пырыс Ме мезда Израильӧс да сета мадиансаясӧс тэнад киӧ. А мукӧдыс мед мунасны гортаныс».
Гедеон колис аскӧдыс куимсё тышкамортӧс, а мукӧдсӧ лэдзис гортаныс. Налӧн заптӧм сёяныс да буксанъясыс колины тайӧ куимсёыслы.
Мадиансаяс сулалісны улынджык, ковтысын.
Сійӧ войнас Господь шуис Гедеонлы: «Лэччы да уськӧдчы мадиансаяс вылӧ, ӧд Ме сета найӧс тэнад киӧ.
Полан кӧ уськӧдчынысӧ, ветлы Пурай кесйӧгыдкӧд налӧн чомъяс дорӧ.
Сэні тэ кылан, мый йылысь найӧ кутасны сёрнитны. Сэки тэ повтӧг верман уськӧдчыны на вылӧ».
Гедеон лэччис аслас Пурай кесйӧгыскӧд вӧрӧглӧн чомъяс дорӧ.
Мадиансаяс, амалик войтыр да асыввылын олысь войтыр вӧлі паськӧдчӧмаӧсь ковтысӧ. Найӧ вӧліны саранча мында, а налӧн верблюдъясыс — саридздор лыа мында.
Гедеон матыстчис да кыліс, кыдзи мадианса морт буретш висьталіс ёртыслы ассьыс вӧтсӧ: «Ме вӧтаси, быттьӧ миян чомъяслань гӧгыльтчис ид нянь тупӧсь. Сійӧ гӧгыльтчис ӧти чом дорӧ да пӧрӧдіс сійӧс. Чомйыс ставнас киссис».
Ёртыс вочавидзис: «Тайӧ израильса Гедеонлӧн, Йоас пилӧн, шыпуртыс.
Енмыс сетас сы киӧ мадиансаясӧс да став тайӧ тышкайӧзсӧ».
Гедеон мыйӧн кыліс вӧт йылысь сёрнисӧ, копыртчӧмӧн юрбитіс Господьлы, сэсся бӧр локтіс израильса тышкайӧз дінӧ. Гедеон шуис налы: «Петамӧй тышӧ!
Господь сетіс тіян киӧ мадиансаясӧс».
Куимсё мортӧс Гедеон юкис куим пельӧ. Быдӧнлы киас сетіс буксан да гырнич доз, кытчӧ вӧлі дзебӧма ӧзъялысь факел.
Сійӧ шуис: «Видзӧдӧй ме вылӧ да вӧчӧй ме моз.
Ме муна вӧрӧглӧн чомъяс дорӧдз. Мый ме кута вӧчны, сійӧс и ті вӧчӧй.
Кор ме да мекӧд орччӧн сулалысьяс букӧстам буксанъясӧн, сэки чомъяс гӧгӧр сулалігмозныд ті тшӧтш букӧстӧй да горзӧй: “[Тышкасям] Господь вӧсна да Гедеон вӧсна!”»
Гедеон локтіс вӧрӧглӧн чомъяс дорӧдз, кор сэні рытъя видзысьясӧс вежисны войся видзысьяс. Гедеонкӧд вӧлі сё морт. Найӧ буксісны буксанъясӧн да жуглісны гырнич дозъяснысӧ.
Став куимнан тышкакотырыс буксісны буксанӧн да жуглісны гырнич дозъяссӧ. Шуйга киас быдӧн кутіс факел, а веськыдас — буксан. Найӧ буксісны да горзісны: «Тышкасям Господь вӧсна да Гедеон вӧсна!»
Найӧ сулалісны мадианса тышкайӧзлӧн чомъяс гӧгӧр, а мадиансаяс горзӧмӧн котралісны ӧтарӧ-мӧдарӧ, кӧсйисны пышйыны.
Куимсё израильса тышкамортлӧн буксігкості Господь вӧчис сідзи, мый мадиансаяс виалісны ӧта-мӧднысӧ. А коляс тышкайӧзыс пышйисны Церера карлань Бет-Шитта карӧдз да Авел-Мехола кар дорӧдз, Табат карсянь матӧ.
Чукӧстісны айуловӧс Неффалим, Асир да Манассей чужанкотыръясысь, медым вӧтӧдны мадиансаясӧс.
Гедеон мӧдӧдіс юӧртысьясӧс Ефрем керӧсвыв муӧ. Найӧ шуисны: «Лэччӧй керӧсъяс вылысь, медым тупкыны Йӧрдан ю дорӧ мунан туйсӧ Бет-Бара карӧдз. Энӧ лэдзӧй мадиансаяслы вуджны юсӧ».
Ефрем чужанкотырысь вӧлі чукӧстӧма ставнысӧ, и найӧ тупкисны туйсӧ Бет-Бара карӧдз да Йӧрдан ю вомӧн вуджанінсӧ.
Найӧ босьтісны мадианса кык юралысьӧс — Оривӧс да Зивӧс. Оривӧс виисны Орив изкырта дорын, а Зивӧс виисны Зивлӧн виноград пычкан гу дорын. Сэсся водзӧ вӧтӧдісны мадиансаясӧс.
Оривлысь да Зивлысь юръяссӧ вайисны Гедеонлы Йӧрдан ю сайӧ.
Ефремсянь чужысьяс скӧрпырысь сёрнитісны Гедеонкӧд. Найӧ шуисны: «Мыйла тэ тадзи вӧчин? Мыйла эн кор миянӧс, медым ми тэкӧд петім тышкасьны мадиансаяслы паныд?»
Гедеон вочавидзис: «Ефремсянь чужысьяс, ті ӧд вӧчинныд ме дорысь унджык на!
Ті чукӧртінныд бӧръя виноград розъяссӧ, тадзи унджык вӧчинныд Авиэзер рӧд дорысь.
Тіян киӧ Енмыс сетіс мадианса юралысьясӧс, Оривӧс да Зивӧс. Ме дорысь ті унджык вӧчинныд».
Тайӧ кывъясыс бӧрын Ефремсянь чужысьяс лӧнисны.
Гедеон локтіс Йӧрдан ю дорӧ да вуджис мӧдлапӧлас. Сыкӧд вӧлі куимсё морт.
Найӧ вӧлі мудзӧмаӧсь [да тшыгӧсь], но водзӧ вӧтӧдісны вӧрӧгӧс.
Гедеон шыасис Суккот карса олысьяс дінӧ: «Сетӧй менам йӧзлы нянь.
Найӧ ёна мудзӧмаӧсь, ӧд ми вӧтӧдам мадианса ӧксыясӧс, Зевейӧс да Салманӧс».
Суккотса юралысьяс шуисны сылы: «Зевейыс да Салманыс ӧмӧй тэнад киынӧсь нин, медым ми нянь сетім тэнад тышкайӧзыдлы?»
Гедеон шуис: «Кор Господь сетас менам киӧ Зевейӧс да Салманӧс, сэки ме тіянӧс овтӧминса лежнӧгӧн кучкала, бытшкасьысь ньӧрйӧн нӧйта».
Гедеон муніс водзӧ Пенуэл карӧ да тадзи жӧ нянь корис сэтчӧс олысьяслысь, но найӧ вочавидзисны суккотса олысьяс моз.
Гедеон шуис Пенуэлын олысьяслы: «Кор ме вермысьӧн бӧр локта, жугӧда тайӧ башнясӧ».
Зевей да Салман ӧксыяс сэки вӧліны Каркор карын. Накӧд вӧлі дас вит сюрс морт, кодъяс колисны асыввыв войтыръяслӧн тышкайӧз пӧвстысь.
А налӧн сё кызь сюрс тышкаморт усис тышын.
Гедеон муніс караван туйӧд, Новах да Иогбега каръяс асыввывладорті. Сійӧ уськӧдчис вӧрӧглӧн тышкайӧз вылӧ, кор найӧ повтӧг шойччисны чомъясын.
Мадианса Зевей да Салман ӧксыяс пышйисны.
Гедеон суӧдіс да кутіс найӧс, а налӧн тышкайӧзыс повзьӧмнысла шӧйӧвошисны.
Йоаслӧн Гедеон пиыс бӧр локтіс тышысь.
Херес ыб вылын сійӧ кутіс суккотса зонмӧс да юасис сылысь.
Зонмыс гижис сылы суккотса сизимдас сизим юралысьлысь да юрнуӧдысьлысь нимъяссӧ.
Гедеон локтіс суккотса олысьяс дінӧ да шуис налы: «Со Зевей да Салман, кодъяс вӧсна ті сералінныд ме вылын. Кор ме кори менам мудзӧм йӧзлы нянь, ті юалінныд, Зевейыс да Салманыс ӧмӧй менам киынӧсь нин».
Гедеон кутіс суккотса юрнуӧдысьясӧс да кучкаліс найӧс овтӧминса лежнӧгӧн, нӧйтіс бытшкасьысь ньӧрйӧн. Тадзи велӧдіс суккотса олысьясӧс.
Сійӧ виис Пенуэл карса олысьясӧс да жугӧдіс сэтчӧс башнясӧ.
Зевейлы да Салманлы шуис: «Кутшӧм йӧзӧс ті виинныд Тавор керӧс вылын?»
Найӧ вочавидзисны: «Тэ кодьӧсь вӧліны, быдӧн вӧлі ӧксы пи кодь».
Гедеон шуис: «Найӧ вӧліны менам вокъяс, менам мамлӧн пияныс.
Ловъя Господь водзын шуа: ті кӧ найӧс ловйӧн колинныд, ме эськӧ тіянӧс тшӧтш ловйӧн коли».
Гедеон шуис Етерлы, медыджыд пиыслы: «Мун ви найӧс!»
Но сійӧ поліс, эз лысьт перйыны шыпуртсӧ, ӧд вӧлі том на.
Сэки Зевей да Салман шуисны: «Ачыд миянӧс ви, ӧд тэныд тайӧ выныд серти».
Гедеон матыстчис да виис Зевейӧс да Салманӧс. Налӧн верблюд голяяс вылысь босьтіс аслыс тӧлысь сяма мичмӧдчанторъяссӧ.
Израиль войтыр шуисны Гедеонлы: «Тэ ло миянлы юралысьнас, тэ бӧрся лоас пиыд, а пиыд бӧрся — сылӧн пиыс. Тэ ӧд миянӧс мездін мадиансаяслӧн киысь».
Гедеон шуис налы: «Ме ог ло тіянлы юралысьнас, и пиӧй оз ло.
Тіян юралысьныд — Господь».
Гедеон содтіс: «Ӧтитор тіянлысь кора. Мед быдӧн сетас меным тышын шедӧдӧмторсьыс исергаӧн».
Тышын вӧлі шедӧдӧма уна зарни исерга, ӧд вӧрӧгыс вӧлі Измаил рӧдысь, а найӧ новлісны исергаяс.
Израильсаяс шуисны: «Сетам».
Сэсся му вылӧ вольсалісны паськӧм да быдӧн шыблаліс сэтчӧ аслас шедӧдӧмторйысь исергаӧн.
Гедеонлы сетӧм зарни исерга чукӧрыс сьӧктанас вӧлі сюрс сизимсё сикель. Исергаяс кындзи вӧрӧглысь вӧлі босьтӧма тӧлысь сяма мичмӧдчанторъяс, сикӧтшъяс, мадианса ӧксыяслысь пемыдгӧрд паськӧм да налӧн верблюдъяслысь голясӧ мичмӧдан [зарни] чепъяс.
Тайӧ зарнисьыс Гедеон вӧчис ефод да пуктіс сійӧс аслас Офра карӧ. Израиль войтыр пондіс юрбитны ефодлы да эновтіс Господьӧс. Гедеонлы да сылӧн рӧдыслы ефодыс лои налькйӧн.
Израиль пиян вермисны мадиансаясӧс, и найӧ эз нин кыпӧдчывны израильсаяслы паныд. Гедеон дырйи нелямын во чӧж Израиль муын эз вӧвны тышъяс.
Йоаслӧн Гедеон пиыс, мӧд ногӧн кӧ, Ероваал, локтіс аслас гортӧ да оліс сэні.
Гедеонлӧн чужис сизимдас пи, ӧд сійӧ вӧлі уна гӧтыра.
Сылӧн кесйӧг-гӧтырыс, коді оліс Сикем карын, тшӧтш чужтіс сылы пиӧс. Гедеон пуктіс сылы Авимелек ним.
Гедеон, Йоаслӧн пи, кувсис вель ыджыд арлыдаӧн. Сійӧс дзебисны Йоас батьыслӧн дзебанінас, Авиэзер рӧдлӧн Офра карӧ.
Гедеонлӧн кувсьӧм бӧрын израильсаяс бара эновтісны Господьӧс да кырсалысь ань моз сетчисны Ваал идолъяслы.
Найӧ пуктісны Ваал-Беритӧс аслыныс ен пыдди и вунӧдісны Господьӧс, ассьыныс Енсӧ, коді мездыліс найӧс на гӧгӧр олысь став вӧрӧгысь.
Гедеонлӧн, мӧд ногӧн кӧ, Еровааллӧн, котырлы найӧ эз мынтысьны бурӧн Гедеонлӧн Израильлы бур вӧчӧмысь.
Еровааллӧн Авимелек пиыс муніс мам вокъясыс дінӧ Сикемӧ, сёрнитіс накӧд да налӧн батьыслӧн став рӧдыскӧд. Сійӧ шуис: «Юалӧй Сикем карса олысьяслысь, бурджык-ӧ лоӧ налы, Еровааллӧн сизимдаснан пияныс кӧ юраласны либӧ ӧти морт юралас.
Энӧ вунӧдӧй, мый ме тіян рӧдвуж, и миян пытшкын визувтӧ ӧти вир».
Мамыслӧн вокъясыс сёрнитісны Авимелек кузя Сикем карса олысьяскӧд, и налӧн сьӧлӧмныс бергӧдчис Авимелек дор. Найӧ шуисны, сійӧ пӧ миян вок.
Сикемсаяс сетісны Авимелеклы Ваал-Беритлы юрбитанінысь сизимдас сикель эзысь.
Тайӧ сьӧм вылас Авимелек медаліс асныра да дыш йӧзӧс, и найӧ мунісны сы бӧрся.
Авимелек локтіс медалӧм йӧзкӧд батьыс керкаӧ Офра карӧ да виис ӧти из вылын ассьыс вокъяссӧ, Еровааллысь сизимдас писӧ.
Сӧмын Еровааллӧн медічӧт Иотам пиыс дзебсис да ловйӧн колис.
Сикем да Бет-Милло каръясысь йӧз чукӧртчисны да мунісны Сикем кардорса тупу дорӧ. Сэні найӧ пуктісны Авимелекӧс ӧксыӧ.
Та йылысь кылӧм бӧрын Иотам кайис Гаризим керӧс вылӧ да горӧдіс: «Сикемса олысьяс, кывзӧй менӧ, сэки Енмыс кылас тіянӧс!
Ӧтчыд чукӧртчисны пуяс, медым мавтыштӧмӧн пуктыны аслыныс ӧксыӧс. Олив пулы найӧ шуисны: “Ло миян ӧксыӧн”.
Но сійӧ шуис: “Менсьым выйӧс ошкӧны енъяс да йӧз. Ме кӧ кута ӧвтчыны мукӧд пуяс весьтын, дугда выйӧс сетны”.
Сэсся пуяс шуисны инжир пулы: “Ло миян ӧксыӧн”.
Но сійӧ шуис: “Ме кӧ кута ӧвтчыны мукӧд пуяс весьтын, дугда юмов да бур вотӧсӧс сетны”.
Пуяс шуисны виноград пулы: “Ло миян ӧксыӧн”.
Но сійӧ шуис: “Менам винаӧй гажӧдӧ енъясӧс да йӧзӧс. Ме кӧ кута ӧвтчыны мукӧд пуяс весьтын, дугда вина сетны”.
Сэки пуяс шуисны лежнӧглы: “Ло миян ӧксыӧн”.
Но сійӧ шуис: “Ті кӧ веськыдӧсь да мавтыштӧмӧн пуктанныд менӧ аслыныд ӧксыӧ, локтӧй ыркӧдчыны менам вуджӧр улӧ.
А ті кӧ абу веськыдӧсь, лежнӧгысь петас би да сотас ливанса сус пуяс”.
Сідзкӧ, вӧчинныд-ӧ ті веськыда да збыльыс серти, кор ӧксыӧ пуктінныд Авимелекӧс?
Бурӧн-ӧ ті мынтысинныд Еровааллы да сылӧн рӧдыслы Еровааллӧн бур вӧчӧмсьыс?
Менам батьӧй олӧмсӧ эз жалит, сійӧ вермасис тіян вӧсна да мездіс тіянӧс мадиансаяслӧн киысь.
А ӧні ті батьӧйлӧн рӧдыслы паныд кыпӧдчинныд: сылысь сизимдас писӧ виинныд ӧти из вылын да Сикем карса олысьяслы ӧксыӧ пуктінныд Авимелекӧс, батьӧйлӧн кесйӧг аньлысь писӧ, сӧмын сы вӧсна, мый сійӧ тіян рӧдвуж.
Еровааллы да сылӧн рӧдыслы кӧ ті веськыда да збыльыс серти вӧчинныд, нимкодясьӧй Авимелек вӧсна [да лоӧй бурсиӧмаӧсь]. Сійӧ мед тшӧтш нимкодясяс тіян вӧсна.
А энӧ кӧ веськыда вӧчӧй, Авимелексянь мед петас би да ньылыштас Сикем да Бет-Милло каръясын олысьясӧс, и мӧдарӧ, Сикем да Бет-Милло каръясын олысьяссянь мед петас би да ньылыштас Авимелекӧс!»
Тайӧс шуӧм бӧрын Иотам пышйис Авимелек воксьыс Берӧ да овмӧдчис сэтчӧ.
Авимелек ыджыдаліс Израиль войтыр вылын куим во.
Ен мӧдӧдіс пеж лолӧс, и Сикем карса олысьяс кыпӧдчисны Авимелеклы паныд. Тадзи лои, медым водзӧс перйыны Авимелеклысь да сикемсаяслысь — Авимелеклысь сы вӧсна, мый сійӧ виис ассьыс вокъяссӧ, Еровааллысь сизимдас писӧ, а сикемсаяслысь сы вӧсна, мый найӧ отсалісны Авимелеклы вины сылысь вокъяссӧ.
Сикемын олысьяс сувтӧдісны керӧсъяс вылӧ йӧзӧс, медым найӧ уськӧдчисны ветлысь-мунысьяс вылӧ да куштісны найӧс.
Тайӧ кывсис Авимелеклы.
Гаал, Эведлӧн пиыс, вокъясыскӧд локтісны Сикемӧ да овмӧдчисны сэтчӧ. Сикемсаяс пондісны лача кутны Гаал вылӧ.
Ӧтчыд сикемсаяс петісны чукӧртны виноград вотӧс. Пычкан гуын вотӧссӧ талялӧм бӧрын чукӧртчисны гажӧдчыны. Найӧ мунісны асланыс енлы юрбитанінӧ, сёйисны-юисны да ёрисны Авимелекӧс.
Эведлӧн Гаал пиыс шуис: «Коді сійӧ Авимелекыс, медым ми, сикемсаяс, кесъялім сылы?
Сійӧ ӧд Еровааллӧн пиыс, и Зевулӧс пуктіс юралысьӧ.
Энӧ кесъялӧй Авимелеклы, а кесъялӧй Сикемлӧн Хамор батьыссянь чужысьяслы.
Ме кӧ вӧлі тайӧ войтырыслӧн веськӧдлысьнас, ме эськӧ вӧтлі Авимелекӧс».
Сэсся Авимелеклы шуис: «Чукӧрт тышкайӧзтӧ да пет меным паныд тышӧ!»
Кор Зевул, Сикем карса юралысь, кыліс Эведлӧн Гаал пилысь кывъяссӧ, ёна скӧрмис.
Зевул гусьӧн мӧдӧдіс Авимелек дінӧ йӧзӧс, кодъяс юӧртісны: «Эведлӧн Гаал пиыс да сылӧн вокъясыс локтісны Сикемӧ да кыпӧдӧны карса олысьясӧс тэныд паныд.
Войнас лок аслад йӧзыдкӧд. Сувтӧй кыйӧдчыны кар сайӧ, а водз асывнас шонді петігӧн уськӧдчӧй кар вылас.
Кор Гаал аслас йӧзыскӧд петас тэныд паныд, сэки вӧч накӧд, мый кӧсъян».
Войнас Авимелек аслас йӧзыскӧд мӧдӧдчисны Сикемӧ. Воӧм бӧраныс нёль пельӧ юксьӧмӧн кыйӧдчисны кар сайын.
[Асывводзнас] Эведлӧн Гаал пиыс петіс карсьыс да сувтіс карса дзиръя дорӧ.
Авимелек аслас йӧзыскӧд петісны кыйӧдчанінысь.
Кор Гаал аддзис найӧс, Зевуллы шуис: «Со кодъяскӧ керӧс вылысь лэччӧны».
Зевул вочавидзис сылы: «Керӧсъяслысь вуджӧрсӧ тэ йӧзӧн чайтан».
Гаал бара шуис: «Видзӧд, керӧсвывса юрбитанінсянь йӧз лэччӧны. Ӧти котыр со Кимӧститчысьяслӧн тупу дорсянь локтӧ».
Зевул вочавидзис: «Тэ ышнясьӧмӧн шуин, коді пӧ сійӧ Авимелекыс, медым ми кесъялім сылы.
Со локтӧны йӧз, кодъясӧс тэ увтыртін.
Ӧні пет да тышкась налы паныд!»
Гаал нуӧдіс сикемсаясӧс Авимелеклы паныд тышӧ.
Но Гааллы ковмис пышйыны, а Авимелек вӧтӧдіс сійӧс. Уна пышйысьӧс вӧлі виӧма карса дзиръя дорын.
Та бӧрын Авимелек муніс Арума карӧ да кольччис сэтчӧ. А Гаалӧс вокъясыскӧд Зевул вӧтліс Сикемысь.
Мӧд луннас сикемсаяс петісны видз-муяс вылӧ. Та йылысь висьталісны Авимелеклы.
Сійӧ юкис ассьыс йӧзсӧ куим пельӧ да пуксьӧдіс кыйӧдчыны кар сайӧ.
Кор сикемсаяс сӧмын на петісны карсьыс, Авимелек аслас йӧзыскӧд уськӧдчис на вылӧ да виис найӧс.
Ачыс Авимелек тышкакотырыскӧд веськӧдчис карлань да сувтіс карса дзиръя дорӧ, а мӧд кык тышкакотырыс уськӧдчисны видз-му вылын уджалысь сикемсаяс вылӧ да виалісны найӧс.
Авимелек тышкасис сикемсаяскӧд лунтыр. Босьтіс карсӧ, а сэтчӧс олысьясӧс виаліс. Сикем карсӧ бырӧдӧм бӧрын кар местасӧ кояліс солӧн.*
Та йылысь кылӧм бӧрын Сикем изкарса олысьяс пышйисны. Найӧ дзебсисны Ваал-Беритлы юрбитанінӧ. Авимелеклы висьталісны та йылысь.
Авимелек да сылӧн йӧзыс черъясӧн кайисны Цалмон керӧс вылӧ. Авимелек кераліс увъяс, босьтіс пельпом вылас да шуис аслас йӧзлы: «Зільджыка ме моз вӧчӧй!»
Быдӧн кераліс увъяс, босьтіс пельпом вылас да мӧдӧчис Авимелек бӧрся. Найӧ локтісны Сикем изкарса олысьяслӧн сайӧдчанін дорӧ, пукталісны сэтчӧ увъяссӧ да ӧзтісны. Тадзи Сикем изкарса став олысьыс куліс — сюрс гӧгӧр айулов да ань.
Авимелек водзӧ мӧдӧдчис Тевецӧ, кытшаліс карсӧ да босьтіс сійӧс.
Кар шӧрын сулаліс джуджыд ён башня, кытчӧ пышйисны карса став айуловыс да аньыс. Найӧ йигнасисны сэтчӧ да кайисны медвыліӧдзыс.
Авимелек да сылӧн тышкайӧзыс матыстчисны башня дорӧ да кытшалісны сійӧс. Кор сійӧ матыстчис башня дзиръя дорӧ, медым ӧзтыны, сэки ӧти ань сылы юр вылас шыбитіс изки.
Изкиыс поткӧдіс сылысь юрсӧ. Авимелек дзик пыр горӧдіс шыпурт новлӧдлысьсӧ да тшӧктіс сылы: «Перйы шыпурттӧ да сатшкы менӧ. Мед некод оз шу, мый менӧ виис ань».
Шыпурт новлӧдлысь сатшкис Авимелекӧс, и сійӧ куліс.
Израильсаяс кор аддзисны, мый Авимелек кулӧма, разӧдчисны гортаныс.
Енмыс тадзи водзӧс перйис Авимелеклысь сыысь, мый Авимелек лёксӧ вӧчис аслас батьыслы — виис ассьыс сизимдас воксӧ.
Енмыс водзӧс перйис тшӧтш Сикем карса олысьяслысь став налӧн лёк вӧчӧмысь.
Найӧс суис Ероваал Иотам пилӧн ёрӧмыс.
Авимелек кулӧм бӧрын Израильӧс мездыны сувтіс Иссакар чужанкотырысь Тол, Додо Пуахлӧн пиыс.
Тол оліс Ефрем керӧсвыв муын, Шамир карын.
Тол вӧлі Израиль войтырлы ёрдысьӧн кызь куим во. Кулӧм бӧрас сійӧс дзебисны Шамир карӧ.
Тол бӧрын кызь кык во чӧж Израиль войтырлы ёрдысьӧн вӧлі Галаадысь Яир.
Сылӧн вӧлі комын [кык] пи, кодъяс ветлісны комын [кык] осёл вылын. Налӧн вӧлі комын [кык] кар.
Ӧнія кадӧдз Галаад муын тайӧ каръяссӧ шуӧны Яирлӧн сиктъясӧн.
Яир куліс, и сійӧс дзебисны Камонӧ.
Израиль пиян бара вӧчисны Господь водзын шогмытӧмсӧ. Найӧ юрбитісны Ваал да Астарта идолъяслы, тшӧтш арамей, сидон, моав, аммон да филистим войтыръяслӧн енъяслы.
Найӧ эновтісны Господьӧс, дугдісны Сылы кесъявны.
Господь скӧрмис Израиль войтыр вылӧ да сетіс найӧс филистим да аммон войтыръяс киӧ.
Дас кӧкъямыс во чӧж найӧ дзескӧдісны да нартитісны Израиль пиянӧс, кодъяс олісны Галаадын, аморейяслӧн муын Йӧрдан ю сайын. 
Аммон войтыр вуджис Йӧрдан ю, медым петны тышӧ Иуда, Венямин да Ефрем чужанкотыръяслы паныд.
Израиль войтырлы вӧлі вывті сьӧкыд.
Израиль пиян шыасисны Господь дінӧ: «Тэныд паныд ми мыжсӧ вӧчим! Ми эновтім ассьыным Енмӧс да юрбитім Ваал идолъяслы!»
Господь вочавидзис налы: «Египетсаяс, аморейяс, аммонсаяс, филистимсаяс да сидонсаяс, тшӧтш амалик да маон войтыръяс дзескӧдісны тіянӧс. Но быд пӧрйӧ, кор ті шыасьлінныд Ме дінӧ, Ме мездылі тіянӧс налӧн киысь.
Но ті эновтінныд Менӧ да пондінныд кесъявны мукӧд енъяслы.
Ме сэсся ог кут мездыны тіянӧс.
Мунӧй да корӧй аслыныд бӧрйӧм енъяслысь, мед найӧ мездасны тіянӧс, кор тіянлы лоӧ сьӧкыд».
Израиль пиян шуисны Господьлы: «Ми мыжаӧсь.
Вӧч миянкӧд, мый кӧсъян, сӧмын мезды миянӧс талун».
Найӧ эновтісны мукӧд енъясӧс да кутісны кесъявны [сӧмын] Господьлы.
Сэки Господь эз нин вермы видзӧдны, кыдзи вӧрӧг дзескӧдӧ Израильӧс.
Аммонсаяс чукӧртчисны да сувтісны Галаадӧ, а израильсаяс чукӧртчисны да сувтісны Миспаӧ.
Галаадын олысь войтыр да налӧн веськӧдлысьяс ӧта-мӧдныслы шуалісны: «Коді медводдзаӧн уськӧдчас аммон войтыр вылӧ, сійӧ и лоӧ став галаадса олысьяслӧн юралысьнас».
Галаадса Еффай вӧлі повтӧм тышкаморт.
Сійӧ вӧлі кырсалысь аньлӧн пиыс, а батьыс вӧлі Галаад.
Галаадлӧн гӧтырыс тшӧтш чужтіс сылы пиянӧс.
Кор найӧ быдмисны, вӧтлісны Еффайӧс. Найӧ шуисны сылы: «Батьнымлӧн овмӧс-эмбурыс тэныд оз вичмы, ӧд тэ — мӧд аньлӧн пи».
Еффай пышйис вокъяссьыс да овмӧдчис Тов муӧ.
Сы дінӧ чукӧртчисны мывкыдтӧм йӧз да ветлӧдлісны сыкӧд.
Недыр мысти аммонсаяс петісны тышӧ Израиль войтырлы паныд.
Сэки галаадса юрнуӧдысьяс мунісны, медым корны Еффайӧс бӧр локны Тов муысь. Найӧ шуисны: «Лок бӧр да нуӧд миянӧс аммон войтырлы паныд тышӧ».
Еффай вочавидзис: «Ті мустӧмтінныд менӧ да вӧтлінныд бать керкаысь.
А ӧні, кор тіянлы сьӧкыд лои, ме дінӧ локтінныд».
Галаадса юрнуӧдысьяс шуисны: «Ми локтім корны тэнӧ, медым тэ миянкӧд ӧтвыв петін аммон войтырлы паныд тышӧ. Ми кӧсъям, медым тэ лоан став галаадса олысьяслӧн юралысьнас».
Еффай шуис налы: «Шуам, ме бӧр локта да тышкася аммонсаяскӧд. Господь кӧ сетас найӧс менам киӧ, сэки ме лоа юралысьӧн».
Галаадса юрнуӧдысьяс вочавидзисны: «Господь кывліс миянлысь сёрнитчӧмнымӧс. Ми тэ ног вӧчам».
Еффай муніс галаадса юрнуӧдысьяскӧд. Войтырыс пуктіс сійӧс юралысьӧ да тышкайӧзӧн веськӧдлысьӧ. Господь водзын Миспаын Еффай мӧдысь висьталіс ассьыс кывъяссӧ.
Еффай мӧдӧдіс юӧртысьясӧс аммон войтырлӧн ӧксы дінӧ. Найӧ юалісны сылысь: «Мый тэныд месянь колӧ? Мыйла тэ локтін менам муӧ тышкасьнысӧ?»
Аммон войтырлӧн ӧксы шуис Еффайлӧн юӧртысьяслы: «Египетысь петӧм бӧрын Израиль войтыр босьтіс менсьым муӧс Арнон юсянь Явок юӧдз да Йӧрдан юӧдз.
Бурӧн бӧр сет сійӧс меным [и ме вешъя]».
[Еффайлӧн йӧзыс бӧр локтісны сы дінӧ.] 
Еффай бара мӧдӧдіс юӧртысьясӧс аммонса ӧксы дінӧ, медым висьтавны сылы: «Со мый висьталӧ Еффай. Израиль войтыр эз мырддьыв моав да аммон войтыръяслысь муяссӧ.
Египетысь петӧм бӧрын Израиль войтыр муніс овтӧминӧд Гӧрд саридзлань да воис Кадешӧ.
Сэтысянь израильсаяс мӧдӧдісны юӧртысьясӧс эдомса ӧксы дінӧ, медым корны мунны сылӧн муӧд.
Но эдомса ӧксы эз лэдз.
Моавса ӧксылысь тшӧтш вӧлі корӧма, медым сійӧ лэдзас мунны. Но сійӧ эз лэдз.
Та вӧсна Израиль войтыр кольччис Кадешӧ.
Сэсся войтырыс муніс овтӧминӧд, Эдом да Моав муясӧ эз пырав, но матыстчис Моав му дінӧ асывладорсяньыс. Сэні израильсаяс сувтісны чомъяснаныс Арнон ю бокӧ.
Арнон ю вомӧн найӧ эз вуджны да Моав муӧ эз пырны.
Израильсаяс мӧдӧдісны юӧртысьясӧс аморейяслӧн Сигон ӧксы дінӧ, коді юраліс Хешбонын, да корисны мунны сылӧн муӧд асланыс муас.
Но Сигон эз лэдз мунны Израиль войтырлы аслас муӧд. Мӧдарӧ, сійӧ чукӧртіс ассьыс йӧзсӧ, сувтӧдіс найӧс Яхац кар дорӧ да петіс израильсаяслы паныд тышӧ.
Господь, Израильлӧн Ен, сетіс Сигонӧс да сылысь тышкайӧзсӧ израильсаяслӧн киӧ. Тадзи израильсаяс пасьвартісны сэні олысь аморейясӧс да босьтісны аслыныс став налысь мусӧ.
Найӧ босьтісны аслыныс аморейяслысь став мусӧ Арнон юсянь Явок юӧдз да овтӧминсянь Йӧрдан юӧдз.
Господь, Израильлӧн Ен, вӧтліс аморейясӧс Аслас Израиль войтыр водзысь. А ӧні тэ, аммонса ӧксы, кӧсъян босьтны тайӧ мусӧ аслыд?
Тэнад эм му, мый тэныд сетіс Кемош енмыд.
Миян эм му, мый миянлы сетіс Господь, миян Енным.
Тэ ӧмӧй бурджык моавса Валак ӧксыысь, Сеппорлӧн пиысь?
Сійӧ эз вензьы да эз пет тышӧ израильсаяслы паныд.
Куимсё во нин Израиль войтыр олӧ Хешбон да Ароэр каръясын да нагӧгӧрса сиктъясын, тшӧтш Арнон ю бокын сулалысь каръясын.
Мыйла нӧ ті водзынджыксӧ энӧ босьтӧй найӧс аслыныд?
Тэ водзын ме абу мыжа. Лёксӧ вӧчин тэ, кор петін тышӧ меным паныд.
Господь — Ёрдысьыс. Сійӧ мед Ачыс талун лоас Израиль пиян да аммонсаяс костын ёрдысьнас!»
Но аммонса ӧксы эз кывзы Еффайлысь кывъяссӧ.
Господьлӧн Лов лэччис Еффай вылӧ. Еффай вуджис Галаад да Манассей муяс. Сэсся бӧр бергӧдчис Галаад муӧ Мицфе карӧ да сэтысянь петіс аммонсаяслы паныд тышӧ.
Еффай кыв сетіс Господьлы: «Тэ кӧ сетан менам киӧ аммонсаясӧс, сэки найӧс вермӧм бӧрын гортӧ локтігам ме сета Тэныд сійӧс, коді менам керкаысь медводдзаӧн петас меным воча. Сійӧс ме вая Тэныд сотан вись пыдди».
Еффай тышкасис аммонсаяскӧд, и Господь сетіс найӧс сылӧн киӧ.
Еффай пасьвартіс аммонсаясӧс. Ароэр карсянь Миннит да Авел-Керамим каръясӧдз сійӧ бырӧдіс кызь кар. Тадзи Израиль пиян вермисны аммонсаясӧс.
Еффай бӧр локтіс гортас Миспаӧ. Тимпанӧн ворсӧмӧн да йӧктӧмӧн Еффайӧс вочааліс сылӧн ӧтка нылыс. Мӧд ныв-пиыс сылӧн эз вӧв.
Нывсӧ аддзӧм бӧрын Еффай косяліс паськӧмсӧ да горӧдіс: «Нылӧй, тэ уськӧдін менӧ кок йывсьым!
Тэ шог вайин меным! Ме кыв сеті Господьлы, и бӧрсӧ босьтны ме ог вермы».
Сійӧ вочавидзис: «Батьӧй, тэ кӧ кыв сетін Господьлы, вӧч мекӧд, мый кӧсйысин. Ӧд Господь сетіс тэныд водзӧс перйыны тэнад вӧрӧглысь, аммонсаяслысь.
Сӧмын кора, лэдзлы менӧ кык тӧлысь кежлӧ.
Ме муна нывъёртъяскӧд керӧс вылӧ бӧрдны, мый некор верӧс сайӧ ог пет».
Батьыс вочавидзис: «Мун».
Батьыс лэдзис сійӧс кык тӧлысь кежлӧ.
Сійӧ муніс нывъёртъясыскӧд керӧс вылӧ да бӧрдіс, мый нылӧн кувны ковмас.
Кык тӧлысь кольӧм бӧрын ныв локтіс батьыс ордӧ. Батьыс збыльмӧдіс Господьлы кыв сетӧмсӧ, и нылыс куліс, верӧс сайӧ эз мунлы.
Тайӧ кадсяньыс Израиль войтыр пӧвстын быд во нёль лун кежлӧ израильса нывъяс мунӧны сьывны галаадса Еффайлӧн ныв йылысь сьыланкывъяс.
Ефремсянь чужысьяс чукӧртчисны да локтісны Цафонӧ. Найӧ шуисны Еффайлы: «Мыйла тэ миянтӧг петін тышӧ аммонсаяслы паныд? 
Ми сотам тэнӧ да тэнсьыд керкатӧ».
Еффай шуис налы: «Кор менам да менам йӧзлӧн вӧлі чорыд зыксьӧм аммонсаяскӧд, ме кори тіянӧс, но ті энӧ отсалӧй меным.
Кор ме гӧгӧрвои, мый отсӧгыс тіянсянь оз ло, ме петі аммонсаяслы паныд да дась вӧлі пуктыны юрӧс. Господь сетіс найӧс менам киӧ.
А ӧні ті мыйла петінныд тышӧ меным паныд?»
Ефремсянь чужысьяс шуисны: «Галаадсаяс, ті — Ефрем муысь пышйысьяс, тіян муныд ӧд Ефрем да Манассей чужанкотыръяслӧн муяс костын». Сэки Еффай чукӧртіс галаадса став айуловсӧ да петіс Ефремсянь чужысьяслы паныд тышӧ. Галаадсаяс пасьвартісны Ефремсянь чужысьясӧс.
Галаадсаяс тупкалісны Ефремсянь чужысьяслысь Йӧрдан ю вуджанінъяссӧ. Кор Ефрем чужанкотырысь ловйӧн кольысь корліс вуджны, сэки галаадсаяс юавлісны, абу-ӧ тэ Ефрем чужанкотырысь.
Мортлы, коді вочавидзис, абу пӧ, тшӧктісны шуны “шибболет”, а сійӧ шуис “сибболет”, ӧд Ефремсянь чужысьяс эз вермыны шуны тайӧ кывсӧ колана ногӧн.
Сэки татшӧм мортсӧ кутісны да виисны Йӧрдан ю вуджанін дорын.
Сійӧ кадас Ефрем чужанкотырысь вӧлі виӧма нелямын кык сюрс мортӧс.
Галаадса Еффай вӧлі Израиль войтырлы ёрдысьӧн квайт во. Кулӧм бӧрас сійӧс дзебисны Галаадын аслас карӧ.
Еффай бӧрын Израиль войтырлы ёрдысьӧн вӧлі Виплиемысь Ивсан.
Сылӧн вӧлі комын пи да комын ныв. Комыннан нывсӧ сійӧ сетіс верӧс сайӧ эз аслас рӧдысь айуловлы, и аслас пиянлы гӧтырӧ босьтіс комын нылӧс эз аслас рӧдысь. Израиль войтырлы ёрдысьӧн Ивсан вӧлі сизим во.
Кулӧм бӧрас сійӧс дзебисны Виплиемӧ.
Ивсан бӧрын дас во чӧж Израиль войтырлы ёрдысьӧн вӧлі Завулон чужанкотырысь Элон. Кулӧм бӧрас сійӧс дзебисны Аялонӧ, Завулон муӧ.
Элон бӧрын Израиль войтырлы ёрдысьӧн вӧлі Пиратонысь Гиллеллӧн Авдон пиыс.
Сылӧн вӧлі нелямын пи, а пияныслӧн — комын пи, ставныс найӧ ветлӧдлісны сизимдас осёл вылын.
Израиль войтырлы ёрдысьӧн Авдон вӧлі кӧкъямыс во.
Кулӧм бӧрас сійӧс дзебисны Ефрем муын сулалысь Пиратон карӧ, амаликъяслӧн керӧсвыв муӧ.
Израиль войтыр бара кутіс вӧчны Господь водзын шогмытӧмсӧ. Таысь Господь сетіс найӧс филистимсаяс киӧ нелямын во кежлӧ.
Тайӧ кадас Цора карын оліс Дан чужанкотырысь Маной нима морт.
Сылӧн гӧтырыс эз вермы сьӧктыны.
Господьлӧн андел петкӧдчис Манойлӧн гӧтырыслы да шуис: «Ӧнӧдз тэ эн вермы сьӧктыны, но тэ сьӧктан да чужтан пиӧс.
Сідзкӧ, вина-сур эн ю, пеж сёян эн сёй, ӧд тэ сьӧктан да чужтан пиӧс, коді мам кынӧмсяньыс лоӧ Енлы торйӧдӧм назорей. Сылысь юрсисӧ шырны оз позь. Сійӧ сувтас мездыны Израильӧс филистимсаяслӧн киысь».
Ань локтіс верӧсыс дінӧ да висьталіс сылы: «Ме дінӧ воліс Енлӧн морт. Сійӧ вӧлі Енлӧн андел кодь, вежавидзана да повзьӧдана.
Ме эг юав, кытысь сійӧ локтіс, и ассьыс нимсӧ сійӧ эз висьтав.
Сійӧ шуис меным, мый ме сьӧкта да чужта пиӧс.
Сійӧ ӧлӧдіс менӧ вина-сур юӧмысь да пеж сёян сёйӧмысь, ӧд менам кынӧмсянь кагаӧс лоӧ торйӧдӧма Енлы. Кувтӧдзыс сійӧ лоӧ назорейӧн».
Маной кевмысис Господьлы. Сійӧ шуис: «Господьӧй!
Мед бара на волас миян дінӧ Енлӧн мортыс, кодӧс Тэ мӧдӧдлін. Сійӧ мед велӧдас миянӧс, мый вӧчны кагаыскӧд, коді миян чужас».
Ен кыліс Манойӧс. Енлӧн андел бара на локтіс сылӧн гӧтырыс дінӧ, кор гӧтырыс вӧлі видз-му вылын. Маной верӧсыс сэки эз вӧв сыкӧд.
Ань котӧртіс верӧсыс дінӧ да шуис сылы: «Мортыд, коді воліс водзынсӧ, бара петкӧдчис меным».
Маной чеччис да муніс гӧтырыс бӧрся. Сэсся матыстчис тайӧ мортыс дінӧ да юаліс сылысь: «Тэ-ӧ сёрнитін сэки менам гӧтыркӧд?»
Андел вочавидзис: «Ме».
Маной юаліс: «Кор тэнад кывъясыд збыльмасны, сэки кыдзи пинымлы колӧ овны да мый вӧчны?»
Господьлӧн андел шуис Манойлы: «Тэнад гӧтырыд мед видзчысяс ставсьыс, мыйысь ме ӧлӧді.
Виноград да сыысь вӧчӧмтор мед оз сёй, вина-сур мед оз ю, пеж сёян мед оз сёй. Мед олас менам тшӧктӧм серти».
Маной шуис Господьлӧн анделлы: «Эн мун, олышт на да сёй миянкӧд. Ми тэныд кӧзапиӧс дасьтам».
Господьлӧн андел шуис Манойлы: «Ме олышта на тэнад корӧм серти, но ог кут сёйны сійӧ, мый тэ сёян.
Кӧсъян кӧ, вай сійӧс Господьлы сотан вись пыдди».
Маной эз тӧд, мый сы водзын Господьлӧн андел.
Маной юаліс Господьлӧн анделлысь: «Мый тэнад нимыд? Ми кӧсъям ошкыны-аттьӧавны тэнӧ, кор тэнад кывйыд инас».
Господьлӧн андел шуис сылы: «Мыйла тэ юасян менсьым нимӧс? Сійӧ шензьӧдана!»
Маной босьтіс кӧзапиӧс да нянь вись, сэсся из вылын сотіс найӧс вись пыдди Господьлы.
Маной да сылӧн гӧтырыс аддзисны шензьӧданатор: висьпуктанінсянь ыпнитысь би пытшкас Господьлӧн андел кыпӧдчис енэжлань.
Тайӧс аддзӧмысь Маной да сылӧн гӧтырыс кымынь уськӧдчисны муӧ.
Сэсся Господьлӧн андел эз нин петкӧдчыв Манойлы да сылӧн гӧтырыслы.
Маной гӧгӧрвоис, мый тайӧ вӧлі Господьлӧн андел, да шуис гӧтырыслы: «Ӧні ми кулам, ӧд ми Енмӧс аддзылім».
Гӧтырыс шуис сылы: «Господь кӧ кӧсйис вины миянӧс, миянлысь эськӧ сотан висьтӧ да нянь висьтӧ эз сибӧд, ставсӧ тайӧс аддзывны эз сет да татшӧмторсӧ водзвыв эз юӧрт».
Манойлӧн гӧтырыс чужтіс пиӧс да пуктіс сылы Самсон ним.
Кага быдмис, и Господь бурсиис сійӧс.
Кор Самсон оліс Махане-Данын, Цора да Эштаол каръяс костын, Господьлӧн Лолыс кутіс ышӧдны сійӧс Израильӧс мездӧм вылӧ.
Самсон ветліс Тимнаӧ, сэні сійӧ аддзыліс филистимса нылӧс [и нылыс сылы сьӧлӧм вылас воис].
Гортас локтӧм бӧрын Самсон шуис бать-мамыслы: «Тимнаын ме аддзылі филистимса нылӧс.
Босьтӧй сійӧс меным гӧтырӧ».
Бать-мамыс сылы шуисны: «Оз ӧмӧй миян чужанкотыр либӧ войтыр пӧвстысь сюр тэныд гӧтырыс? Мыйла тэ кӧсъян босьтны гӧтырӧ вундыштчытӧм филистим войтыр пӧвстысь нылӧс?»
Самсон шуис батьыслы: «Босьт сійӧс меным, ӧд сійӧ меным сьӧлӧм вылӧ воис».
Бать-мамыс эз тӧдны, мый тайӧ вӧлі Господьсянь, ӧд Господь кӧсйис филистимсаяслысь водзӧс перйыны.
Сійӧ кадас филистимсаяс ыджыдалісны Израиль вылын.
Самсон мӧдӧдчис бать-мамыскӧд Тимнаӧ. Сэтчӧс виноград йӧрлань матыстчигӧн сылы воча равзігтырйи уськӧдчис том лев.
Господьлӧн Лолыс лэччис Самсон вылӧ, и Самсон куш кинас косявліс левӧс кӧзапиӧс моз.
Но тайӧ лоӧмтор йывсьыс бать-мамыслы эз висьтав.
Тимнаӧ локтӧм бӧрын Самсон сёрнитіс нывкӧд, коді вӧлі сылы сьӧлӧм сертиыс.
Некымын лун мысти Самсон бара муніс Тимнаӧ, медым босьтны тайӧ нывсӧ аслыс гӧтырӧ. Мунігмозыс сійӧ кежис видзӧдлыны левлысь шойсӧ, а шой пытшкысь аддзис мазі поз да ма.
Самсон босьтіс масӧ ки тырыс да сёйис мунігмозыс.
Бать-мамыс дінӧ локтӧм бӧрас сетіс масӧ тшӧтш налы, и найӧ сёйисны.
Но Самсон эз висьтав налы, мый тайӧ масӧ босьтіс лев шой пытшкысь.
Самсонлӧн батьыс локтіс гӧтырпу керкаӧ, кӧні Самсон лӧсьӧдіс [сизимлунся] гаж, кыдзи вӧчлывлӧны верӧспуяс.
Самсонӧс аддзӧм бӧрын тимнаса олысьяс бӧрйисны кӧлысьвывса комын ёртӧс, медым найӧ вӧліны сыкӧд.
Самсон шуис налы: «Ме висьтала тіянлы нӧдкыв.
Сизим лун чӧжнас, мый дыра лоӧ гажыс, ті кӧ тӧдмаланныд менсьым нӧдкывйӧс, ме сета тіянлы комын вӧсни шабді дӧрӧм да комын вежан паськӧм.
А онӧ кӧ тӧдмалӧй, ті меным сетанныд комын вӧсни шабді дӧрӧм да комын вежан паськӧм».
Найӧ вочавидзисны: «Висьтав ассьыд нӧдкывтӧ. Кывзам».
Самсон шуис: «Сёйысьлӧн пытшкӧсысь петіс сёян, выналӧн пытшкӧсысь — юмовтор».
Куим лун чӧжӧн ёртъясыс зілисны тӧдмавны нӧдкывсӧ, но эз вермыны.
Сизимӧд луннас найӧ шуисны Самсонлӧн гӧтырлы: «Кыскы верӧсыдлысь, мед восьтас нӧдкывсӧ.
А он кӧ, ми сотам тэнӧ да батьыдлысь керкасӧ.
Миянӧс куштыны кӧсъянныд, та вӧсна-ӧ коринныд миянӧс татчӧ?»
Самсонлӧн гӧтырыс бӧрдӧмӧн шуис верӧсыслы: «Тэ мустӧмтан менӧ, ме абу муса тэныд.
Менам войтырлы висьталӧм нӧдкывтӧ мыйла он гӧгӧрвоӧд меным?»
Самсон вочавидзис сылы: «Ме весиг бать-мамлы эг гӧгӧрвоӧд, и тэныд ог».
Гаж мунігчӧжыс гӧтырыс бӧрдӧмнас дӧзмӧдіс Самсонӧс.
Сизимӧд луннас Самсон гӧгӧрвоӧдіс сылы нӧдкывсӧ, ӧд гӧтырыс пикӧ воштіс сійӧс.
Гӧтырыс гӧгӧрвоӧдіс нӧдкывсӧ аслас войтырлы.
Сизимӧд луннас, шонді пуксьытӧдзыс, карса олысьяс шуисны Самсонлы: «Маысь юмолыс да левысь вынаыс абу».
Самсон вочавидзис налы: «Менам мӧскӧн кӧ энӧ гӧрӧй, менсьым нӧдкывйӧс эськӧ энӧ тӧдмалӧй».
Господьлӧн Лолыс лэччис Самсон вылӧ. Самсон муніс Аскалонӧ да виис сэні комын мортӧс, пӧрччӧдіс на вылысь паськӧмсӧ да сетіс налы, кодъяс тӧдмалісны сылысь нӧдкывсӧ.
Скӧрйывсьыс сійӧ бӧр муніс бать керкаас.
А Самсонлысь гӧтырсӧ сетісны Самсонлӧн кӧлысьвывса ёртыс сайӧ.
Бӧрынджык, кор вӧлі шобді вундан кад, Самсон локтіс гӧтырыс ордӧ. Аскӧдыс сійӧ вайис кӧзапиӧс.
Самсон шуис: «Кӧсъя пырны гӧтырӧй дінӧ сылӧн вежӧсас». Но гӧтырыслӧн батьыс эз лэдз Самсонӧс, шуис сылы: «Ме чайті, мый тэ мустӧмтан сійӧс, та вӧсна ме сеті сійӧс тэнад кӧлысьвывса ёртыд сайӧ.
Но гӧтырыдлӧн ичӧтджык чой эм, сы дорысь на мичаджык, верман чойсӧ босьтны сы пыдди».
Самсон шуис сылы: «Ӧні ті, филистимсаяс, асьныд мыжаӧсь, мый ме кута тіянлысь водзӧс перйыны».
Самсон муніс, кыйис куимсё ручӧс, кӧртавліс найӧс кыкӧн-кыкӧн бӧжӧдныс ӧта-мӧд бердас да пысавліс бӧж костаныс факел.
Факелъяссӧ ӧзтӧм бӧрын сійӧ лэдзаліс ручьяссӧ филистимсаяслӧн видз-муяс вылӧ. Тадзи сотіс налысь нянь кольтаяссӧ да вундытӧм няньсӧ, виноград йӧръяссӧ да олив пуяссӧ.
«Коді тайӧс вӧчис?» — юалісны филистимсаяс.
Налы вочавидзисны: «Самсон, тимнаса мортлӧн зятьыс, сы вӧсна мый тимнаса морт сетіс Самсонлысь гӧтырсӧ кӧлысьвывса ёртыс сайӧ».
Филистимсаяс мунісны Тимнаӧ да сотісны тайӧ аньсӧ да сылысь батьсӧ [керканас].
А Самсон шуис тайӧ филистимсаяслы: «Сыысь, мый ті тадзи вӧчинныд, ме ог лӧнь, кытчӧдз водзӧс ог перйы тіянлысь!»
Филистимсаясӧс чорыда нӧйтӧм бӧрын сійӧ муніс Этам изкыртаӧ да овмӧдчис сэтчӧс кырта горсйӧ.
Филистимса тышкайӧз петісны тышӧ, сувтісны Иуда муӧ да паськӧдчисны Лехи карӧдз.
Иудаын олысьяс юалісны: «Мыйла ті кӧсъянныд уськӧдчыны миян вылӧ?»
Найӧ вочавидзисны: «Ми локтім Самсонла, медым вӧчны сылы, кыдзи сійӧ вӧчис миянлы».
Иуда муысь куим сюрс морт локтіс Этам изкыртаӧ. Найӧ шуисны Самсонлы: «Тэ ӧмӧй он тӧд, мый филистимсаяс ыджыдалӧны миян вылын?
Мый тэ вӧчин миянкӧд?»
Самсон вочавидзис налы: «Кыдзи найӧ вӧчисны меным, сідзи ме вӧчи налы».
Иуда муысь локтысьяс шуисны: «Ми локтім тэла, медым кӧртавны тэнӧ да сетны филистимсаяслы».
Самсон шуис налы: «Кыв сетӧй меным, мый онӧ виӧй менӧ».
Самсонлы вочавидзисны: «Ми огӧ виӧй тэнӧ, сӧмын кӧртавлам да сетам филистимсаяслы».
Самсонӧс кӧртавлісны кык выль гезйӧн да петкӧдісны изкыртаысь.
Кор Самсон воис Лехи карӧ, филистимсаяс горзӧмӧн паныдалісны сійӧс.
Господьлӧн Лолыс лэччис Самсон вылӧ. Сэки кисӧ кӧрталӧм гезъясыс сотчӧм шабді моз гылалісны.
Самсон аддзис неважӧн на кулӧм осёллысь черлысӧ, босьтіс сійӧс киас да виис сыӧн сюрс филистимсаӧс.
Самсон шуис: «Осёл черлыӧн лыдтӧм-тшӧттӧм йӧзӧс вии. Осёл черлыӧн сюрс мортӧс вии».
Тайӧс шуӧм бӧрын шыбитіс кисьыс черлысӧ. Тайӧ местасӧ нимтіс Рамат-Лехиӧн.*
Самсонлӧн ёна косьмис горшыс. Сійӧ шыасис Господь дінӧ: «Тэ сетін меным, аслад кесйӧглы, ыджыд вермӧм.
А ӧні ме горш косьмӧмӧйла кула, вундыштчытӧмъяслӧн киӧ веськала».
Сэки Лехи карын Енмыс поткӧдіс мусӧ, кытысь кутіс визувтны ва.
Самсон веськӧдіс горшсӧ, вынсяліс да ловзис.
Та вӧсна тайӧ местаыс шусьӧ Эн-Хаккоре*, и сійӧ ӧнӧдз Лехи карын.
Самсон вӧлі Израиль войтырлы ёрдысьӧн кызь во филистимсаяслӧн ыджыдалӧм дырйи.
Ӧтчыд Самсон локтіс Газа карӧ, аддзис сэні кырсалысь аньӧс да пырис сы ордӧ.
Кор Газаын олысьяс тӧдмалісны Самсонлӧн локтӧм йылысь, найӧ кытшалісны карсӧ да виччысисны сылысь петӧмсӧ карса дзиръя дорын. Найӧ войбыд сулалісны сэні. Мӧвпалісны, мый шонді петтӧдз Самсонӧс виасны.
Самсон войшӧрӧдзыс узис.
Сэсся чеччис да муніс карса дзиръя дорӧ, нетшыштіс дзиръясӧ иганнас да куричнас, пуктіс пельпом вылас да нуис Хеврон карлы воча сулалысь керӧс вылӧ. [Сэтчӧ колис дзиръясӧ.]
Кад мысти Самсонлы мусмис Далида нима ань, коді оліс Сорек ковтысын.
Ань дінӧ локтісны филистимса юралысьяс да шуисны: «Тэ тӧдмав Самсоныдлысь, кытысь сылӧн ыджыд выныс, и кыдзи сійӧс позьӧ вермыны. Сэсся ми кӧрталам сійӧс, и сійӧ лоас миян киын.
Таысь ми быдӧн сетам тэныд сюрс сё сикель эзысь».
Далида юаліс Самсонлысь: «Висьтав меным, кытысь тэнад ыджыд выныд. Кыдзи тэнӧ позьӧ кӧртавны да вермыны?»
Самсон вочавидзис сылы: «Кӧртавны кӧ менӧ косьмытӧм сизим уль сӧнӧн, сэки ме вынтӧмма да мукӧд йӧзыс кодь лоа».
Филистимса юралысьяс вайисны аньлы косьмытӧм сизим уль сӧн, и Далида кӧрталіс Самсонӧс.
Далидалӧн ӧти жырйын пукалісны филистимса кыйӧдчысьяс.
Далида шуис: «Самсон, филистимсаяс локтӧны!»
Самсон орйӧдліс гартӧм сӧнъяссӧ биӧн сотӧм шӧртӧс моз.
Сылысь вынсӧ эз ло тӧдмалӧма.
Далида шуис Самсонлы: «Тэ менӧ ылӧдлін, менӧ пӧръялін.
Висьтав меным, мыйӧн тэнӧ позьӧ кӧртавны».
Самсон вочавидзис: «Кӧртавны кӧ менӧ выль гезйӧн, мыйӧн эз на вӧдитчывны, сэки ме вынтӧмма да мукӧд йӧзыс кодь лоа».
Далида босьтіс выль гез, кӧрталіс Самсонӧс да шуис: «Самсон, филистимсаяс локтӧны!» Самсон сунисӧс моз орйӧдліс гезсӧ кисьыс. Та дырйи ӧти жырйын пукалісны филистимса кыйӧдчысьяс.
Далида шуис Самсонлы: «Тэ менӧ ылӧдлін, менӧ бара пӧръялін.
Висьтав, мыйӧн тэнӧ позьӧ кӧртавны».
Самсон вочавидзис: «Менсьым сизимнан кӧсаӧс кӧ кыан дӧраӧ да тувъялан кысян стан бердас, сэки ме вынтӧмма [да мукӧд йӧзыс кодь лоа]».
[Самсон пуктіс юрсӧ Далидалы пидзӧс вылас, и Далида унмовськӧдіс сійӧс.] 
Самсонлӧн узигкості Далида кыис сылысь сизимнан кӧсасӧ дӧраӧ да тувъяліс кысян стан бердас. Сэсся шуис: «Самсон, филистимсаяс локтӧны!»
Самсон садьмис да дӧрасӧ кысян стансьыс нетшыштіс. 
[Сылысь вынсӧ эз ло тӧдмалӧма.]
Далида шуис Самсонлы: «Тэ шуан, мый радейтан менӧ, а сьӧлӧмыд абу мекӧд!
Тэ куимысь нин ылӧдлін менӧ да эн висьтав меным ыджыд выныд йылысь».
Быд лун сійӧ дӧзмӧдіс Самсонӧс аслас юасьӧмнас. Самсон жуявтӧдз мудзис да восьтіс ассьыс гусяторсӧ: «Менсьым юрсиӧс ньӧтчыдысь на эз шырлыны, ӧд мам кынӧмсянь ме Енлы торйӧдӧм назорей.
Вундыны кӧ менсьым юрсиӧс, вынӧй бырас.
Ме вынтӧмма да мукӧд йӧзыс кодь лоа».
Кор Далида гӧгӧрвоис, мый Самсон восьтіс гусяторсӧ, сійӧ мӧдӧдіс корны филистимса юралысьясӧс. Тшӧктіс висьтавны: «Локтӧй.
Ӧні Самсон збыльысь восьтіс меным гусяторсӧ».
Филистимса юралысьяс локтісны Далида ордӧ да вайисны сылы эзысь.
Далида унмовськӧдіс Самсонӧс пидзӧс вылас, сэсся корис мортӧс, коді шырис Самсонлысь сизимнан кӧсасӧ.
Тадзи Самсонӧс вӧлі вермӧма, и сылӧн выныс бырис.
Далида шуис: «Самсон, филистимсаяс локтӧны!»
Самсон садьмис. Сійӧ мӧвпыштіс, мый воддза мозыс мынтӧдчас наысь.
Но сійӧ эз тӧд, мый Господь эновтіс сійӧс.
Филистимсаяс босьтісны Самсонӧс да бытшкисны сылысь кыкнан синсӧ. Сэсся вайӧдісны сійӧс Газа карӧ да кӧрталісны ыргӧн чепъясӧн. Дзескыдінын сылы ковмис изны нянь.
А шырӧм юрсиыс бара кутіс быдмыны.
Филистимса юралысьяс чукӧртчисны, медым гажӧдчыны да вайны уна вись асланыс Дагон енлы. Найӧ шуалісны, миян енным пӧ сетіс миян киӧ Самсонӧс, вӧрӧгнымӧс.
Самсон вылӧ видзӧдігӧн филистим войтыр ошкис ассьыс енсӧ. Найӧ шуалісны, миян енным пӧ сетіс миян киӧ вӧрӧгнымӧс, коді куштіс мунымӧс да миян пӧвстысь унаӧс виис.
Войтырыс ёна гажмис. Найӧ шуисны, вайӧдӧй пӧ Самсонӧс дзескыдінысь, мед сійӧ гажӧдыштас миянӧс.
Самсонӧс вайӧдісны, и йӧзыс кутісны тешитчыны сы вылын. Сійӧс сувтӧдісны кык сюръя костӧ.
Самсон шуис сійӧс киӧдыс нуӧдысь том мортлы: «Матыст менӧ керкасӧ кутысь сюръяяс дорас, медым меным мыджсьыны на вылӧ».
[Том морт тадзи и вӧчис.]
Йӧзыс вӧлі керка тыр: айулов и аньяс, тшӧтш филистим войтырлӧн став юралысьыс. Керка вевт вылас вӧлі нӧшта куим сюрс айлов да ань, кодъяс видзӧдісны Самсон вылын тешитчӧмсӧ.
Самсон шыасис Господь дінӧ: «Господьӧй Ыджыдӧй, эн вунӧд менӧ! Енмӧй, нӧшта ӧтчыдысь сет меным вын, медым ме кыкнан син вӧсна верми водзӧс перйыны филистимсаяслысь».
Самсон вӧрзьӧдіс керка шӧрын сулалысь кыкнан сюръясӧ, мый вылӧ мыджсис керкаыс. Ӧтар сюръяас сійӧ пыксис веськыд кинас, мӧдарас — шуйганас.
«Мед ме филистимсаяскӧд кула!» — горӧдіс Самсон да кыкнан кинас мый вынсьыс пыксис сюръяясӧ. Керкаыс киссис филистимсаяс да налӧн юралысьяс вылӧ.
Кулігас Самсон виис олігас дорысь унджык мортӧс.
Самсонлӧн вокъясыс став рӧдвужыскӧд локтісны босьтны сылысь шойсӧ. Самсонӧс дзебисны Цора да Эштаол каръяс костӧ, Маной батьыслӧн дзебанінӧ.
Израиль войтырлы ёрдысьӧн Самсон вӧлі кызь во. 
[Самсон бӧрын сувтіс Энанлӧн Эмегар пиыс, коді тшӧтш мездіс Израиль войтырӧс. Сійӧ бырӧдіс филистим войтырысь квайтсё мортӧс да налысь ыж-мӧссӧ.]
Ефрем керӧсвыв муын оліс Микей нима морт.
Ӧтчыд сійӧ шуис мамыслы: «Тэнсьыд гусялӧм сюрс сё сикель эзысьыд ме ордын. Ме кывлі, кыдзи тэ ёрин гусялысьӧс. Тэнсьыд эзысьтӧ ме босьті».
Мамыс шуис: «Господь мед бурсиас менсьым пиӧс!»
Микей бӧр сетіс мамыслы сюрс сё сикель эзысьсӧ.
Мамыс шуис: «Тайӧ эзысьсӧ ме вежӧда-торйӧда Господьлы пиӧй вӧсна. Ме вӧчӧда эзысь бӧлбанӧс да сета тэныд, пиӧй».
Бӧр вайӧм эзысьысь мамыс босьтіс кыксё сикель эзысь да сетіс эзысьысь вӧчасьысьлы, коді сывдіс бӧлбанӧс. Сійӧ кадсяньыс бӧлбаныс сулаліс Микей керкаын.
Микейлӧн вӧлі енъяслы юрбитанін.
Сійӧ вӧчис нӧшта ефод* да гортса бӧлбанъясӧс, и аслас пиянысь ӧтиӧс пуктіс попӧ.
Сійӧ кадас Израильын эз вӧв ӧксыыс.
Быдӧн вӧчис сійӧ, мый чайтіс веськыдӧн.
Иуда муын Виплием карын, Иуда чужанкотыр пӧвстын, оліс ӧти том левит.
Ӧтчыд сійӧ петіс Виплием карысь да мӧдӧдчис туйӧ, кӧсйис мӧдлаӧ овмӧдчыны. Туйыс вайӧдіс сійӧс Ефрем керӧсвыв муӧ, Микей керка дорӧ.
Микей юаліс сылысь: «Тэ кытысь локтан?»
Мӧдыс вочавидзис: «Ме — левит Иуда муысь Виплием карысь. Корся, кытчӧ овмӧдчыны».
Микей шуис сылы: «Кольччы ме ордӧ. Ло меным батьӧн да попӧн.
Быд во ме кута сетны тэныд дас сикель эзысь, нӧшта сета паськӧм да сёян».
Левит кольччис овны Микей ордӧ да лои сылы пи пыдди.
Микей сувтӧдіс том левитӧс кесъявны попӧн. Тадзи сійӧ кольччис овны Микей ордӧ.
Микей мӧвпаліс: «Ӧні ме тӧда, мый Господь кутас вӧчны меным бурсӧ, ӧд ме ордын олысь левит кесъялӧ попӧн».
Сійӧ кадас Израильын эз вӧв ӧксыыс.
Дан чужанкотыр корсис аслыс му, медым овмӧдчыны сэтчӧ, ӧд найӧ эз на вермыны босьтны аслыныс мусӧ Израиль чужанкотыръяс пӧвстын.
Дан чужанкотыр бӧрйис вит ён мортӧс, кодъяс вӧліны Цора да Эштаол каръясысь, да мӧдӧдіс найӧс видзӧдавны мусӧ.
Найӧ локтісны Ефрем керӧсвыв муӧ Микей ордӧ да узьмӧдчисны сэтчӧ.
Микей керкаын найӧ кылісны том левитлысь гӧлӧс шысӧ, матыстчисны сы дінӧ да юалісны: «Коді вайӧдіс тэнӧ татчӧ? Мый тэ тані вӧчан? Мыйла локтін?»
Сійӧ висьталіс ставсӧ. Шуис, Микей пӧ медаліс менӧ, и ӧні ме кесъяла сы ордын попӧн.
Найӧ шуисны: «Юав Енмыслысь, артмас-ӧ миян ветлӧмным».
Поп висьталіс налы: «Мунӧй лӧнь сьӧлӧмӧн!
Господь тӧждысьӧ тіян вӧсна».
Тайӧ вит мортыс мунісны водзӧ да воисны Лаис карӧ. Найӧ аддзисны, мый сэтчӧс йӧзыс тӧждысьтӧг да повтӧг олӧны сидонсаяс моз. Сэтчӧс йӧз вылын некод эз ыджыдав, найӧс некод эз дзескӧд. Найӧ олісны сидонсаясысь ылын, и мукӧд йӧзкӧд эз волысьны.
Кор тайӧ вит мортыс бӧр локтісны асланыс Цора да Эштаол каръясӧ, налысь юалісны ветлӧмныс йылысь.
Найӧ вочавидзисны: «Уськӧдчамӧй Лаис кар вылӧ.
Ми аддзылім, мый сэтчӧс муыс зэв бур.
Мый виччысянныд? Тэрмасьӧй босьтны сэтчӧс мусӧ!
Кор воанныд сэтчӧ, ті аддзанныд повтӧг олысь войтырӧс да налысь паськыд мусӧ.
Енмыс сетас тіян киӧ тайӧ мусӧ, кӧні абу некутшӧм тырмытӧмтор».
Дан чужанкотырысь квайтсё шыпурта тышкаморт мунісны Цора да Эштаол каръясысь.
Найӧ сувтӧдісны чомъяснысӧ Иуда муӧ Киръят-Ярим кар дорӧ.
Ӧнӧдз тайӧ местаыс Киръят-Ярим сайын шусьӧ Махане-Дан.
Сэтысянь найӧ мӧдӧдчисны Ефрем керӧсвыв муӧ да локтісны Микей керка дорӧ.
Вит айловыс, кодъяс волісны Лаис карӧ видзӧдавны мусӧ, шуисны вокъясыслы: «Тані ӧти керкаын эм ефод, сывдӧмӧн вӧчӧм бӧлбан да гортса бӧлбанъяс. Ті тӧданныд, мый вӧчны».
Дан чужанкотырысь тышкайӧз локтісны Микей керкаӧ том левит ордӧ да чолӧмасисны сыкӧд.
Квайтсё шыпурта тышкаморт кольччисны дзиръя дорас, а вит мортыс, кодъяс волісны видзӧдавны мусӧ, пырисны да босьтісны керкасьыс ефодсӧ, сывдӧмӧн вӧчӧм бӧлбансӧ да гортса бӧлбанъяссӧ.
Поп сулаліс дзиръя дорас квайтсё шыпурта тышкаморт пӧвстын.
Кор тайӧ вит мортыс пырисны Микей керкаӧ да босьтісны ефодсӧ, сывдӧмӧн вӧчӧм бӧлбансӧ да гортса бӧлбанъяссӧ, поп юаліс налысь: «Мый ті вӧчанныд?»
Найӧ вочавидзисны: «Тупкы вомтӧ да чӧв ов. Лок мунам миянкӧд, ло миянлы батьӧн да попӧн.
Ӧти мортлӧн керкаын кесъялӧм дорысь бурджык кесъявны израильса дзонь чужанкотырлы».
Поплы нимкодь лои. Сійӧ босьтіс ефодсӧ, сывдӧмӧн вӧчӧм бӧлбансӧ да гортса бӧлбанъяссӧ, сэсся муніс тышкайӧзкӧд.
Тышкайӧз водзвылын восьлалісны налӧн челядьныс, ыж-мӧсныс да эмбур-кӧлуй нуысьяс.
Микей чукӧртіс орччӧн олысьясӧс, медым накӧд вӧтчыны Дансянь чужысьяс бӧрся. Найӧ вӧліны ылынӧсь нин, кор Микей аслас йӧзкӧд суӧдіс найӧс. Суӧдысьяс горзісны Дансянь чужысьяслы.
Дансянь чужысьяс бергӧдчылісны Микейлань да шуисны: «Мый тэныд колӧ? Мыйла йӧзсӧ чукӧртін?»
Микей шуис: «Ті босьтінныд менсьым вӧчӧм енъясӧс да менсьым попӧс. Менам нинӧм эз коль!
И нӧшта на юаланныд, мый меным колӧ?»
Дансянь чужысьяс шуисны сылы: «Ланьт! А он кӧ, миян скӧр йӧзным уськӧдчасны тіян вылӧ. Сэки тэысь ни тэнад котырысь нинӧм оз коль».
Дансянь чужысьяс водзӧ мунісны.
Микей гӧгӧрвоис, мый найӧ сыысь вынаджыкӧсь, да бӧр бергӧдчис гортас.
Дансянь чужысьяс Микейлӧн попкӧд мунісны Лаис карӧ. Аскӧдныс налӧн вӧліны Микейлӧн бӧлбанъясыс. Лаис карын тӧждысьтӧг да повтӧг олысь йӧзсӧ найӧ виалісны шыпуртӧн, а карсӧ сотісны.
Лаис карса олысьяслы отсӧг вылӧ некод эз лок, ӧд карыс сулаліс Бет-Рехов ковтысын, Сидон карысь ылын, и карса олысьяс эз волысьны мукӧд йӧзкӧд.
Дансянь чужысьяс выльысь лэптісны карсӧ да овмӧдчисны сэтчӧ. Найӧ сетісны карлы Дан батьыслысь, Израиль пилысь, нимсӧ, тадзи Лаис нимсӧ вежисны Дан ним вылӧ.
Дансянь чужысьяс сувтӧдісны ас орданыс бӧлбанӧс.
Мӧисейлӧн Гершом пиыслӧн Ионафан пиыс да сылӧн пияныс кесъялісны Дан чужанкотырлы попъясӧн, кытчӧдз Израиль войтырӧс эз ло нуӧдӧма пленӧ.
Микейлысь бӧлбансӧ найӧ видзисны ас орданыс став кад чӧжыс, кор Енлӧн керкаыс вӧлі Силомын.
Сійӧ кадас Израильын эз вӧв ӧксыыс. Ефрем керӧсвыв му пельӧсын оліс ӧти левит.
Сійӧ босьтіс аслыс кесйӧг-гӧтырӧс Виплиемысь, Иуда муысь.
Но коркӧ ань дӧзмис сы вылӧ да бӧр муніс бать керкаас Иуда муӧ, Виплиемӧ. Оліс сэні нёль тӧлысь чӧж.
Верӧсыс босьтіс аскӧдыс кесйӧгсӧ, кык осёлӧс да муніс кесйӧг-гӧтырысла. Сійӧ кӧсйис бурасьны кесйӧг-гӧтырыскӧд да корны сійӧс бӧр ас дінас.
Верӧссӧ аддзӧм бӧрын ань нуӧдіс сійӧс бать керкаас.
Батьыс нимкодьпырысь паныдаліс зятьсӧ да ёна корис сійӧс олыштны на ордын.
Куим лун левит оліс тесьт ордас, сёйис-юис сыкӧд.
Нёльӧд луннас найӧ чеччисны водз асывнас. Левит кӧсйис петны туйӧ, но гӧтырыслӧн батьыс шуис сылы: «Лок сёйышт. Сэсся верманныд петны туйӧ».
Найӧ кыкӧн пуксисны да сёйисны-юисны.
Гӧтырыслӧн батьыс шуис левитлы: «Кольччы нӧшта ӧти вой кежлӧ, бурпӧт олышт на».
Левит чеччис да кӧсйис мунны, но тесьтыс ёна корис, и сійӧ кольччис нӧшта ӧти вой кежлӧ.
Витӧд луннас левит чеччис водз асывнас да кӧсйис мунны, но гӧтырыслӧн батьыс шуис сылы: «Лок сёйышт. Виччысьлы луншӧр бӧрӧдзыс».
Найӧ бара ӧтлаын сёйисны-юисны.
Сэсся левит чеччис да кӧсйис кесйӧг-гӧтырыскӧд да кесйӧгыскӧд петны туйӧ.
Но тесьтыс шуис сылы: «Видзӧдлы, рыт нин воӧ. Узь тані, бурпӧт шойччы.
Аски водз асывнас мӧдӧдчанныд гортад».
Но левит эз кӧсйы кольччыны, а петіс туйӧ.
Воис Евус кар дорӧдз, ӧнія Ерусалим дорӧдз.
Сыкӧд вӧліны нӧбъялӧм кык осёл да кесйӧг-гӧтырыс.
Кор найӧ воисны Евус кар дорӧдз, шондіыс вӧлі пуксьӧ нин.
Кесйӧгыс шуис аслас ыджыдыслы: «Пырамӧй евуссаяслӧн карас да узьмӧдчамӧй сэтчӧ».
Но ыджыдыс шуис сылы: «Огӧ. Йӧз карӧ ми огӧ пырӧй, сэні Израиль пиян оз овны. Ми Гиваӧдз мунам».
Нӧшта шуис: «Мунам Гиваӧдз либӧ Рамаӧдз, кодараскӧ узьмӧдчам».
Найӧ водзӧ мунісны. Шонді саяліс, кор найӧ локтісны Венямин чужанкотырлӧн Гива кар дорӧ.
Найӧ кежисны Гиваӧ, медым узьмӧдчыны сэтчӧ.
Пырисны карас да пуксисны карса изэрд вылӧ, но некод эз кор найӧс гортас, медым узьтӧдны.
Рытнас видз-му вылысь вӧлі локтӧ пӧрысь морт.
Сійӧ вӧлі Ефрем керӧсвыв муысь, но оліс Венямин чужанкотырлӧн Гива карын.
Пӧрысь морт аддзис карса изэрд вылысь локтысьӧс да юаліс: «Кытысь воин да кытчӧ мунан?»
Сійӧ вочавидзис: «Ми воим Иуда муысь, Виплием карысь, да мунам Ефрем керӧсвыв муӧ. Ачым ме сэтчӧс.
Ветлі Виплиемӧ, а ӧні муна Господьлӧн керкаӧ.
Некод тай оз кор миянӧс гортас.
Миян ӧд осёлъяслы идзасыс и сёяныс эм.
Миян, тэнад кесйӧгъяслӧн, эм на нянь и вина, тырмас аслым, кесйӧг-гӧтырӧйлы да кесйӧгӧйлы.
Миян ставыс эм».
Пӧрысь морт шуис сылы: «Эн шогсьы! Лок, ме тэныд ставсӧ сета, мый колӧ. Энӧ узьмӧдчӧй татчӧ карса изэрд вылас».
Пӧрысь морт вайӧдіс левитӧс гортас, тшӧтш вердіс сылысь осёлъяссӧ. Локтысьяс мыськалісны кокнысӧ да сёйисны-юисны.
Кор найӧ гажаа коллялісны кадсӧ, шогмытӧм йӧз кытшалісны пӧрысь мортлысь керкасӧ. Найӧ игӧдчисны ӧдзӧсас да шуисны пӧрысь мортлы, керка кутысьлы: «Петкӧд татчӧ тэ ордӧ локтысьӧс! Ми кӧсъям узьны сыкӧд».
Керка кутысь петіс на дінӧ да шуис: «Вокъяс, кора тіянӧс, энӧ вӧчӧй лёксӧ. Тайӧ мортыс ӧд менам керкаӧ локтіс. Энӧ вӧчӧй пежсӧ!
Менам эм ныв, сійӧ абу на верӧс сайын, а тайӧ локтысь мортлӧн эм кесйӧг-гӧтыр. Найӧс ме петкӧда тіянлы. Вӧчӧй накӧд, мый кӧсъянныд.
Янӧдӧй найӧс, а тайӧ мортыслы энӧ вӧчӧй пежсӧ!»
Но найӧ эз кывзыны сійӧс.
Сэки левит босьтіс кесйӧг-гӧтырсӧ да петкӧдіс сійӧс налы, и найӧ мырдӧналісны-янӧдісны сійӧс войбыд.
Асывнас кыа петігӧн сӧмын лэдзисны сійӧс.
Югдандорыс ань локтіс керка дорӧ, кӧні вӧлі сылӧн ыджыдыс. Сійӧ усис керка ӧдзӧс дорас да куйліс сэні, кытчӧдз эз югды.
Аньлӧн ыджыдыс чеччис асывнас, медым петны туйӧ. Сійӧ восьтіс керка ӧдзӧссӧ да аддзис, мый сылӧн кесйӧг-гӧтырыс куйлӧ ӧдзӧс дорын тагӧс вылӧ кисӧ нюжӧдӧмӧн.
Сійӧ шуис кесйӧг-гӧтырыслы: «Чеччы! Мунам!»
Но гӧтырыс эз вочавидз сылы. [Сійӧ вӧлі кулӧма.] 
Левит босьтіс шойсӧ да пуктіс осёл вылас, сэсся мӧдӧдчис туйӧ.
Гортас воӧм бӧрын левит босьтіс пурт да вундаліс кесйӧг-гӧтырсӧ дас кык пельӧ, сэсся вир-яй юкӧнъяссӧ мӧдӧдаліс Израиль му пасьтала.
[Мӧдӧдӧм йӧзлы левит тшӧктіс юавны Израиль войтырлысь, вӧлі-ӧ коркӧ татшӧмторйыс.] Вир-яй юкӧнъяссӧ аддзылысьяс шуисны: «Израиль пиянлӧн Египетысь петан лунсянь талунъя лунӧдз татшӧмторйыс эз вӧвлы.
Видзӧдӧй да мӧвпалӧй, мый водзӧ вӧчны!»
Войвыв Дансянь лунвыв Бер-Шеваӧдз став Израиль войтыр, тшӧтш Галаад муын олысьяс, быттьӧ ӧти морт чукӧртчисны Миспаӧ Господь водзӧ.
Сэтчӧ чукӧртчисны Израиль войтырлӧн юралысьяс, чужанкотыръяслӧн юралысьяс да став Енлӧн войтырыс. Ставнас сэні вӧлі нёльсё сюрс шыпурта тышкаморт.
Венямин чужанкотыр кыліс, мый Израиль войтыр чукӧртчӧма Миспаӧ.
Израильсаяс юалісны: «Кыдзи тайӧ лёкторйыс лоис?»
Левит, виӧм аньлӧн верӧсыс, вочавидзис: «Аслам кесйӧг-гӧтыркӧд ме локті Венямин чужанкотырлӧн Гива карӧ, медым узьмӧдчыны сэтчӧ.
Гива карса олысьяс кӧсйисны уськӧдчыны ме вылӧ. Войнас найӧ кытшалісны керкасӧ, кӧні ме вӧлі, да кӧсйисны вины менӧ. Гӧтырӧс найӧ мырдӧналісны [да янӧдісны], и сійӧ куліс.
Ме босьті сылысь шойсӧ да кералі, сэсся вир-яй юкӧнъяссӧ ысталі Израиль му пасьтала. Ӧд пеж зывӧктор вӧлі вӧчӧма Израильын.
Ӧні ті, Израиль пиян, мӧвпыштӧй да висьталӧй, мый вӧчны!»
Став войтырыс ӧтитӧг сувтіс да шуис: «Огӧ разӧдчӧй гортаным, огӧ мунӧй чомъясаным.
Пудъясьӧм бӧрын ми уськӧдчам Гива кар вылӧ.
Израильлӧн став чужанкотырысь быд сё мортысь ми босьтам дасӧс, быд сюрс мортысь — сёӧс, дас сюрсысь — сюрсӧс. Найӧ мед ваясны сёян тышкайӧзлы, кодъяс мунасны Венямин чужанкотырлӧн Гива карӧ, медым сэтчӧс олысьяслысь водзӧс перйыны сыысь, мый Израильын найӧ вӧчисны пежсӧ».
Израильсаяс быттьӧ ӧти морт петісны тышӧ Гива карын олысьяслы паныд.
Израиль чужанкотыръяс мӧдӧдісны юӧртысьясӧс висьтавны Венямин чужанкотырлы: «Кыдзи тіян пӧвстын вермис лоны татшӧм лёк вӧчӧм?
Сетӧй миян киӧ Гиваын олысь шогмытӧм йӧзсӧ.
Ми виам найӧс, тадзи бырӧдам Израильысь лёксӧ».
Но Венямин чужанкотыр эз кут кывзыны Израиль пиянӧс, ассьыныс вокъяснысӧ.
Найӧ локталісны асланыс каръясысь да чукӧртчисны Гива карӧ, медым петны тышӧ Израиль пиянлы паныд.
Сійӧ лунӧ лыддисны Венямин чужанкотырлысь тышкайӧзсӧ. Шыпурта тышкайӧзлӧн лыдыс вӧлі кызь квайт сюрс морт, а Гива карын олысь медбур тышкайӧзлӧн лыдыс — сизимсё морт.
Венямин чужанкотырлӧн тышкайӧз пӧвстын вӧлі сизимсё шуйгун, кодъяс кужисны вывті бура изйӧн лыйсьыны, вермисны весиг мортлӧн юрси сіӧ веськавны.
Израильса тышкайӧзлӧн лыдыс вӧлі нёльсё сюрс шыпурта морт, кодъяс кужисны бура тышкасьны. На лыдӧ эз пыр Венямин чужанкотыр.
Израильсаяс локтісны Вефильӧ да юалісны Енлысь: «Кутшӧм чужанкотырлы колӧ медводдзаӧн петны Венямин чужанкотырлы паныд тышӧ?»
Господь вочавидзис: «Иуда чужанкотырлы».
Асывнас израильса тышкайӧз сувтісны Гива кар дорӧ, медым петны тышӧ Венямин чужанкотырлы паныд.
Но Веняминсянь чужысьяс петісны Гива карысь, уськӧдчисны израильсаяс вылӧ да виисны сійӧ лунӧ кызь кык сюрс мортӧс.
Израильсаяс рытӧдзыс бӧрдісны Господь водзын. Найӧ юалісны Господьлысь: «Колӧ-ӧ миянлы бара петны тышӧ Венямин чужанкотырлы, миян вокъяслы, паныд?» Господь вочавидзис: «Петӧй». Сэки израильсаяс збоймӧдчисны да бара лӧсьӧдчисны петны тышӧ сійӧ жӧ местаас, кӧні водзынсӧ тышкасисны.
Мӧд луннас Израиль пиян петісны Венямин чужанкотырлы паныд тышӧ.
Веняминсянь чужысьяс петісны Гива карысь, уськӧдчисны израильсаяс вылӧ да виисны нӧшта дас кӧкъямыс сюрс шыпурта тышкамортӧс.
Та бӧрын став израильса тышкайӧзыс локтісны Вефильӧ. Пукалісны сэні Господь водзын да бӧрдісны. Рытӧдзыс видзалісны*, вайисны Господьлы сотан да бурасян висьяс. 
Сійӧ кадас Енлӧн Йитӧд кудйыс вӧлі Вефильын, и Пинес, Ааронлӧн Элазар пиыслӧн пиыс, кесъяліс сы водзын. Израиль пиян юалісны Господьлысь: «Колӧ-ӧ миянлы бара на петны тышӧ Венямин чужанкотырлы, миян вокъяслы, паныд?»
Господь шуис: «Петӧй.
Аски Ме сета найӧс тіян киӧ».
Израильсаяс сувтӧдісны Гива кар гӧгӧр кыйӧдчысьясӧс.
Коймӧд луннас израильса тышкайӧз бара петісны Венямин чужанкотырлы паныд тышӧ да воддза мозыс сувтісны Гива кар весьтӧ.
Веняминсянь чужысьяс уськӧдчисны израильсаяс вылӧ. Тышкасигмозыс найӧ ылыстчисны Гива кар дорысь. Воддза мозыс найӧ виалісны израильсаясӧс, Вефильӧ да Гиваӧ нуӧдысь туйяс вылын найӧ виисны комын тышкамортӧс.
Веняминсянь чужысьяс чайтісны, мый воддза мозыс найӧ бара вермасны.
Но израильсаяс шуисны ылӧдлыны: быттьӧ пышъясны да тадзи нуӧдасны Веняминсянь чужысьясӧс Гива кар дорысь ылӧджык, туйяс вылӧ. 
[Сідзи и вӧчисны.]
Асланыс чукӧртчанінысь петӧм бӧрын израильса тышкайӧз сувтісны Ваал-Тамарӧ.
А израильса кыйӧдчысьяс петісны Гива кар рытыввывсянь.
Гива кар вылӧ уськӧдчис дас сюрс медбур тышкаморт, кодъяс вӧліны став Израиль му пасьталаысь. Тышыс вӧлі вывті ёсь.
Веняминсянь чужысьяс эз виччысьны, мый найӧс суас ыджыд шог.
Господь сетіс израильсаяслы вермыны Венямин чужанкотырӧс. Сійӧ лунӧ израильсаяс виисны Венямин чужанкотырысь кызь вит сюрс сё шыпурта тышкамортӧс.
Веняминсянь чужысьяс гӧгӧрвоисны, мый найӧс вермӧма. Тыш дырйи израильса тышкайӧз бӧрыньтчисны, ӧд лача кутісны Гива дорӧ сувтӧдӧм кыйӧдчысьясныс вылӧ.
Кыйӧдчысьяс уськӧдчисны Гива кар вылӧ, пырисны карас да ставнысӧ сэтысь виалісны шыпуртӧн.
Израильса тышкайӧз да кыйӧдчысьяс костын вӧлі сэтшӧм сёрнитчӧм, мый Гива карысь кыпӧдчысь тшын лоӧ пасӧн, мый кыйӧдчысьяс пырисны карас.
Израильса тышкайӧзлӧн бӧрыньтчигӧн Веняминсянь чужысьяс виисны комын израильса тышкамортӧс да чайтісны, мый воддза мозыс пасьвартасны израильсаясӧс. Но карсьыс кутіс кыпӧдчыны тшын сюръя.
Веняминсянь чужысьяс видзӧдлісны бӧрвыланыс да аддзисны, мый карыс ставнас тшынйыв кайӧ.
Израильса тышкайӧз бӧр бергӧдчисны, а Венямин чужанкотырлӧн тышкайӧзыс шӧйӧвошисны, ӧд гӧгӧрвоисны, мый найӧс суис.
Найӧ пондісны пышйыны израильса тышкайӧзысь овтӧминӧ нуӧдысь туйӧд, но эз вермыны, ӧд Гива карысь петӧм кыйӧдчысьяс кутісны виавны найӧс.
Израильсаяс кытшӧ босьтісны Веняминсянь чужысьясӧс, сувтлытӧг вӧтӧдісны да виалісны найӧс Гива карсянь асыввылын.
Венямин чужанкотыр воштіс дас кӧкъямыс сюрс вына тышкамортӧс.
Венямин чужанкотырысь ловйӧн кольӧмаяс пышйисны овтӧминлань, Риммон изкырталань. Туйяс вылын израильсаяс виисны вит сюрс мортӧс, водзӧ вӧтӧдісны пышйысьясӧс Гидом карӧдз да виисны нӧшта кык сюрс мортӧс.
Ставнас Венямин чужанкотырлӧн шыпурта тышкайӧз пӧвстысь сійӧ лунӧ куліс кызь вит сюрс вына тышкаморт.
Ловйӧн кольӧм квайтсё мортыс пышйисны овтӧминӧ, Риммон изкыртаӧ, да олісны сэні нёль тӧлысь чӧж.
Израильсаяс бӧр локтісны Венямин муӧ да виисны шыпуртӧн сэтчӧс каръясысь став йӧзсӧ да налысь ыж-мӧснысӧ, а каръяссӧ сотісны.
Миспаӧ чукӧртчылігӧн израильсаяс вӧлі кыв сетӧмаӧсь, мый Венямин чужанкотырӧ некод ассьыс нывсӧ верӧс сайӧ оз сет.
Израиль войтыр локтіс Вефильӧ. Сэні найӧ рытӧдзыс пукалісны Ен водзын да ырзӧмӧн гораа бӧрдісны. Найӧ шуалісны: «Господьӧй, Израильлӧн Енмӧй! Мыйла татшӧмторйыс лои Израильын? Ӧні Израильын оз тырмы ӧти чужанкотыр».
Мӧд асывнас войтырыс чеччис водз, сувтӧдіс висьпуктанін да вайис сэні сотан да бурасян висьяс.
Найӧ юалісны: «Вӧліны-ӧ Израиль чужанкотыръяс пӧвстын сэтшӧм йӧз, кодъяс эз локны, кор ми чукӧртчылім Господь водзӧ?»
Ӧд вӧлі кыв сетӧма, мый лоӧ виӧма быдӧнӧс, коді оз лок Господь водзӧ Миспаӧ.
Израиль пиянлӧн сьӧлӧмныс нормис Венямин чужанкотыр вӧсна, асланыс вокъяс вӧсна. Найӧ шуисны: «Талун Израиль воштіс ӧти чужанкотыр.
Кытысь миянлы корсьны гӧтыръяссӧ Венямин чужанкотырысь ловйӧн кольӧмаяслы? Ми ӧд Господь водзын кыв сетім, мый на сайӧ ог сетӧй нывъяснымӧс».
Нӧшта юалісны: «Вӧліны-ӧ Израиль чужанкотыръяс пӧвстын сэтшӧм йӧз, кодъяс эз локны Миспаӧ Господь водзӧ?»
Вӧлӧмкӧ, Галаад муысь Явис карысь некод абу вӧлӧма чукӧртчанінын. Та йылысь вӧлі тӧдмалӧма, кор лыддисны войтырсӧ.
Израиль войтыр мӧдӧдіс Галаад муӧ Явис карӧ дас кык сюрс вына тышкамортӧс да тшӧктіс: «Мунӧй да виалӧй шыпуртӧн Явис карса олысьясӧс, тшӧтш аньясӧс да челядьӧс.
Дзикӧдз бырӧдӧй став айуловсӧ да сійӧ аньяссӧ, кодъяс узисны айловкӧд [а нывъясӧс ловйӧн кольӧй]».
[Сідзи и вӧчисны.]
Галаад муын Явис карын олысьяс пӧвстысь сюри нёльсё ныв, кодъяс эз на узьлыны айловкӧд.
Нывъясӧс вайӧдісны Ханаан муӧ Силомӧ, израильса тышкайӧзлӧн сувтанінӧ. Та бӧрын израильсаяс мӧдӧдісны йӧзӧс Риммон изкыртаын олысь Венямин чужанкотыр дінӧ, медым юӧртны налы, мый водзӧ оз петны налы паныд тышӧ.
Веняминсянь чужысьяс бӧр локтісны [израильсаяс дінӧ], и израильсаяс сетісны налы нывъясӧс, кодъясӧс ловйӧн колисны Галаад муын Явис карын олысьяс пӧвстысь.
Но нывъясыс ставныслы эз тырмыны.
Израиль войтырлӧн сьӧлӧмыс нормис Венямин чужанкотыр вӧсна, ӧд Господь лэдзис, мый израильса чужанкотыръяс пӧвстын вӧлі зыксьӧм.
Войтырлӧн юрнуӧдысьяс шуисны: «Венямин чужанкотырысь аньясӧс бырӧдӧма. Кытысь миянлы нӧшта корсьны гӧтыръясӧс ловйӧн кольӧм айуловлы?»
Сэсся содтісны: «Венямин чужанкотырлы вичмӧдӧм муыс мед кольӧ Венямин чужанкотыр пӧвстысь ловйӧн кольӧмаяслы. Израиль войтыр пӧвстысь мед оз быр ни ӧти чужанкотыр!
Но ассьыным нывъясӧс ми огӧ вермӧй сетны на сайӧ.
Ӧд Израиль пиян кыв сетісны, мый лоӧ ёрӧма быдӧнӧс, коді Венямин чужанкотырӧ сетас ассьыс нывсӧ верӧс сайӧ».
Юрнуӧдысьяслы тӧд выланыс уси, мый Силом карын быд во пасйӧны Господьлы сиӧм гаж. Карыс сулаліс Левона карсянь лунвылын, Вефиль карсянь войвылын, Вефильсянь Сикемӧ мунан туй асыввылын.
Найӧ шуисны Веняминсянь чужысьяслы: «Мунӧй да дзебсьӧй виноград йӧръясӧ. Кор силомса нывъяс локтасны йӧктыны, сэки петӧй виноград йӧръясысь. Быдӧн мед босьтас аслыс гӧтырӧс да бӧр мунас Венямин муӧ.
Кор нывъяслӧн батьясныс либӧ вокъясныс локтасны норасьны, ми налы шуам: “Лоӧй бур сьӧлӧмаӧсь, ӧд налы ставныслы эз тырмыны тышын шедӧдӧм нывъясыс. Ті абу мыжаӧсь. А асьныд кӧ сетінныд нывъяснытӧ, вӧлінныд эськӧ мыжаӧсь”».
Веняминсянь чужысьяс тадзи и вӧчисны. Быдӧн босьтіс гӧтырӧ йӧктанінысь гусялӧм нылӧс. Сэсся найӧ бӧр мунісны асланыс муӧ, выльысь лэптісны каръяссӧ да овмӧдчисны сэтчӧ.
Израильсаяс разӧдчисны гортаныс, быдӧн муніс аслас муӧ чужанкотырыс да рӧдыс дінӧ.
Сійӧ кадас Израильын эз вӧв ӧксыыс.
Быдӧн вӧчис сійӧ, мый чайтіс веськыдӧн.
{Еврей йӧз (комиӧдіс Kodko) @ Руфа @ религ. гижӧд @ Библия @ 2021 @ Лб. .}
РУФА
Израиль муын ёрдысьяслӧн веськӧдлан кадӧ вӧлі тшыгъялӧм.
Иуда муысь ӧти морт эновтіс Виплием кар да овмӧдчис Моав муӧ. Сыкӧд тшӧтш мунісны гӧтырыс да кыкнан пиыс.
Тайӧ мортсӧ шуисны Элимелек, гӧтырсӧ — Ноеминь, пиянсӧ — Махлон да Килион.
Найӧ вӧліны иудаса Виплием-Епрафа карысь.
Элимелек куліс, и Ноеминь ӧтнасӧн колис пияныскӧд.
Пияныс гӧтрасисны Орфа да Руфа нима моавса нывъяс вылӧ. Матӧ дас во Моав муын олӧм бӧрын
Махлон да Килион кулісны. Ноеминь колис верӧстӧг да пиянтӧг.
Ноеминь шуис бӧр мунны аслас чужанінӧ, ӧд сылы кывсис, мый Господь тӧждысьӧма Аслас войтырыс вӧсна — сетӧма налы нянь.
Моньясыс шуисны тшӧтш мунны сыкӧд. Ноеминь кыкнан моньыскӧд мӧдӧдчис Иуда муӧ.
Муніганыс сійӧ шыасис на дінӧ: «Бергӧдчӧй мамъясныд дорӧ.
Господь мед лоас бур сьӧлӧма тіян дінӧ, кыдзи ті вӧлінныд бурӧсь менам пиян дінӧ да ме дінӧ.
Господь мед сетас кыкнанныдлы выль верӧсӧс — отсалас аддзыны аслыныд дорйысьӧс».
Ноеминь окыштіс найӧс, но найӧ кутісны бӧрдны да шуавны: «Ми тэкӧд тшӧтш мунам тэнад войтырыд дінӧ».
«Мунӧй гортаныд, нывъясӧй, — ӧлӧдіс Ноеминь.
— Мыйла тіянлы мекӧд муннысӧ?
Ме ӧд ог нин вермы чужтыны пиянӧс, медым найӧ сэсся босьтасны тіянӧс гӧтырӧ.
Бӧр бергӧдчӧй, нывъясӧй. Верӧс саяд ме ог нин мун, ме пӧрысь нин.
Весиг кӧ вӧлі на менам лача, мый тавой узя верӧскӧд да чужта, ті ӧмӧй виччысянныд пиянлысь быдмӧмсӧ? Та дыра верӧстӧг овны тіянлы сьӧкыд лоӧ.
Менам сьӧлӧмӧй бӧрдӧ тіян вӧсна, ӧд ті мекӧд тшӧтш сьӧкыдаланныд. Но тайӧ курыд шогыс меным Господьсянь».
Моньясыс бара кутісны бӧрдны.
Орфа окыштіс Ноеминьӧс [да бӧр муніс ас войтырыс дінӧ], а Руфа кольччис Ноеминькӧд.
Ноеминь шуис Руфалы: «Видзӧд, Орфаыд бергӧдчис ас войтырыс дінӧ да аслас енъяс дінӧ.
Тэ тшӧтш мун».
Но Руфа вочавидзис: «Эн тшӧкты менӧ бергӧдчыны. Тэнӧ ме ог эновт.
Кытчӧ тэ мунан, сэтчӧ и ме муна. Кытчӧ тэ кольччан, сэтчӧ и ме кольчча.
Тэнад войтырыд лоӧ менам войтырӧн, и тэнад Енмыд лоӧ менам Енмӧн.
Кӧні тэ кулан, сэні и ме кула, сэтчӧ мед менӧ и дзебасны.
Господь мед чорыда мыждас менӧ, кулӧмысь ӧтдор кӧ мыйкӧ торйӧдас тэа-меаӧс».
Ноеминь гӧгӧрвоис, мый Руфа оз веж шуӧм кывсӧ, а мунас сыкӧд. Ноеминь сэсся эз кут сёрнитны сылӧн бӧр бергӧдчӧм йылысь.
Ноеминь да Руфа водзӧ мунісны кыкӧн. 
Кор найӧ воисны Виплиемӧ, став карыс ёна шызис. Аньяс юасисны ӧта-мӧдныслысь, абу-ӧ тайӧ Ноеминь.
Ноеминь шуис налы: «Энӧ шуӧй менӧ Ноеминьӧн, а шуӧй Мараӧн*, ӧд Ставсӧвермысь мӧдӧдіс меным курыд шог.
Татысь мунігӧн менам ставыс вӧлі, а ӧні, кор Господь менӧ бӧр вайӧдіс, менам нинӧм абу.
Мыйла менӧ шуны Ноеминьнас, ӧд Господь сетіс меным сьӧкыдавнысӧ, Ставсӧвермысь мӧдӧдіс меным шогсӧ?»
Тадзи Ноеминь бӧр локтіс Моав муысь Виплиемӧ. Сыкӧд тшӧтш локтіс моав войтырысь Руфа моньыс. Буретш сэки заводитчис ид вундӧм.
Ноеминьлӧн Элимелек верӧс рӧдын вӧлі Вооз нима морт. Сійӧ вӧлі озыр да пыдди пуктана.
Моавса Руфа шыасис Ноеминь дорӧ: «Позяс-ӧ меным видз-му вылӧ петавны? Лэдзасны кӧ, усьласьӧм шепсӧ ӧктышта».
Ноеминь вочавидзис: «Ветлы, нылӧй».
Руфа локтіс вундысьяс дінӧ да пондіс ӧктыны на бӧрся усьласьӧм шепсӧ.
Сійӧ, вӧлӧмкӧ, веськалӧма Воозлӧн видз-му вылӧ.
Буретш сэки Вооз локтіс Виплиемысь да чолӧмасис ид вундысьяскӧд: «Господь тіянкӧд!»
Сылы вочавидзисны: «Господь мед бурсиас тэнӧ!»
Вооз юаліс вундысьяс бӧрся видзӧдысь кесйӧгыслысь: «Кодлӧн тайӧ том аньыс?»
Кесйӧгыс вочавидзис: «Моавса сійӧ. Локтӧма Ноеминькӧд Моав муысь.
Сійӧ менсьым юаліс, позяс-ӧ вундысьяс бӧрся усьласьӧм шепсӧ ӧктыны.
Локтіс водз асывнас да шойччывтӧг пыр на ӧктысис».
Сэки Вооз шыасис Руфа дінӧ: «Кывзы, нылӧй. Мӧд видз-му вылӧ ӧктысьнытӧ эн вудж, кольччы менам кесйӧг аньяскӧд.
Видзӧд, кутшӧм видз-му кутасны вундыны, сэтчӧ и мун да ветлӧдлы кесйӧг аньяс бӧрся.
Ассьым йӧзӧс ме ӧлӧда, мед оз вӧрӧдны тэнӧ.
Горшыд кӧ косьмас, верман гырнич дозъясысь менам йӧзкӧд васӧ юны».
Руфа уськӧдчис Вооз водзӧ, муӧдзыс копыртчылӧмӧн шуис сылы: «Мыйла тэ бур сьӧлӧма ме дінӧ да тӧждысян ме вӧсна? Ме ӧд йӧз муысь локтысь».
Вооз вочавидзис: «Меным висьталісны, мый верӧс кулӧм бӧрад тэ тӧждысьӧмыд аслад энькаыд вӧсна. Тэ эновтӧмыд бать-мамтӧ, чужан мутӧ да локтӧмыд тӧдтӧм войтыр дінӧ.
Тэнад бур вӧчӧмысь мед тырвыйӧ мынтысяс тэныд Господь, Израильлӧн Ен, кодлӧн борд улӧ тэ пырин, медым аддзыны аслыд дорйӧм».
Руфа вочавидзис: «Ыджыдӧй, тэ зэв бур сьӧлӧма ме дінӧ. 
Ме ог шогмы лоны тэныд весиг кесйӧг туйӧ. Но тэ бурмӧдін менсьым сьӧлӧмӧс аслад кывъясӧн».
Пажын кадӧ Вооз корис Руфаӧс, медым локтас да босьтас нянь, кӧтӧдлас уксуса ваӧ да сёяс.
Руфа пуксис ид вундысьяскӧд орччӧн.
Вооз мыччис сылы пражитӧм тусь.
Руфа сёйис пӧттӧдзыс, да сылӧн тусьыс коли на.
Сэсся Руфа чеччис да муніс водзӧ ӧктысьны.
Вооз кесйӧгъясыслы шуис: «Лэдзӧй сылы ӧктыны шепсӧ тшӧтш кольтаяс костысь да энӧ увтыртӧй сійӧс.
Мӧдарӧ, вундіганыд кольтаяссьыныд пыркӧдыштӧй шепсӧ да колялӧй сылы, мед ӧктӧ [да сёйӧ]. Энӧ пинялӧй сійӧс».
Рытӧдзыс Руфа ӧктіс шепсӧ видз-му вылысь. Сэсся став ӧктӧмасӧ вартіс, и сылӧн лои ефа мында ид.
Карӧ локтӧм бӧрын Руфа петкӧдліс энькаыслы, мында сылӧн лои чукӧртӧма, сэсся [питшӧгсьыс] перйис пажынысь кольӧм тусьсӧ да мыччис энькаыслы.
Ноеминь юаліс: «Кӧні тэ талун ӧктысин? Кӧні уджалін?
Мед лоӧ бурсиӧма сійӧ мортсӧ, коді тӧждысис тэ вӧсна».
Руфа шуис: «Код дінын ме талун уджалі, сійӧс шуӧны Вооз».
«Мед бурсиас сійӧс Господь, коді бур сьӧлӧма ловъяяс да кулӧмаяс дінӧ! — шуис моньыслы Ноеминь. — Тайӧ мортыс миян рӧдысь, миян вӧсна кывкутысь».
Руфа шуис: «Сійӧ весиг тшӧктіс меным уджавны кесйӧгъясыскӧд, кытчӧдз найӧ оз помавны вундӧмсӧ».
Ноеминь шуис Руфа моньыслы: «Нылӧй, зэв бур, тэ кӧ лоан сылӧн кесйӧг аньяскӧд ӧтлаын, сэки некод оз вӧрзьӧд тэнӧ йӧз видз-му вылын».
Руфа кольччис Воозлӧн кесйӧг аньяскӧд да ӧктіс усьласьӧм шепсӧ, кытчӧдз эз помавны ид да шобді вундӧмсӧ. А оліс Руфа энькаыскӧд ӧтлаын.
Ноеминь шуис Руфа моньыслы: «Нылӧй, кӧсъя тэныд верӧс аддзыны, медым тэныд бур вӧлі.
Тэ ӧд тӧдан Воозӧс, сійӧ миян рӧдысь. Сылӧн кесйӧг аньясыскӧд тэ ӧктысин.
Рытнас сійӧ гумла вылас кутас идсӧ тӧлӧдны.
Тэ вай мыссьы, мавтчы чӧскыд дука выйӧн, [мичаа] пасьтась да мун гумла вылас. Но Воозлы рытъя сёйӧм-юӧм бӧрӧдзыс син улас эн петкӧдчы.
Видзӧд, кытчӧ сійӧ водас узьнысӧ.
Мун, лэптышт кокладорсьыс шебрассӧ да вод кок улас.
А мый тэныд водзӧ вӧчнысӧ, сійӧ ачыс висьталас».
Руфа шуис: «Вӧча ставсӧ, кыдзи тэ тшӧктін».
Руфа муніс гумла вылӧ да вӧчис энькаыслӧн тшӧктӧм серти.
Вооз сёйис-юис да долыдпырысь водіс узьны нянь тэчас бокӧ.
Руфа гусьӧникӧн матыстчис, лэптыштіс Воозлӧн кок увсьыс шебрассӧ да водіс.
Войнас Вооз сыркмуніс, бергӧдчис да аддзис кок улас куйлысь аньӧс.
«Коді тэ?» — юаліс Вооз.
Ань вочавидзис: «Ме Руфа, тэнад кесйӧг. Ло меным дорйысьӧн, ӧд тэ миян рӧдысь, миян вӧсна кывкутысь».
Вооз шуис: «Господь мед бурсиас тэнӧ, нылӧй!
Ӧні тэ воддза дорсьыд бурджыка на вӧчин — эн кут корсьны гӧль ни озыр том мортӧс.
Эн пов, нылӧй, ме вӧча тэныд ставсӧ, мый коран.
Тайӧ карас став войтырыс тӧдӧ, мый тэ зэв шань.
Дерт, ме верма босьтны тэ вӧсна кывкутӧм, но миян рӧдвужын эм на матыссаджык морт, кодлы колӧ тэ вӧсна кывкутӧмсӧ босьтны.
Войсӧ узь тані, а аски тыдовтчас, кӧсйысяс оз сійӧ кывкутны тэ вӧсна. Кӧсйысяс кӧ, бур.
Оз кӧ, — ловъя Господь водзын кыв сета — ме босьта тэ вӧсна кывкутӧм.
Узь тані асылӧдзыс».
Руфа узис асылӧдзыс Воозлӧн кок улын да чеччис югдытӧдзыс на, медым йӧзыс эз аддзывны сійӧс.
Вооз мӧвпыштіс: «Мед эськӧ некод оз тӧдмав аньлысь гумла вылӧ волӧмсӧ».
Руфалы сійӧ шуис: «Вай ассьыд вевттьӧдтӧ, кутышт сійӧс».
Руфа кутіс вевттьӧдсӧ, а Вооз кисьтіс сэтчӧ квайт куд тыр ид. Сэсся Вооз пуктіс ид тыра нопсӧ Руфалы пельпом вылас. Та бӧрын Вооз муніс карӧ.
Руфа локтіс энькаыс ордӧ.
Энькаыс юаліс: «Но мый, нылӧй?»
Руфа висьталіс Воозлӧн кӧсйысьӧм йылысь.
Сэсся содтіс: «Вооз сетіс меным квайт куд тыр ид да шуис, энькаыд ордӧ пӧ куш киӧн эн мун».
Ноеминь шуис: «Виччысь, нылӧй, мый водзӧ лоӧ.
Тайӧ мортыс оз лӧнь, кытчӧдз талун помӧдз оз вайӧд мӧвпыштӧмсӧ».
Вооз локтіс карса дзиръя дорӧ да пуксис.
Сійӧ аддзис, мый локтӧ сылӧн рӧдвужысь морт, код йылысь сёрнитіс Руфакӧд.
Вооз шуис сылы: «Лок татчӧ, пуксьы».
Мӧдыс локтіс да пуксис.
Вооз корис карса юрнуӧдысьясысь дас мортӧс да шуис налы, мед пуксясны.
Найӧ пуксялісны.
Аслас рӧдвуж мортлы Вооз шуис: «Ноеминь, коді локтіс Моав муысь, вузалӧ миян Элимелек вокнымлысь видз-мусӧ.
Та йылысь ме кӧсйи сёрнитны тэкӧд. Тані пукалысьяс да войтырлӧн юрнуӧдысьяс дырйи тэ верман ньӧбны мусӧ.
А он кӧ кӧсйы ньӧбны, висьтав, медым ме тӧді.
Тэысь водзджык некод оз вермы ньӧбнысӧ, а он кӧ ньӧб, ме верма».
Рӧдвуж мортыс воча шуис: «Ме ньӧба».
Вооз шуис сылы: «Тэ кӧ ньӧбан Ноеминьлысь видз-мусӧ, сэки моавса Руфаӧс, кодлӧн верӧсыс кулӧма, тэныд ковмас гӧтырӧ босьтны. Но сійӧ кӧ чужтас пиӧс, оз тэнад, а кувсьӧм верӧсыслӧн нимыс овмӧс вылас кольӧ».
Та бӧрын рӧдвуж мортыс шуис: «Ме ог вермы ньӧбны Ноеминьлысь мусӧ, ӧд менам пиянлы тайӧ муыс оз вудж.
Тэ ньӧб тайӧ мусӧ, ме ог вермы».
Важӧн Израиль войтыр мусӧ ньӧбигӧн либӧ мӧдлы вуджӧдігӧн сёрнитчӧмсӧ вынсьӧдлісны тадзи: ӧтарыс пӧрччыліс ассьыс кӧмсӧ да сетліс сійӧс мӧдыслы [кодлы вуджӧ вӧлі рӧдыслӧн муыс] — тайӧ вӧлі сёрнитчӧм йылысь пасӧн Израиль войтыр пӧвстын.
«Ньӧб аслыд», — шуис рӧдвуж морт Воозлы.
Сэсся пӧрччис кӧмсӧ [да сетіс сылы].
Вооз шуис юрнуӧдысьяслы да став йӧзыслы: «Ӧні ті кылінныд, мый ме ньӧба Ноеминьлысь ставсӧ, мый вӧлі Элимелеклӧн, Килионлӧн да Махлонлӧн.
Моавса Руфаӧс, Махлонлысь дӧваӧс, аслым гӧтырӧ босьта, медым кулӧм верӧсыслӧн нимыс овмӧс вылас коляс да сылӧн рӧдыс оз быр чужан карсьыс. Ті тайӧс ставсӧ кывлінныд да аддзылінныд».
Карса дзиръя дорын став йӧзыс да юрнуӧдысьяс шуисны: «Да, ми кывлім да аддзылім.
Тэнад керкаӧ пырысь гӧтыртӧ Господь мед вӧчас Ракель да Лия кодьӧн, кодъяссянь чужис Израиль войтыр.
Озырмӧдчы Епрафаын, нимав Виплиемын!
Тайӧ том аньыслы Господь мед отсалас чужтыны тэныд уна ныв-пиӧс. Сэки тэнад котырыд лоӧ Пареслӧн кодь, кодӧс Фамар чужтіс Иудалы».
Вооз босьтіс Руфаӧс гӧтырӧ да узис сыкӧд.
Господь сетіс Руфалы кынӧмасьны, и сійӧ чужтіс пиӧс.
Ноеминьлы аньяс шуисны: «Ошкӧм Господьлы, коді эз коль тэнӧ питӧг!
Мед лоас нималана тайӧ кагаыс Израильын.
Сійӧ лоӧ гажӧдысьӧн да вердысьӧн тэнад пӧрысь кадӧ, ӧд тэнӧ радейтысь моньыд чужтіс сійӧс! Тэнад моньыд сизим пи дорысь на бурджык».
Ноеминь босьтіс пузчужӧм кагаӧс ки вылас. Сійӧ кутіс тӧждысьны кага вӧсна.
Орчча олысь аньяс сёрнитісны, Ноеминьлӧн пӧ пи чужӧма. Кагалы Овид ним пуктісны.
Овид лои Ессейлӧн батьӧн, а Ессей — Давидлӧн батьӧн.
Пареслӧн рӧдыс татшӧм: Пареслӧн чужис Хецрон, Хецронлӧн — Рам, Рамлӧн — Аминадав, Аминадавлӧн — Наашон, Наашонлӧн — Салмон, Салмонлӧн — Вооз, Воозлӧн — Овид, Овидлӧн — Ессей, Ессейлӧн — Давид.
{Еврей йӧз (комиӧдіс Kodko) @ Ӧксыяслӧн 1 небӧг @ религ. гижӧд @ Библия @ 2021 @ Лб. .}
ӦКСЫЯСЛӦН 1 НЕБӦГ
Ефрем керӧсвыв муын, Раматаим-Зофим* карын, оліс Элкан нима морт. Рӧднас сійӧ вӧлі Епрафаысь. Сійӧ вӧлі Ерохамлӧн пи, Ерохам — Элихулӧн, Элиху — Тохулӧн, Тоху — Цуфлӧн.
Элканлӧн вӧлі кык гӧтыр: ӧтисӧ шуисны Аннаӧн, мӧдсӧ — Пениннаӧн.
Пенинналӧн вӧлі челядьыс, а Анналӧн эз вӧв.
Быд во, урчитӧм лунъясӧ, Элкан ветлывліс Силом карӧ, мед юрбитны да вись вайны Господь Саваофлы.
Попъясӧн сэні вӧліны Илийлӧн* кык пиыс: Офни да Пинес.
Вись ваян лунӧ Элкан сетліс Пенинна гӧтырыслы да ныв-пиыслы вись пыдди вайӧм яйысь юкӧн.
Анналы жӧ сійӧ чуктӧдліс торъя юкӧн, ӧд сійӧс [ёнджыка] радейтіс, кӧть сылы Господь эз сет чужтыны ныв-пиӧс.
Пенинна ёна дӧзмӧдліс Аннаӧс. Кӧсйис, мед эськӧ Анна кутіс шуасьны Господь вылӧ ныв-пи абутӧмсьыс.
Тадзи вӧлі воысь-во: Анна ветліс Господьлӧн керкаӧ, а Пенинна ёна дӧзмӧдліс сійӧс. Анна бӧрдліс да весиг эз сёйлы, но Элкан верӧсыс бурӧдліс сійӧс: «Анна, мыйла тэ бӧрдан? Мыйла он сёй? Мыйысь шогсьӧ тэнад сьӧлӧмыд? Ме ӧмӧй тэныд абу бурджык дас пи дорысь?»
Ӧтчыд Силомын сёйӧм-юӧм бӧрын Анна сувтіс [Господь водзӧ юрбитны].
Господьлӧн керка ӧдзӧс дорын пукаліс Илий поп аслас пуклӧсын.
Анналӧн сэтшӧма шогсис сьӧлӧмыс, мый сійӧ кыз синваӧн бӧрдіс-кевмысис Господьлы. Анна кыв сетіс Сылы: «Господь Саваоф, [Ставсӧвермысь Енмӧй,] эн вунӧд менӧ, Ассьыд кесйӧгтӧ! Видзӧдлы менам шогсьӧм вылӧ, казьтышт менӧ! Господьӧй, сетан кӧ меным пиӧс, ме сета сійӧс Тэныд пыр кежлӧ. Сійӧ [вина-сур оз кут юны,] юрсисӧ некор оз шыр».
Анна дыр кевмысис Господьлы, а Илий та дырйи видзӧдіс сылӧн вом вылӧ.
Анналӧн гӧлӧс шыыс эз кыв. Сійӧ ас пытшкас кевмысис, сӧмын вомдоръясыс вӧрыштісны. Та вӧсна Илий чайтіс, мый сійӧ код юра.
Илий шуис Анналы: «Дыр-ӧ на тэ кутан кодавны? Пальӧдчы! [Мун Господь водзысь!]»
Мӧдыс вочавидзис: «Ыджыдӧй, вина-сур ме эг ю. Ме зэв шудтӧм ань, та вӧсна сьӧлӧмӧс ме личӧді Господь водзын.
Эн лыддьы менӧ, ассьыд кесйӧгтӧ, шогмытӧм нывбабаӧн. Ыджыд шогӧй вӧсна ме дыр кевмыси».
Илий вочавидзис: «Мун лӧнь сьӧлӧмӧн. Израильлӧн Ен мед сетас тэныд, мый тэ корин Сылысь».
Анна шуис: «Ло бур сьӧлӧма аслад кесйӧг дінӧ».
Сэсся Анна муніс, кутіс сёйны, и эз нин шогсьы воддза мозыс.
Мӧд асывнас Элкан водз чеччис аслас гортсаяскӧд. Господьлы юрбитӧм бӧрын найӧ мӧдӧдчисны гортаныс Рамаӧ.
Локтӧм бӧрас Элкан узис Аннакӧд, и Господь вочавидзис Анналӧн кевмысьӧм вылӧ.
Анна кутіс нӧбасьны. Кад мысти сійӧ чужтіс пиӧс да пуктіс сылы Самуил ним, ӧд шуис, Господьлысь [Ен Саваофлысь] пӧ ме кори сійӧс.
Кор Элкан став аслас гортсакӧд бара мӧдӧдчис Силомӧ, мед вайны Господьлы быдвося вись да кыв сетан вись [да аслас мувыв быдтасысь дасӧд юкӧнсӧ], Анна накӧд эз мун. Сійӧ шуис верӧсыслы: «Кор каганым быдмыштас да дугдас нёнясьны, сэки ме вайӧда сійӧс Силомӧ Господь водзӧ, и сійӧ кольччас сэтчӧ пыр кежлӧ».
Верӧсыс шуис сылы: «Вӧч, кыдзи шуан.
Ов гортын, кытчӧдз он торйӧд кагатӧ морӧссьыд.
Господь мед збыльмӧдас Ассьыс кывсӧ».* 
Анна кольччис гортас. Сійӧ нёньӧдіс писӧ, кытчӧдз кагаыс эз эновтчы мам морӧсысь.
Та бӧрын Анна вайӧдіс писӧ Силомӧ Господьлӧн керкаӧ. Сьӧрсьыс вайисны куим ӧшкӧс, [нянь,] ефа мында пызь да кучик дозйын вина.
Пиыс сэки вӧлі ичӧт на.
[Пинысӧ вайӧдісны Господь водзӧ.
Батьыс вайис быдвося вись.] Сэсся начкисны ӧшкӧс да нуӧдісны* писӧ Илий поп дінӧ.
Анна шуис: «Ыджыдӧй, ме кыв сета тэ водзын, мый ме дзик сійӧ аньыс, коді коркӧ сулаліс тані тэ водзын да кевмысис Господьлы.
Тайӧ кагасӧ ме сэки кори Господьлысь, и Господь сетіс сійӧс меным.
Ӧні ме сета сійӧс Господьлы. Мед сійӧ кесъялас Господьлы олӧм чӧжыс».
Найӧ юрбитісны сэні Господьлы.
Анна ошкӧмӧн кевмысис: — Господь гажӧдіс менсьым сьӧлӧмӧс, Сійӧ вылӧ кыпӧдіс менсьым юрӧс.
Ме серала менӧ мустӧмтысьяс вылын, ме нимкодяся, ӧд Господь мездіс менӧ.
Сӧмын Господь вежа, 
Сыысь кындзи мӧдыс абу.
Миян Ен кодь дорйысьыс абу.
Энӧ ышнясьӧй асланыд сёрниясӧн, тіян вомысь мед оз петны тшап кывъяс.
Ӧд Господь эм Ен, Сійӧ ставсӧ тӧдӧ, Сійӧ веситӧ уджъяснымӧс.
Вынаяслӧн ньӧввужйыс чегъясьӧ, а вынтӧмъяслӧн выныс содӧ.
Кодъяс вӧліны коркӧ пӧт кынӧмаӧсь, ӧні найӧ медасьӧны уджавны. Кодъяс водзынсӧ тшыгъялісны, ӧні найӧ шойччӧны.
Сьӧктыны вермытӧм сизимӧс чужтӧ, а уна челядя нярмунӧ.
Господь босьтӧ олӧм и сетӧ сійӧс, лэдзӧ пыдӧстӧминӧ и лэптӧ сэтысь.
Господь гӧльмӧдӧ и озырмӧдӧ, улӧ пуктӧ и вылӧ кыпӧдӧ.
Коньӧрӧс Сійӧ лэптӧ бус пытшкысь, гӧльӧс перйӧ няйтысь, пуксьӧдӧ найӧс ыджыдалысьяскӧд орччӧн, сетӧ налы нималана пуклӧс.
Господь кутӧ мулысь подувсӧ, сы вылӧ пуктӧма муюгыдсӧ.
Господь видзӧ кывзысьысьяслысь воськовъяссӧ, а лёк вӧчысьяс вошӧны пемыдас, ӧд мортлы оз отсав аслас выныс.
Господь бырӧдас Сылы паныд кыпӧдчысьясӧс, енэжсянь гымыштас на вылӧ.
[Господь вежа.
Мывкыда морт мед оз ошйысь аслас мывкыдлунӧн, вына мед оз ошйысь аслас вынӧн, озыр мед оз ошйысь аслас озырлунӧн. Но ошйысьысь мед ошйысьӧ сыӧн, мый гӧгӧрвоӧ да тӧдӧ Господьӧс.] 
Господь мыждас муюгыдын олысьясӧс. Сійӧ вынсьӧдас ӧксыӧс, кодӧс бӧрйис, Ассьыс мавтыштӧмаӧс вылӧ кыпӧдас.
Сэсся Элкан гӧтырыскӧд бӧр муніс Рамаӧ. Пинысӧ найӧ колисны Илий поп дінӧ кесъявны Господьлы.
Илийлӧн пияныс вӧліны шогмытӧм йӧз, найӧ эз тӧдны Господьӧс и эз пыдди пуктыны вись йылысь тшӧктӧмсӧ.
Кор йӧзыс вайлісны вись, яйсӧ пуигӧн матыстчыліс поплӧн отсасьысь да куим вожа вилаӧн перйыліс пӧртйысь, рачысь либӧ гырничысь яй. Вилаӧ шедӧм яйсӧ попъяс босьтлісны аслыныс.
Тадзи найӧ вӧчлісны Силомын израильсаяслӧн вись вайӧм дырйи.
Весиг яйлысь госсӧ соттӧдз воліс поплӧн отсасьысь да шуліс вись вайысьлы: «Сет поплы уль яйсӧ пражитӧм вылӧ. Пуӧм яйсӧ сійӧ оз кӧсйы босьтны».
Вись вайысь кӧ шуліс: «Ог. Медводз госсӧ колӧ сотны, сэсся верман босьтны яйсӧ мыйта колӧ», сэки поплӧн отсасьысь воча шуліс: «Он кӧ сет, мырдӧн босьта».
Илий пиянлӧн мыжыс Господь водзын вӧлі зэв ыджыд, ӧд найӧ эз пыдди пуктыны Господьлы вись вайӧмсӧ.
А Самуил зонка кесъяліс Господь водзын, новліс шабдіысь вурӧм ефод.*
Быд во мамыс вурліс Самуиллы вылыс паськӧм да вайліс сійӧс, кор верӧсыскӧд воліс Силомӧ вись вайны.
Элканӧс да сылысь гӧтырсӧ бурсиӧмӧн Илий шуис: «Господьлы питӧ сетӧмысь Господь мед тайӧ гӧтырыд пыр нӧшта на сетас тэныд ныв-пиӧс».
Сэсся Элкан да Анна бӧр мунісны гортаныс.
Господь эз вунӧд Аннаӧс. Сійӧ чужтіс нӧшта куим пиӧс да кык нылӧс.
А Самуил пиыс быдмис Господь водзын.
Илий вӧлі ёна нин пӧрысь. Сылы кывсис, мый Израиль войтырлӧн вись вайигӧн сылӧн пияныс шогмытӧмтор вӧчӧны, и нӧшта на, мый узьлӧны аньяскӧд, кодъяс кесъялӧны вежа чом пыранінын.
Илий шуис пияныслы: «Мыйла ті тадзи вӧчанныд? 
Ме кыла тіян йылысь лёк сёрнияс [Господьлӧн] войтырсянь.
Дугдӧй, пиянӧй, вӧчны пежсӧ. Ог бурторъяс ме кыв тіян йылысь.
Господьлӧн войтырыс лёктор висьталӧ тіян йылысь.
Морт кӧ мыжмас морт водзын, сэки сы вӧсна верман кевмысьны Енлы.
А мыжмас кӧ Господь водзын, сэки коді лоӧ сылы дорйысьнас?»
Но пияныс эз кывзыны батьсӧ, ӧд Господьлӧн вӧлі шуӧма нин бырӧдны найӧс.
Самуил зонка лунысь-лун быдмис-верстяммис, сійӧ вайис нимкодьлун Господьлы и йӧзыслы.
Илий дінӧ локтіс Енлӧн морт да шуис: «Господь тадзи висьталӧ: “Ме восьті Ачымӧс тэнад батьяслы, кор найӧ Египетын вӧліны фараонлӧн кесйӧгъясӧн.
Ме бӧрйи тэнсьыд рӧдтӧ став Израиль чужанкотырысь да пукті найӧс попъясӧн, медым найӧ кесъялісны Меным висьпуктанін дорын, тшынӧдісны чӧскыд ӧвтанторъяс да новлісны ефод Ме водзын.
Ме тшӧкті, мед тэнад рӧдыд босьтас Израиль войтырлӧн сотӧм висьясысь юкӧн.
Мыйла ті нинӧмӧ пуктанныд Меным вайӧм висьяссӧ да вайӧмторъяссӧ, мый Ме тшӧкті вайны Аслам керкаӧ? Мыйла тэ ассьыд пиянтӧ пуктан Меысь вылӧджык? Ті тшӧгӧдчанныд медбур яйнас, мый вайӧ Меным Израиль войтырӧй.
Ме кӧсйыси, — висьталӧ Господь, Израильлӧн Ен, — мый тэнад рӧдыд да батьыдлӧн рӧдыс пондасны пыр кесъявны Меным.
Но ӧні оз ло тадзи, — висьталӧ Господь. — Ме пыдди пукта Менӧ пыдди пуктысьясӧс да янӧда Менӧ лёкӧдысьясӧс.
Воасны лунъяс, кор Ме орӧда тэнсьыд да тэнад рӧдлысь олан вынсӧ. Тэнад рӧдын дыр олысьыс оз ло.
Тэ аддзан, кутшӧм ыджыд шог суас Менсьым керкаӧс. Ме кута бурсӧ вӧчны Израиль войтырлы, но тэнад рӧдын дыр олысьыс оз ло. Тэнад рӧдысь Ме ог ставнысӧ вешты Аслам висьпуктанін дорысь. Вешта кӧ, сэки бӧрдӧмсьыд синмыд пемдас да сьӧлӧм дойсьыд морӧсыд топалас.
Но тэнад рӧдын став чужысьыс пондас кувны томӧн.
Офни да Пинес пияныд куласны ӧти лунӧ, и тайӧ лоӧ тэныд пас, мый Менам кывъясӧй инасны.
Аслым Ме сувтӧда попӧс, коді кутас кывзысьны Менсьым да збыльмӧдны Менсьым кӧсйӧмӧс.
Сылысь рӧдсӧ вӧча зумыдӧн. Став олӧм чӧжыс сійӧ кутас кесъявны Менам мавтыштӧма водзын.
А найӧ, кодъяс ловйӧн колясны тэнад рӧдысь, локтасны да копыртчыласны сьӧм да няньтор вӧсна тайӧ попыслы. Шуасны, сет пӧ миянлы кутшӧмкӧ левит удж, мед кынӧмпӧт шедӧдны”».
Самуил зонка кесъяліс Господьлы Илий дорын.
Сійӧ кадас Господьсянь кывъяс да петкӧдчылӧмъяс вӧліны зэв гежӧда.
Ӧтчыд войнас Илий куйліс аслас вольпасьын. Сійӧ омӧля нин аддзис, синмыс вӧлі пемдӧма. Самуил куйліс вежа керкаын, кӧні видзисны Енлысь кудсӧ. Кор Енлӧн би дозйын ӧзъяліс на биыс, Господь шыасис Самуил дінӧ. [Шуис: «Самуил, Самуил».] Мӧдыс вочавидзис: «Ме тані».
Сэсся котӧртіс Илий дінӧ да шуис: «Ме тані. Тэ менӧ корин?»
Илий вочавидзис: «Эг.
Мун да бӧр вод».
Самуил муніс да водіс.
Господь мӧдысь шыасис сы дінӧ. [Шуис: «Самуил, Самуил».] 
Самуил чеччис, бара локтіс Илий дінӧ да шуис: «Ме тані. Тэ корин менӧ?»
Но Илий вочавидзис: «Эг, пиӧй.
Мун да бӧр вод».
Самуил сэки эз на тӧд Господьӧс, и Господь эз на восьт кывсӧ сылы.
Господь нӧшта коймӧдысь шыасис Самуил дінӧ.
Мӧдыс чеччис, муніс Илий дінӧ да шуис: «Ме тані. Тэ менӧ корин?»
Сэки Илий гӧгӧрвоис, мый Господь чуксалӧ зонкаӧс.
Илий шуис Самуиллы: «Мун да бӧр вод. Кылан кӧ бара чукӧстӧмсӧ, сэки шу: висьтав, Господьӧй, Тэнад кесйӧгыд кывзӧ Тэнӧ».
Самуил муніс да водіс.
Господь локтіс, сувтіс да воддза мозыс бара шыасис: «Самуил, Самуил!»
Самуил вочавидзис: «Висьтав [Господьӧй], Тэнад кесйӧгыд кывзӧ Тэнӧ».
Господь шуис Самуиллы: «Регыд Израильын Ме вӧча сэтшӧмтор, мый тайӧс кылӧмысь мортыслӧн кыкнан пеляс жуньгыны кутас.
Сійӧ лунӧ Ме водзысяньыс помӧдзыс збыльмӧда ставсӧ, мый шулі Илий да сылӧн рӧд йылысь.
Ме шулі Илийлы, мый Ме мыжда сылысь рӧдсӧ пыр кежлӧ. Мыжда сыысь, мый сійӧ тӧдіс пияныслысь пеж вӧчӧмсӧ, но эз ӧлӧд найӧс.
Та вӧсна Ме кыв сетӧмӧн шуа Илий рӧдлы, мый висьяс да вайӧмторъяс некор оз вештыны Илий рӧдлысь мыжсӧ».
Самуил асылӧдзыс узис [но зэв водз чеччис]. Сэсся восьтіс вежа керкалысь ӧдзӧсъяссӧ.
Сійӧ поліс висьтавны Илийлы, мый сылы войнас восьтіс Господь.
Но Илий корис Самуилӧс ас дорас да шуис: «Самуил пиӧй».
Мӧдыс шуис: «Ме тані».
Илий юаліс: «Мый Енмыс висьталіс тэныд? Эн дзеб меысь.
Мед Енмыс ёна мыждас тэнӧ, он кӧ висьтав меным ставсӧ».
Самуил висьталіс ставсӧ, нинӧм эз дзеб Илийысь.
Сэки Илий шуис: «Сійӧ — Господь.
Мед вӧчас, мый кӧсйӧ».
Самуил быдмис, Господь вӧлі сыкӧд.
Ставсӧ, мый сійӧ висьтавліс Господь нимсянь, Господь збыльмӧдіс.
Тадзи войвыв Дансянь лунвыв Бер-Шеваӧдз став Израиль тӧдмаліс, мый Самуилӧс Господь пуктӧма пророкӧ.
Сы бӧрын, кор Господь восьтіс Асьсӧ Самуиллы, Господь унаысь петкӧдчывліс Силомын. 
[Став Израиль му пасьтала йӧзыс эскисны, мый Самуил — Господьлӧн пророк.
Илий ёна нин пӧрысьмис, а сылӧн пияныс водзӧ олісны шогмытӧма Господь водзын.]
[Филистимсаяс чукӧртчисны, мед тышкасьны израильсаяскӧд.] 
Самуил сёрнитіс став Израиль войтыркӧд, и израильсаяс петісны тышӧ филистимсаяслы паныд. Израильса тышкайӧз сувтісны Эвен-Эзер бокӧ, а филистимсаяс — Афек бокӧ.
Филистимса тышкайӧз уськӧдчисны израильсаяс вылӧ. Пансис тыш. Найӧ пасьвартісны израильсаясӧс, виисны нёль сюрс гӧгӧр мортӧс.
Кор израильса тышкайӧз бӧр косісны асланыс чукӧртчанінӧ, израильса юрнуӧдысьяс шуисны: «Мый понда Господь талун лэдзис филистимсаяслы вермыны миянӧс?
Мунамӧй да ваямӧй Силом карысь Господьлысь Йитӧд кудсӧ. Кудйыс кӧ лоӧ миян ордын, сійӧ мездас миянӧс вӧрӧг киысь».
Херувимъяс вылын пукалысь Господь Саваофлӧн Йитӧд кудла мӧдӧдісны йӧзӧс Силомӧ.
Кудсӧ вайысьяскӧд тшӧтш локтісны Офни да Пинес, Илийлӧн пияныс.
Кор Господьлысь Йитӧд кудсӧ вайисны тышкайӧзлӧн чукӧртчанінӧ, израильсаяс нимкодясьӧмӧн гораа горзісны, мый весиг муыс вӧрис.
Филистимсаяс кылісны горзӧмсӧ да шуисны: «Мыйла еврейяс татшӧма горзӧны?»
Кор филистимсаяс тӧдмалісны Господьлӧн куд йылысь, найӧс полӧм босьтіс. Найӧ шуалісны: «Енмыс локтіс израильса тышкайӧз чукӧртчанінӧ.
Курыд шог миянлы!
Татшӧмыс некор на эз вӧвлы.
Курыд шог миянлы!
Коді мездас миянӧс тайӧ вына Енсьыс?
Ӧд тайӧ Енмыс уна ногӧн чорыда мыждыліс египетсаясӧс овтӧминын.
Филистимсаяс, энӧ полӧй! Вермасьӧй повтӧг, медым ми эгӧ шедӧй еврейяслӧн кипод улӧ, кыдзи найӧ вӧліны миян кипод улынӧсь».
Филистимсаяскӧд бара пансис тыш, и найӧ дзикӧдз пасьвартісны израильсаясӧс. Комын сюрс пода усис тышын, мукӧдыс пышйисны гортаныс.
Филистимсаяс мырддисны Енлысь кудсӧ, а Илийлысь Офни да Пинес пиянсӧ виисны.
Сійӧ жӧ лунӧ Венямин чужанкотырысь ӧти морт тэрмасьӧмӧн локтіс тышкасянінысь Силомӧ.
Паськӧмсӧ сійӧ вӧлі косялӧма, юрсӧ коялӧма муӧн.
Илий сэки пукаліс карса дзиръя дорын аслас пуклӧсын. Сійӧ видзӧдіс туй вылӧ да виччысис юӧр вайысьӧс, ӧд поліс Енлӧн куд вӧсна.
Кор тышысь воӧм морт висьталіс карса олысьяслы израильсаясӧс пасьвартӧм йылысь, йӧзыс ырзӧмӧн кутісны бӧрдны.
Илий кыліс бӧрдӧмсӧ да юаліс, мыйла йӧзыс татшӧма бӧрдӧны.
Сэки сы дінӧ матыстчис юӧр вайысь да ставсӧ висьталіс сылы.
Илийлы вӧлі ӧкмысдас кӧкъямыс арӧс.
Синнас сійӧ эз нин аддзы.
Юӧр вайысь шуис: «Ме сӧмын на локті тышкасянінысь, пышйи сэтысь».
Илий юаліс: «Мый лои, пиӧй?»
Мӧдыс вочавидзис: «Израильса тышкайӧз пышйисны филистимсаясысь. Миянлысь унаӧс виисны, тэнад Офни да Пинес пияныд тшӧтш кулісны. Енлысь кудсӧ филистимсаяс босьтісны».
Мыйӧн Илий кыліс Енлӧн куд йылысь, сійӧ гатш усис пуклӧссьыс дзиръя дорӧ. Аслас сьӧкта да пӧрысьлун вӧснаыс сійӧ песовтіс сьылідзирсӧ да куліс.
Нелямын во чӧж Илий вӧлі ёрдысьӧн Израиль войтырлы.
Илийлӧн моньыс, Пинес пиыслӧн гӧтырыс, буретш нӧбасис, чужтан кад нин вӧлі.
И кор сійӧ кыліс, мый Енлысь кудсӧ мырддьӧмаӧсь, а сылӧн айкаыс да верӧсыс кулӧмаӧсь, сійӧс чорыда топӧдіс чужтан дойыс. Сійӧ усис пидзӧс вылас да чужтіс. Кор сійӧ вӧлі куланвыйын, сы дінын отсасьысь аньяс шуалісны: «Эн шогсьы. Тэнад пи чужис».
Но мӧдыс чӧв оліс.
Пиыслы Икавод* нимсӧ сетігӧн шуис: «Вешйис Израиль войтыр дінысь Енлӧн дзирдлуныс».  Тадзи шуис, ӧд Енлысь кудсӧ вӧлі мырддьӧма, а айкаыс да верӧсыс кулісны.
Та вӧсна и шуис: «Вешйис Израиль войтыр дінысь Енлӧн дзирдлуныс, ӧд Енлысь кудсӧ мырддьӧма». 
Енлысь кудсӧ босьтӧм бӧрын филистимсаяс вайисны сійӧс Эвен-Эзерысь Азотӧ.
Сэсся пыртісны Енлысь кудсӧ Дагон бӧлбанлы юрбитанінӧ да пуктісны Дагонкӧд орччӧн.
Водз асывнас азотса олысьяс локтісны юрбитанінӧ да аддзисны, мый Дагон бӧлбан кымынь куйлӧ Господьлӧн куд водзын. Дагонӧс босьтісны да сувтӧдісны бӧр аслас местаӧ.
Мӧд асывнас локтісны зэв водз да аддзисны, мый Дагон бара кымынь куйлӧ Господьлӧн куд водзын.
Сылысь [коксӧ,] кисӧ да юрсӧ вӧлі керыштӧма, найӧ туплясисны тагӧс вылас. Кольӧма вӧлі сӧмын тушаыс.
Та вӧсна Дагонлӧн попъяс да Дагонлы юрбитанінӧ волысьяс ӧнӧдз оз тувччыны тагӧс вылас [а воськовтӧны сы вомӧн].
Азотын да сы гӧгӧрын олысьясӧс Господь чорыда кутіс мыждыны. Ставнысӧ полӧм босьтіс. Господь дойдаліс йӧзсӧ, яй пасьталаыс налӧн петалісны мыльяс. [Му пасьталаыс рӧдмисны крысаяс. Ыджыд шог суис карын олысьясӧс.]
Ставсӧ тайӧс аддзигӧн азотсаяс шуисны: «Израиль Енлысь кудсӧ колӧ нуны миян дінысь, ӧд Сійӧ сьӧктӧдӧ миянӧс да миянлысь Дагон еннымӧс».
Найӧ чукӧртісны ас дінаныс филистимса став юралысьсӧ да юалісны: «Мый миянлы вӧчны Израиль Енлӧн кудйыскӧд?»
Юралысьяс тшӧктісны нуны кудсӧ Гефӧ.* 
И нуисны Израиль Енлысь кудсӧ Гефӧ.
Сэтчӧ вайӧм бӧрын Господь кутіс мыждыны и тайӧ карсӧ. Ставныс шызисны. Йӧзсӧ полӧм босьтіс. Господь чорыда дойдаліс гырысьӧс и посниӧс, ставныс найӧ мылльӧссисны.
Сэтысь мӧдӧдісны Енлысь кудсӧ Экрон карӧ.
Сэтчӧс олысьяс пондісны шуасьны-горзыны: «Мыйла ті вайинныд татчӧ Израиль Енлысь кудсӧ? Мед вины-бырӧдны миянӧс?»
Сэсся чукӧртісны филистимса став юралысьсӧ да шуисны: «Бӧр нуӧй Израиль Енлысь кудсӧ, кытысь босьтінныд. 
Тані сійӧ ставнымӧс бырӧдас». Экронын олысьяс зэв ёна полісны, ӧд [Израиль Енлысь кудсӧ вайӧм бӧрын] Ен чорыда мыждіс найӧс. Унаӧн кулісны.
А ловйӧн кольысьяс ставныс ёна мылльӧссисны. Карса олысьяслӧн ойзӧмыс кыптіс енэжӧдз.
Сизим тӧлысь чӧж Господьлӧн кудйыс вӧлі Филистим муын. [Муыс тырис крысаясӧн.]
Филистимсаяс корисны попъясӧс, тунъясӧс [да тӧдысьясӧс] да юалісны: «Мый миянлы вӧчны Господьлӧн куднас?
Висьталӧй, кыдзи сійӧс бӧр мӧдӧдны?»
Найӧ вочавидзисны: «Ті кӧ бӧр кӧсъянныд мӧдӧдны [Господьлысь] Израиль Енлысь [Йитӧд] кудсӧ, козинтӧг сійӧс энӧ мӧдӧдӧй. Ыстӧй мыж вештан вись.
Сэки ті бурданныд да тӧдмаланныд, мый вӧсна Израильлӧн Ен оз вешты Ассьыс мыждӧмсӧ тіян вылысь».
Йӧзыс юалісны: «Мый миянлы ыстыны Сылы мыж вештан вись пыдди?»
Мӧдъясыс шуисны: «Ыстӧй зарниысь вӧчӧм вит мыль да вит зарни крыса филистимса юралысьяслӧн лыд серти.
Ӧд тіянӧс да тіянлысь юралысьяснытӧ мыждӧма ӧткодя.
Вӧчӧй мыльяссӧ да мунытӧ бырӧдысь крысаяссӧ, мед пыдди пуктыны Израильлысь Енсӧ.
Гашкӧ, Сійӧ вештас Ассьыс мыждӧмсӧ тіян вылысь, тіян енъяс да тіян му вылысь.
Энӧ чорзьӧдӧй сьӧлӧмнытӧ, кыдзи коркӧ чорзьӧдчисны египетсаяс да фараон.
Найӧ лэдзисны Израиль войтырӧс Египет муысь сӧмын сэки, кор Господь петкӧдліс Ассьыс вынсӧ.
Сідзкӧ, вӧчӧй ӧти выль тарантас, босьтӧй медводдзаысь вайсьӧм кык мӧскӧс, кодъясӧс эз на сийӧсавлыны. Доддялӧй найӧс, а кукъяссӧ торйӧдӧй наысь да йӧртӧй.
Господьлысь кудсӧ пуктӧй тарантасӧ. А зарниысь вӧчӧмторъяснытӧ, кодъясӧс ваянныд Господьлы мыж вештан вись пыдди, пуктӧй тылӧсӧ*, а тылӧссӧ пуктӧй кудйыскӧд орччӧн.
Тадзи ыстӧй кудсӧ.
Но видзӧдӧй сы бӧрся. Мунас кӧ кудйыс аслас муӧ, Бет-Шемеш карлань, сідзкӧ, тайӧ ыджыд шогсӧ миянлы Господь ыстіс.
Оз кӧ сэтчань мун, ми кутам тӧдны, мый эз Господь мыжды миянӧс, но тадзи ачыс лои».
Сідзи и вӧчисны. Филистимсаяс босьтісны медводдзаысь вайсьӧм кык мӧскӧс, доддялісны тарантасӧ, а кукъяссӧ йӧртісны.
Сэсся пуктісны тарантасӧ Господьлысь кудсӧ да тылӧс, кытчӧ пуктісны зарниысь вӧчӧм мыльяссӧ да крысаяссӧ.
Мӧсъяс веськыда мӧдӧдчисны Бет-Шемешлань.
Найӧ пыр мунісны ӧти туйӧд. Муніганыс ӧтарӧ баксісны, но эз кежны веськыдвылӧ ни шуйгавылӧ.
Филистимса юралысьяс вӧтчисны на бӧрся Бет-Шемеш дорӧдз.
Сійӧ кадас Бет-Шемешын олысьяс вундісны ковтысын шобді. Кор найӧ аддзисны Господьлысь кудсӧ, тырисны нимкодьлунӧн.
Тарантас воис Бет-Шемешын олысь Исуслӧн му вылӧ да сувтіс ыджыд из дорӧ. Тарантассӧ кералісны пес вылӧ, а мӧсъяссӧ вайисны Господьлы сотан вись пыдди.
Левитъяс пуктісны ыджыд из вылӧ Господьлысь кудсӧ да тылӧс, кӧні вӧліны зарни вӧчӧмторъяс.
Сійӧ лунӧ Бет-Шемешын олысьяс вайисны Енлы сотан да мукӧд висьяс.
Филистимса витнан юралысьыс аддзылісны тайӧс, сэсся сійӧ жӧ луннас бӧр мунісны Экронӧ.
Зарниысь вӧчӧм мыльяссӧ филистимсаяс вайисны Господьлы мыж вештан вись пыдди вит филистимса кар вӧсна: Азот, Газа, Аскалон, Геф да Экрон каръяс вӧсна.
Зарни крысаяссӧ вӧлі вайӧма став кар-сиктыс вӧсна, кӧні веськӧдлісны филистимса вит юралысьыс. Налӧн изкаръясыс да сиктъясыс вӧлі паськӧдчӧмаӧсь ыджыд изйӧдзыс, кытчӧ пуктісны Господьлысь кудсӧ. Тайӧ изйыс ӧнӧдз сулалӧ Бет-Шемешысь Исуслӧн му вылын.
[Бет-Шемешын олысьяс пиысь Еконейлӧн рӧдыс эз нимкодясь Господьлысь кудсӧ аддзылӧмысь.] 
Куд пытшкӧ видзӧдлӧмысь Господь бырӧдіс Бет-Шемеш карысь ветымын сюрс сизимдас мортӧс.
Сэтчӧс олысьяс ырзӧмӧн бӧрдісны, ӧд Господь чорыда мыждіс найӧс. 
Найӧ шуалісны: «Коді вермас сулавны Господь водзын, тайӧ вежа Енмыс водзын? Вешъяс-ӧ Сійӧ коркӧ миян дінысь?»
Сэки мӧдӧдісны йӧзӧс Киръят-Яримӧ висьтавны, филистимсаяс пӧ вайисны Господьлысь кудсӧ, локтӧй пӧ да босьтӧй сійӧс аслыныд.
Киръят-Яримын олысьяс локтісны да босьтісны Господьлысь кудсӧ. Вайисны сійӧс ыб вылын сулалысь Авинадав керкаӧ. Авинадавлысь Элазар писӧ вежӧдісны да пуктісны видзны Господьлысь кудсӧ.
Енлысь кудсӧ Киръят-Яримӧ вайӧмсянь коли уна кад, кызь во.
Став Израиль войтыр бергӧдчис Господьлань.
Самуил шуис налы: «Ті кӧ став сьӧлӧмнад кӧсъянныд бергӧдчыны Господьлань, сідзкӧ, эновтчӧй мукӧд войтырлӧн енъясысь, тшӧтш Астарта идолысь. Веськӧдӧй сьӧлӧмнытӧ Господьлань да сӧмын Сылы кесъялӧй-юрбитӧй. Сэки Сійӧ мездас тіянӧс филистимсаясысь».
Израиль войтыр бырӧдаліс Ваал да Астарта бӧлбанъясӧс, кутіс кесъявны-юрбитны сӧмын Господьлы.
Самуил шуис: «Чукӧртӧй Израиль войтырӧс Миспаӧ. Сэні ме кевмыся тіян вӧсна Господьлы».
Израильсаяс локтісны Миспаӧ. Сэні найӧ гумлалісны ва да кисьталісны му вылӧ Господь водзын, тайӧн петкӧдлісны мыжсьыныс бергӧдчӧмнысӧ. Сійӧ лунӧ найӧ видзалісны да висьтасисны, ми пӧ мыж вӧчим Господьлы паныд.
Тадзи Миспа карын Израиль войтыр чукӧртчис Самуил ёрдысь водзӧ.
Филистимсаяслы кывсис, мый израильсаяс чукӧртчӧмаӧсь Миспаӧ. Сэки налӧн юралысьясныс тышкайӧзкӧд петісны Израильлы паныд.
Кор израильсаяс кылісны та йылысь, ёна повзисны.
Самуиллы шуисны: «Дугдывтӧг кевмысь миян вӧсна Господьлы, миян Енлы, медым Сійӧ мездас миянӧс филистимсаясысь».
[Самуил шуис: «Мед оз ло сэтшӧмторйыс, мый ме кежа Господьысь, аслам Енмысь, да дугда кевмысьны тіян вӧсна».]
Самуил босьтіс нёньпом баляӧс да вайис [войтырыскӧд] Господьлы сотан вись пыдди. Самуил кевмысьӧмӧн шыасис Господь дінӧ Израиль вӧсна, и Господь кыліс Самуилӧс.
Самуиллӧн вись вайӧм дырйи филистимсаяс матыстчисны израильсаяс дінӧ, медым уськӧдчыны на вылӧ.
Но сійӧ лунӧ Господь чорыда гымаліс филистимсаяс весьтын. Найӧ ёна повзисны. Тадзи израильсаяс вермисны филистимсаясӧс.
Найӧ вӧтчисны филистимсаяс бӧрся Миспасянь Бет-Кар дорӧдз, вӧтӧдігас унаӧс виисны.
Самуил босьтіс из да сувтӧдіс сійӧс Миспа да Шен каръяс костӧ. Самуил сетіс изйыслы Эвен-Эзер* ним да шуис, тайӧ местаӧдзыс пӧ Господь отсаліс миянлы.
Тадзи вӧлі вермӧма филистимсаясӧс. Та бӧрти найӧ эз нин усьласьны Израиль му вылӧ.
Самуиллӧн став олан лунъяс дырйи Господь чорыд кабырын кутіс филистимсаясӧс.
Экронсянь Гефӧдз босьтӧм каръяссӧ филистимсаяс бӧр сетісны Израильлы. Израиль мездіс филистимсаяслӧн кипод улысь тшӧтш нагӧгӧрса муяссӧ. Аморейяскӧд израильсаяс тшӧтш олісны лӧня.
Став аслас олӧм чӧж Самуил вӧлі ёрдысьӧн Израиль войтырлы, та вӧсна сійӧ быд во кытшовтліс Вефиль, Галгал да Миспа каръяс. Самуил оліс Рама карын, сэні сійӧ тшӧтш вӧлі ёрдысьӧн. Рама карын Самуил сувтӧдіс Господьлы висьпуктанін.
Кор Самуил пӧрысьмис, сійӧ пуктіс ассьыс пиянсӧ Израиль войтырлы ёрдысьясӧ.
Ыджыд пиыслӧн нимыс вӧлі Йоиль, ичӧтыслӧн — Авий.
Найӧ вӧліны ёрдысьясӧн Бер-Шеваын.
Найӧ эз ветлыны батьыслӧн туйӧд да эз веськыда мыждыны йӧзсӧ, а сетчисны горшасьӧмӧ да босьтісны козинъяс.
Израильса юрнуӧдысьяс чукӧртчисны да мунісны Самуил дінӧ Рамаӧ. Найӧ шуисны сылы: «Тэ пӧрысь нин, а тэнад пияныд оз ветлыны тэнад туйӧд.
Инды ӧксыӧс, мед сійӧ лоас миянлы ёрдысь-веськӧдлысьӧн. Мукӧд войтыръяслӧн тай эмӧсь ӧксыяс».
Самуиллы эз во сьӧлӧм вылас, мый войтырыс корӧ ӧксыӧс, коді кутас веськӧдлыны наӧн.
Сэки сійӧ шыасис Господь дінӧ.
Господь шуис Самуиллы: «Вӧч ставсӧ налӧн корӧм серти.
Найӧ оз тэнӧ ӧтдортны, а Менӧ, медым Ме эг вӧв налӧн ӧксыӧн.
Сійӧ кадсяньыс, кор Ме петкӧді найӧс Египетысь, найӧ унаысь эновтлісны Менӧ да юрбитлісны мукӧд енъяслы. Найӧ ӧнӧдз тадзи вӧчӧны. Кыдзи найӧ вӧчисны Мекӧд, тадзи вӧчӧны и тэкӧд.
Вӧч налӧн корӧм серти.
Но ӧлӧд найӧс да висьтав, мый вӧчас налы ӧксы, коді кутас ыджыдавны на вылын».
Самуил юӧртіс Господьлысь кывъяссӧ войтырыслы, коді корис сылысь ӧксыӧс. Сійӧ висьталіс налы: «Со, мый вӧчас ӧксы, коді кутас ыджыдавны тіян вылын: сійӧ босьтас тіянлысь пияннытӧ аслас тышкайӧз лыдӧ. Ӧтиясӧс сійӧ индас веськӧдлыны тарантасъясӧн, мӧдъясӧс пуктас верзьӧмаясӧ, а коймӧдъяслы тшӧктас котӧртны аслас тарантас водзын.
Ӧтиясӧс сійӧ сувтӧдас веськӧдлыны сюрс тышкамортӧн, мӧдъясӧс — ветымынӧн. Сійӧ тшӧктас пиянныдлы гӧрны ассьыс муяссӧ да вундыны няньсӧ, вӧчны шыпуртъяс, мукӧд тышкасянтор да тарантасъяслы коланаторъяс.
Ӧксы босьтас тіянлысь нывъяснытӧ, медым найӧ дасьтасны чӧскыд дука мавтасъяс, пуасны сёян да пӧжаласны нянь.
Сійӧ босьтас тіянлысь медбур муяснытӧ, виноград да олив йӧръяснытӧ да сетас аслас кесйӧгъяслы.
Тіян мувыв быдтасысь да виноград вотӧсысь босьтас дасӧд юкӧнсӧ да сетас аслас ыджыд чина йӧзлы да аслас кесйӧгъяслы.
Тіянлысь кесйӧгъяснытӧ — айуловӧс и аньясӧс, медбур зонъяснытӧ да тіянлысь осёлъяснытӧ босьтас да кутас уджӧдны ас вылас.
Тіян ыжъясысь дасӧд юкӧнсӧ сійӧ аслыс босьтас, а асьныд ті лоанныд кесйӧг туйынӧсь.
Ті кутанныд ойзыны асланыд ӧксыысь, кодӧс ті бӧрйинныд, но Господь сэки оз вочавидз тіянлы».
Израиль войтыр эз кӧсйы кывзыны Самуилӧс, найӧ шуисны: «Мед ӧксы ыджыдалас миян вылын. Сэки ми мукӧд войтыр кодь лоам: ӧксы лоас миянлы ёрдысьӧн, кутас ветлыны миянкӧд тышъясӧ да веськӧдлыны сэні».
Самуил кывзіс войтырыслысь кывъяссӧ, сэсся ставсӧ висьталіс Господьлы.
Господь шуис Самуиллы: «Кывзы найӧс. Пукты налы ӧксыӧс».
Сэки Самуил тшӧктіс Израиль войтырлы быдӧнлы мунны аслас карӧ.
Венямин чужанкотырын вӧлі тӧдчана морт, шуисны сійӧс Кис. Кис вӧлі Авиэллӧн пи, Авиэл — Церорлӧн, Церор — Бекоратлӧн, Бекорат — Афийлӧн.
Кислӧн вӧлі Саул нима пи — том да синмӧ шыбитчана зон.
Израильса зонъяс пиысь сійӧ вӧлі медся мича, став йӧзсьыс юрӧн ыджыд.
Ӧтчыд Кислӧн, Саул батьлӧн, вошисны осёлъясыс. Кис шуис Саул пиыслы: «Босьт аскӧдыд ӧти кесйӧгӧс да ветлы корсьны осёлъясӧс».
Саул вуджис кесйӧгыскӧд Ефрем керӧсвыв му, Шалиша му да Шаалим му, но эз аддзы осёлъяссӧ.
Найӧ кытшовтісны ставнас Венямин му, но эз аддзыны осёлъяссӧ.
Кор найӧ воисны Цуф муӧ, Саул шуис кесйӧгыслы: «Вай бӧр мунам гортӧ. Батьӧй вунӧдас вошӧм осёлъяссӧ да пондас миян вӧсна шогсьыны».
Но кесйӧг шуис: «Тайӧ карас олӧ Енлӧн морт, йӧзыс сійӧс пыдди пуктӧны.
Мый сійӧ шуӧ, инӧ.
Ветлам сы ордӧ, гашкӧ, сійӧ индас миянлы, кодарланьӧ мунны».
Саул воча шуис кесйӧгыслы: «Мунам кӧ, мый ми сетам сылы?
Нянь нопным куш, весиг козинтор абу, мед сетны Енлӧн мортлы.
Мый миян эм?»
Сауллӧн кесйӧг шуис: «Менам эм этшаник эзысь сьӧм.
Ме сета сійӧс Енлӧн мортлы, и сійӧ висьталас, кытчӧ мунны миянлы».
Войдӧр Израильын морт кӧ кӧсйис мыйкӧ юавны Енлысь, сійӧ шуліс, ветлам пӧ тӧдысь-аддзысь дінӧ, ӧд пророкъясӧс шулісны тӧдысь-аддзысьясӧн.
«Бур, — шуис Саул, — ветлам».
Сэсся найӧ мунісны сійӧ карас, кӧні оліс Енлӧн морт.
Кар дінӧ матыстчигӧн найӧ паныдасисны вала мунысь нывъяскӧд. Нывъяслысь юалісны, тані-ӧ тӧдысь-аддзысьыс олӧ.
Нывъяс вочавидзисны: «Тані.
Сійӧ тіян водзвылын локтіс карас, ӧд талун мыльк вылын войтыр кутас вись вайны. Тэрмасьӧй!
Ті суанныд сійӧс, ӧд сійӧ эз на пет карсьыс, медым мунны вись ваян мыльк вылӧ сёйны.
Йӧзыс оз кутны сёйны, кытчӧдз сійӧ оз лок да оз бурси вайӧм висьсӧ. Та бӧрти корӧмаяс вӧлисти кутасны сёйны.
Мунӧй, ті сійӧс суанныд на».
Найӧ мунісны карӧ.
Кар шӧрас налы паныдасис Самуил. Сійӧ буретш вӧлі петӧ карсьыс, мед кайны вись ваян мыльк вылӧ.
Сауллӧн локтӧдз воддза луннас Господь восьтіс Самуиллы:
«Аски тайӧ кадас Ме мӧдӧда тэ дінӧ Венямин муысь мортӧс. Тэ мавтышт сійӧс, пукты юралысьӧ Менам Израиль войтырлы. Сійӧ мездас Менсьым войтырӧс филистимсаяслӧн киысь, ӧд Ме видзӧдлі Аслам войтыр вылӧ да кылі налысь ойзӧмсӧ».
Кор Самуил аддзис Саулӧс, Господь шуис сылы: «Со, тайӧ мортыс йылысь Ме висьтавлі тэныд.
Сійӧ кутас веськӧдлыны Менам войтырӧн».
Саул матыстчис Самуил дінӧ карса дзиръя дорӧ да шуис: «Висьтав меным, кӧні тӧдысь-аддзысьлӧн керкаыс».
Самуил вочавидзис: «Ме тӧдысь-аддзысьыс. Кай ме водзвылын вись ваян мыльк вылас.
Талун ті кутанныд сёйны мекӧд, а аски асывнас мунанныд. Мунтӧдзыд ме вочавидза став тэнад юалӧм вылӧ, мый эм сьӧлӧмад.
Эн шогсьы куим лун сайын вошӧм осёлъясыд вӧсна, ӧд найӧ сюрисны нин.
Кодлы нӧ Енмыс дасьтӧма став бурсӧ Израильын?
Абу-ӧ тэныд да тэнад рӧдлы?»
Саул шуис: «Мыйла тэ меным тайӧс висьталан? Ме ӧд Венямин чужанкотырысь, сійӧ Израиль котыръясысь медічӧт. И менам рӧдӧй Венямин чужанкотырын абу тӧдчана».
Самуил вайӧдіс Саулӧс да сылысь кесйӧгсӧ гажӧдчанінӧ да пуксьӧдіс найӧс пызан сайӧ медбуринас, кӧні пукалісны нин комын корӧм морт.
Пусьысьлы Самуил шуис: «Вай сійӧ яйсӧ, мый ме сеті тэныд да тшӧкті торйӧдны».
Пусьысь вайис задвыв яйсӧ да пуктіс Саул водзӧ.
Самуил шуис Сауллы: «Тайӧ яйсӧ торйӧдӧма тэныд. Босьт да сёй. Сійӧс видзӧма тэныд тайӧ гажӧдчан луныс кежлӧ. Войтырсӧ ме кори татчӧ гажӧдчыны».
Сійӧ лунӧ Саул да Самуил ӧтлаын пажнайтісны.
Сэсся вись ваян мыльк вылысь найӧ бӧр лэччисны карас. Самуил да Саул пукалісны керка вевт вылын да сёрнитісны. [Сауллы вольсалісны, и сійӧ узис сэні.]
Садьмисны найӧ водз асывнас, шонді петігас на. Самуил горӧдіс керка вевт вылын узьысь Сауллы: «Чеччы. Ме колльӧда тэнӧ».
Саул чеччис, и найӧ ӧтлаын мӧдӧдчисны.
Кар помас воигӧн Самуил шуис Сауллы: «Шу кесйӧгыдлы, мед водзӧ мунас». Кесйӧг муніс водзӧ.
Сэки Самуил шуис: «Саул, сувтыштлы. Ме висьтала тэныд, мый шуис Ен».
Самуил босьтіс вый тыра доз да кисьтіс Сауллы юр вылас. Сэсся окыштіс сійӧс да шуис: «Господь мавтыштӧма тэнӧ, мед пуктыны тэнӧ юралысьӧ Аслас войтырлы [Израильын. Тэ лоан ӧксыӧн Господьлӧн войтырлы, мездан найӧс на гӧгӧр олысь вӧрӧгъясысь. Со, тэныд пас, мый Ачыс Господь мавтыштӧма тэнӧ ӧксыӧ, мед веськӧдлыны Сылӧн войтырӧн].
Ме дорысь мунӧм бӧрын Венямин муын Селсаын Ракель дзебанін дорын тэ паныдасян кык морткӧд. Найӧ шуасны тэныд: “Осёлъясыд, кодъясӧс тэ корсян, сюрисны. Батьыд вунӧдіс нин найӧс, ӧд сійӧ майшасьӧ тэ вӧсна. Юасьӧ, мый пӧ меным вӧчны”.
Сэтысянь водзӧ мунан да воан Тавор тупуа раскӧ. Сэні тэ паныдасян Вефильӧ Ен дінӧ мунысь куим морткӧд: ӧтиыс нуӧ куим кӧзапи, мӧдыс — куим нянь, коймӧдыс — кучик дозйын вина.
Найӧ чолӧмасясны тэкӧд да сетасны тэныд кык нянь, и тэ босьтан няньсӧ.
Та бӧрти тэ воан Енлӧн керӧс вылӧ, кӧні сулалӧны филистимса тышкайӧз [асланыс юралысьяскӧд]. 
Карас пыригад тэ паныдасян вись ваян мыльк вылысь лэччысь пророкъяскӧд. Ставныс найӧ пророкалӧны, а на водзвылын мунӧны арфаӧн, тимпанӧн, пӧлянӧн да гуслиӧн ворсысьяс.
Господьлӧн Лолыс лэччас тэ вылӧ, и накӧд тшӧтш тэ кутан пророкавны да лоан мӧдпӧлӧс мортӧн.
Кор тайӧ ставыс инас, сэки вӧч, мый вермана тэныд вӧчнысӧ, ӧд тэкӧд лоӧ Ен.
Сэсся мун Галгалӧ. Ме локта сэтчӧ тэ дінӧ, мед вайны сотан да бурасян висьяс.
Виччысь менӧ сэні сизим лун. Ме локта да висьтала, мый тэныд вӧчнысӧ».
Сӧмын Саул бергӧдчис, мед мунны Самуил дорысь, Енмыс сетіс сылы выль сьӧлӧм. Сійӧ лунӧ иніс ставыс, мый Самуил шуис Саул йылысь.
Вись ваян мыльк дорӧ воигӧн Саул да кесйӧгыс паныдасисны пророкъяскӧд. Сэки Енлӧн Лов лэччис Саул вылӧ, и сійӧ накӧд тшӧтш кутіс пророкавны.
Саулӧс тӧдысьяс кор аддзисны, мый сійӧ пророкъяскӧд тшӧтш пророкалӧ, ӧта-мӧдныслысь юасисны: «Мый лоӧма Кислӧн пикӧд?
Саулыс ӧмӧй тшӧтш пророк?»
Йӧз пӧвстысь кодкӧ шуис: «А мукӧдыс нӧ кодлӧн пияныс?»
Тайӧ лоӧмтор бӧрас паськаліс Саул йылысь шуӧм: «Саул ӧмӧй тшӧтш пророк?»
Пророкавны дугдӧм бӧрын Саул кайис вись ваян мыльк вылӧ.
Сауллӧн дядьыс юаліс сылысь да кесйӧгыслысь: «Кӧні ті вӧлінныд?»
Саул вочавидзис: «Осёлъясӧс ветлім корсьны. Найӧс ми эгӧ аддзӧй, та вӧсна мунім Самуил дінӧ».
Дядьыс шуис: «Висьтав, мый тіянлы шуис Самуил».
Саул вочавидзис: «Сійӧ шуис, осёлъясыд пӧ сюрисны нин».
А мый Самуил шуис сійӧс ӧксыӧ пуктӧм йылысь, дядьыслы Саул эз висьтав.
Самуил чукӧртіс Израиль войтырӧс Миспаӧ Господь водзӧ.
Налы шуис: «Господь, Израильлӧн Ен, тадзи висьталӧ: “Ме петкӧді тіянӧс Египетысь, мезді египетсаяслӧн кипод улысь да тіянӧс нартитысь мукӧд войтыръяслӧн кипод улысь”.
Но ті ӧтдортінныд ассьыныд Еннытӧ, коді мездӧ тіянӧс быд лёксьыс да сьӧкыдлунсьыс. Ті шуинныд Сылы: “Пукты миянлы ӧксыӧс”. 
Сідзкӧ, ӧні сувтӧй Господь водзӧ — быдӧн асланыд чужанкотыр да рӧд сертиныд».
Самуил тшӧктіс матыстчыны израильса быд чужанкотырлы. На пиысь пудъясьӧмӧн вӧлі бӧрйӧма Веняминлысь чужанкотырсӧ.
Сэсся тшӧктіс Венямин чужанкотырысь матыстчыны быд рӧдлы. Пудйыс уси Матри рӧдлы.
Матри рӧдысь Самуил корис став айуловсӧ, и пудйыс уси Сауллы, Кислӧн пилы.
Кутісны корсьны сійӧс, но эз аддзыны.
Сэки юалісны Господьлысь, локтас оз Саул.
Господь вочавидзис, сійӧ пӧ кӧлуй чукӧр пытшкын дзебсясьӧ.
Котӧрӧн мунісны да вайӧдісны сэтысь Саулӧс. Йӧз пӧвстас сувтіс да, ставсьыс юрӧн ыджыд вӧлі.
Самуил шуис став Израиль войтырлы: «Аддзанныд, кодӧс бӧрйис Господь?
Войтыр пӧвстаным мӧдыс сы кодьыс абу».
Сэки став йӧзыс гораа горӧдісны: «Мед олас ӧксы!»
Самуил висьталіс войтырыслы, мый вермас вӧчны накӧд ӧксы. Ставсӧ тайӧс гижис небӧгӧ да пуктіс вежаинӧ Господь водзӧ.
Сэсся лэдзис войтырсӧ мунны гортаныс.
Саул тшӧтш муніс гортас Гиваӧ.
Сыкӧд ӧтлаын мунісны збой йӧз, кодъяслы сьӧлӧмас инмӧдчис Енмыс.
А шогмытӧм йӧз шуасисны, кутшӧм пӧ сійӧ мездысь миянлы.
Найӧ нинӧмӧ пуктісны Саулӧс, эз вайны сылы козинъяс.
Но Саул быттьӧ эз казяв тайӧс.
[Тӧлысь мысти] локтіс аммон войтырысь Нахаш да кытшаліс Галаад муын Явис кар.
Явис карын олысьяс шуисны Нахашлы: «Кӧртав миянкӧд бурасян йитӧд, и ми пондам кесъявны тэныд».
Аммон войтырысь Нахаш шуис налы: «Ме кӧртала тіянкӧд йитӧд, но медводз быдӧнлысь тіянлысь перъя веськыд синтӧ. Тадзи янӧда став Израильӧс».
Явис карса юрнуӧдысьяс воча шуисны Нахашлы: «Сет миянлы сизим лун. Ми мӧдӧдам юӧртысьясӧс став Израиль му пасьтала. Некод кӧ оз отсав миянлы, ми сетчам тэныд».
Мӧдӧдӧмаяс локтісны Гиваӧ, Сауллӧн чужан карӧ, да висьталісны войтырлы Нахашлысь кывъяссӧ.
Ставныс ырзӧмӧн кутісны бӧрдны.
Саул тайӧ кадас вӧлі локтӧ ӧшъясыс бӧрся видз-му вывсьыс. Сійӧ юаліс: «Мый лои войтырыскӧд? Мыйла найӧ бӧрдӧны?»
Сылы висьталісны Явис карса олысьяссянь вайӧм юӧрсӧ.
Тайӧс кылӧм бӧрын Енлӧн Лов лэччис Саул вылӧ, сы пытшкын кыптіс скӧрлун.
Сійӧ босьтіс кык ӧшкӧс да кераліс найӧс, яйторъяссӧ ыстіс юӧр вайысьяскӧд став Израиль му пасьтала да тшӧктіс шуны: “Коді оз пет тышӧ Саулкӧд да Самуилкӧд, сылысь ӧшъяссӧ тадзи жӧ лоӧ кералӧма”. 
Господьысь полӧм босьтіс войтырсӧ, и найӧ ставныс ӧтитӧг мунісны Саул бӧрся.
Везекын Саул видзӧдаліс локтӧм йӧзӧс: Израильысь вӧлі куимсё сюрс морт, Иуда муысь — комын сюрс морт.
Юӧр вайысьяслы шуисны: «Висьталӧй Галаад муын Явис карын олысьяслы, аски пӧ луншӧр кадӧ воас тіянлы отсӧг».
Юӧртысьяс бӧр локтісны Явис карӧ да ставсӧ висьталісны сэтчӧс олысьяслы. Йӧзыс пондісны нимкодясьны.
Явис карын олысьяс шуисны Нахашлы: «Аски ми локтам тіян дінӧ. Вӧчӧй миянкӧд, мый кӧсъянныд».
Аскинас Саул юкис ассьыс тышкайӧзсӧ куим пельӧ. Асъядорыс найӧ пырисны аммон тышкайӧзлӧн чукӧртчанінӧ да луншӧр кадӧдз пасьвартісны найӧс.
Ловйӧн кольӧмаяс пышйисны-разалісны.
Сэки Израиль войтыр шуис Самуиллы: «Вайӧдӧй сійӧ йӧзсӧ, кодъяс шуасьлісны, мый Саул оз шогмы ӧксы туйӧ. Ми виам найӧс».
Но Саул шуис: «Тайӧ лунӧ некодӧс оз ков вины, ӧд талун Господь мездіс Израильӧс».
Самуил шуис войтырыслы: «Мунамӧй Галгалӧ. Саулӧс выльпӧв пуктам ӧксыӧ».
Ставныс мунісны Галгалӧ, и сэні Господь водзын пуктісны Саулӧс ӧксыӧ. Сэсся вайисны Господьлы бурасян висьяс.
Израиль войтыр Саулкӧд ёна нимкодясис-гажӧдчис сэні.
Самуил шуис Израиль войтырлы: «Ме ставсӧ вӧчи тіян корӧм серти — пукті тіянлы ӧксыӧс. Ӧні сійӧ кутас веськӧдлыны тіянӧн.
Ме пӧрысь нин, дай дзор нин, но пиянӧй лоӧны тіянкӧд.
Том кадсянь талунъя лунӧдз ме вӧлі тіянлы веськӧдлысьнас.
Ӧні Господь водзын да Сылӧн мавтыштӧмаыс водзын висьталӧй, босьтлі-ӧ ме кодлыськӧ ӧшсӧ либӧ осёлсӧ? Пӧръявлі-ӧ да дзескӧдлі-ӧ кодӧскӧ? Сибӧдлі-ӧ кодсянькӧ козин, медым сылӧн лёк вӧчӧм вылӧ синмӧс тупкыны? Висьталӧй, и ме ставсӧ бӧр сета тіянлы».
Йӧзыс вочавидзисны: «Тэ миянӧс эн пӧръявлы, эн дзескӧдлы да некодлысь нинӧм эн босьтлы».
Самуил шуис налы: «Господь кылӧ, и Сылӧн мавтыштӧмаыс талун кылӧ тіянлысь висьталӧмтӧ, мый ме сайын нинӧм абу».
Ставныс шуисны: «Господь кылӧ».
Сэсся Самуил шыасис йӧзыс дінӧ: «[Господь кылӧ.] Господь бӧрйис Мӧисейӧс да Ааронӧс, и петкӧдіс тіянлысь батьяснытӧ Египет муысь.
Ӧні сувтӧй, а ме кута мыждыны тіянӧс Господь водзын. Кута казьтывны тіянлы Сылысь веськыд уджъяссӧ, мый Сійӧ вӧчис тіянлы да тіян батьяслы.
Яковлӧн Египетӧ локтӧм бӧрын нартитӧм вӧсна батьясныд ойзӧмӧн-бӧрдӧмӧн шыасисны Господь дінӧ. Сэки Сійӧ мӧдӧдіс Мӧисейӧс Ааронкӧд, и найӧ петкӧдісны тіянлысь батьяснытӧ Египетысь да овмӧдісны найӧс татчӧ.
Но батьясныд вунӧдісны Господьӧс, ассьыныс Енсӧ. Сэки Господь сетіс найӧс хацорса тышкайӧзӧн Сисар нима веськӧдлысь киӧ, филистимсаяс киӧ да моавса ӧксы киӧ. Найӧ ставныс тышкасисны батьясныдлы паныд.
Но батьясныд бӧрдӧмӧн шыасисны Господь дінӧ да шуисны: “Ми мыж вӧчим — эновтім Господьӧс да кесъялім-юрбитім Ваал да Астарта идолъяслы. Мезды миянӧс вӧрӧг киысь, ми кутам кесъявны Тэныд”. Сэки Господь мӧдӧдіс Ероваалӧс, Варакӧс, Еффайӧс, Самуилӧс да мездіс тіянӧс став вӧрӧгысь, и ті олінныд повтӧг. Ӧксынас тіян вӧлі Господь, тіян Енныд.
Но кор ті аддзинныд, мый аммон войтырлӧн Нахаш ӧксы уськӧдчӧ тіян вылӧ, ті шуинныд меным: “Миянлы колӧ ӧксы, сійӧ мед ыджыдалас миян вылын”.
Господь пуктіс тіянлы ӧксыӧс, кодӧс ті коринныд да бӧрйинныд.
Понданныд кӧ повны Господьысь, кесъявны Сылы, кывзыны Сійӧс, да онӧ кӧ кутӧй пыксьыны Сылӧн тшӧктӧмъяслы, но понданныд тіян вылын ыджыдалысь ӧксыныдкӧд ветлыны асланыд Господь Енлӧн туйӧд, сэки Господь доръяс тіянӧс.
Онӧ кӧ кутӧй кывзыны Господьӧс, а Сылы паныд кыпӧдчанныд, сэки Господь лэптас Ассьыс кисӧ тіянлы паныд, кыдзи лэптіс кисӧ батьясныдлы паныд.
Ӧні сулалӧй да видзӧдӧй, кутшӧм ыджыдтор тіян син водзын вӧчас Господь.
Ӧні шобді вундан кад.
Но ме кӧ шыася Господь дінӧ, Сійӧ ыстас гым да зэр. Тадзи ті аддзанныд да тӧдмаланныд, кутшӧм ыджыд мыж ті вӧчинныд Господьлӧн син водзын, кор ті коринныд аслыныд ӧксыӧс».
Самуил шыасис Господь дінӧ, и Господь ыстіс сійӧ лунӧ гым да зэр.
Ставнысӧ полӧм босьтіс Господьысь да Самуилысь.
Йӧзыс шуисны Самуиллы: «Кевмысь миян вӧсна Господьлы, аслад Енлы, медым ми, тэнад кесйӧгъяс, эгӧ кулӧй.
Ми корим ӧксыӧс, тадзи асланым мыжъяс дінӧ содтім нӧшта ӧти мыж».
Самуил вочавидзис йӧзыслы: «Энӧ полӧй. Дерт, ті мыж вӧчинныд, но сӧмын энӧ кежӧй Господьысь, а кесъялӧй Сылы став сьӧлӧмнаныд. Энӧ мунӧй идолъяс бӧрся, кодъяс оз вермыны отсавны да мездыны тіянӧс, ӧд найӧ — нинӧм.
Аслас ыджыд нимыс вӧсна Господь оз коль тіянӧс, Ассьыс войтырсӧ. Господь бӧрйис тіянӧс, мед ті вӧлінныд Сылӧн войтырӧн.
Ме ог лэдз ачымӧс мыж вӧчны Господьлы паныд — ог дугды кевмысьны тіян вӧсна. Ме веськӧда тіянӧс бур да веськыд туй вылӧ.
Сӧмын полӧй Господьысь, кесъялӧй Сылы веськыда да став сьӧлӧмсяньныд. Ті ӧд асьныд аддзылінныд, кутшӧм ыджыд уджъяс Сійӧ вӧчис тіян пӧвстын.
А кутанныд кӧ водзӧ вӧчны лёксӧ, сэки куланныд ті, и тіян ӧксыныд».
Сауллӧн ӧксыӧ пуксьӧмсянь коли во. Мӧд вонас Саул бӧрйис Израиль войтырысь аслыс тышкайӧзӧс — куим сюрс мортӧс.
Кык сюрсыс вӧлі Саулкӧд Микмасын да Вефиль керӧсын, а ӧти сюрсыс вӧлі Ионафанкӧд Гиваын Венямин муын.
Мукӧдсӧ Саул лэдзис гортаныс.
Геваын* Ионафан пасьвартіс филистимсаяслысь тышкакотырсӧ.
Та йылысь кывсис мукӧд филистимса тышкайӧзлы. Сэки Саул тшӧктіс буксыны буксанӧн Израиль му пасьтала, медым еврейяс тӧдмалісны, мый Саул пасьвартӧма филистимса тышкакотырӧс, и филистимсаяс лӧгалӧны израильсаяс вылӧ.
Та йылысь кылӧм бӧрын став Израиль войтырыс чукӧртчис Саул дінӧ Галгалӧ.
Филистимсаяс лӧсьӧдчисны петны тышӧ Израильлы паныд. Налӧн вӧлі комын сюрс тарантас да квайт сюрс верзьӧма, а пода йӧзыс — саридздор лыа мында.
Филистимса тышкайӧз локтісны да сувтісны Микмасӧ, Бет-Авенсянь асыввывладорӧ.
Кор израильсаяс казялісны, мый филистимсаяс топӧдӧны найӧс, дзебсисны кырта горсъясӧ, сёнъясӧ, изкыртаяс костӧ, важ гуасянінъясӧ да косьмӧм вайӧртӧдъясӧ.
Мукӧдыс вуджисны Йӧрдан ю сайӧ, Гад чужанкотырлӧн муӧ да Галаад муӧ.
Саул кольччис Галгалӧ. Йӧзыс, кодъяс вӧліны сыкӧд, ёна полісны.
Сизим лун чӧж, Самуиллӧн индӧм кадӧдз, Саул виччысис сійӧс. Но Самуил век на эз лок Галгалӧ, и войтырыс кутіс мунавны Саул дінысь.
Сэки Саул шуис: «Вайӧдӧй пемӧсъясӧс, мед вайны Енлы сотан вись да бурасян висьяс».
Сэсся Саул вайис Енлы сотан вись.
Вись вайӧмыс муртса помасис, и Самуил локтіс.
Саул воча петіс сылы, мед чолӧмасьны сыкӧд.
Но Самуил шуис: «Мый тэ вӧчин?»
Саул вочавидзис: «Урчитӧм кадыс коли нин, а тэ век на эн лок. Войтырыс кутіс мунавны ме дінысь, а филистимсаяс вӧліны нин Микмасынӧсь.
Сэки ме мӧвпышті, ӧні, мися, локтасны филистимсаяс Галгалӧ да уськӧдчасны ме вылӧ, а ме весиг эг на шыась Господь дінӧ. Та вӧсна шуи, мый ачым вая сотан висьсӧ».
Самуил шуис Сауллы: «Тэ лёка вӧчин. Тэ торкин аслад Господь Енлысь тэныд сетӧм тшӧктӧмсӧ. Тэ кӧ вӧчин Господьлӧн тшӧктӧм серти, Сійӧ эськӧ пыр кежлӧ вынсьӧдіс тэнсьыд ӧксыалӧмтӧ Израильын.
Но ӧні тэнад ӧксыалӧмыд оз ло дыр.
Господь корсяс Аслыс мортӧс сьӧлӧм сертиыс да пуктас сійӧс Аслас войтырлы юралысьӧ, ӧд тэ эн вӧч Господьлӧн тшӧктӧм серти».
Самуил чеччис да муніс Галгалысь Гиваӧ Венямин муӧ. 
[Гиваӧ муніганыс Саулкӧд кольччӧм йӧзыс паныдасисны вӧрӧгкӧд. Вӧрӧг уськӧдчис на вылӧ.] 
Гиваын Саул арталіс-гижаліс ассьыс йӧзсӧ, лои морт квайтсё.
Аслас йӧзкӧд да Ионафан пиыскӧд Саул кольччис Геваӧ Венямин муӧ. [Найӧ бӧрдісны, ӧд] филистимса тышкайӧз вӧліны Микмасынӧсь.
Филистимсаяс ыстісны куим тышкакотыр, медым куштыны му. Ӧти тышкакотыр муніс Офралань, Шуал муӧ, мӧд тышкакотырыс веськӧдчис Бет-Хоронлань, а коймӧд тышкакотырыс муніс Цевоим ковтысӧ нуӧдан туйӧд овтӧминлань.
Израиль му пасьтала эз вӧвны дорччысьяс, ӧд филистимсаяс эз лэдзны еврейяслы дорны шыяс да шыпуртъяс.
Израильсаяслы колӧ вӧлі ветлыны филистимсаяс дінӧ, медым лэчтыны гӧр-чернысӧ да кокан-чарланысӧ. Чуктавліс кӧ гӧрныс, коканныс, вила-черныс либӧ колӧ вӧлі веськӧдны бедьлысь кӧрт помсӧ, найӧ мынтылісны ыджыд дон.
Та вӧсна [Микмасын] тышкасигӧн Саул да Ионафан йӧзлӧн эз вӧвны шыпуртъяс ни шыяс, вӧлі сӧмын Сауллӧн да Ионафан пиыслӧн.
Филистимсаяслӧн водзын мунысь тышкакотырыс сувтіс Микмас кардорса сёртасӧ.
Ӧтчыд Сауллӧн Ионафан пиыс шуис шыпурт новлӧдлысь кесйӧгыслы: «Мунам сёртас мӧдарладорас филистимса тышкакотыр дінӧ».
Но аслас батьыслы та йылысь эз висьтав.
Саул вӧлі Гива кар дорын Мигронын, гранат пу улын.
Сыкӧд сэки вӧлі квайтсё гӧгӧр морт. На пӧвстын вӧлі Ахий, Силомын Господьлы кесъялысь поп, кодлӧн вӧлі ефод. Ахий вӧлі Ахитувлӧн пи. Ахитув вӧлі Икаводлӧн вок, найӧ вӧліны Пинеслӧн пиян, а Пинес вӧлі Илий поплӧн пи.
Сауллӧн йӧзыс эз тӧдлыны Ионафанлысь мунӧмсӧ.
Ионафан кӧсйис матыстчыны филистимса тышкакотыр дінӧ кык ёсь изкырта костын сулалысь сёртасӧд. Ӧтиыслӧн нимыс вӧлі Босес, мӧдыслӧн — Сене.
Ӧтиыс чурвидзис войвывладорсянь да видзӧдіс Микмаслань, мӧдыс чурвидзис лунвывладорсянь да видзӧдіс Гевалань.
Ионафан шуис аслас кесйӧглы: «Лок мунам тайӧ вундыштчытӧм тышкакотырыс дінӧ.
Гашкӧ, Господь отсалас миянлы. Сійӧ вермӧ мездыны Ассьыс войтырсӧ уна йӧз пыр либӧ некымын морт пыр».
Кесйӧгыс вочавидзис: «Вӧч, кыдзи сьӧлӧмыд висьталӧ.
Ме тэкӧд. Муна, кытчӧ шуан».
Ионафан шуис: «Ми мунам филистимсаяс дінӧ да петкӧдчам налы.
Найӧ кӧ шуасны миянлы, сувтӧй, ми пӧ асьным матыстчам тіян дінӧ, сэки ми сувтам да огӧ кайӧй на дінӧ.
А тшӧктасны кӧ кайны на дінӧ, ми каям. Тайӧ лоӧ миянлы пасӧн, мый Господь сетіс найӧс миян киӧ».
Кор Ионафан аслас кесйӧгкӧд петкӧдчис филистимса тышкакотырлы, филистимсаяс пондісны шуасьны, видзӧдлӧй пӧ, еврейяс петалӧны сайӧдчанінсьыныс.
Найӧ горӧдісны Ионафанлы да сылӧн кесйӧглы: «Кайӧй миян дінӧ, мыйкӧ висьталам тіянлы».
Ионафан шуис кесйӧгыслы: «Лок ме бӧрся. Господь сетіс найӧс Израиль киӧ».
Кинас и кокнас кутчысьӧмӧн Ионафан кавшасис вывлань. Кесйӧгыс сы бӧрся.
Ионафан водзын филистимсаяс усьласисны муас. Кесйӧгыс муніс Ионафан бӧрся да виаліс найӧс.
Тайӧ медводдза уськӧдчылӧм дырйи Ионафан да сылӧн кесйӧгыс виисны матӧ кызь мортӧс. Тышыс муніс ичӧтик эрд вылын, кодӧс позис лун джынйӧн гӧрны кык ӧшкӧн.
Филистимсаяслӧн чукӧртчанінын да тышкасянінын став йӧзыс зэв ёна повзисны.
Водзын мунысь да мусӧ куштысь тышкакотыръясӧс дзӧрӧм босьтіс. [Найӧ весиг эз кӧсйыны тышӧ петны.] 
Муыс сыркмунліс. Господь ыстіс йӧзыслы полӧм.
Венямин муын Гива карын Сауллӧн тышкайӧзыс аддзисны, мый филистимсаяс пышйӧны коді кытчӧ.
Сэки Саул шыасис аслас йӧз дінӧ, тӧдмалӧй пӧ, эз-ӧ кодкӧ миян пӧвстысь тышӧ пет.
Видзӧдлісны да, Ионафан да сылӧн кесйӧгыс абуӧсь.
Саул тшӧктіс Ахий поплы вайны Енлысь кудсӧ. Енлӧн кудйыс сэки вӧлі Израиль ордын.
Кор Саул да Ахий поп сёрнитісны на, филистимса тышкайӧзлӧн шызьӧмыс [паськаліс да] ӧтарӧ содіс.
Сэки Саул шуис Ахийлы: «Кудйыд оз нин ков».
Саул чукӧртіс ассьыс тышкайӧзсӧ, и найӧ котӧртісны тышкасянінӧ. Филистимсаяс сэтшӧма вӧлі шӧйӧвошӧмаӧсь, мый виалісны ӧта-мӧднысӧ.
Еврейяс, кодъяс водзынсӧ вӧліны филистимса дор да ветлывлісны накӧд тышӧ, вуджисны Сауллӧн да Ионафанлӧн йӧз дінӧ, асланыс Израиль войтыр дінӧ.
Ефрем керӧсвыв муын дзебсясьысь израильсаяс кор кылісны, мый филистимсаяс пышйӧны, тшӧтш ӧтувтчисны израильса тышкайӧзкӧд да петісны тышӧ.
Сійӧ лунӧ Господь мездіс Израиль войтырӧс.
Тышыс воис Бет-Авенӧдз. 
[Саулкӧд ставнас йӧзыс вӧлі дас сюрс морт. Тышыс муніс Ефрем керӧсвыв му пасьтала, став карас.]
Израильса тышкайӧз вӧлі ёна мудзӧмаӧсь.
Ӧд таӧдз Саул шуис налы: «Ёрӧма быдӧнӧс, коді рытӧдзыс, вӧрӧглысь водзӧс перйытӧдз, мыйкӧ сёяс». Сійӧ [мӧвпышттӧг] тшӧктіс тышкайӧзыслы кыв сетны. Та вӧсна найӧ нинӧм эз сёйны.
Став тышкайӧзыс мунісны вӧрӧ. Сэні вӧліны мазі позъяс, маыс весиг войталіс му вылас.
Вӧрӧ пыриганыс найӧ аддзисны масӧ, но некод эз инмӧдчы, ӧд полісны ёрӧмысь.
Ионафан эз кывлы, мый батьыс тшӧктӧма йӧзыслы кыв сетны. Сійӧ нюжӧдіс ассьыс бедьсӧ да чуньыштіс мазі позйысь масӧ. Масӧ видлӧм бӧрын сылӧн синмыс югзис.
Ӧти морт шуис Ионафанлы: «Тэнад батьыд тшӧктіс йӧзыслы кыв сетны. Шуис, коді пӧ талун сёяс, сійӧс лоӧ ёрӧма.
Сёйтӧмнысла йӧзыслӧн эбӧсыс бырис».
«Шог суис тайӧ войтырсӧ батьӧй вӧсна», — майшасис Ионафан.
Сэсся шуис: «Видзӧдлӧй, менам синмӧй югзис масӧ видлӧм бӧрын.
Талун кӧ йӧзыс сёйыштісны вӧрӧгӧн кольӧм сёян, позис эськӧ унджык филистимсаӧс пасьвартны».
Сійӧ лунӧ израильсаяс вӧтлісны филистимсаясӧс Микмассянь Аялонӧдз. Йӧзыс дзикӧдз эбӧстӧммисны.
Сэки найӧ уськӧдчисны босьтавны филистимсаяслысь ыжъяссӧ, ӧшъяссӧ да куканьяссӧ. Сэсся му вылас начкисны найӧс да сёйисны яйсӧ вир сорнас.
Сауллы висьталісны, тэнад йӧзыд пӧ мыж вӧчӧны Господьлы паныд — сёйӧны вир сора яй.
Саул шуис йӧзыслы: «Ті мыжминныд.
Путкыльтӧй меным татчӧ ыджыд из».
Сэсся шуис: «Мунӧй да висьталӧй йӧзыслы, мед быдӧн вайӧдас ме дінӧ ассьыс ӧшсӧ да ыжсӧ. Тані начкысьӧй да сёйӧй. Дугдӧй мыж вӧчны Господьлы паныд — энӧ сёйӧй вир сора яйсӧ».
Войнас быдӧн вайӧдіс ассьыс ӧшсӧ [либӧ ыжсӧ] да начкис Господьлы вӧчӧм висьпуктанін вылын.
Тайӧ вӧлі Саулӧн сувтӧдӧм висьпуктанінъясысь медводдзаыс.
Сэсся Саул шуис аслас тышкайӧзлы: «Петамӧй войнас да вӧтӧдам филистимсаясӧс. Югдытӧдзыс топӧдам найӧс да весиг ӧти мортӧс ловйӧн огӧ кольӧй».
Найӧ вочавидзисны: «Вӧч, кыдзи бурджык чайтан».
Но поп шуис: «Шыасямӧй Ен дінӧ».
Саул кевмысигас юаліс Енлысь: «Вӧтӧдны-ӧ меным филистимсаясӧс?
Сетан-ӧ найӧс Израиль киӧ?»
Но Енмыс сійӧ лунӧ эз вочавидз сылы.
Сэки Саул корис ас дінас став израильса юралысьсӧ да шуис: «Тӧдмалӧй, коді мыжсӧ вӧчис. Израильӧс мездысь ловъя Господь водзын шуа: весиг кӧ менам Ионафан пиӧй мыжа, сійӧ ловйӧн оз коль».
Став йӧзыс чӧв олісны.
Саул шуис израильса тышкайӧзлы: «Ті сувтӧй ӧтарладорас, а ме аслам Ионафан пикӧд сувта мӧдарладорас».
Йӧзыс воча шуисны: «Вӧч, кыдзи бурджык чайтан».
Саул шыасис Господь дінӧ: «Господьӧй, Израильлӧн Енмӧй! 
[Мыйла Тэ талун эн вочавидз меным, Аслад кесйӧглы?] 
Уримӧн да туммимӧн* пудъясьӧм пыр петкӧдлы миянлы мыжаясӧс. Мыжа кӧ ме либӧ менам Ионафан пиӧй, мед усьӧ урим. [Мыжа кӧ Тэнад Израиль войтырыд, мед усьӧ туммим.]» 
Сэки Енмыс индіс, мый мыжаӧсь Ионафан да Саул, а йӧзыс абу мыжаӧсь.
Саул шуис: «Пудъясьӧй ме да менам Ионафан пиӧй вӧсна». [Сійӧ содтіс: «Код вылӧ Господь индас, сылы и ковмас кувны».
Но йӧзыс шуисны Сауллы: «Мед оз ло тадз!»
Но Саул сулаліс аслас шуӧм кыв вылын.
Сэсся пудъясисны.] Пудйыс уси Ионафан вылӧ.
Саул юаліс Ионафанлысь: «Висьтав, мый тэ вӧчин?»
Ионафан висьталіс: «Тайӧ бедь помнас ме видлі ма.
Сідзкӧ, меным кувны».
Саул воча шуис: «Енмыс мед ёна мыждас менӧ, тэ кӧ, Ионафан, талун он кув».
Йӧзыс шуисны Сауллы: «Мед оз ло тадз! Сійӧ ӧд вайис Израильлы ыджыд вермӧм да мездӧм.
Ми кыв сетам ловъя Господь водзын: сылӧн юр вывсьыс весиг юрси сі оз усь. Ен отсӧгӧн талун сійӧ вермис филистимсаясӧс».
Тадзи йӧзыс мездісны Ионафанӧс, и сійӧ ловйӧн коли.
Саул бӧр бергӧдчис, эз кут водзӧ вӧтӧдны филистимсаясӧс.
Филистимсаяс жӧ мунісны асланыс муӧ.
Сауллӧн ӧксыалӧмыс Израильын зумыдмис. Сійӧ тышкасис Израиль гӧгӧр олысь вӧрӧгкӧд: моав да аммон войтыръяскӧд, эдомсаяскӧд [да вефорсаяскӧд], цоваса ӧксыяскӧд да филистимсаяскӧд. Код вылӧ сійӧ уськӧдчыліс, ставнысӧ вермыліс.
Амаликъясӧс пасьвартӧмнас Саул петкӧдліс ассьыс вынсӧ. Сійӧ мездіс Израильӧс куштысьяс киысь.
Сауллысь пиянсӧ шуисны Ионафан, Ишви да Малкисуй.
Нӧшта сылӧн вӧлі кык ныв: ыджыдыслӧн нимыс вӧлі Мерова, ичӧтыслӧн — Мелкола.
Сауллӧн гӧтырыс вӧлі Ахимааслӧн Ахиноама нылыс.
Сауллӧн Нир дядьыслӧн Авенир пиыс веськӧдліс Сауллӧн тышкайӧзӧн.
Сауллӧн Кис батьыс да Авенирлӧн Нир батьыс вӧліны Авиэллӧн пиян.
Сауллӧн ӧксыалан кадӧ израильсаяс дугдывтӧг чорыда тышкасисны филистимсаяскӧд.
Кор Саул аддзывліс Израиль войтыр пӧвстысь ён да збой мортӧс, босьтліс сійӧс аслас тышкайӧз лыдӧ.
Самуил шуис Сауллы: «Господьлӧн тшӧктӧм серти ме мавтыштӧмӧн пукті тэнӧ Сылӧн Израиль войтырлы ӧксыӧ.
Ӧні тэ кывзы Господьлысь кывсӧ.
Господь Саваоф тадзи висьталӧ: “Ме эг вунӧд амалик войтырлысь лёк вӧчӧмсӧ. Эг вунӧд, кыдзи найӧ уськӧдчисны Египетысь петӧм Израиль войтыр вылӧ.
Ӧні мун да пасьварт амаликъясӧс [да ерим войтырӧс]. Бырӧд ставсӧ, мый налӧн эм. 
[Эн босьт аслыд нинӧм, но бырӧд ставсӧ да сет ёрӧм улӧ.] 
Эн жалит найӧс, виав айуловӧс и аньясӧс, челядьӧс и пузчужӧм кагаясӧс. Виав тшӧтш налысь ӧшъяссӧ, ыжъяссӧ, верблюдъяссӧ да осёлъяссӧ”».
Саул чукӧртіс тышкайӧзсӧ Телаимӧ да арталіс-гижаліс найӧс. Сылӧн вӧлі Израиль войтырысь кыксё сюрс пода, а Иуда чужанкотырысь — дас сюрс тышкаморт.
Саул воис амаликъяслӧн кар дорӧ да сувтіс сёртасӧ. Сэні дасьтысис, мед уськӧдчыны на вылӧ.
Сэтчӧс олысь кеней войтырлы ыстіс юӧр: «Петӧй да ылыстчӧй амалик войтырысь, мед ме эг бырӧд тіянӧс накӧд тшӧтш. Ті уна бурсӧ вӧчинныд Израиль войтырлы, кор найӧ локтісны Египет муысь».
Кеней войтыр кывзысис да ылыстчис амалик войтырысь.
Саул пасьвартіс амаликъясӧс. Тышыс муніс Хавиласянь Шурӧдз, мый Египет дорын.
Амаликъяслысь Агаг ӧксысӧ Саул босьтіс ловйӧн, а войтырсӧ виаліс шыпуртӧн [виаліс тшӧтш ерим войтырӧс]. Дзикӧдз бырӧдіс найӧс.
Саул аслас йӧзкӧд жалитісны Агаг ӧксыӧс. Амаликъяслысь медбур ыжъяссӧ, ӧшъяссӧ, тшӧгӧдӧм баляяссӧ да став дона эмбурсӧ эз кӧсйыны бырӧдны, бырӧдісны сӧмын ковтӧмсӧ да лёкджыксӧ.
Сэки Самуиллы вӧлі Господьсянь кыв:
«Ме чорыда жалита, мый пукті Саулӧс ӧксыӧ. Сійӧ бергӧдчис Меысь да эз вӧч Менам тшӧктӧм серти».
Самуил шогӧ усис. Войбыд сійӧ кевмысис Господьлы.
Водз асывнас Самуил чеччис да мӧдӧдчис Саул дінӧ.
Но Самуиллы юӧртісны, Саул пӧ мунӧма Кармил карӧ, мед сувтӧдны сэні аслыс казьтылан из. Сэсянь пӧ [бӧр ыстӧма тарантассӧ,] ачыс мунӧма Галгалӧ.
Самуил локтіс Саул дінӧ. Кор паныдасис сыкӧд, мӧдыс чолӧмасьӧмӧн шыасис: «Бурсиӧма тэнӧ Господь.
Ме ставсӧ вӧчи Господьлӧн тшӧктӧм серти».
Самуил юаліс: «Мыйсяма ӧшъяслӧн да ыжъяслӧн баксӧм кылӧ?»
Саул вочавидзис: «Менам йӧзӧй босьтісны амаликъяслысь медбур ыжъяссӧ да ӧшъяссӧ, медым вись вайны Господьлы, тэнад Енлы.
Мукӧдсӧ ми бырӧдім».
Самуил шуис Сауллы: «Кывзы, ме висьтала тэныд, мый Господь войнас шуис меным».
Саул шуис: «Висьтав».
Самуил пондіс висьтавны: «Эн-ӧ тэ асьтӧ нинӧмӧ пукты, кор лоин Израиль чужанкотыръяслы юралысьӧн?
Но Господь мавтыштіс тэнӧ да пуктіс ӧксыӧ Израиль войтырлы. Господь мӧдӧдіс тэнӧ тыш вылӧ. Сійӧ тшӧктіс уськӧдчыны мыж вӧчысь амаликъяс вылӧ да дзикӧдз бырӧдны найӧс.
Мыйла тэ эн кывзысь Господьлысь? Тэ уськӧдчин босьтны налысь эмбурсӧ, тадзи Господь водзын лёксӧ вӧчин».
Саул шуис: «Ме кывзыси Господьлысь. Муні сэтчӧ, кытчӧ мӧдӧдіс менӧ Господь. Ме вайӧді амалик войтырлысь Агаг ӧксысӧ, а войтырсӧ дзикӧдз бырӧді.
Но йӧзыс босьтісны Господьлы сиӧмторйысь медбур ыжъяссӧ да ӧшъяссӧ, мед Галгалын вись вайны Господьлы, тэнад Енлы».
Самуил шуис: — Мый вайӧ Господьлы нимкодьлун? Сотан да мукӧд висьяс али Сылысь кывзысьӧм?
Кывзысьӧмыд бурджык вись вайӧм дорысь, бурджык межъяслысь госсӧ сотӧм дорысь.
Ӧд кывзысьтӧмлуныд тунасьӧм кодь жӧ мыж, асныралӧмыд гортса бӧлбанъяслы юрбитӧм кодь жӧ.
Тэ нинӧмӧ пуктін Господьлысь шуӧмсӧ, та вӧсна Сійӧ вештіс тэнӧ [Израильын] ӧксыалӧмысь.
Саул вочавидзис Самуиллы: «Ме мыж вӧчи — торки Господьлысь тшӧктӧмсӧ да эг вӧч тэнад шуӧм серти.
Ме йӧзсьыс полі, та вӧсна кывзі найӧс.
Ӧні кора, вешты ме вылысь мыжӧс. Мунам мекӧд, ме копыртчыла Господьлы [тэнад Енлы]».
Самуил шуис: «Ме тэкӧд ог мун, ӧд тэ нинӧмӧ пуктін Господьлысь шуӧмсӧ. Сійӧ вештіс тэнӧ Израильын ӧксыалӧмысь».
Сэсся Самуил бергӧдчис, мед мунны.
Но Саул шашаритчис сылы паськӧм дорышас, и паськӧмыс косяссис-орис.
Самуил шуис: «Талун Господь босьтіс тэнсьыд Израильын ӧксыалӧмтӧ да сетіс сійӧс мӧдлы, тэнад матыссалы, коді тэысь бурджык.
Израильлӧн эскана Енмыс оз пӧръясь да оз соссьы Аслас кывъясысь.
Сійӧ абу морт, мед вежны шуӧм кывсӧ».
Саул шуис: «Ме мыжми. Но эн янӧд менӧ Израильлӧн юрнуӧдысьяс водзын да аслам войтыр водзын. Лок, бӧр мунам, и ме копыртчыла Господьлы, тэнад Енлы».
Саул муніс копыртчыны Господьлы, а Самуил муніс сы бӧрся.
Самуил тшӧктіс вайӧдны сы дінӧ амаликъяслысь Агаг ӧксысӧ.
Агаг тіралӧмӧн матыстчис Самуил дінӧ, мӧвпаліс, мый кулӧмыс оз су сійӧс.
Но Самуил шуис: «Кыдзи тэ аслад шыпуртӧн виалін мамъяслысь челядьсӧ, тадзи тэнад мамыд воштас ассьыс писӧ».
Сэсся кераліс Агагӧс Господь водзын Галгалын.
Та бӧрти Самуил муніс Рама карӧ, а Саул муніс гортас Гиваӧ.
Аслас олӧм помӧдз Самуил эз нин аддзысьлы Саулкӧд, но шогсис сы вӧсна. Господь ёна жалитіс, мый пуктіс Саулӧс Израильлы ӧксыӧ.
Господь шуис Самуиллы: «Дыр-ӧ на тэ кутан шогсьыны Саул вӧсна, кодӧс Ме вешті Израильын ӧксыалӧмысь?
Тырт ассьыд дозтӧ выйӧн да мун Виплиемӧ.
Ме ыста тэнӧ сэні олысь Ессей дінӧ. Сылӧн пиян пӧвстысь Ме бӧрйи Аслым ӧксыӧс».
Самуил воча шуис: «Ме ог вермы сэтчӧ мунны.
Саул кӧ кывлас, виас менӧ».
Господь шуис: «Босьт аскӧдыд куканьӧс да шу, мый тэ локтін вись вайны Господьлы.
Висьваянінас кор Ессейӧс [да сылысь пиянсӧ] сёйны.
Ме висьтала тэныд, мый вӧчны, да инда, кодӧс мавтыштны».
Самуил вӧчис, кыдзи тшӧктіс сылы Господь.
Кор сійӧ локтіс Виплиемӧ, карса юрнуӧдысьяс полігтыр вочаалісны сійӧс да юалісны: «Бур могӧн-ӧ локтін миян дінӧ?»
Самуил вочавидзис: «Бурӧн. Ме локті Господьлы вись вайны.
Вежӧдӧй-сӧстӧммӧдӧй асьнытӧ да мунамӧй мекӧд тшӧтш вись вайны».
Самуил вежӧдіс Ессейӧс, сылысь пиянсӧ да корис найӧс сёйны.
Кор найӧ локтісны, Самуил видзӧдліс Элиав вылӧ да мӧвпыштіс: «Тайӧ дзик сійӧ мортыс, кодӧс Господь мавтыштӧ».
Но Господь шуис Самуиллы: «Эн видзӧд сылӧн мичлун вылӧ да сылӧн кузь туша вылӧ.
Ме сійӧс эг бӧрйы.
Ме ог видзӧд морт моз.
Ӧд морт видзӧдӧ чужӧм вылӧ, а Господь видзӧдӧ сьӧлӧмӧ».
Сэсся Ессей корис Авинадав писӧ да вайӧдіс Самуил дінӧ. Самуил шуис: «Тайӧс Господь абу бӧрйӧма».
Сэки Ессей вайӧдіс Шаммей писӧ. Самуил шуис: «И тайӧс Господь абу бӧрйӧма».
Тадзи Ессей вайӧдліс Самуил дінӧ ассьыс сизимнан писӧ. Но Самуил шуис, мый на пиысь некодӧс Господь абу бӧрйӧма.
Сэки Самуил юаліс Ессейлысь: «Став пияныд-ӧ танӧсь?»
Ессей вочавидзис: «Медічӧт пи на эм.
Сійӧ ыжъясӧс видзӧ».
Самуил шуис: «Мӧдӧд сыла. Ми огӧ пуксьӧй сёйны, кытчӧдз сійӧ оз лок».
Ессей мӧдӧдіс кесйӧгсӧ, и сійӧ вайӧдіс Давидӧс.
Давид вӧлі банйӧм чужӧма, югыд синма мича зон.
Господь шуис Самуиллы: «Чеччы да мавтышт сійӧс. Тайӧ — сійӧ мортыс».
Самуил босьтіс вый тыра доз да мавтыштіс Давидӧс сылӧн вокъяс водзын. Сэки Господьлӧн Лов лэччис Давид вылӧ и сійӧ лунсяньыс вӧлі Давидкӧд.
Сэсся Самуил бӧр муніс Рама карӧ.
Саул дінысь Господьлӧн Лолыс вешйис. Господь ыстіс пеж лолӧс, и сійӧ кутіс топӧдны Саулӧс.
Сауллӧн кесйӧгъяс шуисны сылы: «Енмӧн ыстӧм пеж лов песлӧдлӧ тэнӧ.
Ыджыдӧй, тшӧкты кесйӧгъясыдлы корсьны мортӧс, коді кужӧ ворсны гуслиӧн. Кор Енмыс ыстас тэ вылӧ пеж лолӧс, сэки гуслиӧн ворсысь лӧньӧдас тэнӧ ворсӧмнас».
Саул шуис кесйӧгъясыслы: «Корсьӧй меным гуслиӧн бура ворсысьӧс да вайӧдӧй сійӧс ме дінӧ».
Сэки кесйӧгъяс пиысь ӧти шуис: «Ме аддзылі, мый Виплиемын олысь Ессейлӧн пиыс кужӧ бура ворсны. Сійӧ збой, оз пов тышӧ петны, мывкыд сёрниа, чужӧм-мыгӧрнас мича, дай Господь сыкӧд».
Саул мӧдӧдіс юӧртысьясӧс Ессей дінӧ да тшӧктіс висьтавны, мед мӧдӧдас ыж видзысь Давид писӧ сы дінӧ.
Ессей пуктіс осёл вылӧ нянь, кучик дозйын вина, ӧти кӧзапи да ставсӧ тайӧс мӧдӧдіс Давид пиыскӧд Сауллы.
Давид локтіс Саул дінӧ да кутіс кесъявны сылы. Сауллы Давид ёна воис сьӧлӧм вылас, весиг пуктіс сійӧс шыпурт новлӧдлысьӧ.
А Ессей дінӧ Саул мӧдӧдіс висьтавны, мед лэдзас Давидӧс кольччыны сы ордӧ да кесъявны сылы, ӧд Давид воис сылы сьӧлӧм вылас.
Кор Ен ыстыліс пеж лолӧс Саул вылӧ, Давид босьтліс гусли да ворсіс. Сэки долыдмыліс Сауллӧн лолыс, сылы вӧлі бурджык, и пеж лов эновтліс сійӧс.
Филистимсаяс чукӧртісны тышкайӧзнысӧ Иуда муӧ Соко карӧ. Сэсся найӧ сувтісны Соко да Азека каръяс костӧ Эфес-Даммимӧ.
А Саул израильса тышкайӧзкӧд сувтісны тупуа ковтысӧ. Сэні найӧ дасьтысисны петны тышӧ филистимсаяслы паныд.
Филистимсаяс сулалісны ӧти керӧс вылын, а израильсаяс — мӧд керӧс вылын. Шӧракостас вӧлі ковтыс.
Филистимса чукӧрысь петіс Гефын олысь Голиаф нима вермасьысь.
Сійӧ вӧлі зэв ыджыд тушаа — квайт гырддза да весьт кузьта.
Юр вылас сылӧн вӧлі ыргӧн юртупкӧд, ас вылас вӧлі пасьталӧма чери сьӧм кодь ыргӧнторъясысь вӧчӧм кышӧд, сьӧктаыс кышӧдыслӧн вӧлі вит сюрс сикель.
Коксӧ вӧлі тупкӧма ыргӧн вевттьӧдӧн, а пельпом вылас ӧшӧдӧма ыргӧнысь вӧчӧм сайӧд.
Киас сійӧ кутіс ыджыд шы. Шыыслӧн беддьыс вӧлі шӧрт гартан юранӧш кодь кыз. Шы помыс вӧлі кӧртысь, сылӧн сьӧктаыс вӧлі квайтсё сикель. Сайӧд новлӧдлысь муніс водзвылас.
Голиаф сулаліс да горзіс израильса тышкайӧзлы: «Мыйла ті тышӧ петінныд?
Ме ӧд филистимса, а ті Сауллӧн кесйӧгъяс.
Бӧрйӧй мортӧс ас пӧвстсьыныд, мед сійӧ локтас татчӧ ме дінӧ.
Сійӧ кӧ вермас менӧ да виас, сэки филистимсаяс лоасны тіянлы кесйӧгъясӧн.
А ме кӧ верма сійӧс да виа, сэки ті лоанныд миянлы кесйӧгъясӧн».
Филистимса вермасьысь ӧтарӧ увтыртіс: «Талун ме янӧда израильса тышкайӧзӧс.
Мед локтас морт, и ме вермася сыкӧд».
Филистимсалысь кывъяссӧ кылӧм бӧрын Саул да став сылӧн тышкайӧзыс ёна повзисны, найӧс дзӧрӧм босьтіс.
Давид вӧлі Иуда муысь Виплием-Епрафа карысь Ессейлӧн пи. Ессейлӧн вӧлі кӧкъямыс пи.
Сауллӧн ӧксыалан кадӧ Ессей вӧлі пӧрысь нин, сійӧ вӧлі войтырыслӧн ыджыдъясысь ӧти.
Сылӧн куим ыджыд пиыс вӧліны Саулкӧд тыш вылын.
Медыджыдсӧ шуисны Элиав, мӧдсӧ — Авинадав, коймӧдсӧ — Шаммей.
Давид вӧлі медічӧтыс.
Куимнан вокыс кольччисны Саул дінӧ, а Давид кадысь кадӧ ветлывліс Саул дінысь Виплиемӧ видзны батьыслысь ыжъяссӧ.
Нелямын лун чӧж асыв и рыт Голиаф петавліс да увтыртіс израильсаясӧс.
Ессей шуис Давид пиыслы: «Босьт мешӧк тыр пражитӧм тусь, дас тупӧсь нянь да ӧдйӧджык ну вокъясыдлы тышкайӧз чукӧртчанінӧ.
А тайӧ дас сыр ёкмыльсӧ ну сюрсӧн веськӧдлысьыслы. Тӧдмав вокъясыдлӧн дзоньвидзалун йылысь, гашкӧ, налы мыйкӧ колӧ».
Давидлӧн вокъясыс Саулкӧд да став израильса тышкайӧзкӧд вӧліны тупуа ковтысынӧсь, дасьтысисны тыш кежлӧ.
Давид чеччис водз асывнас да колис ыжъяссӧ мӧд видзысьлы. Сэсся босьтіс сёян тыра нопсӧ да муніс вокъяс дінас, кыдзи тшӧктіс сылы Ессей батьыс. Кор Давид локтіс израильса тышкайӧзлӧн чукӧртчанінӧ, тышкайӧз сулалісны визьӧн-визьӧн да лӧсьӧдчисны гораа горзӧмӧн петны тышӧ.
Израильсаяс да филистимсаяс сулалісны ӧта-мӧдныслы воча.
Давид колис нопсӧ эмбур видзысьлы, сэсся котӧрӧн муніс тышкайӧз пӧвстӧ. Сэні чолӧмасис вокъясыскӧд.
Накӧд сёрнитігкості филистимса тышкайӧз пӧвстысь петіс гефса Голиаф нима вермасьысь. Сійӧ воддза мозыс бара кутіс увтыртны израильсаясӧс. Давид кыліс тайӧс.
Филистимсаӧс аддзӧмысь израильсаяс полӧмнысла пышйисны.
Найӧ сёрнитісны: «Видзӧдлӧй, тайӧ мортыс петӧ, медым янӧдны Израильӧс.
Сійӧс виысьлы ӧксы шуис козьнавны ыджыд озырлун, сетны сы сайӧ ассьыс нывсӧ да мездыны сылысь рӧдсӧ вот мынтӧмысь Израильын».
Давид юаліс сыкӧд орччӧн сулалысьяслысь: «Мый вичмас сійӧ мортыслы, коді виас тайӧ вундыштчытӧм филистимсасӧ да вештас Израиль вылысь янӧдӧмсӧ?
Коді сійӧ сэтшӧмыс, мый лысьтӧ увтыртны ловъя Енлысь тышкайӧзсӧ?»
Йӧзыс висьталісны, мый вичмас сійӧ мортыслы, коді виас филистимсаӧс.
Давидлӧн Элиав нима ыджыд вокыс кывліс Давидлысь юасьӧмсӧ. Сійӧ скӧрмис Давид вылӧ да шуис: «Тэ мыйла татчӧ локтін? Кодлы овтӧминад эновтін ичӧт ыж чукӧртӧ?
Ме тӧда тэнсьыд асныралӧмтӧ да ыкшаасьӧмтӧ.* Тэ локтін, медым видзӧдлыны тышсӧ».
Давид воча шуис: «Мый ме сэтшӧмсӧ вӧчи? Весиг сёрнитны оз позь».
Сэсся Давид бергӧдчис мӧд морт дінӧ да бара сійӧ жӧ юаліс. Быд пӧрйӧ йӧзыс вочавидзлісны сылы воддза мозыс.
Йӧзыс кывлісны Давидлысь юасьӧмсӧ да висьталісны та йылысь Сауллы. Саул корис сійӧс ас дінас.
Давид шуис Сауллы: «Мед некод ловнас оз усь тайӧ мортыс понда.
Ме, тэнад кесйӧг, пета вермасьны тайӧ филистимсаыскӧд».
Но Саул ӧлӧдіс Давидӧс: «Тэ он вермы тышкасьны тайӧ филистимсаыскӧд. Тэ том на, а сійӧ важысянь нин тышӧ ветлӧ».
Давид эскӧдіс Саулӧс: «Ме, тэнад кесйӧг, батьлысь ыжъяссӧ видза. Кор ыж чукӧр вылӧ уськӧдчӧ лев либӧ ош да пышйӧдӧ ыжӧс, сэки ме вӧтча сы бӧрся, уськӧдча да мырддя вомсьыс.
А сійӧ кӧ уськӧдчӧ ме вылӧ, ме босьта сійӧс бурысьӧдыс, личка да виа.
Ме виавлі левӧс и ошкӧс. Тайӧ вундыштчытӧм филистимсаыскӧд тшӧтш тадзи лоӧ. Сійӧ ӧд увтыртӧ ловъя Енлысь тышкайӧзсӧ. 
[Ме муна да верма сійӧс, мед вештыны янӧдӧмсӧ Израиль вылысь.
Тайӧ вундыштчытӧмыс миянлы некод.]»
Давид водзӧ сёрнитіс: «Господь, коді мездыліс менӧ левъясысь да ошъясысь, мездас менӧ тшӧтш тайӧ филистимсаысь».
Сэки Саул шуис Давидлы: «Мун, Господь мед лоас тэкӧд».
Саул сетіс Давидлы ассьыс тышкасян паськӧмсӧ, пасьтӧдіс сійӧс кӧрт кышӧдӧн, а юр вылас пуктіс ыргӧн юртупкӧдсӧ.
Коскас Давид ӧшӧдіс Сауллысь шыпуртсӧ. Но сылы сьӧкыд вӧлі ветлӧдлынысӧ, ӧд абу вӧлі велалӧма новлыны тышӧ ветлан кӧлуйсӧ.
Давид шуис Сауллы: «Ме ог вермы тайӧн ветлӧдлынысӧ, абу велалӧма».
Сэсся Давид ставсӧ тайӧс пӧрччис ас вывсьыс.
Сійӧ босьтіс киас ассьыс бедьсӧ, бӧрйис шорысь вит шыльыд из да пуктіс нопъяс.
Аслас нопйӧн да из лыйлан кӧвйӧн Давид петіс филистимсалы паныд.
Голиаф восьлаліс Давидлань, а водзвылас муніс сылӧн сайӧд новлӧдлысьыс.
Кор Голиаф аддзис Давидӧс, нинӧмӧ пуктіс тайӧ томиник, банйӧм чужӧма мича зонсӧ.
Сійӧ шуис: «Ме вылӧ беддьӧн [да изйӧн] петін?
Ме ӧмӧй пон?» 
[Давид вочавидзис: «Абу, но тэ понйысь на лёк».] 
Сэки филистимса ёрис Давидӧс аслас енъясӧн.
Сэсся шуис Давидлы: «Матыстчы ме дінӧ, и ме сета тэнсьыд шойтӧ лэбачьяслы да зверъяслы».
Давид воча шуис: «Тэ петін меным паныд шыпуртӧн, шыӧн да сайӧдӧн, а ме петі тэныд паныд Господь Саваоф нимӧн. Сійӧ — Ен израильса тышкайӧзлы, кодъясӧс тэ увтыртан.
Талун Господь сетас тэнӧ менам киӧ. Ме виа тэнӧ, юртӧ керышта, и [тэнсьыд шойтӧ да] став филистимса тышкайӧзлысь шойсӧ сета лэбачьяслы да зверъяслы. Сэки став муыс тӧдмалас, мый Израильлӧн эм Ен.
И тані ставныс тӧдмаласны, мый оз шыпуртӧн да шыӧн мезды Господь. Тайӧ тышыс Господьлӧн тыш, и Сійӧ сетас тіянӧс миян киӧ».
Филистимса чеччис да кутіс матыстчыны Давидлань. Давид ӧдйӧ котӧртіс филистимса тышкайӧзлань Голиафлы паныд.
Сэсся сюйис кисӧ нопъяс, перйис сэтысь из да лыйис филистимсалы веськыда плешкас. Изйыс пырис юрас. Голиаф грыпкысис-усис муас чужӧмнас.
Тадзи Давид вермис филистимсаӧс аслас из лыйлан кӧвйӧн. Давидлӧн эз вӧв шыпурт, но сійӧ виис филистимсаӧс.
Давид котӧртіс Голиаф дінӧ, тувччис сы вылӧ кокнас, перйис сылӧн пуртӧсысь шыпуртсӧ да бытшкис сійӧс, а юрсӧ керыштіс.
Кор филистимсаяс аддзисны, мый налӧн медся вына мортыс куліс, уськӧдчисны пышйыны.
Сэки Израиль войтырысь да Иуда чужанкотырысь тышкайӧз пондісны гораа горзӧмӧн вӧтӧдны найӧс. Вӧтчисны ковтысӧдз да Экрон карса дзиръя дорӧдз.
Филистимсаяслӧн шойыс туплясис Шаараим туй пӧлӧн Гефӧдз да Экронӧдз.
Филистимсаясӧс вӧтӧдӧм бӧрын израильсаяс бӧр локтісны, медым босьтны ставсӧ, мый филистимсаяс эновтісны.
Давид босьтіс Голиафлысь юрсӧ да нуис Ерусалимӧ, а сылысь шыпуртсӧ да мукӧд тышкасянторсӧ пуктіс аслас чомйӧ.
Кор Давид петіс филистимсалы паныд, Саул юаліс тышкайӧзӧн веськӧдлысьыслысь: «Авенир, тайӧ том зонкаыс кодлӧн пиыс?»
Авенир вочавидзис: «Ӧксыӧй, ме збыльысь ог тӧд».
Ӧксы шуис: «Юав, он кӧ тӧд».
Филистимсаӧс вермӧм бӧрын Авенир вайӧдіс Давидӧс Саул дінӧ. Киас Давид кутіс филистимсалысь юрсӧ.
Саул юаліс: «Том мортӧй, кодлӧн тэ лоан?»
Давид вочавидзис: «Виплиемын олысь Ессей кесйӧгыдлӧн пи».
Давидлӧн Саулкӧд сёрнитӧм бӧрын Ионафан став сьӧлӧмнас кӧртасис Давид дінӧ, кутіс радейтны сійӧс асьсӧ моз.
Сійӧ лунӧ Саул кольӧдіс Давидӧс ас ордас, эз лэдз мунны батьыс дінӧ гортас.
Ионафан асьсӧ моз радейтіс Давидӧс, та вӧсна кӧрталіс сыкӧд йитӧд.
Ионафан пӧрччис кышансӧ да сетіс сійӧс Давидлы. Сетіс тшӧтш мукӧд тышкасян паськӧмсӧ, ассьыс шыпуртсӧ, ньӧввужсӧ да коскытшсӧ.
Давид вермыліс быд тышын, кытчӧ Саул мӧдӧдліс сійӧс. Та вӧсна Саул пуктіс Давидӧс веськӧдлыны тышкайӧзӧн.
Став йӧзыслы и Сауллӧн кесйӧгъяслы тайӧ воис сьӧлӧм вылас.
Давидлӧн Голиафӧс вермӧм бӧрын тышкайӧз кор вӧлі локтӧны тыш вылысь, быд израильса карысь петавлісны аньяс. Найӧ сьылӧмӧн да йӧктӧмӧн, тимпанӧн да кимвалӧн кыпыда ворсӧмӧн вочаалісны Саул ӧксыӧс.
Аньяс ворсісны да сьылісны: — Саул вермис сюрсъясӧс, Давид — дас сюрсъясӧс!
Сауллы тайӧ эз во сьӧлӧм вылас, сійӧ скӧрмӧмӧн шуис: «Давидӧс нимӧдӧны, сійӧ пӧ дас сюрсъясӧс вермис, а ме пӧ — сӧмын сюрсъясӧс.
Сылы коли сӧмын ӧксыӧ пуксьыны».
Тайӧ лунсяньыс Саул кутіс вежавны Давидлы.
Мӧд луннас Енмӧн ыстӧм пеж лов уськӧдчис Саул вылӧ. Саул пондіс йӧйтавны аслас керкаын, а Давид воддза мозыс ворсіс гуслиӧн.
Сауллӧн киас вӧлі шы.
Сійӧ мӧвпыштіс: «Тувъяла Давидӧс стен бердас».
Сэсся Саул лыйис шысӧ, но Давид удитіс кежны шыысь. Тадзи вӧлі кыкысь.
Саул кутіс повны Давидысь, ӧд Господь вӧлі Давидкӧд, а Саулкӧд Господь эз нин вӧв.
Саул ылыстіс Давидӧс ас дінсьыс да пуктіс веськӧдлыны сюрс тышкамортӧн. Давид ветліс тышкайӧзкӧд тышъясӧ и быдлаын вермыліс, ӧд Господь вӧлі сыкӧд.
Саул аддзис, мый Давид быдлаын вермӧ, та вӧсна поліс сыысь.
Но Израильлӧн да Иудалӧн тышкайӧз радейтісны Давидӧс, ӧд сійӧ веськӧдліс наӧн.
Ӧтчыд Саул вӧзйис Давидлы: «Ассьым Мерова ыджыд нылӧс сета тэ сайӧ, сӧмын повтӧг кесъяв меным да веськӧдлы Господьлӧн тышъясӧн».
Но та дырйи Саул мӧвпаліс: «Сы вылӧ мед оз кыпты менам киӧй, а филистимсаяслӧн».
Давид воча шуис: «Коді ме сэтшӧмыс, мед лоны ӧксылӧн зятьӧн? Батьлӧн рӧдыс Израильын ӧд абу тӧдчана».
Но кор воис ӧтлаасян кадыс, Саул сетіс Мерова нывсӧ мехоласа Адриэл сайӧ.
Но Сауллӧн Мелкола нима мӧд нылыс кутіс радейтны Давидӧс.
Кор Сауллы юӧртісны та йылысь, сылы нимкодь лои.
Саул мӧвпыштіс: «Давидӧс тывйыштӧм могысь сета нылӧс сы сайӧ. Сэки Давид шедас филистимсаяслӧн киӧ».
Сэсся шуис Давидлы: «Мӧд нылӧс сета тэныд, тэ лоан меным зятьӧн».
Саул тшӧктіс аслас кесйӧгъяслы гусьӧникӧн висьтавны Давидлы: «Тэ воин ӧксылы сьӧлӧм вылас. Сылӧн кесйӧгъясыс тшӧтш радейтӧны тэнӧ.
Ло ӧксылы зятьӧн».
Сауллӧн кесйӧгъяс ставсӧ висьталісны Давидлы.
Давид воча шуис налы: «Ті чайтанныд, кокньыд лоны ӧксылӧн зятьӧн. Ме гӧлиник и абу тӧдчана морт».
Кесйӧгъяс висьталісны Сауллы Давидлысь кывъяссӧ.
Саул шуис налы: «Висьталӧй Давидлы, мый ӧксы некутшӧм дон оз босьт гӧтырпуысь, сӧмын кӧсйӧ, мед тэ вайин сылы сё филистимсалӧн чильган йывсьыс вундыштӧм кучикторсӧ — татшӧм ногӧн сійӧ водзӧс перъяс аслас вӧрӧглысь».
Збыльвылас, ӧксы кӧсйис, мед филистимсаяс виасны Давидӧс.
Сауллӧн кесйӧгъяс висьталісны Давидлы ӧксылысь кывъяссӧ. Давидлы сьӧлӧм вылас воис ӧксылӧн вӧзйӧмыс — лоны сылӧн зятьӧн.
Урчитӧм лун вотӧдз Давид аслас йӧзкӧд муніс да виис кыксё филистимсаӧс. Налысь вундыштӧм кучикторсӧ Давид вайис Саул ӧксылы, медым лоны сылӧн зятьӧн.
Сэки Саул сетіс Мелкола нывсӧ Давид сайӧ.
Саул аддзис, мый Господь Давидкӧд. Сійӧ тӧдіс, мый [став Израиль войтыр да] Мелкола нылыс радейтӧ Давидӧс.
Саул нӧшта на ёнджыка кутіс повны Давидысь. И став олӧм чӧжыс мустӧмтіс сійӧс.
Филистимса тышкайӧзӧн веськӧдлысьяс уськӧдчывлісны Израиль вылӧ. Сауллӧн мукӧд веськӧдлысьяс дорысь Давид шедӧдліс унджык вермӧм, та вӧсна пондіс ёна нимавны.
Саул сёрнитіс Ионафан пиыскӧд да став аслас кесйӧгкӧд Давидӧс виӧм йылысь.
Но Ионафан ёна радейтіс Давидӧс.
Сійӧ юӧртіс Давидлы: «Саул батьӧй кӧсйӧ вины тэнӧ.
Видзчысь сыысь. Аски мун да дзебсьы.
Ме пета батькӧд карсьыс да локта сэтчӧ, кӧні тэ кутан дзебсясьны. Ме сёрнита сыкӧд тэ йылысь, сэсся мый тӧдмала, висьтала тэныд».
Ионафан висьталіс батьыслы Давид йылысь уна буртор. Сійӧ шуис: «Ӧксыӧй, эн вӧч лёксӧ аслад Давид кесйӧглы. Сійӧ ӧд тэныд нинӧм лёксӧ эз вӧч, сӧмын бурсӧ.
Филистимсакӧд вермасигӧн сійӧ вермис воштыны ассьыс олӧмсӧ, но Господь сетіс ыджыд вермӧм став Израильлы.
Тэ ачыд аддзылін тайӧс да нимкодясин.
Мыйла тэныд мыж вӧчны, мыжтӧм мортлысь вир кисьтны? Мыйла помкатӧг вины Давидӧс?»
Саул кывзіс Ионафанӧс да кӧсйысис сылы: «Ловъя Господь водзын кыв сета, мый Давид оз кув».
Ионафан корис Давидӧс да став сёрнисӧ висьталіс сылы. Сэсся нуӧдіс сійӧс Саул дінӧ. Давид воддза мозыс кутіс кесъявны Сауллы.
Бара пансис тыш филистимсаяскӧд. Давид петіс тышӧ да пасьвартіс найӧс. Филистимсаяс пышйисны Давидысь.
Сэсся Енмӧн ыстӧм пеж лов бара уськӧдчис Саул вылӧ. Саул пукаліс гортас, киас кутіс шы, а Давид ворсіс гуслиӧн.
Саул лыйис шысӧ, кӧсйис тувъявны Давидӧс стен бердас. Но Давид удитіс чеччыштны бокӧ, и шыыс сатшис стенмас.
Давид сійӧ войнас пышйис, тадзи мыніс Саулысь.
Саул ыстіс ассьыс кесйӧгъяссӧ Давид керкаӧ, медым кыйӧдны да вины сійӧс асъядорыс.
Но Мелкола шуис Давид верӧсыслы: «Тавой кӧ он пышйы, асывнас тэнӧ виасны».
Мелкола отсаліс Давидлы лэччыны ӧшиньӧдыс. Тадзи Давид пышйис да ловйӧн коли.
Мелкола босьтіс гортса бӧлбанӧс да водтӧдіс сійӧс вольпасяс, юрладорас пуктіс кӧза ку, сэсся бӧлбансӧ вевттис паськӧмӧн.
Саул мӧдӧдіс кесйӧгъяссӧ, мед босьтны Давидӧс.
Но Мелкола шуис налы, сійӧ пӧ висьӧ.
Саул бара мӧдӧдіс кесйӧгъяссӧ видзӧдлыны Давидӧс. Шуис налы: «Вайӧй сійӧс вольпасьнас, ме виа сійӧс».
Кор кесйӧгъясыс локтісны, найӧ аддзисны Давид вольпасьысь гортса бӧлбанӧс, юрладорас куйліс кӧза ку.
Саул юаліс Мелколалысь: «Мыйла тэ пӧръялін менӧ, отсалін пышйыны менӧ мустӧмтысьлы?»
Мелкола вочавидзис: «Давид шуис меным, он кӧ пӧ лэдз, виа тэнӧ».
Давид пышйис, локтіс Самуил дінӧ Рамаӧ да висьталіс ставсӧ, мый сыкӧд вӧчис Саул.
Сэсся Давид да Самуил мунісны [рамаса] Найотӧ да кольччисны сэтчӧ.
Сауллы юӧртісны, Давид пӧ рамаса Найотын.
Саул мӧдӧдіс сэтчӧ кесйӧгъяссӧ, мед босьтны Давидӧс. Кор найӧ локтісны, аддзисны пророкъяслысь ыджыд чукӧр да Самуил веськӧдлысьсӧ. Найӧ ставныс пророкалісны. Сэки Енлӧн Лов лэччис Сауллӧн кесйӧгъяс вылӧ да найӧ тшӧтш кутісны пророкавны. Та йылысь юӧртісны Сауллы.
Сэки сійӧ бара мӧдӧдіс кесйӧгъясӧс, и найӧ тшӧтш кутісны пророкавны.
Сэсся нӧшта мӧдӧдіс кесйӧгъясӧс, но и найӧ кутісны пророкавны.
Саул [скӧрмис да] ачыс муніс Рамаӧ. Воис Сефӧ да сувтіс ыджыд вайӧртӧд дорӧ. Сэні юаліс, кӧнӧсь Самуил Давидкӧд.
Сылы вочавидзисны, рамаса Найотынӧсь пӧ.
Саул мӧдӧдчис сэтчӧ. Сэки лэччис сы вылӧ Енлӧн Лов, и сійӧ мунігчӧжыс пыр пророкаліс. Кор воис рамаса Найотӧ, тшӧтш пӧрччис паськӧмсӧ да пророкаліс Самуил водзын. Лунтыр и войбыд сійӧ куйліс пасьтӧгыс.
Тайӧ лоӧмтор бӧрас паськаліс Саул йылысь шуӧм: «Саул ӧмӧй тшӧтш пророк?»
Давид пышйис рамаса Найотысь да локтіс Ионафан дінӧ норасьӧмӧн: «Мый ме сэтшӧмсӧ вӧчи тэнад батьлы? Кутшӧм мыж вӧсна сійӧ кӧсйӧ вины менӧ?»
Ионафан шуис: «Тэ он кув.
Батьӧй меным висьталӧ ставсӧ, мый кӧсйӧ вӧчны.
Кӧсйис кӧ вины тэнӧ, ме эськӧ тӧді та йылысь. Оз ло тадзи!»
Давид эскӧдӧмӧн шуаліс: «Тэнад батьыд бура тӧдӧ, мый ме тэныд муса. Сійӧ оз висьтав тэныд ассьыс мӧвпыштӧмсӧ, мед тэ эн шогсьы.
Но ловъя Господь водзын да тэ водзын шуа: кулӧмӧдзыс меным ӧти воськов».
Ионафан шуис Давидлы: «Тэ ради ме вӧча ставсӧ, мый шуан».
Давид вочавидзис: «Аски выль тӧлысь пасъян лун. Меным колӧ ӧксыкӧд ӧтлаын пажнайтны.
Но кора тэнӧ, лэдз меным петны кар сайӧ да дзебсьыны. Лоа сэні аскомысь рытӧдзыс.
Батьыд кӧ юалас ме йылысь, висьтав, мый ме тэнсьыд вӧзйыси ветлыны Виплиемӧ, ӧд сэні став менам рӧдӧй чукӧртчӧ вайны быдвося вись.
Батьыд кӧ шуас та вылӧ “бур”, сідзкӧ, меным, тэнад кесйӧглы, нинӧмысь повнысӧ.
А скӧрмас кӧ, тӧд, мый лёктӧр кӧсйӧ вӧчны.
Ло бур сьӧлӧма ме дінӧ, аслад кесйӧг дінӧ, ӧд Господь водзын тэ кӧрталін мекӧд йитӧд. А ме кӧ мыйыськӧ мыжа, ачыд ви менӧ.
Сӧмын батьыдлы эн сет менӧ».
Ионафан шуис: «Оз ло тэкӧд тайӧ.
Тӧда кӧ вӧлі, мый батьӧй мӧвпыштӧма тэныд лёктор вӧчны, ме эськӧ висьталі тэныд та йылысь».
Давид юаліс: «Батьыд кӧ скӧрысь вочавидзас тэныд, кыдзи ме тӧдмала та йылысь?»
Ионафан вочавидзис: «Лок мунам кар сайӧ».
Кор найӧ мунісны кар сайӧ, Ионафан шуис: «Ловъя Господь водзын, Израильлӧн Ен водзын, кыв сета: аски либӧ аскомысь тайӧ кадас ме тӧдмала, бур сьӧлӧма-ӧ батьӧй тэ дінӧ. Бур сьӧлӧма кӧ, ме юӧрта тэныд та йылысь. 
Господь мед ёна мыждас менӧ, ог кӧ ме юӧрт, мый батьӧй лёктор кӧсйӧ вӧчны тэныд, да ог кӧ отсав тэныд мунны лӧнь сьӧлӧмӧн. Господь мед лоас тэкӧд, кыдзи Сійӧ вӧлі менам батькӧд.
Ме кӧ ловйӧн коля, Господь моз тэ ло бур сьӧлӧма ме дінӧ.
А ме кӧ кула, ло бур сьӧлӧма менам рӧд дінӧ нэмъяс чӧж. Ло бур сьӧлӧма весиг сэки, кор Господь бырӧдас му вывсьыс тэнсьыд вӧрӧгтӧ».
Тадзи Ионафан кӧрталіс йитӧд Давид рӧдкӧд да шуис: «Господь мед водзӧс перъяс Давидлӧн вӧрӧглысь».
Аслас муслунӧн Ионафан кӧсйысис Давидлы видзны кӧрталӧм йитӧдсӧ, ӧд сійӧ радейтіс Давидӧс асьсӧ моз.
Сэсся Ионафан шуис: «Аски выль тӧлысь пасъян лун. Тэ кӧ он ло пызан саяс, тэ йылысь, дерт, юаласны.
Но аскомысь тэ лэччы сэтчӧ, кытчӧ тэ водзынсӧ дзебсьылін, да пуксьы Азель из дорӧ.
Сыланьӧ ме лэдза куим ньӧв, быттьӧ мыйкӧ лыйла.
Сэсся мӧдӧда зонкаӧс корсьны ньӧвъяссӧ. 
Шуа кӧ сылы: “Ньӧвъясыс со бӧрвыладӧсь, босьт сэтысь”, сэки лок ме дінӧ. Ловъя Господь водзын кыв сета: тэкӧд нинӧм оз ло.
А шуа кӧ зонкаыслы: “Ньӧвъясыс водзвыладӧсь”, сэки пышйы. Тӧд, мый тадзи кӧсйӧ Господь. 
А мый йылысь ми сёрнитчим тэкӧд йитӧд кӧрталігӧн, тӧдӧ Господь».
Давид дзебсис кар сайӧ.
Выль тӧлысь пасъян лунӧ ӧксы пуксис пажнайтны.
Сійӧ пуксис аслас пукаланінӧ стен бердас. Ионафан чеччис, а сы местаӧ Саулкӧд орччӧн пуксис Авенир.
Давидлӧн местаыс вӧлі куш.
Сійӧ лунӧ Саул нинӧм эз шу та вылӧ. Мӧвпыштіс, гашкӧ пӧ, Давид виччысьтӧг пежаліс асьсӧ.
Мӧд луннас выль тӧлысь пасйигӧн пызан сайын Давидлӧн местаыс бара вӧлі куш.
Сэки Саул юаліс Ионафан пиыслысь: «Мыйла Ессейлӧн пиыс тӧрыт ни талун абу пызан сайын?»
Ионафан вочавидзис: «Давид вӧзйысис менсьым ветлыны Виплиемӧ.
Шуис, лэдзлы пӧ менӧ чужан карӧ, вокӧй пӧ корис. Сэні пӧ став рӧдным вись вайӧ.
Ло пӧ бур сьӧлӧма да лэдз менӧ ветлыны аддзысьлыны вокъяскӧд.
Та вӧсна Давид эз лок пажын вылад».
Саул ёна скӧрмис Ионафан вылӧ да шуис: «Шогмытӧм да кывзысьтӧм пи!
Ме ӧмӧй ог тӧд, мый тэ ёртасян Ессей пикӧд. Тэ асьтӧ янӧдан и мамтӧ тшӧтш.
Кытчӧдз Ессейлӧн пиыс пондас овны му вылын, тэ да тэнад ӧксыалӧмыд оз ло зумыд.
Мӧдӧд йӧзӧс, медым вайӧдасны сійӧс ме дінӧ. Сійӧс колӧ вины».
Ионафан воча шуис батьыслы: «Мыйысь сійӧс винысӧ? Мый сійӧ вӧчис?»
Сэки Саул лыйис шыпуртсӧ, медым вины Ионафанӧс.
Ионафан гӧгӧрвоис, мый батьыс кӧсйӧ вины Давидӧс.
Ионафан скӧрмӧмӧн чеччис пызан сайсьыс да весиг эз пажнайт сійӧ лунӧ. Сійӧ шогсис Давид вӧсна, ӧд батьыс сійӧс ёна омӧльтіс.
Мӧд асывнас Ионафан том зонкакӧд петіс кар сайӧ, кыдзи вӧлі сёрнитчӧма Давидкӧд.
Ионафан шуис зонкалы: «Ме лыя ньӧвъяссӧ, а тэ котӧрт да корсь найӧс».
Зонка котӧртіс. Ионафан жӧ лыйис ньӧвъяссӧ зонкаысь ылӧджык. 
Зонка котӧртіс сэтчӧ, кытчӧ усисны ньӧвъясыс. Ионафан горӧдіс зонкалы: «Видзӧд, ньӧвйыс водзвылад! Ӧдйӧджык котӧрт! Эн сувтлась!»
Зонка чукӧртіс Ионафан ыджыдыслысь ньӧвъяссӧ да бӧр локтіс сы дінӧ.
Зонка эз тӧд, мыйла Ионафан тадзи шуис.
Тӧдісны сӧмын Ионафан да Давид.
Ионафан сетіс ассьыс ньӧввужсӧ зонкалы да тшӧктіс нуны карас.
Зонка муніс. Сэки Давид петіс лунвывладорсяньыс да куимысь муӧдзыс копыртчыліс Ионафанлы.
Найӧ окалісны ӧта-мӧднысӧ да кыкнанныс бӧрдісны, но Давид бӧрдіс ёнджыка.
Ионафан шуис Давидлы: «Мун лӧнь сьӧлӧмӧн.
Господь водзын ми кыв сетім видзны кӧрталӧм йитӧднымӧс. Господь лоӧ миян костын, месянь да тэсянь чужысьяс костын нэмъяс чӧж».
Сэсся Давид муніс, а Ионафан бӧр локтіс карас.
Давид локтіс Нов карӧ Ахимелек поп дінӧ. Ахимелек повзьӧмпырысь петіс Давидлы воча да юаліс сылысь: «Мыйла тэ ӧтнад? Мыйла тэкӧд некод абу?»
Давид вочавидзис: «Ӧксы тшӧктіс вӧчны меным ӧти удж. Шуис, мед пӧ некод оз тӧд та йылысь, мый могӧн ме тэнӧ мӧдӧда.
Та вӧсна ассьым йӧзӧс ме коли мӧдлаӧ.
Эм-ӧ тэнад мыйкӧ сёйыштны? Вай меным вит кымын нянь либӧ мый нӧшта сюрас».
Поп шуис Давидлы: «Быдлунся няньыд менам абу, сӧмын вежа нянь эм.
Тэнад йӧзыд кӧ кутчысисны аньяскӧд узьӧмысь, вермасны сёйны».
Давид вочавидзис: «Тышӧ петігъясӧ миянлы оз позь узьлыны аньяскӧд. Менам йӧз видзӧны асьнысӧ сӧстӧма весиг быдлунъя тшӧктӧмъяс збыльмӧдігӧн. Дерт нин, ӧні найӧ сӧстӧмӧсь».
Мӧдпӧлӧс няньыс эз вӧв, та вӧсна поп сетіс Давидлы вежа нянь.
Тайӧ няньсӧ вӧлі босьтӧма Господьлӧн чужӧмбан водзысь, а сы пыдди вӧлі пуктӧма выль пӧжалӧм нянь.
Вежаинын сэки вӧлі Сауллӧн Доик нима кесйӧг, сійӧ вӧлі Эдомысь. Сійӧ веськӧдліс Саул ордын ыж-мӧс видзысьясӧн.
Давид юаліс Ахимелеклысь: «Эм-ӧ тані тэнад шы либӧ шыпурт?
Ӧксы менӧ ёна тэрмӧдліс да, аскӧд некутшӧм тышкасянтор эг босьт, весиг шыпуртӧс».
Поп вочавидзис: «Эм шыпурт филистимса Голиафлӧн, кодӧс тэ ачыд виин тупуа ковтысын. Эстӧн ефод саяс, кӧлуй пытшкӧ гартыштӧма.
Кӧсъян кӧ, босьт.
Сы кындзи менам нинӧм абу».
Давид воча шуис: «Таысь бурджыкыс оз сюр. Вай меным сійӧс».
[Поп сетіс сылы.]
Сійӧ жӧ лунӧ Давид пышйис Саулысь. Локтіс гефса Акиш ӧксы дінӧ.
Акишлӧн кесйӧгъяс шуисны ӧксыныслы: «Абу-ӧ тайӧ Давид, эсійӧ мусьыс ӧксыыс?
Эз-ӧ йӧзыс йӧктӧмӧн сьывны сы йылысь, Саул пӧ вермис сюрсъясӧс, а Давид — дас сюрсъясӧс?»
Тайӧ кывъясыс мӧрччисны Давидлы сьӧлӧмас, и сійӧс полӧм босьтіс гефса Акиш ӧксыысь.
Та вӧсна Давид лэдзчысис йӧй улӧ. Сійӧ кутіс мыйкӧ визьйӧдлыны карса дзиръя вылын [и шенасьны кинас] да лэдзны дульсӧ тош кузяыс.
Акиш шуис аслас кесйӧгъяслы: «Аддзанныд, сійӧ выжыв.
Мыйла ті вайӧдінныд сійӧс ме дінӧ?
Этша на ӧмӧй менам выжывъясыс, нӧшта тайӧс колӧ вӧлі вайӧдны ме водзӧ йӧйтавны? Гашкӧ, аслам керка помӧ на сибӧдны сійӧс?»
Давид пышйис Геф карысь да дзебсис Адуллам кар дорӧ кырта горсйӧ. Кор та йылысь тӧдмалісны вокъясыс да став сылӧн рӧдыс, локтісны сы дінӧ.
Давид дінӧ чукӧртчисны дзескӧдӧмаяс, уджйӧзаяс да шогас вӧйӧмаяс — ставнас нёльсё гӧгӧр морт. Давид лои налӧн веськӧдлысьӧн.
Сэсянь Давид муніс Моав муӧ Мицфеӧ. Моавса ӧксылы шуис: «Кора тэнӧ, лэдз бать-мамлы олыштны тэ ордын, кытчӧдз ме ог тӧдмав, мый мекӧд вӧчас Ен».
Давид вайӧдіс бать-мамсӧ моавса ӧксы дінӧ. Найӧ кольччисны сы ордӧ, кытчӧдз Давид эз пет сайӧдчанінысь.
Но Гад нима пророк шуис Давидлы: «Пет сайӧдчанінысь да мун Иуда муӧ».
Сэки Давид муніс херетса вӧрӧ.
Сауллы висьталісны, мый кодкӧ аддзылӧма Давидӧс да сылысь йӧзсӧ.
Саул вӧлі Гиваын, пукаліс керӧс вылын тамариск пу улын. Киас сійӧ кутіс шы. Кесйӧгъясыс сулалісны сы гӧгӧр.
Саул шуис сійӧс кытшалысь кесйӧгъяслы: «Кывзӧй, Венямин пиян. Ті чайтанныд, мый Ессей пи сетас тіянлы ставныдлы видз-му да виноград йӧръяс, пуктас ставнытӧ сюрс да сё тышкамортӧн веськӧдлыны? Буракӧ, та вӧсна ті ставныд сёрнитчӧмныд меным паныд. Некод меным эз юӧрт, мый менам пиӧй кӧрталӧма йитӧд Ессей пикӧд. Ті энӧ тӧждысьӧй ме вӧсна да энӧ висьталӧй, мый менам пиӧй ышӧдӧма менсьым кесйӧгӧс, медым тывйыштны менӧ».
Эдомса Доик сулаліс Сауллӧн кесйӧгъяс пӧвстын. Сійӧ шуис: «Ме аддзылі, кыдзи Ессейлӧн пиыс воліс Новӧ Ахитувлӧн Ахимелек пи дінӧ. Ахимелек кевмысис Господьлы, медым Сійӧ туйдӧдас Давидӧс. Сэсся сетіс сылы сёян да филистимса Голиафлысь шыпуртсӧ».
Саул ӧксы тшӧктіс корны Ахимелек попӧс, Ахитувлысь писӧ, да сылӧн бать рӧдысь став попсӧ, кодъяс кесъялісны Новын.
Ставныс найӧ локтісны ӧксы дінӧ.
Саул шуис: «Кывзы, Ахитув пи».
Мӧдыс вочавидзис: «Кывза, ыджыдӧй».
Саул юаліс: «Мый вӧсна ті Ессей пикӧд сёрнитчинныд меным паныд? Тэ сетін сылы нянь да шыпурт, нӧшта корин Енмӧс туйдӧдны сійӧс, медым ӧні сійӧ меным паныд кыпӧдчис да тывйыштіс менӧ».
Ахимелек воча шуис ӧксылы: «Сюрас-ӧ кодкӧ тэнад кесйӧгъяс пиысь Давид кодь эсканаыс?
Сійӧ ӧд тэнад зять, вӧчӧ тэнад тшӧктӧмъяс серти, и тэнад керкаын сійӧс пыдди пуктӧны.
Ме збыльысь кори Енмӧс туйдӧдны Давидӧс, кыдзи и водзынджык вӧчлі.
Ӧксыӧй, эн мыжды менӧ, ассьыд кесйӧгтӧ, да менсьым рӧдвужӧс. Ме, тэнад кесйӧг, збыльысь нинӧм эг тӧд тэныд паныд кыпӧдчӧм йылысь».
Но ӧксы шуис: «Тэныд, Ахимелек, и тэнад рӧдвужлы ковмас кувны».
Ӧксы шуис сійӧс кытшалысь видзысьяслы: «Мунӧй да виӧй Господьлысь попъяссӧ, ӧд найӧ Давид дор сулалӧны. Найӧ тӧдісны, мый сійӧ пышйис меысь, и эз висьтавны меным та йылысь».
Но ӧксылӧн кесйӧгъяс эз кӧсйыны кинысӧ лэптыны, медым вины Господьлысь попъяссӧ.
Сэки ӧксы шуис Доиклы: «Мун да ви найӧс».
Эдомса Доик кывзысис. Сійӧ уськӧдчис попъяс вылӧ да сійӧ лунӧ виис кӧкъямысдас вит попӧс. Ставныс найӧ новлісны шабді ефод.
Сійӧ виаліс шыпуртӧн попъяслӧн Нов карысь став олысьсӧ: айуловӧс и аньясӧс, томъясӧс и кагаясӧс, виаліс тшӧтш налысь ӧшъяссӧ, осёлъяссӧ да ыжъяссӧ.
Ловйӧн коли сӧмын Авиатар, Ахитув Ахимелеклӧн пиыс. Сійӧ пышйис Давид дінӧ.
Авиатар висьталіс Давидлы, мый Саул виаліс Господьлысь попъяссӧ.
Давид шуис Авиатарлы: «Сійӧ лунӧ, кор ме вӧлі Новын, сэні вӧлі эдомса Доик. Ме тӧді, мый сійӧ висьталас ме йылысь Сауллы.
Ме мыжа став тэнад рӧдвужлӧн кулӧмысь.
Кольччы мекӧд. Тэнӧ виысь корсьӧ вины тшӧтш менӧ. Эн пов.
Ме доръя тэнӧ».
Давидлы юӧртісны, филистимсаяс пӧ уськӧдчисны Кейла кар вылӧ да сэні пӧ гусявлӧны вартанінъясысь няньсӧ.
Давид юаліс Господьлысь: «Мунны-ӧ меным сэтчӧ? Верма-ӧ ме тайӧ филистимсаяссӧ?»
Господь вочавидзис: «Мун. Тэ верман найӧс, тшӧтш Кейла карсӧ мездан».
Но Давидлӧн йӧзыс шуисны: «Тані, Иуда муын, ми полам-тіралам. А мый лоӧ миянкӧд, ми кӧ мунам Кейлаӧ да петам филистимса тышкайӧзлы паныд?
[Филистимсаяс босьтасны миянӧс пленӧ.]»
Давид бара шыасис Господь дінӧ. Господь шуис сылы: «Чеччы да мун Кейлаӧ. Ме сета филистимсаясӧс тэнад киӧ».
Давид аслас йӧзкӧд муніс Кейла карӧ, уськӧдчис филистимсаяс вылӧ да босьтіс налысь ыж-мӧссӧ. Филистимсаясӧс пасьвартӧмнас Давид мездіс Кейлаын олысьясӧс.
Кор Ахимелеклӧн Авиатар пиыс локтіс Давид дінӧ [сэсся муніс сыкӧд] Кейлаӧ, сійӧ аскӧдыс вайис ефод.
Сауллы юӧртісны, Давид пӧ Кейлаӧ локтӧма. Саул шуис: «Енмыс сетіс сійӧс менам киӧ. Карса иган сайӧ пырӧмнас сійӧ ачыс асьсӧ йӧртіс».
Саул чукӧртіс став тышкайӧзсӧ, мед мунны Кейлаӧ да кытшавны сэні Давидӧс да сылысь йӧзсӧ.
Кор Давид тӧдмаліс, мый Саул мӧвпыштӧма сылы лёктор вӧчны, тшӧктіс Авиатар поплы вайны [Господьлысь] ефод.
Давид шыасис: «Господьӧй, Израильлӧн Енмӧй! Меным, Тэнад кесйӧглы, кывсис, мый Саул кӧсйӧ локны да ме вӧсна бырӧдны Кейла кар.
Сетасны-ӧ Кейлаын олысьяс менӧ сы киӧ?
Збыльысь-ӧ Саул локтас татчӧ, кыдзи меным висьталісны?
Господьӧй, Израильлӧн Енмӧй, вочавидз Аслад кесйӧглы».
Господь вочавидзис: «Локтас».
Давид юаліс: «Сетасны-ӧ Кейлаын олысьяс менӧ да менсьым йӧзӧс Саул киӧ?»
Господь вочавидзис: «Сетасны».
Сэки Давид да сылӧн йӧзыс, морт квайтсё, пышйисны Кейла карысь. Найӧ пышъялісны-ветлӧдлісны ӧти местасянь мӧдлаӧ.
Кор Сауллы юӧртісны, мый Давид пышйӧма Кейлаысь, сійӧ эновтчис сэтчӧ мунӧмсьыс.
Давид дзебсясис овтӧминын, сэсся муніс Зиф овтӧминса керӧсӧ.
Саул быд лун корсис Давидӧс, но Енмыс эз сет сійӧс Саул киӧ.
Давид тӧдіс, мый Саул корсьӧ сійӧс, медым вины.
Зиф овтӧминса вӧрын дзебсясигӧн Давид дінӧ локтіс Сауллӧн Ионафан пиыс да ышӧдіс сійӧс лача кутны Енмыс вылӧ. Ионафан шуис: «Эн пов, Давид. Саул батьӧй оз аддзы тэнӧ да оз вермы тэныд вӧчны лёксӧ. Тэ кутан ӧксыавны Израильын, а ме лоа тэнад веськыд киӧн.
Батьӧй тшӧтш тӧдӧ тайӧс».
Господь водзын найӧ кӧрталісны ӧта-мӧдыскӧд йитӧд.
Давид кольччис вӧрӧ, а Ионафан бӧр муніс гортас.
Зифын олысьяс локтісны Саул дінӧ Гиваӧ да висьталісны: «Давид дзебсясьӧ миян вӧрын, Хакила керӧс бокын Есимонсянь лунвылын.
Ӧксыӧй, кор кӧсъян, сэки и лок.
Ми сетам сійӧс тэнад киӧ».
Саул воча шуис: «Господь мед бурсиас тіянӧс, ӧд ті тӧждысянныд ме вӧсна.
Мунӧй да нӧшта бура ставсӧ тӧдмалӧй. Кыйӧдӧй, кытчӧ сійӧ мунас. Гашкӧ, кодкӧ аддзыліс сійӧс. Меным висьталӧны, сійӧ пӧ зэв сюсь.
Тӧдмалӧй да видзӧдалӧй, кӧні сійӧ дзебсясьӧ. Кор ставсӧ бура тӧдмаланныд, локтӧй да юӧртӧй меным. Сэки ме муна тіянкӧд.
Сійӧ кӧ тані, Иуда муын, ме кута корсьны сійӧс став кар-сиктысь».
Зифын олысьяс бӧр мунісны Зифӧ Саулысь водзджык.
Давид аслас йӧзкӧд вӧлі Маон овтӧминса ковтысын, Есимонсянь лунвылын.
Саул муніс аслас йӧзкӧд корсьны Давидӧс.
Кор Давидлы юӧртісны та йылысь, сійӧ муніс Маон овтӧминса изкыртаӧ да кольччис сэтчӧ.
Саул тӧдмаліс та йылысь да вӧтчис Давид бӧрся.
Саул локтіс керӧс ӧтар сайсяньыс, а Давид аслас йӧзкӧд вӧлі керӧс мӧдар саяс.
Давид зілис пышйыны Саулысь. Но Саул аслас йӧзкӧд уськӧдчис керӧс ӧтар и мӧдар боксяньыс, медым босьтны Давидӧс да сылысь йӧзсӧ.
Сэки Саул дінӧ локтіс юӧр вайысь да висьталіс, ӧдйӧджык пӧ бӧр лок, филистимсаяс пӧ уськӧдчисны муным вылӧ.
Саул ӧвсис Давид бӧрся вӧтчӧмысь, бӧр бергӧдчис да петіс тышӧ филистимсаяслы паныд.
Та вӧсна тайӧ местасӧ кутісны шуны Села-Хаммахлекотӧн.*
Давид муніс Маон овтӧминысь Эн-Гедиӧ да сэні оліс-дзебсясис.
Кор Саул бӧр локтіс филистимсаясӧс вӧтӧдӧмысь, сылы юӧртісны, Давид пӧ Эн-Геди дорын овтӧминын.
Саул босьтіс аскӧдыс Израиль войтырысь куим сюрс медбур айуловӧс да муніс корсьны Давидӧс да сылысь йӧзсӧ изкыртаясысь, кӧні олісны керӧсвывса кӧзаяс.
Туй вывті муніганыс найӧ воисны ыж йӧр дінӧ.
Сэні Саул пырис кырта горсйӧ асмогасьны.
Буретш тайӧ кырта горсъяс, пыді пельӧсас, дзебсясис Давид аслас йӧзкӧд.
Найӧ шуисны Давидлы: «Воис сійӧ луныс, мый йылысь висьтавліс тэныд Господь. Сійӧ кӧсйысис сетны вӧрӧгтӧ тэнад киӧ, и тэ верман вӧчны сыкӧд, мый кӧсъян».
Давид гусьӧникӧн матыстчис да вундыштіс Сауллысь паськӧм дорышсӧ.
Но Давидлы сьӧкыд лои сьӧлӧм вылас таысь.
Давид шуис аслас йӧзлы: «Господь мед оз лэдз меным лёксӧ вӧчны аслам ыджыдлы, Господьлӧн мавтыштӧмалы. Мед видзас менӧ сы вылӧ киӧс лэптӧмысь, ӧд сійӧ — Господьлӧн мавтыштӧм морт».
Тайӧ кывъяснас Давид ӧлӧдіс ассьыс йӧзсӧ да эз лэдз уськӧдчыны Саул вылӧ.
Саул петіс кырта горсйысь да мӧдӧдчис водзӧ.
Давид тшӧтш петіс кырта горсйысь да горӧдіс Сауллы: «Ӧксыӧй-ыджыдӧй!»
Саул бергӧдчис, а Давид сійӧс пыдди пуктӧмӧн муӧдзыс копыртчыліс сылы да шуис: «Мыйла тэ кывзан йӧзыслысь сёрнисӧ, Давид пӧ мӧвпыштӧма лёк вӧчны тэныд.
Тэ аслад синмӧн аддзан, мый талун изкыртаас Господь сетіс тэнӧ менам киӧ.
Йӧзӧй корисны вины тэнӧ.
Но ме бурсьӧлӧмтчи тэ дінӧ, шуи, мый ог лэпты киӧс аслам ыджыд вылӧ, ӧд сійӧ — Господьлӧн мавтыштӧм морт.
Видзӧдлы, батьӧй, менам киын тэнад паськӧм дорышыд.
Ме вундішті тэнсьыд паськӧмтӧ, но асьтӧ тэнӧ эг ви. Тӧд, ме ог кӧсйы тэныд лёксӧ и ог мун тэныд паныд.
Ме абу мыжа тэ водзын, но тэ кӧсъян вины менӧ.
Мед Ачыс Господь лоас ёрдысьӧн тэа-меа костын. Мед Сійӧ водзӧс перъяс тэнсьыд ме вӧсна.
Но менам киӧй оз кыпты тэ вылӧ. Важӧн шулӧмаӧсь, лёкыс пӧ петӧ лёк йӧзсянь.
Но ме ог лэпты киӧс тэ вылӧ.
Кодлы паныд петін тэ, Израильлӧн ӧксы?
Код бӧрся тэ вӧтлысян?
Пон шой бӧрся? Кутшӧмкӧ пытш бӧрся?
Мед Господь лоас ёрдысьӧн миян костын.
Господь тӧдӧ, мый ме абу мыжа. Сійӧ доръяс да мездас менӧ тэнад киысь».
Кор Давид помаліс сёрнисӧ, Саул шуис: «Тэнсьыд-ӧ гӧлӧс шытӧ кыла, Давид пиӧй?»
Сэсся гораа бӧрддзис. Саул шуис Давидлы: «Тэ веськыда вӧчин, ме эг. Тэ вӧчин меным бурсӧ, а ме мынтыси тэныд лёкӧн.
Талун тэ петкӧдлін, мый тэ бур сьӧлӧма ме дінӧ. Господь сетіс менӧ тэнад киӧ, но тэ эн ви менӧ.
Лэдзас ӧмӧй морт ассьыс вӧрӧгсӧ лӧня мунны, шедіс кӧ мӧдыс сылӧн киӧ?
Талунъя бур вӧчӧмсьыд Господь мед сетас тэныд быд бурсӧ.
Ме тӧда, мый тэ лоан ӧксыӧн, и тэнад юралӧмыд Израильын лоӧ зумыд. 
Господь водзын сет меным кыв, мый менам кулӧм бӧрын тэ он ви месянь чужысьясӧс да он бырӧд менсьым нимӧс бать рӧдысь».
Давид кыв сетіс Сауллы.
Сэсся Саул муніс гортас, а Давид аслас йӧзкӧд кайисны изкырта вылӧ сайӧдчанінас.
Самуил куліс.
Став Израиль войтыр чукӧртчис да ёна бӧрдіс сы вӧсна. Дзебисны сійӧс аслас Рама карӧ.
Та бӧрын Давид муніс Паран овтӧминӧ.
Маон карын оліс зэв озыр морт. Кармил карын сылӧн вӧлі ыджыд овмӧс: куим сюрс ыж да ӧти сюрс кӧза.
Буретш сэні сійӧ шырис ассьыс ыжъяссӧ.
Тайӧ мортыслӧн нимыс вӧлі Навал. Гӧтырсӧ шуисны Авигея — сюсь вежӧра да мича чужӧмбана ань. Навал вӧлі Калев рӧдысь, чорыд сьӧлӧма да лёк оласнога морт.
Овтӧминын Давидлы кывсис, мый Навал шырӧ ыжъяссӧ [Кармилын].
Давид мӧдӧдіс сэтчӧ дас зонмӧс да шуис налы: «Мунӧй Кармилӧ Навал дінӧ. Чолӧмасьӧй сыкӧд менам нимсянь. Шуӧй: “[Видза олан.] Лӧнь олӧм тэныд, тэнад керкалы да ставыслы, мый тэнад эм.
Ме кывлі, мый ті ыжъясӧс шыранныд.
Кор тэнад ыж видзысьясыд вӧліны миян дорынӧсь, ми найӧс эгӧ ӧтдортлӧй. Налӧн нинӧм эз вош сійӧ кад чӧжыс, кор найӧ видзисны ыжъяссӧ Кармилын.
Юав аслад кесйӧгъяслысь, и найӧ висьталасны тэныд.
Менам зонъяс локтісны тэ дінӧ тіян гажӧдчан кадӧ. Ло бур сьӧлӧма на дінӧ.
Сет налы, тэнад кесйӧгъяслы, да тэнад Давид пилы, мый верман сетны”».
Давидлӧн йӧзыс мунісны да висьталісны Наваллы ставсӧ, мый тшӧктіс Давид. Сэсся виччысисны вочакыв.
Навал [чеччыштіс да] шуис Давидлӧн кесйӧгъяслы: «Коді сэтшӧм Давидыс? Коді сійӧ Ессейлӧн пиыс?
Ӧні вывті уна кесйӧг пышъялӧны асланыс ыджыдъясысь.
Босьта ӧмӧй ме нянь, ва [вина] да аслам ыж шырысьяслы дасьтӧм яй и сета йӧзлы, кодъясӧс ме ог тӧд, весиг ог тӧд, кытысьӧсь найӧ?»
Давидлӧн мӧдӧдӧмаяс бӧр локтісны да ставсӧ висьталісны Давидлы.
Давид шуис аслас йӧзлы: «Босьтӧй шыпуртнытӧ!»
Давидкӧд тшӧтш ставныс ӧшӧдісны косканыс шыпуртъяс. Нёльсё гӧгӧр морт мунісны Давидкӧд, кыксёыс кольччисны видзны эмбур-кӧлуйнысӧ.
Авигеялы, Навал гӧтырлы, ӧти кесйӧг юӧртіс: «Давидлӧн мӧдӧдӧмаяс волісны овтӧминсянь ыджыдным дінӧ, мед чолӧмасьны сыкӧд, но сійӧ скӧра вочааліс найӧс.
Тайӧ йӧзыс вӧліны бур сьӧлӧмаӧсь миян дінӧ. Эз ӧтдортлыны миянӧс, кор ми вӧлім на дорын видзьяс вылын. Сэки миян нинӧм эз вошлы.
Лунын и войын, кор ми йирсьӧдім ыжъяснымӧс матын на дінсянь, найӧ дорйисны-видзисны миянӧс.
Мӧвпыштлы, мый вӧчны.
Ыджыд лёктор виччысьӧ миян ыджыднымӧс да сылысь гортсаяссӧ. Навал лёк морт, некодӧс оз кывзы».
Авигея тэрмасьӧмӧн босьтіс кыксё тупӧсь нянь, кык кучик дозйын вина, сёйны дасьтӧм вит ыж, вит куд тыр пражитӧм тусь, сё ёкмыль изюм да кыксё ёкмыль косьтӧм инжир. Ставсӧ тайӧс пуктіс осёлъяс вылӧ. Кесйӧгъясыслы Авигея шуис: «Мунӧй ме водзвылын, а ме муна тіян бӧрся».
Но аслас Навал верӧслы нинӧм эз висьтав.
Осёл вылас керӧсысь лэччигӧн чукыль сайсянь Авигея аддзис, мый Давид аслас йӧзкӧд кайӧ сылы воча.
Давид шуасис Навал вылӧ: «Весьшӧрӧ ме овтӧминын видзи тайӧ мортыслысь овмӧссӧ. Сылӧн овмӧсысь нинӧм эз вош, а ӧні сійӧ лёкӧн мынтысьӧ бурсьыс.
Енмыс мед ёна мыждас менӧ, ме кӧ асылӧдзыс ог бырӧд Навал керкаысь став айуловсӧ».
Кор Авигея аддзис Давидӧс, тэрмасьӧмӧн чеччис осёл вывсьыс да уськӧдчис Давид водзӧ. Муӧдзыс кок дорас копыртчӧмӧн шыасис: «Ыджыдӧй, ме мыжаыс.
Лэдз меным, аслад кесйӧглы, сёрнитны тэкӧд, кывзы менӧ.
Ыджыдӧй, эн босьт сьӧлӧмад Наваллысь кывъяссӧ, ӧд сійӧ лёк морт.
Навал нимыс сылы бура лӧсялӧ, сійӧ збыльысь вежӧртӧм.
А ме, тэнад кесйӧг, эг аддзыв тэнсьыд волысь кесйӧгъястӧ.
Ловъя Господь водзын да тэ водзын, ыджыдӧй, шуа, мый Господь оз лэдз тэныд вир кисьтны да водзӧс перйыны. Ыджыдӧй, тэнӧ мустӧмтысьяскӧд да лёксӧ вӧчысьяскӧд мед лоас сійӧ жӧ, мый виччысьӧ Навалӧс.
Ыджыдӧй, тайӧ козинъяссӧ ме, тэнад кесйӧг, вайи тэныд да тэнад кесйӧгъяслы.
Прӧстит менӧ збойлунысь.
Тэ нуӧдан Господьлысь тышъяс, та вӧсна Сійӧ зумыдмӧдас тэнсьыд рӧдтӧ, ыджыдӧй. Став олӧм чӧжыд лёкыс оз су тэнӧ.
Господь, тэнад Енмыд, видзас тэнсьыд олӧмтӧ дзескӧдысьясысь да тэнӧ вины корсьысьясысь, дзебас тэнӧ Аслас питшӧгас. А тэнӧ мустӧмтысьяслысь ловсӧ изйӧс моз Сійӧ шыбитас.
Кор Господь вӧчас тэныд, ыджыдӧй, став бурсӧ, мый Сійӧ кӧсйысьліс, да пуктас тэнӧ юралысьӧ Израильын, сэки сьӧлӧмыд оз кут мыжавны тэнӧ весьшӧрӧ вир кисьтӧмысь да водзӧс перйӧмысь.
Господь вӧчас бурсӧ тэныд, ыджыдӧй. Сэки эн вунӧд менӧ, ассьыд кесйӧгтӧ [да ло бур сьӧлӧма ме дінӧ]».
Давид шуис Авигеялы: «Ошкӧм Господьлы, Израильлӧн Енлы, коді ыстіс тэнӧ меным воча. Бурсиӧма тэнсьыд мывкыдлунтӧ. Бурсиӧма тэнӧ сыысь, мый талун тэ потшӧсалін менӧ вир кисьтӧмысь да водзӧс перйӧмысь.
Ловъя Господь, Израильлӧн Ен, водзын шуа: тэ кӧ эн тэрмась да эн кӧ лок меным воча, ме эськӧ асылӧдзыс вии Навал керкаысь став айуловсӧ. Господь видзис менӧ тэныд лёксӧ вӧчӧмысь».
Давид босьтіс Авигеялысь вайӧм сёянсӧ да шуис: «Мун лӧнь сьӧлӧмӧн гортад.
Ме кылі тэнсьыд корӧмтӧ, и вӧча сы серти».
Авигея локтіс гортас. Навал вӧлі лӧсьӧдӧма ӧксылы кодь ыджыд гаж. Сійӧ гажӧдчис да кодаліс.
Авигея кыв эз шу сылы асылӧдзыс.
Асывнас, кор Навал паляліс, гӧтырыс висьталіс сылы ставсӧ. Сэки Наваллысь сьӧлӧмсӧ топӧдіс, и сійӧ эз вермы вӧрзьӧдчынысӧ.
Лун дас мысти Господь дойдіс Навалӧс кувмӧныс.
Давидлы кывсис, мый Навал кулӧма, сэки шуис: «Ошкӧм Господьлы, коді мынтысис Наваллы менӧ янӧдӧмысь. Господь видзис менӧ, Ассьыс кесйӧгсӧ, лёк вӧчӧмысь, Сійӧ бергӧдіс лёксӧ Навал вылӧ».
Сэсся Давид ыстіс йӧзӧс Авигея дінӧ, мед висьтавны, мый босьтӧ сійӧс гӧтырӧ.
Давидлӧн кесйӧгъяс локтісны Авигея дінӧ Кармилӧ да шуисны сылы, Давид пӧ мӧдӧдіс миянӧс тэ дінӧ, мед босьтны тэнӧ аслыс гӧтырӧ.
Авигея муӧдзыс копыртчӧмӧн шуис: «Ме дась лоны сылӧн кесйӧгӧн, дась весиг мыськавны ыджыдӧйлӧн кесйӧгъяслысь кокнысӧ».
Авигея ӧдйӧ дасьтысис туйӧ. Сійӧ пуксис осёл вылӧ да вит кесйӧг анькӧд петіс туйӧ Давидлӧн кесйӧгъяс бӧрся.
Тадзи Авигея лои Давидлы гӧтырӧн.
Давид нӧшта босьтіс гӧтырӧ Изреельысь Ахиноамаӧс. Тадзи сылӧн лои кык гӧтыр.
А Саул сетіс ассьыс Мелкола нывсӧ, Давидлысь воддза гӧтырсӧ, галлимса Лаишлӧн Палти пи сайӧ.
Зифын олысьяс [лунвывсянь] локтісны Саул дінӧ Гиваӧ да висьталісны, Давид пӧ дзебсясьӧ миян дінын Хакила керӧсын, Есимонсянь лунвылын.
Саул босьтіс аскӧдыс куим сюрс израильса медбур айуловӧс да лэччис Зиф овтӧминӧ корсьны Давидӧс.
Саул сувтіс тышкайӧзыскӧд Есимонсянь лунвылӧ, туй бокын сулалысь Хакила керӧсӧ.
Давид вӧлі овтӧминын, кор тӧдмаліс, мый Саул вӧтчӧ сы бӧрся.
Давид мӧдӧдіс кыйӧдчысьясӧс, кодъяс висьталісны, Саул пӧ збыльысь локтӧма [Кейласянь].
Давид [гусьӧникӧн] муніс Сауллӧн сувтанінӧ. Сэні Давид аддзис Сауллысь да тышкайӧзӧн веськӧдлысь Авенирлысь, Нирлӧн пиыслысь, узянінъяссӧ.
Саул узис шӧрас, а сылӧн тышкайӧзыс — сы гӧгӧр.
Давид шыасис хеттей войтырысь Ахимелек дінӧ да Саруялӧн Авишай пи дінӧ, Йоавлӧн вокыс дінӧ: «Коді мунас мекӧд Саул дінӧ?»
Авишай вочавидзис: «Ме муна».
Войнас Давид муніс Авишайкӧд Сауллӧн тышкайӧз чукӧртчанінӧ.
Саул узис тышкайӧз шӧрас, юр дорас муас вӧлі сатшкӧма ассьыс шысӧ.
Авенир мукӧдыскӧд узис Саул гӧгӧрыс.
Авишай шуис Давидлы: «Ӧні Ен сетіс тэнад киӧ мустӧмтысьтӧ.
Лэдз, ме ӧтчыдысь бытшкӧмӧн сатшка сійӧс му бердас. Мӧдысь бытшкӧмыс оз ковмы!»
Давид шуис Авишайлы: «Эн ви сійӧс!
Господьлӧн мавтыштӧма вылӧ ки лэптысь оз коль мыждытӧг.
Ловъя Господь водзын шуа: Ачыс Господь бырӧдас сійӧс. Ас кулӧмнас либӧ тышын кулас сійӧ.
А Господь мед видзас менӧ Сылӧн мавтыштӧма вылӧ киӧс лэптӧмысь.
Босьт сылӧн юр дорысь шысӧ да ва тыра дозсӧ. Мунам татысь».
Давид ачыс босьтіс Сауллӧн юр дорысь сылысь шысӧ да ва дозсӧ. Сэсся найӧ бӧр мунісны.
Некод эз аддзыв ни эз тӧдлы налысь волӧмсӧ, некод весиг эз садьмыв. Ставныс узисны, ӧд Господь ыстіс налы чорыд ун.
Давид вуджис ковтыс мӧдарладорас, сувтіс керӧс йылӧ — Сауллӧн чукӧрсянь коластыс вӧлі ыджыдкодь.
Сэтысянь Давид горӧдіс Сауллӧн йӧзлы да Нирлӧн Авенир пилы: «Авенир, тэ кылан менӧ?»
Авенир воча шыасис: «Коді тэ сэтшӧмыс? Мый тэ горзан да шызьӧдан ӧксыӧс?»
Давид шуис Авенирлы: «Тэ ӧд вына морт, тэ кодь мӧдыс оз сюр Израильын.
Мыйла нӧ тэ он видз ӧксытӧ, ассьыд ыджыдтӧ? 
Ӧд быдӧн, коді кӧсъяс, вермас локны да вины сійӧс. Тадзи вӧлі нин.
Лёка тэ вӧчан ассьыд уджтӧ.
Ловъя Господь водзын шуа: тіянӧс лӧсялӧ вины сыысь, мый онӧ видзӧй ассьыныд ыджыднытӧ, Господьлысь мавтыштӧмасӧ.
Видзӧдлы, кытчӧ вошис ӧксыыдлӧн юр дорсьыс шыыс да ва дозйыс!»
Саул тӧдіс Давидлысь гӧлӧссӧ да юаліс: «Тэнсьыд-ӧ гӧлӧс шытӧ кыла, Давид пиӧй?»
Давид вочавидзис: «Менсьым, ӧксыӧй-ыджыдӧй».
Сэсся содтіс: «Мыйысь, ыджыдӧй, вӧтлысян аслад кесйӧг бӧрся?
Мый ме вӧчи? Кутшӧм лёктор?
Кывзы менӧ, ӧксыӧй-ыджыдӧй! Господь кӧ ышӧдіс тэнӧ меным паныд, мед висьлӧн чӧскыд дукыс бурмӧдас Сылысь сьӧлӧмсӧ.
А йӧз кӧ ышӧдісны, мед лоӧ ёрӧма найӧс Господь водзын, ӧд найӧ вӧтлісны менӧ Господьлӧн муысь да тшӧктісны юрбитны мукӧд енъяслы.
Менам вирӧй мед оз киссьы Господьысь ылын.
Мыйла израильса ӧксы петӧма корсьны кутшӧмкӧ пытшӧс, вӧтлысьӧ керӧсъясӧд быттьӧ байдӧг бӧрся?»
Саул шуис: «Ме мыжа.
Лок бӧр, Давид пиӧй. Ме сэсся ог кут вӧчны тэныд лёксӧ, ӧд тэ эн босьт менсьым олӧмӧс.
Шогмытӧмтор ме вӧчи, нем думышттӧг».
Давид воча шуис: «Со, ӧксылӧн шыыс.
Тэнад йӧз пӧвстысь кодкӧ мед локтас да босьтас сійӧс.
Господь быдӧнлы мынтысьӧ мортыслӧн веськыдлун да эсканлун серти. Талун Господь сетіс тэнӧ менам киӧ, но ме эг лэпты киӧс Господьлӧн мавтыштӧма вылӧ.
Кыдзи талун ме эг босьт тэнсьыд ловтӧ, тадзи Господь мед оз босьт менсьым лолӧс. Сійӧ мед [видзас да] мездас менӧ быд лёксьыс».
Саул шуис Давидлы: «Бурсиӧма тэнӧ, Давид пиӧй.
Тэ ыджыд уджъяс на вӧчан, и ставыс тэнад артмас».
Сэсся Давид муніс аслас туйӧд, а Саул бӧр локтіс гортас.
Давид мӧвпаліс: «Коркӧ ме збыльысь веськала Саул киӧ. Бурджык меным пышйыны Филистим муӧ, сэки Саул ӧвсяс меысь, дугдас корсьны менӧ став Израиль му пасьтала. Тадзи ме мына сыысь».
Давид босьтіс аскӧдыс квайтсё мортӧс да мӧдӧдчис гефса ӧксы дінӧ, Маоклӧн Акиш пи дінӧ.
Давид аслас кыкнан гӧтырыскӧд, Изреельысь Ахиноамакӧд да Кармилысь Авигеякӧд, Наваллӧн вӧвлӧм гӧтыркӧд, овмӧдчис Гефӧ. Давидкӧд локтӧм йӧзыс асланыс став котырнас тшӧтш овмӧдчисны сэтчӧ.
Сауллы юӧртісны, Давид пӧ пышйӧма Гефӧ. Сэки Саул дугдіс вӧтлысьны Давид бӧрся.
Давид шуис Акишлы: «Ло бур сьӧлӧма ме дінӧ. Овмӧд менӧ кутшӧмкӧ ичӧтик карӧ.
Мыйла меным, тэнад кесйӧглы, овны ӧксылӧн карын?»
Сэки Акиш сетіс Давидлы Сиклаг кар. Тайӧ карас ӧнӧдз веськӧдлӧны Иуда войтырлӧн ӧксыяс.
Филистим муын Давид оліс во да нёль тӧлысь.
Аслас йӧзкӧд Давид тшӧкыда уськӧдчывліс гешурсаяс, гирзейяс да амаликъяс вылӧ. Найӧ важысянь овмӧдчылӧмаӧсь тайӧ муас, паськӧдчылӧмаӧсь Шурӧдз да весиг Египетӧдз.
Давид пазӧдліс тайӧ муяссӧ, виавліс сэтчӧс айуловӧс и аньясӧс, а налысь ыж-мӧссӧ, осёлъяссӧ, верблюдъяссӧ да став кӧлуйсӧ босьтліс аскӧдыс.
Быд пӧрйӧ тышысь воӧм бӧрти Давид петкӧдчывліс Акишлы.
Акиш юавліс: «Код вылӧ талун уськӧдчылін?»
Давид вочавидзліс: «Негевын олысь Иуда войтыр вылӧ», либӧ «Негевын олысь Ерахмель рӧд вылӧ», либӧ «Негевын олысь кеней войтыр вылӧ».
Давид некодӧс эз вайӧдлы Гефӧ, а ставнысӧ — айуловӧс и аньясӧс — виавліс. Эз кӧсйы, медым ловйӧн кольысьяс висьталісны, мый сійӧ збыльвылас вӧчӧ. Филистим муын олігас Давид век вӧчліс тадзи.
Акиш эскис Давидлы. Чайтіс, мый Давид мустӧммис аслас Израиль войтырлы. Та вӧсна мӧвпаліс, мый Давид кутас пыр кесъявны сылы.
Сійӧ кадас филистимсаяс чукӧртісны тышкайӧзӧс, медым уськӧдчыны Израиль вылӧ.
Акиш ӧксы шуис Давидлы: «Кывзы, тэныд да тэнад йӧзлы ковмас мунны мекӧд тышӧ».
Давид вочавидзис Акишлы: «Талун тэ аддзан, мый вылӧ сяммӧ тэнад кесйӧгыд».
Акиш шуис Давидлы: «Таысь ме пукта тэнӧ пыр кежлӧ менӧ видзысьӧ».
Самуил кор куліс, став Израиль ёна бӧрдіс-шогсис сы вӧсна. Дзебисны сійӧс аслас Рама карӧ.
Та бӧрын Саул вӧтлаліс аслас муысь кулӧмаӧс корысьясӧс да тунасьысьясӧс.
Филистимсаяс чукӧртчисны, локтісны Шунем карӧ да сувтісны сэтчӧ.
Саул чукӧртіс израильса тышкайӧзӧс да сувтіс накӧд Гелву керӧс вылӧ.
Саул кор аддзис филистимса тышкайӧзӧс, ёна повзис, сьӧлӧмыс чеччыны кутіс.
Сэки сійӧ шыасис Господь дінӧ, но Господь сылы эз вочавидз вӧт пыр ни уримӧн пудъясьӧм пыр, весиг пророкъяс пыр.
Саул шуис аслас кесйӧгъяслы: «Корсьӧй меным аньӧс, коді вермӧ корны кулӧмаӧс. Ме ветла сы дінӧ отсӧгла».
Кесйӧгъяс вочавидзисны: «Эн-Дорын эм татшӧм аньыс».
Саул вежис паськӧмсӧ, медым сійӧс эз тӧдны, босьтіс аскӧдыс кык мортӧс да петіс туйӧ. Войнас сійӧ локтіс ань дорӧ да шуис: «Кора тэнӧ, тунав меным. Кор меным ловсӧ сылысь, кодлысь нимсӧ ме шуа».
Но ань вочавидзис: «Тэ ӧд тӧдан, мый вӧчис Саул кулӧмаӧс корысьяскӧд да тунасьысьяскӧд. Сійӧ вӧтліс найӧс аслас муысь.
Мыйла тэ сюян менӧ налькйӧ, тойлалан менӧ кулӧмӧ?»
Господь нимӧн кӧсйысьӧмӧн Саул шуис: «Ловъя Господь водзын кыв сета: тэныд таысь лёкыс оз ло».
Сэки ань юаліс: «Кодӧс тэныд корны?»
Саул вочавидзис: «Самуилӧс».
Ань кор аддзис Самуилӧс, гораа горӧдіс.
Сэсся шыасис Саул дінӧ: «Тэ — Саул! Мыйла тэ менӧ пӧръялін?»
Ӧксы вочавидзис сылы: «Эн пов.
Висьтав, мый тэ аддзан».
Ань вочавидзис: «Аддза, мый му пытшсьыс кыпӧдчӧ кодкӧ ен кодь».
«Кутшӧм сійӧ?» — юаліс Саул.
Мӧдыс вочавидзис: «Кыпӧдчӧ кузь паськӧма пӧрысь морт».
Саул гӧгӧрвоис, мый тайӧ Самуил, и муӧдзыс копыртчис.
Самуил шуис Сауллы: «Мыйла тэ менӧ вӧрӧдан, корин локны?»
Саул вочавидзис: «Меным зэв сьӧкыд.
Филистимсаяс тыш панісны, а Енмыс вешйис ме дінысь. Сійӧ оз вочавидз меным пророкъяс пыр ни вӧт пыр [ни петкӧдчылӧм пыр].
Ме кори тэнӧ, мед тэ висьталін, мый меным вӧчны».
Самуил шуис: «Мыйла тэ менсьым юасян, Ачыс кӧ Господь вешйис тэ дінысь да тэныд паныд сувтіс?
Господь вӧчас сійӧ, мый шуліс ме пыр.
Господь босьтас тэнад киысь ӧксыалӧмтӧ да сетас мӧдлы, Давидлы, ӧд тэ эн кывзысь Господьлысь.
Сійӧ кӧсйис кисьтны Ассьыс скӧрлунсӧ амалик войтыр вылӧ, но тэ эн вӧч Сылӧн тшӧктӧм серти. Та вӧсна Господь вӧчас тадзи:
Сійӧ сетас тэнӧ да Израильӧс филистимсаяслӧн киӧ. Аски тэ да тэнад пияныд лоанныд ме дінын, а израильса тышкайӧзӧс Господь сетас филистимсаяслӧн киӧ».
Самуиллӧн кывъясысь повзьӧмысла Саул усис му вылас.
Эбӧсыс сылӧн дзикӧдз бырис, ӧд таӧдз сійӧ лунтыр и войбыд эз босьтлы вомас няньтор.
Ань матыстчис Саул дінӧ да аддзис, мый сійӧ ёна повзьӧма. Сэсся шуис: «Ме, тэнад кесйӧг, кывзыси тэнсьыд. Ассьым олӧмӧс верми воштыны, но ме вӧчи, мый тэ тшӧктін.
Ӧні кора, кывзы менӧ, ассьыд кесйӧгтӧ. Босьт да сёйышт тайӧ няньторсӧ, мед выныд лоӧ туяд петны».
Но Саул пыксис, шуис, ог пӧ кут сёйны.
Но кесйӧгъясыслӧн да аньлӧн ёна корӧм бӧрын Саул кӧсйысис сёйны, чеччис му вывсьыс да пуксис вольпась вылӧ.
Тайӧ аньыслӧн гортас вӧлі тшӧгӧдӧм кукань. Аньыс тэрмасьӧмӧн начкис сійӧс. Сэсся босьтіс пызь, кизьӧртіс сійӧс да пӧжаліс шомтӧм нянь. Ставсӧ тайӧс вайис Сауллы да сылӧн кесйӧгъяслы. Найӧ сёйыштісны да сійӧ жӧ войнас мунісны.
Филистимсаяс чукӧртісны став ассьыныс тышкайӧзсӧ Афекӧ, а израильсаяс сувтісны чукӧрнас Изреельӧ ва петанін дорӧ.
Филистимса юралысьяс мунісны тышкайӧзныскӧд, быдӧн веськӧдліс сё либӧ сюрс мортӧн. А Давид аслас йӧзкӧд да Акиш ӧксыкӧд мунісны на бӧрся.
Филистимса юралысьяс кутісны шуасьны: «Мыйсяма еврейяс мунӧны миянкӧд?»
Акиш вочавидзис налы: «Онӧ ӧмӧй тӧдӧй? Тайӧ ӧд Давид, израильса Саул ӧксылӧн кесйӧгыс.
Сійӧ воысь дырджык нин олӧ ме дорын да локтӧмсяньыс бура кесъялӧ меным».
Филистимса юралысьяс скӧрмисны Акиш вылӧ да шуисны: «Ысты сійӧс бӧр. Мед мунас сэтчӧ, кытчӧ тэ сійӧс овмӧдін. Сылы оз позь миянкӧд ӧтвыв петны тышӧ, вермас миянлы паныд сувтны.
Сэсся миянӧс виалӧмнас бурмӧдас аслас ыджыдлысь сьӧлӧмсӧ.
Тайӧ Давид йывсьыс ӧд коркӧ йӧзыс йӧктӧмӧн сьылісны, Саул пӧ вермис сюрсъясӧс, а Давид пӧ — дас сюрсъясӧс».
Акиш корис Давидӧс да шуис: «Ловъя Господь водзын шуа, мый тэ веськыд морт, и ме эськӧ кӧсйи, мед тэ ветлін мекӧд тышъясӧ.
Локтӧмсяньыд тэ бура кесъялан меным, но мукӧд юралысьыс мустӧмтӧны тэнӧ.
Бӧр бергӧдчы, мед оз скӧрмыны найӧ. Мун лӧнь сьӧлӧмӧн».
«Мыйысь ме мыжми? — юаліс Давид. — Эг-ӧ ме локтӧмсянь бура кесъяв тэныд, ӧксыӧй-ыджыдӧй? Мыйла ме ог вермы мунны да тышкасьны тэнад вӧрӧгыдкӧд?»
Акиш вочавидзис: «Тӧд, тэ меным Енлӧн андел кодь бур.
Но филистимса юралысьяс шуисны, мый тэныд оз позь миянкӧд ӧтвыв петны тышӧ.
Аски асывнас чеччы да мун Саул ыджыдыдлӧн кесйӧгъяскӧд, кодъяс локтісны тэкӧд тшӧтш. [Мунӧй сійӧ карас, кытчӧ ме тіянӧс овмӧді. Эн босьт сьӧлӧмад юралысьяслысь сёрнисӧ. Ме тӧда, мый тэ бура кесъялан.] 
Асывнас югдӧм бӧрас петӧй туйӧ».
Давид аслас йӧзкӧд чеччисны асывнас да бӧр мунісны Филистим муӧ.
А филистимсаяс мунісны [тышкасьны] Изреельӧ.
Куим лун чӧж Давид аслас йӧзкӧд воӧдчис Сиклагӧ. Сэккості амаликъяс уськӧдчисны Негев му да Сиклаг кар вылӧ. Сиклаг карсӧ найӧ пасьвартісны да сотісны. Аньясӧс да карса став олысьсӧ, ичӧтсянь ыджыдӧдз, эз кутны виавны, но нуӧдісны аскӧдныс.
Давид аслас йӧзкӧд локтіс карас да аддзис: карсӧ сотӧмаӧсь, а гӧтыръяснысӧ да ныв-пинысӧ нуӧдӧмаӧсь пленӧ.
Давид да сылӧн йӧзыс ырзӧмӧн кутісны бӧрдны. Бӧрдісны эбӧс быртӧдзныс.
Давидлысь вӧлі босьтӧмаӧсь кыкнан гӧтырсӧ: изреельса Ахиноамаӧс да кармилса Авигеяӧс, Наваллысь вӧвлӧм гӧтырсӧ.
Став йӧзыс ёна шогсисны, быдӧн шогсис аслас ныв-пиыс вӧсна. Найӧ весиг кӧсйисны изъявны Давидӧс, та вӧсна сылы вӧлі вывті сьӧкыд.
Но Давид лача кутіс аслас Господь Ен вылӧ, и тайӧ ёнмӧдіс сійӧс. Сійӧ тшӧктіс Авиатар поплы, Ахимелек пилы, вайны ефод.
Кор Авиатар вайис ефодсӧ, Давид шыасис Господь дінӧ да юаліс: «Вӧтчыны-ӧ меным тайӧ мырддялысь-пазӧдысьяс бӧрся? Суӧда-ӧ ме найӧс?»
Господь вочавидзис: «Вӧтчы. Тэ суӧдан и мездан ассьыд йӧзтӧ».
Давид босьтіс аскӧдыс квайтсё мортӧс да мӧдӧдчис.
Кор воисны Восор ю дорӧ, мудзӧмаяс сувтісны. Налӧн весиг выныс эз вӧв Восор юсӧ вуджны. Кыксёыс колльчисны, а нёльсёыскӧд Давид муніс водзӧ.
Овтӧминысь найӧ аддзисны египетса мортӧс. Сійӧс вайӧдісны Давид дінӧ. Сэсся юкталісны сійӧс ваӧн, сетісны сылы нянь, косьтӧм инжир да кык ёкмыль изюм. Сійӧ сёйис да ёнмыштіс. Таӧдз сійӧ куим лун оліс сёйтӧг-ютӧг.
Давид юаліс сылысь: «Кодлӧн тэ да кытысь ачыд?»
Мӧдыс вочавидзис: «Ме Египетысь, амалик мортлӧн кесйӧг. Куим лун сайын ме висьми, и ыджыдӧй эновтіс менӧ.
Ми уськӧдчылім керетсаяслӧн, Иуда войтырлӧн да Калев рӧдлӧн Негев му вылӧ, а Сиклаг кар ми сотім биӧн».
Давид юаліс: «Нуӧдан-ӧ миянӧс тайӧ мырддялысь-пазӧдысьяс дінӧ?»
Мӧдыс вочавидзис: «Нуӧда. Сӧмын кыв сет меным Ен водзын, мый он ви менӧ да он сет менӧ аслам ыджыдӧйлы».
[Давид кыв сетіс.] Мӧдыс нуӧдіс.
Воӧм бӧраныс аддзисны, мый быдлаӧ паськӧдчӧмаӧсь амаликъяс, найӧ сёйӧны-юӧны да гажӧдчӧны. Тадзи амаликъяс нимкодясисны, мый унатор вермисны курыштны Филистим да Иуда муясысь.
Асъядорыс Давид уськӧдчис на вылӧ да рытӧдзыс ставнысӧ виаліс. Сӧмын нёльсё том зон пышйисны верблюдъяс вылын.
Давид бӧр босьтіс ставсӧ, мый амаликъяс курыштісны, тшӧтш мездіс ассьыс кыкнан гӧтырсӧ.
Вӧлі мездӧма став йӧзсӧ ичӧтсянь ыджыдӧдз. Давид бӧр вайӧдіс быдӧнлысь ныв-писӧ, вайис став озырлунсӧ, мый амаликъяс босьтлісны.
Асланыс ыж-мӧс водзвылын йӧзыс вӧтлісны амаликъяслысь ыж-мӧссӧ, мый Давид босьтіс. Йӧзыс шуалісны, тайӧ пӧ Давидлӧн шедӧдӧмтор.
Сэсся воисны кыксёыс дінӧ, кодъяс эбӧстӧмнысла кольччылісны Восор ю дорӧ. Найӧ воча петісны Давидлы да сылӧн йӧзлы.
Давид матыстчис да чолӧмасис накӧд.
Давидкӧд ветлысьяс пӧвстын вӧліны тшӧтш лёк да шогмытӧм йӧз. Найӧ пондісны шуасьны: «Огӧ сетӧй налы амаликъяслысь мырддьӧмторйысь нинӧм, ӧд найӧ эз ветлыны миянкӧд.
Мед босьтасны ассьыныс гӧтыръяснысӧ, ныв-пинысӧ да мунасны».
Но Давид ӧлӧдіс: «Энӧ вӧчӧй тадзи, вокъяс. Ӧд ставсӧ тайӧс сетіс миянлы Господь. Сійӧ видзис миянӧс да сетіс миян киӧ амаликъясӧс, кодъяс уськӧдчисны мырддявны-пазӧдны миянӧс.
Некод оз кут вӧчны тіян ног. [Найӧ абу лёкджыкӧсь миянысь.] 
Быдӧнлы ӧткодя юкам: тышӧ ветлысьяслы и налы, кодъяс кольччылісны эмбур видзны».
Тайӧ кадсяньыс и ӧнӧдз Израильын тайӧ тшӧктӧмыс вына.
Сиклагӧ воӧм бӧрын Давид мӧдӧдаліс шедӧдӧмторсьыс козинъяс Иуда войтырлӧн юрнуӧдысьяслы, аслас ёртъяслы. Давид тшӧктіс висьтавны, мый налы мӧдӧдӧмторсӧ мырддьӧма Господьӧс мустӧмтысьяслысь. Давид ыстіс козинъяссӧ Вефильӧ, лунвыв Рамотӧ, Яттирӧ, [Гефорӧ,] Ароэрӧ, [Аммадӧ,] Шифмотӧ, Эштемоаӧ, [Гефӧ,] [Кинанӧ, Сафенӧ, Фимафӧ,] Ракалӧ, Ерахмель рӧдлӧн да кеней войтырлӧн каръясӧ, Хормаӧ, Бор-Ашанӧ, Атакӧ, Хевронӧ да быдлаӧ, кыті ветліс Давид аслас йӧзкӧд.
Филистимсаяс тышкасисны израильсаяскӧд. Гелву керӧс вылын найӧ пасьвартісны израильсаясӧс. Унаӧн израильса пӧвстысь кулісны, а мукӧдыс пышйисны.
Филистимсаяс суӧдісны Саулӧс да сылысь пиянсӧ. Найӧ виисны Сауллысь Ионафан, Авинадав да Малкисуй пиянсӧ.
Чорыд тыш вӧлі Саулкӧд. Сійӧс лыйлісны ньӧвъясӧн, зэв ёна дойдалісны.
Саул шуис шыпурт новлӧдлысьыслы: «Перйы шыпурттӧ да бытшкы менӧ! Тайӧ вундыштчытӧмъясыс мед оз вины менӧ да оз тешитчыны ме вылын».
Но шыпурт новлӧдлысь ёна повзис да эз ви Саулӧс.
Сэки Саул босьтіс ассьыс шыпуртсӧ да шыбитчис ёсьладор помас.
Шыпурт новлӧдлысь кор аддзис, мый Саул куліс, тшӧтш шыбитчис шыпурт ёсьладор помас да куліс.
Ӧти лунӧ кулісны Саул, сылӧн куимнан пиыс, шыпурт новлӧдлысьыс да став тышкайӧзыс.
Ковтыс мӧдарладорын да Йӧрдан ю сайын олысь израильсаяс кор кылісны, мый израильса тышкайӧз пышйӧмаӧсь, а Саул пияныскӧд абу нин ловъяӧсь, сэки эновтісны ассьыныс каръяснысӧ да пышйисны. А филистимсаяс локтісны да овмӧдчисны сэтчӧ.
Мӧд луннас, кор филистимсаяс локтісны шобны виӧмаясӧс, аддзисны Гелву керӧс вылысь Сауллысь да куимнан пиыслысь шойяссӧ.
Найӧ [бергӧдісны Сауллысь шойсӧ,] керыштісны сылысь юрсӧ, босьтісны шыпуртсӧ да мукӧд тышкасянторсӧ. Сэсся ставсӧ тайӧс новлӧдлісны Филистим му пасьтала да идолъяслы юрбитанінъясын став войтырыслы юӧртісны асланыс вермӧм йылысь.
Сауллысь тышкасянторъяссӧ пуктісны Астарталы юрбитанінӧ, а шойсӧ ӧшӧдісны Бет-Шеан карса стен бердӧ.
Галаад муын Явис карын кор кылісны, мый филистимсаяс вӧчӧмаӧсь Саулкӧд, сэки став збой йӧзыс петісны туйӧ да войбыд мунісны. Найӧ босьтісны Сауллысь да пияныслысь шойяссӧ, кодъяс ӧшалісны Бет-Шеан стен бердын, вайисны Явис карӧ да сотісны.
Налысь лыяссӧ гуалісны тамариск пу улӧ. Та бӧрын сизим лун чӧж видзалісны.
{Еврей йӧз (комиӧдіс Kodko) @ Ӧксыяслӧн 2 небӧг @ религ. гижӧд @ Библия @ 2021 @ Лб. .}
ӦКСЫЯСЛӦН 2 НЕБӦГ
Сауллӧн кулӧм бӧрын Давид пасьвартіс амаликъясӧс, сэсся бӧр локтіс Сиклагӧ да оліс сэні кык лун. Коймӧд луннас Сауллӧн тышкайӧз пӧвстысь локтіс ӧти морт.
Паськӧмсӧ сійӧ вӧлі косялӧма, юрсӧ коялӧма муӧн.
Сійӧ матыстчис Давид дінӧ да муӧдзыс уськӧдчис сы водзӧ.
Давид юаліс: «Кытысь тэ локтін?»
Мӧдыс вочавидзис: «Ме пышйи израильса тышкайӧзлӧн чукӧртчанінысь».
«Мый лоис?» — юаліс Давид.
Мӧдыс висьталіс: «Израильса тышкайӧз пышйисны тышкасянінысь. На пӧвстысь унаӧс виисны, виисны тшӧтш Саулӧс да сылысь Ионафан писӧ».
«Кытысь тэ тӧдан, мый Саул да сылӧн Ионафан пиыс кулӧмаӧсь?» — водзӧ юасис Давид.
Юӧр вайысь шуис: «Ме локті Гелву керӧсӧ да аддзи доймалӧм Саулӧс. Сійӧ сулаліс шы вылас мыджсьӧмӧн. Тарантасъяс да верзьӧмаяс вӧлі матыстчӧны сылань.
Сійӧ видзӧдліс бӧрлань да аддзис менӧ.
Чукӧстіс менӧ, и ме шыаси.
Сійӧ юаліс, коді ме.
Ме шуи, мый ме амалик войтырысь.
Сэки сійӧ шуис меным: “Матыстчы да ви менӧ. Кулӧмыс топӧдӧ, но ме ловъя на”.
Ме матыстчи да вии. Ме тӧді, мый татшӧма доймалӧм бӧрын сійӧ дыр оз нин ов.
Сэсся босьті юр вывсьыс ӧксы юркытшсӧ, кисьыс сойкытшсӧ да вайи тэныд, ыджыдӧй».
Сэки Давид косяліс ассьыс паськӧмсӧ. Йӧзыс, кодъяс вӧліны сыкӧд, тшӧтш тадзи вӧчисны.
Найӧ рытӧдзыс видзалісны да ырзӧмӧн бӧрдісны шыпурт помысь кулӧм израильсаяс вӧсна: Саул вӧсна, сылӧн Ионафан пиыс вӧсна да Господьлӧн тышкайӧзыс вӧсна.
Давид юаліс юӧр вайысьлысь: «Кытысь ачыд?»
Мӧдыс вочавидзис: «Ме амаликъяслӧн муысь локтысьлӧн пи».
Давид шуис сылы: «Кыдзи тэ лысьтін лэптыны китӧ, медым вины Господьлысь мавтыштӧмасӧ?»
Сэсся Давид корис аслас тышкайӧзысь ӧтиӧс да шуис: «Ви сійӧс».
Шыпурта бытшкис юӧр вайысьӧс, и мӧдыс куліс.
А юӧр вайысьлы шуис: «Тэ ачыд мыжа аслад кулӧмысь. Ӧд тэ аслад вомӧн шуин, мый виин Господьлысь мавтыштӧмасӧ».
Давид сьыліс Саул да сылӧн Ионафан пи йылысь бӧрдӧдчанкыв. Иуда войтырлы сійӧ тшӧктіс велӧдны сьыланкыв, мый сиӧма ньӧввужйысь медбур лыйсьысьяслы. Тайӧ сьыланкывсӧ гижӧма Веськыда олысьлӧн небӧгӧ.
Тэнсьыд медбуръястӧ, Израильӧй, пасьвартісны керӧсъясыд вылын.
Ыджыд шог — вынаяс усисны!
Энӧ висьтавлӧй та йылысь Гефын, энӧ паськӧдӧй юӧрсӧ Аскалон туйяс вылын, медым эз нимкодясьны филистимса нывъяс, эз гажӧдчыны вундыштчытӧмъяслӧн нывъяс.
Гелву керӧсъяс, тіянӧс мед оз кӧтӧдны лысва да зэр, тіян мед оз лоны вотӧса видз-муяс. Ӧд сэні сімӧ выналӧн сайӧдыс, Сауллысь сайӧдсӧ выйӧн оз нин мавтны.
Ионафанлӧн ньӧвйыс эз бергӧдчывлы вӧрӧглысь вирсӧ кисьттӧг, вынаяслысь гырк пытшкӧссӧ видлытӧг, Сауллӧн шыпуртыс весьшӧрӧ эз бытшкывлы.
Саулӧс да Ионафанӧс ёна радейтісны да ошкисны. Оліганыс найӧ эз янсӧдчывны, куліганыс эз торйӧдчыны.
Кутшысь тэрыбджыкӧсь, левысь ёнджыкӧсь вӧліны найӧ.
Израильса нывъяс, бӧрдӧй Саул вӧсна! Сійӧ пасьтӧдліс тіянӧс дона гӧрд паськӧмӧн, судзӧдліс тіянлы зарни мичмӧдчанторъяс.
Ыджыд шог — вынаяс усисны!
Ионафанлӧн шойыс куйлӧ керӧс вылын.
Ёна шогся тэ вӧсна, Ионафан вокӧй.
Тэ вӧлін меным вывті муса, тэнад муслуныд вӧлі меным аньлӧн муслун дорысь на донаджык.
Ыджыд шог — вынаяс усисны, вермасьысьяс кулісны!
Та бӧрын Давид юаліс Господьлысь: «Мунны-ӧ меным иудаса кутшӧмкӧ карӧ?»
Господь вочавидзис: «Мун».
«Кутшӧм карӧ?» — юаліс Давид.
Господь шуис: «Хевронӧ».
Давид муніс сэтчӧ кыкнан гӧтырыскӧд: изреельса Ахиноамакӧд да кармилса Авигеякӧд, Наваллӧн вӧвлӧм гӧтыркӧд.
Вайӧдіс тшӧтш ассьыс йӧзсӧ став налӧн котырнас да овмӧдіс найӧс Хевронӧ.
Сэтчӧ локтісны Иуда чужанкотырысь йӧз да мавтыштӧмӧн пуктісны Давидӧс аслыныс ӧксыӧ.
Давидлы висьталісны, мый Галаад муын Явис карса олысьяс дзебӧмаӧсь Саулӧс.
Давид ыстіс юӧртысьясӧс Явис карӧ да тшӧктіс юӧртны сэтчӧс олысьяслы: «Мед бурсиас тіянӧс Господь, ӧд ті вӧлінныд бур сьӧлӧмаӧсь Саул ыджыдныд дінӧ [Господьлӧн мавтыштӧмаыс дінӧ] — ті гуалінныд сійӧс [да сылысь Ионафан писӧ]. Господь мед лоас бур сьӧлӧма тіян дінӧ да вӧчас тіянлы Аслас веськыдлуныс серти.
Бурсӧ вӧчӧмсьыныд ме тшӧтш мынтыся тіянлы бурӧн.
Лоӧй повтӧмӧсь да зумыдӧсь!
Саул ыджыдныд куліс, но Иуда чужанкотыр мавтыштӧмӧн пуктіс менӧ аслыс ӧксыӧ».
Нирлӧн Авенир пиыс, Сауллӧн тышкайӧзӧн веськӧдлысь, босьтіс Сауллысь Ишвошет писӧ да вайӧдіс Маханаимӧ. Сэні пуктіс сійӧс ӧксыавны Галаадын, Ашурын, Изреельын, Ефрем да Венямин чужанкотыръясын да став Израильын.
Ӧксыӧ пуксигас Сауллӧн Ишвошет пилы вӧлі нелямын арӧс. Кык во чӧж сійӧ юраліс Израильын.
Иуда чужанкотыр кольччис Давидкӧд.
Сизим во да джын Давид юраліс Хевронын, вӧлі Иуда войтырлы ӧксыӧн.
Нирлӧн Авенир пиыс мӧдӧдчис Маханаимсянь Гаваонӧ Ишвошетлӧн, Саул пилӧн, тышкайӧзкӧд.
А Саруялӧн Йоав пиыс мӧдӧдчис Давидлӧн тышкайӧзкӧд. Ишвошетлӧн тышкайӧзыс да Давидлӧн тышкайӧзыс локтісны гаваонса вайӧртӧд дорӧ. Ӧтиясыс сувтісны вайӧртӧд ӧтарладорас, мӧдъясыс — мӧдарладорас.
Авенир вӧзйис Йоавлы: «Том йӧзным мед петаласны да петкӧдласны миянлы тышкасян сямсӧ».
«Мед петаласны», — вочавидзис Йоав.
Венямин чужанкотырысь Ишвошетлӧн тышкайӧзысь петісны дас кыкӧн, и Давидлӧн тышкайӧзысь тшӧтш петісны дас кыкӧн.
Быдӧн ӧта-мӧдсӧ кватитіс юрӧдыс да бытшкис бокас шыпуртнас. Тадзи петалысьяс ставныс ӧттшӧтш кулісны.
Тайӧ местасӧ Гаваонын кутісны нимтыны Шыпурта видз.
Сійӧ лунӧ пансис чорыд тыш. Давидлӧн тышкайӧзыс пасьвартісны Авенирӧс да израильса тышкайӧзӧс.
Тайӧ тышас вӧліны Саруялӧн куимнан пиыс: Йоав, Авишай да Асаил.
Асаил вӧлі газель кодь тэрыб кока.
Кор Авенир пышйис Давидлӧн тышкайӧзысь, Асаил котӧртіс сы бӧрся. Вӧтӧдігас сійӧ эз видзӧд веськыдвылӧ ни шуйгавылӧ.
Авенир бергӧдчылӧмӧн юаліс: «Асаил, тэ-ӧ тайӧ?»
Мӧдыс вочавидзис: «Ме».
«Дугды ме бӧрся вӧтчынытӧ, — шуис Авенир. — Вӧтӧд кодӧскӧ мӧдӧс да босьт сылысь, мый тэныд колӧ».
Но Асаил водзӧ вӧтӧдіс.
Авенир мӧдысь ӧлӧдіс Асаилӧс: «Дугды ме бӧрся вӧтчынытӧ. Ме верма вины тэнӧ.
Кыдзи сэсся ме кута видзӧдны Йоав вокыдлы синмас?
[Мыйӧдз тайӧ вайӧдас? Бергӧдчы Йоав вокыд дінӧ.]» 
Но Асаил эз ӧвсьы.
Сэки Авенир бӧрланьӧ шеныштчӧмӧн бытшкис Асаилӧс. Шыыс муніс кынӧм пырыс. Асаил усис да сэні и куліс.
Быд мунысь сувтыштліс видзӧдлыны Асаил вылӧ.
Йоав да Авишай вӧтчисны Авенир бӧрся.
Шонді пуксигас Йоав да Авишай воисны Амма ыб вылӧ, мый вӧлі Гиахлы воча, Гаваон овтӧминӧ мунан туй бокын.
Венямин чужанкотырысь йӧзыс чукӧртчисны Авенир дінӧ да ӧти чукӧрӧн кайисны мӧд ыб вылӧ.
Авенир горӧдіс Йоавлы: «Дыр-ӧ на ми кутам вирӧсьтны шыпуртнымӧс?
Тэ ӧд тӧдан, мый тайӧ бурӧн оз помась.
Тшӧкты аслад йӧзлы, мед дугдасны вӧтӧдны миянӧс, ассьыныс вокъяснысӧ!»
Йоав вочавидзис: «Бур, мый тэ тайӧс шуин. Ловъя Ен водзын висьтала: эн кӧ шу, менам тышкайӧзӧй эськӧ асылӧдзыс на вӧтӧдісны тіянӧс, ассьыныс вокъяснысӧ».
Йоав букӧстіс буксанӧн, и тышкайӧз дугдісны тышкасьны да вӧтӧдны израильсаясӧс.
Авенир да сылӧн йӧзыс войбыд мунісны ковтысӧд, сэсся вуджисны Йӧрдан ю. Найӧ мунісны Битрон пыр да воисны Маханаимӧ.
Авенирӧс вӧтӧдны дугдӧм бӧрын Йоав чукӧртіс ассьыс йӧзсӧ. Давидлӧн тышкайӧзысь Асаилысь ӧтдор тышас воштісны дас ӧкмыс мортӧс.
А Давидлӧн тышкайӧзыс виисны Венямин чужанкотырысь да Авенирлӧн йӧзысь куимсё квайтымын мортӧс.
Асаиллысь шойсӧ нуисны Виплиемӧ да пуктісны батьыслӧн дзебанінӧ.
Йоав аслас йӧзкӧд войбыд муніс да асъядорыс воис Хевронӧ.
Саул да Давид рӧдъяс костын дыр кад чӧж муніс тыш.
Давидлӧн юралӧмыс ӧтарӧ зумыдмис, а Саул рӧдлӧн — ӧтарӧ жебмис.
Хевронын Давидлӧн чужисны пиян.* 
Медводдза писӧ, Амнонӧс, чужтіс Изреельысь Ахиноама. Мӧд писӧ, Килавӧс, чужтіс Кармилысь Авигея, Наваллӧн вӧвлӧм гӧтырыс.
Коймӧдсӧ, Авессаломӧс, чужтіс Маака, гешурса Талмай ӧксылӧн нылыс.
Нёльӧдсӧ, Адонийӧс, чужтіс Агита; витӧдсӧ, Шефатайӧс, чужтіс Авитала.
Квайтӧд писӧ, Итрамӧс, чужтіс Давидлӧн Эгла нима гӧтырыс.
Тайӧ пияныс Давидлӧн чужисны Хевронын.
Саул да Давид рӧдъяс костын муніс тыш. Авенир вӧлі Саул рӧд дор.
Сауллӧн вӧлі Риспа нима кесйӧг-гӧтыр, Аейлӧн нылыс. [Авенир пырис сы ордӧ узьны.] 
Ишвошет шуис Авенирлы: «Кыдзи тэ лысьтін узьны менам батьлӧн кесйӧг-гӧтыркӧд?»
Ишвошетлӧн кывъясысь Авенир ёна скӧрмис да шуис: «Ме ӧмӧй Иуда чужанкотырлы кесъялысь пон?
Талунӧдз ме век бура кесъялі Саул батьыдлӧн рӧдлы, сылӧн вокъяслы да сылӧн ёртъяслы. Ме эг сет тэнӧ Давид киӧ, а ӧні тэ мыжалан менӧ тайӧ ань вӧснаыс.
Енмыс мед ёна мыждас менӧ, ме кӧ [талун] ог вӧч Давидлы сійӧ, мый Господь кыв сетӧмӧн кӧсйысис сылы.
Господь шуліс, босьта пӧ ӧксыалӧмсӧ Саул рӧдлысь да пуксьӧда юралан пуклӧсас Давидӧс. Сійӧ пӧ кутас юравны Израильын да Иудаын — войвыв Дансянь лунвыв Бер-Шеваӧдз».
Ишвошет повзис да эз нин лысьт нинӧм паныд шуны Авенирлы.
Авенир мӧдӧдіс йӧзӧс Давид дінӧ [Хевронӧ] да тшӧктіс висьтавны сылы: «Ме тӧда, мый тайӧ муыс тэныд вуджӧ.
Кӧртав мекӧд йитӧд, и ме отсала тэныд бергӧдны ас дінад став Израиль войтырсӧ».
Давид вочавидзис: «Бур. Ме кӧртала тэкӧд йитӧд. Сӧмын вайӧд ме дінӧ Сауллысь Мелкола нывсӧ. Сытӧг ме дінӧ эн лок».
Давид мӧдӧдіс йӧзӧс Сауллӧн Ишвошет пи дінӧ да тшӧктіс висьтавны: «Бӧр сет меным Мелкола гӧтырӧс. Сы вӧсна ме коркӧ сё филистимсаӧс вундышті».
Ишвошет мӧдӧдіс йӧзӧс Лаишлӧн Палтиэл пи дінӧ, мед босьтны сылысь Мелкола гӧтырсӧ.
Мелкола бӧрся верӧсыс бӧрдігтырйи муніс Бахуримӧдз.
Но Авенир тшӧктіс сылы бӧр бергӧдчыны гортас, и мӧдыс кывзысис.
Авенир шыасис израильса юрнуӧдысьяс дінӧ: «Ті важӧн нин кӧсйинныд, мед Давид вӧлі тіян ӧксыӧн. Вӧчӧй тайӧс ӧні. Господь ӧд шуліс Давидлы, Менам Давид кесйӧг киӧн пӧ Ме мезда Ассьым Израиль войтырӧс филистимсаясысь да став вӧрӧгысь».
Авенир висьталіс тайӧс тшӧтш Венямин чужанкотырлы.
Сэсся муніс Хевронӧ юӧртны Давидлы, мый шуисны вӧчны Израиль войтыр да Венямин чужанкотыр.
Кор Авенир аслас кызь морткӧд локтіс Хевронӧ Давид дінӧ, Давид котыртіс налы гаж.
Авенир шуис Давидлы: «Ӧксыӧй-ыджыдӧй, лэдз меным ветлыны да чукӧртны став Израиль войтырсӧ тэ дінӧ. Найӧ кӧрталасны тэкӧд йитӧд, и тэ пондан ыджыдавны ставныс вылын, кодъяс вылын кӧсъян ыджыдавны».
Давид лэдзис Авенирӧс, и сійӧ муніс лӧнь сьӧлӧмӧн.
Буретш тайӧ кадас Давидлӧн тышкайӧзыс локтісны Йоавкӧд да вайисны аскӧдныс уна мырддьӧм эмбур.
Авенир сэки эз нин вӧв Давид дінын Хевронын.
Кор Йоав аслас тышкайӧзкӧд локтіс, сылы висьталісны, ӧксы дінӧ пӧ воліс Нирлӧн Авенир пиыс, и ӧксы лэдзис сійӧс мунны лӧнь сьӧлӧмӧн.
Йоав муніс ӧксы дінӧ да шуис: «Мый тэ вӧчин?
Авенир ачыс локтіс, а тэ лэдзин сійӧс мунны!
Тэ ӧд тӧдан Нирлысь Авенир писӧ. Сійӧ пӧръясьӧ. Воліс, мед тӧдмавны тэнад ветлӧм-мунӧм йылысь, и ставсӧ, мый тэ вӧчан».
Давид дорысь петӧм бӧрын Йоав мӧдӧдіс Авенир бӧрся йӧзӧс.
Суӧдісны Авенирӧс Сира юкмӧс дорын да бӧр вайӧдісны сійӧс. Давид та йылысь нинӧм эз тӧд.
Хевронӧ воӧм бӧрын карса дзиръя дорын Йоав нуӧдіс Авенирӧс бокӧ, быттьӧ кӧсйӧ гусьӧн сёрнитыштны сыкӧд. Сэні виис Авенирӧс, бытшкис сылы кынӧмас.
Тадзи водзӧс перйис аслас Асаил вок вӧсна.
Кор Давид тӧдмаліс та йылысь, шуис: «Господь водзын ме да менам йӧз абу мыжаӧсь Нирлӧн Авенир пилысь вирсӧ кисьтӧмысь.
Мыжыс мед кольӧ Йоав да став сылӧн рӧд вылӧ!
Йоав рӧдысь мед оз бырлыны лёквиялӧмӧн* висьысь айулов, проказаӧн висьысьяс, беддьӧн ветлӧдлысьяс, шыпурт улӧ шедысьяс да нянь абутӧмла тшыгъялысьяс».
Йоав да сылӧн Авишай вокыс виисны Авенирӧс сыысь, мый сійӧ виис налысь Асаил вокнысӧ гаваонса тыш дырйи.
Давид шуис Йоавлы да став тышкайӧзыслы: «Косялӧй паськӧмнытӧ, пасьталӧй шогалан паськӧм да бӧрдӧй Авенир вӧсна».
Ачыс Давид ӧксы восьлаліс шойсӧ нуысьяс бӧрся.
Хевронын Авенирӧс дзебигӧн ӧксы став войтырыскӧд гораа бӧрдіс дзебанін дорас.
Ӧксы бӧрдіс лыддьӧдлӧмӧн: — Мыйла Авенирлы колӧ вӧлі лёк кулӧмӧн кувны?
Тэнсьыд китӧ абу вӧлі кӧрталӧма, тэнсьыд коктӧ абу вӧлі дорӧма. Тэ кулін лёк вӧчысьяс киӧ шедӧм морт моз.
Войтырыс нӧшта ёнджыка на кутіс бӧрдны.
Лун чӧжнас йӧзыс матыстчылісны Давид дінӧ да вӧзйисны сылы сёйыштны.
Но Давид кыв сетіс: «Енмыс мед ёна мыждас менӧ, ме кӧ шонді пуксьытӧдзыс босьта вомӧ няньтор либӧ нӧшта мыйкӧ».
Йӧзыслы сьӧлӧм вылас воисны тайӧ кывъясыс и ставыс, мый вӧчис налӧн ӧксыныс.
Сійӧ лунӧ став тышкайӧзыс и став Израиль войтыр гӧгӧрвоисны, мый ӧксы абу мыжа Нирлысь Авенир писӧ виӧмысь.
Ӧксы шуис аслас йӧзлы: «Тӧдӧй ставныд, мый талун Израиль воштіс ыджыд мортӧс, вына веськӧдлысьӧс.
Менӧ мавтыштӧмӧн пуктӧма ӧксыӧ, но ӧні ме абу на сэтшӧм вына. А тайӧ йӧзыс, Саруялӧн пияныс, меысь ёна вынаджыкӧсь.
Сідзкӧ, Господь мед Ачыс мынтысяс лёк вӧчысьлы сылӧн лёк вӧчӧмысь!»
Кор Сауллӧн Ишвошет пиыс тӧдмаліс, мый Авенир кулӧма Хевронын, ёна повзис. Став Израиль войтырӧс тшӧтш полӧм босьтіс.
Ишвошетлӧн вӧлі тышкайӧзӧн кык веськӧдлысь: ӧтисӧ шуисны Баан, мӧдсӧ — Рекав. Найӧ вӧліны Венямин чужанкотырысь, беротса Риммонлӧн пиян.
Берот кар вуджис Венямин чужанкотырлы, кор сэтчӧс олысьяс пышйисны Гиттаймӧ. Найӧ ӧнӧдз сэні олӧны.
Ионафанлӧн, Саул пилӧн, вӧлі Мепибошет нима чотысь пи.
Сылы вӧлі вит арӧс, кор воис Изреельсянь Сауллӧн да Ионафанлӧн кулӧм йылысь юӧр. Сэки кага видзысь кватитіс ичӧт зонкаӧс да котӧрӧн пышйис.
Котӧртігас зонкаӧс уськӧдіс, та бӧрын сійӧ кутіс чотны.
abu
Рекав да Баан, беротса Риммонлӧн пиян, мунісны Ишвошет дінӧ. Локтісны сэтчӧ луншӧрнас, лёк жар дырйиыс, кор Ишвошет шойччис вольпась вылас.
[Керка видзысьыс шобді тусь весалігас вӧлі вугыртӧма.] Рекав да Баан вокъяс пырисны керкаас шобділа моз. 
Ишвошет сэки куйліс аслас узьлан жырйын.
Вокъяс пырӧмсяньыс бытшкисны Ишвошетлы кынӧмас, керыштісны юрсӧ да босьтісны аскӧдыс, сэсся пышйисны. Войбыд найӧ мунісны Йӧрдан ковтысӧд.
Ишвошетлысь юрсӧ вайисны Давид ӧксылы Хевронӧ да шуисны: «Со, тайӧ Ишвошетлӧн юрыс. Сійӧ тэнӧ мустӧмтысь Сауллӧн пиыс.
Саул корсис вины тэнӧ, но талун миян ӧксы-ыджыдным вӧсна Господь мынтысис Сауллы да сысянь чужысьяслы».
Давид шуис Рекавлы да Баанлы, беротса Риммонлӧн пиянлы: «Коркӧ Сиклагын ӧти морт висьталіс меным Сауллӧн [да Ионафанлӧн] кулӧм йылысь.
Сійӧ чайтіс, мый нимкодь юӧр вайӧ, но аттьӧалӧм пыдди ме босьті да вии сійӧс. А ӧні ті, лёк вӧчысьяс, виинныд мыжтӧм мортӧс аслас керкаын вольпась вылас. Ме кыв сета ловъя Господь водзын, менӧ быд лёксьыс Мездысьӧй водзын: ме тіянлысь водзӧс перъя Ишвошетлысь вирсӧ кисьтӧмысь да бырӧда тіянӧс му вывсьыс».
Давид тшӧктіс аслас йӧзлы вины Рекавӧс да Баанӧс. Налысь керыштісны ки-коксӧ, сэсся ӧшӧдісны найӧс Хевронын вайӧртӧд дорӧ.
А Ишвошетлысь юрсӧ босьтісны да пуктісны Авенир дзебанінӧ.
Израильса чужанкотыръяс локтісны Давид дінӧ Хевронӧ. Найӧ шуисны: «Миян пытшкын визувтӧ ӧти вир.
Водзын, кор Саул вӧлі миян ӧксыӧн, Израиль войтыркӧд тэ ветлывлін тышъясӧ.
Господь шуліс тэныд: “Тэ кутан видзны Менсьым Израиль войтырӧс да лоан налы юралысьӧн”».
Хевронын Господь водзын Давид кӧрталіс израильса юрнуӧдысьяскӧд йитӧд.
Найӧ мавтыштӧмӧн пуктісны Давидӧс Израиль войтырлы ӧксыӧ.
Ӧксыӧ пуксигас Давидлы вӧлі комын арӧс.
Сійӧ ӧксыаліс нелямын во чӧж.
Сизим во да джын сійӧ юраліс Хевронын, вӧлі Иуда войтырлы ӧксыӧн. Сэсся комын куим во юраліс Ерусалимын, вӧлі ӧксыӧн став Израиль да Иуда войтырлы.
Ӧтчыд Давид ӧксы аслас тышкайӧзкӧд петіс тышӧ Ерусалимын олысь евуссаяслы паныд.
Найӧ шуисны Давидлы: «Татчӧ тэ он пыр.
Пыран кӧ, тэнӧ вӧтласны весиг синтӧмъяс да коктӧмъяс».
Тадзи шуалісны, ӧд чайтісны, мый Давид оз вермы пырны налӧн изкарӧ.
Но Давид босьтіс Сион изкар. Бӧрынджык изкарсӧ нимтісны Давид карӧн.
Евуссаяскӧд тышкасигӧн Давид шуис аслас йӧзлы: «Бытшйӧдлӧй шынад быд коктӧмӧс да синтӧмӧс, кодъяс мустӧмтӧны Давидӧс».
Та вӧсна и шуӧны: «Синтӧмъяс да коктӧмъяс оз пырны [Господьлӧн] керкаӧ».
Давид овмӧдчис изкарӧ да нимтіс сійӧс Давид карӧн. Миллосянь кар шӧрӧдзыс Давид лэптіс керкаяс.
Господь Ен Саваоф вӧлі Давидкӧд, та вӧсна сійӧ лои вына юралысьӧн.
Тирса Хирам ӧксы мӧдӧдіс аслас йӧзкӧд Давидлы сус пуяс, тшӧтш тшупсьысьясӧс да изйысь вӧчасьысьясӧс. Найӧ лэптісны Давидлы ыджыд керка.
Давидлы вӧлі гӧгӧрвоана, мый Аслас Израиль войтыр вӧсна Господь пуктіс сійӧс ӧксыӧ да зумыдмӧдіс сылысь юралӧмсӧ Израильын.
Хевронысь Ерусалимӧ локтӧм бӧрын Давид босьтіс сэтчӧс аньяс пиысь нӧшта аслыс гӧтыръясӧс.
Сылӧн чужисны нӧшта на ныв-пи.
Ерусалимын сылӧн чужисны Шаммуй, Шовав, Нафан, Соломон, Ивхар, Элишуй, Нефег, Яфий, Элишам, Элиад да Элипелет пиян. [Нӧшта чужисны Самай, Иосиват, Нафан, Галаман, Евар, Фейсус, Элфалат, Нагев, Нафек, Ионафан, Лесамис, Ваалимаф да Элифаф пиян.]
Кор филистимсаяс тӧдмалісны, мый Давидӧс мавтыштӧмӧн пуктӧма ӧксыӧ Израиль войтырлы, сэки петісны корсьны сійӧс.
Та йылысь кылӧм бӧрын Давид муніс изкарӧ.
Филистимсаяс локтісны да сувтісны Рефаим ковтысӧ.
Давид шыасис Господь дінӧ да юаліс: «Петны-ӧ меным филистимсаяслы паныд тышӧ?
Сетан-ӧ Тэ найӧс менам киӧ?»
Господь вочавидзис: «Пет. Ме сета филистимсаясӧс тэнад киӧ».
Сэки Давид муніс Ваал-Перацимӧ да пасьвартіс сэні филистимсаясӧс. Давид шуис: «Ытва моз Господь нуис-бырӧдіс ме водзысь вӧрӧгӧс».
Та вӧсна тайӧ местаыслы сетӧма Ваал-Перацим ним.
Филистимсаяс колисны сэтчӧ ассьыныс бӧлбанъяссӧ, а Давид аслас йӧзкӧд босьтіс найӧс. [Сэсся тшӧктіс сотны биын.]
Кад мысти филистимсаяс бара локтісны да сувтісны Рефаим ковтысӧ.
Давид шыасис Господь дінӧ. [Шуис: «Петны-ӧ меным филистимсаяслы паныд тышӧ? Сетан-ӧ найӧс менам киӧ?»] 
Господь шуис: «Воча налы эн пет. Кытшав найӧс бӧрсяньныс да матыстчы на дінӧ пуяс сайсянь.
Кор тэ кылан шы, быттьӧ пуяс йывті кодкӧ восьлалӧ, сэки уськӧдчы. Тӧд, мый Господь мунӧ тэ водзвылын, медым пасьвартны филистимса тышкайӧзӧс».
Давид вӧчис, кыдзи тшӧктіс сылы Господь. Сійӧ пасьвартіс филистимсаясӧс Гевасянь Гезерӧдз.
Давид чукӧртіс Израиль войтырысь комын сюрс медбур тышкамортӧс.
Сэсся накӧд муніс Иуда муӧ Баала карӧ, мед вайны сэтысь Енлысь кудсӧ. Кудсӧ вӧлі сиӧма херувимъяс вылын пукалысь Господь Саваофлы.
Енлысь кудсӧ босьтісны Авинадав керкаысь, пуктісны выль тарантасӧ да лэччӧдісны ыб вылысь.
Тарантасӧн веськӧдлісны Авинадавлӧн Уззай да Ахио пиян.
abu
Ахио муніс [Господьлӧн] куд водзвылын.
Та дырйи Давид да Израиль войтыр Господь водзын нимкодясьӧмӧн йӧктісны да ворсісны кипарисысь вӧчӧм ворсанторъясӧн — гуслиӧн, арфаӧн, тимпанӧн, сярганӧн да кимвалӧн.
Кор воисны Наконлӧн гумла дорӧ, ӧшъяс пӧлыньтісны тарантассӧ. Пӧрӧмсьыс кутыштӧм могысь Уззай инмӧдчис Енлӧн кудйӧ.
Господь таысь скӧрмис Уззай вылӧ да дзик пыр виис сійӧс. Уззай куліс Енлӧн куд дорын.
Давид шогӧ усис, мый Господь виис Уззайӧс.
Тайӧ местасӧ Давид нимтіс Перез-Узза.* Тадзи ӧнӧдз шуӧны.
Сійӧ лунӧ Давид ёна повзис Господьысь. Сійӧ шуис: «Ме ог вермы босьтны Господьлысь кудсӧ ас дінӧ».
Та вӧсна Давид эз босьт Господьлысь кудсӧ ас дінас, Давид карӧ, а мӧдӧдіс сійӧс гефса Овед-Эдом керкаӧ.
Куим тӧлысь чӧж Господьлӧн кудйыс вӧлі Овед-Эдом керкаын, и Господь бурсиис Овед-Эдомӧс да став сылысь гортсасӧ.
Давидлы висьталісны, Енлӧн куд вӧсна пӧ Господь бурсиӧма Овед-Эдомӧс, сылысь гортсасӧ да ставсӧ, мый сылӧн эм. Сэки Давид нимкодясьӧмӧн вайис Енлысь кудсӧ Овед-Эдомлӧн керкаысь аслас Давид карӧ.
Господьлысь кудсӧ нуысьяслӧн квайт воськов бӧрын Давид вайис вись пыдди ӧшкӧс да тшӧгӧдӧм куканьӧс.
Шабді ефод кежсьыс Давид став сьӧлӧмсяньыс чеччаліс-йӧктіс Господь водзын.
Тадзи буксан шы улӧ гораа нимкодясьӧмӧн Давид да став Израиль войтыр вуджӧдісны Господьлысь кудсӧ.
Кор Господьлысь кудсӧ пыртісны Давид карӧ, Сауллӧн Мелкола нылыс видзӧдіс ӧшиньӧдыс. Сійӧ аддзис, мый Давид ӧксы чеччалӧ-йӧктӧ Господь водзын, да омӧльтіс сійӧс ас пытшкас.
Господьлысь кудсӧ вайисны да пуктісны аслас местаӧ, Давидӧн сувтӧдӧм чом шӧрӧ.
Та бӧрын Давид вайис Господьлы сотан да бурасян висьяс.
Вись вайӧм бӧрын Давид бурсиис войтырсӧ Господь Саваоф нимӧн.
Чукӧртчӧм став Израиль войтырлы [войвыв Дансянь лунвыв Бер-Шеваӧдз олысьяслы], быд айловлы да аньлы, сетіс нянь, пражитӧм яйтор да изюм.
Та бӧрын йӧзыс муналісны гортаныс.
Давид муніс гортас, мед бурсины гортсаяссӧ. Сылы воча петіс Сауллӧн Мелкола нылыс [чолӧмасис сыкӧд] да шуис: «Израильлӧн ӧксы талун янӧдіс асьсӧ. Тэ пасьтӧгыд чеччалін аслад йӧзлӧн кесйӧг аньяс водзын, асьтӧ йӧй туйӧ пуктін».
Давид шуис Мелколалы: «Господь водзын ме йӧкті [и кута йӧктыны.
Ошкӧм Господьлы]. Сійӧ ӧд менӧ бӧрйис, а эз тэнсьыд батьтӧ да сылысь рӧдсӧ. Пуктіс менӧ юравны Израильӧн, Господьлӧн войтырӧн.
Господь водзын ме кӧсъя гажӧдчыны и ачымӧс нӧшта на улӧ пукта. А кесйӧг аньяс, кодъяс йылысь тэ шуин, кутасны пыдди пуктыны менӧ».
Мелколалӧн, Саул нывлӧн, олӧм чӧжыс эз вӧв челядьыс.
Давид ӧксы оліс аслас ыджыд керкаын. Господь сетіс сылы лӧнь кад, мездіс сійӧс кытшалысь вӧрӧгъясысь. Ӧтчыд ӧксы шуис Нафан пророклы: «Кывзы, ме ачым ола сус пуысь вӧчӧм керкаын, а Енлӧн кудйыс сулалӧ чомйын».
Нафан шуис ӧксылы: «Вӧч, мый тэнад сьӧлӧмыд висьталӧ.
Господь тэкӧд».
Но войнас Нафанлы вӧлі Господьсянь кыв:
«Мун да висьтав Менам Давид кесйӧглы, мый шуӧ Господь. Тэ он лэпты Меным керка, мед Ме олі сэні. Израиль войтырӧс Египетысь петкӧдӧмсянь да ӧнӧдз Ме эг овлы керкаын. Ӧтиласянь мӧдлаӧ ветлігӧн Ме олі вежа чомйын.
Израиль войтыркӧд ветлігъясӧ Ме эг тшӧктывлы израильса веськӧдлысьяслы — Менсьым Израиль войтырӧс видзысьяслы — лэптыны Меным сус пуысь керка.
Висьтав Менам Давид кесйӧглы, мый шуӧ Господь Саваоф. Ме босьті тэнӧ ыж йирсянінысь, кӧні тэ видзин ыжъясӧс, да пукті ӧксыӧ Аслам Израиль войтырлы.
Ме вӧлі тэкӧд быдлаын, кытчӧ тэ ветлін. Ме бырӧді тэ водзысь вӧрӧгтӧ. Ӧні Ме нимӧда тэнӧ, кыпӧда тэнӧ мувывса нималана йӧзысь вылӧджык на.
Ме торйӧда Аслам Израиль войтырлы му да вужйӧда найӧс сэтчӧ. Найӧ лӧня да повтӧг кутасны овны асланыс муын. Лёк вӧчысьяс оз кутны дзескӧдны найӧс воддза мозыс, кыдзи вӧлі сэки, кор Ме пукті ёрдысьясӧс веськӧдлыны Аслам Израиль войтырӧн.
Ме сета тэныд лӧнь олӧм, мезда тэнӧ став вӧрӧгсьыд.
Ме, Господь, кӧсйыся тэныд, мый зумыдмӧда тэнсьыд рӧдтӧ.
Кор помасясны тэнад олан лунъясыд, и тэ кутан куйлыны аслад батьяс дінын, сэки Ме пукта ӧксыӧ тэсянь чужысьӧс да зумыдмӧда сылысь юралӧмсӧ.
Сійӧ лэптас Меным керка, и Ме зумыдмӧда сылысь юралӧмсӧ нэмъяс кежлӧ.
Ме лоа сылы батьӧн, а сійӧ — Меным пиӧн.
Сійӧ кӧ мыжмас, Ме чорыда чирышта сійӧс, кыдзи бать чирыштӧ ассьыс писӧ.
Но Ассьым буралӧмӧс ог босьт сы вылысь, кыдзи босьті Саул вылысь. Ме вешті сійӧс ыджыдалӧмсьыс, кор пукті тэнӧ ӧксыӧ. 
Тэнад рӧдыд да ӧксыалӧмыд пыр кежлӧ лоӧ Ме водзын зумыд. Тэнад юралан пуклӧсыд кутас сулавны нэмъяс чӧж».
Став тайӧ кывъяссӧ да Енсянь восьтӧмсӧ Нафан висьталіс Давидлы.
Давид ӧксы муніс вежаинӧ да пондіс кевмысьны Господьлы: «Господьӧй Ыджыдӧй! Коді ме да менам рӧдӧй, мый Тэ татшӧм вылӧ лэптін менӧ!
Но тайӧ, вӧлӧмкӧ, Тэнад абу на ставыс, Господьӧй Ыджыдӧй!
Тэ нӧшта висьталін, мый виччысьӧ Тэнад кесйӧглысь рӧдсӧ.
Господьӧй Ыджыдӧй, тадзи Тэ вӧчан морткӧд.
Мый ме верма нӧшта шунысӧ?
Тэ тӧдан менӧ, Ассьыд кесйӧгтӧ, Господьӧй Ыджыдӧй.
Аслад шуӧмыд да кӧсйӧмыд серти Тэ дасьтін тайӧ ыджыдторсӧ да восьтін сійӧс Аслад кесйӧглы.
Господьӧй Ыджыдӧй, Тэ — ыджыд Ен!
Тэ кодь мӧдыс абу! Тэысь кындзи мӧд Енмыс абу! Тэ йылысь висьталӧ ставыс, мый ми кывлім.
Енмӧй, сюрас-ӧ Тэнад Израиль войтыр кодь мӧдыс? Му вылас олысь войтыръясысь сӧмын на дінӧ Тэ локтін. Локтін, медым мездыны найӧс да вӧчны Аслад войтырӧн, ыдждӧдлыны Ассьыд нимтӧ, вӧчны налӧн синъяс водзын ыджыд да повзьӧдана уджъяс. Тэ мездін Ассьыд войтыртӧ Египетысь, вӧтлін на водзысь мукӧд войтыръясӧс да налысь енъяссӧ.
Тэ вӧчин Израиль войтырӧс Аслад войтырӧн пыр кежлӧ. И Тэ, Господьӧй, лоин налӧн Енмӧн. 
Ӧні, Господьӧй Енмӧй, пыр кежлӧ вынсьӧд да збыльмӧд Ассьыд кывъястӧ, мый Тэ шуин ме йылысь да менам рӧд йылысь.
Мед лоӧ ошкӧма Тэнсьыд нимтӧ нэмъяс чӧж! Мед шуасны: “Господь Саваоф — Израильлӧн Ен”. 
Тэнад Давид кесйӧглӧн рӧдыс мед вӧрзьывтӧг сулалас Тэнад чужӧмбан водзын.
Тэ, Господь Саваоф, Израильлӧн Ен, восьтін меным, Аслад кесйӧглы, мый зумыдмӧдан менсьым рӧдӧс. Та вӧсна ме повтӧг шыаси Тэ дінӧ аслам кевмысьӧмӧн.
Господьӧй Ыджыдӧй, Тэ — Ен.
Тэнад кывъясыд збыльӧсь. Татшӧм буртор Тэ кӧсйысин меным, Аслад кесйӧгыдлы.
Ӧні кора Тэнӧ, бурси менсьым рӧдӧс, мед сійӧ пыр лоас Тэнад чужӧмбан водзын. Ӧд Тэ, Господьӧй Ыджыдӧй, Ачыд тадзи шуин. Тэ кӧ бурсиан, сэки Тэнад кесйӧглӧн рӧдыс пыр кежлӧ лоӧ бурсиӧма».
Кад мысти Давид пасьвартіс филистимсаясӧс, босьтіс налысь Метег-Ха-Амма. Филистимсаяс шедісны Давидлӧн кипод улӧ. 
Давид пасьвартіс тшӧтш моавсаясӧс. Тыш помасьӧм бӧрын сійӧ водтӧдіс найӧс му вылас, босьтіс гез да мурталіс: быд кык гез кузьта мурталӧмаясӧс виис, а ӧти гез кузьта мурталӧмаясӧс ловйӧн колис.
Моавсаяс лоисны Давидлы кесйӧгъясӧн, мынтісны сылы вот.
Давид пасьвартіс и цоваса ӧксыӧс, Реховлысь Ададезер писӧ. Сійӧ буретш вӧлі мунӧ, медым бӧр босьтны Ефрат ю дорысь муяссӧ.
Давид босьтіс сылысь сюрс сизимсё верзьӧмаӧс да кызь сюрс подаӧс. Давид кольӧдіс аслыс тарантаса сё вӧлӧс, а мукӧд вӧлыслысь сӧнсӧ сійӧ вундаліс.
Цоваса Ададезер ӧксылы отсӧг вылӧ локтісны Дамаскысь арамейяс.
Но Давид пасьвартіс найӧс, виис кызь кык сюрс мортӧс.
Дамаскӧ Давид сувтӧдаліс ассьыс тышкакотыръяссӧ. Тадзи арамейяс шедісны Давидлӧн кипод улӧ да кутісны мынтыны сылы вот.
Господь быд тышын отсаліс Давидлы вермыны.
Давид босьтіс Ададезер тышкайӧзлысь зарни сайӧдъяссӧ да вайис Ерусалимӧ. 
[Бӧрынджык найӧс босьтіс египетса Шишак ӧксы, кор сійӧ уськӧдчис Ерусалим вылӧ. Тайӧ вӧлі Соломонлӧн Ровоам пилӧн веськӧдлӧм дырйи.]
Бетаысь да Беротайысь, Ададезерлӧн каръясысь, Давид ӧксы вайис зэв уна ыргӧн. [Сыысь Соломон вӧчӧдіс вайӧртӧд, сюръяяс, мыссян дозъяс да мукӧд дозъяс.]
Хаматса Тойи ӧксылы кывсис, мый Давид кушӧдз пасьвартӧма Ададезерлысь тышкайӧзсӧ. Сэки сійӧ мӧдӧдіс ассьыс Иорам писӧ Давид ӧксы дінӧ, мед чолӧмавны да аттьӧавны сійӧс Ададезерӧс вермӧмысь.
Ӧд Ададезер дугдывтӧг тышкасис Тойикӧд.
Аскӧдыс Иорам вайис эзысь, зарни да ыргӧн дозъяс.
Давид ӧксы вежӧдіс-торйӧдіс найӧс Господьлы. Нӧшта вежӧдіс мукӧд пасьвартӧм войтыръяслысь босьтӧм эзысь да зарни.
Эзысь-зарнисӧ сійӧ босьтіс арамей, моав, аммон, филистим да амалик войтыръяслысь, нӧшта цоваса Ададезер ӧксылысь, Реховлӧн пилысь.
Давид кутіс нимавны, кор сійӧ вермис Сола ковтысын дас кӧкъямыс сюрс эдомса тышкамортӧс.
Став Эдом пасьтала сійӧ сувтӧдаліс тышкакотыръяс. 
Эдомсаяс шедісны Давидлӧн кипод улӧ.
Господь быд тышын отсаліс Давидлы вермыны.
Давид ӧксыаліс став Израиль муын. Ассьыс войтырсӧ мыждігӧн сійӧ быдӧнкӧд вӧлі веськыд.
Саруялӧн Йоав пиыс веськӧдліс Давидлӧн тышкайӧзӧн, Ахилудлӧн Иосафат пиыс пасъяліс небӧгӧ вӧвлӧмторъяс.
Ахитувлӧн Садок пиыс да Авиатарлӧн Ахимелек пиыс вӧліны попъясӧн, Серай вӧлі гижалысьӧн.
Иодайлӧн Бенай пиыс веськӧдліс ӧксыӧс видзысь керетса да пелетса шыпуртаясӧн. Давид ӧксылӧн пияныс отсасисны сылы юралӧмын.
Давид юаліс: «Колис-ӧ кодкӧ ловйӧн Саул рӧдысь?
Ионафан вӧсна ме кӧсъя лоны бур сьӧлӧма на дінӧ».
Саул керкаын вӧлі Сивей нима кесйӧг.
Сійӧс вайӧдісны Давид дінӧ. Ӧксы юаліс: «Сивей-ӧ тэ?»
Мӧдыс шуис: «Дзик сідзи. Ме — тэнад кесйӧг».
Ӧксы юаліс: «Колис-ӧ кодкӧ ловйӧн Саул рӧдысь? Енмыс моз ме кӧсъя лоны бур сьӧлӧма на дінӧ».
Сивей шуис: «Ионафанлӧн чотысь пиыс ловъя».
«Кӧні сійӧ?» — юаліс ӧксы.
Сивей вочавидзис: «Ло-Деварын, Аммиэллӧн Макир пи ордын».
Давид ӧксы ыстіс сэтчӧ йӧзӧс да тшӧктіс вайӧдны Ионафанлысь писӧ.
Саул Ионафанлӧн Мепибошет пиыс локтіс Давид дінӧ да муӧдзыс копыртчис сылы.
«Мепибошет!» — шыасис Давид сы дінӧ.
Мӧдыс вочавидзис: «Ме — тэнад кесйӧг».
Давид шуис: «Эн пов.
Тэнад Ионафан батьыд вӧсна ме лоа бур сьӧлӧма тэ дінӧ. Ме тэныд бӧр сета Саул пӧльыдлысь видз-мусӧ. А ачыд тэ кутан сёйны-юны менам пызан сайын».
Мепибошет копыртчӧмӧн шуис: «Коді ме сэтшӧмыс, мый тэ тӧждысян аслад кесйӧг вӧсна, татшӧм пон шой вӧсна?»
Сэсся ӧксы корис Сивейӧс, Сауллысь кесйӧгсӧ, да шуис сылы: «Ставыс, мый вӧлі Сауллӧн да рӧдвужыслӧн, ме сета тэнад ыджыдыдлӧн Мепибошет пилы.
Аслад пиянкӧд да аслад кесйӧгъяскӧд вӧдит сылысь видз-мусӧ. Мувыв быдтассӧ сет аслад ыджыдыдлӧн пилы, медым сылӧн керкаас пыр вӧлі сёян-юан.
Ачыс Мепибошет мед пыр сёяс-юас менам пызан сайын».
Сивейлӧн вӧлі дас вит пиян да кызь кесйӧг.
Сивей воча шуис ӧксылы: «Ӧксыӧй-ыджыдӧй, ставсӧ, мый тэ тшӧктін, ме вӧча».
Сійӧ кадсяньыс Мепибошет кутіс сёйны Давидкӧд ӧти пызан сайын ӧксылӧн пияныс моз.
Мепибошетлӧн вӧлі Мика нима ичӧт пи.
Сивей керкаын олысьяс ставныс кесъялісны Мепибошетлы.
Мепибошет сёйис-юис ӧксы ордын, та вӧсна сійӧ оліс Ерусалимын.
Мепибошет чотіс кыкнан кокнас.
Кад мысти куліс аммон войтырлӧн ӧксыыс, и сы пыдди пуксис ӧксыӧ сылӧн Ханун пиыс.
Давид шуис: «Ме бурсьӧлӧмтча Ханун дінӧ, ӧд сылӧн Нахаш батьыс вӧлі бур сьӧлӧма ме дінӧ».
Давид мӧдӧдіс кесйӧгъяссӧ, медым Ханункӧд тшӧтш юкны шогсӧ сылӧн батьыс вӧсна.
Кор Давидлӧн кесйӧгъяс локтісны аммон войтырлӧн муӧ, сэтчӧс юралысьяс шуисны асланыс Ханун ыджыдлы: «Тэ чайтан, Давид збыльысь пыдди пуктӧ тэнсьыд батьтӧ и та вӧсна мӧдӧдіс тэ дінӧ ассьыс йӧзсӧ?
Сійӧ мӧдӧдіс найӧс кыйӧдчысьясӧс моз, мед видзӧдлыны карнымӧс, а сэсся бырӧдны сійӧс».
Ханун босьтіс Давидлысь кесйӧгъяссӧ, быдӧнлысь шырис тош джынсӧ да улісяньыс коскӧдзыс вундіс налысь паськӧмнысӧ шӧрипельӧ. Сэсся бӧр ыстіс найӧс.
Давидлы кор юӧртісны, мый сылысь кесйӧгъяссӧ татшӧм ногӧн янӧдӧмаӧсь, сэки налы воча мӧдӧдіс йӧзӧс.
Ӧксы тшӧктіс висьтавны, медым сылӧн янӧдӧм кесйӧгъясыс кольччасны Ериконӧ да оласны сэні, кытчӧдз оз быдмы тошныс, а сэсся вермасны бӧр локны.
Аммонсаяс казялісны, мый найӧ лоины мустӧмӧсь Давидлы.
Найӧ медалісны отсӧг вылӧ Бет-Реховысь да Цоваысь кызь сюрс пода арамейӧс, Маакаысь [амаликъяслӧн] ӧксылысь — сюрс тышкамортӧс да Истовысь — дас кык сюрс тышкамортӧс.
Кор Давид кыліс та йылысь, мӧдӧдіс налы паныд Йоавӧс да став ассьыс тышкайӧзсӧ.
Аммон тышкайӧз сувтісны карса дзиръя дорӧ. Цоваысь да Реховысь арамейяс, Истовысь да Маакаысь медалӧм йӧз сувтісны эрд вылӧ, наысь торйӧн.
Йоав аддзис, мый вӧрӧг локтӧ кыкладорсянь — водзысяньыс и бӧрсяньыс. Сэки сійӧ бӧрйис израильса тышкайӧзысь медбуръяссӧ да сувтӧдіс найӧс арамейяслы паныд.
А мукӧдсӧ сетіс Авишай вокыслы, мед сійӧ сувтас накӧд аммон тышкайӧзлы паныд.
Йоав шуис Авишайлы: «Арамейяс кӧ кутасны вермыны менӧ, тэ отсалан меным, а аммон тышкайӧз кӧ кутасны вермыны тэнӧ, ме локта тэныд отсӧг вылӧ.
Эн пов. Кутам зумыда сулавны асланым войтыр вӧсна, миян Енлӧн каръяс вӧсна. А Господь вӧчас, кыдзи Сылы колана».
Йоав аслас тышкайӧзкӧд уськӧдчис арамейяс вылӧ, и найӧ пышйисны сыысь.
Аммон тышкайӧз аддзисны арамейяслысь пышйӧмсӧ, и найӧ тшӧтш пышйисны Авишайысь да локтісны асланыс карӧ.
Йоав эз кут вӧтчыны на бӧрся, сійӧ бӧр муніс Ерусалимӧ.
Кор арамейяс аддзисны, мый израильсаяс вермисны найӧс, шуисны ӧтувтчыны.
Ададезер ӧксы корис мукӧд арамейясӧс [Халамак] ю сайысь. Найӧ локтісны Хеламӧ.
Наӧн веськӧдліс Шовак, Ададезер тышкайӧзлӧн юралысь.
Давидлы кор юӧртісны та йылысь, сійӧ чукӧртіс став израильса тышкайӧзсӧ, вуджис накӧд Йӧрдан ю сайӧ да локтіс Хеламӧ.
Арамейяс сувталісны, мед петны Давидлы паныд тышӧ.
Давид пасьвартіс арамейясӧс, и найӧ пышйисны израильсаясысь.
Давид бырӧдіс налысь сизимсё тарантас да нелямын сюрс верзьӧмаӧс.
Виис тшӧтш Шовакӧс, тышкайӧзлысь юралысьсӧ.
Кор Ададезерлӧн киподувса ӧксыяс аддзисны, мый израильсаяс вермисны найӧс, сэки сёрнитчисны израильсаяскӧд, мед пом пуктыны тышныслы, сэсся сетчисны налы.
Арамейяс сэсся эз нин лысьтны отсавны аммон войтырлы.
Во мысти, буретш сійӧ кадӧ, кор ӧксыяс петавлӧны тышӧ, Давид мӧдӧдіс Йоавӧс, став израильса тышкайӧзсӧ да налысь веськӧдлысьяссӧ тыш вылӧ.
Найӧ пасьвартісны аммон войтырӧс да кытшалісны Равва кар.
А Давид тайӧ кадас вӧлі Ерусалимын.
Ӧтчыд рытладорыс Давид чеччис вольпасьсьыс да петіс ыркӧдчыны керка вевт вылас. Сэтысянь сійӧ аддзис мыссьысь-сӧстӧммӧдчысь аньӧс.
Аньыс вӧлі зэв мича.
Давид тшӧктіс тӧдмавны, коді тайӧ аньыс.
Сылы висьталісны, Вирсавия пӧ, Элиамлӧн нылыс, хеттей Урийлӧн гӧтырыс.
Давид тшӧктіс кесйӧгъясыслы вайӧдны аньӧс.
Сӧстӧммӧдчӧм бӧрын Вирсавия локтіс Давид дінӧ, и Давид узис сыкӧд.
Сэсся Вирсавия бӧр муніс гортас.
Сійӧ кутіс нӧбасьны да ыстіс та йылысь юӧр Давидлы.
Давид мӧдӧдіс Йоав дінӧ мортӧс. Тшӧктіс висьтавны, мед Йоав ыстас сы дінӧ хеттей Урийӧс.
Йоав кывзысис.
Кор Урий локтіс, Давид кутіс юасьны сылысь Йоав йылысь, тышкайӧз йылысь да тыш мунӧм йылысь.
Сэсся шуис Урийлы: «Мун гортад, мыськы коктӧ да шойччы».
Урий петіс ӧксы керкаысь. Бӧрсяньыс сылы вайисны ӧксысянь козин.
Но Урий эз мун гортас, а узьмӧдчис ӧксылӧн кесйӧгъяскӧд ӧксы керкаӧ пыранін дорын.
Давидлы юӧртісны, Урий пӧ эз мун гортас.
Сэки Давид юаліс Урийлысь: «Мыйла тэ эн мун гортад? Тэ ӧд туй бӧрын».
Урий вочавидзис: «Енлӧн кудйыс, Израильлӧн да Иудалӧн тышкайӧзыс олӧны чомъясын, и менам Йоав ыджыдӧй да сылӧн йӧзыс узьлӧны ывлаын. Ме ӧмӧй верма мунны гортӧ, сёйны-юны да гӧтыркӧд узьны?
Тэ водзын кыв сета: ме тадзи ог вӧч».
Давид шуис Урийлы: «Талун кольччыв на, а аски ме бӧр мӧдӧда тэнӧ тыш вылӧ».
Урий кольччис.
Давид корис Урийӧс ас дінас, вердіс сійӧс да чорыда юкталіс.
Но рытнас Урий эз мун гортас, а бара на узьмӧдчис ӧксылӧн кесйӧгъяс дінӧ.
Асывнас Давид ыстіс Урийкӧд Йоавлы гижӧд, кӧні вӧлі гижӧма: «Мӧдӧд Урийӧс медся чорыд тышас. Асьныд вешйӧй сы дінысь, мед сійӧс виасны».
Йоав тӧдіс, кӧні лоӧны аммон войтырлӧн медвына тышкасьысьясыс, та вӧсна карсӧ босьтігӧн ыстіс сэтчӧ Урийӧс.
Карсьыс йӧзыс петісны да тышкасисны Йоавкӧд. Давидлӧн тышкайӧзысь унаӧс виисны, тшӧтш хеттей Урийӧс.
Йоав ыстіс Давидлы тыш мунӧм йылысь юӧр.
Юӧртысьлы шуис: «Тыш мунӧм йылысь ӧксылы висьтав ставсӧ. Ӧксы вермас скӧрмыны да шуны: “Мыйла ті сэтшӧм матӧ матыстчинныд кар дорас?
Ті ӧд тӧдінныд, мый найӧ кутасны стен вывсяньыс лыйлыны тіянӧс.
Вунӧдінныд ӧмӧй, коді виис Тевецын Еровааллысь Авимелек писӧ?
Стен вывсянь ань шыбитіс сы вылӧ изки, и мӧдыс куліс.
Мыйла ті матыстчинныд стен дорӧдзыс?” 
Сэки тэ шу ӧксылы: “Хеттей Урийӧс, тэнсьыд кесйӧгтӧ, тшӧтш виисны”».
Юӧртысь [кодӧс Йоав мӧдӧдіс ӧксы дінӧ Ерусалимӧ] локтіс Давид дінӧ да висьталіс тыш мунӧм йылысь ставсӧ, кыдзи тшӧктіс сылы Йоав. 
[Давид скӧрмис Йоав вылӧ да шуис юӧртысьлы: «Мыйла ті сэтшӧм матӧ матыстчинныд кар дорас?
Ті ӧд тӧдінныд, мый найӧ кутасны стен вывсяньыс лыйлыны тіянӧс.
Вунӧдінныд ӧмӧй, коді виис Тевецын Еровааллысь Авимелек писӧ?
Стен вывсянь ань шыбитіс сы вылӧ изки, и мӧдыс куліс.
Мыйла ті матыстчинныд стен дорӧдзыс?»]
Сэки юӧр вайысь шуис Давидлы: «Йӧзыс петісны карсьыс да эрд вылын пондісны вермыны миянӧс. Но ми бӧр вӧтлім найӧс карса дзиръя дорӧдз.
Сэки стен вывсяньыс пондісны лыйлыны ньӧвъясӧн тэнсьыд кесйӧгъястӧ, и тэнад йӧзысь, ӧксыӧй, кодсюрӧ кулісны.
Куліс тшӧтш хеттей Урий, тэнад кесйӧгыд».
Тайӧс кылӧм бӧрын Давид шуис юӧр вайысьлы: «Висьтав Йоавлы, медым сійӧ оз шогсьы тайӧ лоӧмторйыс вӧсна, ӧд шыпурт улӧ вермӧ веськавны быдӧн.
Мед сійӧ нӧшта на чорыдджыка тышкасяс да бырӧдас карсӧ.
Ышӧд Йоавӧс тайӧ кывъяснас».
Урийлӧн гӧтырыс бӧрдіс-шогсис верӧсыс вӧсна, кор тӧдмаліс, мый сійӧ кулӧма.
Бӧрдан лунъяс помасьӧм бӧрын Давид тшӧктіс вайӧдны сійӧс аслас керкаӧ. Давид босьтіс сійӧс гӧтырӧ, и мӧдыс чужтіс сылы пиӧс.
Давидлӧн татшӧмтор вӧчӧмыс вӧлі Господь водзын зэв ыджыд лёкторйӧн.
Господь мӧдӧдіс Нафан пророкӧс Давид дінӧ. Сійӧ локтіс да висьталіс ӧксылы татшӧмтор: «Ӧти карын олісны озыр да гӧль морт.
Озырлӧн вӧлі уна ыж-мӧс, а гӧльлӧн вӧлі сӧмын ичӧтик баля, кодӧс сійӧ ньӧбис. Баля сёйис-юис гӧль морткӧд ӧти дозйысь да унмовсьлывліс сылӧн ки вылын, быдмис сылӧн ныв-пиыскӧд ӧтлаын.
Гӧль морт видзис балясӧ ассьыс нылӧс моз.
Ӧтчыд озыр дінӧ пырис туйвыв морт. Горшлуныс вӧсна озыр эз кут начкыны ассьыс пемӧссӧ, мед вердны туйвыв мортӧс, а босьтіс гӧльлысь балясӧ да дасьтіс сёян».
Давид ёна скӧрмис тайӧ озыр мортыс вылӧ да шуис Нафанлы: «Ловъя Господь водзын шуа, татшӧмтор вӧчысьӧс колӧ вины.
Тадзи вӧчӧмсьыс да сьӧлӧмсӧ чорзьӧдӧмысь сылы колӧ мынтысьны балясьыс нёль пӧвстӧн».
Нафан шуис Давидлы: «Тайӧ мортыс [коді вӧчис татшӧмторсӧ] — тэ.
Та вӧсна Господь, Израильлӧн Ен, тадзи висьталӧ: “Ме мавтыштӧмӧн пукті тэнӧ Израиль войтырлы ӧксыӧ. Ме мезді тэнӧ Саул киысь. Сеті тэныд аслад ыджыдлысь керкасӧ да сылысь гӧтыръяссӧ, тшӧтш Израиль да Иуда войтырӧс. И этша кӧ тайӧ вӧлі, нӧшта на эськӧ содті.
Мыйла тэ нинӧмӧ пуктін Менсьым Индӧдӧс да вӧчин Ме водзын шогмытӧмсӧ?
Тэ виин хеттей Урийӧс.
Аммон войтырлӧн шыпурт улӧ тэ сетін сійӧс, а сылысь гӧтырсӧ босьтін аслыд гӧтырӧ.
Менӧ нинӧмӧ пуктӧм вӧсна да хеттей Урийлысь гӧтырсӧ аслыд гӧтырӧ босьтӧм вӧсна тэнад керка весьтын пыр кутас ӧшавны ёсь шыпурт”.
Господь тадзи висьталӧ: “Аслад жӧ керкаысь Ме вайӧда тэ вылӧ лёксӧ. Тэнад син водзын Ме босьта тэнсьыд гӧтыръястӧ да сета найӧс тэнад матысса мортлы. Сійӧ кутас узьлыны накӧд лунъюгыднас.
Тэ вӧчин тайӧс гусьӧн, а Ме вӧча тайӧс восьсӧн став Израиль водзын”».
Давид шуис Нафанлы: «Ме мыжа Господь водзын».
Нафан шуис: «Господь ӧні вештіс тэ вылысь мыжтӧ.
Тэ он кув.
Но тайӧ вӧчӧмторнад тэ сетін помка Господьӧс мустӧмтысьяслы омӧльтны Сійӧс. Та вӧсна кулас тэнад пузчужӧм пиыд».
Сэсся Нафан бӧр муніс гортас.
Господь ыстіс чорыд висьӧм Давидлӧн кагалы, кодӧс сылы чужтіс Урийлӧн гӧтырыс.
Давид кевмысис Енлы пи вӧснаыс. Сійӧ видзаліс да войбыд куйліс му вылас.
Сы дінӧ локтісны сылӧн керкаӧн веськӧдлысьяс, мед лэптыны сійӧс му вывсьыс.
Но Давид пыксис, эз кӧсйы чеччыны да сёйны-юны накӧд.
Сизимӧд луннас кагаыс куліс. Давидлӧн кесйӧгъяс полісны висьтавны сылы та йылысь.
Найӧ сёрнитісны ас костаныс: «Кор кагаыс вӧлі ловъя на, сійӧ эз кӧсйы весиг кывзыны миянӧс. Кыдзи нӧ ми ӧні сылы висьталам, мый пиыс куліс?
Мыйкӧ лёктор вӧчас аскӧдыс».
Давид кор аддзис кесйӧгъяслысь шӧпкӧдчӧмсӧ, гӧгӧрвоис, мый кагаыс куліс. Сэсся юаліс налысь та йылысь. 
Мӧдъясыс вочавидзисны, кагаыд пӧ куліс.
Сэки Давид чеччис му вывсьыс, мыссис, мавтіс асьсӧ чӧскыд дука выйӧн да вежис паськӧмсӧ. Сэсся муніс Господьлӧн керкаӧ кевмысьны.
Кор бӧр локтіс гортас, тшӧктіс вайны сёян. Сэсся сёйис.
Кесйӧгъясыс юалісны: «Висьтав, мыйла тэ тадзи вӧчин? Кор кагаыд ловъя вӧлі, тэ видзалін да бӧрдін [весиг эн узьлы]. 
А кор сійӧ куліс, тэ чеччин да пондін сёйны-юны?»
Давид шуис та вылӧ: «Ловъя дырйиыс ме видзалі да бӧрді, чайті, мый Господь бурсьӧлӧмтчас ме дінӧ, и кагаӧй оз кув.
А ӧні мыйла меным видзавнысӧ, сійӧ кӧ абу нин ловъя?
Ме сійӧс бӧр ловзьӧдны ог вермы.
Кор кула, муна сы дінӧ. А сійӧ ме дінӧ бӧр оз нин лок».
Давид бурӧдіс ассьыс Вирсавия гӧтырсӧ да узис сыкӧд.
Та бӧрын Вирсавия [кутіс нӧбасьны,] чужтіс пиӧс да пуктіс сылы Соломон ним.
Господьлы тайӧ кагаыс вӧлі муса. Господь мӧдӧдіс Нафан пророкӧс, и Господьлӧн кыв серти сійӧ сетіс кагалы Едидий* ним.
Йоав уськӧдчис аммон войтырлӧн Равва кар вылӧ и босьтіс ӧксылысь изкарсӧ.
Сэсся мӧдӧдіс юӧртысьӧс Давид дінӧ, тшӧктіс висьтавны: «Ме уськӧдчи Равва кар вылӧ. Босьті карыслысь ва видзанінсӧ.
Тэ чукӧрт став тышкайӧзтӧ, лок да босьт карсӧ.
Ме кӧ босьта сійӧс, менсьым нимӧс кутасны ыдждӧдлыны».
Давид чукӧртіс став ассьыс тышкайӧзсӧ да муніс Равва карӧ. Тышкасис да босьтіс сійӧс.
Давид босьтіс аммон войтырлӧн ӧксы юр вылысь зарни юркытшсӧ да пуктіс аслас юр вылӧ. Юркытшлӧн сьӧктаыс вӧлі ӧти талант, сійӧс вӧлі мичмӧдӧма дона изъясӧн. Уна озырлун Давид петкӧдіс Равва карысь.
Карса олысьясӧс тшӧтш петкӧдіс. Сійӧ сьӧкыда уджӧдіс найӧс: ӧтияс уджалісны чер-пилаӧн, мӧдъяс — кӧрт коканӧн, коймӧдъяс сотісны кирпич.
Тадзи Давид вӧчис аммон войтырлӧн быд карын, а сэсся аслас тышкайӧзкӧд бӧр локтіс Ерусалимӧ.
Авессаломлӧн, Давид пилӧн, вӧлі Фамар нима зэв мича чой. Сійӧс радейтіс Амнон, Давидлӧн мӧд пиыс.
Амнонлӧн сьӧлӧмыс сы выйӧдз пессис Фамар чойыс вӧсна, мый тайӧ вӧлі сылы висьӧм кодь.
Амнон эз тӧд, кыдзи сибӧдчыны Фамар дінӧ, ӧд сійӧ вӧлі ныв на.
Амнонлӧн вӧлі Ионадав нима ёрт, Давидлӧн Шимей вокыслӧн пиыс.
Ионадав вӧлі зэв сюсь.
Сійӧ юаліс Амнонлысь: «Висьтав, ӧксы пиӧй, мыйысь тэ лунысь-лун косьман?»
Амнон шуис: «Авессалом воклысь Фамар чойсӧ ме радейта».
Ионадав дзик пыр вӧзйис сылы: «Тэ вод аслад вольпасьӧ да лэччысь висьӧм улӧ.
Кор батьыд локтас видлыны тэнӧ, шу сылы: “Ысты ме дінӧ Фамар чойӧс, медым сійӧ вердас менӧ. Сійӧ мед дасьтас сёян менам син водзын, и ме кута сёйны сылӧн киысь”».
Амнон водіс вольпасяс да лэччысис висьӧм улӧ. Кор ӧксы локтіс видлыны сійӧс, мӧдыс шуис: «Ысты ме дінӧ Фамар чойӧс, мед сійӧ пӧжалас ме дырйи кык-куим сӧчӧн, сэсся вердас менӧ».
Давид мӧдӧдіс мортӧс да тшӧктіс висьтавны, мед Фамар мунас Амнон вокыс дінӧ да дасьтас сылы сёян.
Фамар муніс Амнон ордӧ да аддзис, мый сійӧ куйлӧ.
Фамар босьтіс пызь, кӧтіс нянь да вокыслӧн син водзын вӧчаліс сӧчӧнъяс. Сэсся пӧжалӧм сӧчӧнъяссӧ рачын вайис Амнонлы, но сійӧ эз кут сёйны.
«Петӧй татысь ставныд!» — шуис Амнон.
Кор ставныс петісны, сійӧ шуис Фамарлы: «Пырт меным сӧчӧнъястӧ пыді жыръяс. Ме тэнад киысь кута сёйны».
Фамар босьтіс пӧжалӧм сӧчӧнъяссӧ да пыртіс Амнон вокыслы пыді жыръяс.
Кор Фамар матыстчис Амнон дінӧ, мӧдыс кватитіс сійӧс да шуис: «Лок, вод ме дінӧ, чойӧй».
Фамар шуис: «Эн янӧд менӧ, вокӧй! Израильын тадзи оз вӧчны.
Эн вӧч тайӧ пежторсӧ!
Ме сэсся некор ог мын тайӧ яналӧмсьыс.
А тэнӧ став Израиль войтыр кутас нимтыны йӧйӧн.
Сёрнит ӧксыкӧд, сійӧ сетас менӧ тэ сайӧ».
Но Амнон эз кут кывзыны Фамарӧс, а мырдӧналіс сійӧс.
Та бӧрын Амнон пытшкын кыптіс Фамар дінӧ мустӧмлун, мый синнас эз вермы видзӧдны сійӧс. Мустӧмтӧмыс лои вынаджык радейтӧм дорсьыс.
Амнон шуис: «Чеччы да мун татысь».
Фамар воча шуис: «[Вокӧй!] Эн вӧтлы менӧ! Тэ кӧ вӧтлан менӧ, лёкджыктор на вӧчан менӧ мырдӧналӧм дорысь».
Но Амнон весиг эз кӧсйы кывзыны Фамарӧс.
Сэсся корис кесйӧгсӧ да шуис: «Вӧтлы тайӧс татысь да йигнав ӧдзӧссӧ».
Фамар кояліс ассьыс юрсӧ пӧимӧн да косяліс уна рӧма кузь паськӧмсӧ — татшӧм паськӧм новлісны ӧксы нывъяс, кодъяс эз на вӧвны верӧс сайын.
Кесйӧг петкӧдіс Фамарӧс да йигналіс сы бӧрся ӧдзӧссӧ.
Сійӧ муніс юрас кутчысьӧмӧн да ырзӧмӧн бӧрдіс.
Авессалом вокыс юаліс: «Эз-ӧ Амнон тэныд лёктор вӧч? Но тэ чӧв ов та йылысь, чойӧй, сійӧ ӧд тэнад вок.
Дугды шогсьынытӧ».
Фамар оліс Авессалом вокыс ордын эновтӧм ань моз.
Кор Давид ӧксы тӧдмаліс тайӧ лоӧмтор йывсьыс, ёна скӧрмис [но эз кӧсйы шогӧдны Амнонӧс, ӧд радейтіс ассьыс медыджыд писӧ].
Авессалом дугдіс сёрнитны Амнонкӧд, ӧд сійӧ ёна мустӧмтіс Амнонӧс Фамар чойсӧ янӧдӧмысь.
Кык во мысти Ваал-Хацор карын Ефрем му дорын шырисны Авессаломлысь ыжъяссӧ. Авессалом лӧсьӧдіс гаж да корис сэтчӧ ӧксылысь став пиянсӧ.
Авессалом локтіс ӧксы дінӧ да шуис: «Ӧні менам, тэнад кесйӧглӧн, ыж шыран кад.
Кора тэнӧ, ӧксыӧй, аслад йӧзкӧд волы ме ордӧ».
Ӧксы шуис: «Ставным огӧ мунӧй. Ог кӧсйы сьӧктӧдны тэнӧ, пиӧй».
Авессалом ёна корис, но ӧксы сулаліс аслас шуӧм кыв вылын. Сӧмын бурсиис писӧ.
Авессалом шуис: «Сідзкӧ, мед Амнон вокӧй мунас мекӧд».
Ӧксы юаліс: «Мыйла сылы тэкӧд муннысӧ?»
Но мӧдыс корӧмӧн-корис. Сэки ӧксы ыстіс Амнонӧс да ассьыс мукӧд пиянсӧ Авессаломкӧд. 
[Авессалом лӧсьӧдіс ӧксылы кодь ыджыд гаж.]
Аслас кесйӧгъяслы Авессалом шуис: «Видзӧдӧй Амнон бӧрся, и кор сійӧ коддзас, ме тшӧкта тіянлы вины сійӧс. 
Энӧ полӧй, ӧд тайӧ менам тшӧктӧм. Лоӧй повтӧмӧсь да зумыдӧсь!»
Кесйӧгъяс вӧчисны Авессаломлӧн тшӧктӧм серти.
Сэки ӧксылӧн пиян быдӧн сӧліс аслас мул вылӧ да пышйис.
Кор найӧ вӧліны туйынӧсь на, Давид ӧксылы висьталісны, Авессалом пӧ виӧма ӧксылысь став пиянсӧ, некод пӧ ловйӧн абу кольӧма.
Сэки ӧксы косяліс ассьыс паськӧмсӧ да кымынь уськӧдчис муас. Сыкӧд орччӧн сулалысь кесйӧгъяс тшӧтш косялісны паськӧмнысӧ.
Но Ионадав, Давидлӧн Шимей вокыслӧн пиыс, шуис: «Ыджыдӧй, эн эскы, мый тэнсьыд став пиянтӧ виисны. 
Сӧмын Амнонӧс виисны. Сійӧ лунсяньыс, кор Амнон мырдӧналіс-янӧдіс Авессаломлысь Фамар чойсӧ, Авессалом шуис вины сійӧс.
Эн шогсьы, ӧксыӧй-ыджыдӧй, аслад пиян вӧсна. Найӧ ловъяӧсь. Сӧмын Амноныд куліс, Авессаломыд жӧ пышйис».
Карсӧ видзысьясысь ӧти видзӧдліс да аддзис керӧсвыв туйӧд лэччысь уна йӧзӧс. 
[Карсӧ видзысь локтіс да юӧртіс ӧксылы, ме пӧ аддзылі Орон туйӧд керӧс вывсянь локтысь йӧзӧс.]
Сэки Ионадав шуис ӧксылы: «Тайӧ ӧксы пиян локтӧны.
Ме жӧ шулі!»
Тайӧс шуӧм бӧрын ырзӧмӧн бӧрдігтыр пырисны Давид ӧксылӧн пияныс.
Ачыс ӧксы да сылӧн кесйӧгъяс тшӧтш кутісны ырзӧмӧн бӧрдны.
Авессалом пышйис [Маака муӧ] гешурса ӧксы дінӧ, Аммиудлӧн Талмай пи дінӧ, да оліс сэні куим во.
Давид дыр шогсис Амнон пиыс вӧсна.
abu
Но кор дугдіс шогсьынысӧ, сійӧ эз нин кӧсйы водзӧс перйыны Авессаломлысь.
Саруялӧн Йоав пиыс казяліс, мый ӧксы оз вермы вунӧдны Авессаломӧс.
Сійӧ тшӧктіс вайӧдны Текоя карысь сюсь мывкыда аньӧс. Сылы шуис: «Лэччысь бӧрдӧм улӧ. Пасьтав шогалан паськӧм, чӧскыд дука выйнад эн мавтчы. Петкӧдлы, быттьӧ тэ дыр кад нин бӧрдан кулысь вӧсна.
Мун ӧксы дінӧ да висьтав сылы, мый ме тэныд тшӧкта».
Йоав велӧдіс аньӧс, мый шуны ӧксылы.
Текояысь ань локтіс ӧксы дінӧ, муӧдзыс уськӧдчӧмӧн копыртчис сылы да шуис: «Отсав меным, ӧксыӧй!»
«Кутшӧм мог суис тэнӧ?» — юаліс ӧксы.
Мӧдыс висьталіс: «Ме [важӧн нин] дӧва, верӧсӧй кувліс.
Менам, тэнад кесйӧглӧн, коли кык пи.
Ӧтчыдысь видз вылын найӧ тышӧ воисны. Торйӧдысьыс некод эз вӧв, сэки ӧтиыс кучкис мӧдсӧ да виис.
Та бӧрын став рӧдвужӧй сувтіс меным паныд. Найӧ шуалісны, сет пӧ миянлы питӧ, ассьыс воксӧ виысьӧс.
Ми пӧ виам сійӧс вокыс вӧсна, мед сылы батьыслӧн овмӧсыс оз вудж.
Ӧксыӧй, найӧ кӧсйӧны кусӧдны менсьым бӧръя бикиньсӧ, мед бырӧдны верӧслысь нимсӧ да сысянь чужысьӧс».
Ӧксы шуис аньлы: «Мун гортад. Ме тшӧкта тӧждысьны тэ вӧсна».
Но Текояысь локтӧм ань шуис ӧксылы: «Ӧксыӧй-ыджыдӧй, мед мыжыс кольӧ ме вылын да менам батьлӧн рӧд вылын. Тэнад мыжыс абу, и тэнад ыджыдалӧмын мыжыс абу».
Ӧксы шуис: «Тэ вылӧ кӧ кодкӧ кутас шуасьны, вайӧд сійӧс ме дінӧ. Водзӧ сійӧ оз кут тэнӧ дӧзмӧдны».
Ань шуис: «Кора тэнӧ, ӧксыӧй, кыв сет аслад Господь Ен водзын, мый вир кисьтӧм вӧсна водзӧс перйӧм могысь оз кутны водзӧ виавны да оз вины менсьым пиӧс».
Ӧксы воча шуис: «Ловъя Господь водзын кыв сета: тэнад пилӧн весиг ӧти юрси сі оз усь юр вывсьыс».
Ань шуис: «Лэдз аслад кесйӧглы нӧшта мыйкӧ висьтавны тэныд, ӧксыӧй-ыджыдӧй».
«Висьтав», — шуис ӧксы.
Ань шуис: «Мыйла тэ ачыд татшӧм ногӧн вӧчан Енлӧн войтыркӧд?
Меным кыв сетӧмнад, ӧксыӧй, тэ асьтӧ мыждан. Ӧд тэ он сибӧд сійӧс, кодӧс коркӧ вӧтлін.
Ми ставным коркӧ кулам, лоам муӧ кисьтӧм ва кодьӧн, кодӧс бӧр он курав.
Но Енмыс оз кӧсйы бырӧдны мортсӧ. Мӧдарӧ, Сійӧ зільӧ сибӧдны ӧтдортӧмаӧс.
Ме, тэнад кесйӧг, локті тэ дінӧ, ӧксыӧй-ыджыдӧй, медым висьтавны тайӧс. Йӧзыс повзьӧдлӧны менӧ, но ме шуи сёрнитны тэкӧд.
Мӧвпышті, мый ӧксы отсалас меным, кывзас да мездас менӧ лёк йӧзысь, кодъяс кӧсйӧны бырӧдны менӧ да менсьым пиӧс Енлӧн кӧсйысьӧм муысь.
Ме, тэнад кесйӧг, аслым шуи: “Мед ӧксылӧн, менам ыджыдлӧн, шуӧмыс бурӧдас-лӧньӧдас менӧ. Ӧд менам ӧксыӧй-ыджыдӧй Енлӧн андел кодь, кужӧ торйӧдны бурсӧ лёксьыс”. 
Ӧксыӧй, мед Господь, тэнад Енмыд, лоӧ тэкӧд!»
Ӧксы воча шуис аньлы: «Эн дзеб меысь, ме кӧ мыйкӧ юала тэнсьыд».
«Юав, ӧксыӧй-ыджыдӧй», — шуис ань.
«Эз-ӧ Йоав мӧдӧд тэнӧ?» — юаліс ӧксы.
Ань вочавидзис: «Ӧксыӧй-ыджыдӧй, тэ водзын кыв сетӧмӧн шуа: тайӧ тадз.
Тэнад Йоав кесйӧгыд тшӧктіс меным висьтавны ставсӧ тайӧс.
Сійӧ вӧчис тадзи, мед мӧдар боксянь петкӧдлыны тэныд тайӧ лоӧмторсӧ.
Но тэ, ыджыдӧй, Енлӧн андел кодь ыджыд мывкыдлуна. Тӧдан ставсӧ, мый вӧчсьӧ тайӧ муас».
Йоавлы ӧксы шуис: «Бур. Ме вӧча, кыдзи тэ шуин.
Мун да бӧр вайӧд Авессаломӧс».
Йоав муӧдзыс уськӧдчӧмӧн копыртчис сылы да шуис: «Енмыс мед бурсиас тэнӧ, ӧксыӧй-ыджыдӧй! Ӧні ме тӧда, мый тэ бур сьӧлӧма ме дінӧ, ӧд тэ эн ӧтдорт менсьым корӧмӧс».
Сэсся Йоав муніс Гешурӧ да вайӧдіс Авессаломӧс Ерусалимӧ.
Ӧксы шуис: «Авессалом мед мунас аслас керкаӧ, но менам чужӧмбан водзӧ мед оз петкӧдчыв».
Авессалом овмӧдчис аслас керкаӧ, но ӧксы дінӧ сійӧс эз лэдзны.
Израиль му пасьтала эз вӧв Авессаломысь мичаджыкыс да ошканаыс.
Юр вывсяньыс да кок пыдӧсӧдзыс сылӧн ставыс вӧлі тыр-бур.
Ӧтчыдысь вонас сійӧ шырліс юрсисӧ, кор юрсиыс ёна сьӧктӧдліс. Ӧксыӧн индӧм сикель серти кӧ артавны, шырӧм юрсиыслӧн сьӧктаыс вӧлі кыксё сикель.
Авессаломлӧн чужисны куим пи да Фамар нима ӧти ныв.
Фамар вӧлі зэв мича ань. [Сійӧ петіс Соломонлӧн Ровоам пи сайӧ да чужтіс сылы Авийӧс.]
Кык во чӧж Авессалом оліс Ерусалимын, а ӧксыкӧд эз и аддзысьлы.
Ӧтчыд Авессалом корис Йоавӧс, мед мӧдӧдны сійӧс ӧксы дінӧ. Но мӧдыс эз лок.
Корис мӧдысь, но сійӧ бара эз лок.
Сэки Авессалом шуис аслас кесйӧгъяслы: «Ті ӧд тӧданныд, мый Йоавлӧн муыс сулалӧ менам му бокын, сэні сылӧн ид быдмӧ.
Мунӧй да сотӧй».
Кесйӧгъяс мунісны да сотісны Йоавлысь ид мусӧ. 
[Йоавлӧн кесйӧгъясыс косялісны паськӧмнысӧ да локтісны Йоав дінӧ. Шуисны, Авессаломлӧн кесйӧгъясыс пӧ сотісны тэнсьыд мутӧ.]
Сэки Йоав локтіс Авессалом дінӧ гортас да юаліс: «Мыйысь тэнад кесйӧгъясыд сотісны менсьым ид муӧс?»
Авессалом вочавидзис: «Ме корлі тэнӧ, мед мӧдӧдны ӧксы дінӧ да юавны сылысь, мыйла сійӧ коркӧ корис менӧ Гешурысь.
Меным сэні бурджык вӧлі.
Ме кӧсъя аддзысьлыны ӧксыкӧд.
Ме кӧ мыжа, мед сійӧ виас менӧ».
Йоав муніс ӧксы дінӧ да ставсӧ висьталіс сылы.
Ӧксы корис Авессаломӧс ас дорас.
Мӧдыс локтіс да муӧдзыс копыртчис сылы.
Ӧксы окыштіс Авессаломӧс.
Авессалом лӧсьӧдіс аслыс тарантас, вӧвъяс да водзвылас котӧртысь ветымын тышкамортӧс.
Сійӧ чеччыліс водз асывнас да сувтліс карса дзиръялань мунан туй вылӧ. Кор кодкӧ вӧлі локтӧ ёрдӧ, мед ӧксы видлаліс сылысь могсӧ, Авессалом сувтӧдліс сійӧс да юавліс, кутшӧм карысь пӧ тэ.
Мӧдыс вочавидзліс, ме пӧ, тэнад кесйӧг, израильса татшӧмтӧ чужанкотырысь. Сэки Авессалом шуліс сылы: «Дерт, тэнад могыд бур да колана, но ӧксы дорын некод тэнӧ кывзыны оз кут.
Ме кӧ вӧлі ёрдысьӧн тайӧ муас, ме эськӧ сибӧді быд локтысьӧс, кывзі сійӧс да веськыда мыжді».
Локтысьяс пиысь кӧ кодкӧ матыстчыліс, медым копыртчыны Авессаломлы, мӧдыс мыччыліс сылы кисӧ, сывйыштліс да окыштліс сійӧс.
Тадзи Авессалом вӧчліс быд израильсакӧд, коді аслас могӧн воліс ӧксы дінӧ ёрдӧ. Татшӧм ногӧн сійӧ зілис бергӧдны асланьыс йӧзсӧ.
Нёль во мысти Авессалом шуис Давидлы: «Лэдз менӧ ветлыны Хевронӧ, збыльмӧдны Господьлы кӧсйысьӧмӧс.
Арам муын Гешурын олігӧн ме, тэнад кесйӧг, кыв сеті Господьлы, мый кута кесъявны Сылы, Сійӧ кӧ бӧр вайӧдас менӧ Ерусалимӧ».
Ӧксы шуис сылы: «Мун лӧнь сьӧлӧмӧн».
Авессалом муніс Хевронӧ.
Сійӧ мӧдӧдіс ассьыс йӧзсӧ став Израиль му пасьтала да тшӧктіс висьтавны быд чужанкотырлы: «Кор кыланныд буксан шы, сэки горӧдӧй, мый Хевронын Авессалом пуксис ӧксыӧ».
Ерусалимысь Авессаломкӧд локтіс кыксё морт. Найӧс коригӧн Авессалом налы могсӧ эз висьтав.
Вись вайӧм дырйи Авессалом тшӧктіс корны Гило карысь Ахитофелӧс, сійӧ вӧлі Давидӧс туйдӧдысь.
Тадзи вынсяліс израильсаяскӧд гуся сёрнитчӧмыс, и йӧзыс Авессалом дор ӧтарӧ содіс.
Давид дінӧ локтіс юӧр вайысь да висьталіс, израильсаяс пӧ сувтӧмаӧсь Авессалом дор.
Давид сэки шуис аслас йӧзлы, кодъяс вӧліны сыкӧд Ерусалимын: «Миянлы колӧ пышйыны Авессаломысь. 
Тэрмасьӧй, мед сійӧ эз су миянӧс. Суас кӧ, виас миянӧс и карын став олысьсӧ».
«Ми — тэнад кесйӧгъяс, ӧксыӧй-ыджыдӧй, — шуисны Давидлӧн йӧз. — Кыдзи тэ шуан, сідзи и вӧчам».
Аслас йӧзкӧд да гортсаяскӧд Давид ӧксы муніс Ерусалимысь.
Но дас кесйӧг-гӧтырсӧ кольӧдіс сэтчӧ, мед видзӧдасны керка бӧрсяыс.
Ӧксы да став сылӧн йӧзыс подӧн петісны карсьыныс. Туяныс сувтыштлісны Бет-Мерхакӧ.
Ӧксы водзвывті восьлалӧмӧн мунісны сылӧн кесйӧгъясыс, тшӧтш керетсаяс да пелетсаяс да нӧшта квайтсё морт, кодъяс коркӧ локтісны сыкӧд Гефысь.
Гефса Иттайӧс аддзӧм бӧрын ӧксы юаліс сылысь: «А тэ мыйла миянкӧд мунан?
Бӧр бергӧдчы Авессалом ӧксы дінад.
Тэ ӧд локтысь морт, ассьыд чужан мутӧ тэныд ӧтчыд ковмис нин эновтны.
Тӧрыт на сӧмын локтін, а талун бара нин колӧ кытчӧкӧ мунны тэныд.
Ме весиг ачым ог тӧд, кытчӧ муна.
Босьт аскӧдыд гефса йӧзтӧ да бӧр бергӧдчы. [Господьлӧн] буралӧмыс да веськыдлуныс тэкӧд!»
Иттай воча шуис: «Ловъя Господь водзын да тэ водзын, ӧксыӧй-ыджыдӧй, кыв сета: кӧні тэ лоан — ловъя либӧ кулӧмыд, — сэні лоа и ме, тэнад кесйӧгыд».
Сэки ӧксы шуис Иттайлы: «Сідзкӧ, лок мунам мекӧд».
Тадзи Иттай аслас гефса йӧзкӧд став челядьнаныс мунісны Давидкӧд.
Ерусалимын кольӧм йӧзыс видзӧдісны мунысьяс вылӧ да ырзӧмӧн бӧрдісны. Давид аслас йӧзкӧд вуджисны Кедрон ковтыс, сэсся мӧдӧдчисны овтӧминлань.
Накӧд тшӧтш вӧліны Садок [поп] да левитъяс, кодъяс нуисны Енлысь Йитӧд кудсӧ. Левитъяс пуктісны кудсӧ му вылӧ.
Авиатар поп сулаліс мыльк вылын, кытчӧдз Давидлӧн став йӧзыс эз петны Ерусалим карысь.
Ӧксы шуис Садоклы: «Бӧр нуӧй Енлысь кудсӧ Ерусалимӧ [мед сійӧ сулалас аслас местаын]. 
Господь кӧ лоӧ бур сьӧлӧма ме дінӧ, Сійӧ бӧр вайӧдас менӧ да сетас меным аддзыны Ассьыс кудсӧ аслас местаысь.
А шуас кӧ, тэ пӧ Меным абу шогмана, ме дась — мед вӧчас мекӧд, мый кӧсйӧ.
Кывзы, Садок, лӧнь сьӧлӧмӧн бӧр бергӧдчы карас. Босьт аскӧдыд Ахимаас питӧ да Авиатарӧс Ионафан пиыскӧд.
Ме кута виччысьны тіянсянь юӧр овтӧминын, Йӧрдан ю вуджанін дорын».
Садок да Авиатар бӧр нуисны Енлысь кудсӧ Ерусалимӧ, асьныс тшӧтш кольччисны сэтчӧ.
А Давид кайис Олив керӧсӧ. Кӧмтӧгыс да юрсӧ вевттьӧмӧн сійӧ муніс и бӧрдіс.
Сыкӧд мунысь йӧзыс тшӧтш вевттисны юрнысӧ да бӧрдісны.
Давидлы юӧртісны, Ахитофел пӧ ӧтувтчӧма Авессаломкӧд.
Сэки Давид пондіс кевмысьны: «Господьӧй, [Енмӧй,] вӧч сідзи, мед Ахитофеллӧн шуӧм-вӧзйӧмыс лоӧ мывкыдтӧм вӧзйӧмӧн».
Кор Давид кайис керӧс йылӧ, кӧні юрбитлісны Енлы, сэні паныдасис сылы Аркиысь Хушай ёртыс.
Паськӧмсӧ сійӧ вӧлі косялӧма, а юрсӧ коялӧма муӧн.
Давид шуис сылы: «Тэ кӧ мекӧд мунан, сӧмын сьӧктӧдан менӧ.
Бӧр мун Ерусалимӧ да шу Авессаломлы: “Ӧксыӧй, [ме аддзылі тэнад войтырлысь да батьыдлысь мунӧмсӧ, но] ме — тэнад кесйӧг. 
[Эн ви менӧ.] Таӧдз ме кесъялі тэнад батьыдлы, а ӧні ме кута кесъявны тэныд”. Тадзи тэ, Хушай, отсалан меным, вӧчан Ахитофеллысь шуӧм-вӧзйӧмсӧ мывкыдтӧмӧн.
Садок да Авиатар попъяс лоасны тэкӧд. Висьтавлы налы ставсӧ, мый кылан ӧксы керкаын.
Накӧд тшӧтш лоӧны налӧн Ахимаас да Ионафан пиянныс.
На пыр ыстӧй меным юӧръяснытӧ».
Хушай, Давидлӧн ёртыс, муніс Ерусалимӧ. Буретш сэки Авессалом вӧлі локтӧма сэтчӧ.
Олив керӧсысь лэччигӧн Давидлы паныдасис Сивей, Мепибошетлӧн кесйӧгыс. Кык осёл вылын сійӧ нуис кыксё тупӧсь нянь, сё ёкмыль изюм да сё ёкмыль косьтӧм инжир, нӧшта кучик дозйын вина.
Ӧксы юаліс Сивейлысь: «Кытчӧ тэ нуан ставсӧ тайӧс?»
Мӧдыс вочавидзис: «Осёлъяссӧ вая тэнад гортсаяслы, мед ветласны на вылын, няньсӧ да косьтӧм вотӧссӧ — тэнад тышкайӧзлы пӧткӧдчыны, а винасӧ — овтӧминын эбӧстӧмъясыдлы горшнысӧ веськӧдны».
Ӧксы юаліс: «Кӧні тэнад ыджыдыд?»
Сивей вочавидзис: «Сійӧ Ерусалимӧ кольччис. Чайтӧ, мый ӧні израильсаяс пуктасны сійӧс ӧксыӧ, кыдзи коркӧ пуктісны сылысь Саул пӧльсӧ».
Сэки ӧксы шуис Сивейлы: «Ставыс, мый ӧнӧдз вӧлі Мепибошетлӧн, лоӧ тэнад».
Сивей копыртчылӧмӧн воча шуис: «Ӧксыӧй-ыджыдӧй, тэ бур сьӧлӧма ме дінӧ! Мед и водзӧ лоас тадзи».
Кор Давид ӧксы воис Бахуримӧ, сылы воча петіс Герлӧн Шимей пиыс. Сійӧ вӧлі Саул рӧдысь.
Шимей ветлӧдліс да быд ногыс лёкӧдіс Давидӧс. Лыйліс сійӧс да сылысь йӧзсӧ изйӧн.
Но Давид ӧксыӧс веськыдладорсяньыс и шуйгаладорсяньыс видзисны сылӧн тышкайӧзыс веськӧдлысьясныскӧд.
Шимей лёкӧдӧмӧн шуаліс Давидлы: «Весась, морт виысь! Весась, шогмытӧм морт!
Господь водзӧс перйӧ тэнсьыд Саул рӧдлысь вирсӧ кисьтӧмысь. Тэ пуксин ӧксыӧ Саул пыдди, но ӧні Господь сетіс ӧксыалӧмтӧ тэнад Авессалом пилы.
Тэ морт виысь, та вӧсна тэнӧ суис тайӧ шогыс».
Саруялӧн Авишай пиыс шуис ӧксылы: «Кыдзи лысьтӧ тайӧ пон шойыс лёкӧдны тэнӧ, ӧксыӧй-ыджыдӧй!
Муна да керышта сылысь юрсӧ».
Ӧксы шуис: «Мый ті ме понда шогсянныд, Саруя пиян? [Кольӧй сійӧс.] Мед лёкӧдас менӧ. Господь кӧ тшӧктіс лёкӧдны, вермас-ӧ кодкӧ юавны, мыйла сійӧ тадзи вӧчӧ».
Сэсся Авишайлы да тышкайӧзлы Давид шуис: «Менам кӧ пиӧй, аслам вир-яйсянь чужысьӧй, корсьӧ вины менӧ, мый позьӧ виччысьны Веняминлӧн писянь?
Кольӧй сійӧс. Мед лёкӧдас. Сылы, буракӧ, Господь тшӧктӧма.
Гашкӧ, Господь аддзас, кыдзи увтыртӧны менӧ, да менӧ ёрӧмысь бурӧн мынтысяс меным».
Давид водзӧ муніс аслас йӧзкӧд. А Шимей вӧтчис Давид бӧрся керӧс пӧлӧн туй бокиті, лёкӧдіс сійӧс, лыйліс изъясӧн да кояліс муӧн.
Кор ӧксы да сылӧн йӧзыс воисны Йӧрдан ю дорӧ, сувтісны сэтчӧ шойччыны, ӧд вӧлі ёна мудзӧмаӧсь.
Авессалом израильса тышкайӧзкӧд пырис Ерусалимӧ. Накӧд тшӧтш вӧлі Ахитофел.
Аркиысь Хушай, Давидлӧн ёртыс, локтіс Авессалом дінӧ да шуис сылы: «Мед олас ӧксы! Мед олас ӧксы!»
Авессалом воча шуис: «Со тадзи тэ и кесъялан Давид ёртыдлы! Мыйла эн мун сыкӧд?»
Хушай шуис: «Ме лоа сыкӧд, кодӧс бӧрйисны Господь, тайӧ тышкайӧзыс да став Израиль войтыр. Та вӧсна ме кольчча тэкӧд.
Ме кута кесъявны тэныд, ӧд тэ менам ёртлӧн пи.
Кыдзи ме кесъялі тэнад батьыдлы, сідзи кута кесъявны и тэныд».
Авессалом шыасис Ахитофел дінӧ: «Висьтав, мый водзӧ вӧчны».
Ахитофел вӧзйис: «Пыр батьыдлӧн кесйӧг-гӧтыръяс дінӧ, кодъясӧс сійӧ колис керка бӧрсяыс видзӧдны.
Кор Израиль войтыр тӧдмалас, мый тэ вӧчин, гӧгӧрвоас, мый батьыд некор оз бурась тэкӧд. Сэки тэ дор сулалысьяс збойджыкӧсь лоасны».
Авессаломлы сувтӧдісны чом Давидлӧн керка вевт вылӧ. Израиль войтырлӧн син водзын Авессалом пыравліс тайӧ чомъяс да сэні узьліс батьыслӧн кесйӧг-гӧтыръяскӧд.
Сійӧ кадас Ахитофел дінӧ шыасьлісны Ен дінӧ моз, ӧд Ахитофеллӧн быд шуӧм-вӧзйӧм вӧлі Енсянь шуӧм кодь.
Тадзи вӧлі Давидлы, тадзи лои тшӧтш Авессаломлы.
Ахитофел шуис Авессаломлы: «Лэдз меным босьтны аскӧд дас кык сюрс мортӧс. Талун войнас муна вӧтӧдны Давидӧс.
Кор сійӧ ёна мудзас да эбӧстӧммас, ме виччысьтӧг уськӧдча сы вылӧ. Сійӧ повзяс меысь, и сылӧн йӧзыс пышъяласны.
Сэки ме виа Давид ӧксыӧс. Тадзи войтырыс сувтас тэ дор.
Тэ ӧд ловсӧ босьтны кӧсъян сӧмын ӧти мортлысь. Сійӧ кӧ кулас, сэки став войтырыслы бур лоӧ».
Ахитофеллӧн вӧзйӧмыс сьӧлӧм вылас воис Авессаломлы да израильса став юрнуӧдысьлы.
Но Авессалом тшӧктіс корны тшӧтш Аркиысь Хушайӧс.
Кывзам пӧ, мый сійӧ шуас.
Кор Хушай локтіс, Авессалом висьталіс сылы Ахитофеллысь вӧзйӧмсӧ.
«Мый тэ шуан? Кывзыны-ӧ миянлы сійӧс?» — юаліс Авессалом.
Хушай вочавидзис: «Ахитофеллӧн вӧзйӧмыс абу бур.
Тэ ӧд тӧдан ассьыд батьтӧ да сылысь йӧзсӧ.
Найӧ повтӧмӧсь да зэв скӧрӧсь, ошпиянсӧ воштӧм ош кодьӧсь [да видз вылын шӧйтысь скӧр кабан кодьӧсь]. Тэнад батьыд зэв сюсь веськӧдлысь, сійӧ оз ӧтилаын кут узьлыны аслас тышкайӧзкӧд.
Ӧні сійӧ, гашкӧ, кутшӧмкӧ кырта горсйын либӧ кӧнкӧ дзебсясьӧ. Тыш дырйи кӧ тэнад йӧзысь кодсюрӧ куласны, та йылысь дзик пыр паськалас юӧр. Кутасны шуны, Авессаломлысь тышкайӧзсӧ пӧ Давид пасьвартӧма. Сэки тэнад йӧзысь медся повтӧмыс, кӧть сылӧн сьӧлӧмыс левлӧн кодь, усяс ловнас.
Ӧд став Израиль войтыр тӧдӧ, мый тэнад батьыд да сылӧн йӧзыс вына тышкасьысьяс.
Та вӧсна ме вӧзъя тэныд: войвыв Дансянь лунвыв Бер-Шеваӧдз став Израиль войтырсӧ чукӧрт ас дінад. Налӧн лыдыс мед лоӧ саридздор лыа мында. Ачыд накӧд тшӧтш мун.
Ми корсям Давидӧс, кӧні эськӧ сійӧ эз дзебсясь. Кыдзи лысва усьӧ да вевттьӧ ставнас мусӧ, тадзи уськӧдчам Давид вылӧ да сылӧн йӧз вылӧ, и некод ловйӧн оз коль.
А дзебсяс кӧ сійӧ кутшӧмкӧ карӧ, сэки став Израиль войтыр локтас сэтчӧ гезъясӧн. Весиг ӧти из оз коль тайӧ карас, ставсӧ кыскалам ковтысӧ».
Авессалом да Израиль войтыр шуисны, Ахитофеллӧн вӧзйӧм дорысь пӧ Аркиысь Хушайлӧн вӧзйӧмыс бурджык.
Медым бырӧдны Авессаломӧс, Господь татшӧм ногӧн торкис Ахитофеллысь бур вӧзйӧмсӧ.
Хушай висьталіс Садок да Авиатар попъяслы, мый Ахитофел вӧзйис Авессаломлы да израильса юрнуӧдысьяслы. Ассьыс вӧзйӧмсӧ тшӧтш висьталіс.
Сэсся шуис налы: «Мунӧй ӧдйӧджык да висьталӧй Давидлы, мед оз кольччы тайӧ войнас овтӧминӧ, но дзик пыр мед вуджас аслас йӧзкӧд Йӧрдан ю сайӧ. Вермасны вины ӧксыӧс да сылысь став йӧзсӧ».
Ионафанлы да Ахимааслы оз позь вӧлі мыччысьны карас, та вӧсна найӧ виччысисны юӧртысьӧс Рогель ва петанін дорын. На дінӧ локтіс кесйӧг ань да ставсӧ висьталіс налы. А найӧ тайӧ юӧрнас мунісны Давид дінӧ.
Ӧти том морт аддзыліс найӧс да висьталіс та йылысь Авессаломлы.
Но зонъяс ӧдйӧ пышйисны сэтысь да локтісны Бахуримӧ сэтчӧс ӧти олысь дінӧ. Сэні йӧрас дзебсисны сылӧн ӧшмӧсӧ.
Гӧтырыс вевттис ӧшмӧс вомсӧ дӧраӧн да кояліс дӧра вылас шыдӧс, медым ӧшмӧсыс эз тыдав.
Тайӧ керкаас локтісны Авессаломлӧн йӧзыс да юалісны аньлысь, кӧнӧсь Ахимаас да Ионафан.
Мӧдыс вочавидзис, найӧ пӧ юсӧ келӧмӧн вуджисны.
Авессаломлӧн йӧзыс корсисны зонъясӧс, но эз аддзыны. Сэсся бӧр локтісны Ерусалимӧ.
Налӧн мунӧм бӧрын зонъяс петісны ӧшмӧсысь да мунісны Давид ӧксы дінӧ. Сылы висьталісны, мый Ахитофел вӧзйис Авессаломлы, да тшӧктісны ӧдйӧджык вуджны ю мӧдлапӧлас.
Давид став аслас йӧзкӧд вуджис Йӧрдан ю сайӧ.
Асылӧдзыс некод эз коль ю таладорас.
Кор Ахитофел аддзис, мый сылысь вӧзйӧмсӧ ӧтдортісны, пуксис осёл вылӧ да муніс гортас, аслас карӧ. Гортсаясыслы висьталіс, мый вӧчны керканас, сэсся та бӧрти джагӧдчис. Сылысь шойсӧ пуктісны батьыслӧн дзебанінӧ.
Давид локтіс Маханаимӧ, а Авессалом израильса тышкайӧзкӧд вуджис Йӧрдан ю сайӧ.
Йоав пыдди тышкайӧзӧн веськӧдлыны Авессалом пуктіс Амессайӧс.
Амессайлӧн батьыс вӧлі Изреельысь Йитрей, а мамыс вӧлі Авигея, Нахашлӧн ныв да Саруялӧн чой. Саруя вӧлі Йоавлӧн мам.
Авессалом израильса тышкайӧзкӧд сувтіс Галаад муӧ.
Кор Давид локтіс Маханаимӧ, сэтчӧ воисны аммон войтырлӧн Равва карысь Нахашлӧн Шови пиыс, Ло-Деварысь Аммиэллӧн Макир пиыс да Роглим карысь галаадса Барзиллай. Найӧ вайисны [водзвыв дасьтӧм дас] вольпась, [дас] тасьті да сёй дозъяс. Нӧшта вайисны пызь, шобді, ид, проса, анькытш, чечевица, пражитӧм тусь, ма, вый, ыжъясӧс да мӧс йӧлысь вӧчӧм сыр. Ставсӧ тайӧс вайисны, мед вердны Давидӧс да сылысь йӧзсӧ.
Ас костаныс сёрнитісны, овтӧминын пӧ найӧ ёна мудзисны да тшыгъялісны.
Давид чукӧртіс ассьыс тышкайӧзсӧ да пуктіс налы сюрсӧн да сёӧн веськӧдлысьясӧс.
Сэсся мӧдӧдіс став тышкайӧзсӧ куим пельӧ юкӧмӧн. Ӧти чукӧрнас веськӧдліс Йоав, мӧд чукӧрнас — Йоавлӧн вокыс, Саруялӧн Авишай пиыс, коймӧд чукӧрнас — Гефысь Иттай.
Ӧксы шуис тышкайӧзлы: «Ме тшӧтш тіянкӧд муна».
Но найӧ воча шуисны: «Эн мун.
Миянлы кӧ ковмас пышйыны, вӧрӧглы тайӧ веськодь.
Весиг кӧ миян йӧзысь джынйыс кулас, и тайӧ веськодь налы.
Но тэ ӧтнадӧн дас сюрс тышкаморт дон сулалан.
Бурджык, тэ кӧ кольччан карас. Ковмас кӧ, сэтысянь отсалан миянлы».
«Бур. Кыдзи шуанныд, сідзи и вӧча», — шуис ӧксы.
Ӧксы сулаліс карса дзиръя дорын, кор тышкайӧз сёясӧн да сюрсъясӧн петісны карсьыс.
Йоавлы, Авишайлы да Иттайлы ӧксы шуис: «Менам Авессалом пиӧйлы энӧ вӧчӧй лёксӧ».
Тышкайӧз ставныс кывлісны тайӧс.
Давидлӧн тышкайӧзыс петісны тышӧ израильсаяслы паныд. Тышыс муніс Ефрем вӧрын.
Давидлӧн йӧзыс пасьвартісны израильсаясӧс.
Уна вир вӧлі кисьтӧма сійӧ лунӧ — кызь сюрс морт воштіс олӧмсӧ.
Тышыс муніс сэтчӧс му пасьтала. Сійӧ лунӧ унджыкыс вӧрын кулісны, а эз шыпурт помысь.
Авессалом рӧдтіс аслас мул вылын, кор паныдасис Давидлӧн йӧзкӧд.
Рӧдтігас сылӧн кузь юрсиыс гартчис ыджыд тупу вожйӧ. Мулыс котӧртіс водзӧ, а ачыс Авессалом коли ӧшавны енэжа-муа костас.
Ӧти морт аддзыліс тайӧс. Сійӧ муніс да висьталіс Йоавлы: «Ме аддзылі Авессаломӧс. Сійӧ ӧшалӧ тупу вылын».
Йоав шуис юӧртысьлы: «Тэ кӧ аддзылін сійӧс, мыйла эн ви?
Ме эськӧ сеті тэныд дас сикель эзысь да кучик вӧнь».
Мӧдыс вочавидзис Йоавлы: «Меным кӧ сетісны весиг сюрс сикель эзысь, ме и сэки эськӧ эг лэпты киӧс ӧксы пи вылӧ.
Ми ӧд ставным кывлім, мый ӧксы шуис. Сійӧ тшӧктіс тэныд, Авишайлы да Иттайлы видзны Авессаломӧс.
Ме кӧ вӧчи мӧд ногӧн, сэки эськӧ ассьым олӧмӧс вошті. Ӧд ӧксыысь нинӧм он дзеб, и тэ эськӧ тшӧтш сувтін меным паныд».
Йоав шуис: «Мый ме тані тэкӧд кадсӧ колляла!»
Сэсся босьтіс куим ньӧв, муніс да лыйис Авессаломлы веськыда сьӧлӧмас. Пу вылас ӧшалігӧн Авессалом вӧлі ловъя на.
Йоавлӧн шыпурт новлӧдлысьяс дасӧн кытшалісны Авессаломӧс да виисны сійӧс.
Йоав букӧстіс буксанӧн, и сылӧн йӧзыс дугдісны вӧтчыны израильсаяс бӧрся. Йоав эз кӧсйы воштыны ассьыс йӧзсӧ.
Авессаломлысь шойсӧ колисны вӧрас, шыбитісны джуджыд гуӧ да тыртісны изъясӧн.
А израильсаяс ставныс пышйисны гортаныс.
Ловъя дырйиыс на Авессалом сувтӧдіс аслыс Ӧксы ковтысӧ казьтылан из.
Сійӧ шуліс, менам пӧ абу пиӧй, коді эськӧ водзӧ видзис менсьым нимӧс.
Изсӧ нимтіс аслас нимӧн.
Ӧнӧдз тайӧ казьтылан изйыс шусьӧ “Авессаломлы из”.
Садоклӧн Ахимаас пиыс шуис Йоавлы: «Муна, юӧрта ӧксылы, мый Господь Ачыс мездіс сійӧс паныд сувтысьясысь».
Но Йоав шуис: «Талун тэ эн мун юӧртнытӧ.
Ӧксылӧн пиыс куліс. Та вӧсна юӧртан ӧксылы мӧд лунӧ, но он талун».
Сэсся Йоав шуис ӧти кушса мортлы: «Мун да юӧрт ӧксылы, мый тэ аддзылін».
Мӧдыс копыртчыліс Йоавлы да котӧрӧн муніс.
Но Садоклӧн Ахимаас пиыс бара шыасис Йоав дінӧ: «Мый лоана, мед лоӧ, но лэдз менӧ мунны кушса морт бӧрся».
Йоав шуис: «Мыйла тэныд муннысӧ, пиӧй?
Тэ ӧд ӧксылы он бур юӧр ну».
«Мый лоана, мед лоӧ, но ме муна», — воча шуис Ахимаас.
Йоав лэдзис сійӧс.
Ахимаас котӧртіс мӧд туйӧд да воис кушса мортысь водзджык.
Давид сэки пукаліс карса стенлӧн ортсы да пытшкӧс дзиръяяс костын.
Карсӧ видзысь кайис карса пыранінлӧн вевт вылас да аддзис котӧртысь мортӧс.
Сійӧ дзик пыр горӧдіс та йылысь ӧксылы.
Ӧксы шуис: «Ӧтнас кӧ, сідзкӧ, сійӧ юӧр вайӧ».
Котӧртысь матыстчис пыр матӧджык и матӧджык.
Сэсся видзӧдысь аддзис мӧд котӧртысьӧс да горӧдіс дзиръя видзысьлы: «Нӧшта ӧти морт котӧртӧ».
Ӧксы шуис: «Сійӧ тшӧтш юӧр вайӧ».
Видзӧдысь шуис: «Воддза котӧртысьыс дзик Садоклӧн Ахимаас пиыс моз котӧртӧ».
Ӧксы шуис: «Тайӧ бур мортыс бур юӧрӧн локтӧ».
«Ставыс бур!» — горӧдіс Ахимаас.
Сэсся муӧдзыс копыртчӧмӧн шуис: «Ошкӧм Господьлы, тэнад Енлы! Сійӧ сетіс тэнад киӧ, ӧксыӧй-ыджыдӧй, паныд кыпӧдчысьястӧ».
Ӧксы юаліс: «Ловъя-ӧ менам Авессалом пиӧй?»
Ахимаас вочавидзис: «Ӧксыӧй-ыджыдӧй, кор тэнад Йоав кесйӧгыд мӧдӧдіс менӧ татчӧ, сылӧн йӧзыс вӧлі ёна шызьӧмаӧсь.
А мый сэні вӧлі, ме ог тӧд».
Ӧксы шуис Ахимааслы: «Вешйы да сулалышт эстӧні».
Мӧдыс вешйис.
Сэсся локтіс кушса морт.
Сійӧ шуис: «Бур юӧр вайи тэныд, ӧксыӧй-ыджыдӧй!
Талун Господь мыждіс паныд кыпӧдчысьястӧ да мездіс тэнӧ налӧн киысь».
Ӧксы юаліс кушса мортлысь: «Ловъя-ӧ менам Авессалом пиӧй?»
Мӧдыс вочавидзис: «Ӧксыӧй-ыджыдӧй, тэныд паныд сувтысьясӧс да тэныд лёк вӧчысьясӧс мед суас сійӧ жӧ, мый суис тэнсьыд питӧ».
Ӧксы шогӧ усис. Сійӧ чеччис да кайис стенвывса жырйӧ. Мунігмозыс бӧрдӧмӧн шуаліс: «Авессалом пиӧй, Авессалом пиӧй! Бурджык, ме кӧ кулі тэ пыдди, пиукӧй!»
Йоавлы висьталісны, ӧксы пӧ ёна шогсьӧ-бӧрдӧ Авессалом вӧсна.
Сійӧ лунӧ тышын вермӧмыс Давид йӧзлы бергӧдчис бӧрдӧмӧ, кор налы кывсис, мый ӧксы ёна бӧрдӧ пиыс вӧсна.
Тышкайӧз пырисны карас юрнысӧ лэдзӧмӧн, быттьӧ тыш вылысь пышйысьяс, кодъяслы лои юръяндзим.
А ӧксы чужӧмсӧ тупкӧмӧн гораа бӧрдіс: «Авессалом пиӧй, Авессалом пиӧй!»
Йоав муніс ӧксы дінӧ да шуис: «Талун тэ янӧдін ассьыд йӧзтӧ. Найӧ видзисны тэнсьыд олӧмтӧ, тшӧтш ныв-пиыдлысь да гӧтыръясыдлысь олӧмсӧ.
Но тэ, вӧлӧмкӧ, радейтан тэнӧ мустӧмтысьясӧс да мустӧмтан тэнӧ радейтысьясӧс. Талун тэ петкӧдлін, мый тэ нинӧмӧ пуктан ассьыд веськӧдлысьястӧ да тышкайӧзтӧ.
Ме аддза, Авессалом кӧ ловйӧн коли, а ми ставным кулім, тэ эськӧ тадзи эн шогсьы.
Пет да сёрнит аслад йӧзкӧд. Ышӧд найӧс. Господь водзын шуа: он кӧ пет, тайӧ войнас ставныс эновтасны тэнӧ.
Тайӧ лоӧ тэныд ыджыдджык лёкторйӧн став сійӧ лёкыс дорысь, мый вӧлі тэнад олӧм чӧжыд».
Ӧксы петіс да пуксис карса дзиръя дорӧ. Тышкайӧзлы юӧртісны та йылысь, и найӧ ставныс локтісны ӧксы дінӧ.
Авессаломлӧн йӧзыс пышйисны тыш вылысь гортаныс.
Израильса чужанкотыръяс пондісны мыжавны ӧта-мӧднысӧ. Найӧ шуалісны: «Давид ӧксы мездіс миянӧс став вӧрӧгысь. Сійӧ мездіс миянӧс филистимсаяслӧн киысь, а Авессалом понда пышйис аслас муысь.
Но Авессалом, кодӧс ми мавтыштӧмӧн пуктім аслыным ӧксыӧ, куліс тышын.
Мый ті ньӧжмасянныд? Бӧр вайӧдӧй Давид ӧксынытӧ!»
Давид ӧксылы кывсис израильсаяслӧн вӧзйӧмыс.
Сэки сійӧ мӧдӧдіс Садок да Авиатар попъясӧс иудаса юрнуӧдысьяс дінӧ да шуис: «Висьталӧй налы: “Мыйла ті нинӧм онӧ вӧчӧй, мед бӧр вайӧдны менӧ ӧксы керкаӧ?
Ті ӧд менам вокъяс, миян вир-яйын визувтӧ ӧти вир.
Мыйла онӧ водзмӧстчӧй, мед бӧр вайӧдны менӧ?”
Амессайлы висьталӧй, мый сійӧ меным ас морт.
И Енмыс мед ёна мыждас менӧ, ог кӧ пукты сійӧс Йоав пыдди пыр кежлӧ веськӧдлыны тышкайӧзӧн!»
Тадзи ӧксы бергӧдіс асланьыс став Иуда войтырӧс.
Найӧ ӧти сьӧлӧмӧн шуисны мӧдӧдны юӧртысьӧс ӧксы дінӧ да тшӧктісны висьтавны сылы, бӧр лок пӧ, ӧксыӧй, аслад йӧзкӧд.
Ӧксы петіс туйӧ да воис Йӧрдан ю дорӧ. А Иуда войтыр локтіс Галгалӧ, мед вочаавны ӧксыӧс да вуджӧдны сійӧс Йӧрдан ю вомӧн.
Бахуримысь Венямин чужанкотырысь Герлӧн Шимей пиыс Иуда войтыркӧд тшӧтш тэрмасис вочаавны Давид ӧксыӧс. Сыкӧд локтісны Венямин чужанкотырысь сюрс морт, Сауллӧн Сивей кесйӧгыс дас витнан пиыскӧд да кызь кесйӧгыскӧд.
Ставныс найӧ вуджисны Йӧрдан ю сайӧ, медым вочаавны ӧксыӧс да отсавны вуджны сылы да сылӧн гортсаяслы. Найӧ зілисны быд ногыс кесъявны ӧксылы.
Кор ӧксы лӧсьӧдчис вуджны Йӧрдан юсӧ, Шимей [кымынь] уськӧдчис ӧксы водзӧ да шуис: «Ыджыдӧй, эн мыжав менӧ. Эн казьтыв, мый сэки Ерусалимысь петігад ме, тэнад кесйӧг, вӧчи уна лёктор тэныд, ӧксыӧй. Эн кут тайӧс сьӧлӧмад. Ме тӧда, мый ме мыжа. Та вӧсна Ӧсип рӧдысь ме медводдзаӧн локті, мед вочаавны тэнӧ, ӧксыӧй-ыджыдӧй».
Саруялӧн Авишай пиыс сэки шуис: «Шимейӧс колӧ вины, ӧд сійӧ лёкӧдліс Господьлысь мавтыштӧмасӧ».
Давид шуис: «Мый ті ме понда шогсянныд, Саруя пиян? Мыйла ті ӧні меным паныд сувтанныд?
Позьӧ ӧмӧй талун кодӧскӧ вины Израиль войтырысь, кор ме бара лои налы ӧксыӧн».
Шимейлы ӧксы кыв сетӧмӧн шуис: «Тэ он кув».
Саул Ионафанлӧн Мепибошет пиыс тшӧтш локтіс вочаавны ӧксыӧс.
Ӧксылӧн Ерусалимысь петӧмсянь да тайӧ лунӧдзыс, кор сійӧ бӧр локтіс ловъяӧн да дзоньвидзаӧн, Мепибошет эз мыськавлы коксӧ, [эз тшӧтшӧдлы гыжсӧ,] эз шырлы тошсӧ да эз пеславлы паськӧмсӧ.
Кор Мепибошет локтіс Ерусалимысь вочаавны ӧксыӧс, ӧксы юаліс сылысь: «Мепибошет, мыйла тэ эн мун мекӧд?»
Мӧдыс вочавидзис: «Ӧксыӧй-ыджыдӧй! Кесйӧгӧй ылӧдліс менӧ.
Тэ ӧд тӧдан, мый ме, тэнад кесйӧг, чота. Та вӧсна шуи сылы, мися, пукся осёл вылӧ да муна ӧксыкӧд.
Но кесйӧгӧй лёкӧдіс менӧ тэ водзын.
Тэ, ӧксыӧй-ыджыдӧй, Енлӧн андел кодь.
Вӧч, мый кӧсъян.
Ӧксыӧй-ыджыдӧй, тэ ӧд вермин бырӧдны менам батьлысь рӧдсӧ, но тэ лэдзин меным, аслад кесйӧглы, сёйны тэнад пызан сайын.
Меным нинӧмысь элясьнысӧ тэ вылӧ, ӧксыӧй».
Ӧксы шуис Мепибошетлы: «Мыйла тэ меным ставсӧ тайӧс висьтавлан? Оз ков.
Ме тшӧкта, мед тэ да Сивей юкинныд ас костаныд видз-мунытӧ».
Мепибошет шуис: «Мед босьтас кӧть ставсӧ. Меным тырмана, мый тэ, ӧксыӧй-ыджыдӧй, ловйӧн локтін гортад».
Галаад муысь Роглим карысь локтіс Барзиллай да колльӧдіс Давид ӧксыӧс Йӧрдан ю сайӧдз.
Барзиллай вӧлі зэв нин пӧрысь, кӧкъямысдас арӧса.
Сійӧ вӧлі зэв озыр. Маханаимын ӧксылӧн олігӧн Барзиллай вайліс сылы сёян-юан да мукӧд коланаторсӧ.
Ӧксы шуис сылы: «Мунам мекӧд Ерусалимӧ. Ме кута тӧждысьны тэ вӧсна».
Но мӧдыс вочавидзис: «Ӧксыӧй, мыйла меным мунны тэкӧд Ерусалимас? Код тӧдас, дыр-ӧ меным коли овнысӧ.
Меным кӧкъямысдас арӧс нин.
Ог нин сяммы торйӧдны бурсӧ лёксьыс.
Сёян-юанлысь кӧрсӧ ог нин кыв.
Сьӧкыда нин кыла сьылысьяслысь сьылӧмсӧ.
Мыйла меным, тэнад кесйӧглы, сьӧктӧдны тэнӧ, ӧксыӧй-ыджыдӧй?
Сӧмын мунышта тэкӧд Йӧрдан ю мӧдлапӧлӧдзыс.
Меным оз ковны лышкыд козинъяс, ӧксыӧй.
Сэсся лэдз менӧ бӧр мунны. Ме кӧсъя кувны аслам чужан карын, кӧні дзебӧма менсьым бать-мамӧс.
А тэкӧд, ӧксыӧй-ыджыдӧй, мед мунас Кимхам [пиӧй], тэнад кесйӧгыд. Вӧч сылы, мый чайтан колана».
Ӧксы шуис: «Мед, сідзкӧ, Кимхам мунас мекӧд. Сылы вӧча ставсӧ, мый тэ коран.
А тэныд ме вӧча ставсӧ, мый шуан».
Сэсся став йӧзыс ӧксыкӧд вуджисны Йӧрдан ю сайӧ.
Янсӧдчигас ӧксы окыштіс Барзиллайӧс да бурсиис сійӧс, и мӧдыс бӧр муніс гортас.
Давид ӧксы мӧдӧдчис Галгалӧ, сыкӧд тшӧтш муніс Кимхам.
Ӧксыӧс колльӧдісны иудаса тышкайӧз да израильса джын тышкайӧзыс.
Регыд мысти израильсаяс локтісны ӧксы дінӧ да шуисны: «Мыйла миян вокъяс, Иуда айулов, миянысь гусьӧн вуджӧдісны Йӧрдан сайысь тэнӧ, тэнсьыд гортсатӧ да став йӧзтӧ?»
Иуда йӧз вочавидзисны израильсаяслы: «Сы вӧсна, мый ӧксы миянлы матыссаджык.
А мыйысь ті скӧраланныд миян вылӧ?
Ми ӧмӧй чӧсмасьлім ӧксы сёянӧн либӧ босьтлім сысянь козинъяс? 
[Гашкӧ, сійӧ мездіс миянӧс вот мынтӧмысь?]»
Израильсаяс воча шуисны налы: «Ми ӧксылӧн дас чужанкотырыс. Ёнджыкасӧ сійӧ миян ӧксы, абу тіян. 
[Медводдза чужысьсянь петім ми, а энӧ ті.] 
Ті миянӧс нинӧмӧ пуктінныд.
Ми ӧд водзджык шуим ӧксынымӧс бӧр вайӧдны».
Но израильсаяс эз вермыны венны Иуда войтырӧс.
Вензьысьяс пӧвстын вӧлі Венямин чужанкотырысь Бикрилӧн Шевей пиыс. Сійӧ вӧлі лёк морт.
Шевей букӧстіс буксанӧн да горӧдіс: «Давид миянлы некод! Ессей пикӧд миянӧс нинӧм оз йит!
Израиль войтыр, мунӧй быдӧн асланыд чомйӧ!»
Израильсаяс ставныс эновтісны Давидӧс да мунісны Бикрилӧн Шевей пикӧд.
Иуда войтыр кольччис аслас Давид ӧксыкӧд да колльӧдіс сійӧс Йӧрдансянь Ерусалимӧдз.
Ерусалимын Давид ӧксы муніс аслас гортӧ. Даснан кесйӧг-гӧтырсӧ, кодъясӧс кольліс керка бӧрсяыс видзӧдны, овмӧдіс торъя керкаӧ. Давид сувтӧдіс сэтчӧ видзысьясӧс да могмӧдіс аньясӧс став коланаторнас, но на дінӧ эз пыравлы.
Олӧм помӧдзныс аньяс олісны видзӧдӧм улын дӧваяс моз.
Давид шуис Амессайлы: «Куим лун тэныд сета. Чукӧрт ме дінӧ став Иуда войтырсӧ. Ачыд мед тшӧтш тані вӧлін».
Амессай муніс коравны Иуда войтырӧс, но куим луныс сылы эз тырмы.
Сэки Давид шуис Авишайлы: «Бикрилӧн Шевей пиыс вермас Авессалом дорысь на унджык лёксӧ вӧчны миянлы.
Босьт аскӧдыд менсьым йӧзӧс да вӧтчы сы бӧрся. Сійӧ вермас пышйыны миянысь да дзебсьыны изкарӧ».
Медым вӧтӧдны Бикрилысь Шевей писӧ, Ерусалимысь Авишайкӧд петісны Йоавлӧн йӧзыс, нӧшта керетсаяс, пелетсаяс да мукӧд тышкайӧз.
Кор найӧ вӧліны Гаваонын ыджыд из дорын, налы паныдасис Амессай.
Йоав вӧлі тышкасян паськӧма. Шыпуртыс ӧшаліс пуртӧсас коссьыс улынджык. Кор сійӧ воськовтіс, шыпуртыс усис пуртӧссьыс.
Йоав юаліс Амессайлысь: «Кыдзи, вокӧй, олан-вылан?»
Сэсся босьтіс веськыд кинас Амессайӧс тошкӧдыс, мед окыштны.
Амессай эз видзчысь, мый Йоав бытшкас сійӧс лэптӧм шыпуртнас. Шыпуртыс Амессайлы пырис веськыда кынӧмас, и гырк пытшкӧсыс петіс му вылас. Ӧти бытшкӧмысь Амессай дзик пыр куліс.
Йоав Авишай вокыскӧд водзӧ мунісны вӧтӧдны Бикрилысь Шевей писӧ.
Йоавлӧн тышкайӧзысь ӧти сувтіс Амессайлӧн шой дорӧ да горӧдіс: «Коді Йоав да Давид дор, мед мунас Йоавкӧд!»
Амессайлӧн вирӧн ойдӧм шойыс куйліс туй шӧрас.
Тышкаморт кор аддзис, мый ставныс сувтлӧмӧн видзӧдӧны шойыс вылӧ, вештіс шойсӧ туй вывсьыс да вевттис сійӧс паськӧмӧн.
Та бӧрын тышкайӧз мунісны Йоав бӧрся вӧтӧдны Бикрилысь Шевей писӧ.
Шевей кытшовтіс став израильса чужанкотырсӧ да локтіс Авел-Бет-Маакаӧ.
Беримын [да каръясын] став олысьыс чукӧртчис да пырис Шевейкӧд Авел-Бет-Маакаӧ. Йоав аслас тышкайӧзкӧд локтіс сэтчӧ да кытшаліс карсӧ.
Карса стен гӧгӧр лэптісны тымӧд*, медым сибавны стен дорӧ. Йоав аслас йӧзкӧд пондісны жуглыны стенсӧ.
Сэки ӧти сюсь мывкыда ань горӧдіс стен сайсяньыс: «Кывзӧй! Висьталӧй Йоавлы, мед матыстчас татчӧ. Ме кӧсъя сёрнитны сыкӧд».
Кор Йоав матыстчис, ань юаліс: «Йоав-ӧ тэ?»
Йоав вочавидзис: «Ме».
«Кывзышт менӧ, ассьыд кесйӧгтӧ», — шуис ань.
«Кывза», — воча шуис Йоав.
Ань шуис: «Важӧн шулӧмаӧсь, Авел карӧ пӧ юасьнытӧ ветлы.
Сэні тӧдмавлісны, мый водзӧ вӧчны.
[Колисны-ӧ Израиль войтырысь найӧ, кодъяс шуисны помӧдз лоны эсканаӧн?
Мед ветласны юавны Авел карӧ.]
Ми лӧня олам асланым Израиль войтыр пӧвстын, ми эсканаӧсь.
Тайӧ карыс — израильса [каръяслӧн] мам, а тэ кӧсъян бырӧдны сійӧс!
Мыйла тэныд бырӧдны сійӧ, мый Господьлӧн?»
Йоав вочавидзис: «Тайӧ абу тадз. Ме ог кӧсйы кисьтны-бырӧдны тайӧ карсӧ.
Но тіян карын эм Шевей нима морт. Сійӧ Ефрем керӧсвыв муысь, Бикрилӧн пиыс. Сійӧ кыпӧдчис Давид ӧксылы паныд.
Сетӧй меным сійӧс, и ме вешъя тіян кар дорысь».
Ань шуис Йоавлы: «Сылысь юрсӧ ми шыбитам тэныд стен вывсяньыс».
Ань муніс карса олысьяс дінӧ. Сійӧ аслас мывкыдлунӧн кужис ышӧдны найӧс, и найӧ керыштісны Шевейлысь юрсӧ да шыбитісны Йоавлы.
Сэки Йоав букӧстіс буксанӧн, и тышкайӧз вешйисны кар дорсьыс. Ставныс мунісны бӧр гортаныс, а Йоав локтіс Ерусалимӧ ӧксы дінӧ.
Йоав веськӧдліс став израильса тышкайӧзӧн, а Иодайлӧн Бенай пиыс веськӧдліс ӧксыӧс видзысь керетса да пелетса шыпуртаясӧн.
Адорам веськӧдліс йӧзӧн, кодъяс уджалӧмнас мынтісны вот.
Ахилудлӧн Иосафат пиыс пасъяліс небӧгӧ вӧвлӧмторъяс.
Шевай вӧлі гижалысьӧн, Садок да Авиатар вӧліны попъясӧн.
Яирысь Ир тшӧтш вӧлі попӧн Давид ордын.
Давидлӧн ӧксыалан кадӧ куим во чӧж вӧлі тшыгъялӧм.
Давид сэки шыасис Господь дінӧ.
Господь шуис: «Тайӧ лои Саул да сылӧн рӧдвуж понда. Найӧ мыжаӧсь Гаваонын олысьяслысь вирсӧ кисьтӧмысь, ӧд найӧс Саул виис».
Давид корис Гаваонысь йӧзӧс, мед сёрнитны накӧд.
Гаваонсаяс эз вӧвны израильсаясӧн, найӧ петлӧмаӧсь аморей войтырысь.
Израильсаяс коркӧ кыв сетлӧмаӧсь, мый оз вӧчны налы лёксӧ. Но Израиль да Иуда войтыр вӧсна Саул кӧсйис бырӧдны найӧс.
Давид юаліс гаваонсаяслысь: «Мый ме верма вӧчны тіянлы? Мыйӧн мынтысьны Сауллӧн мыжысь, мед ті бурсиинныд Господьлысь войтырсӧ?»
Гаваонсаяс вочавидзисны: «Эзысь-зарни Саулсянь да сылӧн рӧдвужсянь миянлы оз ков. Вины Израиль войтырысь некодӧс ми огӧ вермӧй».
Давид шуис: «Ме вӧча тіянлы ставсӧ, мый ті коранныд».
Сэки найӧ шуисны Давид ӧксылы: «Саул виис миян пӧвстысь унаӧс, кӧсйис бырӧдны миянӧс став Израиль му пасьталаысь. Та вӧсна сет миянлы Саул рӧдысь сизим айуловӧс. Ми ӧшӧдам найӧс [лунъюгыднас] Господь водзын Гиваын, Господьӧн бӧрйӧм Сауллӧн карын».
Давид вочавидзис: «Ме сета найӧс тіянлы».
Но Саул Ионафанлысь Мепибошет писӧ Давид эз сет. Давид кутіс Господь водзын Ионафанлы сетӧм кывсӧ.
Давид ӧксы сетіс гаваонсаяслӧн киӧ Сауллысь Армон да Мепибошет пиянсӧ, кодъясӧс чужтіс Риспа, Аейлӧн нылыс. Нӧшта сетіс Сауллӧн Мерова* нылыслысь вит пиӧс, кодъясӧс сійӧ чужтіс мехоласа Барзиллайлӧн Адриэл пилы. Господь водзын гаваонсаяс ӧшӧдісны найӧс [лунъюгыднас] керӧс вылӧ.
Сизимнанныс ӧтлаын кулісны.
Найӧс виисны ид вундан кадӧ медводдза лунъясас.
Аейлӧн Риспа нылыс босьтіс чорыд дӧра да вольсаліс аслыс керӧс вылӧ. Вундан кад заводитчӧмсянь зэралан кадӧдз* сійӧ пукаліс керӧс вылын. Сэні видзис пияныслысь шойяссӧ, луннас — лэбачьясысь, а войнас — зверъясысь.
Давидлы висьталісны, мый вӧчӧ Сауллӧн Риспа кесйӧг-гӧтырыс. 
[Сісьмӧм шойяссӧ босьтіс Иойлӧн Дан пиыс. Сійӧ петлӧма ыджыд тушаа йӧз рӧдысь.]
Давид муніс Галаад муӧ, мед босьтны Явис карысь Сауллысь да сылӧн Ионафан пилысь лыяссӧ. Гелвуын Саулӧс вермӧм бӧрын филистимсаяс ӧшӧдісны налысь шойяссӧ Бет-Шеан карса изэрд вылӧ, но Явис карын олысьяс гусялісны найӧс.
Давид вайис сэтысь Сауллысь да Ионафанлысь лыяссӧ.
Вайис лыяссӧ тшӧтш налысь, кодъясӧс вӧлі ӧшӧдӧма [лунъюгыднас].
Найӧс дзебисны ӧтлаын Саулкӧд да Ионафанкӧд Венямин муӧ Села карӧ, Сауллӧн Кис батьыслӧн дзебанінӧ.
Ставсӧ вӧчисны ӧксылӧн тшӧктӧм серти. Та бӧрын Енмыс кыліс войтырлысь му вӧсна кевмӧмсӧ.
Израильса да филистимса костын бара пансис тыш.
Кор Давид эбӧстӧммис, Рефай рӧдысь Есвий нима морт кӧсйис вины сійӧс. Рефайлӧн вӧлі куимсё сикель сьӧкта ыргӧн пома шы, коскас ӧшаліс дзик выль шыпурт.
Но Давидлы отсӧг вылӧ локтіс Саруялӧн Авишай пиыс [да мездіс сійӧс]. Авишай виис тайӧ филистимсасӧ.
Та бӧрын Давидлӧн йӧзыс шуисны Давидлы: «Водзӧ миянкӧд он пет тышӧ, медым Израильлӧн биыс эз кус».
Бӧрынджык Гобын вӧлі филистимсаяскӧд тыш, кӧні Хушаысь Сиббекай виис Рефай рӧдысь Саф нима мортӧс.
Сэсся Гобын вӧлі филистимсаяскӧд мӧд тыш.
Виплиемысь Яир-Оргимлӧн Элханан пиыс виис гефса Голиафӧс, кодлӧн шы беддьыс вӧлі шӧрт гартан юранӧш кодь кыз.
Гефын тшӧтш пансис тыш.
Сэні вӧлі зэв ыджыд тушаа морт, сійӧ тшӧтш вӧлі Рефай рӧдысь. Сылӧн быд ки-кокын вӧлі квайт чунь — ставнас вӧлі кызь нёль чунь. Тайӧ мортыс омӧльтіс израильсаясӧс, но Давидлӧн Шимей вокыслӧн Ионафан пиыс виис сійӧс.
Давид да сылӧн йӧзыс виисны гефса Рефай рӧдысь тайӧ нёльнан мортсӧ.
Давид сьыліс тайӧ сьыланкывсӧ Господьлы, кор Господь мездіс сійӧс став вӧрӧгысь да Саулысь. Сійӧ сьыліс тадзи:
— Господьӧй, Тэ — менам зумыд изйыс, менам выныс да менӧ Мездысьыс.
Енмӧй, Тэ — менам изкыртаыс, Тэ вылӧ ме лача кута.
Тэ — менам сайӧдыс, вына Дорйысьыс да Видзысьыс, Тэ — менам дзебсяніныс.
Мездысьӧй, Тэ мездін менӧ виысь-дзескӧдысьясысь!
Ме шыася ёна ошкана Господь дінӧ, Сійӧ мездас менӧ мустӧмтысьясысь.
Менӧ вевттисны кулӧм вайысь гыяс, лёкыс повзьӧдліс менӧ бузгысь ва моз.
Пыдӧстӧминлӧн чепъясыс дорисны менӧ, кулӧмыслӧн тывъясыс гартыштісны менӧ.
Кор менӧ топӧдіс сьӧкыдлун, ме чукӧсті Господьӧс, шыаси аслам Ен дінӧ. Сійӧ кыліс менсьым гӧлӧс шыӧс Аслас вежаинсянь, менам бӧрдӧм шыӧй воис Сылӧн пельӧдзыс.
Муыс сыркмунліс да вӧрзис, енэжсӧ пыкысь керӧсъяс кыпмунлісны да вешйисны места вывсьыс, сэтшӧма скӧрмис Господь.
Сылӧн скӧралӧмсянь кыптіс тшын, Сылӧн вомысь петіс сотысь би.
Сысянь киссисны биа ӧгыръяс.
Сійӧ доровтіс енэжсӧ да лэччис, сувтіс кокнас сьӧд кымӧръяс вылӧ.
Пуксис херувимъяс вылӧ да лэбзис, лэбис тӧв бордъяс вылын.
Сап пемыднас вевттьысис Сійӧ, сук сьӧд кымӧръясӧн кытшаліс Асьсӧ.
Сы водзын дзирдаліс яръюгыд би, сэтысь ыпнитісны биа ӧгыръяс.
Господь муркнитіс енэжас, Медвылыссаыс сетіс Ассьыс гӧлӧс шысӧ.
Лэдзис Ассьыс гымньӧвъяссӧ да чардбиӧн сявкйис найӧс енэж пасьталаыс.
Господьлӧн шыасьӧмысь, Сылӧн скӧрлунӧн пӧльтысь ловшыысь тыдовтчис саридзлӧн пыдӧсыс да муыслӧн подулыс.
Вылісянь Сійӧ нюжӧдіс кисӧ, босьтіс менӧ да лэптіс джуджыд ваысь, мездіс менӧ вына вӧрӧгысь, мездіс мустӧмтысьясысь, кодъяс вӧліны меысь ёнджыкӧсь.
Менам шог дырйи найӧ уськӧдчисны ме вылӧ, но Господь вӧлі меным зумыд пыкӧдӧн. Сійӧ петкӧдіс менӧ паськыдінӧ да мездіс менӧ, ӧд Сійӧ радейтӧ менӧ.
Господь меным бурӧн мынтысис веськыда вӧчӧмысь, сетіс меным тырдон сӧстӧма олӧмысь, ӧд ме ветлі Господьлӧн туйӧд, аслам Ен водзын шогмытӧмсӧ эг вӧч. Став Сылысь тшӧктӧмъяссӧ пыр куті тӧд вылын, Сылӧн велӧдӧмысь эг кежлы. Сы водзын ме вӧлі сӧстӧм, видзи ачымӧс мыж вӧчӧмысь.
Та вӧсна Господь мынтысис меным бурӧн менам веськыда вӧчӧмысь да Сылӧн син водзын сӧстӧм олӧмысь.
Бур сьӧлӧма дінӧ Тэ бур сьӧлӧма, веськыда вӧчысьлы Тэ вӧчан веськыда, сӧстӧмлы вӧчан сӧстӧма, а наянлы — сылӧн наянлуныс серти.
Увтыртӧмаясӧс Тэ мездан, а вылӧ кыпӧдчысьясӧс Тэ улӧ лэдзан.
Господьӧй, Тэ меным югдӧдысь биыс, Тэ югдӧдан менсьым пемыдӧс.
Тэкӧд ме пасьварта тышкайӧзӧс, Тэкӧд ме кая карса стен вылӧ.
Енлӧн туйыс тыр-бур, Господьлӧн кывйыс сӧстӧм. Ен вылӧ лача кутысьяслы Сійӧ — сайӧдыс.
Господьысь кындзи мӧд Енмыс абу, миян Енмысь кындзи мӧд Дорйысьыс абу.
Енмыс вӧньӧдӧ менӧ вынӧн, лӧсьӧдӧ меным веськыд туй, вӧчӧ менсьым кокӧс кӧрлӧн кодь тэрыбӧн, сувтӧдӧ менӧ выліинӧ, велӧдӧ менӧ тышкасьны, менсьым киӧс — зэвтны ыргӧн ньӧввуж.
Тэ — менам сайӧдыс, менӧ Мездысьыс. Тэнад буралӧмыд кыпӧдӧ менӧ.
Тэ зумыдмӧдан менсьым воськовъясӧс, менам кокӧй оз лигышмун.
Ме вӧтӧда да виа вӧрӧгъясӧс. Кытчӧдз ог бырӧд найӧс, бӧр ог бергӧдчы.
Ме дойдала найӧс, и найӧ усясны менам кок улӧ, сувтнысӧ оз вермыны.
Тэ вӧньӧдін менӧ вынӧн тыш вылӧ, уськӧдін менам кок улӧ паныд кыпӧдчысьясӧс.
Тэ бергӧдан вӧрӧгӧс пышйӧмӧ, ме вӧтча мустӧмтысьяс бӧрся да бырӧда найӧс.
Найӧ горзӧны, но мездысьыс абу, шыасьӧны Господь дінӧ, но Сійӧ оз вочавидз.
Ме шердъя найӧс тӧвйыв бусӧс моз, таляла найӧс туйвыв няйтӧс моз.
Тэ мездін менӧ паныд кыпӧдчысь войтырысь, видзин менӧ, мед пуктыны юралысьӧ тшӧтш мукӧд войтыръяслы.
Меным кесъялӧны войтыръяс, кодъясӧс водзын эг тӧдлы.
Йӧз муысь локтысьяс леститчӧны ме дінӧ.
Сӧмын шуа налы, менсьым кывзысьӧны нин.
Найӧ нюкыртчӧмаӧсь, тіралӧны асланыс изкаръясын.
Господь ловъя! Ме ошка Тэнӧ, Дорйысьӧй!
Мед лоӧ нимӧдӧма Тэнӧ, Енмӧй! Тэ — менам мездмӧмлӧн зумыд подулыс. Тэ — водзӧс перйысь Ен, Тэ сетан менам кипод улӧ войтыръясӧс, мездан менӧ вӧрӧгысь.
Тэ лэптін менӧ паныд кыпӧдчысьясысь вылӧджык, мездін менӧ виалысь-дзескӧдысьясысь.
Та вӧсна, Господьӧй, кута ошкыны Тэнӧ мукӧд войтыръяс пӧвстын, кута сьылӧмӧн ошкыны Тэнсьыд нимтӧ. Ыджыд вынӧн Тэ мездан ӧксыӧс. Тэ мавтыштін Давидӧс, Тэ петкӧдлан буралӧмтӧ сы дінӧ да сысянь чужысьяс дінӧ нэмъяс чӧж.
Давидлӧн бӧръя кывъясыс: — Висьталӧ Давид, Ессейлӧн пи, Израильлӧн муса сьылысь. Енмӧн вылӧ пуктӧма, Яковлӧн Енмӧн мавтыштӧма.
Господьлӧн Лов сёрнитӧ ме пыр, Сылӧн кывйыс петӧ менам вомысь.
Израильлӧн Ен сёрнитіс мекӧд, Израильӧс Дорйысь шуис: «Веськыда ыджыдалысь, Енмысь полӧмӧн юралысь асъя кыа кодь, кымӧртӧм енэжын дзирдалысь шонді кодь, зэрӧм бӧрын петысь веж турун кодь». Абу-ӧ татшӧм менам рӧдӧй Ен водзын?
Енмыс пыр кежлӧ кӧрталіс мекӧд йитӧд — зумыдӧс да вежсьывлытӧмӧс.
Быд кадӧ Сійӧ мездыліс менӧ, збыльмӧдліс менсьым кӧсйӧмъясӧс.
Лёк вӧчысьяс нетшыштӧм лежнӧг кодьӧсь. Киад сійӧс он босьт, сӧмын кӧрт беддьӧн либӧ шыӧн инмӧдчан сы дінӧ, сійӧс дзикӧдз сотасны биын.
Давидлӧн тышкайӧзысь тӧдчанлунныс серти торъялісны куимӧн. Медтӧдчанаыс на пиысь вӧлі Тахкемонысь Ишбошет.
Аслас шыӧн сійӧ ӧтчыдӧн виис вӧрӧглысь кӧкъямыссё мортӧс.
Мӧдыс вӧлі Элазар, Ахоах Додолӧн пиыс. Сійӧ вӧлі куим медтӧдчана тышкаморт пиысь ӧти. Давидкӧд найӧ янӧдісны тыш вылӧ чукӧртчӧм филистимсаясӧс.
Израильсаяс сэки бӧрыньтчисны, но Элазар кольччис да ки дубавмӧныс виаліс филистимсаясӧс. Весиг чуньяссӧ эз вермы веськӧдны, мед лэдзны кабырсьыс шыпуртсӧ. 
Сійӧ лунӧ Господь сетіс ыджыд вермӧм Израильлы. Израильсаяс бӧр локтісны Элазар дінӧ, мед виӧмаяслысь босьтавны шыпуртъяссӧ да мукӧд тышкасянторсӧ.
Коймӧдыс вӧлі Харарысь Шаммей, Агелӧн пиыс.
Филистимсаяс чукӧртчисны Лехиӧ, кӧні вӧлі кӧдзӧм чечевица му. Израильса тышкайӧз кутісны пышйыны филистимсаясысь, а кӧдзӧм мусӧ видзӧм могысь Шаммей сувтіс му шӧрас да сэні виаліс филистимсаясӧс.
Тадзи Господь сетіс Израильлы ыджыд вермӧм.
Вундан кадӧ комын веськӧдлысь пиысь куим мортыс мунісны Давид дінӧ адулламса кырта горсйӧ. Филистимса тышкайӧз чукӧртчисны Рефаим ковтысӧ.
Давид вӧлі сайӧдчанінын, а филистимсаяслӧн тышкакотырыс — Виплиемын.
Давидлӧн горшыс кутіс косьмыны. Сійӧ шуис: «Коді эськӧ ваяс меным юкмӧсысь ва Виплием дзиръя дорысь!»
Сэки тайӧ куим тышкамортыс мунісны филистимсаяслӧн сувтанінӧ, тышкасьӧмӧн матыстчисны Виплием дзиръя дорӧ да гумовтісны юкмӧсысь васӧ. Сэсся вайисны Давидлы.
Но Давид эз кут юны тайӧ васӧ, а кисьтіс сійӧс Господьлы вись пыдди. «Господьӧй, ме ог вермы юны тайӧ васӧ!
Тайӧ — йӧзлӧн вир, найӧ дасьӧсь вӧліны воштыны олӧмнысӧ», — шуис Давид и эз кут юны.
Татшӧм уджъяс вӧчисны тайӧ куим тышкамортыс.
Саруялӧн Авишай пиыс, Йоавлӧн вокыс, веськӧдліс тышкайӧзлӧн куим юралысьӧн.
Сійӧ виис аслас шыӧн куимсё мортӧс. Тайӧ куим юралысьыс моз сійӧ вӧлі нималана да пыдди пуктана.
Сійӧ веськӧдліс наӧн, но накӧд сійӧс он ӧткодяв.
Кавцелысь Бенай, Иодайлӧн пиыс, вӧлі збой тышкасьысь да нималіс аслас ыджыд уджъясӧн.
Сійӧ виис моавса Ариллысь кыкнан писӧ.
Коркӧ лым усигӧн сійӧ лэччис косьмӧм вайӧртӧдӧ да виис сэні левӧс.
Нӧшта сійӧ виис ыджыд тушаа египетсаӧс.
Египетса кутіс киас шы, а Бенай петіс сылы паныд беддьӧн. Бенай мырддис египетсалӧн киысь шысӧ да бытшкис сійӧс.
Со татшӧмторъяс вӧчис Иодайлӧн Бенай пиыс. Сійӧ тшӧтш нималіс куим юралысьыс моз.
Комын нималана тышкаморт пӧвстын Бенай вӧлі тӧдчана морт, но тайӧ куим юралысьыскӧд сійӧс он ӧткодяв.
Давид пуктіс сійӧс веськӧдлыны аслас видзысьясӧн.
Давид ӧксылӧн комын нималана тышкаморт лыдӧ пырисны: Йоавлӧн Асаил вокыс, Виплиемысь Додолӧн Элханан пиыс, Хародысь Шаммей да Эликей, Палтиысь Хелец, Текоя карысь Икешлӧн Ир пиыс, Анатотысь Авиэзер, Хушаысь Мебуннай, Ахоахысь Цалмон, Нетофаысь Махрай, Нетофаысь Баанлӧн Хелев пиыс, Гиваысь Венямин чужанкотырысь Рибайлӧн Иттай пиыс, Пиратонысь Бенай, Нахле-Гаашысь Хиддай, Арбаысь Ави-Албон, Бархумысь Азмавет, Шаалбонысь Элияхаб, Яшен пиянысь Ионафан, Харарысь Шаммей, Арарысь Шарарлӧн Ахиам пиыс, Маакаысь Ахасбайлӧн Элипелет пиыс, Гилоысь Ахитофеллӧн Элиам пиыс, Кармилысь Хецро, Арбиысь Паарай, Цоваысь Нафанлӧн Игал пиыс, Гадысь Бани, аммон войтырысь Целек, Беротысь Нахарай — Саруялӧн Йоав пилысь шыпуртсӧ новлӧдлысь, Итриысь Ир да Гарев, хеттей Урий.
Ставнас комын сизим морт.
Господь бара чорыда скӧрмис израильсаяс вылӧ. Медым ыззьӧдны Давидӧс налы паныд Сійӧ шуис: «Мун да артав Израиль да Иуда войтырлысь лыдсӧ».
Ӧксы шуис Йоавлы, тышкайӧзлӧн юралысьлы: «Кытшовтӧй став Израиль [да Иуда] чужанкотырсӧ войвыв Дансянь лунвыв Бер-Шеваӧдз да арталӧй-гижалӧй войтырсӧ. Ме кӧсъя тӧдны налысь лыдсӧ».
Йоав шуис ӧксылы: «Господь, тэнад Енмыд, мед содтас тэнад войтырлысь лыдсӧ сы мында, мыйта ӧні эм, и нӧшта на сё пӧвстӧн мед содтас та дорӧ. Менам ӧксыӧй-ыджыдӧй мед аслас синмӧн аддзас тайӧс.
Ӧксыӧй-ыджыдӧй, мыйла тэ кӧсъян артавны-гижавны найӧс?»
Но Йоавлы да тышкайӧзлӧн мукӧд юралысьяслы колӧ вӧлі вӧчны ӧксылӧн тшӧктӧм серти.
Найӧ мунісны, медым артавны-гижавны Израиль войтырӧс.
Найӧ вуджисны Йӧрдан ю да сувтісны Ароэр карсянь лунвывладорӧ. Карыс сулаліс Гад ковтыс шӧрын. Сэтысянь мунісны Язер карӧ, сэсся Галаад муӧ да Тахтим-Ходши муӧ.
Водзӧ мунісны Дан-Яанӧ да кытшовтісны Сидон му.
Сэсся мунісны Тир изкарӧ. Кытшовтісны хивейяслысь да ханаансаяслысь став карсӧ да локтісны Бер-Шеваӧ, Иуда мулӧн лунвыв карӧ.
Став мусӧ найӧ кытшовтісны ӧкмыс тӧлысьӧн да кызь лунӧн. Сэсся бӧр локтісны Ерусалимӧ.
Йоав юӧртіс ӧксылы войтырлысь лыдсӧ.
Вӧлӧмакӧ, Израильын кӧкъямыссё сюрс шыпурта морт, кодъяс вермӧны тышӧ петны, а Иудаын — витсё сюрс морт.
Войтырсӧ арталӧм бӧрын Давидлы сьӧкыд лои сьӧлӧм вылас.
Сійӧ шуис Господьлы: «Ме, Тэнад кесйӧг, мыжа сыысь, мый лыдди войтырӧс.
Кора Тэнӧ, Господьӧй, вешты ме вылысь мыжӧс. Ме мывкыдтӧг вӧчи».
Гад пророклы, Давидлӧн тӧдысь-аддзысьлы, вӧлі Господьсянь кыв: «Мун да юӧрт Давидлы, мый Господь тадзи висьталӧ: куим мыждӧм Ме вӧзъя тэныд.
Мый бӧръян, сійӧс Ме и вӧча».
Мӧд асывнас, кор Давид чеччис, Гад локтіс сы дінӧ да висьталіс ставсӧ. Шуис: «Бӧрйы. Лоас-ӧ сизим во чӧж тшыгъялӧм тэнад муын? Кутан-ӧ тэ куим тӧлысь чӧж пышъявны вӧрӧгъясысь, кодъяс пондасны вӧтлысьны тэ бӧрся? Либӧ кутас-ӧ куим лун чӧж тэнад муын ыджыдавны пӧрӧс висьӧм?
Мӧвпышт да шу меным, мый висьтавны менӧ Мӧдӧдысьлы».
Давид шуис Гад пророклы: «Ыджыд шог суис менӧ.
Но морт киӧ веськалӧм дорысь бурджык шедны Господьлӧн мыждӧм улӧ, ӧд Сылӧн буралӧмыс ыджыд».
[Давид бӧрйис кулана висьӧм шобді вундан кадӧ.]
Асывнас Господь ыстіс Израиль войтырлы пӧрӧс висьӧм.
Висьӧмыс ыджыдаліс Енлӧн индӧм кадӧдз. Войвыв Дансянь лунвыв Бер-Шеваӧдз куліс сизимдас сюрс морт.
Кор [Енлӧн] андел нюжӧдіс кисӧ Ерусалим вылӧ, медым бырӧдны сійӧс, Господь вежис кывсӧ.
Сійӧ шуис войтырӧс бырӧдысь анделлы: «Тырмас. Вешты китӧ».
Господьлӧн анделыс сэки сулаліс евусса Орнанлӧн гумла дорын.
Кор Давид аддзис войтырӧс бырӧдысь анделӧс, шыасис Господь дінӧ: «Ме мыжаыс. Ме [ыж видзысь] вӧчи та ыджда лёкторсӧ, а тайӧ ыжъясыс абу мыжаӧсь.
Мыжды менӧ да менсьым рӧдӧс!»
Сійӧ лунӧ локтіс Давид дінӧ Гад пророк да шуис: «Мун евусса Орнанлӧн гумла вылӧ да сувтӧд сэтчӧ Господьлы висьпуктанін».
Давид муніс, медым вӧчны Гадлӧн шуӧм серти, кыдзи тшӧктіс Господь.
Орнан кор аддзис сы дінӧ локтысь ӧксыӧс да сылысь йӧзсӧ, петіс налы воча да муӧдзыс копыртчис ӧксылы.
Орнан юаліс: «Ӧксыӧй-ыджыдӧй, мый могӧн тэ локтін аслад кесйӧг дінӧ?»
Давид вочавидзис: «Гумлатӧ ньӧбны. Ме сувтӧда сэтчӧ Господьлы висьпуктанін, медым Господь вештас войтырыс вылысь кулана висьӧмсӧ».
Орнан шуис: «Ӧксыӧй-ыджыдӧй, босьт вись вайӧм вылад ставсӧ, мый кӧсъян.
Ассьым ӧшъясӧс ме сета сотан вись пыдди, доддьӧс да сийӧсӧс — пес пыдди.
Ставсӧ ме сета тэныд, ӧксыӧй!»
И нӧшта Орнан шуис ӧксылы: «Господь, тэнад Енмыд, мед лоӧ бур сьӧлӧма тэ дінӧ!»
Но ӧксы шуис Орнанлы: «Ог босьт, ме ньӧба. Ме ог вермы вайны Господьлы, аслам Енлы, вись пыдди сійӧ, мыйысь эг вештысь».
Орнанлысь гумласӧ да ӧшъяссӧ Давид ньӧбис ветымын сикель эзысьысь.
Сэсся гумла вылас вӧчис Господьлы висьпуктанін да сы вылын вайис сотан да бурасян висьяс. 
[Бӧрынджык Соломон ыдждӧдіс тайӧ висьпуктанінсӧ, ӧд сійӧ вӧлі ичӧт.]
Господь кыліс войтырыслысь кевмӧмсӧ и вештіс кулӧм-бырӧдӧмсӧ Израиль вылысь.
{Еврей йӧз (комиӧдіс Kodko) @ Ӧксыяслӧн 3 небӧг @ религ. гижӧд @ Библия @ 2021 @ Лб. .}
ӦКСЫЯСЛӦН 3 НЕБӦГ
Давид ӧксы пӧрысьмис, вӧлі ыджыд арлыда нин. Ӧксыӧс вевттялісны-поньталісны шебрасъясӧн, но сійӧ некыдз эз вермы шонавны.
Сэки кесйӧгъясыс шуисны сылы: «Ӧксыӧй-ыджыдӧй, лэдз миянлы корсьны тэныд том нылӧс. Сійӧ кутас кесъявны тэныд, тӧждысьны-видзӧдны тэ бӧрся да орччӧн куйлыны тэкӧд, медым тэныд, ӧксыӧй-ыджыдӧй, вӧлі шоныд».
Став Израиль му пасьтала корсисны мича нылӧс. Шунем карысь аддзисны Ависага нима нылӧс да вайӧдісны сійӧс ӧксы дінӧ.
Ависага вӧлі зэв мича. Сійӧ кутіс кесъявны ӧксылы да тӧждысьны сы вӧсна, но ӧксы эз вӧрӧдлы нылӧс вольпасяс.
Адоний, кодлӧн мамыс вӧлі Агита, асьсӧ вылӧ пуктіс да шуаліс, ме пӧ лоа ӧксыӧн.
Сійӧ лӧсьӧдіс аслыс тарантасъяс, верзьӧмаясӧс да ветымын тышкамортӧс, кодъяс ветлісны сы водзвылын да видзисны сійӧс.
Давид некор эз шуасьлы Адоний пиыс вылӧ да эз ӧлӧдлыв сійӧс.
Адоний вӧлі зэв мича, Давидлӧн сійӧ чужис Авессалом бӧрся.
Адоний сёрнитчис Саруялӧн Йоав пикӧд да Авиатар попкӧд, и найӧ вӧліны Адоний дор.
Но Садок поп, Иодайлӧн Бенай пиыс, Нафан пророк, Шимей, Рей да Давидлӧн вына тышкасьысьяс эз вӧвны Адоний дор.
Рогель ва петанінсянь матын Зохелет из дорын Адоний начкис ыжъясӧс, ӧшъясӧс да тшӧгӧдӧм куканьясӧс вись вайӧм могысь. Корис сэтчӧ ассьыс вокъяссӧ — ӧксылысь пиянсӧ — да Иуда му пасьталаысь ӧксылысь чина йӧзсӧ.
А пророк Нафанӧс, Бенайӧс, ӧксылысь вына тышкасьысьяссӧ да ассьыс Соломон воксӧ сійӧ эз кор.
Нафан шуис Вирсавиялы, Соломонлӧн мамлы: «Тэ кывлін, мый Агиталӧн Адоний пиыс пуксьӧма ӧксыӧ, а Давид ыджыдным оз и тӧд та йылысь?
Видз ассьыд олӧмтӧ да Соломон пиыдлысь олӧмсӧ. Со мый ме вӧзъя тэныд.
Мун Давид ӧксы дінӧ да шу сылы: “Ӧксыӧй-ыджыдӧй, тэ кыв сетлін меным, аслад кесйӧглы, мый менам Соломон пиӧй лоӧ ӧксыӧн тэ бӧрти да пуксяс тэнад юралан пуклӧсӧ.
Мыйла нӧ Адоний лои ӧксынас?”
А тэнад сёрнитігкості ме пыра ӧксы дінӧ да сувта тэ дор».
Вирсавия муніс да пырис ӧксылӧн узьлан жырйӧ.
Шунем карысь Ависага тӧждысис сэні пӧрысь Давид бӧрся.
Вирсавия копыртчис ӧксы водзӧ.
Ӧксы юаліс: «Кутшӧм могӧн локтін?»
«Ыджыдӧй, — шыасис Вирсавия, — аслад Господь Ен водзын тэ кыв сетлін меным, аслад кесйӧглы, мый менам Соломон пиӧй лоӧ ӧксыӧн тэ бӧрти да пуксяс тэнад юралан пуклӧсӧ.
Но талун Адоний пуксьӧма ӧксыӧ, а тэ, ӧксыӧй-ыджыдӧй, весиг он тӧд та йылысь.
Вись вайӧм могысь сійӧ начкӧма уна ӧшкӧс, куканьӧс да ыжӧс. Корӧма Авиатар попӧс, тышкайӧзӧн веськӧдлысь Йоавӧс да тэнсьыд пиянтӧ.
Но тэнсьыд Соломон питӧ, коді кесъялӧ тэныд, сійӧ абу корӧма.
Ӧксыӧй-ыджыдӧй, став Израиль войтыр видзӧдӧ тэ вылӧ да виччысьӧ, кодлы тэ шуан пуксьыны ас бӧртиыд юралан пуклӧсад.
Он кӧ ӧні вӧч тайӧс, ӧксыӧй-ыджыдӧй, тэнад кулӧм бӧрын, кор тэ вуджан батьясыд дінӧ, мыжаласны менӧ да менсьым Соломон пиӧс».
Вирсавиялӧн ӧксыкӧд сёрнитігкості локтіс Нафан пророк.
Ӧксылы юӧртісны, Нафан пророк пӧ локтіс.
Нафан пырис ӧксы дінӧ, муӧдзыс копыртчылӧмӧн шуис сылы:
 «Ӧксыӧй-ыджыдӧй, збыльысь-ӧ тэ шулін, мый Адоний лоӧ ӧксыӧн тэ бӧрти да пуксяс тэнад юралан пуклӧсӧ?
Талун сійӧ мунӧма да вись вайӧм могысь начкӧма уна ӧшкӧс, куканьӧс да ыжӧс. Корӧма сэтчӧ, ӧксыӧй, став тэнсьыд пиянтӧ, тышкайӧзӧн веськӧдлысьясӧс да Авиатар попӧс. Ӧні найӧ ставныс сёйӧны-юӧны да шуалӧны: “Мед олас Адоний ӧксы!”
А менӧ, тэнсьыд кесйӧгтӧ, Садок попӧс, Иодайлысь Бенай писӧ да тэнсьыд Соломон питӧ, коді кесъялӧ тэныд, сійӧ эз кор.
Ӧксыӧй-ыджыдӧй, тэнад кӧсйӧм серти-ӧ тадзи вӧчӧны? Мыйла тэ меным, аслад кесйӧглы, эн висьтав, коді тэ бӧрти кутас пукавны тэнад юралан пуклӧсад?»
Давид ӧксы пырысьтӧм-пыр тшӧктіс корны ас дінас Вирсавияӧс.
Вирсавия пырис да сувтіс ӧксы водзӧ.
Ӧксы кыв сетіс сылы: «Ловъя Господь водзын, коді мездыліс менӧ быд лёксьыс, ме збыльмӧда талун сійӧ, мый йылысь коркӧ кыв сеті тэныд Израильлӧн Господь Ен водзын — Соломон пиыд лоӧ ӧксыӧн ме бӧрти да пуксяс менам юралан пуклӧсӧ».
Вирсавия муӧдзыс копыртчылӧмӧн шуис ӧксылы: «Мед олас нэмъяс чӧж Давид ӧксы, менам ыджыдӧй!»
Давид ӧксы тшӧктіс корны ас дінас Садок попӧс, Нафан пророкӧс да Иодайлысь Бенай писӧ.
Кор найӧ локтісны, ӧксы шуис налы: «Босьтӧй аскӧдныд менсьым кесйӧгъясӧс, а Соломон пиӧс пуксьӧдӧй менам мул вылӧ да нуӧдӧй сійӧс Гихон ва петанін дорӧ. Сэні Садок поп да Нафан пророк мед мавтыштӧмӧн пуктасны сійӧс ӧксыӧ Израильлы. Сэсся буксан шы улӧ гораа горзӧй: “Мед олас Соломон ӧксы!”
Та бӧрын бӧр вайӧдӧй Соломонӧс. Сійӧ мед пуксяс менам юралан пуклӧсӧ да ӧксыалас ме пыдди.
Тайӧ менам кӧсйӧм, мед сійӧ лоӧ ӧксынас Израиль да Иуда войтырлы».
Иодайлӧн Бенай пиыс воча шуис Давид ӧксылы: «Мед лоас тадзи! Тэнсьыд шуӧмтӧ, ӧксыӧй-ыджыдӧй, мед вынсьӧдас Господь, тэнад Ен!
Кыдзи Господь Ен вӧлі менам ӧксы-ыджыдкӧд, тадзи Сійӧ мед тшӧтш лоӧ Соломонкӧд! Господь мед зумыдмӧдас сылысь юралӧмсӧ Давид ӧксылӧн, менам ыджыдӧйлӧн, юралӧм дорысь ёнджыка на!»
Садок поп, Нафан пророк, Иодайлӧн Бенай пиыс и ӧксыӧс видзысь керетсаяс да пелетсаяс мунісны, пуксьӧдісны Соломонӧс Давид ӧксылӧн мул вылӧ да нуӧдісны Гихон ва петанін дорӧ.
Садок поплӧн вӧлі вежа чомйысь босьтӧм вый тыра доз. Сійӧ мавтыштіс Соломонӧс.
Буксан шы улӧ став войтырыс гораа горзіс: «Мед олас Соломон ӧксы!»
Войтырыс восьлаліс Соломон бӧрся. Найӧ ворсісны пӧлянӧн да ёна нимкодясисны, налӧн горзӧмысь весиг муыс вӧрис.
Кор Адоний аслас корӧмаяскӧд помалісны сёйны-юны, найӧ кылісны тайӧ горзӧмсӧ.
Буксан шы кылӧм бӧрын Йоав юаліс: «Мыйысь карыс татшӧма шызьӧма?»
Сылӧн сёрнитігкості локтіс Авиатар поплӧн Ионафан пиыс.
Адоний шуис сылы: «Лок, пыр.
Тэ веськыд морт, тэ ваян бур юӧръяс».
Ионафан вочавидзис: «Ӧні ог. Давид ӧксы, миян ыджыдным, пуктіс Соломонӧс ӧксыӧ.
Сійӧ мӧдӧдіс Соломон дінӧ Садок попӧс, Нафан пророкӧс, Иодайлысь Бенай писӧ, керетсаясӧс да пелетсаясӧс. Найӧ пуксьӧдісны Соломонӧс ӧксылӧн мул вылӧ.
Сэсся Гихон ва петанін дорын Садок поп Нафан пророккӧд мавтыштӧмӧн пуктісны сійӧс ӧксыӧ. Бӧрсӧ найӧ локтісны ёна нимкодясьӧмӧн, и карыс ставнас шызис.
Тайӧ шысӧ ӧні ті и кыланныд.
Соломон пукалӧ нин юралан пуклӧсас.
Сылӧн кесйӧгъясыс ветлісны чолӧмавны Давид ӧксыӧс, миянлысь ыджыднымӧс. Найӧ шуӧмаӧсь Давидлы, тэнад Енмыд пӧ мед нимӧдас Соломонӧс тэ дорысь ёнджыка на да зумыдмӧдас сылысь юралӧмсӧ тэнад юралӧм дорысь ёнджыка на.
Вольпасяс ӧксы Енлы копыртчӧмӧн шуӧма, ошкӧма пӧ Господьӧс, Израильлысь Енсӧ, коді талун сетіс меным аддзыны [месянь чужысьӧс,] менам юралан пуклӧсын пукалысьӧс».
Адонийлӧн корӧмаяс ёна повзисны. Найӧ чеччисны да ӧдйӧ разӧдчисны.
Адонийӧс полӧм босьтіс Соломонысь. Сійӧ котӧрӧн муніс висьпуктанін дорӧ да шашаритчис висьпуктанін сюръясӧ.
Соломонлы юӧртісны: «Адоний полӧ тэысь, ӧксыӧй. Сійӧ шашаритчӧма висьпуктанін сюръясӧ да шуалӧ: “Соломон ӧксы мед кыв сетас меным, мый оз ви шыпуртӧн менӧ, ассьыс кесйӧгсӧ”».
Соломон вочавидзис: «Сійӧ кӧ лоӧ веськыд мекӧд, сылӧн ӧти юрси сі оз усь юр вывсьыс.
А кутас кӧ пӧръясьны, кулас».
Соломон ӧксы мӧдӧдіс йӧзӧс Адонийла, и найӧ вайӧдісны сійӧс висьпуктанін дорысь.
Адоний пырис Соломон ӧксы дінӧ да копыртчис сылы.
Соломон шуис: «Мун гортад».
Кулӧм водзвылас Давид колис Соломон пиыслы ассьыс тшӧктӧмъяссӧ.
Сійӧ шуис: «Менам мувывса туйӧй помасьӧ. Но тэ ло зумыд да повтӧм. Вӧч, мый тшӧктӧ Господь, тэнад Енмыд. Ветлы Сылӧн туйӧд да ов Сылӧн индӧд-тшӧктӧмъяс серти, мый гижӧма Мӧисейлӧн Индӧдын. Сэки тэнад артмас ставыс, мый мӧвпыштан да мый кутан вӧчны.
И Господь збыльмӧдас Ассьыс кывсӧ, мый висьтавліс ме йылысь. Сійӧ шуліс: “Тэсянь чужысьяс кӧ кутасны ветлыны веськыд туйӧд да став сьӧлӧмнас овны Ме водзын веськыда, сэки тэнад рӧдысь пыр лоӧ ӧксы, коді кутас веськӧдлыны Израиль войтырӧн”.
Тэ ӧд тӧдан, мый Саруялӧн Йоав пиыс вӧчис меным. Тэ тӧдан, мый сійӧ виис израильса тышкайӧзӧн кык веськӧдлысьӧс, Нирлысь Авенир писӧ да Етерлысь Амессай писӧ. Лӧнь кад дырйи тышын моз вир кисьтіс, вирӧсьтіс коссьыс вӧньсӧ да коксьыс кӧмсӧ.
Тэ ӧд мывкыд морт, сідзкӧ, вӧч мывкыд морт моз. Эн сет пӧрысьмӧм нин Йоавлы лӧня вуджны кулӧмаяс дінӧ.
А галаадса Барзиллайлӧн пиян дінӧ ло бур сьӧлӧма. Лэдз налы пӧткӧдчыны аслад пызан сайын, ӧд найӧ отсалісны меным, кор ме пышйи тэнад Авессалом вокысь.
Тэ тӧдан тшӧтш Бахуримысь Венямин чужанкотырысь Герлысь Шимей писӧ.
Сійӧ лёкӧдіс-ёрис менӧ, кор ме вӧлі муна Маханаимӧ. Но кор ме бӧр локті, сійӧ меным воча петіс Йӧрдан ю дорын, и сэки ме Господь водзын кыв сеті сылы, мый ог ви сійӧс.
А тэ эн коль сійӧс мыждытӧг.
Тэ мывкыд морт, и ачыд тӧдан, мый сыкӧд вӧчны, медым пӧрысь кадас сійӧ вуджас кулӧмаяс дінӧ сылысь вирсӧ кисьтӧм бӧрын».
Давид куліс да вуджис батьясыс дінӧ. Сійӧс дзебисны Давид карӧ.
Давид ӧксыаліс Израильын нелямын во чӧж. Хевронын сійӧ юраліс сизим во, Ерусалимын — комын куим во.
Давид батьыс пыдди ӧксыӧ пуксис Соломон. Сылӧн юралӧмыс вӧлі зумыд.
Адоний, Агиталӧн пиыс, локтіс Соломонлӧн Вирсавия мам дінӧ [да копыртчис сылы]. Вирсавия юаліс: «Бур могӧн-ӧ тэ локтін?»
Мӧдыс вочавидзис: «Бур могӧн».
Сэсся содтіс: «Менам эм сёрни тэ дінӧ».
«Висьтав», — шуис Вирсавия.
Адоний шуис: «Тэ ӧд тӧдан, мый юралӧмыс вӧлі менам киын, Израиль войтыр весиг сибӧдіс менӧ ӧксыӧс моз.
Но ӧксыӧ ме пыдди пуксис менам вокӧй, ӧд тадзи вӧлі шуӧма Господь.
Но менам эм ӧти корӧм. Эн ӧтдорт менсьым корӧмӧс».
«Висьтав», — шуис Вирсавия.
Адоний шуис: «Кора тэнӧ, сёрнит Соломон ӧксыкӧд, сійӧ тэнӧ кывзас. Сійӧ мед сетас меным гӧтыр пыдди Шунем карысь Ависагаӧс».
«Бур, — воча шуис Вирсавия, — ме сёрнита ӧксыкӧд».
Вирсавия муніс Соломон ӧксы дінӧ, медым сёрнитны Адонийлӧн корӧм йылысь.
Ӧксы чеччис да копыртчылӧмӧн вочааліс Вирсавияӧс, сэсся пуксис аслас юралан пуклӧсӧ.
Ӧксылӧн мамыслы тшӧтш вайисны пуклӧс. Вирсавия пуксис ӧксы веськыдладорӧ да шуис: «Менам эм тэ дінӧ ичӧтик корӧм, эн ӧтдорт менсьым корӧмӧс».
Ӧксы шуис: «Висьтав, мамӧй.
Ог ӧтдорт тэнсьыд корӧмтӧ».
Вирсавия шуис: «Сет Адоний вокыдлы гӧтыр пыдди Шунем карысь Ависагаӧс».
Соломон ӧксы вочавидзис мамыслы: «Мыйла тэ коран Адонийлы шунемса Ависагаӧс?
Нӧшта кор сылы и ӧксыалӧм, сійӧ ӧд менам ыджыдджык вок, и сы дор тшӧтш Авиатар поп да Саруялӧн Йоав пиыс [тышкайӧзӧн веськӧдлысь, сылӧн ёртыс]».
Соломон ӧксы кыв сетіс Господь водзын, сійӧ шуис: «Енмыс мед чорыда мыждас менӧ, оз кӧ Адоний мынтысь олӧмнас аслас корӧмысь.
Ловъя Господь водзын, коді Аслас кӧсйысьӧм серти ёнмӧдіс менӧ, пуксьӧдіс менӧ Давид батьӧйлӧн юралан пуклӧсӧ да зумыдмӧдіс менсьым рӧдӧс, ме кыв сета: талун Адоний кулас!»
Соломон ӧксы мӧдӧдіс Иодайлысь Бенай писӧ, и сійӧ виис Адонийӧс.
Авиатар поплы ӧксы шуис: «Мун бӧр Анатотӧ да вӧдит ассьыд видз-мутӧ.
Тэнӧ эськӧ тшӧтш колӧ вины, но ме коля тэнӧ ловйӧн, ӧд тэ новлӧдлін Господь Ыджыдлысь кудсӧ менам Давид бать водзын да сыкӧд тшӧтш мунін сьӧкыдлунъяс пыр».
Соломон вештіс Авиатарӧс Господь водзын попӧн кесъялӧмысь. Тадзи иніс Илийлӧн рӧд йылысь Силомын Господьлӧн шуӧмыс.
Кор Йоавлы кывсис Адонийлӧн кулӧм йылысь, сійӧ котӧртіс Господьлӧн вежа чомйӧ да шашаритчис висьпуктанін сюръясӧ. Ӧд Йоав вӧлі Адоний дор, но сійӧ эз вӧв Авессалом дор. 
Соломон ӧксылы висьталісны, Йоав пӧ пышйӧма Господьлӧн вежа чомйӧ, и ӧні пӧ сійӧ висьпуктанін дорын.
Соломон ыстіс Иодайлысь Бенай писӧ да тшӧктіс сылы вины Йоавӧс [да гуавны сійӧс].
Бенай локтіс Господьлӧн вежа чомйӧ да шуис Йоавлы: «Ӧксы тшӧктӧ тэныд петны татысь».
Йоав вочавидзис: «Ог пет, ме кӧсъя тані кувны».
Бенай муніс ӧксы дінӧ да висьталіс сылы Йоавлысь кывъяссӧ.
Ӧксы шуис Бенайлы: «Вӧч, кыдзи шуӧ Йоав.
Ви сійӧс сэні да гуав. Тадзи вештан ме вылысь да менам батьлӧн рӧд вылысь мыжтӧм йӧзлысь вирсӧ, мый Йоав кисьтіс. Господь водзын сійӧ ачыс мыжа аслас кулӧмысь, ӧд Давид батьӧйлы висьтавтӧг сійӧ виис шыпуртӧн кык мортӧс — Нирлысь Авенир писӧ, израильса тышкайӧзӧн веськӧдлысьӧс, да Етерлысь Амессай писӧ, иудаса тышкайӧзӧн веськӧдлысьӧс. Найӧ вӧліны сыысь веськыдджыкӧсь да бурджыкӧсь.
Тайӧ кык мортлысь вирсӧ кисьтӧмысь мыжыс мед пыр кежлӧ коляс Йоав вылӧ да сысянь чужысьяс вылӧ. А Давидӧс да сысянь чужысьясӧс, сылысь рӧдсӧ да сылысь юралӧмсӧ мед пыр кытшалас Господьлӧн лӧньлуныс».
Иодайлӧн Бенай пиыс муніс да виис Йоавӧс. Дзебисны сійӧс овтӧминӧ, аслас керкасянь матӧ.
Йоав пыдди тышкайӧзӧн веськӧдлыны Соломон пуктіс Бенайӧс, [ачыс Соломон сэки ӧксыаліс Ерусалимын,] а Авиатар поп пыдди ӧксы пуктіс [аркирейӧ] Садокӧс. 
[Господь сетіс Соломонлы ыджыд мывкыдлун, сюсь вежӧр да уна тӧдӧмлун, сылӧн тӧдӧмлуныс вӧлі саридздор лыа мында.
Соломонлӧн мывкыдлуныс вӧлі ёна ыджыдджык важ олысьяслӧн да Египетын олысь мывкыда йӧзлӧн дорысь.
Соломон босьтіс гӧтырӧ фараонлысь нывсӧ да вайӧдіс сійӧс Давид карӧ. Сэні гӧтырыс оліс, кытчӧдз Соломон эз лэпты аслыс керка. Но медводз сійӧ лэптіс Господьлы крам да Ерусалим гӧгӧр стен.
Соломон вӧчис крамсӧ сизим во чӧж.
Соломонлӧн вӧлі сизимдас сюрс морт, кодъяс кыскалісны-ваялісны изъяс, и кӧкъямысдас сюрс морт, кодъяс кералісны-перйисны изсӧ изкыртаысь.
Соломон вӧчӧдіс вайӧртӧд да сы улын сулалысь пыкӧдъяс, вӧчӧдіс ыджыд мыссян дозъяс да сюръяяс, крам йӧрас вӧчӧдіс ва петанін да ыргӧнысь вайӧртӧд. Соломон вӧчӧдіс изкар да сы гӧгӧр стен, юкис Давид карсӧ кык пельӧ.
Фараонлӧн нылыс вуджис Давид карысь аслас керкаӧ, кодӧс Соломон лэптіс сылы.
Кар гӧгӧрыс Соломон кыпӧдіс стен.
Куимысь вонас Соломон вайліс сотан да бурасян висьяс висьпуктанін вылын, кодӧс сійӧ лэптіс Господьлы, и сэні Господь водзын тшынӧдчис. Соломон помаліс керка лэптӧмсӧ.
Сылӧн вӧлі куим сюрс квайтсё морт, кодъяс видзӧдісны уджалысьяс бӧрся.
Господьлысь крамсӧ лэптӧм бӧрын да Ерусалим кар гӧгӧр стен кыпӧдӧм бӧрын Соломон нӧшта кыпӧдіс Ассур, Магдон, Гезер, Вылыс Бет-Хорон да Баалат каръяс.
abu
Ловъя дырйиыс на Давид шуліс Соломонлы: «Тэ тӧдан Бахуримысь Венямин чужанкотырысь Герлысь Шимей писӧ.
Сійӧ быд ногыс лёкӧдіс менӧ, кор ме вӧлі муна Маханаимӧ.
Но кор ме бӧр локті, сійӧ меным воча петіс Йӧрдан ю дорын, и сэки ме Господь водзын кыв сеті сылы, мый ог ви сійӧс.
А тэ эн коль сійӧс мыждытӧг. Тэ мывкыд морт, и ачыд тӧдан, мый сыкӧд вӧчны, медым пӧрысь кадас сійӧ вуджас кулӧмаяс дінӧ сылысь вирсӧ кисьтӧм бӧрын».]
Ӧксы тшӧктіс корны Шимейӧс да шуис сылы: «Лэпты тані, Ерусалимын, аслыд керка да ов сэні. Некытчӧ эн мун татысь.
Тӧд, тэ кӧ петан Ерусалимысь да вуджан Кедрон ковтыс сайӧ, тэнӧ виасны.
Аслад кулӧмысь ачыд лоан мыжа».
Шимей вочавидзис ӧксылы: «Бур, ӧксыӧй-ыджыдӧй.
Кыдзи тшӧктан, сідзи ме, тэнад кесйӧгыд, и вӧча».
Дыр кад чӧж Шимей оліс Ерусалимын.
Куим во мысти Шимейлӧн кык кесйӧг пышйисны гефса ӧксы дінӧ, Мааклӧн Акиш пи дінӧ.
Шимейлы юӧртісны, тэнад кесйӧгъясыд пӧ Гефынӧсь.
Шимей пуксис осёл вылӧ да муніс Гефӧ Акиш дінӧ корсьны ассьыс кесйӧгъяссӧ.
Тадзи Шимей бӧр вайӧдіс кесйӧгъяссӧ Гефысь.
Соломонлы висьталісны, Шимей пӧ ветлӧма Ерусалимысь Гефӧ.
Ӧксы корис Шимейӧс да шуис сылы: «Эг-ӧ ме шулы тэныд, мися, петан кӧ кытчӧкӧ Ерусалимысь, тэнӧ виасны.
И Господь водзын кыв сетӧмӧн тэ кӧсйысин вӧчны менам шуӧм серти.
Кыдзи нӧ тэ лысьтін торкны Господь водзын сетӧм кывтӧ да менсьым тшӧктӧмӧс?»
Сэсся ӧксы шуис Шимейлы: «Тэ ачыд тӧдан, кутшӧм лёктор тэ вӧчин менам Давид батьлы.
Господь мед бергӧдас лёк вӧчӧмтӧ ас вылад.
А менӧ, Соломон ӧксыӧс, мед бурсиас. Давидлӧн юралӧмыс мед зумыда сулалас Господь водзын нэмъяс чӧж!»
Ӧксы тшӧктіс Иодайлӧн Бенай пилы вины Шимейӧс. Иодай муніс да виис сійӧс.
Соломонлӧн юралӧмыс вӧлі зумыд. Соломон босьтіс гӧтырӧ египетса фараонлысь нывсӧ, тадзи найӧ рӧдвужасисны фараонкӧд. Гӧтырсӧ Соломон вайӧдіс Давид карӧ. Сэні гӧтырыс оліс, кытчӧдз Соломон эз лэпты Ерусалимын аслыс олан керка, Господьлы крам да Ерусалим гӧгӧр стен.
Войтырыс важ мозыс мылькъяс вылын вайис висьяс, ӧд Господьлы крамсӧ абу на вӧлі лэптӧма.
Соломон радейтіс Господьӧс, оліс Давид батьыслӧн тшӧктӧмъяс серти, но мылькъяс вылын вайліс висьяс да тшынӧдчис.
Ӧтчыд Соломон муніс Гаваонӧ, мед вись вайны. Буретш сэні сулаліс медшӧр вись ваян мылькйыс.
Сэні висьпуктанін вылын Соломон вайис сюрс мында сотан вись.
Войнас Гаваонын Соломонлы вӧтас петкӧдчис Господь Ен да шуис: «Кор Менсьым, мый кӧсъян, и Ме сета тэныд».
Соломон воча шуис: «Тэ вӧлін зэв бур сьӧлӧма менам Давид бать дінӧ, Аслад кесйӧг дінӧ, ӧд сійӧ оліс Тэнсьыд кывзысьӧмӧн да веськыда, ставсӧ вӧчис сӧстӧм сьӧлӧмӧн. Ассьыд ыджыд буралӧмтӧ Тэ эн вешты сы дінысь, Тэ сетін сылы пиӧс, коді ӧні пукалӧ сылӧн юралан пуклӧсын.
Господьӧй, менам Енмӧй, Тэ ӧксыӧ пуктін менӧ, Ассьыд кесйӧгтӧ, Давид батьӧй бӧрти.
Но ме том на, веськӧдлынысӧ ог куж.
Тэнад бӧрйӧм войтырлӧн лыдыс сы мында, мый некод оз вермы лыддьыны-артавнысӧ, а Ме, тэнад кесйӧг — налӧн веськӧдлысь.
Сідзкӧ, сет меным сюсь вежӧр, медым ме веськыда мыжді Тэнсьыд войтыртӧ да кужи торйӧдны бурсӧ лёксьыс.
Ӧд вермас-ӧ кодкӧ веськӧдлыны Тэнад уна лыда войтырӧн?»
Соломонлӧн корӧмыс воис Господьлы сьӧлӧм вылас.
Ен шуис сылы: «Тэ эн кор аслыд кузь нэм, озырлун да вӧрӧгыдлы кулӧм, а корин сюсь вежӧр, медым веськыда мыждыны. Сыысь, мый тэнад вӧлі татшӧм кӧсйӧм, Ме вӧча тэнад корӧм серти. Ме сета тэныд ыджыд мывкыдлун да сюсь вежӧр. Тэ кодь мортыс эз вӧв, и тэ бӧрын оз ло.
Нӧшта Ме сета тэныд озырлун да нималӧм, мый тэ эн корлы. Тэнад олан лунъяс дырйи Тэ кодь ӧксыыс му вылас оз ло.
Тэ кӧ пондан ветлыны Менам туйӧд, овны Менам индӧд-тшӧктӧмъяс серти аслад Давид батьыд моз, сэки Ме нюжӧда тэнсьыд олан нэмтӧ».
Кор Соломон садьмис, сійӧ гӧгӧрвоис, мый тайӧ вӧлі вӧт.
Сійӧ бӧр локтіс Ерусалимӧ, сэні муніс [висьпуктанін дорӧ] Господьлӧн Йитӧд куд водзӧ и вайис сотан да бурасян висьяс. Та бӧрын аслас кесйӧгъяслы вӧчис ыджыд гаж.
Ӧтчыд Соломон ӧксы дінӧ локтісны кык кырсалысь ань да сувтісны ӧксы водзӧ.
Ӧтиыс шуис: «Ыджыдӧй! Тайӧ аньыскӧд ми олам ӧти керкаын.
Сы дырйи ме чужті сэні ассьым кагаӧс.
Куим лун мысти сійӧ тшӧтш чужтіс.
Миян кындзи керкаас некод эз вӧв, ми сӧмын кыкӧн вӧлім.
Войнас сылӧн кагаыс куліс, узигас мамыс лямӧдіс кагасӧ.
Сэсся войнас менам узигкості сійӧ босьтіс менсьым кагаӧс аслас морӧс бердас, а ассьыс кулӧм кагасӧ пуктіс менам морӧс бердӧ.
Ме чеччи асывнас, мед вердны кагаӧс, и аддзи, мый сійӧ кулӧма.
Сюся видзӧдалӧм бӧрын гӧгӧрвои, мый сійӧ абу менам пиӧй, кодӧс ме чужті».
Сэки мӧд аньыс воча шуис: «Ловъя кагаыс менам, а кулӧмаыс — тэнад».
abu
Тадзи найӧ вензисны ӧта-мӧдныскӧд ӧксы водзын.
Ӧксы шуис: «Ӧтиыс шуӧ, ловъяыс пӧ менам, а кулӧмаыс пӧ тэнад.
Мӧдыс шуӧ, абу пӧ тадз, кулӧмаыс — тэнад, а ловъяыс — менам».
Сэсся ӧксы тшӧктіс вайны шыпурт, и сылы вайисны.
«Керыштӧй ловъя кагасӧ шӧрипӧв да сетӧй ӧти джынсӧ ӧти аньыслы, а мӧд джынсӧ — мӧдыслы!» — тшӧктіс ӧксы.
Ловъя кага мамлӧн сьӧлӧмас ыпнитіс муслун пиыс дінӧ. Сійӧ шуис ӧксылы: «Ыджыдӧй, сет ловъя кагасӧ тайӧ аньыслы. Эн ви сійӧс!»
А мӧд аньыс шуис: «Керыштӧй сійӧс. Мед оз ло меным ни тэныд».
Ӧксы шуис: «Энӧ виӧй кагасӧ. Сетӧй сійӧс мамыслы».
Став Израиль войтыр кыліс ӧксылӧн веськыда мыждӧм йылысь.
Ставнысӧ полӧм босьтіс ӧксыысь. Найӧ гӧгӧрвоисны, мый Енмыс сетӧма Соломонлы мывкыдлун, медым веськыда мыждыны.
Соломон ӧксы веськӧдліс став Израильӧн.
Сылӧн вӧліны ыджыд чина йӧз: Садоклӧн Азарий пиыс вӧлі аркирейӧн, Шишлӧн Элихореп да Ахий пияныс вӧліны гижалысьяс, Ахилудлӧн Иосафат пиыс вӧлі вӧвлӧмторъяс пасъялысь, Иодайлӧн Бенай пиыс веськӧдліс тышкайӧзӧн.
Садок да Авиатар вӧліны попъясӧн.
Нафанлӧн Азарий пиыс веськӧдліс ӧксыув муясын юралысьясӧн. Завуд поп, Нафанлӧн пиыс, вӧлі ӧксыӧс туйдӧдысь.
Ахишар веськӧдліс ӧксылӧн овмӧс-керкаӧн, Авдайлӧн Адонирам пиыс веськӧдліс йӧзӧн, кодъяс уджалӧмнас мынтісны вот.
Став Израиль му пасьтала Соломонлӧн вӧлі дас кык юралысь. Быдӧн на пиысь вайліс Соломон ӧксылы, сылӧн йӧзыслы да гортсаясыслы сёян-юан ӧти тӧлысь чӧж.
Со юралысьясыс: Бен-Хур юраліс Ефрем керӧсвыв муын, Бен-Декер — Макацын, Шаалвимын, Бет-Шемешын, Элонын да Бет-Хананын, Бен-Хесед — Аруботын, сы кипод улын вӧлі тшӧтш Соко кар да став Хефер му.
Бен-Авинадав юраліс Нафат-Дор муын.
Сылӧн гӧтырыс вӧлі Соломонлӧн Тафат нылыс.
Ахилудлӧн Баан пиыс юраліс Танакын, Мегиддоын да Бет-Шеан гӧгӧр муын, мый Цартан кар дорын Изреельысь улынджык. Сы кипод улын нӧшта вӧлі муыс Бет-Шеансянь Авел-Мехолаӧдз да Иокмеам кар сайӧдз.
Бен-Гевер юраліс Галаад муын Рамот карын.
Сы кипод улын вӧліны Галаадын Манассейсянь чужысь Яирлӧн сиктъяс, нӧшта Васанын Аргов му, стенъясӧн кытшалӧм да ыргӧн иганъяс сайын сулалысь квайтымын ыджыд кар.
Иддолӧн Ахинадав пиыс юраліс Маханаимын, Ахимаас — Неффалим муын.
Гӧтырӧ сійӧ босьтіс Соломонлысь Васемата нывсӧ.
Хушайлӧн Баан пиыс юраліс Асир муын да Баалотын, Паруахлӧн Иосафат пиыс — Иссакар муын, Элайлӧн Шимей пиыс — Венямин муын.
Урилӧн Гевер пиыс юраліс Галаадын, аморейяслӧн Сигон ӧксылӧн да васанса Ог ӧксылӧн муясын.
Иуда да Израиль войтырлӧн лыдыс вӧлі саридздор лыа мында. Найӧ сёйисны-юисны да олісны нимкодясьӧмӧн.
Соломон кипод улын вӧлі став муыс Ефрат юсянь Филистим муӧдз да Египетӧдз.
Ӧксыяс вайлісны Соломонлы козинъяс да кесъялісны сылы став сылӧн олан лунъяс чӧж.
Быд лун Соломонлы да сылӧн йӧзыслы вайлісны комын мешӧк шобді пызь да квайтымын мешӧк мукӧдпӧлӧс пызь, дас тшӧгӧдӧм ӧшкӧс, кызь йирсян ӧшкӧс да сё ыжӧс. Наысь ӧтдор нӧшта вайлісны кӧръясӧс, газельясӧс, косуляясӧс да тшӧгӧдӧм дзодзӧгъясӧс.
Соломон кипод улын вӧліны Ефрат ю таладор муяс — Типсахсянь Газаӧдз. Соломон ыджыдаліс сэтчӧс ӧксыяс вылын. Быдлаын, кӧні сійӧ ыджыдаліс, войтыръяс олісны лӧня.
Соломонлӧн ӧксыалӧм дырйи Иуда да Израиль войтыр войвыв Дансянь лунвыв Бер-Шеваӧдз повтӧг олісны. Быдӧн вермис пукавны аслас виноград йӧрын, аслас инжир пу улын.
Соломонлӧн вӧліны вӧв картаяс, кӧні видзисны нелямын сюрс тарантасӧ доддялан вӧвъясӧс. Сылӧн вӧлі дас кык сюрс верзьӧма.
Соломонлӧн киподувса быд юралысь аслас урчитӧм тӧлысьӧ вайліс Соломон ӧксылы да сылӧн пызан сайын сёйысьяслы сёян-юан. Найӧ тӧждысисны, медым ставыс вӧлі тырмана.
Ӧксылӧн ветліг-мунігъясӧ найӧ быдӧн могмӧдлісны ӧксылысь доддялӧм да верзьӧма вӧвъяссӧ урчитӧм мында идӧн да идзасӧн.
Ен сетіс Соломонлы ыджыд мывкыдлун, сюсь вежӧр да уна тӧдӧмлун, сылӧн тӧдӧмлуныс вӧлі саридздор лыа мында.
Соломонлӧн мывкыдлуныс вӧлі ёна ыджыдджык асыввылын олысь да Египетын олысь мывкыда йӧзлӧн дорысь.
Став йӧз пиысь сійӧ вӧлі медсюсь, весиг эзрахса Этан, Махоллӧн Еман, Калкол да Дардай пиян дорысь вӧлі сюсь. Соломон нималіс матігӧгӧр олысь войтыръяс пӧвстын.
Соломон гижис куим сюрс шусьӧг, сюрс да вит сьыланкыв.
Сійӧ вермис висьтавны быдпӧлӧс быдмӧгыс йылысь — ливанса сус пусянь да стен коластӧд быдмысь иссоп турунӧдз.
Вермис висьтавны пемӧсъяс, лэбачьяс, веглясьысь-нюглясьысьяс да черияс йылысь.
Соломонлысь мывкыд сёрнисӧ волісны кывзыны став муясысь йӧз. Найӧс мӧдӧдісны ӧксыяс, кодъяс кывлісны сылӧн мывкыдлун йылысь.
Кор тирса Хирам ӧксы тӧдмаліс, мый Соломонӧс мавтыштӧмӧн пуктӧмаӧсь ӧксыӧ батьыс пыдди, мӧдӧдіс сы дінӧ ассьыс кесйӧгъяссӧ.
Хирам Давидкӧд пыр вӧліны ёртъясӧн.
Соломон сідзжӧ мӧдӧдіс Хирам дінӧ йӧзӧс, медым найӧ висьталасны сылы:
«Тэ ӧд тӧдан, мый орччӧн олысь войтыръяскӧд тышкасьӧм вӧсна менам Давид батьӧй эз вермы лэптыны Господьлы, аслас Енлы, крам.
Давид тышкасис, кытчӧдз Господь эз песовт войтыръясӧс сылӧн кок улӧ. Ӧні Господь, менам Енмӧй, сетіс меным быдласянь лӧньлун: паныд сувтысьяс абуӧсь, миян вылӧ некод оз усьлась.
Ӧні ме кӧсъя лэптыны аслам Господь Енлы крам. Ӧд менам Давид батьлы на Господь шуліс: “Тэнад пиыд, кодӧс Ме пуксьӧда тэ пыдди юралан пуклӧсад, лэптас Меным керка”.
Сідзкӧ, тшӧкты пӧрӧдны Ливанысь сус пуяс.
Менам кесйӧгъяс тшӧтш кутасны уджавны тэнад кесйӧгъяскӧд. Ме мынтыся тэнад йӧзлы, мыйтӧм шуан.
Тэ ӧд ачыд тӧдан, мый сидонса кодь бур пӧрӧдчысьясыс менам абуӧсь».
Соломонлысь кывъяссӧ кылӧм бӧрын Хирамлы лои зэв нимкодь. Сійӧ шуис: «Ошкӧм Господьлы, коді сетіс Давидлы мывкыд пиӧс да пуктіс сійӧс юравны татшӧм уна лыда войтырӧн».
Хирам ыстіс Соломонлы воча кыв: «Ме кылі тэнсьыд корӧмтӧ. Мый кӧсъян, сійӧс и вӧча. Ме сета тэныд сус пу и кипарис пу.
Менам йӧз лэччӧдасны керъяссӧ ливанса керӧсъяс вылысь саридз дорӧ. Сэсся саридз кузя пурйӧн ме кылӧда найӧс сэтчӧ, кытчӧ шуан. Сэні ме тшӧкта разьны пуръяссӧ, а тэ сэсся ачыд сэтысь керъяссӧ босьтан.
Но менам тшӧтш эм тэ дінӧ корӧм. Кора вайны менам керкаӧ сёян-юан».
Хирам сетіс Соломонлы сус пу да кипарис пу, мыйтӧм сійӧ корис.
А Соломон тӧждысис Хирамлӧн керка вӧсна, могмӧдіс сэні олысьясӧс сёян-юанӧн. Быд во сійӧ мӧдӧдліс Хирамлы кызь сюрс мешӧк шобді да кызь бӧчка олив вый.
Господь сетіс Соломонлы мывкыдлун, кыдзи и кӧсйысис.
Хирам да Соломон ёртасисны да кӧрталісны ӧта-мӧдныскӧд йитӧд.
Соломон уджӧдіс Израиль войтырысь комын сюрс мортӧс, кодъяс уджалӧмнас мынтісны вот.
Быд тӧлысьӧ Соломон мӧдӧдліс Ливанӧ дас сюрс мортӧс вежласьӧмӧн.
Ӧти тӧлысьсӧ найӧ уджалісны, а кык тӧлысьсӧ вӧліны гортаныс.
Веськӧдліс наӧн Адонирам.
Нӧшта Соломонлӧн вӧліны уджалысьяс — сизимдас сюрс морт, кодъяс кыскалісны-ваялісны изъяс, и кӧкъямысдас сюрс морт, кодъяс кералісны-перйисны изъяс. Став уджнас веськӧдлісны куим сюрс куимсё морт.
Ен керкалы подув пуктӧм могысь ӧксы тшӧктіс вайны кералӧм гырысь бур изъяс.
Соломонлӧн йӧзыс лӧсалісны изъяссӧ Хирамлӧн йӧзкӧд да гевалсаяскӧд ӧтлаын.
Тадзи [куим во чӧж] найӧ дасьтісны керъяс да изъяс Ен керка лэптӧм вылӧ. Соломон пондіс лэптыны Господьлы крам Израильын аслас нёльӧд ӧксыалан воӧ, зиф нима мӧд тӧлысьӧ. Тайӧ вӧлі Израиль войтырлӧн Египетысь петӧмсянь нёльсё кӧкъямысдасӧд воын.
Крамыс, кодӧс Соломон ӧксы лэптіс Господьлы, вӧлі квайтымын гырддза кузьта, кызь гырддза пасьта да комын гырддза судта. Крамлӧн посводзыс пасьтанас вӧлі ӧткодь крам пасьтаыскӧд — кызь гырддза. Посводзыс петыштіс крамсьыс дас гырддзаӧн водзӧджык.
Крамас Соломон вӧчис таса ӧшиньяс.
Крам пытшкӧссяньыс найӧ вӧліны гырысьджыкӧсь ортсысянь дорысь.
Крам ортсыас, Вежаин да Вежасьыс-вежаин стенъяс бердӧ, сійӧ вӧчис жыръяс.
abu
Жыръясыс вӧліны ӧта-мӧд вылас куим судтаӧн.
Улыс судтаыс вӧлі вит гырддза пасьта, шӧр судтаыс — квайт гырддза пасьта, вылыс судтаыс — сизим гырддза пасьта.
Крам ортсы стенъяссянь чурвидзисны тшупӧдъяс. На вылӧ мыджсисны жыръяссӧ кутысь брусъясыс. Тадзи брусъяссӧ эз ковмы йитны крам стенмас.
Крамсӧ вӧчисны водзвыв лӧсалӧм-шыльӧдӧм изъясысь.
Крам лэптігӧн эз кыв кӧрт нӧш ни чер шы.
Жыръясӧ пыраніныс вӧлі крам лунвывладорсянь.
Шӧр судтаас кайисны поскӧд, а сэсянь водзӧ кайисны вылыс судтаас.
Крамсӧ лэптӧм бӧрын Соломон эжис сійӧс сус пу пӧвъясӧн.
Крам гӧгӧрыс вӧчис вит гырддза судта жыръяс.
Жыръясыс йитчисны крамыскӧд сус пу керъясӧн.
Соломонлы вӧлі Господьсянь кыв:
«Со, ӧні тэ лэптан крам.
Тэ кӧ кутан овны Менам индӧд-тшӧктӧмъяс серти, Ме збыльмӧда кӧсйысьӧмӧс, мый тэ йылысь шулі Давид батьыдлы. Ме ог эновт Ассьым Израиль войтырӧс, но пыр кута овны на пӧвстын».
Крамсӧ лэптӧм бӧрын Соломон тшӧктіс эжны крампытшкӧсса стенъяссӧ джоджсяньыс йиркӧдзыс сус пу пӧвъясӧн, джоджсӧ тшӧктіс вевттьыны кипарис пӧвъясӧн.
Крам помас Соломон вӧчис вежӧс да торйӧдіс сійӧс сус пу пӧвъясысь вӧчӧм стенмӧн. Тайӧ пыді вежӧсыс вӧлі Вежасьыс-вежаин, сылӧн кузьтаыс вӧлі кызь гырддза.
Крамлӧн воддза вежӧсыс кузьтанас вӧлі нелямын гырддза.
Пытшкӧссяньыс крамсӧ ставнас вӧлі эжӧма сус пу пӧвъясӧн, весиг ӧти изтор эз тыдав. Сус пу пӧвъяс вылас вӧлі вундалӧмӧн серпасалӧма тыкваяс да дзоридзьяс.
Крам пытшкӧ вӧлі вӧчӧма Вежасьыс-вежаин, медым пуктыны сэтчӧ Господьлысь Йитӧд кудсӧ.
Вежасьыс-вежаиныс вӧлі кызь гырддза пасьта, кызь гырддза кузьта да кызь гырддза судта.
Стенъяссӧ Соломон эжис весалӧм зарниӧн, сус пуысь вӧчӧм висьпуктанінсӧ тшӧтш эжис зарниӧн.
Крам пытшкӧссӧ Соломон эжис весалӧм зарниӧн. Вежасьыс-вежаинлӧн пыранін водзӧ нюжӧдіс зарни чепъяс.
Крам пытшкӧссӧ дзоньнас эжис зарниӧн, Вежасьыс-вежаин водзвылын сулалысь висьпуктанінсӧ тшӧтш эжис зарниӧн.
Соломон тшӧктіс олив пуысь вӧчны дас гырддза судта кык херувимӧс да пуктыны найӧс Вежасьыс-вежаинӧ.
Херувимлӧн ӧти бордйыс вӧлі вит гырддза пасьта, и мӧд бордйыс вӧлі вит гырддза пасьта.
Бордъяслӧн пасьтаыс ӧти помсянь мӧд помӧдзыс вӧлі дас гырддза.
Мӧд херувимыс бордъяснас тшӧтш вӧлі дас гырддза пасьта.
Кыкнан херувимыс вӧліны ӧткодьӧсь, судта-пасьтанас тшӧтш вӧліны ӧткодьӧсь.
Быд херувимлӧн судтаыс вӧлі дас гырддза.
Соломон сувтӧдіс херувимъясӧс Вежасьыс-вежаинӧ.
Налӧн бордъясыс вӧлі шевкнитчӧмаӧсь: ӧтиыслӧн ӧти бордйыс инмис крамлӧн ӧтар стенмас, мӧдыслӧн — мӧдар стенмас, а мӧд борднас найӧ йитчисны ӧта-мӧдныскӧд.
Херувимъяссӧ Соломон эжис зарниӧн.
Крамлӧн став стен вылас пыді и воддза вежӧсас Соломон вундалӧмӧн серпасаліс херувимъясӧс, пальма пуяс да дзоридзьяс.
Пыді вежӧслысь и воддза вежӧслысь джоджсӧ Соломон эжис зарниӧн.
Вежасьыс-вежаинлысь кык ӧдзӧссӧ вӧчис олив пуысь. Ӧдзӧсъяссӧ вӧчис вит пельӧса куричӧн.
Олив пуысь вӧчӧм кык ӧдзӧс вылас вундалӧмӧн серпасаліс херувимъясӧс, пальма пуяс да дзоридзьяс. 
Ставсӧ эжис зарниӧн.
Крамӧ пыран ӧдзӧсъяслысь куричсӧ вӧчис олив пуысь нёль пельӧсаӧн, а кык ӧдзӧссӧ вӧчис кипарисысь.
Быд ӧдзӧс вӧчис кык воссьысь юкӧнысь.
На вылӧ тшӧтш вундалӧмӧн серпасаліс херувимъясӧс, пальма пуяс да дзоридзьяс, вылытіыс найӧс эжис зарниӧн.
Пытшкӧс йӧрлысь стенсӧ Соломон вӧчис шыльӧдӧм изйысь да сус пуысь. Быд куим судта кералӧм из вылӧ пуктісны сус пу керъяс.
Аслас юралігӧн нёльӧд вонас зиф тӧлысьӧ [мӧд тӧлысьӧ] Соломон пуктіс крамлы подувсӧ, а дас ӧтиӧд вонас бул нима кӧкъямысӧд тӧлысьӧ сійӧ помаліс крам лэптӧмсӧ. Крамсӧ да сэні кесъялӧм могысь став коланаторсӧ вӧлі вӧчӧма, кыдзи вӧлі водзвыв шуӧма вӧчны.
Крамсӧ лэптісны сизим во чӧж.
Ассьыс керкасӧ Соломон лэптіс дас куим во чӧж.
Керка пытшкас сійӧ вӧчис торъя ыджыд вежӧс да нимтіс сійӧс ливанса сус пу керкаӧн. Тайӧ вежӧсыс вӧлі сё гырддза кузьта, ветымын гырддза пасьта да комын гырддза судта.
Сійӧ мыджсис нёль визьӧн сувтӧдӧм сус пу сюръяяс вылӧ, а сюръяяс вылас вомӧнӧн вӧлі пукталӧма сус пу матичьяс. Сус пуысь вольсалӧм йиркыс кутчысис матичьяс вылас. Матичьясыс кутчысисны нелямын вит сюръя вылын. Быд визьын вӧлі дас вит сюръя.
Ӧшиньяссӧ вӧлі писькӧдӧма куим визьӧн, воча стенъясын ӧшиньяссӧ вӧлі вӧчӧма ӧта-мӧд весьтас.
Ӧдзӧсъясыс да ӧдзӧс куричьясыс вӧліны нёль пельӧсаӧсь. Ӧшиньяссӧ вӧлі писькӧдӧма ӧта-мӧдыслы воча куим визьӧн.
Керка пытшкас Соломон вӧчис сюръяяса ыджыд вежӧс — ветымын гырддза кузьта да комын гырддза пасьта. Вежӧс водзас вӧчис сюръяяса посводз, пыранінас вӧчис пос.
Нӧшта вӧчис юралан керка, кӧні юралан пуклӧссянь сійӧ веськыда мыждіс войтырсӧ. Джоджыс сэні дзоньнас вӧлі сус пуысь.
Соломонлӧн олан керкаыс сулаліс мӧд йӧрын, юралан керка сайын. Сылӧн олан керкаыс вӧлі юралан керка кодь жӧ.
Соломон вӧчис татшӧм жӧ керка фараон нывлы, кодӧс сійӧ босьтіс гӧтырӧ.
Став тайӧ лэптӧм керкаяссӧ подувсяньыс керка вевтӧдзыс и ортсы стенсяньыс ыджыд йӧрӧдзыс вӧлі вӧчӧма колана ыджда серти кералӧм-лӧсалӧм гырысь бур изъясысь. Изъяссӧ вӧлі шыльӧдӧма керка ортсыладорсяньыс и пытшкӧсладорсяньыс.
Подувсӧ вӧлі вӧчӧма дас гырддза ыджда и кӧкъямыс гырддза ыджда изъясысь. На вылӧ вӧлі пуктӧма колана ыджда серти кералӧм изъяс да сус пу пӧвъяс.
Ӧксы керкалысь ыджыд йӧрсӧ вӧлі кытшалӧма кералӧм изъясӧн: быд куим судта тэчӧм изъяс вылӧ вӧлі пуктӧма ӧти судта сус пу керъяс.
Татшӧм ногӧн вӧлі кытшалӧма тшӧтш Господьлӧн крамлысь пытшкӧс йӧрсӧ да посводзсӧ.
Соломон корис Тир карысь Хирам нима мортӧс. Сійӧ вӧлі Неффалим чужанкотырысь, дӧвалӧн пи.
Батьыс сылӧн вӧлі ыргӧнысь вӧчасьысь.
Хирам вӧлі зэв киподтуя, кужис вӧчавны ыргӧнысь быдсяматорсӧ.
Хирам локтіс Соломон ӧксы дінӧ да вӧчис быд уджсӧ, мый сылы индыліс ӧксы.
Хирам вӧчис ыргӧнысь кык ыджыд сюръя. Быд сюръя вӧлі дас кӧкъямыс гырддза судта, а медым сюръясӧ гӧгӧртны, колӧ вӧлі дас кык гырддза кузьта кӧв.
Кыкнан сюръя йылас Хирам сывдӧмӧн вӧчис вит гырддза судта юр.
Юр гӧгӧрыс ӧшліс чепъясысь вӧчӧм сизим мичмӧдантор.
Мичмӧданторъяс вылас кык визьӧн вӧчис гранат кодь сяръяс, медым вевттьыны сюръяяслысь юрсӧ.
Посводзын сулалысь сюръяяслӧн юръясыс вӧліны нёль гырддза судта лилия дзоридз кодьӧсь. Кыкнан сюръялӧн юр вылас чепъясысь вӧчӧм мичмӧданторъяс вылӧ вӧлі вӧчӧма гранат кодь кыксё сяр. 
Тайӧ сюръяяссӧ Соломон сувтӧдіс крам посводзӧ, ӧтисӧ — веськыдладорас, мӧдсӧ — шуйгаладорас. Веськыдвыв сюръяыслы сетіс Якин ним, а шуйгаыслы — Воаз ним.
Кыкнан сюръялӧн юрыс вӧлі лилия дзоридз кодь.
abu
Сюръяяс вӧчӧм бӧрын Хирам вӧчис ыргӧнысь ыджыд гӧгрӧс вайӧртӧд, шуисны сійӧс саридзӧн.
Ӧтар дорышсяньыс мӧдар дорышӧдзыс сійӧ вӧлі дас гырддза пасьта, джуджданас вӧлі вит гырддза, а гӧгӧртны кӧ сійӧс кӧвйӧн, колана вӧлі комын гырддза кузьта кӧв.
Вайӧртӧдлысь доргӧгӧрсӧ вӧлі серпасалӧма тыкваясӧн. Быд гырддза пасьтаын вӧлі дас тыква кык визьӧн.
Серпасъяссӧ вӧлі ӧтторъя сывдӧма вайӧртӧдыскӧд.
Вайӧртӧдыс сулаліс дас кык ӧш вылын: куим ӧшкыс видзӧдісны войвылӧ, куимыс — рытыввылӧ, куимыс — лунвылӧ, и куимыс — асыввылӧ.
Ӧшъяслысь бекнысӧ вӧлі веськӧдӧма вайӧртӧд шӧрлань, на вылӧ и мыджсис вайӧртӧдыс.
Вайӧртӧдлӧн стенмыс вӧлі ки пыдӧс кызта, а дорышыс вӧлі чаша сяма, лилия дзоридз кодь.
Сэтчӧ тӧрис кык сюрс бат* мында ва.
Хирам нӧшта вӧчис ыргӧнысь дас джек.
Быд джек вӧлі нёль гырддза кузьта, нёль гырддза пасьта да куим гырддза судта.
Джек дор пӧвъяссӧ пельӧсӧдыс вӧлі топӧдӧма дзавйӧн.
Джек дор пӧвъясас да дзавъяс вылас вӧлі серпасалӧма левъясӧс, ӧшъясӧс да херувимъясӧс, а левъяс да ӧшъяс весьтас вылысяньыс да улысяньыс вӧлі серлӧдлӧма гартчан быдмӧг.
Быд джек сулаліс нёль ыргӧн гӧгыль вылын, гӧгыль тасъясыс тшӧтш вӧліны ыргӧнысь.
Джеклӧн нёльнан пельӧсас вӧліны тшупӧдъяс, на вылын сулаліс мыссян дозйыс. 
Тшупӧдъяссӧ вӧлі сывдӧма ыргӧнысь да серлӧдлӧма гартчан быдмӧгӧн.
Мыссян дозсӧ пуктӧм могысь джек шӧрын вӧлі ӧти гырддза джуджда гӧгрӧс кытш.
Кытшыс пасьтанас вӧлі гырддза да джын, сійӧс вӧлі серлӧдлӧма.
Ачыс джекыс эз вӧв гӧгрӧс, а вӧлі нёль пельӧса.
Джек дор пӧвъяс улас вӧлі нёль гӧгыль, гӧгыль чӧрссӧ вӧлі пысалӧма джек бердас.
Быд гӧгыль вӧлі гырддза да джын ыджда.
Гӧгыльясыс вӧліны тарантас гӧгыль кодьӧсь.
Гӧгыль чӧрссӧ, кытшсӧ, тассӧ да трубичасӧ — ставсӧ вӧлі сывдӧма ыргӧнысь.
Джеклӧн нёльнан пельӧсас чурвидзисны тшупӧдъяс, найӧс вӧлі ӧтторъя сывдӧма джекыскӧд.
Мыссян дозсӧ пуктӧм могысь вӧчӧм кытшлӧн судтаыс джек веркӧссяньыс вӧлі гырддза джын. Джеклысь воропъяссӧ вӧлі ӧтторъя сывдӧма джекыскӧд.
Джек воропъясӧ, джек дор пӧвъясӧ да быдлаӧ, кытчӧ позяна вӧлі, Хирам вундаліс херувим, лев да пальма серпасъяс, а джек гӧгӧрсӧ мичмӧдіс гартчан быдмӧг серпасӧн.
Татшӧм джексӧ Хирам вӧчис дасӧс.
Найӧ вӧліны ӧткодьӧсь да ӧтыдждаӧсь, быдӧнӧс вӧлі сывдӧма ӧтмоза.
Хирам вӧчис ыргӧнысь дас мыссян доз. Быд дозйӧ тӧрис нелямын бат мында ва. Мыссян дозйыс вӧлі нёль гырддза ыджда. Быд джек вылын сулаліс ӧти мыссян доз.
Вит джексӧ сувтӧдіс крам веськыдладорӧ, а мӧд витсӧ — крам шуйгаладорӧ. Вайӧртӧдсӧ сувтӧдіс крам веськыдладорӧ — асыв-лунвывла бокӧ.
Хирам вӧчис мыссян дозъяс, пӧим куралан зыръяс, вир резан тасьтіяс — Господьлӧн крамса став дозмук-кӧлуйсӧ, мый сылы тшӧктіс вӧчны Соломон ӧксы.
Вӧчис кык ыджыд сюръя да сюръя йылас чаша сяма юръяс, найӧс кытшалӧм-вевттьӧм могысь чепъясысь вӧчис кык мичмӧдантор.
Мичмӧданторъяс вылас вӧчис гранат кодь нёльсё сяр — кык визьӧн быд мичмӧдантор вылӧ, медым вевттьыны сюръяяслысь юрсӧ.
Вӧчис дас мыссян доз да на улӧ дас джек, вайӧртӧд да сы улын сулалысь дас кык ӧшкӧс, пӧим воръяс, пӧим куралан зыръяс да вир резан тасьтіяс.
Став тайӧ дозмук-кӧлуйыс, мый Хирам вӧчис Соломон ӧксылы Господьлӧн крамӧ, вӧлі весалӧм-мольӧдӧм ыргӧнысь.
Тайӧ дозмук-кӧлуйсӧ сывдісны-вӧчисны ӧксылӧн тшӧктӧм серти сёйӧд муын Йӧрдан ковтысын, Суккот да Цартан каръяс костын.
Быд вӧчӧмтор Соломон пуктіс-сувтӧдіс ас местаӧ.
Вӧчӧм дозмук-кӧлуйыс вӧлі сэтшӧм уна, мый весиг эз вермыны артавны, уна-ӧ ыргӧн муніс найӧс сывдӧм вылӧ.
Таысь кындзи Господьлӧн крамӧ Соломон вӧчӧдіс уна мукӧдтор: зарни висьпуктанін, вежа няньлы зарни пызан да весалӧм зарниысь бикокъяс. Вит бикоксӧ сувтӧдіс Вежасьыс-вежаин водзӧ веськыдладорас, а мӧд витсӧ — шуйгаладорас. Нӧшта зарниысь Соломон вӧчӧдіс дзоридзьяс, би дозъяс да чепӧляяс, весалӧм зарниысь вӧчӧдіс тасьтіяс, пуртъяс, вир резан тасьтіяс, кӧшъяс да пӧим воръяс.
Зарниысь вӧчисны тшӧтш крампытшкӧсса ӧдзӧсъяслысь дзирсӧ — Вежаинӧ да Вежасьыс-вежаинӧ пыран ӧдзӧсъяслысь дзирсӧ.
Господьлысь крам лэптӧмсӧ помалӧм бӧрын Соломон ӧксы вайис сэтчӧ Давид батьыслысь вежа козинъяс.
Эзысь-зарни да дозмук-кӧлуйсӧ сійӧ пуктіс Господьлӧн крамса озырлун видзанінӧ.
Соломон ӧксы корис ас дінас Ерусалимӧ израильса юрнуӧдысьясӧс, быд чужанкотырысь юралысьӧс да рӧдкутысьясӧс, медым вайны Давид карысь, мӧд ногӧн кӧ, Сионысь, Господьлысь Йитӧд кудсӧ.
Гажӧдчан лунъяс дырйи, этаним нима сизимӧд тӧлысьӧ, израильсаяс чукӧртчисны Соломон ӧксы дінӧ.
Израильса юрнуӧдысьяслӧн локтӧм бӧрын попъяс босьтісны Господьлысь Йитӧд кудсӧ, вежа чомсӧ да вежа дозмук-кӧлуйсӧ, мый вӧлі вежа чомйын, да ставсӧ тайӧс левитъяскӧд нуисны крамӧ.
Соломон ӧксы да Йитӧд куд водзӧ чукӧртчӧм Израиль войтыр вайисны вись пыдди ыж-кӧзаӧс да ӧш-мӧскӧс. Пемӧсыс вӧлі сы мында, мый некод эз вермы лыддьынысӧ.
Попъяс пыртісны Господьлысь Йитӧд кудсӧ крамлӧн пыді вежӧсӧ — Вежасьыс-вежаинӧ — да пуктісны сійӧс индӧм местаӧ херувимъяслӧн бордъяс улӧ.
Херувимъяслӧн бордъясыс вӧлі шевкнитчӧмаӧсь Йитӧд куд весьтын. Бордъяснаныс найӧ вевттисны кудсӧ да куд новлӧдлан потшъяссӧ.
Потшъясыс вӧліны сэтшӧм кузьӧсь, мый налысь помсӧ мортыс вермис аддзыны Вежасьыс-вежаин водзвылын ортсы вежӧсас сулалігӧн, мӧд ногӧн кӧ, Вежаинын сулалігӧн. Но ылыстчыны кӧ, потшъясыс эз тыдавны.
Найӧ ӧнӧдз сэнӧсь.
Кудйын вӧлі сӧмын кык изпӧв, найӧс сэтчӧ Хорив керӧсын пуктыліс Мӧисей. Буретш сэні Израиль войтырлӧн Египет муысь петӧм бӧрын Господь кӧрталіс накӧд йитӧд.
Кор попъяс петісны Вежаинысь, Господьлысь крамсӧ тыртіс кымӧр.
Кымӧр вӧсна попъяс эз вермыны водзӧ кесъявны, ӧд Господьлӧн дзирдлуныс тыртіс Господьлысь крамсӧ.
Сэки Соломон шуис: «Господь висьтавліс, мый Сійӧ лоӧ сьӧд кымӧрын.
Господьӧй, Тэныд ме лэпті керка, медым Тэ олін сэні нэмъяс чӧж».
Соломон ӧксы бергӧдчис сы водзын сулалысь Израиль войтырлань да бурсиис найӧс.
Сійӧ шуис: «Ошкӧм Господьлы, Израильлӧн Енлы! Ӧні Господь збыльмӧдіс сійӧ, мый Аслас вомӧн кӧсйысьліс менам Давид батьлы.
Господь шуліс:
”Ассьым Израиль войтырӧс Египетысь петкӧдӧмсянь Израиль чужанкотыръяслы вичмӧдӧм муясын Ме эг бӧрйывлы некутшӧм кар, медым сэні лэптісны Меным керка. 
[А ӧні Ме бӧрйи Ерусалим кар, медым сэні вӧлі Менам нимӧй.] 
Ме бӧрйи Давидӧс, медым сійӧ веськӧдліс Менам Израиль войтырӧн”.
Менам Давид батьӧй сьӧлӧмсяньыс кӧсйис лэптыны Господьлы, Израильлӧн Енлы, крам.
Но Господь шуис сылы: “Зэв бур, мый тэ кӧсъян лэптыны крам, кӧні лоас Менам нимӧй.
Но он тэ лэпты, а тэсянь чужысь пиыд лэптас Меным крам”.
Господь збыльмӧдіс Ассьыс шуӧм кывсӧ.
Ӧні ме пукала Давид батьлӧн юралан пуклӧсын да веськӧдла Израильӧн, кыдзи Господь и шуліс. Ме лэпті Израильлӧн Господь Енлы крам.
Крамас ме дасьті места Господьлӧн Йитӧд кудлы, кытчӧ пуктӧма йитӧдлысь изпӧвъяс. Тайӧ йитӧдсӧ Сійӧ кӧрталіс миян батьяскӧд Египет муысь найӧс петкӧдӧм бӧрын».
Став Израиль войтыр водзын Соломон сувтіс Господьлӧн висьпуктанін водзӧ, лэптіс кисӧ енэжлань да шуис: «Господьӧй, Израильлӧн Енмӧй!
Тэ кодь мӧд енмыс абу енэжас ни му вылас!
Тэ видзан кӧрталӧм йитӧдтӧ да буралӧмтӧ Аслад кесйӧгъясыд дінӧ, кодъяс став сьӧлӧмсяньыс олӧны Тэнад кӧсйӧм серти.
Тэ кутін Ассьыд кывтӧ, мый шулін Аслад Давид кесйӧглы, менам батьлы.
Ӧні Тэ збыльмӧдін сійӧс, мый шулін Аслад вомӧн.
Господьӧй, Израильлӧн Енмӧй, збыльмӧд тшӧтш Ассьыд мӧд кӧсйысьӧмтӧ, мый Тэ шулін Аслад кесйӧглы, менам Давид батьлы. Тэ ӧд шулін сылы: “Тэсянь чужысьяс кӧ тэ моз кутасны ветлыны Ме водзын веськыд туйӧд, сэки на пӧвстысь пыр лоӧ ӧксы, коді кутас веськӧдлыны Израиль войтырӧн Ме водзын”.
Израильлӧн Енмӧй, мед инас Тэнад кӧсйысьӧмыд, мый Тэ шулін Аслад Давид кесйӧглы, менам батьлы.
Збыльысь, му вылын-ӧ Енмыслы овны?
Енэжыс да енэжвывса енэжъясыс кӧ оз вермыны тӧрӧдны Тэнӧ, дерт нин, тайӧ крамыс, кодӧс ме лэпті [Тэнад нимлы], оз вермы тӧрӧдны Тэнӧ.
Господьӧй Енмӧй, бергӧдчы Аслад кесйӧглань да кывзы сылысь корӧмсӧ!
Кыв Аслад кесйӧглысь Тэ водзын талун кевмысьӧмсӧ!
Тэнад синмыд мед лун и вой видзӧдас тайӧ крамыс вылӧ. Тэ ӧд шулін, мый Тэнад нимыд лоас сэні.
Кыв Аслад кесйӧглысь тайӧ крамас кевмысьӧмсӧ.
Кыв Аслад кесйӧглысь да Аслад Израиль войтырлысь кевмӧмсӧ, кор найӧ шыасясны Тэ дінӧ тайӧ крамас.
Кыв найӧс енэжсяньыд, Аслад оланінсянь. Кыв найӧс да прӧстит найӧс.
Мыжаласны кӧ кодӧскӧ мӧд мортлы паныд мыж вӧчӧмысь, и сылы ковмас локны тайӧ крамас да Тэнад висьпуктанін водзын кыв сетӧмӧн шуны, мый абу мыжа, сэки Тэ кыв енэжсяньыд да веськыда мыжды ассьыд кесйӧгъястӧ: мыжаӧс мыжды, мед сылы юр вылас усьӧ аслас мыжыс, а мыжтӧмӧс дорйы да мынтысь сылы веськыдлуныс серти.
Тэнад Израиль войтырыд кӧ Тэныд паныд мыж вӧчас да та вӧсна вӧрӧг пасьвартас найӧс, а сэсся кӧ найӧ шыасясны Тэ дінӧ, кутасны нимӧдны Тэнӧ да корны-кевмыны Тэ водзын тайӧ крамас, сэки Тэ кыв енэжсяньыд да прӧстит Израиль войтырыдлысь мыжсӧ. Бӧр бергӧд найӧс сійӧ муас, мый Тэ сетін налӧн батьяслы.
Израиль войтырлӧн Тэныд паныд мыж вӧчӧм вӧсна кӧ енэжыс оз сет зэрсӧ, но сэсся кӧ найӧ кевмысясны тайӧ крамас, нимӧдасны Тэнӧ да бергӧдчасны мыжсьыныс, мыйысь Тэ мыждін найӧс, сэки Тэ кыв найӧс енэжсяньыд да прӧстит Аслад кесйӧгъяслысь да Израиль войтырыдлысь мыжсӧ. Петкӧдлы налы бур туйсӧ, кыті налы колӧ мунны, да мӧдӧд зэрсӧ Аслад му вылӧ, мый Тэ вичмӧдін Аслад войтырыдлы.
Налӧн му вылӧ кӧ пуксяс тшыг кад либӧ паськалас пӧрӧс висьӧм, налысь няньсӧ кӧ бырӧдас сотысь тӧвру, кутшӧмкӧ висьӧм, саранча либӧ лёльӧ, налӧн му вылӧ кӧ уськӧдчас вӧрӧг, суас кӧ найӧс ускӧттьӧ либӧ висьӧм, но Тэнад Израиль войтырысь кӧ кӧть ӧти морт либӧ ставнас войтырыд шыасяс Тэ дінӧ да кевмысяс аслас шог дырйи, и найӧ кӧ нюжӧдасны кинысӧ тайӧ крамланьыс, сэки Тэ кыв найӧс енэжсяньыд, Аслад оланінсянь, да прӧстит найӧс.
Тэ ӧд тӧдан быдӧнлысь сьӧлӧмсӧ, сӧмын ӧтнадӧн Тэ тӧдан мортлысь сьӧлӧмсӧ.
Мынтысь быдӧнлы сылӧн уджъясыс серти, медым Тэнад войтырыд став олӧм чӧжыс оліс Тэысь полӧмӧн-вежавидзӧмӧн сійӧ муас, мый Тэ сетін миян батьяслы.
Весиг кӧ йӧз муысь локтысь, коді абу Тэнад Израиль войтыр пӧвстысь, кылас Тэнад ыджыд нимыд, вына киыд да ён сойыд йылысь, локтас ылі муысь Тэнад нимыд вӧсна и кутас кевмысьны тайӧ крамланьыс бергӧдчӧмӧн, сэки Тэ кыв сійӧс енэжсяньыд, Аслад оланінсянь. Кора Тэнӧ, вӧч йӧз муысь локтысьлӧн кевмӧм серти, медым мувывса войтыръяс тӧдісны Тэнсьыд нимтӧ да Тэнад Израиль войтырыд моз полісны-вежавидзисны Тэысь. Сэки найӧ тӧдмаласны, мый Тэнад нимлы сиӧма тайӧ крамсӧ, мый ме лэпті.
Тэнад тшӧктӧм серти кӧ Тэнад войтырыд тышӧ петас вӧрӧглы паныд, кутас кевмысьны Тэныд, Господьӧй, да бергӧдчас Тэнад бӧрйӧм карлань да крамлань, мый ме лэпті Тэныд, сэки Тэ кыв налысь корӧм-кевмӧмсӧ енэжсяньыд да отсав налы.
Но кор найӧ мыж вӧчасны Тэныд паныд, ӧд мыж вӧчтӧм мортыс абу, и Тэ скӧрман на вылӧ да сетан найӧс вӧрӧг киӧ, и кор найӧс нуӧдасны пленӧ ылӧ либӧ матӧ, и сэні кӧ найӧ сьӧлӧмсяньныс бергӧдчасны да Тэ водзын кевмысьӧмӧн висьтасясны, ми пӧ мыжмим, лёксӧ да мыжсӧ вӧчим, и став сьӧлӧмсяньныс кӧ шыасясны Тэ дінӧ вӧрӧг муын, кытчӧ найӧс нуӧдісны, пондасны кевмысьны Тэныд да кевмысиганыс бергӧдчасны асланыс мулань, мый Тэ сетін налӧн батьяслы, карлань, мый Тэ бӧрйин, да крамлань, мый ме лэпті Тэныд, сэки Тэ кыв налысь корӧм-кевмӧмсӧ енэжсяньыд, Аслад оланінсянь, да отсав налы.
Прӧстит Ассьыд войтыртӧ, ӧд найӧ мыж вӧчисны Тэныд паныд. Прӧстит налысь мыжъяснысӧ. Небзьӧд пленӧ босьтысьяслысь сьӧлӧмсӧ, медым найӧ вӧліны бур сьӧлӧмаӧсь Тэнад войтырыд дінӧ.
Ӧд найӧ — Тэнад войтыр да Тэнад бӧрйӧм йӧз. Тэ петкӧдін найӧс Египетысь, тайӧ донӧдӧм пачсьыс.
Енмӧй, эн вешты синтӧ аслад кесйӧг да Аслад Израиль войтыр вылысь, [веськӧд пельтӧ налань,] кыв налысь корӧм-кевмӧмсӧ, кор найӧ шыасясны Тэ дінӧ. Господьӧй Ыджыдӧй, Египетысь батьяснымӧс петкӧдігӧн Тэ торйӧдін найӧс Аслыд мувывса став войтыр пӧвстысь, кыдзи шулін аслад Мӧисей кесйӧг пыр».
Висьпуктанін водзын пидзӧс вылас сулалӧмӧн да кисӧ енэжлань лэптӧмӧн Соломон вайис став ассьыс корӧм-кевмӧмсӧ Господьлы.
Кор помаліс кевмысьӧмсӧ, сувтіс пидзӧс вывсьыс. Сэсся гораа шуалӧмӧн бурсиис став Израиль войтырсӧ:
«Ошкӧм Господь Енлы, коді сетіс Аслас Израиль войтырлы лӧнь олӧм, кыдзи и кӧсйысис.
Сійӧ збыльмӧдіс став бур кӧсйысьӧмсӧ, мый шуліс Аслас Мӧисей кесйӧг пыр.
Господь, миян Енным, мед пыр лоӧ миянкӧд, кыдзи Сійӧ пыр вӧлі миян батьяскӧд. Сійӧ мед оз коль да оз эновт миянӧс. Мед бергӧдас миянлысь сьӧлӧмнымӧс Асланьыс, медым ми ветлім Сылӧн туйясӧд да олім Сылӧн индӧд-тшӧктӧмъяс серти, мый Сійӧ сетіс миян батьяслы.
Мед менам кевмысьӧмӧй, мый ме талун вайи Господь Еннымлы, лун и вой лоӧ Сы водзын. Мед Сійӧ быд кадӧ отсалас меным, Аслас кесйӧглы, да Аслас Израиль войтырлы. Сэки му вылас олысь войтыръяс тӧдмаласны, мый Господь эм Ен, и мӧдыс абу.
Тіян сьӧлӧмныд мед лоӧ йитчӧма Господькӧд, миян Енкӧд, медым и водзӧ ті олінныд Сылӧн индӧд-тшӧктӧмъяс серти».
Ӧксы да сыкӧд став Израиль войтыр вайисны висьяс Господьлы.
Соломон вайис Господьлы бурасян вись пыдди кызь кык сюрс ӧшкӧс да сё кызь сюрс ыжӧс.
Тадзи ӧксы да став Израиль войтыр вежӧдісны Господьлысь крамсӧ.
Сійӧ жӧ лунӧ ӧксы вежӧдіс Господьлӧн крам йӧрлысь шӧр юкӧнсӧ, сотіс сэні сотан вись да нянь вись, тшӧтш бурасян вись пыдди вайӧм пемӧсъяслысь госсӧ. Ӧд ыргӧн висьпуктаніныс, мый сулаліс Господь водзын, вӧлі ичӧт, сэтчӧ эз тӧр сотан вись, нянь вись да пемӧсъяслӧн госыс.
Сійӧ лунъясӧ Соломон став Израиль войтыркӧд пасйис гаж. Лево-Хаматсянь Египет мудорса шорӧдз израильсаяс чукӧртчисны Соломонкӧд ӧтвыв тайӧ гаж вылас.
Асланыс Господь Ен водзын найӧ гажӧдчисны сизим лун чӧж, сэсся нӧшта на гажӧдчисны сизим лун — ставнас дас нёль лун. [Крам дорын найӧ сёйисны-юисны да кевмысисны Господь Ен водзын.]
Гажӧдчан лунъяс помасьӧм бӧрын Соломон лэдзис войтырсӧ.
Найӧ бурсиисны ӧксыӧс да мунісны гортаныс долыд сьӧлӧмӧн, нимкодясисны став бурсьыс, мый Господь вӧчис Аслас Давид кесйӧглы да Аслас Израиль войтырлы.
Соломон помаліс вӧчны Господьлысь крамсӧ, ассьыс ӧксы керкасӧ да ставсӧ, мый кӧсйис вӧчны. Гаваонын моз Господь мӧдысь петкӧдчис Соломонлы.
Господь шуис сылы: «Ме кылі тэнсьыд кевмысьӧмтӧ да корӧмтӧ 
[и ставсӧ вӧчи тэнад кевмӧм-корӧм серти]. 
Тайӧ крамсӧ, мый тэ лэптін, Ме вежӧді, медым сэні пыр вӧлі Менам нимӧй.
Менам синмӧй пыр кутас видзӧдны сы вылӧ, сійӧ пыр лоӧ Менам сьӧлӧмын.
Кутан кӧ тэ ветлыны Менам чужӧмбан водзын Давид батьыд моз сӧстӧм сьӧлӧмӧн да веськыда, кутан кӧ вӧчны ставсӧ, мый Ме тшӧкта тэныд, кутан кӧ овны Менам индӧд-тшӧктӧмъяс серти, сэки Ме пыр кежлӧ зумыдмӧда тэнсьыд ӧксыалӧмтӧ Израильын, кыдзи ме кӧсйысьлі тэнад Давид батьлы. Ме шулі сылы, мый сылӧн рӧдысь петӧм морт кутас пыр пукавны Израильлӧн юралан пуклӧсын.
Но ті да тіянсянь чужысьяс кӧ кежанныд Меысь, онӧ кутӧй овны Менам индӧд-тшӧктӧмъяс серти, мый Ме сеті тіянлы, кутанныд кӧ кесъявны да юрбитны мукӧд енъяслы, сэки Ме бырӧда Израиль войтырӧс сійӧ му вывсьыс, мый Ме сеті налы. А тайӧ крамсӧ, мый Ме вежӧді-торйӧді Аслым, Ме ӧтдорта Аслам чужӧмбан водзысь, и Израиль войтыр лоӧ серамтуйын войтыръяс пӧвстын.
Тайӧ ыджыд крам дінті мунысь весьӧпӧрӧмӧн да шутёвтӧмӧн юалас: “Мый вӧсна нӧ Господь тадзи вӧчис тайӧ муыскӧд да тайӧ крамыскӧд?”
Сылы вочавидзасны: “Израиль войтыр эновтіс Господьӧс, ассьыс Енсӧ, коді петкӧдіс налысь батьяссӧ Египет муысь. Найӧ сирасисны мукӧд енъяс дінӧ, юрбитісны-кесъялісны налы. Та вӧсна Господь ыстіс налы став тайӧ лёксӧ”».
Кызь во чӧжӧн Соломон лэптіс кык керка — Господьлы крам да аслыс ӧксы керка. Тирса Хирам ӧксы сетіс Соломонлы сус пуяс, кипарис пуяс да зарни сы мында, мыйта Соломон корис. Таысь Соломон ӧксы сетіс Хирамлы Галилея муысь кызь кар.
Хирам локтіс Тирысь, медым видзӧдлыны Соломонӧн сетӧм каръяссӧ. Но каръясыс сылы эз кажитчыны.
Сійӧ шуис Соломонлы: «Мыйсяма каръяс тэ меным сетін, вокӧй?»
Сійӧ нимтіс тайӧ каръяс гӧгӧр мусӧ Кавул* муӧн. Тадзи ӧнӧдз шусьӧ.
Тайӧ каръяслӧн доныс, мый Хирам мынтіс Соломонлы, вӧлі сё кызь талант зарни.
Медым лэптыны Господьлы крам, аслыс ӧксы керка, Милло*, Ерусалим стенъяс, Хацор, Мегиддо да Гезер каръяс, Соломон ӧксы уджӧдіс йӧзӧс, кодъяс уджалӧмнас мынтісны вот.
Фараон, египетса ӧксы, водзынджык уськӧдчыліс Гезер кар вылӧ да сотіс сійӧс. Сэтчӧс олысь ханаансаясӧс виаліс, а карсӧ сетіс козин пыдди аслас нывлы, Соломонлӧн гӧтырлы.
Соломон лэптіс Гезер кар да Улыс Бет-Хорон. Овтӧминын сійӧ лэптіс Баалат да Тадмор каръяс. Нянь да эмбур, тарантасъяс да вӧвъяс видзӧм могысь кыпӧдіс аслыс каръяс. Ерусалимын, Ливанын да аслас киподувса муын сійӧ лэптіс ставсӧ, мый кӧсйис.
Аморейясысь, хеттейясысь, перезейясысь, [ханаансаясысь,] хивейясысь, евуссаясысь [да гергесейясысь] ловйӧн кольӧмаясӧс Соломон уджӧдіс. Тадзи найӧ талунӧдз мынтӧны сылы вот. Тайӧ йӧзыс эз вӧвны Израиль войтырысь, а чужисны Израиль муын мукӧд войтыръяссянь, кодъясӧс израильсаяс эз вермыны дзикӧдз бырӧдны.
Израильсаясӧс Соломон эз пуктыв кесйӧгъясӧн. Ӧксылы найӧ кесъялісны веськӧдлысьясӧн да тышкайӧзӧн, веськӧдлісны тарантаса тышкайӧзӧн да верзьӧмаясӧн.
Соломонлӧн вӧлі витсё ветымын морт, кодъяс юралісны-веськӧдлісны сылӧн уджалысьясӧн.
Фараонлӧн нылыс вуджис Давид карысь аслас керкаӧ. Тайӧ керкасӧ сылы вӧчис Соломон, сійӧ лэптіс тшӧтш Милло, Давид карлысь юкӧнсӧ.
Куимысь вонас Соломон вайліс сотан да бурасян висьяс висьпуктанін вылын, мый сійӧ лэптіс Господьлы, и сэні Господь водзын тшынӧдчис.
Крамыс сэки вӧлі дась нин.
Соломон вӧчис корабльяс Эцион-Гевер карын. Карыс сулаліс Эдом муын Гӧрд саридз дорын, Элат карсянь матын.
Хирам мӧдӧдіс корабльясӧн ассьыс йӧзсӧ, кодъяс бура кужисны кывтны саридз вывті.
Соломонлӧн кесйӧгъяскӧд найӧ кывтісны Офирӧ да вайисны сэтысь Соломон ӧксылы нёльсё кызь талант зарни.
Саваса ӧксы-ань кыліс, мый Соломонлӧн нималӧмыс вайӧ ошкӧм Господьлы, да петіс туйӧ, медым нӧдкывъясӧн тӧдмавны Соломонлысь мывкыдлунсӧ.
Сійӧ локтіс Ерусалимӧ зэв уна йӧзкӧд. Верблюдъяс вылын найӧ вайисны зэв уна зарни, дона изъяс да чӧскыд ӧвтанторъяс.
Ӧксы-ань аддзысис Соломонкӧд. Сійӧ сёрнитіс Соломонкӧд быдтор йылысь, мый кӧсйис тӧдны.
Соломон вочавидзис ӧксы-аньлӧн став юалӧмыс вылӧ. Эз вӧв сэтшӧмтор, мый вылӧ эськӧ сійӧ эз вермы вочавидзны.
Саваса ӧксы-ань гӧгӧрвоис, мый Соломон зэв мывкыд морт. Сійӧ аддзыліс керкасӧ, мый Соломон лэптіс, аддзыліс, кутшӧм озыр Соломонлӧн пызаныс, кыдзи кесъялӧны, олӧны да пасьтасьӧны сылӧн йӧзыс, кесйӧгъясыс да вина кисьталысьясыс. Аддзыліс тшӧтш пемӧсъясӧс, кодъясӧс Соломон вайис сотан вись пыдди Господьлӧн крамын.
Ёна шензьӧмӧн ӧксы-ань шуис Соломон ӧксылы: «Ставыс, мый ме кывлі ас муын тэнад уджъясыд да мывкыдлуныд йылысь, збыль.
Сэки ме эг эскы, а ӧні эска, ӧд аслам синмӧн ставсӧ аддзылі. Меным, вӧлӧмкӧ, сӧмын мыйтакӧ висьтавлӧмаӧсь тэнад мывкыдлуныд йылысь.
Тэнад мывкыдлуныд да озырлуныд ёна унджык на менам кывлӧм дорысь.
Шудаӧсь тэнад йӧзыд да тэнад кесйӧгъясыд, кодъяс век тэкӧд орччӧнӧсь да кылӧны тэнсьыд мывкыд сёрнитӧ.
Ошкӧм Господьлы, тэнад Енлы! Аслас кӧсйӧм серти Сійӧ пуксьӧдіс тэнӧ Израильлӧн юралан пуклӧсӧ.
Господь дугдывтӧг радейтӧ Израиль войтырӧс, та вӧсна пуктіс тэнӧ ӧксыӧ, медым тэ юралін да мыждін веськыда».
Ӧксы-ань козьналіс Соломон ӧксылы сё кызь талант зарни, дона изъяс да унасьыс-уна чӧскыд ӧвтантор.
Та мында ӧвтанторйыс, мый саваса ӧксы-ань козьналіс Соломон ӧксылы, Израильын эз на вӧвлы.
Хирамлӧн пыжъясӧн, мыйӧн ваявлісны Офирысь зарни, вайисны сэтысь Соломонлы тшӧтш зэв уна гӧрд пу да дона из.
Гӧрд пуысь ӧксы тшӧктіс вӧчны Господьлӧн крамӧ да аслас ӧксы керкаӧ поскӧд каян кутчысянін, сьылысьяслы гусли да арфа.
Та мында гӧрд пусӧ таӧдз и та бӧрти эз вайлыны.
Козинъяс кындзи Соломон ӧксы сетіс саваса ӧксы-аньлы ставсӧ, мый сійӧ корис да кӧсйис.
Сэсся ӧксы-ань аслас йӧзкӧд бӧр муніс аслас муӧ.
Быд во Соломонлы вайлісны квайтсё квайтымын квайт талант зарни. Таысь ӧтдор вузасьысьяс, ӧксыув муясын юралысьяс да аравияса ӧксыяс мынтылісны сылы вот.
Дорӧм зарниысь Соломон ӧксы вӧчӧдіс кыксё ыджыд сайӧд, быд сайӧд вылӧ муніс квайтсё сикель зарни.
Нӧшта вӧчӧдіс куимсё ичӧтджык сайӧд, быд сайӧд вылӧ муніс куим мина* дорӧм зарни.
Сайӧдъяссӧ ӧксы пуктіс ливанса пуысь вӧчӧм керкаӧ.
Слӧн лыысь ӧксы вӧчӧдіс ыджыд юралан пуклӧс, сійӧс эжисны весалӧм зарниӧн.
Юралан пуклӧс бердас йитісны квайт тшупӧда сод.
Пуклӧс мышкыс вӧлі гӧгрӧс. Пуклӧс ӧтар-мӧдарладорас вӧчисны гырддзаув, а быд гырддзаув дорӧ вӧчисны левӧс.
Нӧшта вӧчисны дас кык левӧс, кодъяс сулалісны квайт тшупӧд вылын ӧтар-мӧдар бокас.
Татшӧм пуклӧсыс эз вӧв сэсся некутшӧм муын.
Соломон ӧксылӧн став юан дозйыс вӧлі зарниысь, а ливанса пуысь вӧчӧм керкаын став дозмук-кӧлуйыс вӧлі весалӧм зарниысь.
Соломон веськӧдлан кадӧ эзысьсӧ эз вылӧ донъявны, та вӧсна эзысьысь вӧчӧмторйыс эз вӧв.
Хирамлӧн корабльясысь ӧтдор саридз вылын Соломон ӧксылӧн вӧліны тшӧтш фарсисса корабльяс.
Куим во пытшкас ӧтчыдысь фарсисса корабльяс вайлісны зарни-эзысь, слӧн лы, ӧблезянаясӧс да павлинъясӧс.
Мувывса став ӧксыыс дорысь Соломон вӧлі медся озыр да медся мывкыд.
Мувывса став йӧзыс* зілисны аддзывны Соломонӧс да кывзыны сійӧс, ӧд сылӧн вӧлі Енсянь мывкыдлун.
Соломон дінӧ волысьяс вайлісны аскӧдныс козинъяс: эзысь-зарниысь вӧчӧм дозмук-кӧлуй, паськӧм, шыпуртъяс, чӧскыд ӧвтанторъяс, вӧвъясӧс да мулъясӧс. Тадзи вӧлі быд во.
Соломон лӧсьӧдіс аслыс тарантаса вӧвъясӧс: 
тарантас лыдыс вӧлі сюрс нёльсё, а вӧвъяслӧн лыдыс — дас кык сюрс.
Сійӧ видзис найӧс тарантаса тышкайӧзлы торйӧдӧм каръясын да аслас Ерусалим карын. 
[Ефрат юсянь Филистим муӧдз да Египетӧдз став ӧксыыс вӧліны Соломон кипод улынӧсь.]
Соломон ӧксы дырйи Ерусалимын эзысьыс вӧлі из мында, а сус пуыс вӧлі сы мында, мыйта вӧлі керӧсбердса муын быдмысь инжир пуыс.
Вӧвъяссӧ Соломонлы вайлісны Египетысь да Куваысь.
Найӧс ньӧблісны ӧксылӧн вузасьысьяс.
Египетысь вайӧм тарантасыс сулаліс квайтсё сикель эзысь, а вӧлыс — сё ветымын.
Соломон ӧксылӧн вузасьысьяс ставсӧ тайӧс вайлісны тшӧтш хеттей войтырлӧн ӧксыяслы да арамейяслӧн ӧксыяслы.
Фараон нылысь ӧтдор Соломонлӧн вӧлі мукӧд войтыръяс пиысь босьтӧм уна гӧтыр, кодъясӧс сійӧ тшӧтш радейтіс. Найӧ вӧліны моав, аммон, эдом, сидон да хеттей войтыръясысь, кодъяс йылысь Господь шуліс Израиль войтырлы: «Энӧ рӧдвужасьӧй накӧд, медым найӧ эз кежӧдны тіянӧс асланыс енъяс дорӧ».
Но Соломонлы мусаӧсь вӧліны тайӧ аньясыс.
Сылӧн вӧлі сизимсё гӧтыр да куимсё кесйӧг-гӧтыр.
Тайӧ аньясыс кежӧдісны Соломонлысь сьӧлӧмсӧ асланыс енъяс дорӧ.
Пӧрысьладорыс Соломонлӧн сьӧлӧмыс эз вӧв йитчӧма аслас Господь Енкӧд сідзи, кыдзи вӧлі Давид батьыслӧн.
Соломон кутіс юрбитны сидонсаяслӧн Астарта енлы да аммон войтырлӧн зывӧк Милком идоллы.
Соломон вӧчис Господь водзын шогмытӧмсӧ. Сійӧ эз тырвыйӧ кывзысь Господьлысь, кыдзи кывзысис сылӧн Давид батьыс.
Ерусалимсянь асыввылын сулалысь керӧс вылын Соломон вӧчис моавсаяслӧн зывӧк Кемош идоллы да аммон войтырлӧн зывӧк Молок идоллы юрбитанінъяс.
Татшӧм юрбитанінъяссӧ сійӧ вӧчис тшӧтш мукӧд войтыръяс пиысь босьтӧм гӧтыръясыслы, кодъяс сэні тшынӧдчисны да вись вайисны асланыс енъяслы.
Господь ёна скӧрмис Соломон вылӧ, мыйла сійӧ кежис аслас Господьысь, Израильлӧн Енмысь, коді кыкысь петкӧдчыліс сылы да ӧлӧдліс, мед сійӧ эз юрбит мукӧд енъяслы.
Но Соломон эз вӧч, мый Господь [Ен] тшӧктіс сылы.
Та вӧсна Господь шуис Соломонлы: «Татшӧм оласногсьыд да сыысь, мый тэ торкин Менсьым йитӧдӧс да эн ов Менам тшӧктӧмъяс серти, мый Ме сеті тэныд, Ме босьта тэнсьыд юралӧмтӧ да сета тэнад кесйӧглы.
Но Давид батьыд вӧсна Ме ог вӧч тайӧс тэнад олан лунъяс дырйи.
Ме нетшышта юралӧмсӧ тэнад пиыдлӧн киысь, но ог ставнас.
Ерусалим кар вӧсна, мый Ме бӧрйи, да Аслам Давид кесйӧгӧй вӧсна Ме коля пиыдлы ӧти чужанкотыр».
Соломонлы паныд Господь кыпӧдіс эдомса ӧксы рӧдысь Хадад нима мортӧс.
Кор Давид тышкасис Эдомын, сылӧн тышкайӧзӧн веськӧдлысь Йоав муніс дзебны виӧмаясӧс. Та дырйи Йоав виис Эдомысь став айуловсӧ. Квайт тӧлысь чӧж израильса тышкайӧз вӧліны Эдомын да виалісны сэтысь став айуловсӧ. Но Хадад да батьыслӧн ӧткымын эдомса кесйӧг пышйисны Египетӧ.
Хадад сэки вӧлі ичӧт зонка на.
Мадиан му эновтӧм бӧрын найӧ воисны Паранӧ. Сэтысь босьтісны аскӧдныс сэтчӧс олысьяссӧ да мунісны Египетӧ фараон, египетса ӧксы, дінӧ. 
[Хадад пырис фараон дінӧ.] 
Фараон сетіс Хададлы керка, му да сёян-юан.
Фараонлы сьӧлӧм вылас воис Хадад. Сійӧ сетіс Хадад сайӧ аслас Тахпенес гӧтырлысь, ӧксы-аньлысь, чойсӧ.
Тахпенеслӧн чойыс чужтіс Хададлы Генуват нима пиӧс.
Тахпенес быдтіс чойыслысь писӧ фараон керкаын.
Сэні Генуват оліс фараон пиянкӧд ӧтлаын.
Кор Хадад тӧдмаліс, мый Давид да сылӧн тышкайӧзӧн веськӧдлысь Йоав абу нин ловъяӧсь, шуис фараонлы: «Лэдз менӧ бӧр мунны аслам муӧ».
Фараон юаліс: «Тэныд ӧмӧй мыйкӧ оз тырмы ме ордын? Мыйла тэ кӧсъян мунны аслад муӧ?»
Хадад вочавидзис: «Тырмӧ. Но кора, лэдз менӧ».
[И муніс Хадад аслас муӧ.]
Соломонлы паныд Енмыс нӧшта кыпӧдіс Элиадлысь Разон писӧ, коді вӧлі пышйӧма аслас ыджыдысь, цоваса Ададезер ӧксыысь. Кор Давид пасьвартіс Ададезерӧс, Разон чукӧртіс йӧзӧс да лои налӧн веськӧдлысьӧн.
Найӧ мунісны Дамаскӧ, овмӧдчисны сэтчӧ да босьтісны тайӧ карсӧ асланыс кипод улӧ.
Соломонлӧн олан лунъяс чӧж Разон, арамейяслӧн ӧксы, эз дугдыв Израильлы паныд кыпӧдчыны.
Хадад моз Разон уна лёк вӧчис Израильлы.
Соломон ӧксылы паныд кыпӧдчис Неватлӧн Еровам пиыс, коді кесъяліс сы дінын. Еровам вӧлі Цереда карысь Ефрем чужанкотырысь. Дӧва мамсӧ шуисны Церуя.
Со кыдзи Еровам кыпӧдчис Соломонлы паныд. Кор Соломон вӧлі лэптӧ Милло да дзоньталӧ Давид батьыслысь кар стенъяссӧ, сылы синмас шыбитчис вына том морт — тайӧ вӧлі Еровам.
Соломон аддзис, мый сійӧ киподтуя морт и пуктіс сійӧс веськӧдлыны Ӧсип рӧдысь уджалысьясӧн.
Ӧтчыд Ерусалимысь петігӧн Еровамлы туй вылас паныдасис Силомысь Ахий нима пророк. Пророк вылын вӧлі выль кышан.
Найӧ вӧліны ӧтнанысӧсь.
Ахий пӧрччис ас вывсьыс выль кышансӧ, косяліс дас кык пельӧ да шуис Еровамлы: «Босьт аслыд дас юкӧнсӧ. Господь, Израильлӧн Ен, тадзи висьталӧ: “Ме босьта Соломон киысь юралӧмсӧ да сета тэныд дас чужанкотыр. Ӧти чужанкотыр Ме коля Соломонлы Давид батьыс вӧсна да Ерусалим кар вӧсна, мый Ме бӧрйи Израиль чужанкотыръяслӧн став карыс пӧвстысь.
Ме вӧча тадзи, ӧд Израиль войтыр эновтіс Менӧ да кутіс юрбитны сидонсаяслӧн Астарта енлы, моавсаяслӧн Кемош енлы да аммон войтырлӧн Милком енлы. Найӧ оз ветлыны Менам туйӧд, оз вӧчны Ме водзын шогманасӧ, оз овны Менам индӧд-тшӧктӧмъяс серти, оз овны Соломонлӧн Давид батьыс моз.
Ме ог босьт Соломонлысь юралӧмсӧ, ӧд пукті сійӧс юравны олӧм помӧдзыс. Тадзи вӧча Аслам Давид кесйӧгӧй вӧсна, кодӧс Ме бӧрйи да коді оліс Менам индӧд-тшӧктӧмъяс серти.
Ме босьта юралӧмсӧ Соломон пиыслӧн киысь да сета тэныд дас чужанкотыр.
Соломонлӧн пиыслы коля ӧти чужанкотыр, медым Менам Давид кесйӧгсянь чужысь юралас нэмъяс чӧж Ме водзын Ерусалим карын, мый Ме бӧрйи Аслым, медым сэні вӧлі Менам нимӧй.
Ме бӧрйи тэнӧ, Еровам, медым тэнад кипод улын вӧлі ставыс, мый тэ кӧсъян. Тэ лоан Израиль войтырлы ӧксыӧн.
Тэ кӧ пондан кывзысьны Менсьым, ветлыны Менам туйясӧд, вӧчны Ме водзын шогманасӧ да овны Менам индӧд-тшӧктӧмъяс серти, кыдзи оліс Менам Давид кесйӧгӧй, Ме лоа тэкӧд. Давидлысь рӧдсӧ моз Ме вӧча зумыдӧн тэнсьыд рӧдтӧ. Ме сета тэныд Израильӧс.
Соломонлӧн мыжъясыс вӧсна Ме янӧда Давидлысь рӧдсӧ, но ог пыр кежлӧ”».
Соломон корсис вины Еровамӧс, но мӧдыс пышйис Египетӧ Шишак ӧксы дінӧ, и сэні оліс Соломонлӧн кувтӧдз.
Соломон ӧксыалӧм дырйи мукӧд лоӧмторъяс йылысь, сылӧн уджъяс да мывкыдлун йылысь гижӧма “Соломонлӧн уджъяс” небӧгӧ.
Нелямын во чӧж Соломон ӧксыаліс Ерусалим карын, веськӧдліс став Израиль войтырӧн.
Сэсся Соломон куліс да вуджис батьясыс дінӧ. Сійӧс дзебисны Давид батьыслӧн карӧ. Соломон бӧрти ӧксыӧ пуксис сылӧн Ровоам пиыс.
Ровоам локтіс Сикемӧ, ӧд сэтчӧ чукӧртчис Израиль войтыр, медым пуктыны сійӧс ӧксыӧ.
Та йылысь кывліс Неватлӧн Еровам пиыс. Соломон ӧксыысь пышйӧм бӧрын сійӧ оліс Египетын, а ӧні бӧр локтіс сэтысь.
Израильсаяс корисны Еровамӧс да мунісны сыкӧд Ровоам [ӧксы] дінӧ.
Найӧ шуисны Ровоамлы:
«Тэнад батьыд пуктіс миян вылӧ сьӧкыд сийӧс, но тэ кокньӧд миянлысь сьӧкыд уджнымӧс да босьт миян вылысь сийӧссӧ, мый батьыд пуктіс миян вылӧ. Сэки ми кутам кесъявны тэныд».
Ровоам шуис налы: «Ӧні мунӧй, а коймӧд луннас бӧр локтӧй ме дінӧ».
Войтырыс разӧдчис.
Ровоам ӧксы муніс сёрнитны израильса юрнуӧдысьяскӧд, кодъяс кесъявлісны Соломон батьыслы на. Сійӧ юаліс налысь: «Мый ті шуанныд? Мый меным вочавидзны тайӧ войтырыслы?»
Найӧ шуисны: «Тэ кӧ талун кутан кесъявны тайӧ войтырыслы, могмӧдан налысь корӧмсӧ да бурногӧн вочавидзан налы, найӧ став олӧм чӧжныс лоасны тэныд кесйӧгъясӧн».
Но Ровоам эз кывзы юрнуӧдысьяслысь туйдӧдӧмсӧ. Сійӧ сёрнитіс том йӧзкӧд, кодъяс быдмисны сыкӧд ӧтвыв и ӧні кесъялісны сылы. Ровоам юаліс налысь: «Мый ті шуанныд? Мый меным вочавидзны тайӧ войтырыслы? Найӧ корӧны, мед ме кокньӧді налысь сийӧссӧ, мый менам батьӧй пуктіс на вылӧ».
Сыкӧд ӧтвыв быдмӧм том йӧз шуисны сылы: «Тайӧ войтырыс элясьӧ, мый тэнад батьыд пуктіс на вылӧ сьӧкыд сийӧс, да корӧны, мед тэ налысь сийӧссӧ вӧчин кокньыдджыкӧн.
Но тэ шу налы: “Менам чалльӧй кызджык батьлӧн лядьвей дорысь.
Менам батьӧй пуктіс тіян вылӧ сьӧкыд сийӧс, но ме вӧча сійӧс сьӧкыдджыкӧн на.
Менам батьӧй нӧйтліс тіянӧс орсӧн, но ме кута нӧйтны тіянӧс кӧрт пома орсӧн”».
Коймӧд луннас Еровам став войтырыскӧд локтісны Ровоам ӧксы дінӧ, кыдзи сійӧ тшӧктыліс налы.
Ӧксы сёрнитіс накӧд чорыда. Сійӧ ӧтдортіс юрнуӧдысьяслысь туйдӧдӧмсӧ, но том йӧзлӧн туйдӧдӧм серти шуис войтырыслы: «Менам батьӧй пуктіс тіян вылӧ сьӧкыд сийӧс, но ме вӧча сійӧс сьӧкыдджыкӧн на.
Менам батьӧй нӧйтліс тіянӧс орсӧн, но ме кута нӧйтны тіянӧс кӧрт пома орсӧн».
Ӧксы эз кывзы войтырӧс, ӧд ставыс тайӧ вӧлі Господьсянь, медым збыльмис Господьлӧн кывйыс, мый Сійӧ висьталіс силомса Ахий пророк пыр Неватлӧн Еровам пилы.
Кор Израиль войтыр гӧгӧрвоис, мый ӧксы оз кывзы найӧс, сэки найӧ шуисны сылы: «Миянӧс нинӧм оз йит Давидкӧд.
Миянлы нинӧм вӧчны Ессейлӧн пикӧд.
Мунамӧй гортӧ, Израиль войтыр!
Давидлӧн рӧдыс мед ачыс тӧждысяс ас вӧснаыс!»
Сэсся израильсаяс разӧдчисны гортаныс.
Ровоам лои ӧксыӧн сӧмын Иуда каръясын олысь Израиль войтырлы.
Ӧтчыд Ровоам ӧксы мӧдӧдіс Израиль войтыр дінӧ Адорамӧс. Сійӧ веськӧдліс йӧзӧн, кодъяс уджалӧмнас мынтісны вот.
Но израильсаяс изъялісны сійӧс кувтӧдзыс.
Сэки Ровоам ӧксы тэрмасьӧмӧн пуксис тарантасӧ да пышйис Ерусалимӧ.
Сійӧ кадас Израиль торйӧдчис Давид рӧдысь, и тайӧ ӧнӧдз тадзи.
Израиль войтыр тӧдмаліс, мый Еровам бӧр локтӧма [Египетысь]. Сэки найӧ чукӧртчисны, корисны Еровамӧс да пуктісны сійӧс ӧксыӧ Израильлы.
Сӧмын Иуда [да Венямин] чужанкотыр кольччис Давид рӧдкӧд.
Ерусалимӧ локтӧм бӧрын Соломонлӧн Ровоам пиыс чукӧртіс Иуда да Венямин чужанкотырысь сё кӧкъямысдас сюрс медбур тышкамортӧс, мед петны тышӧ Израильлы паныд да бӧр босьтны аслас киӧ на вылын ӧксыалӧмсӧ.
Сэки Енлӧн морт Шемайлы вӧлі Енсянь кыв:
«Висьтав Соломонлӧн Ровоам пилы, иудаса ӧксылы, тшӧтш Иуда да Венямин чужанкотырлы да накӧд олысь мукӧд израильсаяслы, мый Господь тадзи висьталӧ: энӧ петӧй тышӧ асланыд вокъяслы, Израиль пиянлы, паныд, а бӧр бергӧдчӧй гортаныд. Ӧд ставыс тайӧ вӧлі Месянь».
Найӧ кывзысисны Господьлысь да бӧр бергӧдчисны гортаныс.
Еровам дзоньталіс-зумыдмӧдіс Ефрем керӧсвыв муын Сикем кар да овмӧдчис сэтчӧ.
Сэсянь мӧдӧдчис Пенуэл карӧ да дзоньталіс-зумыдмӧдіс сійӧс.
Еровам мӧвпыштіс: «Израильын юралӧмыс вермас бӧр вуджны Давид рӧдлы.
Кутас кӧ войтырыс вись вайӧм могысь ветлыны Ерусалимӧ Господьлӧн крамӧ, вермас сувтны аслас Ровоам ыджыдыс дор. Сэки найӧ виасны менӧ да бӧр бергӧдчасны иудаса Ровоам ӧксылӧн кипод улӧ».
Туйдӧдысьяскӧд сёрнитчӧм бӧрын Еровам ӧксы вӧчис кык зарни ӧшкӧс. Сэсся шуис войтырыслы: «Тіянлы оз ков ветлыны Ерусалимӧ.
Израиль, со тэнад енъясыд, кодъяс петкӧдісны тэнӧ Египетысь».
Ӧти ӧшсӧ сійӧ сувтӧдіс Вефильӧ, а мӧдсӧ — Данӧ.
Тайӧ кежӧдіс Израиль войтырӧс мыжас. Войтырыс [эновтіс Господьлысь крамсӧ,] кутіс юрбитны тайӧ енъяслы, ветліс весиг Данӧдз.
Еровам сувтӧдаліс мылькъяс вылын юрбитанінъяс да индіс войтыр пӧвстысь попъясӧс, кодъяс эз вӧвны Левий чужанкотырысь.
Сійӧ индіс, мый кӧкъямысӧд тӧлысьлӧн дас витӧд лунӧ лоӧ гаж, Иуда муын кодь пасъян гаж. 
Вефильӧ сувтӧдӧм висьпуктанін вылын Еровам вайис висьяс вӧчӧм ӧшъяслы да индіс попъясӧс, медым найӧ кесъялісны вись ваян мылькъяс вылын.
Аслас индӧм лунӧ — кӧкъямысӧд тӧлысьлӧн дас витӧд лунӧ — Еровам дасьтіс израильсаяслы гаж.
Вефильӧ сувтӧдӧм висьпуктанін вылын сійӧ вайис висьяс да тшынӧдчис. Кор Еровам висьпуктанін вылын сотіс вись, Вефильӧ локтіс Иуда муысь Енлӧн морт, кодӧс мӧдӧдіс Господь.
Сійӧ горӧдӧмӧн шуис висьпуктанінлы Господьлысь кывсӧ: «Висьпуктанін, висьпуктанін!
Господь тадзи висьталӧ: “Давид рӧдын чужас Иосей нима пи. Мылькъяс вылын кесъялысь попъясӧс сійӧ ваяс вись пыдди тэ вылын, сотас тэ вылын тшынӧдчысьяслысь лыяссӧ”».
Енлӧн морт юӧртіс, мый петкӧдлас индысьпас. Сійӧ шуис: «Господь висьталіс, мый тайӧ висьпуктаніныс киссяс, и сы вылысь пӧимыс разалас».
Кор Еровам ӧксы кыліс Енлӧн мортлысь вефильса висьпуктанін йылысь шуӧмсӧ, сійӧ висьпуктанінсянь индіс кинас Енлӧн морт вылӧ да горӧдіс: «Босьтӧй сійӧс!»
Сэки Еровамлӧн нюжӧдӧм киыс косьмис, и сійӧ бӧрсӧ эз вермы кусыньтны кисӧ.
Висьпуктаніныс киссис, и сы вылысь пӧимыс разаліс. Тадзи иніс Господьлӧн кывйыс, мый Енлӧн морт юӧртіс.
Еровам ӧксы шыасис Енлӧн морт дінӧ: «Кевмысь ме вӧсна аслад Господь Енлы, медым Сійӧ бурсьӧлӧмтчас ме дінӧ да бурдӧдас менсьым киӧс».
Енлӧн морт кевмысис Господьлы, и ӧксылӧн киыс бурдіс да пондіс важ мозыс куснясьны.
Сэсся ӧксы шуис Енлӧн мортлы: «Лок мекӧд, мунам менам гортӧ, ме тэнӧ верда-юктала, нӧшта тэныд козин сета».
Но Енлӧн морт шуис ӧксылы: «Тэ кӧ меным весиг ассьыд овмӧс джынтӧ сетан, ме ог мун тэкӧд. Сёйны-юны ме тані ог кут. Ӧд Господь менӧ ӧлӧдіс, медым ме эг сёй нянь ни эг ю ва, и бӧрсӧ мед муні мӧд туйӧд».
И муніс Енлӧн морт Вефильысь мӧд туйӧд, а эз сійӧ туйӧдыс, кыті локтіс.
Вефильын оліс ӧти пӧрысь пророк.
Сылӧн пияныс локтісны да висьталісны батьныслы ставсӧ, мый сійӧ лунӧ Вефильын вӧчис Енлӧн морт, и мый Енлӧн морт шуис ӧксылы.
Батьыс юаліс пияныслысь: «Кутшӧм туйӧд сійӧ муніс?»
Пияныс петкӧдлісны, кыті бӧрсӧ муніс Енлӧн морт, коді воліс Иуда муысь.
Сэки батьыс тшӧктіс пияныслы дасьтыны осёлӧс.
Сылы вайӧдісны осёлӧс, и сійӧ пуксис осёл вылӧ да муніс Енлӧн морт бӧрся. Сійӧ аддзис Енлысь мортсӧ, коді пукаліс тупу улын, да юаліс сылысь: «Тэ-ӧ Енлӧн мортыс, коді локтіс Иуда муысь?» 
«Ме», — вочавидзис мӧдыс.
«Мунам ме ордӧ сёйны», — шуис пророк.
Но Енлӧн морт воча шуис: «Ме ог вермы тэкӧд бӧр бергӧдчыны, тані ог вермы сёйны-юны тэкӧд.
Господь меным шуис, медым ме эг сёй нянь ни эг ю ва тані, и бӧрсӧ мед муні мӧд туйӧд».
Пророк шуис: «Ме тэ кодь жӧ пророк. Меным андел вайис Господьсянь кыв. Тшӧктіс вайӧдны тэнӧ ме ордӧ, медым тэ сёйин-юин».
Но тайӧ вӧлі пӧръялӧм.
Енлӧн морт бӧр бергӧдчис пророккӧд да сёйис-юис сы ордын.
Пызан саяс пукаліганыс пророклы вӧлі Господьсянь кыв.
Пророк шуис Енлӧн мортлы, коді локтіс Иуда муысь: «Господь тадзи висьталӧ. Тэ эн кывзысь Господьлысь, эн вӧч аслад Господь Енлӧн шуӧм серти, а бӧр бергӧдчин татчӧ сёйны-юны. Господь ӧд шуліс тэныд, мед тэ эн сёй нянь ни эн ю ва тані. Та вӧсна тэнсьыд шойтӧ оз ло дзебӧма батьясыдлӧн дзебанінӧ».
Сёйӧм-юӧм бӧрын пророк дасьтіс ассьыс осёлсӧ Енлӧн мортлы, кодӧс сійӧ бергӧдіс туй вывсьыс.
Енлӧн морт петіс туйӧ.
Туй вылас сы вылӧ уськӧдчис лев да косявліс сійӧс.
Сылӧн шойыс куйліс туй вылын, а лев да осёл сулалісны орччӧн.
Сэті мунысьяс кор аддзисны туй вылысь морт шой да сыкӧд орччӧн сулалысь левӧс, мунісны да висьталісны та йылысь сійӧ карас, кӧні оліс пӧрысь пророк.
Тайӧс кылӧм бӧрын пророк, коді бергӧдіс Енлысь мортсӧ туй вывсьыс, шуис: «Тайӧ мортыс — Енлӧн морт, коді эз кывзысь Господьлысь.
Господь сетіс сійӧс левлы, и лев косявліс сійӧс, кыдзи Господь висьталіс сылы».
Пророк тшӧктіс пияныслы дасьтыны осёлӧс, и найӧ дасьтісны.
Пророк муніс да аддзис туй вылысь Енлӧн мортлысь шойсӧ.
Орччӧн сулалісны лев да осёл.
Лев весиг абу сёйӧма мортлысь шойсӧ да абу косявлӧма осёлӧс.
Пророк пуктіс осёл вылӧ Енлӧн мортлысь шойсӧ да вайис аслас карӧ, медым бӧрдны-шогсьыны сы вӧсна да дзебны сійӧс.
Шойсӧ пуктіс аслас дзебанінӧ. А бӧрдысьяс шуалісны: «Курыд шог, вокӧй!»
Енлысь мортсӧ дзебӧм бӧрас пророк шуис пияныслы: «Кор ме кула, пуктӧй менӧ тайӧ жӧ дзебанінас, кӧні куйлӧ Енлӧн морт.
Пуктӧй менсьым лыясӧс орччӧн сылӧн лыяскӧд.
Инас ставыс, мый Господьлӧн тшӧктӧм серти сійӧ шуис Вефильӧ сувтӧдӧм висьпуктанін йылысь да самарияса вись ваян мылькъяс вылын сулалысь юрбитанінъяс йылысь».
Весиг став тайӧ лоӧмтор бӧртиыс Еровам эз бергӧдчы аслас лёк туй вылысь. Сійӧ водзӧ сувтӧдаліс войтыр пӧвстысь попъясӧс кесъявны вись ваян мылькъяс вылын.
Коді кӧсйис лоны попӧн, сійӧс Еровам и индыліс.
Тайӧ мыжыс вӧсна Еровамлысь рӧдсӧ вӧлі бырӧдӧма му вывсьыс.
Сійӧ кадас висьмис Еровамлӧн Авий пиыс.
Еровам шуис гӧтырыслы: «Пасьтась сідзи, мед некод оз тӧд, мый тэ менам гӧтыр, да ветлы Силомӧ.
Сэні олӧ Ахий нима пророк.
Буретш сійӧ юӧртліс меным, мый ме лоа ӧксыӧн Израиль войтырлы.
Босьт аскӧдыд [Енлӧн мортлы] дас тупӧсь нянь, сӧчӧн, ма доз да мун сы дінӧ. Сійӧ висьталас, мый лоӧ миян пикӧд».
Еровамлӧн гӧтырыс тадзи и вӧчис. Муніс Силомӧ Ахий пророк ордӧ.
Ахий вӧлі пӧрысь нин, и синнас сійӧ эз нин аддзы.
Господь шуис Ахийлы: «Ӧні тэ дінӧ локтас Еровамлӧн гӧтырыс, медым тӧдмавны пиыс йылысь, коді висьӧ.
Ме сета тэныд, мый шуны аньыслы.
Аньыс локтас мӧд паськӧмӧн, медым сійӧс эз тӧдны».
Пырысьлысь воськов шысӧ кылігӧн Ахий шуис: «Пыр, Еровамлӧн гӧтыр.
Мыйла тэ локтін мӧд паськӧмӧн?
Меным сетӧма висьтавны тэныд лёк юӧр.
Мун да висьтав Еровамлы, мый Господь, Израильлӧн Ен, тадзи висьталӧ: “Ме бӧрйи тэнӧ войтыр пӧвстысь да пукті веськӧдлыны Менам Израиль войтырӧн. Ме босьті Давид рӧдлысь юралӧмсӧ да сеті тэныд.
Но тэ абу вӧлӧмыд Менам Давид кесйӧг кодь. Сійӧ оліс Менам тшӧктӧмъяс серти, кывзысис Менсьым став сьӧлӧмнас да вӧчис Ме водзын сӧмын шогманасӧ.
Тэ вӧчин лёксӧ унджык на дорысь, кодъяс вӧліны тэӧдз. Тэ сувтӧдалін аслыд мукӧд енъясӧс да бӧлбанъясӧс, медым Менӧ скӧрмӧдны. Тадзи тэ ӧтдортін Менӧ.
Та вӧсна Ме ыста ыджыд шог Еровам рӧд вылӧ. Ме бырӧда сылысь рӧдсӧ Израильысь, бырӧда став айуловсӧ ичӧтсянь ыджыдӧдз. Куйӧдӧс моз Ме шыбита сылысь рӧдсӧ.
Еровам рӧдысь коді кулас карын, сійӧс сёясны понъяс, а коді кулас видз-му вылын, сійӧс кокаласны лэбачьяс”. 
Тадзи шуис Господь.
Ӧні бӧр мун гортад.
Карад воӧм мысти тэнад пиыд кулас.
Став Израиль войтыр кутас бӧрдны-шогсьыны сы вӧсна. Еровам рӧдысь сійӧс ӧтнассӧ дзебасны морт ногӧн, ӧд Еровам рӧдын сӧмын сы пытшкысь Господь, Израильлӧн Ен, аддзис бурсӧ.
Израиль войтырлы Господь пуктас мӧд ӧксыӧс, коді бырӧдас Еровамлысь рӧдсӧ.
abu
Сійӧ луныс воас на, но бырӧдӧмыс заводитчис нин.
Господь ёна дойдас Израильӧс, сійӧ лоӧ ваын легзьысь эжӧр кодь. Господь нетшыштас Израиль войтырӧс тайӧ бур му вывсьыс, мый сетіс налӧн батьяслы. Юрбитан пуяс сувтӧдӧмысь да тайӧн Господьӧс скӧрмӧдӧмысь Сійӧ разӧдас Израиль войтырӧс Ефрат ю сайӧ.
Еровамлӧн мыж вӧчӧмысь да Израиль войтырӧс мыжас кежӧдӧмысь Господь эновтас Израильӧс».
Еровамлӧн гӧтырыс бӧр муніс аслас Тирза карӧ.
Гортас пыригӧн муртса на сійӧ воськовтіс тагӧс вомӧныс, пиыс куліс.
Писӧ дзебигӧн став Израиль войтыр бӧрдіс-шогсис сы вӧсна. Тадзи иніс Господьлӧн шуӧмыс, мый Сійӧ висьталіс Аслас кесйӧг, Ахий пророк, пыр.
Еровамлӧн мукӧд уджъяс йылысь, сылӧн тышъяс да ӧксыалӧм йылысь гижӧма израильса ӧксыяслӧн каднебӧгӧ.
Еровам ӧксыаліс кызь кык во чӧж.
Еровам куліс да вуджис батьясыс дінӧ. Сы бӧрти ӧксыӧ пуксис сылӧн Надав пиыс.
Соломонлӧн Ровоам пиыс ӧксыаліс Иуда муын.
Ӧксыӧ пуксигас Ровоамлы вӧлі нелямын ӧти арӧс. Дас сизим во чӧж сійӧ юраліс Ерусалим карын. Израильса чужанкотыръяслӧн каръясысь Господь бӧрйис тайӧ карсӧ, медым сэні вӧлі Сылӧн нимыс.
Ровоамлӧн мамыс вӧлі аммон войтырысь Наама.
Иуда войтыр вӧчис Господь водзын шогмытӧмсӧ. Асланыс мыж вӧчӧмнас найӧ дӧзмӧдісны Господьӧс батьясныс дорысь ёнджыка на.
Джуджыд мылькъяс вылын да пашкыр пуяс улын найӧ вӧчисны аслыныс юрбитанінъяс, сувтӧдісны юрбитан изъяс да юрбитан пуяс.
Татшӧм юрбитанінъясын вӧліны кырсалысьяс. Иуда войтыр вӧчис быд зывӧксӧ сійӧ войтыръясыс моз, кодъясӧс Господь вӧтліс Израиль войтыр водзысь.
Ровоам ӧксылӧн витӧд веськӧдлан воӧ египетса Шишак ӧксы аслас тышкайӧзкӧд уськӧдчис Ерусалим кар вылӧ. Сійӧ босьтіс Господьлӧн крамысь да ӧксылӧн керкаысь став озырлунсӧ [тшӧтш зарни сайӧдъяс, кодъясӧс Давид босьтліс цоваса Ададезер ӧксылӧн кесйӧгъяслысь да вайис Ерусалимӧ]. 
Босьтіс тшӧтш Соломонӧн вӧчӧдӧм зарни сайӧдъяссӧ.
На пыдди Ровоам ӧксы вӧчӧдіс ыргӧн сайӧдъяс да сетіс найӧс веськӧдлысьяслы, кодъяс видзӧдісны ӧксы керкаӧ пыранін видзысьяс бӧрся.
Кор ӧксы вӧлі мунӧ Господьлӧн крамӧ, ӧксыӧс видзысьяс босьтлісны аскӧдныс тайӧ сайӧдъяссӧ, а бӧрыннас бӧр пуктывлісны найӧс видзанінӧ.
Ровоам ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма иудаса ӧксыяслӧн каднебӧгӧ.
Ровоам да Еровам костын пыр муніс тыш.
Сэсся Ровоам куліс да вуджис батьясыс дінӧ. Сійӧс дзебисны Давид карӧ батьясыскӧд орччӧн.
Ровоамлӧн мамыс вӧлі аммон войтырысь Наама.
Ровоам бӧрти ӧксыӧ пуксис сылӧн Авий пиыс.
Израильса Еровам ӧксылӧн, Неват пилӧн, дас кӧкъямысӧд веськӧдлан воӧ Иуда муын ӧксыӧ пуксис Авий.
Куим во чӧж сійӧ юраліс Ерусалимын.
Авийлӧн мамыс вӧлі Маака, Авессаломлӧн нылыс.
Авий вӧчис сійӧ жӧ мыжъяссӧ, мый вӧчліс сылӧн батьыс. Авийлӧн сьӧлӧмыс эз вӧв йитчӧма аслас Господь Енкӧд сідзи, кыдзи вӧлі Давид пӧльыслӧн.
Но Давид вӧсна Господь, сылӧн Енмыс, колис ӧзъявны Ерусалимын бисӧ — Авий бӧрти пуктіс ӧксыӧ сылысь писӧ да зумыдмӧдіс Ерусалим кар. Ӧд Давид вӧчис Господь водзын шогманасӧ, став олӧм чӧжыс сійӧ эз кежлыв Господьлӧн тшӧктӧмъясысь, сы кындзи, мый вӧчис хеттей Урийлы.
Авийлӧн став олӧм чӧжыс Ровоамлӧн рӧдыс да Еровам ӧксы костын муніс тыш.
Авий ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма иудаса ӧксыяслӧн каднебӧгӧ.
Авий да Еровам костын муніс тыш.
Сэсся Авий куліс да вуджис батьясыс дінӧ. Сійӧс дзебисны Давид карӧ.
Авий бӧрти ӧксыӧ пуксис сылӧн Аса пиыс.
Израильса Еровам ӧксылӧн кызьӧд веськӧдлан воӧ Иуда муын ӧксыӧ пуксис Аса.
Нелямын ӧти во чӧж сійӧ юраліс Ерусалимын.
Сылӧн пӧчыс вӧлі Маака, Авессаломлӧн нылыс.
Давид пӧльыс моз Аса вӧчис Господь водзын шогманасӧ.
Аса вӧтлаліс аслас муысь юрбитанінъясын кырсалысьясӧс, жугліс бӧлбанъясӧс, кодъясӧс вӧчлісны сылӧн батьясыс. Аслас Маака пӧчыслы Аса эз лэдз водзӧ лоны ӧксы-мамӧн, ӧд сійӧ сувтӧдіс Астарталы сиӧм зывӧк бӧлбанӧс.
Аса кераліс тайӧ зывӧк бӧлбансӧ да сотіс сійӧс Кедрон ковтысын.
Вись ваян мылькъяссӧ эз бырӧдны, но та вылӧ видзӧдтӧг Асалӧн сьӧлӧмыс вӧлі йитчӧма Господькӧд став олӧм чӧжыс.
Сійӧ вайис Господьлӧн крамӧ ассьыс да батьыслысь вежӧдӧм эзысь-зарнисӧ да дозмук-кӧлуйсӧ.
Аса да израильса Ваас ӧксы костын олӧм чӧжныс муніс тыш.
Израильса Ваас ӧксы уськӧдчис Иуда му вылӧ да лэптіс Рамаын изкар, медым некод эз вермы пырны Иуда муӧ Аса ӧксы дінӧ либӧ петны сы дінысь.
Аса босьтіс Господьлӧн крамса да ӧксы керкаса озырлун видзанінъясысь коляс эзысь-зарнисӧ да мӧдӧдіс ассьыс кесйӧгъяссӧ нуны ставсӧ Дамаскӧ арамейяслӧн Бен-Хадад ӧксылы, Хезион Тавриммонлӧн пиыслы. Тшӧктіс висьтавны сылы:
«Тэа-меа костын йитӧдным мед лоӧ миян батьяслӧн кодь.
Тайӧ эзысь-зарнисӧ ме ыста тэныд козин пыдди.
Орӧд израильса Ваас ӧксыкӧд йитӧдтӧ, медым сійӧ ылыстчас менам муысь».
Бен-Хадад вӧчис Аса ӧксылӧн корӧм серти. Сійӧ мӧдӧдіс аслас тышкайӧзӧн веськӧдлысьясӧс израильса каръяслы паныд тышӧ. Найӧ пасьвартісны Ийон, Дан да Авел-Бет-Маака каръяс, Киннерет ты гӧгӧрысь муяс да став Неффалим му.
Ваас кор кыліс та йылысь, сійӧ дугдіс лэптыны Рама изкар да бӧр муніс Тирза карӧ.
Аса ӧксы чукӧртіс став Иуда войтырсӧ. Найӧ петкӧдісны Рама карысь став изсӧ да керсӧ, мыйысь Ваас вӧлі лэптӧма изкар.
Тайӧ изсьыс да керсьыс Аса ӧксы лэптіс Венямин муын Гева да Миспа изкаръяс.
Аса ӧксыалӧм дырйи мукӧд лоӧмторъяс йылысь, сылӧн тӧдчана уджъяс йылысь да сыӧн лэптӧм каръяс йылысь гижӧма иудаса ӧксыяслӧн каднебӧгӧ. Пӧрысь кадас сылӧн ёна висис кокыс.
Аса куліс да вуджис батьясыс дінӧ. Сійӧс дзебисны Давид пӧльыслӧн карӧ батьясыскӧд орччӧн.
Аса бӧрти ӧксыӧ пуксис сылӧн Иосафат пиыс.
Иудаса Аса ӧксылӧн мӧд веськӧдлан воӧ Израиль муын ӧксыӧ пуксис Еровамлӧн Надав пиыс. Кык во чӧж сійӧ юраліс Израильын.
Надав вӧчис Господь водзын шогмытӧмсӧ, ветліс батьыслӧн туйӧд да сы моз вӧчис мыж. Аслас мыж вӧчӧмнас сылӧн батьыс коркӧ кежӧдіс Израиль войтырӧс мыжас.
Иссакар чужанкотырысь Ахийлӧн Ваас пиыс гусьӧн кыпӧдчис Надавлы паныд да виис сійӧс филистимса Гиббетон карын. Буретш сэки Надав израильса тышкайӧзкӧд вӧлі кытшалӧны Гиббетон кар.
Надавӧс виӧм бӧрын Ваас пуксис сы пыдди ӧксыӧ. Тайӧ вӧлі иудаса Аса ӧксылӧн коймӧд веськӧдлан воӧ.
Ӧксыӧ пуксьӧм бӧрын Ваас бырӧдіс Еровамлысь став рӧдсӧ, некодӧс ловйӧн эз коль. Тадзи иніс Господьлӧн шуӧмыс, мый Сійӧ висьталіс Аслас силомса Ахий кесйӧг пыр. Еровамлысь рӧдсӧ вӧлі бырӧдӧма сы вӧсна, мый Еровам мыж вӧчис да кежӧдіс Израиль войтырӧс мыжас, и тадзи скӧрмӧдіс Господьӧс, Израильлысь Енсӧ.
Надав ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма израильса ӧксыяслӧн каднебӧгӧ.
Аса да израильса Ваас ӧксы костын олӧм чӧжныс муніс тыш.
Иудаса Аса ӧксылӧн коймӧд веськӧдлан воӧ Израиль муын ӧксыӧ пуксис Ахийлӧн Ваас пиыс.
Кызь нёль во чӧж сійӧ юраліс Тирза карын. Сійӧ вӧчис Господь водзын шогмытӧмсӧ, ветліс Еровамлӧн туйӧд да сы моз вӧчис мыж. Аслас мыж вӧчӧмнас Еровам коркӧ кежӧдіс Израиль войтырӧс мыжас.
Хананилӧн Еху пилы вӧлі Ваас йылысь Господьсянь кыв:
«Ме лэпті тэнӧ няйтысь да пукті ӧксыӧ Аслам Израиль войтырлы. Но тэ ветлін Еровамлӧн туйӧд да кежӧдін Менсьым Израиль войтырӧс мыжас. Мыж вӧчӧмнаныс найӧ скӧрмӧдісны Менӧ. Таысь Ме бырӧда Ваасӧс да сылысь рӧдсӧ. Ме вӧча сылӧн рӧдкӧд сійӧ жӧ, мый вӧчи Неват Еровамлӧн рӧдкӧд.
Ваас рӧдысь коді кулас карын, сійӧс сёясны понъяс, а коді кулас видз-му вылын, сійӧс кокаласны лэбачьяс».
Ваас ӧксыалӧм дырйи мукӧд лоӧмторъяс йылысь, сылӧн уджъяс да вермӧмъяс йылысь гижӧма израильса ӧксыяслӧн каднебӧгӧ.
Ваас куліс да вуджис батьясыс дінӧ. Сійӧс дзебисны Тирза карӧ.
Ваас бӧрти ӧксыӧ пуксис сылӧн Элай пиыс.
Но Еху пророк пыр, коді вӧлі Хананилӧн пи, Господьлӧн вӧлі шуӧма нин бырӧдны Ваасӧс да сылысь рӧдсӧ. Ӧд Ваас виис Еровамлысь рӧдсӧ, но ачыс Еровам рӧд моз вӧчис Господь водзын шогмытӧмсӧ да скӧрмӧдіс Сійӧс.
Иудаса Аса ӧксылӧн кызь квайтӧд веськӧдлан воӧ Израиль муын ӧксыӧ пуксис Вааслӧн Элай пиыс. Кык во чӧж сійӧ юраліс Тирза карын.
Элай ӧксылӧн Зимри нима кесйӧгыс, коді веськӧдліс тарантаса джын тышкакотырӧн, гусьӧн кыпӧдчис ӧксылы паныд.
Ӧтчыд Тирза карын, ӧксы керкаӧн веськӧдлысь Арс нима морт ордын, Элай ӧксы коддзытӧдзыс юис. Сэки Зимри пырис да виис Элай ӧксыӧс. Тайӧ вӧлі иудаса Аса ӧксылӧн кызь сизимӧд веськӧдлан воӧ. Элай пыдди ӧксыӧ пуксис Зимри.
Ӧксыӧ пуксьӧм бӧрын Зимри бырӧдіс Вааслысь гортсаяссӧ. Вааслӧн рӧдысь да ёртъяс пӧвстысь весиг ӧти айуловӧс эз коль ловйӧн.
Зимри кушӧдз бырӧдіс Вааслысь рӧдсӧ. Тадзи иніс Ваас йылысь Господьлӧн шуӧмыс, мый Сійӧ висьталіс Еху пророк пыр. Ваас да сылӧн Элай пиыс мыж вӧчисны да Израиль войтырӧс кежӧдісны мыжас. Идолъяслы юрбитӧмнас найӧ скӧрмӧдісны Господьӧс, Израильлысь Енсӧ.
Элай ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма израильса ӧксыяслӧн каднебӧгӧ.
Иудаса Аса ӧксылӧн кызь сизимӧд веськӧдлан воӧ Израиль муын ӧксыӧ пуксис Зимри. Сӧмын сизим лун чӧж сійӧ юраліс Тирза карын. Буретш сэки израильса тышкайӧз вӧлі кытшалӧны филистимса Гиббетон кар. 
Кор израильса тышкайӧз тӧдмалісны, мый Зимри кыпӧдчӧма Элай ӧксылы паныд да виӧма сійӧс, сійӧ жӧ лунӧ Израиль войтырлы ӧксыӧ пуктісны Омриӧс, тышкайӧзӧн веськӧдлысьӧс.
Израильса тышкайӧзкӧд Омри эновтіс Гиббетон, муніс да кытшаліс Тирза кар.
Зимри кор аддзис, мый израильса тышкайӧз босьтісны карсӧ, пырис аслас ӧксы керкаӧ пыді жыръяс да ӧзтіс керкасӧ, ачыс сотчис. Тадзи сійӧ куліс аслас мыж вӧсна. Ӧд сійӧ вӧчис Господь водзын шогмытӧмсӧ, ветліс Еровамлӧн туйӧд да сы моз вӧчис мыж. Аслас мыж вӧчӧмнас Еровам коркӧ кежӧдіс Израиль войтырӧс мыжас.
Зимри ӧксыалӧм дырйи мукӧд лоӧмторъяс йылысь да ӧксылы паныд кыпӧдчӧмыс йылысь гижӧма израильса ӧксыяслӧн каднебӧгӧ.
Тайӧ лоӧмторъясыс бӧрын Израиль войтыр юксис кык пельӧ: ӧтияс кӧсйисны пуктыны ӧксыӧ Гинатлысь Тивни писӧ, а мӧдъяс — Омриӧс.
Омри дор сулалысьыс вӧлі унджык, та вӧсна найӧ вермисны Гинатлӧн Тивни пи дор сулалысьясӧс. Тивни куліс, а ӧксыӧ пуксис Омри.
Иудаса Аса ӧксылӧн комын ӧтиӧд веськӧдлан воӧ Израиль муын ӧксыӧ пуксис Омри. Ӧксыаліс сійӧ дас кык во, квайт восӧ юраліс Тирза карын.
Кык эзысь талантысь Омри ньӧбис Шемерлысь Семерон керӧс да лэптіс сэні кар. Нимсӧ карыслы сетіс Самария, керӧс вузалысьлӧн ним серти.
Омри вӧчис Господь водзын шогмытӧмсӧ. Сыӧдз вӧвлӧм ӧксыяс дорысь сійӧ ёна унджык на лёксӧ вӧчис.
Омри ветліс Неват Еровамлӧн туйӧд, вӧчис сійӧ жӧ мыжъяссӧ, мыйӧн Еровам коркӧ кежӧдіс Израиль войтырӧс мыжас. Идолъяслы юрбитӧмнаныс найӧ скӧрмӧдісны Господьӧс, Израильлысь Енсӧ.
Омри ӧксыалӧм дырйи мукӧд лоӧмторъяс йылысь, сылӧн уджъяс да вермӧмъяс йылысь гижӧма израильса ӧксыяслӧн каднебӧгӧ.
Омри куліс да вуджис батьясыс дінӧ. Сійӧс дзебисны Самария карӧ.
Омри бӧрти ӧксыӧ пуксис сылӧн Ахав пиыс.
Иудаса Аса ӧксылӧн комын кӧкъямысӧд веськӧдлан воӧ Израиль муын ӧксыӧ пуксис Омрилӧн Ахав пиыс. Кызь кык во чӧж сійӧ юраліс Самария карын.
Ахав вӧчис Господь водзын шогмытӧмсӧ ёна унджык на сыӧдз вӧвлӧм ӧксыяс дорысь.
Сійӧ вӧчис сійӧ жӧ мыжъяссӧ, мый вӧчліс Неватлӧн Еровам пиыс. Но тайӧ вӧлі этша на.
Сійӧ босьтіс гӧтырӧ сидонса Этваал ӧксылысь Езавель нывсӧ да кутіс кесъявны-юрбитны Вааллы.
Сійӧ лэптіс Самария карын Вааллы юрбитанін да сувтӧдіс сэтчӧ висьпуктанін. Сійӧ сувтӧдіс юрбитан пуяс.
Сыӧдз вӧвлӧм израильса ӧксыяс дорысь Ахав аслас уджъяснас медъёна скӧрмӧдіс Господьӧс, Израильлысь Енсӧ [та вӧсна сылӧн олӧмыс орис].
Ахавлӧн юралігӧн вефильса Хиэл выльысь лэптіс Ерикон кар. Карлы подув пуктӧмысь сійӧ воштіс медводдза чужысь Авирам писӧ, а карса дзиръя сувтӧдӧмысь воштіс Сегув нима медічӧт писӧ. Тадзи иніс Господьлӧн шуӧмыс, мый Сійӧ висьталіс Навлӧн Исус пи пыр.
Галаад муысь Тишби карысь Илля [пророк] шуис Ахавлы: «Ловъя Господь водзын, Израильлӧн Ен водзын, ме, сылӧн кесйӧг, кыв сета: локтан воясӧ лысва войт ни зэр тусь оз усь, кытчӧдз ме ог тшӧкты».
Та бӧрын Иллялы вӧлі Господьсянь кыв:
«Мун татысь асыввылӧ да дзебсьы Йӧрдан мӧдлапӧлӧ Керит шор дорӧ.
Шорсьыс тэ пондан юны, а кырнышъяс кутасны вердны тэнӧ, кыдзи Ме тшӧкті налы».
Илля вӧчис Господьлӧн тшӧктӧм серти: 
муніс Йӧрдан мӧдлапӧлӧ Керит шор дорӧ да кольччис сэтчӧ.
Кырнышъяс быд асыв да рыт вайлісны Иллялы нянь да яй, а васӧ сійӧ юис шорсьыс.
Кад мысти шорыс косьмис, ӧд эз вӧв зэрыс.
Иллялы вӧлі Господьсянь кыв:
«Мун Сидон муӧ да кольччы Сарепта карӧ.
Ме тшӧкті ӧти дӧвалы сэні вердны-юктавны тэнӧ».
Илля муніс Сарепта карӧ.
Карса дзиръя дорӧ матыстчигӧн сійӧ аддзис пес чукӧртысь дӧваӧс.
Илля корис аньӧс да шуис: «Вай меным юыштны гырничсьыд ватӧ».
Мӧдыс муніс гырничысла.
А Илля бӧрсяньыс горӧдіс: «Босьт аскӧдыд тшӧтш няньтор!»
Ань вочавидзис: «Тэнад ловъя Господь Ен водзын шуа: 
некутшӧм пӧжас менам абу, сӧмын дозмукын ки тыр пызь да дозйын этшаник вый.
Ӧні чукӧртышта пес, сэсся муна да пӧжала няньтор аслым да пилы.
Няньторсӧ сёйыштам, дай кулам».
Илля шуис аньлы: «Эн пов. Мун да вӧч, мый шуин, но медводз пӧжав ичӧтик сӧчӧн да вай меным.
Аслыд да пиыдлы бӧрыннас пӧжалан.
Ӧд Господь, Израильлӧн Ен, тадзи висьталӧ: “Пызьыд тэнад дозмукысь оз быр, и выйыд дозсьыд оз чин, кытчӧдз Господь оз сет зэрсӧ му вылӧ”».
Дӧва муніс да вӧчис Иллялӧн шуӧм серти.
Тайӧ лунсяньыс аньлӧн тырмана вӧлі сёяныс аслыс, Иллялы да гортсаыслы.
Пызьыс дозмуксьыс эз бырлы, и выйыс дозъяс эз чинлы. Тадзи иніс Господьлӧн шуӧмыс, мый Сійӧ висьталіс Илля пыр.
Кад мысти дӧва аньлӧн, код ордын оліс Илля, зэв ёна висьмис пиыс. Кор сійӧ дугдіс лолавнысӧ, дӧва шуис Иллялы: «Мый тэныд месянь колӧ, Енлӧн мортӧй?
Тэ локтін, медым казьтыштны меным мыжъясӧс да вины пиӧс».
Илля шуис дӧвалы: «Вай меным питӧ».
Сійӧ босьтіс зонкаӧс мам ки вывсьыс, катӧдіс сійӧс вылыс судтаас аслас олан жырйӧ да пуктіс вольпасяс. Сэсся шыасис Господь дінӧ: «Господьӧй, менам Енмӧй!
Тэ ӧмӧй вӧчан лёксӧ тайӧ дӧваыслы, код ордын ме ола, да босьтан сылӧн пиыслысь олӧмсӧ?»
Зонка весьтӧ куимысь нюжӧдчылӧм бӧрти Илля шыасис Господь дінӧ:
«Господьӧй, менам Енмӧй!
Зонкалӧн лолыс мед бӧр пырас сы пытшкӧ!»
Господь кыліс Илляӧс. Зонкалӧн лолыс бӧр пырис сы пытшкӧ, и сійӧ ловзис.
Илля лэччӧдіс зонкаӧс аслас жырйысь улыс судтаас, сетіс сійӧс мамыслы да шуис: «Видзӧд, тэнад пиыд ловъя».
Дӧва вочавидзис Иллялы: «Ӧні ме тӧда, мый тэ Енлӧн морт, и Господь збыльысь сёрнитӧ тэ пыр».
Зэртӧм кадӧ коймӧд вонас Иллялы вӧлі Господьсянь кыв: «Мун Ахав дінӧ. Сэсся Ме ыста му вылас зэр».
Илля муніс Ахав дінӧ.
Самарияын сэки йӧзыс зэв ёна тшыгъялісны.
Ахав корис Авдийӧс, ӧксы керкаӧн веськӧдлысьӧс.
Авдий поліс-вежавидзис Господьысь. Кор Езавель виаліс Господьлысь пророкъясӧс, Авдий отсаліс сё пророклы дзебсьыны кырта горсъясӧ: быд горсйӧ дзебсисны ветымын мортӧн. Авдий вердіс-юкталіс найӧс сэні.
Ахав шуис Авдийлы: «Мун кытшовт да видзӧдав миян муысь став ва петанінсӧ да ю-шорсӧ. Гашкӧ, вӧвъяснымлы да мулъяснымлы турун сюрас, сэки миянлы оз ковмы вины пемӧсъяснымӧс».
Медым кытшовтны ставнас мусӧ, Ахав муніс ӧтарӧ, Авдий — мӧдарӧ.
Авдийлы туй вылас паныдасис Илля.
Авдий тӧдіс сійӧс. Муӧдзыс копыртчӧмӧн Авдий шыасис: «Тэ-ӧ тайӧ, Илля, менам ыджыдӧй?»
«Ме, — вочавидзис Илля.
— Мун да висьтав аслад ыджыдлы, мый ме тані».
Авдий воча шуис: «Мыйӧн нӧ ме, тэнад кесйӧг, мыжми тэ водзын? Тэ мӧдӧдан менӧ Ахав дінӧ, но сійӧ ӧд виас менӧ.
Ловъя Господь водзын, тэнад Ен водзын, шуа: менам ыджыдӧй мӧдӧдліс корсьны тэнӧ быд муӧ да быд войтыр пӧвстӧ.
Ставныслы сійӧ тшӧктыліс кыв сетны, мый эз аддзывны тэнӧ.
А тэ ӧні тшӧктан менӧ мунны да висьтавны ыджыдӧйлы, мый тэ тані.
Ме кӧ ӧні муна тэ дінысь, Господьлӧн Лолыс нуас тэнӧ код тӧдас кытчӧ.
И кор ме висьтала Ахавлы, мый тэ тані, а сійӧ оз аддзы тэнӧ, сэки виас менӧ.
А ме, тэнад кесйӧг, том кадсянь ола Господьысь полӧмӧн.
Тэ ӧмӧй эн кывлы, менам ыджыдӧй, мый ме отсалі сё пророклы дзебсьыны, кор Езавель виаліс Господьлысь пророкъясӧс. Кык кырта горсйӧ ветымын мортӧн дзеби, верді-юкталі найӧс сэні.
А тэ ӧні тшӧктан менӧ мунны да висьтавны Ахав ыджыдӧйлы, мый тэ тані.
Сійӧ ӧд виас менӧ!»
Илля вочавидзис: «Ловъя Господь Саваоф водзын, кодлы ме кесъяла, шуа:
талун ме петкӧдча Ахавлы».
Авдий муніс Ахав дінӧ да висьталіс Илля йылысь.
Ахав мӧдӧдчис Иллялы воча, и кор паныдасис Иллякӧд, шуис сылы: «Тэ-ӧ тайӧ, Израильлы шогсӧ вайысьыс?»
Илля вочавидзис: «Ог ме вай шогсӧ Израильлы, а тэ да тэнад батьыдлӧн рӧдыс. Ті эновтінныд Господьлысь тшӧктӧмъяссӧ да кутінныд юрбитны Ваал идолъяслы.
Ӧні мӧдӧд йӧзтӧ, мед Кармил керӧсӧ чукӧртасны ме дінӧ став Израиль войтырӧс, тшӧтш Вааллысь нёльсё ветымын пророкӧс да Астарталысь нёльсё пророкӧс, кодъяс сёйӧны Езавельлӧн пызан сайын».
Ахав мӧдӧдіс юӧр став Израиль войтырлы да чукӧртіс пророкъясӧс Кармил керӧсӧ.
Илля матыстчис войтырыс дінӧ да шуис: «Дыр-ӧ на ті кутанныд чотны кыкнан кокнаныд?
Господь кӧ эм Ен, кывзысьӧй Сылысь, Ваал кӧ енмыс, сылысь кывзысьӧй».
Войтырыс чӧв оліс.
Сэки Илля шуис войтырыслы: «Господьлӧн пророкъясысь ме ӧтнам коли, а Вааллӧн пророкъясыс — нёльсё ветымын морт. [Нӧшта Астарталӧн — нёльсё пророк.]
Вайӧдӧй миянлы кык ӧшкӧс. Вааллӧн пророкъяс мед бӧръясны ӧтисӧ, начкасны-кераласны сійӧс да пуктасны пес вылӧ, но бисӧ мед оз ӧзтыны.
Мӧд ӧшсӧ начка ме, тшӧтш пукта пес вылӧ, но бисӧ ог ӧзты».
Вааллӧн пророкъяслы Илля шуис: «Ті шыасьӧй асланыд ен дінӧ, а ме шыася Господь [аслам Ен] дінӧ.
Сійӧ енмыс, коді ыстас бисӧ, эм збыль Ен».
Став войтырыс вочавидзис: «Бур. [Мед лоӧ тадз.]»
Илля шуис Вааллӧн пророкъяслы: «Ті унджыкӧнӧсь, та вӧсна медводз ті бӧрйӧй ӧшсӧ да начкӧй сійӧс.
Сэсся шыасьӧй асланыд ен дінӧ, но бисӧ энӧ ӧзтӧй».
Найӧ босьтісны ӧшкӧс да начкисны сійӧс. Сэсся асывсяньыс луншӧрӧдзыс найӧ горзісны: «Ваал! Кыв миянӧс!»
Найӧ весиг чеччалісны висьпуктанін гӧгӧр, но некод эз вочавидз.
Луншӧр кадӧ Илля кутіс серавны на вылын: «Гораджыка горзӧй! Сійӧ ӧд ен!
Гашкӧ, сійӧ мӧвпалӧ мый йылысь кӧ? Гашкӧ, мыйкӧ вӧчӧ ӧні? А колӧкӧ, кытчӧкӧ муніс? Гашкӧ, узьӧ да, и сійӧс колӧ садьмӧдны?»
Пророкъяс нӧшта на гораджыка горзісны и, кыдзи век вӧчлісны, бытшйӧдлісны асьнысӧ пуртӧн да шыӧн, кытчӧдз эз ойдны вирнас.
Луншӧр кадсянь рытъя вись ваян кадӧдз найӧ этшсьыс петмӧн горзісны.
Но некод эз вочавидз. 
[Тишбиса Илля шуис Вааллӧн пророкъяслы: «Вешйӧй. Ӧні ме кута вись вайны».
Мӧдъясыс ланьтӧмӧн вешйисны.]
Илля корис Израиль войтырӧс матыстчыны ас дінас.
Ставныс матыстчисны.
Илля кутіс тэчны Господьлысь жуглӧм висьпуктанінсӧ.
Сійӧ босьтіс дас кык из — Яковсянь петӧм чужанкотыръяслӧн лыдыс серти. Яковлы коркӧ Господь шуис: «Тэнад нимыд лоӧ Израиль».
Тайӧ изъяссьыс Илля тэчис Господьлы висьпуктанін, гӧгӧрыс кодйис гуран, кытчӧ позьӧ вӧлі тӧрӧдны кык куд тыр шыдӧс. Висьпуктанін вылӧ пукталіс пес, начкис-кераліс ӧшкӧс да пуктіс пес вылӧ. Сэсся Илля шуис: «Тыртӧй ваӧн нёль ыджыд гырнич, кисьтӧй васӧ сотан вись вылас да пес вылас».
[Тадзи и вӧчисны.] 
Сэсся тшӧктіс мӧдысь тадзикӧн вӧчны.
Тадзи вӧчисны.
Сэсся коймӧдысь на тшӧктіс васӧ кисьтны.
И коймӧдысь тадзи вӧчисны.
Ваыс кутіс ызбыльтны-визувтны висьпуктанінысь, и сы гӧгӧр кодйӧм гураныс тырис ваӧн.
Рытъя вись ваян кадӧ Илля пророк матыстчис висьпуктанін дорӧ да [енэжас видзӧдӧмӧн гораа] шуис: «Господьӧй, Ӧвраамлӧн, Исааклӧн да Израильлӧн Ен! 
[Кыв менӧ, Господьӧй, кыв менӧ талун би пытшсянь!] 
Талун мед тӧдмаласны тайӧ йӧзыс, мый Тэ — Израильлӧн Ен, и мый ме — Тэнад кесйӧг. Найӧ мед аддзасны, мый ме ставсӧ вӧчи Тэнад тшӧктӧм серти.
Вочавидз меным, Господьӧй!
Вочавидз, медым тайӧ войтырыс тӧдмалас, мый Тэ, Господьӧй, эм Ен, и мый Тэ бергӧдан налысь сьӧлӧмсӧ Ас дінад».
Сэки вылысянь сяркнитіс Господьлӧн биыс да ньылыштіс сотан висьсӧ, пессӧ, изъяссӧ, висьпуктанін дорысь мусӧ да кодйӧм гуранысь васӧ.
Кор йӧзыс аддзисны тайӧс, кымынь уськӧдчисны муас да шуисны: «Господь эм Ен! Господь эм Ен!»
Илля шуис войтырыслы: «Босьтӧй Вааллысь пророкъяссӧ, энӧ лэдзӧй некодлы пышйыны».
Вааллысь пророкъяссӧ босьтісны. Сэсся Илля нуӧдіс найӧс Кишон ю дорӧ да сэні ставнысӧ виис.
Илля шуис Ахавлы: «Мун сёйны-юны. Зэр шыыс кылӧ нин».
Ахав муніс сёйны-юны. А Илля кайис Кармил керӧсӧ, сувтіс пидзӧс вылас да юрсӧ пидзӧс костас сюйӧмӧн копыртчис муӧдзыс. Аслас кесйӧглы шуис: «Мун да видзӧдлы саридзланьыс».
Мӧдыс ветліс, видзӧдліс да шуис: «Ме нинӧм эг аддзы».
«Мун, бара ветлы», — шуис кесйӧгыслы Илля. Тадзи сизимысь тшӧктіс ветлыны.
Сизимӧдысь ветлӧм бӧрас кесйӧгыс шуис: «Саридз весьтас кыпӧдчӧ ки пыдӧс пасьта ичӧтик кымӧр».
Илля шуис: «Мун да висьтав Ахавлы, мед ӧдйӧджык доддялас вӧвъяссӧ тарантасас да мунас, медым зэрыс эз су сійӧс».
Енэжыс пемдіс, тӧлыс вайис сьӧд кымӧръяс, кутіс сувтсӧн зэрны.
Ахав [бӧрддзӧмӧн] сӧліс аслас тарантасӧ да рӧдтіс Изреельӧ.
Господьлӧн вына киыс вӧлі Илля вылын.
Коссӧ вӧнялӧмӧн сійӧ котӧртіс Ахав водзвылын Изреельӧдз.
Ахав висьталіс Езавель гӧтырыслы ставсӧ, мый вӧчис Илля, и кыдзи сійӧ шыпуртӧн виис Вааллысь став пророксӧ.
Езавель мӧдӧдіс Илля дінӧ юӧртысьӧс, тшӧктіс висьтавны сылы: «[Тэ кӧ Илля, а ме Езавель, сідзкӧ] енъяс мед ёна мыждасны менӧ, ме кӧ аски тайӧ кадӧдзыс ог вӧч тэкӧд сійӧ, мый тэ вӧчин пророкъяскӧд».
Илля повзис.
Сійӧ чеччис да петіс туйӧ, мед ловйӧн кольны. Сійӧ воис иудаса Бер-Шева карӧ. Сэтчӧ колис ассьыс кесйӧгсӧ, ачыс муніс овтӧминӧ лунтыр мунан ылнаӧ да пуксис пу улӧ. Сэні пондіс кевмыны аслыс кулӧм: «Тырмас, Господьӧй, меным овнысӧ.
Босьт менсьым лолӧс, ме ӧд абу бурджык аслам батьяс дорысь».
Сэсся водіс пу улӧ да унмовсис.
Сэки андел инмӧдчис сы дінӧ да шуис: «Чеччы, сёй [да ю]».
Илля видзӧдліс да аддзис юр дорсьыс пӧжалӧм сӧчӧн да ва тыра гырнич.
Илля сёйыштіс-юыштіс да бара водіс.
Господьлӧн андел мӧдысь локтіс, инмӧдчис Илля дінӧ да шуис: «Чеччы, сёй [да ю]. Тэнӧ кузь туй виччысьӧ».
Илля чеччис да сёйис-юис. Сёйӧм бӧртиыс ёнмыштіс да петіс туйӧ.
Нелямын лун да нелямын вой сійӧ муніс Енлӧн Хорив керӧс дорӧдз.
Сэні сійӧ узьмӧдчис кырта горсйӧ.
Войнас сылы вӧлі Господьсянь кыв. Господь шуис: «Илля, тэ мыйла тані?»
Илля вочавидзис: «Господьӧй, Тэ — Ен Саваоф. Ме век кесъялі тэныд став сьӧлӧмсянь. Израиль войтыр ӧтдортіс Тэнсьыд йитӧдтӧ, мый Тэ кӧрталін накӧд. Найӧ жуглісны Тэнсьыд висьпуктанінъястӧ, виалісны шыпуртӧн пророкъястӧ, ӧтнам ме ловйӧн коли. Ӧні корсьӧны вины тшӧтш менӧ».
Господь шуис: «Пет да сувт керӧс вылӧ Господь водзӧ. Господь мунас тэ дінті». Кыпӧдчис ыджыд тӧвныр, сійӧ поткӧдліс керӧсъяс да жугліс изкыртаяс. Тӧвнырыс муніс Господь водзвылын, но Господь эз вӧв тӧвнырын.
Тӧвныр бӧрти заводитчис му вӧрӧм, но Господь эз вӧв му вӧрӧмын.
Му вӧрӧм бӧрти петіс би, но Господь эз вӧв би пытшкын.
Би бӧрти пӧльтіс небыд тӧвру. [Господь вӧлі сэні.]
Тайӧс кылігӧн Илля тупкис чужӧмсӧ аслас кышанӧн, петіс кырта горсйысь да сувтіс кырта горсйӧ пыранін дорас.
И кыліс гӧлӧс шы: «Илля, тэ мыйла тані?»
Илля вочавидзис: «Господьӧй, Тэ — Ен Саваоф. Ме век кесъялі тэныд став сьӧлӧмсянь. Израиль войтыр ӧтдортіс Тэнсьыд йитӧдтӧ, мый Тэ кӧрталін накӧд. Найӧ жуглісны Тэнсьыд висьпуктанінъястӧ, виалісны шыпуртӧн пророкъястӧ, ӧтнам ме ловйӧн коли. Ӧні корсьӧны вины тшӧтш менӧ».
Господь шуис Иллялы: «Мун Дамаскӧ овтӧминӧд сійӧ жӧ туйӧдыс, кыті локтін. Сэтчӧ воӧм бӧрын мавтыштӧмӧн пукты Азаилӧс арамейяслы ӧксыӧ. А Израиль войтырлы мавтыштӧмӧн пукты ӧксыӧ Нимшилысь Еху писӧ.
Пророкӧ ас пыддиыд мавтышт Авел-Мехолаысь Елисейӧс, Шафатлысь писӧ.
Азаиллӧн шыпуртысь пышйысьӧс виас Еху, 
а Ехулӧн шыпуртысь пышйысьӧс виас Елисей.
Израиль войтыр пӧвстысь Ме коля ловйӧн сизим сюрс мортӧс, кодъяс эз пидзӧсчанясьны Ваал водзӧ да эз окавны сійӧс».
Илля петіс туйӧ. Мунігмозыс сійӧ аддзис Шафатлысь Елисей писӧ, коді вӧлі гӧрӧ.
Елисей водзвылын восьлалісны дас кык гоз ӧш, ачыс сійӧ гӧрис дас кыкӧд гознас.
Елисей дінті мунігӧн Илля шыбитіс сы вылӧ ассьыс кышансӧ.
Елисей дзик пыр эновтіс ӧшъяссӧ, котӧртіс Илля бӧрся да шуис: «Лэдз меным ветлыны окыштны бать-мамӧс, сэсся ме муна тэ бӧрся».
Илля шуис: «Ветлы, но бӧр лок. Эн вунӧд, мый ме тэныд вӧчи».
Елисей бӧр бергӧдчис видз-му вылас да начкис кык ӧшкӧс. Гӧрсӧ сотіс, а би вылас пражитіс ӧш яйсӧ да сетіс йӧзыслы. Найӧ сёйисны.
Сэсся Елисей муніс Илля бӧрся да кутіс кесъявны сылы.
Арамейяслӧн Бен-Хадад ӧксы чукӧртіс ассьыс тышкайӧзсӧ. Сыкӧд тшӧтш тышӧ петісны сылӧн киподувса комын кык ӧксы асланыс вӧвъясӧн да тарантасъясӧн. Бен-Хадад уськӧдчис Самария кар вылӧ да кытшаліс сійӧс.
Сэсся ыстіс карас израильса Ахав ӧксы дінӧ ассьыс йӧзсӧ висьтавны сылы: «Тадзи висьталӧ Бен-Хадад: тэнад эзысь-зарниыд, гӧтыръясыд да медбур пияныд лоӧны менам».
Израильса ӧксы вочавидзис: «Мед лоас тэнад шуӧмыд серти, ӧксыӧй-ыджыдӧй. Ме да ставыс, мый менам эм, лоӧ тэнад».
Юӧр вайысьяс бара локтісны Ахав дінӧ да шуисны: «Тадзи висьталӧ Бен-Хадад: “Ме ысті ассьым йӧзӧс висьтавны тэныд, мед тэ сетін меным эзысь-зарнитӧ, гӧтыръястӧ да пиянтӧ.
Та вӧсна аски тайӧ кадас ме мӧдӧда ассьым кесйӧгъясӧс, медым найӧ шобасны тэнсьыд керкатӧ да тэнад кесъялысьяслысь керканысӧ да босьтасны сэтысь став донаторсӧ”».
Израильса ӧксы чукӧртіс аслас муысь став юрнуӧдысьсӧ да шуис: «Аддзанныд, тайӧ мортыс кӧсйӧ миянлы лёксӧ.
Кор сійӧ ыстыліс ассьыс йӧзсӧ висьтавны, мый босьтас менсьым гӧтыръясӧс, пиянӧс да эзысь-зарниӧс, ме сылы паныд эг сувт».
Юрнуӧдысьяс да став Израиль войтыр шуисны ӧксыныслы: «Эн кывзы сійӧс и эн мун та вылӧ!»
Бен-Хададлӧн юӧр вайысьяслы Ахав шуис: «Висьталӧй менам ӧксыӧй-ыджыдӧйлы, мый ме, сылӧн кесйӧг, водзынджык вӧлі дась сетны ставсӧ, мый сійӧ корис, а ӧні тайӧ тшӧктӧмыс серти ог вӧч».
Найӧ нуисны тайӧ юӧрсӧ Бен-Хададлы.
Бен-Хадад воча юӧр ыстіс Ахавлы: «Енъяс мед ёна мыждасны менӧ, Самарияысь кӧ весиг китыр пӧим сюрас менам быд тышкамортлы».
Израильса ӧксы шуис юӧр вайысьяслы: «Висьталӧй ӧксыныдлы, мед оз ошйысь тышӧ дасьтысигӧн, а мед ошйысяс тыш бӧртиыс».
Тайӧс кылӧм бӧрын Бен-Хадад мукӧд ӧксыяскӧд чомъясын юигӧн-гажӧдчигӧн шуис аслас тышкайӧзлы: «Дасьтысьӧй босьтны карсӧ!»
Бен-Хададлӧн тышкайӧзыс дасьтысисны уськӧдчыны Самария кар вылӧ.
Сэки ӧти пророк локтіс израильса Ахав ӧксы дінӧ да шуис: «Господь тадзи висьталӧ: “Аддзан-ӧ тайӧ уна лыда тышкайӧзсӧ?
Талун Ме сета найӧс тэнад киӧ, медым тэ тӧдін, мый Ме — Господь”».
Ахав юаліс: «Код пыр тайӧс лоӧ вӧчӧма?»
Пророк вочавидзис: «Господь тадзи висьталӧ: “Тэнад ӧксыув муясын юралысьяслӧн тышкайӧз пыр”».
«А коді медводз уськӧдчас?» — юаліс Ахав.
«Тэ», — вочавидзис пророк.
Ахав чукӧртіс аслас ӧксыув муясын юралысьяслысь тышкайӧзсӧ, налӧн лыдыс вӧлі кыксё комын кык морт.
Сэсся арталіс-гижаліс Израиль войтырлысь тышкайӧзсӧ — налӧн лыдыс вӧлі сизим сюрс морт.
Луншӧр кадӧ Ахавлӧн тышкайӧзыс петісны тышӧ.
А Бен-Хадад да сылӧн киподувса комын кык ӧксы коддзытӧдзныс юисны-гажӧдчисны чомъясын.
Медводз тышӧ петісны Ахавлӧн ӧксыув муясын юралысьяслӧн тышкайӧзыс.
Бен-Хадад мӧдӧдіс ассьыс йӧзсӧ видзӧдлыны, мый вӧчсьӧ. Сылы юӧртісны, Самария карысь пӧ петісны кутшӧмкӧ йӧз.
Бен-Хадад шуис: «Бур могӧн кӧ локтӧны, босьтӧй найӧс ловйӧн. Тышкасьӧм могысь кӧ локтӧны, тшӧтш ловйӧн босьтӧй».
Ахавлӧн ӧксыув муясын юралысьяслӧн тышкайӧз бӧрся карсьыс петісны израильса тышкайӧз.
Быд тышкаморт виис арамейӧс.
Арамейяс пышйисны, а израильсаяс вӧтӧдісны найӧс.
Арамейяслӧн Бен-Хадад ӧксы мукӧд верзьӧмаяскӧд пышйис аслас вӧв вылын.
Израильса ӧксы аслас тышкайӧзкӧд уськӧдчис да пасьвартіс арамейясӧс, босьтіс налысь вӧвъяссӧ да тарантасъяссӧ.
Израильса ӧксы дінӧ матыстчис пророк да шуис: «Бӧр мун да дасьтысь, ӧд во мысти арамейяслӧн ӧксы бара уськӧдчас тэ вылӧ. Бура мӧвпышт, мый тэныд вӧчны».
Арамса ӧксылӧн йӧзыс шуисны сылы: «Израильлӧн Енмыс — керӧсъяслӧн ен [абу ласталӧн ен], та вӧсна найӧ вермисны миянӧс.
Ми кӧ накӧд вермасям ласта вылын, вермам найӧс.
Со мый вӧч: ӧксыясӧс вешты, а на пыдди ассьыд йӧзтӧ пукты юравны ӧксыув муясӧн.
Чукӧрт аслыд тышкайӧзӧс, мыйта тэ воштін тышад, чукӧрт тшӧтш вӧвъясӧс да тарантасъяс, мыйта тэнад вӧлі.
Тышкасям ласта вылын, сэні ми збыльысь пасьвартам израильсаясӧс».
Ӧксы кывзысис да тадзикӧн и вӧчис.
Во мысти Бен-Хадад чукӧртіс арамейясӧс да муніс Афекӧ, мед сэні тышкасьны израильсаяскӧд.
Израильсаяс тшӧтш дасьтысисны тыш кежлӧ. Найӧ босьтісны аскӧдныс сёян-юан да мӧдӧдчисны петны тышӧ.
Израильсаяс сувтісны арамейяслы воча. Израильса тышкайӧз вӧліны быттьӧ кык ичӧтик кӧза чукӧр, а арамейяс тыртісны ставнас мусӧ.
Сэки израильса ӧксы дінӧ матыстчис Енлӧн морт да шуис: «Господь тадзи висьталӧ: “Арамейяс шуӧны, Господь пӧ керӧсъяслӧн ен, абу ковтыслӧн ен. Та вӧсна Ме сета налысь уна лыда тышкайӧзсӧ тэнад киӧ. Сэки ті тӧдмаланныд, мый Ме — Господь”».
Сизим лун чӧж тышкайӧз сулалісны ӧта-мӧдныслы воча.
Сизимӧд луннас пансис тыш. Израильсаяс ӧти лунӧн виисны арамейяслысь сё сюрс пода тышкамортӧс, а ловйӧн кольӧм кызь сизим сюрс морт пышйисны Афек карӧ. Сэні на вылӧ усис карса стенмыс.
Ачыс Бен-Хадад пышйис карас, и вежӧсысь вежӧсӧ котралӧмӧн сійӧ корсис дзебсянін.
Бен-Хададлӧн йӧзыс шуисны сылы: «Ми кывлім, мый израильса ӧксыяс бур сьӧлӧмаӧсь.
Лэдз миянлы пасьтавны шогалан паськӧм да сьыліаным ӧшлыны кӧвъяс. Сэсся ми мунам израильса ӧксы дінӧ.
Гашкӧ, сійӧ ловйӧн коляс тэнӧ».
Шогалан паськӧмӧн да сьыліас кӧвъяс ӧшлӧмӧн арамейяс локтісны израильса ӧксы дінӧ да шуисны: «Тэнад Бен-Хадад кесйӧгыд корӧ, мед тэ ловйӧн колин сійӧс».
Ӧксы юаліс: «Сійӧ ӧмӧй ловъя на?
Сійӧ менам вок».
Тайӧ шуӧмыс локтысьяслы вӧлі бур пасӧн. Ӧксылӧн кывйӧ кутчысьӧмӧн найӧ воча шуисны: «Збыльысь, Бен-Хадад тэнад вок».
Ӧксы шуис: «Вайӧдӧй сійӧс татчӧ».
Бен-Хадад локтіс Ахав дінӧ, и мӧдыс пуксьӧдіс сійӧс орччӧн аслас тарантасӧ.
Бен-Хадад шуис сылы: «Ме бӧр сета тэныд сійӧ каръяссӧ, кодъясӧс коркӧ менам батьӧй босьтліс тэнад батьлысь. Дамаскын верман восьтны аслыд вузасянінъяс, кыдзи коркӧ менам батьӧй восьтліс Самарияын».
Ахав вочавидзис: «Сёрнитчӧм бӧрын ме лэдза тэнӧ».
Бен-Хададкӧд Ахав кӧрталіс йитӧд, сэсся лэдзис сійӧс.
Господьлӧн тшӧктӧм серти ӧти пророк шуис мӧдлы: «Нӧйт менӧ».
Но мӧдыс эз кут тайӧс вӧчны.
Сэки пророк шуис: «Сыысь, мый тэ эн кывзысь Господьлысь, тэнӧ косявлас лев, кор тэ мунан ме дінысь».
Кор тайӧ мортыс муніс, сылы паныдасис лев да косявліс сійӧс.
Сэсся пророк аддзис мӧд мортӧс да шуис: «Нӧйт менӧ».
Мӧдыс вируля яйӧдз нӧйтіс сійӧс.
Нӧйтӧм пророк петіс туй вылӧ, вевттис чужӧмсӧ, медым сійӧс эз тӧдны, да кутіс виччысьны ӧксыӧс.
Кор ӧксы муніс пророк дінті, пророк горӧдіс: «Ме, тэнад кесйӧг, вӧлі тыш вылын. Сэні ӧти тышкаморт вайӧдіс ме дінӧ кутӧм мортӧс да шуис: “Видз сійӧс.
Лэдзан кӧ, юрнад либӧ талант эзысьӧн мынтысян”.
Но ассьым уджъяс вӧчигкості кутӧм мортыд пышйис».
Израильса ӧксы шуис: «Тэнӧ мед мыждасны сідзи, кыдзи тэ ачыд висьталін».
Сэки пророк пӧрччис вевттьӧдсӧ чужӧм вывсьыс, и израильса ӧксы тӧдмаліс сійӧс.
Пророк шуис ӧксылы: «Господь тадзи висьталӧ: “Сыысь, мый тэ лэдзин мортӧс, кодӧс Ме тшӧкті бырӧдны, тэныд ковмас кувны сы пыдди, а тэнад войтырлы — сылӧн войтыр пыдди”».
Скӧрмӧмӧн да шогӧ усьӧмӧн израильса ӧксы муніс гортас Самарияӧ.
Регыд мысти лои татшӧмтор. Самарияса Ахав ӧксылӧн Изреельын вӧлі ӧксы керка. Ӧксы керкакӧд орччӧн вӧлі изреельса Навотлӧн виноград йӧрыс.
Ахав шуис Навотлы: «Сет меным ассьыд виноград йӧртӧ, мый менам керкакӧд орччӧн.
Сэні ме вӧча аслым град йӧр, а тэныд сета бурджык виноград йӧр либӧ мынтыся виноград йӧрсьыд».
Навот шуис Ахавлы: «Мед Господь видзас менӧ аслам батьяслысь мусӧ тэныд сетӧмысь!»
Ахав муніс гортас скӧрмӧмӧн да шогӧ усьӧмӧн, ӧд изреельса Навот шуис, ог пӧ сет тэныд аслам батьяслысь мусӧ.
Гортас Ахав [инас эз ӧшйы,] водіс вольпасяс да мӧдарӧ бергӧдчис, весиг эз кут сёйны.
Ахавлӧн Езавель гӧтырыс пырис сы дінӧ да юаліс: «Мыйысь тэ шогсян, мый весиг сёйны он кӧсйы?»
Ахав вочавидзис: «Ме сёрниті изреельса Навоткӧд. Кори сылысь, мед сійӧ вузалас меным виноград йӧрсӧ, а кӧсъяс кӧ, виноград йӧрыс пыдди ме сета сылы мӧд виноград йӧр. Но сійӧ шуис, мый оз сет меным [батьяссянь сылы вуджӧм] виноград йӧрсӧ».
Езавель гӧтырыс шуис: «Абу ӧмӧй тэ ӧксыыс Израильын? Чеччы, сёй да лӧнь.
Ме сета тэныд изреельса Навотлысь виноград йӧрсӧ».
Езавель гижис Ахав нимсянь гижӧд, вынсьӧдіс сійӧс ӧксылӧн чунькытш пасӧн да ысталіс юрнуӧдысьяслы да нималана йӧзлы Изреель карӧ, кӧні оліс Навот.
Езавель гижис тадзи: «Юӧртӧй, мый ставныслы колӧ видзавны. Навотӧс пуксьӧдӧй став войтырыс водзӧ, быттьӧ сійӧс пыдди пуктанныд.
Навотлы воча пуксьӧдӧй кык шогмытӧм мортӧс. Найӧ мед шуасны: “Тэ омӧльтін Енмӧс да ӧксыӧс”. 
Та бӧрын петкӧдӧй сійӧс карсьыс да кувтӧдзыс изъялӧй».
Навотлӧн карын олысь юрнуӧдысьяс да нималана йӧз вӧчисны, кыдзи тшӧктіс налы Езавель аслас ыстӧм гижӧдын.
Найӧ юӧртісны видзалӧм йылысь, а Навотӧс пуксьӧдісны став войтырыс водзӧ.
Локтісны кык шогмытӧм морт да пуксисны Навотлы воча. Став йӧз водзас найӧ шуалісны: «Навот омӧльтіс Енмӧс да ӧксыӧс».
Сэсся Навотӧс петкӧдісны кар сайӧ да кувтӧдзыс изъялісны.
Езавельлы юӧртісны, Навотӧс пӧ кувтӧдзыс изъялісны.
Тайӧс тӧдмалӧм бӧрын Езавель муніс Ахав дінӧ да шуис: «Мун да босьт изреельса Навотлысь виноград йӧрсӧ, кодӧс сійӧ эз кӧсйы вузавны тэныд.
Навотыд абу нин ловъя».
Ахав кор кыліс, мый [изреельса] Навот кулӧма, [косяліс ассьыс паськӧмсӧ да пасьталіс шогалан паськӧм, сэсся] муніс да босьтіс изреельса Навотлысь виноград йӧрсӧ.
Сэки тишбиса Иллялы вӧлі Господьсянь кыв:
«Мун воча Ахавлы, израильса ӧксылы, коді олӧ Самария карын.
Ӧні сійӧ локтіс Навотлӧн виноград йӧрӧ, мед босьтны сійӧс аслыс.
Висьтав Ахавлы, мый Господь тадзи висьталӧ: тэ мортӧс виин, а ӧні сылысь овмӧссӧ аслыд босьтан.
Нӧшта висьтав сылы, мый Господь тадзи висьталӧ: кӧні понъяс нюлісны Навотлысь вирсӧ, сэні найӧ пондасны нювны и тэнсьыд виртӧ».
Ахав шуис Иллялы: «Мустӧмтысьӧй, тэ бара аддзин менӧ».
Илля шуис: «Аддзи. Тэ ачыд сетчин, мед вӧчны Господь водзын шогмытӧмсӧ [да скӧрмӧдны Сійӧс].
Господь тадзи висьталӧ: “Ме ыста тэ вылӧ ыджыд шог. Ме вужнас нетшышта тэнӧ да бырӧда Израильысь тэсянь чужысь став айуловсӧ ичӧтсянь ыджыдӧдз.
Мый Ме вӧчи Неват Еровамлӧн да Ахий Вааслӧн рӧдъяскӧд, вӧча тшӧтш тэнад рӧдкӧд, ӧд тэ скӧрмӧдін Менӧ да кежӧдін Израиль войтырӧс мыжас”.
Езавель йылысь Господь шуӧ: “Езавельлысь шойсӧ сёясны понъяс Изреель кар сайын.
Ахав рӧдысь коді кулас карын, сійӧс сёясны понъяс, а коді кулас видз-му вылын, сійӧс кокаласны лэбачьяс”».
Израильса ӧксыяс пиысь некод эз вӧч Господь водзын сэтшӧм шогмытӧмсӧ, мый Ахав вӧчис. Та вылӧ сійӧс ыззьӧдіс Езавель гӧтырыс.
Ахав вӧчис зывӧксӧ — юрбитіс идолъяслы аморей войтыр моз, кодӧс Господь вӧтліс Израиль войтыр водзысь.
Иллялысь кывъяссӧ кылӧм бӧрын Ахав [раммӧдчис Господь водзын да бӧрдӧмӧн ветлӧдліс,] косяліс ассьыс паськӧмсӧ, пасьталіс шогалан паськӧм да пондіс видзавны. Ахав ветлӧдліс юрсӧ ӧшӧдӧмӧн, весиг узьліс шогалан паськӧмнас.
Сэки тишбиса Иллялы вӧлі [Ахав йылысь] Господьсянь кыв:
«Видзӧд, кутшӧма Ахав раммӧдчис Ме водзын.
Раммӧдчӧмыс вӧсна сылӧн олан лунъяс дырйи Ме ог ысты шогсӧ.
Но пиыслӧн олан лунъяс дырйи Ме ыста шогсӧ Ахавлӧн рӧдыс вылӧ».
Куим во чӧж Арам да Израиль костын эз вӧвны тышъяс.
Но коймӧд вонас иудаса Иосафат ӧксы муніс израильса Ахав ӧксы дінӧ.
Израильса ӧксы шуис аслас кесйӧгъяслы: «Ті ӧд тӧданныд, мый галаадса Рамот кар — миян.
Мый нӧ ми сы дыра чӧв олам да огӧ босьтӧй сійӧс арамейяслӧн ӧксылысь».
Ахав ӧксы юаліс Иосафатлысь: «Мунан-ӧ тэ мекӧд тышӧ Галаадӧ Рамот кар босьтны?»
Иосафат вочавидзис израильса ӧксылы: «Ме муна тэ моз тышӧ.
Менам тышкайӧзӧй мунасны тэнад тышкайӧзыд моз, менам вӧвъясӧй мунасны тэнад вӧвъясыд моз».
Иосафат нӧшта шуис израильса ӧксылы: «Но медводз юав Господьлысь, мый Сійӧ шуас».
Израильса ӧксы чукӧртіс нёльсё гӧгӧр пророкӧс да юаліс налысь: «Мый шуанныд, уськӧдчыны-ӧ меным галаадса Рамот кар вылӧ?»
Пророкъяс вочавидзисны: «Уськӧдчы. Господь сетас сійӧс тэнад киӧ, ӧксыӧй».
Иосафат юаліс: «Эм-ӧ тані нӧшта Господьлӧн пророк, кодлысь ми эськӧ вермим юавны?»
Израильса ӧксы вочавидзис Иосафатлы: «Эм нӧшта ӧти морт, код пыр ми вермам юавны Господьлысь. Тайӧ Микей, Имлайлӧн пиыс. Но ме мустӧмта тайӧ мортсӧ. Сійӧ некор оз пророкав меным бурсӧ, а сӧмын лёксӧ».
Иосафат шуис: «Ӧксыӧй, тэныд оз позь тадзи сёрнитны».
Израильса ӧксы корис ыджыд чина мортӧс да шуис: «Ветлы да ӧдйӧджык вайӧд Имлайлысь Микей писӧ».
Израильса ӧксы да иудаса Иосафат ӧксы пукалісны ӧксы паськӧмӧн Самария карса дзиръя дорын изэрд вылын, быдӧн аслас юралан пуклӧсын. А пророкъяс ставныс пророкалісны на водзын.
Кенаанлӧн Седекей пиыс вӧчис аслыс кӧрт сюръяс да шуис: «Господь тадзи висьталӧ: “Тайӧ сюръяснас тэ люкалан арамейясӧс да бырӧдан найӧс”».
Тадзи пророкалісны тшӧтш мукӧд пророкъяс. Найӧ шуалісны: «Уськӧдчы галаадса Рамот кар вылӧ. Тэ верман.
Господь сетас Рамот карсӧ тэнад киӧ, ӧксыӧй». Микейла мӧдӧдӧм морт кор аддзис Микейӧс, шуис: «Пророкъяс ставныс юӧртӧны ӧксылы бурсӧ.
Тэнад юӧртӧмыд мед лоӧ налӧн кодь жӧ.
Висьтав ӧксылы бурсӧ».
Микей вочавидзис: «Ловъя Господь водзын кыв сета: Господь мый шуас меным, сійӧс и юӧрта».
Кор Микей локтіс ӧксы дінӧ, ӧксы юаліс: «Висьтав, Микей, уськӧдчыны-ӧ миянлы галаадса Рамот кар вылӧ?»
Мӧдыс вочавидзис: «Уськӧдчы. Тэ верман. Господь сетас сійӧс тэнад киӧ, ӧксыӧй».
Но ӧксы воча шуис сылы: «Кымынысь меным колӧ тшӧктыны, мед тэ кыв сетін, мый Господь нимсянь тэ висьталан меным сӧмын збыльсӧ?»
Сэки Микей кутіс висьтавны: «Ме аддзылі керӧсъяс пасьтала разалӧм Израиль войтырӧс. Найӧ вӧліны видзысьтӧг кольӧм ыжъяс кодьӧсь. 
Господь шуис: “Налӧн абу ыджыдыс. Найӧ мед повтӧг бӧр мунасны гортаныс”».
Израильса ӧксы шуис Иосафатлы: «Ме жӧ шулі, мый сійӧ некор меным бурсӧ оз пророкав, а сӧмын лёксӧ».
Микей водзӧ висьталіс: «[Тадзисӧ ог ме висьтав.] Кывзӧй Господьлысь кывсӧ! Ме аддзылі Господьӧс, Сійӧ пукаліс Аслас юралан пуклӧсын. Сыкӧд орччӧн шуйгаладорас и веськыдладорас сулалісны енэжвывса тышкакотыръяс.
Господь юаліс: “Коді вермас ылӧдлыны Ахавӧс, медым сійӧ тышӧ петас да усяс галаадса Рамот карын?” 
Ӧти вӧзйис ӧтитор, мӧд — мӧдтор.
Сэки матыстчис ӧти лов, сувтіс Господь водзӧ да шуис: “Ме ылӧдла Ахавӧс”. 
“Кутшӧм ногӧн?” — юаліс Господь.
”Ме муна да кута висьтавлыны ылӧгсӧ сылӧн пророкъяс пыр”, — вочавидзис лов.
Господь шуис: “Ылӧдлы. Тэнад артмас.
Мун да вӧч тадзи!”
Ӧні тадзи и лоис — Господь лэдзис ылӧдлысь ловлы сёрнитны тэнад пророкъяс пыр.
Господь шуис, мый тэнӧ виччысьӧ лёктор».
Кенаанлӧн Седекей пиыс матыстчис Микей дінӧ, кучкис сылы бан бокас да шуис: «Тэ чайтан, мый Господьлӧн лолыс эновтіс менӧ да кутіс сёрнитны тэ пыр?»
Микей воча шуис: «Тайӧс тэ гӧгӧрвоан сійӧ лунӧ, кор кутан котравны вежӧсысь вежӧсӧ да корсьны аслыд дзебсянін». Израильса ӧксы шуис: «Нуӧдӧй Микейӧс карса юралысь Амон дінӧ да ӧксылӧн Йоас пи дінӧ. Шуӧй налы, мый ӧксы тшӧктӧ йӧртны Микейӧс дзескыдінӧ да сетны сылы сӧмын нянь да ва, кытчӧдз ӧксы бӧр оз лок тыш вылысь».
Микей шуис ӧксылы: «Тэ кӧ локтан тыш вылысь ловйӧн, сідзкӧ, эз Господь ме пыр сёрнит».
Нӧшта шуис: «Кывзӧй, войтыръяс!»
Израильса Ахав ӧксы да иудаса Иосафат ӧксы уськӧдчисны галаадса Рамот кар вылӧ.
Израильса ӧксы шуис Иосафатлы: «Ме пета тышӧ мӧд паськӧмӧн, мед менӧ оз тӧдны. А тэ пет аслад паськӧмнад».
Израильса ӧксы вежис паськӧмсӧ да петіс тышӧ.
Арамейяслӧн ӧксы шуис аслас тарантаса тышкайӧзӧн комын кык веськӧдлысьлы: «Тышкайӧзкӧд да налӧн веськӧдлысьяскӧд энӧ тышкасьӧй, а сӧмын израильса ӧксыкӧд».
Кор тарантаса тышкайӧзӧн веськӧдлысьяс аддзисны Иосафатӧс, чайтісны, мый сійӧ израильса ӧксы. Найӧ кытшалісны сійӧс, медым уськӧдчыны сы вылӧ.
Но Иосафат кутіс горзыны, 
и тарантаса тышкайӧзӧн веськӧдлысьяс аддзисны, мый сійӧ абу израильса ӧксы, да вешйисны сы дінысь.
Но ӧти тышкаморт зэвтіс ассьыс ньӧввужсӧ да ылӧсас лэдзис ньӧвсӧ. Ньӧвйыс сатшис израильса Ахав ӧксылы кӧрт паськӧм костӧдыс.
Ӧксы горӧдіс аслас тарантасӧн веськӧдлысьлы: «Бӧр бергӧдчы! Петкӧд менӧ тыш вывсьыс! Менӧ дойдісны».
Чорыд тыш муніс сійӧ лунӧ. Ахав ӧксы рытӧдзыс сулаліс аслас тарантасын арамейяслы воча. Сылӧн вирыс киссис тарантасас, а рытнас сійӧ кувсис.
Шонді пуксигӧн израильса тышкайӧзлы юӧртісны, мед ставныс бӧр мунасны асланыс муӧ да асланыс карӧ.
Тадзи куліс израильса ӧксы. Сылысь шойсӧ вайисны Самария карӧ да дзебисны сэні.
Ӧксылысь тарантассӧ мыськалісны самарияса тыын. Понъяс нюлісны ӧксылысь вирсӧ, и кырсалысь аньяс мыссисны вирӧсь ваын. Тадзи иніс Господьлӧн шуӧмыс.
Ахав ӧксыалӧм дырйи мукӧд лоӧмторъяс йылысь, сылӧн уджъясыс йылысь, слӧн лыысь вӧчӧм керка йылысь да лэптӧм каръясыс йылысь гижӧма израильса ӧксыяслӧн каднебӧгӧ.
Ахав куліс да вуджис батьясыс дінӧ. Сы бӧрти ӧксыӧ пуксис сылӧн Ахазий пиыс.
Израильса Ахав ӧксылӧн нёльӧд веськӧдлан воӧ Иуда муын ӧксыӧ пуксис Асалӧн Иосафат пиыс.
Ӧксыӧ пуксигас Иосафатлы вӧлі комын вит арӧс. Кызь вит во чӧж сійӧ юраліс Ерусалимын.
Сылӧн мамыс вӧлі Азува, Шилхилӧн нылыс.
Иосафат ветліс Аса батьыслӧн туйӧд да эз кежлыв сэтысь. Сійӧ вӧчис Господь водзын шогманасӧ.
Но сійӧ эз бырӧд вись ваян мылькъяс, и войтырыс важ мозыс вайліс сэні висьяс да тшынӧдчис.
Иосафат да израильса ӧксы сёрнитчисны лӧнь олӧм йылысь.
Иосафат ӧксыалӧм дырйи мукӧд лоӧмторъяс йылысь, сылӧн тӧдчана уджъяс да тышъяс йылысь гижӧма иудаса ӧксыяслӧн каднебӧгӧ.
Сійӧ бырӧдіс аслас муысь юрбитанінъясын кырсалысьясӧс, кодъяс вӧліны кольӧмаӧсь Аса батьыслӧн кадсянь на.
Эдом муын сэки эз вӧв ӧксыыс, муӧн веськӧдліс юралысь.
Иосафат ӧксы вӧчис фарсисса корабльяс, медым найӧ кывтісны Офирӧ зарнила.
Но корабльясыс эз воны Офирӧдз, а жугалісны Эцион-Геверын.
Ахавлӧн Ахазий пиыс сэки вӧзйис Иосафатлы: «Менам кесйӧгъяс мед кывтасны тэнад кесйӧгъяскӧд».
Но Иосафат эз мун та вылӧ.
Иосафат куліс да вуджис батьясыс дінӧ. Сійӧс дзебисны Давид пӧльыслӧн карӧ батьясыскӧд орччӧн.
Иосафат бӧрти ӧксыӧ пуксис сылӧн Иорам пиыс.
Иудаса Иосафат ӧксылӧн дас сизимӧд веськӧдлан воӧ Израиль муын ӧксыӧ пуксис Ахавлӧн Ахазий пиыс. Кык во чӧж сійӧ юраліс Самария карын.
Сійӧ вӧчис Господь водзын шогмытӧмсӧ, ветліс бать-мамыслӧн туйӧд да Неват Еровамлӧн туйӧд. Еровам коркӧ кежӧдіс Израиль войтырӧс мыжас.
Ахазий юрбитіс-копрасис Вааллы. Батьыс моз тайӧн скӧрмӧдіс Господьӧс, Израильлысь Енсӧ.
{Еврей йӧз (комиӧдіс Kodko) @ Ӧксыяслӧн 4 небӧг @ религ. гижӧд @ Библия @ 2021 @ Лб. .}
ӦКСЫЯСЛӦН 4 НЕБӦГ
Ахавлӧн кулӧм бӧрын моавсаяс кыпӧдчисны Израильлы паныд.
Самарияын олігас Ахазий аслас керкаын усис вылі судта ӧшиньӧдыс да ёна доймис.
Сійӧ корис ассьыс йӧзсӧ да шуис: «Ветлӧй экронса Ваал-Зевув ен дінӧ да юалӧй, бурда-ӧ ме тайӧ доймӧмсьыс?» 
[Мӧдӧдӧмаяс мунісны.]
Но Тишби карын олысь Иллялы Господьлӧн андел шуис: «Пет воча самарияса ӧксылӧн мӧдӧдӧмаяслы да висьтав налы: “Мыйла ті мунанныд юасьны экронса Ваал-Зевув енлысь? Израильын ӧмӧй абу Енмыс?
Господь тадзи висьталӧ ӧксыныдлы: тэ он чеччы вольпась вывсьыд, кӧні куйлан. Тэ кулан”».
Илля муніс [да висьталіс тайӧс налы].
Мӧдӧдӧмаяс бӧр мунісны Ахазий ӧксыныс дінӧ.
Сійӧ юаліс налысь: «Мыйла ті сэтшӧм ӧдйӧ бӧр бергӧдчинныд?»
Найӧ вочавидзисны: «Миянлы паныдасис морт, коді тшӧктіс миянлы бӧр бергӧдчыны ӧксыным дінӧ да шуны, мый Господь тадзи висьталӧ: “Мыйла тэ мӧдӧдін ассьыд йӧзтӧ юасьны экронса Ваал-Зевув енлысь? Израильын ӧмӧй абу Енмыс?
Тэ он чеччы вольпась вывсьыд, кӧні куйлан. Тэ кулан”».
Ӧксы юаліс: «Кутшӧмджык сійӧ мортыс, коді паныдасис тіянлы да висьталіс тайӧс?»
Ӧксылы вочавидзисны: «Сы вылын вӧлі гӧна паськӧм, коскас — кучик тасма».
Ӧксы шуис: «Тайӧ Тишби карысь Илля».
Ӧксы мӧдӧдіс Илля дінӧ ветымын тышкамортӧс налӧн веськӧдлыськӧд.
Илля пукаліс керӧс йылын, кор тышкакотырӧн веськӧдлысь кайис сы дінӧ да шуис: «Енлӧн мортӧй! Ӧксы тшӧктӧ тэныд лэччыны».
Илля вочавидзис: «Ме кӧ Енлӧн морт, мед лэччас енэжсяньыс би да сотас тэнӧ да тэнсьыд ветымын тышкаморттӧ».
Сэки енэжсяньыс лэччис би да сотіс тышкакотырӧн веськӧдлысьӧс да сылысь йӧзсӧ.
Ӧксы нӧшта мӧдӧдіс Илля дінӧ ветымын тышкамортӧс налӧн веськӧдлыськӧд.
Веськӧдлысьыс шуис Иллялы: «Енлӧн мортӧй! Ӧксы тшӧктӧ, мед тэ ӧдйӧджык лэччин».
Илля вочавидзис: «Ме кӧ Енлӧн морт, мед лэччас енэжсяньыс би да сотас тэнӧ да тэнсьыд ветымын тышкаморттӧ».
Сэки енэжсяньыс лэччис Енлӧн би да сотіс тышкакотырӧн веськӧдлысьӧс да сылысь йӧзсӧ.
Ӧксы коймӧдысь мӧдӧдіс ветымын тышкамортӧс налӧн веськӧдлыськӧд.
Веськӧдлысьыс кайис Илля дінӧ да пидзӧс вылас сувтӧмӧн корис: «Енлӧн мортӧй!
Ло бур сьӧлӧма ме дінӧ да тайӧ ветымын мортыс дінӧ, аслад кесйӧгъяс дінӧ. Эн бырӧд миянӧс.
Ме тӧда, мый енэжсяньыс лэччис би да сотіс кык тышкакотырсӧ да налысь веськӧдлысьяссӧ.
Но ӧні ло бур сьӧлӧма ме дінӧ. Эн бырӧд миянӧс».
Господьлӧн андел шуис Иллялы: «Мун сыкӧд. Эн пов сыысь».
Илля муніс тышкакотырӧн веськӧдлыськӧд ӧксы дінӧ.
Ӧксылы Илля шуис: «Господь тадзи висьталӧ: “Израильын ӧмӧй абу Енмыс, кодлысь позьӧ юавны? Тэ мӧдӧдін йӧзтӧ юасьны экронса Ваал-Зевув енлысь. Та вӧсна тэ он чеччы вольпась вывсьыд, кӧні куйлан. Тэ кулан”».
Ахазий куліс, кыдзи Господь висьталіс Илля пыр.
Ахазийлӧн эз вӧв пиыс, та вӧсна сы бӧрти ӧксыӧ пуксис Иорам [Ахазийлӧн вокыс]. Тайӧ вӧлі иудаса Иорам ӧксылӧн, Иосафат пилӧн, мӧд веськӧдлан воӧ.
Ахазий ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма израильса ӧксыяслӧн каднебӧгӧ.
Со кыдзи Господь тӧвнырӧн кыпӧдіс Илляӧс енэжӧ. Кор Илля Елисейкӧд вӧлі мунӧны Галгал карысь, Илля шуис Елисейлы: «Тэ кольччы татчӧ, а менӧ Господь тшӧктӧ мунны Вефильӧ».
Но Елисей вочавидзис: «Ловъя Господь водзын да тэ водзын шуа: ме тэысь ог кольччы».
И найӧ ӧтлаын мунісны Вефильӧ.
Вефильын Елисейлы воча петісны сэтчӧс пророк-велӧдчысьяс да шуисны: «Тӧдан-ӧ, мый талун Господь босьтас Ас дінас тэнсьыд ыджыдтӧ?»
Елисей вочавидзис: «Тӧда. Но ті чӧв олӧй!»
Илля шуис Елисейлы: «Кольччы татчӧ, Елисей, а менӧ Господь тшӧктӧ мунны Ериконӧ».
Но Елисей вочавидзис: «Ловъя Господь водзын да тэ водзын шуа: ме тэысь ог кольччы».
И найӧ ӧтлаын мунісны Ериконӧ.
Ериконын Елисей дінӧ матыстчисны сэтчӧс пророк-велӧдчысьяс да юалісны сылысь: «Тӧдан-ӧ, мый талун Господь босьтас Ас дінас тэнсьыд ыджыдтӧ?»
Елисей вочавидзис: «Тӧда. Но ті чӧв олӧй!»
Илля бара шуис Елисейлы: «Кольччы татчӧ, а менӧ Господь тшӧктӧ мунны Йӧрдан ю дорӧ».
Но Елисей вочавидзис: «Ловъя Господь водзын да тэ водзын шуа: ме тэысь ог кольччы».
И найӧ водзӧ мунісны.
Пророк-велӧдчысьяс пӧвстысь ветымынӧн мунісны на бӧрся. Кор Илля Елисейкӧд воисны Йӧрдан ю дорӧ, пророк-велӧдчысьяс сувтісны ылӧджык.
Илля пӧрччис ассьыс кышансӧ, гартыштіс сійӧс да кучкис сыӧн ваӧ. Ваыс шӧри потіс, и найӧ вуджисны юсӧ косінті.
Вуджӧм бӧраныс Илля юаліс Елисейлысь: «Тэ дінысь менӧ босьттӧдз мый тэ кӧсъян, мед ме вӧчи тэныд?»
Елисей вочавидзис: «Тэын олысь лолыс мед лоас ме пытшкын кык пӧвстӧн унджык мукӧд велӧдчысьяс пытшкын дорысь».
Илля шуис: «Зэв сьӧкыдтор тэ коран.
Аддзылан кӧ, кыдзи менӧ лоӧ босьтӧма тэ дінысь, сэки тэнад корӧмыд збыльмас. Он кӧ аддзыв — оз збыльмы».
Мунігмозныс Илля да Елисей сёрнитісны ас костаныс. Виччысьтӧг тыдовтчисны биа тарантаса вӧвъяс да торйӧдісны найӧс. Тӧвныр кыпӧдіс Илляӧс енэжӧ.
А Елисей видзӧдіс да горзіс: «Батьӧй, батьӧй! Тэ — Израильлӧн лачаыс, а абу верзьӧмаяс да тарантасъяс!»
Кор Илля вошис Елисейлӧн син водзысь, Елисей косяліс паськӧмсӧ кык пельӧ.
Сійӧ лэптіс Иллялысь му вылӧ усьӧм кышансӧ да бӧр муніс Йӧрдан ю дорӧ.
Сэні Елисей кучкис Иллялӧн кышаннас ваӧ да шуис: «Кӧні ӧні Господь, Иллялӧн Енмыс?»
Кор Елисей кучкис ваас, юыс шӧри потіс, и Елисей вуджис юсӧ.
Ериконысь локтӧм пророк-велӧдчысьяс аддзылісны, мый вӧчис Елисей, да шуисны, Иллялӧн лолыс пӧ Елисей вылын.
Найӧ матыстчисны Елисей дінӧ да муӧдзыс копыртчӧмӧн шуисны сылы: «Миян пӧвстын, тэнад кесйӧгъяс пӧвстын, эм ветымын ён морт.
Найӧ мед ветласны да корсясны тэнсьыд ыджыдтӧ.
Гашкӧ, Господьлӧн Лолыс нуис сійӧс кытчӧкӧ да шыбитіс кутшӧмкӧ керӧс йылӧ либӧ ковтысӧ».
Елисей вочавидзис: «Оз ков мунны».
Но пророк-велӧдчысьяс мырдӧн корисны. Елисей дӧзмис да шуис: «Мӧдӧдӧй, колӧ кӧ».
Сэки мӧдӧдісны ветымын мортӧс, и найӧ мунісны да куим лун чӧж корсисны Илляӧс, но эз аддзыны. Кор найӧ локтісны Елисей дінӧ Ериконӧ, сійӧ шуис: «Ме ӧд шулі, мый оз ков тіянлы муннысӧ».
Ериконын олысьяс шуисны Елисейлы: «Ыджыдӧй, тэ ачыд аддзан, мый миян карным сулалӧ бур местаын.
Но тані ваыс шогмытӧм, муыс вынтӧм».
Елисей шуис: «Пуктӧй выль дозйӧ сов да вайӧй меным».
Тадзи и вӧчисны.
Елисей муніс ва петанін дорӧ, шыбитіс сэтчӧ совсӧ да шуис: «Господь тадзи висьталӧ: “Ме бурдӧді-сӧстӧммӧді васӧ. Водзӧвылӧ сійӧ некодлы оз кут вайны кулӧм, и му вылас ставыс кутас быдмыны”».
Елисейлӧн шуӧм серти ваыс бурмис, сэні ӧнӧдз ваыс бур.
Ериконсянь Елисей муніс Вефильӧ.
Туй кузя мунігас карсьыс петісны зонпосни да пондісны серавны сы вылын: «Куш юра, мун татысь! Куш юра, мун татысь!»
Елисей бергӧдчис налань, видзӧдліс на вылӧ да ёрис Господь нимӧн.
Сэки кык ош петісны вӧрсьыс да косявлісны зонпосни пӧвстысь нелямын кык зонкаӧс.
А Елисей муніс водзӧ да кайис Кармил керӧсӧ. Сэтысянь сійӧ бӧр локтіс Самария карӧ.
Иудаса Иосафат ӧксылӧн дас кӧкъямысӧд веськӧдлан воӧ Израиль муын ӧксыӧ пуксис Ахавлӧн Иорам пиыс. Дас кык во чӧж сійӧ юраліс Самария карын. Иорам вӧчис Господь водзын шогмытӧмсӧ, но эз сы мында, мыйта вӧчисны бать-мамыс. Иорам жугліс-бырӧдіс Вааллы вӧчӧм юрбитан из, мый сувтӧдліс сылӧн батьыс.
Но Иорам эз эновтчы сійӧ мыжъяссьыс, мыйӧн Неватлӧн Еровам пиыс коркӧ кежӧдіс Израиль войтырӧс мыжас.
Моавса Мешай нима ӧксылӧн вӧлі зэв уна ыж-меж. Сійӧ ыстыліс вот пыдди израильса ӧксылы сё сюрс баля да сё сюрс шыртӧм меж.
Но Ахавлӧн кулӧм бӧрын моавса ӧксы кыпӧдчис израильса Иорам ӧксылы паныд.
Сэки Иорам ӧксы петіс Самария карысь да чукӧртіс став израильса тышкайӧзсӧ.
Сійӧ мӧдӧдіс иудаса Иосафат ӧксы дінӧ ассьыс йӧзсӧ да тшӧктіс висьтавны сылы: «Моавса ӧксы кыпӧдчис меным паныд. Мунан-ӧ тэ мекӧд тышӧ Моавлы паныд?» 
«Муна, — вочавидзис Иосафат.
— Ме муна тэ моз тышӧ. Менам тышкайӧзӧй мунасны тэнад тышкайӧзыд моз, менам вӧвъясӧй мунасны тэнад вӧвъясыд моз».
Иосафат юаліс: «Кысянь ми уськӧдчам?»
Израильса ӧксы вочавидзис: «Эдом овтӧминсянь».
Израильса, иудаса да эдомса ӧксыяс петісны туйӧ. Кытшола туйӧд сизим лун мунӧм бӧрын налӧн помасис ваныс — тышкайӧзлы да накӧд мунысь пемӧсъяслы нинӧм вӧлі юнысӧ.
«Курыд шог миянлы! — горӧдіс израильса ӧксы. — Господь татчӧ вайӧдіс миянӧс, куим ӧксыӧс, мед сетны миянӧс моавсаяс киӧ».
Иосафат юаліс: «Эм-ӧ миян пӧвстын Господьлӧн пророк, кодлысь эськӧ ми вермам юавны, мый Господь шуас миянлы?»
Израильса ӧксылӧн кесйӧгъясысь ӧти шуис: «Тані эм Шафатлӧн Елисей пиыс, сійӧ коркӧ кесъявліс Илля пророклы».
Иосафат шуис: «Сылӧн эм Господьсянь кыв».
Иудаса Иосафат ӧксы, израильса ӧксы да эдомса ӧксы мунісны Елисей дінӧ.
Елисей шуис израильса ӧксылы: «Мыйла тэ локтін ме дінӧ?
Мун аслад бать-мамыдлӧн пророкъяс дінӧ».
«Ог мун, — вочавидзис израильса ӧксы. — Господь вайӧдіс миянӧс, куим ӧксыӧс, татчӧ, мед сетны миянӧс моавсаяс киӧ».
Елисей воча шуис: «Ловъя Господь Саваоф водзын, кодлы ме кесъяла, шуа: ме кӧ эг пыдди пукты Иосафатӧс, иудаса ӧксыӧс, ме эськӧ эг и видзӧдлы тэ вылӧ».
Сэсся Елисей тшӧктіс вайӧдны гуслиӧн ворсысьӧс.
Сылӧн ворсігӧн Господьлӧн вына киыс инмӧдчис Елисей дінӧ. Елисей шуис: «Господь тадзи висьталӧ: “Кодйӧй гуранъяс тайӧ ковтыс пасьталаыс”. Ӧд Господь тадзи висьталӧ: “Тӧвзьысьӧм да зэрӧм ті онӧ аддзылӧй, но тайӧ ковтысыс тырас ваӧн. Сэтысь кутанныд юны асьныд, тшӧтш тіян пемӧсъясныд”.
Господьлы абу сьӧкыд вӧчны тайӧс.
Нӧшта Сійӧ сетас тіян киӧ моавсаясӧс. Ті босьтанныд налысь став изкарсӧ да ыджыд каръяссӧ, кераланныд налысь бур пуяссӧ, тырталанныд ва петанінъяссӧ да налӧн бур видз-муяс вылӧ шыблаланныд изъяс».
Мӧд асывнас, нянь вись ваян кадӧ, Эдомсянь став ковтыс пасьтала пондіс визувтны ва.
Моавсаяс кор тӧдмалісны, мый ӧксыяс петісны налы паныд тышӧ, чукӧртісны став ассьыныс айуловсӧ — томӧс и пӧрысьӧс — да сувтӧдісны найӧс видзны ассьыныс мунысӧ.
Сійӧ асывнас моавсаяс чеччисны водз. Асъя шонді югӧрсьыс ковтысын ваыс тыдаліс налы чим гӧрдӧн, быттьӧ вир.
«Тайӧ вир! — шуалісны моавсаяс.
— Ӧксыяс, буракӧ, тышкасьӧмаӧсь ас костаныс да виалӧмаӧсь ӧта-мӧднысӧ.
Моавсаяс, мунамӧй да босьтамӧй налысь эмбурсӧ!»
Кор моавсаяс локтісны израильсаяслӧн сувтанінӧ, израильсаяс уськӧдчисны на вылӧ. Моавсаяс пондісны пышйыны, но израильсаяс вӧтчисны на бӧрся да виалісны найӧс.
Израильсаяс кушӧдз бырӧдісны налысь каръяссӧ. Налӧн бур видз-муяс вылӧ быд израильса тышкаморт шыбитіс из, тадзи видз-муясыс тырисны изъясӧн.
Ва петанінъяссӧ тырталісны, бур пуяссӧ кералісны. Пасьвартісны ставсӧ, сӧмын Кир-Харешет кар колис сулавны.
Но и сійӧс кытшалісны да пасьвартісны изйӧн лыйсьысьяс.
Моавса ӧксы кор аддзис, мый найӧс вермӧны, босьтіс аскӧдыс сизимсё шыпуртаӧс, мед уськӧдчыны эдомса ӧксы вылӧ да тадзикӧн петны кытшалӧм карсьыс.
Но сылӧн тайӧ эз артмы.
Сэки босьтіс ассьыс медыджыд писӧ, кодлы вуджӧ вӧлі ӧксыалӧмыс, да карса стен вылын сотіс сійӧс вись пыдди.
Тайӧ лоӧмторйыс ёна скӧрмӧдіс израильсаясӧс. Найӧ эновтісны моавсаясӧс да бӧр локтісны асланыс муӧ.
Ӧти пророк-велӧдчысьлӧн гӧтырыс бӧрдӧмӧн висьталіс Елисейлы: «Менам верӧсӧй, тэнад кесйӧгыд, куліс.
Тэ ачыд тӧдан, мый сійӧ оліс Господьысь полӧмӧн.
А ӧні сійӧ мортыс, кодлы ми уджйӧзаӧсь, кӧсйӧ босьтны менсьым кыкнан пиӧс аслыс кесйӧг пыдди».
«Мыйӧн ме верма отсавны тэныд? — юаліс Елисей.
— Висьтав меным, мый тэнад эм гортад».
Ань вочавидзис: «Вый тыра доз кындзи менам, тэнад кесйӧглӧн, нинӧм абу».
Елисей шуис: «Мун да кор орччӧн олысьясыдлысь кыдз позьӧ унджык куш доз.
Сэсся пияныдкӧд йигнась гортад да кисьтав выйтӧ дозъясас.
Тырӧм дозъяссӧ вешты бокӧ».
Ань муніс да пияныскӧд йигнасис гортас.
Пияныс сеталісны сылы куш дозъяс, а мӧдыс кисьталіс сэтчӧ выйсӧ.
Кор став дозйыс тырис, ань шуис пиыслы: «Мыччы нӧшта ӧти доз».
Мӧдыс вочавидзис: «Куш дозйыд сэсся абу».
Сэки выйыс дугдіс петны аньлӧн дозйысь.
Ань муніс да ставсӧ висьталіс Енлӧн морт Елисейлы.
Елисей шуис: «Мун, вузав выйтӧ да мынты уджйӧзтӧ.
А мый коляс, сійӧ мед лоӧ тэныд да пияныдлы олӧм вылӧ».
Ӧтчыд Елисей локтіс Шунем карӧ.
Сэні оліс зэв озыр ань. Сійӧ ёна корис Елисейӧс пыравны сы ордӧ сёйны.
И быд пӧрйӧ, кор Елисей волывліс тайӧ карас, сійӧ пыравліс сёйны тайӧ аньыс ордӧ.
Коркӧ ань шуис аслас верӧслы: «Ме тӧда, мый тайӧ мортыс, коді пыравлӧ миян ордӧ, Енлӧн вежа морт.
Вай вӧчам сылы керка вевт выланым ичӧтик жыр, пуктам сэтчӧ вольпась, сувтӧдам пызан, улӧс да би доз.
Кор сійӧ локтас миян ордӧ, мед сэні кутас узьны».
Кор Елисей бара локтіс на ордӧ, сійӧ кайис тайӧ жыръяс да водіс шойччыны. Аслас Гезий кесйӧглы Елисей тшӧктіс корны шунемса аньӧс ас дінас.
Кесйӧг корис аньӧс, и сійӧ локтіс да сувтіс Гезий водзӧ.
Елисей шуис Гезийлы: «Юав сылысь, мый ме верма вӧчны сылы миян вӧсна тӧждысьӧмысь.
Ме верма сёрнитны сы йылысь ӧксыкӧд либӧ тышкайӧзӧн веськӧдлыськӧд?»
Ань вочавидзис: «Оз ков. Ме ӧд ола аслам войтыр пӧвстын».
«Но кутшӧм буртор ми вермам вӧчны сылы?» — юаліс Елисей Гезийлысь.
Мӧдыс вочавидзис: «Сылӧн абу пиыс, а верӧсыс сылӧн пӧрысь нин».
Елисей шуис: «Кор сійӧс».
Гезий корис аньӧс. Ань пырис да сувтіс ӧдзӧс дорас.
Елисей шуис сылы: «Локтан воӧ тайӧ кадас тэ кутан кутны ки вылад ассьыд питӧ».
«Ыджыдӧй, Енлӧн мортӧй, эн пӧрйӧдлы менӧ, ассьыд кесйӧгтӧ», — шуис ань.
Но сійӧ збыльысь кутіс нӧбасьны и во мысти сійӧ жӧ кадас чужтіс пиӧс. Елисейлӧн шуӧмыс иніс.
Кага быдмис. Ӧтчыд сійӧ муніс нянь вундысьяс дінӧ корсьны батьсӧ.
Батьыслы бӧрдӧмӧн висьталіс, менам пӧ юрӧй ёна висьӧ.
Батьыс тшӧктіс кесйӧгыслы нуны писӧ мамыс дінӧ.
Кесйӧгыс босьтіс зонкаӧс ки вылас да нуис мамыс дінӧ.
Луншӧр кадӧдзыс пиыс пукаліс мамыслӧн пидзӧс вылын, а сэсся куліс.
Мамыс катӧдіс сійӧс Енлӧн мортлы лӧсьӧдӧм жырйӧ, пуктіс сылӧн вольпась вылӧ, йигналіс ӧдзӧссӧ да петіс керкасьыс.
Ань корис верӧссӧ да шуис: «Сет меным ӧти кесйӧгӧс да осёлӧс. Ме тэрмасьӧмӧн ветла Енлӧн морт дінӧ да регыд бӧр локта».
«Мыйла талун сы дінӧ муннысӧ? — юаліс верӧсыс.
— Талун ӧд абу выль тӧлысь пасъян лун и абу шойччан лун».
Ань вочавидзис: «Эн тӧждысь, ставыс бур».
Ань пуксис осёл вылӧ да шуис кесйӧгыслы: «Нуӧд осёлӧс.
Мунам тэрмасьӧмӧн. Сувтан сӧмын сэк, кор тшӧкта».
Ань петіс туйӧ. Сійӧ воис Енлӧн морт дінӧ Кармил керӧс вылӧ.
Енлӧн морт ылісянь аддзис аньӧс. Сійӧ шуис Гезий кесйӧгыслы: «Видзӧд, шунемса аньыд локтӧ.
Мун котӧрт сылы воча да юав, ставыс-ӧ сылӧн бур. Дзоньвидзаӧсь-ӧ верӧсыс да пиыс?»
Ань вочавидзис кесйӧглы, мый ставыс бур.
Керӧс вылӧ Енлӧн морт дінӧ воӧм бӧрын ань уськӧдчис да шашаритчис сылы кокас.
Гезий матыстчис, мед вештыны сійӧс, но Енлӧн морт шуис: «Эн вӧрӧд. Сылӧн ыджыд шог. Господь дзебис тайӧс меысь, и эз висьтав меным».
«Ыджыдӧй, ме ӧмӧй кори тэнсьыд пиӧс! — шуаліс ань.
— Эг ӧмӧй ме шулы тэныд, мый оз ков менӧ пӧрйӧдлыны!»
Сэки Елисей шуис Гезийлы: «Вӧнясь, босьт менсьым беддьӧс да тэрмасьӧмӧн пет туйӧ.
Паныдасяс кӧ тэныд кодкӧ, сыкӧд эн чолӧмась, а сійӧ кӧ чолӧмасяс тэкӧд, эн вочавидз.
Менсьым беддьӧс пукты зонкаыслы чужӧм вылас».
Зонкалӧн мамыс шуис: «Ловъя Господь водзын да тэ водзын шуа: тэтӧг ме ог мун».
Сэки Елисей тшӧтш муніс анькӧд.
Гезий водзджык воис аньлӧн керкаӧ. Сійӧ пуктіс бедьсӧ зонкалы чужӧм вылас, но мӧдыс эз вӧрзьы ни шы эз лэдз.
Гезий воча петіс Елисейлы да висьталіс, зонкаыд пӧ эз садьмы.
Елисей пырис керкаас да аддзис аслас вольпась вылын куйлысь кулӧм зонкаӧс.
Сійӧ йигнасис, кевмысис Господьлы да нюжӧдчис-водіс зонка вылӧ: вомдорсӧ матыстіс сылӧн вомдорӧ, синсӧ — сылӧн синмӧ, ки пыдӧссӧ — сылӧн ки пыдӧсӧ. Топӧдчис зонка бердӧ, и зонкалӧн вир-яйыс кутіс шонавны.
Елисей чеччис, ӧтарӧ-мӧдарӧ ветлӧдлыштіс да бара водіс-нюжӧдчис зонка вылӧ.
Зонка сизимысь несйыштіс да восьтіс синсӧ.
Елисей корис Гезийӧс да шуис сылы: «Кор татчӧ шунемса аньӧс».
Гезий корис сійӧс.
Ань локтіс, и Елисей шуис сылы: «Босьт питӧ».
Ань уськӧдчис Елисей кок дорӧ да муӧдзыс копыртчыліс.
Сэсся босьтіс писӧ да петіс.
Елисей бӧр локтіс Галгалӧ.
Сэки сійӧ муас йӧзыс ёна тшыгъялісны. Ӧтчыд пророк-велӧдчысьяс пукалісны Елисей ордын.
Елисей тшӧктіс аслас кесйӧглы пуктыны би вылӧ ыджыд пӧрт да пуны пророк-велӧдчысьяслы шыд.
Велӧдчысьяс пӧвстысь ӧти муніс видз вылӧ чукӧртны сёян быдмӧгъяс. Аддзис гартчан быдмӧг, чукӧртіс сы вылысь вотӧссӧ да гартыштіс паськӧмас.
Сэсся локтіс, вотӧссӧ посньӧдліс да пуктіс шыд пиӧ. Но некод эз тӧд, мыйсяма быдмӧг тайӧ вӧлі.
Кор шыдыс пусис, ставныслы сетісны сёйны.
Шыдсӧ видлӧм бӧрас найӧ горӧдісны: «Енлӧн мортӧй! Тайӧ сёяныс кулӧм вайӧ!»
И водзӧ эз кутны сёйны.
Елисей корис пызьтор, пуктіс сійӧс шыд пиӧ да шуис [Гезийлы]: «Сет ставныслы сёйны».
Шыд пиын некутшӧм пагӧдантор эз нин вӧв.
Ваал-Шалиша карысь локтіс ӧти морт да вайис Енлӧн морт Елисейлы выль воӧм нянь: пӧжалӧм кызь ид нянь да уль тусьяс кышнас.
Елисей шуис кесйӧгыслы: «Сетав йӧзыслы, мед сёясны».
Кесйӧгыс шензьӧмӧн воча шуис: «Кыдзи нӧ тайӧ тырмас сё мортыслы?»
Но Елисей шуис: «Сет йӧзыслы сёйны. Ӧд Господь тадзи висьталӧ: “Найӧ пӧттӧдзныс сёясны да нӧшта коляс на”».
Кесйӧгыс кывзысис да сеталіс йӧзыслы. Ставныс пӧттӧдзныс сёйисны и нӧшта колис на. Тадзи иніс Господьлӧн шуӧмыс.
Арамса ӧксылӧн вӧлі тышкайӧзӧн веськӧдлысь, кодлӧн нимыс вӧлі Нееман. Ӧксы сійӧс пыдди пуктіс, ӧд сы пыр Господь сетіс арамейяслы унаысь вермыны.
Но тайӧ вына тышкасьысьыс висис проказаӧн.
Ӧтчыд, кор арамейяс уськӧдчисны Израиль вылӧ, найӧ босьтісны пленӧ израильса нывкаӧс. Сійӧ лои Нееман гӧтырлы кесйӧгӧн.
Нывка шуис Нееманлӧн гӧтырлы: «Ветлас кӧ менам ыджыдӧй Самарияын олысь пророк дінӧ, пророк эськӧ бурдӧдас сійӧс проказасьыс».
Нееман муніс аслас ӧксы дінӧ да юӧртіс сылы, мый висьталіс израильса нывка.
Арамейяслӧн ӧксы шуис Нееманлы: «Ветлы. Ме ыста тэкӧд израильса ӧксылы гижӧд».
Нееман муніс. Сійӧ босьтіс аскӧдыс дас талант эзысь, квайт сюрс сикель зарни да дас вӧччан паськӧм.
Нееман локтіс израильса ӧксы дінӧ да сетіс сылы гижӧдсӧ. Сэні вӧлі гижӧма: «Тайӧ гижӧдсӧ ваяс тэныд менам Нееман кесъялысьӧй. Ме мӧдӧді сійӧс тэ дінӧ, медым тэ бурдӧдін сійӧс проказаысь».
Гижӧдсӧ лыддьӧм бӧрын израильса ӧксы косяліс ассьыс паськӧмсӧ да шуис: «Ме ӧмӧй Ен? Мортыслӧн олӧмыс да кулӧмыс ӧмӧй менам киын? Мыйла арамейяслӧн ӧксы мӧдӧдӧма тайӧ мортсӧ ме дінӧ, медым ме бурдӧді сійӧс проказаысь?
Аддзанныд, сійӧ корсьӧ помка зыксьыны мекӧд».
Кор Енлӧн морт Елисейлы кывсис, мый израильса ӧксы косялӧма ассьыс паськӧмсӧ, сійӧ мӧдӧдіс мортӧс да тшӧктіс висьтавны ӧксылы: «Мый вӧсна тэ паськӧмтӧ косялін?
Сійӧ мортыс, код вӧсна тэ тадзи вӧчин, мед локтас ме дінӧ да тӧдмалас, мый Израильын эм пророк».
Аслас вӧвъясӧн да тарантасъясӧн Нееман локтіс Елисей керка дінӧ да сувтіс ӧдзӧс дорас.
Елисей мӧдӧдіс Нееман дінӧ юӧртысьӧс, тшӧктіс висьтавны сылы: «Мун Йӧрдан ю дорӧ да сизимысь мыссьы юас. Сэки тэнад кучикыд выльмас да лоас сӧстӧм».
Нееман скӧрмис да муніс шуасьӧмӧн: «Ме чайті, пророк ачыс петас ме дінӧ, кевмысяс Господьлы, аслас Енлы, нюжӧдлас кисӧ висянін весьтӧ да бурдӧдас менӧ проказаысь.
Дамаскса Авана да Фарфар юяс абу ӧмӧй бурджыкӧсь израильса юяс дорысь?
Ме ӧмӧй ог вермы сэні мыссьыны да сӧстӧммыны?»
Скӧралігтырйи Нееман муніс сэтысь.
Нееманлӧн кесйӧгъяс матыстчисны сы дінӧ да шуисны: «Ыджыдӧй, пророк кӧ тшӧктіс тэныд вӧчны мыйкӧ ыджыдджыктор, тэ ӧмӧй эн вӧч?
А ӧні сійӧ тшӧктіс тэныд сӧмын мыссьыны, мед тэ сӧстӧммин».
Сэки Нееман муніс Йӧрдан ю дорӧ да Ен мортлӧн шуӧм серти сизимысь дзумгысьліс юас. Нееман лои сӧстӧм, сылӧн кучикыс лои кагалӧн кодь.
Нееман аслас йӧзкӧд бӧр локтіс Енлӧн морт дінӧ, сувтіс сы водзӧ да шуис: «Ӧні ме тӧда, мый му вылас эм сӧмын ӧти Ен — тайӧ Израильлӧн Ен.
Босьт месянь, аслад кесйӧгсянь, тайӧ козинсӧ».
Но Елисей вочавидзис: «Ловъя Господь водзын, кодлы ме кесъяла, шуа: ог босьт».
Нееман мырдӧн корис босьтны козинсӧ, но Елисей эз босьт.
«Тэ кӧ он кӧсйы нинӧм босьтны, — шуис Нееман, — сідзкӧ, лэдз меным, аслад кесйӧглы, нуны аскӧд Израильысь сы мында му, мыйта вермасны нуны кык мул.
Водзӧвылӧ ме, тэнад кесйӧг, кута вайны сотан висьяс да мукӧд висьяс Господьлы, ог мукӧд енъяслы. Но Господь мед прӧститас менӧ, тэнсьыд кесйӧгтӧ, мый ме копрася Риммон идоллы аслам ӧксыкӧд, кор сійӧ мунӧ юрбитанінӧ. Ӧд ӧксыӧс видзӧм могысь меным быть колӧ мунны сэтчӧ, и тшӧтш копрасьны сыкӧд. Мед Господь прӧститас менӧ таысь».
Елисей шуис Нееманлы: «Мун лӧнь сьӧлӧмӧн».
Кор Нееман вӧлі ылынкодь нин, Енлӧн морт Елисейлӧн Гезий кесйӧгыс мӧвпыштіс: «Сыысь, мый арамей Нееман вайліс, менам ыджыдӧй нинӧм эз босьт.
Ловъя Господь водзын шуа: котӧртла Нееман бӧрся. Гашкӧ, сійӧ мыйкӧ сетас меным».
Гезий котӧртіс суӧдны Нееманӧс.
Нееман кор аддзис сылань котӧртысьӧс, чеччис тарантассьыс да воча петіс сылы. Нееман юаліс: «Мыйкӧ лоис?»
«Ставыс бур, — вочавидзис Гезий.
— Ыджыдӧй ыстіс менӧ висьтавны, мый Ефрем керӧсвыв муысь локтісны сы дінӧ кык том пророк-велӧдчысь.
Корӧ, мед тэ сетін налы ӧти талант эзысь да кык вӧччан паськӧм».
«Дерт сета, — шуис Нееман.
— Босьт кык талант».
Нееман мырдӧн корис Гезийӧс босьтны кык талант эзысь да сӧвтіс эзысьсӧ кык мешӧкӧ. Нееман сетіс эзысьсӧ да кык вӧччан паськӧм аслас кык кесйӧглы, и ставсӧ тайӧс найӧ нуисны Гезий водзвылын.
Кор найӧ воисны ыбвывса карӧ, Гезий босьтіс Нееманлӧн кесйӧгъяслысь козинсӧ да дзебис гортас.
Сэсся тшӧктіс кесйӧгъяслы мунны.
Кор Гезий локтіс Елисей ыджыдыс дінӧ, Елисей юаліс: «Кытчӧ тэ ветлін, Гезий?»
Гезий вочавидзис: «Тэнад кесйӧгыд некытчӧ эз ветлы».
Елисей шуис сылы: «Ме ӧд ловнам вӧлі тэкӧд, кор Нееман чеччис тарантассьыс да петіс тэныд воча.
Ӧні абу сійӧ кадыс, мед босьтны эзысь, паськӧм, олив пуяс да виноград йӧръяс, ыж-мӧскӧс да кесйӧг пыдди йӧзӧс.
Нееманлӧн проказаыс мед пыр кежлӧ вуджас тэ вылӧ да тэнад рӧд вылӧ».
Гезий петіс Елисей ордысь. Сылӧн вир-яйыс вӧлі вевттьысьӧма лым кодь еджыд проказаӧн.
Пророк-велӧдчысьяс шуисны Елисейлы: «Тайӧ вежӧсас, кӧні ми ӧні олам да велӧдчам, дзескыд миянлы.
Лэдз миянлы ветлыны Йӧрдан ю дорӧ, медым пӧрӧдны кер. Сэтысь ми быдӧн ваям ӧти керйӧн да лэптам керка, медым сэні овны-велӧдчыны».
«Ветлӧй», — шуис Елисей.
Ӧти пророк-велӧдчысь шуис Елисейлы: «Ми, тэнад кесйӧгъяс, кӧсъям, мед тэ тшӧтш мунін миянкӧд».
«Муна», — шуис Елисей да мӧдӧдчис накӧд. Найӧ воисны Йӧрдан ю дорӧ да пондісны пӧрӧдны пуяс.
Пусӧ пӧрӧдігӧн ӧтилӧн черыс мыніс черпусьыс да усис ваӧ.
«Ойя, ыджыдӧй! — горӧдіс сійӧ.
— Черсӧ ӧд ме водзӧсӧн босьті!»
Енлӧн морт юаліс: «Кытчӧджык сійӧ усис?»
Мӧдыс петкӧдліс местасӧ.
Елисей керыштіс путор да шыбитіс сійӧс чер усянінӧ. Черыс пырысьтӧм-пыр кыптіс ва веркӧсӧ.
Елисей шуис: «Босьт чертӧ».
Мӧдыс нюжӧдіс кисӧ да босьтіс черсӧ.
Арамейяслӧн ӧксы тышӧ петіс Израильлы паныд. Сійӧ сёрнитліс тышкайӧзӧн веськӧдлысьяскӧд, кытчӧ мунны да кӧні панны тышсӧ.
А Енлӧн морт Елисей тайӧ кадас ыстыліс юӧр израильса ӧксылы, мед сійӧ оз мун сэтчӧ, кытчӧ лӧсьӧдчӧны локны арамейяс.
Израильса ӧксы мӧдӧдліс ассьыс йӧзсӧ сійӧ местаас, мый йылысь висьтавліс Енлӧн морт. 
Татшӧм ногӧн Елисей унаысь ӧлӧдліс ӧксыӧс.
Арамейяслысь ӧксысӧ тайӧ ёна скӧрмӧдіс.
Сійӧ чукӧртіс тышкайӧзӧн веськӧдлысьяссӧ да шуис: «Висьталӧй, коді тіян пӧвстысь гусьӧн новлӧдлӧ юӧр израильса ӧксылы!»
Веськӧдлысьяс пӧвстысь ӧти шуис: «Некод, ӧксыӧй-ыджыдӧй.
Но Израильын эм Елисей нима пророк. Сійӧ висьтавлӧ израильса ӧксылы ставсӧ, весиг сійӧ, мый йылысь тэ, ӧксыӧй, сёрнитан аслад узьлан жырйын».
«Мунӧй да тӧдмалӧй, кӧні сійӧ, — тшӧктіс ӧксы.
— Ме сэсся мӧдӧда ассьым йӧзӧс босьтны сійӧс».
Ӧксылы юӧртісны, Елисей пӧ Дотанын.
Ӧксы мӧдӧдіс сэтчӧ вӧла-тарантаса ыджыд тышкакотыр.
Войнас найӧ локтісны да кытшалісны карсӧ.
Водз асывнас Ен мортлӧн кесйӧгыс петіс ывлаӧ да аддзис, мый карсӧ кытшалӧмаӧсь тарантаса тышкайӧз.
Кесйӧгыс повзьӧмпырысь юаліс пророклысь: «Ыджыдӧй, мый вӧчны?»
«Эн пов, — вочавидзис Елисей. — Налӧн дорысь миян дор сувтысьыс унджык».
Сэсся Елисей кевмысис: «Господьӧй, восьт менам кесйӧглысь синсӧ, мед сійӧ аддзас».
Господь восьтіс кесйӧглысь синсӧ, и мӧдыс аддзис, мый Елисей гӧгӧр керӧс пасьтала сулалӧны биа вӧвъяс да тарантасъяс.
Кор арамейяс матыстчисны Елисей дінӧ, сійӧ шыасис Господь дінӧ: «Господьӧй, синтӧммӧд найӧс».
Господь кыліс Елисейлысь корӧмсӧ — синтӧммӧдіс арамейясӧс.
Елисей шуис налы: «Тайӧ абу сійӧ туйыс и абу сійӧ карыс, кутшӧм тіянлы колӧ.
Локтӧй ме бӧрся. Ме нуӧда тіянӧс сійӧ мортыс дінӧ, кодӧс ті корсянныд».
Елисей вайӧдіс найӧс Самарияӧ.
Сэні сійӧ бара шыасис Господь дінӧ: «Господьӧй, восьт тайӧ йӧзыслысь синсӧ, мед найӧ бӧр кутасны аддзыны».
Господь восьтіс налысь синсӧ. Арамейяс чуймисны, мый найӧ Самария кар шӧрынӧсь.
Кор израильса ӧксы аддзис арамейясӧс, юаліс Елисейлысь: «Гашкӧ, меным вины найӧс, ыджыдӧй?»
«Эн ви, — вочавидзис Елисей.
— Тэ ӧд эн аслад шыпуртӧн да ньӧввужйӧн босьт найӧс.
Верд найӧс, мед сёясны-юасны, а сэсся бӧр мунасны асланыс ӧксы дінӧ».
Арамейяслы дасьтісны ыджыд пызан. Вердӧм-юкталӧм бӧрын израильса ӧксы лэдзис найӧс асланыс ӧксы дінӧ.
Та бӧрын арамейяс дугдісны усьласьны Израиль му вылӧ.
Кутшӧмкӧ кад мысти арамейяслӧн Бен-Хадад ӧксы аслас став тышкайӧзкӧд уськӧдчис Самария кар вылӧ да кытшаліс сійӧс.
Самарияын йӧзыс пондісны ёна тшыгъявны. Осёл юрысь найӧ мынтылісны кӧкъямысдас сикель эзысь, а китыр мында гулю сітысь — вит сикель эзысь.
Ӧтчыд израильса ӧксы вӧлі мунӧ карса стен вывті. Сэки ӧти ань гораа шыасис сы дінӧ: «Отсав меным, ӧксыӧй-ыджыдӧй!»
Ӧксы вочавидзис: «Господь кӧ оз отсав тэныд, мыйӧн нӧ ме отсала?
Менам гумлаӧй и виноград пычкан гуӧй дзик куш».
Ӧксы нӧшта юаліс: «А мый тэкӧд?»
Мӧдыс висьталіс: «Этайӧ аньыс шуис меным, талун пӧ вай сёям тэнсьыд питӧ, а аски пӧ — менсьым.
Ми пуим да сёйим менсьым пиӧс.
Мӧд луннас ме шуи сылы, мый талун сэсся тэнсьыд питӧ сёям.
Но сійӧ дзебис ассьыс писӧ».
Аньлысь кывъяссӧ кылӧм бӧрын ӧксы косяліс ассьыс вылыс паськӧмсӧ.
Ӧксы вӧлі сулалӧ карса стен вылын, и войтырыс аддзис, мый ӧксылӧн куш яй вылас вӧлі шогалан паськӧм.
Ӧксы шуис: «Талун кӧ оз ло керыштӧма Шафатлӧн Елисей пилысь юрсӧ, Енмыс мед чорыда мыждас менӧ».
Елисей пукаліс гортас карса юрнуӧдысьяскӧд, кор ӧксы мӧдӧдіс сы дінӧ ассьыс мортсӧ.
Но сылӧн локтӧдз на, Елисей шуис юрнуӧдысьяслы: «Аддзанныд, морт виысьлӧн пиыс мӧдӧдіс ме дінӧ мортӧс, медым керыштны менсьым юрӧс.
Кор мортыс локтас, пӧдлалӧй сы водзын ӧдзӧссӧ да ёна пыкӧй сійӧс.
Со, сы бӧрся локтысь ыджыдыслӧн кок шыыс кылӧ!»
Налӧн сёрнитігкості пырис на дінӧ ӧксылӧн мӧдӧдӧм мортыс да шуис, кыдзи ӧксы тшӧктіс: «Тайӧ ыджыд шогсӧ ыстіс миянлы Господь!
Мый меным водзӧ виччысьны Сысянь?»
Елисей шуис: «Кывзӧй Господьлысь кывсӧ! Господь тадзи висьталӧ: 
“Аски тайӧ кадас Самария карса дзиръя дорын ӧти куд тыр медбур пызьсӧ пондасны вузавны ӧти сикельысь, та донысь жӧ пондасны вузавны кык куд тыр ид пызь”».
Тышкайӧзӧн веськӧдлысь, коді видзис ӧксыӧс, шуис Енлӧн мортлы: «Весиг кӧ Господь енэжвыв ӧшиньяссӧ восьтас, тадзи оз вермы лоны».
Елисей шуис сылы: «Тэ аслад синмӧн тайӧс аддзылан, но сёйнысӧ он кут».
Карса дзиръя дорын пукалісны проказаӧн висьысь нёль морт. Найӧ шуалісны ӧта-мӧдныслы: «Мый ми пукалам тані да виччысям ассьыным кулӧмнымӧс.
Карас кӧ пырам, сэні тшыгйысла кулам, татчӧ кӧ кольччам, тшӧтш кулам.
Вай мунамӧй арамейяслӧн сувтанінӧ.
Миянӧс кӧ найӧ оз вины, кутам овны, а виасны кӧ — кулам».
Рытъя рӧмыднас найӧ мӧдӧдчисны арамейяслӧн сувтанінӧ.
Кор воисны сэтчӧ, некодӧс эз аддзыны.
Господь вӧчис сідзи, мый арамейяс кылісны тарантас шыяс, вӧвъяслысь гӧрдлӧм да уна тышкайӧзлысь шы.
Арамейяс шуалісны ӧта-мӧдныслы: «Израильса ӧксы, буракӧ, медаліс хеттейяслысь да египетсаяслысь ӧксыясӧс, мед уськӧдчыны миян вылӧ».
Рытъя рӧмыднас арамейяс уськӧдчисны пышйыны. Найӧ эновтісны чомъяснысӧ, вӧвъяснысӧ, осёлъяснысӧ да пышйисны асланыс сувтанінысь, мед сӧмын ловйӧн кольны.
Проказаӧн висьысьяс матыстчисны арамейяслӧн сувтанін дорӧ да пырисны ӧти чомйӧ. Сэні найӧ сёйисны-юисны, босьтісны сэтысь зарни-эзысь да паськӧм, сэсся мунісны да дзебисны ставсӧ, мый босьтісны.
Найӧ бӧр локтісны да пырисны мӧд чомйӧ. Сэтысь тшӧтш босьтісны мыйсюрӧ, мунісны да дзебисны ставсӧ.
Сэсся найӧ шуисны ӧта-мӧдныслы: «Ми вӧчам шогмытӧма, огӧ кӧ талун висьталӧй тайӧ бур юӧрсӧ. Асылӧдзыс кӧ огӧ юӧртӧй та йылысь ӧксынымлы, миянӧс мыждасны.
Мунамӧй карӧ да висьталамӧй ставсӧ ӧксылӧн йӧзыслы».
Проказаӧн висьысьяс бӧр локтісны да висьталісны карса дзиръя видзысьяслы: «Ми вӧлім арамейяслӧн сувтанінын. Сэні весиг ӧти морт абу, оз кыв некутшӧм шы. Сӧмын домалӧм вӧв-осёлныс да эновтӧм чомъясныс сулалӧны сэні».
Видзысьяс юӧртісны та йылысь ӧксылӧн йӧзыслы.
Ӧксы чеччис войнас да шуис аслас йӧзлы: «Ме тӧда, мый кӧсйӧны вӧчны миянлы арамейяс.
Найӧ эновтісны сувтанінсӧ да кытчӧкӧ дзебсисны, ӧд тӧдӧны миян тшыгъялӧм йылысь да виччысьӧны, кор ми петам асланым карысь. Найӧ кӧсйӧны босьтны миянӧс ловйӧн да пырны миян карӧ».
Ӧксылӧн кесъялысьяс пиысь ӧти шуис: «Мӧдӧдамӧй ассьыным йӧзӧс видзӧдлыны, мый вӧчсьӧ. Найӧ мед босьтасны ловйӧн кольӧм вӧвъяс пӧвстысь вит вӧлӧс.
Мӧдӧдӧм йӧзӧс вермасны вины, но найӧ мед оз повны.
abu
Найӧс ӧд тшӧтш виччысьӧ кулӧм уна лыда Израиль войтырӧс моз — миянӧс моз, кодъяс колим тайӧ карас, и на моз, кодъяс кулісны нин».
Доддялісны кык тарантас.
Ӧксы тшӧктіс мунысьяслы вӧтчыны арамейяс бӧрся да видзӧдлыны, мый вӧчсьӧ.
Найӧ вӧтчисны арамейяс бӧрся Йӧрдан ю дорӧдз. Туй вылас туплясис паськӧм-кӧлуй, мый арамейяс вӧлі шыблалӧмаӧсь тэрмасьӧмӧн пышйиганыс.
Мӧдӧдӧмаяс бӧр локтісны да юӧртісны та йылысь ӧксылы.
Сэки войтырыс петіс карсьыс, муніс да кушӧдз куштіс арамейяслысь чомъяснысӧ. Господьлӧн шуӧм серти ӧти куд тыр медбур пызьсӧ сэки вузалісны ӧти сикельысь, та донысь жӧ вузалісны кык куд тыр ид пызь.
Войтыр бӧрся видзӧдӧм могысь ӧксы сувтӧдіс карса дзиръя дорӧ тышкайӧзӧн веськӧдлысьӧс, ассьыс видзысьсӧ.
Но дзиръяӧд петігас войтырыс таляліс тайӧ мортсӧ, и сійӧ кувсис. Лои сідзи, кыдзи шуліс Енлӧн морт, кор ӧксы воліс сы дінӧ.
Енлӧн морт ӧд шуліс ӧксылы: «Аски тайӧ кадас Самария карса дзиръя дорын кык куд тыр ид пызь пондасны вузавны ӧти сикельысь, та донысь жӧ пондасны вузавны ӧти куд тыр медбур пызьсӧ». Но ӧксылӧн видзьысьыс шуліс Енлӧн мортлы: «Весиг кӧ Господь енэжвыв ӧшиньяссӧ восьтас, тадзи оз вермы лоны».
Сэки Елисей шуліс сылы: «Тэ аслад синмӧн тайӧс аддзылан, но сёйнысӧ он кут».
Тадзи сыкӧд и лоис.
Дзиръяӧд петіганыс йӧзыс талялісны тайӧ мортсӧ, и сійӧ кувсис.
Елисей шуис аньлы, кодлысь писӧ сійӧ ловзьӧдіс: «Мун гортсаясыдкӧд Израиль муысь мӧдлаӧ, ӧд Господь ыстас тайӧ муас тшыгъялӧм сизим во кежлӧ».
Ань вӧчис Ен мортлӧн шуӧм серти.
Босьтіс став ассьыс гортсасӧ да муніс Филистим муӧ. Оліс сэні сизим во.
Сизим во мысти ань бӧр локтіс Филистим муысь Израиль муӧ. Сійӧ муніс ӧксы дінӧ, мед бӧр корны ассьыс мусӧ да керкасӧ.
Буретш сэки ӧксы ордын вӧлі Елисейлӧн, Ен мортлӧн, Гезий кесйӧгыс. Ӧксы корис Гезийӧс висьтавны Елисейлӧн ыджыд уджъясыс йылысь.
Кор Гезий вӧлі висьталӧ, кыдзи Елисей ловзьӧдіс кулӧм мортӧс, ӧксы дінӧ локтіс сійӧ аньыс, кодлысь писӧ Елисей ловзьӧдіс. Ань корис ӧксылысь ассьыс мусӧ да керкасӧ.
Гезий шуис: «Ӧксыӧй-ыджыдӧй, тайӧ — буретш сійӧ аньыс да сылӧн пиыс, кодӧс Елисей ловзьӧдіс».
Ӧксы юасис аньлысь лоӧмтор йывсьыс, а мӧдыс ставсӧ сьӧрсьӧн-бӧрсьӧн висьталіс сылы.
Сэки ӧксы тшӧктіс аслас ыджыд чина мортлы отсавны тайӧ аньыслы. Ӧксы шуис: «Видзӧд, мед аньлысь став овмӧссӧ бӧр сетасны сылы. Нӧшта аньлы мед мынтысясны няньсьыс, мый сылӧн му вылын быдмис сійӧ лунсяньыс, кор сійӧ петіс тайӧ мусьыс».
Елисей локтіс Дамаск карӧ. Арамейяслӧн Бен-Хадад ӧксы сэки вӧлі висьӧ.
Ӧксылы юӧртісны, карас пӧ локтіс Енлӧн морт.
Ӧксы шуис Азаиллы: «Босьт аскӧдыд козин да ветлы Енлӧн морт дінӧ. Сійӧ мед юалас Господьлысь, бурда-ӧ ме тайӧ висьӧмсьыс».
Азаил босьтіс Дамаскысь медбур козинъяс, сӧвтіс нелямын верблюд вылӧ да муніс Енлӧн морт Елисей дінӧ. Кор воис сэтчӧ, сувтіс Енлӧн морт водзӧ да шуис: «Арамейяслӧн Бен-Хадад ӧксы, тэнад кесйӧг, мӧдӧдіс менӧ юавны, бурдас-ӧ сійӧ тайӧ висьӧмсьыс».
Елисей вочавидзис: «Мун да висьтав сылы, мый бурдас.
Но Господь восьтіс меным, мый сійӧ кулас».
Елисей синсӧ вештывтӧг видзӧдіс Азаил вылӧ. Сылӧн видзӧдӧмысь Азаил шӧйӧвошис.
Сэсся Енлӧн морт бӧрддзис.
«Ыджыдӧй, мыйла тэ бӧрдан?» — юаліс Азаил.
Елисей вочавидзис: «Ме тӧда, мыйта лёксӧ тэ вӧчан Израиль войтырлы.
Налысь изкаръяссӧ тэ сотан, том зонъяссӧ шыпуртӧн бытшйӧдлан, ичӧт кагаяссӧ муас лясйӧдлан, нӧбасьысь аньяслысь кынӧмсӧ вожӧдан».
Азаил шуис: «Коді ме сэтшӧмыс, тэнад кесйӧг, медым вӧчны татшӧмторсӧ? Ме ӧд сӧмын пон [шой]».
Елисей шуис: «Господь петкӧдліс меным, мый тэ арамса ӧксыӧн лоан».
Елисейкӧд сёрнитӧм бӧрын Азаил муніс аслас ӧксы дінӧ.
Ӧксы юаліс: «Мый нӧ висьталіс тэныд Елисей?»
Азаил вочавидзис: «Шуис, бурдан пӧ».
Мӧд луннас Азаил босьтіс шебрас, кӧтӧдіс сійӧс ваӧн да пуктіс ӧксылы чужӧм вылас, и ӧксы куліс.
Азаил пуксис сы пыдди ӧксыӧ.
Израильса Иорам ӧксылӧн, Ахав пилӧн, витӧд веськӧдлан воӧ Иуда муын Иосафат бӧрти ӧксыӧ пуксис сылӧн Иорам пиыс.
Ӧксыӧ пуксигас Иорамлы вӧлі комын кык арӧс. Кӧкъямыс во чӧж сійӧ юраліс Ерусалимын. Иорам ветліс израильса ӧксыяслӧн туйӧд. Сылӧн гӧтырыс вӧлі Ахавлӧн нылыс, та вӧсна Ахав рӧд моз сійӧ вӧчис Господь водзын шогмытӧмсӧ.
Но Аслас Давид кесйӧг вӧсна Господь эз кӧсйы бырӧдны Иуда му. Ӧд Господь вӧлі кӧсйысьӧма Давидлы, мый сысянь чужысь кутас юравны нэмъяс чӧж.
Иудаса Иорам ӧксылӧн веськӧдлан кадӧ эдом войтыр кыпӧдчис сылы паныд да пуктіс аслыс ӧксыӧс.
Иорам аслас тарантаса тышкайӧзкӧд муніс Цаирӧ.
Эдомса тышкайӧз кытшалісны Иорамӧс да тарантаса тышкайӧзӧн веськӧдлысьяссӧ, но войнас Иорам пасьвартіс найӧс. Эдомсаяс пышйисны асланыс гортӧ.
Эдом войтыр мыніс Иуда кипод улысь, и ӧнӧдз тайӧ тадз.
Сійӧ жӧ кадӧ иудаса ӧксылы паныд кыпӧдчисны тшӧтш Ливна карын олысьяс.
Иорам ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма иудаса ӧксыяслӧн каднебӧгӧ.
Иорам куліс да вуджис батьясыс дінӧ. Сійӧс дзебисны Давид пӧльыслӧн карӧ батьясыскӧд орччӧн.
Иорам бӧрти ӧксыӧ пуксис сылӧн Ахазий пиыс.
Израильса Иорам ӧксылӧн, Ахав пилӧн, дас кыкӧд веськӧдлан воӧ Иуда муын ӧксыӧ пуксис иудаса Иорам ӧксылӧн Ахазий пиыс.
Ӧксыӧ пуксигас сылы вӧлі кызь кык арӧс. Ӧти во чӧж сійӧ юраліс Ерусалимын.
Сылӧн мамыс вӧлі Аталия, израильса Омри ӧксылӧн нылыс.
Ахазий ветліс Ахав рӧдлӧн туйӧд. Сылӧн мамыс вӧлі Ахав рӧдысь, и Ахав рӧд моз Ахазий вӧчис Господь водзын шогмытӧмсӧ.
Ахавлӧн Иорам пикӧд Ахазий петіс тышӧ арамейяслӧн Азаил ӧксылы паныд. Найӧ тышкасисны галаадса Рамот карын, кӧні арамейяс дойдісны Иорамӧс.
Медым бурдны тайӧ дойяссьыс, Иорам бӧр локтіс Изреельӧ.
Иудаса Ахазий ӧксы локтіс Изреельӧ видлыны доймалӧм Иорам ӧксыӧс.
Елисей пророк корис ӧти пророк-велӧдчысьӧс да шуис сылы: «Вӧнясь, босьт тайӧ вый тыра дозсӧ да мун галаадса Рамот карӧ.
Кор воан сэтчӧ, корсь сэтысь Нимши Иосафатлысь Еху писӧ. Матыстчы сы дінӧ, чукӧст сійӧс ёртъяс пӧвстсьыс да нуӧд пыді вежӧсас.
Сэні кисьт сылы юр вылас дозсьыд выйтӧ да шу, мый Господь тадзи висьталӧ: “Ме мавтышта тэнӧ ӧксыӧ Израиль войтырлы”. 
Сэсся восьт ӧдзӧссӧ да котӧрӧн пышйы сэтысь».
Пророк-велӧдчысь, том морт, муніс галаадса Рамот карӧ. Кор воис сэтчӧ, аддзис тышкайӧзӧн веськӧдлысьясӧс, найӧ ставныс пукалісны ӧтлаын.
Пророк-велӧдчысь шыасис: «Веськӧдлысьӧй, менам эм сёрни тэ дінӧ».
Еху юаліс: «Код дінӧ миян пиысь?»
Пророк-велӧдчысь вочавидзис: «Тэ дінӧ, веськӧдлысьӧй».
Еху чеччис да пырис сыкӧд керкаас.
Сэні пророк-велӧдчысь кисьтіс сылы юр вылас вый да шуис: «Господь, Израильлӧн Ен, тадзи висьталӧ: “Ме мавтышта тэнӧ ӧксыӧ Господьлӧн войтырлы — Израильлы. Тэ бырӧдан аслад Ахав ыджыдлысь рӧдсӧ. Тадзи Ме, Господь, водзӧс перъя пророкъяс вӧсна да Аслам став мукӧд кесйӧгъяс вӧсна, кодъясӧс виис Езавель.
Ахавлӧн рӧдыс бырас. Ме бырӧда Израильын Ахав рӧдысь став айуловсӧ ичӧтсянь ыджыдӧдз. Ме вӧча Ахав рӧдкӧд сійӧ жӧ, мый вӧчи Неват Еровамлӧн рӧдкӧд да Ахий Вааслӧн рӧдкӧд.
А Езавельлысь шойсӧ сёясны понъяс Изреель кар сайын, и некод сійӧс оз гуав”».
Сэсся пророк-велӧдчысь восьтіс ӧдзӧссӧ да пышйис.
Кор Еху бӧр бергӧдчис ӧксылӧн киподувса веськӧдлысьяс дінӧ, найӧ юалісны сылысь: «Ставыс-ӧ тэнад бур?
Мыйла воліс тэ дінӧ тайӧ выжывыс?»
Еху вочавидзис: «Ті ӧд асьныд тӧданныд, мыйсяма тайӧ морт, и мый сійӧ вермас висьтавны».
«Тэ ылӧдлан миянӧс, — шуисны веськӧдлысьяс. — Висьтав миянлы збыльсӧ».
Сэки Еху висьталіс налы, мый пророк-велӧдчысь шуис сылы. Нӧшта содтіс: «Сійӧ висьталіс меным, Господь пӧ тадзи висьталӧ: “Ме мавтышта тэнӧ ӧксыӧ Израиль войтырлы”».
Веськӧдлысьяс дзик пыр пӧрччисны вылыс паськӧмнысӧ да вольсалісны сод тшупӧдъяс вылӧ Ехулы кок улас. Сэсся букӧстісны буксанӧн да горӧдісны: «Еху — миян ӧксы!»
Нимши Иосафатлӧн Еху пиыс кыпӧдчис Иорам ӧксылы паныд.
Иорам став израильса тышкайӧзкӧд вӧлі галаадса Рамот карын, дорйис карсӧ арамейяслӧн Азаил ӧксыысь.
Тыш дырйи арамейяс ёна дойдісны Иорам ӧксыӧс, та вӧсна сійӧ бӧр муніс Изреельӧ, мед бурдӧдчыны.
Тышкайӧзӧн веськӧдлысьяслы Еху шуис: «Ті кӧ ме дор, сідзкӧ, некодлы энӧ лэдзӧй петны карсьыс нуны юӧр Изреельӧ».
Ачыс Еху пуксис аслас тарантасӧ да муніс Изреельӧ, кӧні куйліс израильса Иорам ӧксы. [Сійӧс ёна дойдалісны арамейяс Рамот кар вӧсна тышкасигӧн, кор сійӧ вермасис арамейяслӧн вына да ён Азаил ӧксыкӧд.] Сэтчӧ Иорамӧс видлыны локтіс тшӧтш иудаса Ахазий ӧксы.
Изреельын башня вывсянь видзӧдысь аддзис Ехулысь тышкайӧзсӧ да горӧдіс: «Тышкайӧз локтӧны!»
Иорам шуис: «Мӧдӧд налы паныд верзьӧмаӧс юавны, бур могӧн-ӧ найӧ локтӧны?»
Верзьӧма петіс налы воча да шуис: «Ӧксы юасьӧ, бур могӧн-ӧ ті локтанныд?»
Еху вочавидзис: «Тэныд мыйла тайӧс тӧднысӧ?
Бергӧд вӧвтӧ да лок ме бӧрся».
Башня вывсянь видзӧдысь юӧртіс ӧксылы, верзьӧмаыд пӧ воис на дінӧдз, но бӧрсӧ оз лок.
Сэки мӧдӧдісны мӧд верзьӧмаӧс. Сійӧ муніс да шуис Ехулӧн тышкайӧзлы: «Ӧксы юасьӧ, бур могӧн-ӧ ті локтанныд?»
Еху вочавидзис: «Тэныд мыйла тайӧс тӧднысӧ?
Бергӧд вӧвтӧ да лок ме бӧрся».
Башня вывсянь видзӧдысь юӧртіс ӧксылы: «Верзьӧмаыд воис на дінӧдз, но бӧрсӧ оз лок. А медводдза тарантасын рӧдтысьыс лэбӧмӧн-лэбӧ Нимшилӧн Еху пи моз».
«Доддялӧй меным тарантас!» — тшӧктіс Иорам ӧксы.
Кесйӧгъяс доддялісны.
Сэки израильса Иорам ӧксы да иудаса Ахазий ӧксы быдӧн аслас тарантасын петісны Ехулы воча.
Паныдасисны сыкӧд изреельса Навотлӧн му вылын.
Ехуӧс аддзигӧн Иорам юаліс: «Бур могӧн-ӧ тэ локтан, Еху?»
Мӧдыс вочавидзис: «Кутшӧм бур вермас лоны тані, кор тэнад Езавель мамыд быдлаын паськӧдӧ зывӧк идолъяслы юрбитӧм да тшыкӧдчӧм?»
Иорам бӧр бергӧдіс тарантассӧ да пышйигас Ахазийлы горӧдіс: «Ахазий, миянӧс вузалісны!»
Сэки Еху зэлӧдіс ньӧввужсӧ да лыйис Иорамлы. Ньӧвйыс веськаліс Иорамлы мышкуас кык пуліпом костас да муніс сьӧлӧм пырыс. Иорам усис тарантасас.
Еху шуис аслас Бидэкар отсасьысьлы: «Босьт Иорамлысь шойсӧ да шыбит изреельса Навотлӧн му вылӧ. Кор ми тэкӧд вӧлі мунам таті Иорамлӧн Ахав батьыс бӧрся, Господь висьталіс, мый лоас Ахавкӧд. Эн вунӧд, мый Сійӧ тадзи шуис:
”Тӧрыт Ме аддзылі Навотлысь да пияныслысь вирсӧ, — висьталӧ Господь. — Тані Ме водзӧс перъя тэнсьыд на вӧсна, — висьталӧ Господь”. 
Сідзкӧ, босьт да шыбит Иорамлысь шойсӧ тайӧ видз-му вылас».
Иудаса Ахазий ӧксы кор аддзис Иорамлысь кулӧмсӧ, уськӧдчис пышйыны Бет-Хагганлань.
Еху вӧтчис сы бӧрся аслас йӧзлы горзӧмӧн: «Виӧй тшӧтш сійӧс тарантасас!»
Ахазийӧс дойдісны Ивлеам кар дорын Гур керӧсын.
Но сійӧ воӧдчис на Мегиддо карӧдз, и сэні куліс.
Ахазийлӧн кесйӧгъяс нуисны сылысь шойсӧ Ерусалимӧ да дзебисны Давид карӧ аслас дзебанінӧ батьясыскӧд орччӧн.
Ахазий ӧксыаліс Иуда муын израильса Иорам ӧксылӧн, Ахав пилӧн, дас ӧтиӧд веськӧдлан восянь.
Еху локтіс Изреельӧ.
Кор Езавель тӧдмаліс став лоӧмтор йывсьыс, мавтіс синсӧ, баситіс-лӧсьӧдіс юрсисӧ да сувтіс видзӧдны ӧшинь дорас.
Кор Еху вӧлі пырӧ карса дзиръяӧд, Езавель горӧдіс: «Бурмис-ӧ тэнад сьӧлӧмыд? Зимри моз тэ виин ассьыд ӧксытӧ».
Ӧшиньлань юрсӧ лэптӧмӧн Еху юаліс: «Эм-ӧ тані кодкӧ ме дор?»
Ӧшиньӧдыс мыччысисны кык-куим ыджыд чина морт.
«Шыбитӧй тайӧ аньсӧ!» — тшӧктіс Еху.
Найӧ шыбитісны Езавельӧс ӧшиньӧдыс.
Сылӧн вирыс резыштіс стенмас и вӧвъяс вылӧ. Еху аслас тарантасӧн муніс ань вывті.
Еху пырис ӧксы керкаӧ, сёйис-юис да шуис: «Тӧждысьӧй тайӧ ёрӧм аньлӧн шойыс вӧсна, гуалӧй сійӧс, ӧд сійӧ ӧксылӧн ныв».
Но Езавельлӧн шойысла мунысьяс юрлыыс да ки-кокыс кындзи нинӧм эз аддзыны.
Кор локтісны да висьталісны та йылысь Ехулы, сійӧ шуис: «Господьлӧн шуӧмыс иніс.
Аслас тишбиса Илля кесйӧг пыр Господь шуліс: “Изреель кар сайын понъяс сёясны Езавельлысь шойсӧ. Сылӧн шойыс разалас изреельса видз-му вылын куйӧд моз. И некод оз вермы шуны, мый тайӧ Езавельлӧн шойыс”».
Самария карын оліс Ахавлӧн сизимдас пи.
Еху ыстіс гижӧд Самария карӧ изреельса веськӧдлысьяслы, юрнуӧдысьяслы да Ахавлысь пиянсӧ видзысьяслы. Сійӧ гижис:
«Тіянкӧд олӧны ӧксыныдлӧн пияныс, тіян эмӧсь тарантасъяс, вӧвъяс да уна шыпурт, и ті оланныд изкар пытшкын. Тайӧ гижӧдсӧ лыддьӧм бӧрын Ахав ӧксыныдлӧн пиян пӧвстысь бӧрйӧй медбур да медшогмана мортӧс, пуксьӧдӧй сійӧс батьыслӧн юралан пуклӧсӧ да тышкасьӧй асланыд ӧксылӧн рӧд вӧсна».
Карса веськӧдлысьясӧс да пӧрысьясӧс полӧм босьтіс. Найӧ шуисны: 
«Кык ӧксы кӧ ӧтлаын эз вермыны Ехуӧс, дерт нин, ми огӧ вермӧй сійӧс».
Ӧксы керкаӧн веськӧдлысь, карса юралысь, юрнуӧдысьяс да ӧксылысь пиянсӧ видзысьяс ыстісны Ехулы воча юӧр: «Ми — тэнад кесйӧгъяс, и вӧчам ставсӧ, мый тэ тшӧктан.
Ми некодӧс ӧксыӧ огӧ пуктӧй. Вӧч, кыдзи тэ кӧсъян».
Еху ыстіс налы мӧд гижӧд. Сэні гижис: 
«Ті кӧ ме дор да дасьӧсь кывзысьны менсьым, сідзкӧ, аски тайӧ кадас локтӧй ме дінӧ Изреельӧ да вайӧй ӧксы пиянлысь керыштӧм юръяссӧ».
Ӧксылысь сизимдас писӧ видзисны-быдтісны карса нималана йӧз.
Гижӧдсӧ лыддьӧм бӧрын карса веськӧдлысьяс виисны ӧксылысь сизимдаснан писӧ. Налысь юрсӧ пуктісны чуманъясӧ да ыстісны Ехулы Изреельӧ.
Юӧр вайысь локтіс да висьталіс Ехулы, ӧксы пиянлысь пӧ юръяссӧ вайисны.
Еху тшӧктіс кык пельӧ юкӧмӧн пуктыны юръяссӧ карса дзиръя дорӧ да кольны асылӧдзыс.
Асывнас Еху муніс карса дзиръя дорӧ да шыасис став войтырыс дінӧ: «Ті абу мыжаӧсь.
Ме кыпӧдчи аслам ӧксылы паныд да вии сійӧс. А тайӧясӧс коді виис?
Тӧдӧй, мый Ахав рӧд йылысь Господьлӧн быд висьталӧм кыв инас.
Господь збыльмӧдіс ставсӧ, мый шуліс Аслас Илля кесйӧг пыр».
Сэсся Еху виис Ахав рӧдысь ставнысӧ, кодъяс вӧліны Изреельын. Виис тшӧтш ӧксылысь став веськӧдлысьсӧ, ёртъяссӧ да попъяссӧ. Ахав рӧдысь да сылӧн йӧзысь некодӧс ловйӧн эз коль.
Еху муніс Самарияӧ.
Туй вылас Бет-Экед-Хароим дорын сылы паныдасисны иудаса Ахазий ӧксылӧн вокъясыс. Еху юаліс: «Ті кодъяс?»
Сылы вочавидзисны: «Ми Ахазийлӧн вокъяс. Мунам видлыны израильса ӧксылысь пиянсӧ да ӧксылӧн мамыслысь пиянсӧ».
Еху тшӧктіс аслас йӧзлы: «Босьтӧй найӧс ловйӧн!»
Нелямын кыкнан мортсӧ босьтісны ловйӧн да виисны Бет-Экед юкмӧс дорын. Виисны ставнысӧ, некодӧс ловйӧн эз кольны.
Еху водзӧ муніс да паныдасис Рекавлӧн Ионадав пикӧд. Чолӧмасигас Еху шуис сылы: «Менам сьӧлӧмӧй восьса тэныд, а тэнад?»
Ионадав вочавидзис: «Менам сьӧлӧмӧй тшӧтш восьса тэныд».
«Тадзи кӧ, вай меным китӧ», — шуис Еху.
Ионадав мыччис кисӧ, а Еху отсаліс сылы кайны аслас тарантасӧ. Еху шуис: «Мунам мекӧд. Тэ аддзан, кыдзи сьӧлӧмсянь ме тышкася Господь вӧсна».
Ионадав сӧліс Ехулӧн тарантасӧ, и найӧ мунісны водзӧ.
Самарияӧ воӧм бӧрын Еху виис сэні Ахав рӧдысь ставнысӧ. Тадзи иніс Господьлӧн шуӧмыс, мый Сійӧ висьталіс Илля пыр.
Еху чукӧртіс став войтырсӧ да шуис: «Ахав этша кесъяліс Вааллы, ме понда кесъявны сылы ёнджыка на.
Корӧй ме дінӧ Вааллысь пророкъяссӧ, попъяссӧ да сылы юрбитысьяссӧ. Мед локтасны ставныс ӧтитӧг, ме вая Вааллы медся ыджыд вись.
А коді оз лок, сійӧ ловйӧн оз коль».
Тадзи шуигӧн збыльвылас Еху кӧсйис бырӧдны Вааллы юрбитысьясӧс.
Сійӧ тшӧктіс урчитны Вааллы сиӧм ыджыд гаж.
Гажӧдчыны чукӧртчӧм йылысь юӧртісны быдлаын.
Еху ыстіс юӧртысьясӧс став Израиль му пасьтала. 
Вааллы юрбитысьяс локтісны дзик ставныс.
Найӧ чукӧртчисны Вааллы юрбитан керкаӧ. Керкаыс тырис йӧзӧн.
Еху тшӧктіс паськӧм видзысьлы вайны юрбитысьясыслы паськӧм.
Мӧдыс вайис.
Еху да Рекавлӧн Ионадав пиыс пырисны Вааллы юрбитан керкаӧ. Еху шыасис Вааллы юрбитысьяс дінӧ: «Видзӧдалӧй, эм-ӧ тіян пӧвстын Господьлы юрбитысьяс. Тані мед лоӧны сӧмын Вааллы юрбитысьяс».
Сэсся найӧ пондісны вайны сотан да мукӧд висьяс.
Юрбитанін ортсыас Еху сувтӧдіс кӧкъямысдас тышкамортӧс да шуис налы: «Ме сета тайӧ йӧзсӧ тіян киӧ. Коді лэдзас пышйыны на пиысь кодӧскӧ, сійӧ мынтысяс юрнас».
Кор сотан вись вайӧмыс помасис, Еху горӧдіс аслас видзысьяслы да тышкайӧзӧн веськӧдлысьяслы: «Пырӧй да ставнысӧ виӧй! Некодӧс энӧ лэдзӧй петнысӧ!»
Найӧ виисны шыпуртӧн ставнысӧ да шыбитісны шойяссӧ ортсӧ. Сэсся пырисны Вааллы юрбитанінлӧн пыді вежӧсӧ.
Сэтысь петкӧдісны Вааллы сиӧм юрбитан сюръяяссӧ да сотісны.
Вааллы сувтӧдӧм юрбитан изсӧ жугӧдісны, а юрбитан керкасӧ кисьтісны.
Сы местаӧ вӧчисны асмогасянін. Тайӧ ӧнӧдз тадзи.
Еху бырӧдіс Ваалӧс Израиль муысь.
Но Еху эз эновтчы сійӧ мыжъяссьыс, мыйӧн Неватлӧн Еровам пиыс коркӧ кежӧдіс Израиль войтырӧс мыжас, эз бырӧд Вефильысь да Данысь зарни ӧшъяс.
Господь шуис Ехулы: «Тэ веськыда вӧчин Ахав рӧдкӧд, и тайӧ Менам син водзын шогмана. Та вӧсна тэсянь чужысьяс нёльӧд чужанвужйӧдз пондасны пукавны Израильлӧн юралан пуклӧсын».
Но Еху эз зіль став сьӧлӧмсяньыс овны Господьлӧн, Израиль Енлӧн, Индӧд серти.
Еху эз эновтчы сійӧ мыжъяссьыс, мыйӧн Еровам коркӧ кежӧдіс Израиль войтырӧс мыжас.
Сійӧ кадас Господь пондіс чинтыны Израиль му. Арамейяслӧн Азаил ӧксы пасьвартіс израильса тышкайӧзӧс став Израиль му пасьтала. Йӧрдан асыввылын Азаил босьтіс Галаад да Васан муяс — Арнон ю бокын сулалысь Ароэр карсянь войвылӧ став мусӧ, кӧні олісны Гад, Рувим да Манассей чужанкотыръяс.
Еху ӧксыалӧм дырйи мукӧд лоӧмторъяс йылысь, сылӧн уджъяс да вермӧмъяс йылысь гижӧма израильса ӧксыяслӧн каднебӧгӧ.
Еху куліс да вуджис батьясыс дінӧ. Сійӧс дзебисны Самария карӧ.
Еху бӧрти ӧксыӧ пуксис сылӧн Иохаз пиыс.
Кызь кӧкъямыс во чӧж Еху ӧксыаліс Самария карын, веськӧдліс Израиль войтырӧн.
Ахазийлӧн Аталия мамыс кор тӧдмаліс пиыслӧн кулӧм йылысь, шуис бырӧдны иудаса ӧксы рӧдысь став писӧ.
Но Ахазийлӧн Ехошева нима чойыс, Иорам ӧксылӧн нылыс, гусьӧн пышйӧдіс Ахазийлысь Йоас писӧ ӧксылӧн мукӧд пиян пӧвстысь, кодъясӧс вӧлі шуӧма вины. Йоасӧс да сійӧс нёньӧдысьӧс Ехошева дзебис узьлан жырйӧ.
Татшӧм ногӧн мездісны Йоасӧс Аталия киысь, и Йоас ловйӧн коли.
Квайт во чӧж Йоасӧс дзеблалісны Ехошева дінын Господьлӧн крамын. Тайӧ кадас Иуда муын ӧксыаліс Аталия.
Квайт во мысти Иодай поп корис Господьлӧн крамӧ тышкайӧзӧн веськӧдлысьясӧс, кодъяслӧн кипод улын вӧліны ӧксыӧс видзысьяс. Сэні Иодай кӧрталіс веськӧдлысьяскӧд йитӧд да тшӧктіс налы кыв сетны, мый кутасны кывзысьны.
Сэсся петкӧдліс налы ӧксылысь писӧ да тшӧктіс: «Локтана шойччан лунӧ кесъялысь йӧзныд пиысь коймӧд юкӧныс мед видзас ӧксылысь керкасӧ, нӧшта коймӧд юкӧныс мед видзас Сур нима дзиръя, и бӧръя коймӧд юкӧныс мед сувтас Видзысьяслӧн дзиръя дорӧ да видзас крамсӧ.
А кык котырыс, кодъясӧс шойччан лунӧ колӧ вежны кесъялӧм бӧртиныс, мед кольччасны Господьлӧн крамӧ да видзасны ӧксыӧс.
Кытшалӧй-видзӧй ӧксыӧс быд боксянь, кианыд мед лоӧ шыпурт.
Виӧй быдӧнӧс, коді кутас матыстчыны тіян дінӧ.
Видзӧй ӧксыӧс быдлаын, кытчӧ сійӧ мунас».
Тышкайӧзӧн веськӧдлысьяс ставсӧ вӧчисны сідзи, кыдзи тшӧктіс Иодай поп. Быд веськӧдлысь чукӧртіс ассьыс йӧзсӧ — найӧс, кодъяслы колӧ вӧлі кесъявны крамын шойччан лунӧ, и найӧс, кодъясӧс колӧ вӧлі вежны кесъялӧм бӧртиныс. Ставныс локтісны Иодай поп дінӧ.
Тышкайӧзӧн веськӧдлысьяслы Иодай поп сетіс Господьлӧн крамысь шыяс да сайӧдъяс, кодъяс коркӧ вӧліны Давид ӧксылӧн.
Ӧксыӧс видзӧм могысь видзысьяс сувталісны крам ортсыас веськыдладор стенсянь шуйгаладор стенӧдз да висьпуктанін водзӧ. Быдӧн вӧлі дась тышкасьны.
Иодай поп петкӧдіс ӧксылысь Йоас писӧ крамысь, пуктіс сылы юр вылас юркытш да сетіс сылы Индӧд небӧг. Сэсся пуктісны сійӧс ӧксыӧ да мавтыштісны. Войтырыс кинаныс клопайтӧмӧн горзіс: «Мед олас ӧксы!»
Аталия кор кыліс видзысьяслысь да войтырлысь горзӧм шысӧ, локтіс войтырыс дінӧ Господьлӧн крамӧ.
Сэні аддзис, мый джуджыд пос вылын сулалӧ ӧксы. Сыкӧд орччӧн сулалісны тышкайӧзӧн веськӧдлысьяс да трубаӧн ворсысьяс.
Став войтырыс нимкодясис да тутсіс трубаясӧ.
Сэки Аталия косяліс ассьыс паськӧмсӧ да горӧдіс: «Вузалісны! Менӧ вузалісны!»
Иодай поп ӧлӧдіс тышкайӧзӧн веськӧдлысьясӧс Господьлӧн крамын Аталияӧс виӧмысь. Сійӧ тшӧктіс веськӧдлысьяслы петкӧдны Аталияӧс крамысь, а быдӧнӧс, коді мунас Аталия бӧрся, тшӧктіс вины шыпуртӧн.
Аталияӧс петкӧдісны дзиръя дорӧ, кыті вӧвъясӧн пырлісны ӧксылӧн керка йӧрӧ, и сэні сійӧс виисны.
Иодай поп кӧрталіс Господь, ӧксы да войтырыс костын йитӧд сы йылысь, мый найӧ — Господьлӧн войтыр. Нӧшта кӧрталіс торъя йитӧд ӧксы да войтырыс костын.
Став войтырыс муніс Вааллы юрбитанінӧ да жугӧдіс сійӧс. Найӧ торпыригӧдз жуглісны висьпуктанінъяс да бӧлбанъяс, а Вааллысь Маттан нима попӧс виисны висьпуктанін водзас.
Иодай поп индіс йӧзӧс видзны Господьлысь крамсӧ.
Иодай поп босьтіс аскӧдыс тышкайӧзӧн веськӧдлысьясӧс, ӧксыӧс видзысьясӧс да став войтырсӧ, и найӧ нуӧдісны Йоас ӧксыӧс Господьлӧн крамысь. Найӧ пырисны Видзысьяслӧн дзиръяӧд ӧксы керкаӧ.
Сэні Йоас пуксис юралан пуклӧсӧ.
Став войтырыс нимкодясис. Ӧксы керкаын Аталияӧс виӧм бӧрти карас пуксис лӧньлун.
Ӧксыӧ пуксигас Йоаслы вӧлі сизим арӧс.
Израильса Еху ӧксылӧн сизимӧд веськӧдлан воӧ Иуда муын ӧксыӧ пуксис Йоас. Нелямым во чӧж сійӧ юраліс Ерусалимын.
Сылӧн мамыс вӧлі Бер-Шеваысь Цивия.
Аслас олан лунъяс чӧж Йоас вӧчис Господь водзын шогманасӧ, кытчӧдз Иодай поп туйдӧдіс-велӧдіс сійӧс.
Но сійӧ эз бырӧд вись ваян мылькъяс, и войтырыс важ мозыс вайліс сэні висьяс да тшынӧдчис.
Йоас шуис попъяслы: «Господьлӧн крамӧ мед ваясны вежа сетанторъяс: ас пондаыс вештысян дон, Господьлы сиӧм мортысь вештысян дон да ас кӧсйӧм серти ваян сьӧм. Босьтӧй аслыныд тайӧ сетанторъяссӧ крамӧ локтысьяслысь да дзоньталӧй крамсӧ».
Йоас ӧксы веськӧдліс кызь коймӧд во нин, но попъяс эз на дзоньтавны крамсӧ. Та вӧсна Йоас ӧксы корис Иодайӧс, тшӧтш мукӧд попъясӧс да юаліс: «Мыйла ті онӧ дзоньталӧй крамсӧ?
Ӧнісянь ті онӧ кутӧй босьтны аслыныд сьӧмсӧ крамӧ локтысьяслысь, но кутанныд сетны сійӧс крам дзоньталӧм вылӧ».
Попъяс кӧсйысисны, мый найӧ оз кутны босьтны войтырыслысь сьӧмсӧ, но и оз кывкутны крам дзоньталӧм вӧсна.
Иодай поп босьтіс куд, вӧчис вевт вылас розь да пуктіс кудсӧ Господьлӧн крам пыранінӧ, висьпуктанін веськыдладорӧ.
Пыранін видзысь попъяс локтысьяслысь вайӧм сьӧмсӧ чӧвталісны кудйӧ.
Кор попъяс аддзылісны, мый кудъяс сьӧмыс уна нин, корлісны ӧксылысь гижалысьсӧ да аркирейӧс. Найӧ пуктывлісны сьӧмсӧ мешӧкъясӧ да веситлісны.
Тайӧ сьӧмсӧ найӧ сетлісны Господьлысь крамсӧ дзоньталӧм вӧсна кывкутысьяслы, а кывкутысьяс мынтысьлісны пуысь вӧчасьысьяслы, керка лэптысьяслы, стен кыпӧдысьяслы да из кералысьяслы. Нӧшта тайӧ сьӧм вылас ньӧблісны кер, из да мукӧдторсӧ, мый колӧ вӧлі Господьлысь крамсӧ дзоньталӧм вылӧ.
Господьлӧн крамӧ вайӧм сьӧм вылӧ эз вӧчлыны крамын вӧдитчанторъяс: эзысь дозмукъяс, пуртъяс, вир резан тасьтіяс, трубаяс да мукӧдпӧлӧс эзысь-зарни дозъяс. Став сьӧмыс муніс Господьлӧн крам дзоньталӧм вылӧ да сэні уджалысьяслы.
Крам дзоньталӧм вӧсна кывкутысьяс вӧчисны ассьыныс уджнысӧ пӧръясьтӧг, та вӧсна налысь эз корлыны сьӧм видзӧм йылысь пасйӧдъяс.
Мыж вештан висьысь да мыжысь вайӧм висьысь сьӧмсӧ сетлісны попъяслы. Господьлӧн крам дзоньталӧм вылӧ тайӧ сьӧмыс эз мунлы.
Сійӧ кадас арамейяслӧн Азаил ӧксы уськӧдчис Геф кар вылӧ да босьтіс сійӧс.
Лӧсьӧдчис уськӧдчыны тшӧтш Ерусалим вылӧ.
Иудаса Йоас ӧксы чукӧртіс сыӧдз вӧвлӧм иудаса ӧксыяслысь — Иосафат, Иорам да Ахазий батьясыслысь — вежа вайӧмторъяссӧ, тшӧтш ассьыс вежа вайӧмторъяссӧ, нӧшта Господьлӧн крамса озырлун видзанінъясысь да ӧксы керкаса озырлун видзанінъясысь став зарнисӧ да мӧдӧдіс арамейяслӧн Азаил ӧксылы.
Та бӧрын Азаил вешйис Ерусалим кар дорысь.
Йоас ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма иудаса ӧксыяслӧн каднебӧгӧ.
Йоаслӧн кесйӧгъясыс кыпӧдчисны сылы паныд. Гусьӧн сёрнитчӧм бӧрын виисны сійӧс Бет-Миллоын, кысянь туйыс мунӧ Силлаӧ.
Виысьяснас вӧліны Шимеаталӧн Иозакар пиыс да Шомерлӧн Ехозавад пиыс.
Йоасӧс дзебисны Давид карӧ батьясыскӧд орччӧн.
Йоас бӧрти ӧксыӧ пуксис сылӧн Амасей пиыс.
Иудаса Йоас ӧксылӧн, Ахазий пилӧн, кызь коймӧд веськӧдлан воӧ Израиль муын ӧксыӧ пуксис Ехулӧн Иохаз пиыс. Дас сизим во чӧж сійӧ юраліс Самария карын. Иохаз вӧчис Господь водзын шогмытӧмсӧ, вӧчис сійӧ жӧ мыжъяссӧ, мыйӧн Неватлӧн Еровам пиыс коркӧ кежӧдіс Израиль войтырӧс мыжас. Иохаз эз эновтчы тайӧ мыжъяссьыс.
Господь скӧрмис Израиль войтыр вылӧ да дыр кад кежлӧ сетіс найӧс арамса Азаил ӧксылӧн да сылӧн Бен-Хадад пиыслӧн киӧ.
Иохаз кевмысис Господьлы, и Господь кыліс сійӧс, ӧд аддзис, кутшӧм чорыда дзескӧдӧ Израиль войтырӧс арамейяслӧн ӧксыыс.
Господь сетіс мездысьӧс Израиль войтырлы, и найӧ мынісны арамейяслӧн кипод улысь. Израиль войтыр воддза мозыс лӧня пондіс овны аслас муын.
Но найӧ эз эновтчыны Еровам рӧдлӧн мыжъяссьыс, мыйӧн Еровам коркӧ кежӧдіс Израиль войтырӧс мыжас.
Найӧ водзӧ вӧчисны тайӧ мыжъяссӧ, и Самарияын век на сулаліс юрбитан пу.
Иохазлӧн вӧлі кольӧма сӧмын ветымын верзьӧма, дас тарантас да дас сюрс пода тышкаморт сы бӧрти, кор арамейяслӧн ӧксы пасьвартіс израильса тышкайӧзӧс, таляліс найӧс кокувса бусӧс моз.
Иохаз ӧксыалӧм дырйи мукӧд лоӧмторъяс йылысь, сылӧн уджъяс да вермӧмъяс йылысь гижӧма израильса ӧксыяслӧн каднебӧгӧ.
Иохаз куліс да вуджис батьясыс дінӧ. Сійӧс дзебисны Самария карӧ.
Иохаз бӧрти ӧксыӧ пуксис сылӧн Йоас пиыс.
Иудаса Йоас ӧксылӧн комын сизимӧд веськӧдлан воӧ Израиль муын ӧксыӧ пуксис Иохазлӧн Йоас пиыс. Дас квайт во чӧж сійӧ юраліс Самария карын. Израильса Йоас ӧксы вӧчис Господь водзын шогмытӧмсӧ, эз эновтчы сійӧ мыжъяссьыс, мыйӧн Неватлӧн Еровам пиыс коркӧ кежӧдіс Израиль войтырӧс мыжас.
Йоас ӧксыалӧм дырйи мукӧд лоӧмторъяс йылысь, сылӧн тӧдчана уджъяс йылысь да иудаса Амасей ӧксыкӧд тышкасьӧм йылысь гижӧма израильса ӧксыяслӧн каднебӧгӧ.
Йоас куліс да вуджис батьясыс дінӧ. Сы бӧрти ӧксыӧ пуксис Еровам.
Йоасӧс дзебисны Самария карӧ, израильса ӧксыяскӧд орччӧн.
Елисей чорыда висьмис, бӧрынджык тайӧ висьӧмсьыс и кувсис.
Кор Елисей вӧлі висьӧ на, сы дінӧ локтіс израильса Йоас ӧксы. Сійӧ бӧрдӧмӧн шуаліс: 
«Батьӧй, батьӧй!
Тэ — Израильлӧн лачаыс, а абу верзьӧмаяс да тарантасъяс!»
Елисей шуис сылы: «Босьт ассьыд ньӧввужтӧ да ньӧвъястӧ».
Мӧдыс босьтіс.
«Зэлӧд ньӧввужтӧ», — тшӧктіс Елисей израильса ӧксылы.
Мӧдыс зэлӧдіс.
Елисей пуктіс ассьыс кисӧ сылӧн ки вылӧ да шуис: «Восьт асыввылӧ видзӧдысь ӧшиньсӧ».
Ӧксы восьтіс.
Елисей тшӧктіс лыйны ньӧвсӧ.
Мӧдыс лыйис.
Елисей шуис: «Тайӧ ньӧвйыс ваяс Господьсянь вермӧм! Тайӧ ньӧвнас тэ верман арамейясӧс, Афекын тэ дзикӧдз пасьвартан найӧс!»
Сэсся Елисей шуис израильса ӧксылы: «Босьт ӧні мукӧд ньӧвъястӧ».
Мӧдыс босьтіс.
Елисей шуис сылы: «Вачкав наӧн муас».
Ӧксы куимысь вачкис муас.
Кор сійӧ дугдіс вачкавны, Енлӧн морт Елисей скӧрмис сы вылӧ да шуис: «Тэ кӧ вачкин вит-ӧ-квайтысь, сэки эськӧ дзикӧдз пасьвартін арамейясӧс. А ӧні сӧмын куимысь верман найӧс».
Елисей куліс, и сійӧс дзебисны.
Мӧд вонас моавса тышкайӧз уськӧдчисны Израиль вылӧ.
Ӧтчыд израильсаяс вӧлі дзебӧны кулӧм мортӧс. Моавса тышкайӧзӧс аддзӧм бӧрын гуасьысьяс шыбитісны шойсӧ Елисейлӧн дзебанінӧ да пышйисны.
Кор кулӧм мортлӧн шойыс инмис Елисейлӧн лыясӧ, мортыд ловзис да сувтіс кок вылас.
Иохазлӧн ӧксыалігӧн арамейяслӧн Азаил ӧксы эз дугдыв дзескӧдны Израильӧс.
Но Господь бурсьӧлӧмтчис израильсаяс дінӧ. Ӧвраамкӧд, Исааккӧд да Яковкӧд кӧрталӧм йитӧдыс вӧсна Сійӧ петкӧдліс на дінӧ Ассьыс буралӧмсӧ. Господь эз кӧсйы бырӧдны израильсаясӧс, эз на вӧтлы найӧс Аслас чужӧмбан водзысь.
Арамейяслӧн Азаил ӧксылӧн кулӧм бӧрын ӧксыӧ пуксис сылӧн Бен-Хадад пиыс.
Йоас бӧр босьтіс Бен-Хадад киысь сійӧ каръяссӧ, кодъясӧс тыш дырйи Бен-Хададлӧн Азаил батьыс мырддьыліс Иохаз батьыслысь.
Йоас куимысь вермыліс Бен-Хададӧс, и куимнаннысьсӧ бӧр босьтліс израильса каръяс.
Израильса Йоас ӧксылӧн, Иохаз пилӧн, мӧд веськӧдлан воӧ Иуда муын ӧксыӧ пуксис иудаса Йоас ӧксылӧн Амасей пиыс.
Ӧксыӧ пуксигас сылы вӧлі кызь вит арӧс. Кызь ӧкмыс во чӧж сійӧ юраліс Ерусалимын.
Сылӧн мамыс вӧлі Ерусалимысь Еходань.
Амасей вӧчис Господь водзын шогманасӧ, но эз сідзи, кыдзи вӧчис сылӧн Давид пӧльыс. Амасей ставсӧ вӧчис Йоас батьыс моз.
Сійӧ эз бырӧд вись ваян мылькъяс, и войтырыс важ мозыс вайліс сэні висьяс да тшынӧдчис.
Кор Амасейлӧн юралӧмыс зумыдмис, сійӧ виис ассьыс кесйӧгъяссӧ, кодъяс виисны сылысь батьсӧ, Йоас ӧксыӧс.
Но налысь челядьсӧ эз ви, а вӧчис Господьлӧн тшӧктӧм серти, кыдзи гижӧма Мӧисей Индӧдын: «Пиыслӧн мыж вӧсна батьсӧ оз ков вины, и батьыслӧн мыж вӧсна писӧ оз ков вины. Быдӧнӧс аслас мыж вӧсна мед лоӧ мыждӧма кулӧм вылӧ».
Амасей пасьвартіс Сола ковтысын дас сюрс эдомса тышкамортӧс. Сійӧ босьтіс налысь Села кар да сетіс сылы выль ним — Иоктеэл. Тайӧ карыс ӧнӧдз тадзи шусьӧ.
Сэсся Амасей мӧдӧдіс израильса Йоас ӧксы дінӧ юӧртысьӧс. Йоас вӧлі Иохазлӧн пи, Иохаз — Ехулӧн. Амасей тшӧктіс висьтавны Йоаслы, мый кӧсйӧ аддзысьлыны сыкӧд.
Израильса Йоас ӧксы ыстіс иудаса Амасей ӧксылы татшӧм воча юӧр: «Ливанса йӧн ыстіс юӧр ливанса сус пулы. Сійӧ корис, сет пӧ менам пи сайӧ ассьыд нывтӧ.
Но ливанса звер ветлӧдліс да таляліс йӧнсӧ.
Тэ шуан, мый пасьвартін эдомсаясӧс, и таысь тэ ышнясян да вылӧ кыпӧдчан.
Пукав гортад, эн корсь аслыд шогсӧ, сэки тэ да тэкӧд тшӧтш Иуда войтырыд онӧ усьӧй».
Но Амасей эз кывзы Йоасӧс.
Сэки израильса Йоас ӧксы петіс тышӧ иудаса Амасей ӧксылы паныд. Найӧ паныдасисны Иуда муын Бет-Шемеш карын.
Израильсаяс пасьвартісны иудаса тышкайӧзӧс, и найӧ пышйисны гортаныс.
Бет-Шемешын израильса Йоас ӧксы босьтіс пленӧ иудаса Амасей ӧксыӧс, Ахазий Йоаслысь писӧ. Сэсся Йоас тышкайӧзыскӧд муніс Ерусалимӧ. Сэні сійӧ жугӧдіс карса стенсӧ нёльсё гырддза пасьта — Ефрем дзиръясянь Пельӧс дзиръяӧдз.
Йоас ӧксы петкӧдіс Господьлӧн крамысь да ӧксы керкаса озырлун видзанінъясысь став эзысь-зарнисӧ да дозмук-кӧлуйсӧ. Сійӧ босьтіс аскӧдыс Амасейлӧн тӧдчана йӧз пӧвстысь ӧткымынӧс, медым Амасей эз кыпӧдчы сылы паныд. Сэсся Йоас бӧр муніс Самарияӧ.
Йоас ӧксыалӧм дырйи мукӧд лоӧмторъяс йылысь, сылӧн тӧдчана уджъяс йылысь да иудаса Амасей ӧксыкӧд тышкасьӧм йылысь гижӧма израильса ӧксыяслӧн каднебӧгӧ.
Йоас куліс да вуджис батьясыс дінӧ. Сійӧс дзебисны Самария карӧ, израильса ӧксыяскӧд орччӧн.
Йоас бӧрти ӧксыӧ пуксис сылӧн Еровам пиыс.
Израильса Йоас ӧксылӧн, Иохаз пилӧн, кулӧм бӧрын иудаса Амасей ӧксы, Йоаслӧн пиыс, оліс нӧшта на дас вит во.
Амасей ӧксыалӧм дырйи мукӧд лоӧмторъяс йылысь гижӧма иудаса ӧксыяслӧн каднебӧгӧ.
Йӧзыс кыпӧдчисны Амасейлы паныд Ерусалимын, и сійӧ пышйис Лакиш карӧ.
Но паныд кыпӧдчысьяс мӧдӧдісны сэтчӧ ассьыныс йӧзсӧ, и сэні найӧ виисны Амасейӧс.
Амасейлысь шойсӧ вайисны вӧв вылын Ерусалимӧ да дзебисны сійӧс Давид карӧ батьясыскӧд орччӧн.
Амасей ӧксы бӧрти Иуда войтыр пуктіс ӧксыӧ Амасейлысь дас квайт арӧса Азарий писӧ.
Амасей ӧксылӧн кулӧм бӧрын да батьясыс дінӧ вуджӧм бӧрын Азарий бӧр босьтіс Элат кар да выльысь лэптіс сійӧс.
Иудаса Амасей ӧксылӧн, Йоас пилӧн, дас витӧд веськӧдлан воӧ Израиль муын ӧксыӧ пуксис Йоаслӧн Еровам пиыс. Нелямын ӧти во чӧж сійӧ юраліс Самария карын. Еровам вӧчис Господь водзын шогмытӧмсӧ, эз эновтчы сійӧ мыжъяссьыс, мыйӧн Неватлӧн Еровам пиыс коркӧ кежӧдіс Израиль войтырӧс мыжас.
Но сійӧ бӧр бергӧдіс Израильлы Лево-Хаматсянь Сола саридз дорӧдз мусӧ. Тадзи иніс Господьлӧн, Израиль Енлӧн, шуӧмыс, мый Сійӧ висьталіс Аслас Иона кесйӧг пыр, коді вӧлі Амиттайлӧн пи, Гат-Хеферысь пророк. Господь аддзис, кутшӧма сьӧкыдалӧ Израиль войтыр — ичӧтсянь ыджыдӧдз некод эз коль, медым отсавны Израильлы.
Но Господь эз кӧсйы дзикӧдз бырӧдны Израиль войтырӧс енэж увсьыс, та вӧсна мездіс найӧс Йоаслӧн Еровам пиыс пыр.
Еровам ӧксыалӧм дырйи мукӧд лоӧмторъяс йылысь, сылӧн уджъяс да вермӧмъяс йылысь гижӧма израильса ӧксыяслӧн каднебӧгӧ. Сэтчӧ нӧшта гижӧма, кыдзи Еровам тышкасис да бӧр бергӧдіс Израильлы Дамаск да Хамат каръяс, кодъяс коркӧ вӧліны Иуда чужанкотырлӧн кипод улынӧсь.
Еровам куліс да вуджис батьясыс дінӧ, израильса ӧксыяс дінӧ.
Сы бӧрти ӧксыӧ пуксис сылӧн Закар пиыс.
Израильса Еровам ӧксылӧн кызь сизимӧд веськӧдлан воӧ Иуда муын ӧксыӧ пуксис Амасейлӧн Азарий пиыс.
Ӧксыӧ пуксигас Азарийлы вӧлі дас квайт арӧс. Ветымын кык во чӧж сійӧ юраліс Ерусалимын.
Сылӧн мамыс вӧлі Ерусалимысь Еколия.
Амасей батьыс моз Азарий вӧчис Господь водзын шогманасӧ.
Но сійӧ эз бырӧд вись ваян мылькъяс, и войтырыс важ мозыс вайліс сэні висьяс да тшынӧдчис.
Та вӧсна Господь мыждіс ӧксыӧс. Аслас кулан лунӧдз сійӧ висис проказаӧн да оліс торъя керкаын.
Ӧксы керкаӧн да Иуда войтырӧн веськӧдліс сылӧн Иотам пиыс.
Азарий ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма иудаса ӧксыяслӧн каднебӧгӧ.
Азарий куліс да вуджис батьясыс дінӧ. Сійӧс дзебисны Давид карӧ батьясыскӧд орччӧн.
Азарий бӧрти ӧксыӧ пуксис сылӧн Иотам пиыс.
Иудаса Азарий ӧксылӧн комын кӧкъямысӧд веськӧдлан воӧ Израиль муын ӧксыӧ пуксис Еровамлӧн Закар пиыс. Квайт тӧлысь чӧж сійӧ юраліс Самария карын.
Батьясыс моз Закар вӧчис Господь водзын шогмытӧмсӧ, эз эновтчы сійӧ мыжъяссьыс, мыйӧн Неватлӧн Еровам пиыс коркӧ кежӧдіс Израиль войтырӧс мыжас.
Явислӧн Шаллум пиыс кыпӧдчис Закар ӧксылы паныд. Виис сійӧс став войтырыс водзын да пуксис сы пыдди ӧксыӧ.
Закар ӧксыалӧм дырйи мукӧд лоӧмторъяс йылысь гижӧма израильса ӧксыяслӧн каднебӧгӧ.
Тадзи иніс Господьлӧн шуӧмыс, мый Сійӧ висьталіс Ехулы: «Тэсянь чужысьяс нёльӧд чужанвужйӧдз пондасны пукавны Израильлӧн юралан пуклӧсын».
Тадзи и лоис.
Иудаса Озей* ӧксылӧн комын ӧкмысӧд веськӧдлан воӧ Израиль муын ӧксыӧ пуксис Явислӧн Шаллум пиыс. Ӧти тӧлысь чӧж сійӧ юраліс Самария карын.
Гадилӧн Менаим пиыс локтіс Тирза карысь да уськӧдчис Самария кар вылӧ. Сэні сійӧ виис Явислысь Шаллум писӧ да пуксис сы пыдди ӧксыӧ.
Шаллум ӧксыалӧм дырйи мукӧд лоӧмторъяс йылысь да сылӧн паныд кыпӧдчӧм йылысь гижӧма израильса ӧксыяслӧн каднебӧгӧ.
Тирза карысь петӧм бӧрын Менаим пасьвартіс Типсах кар да матігӧгӧр став кар-сиктсӧ. Сылы эз восьтны карса дзиръясӧ, та вӧсна сійӧ виис сэтчӧс став олысьсӧ, а нӧбасьысь аньяслысь кынӧмсӧ вожӧдіс.
Иудаса Азарий ӧксылӧн комын ӧкмысӧд веськӧдлан воӧ Израиль муын ӧксыӧ пуксис Гадилӧн Менаим пиыс. Дас во чӧж сійӧ юраліс Самария карын.
Менаим вӧчис Господь водзын шогмытӧмсӧ.
Став олан лунъяс чӧжыс Менаим эз эновтчы сійӧ мыжъяссьыс, мыйӧн Неватлӧн Еровам пиыс коркӧ кежӧдіс Израиль войтырӧс мыжас.
Ассурса Пул ӧксы уськӧдчис Израиль му вылӧ.
Менаим сетіс Пуллы сюрс талант эзысь, медым мӧдыс отсаліс сылы зумыдмӧдны юралӧмсӧ.
Эзысьсӧ Менаим чукӧртіс израильса озыр йӧзлысь. Быдӧнлы колӧ вӧлі вайны ветымын сикель эзысь, мед сетны ассурса ӧксылы.
Та бӧрын ассурса ӧксы эновтіс Израиль му да бӧр муніс аслас муӧ.
Менаим ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма израильса ӧксыяслӧн каднебӧгӧ.
Менаим куліс да вуджис батьясыс дінӧ.
Сы бӧрти ӧксыӧ пуксис сылӧн Пекахий пиыс.
Иудаса Азарий ӧксылӧн ветымынӧд веськӧдлан воӧ Израиль муын ӧксыӧ пуксис Менаимлӧн Пекахий пиыс. Кык во чӧж сійӧ юраліс Самария карын.
Пекахий вӧчис Господь водзын шогмытӧмсӧ, 
эз эновтчы сійӧ мыжъяссьыс, мыйӧн Неватлӧн Еровам пиыс коркӧ кежӧдіс Израиль войтырӧс мыжас.
Ремальлӧн Пеках пиыс, ӧксылӧн отсасьысь, кыпӧдчис аслас ӧксылы паныд. Самарияын ӧксы керкаын пыді жыръяс сійӧ виис ӧксыӧс, нӧшта виис Арговӧс да Арийӧс. Пекахкӧд тшӧтш вӧліны Галаадысь ветымын морт. Пекахий ӧксыӧс виӧм бӧрын Пеках пуксис сы пыдди ӧксыӧ.
Пекахий ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма израильса ӧксыяслӧн каднебӧгӧ.
Иудаса Азарий ӧксылӧн ветымын кыкӧд веськӧдлан воӧ Израиль муын ӧксыӧ пуксис Ремальлӧн Пеках пиыс. Кызь во чӧж сійӧ юраліс Самария карын.
Пеках вӧчис Господь водзын шогмытӧмсӧ, эз эновтчы сійӧ мыжъяссьыс, мыйӧн Неватлӧн Еровам пиыс коркӧ кежӧдіс Израиль войтырӧс мыжас.
Пекахлӧн ӧксыалӧм дырйи Израиль вылӧ уськӧдчис ассурса Тиглатпаласар ӧксы. Сійӧ босьтіс Ийон, Авел-Бет-Маака, Янох, Кедеш да Хацор каръяс, Галаад, Галилея да Неффалим муяс. Сэтчӧс олысьяссӧ нуӧдіс Ассурӧ.
Ремальлӧн Пеках пилы паныд кыпӧдчис Элайлӧн Осий пиыс да виис сійӧс. Ачыс сы пыдди пуксис ӧксыӧ. Тайӧ вӧлі иудаса Озей Иотам ӧксылӧн кызьӧд веськӧдлан воӧ.
Пеках ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма израильса ӧксыяслӧн каднебӧгӧ.
Израильса Пеках ӧксылӧн, Ремаль пилӧн, мӧд веськӧдлан воӧ Иуда муын ӧксыӧ пуксис Озейлӧн Иотам пиыс.
Ӧксыӧ пуксигас Иотамлы вӧлі кызь вит арӧс. Дас квайт во чӧж сійӧ юраліс Ерусалимын.
Сылӧн мамыс вӧлі Еруша, Садоклӧн нылыс.
Озей батьыс моз Иотам вӧчис Господь водзын шогманасӧ.
Но сійӧ эз бырӧд вись ваян мылькъяс, и войтырыс важ мозыс вайліс сэні висьяс да тшынӧдчис.
Господьлӧн крам йӧрын Иотам вӧчис Вылыс дзиръя.
Иотам ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма иудаса ӧксыяслӧн каднебӧгӧ.
Иотам ӧксылӧн веськӧдлан кадӧ Господь кутіс мӧдӧдны арамейяслысь Рецин ӧксысӧ да Ремальлысь Пеках писӧ, медым найӧ уськӧдчисны Иуда му вылӧ.
Иотам куліс да вуджис батьясыс дінӧ. Сійӧс дзебисны Давид пӧльыслӧн карӧ батьясыскӧд орччӧн.
Иотам бӧрти ӧксыӧ пуксис сылӧн Ахаз пиыс.
Израильса Пеках ӧксылӧн, Ремаль пилӧн, дас сизимӧд веськӧдлан воӧ Иуда муын ӧксыӧ пуксис Иотамлӧн Ахаз пиыс.
Ӧксыӧ пуксигас Ахазлы вӧлі кызь арӧс. Дас квайт во чӧж сійӧ юраліс Ерусалимын. Сійӧ эз вӧч аслас Господь Ен водзын шогманасӧ, эз ов Давид пӧльыс моз. Сійӧ ветліс израильса ӧксыяслӧн туйӧд, весиг сотіс биын ассьыс писӧ*, тадзи вӧчис пежсӧ войтыръяс моз, кодъясӧс Господь вӧтліс Израиль войтыр водзысь. Ахаз вайліс висьяс, тшынӧдчис мылькъяс да керӧсъяс вылын и быд пашкыр пу улын.
Арамейяслӧн Рецин ӧксы да израильса Пеках ӧксы, Ремальлӧн пиыс, петісны тышӧ Ахазлы паныд. Найӧ кытшалісны Ерусалим, но эз вермыны босьтны сійӧс.
Сійӧ кадас арамейяслӧн Рецин ӧксы бӧр бергӧдіс Арамлы Элат кар да вӧтліс сэтысь Иуда войтырӧс.
Сэтчӧ овмӧдчисны эдомсаяс, и найӧ ӧнӧдз сэні олӧны.
Ахаз мӧдӧдіс юӧртысьясӧс ассурса Тиглатпаласар ӧксы дінӧ да тшӧктіс шуны сылы: «Ме — тэнад кесйӧг, тэнад пи.
Лок да мезды менӧ арамса да израильса ӧксыяслӧн киысь, ӧд найӧ тышӧ петісны меным паныд».
Ахаз босьтіс Господьлӧн крамысь да ӧксы керкаса озырлун видзанінъясысь став эзысь-зарнисӧ да ыстіс ассурса ӧксылы козин пыдди.
Ассурса ӧксы вӧчис Ахазлӧн корӧм серти.
Сійӧ уськӧдчис Дамаск кар вылӧ да босьтіс сійӧс. Олысьяссӧ нуӧдіс Кирӧ, а Рецинӧс виис.
Ахаз ӧксы муніс Дамаскӧ, мед аддзысьлыны ассурса Тиглатпаласар ӧксыкӧд. Дамаскын сійӧ аддзис висьпуктанін да ыстіс Урий поплы висьпуктанінлысь серпассӧ да сійӧс вӧчанноглысь баласӧ.
Ахаз ӧксылӧн бӧрсӧ локтӧдз Урий поп вӧчис висьпуктанінсӧ дзик сійӧ серпасыс да балаыс серти, мый Ахаз ӧксы ыстыліс сылы Дамаскысь.
Дамаскысь локтӧм бӧрын ӧксы муніс видзӧдлыны висьпуктанінсӧ.
Сійӧ матыстчис висьпуктанін дорӧ да вайис сы вылын висьяс.
Сотан висьсӧ да нянь висьсӧ сотӧм бӧрын ӧксы кисьтіс вина вись, сэсся аслас бурасян висьлӧн вирнас резіс висьпуктанінсӧ.
Сійӧ босьтіс Господь водзын сулалысь ыргӧн висьпуктанінсӧ крам водзладорысь — крам да выль висьпуктанін костысь — да вештіс сійӧс выль висьпуктанінсянь войвывладорӧ.
Ахаз ӧксы шуис Урий поплы: «Выль ыджыд висьпуктанін вылас сот асъя сотан вись да рытъя нянь вись, ӧксылысь сотан висьсӧ да нянь висьсӧ, войтырлысь сотан висьсӧ, нянь висьсӧ да вина висьяссӧ. Сотан вись пыдди да мукӧд вись пыдди вайӧм пемӧсъяслӧн вирнас рез висьпуктанінсӧ. А ыргӧн висьпуктаніныс мед сулалас, кытчӧдз ме ог тшӧкты, мый вӧчны».
Урий поп вӧчис ставсӧ сідзи, кыдзи тшӧктіс сылы Ахаз ӧксы.
Ахаз ӧксы тшӧктіс босьтны мыссян дозъяссӧ джекъяс вылысь да перйыны джекъяслысь дор пӧвъяссӧ. Ыджыд ыргӧн вайӧртӧдсӧ, коді сулаліс ыргӧн ӧшъяс вылын, лэдзис да пуктіс изйысь вӧчӧм подув вылӧ.
Ахаз вештіс лэбув, кӧні сійӧ пукавліс шойччан лунӧ.
Сійӧ тупкис пыранін, кыті ӧксыяс пырлісны Господьлӧн крам йӧрӧ. Ставсӧ тайӧс вӧчис ассурса ӧксы вӧсна.
Ахаз ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма иудаса ӧксыяслӧн каднебӧгӧ.
Ахаз куліс да вуджис батьясыс дінӧ. Сійӧс дзебисны Давид карӧ батьясыскӧд орччӧн.
Ахаз бӧрти ӧксыӧ пуксис сылӧн Езекей пиыс.
Иудаса Ахаз ӧксылӧн дас кыкӧд веськӧдлан воӧ Израиль муын ӧксыӧ пуксис Элайлӧн Осий пиыс. Ӧкмыс во чӧж сійӧ юраліс Самария карын.
Осий вӧчис Господь водзын шогмытӧмсӧ, но эз сы мында, мыйта вӧчисны сыӧдз вӧвлӧм израильса ӧксыяс.
Ассурса Салманассар ӧксы тышӧ петіс Осийлы паныд. Осий шедіс Салманассар кипод улӧ и кутіс мынтыны сылы вот.
Но бӧрынджык Осий кыпӧдчис ассурса ӧксылы паныд да мӧдӧдіс ассьыс йӧзсӧ египетса Сигор ӧксы дінӧ корны отсӧг. Осий дугдіс мынтыны ассурса ӧксылы быдвося вот.
Кор ассурса ӧксы казяліс, мый Осий вӧчӧ, пуксьӧдіс сійӧс дзескыдінӧ.
Ассурса Салманассар ӧксы уськӧдчис Израиль му вылӧ да кытшаліс Самария кар, и куим во чӧж видзис сійӧс кытшын.
Осийлӧн ӧкмысӧд веськӧдлан воӧ ассурса ӧксы босьтіс карсӧ. Израильсаясӧс нуӧдіс Ассурӧ да овмӧдіс найӧс Халахӧ да Хавор юдорса Гозанӧ, тшӧтш мидияса каръясӧ.
Тайӧ ставыс суис Израиль войтырӧс сы понда, мыйла найӧ мыж вӧчисны асланыс Господь Енлы паныд, коді коркӧ петкӧдіс найӧс Египет муысь да мездіс фараонлӧн, египетса ӧксылӧн, нартитӧм улысь. Израильсаяс юрбитісны мукӧд енъяслы, олісны израильса ӧксыяс моз да сійӧ войтыръясыс моз, кодъясӧс Господь коркӧ вӧтліс Израиль войтыр водзысь.
Израильсаяс вӧчисны асланыс Господь Ен водзын шогмытӧмсӧ.
Найӧ вӧчалісны вись ваян мылькъяс став асланыс изкаръясын да ичӧт каръясын, кӧні эз вӧв карса стенмыс, а сулаліс сӧмын видзӧдан башня. Быд джуджыд мыльк вылӧ да быд пашкыр пу улӧ найӧ сувтӧдалісны юрбитан изъяс да юрбитан пуяс. Войтыръяс моз, кодъясӧс Господь вӧтліс израильсаяс водзысь, найӧ сотісны висьяс мылькъяс вылын. Асланыс лёк вӧчӧмнаныс найӧ дӧзмӧдісны Господьӧс. Найӧ юрбитісны идолъяслы, эз кывзыны Господьлысь ӧлӧдӧмсӧ.
Быд пророк да тӧдысь-аддзысь пыр Господь ӧлӧдліс Израильӧс да Иудаӧс: «Бергӧдчӧй асланыд лёк туйясысь. Олӧй Менам индӧд-тшӧктӧмъяс серти, мый Ме тшӧкті тіян батьяслы да висьтавлі тіянлы пророкъяс пыр, кодъяс кесъялісны Меным».
Но израильсаяс эз кывзысьны. Найӧ асныралісны асланыс батьяс моз, кодъяс эз эскыны Господьлы, асланыс Енлы.
Найӧ ӧтдортісны Господьлысь тшӧктӧмъяссӧ, ӧлӧдӧмъяссӧ да йитӧдсӧ, мый Сійӧ кӧрталіс налӧн батьяскӧд. Найӧ мунісны шогмытӧм ылӧг енъяс бӧрся, и асьныс лоины сэтшӧм жӧ шогмытӧмӧсь. Найӧ олісны на гӧгӧр олысь войтыръяс моз, эз кывзыны Господьлысь ӧлӧдӧмсӧ. Найӧ кежисны Господьлӧн, асланыс Енлӧн, тшӧктӧмъясысь, вӧчисны аслыныс кык зарни ӧшкӧс, сувтӧдісны юрбитан пуяс, юрбитісны енэжвыв вынъяслы да Вааллы.  Ныв-пинысӧ найӧ сотісны вись пыдди, тунасисны да тшыкӧдчисны. Найӧ сетчисны лёкас, вӧчисны Господь водзын шогмытӧмсӧ, тадзи скӧрмӧдісны Господьӧс.
Господь чорыда скӧрмис Израиль войтыр вылӧ, вештіс найӧс Аслас чужӧмбан водзысь, а колис сӧмын Иуда чужанкотырӧс.
Но Иуда чужанкотыр тшӧтш торкаліс аслас Господь Енлысь тшӧктӧмъяссӧ да оліс израильсаяс моз.
Господь бергӧдчис Израильлӧн став чужанкотырысь, ыстіс налы уна шог да сетіс найӧс куштысь-мырддялысьяс киӧ. Сійӧ вӧтліс найӧс Аслас чужӧмбан водзысь.
Кор Господь торйӧдіс Израильӧс Давид рӧдлӧн юралӧм улысь, израильсаяс пуктісны ӧксыӧ Неватлысь Еровам писӧ.
Еровам кежӧдіс Израиль войтырӧс Господьысь да кыскис найӧс ыджыд мыжӧ.
Израильсаяс вӧчисны сійӧ жӧ мыжъяссӧ, мый вӧчліс Еровам. Найӧ эз эновтчыны тайӧ мыжъяссьыс, кытчӧдз Господь эз вешты найӧс Аслас чужӧмбан водзысь. Та йылысь Сійӧ водзвыв висьтавліс пророкъяс пыр, кодъяс кесъялісны Сылы.
Израильсаясӧс вӧлі нуӧдӧма асланыс муысь Ассурӧ, кӧні найӧ ӧнӧдз олӧны.
Самарияса каръясӧ ассурса ӧксы вайӧдіс Вавилонысь, Кутаысь, Авваысь, Хаматысь да Сепарваимысь олысьясӧс. 
Найӧ босьтісны аслыныс Самария му да овмӧдчисны сэтчӧс каръясӧ израильсаяс пыдди.
Овмӧдчӧм бӧраныс тайӧ олысьясыс эз на пыдди пуктыны Господьӧс, та вӧсна Господь ыстіс на вылӧ левъясӧс, кодъяс косявлісны йӧзсӧ.
Та йылысь юӧртісны ассурса ӧксылы: «Войтыръясыд, кодъясӧс тэ овмӧдін самарияса каръясӧ, оз тӧдны сэтчӧс Енлысь тшӧктӧмъяссӧ. Та вӧсна Енмыс мӧдӧдӧ на вылӧ левъясӧс, и найӧ косявлӧны йӧзсӧ».
Сэки ассурса ӧксы тшӧктіс бӧр мӧдӧдны Самарияӧ ӧти попӧс на пӧвстысь, кодъясӧс сэтысь нуӧдлісны пленӧ.
Ӧксы тшӧктіс овмӧдны попсӧ Самарияӧ, мед сійӧ велӧдас йӧзсӧ овны сэтчӧс Енлӧн тшӧктӧмъяс серти.
Самарияысь пленӧ нуӧдӧм попъясысь ӧти поп бӧр локтіс Самарияӧ да овмӧдчис Вефильӧ. Сійӧ пондіс велӧдны йӧзсӧ овны Господьысь полӧмӧн.
Но быд локтысь войтыр аслас карын вӧчис ассьыс енмӧс да сувтӧдіс сійӧс вись ваян мыльк вылын сулалысь юрбитанінӧ. Тайӧ юрбитанінъяссӧ коркӧ вӧчлісны самарияса олысьяс.
Вавилонсаяс вӧчисны Суккот-Бенот бӧлбанӧс, Кутаысь локтысьяс — Нергал бӧлбанӧс, Хаматысь локтысьяс — Ашима бӧлбанӧс, Авваысь локтысьяс — Нивхаз да Тартак бӧлбанъясӧс. Сепарваимысь локтысьяс асланыс Адрамелек да Анамелек енъяслы вись пыдди сотісны ассьыныс ныв-пинысӧ.
Тайӧ войтыръясыс юрбитісны Господьлы, но индісны аслыныс попъясӧс, медым найӧ кесъялісны вись ваян мылькъяс вылын.
Господьлы юрбитӧм кындзи найӧ юрбитісны тшӧтш асланыс енъяслы войтыръясныс моз, кодъяс пӧвстысь найӧс вӧлі вайӧдӧма Самарияӧ.
Самарияса олысьяс ӧнӧдз важ мозыс олӧны. Найӧ оз повны Господьысь, оз овны сійӧ индӧд-тшӧктӧмъясыс серти, мый серти Господь тшӧктыліс овны Яковсянь чужысьяслы.
Сійӧ сетіс Яков рӧдлы Израиль ним да кӧрталіс накӧд йитӧд. Сійӧ тшӧктіс: «Энӧ юрбитӧй мукӧд енъяслы, энӧ копрасьӧй да энӧ кесъялӧй налы, энӧ вайӧй налы висьяс. Но полӧй Господьысь, коді ыджыд выннас да вына кисӧ лэптӧмӧн петкӧдіс тіянӧс Египет муысь. Сӧмын Сылы юрбитӧй да висьяснытӧ вайӧй. Олӧй Сылӧн индӧд-тшӧктӧмъяс серти, мый Сійӧ гижис тіянлы. Кутчысьӧй Сылӧн тшӧктӧмъясӧ став олӧм чӧжныд да энӧ юрбитӧй мукӧд енъяслы.
Энӧ вунӧдӧй йитӧдӧс, мый Ме кӧрталі тіянкӧд, и энӧ юрбитӧй мукӧд енъяслы. Полӧй Господьысь, асланыд Енмысь, и Сійӧ мездас тіянӧс вӧрӧгныдлӧн киысь».
Но Самарияын олысьяс эз кывзысьны Господьлысь, а важ мозыс кутчысисны асланыс оласногӧ.
Найӧ юрбитісны Господьлы, но тшӧтш и асланыс идолъяслы.
Весиг ӧнӧдз налӧн челядьыс да челядьныслӧн челядьыс кутчысьӧны батьясныслӧн оласногӧ.
Израильса Осий ӧксылӧн, Элай пилӧн, коймӧд веськӧдлан воӧ Иуда муын ӧксыӧ пуксис Ахазлӧн Езекей пиыс.
Ӧксыӧ пуксигас сылы вӧлі кызь вит арӧс. Кызь ӧкмыс во чӧж сійӧ юраліс Ерусалимын.
Сылӧн мамыс вӧлі Авия, Закарлӧн нылыс.
Давид пӧльыс моз Езекей вӧчис Господь водзын шогманасӧ.
Сійӧ бырӧдіс вись ваян мылькъяс, жугліс юрбитан изъяс да пӧрӧдіс юрбитан пуяс. Жугӧдіс-пазӧдіс ыргӧн змейӧс, кодӧс коркӧ вӧчліс Мӧисей. Ӧд тайӧ Нехуштан нима ыргӧн змейлы израильсаяс тайӧ кадӧдзыс пыр на сотісны висьяс.
Езекей лача кутіс Израильлӧн Господь Ен вылӧ.
Иудаса ӧксыяс пиысь сыӧдз и сы бӧрын сы кодьыс эз вӧв.
Езекей кутчысис Господь дінӧ, эз кежлыв Сыысь, оліс Сылӧн тшӧктӧмъяс серти, мый Сійӧ сетліс Мӧисей пыр.
Господь вӧлі Езекейкӧд, та вӧсна сылӧн ставыс артмис.
Езекей кыпӧдчис ассурса ӧксылы паныд да дугдіс сылы кесъявны.
Сійӧ пасьвартіс филистимсаясӧс, босьтіс налысь мусӧ Газа карӧдз. Босьтіс изкаръяс да ичӧт каръяс, кӧні эз вӧв карса стенмыс, а сулаліс сӧмын видзӧдан башня.
Езекейлӧн нёльӧд веськӧдлан воӧ да израильса Осий ӧксылӧн, Элай пилӧн, сизимӧд веськӧдлан воӧ, ассурса Салманассар ӧксы уськӧдчис Самария кар вылӧ да кытшаліс сійӧс. А куим во мысти Езекей ӧксылӧн квайтӧд веськӧдлан воӧ да израильса Осий ӧксылӧн ӧкмысӧд веськӧдлан воӧ Салманассар босьтіс Самария кар.
Ассурса ӧксы нуӧдіс израильсаясӧс Ассурӧ да овмӧдіс найӧс Халахӧ да Хавор юдорса Гозанӧ, тшӧтш мидияса каръясӧ. Тайӧ ставыс суис Израиль войтырӧс сы понда, мыйла найӧ эз кывзысьны асланыс Господь Енлысь, торкисны Господьлысь йитӧдсӧ, мый Сійӧ кӧрталіс накӧд, торкисны став индӧд-тшӧктӧмсӧ, мый сетліс налы Мӧисей, Господьлӧн кесйӧг. Найӧ эз кывзыны сылысь тшӧктӧмъяссӧ да эз овны на серти.
Езекей ӧксылӧн дас нёльӧд веськӧдлан воӧ ассурса Сеннахирим ӧксы уськӧдчис иудаса изкаръяс вылӧ да босьтіс найӧс.
Иудаса Езекей ӧксы ыстіс Лакишӧ ассурса ӧксылы юӧр: «Ме мыжа тэ водзын.
Кута мынтыны тэныд вот, мыйта шуан, сӧмын дугды дзескӧдны менӧ».
Ассурса ӧксы тшӧктіс иудаса Езекей ӧксылы мынтыны куимсё талант эзысь да комын талант зарни.
Езекей сетіс сылы став эзысьсӧ, мый вӧлі Господьлӧн крамын да ӧксы керкаса озырлун видзанінъясын.
Крам ӧдзӧсъяс да куричьяс вылысь Езекей ӧксы перъяліс зарни эжӧдсӧ, мый коркӧ вӧчлісны сылӧн тшӧктӧм серти, да тшӧтш сетіс ассурса ӧксылы.
Ассурса ӧксы мӧдӧдіс Лакишысь Ерусалимӧ Езекей ӧксы дінӧ уна тышкайӧзӧс, тышкайӧзӧн веськӧдлысьӧс, ыджыд чинаясӧн веськӧдлысьӧс да ассьыс эскана мортӧс.
Кор найӧ воисны Ерусалимӧ, сувтісны вылыс вайӧртӧдсянь визувтысь ва дорӧ, пожъясянінӧ нуӧдан туй вылӧ.
Найӧ корисны Езекей ӧксыӧс, но на дінӧ локтісны ӧксы керкаӧн веськӧдлысь Эляким, Хилкилӧн пиыс, Шевнай нима гижалысь да вӧвлӧмторъяс пасъялысь Йоах, Асафлӧн пиыс.
Ассурса ӧксылӧн эскана морт шуис налы: «Висьталӧй Езекейлы, мый ассурса ыджыд ӧксы тадзи шуӧ: “Мый вылӧ тэ лача кутан?
Тэ висьталан нинӧм абусӧ, а тышад колӧны сюсьлун да вын.
Тэ кыпӧдчин меным паныд, а ӧні код вылӧ тэ лача кутан?
Тэ лача кутан Египет вылӧ, тайӧ чегӧм беддьыс вылӧ. Но мыджсяс кӧ кодкӧ сы вылӧ, сійӧ сатшас сылы ки пыдӧсас да ки пырыс петас.
Тадзи фараон, египетса ӧксы, вӧчӧ быдӧнкӧд, коді сы вылӧ лача кутӧ.
Гашкӧ, ті шуанныд, мый Господь Енныд вылӧ лачанытӧ кутанныд? Но эз ӧмӧй Сылысь вись ваян мылькъяссӧ да висьпуктанінъяссӧ бырӧд Езекей? Эз ӧмӧй сійӧ тшӧкты Иуда войтырлы да Ерусалимын олысьяслы юрбитны сӧмын ӧти висьпуктанін водзын, мый сулалӧ Ерусалимын?”»
Ассурса ӧксылӧн эскана морт водзӧ тшӧктіс висьтавны Езекейлы: «Ӧтувтчы менам ыджыдкӧд, ассурса ӧксыкӧд. Ме сета тэныд кык сюрс вӧв, сюрас кӧ тэнад та мында верзьӧмаыс.
Тэ он вермы вӧтлыны аслад муысь весиг ӧти веськӧдлысьӧс, менам ыджыдлы медічӧт кесъялысьӧс.
Но тэ лача кутан Египет вылӧ, сылӧн тарантасъяс да вӧвъяс вылӧ!
Ме ӧд Господьлӧн кӧсйӧм серти локті татчӧ, медым бырӧдны тайӧ мусӧ.
Господь Ачыс шуис меным: “Мун да бырӧд сійӧ мусӧ”».
Хилкилӧн Эляким пиыс, Шевнай да Йоах шуисны ассурса ӧксылӧн эскана мортлы: «Корам тэнӧ, ыджыдӧй, сёрнит миянкӧд арамей кыв вылын, ми ӧд гӧгӧрвоам. Эн сёрнит миянкӧд еврей кыв вылын, ӧд карса стен вылын войтырыс ставсӧ кылӧ».
Но сійӧ вочавидзис: «Менам ыджыдӧй ӧмӧй мӧдӧдіс менӧ висьтавны тайӧ кывъяссӧ сӧмын тэныд да тэнад ӧксыыдлы?
Эз! Менӧ мӧдӧдӧма висьтавны тшӧтш карса стен вылын пукалысь йӧзлы, кодъяс регыд тіян моз пондасны сёйны ассьыныс сітсӧ да юны ассьыныс кудзсӧ».
Ассурса ӧксылӧн эскана морт сувтіс да еврей кыв вылын гораа шуис: «Кывзӧй ассурса ыджыд ӧксылысь кывъяссӧ.
Сійӧ тадзи висьталӧ: “Энӧ кывзӧй Езекейӧс, сійӧ ылӧдлӧ. Сійӧ оз вермы мездыны тіянӧс менам киысь. Энӧ эскӧй Езекейлы!
Сійӧ ышӧдӧ тіянӧс Господь вылӧ лача кутны, да эскӧдӧ, мый Господь мездас тіянӧс, и карнытӧ оз ло сетӧма ассурса ӧксы киӧ”.
Энӧ кывзӧй Езекейӧс!
Ассурса ӧксы тадзи висьталӧ: “Сетчӧй меным да локтӧй ме дінӧ! Сэки ті кутанныд сёйны виноград да инжир вотӧс асланыд пуясысь, юны ва асланыд юкмӧсысь. Сэсся ме локта да нуӧда тіянӧс мӧд муӧ, тіян кодь муӧ, кӧні эм нянь, вина да виноград йӧръяс, олив вый да ма. Сэні ловйӧн колянныд, онӧ кулӧй.
Сідзкӧ, энӧ кывзӧй Езекейӧс! Сійӧ пӧръясьӧ, кор шуӧ тіянлы, Господь пӧ мездас миянӧс.
Мукӧд войтыръяслӧн енъяс ӧмӧй мездісны налысь мусӧ ассурса ӧксылӧн кипод улысь?
Кӧнӧсь Хамат да Арпад каръяслӧн енъясыс?
Кӧнӧсь Сепарваим, Ена да Ивва каръяслӧн енъясыс?
Мездісны ӧмӧй Самарияӧс сылӧн енъясыс менам киысь?
Кутшӧмкӧ ен ӧмӧй мездіс ассьыс мусӧ менам киысь?
Господь сідзжӧ оз вермы мездыны Ерусалимнытӧ менам киысь”».
Но войтырыс чӧв оліс, весиг кыв эз шу сылы. Ӧд буретш тадзи тшӧктіс налы вӧчны Езекей ӧксыныс.
Ӧксы керкаӧн веськӧдлысь Эляким, Хилкилӧн пиыс, гижалысь Шевнай да вӧвлӧмторъяс пасъялысь Йоах, Асафлӧн пиыс, косялісны ассьыныс паськӧмнысӧ, мунісны Езекей дінӧ да висьталісны сылы ассурса ӧксылӧн эскана мортлысь кывъяссӧ.
Кор Езекей ӧксы кыліс та йылысь, сійӧ косяліс ассьыс паськӧмсӧ. Сэсся пасьталіс шогалан паськӧм да муніс Господьлӧн крамӧ.
Езекей мӧдӧдіс Исай пророк дінӧ, Амослӧн пи дінӧ, ӧксы керкаӧн веськӧдлысь Элякимӧс, гижалысь Шевнайӧс да юрнуӧдысь попъясӧс. Ставныс найӧ вӧліны шогалан паськӧмаӧсь.
Езекей тшӧктіс висьтавны Исайлы: «Тайӧ луныс — шогалан да мыждан-янӧдан лун.
Чужысь кага дась нин петны мам кынӧмысь, но мамлӧн абу выныс чужтынысӧ.
Гашкӧ, Господь, тэнад Енмыд, кылас ассурса ӧксылӧн эскана мортлысь кывъяссӧ. Сылӧн ыджыдыс, ассурса ӧксы, мӧдӧдіс сійӧс, медым омӧльтны ловъя Енмӧс. Гашкӧ, Господь, тэнад Енмыд, мыждас сійӧс омӧльтана кывъяссьыс.
Кевмысь ловйӧн кольӧмаяс вӧсна».
Езекей ӧксылӧн кесъялысьясыс локтісны Исай дінӧ. Ӧксылысь кывъяссӧ кылӧм бӧрын Исай шуис налы: «Висьталӧй асланыд ыджыдлы, мый Господь тадзи висьталӧ: “Эн пов тэныд висьталӧм кывъясысь, мыйӧн Менӧ лёкӧдісны ассурса ӧксылӧн кесъялысьясыс.
Ме ыста ассурса ӧксы пытшкӧ сэтшӧм лов, мый юӧр кылӧм бӧрти сійӧ бӧр бергӧдчас аслас муӧ. Сэні Ме вӧча сідзи, мый сійӧ кулас шыпурт помысь”».
Ассурса ӧксылӧн эскана морт кор кыліс, мый сылӧн ӧксыыс эновтӧма Лакиш кар, мӧдӧдчис сы дінӧ. Сэки ӧксы вӧлі тышкасьӧ Ливна карлы паныд.
Ӧксылы юӧртісны, мый сылы паныд тышӧ петӧма Тиргак, эфиопияса ӧксы.
Сэки ассурса ӧксы бара мӧдӧдіс ассьыс йӧзсӧ Езекей дінӧ.
Сійӧ тшӧктіс висьтавны иудаса Езекей ӧксылы: «Тэнад Енмыд, код вылӧ тэ лача кутан, ылӧдлӧ тэнӧ, кор шуӧ, мый Ерусалимӧс оз ло сетӧма ассурса ӧксы киӧ.
Тэ ӧд тӧдан, мый вӧчисны ассурса ӧксыяс став муясыскӧд — дзикӧдз бырӧдісны найӧс. Тэ чайтан, мый тэ мездман?
Мукӧд войтыръясӧс ӧмӧй мездісны налӧн енъясыс?
Менам батьяс бырӧдісны налысь Гозан, Харан да Рецеф каръяс, тшӧтш Телассар муысь Эден карын олысьясӧс.
Кӧнӧсь ӧні Хамат, Арпад, Сепарваим, Ена да Ивва каръяслӧн ӧксыясыс?»
Езекей босьтіс юӧр вайысьяслӧн киысь гижӧдсӧ да лыддис сійӧс. Сэсся муніс Господьлӧн крамӧ да восьтіс гижӧдсӧ Господь водзын. Езекей пондіс кевмысьны: «Господьӧй, Израильлӧн Енмӧй! Тэ пукалан херувимъяс вылын.
Тэ — ӧти Ен, Тэ ыджыдалан став му пасьталаыс. Тэ вӧчин енэжсӧ и мусӧ.
Господьӧй, копырт Ассьыд пельтӧ да кывзы [менӧ]. 
Господьӧй, восьт Ассьыд синтӧ да видзӧдлы. Кыв Сеннахиримлысь кывъяссӧ — сійӧ омӧльтӧ Тэнӧ, ловъя Енмӧс.
Господьӧй, збыльысь, ассурса ӧксыяс бырӧдісны войтыръясӧс да куштісны налысь муяссӧ, а налысь енъяссӧ шыблалісны биӧ.
Но тайӧ эз вӧвны енъяс, а пуысь да изйысь вӧчӧмторъяс.
Та вӧсна и вермисны бырӧдны найӧс.
Ӧні, Господьӧй, миян Енмӧй, мезды миянӧс Сеннахирим киысь. Мувывса став войтыръяс мед тӧдмаласны, мый Тэ, Господьӧй, ӧти Ен».
Амослӧн Исай пиыс мӧдӧдіс мортӧс да тшӧктіс висьтавны Езекейлы: «Господь, Израильлӧн Ен тадзи висьталӧ: “Тэ кевмысин Меным, кор ассурса Сеннахирим ӧксы повзьӧдліс тэнӧ, и Ме кылі тэнӧ”.
Со татшӧм кыв Господь висьталіс ассурса ӧксы йылысь: 
— Тэнӧ мустӧмтӧ сӧстӧм Сион ныв, сійӧ лёкӧдӧ тэнӧ.
Юрнас довкйӧдлӧ, тэ вылын сералӧ Ерусалим ныв.
Кодӧс тэ омӧльтін? Кодӧс тэ лёкӧдін?
Кодлы паныд тэ гӧлӧстӧ кыпӧдін? Код вылӧ ышнясьӧмӧн видзӧдін?
Израильлӧн вежа Ен вылӧ!
Аслад юӧр вайысьяс пыр тэ омӧльтін Господьӧс. Тэ шуин: “Аслам уна лыда тарантасъясӧн ме кайи джуджыд керӧсъяс вылӧ, ливанса керӧсъяс йылӧдз. Ме кералі сылысь гырысь сус пуяссӧ, пӧрӧді медбур кипарисъяссӧ. Ме волі сылӧн медылі пельӧсӧдз, пыралі сылӧн медпыді раскӧдз.
Йӧз муын ме кодйи юкмӧсъяс да юи сэтысь васӧ, ме восьлалі египетса юясӧд, и найӧ косьмисны”.
Но тэ ӧмӧй эн кывлы, мый ставсӧ тайӧс Ме важысянь нин дасьті? Ме водзысяньыс мӧвпышті та йылысь, а ӧні збыльмӧді тайӧс тэ пыр — тэ пазӧдін зумыд каръяс, найӧ лоины из чукӧръясӧн.
Сэтчӧс олысьясыс вынтӧммисны, найӧ яналісны да ёна полӧны.
Найӧ лоины видзвывса турун кодьӧсь, вежӧдысь турун кодьӧсь, керка вевтвывса нявда кодьӧсь, шептасьтӧдзыс на чишкасьӧм нянь кодьӧсь.
Ме тӧда тэ йылысь ставсӧ: пукалан-ӧ, пыран-ӧ, петан-ӧ.
Ме тӧда Меным паныд кыпӧдчӧмтӧ.
Тэ кыпӧдчин Меным паныд, тэнад ышнясьӧмыд воис Менам пельӧдз. Таысь Ме сюя тэнад ныр розьӧ кольча да кӧртвомала тэнӧ, сэсся бӧр ыста тэнӧ сійӧ туйӧдыс, кыті тэ локтін.
Со, Езекей, тэныд пас. Тайӧ вонас ті сёянныд усьӧм тусьясысь быдмӧм няньсӧ, мӧд вонас сёянныд, мый ачыс чужас, а коймӧд вонас кӧдзанныд да вунданныд, пуктанныд виноград пуяс да сёянныд налысь вотӧссӧ.
Сэки Иуда чужанкотырлӧн колясыс бара пыдӧдз лэдзас вужсӧ да ваяс вотӧс. Ерусалим карын ловйӧн кольӧмаяс паськӧдчасны кар гӧгӧрыс, мездмӧмаяс паськӧдчасны Сион керӧс гӧгӧр.
Тадзи вӧчас Господь Саваоф, ӧд Сійӧ — вежӧгтысь Ен.
Ассурса ӧксы йылысь Господь тадзи висьталӧ: 
— Сійӧ оз пыр тайӧ карас, оз лый сэтчӧ ньӧвъяссӧ, оз матыстчы сы дорӧ сайӧдӧн, оз лэпты сы гӧгӧр тымӧд.
Сійӧ бӧр мунас сійӧ туйӧдыс, кыті локтіс, тайӧ карас сійӧ оз пыр, — висьталӧ Господь. — Ме видза тайӧ карсӧ, мезда сійӧс Ас ради да Аслам Давид кесйӧгӧй ради».
Сійӧ войнас локтіс Господьлӧн анделыс да ассурса тышкайӧзлӧн чукӧртчанінын виис сё кӧкъямысдас вит сюрс мортӧс.
Асывнас ловйӧн кольӧм ассурсаяс садьмисны да аддзисны, мый гӧгӧр туплясьӧны шойяс.
Сэки ассурса Сеннахирим ӧксы бӧр бергӧдчис аслас муӧ Ниневия карӧ да кольччис сэтчӧ.
Кор Сеннахирим юрбитіс аслас Нисрох нима енлӧн крамын, сылӧн Адрамелек да Сарецер пияныс виисны сійӧс шыпуртӧн. Сэсся найӧ пышйисны Арарат муӧ.
Сеннахирим пыдди ӧксыӧ пуксис сылӧн Асардан пиыс.
Сійӧ кадас Езекей чорыда висьмис да вӧлі куланвыйын. Сы дінӧ локтіс Исай пророк, Амослӧн пиыс, да шуис: «Господь тадзи висьталӧ: “Висьтав гортсаыдлы ассьыд бӧръя кӧсйӧмтӧ, ӧд тэ он бурд, но кулан”».
Сэки Езекей бергӧдчис стенланьыс да кевмысис Господьлы:
«Господьӧй, казьтышт, мый ме олі Тэ водзын веськыда, став сьӧлӧмсянь кесъялі Тэныд да вӧчи Тэ водзын шогманасӧ».
Сэсся Езекей ёна бӧрддзис.
Исай эз на удит петны ӧксы керка йӧрысь, сылы вӧлі Господьсянь кыв:
«Бӧр бергӧдчы да висьтав Езекейлы, Менам войтырлӧн юралысьлы, мый Господь, Давид пӧльыдлӧн Ен, тадзи висьталӧ: “Ме кылі тэнсьыд кевмӧмтӧ да аддзи тэнсьыд синватӧ.
Ме бурдӧда тэнӧ.
Кык лун мысти тэ мунан Господьлӧн крамӧ.
Ме сета тэныд овны нӧшта дас вит во. Ме мезда тэнӧ да тайӧ карсӧ ассурса ӧксылӧн киысь. Ме видза тайӧ карсӧ Ас ради да Аслам Давид кесйӧгӧй ради”».
Исай тшӧктіс вайны косьтӧм инжир.
Сійӧс вайисны да пуктісны Езекейлы орзьӧминас, и Езекей бурдіс.
Езекей юаліс Исайлысь: «Мый серти ме тӧдмала, мый Господь бурдӧдіс менӧ, и кык лун мысти ме верма мунны Господьлӧн крамӧ?»
Исай вочавидзис Езекейлы: «Господь сетас тэныд пас, мый Сійӧ вӧчас Аслас кӧсйысьӧм серти. Висьтав, мый тэ кӧсъян. Шонді вуджӧрыс мед усяс дас тшупӧдӧн водзлань али дас тшупӧдӧн бӧрлань?»
Езекей вочавидзис: «Вуджӧрлы кокньыд усьны дас тшупӧдӧн водзлань.
Мед сійӧ бергӧдчас дас тшупӧдӧн бӧрлань».
Сэки Исай пророк кевмысис Господьлы, и Господь бергӧдіс Ахазлӧн пос вылӧ шондісянь усьӧм вуджӧрсӧ дас тшупӧдӧн бӧрлань.
Сійӧ кадас вавилонса Меродах-Валадан ӧксы, Валаданлӧн пиыс, тӧдмаліс Езекейлӧн висьмылӧм йылысь. Та вӧсна сійӧ мӧдӧдіс Езекейлы гижӧд да козинъяс.
Локтысьясӧс кывзӧм бӧрын Езекей петкӧдліс налы ассьыс озырлун видзанінъяссӧ да ставсӧ, мый сэні вӧлі: эзысь-зарни, чӧскыд ӧвтанторъяс да дона мавтасъяс. Нӧшта петкӧдліс шыпурт видзанінсӧ.
Ӧксы керкаысь да аслас муысь Езекей петкӧдліс налы став озырлунсӧ.
Исай пророк локтіс Езекей ӧксы дінӧ да юаліс: 
«Мый висьталісны тайӧ йӧзыс? Кытысь найӧ волісны тэ дінӧ?»
Езекей вочавидзис: «Найӧ волісны ылі муысь, Вавилонысь».
«Мый найӧ аддзылісны тэнад керкаысь?» — юаліс Исай.
Езекей вочавидзис: «Найӧ аддзылісны ставсӧ. Ме петкӧдлі налы озырлун видзанінъясысь ставсӧ».
Сэки Исай шуис Езекейлы: «Кывзы Господьлысь кывсӧ.
Воасны лунъяс, кор тэнад керкаысь ставсӧ нуасны Вавилонӧ. Нуасны тшӧтш сійӧ, мый тэнад батьясыд чукӧртісны тайӧ лунӧдзыс.
Нинӧм оз коль, — висьталӧ Господь. — Тэсянь чужысьясӧс нуӧдасны вавилонса ӧксы керкаӧ, и налы ковмас кесъявны сэні евнукъясӧн».
Та вӧсна сійӧ шуис Исайлы: «Господьлӧн кывйыс, мый ӧні висьталін меным — бур».
Езекей мӧвпыштіс: «Сідзкӧ, менам олан кадӧ тані лоӧ лӧньлун да бур олӧм».
Езекей ӧксыалӧм дырйи мукӧд лоӧмторъяс йылысь да сылӧн тӧдчана уджъясыс йылысь гижӧма иудаса ӧксыяслӧн каднебӧгӧ. Сэтчӧ нӧшта гижӧма, мый сійӧ кодйис вайӧртӧд да ва визувтанін, и карас нюжӧдіс ва.
Езекей куліс да вуджис батьясыс дінӧ. Сы бӧрти ӧксыӧ пуксис сылӧн Манассей пиыс.
Ӧксыӧ пуксигас Манассейлы вӧлі дас кык арӧс. Ветымын вит во чӧж сійӧ юраліс Ерусалимын.
Сылысь мамсӧ шуисны Хефциба.
Манассей вӧчис Господь водзын шогмытӧмсӧ. Сійӧ вӧчис пежсӧ войтыръяс моз, кодъясӧс Господь вӧтліс Израиль войтыр водзысь.
Манассей выльысь вӧчис вись ваян мылькъяс, кодъясӧс бырӧдліс Езекей батьыс. Лэптіс Вааллы висьпуктанінъяс, израильса Ахав ӧксы моз сувтӧдіс юрбитан пуяс, юрбитіс енэжвыв вынъяслы.
Манассей сувтӧдіс идолъяслы висьпуктанінъяс тшӧтш Господьлӧн крамӧ, мый йылысь Господь шуліс, Ерусалимын пӧ лоас Менам нимӧйлы оланін.
Господьлӧн крам кыкнан йӧрас Манассей сувтӧдіс енэжвыв вынъяслы висьпуктанінъяс. Ассьыс писӧ Манассей сотіс биын. Сійӧ кимӧститчис, тунасис да шыасьліс кулӧмаӧс корысьяс да тунасьысьяс дінӧ.
Сійӧ вӧчис Господь водзын уна шогмытӧмсӧ, и тайӧн дӧзмӧдіс Господьӧс.
Манассей вӧчӧдіс Астарта бӧлбанӧс да сувтӧдіс сійӧс крамӧ, мый йылысь Господь шуліс на Давидлы да сылӧн Соломон пилы: «Тайӧ крамас да Ерусалим карын, мый Ме бӧрйи Израиль чужанкотыръяслӧн став карыс пӧвстысь, лоас Менам нимӧй нэмъяс чӧж.
Израиль войтыр кӧ кутас овны сы серти, мый Ме тшӧкті налы, да Менам Мӧисей кесйӧгӧн налы сетӧм Индӧд серти, Ме ог вӧтлы найӧс сійӧ мусьыс, мый Ме сеті налӧн батьяслы».
Но Израиль войтыр эз кывзысь Господьлысь.
Манассей кежӧдіс найӧс лёкас. Найӧ вӧчисны лёксӧ унджык на сійӧ войтыръясыс дорысь, кодъясӧс Господь бырӧдіс Израиль войтыр водзысь.
Господь висьталіс пророкъяс пыр, кодъяс кесъялісны Сылы. Сійӧ шуис:
«Иудаса Манассей ӧксы вӧчис пежсӧ. Сыӧдз олысь аморей войтыр дорысь сійӧ лёксӧ вӧчис унджык на. Аслас идолъяслы юрбитӧмӧн сійӧ кежӧдіс тшӧтш Иуда войтырӧс мыжас. Таысь, — висьталӧ Господь, Израильлӧн Ен, — Ме ыста Ерусалим вылӧ да Иуда муӧ сэтшӧм ыджыд шог, мый тайӧс кылӧмысь мортыслӧн кыкнан пеляс жуньгыны кутас.
Ме муртала Ерусалимлы мыждӧмсӧ сідзи жӧ, кыдзи мурталі Самария карлы. Ме весита Ерусалимӧс сійӧ жӧ вескинас, мыйӧн веситі Ахавлысь рӧдсӧ. Кыдзи тасьті чышкалӧны да кымыньтӧны, тадзи вӧча тшӧтш Ерусалимкӧд.
Ме эновта Ассьым коляс войтырӧс да сета найӧс вӧрӧг киӧ. Вӧрӧг куштас налысь мусӧ да мырддяс налысь став эмбурсӧ. Тадзи вӧча Аслам войтыркӧд, мыйла батьясныслӧн Египетысь петӧмсянь найӧ ӧнӧдз вӧчӧны Ме водзын шогмытӧмсӧ да тайӧн скӧрмӧдӧны Менӧ».
Манассей кежӧдіс Иуда войтырӧс мыжас, и найӧ вӧчисны Господь водзын шогмытӧмсӧ. Тайӧ мыжсьыс ӧтдор Манассей кисьтіс мыжтӧм йӧзлысь вирсӧ сы мында, мый Ерусалим помсянь помӧдзыс тырис вирӧн.
Манассей ӧксыалӧм дырйи мукӧд лоӧмторъяс йылысь, сылӧн уджъяс да мыжъяс йылысь гижӧма иудаса ӧксыяслӧн каднебӧгӧ.
Манассей куліс да вуджис батьясыс дінӧ. Сійӧс дзебисны аслас ӧксы керка йӧрӧ — Уззайлӧн сад йӧрӧ.
Манассей бӧрти ӧксыӧ пуксис сылӧн Амон пиыс.
Ӧксыӧ пуксигас Амонлы вӧлі кызь кык арӧс. Кык во чӧж сійӧ юраліс Ерусалимын.
Сылӧн мамыс вӧлі Мешуллемет, Ятбаысь Харуцлӧн нылыс.
Манассей батьыс моз Амон вӧчис Господь водзын шогмытӧмсӧ.
Сійӧ ветліс батьыслӧн туйӧд, сы моз тшӧтш копрасис да юрбитіс идолъяслы. Сійӧ эновтіс Господьӧс, аслас батьяслысь Енсӧ, да эз ветлы Господьлӧн туйӧд.
Амонлӧн кесйӧгъясыс кыпӧдчисны сылы паныд да виисны сійӧс аслас керкаас.
Но Иуда войтыр виис ставнысӧ, кодъяс кыпӧдчисны Амон ӧксылы паныд.
Амон бӧрти найӧ пуктісны ӧксыӧ сылысь Иосей писӧ.
Амон ӧксыалӧм дырйи мукӧд лоӧмторъяс да сылӧн уджъясыс йылысь гижӧма иудаса ӧксыяслӧн каднебӧгӧ.
Амонӧс дзебисны Уззайлӧн сад йӧрӧ аслас дзебанінӧ.
Амон бӧрти ӧксыӧ пуксис сылӧн Иосей пиыс.
Ӧксыӧ пуксигас Иосейлы вӧлі кӧкъямыс арӧс. Комын ӧти во чӧж сійӧ юраліс Ерусалимын.
Сылӧн мамыс вӧлі Едида, Боцкатысь Адайлӧн нылыс.
Иосей вӧчис Господь водзын шогманасӧ. Сійӧ ветліс Давид пӧльыслӧн туйӧд, эз кежлыв сэтысь веськыдвылӧ ни шуйгавылӧ.
Аслас дас кӧкъямысӧд веськӧдлан воӧ Иосей ӧксы ыстіс Господьлӧн крамӧ ассьыс Шафан гижалысьӧс. Шафан вӧлі Ацалийлӧн пи, Ацалий — Мешулламлӧн. Иосей шуис Шафанлы:
«Мун Хилки аркирей дінӧ. Тшӧкты, мед сійӧ арталас Господьлӧн крамӧ вайӧм сьӧмсӧ, мый пыранін видзысьяс чукӧртісны войтырыслысь. Чукӧртӧм сьӧмсӧ мед сетасны Господьлысь крамсӧ дзоньталӧм вӧсна кывкутысьяслы, а найӧ мед юкласны сьӧмсӧ уджалысьяслы, кодъяс дзоньталӧны Господьлысь крамсӧ: тшупсьысьяслы, керка лэптысьяслы да стен кыпӧдысьяслы. Нӧшта тайӧ сьӧм вылас крам дзоньталӧм могысь мед ньӧбасны из да кер.
Крам дзоньталӧм вӧсна кывкутысьяслысь энӧ корӧй сьӧм видзӧм йылысь пасйӧдъяс, ӧд найӧ вӧчӧны ассьыныс уджнысӧ пӧръясьтӧг».
Хилки аркирей шуис Шафан гижалысьлы: «Господьлӧн крамысь ме аддзи Индӧд небӧг».
Хилки сетіс небӧгсӧ Шафанлы. Шафан лыддис сійӧс.
Сэсся Шафан гижалысь бӧр локтіс ӧксы дінӧ да шуис: «Тэнад кесйӧгъясыд босьтісны крамӧ чукӧртӧм сьӧмсӧ да сетісны крам дзоньталӧм вӧсна кывкутысьяслы».
Нӧшта Шафан содтіс, Хилки поп пӧ сетіс меным небӧг.
Шафан лыддис сійӧс ӧксылы.
Индӧд небӧгысь кывъяссӧ кылӧм бӧрын ӧксы косяліс ассьыс паськӧмсӧ.
Хилки поплы, Шафанлӧн Ахикам пилы, Микайлӧн Акбор пилы, Шафан гижалысьлы да аслас Асай кесйӧглы ӧксы тшӧктіс:
«Мунӧй да юалӧй Господьлысь, мый меным да менам войтырлы колӧ вӧчны. Юалӧй, мый Иуда войтырлы колӧ вӧчны тайӧ небӧгас гижӧмаыс серти. Ӧд Господьлӧн ыджыд скӧрлуныс ыпнитіс миян вылӧ сыысь, мый миян батьяс эз кывзысьны да эз овны тайӧ небӧгас гижӧм кывъясыс серти».
Хилки поп, Ахикам, Акбор, Шафан да Асай мунісны Олдана пророк ань дінӧ. Сылӧн верӧсыс вӧлі Шаллум, коді вӧлі вежа паськӧм видзысьӧн. Шаллумлӧн батьыс вӧлі Тиквай, Тиквайлӧн — Хархас. Олдана оліс Ерусалим карлӧн мӧд юкӧнас. Локтысьяс висьталісны сылы ӧксылысь корӧмсӧ.
Олдана шуис: «Господь, Израильлӧн Ен, тадзи висьталӧ: “Тіянӧс мӧдӧдысьлы шуӧй, мый Господь тадзи висьталӧ: 
Ме ыста ыджыд шог тайӧ карыс да сэні олысьяс вылӧ. Ме олӧмӧ пӧрта ставсӧ, мый гижӧма сійӧ небӧгас, кодӧс лыддис иудаса ӧксы.
Тайӧ войтырыс эновтіс Менӧ, найӧ сотісны висьяс мукӧд енъяслы, ёна дӧзмӧдісны Менӧ асланыс киӧн вӧчӧмторъясӧн. Таысь Менам скӧрлунӧй ыпъялӧ тайӧ карыс вылӧ да оз куслы”.
Иудаса ӧксылы, коді ыстіс тіянӧс шыасьны Господь дінӧ, висьталӧй, мый Господь, Израильлӧн Ен, сійӧ кывъясыс йылысь, мый тэ кывлін, тадзи висьталӧ:
”Ме висьтавлі тайӧ карыс да сэні олысьяс йылысь, мый найӧ лоӧны повзьӧданторйӧн да ёранторйӧн. Тайӧс кылӧм бӧрын тэ небзьӧдін сьӧлӧмтӧ да раммӧдчин Ме водзын, косялін паськӧмтӧ да бӧрдін Ме водзын, та вӧсна Ме кылі тэнӧ, — висьталӧ Господь. 
— Ме вуджӧда тэнӧ батьясыд дінӧ. Тэ лӧня кулан, и тэнӧ пуктасны дзебанінӧ. Тэнад синмыд оз аддзыв сійӧ ыджыд шогсӧ, мый Ме ыста тайӧ карыс вылӧ”».
Мӧдӧдӧмаяс бӧр локтісны да висьталісны ӧксылы тайӧ кывъяссӧ.
Иосей ӧксы чукӧртіс Иуда муысь да Ерусалим карысь став юрнуӧдысьсӧ.
Сэсся ӧксы муніс Господьлӧн крамӧ. Сыкӧд тшӧтш мунісны Иуда войтыр да Ерусалимын олысьяс, попъяс да пророкъяс — муніс став войтырыс, том и пӧрысь. Ӧксы гораа лыддис ставнас Йитӧд небӧгсӧ, мый аддзисны Господьлӧн крамысь. 
Сэсся ӧксы сувтіс джуджыд пос вылӧ да Господь водзын кӧсйысис видзны йитӧд, мый Господь кӧртавліс Аслас войтыркӧд. Ӧксы кӧсйысис кывзысьны Господьлысь да став сьӧлӧмсяньыс овны Сылӧн индӧд-тшӧктӧмъяс серти, медым видзны небӧгӧ гижӧм йитӧдлысь кывъяссӧ.
Став войтырыс тшӧтш кӧсйысис видзны тайӧ йитӧдсӧ.
Ӧксы тшӧктіс Хилки аркирейлы, попъяслы да крам пыранін видзысьяслы петкӧдны Господьлӧн крамысь став юрбитанторсӧ, мый вӧлі вӧчӧма Ваал да Астарта идолъяслы да енэжвыв вынъяслы. Сійӧ сотіс ставсӧ Ерусалим кар сайын Кедрон ковтысын да нуис пӧимсӧ Вефильӧ.
Ӧксы вӧтлаліс аслас муысь ылӧг енъяслы кесъялысь попъясӧс, кодъясӧс иудаса ӧксыяс индылісны, медым иудаса каръясын да Ерусалим гӧгӧр вись ваян мылькъяс вылын сотны висьяс Вааллы да Астарталы, нӧшта шонділы, тӧлысьлы да кодзувъяслы — став енэжвыв выныслы.
Сійӧ петкӧдіс Астарта бӧлбанӧс Господьлӧн крамысь Ерусалим кар сайӧ Кедрон ковтысӧ да сотіс сэні. Сэсся пызьӧдз нырис, а пызьсӧ койыштіс шойна вылӧ.
Сійӧ бырӧдіс Господьлӧн крам йӧрысь кырсалысьяслысь керкаяс, кӧні аньяс кыисны Астарта бӧлбанлы паськӧм.
Ӧксы вуджӧдіс иудаса мукӧд каръясысь став попсӧ Ерусалимӧ да пежаліс Гевасянь Бер-Шеваӧдз вись ваян мылькъяс, кӧні найӧ сотісны висьяс. Сійӧ жугліс карса юралысь Исуслӧн дзиръя дорысь вись ваян мылькъяс, кодъяс сулалісны карӧ пыран дзиръя шуйгаладорын.
Вись ваян мылькъяс вылын кесъялысь попъяслы эз позь кесъявны Ерусалимын Господьлӧн висьпуктанін дорын, но мукӧд попъяскӧд найӧ вермисны сёйны шомтӧм нянь.
Ӧксы пежаліс Бен-Хинном ковтысын Тофет нима висьваянін, медым йӧзыс дугдісны сэні сотны ассьыныс ныв-пинысӧ Молок идоллы.
Сійӧ бырӧдіс тшӧтш иудаса ӧксыясӧн шонділы сиӧм вӧвъясӧс, кодъяс сулалісны Господьлӧн крам пыранін водзын Нетан-Мелеклӧн, ыджыд чина мортлӧн, вежӧс дорын. Шонділы сиӧм тарантасъяс ӧксы сотіс.
Сійӧ бырӧдіс висьпуктанінъяс, кодъясӧс иудаса ӧксыяс сувтӧдісны Ахазлӧн керка вевт вылӧ. Бырӧдіс тшӧтш Господьлӧн крам кыкнан йӧрысь Манассейӧн сувтӧдӧм висьпуктанінъяс. Жугліс найӧс торпыригӧдз, нырис пызьӧдз да шыблаліс Кедрон ковтысӧ.
Ӧксы пежаліс вись ваян мылькъяс, кодъяс сулалісны Ерусалимсянь асыввылын, Бырӧдӧмлӧн керӧссянь* лунвылын. Найӧс коркӧ вӧчліс израильса Соломон ӧксы, мед юрбитны сидонсаяслӧн зывӧк Астарта идоллы, моавсаяслӧн зывӧк Кемош идоллы да аммон войтырлӧн зывӧк Милком идоллы.
Ӧксы жугліс юрбитан изъяс, пӧрӧдіс юрбитан пуяс да тыртіс сійӧ местасӧ морт лыясӧн.
Иосей ӧксы жугӧдіс Вефильысь висьпуктанін да вись ваян мыльк, мый коркӧ вӧчліс Неватлӧн Еровам пиыс, коді кежӧдіс Израиль войтырӧс мыжас. Иосей сотіс юрбитан пу да вись ваян мыльк, сэтысь изъяссӧ нырис пызьӧдз.
Гӧгӧрбок видзӧдалігӧн Иосей аддзис керӧс пӧлӧнысь шойна. Сійӧ тшӧктіс перъявны сэтысь лыяссӧ да сотіс найӧс висьпуктанін вылын. Тадзи пежаліс висьпуктанінсӧ Господьлӧн шуӧмыс серти, мый йылысь Енлӧн морт водзынджык юӧртліс. [Сійӧ юӧртліс та йылысь сэки, кор Еровам ӧксы сулаліс гаж дырйи висьпуктанін водзын.
А ӧні гӧгӧрбок видзӧдалігӧн Иосей аддзис дзебанінсӧ Енлӧн мортлысь, коді водзвыв висьтавліс тайӧ лоӧмторйыс йылысь.]
Гӧгӧрбок видзӧдалігӧн Иосей юаліс: «Мыйсяма казьтылан из ме аддза?»
Карса олысьяс вочавидзисны: «Тайӧ Ен мортлӧн дзебаніныс. Сійӧ воліс Иуда муысь да водзвыв висьтавліс сы йылысь, мый тэ ӧні вӧчин вефильса висьпуктанінкӧд».
«Энӧ вӧрӧдӧй сылысь лыяссӧ да дзебанінсӧ», — шуис ӧксы.
Тадзи вӧлі видзӧма тайӧ мортыслысь лыяссӧ, нӧшта Самарияысь локтӧм пророклысь лыяссӧ.
Иосей ӧксы бырӧдіс тшӧтш Самария каръясысь вись ваян мылькъяс вылын сулалысь юрбитанінъяс, кодъясӧс вӧчлісны израильса ӧксыяс. Тайӧн найӧ дӧзмӧдлісны Господьӧс. Иосей вӧчис сэтчӧс юрбитанінъяскӧд сійӧ жӧ, мый вӧчис Вефильын.
Вись ваян мылькъяс вылын кесъялысь попъясӧс Иосей виис налӧн висьпуктанінъяс вылын, тшӧтш сотіс сэні шойнаысь перйӧм лыяссӧ. Та бӧрын ӧксы бӧр локтіс Ерусалимӧ.
Иосей ӧксы тшӧктіс став войтырыслы: «Пасйӧй асланыд Господь Енлысь Ыджыд лунсӧ, кыдзи гижӧма Йитӧд небӧгас». Израильын тадзисӧ эз на пасйывны Ыджыд лунсӧ ёрдысьяслӧн веськӧдлан кад бӧрти, кор Иудаын да Израильын юралісны ӧксыяс.
Тайӧ Ыджыд лунсӧ вӧлі пасйӧма Иосей ӧксылӧн дас кӧкъямысӧд веськӧдлан воӧ Ерусалимын. Гажсӧ вӧлі сиӧма Господьлы.
Иосей бырӧдіс кулӧмаӧс корысьясӧс да тунасьысьясӧс, гортса бӧлбанъясӧс, идолъясӧс да став пежторсӧ, мый вӧлі Иуда муын да Ерусалимын. Тадзи сійӧ збыльмӧдіс Индӧд кывъяссӧ, мый вӧлі гижӧма небӧгӧ, кодӧс аддзис Господьлӧн крамысь Хилки поп.
Таӧдз эз вӧв Иосей кодь ӧксыыс, коді эськӧ став сьӧлӧмнас, олӧмнас да став выннас шыасис Господь дінӧ да оліс Мӧисейлӧн Индӧд серти.
И Иосейлӧн кулӧм бӧрти сы кодь ӧксыыс эз вӧв.
Но Господь эз кусӧд Ассьыс ыджыд скӧрлунсӧ. Господьлӧн скӧрлуныс ыпъяліс Иуда вылӧ, ӧд Манассей ёна дӧзмӧдіс Сійӧс.
Господь шуис: «Израильӧс моз Ме ӧтдорта Иуда войтырӧс. Ме эновта Ерусалим кар, мый Ме бӧрйи, и крам, мый йылысь Ме шулі, мый сэні лоас Менам нимӧй».
Иосей ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма иудаса ӧксыяслӧн каднебӧгӧ.
Иосейлӧн ӧксыалігӧн Неко фараон, египетса ӧксы, мӧдӧдчис Ефрат ю дорӧ ассурса ӧксылы отсӧг вылӧ.
Иосей ӧксы петіс фараонлы паныд тышӧ, но Мегиддо кар дорын фараон виис сійӧс.
Иосейлӧн кесйӧгъясыс вайисны Мегиддоысь сылысь шойсӧ Ерусалимӧ да дзебисны сійӧс аслас дзебанінӧ.
Сэсся Иуда войтыр мавтыштіс Иосейлысь Иохаз писӧ да пуктіс сійӧс ӧксыӧ Иосей батьыс пыдди.
Ӧксыӧ пуксигас Иохазлы вӧлі кызь куим арӧс. Куим тӧлысь чӧж сійӧ юраліс Ерусалимын.
Сылӧн мамыс вӧлі Хамуталь, Ливнаысь Еремейлӧн нылыс.
Батьясыс моз Иохаз вӧчис Господь водзын шогмытӧмсӧ.
Хамат муын Ривла карын Неко фараон пуксьӧдіс Иохазӧс дзескыдінӧ, тадзи вештіс сійӧс Ерусалимын ӧксыалӧмысь. Иуда войтырлы фараон тшӧктіс мынтыны вот — сё талант эзысь да [сё] талант зарни.
Неко фараон пуктіс ӧксыӧ Иосейлысь Эляким писӧ да сетіс сылы Ехояким ним.
Иохазӧс фараон нуӧдіс Египетӧ, кӧні Иохаз куліс.
Ехояким мынтіс фараонлы эзысь да зарни.
Медым сетны фараонлы сьӧм сылӧн корӧм серти, Ехояким ӧксы перйис аслас войтырыслысь вот.
Быд мортлысь сійӧ чукӧртіс эзысь да зарни сылысь овмӧссӧ донъялӧм серти, сэсся чукӧртӧмасӧ сетіс фараонлы.
Ӧксыӧ пуксигас Ехоякимлы вӧлі кызь вит арӧс. Дас ӧти во чӧж сійӧ юраліс Ерусалимын.
Сылӧн мамыс вӧлі Зевудда, Румаысь Педайлӧн нылыс.
Батьясыс моз Ехояким вӧчис Господь водзын шогмытӧмсӧ.
Ехоякимлӧн юралан кадӧ Иуда му вылӧ уськӧдчис вавилонса Навукодоносор ӧксы. Куим во чӧж Ехояким вӧлі Навукодоносорлӧн кипод улын, но сэсся кыпӧдчис сылы паныд.
Господь мӧдӧдіс Ехоякимлы паныд калдея, арамей, моав да аммон тышкайӧзӧс, медым бырӧдны Иуда му, кыдзи висьталіс Господь Сылы кесъялысь пророкъяс пыр. Ставыс тайӧ суис Иуда муӧс, ӧд тадзи вӧлі шуӧма Господьлӧн.
Господь вештіс Иуда войтырӧс Аслас чужӧмбан водзысь Манассей ӧксылӧн мыжъяс вӧсна, мый сійӧ вӧчис.
Манассей кисьтіс мыжтӧм йӧзлысь вирсӧ сы мында, мый Ерусалим тырис вирӧн. Та вӧсна Господь эз прӧстит сійӧс.
Ехояким ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма иудаса ӧксыяслӧн каднебӧгӧ.
Ехояким куліс да вуджис батьясыс дінӧ. Ехояким бӧрти ӧксыӧ пуксис сылӧн Еконей пиыс.
Египетса ӧксы эз нин петавлы тышӧ аслас муысь, ӧд вавилонса ӧксы босьтіс Египет кипод улысь став мусӧ Египет мудорса шорсянь Ефрат ю дорӧдз.
Ӧксыӧ пуксигас Еконейлы вӧлі дас кӧкъямыс арӧс. Куим тӧлысь чӧж сійӧ юраліс Ерусалимын.
Сылӧн мамыс вӧлі Нехушта, Ерусалимысь Элнатанлӧн нылыс.
Батьыс моз Еконей вӧчис Господь водзын шогмытӧмсӧ.
Сійӧ кадас вавилонса Навукодоносор ӧксылӧн тышкайӧзыс уськӧдчисны Ерусалим вылӧ да кытшалісны сійӧс.
Навукодоносор локтіс сэтчӧ, кор сылӧн тышкайӧзыс вӧлі кытшалӧны карсӧ.
Сэки иудаса Еконей ӧксы аслас мамкӧд, кесйӧгъясыскӧд, веськӧдлысьясыскӧд да ыджыд чина йӧзыскӧд сетчис вавилонса ӧксылы. Навукодоносор босьтіс Еконейӧс пленӧ аслас кӧкъямысӧд веськӧдлан воӧ.
Навукодоносор босьтіс Господьлӧн крамысь да ӧксы керкаысь став озырлунсӧ.
Сійӧ жугліс став зарни дозмук-кӧлуйсӧ, мый коркӧ вӧчліс израильса Соломон ӧксы Господьлӧн крамын кесъялӧм вылӧ. Тадзи иніс Господьлӧн шуӧмыс.
Ерусалимысь став олысьсӧ, став веськӧдлысьсӧ да тышкайӧзсӧ Навукодоносор нуӧдіс пленӧ. Налӧн лыдыс вӧлі дас сюрс морт. Сійӧ нӧшта нуӧдіс пленӧ став тшупсьысьсӧ да дорччысьсӧ, колис Ерусалимӧ сӧмын гӧль йӧзӧс.
Еконей ӧксыӧс, сылысь мамсӧ да гӧтыръяссӧ, ыджыд чина йӧзӧс да иудаса юралысьясӧс Навукодоносор нуӧдіс Ерусалимысь пленӧ Вавилонӧ.
Нӧшта нуӧдіс Вавилонӧ став тышкайӧзсӧ — сизим сюрс мортӧс, тшӧтш тшупсьысьясӧс да дорччысьясӧс — сюрс мортӧс. Ставныс найӧ вӧліны тышӧ петны вермысьяс.
Ерусалимын Навукодоносор пуктіс ӧксыӧ Еконейлысь Маттанай дядьсӧ да сетіс сылы Седекей ним.
Ӧксыӧ пуксигас Седекейлы вӧлі кызь ӧти арӧс. Дас ӧти во чӧж сійӧ юраліс Ерусалимын.
Сылӧн мамыс вӧлі Хамуталь, Ливнаысь Еремейлӧн нылыс.
Ехояким моз Седекей вӧчис Господь водзын шогмытӧмсӧ.
Иуда муын да Ерусалим карын олысьяс вылӧ Господьлӧн скӧрлуныс вӧлі сэтшӧм ыджыд, мый вӧтліс найӧс Аслас чужӧмбан водзысь.
Седекей кыпӧдчис вавилонса ӧксылы паныд.
Та вӧсна Седекейлӧн ӧкмысӧд веськӧдлан воӧ дасӧд тӧлысьлӧн дасӧд лунӧ вавилонса Навукодоносор ӧксы аслас тышкайӧзкӧд уськӧдчис Ерусалим кар вылӧ. Найӧ кытшалісны карсӧ да лэптісны сы гӧгӧр тымӧд.
Карыс вӧлі кытшын Седекей ӧксылӧн дас ӧтиӧд веськӧдлан воӧдз.
Нёльӧд тӧлысьлӧн ӧкмысӧд лунӧ, кор карас войтырыс ёна тшыгъяліс, и налы нинӧм вӧлі сёйнысӧ, карсӧ кытшалысь калдеяса тышкайӧз жугӧдісны карса стенсӧ. Войнас иудаса тышкайӧз петісны Ерусалим карысь дзиръяӧд, мый вӧлі кыкпӧвста стенмас ӧксылӧн сад дорын.
Седекей ӧксы аслас йӧзкӧд пышйис Йӧрдан ковтыслань.
Но калдеяса тышкайӧз вӧтчисны ӧксы бӧрся да суӧдісны сійӧс Ерикон кардорса ковтысын. Ӧксылӧн тышкайӧзыс эновтісны сійӧс да пышйисны-разалісны.
Седекей ӧксыӧс кутісны да вайӧдісны вавилонса ӧксы дінӧ Ривлаӧ, и сэні сійӧс мыждісны.
Седекейлысь пиянсӧ виисны сылӧн син водзын. Сэсся вавилонса ӧксы бытшкис Седекейлысь кыкнан синсӧ, дорис сійӧс ыргӧн чепъясӧн да нуӧдіс Вавилонӧ.
Вавилонса Навукодоносор ӧксылӧн дас ӧкмысӧд веськӧдлан воӧ витӧд тӧлысьлӧн сизимӧд лунӧ Ерусалимӧ локтіс Навузардан, ӧксыӧс видзысьяслӧн юралысь, вавилонса ӧксылӧн кесъялысь.
Сійӧ сотіс Ерусалимысь Господьлысь крамсӧ, ӧксылысь керкасӧ да став ыджыд керкасӧ.
Навузарданлӧн калдеяса тышкайӧзыс жугӧдісны Ерусалимӧс кытшалысь стенсӧ.
А карас кольӧм войтырсӧ, весиг вавилонса ӧксы дор вуджӧм йӧзӧс, Навузардан, ӧксыӧс видзысьяслӧн юралысь, нуӧдіс Вавилонӧ.
Сӧмын гӧль йӧз пӧвстысь этшаникӧс Навузардан кольӧдіс уджавны виноград йӧрын да видз-му вылын.
Калдеяса тышкайӧз жуглісны Господьлӧн крамысь ыргӧн сюръяяссӧ, мыссян доз улысь джекъяссӧ да ыргӧн вайӧртӧдсӧ. Ыргӧнсӧ нуисны Вавилонӧ.
Найӧ босьтісны тшӧтш пӧим чукӧртан воръяс, пӧим куралан зыръяс, пуртъяс, кӧшъяс да ыргӧнысь вӧчӧм мукӧд дозмуксӧ, мыйӧн вӧдитчисны крамын кесъялігӧн.
Ӧксыӧс видзысьяслӧн юралысь босьтіс зарниысь да эзысьысь вӧчӧм дозмук: ӧгыр пӧртъяс да вир резан тасьтіяс.
Кык сюръя, вайӧртӧд да джекъяс, мый вылын сулалісны мыссян дозъяс, коркӧ Господьлӧн крамӧ вӧчліс Соломон. Тайӧ вӧчӧмторъясас ыргӧныс вӧлі сы мында, мый весиг эз позь веситнысӧ.
Быд сюръя вӧлі дас кӧкъямыс гырддза судта.
Сюръя йылас вӧлі ыргӧнысь вӧчӧм юр, сылӧн судтаыс вӧлі куим гырддза. Юр гӧгӧрыс вӧліны чепъясысь вӧчӧм мичмӧданторъяс да гранат кодь сяръяс.  Ставсӧ вӧлі вӧчӧма ыргӧнысь.
Сюръяясыс вӧліны ӧткодьӧсь.
Навузардан, ӧксыӧс видзысьяслӧн юралысь, босьтіс Серай аркирейӧс да сылы отсасьысь Софоний попӧс, тшӧтш крам пыранін видзысь куим попӧс.
Карсьыс босьтіс ыджыд чина мортӧс, коді кывкутіс тышкайӧз вӧсна, босьтіс ӧксылысь вит туйдӧдысьӧс, кодъяс вӧлі кольӧмаӧсь на карас, тшӧтш тышкайӧзлӧн юралысьлысь гижалысьсӧ, коді пасъяліс небӧгӧ тышӧ мунысьясӧс. Нӧшта Навузардан босьтіс карсьыс квайтымын мортӧс, кодъяс шедісны сы киӧ.
Ставнысӧ Навузардан, ӧксыӧс видзысьяслӧн юралысь, вайӧдіс вавилонса ӧксы дінӧ Ривлаӧ.
Ривлаын, Хамат муын, вавилонса ӧксы виис найӧс.
Тадзи Иуда войтырӧс вӧлі нуӧдӧма пленӧ аслас муысь.
Вавилонса Навукодоносор ӧксы пуктіс Шафан Ахикамлысь Гедалий писӧ веськӧдлыны Иуда муын кольӧм войтырӧн.
Кор иудаса тышкайӧзӧн веськӧдлысьяс кылісны Гедалийӧс юралысьӧ пуктӧм йылысь, найӧ локтісны асланыс йӧзкӧд Гедалий дінӧ Миспаӧ. Веськӧдлысьясыс вӧліны: Нетанийлӧн Измаил пиыс, Карейлӧн Иоханан пиыс, Нетофаысь Танхуметлӧн Серай пиыс да Язаний, кодлӧн батьыс вӧлі Маакаысь.
Гедалий кыв сетӧмӧн шуис веськӧдлысьяслы да налӧн тышкайӧзлы: «Энӧ полӧй калдеяса юралысьясысь. Кольччӧй тайӧ муас да кесъялӧй вавилонса ӧксылы. Сэки тіянлы лоӧ бур».
Но сизимӧд тӧлысьӧ Миспаӧ локтіс Элишам Нетанийлӧн Измаил пиыс, коді вӧлі ӧксы рӧдысь. Сыкӧд тшӧтш локтіс дас морт. Найӧ виисны Гедалийӧс, тшӧтш иудаса да калдеяса йӧзӧс, кодъяс вӧліны сыкӧд Миспаын.
Та бӧрын став войтырыс ичӧтсянь ыджыдӧдз, тшӧтш тышкайӧзӧн веськӧдлысьяс, пышйисны Египетӧ. Найӧ ёна полісны калдеяса йӧзысь.
Иудаса Еконей ӧксыӧс пленӧ нуӧдӧм бӧрын комын сизимӧд вонас дас кыкӧд тӧлысьлӧн кызь сизимӧд лунӧ вавилонса Эвил-Меродак ӧксы бурсьӧлӧмтчис иудаса Еконей ӧксы дінӧ да лэдзис сійӧс дзескыдінысь. Буретш тайӧ вонас Эвил-Меродак лоис ӧксыӧн.
Сійӧ бура сёрнитіс Еконейкӧд да пуктіс сійӧс Вавилонын олысь мукӧд ӧксыяс дорысь вылӧджык.
Еконей пӧрччис дзескыдінын пукалан паськӧмсӧ да пасьталіс мӧд паськӧм. Сійӧ кадсяньыс да олӧм помӧдзыс Еконей сёйис-юис вавилонса ӧксылӧн пызан сайын.
Вавилонса ӧксы сетіс сылы быд лун кежлӧ став коланаторсӧ, и тадзи вӧлі Еконейлӧн олӧм помӧдзыс.
{Еврей йӧз (комиӧдіс Kodko) @ 1 каднебӧг @ религ. гижӧд @ Библия @ 2021 @ Лб. .}
ВОДДЗА КАДНЕБӦГ
Адамлӧн чужис Сиф, Сифлӧн — Енос, Енослӧн — Кенан, Кенанлӧн — Махалалел, Махалалеллӧн — Яред, Яредлӧн — Енок, Еноклӧн — Метушал, Метушаллӧн — Ламек, Ламеклӧн — Ной, Нойлӧн чужисны Сим, Хам да Яфет.
Яфетлӧн вӧліны Гомер, Магог, Мадай, Яван, [Элис,] Тувал, Мешек да Фирас пиян.
Гомерлӧн вӧліны Аскеназ, Рифат да Тогарма пиян.
Яванлӧн вӧліны Элиш да Фарсис пиян, сысянь петісны тшӧтш киттимсаяс да доданейяс.
Хамлӧн вӧліны Куш, Мицраим, Фут да Ханаан пиян.
Кушлӧн вӧліны Севей, Хавил, Савтай, Рамай да Савтек пиян.
Рамайлӧн вӧліны Шевей да Дедан пиян.
Кушлӧн чужис Нимрод. Му вылын сійӧ вӧлі медводдза вына юралысь.
Мицраим рӧдысь петісны лудъяс, анамъяс, лехавъяс, нафтухъяс, патрусъяс, каслухъяс да кафторъяс. Каслухъяссянь петісны филистимсаяс.
Ханаанлӧн чужис Сидон, медводдза пиыс, сэсся чужис Хет. Ханаан рӧдысь петісны тшӧтш евуссаяс, аморейяс, гергесейяс, хивейяс, аркейяс, синейяс, арвадейяс, чемарейяс да хаматъяс.
Симлӧн вӧліны Элам, Ассур, Арфаксад, Луд да Арам пиян.
Арамлӧн вӧліны Уц, Хул, Гефер да Мешек пиян.
Арфаксадлӧн чужис [Кенан, Кенанлӧн чужис] Шелах, Шелахлӧн чужис Эвер.
Эверлӧн чужис кык пи. Ӧтисӧ нимтісны Пелегӧн, ӧд сылӧн чужан кадӧ йӧзыс разалісны му пасьтала.
Мӧдсӧ, сылысь воксӧ, шуисны Иоктанӧн.
Иоктанлӧн чужисны Алмодад, Шалеф, Хацармавет, Ерах, Адорам, Узал, Диклай, Эвал, Авимаэл, Шевей, Офир, Хавил да Иовав.
Ставныс найӧ Иоктанлӧн пиян.
Симлӧн чужисны Арфаксад, [Кенан,] Шелах, Эвер, Пелег, Рагав, Серуг, Нахор, Терах да Ӧврам, кодлы бӧрынджык вӧлі сетӧма Ӧвраам ним.
Ӧвраамлӧн вӧліны Исаак да Измаил пиян.
Налӧн рӧдныс татшӧм. Измаиллӧн медводдза пиыс вӧлі Невайот, нӧшта сылӧн вӧліны Кедар, Адбел, Мивсам, Мишмай, Думай, Массай, Хадад, Темай, Етур, Нафиш да Кедмай пиян.
Ӧвраамлӧн Кетура нима кесйӧг-гӧтырыс чужтіс сылы Зимранӧс, Иокшанӧс, Меданӧс, Мадианӧс, Ишбакӧс да Шуахӧс.
Иокшанлӧн вӧліны Шевей да Дедан пиян. [Деданлӧн чужисны Рагуил да Навдеил.
Дедан рӧдысь петісны тшӧтш ашшурейяс, астусейяс да асомейяс.]
Мадианлӧн вӧліны Эфай, Эфер, Енок, Авид да Эльдаг пиян. 
Ставныс найӧ вӧліны Кетуралӧн пиянсянь чужысьяс.
Ӧвраамлӧн чужис Исаак.
Исааклӧн вӧліны Исав да Израиль пиян.
Исавлӧн вӧліны Элифаз, Регуэл, Еуш, Ялам да Корей пиян.
Элифазлӧн вӧліны Теман, Омар, Цефо, Гатам, Кеназ, Тимней* да Амалик пиян.
Регуэллӧн вӧліны Нахат, Зерах, Шаммей да Миззай пиян.
Сеирлӧн вӧліны Лотан, Шовал, Цивеон, Ан, Дишон, Эцер да Дишан пиян.
Лотанлӧн вӧліны Хори да Геман пиян.
Лотанлӧн вӧлі Тимна нима чой.
Шоваллӧн вӧліны Алван, Манахат, Эвал, Шефо да Онам пиян.
Цивеонлӧн вӧліны Аей да Ан пиян.
Анлӧн вӧлі Дишон пи [да Охоливама ныв]. 
Дишонлӧн вӧліны Хемдан, Эшбан, Итран да Керан пиян.
Эцерлӧн вӧліны Билган, Заван да Акан пиян.
Дишанлӧн вӧліны Уц да Аран пиян.
Израиль войтырлӧн ӧксыясӧдз Эдом муын вӧліны нин ӧксыяс. Медводдза ӧксыӧн вӧлі Веорлӧн Белай пиыс, коді юраліс Дингава карын.
Сэсся Белай кулӧм бӧрын кутіс ӧксыавны Восораысь Зерахлӧн Иовав пиыс.
Иовав кулӧм бӧрын пуксис ӧксыавны Теман муысь Хушам.
Хушам кулӧм бӧрын пуксис ӧксыавны Бедадлӧн Хадад пиыс, коді Моав ласта вылын вермис мадиансаясӧс.
Сійӧ юраліс Авит карын.
Хадад кулӧм бӧрын пуксис ӧксыавны Масрекаысь Самла.
Самла кулӧм бӧрын пуксис ӧксыавны юбердса Реховотысь Саул.
Саул кулӧм бӧрын пуксис ӧксыавны Акборлӧн Баал-Ханан пиыс.
Баал-Ханан кулӧм бӧрын пуксис ӧксыавны Хадад.
Сійӧ ӧксыаліс Пау карын.
Сылӧн гӧтырыс вӧлі Матредлӧн Мегетавель нылыс, а Матред вӧлі Мезагавлӧн нылыс.
Хадад кулӧм бӧрын Эдомын сьӧрсьӧн-бӧрсьӧн юралісны Тимней, Алвей, Етет, Охоливам, Элай, Пинон, Кеназ, Теман, Мивсар, Магдиэл да Ирам. Найӧ вӧліны эдомса чужанкотыръяслӧн юралысьяс.
Израильлӧн вӧліны Рувим, Симеон, Левий, Иуда, Иссакар, Завулон, Дан, Ӧсип, Венямин, Неффалим, Гад да Асир пиян.
Иудалӧн вӧліны Ир, Онан да Шелай пиян. Тайӧ куим писӧ чужтіс сылы ханаанса Шуалӧн нылыс.
Ир, Иудалӧн медводдза пиыс, эз вӧв шогмана Господьлы, и Господь бырӧдіс сійӧс.
Иудалӧн Фамар нима моньыс чужтіс сылы Паресӧс да Зерахӧс.
Ставнас Иудалӧн вӧлі вит пи.
Пареслӧн вӧліны Хецрон да Хамул пиян.
Зерахлӧн вӧлі вит пи: Зимри, Этан, Еман, Калкол да Дара.
Кармилӧн вӧлі Акар нима пи. Сійӧ торкис Господьлы сиӧмтор йылысь тшӧктӧмсӧ, та вӧсна вайис шог Израильлы.
Этанлӧн вӧлі Азарий нима пи.
Хецронлӧн чужисны Ерахмеэл, Рам да Келувай пиян.
Рамлӧн чужис Аминадав, Аминадавлӧн — Наашон. Наашон вӧлі Иуда чужанкотырлӧн юралысь.
Наашонлӧн чужис Салмон, Салмонлӧн — Вооз.
Воозлӧн чужис Овид, Овидлӧн — Ессей.
Ессейлӧн медводдза пиыс вӧлі Элиав, мӧдыс — Авинадав, коймӧдыс — Шимей, нёльӧдыс — Нафанаил, витӧдыс — Раддай, квайтӧдыс — Оцем, сизимӧдыс — Давид.
Налӧн вӧліны Саруя да Авигея чойяс.
Саруялӧн вӧлі куим пи: Авишай, Йоав да Асаил.
Авигея чужтіс Амессайӧс.
Амессайлӧн Етер батьыс вӧлі измаил войтырысь.
Хецронлӧн Калев пилы Азува да Ериота гӧтыръясыс чужтісны Ешер, Шовав да Ардон пиянӧс.
Азува кулӧм бӧрын Калев босьтіс гӧтырӧ Ефрафаӧс. Сійӧ чужтіс Калевлы Хурӧс.
Хурлӧн чужис Ури, Урилӧн — Безалел.
Кор Хецронлы вӧлі квайтымын арӧс, сійӧ босьтіс гӧтырӧ Макирлысь нывсӧ. Макир вӧлі Галаадлӧн бать. Макирлӧн нылыс чужтіс Хецронлы Сегувӧс.
Сегувлӧн чужис Яир. Галаад муын Яирлӧн вӧлі кызь куим кар.
Но гешурсаяс да арамейяс босьтісны Яирлысь сиктъяссӧ, Кенат кар да сыгӧгӧрса квайтымын сикт.
Став тайӧ кар-сиктас олісны Галаадлӧн Макир батьсянь чужысьяс.
Хецрон куліс Калев-Епрафаын. Сылӧн кулӧм бӧрын Авия гӧтырыс чужтіс Ашхур пиӧс. Ашхурлӧн чужис Текоя нима пи.
Хецронлӧн медводдза пиыс вӧлі Ерахмеэл. Ерахмеэллӧн медводдза пиыс вӧлі Рам, нӧшта сылӧн вӧліны Бунах, Орен, Оцем да Ахий пиян.
Ерахмеэллӧн вӧлі нӧшта мӧд гӧтыр, сійӧс шуисны Афара.
Сійӧ вӧлі Онамлӧн мамыс.
Рамлӧн, Ерахмеэллӧн медводдза пилӧн, вӧліны Маац, Ямин да Экер пиян.
Онамлӧн вӧліны Шаммай да Ядай пиян.
Шаммайлӧн вӧліны Надав да Авишур пиян.
Авишурлӧн вӧлі Авихаиль нима гӧтыр, коді чужтіс сылы Ахбанӧс да Молидӧс.
Надавлӧн вӧліны Селед да Афайм пиян.
Селедлӧн эз вӧв челядьыс.
Афаймлӧн вӧлі Иший нима пи, Ишийлӧн — Шешан, Шешанлӧн — Ахлай.
Ядайлӧн, Шаммай воклӧн, вӧліны Етер да Ионафан пиян.
Етерлӧн эз вӧв челядьыс.
Ионафанлӧн вӧліны Пелет да Заза пиян.
Ставныс найӧ вӧліны Ерахмеэлсянь чужысьяс.
Шешанлӧн эз вӧвны пияныс, вӧліны сӧмын нывъяс.
Шешанлӧн вӧлі Ярха нима египетса кесйӧг, кодлы сійӧ сетіс ассьыс нывсӧ гӧтыр пыдди. Гӧтырыс чужтіс Ярхалы Аттайӧс.
Аттайлӧн чужис Нафан, Нафанлӧн — Завад, Завадлӧн — Ефлал, Ефлаллӧн — Овид, Овидлӧн — Еху, Ехулӧн — Азарий, Азарийлӧн — Хелец, Хелецлӧн — Элас, Эласлӧн — Сисмай, Сисмайлӧн — Шаллум, Шаллумлӧн — Екамий, Екамийлӧн чужис Элишам.
Калевлӧн, Ерахмеэл воклӧн, медводдза пиыс вӧлі Меша, Зифлӧн бать.
Хевронлӧн Мареш батьсянь чужысьясыс татшӧмӧсь.
Хевронлӧн вӧліны Корей, Таппуах, Рекем да Шемай пиян.
Шемайлӧн чужис Рахам. Рахам вӧлі Иоркеамлӧн бать. Рекемлӧн чужис Шаммай.
Шаммайлӧн вӧлі Маон нима пи, Маонлӧн — Бет-Цур.
Калевлӧн Эфа нима кесйӧг-гӧтырыс чужтіс Харанӧс, Моцайӧс да Газезӧс.
Харанлӧн тшӧтш вӧлі Газез нима пи.
Ягдайлӧн вӧліны Регем, Иотам, Гешан, Пелет, Эфай да Шааф пиян.
Калевлӧн Маака нима кесйӧг-гӧтырыс чужтіс Шеверӧс, Тирханӧс, Шаафӧс да Шевайӧс.
Шааф вӧлі Мадманлӧн бать, Шевай — Макбенлӧн да Гивлӧн бать.
Калевлӧн сідзжӧ вӧлі Акса нима ныв.
Ставныс найӧ — Калевсянь чужысьяс. Хур вӧлі Ефрафалӧн медводдза пиыс.
Хурлӧн вӧліны Шовал, Салмон да Хареф пиян. Шовал вӧлі Киръят-Яримлӧн бать, Салмон — Виплиемлӧн бать, Хареф — Бет-Гадерлӧн бать.
Шоваллӧн, Киръят-Яримлӧн батьыслӧн, чужис нӧшта Хароэ. Шовал рӧдысь петісны тшӧтш Манахатын джын олысьыс.
Киръят-Ярим рӧдысь петісны итрияс, путъяс, шуматъяс да мишрайяс.
Насянь чужисны Цора да Эштаол каръясын олысьяс.
Салмонлӧн чужисны Виплием да Атрот-Бет-Йоав пиян, сысянь петісны тшӧтш нетофасаяс да цораяс — манахатса джын олысьыс. Ябецын олысь соферъяссянь чужисны тирейяс, шимейяс да сукатъяс. Найӧ вӧліны кенейяс, Хамматсянь чужысьяс, Рекав рӧдысь.
Хевронын Давидлӧн чужисны пиян. Медводдза писӧ, Амнонӧс, чужтіс Изреельысь Ахиноама.
Мӧд писӧ, Даниилӧс, чужтіс Кармилысь Авигея.
Коймӧдсӧ, Авессаломӧс, чужтіс Маака, гешурса Талмай ӧксылӧн нылыс.
Нёльӧдсӧ, Адонийӧс, чужтіс Агита; 
витӧдсӧ, Шефатайӧс, чужтіс Авитала.
Квайтӧд писӧ, Итрамӧс, чужтіс Давидлӧн Эгла нима гӧтырыс. Тайӧ квайтнан пиыс Давидлӧн чужисны Хевронын.
Хевронын Давид ӧксыаліс сизим во да квайт тӧлысь, а Ерусалимын сійӧ ӧксыаліс комын куим во.
Ерусалимын сылӧн чужисны Шимей, Шовав, Нафан да Соломон. Тайӧ нёльнан писӧ чужтіс Вирсавия, Аммиэллӧн нылыс.
Нӧшта Ерусалимын чужисны Ивхар, Элишам, Элипелет, Ногах, Нефег, Яфий, Элишам, Элиад да Элипелет — ӧкмыс пи.
Ставныс найӧ — Давидлӧн пиян. Давидлӧн тшӧтш вӧліны сылӧн кесйӧг-гӧтыръясӧн чужтӧм пиян.
Налӧн нӧшта вӧлі Фамар нима чой.
Соломонлӧн вӧлі Ровоам нима пи, Ровоамлӧн — Авий, Авийлӧн — Аса, Асалӧн — Иосафат, Иосафатлӧн — Иорам, Иорамлӧн — Ахазий, Ахазийлӧн — Йоас, Йоаслӧн — Амасей, Амасейлӧн — Азарий, Азарийлӧн — Иотам, Иотамлӧн — Ахаз, Ахазлӧн — Езекей, Езекейлӧн — Манассей, Манассейлӧн — Амон, Амонлӧн — Иосей.
Иосейлӧн медводдза пиыс вӧлі Иоханан, мӧдыс — Ехояким, коймӧдыс — Седекей, нёльӧдыс — Шаллум.
Ехоякимлӧн вӧліны Еконей да Седекей пиян.
Еконейлӧн вӧліны Асир, Шеалтиэл, Малкирам, Педай, Шенацар, Екамий, Гошам да Недавий пиян.
Педайлӧн вӧліны Зоровавель да Шимей пиян.
Зоровавельлӧн вӧліны Мешуллам да Хананей пиян, налӧн вӧлі Шеломит нима чой. Нӧшта Зоровавельлӧн вӧлі вит пи: Хашув, Охел, Берек, Хасадий да Юшав-Хесед.
Хананейлӧн вӧліны Пелатий да Исай пиян.
Исайлӧн вӧлі Рефай пи, Рефайлӧн — Арнан, Арнанлӧн — Авдий, Авдийлӧн — Шеканий.
Шеканийлӧн вӧлі Шемай нима пи.
Шемайлӧн вӧліны Хаттуш, Игал, Бариах, Неарий да Шафат нима пиян. Но ставнас Шемайлӧн вӧлі квайт пи.
Неарийлӧн вӧлі куим пи: Элионай, Езекей да Азрикам.
Элионайлӧн вӧлі сизим пи: Ходавий, Эльяшив, Пелай, Аккув, Иоханан, Делай да Анани.
Иудалӧн вӧліны Парес, Хецрон, Карми, Хур да Шовал нима пиян.
Шоваллӧн вӧлі Реай пи.
Реайлӧн чужис Яхат, Яхатлӧн чужисны Ахумай да Лагад. Насянь чужисны Цораын олысьяслӧн рӧдъясыс.
Этам карын олысьяс петісны Изреельсянь, Ишмасянь да Идбашсянь. Налӧн вӧлі Гацлелпони нима чой. Пенуэл вӧлі Гедорлӧн бать, Эзер — Хушалӧн бать.
Пенуэл да Эзер вӧліны Хурлӧн пиян. Хур, Ефрафалӧн медводдза пиыс, вӧлі тшӧтш Виплиемлӧн бать.
Ашхурлӧн, Текоялӧн батьлӧн, вӧлі кык гӧтыр: Хела да Наара.
Наара чужтіс Ашхурлы Ахузам, Хефер, Фимни да Ахаштар пиянӧс.
Хелалӧн вӧліны Церет, Цохар да Этнан пиян.
Коцлӧн чужисны Анув да Цовев пиян. Коцсянь чужис тшӧтш Харум Ахархеллӧн рӧдыс.
Аслас вокъяс дорысь Явис нималіс ёнджыка.
Мамыс нимтіс сійӧс Явисӧн, ӧд шуис: «Ме сьӧкыда чужті сійӧс».
Явис шыасис Израильлӧн Ен дінӧ: «Енмӧй, Тэ кӧ эськӧ бурсиин менӧ да ыдждӧдін менсьым муӧс, Тэнад киыд кӧ эськӧ кутыштіс менӧ да видзис, медым лёкыс эз су менӧ!»
И Енмыс мӧдӧдіс Явислы сійӧ, мый корис.
Келувлӧн, Шух воклӧн, чужис Мехир.
Мехир вӧлі Эштонлӧн бать.
Эштонлӧн чужисны Бет-Рафай, Пасеах да Техиннай. Техиннай рӧдысь петісны Нахаш карын олысьяс. [Техиннай вӧлі Кенез рӧдысь Селомлӧн вок.] 
Найӧ вӧліны Рехаын олысьяс.
Кеназлӧн вӧліны Отниэл да Серай пиян.
Отниэллӧн вӧлі Хатат нима пи.
Менотайлӧн чужис Офра, Серайлӧн чужис Йоав. Йоав вӧлі Ге-Харашимлӧн бать. Сысянь чужысьяс вӧліны пуысь вӧчасьысьяс.
Калев вӧлі Ефуннилӧн пи. Калевлӧн вӧліны Ир, Элай да Наам пиян.
Элайлӧн вӧлі Кеназ нима пи.
Егаллеллӧн вӧліны Зиф, Зифа, Фирий да Асарел пиян.
Эзрайлӧн вӧліны Етер, Меред, Эфер да Ялон пиян.
Етерлӧн чужисны Мирьям, Шаммай да Ишбах. Ишбах вӧлі Эштемлӧн бать.
Мередлӧн гӧтырыс, коді вӧлі Иуда чужанкотырысь, чужтіс Яредӧс, Хеверӧс да Екутиэлӧс. Яред вӧлі Гедорлӧн бать, Хевер — Соколӧн бать, Екутиэл — Заноахлӧн бать.
Мередлы пиянӧс чужтіс тшӧтш фараонлӧн Битя нима нылыс, кодӧс Меред босьтіс гӧтырӧ.
Ходийлӧн гӧтырсянь, Нахамлӧн чойсянь, чужисны Кейллӧн Гарми батьыс да Маакаысь Эштем.
Шимонлӧн вӧліны Амнон, Риннах, Бен-Ханан да Филон пиян.
Ишийсянь чужисны Зохет да Зохетлӧн пиыс.
Иудалӧн вӧлі Шелай нима пи. Шелайлӧн вӧліны Ир да Лаед пиян. Ир вӧлі Лекалӧн бать, Лаед — Марешлӧн бать. Лаедсянь чужисны тшӧтш Бет-Ашбеяын олысь рӧдъяс, кодъяс кыисны вӧсни шабді дӧра. Шелайлӧн вӧліны нӧшта Иоким, Йоас да Сараф пиян. Шелайсянь чужисны тшӧтш Козеваын олысьяс. Йоас да Сараф ыджыдалісны моавсаяс вылын, кодъяс олісны Лехемын.
Но тайӧ вӧлі важӧн нин.
Йоассянь да Сарафсянь чужысьяс вӧліны гырнич вӧчысьяс, олісны Нетаймын да Гедераын да уджалісны-кесъялісны ӧксылы.
Симеонлӧн вӧліны Немуэл, Ямин, Ярив, Зерах да Саул пиян.
Сауллӧн вӧлі Шаллум пи, Шаллумлӧн — Мивсам, Мивсамлӧн — Мишмай, Мишмайлӧн — Хаммуил, Хаммуиллӧн — Заккур, Заккурлӧн — Шимей.
Шимейлӧн вӧлі дас квайт пи да квайт ныв.
Шимей вокъяслӧн пияныс этша вӧлі. Симеон чужанкотыр эз вӧв сэтшӧм ыджыд, кутшӧм вӧлі Иуда чужанкотыр.
Симеонсянь чужысьяс олісны Бер-Шеваын, Моладаын, Хацар-Шуалын, Билгаын, Эцемын, Фоладын, Бетуэлын, Хормаын, Сиклагын, Бет-Маркавотын, Хацар-Сусаын, Бет-Бириын да Шаараимын.
Давидлӧн ӧксыавтӧдз тайӧ каръясыс вӧліны налӧн. Налӧн вӧліны тшӧтш вит кар — Этам, Айн, Риммон, Токен да Ашан — да Ваалӧдз нагӧгӧрса сиктъяс.
Тайӧ кар-сиктас олісны Симеонсянь петӧм рӧдъяс.
abu
Амасейлӧн Иоша пиыс, Мешовав, Ямлек, Йоиль, Еху, Элионай, Яковей, Ишохай, Асай, Адиэл, Ишимиэл, Бенай да Зиз вӧліны рӧдкутысьяс. Налӧн рӧдныс ёна содіс-паськаліс. Ехулӧн батьыс вӧлі Иошив, Иошивлӧн — Серай, Серайлӧн — Асиэл. Зизлӧн батьыс вӧлі Шифий, Шифийлӧн — Аллон, Аллонлӧн — Едай, Едайлӧн — Шимри, Шимрилӧн — Шемай.
Асланыс ыжъяслы йирсянін корсьӧм могысь найӧ ветлывлісны ковтыс асыввылӧдз, Гедор дорӧдз.
Сэні найӧ аддзисны бур да пӧтӧса йирсянінъяс да паськыд муяс, кӧні йӧзыс олісны лӧня, и налы нинӧмысь вӧлі повнысӧ. Тайӧ муас воддза олысьясыс петісны Хам рӧдысь.
Вылынджык лыддьӧдлӧм йӧзыс локтісны тайӧ муас иудаса Езекей ӧксылӧн веськӧдлан кадӧ. Найӧ дзикӧдз бырӧдісны Хамсянь чужысьясӧс да налысь оланінъяссӧ быдлаын, кытчӧ мунісны. Асьныс овмӧдчисны налӧн оланінъясӧ, ӧд сэні вӧліны ыжъяслы йирсянінъяс.
Симеонсянь чужысьяс пӧвстысь витсё морт мунісны Сеир керӧсвыв муӧ. Наӧн веськӧдлісны Ишийлӧн Пелатий, Неарий, Рефай да Узиэл пиян.
Найӧ виалісны сэні олысь коляс амалик войтырӧс и асьныс ӧніӧдз сэні олӧны.
Рувим вӧлі Израильлӧн медводдза пи, но сійӧ узис аслас батьыслӧн гӧтыръяс пиысь ӧтикӧд да воштіс медводдза чужысьлысь нимсӧ. Медводдза чужысьлӧн нимыс вуджис Израильлӧн Ӧсип пиянлы.
Иуда вӧлі медся тӧдчана аслас вокъяс пӧвстын, и сылӧн рӧдысь петіс юралысь, но медводдза чужысьлӧн нимыс вуджис эз сылы, а Ӧсиплы.
Рувимлӧн, Израильлӧн медводдза пилӧн, вӧліны Енок, Паллу, Хецрон да Карми пиян.
Йоильлӧн вӧлі Шемай пи, Шемайлӧн — Гог, Гоглӧн — Шимей, Шимейлӧн — Микей, Микейлӧн — Реай, Реайлӧн — Ваал, Вааллӧн — Бера. Ассурса Тиглатпаласар ӧксы нуӧдіс Бераӧс пленӧ.
Бера вӧлі Рувим чужанкотырлӧн юралысь.
Чужанвуж гижӧдын рӧд сертиныс вӧлі лыддьӧдлӧма сылысь вокъяссӧ: рӧдкутысь Евэл, Закар да Азазлӧн Белай пиыс. Азазлӧн батьыс вӧлі Шемай, Шемайлӧн батьыс — Йоиль.
Белайлӧн рӧдыс оліс Ароэрын, налӧн муыс нюжаліс Невоӧдз да Ваал-Меонӧдз.
Асыввылын Рувимсянь чужысьяслӧн оланіныс нюжаліс овтӧминӧдз, коді помасис Ефрат ю дорын, ӧд Галаадын налӧн ыж-мӧсныс ёна рӧдмис-содіс.
Сауллӧн веськӧдлан кадӧ найӧ тышкасисны Агарсянь чужысьяскӧд да пасьвартісны найӧс. Асьныс пондісны овны чомъясын Галаадсянь асыввылын.
Гадсянь чужысьяс олісны Васан муын Салка карӧдз, Рувим чужанкотырсянь рытыввылын.
Васанын рӧдкутысьнас вӧлі Йоиль, сы бӧрся Шафам, сэсся Янай да Шафат.
Налӧн рӧдысь вӧліны Микаил, Мешуллам, Шевей, Иорай, Якан, Зиа да Эвер — сизим рӧдкутысь.
Тайӧ вӧліны Абихайллӧн пиян. Абихайллӧн батьыс вӧлі Хури, Хурилӧн — Яроах, Яроахлӧн — Галаад, Галаадлӧн — Микаил, Микаиллӧн — Ешишай, Ешишайлӧн — Яхдо, Яхдолӧн — Буз.
Ахи тшӧтш вӧлі рӧдкутысь. Сылӧн батьыс вӧлі Авдиэл, Авдиэллӧн — Гуни.
Гадсянь чужысьяс олісны Галаад да Васан муясын, тайӧ муяслӧн киподувса сиктъясын да Шарон гӧгӧрса став видз вылын.
Гадсянь чужысьяслысь став тайӧ нимъяссӧ вӧлі лыддьӧдлӧма чужанвуж гижӧдын иудаса Иотам ӧксылӧн да израильса Еровам ӧксылӧн веськӧдлан кадӧ.
Рувимсянь да Гадсянь чужысьяс пӧвстын да Манассейлӧн джын чужанкотырыс пӧвстын вӧлі нелямын нёль сюрс сизимсё квайтымын тышкаморт. Найӧ вӧліны вынаӧсь, новлӧдлісны сайӧд да шыпурт, кужисны лыйсьыны ньӧввужйысь да тышкасьны.
Кор найӧ уськӧдчисны Агарсянь, Етурсянь, Нафишсянь да Нодавсянь чужысьяс вылӧ, Енмыс отсаліс налы да сетіс налӧн киӧ Агарсянь чужысьясӧс да на дор сулалысьясӧс. Енмыс кыліс Сы вылӧ лача кутысьяслысь кевмӧмсӧ, кор найӧ тыш дырйи шыасисны Сы дінӧ.
Найӧ мырддисны вӧрӧглысь ветымын сюрс верблюдӧс, кыксё ветымын сюрс ыжӧс да кык сюрс осёлӧс, нӧшта босьтісны пленӧ сё сюрс мортӧс. Унаӧс вӧлі виӧма, ӧд тышыс вӧлі Енсянь.
Рувимсянь да Гадсянь чужысьяс да Манассей джын чужанкотырыс олісны вӧрӧглысь босьтӧм муын пленӧ нуӧдан кадӧдз.
Манассейлӧн уна лыда джын чужанкотырыс оліс сійӧ муас, мый нюжаліс Васансянь Ваал-Ермон, Сенир да Ермон керӧсъясӧдз.
Налӧн рӧдкутысьяснас вӧліны Эфер, Иший, Элиэл, Азриэл, Еремей, Ходавий да Яхдиэл. Ставныс найӧ вӧліны вына тышкасьысьяс, асланыс рӧдын юралысьяс.
Но Рувимсянь да Гадсянь чужысьяс да Манассейлӧн джын чужанкотырыс эновтісны асланыс батьяслысь Енсӧ да кырсалысь ань моз сетчисны тайӧ муас олысь войтыръяслӧн енъяслы. Тайӧ войтыръяссӧ Енмыс коркӧ бырӧдіс на водзысь.
Израильлӧн Ен ышӧдіс ассурса Пул ӧксыӧс, мӧд ногӧн кӧ, Тиглатпаласар ӧксыӧс, нуӧдны пленӧ Рувимсянь да Гадсянь чужысьясӧс да Манассейлысь джын чужанкотырсӧ. Найӧс вайӧдісны Халахӧ да Хараӧ, тшӧтш Хавор ю дорӧ да Гозанын визувтысь ю дорӧ. Найӧ ӧнӧдз на сэні олӧны.
Левийлӧн вӧліны Гирсон, Кааф да Мерари пиян.
Каафлӧн вӧліны Амрам, Ицгар, Хеврон да Узиэл пиян.
Амрамлӧн вӧліны Аарон да Мӧисей пиян да Мирьям ныв.
Ааронлӧн вӧліны Надав, Авиуд, Элазар да Итамар пиян.
Элазарлӧн чужис Пинес, Пинеслӧн — Авишуй, Авишуйлӧн — Букки, Буккилӧн — Уззей, Уззейлӧн — Зерахий, Зерахийлӧн — Мерайот, Мерайотлӧн — Амарей, Амарейлӧн — Ахитув, Ахитувлӧн — Садок, Садоклӧн — Ахимаас, Ахимааслӧн — Азарий, Азарийлӧн — Иоханан, Иохананлӧн — Азарий. Азарий кесъяліс попӧн крамын, мый Соломон вӧчис Ерусалимын.
Азарийлӧн чужис Амарей, Амарейлӧн — Ахитув, Ахитувлӧн чужис Садок, Садоклӧн — Шаллум, Шаллумлӧн чужис Хилки, Хилкилӧн — Азарий, Азарийлӧн чужис Серай, Серайлӧн — Иоседек.
Иоседекӧс нуӧдісны пленӧ сэки, кор Господь лэдзис Навукодоносорлы нуӧдны пленӧ Иудаын да Ерусалимын олысьясӧс.
Левийлӧн вӧліны Гирсон, Кааф да Мерари пиян.
Гирсон пиянлӧн нимъясыс вӧліны Ливни да Шимей.
Каафлӧн вӧліны Амрам, Ицгар, Хеврон да Узиэл пиян.
Мерарилӧн вӧліны Махли да Муши пиян.
Со, Левийсянь чужысьяслӧн рӧдъясыс батьясныс серти:
Гирсонлӧн чужис Ливни пи, Ливнилӧн — Яхат, Яхатлӧн — Зимма, Зиммалӧн — Йоах, Йоахлӧн — Иддо, Иддолӧн — Зерах, Зерахлӧн — Ефрай.
Каафлӧн чужис Аминадав пи, Аминадавлӧн — Корей, Корейлӧн — Асир, Асирлӧн — Элкан, Элканлӧн — Эвиасаф, Эвиасафлӧн — Асир, Асирлӧн — Тахат, Тахатлӧн — Уриэл, Уриэллӧн — Озей, Озейлӧн — Саул.
Элканлӧн вӧліны Амасай да Ахимот пиян.
Ахимотлӧн вӧлі Элкан пи, Элканлӧн — Цофай, Цофайлӧн — Нахат, Нахатлӧн — Элиав, Элиавлӧн — Ерохам, Ерохамлӧн — Элкан [Элканлӧн — Самуил].
Самуиллӧн медводдза пиыс вӧлі Йоиль, мӧдыс — Авий.
Мерарилӧн вӧлі Махли пи, Махлилӧн — Ливни, Ливнилӧн — Шимей, Шимейлӧн — Уззай, Уззайлӧн — Шимей, Шимейлӧн — Хаггий, Хаггийлӧн — Асай.
Давид индіс сьылысь-кесъялысьясӧс, кор Господьлӧн вежаинӧ вӧлі вайӧма Йитӧд кудсӧ.
Кытчӧдз Соломон эз вӧч Ерусалимын Господьлысь крамсӧ, найӧ сьылісны-кесъялісны вежа чом водзын.
Найӧ кесъялісны сідзи, кыдзи налы вӧлі тшӧктӧма вӧчны.
Со, тайӧ сьылысь-кесъялысьясыс да насянь чужысьяс: Кааф рӧдысь вӧлі Еман нима сьылысь. Сылӧн батьыс вӧлі Йоиль, Йоильлӧн батьыс — Самуил, Самуиллӧн — Элкан, Элканлӧн — Ерохам, Ерохамлӧн — Элиэл, Элиэллӧн — Тоах, Тоахлӧн — Цуф, Цуфлӧн — Элкан, Элканлӧн — Махат, Махатлӧн — Амасай, Амасайлӧн — Элкан, Элканлӧн — Йоиль, Йоильлӧн — Азарий, Азарийлӧн — Софоний, Софонийлӧн — Тахат, Тахатлӧн — Асир, Асирлӧн — Эвиасаф, Эвиасафлӧн — Корей, Корейлӧн — Ицгар, Ицгарлӧн — Кааф, Каафлӧн — Левий, Левийлӧн — Израиль.
Еманлӧн веськыдладорас сьыліс-кесъяліс Асаф. Асафлӧн батьыс вӧлі Берек, Береклӧн — Шимей, Шимейлӧн — Микаил, Микаиллӧн — Баасей, Баасейлӧн — Малкий, Малкийлӧн — Этни, Ефнийлӧн — Зерах, Зерахлӧн — Адай, Адайлӧн — Этан, Этанлӧн — Зимма, Зиммалӧн — Шимей, Шимейлӧн — Яхат, Яхатлӧн — Гирсон, Гирсонлӧн — Левий.
Еманлӧн шуйгаладорас сьыліс-кесъяліс Мерари рӧдысь Этан. Этанлӧн батьыс вӧлі Киший, Кишийлӧн — Авди, Авдилӧн — Маллук, Маллуклӧн — Хашавий, Хашавийлӧн — Амасей, Амасейлӧн — Хилки, Хилкилӧн — Амци, Амцилӧн — Бани, Банилӧн — Шемер, Шемерлӧн — Махли, Махлилӧн — Муши, Мушилӧн — Мерари, Мерарилӧн — Левий.
Левий рӧдысь мукӧдсӧ вӧлі индӧма Ен керкаын вӧчны мӧдпӧлӧс уджъяс.
Сӧмын Аарон да сысянь чужысьяс вермисны висьпуктанін вылын да тшынӧдчан висьпуктанін вылын сотны висьяс, кесъявны Вежасьыс-вежаинын да вештыны Израиль войтырлысь мыжсӧ. Найӧ ставсӧ вӧчисны Ен кесйӧг Мӧисейлӧн тшӧктӧм серти.
Ааронлӧн вӧлі Элазар пи, Элазарлӧн — Пинес, Пинеслӧн — Авишуй, Авишуйлӧн — Букки, Буккилӧн — Уззей, Уззейлӧн — Зерахий, Зерахийлӧн — Мерайот, Мерайотлӧн — Амарей, Амарейлӧн — Ахитув, Ахитувлӧн — Садок, Садоклӧн — Ахимаас.
Со, Левийсянь чужысьяслӧн оланінъяс налы сетӧм муын: Кааф рӧдысь Ааронсянь чужысьяслы пудъясьӧм бӧрти вӧлі сетӧма Иуда муысь Хеврон кар да сыгӧгӧрса видзьяс, но каргӧгӧрса сиктъяссӧ да кӧдзан муяссӧ сетісны Ефуннилӧн Калев пилы.
Ааронсянь чужысьяслы вӧлі сетӧма тшӧтш каръяс, кытчӧ вӧлі позьӧ пышйыны.
Тайӧ — Хеврон, Ливна да сыгӧгӧрса видзьяс, Яттир, Эштемоа да сыгӧгӧрса видзьяс, Хилен, Девир да нагӧгӧрса видзьяс, Ашан, Бет-Шемеш да нагӧгӧрса видзьяс.
Таысь кындзи Венямин чужанкотыр вичмӧдіс налы Гева, Алемет да Анатот каръяс да нагӧгӧрса видзьяс. 
Ставнас Ааронсянь чужысьяслы вӧлі сетӧма дас куим кар.
Пудъясьӧм бӧрти Кааф рӧдысь мукӧдыслы вӧлі сетӧма Манассей джын чужанкотырлӧн муысь дас кар.
Гирсонсянь чужысьяслы налӧн рӧд лыд серти Иссакарлӧн, Асирлӧн да Неффалимлӧн чужанкотыръясыс да Васанын олысь Манассей чужанкотырыс вичмӧдісны дас куим кар.
Мерарисянь чужысьяслы налӧн рӧд лыд серти пудъясьӧм бӧрти вӧлі сетӧма Рувим, Гад да Завулон чужанкотыръяслӧн муысь дас кык кар.
Тадзи Израиль войтыр сетісны левитъяслы каръяс да нагӧгӧрса видзьяс.
Иуда, Симеон да Венямин чужанкотыръяс пудъясьӧм бӧрти сетісны левитъяслы тайӧ лыддьӧдлӧм каръяссӧ.
Каафсянь чужысьясысь ӧткымын рӧдлы вичмисны каръяс Ефрем чужанкотырлӧн муысь.
Налы сетісны каръяс, кытчӧ вӧлі позьӧ пышйыны: Сикем да сыгӧгӧрса видзьяс Ефрем керӧсвыв муысь, Гезер да сыгӧгӧрса видзьяс, Иокмеам, Бет-Хорон да нагӧгӧрса видзьяс, Аялон, Гат-Риммон да нагӧгӧрса видзьяс.
Манассейлӧн джын чужанкотырыс вичмӧдіс Каафсянь чужысьясысь ӧткымын рӧдлы Анер да Билеам каръяс да нагӧгӧрса видзьяс.
Гирсонсянь чужысьяслы Манассейлӧн джын чужанкотырыс вичмӧдіс Аштарот кар да Васан муысь Голан кар да нагӧгӧрса видзьяс.
Иссакар чужанкотыр вичмӧдіс Кедеш, Даврат, Рамот да Анем каръяс да нагӧгӧрса видзьяс.
Асир чужанкотыр вичмӧдіс Машал, Авдон, Хукок да Рехов каръяс да нагӧгӧрса видзьяс.
Неффалим чужанкотыр вичмӧдіс налы Галилеяысь Кедеш кар да сыгӧгӧрса видзьяс, тшӧтш Хаммон да Киръятаим каръяс да нагӧгӧрса видзьяс.
Мерарилӧн рӧдысь мукӧдыслы Завулон чужанкотыр вичмӧдіс Риммон да Тавор каръяс да нагӧгӧрса видзьяс.
Йӧрдан юсянь асыввылын, Ериконлы воча, Рувим чужанкотыр вичмӧдіс налы овтӧминса Бецер кар да сыгӧгӧрса видзьяс, тшӧтш Яхац, Кедемот да Мефат каръяс да нагӧгӧрса видзьяс.
Гад чужанкотыр вичмӧдіс налы Галаадысь Рамот кар да сыгӧгӧрса видзьяс, тшӧтш Маханаим, Хешбон да Язер каръяс да нагӧгӧрса видзьяс.
Иссакарлӧн вӧлі нёль пи: Тол, Пуах, Яшув да Шимрон.
Толлӧн вӧліны Уззей, Рефай, Ерил, Яхмай, Ивсам да Самуил пиян. Найӧ вӧліны рӧдкутысьяс.
Чужанвуж гижӧд серти Давидлӧн веськӧдлан кадӧ Толлӧн рӧдас вӧлі кызь кык сюрс квайтсё вына тышкаморт.
Уззейлӧн вӧлі Израхий нима пи.
Израхийлӧн вӧліны Микаил, Авдий, Йоиль да Ишший пиян. Став тайӧ витнан мортыс вӧліны рӧдкутысьяс.
Чужанвуж гижӧд серти налӧн рӧдын вӧлі комын квайт сюрс тышкаморт, ӧд налӧн вӧлі уна гӧтыр да пиян.
Чужанвуж гижӧд серти Иссакарсянь чужысьяслӧн мукӧд рӧдын вӧлі нӧшта кӧкъямысдас сизим сюрс вына тышкаморт.
Веняминлӧн вӧлі куим пи: Белай, Бекер да Едиэл.
Белайлӧн вӧлі вит пи: Эцбон, Уззей, Узиэл, Еримот да Ири. Найӧ вӧліны рӧдкутысьяс да вына тышкасьысьяс.
Чужанвуж гижӧд серти насянь чужысьяслӧн лыдыс вӧлі кызь кык сюрс комын нёль морт.
Бекерлӧн вӧліны Земир, Йоас, Элизер, Элионай, Омри, Еремот, Авий, Анатот да Алемет пиян.
Ставныс найӧ — Бекерлӧн пиян.
Чужанвуж гижӧдын лыддьӧдлӧма налысь рӧдкутысьясӧс да кызь сюрс кыксё вына тышкамортӧс.
Едиэллӧн вӧлі Билган нима пи.
Билганлӧн вӧліны Еус, Венямин, Эхуд, Кенаан, Зефан, Фарсис да Ахишахар пиян.
Едиэллӧн став тайӧ пияныс вӧліны рӧдкутысьяс да вына тышкасьысьяс.
Налӧн рӧдын вӧлі дас сизим сюрс кыксё тышкаморт.
Шуппим да Хуппим вӧліны Ирсянь чужысьяс, Хушим чужис Ахерсянь.
Неффалимлӧн вӧліны Яхциэл, Гуни, Ецер да Шаллум пиян. Неффалимлӧн мамыс вӧлі Валла.
Манассейлӧн вӧліны Асриэл да Макир пиян, кодъясӧс чужтіс сылӧн кесйӧг-гӧтырыс, коді вӧлі арамей войтырысь.
Макир вӧлі Галаадлӧн бать.
Макир босьтіс гӧтырӧ Хуппимлысь да Шуппимлысь Маака нима чойсӧ.
Макирлысь мӧд писӧ шуисны Салпаад.
Салпаадлӧн чужисны сӧмын нывъяс.
Макирлӧн Маака гӧтырыс чужтіс пиӧс да сетіс сылы Переш ним, а мӧд пиыслы — Шереш ним.
Шерешлӧн вӧліны Улам да Рекем пиян.
Уламлӧн вӧлі Бедан нима пи.
Татшӧм вӧлі Галаадлӧн рӧдыс. Галаад вӧлі Макирлӧн пи, Макир — Манассейлӧн.
Галаадлӧн Молекеф нима чойыс чужтіс Ишходӧс, Авиэзерӧс да Махлаӧс.
Шемидлӧн вӧліны Ахиан, Шекем, Ликки да Аниам пиян.
Ефремлӧн вӧлі Шутелах нима пи, Шутелахлӧн — Беред, Бередлӧн — Тахат, Тахатлӧн — Элеадай, Элеадайлӧн — Тахат, Тахатлӧн — Завад, Завадлӧн — Шутелах. Чужӧмсяньныс Гефын олысьяс виисны Ефремлысь Эзер да Элеад пиянсӧ, кор найӧ мунісны мырддьыны гефсаяслысь ыж-мӧссӧ.
Налӧн Ефрем батьныс дыр бӧрдіс на вӧсна, а сылӧн вокъясыс волывлісны сійӧс бурӧдны.
Ефрем узис гӧтырыскӧд, гӧтырыс сьӧктіс да чужтіс пиӧс. Ефрем сетіс пиыслы Берий ним, ӧд налӧн керкаын вӧлі шог.
Ефремлӧн Шера нылыс вӧчӧдіс Улыс Бет-Хорон кар да Вылыс Бет-Хорон кар, тшӧтш Уззен-Шера кар.
Берийлӧн вӧлі Рефах нима пи, Рефахлӧн — Решеф, Решефлӧн — Телах, Телахлӧн — Тахан, Таханлӧн — Лаедан, Лаеданлӧн — Аммиуд, Аммиудлӧн — Элишам, Элишамлӧн — Нав, Навлӧн — Исус.
Ефремсянь чужысьяс олісны Вефильын да сыгӧгӧрса сиктъясын, асыввылын — Нааранын, рытыввылын — Гезерын да сыгӧгӧрса сиктъясын, Сикемын да сыгӧгӧрса сиктъясын, кодъяс нюжалӧны Айяӧдз да сыгӧгӧрса сиктъясӧдз. Тайӧ оланінъясыс вӧліны Ефрем чужанкотырлӧн кипод улын.
Манассей чужанкотырлӧн кипод улын вӧліны Бет-Шеан, Танак, Мегиддо да Дор каръяс да нагӧгӧрса сиктъяс.
Тайӧ кар-сиктъясас олісны Израильлӧн Ӧсип писянь чужысьяс.
Асирлӧн вӧліны Имнай, Ишвай, Ишви да Берий пиян. Налӧн вӧлі Серах нима чой.
Берийлӧн вӧліны Хевер да Малкиэл пиян.
Малкиэл вӧлі Бирзайтлӧн бать.
Хеверлӧн чужисны Яфлет, Шомер, Хотам да налӧн Шуя чойныс.
Яфлетлӧн вӧліны Пасак, Бимгал да Ашват пиян.
Шемерлӧн вӧліны Ахи, Рохга, Хубба да Арам пиян.
Шемерлӧн Хелем воклӧн вӧліны Цофах, Имнай, Шелеш да Амал пиян.
Цофахлӧн вӧліны Суах, Харнефер, Шуал, Бери, Имра, Бецер, Ход, Шаммей, Шилша, Итран да Беэр пиян.
Етерлӧн вӧліны Ефунни, Фиспа да Ара пиян.
Уллалӧн вӧліны Арах, Ханниэл да Риций пиян.
Ставныс найӧ — Асирсянь чужысьяс. Найӧ вӧліны рӧдкутысьяс, вына тышкасьысьяс, веськӧдлысьяслӧн юралысьяс.
Чужанвуж гижӧд серти Асир чужанкотырын вӧлі кызь квайт сюрс тышкаморт.
Веняминлӧн медводдза пиыс вӧлі Белай, мӧдыс — Ашбел, коймӧдыс — Ахрай, нёльӧдыс — Ноха, витӧдыс — Рафа.
Белайлӧн вӧліны Аддар, Гер, Авихуд, Авишуй, Нааман, Ахоах, Гер, Шефуфан да Хурам пиян.
Эхудлӧн Нааман, Ахий да Гер пияныс вӧліны Геваын олысьяслӧн рӧдкутысьяс. Кор найӧс вӧтлісны Манахатӧ, найӧ овмӧдчисны сэтчӧ Герлӧн веськӧдлӧм улын.
Сылӧн чужисны Уззай да Ахихуд пиян.
Шехарайм вӧтліс ассьыс Хушим да Баара гӧтыръяссӧ. Та бӧрти Моав муын сылӧн Ходеш нима гӧтырыс чужтіс сылы Иовав, Цивий, Мешай, Малкам, Еуц, Сакий да Мирмай нима пиянӧс. Найӧ вӧліны рӧдкутысьяс.
Хушим гӧтырсянь Шехараймлӧн вӧліны нин Авитув да Элпаал нима пиян.
Элпааллӧн вӧліны Эвер, Мишам да Шемед пиян. Шемед кыпӧдіс Оно кар, тшӧтш Лод кар да сыгӧгӧрса сиктъяс.
Берий да Шемай вӧліны Аялонын олысьяслӧн рӧдкутысьяс.
Найӧ вӧтлісны Гефын олысьясӧс.
Ахио, Шашак, Еремот, Зевадай, Арад, Эдер, Микаил, Ишпай да Иох вӧліны Берийлӧн пиян.
Зевадай, Мешуллам, Хизкий, Хевер, Ишмерай, Излий да Иовав вӧліны Элпааллӧн пиян.
Яким, Зикри, Завдий, Элиенай, Цилтай, Элиэл, Адай, Берай да Шимрат вӧліны Шимейлӧн пиян.
Ишпан, Эвер, Элиэл, Авдон, Зикри, Ханан, Хананей, Элам, Антотий, Ифдий да Пенуэл вӧліны Шашаклӧн пиян.
Шамшерай, Шехарий, Аталей, Яреш, Илля да Зикри вӧліны Ерохамлӧн пиян.
Тайӧ йӧзыс вӧліны рӧдкутысьяс, найӧс лыддьӧдлӧма рӧдныс серти.
Найӧ олісны Ерусалимын.
Гаваон карлы подув пуктысь [Евэл] да сылӧн Маака гӧтырыс олісны Гаваонын.
Сылӧн медводдза пиыс вӧлі Авдон, нӧшта сылӧн вӧліны Цур, Кис, Ваал, Надав, [Нир,] Гедор, Ахио, Зекер да Миклот пиян.
Миклотлӧн чужис Шимеам.
Асланыс рӧдвужкӧд найӧ олісны Ерусалимын.
Нирлӧн чужис Кис, Кислӧн — Саул, Сауллӧн чужисны Ионафан, Малкисуй, Авинадав да Эшбаал.
Ионафанлӧн вӧлі Мерибал нима пи.
Мерибаллӧн чужис Микей.
Микейлӧн вӧліны Питон, Мелек, Тарей да Ахаз пиян.
Ахазлӧн чужис Ехоад, Ехоадлӧн чужисны Алемет, Азмавет да Зимри.
Зимрилӧн чужис Моцай, Моцайлӧн — Биней, Бинейлӧн — Рефай, Рефайлӧн — Элас, Эласлӧн — Ацел.
Ацеллӧн вӧлі квайт пи: Азрикам, Бокру, Измаил, Шеарий, Авдий да Ханан.
Ставныс найӧ вӧліны Ацеллӧн пиян.
Ацеллӧн вӧлі Эшек нима вок. Ешеклӧн медводдза пиыс вӧлі Улам, мӧдыс — Еуш, коймӧдыс — Элипелет.
Уламлӧн пияныс вӧліны вына тышкасьысьяс, найӧ бура лыйсисны ньӧввужйысь. Налӧн вӧлі уна пи да пияныслӧн пи — сё ветымын морт.
Ставныс найӧ вӧліны Венямин чужанкотырысь.
Тадзи став Израиль войтырсӧ вӧлі лыддьӧдлӧма рӧд сертиныс да гижалӧма израильса ӧксыяслӧн небӧгӧ.
Енсӧ эновтӧм вӧсна Иуда войтырӧс вӧлі нуӧдӧма пленӧ Вавилонӧ.
Медводдзаясӧн Вавилонысь Израильӧ локтісны попъяс, левитъяс да крамбердса кесйӧгъяс. Найӧ овмӧдчисны асланыс му юкӧнӧ, асланыс карӧ.
Ерусалимын олісны Иуда, Венямин, Ефрем да Манассей чужанкотырысь йӧз.
Иуда чужанкотырысь Ерусалимын оліс Парес рӧдысь Аммиудлӧн Утай пиыс. Аммиуд вӧлі Омрилӧн пи, Омри — Имрилӧн, а Имри — Банилӧн. Ерусалимын олісны Шелай рӧдысь сылӧн медводдза чужысь Асай пиыс да Асайлӧн пияныс, а Зерах рӧдысь — Еуэл аслас рӧднас. Ставнас — квайтсё ӧкмысдас морт.
Венямин чужанкотырысь Ерусалимын олісны Саллу, Ивней, Элай да Мешуллам.
Саллу вӧлі Мешулламлӧн пи, Мешуллам — Ходавийлӧн, Ходавий — Сенуйлӧн. Ивней вӧлі Ерохамлӧн пи. Элай вӧлі Уззейлӧн пи, Уззей — Микрилӧн. Мешуллам вӧлі Шефатайлӧн пи, Шефатай — Регуэллӧн, Регуэл — Ивнейлӧн. Чужанвуж гижӧд серти налӧн лыдыс вӧлі ӧкмыссё ветымын квайт морт. Ставныс найӧ вӧліны рӧдкутысьяс.
Попъяс пӧвстысь Ерусалимын олісны Едай, Ехоярив, Якин, да Азарий, Енлӧн крамын веськӧдлысь. Азарий вӧлі Хилкилӧн пи, Хилки — Мешулламлӧн, Мешуллам — Садоклӧн, Садок — Мерайотлӧн, Мерайот — Ахитувлӧн.
Ерусалимын олісны тшӧтш Адай да Маасай попъяс. Адай вӧлі Ерохамлӧн пи, Ерохам — Пашхурлӧн, Пашхур — Малкийлӧн. Маасай вӧлі Адиэллӧн пи, Адиэл — Яхзерлӧн, Яхзер — Мешулламлӧн, Мешуллам — Мешиллемотлӧн, Мешиллемот — Иммерлӧн.
Ерусалимын олісны тшӧтш налӧн чужанкотырысь рӧдкутысьяс. Ставнас — сюрс сизимсё квайтымын морт, кодъяс вермисны кесъявны Енлӧн крамын.
Левитъяс пӧвстысь Ерусалимын олісны Шемай, Бакбакар, Хереш, Галал, Маттанай, Авдий да Берек. Шемай вӧлі Хашшувлӧн пи, Хашшув — Азрикамлӧн, Азрикам — Хашавийлӧн, Хашавий — Мерарилӧн пи. Маттанай вӧлі Микалӧн пи, Мика — Зикрилӧн, Зикри — Асафлӧн. Авдий вӧлі Шемайлӧн пи, Шемай — Галаллӧн, Галал — Едутунлӧн. Берек вӧлі Асалӧн пи, Аса — Элканлӧн, коді оліс нетофасаяслӧн сиктъясын.
Крам дзиръя видзысьяс пӧвстысь Ерусалимын олісны Шаллум, Аккув, Талмон, Ахиман да налӧн рӧдвужыс.
Налӧн веськӧдлысьнас вӧлі Шаллум.
Ӧніӧдз найӧ видзисны крам асывладорысь Ӧксы дзиръя. А водзынджык найӧ видзисны левитъяслысь чомъяссӧ.
Шаллум вӧлі Корелӧн пи, Коре — Эвиасафлӧн, Эвиасаф — Корейлӧн. Шаллум да сылӧн бать рӧдысь вокъясыс кесъялісны-видзисны вежаинлысь пыранінсӧ. Налӧн батьясныс видзисны Господь войтырлӧн чомъяс сулаланінӧ пыранінсӧ.
Сійӧ кадас наӧн веськӧдліс Элазарлӧн Пинес пиыс, и Господь вӧлі сыкӧд.
Мешелемлӧн Закар пиыс видзис вежаинлысь пыранінсӧ.
Кыксё дас кык мортӧс вӧлі бӧрйӧма видзны вежаинлысь пыранінсӧ.
Найӧс вӧлі лыддьӧдлӧма чужанвуж гижӧдын сиктъясныс серти.
Давид да Самуил пророк индісны найӧс тайӧ кывкутана уджыс вылӧ, медым видзны вежаинлысь, Господьлӧн керкалысь, дзиръяяссӧ.
Видзысьяс сулалісны нёльлаын: асыввылын, рытыввылын, войвылын да лунвылын.
Кадысь кадӧ налӧн рӧдысь видзысьяс, кодъяс олісны сиктъясын, волывлісны сизим лун кежлӧ, медым кесъявны накӧд ӧтвылысь.
Нёль левит, кодъяс кывкутісны дзиръя видзысьяслӧн удж вӧсна, тӧждысисны Ен крамлӧн вежӧсъяс да озырлун видзанінъяс вӧсна.
Видзысьясыс коллялісны войсӧ Енлӧн крам дорын, медым видзны крамсӧ. Асывнас найӧ восьтлісны дзиръяяссӧ.
Кодсюрӧӧс на пӧвстысь вӧлі индӧма тӧждысьны крамын кесъялан-вӧдитчан дозмук-кӧлуй вӧсна. Найӧ арталӧмӧн вайлісны дозмук-кӧлуйсӧ, и арталӧмӧн бӧр нулісны сійӧс.
Мукӧдсӧ на пӧвстысь вӧлі индӧма тӧждысьны вежаинса став дозмук-кӧлуй вӧсна, пызь, вина, вый, ладан да чӧскыд ӧвтанторъяс вӧсна.
Попъяс пӧвстысь кодсюрӧ вӧчлісны-дасьтывлісны чӧскыд ӧвтанторъяс.
Маттитай нима левитӧс, Корей рӧдысь Шаллумлысь медводдза писӧ, вӧлі индӧма кывкутны нянь пӧжалӧм вӧсна.
Кааф рӧдысь кодсюрӧ тӧждысисны нянь вӧсна, медым быд шойччан лунӧ вайны крамӧ нянь.
Левий рӧдысь сьылысьяс, кодъяс вӧліны рӧдкутысьясӧн, олісны крам вежӧсъясын. Мукӧд уджсӧ найӧ эз вӧчны, ӧд найӧ лун и вой сьылісны-кесъялісны крамын.
Ставныс найӧ вӧліны Левий чужанкотырлӧн рӧдкутысьяс, найӧс лыддьӧдлӧма рӧдныс серти.
Найӧ олісны Ерусалимын.
Гаваон карлы подув пуктысь Евэл да сылӧн Маака гӧтырыс олісны Гаваонын. Сылӧн медводдза пиыс вӧлі Авдон, нӧшта сылӧн вӧліны Цур, Кис, Ваал, Нир, Надав, Гедор, Ахио, Закар да Миклот пиян.
Миклотлӧн чужис Шимеам.
Асланыс рӧдвужкӧд найӧ олісны Ерусалимын.
Нирлӧн чужис Кис, Кислӧн — Саул, Сауллӧн чужисны Ионафан, Малкисуй, Авинадав да Эшбаал.
Ионафанлӧн вӧлі Мерибал нима пи.
Мерибаллӧн чужис Микей.
Микейлӧн вӧліны Питон, Мелек, Тарей да Ахаз пиян.
Ахазлӧн чужис Ярей, Ярейлӧн чужисны Алемет, Азмавет да Зимри.
Зимрилӧн чужис Моцай, Моцайлӧн — Биней, Бинейлӧн — Рефай, Рефайлӧн — Элас, Эласлӧн — Ацел.
Ацеллӧн вӧлі квайт пи: Азрикам, Бокру, Измаил, Шеарий, Авдий да Ханан.
Ставныс найӧ вӧліны Ацеллӧн пиян.
Филистимсаяс тышкасисны израильсаяскӧд. Гелву керӧс вылын найӧ пасьвартісны израильсаясӧс. Унаӧн израильса пӧвстысь кулісны, а мукӧдыс пышйисны.
Филистимсаяс суӧдісны Саулӧс да сылысь пиянсӧ. Найӧ виисны Сауллысь Ионафан, Авинадав да Малкисуй пиянсӧ.
Чорыд тыш вӧлі Саулкӧд. Сійӧс лыйлісны ньӧвъясӧн, ёна дойдалісны.
Саул шуис шыпурт новлӧдлысьыслы: «Перйы шыпурттӧ да бытшкы менӧ! Тайӧ вундыштчытӧмъясыс мед оз тешитчыны ме вылын».
Но шыпурт новлӧдлысь ёна повзис да эз ви Саулӧс.
Сэки Саул босьтіс ассьыс шыпуртсӧ да шыбитчис ёсьладор помас.
Шыпурт новлӧдлысь кор аддзис, мый Саул куліс, тшӧтш шыбитчис шыпурт ёсьладор помас да куліс.
Саул, сылӧн куимнан пиыс да став сылӧн йӧзыс кулісны.
Ковтысын олысь израильсаяс кор кылісны, мый израильса тышкайӧз пышйӧмаӧсь, а Саул пияныскӧд абу нин ловъяӧсь, сэки эновтісны ассьыныс каръяснысӧ да пышйисны.
А филистимсаяс локтісны да овмӧдчисны сэтчӧ.
Мӧд луннас, кор филистимсаяс локтісны шобны виӧмаясӧс, аддзисны Гелву керӧс вылысь Сауллысь да сылӧн пияныслысь шойяссӧ. Филистимсаяс пӧрччӧдісны Саулӧс, керыштісны сылысь юрсӧ, босьтісны шыпуртсӧ да мукӧд тышкасянторсӧ. Сэсся ставсӧ тайӧс новлӧдлісны Филистим му пасьтала да юӧртісны асланыс вермӧм йылысь идолъясныс да войтырныс водзын.
Сауллысь тышкасянторъяссӧ пуктісны асланыс енъяслы юрбитанінӧ, а юрсӧ тувъялісны Дагон идоллы юрбитанінса стенмӧ.
Галаад муын Явис карын кор кылісны, мый филистимсаяс вӧчӧмаӧсь Саулкӧд, сэки став збой йӧзыс петісны туйӧ. Найӧ босьтісны Сауллысь да пияныслысь шойяссӧ да вайисны Явис карӧ. Налысь лыяссӧ гуалісны тупу улӧ. Та бӧрын сизим лун чӧж видзалісны.
Тадзи куліс Саул, ӧд сійӧ эновтіс Господьӧс. Сійӧ мыж вӧчис Господьлы паныд, эз ов Господьлӧн кыв серти, но туйдӧдӧмла шыасис кулӧмаӧс корысь ань дінӧ, а эз Господь дінӧ.
Та вӧсна Господь бырӧдіс сійӧс, а ӧксыӧ пуктіс Давидӧс, Ессейлысь писӧ.
Израильсаяс чукӧртчисны Давид дінӧ Хевронӧ. Найӧ шуисны: «Миян пытшкын визувтӧ ӧти вир.
Водзын, кор Саул вӧлі ӧксыӧн, Израиль войтыркӧд тэ ветлывлін тышъясӧ. Господь, тэнад Енмыд, шуліс тэныд: “Тэ кутан видзны Менсьым Израиль войтырӧс да лоан налы юралысьӧн”».
Хевронын Господь водзын Давид кӧрталіс израильса юрнуӧдысьяскӧд йитӧд.
Найӧ мавтыштӧмӧн пуктісны Давидӧс Израиль войтырлы ӧксыӧ. Тадзи иніс Самуил пыр висьталӧм Господьлӧн кывйыс.
Ӧтчыд Давид израильса тышкайӧзкӧд петіс тышӧ, медым босьтны Ерусалим, мӧд ногӧн кӧ, Евус кар.
Сэні олісны евуссаяс.
Найӧ шуисны Давидлы: «Татчӧ тэ он пыр».
Но Давид босьтіс Сион изкар.
Бӧрынджык изкарсӧ нимтісны Давид карӧн.
Саруялӧн Йоав пиыс медводдзаӧн пырис изкарӧ да лои тышкайӧзлӧн юралысьӧн, ӧд Давид шуліс: «Коді медводдзаӧн виас евуссаӧс, лоас тышкайӧзлӧн юралысьӧн».
Давид овмӧдчис изкарӧ, та вӧсна изкарсӧ кутісны нимтыны Давид карӧн.
Милло гӧгӧр керкаяссӧ лэптіс Давид, а сэсянь водзӧ карсӧ выльысь лэптіс-кыпӧдіс Йоав.
Господь Саваоф вӧлі Давидкӧд, та вӧсна сійӧ лои вына юралысьӧн.
Тані лыддьӧдлӧма тышкайӧзлысь юралысьясӧс, кодъяс Израиль войтыркӧд сулалісны Давидлӧн ӧксыалӧм дор, медым пуктыны сійӧс ӧксыӧ Израиль йылысь Господьлӧн шуӧм серти. Давидлӧн тышкайӧзысь тӧдчанлунныс серти торъялісны комынӧн.
Медтӧдчанаыс на пиысь вӧлі Хакмонилӧн Яшовам пиыс.
Аслас шыӧн сійӧ ӧтчыдӧн виис вӧрӧглысь куимсё мортӧс.
Мӧдыс вӧлі Элазар, Ахоах Додолӧн пиыс. Сійӧ вӧлі куим медтӧдчана тышкаморт пиысь ӧти.
Сійӧ вӧлі Давидкӧд Пас-Даммимын, кытчӧ филистимсаяс чукӧртчисны тыш вылӧ.
Пас-Даммимын вӧлі кӧдзӧм ид му. Израильса тышкайӧз кутісны пышйыны филистимсаясысь, а кӧдзӧм мусӧ видзӧм могысь тайӧ куим тышкамортыс сувтісны му шӧрас да сэні виалісны филистимсаясӧс.
Тадзи Господь сетіс Израильлы ыджыд вермӧм.
Ӧтчыд комын веськӧдлысь пиысь куим мортыс мунісны Давид дінӧ адулламса кырта горсйӧ. Филистимса тышкайӧз чукӧртчисны Рефаим ковтысӧ.
Давид вӧлі сайӧдчанінын, а филистимсаяслӧн тышкакотырыс — Виплиемын.
Давидлӧн горшыс кутіс косьмыны.
Сійӧ шуис: «Коді эськӧ ваяс меным юкмӧсысь ва Виплием дзиръя дорысь!»
Сэки тайӧ куим мортыс мунісны филистимсаяслӧн сувтанінӧ, тышкасьӧмӧн матыстчисны Виплием дзиръя дорӧ да гумовтісны юкмӧсысь васӧ. Сэсся вайисны Давидлы.
Но Давид эз кут юны тайӧ васӧ, а кисьтіс сійӧс Господьлы вись пыдди.
«Енмӧй, ме ог вермы юны тайӧ васӧ!
Тайӧ — йӧзлӧн вир, найӧ дасьӧсь вӧліны воштыны олӧмнысӧ», — шуис Давид и эз кут юны.
Татшӧм уджъяс вӧчисны тайӧ куим тышкамортыс.
Йоавлӧн Авишай вокыс веськӧдліс тышкайӧзлӧн куим юралысьӧн. Сійӧ виис аслас шыӧн куимсё мортӧс.
Тайӧ куим юралысьыс моз сійӧ вӧлі нималана да пыдди пуктана.
Сійӧ веськӧдліс наӧн, но накӧд сійӧс он ӧткодяв.
Кавцелысь Бенай, Иодайлӧн пиыс, вӧлі збой тышкасьысь да нималіс аслас ыджыд уджъясӧн. 
Сійӧ виис моавса Ариллысь кыкнан писӧ.
Коркӧ лым усигӧн сійӧ лэччис косьмӧм вайӧртӧдӧ да виис сэні левӧс.
Нӧшта сійӧ виис ыджыд тушаа египетсаӧс, коді вӧлі вит гырддза судта.
Египетса кутіс киас шы, и шыыс вӧлі шӧрт гартан юранӧш кодь кыз, а Бенай петіс сылы паныд беддьӧн. Бенай мырддис египетсалӧн киысь шысӧ да бытшкис сійӧс.
Со татшӧмторъяс вӧчис Иодайлӧн Бенай пиыс.
Сійӧ тшӧтш нималіс куим юралысьыс моз.
Комын нималана тышкаморт пӧвстын Бенай вӧлі тӧдчана морт, но тайӧ куим юралысьыскӧд сійӧс он ӧткодяв. Давид пуктіс сійӧс веськӧдлыны аслас видзысьясӧн.
Давид ӧксылӧн нималана тышкайӧз лыдӧ пырисны: Йоавлӧн Асаил вокыс, Виплиемысь Додолӧн Элханан пиыс, Харорысь Шаммот, Пелонысь Хелец, Текоя карысь Икешлӧн Ир пиыс, Анатотысь Авиэзер, Хушаысь Сиббекай, Ахоахысь Илай, Нетофаысь Махрай да Баанлӧн Хелед пиыс, Гиваысь Венямин чужанкотырысь Рибайлӧн Иттай пиыс, Пиратонысь Бенай, Нахле-Гаашысь Хурай, Арбаысь Авиэл, Бахарумысь Азмавет, Шаалбонысь Элияхаб, 
Гизонысь Хашемлӧн пиян, Харарысь Шагейлӧн Ионафан пиыс, Харарысь Сакарлӧн Ахиам пиыс, Урлӧн Элифал пиыс, Мекераысь Хефер, Пелонысь Ахий, Кармилысь Хецро, Эзбайлӧн Наарай пиыс, Йоиль, Нафанлӧн вокыс, Хагрилӧн Мивхар пиыс, аммон войтырысь Целек, Беротысь Нахарай — Саруялӧн Йоав пилысь шыпуртсӧ новлӧдлысь, Итриысь Ир да Гарев, хеттей Урий, Ахлайлӧн Завад пиыс, Шизлӧн Адин пиыс — Рувим чужанкотырлӧн юралысь да сылӧн комын тышкаморт, Мааклӧн Ханан пиыс, Митниысь Иосафат, Аштаротысь Уззай, Ароэрысь Хотамлӧн Шама да Евэл пиян, Шимрилӧн Едиэл пиыс да Тизиысь сылӧн Иох вокыс, Махавысь Элиэл, Элнаамлӧн Еривай да Иошавий пиян, моавса Итмай, Элиэл, Овид да Мецоваысь Ясиэл.
Тані лыддьӧдлӧма йӧзӧс, кодъяс локтісны Давид дінӧ Сиклагӧ, кор Давид дзебсясис Саулысь, Кислӧн пиысь. Найӧ вӧліны вына йӧз, отсасисны Давидлы тышын.
Найӧ вермисны лыйсьыны изйӧн да ньӧвйӧн веськыд кинас и шуйга кинас. Найӧ вӧліны Венямин чужанкотырысь, Сауллӧн рӧдысь:
Ахиэзер юралысь да Йоас — Гиваысь Шемайлӧн пиян, Езиэл да Пелет — Азмаветлӧн пиян, Анатотысь Берак да Еху, Гаваонысь Ишмай — комын юралысьысь ӧти да комын тышкамортӧн веськӧдлысь, Еремей, Яхазиэл, Иоханан, Гедераысь Иозавад, Элузай, Еримот, Беалий, Шемарай, Харифысь Шефатай, Корей рӧдысь Элкан, Ишший, Азарэл, Иозер да Яшовам, Йоэл да Зевадай — Гедорысь Ерохамлӧн пиян.
Гад чужанкотырысь йӧз ӧтувтчисны Давидкӧд, кор сійӧ дзебсясис овтӧминын. Найӧ вӧліны вынаӧсь да повтӧмӧсь, дасьӧсь тышкасьны шыӧн да сайӧдӧн, вӧліны левъяс кодь скӧрӧсь, керӧсвывса газельяс кодь тэрыбӧсь.
Медыджыдыс вӧлі Эзер, мӧдыс — Авдий, коймӧдыс — Элиав, нёльӧдыс — Мишман, витӧдыс — Еремей, квайтӧдыс — Аттай, сизимӧдыс — Элиэл, кӧкъямысӧдыс — Иоханан, ӧкмысӧдыс — Элзавад, дасӧдыс — Еремей, дас ӧтикӧдыс — Макбанай.
Найӧ вӧліны тышкайӧзӧн веськӧдлысьяс Гад чужанкотырысь.
На пиысь медся жебыс веськӧдліс сё тышкамортӧн, медся вынаыс — сюрсӧн.
Буретш тайӧ веськӧдлысьясыс вуджисны Йӧрдан ю медводдза тӧлысьнас, кор Йӧрдан ю вӧлі ойдӧма, да вӧтлісны ковтысын олысьясӧс асыввывладорсьыс и рытыввывладорсьыс.
Венямин да Иуда чужанкотырысь йӧз локтісны Давид дінӧ, сылӧн дзебсясянінӧ.
Давид паныдаліс найӧс татшӧм кывъясӧн: «Ті кӧ локтінныд ме дінӧ лӧньлунӧн да кӧсъянныд отсавны меным, сідзкӧ, ме лоа тіянлы ёртӧн.
А локтінныд кӧ вузавны менӧ вӧрӧглы, миян батьяслӧн Ен мед аддзас тайӧс да мыждас тіянӧс, ӧд ме некодӧс эг ви, эг дзескӧд».
Сэки Енлӧн Лолыс лэччис Амасай вылӧ, комын тышкамортӧн веськӧдлысь вылӧ, и сійӧ шуис: Ми — тэнад йӧз, Давид, ми тэкӧд, Ессейлӧн пи!
Лӧнь олӧм тэныд, лӧнь олӧм тэнад отсасьысьяслы!
Тэнад Енмыд отсалӧ тэныд.
Давид сибӧдіс локтысьясӧс да пуктіс найӧс веськӧдлыны тышкайӧзӧн.
Манассей чужанкотырысь йӧз вуджисны Давид дор, кор Давид филистимсаяскӧд петіс тышӧ Сауллы паныд. Но Давид да сылӧн йӧзыс эз отсасьны филистимсаяслы, ӧд филистимса юралысьяс ас костаныс сёрнитчӧм бӧрын ыстісны Давидӧс ас дінсьыныс.
Найӧ шуисны: «Сійӧ вермас вуджны Саул ыджыдыс дінӧ, и ми вермам воштыны ассьыным юрнымӧс».
Кор Давид бӧр мӧдӧдчис Сиклагӧ, сы дор вуджисны Манассей чужанкотырысь Аднах, Иозавад, Едиэл, Микаил, Иозавад, Элиху да Цилтай. Тайӧ вӧліны Манассей чужанкотырысь сюрс тышкамортӧн веськӧдлысьяс.
Найӧ отсасисны Давидлы тышкасьны уськӧдчысьяслы паныд. Ставныс найӧ вӧліны вынаӧсь да повтӧмӧсь, тышкайӧзӧн веськӧдлысьяс.
Быд лун Давид дінӧ отсӧг вылӧ локтісны йӧз, и сылӧн тышкайӧзыс содіс да лои Енлӧн тышкакотыр мында.
Со, тышкайӧзӧн веськӧдлысьяслӧн лыдыс, кодъяс локтісны Хевронӧ Давид дінӧ, медым сетны сылы Сауллысь юралӧмсӧ Господьлӧн тшӧктӧмыс серти.
Иуда чужанкотырысь вӧліны квайт сюрс кӧкъямыссё тышкаморт, кодъяслӧн вӧлі шы да сайӧд.
Симеон чужанкотырысь вӧліны сизим сюрс сё вына тышкаморт.
Левий чужанкотырысь вӧліны нёль сюрс квайтсё морт, 
Иодай, Аарон рӧдын юралысь, да сыкӧд куим сюрс сизимсё морт, 
нӧшта Садок, том да вына тышкаморт, да сылӧн батьыслӧн рӧдысь кызь кык тышкайӧзӧн веськӧдлысь.
Венямин чужанкотырысь, Саул рӧдысь, вӧліны куим сюрс морт, таӧдз унджыкыс на пиысь кесъялісны Сауллы.
Ефрем чужанкотырысь вӧліны кызь сюрс кӧкъямыссё вына тышкаморт, асланыс рӧдын тӧдчана йӧз.
Манассейлӧн джын чужанкотырысь вӧліны дас кӧкъямыс сюрс морт, кодъясӧс вӧлі бӧрйӧма да мӧдӧдӧма, медым найӧ пуктісны Давидӧс ӧксыӧ.
Иссакар чужанкотырысь вӧліны кыксё юралысь, мывкыда йӧз, кодъяс тӧдісны, мый бурджык Израильлы. Накӧд вӧлі став налӧн рӧдыс.
Завулон чужанкотырысь вӧліны ветымын сюрс морт, кодъяс вӧліны дасьӧсь тышӧ петны быдпӧлӧс тышкасянторйӧн. Найӧ ӧти сьӧлӧмӧн сулалісны Давид дор.
Неффалим чужанкотырысь вӧліны тышкайӧзӧн сюрс веськӧдлысь да накӧд комын сизим сюрс тышкаморт, кодъяслӧн вӧлі шы да сайӧд.
Дан чужанкотырысь вӧліны кызь кӧкъямыс сюрс квайтсё тышкаморт, кодъяс вӧліны дасьӧсь тышӧ петны.
Асир чужанкотырысь вӧліны нелямын сюрс тышкаморт, кодъяс вӧліны дасьӧсь тышӧ петны.
Йӧрдан ю сайысь, Рувимсянь да Гадсянь чужысьяс пӧвстысь да Манассейлӧн джын чужанкотырысь вӧліны сё кызь сюрс тышкаморт, аскӧдныс налӧн вӧлі быдпӧлӧс тышкасянторйыс.
Став тайӧ тышкайӧзыс, кодъяс вӧліны дасьӧсь тышӧ петны, локтісны Хевронӧ ыджыд кӧсйӧмӧн пуктыны Давидӧс Израильлы ӧксыӧ.
Израильсаяс ставныс на моз жӧ ӧти сьӧлӧмӧн кӧсйисны пуктыны Давидӧс ӧксыӧ.
Куим лун чӧж найӧ вӧліны Давид ордын, сёйисны-юисны, мый налӧн рӧдвуж йӧзыс вӧлі дасьтӧмаӧсь.
Тшӧтш матын олысьяс, весиг Иссакарлӧн, Завулонлӧн да Неффалимлӧн чужанкотыръяс вайисны налы осёл-мулъяс вылын, верблюдъяс да ӧшъяс вылын сёян: пызь, косьтӧм инжир, изюм, вина, вый да уна ыж-мӧс, ӧд Израильын вӧлі ыджыд нимкодьлун.
Давид сёрнитіс тышкайӧзӧн веськӧдлысьяскӧд да мукӧд юралысьяскӧд. Сійӧ шуис чукӧртчӧм Израиль войтырлы: 
«Тайӧ кӧ Господьсянь, миян Енсянь, да шогмана тіянлы, сідзкӧ, Израиль му пасьтала мӧдӧдам юӧр миян вокъяслы, тшӧтш попъяслы да левитъяслы налӧн кар-сиктъясӧ, медым чукӧртчасны миян дінӧ.
Сэсся ми бӧр ваям ас дінӧ миян Енлысь кудсӧ. Сауллӧн ӧксыалігӧн ми эгӧ тӧждысьлӧй та йылысь».
Чукӧртчӧм йӧзлы тайӧ воис сьӧлӧм вылас, и найӧ шуисны тадзи вӧчны.
Египетса Шихор ю дорсянь Лево-Хаматӧдз Давид чукӧртіс став Израиль войтырӧс, медым вайны Енлысь кудсӧ Киръят-Яримысь.
Сэсся накӧд муніс Иуда муӧ Баала карӧ, мӧд ногӧн кӧ, Киръят-Яримӧ, мед вайны сэтысь Господь Енлысь кудсӧ. Кудсӧ вӧлі сиӧма херувимъяс вылын пукалысь Господьлы.
Енлысь кудсӧ босьтісны Авинадав керкаысь да пуктісны выль тарантасӧ.
Тарантасӧн веськӧдлісны Уззай да Ахио.
Та дырйи Давид да Израиль войтыр Ен водзын нимкодясьӧмӧн йӧктісны, сьылісны, ворсісны гуслиӧн, арфаӧн, тимпанӧн, кимвалӧн да трубаӧн.
Кор воисны Кидонлӧн гумла дорӧ, ӧшъяс пӧлыньтісны тарантассӧ. Пӧрӧмсьыс кутыштӧм могысь Уззай инмӧдчис Енлӧн кудйӧ.
Господь таысь скӧрмис Уззай вылӧ да дзик пыр виис сійӧс.
Уззай куліс Ен водзын.
Давид шогӧ усис, мый Господь виис Уззайӧс.
Тайӧ местасӧ Давид нимтіс Перез-Узза.
Тадзи ӧнӧдз шуӧны.
Сійӧ лунӧ Давид ёна повзис Енмысь. Сійӧ шуис: «Ме ог вермы босьтны Енлысь кудсӧ ас дінӧ».
Та вӧсна Давид эз босьт кудсӧ ас дінас, Давид карӧ, а мӧдӧдіс сійӧс гефса Овед-Эдом керкаӧ.
Куим тӧлысь чӧж Енлӧн кудйыс вӧлі Овед-Эдом керкаын, и Господь бурсиис Овед-Эдомӧс да став сылысь гортсасӧ.
Тирса Хирам ӧксы мӧдӧдіс аслас йӧзкӧд Давидлы сус пуяс, тшӧтш изйысь вӧчасьысьясӧс да тшупсьысьясӧс, медым лэптыны Давидлы ыджыд керка.
Давидлы вӧлі гӧгӧрвоана, мый Аслас Израиль войтыр вӧсна Господь пуктіс сійӧс ӧксыӧ да зумыдмӧдіс сылысь юралӧмсӧ Израильын. Ерусалимын Давид босьтіс нӧшта аслыс гӧтыръясӧс. Сылӧн чужисны нӧшта на ныв-пи.
Ерусалимын сылӧн чужисны Шаммуй, Шовав, Нафан, Соломон, Ивхар, Элишуй, Элпелет, Ногах, Нефег, Яфий, Элишам, Белидай да Элипелет пиян.
Кор филистимсаяс тӧдмалісны, мый Давидӧс мавтыштӧмӧн пуктӧма ӧксыӧ Израиль войтырлы, сэки петісны корсьны сійӧс.
Та йылысь кылӧм бӧрын Давид петіс налы паныд.
Филистимсаяс локтісны да сувтісны Рефаим ковтысӧ.
Давид шыасис Енмыс дінӧ да юаліс: «Петны-ӧ меным филистимсаяслы паныд тышӧ? Сетан-ӧ Тэ найӧс менам киӧ?»
Господь вочавидзис: «Пет. Ме сета найӧс тэнад киӧ».
Сэки израильсаяс мунісны Ваал-Перацимӧ. Давид пасьвартіс сэні филистимсаясӧс.
Давид шуис: «Ытва моз Енмыс нуис-бырӧдіс вӧрӧгӧс менам киӧн».
Та вӧсна тайӧ местаыслы сетӧма Ваал-Перацим ним.
Филистимсаяс колисны сэтчӧ ассьыныс бӧлбанъяссӧ. Давидлӧн тшӧктӧм серти бӧлбанъяссӧ сотісны.
Кад мысти филистимсаяс бара локтісны да сувтісны Рефаим ковтысӧ.
Давид шыасис Енмыс дінӧ. Енмыс шуис: «Воча налы эн пет. Кытшав найӧс бӧрсяньныс да матыстчы на дінӧ пуяс сайсянь.
Кор тэ кылан шы, быттьӧ пуяс йывті кодкӧ восьлалӧ, сэки уськӧдчы. Тӧд, мый Енмыс мунӧ тэ водзвылын, медым пасьвартны филистимса тышкайӧзӧс».
Давид вӧчис, кыдзи тшӧктіс сылы Ен.
Израильсаяс пасьвартісны филистимсаясӧс Гаваонсянь Гезерӧдз.
Давидӧс кутісны нимӧдны быд муын, и Господь вӧчис сідзи, мый став войтыръяс кутісны повны Давидысь.
Давидлӧн карын Давид вӧчис аслыс керкаяс, дасьтіс Енлӧн кудлы места да вӧчис чом, медым кудсӧ пуктыны сэтчӧ.
Давид шуис, мый Енлысь кудсӧ вермасны новлӧдлыны сӧмын левитъяс, ӧд Господь бӧрйис найӧс пыр кежлӧ, медым найӧ новлӧдлісны Господьлысь кудсӧ да кесъялісны Господьлы.
Став Израиль войтырӧс Давид чукӧртіс Ерусалимӧ, медым Господьлысь кудсӧ вуджӧдны местаас, мый Давид дасьтіс кудлы.
Давид чукӧртіс Ааронлысь рӧдсӧ да левитъясӧс.
Кааф рӧдысь чукӧртіс Уриэл веськӧдлысьӧс да сё кызь мортӧс, Мерари рӧдысь — Асай веськӧдлысьӧс да кыксё кызь мортӧс, Гирсон рӧдысь — Йоиль веськӧдлысьӧс да сё комын мортӧс, Элицафан рӧдысь — Шемай веськӧдлысьӧс да кыксё мортӧс, Хеврон рӧдысь — Элиэл веськӧдлысьӧс да кӧкъямысдас мортӧс, Узиэл рӧдысь — Аминадав веськӧдлысьӧс да сё дас кык мортӧс.
Давид корис ас дінас Садок да Авиатар попъясӧс, Уриэл, Асай, Йоиль, Шемай, Элиэл да Аминадав левитъясӧс.
Налы шуис: «Ті, левитъяслӧн рӧдкутысьяс, вежӧдӧй-сӧстӧммӧдӧй асьнытӧ да вокъяснытӧ, сэсся вайӧй Израильлӧн Господь Енлысь кудсӧ сійӧ местаас, мый ме дасьті сылы.
Водзынджык энӧ ті новлӧдлӧй кудсӧ, та вӧсна Господь, миян Енным, мыждіс миянӧс, ӧд ми эгӧ шогмана ногӧн шыасьлӧй Сы дінӧ».
Попъяс да левитъяс вежӧдісны-сӧстӧммӧдісны асьнысӧ, медым вермисны нуны Израильлӧн Господь Енлысь кудсӧ.
Потшъяс отсӧгӧн левитъяс нуисны пельпом выланыс Енлысь кудсӧ, кыдзи Мӧисей тшӧктіс вӧчны Господьлӧн шуӧм серти.
Левитъяслӧн веськӧдлысьяслы Давид тшӧктіс сувтӧдны левитъяс пӧвстысь сьылысьясӧс, нӧшта арфаӧн, гуслиӧн да кимвалӧн ворсысьясӧс, медым найӧ гораа да нимкодясьӧмӧн сьылісны-ворсісны.
Левитъяс индісны Йоильлысь Еман писӧ да сылӧн рӧдысь Береклысь Асаф писӧ, нӧшта Мерари рӧдысь Кушайлысь Этан писӧ.
Налы отсасьысьясӧн индісны Закарӧс, Бенӧс, Язиэлӧс, Шемирамотӧс, Ехиэлӧс, Уннийӧс, Элиавӧс, Бенайӧс, Маасейӧс, Маттитайӧс, Элифелейӧс, Микнейӧс, Овед-Эдомӧс да Евэлӧс. Овед-Эдом да Евэл вӧліны дзиръя видзысьяс.
Еман, Асаф да Этан гораа ворсісны ыргӧн кимвалъяс вылын, а Закар, Азиэл, Шемирамот, Ехиэл, Унний, Элиав, Маасей да Бенай ворсісны вӧсни шыа арфаӧн.
Маттитай, Элифелей, Микней, Овед-Эдом, Евэл да Азазий ворсісны гуслиӧн, медым веськӧдлыны ворсысьясӧн.
Кенаний веськӧдліс сьылысь-ворсысь левитъясӧн, ӧд сылӧн вӧлі та вылӧ сямлун.
Берек да Элкан видзисны Енлысь кудсӧ.
Шеваний, Иосафат, Нафанаил, Амасай, Закар, Бенай да Элизер попъяс ворсісны трубаӧн Енлӧн куд водзын.
Овед-Эдом да Ехий тшӧтш видзисны кудсӧ.
Тадзи Давид, израильса юрнуӧдысьяс да сюрс тышкамортӧн веськӧдлысьяс нимкодясьӧмӧн мунісны, медым Господьлысь Йитӧд кудсӧ вайны Овед-Эдомлӧн керкаысь.
Енмыс отсаліс Господьлысь Йитӧд кудсӧ нуысь левитъяслы, та вӧсна найӧ вайисны Енмыслы вись пыдди сизим ӧшкӧс да сизим межӧс.
Давид вӧлі пасьтасьӧма вӧсни шабдіысь кыӧм ризаӧ, тадзи жӧ вӧлі пасьтасьӧмаӧсь Енлысь кудсӧ нуысь левитъяс, сьылысьяс да Кенаний — сьылысьясӧн да ворсысьясӧн веськӧдлысь.
Давид вылын нӧшта вӧлі шабді ефод.
Тадзи буксан да труба шы улӧ гораа нимкодясьӧмӧн, кимвалӧн, арфаӧн да гуслиӧн ворсӧмӧн став Израиль войтыр вуджӧдіс Господьлысь Йитӧд кудсӧ.
Кор Господьлысь Йитӧд кудсӧ пыртісны Давид карӧ, Сауллӧн Мелкола нылыс видзӧдіс ӧшиньӧдыс. Сійӧ аддзис, мый Давид ӧксы чеччалӧ-йӧктӧ, да омӧльтіс сійӧс ас пытшкас.
Енлысь кудсӧ вайисны да пуктісны Давидӧн сувтӧдӧм чом шӧрӧ. Та бӧрын вайисны Енлы сотан да бурасян висьяс.
Вись вайӧм бӧрын Давид бурсиис войтырсӧ Господь нимӧн.
Чукӧртчӧм став Израиль войтырлы, быд айловлы да аньлы, сетіс нянь, пражитӧм яйтор да изюм. Давид сувтӧдіс левитъясӧс кесъявны Господьлӧн кудйыс водзын: сьывны-ошкыны, аттьӧавны да ыдждӧдлыны Господьӧс, Израильлысь Енсӧ.
Сьылысьясӧн веськӧдліс Асаф, а Закар отсасис сылы. Евэл, Шемирамот, Ехиэл, Маттитай, Элиав, Бенай, Овед-Эдом да Евэл ворсісны арфаӧн да гуслиӧн. Асаф ворсіс кимвалӧн. Бенай да Яхазиэл попъясӧс вӧлі сувтӧдӧма, медым найӧ дугдывтӧг ворсісны трубаӧн Енлӧн Йитӧд куд водзын.
Сійӧ лунӧ Давид медводдзаысь пуктіс Асафӧс да сылысь вокъяссӧ, медым найӧ сьылӧмӧн ошкисны Господьӧс.
— Ошкӧй Господьӧс, шыасьӧй Сы дінӧ, 
войтыръяс пӧвстын висьтавлӧй Сылӧн уджъясыс йылысь!
Сьылӧй Сылы, ошкӧй Сійӧс, висьтавлӧй Сылӧн шензьӧдана уджъясыс йылысь!
Ошйысьӧй Сылӧн вежа нимнас!
Господьӧс корсьысьлӧн мед нимкодясяс сьӧлӧмыс!
Корсьӧй Господьӧс да Сылысь вынсӧ, дугдывтӧг корсьӧй Сылысь чужӧмбансӧ.
Ті, Израильсянь чужысьяс, Господьлӧн кесйӧгъяс, Яковлӧн пиян, Господьлӧн бӧрйӧмаяс, энӧ вунӧдӧй Сылысь шензьӧданаторъяссӧ, индысьпасъяссӧ да веськыда мыждӧмсӧ.
Сійӧ — Господь, миян Енным, Сійӧ веськыда мыждӧ став му пасьтала.
Некор энӧ вунӧдӧй Сылысь тіянкӧд кӧрталӧм йитӧдсӧ, Сылысь кывсӧ, мый Сійӧ пыр кежлӧ сетіс водзӧ чужысьяслы. Энӧ вунӧдӧй Сылысь Ӧвраамкӧд кӧрталӧм йитӧдсӧ, Исааклы сетӧм кывсӧ. Яковлы Сійӧ вынсьӧдіс Ассьыс кывсӧ, Израилькӧд йитӧдсӧ кӧрталіс пыр кежлӧ. Сійӧ шуис: «Ме сета тэныд Ханаан му, вичмӧда сійӧс тэныд».
Сэки Израиль войтырлӧн лыдыс вӧлі этша на, Ханаан муын найӧ вӧліны локтысь йӧзӧн. Ӧти войтырсянь найӧ вуджлісны мӧд войтыр дінӧ, ӧти муысь — мӧд муӧ.
Господь некодлы эз лэдз дзескӧдны найӧс, Сійӧ ӧлӧдліс ӧксыясӧс:
«Энӧ вӧрӧдӧй Менсьым мавтыштӧмаясӧс, Менам пророкъяслы энӧ вӧчӧй лёксӧ».
Му вылын олысьяс, сьылӧй Господьлы! Лунысь-лун юӧртӧй, мый Сійӧ мездӧ.
Висьтавлӧй войтыръяслы Сылӧн дзирдлуныс йылысь, быд войтырлы — Сылӧн шензьӧдана уджъясыс йылысь. Ошкӧй Господьӧс, ӧд Сійӧ ыджыд, мукӧд енмыс дорысь медъёна Сыысь колӧ повны.
Войтыръяслӧн енъясыс — идолъяс, а Господь енэжъяс вӧчис.
Сылӧн эм ыджыдалӧм да дзирдлун, Сылӧн вежаинын — вын да нимкодьлун.
Войтыръяс, кыпӧдӧй ошкӧм Господьлы, ошкӧй-нимӧдӧй Господьӧс, ошкӧй Господьлысь нимсӧ, локтӧй Сы водзӧ, вайӧй Сылы козинъяс, копыртчӧй Господьлы Сылӧн мича вежаинын!
Му вылын олысьяс, полӧй-тіралӧй Сыысь! Муюгыдыс сулалӧ зумыда, сійӧ оз вӧрзьыв.
Мед гажӧдчас енэжыс, мед нимкодясяс муыс, мед шуасны войтыръяс пӧвстын: «Господь ӧксыалӧ!»
Мед шызяс саридзыс да став сэні олысьыс, мед нимкодясяс видз-муыс да ставыс, мый сэні эм, 
мед гажӧдчасны вӧрса пуяс Господь водзын, ӧд Сійӧ локтӧ мыждыны муюгыдсӧ.
Ошкӧй Господьӧс, ӧд Сійӧ бур, Сылӧн буралӧмыс оз помасьлы!
Шуӧй: Енмӧй, миян Мездысьӧй, мезды миянӧс, чукӧрт миянӧс войтыръяс пӧвстысь.
Сэки ми ошкам Тэнсьыд вежа нимтӧ, кутам ошйысьны Тэнад дзирдлунӧн.
Ошкӧм Господьлы, Израильлӧн Енлы, нэмъяс чӧж!
Став войтырыс шуис: «Аминь!» да ошкис Господьӧс.
Давид тшӧктіс Асафлы да сылӧн вокъяслы, медым найӧ дугдывлытӧг кесъяласны Господьлӧн Йитӧд куд водзын, быд лун вӧчасны, мый колӧ вӧчны сійӧ лунӧ. Едутунлысь Овед-Эдом писӧ, сылӧн рӧдысь квайтымын кӧкъямыс мортӧс да Хосӧс Давид индіс крам дзиръя видзысьясӧн.
Садок попӧс да сылӧн рӧдысь мукӧд попъясӧс Давид индіс кесъявны Господьлӧн вежа чом водзын гаваонса ыб вылын. Быд асыв и рыт налы колӧ вӧлі висьпуктанін вылын вайны сотан висьяс Господьлы да ставсӧ вӧчны сідзи, кыдзи гижӧма Индӧдас, мый Господь сетіс Израильлы.
Накӧд тшӧтш кесъялісны Еман, Едутун да мукӧд бӧрйӧм йӧз, кодъясӧс вӧлі индӧма нимнас, медым найӧ ошкисны Господьӧс, кодлӧн буралӧмыс оз помасьлы.
Еманӧс да Едутунӧс индісны ворсны трубаӧн, кимвалӧн да мукӧд ворсанторйӧн, медым ошкыны Енмӧс.
Едутунлысь пиянсӧ пуктісны видзны вежа чомлысь пыранінсӧ.
Став войтырыс разӧдчис асланыс гортаныс.
Давид тшӧтш муніс, медым бурсины ассьыс гортсасӧ.
Кор Давид оліс аслас ыджыд керкаын, сійӧ шуис Нафан пророклы: «Кывзы, ме ачым ола сус пуысь вӧчӧм керкаын, а Господьлӧн Йитӧд кудйыс сулалӧ чомйын».
Нафан шуис Давидлы: «Вӧч, мый тэнад сьӧлӧмыд висьталӧ. Енмыс тэкӧд».
Но войнас Нафанлы вӧлі Енсянь кыв:
«Мун да висьтав Менам Давид кесйӧглы, мый шуӧ Господь.
Тэ он лэпты Меным керка, мед Ме олі сэні. Израиль войтырӧс Египетысь петкӧдӧмсянь да ӧнӧдз Ме эг овлы керкаын. Ӧтиласянь мӧдлаӧ ветлігӧн Ме олі вежа чомйын.
Израиль войтыркӧд ветлігъясӧ Ме эг тшӧктывлы израильса веськӧдлысьяслы — Менсьым войтырӧс видзысьяслы — лэптыны Меным сус пуысь керка.
Висьтав Менам Давид кесйӧглы, мый шуӧ Господь Саваоф.
Ме босьті тэнӧ ыж йирсянінысь, кӧні тэ видзин ыжъясӧс, да пукті ӧксыӧ Аслам Израиль войтырлы.
Ме вӧлі тэкӧд быдлаын, кытчӧ тэ ветлін.
Ме бырӧді тэ водзысь вӧрӧгтӧ.
Ӧні Ме нимӧда тэнӧ, кыпӧда тэнӧ мувывса нималана йӧзысь вылӧджык на.
Ме торйӧда Аслам Израиль войтырлы му да вужйӧда найӧс сэтчӧ.
Найӧ лӧня да повтӧг кутасны овны асланыс муын.
Лёк вӧчысьяс оз кутны дзескӧдны найӧс воддза мозыс, кыдзи вӧлі сэки, кор Ме пукті ёрдысьясӧс веськӧдлыны Аслам Израиль войтырӧн.
Ме пасьварта став тэнсьыд вӧрӧгтӧ. Ме, Господь, кӧсйыся тэныд, мый зумыдмӧда тэнсьыд рӧдтӧ.
Кор помасясны тэнад олан лунъясыд, и тэ вуджан аслад батьяс дінӧ, сэки Ме пукта ӧксыӧ тэсянь чужысьӧс да зумыдмӧда сылысь юралӧмсӧ.
Сійӧ лэптас Меным керка, и Ме зумыдмӧда сылысь юралӧмсӧ нэмъяс кежлӧ.
Ме лоа сылы батьӧн, а сійӧ — Меным пиӧн. Ассьым буралӧмӧс ог босьт сы вылысь, кыдзи босьті морт вылысь, коді тэӧдз вӧлі ӧксыӧн.
Ме сувтӧда сійӧс юравны Менам керкаын да юраланінын пыр кежлӧ, и сылӧн ӧксыалӧмыс лоӧ зумыд нэмъяс чӧж».
Став тайӧ кывъяссӧ да Енсянь восьтӧмсӧ Нафан висьталіс Давидлы.
Давид ӧксы муніс вежаинӧ да пондіс кевмысьны Господьлы: 
«Господьӧй Енмӧй! Коді ме да менам рӧдӧй, мый Тэ татшӧм вылӧ лэптін менӧ! 
Но тайӧ, вӧлӧмкӧ, Тэнад абу на ставыс, Енмӧй! Тэ нӧшта висьталін, мый виччысьӧ Тэнад кесйӧглысь рӧдсӧ. Господьӧй Енмӧй, Тэ видзӧдан ме вылӧ вывті тӧдчана морт вылӧ моз. Тэ сэтшӧма ыдждӧдлан менӧ, Ассьыд Давид кесйӧгтӧ, мый меным сэсся нинӧм оз ков.
Тэ тӧдан менӧ, Ассьыд кесйӧгтӧ.
Господьӧй, Аслад кесйӧгыд ради да Аслад кӧсйӧмыд серти Тэ дасьтін тайӧ ыджыдторсӧ да восьтін сійӧс меным.
Господьӧй, Тэ кодь мӧдыс абу! Тэысь кындзи мӧд Енмыс абу! Тэ йылысь висьталӧ ставыс, мый ми кывлім.
Енмӧй, сюрас-ӧ Тэнад Израиль войтыр кодь мӧдыс? Му вылас олысь войтыръясысь сӧмын на дінӧ Тэ локтін. Локтін, медым мездыны найӧс да вӧчны Аслад войтырӧн, ыдждӧдлыны Ассьыд нимтӧ ыджыд да повзьӧдана уджъяс пыр — Тэ мездін Ассьыд войтыртӧ Египетысь, вӧтлін на водзысь мукӧд войтыръясӧс.
Тэ вӧчин Израиль войтырӧс Аслад войтырӧн пыр кежлӧ. И Тэ, Господьӧй, лоин налӧн Енмӧн.
Ӧні, Господьӧй, пыр кежлӧ вынсьӧд да збыльмӧд Ассьыд кывъястӧ, мый Тэ шуин ме йылысь да менам рӧд йылысь.
Мед лоӧ ошкӧма Тэнсьыд нимтӧ нэмъяс чӧж! Мед шуасны: “Господь Саваоф — Израильлӧн Ен”. Тэнад Давид кесйӧглӧн рӧдыс мед вӧрзьывтӧг сулалас Тэнад чужӧмбан водзын.
Тэ, Енмӧй, восьтін меным, Аслад кесйӧглы, мый зумыдмӧдан менсьым рӧдӧс. Та вӧсна ме повтӧг шыаси Тэ дінӧ аслам кевмысьӧмӧн.
Господьӧй, Тэ — Ен. Татшӧм буртор Тэ кӧсйысин меным, Аслад кесйӧгыдлы.
Ӧні кора Тэнӧ, бурси менсьым рӧдӧс, мед сійӧ пыр лоас Тэнад чужӧмбан водзын.
Господьӧй, Тэ кӧ бурсиан, сэки Тэнад кесйӧглӧн рӧдыс пыр кежлӧ лоӧ бурсиӧма».
Кад мысти Давид пасьвартіс филистимсаясӧс, босьтіс налысь Геф кар да сыгӧгӧрса сиктъяс. Филистимсаяс шедісны Давидлӧн кипод улӧ.
Давид пасьвартіс тшӧтш моавсаясӧс. Найӧ лоисны Давидлы кесйӧгъясӧн, мынтісны сылы вот.
Давид пасьвартіс и цова-хаматса Ададезер ӧксыӧс, коді буретш вӧлі мунӧ, медым босьтны Ефрат ю дорысь муяссӧ.
Давид босьтіс сылысь сюрс тарантас, сизим сюрс верзьӧмаӧс да кызь сюрс подаӧс. Давид кольӧдіс аслыс тарантаса сё вӧлӧс, а мукӧд вӧлыслысь сӧнсӧ сійӧ вундаліс.
Цоваса Ададезер ӧксылы отсӧг вылӧ локтісны Дамаскысь арамейяс. Но Давид пасьвартіс найӧс, виис кызь кык сюрс мортӧс.
Дамаскӧ Давид сувтӧдаліс ассьыс тышкакотыръяссӧ. Тадзи арамейяс шедісны Давидлӧн кипод улӧ да кутісны мынтыны сылы вот.
Господь быд тышын отсаліс Давидлы вермыны.
Давид босьтіс Ададезер тышкайӧзлысь зарни сайӧдъяссӧ да вайис Ерусалимӧ.
Тивхатысь да Кунысь, Ададезерлӧн каръясысь, Давид вайис зэв уна ыргӧн.
Сыысь Соломон вӧчӧдіс вайӧртӧд, сюръяяс да дозмук-кӧлуй.
Хаматса Тойи ӧксылы кывсис, мый Давид кушӧдз пасьвартӧма цоваса Ададезер ӧксылысь тышкайӧзсӧ.
Сэки сійӧ мӧдӧдіс ассьыс Адорам писӧ Давид ӧксы дінӧ, мед чолӧмавны да аттьӧавны сійӧс Ададезерӧс вермӧмысь. Ӧд Ададезер дугдывтӧг тышкасис Тойикӧд. Аскӧдыс Адорам вайис эзысь, зарни да ыргӧн дозъяс.
Давид ӧксы вежӧдіс-торйӧдіс найӧс Господьлы. Нӧшта сиис Господьлы мукӧд войтыръяслысь босьтӧм эзысь да зарни. Эзысь-зарнисӧ сійӧ босьтіс эдом, моав, аммон, филистим да амалик войтыръяслысь.
Саруялӧн Авишай пиыс пасьвартіс Сола ковтысын дас кӧкъямыс сюрс эдомса тышкамортӧс.
Став Эдом пасьтала сійӧ сувтӧдаліс тышкакотыръяс. Эдомсаяс шедісны Давидлӧн кипод улӧ.
Господь быд тышын отсаліс Давидлы вермыны.
Давид ӧксыаліс став Израиль муын. Ассьыс войтырсӧ мыждігӧн сійӧ быдӧнкӧд вӧлі веськыд.
Саруялӧн Йоав пиыс веськӧдліс Давидлӧн тышкайӧзӧн, Ахилудлӧн Иосафат пиыс пасъяліс небӧгӧ вӧвлӧмторъяс. Ахитувлӧн Садок пиыс да Авиатарлӧн Ахимелек пиыс вӧліны попъясӧн, Шавшай вӧлі гижалысьӧн. Иодайлӧн Бенай пиыс веськӧдліс ӧксыӧс видзысь керетса да пелетса шыпуртаясӧн. Давид ӧксылӧн ыджыдджык пияныс отсасисны сылы юралӧмын.
Кад мысти куліс аммон войтырлӧн Нахаш ӧксы, и сы пыдди пуксис ӧксыӧ сылӧн пиыс.
Давид шуис: «Ме бурсьӧлӧмтча Ханун дінӧ, ӧд сылӧн Нахаш батьыс вӧлі бур сьӧлӧма ме дінӧ».
Давид мӧдӧдіс йӧзӧс, медым Ханункӧд тшӧтш юкны шогсӧ сылӧн батьыс вӧсна.
Кор Давидлӧн кесйӧгъяс локтісны аммон войтырлӧн муӧ, медым бурӧдны Ханунӧс, сэтчӧс юралысьяс шуисны Ханунлы: «Тэ чайтан, Давид збыльысь пыдди пуктӧ тэнсьыд батьтӧ и та вӧсна мӧдӧдіс тэ дінӧ ассьыс йӧзсӧ?
Сійӧ мӧдӧдіс найӧс кыйӧдчысьясӧс моз, мед видзӧдлыны мунымӧс, а сэсся бырӧдны сійӧс».
Ханун босьтіс Давидлысь кесйӧгъяссӧ, шырис найӧс да улісяньыс коскӧдзыс вундіс налысь паськӧмнысӧ шӧрипельӧ. Сэсся бӧр ыстіс найӧс.
Найӧ мунісны.
Давидлы кор юӧртісны, мый сылысь кесйӧгъяссӧ татшӧм ногӧн янӧдӧмаӧсь, сэки налы воча мӧдӧдіс йӧзӧс.
Ӧксы тшӧктіс висьтавны, медым сылӧн янӧдӧм кесйӧгъясыс кольччасны Ериконӧ да оласны сэні, кытчӧдз оз быдмы тошныс, а сэсся вермасны бӧр локны.
Аммонсаяс казялісны, мый найӧ лоины мустӧмӧсь Давидлы. Ханун да аммонсаяс мӧдӧдісны сюрс талант эзысь арамейяслы Месопотамияӧ, Маакаӧ да Цоваӧ, медым медавны сэтысь аслыныс тарантасъяс да верзьӧмаясӧс.
Найӧ медалісны комын кык сюрс тарантас да маакаса ӧксыӧс сылӧн тышкайӧзкӧд. Найӧ локтісны да сувтісны Медева кар водзӧ.
Аммонсаяс асланыс каръясысь чукӧртчисны ӧти карӧ да дасьтысисны петны тышӧ.
Кор Давид кыліс та йылысь, мӧдӧдіс налы паныд Йоавӧс да став ассьыс тышкайӧзсӧ.
Аммон тышкайӧз сувтісны карса дзиръя дорӧ. Отсавны локтысь ӧксыяс сувтісны эрд вылӧ, наысь торйӧн.
Йоав аддзис, мый вӧрӧг локтӧ кыкладорсянь — водзысяньыс и бӧрсяньыс. Сэки сійӧ бӧрйис израильса тышкайӧзысь медбуръяссӧ да сувтӧдіс найӧс арамейяслы паныд.
А мукӧдсӧ сетіс Авишай вокыслы, мед сійӧ сувтас накӧд аммон тышкайӧзлы паныд.
Йоав шуис Авишайлы: «Арамейяс кӧ кутасны вермыны менӧ, тэ отсалан меным, а аммон тышкайӧз кӧ кутасны вермыны тэнӧ, ме локта тэныд отсӧг вылӧ.
Эн пов. Кутам зумыда сулавны асланым войтыр вӧсна, миян Енлӧн каръяс вӧсна. А Господь вӧчас, кыдзи Сылы колана».
Йоав аслас тышкайӧзкӧд уськӧдчис арамейяс вылӧ, и найӧ пышйисны сыысь.
Аммон тышкайӧз аддзисны арамейяслысь пышйӧмсӧ, и найӧ тшӧтш пышйисны Йоавлӧн Авишай вокысь да локтісны асланыс карӧ.
Йоав бӧр муніс Ерусалимӧ.
Кор арамейяс аддзисны, мый израильсаяс вермисны найӧс, мӧдӧдісны юӧртысьясӧс да корисны мукӧд арамейясӧс ю сайысь. Сэтысь локтысьясӧн веськӧдліс Шовак, Ададезер тышкайӧзлӧн юралысь.
Давидлы кор юӧртісны та йылысь, сійӧ чукӧртіс став израильса тышкайӧзсӧ да вуджис накӧд Йӧрдан ю сайӧ. Давид аслас йӧзкӧд сувтісны, мед петны арамейяслы паныд тышӧ. Давид пасьвартіс арамейясӧс, и найӧ пышйисны израильсаясысь. Давид бырӧдіс налысь сизим сюрс тарантас да нелямын сюрс подаӧс. Виис тшӧтш Шовакӧс, тышкайӧзлысь юралысьсӧ.
Кор Ададезерлӧн киподувса ӧксыяс аддзисны, мый израильсаяс вермисны найӧс, сэки сёрнитчисны Давидкӧд, мед пом пуктыны тышныслы, сэсся сетчисны сылы.
Арамейяс сэсся эз нин кӧсйыны отсавны аммон войтырлы.
Во мысти, буретш сійӧ кадӧ, кор ӧксыяс петавлӧны тышӧ, Йоав уськӧдчис израильса тышкайӧзкӧд аммон войтыр вылӧ. Сійӧ бырӧдіс-пазӧдіс аммон войтырлысь мусӧ, кытшаліс Равва кар да пасьвартіс сійӧс.
А Давид тайӧ кадас вӧлі Ерусалимын.
Давид босьтіс аммон войтырлӧн ӧксы юр вылысь зарни юркытшсӧ да пуктіс аслас юр вылӧ. Юркытшлӧн сьӧктаыс вӧлі ӧти талант. Сійӧс вӧлі мичмӧдӧма дона изъясӧн.
Уна озырлун Давид петкӧдіс Равва карысь.
Карса олысьясӧс тшӧтш петкӧдіс. Сійӧ сьӧкыда уджӧдіс найӧс: ӧтияс уджалісны чер-пилаӧн, мӧдъяс — кӧрт коканӧн.
Тадзи Давид вӧчис аммон войтырлӧн быд карын, а сэсся аслас тышкайӧзкӧд бӧр локтіс Ерусалимӧ.
Бӧрынджык Гезерын вӧлі филистимсаяскӧд тыш, кӧні Хушаысь Сиббекай виис Рефай рӧдысь Сиппай нима мортӧс.
Филистимсаясӧс вӧлі вермӧма.
Сэсся вӧлі филистимсаяскӧд мӧд тыш.
Яирлӧн Элханан пиыс виис гефса Голиафлысь Лахми воксӧ. Голиафлӧн шы беддьыс вӧлі шӧрт гартан юранӧш кодь кыз.
Гефын тшӧтш пансис тыш.
Сэні вӧлі зэв ыджыд тушаа морт, сійӧ тшӧтш вӧлі Рефай рӧдысь. Сылӧн быд ки-кокын вӧлі квайт чунь — ставнас вӧлі кызь нёль чунь.
Тайӧ мортыс омӧльтіс израильсаясӧс, но Давидлӧн Шимей вокыслӧн Ионафан пиыс виис сійӧс.
Давид да сылӧн йӧзыс виисны Рефай рӧдысь тайӧ гефсаяссӧ.
Сӧтана кыпӧдчис Израильлы паныд да ыззьӧдіс Давидӧс артавны Израиль войтырлысь лыдсӧ.
Давид шуис Йоавлы да Израиль войтырлӧн мукӧд юралысьяслы: «Мунӧй да арталӧй лунвыв Бер-Шевасянь войвыв Данӧдз Израиль войтырлысь лыдсӧ, сэсся юӧртӧй меным».
Йоав шуис Давидлы: «Господь мед сё пӧвстӧн содтас Аслас войтырлысь лыдсӧ.
Ӧксыӧй-ыджыдӧй, найӧ ӧд ставныс тэнад кесйӧгъяс.
Ыджыдӧй, мыйла тэ кӧсъян лыддьыны найӧс?
Тайӧ мыжыс ӧд лоӧ Израиль вылын».
Но Йоавлы колӧ вӧлі вӧчны ӧксылӧн тшӧктӧм серти. 
Сійӧ муніс, кытшовтіс Израиль му да бӧр локтіс Ерусалимӧ.
Йоав юӧртіс Давидлы войтырлысь лыдсӧ. Вӧлӧмакӧ, Израильын миллион сё сюрс морт, кодъяс вермӧны тышӧ петны, а Иудаын — нёльсё сизимдас сюрс морт.
Левий чужанкотырысь да Венямин чужанкотырысь йӧзсӧ Йоав эз лыддьы, ӧд ӧксылӧн тшӧктӧмыс вӧлі мустӧм сылы.
Енмыслы шогмытӧм вӧлі йӧзсӧ лыддьӧмыс, и Сійӧ мыждіс Израильӧс.
Давид шуис Енлы: «Ме, Тэнад кесйӧг, мыжа сыысь, мый лыдди войтырӧс.
Кора Тэнӧ, вешты ме вылысь мыжӧс. Ме мывкыдтӧг вӧчи».
Господь шуис Гадлы, Давидлӧн тӧдысь-аддзысьлы:
«Мун да юӧрт Давидлы, мый Господь тадзи висьталӧ: куим мыждӧм Ме вӧзъя тэныд. Мый бӧръян, сійӧс Ме и вӧча».
Гад локтіс Давид дінӧ да шуис: «Господь тадзи висьталӧ: “Бӧрйы. Лоас-ӧ куим во чӧж тшыгъялӧм? Кутан-ӧ тэ куим тӧлысь чӧж пышъявны вӧрӧгъясысь, кодъяс шыпуртӧн пондасны вӧтлысьны тэ бӧрся?
Либӧ кутас-ӧ куим лун чӧж тэнад муын ыджыдавны пӧрӧс висьӧм — Господьлӧн шыпуртыс дойдас Израиль войтырӧс, кор Господьлӧн анделыс кутас бырӧдны найӧс Израиль му пасьтала?” 
Мӧвпышт да шу меным, мый висьтавны менӧ Мӧдӧдысьлы».
Давид шуис Гад пророклы: «Ыджыд шог суис менӧ. Но морт киӧ веськалӧм дорысь бурджык шедны Господьлӧн мыждӧм улӧ, ӧд Сылӧн буралӧмыс зэв ыджыд».
Господь ыстіс Израиль войтырлы пӧрӧс висьӧм. Куліс сизимдас сюрс морт.
Енмыс мӧдӧдіс анделӧс, медым бырӧдны Ерусалим.
Кор андел пондіс бырӧдны йӧзсӧ, Господь видзӧдліс Ерусалим вылӧ да вежис кывсӧ. Сійӧ шуис бырӧдысь анделлы: «Тырмас. Вешты китӧ».
Господьлӧн анделыс сэки сулаліс евусса Орнанлӧн гумла дорын.
Давид лэптіс синсӧ да аддзис Господьлысь анделсӧ, коді сулаліс енэжа-муа костас. Киас сійӧ кутіс перйӧм шыпурт. Шыпуртсӧ вӧлі нюжӧдӧма Ерусалимлань.
Давид да израильса юрнуӧдысьяс усисны чужӧм выланыс. Найӧ вӧлі пасьтасьӧмаӧсь шогалан паськӧмӧ.
Давид шуис Енмыслы: «Войтырыслысь лыдсӧ тшӧкті лыддьыны-артавны ме.
Ме мыжаыс. Ме вӧчи та ыджда лёкторсӧ, а тайӧ ыжъясыс абу мыжаӧсь.
Господьӧй Енмӧй, мыжды менӧ да менсьым рӧдӧс, но Ассьыд войтыртӧ эн бырӧд!»
Гад пророк пыр Господьлӧн анделыс тшӧктіс Давидлы мунны евусса Орнанлӧн гумла вылӧ да сувтӧдны сэтчӧ Господьлы висьпуктанін.
Давид муніс, медым вӧчны Гадлӧн шуӧм серти, мый сійӧ висьталіс Господь нимсянь.
Орнан аслас нёльнан пиыскӧд вӧлі вартӧ-изӧ шобдісӧ гумла вылын. Орнан бергӧдчис да аддзис анделӧс. Орнанлӧн пияныс дзебсисны.
Давид локтіс Орнан дінӧ.
Давидӧс аддзигӧн Орнан петіс гумла вывсьыс да муӧдзыс копыртчис Давидлы.
Давид шуис Орнанлы: «Вузав меным гумлатӧ сійӧ донсьыс, мыйта сійӧ сулалӧ. Ме сувтӧда сэтчӧ Господьлы висьпуктанін, медым Господь вештас войтырыс вылысь кулана висьӧмсӧ».
Орнан шуис: «Ӧксыӧй-ыджыдӧй, босьт аслыд ставсӧ да вӧч, мый кӧсъян.
Ассьым ӧшъясӧс ме сета сотан вись пыдди, доддьӧс — пес пыдди, шобдіӧс — нянь вись пыдди.
Ставсӧ ме сета тэныд».
Но Давид ӧксы шуис Орнанлы: «Ог босьт, ме ньӧба. Ме ог вермы вайны Господьлы сійӧ, мый абу менам, ог вермы вайны вись пыдди сійӧ, мыйысь эг вештысь».
Гумлаысь Давид сетіс Орнанлы квайтсё сикель зарни.
Сэсся гумла вылас вӧчис Господьлы висьпуктанін да сы вылын вайис сотан да бурасян висьяс.
Давид шыасис Господь дінӧ, и Господь вочавидзис сылы да висьпуктанін вылӧ ыстіс енэжсянь би.
Господьлӧн тшӧктӧм серти андел бӧр сюйис шыпуртсӧ пуртӧсас.
Кор Давид аддзис, мый евусса Орнанлӧн гумла вылын Господь кыліс сійӧс, водзӧ сэні кутіс вайны Господьлы вись.
Сійӧ кадас Господьлӧн вежа чомйыс, кодӧс Мӧисей вӧчис овтӧминын, да сотан висьяслы висьпуктаніныс вӧліны гаваонса ыб вылын.
Давид эз вермы мунны сэтчӧ, медым шыасьны Енмыс дінӧ, ӧд Господьлӧн шыпурта анделыс ёна повзьӧдіс сійӧс.
Давид шуис: «Тані лоӧ Господь Енлӧн керкаыс, тайӧ висьпуктанін вылас Израиль войтыр кутасны сотны висьяс».
Давид тшӧктіс чукӧртны ставнысӧ, кодъяс локтісны йӧз муысь да овмӧдчисны Израиль муӧ. Сійӧ пуктіс найӧс керавны-перйыны изъяс Енлысь крамсӧ лэптӧм вылӧ.
Давид дасьтіс дзиръяяслы кӧрттув-потш вӧчӧм могысь уна кӧрт, дасьтіс тшӧтш сы мында ыргӧн, мый эз позь веситнысӧ. Нӧшта Давид дасьтіс лыдтӧм-тшӧттӧм сус пу керъяс, ӧд Сидонын да Тирын олысьяс вайисны сылы сус пу керсӧ лышкыда.
Давид шуис: «Менам Соломон пиӧй том на, сылӧн абу на сямлуныс, а крамыс, мый колӧ вӧчны Господьлы, мед лоӧ медся мичаӧн, ошканаӧн да нималанаӧн став му пасьталаыс. Та вӧсна ме ставсӧ дасьта крам вӧчӧм вылӧ».
Аслас кувтӧдз Давид унатор дасьтіс крам вӧчӧм вылӧ.
Давид корис Соломон писӧ да тшӧктіс сылы лэптыны крам Господьлы, Израильлӧн Енлы.
Давид шуис Соломонлы: «Пиӧй, ме ачым кӧсйи лэптыны крам Господьлы, менам Енлы. Но меным вӧлі Господьсянь кыв: “Ыджыд тышъяс дырйи тэ кисьтін уна вир.
Тэ он лэпты Меным крамсӧ, ӧд Менам син водзын му вылӧ тэ кисьтін уна вир.
Но тэнад чужас пи, сійӧ лоас лӧня олысь морт.
Ме доръя сійӧс став кытшалысь вӧрӧгысь. Сылӧн нимыс лоӧ Соломон, сылӧн веськӧдлан кадӧ Ме сета Израильлы лӧнь олӧм да шойччӧг.
Сійӧ лэптас Меным крам, и сійӧ лоӧ Меным пиӧн, а Ме лоа сылы Батьӧн. Ме пыр кежлӧ вынсьӧда сылысь юралӧмсӧ Израильын”.
Господь мед лоас тэкӧд, пиӧй! Сэки тэнад ставыс артмас, и тэ лэптан крам Господьлы, аслад Енлы, Сылӧн водзвыв висьталӧмыс серти.
Господь мед сетас тэныд мывкыдлун да вежӧр, Сійӧ мед сувтӧдас тэнӧ веськӧдлыны Израиль войтырӧн, а тэ ставсӧ вӧч аслад Господь Енлӧн Индӧд серти.
Тэ кӧ кутан овны индӧд-тшӧктӧмъяс серти, мый Господь сетіс Израиль войтырлы Мӧисей пыр, сэки тэнад ставыс артмас.
Ло зумыд да повтӧм! Эн пов, эн майшась!
Сьӧкыдлунъяс вылӧ видзӧдтӧг ме дасьті Господьлысь крамсӧ вӧчӧм вылӧ сё сюрс талант зарни да миллион талант эзысь, а ыргӧнсӧ да кӧртсӧ ме дасьті сы мында, мый веситнысӧ он вермы.
Ме дасьті керъяс да изъяс, но тэ чукӧрт нӧшта на унджык.
Тэнад эм уна уджалысь, на пӧвстын эмӧсь из кералысьяс, изйысь да пуысь вӧчасьысьяс да уна мукӧд киподтуя йӧз.
Тэнад эм лыдтӧм-тшӧттӧм зарни, эзысь, ыргӧн да кӧрт. Босьтчы уджӧ, Господь лоӧ тэкӧд».
Израиль войтырлӧн став юралысьыслы Давид тшӧктіс отсавны аслас Соломон пилы.
Давид шуис: «Господь, тіян Енныд, тіянкӧд. Сійӧ быдлаын сетіс тіянлы лӧнь олӧм. Сійӧ сетіс менам кипод улӧ тайӧ муас олысьясӧс, и тайӧ муас юралӧ Господь да Сылӧн войтырыс.
Сідзкӧ, став сьӧлӧмсяньныд да став олӧмнаныд корсьысьӧй Господьӧс, ассьыныд Ентӧ.
Лэптӧй Господь Енлы вежаин, нуӧй сэтчӧ Господьлысь Йитӧд кудсӧ да Енлы кесъялан вежа дозмук-кӧлуйсӧ. Крамсӧ сиӧй Господьлы».
Кор Давид пӧрысьмис да пӧтіс олан лунъяснас, сэки пуктіс ассьыс Соломон писӧ Израиль войтырлы ӧксыӧ.
Давид чукӧртіс Израиль войтырлысь юралысьяссӧ, попъясӧс да левитъясӧс. Вӧлі арталӧма-гижалӧма комын арӧса да ыджыдджык арлыда левитъясӧс. Налӧн лыдыс вӧлі комын кӧкъямыс сюрс морт.
На пӧвстысь вӧлі индӧма кесъявны Господьлӧн крамын кызь нёль сюрс мортӧс, квайт сюрс мортӧс вӧлі индӧма лоны гижалысьясӧн да ёрдысьясӧн. Нёль сюрс мортӧс вӧлі индӧма видзны крам дзиръяяс, нёль сюрс мортӧс — ворсанторъясӧн ошкыны Господьӧс. Та могысь и Давид тшӧктіс вӧчны ворсанторъяссӧ.
Давид юкліс левитъясӧс куим чукӧр вылӧ Левийлӧн Гирсон, Кааф да Мерари пияныс серти.
Гирсонлӧн вӧліны Лаедан да Шимей пиян.
Лаеданлӧн вӧлі куим пи: рӧдкутысь Ехиэл, Зетам да Йоиль.
Шимейлӧн куим пиыс — Шеломот, Хазиэл да Харан — вӧліны Лаедансянь чужысьяслӧн рӧдкутысьяс.
Шимейлӧн вӧлі нӧшта нёль пи: Яхат, Зиз, Еуш да Берий.
Яхат вӧлі рӧдкутысь, Зиз тшӧтш вӧлі рӧдкутысь.
Еушлӧн да Берийлӧн пияныс вӧлі этша, та вӧсна найӧс лыддисны ӧти котырӧн.
Каафлӧн вӧлі нёль пи: Амрам, Ицгар, Хеврон да Узиэл.
Амрамлӧн вӧліны Аарон да Мӧисей пиян.
Ааронӧс да сылысь пиянсӧ вӧлі вежӧдӧма, медым найӧ вӧліны вежасьыс-вежаӧсь, да пыр кежлӧ торйӧдӧма, медым найӧ сотісны висьяс Господь водзын, кесъялісны Сылы да бурсиисны Сылӧн нимӧн.
Мӧисей вӧлі Енлӧн морт. Сысянь чужысьяс вӧліны левитъяс.
Мӧисейлӧн вӧліны Гершом да Элизер пиян.
Гершомлӧн вӧлі Шевуэл нима пи, рӧдкутысь.
Элизерлӧн вӧлі Рехавий нима пи, рӧдкутысь.
Элизерлӧн сэсся эз вӧв пияныс, а Рехавийлӧн вӧлі уна пи.
Ицгарлӧн вӧлі Шеломот нима пи, рӧдкутысь.
Хевронлӧн пиянысь Ерий вӧлі рӧдкутысь, мӧд пиыс вӧлі Амарей, коймӧдыс — Яхазиэл, нёльӧдыс — Екамам.
Узиэллӧн пиянысь Микей вӧлі рӧдкутысь, мӧд пиыс вӧлі Ишший.
Мерарилӧн вӧліны Махли да Муши пиян.
Махлилӧн вӧліны Элазар да Кис пиян.
Элазар куліс, но сылӧн эз вӧвны пияныс, вӧліны сӧмын нывъяс.
Налӧн воча вокъясыс, Кислӧн пияныс, босьтісны найӧс гӧтырӧ.
Мушилӧн вӧлі куим пи: Махли, Эдер да Еремот.
Тайӧ вӧліны Левийсянь чужысьяс, кодъясӧс лыддьӧдлӧма нимъяснаныс асланыс рӧдныс да рӧдкутысьныс серти. Найӧ кесъялісны Господьлӧн крамын кызь арӧссянь.
Давид шуис: «Господь, Израильлӧн Ен, сетіс Аслас войтырлы лӧнь олӧм, Сійӧ пыр кежлӧ овмӧдчис Ерусалимӧ. Левитъяслы оз нин ков новлӧдлыны вежа чом да сэні кесъялан дозмук-кӧлуй».
Давидлӧн бӧръя тшӧктӧмыс серти вӧлі лыддьӧдлӧма став левитсӧ, кодъяслы вӧлі кызь арӧс да унджык.
Левитъяслы колӧ вӧлі отсасьны Ааронсянь чужысьяслы Господьлӧн крамын кесъялӧм дырйи, тӧждысьны крам йӧръяс да вежӧсъяс вӧсна, став вежаторсӧ сӧстӧммӧдӧм вӧсна да Енлӧн крамын кесъялӧм вӧсна.
Найӧ кывкутісны вежа нянь вӧсна, нянь вись пыдди ваян шобді пызь вӧсна, шомтӧм сӧчӧнъяс, пӧжалӧм нянь да шомӧс вӧсна, тшӧтш ставсӧ мурталӧм-веситӧм вӧсна.
Быд асыв да рыт налы колӧ вӧлі аттьӧавны-ошкыны Господьӧс.
Налы колӧ вӧлі пыр вайны Господьлы сотан висьяс шойччан лунӧ, выль тӧлысь чужигӧн да гажӧдчан лунъяс дырйи. Быд пӧрйӧ Ен водзын колӧ вӧлі кесъявны сы мында левитлы, мыйта вӧлі шуӧма.
Налы колӧ вӧлі видзны вежа чом да вежаин, колӧ вӧлі отсасьны Ааронсянь чужысьяслы, асланыс вокъяслы, Господьлӧн крамын кесъялӧм дырйи.
Ааронсянь чужысьясӧс юклісны котыръяс вылӧ. Ааронлӧн вӧліны Надав, Авиуд, Элазар да Итамар пиян.
Надав да Авиуд кулісны батьсьыс водзджык, налӧн эз вӧвны пияныс. Элазар да Итамар кесъялісны попъясӧн.
Элазар рӧдысь Садоккӧд да Итамар рӧдысь Ахимелеккӧд ӧтвылысь Давид юкліс попъясӧс котыръяс вылӧ, медым найӧ кесъялісны сьӧрсьӧн-бӧрсьӧн.
Элазарсянь чужысьыс вӧлі унджык Итамарсянь чужысьяс дорысь, та вӧсна найӧс вӧлі юклӧма сідзи, мый Элазарлӧн рӧдын вӧлі дас квайт рӧдкутысь, Итамарлӧн рӧдын — кӧкъямыс.
Найӧс юклісны пудъясьӧмӧн, ӧд Енлӧн вежаинын юралысьясыс вӧліны кыкнан рӧдсьыс: Элазарлӧн да Итамарлӧн рӧдысь.Гижалысь Шемай, Нафанаиллӧн пиыс, коді тшӧтш вӧлі левит, гижаліс налысь нимъяссӧ ӧксы да юралысьяс дырйи, Садок поп дырйи да Авиатарлӧн Ахимелек пиыс дырйи, попъяслӧн да левитъяслӧн рӧдкутысьяс дырйи. Пудъясьӧмӧн индылісны сьӧрсьӧн-бӧрсьӧн Элазар рӧдысь ӧти котыр, сэсся Итамар рӧдысь ӧти котыр, и тадзи водзӧ.
Медводдза пудйыс уси Ехояривлы, мӧдыс — Едайлы, коймӧдыс — Харимлы, нёльӧдыс — Сеоримлы, витӧдыс — Малкийлы, квайтӧдыс — Мияминлы, сизимӧдыс — Хаккоцлы, кӧкъямысӧдыс — Авийлы, ӧкмысӧдыс — Исуслы, дасӧдыс — Шеканийлы, дас ӧтикӧдыс — Эльяшивлы, дас кыкӧдыс — Якимлы, дас коймӧдыс — Хуппайлы, дас нёльӧдыс — Ешевавлы, дас витӧдыс — Вилгалы, дас квайтӧдыс — Иммерлы, дас сизимӧдыс — Хезирлы, дас кӧкъямысӧдыс — Гапицецлы, дас ӧкмысӧдыс — Петахийлы, кызьӧдыс — Езекильлы, кызь ӧтикӧдыс — Якинлы, кызь кыкӧдыс — Гамуллы, кызь коймӧдыс — Делайлы, кызь нёльӧдыс — Маазийлы.
Тадзи налӧн котыръяслы вӧлі лӧсьӧдӧма сьӧрсьӧн-бӧрсьӧн кесъявны Господьлӧн крамын, кыдзи Аарон батьныс пыр налы тшӧктіс вӧчны Господь, Израильлӧн Ен.
Левий чужанкотырысь нӧшта вӧліны Амрамлӧн Шуваэл пиыс, Шуваэллӧн Ехдей пиыс, Рехавийлӧн Ишший пиыс, рӧдкутысь, Ицгарлӧн Шеломот пиыс да Шеломотлӧн Яхат пиыс.
Хевронлӧн пиянысь Ерий вӧлі рӧдкутысь, мӧд пиыс вӧлі Амарей, коймӧдыс — Яхазиэл, нёльӧдыс — Екамам.
Узиэллӧн вӧлі Микей нима пи, Микейлӧн — Шамир.
Микейлӧн вӧлі Ишший нима вок.
Ишшийлӧн вӧлі Закар нима пи.
Мерарилӧн вӧліны Махли да Муши пиян.
Яазийлӧн вӧлі Бено нима пи.
Мерарисянь чужысь Яазийлӧн вӧліны Бено, Шогам, Заккур да Иври пиян.
Махлилӧн вӧлі Элазар нима пи, но сылӧн эз вӧвны пияныс.
Кислӧн вӧлі Ерахмеэл нима пи.
Мушилӧн вӧліны Махли, Эдер да Еримот пиян.
Тайӧ вӧліны левитъяс рӧдныс серти.
Найӧ тшӧтш пудъясисны, кыдзи пудъясисны Ааронлӧн рӧдысь налӧн вокъясныс. Аарон рӧдысь вокъясныс моз найӧ пудъясисны Давид, Садок да Ахимелек дырйи, тшӧтш попъяслӧн да левитъяслӧн рӧдкутысьяс дырйи. Рӧдкутысьяс йылысь да налӧн ичӧтджык вокъясныс йылысь пудъясисны ӧтмоза.
Давид да тышкайӧзӧн веськӧдлысьяс торйӧдісны кесъялӧм вылӧ Асафлысь, Еманлысь да Едутунлысь пиянсӧ, медым найӧ Енмӧс ошкӧмӧн ворсісны гуслиӧн, арфаӧн да кимвалӧн.
Кесъявны индӧм йӧзлӧн нимъясныс татшӧмӧсь:
Асафлӧн пиянысь вӧліны Заккур, Ӧсип, Нетаний да Асарел. Наӧн веськӧдліс ачыс Асаф. Сійӧ ошкис Енмӧс ӧксылӧн туйдӧдӧм серти.
Едутунлӧн пиянысь вӧліны Гедалий, Цери, Исай, Шимей, Хашавий да Маттитай. Ставнас — квайт морт. Наӧн веськӧдліс налӧн Едутун батьыс, коді ворсіс гуслиӧн да ошкис-аттьӧаліс Господьӧс.
Еманлӧн пиянысь вӧліны Буккий, Маттанай, Узиэл, Шевуэл, Еримот, Хананей, Ханани, Элиат, Гиддалти, Ромамти-Эзер, Иошбекаш, Маллоти, Хотир да Махазиот.
Ставныс найӧ — Еманлӧн пиян. Еман вӧлі ӧксылӧн тӧдысь-аддзысь. Енмыс кӧсйис кыпӧдны Еманӧс, и сетіс сылы дас нёль пиӧс да куим нылӧс.
Пияннас веськӧдліс налӧн батьныс. Господьлӧн крамын кесъялӧм дырйи найӧ сьылісны-ворсісны кимвалӧн, арфаӧн да гуслиӧн ӧксылӧн тшӧктӧм серти. Найӧ сьылісны-ворсісны Асафлӧн, Едутунлӧн да Еманлӧн веськӧдлӧм улын.
Налӧн да налӧн вокъяслӧн лыдыс вӧлі кыксё кӧкъямысдас кӧкъямыс морт. Найӧс вӧлі велӧдӧма сьывны Господьлы, найӧ вӧліны сьывны кужысь йӧз.
Найӧ пудъясисны, кодлы кор кесъявны. Ыджыдджыкъяс и томджыкъяс, велӧдысьяс и велӧдчысьяс пудъясисны ӧтмоза.
Медводз мойвиис кесъявны Асаф рӧдысь Ӧсиплы.
Мӧдӧн вӧлі Гедалий вокъясыскӧд да пияныскӧд, дас кык морт, коймӧдӧн вӧлі Заккур пияныскӧд да вокъясыскӧд, дас кык морт, нёльӧдӧн вӧлі Ицри пияныскӧд да вокъясыскӧд, дас кык морт, витӧдӧн вӧлі Нетаний пияныскӧд да вокъясыскӧд, дас кык морт, квайтӧдӧн вӧлі Буккий пияныскӧд да вокъясыскӧд, дас кык морт, сизимӧдӧн вӧлі Есарел пияныскӧд да вокъясыскӧд, дас кык морт, кӧкъямысӧдӧн вӧлі Исай пияныскӧд да вокъясыскӧд, дас кык морт, ӧкмысӧдӧн вӧлі Маттанай пияныскӧд да вокъясыскӧд, дас кык морт, дасӧдӧн вӧлі Шимей пияныскӧд да вокъясыскӧд, дас кык морт, дас ӧтикӧдӧн вӧлі Азарэл пияныскӧд да вокъясыскӧд, дас кык морт, дас кыкӧдӧн вӧлі Хашавий пияныскӧд да вокъясыскӧд, дас кык морт, дас коймӧдӧн вӧлі Шуваэл пияныскӧд да вокъясыскӧд, дас кык морт, дас нёльӧдӧн вӧлі Маттитай пияныскӧд да вокъясыскӧд, дас кык морт, дас витӧдӧн вӧлі Еремот пияныскӧд да вокъясыскӧд, дас кык морт, дас квайтӧдӧн вӧлі Хананей пияныскӧд да вокъясыскӧд, дас кык морт, дас сизимӧдӧн вӧлі Иошбекаш пияныскӧд да вокъясыскӧд, дас кык морт, дас кӧкъямысӧдӧн вӧлі Ханани пияныскӧд да вокъясыскӧд, дас кык морт, дас ӧкмысӧдӧн вӧлі Маллоти пияныскӧд да вокъясыскӧд, дас кык морт, кызьӧдӧн вӧлі Элиат пияныскӧд да вокъясыскӧд, дас кык морт, кызь ӧтикӧдӧн вӧлі Хотир пияныскӧд да вокъясыскӧд, дас кык морт, кызь кыкӧдӧн вӧлі Гиддалти пияныскӧд да вокъясыскӧд, дас кык морт, кызь коймӧдӧн вӧлі Махазиот пияныскӧд да вокъясыскӧд, дас кык морт, кызь нёльӧдӧн вӧлі Ромамти-Эзер пияныскӧд да вокъясыскӧд, дас кык морт.
Крам дзиръя видзысьяслӧн нимъясныс татшӧмӧсь. Корейсянь чужысьясысь вӧлі Мешелемий, сійӧ вӧлі Корелӧн пиыс, а Коре вӧлі Асафлӧн пиыс.
Мешелемийлӧн медводдза пиыс вӧлі Закар, мӧдыс — Едиэл, коймӧдыс — Зевадай, нёльӧдыс — Ятниэл, витӧдыс — Элам, квайтӧдыс — Иоханан, сизимӧдыс — Эльхоенай.
Овед-Эдомлӧн медводдза пиыс вӧлі Шемай, мӧдыс — Ехозавад, коймӧдыс — Йоах, нёльӧдыс — Сакар, витӧдыс — Нафанаил, квайтӧдыс — Аммиэл, сизимӧдыс — Иссакар, кӧкъямысӧдыс — Пеультай. Тадзи Енмыс бурсиис Овед-Эдомӧс.
Овед-Эдом Шемайлӧн чужисны пиян. Найӧ вӧліны рӧдкутысьяс, ӧд найӧ вӧліны кужысь йӧз.
Шемайлӧн вӧліны пиян: Отни, Рефаэл, Овид, Элзавад да сылӧн вокъясыс. Найӧ вӧліны кужысь йӧз. Шемайлӧн вӧліны тшӧтш Элиху, Семакий [да Исваком] пиян.
Ставныс найӧ — Овед-Эдомсянь чужысьяс.
Найӧ вӧліны кужысь йӧз, бур кесъялысьяс. Налӧн лыдыс вӧлі квайтымын кык морт.
Мешелемийлӧн пияныс да вокъясыс вӧліны кужысь йӧз, налӧн лыдыс вӧлі дас кӧкъямыс морт.
Мерарисянь чужысь Хослӧн вӧлі Шимри нима пи, рӧдкутысь. Сійӧ эз вӧв медводдза пи, но батьыс пуктіс сійӧс рӧдкутысьӧ.
Хослӧн мӧд пиыс вӧлі Хилки, коймӧдыс — Тевалий, нёльӧдыс — Закар.
Ставнас Хослӧн пияныс да вокъясыс вӧліны дас куим морт.
Татшӧмӧсь вӧліны крам дзиръя видзысьяслӧн котыръяс рӧдкутысьясныс серти. Вокъясныс моз тайӧ видзысьясыс кесъялісны Господьлӧн крамын.
Ыджыд да ичӧт рӧдъяс пудъясисны, кодлы кутшӧм дзиръя видзны.
Шелемейлы мойвиис видзны асыввыв дзиръя.
Шелемейлӧн вӧлі Закар нима пи, мывкыд туйдӧдысь. Пудъясисны, и сылы мойвиис видзны войвыв дзиръя.
Овед-Эдомлы мойвиис видзны лунвыв дзиръя, а сылӧн пияныслы — видзанінъяс.
Шуппимлы да Хослы мойвиис видзны рытыввыв Шаллекет дзиръя, кысянь заводитчис керӧсӧ каян туй.
Дзиръя видзысьяс сулалісны тадзи: быд лун стен асывладорас сулалісны квайт левит, войвывладорас — нёльӧн, лунвывладорас — нёльӧн, кык видзанін дорын сулалісны кык мортӧн.
Стен рытывладорас крам пыранін весьтын туй вылас сулалісны нёль видзысь, а крам пыранінас — кыкӧн.
Тайӧ вӧліны Корей рӧдысь да Мерари рӧдысь дзиръя видзысьяслӧн котыръяс.
Ӧткымын левитӧс пуктісны видзны Енлӧн крамса озырлун видзанінъяс да вежа козин видзанінъяс.
Гирсонсянь чужысь Лаедан рӧдысь Ехиэл вӧлі рӧдкутысь.
Ехиэллӧн Зетам да Йоиль пияныс видзисны Господьлӧн крамса озырлун видзанінъяс. Мукӧд видзысьясыс вӧліны Амрам, Ицгар, Хеврон да Узиэл рӧдъясысь.
Крамса озырлун видзысьясӧн веськӧдліс Шевуэл, Гершомлӧн пиыс. Гершом вӧлі Мӧисейлӧн пи. Гершомлӧн вӧлі Элизер нима вок.
Элизерлӧн вӧлі Рехавий нима пи, Рехавийлӧн — Исай, Исайлӧн — Иорам, Иорамлӧн — Зикри, Зикрилӧн — Шеломот.
Шеломот да сылӧн вокъясыс видзисны крам видзанінӧ вайӧм вежа козинъяс. Тайӧ козинъяссӧ Енлы вежӧдісны-торйӧдісны Давид ӧксы, рӧдкутысьяс, тышкайӧзлӧн юралысьяс да веськӧдлысьяс.
Тышын шедӧдӧм озырлунысь юкӧн найӧ вежӧдісны Господьлысь крамсӧ дзоньталӧм вылӧ.
Шеломот да сылӧн вокъясыс видзисны тшӧтш сійӧ, мый Енлы вежӧдісны-торйӧдісны Самуил пророк, Кислӧн Саул пиыс, Нирлӧн Авенир пиыс да Саруялӧн Йоав пиыс.
Ицгар рӧдысь Кенанийӧс да сылысь пиянсӧ вӧлі индӧма Израиль войтырлӧн гижалысьясӧн да ёрдысьясӧн.
Хеврон рӧдысь Хашавий да сылӧн вокъясыс вӧліны кужысь йӧз, налӧн лыдыс вӧлі сюрс сизимсё морт. Найӧс индісны Йӧрдан ю рытыввылын олысь израильсаяс пӧвстын кывкутны Господьлы кесъялӧм вӧсна да ӧксылӧн юралӧм вӧсна.
Хевронсянь чужысьяс пӧвстын Ерий вӧлі рӧдкутысь.
Давидлӧн нелямынӧд ӧксыалан воӧ вӧлі арталӧма Хевронсянь чужысьяслысь лыдсӧ. Вӧлі тӧдмалӧма, мый Галаад муын, Язерын, олӧны кужысь йӧз, кодъяс тшӧтш вӧліны Хеврон рӧдысь. Сэні олісны кык сюрс сизимсё кужысь морт, найӧ вӧліны рӧдкутысьяс.
Давид индіс найӧс кывкутны Енлы кесъялӧм вӧсна да ӧксылӧн юралӧм вӧсна Рувимсянь да Гадсянь чужысьяс пӧвстын да Манассейлӧн джын чужанкотырыс пӧвстын.
Тані лыддьӧдлӧма Израиль войтырлысь рӧдкутысьяссӧ, тышкайӧзлысь юралысь-веськӧдлысьяссӧ да ӧксылы кесъялысь чина йӧзӧс, кодъяс кывкутісны тышкакотыръяс вӧсна. Быд тышкакотыр кесъяліс ӧти тӧлысь чӧж.
Быд котырын вӧлі кызь нёль сюрс морт.
Медводдза тӧлысьнас кесъялысь тышкакотырӧн веськӧдліс Яшовам, Завдиэллӧн пиыс.
Сылӧн тышкакотырын вӧлі кызь нёль сюрс морт.
Сійӧ вӧлі Парес рӧдысь. Медводдза тӧлысьнас сійӧ вӧлі тышкайӧзӧн став веськӧдлысьяс вылын юралысьӧн.
Мӧд тӧлысьнас кесъялысь тышкакотырӧн веськӧдліс Ахоах рӧдысь Додай.
Сылӧн тышкакотырын вӧлі кызь нёль сюрс морт. Сыкӧд тшӧтш мӧд веськӧдлысьнас вӧлі Миклот.
Коймӧд тӧлысьнас кесъялысь тышкакотырӧн веськӧдліс Бенай, Иодай аркирейлӧн пиыс. Сылӧн тышкакотырын вӧлі кызь нёль сюрс морт.
Бенай вӧлі комын медтӧдчана веськӧдлысь пӧвстысь и вӧлі налӧн юралысьӧн. Сылӧн тышкакотырын кесъяліс Аммизавад пиыс.
Нёльӧд тӧлысьнас веськӧдліс Асаил, Йоавлӧн вокыс. Сылӧн тышкакотырын вӧлі кызь нёль сюрс морт. Асаиллӧн кулӧм бӧрын веськӧдлысьнас лои сылӧн Зевадай пиыс.
Витӧд тӧлысьнас веськӧдліс Израхысь Шамхут. Сылӧн тышкакотырын вӧлі кызь нёль сюрс морт.
Квайтӧд тӧлысьнас веськӧдліс Текояысь Ир, Икешлӧн пиыс. Сылӧн тышкакотырын вӧлі кызь нёль сюрс морт.
Сизимӧд тӧлысьнас веськӧдліс Пелонысь Хелец, коді вӧлі Ефрем чужанкотырысь. Сылӧн тышкакотырын вӧлі кызь нёль сюрс морт.
Кӧкъямысӧд тӧлысьнас веськӧдліс Хушаысь Сиббекай, коді вӧлі Зерах рӧдысь. Сылӧн тышкакотырын вӧлі кызь нёль сюрс морт.
Ӧкмысӧд тӧлысьнас веськӧдліс Анатотысь Авиэзер, коді вӧлі Венямин чужанкотырысь. Сылӧн тышкакотырын вӧлі кызь нёль сюрс морт.
Дасӧд тӧлысьнас веськӧдліс Нетофаысь Махрай, коді вӧлі Зерах рӧдысь. Сылӧн тышкакотырын вӧлі кызь нёль сюрс морт.
Дас ӧтиӧд тӧлысьнас веськӧдліс Пиратонысь Бенай, коді вӧлі Ефрем чужанкотырысь. Сылӧн тышкакотырын вӧлі кызь нёль сюрс морт.
Дас кыкӧд тӧлысьнас веськӧдліс Нетофаысь Хелдай, коді вӧлі Отниэл рӧдысь. Сылӧн тышкакотырын вӧлі кызь нёль сюрс морт.
Тані лыддьӧдлӧма израильса чужанкотыръяслысь юралысьяссӧ.
Рувим чужанкотырын юралысьнас вӧлі Зикрилӧн Элизер пиыс, Симеон чужанкотырын — Мааклӧн Шефатай пиыс, Левий чужанкотырын — Кемуэллӧн Хашавий пиыс, Аарон рӧдын — Садок, Иуда чужанкотырын — Давидлӧн Элиав вокыс, Иссакар чужанкотырын — Микаиллӧн Омри пиыс, Завулон чужанкотырын — Овадийлӧн Ишмай пиыс, Неффалим чужанкотырын — Азриэллӧн Еримот пиыс, Ефрем чужанкотырын — Азазийлӧн Осий пиыс, Манассейлӧн джын чужанкотырыслӧн юралысьнас вӧлі Педайлӧн Йоиль пиыс, Манассейлӧн джын чужанкотырыслӧн, Галаадын олысьяслӧн, юралысьнас вӧлі Закарлӧн Иддо пиыс, Венямин чужанкотырын — Авенирлӧн Ясиэл пиыс, Дан чужанкотырын — Ерохамлӧн Азарэл пиыс.
Тайӧ вӧліны Израиль чужанкотыръяслӧн юралысьяс.
Давид эз лыддьы кызь арӧсаясӧс да наысь томджыкъясӧс, ӧд Господьлӧн кӧсйысьӧм серти Израиль войтырлӧн лыдыс вӧлі енэжвыв кодзувъяс мында.
Саруялӧн Йоав пиыс пондыліс артавны Израиль войтырлысь лыдсӧ, но эз вермы помавны, ӧд Израиль войтырӧс суис Енлӧн скӧрлуныс. Та вӧсна Давид ӧксылӧн небӧгӧ абу вӧлі гижӧма войтырлысь лыдсӧ.
Ӧксылӧн озырлун видзанінъяс вӧсна кывкутіс Азмавет, Адиэллӧн пиыс. Мукӧд видзанінъяс вӧсна, кодъяс вӧліны видз-му вылын, каръясын, сиктъясын да изкаръясын, кывкутіс Ионафан, Озейлӧн пиыс.
Видз-му вылын уджалысьясӧн веськӧдліс Эзри, Келувлӧн пиыс.
Виноград йӧръяс вӧсна кывкутіс Рамаысь Шимей, а вина видзанінъяс вӧсна — Шефамысь Завдий.
Керӧсбердса муын олив да инжир быдтӧм вӧсна кывкутіс Гедерысь Баал-Ханан, а олив вый видзанінъяс вӧсна — Йоас.
Шаронын йирсьысь ӧш-мӧс вӧсна кывкутіс шаронса Шитрай, а ковтысын йирсьысь ӧш-мӧс вӧсна кывкутіс Адлайлӧн Шафат пиыс.
Верблюдъяс вӧсна кывкутіс Измаилсянь чужысь Овил, осёлъяс вӧсна — Меронотысь Ехдей, а ыжъяс вӧсна кывкутіс Агарсянь чужысь Язиз.
Став тайӧ йӧзыс веськӧдлісны Давид ӧксылӧн овмӧсӧн.
Давидлӧн туйдӧдысьӧн вӧлі сылӧн Ионафан дядьыс. Сійӧ вӧлі гижалысь, сюсь вежӧра морт.
Хакмонилӧн Ехиэл пиыс вӧлі ӧксылысь пиянсӧ велӧдысь. 
Ахитофел вӧлі ӧксыӧс туйдӧдысь.
Аркиысь Хушай вӧлі ӧксылӧн ёрт.
Ахитофеллӧн кулӧм бӧрын ӧксыӧс туйдӧдысьясӧн вӧліны Бенайлӧн Иодай пиыс да Авиатар. Йоав вӧлі ӧксы тышкайӧзлӧн юралысь.
Давид чукӧртіс Ерусалимӧ израильса веськӧдлысьясӧс. На лыдын вӧліны чужанкотыръяслӧн юралысьяс, ӧксылӧн тышкакотыръясӧн веськӧдлысьяс, тышкайӧзлӧн юралысь-веськӧдлысьяс, ӧксылӧн да сылӧн пияныслӧн овмӧс да ыж-мӧс вӧсна кывкутысьяс, ыджыд чина йӧз да став тӧдчана йӧз.
Давид ӧксы сувтіс да шыасис на дінӧ: «Кывзӧй менӧ, вокъясӧй, менам войтырӧй!
Менам вӧлі кӧсйӧм лэптыны Господьлӧн Йитӧд кудйыслы керка, медым сійӧ вӧлі миян Енлӧн кок улӧн. Ме дасьтыси лэптыны сійӧс, но Енмыс шуис меным: “Тэ он лэпты Меным керка, ӧд тэ уна вир кисьтін тышъяс дырйи”.
Господь, Израильлӧн Ен, бӧрйис менӧ батьлӧн рӧдысь да пыр кежлӧ пуктіс Израильлӧн ӧксыӧ. Став чужанкотырыс пӧвстысь Сійӧ бӧрйис Иудаӧс да пуктіс сійӧс юралысьӧ, Иуда чужанкотыр пӧвстысь бӧрйис менам батьлысь рӧдсӧ, а менам батьлӧн пиян пӧвстысь ме вои Сылы сьӧлӧм вылас, и Сійӧ пуктіс менӧ ӧксыӧ Израильлы. Господь сетіс меным уна пи, но став пиян пӧвстысь Сійӧ бӧрйис Соломонӧс, медым сійӧ пукаліс Господьлӧн юралан пуклӧсын да веськӧдліс Израиль войтырӧн.
Господь шуис меным: “Тэнад Соломон пиыд лэптас Меным керка да вӧчас йӧр. Ӧд Ме бӧрйи сійӧс, медым сійӧ вӧлі Меным пиӧн, а Ме — сылы батьӧн.
Сійӧ кӧ кутас овны менам индӧд-тшӧктӧмъяс серти, кыдзи сійӧ ӧні вӧчӧ, Ме вынсьӧда сылысь юралӧмсӧ нэмъяс кежлӧ”.
Ӧні Господьлӧн став Израиль войтыр водзын да миян Ен водзын тшӧкта: зумыда кутчысьӧй асланыд Господь Енлӧн тшӧктӧмъясӧ. Сэки тайӧ бур муыс лоӧ тіян, и ті вичмӧданныд сійӧс асланыд челядьныдлы пыр кежлӧ.
А тэ, Соломон пиӧй, тӧд аслад батьыдлысь Енсӧ, кесъяв Сылы став сьӧлӧмнад да став олӧмнад. Ӧд Господь быдӧнлысь тӧдмалӧ сьӧлӧмсӧ да тӧдӧ мӧвпъяссӧ.
Кутан кӧ корсьны Сійӧс, сэки аддзан, а эновтан кӧ, Сійӧ пыр кежлӧ эновтас тэнӧ.
Видзӧдлы, Господь бӧрйис тэнӧ вӧчны вежа керка. Сідзкӧ, ло зумыд, вӧч сійӧс!»
Давид сетіс аслас Соломон пиыслы серпасъяс, мый серти колӧ вӧлі вӧчны крам посводз да дзоньнас крамсӧ, озырлун видзанінъяс, вылысса жыръяс, вежӧсъяс да Ен куд видзан вежаин. Сетіс став серпас-баласӧ, мый дасьтіс-лӧсьӧдіс Лов нуӧдӧм улын: Господьлӧн крам йӧрлысь да сыгӧгӧрса вежӧсъяслысь серпассӧ, Енлӧн крам видзанінлысь да вежа козин видзанінлысь серпассӧ. Давид сетіс Соломонлы поп-левит котыръяс йылысь, Господьлӧн крамын кесъялӧм йылысь да кесъялан дозмук-кӧлуй йылысь тшӧктӧмъяс.
Сійӧ висьталіс, уна-ӧ колӧ эзысь-зарни, медым вӧчны кесъялан дозмук-кӧлуй, бикокъяс да би дозъяс. Сійӧ индіс быд бикоклысь сьӧктасӧ сыӧн вӧдитчӧм серти.
Давид висьталіс, уна-ӧ колӧ эзысь-зарни, медым вӧчны эзысь пызанъяс да зарни пызан, кытчӧ пуктыны нянь, уна-ӧ колӧ весалӧм зарни, медым вӧчны яй бергӧдлан вилаяс, вир резан тасьтіяс да кисьтан вись дозъяс, уна-ӧ колӧ эзысь-зарни, медым вӧчны мукӧд дозсӧ, уна-ӧ колӧ сывдӧм зарни, медым вӧчны тшынӧдчан висьпуктанін. Давид сетіс серпасъяс, мый серти колӧ вӧлі вӧчны тарантас да зарни херувимъяс, кодъяс шевкнитӧм бордъяснас вевттясны Господьлысь Йитӧд кудсӧ.
«Став тайӧ тшӧктӧмъяссӧ крам вӧчӧм йылысь ме тӧдмалі Господьсянь да гижи найӧс», — висьталіс Давид.
Давид шуис аслас Соломон пиыслы: «Ло зумыд да повтӧм, босьтчы уджӧ! Эн пов, эн майшась, ӧд Господь Ен, менам Енмӧй, тэкӧд.
Сійӧ оз коль, оз эновт тэнӧ, но отсалас помавны Господьлысь крам вӧчан уджъяссӧ.
Попъяс да левитъяс дасьӧсь вӧчны быдпӧлӧс уджсӧ Енлӧн крамын.
Тэнад эм йӧз, кодъяс кӧсйӧны да кужӧны вӧчны быдтор. А юралысьяс да став войтырыс кутасны кывзыны став тэнсьыд тшӧктӧмъястӧ».
Чукӧртчӧм йӧзлы Давид ӧксы шуис: «Енмыс бӧрйис сӧмын ӧтнассӧ менсьым Соломон пиӧс. Сійӧ том на, оз на куж ставсӧ вӧчны. Сійӧс виччысьӧ ыджыд удж, ӧд тайӧ керкасӧ лоӧ вӧчӧма Господь Енлы, а оз мортлы.
Ме пукті став ассьым вынӧс, медым менам Енлысь крамсӧ лэптӧм вылӧ чукӧртны зарни, эзысь, ыргӧн, кӧрт, пу, оникс из, уна рӧма мича да дона изъяс да уна мрамор.
Менам Енлӧн крамыс меным муса, та вӧсна Енлысь крамсӧ лэптӧм могысь ме сета аслам озырлунысь зарни да эзысь.
Сыысь кындзи, мый ме дасьті нин вежа керка лэптӧм вылӧ, ме сета куим сюрс талант офирса зарни да сизим сюрс талант сывдӧм эзысь, медым эжасны керкапытшкӧсса стенъяс да вӧчасны зарни да эзысь дозмук-кӧлуй.
Коді нӧшта кӧсйӧ вайны сетӧмторсӧ Господьлы?»
Сэки рӧдкутысьяс, израильса чужанкотыръяслӧн юралысьяс, тышкайӧзлӧн юралысьяс да веськӧдлысьяс да ӧксылы уджалысьясӧн веськӧдлысьяс вайисны ассьыныс сетӧмторъяснысӧ.
Енлысь крамсӧ лэптӧм вылӧ найӧ сетісны вит сюрс талант зарни да дас сюрс зарни дарик*, дас сюрс талант эзысь, дас кӧкъямыс сюрс талант ыргӧн да сё сюрс талант кӧрт.
Кодлӧн вӧліны дона изъяс, найӧ сетісны тайӧ изъяссӧ Господьлӧн крамса озырлун видзанінӧ, Гирсон рӧдысь Ехиэл киӧ. 
Ставныс найӧ сьӧлӧмсяньныс вайисны ассьыныс сетӧмторнысӧ Господьлы. Став войтырыс нимкодясис таысь, Давид ӧксы тшӧтш ёна нимкодясис.
Чукӧртчӧм йӧз водзын Давид ошкис Господьӧс: «Господьӧй, миян Израиль батьлӧн Енмӧй, мед лоӧ ошкӧма Тэнӧ нэмъяс чӧж.
Господьӧй, Тэнад эм нималӧм, вын, дзирдлун, вермӧм да юралӧм. Ставыс, мый эм енэжас да му вылас — тайӧ Тэнад. Господьӧй, Тэ — Ӧксы, Тэ ставыс вылын Медыджыдыс.
Тэ сетан озырлунсӧ да нималӧмсӧ, Тэ веськӧдлан ставнас, Тэнад киын выныс да ыджыдалӧмыс, Тэ верман кыпӧдны да вынсьӧдны.
Миян Енмӧй, ӧні ми аттьӧалам да ошкам Тэнсьыд дзирдлуна нимтӧ.
Коді ме да менам войтырӧй, медым вайны Тэныд татшӧм сетӧмторъяс.
Но ставыс Тэсянь, и ми сетам Тэныд сійӧ, мый сибӧдім Тэсянь. Тэ водзын ми батьясным моз йӧз муысь локтысьяс. Му вылас миян олан лунъясным вуджӧр кодь, миянлы нинӧм вылӧ лачанымӧс кутны.
Господьӧй, миян Енмӧй, ставыс — Тэнад, Тэнад кисянь ми сибӧдім ставсӧ, мый вайим, медым Тэнад вежа нимлы крам лэптыны.
Енмӧй, ме тӧда, мый Тэ тӧдмалан мортлысь сьӧлӧмсӧ. Тэныд мусаӧсь сӧстӧм сьӧлӧмаяс.
Став тайӧ сетӧмторсӧ ме вайи сӧстӧм сьӧлӧмсянь. Ме аддза, мый татчӧ чукӧртчӧм Тэнад войтырыд нимкодьпырысь вайӧны Тэныд сетӧмторъяс.
Господьӧй, миян Ӧвраам батьлӧн, Исаак батьлӧн да Израиль батьлӧн Ен, нэмъяс чӧж видз Аслад войтырыд сьӧлӧмын тайӧ кӧсйӧмсӧ, веськӧд налысь сьӧлӧмсӧ Ас дінад!
Отсав менам Соломон пилы став сьӧлӧмсяньыс овны-вӧчны Тэнад индӧд-тшӧктӧмъяс серти да лэптыны крамсӧ, мый могысь ме ставсӧ тайӧс дасьті».
Сэсся Давид шуис чукӧртчӧм йӧзлы: «Ошкӧй Господьӧс, ассьыныд Еннытӧ!»
Йӧзыс ошкисны Господьӧс, асланыс батьяслысь Енсӧ, муӧдз копыртчисны Господьлы да ӧксылы.
Мӧд луннас вайисны Господьлы сотан да мукӧд висьяс: сюрс ӧшкӧс, сюрс межӧс да сюрс ыжӧс. Нӧшта вайисны вина висьяс да став Израиль вӧсна уна мукӧд вись.
Сійӧ лунӧ найӧ ёна нимкодясьӧмӧн сёйисны-юисны Господь водзын.
Давидлысь Соломон писӧ выльпӧв пуктісны ӧксыӧ да мавтыштӧмӧн сиисны Господьлы, а Садокӧс мавтыштӧмӧн пуктісны аркирейӧ.
Соломон пуксис Господьлӧн юралан пуклӧсӧ, сійӧ лои ӧксыӧн аслас Давид батьыс пыдди. Сылӧн ставыс артмис, и Израиль войтыр кывзысис сылысь.
Став веськӧдлысьыс и тышкайӧзыс, тшӧтш Давид ӧксылӧн став пияныс кӧсйысисны кывзысьны Соломон ӧксылысь.
Господь кыпӧдіс Соломонӧс став Израиль войтыр водзын да сетіс сылы сэтшӧм нималӧм, мый татшӧм нималӧмыс израильса ӧксыяслӧн эз вӧвлы.
Давид, Ессейлӧн пиыс, вӧлі став Израиль войтырлӧн ӧксыӧн.
Давид ӧксыаліс Израильын нелямын во чӧж. Хевронын сійӧ юраліс сизим во, Ерусалимын — комын куим во.
Сійӧ кувсис ыджыд арлыдаӧн, олӧмнас пӧтӧмаӧн. Сылӧн вӧлі уна озырлун, вӧлі нималӧм.
Сы пыдди ӧксынас лои Соломон пиыс.
Давид ӧксылӧн веськӧдлан кадӧ лоӧмторъяс йылысь водзысяньыс и помӧдзыс пасъялӧма Самуил пророклӧн, Нафан пророклӧн да Гад нима тӧдысь-аддзысьлӧн гижӧдъясын. Сэні гижӧма тшӧтш Давидлӧн юралӧм йылысь, сылӧн тӧдчана уджъяс йылысь, сылӧн олӧмын, Израильын да мукӧд муясын лоӧмторъяс йылысь.
{Еврей йӧз (комиӧдіс Kodko) @ 2 каднебӧг @ религ. гижӧд @ Библия @ 2021 @ Лб. .}
МӦД КАДНЕБӦГ
Давидлӧн Соломон пиыс лои вына ӧксыӧн.
Господь, сылӧн Енмыс, вӧлі сыкӧд и вылӧ кыпӧдіс сійӧс.
Соломон корис ас дінас Израиль му пасьталаысь тышкайӧзлысь юралысь-веськӧдлысьясӧс, ёрдысьясӧс, войтырлысь юралысьясӧс да рӧдкутысьясӧс.
Чукӧртчӧм бӧрын Соломон ставныскӧд муніс Гаваонӧ вись ваян мыльк вылӧ. Сэні вӧлі Енлӧн вежа чом, кодӧс овтӧминын вӧчліс Мӧисей, Господьлӧн кесйӧг.
Водзынджык Давид вуджӧдіс Енлысь кудсӧ Киръят-Яримысь Ерусалимӧ, кӧні сійӧ сувтӧдіс кудйыслы чом.
Но ыргӧн висьпуктаніныс сулаліс Гаваонын, Господьлӧн вежа чом водзын. Тайӧ висьпуктанінсӧ вӧчліс Хур Урилӧн Безалел пиыс. Сэні Соломон да чукӧртчӧм войтырыс шыасисны Господь дінӧ.
Ыргӧн висьпуктанін вылын Соломон вайис Господьлы сюрс сотан вись.
Войнас Соломонлы вӧтас петкӧдчис Ен да шуис: «Кор Менсьым, мый кӧсъян, и Ме сета тэныд».
Соломон шуис Енлы: «Тэ вӧлін зэв бур сьӧлӧма менам Давид бать дінӧ. Сы бӧрти Тэ пуктін менӧ ӧксыӧ.
Господьӧй Енмӧй, мед инас Тэнад кывйыд, мый Тэ шулін менам Давид батьлы.
Тэ пуктін менӧ ӧксыӧ, медым веськӧдлыны войтырӧн, кодлӧн лыдыс мувывса бус мында. Сідзкӧ, сет меным мывкыдлун да вежӧр, медым ме верми нуӧдны тайӧ войтырсӧ. Ӧд вермас-ӧ кодкӧ веськӧдлыны Тэнад уна лыда войтырӧн?»
Енмыс шуис Соломонлы: «Аслыд тэ эн кор озырлун, овмӧс-эмбур, нималӧм, эн кӧсйы тэнӧ мустӧмтысьяслы кулӧм, эн кор кузь нэм, но корин мывкыдлун да вежӧр, медым веськӧдлыны Менам войтырӧн, кодлы Ме пукті тэнӧ ӧксыӧ.
Сыысь, мый тэнад сьӧлӧмад вӧлі татшӧм кӧсйӧм, Ме сета тэныд мывкыдлун да вежӧр, а озырлунсӧ, овмӧс-эмбурсӧ да нималӧмсӧ Ме сета тэныд сы мында, мыйта эз на вӧв тэӧдз и оз ло тэ бӧрти веськӧдлысь ӧксыяслӧн».
Гаваонысь, вись ваян мыльк вылысь, кӧні вӧлі вежа чом, Соломон бӧр локтіс Ерусалимӧ да пондіс ӧксыавны Израильын.
Соломон лӧсьӧдіс аслыс тарантаса вӧвъясӧс: тарантас лыдыс вӧлі сюрс нёльсё, а вӧвъяслӧн лыдыс — дас кык сюрс.
Сійӧ видзис найӧс тарантаса тышкайӧзлы торйӧдӧм каръясын да аслас Ерусалим карын.
Соломон ӧксы дырйи Ерусалимын эзысь-зарниыс вӧлі из мында, а сус пуыс вӧлі сы мында, мыйта вӧлі керӧсбердса муын быдмысь инжир пуыс.
Вӧвъяссӧ Соломонлы вайлісны Египетысь да Куваысь.
Найӧс ньӧблісны ӧксылӧн вузасьысьяс.
Египетысь вайӧм тарантасыс сулаліс квайтсё сикель эзысь, а вӧлыс — сё ветымын.
Соломон ӧксылӧн вузасьысьяс ставсӧ тайӧс вайлісны тшӧтш хеттей войтырлӧн ӧксыяслы да арамейяслӧн ӧксыяслы.
Соломон тшӧктіс лэптыны Господьлы крам да аслыс ӧксы керка.
Сійӧ индіс сизимдас сюрс мортӧс кыскавны-ваявны изъяс, кӧкъямысдас сюрс мортӧс керавны-перйыны изъяс, а куим сюрс квайтсё мортӧс индіс уджалысьяс бӧрся видзӧдны.
Тирса Хирам ӧксы дінӧ Соломон мӧдӧдіс йӧзӧс, медым найӧ висьталісны сылы: «Водзынджык тэ отсалін менам Давид батьлы — мӧдӧдлін сылы сус пуяс, медым вӧчны наысь аслыс керка.
Ӧні ме кыпӧда аслам Господь Енлы крам. Ме вежӧда-торйӧда сійӧс Господьлы, медым тшынӧдны Господь водзын чӧскыд ӧвтанторъяс, медым вайны крамӧ вежа нянь, медым рытын и асылын, шойччан лунӧ и выль тӧлысь чужигӧн да миян Господь Енлы сиӧм гажӧдчан лунъясӧ вайны сотан висьяс, кыдзи пыр кежлӧ тшӧктӧма вӧчны Израильлы.
Крамыс, мый ме кыпӧда, лоӧ ыджыд, ӧд миян Енным став енсьыс ыджыд.
Но коді вермас лэптыны Сылы керка, весиг кӧ енэжыс да енэжвывса енэжъясыс оз вермыны тӧрӧдны Сійӧс?
Коді ме сэтшӧмыс, медым лэптыны Сылы керка?
Ме верма сӧмын вись сотӧм могысь лэптыны Сылы керка.
Сідзкӧ, мӧдӧд меным мортӧс, коді бура кужӧ вӧчасьны эзысь-зарниысь, ыргӧнысь, кӧртысь, кужӧ вӧчны пемыдгӧрд, югыдгӧрд да гӧрдовлӧз рӧма дӧра, бура кужӧ вундалӧмӧн серпасавны. Сійӧ кутас уджавны Иудаын да Ерусалимын олысь киподтуя йӧзкӧд, кодъясӧс индіс меным Давид батьӧй.
Нӧшта мӧдӧд меным Ливанысь сус пу, кипарис да гӧрд пу. Ме тӧда, тэнад кесйӧгъясыд бура кужӧны пӧрӧдны ливанса вӧр.
Менам кесйӧгъясӧй кутасны ӧтвылысь уджавны накӧд, медым дасьтыны уна кер. Ӧд крамыс, мый ме кута вӧчны, лоӧ зэв ыджыд да мича.
Тэнад кесйӧгъяслы, кодъяс кутасны пӧрӧдны вӧр, ме сета пӧткӧдчӧм вылӧ кызь сюрс мешӧк шобді, кызь сюрс мешӧк ид, кызь сюрс бат мында вина да кызь сюрс бат мында олив вый».
Тирса Хирам ӧксы мӧдӧдіс Соломонлы гижӧд: «Господь радейтӧ Ассьыс войтырсӧ, та вӧсна пуктіс тэнӧ налы ӧксыӧ».
Хирам нӧшта содтіс: «Ошкӧм Господьлы, Израильлӧн Енлы, коді вӧчис енэжсӧ и мусӧ. Давид ӧксылы Сійӧ сетіс мывкыд пиӧс. Сылӧн пиыс сюсь вежӧра, сійӧ вӧчас Господьлы крам да аслыс ӧксы керка.
Ме мӧдӧда тэ дінӧ Хирам-Авиӧс, сійӧ — мывкыд да киподтуя морт. Сылӧн мамыс Дан рӧдысь, а батьыс сылӧн Тирысь. Сійӧ бура кужӧ вӧчасьны эзысь-зарниысь, ыргӧнысь, кӧртысь, изйысь да пуысь, бура кужӧ вӧчны пемыдгӧрд, гӧрдовлӧз да югыдгӧрд рӧма дӧра, тшӧтш вӧсни шабді дӧра. Сійӧ бура кужӧ вундалӧмӧн серпасавны да вӧчны быдпӧлӧс уджсӧ, мый сылы тшӧктасны. Сійӧ ӧтвыв кутас уджавны тэнад киподтуя йӧзкӧд да менам Давид ыджыдлӧн, тэнад батьыдлӧн, киподтуя йӧзкӧд.
Мӧдӧд аслад кесйӧгъяслы шобді, ид, вый да вина, мый йылысь тэ висьтавлін, менам ыджыдӧй.
А ми кутам Ливанын пӧрӧдны вӧр, мыйта тэныд колӧ, а сэсся пуръясӧн кылӧдам саридз кузя Иоппияӧдз. Сэсянь тэ нуан найӧс Ерусалимӧ».
Соломон тшӧктіс артавны мукӧд войтыръяс пӧвстысь Израиль муӧ овмӧдчӧм йӧзӧс. Водзынджык тадзи тшӧтш вӧчліс сылӧн Давид батьыс. Тайӧ йӧзыслӧн лыдыс вӧлі сё ветымын куим сюрс квайтсё морт.
На пиысь сизимдас сюрсӧс Соломон индіс кыскавны-ваявны изъяс, кӧкъямысдас сюрсӧс — керавны-перйыны изъяс, а куим сюрс квайтсё мортӧс индіс уджалысьяс бӧрся видзӧдны.
Соломон пондіс лэптыны Господьлы крам Ерусалимын, Мориа керӧс вылын, мый вӧлі индӧма сылӧн Давид батьлы. Давид водзвыв дасьтіс унатор, медым евусса Орнанлӧн гумла вылын сэсся лэптісны крам.
Соломон пондіс вӧчны крамсӧ аслас нёльӧд ӧксыалан воӧ, мӧд тӧлысьлӧн мӧд лунӧ.
Медым лэптыны Енлысь крамсӧ, Соломон пуктіс подув, кодлӧн кузьтаыс важ муртӧс серти вӧлі квайтымын гырддза, а пасьтаыс — кызь гырддза.
Крамлӧн посводзыс пасьтанас вӧлі ӧткодь крам пасьтаыскӧд — кызь гырддза. Судтанас посводзыс вӧлі сё кызь гырддза.
Посводз пытшкӧссӧ Соломон эжис весалӧм зарниӧн.
Крамлысь ыджыд вежӧссӧ пытшкӧссяньыс Соломон эжис кипарис пуӧн, сэсся вевттис медбур зарниӧн, нӧшта мичмӧдіс пальма да чеп серпасъясӧн.
Тайӧ вежӧссӧ Соломон мичмӧдіс дона изъясӧн да эжис Парваимысь вайӧм зарниӧн.
Ыджыд вежӧсысь матичьяс, тагӧсъяс, стенъяс да ӧдзӧсъяс [тшӧтш ӧшинь рамаяс] сійӧ эжис зарниӧн. Стенъяс вылас вундалӧмӧн серпасаліс херувимъясӧс.
Соломон тшӧктіс вӧчны Вежасьыс-вежаин. Кузьтанас и пасьтанас сійӧ вӧлі ӧткодь крам пасьтаыскӧд — кызь гырддза.
Вежасьыс-вежаинсӧ Соломон тшӧктіс эжны медбур зарниӧн, кодлӧн сьӧктаыс вӧлі квайтсё талант.
Кӧрттувъяссӧ эжисны зарниӧн, зарниыс вӧлі ветымын сикель сьӧкта.
Крамлысь вылысса жыръяссӧ тшӧтш эжис зарниӧн.
Соломон тшӧктіс вӧчны кык херувимӧс, эжны найӧс зарниӧн да пуктыны Вежасьыс-вежаинӧ.
Ӧти херувимыслӧн бордйыс пасьтанас вӧлі вит гырддза и инмис крамлӧн стен бердас. Мӧд бордйыс пасьтанас вӧлі тшӧтш вит гырддза и йитчис мӧд херувимыслӧн бордйыскӧд.
Ставнас бордъяслӧн пасьтаыс ӧти помсянь мӧд помӧдзыс вӧлі кызь гырддза. Мӧд херувимыслӧн бордъясыс пасьтанас вӧліны тшӧтш вит гырддза, ӧти бордйыс инмис крамлӧн стен бердас, а мӧд бордйыс йитчис мӧд херувимыслӧн бордйыскӧд.
Тадзи херувимъяслӧн бордъясыс шевкнитчисны кызь гырддза пасьта.
Херувимъяс сулалісны кок выланыс, чужӧмнаныс крамлань бергӧдчӧмӧн.
Соломон тшӧктіс кыны гӧрдовлӧз, пемыдгӧрд да югыдгӧрд вурун шӧртъясысь да вӧсни шабді шӧртысь ӧшӧдан дӧра. Дӧра вылас сійӧ тшӧктіс вурны-серпасавны херувимъясӧс.
Крам водзвылас Соломон тшӧктіс вӧчны кык сюръя, судтанас комын вит гырддза. Быд сюръя помын вӧлі вит гырддза судта юр.
Сюръя помъяссӧ крамын моз Соломон тшӧктіс мичмӧдны чепъясӧн. Нӧшта тшӧктіс вӧчны гранат кодь сё сяр да пуктыны найӧс чепъяс вылас.
Тайӧ сюръяяссӧ Соломон сувтӧдіс крам водзӧ, ӧтисӧ — веськыдладорас, мӧдсӧ — шуйгаладорас. Веськыдвыв сюръяыслы сетіс Якин ним, а шуйгаыслы — Воаз ним.*
Соломон вӧчӧдіс ыргӧн висьпуктанін, кузьта-пасьтанас кызь гырддза, судтанас дас гырддза.
Соломон вӧчӧдіс ыргӧнысь ыджыд гӧгрӧс вайӧртӧд, шуисны сійӧс саридзӧн. Ӧтар дорышсяньыс мӧдар дорышӧдзыс сійӧ вӧлі дас гырддза пасьта, джуджданас вӧлі вит гырддза, а гӧгӧртны кӧ сійӧс кӧвйӧн, колана вӧлі комын гырддза кузьта кӧв.
Вайӧртӧд улын гӧгӧрыс кык визьӧн сулалісны сывдӧмӧн вӧчӧм ӧшъяс, быд гырддза пасьтаын сулаліс дас ӧш. Ӧшъяссӧ вӧлі ӧтторъя сывдӧма вайӧртӧдыскӧд.
Вайӧртӧдыс сулаліс дас кык ӧш вылын: куим ӧшкыс видзӧдісны войвылӧ, куимыс — рытыввылӧ, куимыс — лунвылӧ, и куимыс — асыввылӧ. Ӧшъяслысь бекнысӧ вӧлі веськӧдӧма вайӧртӧд шӧрлань, на вылӧ и мыджсис вайӧртӧдыс.
Вайӧртӧдлӧн стенмыс вӧлі ки пыдӧс кызта, а дорышыс вӧлі чаша сяма, лилия дзоридз кодь.
Сэтчӧ тӧрис куим сюрс бат мында ва.
Соломон вӧчӧдіс дас ыджыд мыссян доз. Витсӧ сувтӧдісны вайӧртӧд веськыдладорас, а мӧд витсӧ — шуйгаладорас. Тайӧ дозъясас мыськалісны пемӧсъяслысь яйсӧ, мый дасьтісны сотан вись вайӧм вылӧ.
А вайӧртӧдас мыссисны попъяс.
Соломон вӧчӧдіс дас зарни бикок, кыдзи колӧ вӧлі найӧс вӧчнысӧ. Найӧс сувтӧдісны крамӧ, витсӧ — веськыдладорас, а мӧд витсӧ — шуйгаладорас.
Соломон вӧчӧдіс дас пызан. Найӧс сувтӧдісны крамӧ, витсӧ — веськыдладорас, а мӧд витсӧ — шуйгаладорас. Нӧшта зарниысь вӧчисны вир резан сё тасьті.
Соломон вӧчӧдіс ыджыд йӧр, попъяслы йӧр да йӧръясас пыран дзиръяяс. Дзиръяяссӧ эжисны ыргӧнӧн.
Вайӧртӧдсӧ сувтӧдісны крамлӧн веськыдладорас, асыв-лунвывлань.
Хирам вӧчис пӧим воръяс, пӧим куралан зыръяс да вир резан тасьтіяс [тшӧтш тшынӧдчан дозъяс да вись ваян дозъяс] — Енлӧн крамса став дозмук-кӧлуйсӧ, мый сылы тшӧктіс вӧчны Соломон ӧксы.
Вӧчис кык ыджыд сюръя да сюръя йылас чаша сяма юръяс, найӧс кытшалӧм-вевттьӧм могысь чепъясысь вӧчис кык мичмӧдантор. Мичмӧданторъяс вылас вӧчис гранат кодь нёльсё сяр — кык визьӧн быд мичмӧдантор вылӧ, медым вевттьыны сюръяяслысь юрсӧ.
Вӧчис дас мыссян доз да на улӧ дас джек, вайӧртӧд да сы улын сулалысь дас кык ӧшкӧс, пӧим воръяс, пӧим куралан зыръяс да яй бергӧдлан вилаяс. Став дозмук-кӧлуйыс, мый Хирам-Ави вӧчис Соломон ӧксылы Господьлӧн крамӧ, вӧлі весалӧм-мольӧдӧм ыргӧнысь.
Тайӧ дозмук-кӧлуйсӧ сывдісны-вӧчисны ӧксылӧн тшӧктӧм серти сёйӧд муын Йӧрдан ковтысын, Суккот да Цереда каръяс костын.
Дозмук-кӧлуйсӧ вӧчисны сы мында, мый весиг эз вермыны артавны, уна-ӧ ыргӧн муніс найӧс сывдӧм вылӧ.
Таысь кындзи Енлӧн крамӧ Соломон вӧчӧдіс уна мукӧдтор: зарни висьпуктанін, вежа няньлы пызанъяс, весалӧм зарниысь бикокъяс да би дозъяс, медым ӧзъялісны Вежасьыс-вежаин водзын, кыдзи индӧма.
Нӧшта медбур зарниысь Соломон вӧчӧдіс дзоридзьяс, би дозъяс да чепӧляяс, весалӧм зарниысь вӧчӧдіс пуртъяс, вир резан тасьтіяс, кӧшъяс да пӧим воръяс. Зарниысь вӧчисны тшӧтш крампытшкӧсса ӧдзӧсъяс — Вежаинӧ да Вежасьыс-вежаинӧ пыран ӧдзӧсъяс.
Господьлысь крам лэптӧмсӧ помалӧм бӧрын Соломон вайис сэтчӧ Давид батьыслысь вежа козинъяс. Эзысь-зарни да став дозмук-кӧлуйсӧ сійӧ пуктіс Енлӧн крамса озырлун видзанінӧ.
Соломон корис Ерусалимӧ израильса юрнуӧдысьясӧс, быд чужанкотырысь юралысьӧс да рӧдкутысьясӧс, медым вайны Давид карысь, мӧд ногӧн кӧ, Сионысь, Господьлысь Йитӧд кудсӧ.
Гажӧдчан лунъяс дырйи, волӧн сизимӧд тӧлысьӧ, израильсаяс чукӧртчисны Соломон ӧксы дінӧ.
Израильса юрнуӧдысьяслӧн локтӧм бӧрын левитъяс босьтісны Йитӧд кудсӧ, вежа чомсӧ да вежа дозмук-кӧлуйсӧ, мый вӧлі вежа чомйын, да ставсӧ тайӧс попъяскӧд нуисны крамӧ.
Соломон ӧксы да Йитӧд куд водзӧ чукӧртчӧм Израиль войтыр вайисны вись пыдди ыж-кӧзаӧс да ӧш-мӧскӧс. Пемӧсыс вӧлі сы мында, мый некод эз вермы лыддьынысӧ.
Попъяс пыртісны Господьлысь Йитӧд кудсӧ крамлӧн пыді вежӧсӧ — Вежасьыс-вежаинӧ — да пуктісны сійӧс индӧм местаӧ херувимъяслӧн бордъяс улӧ.
Херувимъяслӧн бордъясыс вӧлі шевкнитчӧмаӧсь Йитӧд куд весьтын. Бордъяснаныс найӧ вевттисны кудсӧ да куд новлӧдлан потшъяссӧ.
Потшъясыс вӧліны сэтшӧм кузьӧсь, мый налысь помсӧ мортыс вермис аддзыны Вежасьыс-вежаин водзвылын ортсы вежӧсас* сулалігӧн. Но ылыстчыны кӧ, потшъясыс эз тыдавны. Йитӧд кудйыс ӧнӧдз сэні сулалӧ.
Кудйын вӧлі сӧмын кык изпӧв, найӧс сэтчӧ Хорив керӧсын пуктыліс Мӧисей. Буретш сэні Израиль войтырлӧн Египетысь петӧм бӧрын Господь кӧрталіс накӧд йитӧд.
Быд котырысь крамӧ локтӧм попъяс вӧлі вежӧдӧмаӧсь-сӧстӧммӧдӧмаӧсь асьнысӧ.
Кор попъяс петісны вежаинысь, сьылысь-ворсысь левитъяс — Асаф, Еман, Едутун, налӧн пиянныс да вокъясныс — ставныс сулалісны висьпуктанін асывладорын. На вылын вӧлі вӧсни шабді дӧраысь паськӧм. Найӧ ворсісны кимвалӧн, арфаӧн да гуслиӧн. Накӧд орччӧн сё кызь поп тутсісны трубаясӧ. Труба шыыс да сьылан шыыс юргисны ӧтмоза, ӧти шыӧн. Тадзи найӧ ошкисны-нимӧдісны Господьӧс.
Кор кыліс трубалӧн тутсан шыыс, кимваллӧн да мукӧд ворсанторлӧн шыыс, кор пондісны сьывны-ошкыны Господьӧс: «Сійӧ бур, Сылӧн буралӧмыс оз помасьлы», сэки Господьлысь крамсӧ тыртіс кымӧр. Кымӧр вӧсна попъяс эз вермыны водзӧ кесъявны, ӧд Господьлӧн дзирдлуныс тыртіс крамсӧ.
Сэки Соломон шуис: «Господь висьтавліс, мый Сійӧ лоӧ сьӧд кымӧрын. [Вежа Енмӧй,] Тэныд ме лэпті керка, медым Тэ олін сэні нэмъяс чӧж».
Соломон ӧксы бергӧдчис сы водзын сулалысь Израиль войтырлань да бурсиис найӧс.
Сійӧ шуис: «Ошкӧм Господьлы, Израильлӧн Енлы! Ӧні Господь збыльмӧдіс сійӧ, мый Аслас вомӧн кӧсйысьліс менам Давид батьлы.
Господь шуліс:
”Ассьым войтырӧс Египетысь петкӧдӧмсянь Израиль чужанкотыръяслы вичмӧдӧм муясын Ме эг бӧрйывлы некутшӧм кар, медым сэні лэптісны Меным керка. Эг бӧрйывлы некодӧс, медым пуктыны сійӧс Аслам Израиль войтырлы юралысьӧ. А ӧні Ме бӧрйи Ерусалим кар, медым сэні вӧлі Менам нимӧй. Ме бӧрйи Давидӧс, медым сійӧ веськӧдліс Менам Израиль войтырӧн”.
Менам Давид батьӧй сьӧлӧмсяньыс кӧсйис лэптыны Господьлы, Израильлӧн Енлы, крам.
Но Господь шуис сылы: “Зэв бур, мый тэ кӧсъян лэптыны крам, кӧні лоас Менам нимӧй.
Но он тэ лэпты, а тэсянь чужысь пиыд лэптас Меным крам”.
Господь збыльмӧдіс Ассьыс шуӧм кывсӧ. Ӧні ме пукала Давид батьлӧн юралан пуклӧсын да веськӧдла Израильӧн, кыдзи Господь и шуліс. Ме лэпті Израильлӧн Господь Енлы крам.
Крамас ме пукті Господьлысь Йитӧд кудсӧ, кытчӧ пуктӧма йитӧдлысь изпӧвъяс. Тайӧ йитӧдсӧ Сійӧ кӧрталіс Израиль войтыркӧд».
Став Израиль войтыр водзын Соломон сувтіс Господьлӧн висьпуктанін водзӧ да лэптіс кисӧ.
Крам йӧр шӧрас Соломонлӧн тшӧктӧм серти вӧлі вӧчӧма ыргӧн содъя пос да пуктӧма крам йӧр шӧрас. Сылӧн кузьта-пасьтаыс вӧлі вит гырддза, а судтаыс вӧлі куим гырддза.
Соломон кайис сэтчӧ да Израиль войтыр водзын сувтіс пидзӧс вылас. Кисӧ енэжлань кыпӧдӧмӧн
Соломон шуис: «Господьӧй, Израильлӧн Енмӧй!
Тэ кодь мӧд енмыс абу енэжас ни му вылас!
Тэ видзан кӧрталӧм йитӧдтӧ да буралӧмтӧ Аслад кесйӧгъясыд дінӧ, кодъяс став сьӧлӧмсяньыс олӧны Тэнад кӧсйӧм серти.
Тэ кутін Ассьыд кывтӧ, мый шулін Аслад Давид кесйӧглы, менам батьлы.
Ӧні Тэ збыльмӧдін сійӧс, мый шулін Аслад вомӧн.
Господьӧй, Израильлӧн Енмӧй, збыльмӧд тшӧтш Ассьыд мӧд кӧсйысьӧмтӧ, мый Тэ шулін Аслад кесйӧглы, менам Давид батьлы. Тэ ӧд шулін сылы: 
“Тэсянь чужысьяс кӧ тэ моз кутасны ветлыны веськыд туйӧд да овны Менам Индӧд серти, сэки на пӧвстысь пыр лоӧ ӧксы, коді кутас веськӧдлыны Израиль войтырӧн Ме водзын”.
Господьӧй, Израильлӧн Енмӧй, мед инас Тэнад кӧсйысьӧмыд, мый Тэ шулін Аслад Давид кесйӧглы.
Збыльысь, му вылын-ӧ Енмыслы овны йӧзыскӧд?
Енэжыс да енэжвывса енэжъясыс кӧ оз вермыны тӧрӧдны Тэнӧ, дерт нин, тайӧ крамыс, кодӧс ме лэпті, оз вермы тӧрӧдны Тэнӧ.
Господьӧй Енмӧй, бергӧдчы Аслад кесйӧглань да кывзы сылысь корӧмсӧ! Кыв Аслад кесйӧглысь Тэ водзын кевмысьӧмсӧ!
Тэнад синмыд мед лун и вой видзӧдас тайӧ крамыс вылӧ. Тэ ӧд шулін, мый Тэнад нимыд лоас сэні. Кыв Аслад кесйӧглысь тайӧ крамас кевмысьӧмсӧ.
Кыв Аслад кесйӧглысь да Аслад Израиль войтырлысь кевмӧмсӧ, кор найӧ шыасясны Тэ дінӧ тайӧ крамас.
Кыв найӧс енэжсяньыд, Аслад оланінсянь. Кыв найӧс да прӧстит найӧс.
Мыжаласны кӧ кодӧскӧ мӧд мортлы паныд мыж вӧчӧмысь, и сылы ковмас локны тайӧ крамас да Тэнад висьпуктанін водзын кыв сетӧмӧн шуны, мый абу мыжа, сэки Тэ кыв енэжсяньыд да веськыда мыжды Ассьыд кесйӧгъястӧ: мыжаӧс мыжды, мед сылы юр вылас усьӧ аслас мыжыс, а мыжтӧмӧс дорйы да мынтысь сылы веськыдлуныс серти.
Тэнад Израиль войтырыд кӧ Тэныд паныд мыж вӧчас да та вӧсна вӧрӧг пасьвартас найӧс, а сэсся кӧ найӧ шыасясны Тэ дінӧ, кутасны нимӧдны Тэнӧ да корны-кевмыны Тэ водзын тайӧ крамас, сэки Тэ кыв енэжсяньыд да прӧстит Израиль войтырыдлысь мыжсӧ. Бӧр бергӧд найӧс сійӧ муас, мый Тэ сетін налы да налӧн батьяслы.
Израиль войтырлӧн Тэныд паныд мыж вӧчӧм вӧсна кӧ енэжыс оз сет зэрсӧ, но сэсся кӧ найӧ кевмысясны тайӧ крамас, нимӧдасны Тэнӧ да бергӧдчасны мыжсьыныс, мыйысь Тэ мыждін найӧс, сэки Тэ кыв найӧс енэжсяньыд да прӧстит Аслад кесйӧгъяслысь да Израиль войтырыдлысь мыжсӧ. Петкӧдлы налы бур туйсӧ, кыті налы колӧ мунны, да мӧдӧд зэрсӧ Аслад му вылӧ, мый Тэ вичмӧдін Аслад войтырыдлы.
Налӧн му вылӧ кӧ пуксяс тшыг кад либӧ паськалас пӧрӧс висьӧм, налысь няньсӧ кӧ бырӧдас сотысь тӧвру, кутшӧмкӧ висьӧм, саранча либӧ лёльӧ, налӧн му вылӧ кӧ уськӧдчас вӧрӧг, суас кӧ найӧс ускӧттьӧ либӧ висьӧм, но Тэнад Израиль войтырысь кӧ кӧть ӧти морт либӧ ставнас войтырыд шыасяс Тэ дінӧ да кевмысяс аслас шог да ускӧттьӧ дырйи, и найӧ кӧ нюжӧдасны кинысӧ тайӧ крамланьыс, сэки Тэ кыв найӧс енэжсяньыд, Аслад оланінсянь, да прӧстит найӧс. Тэ ӧд тӧдан быдӧнлысь сьӧлӧмсӧ, сӧмын ӧтнадӧн Тэ тӧдан мортлысь сьӧлӧмсӧ. Мынтысь быдӧнлы сылӧн уджъясыс серти, медым Тэнад войтырыд став олӧм чӧжыс оліс Тэысь полӧмӧн-вежавидзӧмӧн да ветліс Тэнад туйӧд сійӧ муас, мый Тэ сетін миян батьяслы.
Весиг кӧ йӧз муысь локтысь, коді абу Тэнад Израиль войтыр пӧвстысь, локтас ылі муысь Тэнад ыджыд нимыд, вына киыд да ён сойыд вӧсна и кутас кевмысьны тайӧ крамланьыс бергӧдчӧмӧн, сэки Тэ кыв сійӧс енэжсяньыд, Аслад оланінсянь. Кора Тэнӧ, вӧч йӧз муысь локтысьлӧн кевмӧм серти, медым мувывса войтыръяс тӧдісны Тэнсьыд нимтӧ да Тэнад Израиль войтырыд моз полісны-вежавидзисны Тэысь. Сэки найӧ тӧдмаласны, мый Тэнад нимлы сиӧма тайӧ крамсӧ, мый ме лэпті.
Тэнад тшӧктӧм серти кӧ Тэнад войтырыд тышӧ петас вӧрӧглы паныд, кутас кевмысьны Тэныд да бергӧдчас Тэнад бӧрйӧм карлань да крамлань, мый ме лэпті Тэныд, сэки Тэ кыв налысь корӧм-кевмӧмсӧ енэжсяньыд да отсав налы.
Но кор найӧ мыж вӧчасны Тэныд паныд, ӧд мыж вӧчтӧм мортыс абу, и Тэ скӧрман на вылӧ да сетан найӧс вӧрӧг киӧ, и кор найӧс нуӧдасны пленӧ ылӧ либӧ матӧ, и сэні кӧ найӧ сьӧлӧмсяньныс бергӧдчасны да Тэ водзын кевмысьӧмӧн висьтасясны, 
ми пӧ мыжмим, лёксӧ да мыжсӧ вӧчим, и став сьӧлӧмсяньныс кӧ шыасясны Тэ дінӧ вӧрӧг муын, кытчӧ найӧс нуӧдісны, пондасны кевмысьны да кевмысиганыс бергӧдчасны асланыс мулань, мый Тэ сетін налӧн батьяслы, карлань, мый Тэ бӧрйин, да крамлань, мый ме лэпті Тэныд, сэки Тэ кыв налысь корӧм-кевмӧмсӧ енэжсяньыд, Аслад оланінсянь, да отсав налы. Прӧстит Ассьыд войтыртӧ, ӧд найӧ мыж вӧчисны Тэныд паныд.
Енмӧй, Тэнад синмыд мед аддзас, Тэнад пельыд мед кылас тайӧ крамас кевмысьӧмсӧ.
Господьӧй Енмӧй, чеччы да лок Аслад шойччанінӧ, Тэ да Тэнад выныдлӧн кудйыс, локтӧй!
Господьӧй Енмӧй, Тэнад попъясыд мед вевттьысясны мездлунӧн, Тэнад эскана войтырыд мед нимкодясяс Тэнад бурлунысь.
Господьӧй Енмӧй, эн ӧтдорт Ассьыд мавтыштӧматӧ, эн вунӧд Ассьыд буралӧмтӧ Давид кесйӧгыд дінӧ».
Кор Соломон помаліс кевмысьӧмсӧ, енэжсяньыс лэччис би да ньылыштіс сотан да мукӧд висьяс, и Господьлӧн дзирдлуныс тыртіс крамсӧ.
Попъяс эз вермыны пырны Господьлӧн крамӧ, ӧд крамыс вӧлі тырӧма Господьлӧн дзирдлунӧн.
Кор Израиль войтыр аддзис енэжсяньыс лэччысь би да крам вылысь Господьлысь дзирдлунсӧ, найӧ кымынь уськӧдчисны муас да копыртчӧмӧн ошкисны Господьӧс: «Сійӧ бур, Сылӧн буралӧмыс оз помасьлы!»
Ӧксы да став войтырыс вайисны висьяс Господьлы.
Соломон ӧксы вайис вись пыдди кызь кык сюрс ӧшкӧс да сё кызь сюрс ыжӧс. Тадзи ӧксы да став войтырыс вежӧдісны Енлысь крамсӧ.
Попъяс сулалісны асланыс кесъяланінын, а левитъяс сулалісны шылада ворсанторъясӧн. Налысь ворсанторъяссӧ вӧлі вӧчӧма Давид ӧксыалӧм дырйи на. Господьӧс ошкисны Давидлӧн кывъясӧн: «Сылӧн буралӧмыс оз помасьлы».
Трубаясӧ тутсысь попъяс сулалісны левитъяс водзвылын. Став Израиль войтырыс сулаліс.
Соломон вежӧдіс Господьлӧн крам йӧрлысь шӧр юкӧнсӧ, сотіс сэні сотан висьяс да бурасян вись пыдди вайӧм пемӧсъяслысь госсӧ. Ӧд Соломон тшӧктӧм серти вӧчӧм ыргӧн висьпуктанін вылӧ эз тӧр сотан вись, нянь вись да пемӧсъяслӧн госыс.
Сійӧ лунъясӧ Соломон став Израиль войтыркӧд пасйис сизимлунся гаж. Лево-Хаматсянь Египет мудорса шорӧдз израильсаяс чукӧртчисны Соломонкӧд ӧтвыв тайӧ гаж вылас.
Сизим лун чӧж найӧ вежӧдісны висьпуктанінсӧ, сэсся сизим лун чӧж гажӧдчисны. А гаж заводитчӧмсянь кӧкъямысӧд луннас налӧн вӧлі чукӧртчӧм.
Сизимӧд тӧлысьлӧн кызь коймӧд лунӧ Соломон ӧксы лэдзис войтырсӧ гортаныс. Найӧ мунісны долыд сьӧлӧмӧн, нимкодясисны став бурсьыс, мый Господь вӧчис Давидлы, Соломонлы да Аслас Израиль войтырлы.
Соломон помаліс вӧчны Господьлысь крамсӧ да ассьыс ӧксы керкасӧ.
Мый Соломон кӧсйис вӧчны Господьлӧн крамын да аслас керкаын, ставыс артмис.
Войнас Господь петкӧдчис Соломонлы да шуис: «Ме кылі тэнсьыд кевмысьӧмтӧ да бӧрйи тайӧ местасӧ, медым тані вӧлі крам, кӧні кутасны вайны висьяс.
Ме кӧ тупка енэжсӧ, и зэрыс оз ло, Ме кӧ тшӧкта саранчалы сёйны мувывса быдтассӧ, Ме кӧ мӧдӧда Аслам войтыр вылӧ пӧрӧс висьӧм, и Менам нимӧн пасйӧм войтырӧй кӧ раммӧдчас, шыасяс Ме дінӧ кевмысьӧмӧн, эновтчас аслас лёк туйясысь да кутас корсьны Менӧ, сэки Ме кыла найӧс енэжсяньыс, прӧстита налысь мыжсӧ да бурдӧда налысь мусӧ.
Ӧні Менам синмӧй аддзӧ, Менам пельӧй кылӧ тайӧ крамас кевмысьӧмсӧ.
Ме бӧрйи да вежӧді тайӧ крамсӧ, медым сэні пыр вӧлі Менам нимӧй.
Менам синмӧй пыр кутас видзӧдны сы вылӧ, сійӧ пыр лоӧ Менам сьӧлӧмын.
Кутан кӧ тэ ветлыны Менам чужӧмбан водзын Давид батьыд моз, кутан кӧ вӧчны ставсӧ, мый Ме тшӧкта тэныд, кутан кӧ овны Менам индӧд-тшӧктӧмъяс серти, сэки Ме зумыдмӧда тэнсьыд ӧксыалӧмтӧ, кыдзи ме кӧсйысьлі тэнад Давид батьлы. Ме шулі сылы, мый сылӧн рӧдысь петӧм морт кутас пыр юравны Израильын.
Но ті кӧ кежанныд Меысь да эновтанныд Менсьым индӧд-тшӧктӧмъясӧс, мый Ме сеті тіянлы, кутанныд кӧ кесъявны да юрбитны мукӧд енъяслы, сэки Ме нетшышта тіянӧс Аслам му вылысь, мый Ме сеті тіянлы. А тайӧ крамсӧ, мый Ме вежӧді-торйӧді Аслым, Ме ӧтдорта Аслам чужӧмбан водзысь да серамтуйӧ пукта войтыръяс пӧвстын.
Тайӧ ыджыд крам дінті мунысь весьӧпӧрӧмӧн юалас: “Мый вӧсна нӧ Господь тадзи вӧчис тайӧ муыскӧд да тайӧ крамыскӧд?”
Сылы вочавидзасны: “Израиль войтыр эновтіс Господьӧс, асланыс батьяслысь Енсӧ, коді петкӧдіс найӧс Египет муысь. Найӧ сирасисны мукӧд енъяс дінӧ, юрбитісны-кесъялісны налы. Та вӧсна Господь ыстіс налы став тайӧ лёксӧ”».
Кызь во чӧжӧн Соломон лэптіс Господьлы крам да аслыс керка. Соломон дзоньталіс-лэптіс тшӧтш каръяс, кодъясӧс сетіс сылы Хирам, да овмӧдіс сэтчӧ израильсаясӧс.
Соломон уськӧдчис Хамат-Сова кар вылӧ да босьтіс сійӧс.
Овтӧминын сійӧ лэптіс Тадмор кар. Нянь да эмбур видзӧм могысь Хаматын кыпӧдіс каръяс.
Нӧшта Соломон лэптіс Вылыс Бет-Хорон да Улыс Бет-Хорон изкаръяс, кыпӧдіс на гӧгӧр стенъяс, вӧчис дзиръяяс да тасъяс. Сійӧ лэптіс Баалат кар. Нянь да эмбур, тарантасъяс да вӧвъяс видзӧм могысь кыпӧдіс аслыс каръяс. Ерусалимын, Ливанын да аслас киподувса муын сійӧ лэптіс ставсӧ, мый кӧсйис.
Хеттейясысь, аморейясысь, перезейясысь, хивейясысь да евуссаясысь ловйӧн кольӧмаясӧс Соломон уджӧдіс. Тадзи найӧ талунӧдз мынтӧны сылы вот. Тайӧ йӧзыс эз вӧвны Израиль войтырысь, а чужисны Израиль муын мукӧд войтыръяссянь, кодъясӧс израильсаяс эз бырӧдны.
Израильсаясӧс Соломон эз пуктыв кесйӧгъясӧн. Ӧксылы найӧ кесъялісны веськӧдлысьясӧн да тышкайӧзӧн, веськӧдлісны тарантаса тышкайӧзӧн да верзьӧмаясӧн.
Соломон ӧксылӧн вӧлі кыксё ветымын морт, кодъяс юралісны-веськӧдлісны сылӧн войтырӧн.
Фараонлысь нывсӧ Соломон вуджӧдіс Давид карысь сылы вӧчӧдӧм керкаӧ. Соломон шуис: «Менам гӧтырӧйлы оз позь овны израильса Давид ӧксы керкаын. Тайӧ керкаыс вежа, ӧд татчӧ коркӧ вайлісны Господьлысь Йитӧд кудсӧ».
Господьлы сотан висьяс Соломон вайліс висьпуктанін вылын, кодӧс сійӧ вӧчис да сувтӧдіс крам посводзлы воча. Мӧисейлӧн Индӧдын урчитӧм висьяс сійӧ вайліс шойччан лунӧ, выль тӧлысь чужигӧн да куимысь вонас гажӧдчан лунъяс дырйи: Шомтӧм нянь сёян лунъясӧ, Ветымынӧд лунся гаж дырйи да Чом вӧчан лунъясӧ.
Давид батьыслӧн тшӧктӧм серти Соломон индіс кесъявны поп котыръясӧс, индіс тшӧтш левитъясӧс быд лун кежлӧ вӧчны ассьыныс уджнысӧ — ошкыны Господьӧс да отсасьны попъяслы. Нӧшта Соломон сувтӧдаліс быд дзиръя дорӧ крам видзысьясӧс. Тадзи вӧчны тшӧктіс сылы Енлӧн морт Давид.
Ставсӧ вӧлі вӧчӧма сы серти, мый ӧксы тшӧктыліс попъяс да левитъяс йылысь, озырлун видзанінъяс да мукӧдторйыс йылысь.
Господьлӧн крамлы подув пуктӧмсянь да сійӧс лэптӧмӧдз вӧлі вӧчӧма-эштӧдӧма Соломонлысь став уджсӧ.
Сэсся Соломон муніс Эдом муӧ, Эцион-Гевер да саридздорса Элат каръясӧ.
Хирам мӧдӧдіс ассьыс йӧзсӧ, медым найӧ ваясны Соломонлы корабльяс да кесйӧгъясӧс, кодъяс бура кужӧны кывтны саридз вывті. Соломонлӧн кесйӧгъяскӧд найӧ кывтісны Офирӧ да вайисны сэтысь Соломон ӧксылы нёльсё ветымын талант зарни.
Саваса ӧксы-ань кыліс Соломонлӧн нималӧмыс йылысь да муніс Ерусалимӧ, медым нӧдкывъясӧн тӧдмавны Соломонлысь мывкыдлунсӧ. Сыкӧд вӧлі зэв уна йӧз. Верблюдъяс вылын найӧ вайисны уна зарни, дона изъяс да чӧскыд ӧвтанторъяс.
Ӧксы-ань аддзысис Соломонкӧд. Сійӧ сёрнитіс Соломонкӧд быдтор йылысь, мый кӧсйис тӧдны.
Соломон вочавидзис ӧксы-аньлӧн став юалӧмыс вылӧ. Эз вӧв сэтшӧмтор, мый вылӧ эськӧ сійӧ эз вермы вочавидзны.
Саваса ӧксы-ань гӧгӧрвоис, мый Соломон зэв мывкыд морт. Сійӧ аддзыліс керкасӧ, мый Соломон лэптіс, аддзыліс, кутшӧм озыр Соломонлӧн пызаныс, кыдзи кесъялӧны, олӧны да пасьтасьӧны сылӧн йӧзыс, кесйӧгъясыс да вина кисьталысьясыс. Аддзыліс тшӧтш пемӧсъясӧс, кодъясӧс Соломон вайис сотан вись пыдди Господьлӧн крамын.
Ёна шензьӧмӧн ӧксы-ань шуис Соломон ӧксылы: «Ставыс, мый ме кывлі ас муын тэнад уджъясыд да мывкыдлуныд йылысь, збыль. Сэки ме эг эскы, а ӧні эска, ӧд аслам синмӧн ставсӧ аддзылі.
Меным, вӧлӧмкӧ, сӧмын мыйтакӧ висьтавлӧмаӧсь тэнад ыджыд мывкыдлуныд йылысь. Тэнад ставыс ёна унджык на менам кывлӧм дорысь.
Шудаӧсь тэнад йӧзыд да тэнад кесйӧгъясыд, кодъяс век тэкӧд орччӧнӧсь да кылӧны тэнсьыд мывкыд сёрнитӧ.
Ошкӧм Господьлы, тэнад Енлы! Аслас кӧсйӧм серти Господь, тэнад Енмыд, пуксьӧдіс тэнӧ юралан пуклӧсӧ, пуктіс тэнӧ ӧксыавны Аслас нимсянь.
Тэнад Енмыд радейтӧ Израиль войтырӧс, та вӧсна кӧсйӧ вынсьӧдны сійӧс пыр кежлӧ. Сійӧ пуктіс тэнӧ Израиль войтырлы ӧксыӧ, медым тэ юралін да мыждін веськыда».
Ӧксы-ань козьналіс Соломон ӧксылы сё кызь талант зарни, дона изъяс да унасьыс-уна чӧскыд ӧвтантор.
Татшӧм ӧвтанторъясыс, мый саваса ӧксы-ань козьналіс Соломон ӧксылы, Израильын эз на вӧвлыны.
Хирамлӧн да Соломонлӧн кесйӧгъясыс, кодъяс вайлывлісны Офирысь зарни, вайисны тшӧтш гӧрд пу да дона изъяс.
Гӧрд пуысь ӧксы тшӧктіс вӧчны Господьлӧн крамӧ да аслас ӧксы керкаӧ посъяс, сьылысьяслы гусли да арфа.
Татшӧмторъяссӧ Иуда муын эз на аддзывны.
Козинъяс кындзи Соломон ӧксы сетіс саваса ӧксы-аньлы ставсӧ, мый сійӧ корис да кӧсйис.
Сэсся ӧксы-ань аслас йӧзкӧд бӧр муніс аслас муӧ.
Быд во Соломонлы вайлісны квайтсё квайтымын квайт талант зарни.
Таысь ӧтдор вузасьысьяс мынтылісны сылы вот, а ӧксыув муясын юралысьяс да аравияса ӧксыяс вайлісны сылы эзысь-зарни.
Дорӧм зарниысь Соломон ӧксы вӧчӧдіс кыксё ыджыд сайӧд. Быд сайӧд вылӧ муніс квайтсё сикель зарни.
Нӧшта вӧчӧдіс куимсё ичӧтджык сайӧд, быд сайӧд вылӧ муніс куимсё сикель дорӧм зарни.
Сайӧдъяссӧ ӧксы пуктіс ливанса пуысь вӧчӧм керкаӧ.
Слӧн лыысь ӧксы вӧчӧдіс ыджыд юралан пуклӧс, сійӧс эжисны весалӧм зарниӧн. Юралан пуклӧс бердас йитісны квайт тшупӧда сод да зарниысь вӧчӧм кок пуктанін. Пуклӧс ӧтар-мӧдарладорас вӧчисны гырддзаув, а быд гырддзаув дорӧ вӧчисны левӧс. Нӧшта вӧчисны дас кык левӧс, кодъяс сулалісны квайт тшупӧд вылын ӧтар-мӧдар бокас.
Татшӧм пуклӧсыс эз вӧв сэсся некутшӧм муын.
Соломон ӧксылӧн став юан дозйыс вӧлі зарниысь, а ливанса пуысь вӧчӧм керкаын став дозмук-кӧлуйыс вӧлі весалӧм зарниысь.
Соломон веськӧдлан кадӧ эзысьсӧ эз вылӧ донъявны. Соломон ӧксылӧн корабльяс вылын сылӧн йӧзыс Хирамлӧн йӧзкӧд кывтлісны Фарсисӧ. Куим во пытшкас ӧтчыдысь найӧ вайлісны сэтысь зарни-эзысь, слӧн лы, ӧблезянаясӧс да павлинъясӧс.
Мувывса став ӧксыыс дорысь Соломон вӧлі медся озыр да медся мывкыд.
Мувывса став ӧксыыс зілисны аддзывны Соломонӧс да кывзыны сійӧс, ӧд сылӧн вӧлі Енсянь мывкыдлун.
Соломон дінӧ волысьяс вайлісны аскӧдныс козинъяс: эзысь-зарниысь вӧчӧм дозмук-кӧлуй, паськӧм, шыпуртъяс, чӧскыд ӧвтанторъяс, вӧвъясӧс да мулъясӧс. Тадзи вӧлі быд во.
Соломонлӧн вӧлі нёль сюрс лэбув, кӧні видзисны вӧвъясӧс да тарантасъяс. Сылӧн вӧлі дас кык сюрс верзьӧма, кодъясӧс сійӧ овмӧдіс тарантаса тышкайӧзлы торйӧдӧм каръясӧ да аслас Ерусалим карӧ.
Ефрат юсянь Филистим муӧдз да Египетӧдз став ӧксыыс вӧліны Соломон кипод улынӧсь.
Соломон ӧксы дырйи Ерусалимын [зарниыс да] эзысьыс вӧлі из мында, а сус пуыс вӧлі сы мында, мыйта вӧлі керӧсбердса муын быдмысь инжир пуыс.
Вӧвъяссӧ Соломонлы вайлісны Египетысь да мукӧд муясысь.
Соломон ӧксыалӧм дырйи мукӧд лоӧмторъяс йылысь водзысяньыс и помӧдзыс пасъялӧма Нафан пророклӧн гижӧдъясын, силомса Ахийлӧн пророкалан гижӧдъясын да Иддо нима тӧдысь-аддзысьлӧн восьтӧмъясын. Тайӧ восьтӧмъясыс вӧліны Неватлӧн Еровам пиыс йылысь.
Нелямын во чӧж Соломон ӧксыаліс Ерусалим карын, веськӧдліс став Израиль войтырӧн.
Сэсся Соломон куліс да вуджис батьясыс дінӧ. Сійӧс дзебисны Давид батьыслӧн карӧ.
Соломон бӧрти ӧксыӧ пуксис сылӧн Ровоам пиыс.
Ровоам локтіс Сикемӧ, ӧд сэтчӧ чукӧртчис Израиль войтыр, медым пуктыны сійӧс ӧксыӧ.
Та йылысь кывліс Неватлӧн Еровам пиыс. Соломон ӧксыысь пышйӧм бӧрын сійӧ оліс Египетын, а ӧні бӧр локтіс сэтысь.
Израильсаяс корисны Еровамӧс да мунісны сыкӧд Ровоам дінӧ. Найӧ шуисны Ровоамлы:
«Тэнад батьыд пуктіс миян вылӧ сьӧкыд сийӧс.
Но тэ кокньӧд миянлысь сьӧкыд уджнымӧс да босьт миян вылысь сийӧссӧ, мый батьыд пуктіс миян вылӧ. Сэки ми кутам кесъявны тэныд».
Ровоам шуис налы: «Ӧні мунӧй, а коймӧд луннас бӧр локтӧй ме дінӧ».
Войтырыс разӧдчис.
Ровоам ӧксы муніс сёрнитны израильса юрнуӧдысьяскӧд, кодъяс кесъявлісны Соломон батьыслы на. Сійӧ юаліс налысь: «Мый ті шуанныд? Мый меным вочавидзны тайӧ войтырыслы?»
Найӧ шуисны: «Тэ кӧ лоан бур сьӧлӧма тайӧ войтырыс дінӧ, могмӧдан налысь корӧмсӧ да бурногӧн вочавидзан налы, найӧ став олӧм чӧжныс лоасны тэныд кесйӧгъясӧн».
Но Ровоам эз кывзы юрнуӧдысьяслысь туйдӧдӧмсӧ. Сійӧ сёрнитіс том йӧзкӧд, кодъяс быдмисны сыкӧд ӧтвыв и ӧні кесъялісны сылы.
Ровоам юаліс налысь: «Мый ті шуанныд? Мый меным вочавидзны тайӧ войтырыслы? Найӧ корӧны, мед ме кокньӧді налысь сийӧссӧ, мый менам батьӧй пуктіс на вылӧ».
Сыкӧд ӧтвыв быдмӧм том йӧз шуисны сылы: «Тайӧ войтырыс элясьӧ, мый тэнад батьыд пуктіс на вылӧ сьӧкыд сийӧс, да корӧны, мед тэ налысь сийӧссӧ вӧчин кокньыдджыкӧн. Но тэ шу налы: “Менам чалльӧй кызджык батьлӧн лядьвей дорысь.
Менам батьӧй пуктіс тіян вылӧ сьӧкыд сийӧс, но ме вӧча сійӧс сьӧкыдджыкӧн на.
Менам батьӧй нӧйтліс тіянӧс орсӧн, но ме кута нӧйтны тіянӧс кӧрт пома орсӧн”».
Коймӧд луннас Еровам став войтырыскӧд локтісны Ровоам ӧксы дінӧ, кыдзи сійӧ тшӧктыліс налы. 
Ровоам ӧксы сёрнитіс накӧд чорыда. Сійӧ ӧтдортіс юрнуӧдысьяслысь туйдӧдӧмсӧ, но том йӧзлӧн туйдӧдӧм серти шуис войтырыслы:
«Менам батьӧй пуктіс тіян вылӧ сьӧкыд сийӧс, но ме вӧча сійӧс сьӧкыдджыкӧн на.
Менам батьӧй нӧйтліс тіянӧс орсӧн, но ме кута нӧйтны тіянӧс кӧрт пома орсӧн».
Ӧксы эз кывзы войтырӧс, ӧд ставыс тайӧ вӧлі Енсянь, медым збыльмис Господьлӧн кывйыс, мый Сійӧ висьталіс силомса Ахий пророк пыр Неватлӧн Еровам пилы.
Кор Израиль войтыр гӧгӧрвоис, мый ӧксы оз кывзы найӧс, сэки найӧ шуисны сылы: «Миянӧс нинӧм оз йит Давидкӧд, миянлы нинӧм вӧчны Ессейлӧн пикӧд.
Мунамӧй гортӧ, Израиль войтыр!
Давидлӧн рӧдыс мед ачыс тӧждысяс ас вӧснаыс!»
Сэсся израильсаяс разӧдчисны гортаныс.
Ровоам лои ӧксыӧн сӧмын Иуда каръясын олысь Израиль войтырлы.
Ӧтчыд Ровоам ӧксы мӧдӧдіс Израиль войтыр дінӧ Адорамӧс. Сійӧ веськӧдліс йӧзӧн, кодъяс уджалӧмнас мынтісны вот. Но израильсаяс изъялісны сійӧс кувтӧдзыс.
Сэки Ровоам ӧксы тэрмасьӧмӧн пуксис тарантасӧ да пышйис Ерусалимӧ.
Сійӧ кадас Израиль торйӧдчис Давид рӧдысь, и тайӧ ӧнӧдз тадзи.
Ерусалимӧ локтӧм бӧрын Ровоам чукӧртіс Иуда да Венямин чужанкотырысь сё кӧкъямысдас сюрс медбур тышкамортӧс, мед петны тышӧ Израильлы паныд да бӧр босьтны аслас киӧ на вылын ӧксыалӧмсӧ.
Сэки Енлӧн морт Шемайлы вӧлі Господьсянь кыв:
«Висьтав Соломонлӧн Ровоам пилы, иудаса ӧксылы, тшӧтш Иуда да Венямин муясын олысь Израиль войтырлы, мый Господь тадзи висьталӧ: 
энӧ петӧй тышӧ асланыд вокъяслы паныд, а бӧр бергӧдчӧй гортаныд. Ӧд ставыс тайӧ вӧлі Месянь».
Найӧ кывзысисны Господьлысь да эз петны Еровамлы паныд тышӧ.
Ровоам оліс Ерусалимын, лэптіс изкаръяс Иуда муын.
Сійӧ кытшаліс стенмӧн Виплием, Этам, Текоя, Бет-Цур, Соко, Адуллам, Геф, Мареша, Зиф, Адораим, Лакиш, Азека, Цора, Аялон да Хеврон изкаръяс Иуда да Венямин муын.
Ровоам зумыдмӧдіс тайӧ изкаръяссӧ, быд изкарӧ индіс юралысьӧс да лӧсьӧдіс сэні сёян, вый да вина видзанінъяс.
Быд карын видзисны сайӧдъяс да шыяс. Ровоам зумыда вынсьӧдіс тайӧ каръяссӧ.
Тадзи Иуда да Венямин муяс колины сылӧн кипод улӧ.
Израиль му пасьталаысь попъяс да левитъяс чукӧртчисны Ровоам дінӧ. Левитъяс эновтісны ассьыныс видзьяснысӧ, овмӧснысӧ да овмӧдчисны Иуда муӧ да Ерусалимӧ, ӧд Еровам да сылӧн пияныс эз сетны налы лоны попъясӧн да кесъявны Господьлы. Еровам индіс аслыс попъясӧс, медым найӧ кесъялісны вись ваян мылькъяс вылын кӧза да ӧш сяма бӧлбанъяслы, кодъясӧс сійӧ вӧчӧдіс.
Но израильса быд чужанкотырын вӧліны сэтшӧм йӧз, кодъяс став сьӧлӧмсяньныс кесъялісны Господьлы, Израильлӧн Енлы. Левитъяс бӧрся найӧ тшӧтш мунісны Ерусалимӧ, медым вись вайны Господьлы, асланыс батьяслӧн Енлы.
Куим во чӧж найӧ вынсьӧдісны Иуда муын Соломонлӧн Ровоам пилысь юралӧмсӧ, ӧд куим во чӧж найӧ ветлісны Давидлӧн да Соломонлӧн туйӧд.
Ровоам босьтіс гӧтырӧ Давидлӧн Еримот пилысь Махалата нывсӧ. Махалаталӧн мамыс вӧлі Авихаиль, Ессейлӧн Элиав пилӧн нылыс. Махалата чужтіс Ровоамлы Еуш, Шемарай да Захам пиянӧс.
Нӧшта Ровоам босьтіс гӧтырӧ Авессаломлысь Маака нывсӧ. Маака чужтіс сылы Авийӧс, Аттайӧс, Зизӧс да Шеломотӧс.
Аслас став гӧтырыс пӧвстысь Ровоам ёнджыка радейтіс Авессаломлысь Маака нывсӧ. Ровоамлӧн вӧлі дас кӧкъямыс гӧтыр да квайтымын кесйӧг-гӧтыр. Найӧ чужтісны сылы кызь кӧкъямыс пиӧс да квайтымын нылӧс.
Ровоам пуктіс Маакалысь Авий писӧ медыджыдӧн сылӧн вокъяс пӧвстын. Ас бӧртиыс Ровоам кӧсйис пуктыны ӧксыӧ Авийӧс.
Ровоам мывкыда вӧчис — овмӧдіс ассьыс пиянсӧ Иуда да Венямин муясын сулалысь изкаръясӧ. Сійӧ тӧждысис налӧн сёян-юан вӧсна да корсис налы уна гӧтыр.
Кор Ровоамлӧн юралӧмыс зумыдмис, и сійӧ лои вына юралысьӧн, сэки сійӧ да став Израиль войтырыс эновтісны Господьлысь Индӧдсӧ.
Найӧ эновтісны Господьӧс, та вӧсна Ровоам ӧксылӧн витӧд веськӧдлан воӧ египетса Шишак ӧксы аслас тышкайӧзкӧд уськӧдчис Ерусалим кар вылӧ. Египетысь Шишаккӧд локтісны квайтымын сюрс верзьӧма да лыдтӧм-тшӧттӧм тышкайӧз Ливияысь, Эфиопияысь да сукки войтырысь. Тышкайӧзлӧн вӧлі сюрс кыксё тарантас.
Найӧ босьтісны иудаса изкаръяс, сэсся матыстчисны Ерусалимлань.
Шемай пророк локтіс Ровоам дінӧ да иудаса юралысьяс дінӧ, кодъяс Шишакысь пышйигӧн чукӧртчисны Ерусалимӧ. Шемай шуис налы: 
«Господь тадзи висьталӧ: “Ті эновтінныд Менӧ, та вӧсна Ме тшӧтш эновта тіянӧс да сета тіянӧс Шишаклӧн киӧ”».
Сэки иудаса юралысьяс да ӧксы раммӧдчисны да шуисны: «Господь веськыда вӧчӧ!»
Кор Господь аддзис налысь раммӧдчӧмсӧ, Шемайлы вӧлі Господьсянь кыв:
«Найӧ раммӧдчисны, та вӧсна Ме ог бырӧд найӧс, регыд мезда найӧс. Шишак ки отсӧгӧн Менам скӧрлунӧй оз бырӧд Ерусалим кар.
Но найӧ лоӧны сылӧн кесйӧгъясӧн, медым тӧдісны, мыйӧн торъялӧ Меным кесъялӧмыс мувывса ӧксыяслы кесъялӧмысь».
Египетса Шишак ӧксы пырис Ерусалимӧ да босьтіс Господьлӧн крамысь да ӧксылӧн керкаысь став озырлунсӧ, босьтіс тшӧтш Соломонӧн вӧчӧдӧм зарни сайӧдъяссӧ.
На пыдди Ровоам ӧксы вӧчӧдіс ыргӧн сайӧдъяс да сетіс найӧс веськӧдлысьяслы, кодъяс видзӧдісны ӧксы керкаӧ пыранін видзысьяс бӧрся.
Кор ӧксы вӧлі мунӧ Господьлӧн крамӧ, ӧксыӧс видзысьяс босьтлісны аскӧдныс тайӧ сайӧдъяссӧ, а бӧрыннас бӧр пуктывлісны найӧс видзанінӧ.
Ровоам раммӧдчис, та вӧсна Господьлӧн скӧрлуныс вешйис сы вылысь, эз дзикӧдз бырӧд сійӧс.
Ӧд Иуда муын мыйкӧ бурыс вӧлі на.
Ровоам ӧксылӧн юралӧмыс зумыдмис Ерусалим карын.
Ӧксыӧ пуксигас Ровоамлы вӧлі нелямын ӧти арӧс. Дас сизим во чӧж сійӧ юраліс Ерусалим карын. Израильса чужанкотыръяслӧн каръясысь Господь бӧрйис тайӧ карсӧ, медым сэні вӧлі Сылӧн нимыс.
Ровоамлӧн мамыс вӧлі аммон войтырысь Наама.
Ровоам вӧчис лёксӧ, ӧд сійӧ эз сьӧлӧмсяньыс корсь Господьӧс.
Ровоам ӧксыалӧм дырйи лоӧмторъяс йылысь водзысяньыс и помӧдзыс гижӧма Шемай пророклӧн гижӧдъясӧ да Иддо нима тӧдысь-аддзысьлӧн чужанвуж небӧгӧ.
Ровоам да Еровам костын пыр муніс тыш.
Сэсся Ровоам куліс да вуджис батьясыс дінӧ. Сійӧс дзебисны Давид карӧ.
Ровоам бӧрти ӧксыӧ пуксис сылӧн Авий пиыс.
Израильса Еровам ӧксылӧн дас кӧкъямысӧд веськӧдлан воӧ Иуда муын ӧксыӧ пуксис Авий.
Куим во чӧж сійӧ юраліс Ерусалимын.
Авийлӧн мамыс вӧлі Микая, Гиваысь Уриэллӧн нылыс.
Авий да Еровам костын муніс тыш.
Тышсӧ паніс Авий. Сылӧн вӧлі нёльсё сюрс медбур тышкаморт.
Еровам петіс сылы паныд кӧкъямыссё сюрс медбур тышкаморткӧд.
Ефрем керӧсвыв муын Авий кайис Цемараим керӧс йылӧ да шыасис сэсянь: «Кывзӧй менӧ, Еровам да став Израиль войтыр!
Ті ӧд тӧданныд, мый Господь, Израильлӧн Ен, пыр кежлӧ сетіс Израильын ӧксыалӧмсӧ Давидлы да сысянь чужысьяслы да пыр кежлӧ кӧрталіс накӧд вежсьывлытӧм йитӧд.
Но Неватлӧн Еровам пиыс, коді кесъяліс Давидлӧн Соломон пилы, кыпӧдчис аслас ыджыдлы паныд.
Еровам дінӧ чукӧртчисны мывкыдтӧм да шогмытӧм йӧз да кыпӧдчисны Соломонлӧн Ровоам пилы паныд.
Ровоам вӧлі том на, сійӧ унатор эз куж да эз вермы водзсасьны налы паныд.
Ӧні ті мӧвпыштінныд паныд кыпӧдчыны Господьлӧн ӧксыалӧмлы, мый сетӧма Давидсянь чужысьяслы. Ті уна лыдаӧсь, тіян эмӧсь зарни ӧшъяс, кодъясӧс Еровам вӧчис тіянлы ен пыдди.
Господьлысь попъясӧс — Ааронсянь чужысьясӧс — да левитъясӧс ті вӧтлінныд. Мукӧд войтыръяс моз ті асьныд пуктінныд аслыныд попъясӧс.
Быдӧн, коді локтӧ асьсӧ вежӧдӧм могысь да вайӧдӧ ӧшкӧс да сизим межӧс, сійӧ и лоӧ ылӧг енъяслӧн попӧн.
Но миян Енным — Господь, ми эгӧ эновтлӧй Сійӧс. Господьлы кесъялӧны Ааронсянь чужысь попъяс, и левитъяс тшӧтш вӧчӧны ассьыныс уджнысӧ.
Быд асыв да рыт найӧ вайӧны Господьлы сотан висьяс да тшынӧдӧны чӧскыд ӧвтанторъяс. Найӧ пуктӧны вежа нянь сӧстӧм пызан вылӧ да быд рыт ӧзтӧны зарни бикок вылын сулалысь би дозъяс. Ми ставсӧ вӧчам асланым Господь Енлӧн индӧд серти, а ті эновтінныд Сійӧс.
Енмыс миянкӧд, Сійӧ — миян юралысьным. Кор Сылӧн попъясыс кутасны тутсыны трубаясӧ, ми петам тышӧ тіянлы паныд.
А ті, Израиль войтыр, энӧ тышкасьӧй Господькӧд, тіян батьяслӧн Енкӧд, ӧд тіян оз ло вермӧмыс».
Аслас тышкайӧз пӧвстысь Еровам мӧдӧдіс кыйӧдчысьясӧс сэтшӧм местаӧ, кысянь позьӧ мышсяньыс уськӧдчыны иудаса тышкайӧз вылӧ, а ачыс мукӧд тышкайӧзыскӧд сувтіс иудаса тышкайӧзлы воча.
Иудаса тышкайӧз бергӧдчисны да аддзисны, мый на вылӧ уськӧдчӧны водзысяньыс и бӧрсяньыс.
Сэки найӧ шыасисны Господь дінӧ, а попъяс кутісны тутсыны трубаясӧ.
Иудаса тышкайӧз гораа горӧдісны.
Налӧн горӧдӧм дырйи Енмыс пасьвартіс Еровамӧс да израильса тышкайӧзӧс Авий ӧксылӧн да Иуда войтырлӧн син водзын.
Израильса тышкайӧз пышйисны иудаса тышкайӧзысь, но Енмыс сетіс найӧс иудаса тышкайӧзлӧн киӧ.
Авий аслас тышкайӧзкӧд вермис-пасьвартіс израильсаясӧс.
Вӧлі виӧма витсё сюрс медбур израильса тышкамортӧс.
Тадзи вӧлі раммӧдӧма Израиль войтырӧс. А Иуда войтыр вӧлі вына, ӧд найӧ лача кутісны батьясныслӧн Господь Ен вылӧ.
Авий вӧтчис Еровам бӧрся да босьтіс сылысь Вефиль, Ешана да Ефрон каръяс да нагӧгӧрса сиктъяс.
Авий веськӧдлан кадӧ Еровам эз нин вермы бӧр бергӧдны аслыс нималӧмсӧ.
Господь пасьвартіс Еровамӧс, и сійӧ куліс.
А Авийлӧн юралӧмыс зумыдмис.
Сылӧн вӧлі дас нёль гӧтыр, кызь кык пи да дас квайт ныв.
Авийлысь олӧмсӧ, сылысь уджъяссӧ да кывъяссӧ гижӧма Иддо пророклӧн гижӧдын.
Авий куліс да вуджис батьясыс дінӧ. Сійӧс дзебисны Давид карӧ.
Авий бӧрти ӧксыӧ пуксис сылӧн Аса пиыс.
Сылӧн юралігӧн дас во чӧж Иуда муын эз вӧв некутшӧм тыш.
Аса вӧчис аслас Господь Ен водзын бурсӧ да шогманасӧ.
Сійӧ бырӧдіс ылӧг енъяслы вӧчӧм висьпуктанінъяс да вись ваян мылькъяс, жугліс юрбитан изъяс да пӧрӧдіс юрбитан пуяс.
Сійӧ тшӧктіс Иуда войтырлы корсьны Господьӧс, асланыс батьяслысь Енсӧ, да вӧчны Сылӧн Индӧдыс да тшӧктӧмъясыс серти.
Иудаса став карысь сійӧ бырӧдіс вись ваян мылькъяс да тшынӧдчан висьпуктанінъяс.
Аса ӧксылӧн веськӧдлан кадӧ Иуда муын овсис лӧня.
Сійӧ воясӧ, кор Господь сетіс шойччӧг Иуда мулы, и сэні эз вӧвны тышъяс, Аса лэптіс изкаръяс.
Сійӧ шуис Иуда войтырлы: «Тайӧ каръяс гӧгӧрыс сувтӧдамӧй стенъяс да башняяс, вӧчамӧй дзиръяяс да тасъяс.
Муыс миян на, ӧд ми корсим Господьӧс, ассьыным Енмӧс. Ми корсим Сійӧс, и быд боксянь Сійӧ сетіс миянлы лӧнь олӧм».
Иуда войтыр лэптісны каръяс, и налӧн ставыс артмис.
Асалӧн вӧлі Иуда чужанкотырысь куимсё сюрс тышкаморт, кодъяслӧн вӧліны сайӧдъяс да шыяс. Нӧшта сылӧн вӧлі Венямин чужанкотырысь кыксё кӧкъямысдас сюрс тышкаморт, кодъяслӧн вӧліны сайӧдъяс да ньӧввужъяс. Ставныс найӧ вӧліны вына тышкасьысьяс.
Налы паныд тышӧ петіс Эфиопияысь Зерах. Сылӧн вӧлі миллион тышкаморт да куимсё тарантас.
Кор сійӧ матыстчис Мареша кар дорӧ, сылы паныд тышӧ петіс Аса. Асалӧн тышкайӧзыс дасьтысисны тыш кежлӧ Цефата ковтысын, Мареша кар дорын.
Аса шыасис аслас Господь Ен дінӧ: «Господьӧй, Тэ верман отсавны жеблы и выналы.
Господьӧй, миян Енмӧй, отсав миянлы! Ӧд Тэ вылӧ ми лача кутам, Тэнад нимӧн ми петім тайӧ лыдтӧм-тшӧттӧм йӧзыслы паныд.
Господьӧй, Тэ — миян Ен. Эн лэдз мортлы вермыны Тэнӧ».
Аса да иудаса тышкайӧз водзын Господь пасьвартіс эфиопияса тышкайӧзӧс, и найӧ пышйисны.
Аслас тышкайӧзкӧд Аса вӧтчис на бӧрся Герар карӧдз. Эфиопияысь локтӧм йӧзыс кулісны, эз коль на пӧвстысь весиг ловъя морт, ӧд Господь Аслас тышкайӧзкӧд пасьвартіс найӧс.
Иудаса тышкайӧзлы вичмис тышын зэв уна шедӧдӧмтор.
Найӧ пасьвартісны Герар гӧгӧрысь став карсӧ, ӧд сэні олысьяс пӧвстӧ Господь ыстіс ыджыд полӧм.
Иудаса тышкайӧз куштісны став тайӧ каръяссӧ да нуисны сэтысь зэв уна эмбур.
Нӧшта найӧ пазӧдісны ыж-мӧс видзысьяслысь чомъяссӧ да нуӧдісны аскӧдныс верблюдъясӧс да уна ыж, сэсся бӧр бергӧдчисны Ерусалимӧ.
Енлӧн Лолыс лэччис Одедлӧн Азарий пи вылӧ, и сійӧ муніс Аса дінӧ да шуис сылы: 
«Кывзы менӧ, Аса. Кывзӧй менӧ, Иуда да Венямин чужанкотыръяс. Господь лоӧ тіянкӧд, ті кӧ лоанныд Сыкӧд.
Ті кӧ кутанныд корсьны Сійӧс, Сійӧ воссяс тіянлы.
А эновтанныд кӧ Сійӧс, Сійӧ тшӧтш эновтас тіянӧс.
Дыр кад чӧж Израиль войтыр оліс збыль Ентӧг да Индӧдтӧг, налӧн эз вӧвны туйдӧдысь попъяс.
Но сьӧкыдалігӧн Израиль войтыр бергӧдчис аслас Господь Ен дінӧ, найӧ корсисны Сійӧс, и Енмыс воссис налы.
Сійӧ кадас ветлысь-мунысьяс полісны, ӧд сэтчӧс муясын олысьяс вӧлі шызьӧмаӧсь.
Войтыръяс тышкасисны ӧта-мӧдныскӧд, ӧти карын олысьяс тышкасисны мӧд карын олысьяскӧд. Енмыс мӧдӧдліс налы уна сьӧкыдлун, та вӧсна найӧ шызьывлісны.
Но ті лоӧй зумыдӧсь, энӧ лэдзӧй кинытӧ, ӧд уджъяссьыныд лоӧ тіянлы тырдон».
Кор Аса кыліс Азарий пророклысь тайӧ кывъяссӧ да пророкалӧмсӧ, сійӧ збоймис да бырӧдіс став зывӧк идолсӧ Иуда да Венямин муясысь, тшӧтш Ефрем керӧсвывса каръясысь, кодъясӧс сійӧ босьтіс тышын. Сійӧ дзоньталіс Господьлысь висьпуктанінсӧ, коді сулаліс Господьлӧн крам посводзлы воча.
Аса чукӧртіс Иуда да Венямин чужанкотыръяс, тшӧтш на пӧвстӧ Ефрем, Манассей да Симеон чужанкотыръясысь овмӧдчӧм йӧзӧс.
Ӧд Израиль войтыр пӧвстысь унаӧн сувтісны Аса дор, кор найӧ аддзисны, мый сыкӧд Господь, сылӧн Енмыс.
Найӧ чукӧртчисны Ерусалимӧ Асалӧн дас витӧд ӧксыалан воӧ коймӧд тӧлысьнас.
Сійӧ лунӧ Господьлы вись пыдди найӧ вайисны тышын шедӧдӧмаысь сизимсё ӧшкӧс да сизим сюрс ыжӧс.
Найӧ кӧрталісны Господькӧд, асланыс батьяслӧн Енкӧд йитӧд, кӧсйысисны став сьӧлӧмсянь корсьны Господьӧс да вины быдӧнӧс, коді оз кут корсьны Господьӧс, Израильлысь Енсӧ, том морт-ӧ сійӧ либӧ пӧрысь, айлов-ӧ сійӧ либӧ ань.
Гораа нимкодясьӧмӧн найӧ кыв сетісны Господьлы труба да буксан шы улӧ.
Став Иуда войтыр нимкодясис тайӧ кыв сетӧмсьыс, ӧд найӧ сьӧлӧмсяньныс кыв сетісны да корсисны Господьӧс, и Сійӧ воссис налы.
Господь быд боксянь сетіс налы лӧнь олӧм.
Аслас Маака пӧчыслы Аса ӧксы эз лэдз водзӧ лоны ӧксы-мамӧн, ӧд сійӧ сувтӧдіс Астарталы сиӧм зывӧк бӧлбанӧс.
Аса кераліс тайӧ зывӧк бӧлбансӧ торпыригӧдз да сотіс сійӧс Кедрон ковтысын.
Вись ваян мылькъяссӧ эз бырӧдны Израильысь, но та вылӧ видзӧдтӧг Асалӧн сьӧлӧмыс вӧлі йитчӧма Господькӧд став олӧм чӧжыс.
Сійӧ вайис Енлӧн крамӧ ассьыс да батьыслысь вежӧдӧм эзысь-зарнисӧ да дозмук-кӧлуйсӧ.
Асалӧн комын витӧд ӧксыалан воӧдз Иуда муын эз вӧвны тышъяс.
Асалӧн комын квайтӧд ӧксыалан воӧ израильса Ваас ӧксы уськӧдчис Иуда му вылӧ да лэптіс Рамаын изкар, медым некод эз вермы пырны Иуда муӧ Аса ӧксы дінӧ либӧ петны сы дінысь.
Аса босьтіс Господьлӧн крамса да ӧксы керкаса озырлун видзанінъясысь эзысь-зарни да мӧдӧдіс Дамаскӧ арамейяслӧн Бен-Хадад ӧксылы. Тшӧктіс висьтавны сылы:
«Тэа-меа костын йитӧдным мед лоӧ миян батьяслӧн кодь.
Ме ыста тэныд эзысь-зарни да кора орӧдны израильса Ваас ӧксыкӧд йитӧдтӧ, медым сійӧ ылыстчас менам муысь».
Бен-Хадад вӧчис Аса ӧксылӧн корӧм серти. Сійӧ мӧдӧдіс аслас тышкайӧзӧн веськӧдлысьясӧс израильса каръяслы паныд тышӧ. Найӧ пасьвартісны Ийон, Дан, Авел-Маим каръяс да Неффалим муысь став карсӧ, кӧні видзисны нянь да эмбур.
Ваас кор кыліс та йылысь, сійӧ дугдіс лэптыны Рама изкар, эновтіс ассьыс уджсӧ.
Аса ӧксы вайӧдіс сэтчӧ Иуда войтырӧс. Найӧ петкӧдісны сэтысь став изсӧ да керсӧ, мыйысь Ваас вӧлі лэптӧма изкарсӧ. Тайӧ изсьыс да керсьыс Аса лэптіс Гева да Миспа изкаръяс.
Сэки иудаса Аса ӧксы дінӧ локтіс Ханани нима пророк да шуис сылы: «Тэ шыасин отсӧгла арамейяслӧн ӧксы дінӧ, а эн аслад Господь Ен дінӧ. Та вӧсна арамса ӧксылӧн тышкайӧзыс оз лоны тэнад кипод улынӧсь.
Эфиопияса да ливияса тышкайӧзлӧн вӧлі лыдтӧм-тшӧттӧм тарантас да верзьӧма, но Господь сетіс найӧс тэнад киӧ, ӧд тэ лача кутін Господь вылӧ. Господьлӧн синмыс аддзӧ ставнас мусӧ. Сійӧ вынсьӧдӧ найӧс, кодъяслӧн сьӧлӧмныс йитчӧма Сыкӧд.
Тэ вӧчин мывкыдтӧма, та вӧсна ӧнісянь тэнад муын лоӧны тышъяс».
Аса ёна скӧрмис пророк вылӧ да йӧртіс сійӧс дзескыдінӧ. 
Войтырысь ӧткымынӧс Аса тшӧтш дзескӧдіс сійӧ кадас.
Аса ӧксыалӧм дырйи лоӧмторъяс йылысь водзысяньыс и помӧдзыс гижӧма иудаса да израильса ӧксыяслӧн небӧгӧ.
Комын ӧкмысӧд ӧксыалан воӧ Асалӧн чорыда висьмис кокыс, и висьӧмыс ёна топӧдіс сійӧс.
Но висигас сійӧ шыасис эз Господь дінӧ, а бурдӧдысьяс дінӧ.
Нелямын ӧтиӧд ӧксыалан воас Аса куліс да вуджис батьясыс дінӧ.
Сійӧс дзебисны Давид карӧ дзебанінӧ, мый сійӧ водзвыв вӧлі дасьтӧма аслыс.
Куйланіныс вӧлі тырӧма чӧскыд ӧвтанторъясӧн да мавтасъясӧн. Асаӧс казьтывлӧм могысь пестісны ыджыд бипур.
Аса бӧрти ӧксыӧ пуксис сылӧн Иосафат пиыс.
Сійӧ зумыдмӧдіс ассьыс мусӧ, медым израильсаяс эз вермыны сійӧс. Иосафат мӧдӧдіс ассьыс тышкайӧзсӧ иудаса став изкарӧ.
Сійӧ сувтӧдіс тышкакотыръясӧс Иуда му пасьтала да Ефрем чужанкотырлӧн каръясӧ, тайӧ каръяссӧ босьтліс сылӧн Аса батьыс.
Господь вӧлі Иосафаткӧд, ӧд сійӧ ветліс веськыд туйӧд, кыдзи сылӧн Давид пӧльыс вӧчис аслас медводдза ӧксыалан воясӧ. Иосафат эз юрбит Ваал идолъяслы, а корсис аслас батьыслысь Енсӧ да оліс Енлӧн тшӧктӧмъяс серти, а эз израильсаяс моз.
Господь ёнмӧдіс сылысь юралӧмсӧ. Иуда войтыр вайисны Иосафатлы козинъяс. Иосафатлӧн вӧлі уна озырлун, сійӧ ёна нималіс.
Став сьӧлӧмсяньыс сійӧ кывзысис Господьлысь.
Иуда муысь сійӧ бырӧдіс вись ваян мылькъяс да юрбитан пуяс.
Аслас коймӧд ӧксыалан воӧ Иосафат мӧдӧдіс ассьыс чина йӧзсӧ — Бен-Хаилӧс, Авдийӧс, Закарӧс, Нафанаилӧс да Микайӧс, медым Иуда каръясын найӧ велӧдісны войтырсӧ. Накӧд тшӧтш Иосафат мӧдӧдіс Шемай, Нетаний, Зевадай, Асаил, Шемирамот, Ионафан, Адоний, Товий да Тов-Адоний левитъясӧс, нӧшта Элишам да Иорам попъясӧс.
Найӧ велӧдісны Иуда войтырӧс. Иуда муысь став карсӧ кытшовтігӧн налӧн аскӧдныс вӧлі Господьлӧн Индӧд небӧг.
Иуда му гӧгӧр олысь войтыръяс пӧвстӧ Господь ыстіс ыджыд полӧм, та вӧсна найӧ эз лысьтны тыш панны Иосафаткӧд.
Филистимсаяс вайлісны Иосафатлы козинъяс да вот пыдди эзысь, арабъяс вайлісны сылы сизим сюрс сизимсё межӧс да сизим сюрс сизимсё ай кӧзаӧс.
Иосафатлӧн юралӧмыс ёнджыка на зумыдмис. Иуда муын сійӧ лэптіс изкаръяс, лэптіс нянь да эмбур видзӧм могысь каръяс.
Иуда каръясын сылӧн вӧлі уна тышкасян кӧлуй, но тышкайӧзыс олісны Ерусалимын.
Тані лыддьӧдлӧма Иосафатлысь тышкайӧзсӧ рӧдныс серти. Иуда чужанкотырысь тышкайӧзӧн веськӧдлісны Аднай, куимсё сюрс тышкамортлӧн юралысь, Иоханан, кыксё кӧкъямысдас сюрс тышкамортлӧн юралысь, да Зикрилӧн Амасий пиыс, кыксё сюрс тышкамортлӧн юралысь. Амасий сьӧлӧмсяньыс кесъяліс Господьлы.
Венямин чужанкотырысь тышкайӧзӧн веськӧдлісны Элиад нима вына тышкасьысь, кодлӧн кипод улын вӧлі кыксё сюрс ньӧввужъя да сайӧда тышкаморт, да Ехозавад, кодлӧн кипод улын вӧлі сё кӧкъямысдас сюрс тышкаморт. Став тайӧ тышкайӧзыс кесъялісны ӧксылы.
Наысь ӧтдор вӧліны тышкайӧз, кодъясӧс ӧксы индіс, медым найӧ кесъялісны иудаса изкаръясын.
Иосафатлӧн вӧлі уна озырлун, сійӧ ёна нималіс.
Сійӧ лои рӧдвужӧн Ахавлы.
Кымынкӧ во мысти Иосафат муніс Самарияӧ Ахав дінӧ.
Иосафатлы да сылӧн йӧзыслы Ахав начкис уна ыжӧс да ӧшкӧс. Ахав пондіс корны Иосафатӧс уськӧдчыны галаадса Рамот кар вылӧ.
Израильса Ахав ӧксы юаліс иудаса Иосафат ӧксылысь: «Мунан-ӧ тэ мекӧд Галаадӧ Рамот кар босьтны?»
Иосафат вочавидзис: «Ме муна тэ моз тышӧ. Менам тышкайӧзӧй мунасны тэнад тышкайӧзыд моз. Ме муна тэкӧд тышӧ».
Иосафат нӧшта шуис израильса ӧксылы: «Но медводз юав Господьлысь, мый Сійӧ шуас».
Израильса ӧксы чукӧртіс нёльсё пророкӧс да юаліс налысь: «Мый шуанныд, уськӧдчыны-ӧ миянлы галаадса Рамот кар вылӧ?»
Пророкъяс вочавидзисны: «Уськӧдчы. Енмыс сетас сійӧс тэнад киӧ, ӧксыӧй».
Иосафат юаліс: «Эм-ӧ тані нӧшта Господьлӧн пророк, кодлысь ми эськӧ вермим юавны?»
Израильса ӧксы вочавидзис Иосафатлы: «Эм нӧшта ӧти морт, код пыр ми вермам юавны Господьлысь.
Тайӧ Микей, Имлайлӧн пиыс. Но ме мустӧмта тайӧ мортсӧ. Сійӧ некор оз пророкав меным бурсӧ, а сӧмын лёксӧ».
Иосафат шуис: «Ӧксыӧй, тэныд оз позь тадзи сёрнитны».
Израильса ӧксы корис ыджыд чина мортӧс да шуис: «Ветлы да ӧдйӧджык вайӧд Имлайлысь Микей писӧ».
Израильса ӧксы да иудаса Иосафат ӧксы пукалісны ӧксы паськӧмӧн Самария карса дзиръя дорын изэрд вылын, быдӧн аслас юралан пуклӧсын. А пророкъяс ставныс пророкалісны на водзын.
Кенаанлӧн Седекей пиыс вӧчис аслыс кӧрт сюръяс да шуис: «Господь тадзи висьталӧ: “Тайӧ сюръяснас тэ люкалан арамейясӧс да бырӧдан найӧс”».
Тадзи пророкалісны тшӧтш мукӧд пророкъяс. Найӧ шуалісны: «Уськӧдчы галаадса Рамот кар вылӧ! 
Тэ верман. Господь сетас Рамот карсӧ тэнад киӧ, ӧксыӧй».
Микейла мӧдӧдӧм морт кор аддзис Микейӧс, шуис: «Пророкъяс ставныс юӧртӧны ӧксылы бурсӧ.
Тэнад юӧртӧмыд мед лоӧ налӧн кодь жӧ. Висьтав ӧксылы бурсӧ».
Микей вочавидзис: «Ловъя Господь водзын кыв сета: Енмӧй мый шуас меным, сійӧс и юӧрта».
Кор Микей локтіс ӧксы дінӧ, ӧксы юаліс: «Висьтав, Микей, уськӧдчыны-ӧ миянлы галаадса Рамот кар вылӧ?»
Мӧдыс вочавидзис: «Уськӧдчӧй. Ті верманныд. Рамотын олысьясӧс лоӧ сетӧма тіян киӧ».
Но ӧксы воча шуис сылы: «Кымынысь меным колӧ тшӧктыны, мед тэ кыв сетін, мый Господь нимсянь тэ висьталан меным сӧмын збыльсӧ?»
Сэки Микей кутіс висьтавны: «Ме аддзылі керӧсъяс пасьтала разалӧм Израиль войтырӧс. Найӧ вӧліны видзысьтӧг кольӧм ыжъяс кодьӧсь. Господь шуис: “Налӧн абу ыджыдыс. Найӧ мед повтӧг бӧр мунасны гортаныс”».
Израильса ӧксы шуис Иосафатлы: «Ме жӧ шулі, мый сійӧ некор меным бурсӧ оз пророкав, а сӧмын лёксӧ».
Микей водзӧ висьталіс: «Кывзӧй Господьлысь кывсӧ! Ме аддзылі Господьӧс, Сійӧ пукаліс Аслас юралан пуклӧсын. Сыкӧд орччӧн, шуйгаладорас и веськыдладорас, сулалісны енэжвывса тышкакотыръяс.
Господь юаліс: “Коді вермас ылӧдлыны израильса Ахав ӧксыӧс, медым сійӧ тышӧ петас да усяс галаадса Рамот карын?” 
Ӧти вӧзйис ӧтитор, мӧд — мӧдтор.
Сэки матыстчис ӧти лов, сувтіс Господь водзӧ да шуис: “Ме ылӧдла Ахавӧс”. 
“Кутшӧм ногӧн?” — юаліс Господь.
”Ме муна да кута висьтавлыны ылӧгсӧ сылӧн пророкъяс пыр”, — вочавидзис лов.
Господь шуис: “Ылӧдлы. Тэнад артмас.
Мун да вӧч тадзи!”
Ӧні тадзи и лоис — Господь лэдзис ылӧдлысь ловлы сёрнитны тэнад пророкъяс пыр. Господь шуис, мый тэнӧ виччысьӧ лёктор».
Кенаанлӧн Седекей пиыс матыстчис Микей дінӧ, кучкис сылы бан бокас да шуис: «Тэ чайтан, мый Господьлӧн лолыс эновтіс менӧ да кутіс сёрнитны тэ пыр?»
Микей воча шуис: «Тайӧс тэ гӧгӧрвоан сійӧ лунӧ, кор кутан котравны вежӧсысь вежӧсӧ да корсьны аслыд дзебсянін».
Израильса ӧксы шуис: «Нуӧдӧй Микейӧс карса юралысь Амон дінӧ да ӧксылӧн Йоас пи дінӧ. Шуӧй налы, мый ӧксы тшӧктӧ йӧртны Микейӧс дзескыдінӧ да сетны сылы сӧмын нянь да ва, кытчӧдз ӧксы бӧр оз лок тыш вылысь».
Микей шуис ӧксылы: «Тэ кӧ локтан тыш вылысь ловйӧн, сідзкӧ, эз Господь ме пыр сёрнит».
Нӧшта шуис: «Кывзӧй, войтыръяс!»
Израильса Ахав ӧксы да иудаса Иосафат ӧксы уськӧдчисны галаадса Рамот кар вылӧ.
Израильса ӧксы шуис Иосафатлы: «Ме пета тышӧ мӧд паськӧмӧн, мед менӧ оз тӧдны. А тэ пет аслад паськӧмнад».
Израильса ӧксы вежис паськӧмсӧ, и найӧ петісны тышӧ.
Арамейяслӧн ӧксы шуис аслас тарантаса тышкайӧзӧн веськӧдлысьяслы: «Тышкайӧзкӧд да налӧн веськӧдлысьяскӧд энӧ тышкасьӧй, а сӧмын израильса ӧксыкӧд».
Кор тарантаса тышкайӧзӧн веськӧдлысьяс аддзисны Иосафатӧс, чайтісны, мый сійӧ израильса ӧксы. Найӧ кытшалісны сійӧс, медым уськӧдчыны сы вылӧ.
Но Иосафат кутіс горзыны, и Господь отсаліс сылы. Енмыс ылыстіс найӧс сы дінысь.
Тарантаса тышкайӧзӧн веськӧдлысьяс аддзисны, мый сійӧ абу израильса ӧксы, да вешйисны сы дінысь.
Но ӧти тышкаморт зэвтіс ассьыс ньӧввужсӧ да ылӧсас лэдзис ньӧвсӧ. Ньӧвйыс сатшис израильса Ахав ӧксылы кӧрт паськӧм костӧдыс.
Ӧксы горӧдіс тарантасӧн веськӧдлысьлы: «Бӧр бергӧдчы! Петкӧд менӧ тыш вывсьыс! Менӧ дойдісны».
Чорыд тыш муніс сійӧ лунӧ.
Израильса ӧксы рытӧдзыс сулаліс аслас тарантасын арамейяслы воча, а шонді пуксигӧн сійӧ кувсис.
Иудаса Иосафат ӧксы ловйӧн бергӧдчис гортас, Ерусалимӧ.
Иосафат ӧксылы воча петіс Еху нима пророк, Хананилӧн пиыс, да шуис: «Мыйла тэ отсалін лёк вӧчысьлы? Мыйла тэ Господьӧс мустӧмтысьясӧс радейтан?
Таысь тэнӧ суас Господьлӧн скӧрлуныс.
Дерт, тэнад эм и бур уджъяс. Тэ бырӧдін Иуда муысь юрбитан пуяс да сьӧлӧмсяньыд корсин Енмӧс».
Иосафат оліс Ерусалимын.
Бер-Шевасянь да Ефрем керӧсвыв муӧдз сійӧ унаысь кытшовтіс мусӧ да аддзысьліс войтырыскӧд. Сійӧ бӧр бергӧдіс найӧс Господьлань, налӧн батьяслӧн Енлань.
Иуда муын Иосафат индіс ёрдысьясӧс быд изкарӧ. Сійӧ шуис ёрдысьяслы: «Видзӧдӧй ас бӧрсяныд, мый ті вӧчанныд, ӧд мортӧс мыждӧмысь ті кывкутанныд онӧ йӧз водзын, а Господь водзын.
Господь лоӧ тіянкӧд ёрд вылын.
Полӧй Господьысь, ставсӧ вӧчӧй веськыда, ӧд Господь, миян Енным, мустӧмтӧ пӧръясьӧм, леститчӧм да козин босьтӧм».
Ерусалимын Иосафат тшӧтш индіс левитъясӧс, попъясӧс да израильса рӧдкутысьясӧс веськыда мыждыны Господьлӧн Индӧд серти да видлавны Ерусалимын олысьяслысь веньзӧмъяс.
Иосафат шуис налы: «Ставсӧ вӧчӧй сьӧлӧмсяньныд, веськыда да Господьысь полӧмӧн.
Кор мукӧд каръясын олысь вокъясныд локтасны тіян дінӧ вир кисьтӧм понда либӧ индӧд-тшӧктӧм торкӧм йылысь вензьӧмъясӧн, сэки туйдӧдӧй-ӧлӧдӧй найӧс. Тадзи кӧ вӧчанныд, найӧ оз мыжмыны Господь водзын, ті тшӧтш онӧ мыжмӧй, и Господьлӧн скӧрлуныс оз су тіянӧс да вокъяснытӧ.
Амарей аркирей мед кывкутас Господьлы кесъялӧм вӧсна, а Измаиллӧн Зевадай пиыс, Иуда чужанкотырлӧн юралысь, мед кывкутас ӧксылы кесъялӧм вӧсна. Левитъяс мед отсасясны тіянлы.
Лоӧй зумыдӧсь, кутчысьӧй уджӧ! Господь мед лоас бурсӧ вӧчыськӧд!»
Кутшӧмкӧ кад мысти Иосафатлы паныд тышӧ петісны моав да аммон войтыръяс, накӧд тшӧтш тышӧ петісны маонсаяс пӧвстысь ӧткымын морт.
Иосафатлы юӧртісны: «Сола саридз сайысь, Эдомысь, тэныд паныд локтӧ лыдтӧм-тшӧттӧм тышкайӧз. Найӧ воӧмаӧсь нин Хацацон-Тамарӧ». Мӧд ногӧн кӧ, тайӧ лоӧ Эн-Геди.
Иосафат повзис. Сійӧ шыасис Господь дінӧ, а Иуда муын олысьяслы тшӧктіс видзавны.
Иуда войтыр чукӧртчис, медым корны Господьлысь отсӧг.
Иудаса быд карысь локтісны йӧз, медым кевмысьны Господьлы.
Иосафат сувтіс Иудаысь да Ерусалимысь локтӧм-чукӧртчӧм войтыр водзӧ, Господьлӧн крамса выль йӧрӧ. Иосафат кевмысис: «Господьӧй, миян батьяслӧн Енмӧй!
Тэ — енэжъяс вылын олысь Ен, Тэ веськӧдлан став войтыръясӧн. Тэнад киын выныс да ыджыдалӧмыс, некод оз вермы водзсасьны Тэкӧд.
Миян Енмӧй, Тэ вӧтлін тайӧ муас олысьясӧс Аслад Израиль войтыр водзысь да пыр кежлӧ сетін тайӧ мусӧ Аслад Ӧвраам ёртсянь чужысьяслы.
Найӧ овмӧдчисны татчӧ да лэптісны крам, медым сэні вӧлі Тэнад нимыд. Найӧ шуисны:
”Миянӧс кӧ суас сьӧкыдлун, тыш, пӧрӧс висьӧм либӧ тшыглун, сэки ми сувтам Тэ водзӧ да тайӧ крамыс водзӧ, кӧні Тэнад нимыд.
Сьӧкыдаліганым ми шыасям Тэ дінӧ, и Тэ кылан да мездан миянӧс”.
Ӧні татчӧ локтӧны аммон войтыр, моавсаяс да Сеир керӧсвыв муын олысьяс. Кор израильсаяс локтісны Египет муысь, Тэ эн лэдз налы мунны тайӧ войтыръяслӧн муясӧд. Та вӧсна израильсаяс ордйисны налысь муяссӧ да эз бырӧдны найӧс. Но ӧні найӧ мынтысьӧны миянлы — кӧсйӧны вӧтлыны миянӧс Тэнад муысь, мый Тэ вичмӧдін миянлы.
Миян Енмӧй, мыжды найӧс.
Ми абу сэтшӧм вынаӧсь, медым вермим паныд сувтны тайӧ уна лыда тышкайӧзыслы. Ми огӧ тӧдӧй, мый миянлы вӧчны, но Тэлань ми кыпӧдам синнымӧс!»
Став Иуда войтырыс сулаліс Господь водзын, накӧд тшӧтш вӧліны гӧтыръясныс да челядьныс.
Чукӧртчӧм йӧз пӧвстын Господьлӧн Лолыс лэччис Асаф рӧдысь Яхазиэл нима левит вылӧ. Яхазиэл вӧлі Закарлӧн пи, Закар — Бенайлӧн, Бенай — Евэллӧн, Евэл — Маттанайлӧн. Яхазиэл шуис: «Иуда войтыр, Ерусалимын олысьяс да Иосафат ӧксы, кывзӧй!
Господь тіянлы тадзи висьталӧ. Энӧ полӧй да энӧ тіралӧй тайӧ уна лыда тышкайӧзсьыс, ӧд тайӧ тышыс абу тіян, а Енмыслӧн.
Аски петӧй налы паныд тышӧ. Найӧ каясны Циц керӧс вылӧ, и ті паныдаланныд найӧс ковтыс помас, Еруэл овтӧминсянь асыввылын.
Энӧ тышкасьӧй накӧд, сӧмын сулалӧй да видзӧдӧй, кыдзи Господь мездас тіянӧс.
Иудаын да Ерусалимын олысьяс, энӧ полӧй да энӧ тіралӧй!
Петӧй аски налы паныд. Господь лоӧ тіянкӧд».
Иосафат копыртчис муӧдзыс, став Иуда войтырыс да Ерусалимын олысьяс тшӧтш уськӧдчисны Господь водзӧ, медым юрбитны Сылы.
Кааф да Корей рӧдъясысь левитъяс сувтісны да пондісны гораа ошкыны Господьӧс, Израильлысь Енсӧ.
Иосафатлӧн тышкайӧзыс чеччисны водз асывнас да мӧдӧдчисны Текоя овтӧминлань.
Кор найӧ мӧдӧдчисны, Иосафат сувтіс да шуис: «Кывзӧй менӧ, Иуда войтыр да Ерусалимын олысьяс!
Эскӧй Господьлы, асланыд Енлы, да лоӧй зумыдӧсь.
Эскӧй Сылӧн пророкъяслы, и тіян лоӧ вермӧм».
Войтырыскӧд сёрнитчӧм бӧрын Иосафат индіс сьылысьясӧс, медым найӧ вежа паськӧмӧн мунісны тышкайӧз водзын да ошкисны Господьӧс тайӧ кывъяснас: Ошкӧй Господьӧс, ӧд Сылӧн буралӧмыс оз помасьлы!
Кор сьылысьяс пондісны нимкодясьӧмӧн гораа ошкыны Господьӧс, сэки Господь мӧдӧдіс йӧзӧс уськӧдчыны аммонсаяс, моавсаяс да Сеир керӧсвыв муын олысьяс вылӧ, кодъяс кӧсйисны уськӧдчыны Иуда вылӧ.
Но Господь пасьвартіс Иудалысь вӧрӧгсӧ, ӧд аммонсаяс да моавсаяс уськӧдчисны Сеир керӧсвыв муын олысьяс вылӧ. Найӧс бырӧдӧм бӧрын аммонсаяс да моавсаяс пондісны виавны ӧта-мӧднысӧ.
Кор иудаса тышкайӧз кайисны овтӧминса керӧс вылӧ, медым сэсянь видзӧдлыны да уськӧдчыны вӧрӧг вылӧ, вылісяньыс аддзисны сӧмын шойяс, некод абу вӧлі ловйӧн кольӧма.
Кор Иосафат аслас тышкайӧзкӧд пондісны чукӧртны вӧрӧглысь эмбурсӧ, найӧ аддзисны уна кӧлуй, паськӧм да озырлун. Найӧ чукӧртісны аслыныс сы мында, мый эз вермыны весиг нунысӧ.
Эмбурыс вӧлі зэв уна, сійӧс ковмис чукӧртны куим лун чӧж.
Нёльӧд луннас найӧ чукӧртчисны Берака ковтысын, и сэні найӧ ошкисны Господьӧс.
Та вӧсна ӧнӧдз тайӧ ковтыссӧ шуӧны Берака* ковтысӧн.
Иосафатлӧн веськӧдлӧм улын иудаса да ерусалимса став тышкайӧзыс бӧр бергӧдчисны Ерусалимӧ нимкодясьӧмӧн, ӧд налысь вӧрӧгсӧ пасьвартӧм вӧсна Господь сетіс налы помка гажӧдчыны.
Арфа, гусли да труба ворсан шы улӧ найӧ локтісны Ерусалимӧ да пырисны Господьлӧн крамӧ.
Став муясын олысьяс кутісны повны Енсьыс, кор найӧ кылісны, мый Ачыс Господь тышкасис Израильлӧн вӧрӧгкӧд.
Иосафат ӧксылӧн му вылӧ пуксис лӧнь олӧм, сылӧн Енмыс быд боксянь сетіс сылы лӧньлун.
Иосафат ӧксы юраліс Иуда муын. Ӧксыӧ пуксигас сылы вӧлі комын вит арӧс. Кызь вит во чӧж сійӧ юраліс Ерусалимын.
Сылӧн мамыс вӧлі Азува, Шилхилӧн нылыс.
Иосафат ветліс Аса батьыслӧн туйӧд да эз кежлыв сэтысь. Сійӧ вӧчис Господь водзын шогманасӧ.
Но сійӧ эз бырӧд вись ваян мылькъяс, и войтырыс эз став сьӧлӧмсяньыс кесъяв аслас батьяслӧн Енлы.
Иосафат ӧксыалӧм дырйи лоӧмторъяс йылысь водзысяньыс и помӧдзыс пасъялӧма Ханани Ехулӧн гижӧдын, мый пыртӧма израильса ӧксыяслӧн небӧгӧ.
Бӧрынджык иудаса Иосафат ӧксы кӧрталіс йитӧд израильса Ахазий ӧксыкӧд, коді вӧчис лёксӧ. Найӧ сёрнитчисны вӧчны корабльяс, медым мӧдӧдны найӧс Фарсисӧ.
Корабльяссӧ вӧчисны Эцион-Геверын.
Но Элизер, Мареша карысь Додавлӧн пиыс, пророкаліс Иосафат йылысь: «Тэ кӧрталін йитӧд Ахазийкӧд, та вӧсна Господь жугӧдас тэнсьыд вӧчӧмтортӧ».
Корабльяс жугалісны, Фарсисӧдз эз воны.
Иосафат куліс да вуджис батьясыс дінӧ. Сійӧс дзебисны Давид карӧ батьясыскӧд орччӧн.
Иосафат бӧрти ӧксыӧ пуксис сылӧн Иорам пиыс.
Иорамлӧн вӧліны Азарий, Ехиэл, Закар, Азарий, Микаил да Шефатай нима вокъяс. Ставныс найӧ вӧліны израильса Иосафат ӧксылӧн пиян.
Батьыс лышкыда козьналіс налы зарни, эзысь да мукӧд дона козинъяс. Сетіс налы тшӧтш Иуда муысь изкаръяс.
Но юралӧмсӧ Иосафат сетіс Иорамлы, аслас медводдза пилы.
Кор батьыс бӧрти Иорам пуксис ӧксыӧ да зумыдмӧдіс ассьыс юралӧмсӧ, сійӧ виис шыпуртӧн став ассьыс воксӧ да ӧткымын израильса юралысьӧс.
Ӧксыӧ пуксигас Иорамлы вӧлі комын кык арӧс. Кӧкъямыс во чӧж сійӧ юраліс Ерусалимын.
Иорам ветліс израильса ӧксыяслӧн туйӧд. Сылӧн гӧтырыс вӧлі Ахавлӧн нылыс, та вӧсна Ахав рӧд моз сійӧ вӧчис Господь водзын шогмытӧмсӧ.
Но Господь эз кӧсйы бырӧдны Давидлысь рӧдсӧ, ӧд Сійӧ вӧлі кӧрталӧма Давидкӧд йитӧд да кӧсйысьӧма, мый Давидсянь чужысь кутас юравны нэмъяс чӧж.
Иудаса Иорам ӧксылӧн веськӧдлан кадӧ эдом войтыр кыпӧдчис сылы паныд да пуктіс аслыс ӧксыӧс.
Иорам аслас тарантаса тышкайӧзкӧд да наӧн веськӧдлысьяскӧд петіс тышӧ эдомсаяслы паныд.
Эдомса тышкайӧз кытшалісны Иорамӧс да тарантаса тышкайӧзӧн веськӧдлысьяссӧ, но войнас Иорам пасьвартіс найӧс. [Эдомсаяс пышйисны асланыс гортӧ.]
Эдом войтыр мыніс Иуда кипод улысь, и ӧнӧдз тайӧ тадз.
Сійӧ жӧ кадӧ иудаса ӧксылы паныд кыпӧдчисны тшӧтш Ливна карын олысьяс. Тадзи лои, ӧд Иорам эновтіс Господьӧс, аслас батьяслысь Енсӧ.
Иуда керӧсвыв муын Иорам вӧчис вись ваян мылькъяс. Сылӧн веськӧдлӧм улын Ерусалимын олысьяс кырсалысь ань моз сетчисны идолъяслы, тадзи сійӧ кежӧдіс Иуда войтырӧс веськыд туй вылысь.
Иорамлы вайисны Илля пророксянь гижӧд. Сэні вӧлі гижӧма: 
«Господь, Давид пӧльыдлӧн Ен, тадзи висьталӧ: “Аслад Иосафат батьыдлӧн да иудаса Аса ӧксылӧн туйӧд тэ он ветлы, а ветлан израильса ӧксыяслӧн туйӧд. Тэ кежӧдін Иуда войтырӧс да Ерусалимын олысьясӧс кырсалысь ань моз сетчыны идолъяслы да овны Ахав рӧд моз. Ассьыд вокъястӧ, батьыдлысь пиянсӧ, кодъяс вӧліны тэысь бурджыкӧсь, тэ виин. Таысь Господь мӧдӧдас ыджыд мыждӧм тэнад войтырыд вылӧ, тэнад пияныд да гӧтыръясыд вылӧ, став тэнад овмӧсыд вылӧ. Асьтӧ тэнӧ Господь дойдас пытшкӧсса сьӧкыд висьӧмӧн. Лунысь-лун тэ пондан висьны, кытчӧдз тэнад гырк пытшкӧсыд ортсӧ оз пет”».
Филистимсаяс да арабъяс пӧвстын, кодъяс олісны эфиопияса йӧзкӧд орччӧн, Господь кыпӧдіс лӧглун Иорам вылӧ.
Найӧ уськӧдчисны Иуда му вылӧ, пырисны сэтчӧ да куштісны ӧксылысь керкасӧ. Найӧ босьтісны аскӧдныс Иорамлысь пиянсӧ да гӧтыръяссӧ.
Ичӧтджык Иохаз пиыс кындзи сылӧн пиян пӧвстысь некод эз коль.
Та бӧрти Господь мӧдӧдіс Иорамлы кулана пытшкӧсса висьӧм.
Лунысь-лун сійӧ сьӧкыда висис, а мӧд во помасигас сылӧн гырк пытшкӧсыс висьӧмысла ортсӧ петіс. Сійӧ куліс ёна сьӧкыдалӧмӧн.
Казьтывлӧм могысь сылӧн батьяслы моз войтырыс эз песты сылы бипур.
Ӧксыӧ пуксигас Иорамлы вӧлі комын кык арӧс. Кӧкъямыс во чӧж сійӧ юраліс Ерусалимын. Сылӧн кулӧм вӧсна некод эз бӧрд. Сійӧс дзебисны Давид карӧ, но эз ӧксыяслӧн дзебанінӧ.
Ерусалимса олысьяс Иорам бӧрти ӧксыӧ пуктісны Ахазийӧс, иудаса Иорам ӧксылысь медічӧт писӧ, ӧд сылысь ыджыдджык пиянсӧ виисны арабъяскӧд локтӧм йӧз, кодъяс уськӧдчисны иудаса тышкайӧз вылӧ. Та вӧсна Ахазий лои ӧксыӧн.
Ӧксыӧ пуксигас сылы вӧлі кызь кык арӧс. Ӧти во чӧж сійӧ юраліс Ерусалимын.
Сылӧн мамыс вӧлі Аталия, Омрилӧн нылыс.
Ахазий ветліс Ахав рӧдлӧн туйӧд, ӧд сылӧн мамыс веськӧдіс сійӧс лёкас.
Ахав рӧд моз Ахазий вӧчис Господь водзын шогмытӧмсӧ, ӧд сійӧс туйдӧдысьясӧн батьыслӧн кулӧм бӧрын вӧліны Ахавсянь чужысьяс. Тайӧ вайӧдіс сійӧс кулӧмӧдз.
Налӧн туйдӧдӧм серти израильса Иорам ӧксыкӧд, Ахавлӧн пикӧд, Ахазий петіс тышӧ арамейяслӧн Азаил ӧксылы паныд.
Найӧ тышкасисны галаадса Рамот карын, кӧні арамейяс дойдісны Иорамӧс. Медым бурдны тайӧ дойяссьыс, Иорам бӧр локтіс Изреельӧ.
Иудаса Ахазий ӧксы локтіс Изреельӧ видлыны доймалӧм Иорам ӧксыӧс.
Но Енмыслӧн вӧлі шуӧма, мый Иорам дінӧ Ахазийлӧн локтӧмыс вайӧдас сійӧс кулӧмӧдз. Локтӧм бӧртиыс Ахазий Иорамкӧд мунісны Нимшилӧн Еху пи дінӧ, кодӧс Господь вӧлі мавтыштӧма, медым сійӧ бырӧдас Ахавлысь рӧдсӧ.
Ахавлысь рӧдсӧ бырӧдігӧн Еху паныдасис иудаса юралысьяскӧд да Ахазий вокъяслӧн пиянкӧд, кодъяс кесъялісны Ахазийлы. Еху виис тшӧтш найӧс.
Сэсся Еху тшӧктіс корсьны Ахазийӧс, коді вӧлі дзебсясьӧ Самарияын. Аддзӧм бӧрын сійӧс вайӧдісны Еху дінӧ да виисны. Ахазийӧс дзебисны сӧмын сылӧн Иосафат пӧль вӧснаыс, коді став сьӧлӧмсяньыс корсис Господьӧс.
Ахазийлӧн рӧдысь некод эз коль, коді эськӧ вермис пуксьыны ӧксыӧ.
Ахазийлӧн Аталия мамыс кор тӧдмаліс пиыслӧн кулӧм йылысь, шуис бырӧдны иудаса ӧксы рӧдысь став писӧ.
Но Ахазийлӧн Ехошева нима чойыс, Иорам ӧксылӧн нылыс, гусьӧн пышйӧдіс Ахазийлысь Йоас писӧ ӧксылӧн мукӧд пиян пӧвстысь, кодъясӧс вӧлі шуӧма вины. Йоасӧс да сійӧс нёньӧдысьӧс Ехошева дзебис узьлан жырйӧ.
Татшӧм ногӧн Ехошева, Иодай поплӧн гӧтырыс, мездіс Йоасӧс Аталия киысь, и Аталия эз вермы вины Йоасӧс.
Квайт во чӧж Йоасӧс дзеблалісны Енлӧн крамын.
Тайӧ кадас Иуда муын ӧксыаліс Аталия.
Квайт во мысти Иодай поп повтӧг кӧрталіс йитӧд тышкайӧзӧн веськӧдлысьяскӧд: Ерохамлӧн Азарий пикӧд, Иохананлӧн Измаил пикӧд, Овидлӧн Азарий пикӧд, Адайлӧн Маасей пикӧд да Зикрилӧн Элишафат пикӧд.
Найӧ кытшовтісны Иуда му да иудаса быд карысь чукӧртісны левитъясӧс да израильса рӧдкутысьясӧс Ерусалимӧ.
Енлӧн крамын став чукӧртчӧм йӧзыс кӧрталісны йитӧд ӧксыкӧд.
Иодай поп шуис налы: «Со, Йоас, ӧксылӧн пиыс. Сійӧс колӧ пуктыны ӧксыӧ, ӧд тадзи Господь висьталіс Давидсянь чужысьяс йылысь.
Локтана шойччан лунӧ крамын кесъялысь попъясысь да левитъясысь коймӧд юкӧныс мед видзас крамӧ пыран ӧдзӧсъяс, нӧшта коймӧд юкӧныс мед видзас ӧксылысь керкасӧ, и бӧръя коймӧд юкӧныс мед видзас Есод* нима дзиръя. Став войтырыс мед лоас Господьлӧн крам йӧрын.
Попъяс да сійӧ лунӧ кесъялысь левитъяс кындзи некод мед оз пыр Господьлӧн крамӧ.
А налы позьӧ пырны, ӧд найӧ вежӧдӧмаӧсь-сӧстӧммӧдӧмаӧсь асьнысӧ.
Но став войтырыслы Господьлӧн тшӧктӧм серти колӧ лоны крам ортсыас.
Левитъяс мед кытшаласны-видзасны ӧксыӧс быд боксянь, налӧн кианыс мед лоӧ шыпурт. Виӧй быдӧнӧс, коді кутас пырны крамӧ.
Видзӧй ӧксыӧс быдлаын, кытчӧ сійӧ мунас».
Левитъяс да Иуда войтыр ставсӧ вӧчисны сідзи, кыдзи тшӧктіс Иодай поп.
Быд веськӧдлысь чукӧртіс ассьыс йӧзсӧ — найӧс, кодъяслы колӧ вӧлі кесъявны крамын шойччан лунӧ, и найӧс, кодъясӧс колӧ вӧлі вежны кесъялӧм бӧртиныс. Иодай поп некодӧс эз лэдз мунны гортас.
Тышкайӧзӧн веськӧдлысьяслы Иодай поп сетіс Енлӧн крамысь шыяс да сайӧдъяс, кодъяс коркӧ вӧліны Давид ӧксылӧн.
Ӧксыӧс видзӧм могысь Иодай сувтӧдіс тышкайӧзӧс крам ортсыас веськыдладор стенсянь шуйгаладор стенӧдз да висьпуктанін водзӧ.
Быдӧн вӧлі дась тышкасьны.
Ӧксылысь Йоас писӧ петкӧдісны крамысь, пуктісны сылы юр вылас юркытш да сетісны сылы Индӧд небӧг. Сэсся пуктісны сійӧс ӧксыӧ.
Иодай поп да сылӧн пияныс мавтыштісны Йоасӧс. Войтырыс горзіс: «Мед олас ӧксы!»
Аталия кор кыліс войтырлысь котӧртӧм шы да ӧксыӧс ошкӧм, локтіс войтырыс дінӧ Господьлӧн крамӧ. Сэні аддзис, мый крамӧ пыранінын джуджыд пос вылын сулалӧ ӧксы. Сыкӧд орччӧн сулалісны тышкайӧзӧн веськӧдлысьяс да трубаӧн ворсысьяс. Став войтырыс нимкодясис, сьылысьяс ворсісны да сьылісны ошкана сьыланкывъяс.
Сэки Аталия косяліс ассьыс паськӧмсӧ да горӧдіс: «Вузалісны! Менӧ вузалісны!»
Иодай поп ӧлӧдіс тышкайӧзӧн веськӧдлысьясӧс Господьлӧн крамын Аталияӧс виӧмысь. Сійӧ тшӧктіс веськӧдлысьяслы петкӧдны Аталияӧс крамысь, а быдӧнӧс, коді мунас Аталия бӧрся, тшӧктіс вины шыпуртӧн.
Аталияӧс петкӧдісны дзиръя дорӧ, кыті вӧвъясӧн пырлісны ӧксылӧн керка йӧрӧ, и сэні сійӧс виисны.
Иодай поп кӧрталіс став войтырыскӧд да ӧксыкӧд йитӧд сы йылысь, мый найӧ — Господьлӧн войтыр.
Став войтырыс муніс Вааллы юрбитанінӧ да жугӧдіс сійӧс. Найӧ торпыригӧдз жуглісны висьпуктанінъяс да бӧлбанъяс, а Вааллысь Маттан нима попӧс виисны висьпуктанін водзас.
Иодай индіс попъясӧс да левитъясӧс тӧждысьны Господьлӧн крам вӧсна [да тшӧктіс, кодлы кор кесъявны]. Мӧисейлӧн Индӧд серти Давид вӧлі индӧма найӧс вайны крамын сотан висьяс Господьлы, тайӧс колӧ вӧлі вӧчны сьылӧмӧн-нимкодясьӧмӧн.
Господьлӧн крам дзиръяяс дорӧ Иодай сувтӧдіс видзысьясӧс, медым крамӧ эз пыр некод, коді абу вӧлі сӧстӧммӧдчӧма.
Иодай поп босьтіс аскӧдыс тышкайӧзӧн веськӧдлысьясӧс, тӧдчана йӧзӧс, войтырӧн веськӧдлысьясӧс да став войтырсӧ и нуӧдіс Йоас ӧксыӧс Господьлӧн крамысь. Найӧ пырисны Вылыс дзиръяӧд ӧксы керкаӧ. Сэні пуксьӧдісны ӧксыӧс юралан пуклӧсӧ.
Став войтырыс нимкодясис. Аталияӧс виӧм бӧрти карас пуксис лӧньлун.
Ӧксыӧ пуксигас Йоаслы вӧлі сизим арӧс. Нелямын во чӧж сійӧ юраліс Ерусалимын.
Сылӧн мамыс вӧлі Бер-Шеваысь Цивия.
Иодай поплӧн олан кадӧ Йоас вӧчис Господь водзын шогманасӧ.
Иодай бӧрйис Йоаслы кык гӧтырӧс, и найӧ чужтісны Йоаслы ныв-пиӧс.
Кутшӧмкӧ кад мысти Йоаслы воис сьӧлӧм вылас, мый колӧ дзоньтавны Господьлысь крамсӧ. Йоас чукӧртіс попъясӧс да левитъясӧс да шуис налы: «Мунӧй Иуда каръясӧ да чукӧртӧй став Израиль войтырлысь сьӧм, медым позис дзоньтавны тіян Енлысь крамсӧ быд во. Вӧчӧй тайӧс ӧдйӧджык».
Но левитъяс эз тэрмасьны тайӧс вӧчнысӧ.
Та вӧсна Йоас корис ас дінас Иодай аркирейӧс да юаліс сылысь: «Мыйла тэ он тшӧкты левитъяслы, медым найӧ Иудаын да Ерусалимын олысьяслысь чукӧртісны вот? Ӧд Мӧисей, Господьлӧн кесйӧг, да Израиль войтыр тшӧктылісны чукӧртны сьӧм вежа чом вылӧ.
Ентӧг олысь Аталия да сылӧн йӧзыс куштісны-пазӧдісны Енлысь крамсӧ. Найӧ босьтісны крамысь став вежа дозмук-кӧлуйсӧ да вӧдитчисны сыӧн Ваал идолъяслы кесъялӧм могысь».
Ӧксылӧн тшӧктӧм серти вӧчисны куд да пуктісны сійӧс Господьлӧн крам пыранінӧ.
Иудаын да Ерусалимын олысьяслы вӧлі юӧртӧма, мый налы колӧ мынтыны Господьлы вот. Ӧд овтӧминын на Мӧисей, Енлӧн кесйӧг, сетіс Израиль войтырлы вот мынтӧм йылысь тшӧктӧм.
Юралысьяс да став войтырыс нимкодьпырысь вайисны сьӧм да пукталісны кудйӧ, кытчӧдз кудйыс эз тыр.
Кор левитъяс вайлісны сьӧм кудсӧ ӧксылӧн чина йӧзлы, и найӧ аддзылісны, мый кудъяс сьӧмыс уна нин, сэки волісны ӧксылӧн гижалысь да аркирейлӧн отсасьысь, ректывлісны кудсӧ да бӧр нулісны ас местаас.
Тадзи найӧ вӧчлісны лунысь-лун да чукӧртісны зэв уна сьӧм.
Йоас ӧксы да Иодай поп сетлісны тайӧ сьӧмсӧ налы, кодъяс кывкутісны Господьлысь крамсӧ дзоньталӧм вӧсна. Найӧ медавлісны из кералысьясӧс, тшупсьысьясӧс да кӧртысь-ыргӧнысь вӧчасьысьясӧс, медым дзоньтавны Господьлысь крамсӧ.
Уджалысьяс босьтчисны уджӧ, дзоньталӧмыс муніс лючки бура. Найӧ дзоньталісны-зумыдмӧдісны Енлысь крамсӧ, и сійӧ лои важыс кодь.
Дзоньталӧмсӧ помалӧм бӧрын сьӧмсӧ, мый коли, вайисны Йоас ӧксылы да Иодай поплы.
Тайӧ сьӧм вылас вӧчисны Господьлӧн крамын кесъялӧм вылӧ да вись вайӧм вылӧ дозмук-кӧлуй да зарни-эзысьысь мукӧд дозмук-кӧлуй.
Иодай поплӧн олан лунъяс чӧжыс Господьлӧн крамын вайлісны сотан висьяс.
Иодай поп пӧрысьмис да кувсис олӧмнас пӧтӧмаӧн. Кулігас сылы вӧлі сё комын арӧс.
Сійӧс дзебисны Давид карӧ, ӧксыяскӧд орччӧн, ӧд сійӧ бурсӧ вӧчис Израиль войтырлы, Енмыслы да Сылӧн крамлы.
Иодай поплӧн кулӧм бӧрын иудаса юралысьяс локтісны копыртчывны Йоас ӧксылы.
Тайӧ кадсяньыс ӧксы пондіс кывзыны найӧс.
Найӧ эновтісны Господьлысь крамсӧ, асланыс батьяслӧн Енлысь крамсӧ, да пондісны юрбитны пуяслы да идолъяслы. Тайӧ мыжсьыс Иудаын да Ерусалимын олысьяс вылӧ киссис Енлӧн скӧрлуныс.
Господь мӧдӧдліс на дінӧ пророкъясӧс, медым бергӧдны найӧс Ас дінас. Пророкъяс ӧлӧдлісны найӧс, но найӧ эз кывзыны.
Енлӧн Лолыс лэччис Иодай поплӧн Закар пи вылӧ. Закар сувтіс войтырыс водзӧ содъя пос вылӧ да шуис налы: «Господь тадзи висьталӧ: “Мыйла ті торкаланныд Господьлысь тшӧктӧмъяссӧ?
Тіян олӧманыд нинӧм оз кут артмыны.
Ті эновтінныд Господьӧс, сідзкӧ, Сійӧ тшӧтш эновтас тіянӧс”».
Войтырыс сувтіс Закарлы паныд. Йоас ӧксылӧн тшӧктӧм серти Господьлӧн крам йӧрын сійӧс кувтӧдзыс изъялісны.
Йоас ӧксы вунӧдіс Закарлӧн Иодай батьыслысь сылы бур вӧчӧм йылысь да виис Иодайлысь писӧ.
Кулігас Закар шуис: «Господь аддзӧ тайӧс, Сійӧ мед водзӧс перъяс!»
Во мысти Йоаслы паныд тышӧ петісны арамейяс. Найӧ пырисны Иуда муӧ да Ерусалимӧ, бырӧдісны сэні войтырыслысь став юралысьсӧ, а тышын став шедӧдӧмторсӧ мӧдӧдісны ӧксылы Дамаскӧ.
Арамейяс вӧліны этшаӧнӧсь, но Господь сетіс на киӧ уна лыда иудаса тышкайӧзӧс сыысь, мый Иуда войтыр эновтісны Господьӧс, асланыс батьяслысь Енсӧ.
Тадзи арамейяс олӧмӧ пӧртісны Енлысь мыждӧмсӧ, мый вӧлі дасьтӧма Йоаслы. Кор арамейяс мунісны, колисны Йоасӧс ёна дойдалӧмаӧн. Сэки Йоаслӧн кесйӧгъясыс сёрнитчисны сылысь водзӧс перйыны Иодай поплысь писӧ виӧмысь. Кесйӧгъясыс виисны Йоасӧс вольпасяс. Йоас куліс, и сійӧс дзебисны Давид карӧ, но эз ӧксыяслӧн дзебанінӧ.
Йоасӧс виысьяс вӧліны Завад, аммон войтырысь Шимеата аньлӧн пиыс, да Ехозавад, моавса Шимрита аньлӧн пиыс.
Йоаслӧн пияныс йылысь да Енлысь крамсӧ дзоньталӧм йылысь гижӧма ӧксыяслӧн небӧгӧ. Сэтчӧ гижӧма тшӧтш Йоасӧс мыждӧм йылысь уна водзвыв висьталӧм.
Йоас бӧрти ӧксыӧ пуксис сылӧн Амасей пиыс.
Ӧксыӧ пуксигас Амасейлы вӧлі кызь вит арӧс. Кызь ӧкмыс во чӧж сійӧ юраліс Ерусалимын.
Сылӧн мамыс вӧлі Ерусалимысь Еходань.
Амасей вӧчис Господь водзын шогманасӧ, но эз став сьӧлӧмсяньыс.
Кор Амасейлӧн юралӧмыс зумыдмис, сійӧ виис ассьыс кесйӧгъяссӧ, кодъяс виисны сылысь батьсӧ, Йоас ӧксыӧс.
Но налысь челядьсӧ эз ви, а вӧчис Господьлӧн тшӧктӧм серти, кыдзи гижӧма Мӧисей Индӧдын: «Пиыслӧн мыж вӧсна батьсӧ оз ков вины, и батьыслӧн мыж вӧсна писӧ оз ков вины. Быдӧн мед аслас мыж вӧсна кулас».
Амасей чукӧртіс Иудаын олысь айуловӧс, сэсся Иуда да Венямин чужанкотырысь айуловсӧ юкліс рӧдныс серти да сетіс найӧс сюрс тышкамортӧн да сё тышкамортӧн веськӧдлысьяслӧн кипод улӧ. Кызь арӧса да ыджыдджык арлыда айуловӧс арталӧм бӧрти Амасей тӧдмаліс, мый сылӧн эм куимсё сюрс морт, кодъяс вермӧны тышӧ ветлыны. Налӧн быдӧнлӧн вӧлі шы да сайӧд.
Нӧшта Израиль войтыр пӧвстысь сё талант эзысь вылӧ сійӧ медаліс сё сюрс вына тышкамортӧс.
Но сы дінӧ локтіс Енлӧн морт да шуис: «Ӧксыӧй, израильса тышкайӧзӧс эн босьт аскӧдыд, ӧд Господь оз ло Израилькӧд, Ефремсянь чужысьяскӧд.
Мун да тышкась повтӧг!
А мунан кӧ израильсаяскӧд, Енмыс пасьвартас тэнӧ вӧрӧг водзад, ӧд Енмыслӧн эм вын отсавны и уськӧдны».
Амасей юаліс Енлӧн мортлысь: «А мый лоӧ сё талант эзысьыскӧд, мыйӧн ме мынтыси израильса тышкайӧзлы?»
Енлӧн морт вочавидзис: «Господь вермас сетны тэныд ёна унджык на».
Сэки Амасей чукӧртіс Ефрем муысь локтӧм тышкайӧзӧс да тшӧктіс налы бӧр мунны.
Найӧ чорыда скӧрмисны Иуда войтыр вылӧ да ёна дӧзмӧмӧн бӧр мунісны.
Амасей веніс ассьыс полӧмсӧ да нуӧдіс тышкайӧзсӧ Сола ковтысӧ. Сэні иудаса тышкайӧз виисны дас сюрс сеирса тышкамортӧс, а дас сюрс мортӧс босьтісны пленӧ. Сэсся вайӧдісны найӧс изкырта вылӧ да тойыштісны сэсянь. Ставныс найӧ пасьмунісны.
А медалӧм тышкайӧзыс, кодъясӧс Амасей эз босьт аскӧдыс тышӧ, но бӧр ыстіс гортаныс, уськӧдчисны Самария да Бет-Хорон костын сулалысь иудаса каръяс вылӧ. Сэні найӧ виисны куим сюрс мортӧс да мырддисны уна эмбур.
Эдомсаясӧс пасьвартӧм бӧрын гортас локтігӧн Амасей вайис аскӧдыс Сеир керӧсвыв муын олысьяслысь идолъяссӧ. Сійӧ пуктіс найӧс аслыс ен пыдди, юрбитіс налы да сотіс налы висьяс.
Господь ёна скӧрмис Амасей вылӧ да мӧдӧдіс сы дінӧ пророкӧс. Сійӧ шуис Амасейлы: «Мыйла тэ юрбитан мукӧд войтырлӧн енъяслы? Тайӧ енъясыс эз вермыны мездыны ассьыныс войтырсӧ тэнад киысь».
Пророк эз на помав сёрнисӧ, а ӧксы шуис нин сылы: «Тэнӧ ӧмӧй индісны туйдӧдны ӧксыӧс? Дугды сёрнитнытӧ! Он кӧ, тэнӧ виасны».
Но сёрни помавтӧдзыс пророк шуис: «Ме тӧда, мый Енмыс шуис бырӧдны тэнӧ сыысь, мый тэ вӧчин. Но менсьым туйдӧдӧмӧс тэ он кывзы».
Аслас туйдӧдысьяскӧд сёрнитӧм бӧрын иудаса Амасей ӧксы мӧдӧдіс израильса Йоас ӧксы дінӧ юӧртысьӧс. Йоас вӧлі Иохазлӧн пи, Иохаз — Ехулӧн. Амасей тшӧктіс висьтавны Йоаслы, мый кӧсйӧ аддзысьлыны сыкӧд.
Израильса Йоас ӧксы ыстіс иудаса Амасей ӧксылы татшӧм воча юӧр: «Ливанса йӧн ыстіс юӧр ливанса сус пулы. Сійӧ корис, сет пӧ менам пи сайӧ ассьыд нывтӧ.
Но ливанса звер ветлӧдліс да таляліс йӧнсӧ.
Тэ шуан, мый пасьвартін эдомсаясӧс, и таысь тэ ышнясян да вылӧ кыпӧдчан.
Пукав гортад, эн корсь аслыд шогсӧ, сэки тэ да тэкӧд тшӧтш Иуда войтырыд онӧ усьӧй».
Но Амасей эз кывзы Йоасӧс, ӧд Енмыс вӧлі шуӧма сетны Иуда войтырӧс Йоаслӧн киӧ сыысь, мый найӧ юрбитісны эдом войтырлӧн енъяслы.
Израильса Йоас ӧксы петіс тышӧ иудаса Амасей ӧксылы паныд. Найӧ паныдасисны Иуда муын Бет-Шемеш карын.
Израильсаяс пасьвартісны иудаса тышкайӧзӧс, и найӧ пышйисны гортаныс.
Бет-Шемешын израильса Йоас ӧксы босьтіс пленӧ иудаса Амасей ӧксыӧс, Ахазий Йоаслысь писӧ да нуӧдіс сійӧс Ерусалимӧ. Сэні Йоас жугӧдіс карса стенсӧ нёльсё гырддза пасьта — Ефрем дзиръясянь Пельӧс дзиръяӧдз.
Йоас ӧксы петкӧдіс Енлӧн крамысь став эзысь-зарнисӧ да дозмук-кӧлуйсӧ, мый вӧсна кывкутіс Овед-Эдом. Сійӧ босьтіс ӧксы керкаысь озырлунсӧ, босьтіс аскӧдыс Амасейлӧн тӧдчана йӧз пӧвстысь ӧткымынӧс, медым Амасей эз кыпӧдчы сылы паныд. Сэсся Йоас бӧр муніс Самарияӧ.
Израильса Йоас ӧксылӧн, Иохаз пилӧн, кулӧм бӧрын иудаса Амасей ӧксы, Йоаслӧн пиыс, оліс нӧшта на дас вит во.
Амасей ӧксыалӧм дырйи лоӧмторъяс йылысь водзысяньыс и помӧдзыс гижӧма иудаса да израильса ӧксыяслӧн небӧгӧ.
Сы бӧрти, кор Амасей эновтіс Господьӧс, йӧзыс кыпӧдчисны Амасейлы паныд Ерусалимын, и сійӧ пышйис Лакиш карӧ.
Но паныд кыпӧдчысьяс мӧдӧдісны сэтчӧ ассьыныс йӧзсӧ, и сэні найӧ виисны Амасейӧс.
Амасейлысь шойсӧ вайисны вӧв вылын Ерусалимӧ да дзебисны сійӧс Давид карӧ батьясыскӧд орччӧн.
Амасей ӧксы бӧрти Иуда войтыр пуктіс ӧксыӧ Амасейлысь дас квайт арӧса Озей писӧ.
Амасейлӧн кулӧм да аслас батьяс дінӧ вуджӧм бӧрын Озей бӧр босьтіс Иуда мулы Элат кар да выльысь лэптіс сійӧс.
Ӧксыӧ пуксигас Озейлы вӧлі дас квайт арӧс. Ветымын кык во чӧж сійӧ юраліс Ерусалимын.
Сылӧн мамыс вӧлі Ерусалимысь Еколия.
Амасей батьыс моз Озей вӧчис Господь водзын шогманасӧ.
Озей юрбитіс Енлы, кытчӧдз ловъя вӧлі Закар, коді велӧдіс войтырсӧ Енмысь вежавидзны.
Кор Озей корсис Господьӧс, Ен отсӧгӧн сылӧн ставыс артмис.
Озей петіс филистимсаяслы паныд тышӧ да жугӧдіс-пазӧдіс Геф, Явне да Азот каръяслысь стенъяссӧ.
Сэсся сійӧ Азот кар гӧгӧрын да мукӧдлаын Филистим муын лэптіс каръяс.
Енмыс отсаліс сылы тышкасьны филистимсаяслы паныд, Гур-Ваалын олысь арабъяслы да меунъяслы паныд.
Аммон войтыр мынтіс Озейлы вот. Озей нималіс весиг Египетын, ӧд сылӧн юралӧмыс вӧлі зумыд.
Ерусалимын Пельӧс дзиръя дорӧ, Ковтыс дзиръя дорӧ да стен пельӧс дорӧ Озей вӧчис зумыд башняяс.
Овтӧминын сійӧ тшӧтш вӧчис башняяс, изкыртаӧ кераліс уна вайӧртӧд, ӧд керӧсбердса муын да вывтасінын сылӧн вӧлі уна ыж-мӧс. Озей радейтіс му вӧдитӧм, та вӧсна керӧсъяс да ыбъяс вылын сылӧн йӧзыс быдтісны виноград да вӧдитісны му.
Озейлӧн вӧліны тышкайӧз, кодъяс петлісны тышӧ котыръясӧн. Налысь лыдсӧ арталісны-гижалісны Евэл нима гижалысь да Маасей нима чина морт. Наӧн веськӧдліс Хананей, коді вӧлі ӧксылӧн киподувса юралысьяс пӧвстысь.
Тышкайӧзӧн веськӧдлісны рӧдкутысьяс, кодъяслӧн лыдыс вӧлі кык сюрс квайтсё морт. Налӧн веськӧдлӧм улын вӧліны куимсё сизим сюрс витсё тышкаморт, кодъяс вӧліны вына тышкасьысьяс, ӧксы вӧсна найӧ дасьӧсь вӧліны петны вӧрӧглы паныд.
Став аслас тышкайӧзлы Озей дасьтіс сайӧдъяс, шыяс, юртупкӧдъяс, кӧрт кышӧдъяс, ньӧввужъяс да лыйсян изъяс.
Ерусалимын башняяс вылӧ да карса стен пельӧсъясӧ Озей сувтӧдаліс кужӧмӧн вӧчӧм лыйсянторъяс, медым на отсӧгӧн лыйлыны ньӧвъяс да ыджыд изъяс.
Озейлӧн нималӧмыс ылӧдз паськаліс. Кор сылӧн юралӧмыс эз на вӧв зумыд, Енмыс пыр отсавліс сылы.
Но кор Озейлӧн юралӧмыс зумыдмис, сійӧ пондіс ышнясьны, и тайӧ вайӧдіс сійӧс кулӧмӧдз. Сійӧ мыж вӧчис аслас Господь Енлы паныд, ӧд сійӧ пырис Господьлӧн крамӧ, медым тшынӧдчан висьпуктанін вылын тшынӧдчыны.
Сы бӧрся крамӧ пырис Азарий поп, сыкӧд тшӧтш пырисны Господьлӧн попъяс, кӧкъямысдас повтӧм морт. Найӧ кыпӧдчисны Озей ӧксылы паныд да шуисны сылы: «Озей, тэныд оз позь тшынӧдчыны Господь водзын.
Тайӧс вермӧны вӧчны сӧмын попъяс, Ааронсянь чужысьяс, кодъясӧс вежӧдӧма-торйӧдӧма тшынӧдчыны.
Пет крамсьыс, ӧд тэ мыж вӧчин, и тайӧ оз вай тэныд Господь Ен водзын нималӧмсӧ».
Озей, кодлӧн киас вӧлі тшынӧдчан дозйыс, ёна скӧрмис.
Тайӧ кадас сійӧ сулаліс попъяс водзын Господьлӧн крамын, тшынӧдчан висьпуктанін дорын. Кор сійӧ скӧрмис попъяс вылӧ, сылӧн плешкас мыччысис проказа.
Азарий аркирей да попъяс видзӧдлісны Озей вылӧ, и сылӧн плешкысь аддзисны проказа.
Найӧ тшӧктісны сылы ӧдйӧджык петны крамысь, но сійӧ и ачыс тэрмасис петны, ӧд Господь мыждіс сійӧс.
Аслас кулан лунӧдз Озей ӧксы висис проказаӧн да оліс торъя керкаын. Сылы оз позь вӧлі пырны Господьлӧн крамӧ.
Ӧксы керкаӧн да Иуда войтырӧн веськӧдліс сылӧн Иотам пиыс.
Озей ӧксыалӧм дырйи лоӧмторъяс йылысь водзысяньыс и помӧдзыс гижис Исай пророк, Амослӧн пиыс.
Озей куліс да вуджис батьясыс дінӧ. Сійӧс дзебисны ыб вылӧ батьясыскӧд орччӧн, но дзебисны эз ӧксыяслӧн дзебанінӧ, ӧд сійӧ висис проказаӧн.
Озей бӧрти ӧксыӧ пуксис сылӧн Иотам пиыс.
Ӧксыӧ пуксигас Иотамлы вӧлі кызь вит арӧс. Дас квайт во чӧж сійӧ юраліс Ерусалимын.
Сылӧн мамыс вӧлі Еруша, Садоклӧн нылыс.
Озей батьыс моз Иотам вӧчис Господь водзын шогманасӧ, да нӧшта бурджыка на, ӧд сійӧ эз пыравлы Господьлӧн крамӧ тшынӧдчыны. А войтырыс водзӧ мыж вӧчис.
Господьлӧн крам йӧрын Иотам вӧчис Вылыс дзиръя. Офелын, ерусалимса кар юкӧнын, сійӧ зумыдмӧдіс-дзоньталіс карса стенсӧ.
Иуда керӧсвыв муын сійӧ лэптіс каръяс, вӧрын кыпӧдіс изкаръяс да башняяс.
Сійӧ тышкасис аммон войтырлӧн ӧксыкӧд да вермис сійӧс. Сійӧ жӧ вонас аммон войтыр вайис сылы вот пыдди сё эзысь талант, дас сюрс мешӧк шобді да дас сюрс мешӧк ид.
Та мында жӧ аммон войтыр вайис сылы мӧд вонас и коймӧд вонас.
Иотам лои вына ӧксыӧн, ӧд сійӧ кывзысьӧмӧн ветліс аслас Господь Енлӧн туйӧд.
Иотам ӧксыалӧм дырйи мукӧд лоӧмторъяс йылысь, сылӧн тышъяс да уджъяс йылысь гижӧма израильса да иудаса ӧксыяслӧн небӧгӧ.
Ӧксыӧ пуксигас Иотамлы вӧлі кызь вит арӧс. Дас квайт во чӧж сійӧ юраліс Ерусалимын.
Иотам куліс да вуджис батьясыс дінӧ. Сійӧс дзебисны Давид карӧ.
Иотам бӧрти ӧксыӧ пуксис сылӧн Ахаз пиыс.
Ӧксыӧ пуксигас Ахазлы вӧлі кызь арӧс. Дас квайт во чӧж сійӧ юраліс Ерусалимын.
Сійӧ эз вӧч Господь водзын шогманасӧ, эз ов Давид пӧльыс моз.
Сійӧ ветліс израильса ӧксыяслӧн туйӧд, весиг сывдӧмӧн вӧчис Ваал бӧлбанъяс.
Бен-Хинном ковтысын сійӧ сотліс висьяс ылӧг енъяслы, сотліс биын ассьыс пиянсӧ, тадзи вӧчис пежсӧ войтыръяс моз, кодъясӧс Господь вӧтліс Израиль войтыр водзысь.
Ахаз вайліс висьяс, тшынӧдчис мылькъяс да керӧсъяс вылын и быд пашкыр пу улын.
Та вӧсна Господь Ен сетіс Ахазӧс арамейяслӧн ӧксы киӧ. Арамейяс пасьвартісны сійӧс да уна йӧзӧс нуӧдісны пленӧ Дамаскӧ.
Господь сетіс Ахазӧс тшӧтш израильса ӧксы киӧ, и израильса ӧксы виис сылысь уна мортӧс.
Израильса ӧксы, Ремальлӧн Пеках пиыс, ӧти лунӧ виис сё кызь сюрс иудаса тышкамортӧс, ӧд найӧ эновтісны Господьӧс, асланыс батьяслысь Енсӧ.
Зикри, ефремса вына тышкаморт, виис иудаса ӧксылысь Маасей писӧ, ӧксы керкаӧн веськӧдлысь Азрикамӧс да Элканӧс, ӧксы бӧрся мӧд юралысьӧс.
Израильсаяс босьтісны пленӧ иудаса аньясӧс да ныв-зонмӧс, налӧн лыдыс вӧлі кыксё сюрс морт.
Нӧшта мырддисны Иуда войтырлысь, асланыс вокъяслысь, уна эмбур да нуисны Самарияӧ.
Самарияын оліс Господьлӧн Одед нима пророк.
Сійӧ воча петіс Самарияӧ локтысь тышкайӧзлы да шуис налы: «Господь, тіян батьяслӧн Ен, скӧрмис Иуда войтыр вылӧ да сетіс найӧс тіян киӧ. Ті виалінныд найӧс сэтшӧм скӧрлунӧн, мый тайӧ воис весиг енэжӧдзыс.
А ӧні ті кӧсъянныд вӧчны Иудаын да Ерусалимын олысьясӧс асланыд кесйӧгъясӧн.
Но ті ӧмӧй асьныд абу мыжаӧсь Господь Енныд водзын?
Кывзӧй менӧ! Лэдзӧй пленӧ босьтӧмаясӧс, ассьыныд вокъяснытӧ, ӧд Господьлӧн скӧрлуныс ыпъялӧ тіян вылӧ».
Иохананлӧн Азарий пиыс, Мешиллемотлӧн Берек пиыс, Шаллумлӧн Езекей пиыс да Хадлайлӧн Амессай пиыс — ефремса юралысьяс — сувтісны тыш вылысь локтысьяс водзӧ да шуисны налы: «Энӧ вайӧдӧй татчӧ пленӧ босьтӧм йӧзӧс, медым ми эгӧ мыжмӧй Господь водзын.
Миян мыжным сідзи нин ыджыд, и Господьлӧн скӧрлуныс ыпъялӧ Израиль вылӧ, но ті нӧшта на кӧсъянныд содтыны миянлысь мыжъяснымӧс да лёк вӧчӧмнымӧс».
Сэки тышкайӧз колисны пленӧ босьтӧм йӧзсӧ да мырддьӧм эмбурсӧ юралысьяс да чукӧртчӧм войтыр дінӧ.
Сійӧ йӧзыс, кодъясӧс вӧлі индӧма тӧждысьны пленӧ босьтӧмаяс вӧсна, мунісны на дінӧ, сетісны пасьтӧмъяслы мырддьӧм эмбурысь кӧм-пась, вердісны-юкталісны найӧс да мавтісны налысь дойяссӧ. Жебмӧмаясӧс найӧ пуксьӧдісны осёлъяс вылӧ да нуӧдісны пленӧ босьтӧм йӧзӧс налӧн войтыр дінӧ Ериконӧ, мӧд ногӧн кӧ, Пальма карӧ, а асьныс бӧр бергӧдчисны Самарияӧ.
Тайӧ кадас Ахаз ӧксы мӧдӧдіс юӧр ассурса ӧксылы да корис отсавны, ӧд эдомсаяс бара уськӧдчисны Иуда войтыр вылӧ да пасьвартісны найӧс. Босьтӧм йӧзсӧ найӧ нуӧдісны пленӧ.
Филистимсаяс уськӧдчисны керӧсбердса муын да Негевын сулалысь Иуда каръяс вылӧ. Найӧ босьтісны Бет-Шемеш, Аялон да Гедерот каръяс, тшӧтш Соко, Тимна да Гимзо каръяс да нагӧгӧрса сиктъяс и овмӧдчисны сэтчӧ.
Тадзи Господь раммӧдіс Иуда войтырӧс Ахаз ӧксы вӧсна, ӧд Ахаз эновтіс Господьӧс да лёкас кыскис ассьыс войтырсӧ.
Ахаз дінӧ локтіс ассурса Тиглатпаласар ӧксы. Но отсалӧм пыдди сійӧ дзескӧдіс Ахаз ӧксыӧс. Ахаз босьтіс Господьлӧн крамысь, ӧксы керкаысь да юралысьяслысь озырлунсӧ да сетіс ассурса ӧксылы, но та вылӧ видзӧдтӧг ассурса ӧксы эз отсав сылы.
Тайӧ сьӧкыд кадас Ахаз ӧксы ёнджыка на мыж вӧчис Господьлы паныд.
Сійӧ вись вайис Дамаскын олысьяслӧн идолъяслы, ӧд чайтіс, мый налӧн енъясыс пасьвартісны сійӧс. Сійӧ шуаліс: «Арамса ӧксыяслӧн енъясыс отсалӧны налы.
Ме вись вая налы, и найӧ меным тшӧтш отсаласны».
Но найӧ мыжӧ вӧйтісны Ахазӧс да став Израиль войтырӧс.
Енлӧн крамысь Ахаз чукӧртіс да жугліс став дозмук-кӧлуйсӧ, сэсся йигналіс Господьлӧн крамлысь ӧдзӧсъяссӧ. Ерусалим кар пасьтала сійӧ сувтӧдаліс ылӧг енъяслы висьпуктанінъяс. Иудаса быд карын сійӧ вӧчаліс вись ваян мылькъяс, сотліс сэні висьяс мукӧд енъяслы. Тадзи сійӧ дӧзмӧдіс Господьӧс, аслас батьяслысь Енсӧ.
Ахаз ӧксыалӧм дырйи мукӧд лоӧмторъяс йылысь да сылӧн уджъясыс йылысь водзысяньыс и помӧдзыс гижӧма иудаса да израильса ӧксыяслӧн небӧгӧ.
Ахаз куліс да вуджис батьясыс дінӧ. Сійӧс дзебисны Ерусалимӧ, но эз израильса ӧксыяслӧн дзебанінӧ.
Ахаз бӧрти ӧксыӧ пуксис сылӧн Езекей пиыс.
Ӧксыӧ пуксигас Езекейлы вӧлі кызь вит арӧс. Кызь ӧкмыс во чӧж сійӧ юраліс Ерусалимын.
Сылӧн мамыс вӧлі Авия, Закарлӧн нылыс.
Давид пӧльыс моз Езекей вӧчис Господь водзын шогманасӧ.
Аслас медводдза ӧксыалан воӧ, медводдза тӧлысьнас, сійӧ восьтіс Господьлӧн крамлысь ӧдзӧсъяссӧ да дзоньталіс найӧс. Попъяслы да левитъяслы сійӧ тшӧктіс чукӧртчыны асыввыв изэрд вылӧ. Сэсся шуис налы: «Левитъяс, кывзӧй менӧ!
Ӧні вежӧдӧй-сӧстӧммӧдӧй асьнытӧ да вежӧдӧй тіян батьяслӧн Господь Енлысь крамсӧ. Шыбитӧй вежаинысь став пежсӧ.
Миян батьяс мыж вӧчисны, вӧчисны Господь Енным водзын шогмытӧмсӧ. Найӧ эновтісны Господьӧс, бергӧдчисны Сылӧн оланінлы мышкӧн. Найӧ йигналісны крам посводзлысь ӧдзӧсъяссӧ да кусӧдісны бияссӧ. Вежаинын найӧ эз тшынӧдны чӧскыд ӧвтанторъяс, эз вайны сотан висьяс Израильлӧн Енлы.
Та вӧсна Господь скӧрмис Иуда да Ерусалим вылӧ, вӧчис найӧс мукӧдлы повзьӧданторйӧн, сетіс найӧс сералӧм да янӧдӧм вылӧ, мый ті асьныд аддзанныд.
Та вӧсна миян батьясным кулісны шыпуртысь, а миянлысь ныв-пинымӧс да гӧтыръяснымӧс нуӧдісны пленӧ, и ӧнӧдз найӧ йӧз муынӧсь.
Но ӧні ме кӧсъя кӧртавны йитӧд Господькӧд, Израильлӧн Енкӧд, медым Сійӧ вештас миян вылысь Ассьыс ыпъялан скӧрлунсӧ.
Пиянӧй, энӧ весьшӧрӧ коллялӧй каднытӧ, ӧд Господь бӧрйис тіянӧс, медым ті сулалінныд Сы водзын, кесъялінныд Сылы да сотінныд висьяс».
Сэки сувтісны левитъяс: Кааф рӧдысь Амасайлӧн Махат пиыс да Азарийлӧн Йоиль пиыс, Мерари рӧдысь Авдилӧн Кис пиыс да Егаллеллӧн Азарий пиыс, Гирсон рӧдысь Зиммалӧн Йоах пиыс да Йоахлӧн Эден пиыс, Элицафан рӧдысь Шимри да Евэл, Асаф рӧдысь Закар да Маттанай, Еман рӧдысь Ехиэл да Шимей, Едутун рӧдысь Шемай да Узиэл.
Найӧ чукӧртісны вокъяснысӧ, вежӧдісны-сӧстӧммӧдісны асьнысӧ да ӧксылӧн тшӧктӧм серти мунісны весавны-сӧстӧммӧдны Господьлысь крамсӧ, кыдзи тшӧктіс вӧчны Господь.
Попъяс пырисны Господьлӧн крам пытшкӧ, медым весавны-сӧстӧммӧдны сійӧс. Став пежсӧ, мый аддзисны Господьлӧн крамысь, найӧ петкӧдісны йӧрас. А левитъяс нуисны ставсӧ Кедрон ковтысӧ.
Крам вежӧдӧмсӧ попъяс да левитъяс заводитісны вӧчны медводдза тӧлысьлӧн медводдза лунӧ, и крам посводзӧдзыс найӧ воисны кӧкъямысӧд лунӧ.
Крамсӧ вежӧдісны нӧшта кӧкъямыс лун чӧж, и вежӧдӧмсӧ помалісны медводдза тӧлысьлӧн дас квайтӧд лунӧ.
Сэсся попъяс да левитъяс мунісны Езекей ӧксы дінӧ да шуисны: «Ми весалім-сӧстӧммӧдім Господьлысь крамсӧ, сотан висьлы висьпуктанінсӧ, вежа няньлы пызансӧ да став дозмук-кӧлуйсӧ.
Ми дасьтім да вежӧдім тшӧтш сійӧ дозмук-кӧлуйсӧ, мый Ахаз ӧксы петкӧдіс крамысь, кор сійӧ эновтіс Енсӧ. Ӧні ставыс тайӧ Господьлӧн висьпуктанін водзын».
Мӧд луннас Езекей ӧксы чеччис водз асывнас, чукӧртіс карса юралысьясӧс да муніс накӧд Господьлӧн крамӧ.
Мыжысь вись пыдди найӧ вайисны сизим ӧшкӧс, сизим межӧс, сизим ыжӧс да сизим ай кӧзаӧс ӧксы вӧсна, крам вӧсна да став Иуда войтырыс вӧсна.
Ӧксы тшӧктіс попъяслы, Ааронсянь чужысьяслы, сотны тайӧ пемӧсъяссӧ Господьлӧн висьпуктанін вылын.
Ӧшъясӧс начкӧм бӧрын попъяс чукӧртісны налысь вирсӧ да резісны вирнас висьпуктанінсӧ. Сэсся найӧ начкисны межъясӧс да налӧн вирнас тшӧтш резісны висьпуктанінсӧ.
Та бӧрти попъяс начкисны ыжъясӧс да налӧн вирнас резісны висьпуктанінсӧ.
Мыжысь вись пыдди ваян кӧзаясӧс вайӧдісны ӧксы водзӧ да чукӧртчӧм войтыр водзӧ, и найӧ пуктылісны кинысӧ кӧзаяс вылӧ.
Попъяс начкисны кӧзаясӧс да налысь вирсӧ мыжысь вись пыдди вайисны висьпуктанін вылын, медым вештыны Израиль войтырлысь мыжсӧ, ӧд ӧксы тшӧктіс вайны сотан вись да мыжысь вись став Израиль войтыр вӧсна.
Ӧксы тшӧктіс левитъяслы сулавны Господьлӧн крамын да ворсны кимвалӧн, арфаӧн да гуслиӧн, кыдзи тшӧктылісны вӧчны Давид ӧксы, сылӧн Гад нима пророк да Нафан пророк. Тайӧ тшӧктӧмыс вӧлі Господьсянь Сылӧн пророкъяс пыр.
Левитъяс сулалісны Давидлӧн кодь ворсанторъясӧн, а попъяс — трубаясӧн.
Езекей тшӧктіс вайны висьпуктанін вылын сотан вись.
Кор попъяс пондісны вись вайны, сэки сьылысьяс пондісны сьывны Господьлы труба шы улӧ да израильса Давид ӧксылӧн кодь ворсанторъяс шы улӧ.
Кытчӧдз эз помась вись вайӧмыс, став чукӧртчӧм войтырыс юрбитіс, сьылысьяс сьылісны, а ворсысьяс тутсісны трубаясӧ.
Вись вайӧм бӧрын ӧксы да сыкӧд локтӧмаяс копыртчисны, медым юрбитны.
Езекей ӧксы да юралысьяс тшӧктісны левитъяслы ошкыны Господьӧс Давидлӧн да Асаф пророклӧн кывъясӧн. Левитъяс нимкодьпырысь ошкисны Господьӧс да копыртчӧмӧн юрбитісны Сылы.
Сэсся Езекей шуис: «Ӧні ті сиинныд асьнытӧ Господьлы.
Локтӧй да вайӧй Господьлӧн крамӧ висьяс да аттьӧалӧм могысь вайӧмторъяс».
Сэки чукӧртчӧм войтырыс вайис висьяс да вайӧмторъяс. И быдӧн, коді кӧсйис, вайис тшӧтш сотан вись.
Чукӧртчӧм войтырыс вайис Господьлы сотан вись пыдди сизимдас ӧшкӧс, сё межӧс да кыксё баляӧс.
Ставнас вежа вись пыдди вайисны квайтсё ӧшкӧс да куим сюрс ыж-кӧзаӧс.
Но попъяс вӧліны этшаӧнӧсь, и найӧ эз удитны кульны сотан вись пыдди вайӧм пемӧсъяслысь кучиксӧ. Налӧн левит вокъясыс отсасисны налы, кытчӧдз эз помась тайӧ уджыс да кытчӧдз мукӧд попъяс эз вежӧдны-сӧстӧммӧдны асьнысӧ. Ӧд левитъяс, кодъяс вӧлі вежӧдӧмаӧсь-сӧстӧммӧдӧмаӧсь нин асьнысӧ, попъяс дорысь вӧліны унджыкӧнӧсь.
Сотан висьяс кындзи колӧ вӧлі сотны бурасян вись пыдди вайӧм пемӧсъяслысь госсӧ и сотан виськӧд ӧтвыв вайны вина вись.
Тадзи вӧлі выльысь лӧсьӧдӧма Господьлӧн крамын кесъялӧмсӧ.
Ставыс артмис ӧдйӧ. Езекей да став войтырыс нимкодясисны сыысь, мый Енмыс вӧчис Аслас войтырлы.
Езекей мӧдӧдіс юӧртысьясӧс Израиль да Иуда муӧ, тшӧтш ыстіс гижӧдъяс Ефрем да Манассей чужанкотыръяслы. Сійӧ чукӧстіс ставнысӧ локны Господьлӧн крамӧ Ерусалимӧ, медым пасйыны Израильлӧн Господь Енлысь Ыджыд лун.
Езекей ӧксы, юралысьяс да Ерусалимын чукӧртчӧм войтыр шуисны пасйыны Ыджыд лунсӧ мӧд тӧлысьнас. Найӧ эз вермыны пасйыны Ыджыд лунсӧ колана кадӧ, ӧд эз на вӧвны тырмымӧн попъяс, кодъяс эськӧ вӧлі вежӧдӧмаӧсь-сӧстӧммӧдӧмаӧсь нин асьнысӧ, и войтырыс абу на вӧлі чукӧртчӧма Ерусалимӧ.
Ӧксылы да став чукӧртчӧм войтырлы сьӧлӧм выланыс воис тайӧ шуӧмыс.
Став Израиль му пасьтала лунвыв Бер-Шевасянь войвыв Данӧдз юӧртісны тшӧктӧм, медым войтырыс локтас Ерусалимӧ пасйыны Израильлӧн Господь Енлысь Ыджыд лунсӧ, ӧд найӧ важӧн нин эз пасйывны сійӧс Гижӧдас тшӧктӧм серти.
Юӧр нуысьяс мӧдӧдчисны ӧксылӧн да юралысьяслӧн гижӧднас да ӧксылӧн тшӧктӧм серти юӧртісны став Израиль да Иуда му пасьтала: «Израиль войтыр, бергӧдчӧй Господь дінӧ, Ӧвраамлӧн, Исааклӧн да Израильлӧн Ен дінӧ, сэки Сійӧ бергӧдчас тіян дінӧ, кодъяс мынінныд ассурса ӧксыяслӧн киысь да ловйӧн колинныд.
Энӧ лоӧй асланыд батьяс кодьӧсь да асланыд войтыр кодьӧсь, кодъяс мыж вӧчисны Господьлы паныд, асланыс батьяслӧн Енлы паныд.
Та вӧсна Енмыс сетіс найӧс бырӧдӧм вылӧ, ті асьныд тӧданныд тайӧс.
Ӧні батьясныд моз энӧ асныралӧй. Сетчӧй Господьлы да локтӧй Сылӧн крамӧ, кодӧс Сійӧ вежӧдіс пыр кежлӧ.
Кесъялӧй Господьлы, асланыд Енлы, и Сійӧ вештас тіян вылысь Ассьыс ыпъялан скӧрлунсӧ.
Ті кӧ бергӧдчанныд Господь дінӧ, сэки тіян рӧдвуж дінӧ да тіян челядь дінӧ бурсьӧлӧмтчасны найӧс пленӧ босьтысьяс, и лэдзасны найӧс бӧр бергӧдчыны тайӧ муас, ӧд Господь, тіян Енныд, бур да мелі сьӧлӧма. Сійӧ оз бергӧдчы тіянысь, ті кӧ бергӧдчанныд Сы дінӧ».
Юӧртысьяс ветлісны карысь карӧ, найӧ кытшовтісны Ефрем да Манассей чужанкотыръяслысь мусӧ Завулон чужанкотырлӧн муӧдз, но найӧс сералісны-лёкӧдісны.
Сӧмын Асирлӧн, Манассейлӧн да Завулонлӧн чужанкотырысь кодсюрӧ раммӧдчисны да локтісны Ерусалимӧ.
Иуда войтыр вылын вӧлі Енлӧн киыс. Сійӧ сетіс налы ӧти сьӧлӧм, медым найӧ вӧчисны сійӧ, мый ӧксы да юралысьяс Господьлӧн кыв серти тшӧктісны вӧчны.
Мӧд тӧлысьнас Ерусалимӧ войтырыс чукӧртчис зэв уна, медым пасйыны Шомтӧм нянь сёян лунъяс.
Найӧ петкӧдісны Ерусалимысь идолъяслы сувтӧдӧм висьпуктанінъяс да тшынӧдчан висьпуктанінъяс, жугӧдісны да шыбитісны найӧс Кедрон ковтысӧ.
Мӧд тӧлысьлӧн дас нёльӧд лунӧ начкисны ыджыдлунся баляясӧс.
Попъяслы да левитъяслы яндзим вӧлі, мый ас кадӧ найӧ эз вежӧдны-сӧстӧммӧдны асьнысӧ, та вӧсна ӧні тайӧс вӧчисны. Сэсся найӧ вайисны Господьлӧн крамӧ сотан висьяс. Попъяс сулалісны асланыс местаын Енлӧн морт Мӧисейлӧн Индӧд серти.
Найӧ босьтісны левитъяслӧн киысь висьяслысь вирсӧ да резісны вирнас.
Чукӧртчӧм войтыр пӧвстын вӧлі уна йӧз, кодъяс абу вӧлі вежӧдӧмаӧсь-сӧстӧммӧдӧмаӧсь асьнысӧ. На пыдди левитъяслы ковмис начкыны баляясӧс да вежӧдны-торйӧдны найӧс Господьлы.
Унаӧн, торйӧн нин Ефремлӧн, Манассейлӧн, Иссакарлӧн да Завулонлӧн чужанкотыръясысь, абу вӧлі сӧстӧммӧдӧмаӧсь асьнысӧ, но найӧ сёйисны ыджыдлунся баляӧс.
Тадзи найӧ торкисны Индӧдсӧ, но Езекей кевмысис на вӧсна. Сійӧ шуис: «Бур сьӧлӧма Господь мед вештас мыжсӧ быдӧнлысь, коді эз сӧстӧммӧдчы вежаин йылысь индӧд серти, но став сьӧлӧмсяньыс корсьысьӧ Господь Енмӧс, аслас батьяслысь Енсӧ».
Господь кыліс Езекейлысь кевмысьӧмсӧ да эз мыжды войтырсӧ.
Ерусалимӧ чукӧртчӧм Израиль войтыр ёна нимкодясьӧмӧн сизим лун чӧж пасйис Шомтӧм нянь сёян лунъяс.
Левитъяс да попъяс быд лун ошкисны Господьӧс ворсанторъясӧн, кодъясӧс вӧлі вӧчӧма Господьӧс ошкӧм вылӧ.
Езекей висьталіс бур кывъяс левитъяслы, кодъяс бурногӧн лӧсьӧдісны Господьлы кесъялӧм.
Сизим лун чӧж войтырыс сёйис-гажӧдчис, вайис бурасян висьяс да ошкис Господьӧс, асланыс батьяслысь Енсӧ.
Ерусалимӧ чукӧртчӧм войтырыс шуис нӧшта на сизим лун чӧж гажӧдчыны, и тайӧ сизимнан лунсӧ найӧ гажӧдчисны-нимкодясисны. Иудаса Езекей ӧксы сетіс чукӧртчӧм войтырлы сюрс ӧшкӧс да сизим сюрс ыжӧс, а юралысьяс сетісны войтырыслы сюрс ӧшкӧс да дас сюрс ыжӧс.
Тайӧ кадас попъяс унаӧн нин вӧлі вежӧдӧмаӧсь-сӧстӧммӧдӧмаӧсь асьнысӧ.
Иуда войтыр, попъяс, левитъяс да Израиль муысь локтӧм войтыр ёна нимкодясисны. Нимкодясисны тшӧтш Израиль муысь да Иуда муысь локтӧм мукӧд войтыръяс.
Ерусалимын вӧлі ыджыд гаж, татшӧм гажыс эз нин вӧвлы сэні израильса Соломон ӧксылӧн, Давид пилӧн, веськӧдлан кадсянь.
Попъяс да левитъяс бурсиисны войтырсӧ.
Енмыс кыліс налысь гӧлӧс шысӧ, налӧн кевмӧмыс воис енэжӧдз, Енлӧн вежа оланінӧдз.
Гажӧдчӧм бӧрын став Израиль войтырыс разӧдчис иудаса каръясӧ. Найӧ жуглісны юрбитан изъяс, пӧрӧдісны юрбитан пуяс, пазӧдісны вись ваян мылькъяс да висьпуктанінъяс став Иуда му пасьталаысь, тшӧтш Венямин, Ефрем да Манассей чужанкотыръяслӧн муысь.
Та бӧрти Израиль войтырысь быдӧн бӧр муніс аслас муӧ да карӧ.
Езекей ӧксы индіс попъяслӧн да левитъяслӧн быд котырлы вӧчны ассьыс удж: вайны сотан да бурасян висьяс, сьывны-ошкыны да кесъявны Господьлӧн крамӧ пыранін дорын.
Ӧксы сетіс аслас овмӧсысь пемӧсъясӧс, медым Господьлӧн Индӧд серти вайны сотан висьяс асывнас и рытнас, шойччан лунӧ, выль тӧлысь чужигӧн да гажӧдчан лунъясӧ.
Ерусалимын олысьяслы ӧксы тшӧктіс, медым найӧ сетасны попъяслы да левитъяслы олӧм вылӧ колана пай. Тадзи попъяс да левитъяс ассьыныс олӧмсӧ вермисны сины Господьлысь Индӧд збыльмӧдӧмлы.
Кор тайӧ тшӧктӧмсӧ вӧлі юӧртӧма Израиль войтырлы, найӧ вайисны асланыс медводдза быдтасысь уна нянь, вина, вый, ма да мукӧдторъяс, мый быдмӧ видз-му вылын.
Найӧ вайисны тшӧтш асланыс овмӧс-эмбурысь дасӧд юкӧнсӧ.
Иуда каръясын олысь Израиль да Иуда войтыр вайисны тшӧтш асланыс ыж-мӧскысь дасӧд юкӧнсӧ, нӧшта вайисны Господьлы, асланыс Енлы, мукӧд вежӧдӧм козинъяс.
Вайӧмторъяссӧ тэчисны чукӧръясӧ.
Вайӧмторъяссӧ пондісны чукӧртны коймӧд тӧлысьнас, а помалісны — сизимӧд тӧлысьнас.
Кор Езекей да юралысьяс локтісны да аддзисны чукӧръяссӧ, найӧ ошкисны Господьӧс да Сылысь Израиль войтырӧс.
Езекей юаліс попъяслысь да левитъяслысь вайӧмторъясыс йылысь.
Садок рӧдысь Азарий аркирей вочавидзис сылы: «Сійӧ кадсяньыс, кор йӧзыс пондісны вайны Господьлӧн крамӧ козинъяс, ми пӧттӧдз сёям. И унатор кольӧ на, ӧд Господь бурсиис Ассьыс войтырсӧ.
Со, тайӧ чукӧръясыс колисны на».
Езекей тшӧктіс дасьтыны Господьлӧн крамын вежӧсъяс.
Тадзи и вӧчисны.
Сэтчӧ вуджӧдісны козинъяс, дасӧд юкӧнъяс да вежа вайӧмторъяс. Тайӧ уджсӧ вӧчисны ылӧдчытӧг.
Став вайӧмторйыс вӧсна кывкутысьнас вӧлі Конаний нима левит, мӧд кывкутысьнас вӧлі сылӧн Шимей вокыс.
Езекей ӧксылӧн да Енлӧн крамӧн веськӧдлысь Азарийлӧн индӧм серти Конанийлӧн да Шимейлӧн веськӧдлӧм улын вайӧмторъяссӧ видзисны Ехиэл, Азазий, Нахат, Асаил, Еримот, Иозавад, Элиэл, Исмакий, Махат да Бенай.
Коре нима левит, Имнайлӧн пиыс, асыввыв дзиръя видзысь, тӧждысис войтырлӧн ас кӧсйӧм серти Енлы вайӧмторъяс вӧсна, юкліс попъяслы вежасьыс-вежаторъяс* да Господьлы вайӧм козинъяс.
Попъяслӧн олан каръясын Коре веськӧдлӧм улын уджалісны-кесъялісны Эден, Минямин, Исус, Шемай, Амарей да Шеканий. Найӧ пӧръясьтӧг юклісны вайӧмторъяссӧ асланыс вокъяслы котыръяс серти — пӧрысьлы и томлы. Но налы, кодъяс сійӧ кадас кесъялісны Господьлӧн крамын, эз юклыны. Чужанвуж гижӧдын вӧлі лыддьӧдлӧма куим арӧса да ыджыдджык арлыда став айуловсӧ налӧн удж вӧчӧмныс да котырныс серти. Найӧс вӧлі лыддьӧдлӧма попъяслӧн чужанвуж гижӧдын рӧдныс серти. Кызь арӧса да ыджыдджык арлыда левитъясӧс вӧлі лыддьӧдлӧма налӧн удж вӧчӧмныс да котырныс серти. Лыддьӧдлӧма вӧлі тшӧтш левитъяслысь гӧтыръяссӧ, ныв-писӧ да весиг ичӧт кагаяссӧ, ӧд левитъяс вӧлі вежӧдӧмаӧсь-сӧстӧммӧдӧмаӧсь асьнысӧ крамын кесъялӧм могысь.
Попъяслы, Ааронсянь чужысьяслы, кодъяс олісны сиктын, асланыс каръяскӧд орччӧн, быд карын вӧлі индӧма йӧзӧс, медым найӧ поп рӧдысь став айуловлы да чужанвуж гижӧдын лыддьӧдлӧм левитъяслы юклісны пай.
Тадзи Езекей вӧчис став Иуда му пасьтала. Сійӧ вӧчис аслас Господь Ен водзын бурсӧ, шогманасӧ да веськыдсӧ.
Мыйӧ сійӧ босьтчыліс Енлӧн крамын кесъялӧм могысь, Индӧд да тшӧктӧмъяс збыльмӧдӧм могысь, ставсӧ вӧчис Енсӧ сьӧлӧмсяньыс корсьӧмӧн. Та вӧсна сылӧн ставыс артмис.
Тайӧ лоӧмторъяс бӧртиыс, кор Езекей петкӧдліс Господьлы ассьыс эсканлунсӧ, Иуда му вылӧ уськӧдчис ассурса Сеннахирим ӧксы. Сійӧ кытшаліс изкаръяс, медым босьтны найӧс.
Кор Езекей аддзис, мый Сеннахирим кӧсйӧ уськӧдчыны Ерусалим вылӧ, сійӧ аслас юралысьяскӧд да тышкайӧзӧн веськӧдлысьяскӧд шуис тупкыны кар ортсыысь ва петанінъяс.
Чукӧртчис уна йӧз, и найӧ тупкисны му пытшті визувтысь васӧ да ва петанінъяссӧ. Найӧ шуалісны: «Ассурса ӧксыяс мед оз аддзыны татысь васӧ [да мед оз вынсяммыны]».
Езекей повтӧг босьтчис уджӧ. Сійӧ выльысь кыпӧдіс жугалӧм карса стен, сувтӧдіс стен вылӧ башняяс, карса стен ортсыладорас кыпӧдіс мӧд стен. Сійӧ зумыдмӧдіс Милло, Давид карлысь юкӧнсӧ. Сійӧ вӧчӧдіс уна сайӧд да шы.
Езекей индіс тышкайӧзӧн веськӧдлысьясӧс, чукӧртіс найӧс изэрд вылӧ карса стен дорӧ да шуис налы ышӧдана кывъяс:
«Лоӧй зумыдӧсь да повтӧмӧсь! Энӧ полӧй ассурса ӧксыысь, энӧ тіралӧй сылӧн уна лыда тышкайӧзысь. Сійӧ, коді миянкӧд, ыджыдджык сы дорысь, коді ассурса ӧксыкӧд.
Сыкӧд — мортлӧн выныс, а миянкӧд — Господь, миян Енным. Сійӧ пыр отсалӧ миянлы да тышкасьӧ миян пыдди».
Иудаса Езекей ӧксылӧн кывъясыс ёнмӧдісны тышкайӧзӧс.
Та бӧрти ассурса Сеннахирим ӧксы мӧдӧдіс Ерусалимӧ ассьыс йӧзсӧ. Ачыс Сеннахирим да сылӧн тышкайӧзыс сэки кытшалісны Лакиш кар. Сійӧ тшӧктіс шуны иудаса Езекей ӧксылы да Ерусалимын олысь Иуда войтырлы:
«Ассурса Сеннахирим ӧксы тадзи шуӧ: “Мый вылӧ ті понданныд лача кутны, кор колянныд кытшалӧм Ерусалим карӧ.
Езекей шуӧ, мый Господь, тіян Енныд, мездас тіянӧс ассурса ӧксылӧн киысь. Но тадзи шуалігӧн сійӧ ылӧдлӧ тіянӧс, и ті куланныд тшыгныдла да горш косьмӧмныдла.
Эз ӧмӧй Езекей бырӧд тіян Енлысь вись ваян мылькъяссӧ да висьпуктанінъяссӧ? Эз ӧмӧй сійӧ тшӧкты Иуда войтырлы да Ерусалимын олысьяслы юрбитны сӧмын ӧти висьпуктанін водзын да сы вылын сотны висьяс?
Но ті ӧмӧй онӧ тӧдӧй, мый вӧчи ме, и мый вӧчисны менам батьяс мувывса войтыръяскӧд?
Мукӧд войтыръяслӧн енъяс ӧмӧй вермисны мездыны налысь мусӧ менам кипод улысь?
Вермис ӧмӧй кутшӧмкӧ ен мездыны ассьыс войтырсӧ менам киысь? Менам батьясӧй ставнысӧ бырӧдісны.
Тіян Енныд сідзжӧ оз вермы мездыны тіянӧс менам киысь.
Сідзкӧ, энӧ лэдзӧй Езекейлы ылӧдлыны тіянӧс.
Энӧ эскӧй сылы. Оз сюр сэтшӧм войтырыс, кодлӧн енмыс эськӧ вермис мездыны ассьыс войтырсӧ менам киысь да менам батьяслӧн киысь. Тіян Енныд сідзжӧ оз мезды тіянӧс менам киысь”».
Сеннахиримлӧн йӧзыс унатор на шуалісны Господь Енлы паныд да Сылӧн Езекей кесйӧглы паныд.
Аслас гижӧдъясын Сеннахирим омӧльтіс Господьӧс, Израильлысь Енсӧ: «Войтыръяслӧн енъясыс эз мездыны менам киысь ассьыныс войтырсӧ. Тадзи жӧ Езекейлӧн Енмыс оз мезды менам киысь Ассьыс войтырсӧ».
Сеннахиримлӧн йӧзыс еврей кыв вылын гораа горзісны тайӧ кывъяссӧ карса стен вылӧ чукӧртчӧм ерусалимса войтырлы, медым повзьӧдны найӧс да босьтны карсӧ.
Найӧ шуалісны, мый ерусалимсаяслӧн Енмыс сэтшӧм жӧ, кутшӧм мукӧд войтыръяслӧн енъясыс, кодъясӧс вӧчӧма морт киӧн.
Езекей ӧксы да Исай пророк, Амослӧн пиыс, кевмысисны да горзӧмӧн корисны отсӧг енэжсяньыс.
Сэки Господь мӧдӧдіс анделӧс, и сійӧ бырӧдіс ассурса ӧксылысь став вына тышкайӧзсӧ да налысь юралысь-веськӧдлысьяссӧ.
Ассурса ӧксы яналӧмӧн бӧр бергӧдчис аслас муӧ.
Кор сійӧ пырис аслас енлӧн крамӧ, сэні сылӧн пияныс виисны сійӧс шыпуртӧн.
Тадзи Господь мездіс Езекейӧс да Ерусалимын олысьясӧс ассурса Сеннахирим ӧксылӧн киысь да мукӧд вӧрӧгысь. Сійӧ видзис найӧс быд боксянь.
Унаӧн вайисны Ерусалимӧ Господьлы вайӧмторъяс да иудаса Езекей ӧксылы дона козинъяс.
Тайӧ кадсяньыс Езекей пондіс нимавны став войтыръяс пӧвстын.
Сійӧ кадас Езекей чорыда висьмис да вӧлі куланвыйын.
Сійӧ кевмысис Господьлы, и Господь кыліс сійӧс да петкӧдліс сылы индысьпас.
Но таысь Езекей эз ошкы Господьӧс, а вылӧ кыпӧдіс асьсӧ.
Та вӧсна Енмыс скӧрмис сы вылӧ, тшӧтш Иуда да Ерусалим вылӧ.
Но Езекей раммӧдчис, Ерусалимын олысьяс тшӧтш раммӧдчисны, и Езекейлӧн олан кадӧ Господьлӧн скӧрлуныс эз су найӧс.
Езекей вӧлі зэв озыр, сійӧ ёна нималіс. Сійӧ вӧчис видзанінъяс, медым пуктавны сэтчӧ эзысь, зарни, дона изъяс, чӧскыд ӧвтанторъяс, сайӧдъяс да дона дозмук-кӧлуй. Вӧчис тшӧтш нянь, вина да олив вый видзанінъяс, сідзжӧ ыж-мӧслы лэбувъяс да йӧръяс.
Сійӧ лэптіс аслыс каръяс, сылӧн вӧлі лыдтӧм-тшӧттӧм ыж-мӧс, ӧд Енмыс сетіс сылы уна озырлун.
Езекей тупкис Гихон ва петанінлысь вылыс визувтанінсӧ да веськӧдіс васӧ визувтны увлань, Давид кар рытывладорӧ.
Езекейлӧн артмис быд удж.
Но кор вавилонса юралысьяс мӧдӧдісны сы дінӧ ассьыс йӧзсӧ, медым тӧдмавны Иуда муын петкӧдлӧм индысьпас йылысь, сэки Енмыс колис сійӧс ӧтнассӧ, медым тӧдмавны сійӧс да аддзыны, мый сылӧн сьӧлӧмас.
Езекей ӧксыалӧм дырйи мукӧд лоӧмторъяс йылысь да сылӧн бур уджъясыс йылысь гижӧма Исай пророклӧн, Амос пилӧн, восьтӧмын да пыртӧма иудаса да израильса ӧксыяслӧн небӧгӧ.
Езекей куліс да вуджис батьясыс дінӧ. Сійӧс дзебисны Давидсянь чужысьяслӧн дзебанінӧ, выліинӧ. Сылӧн кулӧм бӧрын став Иуда войтыр да Ерусалимын олысьяс нимӧдісны сійӧс.
Езекей бӧрти ӧксыӧ пуксис сылӧн Манассей пиыс.
Ӧксыӧ пуксигас Манассейлы вӧлі дас кык арӧс. Ветымын вит во чӧж сійӧ юраліс Ерусалимын. Манассей вӧчис Господь водзын шогмытӧмсӧ. Сійӧ вӧчис пежсӧ войтыръяс моз, кодъясӧс Господь вӧтліс Израиль войтыр водзысь. Манассей выльысь вӧчис вись ваян мылькъяс, кодъясӧс бырӧдліс Езекей батьыс. Лэптіс Ваал идолъяслы висьпуктанінъяс, сувтӧдіс юрбитан пуяс, юрбитіс енэжвыв вынъяслы. Манассей сувтӧдіс идолъяслы висьпуктанінъяс тшӧтш Господьлӧн крамӧ, мый йылысь Господь шуліс, Ерусалимын пӧ лоас Менам нимӧйлы оланін нэмъяс чӧж.
Господьлӧн крам кыкнан йӧрас Манассей сувтӧдіс енэжвыв вынъяслы висьпуктанінъяс.
Бен-Хинном ковтысын Манассей сотліс биын ассьыс пиянсӧ.* Сійӧ кимӧститчис, тунасис, тшыкӧдчис да шыасьліс кулӧмаӧс корысьяс да тунасьысьяс дінӧ.
Сійӧ вӧчис Господь водзын уна шогмытӧмсӧ, и тайӧн дӧзмӧдіс Господьӧс.
Манассей вӧчӧдіс бӧлбанӧс да сувтӧдіс сійӧс Енлӧн крамӧ, мый йылысь Ен шуліс на Давидлы да сылӧн Соломон пилы: «Тайӧ крамас да Ерусалим карын, мый Ме бӧрйи Израиль чужанкотыръяслӧн став карыс пӧвстысь, лоас Менам нимӧй нэмъяс чӧж.
Израиль войтыр кӧ кутас овны сы серти, мый Ме тшӧкті налы, Мӧисей пыр сетӧм индӧд-тшӧктӧмъяс серти, Ме ог вӧтлы найӧс сійӧ мусьыс, мый Ме сеті налӧн батьяслы».
Иуда войтырӧс да Ерусалимын олысьясӧс Манассей кежӧдіс лёкас. Найӧ вӧчисны лёксӧ унджык на сійӧ войтыръясыс дорысь, кодъясӧс Господь бырӧдіс Израиль войтыр водзысь.
Господь ӧлӧдліс Манассейӧс да Ассьыс войтырсӧ, но найӧ эз кывзыны Сійӧс.
Сэки Господь мӧдӧдіс налы паныд ассурса ӧксылӧн тышкайӧзлысь юралысьясӧс. Найӧ дорисны Манассейлысь ки-коксӧ чепъясӧн да нуӧдісны сійӧс Вавилонӧ.
Сьӧкыдалігас Манассей кутіс кевмысьны Господьлы, аслас Енлы. Сійӧ раммӧдчис аслас батьяслӧн Ен водзын.
Манассей кевмысис Енлы, и Енмыс кыліс сылысь кевмӧмсӧ да бӧр бергӧдіс сійӧс Ерусалимӧ ӧксыавны.
Тадзи Манассей тӧдмаліс, мый Господь эм Ен.
Та бӧрти Давид кар ортсыӧ, Офел* гӧгӧр, Манассей кыпӧдіс зэв джуджыд стен Гихон ва петанінсянь рытыввылӧ Чери дзиръя дорӧдз.
Иуда му пасьтала став изкарӧ сійӧ индіс тышкайӧзӧн веськӧдлысьясӧс. Господьлӧн крамысь Манассей шыбитіс сэтчӧ сувтӧдӧм бӧлбанӧс да мукӧд войтыръяслысь енъяссӧ. Сійӧ жугӧдіс висьпуктанінъяс, мый вӧлі сувтӧдӧма крамса керӧс вылӧ да Ерусалим карын мукӧдлаӧ, сэсся шыбитіс найӧс кар сайӧ.
Сійӧ дзоньталіс Господьлысь висьпуктанінсӧ да вайис сэні бурасян да аттьӧалана висьяс. Сійӧ тшӧктіс Иуда войтырлы юрбитны Господьлы, Израильлӧн Енлы.
Та вылӧ видзӧдтӧг войтырыс пыр на вайис висьяс мылькъяс вылын, но вайис найӧс Господьлы, аслас Енлы.
Манассей ӧксыалӧм дырйи мукӧд лоӧмторъяс йылысь гижӧма израильса ӧксыяслӧн небӧгӧ. Сэтчӧ гижӧма тшӧтш Манассейлысь Енмыслы кевмысьӧмсӧ да пророкъяслысь кывъяссӧ, мый найӧ висьталісны Манассейлы Израильлӧн Господь Ен нимсянь.
Хозайлӧн небӧгӧ гижӧма Манассейлысь кевмысьӧмсӧ да кыдзи Енмыс кыліс сійӧс, сылӧн мыжъяс йылысь да Енсӧ эновтӧм йылысь. Сэтчӧ гижӧма тшӧтш вись ваян мылькъяс йылысь, юрбитан пуяс да идолъяс йылысь, кодъясӧс сійӧ сувтӧдаліс Ен водзын раммӧдчытӧдз на.
Манассей куліс да вуджис батьясыс дінӧ. Сійӧс дзебисны аслас керка йӧрӧ.
Манассей бӧрти ӧксыӧ пуксис сылӧн Амон пиыс.
Ӧксыӧ пуксигас Амонлы вӧлі кызь кык арӧс. Кык во чӧж сійӧ юраліс Ерусалимын.
Манассей батьыс моз Амон вӧчис Господь водзын шогмытӧмсӧ.
Амон юрбитіс да вайліс висьяс идолъяслы, кодъясӧс вӧчис сылӧн Манассей батьыс.
Но Амон эз раммӧдчы Господь водзын, кыдзи сылӧн Манассей батьыс раммӧдчис, а мӧдарӧ, сійӧ ёнджыка на мыжсӧ вӧчис.
Амонлӧн кесйӧгъясыс кыпӧдчисны сылы паныд да виисны сійӧс аслас керкаас.
Но Иуда войтыр виис ставнысӧ, кодъяс кыпӧдчисны Амон ӧксылы паныд. Амон бӧрти найӧ пуктісны ӧксыӧ сылысь Иосей писӧ.
Ӧксыӧ пуксигас Иосейлы вӧлі кӧкъямыс арӧс. Комын ӧти во чӧж сійӧ юраліс Ерусалимын. Иосей вӧчис Господь водзын шогманасӧ. Сійӧ ветліс Давид пӧльыслӧн туйӧд, эз кежлыв сэтысь веськыдвылӧ ни шуйгавылӧ.
Аслас кӧкъямысӧд ӧксыалан воӧ, кор сійӧ вӧлі дзик на том, сійӧ кутіс корсьны аслас Давид пӧльлысь Енсӧ. А дас кыкӧд веськӧдлан воӧ сійӧ пондіс сӧстӧммӧдны Иуда му да Ерусалим кар. Сійӧ бырӧдіс вись ваян мылькъяс, юрбитан пуяс, идолъясӧс да бӧлбанъясӧс.
Иосейлӧн тшӧктӧм серти жуглісны Вааллысь висьпуктанінъяс да на весьтын сулалысь тшынӧдчан висьпуктанінъяс.
Юрбитан пуяс пӧрӧдісны, идолъясӧс да бӧлбанъясӧс жуглісны торпыригӧдз, а торпыригъяссӧ шыблалісны сійӧ йӧзыслӧн дзебанінъяс вылӧ, кодъяс вайлісны идолъяслы вись. Ылӧг енъяслӧн попъяслысь лыяссӧ Иосей сотіс налӧн висьпуктанін вылын, тадзи сійӧ сӧстӧммӧдіс Иуда му да Ерусалим кар. Манассей, Ефрем да Симеон чужанкотыръяслӧн каръясын да нагӧгӧрса бырӧдӧм муын, весиг Неффалим муӧдз, Иосей жугліс висьпуктанінъяс да пӧрӧдіс юрбитан пуяс. Израиль му пасьтала сійӧ торпыригӧдз жугліс бӧлбанъясӧс, пӧрӧдіс тшынӧдчан висьпуктанінъяс, сэсся бӧр бергӧдчис Ерусалимӧ.
Аслас дас кӧкъямысӧд ӧксыалан воӧ, мусӧ да Енлысь крамсӧ сӧстӧммӧдӧм бӧрын, Иосей мӧдӧдіс Ацалийлысь Шафан писӧ, Маасей нима карса юралысьӧс да вӧвлӧмторъяс пасъялысь Йоахӧс, Иохазлысь писӧ, медым найӧ дзоньталісны Господь Енлысь крамсӧ.
Найӧ локтісны Хилки аркирей дінӧ да сетісны сылы Енлӧн крамӧ вайӧм сьӧмсӧ, мый пыранін видзысь левитъяс чукӧртісны Манассейлӧн да Ефремлӧн чужанкотыръяслысь, Израиль войтырлӧн мукӧд чужанкотыръяслысь, став Иуда войтырлысь, Венямин чужанкотырлысь да Ерусалимын олысьяслысь. Чукӧртӧм сьӧмсӧ сетісны Господьлысь крамсӧ дзоньталӧм вӧсна кывкутысьяслы, а найӧ юклісны сьӧмсӧ уджалысьяслы, кодъяс дзоньталісны-бурмӧдісны Господьлысь крамсӧ, юклісны тшӧтш тшупсьысьяслы да керка лэптысьяслы, медым найӧ ньӧбисны из да кер, дзоньталісны-зумыдмӧдісны иудаса ӧксыясӧн жугӧдӧм-пазӧдӧм керкаяс.
Крам дзоньталысьяс сьӧлӧмсяньныс вӧчисны ассьыныс уджнысӧ. Наӧн веськӧдлыны вӧлі индӧма левитъясӧс — Мерари рӧдысь Яхатӧс да Овадийӧс, Кааф рӧдысь Закарӧс да Мешулламӧс. Левитъяс, кодъяс кужисны ворсны, асланыс ворсан шы улӧ видзӧдісны из новлысьяс да мукӧд уджалысьяс бӧрся.
Левитъяс пӧвстысь вӧліны тшӧтш гижалысьяс, чина йӧз да дзиръя видзысьяс.
Кор Господьлӧн крамысь босьтісны сэтчӧ вайӧм сьӧмсӧ, Хилки поп аддзис сэтысь Господьлысь Индӧд небӧг, кодӧс вӧлі сетӧма Мӧисей пыр.
Хилки шуис Шафан гижалысьлы: «Господьлӧн крамысь ме аддзи Индӧд небӧг».
Хилки сетіс небӧгсӧ Шафанлы.
Шафан нуис небӧгсӧ ӧксылы да шуис: «Тэнад кесйӧгъясыд вӧчӧны ставсӧ, мый тэ тшӧктін.
Найӧ босьтісны Господьлӧн крамӧ чукӧртӧм сьӧмсӧ да сетісны крам дзоньталӧм вӧсна кывкутысьяслы да уджалысьяслы».
Нӧшта Шафан шуис ӧксылы, Хилки поп пӧ сетіс меным небӧг.
И Шафан лыддис тайӧ небӧгсӧ ӧксылы.
Кор ӧксы кыліс Индӧд небӧгысь кывъяссӧ, сійӧ косяліс паськӧмсӧ.
Хилкилы, Шафанлӧн Ахикам пилы, Микейлӧн Авдон пилы, Шафан гижалысьлы да аслас Асай кесйӧглы ӧксы тшӧктіс:
«Мунӧй да юалӧй Господьлысь, мый меным, а сідзжӧ Израильын да Иудаын коляс войтырыслы колӧ вӧчны тайӧ небӧгас гижӧмаыс серти. Ӧд Господьлӧн ыджыд скӧрлуныс ыпнитіс миян вылӧ сыысь, мый миян батьяс эз кутчысьны Господьлӧн кывйӧ, эз овны сы серти, мый гижӧма тайӧ небӧгас».
Хилки да ӧксылӧн мӧдӧдӧм йӧзыс мунісны Олдана пророк ань дінӧ. Сылӧн верӧсыс вӧлі Шаллум, коді вӧлі вежа паськӧм видзысьӧн. Шаллумлӧн батьыс вӧлі Токхат, Токхатлӧн — Хасрах. Олдана оліс Ерусалим карлӧн мӧд юкӧнас. Локтысьяс висьталісны сылы ӧксылысь корӧмсӧ.
Олдана шуис: «Господь, Израильлӧн Ен, тадзи висьталӧ: “Тіянӧс мӧдӧдысьлы шуӧй, мый Господь тадзи висьталӧ: 
Ме ыста ыджыд шог тайӧ карыс да сэні олысьяс вылӧ. Ме олӧмӧ пӧрта став ёрӧмсӧ, мый гижӧма сійӧ небӧгас, кодӧс ті лыддинныд иудаса ӧксылы. Тайӧ войтырыс эновтіс Менӧ, найӧ сотісны висьяс мукӧд енъяслы, ёна дӧзмӧдісны Менӧ асланыс киӧн вӧчӧмторъясӧн.
Таысь Менам скӧрлунӧй киссяс тайӧ карыс вылӧ да оз куслы”.
Иудаса ӧксылы, коді ыстіс тіянӧс шыасьны Господь дінӧ, висьталӧй, мый Господь, Израильлӧн Ен, сійӧ кывъясыс йылысь, мый тэ кывлін, тадзи висьталӧ:
”Тэ небзьӧдін сьӧлӧмтӧ да раммӧдчин Ме водзын, кор тэ кылін, мый Ме висьтавлі тайӧ карыс да сэні олысьяс йылысь. Тэ раммӧдчин Ме водзын, косялін паськӧмтӧ да бӧрдін Ме водзын, та вӧсна Ме кылі тэнӧ, — висьталӧ Господь. — 
Ме вуджӧда тэнӧ батьясыд дінӧ. Тэ лӧня кулан, и тэнӧ пуктасны дзебанінӧ. Тэнад синмыд оз аддзыв сійӧ ыджыд шогсӧ, мый Ме ыста тайӧ карыс да сэні олысьяс вылӧ”».
Мӧдӧдӧмаяс бӧр локтісны да висьталісны ӧксылы тайӧ кывъяссӧ.
Иосей ӧксы чукӧртіс Иуда муысь да Ерусалим карысь став юрнуӧдысьсӧ. Сэсся ӧксы муніс Господьлӧн крамӧ. Сыкӧд тшӧтш мунісны Иуда войтыр да Ерусалимын олысьяс, попъяс да левитъяс — муніс став войтырыс, пӧрысь и том.
Ӧксы гораа лыддис ставнас Йитӧд небӧгсӧ, мый аддзисны Господьлӧн крамысь.
Сэсся ӧксы сувтіс аслас местаӧ да Господь водзын кӧсйысис видзны йитӧд, мый Господь кӧртавліс Аслас войтыркӧд. Ӧксы кӧсйысис кывзысьны Господьлысь да став сьӧлӧмсяньыс овны Сылӧн индӧд-тшӧктӧмъяс серти, медым видзны небӧгӧ гижӧм йитӧдлысь кывъяссӧ.
Ӧксы тшӧктіс ставныслы, кодъяс вӧліны Ерусалимын, тшӧтш Венямин чужанкотырлы, вынсьӧдны йитӧдсӧ.
Ерусалимын олысьяс пондісны овны йитӧд серти, мый налӧн батьяслӧн Ен кӧрталіс накӧд.
Израиль войтырлӧн му пасьталаысь Иосей бырӧдіс став зывӧк идолсӧ да Израиль муын олысьяслы тшӧктіс юрбитны Господьлы, асланыс Енлы.
Иосейлӧн олан кадӧ найӧ эз кежлыны Господьысь, асланыс батьяслӧн Енмысь.
Ерусалимын Иосей пасйис Господьлы сиӧм Ыджыд лун. Медводдза тӧлысьлӧн дас нёльӧд лунӧ начкисны ыджыдлунся баляӧс.
Попъяслы Иосей индіс вӧчны ассьыныс уджсӧ да ышӧдіс найӧс кесъявны Господьлӧн крамын. Господьлы вежӧдӧм-торйӧдӧм левитъяслы, Израиль войтырӧс туйдӧдысьяслы, Иосей шуис: «Тіянлы оз нин ков новлӧдлыны пельпом выланыд вежа кудсӧ, ӧд сійӧс сувтӧдӧма крамӧ, мый лэптіс Давидлӧн Соломон пиыс, израильса ӧксы.
Ӧні кесъялӧй Господьлы, асланыд Енлы, да Сылӧн Израиль войтырлы.
Юксьӧй рӧд сертиныд котыръясӧ, кыдзи тшӧктісны израильса Давид ӧксы да сылӧн Соломон пиыс. Сулалӧй крамын котыръясӧн, медым войтырлӧн быд рӧдлы кесъяліс ӧти котыр. Вежӧдӧй-сӧстӧммӧдӧй асьнытӧ, начкӧй ыджыдлунся баляӧс да дасьтӧй сійӧс асланыд войтырлы. Ставсӧ вӧчӧй сідзи, кыдзи Господь тшӧктіс Мӧисей пыр».
Аслас пемӧс чукӧрысь Иосей ӧксы сетіс войтырыслы ыджыдлунся вись пыдди комын сюрс баляӧс да кӧзапиӧс, аслас овмӧсысь сетіс тшӧтш налы вись пыдди куим сюрс ӧшкӧс.
Ӧксылӧн киподувса юралысьяс ас кӧсйӧм сертиныс сетісны войтырыслы, попъяслы да левитъяслы козинъяс. Тайӧ юралысьясыс пӧвстысь Хилки, Закар да Ехиэл — Енлӧн крамын веськӧдлысьяс — сетісны попъяслы ыджыдлунся вись пыдди кык сюрс квайтсё баляӧс да кӧзапиӧс и куимсё ӧшкӧс, а Конаний да сылӧн Шемай да Нафанаил вокъясыс, нӧшта левитъяслӧн юралысьясыс — Хашавий, Евэл да Иозавад — сетісны левитъяслы ыджыдлунся вись пыдди вит сюрс баляӧс да кӧзапиӧс и витсё ӧшкӧс.
Кор ставсӧ вӧлі дасьтӧма кесъялӧм кежлӧ, сэки ӧксылӧн тшӧктӧм серти попъяс сувтісны асланыс местаӧ, а левитъяс сувтісны котыръясӧн.
Левитъяс начкисны ыджыдлунся баляясӧс, кулисны налысь кучиксӧ, а вирсӧ сетісны попъяслы. Тайӧ вирнас попъяс резісны висьпуктанінсӧ.
Левитъяс торйӧдісны висьяслысь юкӧнъяссӧ, мый колӧ вӧлі вайны сотан вись пыдди, да юклісны войтырыслы рӧд сертиныс, медым вись вайны Господьлы, кыдзи гижӧма Мӧисей небӧгын.
abu
Ыджыдлунся баляясӧс левитъяс пражитісны би вылын, кыдзи вӧлі тшӧктӧма вӧчны, а вежа вись пыдди вайӧм ӧшъяслысь яйсӧ найӧ пуисны гырничьясын да пӧртъясын да дзик пыр сеталісны войтырыслы. Та бӧрти левитъяс дасьтісны ыджыдлунся баляӧс аслыныс да попъяслы. Ӧд попъяс, Ааронсянь чужысьяс, сёр рытӧдз вайисны сотан висьяс да сотісны пемӧсъяслысь госсӧ.
Давид ӧксылӧн да сылӧн Асаф, Еман да Едутун пророкъяслӧн тшӧктӧм серти сьылысьяс, Асафсянь чужысьяс, сулалісны асланыс местаын. Быд дзиръя дорын сулалісны дзиръя видзысьяс. Сьылысьяслӧн да дзиръя видзысьяслӧн вокъясыс, левитъяс, дасьтісны налы ыджыдлунся баляӧс, та вӧсна налы эз вӧв колана мунны асланыс кесъяланінысь.
Тадзи сійӧ лунӧ вӧлі лӧсьӧдӧма Господьлы кесъялӧм, медым Иосей ӧксылӧн тшӧктӧм серти пасйыны Ыджыд лун да вайны сотан висьяс Господьлӧн висьпуктанін вылын.
Ерусалимӧ чукӧртчӧм Израиль войтыр пасйис Ыджыд лун. Та бӧрын сизим лун чӧж нӧшта пасйисны Шомтӧм нянь сёян лунъяс.
Израильын тадзисӧ эз на пасйывны Ыджыд лунсӧ Самуил пророклӧн олан лунъяссянь.
Весиг ӧти израильса ӧксы эз пасйывлы Ыджыд лунсӧ сідзи, кыдзи ӧні пасйисны сійӧс Иосей ӧксы, попъяс, левитъяс, став Иуда войтырыс, Израильысь локтӧмаяс да Ерусалимын олысьяс.
Тайӧ Ыджыд лунсӧ вӧлі пасйӧма Иосейлӧн дас кӧкъямысӧд ӧксыалан воӧ.
[Иосей ӧксы сотіс Ерусалим карын да став Иуда муын туналысьясӧс да ылӧгсӧ водзвыв юӧртысьясӧс, сотіс бӧлбанъяс, идолъяс да идолъяслы юрбитанінъяс. Тадзи сійӧ збыльмӧдіс Индӧд кывъяссӧ, мый вӧлі гижӧма небӧгӧ, кодӧс аддзис Господьлӧн крамысь Хилки поп. Таӧдз эз вӧв Иосей кодь ӧксыыс, коді эськӧ став сьӧлӧмнас, олӧмнас да став выннас шыасис Господь дінӧ да оліс Мӧисейлӧн Индӧд серти.
И Иосейлӧн кулӧм бӧрти сы кодь ӧксыыс эз вӧв.
Но Господь эз кусӧд Ассьыс ыджыд скӧрлунсӧ. Господьлӧн скӧрлуныс ыпъяліс Иуда вылӧ, ӧд Манассей ёна дӧзмӧдіс Сійӧс.
Господь шуис: «Израильӧс моз Ме ӧтдорта Иуда войтырӧс. Ме эновта Ерусалим кар, мый Ме бӧрйи, и крам, мый йылысь Ме шулі, мый сэні лоас Менам нимӧй».] Сы бӧрти, кор Иосей ӧксы выльысь лӧсьӧдіс крамын кесъялӧмсӧ, египетса Неко ӧксы мӧдӧдчис уськӧдчыны Каркемис кар вылӧ, мый сулаліс Ефрат ю дорын.
Иосей ӧксы петіс сылы паныд тышӧ.
Неко мӧдӧдіс ассьыс йӧзсӧ да тшӧктіс шуны Иосейлы: «Ме ог тэкӧд кӧсйы тышкасьны, иудаса ӧксы.
Ме эг тэныд паныд пет, а аслам вӧрӧглы паныд петі.
Енмыс тшӧктӧ менӧ тэрмасьны.
Эн пыксьы Енмыслы, медым Сійӧ эз бырӧд тэнӧ, ӧд Енмыс мекӧд».
Но Иосей дасьтысис тыш кежлӧ, эз бӧрыньтчы. Сійӧ эз кывзы Неколысь Енсянь висьталӧм кывъяссӧ, и Мегиддо ковтысын паніс тыш.
Ньӧвйӧн лыйсьысьяс лыйисны Иосей ӧксылы, и сійӧ шуис аслас кесйӧгъяслы: «Петкӧдӧй менӧ татысь, менӧ чорыда дойдісны».
Кесйӧгъясыс босьтісны сійӧс тарантассьыс, пуктісны мӧд тарантасӧ да нуисны Ерусалимӧ.
Сэні сійӧ кувсис. Сійӧс дзебисны батьясыслӧн дзебанінӧ.
Став Иуда войтырыс да Ерусалимын олысьяс бӧрдісны Иосей вӧсна.
Еремей сьыліс Иосей йылысь бӧрдан сьыланкыв.
Сьылысьяс талунъя лунӧдз сьылӧны Иосей йылысь бӧрдан сьыланкыв. Тайӧ сьыланкывсӧ пыртӧма бӧрдан сьыланкывъяс лыдӧ, Израильын ӧнӧдз сійӧс сьылӧны.
Став бурыс йылысь, мый Иосей ӧксы вӧчис Господьлӧн Индӧд серти, сылӧн мукӧд уджъясыс йылысь да сылӧн ӧксыалӧм дырйи лоӧмторъяс йылысь водзысяньыс и помӧдзыс гижӧма израильса да иудаса ӧксыяслӧн небӧгӧ.
Иосейлӧн кулӧм бӧрын Ерусалимын Иуда войтыр [мавтыштіс да] пуктіс ӧксыӧ Иосейлысь Иохаз писӧ.
Ӧксыӧ пуксигас Иохазлы вӧлі кызь куим арӧс. Куим тӧлысь чӧж сійӧ юраліс Ерусалимын. 
[Сылӧн мамыс вӧлі Хамуталь, Ливнаысь Еремейлӧн нылыс.
Батьясыс моз Иохаз вӧчис Господь водзын шогмытӧмсӧ.
Хамат муын Ривла карын Неко фараон дорис сійӧс чепъясӧн, медым сійӧ эз вермы юравны Ерусалимын.]
Ерусалимын египетса Неко ӧксы чӧвтіс Иохазӧс юралан пуклӧсысь [да вайӧдіс сійӧс Египет муӧ]. Иуда войтырлы египетса ӧксы тшӧктіс мынтыны вот — сё талант эзысь да ӧти талант зарни.
Иохазлысь Эляким воксӧ египетса Неко фараон пуктіс ӧксыавны Иуда муын да Ерусалим карын и сетіс сылы Ехояким ним. Сылысь Иохаз воксӧ фараон нуӧдіс Египетӧ. [Иохаз куліс сэні.
Ӧксы чукӧртіс войтырлысь эзысь да зарни, сэсся чукӧртӧмасӧ сетісны фараонлы. Тадзи Иуда войтыр кутіс мынтыны Неко фараонлы вот.]
Ӧксыӧ пуксигас Ехоякимлы вӧлі кызь вит арӧс. Дас ӧти во чӧж сійӧ юраліс Ерусалимын. [Сылӧн мамыс вӧлі Зевудда, Румаысь Педайлӧн нылыс.
Батьясыс моз] Ехояким вӧчис аслас Господь Ен водзын шогмытӧмсӧ.
[Ехоякимлӧн юралан кадӧ вавилонса Навукодоносор ӧксы уськӧдчис Иуда му вылӧ. Куим во чӧж Ехояким вӧлі Навукодоносорлӧн кипод улын, но сэсся кыпӧдчис сылы паныд.
Калдеяысь, Самарияысь да аммон войтырлӧн муысь Господь мӧдӧдіс йӧзӧс, медым найӧ уськӧдчисны Иуда войтыр вылӧ. Мӧдӧдіс тшӧтш Арамысь да Моавысь куштысь-мырддялысьясӧс. Но сэсся найӧ вешйисны Иуда войтыр дінысь. Господь водзвыв висьталіс та йылысь пророкъяс пыр, кодъяс кесъялісны Сылы.
Господь ёна скӧраліс Иуда вылӧ, кӧсйис эновтны сійӧс Манассейлӧн став мыжыс вӧсна да сы вӧсна, мый Ехояким кисьтіс мыжтӧм йӧзлысь вирсӧ да тыртіс сыӧн Ерусалим кар.
Но Господь эз кӧсйы дзикӧдз бырӧдны Иуда войтырӧс.]
Вавилонса Навукодоносор ӧксы уськӧдчис Ехояким вылӧ да дорис сійӧс чепъясӧн, медым нуӧдны Вавилонӧ.
Господьлӧн крамысь Навукодоносор нуис Вавилонӧ дозмук-кӧлуй да пуктіс найӧс аслас керкаӧ.
Ехояким ӧксыалӧм дырйи мукӧд лоӧмторъяс йылысь, зывӧк идолъяслы Ехоякимлӧн копрасьӧм йылысь да сылӧн олӧм пом йылысь гижӧма израильса да иудаса ӧксыяслӧн небӧгӧ. 
[Ехояким куліс да вуджис батьясыс дінӧ. Сійӧс дзебисны Ганозанӧ батьясыскӧд орччӧн.] 
Ехояким бӧрти ӧксыӧ пуксис сылӧн Еконей пиыс.
Ӧксыӧ пуксигас Еконейлы вӧлі дас кӧкъямыс арӧс. Куим тӧлысь да дас лун чӧж сійӧ юраліс Ерусалимын. Еконей вӧчис Господь водзын шогмытӧмсӧ.
Во заводитчигас Навукодоносор ӧксы мӧдӧдіс ассьыс йӧзсӧ, медым вайӧдны Еконейӧс Вавилонӧ. Господьлӧн крамысь Вавилонӧ нуисны дона дозмук-кӧлуй. Иудаын да Ерусалимын юравны Навукодоносор пуктіс Еконей рӧдысь Седекейӧс.
Ӧксыӧ пуксигас Седекейлы вӧлі кызь ӧти арӧс. Дас ӧти во чӧж сійӧ юраліс Ерусалимын. Сійӧ вӧчис аслас Господь Ен водзын шогмытӧмсӧ.
Сійӧ весиг эз раммӧдчы Еремей пророк водзын, коді сёрнитіс Господьсянь. Седекей кыпӧдчис Навукодоносор ӧксылы паныд, кодлы Ен водзын кыв сетіс, мый лоас ӧксылӧн кипод улын. Седекей пыксис да чорзьӧдіс сьӧлӧмсӧ, эз кӧсйы бергӧдчыны Израильлӧн Господь Ен дінӧ.
Попъяслӧн да войтырлӧн юралысьясыс тшӧтш эновтісны Господьӧс. Мукӧд войтыр моз найӧ вӧчисны пежсӧ да пежалісны Господьлысь крамсӧ, мый Сійӧ вежӧдіс Ерусалимын.
Господь, налӧн батьяслӧн Ен, выльысь и выльысь мӧдӧдліс на дінӧ юӧртысьясӧс, ӧд Сійӧ жалитіс Ассьыс войтырсӧ да Ассьыс оланінсӧ.
Но найӧ лёкӧдісны Енсянь юӧртысьясӧс да нинӧмӧ пуктісны Сылысь кывъяссӧ. Найӧ омӧльтісны Енлысь пророкъяссӧ сэтчӧдз, кытчӧдз Господь эз скӧрмы Аслас войтыр вылӧ, и налы эз вӧв мездмӧмыс.
Господь мӧдӧдіс калдеяса ӧксыӧс, медым сійӧ уськӧдчис Иуда войтыр вылӧ да виис шыпуртӧн вежа крамын налысь зонъяссӧ. Господь эз жалит [Седекейӧс,] зонъясӧс, нывъясӧс, пӧрысь да олӧма йӧзӧс, Сійӧ ставнысӧ сетіс калдеяса ӧксы киӧ.
Господь Енлӧн крамысь став дозмук-кӧлуйсӧ, ыджыдӧс и ичӧтӧс, крамысь став озырлунсӧ, ӧксылысь да сылӧн киподувса юралысьяслысь озырлунсӧ — ставсӧ вайисны Вавилонӧ.
Найӧ сотісны Енлысь крамсӧ, жугӧдісны Ерусалим карлысь стенсӧ, сотісны ӧксылысь керкаяссӧ да бырӧдісны сылысь став озырлунсӧ.
А найӧс, кодъяс ловйӧн колисны, нуӧдісны пленӧ Вавилонӧ. Калдеяса ӧксылы да сысянь чужысьяслы найӧ вӧліны кесйӧг туйынӧсь сэтчӧдз, кытчӧдз сэні эз кут юравны персияса ӧксы. Тадзи иніс Господьлӧн шуӧмыс, мый Еремей висьтавліс, муыс пӧ лоӧ овтӧминӧн сизимдас во чӧж, сійӧ кутас шойччыны сійӧ кад чӧжыс, мыйта кад сылы шойччӧгсӧ эз сетлыны.
Персияса Кир ӧксылӧн медводдза веськӧдлан воӧ иніс Господьлӧн кывйыс, мый Сійӧ висьталіс Еремей пыр. Господь ышӧдіс Кир ӧксыӧс гижны да ас му пасьталаыс юӧртны татшӧм тшӧктӧм:
«Тадзи висьталӧ персияса Кир ӧксы. Господь, енэжвывса Ен, став му пасьталаысь войтыръясӧс сетіс менам кипод улӧ. Сійӧ тшӧктіс меным лэптыны Иуда муын, Ерусалим карын, Сылы крам.
Быдӧн Сылӧн войтырысь мед мӧдӧдчас туйӧ. Господь Ен мед лоас быдӧнкӧд!»
abu
[Господьӧй, Ставсӧвермысьӧй, Тэ — миян батьяслӧн Ен, Ӧвраамлӧн, Исааклӧн да Яковлӧн Ен да насянь чужысь веськыда олысьяслӧн Ен! Тэ вӧчин енэжсӧ да мусӧ став налӧн мичлуннас, Аслад шуӧмӧн Тэ дорин саридзсӧ, Тэ тупкин пыдӧстӧмин, кӧрталін сійӧс Аслад повзьӧдана да ошкана нимнад. Тэнад нимысь ставныс полӧны, Тэнад вынысь ставныс дзӧрӧны-тіралӧны. Тэнад помтӧм-дортӧм да шензьӧдана дзирдлуныд водзын да Тэнад скӧрлуныд водзын некод оз вермы сулавны, ӧд Тэ повзьӧдан мыж вӧчысьясӧс.
Но Тэнад кӧсйысьӧм буралӧмыд помтӧм-дортӧм да вежӧрӧ тӧртӧм. Господьӧй, Тэ — медыджыдыс, Тэ — бур сьӧлӧма, дыр терпитысь, Тэнад буралӧмыд ыджыд, Тэ бӧр босьтан мортлы мӧдӧдӧм шогсӧ.
Господьӧй, Тэ вывті бур, Тэ кӧсйысин сетны позянлун бергӧдчыны мыжысь, Тэ кӧсйысин прӧститны Тэ водзын мыжаясӧс, Аслад ыджыд буралӧмыд вӧсна Тэ сетін мыжаяслы позянлун бергӧдчыны да мездмыны.
Господьӧй, веськыда олысьяслӧн Енмӧй, Тэ эн тшӧкты бергӧдчыны веськыда олысьяслы — Ӧвраамлы, Исааклы да Яковлы, кодъяс эз вӧчны мыжсӧ Тэныд паныд, — но Тэ тшӧктан бергӧдчыны меным, мыжа мортлы, ӧд ме уна мыж вӧчи, менам мыжъясӧй саридздор лыа дорысь унджык на.
Господьӧй, менам мыжъясӧй лыдтӧм-тшӧттӧмӧсь, ме вывті уна лёксӧ вӧчи, та вӧсна ме ог шогмы видзӧдны енэжас.
Менӧ личкӧны кӧрт чепъяс, ме ог вермы весиг юрӧс кыпӧдны, меным абу шойччӧгыс, ӧд ме скӧрмӧді Тэнӧ, вӧчи Тэ водзын лёксӧ. Ме эг ов Тэнад кӧсйӧм серти, эг кутчысь Тэнад тшӧктӧмъясӧ, ме сувтӧді бӧлбанъясӧс, вӧчи сійӧ, мый Тэ мустӧмтан.
Ӧні став сьӧлӧмсянь ме копыртча Тэ водзӧ, кора Тэнӧ бурсьӧлӧмтчыны ме дінӧ.
Господьӧй, ме мыж вӧчи, ме мыжа Тэ водзын, ме тӧда ассьым лёк вӧчӧмъясӧс, но кора-кевма Тэнӧ, прӧстит менӧ, Господьӧй, прӧстит, эн скӧрав ме вылӧ лёк вӧчӧмъясӧй вӧсна, вунӧд найӧс пыр кежлӧ, эн мыжды менӧ, эн шыбит пыдӧстӧминӧ, ӧд Тэ, Енмӧй, мыжысь бергӧдчысьяслӧн Ен.
Петкӧдлы ыджыд бурлунтӧ менам олӧмын, Аслад ыджыд буралӧмыд кузя мезды менӧ, шогмытӧмӧс. Сэки став олӧм чӧж ме кута ошкыны Тэнӧ. Ӧд Тэнӧ ошкӧны енэжвыв вынъяс, Тэнад дзирдлуныд мед лоӧ нэмъяс чӧж.
Аминь!]
{Еврей йӧз (комиӧдіс Kodko) @ Ездра @ религ. гижӧд @ Библия @ 2021 @ Лб. .}
ЕЗДРА
Персияса Кир ӧксылӧн медводдза веськӧдлан воӧ иніс Господьлӧн кывйыс, мый Сійӧ висьталіс Еремей пыр. Господь ышӧдіс Кир ӧксыӧс гижны да ас му пасьталаыс юӧртны татшӧм тшӧктӧм:
«Тадзи висьталӧ персияса Кир ӧксы. Господь, енэжвывса Ен, став му пасьталаысь войтыръясӧс сетіс менам кипод улӧ. Сійӧ тшӧктіс меным лэптыны Иуда муын, Ерусалим карын, Сылы крам.
Быдӧн Сылӧн войтырысь мед мунас Иуда муӧ Ерусалимӧ. Енмыс мед лоас быдӧнкӧд! Лэптӧй сэні крам Господьлы, Израильлӧн Енлы. Сійӧ — Ен, кодлӧн оланіныс Ерусалимын.
Быдлаын, кӧні олӧ тайӧ коляс войтырыс, сэтчӧс олысьяс мед отсасясны тайӧ войтырыслы. Ерусалимын Енлысь крам лэптӧм вылӧ мед сетасны эзысь-зарни, эмбур, ыж-мӧс да ас кӧсйӧм серти козинъяс».
Иуда да Венямин чужанкотыръясысь рӧдкутысьяс, попъяс да левитъяс — ставныс, кодӧс Ен ышӧдіс лэптыны Ерусалимын Господьлысь крам, лӧсьӧдчисны петны туйӧ.
Матігӧгӧр олысьяс сетісны налы эзысь дозмук-кӧлуй, зарни, эмбур, ыж-мӧс, уна донатор да козин.
Кир ӧксы тшӧктіс вайны став дозмук-кӧлуйсӧ, мый Навукодоносор вӧлі босьтӧма Господьлӧн крамысь, вайӧма Ерусалимысь да пуктӧма аслас енлӧн керкаӧ.
Персияса Кир ӧксы став тайӧ дозмук-кӧлуйсӧ сетіс озырлун видзысь Мифредатлы, а мӧдыс ставсӧ арталӧм-гижалӧм бӧрын сетіс Шешбацарлы, Иуда чужанкотырлӧн юралысьлы.
Дозмук-кӧлуй лыдыс вӧлі: комын зарни тасьті, сюрс эзысь тасьті, кызь ӧкмыс пурт, комын зарни доз, нёльсё дас эзысь доз да сюрс мында нӧшта мукӧд доз.
Ставнас зарни да эзысь дозмук-кӧлуйыс вӧлі вит сюрс нёльсё.
Ставсӧ тайӧс Шешбацар босьтіс аскӧдыс, кор пленӧ босьтӧмаяс Вавилонысь мӧдӧдчисны Ерусалимӧ.
Иуда муысь йӧз, кодъясӧс вавилонса Навукодоносор ӧксы коркӧ нуӧдліс пленӧ, ӧні бӧр локтісны Вавилонысь Ерусалимӧ да Иуда муӧ — быдӧн аслас карӧ. Найӧс вайӧдісны Зоровавель, Исус, Неемий, Серай, Релай, Мардокей, Билшан, Миспар, Бигвай, Рехум да Баан.
Израиль войтырлӧн айулов лыдыс:
Парош рӧдысь вӧлі кык сюрс сё сизимдас кык морт, Шефатай рӧдысь — куимсё сизимдас кык морт, Арах рӧдысь — сизимсё сизимдас вит морт, Пахат-Моав рӧдысь Исуссянь да Йоавсянь чужысьыс — кык сюрс кӧкъямыссё дас кык морт, Элам рӧдысь — сюрс кыксё ветымын нёль морт, Затту рӧдысь — ӧкмыссё нелямын вит морт, Заккай рӧдысь — сизимсё квайтымын морт, Бани рӧдысь — квайтсё нелямын кык морт, Бебай рӧдысь — квайтсё кызь куим морт, Азгад рӧдысь — сюрс кыксё кызь кык морт, Адоникам рӧдысь — квайтсё квайтымын квайт морт, Бигвай рӧдысь — кык сюрс ветымын квайт морт, Адин рӧдысь — нёльсё ветымын нёль морт, Атер рӧдысь Езекейсянь чужысьыс — ӧкмысдас кӧкъямыс морт, Бецай рӧдысь — куимсё кызь куим морт, Иор рӧдысь — сё дас кык морт, Хашум рӧдысь — кыксё кызь куим морт, Гиббар рӧдысь — ӧкмысдас вит морт.
Виплиемысь вӧлі сё кызь куим морт, Нетофаысь — ветымын квайт морт, Анатотысь — сё кызь кӧкъямыс морт, Азмаветысь — нелямын кык морт, Киръят-Яримысь, Кефираысь да Беротысь — сизимсё нелямын куим морт, Рамаысь да Геваысь — квайтсё кызь ӧти морт, Микмасысь — сё кызь кык морт, Вефильысь да Гайысь — кыксё кызь куим морт, Невоысь — ветымын кык морт, Магбишысь — сё ветымын квайт морт.
Мӧд Элам рӧдысь вӧлі сюрс кыксё ветымын нёль морт, Харим рӧдысь — куимсё кызь морт.
Лодысь, Хадидысь да Оноысь вӧлі сизимсё кызь вит морт, Ериконысь — куимсё нелямын вит морт, Сенаысь — куим сюрс квайтсё комын морт.
Попъяслӧн лыдыс: Едай рӧдысь Исуссянь чужысьыс вӧлі ӧкмыссё сизимдас куим морт, Иммер рӧдысь — сюрс ветымын кык морт, Пашхур рӧдысь — сюрс кыксё нелямын сизим морт, Харим рӧдысь — сюрс дас сизим морт.
Левитъяслӧн лыдыс вӧлі сизимдас нёль морт. Найӧ вӧліны Исус да Кадмиэл рӧдъясысь, Ходавийсянь чужысьяс.
Сьылысьяслӧн лыдыс вӧлі сё кызь кӧкъямыс морт. Найӧ вӧліны Асаф рӧдысь.
Дзиръя видзысьяслӧн лыдыс вӧлі сё комын ӧкмыс морт. Найӧ вӧліны Шаллум, Атер, Талмон, Аккув, Хатит да Шовай рӧдъясысь.
Крамбердса кесйӧгъяс вӧліны Цихай рӧдысь, нӧшта Хасуф, Таббаот, Керос, Сиах, Падон, Лебан, Хагаб, Аккув, Хагав, Шалмай, Ханан, Гиддел, Гахар, Реай, Рецин, Некодай, Газзам, Уззай, Пасеах, Бесай, Аснай, Меун, Нефис, Бакбук, Хакуп, Хархур, Бацлут, Мехид, Харшай, Баркос, Сисар, Темах, Нециах да Хатиф рӧдъясысь.
Соломонлӧн кесйӧгъяссянь чужысьяс вӧліны Сотай рӧдысь, нӧшта Соферет, Перуд, Ял, Даркон, Гиддел, Шефатай, Хаттил, Покерет-Цевайм да Ами рӧдъясысь. Крамбердса кесйӧгъяслӧн да Соломонлӧн кесйӧгъяссянь чужысьяслӧн лыдыс вӧлі куимсё ӧкмысдас кык морт.
Тел-Мелахысь, Тел-Харшаысь, Керубысь, Адданысь да Иммерысь петысьяс эз вермыны висьтавны, кутшӧм чужанкотырысь найӧ, эз вермыны эскӧдны, мый налӧн рӧдыс петӧ Израиль войтырысь.
Тайӧ йӧзыс вӧліны Делайсянь, Товисянь да Некодайсянь чужысьяс — ставнас квайтсё ветымын кык морт, тшӧтш Хабай, Хаккоц да Барзиллай попъяссянь чужысьяс. Барзиллай гӧтрасьлӧма галаадса Барзиллайлӧн ныв вылӧ, та бӧрын сійӧс кутӧмаӧсь тадзи нимтыны.
Найӧ корсисны чужанвуж гижӧдъясысь нимъяснысӧ, но эз аддзыны. Та вӧсна найӧс эз пыртны попъяс лыдӧ.
Медыджыд юралысь шуис, мый налы оз ков сёйны вежа вись, кытчӧдз оз лок поп, коді пудъясяс урим да туммим отсӧгӧн.
Локтысьяслӧн лыдыс ставнас вӧлі нелямын кык сюрс куимсё квайтымын морт. Тайӧ лыдас эз пырны кесйӧгъяс, кодъяслӧн лыдыс вӧлі сизим сюрс куимсё комын сизим морт.
Локтысьяс пӧвстын вӧлі кыксё сьылысь.
Локтысьяслӧн вӧлі сизимсё комын квайт вӧв, кыксё нелямын вит мул, нёльсё комын вит верблюд да квайт сюрс сизимсё кызь осёл.
Кор рӧдкутысьяс локтісны Ерусалимӧ Господьлӧн жугӧдӧм крам дорӧ, на пиысь унаӧн ас кӧсйӧм сертиныс сетісны козинъяс, медым Енлысь керкасӧ лэптыны важ подув вылас.
Быдӧн сетіс сы мында, мыйта вермис. Ставнас вӧлі сетӧма квайтымын ӧти сюрс зарни сьӧм, вит сюрс эзысь сьӧм* да попъяслы сё дӧрӧм.
Попъяс, левитъяс, войтыр, сьылысьяс, дзиръя видзысьяс да крамбердса кесйӧгъяс овмӧдчисны асланыс каръясӧ. Быд израильса морт овмӧдчис аслас карӧ.
Сизимӧд тӧлысьнас став Израиль войтыр локтіс асланыс каръясысь да чукӧртчис Ерусалимӧ.
Иоседеклӧн Исус пиыс аслас вокъяскӧд, кодъяс вӧліны попъясӧн, да Шеалтиэллӧн Зоровавель пиыс аслас вокъяскӧд вӧчисны Израильлӧн Енлы висьпуктанін, медым вайны сэні сотан висьяс, кыдзи гижӧма Енлӧн морт Мӧисейлӧн Индӧдын.
Найӧ полісны налӧн муын олысь войтыръясысь. Но та вылӧ видзӧдтӧг найӧ сувтӧдісны висьпуктанінсӧ важ подув вылас да пондісны вайны Господьлы сотан висьяс асывнас и рытнас.
Индӧдын гижӧм серти пасйисны Чом вӧчан лунъяс, быд лун вайисны сотан висьяс, мыйта вӧлі тшӧктӧма вайны сійӧ лунӧ.
Тайӧ кадсяньыс найӧ вайисны быдлунся сотан висьяс, а выль тӧлысь пасйигӧн да Господьлы сиӧм мукӧд вежа гажӧдчан лунъясӧ вайисны индӧм висьяс. Нӧшта вайисны Господьлы ас кӧсйӧм серти висьяс.
Тадзи сизимӧд тӧлысьлӧн медводдза лунӧ Израиль войтыр бара пондіс вайны Господьлы сотан висьяс, но крамлы подувсӧ абу на вӧлі пуктӧма.
Изйысь да пуысь вӧчасьысьяслы израильсаяс сетісны сьӧм, а сёян-юан да вый сетісны сидонса да тирса йӧзлы, медым найӧ саридзті вайисны Иоппия карӧ Ливанысь сус пуяс. Персияса Кир ӧксы лэдзис вӧчны тайӧс.
Ерусалимӧ Енлӧн крам вӧчанінӧ локтӧмсянь мӧд во мӧд тӧлысьнас Шеалтиэллӧн Зоровавель пиыс да Иоседеклӧн Исус пиыс, нӧшта налӧн вокъясыс — попъяс да левитъяс — да пленысь Ерусалимӧ локтӧмаяс босьтчисны вӧчны крам. Уджнас веськӧдлыны пуктісны кызь арӧса да ыджыдджык арлыда левитъясӧс.
Тайӧ вӧліны Исус аслас пиянкӧд да вокъясыскӧд, Иуда чужанкотырысь Кадмиэл аслас пиянкӧд да левитъяс пӧвстысь Хенададлӧн пияныс асланыс пиянкӧд. Найӧ видзӧдісны Енлӧн крам лэптӧм бӧрся.
Кор Господьлӧн крамлы подувсӧ вӧлі пуктӧма, сувтӧдісны попъясӧс кесъялан паськӧмӧн да трубаясӧн, Асаф рӧдысь левитъясӧс — кимвалъясӧн, медым ошкыны Господьӧс, кыдзи коркӧ тшӧктыліс Давид, Израильлӧн ӧксы.
Господьӧс ошкӧмӧн да нимӧдӧмӧн найӧ сьылісны: Господь бур, Сылӧн буралӧмыс Израиль дінӧ оз помасьлы!
Став войтырыс гораа горзӧмӧн ошкис Господьӧс. Ошкисны Господьӧс сыысь, мый крамлысь подувсӧ лои пуктӧма.
Олӧма попъяс, левитъяс да рӧдкутысьяс пиысь унаӧн, кодъяс аддзылісны воддза крамсӧ, выль крамлӧн подув вылӧ видзӧдӧмӧн сыркъялӧмӧн бӧрдісны, а мукӧдыс нимкодьнысла гораа горзісны.
Войтырыс сэтшӧм гораа горзіс, мый бӧрдӧм шысӧ сьӧкыд вӧлі торйӧдны нимкодясян шыысь. Горзӧмыс кыліс зэв ылӧдз.
Иуда да Венямин чужанкотыръясӧс мустӧмтысьяс тӧдмалісны, мый пленысь локтӧмаяс лэптӧны крам Господьлы, Израильлӧн Енлы.
Найӧ локтісны Зоровавель да рӧдкутысьяс дінӧ да шуисны: «Лэдзӧй миянлы тіянкӧд ӧтвыв лэптыны крамсӧ, ӧд ми тіян моз юрбитам тіян Енлы. Сійӧ кадсяньыс, кор ассурса Асардан ӧксы вайис миянӧс татчӧ, ми вись ваям тіян Енлы».
Зоровавель, Исус да израильса мукӧд рӧдкутысьяс вочавидзисны: «Миянкӧд тшӧтш ті онӧ кутӧй лэптыны миян Енлы крамсӧ.
Ми асьным лэптам сійӧс Господьлы, Израильӧн Енлы, кыдзи тшӧктіс миянлы персияса Кир ӧксы».
Та бӧрын сэтчӧс муын олысьяс пондісны повзьӧдлыны Иуда войтырӧс да падмӧдны найӧс крамсӧ лэптӧмысь, весиг сетлісны козинъяс чина йӧзлы, медым торкны уджсӧ. Тадзи найӧ вӧчисны персияса Кир ӧксылӧн веськӧдлан кадӧ Дарийлӧн ӧксыӧ пуксьытӧдз.
Ахашверош дырйи, кор сійӧ сӧмын на пуксис ӧксыавны, крам лэптӧмлы паныд сувтысьяс гижисны Иудаын да Ерусалимын олысьяс вылӧ удтысян гижӧд.
Бӧрынджык персияса Артаксеркс ӧксылӧн веськӧдлігӧн Бишлам, Мифредат да Табел асланыс йӧзкӧд ыстісны ӧксылы гижӧд.
Сійӧс гижӧма вӧлі арамей кыв вылын.
Рехум юралысь да Шимшай гижалысь Ерусалим йылысь гижисны Артаксеркс ӧксылы татшӧм гижӧд:
«Гижӧны Рехум юралысь, Шимшай гижалысь да налӧн уджъёртъясыс — ёрдысьяс да Тарпелысь, Персияысь, Урукысь, Вавилонысь, Сузаысь, Дехаысь да Эламысь мӧдӧдӧмаяс, нӧшта мукӧд войтыр пӧвстысь йӧз. Коркӧ тайӧ войтыръяссӧ вайӧдіс да овмӧдіс самарияса каръясӧ да Авар-Нахара* муӧ вына да нималана Аснафар [Сеннахирим]».
Гижӧдыс водзӧ юргис тадзи: «Артаксеркс ӧксылы гижӧны тэнад кесйӧгъяс, Авар-Нахараын олысьяс.
Юӧртам тэныд, ӧксыӧй, мый иудейяс, кодъяс мунісны тэ дорысь, локтісны миян дінӧ Ерусалимӧ. Ӧні найӧ лэптӧны лёкнас да шызьӧмнас тырӧм тайӧ карсӧ, кыпӧдӧны карса стенсӧ да дзоньталӧны подувсӧ.
Та вӧсна сетам тӧдны тэныд, ӧксыӧй: найӧ кӧ лэптасны карнысӧ да кыпӧдасны стенсӧ, сэки дугдасны мынтыны тэныд воттӧ. Тадзикӧн ӧксы кудйыд вермас кушмыны.
Ми, тэнад кесйӧгъяс, огӧ вермӧй видзӧдны, кыдзи ӧксынымӧс нинӧм туйӧ пуктӧны. Та вӧсна, ӧксыӧй, ми ыстам тэныд тайӧ гижӧдсӧ.
Корам видзӧдлыны воддза ӧксыяслысь казьтылан небӧгъяссӧ. Сэтысь тӧдмалан, мый тайӧ карыс, збыльысь, паныд кыпӧдчысьяслӧн кар, кысянь локтӧ лёкыс ӧксыяслы да налӧн муяслы. Тайӧ карас важысянь нин шызьӧм-гызьӧмыс мунӧ, та вӧсна и бырӧдӧма вӧлі сійӧс.
Ми юӧртам тэныд, ӧксыӧй: карсӧ кӧ лэптасны да карса стенсӧ кыпӧдасны, сэки Авар-Нахара мутӧ воштан».
Ӧксы мӧдӧдіс татшӧм вочавидзӧм: «Гижа Рехум юралысьлы, Шимшай гижалысьлы да налӧн уджъёртъяслы, кодъяс олӧны Самарияын да Авар-Нахараын. Лӧнь олӧм тіянлы!
Тіянлысь мӧдӧдӧм гижӧднытӧ меным вуджӧдісны да лыддисны.
Ме тшӧкті видзӧдлыны важ пасйӧдъяс. И збыльысь, тайӧ карыс, вӧлӧмкӧ, важысянь нин кыпӧдчӧ ӧксыяслы паныд, и сійӧ пыр шызьӧма-гызьӧма. Ерусалим вылын ыджыдалӧмаӧсь вына ӧксыяс. На улын вӧлӧма став Авар-Нахара муыс, и сэтчӧс олысьясыс налы мынтылӧмаӧсь вот.
Сідзкӧ, карсӧ лэптысьяслы тшӧктӧй, мед дугдасны уджавнысӧ. Менам тшӧктытӧдз мед карсӧ оз лэптыны.
Тӧждысьӧй та йылысь, медым ӧксылы таысь лёкыс эз ло».
Кор Артаксеркс ӧксылысь гижӧдсӧ лыддисны Рехумлы, Шимшай гижалысьлы да налӧн уджъёртъяслы, найӧ дзик пыр мунісны Ерусалимӧ иудейяс дінӧ. Сэні тышкайӧз отсӧгӧн падмӧдісны налысь уджсӧ.
Тадзи вӧлі дугӧдӧма Ерусалимын крам лэптӧмсӧ. Уджыс сулаліс персияса Дарий ӧксылӧн мӧд веськӧдлан воӧдз.
Аггей пророк да Закар пророк, Иддолӧн пиыс, пророкалісны Израильлӧн Ен нимсянь Иуда муын да Ерусалимын олысь иудейяслы.
Сэки Шеалтиэллӧн Зоровавель пиыс да Иоседеклӧн Исус пиыс босьтчисны лэптыны Енлысь крамсӧ Ерусалимын. Енлӧн пророкъяс вӧліны накӧд да отсасисны налы.
Крам лэптысьяс дінӧ локтісны Авар-Нахара муын юралысь Таттенай, Шетар-Бозенай да налӧн уджъёртъясыс. Найӧ юалісны: «Коді лэдзис тіянлы лэптыны тайӧ крамсӧ да водзӧ уджавны тані?»
Нӧшта корисны висьтавны крам лэптысьяслысь нимъяссӧ.
Но Енмыс вӧлі иудейяслӧн юрнуӧдысьяскӧд. Налы лэдзисны уджавны водзӧ. Юралысь аслас йӧзкӧд шуис гижны Дарий ӧксылы да виччысьны сысянь вочавидзӧм.
Авар-Нахара муын юралысь Таттенай, Шетар-Бозенай да накӧд уджалысь чина йӧз мӧдӧдісны Дарий ӧксылы татшӧм гижӧд:
«Лӧнь олӧм Дарий ӧксылы!
Юӧртам тэныд, ӧксыӧй, мый ми ветлім Иуда муӧ видзӧдлыны ыджыд Енлысь крамсӧ.
Крамсӧ лэптӧны ыджыд изъясысь, стенсӧ эжӧны пӧвъясӧн.
Уджыс мунӧ ӧдйӧ да бура.
Ми юалім налӧн юрнуӧдысьяслысь, коді лэдзис налы уджавны да лэптыны крамсӧ.
Нӧшта ми юалім нимъяснысӧ, медым юӧртны тэныд, коді веськӧдлӧ уджнас.
Найӧ вочавидзисны миянлы тадзи: “Ми енэжын да му вылын ыджыдалысь Енлӧн кесйӧгъяс. Ми выльысь вӧчам крамсӧ, кодӧс вӧлі лэптӧма тані уна во сайын. Сійӧс лэптыліс Израильлӧн ыджыд ӧксы.
Но миян батьяс скӧрмӧдісны енэжвывса Енмӧс, и Сійӧ сетіс найӧс калдеяса Навукодоносорлӧн, вавилонса ӧксылӧн, киӧ.
Навукодоносор жугӧдіс крамсӧ, а войтырсӧ нуӧдіс Вавилонӧ.
Но кор Вавилонын ӧксыӧ пуксис Кир, сійӧ аслас медводдза веськӧдлан воӧ тшӧктіс лэптыны Енлысь крамсӧ.
Кир ӧксы тшӧктіс вайны став зарни да эзысь дозмук-кӧлуйсӧ, мый Навукодоносор вӧлі босьтӧма Енлӧн крамысь, вайӧма Ерусалимысь да пуктӧма вавилонса крамӧ.
Кир ӧксы босьтіс найӧс вавилонса крамысь да сетіс Шешбацарлы, кодӧс сійӧ индіс юралысьӧн. Шешбацарлы шуис, мый Енлысь крамсӧ колӧ лэптыны Ерусалимын важ местаас и дозмук-кӧлуйсӧ нуны сэтчӧ.
Шешбацар локтіс Ерусалимӧ да пуктіс Енлӧн крамлы подувсӧ.
Сійӧ кадсяньыс ми лэптам крамсӧ, но сійӧс абу на эштӧдӧма”.
Ӧксыӧй, тэныд кӧ шогмана, мед корсьласны Вавилонысь ӧксыяслӧн небӧг видзанінысь, збыльысь-ӧ Кир ӧксы тшӧктылӧма лэптыны Ерусалимын Енлысь крамсӧ. Лача кутам, ӧксыӧй, мый миянлы сетасны тӧдны тэнсьыд шуӧмтӧ».
Дарий ӧксы тшӧктіс корсьны вавилонса озырлун видзанінъясысь небӧгъяс.
Мидия муын Экбатана карын ӧксы керкаысь сюри небӧг, кытчӧ вӧлі гижӧма: «Казьтылан пасйӧдъяс.
Кир ӧксы аслас медводдза веськӧдлан воӧ сетіс тшӧктӧм, медым вись вайӧм могысь Ерусалимын лэптыны Енлысь крамсӧ. Подувсӧ мед вӧчасны зумыда.
Крамыс судтанас мед вӧлі квайтымын гырддза, и пасьтанас — квайтымын гырддза.
Стенсӧ мед тэчасны ыджыд изъясысь. Быд куим изъя визь вылӧ мед пуктасны ӧти визь кер.
Ставсьыс мед мынтысясны ӧксылӧн кудйысь.
Енлӧн крамын вӧдитчан зарни да эзысь дозмук-кӧлуйсӧ, мый Навукодоносор вӧлі босьтӧма ерусалимса крамысь да нуӧма Вавилонӧ, мед бӧр ваясны Ерусалимӧ да пуктасны Енлӧн крамӧ важ местаас».
Дарий ӧксы ыстіс татшӧм гижӧд: «Гижа тэныд, Таттенай, Авар-Нахара муын юралысьлы, тшӧтш Шетар-Бозенайлы да тіянкӧд уджалысь чина йӧзлы. Энӧ сюйӧй нырнытӧ крам лэптӧмас!
Лэдзӧй вӧчны Енлысь крамсӧ.
Мед иудейяслӧн юралысьыс да юрнуӧдысьяс водзӧ лэптасны Енлысь крамсӧ важ местаас.
Отсалӧй иудейяслӧн юрнуӧдысьяслы Енлысь крамсӧ вӧчиганыс. Вӧчӧй, кыдзи ме тшӧкта. Авар-Нахара муын ӧксылы чукӧртӧм сьӧмысь чуктӧдӧй крам вӧчысьяслы, медым налӧн уджыс эз сувт. 
Сетӧй ерусалимса попъяслы став коланасӧ — ӧшъясӧс, межъясӧс, баляясӧс, шобді, сов, вина да вый. Сетӧй сы мында, мыйта попъяс корасны енэжвывса Енлы вись вайӧм вылӧ. Вӧчӧй тайӧс быд лун да сёрмытӧг, медым найӧ вермисны вайны енэжвывса Енлы шогмана вись да кевмысьны ӧксы да сылӧн пиян понда.
Нӧшта тшӧкта, мед быдӧнӧс, коді торкӧ менсьым тшӧктӧмӧс, тувъяласны аслас керкаысь перйӧм кер бердӧ, а керкасӧ мед кисьтасны.
Енмыс, коді бӧрйис Ерусалим кар Аслас нимлы оланінӧн, мед бырӧдас быд ӧксыӧс да войтырӧс, кодъяс паныд кыпӧдчасны тайӧ тшӧктӧмыслы да лёктор вӧчасны Енлӧн ерусалимса крамлы.
Ме, Дарий, гижи тайӧс.
Менсьым тшӧктӧмӧс мед стӧча пӧртасны олӧмӧ».
Авар-Нахара муын юралысь Таттенай, Шетар-Бозенай да налӧн уджъёртъясыс ставсӧ вӧчисны Дарий ӧксылӧн тшӧктӧм серти.
Иудейяслӧн юрнуӧдысьяс вӧчисны крамсӧ водзӧ. Аггей пророк да Закар пророк, Иддолӧн пиыс, ышӧдісны найӧс пророкалӧмнас, та вӧсна уджыс муніс бура.
Израиль Енлӧн кӧсйӧм серти, персияса Кир, Дарий да Артаксеркс ӧксыяслӧн тшӧктӧм улын крам лэптӧмсӧ вӧлі вайӧдӧма помӧдз.
Крамсӧ вӧлі эштӧдӧма Дарий ӧксылӧн квайтӧд веськӧдлан воӧ адар тӧлысьлӧн коймӧд лунӧ.
Израиль войтыр, попъяс, левитъяс да пленысь мукӧд локтӧмаяс нимкодясисны Енлысь крамсӧ вежӧдігӧн.
Крам вежӧдӧм дырйи вись пыдди вайисны сё ӧшкӧс, кыксё межӧс да нёльсё баляӧс. Израильлӧн мыжъяс вӧсна вайисны вись пыдди дас кык кӧзаӧс — чужанкотыръяслӧн лыд серти.
Мӧисей небӧгын тшӧктӧм серти поп котыръясӧс да левит чукӧръясӧс индісны кесъявны Енлы Ерусалимын.
Медводдза тӧлысьлӧн дас нёльӧд лунӧ пленысь локтӧмаяс пасйисны Ыджыд лун. Попъяс да левитъяс ставныс сӧстӧммӧдчисны.
Сэсся пленысь локтӧмаяс вӧсна, мукӧд попъяс вӧсна да ас вӧснаныс начкисны ыджыдлунся баляясӧс.
Ыджыдлунся баляӧс сёйисны пленысь локтӧм Израиль войтыр да мукӧд войтыръясысь найӧ, кодъяс торйӧдчисны сэтчӧс олысьяслӧн пежысь, медым юрбитны Господьлы, Израильлӧн Енлы.
Сизим лун чӧж найӧ нимкодясьӧмӧн пасйисны Шомтӧм нянь сёян лунъяс. Господь тыртіс йӧзыслысь сьӧлӧмсӧ нимкодьлунӧн, ӧд Сійӧ бергӧдіс налань ассурса ӧксылысь сьӧлӧмсӧ, и сійӧ отсаліс лэптыны Израильлӧн Енлы крам.
Став тайӧ лоӧмторйыс бӧрын персияса Артаксеркс ӧксылӧн веськӧдлӧм дырйи Ерусалимӧ локтіс Ездра. Сійӧ вӧлі Серайлӧн пи, Серай — Азарийлӧн, Азарий — Хилкилӧн, Хилки — Шаллумлӧн, Шаллум — Садоклӧн, Садок — Ахитувлӧн, Ахитув — Амарейлӧн, Амарей — Азарийлӧн, Азарий — Мерайотлӧн, Мерайот — Зерахийлӧн, Зерахий — Уззейлӧн, Уззей — Буккилӧн, Букки — Авишуйлӧн, Авишуй — Пинеслӧн, Пинес — Элазарлӧн, Элазар — Аарон аркирейлӧн пи. Ездра локтіс Вавилонысь.
Сійӧ вӧлі велӧдчӧм морт, бура тӧдіс Мӧисейлысь Индӧдсӧ, мый вӧлі сетӧма Господь, Израильлӧн Ен.
Ӧксы сетіс Ездралы ставсӧ, мый сійӧ корис, ӧд Ездракӧд вӧлі Господь, сылӧн Енмыс.
Артаксеркс ӧксылӧн сизимӧд веськӧдлан воӧ Ездракӧд тшӧтш Ерусалимӧ мӧдӧдчисны попъяс, левитъяс, сьылысьяс, дзиръя видзысьяс, крамбердса кесйӧгъяс да кодсюрӧ Израиль войтырысь.
Найӧ воисны Ерусалимӧ ӧксылӧн сизимӧд веськӧдлан воӧ витӧд тӧлысьнас.
Ездра петіс Вавилонысь медводдза тӧлысьлӧн медводдза лунӧ, а воис Ерусалимӧ витӧд тӧлысьлӧн медводдза лунӧ. Енмыс Аслас киӧн видзис Ездраӧс, ӧд Ездра став сьӧлӧмсӧ пуктіс, медым тӧдны Господьлысь Индӧдсӧ, овны сы серти да велӧдны Израиль войтырӧс тшӧктӧмъясӧ да веськыда мыждӧмӧ.
Артаксеркс ӧксы сетіс гижӧд Ездра поплы, велӧдчӧм мортлы, коді бура тӧдіс Господьлысь индӧд-тшӧктӧмъяссӧ, мый вӧлі сетӧма Израиль войтырлы. Со ӧксылӧн гижӧдыс:
«Артаксеркс, ӧксыяслӧн ӧксы, гижӧ Ездра поплы, енэжвывса Енлӧн Индӧдӧ велӧдысьлы.
Ме сеті тшӧктӧм, медым менам муын олысь Израиль войтыр, налӧн попъяс да левитъяс, кӧсйӧны кӧ, тэкӧд мунасны Ерусалимӧ.
Ме, ӧксы, аслам сизим туйдӧдыськӧд мӧдӧдам тэнӧ Иуда муӧ да Ерусалимӧ, медым тэ тӧдмалан, олӧны-ӧ сэні Енлӧн Индӧд серти, мый тэ ачыд бура тӧдан. Босьт тшӧтш зарни да эзысь, мый ӧксы аслас туйдӧдысьяскӧд сетіс Израильлӧн Енлы, кодлӧн оланіныс Ерусалимын. Эзысь-зарнитӧ, мый тэ чукӧртан Вавилон пасьтала, да козинъяс, мый войтырыс да попъяс сетасны асланыс Енлӧн ерусалимса крамӧ, тшӧтш босьт аскӧдыд.
Чукӧртӧм сьӧм вылад дзик пыр ньӧб ӧшъясӧс, межъясӧс, баляясӧс, нянь да вина, сэсся Ерусалимын асланыд Енлӧн крамын висьпуктанін вылын вай найӧс вись пыдди.
Коляс эзысь-зарнисӧ вокъясыдкӧд видзӧй Енлӧн кӧсйӧм да асланыд видзӧдлас серти.
Енлӧн крамын вӧдитчан став дозмук-кӧлуйсӧ, мый тэныд сетӧма, ну да пукты Ерусалимлӧн Ен водзӧ.
Нӧшта кӧ мукӧдтор ковмас тэнад Енлысь крам лэптӧм вылӧ, верман босьтны ӧксылӧн озырлун видзанінысь.
Ме, Артаксеркс ӧксы, Авар-Нахара муын озырлун видзысьяслы тшӧкта: ставсӧ, мый корас тіянлысь Ездра поп, енэжвывса Енлӧн Индӧдӧ велӧдысь, сетӧй нюжмасьтӧг.
Корас кӧ, сетӧй сылы эзысьсӧ весиг сё талант* мында, шабдісӧ сё кор мында, винасӧ сё бат мында да олив выйсӧ сё бат мында, а совсӧ — артавтӧг.
Енэжвывса Енлысь крамсӧ лэптігӧн вӧчӧй ставсӧ Сылӧн тшӧктӧм серти [и крам лэптӧмлы паныд энӧ сувтӧй], медым Енлӧн скӧрлуныс эз лэччы ӧксылӧн муыс да сылӧн пияныс вылӧ.
Нӧшта тшӧкта, мый оз ков босьтны вот попъяслысь, левитъяслысь, сьылысьяслысь, дзиръя видзысьяслысь, крамбердса кесйӧгъяслысь да мукӧдлысь, кодъяс уджалӧны Енлӧн крамын.
А тэ, Ездра, Енсянь сетӧм мывкыдлуныд серти сувтӧд ёрдысь-мыждысьясӧс, медым найӧ веськыда мыждасны Авар-Нахара муын олысьясӧс, кодъяс тӧдӧны тэнад Енлысь тшӧктӧмъяссӧ. А кодъяс оз тӧдны, велӧдӧй найӧс.
Коді кутас торкавны тэнад Енлысь Индӧдсӧ да ӧксылысь тшӧктӧмсӧ, сійӧс мед дзик пыр мыждасны: виасны либӧ вӧтласны аслас муысь, овмӧс-эмбурсӧ босьтасны либӧ пуксьӧдасны дзескыдінӧ».
Ошкӧм Господьлы, миян батьяслӧн Енлы! Сійӧ пуктіс ӧксылы сьӧлӧмас, мый колӧ пыдди пуктыны Господьлысь ерусалимса крамсӧ. Господь бергӧдіс мелань ӧксылысь, сылӧн туйдӧдысьяслысь да тӧдчана юралысьяслысь сьӧлӧмсӧ.
Господьлӧн, менам Енлӧн, киыс вынсьӧдіс менӧ, и ме чукӧрті Израиль войтырлысь веськӧдлысьясӧс, медым найӧ мунісны мекӧд.
Тані пасйӧма чужанвуж гижӧдъяс серти рӧдкутысьясӧс, кодъяс петісны мекӧд Вавилонысь Артаксеркс ӧксылӧн веськӧдлӧм дырйи.
Тайӧ рӧдкутысьясыс вӧліны: Пинес рӧдысь Гершом, Итамар рӧдысь Даниил, Давид рӧдысь Хаттуш, Шеканийлӧн пи, Парош рӧдысь Закар да сыкӧд чужанвуж гижӧдӧ пасйӧм сё ветымын айлов, Пахат-Моав рӧдысь Зерахийлӧн Эльхоенай пиыс да сыкӧд кыксё айлов, Затту рӧдысь Яхазиэллӧн Шеканий пиыс да сыкӧд куимсё айлов, Адин рӧдысь Ионафанлӧн Эвед пиыс да сыкӧд ветымын айлов, Элам рӧдысь Аталейлӧн Исай пиыс да сыкӧд сизимдас айлов, Шефатай рӧдысь Микаиллӧн Зевадай пиыс да сыкӧд кӧкъямысдас айлов, Йоав рӧдысь Ехиэллӧн Авдий пиыс да сыкӧд кыксё дас кӧкъямыс айлов, Бани рӧдысь Иосифейлӧн Шеломот пиыс да сыкӧд сё квайтымын айлов, Бебай рӧдысь Бебайлӧн Закар пиыс да сыкӧд кызь кӧкъямыс айлов, Азгад рӧдысь Хаккатанлӧн Иоханан пиыс да сыкӧд сё дас айлов, Адоникам рӧдысь бӧръяясыс — Элипелет, Евэл, Шемай да накӧд квайтымын айлов, Бигвай рӧдысь Утай, Заккур да накӧд сизимдас айлов.
Ме чукӧрті тайӧ йӧзсӧ Ахавалань визувтысь ю дорӧ. Сэні ми сулалім куим лун. Ме корси войтыр пӧвстысь да попъяс пӧвстысь левитъясӧс, но эг аддзы.
Сэки ме кори Элизер, Ариэл, Шемай, Элнатан, Ярив, Элнатан, Нафан, Закар, Мешуллам веськӧдлысьясӧс, нӧшта Йоярив да Элнатан велӧдысьясӧс.
Ме мӧдӧді найӧс Касипияӧ Иддо юралысь дінӧ. Тшӧкті висьтавны Иддолы да сылӧн вокъяслы, Касипияын олысь крамбердса кесйӧгъяслы, медым найӧ ыстасны миянлы Енлӧн крамын кесъялӧм вылӧ йӧзӧс.
Енмыс тӧждысис миян вӧсна, и найӧ мӧдӧдісны миян дінӧ Шеревий нима сюсь вежӧра мортӧс. Сійӧ вӧлі Израиль войтырысь Левий чужанкотырлӧн Махли рӧдысь. Сыкӧд локтісны сылӧн пияныс да вокъясыс — дас кӧкъямыс морт.
Мӧдӧдісны тшӧтш Мерари рӧдысь Хашавийӧс, Исайӧс да сылысь вокъяссӧ пияныскӧд — кызь мортӧс.
Нӧшта мӧдӧдісны кыксё кызь крамбердса кесйӧгӧс. Налысь батьяссӧ Давид да израильса юралысьяс индылӧмаӧсь отсасьны левитъяслы.
Налысь быдӧнлысь нимсӧ пасйӧма небӧгӧ.
Ахава ю дорын ме тшӧкті видзавны, медым раммӧдчыны асланым Ен водзын да корны Сійӧс видзны миянӧс, челядьнымӧс да став эмбур-озырлуннымӧс туяным. Меным яндзим вӧлі корны ӧксылысь тышкайӧзӧс да вӧлаясӧс, мед видзасны миянӧс туяным вӧрӧгысь. Ми ӧд шуим ӧксылы, мый миян Енным видзӧ Сы дінӧ шыасьысьясӧс, а кодъяс ӧтдортӧны Сійӧс, на вылӧ лэччӧ Сылӧн повзьӧдана выныс да скӧрлуныс.
Ми видзалім да кевмысим Енлы, и Сійӧ кыліс миянӧс.
Ме торйӧді попъяслӧн веськӧдлысьясысь дас кыкӧс — Шеревийӧс, Хашавийӧс да налӧн рӧдвужысь дас мортӧс.
Налы веситӧмӧн сеті эзысь-зарни да дозмук-кӧлуй — козинъяс, мый Енлӧн крамӧ вайисны ӧксы, сылӧн туйдӧдысьяс, юралысьяс да налӧн муын олысь Израиль войтыр.
Ме сеті налы квайтсё ветымын талант эзысь, сё талант сьӧкта эзысь дозъяс, сё талант зарни, кызь зарни доз — быдӧнлӧн доныс сюрс дарик*, югъялысь ыргӧнысь вӧчӧм кык доз — дозъяслӧн доныс зарнилӧн кодь.
Ме шуи налы: «Тіянӧс вежӧдӧма Господьлы. Дозмук-кӧлуйыс тшӧтш вежа, эзысь-зарниыс — войтырыслӧн ас кӧсйӧм серти вайӧм козин Господьлы, тіян батьяслӧн Енлы.
Бура видзӧй ставсӧ Ерусалимӧ муніганыд. Сэні веситӧй ставсӧ попъяслӧн да левитъяслӧн веськӧдлысьяс водзын да Израиль войтырлӧн рӧдкутысьяс водзын да пуктӧй Господьлӧн крам видзанінӧ».
Попъяс левитъяскӧд босьтісны веситӧм эзысь-зарнисӧ да дозмук-кӧлуйсӧ, мед нуны Ерусалимӧ миян Енлӧн крамӧ.
Медводдза тӧлысьлӧн дас кыкӧд лунӧ ми петім Ахава ю дорысь да мӧдӧдчим Ерусалимӧ.
Енмыс видзис миянӧс туяным, мездіс вӧрӧгъясысь да кыйӧдчысьясысь.
Ерусалимӧ воӧм бӧрын ми шойччим куим лун.
Нёльӧд луннас ми веситім миян Енлӧн крамын эзысь-зарни, дозмук-кӧлуй да сетім ставсӧ Меремот поплы, коді вӧлі Урийлӧн пиыс, Пинеслӧн Элазар пиыслы да кык левитлы — Исуслӧн Иозавад пилы да Биннуйлӧн Ноад пилы.
Арталӧм-веситӧм бӧрын пасъялісны вайӧмторлысь сьӧктасӧ.
Пленысь локтӧмаяс вайисны Израильлӧн Енлы сотан висьяс: став Израиль войтыр вӧсна вайисны дас кык ӧшкӧс, ӧкмысдас квайт межӧс, сизимдас сизим баляӧс да мыжысь вись пыдди дас кык ай кӧзаӧс. Ставыс тайӧ вӧлі Господьлы вайӧм сотан вись.
Найӧ сетісны ӧксылӧн сатрапъяслы * да Авар-Нахара муын юралысьяслы ӧксылысь гижӧм тшӧктӧмъяссӧ. Сатрапъяс да юралысьяс эз сувтны войтырыслы да Енлӧн крамлы паныд.
Тайӧ лоӧмторъясыс бӧрын локтісны ме дінӧ израильса юралысьяс да шуисны: «Израиль войтыр, попъяс да левитъяс абу торйӧдчӧмаӧсь ханаан, хеттей, перезей, евус, аммон, моав, египет да аморей войтыръясысь, и на моз вӧчӧны быд пежсӧ. Тайӧ войтыръясысь найӧ босьтісны аслыныс да пияныслы гӧтыръясӧс. Тадзи вежа войтыр сорласис мукӧд войтыркӧд. Татшӧм мыж вӧчӧмыс петіс юралысьяссянь да веськӧдлысьяссянь».
Тайӧс кылӧм бӧрын ме косялі паськӧмӧс, понді нетшкыны юрсиӧс да тошкӧс. Ме пукалі ыджыд шогын.
Ме дінӧ чукӧртчисны найӧ, кодъяс полісны локтӧмаяслӧн мыж вӧсна Израиль Енлӧн мыждӧмысь. Шогалӧмӧн ме пукалі рытъя вись ваян кадӧдз.
Рытъя вись ваян кадӧ ме чеччи шогалӧмысь. Косялӧм паськӧмӧн ме уськӧдчи пидзӧс вылӧ да нюжӧді киӧс аслам Господь Ен дінӧ. Ме шуи: «Енмӧй, меным сэтшӧм яндзим, весиг пола лэптыны синмӧс Тэлань, ӧд лёк вӧчӧмным содӧма-быдмӧма юрысь вылӧджык на, ыджыд мыжным кыптӧма енэжӧдзыс.
Батьяслӧн кадсянь и ӧнӧдз миян вылын куйлӧ ыджыд мыж. Асланым мыжъяс вӧсна ми асьным, миян ӧксыяс и попъяс шедім мукӧд войтырлӧн ӧксыяс киӧ да шыпурт улӧ. Найӧ нуӧдісны миянӧс пленӧ, мырддялісны эмбурнымӧс да янӧдісны миянӧс. Тадзи найӧ вӧчӧны весиг талун.
Но дженьыд кад кежлӧ Господь, миян Енным, петкӧдліс Ассьыс буралӧмсӧ миян дінӧ. Сійӧ мездіс миян войтырлысь коляссӧ да лэдзис миянлы бӧр овмӧдчыны Аслас вежа карӧ. Миян Енным сетіс югъявны миян синъяслы, кесйӧг туйын оліганым сетіс миянлы ловзьыштны.
Ми — кесйӧг туйынӧсь, но миян Енным эз коль миянӧс.
Сійӧ бергӧдіс миянлань персияса ӧксыяслысь сьӧлӧмнысӧ, медым найӧ лэдзисны миянлы сувтны кок йыланым, лэптыны миян Енлысь крамсӧ да повтӧг овны Иуда муын да Ерусалимын.
Мый ми вермам та бӧрын шуны Тэныд, Енмӧй?
Ми ӧд эновтім Тэнсьыд тшӧктӧмъястӧ, кодъясӧс Тэ сетін миянлы Аслад кесъялысь пророкъяс пыр. Тэ шулін: “Муыс, кытчӧ ті мунанныд, медым босьтны сійӧс, пежалӧм му. Мукӧд войтыръяс пежалісны сійӧс асланыс зывӧкторъясӧн, помсянь помӧдзыс тыртісны пежнас.
Та вӧсна энӧ сетӧй ассьыныд нывъяснытӧ налӧн пиян сайӧ, и энӧ босьтӧй налысь нывъяссӧ асланыд пиянлы гӧтырӧ. Некор энӧ пуктӧй пай налысь олӧмсӧ бурмӧдӧмӧ да налӧн озырлун чукӧртӧмӧ. Тайӧ тшӧктӧмъясыс серти кӧ кутанныд овны, ті ёнманныд, кутанныд пӧткӧдчыны муыслӧн вотӧсӧн, и колянныд мунытӧ пияныдлы пыр кежлӧ”.
Ми ёна сьӧкыдалім лёк уджъясным да ыджыд мыжным вӧсна. Но Тэ, миян Енмӧй, чорыда мыждӧм пыдди бурсьӧлӧмтчин миян дінӧ да мездін тайӧ коляс войтырсӧ. Та бӧрын бара ӧмӧй ми торкам Тэнсьыд тшӧктӧмъястӧ да рӧдвужасям тайӧ пеж войтыръясыскӧд?
Тэ ӧд верман чорыда скӧрмыны миян вылӧ да дзикӧдз бырӧдны миянӧс, мый весиг ӧти морт оз коль.
Господьӧй, Израильлӧн Енмӧй, Тэ веськыд Ен!
Талун ми, войтырлӧн колясыс, асланым мыжъясӧн сулалам Тэ водзын. Дерт, татшӧмтор бӧрын ми огӧ шогмӧй локны Тэнад чужӧмбан водзӧ».
Кор Енлӧн крам водзын Ездра бӧрдӧмӧн да муас уськӧдчӧмӧн кевмысис да висьтасис войтырыслӧн мыжъясысь, сы дінӧ чукӧртчис Израиль войтырысь зэв уна йӧз — айулов, аньяс и челядь. Ставныс найӧ тшӧтш ёна бӧрдісны.
Элам рӧдысь Ехиэллӧн Шеканий пиыс шыасис Ездра дінӧ: «Ми эновтім ассьыным Енмӧс, кор босьтім гӧтыръяснымӧс мукӧд войтырысь. Но Израиль войтырлӧн эм на лачаыс.
Ми кӧрталам йитӧд асланым Енкӧд да кӧсйысям ыстыны ас дінысь гӧтыръяснымӧс ныв-пиныскӧд. Вӧчам тайӧс, ыджыдӧй, тэнсьыд кывзысьӧмӧн да миян Енлысь тшӧктӧмъяссӧ пыдди пуктысьяслысь кывзысьӧмӧн. Мед ставыс лоӧ Индӧд серти.
Чеччы, тэныд колӧ тайӧс вӧчны. Ми тэкӧд. Вӧч повтӧг».
Ездра чеччис да тшӧктіс попъяслӧн, левитъяслӧн да став Израиль войтырлӧн веськӧдлысьяслы кыв сетны, мый найӧ вӧчасны шуӧм сертиныс.
Найӧ кыв сетісны.
Сэсся Ездра муніс Енлӧн крам водзысь Эльяшив Иохананлӧн вежӧсӧ.
Сэні сійӧ эз сёй и эз ю, а бӧрдіс Вавилонысь локтӧмаяслӧн мыж вӧчӧмысь.
Став Иуда да Ерусалим пасьталаысь корисны чукӧртчыны Ерусалимӧ Вавилонысь локтӧмаясӧс.
А коді куим лун чӧжӧн оз лок, сійӧс веськӧдлысьяслӧн да юрнуӧдысьяслӧн шуӧм серти киритасны локтӧмаяслӧн котырысь да сылысь овмӧс-эмбурсӧ сиасны Господьлы.
Куим лунӧн Иуда да Венямин чужанкотырысь став айуловыс чукӧртчис Ерусалимӧ.
Тайӧ вӧлі ӧкмысӧд тӧлысьлӧн кызьӧд лунӧ.
Йӧзыс полӧмнысла тіралӧмӧн пукалісны зэр улын Енлӧн крам водзын изэрд вылын.
Ездра поп сувтіс да шуис налы: «Ті босьтінныд аслыныд гӧтыръястӧ мукӧд войтырысь, тайӧн ті мыж вӧчинныд, содтінныд Израильлы мыжсӧ.
Ӧні висьтасьӧй асланыд мыж вӧчӧмысь Господь водзын, батьясныдлӧн Ен водзын. Сылӧн кӧсйӧм серти торйӧдчӧй мукӧд войтыръясысь да налӧн аньясысь».
Став чукӧртчӧм йӧзыс гораа шуисны: «Вӧчам, кыдзи тэ шуан.
Но ми тані зэв унаӧнӧсь, да и зэран кад ӧні, та вӧсна огӧ вермӧй сулавны ывлаас.
Тайӧс он вермы туявны ӧти-кык лунӧн, ӧд миян пӧвстын унаӧн мыжмисны тайӧ пежсьыс.
Веськӧдлысьясным мед сувтасны миян пыдди. А миян каръясын олысьяс, кодъяс босьтісны гӧтыръяссӧ мукӧд войтырысь, мед локтасны урчитӧм кадӧ асланыс карса юрнуӧдысьяскӧд да ёрдысьяскӧд. Гашкӧ, татшӧм ногӧн Енмыс вештас миян вылысь мыжным вӧсна ыпъялысь скӧрлунсӧ».
Сӧмын Асаиллӧн Ионафан пиыс да Тиквайлӧн Яхзей пиыс паныд сувтісны талы, на дор вӧліны тшӧтш Мешуллам да Шаббетай левит.
Пленысь локтӧмаяс вӧчисны, кыдзи вӧлі вӧзйӧма.
Тайӧ уджсӧ вӧчны Ездра поп пуктіс быд рӧдысь рӧдкутысьӧс, быдӧнӧс индіс нимнас.
Дасӧд тӧлысьлӧн медводдза лунӧ найӧ чукӧртчисны, мед тӧдмавны, кодъяс босьтӧмаӧсь гӧтыръяссӧ мукӧд войтырысь. Медводдза тӧлысьлӧн медводдза лунӧ тӧдмалӧм-туялӧмсӧ вӧлі эштӧдӧма.
Мукӧд войтырысь гӧтыръясӧс вӧлі босьтӧмаӧсь тшӧтш тайӧ попъясыс: Иоседек Исуслӧн да сылӧн вокъяс рӧдысь Маасей, Элизер, Ярив да Гедалий.
Найӧ кыв сетісны, мый бӧр ыстасны гӧтыръяснысӧ да быдӧн аслас мыж вӧсна ваяс вись пыдди межӧс.
Мукӧд войтырысь гӧтыръяссӧ вӧлі босьтӧмаӧсь нӧшта Иммер рӧдысь Ханани да Зевадай попъяс, Харим рӧдысь Маасей, Илля, Шемай, Ехиэл да Озей попъяс, Пашхур рӧдысь Элионай, Маасей, Измаил, Нафанаил, Иозавад да Элас попъяс, Иозавад, Шимей, Келай-Келит, Петахий, Иуда да Элизер левитъяс, Эльяшив сьылысь, Шаллум, Телем да Ури — дзиръя видзысьяс.
Мукӧд войтырысь гӧтыръяссӧ вӧлі босьтӧмаӧсь тшӧтш тайӧ израильсаяс: Парош рӧдысь Рамай, Иззай, Малкий, Миямин, Элазар, Малкий да Бенай, Элам рӧдысь Маттанай, Закар, Ехиэл, Авди, Еремот да Илля, Затту рӧдысь Элионай, Эльяшив, Маттанай, Еремот, Завад да Азиз, Бебай рӧдысь Иоханан, Хананей, Заббай да Атлай, Бани рӧдысь Мешуллам, Маллук, Адай, Яшув, Шеал да Еремот, Пахат-Моав рӧдысь Аднай, Келал, Бенай, Маасей, Маттанай, Безалел, Биннуй да Манассей, Харим рӧдысь Элизер, Ишший, Малкий, Шемай, Симеон, Венямин, Маллук да Шемарай, Хашум рӧдысь Маттенай, Маттат, Завад, Элипелет, Еремай, Манассей да Шимей, Бани рӧдысь Мадай, Амрам, Уэл, Бенай, Бедей, Келух, Ваней, Меремот, Эльяшив, Маттанай, Маттенай, Ясай, Бани, Биннуй, Шимей, Шелемей, Нафан, Адай, Макнадбай, Шашай, Шарай, Азарэл, Шелемей, Шемарай, Шаллум, Амарей да Ӧсип, Нево рӧдысь Евэл, Маттитай, Завад, Зевин, Яддай, Йоиль да Бенай.
Ставныс найӧ вӧлі босьтӧмаӧсь гӧтыръяснысӧ мукӧд войтырысь, и гӧтыръясныс вӧлі чужтӧмаӧсь налы челядьӧс.
{Еврей йӧз (комиӧдіс Kodko) @ Неемий @ религ. гижӧд @ Библия @ 2021 @ Лб. .}
НЕЕМИЙ
Неемийлӧн, Хакалий пилӧн, висьталӧм.
Кызьӧд вонас кислев тӧлысьӧ ме вӧлі Суза изкарын.
Сэтчӧ Иуда муысь локтіс менам Ханани вокӧй, сыкӧд вӧлі некымын морт.
Ме юаси найӧс пленысь локтӧм иудейяслӧн коляс йылысь да Ерусалим йылысь.
Найӧ вочавидзисны, пленысь локтысьяс пӧ ёна сьӧкыдалӧны асланыс муын, сэні пӧ найӧс увтыртӧны.
Ерусалим карлысь пӧ стенъяссӧ жуглӧма, а дзиръяяссӧ сотӧма.
Тайӧс кылӧм бӧрын ме пукси да бӧрддзи. Некымын лун чӧж ме шогалі да видзалі-кевмыси енэжвывса Ен водзын. Ме шуи: «Господьӧй, енэжвывса Енмӧй, Тэ ыджыд да повзьӧдана Ен! Тэ видзан Ассьыд йитӧдтӧ да буралӧмтӧ на дінӧ, кодъяс радейтӧны Тэнӧ да олӧны Тэнад тшӧктӧмъяс серти.
Видзӧдлы да веськӧд пельтӧ, медым кывны Аслад кесйӧглысь кевмӧмсӧ. Лун и вой ме кевмыся Тэ водзын Израиль войтыр вӧсна, Тэнад кесйӧгъяс вӧсна. Ме висьтася Израильлӧн мыжъясысь, кодъясӧс ми вӧчим Тэныд паныд. Ми ставным, тшӧтш ме да менам рӧдвужӧй, мыжаӧсь Тэ водзын.
Ми ыджыд мыж вӧчим Тэныд паныд, эгӧ олӧй Тэнад индӧд-тшӧктӧмъяс серти, мый Тэ сетін Аслад Мӧисей кесйӧглы.
Казьтышт, мый Тэ шулін Аслад Мӧисей кесйӧглы: “Ті кӧ эновтанныд Менӧ, Ме разӧда тіянӧс мукӧд войтыръяс пӧвстӧ.
Но ті кӧ бӧр бергӧдчанныд Ме дінӧ, видзанныд кӧ Менсьым тшӧктӧмъясӧс да оланныд на серти, Ме чукӧрта тіянӧс, весиг вӧтлӧма кӧ лоӧ тіянӧс му помӧдзыс. Ме бӧр вайӧда тіянӧс Аслам нимӧйлы бӧрйӧм оланінӧ”.
Господьӧй, найӧ ӧд Тэнад кесйӧгъяс, найӧ — Тэнад войтыр. Тэ мездін найӧс Аслад ыджыд вынйӧрӧн да вына киӧн.
Кевма Тэныд, Господьӧй, копырт пельтӧ Аслад кесйӧглань! Кыв менсьым да став Аслад кесйӧглысь кевмӧмсӧ, ӧд ми кӧсъям вежавидзны Тэысь.
Талун отсав меным, Аслад кесйӧглы, сійӧн, мый ӧксы лоас бур сьӧлӧма ме дінӧ».
Сійӧ кадас ме вӧлі ӧксылӧн вина кисьталысьӧн.
Тайӧ вӧлі Артаксеркс ӧксылӧн кызьӧд веськӧдлан воӧ нисан тӧлысьӧ.
Ӧксылы вайисны вина. Ме босьті винасӧ да мыччи сылы. Таӧдз ӧксы некор эз аддзыв менӧ шог чужӧмӧн.
Ӧксы юаліс: «Мыйла тэ шог чужӧма?
Аддза, тэ он вись, но сьӧлӧмыд мыйыськӧ шогсьӧ».
Ме зэв ёна повзи. Полӧмпырысь вочавидзи сылы: «Кузь нэм ӧксылы!
Кыдзи нӧ ме верма дзебны шогсьӧмӧс, кор кисьтӧма карсӧ, кытчӧ дзебӧма менсьым батьясӧс, да сотӧма карыслысь дзиръяяссӧ».
Ӧксы юаліс менсьым: «Мый тэ кӧсъян?»
Ме кевмыси енэжвывса Енлы да вочавидзи ӧксылы: «Ме, тэнад кесйӧг, шогмана кӧ тэныд, ӧксыӧй, и тэ кӧ чайтан, мый менам корӧмӧй бур, лэдз менӧ мунны Иуда муӧ, медым лэптыны сійӧ карсӧ, кытчӧ дзебӧма менсьым батьясӧс».
Ӧксыкӧд орччӧн пукаліс гӧтырыс. Ӧксы юаліс менсьым: «Дыр-ӧ кежлӧ тэ сэтчӧ кӧсъян мунны? Кор бӧрсӧ локтан?»
Ме висьталі ӧксылы кадыс йылысь. Менам вочавидзӧмӧй вӧлі шогмана ӧксылы, и сійӧ лэдзис менӧ мунны.
Ме нӧшта шуи сылы: «Ӧксыӧй, тэныд кӧ шогмана, Ефрат ю рытыввыв муясын юралысьяслы ысты мекӧд гижӧд, медым найӧ лэдзасны менӧ мунны Иуда муӧ налӧн муясӧд. Кора ыстыны гижӧд тшӧтш Асафлы, ӧксылысь вӧрсӧ видзысьлы, медым крам дзиръяяс да карса стен вӧчӧм вылӧ сійӧ сетас кер, сетас тшӧтш керсӧ меным олан керка лэптӧм вылӧ».
Ӧксы сетіс меным гижӧдъяс, ӧд Енлӧн буралан киыс вӧлі мекӧд.
Ме муні Ефрат ю рытыввыв муын юралысьяс дінӧ да сеті налы ӧксылысь гижӧдсӧ.
Мекӧд тшӧтш ӧксы мӧдӧдіс верзьӧма тышкайӧзӧс да веськӧдлысьясӧс.
Хоронса Санваллат да аммон войтырысь Тови чина морт кор кылісны, мый кодкӧ локтӧма тӧждысьны Израиль войтыр вӧсна, ёна дӧзмисны таысь.
Ерусалимӧ локтӧм бӧрын куим лун мысти ме чеччи войнас да петі керкаысь. Ме некодлы на эг висьтав, мый Енмыс пуктіс менам сьӧлӧмӧ вӧчны Ерусалимын.
Мекӧд вӧлі некымын морт, ме муні осёл вылын, мукӧдыс подӧн мунісны.
Ковтыс дзиръяӧд петӧм бӧрын ме мӧдӧдчи Гундыр ва петанінлань да Ёг дзиръялань. Мунігам ме видзӧдалі Ерусалимлысь жуглӧм стенсӧ да сотӧм дзиръяяссӧ.
Сэсся ме мӧдӧдчи Дзульк дзиръялань да Ӧксы вайӧртӧдлань. Но верзьӧмаӧн ме сэті муннысӧ эг вермы. Та вӧсна ме муні войнас ковтысӧд да сэтысянь видзӧдалі карлысь стенсӧ. Карас ме бӧр пыри Ковтыс дзиръяӧд.
Веськӧдлысьяс эз тӧдлыны, кытчӧ да кутшӧм могӧн ме ветлі. Иудейяслы — попъяслы, нималана йӧзлы, веськӧдлысьяслы да налы, кодъяслы колӧ тайӧ уджсӧ вӧчны — ме таӧдз нинӧм эг висьтавлы.
Ме шуи налы: «Ті аддзанныд, мый миянӧс суис: Ерусалим карнымӧс кисьтӧма, сылысь дзиръяяссӧ сотӧма.
Выльысь лэптам карлысь стенъяссӧ, вештам ас вылысь янӧдӧмсӧ».
Ме висьталі налы, кутшӧма менам Енмӧй отсаліс меным, да мый шуис меным ӧксы.
Сэки найӧ шуисны: «Кутам лэптыны!» Сэсся босьтчисны тайӧ бур уджас.
Кор та йылысь кылісны хоронса Санваллат, аммон войтырысь Тови чина морт да Гешем араб, серамвыв лэптісны миянӧс. Найӧ увтыртӧмӧн шуалісны: «Мыйсяма уджӧ ті босьтчинныд? Он-ӧ ӧксылы паныд кыпӧдчӧй?»
Ме вочавидзи налы: «Енэжвывса Ен отсалас миянлы лэптыны тайӧ карсӧ. Ми, Сылӧн кесйӧгъяс, лэптам сійӧс, а тіян некутшӧм пай оз ло Ерусалимын, тіян йылысь весиг оз казьтыштны тані».
Аркирей Эльяшив да попъяс вӧчисны карлысь Ыж дзиръя, вежӧдісны сійӧс да сувтӧдісны ӧдзӧсъяс. Сэсся Сё тышкамортлы башня дорсянь Хананел башня дорӧдз вежӧдісны стенсӧ.
Накӧд орччӧн уджалісны Ериконын олысьяс, а ериконсаяскӧд орччӧн — Имрилӧн Заккур пиыс.
Сенлӧн рӧдыс вӧчис Чери дзиръя. Найӧ вӧчисны куричьяс, сувтӧдісны ӧдзӧсъяс да пуктісны сэтчӧ иган-тасъяс.
Накӧд орччӧн стенсӧ дзоньталіс Хаккоц Урийлӧн Меремот пиыс, сыкӧд орччӧн — Мешезавел Береклӧн Мешуллам пиыс, Мешулламкӧд орччӧн — Баанлӧн Садок пиыс. Насянь водзӧ стенсӧ дзоньталісны Текояын олысьяс, но налӧн тӧдчана йӧзыс эз кывзысьны асланыс ыджыдъяслысь да эз кӧсйыны уджавны.
Пасеахлӧн Йоад пиыс да Бесодийлӧн Мешуллам пиыс дзоньталісны Важ дзиръя. Найӧ вӧчисны куричьяс, сувтӧдісны ӧдзӧсъяс да пуктісны сэтчӧ иган-тасъяс.
Накӧд орччӧн стенсӧ дзоньталісны Гаваонысь Мелатий да Меронотысь Ядон ӧтвылысь гаваонса да миспаса олысьяскӧд. Тайӧ олысьясыс вӧліны Ефрат ю рытыввыв муын юралысьлӧн кипод улынӧсь.
Водзӧ стенсӧ дзоньталіс Харгайлӧн Узиэл пиыс, эзысьысь вӧчасьысь. Сыкӧд орччӧн уджаліс Хананей, чӧскыд дука мавтас вӧчысь.
Тайӧ йӧзыс лэптісны Ерусалимлысь стенсӧ Паськыд стенмӧдз.
Накӧд орччӧн стенсӧ дзоньталіс Хурлӧн Рефай пиыс, Ерусалим гӧгӧр му джынйӧн веськӧдлысь.
Сыкӧд орччӧн аслас керка весьтӧд стенсӧ дзоньталіс Харумафлӧн Едай пиыс, а Едайсянь водзӧсӧ — Хашавнилӧн Хаттуш пиыс.
Мӧдлаын стенсӧ дзоньталісны Харимлӧн Малкий пиыс да Пахат-Моавлӧн Хашшув пиыс.
Найӧ кыпӧдісны нӧшта Пач башня.
Накӧд орччӧн стенсӧ дзоньталіс аслас нывъяскӧд Халлохешлӧн Шаллум пиыс, Ерусалим гӧгӧр мӧд му джынйӧн веськӧдлысь.
Ковтыс дзиръя дзоньталісны Ханун да Заноахын олысьяс. Ӧдзӧсъяс сувтӧдӧм бӧрын пуктісны сэтчӧ иган-тасъяс. Нӧшта найӧ лэптісны сюрс гырддза кузьта стен, сійӧ нюжаліс Ёг дзиръя дорӧдз.
Ёг дзиръя дзоньталіс Рекавлӧн Малкий пиыс, Бет-Карем гӧгӧр муӧн веськӧдлысь. Вӧчӧм дзиръяӧ сійӧ сувтӧдіс ӧдзӧсъяс да пуктіс сэтчӧ иган-тасъяс.
Дзульк дзиръя дзоньталіс Кол-Хозелӧн Шаллун пиыс, Миспа гӧгӧр муӧн веськӧдлысь. Сійӧ вӧчис дзиръясӧ, дзиръялы лэптіс лэбув, сувтӧдіс ӧдзӧсъяс да пуктіс сэтчӧ иган-тасъяс. Нӧшта сійӧ лэптіс стенсӧ Шелах вайӧртӧд дорын, ӧксылӧн сад йӧр дорті Давид карысь лэччан поскӧдз.
Сэтысянь водзӧ Давид рӧдлӧн дзебанін дорӧдз, кодйӧм вайӧртӧдӧдз да тышкайӧз керкаӧдз, стенсӧ дзоньталіс Азбуклӧн Неемий пиыс, Бет-Цур гӧгӧр му джынйӧн веськӧдлысь.
Сысянь водзӧ дзоньталісны стенсӧ левитъяс: Банилӧн Рехум пиыс да сыкӧд орччӧн Хашавий, Кейла гӧгӧр му джынйӧн веськӧдлысь. Сійӧ уджаліс аслас веськӧдлан му нимсянь.
Сысянь водзӧ дзоньталіс стенсӧ сылӧн рӧдвужысь Хенададлӧн Бавай пиыс, Кейла гӧгӧр мӧд му джынйӧн веськӧдлысь.
Сыкӧд орччӧн дзоньталіс стенсӧ Исуслӧн Эзер пиыс, Миспаӧн веськӧдлысь. Сійӧ уджаліс стен пельӧсын, шыпурт видзанінӧ пыранін весьтын.
Стен пельӧссянь Эльяшив аркирейлӧн керка ӧдзӧс дорӧдз стенсӧ дзоньталіс Заббайлӧн Барук пиыс. Сійӧ уджаліс зэв зіля.
Эльяшивлӧн керка ӧдзӧссянь да керка пельӧсӧдз стенсӧ дзоньталіс Хаккоц Урийлӧн Меремот пиыс.
Сысянь водзӧ стенсӧ дзоньталісны Ерусалим кар гӧгӧрын олысь попъяс.
Попъяскӧд орччӧн асланыс керка весьтӧд стенсӧ дзоньталісны Венямин да Хашшув.
Насянь водзӧ аслас керка дорті стенсӧ дзоньталіс Ананий Маасейлӧн Азарий пиыс.
Азарий керкасянь стен пельӧс сайӧдз стенсӧ дзоньталіс Хенададлӧн Биннуй пиыс.
Узайлӧн Фалал пиыс лэптіс пельӧс стенсӧ башня дорті, мый чурвидзис ӧксылӧн вылыс керка бердын видзысьяслӧн йӧрын.
Фалалкӧд орччӧн уджаліс Парошлӧн Педай пиыс.
Офелын олысь крамбердса кесйӧгъяс лэптісны стенсӧ Ва дзиръя дорсянь асыввывлань да чурвидзысь башняӧдз.
Ыджыд чурвидзысь башнясянь Офел стенмӧдз стенсӧ дзоньталісны Текояын олысьяс.
Вӧв дзиръя дорсянь водзӧ стенсӧ дзоньталісны попъяс, быдӧн дзоньталіс аслас керка весьтті.
Накӧд орччӧн аслас керка весьтті стенсӧ дзоньталіс Иммерлӧн Садок пиыс, а сысянь водзӧ — Шеканийлӧн Шемай пиыс, Асыввыв дзиръя видзысь.
Сыкӧд орччӧн стенсӧ дзоньталісны Шелемейлӧн Хананей пиыс да Цалафлӧн Ханун нима квайтӧд пиыс.
Насянь водзӧ аслас жырлы воча уджаліс Береклӧн Мешуллам пиыс.
Сыкӧд орччӧн уджаліс Малкий, зарниысь вӧчасьысь. Сійӧ дзоньталіс стенсӧ крамбердса кесйӧгъяслӧн да вузасьысьяслӧн керка дорӧдз — Мифкад дзиръяӧдз да стен пельӧсса жыр дорӧдз.
Стен пельӧсса жыр дорсянь Ыж дзиръяӧдз стенсӧ дзоньталісны эзысьысь вӧчасьысьяс да вузасьысьяс.
Санваллат кор тӧдмаліс, мый ми лэптам Ерусалимлысь стенсӧ, ёна скӧрмис. Сійӧ пондіс лӧгавны да лёкӧдны иудейясӧс.
Аслас йӧз водзын да самарияса тышкайӧз водзын сійӧ шуаліс: «Мый бара-й ноксьӧны тайӧ коньӧр иудейясыс-а?
Чайтӧны, мый выльысь стенсӧ лэптасны?
Пондасны бара висьяс вайны?
Ӧти лунӧн, буракӧ, кӧсйӧны лэптыны?
Кӧсйӧны бӧр ловзьӧдны сотчӧм изъяссӧ тайӧ пӧим чукӧрсьыс?»
Аммон войтырысь Тови, коді сулаліс Санваллаткӧд орччӧн, шуис: «Мед-мед лэптӧны.
Весиг руч кӧ кавшасяс, налӧн изъя стенмыс киссяс».
Енмӧй, кывзы, кутшӧма миянӧс лёкӧдӧны. Налысь увтыртӧмсӧ бергӧд ас выланыс. Сет найӧс мырддялысьяс киӧ, нуӧд пленӧ.
Налысь лёк вӧчӧмсӧ эн вунӧд, налысь мыжсӧ эн прӧстит, ӧд найӧ ёна дӧзмӧдісны уджалысьястӧ.
Карлысь стенсӧ ми лэптім водзӧ. Джынйӧдзыс сійӧс вӧлі кыпӧдӧма нин.
Войтырыс став сьӧлӧмсяньыс уджаліс.
Санваллат да Тови, арабъяс, аммонсаяс да азотсаяс ёна скӧрмисны, кор кылісны, мый Ерусалимлӧн стенмыс ӧдйӧ кыптӧ, и мый сылысь жугалӧминъяссӧ дзоньталӧны.
Найӧ сёрнитчисны уськӧдчыны Ерусалим вылӧ, мед шызьӧдны карсӧ.
Но ми кевмысим асланым Енлы. Ми сувтӧдім йӧзӧс, медым найӧ лун и вой видзасны карнымӧс.
Иуда войтыр кутіс элясьны, из-лӧп кыскалысьяс пӧ кок йывсьыныс усьӧны, сы мында пӧ уджыс.
Ми пӧ огӧ вермӧй стентӧ водзӧ лэптыны.
Миянӧс дзескӧдысьяс шуалісны, ерусалимса олысьяс пӧ оз и казявны да оз и тӧдлыны, кыдз ми тӧдлытӧг сувтам на шӧрӧ да виалам найӧс, тадзи сувтӧдам уджсӧ.
Вӧрӧг пӧвстын олысь иудейяс уналаысь волывлісны миян дінӧ да висьтавлісны, вӧрӧгыд пӧ кӧсйӧ уськӧдчыны миян вылӧ.
Сэки ме сувтӧдалі войтырӧс кар горулас стен сайӧ, восьсаинъясӧ. Сувтӧдалі найӧс рӧдкотыръясӧн, быдӧн босьтіс киас шыпурт, шы либӧ ньӧввуж.
Ставсӧ видзӧдалӧм бӧрын ме шуи нималана йӧзлы, веськӧдлысьяслы да войтырлы: «Энӧ полӧй вӧрӧгысь!
Тӧдӧй, мый Господьыс ыджыд да повзьӧдана! Тышкасьӧй вокъясныд, ныв-пиныд, гӧтыръясныд да керкаясныд вӧсна!»
Дзескӧдысьяслы кывсис, мый ми тӧдам налӧн уськӧдчыны кӧсйӧм йылысь. Но Енмыс торкис налысь кӧсйӧмсӧ, и ми ставным бӧр сувталім стен дорӧ, быдӧн босьтчис аслас уджӧ.
Тайӧ лунсяньыс джын том йӧзыс уджалісны, а мӧд джынйыс сулалісны сайӧдъясӧн, шыясӧн, ньӧввужйӧн да кӧрт кышӧдӧ пасьтасьӧмӧн.
Веськӧдлысьяс сайӧдісны Иуда войтырӧс, кор найӧ лэптісны стенсӧ.
Сьӧкыдтор новлӧдлысьяс ӧти кинас удж вӧчисны, мӧд киас шы кутісны.
Стен дзоньталысьяслӧн коскас ӧшаліс шыпурт. Тадзи найӧ кыпӧдісны стенсӧ.
Буксан шы сетысь вӧлі мекӧд.
Ме шуи нималана йӧзлы, веськӧдлысьяслы да войтырлы: «Уджыс зэв ыджыд да вывті уна. Ми уджалам стен кузялаыс, ӧта-мӧдсьыным ылынӧсь.
Та вӧсна, кысянь кыланныд буксан шы, сэтчӧ миян дінӧ чукӧртчӧй. Миян Енным кутас тышкасьны миян пыдди!»
Тадзи ми вӧчим уджсӧ, а джын йӧзыс шонді петӧмсянь да кодзувъяс мыччысьтӧдз кутісны кианыс шы.
Сійӧ кадас ме нӧшта тшӧкті войтырлы вой кежлас кольччыны аслас кесйӧгъяскӧд Ерусалимӧ, медым войнас видзны карсӧ, а луннас — уджавны.
Ачым ме, менам вокъяс, кесйӧгъяс да кар видзысьяс, кодъяс вӧліны мекӧд, — ставным ми узьлім паськӧмӧн. Быдӧнлӧн ки уланым вӧлі шыпурт да ва доз.
Уна айулов гӧтыръясныскӧд пондісны ёна элясьны иудей вокъясныс вылӧ.
Ӧтияс шуалісны: «Ми уна челядяӧсь.
Миянлы колӧ шедӧдны нянь кынӧмпӧт вылӧ, мед ловйӧн кольны».
Мӧдъяс шуалісны: «Уджйӧзным вӧсна миянлы колӧ сетны ассьыным муяс, виноград йӧръяс да керкаяс, медым тшыг кулӧмысь нянь ньӧбны».
Кодсюрӧ шуалісны: «Ми сетам ассьыным муяс да виноград йӧръяс, медым уджйӧзӧн босьтны сьӧм да мынтыны ӧксылы вот.
Мыйӧн нӧ ми торъялам вокъясысь? Миян челядьным тшӧтш ӧткодьӧсь.
Но миянлы быть лоӧ кесйӧг туйӧ вузавны ныв-пинымӧс. Кодсюрӧ нывъясным кесйӧг туйынӧсь нин.
Ми нинӧм огӧ вермӧй вежны, ӧд муясным да виноград йӧръясным йӧз киын».
Кор ме кылі войтырлысь элясьӧмсӧ, ме ёна скӧрми.
Мӧвпалӧм бӧрын ме чорыда сёрниті нималана йӧзкӧд да веськӧдлысьяскӧд. Ме шуи налы: «Сетӧм уджйӧзнытӧ ті содтӧдӧн босьтанныд асланыд вокъяслысь».
Ме чукӧрті войтырӧс, медым на водзын мыжавны нималана йӧзӧс да веськӧдлысьясӧс. Ме шуи: «Ми сьӧкыда ньӧбим вокъяснымӧс, кодъясӧс вӧлі вузалӧма мукӧд войтыръяслы. А ӧні ті вузаланныд ассьыныд вокъяснытӧ! Миянлы бара ӧмӧй ньӧбны найӧс?»
Найӧ чӧв олісны, налы эз сюр воча кыв.
Сэки ме шуи налы: «Ті лёктор вӧчанныд.
Тіянлы колӧ овны асланым Енмысь полӧмӧн, медым мустӧмтысь войтыръяс эз омӧльтны миянӧс.
Аслам вокъяскӧд да кесйӧгъяскӧд ме тшӧтш водзӧсӧн сета сьӧм да нянь, но содтӧдӧн бӧрсӧ ми огӧ босьтӧй.
Талун жӧ бӧр сетӧй йӧзыслы налысь муяссӧ, виноград да олив йӧръяссӧ, керкаяссӧ, уджйӧзсьыныс содтӧдӧн босьтӧм сьӧмсӧ, няньсӧ, винасӧ да олив выйсӧ».
Найӧ вочавидзисны: «Ставсӧ бӧр сетам, и босьтны насянь нинӧм огӧ кутӧй.
Вӧчам, кыдзи тэ шуан».
Ме кори попъясӧс да на дырйи тшӧкті нималана йӧзлы да веськӧдлысьяслы кыв сетны, мый найӧ тадзикӧн и вӧчасны.
Сэсся ме пыркниті ассьым паськӧмӧс да шуи: «Тадзи Енмыс мед пыркнитас Аслас керкаысь да Аслас муысь быдӧнӧс, коді ассьыс кывсӧ оз кут. Тадзи сійӧс кушӧдз лоӧ пыркнитӧма».
Став войтырыс шуис “аминь” да ошкис Енмӧс.
Ассьыныс кывсӧ найӧ кутісны.
Артаксеркс ӧксылӧн кызьӧд веськӧдлан восянь комын кыкӧд воӧдз ме юралі Иуда муын. Дас кык во чӧж ме аслам йӧзкӧд эг босьтлы уджысь нянь.
Меӧдз вӧвлӧм юралысьяс сьӧктӧдлӧмаӧсь войтырсӧ. Нелямын сикель эзысьысь ӧтдор найӧ босьтлӧмаӧсь нянь да вина.
Весигтӧ налӧн кесйӧгъясыс дзескӧдлӧмаӧсь войтырсӧ.
Но ме Енмысь полӧм вӧсна эг вӧч на моз.
Ме аслам кесйӧгъяскӧд тшӧтш лэпті карса стен.
Муяс аслыным ми эгӧ ньӧбавлӧй. 
Менам пызан сайӧ сёйны чукӧрмывліс иудейясысь да веськӧдлысьясысь сё ветымын мортӧдз. Наысь ӧтдор орччӧн олысь войтыръяс пӧвстысь локтысьяс тшӧтш пукавлісны менам пызан сайын.
Быд лун меным дасьтісны ӧти ӧшкӧс, квайт медбур ыжӧс да нӧшта пӧтка яй.
Быд дас лун мысти вайисны быдпӧлӧс вина.
Но та дырйи аслам юралан уджысь ме нинӧм эг корлы, ӧд войтырыс сьӧкыдаліс.
Енмӧй, бурӧн мынтысь меным ставсьыс, мый ме вӧчи тайӧ войтырыслы!
Санваллатлы, Товилы, араб войтырысь Гешемлы да мукӧд дзескӧдысьяслы кывсис, мый ме помалі лэптыны карса стен, и стенмын эз коль ни ӧти жугалӧмин. Сӧмын дзиръяясӧ абу на вӧлі пуктӧма ӧдзӧсъяс. Санваллат да Гешем корисны менӧ аддзысьны накӧд Оно ковтысын Кефирим сиктын.
Збыльвылас, найӧ мӧвпалісны вӧчны меным лёктор.
Ме мӧдӧді на дінӧ юӧртысьясӧс висьтавны, мый менам ыджыд удж мунӧ, и локнысӧ ог вермы, а локта кӧ, уджыс сувтас.
Найӧ нёльысь ыстылісны меным татшӧм корӧмсӧ, и ме пыр ӧткодя вочавидзлі налы.
Витӧдысьсӧ Санваллат мӧдӧдіс ме дінӧ ассьыс кесйӧгсӧ восьса письмӧӧн.
Сэтчӧ вӧлі гижӧма: «Войтыръяс пӧвстын сёрнитӧны, тшӧтш Гешем висьталӧ, мый тэ иудейяскӧд кӧсъян паныд кыпӧдчыны, та вӧсна ті и лэптінныд Ерусалимлысь стенъяссӧ. Нӧшта сёрнитӧны, мый тэ кӧсъян лоны налӧн ӧксыӧн.
Тэ индӧмыд пророкъясӧс, медым найӧ Ерусалимын юӧртасны, мый тэ Иуда войтырлӧн ӧксы.
Тайӧ юӧрыс воас Артаксеркс ӧксыӧдз.
Сідзкӧ, лок, да ми сёрнитам та йылысь».
Ме мӧдӧді сылы воча кыв: «Татшӧмторйыс, мый йылысь тэ гижӧмыд, эз вӧв.
Тэ ачыд лӧсьӧдлін тайӧс».
Татшӧм ногӧн найӧ повзьӧдлісны миянӧс. Чайтісны, мый ми кияснымӧс лэдзам да дугдам уджавны.
Но ме зільджыка на босьтчи уджас.
Ме муні Мегетавель Делайлӧн Шемай пи ордӧ, коді вӧлі йигнасьӧма гортас. Сійӧ шуис меным: «Мунам Енлӧн керкаӧ, йигнасям крам пытшкас, ӧд тэнӧ вины локтасны, тавой локтасны».
Но ме шуи: «Ме абу сэтшӧм морт, мед пышйыны.
Ме коддьӧмыс кӧ пырас крам пытшкӧ, ловйӧн оз коль.
Ме ог мун».
Ме гӧгӧрвои, мый эз Ен сійӧс мӧдӧд, но Тови да Санваллат мынтысисны сылы пророкалӧмсьыс.
Найӧ медалісны сійӧс, мед менӧ повзьӧдны да мыжӧ уськӧдны. И ме кӧ вӧчи Шемайлӧн вӧзйӧм серти, найӧ эськӧ лёкӧдісны-янӧдісны менӧ.
Енмӧй, эн вунӧд, мый вӧчисны Тови да Санваллат. Эн вунӧд тшӧтш Ноадия пророк аньӧс да мукӧд пророксӧ, кодъяс повзьӧдлісны менӧ.
Элул тӧлысьлӧн кызь витӧд лунӧ Ерусалимлысь стенсӧ вӧлі эштӧдӧма. Ветымын кык лунӧн вӧлі лэптӧма сійӧс.
Кор миянӧс дзескӧдысьяс да миян гӧгӧр олысь войтыръяс кылісны та йылысь, повзисны. Налы яндзим лои, ӧд гӧгӧрвоисны, мый тайӧ уджсӧ вӧчны миянлы отсаліс миян Енным.
Сійӧ кадас Иуда войтырысь нималана йӧз вӧлі ёна гижасьӧны Товикӧд. Тови вӧлі Арах Шеканийлӧн зять, а Товилӧн Иоханан пиыс вӧлі босьтӧма гӧтырӧ Берек Мешулламлысь нывсӧ. Та вӧсна унаӧн Иуда войтырысь кыв сетӧмӧн вӧлі кӧрталӧмаӧсь йитӧд Товикӧд.
Найӧ висьтавлісны меным Товилӧн бур вӧчӧм йылысь, а сылы висьтавлісны менсьым шуӧмӧс.
Тови аслас гижӧдъясӧн зілис повзьӧдлыны менӧ.
Стенсӧ лэптӧм бӧрын да ӧдзӧсъяс пукталӧм бӧрын индісны дзиръя видзысьясӧс, сьылысьясӧс да левитъясӧс. Ме пукті Ерусалимын юравны ассьым Ханани вокӧс да Хананейӧс, изкарӧн веськӧдлысьӧс, коді эз вудж ассьыс кывсӧ, а поліс Енмысь. Ме тшӧкті налы: «Ерусалимлысь дзиръяяссӧ мед оз восьтны, кытчӧдз шондіыс оз кут пӧжны. Вой кежлас дзиръя видзысьяс мед пӧдлаласны-йигналасны ӧдзӧсъяссӧ.
Ерусалимын олысьясӧс сувтӧдӧй видзны карсӧ, ӧтиясӧс — карса стен вылӧ, мӧдъясӧс — асланыс керкалы воча».
Ерусалим кар вӧлі паськыд да ыджыд, но олысьыс сэні вӧлі этша на, и керкаяссӧ абу на вӧлі вӧчӧма.
Менам Енмӧй пуктіс меным сьӧлӧмӧ чукӧртны нималана йӧзӧс, веськӧдлысьясӧс да став войтырсӧ, медым артавны-гижавны найӧс.
Ме аддзи небӧг, кытчӧ вӧлі пасйӧма медводз локтысьяслысь нимсӧ. Сэні вӧлі гижӧма:
Иуда муысь йӧз, кодъясӧс вавилонса Навукодоносор ӧксы коркӧ нуӧдліс пленӧ, ӧні бӧр локтісны Ерусалимӧ да Иуда муӧ — быдӧн аслас карӧ. Найӧс вайӧдісны Зоровавель, Исус, Неемий, Азарий, Раамай, Нахман, Мардокей, Билшан, Мисперет, Бигвай, Нехум да Баан.
Израиль войтырлӧн айулов лыдыс:
Парош рӧдысь вӧлі кык сюрс сё сизимдас кык морт, Шефатай рӧдысь — куимсё сизимдас кык морт, Арах рӧдысь — квайтсё ветымын кык морт, Пахат-Моав рӧдысь Исуссянь да Йоавсянь чужысьыс — кык сюрс кӧкъямыссё дас кӧкъямыс морт, Элам рӧдысь — сюрс кыксё ветымын нёль морт, Затту рӧдысь — кӧкъямыссё нелямын вит морт, Заккай рӧдысь — сизимсё квайтымын морт, Биннуй рӧдысь — квайтсё нелямын кӧкъямыс морт, Бебай рӧдысь — квайтсё кызь кӧкъямыс морт, Азгад рӧдысь — кык сюрс куимсё кызь кык морт, Адоникам рӧдысь — квайтсё квайтымын сизим морт, Бигвай рӧдысь — кык сюрс квайтымын сизим морт, Адин рӧдысь — квайтсё ветымын вит морт, Атер рӧдысь Езекейсянь чужысьыс — ӧкмысдас кӧкъямыс морт, Хашум рӧдысь — куимсё кызь кӧкъямыс морт, Бецай рӧдысь — куимсё кызь нёль морт, Хариф рӧдысь — сё дас кык морт, Гаваон рӧдысь — ӧкмысдас вит морт.
Виплиемысь да Нетофаысь вӧлі сё кӧкъямысдас кӧкъямыс морт, Анатотысь — сё кызь кӧкъямыс морт, Бет-Азмаветысь — нелямын кык морт, Киръят-Яримысь, Кефираысь да Беротысь — сизимсё нелямын куим морт, Рамаысь да Геваысь — квайтсё кызь ӧти морт, Микмасысь — сё кызь кык морт, Вефильысь да Гайысь — сё кызь куим морт, мӧд Невоысь — ветымын кык морт.
Мӧд Элам рӧдысь вӧлі сюрс кыксё ветымын нёль морт, Харим рӧдысь — куимсё кызь морт.
Ериконысь вӧлі куимсё нелямын вит морт, Лодысь, Хадидысь да Оноысь — сизимсё кызь ӧти морт, Сенаысь — куим сюрс ӧкмыссё комын морт.
Попъяслӧн лыдыс: Едай рӧдысь Исуссянь чужысьыс вӧлі ӧкмыссё сизимдас куим морт, Иммер рӧдысь — сюрс ветымын кык морт, Пашхур рӧдысь — сюрс кыксё нелямын сизим морт, Харим рӧдысь — сюрс дас сизим морт.
Левитъяслӧн лыдыс вӧлі сизимдас нёль морт. Найӧ вӧліны Исус да Кадмиэл рӧдъясысь, Ходавийсянь чужысьяс.
Сьылысьяслӧн лыдыс вӧлі сё нелямын кӧкъямыс морт. Найӧ вӧліны Асаф рӧдысь.
Дзиръя видзысьяслӧн лыдыс вӧлі сё комын кӧкъямыс морт. Найӧ вӧліны Шаллум, Атер, Талмон, Аккув, Хатит да Шовай рӧдъясысь.
Крамбердса кесйӧгъяс вӧліны Цихай рӧдысь, нӧшта Хасуф, Таббаот, Керос, Сиах, Падон, Лебан, Хагаб, Шалмай, Ханан, Гиддел, Гахар, Реай, Рецин, Некодай, Газзам, Уззай, Пасеах, Бесай, Меун, Нефис, Бакбук, Хакуп, Хархур, Бацлут, Мехид, Харшай, Баркос, Сисар, Темах, Нециах да Хатиф рӧдъясысь.
Соломонлӧн кесйӧгъяссянь чужысьяс вӧліны Сотай рӧдысь, нӧшта Соферет, Перуд, Ял, Даркон, Гиддел, Шефатай, Хаттил, Покерет-Цевайм да Амон рӧдъясысь. 
Крамбердса кесйӧгъяслӧн да Соломонлӧн кесйӧгъяссянь чужысьяслӧн лыдыс вӧлі куимсё ӧкмысдас кык морт.
Тел-Мелахысь, Тел-Харшаысь, Керубысь, Адданысь да Иммерысь петысьяс эз вермыны висьтавны, кутшӧм чужанкотырысь найӧ, эз вермыны эскӧдны, мый налӧн рӧдыс петӧ Израиль войтырысь.
Тайӧ йӧзыс вӧліны Делайсянь, Товисянь да Некодайсянь чужысьяс — ставнас квайтсё нелямын кык морт, тшӧтш Хабай, Хаккоц да Барзиллай попъяссянь чужысьяс. Барзиллай гӧтрасьлӧма галаадса Барзиллайлӧн ныв вылӧ, та бӧрын сійӧс кутӧмаӧсь тадзи нимтыны.
Найӧ корсисны чужанвуж гижӧдъясысь нимъяснысӧ, но эз аддзыны. Та вӧсна найӧс эз пыртны попъяс лыдӧ.
Медыджыд юралысь шуис, мый налы оз ков сёйны вежа вись, кытчӧдз оз лок поп, коді пудъясяс урим да туммим отсӧгӧн.
Локтысьяслӧн лыдыс ставнас вӧлі нелямын кык сюрс куимсё квайтымын морт. Тайӧ лыдас эз пырны кесйӧгъяс, кодъяслӧн лыдыс вӧлі сизим сюрс куимсё комын сизим морт.
Локтысьяс пӧвстын вӧлі кыксё нелямын вит сьылысь.
Локтысьяслӧн вӧлі сизимсё комын квайт вӧв, кыксё нелямын вит мул, нёльсё комын вит верблюд да квайт сюрс сизимсё кызь осёл.
Рӧдкутысьясысь унаӧн сетісны крам лэптӧм вылӧ козинъяс.
Медыджыд юралысьыс сетіс крам видзанінӧ сюрс зарни сьӧм*, вир резан ветымын тасьті да попъяслы витсё комын дӧрӧм.
Рӧдкутысьяс сетісны крам видзанінӧ кызь сюрс зарни сьӧм да кык сюрс кыксё эзысь сьӧм.
Войтырыс сетіс кызь сюрс зарни сьӧм, кык сюрс эзысь сьӧм да попъяслы квайтымын сизим дӧрӧм.
Попъяс, левитъяс, дзиръя видзысьяс, сьылысьяс, войтыр да крамбердса кесйӧгъяс овмӧдчисны асланыс каръясӧ. Быд израильса морт овмӧдчис аслас карӧ.
Сизимӧд тӧлысьнас, кор Израиль войтыр оліс нин аслас каръясын, ставныс ӧтитӧг чукӧртчисны Ва дзиръялы паныда изэрд вылӧ. Индӧдӧ велӧдысь Ездраӧс корисны вайны Мӧисейлысь Индӧд, мый Господь сетіс Израиль войтырлы. Ездра поп вайис Индӧдсӧ, медым лыддьыны сійӧс чукӧртчӧм айулов да аньяс водзын.
Сизимӧд тӧлысьлӧн медводдза лунӧ кывзыны чукӧртчисны ставныс, кодъяс сяммисны гӧгӧрвоны.
Ва дзиръя дорын изэрд вылын шонді петӧмсянь луншӧр кадӧдз Ездра лыддис Индӧдсӧ айуловлы да аньяслы — ставныслы, кодъяс сяммисны гӧгӧрвоны.
Став войтырыс сюся кывзіс.
Индӧдӧ велӧдысь Ездра сулаліс пуысь вӧчӧм сод вылын, мый вӧлі вӧчӧма дзик та могысь. Сылӧн веськыдладорын сулалісны Маттитай, Шемай, Анай, Урий, Хилки да Маасей. Шуйгаладорас сулалісны Педай, Мисаэл, Малкий, Хашум, Хашбадан, Закар да Мешуллам.
Став войтырыс аддзис, кыдзи Ездра восьтіс небӧгсӧ, ӧд сійӧ сулаліс наысь вылынджык. Ставныс сувтісны.
Ездра ошкис Господьӧс, ыджыд Енмӧс.
А став войтырыс кинысӧ вывлань лэптӧмӧн шуаліс: «Аминь! Аминь!» Сэсся найӧ муӧдзыс копыртчӧмӧн юрбитісны Господьлы.
Кор войтырыс сулаліс, Исус, Бани, Шеревий, Ямин, Аккув, Шаббетай, Ходий, Маасей, Келит, Азарий, Иозавад, Ханан да Фелай левитъяс гӧгӧрвоӧдісны Индӧдсӧ.
Найӧ ясыда лыддисны Енлысь Индӧдсӧ да восьтісны гижӧдыслысь вежӧртассӧ. Йӧзыс гӧгӧрвоисны лыддьӧмасӧ.
Сэки Неемий юралысь, Индӧдӧ велӧдысь Ездра поп да войтырсӧ велӧдысь левитъяс шуисны кывзысьяслы: «Тайӧ лунсӧ вежӧдӧма Господьлы, тіян Енлы.
Энӧ шогсьӧй да энӧ бӧрдӧй. Индӧдсӧ кывзігӧн став войтырыс бӧрдіс.
Мунӧй гортаныд да чӧскыда сёйӧй-юӧй. Юксьӧй сёян-юаннад накӧд, кодлӧн нинӧм абу дасьтӧма, ӧд тайӧ лунсӧ вежӧдӧма миян Господьлы.
Энӧ шогсьӧй, ӧд Господь водзын нимкодясьӧм ёнмӧдӧ тіянӧс».
Левитъяс лӧньӧдісны войтырсӧ: «Энӧ шогсьӧй, ӧд тайӧ луныс вежа».
Войтырыс муніс сёйны-юны, тшӧтш мукӧдӧс на чӧсмӧдлісны. Найӧ гажӧдчисны ёна нимкодясьӧмӧн, ӧд гӧгӧрвоисны налы шуӧм кывъяссӧ.
Мӧд луннас Израиль войтырысь рӧдкутысьяс, попъяс да левитъяс чукӧртчисны Индӧдӧ велӧдысь Ездра дінӧ, мед сійӧ гӧгӧрвоӧдас налы Индӧдсӧ.
Мӧисейлы сетӧм Индӧдысь найӧ аддзисны Господьлысь тшӧктӧм, мый сизимӧд тӧлысьнас гажӧдчан лунъяс дырйи Израиль войтырлы колӧ овны чомъясын.
Та вӧсна найӧ тшӧктісны юӧртны став асланыс каръясын да Ерусалимын: «Мунӧй керӧсъясӧ да вайӧй сэтысь вӧрса да быдтӧм олив пулысь вожъяссӧ, мирт да пальма вожъяс, нӧшта мукӧд паськыд коръя пу вожъяс, мед вӧчны чомъяс, кыдзи гижӧма Индӧдын».
Став йӧзыс ветлісны пу вожъясла да вӧчисны аслыныс чомъяс. Сувтӧдалісны чомъяснысӧ асланыс керка вевт вылӧ, олан йӧръясаныс да Енлӧн крам йӧрӧ, тшӧтш Ва дзиръя да Ефрем дзиръя дорӧ изэрд вылӧ.
Пленысь локтӧм израильсаяс ставныс вӧчисны аслыныс чомъяс да олісны сэні.
Нав Исус кадсянь тайӧ лунӧдзыс Израиль войтыр эз вӧчлы тадзи.
Нимкодясьӧмыс вӧлі вывті ыджыд.
Медводдза гажӧдчан лунсянь бӧръя лунӧдзыс быд лун лыддисны Енлысь Индӧдсӧ.
Гажӧдчисны сизим лун чӧж, а кӧкъямысӧд луннас Гижӧд серти вӧлі вежа чукӧртчӧм.
Кызь нёльӧд лунӧ сійӧ жӧ тӧлысьнас Израиль войтыр чукӧртчис, мед видзавны. Найӧ пасьталісны шогалан паськӧм да коялісны юрнысӧ муӧн.
Израиль войтыр торйӧдчис мукӧд войтыръясысь. Найӧ сувтісны да висьтасисны асланыс мыжъясысь да батьясныслӧн мыжъясысь.
Найӧ сулалісны куим час чӧж, кор налы лыддисны Господь Енлысь Индӧдсӧ. Сэсся найӧ куим час чӧж копыртчӧмӧн висьтасисны мыжъяссьыныс Господьлы, асланыс Енлы.
Исус, Бани, Кадмиэл, Шеваний, Бунни, Шеревий, Бани да Кенани сувтісны левитъяслы лӧсьӧдӧм сод вылӧ да гораа кевмысисны Господьлы, асланыс Енлы.
Сэсся Исус, Кадмиэл, Бани, Хашавни, Шеревий, Ходий, Шеваний да Петахий левитъяс шуисны: «Сувтӧй да ошкӧй Господьӧс, ассьыныд Ентӧ, ӧні да нэмъяс чӧж!
Господьӧй, мед лоӧ кыпӧдӧма Тэнсьыд ыджыд нимтӧ! Сійӧ став ошкӧмсьыс медвылын!»
[Ездра шыасис]: — Тэ — ӧти Господь! Тэ вӧчин енэжсӧ, енэжвыв енэжъяссӧ да вынъяссӧ, мусӧ да ставсӧ, мый сы вылын, саридзсӧ да ставсӧ, мый сэні эм. Тэ ставыслы сетан олӧм, енэжвыв вынъяс копрасьӧны Тэныд!
Тэ — Господь Ен. Тэ бӧрйин Ӧврамӧс, петкӧдін сійӧс Калдея Урысь, сетін сылы Ӧвраам ним. Тэ аддзин, мый сылӧн сьӧлӧмыс эскана Тэ водзын. Тэ кӧрталін сыкӧд йитӧд, мед сетны [сылы да] сысянь чужысьяслы ханаан, хеттей, аморей, перезей, евус да гергесей войтырлысь муяссӧ.
Ассьыд кывтӧ Тэ кутін, ӧд Тэ — веськыд.
Тэ аддзин миян батьяслысь Египетын сьӧкыдалӧмсӧ, кылін налысь горзӧмсӧ Гӧрд саридз дорын. Тэ петкӧдлін индысьпасъяс да шензьӧданаторъяс фараонлы, сылӧн кесйӧгъяслы да сылӧн муын став олысьыслы, ӧд Тэ тӧдін, кутшӧм ёна египетса увтыртісны миянлысь батьяснымӧс. Тэ кыпӧдін Ассьыд нимтӧ, ӧнӧдз сійӧ ошкана.
Миян батьяс водзын Тэ шӧри поткӧдін саридз, и найӧ вуджисны сійӧс косінті. На бӧрся вӧтчысьясӧс Тэ вӧйтін джуджыд саридзӧ, изйӧс моз шыбитін бузгысь ваӧ.
Луннас Тэ нуӧдін найӧс кымӧр сюръяӧн, войнас Тэ югзьӧдін налысь туйсӧ биа сюръяӧн.
Тэ лэччин Синай керӧс вылӧ, сёрнитін накӧд енэжсяньыс, сетін налы веськыд Индӧд, бур шуӧмъяс да тшӧктӧмъяс.
Тэ сетін налы тшӧктӧм Аслад вежа шойччан лун йылысь, юӧртін Аслад Мӧисей кесйӧг пыр индӧд-тшӧктӧмъястӧ.
Тшыгъяліганыс Тэ сетін налы енэжсянь нянь, горш косьмиганыс Тэ изкыртаысь перйин налы ва. Тэ тшӧктін налы мунны да босьтны аслыныс му, мый китӧ лэптӧмӧн кӧсйысин сетны налы.
Но найӧ, миян батьяс, пыксисны, асныралісны да эз кывзыны Тэнсьыд тшӧктӧмъястӧ. Найӧ эз кӧсйыны кывзысьны, вунӧдісны на пӧвстын вӧчӧм шензьӧданаторъястӧ.
Найӧ асныралісны да индісны веськӧдлысьӧс, пыксисны да кӧсйисны бӧр бергӧдчыны нартитӧм улӧ.
Но Тэ — прӧститысь Ен, Тэ бур да мелі сьӧлӧма, Тэнад терпитӧмыд ыджыд, Тэнад буралӧмлы абу помыс, Тэ эн эновт найӧс.
Найӧ вӧчисны зарни ӧшкӧс, шуисны, тайӧ пӧ миян ен, коді петкӧдіс миянӧс Египетысь. Найӧ вӧчисны уна пеж, но Тэ вӧлін на дінӧ бур сьӧлӧма, Тэ эн эновт найӧс овтӧминын.
Луннас кымӧр сюръя эз вешйыв на дінысь, а нуӧдіс найӧс, войнас биа сюръя югзьӧдіс налысь туйсӧ, кыті налы колӧ вӧлі мунны.
Тэ сетін налы Ассьыд бурлуна Ловтӧ, медым велӧдны найӧс. Тэ эн дугды вердны найӧс маннаӧн, сетін налы ва, мед эз косьмы налӧн горшыс.
Нелямын во чӧж Тэ тӧждысин на вӧсна овтӧминын, налы ставыс вӧлі тырмана, налӧн паськӧмыс эз важмыв, кокныс эз пыктавлы.
Тэ сетін налы муяс да войтыръясӧс, юклін налы мусӧ. Найӧ босьтісны хешбонса Сигон ӧксылысь мусӧ да васанса Ог ӧксылысь мусӧ.
Налысь пиянсӧ Тэ рӧдмӧдін енэжвыв кодзувъяс мында. Тэ вайӧдін найӧс сійӧ муас, мый йылысь Тэ кӧсйысьлін налӧн батьяслы.
Пияныс локтісны да босьтісны тайӧ мусӧ.
Тэ сетін налӧн кипод улӧ сэтчӧс ханаан войтырӧс, сетін налӧн киӧ ӧксыясӧс да сэні олысь войтыръясӧс, медым вӧчисны тайӧ йӧзыскӧд асланыс кӧсйӧм серти.
Найӧ босьтісны изкаръяс да бур муяс, овмӧдчисны эмбур тыра керкаясӧ, налы вичмисны изкыртаын кералӧм вайӧртӧдъяс, виноград йӧръяс, олив расъяс да уна мукӧд вотӧса пуяс.
Найӧ пӧттӧдзныс сёйисны-тшӧгӧдчисны, нимкодясисны Тэнад бур козинъясысь.
Но найӧ кутісны пыксьыны Тэныд, кыпӧдчисны Тэныд паныд, ӧтдортісны Тэнсьыд Индӧдтӧ, виалісны Тэнсьыд пророкъястӧ, кодъяс ӧлӧдісны найӧс, медым веськӧдны Тэлань. Найӧ вӧчисны уна пеж, та вӧсна Тэ сетін найӧс мустӧмтысьяс киӧ, кодъяс дзескӧдісны найӧс.
Но сьӧкыд кад дырйи найӧ горзӧмӧн шыасьлісны Тэ дінӧ, и Тэ кылін найӧс енэжсяньыс, Аслад ыджыд буралӧмыд вӧсна ыстылін дорйысьясӧс, кодъяс мездылісны найӧс дзескӧдысьясысь.
Кор найӧ олісны лӧня, найӧ бара вӧчисны лёксӧ Тэныд паныд. Сэки Тэ сетлін найӧс дзескӧдысьяс киӧ, кодъяс ыджыдалісны на вылын.
Но найӧ бара горзӧмӧн шыасьлісны Тэ дінӧ, и Тэ кылін найӧс енэжсяньыс, Аслад ыджыд буралӧмыд вӧсна Тэ унаысь мездылін найӧс.
Тэ ӧлӧдлін найӧс, медым найӧ бергӧдчисны Тэнад Индӧд дінӧ, но найӧ пыксисны, эз кывзыны Тэнсьыд тшӧктӧмъястӧ, мыж вӧчӧмӧн торкисны Тэнсьыд Индӧдтӧ, мый вайӧ олӧм мортыслы, коді сы серти олӧ. Найӧ пыксисны-асныралісны, эз кывзыны Тэнӧ.
Уна во чӧж Тэ виччысин, Аслад Ловсянь Тэ ӧлӧдлін найӧс пророкъяс пыр, но найӧ эз кывзыны.
Сэки Тэ сетін найӧс мукӧд войтыръяслӧн киӧ.
Но Аслад ыджыд буралӧмыд вӧсна Тэ найӧс дзикӧдз эн бырӧд, Тэ эн эновт найӧс, ӧд Тэ — бур да мелі сьӧлӧма Ен.
Миян Енмӧй, Тэ ыджыд, вына да повзьӧдана Ен, Тэ видзан Ассьыд йитӧдтӧ да буралӧмтӧ!
Видзӧдлы став сьӧкыдлуныс вылӧ, мый суис миянӧс, миянлысь ӧксыясӧс да юралысьясӧс, попъясӧс да пророкъясӧс, батьяснымӧс да Тэнсьыд став войтыртӧ ассурса ӧксыяслӧн веськӧдлан кадсянь да талунъя лунӧдз.
Быдторйын, мый суис миянӧс, Тэ веськыда вӧчин, ӧд Тэ веськыд, а ми — мыжаӧсь.
Миян ӧксыяс, юралысьяс, попъяс да батьяс эз овны Тэнад Индӧд серти, эз кывзыны Тэнсьыд тшӧктӧмъястӧ, вунӧдісны Тэнсьыд ӧлӧдӧмъястӧ.
Асланыс муын, кӧні Тэ кытшалін найӧс быд бурнас, паськыд да озыр муын, мый Тэ сетін налы, найӧ эз кесъявны Тэныд, эз бергӧдчыны асланыс лёк уджъясысь.
Ми ӧні кесйӧгъяс.
Сійӧ муас, мый тэ сетін миян батьяслы, медым пӧткӧдчыны став вотӧснас да бурнас, ми лоим кесйӧг туйынӧсь.
Тайӧ му вывсьыс быдтасыс вичмӧ ӧксыяслы, кодъясӧс Тэ пуктін ыджыдавны миян вылын асланым мыжъяс вӧсна.
Миян вылын да ыж-мӧсным вылын найӧ ыджыдалӧны, кыдзи кӧсйӧны. Ми ёна сьӧкыдалам.
Та вӧсна ми лӧсьӧдім кӧсйысяна гижӧд. Гижӧд улас миян юралысьяс, левитъяс да попъяс пуктісны ассьыныс пас.
Гижӧдас пассӧ пуктісны Неемий юралысь, Хакалийлӧн пиыс, да Седекей, тшӧтш Серай, Азарий, Еремей, Пашхур, Амарей, Малкий, Хаттуш, Шеваний, Маллук, Харим, Меремот, Авдий, Даниил, Гиннетон, Барук, Мешуллам, Авий, Миямин, Маазай, Вилгай да Шемай попъяс.
Левитъясысь пассӧ пуктісны Азанийлӧн Исус пиыс, Хенадад рӧдысь Биннуй, нӧшта Кадмиэл да налӧн вокъясыс: Шеваний, Ходий, Келит, Фелай, Ханан, Мика, Рехов, Хашавий, Заккур, Шеревий, Шеваний, Ходий, Бани да Бенину.
Войтырлӧн веськӧдлысьясысь пассӧ пуктісны Парош, Пахат-Моав, Элам, Затту, Бани, Бунни, Азгад, Бебай, Адоний, Бигвай, Адин, Атер, Езекей, Азур, Ходий, Хашум, Бецай, Хариф, Анатот, Невай, Магпиаш, Мешуллам, Хезир, Мешезавел, Садок, Яддуй, Пелатий, Ханан, Анай, Осий, Хананей, Хашшув, Халлохеш, Пилхай, Шовек, Рехум, Хашавнай, Маасей, Ахий, Ханан, Анан, Маллук, Харим да Баан.
Мукӧдыс — попъяс, левитъяс, дзиръя видзысьяс, сьылысьяс, крамбердса кесйӧгъяс да найӧ, кодъяс тшӧтш торйӧдчисны мукӧд войтырысь, мед овны Енлӧн Индӧд серти, асланыс гӧтыръяскӧд да челядькӧд, кодъяс сяммисны гӧгӧрвоны — ӧтувтчисны асланыс веськӧдлысьяскӧд да кыв сетӧмӧн кӧсйысисны кутчысьны Енлӧн Индӧдӧ, мый Мӧисей, Енлӧн кесйӧг, сетіс налы. Кӧсйысисны овны Господь Ыджыдлӧн став индӧд-тшӧктӧмыс серти. Шуисны: «Ассьыным нывъяснымӧс огӧ сетӧй верӧс сайӧ мукӧд войтыръяслы и налысь нывъяснысӧ огӧ босьтӧй асланым пиянлы гӧтырӧ.
Мукӧд войтырысь кӧ кодкӧ ваяс нянь либӧ мукӧд вузалантор шойччан лунӧ, ми налысь огӧ ньӧбӧй ни шойччан лунӧ, ни вежа лунъясӧ. Быд сизимӧд воӧ ми кутам шойччӧдны мунымӧс да вунӧдам быдпӧлӧс уджйӧз.
Ми кӧсйысям быд во сикельысь коймӧд пайсӧ сетны Енлӧн крамын кесъялӧм вылӧ: вежа нянь вылӧ, быдлунся нянь да сотан вись вылӧ, тшӧтш шойччан лунӧ, выль тӧлысь чужигӧн да гажӧдчан лунъясӧ вайӧмторъяс вылӧ, вежа козинъяс вылӧ, мыжысь вись вылӧ, мый вайӧны Израиль войтырлысь мыжсӧ вештӧм могысь, да крампытшса став уджыс вылӧ.
Ми — попъяс, левитъяс да войтыр — пудъясим Енлӧн крамӧ пес вайӧм кузя. Быд рӧдлы быд во урчитӧм кадӧ колӧ вайны пес, медым Индӧдын гижӧм серти миян Господь Енлӧн висьпуктанін вылын ӧзъяліс би.
Быд во ми пондам вайны Господьлӧн крамӧ медводдза воӧм нянь да пуяслысь вотӧс.
Миян Енлӧн крамӧ, сэні кесъялысь попъяс водзӧ Индӧдын гижӧм серти ми пондам вайны медводдза чужысь пияннымӧс, вись пыдди пондам вайны ыж-мӧснымлысь медводдза чужысьясӧс.
Миян Енлӧн крам видзанінъясӧ попъяслы ми пондам вайны выль быдтасысь медводдза пӧжалӧм сӧчӧн да мукӧд вайӧмторъяс, быдпӧлӧс пулысь вотӧс, вина да олив вый. Мувыв быдтасысь дасӧд юкӧныс лоӧ левитъяслы.
Найӧ мед чукӧртасны сійӧс быд карын, кӧні вӧдитӧны муяс.
Аарон рӧдысь поп мед лоӧ левитъяскӧд, кор найӧ пондасны чукӧртны дасӧд юкӧнсӧ войтырлысь. Тайӧ дасӧд юкӧнысь дасӧд пайсӧ левитъяслы колӧ нуны миян Енлӧн крам видзанінӧ. Израиль войтыр моз левитъяслы колӧ вайны нянь, вина да олив вый — став ассьыныс вайӧмторнысӧ — жыръясӧ, кӧні видзӧны вежаинса дозмук-кӧлуй, и кӧні кесъялӧм дырйи олӧны попъяс, дзиръя видзысьяс да сьылысьяс.
Ми огӧ эновтӧй миян Енлысь керкасӧ».
Израиль войтырлӧн юралысьяс олісны Ерусалимын. Войтырыс пудъясьӧмӧн индіс быд дасӧд мортӧс, коді овмӧдчас вежа Ерусалим карӧ, тадзи ӧкмысыс кольччис овны аслас карӧ.
Войтырыс бурсиис быдӧнӧс, коді ас кӧсйӧм сертиыс овмӧдчис Ерусалимӧ.
Иуда муын мукӧд каръясын — быдӧн аслас карын да аслас овмӧсын — олісны израильсаяс, попъяс, левитъяс, крамбердса кесйӧгъяс да Соломонлӧн кесйӧгъяссянь чужысьяс.
А Ерусалимын олісны Иуда муӧн юралысьяс, кодъяс вӧліны Иуда да Венямин чужанкотыръясысь. Иуда чужанкотырысь Парес рӧдысь сэні оліс Атай. Сійӧ вӧлі Озейлӧн пи, Озей — Закарлӧн, Закар — Амарейлӧн, Амарей — Шефатайлӧн, Шефатай — Махалалеллӧн.
Шелай рӧдысь Ерусалимын оліс Маасей. Сійӧ вӧлі Баруклӧн пи, Барук — Кол-Хозелӧн, Кол-Хозе — Хазайлӧн, Хазай — Адайлӧн, Адай — Йояривлӧн, Йоярив — Закарлӧн. Парес рӧдысь Ерусалимын оліс нёльсё квайтымын кӧкъямыс тышкаморт.
Венямин чужанкотырысь Ерусалимын оліс Саллу. Сійӧ вӧлі Мешулламлӧн пи, Мешуллам — Йоэдлӧн, Йоэд — Педайлӧн, Педай — Колайлӧн, Колай — Маасейлӧн, Маасей — Итиэллӧн, Итиэл — Исайлӧн. Нӧшта Габбай да Саллай олісны Ерусалимын. Ставнас Венямин чужанкотырысь сэні оліс ӧкмыссё кызь кӧкъямыс морт.
Зикрилӧн Йоиль пиыс вӧлі карса юралысьӧн, а Сенуйлӧн Иуда пиыс вӧлі сы бӧрся мӧд юралысьӧн.
Попъясысь Ерусалимын олісны Йояривлӧн Едай пиыс, Якин да Серай, коді веськӧдліс Енлӧн крамын. Серай вӧлі Хилкилӧн пи, Хилки — Мешулламлӧн, Мешуллам — Садоклӧн, Садок — Мерайотлӧн, Мерайот — Ахитувлӧн. Тайӧ поп рӧдъясысь Енлӧн крамын кесъяліс кӧкъямыссё кызь кык морт.
Попъяс лыдын вӧлі Адай. Сійӧ вӧлі Ерохамлӧн пи, Ерохам — Пелалийлӧн, Пелалий — Амцилӧн, Амци — Закарлӧн, Закар — Пашхурлӧн, Пашхур — Малкийлӧн. Адай рӧдын рӧдкутысьыс вӧлі кыксё нелямын кык морт.
Попъяс лыдын вӧлі нӧшта Амашсай. Сійӧ вӧлі Азарэллӧн пи, Азарэл — Ахзайлӧн, Ахзай — Мешиллемотлӧн, Мешиллемот — Иммерлӧн. Амашсай рӧдын вӧлі сё кызь кӧкъямыс тышкаморт, медбуръясыс.
Налӧн веськӧдлысьнас вӧлі Гедолимлӧн Завдиэл пиыс.
Левитъясысь Ерусалимын оліс Шемай. Сійӧ вӧлі Хашшувлӧн пи, Хашшув — Азрикамлӧн, Азрикам — Хашавийлӧн, Хашавий — Буннилӧн. Сэні олісны тшӧтш Шаббетай да Иозавад, левитъяслӧн юралысьяс, кодъяс кывкутісны Енлӧн крам йӧрын уджъяс вӧсна. Ерусалимын олісны тшӧтш Маттанай, Бакбук да Авдай. Маттанай вӧлі сьылысь котырын ошкӧм-кевмысьӧм дырйи шылад босьталысьӧн. Сійӧ вӧлі Микейлӧн пи, Микей — Завдийлӧн, Завдий — Асафлӧн. Бакбук вӧлі сьылысь котырын шылад мӧд босьталысьӧн. Авдай вӧлі Шаммуйлӧн пи, Шаммуй — Галаллӧн, Галал — Едутунлӧн. 
Ставнас левитъясысь вежа карын оліс кыксё кӧкъямысдас нёль морт.
Дзиръя видзысьясысь Ерусалимын олісны Аккув, Талмон да налӧн вокъясыс — ставнас сё сизимдас кык морт, кодъяс видзисны карса дзиръяяс.
Мукӧд израильсаяс, попъяс да левитъяс олісны Иуда му пасьтала мукӧд каръясын, быдӧн батьсяньыс вичмӧм му вылын.
Крамбердса кесйӧгъяс олісны Офелын.
Наӧн веськӧдлісны Цихай да Гишпай.
Левитъяслӧн веськӧдлысьнас Ерусалимын вӧлі Асаф рӧдысь Уззей. Сійӧ вӧлі Банилӧн пи, Бани — Хашавийлӧн, Хашавий — Маттанайлӧн, Маттанай — Микалӧн. Асафсянь чужысьяс вӧліны сьылысьясӧн Енлӧн крамын кесъялӧм дырйи. На йылысь ӧксысянь вӧлі тшӧктӧм, мый колӧ сетны налӧн быдлунъя олӧм вылӧ.
Иудалӧн Зерах пи рӧдысь Мешезавеллӧн Петахий пиыс вӧлі ӧксыӧн индӧм морт, коді кывкутіс войтырлӧн могъяс вӧсна.
Иуда чужанкотырлӧн вӧліны видз-муа сиктъяс: Киръят-Арба да сыгӧгӧрса грездъяс, Дивон да сыгӧгӧрса грездъяс, Екавцел да сыгӧгӧрса сиктъяс, Исус, Молада да Бет-Пелет, Хацар-Шуал, Бер-Шева да сыгӧгӧрса грездъяс, Сиклаг, Мекона да сыгӧгӧрса грездъяс, Эн-Риммон, Цора да Ярмут, Заноах, Адуллам да сыгӧгӧрса сиктъяс, Лакиш да сыгӧгӧрса ыбъяс, Азека да сыгӧгӧрса грездъяс.
Иуда чужанкотыр овмӧдчис Бер-Шевасянь Хинном ковтысӧдз.
Венямин чужанкотырлӧн оланінъясыс вӧліны Гевасянь да водзӧ: Микмас, Айя, Вефиль да сыгӧгӧрса сиктъяс, Анатот, Нов, Анания, Хацор, Рама, Гиттайм, Хадид, Цевоим, Неваллат, Лод, Оно да Ге-Харашим.
Иудаын олысь левитъясысь кодсюрӧ овмӧдчисны Венямин муӧ.
Шеалтиэллӧн Зоровавель пикӧд да Исускӧд пленысь локтісны попъяс да левитъяс. Попъясысь локтісны Серай, Еремей, Ездра, Амарей, Маллук, Хаттуш, Шеканий, Рехум, Меремот, Иддо, Гиннетой, Авий, Миямин, Маади, Вилга, Шемай, Йоярив, Едай, Саллу, Амок, Хилки да Едай.
Исус аркирей кадӧ найӧ веськӧдлісны попъясӧн, асланыс вокъясӧн.
Левитъясысь локтісны Исус, Биннуй, Кадмиэл, Шеревий, Иуда да Маттанай. Аслас вокъяскӧд Маттанай веськӧдліс сьылӧм-ошкӧмӧн. Нӧшта локтісны Бакбук, Унний да налӧн вокъяс, кесъялӧм дырйи сьылысьяс.
Исуслӧн чужис Йояким, Йоякимлӧн — Эльяшив, Эльяшивлӧн — Йоад, Йоадлӧн — Ионафан, Ионафанлӧн — Яддуй.
Йояким дырйи попъясысь рӧдкутысьясӧн вӧліны: Серай рӧдын Мерай, Еремей рӧдын Хананей, Ездра рӧдын Мешуллам, Амарей рӧдын Иоханан, Маллук рӧдын Ионафан, Шеваний рӧдын Ӧсип, Харим рӧдын Аднай, Мерайот рӧдын Хелкай, Иддо рӧдын Закар, Гиннетон рӧдын Мешуллам, Авий рӧдын Зикри, Минямин рӧдын ...*, Моад рӧдын Пилтай, Вилга рӧдын Шаммуй, Шемай рӧдын Ионафан, Йоярив рӧдын Маттенай, Едай рӧдын Уззей, Саллу рӧдын Каллай, Амок рӧдын Эвер, Хилки рӧдын Хашавий, Едай рӧдын Нафанаил.
Левитъяслысь рӧдкутысьяссӧ вӧлі пасйӧма небӧгас Эльяшив, Йоад, Иоханан да Яддуй кадӧ, а попъясӧс — персияса Дарий ӧксыалӧм дырйи.
Левитъяслысь рӧдкутысьяссӧ пасъявлӧмаӧсь небӧгас Эльяшив Иохананлӧн кадӧдз.
Левитъясӧн веськӧдлысьяснас вӧліны Хашавий, Шеревий, Кадмиэллӧн Исус пиыс да налӧн вокъяс, кодъяс вежласьӧмӧн сьылісны ошкана да аттьӧалана сьыланъяс Енлӧн морт Давидлӧн лӧсьӧдӧм серти.
Маттанай, Бакбук, Авдий, Мешуллам, Талмон да Аккув, крам дзиръя видзысьяс, кывкутісны дзиръядор видзанінъяс вӧсна.
Тадзи вӧлі Неемий юралысьлӧн, Индӧдӧ велӧдысь Ездра поплӧн да Йоякимлӧн кадӧ. Йояким вӧлі Иоседек Исуслӧн пиыс.
Ерусалимса стенъяс вежӧдігкежлӧ быдлаысь корисны левитъясӧс Ерусалимӧ, медым аттьӧалӧмӧн да сьылӧмӧн, кимвалӧн, арфаӧн да гуслиӧн ворсӧмӧн нимкодя пасйыны вежӧдӧм.
Сьылысьяс локтісны Ерусалим гӧгӧрысь, Нетофа гӧгӧр сиктъясысь, Бет-Гилгалысь, Гева да Азмавет гӧгӧр ыбъяс вылысь, ӧд сьылысьяс лэптісны сиктъяснысӧ Ерусалим гӧгӧр.
Попъяс да левитъяс асьныс сӧстӧммӧдчисны, сэсся сӧстӧммӧдісны войтырсӧ, карса дзиръяяс да стенъяс.
Та бӧрын ме нуӧді иудаса юралысьясӧс стен вылӧ. Сэні ме сувтӧді кык ыджыд котыр сьывны ошкана сьыланъяс. Ӧти котырыс муніс стен кузя веськыдвылӧ Ёг дзиръялань.
На бӧрся мунісны Хошай да иудаса юралысьяслӧн ӧти джынйыс, нӧшта Азарий, Ездра, Мешуллам, Иуда, Венямин, Шемай да Еремей попъяс. На бӧрся трубаясӧн мунісны том попъяс. На пӧвстын муніс Ионафанлӧн Закар пиыс. Ионафан вӧлі Шемайлӧн пи, Шемай — Маттанайлӧн, Маттанай — Микайлӧн, Микай — Заккурлӧн, Заккур — Асафлӧн. Нӧшта мунісны Закарлӧн Шемай, Азарэл, Милалай, Гилалай, Маай, Нафанаил, Иуда да Ханани вокъясыс. Найӧ ворсісны Енлӧн морт Давидлӧн кодь шылада ворсанторъясӧн. На водзвылын муніс Индӧдӧ велӧдысь Ездра.
Дзульк дзиръя дорті Давид карлӧн поскӧд найӧ кайисны карса стен вылӧ, сэсся мунісны Давид керка весьтӧд асыввылӧ Ва дзиръя дорӧдз.
Мӧд сьылысь котырыс муніс шуйгавылӧ. Ме да джын войтырыс восьлалім на бӧрся стен вывті Пач башняӧдз. Сэсянь ми мунім Паськыд стенӧдз. Ефрем дзиръясянь, Важ дзиръя да Чери дзиръя дорті, Хананел башня да Сё тышкамортлы башня бокиті ми мунім Ыж дзиръялань да сувтім Видзан дзиръя дорӧ.
Сэсся кыкнан сьылысь котырыс сувталісны Енлӧн крамӧ, сувтім тшӧтш ме да юралысьяслӧн джынйыс, нӧшта сувтісны Эляким, Маасей, Минямин, Микай, Элионай, Закар да Хананей попъяс трубаясӧн, а сідзжӧ Маасей, Шемай, Элазар, Уззей, Иоханан, Малкий, Элам да Эзер.
Сьылысьяс гораа сьылісны, наӧн веськӧдліс Израхий.
Сійӧ лунӧ йӧзыс вайисны уна вись да ёна гажӧдчисны, ӧд Енмыс тыртіс найӧс ыджыд нимкодьлунӧн.
Аньяс и челядь тшӧтш ёна нимкодясисны. Ерусалимын гажӧдчӧмыс кыліс ылӧдз.
Сійӧ жӧ лунӧ вӧлі индӧма йӧзӧс кывкутны крам видзанінъяс вӧсна, сэтчӧ пуктӧм дасӧд юкӧнъяс вӧсна, медводдза воӧм нянь да вотӧс вӧсна. Найӧ чукӧртісны видзанінъясӧ карса видз-муяс вылысь сійӧ пайсӧ, мый колӧ вӧлі Индӧд серти сетны попъяслы да левитъяслы. Иуда войтыр нимкодясис попъяс да левитъяс вӧсна, кодъяс тӧждысисны сӧстӧммӧдчӧм да асланыс Енлы кесъялӧм вӧсна. Тшӧтш нимкодясисны сьылысьяс да дзиръя видзысьяс вӧсна, кодъяс кесъялісны Давидлӧн да Соломон пиыслӧн тшӧктӧм серти.
Важысянь нин, Давид да Асаф дырйи на, сьылысьяслы вӧлі пуктӧма веськӧдлысьясӧс да лӧсьӧдӧма Енмӧс ошкана-аттьӧалана сьыланъяс.
Зоровавель да Неемий кадъясӧ став Израиль войтыр вичмӧдліс сьылысьяслы да дзиръя видзысьяслы пай налӧн быдлунся олӧм вылӧ. Таысь ӧтдор найӧ торйӧдлісны вежа пай левитъяслы, а левитъяс чуктӧдлісны сэтысь вежа пай Аарон рӧдлы.
Сійӧ лунӧ Израиль войтырлы лыддисны Мӧисейлысь небӧг. Сэні вӧлі гижӧма, мый аммон да моав войтыръясысь некод оз вермы лоны Ен войтырлӧн чукӧртчӧмын. Ӧд тайӧ войтыръясыс эз вочаавны Израиль войтырӧс ваӧн да няньӧн, а мӧдарӧ, медалісны Валаамӧс, мед ёрны найӧс. Но миян Енным бергӧдіс ёрӧмсӧ бурсиӧмӧ.
Индӧдсӧ кывзӧм бӧрын Израиль войтыр торйӧдіс ас пӧвстысь ставнысӧ, кодъяс чужисны мукӧд войтырсянь.
Таӧдз Енлӧн крам видзанінъяс вӧсна кывкутысьнас вӧлі пуктӧма Товилӧн матысса рӧдвужысь Эльяшив попӧс. Эльяшив торйӧдіс Товилы ыджыд жыр, кӧні водзынсӧ видзлӧмаӧсь нянь вись, ладан, дозмук-кӧлуй, попъяслы вайӧмторъяс, тшӧтш няньлысь, виналысь да выйлысь дасӧд юкӧнсӧ, мый Индӧд серти вӧлі сетӧны левитъяслы, сьылысьяслы да дзиръя видзысьяслы.
Тайӧ лоӧмтор дырйиыс ме эг вӧв Ерусалимын, ӧд вавилонса Артаксеркс ӧксылӧн комын кыкӧд веськӧдлан воӧ ме бӧр муні сы дінӧ. Но кад мысти ме бара вӧзйыси ӧксылысь.
Ерусалимӧ локтӧм бӧрын ме тӧдмалі, мый Эльяшив лёктор вӧчӧма: Енлӧн крам йӧрысь сетӧма Товилы жыр. Ме ёна скӧрми таысь, шыблалі видзанінысь Товилысь став эмбур-кӧлуйсӧ. Ме тшӧкті сӧстӧммӧдны видзанінъяс да бӧр пуктыны сэтчӧ Енлӧн крамлысь дозмук-кӧлуйсӧ, нянь вись да ладан.
Нӧшта ме тӧдмалі, мый левитъяслы, вӧлӧмкӧ, оз сетны налысь пайсӧ. Та вӧсна кесъялӧм пыдди левитъяс да сьылысьяс вӧлі петӧмаӧсь быдӧн аслас видз-му вылӧ.
Ме чирышті веськӧдлысьясӧс. Юалі: «Мыйла эновтӧма Енлысь крамсӧ?»
Сэсся ме чукӧрті левитъясӧс да сьылысьясӧс да бӧр сувтӧді найӧс вӧчны ассьыныс уджсӧ.
Став Иуда войтырыс бара пондіс вайны видзанінъясӧ няньлысь, виналысь да выйлысь дасӧд юкӧнсӧ.
Крам видзанінӧ кывкутысьясӧн ме инді Шелемей попӧс, Индӧдӧ велӧдысь Садокӧс да левитъяс пӧвстысь Педайӧс, а Маттанай Заккурлысь Ханан писӧ пукті налы отсасьысьӧн. Тайӧ йӧзыслы позис эскыны.
Налы вӧлі тшӧктӧма юклыны вайӧмторъяссӧ асланыс вокъяслы.
Енмӧй, казьтышт менӧ тайӧторсьыс! Эн вунӧд Тэнад крамыд вӧсна да сэні кесъялӧм вӧсна тӧждысьӧмӧс.
Сійӧ кадас ме казялі, мый Иуда муын шойччан лунӧ талялӧны виноград, осёлъяс вылын вайӧны Ерусалимӧ нянь кольтаяс, вина, виноград, инжир да уна мукӧдтор. Ставсӧ тайӧс вӧчисны шойччан лунӧ.
Ме чорыда ӧлӧді найӧс шойччан лунӧ вузасьӧмысь.
Ерусалимын олысь тирса йӧз вайлісны сэтчӧ чери да мукӧд вузӧс и вузавлісны шойччан лунӧ Иуда войтырлы.
Ме чирыштӧмӧн шуи иудаса нималана йӧзлы: «Мыйла ті вӧчанныд татшӧм лёксӧ, пежаланныд шойччан лун?
Эз-ӧ тадзи вӧчлыны тіян батьяс? Таысь Енным ыстіс миян вылӧ да тайӧ карыс вылӧ став тайӧ шогсӧ.
Но шойччан лунсӧ пежалӧмнаныд ті содтанныд Израиль дінӧ Енлысь скӧрлунсӧ».
Шойччан лун водзвылын, кор Ерусалим дзиръяяс дорын шондіыс саяліс, ме тшӧкті йигнавны дзиръяяс да эг лэдз восьтны шойччан лун помасьтӧдз.
Ме сувтӧді дзиръяяс дорӧ ассьым кесйӧгъясӧс, медым нинӧм эз лэдзны вайны карӧ шойччан лунӧ.
Вузасьысьяс ӧтчыдысь и мӧдысь узьмӧдчылісны Ерусалим кар ортсыӧ.
Но ме ӧлӧді найӧс: «Мыйла ті узьланныд стен дорас?
Нӧшта кӧ тадзи вӧчанныд, тшӧкта босьтны тіянӧс».
Та бӧрын шойччан лунӧ найӧ сэсся эз нин волыны.
Левитъяслы ме тшӧкті сӧстӧммӧдчыны, сэсся мунны да видзны дзиръяяс, медым шойччан лунсӧ вӧлі вежӧдӧма.
Енмӧй, казьтышт менӧ тайӧ вӧчӧмторсьыс! Аслад ыджыд буралӧмыд кузя ло бур сьӧлӧма ме дінӧ!
Сійӧ кадас ме нӧшта казялі, мый иудейяс босьтӧмаӧсь гӧтыръяссӧ азот, аммон да моав войтыръясысь.
Та вӧсна джын челядьыс оз тӧдны еврей кывсӧ, сёрнитӧны азот кыв вылын да мукӧд войтыр кывйӧн.
Таысь ме чирышті да ёри тайӧ айуловсӧ. Кодсюрӧӧс весиг вачкалі да някралі юрсиӧдыс. Тшӧкті кыв сетны Ен водзын, мый водзӧ найӧ оз сетны нывъяснысӧ мукӧд войтырлӧн пиян сайӧ да оз босьтны налысь нывъяснысӧ гӧтырӧ аслыныс да пияныслы.
Эз-ӧ на вӧсна Израильлӧн Соломон ӧксы мыжсӧ вӧч?
Некутшӧм войтырлӧн эз вӧв Соломон кодь ӧксыыс.
Сылӧн Енмыс радейтіс сійӧс, и пуктіс сійӧс ӧксыӧ став Израильлы.
Но мукӧд войтырысь босьтӧм гӧтыръясыс кыскисны сійӧс мыжас.
А ӧні ми кылам, мый ті тшӧтш вӧчанныд тайӧ ыджыд лёкторсӧ. Мукӧд войтырысь аньяс вылӧ гӧтрасьӧмнаныд ті эновтінныд миянлысь Енмӧс.
Эльяшив аркирейлӧн Йоад нима пиыслӧн ӧти пи вӧлі хоронса войтырысь Санваллатлӧн зять.
Ме сійӧс вӧтлі син водзысь.
Казьтышт налы, Енмӧй, мый найӧ пежалісны поп чинсӧ и торкисны йитӧдтӧ, мый Тэ кӧрталін попъяскӧд да левитъяскӧд.
Ме сӧстӧммӧді войтырӧс йӧз пежысь, сувтӧді попъясӧс да левитъясӧс кесъявны, медым быдӧн вӧчис ассьыс удж. Тшӧкті индӧм кадӧ вайны крамӧ пес, медводдза воӧм нянь да быдтас-вотӧс.
Енмӧй, бурӧн мынтысь меным!
{Еврей йӧз (комиӧдіс Kodko) @ Эсфир @ религ. гижӧд @ Библия @ 2021 @ Лб. .}
ЭСФИР
abu
[Артаксеркс ыджыд ӧксылӧн мӧд веськӧдлан воӧ нисан тӧлысьлӧн медводдза лунӧ Кис Шимей Яирлӧн Мардокей пиыс аддзыліс вӧт. Мардокей вӧлі тӧдчана морт, иудей, Венямин чужанкотырысь. Сійӧ оліс Суза карын, кесъяліс ӧксы керкаын.
Мардокей вӧлі на пиысь, кодъясӧс вавилонса Навукодоносор ӧксы босьтіс пленӧ да нуӧдіс Ерусалимысь Вавилонӧ. На пӧвстын вӧлі тшӧтш иудаса Еконей ӧксы.
Мардокейлӧн вӧтыс вӧлі татшӧм. Весьӧпӧртана шы кыліс. Гымаліс. Муыс вӧрис, му вылас ставыс шызис.
Сэки петкӧдчисны кык ыджыд гундыр, найӧ дасьӧсь вӧліны тышкасьны ӧта-мӧдыскӧд.
Найӧ гораа равзісны. Налӧн равзӧм шы улӧ войтыръяс дасьтысисны тышӧ, мед пасьвартны веськыда олысь войтырӧс.
Сап пемыд пуксис му вылас. Сэні лои шогсьӧм да дзескӧдӧм, сьӧкыдалӧм да ыджыд шызьӧм.
Лёк суӧмысь полӧмысла веськыда олысь войтыр шӧйӧвошис, найӧ лӧсьӧдчисны нин кувны, но шыасисны Господь дінӧ.
Налӧн горзӧмысь ичӧт ва визулысь артмис ыджыд ю, гӧгӧр югдіс, пондіс дзирдавны шонді. Сэки Енмыс кыпӧдіс рам сьӧлӧмаясӧс, и найӧ бырӧдісны ыкшаасьысьясӧс.
Вӧтсӧ аддзылӧм бӧрын Мардокей садьмис. Сійӧ мӧвпаліс ас пытшкас, мый эськӧ Енмыс кӧсйӧ вӧчны, и рытӧдзыс кӧсйис гӧгӧрвоны вӧтсӧ.
Ӧтчыд Мардокей вӧлі ӧксы керкаын Бигтанкӧд да Терешкӧд. Тайӧ кык евнукыс видзисны ӧксылысь керкасӧ. Мардокей кыліс налысь сёрнисӧ и гӧгӧрвоис, мый найӧ лӧсьӧдчӧны вины Артаксеркс ӧксыӧс. Мардокей висьталіс та йылысь ӧксылы.
А ӧксы юаліс кыкнан евнуклысь, и кор найӧ висьтасисны, тшӧктіс вины найӧс.
Ӧксы да Мардокей гижисны тайӧ лоӧмтор йывсьыс, медым эз вӧв вунӧдӧма.
Ӧксы тшӧктіс Мардокейлы кесъявны сы ордын, таысь сетіс сылы козинъяс.
Ӧксылӧн йӧз пӧвстын сэки ёна нималіс Агагсянь чужысь Аммедатлӧн Аман пиыс. Тайӧ кык виӧм евнук вӧсна сійӧ зілис лёк вӧчны Мардокейлы да сылӧн войтырлы.] 
Тайӧ вӧлі Артаксеркс ӧксы дырйи. Сы кипод улын сэки вӧлі сё кызь сизим му Индиясянь да Эфиопияӧдз. Сійӧ кадас Артаксеркс ӧксылӧн юралан пуклӧсыс вӧлі Суза изкарын. Коймӧд веськӧдлан воӧ став аслас юралысь-веськӧдлысьыслы ӧксы лӧсьӧдіс гаж. Сэтчӧ локтісны Персия да Мидия муясысь тышкайӧзӧн веськӧдлысьяс да ӧксыув муясӧн юралысьяс. Сё кӧкъямысдас лун чӧж ӧксы петкӧдліс налы аслас муысь озырлунсӧ да аслас юралӧмлысь ыджыд вынсӧ.
Кор тайӧ лунъясыс помасисны, ӧксы аслас сад йӧрын лӧсьӧдіс нӧшта сизимлунся гаж. Корис гаж вылас Суза изкарысь став олысьсӧ — тӧдчана и прӧстӧй йӧзӧс.
Мрамор сюръяяс бердӧ эзысь кольчаясӧ вӧлі ӧшӧдӧма еджыд дӧраяс да гӧрдовлӧз вурун дӧраяс, медым тупкысьны шондіысь. Найӧс вӧлі зэвтӧма вӧсни шабді да пемыдгӧрд вурун кӧвъясӧн.
Йӧрас вӧчӧм джодж вылӧ вӧлі сувтӧдалӧма зарни да эзысь куйланінъяс. Джоджсӧ вӧлі вольсалӧма мраморысь, турунвиж, сьӧд да пӧртмасян изъясысь.
Йӧзсӧ юктӧдісны зарни дозъясысь, быд доз вӧлі аслыспӧлӧс. [Вӧліны тшӧтш эзысь дозъяс. А ӧти рубин дозлӧн доныс вӧлі комын сюрс талант.] 
Ӧксы вӧлі зэв озыр, та вӧсна винаыс вӧлі вывті уна.
Юктасисны ӧксылӧн тшӧктӧм серти. Ӧксы керкаӧн веськӧдлысьяс быдӧнлы кисьталісны, мыйтӧм коді кӧсйис юны, некодлы мырдӧн эз кисьтны.
Артаксеркс ӧксы керкаын Астинь ӧксы-ань тшӧтш лӧсьӧдіс аньяслы гаж.
Сизимӧд луннас винаысь гажмӧм Артаксеркс ӧксы корис ас дінас ассьыс сизим кесъялысь евнукӧс: Мехуманӧс, Биззетӧс, Харвонӧс, Бигтайӧс, Авагтайӧс, Зетарӧс да Каркасӧс. Тшӧктіс налы вайӧдны ас дінас Астинь ӧксы-аньӧс юр вылас юркытшсӧ пуктӧмӧн, медым петкӧдлыны войтыръяслы да юралысьяслы сылысь мичлунсӧ.
Астинь збыльысь вӧлі зэв мича.
Евнукъяс висьталісны ӧксылысь тшӧктӧмсӧ Астинь ӧксы-аньлы, но сійӧ эз пет.
Ӧксы ёна скӧрмис таысь, скӧрысла пузис ас пытшкас.
Сійӧ шыасис мывкыда йӧз дінӧ, кодъяс тӧдісны, кыдзи важӧн вӧчлісны ӧксыяс. Ассьыс бӧръя кывсӧ шутӧдз ӧксы сёрнитіс накӧд, кодъяс тӧдісны индӧд да веськыда мыждӧм. На пӧвстысь медматысса йӧзӧн ӧксылы вӧліны Каршен, Шефар, Адмаф, Фарсис, Мерес, Марсен да Мемукан. Тайӧ сизим мортыс вӧліны персияса да мидияса юралысьяс, ӧксылӧн медтӧдчана йӧзыс, кодъяс быд кадӧ вермисны локны ӧксы дінӧ.
Артаксеркс ӧксы юаліс налысь: «Индӧд серти мый колӧ вӧчны Астинь ӧксы-анькӧд, ӧд сійӧ эз кывзы ӧксылысь тшӧктӧмсӧ, мый вӧлі висьталӧма евнукъяс пыр?»
Мемукан став юралысьыс дырйи шуис ӧксылы: «Астинь ӧксы-ань мыжа абу сӧмын ӧксы водзын, но тшӧтш юралысьяс да войтыръяс водзын, кодъяс олӧны Артаксеркс ӧксылӧн муясын.
Аньяс кӧ тӧдмаласны, мый вӧчис ӧксы-ань, дугдасны пыдди пуктыны верӧсъяснысӧ. Шуасны, Артаксеркс ӧксы пӧ тшӧктӧма вайӧдны ас дінас Астинь ӧксы-аньӧс, но сійӧ абу локтӧма.
Ӧні персияса да мидияса юралысьяслӧн гӧтыръясныс, кодъяс кыласны, мый вӧчис ӧксы-ань, пондасны тадзи жӧ вӧчны.
Сэки увтыртӧмыс да скӧрмӧмыс содас.
Шогмана кӧ ӧксылы, мед петас сысянь тшӧктӧм, мый Астинь некор оз вермы локны Артаксеркс ӧксы водзӧ, а ӧксы-аньӧ сійӧ босьтас бурджык аньӧс. Тайӧ тшӧктӧмсӧ мед гижасны персияса да мидияса индӧдӧ, кытысь нинӧм вежны оз позь.
Кор ӧксылӧн ыджыд му пасьтала кыласны сылысь тшӧктӧмсӧ, сэки гӧтыръяс пондасны пыдди пуктыны верӧсъяснысӧ — тӧдчана-ӧ верӧсыс али абу».
Ӧксылы да юралысьяслы сьӧлӧм вылас воис Мемуканлӧн вӧзйӧмыс.
Ӧксы тадзи и вӧчис.
Сійӧ дасьтіс гижӧд аслас ӧксыув муясын олысьяслӧн шыпасъясӧн да быд войтырлӧн чужан кыв вылын. Тайӧ мӧдӧдӧм гижӧдас тшӧктіс, мый верӧслы аслас керкаын колӧ лоны ыджыдӧн.
Кад мысти Артаксеркс ӧксы лӧнис скӧралӧмсьыс, но эз вунӧд, мый Астинь вӧчис, и мый сы йылысь вӧлі шуӧма.
Ӧксы бердын кесъялысьяс шуисны: «Колӧ корсьны ӧксылы том мича нывъясӧс. Ӧксы мед индас став аслас ӧксыув муясын йӧзӧс, кодъяс чукӧртасны том мича нывъясӧс Суза изкарӧ. Найӧс мед овмӧдасны аньяслӧн керкаӧ аньясӧс видзысь Гегайлӧн, ӧксы евнуклӧн, тӧждысьӧм-видзӧдӧм улӧ. Нывъяслы мед сетасны чӧскыд дука мавтасъяс [да мукӧд коланаторсӧ].
Кутшӧм ныв воас ӧксылы сьӧлӧм вылас, сійӧ мед и лоӧ Астинь пыдди ӧксы-аньӧн».
Ӧксылы кажитчис татшӧм вӧзйӧмыс. Сійӧ тадзи и вӧчис.
Суза изкарын оліс Мардокей нима морт. Сійӧ вӧлі иудей, Венямин чужанкотырысь Кис Шимей Яирлӧн пи.
Мардокей вӧлі на пиысь, кодъясӧс вавилонса Навукодоносор ӧксы босьтіс пленӧ да нуӧдіс Ерусалимысь Вавилонӧ.
На пӧвстын вӧлі тшӧтш иудаса Еконей ӧксы. Мардокей быдтіс батьтӧм-мамтӧм Гадасса нима нылӧс — аслас дядьлысь нывсӧ. Гадассалӧн мӧд нимыс вӧлі Эсфир.
Сійӧ вӧлі лӧсьыд мыгӧра да мича чужӧма ныв.
Эсфирлӧн бать-мамыс кувлӧмаӧсь, та вӧсна Мардокей босьтӧма сійӧс ныв пыдди.
Ӧксылысь тшӧктӧмсӧ да индӧмъяссӧ юӧртӧм бӧрын Суза изкарӧ Гегайлӧн видзӧм-тӧждысьӧм улӧ вӧлі чукӧртӧма уна нылӧс. Эсфирӧс тшӧтш овмӧдісны ӧксы керкаӧ, сетісны аньясӧс видзысь Гегайлӧн тӧждысьӧм улӧ.
Эсфир дінӧ Гегай вӧлі бур сьӧлӧма. Сійӧ дзик пыр сетіс Эсфирлы чӧскыд дука мавтасъяс да сёян-юан. Ӧксы керкаысь Гегай вайӧдіс Эсфирлы сизим бӧрйӧм кесйӧг аньӧс да овмӧдіс найӧс Эсфиркӧд аньяслӧн керкаӧ, сэтчӧс медбур жыръясӧ.
Эсфир некодлы эз висьтав аслас войтыр да аслас рӧд йылысь, ӧд Мардокей ӧлӧдіс сійӧс.
Мардокей быд лун ветлӧдліс аньяслӧн керка йӧр дорын, сійӧ кӧсйис тӧдмавны, кыдзи олӧ Эсфир.
Урчитӧм кадӧ быд нывлы колӧ вӧлі мунны Артаксеркс ӧксы дінӧ. Таӧдз найӧс индӧд серти мичмӧдісны дас кык тӧлысь чӧж: квайт тӧлысь чӧж мавтісны смирна выйӧн, мӧд квайт тӧлысь чӧжсӧ — чӧскыд дука мавтасъясӧн да мукӧдторъясӧн. Та бӧрын том ныв вермис пырны ӧксы дінӧ.
Ӧксы ордӧ мунӧм водзын нывлы сетлісны аньяслӧн керкаысь ставсӧ, мый сійӧ корліс.
Рытнас ныв пырліс ӧксы дінӧ, а асывнас вуджліс овны аньяслӧн мӧд керкаӧ, кӧні Шаашгаз, ӧксылӧн евнук, видзис ӧксылысь гӧтыръяссӧ.
Та бӧрын том ань пыравліс ӧксы дінӧ сӧмын сэк, кор ӧксы ачыс кӧсйис да аньлысь нимсӧ шуӧмӧн тшӧктіс вайӧдны сійӧс ас дінас.
Кор Абихайллӧн Эсфир нывлы, кодӧс Мардокей аслас дядьлӧн кулӧм бӧрын босьтіс ныв пыдди, воис кад мунны ӧксы дінӧ, сійӧ нинӧм эз кор, а босьтіс сӧмын сійӧ, мый вӧзйис сылы ӧксылӧн Гегай евнук, аньясӧс видзысь.
Быдӧнлы, коді аддзыліс Эсфирӧс, сійӧ воис сьӧлӧм вылас.
Артаксеркс ӧксылӧн сизимӧд веськӧдлан воӧ, дасӧд тебет тӧлысьӧ, Эсфирӧс вайӧдісны ӧксы керкаӧ Артаксеркс дінӧ.
Став гӧтыр дорсьыс ӧксылы Эсфир лои медмуса. Эсфир воис ӧксылы сьӧлӧм вылас, и мукӧд нывъяс дорысь Эсфир дінӧ сійӧ вӧлі вывті бур сьӧлӧма.
Ӧксы пуктіс сылы юр вылас юркытш да индіс сійӧс Астинь пыдди ӧксы-аньӧн.
Эсфир ради ӧксы лӧсьӧдіс став аслас юралысьяслы да веськӧдлысьяслы ыджыд гаж. Сійӧ чинтіс ӧксыув муясын вот мынтӧм, лышкыда сеталіс козинъяс.
Мардокей кесъяліс ӧксы дінын, кор нывъясӧс чукӧртісны мӧдысь. Мардокейлӧн тшӧктӧм серти Эсфир эз висьтавлы аслас рӧд да аслас войтыр йылысь.
Эсфир кывзысис Мардокейлысь, кыдзи пыр кывзысьліс сы ордын быдмигас.
Кор Мардокей кесъяліс ӧксы дінын, Бигтан да Тереш нима евнукъяс, кодъяс видзисны ӧксылысь вежӧсъяс, [Мардокейӧс пыдди пуктӧмысь] чорыда скӧралісны Артаксеркс ӧксы вылӧ да дасьтысисны вины сійӧс.
Мардокей тӧдмаліс та йылысь да висьталіс Эсфир ӧксы-аньлы, а Эсфир Мардокей нимсянь висьталіс ӧксылы.
Лоӧмторсӧ туялӧм бӧрын тыдовтчис, мый, вӧлӧмакӧ, збыль. Сэки кыкнан кесйӧгсӧ ӧшӧдісны пу сюръя вылӧ.
Тайӧ лоӧмтор йывсьыс гижисны ӧксылӧн каднебӧгӧ.
Тайӧ лоӧмторъяс бӧрын Артаксеркс ӧксы ыдждӧдліс Агагсянь чужысь Аммедатлысь Аман писӧ, кыпӧдіс сійӧс да пуктіс веськӧдлыны мукӧд юралысьясӧн.
Быдӧн, коді кесъяліс ӧксылы, Аманкӧд паныдасигӧн пидзӧс вылас сувтӧмӧн копыртчыліс сы водзӧ, ӧд татшӧм вӧлі ӧксылӧн тшӧктӧмыс.
Но Мардокей эз копыртчыв да эз сувтлы пидзӧс вылас Аман водзӧ.
Ӧксылӧн веськӧдлысьяс юалісны Мардокейлысь, мыйла сійӧ торкӧ ӧксылысь тшӧктӧмсӧ.
Быд лун найӧ долисны тайӧс Мардокейлы, но сійӧ эз кывзы. Найӧ висьталісны та йылысь Аманлы, медым тӧдны, позьӧ-ӧ Мардокейлы тадзи вӧчны сӧмын сы вӧсна, мый сійӧ иудей, кыдзи сійӧ шуліс налы.
Кор Аман аддзис, мый Мардокей эз сувт пидзӧс вылас да эз копыртчыв сылы, скӧрысла пузис.
Аман шуис вины Мардокейӧс, но тайӧ вӧлі сылы этша на.
Кор сійӧ тӧдмаліс, кутшӧм войтырысь Мардокей, шуис кушӧдз бырӧдны Артаксеркс ӧксы му пасьталаысь иудейясӧс.
Артаксеркс ӧксылӧн дас кыкӧд веськӧдлан воӧ медводдза нисан тӧлысьӧ Аманлӧн тшӧктӧм серти пудъясисны тӧлысьяс да лунъяс йылысь [медым ӧти лунӧн бырӧдны Мардокейлысь войтырсӧ]. Пудйыс уси дас кыкӧд адар тӧлысь вылӧ.
Аман шуис Артаксеркс ӧксылы: «Эм ӧти войтыр, коді разалӧма тэнад му пасьтала.
Тайӧ войтырыс олӧ мукӧд войтыръяс пӧвстын, но наысь торйӧдчӧмӧн. Налӧн индӧдыс торъялӧ мукӧд войтыръяслӧн индӧдысь, и найӧ оз овны ӧксылӧн тшӧктӧмъяс серти.
Ӧксыӧй, тайӧс тадзи оз позь кольны.
Ӧксылы кӧ шогмана, мед гижас тайӧ войтырсӧ бырӧдӧм йылысь тшӧктӧм. А ме чуктӧда дас сюрс талант эзысь да сета ӧксылӧн видзанінӧ».
Сэки ӧксы пӧрччис ассьыс чунькытшсӧ да сетіс сійӧс Агагсянь чужысь Аммедатлӧн Аман пилы, медым вынсьӧдны иудейясӧс бырӧдӧм йылысь тшӧктӧмсӧ.
Ӧксы шуис Аманлы: «Эзысьтӧ коль аслыд, а тайӧ войтырыскӧд вӧч, мый кӧсъян».
Медводдза тӧлысьлӧн дас коймӧд лунӧ чукӧртісны ӧксылысь гижалысьясӧс. Аманлысь тшӧктӧмсӧ найӧ гижисны ӧксылӧн сатрапъяслы, [Индиясянь Эфиопияӧдз сё кызь сизим] ӧксыув муын юралысьяслы да войтыръяслӧн веськӧдлысьяслы. Гижӧдсӧ дасьтісны ӧксыув муясын олысьяслӧн шыпасъясӧн да быд войтырлӧн чужан кыв вылын. Сійӧс вӧлі гижӧма Артаксеркс ӧксы нимсянь да вынсьӧдӧма ӧксылӧн чунькытш пасӧн.
Вӧлі мӧдӧдӧма йӧзӧс, кодъяс нуисны гижӧдсӧ ӧксыув муясӧ, медым ӧти лунӧн — дас кыкӧд адар тӧлысьлӧн дас коймӧд лунӧ — вины-бырӧдны став иудейсӧ, томӧс и пӧрысьӧс, челядьӧс и аньясӧс, а налысь эмбурсӧ мырддявны. 
[Гижӧдас вӧлі пасйӧма: «Индиясянь Эфиопияӧдз сё кызь сизим муын юралысьяслы да налӧн киподувса веськӧдлысьяслы гижӧ Артаксеркс ыджыд ӧксы.
Ме ыджыдала войтыръяс вылын, юрала став муюгыднас. Но вылӧ кыпӧдчытӧг, рам да лӧнь сьӧлӧмӧн веськӧдлігӧн ме кӧсъя, медым менам муын олысьяс олісны зыксьытӧг. Ме зіля видзны став аслам муын лӧньлун, медым сэті позис ветлыны повтӧг, и ставныс вермисны лӧня овны ӧта-мӧдныскӧд.
Ме юалі туйдӧдысьяслысь, кыдзи тайӧс пӧртны олӧмӧ. Сэки миян пӧвстын аслас сюсьлунӧн торъялысь да эскана морт, Аман, ӧксы бӧрся медыджыдыс, коді тӧждысьӧ бурсӧ вӧчны мунымлы, гӧгӧрвоӧдіс миянлы, мый став му пасьтала мукӧд войтыръяс пӧвстын олӧ ӧти зыксьысь войтыр. Аслас индӧдъясӧн тайӧ войтырыс сувтӧ мукӧд войтыръяслы паныд, ӧтдортӧ ӧксылысь тшӧктӧмъяссӧ, медым торкны миянлысь юралӧмнымӧс.
Ми тӧдмалім, мый збыльысь сӧмын тайӧ войтырыс век зыксьӧ мукӧд йӧзкӧд, аслас оласногӧн торкӧ индӧднымӧс да миян юралӧмлы паныд кыпӧдчӧмнас вӧчӧ ыджыд лёкторъяс, медым миян муын дзугны йӧзыслысь бур олӧмсӧ. Та вӧсна тшӧктам бырӧдны пыдди пуктана Аман юралысьлӧн гижӧдын индӧм йӧзӧс, тшӧктам жалиттӧг шыпуртӧн вины найӧс ставнысӧ, тшӧтш гӧтыръяснысӧ да челядьнысӧ. Вӧчны тайӧс тшӧктам таво дас кыкӧд адар тӧлысьлӧн дас коймӧд лунӧ. Колӧ ӧти лунӧн бырӧдны тайӧ йӧзсӧ, кодъяс дугдывтӧг паныд сувтӧны, и пыр кежлӧ шыбитны найӧс адӧ. Сэки найӧ оз кутны водзӧ падмӧдны миянӧс, и ми вермам олӧм помӧдзным овны лӧня да зыксьытӧг».]
Тайӧ гижӧдсӧ индӧдӧс моз колӧ вӧлі юӧртны ӧксыув муясын олысь войтыръяслы, медым найӧ ставныс вӧліны дасьӧсь сійӧ луныс кежлӧ.
Гижӧд нуысьяс тэрмасьӧмӧн мунісны паськӧдны ӧксылысь тшӧктӧмсӧ.
Юӧртісны тшӧтш Суза изкарын.
Ӧксы да Аман пуксисны юны-гажӧдчыны, а Суза кар ёна шызис.
Кор Мардокей тӧдмаліс та йылысь, сійӧ косяліс паськӧмсӧ, пасьталіс шогалан паськӧм, кояліс юрсӧ пӧимӧн да петіс кар шӧрӧ. Сійӧ ырзӧмӧн бӧрдіс да гораа горзіс. [Горӧдіс: «Мыжтӧм войтырӧс бырӧдӧны!»]
Сійӧ локтіс ӧксылӧн керка дзиръя дорӧ [да сувтіс]. Сэтчӧ эз позь пырны шогалан паськӧмӧн [да коялӧм пӧимӧн].
Ӧксыув муясын, кытчӧ нуисны ӧксылысь тшӧктӧмсӧ, иудейяс ёна шогалісны, видзалісны да ырзӧмӧн бӧрдісны.
Уналы чорыд дӧраыс да пӧимыс вӧлі вольпасьӧн.
Эсфирлӧн кесйӧг аньяс да евнукъяс локтісны да висьталісны сылы та йылысь. Эсфир ӧксы-ань шӧйӧвошис.
Сійӧ мӧдӧдіс Мардокейлы паськӧм, мед сійӧ вежас шогалан паськӧмсӧ, но Мардокей эз босьт.
Сэки Эсфир корис Хатакӧс, ӧксы евнукъясысь ӧтиӧс, кодӧс ӧксы пуктіс кесъявны Эсфирлы. Эсфир мӧдӧдіс сійӧс Мардокей дінӧ, мед тӧдмавны, мыйысь сійӧ татшӧмасӧ шогалӧ.
Хатак муніс ӧксы дзиръялы воча карса изэрд вылӧ Мардокей дінӧ.
Мардокей висьталіс Хатаклы ставсӧ, мый сыкӧд лои. Висьталіс, мыйта эзысь кӧсйысьӧма Аман сетны ӧксылӧн видзанінӧ иудейясӧс бырӧдӧмысь.
Сэсся сетіс Хатаклы иудейясӧс бырӧдӧм йылысь Суза карын йӧзӧдӧм тшӧктӧм. Тайӧ гижӧдсӧ тшӧктіс петкӧдлыны Эсфирлы да висьтавны сылы лоӧмтор йывсьыс.
Нӧшта шуис, мый Эсфирлы колӧ мунны ӧксы дінӧ да кевмыны-корны аслас войтыр вӧсна, медым ӧксы бурсьӧлӧмтчас на дінӧ. [Мардокей шуис Хатаклы: «Висьтав, мед Эсфир оз вунӧд, кытысь сійӧ петіс да код пӧвстын сійӧ оліс, кор ме быдті сійӧс. Аман, ӧксы бӧрся медыджыдыс, шуис бырӧдны миянӧс. Эсфир мед шыасяс Господь дінӧ да висьталас миян йылысь ӧксылы, корас сійӧс мездыны миянӧс кулӧмысь».]
Хатак муніс да висьталіс Мардокейлысь кывъяссӧ Эсфирлы.
Эсфир мӧдӧдіс Хатакӧс Мардокей дінӧ висьтавны:
«Ставныс, кодъяс кесъялӧны ӧксылы, да став войтырыс, кодъяс олӧны сылӧн муын, тӧдӧны, мый быдӧнӧс, айуловӧс и аньӧс, коді кортӧг пырас ӧксы дінӧ пытшкӧс йӧрас, виччысьӧ кулӧм.
Но ӧксы кӧ нюжӧдас пырысьлань зарни бедьсӧ, сійӧ ловйӧн коляс.
А менӧ ӧксы комын лун нин эз корлы ас дінас».
Мардокейлы висьталісны Эсфирлысь кывъяссӧ.
Мардокей тшӧктіс воча висьтавны Эсфирлы: «Эн мӧвпав, мый тэ иудейяс пӧвстысь ӧтнадӧн мездман, мед кӧ тэ ӧксы керкаын олан.
Тэ кӧ ӧні пондан чӧв овны, отсӧгыс да мездмӧмыс иудейяслы воас мӧдласянь. А тэнӧ да тэнад батьлысь рӧдсӧ бырӧдасны.
Гашкӧ, дзик тайӧ кадыс вӧсна тэ и лоин ӧксы гӧтырӧн».
Эсфир ыстіс воча кыв Мардокейлы:
«Мун да чукӧрт Суза карысь став иудейсӧ. Видзалӧй ме вӧсна. Энӧ сёйӧй да энӧ юӧй куим лун и куим вой чӧж. Аслам кесйӧг аньяскӧд ме тшӧтш кута видзавны. Та бӧрын ме муна ӧксы дінӧ, мед кӧ тайӧ лоӧ индӧд торкӧм. Ковмас кӧ кувны, кула».
Мардокей муніс да вӧчис Эсфирлӧн тшӧктӧм серти. 
[Мардокей кевмысис Господьлы Сылысь уджъяссӧ казьтылӧмӧн: «Господьӧй, Ставсӧвермысь Ӧксыӧй, ставыс Тэнад киын.
Тэ шуин мездыны Израильӧс, и некод оз вермы Тэныд паныд сувтны.
Тэ вӧчин енэжсӧ, мусӧ да став шензьӧданасӧ енэж улас.
Тэ быдӧн вылын Господь. Оз сюр сэтшӧм мортыс, коді эськӧ Тэныд паныд вермис сувтны, Господьӧй.
Тэ тӧдан ставсӧ.
Тэ тӧдан, Господьӧй, мыйла ме эг копыртчыв вылӧ кыпӧдчысь Аман водзӧ. Ме вӧчи тадзи, но эг аслам дӧзмӧм вӧсна, вылӧ кыпӧдчӧм да вывтіасьӧм вӧсна. Израильӧс мездӧм вӧсна ме дась окавны весиг сылысь коксӧ.
Но ме эг кӧсйы ошкыны мортӧс Енмӧс пыдди, та вӧсна эг и копыртчыв. Ме ог кӧсйы копрасьны некод водзын Тэысь кындзи, Господьӧй. Ме ӧд вӧча тадзи ог вылӧ кыпӧдчӧмӧй вӧсна.
А ӧні, Господьӧй Енмӧй, Ӧксыӧй, Ӧвраамлӧн Енмӧй, мезды шогысь Ассьыд войтыртӧ.
Миянӧс пыр кӧсйӧны вины, пыр кӧсйӧны бырӧдны Тэнсьыд водзысянь бӧрйӧм войтыртӧ.
Эн ӧтдорт Ассьыд войтыртӧ, кодъясӧс Тэ мездін Аслыд вылӧ да петкӧдін Египет муысь.
Кыв менсьым кевмӧмӧс да ло бур сьӧлӧма Аслад бӧрйӧм войтыр дінӧ. Бергӧд миянлысь шогнымӧс нимкодясьӧмӧ, медым ми олӧм чӧжным ошким Тэнсьыд нимтӧ, Господьӧй. Эн бырӧд Тэнӧ ошкысьясӧс, Господьӧй!»
Став Израиль войтыр горзӧмӧн кевмис, ӧд кулӧмыс вӧлі зэв матын.
Эсфир ӧксы-ань шогнас тырӧмӧн тшӧтш кевмысис Господьлы. Сійӧ пӧрччис ассьыс ӧксы-ань паськӧмсӧ да пасьталіс бӧрдан-шогалан паськӧм. Дона выйӧн мавтчӧм пыдди кояліс юрсӧ пӧимӧн да муӧн, эз жалит ассьыс вир-яйсӧ. Водзынсӧ нимкодьпырысь мичмӧдӧм вывтырсӧ ӧні вевттис лэдзалӧм юрсинас. Сійӧ кевмысис Господьлы, Израильлӧн Енлы: «Господьӧй, Тэ ӧти миян Ӧксыыс.
Отсав меным, ме дзик ӧтнамӧн, Тэ кындзи меным отсалысьыс абу.
Шогӧй мекӧд орччӧн.
Ме кывлі, Господьӧй, аслам батьсянь, аслам рӧдвужсянь, мый Тэ, Господьӧй, бӧрйин Аслыд Израиль войтырӧс мукӧд войтыръяс пӧвстысь, бӧрйин миянлысь батьясӧс пыр кежлӧ, вӧчин налы Аслад кӧсйӧм серти.
Но ми мыжмим Тэ водзын. Тэ сетін миянӧс вӧрӧг киӧ, ӧд ми юрбитім налӧн енъяслы. Тэ, Господьӧй, Веськыда Олысь!
Вӧрӧгъяс ёна нартитӧны миянӧс, но тайӧ налы этша на. Найӧ кӧрталісны йитӧд асланыс идол-енъяскӧд, медым Тэнад вомысь петӧм тшӧктӧмъястӧ вештыны, Тэнсьыд бӧрйӧм войтыртӧ бырӧдны, Тэнӧ ошкысьяслысь вомсӧ тупкыны, Тэнад крамлысь да висьпуктанінлысь нималӧмсӧ вуштыштны. Найӧ кӧсйӧны, медым войтыръяс ошкисны ылӧг енъясӧс да нэмъяс чӧж нимӧдісны ӧксыӧс, но сійӧ сӧмын морт.
Господьӧй, эн сет Ассьыд юралан бедьтӧ абутӧм енъяслы. Найӧ мед оз нимкодясьны миян усьӧмысь. Бергӧд на вылӧ сійӧ, мый найӧ кӧсйисны миянлы вӧчны. Янӧд сійӧс, кодсянь петіс миянлы паныд сувтӧмыс.
Эн вунӧд миянӧс, Господьӧй! Ло миянкӧд ыджыд шогным дырйи да сет меным повтӧмлун, енъяслӧн Ӧксы да юралысьяслӧн Юралысь!
Сет меным шуны бур кывъяс тайӧ лев водзас, тырт сылысь сьӧлӧмсӧ скӧрлунӧн миянӧс дзескӧдысь дінӧ, бырӧд дзескӧдысьӧс да сы дор сувтысьясӧс.
А миянӧс Тэ мезды Аслад киӧн. Отсав меным, ме дзик ӧтнамӧн. Господьӧй, Тэ кындзи меным отсалысьыс абу.
Тэ ставсӧ тӧдан. Тӧдан, мый ме мустӧмта, кор Индӧдтӧг олысьяс нимӧдӧны менӧ, зывӧкта вундыштчытӧмлысь вольпасьсӧ, мукӧд войтырысь мортлысь узянінсӧ.
Тэ тӧдан, мый ме зывӧкта ӧксы-аньлысь юркытшсӧ, мый колӧ йӧз водзӧ петігӧн пуктыны юр вылӧ, но меным быть лоӧ тайӧс вӧчны. Вир мунӧмӧн пежасьӧм паськӧмӧс моз ме зывӧкта сійӧс, та вӧсна ог новлы, кор кольла ас кежам.
Ме, Тэнад кесйӧг, эг видлы Аман пызан вылысь сёян-юансӧ, вылӧ эг пуктыв ӧксылысь гажӧдчӧмъяссӧ да эг юлы идоллы вись пыдди вайӧм вина. Сійӧ лунсяньыс, кор менам став олӧмӧй бергӧдчис мӧдарӧ, ме, Тэнад кесйӧг, нимкодяся сӧмын Тэӧн, Господьӧй, Ӧвраамлӧн Енмӧй.
Ставыс вылын вына Енмӧй, кыв коньӧръяслысь гӧлӧс шысӧ да мезды миянӧс лёк вӧчысьяслӧн киысь. Мезды менӧ аслам полӧмысь».]
Коймӧд луннас Эсфир [дугдіс кевмысьны, пӧрччис шогалан паськӧмсӧ да] пасьталіс ассьыс ӧксы паськӧмсӧ. [Эсфир лои шензьӧдана мича ӧксы-аньӧн. Ставсӧ аддзысь да мездысь Ен дінӧ шыасьӧмӧн сійӧ босьтіс аскӧдыс кык кесйӧг аньӧс, ӧти вылас сійӧ мыджсис, медым мунны ӧксы-ань восьласӧн, а мӧдыс бӧрсяньыс кутіс сылысь платтьӧ бӧжсӧ.
Эсфир дзоридзаліс аслас мичлунӧн. Чужӧм вылас тыдаліс сэтшӧм долыдлун, мый тыдавлӧ муслунӧн тырӧм мортлӧн. Но сьӧлӧмсӧ Эсфирлысь вӧлі топӧдӧма полӧм.] 
Эсфир локтіс ӧксылӧн пытшкӧс йӧрӧ да сувтіс ӧксы керкаӧ пыранін водзӧ.
Ӧксы сэки пукаліс ӧксы керкаын юралан пуклӧсын, пыран ӧдзӧслы воча. [Ӧксыалан паськӧма, зарниӧн да дона изъясӧн мичмӧдӧм ӧксы вӧлі повзьӧдана.] 
Кор ӧксы аддзис йӧрын сулалысь Эсфир ӧксы-аньӧс, сійӧ бурсьӧлӧмтчис Эсфир дінӧ. 
[Югъялан чужӧмсӧ бергӧдӧмӧн ӧксы зэв скӧра видзӧдліс.
Эсфир ӧксы-аньлӧн вежсис чужӧмыс, сійӧ садьсӧ воштіс да лёсмуніс-усис аслас кесйӧг ань вылӧ.
Сэки Енмыс небзьӧдіс ӧксылысь сьӧлӧмсӧ. Ӧксы дзик пыр чеччис аслас юралан пуклӧсысь да сывйыштіс Эсфирӧс. Сывъяс кутіс, кытчӧдз сійӧ эз во ас садяс.
Сэсся ӧксы бурӧдігмоз меліа шуаліс: «Эсфир, мый тэкӧд? 
Ме ӧд тэныд вок кодь.
Эн пов. Тэ он кув, ӧд тэ ӧксы-ань.
Матыстчы ме дінӧ».]
Ӧксы нюжӧдіс Эсфирлань зарни бедьсӧ, мый киас кутіс. Эсфир матыстчис да инмӧдчыліс бедь помас. [Ӧксы инмӧдліс бедьсӧ Эсфирлы сьыліас, окыштіс сійӧс да шуис: «Висьтав, мый тэкӧд?»
Эсфир шуис: «Ыджыдӧй, кор ме видзӧдлі тэ вылӧ, тэ вӧлін Ен андел кодь. Тэнад дзирдалӧмысь полӧмӧйла ме шӧйӧвоши. Ыджыдӧй, тэ шензьӧдана! Тэнад чужӧм вылын тыдалӧ ыджыд буралӧм».
Сёрнитігкостіыс Эсфир лигышмуніс да усис.
Ӧксы шӧйӧвошис. Ӧксылӧн кесъялысьяс ставныс пондісны отсавны Эсфирлы.]
Ӧксы юаліс: «Мый тэ кӧсъян, Эсфир ӧксы-аньӧй? Кутшӧм тэнад корӧмыд?
Весиг аслам мулысь джынсӧ сета тэныд».
Эсфир вочавидзис: «[Талун менам гажӧдчан лун.] 
Шогмана кӧ ӧксылы, талун мед локтас Аманкӧд гаж вылӧ. Тайӧ гажсӧ ме дасьті ӧксылы».
Ӧксы тшӧктіс дзик пыр вайӧдны Аманӧс, медым вӧчны Эсфирлӧн кӧсйӧм серти.
Сэсся ӧксы да Аман локтісны Эсфирлӧн гаж вылӧ.
Вина юӧм дырйи ӧксы юаліс Эсфирлысь: «Мый тэ кӧсъян? Ставсӧ вӧча.
Кутшӧм тэнад корӧмыд?
Весиг аслам мулысь джынсӧ сета тэныд».
Эсфир вочавидзис: «Менам корӧм-кӧсйӧмӧй татшӧм: ӧксы кӧ бур сьӧлӧма ме дінӧ да лыддьӧ шогманаӧн вӧчны менам корӧм-кӧсйӧм серти, мед [аски бара] локтас Аманкӧд гаж вылӧ, мый ме дасьта налы. Аски ме вочавидза ӧксылы».
Сійӧ лунӧ Аман петіс Эсфир дорысь долыда нимкодясьӧмӧн.
Но кор аддзис ӧксылы кесъялысь Мардокейӧс, коді эз сувт да эз тірав-пов сы водзын, тырис Мардокей дінӧ лӧглунӧн.
Но Аман кутчысис.
Кор локтіс гортас, корис ассьыс ёртъяссӧ да Зереш гӧтырсӧ.
Аман ошйысис налы аслас ыджыд озырлунӧн, ошйысис, мый сылӧн уна пи, и мый ӧксы ыдждӧдліс сійӧс да кыпӧдіс аслас юралысьясысь да веськӧдлысьясысь медвылӧ.
Сэсся Аман содтіс: «Эсфир ӧксы-ань некодӧс эз кор аслас гаж вылӧ, сӧмын ӧксыӧс да менӧ.
Аски бара корис локны ӧксыкӧд.
Но ӧксылы кесъялысь Мардокей нима иудейӧс аддзигӧн менам став долыдлунӧй вошӧ».
Сэки Зереш гӧтырыс да ёртъясыс шуисны Аманлы: «Тшӧкты сувтӧдны ветымын гырддза судта пу сюръя. Асывнас ӧксылы шу, мед тшӧктас ӧшӧдны сэтчӧ Мардокейӧс. Сэки нимкодь сьӧлӧмӧн верман мунны ӧксыкӧд гаж вылад».
Аманлы сьӧлӧм вылас воис татшӧм вӧзйӧмыс, и сійӧ тшӧктіс сувтӧдны пу сюръя.
Сійӧ войнас ӧксы эз вермы унмовсьны.* Ӧксы тшӧктіс [кесйӧгыслы] вайны каднебӧг.
Кор сійӧс лыддисны ӧксылы, аддзисны сэтысь пасйӧд: Мардокей, вӧлӧм, юӧртлӧма, мый Бигтан да Тереш евнукъяс, кодъяс видзисны ӧксылысь вежӧсъяс, кӧсйӧмаӧсь вины Артаксеркс ӧксыӧс.
Ӧксы юаліс: «Кутшӧм ногӧн донъялӧма-нимӧдӧма Мардокейӧс таысь?»
Ӧксы бердын кесъялысьяс вочавидзисны: «Кольӧма донъявтӧг».
[Кор ӧксы вӧлі юасьӧ Мардокейлӧн бур вӧчӧм йылысь, йӧрӧ пырис Аман.] Ӧксы юаліс: «Коді сэні йӧрас?»
Ӧксы керкалӧн ортсы йӧрӧ вӧлі локтӧма Аман сёрнитны ӧксыкӧд, медым ӧшӧдны Мардокейӧс пу сюръя вылӧ, мый Аман сувтӧдіс сылы.
Кесъялысьяс вочавидзисны ӧксылы: «Йӧрад Аман сулалӧ».
«Мед пырас», — шуис ӧксы.
Кор Аман пырис, ӧксы юаліс сылысь: «Висьтав, мый позьӧ вӧчны сійӧ мортыслы, кодӧс ӧксы кӧсйӧ донъявны?»
Аман ас кежас мӧвпыштіс: «Буракӧ, ӧксы кӧсйӧ менӧ донъявны? А кодӧс сэсся меысь кындзи?»
Сэсся вочавидзис ӧксылы: «Сійӧ мортыслы, кодӧс ӧксы кӧсйӧ донъявны, мед ваясны ӧксы паськӧм, мый ӧксы пасьтавліс, да ӧксы юркытшӧн мичмӧдӧм вӧв, код вылын ӧксы ветліс. Паськӧмсӧ да вӧвсӧ мед ваяс ӧксылӧн медыджыд юралысьясысь ӧти. Сійӧ мортсӧ, кодӧс ӧксы кӧсйӧ донъявны, мед пасьтӧдасны, пуксьӧдасны вӧв вылӧ да петкӧдасны карса изэрд вылӧ. Сы водзын мед гораа юӧртасны: 
“Тадзи вӧчӧны сылы, кодӧс ӧксы кӧсйӧ донъявны!”»
Ӧксы шуис Аманлы: «[Бур вӧзйӧм]. 
Дзик пыр босьт паськӧмсӧ да вӧвсӧ, кыдзи тэ ачыд вӧзйин, да ставсӧ вӧч аслад шуӧм серти Мардокей нима иудейлы, коді кесъялӧ меным».
Аман босьтіс ӧксы паськӧм да вӧв, пасьтӧдіс Мардокейӧс, петкӧдіс сійӧс вӧв вылын карса изэрд вылӧ да мунігмозыс сы водзын юӧртіс: «Тадзи вӧчӧны сылы, кодӧс ӧксы кӧсйӧ донъявны!»
Та бӧрын Мардокей бӧр локтіс ӧксы керкаӧ, а Аман шогсьӧмысла юрсӧ тупкӧмӧн тэрмасьӧмӧн муніс гортас.
Аман висьталіс Зереш гӧтырыслы да аслас ёртъяслы, мый сыкӧд лои.
Сылӧн сюсь мывкыда ёртъясыс да Зереш гӧтырыс шуисны сылы: «Иудейясысь кӧ тайӧ Мардокейыс, код вӧсна пондін усьны, тэ сійӧс он вермы, а ачыд дзикӧдз усян [ӧд сыкӧд ловъя Ен]».
Налӧн сёрнитігкості локтісны ӧксылӧн евнукъяс, мед тэрмасьӧмӧн вайӧдны Аманӧс Эсфирлӧн дасьтӧм гаж вылӧ.
Ӧксы да Аман локтісны Эсфир ӧксы-ань дінӧ гаж вылӧ.
Вина юӧм дырйи ӧксы воддза мозыс юаліс Эсфирлысь: «Мый тэ кӧсъян, Эсфир ӧксы-аньӧй? Ставсӧ вӧча.
Кутшӧм тэнад корӧмыд?
Весиг аслам мулысь джынсӧ сета тэныд».
Эсфир ӧксы-ань вочавидзис: «Тэ кӧ бур сьӧлӧма ме дінӧ, ӧксыӧй, да шогмана кӧ тэныд, видз менсьым да менам войтырлысь олӧмсӧ. Татшӧм менам корӧм-кӧсйӧмӧй.
Ӧд менӧ да менсьым войтырӧс вузалісны бырӧдӧм вылӧ, миянӧс кӧсйӧны вины да дзикӧдз бырӧдны.
Миянӧс кӧ вузалісны кесйӧг туйӧ, ме эськӧ чӧв олі да тэнӧ, ӧксыӧй, эг дӧзмӧд».
Артаксеркс ӧксы пондіс юасьны Эсфир ӧксы-аньӧс: «Коді кӧсйӧ татшӧмторсӧ вӧчны? Кӧні сійӧ?»
Эсфир вочавидзис: «Тайӧ дзескӧдысьыс да мустӧмтысьыс — лёк Аман».
Аман повзьӧмысла тіравны пондіс ӧксы да Эсфир водзын.
Ӧксы скӧрмис, чеччис да петіс гаж вылысь сад йӧрӧ.
Аман кольччис, медым корны Эсфир ӧксы-аньӧс видзны сылысь олӧмсӧ, ӧд гӧгӧрвоис, мый ӧксы бырӧдас сійӧс.
Кор ӧксы бӧр пырис сад йӧрысь гажӧдчанінӧ, аддзис, мый Аман вӧлі копыртчӧма Эсфирлӧн куйланін дорӧ.
Ӧксы шуис: «Тэ весиг менам керкаын кӧсъян мырдӧнавны ӧксы-аньӧс!»
Ӧксылӧн шуӧм бӧрын Аманлысь чужӧмсӧ дзик пыр вевттисны.
Харвон, ӧксылӧн евнукъясысь ӧти, шуис: «Аман керка дорын сулалӧ ветымын гырддза судта пу сюръя. Сійӧ сувтӧдліс сюръясӧ Мардокейлы, коді мездіс ӧксылысь олӧмсӧ».
Ӧксы воча шуис: «Ӧшӧдӧй сэтчӧ Аманӧс».
Аманӧс ӧшӧдісны пу сюръя вылӧ, мый сійӧ дасьтіс Мардокейлы.
Та бӧрын ӧксылӧн скӧрлуныс лӧнис.
Сійӧ жӧ лунӧ Артаксеркс ӧксы сетіс Эсфир ӧксы-аньлы Аманлысь, иудейясӧс мустӧмтысьлысь, овмӧссӧ.
Эсфир висьталіс ӧксылы, кодӧн лоӧ сылы Мардокей, и Мардокей пырис ӧксы дінӧ.
Ӧксы пӧрччис чунькытшсӧ, мый бӧр босьтіс Аманлысь, да сетіс сійӧс Мардокейлы.
А Эсфир пуктіс Мардокейӧс веськӧдлыны Аман овмӧсӧн.
Эсфир бара шыасис аслас могӧн ӧксы дінӧ. Сылы кок дорас уськӧдчӧмӧн Эсфир бӧрдӧмӧн корис, мед ӧксы видзас иудейясӧс лёксьыс, мый мӧвпыштӧма вӧлі вӧчны Агагсянь чужысь Аман.
Ӧксы нюжӧдіс зарни бедьсӧ Эсфирлань.
Эсфир чеччис да сувтіс ӧксы водзӧ. Сэсся шуис: «Ӧксылы кӧ шогмана, да сійӧ кӧ бур сьӧлӧма ме дінӧ, и тайӧ могсӧ кӧ ӧксы лыддьӧ веськыдӧн, да ме кӧ сылӧн синлы вая нимкодьлун, мед гижас тшӧктӧм, мый Агагсянь чужысь Аммедат Аманлӧн гижӧдыс да ӧксыув муясысь иудейясӧс бырӧдӧм йылысь шуӧмыс абу нин вына.
Кыдзи нӧ ме верма видзӧдны менсьым войтырӧс суӧм шог вылӧ? Верма ӧмӧй видзӧдны ассьым рӧдӧс бырӧдӧм вылӧ?»
Артаксеркс ӧксы шуис Эсфир ӧксы-аньлы да иудей Мардокейлы: «Аманлысь овмӧссӧ ме сеті нин Эсфирлы, и Аманӧс иудейяс вылӧ кисӧ лэптӧмысь ӧшӧдӧма нин пу сюръя вылӧ.
Ті асьныд гижӧй иудейяс йылысь тшӧктӧм, кутшӧм тіянлы колӧ. Гижӧй сійӧс ӧксы нимсянь да ӧксылӧн чунькытшнас пуктӧй вынсьӧдана пас. Ӧксы нимсянь гижӧм да ӧксы чунькытшӧн вынсьӧдӧм гижӧдсӧ некод вежны оз вермы».
Коймӧд сиван тӧлысьлӧн кызь коймӧд лунӧ чукӧртісны ӧксылысь гижалысьясӧс. Мардокейлысь тшӧктӧмсӧ гижисны иудейяслы, ыджыдалысьяслы, сатрапъяслы да ӧксыув муясын юралысьяслы Индиясянь Эфиопияӧдз, сё кызь сизим муӧ — быдлаӧ сэні олысьяслӧн шыпасъясӧн да быд войтырлӧн чужан кыв вылын. Иудейяслы тшӧтш гижисны налӧн шыпасъясӧн да налӧн кыв вылын.
Мардокей гижис Артаксеркс ӧксы нимсянь, вынсьӧдіс гижӧдсӧ ӧксылӧн чунькытшнас да ыстіс сійӧс верзьӧмаяскӧд ӧксылӧн медбур вӧвъяс вылын. Гижӧдас вӧлі юӧртӧма, мый быд карын олысь иудейяслы ӧксы лэдзӧ чукӧртчыны да дорйыны асьнысӧ, вины да бырӧдны на вылӧ уськӧдчысьясӧс быд муысь да быд войтыр пӧвстысь, весиг аньясӧс челядьныскӧд, а эмбурсӧ налысь мырддьыны. Тайӧс позис вӧчны Артаксеркслӧн быд ӧксыув муын ӧти и сійӧ жӧ лунӧ — дас кыкӧд адар тӧлысьлӧн дас коймӧд лунӧ. 
[Гижӧдас вӧлі пасйӧма: «Артаксеркс ыджыд ӧксы чолӧмалӧ Индиясянь Эфиопияӧдз сё кызь сизим му вылын ыджыдалысь сатрапъясӧс да миянлысь кывзысьысь войтырӧс.
Бурсӧ вӧчысьяслӧн мелілунысь да налӧн пыдди пуктӧмысь унаӧн юрнысӧ вылӧ лэптӧны. Найӧ зільӧны вӧчны лёксӧ оз сӧмын миян киподувса йӧзлы, но весиг асланыс бур вӧчысьяслы, ӧд налы нинӧм оз тырмы. Найӧ бурсӧ сибӧдны оз кужны, вунӧдӧны аттьӧавны да ошйысьӧны вывтіасьӧмнас. Найӧ чайтӧны, мый пышъясны лёксӧ мустӧмтысь да ставсӧ аддзысь Енлӧн мыждӧмысь.
Ыджыдалысьяс, кодъяс эскӧны асланыс ёртъясныслы да пуктӧны найӧс веськӧдлыны, асланыс ёртъяслӧн туйдӧдӧм вӧсна тшӧкыда лоӧны мыжаӧсь мыжтӧм йӧзлысь вирсӧ кисьтӧмысь да вежны позьтӧм лёк вӧчӧмысь. Тайӧ ёртъясыс наяна пӧръясьӧны, ылӧдлӧны ассьыныс ыджыдалысьяссӧ, кодъяс восьса сьӧлӧмаӧсь на дінӧ.
Татшӧмторсӧ позьӧ аддзыны оз сӧмын важдырся лоӧмторъясысь, но и талун ті аддзанныд шогмытӧм веськӧдлысьяслысь лёк вӧчӧмсӧ.
Та вӧсна водзӧвылӧ тӧждысям сы йылысь, мый миян юраланінын став йӧзыс вермасны овны повтӧг да лӧня. Огӧ лэдзӧй пыртны вежсьӧмъяс, но сюся видлалам миян водзӧ пуктӧм могъяс.
Шуны кӧ Аммедатлӧн Аман пи йылысь, коді Македонияысь, сійӧ мӧд вира, абу Персия войтырысь. Миян бур оласногысь сійӧ вӧлі ёна ылын, но ми быд войтырӧс моз сибӧдім сійӧс бур сьӧлӧмӧн. Ставныс сійӧс пыдди пуктісны, ыдждӧдлӧмӧн шуисны миян батьӧн. Сійӧ вӧлі ӧксы бӧрся медыджыд морт.
Но вылӧ кыпӧдчӧмнас сійӧ зілис вины миянӧс да пуксьыны миян пыдди ӧксыӧ. А миянӧс мездысь да дугдывтӧг бурсӧ вӧчысь Мардокейӧс, миянлысь сӧстӧм сьӧлӧма Эсфир ӧксы-аньӧс да налысь став войтырсӧ Аман быд ногыс миянӧс ылӧдлӧмӧн корис бырӧдны.
Тадзи сійӧ кӧсйис кольны миянӧс ӧткӧн да Персия мунымӧс сетны Македония войтырлы.
Но ми аддзам, мый иудейяс, кодъясӧс тайӧ лёк вӧчысьыс кӧсйис бырӧдны, абу лёк йӧз, найӧ олӧны медся веськыд тшӧктӧмъяс серти. Найӧ юрбитӧны медвылысса да медыджыд ловъя Енлы, коді веськӧдліс батьяснымӧн да ӧні веськӧдлӧ миянӧн, медым миян муын вӧлі лӧнь олӧм.
Та вӧсна ті бура вӧчанныд, онӧ кӧ збыльмӧдӧй Аммедат Аманлысь гижӧдсӧ.
Таысь сійӧс гортсаясыскӧд ӧшӧдӧма Енлӧн кӧсйӧм серти Суза кар дзиръя дорын. Енмыс, коді ставыс вылын ыджыдалӧ, нюжмасьтӧг мыждіс сійӧс колана ногӧн.
Тайӧ гижӧдсӧ ӧшлӧй быдлаӧ йӧзаинъясӧ. Лэдзӧй иудейяслы кутчысьны асланыс оласногӧ. Дас кыкӧд адар тӧлысьлӧн дас коймӧд лунӧ, кор на вылӧ уськӧдчасны, отсалӧй налы дорйысьны тайӧ сьӧкыд кадас.
Ӧд Енмыс, коді ыджыдалӧ ставыс вылын, аслас бӧрйӧм войтырлы кулӧм пыдди лӧсьӧдіс нимкодясьӧм.
Сідзкӧ, тайӧ тӧдчана лунӧ мукӧд гажӧдчан лунъясӧ моз ёна нимкодясьӧй, медым ӧні и водзӧ оз ло вунӧдӧма миянӧс мездӧм да Персия войтыр дінӧ бур сьӧлӧмаясӧс мездӧм йылысь, оз ло вунӧдӧма миянӧс бырӧдны лӧсьӧдчысьяслӧн кулӧм йылысь.
Быд кар да быд му, кӧні оз вӧчны тайӧ гижӧдыс серти, лоӧ жалиттӧг бырӧдӧма шыпуртӧн да биӧн. Сэні некод оз кут овны, весиг лэбачлы да пемӧслы зывӧк лоӧ сэтчӧ локны».]
Тайӧ гижӧдсӧ индӧдӧс моз колӧ вӧлі юӧртны ӧксыув муясын олысь войтыръяслы, медым индӧм лунӧ иудейяс вӧліны дасьӧсь водзӧс перйыны найӧс мустӧмтысьяслысь.
Ӧксылӧн тэрыб вӧвъяс вылын верзьӧмаяс дзик пыр тӧвзисны юӧртны ӧксылысь тшӧктӧмсӧ.
Юӧртісны тшӧтш Суза изкарын.
Кор Мардокей петіс ӧксы дінысь, сы вылын вӧлі ӧксылӧн еджыд да гӧрдовлӧз рӧма паськӧм, вӧсни шабдіысь пемыдгӧрд кышан, юр вылас ыджыд зарни юркытш.
Суза карын олысьяс гажӧдчисны да нимкодясисны.
Иудейяслӧн олӧмыс югдіс, локтіс долыдлун да пыдди пуктӧм.
Быд муын да быд карын — быдлаын, кӧні юӧртісны ӧксылысь тшӧктӧмсӧ, иудейяслӧн вӧлі нимкодьлун да долыдлун, найӧ сёйисны-юисны да гажӧдчисны.
Мукӧд войтыръясысь унаӧн лоисны иудейясӧн, ӧд полісны наысь.
Дас кыкӧд адар тӧлысьлӧн дас коймӧд лунӧ воис кад збыльмӧдны ӧксылысь тшӧктӧмсӧ. Иудейясӧс мустӧмтысьяс лача кутісны, мый дзик сійӧ лунӧ вермасны найӧс. Но артмис мӧдарӧ — иудейяс вермисны мустӧмтысьяснысӧ. Артаксеркслӧн ӧксыув муясын олысь иудейяс чукӧртчисны асланыс каръясын, медым уськӧдчыны на вылӧ, кодъяс кӧсйисны лёк вӧчны иудейяслы.
Некод эз сувт иудейяслы паныд, ӧд ставныс полісны наысь.
Мардокейысь полӧмнысла ӧксыув муясын юралысьяс, сатрапъяс, ыджыдалысьяс да ӧксылӧн чина йӧз сувтісны иудейяс дор.
Мардокей вӧлі ӧксы керкаын ыджыд мортӧн. Сійӧс нимӧдісны быд муын, ӧд сылӧн ыджыдалӧмыс ӧтарӧ вынсяліс.
Иудейяс пасьвартісны вӧрӧгнысӧ, виалісны-бырӧдісны найӧс шыпуртӧн да вӧчисны мустӧмтысьясныскӧд, мый кӧсйисны.
Суза изкарын иудейяс виисны витсё мортӧс.
Виисны тшӧтш Паршандатӧс, Далфонӧс, Асфатӧс, Поратӧс, Адальӧс, Аридатӧс, Пармаштӧс, Арисайӧс, Аридайӧс да Вайзатӧс. Тайӧ дас мортыс вӧліны Аммедат Аманлӧн, иудейясӧс мустӧмтысьлӧн, пиян. Найӧс виисны, но налысь овмӧс-эмбурсӧ эз босьтны.
Сійӧ жӧ лунӧ ӧксылы юӧртісны Суза юркарын виӧмаяслысь лыдсӧ.
Ӧксы висьталіс Эсфир ӧксы-аньлы: «Суза изкарын иудейяс виисны витсё мортӧс, тшӧтш Аманлысь даснан писӧ.
А мукӧд ӧксыув муясын мый на вӧчисны!
Висьтав, мый тэ кӧсъян? Ставсӧ сета тэныд.
Кутшӧм корӧм тэнад? Ставсӧ вӧча».
Эсфир вочавидзис: «Ӧксылы кӧ шогмана, мед лэдзас Суза карын олысь иудейяслы аски тшӧтш талунъя моз вӧчны. И Аманлысь даснан писӧ мед ӧшӧдасны пу сюръя вылӧ».
Ӧксы тшӧктіс вӧчны тайӧс.
Суза карын юӧртісны ӧксылысь тшӧктӧмсӧ, а Аманлысь даснан писӧ ӧшӧдісны пу сюръя вылӧ.
Адар тӧлысьлӧн дас нёльӧд лунӧ Суза карын олысь иудейяс бара чукӧртчисны да виисны куимсё мортӧс, но налысь овмӧс-эмбурсӧ эз босьтны.
Мукӧд ӧксыув муясын олысь иудейяс тшӧтш чукӧртчисны, мед дорйыны асьнысӧ да мынтӧдчыны вӧрӧгысь. Иудейяс виисны найӧс мустӧмтысьяс лыдысь сизимдас вит сюрс мортӧс, но налысь овмӧс-эмбурсӧ эз босьтны.
Тайӧ вӧлі адар тӧлысьлӧн дас коймӧд лунӧ.
Дас нёльӧд луннас найӧ шойччисны — гажӧдчисны да нимкодясисны.
А Суза карын олысь иудейяс чукӧртчылісны дорйыны асьнысӧ дас коймӧд и дас нёльӧд лунъясӧ, а дас витӧд луннас найӧ шойччисны — гажӧдчисны да нимкодясисны.
Та вӧсна ылысса кар-сиктъясын олысь иудейяс пасйӧны тайӧ лунсӧ адар тӧлысьлӧн дас нёльӧд лунӧ. Сэки найӧ нимкодясьӧны, гажӧдчӧны да ысталӧны матыссаясыслы чӧскыдторъяс. 
[Ыджыд каръясын нимкодясьӧны да гажӧдчӧны адар тӧлысьлӧн дас витӧд лунӧ, и сэки найӧ ысталӧны матыссаясыслы козинъяс.]
Мардокей гижис тайӧ лоӧмторъяс йылысь да ысталіс гижӧдсӧ Артаксеркс ӧксыув муясӧ матын и ылын олысь иудейяслы. Сійӧ тшӧктіс налы быд во адар тӧлысьӧ пасйыны дас нёльӧд да дас витӧд лунъяс. Ӧд тайӧ лунъясӧ иудейяс мынтӧдчисны вӧрӧгысь, тайӧ тӧлысяс шогыс бергӧдчис налы нимкодясьӧмӧ, бӧрдӧмыс — гажӧдчӧмӧ. Мед тайӧ лунъясӧ найӧ гажӧдчасны да нимкодясясны, мед ысталасны матыссаясыслы чӧскыдторъяс да гӧльяслы козинъяс.
Иудейяс водзӧ пондісны вӧчны сійӧ, мый заводитісны нин, и мый йылысь Мардокей гижліс налы. Агагсянь чужысь Аммедатлӧн Аман пиыс, иудейясӧс мустӧмтысь, кӧсйис дзикӧдз бырӧдны найӧс. Аман пудъясис найӧс пасьвартан да бырӧдан лун вӧсна. Но кор Эсфир локтіс ӧксы водзӧ, ӧксы тшӧктіс гижны выль гижӧд, медым лёкыс, мый Аман кӧсйис вӧчны иудейяслы, сылы аслыс бергӧдчас, и медым сійӧс пияныскӧд ӧшӧдасны пу сюръя вылӧ.
Та вӧсна тайӧ лунъясыслы сетӧма “пурим” ним, артмӧма “пур” кывйысь [еврей “пур” кывйыслӧн вежӧртасыс “пудъясянтор”]. 
Гижӧд вылӧ, аддзылӧмторъяс да лоӧмторъяс вылӧ подуласьӧмӧн иудейяс тшӧктісны, мый быд во индӧм кадӧ налы, налӧн ныв-пилы да накӧд ӧтувтчысь йӧзлы гижӧд серти колӧ пасйыны тайӧ кык лунсӧ.
Чужысьяссянь чужысьясӧдз быд рӧдын мед тӧд выланыс кутӧмӧн пасъясны тайӧ лунъяссӧ быд муын да быд карын.
Иудейяс мед оз вежны пурим лунъяссӧ, а насянь чужысьяс мед оз вунӧдны тайӧ гажсӧ.
Эсфир ӧксы-ань, Абихайллӧн нылыс, гижис иудей Мардокейкӧд мӧд гижӧд да аслас нимӧн вынсьӧдіс ставсӧ, мый вӧлі гижӧма пурим йылысь.
Лӧньлун вайысь гижӧдсӧ ысталісны иудейяслы Артаксеркслӧн сё кызь сизим ӧксыув муӧ, медым вынсьӧдны пурим лунъяс пасйӧмсӧ иудей Мардокейлӧн да Эсфир ӧксы-аньлӧн урчитӧм кадӧ. Иудейяс асьныс кӧсйысисны да водзӧ чужысьяслы колисны тшӧктӧм — пасйыны тайӧ лунъяссӧ видзалӧмӧн да бӧрдӧмӧн.
Тадзи Эсфирлӧн тшӧктӧмыс вынсьӧдіс пурим пасйӧмсӧ, и тайӧ тшӧктӧмсӧ вӧлі гижӧма небӧгӧ.
Быд муын да діяс вылын олысьяслы Артаксеркс ӧксы индіс мынтыны вот.
Ӧксылӧн ыджыд да вына уджъяс йылысь да сы йылысь, кыдзи сійӧ вылӧ кыпӧдіс Мардокейӧс, гижӧма мидияса да персияса ӧксыяслӧн каднебӧгӧ. Иудей Мардокей вӧлі Артаксеркс ӧксы бӧрся медыджыд морт. Иудейяс пӧвстын Мардокей вӧлі пыдди пуктана да радейтана, ӧд сійӧ кӧсйис сӧмын бурсӧ аслас войтырлы да тӧждысис на вӧсна. 
[Мардокейлӧн висьталӧм: «Ставыс тайӧ вӧлі Енсянь. Тайӧ лоӧмторъяс йылысь вӧтӧй ставнас иніс, и ме ог вунӧд сійӧс.
Ичӧт ва петанін лои юӧн. Вӧлі югыд, вӧлі шонді да уна ва. Юыс вӧлі Эсфир, кодӧс ӧксы босьтіс гӧтырӧ да пуктіс ӧксы-аньӧ.
Кык гундырыс — тайӧ ме да Аман.
Войтыръяс чукӧртчисны бырӧдны иудейясӧс, но менам Израиль войтырӧй шыасис Ен дінӧ да мездмис.
Господь мездіс Ассьыс войтырсӧ, видзис миянӧс став лёксьыс. Енмыс петкӧдліс индысьпасъяс да вӧчис ыджыд шензьӧданаторъяс — татшӧмыс некор эз вӧвлы мукӧд войтыръяс пӧвстын.
Енмыс лӧсьӧдіс Аслас войтырлы ӧтитор, мукӧд войтыръяслы — мӧдтор, тадзи Аманлысь пудъясьӧмсӧ бергӧдіс мӧдарӧ. Воис кад инны пудъясьӧмыслы, воис лун мыждыны Енлы войтыръясӧс.
Енмыс эз вунӧд Ассьыс войтырсӧ, веськыда вӧчис Аслас бӧрйӧм войтырлы.
Та вӧсна быд во нэмъяс чӧж адар тӧлысь дас нёльӧд да дас витӧд лунъясӧ Енлӧн Израиль войтыр мед чукӧртчас Ен водзӧ да гажӧдчас нимкодясьӧмӧн».
Птоломейлӧн да Клеопатралӧн нёльӧд ӧксыалан воӧ Досифей да сылӧн Птоломей пиыс вайӧмаӧсь пурим йылысь тайӧ гижӧдсӧ Александрия карӧ. Шуӧны, мый Досифейыс вӧлӧма попӧн да левитӧн. Гижӧдсӧ вуджӧдіс Птоломейлӧн Лисимах пиыс, коді оліс Ерусалимын.]
{Еврей йӧз (комиӧдіс Kodko) @ Иов @ религ. гижӧд @ Библия @ 2021 @ Лб. .}
ИОВ
Уц муын оліс Иов нима морт.
Сійӧ вӧлі сӧстӧм сьӧлӧма веськыд морт, поліс Енсьыс да ӧтдортчис лёксьыс.
Сылӧн вӧлі сизим пи да куим ныв.
Овмӧсыс вӧлі зэв ыджыд: сизим сюрс ыж-кӧза, куим сюрс верблюд, сюрс доддялан ӧш, витсё энь осёл да зэв уна кесйӧг.
Асыввыв муын Иов вӧлі медся нималана мортӧн.
Иовлӧн пияныс тшӧкыда чукӧртчывлісны ӧта-мӧд ордас. Быдӧн ас кадӧ аслас керкаын лӧсьӧдліс гаж, корліс сёйны-юны тшӧтш куимнан чойсӧ.
Кор став сизимнан пи ордас вӧлі пасйӧма гажсӧ, Иов корліс пиянсӧ ас ордас, медым вежӧдны-сӧстӧммӧдны найӧс. Сійӧ чеччыліс водз асывнас да быдӧн вӧсна торйӧн вайліс сотан вись. [Нӧшта ӧти ӧшкӧс вайліс ставныслӧн мыж вӧсна.] 
Иов мӧвпаліс, гашкӧ пӧ, пиянӧй гажӧдчиганыс мыжмисны да сьӧлӧманыс сералісны Енсӧ.
Иов быд пӧрйӧ тадзи вӧчліс.
Ӧтчыд Енлӧн пиян* локтісны да сувтісны Господь водзӧ.
Накӧд локтіс тшӧтш сӧтана.
Господь юаліс сӧтаналысь: «Кытысь тэ локтін?»
Сӧтана вочавидзис: «Ме ветлӧдлі му вывті да кытшовті сійӧс».
«Казялін-ӧ Менсьым Иов кесйӧгӧс? — юаліс Господь. — Му вылас ӧд сы кодь мӧдыс абу. Сійӧ сӧстӧм сьӧлӧма веськыд морт, полӧ Енсьыс да ӧтдортчӧ лёксьыс».
Сӧтана воча шуис Господьлы: «Оз весьшӧрӧ сійӧ пов Енсьыс.
Тэ ӧд быд боксянь кытшалӧмыд сійӧс, сылысь гортсасӧ да став овмӧссӧ.
Тэ бурсиан сылысь быд удж, сылӧн ыж-мӧскыс рӧдмӧ-содӧ.
Но Тэ кӧ нюжӧдан китӧ да босьтан ставсӧ, мый сылӧн эм, сійӧ омӧльтас Тэнӧ».
Господь шуис сӧтаналы: «Ставыс, мый сылӧн ӧні эм, лоӧ тэнад киын, сӧмын сійӧс асьсӧ эн вӧрӧд».
Та бӧрын сӧтана вешйис Господь водзысь.
Сійӧ лунӧ, кор Иовлӧн ныв-пиыс вӧлі сёйӧны-юӧны ыджыд вокныс ордын, локтіс Иов дінӧ юӧртысь да висьталіс:
«Сава войтыр уськӧдчис миян вылӧ. Найӧ босьтісны гӧрысь ӧшъястӧ да орччӧн йирсьысь энь осёлъястӧ, а кесйӧгъястӧ виалісны шыпуртӧн.
Сӧмын ме ловйӧн коли, медым юӧртны тэныд».
Сылӧн сёрнитігӧн локтіс мӧд юӧртысь да шуис: «Енлӧн би лэччис енэжсянь, сотіс ыж-кӧзатӧ да кесйӧгъястӧ.
Сӧмын ме ловйӧн коли, медым юӧртны тэныд».
Сылӧн сёрнитігӧн локтіс коймӧд юӧртысь да шуис: «Калдея муысь локтісны йӧз куим чукӧрӧн, найӧ уськӧдчисны да босьтісны тэнсьыд верблюдъястӧ, а кесйӧгъястӧ виалісны шыпуртӧн.
Сӧмын ме ловйӧн коли, медым юӧртны тэныд».
Сылӧн сёрнитігӧн локтіс нӧшта ӧти юӧртысь да шуис: «Кор тэнад ныв-пиыд вӧлі сёйӧны-юӧны ыджыд вокныс ордын, овтӧминысь петіс ыджыд тӧвныр да керкасӧ нёльнан пельӧсӧдыс лэптыштӧмӧн уськӧдіс челядь вылад. Найӧ ставныс кулісны.
Сӧмын ме ловйӧн коли, медым юӧртны тэныд».
Иов чеччис да косяліс вылыс паськӧмсӧ, юрсисӧ шырис да кымынь уськӧдчис муас. Иов шуис: 
— Пасьтӧг ме петі мам кынӧмысь, пасьтӧг и бӧр муна.
Господь сетіс, Господь и бӧр босьтіс. 
[Ӧд тадзи вӧлі шогмана Господьлы.] 
Мед лоӧ ошкӧма Господьлысь нимсӧ!
Став тайӧ лоӧмторйыс дырйи Иов эз мыжмы и эз мыжав Енсӧ.
Енлӧн пиян бара локтісны да сувтісны Господь водзӧ.
Накӧд тшӧтш локтіс сӧтана да сувтіс Господь водзӧ.
Господь юаліс сӧтаналысь: «Кытысь тэ локтін?»
Сӧтана вочавидзис: «Ме ветлӧдлі му вывті да кытшовті сійӧс».
«Казялін-ӧ Менсьым Иов кесйӧгӧс? — юаліс Господь.
— Му вылас ӧд сы кодь мӧдыс абу. Сійӧ сӧстӧм сьӧлӧма веськыд морт, полӧ Енсьыс да ӧтдортчӧ лёксьыс.
Тэ ыззьӧдін Менӧ, медым Ме нинӧм абусьыс бырӧді сійӧс, но сійӧ важ мозыс зумыда кутчысьӧ сӧстӧмлунас».
Сӧтана воча шуис Господьлы: «Аслас вир-яй вӧсна мортыд сетас ставсӧ, мый сылӧн эм.
Сӧмын нюжӧд китӧ да инмӧдчыв сылӧн лыӧ да вир-яйӧ, сэки сійӧ омӧльтас Тэнӧ».
Господь шуис сӧтаналы: «Сета сійӧс тэнад киӧ, сӧмын олӧмсӧ сылысь эн босьт».
Сӧтана муніс Господь водзысь да чорыда дойдіс Иовӧс висьӧмӧн. Сылӧн юр пыдӧссяньыс кок чунь йылӧдзыс петалісны орзьӧм мыльяс.
Иов босьтіс гырничтор, медым гирскыны асьсӧ, да пуксис [кар сайӧ] пӧим пытшкӧ.
Гӧтырыс шуис сылы: «Тэ век на кутчысян аслад сӧстӧмлунӧ?
Омӧльт Енсӧ и кув».
Иов вочавидзис: «Вежӧртӧм ань моз тэ сёрнитан. Сӧмын бурсӧ ӧмӧй сибӧдам Енсяньыс, а лёксӧ огӧ?»
Та дырйи Иов эз мыжмы аслас кывъясӧн.
Иовлӧн куим ёрт — Теманысь Элифаз, Шуахысь Вилдад да Наамаысь Софар — кывлісны сылӧн ыджыд шог йылысь. Найӧ мӧдӧдчисны быдӧн аслас оланінысь, медым паныдасьны да ӧтлаын мунны Иов дінӧ, юкны сыкӧд шогсӧ да бурӧдны сійӧс.
Найӧ ылісянь на аддзисны Иовӧс, но эз тӧдны сійӧс.
Сэки найӧ пондісны ырзӧмӧн бӧрдны, косялісны паськӧмнысӧ да юр весьтаныс коялісны му енэжланьыс.
Сизим лун да сизим вой найӧ пукалісны Иовкӧд му вылын.
Найӧ кыв эз шуны Иовлы, ӧд аддзисны, кутшӧм ёна сійӧ сьӧкыдалӧ.
abu
Сэсся Иов ёрис ассьыс чужан лунсӧ.
Сійӧ шуис:
— Мед бырас сійӧ луныс, кор ме чужи, мед бырас сійӧ войыс, кор пиӧн сьӧктаммис ань.
Сійӧ луныс мед лоӧ сап пемыдӧн, Енмыс мед оз казьтышт сы йылысь енэжас, асъя югыдыс мед оз мыччысь сылы.
Мед шымыртас сійӧс пемыдыс, лэччас сы вылӧ сап пемыдыс, мед вевттяс сійӧс сьӧд кымӧрыс, мед повзьӧдас сійӧс шонділӧн кусӧмыс.
Сійӧ войсӧ мед ньылыштас пемыдыс, сійӧ лунсӧ мед лоӧ вуштӧма воыслӧн лунъяс лыдысь, ни ӧти тӧлысьӧ мед оз ло пыртӧма.
Сійӧ войыс мед оз сет сьӧктаммыны, мед оз тӧд нимкодясьӧмсӧ.
Мед ёрасны сійӧс нимкыв* лыддьысьяс, кодъяс вермӧны садьмӧдны весиг левиафанӧс.*
Асъя кодзувъяс мед кусасны югдытӧдзыс на, сійӧ войыс мед весьшӧрӧ виччысяс югдӧмсӧ, мед оз аддзыв кыа петӧмсӧ, ӧд мамлысь чужтан ӧдзӧссӧ эз тупкы, менам синмысь шогсӧ эз дзеб.
Мыйла ме эг чуж шойӧн, мыйла эг кув мам кынӧмысь петігӧн?
Мыйла аслас пиӧн шуис менӧ батьӧй, мыйла морӧснас нёньӧдіс менӧ мамӧй?
Ме эськӧ ӧні лӧня куйлі, шойччи-узи ӧксыяскӧд да налӧн туйдӧдысьяскӧд, кодъяслӧн керкаясыс ӧні киссьӧмаӧсь, юралысьяскӧд, кодъяслӧн вӧлі зарни, кодъяс тыртісны керканысӧ эзысьӧн.
Менӧ эськӧ гуалісны чӧвтчӧм кагаӧс моз, пузчужӧмаӧс моз, коді югыдсӧ эз аддзыв.
Сэні лёк вӧчысьяс дугдӧны повзьӧдлыны, вынсьыс усьӧмаяс шойччӧны, дзескыдінӧ йӧртлӧмаяс повтӧг олӧны, найӧ оз нин кывны уджӧдысьлысь горзӧмсӧ.
Ичӧт и ыджыд сэні ӧткодьӧсь, кесйӧг абу нин ыджыдыслӧн кипод улын.
Сьӧкыдалысьлы мыйла сетӧма югыдсӧ, ловнас усьӧмалы — олӧмсӧ? Найӧ виччысьӧны кулӧмсӧ, а сійӧ оз лок, корсьӧны сійӧс дзебӧм озырлунӧс моз. Кор воӧ кад водны гортйӧ, найӧ тырӧны ыджыд нимкодьлунӧн.
Мыйла югыдсӧ сетӧма сылы, кодлысь туйсӧ Енмыс потшӧсалӧма, коді мунан туйсӧ оз аддзы.
Менам ойзӧмӧй лои быдлунъя няньӧн, менам бӧрдӧмӧй — визувтысь ваӧн.  Мыйысь ме полі, сійӧ и лоис, мыйысь ме тіралі, сійӧ и суис менӧ.
Лӧньлуныс да шойччӧгыс менам абу, ӧтторъя шог воӧ.
Теманса Элифаз воча шуис:
— Ме кӧ мыйкӧ шуа тэныд, гашкӧ, тайӧ дойдас тэнӧ.
Но коді вермас чӧв овны?
Тэ ачыд унаӧс велӧдлін, вынтӧмлысь кисӧ ёнмӧдлін, тэнад кывйыд усьӧмаӧс кыпӧдліс, лигышмунӧмаӧс тэ вынсьӧдлін.
А ӧні тэнӧ суис сьӧкыдыс, и тэ нюкыртчин, шогыс инмӧдчис тэӧ, и тэ ловнад усин.
Енмысь полӧмыд — тэнад зумыд подулыд, сӧстӧм олӧмыд сетӧ тэныд лача.
Висьтав, вӧлі-ӧ виӧма мыжтӧмӧс, вӧлі-ӧ бырӧдӧма веськыда олысьӧс.
Ме аддзылі, мый лёксӧ гӧрысьяс да шогсӧ кӧдзысьяс асьныс вундӧны лёксӧ да шогсӧ.
Енлӧн лолыштӧмысь найӧ кулӧны, Сылӧн скӧрлуна пӧльыштӧмысь бырӧны.
Левлӧн равзӧмыс да эргӧмыс ланьтӧ, том левъяслӧн пиньыс чегъясьӧ.
Кыйдӧстӧг лев кулӧ, левпиян пышйӧны-разалӧны.
Гусьӧникӧн локтіс меным кыв, сылӧн вашкӧдӧмыс воис менам пельӧдз.
Кывйыс локтіс, кор ме мӧвпалі войся аддзылӧм йылысь йӧзыслӧн чорыда узигӧн. Сэки менӧ полӧм-дзӧрӧм босьтіс, став менам лыясӧй тіралісны.
Тӧв пӧльыштіс чужӧмам, и менам ловгӧнӧй сувтіс.
Ме водзын кодкӧ сулаліс, но ме сійӧс эг тӧд, меным тыдаліс сӧмын мыгӧрыс.
Гӧгӧр лӧнис, и ме кылі гӧлӧс шы:
— Морт ӧмӧй вермас лоны Енмысь веськыдджыкӧн, аслас Вӧчысьысь сӧстӧмджыкӧн?
Енмыс весиг Аслас кесйӧгъяслы оз эскы, Аслас анделъяслысь Сійӧ аддзӧ тырмытӧмторъяс.
Нӧшта этшаджыка на Сійӧ эскӧ муысь вӧчӧм мортлы, сёйысь вӧчӧм чомйын олысьлы, кодӧс позьӧ бырӧдны возйӧс моз.
Асывнас на мортыс вӧлі, а рытнас абу нин, он и казявлы сылысь бырӧмсӧ.
Мывкыдлун шедӧдтӧг сійӧ кулӧ, сылысь олӧмсӧ лоӧ босьтӧма.
Тэнад корӧм вылӧ коді вочавидзас, енэжвывсаяс пӧвстысь код дінӧ тэ шыасян?
Мывкыдтӧмӧс виӧ сылӧн скӧрлуныс, вежӧртӧмӧс — дӧзмӧмыс.
Ме аддзылі, мый мывкыдтӧм вужъясис, но сылӧн керка вылӧ виччысьтӧг усис ёрӧм.
Сылӧн ныв-пиыс олӧны полӧмӧн, найӧс мыждӧны карса дзиръя дорын, и дорйысьыс налы абу.
Сылысь видз-му быдтассӧ сёясны тшыгъялысьяс, чукӧртасны сійӧс весиг лежнӧг пӧвстысь, сылысь овмӧссӧ куштасны горш йӧз.
Сьӧкыдлуныс оз пет му пытшкысь, шогыс оз быдмы му вылын.
Кыдзи бикиньлы шуӧма кайны вывлань, тадзи мортлы шуӧма чужны, мед шогсьыны.
Тэ местаын ме эськӧ корси Енмӧс, шыаси Сы дінӧ, кодлӧн ыджыд уджъясыс шымыртны вермытӧмӧсь, кодлӧн шензьӧданаторъяслы лыдыс абу. Муыслы Сійӧ сетӧ зэр, видз-муяс юкталӧ ваӧн, увтыртӧмаӧс кыпӧдӧ, шогас вӧйӧмаӧс мездӧ.
Наян йӧзлысь мӧвпъяссӧ Сійӧ дзугӧ, налӧн уджъясыс оз артмыны, сюсьӧ пуксьысьясӧс Сійӧ тывйыштӧ асланыс наянлунӧ, ылӧдчысьяслӧн туйдӧдӧмыс бырӧ.
Лунъюгыднас найӧс вевттьӧ пемыдыс, луншӧрнас найӧ ветлӧны войын моз кималасӧн.
Коньӧрӧс Сійӧ мездӧ налӧн шыпуртысь, лёкӧдӧмысь да вына киысь.
Коньӧрлӧн эм лача, и лёкыс тупкӧ ассьыс вомсӧ.
Майбыр сійӧ, кодӧс вежӧрсьӧдӧ Ен, Ставсӧвермысьлысь чирыштӧмсӧ эн ӧтдорт. Ӧд Сійӧ дойдӧ, Сійӧ и кӧрталӧ дойтӧ, Сійӧ вачкӧ, Сылӧн киыс и бурдӧдӧ.
Квайт шогысь Сійӧ мездас тэнӧ, сизимӧдыс оз инмӧдчыв тэ дінӧ.
Тшыгъялігад мездас тэнӧ кулӧмысь, тышын — шыпуртысь.
Тэнӧ лоӧ сайӧдӧма лёкӧдӧмысь, локтана бырӧдӧмысь он повзьы, бырӧдӧм да тшыглун вылын пондан серавны, зверъясысь он кут тіравны. Весиг изъяс тэ дор лоасны, зверъяс кутасны овны тэкӧд лӧня.
Тэ тӧдмалан, мый верман повтӧг овны, керка-овмӧстӧ кытшовтан, а сэні нинӧм абу вошӧма.
Тэ аддзан, мый тэсянь чужысьыс вывті уна, налӧн лыдыс — видзвыв турун мында.
Кыдзи воӧм нянь ас кадӧ кӧртавлӧны кольтаясӧ, тадзи пӧрысь кадӧ тэ водан гортйӧ.
Ставсӧ тайӧс ми тӧдмалім-туялім, ставыс тадзи и эм. Кывзы тайӧс да велӧдчы.
Иов воча шуис:
— Веситны кӧ менсьым шогӧс, пуктыны кӧ вески вылӧ сьӧкыдалӧмӧс, сійӧ эськӧ саридздор лыаысь на сьӧкыдджык лои.
Та вӧсна менам сёрниӧй йӧй мортлӧн кодь.
Ставсӧвермысьлӧн ньӧвъясыс сатшисны меным, менам лолӧй пагалӧ налӧн ядысь, Енмыс мӧдӧдіс меным повзьӧданторъяс.
Осёл ӧмӧй горзӧ йирсигас, ӧш ӧмӧй баксӧ турун сёйигас?
Дуб сёянтӧ ӧмӧй сёйлӧны совтӧг, чипан кольклӧн еджыдас ӧмӧй эм кӧр?
Мый дінӧ весиг инмӧдчывны эг кӧсйы, сійӧ лои меным зывӧк сёянӧн.
Кор бара-й инас менам кӧсйӧмӧй, кор бара-й Енмыс збыльмӧдас менсьым корӧмӧс?
Енмыс кӧ эськӧ виис менӧ, кисӧ нюжӧдіс да олӧмӧс орӧдіс!
Тайӧ эськӧ вӧлі меным бурӧдӧмӧн, верми эськӧ нимкодясьны дойяс дырйи, ӧд ме эг ӧтдорт вежа Енлысь шуӧмсӧ.
Кытысь меным вынсӧ босьтны, медым овны лачаӧн, кутшӧм пом виччысьӧ менӧ, медым водзӧ овны?
Менам вынӧй ӧмӧй излӧн выныс кодь, менам вир-яйӧй ӧмӧй ыргӧнысь?
Ме ог вермы отсавны аслым, менам нинӧм оз артмы.
Мортыс кӧ полӧ Ставсӧвермысь Енмысь, сійӧ оз эновт сьӧкыдалысь ёртсӧ.
Но менам ёртъяслы оз позь эскыны, найӧ визув ю кодьӧсь, котӧртысь шор кодьӧсь. Йи кылалігӧн найӧ гудырмылӧны, лым сылігӧн — ойдӧны.
Кор шондӧдӧ, найӧ ямӧны, ёна пӧжигӧн — дзикӧдз косьмӧны.
Найӧ вежлалӧны ассьыныс визувтан туйвизьсӧ, кежӧны овтӧминӧ да бырӧны.
Темаса караванъяс корсьӧны шоръяс, саваса ветлысь-мунысьяс лача кутӧны ва вылӧ. Но налӧн лачаыс весьшӧрӧ, найӧ воӧны косьмӧм шор дорӧ да шогӧ усьӧны.
Ӧні ті татшӧм шорыс кодьӧсь — аддзинныд менсьым сьӧкыдалӧмӧс да повзинныд.
Ме ӧмӧй шулі тіянлы: «Вайӧй меным», корлі ӧмӧй мынтысьны ме вӧсна?
Корлі ӧмӧй мездыны менӧ дзескӧдысьясысь, ньӧбны менӧ лёк вӧчысьлӧн киысь?
Вежӧрсьӧдӧй менӧ, и ме чӧв ланьта, висьталӧй, мыйын ме мыжа.
Веськыд кывъясыд вынаӧсь, но тіян мыжалӧмыд оз туйдӧд.
Ті лӧсьӧдланныд, медым мыжавны, а сьӧкыдалысьлӧн кывъясыс тіянлы тӧвру кодьӧсь.
Ті усьласянныд батьтӧм-мамтӧм вылӧ, асланыд ёртлы гу кодъянныд.
Бергӧдчӧй мелань, ме ог ылӧдчы.
Мӧвпыштӧй да лёксӧ энӧ вӧчӧй, тӧдӧй — ме абу мыжа!
Менам кывйӧй оз ылӧдчы, менам вомысь оз петны бырӧдан кывъяс.
Мортлӧн олӧмыс му вылын — сьӧкыда уджалӧм, сылӧн олан лунъясыс — медалӧм мортлӧн кодьӧсь.
Кесйӧг моз сійӧ корсьӧ пуксьывны гож сайӧ, медалӧм морт моз виччысьӧ удждон. Меным вичмисны ковтӧм тӧлысьяс, индӧма сьӧкыд войяс.
Водігӧн ме виччыся нин чеччӧмсӧ, но войыс сэтшӧм кузь, югдытӧдзыс ме ӧтарӧ бергала.
Яйӧй лӧмӧсь-номырӧсь, няйтӧн вевттьысьӧма, кучикӧй потласьӧ-орзьӧ.
Лунъясӧй котӧртӧны кысян сусаысь* ӧдйӧ, найӧ помасьӧны лачатӧг.
Енмӧй, эн вунӧд, мый менам олӧмӧй тӧвру кодь, менам синмӧй бурсӧ оз нин аддзыв.
Тэ он нин аддзыв менӧ, Тэ видзӧдлан ме вылӧ, а ме ог нин ло.
Кыдзи кымӧр вешйӧ да бырӧ, тадзи кулӧмаяслӧн оланінӧ мунысь бӧрсӧ оз нин лок. Аслас керкаӧ сійӧ бӧрсӧ оз бергӧдчы, сылӧн мувыв оланіныс оз нин тӧд сійӧс.
Ӧні ме ог кут чӧв овны.
Ме кута сёрнитны, ӧд дзескыд менам ловлы, кута норасьны, ӧд курыд шог меным.
Енмӧй, мыйла Тэ потшӧсалін менӧ, ме ӧмӧй саридз али саридзса гундыр?
Ме мӧвпала, мый вольпасьӧй менӧ бурӧдас, унмӧй шогӧс вештас, но Тэ вӧтъясӧн менӧ повзьӧдлан, аддзылӧмъясӧн весьӧпӧртан.
Бурджык, менам ловшыӧй кӧ чӧв ланьтас, сьӧкыдалӧм дорысь кӧ ме кулышта.
Зывӧк лои меным олӧмыс, менам нэмӧй дженьыд.
Эновт менӧ! Менам олан лунъясӧй тӧвру пӧльыштӧм кодьӧсь.
Мыйла мортыс Тэныд дона, мыйла видзӧдан сы бӧрся? Быд асыв Тэ волан сійӧс видлыны, быд здукӧ тӧдмалан.
Мыйла Тэ он эновт менӧ, он вешйы ме дінысь, медым верми кӧть дулльӧс ньылыштны?
Ме кӧ мыж вӧчи, Тэныд ӧмӧй паныд вӧчи, морт бӧрся Видзӧдысьӧй?
Ме ачым аслым лои сьӧктӧдӧн, а Тэ нӧшта пуктін менӧ Аслыд лыйсян пас пыдди. Мыйла?
Мыйла Тэ он прӧстит менсьым мыжӧс, мыйла он вешты менсьым мыжмӧмӧс?
Ӧні ме кыз му улӧ вода, Тэ кутан корсьны менӧ, а ме ог нин ло.
Шуахса Вилдад воча шуис:
— Дыр-ӧ на тэ кутан тадзисӧ сёрнитны?
Тэнад кывъясыд бушков кодьӧсь!
Енмыс ӧмӧй оз веськыда мыжды, Ставсӧвермысь ӧмӧй вежас збыльсӧ?
Тэнад пияныд кӧ мыж вӧчисны Сылы паныд, Сійӧ мынтысис налы мыжныс серти.
Но тэ кӧ корсян Енсӧ, кевмысян Ставсӧвермысьлы, тэ кӧ сӧстӧм да веськыд, Сійӧ бергӧдас чужӧмбансӧ тэлань да веськыдлуныд серти сетас тэныд овны.
Водзынсӧ кӧ тэнад вӧлі этша, бӧрыннас тэнад лоӧ вывті уна.
Юав воддза олысьяслысь, тӧдмав, мый батьясныс висьтавлісны.
Ми ӧд тӧрытъя чужысьяс, нинӧм огӧ тӧдӧй, му вылас миян олан лунъясным вуджӧр кодьӧсь.
Батьяс велӧдасны тэнӧ, висьталасны, мый эм сьӧлӧманыс.
Петас-ӧ юсьпӧлян ватӧминӧ, быдмас-ӧ эжӧр ватӧг?
Петігас на сійӧ нярмӧ, ытшкан кадӧдз оз быдмы, мукӧд турунсьыс водз сійӧ косьмӧ.
Татшӧм туйыс быдӧнлӧн, коді вунӧдӧ Енсӧ, Ентӧг олысьлӧн лачаыс вошас.
Шатовтчӧ ставыс, мый вылӧ лача кутӧ, сійӧ кутчысьӧ быттьӧ черань везйӧ.
Сійӧ мыджсьӧ аслас овмӧс вылӧ, но овмӧсыс киссьӧ, кутчысьӧ озырлунас, но озырлуныс ылӧдлӧ.
Сійӧ вежӧдӧ шонді улын, вожъясыс шевкнитчӧмаӧсь сад йӧрын, вужйыс гартчӧма изъяс гӧгӧр, пырӧма изъяс костӧ.
Но кор сійӧс нетшыштасны, сэки муыс ӧтдортчас сыысь, шуас, мый оз тӧд сійӧс.
Муысь петасны-быдмасны мукӧдъяс — татшӧм гажсӧ сылы вайӧ олӧмыс.
Енмыс мыжтӧмӧс оз ӧтдорт, лёк вӧчысь дор оз сувт.
Сійӧ тыртас на тэнӧ серамӧн, вомсьыд петас на гораа нимкодясьӧм.
Тэнӧ мустӧмтысьясӧс вевттяс яналӧм, лёк йӧзлӧн оланіныс бырас.
Иов воча шуис:
— Ме тӧда, мый ставыс тайӧ тадз.
Мортыс оз вермы лоны Ен водзын веськыдӧн.
Кутас кӧ мортыс вензьыны Енмыскӧд, сійӧ оз вермы вочавидзны весиг ӧти юалӧм вылӧ.
Енмыс — ыджыд мывкыдлуна, вынасьыс-вына, Сылы паныд кыпӧдчӧмысь мортлы бурыс оз ло.
Виччысьтӧг Сійӧ вештӧ керӧсъяс, Аслас скӧрлунӧн путкыльтӧ найӧс.
Сійӧ вӧрзьӧдӧ мусӧ, и подулыс пондӧ вӧрны.
Сійӧ вевттьӧ кодзувъяс, ӧлӧдӧ шондісӧ, и шонді оз пет.
Сійӧ ӧтнас шевкнитіс енэжсӧ, Сійӧ ветлӧ саридзса гыяс вывті.
Сійӧ вӧчис-артмӧдіс Сизима, Куима да Корӧся кодзув чукӧръяс*, тшӧтш лунвыв кодзувъяс.
Сылӧн уджъясыс ыджыдӧсь, вежӧрӧ тӧрӧдтӧмӧсь, Сылӧн шензьӧданаторъяслы лыдыс абу.
Сійӧ мунӧ ме водзті, а ме ог аддзы Сійӧс, Сійӧ ветлӧ ме дінті, а ме ог казяв Сійӧс.
Коді сувтӧдас Сійӧс мыйкӧ босьтӧмысь, коді шуас Сылы: «Мый Тэ вӧчан?»
Енмыс скӧралӧ, оз ланьт, Рахавлы* отсасьысьяс кымынь уськӧдчасны Ен водзӧ.
Мый ме верма воча шуны Енмыслы, кытысь босьтны кывъяс Сылы паныд?
Ме кӧ вӧлі мыжтӧм, весиг сэки эг вермы вочавидзны Сылы, ме верми сӧмын корны Ёрдысьӧс лоны бур сьӧлӧмаӧн ме дінӧ.
Ме кӧ шыаси, и Сійӧ кӧ вочавидзис меным, весиг сэки эг эскы, мый Сійӧ кылӧ менӧ. Тӧвныр моз Сійӧ уськӧдчӧ ме вылӧ, нинӧм абусьыс дойясӧс содтӧ, оз сет лолыштны меным, ӧтарӧ топӧдӧ менӧ курыд шогӧн.
Вермасьны кӧ Сыкӧд — Сійӧ медвынаыс, сувта кӧ ёрд водзӧ, коді Сійӧс вайӧдас сэтчӧ?
Ме мыжтӧм, но менӧ мыждас менам кывйӧй, ме абу мыжа, но Енмыс шуас менӧ мыжаӧн.
Ме абу мыжа, но меным ставыс веськодь, меным мустӧм аслам олӧмӧй.
Енмыс ӧтмоза бырӧдӧ мыжтӧмӧс и мыжаӧс, та вӧсна ме шуа, мый ставыс веськодь.
Виччысьтӧм бырӧдӧм дырйи Сійӧ сералӧ мыжтӧмлӧн шог вылын.
Мусӧ сетӧма лёк йӧзлӧн киӧ, а Сійӧ тупкӧ ёрдысьяслысь синсӧ.
Коді тайӧс вӧчӧ, оз-ӧ Енмыс?
Менам олан лунъясӧй юӧр нуысь моз котӧртӧны, лэбӧны, бурсӧ оз аддзыны, тӧвзьӧны кокньыд пыж моз, кыйдӧс вылӧ уськӧдчысь кутш моз.
Ме верма шуны, мый дугда няргыны, вунӧда ассьым шогӧс да понда нюмъявны, но шогысь полӧмыс оз эновт менӧ, ӧд ме тӧда: Тэ менӧ мыжтӧмӧн он шу.
Менӧ кӧ мыждӧма нин, мыйла меным весьшӧрӧ дорйысьнысӧ?
Весиг кӧ лымваӧн мысся, кунваӧн киӧс мыськала, Тэ менӧ йӧткыштан няйт гуранӧ, мый весиг паськӧмӧй зывӧктас менӧ.
Енмыс абу морт, абу ме кодь, медым ме Сылы мыйкӧ воча шуи, сувті Сыкӧд ёрд водзӧ.
Миян абу ёрдысьыс, коді эськӧ кыкнанным вылын вӧлі ыджыдыс.
Енмыс мед вештас ме вылысь Ассьыс бедьсӧ, дугдас повзьӧдлыны менӧ, сэки ме повтӧг кута сёрнитны Сыкӧд. А ӧні ог вермы, ӧд ме ӧтнам.
abu
Меным зывӧк аслам олӧмӧй, норасьӧмӧс ас пытшкам ог кут, ме кута сёрнитны, ӧд дзескыд менам ловлы.
Енмыслы ме шуа: эн мыжды менӧ, висьтав, мыйысь Тэ менӧ мыжалан.
Тэныд ӧмӧй нимкодь дзескӧдны менӧ, ӧтдортны Ассьыд вӧчӧмтортӧ, а лёк йӧзлысь туйсӧ югдӧдны?
Тэнад ӧмӧй мортлӧн кодь синмыд, Тэ ӧмӧй морт моз видзӧдан?
Тэнад олан лунъясыд ӧмӧй мортлӧн кодьӧсь, олан воясыд ӧмӧй мувыв олысьлӧн кодьӧсь? Мыйла Тэ корсян менсьым мыжӧс, туялан менсьым лёк вӧчӧмӧс? Тэ ӧд тӧдан, мый ме абу мыжа, тӧдан, мый некод оз вермы мездыны менӧ Тэнад киысь.
Тэнад киыд вӧчис-лӧсьӧдіс менӧ, а ӧні Тэ бырӧдан менӧ?
Эн вунӧд, мый Тэ сёйысь вӧчин менӧ, а ӧні бӧр вӧчан менӧ муӧн?
Тэ сысъялін менӧ йӧлӧс моз, суктін рыськӧс моз, кучикӧн да яйӧн вевттин менӧ, лыясӧс тэчин да сӧнъясӧн йитін. Тэ козьналін меным олӧм да буралӧм, тӧждысьӧмӧн видзин менсьым лолӧс.
Но Тэнад сьӧлӧмын вӧлі дзебӧма, мый мекӧд лоас, тӧда, мый Тэ тадзи лӧсьӧдін. Тэ видзӧдан ме бӧрся, вӧча-ӧ ме мыжсӧ, Тэ он коль менсьым мыжӧс мыждытӧг.
Ме кӧ мыжа — курыд шог меным!
А мыжтӧм кӧ, весиг сэки ог лысьт юрӧс лэптыны, ме пӧтӧма яналӧмнас, кок йылысь усьмӧн менӧ юкталӧма шогнас.
Муртса лэптышта юрӧс, Тэ лев моз нин вӧтчан ме бӧрся, бара повзьӧдлан менӧ Аслад шензьӧдана выннад.
Тэ выльысь вайӧдан мыжалысьясӧс, ёнджыка на скӧралан ме вылӧ, шог бӧрся шог ыстан меным.
Мыйла Тэ петкӧдін менӧ мам кынӧмысь?
Бурджык, ме кӧ кулі, и некод эз аддзыв менӧ.
Бурджык, ме кӧ эг вӧв, мам кынӧмсянь кӧ менӧ водтӧдісны гортйӧ.
Менам олан лунъясӧй регыд помасясны.
Вешйы ме дінысь, коль менӧ! Пемыдас, сап пемыдас менам мунтӧдз сет меным здук-мӧд нимкодясьыштны, ӧд сійӧ мусьыс ме бӧрсӧ ог нин лок. Сійӧ муас пемыд да гудыр-гадыр, сэні сап пемыд, весиг югыдыс — пемыд.
Наамаса Софар воча шуис:
— Уна кыв шуалысьлы оз ӧмӧй ков вочавидзны, уна сёрнитысь ӧмӧй збыльсӧ висьталӧ?
Тэнад больгӧмыд ӧмӧй ланьтӧдас мукӧдӧс, тешитчӧмсьыд ӧмӧй тэнӧ некодлы янӧдны?
Тэ шуин Енлы, мый сёрнитан веськыда, мый Сы водзын тэ сӧстӧм.
Но Енмыс кӧ збыльысь вочавидзас тэныд, сёрни панас тэкӧд, восьтас тэныд мывкыдлуныслысь гусяторъяссӧ, сэки эськӧ тэныд кык пӧв унджык ковмас нуны сьӧкыдсӧ.
Тӧд, мый тэнсьыд уна мыж Енмыс вунӧдіс.
Верман-ӧ тӧдӧмлуннад аддзыны Енсӧ, верман-ӧ тырвыйӧ шымыртны Ставсӧвермысьӧс?
Сійӧ енэжъясысь на вылын — тэ он вермы судзӧдчыны Сыӧдз, Сійӧ пыдӧстӧминысь на джуджыд — тэ он вермы тӧдмавны Сійӧс.
Сійӧ муюгыдысь на ыджыд, саридзысь на паськыд.
Сійӧ кӧ локтас, йӧртас дзескыдінӧ да вайӧдас ёрд водзӧ, сэки коді Сійӧс падмӧдас?
Сійӧ тӧдӧ ылӧдчысьӧс, аддзӧ лёк вӧчӧм, казявтӧг оз коль.
Вежӧртӧм морт вежӧрсялас, кор вӧлявывса осёл пӧрас мортӧ.
Тэ кӧ сьӧлӧмтӧ веськӧдан Енлань, нюжӧдан китӧ Сылань, шыбитан кӧ лёк вӧчӧмсӧ аслад киысь, он лэдз овны лёкыслы аслад керкаын, сэки яндысьтӧг лэптан синтӧ, пондан зумыда сулавны да он кут повны.
Тэ вунӧдан шогъястӧ, найӧ лоӧны тэныд визувтӧм ва кодьӧн.
Тэнад олӧмыд лоӧ луншӧра югыд кодь, тэнӧ кытшалысь пемыдыс лоӧ асъя югыд кодь.
Тэ он кут майшасьны, ӧд тэнад лоӧ лача, тэ верман лӧня узьны, ӧд тэнӧ лоӧ видзӧма, тэ водан шойччыны, и некод тэнӧ оз повзьӧд, унаӧн кутасны тэнсьыд отсӧг корны.
А лёк вӧчысьлӧн синмыс бердас, сійӧ оз вермы пышйыны, сылӧн лачаыс — бӧръя лолыштӧмыс.
Иов воча шуис:
— Збыльысь тай, сӧмын ті йӧзыс, и тіянкӧд тшӧтш мывкыдлуныс кулас!
Но менам тшӧтш эм вежӧр, ме дзик жӧ тіян кодь.
Коді нӧ оз тӧд тайӧс?
Но серамтуйын аслам ёртъяслы ме лои — ме, коді шыасьлі Енмыс дінӧ, и кодлы Сійӧ вочавидзліс. Менӧ, мыжтӧмӧс да веськыда олысьӧс, серамтуйӧ пуктӧны.
Сійӧ, кодлӧн ставыс бур, увтыртӧ шогсьысьӧс, йӧткыштӧ мортӧс, коді крукасьлӧ.
Эмбур мырддялысьяслысь керкаяссӧ некод оз вӧрзьӧд, Енсӧ дӧзмӧдысьяс олӧны повтӧг, енмӧн лыддьӧны ассьыныс вынсӧ.
Юав пемӧсъяслысь — найӧ тэнӧ велӧдасны, юав енэжвыв лэбачьяслысь — найӧ тэныд юӧртасны.
Сёрнит муыскӧд — сійӧ тэныд гӧгӧрвоӧдас, весиг саридзса черияс тэныд вочавидзасны.
Коді на пиысь оз тӧд, мый ставсӧ вӧчӧма Господь, кодлӧн киын став ловъя олысьлӧн олӧмыс, тшӧтш мортлӧн лолыс.
Оз ӧмӧй пельыд торйӧд кылӧм кывсӧ, оз ӧмӧй вомыд тӧдмав сёянлысь кӧрсӧ?
Пӧрысьяслӧн эм мывкыдлун, дыр олысьяслӧн — сюсь вежӧр.
Енлӧн эм мывкыдлуныс да выныс, эм тӧдӧмлуныс да вежӧрыс.
Сійӧ кӧ жугӧдас, выльысь он лэпты, пуксьӧдас кӧ мортсӧ иган сайӧ, сэтысь сійӧ оз пет.
Дугӧдас кӧ зэрсӧ — ставыс косьмас, пондас кӧ дугдывтӧг кисьтны — муыс ойдас.
Сылӧн эм выныс да вежӧрыс, Сылӧн кипод улын — ылӧдлысь и ылӧгас шедысь.
Ӧксыӧс туйдӧдысьясӧс Сійӧ вӧтлӧ кӧмтӧгныс, ёрдысьясӧс бӧбъясӧн вӧчӧ.
Ӧксы кипод улысь лэдзӧ кӧрталӧмаясӧс, а ӧксылы коскас кӧрталӧ кесйӧглысь вӧньсӧ. Попъясӧс Сійӧ вӧтлӧ кӧмтӧгныс, юралысьясӧс чӧвтӧ, пыдди пуктана йӧзлысь вомсӧ тупкӧ, юрнуӧдысьяслысь вежӧрсӧ босьтӧ, нималысьясӧс янӧдӧ, вынаясӧс жебмӧдӧ.
Сійӧ восьтӧ джуджыд пемыд гуяс, сап пемыдсӧ югыдӧ петкӧдӧ.
Сійӧ рӧдмӧдӧ и бырӧдӧ войтыръясӧс, сетӧ паськӧдчыны и мутӧг кольӧ.
Войтыръяслӧн юралысьяслысь вежӧрсӧ босьтӧ, кольӧ найӧс шӧйтны овтӧминын, кӧні туйыс абу.
Битӧг найӧ кималасӧн ветлӧны пемыдас, шатлалӧны код юраяс моз.
Ставсӧ тайӧс ме аслам синмӧн аддзылі, аслам пельӧн кывлі да гӧгӧрвои.
Мый тӧданныд ті, сійӧс тӧда и ме, ме дзик жӧ тіян кодь.
Ставсӧвермысьлы ме эськӧ кӧсйи ставсӧ висьтавны, Сыкӧд эськӧ кӧсйи веськыда сёрнитны.
А ті мичмӧданныд ылӧгсӧ, ті — шогмытӧм бурдӧдысьяс.
Бурджык тіянлы чӧв овны, бурджык мывкыдаӧн лоны.
Кывзӧй менсьым висьталӧмӧс, кылӧй менсьым паныд вочавидзӧмӧс.
Енсӧ дорйӧм могысь ті висьталанныд ылӧгсӧ, Сылы отсалӧм могысь ті пӧръясянныд.
Чайтанныд, мый тіянлы колӧ Енмыс дор сулавны, колӧ Сы пыдди вензьыны?
Бур ӧмӧй лоӧ, кор Сійӧ пондас туявны-тӧдмавны тіянӧс?
Пӧръяланныд ӧмӧй Сійӧс мортӧс моз?
Сійӧ чорыда мыждас, кор ті гусьӧн кодкӧ дор сувтанныд.
Сылӧн ыджыдалан выныс оз ӧмӧй повзьӧдлы тіянӧс, оз ӧмӧй босьт тіянӧс полӧм-тіралӧм?
Тіян сёрниныд пӧим кодь, дорйысьӧмныд жугалӧм сёй гырнич кодь.
Ӧні ті чӧв олӧй, а ме кута сёрнитны, сэсся кӧть мый лоӧ.
Ме ачымӧс ог видз, ме дась аслам олӧмӧн пудъясьны.
Мед Енмыс виӧ менӧ, но ме лача кута, кӧсъя Сы водзын дорйысьны на.
Тайӧ меным мездмӧмыс, ӧд Ентӧг олысь оз вермы сувтны Сы водзӧ.
Сюся кывзӧй менсьым висьталӧмӧс, пель саяныд сюркнялӧй менсьым кывъясӧс.
Ёрд водзӧ ме вая ассьым могӧс, ме тӧда, мый ме абу мыжа.
Коді вермас вензьыны мекӧд?
Вермас кӧ кодкӧ, ме дзик пыр ланьта да кула.
Ме ог дзебсьы Тэысь, Енмӧй, вӧчан кӧ меным тайӧ кыкторсӧ: вештан ме вылысь Ассьыд китӧ да дугдан повзьӧдлыны менӧ.
Сэки чукӧстан менӧ, и ме воча шыася, лэдзан меным сёрнитны, и Ачыд вочавидзан.
Уна-ӧ ме сайын лёк вӧчӧмыс да мыжыс?
Петкӧдлы меным кывзысьтӧмлунӧс да мыжӧс.
Мыйла Тэ дзебан Ассьыд чужӧмтӧ меысь, лыддян менӧ Аслад вӧрӧгӧн, повзьӧдлан менӧ усьӧм корйӧс моз, вӧтлысян кос идзас бӧрся моз?
Тэ индін меным курыд лунъяс, пуктін ме вылӧ томдырся мыжъясӧс. Тэ сюйин кокӧс тшемилӧ костӧ, кыйӧдан менсьым быд воськов, вӧтлысян менам кок туй бӧрся.
Но мортыс сӧмын сісьмантор, сійӧ возйӧн сёйӧм паськӧм кодь.
Аньсянь чужысь дженьыд нэма, мортлӧн олӧмыс тырӧма шогӧн.
Дзоридз моз сійӧ мыччысьлӧ да нярмунӧ, вуджӧр моз вешйӧ, оз сувтлы.
И татшӧм морт бӧрся Тэ кыйӧдан, нуӧдан ёрд водзӧ.
Коді вермас пежсянь чужны сӧстӧмӧн?
Некод оз.
Тэнад кӧ индӧма нин мортлысь олан лунъяссӧ, арталӧма сылысь тӧлысь лыдсӧ, пасйӧма олан нэмыслысь помсӧ, мый сійӧ оз вермы вежны, сідзкӧ, вешты синтӧ сы вылысь, мед сійӧ шойччыштас. Сійӧ мед нимкодясьыштас, кыдзи нимкодясьӧ меда морт уджалан лун помасигас.
Весиг пулӧн эм лача: сійӧс кӧ керыштасны, сійӧ бара кутас быдмыны, сылӧн выль вожъясыс петасны.
Мед кӧ вужйыс пӧрысьмӧма нин, а мырйыс муас пырӧма, но сюрӧ кӧ сылы ватор, сійӧ вежӧдас, том пу моз лэдзас выль вожъяс.
А мортыс вынтӧммӧ да кулӧ.
Кор сылӧн лолыс петас, кӧні сійӧ лоӧ?
Тыясысь ваыс бырӧ, юяс ямӧны да косьмӧны, тадзи тшӧтш мортыд — водӧ да оз нин чеччы.
Кытчӧдз лоӧ енэжыс му весьтас, сійӧ оз садьмы, аслас унмысь оз паляв.
Тэ кӧ эськӧ кулӧмаяслӧн оланінын сайӧдін менӧ, дзебин менӧ, кытчӧдз скӧралӧмсьыд он лӧнь, индін меным кад, а сэсся ме йылысь бара казьтыштін!
Кутас-ӧ мортыс кулӧм бӧрас бара овны?
Сьӧкыда мырсигӧн ме виччыся, кор нин локтас менӧ вежысь.
Сэки Тэ чукӧстан, и ме вочавидза Тэныд, Тэ кӧсъян аддзысьны Аслад вӧчӧмторкӧд.
Сэки Тэ кутан видзӧдны менам воськовъяс бӧрся, он кут кыйӧдны менсьым мыжъясӧс, Тэ вевттян менсьым став лёк вӧчӧмӧс, дзебан менсьым мыжӧс.
Но кыдзи керӧсъяс потласьӧны да киссьӧны, изкырта вешйӧ места вывсьыс, кыдзи ва поткӧдӧ изъяс, визувтысь ва вожӧдӧ му, тадзи Тэ бырӧдан мортлысь лачасӧ.
Тэ дзескӧдан мортӧс помӧдзыс, а сэсся сійӧ мунӧ, вежан сылысь чужӧмбансӧ да мӧдӧдан сійӧс.
Нималӧны-ӧ сылӧн челядьыс, сійӧ оз тӧд, увтыртӧны-ӧ найӧс, сійӧ оз аддзы.
Сӧмын вир-яйыс кылӧ ассьыс дойсӧ, лолыс бӧрдӧ ас вӧснаыс.
Теманса Элифаз воча шуис:
— Мывкыд морт оз вочавидз абутӧм тӧдӧмлунӧн, сійӧ оз пӧткӧдчы сынӧднас, оз дорйысь ковтӧм кывъясӧн, сёрниӧн, мый некодлы оз вай бурсӧ.
Тэ ӧтдортан Енмысь полӧмсӧ, падмӧдан Ен дінӧ шыасьысьясӧс.
Тэнад мыжыд ышӧдіс тэнӧ тадзи сёрнитны, тэ бӧрйин аслыд наян сёрни.
Аслад вомыд тэнӧ мыждӧ, а ог ме, аслад кывйыд тэныд паныд висьталӧ.
Гашкӧ, тэ медводдза мортӧн чужин, керӧсъясысь водзджык тэнӧ вӧлі вӧчӧма?
Гашкӧ, тэ вӧлін Ен дінын, кор Сійӧ чукӧртчис енэжвывса олысьяскӧд, гашкӧ, тэныд вичмис сэні мывкыдлуныс?
Мый тэ сэтшӧмсӧ тӧдан, мый ми огӧ тӧдӧй, мый тэ сэтшӧмсӧ гӧгӧрвоан, мый ми огӧ гӧгӧрвоӧй?
Миян пӧвстын эм кык морт, ӧтиыс дзор юрсиа, а мӧдыс ёна пӧрысь нин, найӧ тэнад бать дорысь ыджыдӧсь.
Тэныд ӧмӧй абу тырмана Енлӧн бурӧдӧмыс, Сылӧн шуӧм бур кывъясыс?
Мыйла шызьӧдӧ тэнӧ сьӧлӧмыд, мыйла скӧрпырысь видзӧдан?
Мыйла тэнад лолыд пыксьӧ Енмыслы, мыйла тэнад вомысь петӧны татшӧм кывъясыс?
Вермас-ӧ морт лоны сӧстӧмӧн, аньсянь чужысь — веськыда олысьӧн?
Енмыс весиг Аслас анделъяслы оз эскы, весиг енэжыс абу сӧстӧм Сылӧн син водзын.
Кыдзи вермас лоны сӧстӧмӧн пеж да шогмытӧм морт, кодлы лёк вӧчӧмыс ва юӧм кодь?
Ме тэныд гӧгӧрвоӧда, а тэ кывзы, висьтала тэныд, мый аддзылі, висьтала, мый юӧртісны мывкыд йӧзыс, кодъяс эз дзебны асланыс батьяссянь кывлӧмасӧ. Сӧмын батьяслы вӧлі сетӧма мусӧ, эз вӧвны на пӧвстын йӧз муысь локтысьяс.
Лёк вӧчысь сьӧкыдалӧ став олӧм чӧжыс, дзескӧдысьлӧн олан воясыс лыдаӧсь.
Повзьӧдлан шы жвиньгӧ сылӧн пеляс, лӧньлун дырйи локтӧ сійӧс бырӧдысь.
Сійӧ оз эскы, мый мездмас пемыдсьыс, тӧдӧ, мый сійӧс виччысьӧ шыпурт.
Сійӧ шӧйтӧ-ветлӧ, нянь шӧрӧм корсьӧ, тӧдӧ, мый пемыдыслӧн луныс матын.
Шогыс да сьӧкыдалӧмыс повзьӧдлӧны сійӧс, тышӧ петысь ӧксы моз найӧ вермӧны сійӧс. Тайӧ лои сыысь, мый сійӧ кисӧ лэптіс Енлы паныд, пыксис Ставсӧвермысьлы, ышнясьӧмӧн сувтіс Сылы паныд кыз сайӧдӧн тупкысьӧмӧн.
Тшӧгӧмысла сылӧн чужӧмыс паськаліс, лядьвейыс госсяліс.
Сійӧ овмӧдчас куштӧм каръясӧ, киссянвыйӧ эновтӧм керкаясӧ.
Сійӧ оз нин озырмы, овмӧс-эмбурсӧ воштас, ас бӧрсяыс му вылас нинӧм оз коль.
Пемыдсьыс сійӧ оз вермы пышйыны, сылысь выль вожъяссӧ би чишкалас, Енлӧн пӧльыштӧмыс сійӧс нӧбӧдас.
Мед оз ылӧдлы асьсӧ абутӧм вылас лача кутӧмнас, нинӧм абуыс сылы аслыс бергӧдчас.
Сійӧ кулас аслас кадысь водз, сылӧн вожъясыс оз кутны вежӧдны.
Виноград пу вылысь моз сылӧн кисьмытӧм вотӧсыс усьласяс, олив пу вылысь моз дзоридзыс гылалас.
Тадзи кушмас Ентӧг олысьлӧн оланіныс, би ньылыштас козин босьтны радейтысьлысь керкасӧ.
Ӧд сійӧ нӧбасис лёкнас да чужтіс шог, сійӧ новлӧдліс ас пытшкас ылӧг.
Иов воча шуис:
— Татшӧм сёрнисӧ ме унаысь нин кывлі, ті ставныд — туйтӧм бурӧдысьяс.
Эм-ӧ помыс тӧвйыв лэдзӧм сёрнилы?
Мый тэнӧ ышӧдіс тадзи сёрнитны?
Ті кӧ сьӧкыдалінныд ме моз, ме эськӧ тіян моз жӧ сёрниті, дасьті сёрниӧс тіянлы паныд, шуаси юрӧс довкйӧдлӧмӧн, ёнмӧді эськӧ тіянӧс аслам кывъясӧн, вомдорӧс нюмрӧдлӧмӧн бурӧді тіянӧс.
Сёрнитӧмысь менам дойӧй оз ланьт, дугда кӧ, весиг сэки оз вешйы ме дінысь.
Тэ дзикӧдз мудзтӧдін менӧ, Енмӧй, Тэ бырӧдін менсьым став гортсаӧс.
Тэ вевттин менсьым кучикӧс чукыръясӧн, тадзи петкӧдлін, мый ме мыжа.
Менам омӧльтчӧмӧй кыпӧдчӧ меным паныд да мыжалӧ менӧ.
Енлӧн скӧрлуныс косявлӧ менӧ, усьласьӧ ме вылӧ, пиньсӧ йирӧ ме вылӧ, менӧ мустӧмтысь синсӧ сувтӧдӧма ме вылӧ.
Йӧзыс жергӧдісны ме вылӧ пиньнысӧ, лёкӧдӧмӧн кучкалӧны меным чужӧмбанӧ, ставныс ӧтувтчисны меным паныд.
Енмыс шыбитіс менӧ лёк йӧзлы, сетіс менӧ Ентӧг олысьяс киӧ.
Ме олі лӧня, но Сійӧ пыркнитіс менӧ, кватитіс сьыліӧд да песлӧдліс, сувтӧдіс менӧ Аслыс лыйсян пас пыдди.
Сійӧ лыйис ньӧвъяссӧ менам вир-яйӧ, жалиттӧг сатшкис менам гыркйӧ, кисьтіс му вылас сӧптӧс, бытшйӧдліс менсьым вир-яйӧс, тышкаморт моз уськӧдчис ме вылӧ.
Ме вури аслым шогалан паськӧм, чужӧмбанӧн ляскыси му бердас.
Бӧрдӧмӧйла чужӧмӧй доналіс, синмӧс вевттис сап пемыд. Но менам кевмӧмӧй сӧстӧм, менам киӧй некодӧс эз вилы да эз дзескӧдлы.
Муӧй, эн дзеб менсьым вирӧс, ырзӧм-бӧрдӧмӧй мед кылас на.
Енэжас эм ме дор Сулалысьыс, медвыліас эм менӧ Дорйысьыс.
Менам ёртъясӧй лёкӧдӧны менӧ, но ме Ен водзын кисьта синваӧс.
Вермис кӧ эськӧ мортыс дорйысьны Ен водзын морт водзын моз.
Менам олан воясӧй лыдаӧсь, ме муна сэтчӧ, кытысь бӧрсӧ ог нин бергӧдчы.
Менам лолӧй нюкыртчӧма, олан лунъясӧй чинӧны, кок пӧлӧн ме гортйын нин.
Лёкӧдысьяс кытшалісны менӧ, меным лоӧ видзӧдны налӧн лӧгалӧм вылӧ.
Енмӧй, кывкут ме вӧсна.
Тэысь ӧтдор коді тайӧс вӧчас?
Тэ тупкин налысь сьӧлӧмсӧ, и найӧ оз гӧгӧрвоны, Тэ он сет налы вермыны менӧ.
Коді ылӧдлӧ ёртсӧ аслыс мыйкӧ босьтӧм могысь, сылӧн челядьыслӧн синныс бердас.
Ме лои войтыръяслы лёкӧданторйӧн, найӧ сьӧлалӧны меным чужӧмӧ.
Шогсьӧмӧйла менам синмӧй пемдіс, вир-яйӧй лои вуджӧр кодь.
Таысь веськыда олысьӧс шемӧс босьтас, Ентӧг олысь шызьӧдас мыжтӧмӧс.
Но веськыда олысь оз кеж аслас туй вылысь, сӧстӧм киа морт вынсялас-зумыдмас.
Локтӧй ставныд, матыстчӧй, но тіян пӧвстысь ме ог аддзы мывкыдаӧс.
Менам олан лунъясӧй помасисны, сьӧлӧмпытшса кӧсйӧмъясӧй киссисны.
Войсӧ ті вӧчанныд лунӧн, пемыднас шуанныд, мый югыд нин.
Ме виччыся вуджны кулӧмаяслӧн оланінӧ, пемыдінас вольсала вольпасьӧс, гортйӧс шуа аслам батьӧн, номыръясӧс — мамӧн да чойӧн.
Кӧні сэки лоӧ менам лачаӧй?
Коді тӧдӧ тайӧс?
Сійӧ мекӧд тшӧтш лэччас кулӧмаяс дінӧ, мекӧд ӧтлаын водас му пытшкӧ.
Шуахса Вилдад воча шуис:
— Кор нин дугданныд тадзисӧ сёрнитны?
Медводз мӧвпыштӧй, сэсся пондам сёрнитны.
Мыйла пуктыны миянӧс пемӧс туйӧ, лыддьыны вежӧртӧмъясӧн?
Скӧралӧмнад тэ, Иов, асьтӧ йиран-косявлан!
Чайтан, мый тэ вӧсна муыс кушмас, изкырта вешъяс места вывсьыс?
Лёк вӧчысьлӧн биыс кусас, бикиньыс дугдас сявкйыны.
Сылӧн керка пытшкыс пемдас, сы весьтын югъялысь биыс кусас.
Сылӧн зумыд воськовъясыс вынтӧммасны, сылӧн лёк вӧзйӧмыс сійӧс асьсӧ уськӧдас. Сылӧн кокыс шедас налькйӧ, гартчас тывйӧ, пысасяс дзугйӧ, сійӧ шедас кыйсьысь киӧ.
Му вылас сылы октӧма лэч, туй вылас сійӧс виччысьӧ нальк.
Повзьӧданторъяс кытшаласны сійӧс, вӧтчасны сы бӧрся.
Тшыглуныс сылысь вынсӧ босьтас, кулӧмыс сыкӧд орччӧн сулалӧ.
Кулана висьӧмыс сылысь кучиксӧ сёяс, лысӧ и яйсӧ вильӧдас.
Сійӧс лоӧ вӧтлӧма аслас керкаысь, мый вылӧ лача кутіс, лоӧ нуӧдӧма повзьӧдана ӧксы дінӧ.
Лёк вӧчысьлӧн керкаӧ овмӧдчасны мукӧдъяс, сылысь оланінсӧ кояласны тэгйӧн.*
Сылӧн вужйыс косьмас улісяньыс, а вожъясыс — вылісяньыс.
Сы йылысь оз кутны казьтывны му вылын, сылысь нимсӧ вунӧдасны йӧз пӧвстын.
Сійӧс лоӧ вӧтлӧма югыдсьыс пемыдӧ, лоӧ шыбитӧма кулӧмаяс дінӧ.
Сылӧн оз ло пиыс, ас войтыр пӧвстын оз лоны сысянь чужысьяс, сылӧн оланінӧ некод оз коль.
Рытыввылын весьӧпӧрасны сійӧс бырӧдӧмысь, асыввылын полӧм-тіралӧм босьтас.
Тадзи лоӧ лёк вӧчысьлӧн керкакӧд, Енсӧ тӧдтӧм мортлӧн оланінкӧд.
Иов воча шуис:
— Дыр-ӧ на ті кутанныд дзескӧдны менӧ, дойдавны асланыд кывъясӧн?
Ті ӧтарӧ омӧльтанныд менӧ, яндысьтӧг увтыртанныд.
Ме кӧ збыльысь мыж вӧчи, менам мыжӧй ас вылам кольӧ.
Но ті кӧ янӧданныд менӧ, медым асьнытӧ кыпӧдны, тӧдӧй, мый менӧ Енмыс йӧртіс, Сійӧ менӧ Аслас тывйӧн гартыштіс.
Ме горза: «Виӧны-дзескӧдӧны!», но менӧ некод оз кыв, ме кора отсӧг, а дорйысьыс абу.
Енмыс потшис менсьым туйӧс, водзӧ ог вермы мунны, вевттис ордымъясӧс сап пемыднас.
Сійӧ вештіс ме дінысь пыдди пуктӧмӧс, пӧрччӧдіс юр вылысь юркытшӧс.
Сійӧ гӧгӧрбок жуглӧ менӧ, и ме куланвыйын, менсьым лачаӧс Сійӧ пуӧс моз нетшыштіс вужнас.
Сылӧн скӧрлуныс ыпнитіс ме вылӧ, Сійӧ лыддьӧ менӧ Аслас вӧрӧгӧн.
Локтӧ Сылӧн тышкакотырыс, писькӧдӧ туйсӧ мелань, кытшалӧ менсьым чомйӧс.
Вокъясӧс Сійӧ ылыстіс ме дінысь, менам ёртъясӧй ӧтдортчисны меысь.
Матыссаяс эновтісны менӧ, тӧдсаяс вунӧдісны менӧ.
Менам керкаӧ волысьяс оз кӧсйыны тӧдны менӧ, аслам кесйӧг аньяслы ме лои бокысаӧн.
Ме кора кесйӧгӧс, а сійӧ оз вочавидз, меным лоӧ корӧмӧн корны сійӧс.
Гӧтырлы менам лолыштӧмысь зывӧк, вокъясӧй кедзовтӧны менӧ.
Весиг посни челядь менӧ мустӧмтӧны, сералӧны ме вылын менӧ аддзигӧн.
Менам ёртъясӧй зывӧктӧны менӧ, муса йӧзӧй бергӧдчисны меысь.
Лы да кучик коли меысь, вом пытшкын сӧмын пинь анъяс колины.
Ёртъясӧй, жалитыштӧй менӧ, ӧд Енлӧн киыс инмӧдчис ме дінӧ.
Мыйла ті Енмыс моз дзескӧданныд менӧ, йиранныд менӧ, некыдз онӧ вермӧй пӧтны?
Менсьым кывъясӧс кӧ эськӧ вӧлі гижӧма, небӧгӧ пасйӧма, кӧрттувйӧн из вылӧ серлӧдлӧма, нэм кежлӧ свинечӧн мавтӧма.
Но ме тӧда, менам Мездысьӧй ловъя! Сійӧ медбӧръяыс, коді сувтас му вылӧ. Кор ме вылысь кучикӧс лоӧ кульыштӧма, ме аддза Енмӧс.
Ме кута видзӧдны Сы вылӧ, аслам синмӧн аддза Сійӧс.
Тайӧс виччысьӧмысь сьӧлӧмӧй нюкыртчӧма.
Ті шуанныд, кутам пӧ дзескӧдны Иовӧс, и аддзам сы пытшкысь мыж.
Но тӧдӧй, мый лоас мыждӧм, полӧй шыпуртысь, ӧд скӧрлун веськӧдӧма шыпуртсӧ мыжлань.
Наамаса Софар воча шуис:
— Мӧвпъясӧй вӧзйысьӧны ортсӧ петны, сёрнитӧмысь кутчысьны ог вермы.
Ме кылі менӧ янӧдана вомалӧм, но сюсь вежӧрӧй вочавидзас тэныд.
Тэ ӧмӧй он тӧд, мый водзысяньыс — мортӧс вӧчӧмсяньыс — лёк вӧчысьлӧн гажӧдчӧмыс дженьыд, Ентӧг олысьлӧн нимкодясьӧмыс здук мында?
Весиг кӧ сійӧ быдмас енэжӧдз, юрнас люкасяс кымӧръясӧ, аслас сіт-куйӧд моз сійӧ бырас пыр кежлӧ, сійӧс тӧдлысьяс пондасны юасьны, кӧні сійӧ.
Вӧт моз сійӧ лэбыштас-вошас, и сійӧс оз нин аддзыны, войся петкӧдчылӧм моз сійӧ бырас.
Сійӧ некодлы нин оз усь син улас, сылӧн оланіныс оз нин аддзыв сійӧс.
Гусявлӧмторсӧ сылы ковмас бӧр сетны аслас киӧн, пияныслы ковмас корны гӧльяслысь.
Выныс, мыйӧн тырӧма сылӧн том лыясыс, водас сыкӧд гуӧ.
Лёкыс Ентӧг олысьлы юмовтор кодь, пуктӧма сійӧс кыв улас, нёнялӧ, оз сьӧлышт, кутӧ сійӧс вомас. Но кынӧм пытшкас юмыс вошас, гырк пытшкас змей ядӧ пӧрас.
Озырлуныс, мый сійӧ ньылыштіс, воснас петас, Енмыс перъяс сійӧс кынӧм пытшсьыс.
Сійӧ чурскӧ змей яд, змейлӧн чушкысь кывйыс виас сійӧс.
Сійӧ оз нин аддзыв визув шоръяс, маа да йӧла юяс.
Чукӧртӧм озырлунсӧ бӧр ковмас сетны, нажӧвитӧм удждоныс оз вай сылы нимкодьлун.
Ӧд сійӧ гӧльясӧс дзескӧдліс да ӧтдортліс, мырддявліс керкаяс, мый эз лэптывлы.
Сійӧ некор оз пӧтлы, озырмӧдчӧмнас оз мезды асьсӧ.
Сылӧн пӧтлытӧмлуныс ньылыштіс ставсӧ, та вӧсна сылӧн шудыс киссяс.
Озырлун дырйиыс сылы дзескыд лоӧ, дзескӧдӧмаяс кинысӧ лэптасны сы вылӧ.
Кор сійӧ дзикӧдз пӧтас, Енмыс ыстас сы вылӧ Ассьыс ыпъялан скӧрлунсӧ, зэр моз кисьтас сы вылӧ ярлунсӧ.
Сійӧ пышъяс кӧрт шыпуртысь, но сыӧ ыргӧн йыла ньӧв сатшас, поткӧдас сылысь сӧпсӧ, ньӧвсӧ перйигӧн курыд сӧптыс петас, и сійӧс полӧм-тіралӧм босьтас, пемыдыс шымыртас сійӧс, сійӧс ньылыштас би, мый абу мортӧн пестӧма, лёкыс суас сылӧн чомйын ловйӧн кольӧмаясӧс.
Енэжыс восьтас сылысь мыжсӧ, муыс кыпӧдчас сылы паныд.
Аслас керкаӧ чукӧртӧм озырлуныс бырас-вошас, Енлӧн скӧралан лунӧ ставыс кылалас ва вывті моз.
Татшӧмтор вичмас лёк вӧчысьлы Енсянь, тадзи шуӧма лоны сылы Енмыс!
Иов воча шуис:
— Сюся кывзӧй, мый ме шуа, тайӧ лоӧ меным тіянсянь бурӧдӧм.
Терпитыштӧй менӧ, лэдзӧй висьтавны, а кор помала, верманныд серавны.
Ме ӧмӧй мортлы нярга-эляся?
Меным ӧмӧй оз позь дӧзмыны?
Вомнытӧ кинаныд тупкӧй, видзӧдлӧй ме вылӧ, и ті повзянныд.
Кор ме мӧвпала мекӧд лоӧмтор йылысь, менӧ дзӧрӧм босьтӧ, став вир-яйӧй тіралӧ.
Мыйла, бара-й, лёк йӧз олӧны на? Найӧ вынаӧсь да пӧрысь кадӧдз ёнӧсь.
Найӧ аддзӧны ныв-пиыслысь быдмӧмсӧ, челядьыслӧн челядьыс син водзасӧсь.
Лёк вӧчысьлӧн гортсаяс олӧны повтӧг, Енлӧн беддьыс абу на вылын.
Сылӧн ӧшкыс бура тырсьӧдӧ, мӧскыс вайсьӧ, некор оз чӧвтчыв.
Посни челядьыс баля чукӧр моз котралӧны, ныв-пияныс чеччалӧны-ризъялӧны, сьылӧны тимпан да гусли улын, гажӧдчӧны пӧлян шы улӧ.
Лёк вӧчысьлӧн олан лунъясыс шудаӧсь, сійӧ лӧня вуджӧ кулӧмаяс дінӧ.
Но Енмыслы лёк йӧз шуалӧны: «Вешйы миян дінысь, ми огӧ кӧсйӧй тӧдны Тэнсьыд туйястӧ!
Коді сійӧ Ставсӧвермысьыс, мед ми кесъялім Сылы?
Мый бурсӧ ваяс миянлы Сы дінӧ шыасьӧмыс?»
Лёк йӧзлӧн шудыс абу асланыс киын.
Лёк вӧчысьлӧн мӧвпъясыс мед ылыстчасны ме дінысь!
Тшӧкыда-ӧ куслӧ лёк вӧчысьлӧн биыс? Тшӧкыда-ӧ Ен скӧралӧмсянь вичмӧ сылы шогыс да сьӧкыдлуныс?
Сійӧ абу тӧлӧн нӧбӧдӧм идзас кодь, тӧвнырӧн шердйӧм кыд кодь.
Тэ шуан, Енмыс пӧ мыждас лёк вӧчысьлысь ныв-писӧ.
Но Енмыс мед мыждас лёк вӧчысьӧс асьсӧ, медым сійӧ та пыр велӧдчас.
Лёк вӧчысь мед аслас синмӧн аддзылас шогсӧ, олігас мед ачыс юас Ставсӧвермысьлысь скӧрлунсӧ.
А кулӧм бӧрас сылы веськодь, мый лоас гортсаыскӧд, ӧд олан кадыс сылӧн помасьӧма.
Енсӧ-ӧ велӧдны мывкыдлунас, Сійӧс, коді весиг енэжвывса олысьясӧс мыждӧ?
Ӧти кулӧ, кор сійӧ вына да том на, лӧнь да шуда лунъясӧ, кор сылӧн яй чигыс топыд на, лыясыс ёнӧсь на.
А мӧд кулӧ курыда шогалӧмӧн, бурсӧ тӧдлытӧг.
Но налӧн шойыс кутас ӧтлаын куйлыны му пытшкас, кыкнаннысӧ вегыль-номыр сёяс.
Ме тӧда, мый йылысь ті мӧвпаланныд, тӧда, мый кӧсъянныд нюкыртны менӧ.
Ті юаланныд, кӧні ӧні нималана мортлӧн керкаыс, кӧні лёк вӧчысьяслӧн оланіныс?
Ті ӧмӧй энӧ юасьлӧй ветлысь-мунысьяслысь, энӧ ӧмӧй гӧгӧрволӧй налысь висьталӧмсӧ, мый бырӧдан лунӧ лёк вӧчысь мездмас, Енлӧн скӧралан лунӧ сійӧс лоӧ вештӧма мӧдлаӧ.
Коді мыждас сійӧс олан туйсьыс, коді мынтысяс сылы лёк вӧчӧмсьыс?
Сійӧс колльӧдӧны-дзебӧны, дзебанін дорас видзысьясӧс сувтӧдӧны.
Ыджыд йӧз чукӧр сійӧс колльӧдӧ, шой водзвылас мунысьяслы лыдыс абу. Му улын куйлігас сылы лоӧ лӧсьыд.
Куш кывъяснад ті онӧ бурӧдӧй менӧ, тіян сёрниныд — сӧмын ылӧг.
Теманса Элифаз воча шуис:
— Вайӧ-ӧ бурсӧ мортыс Енмыслы?
Сюсь мывкыда морт сӧмын аслыс вайӧ бурсӧ.
Веськыда олӧмнад ваян-ӧ нимкодьлун Ставсӧвермысьлы?
Мый бурыс Сылы, тэнад кӧ сӧстӧмӧсь олан туйясыд?
Енмысь полӧмыд да вежавидзӧмыд вӧсна Сійӧ ӧмӧй чирыштӧ тэнӧ, сувтӧ тэкӧд ёрд водзӧ?
Оз ӧмӧй тэнад ыджыд лёклуныд вӧсна, оз ӧмӧй тэнад помтӧм мыжъясыд вӧсна?
Вокъяслы уджйӧзӧн сетӧмсьыд тэ босьтлін налысь коланаторсӧ, гӧльяслысь пӧрччӧдлін бӧръя паськӧмсӧ.
Кодлӧн горшыс косьмис, сійӧс ваӧн эн юктӧдлы, тшыгъялысьлы няньтор эн сетлы.
Вынаяс моз тэ ыджыдалін аслад му вылын, вылӧ кыпӧдчӧмӧн олін сэні.
Дӧваясӧс тэ ыстылін куш киӧн, батьтӧм-мамтӧмъясӧс кольлін нинӧмтӧг.
Та вӧсна тэ гӧгӧр октӧма лэчьяс, виччысьтӧг тэнӧ полӧм-тіралӧм босьтіс. Тэ гӧгӧр сап пемыд, тэ нинӧм он аддзы, ыджыд ваыс вевттис тэнӧ.
Енмыс ӧмӧй абу енэжсьыс на вылын?
Видзӧдлы кодзувъяс вылӧ, кутшӧм найӧ ылынӧсь.
А тэ шуан, мый Енмыс оз тӧд, оз аддзы, оз вермы мыждыны сап пемыд пырыс, шуан, мый кымӧръяс сайӧдӧны Сійӧс, оз сетны аддзыны, и мый Сійӧ ветлӧ енэж кытшолӧд.
Тэ ӧмӧй водзӧ кутан талявны важ туйсӧ, кыті ветлісны лёк вӧчысьяс. Кадысь водз найӧс вӧлі бырӧдӧма, налысь керкаяссӧ ыджыд ва кылӧдіс.
Найӧ шуавлісны Енмыслы: «Вешйы миян дінысь!
Мый миянкӧд вермас вӧчны Ставсӧвермысь?»
А Енмыс озырмӧдіс налысь керкаяссӧ быд бурнас.
Лёк вӧчысьлӧн мӧвпъясыс мед ылыстчасны ме дінысь!
Веськыда олысьяс видзӧдӧны да нимкодясьӧны, сӧстӧм сьӧлӧмаяс сералӧны лёк вӧчысьяс вылын, шуалӧны: «Миянлы паныд сувтысьясӧс бырӧдӧма, налысь эмбурсӧ би ньылыштӧма».
Раммӧдчы Ен водзын, Иов, та пыр тэныд локтас быд бурыс.
Сибӧд Енмыслысь туйдӧдӧмсӧ, пукты Сылысь кывъяссӧ сьӧлӧмад.
Бергӧдчан кӧ Ставсӧвермысь дінӧ, вештан кӧ лёксӧ аслад керка дінысь, сэки Сійӧ бара кыпӧдас тэнӧ. Тэ кӧ зарнитӧ кутан лыддьыны бусӧн, Офирысь вайӧм зарнитӧ — ковтысса изъясӧн, но зарнинас да дзирдалысь эзысьнас кӧ тэныд лоӧ Ставсӧвермысь, сэки пондан нимкодясьны Ставсӧвермысьӧн, верман синтӧ лэптыны Енлань.
Кевмысян Сылы, и Сійӧ кылас тэнӧ, и тэ вӧчан, мый кӧсйысьлін.
Мый шуан вӧчны, сійӧ артмас, туй вылад кутас ӧзйыны югыд би.
Улӧ лэдзӧмаяслы тэ шуан: «Кыпӧдчӧй», Енмыс мездас рамъясӧс. Тэнад сӧстӧмлун вӧсна Сійӧ мездас весиг мыжаӧс.
Иов воча шуис:
— Менам норасьӧмӧй и талун курыд, сьӧкыдалӧмӧй ойзӧм дорысь ыджыд.
Тӧді кӧ, кытысь аддзыны Енсӧ, кутшӧм туйӧд мунны Сылӧн оланінӧ, ме эськӧ вайи Сы водзӧ ассьым могӧс, висьталі ставсӧ, медым дорйыны ачымӧс, тӧдмалі эськӧ Сылысь вочавидзӧмсӧ, гӧгӧрвои Сылысь шуӧмсӧ.
Ыджыд вына Енмыс ӧмӧй кутас вензьыны мекӧд?
Оз!
Но кутас кывзыны менӧ.
Сэки эськӧ веськыда олысь вермис дорйысьны Сы водзын, ме эськӧ пыр кежлӧ мездми менӧ Мыждысьлӧн киысь.
Муна кӧ асыввылӧ, сэні Сійӧ абу, муна кӧ рытыввылӧ, и сэтысь Сійӧс ог аддзы, войвывладорын кӧ Сійӧ мыйкӧ вӧчӧ, ме ог казяв тайӧс, лунвывладорын кӧ дзебсясьӧ, ог аддзы Сійӧс.
Но Сійӧ тӧдӧ менсьым туйӧс, зарниӧс моз Сійӧ тӧдмалӧ менӧ биӧн.
Ме восьлала Сылӧн кок туйӧд, Сылӧн туйысь ог кеж.
Сылӧн тшӧктӧмъясысь ме ог ӧтдортчы, Сылысь кывъяссӧ сьӧлӧм бердын видза, аслам кӧсйӧм дорысь вылӧджык на пукта.
Енмыслӧн шуӧмыс вына, некод сійӧс оз веж.
Сійӧ вӧчӧ, мый кӧсйӧ.
Сійӧ збыльмӧдас, мый шуӧма лоны меным, и татшӧм шуӧмыс Сылӧн уна.
Та вӧсна ме пола-тірала Сыысь, Сы йылысь мӧвпалігӧн менӧ полӧм босьтӧ.
Енмыс жебмӧдіс менсьым лолӧс, Ставсӧвермысь повзьӧдлӧ менӧ.
Мыйла Сійӧ эз бырӧд менӧ став тайӧ пемыдсьыс водзджык, мыйла Сійӧ оз вешты сап пемыдсӧ менам чужӧмбан водзысь?
Мыйла Ставсӧвермысь абу индӧма мыждан кадъяссӧ, мыйла Сійӧс тӧдысьяс оз аддзыны Сылысь мыждан лунъяссӧ?
Ентӧг олысьяс вешталӧны мудор пасъяс, йирсьӧдӧны гусялӧм ыжъясӧс.
Батьтӧм-мамтӧмлысь мырддьӧны осёлсӧ, дӧвалы уджйӧзӧн сетӧмысь босьтӧны сылысь ӧшсӧ.
Коньӧръясӧс найӧ тойлалӧны туй вылысь, гӧльяслы лоӧ дзебсясьны наысь.
Овтӧминса осёлъяс моз гӧльяс ветлӧны, ласта вылысь кынӧмпӧт корсьӧны, медым вердны ныв-пинысӧ.
Найӧ йӧз му вылысь вундӧны коляс няньсӧ, лёк вӧчысьлӧн йӧрысь чукӧртӧны виноград.
Найӧ узьлӧны пасьтӧгныс, налы нинӧмӧн вевттысьны кӧдзыдсьыс.
Керӧсъясын зэр улас найӧ кӧтасьӧны, саймовтчӧм могысь ляскысьӧны изкырта бердӧ.
Ентӧг олысьяс торйӧдӧны батьтӧг кольӧм кагаӧс мам морӧс бердысь, гӧльлы уджйӧзӧн сетӧмысь босьтӧны сылысь кагасӧ.
Гӧльяс ветлӧны пасьтӧгныс, кольтаяс новлӧдлігӧн асьныс тшыгъялӧны, йӧз йӧрын найӧ пычкӧны олив вый, пычкан гуын виноград талялігӧн налӧн горшныс косьмӧ.
Кулысь йӧз ойзӧны карас, доймалӧмаяс отсӧг корӧны, но Енмыс лэдзӧ тадзи лоны.
Ентӧг олысьяс кыпӧдчӧны югыдыслы паныд, найӧ оз тӧдны югыдыслысь туйсӧ, оз ветлыны югыдыслӧн ордымӧд.
Морт виысь югдытӧдзыс на чеччӧ, виӧ гӧльӧс да коньӧрӧс, войнас ветлӧдлӧ гусясьысь моз.
Гӧтыр вывті ветлысь виччысьӧ рӧмдӧм, шуалӧ, менӧ пӧ некод оз аддзыв, и мунӧ чужӧмсӧ тупкӧмӧн.
Пемыднас гусясьысь пырӧ керкаӧ, а луннас дзебсясьӧ, сылы югыдыс мустӧм.
Асылыс налы сап пемыд кодь, пемыдыслысь повзьӧданторъяссӧ найӧ тӧдӧны.
Ентӧг олысь ва вывті кылалысь чаг кодь. Сылысь мусӧ лоӧ ёрӧма, сылӧн виноград йӧрлань мунысьыс оз ло.
Кыдзи шонді пӧжигӧн кос му сёйӧ лым, тадзи пыдӧстӧминыс ньылыштӧ мыж вӧчысьӧс.
Чужтысь мамыс мед вунӧдас сійӧс, вегыль мед чӧсмасяс сыӧн.
Лёк вӧчысьӧс мед оз казьтывны, косьмӧм пуӧс моз мед керыштасны сійӧс, ӧд ныв-питӧм да сьӧктыны вермытӧм аньӧс сійӧ дзескӧдӧ, дӧвалы сійӧ оз отсав.
Аслас вынӧн Енмыс вештӧ вынаясӧс, найӧ оз тӧдны, колясны-ӧ ловйӧн, кор Енмыс сувтас.
Енмыс видзӧ найӧс, та вӧсна налӧн эм лача, но Енмыс видзӧдӧ налӧн туй бӧрся.
Найӧ сӧмын на кыпӧдчасны, и абуӧсь нин, став йӧзыс моз найӧ усясны да куласны, найӧс нетшкасны шептӧс моз.
Абу-ӧ тадз? Сідзкӧ, коді вермас шуны, мый ме пӧръяся, мый менам сёрниӧй — сӧрӧм?
Шуахса Вилдад воча шуис:
— Ен киын юралӧмыс да повзьӧдлӧмыс, медвыліас Сійӧ лӧсьӧдӧма лӧньлун.
Сылысь тышкакотыръяссӧ верман-ӧ артавны?
Сылӧн югыдыс оз-ӧ югды быд морт весьтын?
Вермас-ӧ морт лоны Ен водзын веськыдӧн, вермас-ӧ аньсянь чужысь лоны сӧстӧмӧн?
Ен син водзын весиг тӧлысьыс абу югыд, енэжвыв кодзувъяс абу сӧстӧмӧсь.
Дерт нин, Сы водзын морт — вегыль кодь, мортсянь чужысь — номыр кодь.
Иов воча шуис:
— Кутшӧма жӧ тэ отсалін вынтӧмлы, ёнмӧдін сылысь жебмӧм кисӧ!
Кутшӧма жӧ тэ туйдӧдін мывкыдтӧмӧс, тырвыйӧ гӧгӧрвоӧдін ставсӧ!
Кодлы эськӧ тэ тайӧ кывъяссӧ висьталін, кутшӧм ловсянь тэ сёрнитін?
Кулӧмаяслӧн вуджӧръясыс тіралӧны пыдӧстӧм йирыскӧд да сэні олысьяскӧд.
Кулӧмаяслӧн оланіныс Ен водзын восьса, пыдӧстӧминлӧн абу вевттьӧдыс.
Енмыс шевкнитіс войвывсӧ нинӧм весьтас, ӧшӧдіс мусӧ абутӧмас.
Аслас кымӧръяс пытшкӧ Сійӧ йӧршитӧ ва, валӧн сьӧктаысь кымӧръяс оз нёйдны.
Сійӧ вевттьӧма Ассьыс юралан пуклӧссӧ, шлапнитӧма сы вылӧ Ассьыс кымӧрсӧ.
Ва веркӧсті Сійӧ нуӧдіс визь, торйӧдіс югыдсӧ пемыдысь.
Енэжсӧ пыкысь сюръяяс дзӧрӧны, Енлӧн горӧдӧмысь найӧс полӧм босьтӧ.
Аслас вынӧн Енмыс гызьӧдӧ саридз, Аслас мывкыдлунӧн пасьвартӧ Рахавӧс.*
Енлӧн пӧльыштӧмысь енэжыс мичаммӧ, Сылӧн киыс бытшкӧ ӧдйӧ пышйысь змейӧс.
Сылӧн уджъяс пиысь ставыс тайӧ сӧмын этшаниктор, Сы йылысь ми кылам сӧмын вашкӧдӧмсӧ.
Коді вермас гӧгӧрвоны Сылысь гымалана вынсӧ?
Иов водзӧ сёрнитіс:
— Ловъя Ен водзын, коді эз веськыда мыжды менӧ, Ставсӧвермысь водзын, коді шогнас тыртіс олӧмӧс, ме шуа: кытчӧдз менам ловшыӧй шедӧ на, кытчӧдз Енлӧн лолалӧмыс ме пытшкын, оз пет менам вомысь ылӧгыс, оз пӧръяв менам кывйӧй.
Ме некор ог шу, мый ті веськыдӧсь.
Кытчӧдз ме ловъя, ме кута дорйыны ассьым сӧстӧмлунӧс.
Ме кутчыся аслам веськыдлунӧ, ог лэдзчысь сыысь.
Сьӧлӧмӧй оз мыжав менӧ нинӧмысь.
Менӧ мустӧмтысьлы мед лоас лёк вӧчысьлы моз, меным паныд кыпӧдчысьлы — Индӧд торкысьлы моз.
Кор Ентӧг олысьлы воас пом, кор Енмыс босьтас сылысь олӧмсӧ, сэки мый вылӧ сійӧ лачасӧ кутас?
Сійӧс шогыс суас, но Енмыс оз кыв сылысь бӧрдӧмсӧ.
Сійӧ оз кут нимкодясьны Ставсӧвермысьӧн, оз шыась Енмыс дінӧ.
Ме висьтала тіянлы Енмыслӧн выныс йылысь, ог дзеб, мый вӧчӧ Ставсӧвермысь.
Ті асьныд ставсӧ аддзылінныд, сідзкӧ, мыйла нинӧм абусӧ сёрнитанныд?
Со мый дасьтӧма Енмыс лёк вӧчысьлы, со мый вичмас дзескӧдысьлы Ставсӧвермысьсянь: 
мед кӧ сылӧн пияныс уна, найӧ шыпурт улӧ веськаласны, сысянь чужысьяслы оз ло пӧтмӧн няньыс.
Ловйӧн кольӧмаясӧс кулана висьӧм гортйӧ водтӧдас, налӧн дӧваясыс весиг оз вермыны бӧрдны-шогсьыны.
Лёк вӧчысьлӧн кӧ эзысьыс лоӧ лыа мында, паськӧмыс — ёг турун мында, сылысь паськӧмсӧ веськыда олысь пасьталас, эзысьыс мыжтӧмлы вичмас.
Керкаыс, мый сійӧ лэптӧ, ӧдйӧ киссяс, сылӧн керкаыс видз-му бӧрся видзӧдысьлӧн чом кодь.
Сійӧ водас озыр мортӧн, но татшӧмнас оз чеччы, восьтас синсӧ, а сылӧн нинӧм абу.
Ойдігӧн моз сійӧс полӧм босьтас, войнас сійӧс бушков суас.
Сійӧ кутас зільны пышйыны, но асыв тӧв кыпӧдас сійӧс, ыджыд ӧдӧн нӧбӧдас да нем жалиттӧг шыбитас мӧдлаӧ.
Тайӧс аддзылысь шлопнитас кинас, пондас сы вылын шутьлялӧмӧн серавны.
Эзысьлӧн эм куйланін, кытысь перйӧны сійӧс, и зарнилӧн эм сывданін, кӧні весалӧны сійӧс.
Кӧрт перйӧны муысь, ыргӧн сывдӧны изйысь.
Морт вермӧ пемыдсӧ, лэччӧ медся джуджыдінӧ, сэні сап пемыдас сійӧ корсьӧ из.
Кытчӧ мортлӧн кокыс эз на тувччыв, сэні кодйӧны из перъян джуджыд гу, гез кузя лэччӧны сэтчӧ, кӧні ловъя морт абу.
Му вылын быдмӧ нянь, а пытшкӧссяньыс мусӧ быттьӧ би кодйӧма.
Изъяс пытшкысь сапфир сюрласьӧ, лыа пытшкысь — зарни чиръяс.
Кырныш оз тӧд му пытшкӧ туйсӧ, варышлӧн синмыс оз аддзы сійӧс, звер сэті оз ветлы, лев оз тувччыв сэтчӧ.
Морт кералӧ изкырта, путкыльтӧ керӧссӧ подулӧдзыс, писькӧдӧ туйяс изкырта пытшкын, и аддзӧ сэтысь озырлун.
Сійӧ потшӧ ва визувъяс, некор аддзывлытӧмторсӧ вайӧ югыдас.
Но кытысь аддзыны мывкыдлунсӧ?
Кӧні олӧ сюсь вежӧрыс?
Сылысь донсӧ морт оз тӧд, тайӧ муюгыдсьыс сійӧс он аддзы.
Пыдӧстӧм йир шуӧ: «Сійӧ ме пытшкын абу», и саридз шуӧ: «Ме дорын абу».
Сійӧс он ньӧб зарни вылӧ, сылысь донсӧ он артав эзысьӧн, сыысь он мынтысь офирса зарниӧн, сапфирӧн да дона оникс изъясӧн, зарни да дона стеклӧ он ӧткодяв сыкӧд, весалӧм зарниысь вӧчӧм дозлӧн доныс оз лӧсяв сылы.
Коралл да крусталь йылысь и сёрнитнысӧ нинӧм, мывкыдлунсӧ шедӧдӧмыд дона изъясысь на бурджык.
Сыкӧд он ӧткодяв эфиопияса топаз, сыысь он мынтысь весалӧм зарниӧн.
Кытысь локтӧ мывкыдлуныс?
Кӧні олӧ сюсь вежӧрыс?
Сійӧс дзебӧма став ловъя олысьыслӧн синмысь, сайӧдӧма енэжвыв лэбачьясысь.
Пыдӧстӧминыс да кулӧмыс шуӧны: «Ми сӧмын пель йылӧн кывлім сы йылысь».
Сӧмын Енмыс тӧдӧ мывкыдлун дорӧ туйсӧ, тӧдӧ сылысь оланінсӧ.
Сылы тыдалӧ муыс помсянь помӧдзыс, Сійӧ аддзӧ ставсӧ енэж увсьыс.
Кор Енмыс тӧврулы сетіс вын, кымӧръяслы мурталіс ва, зэрлы сетіс индӧдъяс, чард-гымлы урчитіс туй, сэки Сійӧ аддзис мывкыдлунсӧ да донъяліс сійӧс, тӧдмаліс мывкыдлунсӧ да вынсьӧдіс сійӧс. Мортлы Енмыс шуис: «Господьысь полӧм эм мывкыдлун, лёксьыс ылыстчӧм эм сюсь вежӧр».
Иов водзӧ сёрнитіс:
— Вӧлі кӧ эськӧ менам олӧмӧй воддза кодьыс, сійӧ лунъясыс кодь, кор Енмыс видзис менӧ. Сылӧн биыс ӧзъяліс ме весьтын, Сылӧн югӧр улын ме муні пемыдыс пыр.
Татшӧм бур лунъяс вӧліны менам, кор Енмыс видзис менсьым чомйӧс, Ставсӧвермысь вӧлі мекӧд, и ныв-пиӧй вӧліны ме гӧгӧр. Сэки менам туйясӧд визувтіс йӧв, изкыртаысь меным вияліс олив вый.
Кор ме петавлі карса дзиръя дорӧ, изэрд вылын пуксьывлі аслам пуклӧсӧ, сэки том йӧз менӧ аддзигӧн саймовтчылісны, пӧрысьяс чеччылісны да сулалісны, карса веськӧдлысьяс чӧв ланьтлісны, вомнысӧ кинас тупкылісны, нималана йӧзлӧн гӧлӧс шыныс лӧньліс, кывйыс ляксьыліс горш бердас.
Кывзысьяс шулісны менӧ шуда мортӧн, аддзылысьяс ошкылісны менӧ, ӧд ме мездывлі отсӧг корысь гӧль мортӧс, дорйылі батьтӧм-мамтӧмӧс, кор сылы некод эз отсав.
Куланвыйӧдз воӧм морт бурсиӧмӧн аттьӧавліс менӧ, дӧваяслысь сьӧлӧмсӧ ме гажӧдлі.
Веськыдлуныс вӧлі меным паськӧмӧн, веськыда мыждӧмыс — кышанӧн да юрвевттьӧдӧн.
Синтӧмлы ме вӧлі синмӧн, коктӧмлы — кокӧн, коньӧръяслы ме вӧлі батьӧн, тӧдтӧм йӧзӧс ме дорйылі ёрд водзын, лёк вӧчысьлысь ме чегъявлі черлысӧ, сылӧн пиньысь нетшыштлі мырддьӧмасӧ.
Ме чайті, мый ме лӧня кула аслам позйын, менам олан лунъяслӧн лыдыс лоӧ лыа чир мында, менам вужъяслы век сюрас ва, менам вожъясӧ узьмӧдчас войся лысва, чайті, пыдди пуктӧмыс ме дінысь оз вешйыв, ньӧввужйӧй менам киын пыр лоӧ зэвтӧма.
Менсьым шуӧмӧс виччысьлісны да кывзылісны, йӧзыс чӧв олісны, кор ме найӧс туйдӧдлі.
Менам кывъяс бӧрын некод нинӧм эз содтыв, менам сёрниӧй ва моз войталіс на вылӧ.
Зэрӧс моз найӧ виччысьлісны менсьым висьталӧмӧс, быттьӧ тувсовъя зэрӧн веськӧдісны горшнысӧ.
Кор налӧн эз нин вӧв лачаныс, менам нюмъялӧмӧй бурӧдліс найӧс, менам чужӧмбанлӧн югыдыс ышӧдліс найӧс.
Ме индылі налы туйсӧ, вӧлі налы юралысьӧн, олі накӧд, кыдзи тышкайӧз пӧвстын ӧксы, вӧлі бурӧдысьӧн бӧрдысьяслы.
А ӧні менӧ сералӧны меысь томджыкъяс. Налысь батьяссӧ ме матӧ эг сибӧдлы, весиг аслам ыж видзан понъяс пӧвстӧ эг лэдзлы.
Мый меным налӧн вына киысь?
Налӧн ёнлуныс кольӧма нин, тшыглун да гӧльлун вӧсна найӧ шӧйтӧны ватӧм му вывті, куш да пемыд овтӧминӧд.
Лежнӧг улысь найӧ нетшкӧны турун, нянь пыдди сёйӧны быдмӧг вужъяс.
Йӧз пӧвстысь найӧс вӧтлӧны, гусясьысьяс вылӧ моз на вылӧ лёкысь горзӧны. Найӧ олӧны ковтысса кырӧмъясын*, му гуранъясын да кырта горсъясын.
Рассялӧминын ружтӧны-омлялӧны, чукӧрӧн йӧжгыльтчӧмаӧсь лежнӧг улӧ.
Налысь нимсӧ вунӧдӧма, найӧ эновтӧм йӧз, асланыс муысь вӧтлӧмаяс.
Найӧ лӧсьӧдлӧны ме йылысь сералана сьылан, гартлӧны менӧ сёрнианыс.
Найӧ зывӧктӧны менӧ, ӧтдортчӧны меысь, сьӧлалӧны меным чужӧмӧ.
Енмыс личӧдіс менам ньӧввужлысь везсӧ, пегыртіс менӧ, та вӧсна найӧс нинӧм оз кут меным лёк вӧчӧмысь.
Тайӧ пеж йылӧмыс кыпӧдчӧ ме вылӧ веськыдладорсянь, найӧ уськӧдӧны менӧ кок йылысь, писькӧдӧны мелань туйнысӧ, мед бырӧдны менӧ.
Менсьым туйӧс потшисны, дасьтысьӧны бырӧдны менӧ, и некод найӧс оз сувтӧд.
Ыджыд розьӧд моз найӧ пырӧны, гора шыӧн уськӧдчӧны ме вылӧ.
Полӧм кытшаліс менӧ, нималӧмӧй тӧвру моз разаліс, шудлунӧй кымӧр моз ылыстчис-вошис.
Менӧ шымыртісны шогӧн тырӧм лунъяс, олӧмӧй эновтӧ менӧ.
Войнас лыясӧй юкалӧны, дойӧй оз ланьтлы.
Енмыс ыджыд вынӧн нетшыштіс паськӧмӧс ме вылысь, дӧрӧм шошаӧд кыскыштіс, шыбитіс менӧ сёй лятиӧ, ме лои бус да пӧим кодь.
Ме чуксала-кора Тэнӧ, Енмӧй, но Тэ меным он вочавидз, ме сулала Тэ водзын, а Тэ сӧмын видзӧдан ме вылӧ.
Тэ чорыд лоин ме дінӧ, дзескӧдан менӧ вына кинад.
Тэ шыбитін менӧ тӧвнырлы, летан-швачйӧдлан менӧ.
Ме тӧда: Тэ менӧ вайӧдан кулӧмас, сэтчӧ, кытчӧ чукӧртчас став ловъя олысьыс.
Тэ вештан китӧ лы чукӧр дінысь, шог дырйиыс он кыв отсӧг корысьӧс.
Эг ӧмӧй ме бӧрдлы сьӧкыдалысь вӧсна, эз ӧмӧй сьӧлӧмӧй шогсьывлы коньӧр вӧсна?
Ме виччыси бурсӧ, но менӧ лёкыс суис, виччыси югыдсӧ, но локтіс пемыдыс.
Пытшкӧсӧй сотчӧ, оз лӧнь, шог лунъяс суисны менӧ.
Ме сьӧдӧді, но эг шондісьыс, йӧз чукӧрын ме горзӧмӧн отсӧг кора.
Шакалъяслы ме лои вокӧн, страусъяслы — ёртӧн.
Кучикӧй сьӧдӧдіс, лыясӧй биа висьӧмысь сотчӧны.
Менам гуслиӧй бӧрдан шы лэдзӧ, пӧлянӧй шог сьыланкыв ворсӧ.
Ме кӧрталі йитӧд аслам синкӧд, мый ог кут кыйявны аньяс вылӧ.
Медвылысса Енсянь мый меным виччысьны?
Енэжвывса Ставсӧвермысьсянь мый меным вичмас?
Бырӧдӧмыс ӧмӧй оз вичмы мыж вӧчысьлы, шогыс — лёк вӧчысьлы?
Менсьым туйясӧс ӧмӧй Енмыс оз аддзы, менсьым воськовъясӧс ӧмӧй оз лыддьы?
Но ме кӧ олі ылӧдчӧмӧн, менам кокӧй кӧ тэрмасис пӧръясьны, сідзкӧ, Енмыс мед пуктас менӧ веськыдлуныслӧн вески вылӧ, сэки Сійӧ аддзас, мый ме абу мыжа.
Менам воськовъясӧй кӧ кежисны веськыд туйысь, сьӧлӧмӧй кӧ син бӧрся вӧтчис, ки пыдӧсӧ кӧ пежыс ляксис, сэки менсьым кӧдзӧмасӧ мед мукӧдъяс сёясны, менсьым став петассӧ мед вужнас нетшкасны.
Менам сьӧлӧмӧй кӧ ыштыліс ань вылӧ, ме кӧ кыйӧдлі матыссалысь гӧтырсӧ сылӧн ӧдзӧс дорас, сэки гӧтырӧй мед мукӧдлы нянь изас, сыкӧд мед мукӧдъяс узьласны. Татшӧм пеж вӧчӧмыс — мыж, мыйысь колӧ мыждыны.
Татшӧм мыжыс эськӧ кушӧдз нетшкис менсьым быдмӧм няньӧс, би моз эськӧ ньылыштіс да бырӧдіс ставсӧ.
Ме кӧ эг вӧв веськыдӧн кесйӧгъяс дінӧ, кор найӧ норасьлісны меным, сэки мый меным вӧчны, кор Енмыс сувтас мыждыны, мый ме вочавидза Сылы?
Ӧд Сійӧ, коді артмӧдіс менӧ мам кынӧмын, артмӧдіс тшӧтш менсьым кесйӧгъясӧс. 
Ми — ӧти Енлӧн вӧчӧмторъяс.
Ме ӧмӧй эг отсавлы гӧльяслы, ме ӧмӧй мӧдӧдлі дӧваӧс бӧрдан синмӧн?
Ӧтнам ӧмӧй сёйлі ассьым няньӧс, эг ӧмӧй юксьывлы сыӧн батьтӧм-мамтӧмъяскӧд?
Том кадсянь ме вӧлі батьтӧм-мамтӧмъяслы бать кодьӧн, став олӧм чӧж тӧждыси дӧваяс вӧсна.
Ме кӧ аддзывлі кынмысьӧс, коді вӧлі куланвыйын, коньӧрӧс, кодлӧн эз вӧв мыйӧн вевттьысьны, сэки менам ыж вурунӧй шонтыліс сійӧс, и сійӧ аттьӧавліс менӧ.
Ме кӧ кыпӧдлі киӧс батьтӧм-мамтӧм вылӧ, тӧдӧмӧн, мый менам эмӧсь дорйысьяс карса дзиръя дорын, сэки менам сойӧй мед орас пельпомысь, менам киӧй мед чегас гырддзаӧд. Енлӧн ыджыдалан выныс водзын ме эськӧ эг вермы сулавны, но ме пола Сылӧн мыждӧмысь.
Ме ӧмӧй лача куті зарни вылӧ, шулі ӧмӧй зарнилы, тэ пӧ менӧ видзысьыс?
Ме ӧмӧй нимкодясьлі, мый менам уна озырлун, мый сы мындасӧ ме аслам киӧн шедӧді?
Шонділысь дзирдалӧмсӧ, тӧлысьлысь пӧртмасьӧмсӧ аддзигӧн менам сьӧлӧмӧй кӧ гусьӧн копрасис налы, ме кӧ ыстылі налы ки пыдӧсын окыштӧмӧс, тайӧ эськӧ тшӧтш вӧлі мыжӧн, мыйысь колӧ мыждыны, тайӧ эськӧ вӧлі Медвылысса Енмысь соссьӧм.
Ме ӧмӧй нимкодясьлі менӧ мустӧмтысьлӧн шог понда, меным ӧмӧй долыд вӧлі, кор сійӧс лёктор суліс?
Ме эг лэдзлы аслам вомлы вӧчны мыжсӧ, ёрны мустӧмтысьлысь олӧмсӧ.
Менам керкаын олысьяслӧн эз вӧв помка шуасьны, мый ме эг лэдз налы пӧттӧдз яй сёйны.
Йӧз муысь локтысьӧс эг кольлы ывлаӧ, менам ӧдзӧсӧй пыр вӧлі восьса.
Мукӧдыс моз кӧ ме вевтти лёк вӧчӧмӧс, питшӧгӧ дзеби мыжӧс, сэки эськӧ ме тіралі йӧз чукӧрын, полі ас войтырлӧн увтыртӧмысь, ме эськӧ чӧв олі да керкаысь эг петавлы.
Кывзіс кӧ эськӧ кодкӧ менӧ!
Аслам кывъяс улӧ ме кырмася.
Ставсӧвермысь мед вочавидзас меным, менӧ Мыжалысь мед гижас мыжалӧмсӧ.
Ме эськӧ новлӧдлі тайӧ гижӧдсӧ пельпом вылын, юркытшӧс моз пукті сійӧс юр вылӧ, висьталі эськӧ Енлы аслам быд воськов йылысь, ӧксы моз эськӧ матыстчи Сы дінӧ.
Аслам видз-муӧй кӧ менӧ мыжалӧ, гӧрӧм муӧй кӧ ме вылӧ элясьӧ, ме кӧ эг тӧждысь муӧй вӧсна, кытысь сёйлі быдтассӧ, ме кӧ увтыртлі сэні уджалысьясӧс, сэки шобді пыдди мед петас йӧн, ид пыдди — ёг турун.
Тайӧ кывъяснас Иовлӧн сёрниыс помасис.
Та бӧрын куимнан ёртыс дугдісны вензьыны Иовкӧд, ӧд сійӧ лыддис асьсӧ веськыдӧн.
Сэки Рам рӧдысь Буз чужанвужйысь Баракеллӧн Элиху пиыс ёна скӧрмис Иов вылӧ сыысь, мый Иов лыддис веськыдӧн асьсӧ, а эз Енсӧ. Скӧрмис тшӧтш Иовлӧн куим ёртыс вылӧ, ӧд найӧ эз сяммыны вочавидзны Иовлы, а мыждісны сійӧс.
Элиху виччысис, медым панны сёрни, ӧд мукӧдыс арлыднас вӧліны сыысь ыджыдджыкӧсь.
Но кор аддзис, мый Иовлӧн куим ёртыс оз вермыны вочавидзны Иовлы, пузис ас пытшкас.
Элиху, Буз чужанвужйысь Баракеллӧн пиыс, шыасис: — Ме том на, а ті ыджыд арлыдаӧсь нин, та вӧсна ме полі, эг лысьт висьтавны сійӧ, мый ме тӧда.
Ме шуи аслым: мед пӧрысьяс сёрнитасны, мед дыр олысьяс велӧдасны мывкыдлунас.
Но ӧд морт пытшкас эм лов, Ставсӧвермысьлӧн лолыштӧмыс сетӧ сылы мывкыдлунсӧ.
Абу сӧмын дыр олысьяс мывкыдаӧсь, оз сӧмын пӧрысьяс гӧгӧрвоны збыльсӧ.
Та вӧсна кывзыштӧй менӧ, а ме висьтала сійӧс, мый тӧда.
Ме виччыси, мый ті шуанныд, сюся кывзі тіянлысь гӧгӧрвоӧдӧмнытӧ, кор ті корсинныд колана кывъяс.
Ме зіли гӧгӧрвоны тіянӧс, но аддза, тіян пиысь некод оз вермы чирыштны Иовӧс, оз вермы воча шуны сылы.
Энӧ шуӧй, мый ті аддзинныд мывкыдлунсӧ. Иовӧс Енмыс чирыштас, а оз морт.
Сійӧ кӧ мекӧд сёрнитіс тіянкӧд моз, менам вочавидзӧмӧй эськӧ эз вӧв тіян кодь.
Тайӧ куим мортыс повзисны, тшӧк ланьтісны, вочакыв оз сетны.
Ме ог кут виччысьны, найӧ кӧ нинӧм оз висьтавны, сулалӧны кӧ да чӧв олӧны. Сідзкӧ, ӧні ме кута сёрнитны, висьтала сійӧ, мый ме тӧда. Ме тырӧма сёрниӧн, ловлы дзескыд пытшкӧсам.
Ме восьттӧм вина доз кодь, выль кучик доз моз дась косясьны.
Висьтала кӧ, меным кокньӧдас, сідзкӧ, восьта вомӧс да вочавидза.
Мортлӧн чужӧм вылӧ видзӧдны ог кут, некодлы шогмыны ог зіль, ӧд ме ог куж пӧръясьны. Татшӧмторсӧ кӧ вӧча, менӧ Вӧчысьӧй бырӧдас менӧ.
Кывзы менӧ, Иов, быд кыв сюркняв пель саяд.
Со, ме восьті вомӧс, кывйӧй вомам чепсасьӧ нин.
Менам кывъясӧй петӧны веськыд сьӧлӧмысь, менам вомӧй висьталӧ збыльсӧ — сійӧ, мый ме тӧда.
Енлӧн Лов вӧчис менӧ, Ставсӧвермысь пӧльыштіс ме пытшкӧ олӧмсӧ.
Верман кӧ, вочавидз меным, сувт ме водзӧ да дорйысь.
Ен водзын ме — тэ кодь жӧ, миянӧс тэкӧд ӧти сёйысь вӧчӧма, та вӧсна эн пов меысь, Иов, ме тэнӧ ог сьӧктӧд.
Аслам пельӧн ме кывлі тэнсьыд сёрнитӧ, кывлі, мый тэ висьталін.
Тэ шуин: «Ме сӧстӧм, лёксӧ эг вӧчлы, ме абу мыжа, и мыжсӧ эг вӧчлы.
Но Енмыс аддзис, мыйысь мыжавны менӧ, Сійӧ лыддьӧ менӧ Аслас вӧрӧгӧн.
Сійӧ сюйис кокӧс тшемилӧ костӧ, кыйӧдӧ менсьым быд воськов».
Ме шуа: тайӧ абу тадз. Енмыс ӧд мортсьыс ёна ыджыд.
Мыйла тэ вензян Сыкӧд, шуан, мортлы пӧ Сійӧ оз вочавидз?
Енмыс висьталӧ ӧтчыд, висьталӧ мӧдысь, но мортыс оз казяв тайӧс.
Вӧтын, войся петкӧдчылӧмын, кор мортсӧ унмыс личкӧма нин, кор сійӧ вугыртӧма нин вольпасяс, 
Енмыс восьтӧ мортлысь пельсӧ, вынсьӧдӧ Ассьыс ӧлӧдӧмсӧ, медым ылыстны мортсӧ лёк вӧчӧмысь, мездыны вылӧ кыпӧдчӧмысь, видзны сійӧс кулӧмысь, сылысь олӧмсӧ — шыпуртысь.
Вольпасьын куйлысьӧс Енмыс чирыштӧ висьӧм пыр, кор сьӧкыд дойыс песлӧдлӧ лыяссӧ. Сэки сылы вомас нянь оз пыр, весиг чӧскыд сёян сылы оз ков.
Сылӧн вир-яйыс син водзас сылӧ, тыдавтӧм лыясыс пондӧны чурвидзны.
Кок пӧвнас сійӧ гуын нин, сылӧн олӧмыс матыстчӧ кулӧмлань.
Но сюрас кӧ андел, сюрс пытшкысь ӧти, коді сувтас висьысь дор да индас сылы веськыд туй, сэки Енмыс бурсьӧлӧмтчас висьысь дінӧ, тшӧктас анделлы мездыны висьысьӧс кулӧмсьыс, ӧд сыысь вештысьӧма нин.
Сэки сылӧн вир-яйыс выльмас, томлуныс сылы бӧр бергӧдчас.
Сійӧ пондас кевмысьны Енлы, и Енмыс бурсьӧлӧмтчас сы дінӧ, сійӧ нимкодясьӧмӧн кутас видзӧдны Енлӧн чужӧмбан вылӧ, и Енмыс бара сетас сылы веськыда овны.
Сьылӧмӧн сійӧ кутас юӧртны йӧзыслы: «Ме мыж вӧчи, эг вӧв веськыд, но Енмыс эз мынтысь меным уджъясӧй серти.
Сійӧ мездіс менӧ гортйӧ водӧмысь, сетіс меным аддзыны югыдсӧ!»
Енмыс тадзи вӧчӧ мортыскӧд кыкысь-куимысь, медым видзны сійӧс кулӧмысь, югдӧдны сійӧс олӧмыслӧн югыднас.
Сюся кывзы менӧ, Иов, чӧв ов, а ме кута висьтавны.
Эм кӧ мыйкӧ шуны, шу, ме кӧсъя, мед тэ колин веськыдӧн.
А шунытӧ кӧ нинӧм, сідзкӧ, кывзы менӧ, ме велӧда тэнӧ мывкыдлунас, а тэ чӧв ов.
Элиху водзӧ сёрнитіс:
— Кывзӧй менсьым висьталӧмӧс, мывкыдаяс, пельнытӧ копыртӧй мелань, вежӧртысьяс!
Вом тӧдмалӧ сёянлысь кӧрсӧ, пель торйӧдӧ кылӧм кывъяс.
Мӧвпалыштамӧй, мый вӧлі шуӧма веськыда, тӧдмаламӧй, мый вӧлі шуӧма бура.
Иов шуис, ме пӧ абу мыжа, но Енмыс менӧ оз веськыда мыжды, ме пӧ збыльсӧ висьтала, но менӧ лыддьӧны пӧръясьысьӧн, менам пӧ абу мыжыс, но дойӧй менам оз бурд.
Сюрас-ӧ Иов кодь лёкӧдысь мортыс, кодлы омӧльтӧмыс ва юӧм кодь? Сійӧ ёртасьӧ мыжаяскӧд, ветлӧ лёк вӧчысьяскӧд ӧти туйӧд.
Сійӧ шуліс, Енмыслы шогмӧмыс пӧ мортлы бурсӧ оз вай.
Сідзкӧ, кывзӧй менӧ, сюсь вежӧраяс!
Енмыс оз вӧч лёксӧ, Ставсӧвермысьлӧн уджъясыс веськыдӧсь. Сійӧ мынтысьӧ мортлы сылӧн уджъясыс серти, сетӧ сылы оласногыс кузя.
Дзик збыльысь Енмыс оз вӧч лёксӧ, Ставсӧвермысь мыждігас оз пӧръясь.
Коді пуктіс Сійӧс юравны муӧн?
Коді сетіс муюгыдсӧ Сылӧн кипод улӧ?
Сійӧ кӧ Ассьыс сьӧлӧмсӧ бергӧдас Асланьыс, Ассьыс ловсӧ да ловшысӧ бӧр босьтас, сэки эськӧ став ловъя олысьыс ӧти здукӧн кулас, мортыс муӧн бӧр лоас.
Тэнад кӧ эм вежӧр, кывзы, сюся кывзы менсьым висьталӧмӧс.
Енмыс кӧ мустӧмтӧ веськыдлунсӧ, вермас-ӧ Сійӧ юравны?
Тэныд-ӧ мыждыны веськыд да вына Енмӧс?
Енмыс ӧксыӧс шуӧ шогмытӧмӧн, нималана йӧзӧс — лёк вӧчысьясӧн, Сійӧ оз сулав юралысьяс дор, озырӧс оз пукты гӧль дорысь вылӧджык, ӧд ставныс найӧ — Сылӧн вӧчӧмторъяс.
Войшӧрнас найӧ тӧдлытӧг кулӧны, войтыръяс шызьӧны-кыпӧдчӧны да бырӧны, вынаясӧс вештӧны, но оз морт киӧн.
Енмыс видзӧдӧ мортлӧн туй бӧрся, аддзӧ сылысь быд воськов.
Абу сэтшӧм пемыдыс, весиг сэтшӧм сап пемыдыс, кытчӧ эськӧ вермисны дзебсьыны мыж вӧчысьяс.
Енмыс оз инды мортлы кадсӧ, кор сылы сувтны Енлӧн ёрд водзӧ.
Юасьтӧг Сійӧ пасьвартӧ вынаясӧс, на пыдди пуктӧ мӧдъясӧс.
Сійӧ бура тӧдӧ налысь уджъяссӧ, ӧти войӧн найӧс песовтӧ да бырӧдӧ.
Лёк вӧчысьясӧс моз Енмыс мыждӧ найӧс ставныслӧн син водзын, мыждӧ сыысь, мый найӧ кежисны Енсьыс, эз кӧсйыны тӧдны Сылысь туйяссӧ. Мыждӧ найӧс, ӧд гӧльяслӧн бӧрдӧмыс воис Сыӧдз, коньӧръяслысь ойзӧмсӧ Сійӧ кыліс.
Енмыс кӧ чӧв ланьтас, коді вермас мыжавны Сійӧс?
Енмыс кӧ вевттяс чужӧмбансӧ, коді вермас аддзыны Сійӧс?
Сійӧ ыджыдалӧ войтыр вылын и торъя морт вылын, медым Ентӧг олысь эз ыджыдав, эз ло войтырыслы налькйӧн.
Морт мед шуас Енмыслы: «Ме нуи сьӧкыдсӧ, водзӧ ог кут вӧчны мыжсӧ.
Ме кӧ мыйкӧ ог гӧгӧрво, велӧд менӧ, вӧчи кӧ лёксӧ, водзӧ ог кут вӧчны».
Аслад пыксьӧмӧн чайтан, мый тэнад кӧсйӧм серти Енмыс мыждӧ да тырдонсӧ сетӧ?
Тэныд аслыд колӧ бӧрйыны, оз меным.
Висьтав, мый тэ тӧдан.
Вежӧра йӧз шуасны меным, мывкыд морт менӧ кывзігӧн шуас, Иов пӧ сёрнитӧ мӧвпавтӧг, сылӧн кывъясыс пӧ вежӧртӧмӧсь.
Иовӧс тӧдмалӧмыс мед оз помась, ӧд сылӧн сёрниыс лёк вӧчысьлӧн кодь.
Мыж дінас сійӧ содтӧ нӧшта на Енлы паныд кыпӧдчӧм, серам туйӧ пуктӧ миянӧс да водзӧ мыжалӧ Енсӧ.
Элиху водзӧ сёрнитіс:
— Тэ асьтӧ шуан Ен дорысь веськыдӧн. Чайтан, мый тайӧ веськыд?
Тэ шуин: «Мый бурыс меным, ме кӧ ӧтдортча мыжсьыс?»
Ме вочавидза тэныд, тшӧтш тэнад ёртъяслы.
Лэпты синтӧ енэжланьыс да видзӧдлы, аддзан, кымӧръясыс тэысь ёна вылынӧсь.
Тэ кӧ мыж вӧчан, тайӧн ӧмӧй тэ Енмыслы паныд вӧчан?
Весиг тэнад уна лёк вӧчӧмыд оз вай Сылы лёксӧ.
Тэ кӧ веськыда олан, мый Сылы тайӧн сетан, мый Сійӧ тэнад кисянь босьтӧ?
Тэнад мыж вӧчӧмыд инмӧ мортлы, тэнад веськыда олӧмыд — мувывса олысьлы.
Йӧзыс ойзӧны дзескӧдӧмысь, горзӧны вынаяслӧн нартитӧмысь.
Но некод оз шу: «Кӧні Енмыс, менӧ Вӧчысьыс? Кӧні Сійӧ, коді войся кадӧ сетӧ сьывны, коді пемӧслы дорысь миянлы унджык сетӧ гӧгӧрвоӧмлунсӧ, енэжвыв лэбачӧс дорысь миянӧс ёнджыка вежӧрсьӧдӧ».
Йӧзыс горзӧмӧн отсӧг корӧны, но налӧн вылӧ кыпӧдчӧм да лёклун вӧсна Енмыс налы оз вочавидз.
Енмыс збыльысь оз кыв налысь ковтӧм кывъяссӧ, Ставсӧвермысь оз видзӧдлы на вылӧ.
Тэ шуан, мый тэ Енсӧ он аддзы, но виччысь Сійӧс, ӧд тэнсьыд могтӧ Сійӧ кутас видлавны.
Енмыс кӧ Аслас скӧрлунӧн оз мыжды, Сылы кӧ веськодь мортлӧн мыжыс, сідзкӧ, Иов весьшӧрӧ вомсӧ восьтіс, шыбласис мӧвпышттӧм кывъяснас.
Элиху водзӧ сёрнитіс:
— Кывзышт на менӧ, Иов, менам эм на мый тэныд Енсянь висьтавны.
Менам тӧдӧмлунӧй пыдісянь, ме петкӧдла, мый менӧ Вӧчысьӧй веськыд. Дзик збыльысь менам кывъясын ылӧгыс абу, тэ водзын — ыджыд тӧдӧмлуна морт.
Енмыс некодӧс оз увтырт, Сійӧ мывкыд да ыджыд вына.
Лёк вӧчысьӧс Сійӧ оз коль ловйӧн, коньӧрлы веськыдлун серти вӧчӧ.
Веськыда олысьяс вылысь Сійӧ синсӧ оз вештыв, пуксьӧдӧ найӧс юравны ӧксыяскӧд, вылӧ кыпӧдӧ найӧс пыр кежлӧ.
Чептӧн дорӧмаяслы, сьӧкыдас йӧрмӧмаяслы Енмыс петкӧдлӧ налысь уджъяссӧ — лёк вӧчӧмсӧ да ыкшаасьӧмсӧ. Енмыс восьтӧ налысь пельсӧ да ӧлӧдӧ найӧс, тшӧктӧ ылыстчыны лёксьыс.
Кывзасны кӧ да пондасны кесъявны Сылы, сэки олан лунъясыс налӧн лоӧны шудаӧсь, олан нэмыс тырас нимкодьлунӧн.
Оз кӧ кывзыны, шыпуртысь моз куласны, тӧдӧмлунтӧг вуджасны мӧдаръюгыдас.
Ентӧг олысьяслӧн сьӧлӧмыс скӧрлунӧн тырӧма, найӧ оз шыасьны Енмыс дінӧ весиг сэки, кор Сійӧ чепъясӧн найӧс дорӧ.
Налӧн олӧмыс помасьӧ том кадӧ, найӧс кулӧмыс виччысьӧ кырсалысьясӧс моз.
Но коньӧрӧс Енмыс мездӧ шог пыр, восьтӧ сылысь пельсӧ сьӧкыдалӧм пыр.
Сійӧ эськӧ тшӧтш тэнӧ петкӧдіс дзескыдінсьыд паськыдінӧ, кӧні топӧдӧмыс абу, и тэнад пызаныд эськӧ тыр вӧлі чӧскыд сёянӧн.
Но тэнӧ суис мыждӧм лёк вӧчӧмсьыд, и тэнӧ лоӧ веськыда мыждӧма.
Видзчысь, мед Енлӧн скӧрлуныс эз бырӧд тэнӧ!
Ыджыд дон мынтӧмыд тэнӧ оз мезды.
Мездас-ӧ тэнӧ отсӧг йылысь горзӧмыд, отсалас-ӧ тэныд мый вынсьыд уджалӧмыд?
Эн виччысь сійӧ войсӧ, кор войтыръясӧс суас бырӧдӧм.
Видзчысь лёкас сетчӧмысь, сьӧкыдалӧм пыдди эн бӧрйы лёксӧ.
Видзӧд, кутшӧм ыджыд Енлӧн выныс! Сюрас-ӧ Сы кодь велӧдысьыс?
Коді индас Сылы туйсӧ?
Коді вермас шуны, мый Сійӧ оз веськыда вӧч?
Эн вунӧд ошкыны Сылысь уджъяссӧ, мый йылысь йӧзыс сьылӧны.
Став йӧзыс аддзӧны, но сӧмын ылісянь видзӧдӧны Сылӧн уджъясыс вылӧ.
Енмыс сэтшӧм ыджыд, ми огӧ вермӧй тӧдмавны Сійӧс, огӧ вермӧй артавны Сылысь вояссӧ.
Сійӧ чукӧртӧ ва войтъяс, сэсся зэрӧн кисьтӧ, найӧ войталӧны кымӧрсянь, сувтса зэрӧн киссьӧны йӧз вылӧ.
Коді вермас гӧгӧрвоны, кыдзи Сійӧ ӧшлӧ кымӧръяссӧ? Коді вермас гӧгӧрвоны Енлӧн оланінсянь гымыштӧмсӧ?
Енэж пасьтала Сійӧ койыштӧ чардбисӧ, саридз пыдӧссӧ Сійӧ пӧдлалӧ.
Зэр кисьтӧмӧн Сійӧ мыждӧ войтыръясӧс, зэр отсӧгӧн сетӧ налы тырмымӧн нянь.
Сылӧн киын чардбиыс, тшӧктӧ лыйны, кытчӧ колӧ.
Гымыштӧмыс юӧртӧ Сы йылысь, весиг пемӧсъяс тайӧс гӧгӧрвоӧны.
Таысь менам сьӧлӧмӧй тіралӧ, чеччалӧ морӧсын.
Кывзӧй, кывзӧй Енлысь гӧлӧс шысӧ, Сылӧн вомысь петӧ гымалӧм.
Гым шыыс разалӧ енэж пасьтала, чардбиыс югнитӧ му помӧдзыс.
Чардыштӧм бӧрын гораа гымыштӧ, Енмыс лэдзӧ Ассьыс ён гӧлӧссӧ, оз сувтӧд чардалӧмсӧ.
Енлӧн гымалан шыыс шензьӧдана, Сылысь ыджыд уджъяссӧ ми огӧ вермӧй гӧгӧрвоны.
Лымлы Сійӧ шуӧ: «Усь му вылас», зэрлы тшӧктӧ войтасьны, и тшӧктӧ чорыда зэрны.
Енмыс сэки падмӧдӧ йӧзлысь уджсӧ, медым быдӧн тӧдіс Енлысь уджъяссӧ.
Весиг звер пырӧ аслас пырмӧсӧ, пукалӧ аслас сайӧдчанінын.
Лунвывсянь кыпӧдчӧ бушков, войвывсянь пӧльтӧ кӧдзыд тӧв.
Енлӧн пӧльыштӧмысь артмӧ йи, кынмӧ ва веркӧс.
Сійӧ тыртӧ кымӧрӧс ваӧн, Сылӧн чардбиыс сявкйӧ кымӧрсянь. Енлӧн шуӧм серти кымӧръяс кытшлалӧны му весьтті, вӧчӧны сійӧ, мый Енмыс тшӧктӧ.
Енмыс ыстӧ найӧс, медым мыждыны мусӧ, и ыстӧ, медым бурсьӧлӧмтчыны.
Пель саяд сюркняв тайӧс, Иов, зіль гӧгӧрвоны Енлысь шензьӧданаторъяссӧ!
Тэ ӧмӧй тӧдан, кыдзи Енмыс веськӧдлӧ кымӧръясӧн, кыдзи чардбиыс югнитӧ Сылӧн кымӧрсянь?
Тӧдан-ӧ, кыдзи ӧшалӧны кымӧръяс, гӧгӧрвоан-ӧ Ставсӧтӧдысьлысь шензьӧданаторъяссӧ?
Кор пӧльтӧ лун тӧв да пӧжӧ мусӧ, сэки тэнӧ пӧсьӧдӧ паськӧмыд.
Тэ ӧмӧй Енмыскӧд артмӧдін енэжсӧ, ыргӧн рӧмпӧштан кодь ёнӧн вӧчин енэжвевтсӧ?
Сідзкӧ, велӧд миянӧс, мый шуны Енмыслы, тайӧ пемыдыс вӧсна ми нинӧм огӧ вежӧртӧй.
Коді висьталас Сылы менсьым кывъясӧс?
Воас-ӧ Сыӧдз мортлӧн шуӧмыс?
Ӧні кымӧр сайсянь оз тыдав югыдыс, но тӧвру пӧльыштас и вештас кымӧръяссӧ.
Войвывсянь локтӧ зарни кодь югӧр, Енсӧ кытшалӧ повзьӧдана дзирдалӧм.
Ми огӧ вермӧй шымыртны Ставсӧвермысьӧс, Сійӧ ён вына, веськыда мыждӧ, Сылӧн эм веськыдлун, Сійӧ некодӧс оз увтырт.
Та вӧсна быдӧн мед вежавидзӧмӧн полас Сыысь. Сійӧ оз видзӧд на вылӧ, кодъяс лыддьӧны асьнысӧ мывкыдаӧн.
[Кор Элиху помаліс сёрнисӧ,] Господь шыасис Иов дінӧ бушков пытшсянь:
— Коді тэ сэтшӧмыс, мый Менсьым мывкыдлунӧс аслад вежӧртӧм сёрниӧн вевттян?
Вӧнясь тышкаморт моз!
Ме кута юасьны, а тэ Меным вочавидз.
Кӧні тэ вӧлін, кор Ме пукті муыслы подувсӧ?
Висьтав, тӧдан кӧ.
Тӧдан-ӧ, коді индіс муыслы мурталан пассӧ?
Коді муӧд нюжӧдіс мурталан кӧвсӧ?
Муыслӧн подулыс мый вылӧ мыджсьӧ? Коді пуктіс сылысь пельӧс изсӧ, кор асъя кодзувъяс нимкодясисны, кор Енлӧн пияныс долыда горзісны?
Коді тупкис саридзлысь дзиръяяссӧ, кор ваыс му пытшсьыс ыльӧбтіс? Ме пасьтӧді саридзсӧ кымӧръясӧн, гартышті сійӧс пемыднас, потшӧсалі сійӧс, сувтӧді дзиръяяс да пукті иган-тасъяс, шуи сылы: «Татчӧдз паськӧдчан, водзӧсӧ он вудж, тані помасяс тэнад гыяслӧн вывтіасьӧмыс».
Тэ ӧмӧй тшӧктін асылыслы югдыны, асъя кыалы индін, кӧні петны, медым сійӧ босьтіс мусӧ помъясӧдыс да пыркнитіс сы вылысь став лёк вӧчысьсӧ, уна рӧма паськӧмӧн пасьтӧдіс мусӧ, сёй вылӧ моз вӧчис выль серпас, лёк вӧчысьяслысь югыдсӧ босьтіс, налысь ыршасян кияссӧ чегъяліс?
Лэччылін-ӧ тэ саридз пыдӧсӧдз, ветлӧдлін-ӧ тэ сылӧн пыдӧстӧминӧд?
Воссьыліс-ӧ тэ водзын кулӧмыслӧн ӧдзӧсыс, аддзылін-ӧ тэ сап пемыдас пыранінсӧ?
Тэ ӧмӧй тӧдан муыслысь пасьтасӧ?
Тӧдан кӧ ставсӧ тайӧс, висьтав.
Кӧні туйыс югыдыслӧн оланінӧ? Кӧні олӧ пемыдыс?
Тэ ӧмӧй пемыдсӧ бӧр нуӧдан оланінас, тэ ӧмӧй тӧдан туйсӧ сылӧн керка дінӧ?
Дерт, тэ тӧдан. Тэ, буракӧ, чужӧмыд югыдсьыс да пемыдсьыс водзджык, тэнад олан лунъяслӧн лыдыс вывті уна.
Пыралін-ӧ тэ лым видзанінъясӧ, аддзылін-ӧ тэ шерлысь йӧртӧдъяссӧ? Ме видза найӧс сьӧкыд кад кежлӧ, тышӧ петан лун кежлӧ.
Кутшӧм туйвизьясӧд югыдыс паськалӧ, кыті кытшлалӧ му вылын асыв тӧв?
Коді писькӧдӧ зэрлы туйсӧ, восьтӧ гымньӧвлы ордымсӧ, медым киськавны эновтӧм му, овтӧмин, кӧні морт оз тыдав, медым юктавны кушин, быдтыны сэні веж турун?
Эм-ӧ зэрлӧн батьыс?
Коді чужтӧ лысва войтсӧ?
Кодлӧн кынӧмысь петӧ йи? Коді чужтӧ енэжвыв гыӧр, медым ваыс лои из кодь чорыд, медым пыдӧстӧм йирлӧн веркӧсыс йизис?
Верман-ӧ тэ гӧрддзавны Корӧся кодзув чукӧр, разьны Куима кодзув чукӧрлысь вӧньсӧ?
Верман-ӧ быд кодзув чукӧр петкӧдны ас кадӧ, нуӧдны Сизима кодзулӧс челядьыскӧд?
Тэ ӧмӧй тӧдан енэжлысь индӧдъяссӧ, тэ-ӧ индан, кыдзи енэжыслы ыджыдавны му вылын?
Верман-ӧ тэ горӧдны кымӧръяслы, медым найӧ ыльӧбтасны тэ вылӧ сувтса зэр?
Верман-ӧ лыйны гымньӧвйӧн, шуас-ӧ сійӧ тэныд, ме пӧ дась лыйны?
Коді петуклы сетіс гӧгӧрвоӧмлунсӧ, ибислы — мывкыдлунсӧ?
Коді аслас мывкыдлунӧн вермас артавны кымӧръяс? Коді доровтас енэжвывса ва дозъяс, кор муыс чорзьӧма, ёкмыльтчӧма тшалакӧ?
Тэ ӧмӧй кыян левлы кыйдӧссӧ, тэ ӧмӧй вердан левлысь пиянсӧ, кор найӧ куйлӧны асланыс сайӧдчанінын, кыйӧдчӧны турун пӧвстын?
Тэ ӧмӧй сёян дасьтан кырнышлы, кор сылӧн пияныс горзӧны Енмыслы, тшыг кынӧмӧн котралӧны?
Тӧдан-ӧ тэ керӧсвыв кӧзалысь чужтысян кадсӧ, тӧждысян ӧмӧй вайсьысь лань вӧсна?
Сямман-ӧ тэ артавны налысь нӧбасян кадсӧ, тӧдан ӧмӧй чужтан здуксӧ?
Вайсиганыс найӧ лажыньтчӧны, сьӧкыд нопйӧс моз йӧткыштӧны чужысьӧс.
Пияныс быдмӧны-ёнмӧны видз вылын, сэсся мунӧны мамныс дорысь да бӧрсӧ оз нин локны.
Коді лэдзис ризъявны вӧлявывса осёлӧс? Коді разис сійӧс кӧртӧдысь? Ме овмӧді сійӧс ласта вылӧ, сеті сылы оланінсӧ солаинысь.
Сылы тешкодь йӧзӧн жуысь каръяс, сылы оз ков кывзыны уджӧдысьлысь горзӧмсӧ, сійӧ йирсьӧ керӧсъяс вылын, корсьӧ сэтысь веж турунтор.
Кутас-ӧ уджавны тэ вылӧ вӧлявывса ӧш, узьмӧдчас-ӧ сійӧ тэнад лясни дорӧ?
Верман-ӧ тэ сійӧс доддявны, кутас-ӧ сійӧ гӧрны-агсавны тэнсьыд мутӧ?
Сылӧн ыджыд выныс вылӧ ӧмӧй пондан лачатӧ кутны, сы вылӧ ӧмӧй уджъястӧ ӧшӧдан?
Кутан ӧмӧй эскыны, мый сійӧ ваяс няньтӧ да тэчас гумла вылад?
Страус долыда швачкӧ бордъяснас, но аист моз сійӧ оз лэбав.
Страус кольӧ ассьыс колькъяссӧ му вылӧ, медым пӧжсисны пӧсь лыа вылын. Сійӧ юрас оз кут, мый ветлысь вермас лямӧдны найӧс, пемӧс вермас талявны кок улас.
Сійӧ кын сьӧлӧма пияныс дінӧ, быттьӧ найӧ абу сылӧн, аслас мырсьӧм-вайсьӧмыс сылы веськодь, ӧд Енмыс абу сетӧма сылы мывкыдлунсӧ, абу козьналӧма гӧгӧрвоӧмлунсӧ.
Но кор страус ӧддзӧдчӧ, вӧлӧс да сы вылын верзьӧмаӧс серамтуйӧ кольӧ.
Тэ ӧмӧй вӧвлы вынсӧ сетін, бурысьӧн сьылісӧ вевттин?
Тэ ӧмӧй велӧдін сійӧс чеччавны саранча моз?
Сылӧн гораа корскӧмыс повзьӧдана, сійӧ нимкодьпырысь кок увсьыс мусӧ гудйӧ, аслас выннас тышӧ нырччӧ.
Сылы веськодь повзьӧдлӧмыс, сійӧ оз тірав, шыпуртысь оз пышйы.
Сы вылын гольскӧ верзьӧмалӧн ньӧвпуртӧс, дзирдалӧны ёсь шыяс.
Ыззьӧмысла котӧртігас чашнитӧ мусӧ, сійӧ оз сулав буксан шы кылігӧн.
Буксігӧн сійӧ гораа гӧрдлӧ, ылісянь исалӧ тышлысь дуксӧ, кылӧ тыш мунӧмсӧ да веськӧдлысьяслысь горӧдӧмсӧ.
Тэнад мывкыдлун вӧсна ӧмӧй варыш лэбалӧ, шевкнитӧ ассьыс бордъяссӧ лунвывлань?
Тэнад шуӧмысь ӧмӧй кутш кыпӧдчӧ, джуджыд керӧс йылын позсӧ лӧсьӧдӧ?
Сійӧ олӧ джуджыд изкырта вылын, узьлӧ сибавтӧм изъя тшупӧд вылын.
Сэсянь сійӧ кыйӧдӧ аслыс сёян, синмыс сылӧн ылӧдз аддзӧ.
Кӧні шой, сэтчӧ сійӧ лэбӧ, пиянсӧ вирӧн вердӧ.
Господь нӧшта шуис Иовлы:
— Вермас-ӧ Ставсӧвермыськӧд вензьысь велӧдны Сійӧс?
Енмӧс мыжалысь мед вочавидзас Сылы.
Сэки Иов воча шуис Господьлы:
— Ме — шогмытӧм!
Мый ме верма вочавидзны Тэныд?
Тупка вомӧс киӧн.
Ме шулі ӧтчыдысь, а ӧні кыв ог лэдз, шулі кыкысь, а ӧні тшӧк ланьта.
Господь бара шыасис Иов дінӧ бушков пытшсянь:
— Вӧнясь тышкаморт моз!
Ме кута юасьны, а тэ Меным вочавидз.
Тэ шуан, мый Ме ог веськыда мыжды, мыжалан Менӧ, мед дорйыны асьтӧ.
Тэнад ӧмӧй Енлӧн кодь выныд, тэ ӧмӧй верман Сы моз гымыштны?
Вевттьы асьтӧ ӧксылӧн кодь дзирдлунӧн, пасьтӧд асьтӧ ыджыдалан вынӧн, кисьт ассьыд ыпъялан скӧрлунтӧ, нюкырт вылӧ кыпӧдчысьясӧс, раммӧд ышнясьысьясӧс, лямӧд лёк вӧчысьясӧс асланыс сулаланінын, ставнысӧ найӧс тырт мунас, чужӧмнысӧ вевттьы сап пемыднас, сэки Ме ошка тэнӧ, ӧд тэ верман мездыны ачыд асьтӧ.
Видзӧдлы бегемот вылӧ — и сійӧс, и тэнӧ Ме вӧчи.
Сійӧ ӧш моз сёйӧ турун, сылӧн лядьвейыс ён, кынӧм яйчигыс чорыдсьыс-чорыд.
Сійӧ ӧвтчӧ сус пу кодь чорыд бӧжнас, лядьвей сӧнъясыс кыӧм гез кодьӧсь, лыяссӧ быттьӧ ыргӧнысь вӧчӧма, сюрса лысӧ — кӧртысь.
Енмыслӧн став вӧчӧмторсьыс сійӧ медвына, сӧмын Вӧчысьыс вермӧ лэптыны сы вылӧ шыпуртсӧ.
Керӧсъяс вердӧны сійӧс, вӧлявывса пемӧсъяс котралӧны сыкӧд орччӧн.
Сійӧ шойччӧ пашкыр пу улын, куйлӧ вадйын эжӧр пӧвстын.
Пашкыр пуяс сайӧдӧны сійӧс вуджӧрнаныс, юдорса бадьяс кытшалӧны сійӧс.
Бузгысь юысь сійӧ оз пов, сійӧ лӧнь, весиг кӧ Йӧрдан юын ваыс ныр-вомӧдзыс.
Коді вермас кутны сійӧс синмас видзӧдӧмӧн, крукыштны нырӧдыс багырӧн.
Верман-ӧ тэ вугырӧн кыйны левиафанӧс, гезйӧн кыскыны сійӧс кывйӧдыс?
Пысалан-ӧ тэ эжӧрысь кыӧм кӧв сылӧн ныр розьӧ, писькӧдан-ӧ ёсь беддьӧн сылысь черлысӧ?
Пондас-ӧ сійӧ кевмӧмӧн корны тэнӧ, сёрнитны тэкӧд небыда?
Кӧрталас-ӧ сійӧ тэкӧд йитӧд, босьтан-ӧ тэ сійӧс кесйӧгӧ пыр кежлӧ?
Пондан-ӧ ворсӧдчыны сыкӧд лэбачкӧд моз, сетан-ӧ нывъясыдлы кӧв йылысь новлӧдлыны сійӧс?
Пондасны-ӧ вузасьны сыӧн чери кыйысьяс, юкласны-ӧ сылысь яйсӧ ас костаныс ханаанса вузасьысьяс?
Верман-ӧ розьӧдны сылысь кучиксӧ ёсь шыӧн, писькӧдны сылысь юрсӧ пыридзӧн?
Лэптан кӧ китӧ сы вылӧ, сыкӧд вермасьӧмтӧ некор он вунӧд, и мӧдысь он нин вӧч тадзи.
Левиафанӧс вермӧм вылӧ лачаыс ылӧдлӧ мортӧс, сійӧс аддзӧмысь нин мортыс кок йывсьыс усьӧ.
Весиг збой морт оз кут скӧрмӧдны сійӧс.
Сідзкӧ, коді нӧ вермас сулавны Менам чужӧмбан водзын?
Коді Меным мыйкӧ водзвыв юӧртліс, медым Меным ковмис бурӧн мынтысьны сылы?
Ставыс, мый енэж улас — Менам!
Висьтала левиафанлӧн вир-яй юкӧнъяс йылысь, сылӧн вын йылысь, сылӧн лӧсьыд мыгӧр йылысь.
Коді вермас пӧрччӧдны сійӧс, лысьтас кыкпӧвста черлыас инмӧдчыны?
Коді вермас восьтны сылысь черлысӧ?
Сылӧн чурвидзысь пиньясысь быдӧн повзяс.
Кӧрт кодь сайӧдъясӧн вольсалӧм мышкыс — сылӧн ошйысянтор, найӧс топыда йитлӧма, найӧ ляскысьӧмаӧсь ӧта-мӧд бердас, весиг сынӧд оз вермы костӧдыс пырны.
Найӧ сэтшӧма йитчӧмаӧсь, мый торйӧднысӧ он вермы.
Сылӧн несйыштӧмысь югдылӧ, сылӧн синмыс асъя кыа кодь, вом пытшсьыс би чепӧсйӧ, бикиньыс сявкйӧ, нырсьыс тшын пуркйӧ пусян пӧрт улысь моз, лолыштӧмнас ӧгыр ӧзтӧ, вомсьыс ыпъялысь би петӧ.
Сылӧн выныс сьыліас, водзвылас котӧртӧ повзьӧдлӧм.
Чиг яйыс сылӧн топыд, оз сыркъяв, сьӧлӧмыс из кодь чорыд, изки кодь ён.
Кор сійӧ мыччысьӧ, вынаяс повзьӧны, полӧмысла шӧйӧвошӧны.
Шыпуртӧн сійӧс он бытшкы, ёсь шыӧн, пуртӧн да ньӧвйӧн сійӧс он босьт.
Кӧртыд сылы идзас кодь, ыргӧныд — сісь пу кодь.
Ньӧвйысь сійӧ оз пышйы, лыйӧм изйыд сылы кыд кодь.
Нӧшкыд сылы идзас кодь, ёсь шылӧн шутёвтӧм вылӧ сійӧ видзӧдӧ сералӧмӧн.
Кынӧмув кучикыс ёсь йӧнгыльяса, вадорті кыссигӧн гӧрӧ мусӧ.
Саридз пыдӧсын сы гӧгӧр ваыс пуӧ пӧртйын моз, саридзсӧ вӧчӧ варкйысь вый кодьӧн.
Кывтігас бӧрсяньыс кольӧ югыд туйвизь, пемыд ваыс лоӧ дзормӧм рӧма.
Левиафан кодь мӧдыс му вылас абу, сійӧ нинӧмысь оз пов, вынаджыкъяс вылӧ сійӧ видзӧдӧ повтӧг, зверъяслы сійӧ — ӧксы.
Иов воча шуис Господьлы:
— Ме тӧда, мый Тэ ставсӧ верман, Тэнӧ некод оз вермы кутны Аслад шуӧм серти вӧчӧмысь.
Тэ шуин: «Коді тэ сэтшӧмыс, мый Менсьым мывкыдлунӧс аслад вежӧртӧм сёрниӧн вевттян?»
Ме татшӧмыс, сёрниті гӧгӧрвотӧг, висьталі тӧдтӧг сы йылысь, мый оз вермы тӧрны менам вежӧрӧ.
Тэ шуин: «Кывзы, мый Ме висьтала, Ме кута юасьны, а тэ Меным вочавидз».
Енмӧй, таӧдз ме сӧмын пель йылӧн Тэ йылысь кывлі, а ӧні аддза Тэнӧ.
Та вӧсна шуӧм кывъясӧс ме бӧр босьта, бус да пӧим пытшкын пукалӧмӧн каитча.
Иовкӧд сёрнитӧм бӧрын Господь шуис теманса Элифазлы: «Менам скӧрлунӧй ыпъялӧ тэ вылӧ да тэнад кык ёрт вылӧ, ӧд ті энӧ висьталӧй збыльсӧ Ме йылысь, кыдзи вӧчис Менам Иов кесйӧгӧй.
Та вӧсна босьтӧй сизим ӧшкӧс, сизим межӧс да мунӧй Менам Иов кесйӧг дінӧ. Вайӧй ас вӧснаныд сотан вись, а Менам Иов кесйӧгӧй кевмысяс тіян вӧсна. Ме сибӧда сылысь кевмысьӧмсӧ — тадзи тіянӧс ог янӧд сыысь, мый ті энӧ висьталӧй збыльсӧ Ме йылысь, кыдзи вӧчис Менам Иов кесйӧгӧй».
Теманса Элифаз, шуахса Вилдад да наамаса Софар мунісны да вӧчисны, кыдзи тшӧктіс налы Господь. Господь сибӧдіс Иовлысь кевмысьӧмсӧ сылӧн ёртъясыс вӧсна.
Та бӧрын Господь сетіс Иовлы ставсӧ кык пӧв унджык, мый сылӧн вӧлі водзынсӧ.
Иов дінӧ локтісны сылӧн чой-вокыс да важ тӧдсаясыс. Найӧ ӧтлаын сёйисны-юисны Иов ордын, бурӧдісны-ышӧдісны сійӧс став сьӧкыд нуӧмсьыс, мый сылы вӧлі ыстӧма Господь. Быдӧн козьналіс Иовлы зарни чунькытш да эзысь.
Господь бурсиис Иовлысь бӧръя лунъяссӧ воддза дорсьыс ёнджыка на. Сылӧн вӧлі дас нёль сюрс ыж-кӧза, квайт сюрс верблюд, кык сюрс доддялан ӧш да сюрс энь осёл.
Сылӧн чужис сизим пи да куим ныв.
Ӧти нылыслы сійӧ сетіс Емима ним, мӧдыслы — Кассия, коймӧдыслы — Керен-Хаппук.*
Став му пасьталаыс Иовлӧн нывъяс дорысь мичаджыкъясыс эз вӧвны. Вокъясныслы моз батьныс сетіс налы быдӧнлы аслас овмӧс-эмбурысь юкӧн.
Сьӧкыд нуӧм бӧрын Иов оліс нӧшта на сё нелямын во. Сійӧ аддзыліс аслас челядьлысь да налӧн челядьлысь олӧмсӧ нёльӧд чужанвужйӧдз.
Иов куліс пӧрысь кадӧ олӧмнас пӧтӧмаӧн.
abu
==ПСАЛТЫР
{Еврей йӧз (комиӧдіс Kodko) @ 1 псалом @ религ. гижӧд @ Библия @ 2021 @ Лб. .}
1 псалом 
Давидлӧн псалом.
Шуда сійӧ, коді оз ов лёк вӧчысь моз, оз ветлы мыжаяслӧн туйӧд, оз пукав Енсӧ омӧльтысьяслӧн чукӧрын. Сійӧ кӧсйӧ овны Господьлӧн Индӧд серти, мӧвпалӧ та йылысь лун и вой.
Сійӧ лоӧ визув ю дорын быдмысь пу кодь, ас кадӧ вайӧ вотӧс, сылӧн коръясыс оз косьмыны.
Быд удж сылӧн кутас артмыны.
Но лёк вӧчысьяслӧн оз ло тадзи. Найӧ лоӧны [му вылысь] тӧвнырӧн нӧбӧдан кыд кодьӧсь.
Та вӧсна лёк вӧчысьясӧс лоӧ мыждӧма, мыж вӧчысьяс оз лоны веськыда олысьяслӧн чукӧрын.
Господь тӧдӧ веськыда олысьяслысь туйсӧ, а лёк вӧчысьяслӧн туйыс нуӧдӧ кулӧмӧ.
{Еврей йӧз (комиӧдіс Kodko) @ 2 псалом @ религ. гижӧд @ Библия @ 2021 @ Лб. .}
2 псалом
Давидлӧн псалом.
Мыйла шызьӧны войтыръяс, мыйла мӧвпалӧны ковтӧмсӧ?
Мувывса ӧксыяс ӧтувтчӧны, ыджыдалысьяс кыпӧдчӧны Господьлы паныд да Сылӧн Мавтыштӧмалы паныд, шуӧны:
«Разям ас вылысь налысь кӧртӧдъяссӧ, шыбитам ас вылысь налысь чепъяссӧ!»
Но енэжъясын Олысь сералас на вылын, Господь янӧдас найӧс.
Аслас скӧрлунӧн Сійӧ повзьӧдас найӧс, дӧзмӧмӧн шуас налы:
«Ме мавтышті Ассьым Ӧксыӧс да сувтӧді Сійӧс Сионӧ, Менам вежа керӧс вылӧ».
Ме висьтала Господьлысь кывъяссӧ.
Сійӧ шуис Меным: «Тэ — Менам Пи, талун Ме лои Тэныд Батьӧн.
Кор Менсьым, и Ме вичмӧда Тэныд войтыръясӧс, сета Тэнад кипод улӧ став муюгыдсӧ.
Тэ бырӧдан войтыръясӧс кӧрт беддьӧн, сёй дозмукӧс моз жуглан найӧс торпыригӧдз».
Сідзкӧ, вежӧрсялӧй, ӧксыяс!
Лоӧй мывкыдаӧсь, мувывса ыджыдалысьяс!
Кесъялӧй Господьлы полӧмпырысь, [Сы водзын] нимкодясьӧй вежавидзӧмӧн.
Вылӧ пуктӧй Писӧ, медым Сійӧ эз скӧрмы, и медым ті энӧ кулӧй туй выланыд, ӧд Сылӧн скӧрлуныс регыд нин ыпнитас.
Шудаӧсь Сы вылӧ лача кутысьяс.
{Еврей йӧз (комиӧдіс Kodko) @ 3 псалом @ религ. гижӧд @ Библия @ 2021 @ Лб. .}
3 псалом
Давидлӧн псалом, кор сійӧ пышйис аслас Авессалом пиысь.
Господьӧй, кутшӧма содіс дзескӧдысьяслӧн лыдыс!
Унаӧн кыпӧдчӧны меным паныд, унаӧн сёрнитӧны ме йылысь, Енмыс пӧ оз мезды сійӧс.
Но Тэ, Господьӧй, менам сайӧдыс, ме ошка Тэнӧ. Тэ кыпӧдан менсьым юрӧс.
Ме шыася Господь дінӧ, и Сійӧ вочавидзас меным Аслас вежа керӧссянь.
Ме вода, узя да чечча, ӧд Господь видзӧ менӧ.
Лыдтӧм-тшӧттӧм йӧз чукӧр усьласьӧ ме вылӧ, но ме ог повзьы наысь.
Кыпӧдчы, Господьӧй!
Мезды менӧ, Енмӧй!
Тэ жуглан мустӧмтысьяслысь тшӧка лысӧ, кисьтан лёк вӧчысьяслысь пиньнысӧ.
Мездмӧмыс — Господьсянь.
Господьӧй, Тэ бурсиан Ассьыд войтыртӧ.
{Еврей йӧз (комиӧдіс Kodko) @ 4 псалом @ религ. гижӧд @ Библия @ 2021 @ Лб. .}
4 псалом
Сьылысьясӧн веськӧдлысьлы.
Ворсӧны струнаа ворсанторйӧн.
Давидлӧн псалом.
Кор ме шыася Тэ дінӧ, вочавидз меным, веськыда вӧчысь Енмӧй!
Кор меным вӧлі дзескыд, Тэ восьтін меным петан туйсӧ.
Кыв менсьым кевмӧмӧс, ло бур сьӧлӧма ме дінӧ.
Морт пиян, дыр-ӧ ті понданныд лёкӧдны менсьым нималӧмӧс, дыр-ӧ ті понданныд радейтны ковтӧмсӧ да корсьны ылӧгсӧ?
Тӧдӧй, мый Господь торйӧдіс Аслыс эскана кесйӧгӧс, Господь кылӧ, кор ме шыася Сы дінӧ.
Скӧраліганыд энӧ мыжмӧй.
Вольпасяд куйлігӧн чӧв олӧй да мӧвпалӧй ас пытшканыд.
Вайӧй шогмана висьяс да лача кутӧй Господь вылӧ.
Унаӧн шуалӧны: «Коді сетас миянлы бурсӧ?»
Господьӧй, петкӧдлы миянлы Аслад чужӧмбанлысь югыдсӧ.
Тэ сетан менам сьӧлӧмӧ нимкодьлунсӧ ёна унджык на дорысь, кодъяслӧн тырмымӧн [вый,] нянь да вина.
Ме лӧня вода да узя, ӧд сӧмын Тэ, Господьӧй, сетан меным повтӧг овнысӧ.
{Еврей йӧз (комиӧдіс Kodko) @ 5 псалом @ религ. гижӧд @ Библия @ 2021 @ Лб. .}
5 псалом
Сьылысьясӧн веськӧдлысьлы.
Ворсӧны пӧлянӧн.
Давидлӧн псалом.
Господьӧй, кыв менсьым кывъясӧс, гӧгӧрво менсьым мӧвпъясӧс.
Менам Енмӧй да Ӧксыӧй, кыв менсьым гораа бӧрдӧмӧс, ӧд ме кевмыся Тэныд.
Господьӧй, асывсяньыс кыв менсьым гӧлӧс шыӧс. Асывнас ме сувта Тэ водзӧ да кута виччысьны.
Тэ — лёксӧ мустӧмтысь Ен.
Лёк вӧчысь оз овмӧдчы Тэ ордӧ, вылӧ кыпӧдчысь оз ло Тэнад син водзын. Лёк вӧчысьӧс Тэ мустӧмтан, ылӧдчысьӧс Тэ бырӧдан, вир кисьтысьӧс да наян мортӧс Тэ, Господьӧй, зывӧктан.
Но Тэнад ыджыд буралӧмыд вӧсна ме верма пырны Тэнад крамӧ, Тэысь полӧмӧн копыртчыны Тэнад вежаинлань.
Господьӧй, нуӧд менӧ Аслад веськыд туйӧд, шыльӧд сійӧс меным мустӧмтысьяслӧн син водзын.
Ӧд налӧн вомын збыльыс абу, налӧн сьӧлӧмын — бырӧдӧм, налӧн горшныс — восьса гу, кывнас найӧ пӧръясьӧны.
Енмӧй, мыжды найӧс, налӧн лёк мӧвпъясыс мед бырӧдасны асьнысӧ.
Шыбит найӧс уна лёк вӧчӧмныс вӧсна, ӧд найӧ кыпӧдчисны Тэныд паныд.
Тэ вылӧ лача кутысьяс мед нимкодясясны, найӧ мед помтӧг гажӧдчасны. Тэ доръян найӧс, кодъяслы муса Тэнад нимыд, и найӧ кутасны ошйысьны Тэӧн.
Ӧд Тэ, Господьӧй, бурсиан веськыда олысьӧс, Тэнад бурлуныд сайӧд моз видзӧ найӧс.
{Еврей йӧз (комиӧдіс Kodko) @ 6 псалом @ религ. гижӧд @ Библия @ 2021 @ Лб. .}
6 псалом
Сьылысьясӧн веськӧдлысьлы.
Ворсӧны кӧкъямыс струнаа ворсанторйӧн.
Давидлӧн псалом.
Господьӧй, эн янӧд менӧ лӧгалігад, эн мыжды менӧ скӧралігад.
Господьӧй, ло бур сьӧлӧма ме дінӧ, ӧд ме жеб.
Бурдӧд менӧ, ӧд став лыӧй менам юкалӧ.
Менам лолӧй дзикӧдз нюкыртчӧма.
Господьӧй, дыр-ӧ на меным виччысьнысӧ?
Господьӧй, бергӧдчы мелань, видз менсьым лолӧс! Мезды менӧ, ӧд Тэ бур сьӧлӧма! Кулӧм мортыд оз нин казьтыв Тэнӧ, гуын куйлысь оз нин ошкы Тэнӧ.
Ме мудзи нин аслам ружтӧмысь, быд вой ме бӧрда аслам вольпасьын, кӧтӧда ассьым юрлӧсӧс синваӧн.
Шогӧйла менам синмӧй вӧйис, менӧ дзескӧдысьяс вӧсна синмӧй дзикӧдз жебмис.
Лёк вӧчысьяс, вешйӧй ме дінысь, ӧд Господь кылӧ менсьым бӧрдӧмӧс. Сійӧ кылӧ менсьым корӧмӧс, Сійӧ вочавидзас менам кевмысьӧм вылӧ.
Став менсьым вӧрӧгӧс лоӧ янӧдӧма, найӧс полӧм босьтас, найӧ бӧр бергӧдчасны да яналӧмӧн пышъясны.
{Еврей йӧз (комиӧдіс Kodko) @ 7 псалом @ религ. гижӧд @ Библия @ 2021 @ Лб. .}
7 псалом
Господьлы Давидлӧн бӧрдана сьыланкыв Куш йылысь, коді вӧлі Венямин чужанкотырысь.
Господьӧй Енмӧй, Тэ вылӧ ме лача кута.
Мезды менӧ дзескӧдысьясысь да дорйы менӧ, медым лев моз найӧ эз косявлыны менӧ, эз босьтны менсьым олӧмӧс, кор оз ло дорйысьыс [да мездысьыс].
Господьӧй Енмӧй, вӧчлі-ӧ ме мыйкӧ лёксӧ аслам киӧн, мынтысьлі-ӧ ме лёкӧн сылы, коді оліс мекӧд лӧня? Ме ӧд мездывлі весиг сійӧс, коді нинӧм абусьыс менӧ мустӧмтліс. Ме кӧ мыжми, дзескӧдысь мед вӧтӧдас менӧ, мед суӧдас да талялас менсьым олӧмӧс няйтӧ, мед бус йыв кыпӧдас менсьым нималӧмӧс.
Господьӧй, кыпӧдчы Аслад скӧрлунӧн, дорйы менӧ мустӧмтысьяслӧн лёкалӧмысь. Чеччы, Господьӧй, лок меным отсӧг вылӧ, ӧд веськыда мыждӧмыс — Тэнад киын. Войтыръяс чукӧртчасны Тэ гӧгӧр, а Тэ пуксьы выліинӧ юралан пуклӧсад.
Господь мыждӧ войтыръясӧс.
Мыжды менӧ, Господьӧй, менам веськыдлун да мыжтӧмлун серти.
Веськыд Енмӧй, лёк вӧчысьяслӧн скӧралӧмлы Тэ пукты пом, а веськыда олысьӧс ёнмӧд, ӧд Тэ пыдӧдз тӧдмалан мортлысь сьӧлӧмсӧ да пытшкӧсса мӧвпъяссӧ.
Енмыс — менам сайӧдыс, Сійӧ мездӧ веськыд сьӧлӧмаясӧс.
Енмыс — веськыда Мыждысь, [вына да терпитысь Ен,] Сійӧ быд лун чорыда мыждӧ мортӧс, коді оз бергӧдчы Сы дінӧ.
Енмыс лэчтӧ Ассьыс шыпуртсӧ, зэвтӧ Ассьыс ньӧввужсӧ да веськӧдӧ сылань. Енмыс сылы паныд дасьтӧ вианторъяс, лӧсьӧдӧ биа ньӧвъяс.
Ентӧг олысь нӧбасьӧ лёк мӧвпъясӧн, новлӧдлӧ ас пытшкас лёксӧ да чужтӧ ылӧгсӧ.
Сійӧ кодйӧ гу, но ачыс сэтчӧ усьӧ.
Сылӧн лёк вӧчӧмыс бергӧдчас ас вылас, сылӧн виалӧм-дзескӧдӧмыс усяс сылы юр вылас.
Ошка Господьӧс Сылӧн веськыдлунысь, сьыла ошкӧм Медвылысса Господьлӧн нимыслы.
{Еврей йӧз (комиӧдіс Kodko) @ 8 псалом @ религ. гижӧд @ Библия @ 2021 @ Лб. .}
8 псалом
Сьылысьясӧн веськӧдлысьлы.
Ворсӧны гефса ворсанторйӧн.
Давидлӧн псалом.
Господьӧй, миян Ыджыдӧй, кутшӧм шензьӧдана Тэнад нимыд став му пасьталаыс!
Тэныд ошкӧмыс кыптӧ енэжъясысь вылӧджык на.
Челядь да морӧсбердса кагаяс вомсянь Тэ кыпӧдан Аслыд ошкӧмсӧ, медым янӧдны Тэнӧ мустӧмтысьясӧс, медым тупкыны лӧгалысьяслысь да водзӧс перйысьяслысь вомсӧ.
Кор ме видзӧда енэжас — Тэнад киӧн вӧчӧмтор вылӧ, тӧлысь да кодзувъяс вылӧ, кодъясӧс Тэ пуктін енэжас, сэки мӧвпала: мортыс — коді сэтшӧмыс, мый Тэ казьтывлан сійӧс, мортлӧн пиыс — коді сэтшӧмыс, мый Тэ тӧждысян сы вӧсна?
Тэ пуктін сійӧс Ас дорсьыд * сӧмын неуна улӧджык, мичмӧдін сійӧс дзирдлунӧн да нимӧдӧмӧн.
Тэ сувтӧдін сійӧс веськӧдлыны Аслад вӧчӧмторъяснад, пуктін сы кок улӧ ставсӧ: ыж-мӧскӧс да зверъясӧс, енэжвывса лэбачьясӧс, саридзса чериясӧс да саридзын став уялысьсӧ.
Господьӧй, миян Ыджыдӧй, кутшӧм шензьӧдана Тэнад нимыд став му пасьталаыс!
{Еврей йӧз (комиӧдіс Kodko) @ 9 псалом @ религ. гижӧд @ Библия @ 2021 @ Лб. .}
9 псалом
Сьылысьясӧн веськӧдлысьлы.
Сьылісны Лабенлӧн кулӧм бӧрын.
Давидлӧн псалом.
Господьӧй, кута ошкыны Тэнӧ став сьӧлӧмсянь, понда висьтавлыны Тэнад шензьӧдана уджъясыд йылысь.
Кута кыпыда гажӧдчыны да нимкодясьны Тэӧн, понда сьылӧмӧн ошкыны Тэнсьыд нимтӧ, Медвылыссаӧй.
Меным паныд сувтысьяс бӧр бергӧдчасны да пышъясны, усясны да бырасны Тэнад чужӧмбан водзысь. Медым веськыда мыждыны, Тэ пуксин юралан пуклӧсӧ, Тэ веськыда мыждін менӧ, петкӧдлін менсьым мыжтӧмлунӧс.
Тэ дӧзмин войтыръяс вылӧ, бырӧдін лёк вӧчысьясӧс, вуштыштін налысь нимсӧ пыр кежлӧ.
Вӧрӧгыс абу, сійӧс пасьвартӧма, мустӧмтысьяслысь каръяссӧ Тэ кисьтін, на йылысь оз нин казьтывлыны.
Но Господь олӧ нэмъяс чӧж, Сійӧ дасьтіс Ассьыс юралан пуклӧссӧ, медым мыждыны. Сійӧ кутас веськыда мыждыны муюгыдсӧ, Сійӧ веськыда мыждас войтыръясӧс.
Господь лоӧ сайӧдчанінӧн дзескӧдӧмалы, дзебсянінӧн — шог дырйи.
Тэнсьыд нимтӧ тӧдысьяс пондасны Тэ вылӧ лача кутны, ӧд Тэ, Господьӧй, он эновт Тэнӧ корсьысьясӧс.
Сьылӧй Господьлы, Сионын Олысьлы, войтыръяс пӧвстын висьтавлӧй Сылӧн уджъясыс йылысь! Сійӧ оз вунӧд виӧмаясӧс, водзӧс перъяс вир кисьтӧмысь, оз вунӧд дзескӧдӧмаяслысь бӧрдӧмсӧ.
Господьӧй, ло бур сьӧлӧма ме дінӧ, видзӧдлы, кутшӧма ме сьӧкыдала менӧ мустӧмтысьяс вӧсна. Тэ лэптан менӧ кулӧмыслӧн дзиръя дорысь. Сэки ме кута висьтавлыны Тэнад ошкана уджъясыд йылысь, сионса дзиръяяс дорын кута нимкодясьны, мый Тэ мездін менӧ.
Войтыръяс усисны гуӧ, кодӧс асьныс кодйисны.
Налӧн кокныс шедіс налькйӧ, кодӧс асьныс пуктісны.
Господьӧс тӧдмалӧны Сылӧн веськыда мыждӧмыс серти — лёк вӧчысь шедӧ аслас киӧн вӧчӧм налькйӧ.
Мед веськаласны пыдӧстӧминӧ лёк вӧчысьяс, Енсӧ вунӧдысь войтыръяс.
Корысьӧс оз ло пыр кежлӧ вунӧдӧма, гӧль мортлӧн лачаыс оз дзикӧдз вош.
Кыпӧдчы, Господьӧй! Эн лэдз мортыслы пуктыны асьсӧ Тэысь вылӧджык, войтыръясӧс мед лоӧ мыждӧма Тэнад син водзын!
Господьӧй, чорыда повзьӧд войтыръясӧс, мед тӧдасны, мый найӧ сӧмын мортъяс.
Господьӧй, мыйла Тэ ылын сулалан, мыйла тупкан чужӧмбантӧ, кор ми сьӧкыдалам?
Вылӧ кыпӧдчӧмнас лёк вӧчысь дзескӧдӧ гӧльӧс, но сійӧ ачыс мед шедас аслас наян мӧвпъясас.
Лёк вӧчысь ошйысьӧ ассьыс кӧсйӧмсӧ збыльмӧдӧмнас, горшасьысь бурмӧдӧ сьӧлӧмсӧ озырлуннас.
Вылӧ пуксьӧмнас лёк вӧчысь нинӧмӧ пуктӧ Господьӧс, мӧвпалӧ, мый Енмыс оз мыжды, мый Енмыс абу.
Сылӧн олан туйясыс вайӧдӧны кулӧмӧ, сійӧ чайтӧ, мый Тэнад мыждӧмыд ылын сыысь.
Сійӧ сералӧ сылы паныд сувтысьяс вылын, мӧвпалӧ: «Ме ог усь, менӧ некор оз су лёкыс».
Сылӧн вомыс тырӧма ёрӧмӧн, ылӧгӧн да пӧръясьӧмӧн, сылӧн кывйыс вайӧ шог да кулӧм.
Сійӧ дзебсясьӧ йӧр ортсыын, кытысь некод оз аддзы сійӧс.
Сэні сійӧ виӧ мыжтӧмӧс, сылӧн синмыс кыйӧдӧ коньӧрӧс.
Сійӧ кыйӧдчӧ лев моз, дзебсьӧмӧн виччысьӧ кыйӧдчанінас, тшапнитӧ коньӧрӧс да кыскӧ сійӧс аслас налькйӧ.
Сійӧ лажыньтчылӧмӧн уськӧдчӧ, и коньӧръяс веськалӧны сылӧн ёсь гыж улӧ.
Лёк вӧчысь мӧвпалӧ: «Енмыс вунӧдіс, тупкис Ассьыс чужӧмбансӧ да оз аддзы».
Кыпӧдчы, Господьӧй Енмӧй! Лэпты Ассьыд китӧ! Дзескӧдӧмаясӧс [дзикӧдз] эн вунӧд!
Мыйла лёк вӧчысь нинӧм туйӧ пуктӧ Енсӧ, мӧвпалӧ, мый Сійӧ оз мыжды?
Но Тэ, Господьӧй, ставсӧ аддзан, Тэ аддзан увтыртӧм да дзескӧдӧм, Тэ лэптан Ассьыд китӧ.
Гӧль морт локтӧ Тэ дінӧ, батьтӧм-мамтӧмлы Тэ сетан отсӧг.
Чегъяв Ентӧг олысьяслысь да лёк вӧчысьяслысь кисӧ, мыжды найӧс да пукты пом налӧн лёк уджъяслы!
Господьӧй, Тэ — Ӧксыыс пыр кежлӧ да нэмъяс чӧж.
Мукӧд войтыръяс бырасны Тэнад муысь.
Господьӧй, Тэ кылан рам сьӧлӧмаяслысь корӧм-кевмӧмсӧ, ёнмӧдан налысь сьӧлӧмсӧ.
Восьт Ассьыд пельтӧ, дорйы батьтӧм-мамтӧмӧс да увтыртӧмаӧс, бырӧд дзескӧдысьясӧс му вылысь.
{Еврей йӧз (комиӧдіс Kodko) @ 10 псалом @ религ. гижӧд @ Библия @ 2021 @ Лб. .}
10 псалом
Сьылысьясӧн веськӧдлысьлы.
Давидлӧн псалом.
Господь вылӧ ме лача кута.
А ті шуанныд меным: «Лэбзьы керӧс вылӧ лэбач моз!»
Лёк вӧчысьяс зэвтӧмаӧсь ньӧввужсӧ, дасьтӧмаӧсь ньӧвъяссӧ, медым пемыд кадӧ лыйлыны веськыд сьӧлӧмаясӧс.
Кор жугӧдӧма подувсӧ, мый вермас вӧчны веськыда олысь?
Господь олӧ Аслас вежа крамын, Сылӧн юралан пуклӧсыс енэжас. Сылӧн синмыс видзӧдӧ [корысь бӧрся], Сійӧ пыдӧдз тӧдмалӧ мортлысь сьӧлӧмсӧ.
Господь тӧдмалӧ веськыда олысьӧс, а лёк вӧчысьӧс да виалӧм-дзескӧдӧмсӧ радейтысьӧс Сійӧ мустӧмтӧ.
Лёк вӧчысьяс вылӧ Сійӧ зэрӧн кисьтас биа ӧгыръяс да сотчысь тэг, мӧдӧдас на вылӧ сотысь тӧвныр — тайӧ лоӧ налӧн курыд пайыс.
Ӧд Господь веськыда вӧчӧ, Сійӧ радейтӧ веськыдлунсӧ, веськыда олысьяс аддзасны Сылысь чужӧмбансӧ.
{Еврей йӧз (комиӧдіс Kodko) @ 11 псалом @ религ. гижӧд @ Библия @ 2021 @ Лб. .}
11 псалом
Сьылысьясӧн веськӧдлысьлы.
Ворсӧны кӧкъямыс струнаа ворсанторйӧн.
Давидлӧн псалом.
Господьӧй, отсав меным, ӧд мувывса йӧз пӧвстын эз коль мортыс, кодлы позьӧ эскыны.
Ставныс пӧрйӧдлӧны ӧта-мӧднысӧ, кывнас мавтыштӧны да наяна сёрнитӧны.
Но Господь бырӧдас ылӧдчысьясӧс, найӧс, кодъяс ошйысьӧны, миян кывным пӧ вына, вомнымӧс некод оз вермы тупкыны, некод оз вен миянӧс.
Но Господь висьталӧ: «Ме сувта, медым мездыны коньӧръясӧс дзескӧдӧмысь, медым отсавны гӧльяслы налӧн шог дырйи. Доръя сійӧс, кодӧс кӧсйӧны кыйны».
Господьлӧн кывъясыс сӧстӧмӧсь, найӧ няйтысь весалӧм эзысь кодьӧсь, сизим пӧв биын сывдӧм эзысь кодьӧсь.
Господьӧй, видз миянӧс, быд кадӧ дорйы тайӧ нэмас олысь йӧзысь!
Ӧд быдлаын ветлӧны лёк вӧчысьяс, йӧзыс ошйысьӧны асланыс лёк уджъясӧн.
{Еврей йӧз (комиӧдіс Kodko) @ 12 псалом @ религ. гижӧд @ Библия @ 2021 @ Лб. .}
12 псалом
Сьылысьясӧн веськӧдлысьлы.
Давидлӧн псалом.
Господьӧй, гашкӧ, Тэ дзикӧдз вунӧдін менӧ? Дыр-ӧ Тэ кутан тупкыны меысь Ассьыд чужӧмбантӧ?
Дыр-ӧ меным майшасьны да дугдывтӧг шогсьыны? 
Дыр-ӧ мустӧмтысь кутас паныд сувтны меным?
Господьӧй, менам Енмӧй, видзӧдлы ме вылӧ да вочавидз меным.
Сет меным аддзыны Тэнсьыд югыдтӧ, медым ме эг унмовсь кулана унмӧн, медым менӧ мустӧмтысь эз вермы менӧ, медым менӧ дзескӧдысь эз нимкодясь, кор ме уся.
Тэнад буралӧмыд вылӧ ме лача кута, нимкодяся, мый Тэ мездан менӧ.
Кута сьылӧмӧн ошкыны Господьӧс меным бурсӧ вӧчӧмысь. [Кута сьывны Медвылысса Господьлӧн нимыслы.]
{Еврей йӧз (комиӧдіс Kodko) @ 13 псалом @ религ. гижӧд @ Библия @ 2021 @ Лб. .}
13 псалом
Сьылысьясӧн веськӧдлысьлы.
Давидлӧн псалом.
Мывкыдтӧм морт мӧвпалӧ, мый Енмыс абу.
Йӧзыс сетчисны лёкас, олӧны зывӧка, бур вӧчысьыс абу.
Господь енэжсяньыс видзӧдӧ йӧзыс вылӧ, медым аддзыны, эм-ӧ вежӧра мортыс, Енсӧ корсьысьыс.
Но ставныс кежӧмаӧсь, ӧтитӧг шогмытӧмӧсь, бур вӧчысьыс абу, весиг ӧтик абу.
Мыйла оз мывкыдсявны лёксӧ вӧчысьяс? Найӧ нянь моз сёйӧны менсьым войтырӧс, оз шыасьны Господь дінӧ.
Но найӧс полӧм босьтас, [кор нинӧмысь лоӧ повнысӧ,] ӧд Енмыс дорйӧ веськыда олысьясӧс.
Ті сераланныд гӧль морт вылын, но сійӧ лача кутӧ Господь вылӧ.
Сионысь мед воас Израильлы мездмӧмыс!
Кор Господь бӧр бергӧдас Ассьыс войтырсӧ пленысь, сэки Яков кутас нимкодясьны, Израиль кутас гажӧдчыны.
{Еврей йӧз (комиӧдіс Kodko) @ 14 псалом @ религ. гижӧд @ Библия @ 2021 @ Лб. .}
14 псалом
Давидлӧн псалом.
Господьӧй, коді вермас лоны Тэнад оланінын?
Коді вермас овны Тэнад вежа керӧс вылын?
Сӧмын сійӧ, коді олӧ сӧстӧма, вӧчӧ веськыда да сьӧлӧмсяньыс висьталӧ збыльсӧ, оз суклясь, оз вӧч лёксӧ орччӧн олысьлы, оз омӧльт мӧд мортӧс, Господь водзын шогмытӧмаясӧс мустӧмтӧ, а Господьысь полысьясӧс пыдди пуктӧ.
Сійӧ кутӧ ассьыс кывсӧ, весиг таысь кӧ ачыс сьӧкыдалӧ.
Сьӧмсӧ водзӧсӧн сетӧмысь сійӧ бӧрсӧ унджык оз босьт, козинъяс оз босьт, медым мыждыны мыжтӧм мортӧс.
Тадзи вӧчысь некор оз усь.
{Еврей йӧз (комиӧдіс Kodko) @ 15 псалом @ религ. гижӧд @ Библия @ 2021 @ Лб. .}
15 псалом
Давидлӧн кывбур.
Енмӧй, видз менӧ, ӧд Тэ вылӧ ме лача кута.
Ме шуи Господьлы: «Тэ — менам Ыджыдӧй, Тэ медбурыс, мый менам эм».
Му вылын олысь вежа войтырыд шензьӧдана, ме нимкодяся наӧн.
Мед содасны шогъясыс налӧн, кодъяс юрбитӧны мукӧд енъяслы.
Ме ог вай налы кисьтан вись пыдди вир, ог казьтыв налысь нимъяссӧ.
Господьӧй, Тэ менам пайыс да олӧмыс, менам пудйыс Тэнад киын.
Меным вичмис бур му, сійӧ гажӧдӧ менсьым синмӧс.
Ошка Господьӧс, Сійӧ туйдӧдӧ менӧ.
Весиг войнас ме сьӧлӧмын кыла Сылысь велӧдӧмсӧ.
Господь век ме водзын, Сійӧ менам веськыдладорын, медым ме эг усь.
Та вӧсна менам сьӧлӧмӧй нимкодясьӧ, менам лолӧй гажӧдчӧ, вир-яйӧй повтӧг шойччӧ. Ӧд Тэ он коль менсьым лолӧс кулӧмаяс дінӧ, Тэ он сет Аслад эскана кесйӧглы аддзывны сісьмӧмсӧ. Тэ петкӧдлан меным олӧмыслысь туйсӧ.
Тэнад чужӧмбан водзын ме кута ёна нимкодясьны, Тэнад веськыдладорын ме лоа шуда нэмъяс чӧж.
{Еврей йӧз (комиӧдіс Kodko) @ 16 псалом @ религ. гижӧд @ Библия @ 2021 @ Лб. .}
16 псалом
Давидлӧн кевмысьӧм.
Господьӧй, кывзы менсьым веськыда висьталӧмӧс, кыв менсьым гораа кевмысьӧмӧс, сибӧд менам ылӧдчытӧм вомсянь корӧм-кевмӧмӧс.
Тэсянь мед петас менӧ веськыда мыждӧмыс, Тэнад синмыд мед аддзас веськыда вӧчӧмӧс.
Тэ видзӧдлан менам сьӧлӧмӧ, видлан менӧ войся кадӧ, тӧдмалан менӧ, но нинӧм лёксӧ он аддзы, ӧд менам мӧвпъясӧй оз торъявны кывъясысь.
Ме ола Тэнад кывъясыд серти, некодӧс ог дзескӧд, кыдзи мукӧдыс вӧчӧны.
Ёнмӧд менсьым воськовъясӧс, медым менам кокӧй эз кеж Тэнад туйысь.
Енмӧй, ме шыася Тэ дінӧ, ӧд Тэ вочавидзан меным.
Копырт Ассьыд пельтӧ мелань да кыв менсьым кевмӧмӧс.
Мездысьӧй, петкӧдлы Ассьыд шензьӧдана буралӧмтӧ Тэ вылӧ лача кутысьяслы! Аслад веськыд киӧн Тэ мездан найӧс паныд сувтысьясысь.
Видз менӧ синмӧс моз, дзеб Аслад бордъяс улӧ лёк вӧчысьясысь, кодъяс усьласьӧны ме вылӧ, дзеб мустӧмтысьясысь, кодъяс кытшалӧны менӧ.
Найӧ чорзьӧдӧмаӧсь сьӧлӧмнысӧ, тшапа сёрнитӧны, кыйӧдӧны менсьым быд воськов, медым кытшавны менӧ.
Сюся видзӧдӧны ме бӧрся, медым ляскыны менӧ му вылӧ.
Найӧ кыйдӧс вылӧ уськӧдчысь лев кодьӧсь, дзебсянінсянь кыйӧдчысь том лев кодьӧсь.
Господьӧй, чеччы да ӧлӧд лёк вӧчысьясӧс, уськӧд найӧс кок йывсьыныс.
Аслад шыпуртӧн мезды менӧ наысь! Господьӧй, Аслад киӧн мезды менӧ йӧзысь, кодъяс му вылас олігӧн босьтӧны ассьыныс пайнысӧ. Тэ пӧткӧдан найӧс Аслад ыджыд озырлунысь, сетан налы сы мында, мый налӧн челядьыс пӧтасны да нӧшта асланыс челядьлы колясны.
Понда видзӧдны Тэнад чужӧмбан вылӧ, ӧд Тэ водзын ме веськыд.
Садьмӧм бӧрын понда пӧткӧдчыны Тэнад матілунӧн.
{Еврей йӧз (комиӧдіс Kodko) @ 17 псалом @ религ. гижӧд @ Библия @ 2021 @ Лб. .}
17 псалом
Сьылысьясӧн веськӧдлысьлы.
Господьлӧн Давид кесйӧгыс сьыліс тайӧ сьыланкывсӧ Господьлы, кор Господь мездіс сійӧс став вӧрӧгысь да Саулысь.
Сійӧ сьыліс тадзи:
— Господьӧй, Тэ меным ёна муса, Тэ — менам выныс!
Господьӧй, Тэ — менам зумыд изйыс да сайӧдчаніныс, менӧ Мездысьыс. Енмӧй, Тэ — менам изкыртаыс, Тэ вылӧ ме лача кута.
Тэ — менам сайӧдыс, вына Дорйысьыс да Видзысьыс.
Ме шыася ёна ошкана Господь дінӧ, Сійӧ мездас менӧ мустӧмтысьясысь.
Менӧ топӧдісны кулӧм вайысь шогъяс, лёкыс повзьӧдліс менӧ бузгысь ва моз.
Пыдӧстӧминлӧн чепъясыс дорисны менӧ, кулӧмыслӧн тывъясыс гартыштісны менӧ.
Кор менӧ топӧдіс сьӧкыдлун, ме чукӧсті Господьӧс, шыаси аслам Ен дінӧ.
Сійӧ кыліс менсьым гӧлӧс шыӧс Аслас вежаинсянь, менам бӧрдӧм шыӧй воис Сылӧн пельӧдзыс.
Муыс сыркмунліс да вӧрзис, керӧсъяс кыпмунлісны да вешйисны места вывсьыс, сэтшӧма скӧрмис Господь.
Сылӧн скӧралӧмсянь кыптіс тшын, Сылӧн вомысь петіс сотысь би, Сысянь киссисны биа ӧгыръяс.
Сійӧ доровтіс енэжсӧ да лэччис, сувтіс кокнас сьӧд кымӧръяс вылӧ.
Пуксис херувимъяс вылӧ да лэбзис, лэбис тӧв бордъяс вылын.
Сап пемыднас вевттьысис Сійӧ, сук сьӧд кымӧръясӧн кытшаліс Асьсӧ.
Сы водзын дзирдаліс яръюгыд би, сэтысь петісны кымӧръяс, шер да биа ӧгыръяс.
Господь муркнитіс енэжас, Медвылыссаыс сетіс Ассьыс гӧлӧс шысӧ, кисьтіс шер да биа ӧгыръяс.
Лэдзис Ассьыс гымньӧвъяссӧ да чардбиӧн сявкйис найӧс енэж пасьталаыс.
Господьӧй, Тэнад шыасьӧмысь, Тэнад скӧрлунӧн пӧльтысь ловшыысь тыдовтчис саридзлӧн пыдӧсыс да муыслӧн подулыс.
Вылісянь Сійӧ нюжӧдіс кисӧ, босьтіс менӧ да лэптіс джуджыд ваысь, мездіс менӧ вына вӧрӧгысь, мездіс мустӧмтысьясысь, кодъяс вӧліны меысь ёнджыкӧсь.
Менам шог дырйи найӧ уськӧдчисны ме вылӧ, но Господь вӧлі меным зумыд пыкӧдӧн.
Сійӧ петкӧдіс менӧ паськыдінӧ да мездіс менӧ, ӧд Сійӧ радейтӧ менӧ.
Господь меным бурӧн мынтысис веськыда вӧчӧмысь, сетіс меным тырдон сӧстӧма олӧмысь, ӧд ме ветлі Господьлӧн туйӧд, аслам Ен водзын шогмытӧмсӧ эг вӧч.
Став Сылысь тшӧктӧмъяссӧ пыр куті тӧд вылын, Сылӧн велӧдӧмысь эг кежлы.
Сы водзын ме вӧлі сӧстӧм, видзи ачымӧс мыж вӧчӧмысь.
Та вӧсна Господь мынтысис меным бурӧн менам веськыда вӧчӧмысь да Сылӧн син водзын сӧстӧм олӧмысь.
Бур сьӧлӧма дінӧ Тэ бур сьӧлӧма, веськыда вӧчысьлы Тэ вӧчан веськыда, сӧстӧмлы вӧчан сӧстӧма, а наянлы — сылӧн наянлуныс серти. Увтыртӧмаясӧс Тэ мездан, а вылӧ кыпӧдчысьясӧс Тэ улӧ лэдзан.
Господьӧй, Тэ ӧзтан менсьым биӧс.
Енмӧй, Тэ югдӧдан менсьым пемыдӧс.
Тэкӧд ме пасьварта тышкайӧзӧс, Тэкӧд ме кая карса стен вылӧ.
Енлӧн туйыс тыр-бур, Господьлӧн кывйыс сӧстӧм.
Ен вылӧ лача кутысьяслы Сійӧ — сайӧдыс.
Господьысь кындзи мӧд Енмыс абу, миян Енмысь кындзи мӧд Дорйысьыс абу.
Енмыс вӧньӧдӧ менӧ вынӧн, лӧсьӧдӧ меным веськыд туй, вӧчӧ менсьым кокӧс кӧрлӧн кодь тэрыбӧн, сувтӧдӧ менӧ выліинӧ, велӧдӧ менӧ тышкасьны, менсьым киӧс — зэвтны ыргӧн ньӧввуж.
Тэ — менам сайӧдыс, менӧ Мездысьыс. Тэнад веськыд киыд — менам пыкӧдыс, Тэнад буралӧмыд кыпӧдӧ менӧ.
Тэ зумыдмӧдан менсьым воськовъясӧс, менам кокӧй оз лигышмун.
Ме вӧтӧда да суӧда вӧрӧгъясӧс. Кытчӧдз ог бырӧд найӧс, бӧр ог бергӧдчы.
Ме дойдала найӧс, и найӧ усясны менам кок улӧ, сувтнысӧ оз вермыны. Тэ вӧньӧдін менӧ вынӧн тыш вылӧ, уськӧдін менам кок улӧ паныд кыпӧдчысьясӧс.
Тэ бергӧдан вӧрӧгӧс пышйӧмӧ, ме вӧтча мустӧмтысьяс бӧрся да бырӧда найӧс.
Найӧ горзӧны, но мездысьыс абу, шыасьӧны Господь дінӧ, но Сійӧ оз вочавидз.
Ме шердъя найӧс тӧвйыв бусӧс моз, таляла найӧс туйвыв няйтӧс моз.
Тэ мездін менӧ паныд кыпӧдчысь войтырысь, пуктін менӧ юралысьӧ тшӧтш мукӧд войтыръяслы.
Меным кесъялӧны войтыръяс, кодъясӧс водзын эг тӧдлы.
Сӧмын шуа налы, менсьым кывзысьӧны нин.
Йӧз муысь локтысьяс леститчӧны ме дінӧ.
Найӧ нюкыртчӧмаӧсь, тіралӧны асланыс изкаръясын.
Господь ловъя! Ме ошка Тэнӧ, Дорйысьӧй!
Мед лоӧ нимӧдӧма Тэнӧ, Енмӧй, менӧ Мездысьӧй! Тэ — водзӧс перйысь Ен, Тэ сетан менам кипод улӧ войтыръясӧс, мездан менӧ вӧрӧгысь.
Тэ лэптін менӧ паныд кыпӧдчысьясысь вылӧджык, мездін менӧ виалысь-дзескӧдысьясысь.
Та вӧсна, Господьӧй, кута ошкыны Тэнӧ мукӧд войтыръяс пӧвстын, кута сьылӧмӧн ошкыны Тэнсьыд нимтӧ. Ыджыд вынӧн Тэ мездан ӧксыӧс. Тэ мавтыштін Давидӧс, Тэ петкӧдлан буралӧмтӧ сы дінӧ да сысянь чужысьяс дінӧ нэмъяс чӧж.
{Еврей йӧз (комиӧдіс Kodko) @ 18 псалом @ религ. гижӧд @ Библия @ 2021 @ Лб. .}
18 псалом
Сьылысьясӧн веськӧдлысьлы.
Давидлӧн псалом.
Енэжыс висьталӧ Енлӧн дзирдлуныс йылысь, енэжвевтыс юӧртӧ Сылӧн киӧн вӧчӧмторъяс йылысь.
Лун юӧртӧ та йылысь лунлы, вой висьталӧ войлы.
Налӧн абу сёрниыс, абу кывъясыс, гӧлӧс шысӧ он кыв, но став му пасьталаыс юргӧ налӧн гӧлӧс шыныс, муюгыдыслӧн медылі пельӧсӧдз воӧны налӧн кывъясыс.
Сэні Енмыс вӧчис шонділы оланін. Сэтысь шонді долыда петӧ, кыдзи верӧспу аслас гӧтрасян вежӧсысь, кыдзи панласьысь нимкодьпырысь котӧртӧ аслас туйӧд.
Сійӧ кытшовтӧ енэжсӧ помсянь помӧдзыс, и сылӧн шоныдыс быдӧнӧдз воӧ.
Господьлӧн Индӧдыс тырвыйӧ бур, ёнмӧдӧ ловтӧ.
Господьлӧн туйдӧдӧмыс эскӧдана, вежӧрсьӧдӧ мывкыдтӧмӧс.
Господьлӧн тшӧктӧмъясыс веськыдӧсь, гажӧдӧны сьӧлӧмтӧ.
Господьлӧн велӧдӧмыс югыд, югдӧдӧ синтӧ.
Господьысь полӧмыс сӧстӧм, олӧ нэмъяс чӧж.
Господьлӧн мыждӧмыс збыль да ставнас веськыд.
Господьлӧн тшӧктӧмъясыс зарниысь донаджыкӧсь, весиг уна весалӧм зарниысь, найӧ маысь на чӧскыдджыкӧсь.
Тэнад тшӧктӧмъясыд видзӧны кесйӧгтӧ, на серти олӧмысь вичмӧ ыджыд тырдон.
Коді казялас ассьыс мыжъяссӧ?
Господьӧй, весав менӧ гуся мыжъясысь, видз Ассьыд кесйӧгтӧ тӧдӧмӧн мыж вӧчӧмысь, медым найӧ эз ыджыдавны ме вылын.
Сэки ме ог сетчы лёкас, лоа сӧстӧм да мыжтӧм.
Господьӧй, мед лоӧны шогманаӧсь Тэныд менам кывъясӧй да сьӧлӧмпытшса мӧвпъясӧй. Тэ менӧ Дорйысьыс да Мездысьыс!
{Еврей йӧз (комиӧдіс Kodko) @ 19 псалом @ религ. гижӧд @ Библия @ 2021 @ Лб. .}
19 псалом
Сьылысьясӧн веськӧдлысьлы.
Давидлӧн псалом.
Мед вочавидзас тэныд Господь сьӧкыд кадӧ, мед доръяс тэнӧ Яков Енлӧн нимыс!
Мед мӧдӧдас тэныд отсӧгсӧ вежаинсянь, мед ёнмӧдас тэнӧ Сионсянь!
Мед казьтыштас тэнсьыд вайӧмторъястӧ, мед сибӧдас тэнсьыд сотан висьястӧ!
Мед [Господь] сетас тэныд сьӧлӧм сертиыд, мед збыльмӧдас став тэнсьыд кӧсйӧмтӧ!
Сэки ми кутам нимкодясьны тэнад вермӧмысь, Ен нимӧн ми кыпӧдам вермӧм йылысь дӧрапас.
Господь мед могмӧдас став тэнсьыд корӧмтӧ!
Ӧні ме тӧда, мый Господь мездӧ Ассьыс мавтыштӧмасӧ, вочавидзӧ сылы Аслас вежа енэжсянь, мездӧ сійӧс вына веськыд кинас.
Ӧтияс ошйысьӧны вӧвъяснас, мӧдъяс — тарантаснас, а ми ошйысям асланым Господь Ен нимӧн.
Найӧ лигышмунісны да усисны, а ми сувтім кок выланым да зумыда сулалам.
Господьӧй, мезды ӧксыӧс! Кор шыасям Тэ дінӧ, вочавидз миянлы!
{Еврей йӧз (комиӧдіс Kodko) @ 20 псалом @ религ. гижӧд @ Библия @ 2021 @ Лб. .}
20 псалом
Сьылысьясӧн веськӧдлысьлы.
Давидлӧн псалом.
Господьӧй, ӧксы нимкодясьӧ Тэнад вынӧн, ёна гажӧдчӧ, мый Тэ мездін сійӧс.
Тэ сетін сылы, мый сьӧлӧмыс кӧсйис, сылысь корӧмсӧ эн ӧтдорт. Озыра бурсиӧмӧн Тэ паныдалін сійӧс, пуктін сылы юр вылас зарни юркытш.
Сійӧ корис Тэнсьыд олӧм, и Тэ нюжӧдін сылысь олӧмсӧ, сетін сылы овны нэмъяс чӧж.
Сійӧс ёна ошкӧны, ӧд Тэ мездін сійӧс.
Тэ сетін сылы нимавны да ыджыдавны, бурсиин сійӧс нэмъяс кежлӧ.
Тэ сетан сылы нимкодясьны Аслад чужӧмбан водзын. Ӧксы кӧ лача кутӧ Господь вылӧ, сійӧ оз вӧрзьыв, ӧд Медвылыссаыс бур сьӧлӧма сы дінӧ.
Господьӧй, Тэнад киыд судзӧдас паныд сувтысьясӧс, Тэнад веськыд киыд вӧтӧдас Тэнӧ мустӧмтысьясӧс.
Скӧралігад Тэ сотан найӧс биа пачын моз, лӧгалігад бырӧдан найӧс, Господьӧй, и биыс ньылыштас найӧс.
Тэ бырӧдан му вылысь налысь йылӧмсӧ, насянь чужысьясӧс Тэ бырӧдан йӧз пӧвстысь. Найӧ кыпӧдчисны Тэныд паныд, мӧвпыштісны лёксӧ, но налӧн нинӧм эз артмы.
Тэ сувтӧдан найӧс лыйсян пас пыдди, Аслад ньӧввужйысь лыйлан налы чужӧмас.
Господьӧй, кыпӧдчы Аслад вынӧн. Ми кутам сьылӧмӧн ошкыны Тэнсьыд ыджыд вынтӧ.
{Еврей йӧз (комиӧдіс Kodko) @ 21 псалом @ религ. гижӧд @ Библия @ 2021 @ Лб. .}
21 псалом
Сьылысьясӧн веськӧдлысьлы.
Кыа петігӧн сьылӧм.
Давидлӧн псалом.
Енмӧй, Енмӧй! [Кыв менӧ!] Мыйла Тэ эновтін менӧ?
Ме горзӧмӧн шыася Тэ дінӧ, мед Тэ мездін менӧ, но Тэ ылын меысь.
Енмӧй, ме бӧрдӧмӧн шыася Тэ дінӧ луннас, но Тэ он вочавидз, шыася войнас, но меным кокньӧдыс абу.
Тэ вежа, Тэ олан Израиль войтыр пӧвстын, найӧ сьылӧмӧн ошкӧны Тэнӧ.
Миян батьяс Тэ вылӧ лача кутісны, Тэныд найӧ эскисны, и Тэ мездылін найӧс.
Найӧ горзӧмӧн шыасисны Тэ дінӧ, и мездмисны, Тэ вылӧ лача кутісны, и некор эз янавлыны.
Ме абу морт, а нидзув, йӧзыс омӧльтӧны менӧ, войтырӧй увтыртӧ менӧ.
Мекӧд аддзысигӧн ставныс лёкӧдӧны менӧ, юрнас довкйӧдлӧмӧн шуалӧны:
«Сійӧ лача кутіс Господь вылӧ.
Шогмана кӧ сійӧ Господьлы, мед доръяс да мездас сійӧс».
Тэ петкӧдін менӧ мам кынӧмысь, видзин менӧ мам морӧс бердын.
Чужӧмсянь ме Тэнад киын, мам кынӧмсянь Тэ — менам Ен.
Эн ылыстчы меысь, ӧд шогыс матын, а отсӧг сетысьыс абу.
Уна ӧш чукӧртчисны ме гӧгӧр, васанса тшӧгӧдӧм ӧшъяс кытшалісны менӧ. Найӧ паськӧдісны ассьыныс горшнысӧ равзысь лев моз, коді чашйӧ ассьыс кыйдӧссӧ.
Менам вынӧй визувтіс ва моз, став лыясӧй гользисны, сьӧлӧмӧй лои сывдӧм сись кодь, сыліс ме пытшкын.
Менам вынӧй дзикӧдз бырис, ме лои жугалӧм гырнич кодь, менам кывйӧй сибдіс горш бердӧ. Тэ сетін менӧ кулӧмыслӧн гыжъясӧ.
Менӧ кытшалісны понъяс, ме гӧгӧр чукӧртчисны лёк йӧз. Найӧ бытшкисны менсьым ки-кокӧс, став лыясӧй тыдалӧны.
Найӧ сералӧмӧн видзӧдӧны ме вылӧ, ас костаныс юклӧны менсьым паськӧмӧс, пудъясьӧны менам дӧрӧм вӧсна.
Господьӧй, эн ылыстчы меысь, Тэ — менам выныс, тэрмась отсавны меным!
Мезды менсьым олӧмӧс шыпуртысь, видз менӧ понъясысь!
Мезды менӧ левлӧн паськыд горшысь, видз менӧ ӧшъяслӧн сюръясысь! Вочавидз меным!
Аслам вокъяслы юӧрта Тэнсьыд нимтӧ, Тэнад войтырлӧн чукӧртчӧмын ошка Тэнӧ.
Господьысь полысьяс, ошкӧй Сійӧс!
Яковсянь чужысьяс, нимӧдӧй Сійӧс!
Израиль войтыр, вежавидзӧмӧн полӧй Сыысь! Ӧд Сійӧ эз увтырт шогсьысьӧс, эз кедзовт сьӧкыд нуысьӧс, эз дзеб Ассьыс чужӧмбансӧ, но кыліс Сы дінӧ шыасьысьӧс.
Тэнад войтырлӧн ыджыд чукӧртчӧмын ме ошка Тэнӧ, Тэысь полысьяс водзын вая Тэныд кыв сетан вись.
Мед пӧттӧдзныс сёясны гӧльяс, мед ошкасны Господьӧс Сійӧс корсьысьяс.
Тіян сьӧлӧмныд мед тіпкас нэмъяс чӧж!
Мувывса став йӧзыс кутасны казьтывлыны Господь йылысь да бергӧдчасны Сылань. Тэныд копыртчасны войтыръяс. Господь — Ӧксыыс, Сійӧ ыджыдалӧ войтыръяс вылын.
Сылы кутасны копрасьны мувывса юралысьяс, Сылы копыртчасны ставныс, кодъяс кулӧны да бӧр муӧ пӧрӧны, кодъяс оз вермыны нюжӧдны ассьыныс олӧмсӧ.
Налӧн челядьыс кутасны кесъявны Господьлы, найӧс пыр кутасны шуны Сылӧн войтырӧн, найӧ локтасны висьтавлыны Сылӧн веськыдлуныс йылысь, кутасны юӧртны водзӧ чужысьяслы Господьлӧн уджъясыс йылысь.
{Еврей йӧз (комиӧдіс Kodko) @ 22 псалом @ религ. гижӧд @ Библия @ 2021 @ Лб. .}
22 псалом
Давидлӧн псалом.
Господь — менӧ Видзысьыс, менам ставыс лоӧ тырмана.
Сійӧ шойччӧдӧ менӧ веж видз вылын, вайӧдӧ менӧ лӧнь ва дорӧ, ёнмӧдӧ менсьым лолӧс, нуӧдӧ менӧ веськыд туйӧд Аслас нимыс вӧсна.
Ме кӧ муна весиг сап пемыд сёртасӧд, ог повзьы лёксьыс, ӧд Тэ мекӧд.
Тэнад веськӧдлан да доръян беддьыд нуӧдӧны менӧ.
Менӧ дзескӧдысьяслӧн син водзын Тэ дасьтан меным чӧскыд пызан, мавтан менсьым юрӧс выйӧн, тыртан менсьым чашаӧс тырӧдзыс.
Тэнад бурлуныд да буралӧмыд лоасны мекӧд быд лун олӧм помӧдз, и ме кута овны Господьлӧн керкаын став олӧм чӧж.
{Еврей йӧз (комиӧдіс Kodko) @ 23 псалом @ религ. гижӧд @ Библия @ 2021 @ Лб. .}
23 псалом
Давидлӧн псалом. 
[Сьылӧны вежонса медводдза лунӧ.] 
Муыс да ставыс, мый сэні эм, муюгыдыс да сэні олысьяс — Господьлӧн. Господь пуктіс мулысь подувсӧ саридзьяс вылӧ, сувтӧдіс сійӧс юяс вылӧ.
Коді вермас кайны Господьлӧн керӧс вылӧ? Коді вермас сулавны Сылӧн вежаинын?
Сӧмын сійӧ, кодлӧн киыс мыжтӧм да сьӧлӧмыс сӧстӧм, коді кывсӧ оз сет весьшӧрӧ, оз ылӧдлы [ассьыс матыссасӧ] Господь нимӧн. Сылы вичмас Господьсянь бурсиӧм, мездысь Ен шуас сійӧс веськыдӧн.
Татшӧм сійӧ войтырыс, коді корсьӧ Господьӧс, корсьӧ Яковлӧн Енлысь чужӧмбансӧ.
Джудждаммӧй, дзиръяяс, паськыда воссьӧй, нэмӧвӧйся ӧдзӧсъяс! И пырас дзирдлуна Ӧксы.
Коді тайӧ дзирдлуна Ӧксыыс?
Сійӧ — ён да вынйӧра Господь, тышын вына вермысь.
Джудждаммӧй, дзиръяяс, паськыда воссьӧй, нэмӧвӧйся ӧдзӧсъяс! И пырас дзирдлуна Ӧксы.
Коді тайӧ дзирдлуна Ӧксыыс?
Сійӧ — Господь Саваоф, Сійӧ — дзирдлуна Ӧксы.
{Еврей йӧз (комиӧдіс Kodko) @ 24 псалом @ религ. гижӧд @ Библия @ 2021 @ Лб. .}
24 псалом
Давидлӧн псалом.
Господьӧй, Тэлань веськӧда сьӧлӧмӧс.
Енмӧй, Тэ вылӧ лача кута да ог янав. Вӧрӧглы Тэ он сет нимкодясьны менӧ вермӧмысь. Тэ вылӧ лача кутысьяс оз янавны, но Тэнад Индӧдлы паныд кыпӧдчысьяс яналасны.
Господьӧй, инды меным Ассьыд туйтӧ, велӧд менӧ ветлыны Тэнад кок туйӧд.
Веськӧд менӧ Аслад збыляд да велӧд менӧ, ӧд Тэ — менӧ мездысь Ен, Тэ вылӧ ме лача кута быд кадӧ.
Господьӧй, эн вунӧд Ассьыд мелілунтӧ да буралӧмтӧ, ӧд налы помыс абу.
Господьӧй, эн казьтывлы менсьым томдырся мыжъясӧс, эн казьтывлы менсьым лёк вӧчӧмъясӧс, но петкӧдлы меным Ассьыд буралӧмтӧ да бурлунтӧ, эн вунӧд менӧ!
Господь бур сьӧлӧма да веськыд, Сійӧ веськӧдӧ мыжаясӧс бур туй вылӧ. Рамъясӧс Сійӧ туйдӧдӧ веськыдлунас, велӧдӧ найӧс ветлыны Аслас туйӧд.
Господьлӧн туйясыс бурӧсь да веськыдӧсь налы, кодъяс видзӧны сьӧлӧмас Сылысь тшӧктӧмъяссӧ да йитӧдсӧ, мый Сійӧ кӧрталіс накӧд.
Господьӧй, Аслад нимыд вӧсна прӧстит менсьым мыжӧс, ӧд сійӧ вывті ыджыд.
Коді олӧ Господьысь полӧмӧн, сылы Господь индас колана туй.
Сылӧн олӧмас ставыс лоӧ тырмымӧн, сысянь чужысьяслы вичмас му.
Господь восьтӧ Ассьыс гусяторсӧ Сыысь полысьяслы, тӧдмӧдӧ найӧс йитӧдӧн, мый кӧрталіс накӧд.
Менам синмӧй пыр видзӧдӧ Господь вылӧ, ӧд Сійӧ мездӧ менсьым кокӧс налькйысь.
Господьӧй, бергӧдчы мелань да ло бур сьӧлӧма, ӧд ме дзик ӧтнамӧн, шогӧн тырӧма.
Сьӧлӧм дойясӧй менам содісны, мезды менӧ курыд шогъясысь. Видзӧдлы менам шог да сьӧкыдалӧм вылӧ, прӧстит менсьым мыжъясӧс.
Видзӧдлы, мыйта паныд сувтысьыс, найӧ ёна мустӧмтӧны да дзескӧдӧны менӧ.
Видз менсьым олӧмӧс да мезды менӧ, медым ме эг янав, мый Тэ вылӧ лача кута.
Сӧстӧмлуныс да веськыдлуныс мед видзасны менӧ, ӧд Тэ вылӧ ме лача кута.
Енмӧй, мезды Израиль войтырӧс налӧн шогъясысь!
{Еврей йӧз (комиӧдіс Kodko) @ 25 псалом @ религ. гижӧд @ Библия @ 2021 @ Лб. .}
25 псалом
Давидлӧн псалом.
Господьӧй, мыжды менӧ веськыда, ӧд ме ола сӧстӧма да Тэ вылӧ зумыд лача кута. 
Господьӧй, видзӧдлы менам сьӧлӧмӧ да тӧдмав менӧ, тӧдмав менсьым мӧвпъясӧс да сьӧлӧмӧс. Тэнсьыд буралӧмтӧ ме пыр кута тӧд вылын, ме ветлӧдла Тэнад збыль туйӧд. Ылӧдчысь йӧзкӧд ӧтлаын ме ог пукав, наян йӧзкӧд ог ӧтувтчы.
Лёк вӧчысьяслысь чукӧртчӧмсӧ ме мустӧмта, Ентӧг олысьяскӧд ӧтлаын ог пуксьы.
Господьӧй, ме мыжтӧм, мыська киӧс да кута ветлӧдлыны Тэнад висьпуктанін гӧгӧр, кута аттьӧавны Тэнӧ, юӧртны Тэнад шензьӧдана уджъясыд йылысь.
Господьӧй, меным муса Тэнад крамыд, Тэнад дзирдлуныдлӧн оланіныс.
Эн бырӧд менӧ мыжаяскӧд, эн босьт менсьым олӧмӧс вир кисьтысьяскӧд ӧтвыв. Асланыс киясӧн найӧ лёксӧ вӧчӧны, налӧн веськыд киныс виччысьӧ козинъяс.
Но ме ола сӧстӧма.
Мезды менӧ, [Господьӧй,] ло бур сьӧлӧма ме дінӧ!
Ме ветлӧдла веськыд туйӧд, Ен войтырлӧн чукӧртчӧмын ме ошка Господьӧс.
{Еврей йӧз (комиӧдіс Kodko) @ 26 псалом @ религ. гижӧд @ Библия @ 2021 @ Лб. .}
26 псалом
Давидлӧн псалом. 
[Давид лӧсьӧдіс тайӧ сьыланкывсӧ сійӧс ӧксыӧ мавтышттӧдз.] 
Господь — менам югыдыс, менӧ Мездысьыс. Кодысь меным повнысӧ?
Господь — менсьым олӧмӧс Видзысьыс. Кодысь меным повнысӧ?
Ме вылӧ кӧ уськӧдчасны лёк вӧчысьяс, мустӧмтысьяс да дзескӧдысьяс, медым косявлыны менсьым вир-яйӧс, найӧ асьныс крукасясны да усясны.
Ме вылӧ кӧ уськӧдчас тышкайӧз, менам сьӧлӧмӧй оз повзьы.
Тышӧ кӧ петасны меным паныд, весиг сэки ме ог вошты лачаӧс.
Сӧмын ӧтитор ме кора Господьлысь, сӧмын ӧтитор ме кӧсъя: став олӧм чӧж овны Господьлӧн керкаын, аддзыны Господьлысь бурлунсӧ, юрбитны Сылӧн [вежа] крамын. Шог дырйи Сійӧ дзебӧ менӧ Аслас крамӧ, видзӧ менӧ Аслас оланінын, кыпӧдӧ менӧ изкырта вылӧ.
Сэки ме лэпта юрӧс, ог кут повны менӧ кытшалысь вӧрӧгысь.
Господьлӧн крамын вая Сылы висьяс, нимкодясьӧмӧн понда сьывны Сылы ошкӧм.
Господьӧй, кыв менсьым гӧлӧс шыӧс, кор ме шыася Тэ дінӧ. Ло бур сьӧлӧма ме дінӧ да вочавидз!
Ме ог вунӧд Тэнсьыд кывъястӧ. Тэ шуин: «Корсьӧй Менсьым чужӧмбанӧс».
Господьӧй, ме кута корсьны Тэнсьыд чужӧмбантӧ.
Эн тупкы меысь Ассьыд чужӧмбантӧ, скӧралігад эн вӧтлы Ассьыд кесйӧгтӧ, ӧд Тэ — меным отсӧг сетысьыс.
Енмӧй, менам Мездысьӧй, эн ӧтдорт, эн эновт менӧ!
Менам бать-мамӧй эновтісны менӧ, но Господь менӧ сибӧдӧ.
Господьӧй, велӧд менӧ ветлыны Тэнад туйӧд, менӧ мустӧмтысьяс понда сувтӧд менӧ веськыд туй вылӧ.
Эн сет менӧ налӧн киӧ, ӧд найӧ ылӧг висьталӧны ме йылысь, кӧсйӧны вины-дзескӧдны менӧ.
Но ме эска, мый ловъя дырйи на аддза Господьлысь бурлунсӧ.
Лача кут Господь вылӧ, ло зумыд да повтӧм! Лача кут Господь вылӧ!
{Еврей йӧз (комиӧдіс Kodko) @ 27 псалом @ религ. гижӧд @ Библия @ 2021 @ Лб. .}
27 псалом
Давидлӧн псалом.
Господьӧй, ме шыася Тэ дінӧ, Тэ менам Дорйысьӧй.
Кор шыася Тэ дінӧ, эн чӧв ов. Тэ кӧ кутан чӧв овны, ме кула.
Кор ме шыася Тэ дінӧ, кыпӧда киӧс Тэнад вежа крамлань, кыв менсьым кевмӧмӧс.
Эн бырӧд менӧ Ентӧг олысьяс да лёк вӧчысьяс лыдын. Йӧзыскӧд найӧ бурнога сёрнитӧны, а сьӧлӧманыс новлӧдлӧны лёксӧ.
Мынтысь налы уджъясныс да лёк вӧчӧмныс серти, мынтысь налы сы серти, мый вӧчисны асланыс киӧн. Сет налы сійӧ, мый асьныс корсисны.
Ӧд найӧ нинӧмӧ пуктӧны Господьлысь уджъяссӧ, Сылысь вӧчӧмторъяссӧ. Та вӧсна Сійӧ пасьвартас найӧс, и бӧрсӧ кок выланыс оз сувтӧд.
Ошкӧм Господьлы, ӧд Сійӧ кыліс менсьым кевмысьӧмӧс.
Господь — менам выныс да сайӧдыс.
Ме лача куті Сы вылӧ, и Сійӧ отсаліс меным. Менам сьӧлӧмӧй ёна нимкодясьӧ, ме сьылӧмӧн ошка Сійӧс.
Господь — Аслас войтырлӧн выныс, Аслас мавтыштӧмалӧн Дорйысьыс да Мездысьыс.
Господьӧй, мезды Ассьыд войтыртӧ, бурси да видз найӧс, ну Аслад ки вылад нэмъяс чӧж!
{Еврей йӧз (комиӧдіс Kodko) @ 28 псалом @ религ. гижӧд @ Библия @ 2021 @ Лб. .}
28 псалом
Давидлӧн псалом. 
[Сьылӧны Чом вӧчан лунъяс помасигӧн.] 
Енэжвывса олысьяс, кыпӧдӧй ошкӧм Господьлы, ошкӧй-нимӧдӧй Господьӧс! Ошкӧй Господьлысь нимсӧ, копыртчӧй Господь водзӧ Сылӧн мича вежаинын!
Господьлӧн гӧлӧс шыыс ва весьтын, дзирдлуна Ен гымӧбтӧ, Господь лэдзӧ гӧлӧс шысӧ ыджыд ва весьтын.
Господьлӧн гӧлӧс шыыс вына, Господьлӧн гӧлӧс шыыс ён.
Господьлӧн гӧлӧс шыысь пӧрӧны сус пуяс, Господь чегъялӧ ливанса сус пуяс. Сылӧн гӧлӧс шыысь вӧрзьывлӧны керӧсъяс, чеччалӧны куканьяс моз, Ливан да Сирион * керӧсъяс чеччалӧны ӧшпиян моз.
Господьлӧн гӧлӧс шыыс лэдзӧ чардби.
Господьлӧн гӧлӧс шыысь вӧрзьывлӧ овтӧмин, Господь пыркнитлӧ Кадеш овтӧмин.
Господьлӧн гӧлӧс шыысь вайсьӧны кӧръяс, Сылӧн гӧлӧс шыысь кушмӧны вӧръяс.
Сылӧн крамын ставныс гораа шуалӧны: «Ошкӧм Сылы!»
Господь ыджыдалӧ ваяс вылын, Господь ӧксыалӧ нэмъяс чӧж.
Господь сетас Аслас войтырлы вын, Господь бурсиас Ассьыс войтырсӧ лӧньлунӧн.
{Еврей йӧз (комиӧдіс Kodko) @ 29 псалом @ религ. гижӧд @ Библия @ 2021 @ Лб. .}
29 псалом
Давидлӧн псалом.
Крам вежӧдігӧн сьылӧм.
Господьӧй, ме ыдждӧдла Тэнӧ, ӧд Тэ кыпӧдін менӧ, эн сет менӧ мустӧмтысьлы нимкодясьны.
Господьӧй, менам Енмӧй, ме шыаси Тэ дінӧ, и Тэ бурдӧдін менӧ.
Господьӧй, Тэ петкӧдін менсьым лолӧс пыдӧстӧминысь, ловзьӧдін менӧ, и менӧ эз гуавны.
Сьылӧй Господьлы, Сылӧн эскана войтыр, ошкӧмӧн казьтывлӧй Сылысь вежалунсӧ. Сылӧн скӧралӧмыс сӧмын здук кежлӧ, а бурлуныс — став олӧм чӧж. Рытнас кылӧ бӧрдӧм, а асывнас — нимкодясьӧм.
Кор менам ставыс вӧлі бур, ме шуи: «Ме некор ог усь».
Господьӧй, Аслад бурлуныд кузя Тэ сувтӧдін менӧ зумыд керӧс вылӧ, но кор дзебин Ассьыд чужӧмбантӧ, ме шӧйӧвоши.
Сэки ме шыаси Тэ дінӧ, Господьӧй, ме кевмыси аслам Ыджыдлы:
«Мый бурыс сыысь, ме кӧ кула да менӧ гуаласны?
Кутас ӧмӧй шойыс ошкыны Тэнӧ, юӧртны, мый Тэныд позьӧ эскыны?
Господьӧй, кыв менӧ, ло бур сьӧлӧма ме дінӧ.
Господьӧй, отсав меным!»
Менсьым шогсьӧмӧс Тэ бергӧдін йӧктӧм-гажӧдчӧмӧ, пӧрччӧдін ме вылысь шогалан паськӧмӧс да вӧньӧдін менӧ нимкодьлунӧн. Та вӧсна ме дугдывтӧг сьыла Тэныд ошкӧмсӧ.
Господьӧй, менам Енмӧй, кута помтӧг ошкыны Тэнӧ.
{Еврей йӧз (комиӧдіс Kodko) @ 30 псалом @ религ. гижӧд @ Библия @ 2021 @ Лб. .}
30 псалом
Сьылысьясӧн веськӧдлысьлы.
Давидлӧн псалом. 
[Шогсян кадӧ сьылӧм.]
Господьӧй, Тэ вылӧ лача кута, ме некор ог янав.
Аслад веськыдлуныд вӧсна мезды менӧ!
Копырт Ассьыд пельтӧ мелань, тэрмась мездыны менӧ!
Ло меным изкыртаӧн да сайӧдчанінӧн, мезды менӧ! Ӧд Тэ — менам зумыд изйыс да изкарыс.
Аслад нимыд вӧсна нуӧд менӧ да веськӧдлы меӧн.
Мезды менӧ налькйысь, кодӧс гусьӧн октісны меным, ӧд Тэ — менам сайӧдчаніныс.
Тэнад киӧ сета Ассьым лолӧс.
Тэ мездан менӧ, Господьӧй, эскана Енмӧй.
Идолъяслы юрбитысьясӧс мустӧмта, ме лача кута Господь вылӧ.
Кута нимкодясьны да гажӧдчыны Тэнад буралӧмысь, ӧд Тэ аддзин менсьым сьӧкыдалӧмӧс, аддзин менам ловлысь шогсьӧмсӧ. Тэ эн сет менӧ мустӧмтысьяслӧн киӧ, Тэ петкӧдін менӧ паськыдінӧ.
Господьӧй, ло бур сьӧлӧма ме дінӧ, меным ӧд ёна сьӧкыд.
Курыд шогысь жебмис менам синмӧй, топаліс менам лолӧй да пытшкӧсӧй.
Шогын помасьӧ менам олӧмӧй, бӧрдӧмӧн тырӧма олан лунъясӧй.
Аслам мыж вӧсна ме дзикӧдз вынтӧмми, менам лыясӧй косьмисны.
Менӧ мустӧмтысьяс сералӧны ме вылын, орччӧн олысьяс лёкӧдӧны менӧ, тӧдсаяс зывӧктӧны менӧ, мекӧд паныдасьысьяс пышйӧны меысь.
Кулӧмаӧс моз менӧ вунӧдӧма, ме лои жугалӧм доз кодь. Унаӧн лёкӧдӧны менӧ, быд боксянь повзьӧдлӧны, ӧтвылысь сёрнитчӧны меным паныд, кӧсйӧны босьтны менсьым лолӧс.
Господьӧй, Тэ вылӧ ме лача кута, шуа: «Тэ — менам Ен».
Тэнад киын менам олан лунъясӧй.
Мезды менӧ мустӧмтысьясысь да вӧтлысьясысь, петкӧдлы Аслад кесйӧглы югыд чужӧмбантӧ, мезды менӧ Аслад буралӧмыд вӧсна.
Господьӧй, ме ог янав Тэ дінӧ шыасьӧмысь.
Лёк вӧчысьяс мед яналасны да ланьтасны пыдӧстӧминын.
Мед тупкасны вомнысӧ ылӧдчысьяс, кодъяс лёкӧдӧны веськыда олысьӧс, ышнясьӧмӧн да увтыртӧмӧн сёрнитӧны сылы паныд.
Уна бурсӧ Тэ дасьтӧмыд Тэысь полысьяслы, йӧз водзын Тэ петкӧдлан бурлунтӧ Тэ вылӧ лача кутысьяслы.
Тэ Аснад вевттян найӧс йӧзлӧн лёк вӧчӧмысь, дзебан найӧс Аслад вевт улӧ йӧзлӧн омӧльтӧмысь.
Ме ошка Господьӧс, ӧд Сійӧ петкӧдліс меным Ассьыс шензьӧдана буралӧмсӧ, видзис менӧ изкарын.
Майшасигӧн ме мӧвпышті: «Тэ вештін менӧ Аслад син водзысь».
Но кор ме шыаси Тэ дінӧ, Тэ кылін менсьым кевмӧмӧс.
Радейтӧй Господьӧс, Сылӧн эскана войтыр!
Господь видзӧ Сылысь кывзысьысьясӧс, а вылӧ кыпӧдчысьяслы Сійӧ мынтысьӧ тырвыйӧ.
Ёнмӧдчӧй, лоӧй зумыдӧсь, Господь вылӧ лача кутысьяс!
{Еврей йӧз (комиӧдіс Kodko) @ 31 псалом @ религ. гижӧд @ Библия @ 2021 @ Лб. .}
31 псалом
Давидлӧн сьыланкыв.
Шуда сійӧ, кодлысь лёк вӧчӧмъяссӧ прӧститӧма, мыжъяссӧ вевттьӧма.
Шуда сійӧ мортыс, кодлысь мыжсӧ Господь оз казьтыв, кодлӧн сьӧлӧмас абу наянлуныс.
Кытчӧдз ме эг висьтав ассьым мыжӧс, менам лыясӧй косьмисны быдлунъя бӧрдӧмысь. Лун и вой Тэнад киыд сьӧктӧдіс менӧ.
Менам олан вынӧй бырис, кыдзи гожся пӧжигӧн косьмӧ веж турун.
Но ме восьті Тэныд ассьым мыжӧс, эг дзеб ассьым лёк вӧчӧмӧс.
Ме шуи: «Висьтася Господьлы аслам лёк вӧчӧмысь», и Тэ прӧститін менсьым мыжӧс.
Эскана войтырыд мед кевмысяс Тэныд, кор позьӧ на шыасьны Тэ дінӧ. Сэки ыджыд валӧн ойдӧмыс оз су найӧс.
Тэ — менам сайӧдчаніныс. Тэ видзан менӧ шог дырйи, сетан меным нимкодясьны мездмӧмысь.
«Ме велӧда тэнӧ, — шуӧ Господь, — петкӧдла тэныд колана туйсӧ.
Ме туйдӧда тэнӧ, Менам синмӧй видзӧдӧ тэ бӧрся.
Энӧ лоӧй асныра вӧвъяс да осёлъяс кодьӧсь, ӧд найӧс колӧ кӧртвомавны да домповодавны, медым найӧ кывзысисны».
Лёк вӧчысьӧс суӧ уна шог, а Господь вылӧ лача кутысьӧс кытшалӧ буралӧм.
Веськыда олысьяс, гажӧдчӧй да нимкодясьӧй Господьӧн!
Нимкодясьӧй, веськыд сьӧлӧмаяс!
{Еврей йӧз (комиӧдіс Kodko) @ 32 псалом @ религ. гижӧд @ Библия @ 2021 @ Лб. .}
32 псалом
[Давидлӧн псалом.] 
Веськыда олысьяс, нимкодясьӧй Господьӧн!
Веськыд сьӧлӧмаяслы лӧсялӧ ошкыны Господьӧс.
Ошкӧй Господьӧс гуслиӧн, ворсӧй Сылы дас струнаа арфаӧн!
Сьылӧй Сылы выль сьыланкыв, кыпыда ворсӧй Сылы, гораа ошкӧй Сійӧс! Ӧд Господьлӧн кывйыс збыль, Сылӧн уджъясыс веськыдӧсь.
Господь радейтӧ збыльсӧ да веськыда мыждӧмсӧ, муыс тыр Господьлӧн буралӧмӧн.
Господьлӧн кывйӧн вӧчӧма енэжъяссӧ, Сылӧн ловшыӧн артмис став енэжвывсаыс.
Ыджыд чукӧрӧ Сійӧ чукӧртіс саридзса ваяс, Аслас видзанінӧ пуктіс джуджыд юяс.
Став муыс мед полӧ Господьысь, муюгыдын став олысьыс мед дзӧрӧ Сы водзын. Ӧд мый Сійӧ шуис, тайӧ лоис, мый Сійӧ тшӧктіс, тайӧ артмис.
Господь торкӧ войтыръяслысь шуӧмсӧ, жугӧдӧ налысь кӧсйӧмсӧ. 
[Сійӧ бырӧдӧ ӧксыяслысь сёрнитчӧмсӧ.]
Но Господьлӧн шуӧмыс олӧ нэмъяс чӧж, Сылӧн кӧсйӧмыс чужысьяссянь чужысьясӧдз оз вежсьы.
Шуда сійӧ войтырыс, кодлӧн Енмыс эм Господь. Шуда сійӧ войтырыс, кодӧс Господь бӧрйис Аслыс.
Господь видзӧдӧ енэжсянь да аддзӧ став йӧзсӧ.
Аслас юралан пуклӧссянь Сійӧ видзӧдӧ мувывса став олысьыс вылӧ.
Сійӧ вӧчис быд мортлысь сьӧлӧмсӧ, тӧдӧ быдӧнлысь уджъяссӧ.
Уна лыда тышкайӧз оз мездыны ӧксыӧс, вына мортӧс оз видз сылӧн ёнлуныс.
Вӧлыс оз мезды верзьӧмаӧс, сылы оз отсав вӧвлӧн ыджыд выныс.
Но Господь тӧждысьӧ на вӧсна, кодъяс полӧны Сыысь да лача кутӧны Сылӧн буралӧмыс вылӧ. Сійӧ пӧткӧдас найӧс тшыг кадӧ, видзас найӧс кулӧмысь.
Миян ловным лача кутӧ Господь вылӧ, Сійӧ миянлы отсӧг сетысьыс да миян сайӧдыс.
Миян сьӧлӧмным нимкодясьӧ Сыӧн, ми лача кутам Сылӧн вежа нимыс вылӧ.
Господьӧй, Тэнад буралӧмыд мед лоӧ миянкӧд, ӧд ми лача кутам Тэ вылӧ.
{Еврей йӧз (комиӧдіс Kodko) @ 33 псалом @ религ. гижӧд @ Библия @ 2021 @ Лб. .}
33 псалом
Давид лӧсьӧдіс тайӧ сьыланкывсӧ, кор лэччысис йӧй улӧ Авимелек водзын. Авимелек вӧтліс Давидӧс, и сійӧ муніс.
Ошка Господьӧс быд кадӧ, менам вомысь дугдывтӧг петӧ Сылы ошкӧмыс, менам лолӧй ошйысьӧ Господьӧн.
Рам сьӧлӧмаяс кыласны тайӧс да кутасны нимкодясьны.
Ыдждӧдлӧй Господьӧс мекӧд, ӧтвылысь кыпӧдам Сылысь нимсӧ!
Ме шыаси Господь дінӧ, и Сійӧ вочавидзис меным, Сійӧ мездіс менӧ став полӧмысь.
Сы вылӧ видзӧдысьяслӧн чужӧмныс югдӧ, найӧ некор оз янавны.
Ме, коньӧр морт, шыаси Господь дінӧ, и Сійӧ кыліс менӧ да став шогсьыс мездіс менӧ.
Господьлӧн анделыс кытшалӧ Господьысь полысьясӧс, видзӧ да мездӧ найӧс.
Тӧдмалӧй Господьӧс, и аддзанныд, кутшӧм Сійӧ бур!
Шуда сійӧ мортыс, коді лача кутӧ Господь вылӧ.
Полӧй Господьысь, Сылӧн вежа войтыр! Сыысь полысьяслӧн ставыс лоӧ тырмымӧн.
Том левъяс сьӧкыдалӧны да тшыгъялӧны, а Господьӧс корсьысьяслӧн оз ло тырмытӧмыс.
Локтӧй, челядь, кывзӧй менӧ! Ме велӧда тіянӧс овны Господьысь полӧмӧн.
Кӧсъян кӧ, мортӧй, кузь нэм овны да аддзыны шуда лунъяс, кут ассьыд кывтӧ лёк сёрниысь, видз ассьыд вомтӧ пӧръясьӧмысь.
Ылыстчы лёксьыс да вӧч бурсӧ, корсь лӧньлунсӧ да кутчысь сэтчӧ.
Господьлӧн синмыс видзӧдӧ веськыда олысьяс вылӧ, Сылӧн пельыс кылӧ налысь горзӧмсӧ, а лёк вӧчысьяслы Господь паныд сувтӧ, медым бырӧдны му вылысь на йылысь казьтылӧмсӧ.
Кор веськыда олысьяс шыасьӧны Господь дінӧ, Сійӧ кылӧ найӧс да мездӧ став налӧн шогсьыс.
Господь матын шогсьысь сьӧлӧмаяс дінӧ, ловнас усьӧмаясӧс Сійӧ мездӧ.
Веськыда олысьлӧн уна шогыс, но Господь мездас сійӧс став шогсьыс.
Господь видзӧ сылысь лыяссӧ, весиг ӧти на пиысь оз чег.
Мыж вӧчысьӧс виас лёкыс. Коді мустӧмтӧ веськыда олысьӧс, сійӧс лоӧ мыждӧма.
Господь видзас Аслас кесйӧгъяслысь олӧмсӧ, Сы вылӧ лача кутысьӧс оз ло мыждӧма.
{Еврей йӧз (комиӧдіс Kodko) @ 34 псалом @ религ. гижӧд @ Библия @ 2021 @ Лб. .}
34 псалом
Давидлӧн псалом.
Господьӧй, вермась накӧд, кодъяс меным паныд сувтӧны, водзсась накӧд, кодъяс меным паныд водзсасьӧны.
Босьт Ассьыд ичӧт да ыджыд сайӧдтӧ, лок меным отсӧг вылӧ.
Перйы Ассьыд шыпурттӧ да тупкы менӧ вӧтӧдысьяслысь туйсӧ.
Шу менам ловлы, мый Тэ — менам Мездысьыс.
Менсьым олӧмӧс босьтны кӧсйысьяс мед яналасны да лоасны серамтуйынӧсь.
Меным лёксӧ вӧчны кӧсйысьяс мед яналӧмӧн бӧр бергӧдчасны.
Мед найӧ лоӧны тӧвйыв шердйӧм кыд кодьӧсь, мед Господьлӧн анделыс вӧтлас найӧс.
Налӧн туйыс мед лоӧ пемыд да вильыд, и Господьлӧн анделыс мед вӧтчас на бӧрся. Ме нинӧм лёксӧ эг вӧч, но найӧ пуктісны нальк, медым кыйны менӧ, кодйисны джуджыд гу, медым босьтны менсьым олӧмӧс.
Найӧс мед тӧдлытӧг суас бырӧдӧмыс, найӧ мед асьныс шедасны меным пуктӧм налькйӧ, усясны асланыс гуӧ.
Но менам лолӧй кутас нимкодясьны Господьӧн, кутас гажӧдчыны, ӧд Сійӧ мездіс менӧ.
Став менам лыясӧй шуӧны: «Господьӧй, Тэ кодь мӧдыс абу. Жебӧс Тэ мездан вынаысь, гӧльӧс да коньӧрӧс — сійӧс нартитысьысь».
Ылӧг висьталысьяс чеччӧны ёрд вылын, юасьӧны менсьым, мый ог тӧд.
Бурсьыс мынтысьӧны меным лёкӧн, ме коли дзик ӧтнам.
Налӧн висигӧн ме пасьтавлі шогалан паськӧм, тшыгъялі-видзалі да кевмыси став сьӧлӧмсянь.
Ме кевмысьлі на вӧсна, кыдзи ёрт либӧ вок вӧсна.
Ме ветлі шогсьӧмӧн да юрӧс ӧшӧдӧмӧн, бӧрді мам вӧсна моз.
А кор ме крукасьлі, найӧ ӧтув чукӧртчӧмӧн нимкодясисны.
Ӧтвыв сёрнитчӧмӧн найӧ дугдывтӧг лёкӧдісны менӧ, и мыйысь — ог тӧд, пиньнысӧ йирӧмӧн найӧ наяна сералісны ме вылын.
Господьӧй, дыр-ӧ на Тэ кутан видзӧдны тайӧс?
Видз менӧ налӧн лёк вӧчӧмысь, видз менсьым олӧмӧс тайӧ левъяссьыс.
Тэнад войтырлӧн ыджыд чукӧртчӧмын ме ошка Тэнӧ, уна йӧз пӧвстын ыдждӧдла Тэнӧ. Эн сет мустӧмтысьяслы серавны ме вылын, ӧд ме мыжтӧм. Эн сет налы читкыравны синнысӧ, ӧд менам абу некутшӧм мыж.
Найӧ сёрнитӧны оз бурасьӧм йылысь, а мӧвпалӧны му вылын лӧня олысьяслы лёксӧ вӧчны.
Найӧ вомнысӧ паськӧдӧмӧн шуалӧны меным паныд: «Тайӧ тадзи!
Ми асланым синъясӧн аддзылім, мый вӧлі!»
Господьӧй, эн чӧв ов, Тэ ӧд аддзылін тайӧс, Ыджыдӧй, эн ылыстчы меысь.
Господьӧй Енмӧй, садьмы-кыпӧдчы, веськыда мыжды да дорйы менӧ!
Господьӧй, менам Енмӧй, мыжды менӧ Аслад веськыдлуныд серти. Найӧ мед оз нимкодясьны, мед оз шуны асланыс сьӧлӧмын, бур, тайӧс пӧ ми и кӧсйим.
Найӧ мед оз ошйысьны, ми пӧ ньылыштім сійӧс.
Мед яналасны да лоӧны серамтуйынӧсь найӧ, кодъяс нимкодясьӧны менам шогысь.
Мед юръяндзим лоӧ ме водзын ошйысьысьяслы.
Мед долыда нимкодясясны найӧ, кодъяс кӧсйӧны меным веськыда мыждӧмсӧ. Мед дугдывтӧг шуаласны: «Господь ыджыд! Сійӧ сетӧ Аслас кесйӧглы лӧнь олӧм».
Ме юӧрта Тэнад веськыдлун йылысь, быд лун ошка Тэнӧ.
{Еврей йӧз (комиӧдіс Kodko) @ 35 псалом @ религ. гижӧд @ Библия @ 2021 @ Лб. .}
35 псалом
Сьылысьясӧн веськӧдлысьлы.
Давидлӧн, Господьлӧн кесйӧглӧн, сьыланкыв.
Мыжыс сёрнитӧ лёк вӧчысьлӧн сьӧлӧмас, Енсьыс полӧмыс сылӧн абу. Ӧд мыжыс тупкӧма сылысь синсӧ, сійӧ оз аддзы да оз мустӧмт ассьыс мыжъяссӧ.
Сылӧн вомысь петӧны ылӧг да наян кывъяс, сійӧ оз кӧсйы вежӧрсявны да вӧчны бурсӧ.
Весиг вольпасяс куйлігӧн сійӧ мӧвпалӧ лёксӧ вӧчны, сійӧ сувтӧма мыжаяслӧн туй вылӧ, оз зывӧкты лёксӧ.
Господьӧй, Тэнад буралӧмыд — енэжӧдзыс, Тэнад збыльыд — кымӧръясӧдзыс.
Тэнад веськыдлуныд джуджыд керӧс кодь, Тэнад веськыда мыждӧмыд пыдӧстӧм саридз кодь.
Господьӧй, Тэ видзан мортӧс да ыж-мӧскӧс.
Енмӧй, Тэнад буралӧмыд дона, Тэнад бордъяс улӧ йӧзыс сайӧдчӧны.
Найӧ пӧткӧдчӧны Тэнад керкаса озырлунӧн, Тэ юктӧдан найӧс Аслад юмов ваӧн. Ӧд Тэсянь визувтӧ олӧм, Тэнад югыдад ми аддзам югыдсӧ.
Енмӧй, нюжӧд Ассьыд буралӧмтӧ Тэнӧ тӧдысьяс дінӧ, петкӧдлы Ассьыд веськыдлунтӧ сӧстӧм сьӧлӧмаяслы. Вылӧ кыпӧдчысьлӧн кокыс мед оз тальышт менӧ, лёк вӧчысьлӧн киыс мед оз вӧтлы менӧ.
Видзӧдлы, лёк вӧчысьяс усисны! Енмыс уськӧдіс найӧс кок йывсьыныс, и найӧ оз вермыны сувтнысӧ.
{Еврей йӧз (комиӧдіс Kodko) @ 36 псалом @ религ. гижӧд @ Библия @ 2021 @ Лб. .}
36 псалом
Давидлӧн псалом.
Эн дӧзмы лёк вӧчысьяс вылӧ, эн вежав Индӧд торкысьяс вылӧ. Ӧд турунӧс моз найӧс регыд лоӧ ытшкыштӧма, веж быдмӧг моз найӧ нярмунасны.
Лача кут Господь вылӧ да вӧч бурсӧ, ов му вылас да видз збыльсӧ.
Бурмӧд сьӧлӧмтӧ Господьӧн, и Сійӧ збыльмӧдас тэнсьыд сьӧлӧм кӧсйӧмтӧ.
Сет ассьыд олан туйтӧ Господьлы да лача кут Сы вылӧ, и Сійӧ тӧждысяс тэ вӧсна. Тэнсьыд мыжтӧмлунтӧ Сійӧ петкӧдас югыдас, тэнад веськыдлуныд кутас дзирдавны луншӧрся шонді моз.
Лӧня виччысь Господьӧс да лача кут Сы вылӧ.
Эн вежав наяна вӧчысьлы, кодлӧн ставыс артмӧ.
Дугды скӧравнытӧ да эновтчы лёксьӧмысь, эн ыпъяв скӧрлуннад сы выйӧдз, медым вӧчны лёксӧ. Ӧд лёк вӧчысьясӧс лоӧ бырӧдӧма, а Господь вылӧ лача кутысьяслы вичмас му.
Нӧшта этшаник кад, и лёк вӧчысь оз ло.
Видзӧдлан сылӧн оланін вылӧ, а сійӧ куш.
Но рам сьӧлӧмаяслы вичмас му, найӧ кутасны ёна нимкодясьны лӧнь олӧмнас.
Ентӧг олысь мӧвпалӧ лёк вӧчны веськыда олысьлы, пиньсӧ йирӧ сы вылӧ.
Но Господь сералӧ Ентӧг олысь вылын, аддзӧ, мый матын нин сійӧс мыждан луныс.
Лёк вӧчысьяс перйӧны ассьыныс шыпуртсӧ, зэвтӧны ньӧввужсӧ, медым лыйны гӧльӧс да коньӧрӧс, медым вины веськыд туйӧд ветлысьясӧс.
Но налӧн шыпуртыс сатшас аслыныс сьӧлӧмас, налӧн ньӧввужйыс чегас.
Веськыда олысьлӧн этшаникыс ёна бурджык лёк вӧчысьлӧн уна озырлунысь. Ӧд лёк вӧчысьяс вынтӧммӧны, а веськыда олысьясӧс ёнмӧдӧ Господь.
Господь тӧдӧ сӧстӧм сьӧлӧмаяслысь олан лунъяссӧ, налы вичманаыс некор оз бырлы.
Сьӧкыд кадӧ найӧ оз янавны, тшыг кадӧ пӧттӧдзныс сёясны.
А лёк вӧчысьяс бырасны, Господьӧс мустӧмтысьяс ыж гос моз сыласны, тшын моз разаласны.
Лёк вӧчысь водзӧсӧн босьтӧ, но бӧрсӧ оз мынтысь, а веськыда олысь бур сьӧлӧма, сійӧ лышкыда сетӧ. Господьлӧн бурсиӧмаяслы вичмӧ му, но Господьӧн ёрӧмаясӧс лоӧ бырӧдӧма.
Господь ёнмӧдӧ веськыда олысьлысь воськовъяссӧ, сылӧн туйыс шогмана Господьлы.
Сійӧс шатовтӧдас, но сійӧ оз усь, ӧд Господь кутӧ сійӧс киӧдыс.
Ме том вӧлі, ӧні пӧрысьми, но некор эг аддзывлы, мый веськыда олысьӧс вӧлі эновтӧма, и сылӧн челядьыс нянь корӧны.
Веськыда олысь быд лун буралӧ да водзӧсӧн сетӧ, сылӧн челядьыс вайӧны бурсиӧм.
Ылыстчы лёксьыс да вӧч бурсӧ, сэки тэ кутан овны нэмъяс чӧж.
Ӧд Господь радейтӧ веськыдлунсӧ, Сійӧ оз эновт Ассьыс эскана войтырсӧ, пыр кутас видзны найӧс. 
[Индӧд торкысьясӧс лоӧ вӧтлӧма.] Лёк вӧчысьяслысь рӧдсӧ лоӧ бырӧдӧма.
Веськыда олысьяслы вичмас му, найӧ кутасны овны сэні нэмъяс чӧж.
Веськыда олысь сёрнитӧ мывкыд кывъясӧн, сылӧн вомыс висьталӧ збыльсӧ.
Сылӧн сьӧлӧмын — Енлӧн Индӧдыс, сылӧн воськовъясыс зумыдӧсь.
Лёк вӧчысь кыйӧдчӧ веськыда олысь бӧрся, кӧсйӧ вины сійӧс, но Господь оз сет сійӧс лёк вӧчысьлӧн киӧ, ёрд водзын оз лэдз сійӧс мыждыны.
Лача кут Господь вылӧ да ветлы Сылӧн туйӧд!
Сійӧ вылӧ кыпӧдас тэнӧ, и тэныд вичмас му, тэ аддзан, кыдзи лоӧ бырӧдӧма лёк вӧчысьясӧс.
Ме аддзылі чорыд сьӧлӧма лёк вӧчысьӧс, сійӧ вӧлі паськыда быдмысь пу кодь, крепыд вужъяса да уна вожа.
Но сійӧ бырис, и эз нин вӧв, ме корси сійӧс, но эг аддзы.
Видзӧд сӧстӧм сьӧлӧмаяс да веськыда олысьяс вылӧ, ӧд найӧс виччысьӧ лӧнь олӧм.
А мыж вӧчысьясӧс лоӧ бырӧдӧма, лёк вӧчысьяслӧн оз ло локтана кадыс.
Веськыда олысьяслы мездмӧмыс воас Господьсянь, Сійӧ доръяс найӧс шог дырйи.
Господь отсалас налы да мездас найӧс, мездас лёк вӧчысьяслӧн киысь, доръяс найӧс, ӧд найӧ Сы вылӧ лача кутӧны.
{Еврей йӧз (комиӧдіс Kodko) @ 37 псалом @ религ. гижӧд @ Библия @ 2021 @ Лб. .}
37 псалом
Давидлӧн псалом.
Сьылӧны казьтылан вись вайигӧн [шойччан лунӧ].
Господьӧй, эн янӧд менӧ лӧгалігад, эн мыжды менӧ скӧралігад. Тэнад ньӧвъясыд сатшисны меӧ, Тэнад киыд личкӧ менӧ.
Тэнад скӧралӧмысь менам вир-яйын абу висьтӧминыс, менам мыж вӧсна лыясӧй оз ланьтлыны висьӧмысь. Ӧд менам мыжъясӧй юрвывтыр, сьӧкыд ноп моз найӧ личкӧны менӧ. Менам мывкыдтӧмлун вӧсна дойясӧй орзьӧмаӧсь, ӧвтӧны лёк дукӧн.
Ме мышкыртчи да дзикӧдз нюкыртчи, лунтыр ветлӧдла шогсьӧмӧн. Менам пытшкӧсӧй ставнас сотчӧ, абу висьтӧминыс менам вир-яйын.
Ме дзикӧдз вынтӧмми да жугалі, сьӧкыда ружта сьӧлӧмпытшса дойысь.
Господьӧй, Тэ аддзан став менсьым кӧсйӧмӧс, кылан став менсьым ышлолалӧмӧс.
Менам сьӧлӧмӧй чеччӧ, ме дзикӧдз вынтӧмми, менам синмӧй пемдіс.
Дойясӧй вӧсна менам ёртъясӧй да муса йӧзӧй ылыстчисны меысь, менам матыссаяс ӧтдортчисны.
Менсьым олӧмӧс корсьысьяс октӧны меным нальк, меным лёксӧ вӧчны кӧсйысьяс мӧвпалӧны менӧ виӧм йылысь, найӧ быд лун наяна сёрнитӧны меным паныд.
Но ме лои пельтӧм, нинӧм ог кыв, сёрниттӧм морт моз нинӧм ог шу.
Ме лои пельтӧм морт кодь, ог кыв да ог вермы вочавидзны. Господьӧй, Тэ вылӧ ме лача кута, Господьӧй Енмӧй, Тэ вочавидзан меным.
Ме шуи: «Эн сет мустӧмтысьяслы нимкодясьны, эн сет налы ышнясьны ме водзын, кор менам кокӧй лигышмунӧ.
Ме усянвыйын, ме дугдывтӧг шогся.
Ме висьтася аслам мыж вӧчӧмысь, шогся мыжӧй вӧсна.
Но менӧ мустӧмтысьяс олӧны да вынсялӧны, унаӧн помкатӧг мустӧмтӧны менӧ.
Бурсьыс найӧ мынтысьӧны лёкӧн, ме бурсӧ кӧсъя, но найӧ мыжалӧны менӧ.
Господьӧй, эн эновт менӧ!
Енмӧй, эн ылыстчы меысь!
Господьӧй, менам Мездысьӧй, тэрмась отсавны меным!»
{Еврей йӧз (комиӧдіс Kodko) @ 38 псалом @ религ. гижӧд @ Библия @ 2021 @ Лб. .}
38 псалом
Едутунлы, сьылысьяслӧн веськӧдлысьлы.
Давидлӧн псалом.
Ме шуи: «Кута видзӧдны ас бӧрся, медым аслам сёрниӧн эг мыжмы.
Ог восьт вомӧс, чӧв ола, кытчӧдз лёк вӧчысь оз вешйы ме дінысь».
Ме чӧв олі, эг шыасьлы, эг сёрнит весиг бурыс йылысь, и менам сьӧлӧмӧй тырис шогӧн.
Менам сьӧлӧмӧй пондіс сотчыны, мӧвпъясӧй кутісны ыпъявны, сэки ме понді сёрнитны.
Господьӧй, висьтав меным олӧм помӧс, висьтав олан лунъяслысь лыдсӧ, мед ме тӧді ассьым нэмӧс.
Сӧмын весьт мында Тэ сетін меным олан лунъяс, и менам нэмӧй Тэнад син водзын нинӧм кодь.
Дзик збыльысь, мортыдлӧн олӧмыс тӧвру пӧльыштӧм кодь.
Мортлӧн олӧмыс вуджӧр кодь.
Весьшӧрӧ сійӧ мырсьӧ-пессьӧ да чукӧртӧ эмбурсӧ, но оз тӧд, кодлы тайӧ вичмас.
Господьӧй, мый меным виччысьны?
Тэ вылӧ ме лача кута.
Мезды менӧ став менам мыжысь, эн лэдз мывкыдтӧм йӧзлы серавны ме вылын.
Ме чӧв ола, вомӧс ог восьтлы, ӧд ставыс тайӧ Тэсянь.
Господьӧй, дугды менӧ дойдавны, Тэнад нӧйтӧмысь ме куланвыйын.
Тэ кӧ мыж вӧчӧмысь янӧдан да мыждан мортӧс, сэки сылӧн мичлуныс бырас воз сёйӧм паськӧм моз.
Быд мортлӧн олӧмыс тӧвру пӧльыштӧм кодь.
Господьӧй, кыв менсьым кевмысьӧмӧс, сибӧд менсьым кевмӧмӧс.
Менам бӧрдігӧн эн тупкы пельтӧ, ӧд Тэ водзын ме йӧз муысь локтысь кодь, аслам батьяс моз ме бокыса морт кодь.
Ылыстчы ме дінысь, медым кулӧм водзвылын ме верми на нимкодясьыштны.
{Еврей йӧз (комиӧдіс Kodko) @ 39 псалом @ религ. гижӧд @ Библия @ 2021 @ Лб. .}
39 псалом
Сьылысьясӧн веськӧдлысьлы.
Давидлӧн псалом.
Ме куті зумыд лача Господь вылӧ, и Сійӧ копыртіс мелань пельсӧ, кыліс менсьым бӧрдӧмӧс.
Сійӧ лэптіс менӧ пемыд гуысь, петкӧдіс менӧ зыбуч нюрысь, сувтӧдіс менӧ зумыд из вылӧ, ёнмӧдіс менсьым воськовъясӧс, пуктіс менам вомӧ выль сьыланкыв — миян Енмӧс ошкана сьыланкыв.
Тайӧс аддзигӧн унаӧн кутасны повны-вежавидзны Господьысь, лача кутасны Сы вылӧ.
Шуда сійӧ мортыс, коді лача кутӧ Господь вылӧ, а оз шыась вылӧ кыпӧдчысьяс да ылӧгас кежысьяс дінӧ.
Господьӧй, менам Енмӧй, Тэ вӧчин уна шензьӧданатор, Тэ дугдывтӧг мӧвпалан миян йылысь. Кодӧс позяс ӧткодявны Тэкӧд?
Ме эськӧ кӧсйи висьтавны Тэнад уджъясыд йылысь, но весиг лыддьӧдлынысӧ ог вермы найӧс.
Вись да вайӧмтор Тэныд оз ков, сотан вись да мыжысь вись Тэ он кор, но Тэ вӧчин меным пель, медым кывны.
Та вӧсна ме шуи: «Со, ме локті, кыдзи гартӧм гижӧдас ме йылысь гижӧма.
Енмӧй, ме кӧсъя збыльмӧдны Тэнсьыд кӧсйӧмтӧ, Тэнад Индӧдыд олӧ менам сьӧлӧмын».
Ен войтырлӧн ыджыд чукӧртчӧмын ме юӧрті Тэнад веськыдлуныд йылысь, эг тупкыв ассьым вомӧс. Господьӧй, Тэ тӧдан тайӧс!
Тэнсьыд веськыдлунтӧ ме эг дзеблы, а восьсӧн висьтавлі, мый Тэ эскана Мездысь. Тэнад войтырлӧн ыджыд чукӧртчӧмын ме висьтавлі Тэнад буралӧмыд да збыльыд йылысь.
Господьӧй, эн тупкы меысь Ассьыд бурлунтӧ.
Тэнад буралӧмыд да збыльыд мед дугдывтӧг видзасны менӧ. Лыдтӧм-тшӧттӧм шогъяс кытшалӧны менӧ, менам мыжъясӧй суӧдісны менӧ, та вӧсна менам синмӧй бердӧма. Менам мыжъяслӧн лыдыс юрси сі дорысь унджык, менам сьӧлӧмӧй дзикӧдз нюкыртчис.
Господьӧй, ло бур сьӧлӧма, мезды менӧ, Господьӧй, тэрмась отсавны меным!
Мед яналасны да лоӧны серамтуйынӧсь менсьым олӧмӧс корсьысьяс, мед бӧр бергӧдчасны да лоӧны серамтуйынӧсь меным лёксӧ кӧсйысьяс.
Мед яналасны да шӧйӧвошасны найӧ, кодъяс шуалӧны, тадзи пӧ тэныд и колӧ.
Господьӧй, Тэнӧ корсьысьяс мед долыда нимкодясясны, Тэсянь воӧм мездӧмсӧ радейтысьяс мед дугдывтӧг шуаласны: «Господь ыджыд!»
Ме гӧль да коньӧр морт, но Господь тӧждысьӧ ме вӧсна.
Тэ меным отсӧг сетысьыс да менӧ Мездысьыс. Енмӧй, эн ньӧжмась!
{Еврей йӧз (комиӧдіс Kodko) @ 40 псалом @ религ. гижӧд @ Библия @ 2021 @ Лб. .}
40 псалом 
Сьылысьясӧн веськӧдлысьлы.
Давидлӧн псалом.
Шуда сійӧ, коді тӧждысьӧ гӧль [да коньӧр] морт вӧсна.
Господь отсалӧ сылы сьӧкыд кадӧ, дорйӧ сійӧс да видзӧ сылысь олӧмсӧ.
Аслас муас сійӧс шуӧны майбырӧн, Господь оз сет сійӧс мустӧмтысьяслӧн киӧ.
Сылӧн висигас Господь ёнмӧдӧ сійӧс, чеччӧдӧ сійӧс вольпасьысь.
Ме шуи: «Господьӧй, ме мыж вӧчи Тэныд паныд. Ло бур сьӧлӧма ме дінӧ, бурдӧд менӧ!»
Менӧ мустӧмтысьяс лёка сёрнитӧны ме йылысь: «Мед эськӧ сійӧ кулас, мед эськӧ вунӧдасны сылысь нимсӧ!»
Менӧ видлыны волысь сёрнитӧ пӧръясьӧмӧн, сьӧлӧмас сылӧн чужӧны лёк мӧвпъяс, петӧм бӧрас сійӧ суклясьӧ ме йылысь.
Менӧ мустӧмтысьяс вашкӧдчӧны ас костаныс, мӧвпалӧны меным лёксӧ вӧчны.
Найӧ шуалӧны: «Кулӧмыслӧн выныс уськӧдіс сійӧс кок йывсьыс, сійӧ оз нин вермы чеччынысӧ».
Весиг матысса ёртӧй, кодлы ме эски, кодкӧд ӧтвыв сёйлім, сувтіс меным паныд.
Но Тэ, Господьӧй, ло бур сьӧлӧма ме дінӧ, сувтӧд менӧ кок йылӧ, сэки ме водзӧс перъя налысь.
Мустӧмтысьяс кӧ оз вермыны менӧ, сэки ме тӧдмала, мый Тэ бур сьӧлӧма ме дінӧ. Тэ видзан менӧ, ӧд ме сӧстӧма ола. Тэ сувтӧдан менӧ Аслад чужӧмбан водзӧ пыр кежлӧ.
Ошкӧм Господьлы, Израильлӧн Енлы, нэмъяссянь нэмъясӧдз!
Аминь, аминь!
{Еврей йӧз (комиӧдіс Kodko) @ 41 псалом @ религ. гижӧд @ Библия @ 2021 @ Лб. .}
41 псалом
Сьылысьясӧн веськӧдлысьлы.
Корей пиянлӧн сьыланкыв.
Кыдзи горш косьмигас кӧр тэрмасьӧ визув ва дорӧ, сідзи менам лолӧй ёна кӧсйӧ Тэ дінӧ, Енмӧй.
Менам лолӧй ёна гажтӧмтчӧ [вына да] ловъя Енмысь. Кор нин ме верма сувтны Енлӧн чужӧмбан водзӧ?
Лун и вой ме пӧткӧдча аслам синваӧн, ӧд быд лун менсьым юасьӧны, кӧні пӧ тэнад Енмыд.
Ме восьта ассьым сьӧлӧм дойӧс, казьтывла гажӧдчан кадсӧ, кор ми ыджыд чукӧрӧн ветлім Енлӧн крамӧ да гораа нимкодясьӧмӧн аттьӧалім Енсӧ.
Мыйла шогсян да майшасян, менам лолӧй?
Лача кут Ен вылӧ! Ме кута на ошкыны Сійӧс, ассьым Енмӧс да Мездысьӧс.
Менам лолӧй дзикӧдз нюкыртчӧма, та вӧсна ме казьтывла Тэнӧ Йӧрдан юбокса му вылын, Ермон да Мицар керӧсъясын.
Пыдӧстӧм саридзьяс гораа сёрнитӧны ӧта-мӧдныскӧд, Тэнад ваясыд ыджыд шыӧн бузгӧны, став Тэнад гыясыд мунӧны менам юр весьтті.
Луннас Господь петкӧдлӧ Ассьыс буралӧмсӧ, а войнас ме сьылӧмӧн ошка Сійӧс, кевмыся менам олӧмӧйлӧн Енлы.
Ме шуа менӧ дорйысь Енлы: «Мыйла Тэ вунӧдін менӧ?
Мыйла меным лоӧ шогсьыны мустӧмтысьяслӧн дзескӧдӧмысь?»
Дойыс йиджӧ менам лыясӧдз, кор мустӧмтысьяс янӧдӧны менӧ, быд лун юасьӧны менсьым, кӧні пӧ тэнад Енмыд.
Мыйла шогсян да майшасян, менам лолӧй?
Лача кут Ен вылӧ! Ме кута на ошкыны Сійӧс, ассьым Енмӧс да Мездысьӧс.
{Еврей йӧз (комиӧдіс Kodko) @ 42 псалом @ религ. гижӧд @ Библия @ 2021 @ Лб. .}
42 псалом
Енмӧй, мыжды менӧ веськыда! Дорйы менӧ Тэнсьыд кывзысьтӧм войтырысь, мезды менӧ лёк да ылӧдчысь йӧзысь, Тэ ӧд менӧ дорйысь Ен.
Мыйла Тэ эновтін менӧ, мыйла меным лоӧ шогсьыны мустӧмтысьяслӧн дзескӧдӧмысь?
Мӧдӧд Ассьыд югыдтӧ да збыльтӧ!
Найӧ мед нуӧдасны менӧ, мед вайӧдасны Тэнад вежа керӧс вылӧ, Тэнад оланінӧ.
Ме матыстча Тэнад висьпуктанін дорӧ, матыстча Тэ дінӧ, Енмӧй. Тэ сетан меным нимкодьлун да гажлун, гуслиӧн ворсӧмӧн ме кута ошкыны Тэнӧ, менам Енмӧй.
Мыйла шогсян да майшасян, менам лолӧй?
Лача кут Ен вылӧ!
Ме кута на ошкыны Сійӧс, ассьым Енмӧс да Мездысьӧс.
{Еврей йӧз (комиӧдіс Kodko) @ 43 псалом @ религ. гижӧд @ Библия @ 2021 @ Лб. .}
43 псалом
Сьылысьясӧн веськӧдлысьлы.
Корей пиянлӧн сьыланкыв.
Енмӧй, ми асланым пельясӧн кывлім, батьясным миянлы висьталісны, мый Тэ вӧчлін важӧн, вӧчлін налӧн олан кадӧ.
Аслад киӧн Тэ бырӧдін мукӧд войтыръясӧс, вермин найӧс да вӧтлін тайӧ муысь, овмӧдін татчӧ миянлысь батьясӧс.
Эз шыпурт отсӧгӧн босьтны миян батьяс тайӧ мусӧ, эз асланыс вынӧн найӧ вермыны, а Тэнад веськыд киӧн да вынӧн, Тэнад чужӧмбаныдлӧн югыдӧн, ӧд Тэ вӧлін бур сьӧлӧма на дінӧ.
Енмӧй, Тэ менам Ӧксыӧй, сет мездмӧмсӧ Яковлы!
Тэкӧд ми люкалам дзескӧдысьясӧс, Тэнад нимӧн ми талялам паныд кыпӧдчысьясӧс.
Аслам ньӧввуж вылӧ ме лачаӧс ог кут, менам шыпуртӧй оз мезды менӧ, но Тэ мездан миянӧс дзескӧдысьясысь, янӧдан мустӧмтысьясӧс.
Быд лун ми кутам ошйысьны Енмӧн, Сылысь нимсӧ кутам ошкыны нэмъяс чӧж.
Но Тэ эновтін да янӧдін миянӧс, миянкӧд ӧтвыв эн пет тышӧ.
Тэ сетін дзескӧдысьяслы вӧтчыны миян бӧрся, мустӧмтысьяслы куштыны миянӧс.
Ыжъясӧс моз Тэ сетін налы миянӧс сёйны, разӧдін миянӧс войтыръяс пӧвстӧ.
Донтӧм донысь Тэ вузалін Ассьыд войтыртӧ, сылысь донсӧ эн кыпӧд.
Тэ сетін орччӧн олысьяслы миянӧс омӧльтны, матігӧгӧрса олысьяс сералӧны-лёкӧдӧны миянӧс.
Ми лоим шусьӧгӧн войтыръяслы, юрнас довкйӧдлӧмӧн найӧ сералӧны миян вылын.
Быд лун менӧ янӧдӧны, менам чужӧмӧй сотчӧ менӧ лёкӧдысьяслӧн да суклясьысьяслӧн сёрниысь, мустӧмтысьяслӧн да водзӧс перйысьяслӧн видзӧдӧмысь.
Ставыс тайӧ суис миянӧс, но ми эгӧ вунӧдӧй Тэнӧ, эгӧ торкӧй йитӧдтӧ, мый Тэ кӧрталін миянкӧд.
Сьӧлӧмным эз бергӧдчы Тэысь, кокным эз кеж Тэнад туй вылысь. Но Тэ пасьвартін миянӧс гундыръяслӧн му вылын, вевттин миянӧс сап пемыдӧн.
Енмӧй, ми кӧ вунӧдім Тэнсьыд нимтӧ, нюжӧдім кинымӧс ылӧг ен дінӧ, Тэ эськӧ тӧдін та йылысь, Тэ ӧд тӧдан сьӧлӧмпытшса став гусяторсӧ.
Но Тэ вӧсна быд лун миянӧс виалӧны, лыддьӧны начкыны дасьтӧм ыжъясӧн.
Чеччы, Господьӧй, эн узь, садьмы, эн вӧтлы миянӧс пыр кежлӧ!
Мыйла Тэ тупкан Ассьыд чужӧмбантӧ, мыйла вунӧдін сьӧкыдалӧмнымӧс, вунӧдін миянӧс дзескӧдӧмсӧ?
Ӧд миянӧс талялӧны няйтӧс моз, ми усим чужӧм выланым, туплясям муас.
Господьӧй, чеччы да отсав миянлы, Аслад буралӧмыд кузя мезды миянӧс!
{Еврей йӧз (комиӧдіс Kodko) @ 44 псалом @ религ. гижӧд @ Библия @ 2021 @ Лб. .}
44 псалом
Сьылысьясӧн веськӧдлысьлы.
Сьылӧны “Шушан” шылад улӧ.
Корей пиянлӧн сьыланкыв.
Муслун йылысь.
Менам сьӧлӧмысь петӧны мича кывъяс, ме сьыла ӧксы йылысь, кывъясӧй ворсӧдчӧны мичаа гижысьлӧн ки моз.
Ӧксыӧй, став йӧзыс пӧвстысь тэ медся мичаыс, тэнад вомысь петӧны мелі кывъяс, та вӧсна Енмыс бурсиис тэнӧ нэмъяс кежлӧ.
Вынаӧй, вӧняв коскад ассьыд шыпурттӧ, кышанӧс моз пасьтав ас вылад дзирдлунтӧ да вынтӧ. Дзирдлуннад да выннад пет тышӧ, дорйы збыльсӧ, рамлунсӧ да веськыдлунсӧ. Тэнад веськыд киыд мед петкӧдлас шензьӧдана уджъяс.
Тэнад ньӧвъясыд ёсьӧсь, [вынаӧй,] найӧ сатшасны сьӧлӧманыс ӧксыӧс мустӧмтысьяслы, тэнад кок улӧ усясны войтыръяс.
Енлӧн юралан пуклӧсыс моз тэнад юралан пуклӧсыд лоӧ нэмъяс чӧж, тэнад юралан беддьыд — веськыдлун.
Веськыдлуныс тэныд муса, а лёксӧ тэ мустӧмтан. Та вӧсна тэнад Енмыд мавтыштіс тэнӧ нимкодьлунӧн мукӧд дорысь ёнджыка на.
Тэнад паськӧмыд ӧвтӧ чӧскыд дукӧн, смирна, алоэ да кассия дукӧн.
Тэ олан слӧн лыысь вӧчӧм керкаын, тэнӧ гажӧдӧны шылада ворсанторъясӧн.
Тэнад керкаын олӧны нималана аньяс да ӧксыяслӧн нывъясыс, тэнад веськыдладорын пукалӧ офирса зарниӧн мичмӧдӧм ӧксы-ань.
Кывзы, нылӧй, сюся кывзы! Вунӧд ассьыд войтыртӧ да бать керкатӧ.
Тэнад мичлуныд мед кыскас тэ дінӧ ӧксыӧс.
Копыртчыв сылы, ӧд сійӧ — тэнад ыджыдыд.
Тирса йӧз локтасны тэ дінӧ козинъясӧн, озыръяс кутасны виччысьны тэсянь буралӧм.
Ӧксы рӧдысь нылӧс мичмӧдӧма, сылӧн паськӧмыс зарниысь.
Серлӧдлӧм паськӧмӧн сійӧс нуӧдӧны ӧксы дінӧ, сы бӧрся мунӧны сылӧн нывъёртъясыс. Найӧс вайӧдӧны долыда нимкодясьӧмӧн, гажӧдчигтырйи найӧ пырӧны ӧксылӧн керкаӧ.
Ӧксыӧй, тэнад пияныд кутасны ӧксыавны батьясыд пыдди, тэ пуктан найӧс юравны став му пасьталаыс.
Чужысьяссянь чужысьясӧдз кутасны казьтывны тэнсьыд нимтӧ, войтыръяс кутасны ошкыны тэнӧ нэмъяс чӧж.
{Еврей йӧз (комиӧдіс Kodko) @ 45 псалом @ религ. гижӧд @ Библия @ 2021 @ Лб. .}
45 псалом
Сьылысьясӧн веськӧдлысьлы.
Корей пиянлӧн сьыланкыв.
Ворсӧны аламот ворсанторйӧн.
Енмыс — миянлы сайӧдчаніныс да выныс, Сійӧ тэрмасьӧ отсавны шог дырйи. Та вӧсна ми огӧ полӧй, весиг муыс кӧ кутас вӧрны, керӧсъяс кӧ усясны саридз пыдӧсӧ, весиг саридзса ваыс кӧ кыптас ыджыд шыӧн, керӧсъяс кӧ вӧрзясны сылӧн гызьӧмысь.
Визувтысь юяс гажӧдӧны Енлысь карсӧ, Медвылыссалысь вежа оланінсӧ.
Ачыс Енмыс кар шӧрас, карыс оз вӧрзьы, водз асывсянь Енмыс отсалӧ сылы.
Войтыръяс шызьӧны, юралӧмъяс киссьӧны, муыс сыркмунлӧ Медвылыссалӧн гӧлӧс шыысь.
Господь Саваоф миянкӧд, Яковлӧн Енмыс — миянӧс Дорйысьыс.
Локтӧй да видзӧдӧй Господьлысь уджъяссӧ, Сыӧн бырӧдӧм мувывса оланінъяс.
Став му пасьтала Сійӧ дугӧдіс тышъяс, чегъяліс ньӧввужъяс да шыяс, биын сотіс тарантасъяс.
Господь висьталӧ: «Сувтыштлӧй да тӧдӧй, мый Ме — Енмыс. Менӧ вылӧ кыпӧдӧны войтыръяс пӧвстын, Менӧ ошкӧны став му пасьтала».
Господь Саваоф миянкӧд, Яковлӧн Енмыс — миянӧс Дорйысьыс.
{Еврей йӧз (комиӧдіс Kodko) @ 46 псалом @ религ. гижӧд @ Библия @ 2021 @ Лб. .}
46 псалом
Сьылысьясӧн веськӧдлысьлы.
Корей пиянлӧн псалом.
Войтыръяс, клопайтӧй кинаныд, гораа нимкодясьӧмӧн ошкӧй Енсӧ!
Господь — Медвылыссаыс, полӧй Сыысь! Став му пасьтала Сійӧ ыджыд Ӧксыыс.
Сійӧ сетіс миян кипод улӧ войтыръясӧс, пуктіс найӧс миян кок улӧ.
Сійӧ бӧрйис да вичмӧдіс миянлы му, тайӧ мунас ошйысис Сылӧн муса Яков.
Гажӧдчан шы улӧ Господь Ен пуксис юралан пуклӧсӧ, буксан шы улӧ Сійӧ пуксис юравны.
Сьылӧй Енлы, сьылӧй!
Сьылӧй миян Ӧксылы, сьылӧй! Ӧд Енмыс став му пасьтала Ӧксы.
Сьылӧмӧн ошкӧй Сійӧс!
Енмыс ӧксыалӧ войтыръяс вылын, Сійӧ пукалӧ Аслас вежа пуклӧсын.
Войтыръяслӧн юралысьяс чукӧртчӧны Ен войтыр дінӧ, тайӧ войтырыс кесъялӧ Ӧвраамлӧн Енлы.
Мувывса став веськӧдлысьыс Енмыслӧн, Сійӧ юралӧ-ыджыдалӧ на вылын.
{Еврей йӧз (комиӧдіс Kodko) @ 47 псалом @ религ. гижӧд @ Библия @ 2021 @ Лб. .}
47 псалом
Сьыланкыв.
Корей пиянлӧн псалом.
Господь ыджыд! Ёна ошкӧй миянлысь Еннымӧс Сылӧн карын, Сылӧн вежа керӧс вылын!
Сион керӧс мича да джуджыд, став му пасьтала нимкодясьӧны сыӧн.
Керӧслӧн войвывладорын сулалӧ ыджыд Ӧксылӧн карыс.
Сэні олысьяс тӧдӧны, мый Енмыс дорйӧ найӧс.
Ӧксыяс чукӧртчисны, медым сувтны Сионлы паныд.
Но карсӧ аддзигӧн найӧ шӧйӧвошисны, повзьӧмнысла бӧр пышйисны.
Полӧм-дзӧрӧм топӧдіс найӧс, кыдзи сьӧкыд дой топӧдӧ чужтысь аньӧс.
Енмӧй, асыв тӧлӧн Тэ жуглін налысь корабльяссӧ, кодъяс локтісны Фарсис карысь.
Мый йылысь ми кывлім, сійӧс и аддзылім Господь Саваофлӧн, миян Енлӧн, карысь. Енмыс зумыдмӧдас Ассьыс карсӧ нэмъяс кежлӧ.
Енмӧй, Тэнад крамын ми мӧвпалам Тэнад буралӧмыд йылысь.
Енмӧй, Тэнсьыд нимтӧ тӧдӧны став му пасьталаыс, ошкӧмыс кыптӧ Тэныд став му пельӧсын.
Тэнад веськыд киыд тырӧма веськыдлуннас.
[Господьӧй,] Тэнад веськыда мыждӧмысь мед гажӧдчас Сион керӧс, мед нимкодясясны Иуда каръясын олысьяс.
Мунӧй, кытшовтӧй Сион кар гӧгӧр, лыддьӧй сылысь башняяссӧ.
Сюся видзӧдалӧй сылысь зумыд стенъяссӧ, ветлӧдлӧй изкарті, медым висьтавны Сион йылысь водзӧ чужысьяслы. Ӧд Енмыс — нэмъяс кежлӧ миян Ен, Сійӧ нуӧдӧ миянӧс олӧм помӧдз.
{Еврей йӧз (комиӧдіс Kodko) @ 48 псалом @ религ. гижӧд @ Библия @ 2021 @ Лб. .}
48 псалом
Сьылысьясӧн веськӧдлысьлы.
Корей пиянлӧн псалом.
Кывзӧй, войтыръяс, сюся кывзӧй, му вылас олысьяс, нималана йӧз и нимавтӧмъяс, озыръяс и гӧльяс.
Менам вомӧй висьталӧ мывкыд кывъяс, сьӧлӧмпытшса мӧвпъясӧй восьтӧны тӧдӧмлун.
Ме бергӧда пельӧс шусьӧгъяслань, гуслиӧн ворсігӧн ме висьтала нӧдкывъяс.
Мыйла меным повнысӧ сьӧкыд кадӧ, кор лёк ылӧдчысьяс кытшалӧны менӧ?
Найӧ лача кутӧны асланыс эмлуныс вылӧ, ошйысьӧны асланыс ыджыд озырлунӧн.
Мортыс нинӧм вылӧ оз вермы ньӧбны ассьыс воксӧ, нинӧмӧн оз вермы вештысьны Енмыслы сылӧн олӧмысь.
Морт олӧмыд ыджыд дон сулалӧ, он вермы мынтысьны, медым сійӧ помтӧг оліс, медым сійӧс некор эз гуавны.
Быдӧн тӧдӧ, мый мывкыдтӧмъяс да вежӧртӧмъяс моз весиг мывкыдаяс кулӧны, ассьыныс эмбурсӧ кольӧны мукӧдлы.
Найӧ чайтӧны, мый налӧн керкаясыс пыр кутасны сулавны, налӧн оланінъясыс вуджасны на бӧрся чужысьяслы. Му пайнысӧ найӧ нимтӧны асланыс нимӧн, но весиг нималана морт оз кут пыр овны, сійӧ пемӧс моз тшӧтш кулӧ.
Налӧн олан туйыс — мывкыдтӧмлун, и на бӧрся олысьяс дорйӧны налысь видзӧдлассӧ.
Ыжъясӧс моз найӧс йӧртасны пыдӧстӧминӧ, кулӧмыс кутас видзны найӧс, а асывнас веськыда олысьяс кутасны ыджыдавны на вылын.
Найӧ вынтӧммасны да колясны пыдӧстӧминас.
Но Енмыс вештысяс меысь, мездас менӧ кулӧмыслӧн кабыр улысь.
Эн пов, кор кодкӧ озырмӧ, кор сылӧн керкаас содӧ озырлуныс.
Ӧд кулігас сійӧ нинӧм оз босьт аскӧдыс, сылӧн озырлуныс оз вӧтчы сы бӧрся.
Му вылас олігӧн сійӧ лыддьӧ асьсӧ шудаӧн, йӧзыс ошкӧны, мый сылӧн ставыс артмӧ, но кулӧм бӧрас сійӧ вуджас аслас батьяс дінӧ, кодъяс оз нин аддзывны югыдсӧ.
Весиг мортыс кӧ нималӧ, но олӧ мывкыдтӧма, сійӧ пемӧс моз тшӧтш кулӧ.
{Еврей йӧз (комиӧдіс Kodko) @ 49 псалом @ религ. гижӧд @ Библия @ 2021 @ Лб. .}
49 псалом
Асафлӧн псалом.
Енмыс, Господь Ен, сетіс Ассьыс гӧлӧс шысӧ, став му пасьталаысь асыввывсянь рытыввылӧдз Сійӧ чукӧстіс йӧзӧс.
Сионсянь, тырвыйӧ мича карсянь, Ен петкӧдчӧ дзирдлуннас. Миян Енным локтас, чӧв оз ов, Сы водзвылын лоӧ ставсӧ сотысь би, Сы гӧгӧр лоӧ ыджыд тӧвныр.
Сійӧ чуксалӧ енэжсӧ да мусӧ, медым мыждыны Ассьыс войтырсӧ.
Сійӧ шуӧ: «Чукӧртӧй Ме дінӧ Менсьым эскана войтырӧс, коді вись вайӧмӧн пырис Менам йитӧдӧ».
Енэжыс юӧртас Енлӧн веськыдлун йылысь, ӧд Сійӧ — веськыда мыждысь Ен.
— Кывзӧй, Менам войтырӧй, ӧні Ме кута сёрнитны.
Израиль, Ме кута сёрнитны тэныд паныд. Ме — Ен, тэнад Енмыд.
Ме ог понды янӧдны тэнӧ вись вайӧм вӧсна, ӧд тэнад сотан висьыд пыр Менам син водзын.
Меным оз ковны тэнад вевт улысь ӧшъяс, оз ковны тэнад йӧрысь кӧзаяс, ӧд вӧрса став звер-пӧткаыс Менам, сюрс керӧс вылын олысь став пемӧсыс тшӧтш Менам. Ме тӧда керӧсвывса став лэбачсӧ, видзвывса став пемӧсыс — Менам.
Ме кӧ тшыгъялі, Ме эськӧ эг висьтав тэныд, ӧд муюгыдыс да ставыс, мый сэні эм — Менам.
Ме ӧмӧй сёя ӧш яй, Ме ӧмӧй юа кӧза вир?
Вай Енмыслы вись пыдди аттьӧалӧм, вӧч сійӧ, мый кӧсйысин Медвылыссалы. Шыась Ме дінӧ сьӧкыд кадӧ, сэки Ме мезда тэнӧ, и тэ нимӧдан Менӧ.
Лёк вӧчысьлы Енмыс шуӧ: — Мыйла тэ висьтавлан Менам тшӧктӧмъяс йылысь, сёрнитан Менам йитӧд йылысь, но мустӧмтан Менсьым велӧдӧмӧс, нинӧмӧ пуктан Менсьым кывъясӧс?
Аддзан кӧ гусясьысьӧс, ӧтвывтчан сыкӧд, волысян гозъякост олӧм пежалысьяскӧд.
Ассьыд вомтӧ восьтан лёк сёрни вылӧ, аслад кывйӧн гудрасян ылӧгас.
Пукалан да удтысян аслад вокыд вылӧ, мамыдлӧн пиыс йылысь суклясян.
Тэ вӧчин тадзи, но Ме чӧв олі.
Тэ чайтін, мый Ме тэ кодь жӧ.
Но Ме янӧда тэнӧ, мыжала тэнӧ [мыжъяссьыд].
Енсӧ вунӧдысьяс, гӧгӧрвоӧй тайӧс, медым Ме эг бырӧд тіянӧс. Сэки некод оз мезды тіянӧс.
Коді вайӧ Меным вись пыдди аттьӧалана кывъяс, сійӧ бурӧ пуктӧ Менӧ. Коді видзӧдӧ аслас олан туй бӧрся, сійӧ аддзас Менсьым мездӧмӧс.
{Еврей йӧз (комиӧдіс Kodko) @ 50 псалом @ религ. гижӧд @ Библия @ 2021 @ Лб. .}
50 псалом
Сьылысьясӧн веськӧдлысьлы.
Давидлӧн псалом. Давидлӧн Вирсавиякӧд узьӧм бӧрас сы дінӧ воліс Нафан пророк.
Енмӧй, Аслад буралӧмыд кузя ло бур сьӧлӧма ме дінӧ, Аслад ыджыд бурлуныд кузя чышкышт менсьым мыжъясӧс.
Мыськы менӧ лёк вӧчӧмысь, весав менӧ, сӧстӧммӧд менӧ мыжысь. Ӧд ме тӧда ассьым лёк вӧчӧмъясӧс, менам мыжӧй пыр син водзын.
Тэныд, сӧмын Тэныд паныд ме мыж вӧчи, Тэнад син водзын ме лёксӧ вӧчи. Тэ веськыда вӧчан, кор менӧ чирыштан, Тэ веськыда мыждан менӧ.
Бать кӧйдысын нин ме вӧлі мыж пытшкас, мам кынӧмсянь — мыжа морт.
Но Тэныд муса сьӧлӧмпытшса збыльыс, восьт меным Ассьыд мывкыдлунтӧ.
Рез менӧ иссоп турунӧн, и ме сӧстӧмма.
Мыськы менӧ, и ме лоа лымйысь на еджыд.
Сет меным кывны нимкодь юӧр, мед нимкодясясны Тэӧн жугӧдӧм лыясӧй.
Бергӧд Ассьыд чужӧмбантӧ менам мыжъясысь, чышкышт менсьым став лёк вӧчӧмӧс.
Енмӧй, вӧч ме пытшкын сӧстӧм сьӧлӧм, выльмӧд да ёнмӧд менсьым лолӧс.
Эн вӧтлы менӧ Аслад чужӧмбан водзысь, Ассьыд Вежа Ловтӧ эн босьт ме пытшкысь.
Сет меным бара нимкодясьны мездмӧмысь, вына Ловнад ёнмӧд менӧ.
Лёк вӧчысьясӧс ме веськӧда Тэнад туй вылӧ, мыжаяс мед бергӧдчасны Тэ дінӧ.
Енмӧй, менӧ мездысь Енмӧй, вешты ме вылысь вир кисьтан мыжӧс, сэки менам вомӧй кутас ошкыны Тэнсьыд веськыда мыждӧмтӧ.
Господьӧй, восьт менсьым вомӧс, и менам вомысь кыптас Тэныд ошкӧмыс.
Ме эськӧ вайи Тэныд вись, но Тэ он кӧсйы сійӧс, сотан вись оз шогмы Тэныд.
Енлы медбур висьыс — доймӧм сьӧлӧм.
Небзьӧм да рам сьӧлӧмаӧс Тэ он увтырт, Енмӧй.
[Господьӧй,] Аслад бурлуныд кузя вӧч бурсӧ Сионлы, выльысь кыпӧд Ерусалимлысь стенъяссӧ!
Сэки Тэ сибӧдан сотан да мукӧд висьяс, мый колӧ вайны веськыдлун серти.
Тэнад висьпуктанін вылын ваясны вись пыдди ӧшъясӧс.
{Еврей йӧз (комиӧдіс Kodko) @ 51 псалом @ религ. гижӧд @ Библия @ 2021 @ Лб. .}
51 псалом
Сьылысьясӧн веськӧдлысьлы.
Давидлӧн сьыланкыв. Давид лӧсьӧдіс тайӧ сьыланкывсӧ сы бӧрти, кор эдомса Доик юӧртіс Сауллы Ахимелек ордӧ Давидлӧн локтӧм йылысь.
Вына мортӧй, мыйла ошйысян лёк вӧчӧмнад?
Енлӧн буралӧмыс оз помасьлы!
Тэнад кывйыд сёрнитӧ бырӧдӧм йылысь, сійӧ бритва кодь лэчыд, тэ — ылӧдчысь!
Бурыс дорысь тэ ёнджыка радейтан лёксӧ, збыльыс дорысь ёнджыка радейтан ылӧгсӧ.
Тэ радейтан виана кывъяс, тэ ылӧдчысь вома морт!
Та вӧсна Енмыс дзикӧдз бырӧдас тэнӧ, босьтас да шыбитас тэнӧ аслад оланінсьыд, вужнас нетшыштас тэнӧ ловъя олысьяслӧн муысь.
Тайӧс аддзӧмысь веськыда олысьясӧс полӧм босьтас, найӧ кутасны серавны тэ вылын. Шуасны:
«Видзӧдлӧй, тайӧ мортыс эз Енсянь корсь дорйӧмсӧ, сійӧ лача кутіс аслас ыджыд озырлун вылӧ, ёнмӧдчис аслас лёк уджъясӧн».
А ме Енлӧн керкаын вежӧдысь олив пу кодь, лача кута Енлӧн буралӧмыс вылӧ нэмъяс чӧж. Енмӧй, кута помтӧг ошкыны Тэнӧ став уджсьыд. Тэнад эскана войтырыдкӧд понда лача кутны бур нимыд вылӧ.
{Еврей йӧз (комиӧдіс Kodko) @ 52 псалом @ религ. гижӧд @ Библия @ 2021 @ Лб. .}
52 псалом
Сьылысьясӧн веськӧдлысьлы.
Сьылӧны “Махалат” шылад улӧ.
Давидлӧн сьыланкыв.
Мывкыдтӧм морт мӧвпалӧ, мый Енмыс абу.
Йӧзыс сетчисны лёкас, олӧны зывӧка, бур вӧчысьыс абу.
Енмыс енэжсяньыс видзӧдӧ йӧзыс вылӧ, медым аддзыны, эм-ӧ вежӧра мортыс, Енсӧ корсьысьыс.
Но ставныс кежӧмаӧсь, ӧтитӧг шогмытӧмӧсь, бур вӧчысьыс абу, весиг ӧтик абу.
Мыйла оз мывкыдсявны лёксӧ вӧчысьяс? Найӧ нянь моз сёйӧны менсьым войтырӧс, оз шыасьны Ен дінӧ.
Но найӧс полӧм босьтас, кор нинӧмысь лоӧ повнысӧ, ӧд Енмыс разӧдас вӧрӧглысь лыяссӧ.
Найӧс лоӧ янӧдӧма, ӧд Енмыс эновтіс найӧс.
Сионысь мед воас Израильлы мездмӧмыс!
Кор Енмыс бӧр бергӧдас Ассьыс войтырсӧ пленысь, сэки Яков кутас нимкодясьны, Израиль кутас гажӧдчыны.
{Еврей йӧз (комиӧдіс Kodko) @ 53 псалом @ религ. гижӧд @ Библия @ 2021 @ Лб. .}
53 псалом
Сьылысьясӧн веськӧдлысьлы.
Ворсӧны струнаа ворсанторйӧн.
Давидлӧн сьыланкыв. Давид лӧсьӧдіс тайӧ сьыланкывсӧ, кор Зиф карысь локтісны йӧз да висьталісны Сауллы, мый Давид дзебсясьӧ на пӧвстын.
Енмӧй, Аслад нимыд кузя мезды менӧ, Аслад вынӧн дорйы менӧ!
Енмӧй, кыв менсьым кевмӧмӧс, кывзы менсьым кывъясӧс! Локтысь йӧз кыпӧдчисны меным паныд, лёк вӧчысьяс корсьӧны босьтны менсьым олӧмӧс, Енсӧ найӧ нинӧм туйӧ пуктӧны.
Енмыс — меным отсӧг сетысьыс, Господь ёнмӧдӧ менсьым лолӧс.
Сійӧ мынтысяс менӧ мустӧмтысьяслы налӧн лёк вӧчӧмысь.
Господьӧй, Аслад кӧсйысьӧм серти бырӧд найӧс.
Господьӧй, ме сьӧлӧмсянь вая Тэныд вись, ошка Тэнсьыд нимтӧ, ӧд сійӧ бур. Тэ мездан менӧ став шогысь, аслам синмӧн ме аддза менӧ мустӧмтысьясӧс бырӧдӧм.
{Еврей йӧз (комиӧдіс Kodko) @ 54 псалом @ религ. гижӧд @ Библия @ 2021 @ Лб. .}
54 псалом
Сьылысьясӧн веськӧдлысьлы.
Ворсӧны струнаа ворсанторйӧн.
Давидлӧн сьыланкыв.
Енмӧй, кыв менсьым кевмысьӧмӧс, эн ӧтдорт менсьым кевмӧмӧс.
Кывзы менӧ да вочавидз меным.
Ыджыд шогӧйла ме ойза, ёна майшася мустӧмтысьяслӧн гӧлӧс шыысь, лёк вӧчысьяслӧн дзескӧдӧмысь, ӧд найӧ вайӧны меным уна сьӧкыдлун, ыджыд скӧрлунӧн мыжалӧны менӧ.
Менам сьӧлӧмӧй тіралӧ, менӧ топӧдӧ кулана полӧм.
Менӧ дзӧрӧдӧ полӧмӧйла, менӧ шымыртіс ыджыд полӧм.
Ме шуи: «Вӧліны кӧ менам гулюлӧн кодь бордъяс, ме эськӧ лэбзи да лӧни, ме эськӧ ылӧдз лэбзи, кольччи овтӧминӧ, тэрмаси эськӧ сайӧдчыны, дзебси тӧвнырысь да бушколысь».
Господьӧй, шӧйӧвошт найӧс, торк налысь сёрнисӧ, ӧд тайӧ карас ме аддза виалӧм-дзескӧдӧм да лёксьӧм.
Лун и вой найӧ ветлӧдлӧны карті, кыйӧдчӧны карса стенъяс вылын.
Карыс тырӧма лёк вӧчӧмӧн да шогӧн, карас ыджыдалӧ лэдзчысьӧм олӧм, сылӧн туйяс вылысь оз бырлыны нартитӧм да пӧръясьӧм.
Паныд сувтысь кӧ лёкӧдіс менӧ, тайӧс эськӧ ме верми нунысӧ.
Мустӧмтысь кӧ дзескӧдіс менӧ, сыысь эськӧ ме дзебси.
Но тадзи вӧчан тэ, ме кодь жӧ морт, менам матысса ёртӧй, кодкӧд ме сёрнитлі восьса сьӧлӧмӧн, кодкӧд ӧтвыв ми ветлывлім Енлӧн керкаӧ.
Менӧ мустӧмтысьясӧс мед суас кулӧмыс, найӧ мед ловйӧн мунасны пыдӧстӧминӧ, ӧд налӧн оланінын да налӧн сьӧлӧмын ыджыдалӧ лёкыс.
Но ме шыася Господь Ен дінӧ, и Сійӧ мездас менӧ.
Рыт-асывсӧ и луншӧр кадӧ ме понда бӧрдӧмӧн кевмысьны, и Енмыс кылас менсьым гӧлӧс шыӧс. Унаӧн сувтӧны меным паныд, но Енмыс мездас менӧ да сетас лӧньлун.
Енмыс кылас менӧ, пыр Олысь ланьтӧдас найӧс, кодъяс Енсьыс оз повны, оз кӧсйыны вежсьыны бурланьӧ. Найӧ лэптӧны кинысӧ накӧд лӧня олысьяс вылӧ, торкӧны ёртасян йитӧдсӧ.
Налӧн сёрниныс выйысь на небыдджык, но налӧн сьӧлӧмын — лёксьӧм, налӧн кывъясыс вый моз мавтыштӧны, но найӧ шыпурт кодь лэчыдӧсь.
Вай ассьыд тӧжд-могтӧ Господьлы, и Сійӧ кутыштас тэнӧ, Сійӧ некор оз лэдз лигышмунны веськыда олысьлы.
Енмӧй, Тэ шыбитан джуджыд гуӧ вир кисьтысьясӧс да ылӧдчысьясӧс, найӧ оз овны весиг ассьыныс джын нэмсӧ.
А ме, [Господьӧй,] Тэ вылӧ лача кута.
{Еврей йӧз (комиӧдіс Kodko) @ 55 псалом @ религ. гижӧд @ Библия @ 2021 @ Лб. .}
55 псалом
Сьылысьясӧн веськӧдлысьлы.
Сьылӧны “Ылі муын чӧв олысь гулю” шылад улӧ.
Давид лӧсьӧдіс тайӧ кывбурсӧ, кор филистимсаяс кутісны сійӧс Гефын.
Енмӧй, ло бур сьӧлӧма ме дінӧ, ӧд йӧзыс кӧсйӧны бырӧдны менӧ, быд лун усьласьӧны ме вылӧ да дзескӧдӧны менӧ.
Мустӧмтысьяс быд лун кӧсйӧны бырӧдны менӧ. Медвылыссаӧй, ме вылӧ усьласьысьыс вывті уна!
Кор ме пола, Тэ вылӧ лача кута.
Ме ошка Енмӧс Сылӧн кывйысь, Ен вылӧ лача кута, нинӧмысь ог пов.
Мый вӧчас меным мортыс?
Мустӧмтысьяс быд лун мӧдарӧ бергӧдӧны менсьым кывъясӧс, мӧвпалӧны меным лёксӧ вӧчны.
Найӧ гусьӧн чукӧртчӧны да кыйӧдчӧны ме бӧрся, медым босьтны менсьым олӧмӧс.
Енмӧй, найӧ мед оз пышйыны водзӧс перйӧмсьыд!
Аслад скӧрлунӧн улӧ лэдз войтыръясӧс.
Тэнад лыддьӧма став менсьым пышъялан лунӧс.
Чукӧрт Аслад дозъяд менсьым синваӧс, гиж найӧс Аслад небӧгад.
Кор ме шыася Тэ дінӧ, мустӧмтысьяс бӧр пышйӧны. Та серти тӧдмала, мый Енмыс ме дор.
Ме ошка Енмӧс Сылӧн кывйысь, ошка Господьӧс Сылӧн шуӧмысь.
Ен вылӧ лача кута, нинӧмысь ог пов.
Мый вӧчас меным мортыс?
Енмӧй, ме сеті Тэныд кыв и куті сійӧс, ӧні ме вая Тэныд аттьӧалана вись. Ӧд Тэ мездін менӧ кулӧмысь, [чышкин менсьым синваӧс,] видзин менсьым кокӧс крукасьӧмысь. Ме ветла Енлӧн чужӧмбан водзын олӧмыслӧн югыдас.
{Еврей йӧз (комиӧдіс Kodko) @ 56 псалом @ религ. гижӧд @ Библия @ 2021 @ Лб. .}
56 псалом
Сьылысьясӧн веськӧдлысьлы.
Сьылӧны “Эн бырӧд” шылад улӧ.
Давид лӧсьӧдіс тайӧ кывбурсӧ, кор пышйис Саулысь изкыртаӧ.
Енмӧй, ло бур сьӧлӧма ме дінӧ, бурсьӧлӧмтчы, ӧд Тэ вылӧ ме лача кута. Ме сайӧдча Тэнад бордъяс улӧ, кытчӧдз шогыс оз помась.
Ме шыася Медвылысса Ен дінӧ, меным бурсӧ вӧчысь Ен дінӧ.
Сійӧ мӧдӧдас меным отсӧгсӧ енэжсянь да мездас менӧ, янӧдас найӧс, кодъяс кӧсйӧны бырӧдны менӧ.
Енмыс восьтас меным Ассьыс буралӧмсӧ да збыльсӧ.
Ме ола левъяс пӧвстын, биӧн лолалысь зверъяс пӧвстын, сэтшӧм йӧз пӧвстын, кодъяслӧн пиньныс шы да ньӧв кодь, кодъяслӧн кывйыс ёсь шыпурт кодь.
Енмӧй, Тэнӧ нимӧдӧмыс мед кыптас енэжъясысь на вылӧджык, Тэнад дзирдлуныд мед паськалас став му пасьтала!
Менам коклы нальк пуктісны, менам лолӧй дзикӧдз нюкыртчис.
Найӧ кодйисны меным гу, но асьныс сэтчӧ усисны.
Енмӧй, менам сьӧлӧмӧй дась нин, менам сьӧлӧмӧй дась сьывны да ошкыны Тэнӧ.
Садьмы, менам лолӧй, садьмӧй, арфа да гусли!
Ме садьмӧда асъя кыасӧ.
Господьӧй, ме ошка Тэнӧ войтыръяс пӧвстын, сьыла Тэныд чужанкотыръяс пӧвстын, ӧд Тэнад буралӧмыд енэжъясысь вылынджык, Тэнад збыльыд кымӧръясысь вылынджык.
Енмӧй, Тэнӧ нимӧдӧмыс мед кыптас енэжъясысь на вылӧджык, Тэнад дзирдлуныд мед паськалас став му пасьтала!
{Еврей йӧз (комиӧдіс Kodko) @ 57 псалом @ религ. гижӧд @ Библия @ 2021 @ Лб. .}
57 псалом
Сьылысьясӧн веськӧдлысьлы.
Сьылӧны “Эн бырӧд” шылад улӧ.
Давидлӧн кывбур.
Мыждысьяс, збыльсӧ-ӧ ті висьталанныд? Мортлӧн пиян, веськыда-ӧ ті мыжданныд?
Сьӧлӧманыд ті лёксӧ вӧчанныд, асланыд киӧн виаланныд-дзескӧданныд.
Лёк вӧчысьяс чужӧмсяньныс вошӧмаӧсь, пӧръясьысьяс мам кынӧмсяньныс ылалӧмаӧсь.
Налӧн ядыс — змей яд кодь, найӧ тупкӧмаӧсь пельнысӧ, найӧ пельтӧм змей кодьӧсь. Пельтӧм змей оз кыв нимкыв лыддьысьлысь гӧлӧс шысӧ, кимӧститчысьлысь мича кывъяссӧ.
Енмӧй, чегъяв налӧн вомысь пиньяссӧ, Господьӧй, жуглы тайӧ левъяслысь черлыяссӧ!
Найӧ мед бырасны визувтысь ва моз, ньӧввужнысӧ зэвттӧдз мед куласны.
Найӧ мед косьмасны мыччысьысь лёльӧ моз, мед оз аддзыны шондісӧ чӧвтчӧм кага шой моз.
Найӧ бипурвывса увъяс кодьӧсь, ӧтияс дзоньӧсь на, мӧдъяс сотчӧны нин. Пуан пӧртйӧ биыслӧн инмытӧдз на тӧвнырыс разӧдас найӧс.
Веськыда олысь кутас нимкодясьны, кор аддзас водзӧс перйӧмсӧ, сійӧ мыськалас ассьыс коксӧ лёк вӧчысьяслӧн вирӧн.
Сэки йӧзыс шуасны: «Веськыда олысьлы вичмас тырдон.
Збыльысь эм Ен, коді веськыда мыждӧ му вылын».
{Еврей йӧз (комиӧдіс Kodko) @ 58 псалом @ религ. гижӧд @ Библия @ 2021 @ Лб. .}
58 псалом
Сьылысьясӧн веськӧдлысьлы.
Сьылӧны “Эн бырӧд” шылад улӧ.
Давид лӧсьӧдіс тайӧ кывбурсӧ, кор Саул мӧдӧдіс Давидлӧн керка дорӧ кыйӧдчысьясӧс, медым вины сійӧс.
Енмӧй, мезды менӧ мустӧмтысьясысь, дорйы менӧ паныд кыпӧдчысьясысь, мезды менӧ лёк вӧчысьясысь, видз менӧ вир кисьтысьясысь, ӧд найӧ кыйӧдӧны босьтны менсьым олӧмӧс.
Господьӧй, ме лёктор да мыж эг вӧч, но вынаяс усьласьӧны ме вылӧ.
Ме абу мыжа, но найӧ дасьӧсь уськӧдчыны ме вылӧ.
Господьӧй, видзӧдлы да лок меным отсӧг вылӧ!
Господьӧй, Ен Саваоф, Тэ Израильлӧн Ен, кыпӧдчы мыждыны войтыръясӧс, эн жалит лёк вӧчысьясӧс.
Рытнас найӧ локтӧны, омлялӧны понъяс моз, шӧйтӧны кар гӧгӧрыс.
Налӧн вомысь петӧ лёкӧдӧм, налӧн кывйыс шыпурт кодь.
Найӧ чайтӧны, мый найӧс некод оз кыв.
Но Тэ, Господьӧй, сералан лёк вӧчысьяс вылын, Тэ янӧдан войтыръясӧс.
Енмӧй, Тэ — менам выныс! Ме виччыся Тэнӧ, ӧд Тэ — менӧ Дорйысьыс.
Менам Енмӧй бур сьӧлӧма ме дінӧ, Сійӧ нуӧдӧ менӧ.
Енмыс сетас меным аддзыны, мый лоас менӧ мустӧмтысьяскӧд.
Господьӧй, эн бырӧд найӧс, медым менам войтырӧй эз вунӧд Тэнсьыд уджъястӧ.
Тэ — миян сайӧдыс, Аслад вынӧн разӧд найӧс да уськӧд кок йывсьыныс.
Асланыс сёрниӧн найӧ мыжмӧны. Мед найӧ шедасны налькйӧ асланыс ышнясьӧмысь, пӧръясьӧмысь да ёрӧмысь.
Аслад скӧрлунӧн бырӧд найӧс, бырӧд, мед найӧ дзикӧдз бырасны.
Сэки йӧзыс тӧдмаласны, мый Енмыс ыджыдалӧ Яковлӧн рӧд вылын да став му пасьтала.
Рытнас найӧ локтӧны, омлялӧны понъяс моз, шӧйтӧны кар гӧгӧрыс, шӧйтӧны да корсьӧны кынӧмпӧт, но войсӧ тшыгйӧн коллялӧны.
А ме кута сьывны Тэнад выныд йылысь, водз асывсянь ошкыны Тэнсьыд буралӧмтӧ, ӧд менам сьӧкыдалігӧн Тэ вӧлін меным сайӧдчанінӧн да дзебсянінӧн.
Тэ — менам выныс!
Кута сьывны Тэныд, ӧд Тэ, Енмӧй, менӧ Дорйысьыс, Тэ — ме дінӧ буралысь Ен.
{Еврей йӧз (комиӧдіс Kodko) @ 59 псалом @ религ. гижӧд @ Библия @ 2021 @ Лб. .}
59 псалом
Сьылысьясӧн веськӧдлысьлы.
Сьылӧны “Шушан эдут” шылад улӧ.
Давид лӧсьӧдіс тайӧ кывбурсӧ велӧдӧм могысь, кор сійӧ тышкасис месопотамияса да цоваса арамейяскӧд, и кор тышысь бӧрсӧ локтігӧн Сола ковтысын Йоав бырӧдіс дас кык сюрс эдомса тышкамортӧс.
Енмӧй, Тэ дӧзмин миян вылӧ, Тэ эновтін да пасьвартін миянӧс. Бӧр бергӧдчы миянлань!
Тэ вӧрзьӧдін мусӧ да поткӧдін сійӧс.
Бурдӧд сылысь дойяссӧ, ӧд сійӧ сыркакылӧ.
Тэ сетін нуны Аслад войтырлы уна сьӧкыдлун, Тэ юкталін миянӧс коддзӧдан винаӧн.
Тэысь полысьяслы Тэ сетін дӧрапас, медым найӧ кыпӧдісны сійӧс збыльыс вӧсна. Мезды Ассьыд мусаястӧ, дорйы найӧс Аслад веськыд кинад, вочавидз меным!
Енмыс шуис Аслас вежаинсянь: «Нимкодьпырысь Ме юкла тіянлы Сикем му, муртала тіянлы Суккот ковтыс.
Галаад му — Менам, Манассей чужанкотырлӧн му — Менам, Ефрем му — Менам юртупкӧдӧй, Иуда му — Менам юралан беддьӧй, Моав му — Менам мыссян дозйӧй, Эдом муӧ Ме шыбита Ассьым кӧмкотӧс.
Филистим му, нимкодясьӧмӧн ошкы Менӧ!»
Коді пыртас менӧ изкарӧ?
Коді вайӧдас менӧ Эдом муӧдз?
Он-ӧ Тэ, Енмӧй? Но Тэ, Енмӧй, эновтін миянӧс, миян тышкайӧзкӧд ӧтвыв эн пет тышӧ.
Отсав миянлы, ӧд миянӧс дзескӧдӧны, а йӧзсянь отсӧгсӧ виччысьны весьшӧрӧ.
Енмыскӧд ми вӧчам ыджыд уджъяс, миянӧс дзескӧдысьясӧс Сійӧ талялас.
{Еврей йӧз (комиӧдіс Kodko) @ 60 псалом @ религ. гижӧд @ Библия @ 2021 @ Лб. .}
60 псалом
Сьылысьясӧн веськӧдлысьлы.
Ворсӧны струнаа ворсанторйӧн.
Давидлӧн псалом.
Енмӧй, кыв менсьым гораа бӧрдӧмӧс, кывзы менсьым кевмысьӧмӧс.
Му пельӧссянь ме шыася Тэ дінӧ шогсян сьӧлӧмӧн.
Нуӧд менӧ изкырта вылӧ, кытчӧ ачым ме ог вермы кайнысӧ. Ӧд Тэ — менам сайӧдчаніныс, Тэ — вына Дорйысь паныд сувтысьясысь.
Ме кӧсъя пыр овны Тэнад оланінын, кӧсъя сайӧдчыны Тэнад бордъяс улӧ. Енмӧй, Тэ кылін менсьым кыв сетӧмӧс, Тэ вичмӧдін меным сійӧ, мый кӧсйысин сетны Тэнад нимысь полысьяслы.
Нюжӧд ӧксылысь олан лунъяссӧ, мед сылӧн юралӧмыс лоас чужысьяссянь чужысьясӧдз, мед сылӧн юралан пуклӧсыс пыр лоӧ Тэ водзын.
Тэнад буралӧмыд да збыльыд мед видзасны сійӧс.
Сэки ме помтӧг кута сьывны ошкӧмсӧ Тэнад нимлы, лунысь-лун кута вӧчны аслам кыв сетӧм серти.
{Еврей йӧз (комиӧдіс Kodko) @ 61 псалом @ религ. гижӧд @ Библия @ 2021 @ Лб. .}
61 псалом
Едутунлы, сьылысьяслӧн веськӧдлысьлы.
Давидлӧн псалом.
Сӧмын Енмыс сетӧ менам ловлы лӧньлунсӧ, Сысянь воӧ меным мездмӧмыс.
Сӧмын Сійӧ — менам изкыртаыс, менӧ Мездысьыс да Дорйысьыс, ме ог вӧрзьы.
Дыр-ӧ ті понданныд дзескӧдны менӧ?
Ті ставныд усянныд пӧлыньтчӧм стен моз, нёровтчӧм потшӧс моз.
Ті мӧвпаланныд шыбитны менӧ вылісянь, сьӧлӧмнытӧ бурмӧданныд пӧръясьӧмӧн.
Вомнаныд ті бурсианныд, но ас пытшканыд ёранныд.
Сӧмын Енмыс сетӧ менам ловлы лӧньлунсӧ, Сы вылӧ ме лача кута.
Сӧмын Сійӧ — менам изкыртаыс, менӧ Мездысьыс да Дорйысьыс, ме ог вӧрзьы.
Енмыс — менӧ Мездысьыс, Сыӧн ме ошйыся.
Енмыс — менам изкыртаыс, Сы вылӧ ме лача кута.
Войтырӧй, Сы вылӧ лача кутӧй быд кадӧ, восьтӧй Сылы ассьыныд сьӧлӧмнытӧ. Енмыс — миянлы сайӧдчаніныс.
Мортлӧн пияныс — тӧвру пӧльыштӧм кодьӧсь, войтырлӧн пияныс — ылӧг, найӧс кӧ ставнысӧ ӧтлаын пуктыны вески вылӧ, найӧ лоӧны нинӧм абусьыс на кокньыдджыкӧсь.
Энӧ лача кутӧй мырддялӧм эмбур вылӧ, энӧ ошйысьӧй гусявлӧмторнаныд.
Кор тіян озырлунныд содас, тіян сьӧлӧмныд мед оз ляскысь сы дінӧ.
Ӧтчыдысь Енмыс шуис, ме кыкысь кывлі, мый выныс — Енмыслӧн. Господьӧй, буралӧмыс Тэнад, Тэ быдӧнлы мынтысян сылӧн уджъясыс серти.
{Еврей йӧз (комиӧдіс Kodko) @ 62 псалом @ религ. гижӧд @ Библия @ 2021 @ Лб. .}
62 псалом
Давидлӧн псалом. Сійӧ лӧсьӧдіс тайӧс Иуда овтӧминын олігӧн.
Енмӧй, Тэ менам Енмӧй. Водз асывсяньыс ме корся Тэнӧ, 
менам лолӧй гажтӧмтчӧ Тэысь, менам вир-яйӧй виччысьӧ Тэнӧ, нярмӧ куш да ватӧм овтӧминын. Ме ёна кӧсъя аддзыны Тэнсьыд вынтӧ да дзирдлунтӧ, кыдзи водзын ме аддзывлі Тэнӧ вежаинын.
Ӧд Тэнад буралӧмыд олӧм дорысь на бурджык.
Менам вомӧй ошкӧ Тэнӧ.
Кута ошкыны Тэнӧ, кытчӧдз ме ловъя, Тэ дінӧ шыасьӧмӧн кыпӧда ассьым киӧс.
Менам сьӧлӧмӧй бурмӧ чӧскыд да пӧтӧса сёянысь моз, менам вомӧй долыда ошкӧ Тэнӧ. Вольпасьын ме казьтывла Тэнӧ, войся кадӧ мӧвпала Тэ йылысь. Ӧд Тэ — меным отсӧг сетысьыс, Тэнад бордъяс улын ме кута долыда нимкодясьны.
Тэкӧд йитчӧма менам сьӧлӧмӧй, Тэнад веськыд киыд кутӧ менӧ.
Найӧс, кодъяс кӧсйӧны босьтны менсьым олӧмӧс, лоӧ шыбитӧма пыдӧстӧм гуӧ.
Найӧс лоӧ виӧма шыпуртӧн, налӧн шойясӧн кутасны пӧткӧдчыны шакалъяс.
Но ӧксы кутас нимкодясьны Енмӧн. Ен водзын кыв сетысь кутас ошкыны Енмӧс, а пӧръясьысьяслысь вомсӧ лоӧ тупкӧма.
{Еврей йӧз (комиӧдіс Kodko) @ 63 псалом @ религ. гижӧд @ Библия @ 2021 @ Лб. .}
63 псалом
Сьылысьясӧн веськӧдлысьлы.
Давидлӧн псалом.
Енмӧй, кыв менсьым гӧлӧс шыӧс, кор ме кевмыся, видз менсьым олӧмӧс мустӧмтысьлӧн повзьӧдлӧмысь.
Дорйы менӧ лёк йӧзлӧн гуся сёрнитчӧмысь, лёк вӧчысьяслӧн паныд кыпӧдчӧмысь. Ӧд найӧ лэчтӧны ассьыныс кывнысӧ шыпурт моз, налӧн сёрниыс — яда ньӧв лыйӧм кодь.
Найӧ гусьӧн лыйлӧны мыжтӧмӧс, виччысьтӧг лыйӧны, нинӧмысь оз повны.
Найӧ ышӧдӧны ӧта-мӧднысӧ лёк вӧчны, сёрнитчӧны нальк пуктӧм йылысь, шуалӧны, миянӧс пӧ некод оз аддзы.
Найӧ кӧсйӧны лёксӧ вӧчны, шуалӧны, миян пӧ эм гуся сёрнитчӧм. Збыльысь, мортлысь сьӧлӧмсӧ он вермы туявны-тӧдмавны.
Но Енмыс лыйлас найӧс ньӧвйӧн, найӧс виччысьтӧг лоӧ дойдалӧма.
Налӧн кывйыс уськӧдас найӧс асьнысӧ кок йывсьыныс, и тайӧс аддзысьяс бергӧдчасны наысь.
Став йӧзыс повзясны, кутасны висьтавлыны Енлӧн уджъяс йылысь, гӧгӧрвоасны, мый Енмыс вӧчис.
Веськыда олысь мед нимкодясяс Господьӧн да Сы вылӧ лача кутас.
Веськыд сьӧлӧмаяс мед гажӧдчасны!
{Еврей йӧз (комиӧдіс Kodko) @ 64 псалом @ религ. гижӧд @ Библия @ 2021 @ Лб. .}
64 псалом
Сьылысьясӧн веськӧдлысьлы.
Давидлӧн псалом. Сьыланкыв.
Енмӧй, Тэнӧ ошкӧны Сионын, вайӧны Тэныд кыв сетан висьяс [Ерусалимын].
Тэ кылан кевмысьӧм, та вӧсна став йӧзыс локтӧны Тэ дінӧ.
Лёк уджъясӧй личкӧны менӧ, но Тэ вештан миянлысь мыжнымӧс.
Шуда сійӧ, кодӧс Тэ бӧрйин да матыстін Ас дінад, медым сійӧ оліс Тэнад крамын.
Пӧткӧд миянӧс Аслад вежа крамлӧн бурлуннас. 
Енмӧй, миян Мездысьӧй, вочавидз миянлы! Тэ повзьӧдана, веськыда мыждан, Тэ вылӧ лача кутӧны мувывса став йӧзыс, весиг ылі саридз дорын олысьяс. Аслад вынӧн Тэ сувтӧдін керӧсъяс, Тэ вӧнясьӧмыд ыджыд вынӧн. Тэ лӧньӧдан саридзлысь ызгӧмсӧ, гыяслысь бузгӧмсӧ да йӧзыслысь шызьӧмсӧ.
Му пельӧсын олысьяс повзясны Тэнад шензьӧданаторъясысь, асылын и рытын кутасны кыпӧдны Тэныд ошкӧмсӧ.
Тэ тӧждысян муыс вӧсна, юктӧдан сійӧс ваӧн, сетан сылы озыр быдтас. Енмӧй, Тэнад юыд тырӧма ваӧн.
Йӧзыслы Тэ быдтан нянь, ӧд та могысь Тэ лӧсьӧдін мусӧ.
Гӧрӧм мусӧ Тэ юкталан ваӧн, чорыд шмакъяссӧ поткӧдлан, небзьӧдан мусӧ зэр войтъясӧн, бурсиан мулысь быдтассӧ.
Юркытшӧн моз Тэ мичмӧдан вояс Аслад бур сетӧмторнад. Кытчӧ Тэ воськовтан, сэні муыс тырӧ пуктас-быдтасӧн, овтӧминса йирсянінъяс вежӧдӧны, ыбъяс долыда нимкодясьӧны, видзьяс тырӧны ыж чукӧръясӧн, ковтысъяс шептасьӧны няньӧн, сьылӧны да гораа нимкодясьӧны.
{Еврей йӧз (комиӧдіс Kodko) @ 65 псалом @ религ. гижӧд @ Библия @ 2021 @ Лб. .}
65 псалом
Сьылысьясӧн веськӧдлысьлы.
Сьыланкыв.
Гораа нимкодясьӧмӧн ошкӧй Енсӧ, му вылын олысьяс!
Сьылӧмӧн ошкӧй Сылысь нимсӧ, кыпӧдӧй Сылы ошкӧмсӧ да нимӧдӧмсӧ.
Шуӧй Енмыслы: «Тэнад уджъясыд повзьӧдланаӧсь!
Тэнад кипод улӧ сетчасны Тэныд паныд сувтысьяс, ӧд Тэнад выныд вывті ыджыд.
Му вылын став олысьыс мед копыртчас Тэ водзӧ, мед сьылас Тэныд, [Медвылыссаӧй,] мед сьылӧмӧн ошкас Тэнсьыд нимтӧ!»
Локтӧй да видзӧдлӧй Енлӧн уджъяс вылӧ, наысь йӧзӧс полӧм босьтас.
Саридзсӧ Сійӧ вӧчис кос муӧн, войтырыс подӧн вуджис саридз вомӧн, та вӧсна ми нимкодясям Сыӧн.
Аслас вынӧн Сійӧ ыджыдалӧ помтӧг, Сылӧн синмыс видзӧдӧ войтыръяс бӧрся, медым найӧ эз кыпӧдчыны Сылы паныд.
Войтыръяс, ошкӧй миянлысь Еннымӧс, гораа кыпӧдӧй Сылы ошкӧмсӧ!
Сійӧ видзӧ миянлысь олӧмнымӧс, оз сет лигышмунны миян кокъяслы.
Енмӧй, Тэ тӧдмалін миянӧс, эзысьӧс моз сывдӧмӧн весалін миянӧс.
Тэ лэдзин гартыштны миянӧс тывйӧн, дорны миянӧс чепъясӧн. Тэ лэдзин вӧрӧглы мунны миян вывті.
Ми веськалім биӧ и ваӧ, но Тэ мездін миянӧс.
Ме вая Тэнад керкаӧ сотан вись, вая Тэныд кыв сетан вись, мый ме кӧсйыси аслам вомӧн, сьӧкыдалігӧн висьталі аслам кывйӧн.
Ме вая Тэныд сотан висьяс, тшынӧда Тэ водзын тшӧгӧдӧм межъясӧс, вая Тэныд вись пыдди ӧшъясӧс да ай кӧзаясӧс.
Енсьыс полысьяс, локтӧй да кывзӧй, ме висьтала тіянлы ставсӧ, мый Сійӧ вӧчис менам олӧмын.
Аслам вомӧн ме шыаси Сы дінӧ, аслам кывйӧн ме ошки Сійӧс.
Менам сьӧлӧмын кӧ вӧлі мыж, Господь эськӧ эз кывзы менӧ.
Но Енмыс кывзіс менӧ, Сійӧ кыліс менсьым кевмысьӧмӧс.
Ошкӧм Енлы! Сійӧ сибӧдіс менсьым кевмӧмӧс, эз вешты ме дінысь Ассьыс буралӧмсӧ.
{Еврей йӧз (комиӧдіс Kodko) @ 66 псалом @ религ. гижӧд @ Библия @ 2021 @ Лб. .}
66 псалом
Сьылысьясӧн веськӧдлысьлы.
Ворсӧны струнаа ворсанторйӧн.
Псалом.
Сьыланкыв.
Енмыс мед бурсьӧлӧмтчас миян дінӧ да бурсиас миянӧс, видзӧдлас миян вылӧ югыд чужӧмбаннас. Сэки му вылын олысьяс тӧдмаласны Тэнсьыд туйтӧ, войтыръяс пӧвстын тӧдмаласны Тэнсьыд мездӧмтӧ.
Енмӧй, войтыръяс мед ошкасны Тэнӧ, став войтыръяс мед нимӧдасны Тэнӧ.
Войтыръяс мед гажӧдчасны-нимкодясясны, ӧд Тэ веськыда мыждан найӧс, Тэ веськӧдлан мувывса чужанкотыръясӧн.
Енмӧй, войтыръяс мед ошкасны Тэнӧ, став войтыръяс мед нимӧдасны Тэнӧ.
Муыс сетіс миянлы озыр быдтас.
Енмӧй, миян Енным, бурси миянӧс!
Енмӧй, бурси миянӧс! Мед поласны Тэысь мувывса став олысьыс!
{Еврей йӧз (комиӧдіс Kodko) @ 67 псалом @ религ. гижӧд @ Библия @ 2021 @ Лб. .}
67 псалом
Сьылысьясӧн веськӧдлысьлы.
Давидлӧн псалом.
Сьыланкыв.
Енмӧй, кыпӧдчы! Тэныд паныд сувтысьяс мед разаласны, Тэнӧ мустӧмтысьяс мед пышъясны Тэнад син водзысь!
Разӧд найӧс тшын моз!
Кыдзи сись сылӧ ӧзъялігас, сідзи лёк вӧчысьяс бырасны Ен водзысь.
А веськыда олысьяс кутасны гажӧдчыны, кутасны долыда нимкодясьны Ен водзын.
Сьылӧй Енлы, сьылӧмӧн ошкӧй Сылысь нимсӧ, ыдждӧдлӧй Сійӧс, коді енэжъясын ветлӧдлӧ.
Сылӧн нимыс — Господь. Нимкодясьӧй Сылӧн чужӧмбан водзын!
Енмыс олӧ Аслас вежа оланінын. Батьтӧмлы Сійӧ — Бать, дӧвалы Сійӧ — Дорйысь.
Ӧткаяслы Енмыс сетӧ оланін да котыр, дорӧмаясӧс мездӧ дзескыдінысь, но кывзысьтӧмъяс кутасны овны косьмӧм му вылын.
Енмӧй, кор Тэ мунін Аслад войтырыд водзын, кор Тэ восьлалін овтӧминӧд, сэки муыс вӧрис, енэжсянь киссис зэр. Синай керӧс вӧрис Тэнад чужӧмбанысь, Израиль Енлӧн чужӧмбанысь.
Енмӧй, Тэ уна зэр кисьтлін, ёнмӧдлін вынтӧм мутӧ.
Енмӧй, Тэнад войтырыд оліс сэні, Аслад бурлуныд кузя Тэ тӧждысин гӧльяс вӧсна.
Господь шуӧ кыв, и аньяс ыджыд чукӧрӧн вермӧм йылысь юӧр вайӧны.
Пышйӧны ӧксыяс тышкайӧзыскӧд, пышйӧны, а тышын шедӧдӧмасӧ аньяс юклӧны гортаныс.
Ті куйланныд асланыд оланінын, лоинныд гулю кодьӧсь, сэтшӧм гулю, кодлӧн бордйыс вевттьысьӧма эзысьӧн, гӧныс — сӧстӧм зарниӧн.
Кор Ставсӧвермысь разӧдіс ӧксыясӧс, сэки муыс едждіс, лои Цалмон керӧсвывса лым кодь.
Васан керӧс — Енлӧн керӧс, Васан керӧс — джуджыд керӧс.
Джуджыд керӧсъяс, мыйла ті вежаланныд сійӧ керӧсыс вылӧ, кодӧс Енмыс бӧрйис Аслыс оланін пыдди? Господь кутас овны сэні помтӧг.
Енлӧн тышкасян тарантасыс лыдтӧм-тшӧттӧм, сюрсъясӧн да сюрсъясӧн.
На пӧвстын Господь Аслас вежаинын, Синай керӧсын.
Господьӧй, Тэ кыпӧдчин вылісьыс-вылӧ, босьтін Аскӧдыд дорӧмаясӧс, Тэ сибӧдін йӧзӧс козин пыдди. Весиг паныд кыпӧдчысьяслы ковмас овны Господь Ен дінын.
Господьлы ошкӧмыс лунысь-лун!
Миянӧс мездысь Ен нуӧ миянлысь сьӧкыд нопнымӧс.
Миян Енным — мездысь Ен.
Господь Ыджыдыс мездӧ миянӧс кулӧмысь.
Енмыс жугӧдас Сійӧс мустӧмтысьяслысь юрсӧ, поткӧдас мыжӧ вӧйӧмаяслысь юр пыдӧссӧ.
Господь шуис: «Ме вайӧда найӧс Васансянь, лэпта найӧс саридз пыдӧсысь. Сэки тэ мыськалан ассьыд коктӧ налӧн вирӧн, тэнад понъясыд кутасны лакны налысь вирсӧ».
Енмӧй, Тэнад войтырыд аддзӧ крамӧ мунӧм, менсьым Енмӧс да Ӧксыӧс ошкысьяслысь восьлалӧмсӧ.
Водзвылас мунӧны сьылысьяс, бӧрвылас — мылаа ворсысьяс, а шӧракостас мунӧны нывъяс тимпанъяс вылын ворсӧмӧн.
Найӧ сьылӧны: «Ошкӧй Господьӧс Ен войтырлӧн чукӧртчӧмын! Ошкӧй Енмӧс, Израиль войтыр!»
Сэні мунӧ Венямин чужанкотыр, сійӧ чужанкотыръяс пӧвстысь медічӧт, но ыджыдалӧ, сэні мунӧны Иуда чужанкотырлӧн юралысьяс асланыс йӧзкӧд, тшӧтш Завулон да Неффалим чужанкотыръяслӧн юралысьяс.
Миян Енным сетіс миянлы вын.
Енмӧй, водзӧ на ёнмӧд миянӧс!
Ерусалимса крамтӧ нимӧдӧм могысь ӧксыяс ваясны Тэныд козинъяс.
Енмӧй, чирышт эжӧр пӧвстын олысь зверӧс, войтыръяс вылын ыджыдалысь ӧшъясӧс, кодъяс ошйысьӧны асланыс эзысьӧн.
Разӧд войтыръясӧс, кодъяс зэвтчӧны тышкасьны.
Ӧксылӧн йӧзыс локтасны Египетысь, эфиопияса войтыр нюжӧдас кисӧ Енлань.
Мувывса войтыръяс, сьылӧй Енлы, сьылӧмӧн ошкӧй Господьӧс! Сійӧ ветлӧдлӧ нэмӧвӧйся енэжъясын, Сійӧ шыасьӧ, сетӧ вына шы.
Кыпӧдӧй ошкӧм Енлы!
Сылӧн дзирдлуныс вевттьӧ Израиль войтырӧс, Сылӧн выныс кымӧръясӧдз.
Енмӧй, Тэ повзьӧдана Аслад вежаинын.
Тэ — Израильлӧн Ен, Тэ сетан Аслад войтырыдлы вын да зумыдлун.
Ошкӧм Енлы!
{Еврей йӧз (комиӧдіс Kodko) @ 68 псалом @ религ. гижӧд @ Библия @ 2021 @ Лб. .}
68 псалом
Сьылысьясӧн веськӧдлысьлы.
Сьылӧны “Шушан” шылад улӧ.
Давидлӧн псалом.
Енмӧй, мезды менӧ, ӧд ваыс пӧдтіс менӧ юрвывтыр.
Ме вӧйи зыбуч нюрӧ, меным некытчӧ сувтнысӧ.
Ме веськалі джуджыд ваӧ, сылӧн визулыс кылӧдӧ менӧ.
Горзӧмӧйла менам эбӧсӧй бырис, менам гӧлӧсӧй сибдіс, синмӧй мудзис Енмӧс виччысьӧмысь.
Помкатӧг менӧ мустӧмтысьыс унджык менам юрси дорысь, менӧ дзескӧдысьяс ёнмӧдчӧны, меным ковмас сетны весиг сійӧ, мый эг босьтлы налысь.
Енмӧй, Тэ тӧдан менсьым мывкыдтӧм олӧмӧс, аддзан менсьым мыжъясӧс.
Ыджыдӧй, Господь Саваоф, Тэ вылӧ лача кутысьяс мед оз янавны ме понда.
Израильлӧн Енмӧй, Тэнӧ корсьысьяс мед оз янавны ме понда. Тэ вӧсна менӧ лёкӧдӧны, менам чужӧмӧй сотчӧ.
Аслам вокъяслы ме лои бокысаӧн, аслам мамлӧн пиянлы — локтысь мортӧн. Тэнад керка вӧсна вежӧгтӧмыс топӧдӧ менсьым сьӧлӧмӧс, Тэнӧ омӧльтысьяслӧн лёкӧдӧмыс уси ме вылӧ.
Кор ме видзала да бӧрда, таысь менӧ серамвыв лэптӧны.
Кор ме пасьтала шогалан паськӧм, сэки ме йылысь кывбертӧны.
Кар дзиръя дорын пукалысьяс ме йылысь суклясьӧны, вина юысьяс сьылӧны ме йылысь.
Господьӧй, ме кевмыся Тэныд ӧні, кор Тэ бур сьӧлӧма ме дінӧ.
Енмӧй, эскана Мездысьӧй, Аслад ыджыд буралӧмыд кузя вочавидз меным!
Перйы менӧ нюйтсьыс, эн лэдз меным вӧйны, мезды менӧ мустӧмтысьясысь да джуджыд ваысь.
Вабергачыс мед оз кыскы менӧ, джуджыд ваыс мед оз ньылышт менӧ, гуыс мед оз тупкы ассьыс вомсӧ менам юр весьтын.
Господьӧй, вочавидз меным, ӧд Тэ бур сьӧлӧма.
Ыджыд буралӧмыд кузя видзӧдлы ме вылӧ.
Эн тупкы Ассьыд чужӧмбантӧ Аслад кесйӧгысь, ӧд ме ёна шогся.
Тэрмась вочавидзны меным!
Матыстчы ме дінӧ да дорйы менӧ, мустӧмтысьяс вӧсна мезды менӧ.
Тэ тӧдан, кыдзи лёкӧдісны, янӧдісны да серавлісны менӧ, Тэ аддзан менӧ дзескӧдысьясӧс.
Лёкӧдӧмыс дойдіс менсьым сьӧлӧмӧс, ме дзикӧдз жебми. Ме виччыси жалитӧм, но сійӧ эз ло, виччыси бурӧдысьясӧс, но найӧ эз тыдавны.
Сёян пыдди меным сетісны курыд сӧп, горш косьмигӧн менӧ юктӧдісны уксусӧн.
Сёянныс мед лоӧ налы тывйӧн, чӧсмасьӧмныс — налькйӧн.
Налӧн синныс мед дзикӧдз пемдас, налӧн кокныс мед лигышмунас пыр кежлӧ.
Кисьт на вылӧ Ассьыд скӧрлунтӧ, Тэнад скӧралан биыд мед ньылыштас найӧс.
Налӧн оланінъясыс мед кушмасны, налӧн чомъясын мед оз ло олысьыс. Ӧд найӧ дзескӧдӧны сійӧс, кодӧс Тэ пасьвартін, содтӧны дойсӧ сылы, кодӧс Тэ дойдалін.
Мыж вылӧ мыж содты, мед налы оз вичмы Тэнад веськыдлуныд.
Налысь нимъяссӧ мед лоӧ вуштӧма Олӧмыслӧн небӧгысь, найӧс мед оз ло гижӧма веськыда олысьяс лыдӧ.
Ме коньӧр морт, ме ёна сьӧкыдала, отсав меным, Енмӧй, дорйы менӧ.
Ме кута сьылӧмӧн ошкыны [Аслам] Енлысь нимсӧ, аттьӧалӧмӧн кута нимӧдны Сійӧс. Тайӧ лоӧ Господьлы шогманаджык ӧш дорысь, сюра да гыжъя ӧшпи дорысь.
Тайӧс аддзасны рам сьӧлӧмаяс да кутасны нимкодясьны, Енсӧ корсьысьяслӧн сьӧлӧмныс ловзяс. Господь кылӧ коньӧръяслысь кевмӧмсӧ, Сійӧ оз ӧтдорт Ассьыс йӧзсӧ, дзескыдінын пукалысьясӧс.
Мед ошкасны Господьӧс енэжыс да муыс, саридзыс да сэні став олысьыс. Ӧд Енмыс мездас Сион, выльысь кыпӧдас Иудаын каръяс.
Сэні кутас овны Сылӧн войтырыс, налы вичмас кӧсйысьӧм му. Сэтчӧ овмӧдчасны Сылӧн кесйӧгъяссянь чужысьяс, сэні кутасны овны Сылысь нимсӧ радейтысьяс.
{Еврей йӧз (комиӧдіс Kodko) @ 69 псалом @ религ. гижӧд @ Библия @ 2021 @ Лб. .}
69 псалом
Сьылысьясӧн веськӧдлысьлы.
Давидлӧн псалом.
Сьылӧны казьтылан вись вайигӧн.
Енмӧй, мезды менӧ, Господьӧй, тэрмась отсавны меным!
Мед яналасны да лоӧны серамтуйынӧсь менсьым олӧмӧс корсьысьяс.
Мед бӧр бергӧдчасны да лоӧны серамтуйынӧсь меным лёксӧ кӧсйысьяс.
Мед яналасны да бӧр пышъясны найӧ, кодъяс шуалӧны, тадзи пӧ тэныд и колӧ.
Господьӧй, Тэнӧ корсьысьяс мед долыда нимкодясясны, Тэсянь воӧм мездӧмсӧ радейтысьяс мед дугдывтӧг шуаласны: «Енмыс ыджыд!»
Ме гӧль да коньӧр морт.
Енмӧй, тэрмась локны ме дінӧ!
Тэ меным отсӧг сетысьыс да менӧ Мездысьыс.
Господьӧй, эн ньӧжмась!
{Еврей йӧз (комиӧдіс Kodko) @ 70 псалом @ религ. гижӧд @ Библия @ 2021 @ Лб. .}
70 псалом
Господьӧй, Тэ вылӧ лача кута, ме некор ог янав.
Аслад веськыдлуныд вӧсна дорйы менӧ да мезды менӧ, копырт Ассьыд пельтӧ мелань да мезды менӧ!
Ло меным изкыртаӧн, кытчӧ ме верма быд кадӧ пышйыны.
Тэ шуин менӧ мездыны, ӧд Тэ менам зумыд изйыс да сайӧдчаніныс.
Енмӧй, мезды менӧ Ентӧг олысьяслӧн киысь, мезды менӧ лёк вӧчысьясысь да дзескӧдысьясысь. Господьӧй Ыджыдӧй, Тэ — менам лачаыс, том кадсянь Тэ вылӧ лача кута.
Мам кынӧмсянь Тэ вӧлін меным зумыд пыкӧдӧн, Тэ петкӧдін менӧ мам кынӧмысь.
Ме дугдывтӧг ошка Тэнӧ.
Унаӧн шензьӧны ме вылӧ, но Тэ вылӧ ме зумыд лача кута.
Менам вомӧй мед тырас Тэнӧ ошкӧмӧн, [медым ме ошкӧмӧн сьылі Тэныд,] медым ме быд лун ошки Тэнсьыд дзирдлунтӧ.
Эн ӧтдорт менӧ пӧрысь кадӧ, эн эновт менӧ, кор менам вынӧй бырас. Менӧ мустӧмтысьяс шуалӧны меным паныд, менсьым олӧмӧс босьтны кӧсйысьяс сёрнитӧны ас костаныс: «Енмыс эновтӧма сійӧс.
Вӧтчӧй сы бӧрся да кутӧй сійӧс, ӧд сійӧс мездысьыс абу».
Енмӧй, эн ылыстчы меысь!
Енмӧй, тэрмась отсавны меным!
Менӧ мустӧмтысьяс мед яналасны да бырасны, меным лёксӧ вӧчны кӧсйысьяслы мед лоӧ юръяндзим.
А ме век понда [Тэ вылӧ] лача кутны, понда ёнджыка на ошкыны Тэнӧ.
Менам вомӧй пондас юӧртны Тэнсьыд веськыдлунтӧ, быд лун ме кута висьтавлыны Тэнад бур уджъясыд йылысь, ӧд налӧн лыдыс помтӧм-дортӧм.
Кута мӧвпавны Тэнад вына уджъяс йылысь, Господьӧй Ыджыдӧй, кута казьтывны Тэнсьыд веськыдлунтӧ, сӧмын Тэнсьыд.
Енмӧй, том кадсянь Тэ туйдӧдлін менӧ. Ме ӧнӧдз висьтавла Тэнад шензьӧдана уджъясыд йылысь.
Енмӧй, эн коль менӧ, кор ме пӧрысьма да дзорма. Ме кӧсъя висьтавны водзӧ чужысьяслы Тэнад ыджыд выныд йылысь.
Енмӧй, Тэнад веськыдлуныд енэжсьыс на вылынджык, Тэ вӧчин ыджыд уджъяс.
Енмӧй, кодӧс позяс ӧткодявны Тэкӧд?
Тэ мӧдӧдлін менам олӧмӧ уна шог да сьӧкыдлун, но сэсся бара ловзьӧдлін менӧ, му пыдӧссьыс лэптывлін менӧ.
Вылӧ кыпӧд менӧ, бурӧд менӧ! [Му пыдӧссьыс Тэ лэптывлін менӧ.]
Арфаӧн ворсӧмӧн кута ошкыны Тэнӧ, кута ошкыны Тэнсьыд збыльтӧ, Енмӧй, понда ворсны Тэныд гуслиӧн, Израильлӧн вежа Енмӧй!
Менам вомӧй нимкодясьӧмӧн сьылӧ Тэныд, менам лолӧй тырӧма гажлунӧн, ӧд Тэ мездін менӧ.
Дугдывтӧг кута висьтавлыны Тэнад веськыдлуныд йылысь, ӧд Тэ янӧдін да серамтуйӧ пуктін менӧ дзескӧдысьясӧс.
{Еврей йӧз (комиӧдіс Kodko) @ 71 псалом @ религ. гижӧд @ Библия @ 2021 @ Лб. .}
71 псалом
Соломон йылысь [Давидлӧн псалом]. 
Енмӧй, велӧд ӧксыӧс Тэ моз веськыда мыждыны, туйдӧд ӧксылысь писӧ Тэ моз веськыда вӧчны. Ӧксы мед веськыда мыждас Тэнсьыд войтыртӧ, ёрд вылын мед доръяс гӧльясӧс.
Керӧсъяс мед ваясны йӧзыслы лӧньлун, мылькъяс — веськыдлун.
Ӧксы мед доръяс войтыр пӧвстысь гӧльясӧс, мездас коньӧръяслысь челядьсӧ, но дзескӧдысьясӧс мед топӧдас. 
Сэки войтырыс пондас повны Енмысь нэмъяс чӧж, кытчӧдз дзирдалас шонді да югъялас тӧлысь.
Ӧксы мед лоас ытшкӧм видз вылӧ киссьысь зэр кодь, мусӧ кӧтӧдысь сувтса зэр кодь.
Сылӧн ӧксыалан кадӧ веськыда олысь кутас дзоридзавны, му вылас лоӧ лӧнь олӧм, кытчӧдз оз кус тӧлысьыс.
Ӧксы мед ыджыдалас саридзсянь саридзӧдз, Ефрат юсянь му помӧдз.
Сы водзӧ мед копыртчасны овтӧминын олысьяс, сійӧс мустӧмтысьяс мед нюласны мусӧ сы водзын.
Фарсисса да дівывса ӧксыяс мед мынтасны сылы вот, саваса да севаса ӧксыяс мед ваясны сылы козинъяс.
Сы водзӧ мед копыртчасны ӧксыяс, войтыръяс мед кесъяласны сылы.
Ӧд сійӧ мездас гӧль мортӧс, коді шыасьӧ отсӧгла, мездас коньӧр мортӧс, кодлы отсӧг сетысьыс абу.
Сійӧ лоӧ бур сьӧлӧма гӧльяс да коньӧръяс дінӧ, сійӧ видзас налысь олӧмсӧ.
Сійӧ мездас найӧс нартитӧмысь да виалӧм-дзескӧдӧмысь, налӧн олӧмыс ёна дона сылы.
Ӧксылӧн олӧмыс мед лоӧ кузь нэма, сылы мед ваясны Саваысь дона зарни, йӧзыс мед дугдывтӧг кевмысясны сы вӧсна, быд лун мед бурсиасны сійӧс.
Му вылын, весиг керӧсъяс вылын, тырмымӧн мед лоӧ няньыс, шепъясыс мед гыаласны ливанса вӧр моз, йӧзыс мед чужасны-быдмасны видзвывса турун моз.
Ӧксылысь нимсӧ мед ошкасны нэмъяс чӧж, сылысь нимсӧ мед оз вунӧдны, кытчӧдз югъялӧ шонді.
Сійӧ лоӧ бурсиӧмӧн [став мувывса йӧзыслы], войтыръяс шуасны сійӧс майбырӧн.
Ошкӧм Господь Енлы, Израильлӧн Енлы, Сійӧ ӧтнасӧн вӧчӧ шензьӧданаторъяс. Ошкӧм Сылӧн ыджыд нимлы нэмъяс чӧж! Сылӧн дзирдлуныс мед вевттяс став мусӧ!
Аминь, аминь.
Тайӧн помасьӧны Давидлӧн, Ессей пилӧн, кевмысьӧмъясыс.
{Еврей йӧз (комиӧдіс Kodko) @ 72 псалом @ религ. гижӧд @ Библия @ 2021 @ Лб. .}
72 псалом
Асафлӧн псалом.
Енмыс сэтшӧм бур Израиль войтыр дінӧ, сӧстӧм сьӧлӧмаяс дінӧ!
Ӧдва эз крукась менам кокӧй, ӧдва эз вильды, ӧд ме вежалі лёк вӧчысьяслы, кор аддзи налысь бур олӧмсӧ. Найӧ нинӧмысь оз шогавны, найӧ ёнӧсь да дзоньвидзаӧсь.
Найӧ оз уджавны пӧсь петтӧдз, мукӧд йӧзсӧ моз оз топӧд найӧс сьӧкыд олӧм.
Та вӧсна найӧ сикӧтшӧн моз мичмӧдӧмаӧсь асьнысӧ ышнясьӧмнас, мича паськӧмӧн моз вевттьӧмаӧсь асьнысӧ виалӧм-дзескӧдӧмнас.
Тшӧгнысла налӧн синныс бердӧма, налӧн мӧвпъясныс жуӧны-бергалӧны.
Найӧ сералӧны да лёкӧдӧны, суклясьӧны да ышнясьӧмӧн сёрнитӧны.
Сёрнинас найӧ сувтӧны енэжлы паныд, налӧн лёк кывъясыс паськалӧны став му пасьтала.
Лёк вӧчысьяс дінӧ бергӧдчӧ тшӧтш Енлӧн войтырыс, ва моз пӧтлытӧг юӧ налысь лёк кывъяссӧ. Найӧ шуалӧны: «Кытысь Енмыс тӧдмалас?
Медвылыссаыс ӧмӧй тӧдӧ та йылысь?»
Татшӧмӧсь лёк вӧчысьяс, найӧ лӧня олӧны, пыр озырмӧдчӧны.
Ме шуи: «Весьшӧрӧ-ӧ ме видзи ассьым сьӧлӧмӧс сӧстӧмӧн, ассьым киӧс мыжтӧмӧн? Быд лун менӧ дойдалӧны, быд асыв — янӧдӧны».
Но ме кӧ шуи, мый кута на моз сёрнитны, ме эськӧ мыжа вӧлі Тэнад войтырыд водзын.
Ме мӧвпалі, кыдзи меным гӧгӧрвонысӧ, но тайӧ сьӧкыд вӧлі меным, кытчӧдз ме эг пыр Енлӧн вежаинӧ и эг гӧгӧрво, мый виччысьӧ лёк вӧчысьясӧс.
Тэ сувтӧдан найӧс вильыд туй вылӧ, шыбитан найӧс пыдӧстӧм гуӧ.
Ӧти здукӧн найӧс лоӧ бырӧдӧма, найӧ вошасны, налӧн олӧмныс лёка помасяс.
Кыдзи садьмӧм бӧрын ми вунӧдам вӧтнымӧс, тадзи Тэ, Господьӧй, чеччан да вуштыштан найӧс.
Кор менам сьӧлӧмӧй сотчис, кор пытшкӧсӧй вӧлі топалӧма сьӧкыд дойясысь, сэки ме вӧлі мывкыдтӧм, нинӧм эг гӧгӧрво, ме вӧлі Тэ водзын вежӧртӧм пемӧс кодь.
Но ме пыр Тэкӧд, Тэ кутан менӧ веськыд киӧд.
Тэ туйдӧдан да нуӧдан менӧ, вайӧдан менӧ Аслад дзирдлунӧ.
Енэжас Тэысь кындзи некод менам абу, и кор ме Тэкӧд, му вылас меным нинӧм оз ков.
Менам вир-яйӧй да сьӧлӧмӧй жебмӧны, но Енмыс — менам сьӧлӧмлӧн зумыдлуныс, менам олан пайыс нэмъяс чӧж.
Тэ дінысь ылыстчысьяс кулӧны, Тэнӧ эновтысьясӧс Тэ бырӧдан.
А меным нимкодь матыстчыны Ен дінӧ, ме лача кута Господь Ыджыдӧй вылӧ, висьтавла Сылӧн уджъясыс йылысь [сионса дзиръяяс дорын].
{Еврей йӧз (комиӧдіс Kodko) @ 73 псалом @ религ. гижӧд @ Библия @ 2021 @ Лб. .}
73 псалом
Асафлӧн сьыланкыв.
Енмӧй, мыйла Тэ дзикӧдз эновтін миянӧс, мыйла Тэ ыпъялан-скӧралан Аслад ыж чукӧр вылӧ?
Эн вунӧд Ассьыд войтыртӧ, Тэ ӧд бӧрйин сійӧс важысянь, ньӧбин, медым сійӧ вӧлі Тэнад войтырӧн. Эн вунӧд Сион керӧстӧ, Ассьыд оланінтӧ.
Лок видзӧдлы из чукӧр вылӧ, вӧрӧг жугліс вежа крам.
Тэнӧ мустӧмтысьяс равзӧны войтырыдлӧн вежа чукӧртчанінас, найӧ лэптісны сэтчӧ ассьыныс дӧрапас.
Вӧр пӧрӧдысьяс моз найӧ ӧвтчисны чернаныс.
Черъясӧн да пыридзьясӧн найӧ жуглісны крамысь став серпасалӧмторсӧ.
Найӧ сотісны Тэнсьыд вежаинтӧ, пежалісны Тэнад нимлысь оланінсӧ.
Найӧ мӧвпыштісны: «Ми дзикӧдз бырӧдам найӧс», и сотісны миян муысь Енлысь вежаинъяссӧ.
Индысьпасъяс ми огӧ нин аддзӧй, миян пӧвстын эз нин коль пророкыс, некод миян пӧвстысь оз тӧд, дыр-ӧ тадзи лоӧ.
Енмӧй, дыр-ӧ на дзескӧдысь пондас лёкӧдны миянӧс, дыр-ӧ на мустӧмтысь пондас омӧльтны Тэнсьыд нимтӧ?
Мыйла Тэ дзебан Ассьыд китӧ?
Лэпты веськыд китӧ да пасьварт найӧс!
Енмӧй, Тэ водзысяньыс менам Ӧксы, Тэ вӧчан му вылас ыджыд уджъяс.
Аслад вынӧн Тэ поткӧдін саридзсӧ, жугӧдін саридзса гундыръяслысь юръяссӧ.
Тэ пасьвартін юрсӧ левиафанлысь, сетін сійӧс сёйны [эфиопияса] овтӧминын олысь йӧзлы.
Ва петанінъяслы да шоръяслы Тэ восьтін туйяс, а ыджыд юяссӧ Тэ косьтін.
Луныс да войыс — Тэнад, Тэ вӧчин тӧлысьсӧ да шондісӧ.
Тэ мурталін муыслысь помъяссӧ, дасьтін тӧвсӧ да гожӧмсӧ.
Господьӧй, эн вунӧд, мый мустӧмтысь лёкӧдӧ Тэнӧ, мывкыдтӧм йӧз омӧльтӧны Тэнсьыд нимтӧ.
Эн сет зверъяслы косявлыны Ассьыд гулютӧ, пыр кежлӧ эн вунӧд Ассьыд гӧль йӧзтӧ.
Эн вунӧд Ассьыд йитӧдтӧ, ӧд му вылас став пемыд пельӧсыс тырӧма виалӧм-дзескӧдӧмӧн.
Увтыртӧмаяс бӧрсӧ мед оз бергӧдчыны яналӧмаӧн, корысьяс да коньӧръяс мед ошкасны Тэнсьыд нимтӧ.
Енмӧй, кыпӧдчы да дорйы Ассьыд нимтӧ, эн вунӧд, мый мывкыдтӧм йӧз быд лун лёкӧдӧны Тэнӧ.
Эн вунӧд Тэнӧ мустӧмтысьяслысь горзӧмсӧ, Тэныд паныд кыпӧдчысьяс ӧтарӧ шызьӧны.
{Еврей йӧз (комиӧдіс Kodko) @ 74 псалом @ религ. гижӧд @ Библия @ 2021 @ Лб. .}
74 псалом
Сьылысьясӧн веськӧдлысьлы.
Сьылӧны “Эн бырӧд” шылад улӧ.
Асафлӧн псалом.
Сьыланкыв.
Енмӧй, ошкам Тэнӧ, ошкам, ӧд Тэ матын.
Йӧзыс висьтавлӧны Тэнад шензьӧдана уджъясыд йылысь.
Ме, Господь, урчита колана кадсӧ да кута веськыда мыждыны.
Муыс да сы вылын став олысьыс сыркмунласны, но Ме зумыда кута муыслысь сюръяяссӧ.
Мывкыдтӧмъяслы Ме шуа: «Энӧ йӧйталӧй!» Лёк вӧчысьясӧс Ме ӧлӧда: «Энӧ чургӧдӧй ассьыныд сюрнытӧ! Энӧ ышнясьӧй, [Енлы паныд] тшапа энӧ сёрнитӧй». Ӧд мортсӧ вылӧ кыпӧдӧмыс оз во асыввывсянь, рытыввывсянь либӧ овтӧминсянь, но Енмыс эм Мыждысьыс: ӧтиӧс Сійӧ лэдзӧ, мӧдӧс — кыпӧдӧ.
Господь киын чашаыс, сэні быгзьӧ чорыд вина. Сійӧ кисьталӧ сэтысь лёк вӧчысьяслы, и найӧ юӧны, юӧны весиг пыдӧссьыс став гудырсӧ.
А ме кута помтӧг нимӧдны Господьӧс, кута сьылӧмӧн ошкыны Яковлысь Енсӧ. Сійӧ чегъялас Ентӧг олысьяслысь сюръяссӧ, а веськыда олысьясӧс вылӧ кыпӧдас.
{Еврей йӧз (комиӧдіс Kodko) @ 75 псалом @ религ. гижӧд @ Библия @ 2021 @ Лб. .}
75 псалом
Сьылысьясӧн веськӧдлысьлы.
Ворсӧны струнаа ворсанторйӧн.
Асафлӧн псалом.
Сьыланкыв.
Енмӧс тӧдӧны Иудаын, Сылысь нимсӧ ыдждӧдлӧны Израильын.
Сылӧн оланіныс Салимын, Сійӧ олӧ Сионын.
Сэні Сійӧ чегъяліс ньӧвъяс, жугліс сайӧд, шыпурт да мукӧд тышкасянтор.
Енмӧй, Тэ дзирдалан югыда, нэмӧвӧйся керӧсъясысь Тэ ёна ыджыд.
Тышкайӧзӧс кыйисны, унмыс личкис найӧс, налӧн киясыс вынтӧммисны.
Яковлӧн Енмӧй, Тэнад горӧдӧмысь тарантасъяс да вӧвъяс сувтісны.
Енмӧй, Тэ повзьӧдана! Тэнад скӧралігӧн коді вермас сулавны Тэ водзын?
Енэжсянь Тэ юӧртан мыждӧмтӧ.
Муыс повзьӧ да чӧв ланьтӧ, кор Енмыс сувтӧ мыждыны, медым мездыны мувывса став увтыртӧмасӧ.
Весиг мортлӧн скӧралӧмыс бергӧдчас Тэнӧ ошкӧм вылӧ, а коляс скӧрлунсӧ Тэ лӧньӧдан.
Кыв сетӧй Господьлы, асланыд Енлы, да сетӧм кывныд серти вӧчӧй!
Матігӧгӧр олысьяс мед ваясны козинъяснысӧ повзьӧдана Енлы.
Сійӧ раммӧдӧ юралысьясӧс, Сыысь полӧны мувывса ӧксыяс.
{Еврей йӧз (комиӧдіс Kodko) @ 76 псалом @ религ. гижӧд @ Библия @ 2021 @ Лб. .}
76 псалом
Едутунлы, сьылысьясӧн веськӧдлысьлы.
Асафлӧн псалом.
Ме гораа шыася Ен дінӧ, ме шыася Ен дінӧ, и Сійӧ кылас менӧ.
Аслам шогалігӧн ме корся Господьӧс, войбыд нюжӧда киӧс Сылань да ог лэдзлы, менам сьӧлӧмӧй нинӧмӧн оз бурась.
Кор казьтывла Ен йылысь, менӧ дзӧрӧдӧ, кор мӧвпала Сы йылысь, менсьым лолӧс личкӧ.
Енмӧй, Тэ он лэдз меным куньны синмӧс, ме ловнам усьӧма, ог вермы весиг сёрнитны.
Ме мӧвпала важ олӧм йылысь, воддза кадыс йылысь.
Войнас ме казьтывла ассьым сьыланкывъясӧс, мӧвпала да кӧсъя тӧдны, Господь ӧмӧй пыр кежлӧ эновтіс, Сійӧ ӧмӧй оз нин радейт менӧ?
Сылӧн буралӧмыс ӧмӧй пыр кежлӧ помасис, чужысьяссянь чужысьясӧдз Сійӧ ӧмӧй кутас чӧв овны?
Енмыс ӧмӧй вунӧдіс Ассьыс буралӧмсӧ, скӧралігас ӧмӧй дзикӧдз тупкис сьӧлӧмсӧ?
Ме шуи: «Ыджыд шог меным, ӧд Медвылыссаыс оз нин кутышт менӧ Аслас кинас».
Но ме кута казьтывлыны Господьлӧн уджъяс йылысь, Сылӧн важся шензьӧданаторъяс йылысь.
Кута мӧвпавны Тэнад уджъяс йылысь, Тэнад ыджыд уджъяс йылысь.
Енмӧй, Тэнад туйыд вежа, Тэ — миян ыджыд Ен!
Тэ — Ен, Тэ вӧчан шензьӧданаторъяс, Тэ петкӧдлін Ассьыд вынтӧ войтыръяс пӧвстын, Аслад кинад Тэ мездін Ассьыд войтыртӧ, Яковлысь да Ӧсиплысь рӧдсӧ.
Ваяс аддзисны Тэнӧ, Енмӧй, найӧ аддзисны Тэнӧ да повзисны, весиг ва пыдӧсыс тіраліс.
Кымӧрсяньыс лэччис ва, енэжас муркакыліс-гымаліс, гымньӧвъясыд сявкйисны биӧн.
Тэнад гым шыыд разаліс енэж пасьтала, чардбиыд югзьӧдліс муюгыдсӧ, муыс вӧрис да сыркакыліс.
Тэнад туйыд муніс саридз пыр, Тэнад кок туйыд — джуджыд ваӧд, но Тэнсьыд воськовъястӧ некод эз аддзыв.
Ыжъясӧс моз Тэ нуӧдін Ассьыд войтыртӧ, Мӧисей да Аарон веськӧдлісны наӧн.
{Еврей йӧз (комиӧдіс Kodko) @ 77 псалом @ религ. гижӧд @ Библия @ 2021 @ Лб. .}
77 псалом
Асафлӧн сьыланкыв.
Менам войтырӧй, кывзӧй менсьым велӧдӧмӧс, сюся кывзӧй менсьым кывъясӧс.
Ме сёрнита тіянкӧд шусьӧгъясӧн, висьтала тіянлы важся нӧдкывъяс.
Мый кывлім да тӧдмалім, мый батьяс миянлы висьтавлісны, сійӧс ми огӧ дзебӧй ас войтырысь, а висьталам водзӧ чужысьяслы Господьлӧн ошкана уджъясыс йылысь, Сылӧн выныс да шензьӧданаторъясыс йылысь.
Господь сетіс тшӧктӧмъяс Яков рӧдлы, Индӧдсӧ сетіс Израиль войтырлы, тшӧктіс миян батьяслы велӧдны Индӧдӧ ассьыныс челядьсӧ, медым тӧдісны та йылысь на бӧрся чужысьяс, медым насянь чужысьяс сэсся висьтавлісны асланыс челядьлы.
Найӧ мед лача кутасны Ен вылӧ, мед оз вунӧдны Енлысь уджъяссӧ, а Енлысь тшӧктӧмъяссӧ мед видзасны сьӧлӧманыс. Найӧ мед оз лоны асланыс батьяс кодьӧсь: асныраӧсь да паныд кыпӧдчысьяс, Енлысь кывзысьтӧмъяс да Сыысь кежысьяс.
Ефремсаяслӧн вӧліны шыпуртъяс да ньӧввужъяс, но тыш дырйи найӧ пышйисны.
Асныраяс эз видзны Енлысь йитӧдсӧ, эз кӧсйыны овны Сылӧн Индӧд серти.
Найӧ вунӧдісны Сылысь уджъяссӧ, шензьӧданаторъяссӧ, мый Сійӧ петкӧдліс налы.
Налӧн батьяслӧн син водзын Енмыс вӧчис шензьӧданаторъяс Египет муын, Цоан эрд вылын.
Сійӧ шӧрипӧв поткӧдіс саридз да вуджӧдіс найӧс, васӧ ӧтар-мӧдар бокас сувтӧдіс стен моз.
Луннас нуӧдіс найӧс кымӧр отсӧгӧн, войнас югзьӧдіс налысь туйсӧ биӧн.
Овтӧминын поткӧдіс изкырта, джуджыд юкмӧсысь моз юктӧдіс найӧс ваӧн.
Сійӧ сетіс валы ыльӧбтыны изкыртаысь, и ваыс визувтіс ю моз.
Но найӧ водзӧ Енлы паныд мыж вӧчисны, дӧзмӧдісны Медвылыссаӧс овтӧминын.
Найӧ тӧдӧмӧн дӧзмӧдісны Енсӧ, корисны Сылысь сёян сьӧлӧм сертиныс. Найӧ шуасисны Енлы паныд да сёрнитісны: «Енмыс ӧмӧй вермас овтӧминын дасьтыны чӧскыд пызан?
Дерт, кор Сійӧ вартіс изкыртаӧ, сэтысь ыльӧбтіс ва да визувтісны шоръяс.
Но вермас-ӧ Сійӧ сетны нянь да вердны Ассьыс войтырсӧ яйӧн?»
Господь кыліс тайӧс да тырис лӧглунӧн, биыс ыпнитіс Яковлӧн рӧд пӧвстын, Енмыс чорыда скӧрмис Израиль войтыр вылӧ, ӧд найӧ эз эскыны Сылы, эз кутны лача, мый Сійӧ мездас найӧс.
Но Енмыс восьтіс енэжвыв ӧдзӧсъяс, вылісянь тшӧктіс кымӧръяслы зэр моз кисьтны на вылӧ манна, сетіс налы сёйны енэжвыв нянь.
Йӧзыс сёйисны анделъяслысь нянь, Енмыс найӧс пӧттӧдзныс вердіс.
Енэжсянь Сійӧ мӧдӧдіс асыв тӧв, Аслас вынӧн кыпӧдіс лун тӧв. Сійӧ кисьтіс на вылӧ бус мында яй, мӧдӧдіс налы лыа мында лэбач.
Лэбачьяссӧ уськӧдіс налӧн сувтанін шӧрӧ, налӧн чомъяс дорӧ, и найӧ пӧттӧдзныс сёйисны, Енмыс сетіс налы кӧсйӧм сертиныс.
Но найӧ эз дугдыны горшасьнысӧ, налӧн сёяныс вӧлі воманыс на, кор Енлӧн скӧрлуныс суис найӧс. Сійӧ бырӧдіс на пӧвстысь медся вынаяссӧ, виис израильса том йӧзӧс.
Но та вылӧ видзӧдтӧг найӧ эз ӧвсьыны мыж вӧчӧмсьыс, эз эскыны Сылӧн шензьӧдана уджъясӧ.
Та вӧсна налӧн олан лунъясыс виччысьтӧг помасисны, налӧн олӧмыс ру моз бырис.
Кор Енмыс бырӧдліс найӧс, сэки найӧ корсисны Енсӧ, бӧр локтісны Сы дінӧ, ёна корсисны Сійӧс. Найӧ гӧгӧрвоисны, мый Енмыс — налӧн Дорйысьыс, Медвылысса Енмыс — найӧс Мездысьыс. Но асланыс кывъясӧн найӧ леститчисны Сы дінӧ, асланыс вомнас ылӧдлісны Сійӧс.
Налӧн сьӧлӧмныс эз вӧв веськыд Сы водзын, найӧ торкисны йитӧдсӧ, мый Сійӧ кӧрталіс накӧд.
Но Енмыс мелі сьӧлӧма, Сійӧ вештіс налысь мыжсӧ, эз бырӧд найӧс. Сійӧ унаысь ылыстліс на дінысь Ассьыс лӧглунсӧ, эз кисьт на вылӧ Ассьыс скӧрлунсӧ.
Сійӧ тӧдіс, мый найӧ сӧмын вир-яй, сӧмын ловшы, коді петӧ да бӧрсӧ оз бергӧдчы.
Кымынысь найӧ дӧзмӧдлісны Сійӧс овтӧминын, скӧрмӧдлісны Сійӧс кушинын!
Найӧ выльысь и выльысь дӧзмӧдісны Енмӧс, омӧльтісны Израильлысь вежа Енсӧ. Найӧ вунӧдісны Енлысь вына кисӧ да лунсӧ, кор Сійӧ мездіс найӧс нартитӧмысь. Египет муын Енмыс петкӧдліс индысьпасъяс, Цоан эрд вылын вӧчис шензьӧданаторъяс.
Египетса ваяссӧ да юяссӧ Сійӧ пӧртіс вирӧ, и сэтысь эз позь юны васӧ.
Сійӧ мӧдӧдіс лӧдз-гутӧс курччавны египетсаясӧс, мӧдӧдіс жабаясӧс тшыкӧдны мусӧ.
Налысь быдтассӧ Енмыс сетіс лёльӧяслы, пуктассӧ — саранчалы.
Налысь виноградсӧ жугліс шерӧн, инжир пуяссӧ — йиа зэрӧн.
Налысь пемӧссӧ бырӧдіс шерӧн, ыжъяссӧ да ӧшъяссӧ виис чардбиӧн.
Енмыс кисьтіс на вылӧ ыпъялан скӧрлунсӧ, лӧглунсӧ да ярлунсӧ, мӧдӧдіс налы уна сьӧкыдлун да найӧс бырӧдысь андел чукӧрӧс.
Сійӧ восьтіс ӧдзӧсъяс Аслас скӧрлунлы, эз видз египетсаясӧс кулӧмысь, бырӧдіс налысь пемӧссӧ пӧрӧс висьӧмӧн, 
виис Египетысь медводдза чужысь пиянӧс, Хамлӧн чомъясысь — став медводдза чужысьсӧ.
Енмыс нуӧдіс Ассьыс войтырсӧ ыжъясӧс моз, нуӧдіс найӧс овтӧминӧд ыж чукӧрӧс моз.
Сылӧн нуӧдӧм улын налы нинӧмысь вӧлі повнысӧ, а на бӧрся вӧтчысьясӧс пӧдтіс саридз.
Израиль войтырӧс Сійӧ вайӧдіс Аслас вежа оланінӧ, керӧсӧ, мый веськыд кинас босьтіс Аслыс.
Аслас войтыр водзысь Сійӧ вӧтліс мукӧд войтыръясӧс, юкліс налысь мусӧ да вичмӧдіс израильса чужанкотыръяслы, мукӧд войтыръяслӧн чомъясӧ овмӧдіс Ассьыс войтырсӧ.
Но Израиль войтыр водзӧ дӧзмӧдіс Медвылысса Енмӧс, эз видз сьӧлӧмас Сылысь тшӧктӧмъяссӧ.
Асланыс батьяс моз найӧ эновтісны Енсӧ, личалӧм ньӧввуж моз лоины шогмытӧмӧсь.
Вись ваян мылькъяснаныс найӧ дӧзмӧдісны Енсӧ, бӧлбанъяслы юрбитӧмнас найӧ кыпӧдісны Сы пытшкын вежӧгтӧм.
Тайӧс аддзӧмысь Енмыс пузис скӧрлунӧн, дзикӧдз эновтіс Израиль войтырӧс.
Сійӧ эновтіс Ассьыс силомса оланінсӧ, вежа чомсӧ, кӧні Сійӧ оліс йӧз пӧвстын.
Йитӧд кудсӧ Сійӧ сетіс вӧрӧглӧн киӧ, Ассьыс вынсӧ да дзирдлунсӧ лэдзис мырддьыны. Ассьыс войтырсӧ сетіс шыпурт улӧ, скӧрмис Аслас йӧзыс вылӧ.
Том зонъясӧс ньылыштіс би, нывъяслы эз сьывны кӧлысьвывса сьыланкывъяс, попъяс кулісны шыпуртысь, дӧваяслы эз позь бӧрдӧдчыны.
Сэки Господь быттьӧ унмысь садьмис, чеччис быттьӧ винаысь палялӧм тышкаморт, пасьвартіс Сійӧс мустӧмтысьясӧс, пыр кежлӧ янӧдіс найӧс.
Господь эновтіс Ӧсипсянь чужысьясӧс, эз бӧрйы Ефремлысь чужанкотырсӧ, но бӧрйис Иудалысь чужанкотырсӧ да Ассьыс муса Сион керӧссӧ.
Сійӧ сувтӧдіс сэтчӧ Ассьыс вежаинсӧ, вӧчис сійӧс енэжыс кодь джуджыдӧн, муӧс моз зумыда сувтӧдіс сійӧс нэмъяс кежлӧ. Сійӧ бӧрйис Давидӧс, Ассьыс кесйӧгсӧ, босьтіс сійӧс ыж йирсянінысь, вайӧдіс сійӧс ыж чукӧр пӧвстысь, медым видзны Ассьыс войтырсӧ — Яковсянь чужысьясӧс, Израильӧс — Ассьыс бӧрйӧмаясӧс.
Давид видзис найӧс сӧстӧм сьӧлӧмӧн, веськӧдліс наӧн бур мывкыдӧн.
{Еврей йӧз (комиӧдіс Kodko) @ 78 псалом @ религ. гижӧд @ Библия @ 2021 @ Лб. .}
78 псалом
Асафлӧн псалом.
Енмӧй, войтыръяс локтісны Тэнад муӧ, пежалісны Тэнсьыд вежа крамтӧ, подулӧдзыс жугӧдісны Ерусалим.
Тэнад кесйӧгъяслысь шойяссӧ колисны енэжвыв лэбачьяслы, Тэнад эскана войтырлысь шойяссӧ — мувывса зверъяслы.
Налӧн вирыс шорӧн визувтіс Ерусалим гӧгӧр, найӧс некодлы вӧлі гуавнысӧ.
Орччӧн олысьяс серамвыв лэптӧны миянӧс, миян гӧгӧр олысьяс лёкӧдӧны да омӧльтӧны миянӧс.
Господьӧй, дыр-ӧ пондан лӧгавны миян вылӧ? Дыр-ӧ пондас би моз ыпъявны Тэнад скӧрлуныд?
Кисьт Ассьыд скӧрлунтӧ войтыръяс вылӧ, кодъяс оз тӧдны Тэнӧ, кодъяс оз шыасьны Тэ дінӧ. Ӧд найӧ бырӧдісны Яковсянь чужысьясӧс, куштісны налысь оланіннысӧ.
Эн пукты миян вылӧ батьяснымлысь мыжъяссӧ, тэрмась петкӧдлыны миянлы Ассьыд бурлунтӧ, ӧд ми дзикӧдз жебмим.
Енмӧй, миян Мездысьӧй, отсав миянлы, медым та пыр лоӧ ошкӧма Тэнсьыд нимтӧ.
Аслад нимыд вӧсна мезды миянӧс да вешты миянлысь мыжнымӧс.
Мыйла лэдзан войтыръяслы шуасьны: «Кӧні налӧн Енмыс?»
Тэнад кесйӧгъяслысь вирсӧ кисьтӧмысь сет миянлы аддзыны водзӧс перйӧмтӧ. Та йылысь мед тӧдмаласны войтыръяс!
Енмӧй, кыв дзескыдінын пукалысьяслысь ойзӧмсӧ, Аслад вына кинад мезды кулӧм вылӧ мӧдӧдӧмаясӧс.
Господьӧй, водзӧс перйы миянкӧд орччӧн олысьяслысь, сизим пӧв унджык водзӧс перйы Тэнӧ лёкӧдӧмысь.
А ми, Тэнад войтырыд, Тэнад йӧрысь ыжъясыд, кутам помтӧг нимӧдны Тэнӧ, кутам ошкыны Тэнӧ чужысьяссянь чужысьясӧдз.
{Еврей йӧз (комиӧдіс Kodko) @ 79 псалом @ религ. гижӧд @ Библия @ 2021 @ Лб. .}
79 псалом
Сьылысьясӧн веськӧдлысьлы.
Сьылӧны “Шушан эдут” шылад улӧ.
Асафлӧн псалом.
Израильӧс Видзысь, кывзы миянӧс!
Ыж видзысь моз Тэ нуӧдан Ӧсиплысь пиянсӧ. Тэ, коді пукалан херувимъяс вылын, петкӧдчы дзирдлуннад!
Петкӧдлы Ассьыд вынтӧ, Ефрем, Венямин да Манассей чужанкотыръяслы! Лок миянӧс мездыны!
Енмӧй, выльысь сувтӧд миянӧс!
Сет миянлы аддзыны Тэнсьыд югыд чужӧмбантӧ, сэки ми мездмам.
Господьӧй, Ен Саваоф, дыр-ӧ на Тэ кутан скӧравны Аслад войтырыд вылӧ, ӧтдортны кевмысьӧмнымӧс?
Няньӧн моз Тэ вердін миянӧс синваӧн, уна синваӧн юктӧдін миянӧс. Орччӧн олысьяслы Тэ вӧчин миянӧс лёкӧданторйӧн, мустӧмтысьяс сералӧны миян вылын.
Ен Саваоф, выльысь сувтӧд миянӧс!
Сет миянлы аддзыны Тэнсьыд югыд чужӧмбантӧ, сэки ми мездмам.
Египетысь Тэ вайин виноград вожтӧ, вӧтлін войтыръясӧс, а вожтӧ вужйӧдін.
Мусӧ Тэ весалін, виноградтӧ сэтчӧ вужйӧдін, и сійӧ паськаліс му пасьталаыс.
Сылӧн вуджӧрыс вевттис керӧсъяс, сылӧн вожъясыс вевттисны Енлысь сус пуяссӧ.
Сылӧн петасъясыс нюжӧдчисны саридз дорӧдз, паськалісны ю дорӧдз.
Мыйла тэ кисьтін сылысь потшӧсъяссӧ? Сы дінті мунысьяс нетшкӧны сылысь розъяссӧ.
Вӧрпорсь йирӧ сійӧс, вӧрса звер куштӧ сійӧс.
Ен Саваоф, бергӧд Ассьыд чужӧмбантӧ, видзӧдлы енэжсянь, видзӧдлы да волы видлыны тайӧ виноград йӧрсӧ.
Видз сійӧс, мый пуктін Аслад веськыд кинад. Видз пиӧс, кодӧс Тэ Аслыд быдтін-ёнмӧдін.
Тэнсьыд виноградтӧ кералӧма, сотӧма биын, Тэнад скӧр видзӧдласысь сылӧн петасъясыс кулісны.
Тэнад киыд мед видзас морт пиӧс, кодӧс Тэ Аслыд быдтін-ёнмӧдін, сійӧс, коді пукалӧ Тэнад веськыдладорын. Тэысь ми огӧ кежӧй.
Ловзьӧд миянӧс, и ми шыасям Тэ дінӧ.
Господьӧй, Ен Саваоф, выльысь сувтӧд миянӧс!
Сет миянлы аддзыны Тэнсьыд югыд чужӧмбантӧ, сэки ми мездмам.
{Еврей йӧз (комиӧдіс Kodko) @ 80 псалом @ религ. гижӧд @ Библия @ 2021 @ Лб. .}
80 псалом
Сьылысьясӧн веськӧдлысьлы.
Ворсӧны гефса ворсанторйӧн.
Асафлӧн псалом.
Долыда сьылӧй Енлы, Сійӧ — миян выныс!
Гораа сьылӧмӧн ошкӧй Яковлысь Енсӧ!
Сьылӧй сьыланкыв, ворсӧй тимпанӧн, ворсӧй мичаа юргысь гуслиӧн да арфаӧн.
Буксӧй буксанӧн выль тӧлысь чужигӧн, миян гажӧдчан кадӧ, кор енэжас тӧлысьыс тырвыйӧ содас.
Ӧд тайӧ — Израиль войтырлы индӧд, Яковлӧн Енсянь тшӧктӧм.
Тайӧ тшӧктӧмсӧ Енмыс сетіс Ӧсиплӧн рӧдлы, кор петіс Египетлы паныд. Сэні найӧ кылісны кывъяс, кодъясӧс водзынджык эз кывлыны.
Енмыс шуис: «Ме лэдзи пельпом вывсьыд сьӧкыд ноптӧ, мезді китӧ сьӧкыдтор новлӧдлӧмысь.
Сьӧкыдалігад тэ шыасин Ме дінӧ, и Ме мезді тэнӧ.
Гым пытшсянь Ме вочавидзи тэныд, Мерива ва дорын тӧдмалі тэнӧ.
Кывзы, Менам войтырӧй, Ме ӧлӧда тэнӧ.
Тэ кӧ эськӧ кывзысин Менсьым, Израиль!
Мед оз лоны тэнад мукӧд енъяс, мукӧд войтырлӧн енъяслы эн копрась.
Ме — Господь, тэнад Енмыд, Ме петкӧді тэнӧ Египет муысь.
Восьт ассьыд вомтӧ, и Ме тырта сійӧс.
Но Менам войтырӧй эз кывзы Менӧ, Израиль эз кывзысь Менсьым.
Та вӧсна Ме эновті найӧс, коли найӧс овны чорзьӧм сьӧлӧмӧн, асланыс кӧсйӧм серти.
Менам войтырӧй кӧ кывзіс Менӧ, Израиль войтыр кӧ ветліс Менам туйясӧд, Ме эськӧ ӧдйӧ ланьтӧді налысь вӧрӧгсӧ, Ассьым киӧс эськӧ лэпті найӧс дзескӧдысьяслы паныд, Менӧ мустӧмтысьяс эськӧ леститчисны Ме водзын, и тайӧ вӧлі эськӧ налӧн пайыс нэмъяс чӧж.
А Ассьым войтырӧс Ме эськӧ верді медбур шобді няньӧн, пӧткӧді найӧс изкыртаысь босьтӧм маӧн».
{Еврей йӧз (комиӧдіс Kodko) @ 81 псалом @ религ. гижӧд @ Библия @ 2021 @ Лб. .}
81 псалом
Асафлӧн псалом.
Енмыс сувтіс енэжвывса олысьяс водзӧ, висьталіс налы мыждӧмсӧ:
«Ті онӧ веськыда мыждӧй, ті доръянныд лёк вӧчысьясӧс!
Дорйӧй гӧльясӧс да батьтӧм-мамтӧмъясӧс, веськыда мыждӧй увтыртӧмаясӧс да коньӧръясӧс.
Гӧльясӧс да коньӧръясӧс мездӧй, нетшыштӧй найӧс лёк вӧчысьяслӧн киысь.
Ті нинӧм онӧ тӧдӧй, нинӧм онӧ гӧгӧрвоӧй, ветланныд пемыдас, та вӧсна муыслӧн подулыс вӧрӧ.
Ме шуи, мый ті — енъяс, Медвылыссалӧн пиян, но мувывса йӧз моз ті куланныд, ӧксыяс моз усянныд».
Енмӧй, кыпӧдчы да мыжды му вылын олысьясӧс, ӧд войтыръясыс — Тэнад.
{Еврей йӧз (комиӧдіс Kodko) @ 82 псалом @ религ. гижӧд @ Библия @ 2021 @ Лб. .}
82 псалом
Сьыланкыв.
Асафлӧн псалом.
Енмӧй, эн чӧв ов! Эн ланьтӧдчы, дугды чӧв овны! Ӧд Тэныд паныд сувтысьяс шызьӧны, Тэнӧ мустӧмтысьяс кыпӧдӧны ассьыныс юрнысӧ.
Найӧ сёрнитчӧны лёк вӧчны Тэнад войтырлы — налы, кодъясӧс Тэ видзан.
Найӧ шуалӧны, мунам пӧ да бырӧдам найӧс войтыръяс пӧвстысь, медым Израиль нимсӧ весиг вунӧдасны.
Тэныд паныд сёрнитчисны, ӧтвыв йитӧд кӧрталісны Эдомын олысьяс да Измаилсянь чужысьяс, моавсаяс да Агарсянь чужысьяс, гевал, аммон да амалик войтыръяс, филистимсаяс да Тирын олысьяс.
Накӧд ӧтувтчисны тшӧтш ассурсаяс, локтісны отсавны Лот пиянлы.
Енмӧй, Тэ вӧч налы сійӧ жӧ, мый вӧчин мадиансаяслы, мый вӧчин Кишон ю дорын Сисарлы да Явинлы. Тайӧ кык мортсӧ виисны Эн-Дорын, налӧн шойясыс лоины муыслы куйӧдӧн.
Тэныд паныд сувтысьяслӧн ӧксыяслы вӧч сійӧ жӧ, мый вӧчин Оривлы да Зивлы. Вӧч налӧн юралысьяслы сійӧ жӧ, мый вӧчин Зевейлы да Салманлы, кодъяс шуалісны: «Босьтам аслыным Енлысь муяссӧ».
Енмӧй, вӧч Тэныд паныд сувтысьясӧс тӧвнырӧн кыпӧдан бус кодьӧн, тӧлӧн нӧбӧдан идзас кодьӧн.
Кыдзи яр би сотӧ вӧр, кыдзи ыпъялысь би чишкалӧ керӧсъяс, сідзи жӧ Тэ вӧтлы найӧс Аслад ыджыд тӧвнырӧн, повзьӧд найӧс Аслад бушколӧн.
Господьӧй, янӧд найӧс, медым найӧ корсисны Тэнӧ.
Мед найӧ пыр кежлӧ яналасны да шӧйӧвошасны, мед налӧн олан лунъясыс помасясны яналӧмӧн. Мед найӧ тӧдмаласны, мый Тэнад нимыд — Господь, Тэ ӧтнад Медвылыссаыс, Тэ ыджыдалан став му пасьтала.
{Еврей йӧз (комиӧдіс Kodko) @ 83 псалом @ религ. гижӧд @ Библия @ 2021 @ Лб. .}
83 псалом
Сьылысьясӧн веськӧдлысьлы.
Ворсӧны гефса ворсанторйӧн.
Корей пиянлӧн псалом.
Кутшӧм мичаӧсь Тэнад оланінъясыд, Господь Саваоф!
Менам лолӧй ёна гажтӧмтчӧ, ме ёна кӧсъя пырны Господьлӧн крам йӧрӧ, менам сьӧлӧмӧй да вир-яйӧй нимкодясьӧны ловъя Ен водзын.
Господь Саваоф, менам Ӧксыӧй да Енмӧй! Тэнад висьпуктанін дорын весиг лэбач аддзӧ аслыс оланін, чикыш вӧчӧ аслыс поз, медым быдтыны сэні пиянсӧ.
Шудаӧсь Тэнад керкаын олысьяс, найӧ дугдывтӧг ошкӧны Тэнӧ.
Шуда сійӧ мортыс, кодлӧн выныс Тэсянь, коді сьӧлӧмсянь кӧсйӧ локны Тэнад крамӧ.
Бӧрдан сёртасӧд мунысьяслы воссьӧ сэні ва петанін, зэрыс кисьтӧ сэні бурсиӧмсӧ.
Найӧ восьлалӧны да вынсялӧны, локтӧны Ен водзӧ Сионӧ.
Господьӧй, Ен Саваоф, кыв менсьым кевмӧмӧс, сибӧд сійӧс, Яковлӧн Енмӧй!
Енмӧй, миянӧс Дорйысьӧй, видзӧдлы Аслад Мавтыштӧмаыд вылӧ.
Тэнад крамбердса йӧръясын ӧти луныс бурджык мукӧдлаын сюрс лун коллялӧм дорысь.
Бурджык овны Енлӧн крам дзиръя дорын лёк вӧчысьяслӧн керкаын олӧм дорысь.
Ӧд Господь Ен — шондіыс да сайӧдыс, Господь сетӧ буралӧмсӧ да нимӧдӧмсӧ.
Сӧстӧма олысьяслы Сійӧ лышкыда бурсӧ сетӧ.
Шуда сійӧ мортыс, коді лача кутӧ Тэ вылӧ, Господь Саваоф.
{Еврей йӧз (комиӧдіс Kodko) @ 84 псалом @ религ. гижӧд @ Библия @ 2021 @ Лб. .}
84 псалом
Сьылысьясӧн веськӧдлысьлы.
Корей пиянлӧн псалом.
Господьӧй, Тэ вӧлін бур сьӧлӧма Аслад муыд дінӧ, бӧр вайӧдін пленысь Яковсянь чужысьясӧс.
Тэ прӧститін Аслад войтырыдлысь лёк вӧчӧмсӧ, вевттин налысь став мыжсӧ. Тэ ылыстін на дінысь Ассьыд лӧглунтӧ, кусӧдін Ассьыд ыпъялысь скӧрлунтӧ.
Енмӧй, миянӧс Мездысьӧй, выльысь сувтӧд миянӧс, дугды лӧгавнытӧ миян вылӧ.
Помтӧг ӧмӧй пондан лӧгавны миян вылӧ, Тэнад скӧрлуныд ӧмӧй нюжалас чужысьяссянь чужысьясӧдз?
Он ӧмӧй выльысь ловзьӧд миянӧс, медым Тэнад войтырыд вермис нимкодясьны Тэӧн?
Господьӧй, петкӧдлы миянлы Ассьыд буралӧмтӧ, мезды миянӧс!
Ме кывза, мый висьталас Господь Ен.
Сійӧ кӧсйысьӧ сетны лӧнь олӧм Аслас эскана войтырлы. Сӧмын найӧ мед бӧр оз сетчыны мывкыдтӧм оласногас.
Сійӧ регыд нин мездас Сыысь полысьясӧс, Сылӧн дзирдлуныс лоас миян му вылын.
Буралӧмыс да збыльыс паныдасясны, веськыдлуныс да лӧньлуныс окыштчасны.
Збыльыс кыпӧдчӧ мусянь, веськыдлуныс видзӧдӧ енэжсянь.
Господь сетас миянлы бурсӧ, муыс козьналас ассьыс быдтассӧ.
Веськыдлуныс мунӧ Господь водзвылын да дасьтӧ Сылы туйсӧ.
{Еврей йӧз (комиӧдіс Kodko) @ 85 псалом @ религ. гижӧд @ Библия @ 2021 @ Лб. .}
85 псалом
Давидлӧн кевмысьӧм.
Господьӧй, копырт Ассьыд пельтӧ мелань, вочавидз меным, ӧд ме гӧль да коньӧр.
Видз менсьым олӧмӧс, ӧд ме кывзыся Тэнсьыд.
Енмӧй, мезды менӧ, Ассьыд кесйӧгтӧ, ӧд ме лача кута Тэ вылӧ.
Господьӧй, ло бур сьӧлӧма ме дінӧ, быд лун ме шыася Тэ дінӧ.
Господьӧй, гажӧд Ассьыд кесйӧгтӧ, Тэныд ме восьта ассьым сьӧлӧмӧс. Господьӧй, Тэ бур да мелі сьӧлӧма, Тэ ёна буралан Тэнсьыд отсӧг корысьяс дінӧ.
Господьӧй, кыв менсьым кевмӧмӧс, кывзы менсьым кевмысьӧмӧс.
Шог дырйи ме шыася Тэ дінӧ, и Тэ вочавидзан меным.
Господьӧй, енъяс пӧвстын Тэ кодь мӧдыс абу, абуӧсь Тэ моз вӧчӧм уджъясыс.
Господьӧй, Тэ вӧчин став войтыръяссӧ. Найӧ локтасны да копыртчасны Тэ водзӧ, ошкасны Тэнсьыд нимтӧ. Ӧд Тэ ыджыд, Тэ вӧчан шензьӧданаторъяс. Тэ — Ен, и мӧдыс абу.
Господьӧй, велӧд менӧ Тэнад туйӧ, велӧд ветлыны Тэнад збыльыд серти, пукты менам сьӧлӧмӧ Тэнад нимысь полӧм.
Господьӧй, менам Енмӧй, став сьӧлӧмсянь кута аттьӧавны Тэнӧ, кута помтӧг ошкыны Тэнсьыд нимтӧ. Ӧд Тэнад буралӧмыд ме дінӧ вывті ыджыд, Тэ мездін менсьым олӧмӧс пыдӧстӧминысь.
Енмӧй, вылӧ кыпӧдчысьяс сувтісны меным паныд, лёк вӧчысьяс корсьӧны босьтны менсьым олӧмӧс, найӧ нинӧм туйӧ пуктӧны Тэнӧ.
Но Тэ, Господьӧй, бур да мелі сьӧлӧма Ен, Тэ дыр терпитан, ёна буралан да веськыда вӧчан. Видзӧдлы ме вылӧ да ло бур сьӧлӧма ме дінӧ, сет меным, Аслад кесйӧглы, вынтӧ, мезды менӧ, Аслад кесйӧг аньлысь писӧ.
Петкӧдлы меным Ассьыд бурлунтӧ. Менӧ мустӧмтысьяс яналасны, кор аддзасны, мый Тэ, Господьӧй, отсалін меным да бурӧдін менӧ.
{Еврей йӧз (комиӧдіс Kodko) @ 86 псалом @ религ. гижӧд @ Библия @ 2021 @ Лб. .}
86 псалом
Корей пиянлӧн псалом.
Сьыланкыв.
Господьлӧн карыс сулалӧ вежа керӧсъяс вылын.
Господь радейтӧ Сионӧс да сылысь пыранінъяссӧ Яков рӧдлӧн став мукӧд кар дорысь ёнджыка на.
Тэ йылысь, Енлӧн кар, висьталӧны сӧмын бурсӧ.
Египетын да Вавилонын олысьяс йылысь, Тир карын, Филистим да Эфиопия муясын олысьяс йылысь Ме шуа, мый найӧ тӧдӧны Менӧ, шуа, мый найӧ чужлісны Сион карын.
Сион кар йылысь шуӧны, сэтшӧмтӧ морт пӧ чужліс сэні, и Ачыс Медвылыссаыс пӧ сувтӧдіс тайӧ карсӧ.
Войтыръясӧс арталігӧн-гижалігӧн Господь пасйӧ, мый тайӧ мортыс чужліс Сион карын.
Сьылысьяс да ворсысьяс шуалӧны, ми пӧ ставным чужлім Сион карын.
{Еврей йӧз (комиӧдіс Kodko) @ 87 псалом @ религ. гижӧд @ Библия @ 2021 @ Лб. .}
87 псалом
Сьыланкыв.
Корей пиянлӧн псалом.
Сьылысьясӧн веськӧдлысьлы. Сьылӧны “Махалат” шылад улӧ.
Эзрахса Еманлӧн сьыланкыв.
Господьӧй Енмӧй, менӧ Мездысьӧй, лун и вой ме шыася Тэ дінӧ.
Менам кевмысьӧмӧй мед воас Тэнад чужӧмбан водзӧ, копырт Ассьыд пельтӧ менам кевмӧмлань. Менам олӧмӧй тырӧма шогӧн, ме матыстча кулӧмаяслӧн оланінлань.
Менӧ дасьтӧны гуавны, ме лои вынсӧ воштӧм морт кодь, менӧ кольӧма кулӧмаяс пӧвстӧ, гуын куйлысь виӧмаяс дінӧ. Найӧс Тэ он нин казьтыв, Тэнад киыд найӧс оз нин видз.
Тэ шыбитін менӧ пыдӧстӧм гуӧ, пемыдінӧ да джуджыдінӧ.
Тэнад скӧрлуныд дзикӧдз личкис менӧ, Тэнад гыясыд уськӧдісны менӧ кок йылысь.
Тэ ылыстін ме дінысь тӧдсаясӧс, вӧчин менӧ налы зывӧкторйӧн.
Менӧ йӧртӧма дзескыдінӧ, ог вермы сэтысь петнысӧ.
Бӧрдӧмӧйла менам синмӧй пемдіс. Господьӧй, быд лун ме шыася Тэ дінӧ, лэпта киӧс Тэлань.
Тэ ӧмӧй кулӧмаяслы вӧчан шензьӧданаторъяс?
Кулӧмаяс ӧмӧй чеччасны да пондасны ошкыны Тэнӧ?
Гуын ӧмӧй юӧртӧны Тэнсьыд буралӧмтӧ, пыдӧстӧминын — Тэнсьыд збыльтӧ?
Пемыдінын ӧмӧй тӧдӧны Тэнсьыд шензьӧданаторъястӧ, вунӧдӧмаяслӧн муын — Тэнсьыд веськыдлунтӧ?
Но ме, Господьӧй, шыася Тэ дінӧ, водз асывсянь ме кевмыся Тэныд.
Господьӧй, мыйла Тэ эновтін менӧ, дзебин меысь Ассьыд чужӧмбантӧ?
Томдырсянь ме ёна сьӧкыдала, унаысь вӧлі куланвыйын, ме нуа Тэӧн мӧдӧдӧм шогъяс, дзикӧдз вынтӧмми.
Тэнад скӧрлуныд муніс ме вывті, Тэнад повзьӧдлӧмыд уськӧдіс менӧ кок йылысь. Ытва моз полӧмыс быд лун кытшалӧ менӧ, топӧдӧ менӧ быд боксянь.
Тэ ылыстін ме дінысь ёртъясӧс, мекӧд сӧмын пемыдыс.
{Еврей йӧз (комиӧдіс Kodko) @ 88 псалом @ религ. гижӧд @ Библия @ 2021 @ Лб. .}
88 псалом
Эзрахса Этанлӧн сьыланкыв.
Господьӧй, Тэнад буралӧмыд йылысь кута сьывны помтӧг, Тэнсьыд збыльтӧ кута юӧртны чужысьяссянь чужысьясӧдз.
Тэнад буралӧмыд лоӧ нэмъяс чӧж, енэжас Тэ вынсьӧдін Ассьыд збыльтӧ.
Ме, Господь, кӧрталі йитӧд Аслам бӧрйӧмакӧд, кыв сеті Аслам Давид кесйӧглы.
Шуи: Ме ёнмӧда тэнсьыд рӧдтӧ пыр кежлӧ, тэнад юралан пуклӧсыд сулалас чужысьяссянь чужысьясӧдз.
Господьӧй, енэжъясыс ошкӧны Тэнсьыд шензьӧданаторъястӧ, вежаяслӧн чукӧртчӧмын нимӧдӧны Тэнсьыд збыльтӧ.
Енэжас Господь кодьыс абу, енъясӧс оз позь ӧткодявны Господькӧд.
Ен водзын тіралӧны енэжвывса вежаяс, Сыысь полӧ Сы гӧгӧр став олысьыс.
Господьӧй, Ен Саваоф, Тэ кодь вынаыс абу, Тэ быдторйын эскана Ен.
Тэ ыджыдалан шызьӧм саридз вылын, Тэ лӧньӧдан сылысь гыяссӧ.
Тэ кувтӧдз пасьвартін Рахавӧс *, саридзын олысь зверӧс, вына кинад вӧтлін вӧрӧгтӧ.
Енэжыс Тэнад, и муыс Тэнад, Тэ вӧчин муюгыдсӧ да ставсӧ, мый сэні эм.
Тэ вӧчин войвыв да лунвыв, Тавор да Ермон керӧсъяс нимкодясьӧны Тэнад нимыд йылысь.
Тэнад киыд вына, Тэнад сойыд ён, веськыд китӧ Тэ кыпӧдӧмыд вылӧ.
Тэнад юралӧмыдлӧн подулыс — веськыдлун да веськыда мыждӧм.
Буралӧмыс да збыльыс ветлӧны Тэ водзвылын.
Шуда сійӧ войтырыс, коді нимкодясьӧмӧн ошкӧ Тэнӧ, Господьӧй.
Найӧ олӧны Тэнад чужӧмбанлӧн югыдас. Быд лун найӧ нимкодясьӧны Тэнад нимыд йылысь, Тэнад веськыдлуныд найӧс вылӧ кыпӧдӧ. Тэ — миян выныс да ошйысянторйыс, Тэнад бурлуныд кыпӧдӧ юрнымӧс.
Господьсянь миян дорйысьыс, Израильлӧн вежа Енсянь миян ӧксыыс.
Петкӧдчылӧм пыр Тэ висьтавлін Аслад эскана кесйӧгъяслы: «Ме отсалі повтӧмлы, сувтӧді войтыр пӧвстысь Аслым бӧрйӧмаӧс.
Ме аддзи Аслым кесйӧгӧс — Давидӧс, Аслам вежа выйӧн мавтышті сійӧс.
Менам киӧй отсалӧ сылы, Менам вынӧй ёнмӧдӧ сійӧс.
Вӧрӧг оз вермы сійӧс, лёк вӧчысь оз дзескӧд сійӧс.
Паныд сувтысьясӧс Ме пасьварта сылӧн син водзын, сійӧс мустӧмтысьясӧс Ме бырӧда.
Менам збыльӧй да буралӧмӧй сыкӧд, Менам нимӧй вылӧ кыпӧдӧ сійӧс.
Ме сета сылӧн кипод улӧ став мусӧ саридз дорсянь ыджыд юясӧдз.
Сійӧ шуӧ Меным: “Тэ менам Бать, менам Ен, менам мездмӧмлӧн зумыд подулыс”.
Сійӧс Ме шуи медводдза чужысьӧн, сійӧс Ме кыпӧда мувывса став ӧксыясысь на вылӧджык. Менам буралӧмӧй сы дінӧ оз помасьлы, сыкӧд кӧрталӧм йитӧдӧй зумыд.
Ме ёнмӧда сылысь рӧдсӧ пыр кежлӧ, сылӧн юралан пуклӧсыс енэжыс моз пыр сулалас.
Сылӧн пияныс кӧ эновтасны Менсьым Индӧдӧс, оз кутны овны Менам тшӧктӧмъяс серти, найӧ кӧ торкасны Менсьым Индӧдӧс, оз видзны Менсьым кывъясӧс, сэки Ме беддьӧн нӧйта найӧс мыжъяссьыныс, ньӧръяла найӧс лёк вӧчӧмсьыныс.
Но Ассьым буралӧмӧс ог вешты на дінысь, ог веж Ассьым веськыдлунӧс.
Ог торк Ассьым йитӧдӧс, мый кӧрталі накӧд, ог веж Аслам вомысь петӧм кывъясӧс.
Ӧтчыд и пыр кежлӧ Ме кыв сеті, кӧсйыси Аслам вежалунӧн, мый ог пӧръяв Давидӧс.
Сылӧн рӧдыс лоӧ нэмъяс чӧж, сылӧн юралан пуклӧсыс шонді моз пыр сулалас Ме водзын, сылысь юралан пуклӧссӧ лоӧ зумыдмӧдӧма нэмъяс кежлӧ, кыдзи енэжас зумыда ӧшалӧ ставсӧ аддзысь тӧлысь».
Но Тэ дӧзмин Аслад мавтыштӧмаыд вылӧ, ӧтдортін-эновтін сійӧс.
Тэ орӧдін йитӧдтӧ, мый кӧрталін Аслад кесйӧгкӧд, ӧксылысь юркытшсӧ шыбитін муас.
Сылӧн карлысь стенъяссӧ Тэ жугӧдін, сылӧн изкаръясысь вӧчин из чукӧръяс.
Ветлысь-мунысьяс гусялӧны сылысь эмбурсӧ, орччӧн олысьяслы сійӧ лои серамтуйын.
Сійӧс дзескӧдысьясӧс Тэ ёнмӧдін, сійӧс мустӧмтысьяслы сетін нимкодясьны, сылысь шыпуртсӧ Тэ бергӧдін аслыс паныд, эн отсав сылы тышын.
Тэ пуктін пом сылӧн ыджыдалӧмлы, сылысь юралан пуклӧссӧ пӧрӧдін.
Тэ дженьдӧдін сылысь томдырся лунъяссӧ, вевттин сійӧс янӧдӧмӧн.
Господьӧй, Тэ ӧмӧй пыр кежлӧ дзебсин? Тэнад скӧрлуныд ӧмӧй помтӧг кутас ыпъявны би моз?
Эн вунӧд, мый мортлӧн олан лунъясыс дженьыдӧсь. Тэ вӧчин мортӧс, и сійӧ ӧмӧй нинӧм абу кодь?
Эм-ӧ сэтшӧм морт, кодӧс эськӧ эз су кулӧмыс, коді эськӧ видзис ассьыс олӧмсӧ пыдӧстӧминӧ вуджӧмысь?
Господьӧй, кӧні Тэнад важ моз буралӧмыд?
Кӧні Тэнад Давидлы сетӧм кывйыд?
Господьӧй, эн вунӧд, мыйта лёкӧдӧны Тэнсьыд кесйӧгъястӧ войтыръяс, мыйта дой ме нуа сьӧлӧмын.
Господьӧй, эн вунӧд Ассьыд мавтыштӧматӧ, Тэнӧ мустӧмтысьяс омӧльтӧны сійӧс, лёкӧдӧны сылысь быд воськов.
Ошкӧм Господьлы нэмъяс чӧж!
Аминь, аминь.
{Еврей йӧз (комиӧдіс Kodko) @ 89 псалом @ религ. гижӧд @ Библия @ 2021 @ Лб. .}
89 псалом
Енлӧн морт Мӧисейлӧн кевмысьӧм.
Господьӧй, чужысьяссянь чужысьясӧдз Тэ миянлы сайӧдчаніныс.
Керӧсъяс артмытӧдз, мусӧ да ентыкӧласӧ вӧчтӧдз Тэ вӧлін нин, Тэ эм Ен.
Мортсӧ Тэ бӧр бергӧдан муӧ, Тэ шуан: «Мувывса йӧз, бӧр бергӧдчӧй муӧ».
Тэнад син водзын сюрс воыс тӧрытъя кольӧм лун кодь, кар видзысьлӧн войся дӧзьӧритан кад кодь.
Тэ кылӧдан йӧзӧс ытваӧн моз, налӧн олӧмыс вӧт кодь дженьыд, найӧ вежӧдысь турун кодьӧсь, асывнас сійӧ чепӧсйӧ-быдмӧ, а рытнас нярмӧ-косьмӧ.
Тэнад скӧралӧмысь ми бырам, Тэнад лӧгалӧмысь ми полам-тіралам.
Тэ тӧдан миянлысь лёк вӧчӧмнымӧс, Тэ аддзан миянлысь гуся мыжъяснымӧс.
Тэнад скӧралӧмысь миян лунъясным бырӧны, миян олӧмным помасьӧ ышлолыштӧм моз.
Миян олан лунъясным — сизимдас во, а ёнджыкъяслӧн — кӧкъямысдас.
Миян олан лунъясысь унджыкыс — мырсьӧм да шогсьӧм, найӧ ӧдйӧ кольӧны, и ми лэбам.
Коді тӧдӧ Тэнад скӧралӧмлысь вынсӧ? Коді вермӧ муртавны Тэнад ярлунысь полӧмсӧ?
Велӧд миянӧс артавны ассьыным олан лунъяснымӧс, медым миян вӧлі мывкыд сьӧлӧм.
Господьӧй, дыр-ӧ на виччысьнысӧ? Бергӧдчы миянлань, ло бур сьӧлӧма Аслад кесйӧгъяс дінӧ.
Быд асыв сет миянлы пӧткӧдчыны Тэнад буралӧмӧн, медым ми нимкодясим да гажӧдчим став олӧм чӧжным.
Гажӧд миянӧс сійӧ лунъясыс пыдди, кор Тэ дойдалін миянӧс, сійӧ воясыс пыдди, кор ми нуим сьӧкыдсӧ.
Тэнад кесйӧгъясыд мед аддзасны Тэнсьыд уджъястӧ, налӧн ныв-пиныс — Тэнсьыд дзирдлунтӧ.
Господьӧй, миян Енмӧй, Тэнад бурлуныд мед лоӧ миян олӧмын, сет миянлы отсӧгсӧ уджъясын, отсав миянлы кипомса уджъясын.
{Еврей йӧз (комиӧдіс Kodko) @ 90 псалом @ религ. гижӧд @ Библия @ 2021 @ Лб. .}
90 псалом
[Давидлӧн ошкана сьыланкыв.] 
Медвылыссалӧн вевттьӧд улын олысь, Ставсӧвермысьлӧн бордъяс улын шойччысь шуӧ Господьлы: «Тэ — менам сайӧдчаніныс да изкарыс, Тэ — менам Ен, Тэ вылӧ ме лача кута».
Господь видзӧ тэнӧ налькйӧ шедӧмысь, мездӧ тэнӧ пӧрӧс висьӧмысь. Сійӧ вевттьӧ тэнӧ бордъяснас, Сылӧн борд улын тэныд нинӧмысь повнысӧ.
Сылӧн збыльыс — тэныд сайӧд да зумыд потшӧс.
Луннас он повзьы ньӧвйӧн лыйӧмысь, и войыс тэнӧ оз повзьӧд. Он повзьы пемыдас ветлысь пӧрӧс висьӧмысь и луншӧр кадӧ бырӧдысь висьӧмысь.
Мед кӧть сюрсъяс усясны тэ гӧгӧр, дас сюрсъяс куласны тэнад веськыдладорысь, но тэныд тайӧ оз инмы.
Тэ сӧмын кутан видзӧдны, аслад синнад аддзан лёк вӧчысьяслысь водзӧс перйӧмсӧ.
Ӧд Господь — тэнад лачаыд, Медвылыссаӧс тэ бӧрйин аслыд сайӧдчанінӧн.
Оз су тэнӧ лёкыс, пеж висьӧм оз инмӧдчы тэнад оланінӧ.
Аслас анделъяслы Господь тшӧктӧ видзны тэнӧ став тэнад туйяс вылын.
Найӧ нуасны тэнӧ ки выланыс, видзасны изйӧ крукасьӧмысь.
Яда змей вылӧ тувччан, талялан левӧс да гундырӧс.
Господь висьталӧ: «Сійӧ радейтӧ Менӧ, та вӧсна Ме мезда сійӧс.
Ме доръя сійӧс, ӧд сійӧ тӧдӧ Менсьым нимӧс.
Сійӧ шыасяс Ме дінӧ, и Ме вочавидза сылы.
Ме лоа сыкӧд сьӧкыд нуигас, мезда сійӧс да нимӧда сійӧс. Ме нюжӧда сылысь олан лунъяссӧ, петкӧдла сылы Ассьым мездӧмӧс».
{Еврей йӧз (комиӧдіс Kodko) @ 91 псалом @ религ. гижӧд @ Библия @ 2021 @ Лб. .}
91 псалом
Псалом.
Сьылӧны шойччан лунӧ.
Кутшӧм бур ошкыны Тэнӧ, Господьӧй, сьылӧмӧн ошкыны Тэнсьыд нимтӧ, Медвылыссаӧй! Кутшӧм бур асывнас юӧртны Тэнсьыд буралӧмтӧ, рытнас — Тэнсьыд збыльтӧ, ошкыны Тэнӧ арфаӧн да гуслиӧн, дас струнаа ворсанторйӧн.
Господьӧй, Тэ гажӧдан менӧ Аслад уджъяснад. Ме нимкодяся Тэнад киӧн вӧчӧмторъясысь.
Господьӧй, кутшӧм ыджыдӧсь Тэнад уджъясыд, кутшӧм мывкыдаӧсь Тэнад мӧвпъясыд!
Вежӧртӧм морт оз тӧд, мывкыдтӧм морт оз гӧгӧрво тайӧс.
Ентӧг олысьяс вежӧдӧны турун моз, лёк вӧчысьяс дзоридзалӧны, но найӧ бырасны пыр кежлӧ.
Но Тэ, Господьӧй, нэмъяс чӧж Медвылыссаыс.
Господьӧй, Тэнӧ мустӧмтысьяс кулӧны, лёксӧ вӧчысьяс разалӧны.
Тэ ёнмӧдан менӧ, и ме лоа ӧш кодь вына, Тэ мавтыштан менӧ выль выйӧн.
Аслам синмӧн ме аддза паныд сувтысьяслысь усьӧмсӧ, аслам пельӧн ме кыла лёк вӧчысьясӧс бырӧдӧмсӧ.
Веськыда олысьяс дзоридзалӧны пальма моз, кыпӧдчӧны ливанса сус пу моз.
Найӧс вужйӧдӧма Господьлӧн керкаын, найӧ дзоридзалӧны миян Енлӧн йӧръясын.
Весиг пӧрысь кадӧ веськыда олысьяс вайӧны вотӧс, лоӧны чӧскыдӧсь да вежӧсь, юӧртӧны Господьлӧн веськыда вӧчӧмыс йылысь. Сійӧ — менам изкыртаыс, Сы пытшкын ылӧгыс абу.
{Еврей йӧз (комиӧдіс Kodko) @ 92 псалом @ религ. гижӧд @ Библия @ 2021 @ Лб. .}
92 псалом
[Давидлӧн ошкана сьыланкыв Ен войтырлӧн ас муӧ бергӧдчӧм йылысь. Сьылӧны шойччан лун водзвылын.] 
Господь ӧксыалӧ, Сійӧ вевттьысьӧма дзирдлунӧн, пасьтасьӧма вынӧн да вӧнясьӧма. Муюгыдыс зумыда сулалӧ, сійӧ оз вӧрзьыв.
Тэнад юралан пуклӧсыд важысянь сулалӧ, му пуксьытӧдзыс на Тэ пыр вӧлін.
Господьӧй, юяс гызьӧны, юяс ыджыд шыӧн гызьӧны, кыпӧдӧны ассьыныс гыяссӧ.
Но уна валӧн бузгӧм дорысь, саридзлӧн гызьӧм дорысь ёна вынаджык выліинын олысь Господь.
Господьӧй, Тэнад кывъясыд веськыдӧсь, Тэнад керкаын нэмъяс чӧж лоӧ вежалун.
{Еврей йӧз (комиӧдіс Kodko) @ 93 псалом @ религ. гижӧд @ Библия @ 2021 @ Лб. .}
93 псалом
[Давидлӧн псалом. Сьылӧны вежонса нёльӧд лунӧ.] 
Господьӧй, Тэ — водзӧс перйысь Ен. Водзӧс перйысь Енмӧй, петкӧдчы дзирдлуннад!
Кыпӧдчы, муюгыдсӧ Мыждысьӧй, мынтысь вылӧ кыпӧдчысьяслы налӧн уджъясыс серти.
Господьӧй, дыр-ӧ на лёк вӧчысьяс пондасны гажӧдчыны?
Найӧ ышнясьӧны, налӧн вомысь петӧны тшап кывъяс.
Господьӧй, Тэнсьыд войтыртӧ найӧ топӧдӧны, Тэнсьыд бӧрйӧм войтыртӧ дзескӧдӧны.
Дӧваясӧс да йӧз муысь локтысьясӧс найӧ бырӧдӧны, батьтӧм-мамтӧмъясӧс виалӧны. Найӧ шуалӧны: «Господь оз аддзы, Яковлӧн Енмыс оз тӧдмав».
Вежӧрсялӧй, мывкыдтӧмъяс!
Вежӧртӧмъяс, кор ті мывкыдсяланныд?
Пель Вӧчысь ӧмӧй оз кыв, син Вӧчысь ӧмӧй оз аддзы?
Войтыръяслы вежӧр Сетысьыс, мортсӧ гӧгӧрвоны Велӧдысьыс оз ӧмӧй мыжды?
Господь тӧдӧ мортлысь мӧвпъяссӧ, Сійӧ тӧдӧ, мый найӧ ковтӧмӧсь.
Шуда сійӧ мортыс, кодӧс Тэ, Господьӧй, вежӧрсьӧдан да велӧдан Аслад Индӧдӧ. Тэ сетан сылы лӧньлун сьӧкыд кадӧ, кытчӧдз лёк вӧчысьлы оз ло кодйӧма гу.
Ӧд Господь оз ӧтдорт Ассьыс войтырсӧ, оз эновт Ассьыс бӧрйӧм войтырсӧ.
Йӧз пӧвстын бара лоӧ веськыда мыждӧм, и веськыд сьӧлӧмаяс кутчысясны сэтчӧ.
Коді доръяс менӧ лёк вӧчысьясысь?
Коді ме дор сувтас мыж вӧчысьяслы паныд?
Господь кӧ эз отсав меным, менам лолӧй эськӧ важӧн нин вуджис мӧдаръюгыдас.
Кор ме шулывлі, мый менам кокӧй лигышмуніс, Тэнад буралӧмыд, Господьӧй, кутыштліс менӧ.
Кор менам сьӧлӧмӧй тырӧма шогнас, Тэнад бурӧдӧмыд гажӧдӧ менсьым лолӧс.
Тэ ӧмӧй ӧтувтчан накӧд, кодъяс оз веськыда мыждыны? Найӧ быттьӧ кутчысьӧны Индӧдас, но вӧчӧны лёксӧ.
Найӧ чукӧрӧн уськӧдчӧны веськыда олысь вылӧ, мыжтӧм мортӧс кулӧм вылӧ мыждӧны.
Но Господь — менӧ Дорйысьыс, менам Енмӧй — менам изкыртаӧй да сайӧдчанінӧй. Налысь лёк вӧчӧмсӧ Господь бергӧдас ас выланыс, Сійӧ бырӧдас найӧс лёк пытшканыс. Господь, миян Енным, бырӧдас найӧс.
{Еврей йӧз (комиӧдіс Kodko) @ 94 псалом @ религ. гижӧд @ Библия @ 2021 @ Лб. .}
94 псалом
[Давидлӧн ошкана сьыланкыв.] 
Локтӧй, сьыламӧй Господьлы, кыпыда сьылӧмӧн ошкамӧй Сійӧс, Сійӧ — миян мездмӧмлӧн зумыд подулыс.
Локтӧй Сылӧн чужӧмбан водзӧ Сійӧс аттьӧалӧмӧн, ошкӧй Сійӧс гораа сьылӧмӧн! Господь — ыджыд Ен, Сійӧ — став енъяс вылын ыджыд Ӧксы.
Му пыдӧсыс — Сы киын, керӧс йылыс — Сылӧн, саридзыс тшӧтш Сылӧн, Аслас киӧн Сійӧ вӧчис саридзсӧ да мусӧ.
Локтӧй да копыртчамӧй Господь водзӧ, сувтамӧй пидзӧс выланым миянӧс Вӧчысь водзӧ.
Ӧд Сійӧ — миян Ен, а ми — Сылӧн йӧрысь ыжъясыс, Сійӧ видзӧ миянӧс.
Ті кӧ талун кыланныд Сылысь гӧлӧс шысӧ, энӧ чорзьӧдӧй сьӧлӧмнытӧ, кыдзи ті вӧчинныд овтӧминын, Мерива да Масса* дорын. Сэні тіян батьясныд аддзылісны Менсьым уджъясӧс, но дӧзмӧдісны Менӧ.
Нелямын во чӧж Ме дӧзмывлі на вылӧ. Ме шуи: — Тайӧ войтырыс сьӧлӧмнас ылалӧма, Менсьым туйясӧс найӧ оз тӧдны. Та вӧсна Ме скӧрми на вылӧ да кыв сеті, мый найӧ оз пырны Менам шойччанінӧ.
{Еврей йӧз (комиӧдіс Kodko) @ 95 псалом @ религ. гижӧд @ Библия @ 2021 @ Лб. .}
95 псалом
[Давидлӧн ошкана сьыланкыв.
Сьылӧны керка лэптігӧн.] 
Сьылӧй Господьлы выль сьыланкыв, му вылын олысьяс, сьылӧй Господьлы!
Сьылӧй Господьлы, ошкӧй Сылысь нимсӧ, лунысь-лун юӧртӧй, мый Сійӧ мездӧ.
Висьтавлӧй войтыръяслы Сылӧн дзирдлуныс йылысь, быд войтырлы — Сылӧн шензьӧдана уджъясыс йылысь.
Ошкӧй Господьӧс, ӧд Сійӧ ыджыд, мукӧд енмыс дорысь медъёна Сыысь колӧ повны.
Войтыръяслӧн енъясыс — идолъяс, а Господь енэжъяс вӧчис.
Сылӧн эм ыджыдалӧм да дзирдлун, Сылӧн вежаинын — вын да мичлун.
Войтыръяс, кыпӧдӧй ошкӧм Господьлы, ошкӧй-нимӧдӧй Господьӧс, ошкӧй Господьлысь нимсӧ, локтӧй Сылӧн крамбердса йӧръясӧ, вайӧй Сылы козинъяс, копыртчӧй Господьлы Сылӧн мича вежаинын!
Му вылын олысьяс, полӧй-тіралӧй Сыысь!
Висьталӧй войтыръяс пӧвстын: «Господь ӧксыалӧ! Муюгыдыс сулалӧ зумыда, сійӧ оз вӧрзьыв.
Господь кутас веськыда мыждыны войтыръясӧс».
Мед гажӧдчас енэжыс, мед нимкодясяс муыс, мед шызяс саридзыс да став сэні олысьыс, мед нимкодясяс видз-муыс да ставыс, мый сэні эм, мед гажӧдчасны вӧрса пуяс Господь водзын, ӧд Сійӧ локтӧ, локтӧ мыждыны муюгыдсӧ.
Сійӧ кутас веськыда мыждыны муюгыдсӧ, кутас мыждыны войтыръясӧс Аслас збыльыс серти.
{Еврей йӧз (комиӧдіс Kodko) @ 96 псалом @ религ. гижӧд @ Библия @ 2021 @ Лб. .}
96 псалом
[Давид лӧсьӧдіс тайӧ псаломсӧ, кор Израиль му лои сылӧн юраланінӧн.] Господь ӧксыалӧ!
Мед нимкодясяс муыс, мед гажӧдчасны лыдтӧм-тшӧттӧм діяс!
Господьӧс кытшалӧны сьӧд кымӧр да пемыд, Сылӧн юралӧмлӧн подулыс — веськыдлун да веськыда мыждӧм.
Господь водзвылын мунӧ би, Господьӧс мустӧмтысьясӧс бырӧдӧ.
Сылӧн чардбиыс югзьӧдлӧ муюгыдсӧ, муыс аддзӧ тайӧс да сыркмунлӧ.
Господьлӧн чужӧмбан водзын сись моз сылӧны керӧсъяс, ӧд Сійӧ став му пасьтала Ыджыдыс.
Енэжъясыс юӧртӧны Сылысь веськыдлунсӧ, войтыръяс аддзӧны Сылысь дзирдлунсӧ.
Мед яналасны бӧлбанъяслы юрбитысьяс, идолъясӧн ошйысьысьяс.
Копыртчӧй Господь водзӧ, став енъяс.
Сион кылӧ тайӧс да кыпыда гажӧдчӧ, Иуда каръяс нимкодясьӧны Тэнад веськыда мыждӧмыд йылысь, Господьӧй. Тэ — Медвылыссаыс став му пасьталаыс, Господьӧй, став енсьыс Тэ медвылын.
Господьӧс радейтысьяс, мустӧмтӧй лёксӧ!
Сійӧ видзӧ Аслас эскана войтырлысь олӧмсӧ, мездӧ найӧс лёк вӧчысьяслӧн киысь.
Веськыда олысьяслы лоӧ югыд, веськыд сьӧлӧмаяслы — нимкодь.
Нимкодясьӧй Господьӧн, веськыда олысьяс, ошкӧй Сылысь вежа нимсӧ!
{Еврей йӧз (комиӧдіс Kodko) @ 97 псалом @ религ. гижӧд @ Библия @ 2021 @ Лб. .}
97 псалом
[Давидлӧн] псалом.
Сьылӧй Господьлы выль сьыланкыв! Сійӧ вӧчис шензьӧданаторъяс.
Сылӧн веськыд киыс да вежа выныс вайисны Сылы вермӧмсӧ.
Господь петкӧдліс Ассьыс мездӧмсӧ, восьтіс войтыръяслы Ассьыс веськыдлунсӧ.
Сійӧ эз вунӧд [Яковсянь чужысьяс дінӧ] Ассьыс буралӧмсӧ, петкӧдліс Израиль войтырлы Ассьыс эсканлунсӧ.
Став му пасьтала олысьяс аддзисны, мый миян Енным мездіс миянӧс.
Му вылын олысьяс, гораа ошкӧй Господьӧс, сьылӧй-гажӧдчӧй да нимкодясьӧй!
Сьылӧй Господьлы да ворсӧй гуслиӧн, ворсӧй гуслиӧн да сьылӧй.
Труба да буксан шы улӧ ошкӧй Господьӧс, миянлысь Ӧксыӧс.
Мед шызяс саридзыс да ставыс, мый сэні эм, мед шызяс муыс да став сэні олысьыс.
Мед сёльӧдчасны юяс, накӧд ӧтвыв мед нимкодясясны керӧсъяс Господь водзын, ӧд Сійӧ локтӧ мыждыны мусӧ.
Сійӧ кутас веськыда мыждыны муюгыдсӧ, кутас мыждыны войтыръясӧс Аслас веськыдлуныс серти.
{Еврей йӧз (комиӧдіс Kodko) @ 98 псалом @ религ. гижӧд @ Библия @ 2021 @ Лб. .}
98 псалом
[Давидлӧн псалом.] 
Господь ӧксыалӧ! Полӧй-тіралӧй Сыысь, войтыръяс!
Сійӧ пукалӧ херувимъяс вылын. Мед сыркакылас муыс!
Господь ыджыдалӧ Сионын, Сійӧ войтыръяс вылын ыджыдыс.
Господьӧй, мед ошкасны Тэнсьыд ыджыд нимтӧ, Тэнад нимысь мед полӧны ставныс, Тэнад нимыд вежа!
Тэ — вына Ӧксы, Тэ радейтан збыльсӧ, Тэ вынсьӧдін Ассьыд веськыдлунтӧ.
Яковсянь чужысьясӧс Тэ веськыда мыждін, вӧчин налы збыльыд серти.
Ыдждӧдлӧй Господьӧс, миянлысь Енмӧс! Кок улас уськӧдчӧмӧн копыртчӧй Сы водзӧ, ӧд Сійӧ вежа!
Мӧисей и Аарон вӧліны Господьлӧн попъяс, Самуил вӧлі Господь дінӧ шыасьысьяс лыдын. Найӧ шыасьлісны Господь дінӧ, и Сійӧ вочавидзліс налы.
Сійӧ сёрнитіс накӧд кымӧр сюръя пытшсянь.
Найӧ видзисны Сылысь индӧд-тшӧктӧмсӧ.
Господьӧй, миян Енмӧй, Тэ вочавидзин налы, Тэ вӧлін налӧн Енмӧн, прӧститін найӧс, но и мыждін лёк вӧчӧмсьыныс.
Ыдждӧдлӧй Господьӧс, миянлысь Енмӧс! Копыртчӧй Сылӧн вежа керӧслань, ӧд Господь, миян Енным, вежа!
{Еврей йӧз (комиӧдіс Kodko) @ 99 псалом @ религ. гижӧд @ Библия @ 2021 @ Лб. .}
99 псалом
[Давидлӧн] аттьӧалана псалом.
Му вылын олысьяс, гораа нимкодясьӧмӧн ошкӧй Господьӧс!
Кесъялӧй Господьлы нимкодьпырысь, локтӧй Сы водзӧ гажӧдчӧмӧн.
Тӧдӧй, мый Господь эм Ен. Сійӧ вӧчис миянӧс, и ми — Сылӧн, ми — Сылӧн войтырыс, Сылӧн йӧрысь ыжъясыс.
Локтӧй Сылӧн дзиръяяс дорӧ Сійӧс аттьӧалӧмӧн, пырӧй Сылӧн йӧрӧ Сійӧс ошкӧмӧн.
Аттьӧалӧй Господьӧс, ошкӧй Сылысь нимсӧ, ӧд Господь — бур, Сылӧн буралӧмыс оз помасьлы, чужысьяссянь чужысьясӧдз Сійӧ — эскана Ен.
{Еврей йӧз (комиӧдіс Kodko) @ 100 псалом @ религ. гижӧд @ Библия @ 2021 @ Лб. .}
100 псалом
Давидлӧн псалом.
Господьӧй, ме кута сьывны Тэныд ошкӧм, кута сьывны буралӧмыд да веськыдлуныд йылысь. Кор нин Тэ локтан ме дінӧ?
Ме кӧсъя сӧстӧма овны, кута овны сӧстӧм сьӧлӧмӧн аслам керкаын.
Став шогмытӧмсӧ ме ылыста аслам син водзысь, лёк вӧчӧмсӧ ме мустӧмта, сійӧ оз ляксьы ме дінӧ.
Ме вӧтла ас пытшкысь наян мӧвпъяс, лёкыскӧд ме ог ӧтувтчы.
Аслас матысса вылӧ гусьӧн удтысьысьӧс ме вӧтла ас дінысь, вылӧ кыпӧдчысьӧс да ышнясьысьӧс ме ог сибӧд.
Ме бӧръя аслым эскана йӧзӧс, мед найӧ вӧліны мекӧд.
Коді олӧ сӧстӧма, сійӧ кутас кесъявны меным.
Ылӧдчысьяс оз кутны овны менам керкаын, пӧръясьысьяс оз лоны мекӧд орччӧн.
Водз асывсянь ме бырӧда лёк вӧчысьясӧс ас му вылысь, вӧтла Господьлӧн карысь мыж вӧчысьясӧс.
{Еврей йӧз (комиӧдіс Kodko) @ 101 псалом @ религ. гижӧд @ Библия @ 2021 @ Лб. .}
101 псалом
Шогсьысь мортлӧн кевмысьӧм, кор сійӧ ловнас усьӧма да вайӧ ассьыс шогсӧ Господь водзӧ.
Господьӧй, кыв менсьым кевмӧмӧс! Менам гораа бӧрдӧмӧй мед воас Тэнад пельӧдз.
Эн дзеб меысь Ассьыд чужӧмбантӧ, менам шогсигӧн копырт мелань Ассьыд пельтӧ.
Тэ дінӧ ме шыася, тэрмась вочавидзны меным.
Менам олан лунъясӧй тшын моз бырӧны, дойыс би моз сотӧ менсьым лыясӧс.
Менам сьӧлӧмӧй дойысла дзикӧдз топаліс, сійӧ турун моз косьмис. Ме вунӧдла весиг сёйнысӧ, гораа бӧрдӧмӧйла менам сӧмын лы-кучикӧй коли.
Ме лои кушинын олысь пеликан кодь, эновтӧм карын пукалысь сюзь кодь.
Ме ог вермы узьнысӧ, лои керка вевт вылын пукалысь ӧтка лэбач кодь.
Мустӧмтысьяс быд лун лёкӧдӧны менӧ, менам нимӧй лои налы ёран кывйӧн.
Ме нянь моз сёя пӧимсӧ, синваӧй лои меным юанторйӧн, ӧд Аслад скӧралӧмыд да лӧгалӧмыд вӧсна Тэ лэптін менӧ да шыбитін Ас дінсьыд.
Менам олан лунъясӧй вуджӧр моз бырӧны, ме турун моз косьми.
Но Тэ, Господьӧй, олан нэмъяс чӧж, чужысьяссянь чужысьясӧдз оз вунӧдлыны Тэнӧ.
Тэ кыпӧдчан, Тэ петкӧдлан буралӧмтӧ Сион дінӧ. Воис кад прӧститны сійӧс, воис сылӧн кадыс.
Тэнад кесйӧгъяслы мусаӧсь Сион карлӧн изъясыс, весиг бусыс налы дона.
Войтыръяс пондасны повны Господьлӧн нимысь, мувывса ӧксыяс — Сылӧн дзирдлунысь, ӧд Господь выльысь сувтӧдас Сион, петкӧдчас Аслас дзирдлунӧн.
Господь кылас коньӧръяслысь кевмӧмсӧ, оз ӧтдорт налысь кевмысьӧмсӧ.
Та йылысь лоӧ гижӧма водзӧ чужысьяслы, водзӧ олысьяс кутасны ошкыны Господьӧс. Господь видзӧдӧ вылісянь, Аслас вежаинсянь, видзӧдӧ му вылӧ енэжсяньыс. Сійӧ кылӧ дзескыдінын пукалысьяслысь ымзӧмсӧ, мездӧ кулӧм вылӧ мыждӧмаясӧс. Кор войтыръяс чукӧртчасны, локтасны кесъявны Господьлы, Сылысь нимсӧ кутасны юӧртны Сионын, Сійӧс кутасны ошкыны Ерусалимын.
Кадысь водз Сійӧ лэдзис меным вынтӧммыны, дженьдӧдіс менсьым олан лунъясӧс.
Ме шуи: «Енмӧй, эн босьт менсьым олӧмӧс, ӧд ме том на.
Тэ олан нэмъяс чӧж.
[Господьӧй!] Медводз Тэ вӧчин мусӧ, енэжыс тшӧтш Тэнад вӧчӧмтор.
Найӧ бырасны, а Тэ помтӧг олан.
Паськӧм моз найӧ важмасны, новлӧм кӧлуйӧс моз Тэ вежан найӧс, и найӧ вежсясны.
А Тэ он вежсьы, Тэнад олан вояслы помыс оз ло.
Тэнад кесйӧгъяслӧн челядьыс кутасны дыр овны, насянь чужысьяс пыр лоӧны Тэнад син водзын».
{Еврей йӧз (комиӧдіс Kodko) @ 102 псалом @ религ. гижӧд @ Библия @ 2021 @ Лб. .}
102 псалом
Давидлӧн псалом.
Ошкы Господьӧс, менам лолӧй! Став пытшкӧсӧй, ошкы Сылысь вежа нимсӧ!
Ошкы Господьӧс, менам лолӧй, эн вунӧд Сылысь став бур вӧчӧмсӧ!
Сійӧ прӧститӧ тэнсьыд став мыжтӧ, бурдӧдӧ тэнӧ став висьӧмысь.
Мездӧ тэнӧ кулӧмыслӧн кабыр улысь, кытшалӧ тэнӧ буралӧмнас да мелілуннас.
Пӧткӧдӧ тэнсьыд олӧмтӧ бурнас, тэнад томлуныд кутш моз выльмӧ.
Господь веськыда вӧчӧ, Сійӧ дорйӧ дзескӧдӧмаясӧс.
Сійӧ петкӧдліс Ассьыс туйяссӧ Мӧисейлы, Ассьыс уджъяссӧ — Израиль войтырлы.
Господь мелі да бур сьӧлӧма, Сійӧ дыр терпитӧ да ёна буралӧ.
Оз век Сійӧ скӧрав, оз лӧгав нэмъяс чӧж, оз мынтысь миянлы мыжъясным серти, оз мыжды миянӧс лёк вӧчӧмным серти.
Кутшӧм ыджыд коластыс енэжа-муа костас, сэтшӧм ыджыд Господьлӧн буралӧмыс Сыысь полысьяс дінӧ.
Кутшӧм ылын асыввылыс рытыввывсянь, сы ылна ылыстіс Господь миянлысь мыжъяснымӧс.
Кыдзи батьыс буралӧ ныв-пиыс дінӧ, сідзи Господь буралӧ Сыысь полысьяс дінӧ.
Сійӧ тӧдӧ, мыйысь вӧчӧма миянӧс, Сійӧ оз вунӧд, мый ми — сӧмын бус чиръяс.
Мортлӧн олӧмыс — турун кодь, сійӧ дзоридзалӧ видзвывса дзоридз моз.
Тӧв пӧльыштас, и сійӧ абу, некод оз нин казьтыв сы йылысь.
Но Господьлӧн буралӧмыс помасьлытӧм Сыысь полысьяс дінӧ, Сійӧ веськыда вӧчӧ ныв-пиныдлӧн ныв-пиыслы, кодъяс видзӧны Сылысь йитӧдсӧ, оз вунӧдны Сылысь тшӧктӧмъяссӧ, а олӧны на серти.
Господь сувтӧдіс Ассьыс юралан пуклӧссӧ енэжас, ставыс Сылӧн кипод улын.
Ошкӧй Господьӧс, вына анделъяс, Сылӧн кыв серти вӧчысьяс, Сылысь висьталӧмсӧ кывзысьяс!
Ошкӧй Господьӧс, Сылӧн тышкакотыръяс, Сылӧн кесъялысьяс — Сылӧн кӧсйӧм серти олысьяс!
Ошкӧй Господьӧс, Сылӧн вӧчӧмторъяс! Ошкӧй Сійӧс быдлаын, кӧні Сійӧ юралӧ!
Ошкы Господьӧс, менам лолӧй!
{Еврей йӧз (комиӧдіс Kodko) @ 103 псалом @ религ. гижӧд @ Библия @ 2021 @ Лб. .}
103 псалом
[Му вӧчӧм йылысь Давидлӧн псалом.] 
Ошкы Господьӧс, менам лолӧй!
Господьӧй, менам Енмӧй, Тэ шензьӧдана ыджыд! Тэ вевттьысьӧмыд дзирдлунӧн да ыджыдалан вынӧн.
Тэ пасьтасьӧмыд югыднас, вонйӧс моз Тэ шевкнитӧмыд енэжъяс, ваяс весьтын лӧсьӧдӧмыд Аслыд вылысса жыръяс. Кымӧръяссӧ Тэ вӧчан Аслад тарантасӧн, Тэ шевкъялан тӧв бордъяс вылын.
Тӧвнырысь Тэ вӧчан Аслыд юӧр вайысьясӧс, ыпъялан биысь — Аслыд кесъялысьясӧс.
Тэ сувтӧдін мусӧ зумыд подув вылӧ, сійӧ некор оз вӧрзьыв.
Эшкынӧн моз Тэ вевттин сійӧс пыдӧстӧм ваӧн, весиг керӧсъясӧс вевттис ва.
Но Тэнад ӧлӧдӧмысь ваяс пышйисны, Тэнад гым шыысь найӧ ӧдйӧ ылыстчисны.
Керӧс вывсянь найӧ визувтӧны ласта вылӧ, сэтчӧ, кытчӧ Тэ тшӧктін.
Тэ потшӧсалін ваяс, медым найӧ бара эз вевттьыны мусӧ.
Ва визувтанінъяс Тэ восьтін ковтысъясын, ваыс визувтӧ керӧсъяс костӧд. Сэтысь юӧны вӧрса пемӧсъяс, сэтысь веськӧдӧны горшнысӧ вӧлявывса осёлъяс.
Ва дорӧ поздысьӧны лэбачьяс, дзользьӧны-сьылӧны пу вожъяс вылын.
Аслад выліинсянь Тэ зэрӧн юктӧдан керӧсъяс, Тэнад сетӧмторъясӧн пӧткӧдчӧ муыс.
Ыж-мӧслы Тэ быдтан турун, мортлы — быдмӧг, тадзи муыс сетӧ налы сёян. Тэ сетан вина, медым гажӧдны мортлысь сьӧлӧмсӧ, нянь, медым ёнмӧдны мортӧс, вый, медым югъяліс мортлӧн чужӧмыс.
Тэ пӧткӧдан ливанса сус пуяс, Господьлӧн пуяс пыр вежӧсь.
Налӧн вожъяс вылӧ поздысьӧны лэбачьяс, сэтчӧ поздысьӧны аистъяс. Джуджыд керӧс вылӧ овмӧдчӧны кӧзаяс, изкыртаӧ овмӧдчӧны даманъяс.
Тэ вӧчин тӧлысь, медым петкӧдлыны кадсӧ. Шонді тӧдӧ ассьыс лэччан кадсӧ.
Тэ мӧдӧдан пемыдсӧ, пуксьӧ вой, и зверъяс петӧны кынӧмпӧт корсьны.
Левъяс равзӧны, корсьӧны аслыныс кыйдӧс, корӧны Енмыслысь сёян.
Шонді петігӧн найӧ дзебсьӧны, бӧр бергӧдчӧны асланыс шойччанінӧ.
Сэки морт петӧ уджавны, рытӧдзыс вӧчӧ ассьыс уджсӧ.
Господьӧй, Тэнад уджъясыд лыдтӧм-тшӧттӧмӧсь, Тэ ставсӧ вӧчӧмыд бур мывкыдӧн!
Муыс тыр Тэнад вӧчӧмторъясӧн.
Со помтӧм-дортӧм саридз! Сэні олысьсӧ он вермы лыддьыны, сэні олӧны гырысь и посни уялысьяс.
Сэті кывтӧны корабльяс, сэні ворсӧдчӧ левиафан — Тэнад вӧчӧмторйыд.
Тэнад вӧчӧмторъясыд виччысьӧны, медым Тэ ас кадӧ сетін налы сёян.
Тэ сетан налы, и найӧ босьтӧны, Аслад киӧн Тэ вердан найӧс, и найӧ пӧттӧдзныс сёйӧны.
Тэ тупкан наысь Ассьыд чужӧмбантӧ, и найӧ шызьӧны, босьтан налысь ловсӧ, и найӧ кулӧны, бӧр бергӧдчӧны муӧ.
Тэ мӧдӧдан Ассьыд ловтӧ, и найӧ ловзьӧны, Тэ выльмӧдан муыслысь чужӧмбансӧ.
Господьӧс мед нимӧдасны нэмъяс чӧж!
Мед нимкодясяс Господь Аслас уджъяснас!
Сылӧн видзӧдлӧмысь муыс дзӧрӧ, Сылӧн инмӧдчылӧмысь керӧсъяс тшыналӧны.
Кута сьывны Господьлы став олӧм чӧж, кута ошкыны ассьым Енмӧс, кытчӧдз ловъя.
Менам сьылӧмӧй мед лоӧ шогмана Господьлы, ме кута нимкодясьны Господь пытшкын.
Мед бырасны му вывсьыс мыж вӧчысьяс, лёк вӧчысьяс мед водзӧ оз нин лоны!
Ошкы Господьӧс, менам лолӧй!
Аллилуйя!
{Еврей йӧз (комиӧдіс Kodko) @ 104 псалом @ религ. гижӧд @ Библия @ 2021 @ Лб. .}
104 псалом
Ошкӧй Господьӧс, шыасьӧй Сы дінӧ, войтыръяс пӧвстын висьтавлӧй Сылӧн уджъясыс йылысь!
Сьылӧй Сылы, ошкӧй Сійӧс, висьтавлӧй Сылӧн шензьӧдана уджъясыс йылысь!
Ошйысьӧй Сылӧн вежа нимнас!
Господьӧс корсьысьлӧн мед нимкодясяс сьӧлӧмыс!
Корсьӧй Господьӧс да Сылысь вынсӧ, дугдывтӧг корсьӧй Сылысь чужӧмбансӧ.
Ті, Ӧвраамсянь чужысьяс, Господьлӧн кесйӧгъяс, Яковлӧн пиян, Господьлӧн бӧрйӧмаяс, энӧ вунӧдӧй Сылысь шензьӧданаторъяссӧ, индысьпасъяссӧ да веськыда мыждӧмсӧ.
Сійӧ — Господь, миян Енным, Сійӧ веськыда мыждӧ став му пасьтала.
Сійӧ некор оз вунӧд Ассьыс йитӧдсӧ, водзӧ чужысьяслы пыр кежлӧ сетӧм кывсӧ. Сійӧ оз вунӧд Ӧвраамкӧд кӧрталӧм йитӧдсӧ, Исааклы сетӧм кывсӧ. Яковлы Сійӧ вынсьӧдіс Ассьыс кывсӧ, Израилькӧд йитӧдсӧ кӧрталіс пыр кежлӧ. Сійӧ шуис: «Ме сета тэныд Ханаан му, вичмӧда сійӧс тэныд».
Сэки Израиль войтырлӧн лыдыс вӧлі этша на, Ханаан муын найӧ вӧліны локтысь йӧзӧн. Ӧти войтырсянь найӧ вуджлісны мӧд войтыр дінӧ, ӧти муысь — мӧд муӧ. Господь некодлы эз лэдз дзескӧдны найӧс, Сійӧ ӧлӧдліс ӧксыясӧс:
«Энӧ вӧрӧдӧй Менсьым мавтыштӧмаясӧс, Менам пророкъяслы энӧ вӧчӧй лёксӧ».
Господь мӧдӧдіс му вылӧ тшыг кад, бырӧдіс став кӧдзӧм няньсӧ, та водзвылын мӧдӧдіс Ӧсипӧс Египет муӧ, сійӧс вӧлі вузалӧма сэтчӧ кесйӧг пыдди.
Сылысь коксӧ вӧлі дорӧма чептӧн, сылӧн сьыліас ӧшаліс кӧрт кольча, кытчӧдз эз ин Господьлӧн кывйыс, кытчӧдз Господь Аслас кывйӧн эз тӧдмав Ӧсипӧс.
Египетса ӧксы мездіс сійӧс дорӧмысь, войтыръяслӧн юралысь лэдзис сійӧс дзескыдінысь.
Ӧксы пуктіс сійӧс ыджыдавны аслас керка вылын, кывкутны аслас овмӧс вӧсна, индіс туйдӧдны юралысьясӧс, велӧдны мывкыдлунӧ юрнуӧдысьясӧс.
Тадзи Израиль локтіс Египетӧ, Яков овмӧдчис Хамлӧн муӧ.
Сэні Господь рӧдмӧдіс Ассьыс войтырсӧ, вӧчис вӧрӧг дорысь вынаджыкӧн.
Египетсаясӧс Сійӧ ышӧдіс мустӧмтны Ассьыс войтырсӧ, нартитны Ассьыс кесйӧгъяссӧ.
Сэки Господь мӧдӧдіс Мӧисейӧс, Ассьыс кесйӧгсӧ, да Ааронӧс, Ассьыс бӧрйӧмасӧ.
Найӧ петкӧдлісны индысьпасъяс египетсаяс пӧвстын, шензьӧданаторъяс Хамлӧн муын.
Господь мӧдӧдіс пемыдсӧ, пуксис сап пемыд, и египетсаяс эз вермыны паныд кыпӧдчыны Сылы.
Налысь васӧ Господь пӧртіс вирӧ, бырӧдіс налысь став черисӧ.
Налӧн муыс тырис жабаясӧн, найӧ локтісны весиг ӧксылӧн вежӧсъясӧ.
Господь шуис, и лӧдз-гут вевттис енэжсӧ, гебъяс кутісны лэбавны став му пасьталаыс.
Зэр пыдди Сійӧ мӧдӧдіс налы шер, ыпъялысь би мӧдӧдіс налӧн му вылӧ. Сійӧ жугліс налысь виноград да инжир пуяссӧ, чегъяліс налӧн му вылысь мукӧд пуяссӧ.
Сійӧ шуис, и саранча уськӧдчис лыдтӧм-тшӧттӧм чукӧрӧн, сёйис видз вылысь став турунсӧ, куштіс видз-му вылысь став быдмӧг-вотӧссӧ.
Господь бырӧдіс Египетысь став медводдза чужысьсӧ, виис египетсаяслысь медводдза пиянсӧ.
Сійӧ петкӧдіс Египетысь Израиль войтырӧс, найӧ петісны эзысь-зарниӧн, налӧн чужанкотыръясын эз вӧв вынтӧмыс.
Египетсаяс нимкодясисны налӧн петӧмысь, ӧд ёна полісны наысь.
Израиль войтырӧс Господь вевттис кымӧрӧн, мӧдӧдіс налы би, медым войнас югзьӧдны налы.
Найӧ корисны сёян, и Господь мӧдӧдіс налы квайтпалич пӧткаясӧс, вердіс найӧс енэжвывса няньӧн.
Сійӧ поткӧдіс изкырта, и ваыс ыльӧбтіс сэтысь, шорӧн визувтіс косінті. Сійӧ эз вунӧд Ассьыс вежа кывсӧ, Ӧвраам кесйӧгыслы кӧсйысьӧмсӧ. Сійӧ петкӧдіс Ассьыс войтырсӧ, и найӧ нимкодясисны, петкӧдіс бӧрйӧмаясӧс, и найӧ гажӧдчисны. Сійӧ сетіс налы войтыръяслысь муяссӧ, вичмӧдіс видз-муяссӧ, медым найӧ видзисны Сылысь тшӧктӧмъяссӧ, олісны Сылӧн Индӧд серти.
Аллилуйя!
{Еврей йӧз (комиӧдіс Kodko) @ 105 псалом @ религ. гижӧд @ Библия @ 2021 @ Лб. .}
105 псалом
Аллилуйя!
Ошкӧй Господьӧс, ӧд Сійӧ бур, Сылӧн буралӧмыс оз помасьлы.
Коді вермас тырвыйӧ ошкыны Господьӧс, висьтавны Сылӧн став вына уджъясыс йылысь?
Шудаӧсь найӧ, кодъяс олӧны веськыдлун серти, веськыда вӧчӧны быд кадӧ.
Господьӧй, Аслад войтырыд дінӧ буралігӧн эн вунӧд ме йылысь, лок ме дінӧ, мезды менӧ, медым ме босьті бур олӧмсӧ Тэнад бӧрйӧмаяскӧд, верми нимкодясьны Тэнад войтырыдкӧд, Тэнад бӧрйӧмаяскӧд ошкыны Тэнӧ.
Асланым батьяс моз ми мыж вӧчим, кежим веськыдлунсьыс да вӧчим лёксӧ.
Египетын оліганыс миян батьяс эз гӧгӧрвоны Тэнсьыд шензьӧданаторъястӧ, найӧ вунӧдісны Тэнсьыд ыджыд буралӧмтӧ, Гӧрд саридз дорын кыпӧдчисны Тэныд паныд.
Но Аслас нимыс вӧсна Господь мездіс найӧс, петкӧдліс Ассьыс ыджыд вынсӧ.
Господь тшӧктіс Гӧрд саридзлы, и сійӧ косьмис.
Сэки Господь нуӧдіс найӧс саридз пыдӧсӧд косінті моз.
Сійӧ мездіс найӧс мустӧмтысьяслӧн киысь, дорйис вӧтчысьясысь.
Ваыс вевттис дзескӧдысьясӧс, весиг ӧти на пиысь ловйӧн эз коль.
Сэки миян батьяс эскисны Господьлӧн кывъясӧ, сьылӧмӧн ошкисны Сійӧс.
Но найӧ ӧдйӧ вунӧдісны Сылысь уджъяссӧ, эз виччысьны Сылысь туйдӧдӧмсӧ.
Овтӧминын найӧ пӧтлытӧг горшасисны, дӧзмӧдісны сэні Енсӧ.
Енмыс сетіс налы корӧм сертиныс, но мӧдӧдіс сьӧкыд висьӧм.
Асланыс чомъясын найӧ пондісны вежавны Мӧисейлы да Ааронлы, Господьлӧн вежа мортлы.
Сэки муыс воссис да ньылыштіс Датанӧс, тшӧтш Авирамӧс да сыкӧд ӧтувтчысьясӧс.
Йӧз чукӧрас ыпнитіс би да сотіс лёк вӧчысьясӧс.
Хорив керӧс дорын миян батьяс вӧчисны ӧшкӧс, копыртчисны бӧлбанлы.
Ассьыныс дзирдлуна Енсӧ найӧ вежисны бӧлбан вылӧ, турун сёйысь ӧш вылӧ.
Найӧ вунӧдісны Енсӧ, ассьыныс Мездысьӧс, коді Египетын вӧчис ыджыд уджъяс, Хамлӧн муын — шензьӧданаторъяс, Гӧрд саридз дорын — повзьӧданаторъяс.
Енмыс шуис бырӧдны найӧс, но Мӧисей, Сылӧн бӧрйӧмаыс, сувтіс Сы водзӧ, медым Сійӧ Аслас скӧрлунӧн эз бырӧд найӧс.
Найӧ нинӧмӧ пуктісны бур мусӧ, эз эскыны Господьлӧн кывйӧ, ропкисны асланыс чомъясын, эз кывзыны Господьӧс.
Сэки Господь лэптіс Ассьыс кисӧ, медым бырӧдны найӧс овтӧминын, разӧдны насянь чужысьясӧс войтыръяс пӧвстӧ, шердйыны найӧс став му пасьталаыс.
Сьӧлӧмнаныс найӧ сирасисны Ваал-Пеор ен дінӧ, сёйисны идолъяслы вайӧм висьяс. Асланыс уджъясӧн найӧ дӧзмӧдісны Господьӧс, та вӧсна найӧс суис бырӧдӧм.
Сэки чеччис Пинес, мыждіс мыжаясӧс, и бырӧдӧмыс лӧнис.
Та понда сійӧс лыддьӧны веськыда олысьӧн чужысьяссянь чужысьясӧдз нэмъяс чӧж.
Мерива ва дорын найӧ бара дӧзмӧдісны Господьӧс, и Мӧисейлы ковмис сьӧкыдавны на вӧсна. Найӧ скӧрмӧдісны Мӧисейӧс, и сійӧ мыжмис аслас кывъясыс вӧсна.
Найӧ эз бырӧдны сійӧ войтыръяссӧ, кодъяс йылысь Господь висьтавліс налы, но ӧтувтчисны накӧд, вӧчисны на моз жӧ, юрбитісны налӧн идолъяслы да шедісны налӧн налькйӧ.
Ныв-пинысӧ найӧ вайлісны вись пыдди пеж ловъяслы, кисьтісны мыжтӧм ныв-пиныслысь вирсӧ, вайлісны найӧс вись пыдди ханаансаяслӧн идолъяслы, вир кисьтӧмнас пежалісны мусӧ.
Уджъяснас найӧ пежалісны асьнысӧ, кырсалысь ань моз сетчисны идолъяслы.
Господьлӧн скӧрлуныс ыпнитіс Аслас войтыр вылӧ, Сійӧ зывӧктіс Ассьыс бӧрйӧмаяссӧ. Сійӧ сетіс найӧс войтыръяслӧн киӧ, мустӧмтысьяс ыджыдалісны на вылын.
Найӧ шедісны вӧрӧглӧн кипод улӧ, мустӧмтысьяс дзескӧдісны найӧс.
Господь унаысь мездыліс найӧс, но найӧ кыпӧдчисны Сылы паныд, асныралӧмнас вӧйисны мыжас.
Но Господь аддзис налысь шогсӧ, кывзіс налысь бӧрдӧмӧн шыасьӧмсӧ. Сійӧ эз вунӧд накӧд кӧрталӧм йитӧдсӧ, ыджыд буралӧмыс кузя Сійӧ бурсьӧлӧмтчис на дінӧ, найӧс пленӧ нуӧдысьяслысь сьӧлӧмсӧ небзьӧдліс.
Господьӧй, миян Енмӧй, мезды миянӧс, чукӧрт миянӧс войтыръяс пӧвстысь. Сэки ми ошкам Тэнсьыд вежа нимтӧ, кутам ошйысьны Тэнад дзирдлунӧн.
Ошкӧм Господьлы, Израильлӧн Енлы, нэмъяс чӧж!
Став войтырыс мед шуас: «Аминь!
Аллилуйя!»
{Еврей йӧз (комиӧдіс Kodko) @ 106 псалом @ религ. гижӧд @ Библия @ 2021 @ Лб. .}
106 псалом
[Аллилуйя!] 
Ошкӧй Господьӧс, ӧд Сійӧ бур, Сылӧн буралӧмыс оз помасьлы!
Тадзи мед шуасны мездмӧмаяс, кодъясӧс Господь мездіс дзескӧдысьлӧн кипод улысь, чукӧртіс быд му пельӧсысь: асыввылысь и рытыввылысь, войвылысь и саридз дорысь.
Найӧ шӧйтісны-ветлісны овтӧминӧд, корсисны кушинысь кар, медым овмӧдчыны, но эз аддзыны.
Найӧ пыкисны тшыглун да горш косьмӧм, найӧ дзикӧдз нюкыртчисны.
Но сьӧкыдаліганыс найӧ шыасисны Господь дінӧ, и Сійӧ мездіс найӧс шогысь. Сійӧ нуӧдіс найӧс веськыд туйӧд, вайӧдіс карӧ, кытчӧ найӧ вермисны овмӧдчыны.
Ошкӧй Господьӧс Сылӧн буралӧмысь да шензьӧдана уджъясысь, мый Сійӧ вӧчӧ йӧзыслы!
Ӧд Сійӧ ловзьӧдӧ нюкыртчӧмаясӧс, Аслас бурнас пӧткӧдӧ тшыгъялысьясӧс.
Найӧ олісны пемыдас, сап пемыдас, вӧлі тырӧмаӧсь шогӧн, найӧс вӧлі дорӧма кӧртӧн, ӧд пыксисны Енлӧн кывъяслы, нинӧмӧ пуктісны Медвылыссалысь туйдӧдӧмсӧ.
Господь раммӧдліс налысь сьӧлӧмсӧ сьӧкыд уджӧн.
Найӧ усисны кок йывсьыныс, и отсалысьыс эз вӧв.
Но сьӧкыдаліганыс найӧ шыасисны Господь дінӧ, и Сійӧ мездіс найӧс шогысь.
Сійӧ петкӧдіс найӧс пемыдсьыс, сап пемыдсьыс, жугліс налысь чепъяссӧ.
Ошкӧй Господьӧс Сылӧн буралӧмысь да шензьӧдана уджъясысь, мый Сійӧ вӧчӧ йӧзыслы!
Сійӧ кисьтіс ыргӧн дзиръяяс, жугліс кӧрт иганъяс.
Мывкыдтӧмъяс сьӧкыдалісны кывзысьтӧм оласног да мыж вӧснаныс.
Найӧ зывӧктісны сёяннысӧ, воисны куланвыйӧдз.
Но сьӧкыдаліганыс найӧ шыасисны Господь дінӧ, и Сійӧ мездіс найӧс шогысь.
Сійӧ мӧдӧдіс Ассьыс кывсӧ да бурдӧдіс найӧс, видзис найӧс гуӧ веськалӧмысь.
Ошкӧй Господьӧс Сылӧн буралӧмысь да шензьӧдана уджъясысь, мый Сійӧ вӧчӧ йӧзыслы!
Вайӧй Сылы аттьӧалана вись, нимкодясьӧмӧн юӧртӧй Сылӧн уджъясыс йылысь!
Кодсюрӧ кывтісны корабльяс вылын саридзӧд, сэні перйисны аслыныс кынӧмпӧт. Найӧ аддзисны Господьлысь уджъяссӧ, пыдӧстӧм ваысь Сылысь шензьӧданаторъяссӧ.
Господь тшӧктіс, и кыптіс ыджыд тӧвныр, саридзын быгзисны гыясыс.
Корабльын кывтысьяс кыптылісны енэжӧдзыс, усьлісны саридз пыдӧсӧдзыс, полӧмнысла налӧн сьӧлӧмныс лэччывліс коклябӧрӧдзыс.
Найӧс шатлӧдліс код мортӧс моз, найӧ ӧдва сулалісны кок йыланыс, налӧн став кужӧмлуныс бырис-вошис.
Но сьӧкыдаліганыс найӧ шыасисны Господь дінӧ, и Сійӧ мездіс найӧс шогысь.
Сійӧ лӧньӧдіс тӧвнырсӧ, и гыясыс ланьтісны.
Кывтысьяс нимкодясисны, мый саридзыс лӧнис. Господь вайӧдіс найӧс сэтчӧ, кытчӧ налы колӧ вӧлі кывтнысӧ.
Ошкӧй Господьӧс Сылӧн буралӧмысь да шензьӧдана уджъясысь, мый Сійӧ вӧчӧ йӧзыслы!
Ен войтырлӧн чукӧртчӧмын ыдждӧдлӧй Сійӧс, юрнуӧдысьяс пӧвстын ошкӧй Сійӧс!
Юясысь Сійӧ вӧчӧ овтӧмин, ва петанінъясысь — косін, бур муысь — сола му сэтчӧс олысьяслӧн лёк оласногныс вӧсна.
Кушинысь Сійӧ артмӧдӧ ты, кос муысь — ва петанінъяс, овмӧдӧ сэтчӧ тшыгъялысьясӧс. Найӧ лэптӧны сэні аслыныс кар, кӧдзӧны муяс, пуктӧны виноград пуяс, и пуясыс вайӧны уна вотӧс.
Господь бурсиӧ найӧс, и налӧн лыдыс содӧ, налӧн ыж-мӧскыс оз чин.
Но дзескӧдысь вӧсна налӧн лыдыс чинӧ, найӧ сьӧкыдалӧны да шогсьӧны.
Сэки Господь чорыда янӧдӧ налысь юрнуӧдысьяссӧ, эновтӧ найӧс шӧйтны-ветлыны овтӧминӧд.
А гӧльясӧс Сійӧ мездӧ шогысь, насянь чужысьясӧс рӧдмӧдӧ ыж чукӧрӧс моз.
Тайӧс аддзигӧн веськыда олысьяс нимкодясьӧны, а лёк вӧчысьяс тупкӧны вомнысӧ.
Мывкыд морт казялӧ тайӧс, гӧгӧрвоӧ Господьлысь буралӧмсӧ.
{Еврей йӧз (комиӧдіс Kodko) @ 107 псалом @ религ. гижӧд @ Библия @ 2021 @ Лб. .}
107 псалом
Сьыланкыв.
Давидлӧн псалом.
Енмӧй, менам сьӧлӧмӧй дась нин, кута сьывны да ошкыны Тэнӧ.
Садьмӧй, арфа да гусли!
Ме садьмӧда асъя кыасӧ.
Господьӧй, ме ошка Тэнӧ войтыръяс пӧвстын, сьыла Тэныд чужанкотыръяс пӧвстын, ӧд Тэнад буралӧмыд енэжъясысь вылынджык, Тэнад збыльыд кымӧръясысь вылынджык.
Енмӧй, Тэнӧ нимӧдӧмыс мед кыптас енэжъясысь на вылӧджык, Тэнад дзирдлуныд мед паськалас став му пасьтала! Мезды Ассьыд мусаястӧ, дорйы найӧс Аслад веськыд кинад, вочавидз меным!
Енмыс шуис Аслас вежаинсянь: «Нимкодьпырысь Ме юкла тіянлы Сикем му, муртала тіянлы Суккот ковтыс.
Галаад му — Менам, Манассей чужанкотырлӧн му — Менам, Ефрем му — Менам юртупкӧдӧй, Иуда му — Менам юралан беддьӧй, Моав му — Менам мыссян дозйӧй, Эдом муӧ Ме шыбита Ассьым кӧмкотӧс, Филистим муӧс вермӧм йылысь кута гораа горзыны».
Коді пыртас менӧ изкарӧ, коді вайӧдас менӧ Эдом муӧдз?
Он-ӧ Тэ, Енмӧй? Но Тэ, Енмӧй, эновтін миянӧс, миян тышкайӧзкӧд ӧтвыв эн пет тышӧ.
Отсав миянлы, ӧд миянӧс дзескӧдӧны, а йӧзсянь отсӧгсӧ виччысьны весьшӧрӧ.
Енмыскӧд ми вӧчам ыджыд уджъяс, миянӧс дзескӧдысьясӧс Сійӧ талялас.
{Еврей йӧз (комиӧдіс Kodko) @ 108 псалом @ религ. гижӧд @ Библия @ 2021 @ Лб. .}
108 псалом
Давидлӧн псалом.
Енмӧй, ме ошка Тэнӧ, кора Тэнӧ, эн чӧв ов! Ӧд ылӧдчысьяс меным паныд вомнысӧ паськӧдісны, лёк вӧчысьяс меным ылӧгсӧ висьталӧны.
Быд боксянь резӧны менӧ мустӧм кывъясӧн, помкатӧг усьласьӧны ме вылӧ.
Найӧ мыжалӧны менӧ, а ме радейта найӧс да кевмыся.
Бур вӧчӧмысь найӧ мынтысьӧны меным лёкӧн, менам муслунысь — мустӧмтӧмӧн.
Енмӧй, менӧ мустӧмтысь вылӧ сувтӧд лёк мортӧс, сӧтана мед лоӧ сылӧн веськыдладорын.
Сійӧс мед мыждасны ёрд водзын, сылысь кевмысьӧмсӧ мед лыддясны мыж вӧчӧмӧн.
Сылӧн олан лунъясыс мед дженьдасны, сылысь кесъялӧмсӧ мед босьтас мӧд.
Сылӧн челядьыс мед колясны батьтӧг, сылӧн гӧтырыс мед лоӧ дӧваӧн.
Сылӧн челядьыс мед лоасны корысь-шӧйтысьясӧн, найӧ мед оласны киссьӧм керкаын да корасны няньтор.
Водзӧсалысь мед бӧр босьтас сылысь ставсӧ, йӧз муысь локтысь мед мырддяс сылысь эмбурсӧ.
Мед некод оз ло бур сьӧлӧма сы дінӧ, сылысь батьтӧм челядьсӧ мед некод оз жалит.
Сысянь чужысьясӧс мед лоӧ бырӧдӧма, сылӧн пияныс мед кольӧны питӧг.
Господь мед оз вунӧд сылӧн батьяслысь лёк вӧчӧмсӧ, мед оз вунӧд сылӧн мамыслысь мыжсӧ, налӧн мыжъясыс мед пыр лоасны Господьлӧн син водзын, но асьнысӧ найӧс мед пыр кежлӧ лоӧ вунӧдӧма. Менӧ мустӧмтысь эз вӧв бур сьӧлӧма, а дзескӧдіс гӧльӧс да коньӧрӧс, ловнас усьӧмаӧс водзӧ уськӧдіс.
Сійӧ радейтіс ёрны, та вӧсна ёрӧмыс бӧр воас сы вылӧ.
Сійӧ эз кӧсйы бурсины, та вӧсна бурсиӧмыс ылыстчас сы дінысь.
Ёрӧм мед вевттяс сійӧс паськӧм моз, ва моз мед визувтас сы пытшкӧ, вый моз мед йиджас сылӧн лыясӧдз.
Ёрӧмыс сылы мед лоас паськӧмӧн, сылӧн коскас — вӧньӧн.
Тадзи Господь мед мынтысяс менӧ мустӧмтысьлы, ме йылысь лёксӧ висьталысьлы.
Но Тэ, Господьӧй Ыджыдӧй, Аслад нимыд вӧсна дорйы менӧ, мезды менӧ, ӧд Тэнад буралӧмыд вывті ыджыд.
Ме гӧль да коньӧр, менам сьӧлӧмӧй доймалӧма.
Ме вуджӧр моз быра, саранчаӧс моз менӧ пыркнитӧны.
Видзалӧмысь менам пидзӧсӧй жебмис, ме дзикӧдз омӧльтчи.
Мустӧмтысьяс лэптӧны менӧ серамвыв, менӧ аддзигӧн довкйӧдлӧны юрнаныс.
Господьӧй Енмӧй, отсав меным, Аслад буралӧмыд кузя мезды менӧ.
Мед найӧ аддзасны, мый Тэнад киыд мездіс менӧ, мый Тэ, Господьӧй, вӧчин тайӧс.
Найӧ ёрӧны, но Тэ бурси менӧ.
Найӧ кыпӧдчӧны меным паныд, но найӧс лоӧ янӧдӧма.
А ме, Тэнад кесйӧгыд, кута нимкодясьны.
Лёкӧдӧмыс мед лоас налы паськӧмӧн, янӧдӧмнас — вевттьӧдӧн.
Аслам вомӧн ме аттьӧала Господьӧс, ошка Сійӧс уна йӧз водзын. Ӧд Сійӧ сулалӧ коньӧрлӧн веськыдладорын, мездӧ сійӧс мыждысьясысь.
{Еврей йӧз (комиӧдіс Kodko) @ 109 псалом @ религ. гижӧд @ Библия @ 2021 @ Лб. .}
109 псалом
Давидлӧн псалом.
Господь шуис менам Ыджыдлы: «Пукав Менам веськыдладорын, кытчӧдз ог пукты Тэнад кок улӧ Тэнӧ мустӧмтысьясӧс».
Господь мӧдӧдас Тэныд юралан бедьсӧ Сионсянь, медым Тэ ыджыдалін вӧрӧгыд вылын.
Тышӧ петан лунӧ Тэнад вежа войтырыд сувтас вынаӧн.
Тэ чужин, кыдзи лысваыс усьӧ кыа петтӧдз на.
Господь кыв сетіс да оз веж сійӧс. Сійӧ шуис: «Мелкиседек моз Тэ пыр кежлӧ Аркирей».
Господь сулалӧ Тэнад веськыдладорын.
Аслас скӧралан лунӧ Сійӧ пасьвартас ӧксыясӧс, мыждас войтыръясӧс, тыртас мусӧ шойясӧн, разӧдас налысь юръяссӧ став му пасьтала.
Аслас туйӧд мунігӧн ӧксы пондас юны шорысь ва, вермысьӧн кыпӧдас юрсӧ.
{Еврей йӧз (комиӧдіс Kodko) @ 110 псалом @ религ. гижӧд @ Библия @ 2021 @ Лб. .}
110 псалом
Аллилуйя!
Господьӧй, став сьӧлӧмсянь ошка Тэнӧ веськыда олысьяс пӧвстын, Тэнад войтырлӧн чукӧртчӧмын.
Господьлӧн уджъясыс ыджыдӧсь, Сылысь уджъяссӧ радейтысьяс кӧсйӧны тӧдны найӧс.
Сылӧн уджъясыс ошканаӧсь да мичаӧсь, Сылӧн веськыдлуныс олӧ нэмъяс чӧж, Сылысь шензьӧданаторъяссӧ огӧ вунӧдӧй.
Господь — бур да мелі сьӧлӧма.
Сыысь полысьясӧс Сійӧ пӧткӧдӧ, некор оз вунӧд Ассьыс йитӧдсӧ.
Уджъясыс пыр Сійӧ петкӧдліс войтырыслы Ассьыс вынсӧ, вичмӧдіс налы войтыръяслысь муяссӧ.
Сійӧ ставсӧ вӧчӧ збыль да веськыдлун серти,
Сылӧн тшӧктӧмъясыс зумыдӧсь, вынаӧсь нэмъяс чӧж, налӧн подулыс — збыльыс да веськыдлуныс.
Сійӧ мездіс Ассьыс войтырсӧ, кӧрталіс накӧд йитӧд нэмъяс кежлӧ.
Сылӧн нимыс вежа да повзьӧдана.
Мывкыдлуныс чужӧ Господьысь полӧмсянь, Сылӧн тшӧктӧм серти олысьяс бур мывкыдаӧсь.
Сылы ошкӧмыс мед лоӧ нэмъяс чӧж!
{Еврей йӧз (комиӧдіс Kodko) @ 111 псалом @ религ. гижӧд @ Библия @ 2021 @ Лб. .}
111 псалом
Аллилуйя!
Шуда сійӧ мортыс, коді полӧ Господьысь да ёна радейтӧ Сылысь тшӧктӧмъяссӧ.
Сысянь чужысьяс лоӧны вынаӧсь асланыс муас, веськыда олысьяслысь рӧдсӧ лоӧ бурсиӧма.
Сылӧн керкаын тырмымӧн лоӧ озырлуныс, сылӧн веськыдлуныс лоӧ нэмъяс чӧж.
Весиг пемыдас ӧзйӧ югыдыс веськыда олысьлы, сійӧ бур да мелі сьӧлӧма, веськыда вӧчӧ.
Бур морт буралӧ мӧдыс дінӧ да водзӧсӧн сетӧ, ставсӧ вӧчӧ веськыдлун серти.
Веськыда олысь некор оз вӧрзьыв, сійӧс оз вунӧдны.
Сійӧ оз повзьы лёк юӧрысь, сійӧ зумыд лача кутӧ Господь вылӧ.
Сійӧ повтӧм сьӧлӧма да збой, вермысьӧн видзӧдӧ дзескӧдысьяс вылӧ.
Сійӧ лышкыда разӧдӧ, сеталӧ гӧльяслы, сылӧн веськыда вӧчӧмыс кутас овны нэмъяс чӧж, сійӧ олӧ юрсӧ лэптӧмӧн, ӧд сійӧс пыдди пуктӧны.
Тайӧс аддзигӧн Ентӧг олысь скӧралӧ, пиньсӧ йирӧ и лёкысла потӧ.
Лёк вӧчысьяслӧн кӧсйӧмыс торксьӧ.
{Еврей йӧз (комиӧдіс Kodko) @ 112 псалом @ религ. гижӧд @ Библия @ 2021 @ Лб. .}
112 псалом
Аллилуйя!
Господьлӧн кесйӧгъяс, ошкӧй Господьлысь нимсӧ!
Господьлысь нимсӧ мед лоӧ ошкӧма ӧні и нэмъяс чӧж!
Асыввывсянь рытыввылӧдз мед лоӧ ошкӧма Господьлысь нимсӧ!
Господь — став войтыръяс вылын Ыджыдыс, Сылӧн дзирдлуныс кыптӧ енэжъясысь вылӧджык на.
Кодӧс позяс ӧткодявны Господькӧд, миян Енкӧд? Сійӧ пукалӧ выліинын, аддзӧ ставсӧ, мый эм енэжас да му вылас.
Коньӧрӧс сійӧ лэптӧ бус пытшкысь, гӧльӧс перйӧ няйтысь, медым пуксьӧдны сійӧс ӧксыяскӧд ӧтвыв, Аслас войтырлӧн ӧксыяскӧд ӧтвыв.
Кага вайтӧм аньлы Сійӧ сетӧ оланін да челядь, и сійӧ лоас шуда мамӧн.
Аллилуйя!
{Еврей йӧз (комиӧдіс Kodko) @ 113 псалом @ религ. гижӧд @ Библия @ 2021 @ Лб. .}
113 псалом
[Аллилуйя!] 
Кор Израиль войтыр петіс Египетысь, Яковлӧн рӧдыс — йӧз муысь, сэки Иуда му лои Господьлӧн вежаинӧн, Израиль му — Сылӧн юраланінӧн.
Тайӧс аддзӧмысь саридз пышйис, Йӧрдан ю кутіс мӧдарӧ визувтны.
Керӧсъяс кутісны межъяс моз чеччавны, мылькъяс — баляяс моз.
Саридз, мыйла тэ пышъян? Йӧрдан, мыйла тэ мӧдарӧ визувтан?
Керӧсъяс, мыйла ті чеччаланныд межъяс моз, а ті, мылькъяс, — баляяс моз?
Мед тіралас муыс Господьлӧн чужӧмбан водзын, Яковлӧн Ен водзын! Изкыртаысь Сійӧ вӧчӧ ты, изйысь — ва петанін.
Господьӧй, эн миянӧс нимӧд, а Ассьыд нимтӧ, ӧд буралӧмыс да збыльыс — Тэнад.
Мыйла лэдзан войтыръяслы шуасьны: «Кӧні налӧн Енмыс?»
Миян Енным енэжас [да му вылас], Сійӧ вӧчӧ ставсӧ, мый кӧсйӧ.
Войтыръяслӧн идолъясыс — эзысьысь да зарниысь киӧн вӧчӧмторъяс.
Налӧн эм вом, но найӧ оз сёрнитны, налӧн эм син, но найӧ оз аддзыны, налӧн эм пель, но найӧ оз кывны, налӧн эм ныр, но найӧ оз исавны, налӧн эм ки, но найӧ оз видлавны, налӧн эм кок, но найӧ оз ветлӧдлыны, налӧн горшысь оз пет гӧлӧс шы.
На кодьӧсь жӧ лоӧны найӧс вӧчысьяс, тшӧтш на вылӧ лача кутысьяс.
Израиль войтыр, лача кут Господь вылӧ!
Сійӧ — миянлы отсӧг сетысьыс да сайӧдыс.
Ааронлӧн котырыс, лача кут Господь вылӧ!
Сійӧ — тіянлы отсӧг сетысьыс да сайӧдыс.
Господьысь полысьяс, лача кутӧй Господь вылӧ!
Сійӧ — миянлы отсӧг сетысьыс да сайӧдыс.
Господь оз вунӧдлы миянӧс, Сійӧ бурсиӧ миянӧс, бурсиӧ Израиль войтырӧс, бурсиӧ Ааронлысь котырсӧ.
Господь бурсиӧ Сыысь полысьясӧс: ичӧтӧс и гырысьӧс.
Господь мед уна пӧвстӧн содтас тіянӧс, тіянлысь да тіян ныв-пилысь лыдсӧ.
Мед бурсиас тіянӧс Господь, коді вӧчис енэжсӧ да мусӧ.
Енэжыс — Господьлӧн, а мусӧ Сійӧ йӧзлы сетіс.
Оз кулӧмаяс ошкыны Господьӧс, оз найӧ, кодъясӧс гуалӧны, а ми ошкам Господьӧс, ошкам Сійӧс ӧні и нэмъяс чӧж.
Аллилуйя!
{Еврей йӧз (комиӧдіс Kodko) @ 114 псалом @ религ. гижӧд @ Библия @ 2021 @ Лб. .}
114 псалом
[Аллилуйя!]
Ме нимкодяся, ӧд Господь кыліс менсьым гӧлӧс шыӧс, кыліс менсьым кевмӧмӧс.
Сійӧ копыртіс мелань пельсӧ, та вӧсна став олӧм чӧж кута шыасьны Сы дінӧ.
Кулӧмыс тывйыштіс менӧ, пыдӧстӧминлӧн шогыс суис менӧ, сьӧкыдлуныс да шогыс личкисны менӧ.
Сэки ме шыаси Господь дінӧ: «Господьӧй, мезды менӧ!»
Господь бур сьӧлӧма, Сійӧ веськыда вӧчӧ, миян Енным мелі сьӧлӧма.
Господь видзӧ восьса сьӧлӧмаясӧс. Кор ме вынтӧмми, Сійӧ отсаліс меным.
Шойччы, менам лолӧй, ӧд Господь тӧждысьӧ тэ вӧсна.
Господьӧй, Тэ мездін менӧ кулӧмысь, менсьым синмӧс — синваысь, менсьым кокӧс — крукасьӧмысь.
Ловъяяслӧн му вылын ме кута овны Господь водзын.
{Еврей йӧз (комиӧдіс Kodko) @ 115 псалом @ религ. гижӧд @ Библия @ 2021 @ Лб. .}
115 псалом
[Аллилуйя!] 
Ме эска, та вӧсна висьтала. Кор ме вӧлі шогӧ усьӧма, кор меным вӧлі вывті сьӧкыд, ме шуи: «Став йӧзыс — пӧръясьысьяс».
Мыйӧн ме мынтыся Господьлы став бурсьыс, мый Сійӧ вӧчис меным?
Ме вая вина вись, аттьӧала Господьӧс мездмӧмысь.
Мый кӧсйыси Господьлы, сійӧс вӧча став Сылӧн войтырыс водзын.
Господьлы дона Сылы эскана войтырлӧн кулӧмыс.
Господьӧй, ме — Тэнад кесйӧгыд, ме — Тэнад кесйӧг аньлӧн пиыс, Тэнад кесйӧгыд.
Тэ разин менсьым чепъясӧс.
Господьӧй, ме вая Тэныд аттьӧалана вись, ошка Тэнсьыд нимтӧ.
Мый кыв сетӧмӧн кӧсйыси Господьлы, сійӧс вӧча став Сылӧн войтырыс водзын Господьлӧн крам йӧрын, Ерусалим кар шӧрын.
Аллилуйя!
{Еврей йӧз (комиӧдіс Kodko) @ 116 псалом @ религ. гижӧд @ Библия @ 2021 @ Лб. .}
116 псалом
[Аллилуйя!] 
Ошкӧй Господьӧс, войтыръяс, ыдждӧдлӧй Сійӧс, став мувывса йӧз!
Ӧд Господьлӧн буралӧмыс миян дінӧ вывті ыджыд, Сылӧн збыльыс олӧ нэмъяс чӧж.
Аллилуйя!
{Еврей йӧз (комиӧдіс Kodko) @ 117 псалом @ религ. гижӧд @ Библия @ 2021 @ Лб. .}
117 псалом
[Аллилуйя!] 
Ошкӧй Господьӧс, ӧд Сійӧ бур, Сылӧн буралӧмыс оз помасьлы.
Израиль войтыр мед шуас: «[Сійӧ бур,] Сылӧн буралӧмыс оз помасьлы».
Ааронлӧн котыр мед шуас: «[Сійӧ бур,] Сылӧн буралӧмыс оз помасьлы».
Господьысь полысьяс мед шуасны: «[Сійӧ бур,] Сылӧн буралӧмыс оз помасьлы».
Ёна сьӧкыдалігӧн ме шыаси Господь дінӧ. Сійӧ кыліс менӧ да петкӧдіс паськыдінӧ.
Господь ме дор, меным нинӧмысь повнысӧ.
Мый вӧчас меным морт?
Господь — меным отсӧг сетысьыс, кута повтӧг видзӧдны менӧ мустӧмтысьяс вылӧ.
Бурджык Господь вылӧ лача кутны морт вылӧ лача кутӧм дорысь.
Бурджык Господь вылӧ лача кутны ӧксыяс вылӧ лача кутӧм дорысь.
Менӧ кытшалісны войтыръяс, но Господь нимӧн ме пасьварті найӧс.
Найӧ быд боксянь кытшалісны менӧ, но Господь нимӧн ме пасьварті найӧс.
Кытшалісны менӧ зі чукӧр моз, но биын сотӧм лежнӧг моз бырисны.
Господь нимӧн ме пасьварті найӧс.
Найӧ ёна тойыштісны менӧ, медым ме уси, но Господь кутыштіс менӧ.
Господь — менам вынӧй да сьыланкывйӧй, Сійӧ мездіс менӧ.
Веськыда олысьяслӧн керкаясын кылӧ мездмӧм йылысь нимкодясян шы: «Господьлӧн веськыд киыс вӧчӧ ыджыд уджъяс!
Господь веськыд кисӧ вылӧ кыпӧдӧма, Господьлӧн веськыд киыс вӧчӧ ыджыд уджъяс!»
Ме ог кув, но кута овны да висьтавлыны Господьлӧн уджъяс йылысь.
Господь чорыда мыждіс менӧ, но эз лэдз меным кувны.
Восьтӧй меным веськыдлуныслысь дзиръясӧ!
Ме пыра сэті да понда ошкыны Господьӧс.
Со, Господьлӧн дзиръяыс, веськыда олысьяс пырасны сэті.
Господьӧй, ме ошка Тэнӧ! Тэ кылін менӧ да мездін менӧ.
Изйыс, кодӧс ӧтдортісны керка лэптысьяс, лоис пельӧс изйӧн.
Тайӧ Господьсянь да шензьӧдӧ миянӧс.
Тайӧ лунсӧ вӧчис Господь, кутам нимкодясьны да гажӧдчыны!
Господьӧй, мезды миянӧс!
Господьӧй, отсав миянлы!
Бурсиӧма Господь нимӧн локтысьӧс!
Господьлӧн керкасянь ми бурсиам тіянӧс.
Господь эм Ен, Сійӧ югдӧдіс миянӧс.
Гажӧдчан лунӧ вайӧдӧй ыж-мӧснытӧ, висьпуктанінлӧн сюръясӧ кӧрталӧй висьнытӧ.
Тэ — менам Ен, ме ошка Тэнӧ, Енмӧй, ме ыдждӧдла Тэнӧ! 
[Кута ошкыны Тэнӧ, ӧд Тэ кылін да мездін менӧ.]
Ошкӧй Господьӧс, ӧд Сійӧ бур, Сылӧн буралӧмыс оз помасьлы!
{Еврей йӧз (комиӧдіс Kodko) @ 118 псалом @ религ. гижӧд @ Библия @ 2021 @ Лб. .}
118 псалом
[Аллилуйя!] 
Шудаӧсь сӧстӧма олысьяс, Господьлӧн Индӧдӧ кутчысьысьяс.
Шудаӧсь Сылысь тшӧктӧмъяссӧ видзысьяс, став сьӧлӧмнас Сійӧс корсьысьяс.
Найӧ оз вӧчны лёксӧ, а ветлӧны Сылӧн туйясӧд.
Господьӧй, Тэ кӧсъян, медым ми зумыда кутчысим Тэнад тшӧктӧмъясӧ.
Ме кӧсъя Тэнад тшӧктӧмъяс серти овны, кӧсъя, медым туйясӧй вӧліны веськыдӧсь.
Ме кӧ тӧд вылын кута Тэнсьыд тшӧктӧмъястӧ, меным оз ло яндзим.
Ме ошка Тэнӧ став сьӧлӧмсянь, велӧдча гӧгӧрвоны Тэнсьыд веськыда мыждӧмтӧ.
Ме ола Тэнад тшӧктӧмъяс серти, сӧмын эн эновт менӧ.
Кыдзи вермас том зон видзны ассьыс олӧмсӧ сӧстӧмӧн?
Тэнад кывйыд серти олӧмӧн.
Став сьӧлӧмӧн корсьыся Тэнӧ, эн лэдз меным кежны Тэнад тшӧктӧмъясысь.
Аслам сьӧлӧмын ме видза Тэнсьыд кывтӧ, медым эг вӧч Тэныд паныд мыж.
Ошкӧм Тэныд, Господьӧй!
Велӧд менӧ Аслад тшӧктӧмъясӧ.
Став Тэнсьыд веськыда мыждӧмтӧ ме юӧрта йӧзыслы.
Кыдзи йӧзыс нимкодясьӧны озырлунӧн, сідзи жӧ меным нимкодь овны Тэнад тшӧктӧмъяс серти.
Ме тӧдмала-туяла Тэнсьыд тшӧктӧмъястӧ, тӧд вылам кута Тэнсьыд туйястӧ.
Ме бурмӧда сьӧлӧмӧс Тэнад индӧдъясӧн, ог вунӧд Тэнсьыд кывтӧ.
Петкӧдлы бурлунтӧ меным, Аслад кесйӧглы, и ме кута овны да видзны сьӧлӧмын Тэнсьыд кывтӧ.
Восьт менсьым синмӧс, медым ме аддзи, кутшӧм шензьӧдана Тэнад Индӧдыд.
Тайӧ му вылас ме йӧз муысь локтысь кодь, эн дзеб меысь Ассьыд тшӧктӧмъястӧ.
Менам сьӧлӧмӧй ёна гажтӧмтчӧ, ме быд кадӧ виччыся Тэнсьыд веськыда мыждӧмтӧ.
Тэ раммӧдан вылӧ кыпӧдчысьясӧс, ёрӧмаясӧс, кодъяс кежӧны Тэнад тшӧктӧмъясысь.
Вешты ме вылысь лёкӧдӧмсӧ да омӧльтӧмсӧ, ӧд ме кутчыся Тэнад тшӧктӧмъясӧ.
Юралысьяс пукалӧны да сёрнитчӧны меным паныд, но ме, Тэнад кесйӧгыд, видза Тэнсьыд тшӧктӧмъястӧ.
Тэнад индӧдъясыд бурӧдӧны менсьым сьӧлӧмӧс, тшӧктӧмъясыд туйдӧдӧны менӧ.
Ме дзикӧдз нюкыртчӧма, ловзьӧд менӧ Аслад кывйыд серти.
Ме восьті Тэныд ассьым олан туйӧс, и Тэ кылін менӧ.
Велӧд менӧ Аслад тшӧктӧмъясӧ.
Гӧгӧрвоӧд меным Ассьыд тшӧктӧмъястӧ, медым тӧдны Тэнсьыд шензьӧданаторъястӧ.
Шогӧйла менам лолӧй бӧрдӧ, ёнмӧд менӧ Аслад кывйыд серти.
Эн сет меным кежны ылӧг туй вылӧ, велӧд менӧ Аслад Индӧдӧ, ло бур сьӧлӧма.
Ме бӧрйи аслым збыль туй, Тэнсьыд веськыда мыждӧмтӧ ог вунӧд.
Ме кутчыся Тэнад индӧдъясӧ, Господьӧй, эн сет меным янавны!
Ме тэрмася ветлыны Тэнад тшӧктӧмъяслӧн туйӧд, Тэ кокньӧдан менсьым сьӧлӧмӧс.
Господьӧй, велӧд менӧ Тэнад тшӧктӧмъяслӧн туйӧ, и ме кута ветлыны тайӧ туйӧдыс.
Вежӧрсьӧд менӧ, и кута овны Тэнад Индӧдыд серти, кута кутчысьны сэтчӧ став сьӧлӧмӧн.
Нуӧд менӧ Аслад тшӧктӧмъяслӧн туйӧд, ӧд тайӧ вайӧ меным нимкодьлун.
Веськӧд менсьым сьӧлӧмӧс Тэнад индӧдъяслань, а эн озырмӧдчыны кӧсйӧмлань.
Бергӧд синмӧс ковтӧмтор дінысь, ловзьӧд менӧ Аслад туй вылад.
Вӧч меным, Аслад кесйӧглы, мый Тэ кӧсйысин Тэысь полысьяслы.
Ылыст ме дінысь лёкӧдӧмсӧ, сійӧ повзьӧдлӧ менӧ. Но Тэнад веськыда мыждӧмыд — бур.
Ме гажтӧмтча Тэнад тшӧктӧмъясысь, ловзьӧд менӧ Аслад веськыдлуннад.
Господьӧй, Тэнад буралӧмыд мед вичмас меным, мезды менӧ Аслад кывйыд серти! Ме лача кута Тэнад кывйыд вылӧ, та вӧсна верма сетны воча кыв менӧ лёкӧдысьлы.
Эн босьт менам вомысь збыль кывсӧ, ме лача кута Тэнад веськыда мыждӧм вылӧ. Тэнсьыд Индӧдтӧ пыр видза сьӧлӧмын, кута видзны сійӧс нэмъяс чӧж.
Кута овны мездлунас, ӧд ме зіля овны Тэнад тшӧктӧмъяс серти.
Ӧксыяс водзын ме ог яндысь, висьтала Тэнад индӧдъяс йылысь.
Сьӧлӧмӧс бурмӧда Тэнад тшӧктӧмъясӧн, ӧд найӧ меным мусаӧсь.
Ме нюжӧда киӧс Тэнад тшӧктӧмъяслань, найӧс ме радейта, найӧс кӧсъя тӧдны.
Господьӧй, эн вунӧд Аслад кесйӧглы сетӧм кывтӧ, сы вылӧ ме лача кута.
Тэнад сетӧм кывйыд ловзьӧдӧ менӧ, сійӧ бурӧдӧ менӧ шог дырйи.
Вылӧ кыпӧдчысьяс лёкӧдӧны менӧ, но ме ог кеж Тэнад Индӧдысь.
Господьӧй, ме ог вунӧд Тэнсьыд нэмӧвӧйся шуӧмъястӧ, найӧ бурӧдӧны менӧ.
Ме ыпъяла-скӧрала лёк вӧчысьяс вылӧ, ӧд найӧ эновтӧмаӧсь Тэнсьыд Индӧдтӧ.
Тэнад тшӧктӧмъясыд вӧліны менам сьыланкывйӧн му вывті ветліг-мунігӧн.
Господьӧй, весиг войнас ме казьтывла Тэнсьыд нимтӧ, видза сьӧлӧмын Тэнсьыд Индӧдтӧ.
Менам олан пайӧй — кутчысьны Тэнад тшӧктӧмъясӧ.
Господьӧй, Тэ — менам олан пайӧй, ме шуи овны Тэнад кывъяс серти.
Ме кевмыся Тэныд став сьӧлӧмсянь, ло бур сьӧлӧма ме дінӧ Аслад кывйыд серти.
Ме мӧвпала аслам олан туй йылысь, веськӧда ассьым воськовъясӧс Тэнад тшӧктӧмъяслань.
Ме тэрмася кутчысьны Тэнад тшӧктӧмъясӧ, ог нюжмась.
Лёк вӧчысьяс тывйыштӧны менӧ, но ме ог вунӧд Тэнсьыд Индӧдтӧ.
Войшӧрнас ме чеччывла Тэнӧ ошкыны Тэнад веськыда мыждӧмысь.
Ме ёртася накӧд, кодъяс полӧны Тэысь, видзӧны Тэнсьыд тшӧктӧмъястӧ.
Господьӧй, муыс тыр Тэнад буралӧмӧн.
Велӧд менӧ Аслад тшӧктӧмъясӧ.
Господьӧй, Аслад кесйӧглы Тэ бурсӧ вӧчин, Аслад кывйыд серти вӧчин.
Сет меным бур мывкыд да тӧдӧмлун, ме лача кута Тэнад тшӧктӧмъяс вылӧ.
Сьӧкыд нутӧдз ме вӧлі вошӧм морт, но ӧні ме кутчыся Тэнад кывъясӧ.
Господьӧй, Тэ бур, Тэ вӧчан бурсӧ.
Велӧд менӧ Аслад тшӧктӧмъясӧ!
Вылӧ кыпӧдчысьяс пӧръясьӧны-суклясьӧны ме йылысь, но ме став сьӧлӧмсянь видза Тэнсьыд тшӧктӧмъястӧ.
Найӧ тшапӧсь да вежӧртӧмӧсь, а ме бурмӧда сьӧлӧмӧс Тэнад Индӧдӧн.
Сьӧкыд нуӧмыс меным вӧлі бур вылӧ, та пыр ме велӧдчи Тэнад тшӧктӧмъясӧ.
Тэнад Индӧдыд меным ёна донаджык уна зарниысь да эзысьысь.
abu
Тэнад киыд вӧчис менӧ, пуктіс ставсӧ коланаинӧ.
Вежӧрсьӧд менӧ, медым ме велӧдчи Тэнад тшӧктӧмъясӧ.
Тэысь полысьяс нимкодясьӧны ме вӧсна, ӧд ме лача кута Тэнад кывйыд вылӧ.
Господьӧй, ме тӧда, мый Тэнад шуӧмыд веськыд, Тэ веськыда мыждін менӧ.
Тэнад буралӧмыд мед бурӧдас менӧ, кыдзи Тэ и кӧсйысьлін меным, Аслад кесйӧглы.
Ло бур сьӧлӧма ме дінӧ, и ме кута овны.
Тэнад Индӧдыд бурӧдӧ менӧ.
Вылӧ кыпӧдчысьяс мед яналасны, ӧд найӧ некутшӧм помкатӧг дзескӧдӧны менӧ.
Но ме тӧдмала-туяла Тэнсьыд тшӧктӧмъястӧ.
Тэысь полысьяс мед бергӧдчасны ме дінӧ, найӧ, кодъяс тӧдӧны Тэнсьыд индӧдъястӧ.
Мед эськӧ ме олі сӧстӧма, олі Тэнад тшӧктӧмъяс серти, сэки ме ог янав.
Менам лолӧй гажтӧмтчӧ Тэсянь мездмӧмсӧ виччысигӧн, ме лача кута Тэнад кывйыд вылӧ.
Ме гажтӧмтча Тэнсьыд кывтӧ виччысигӧн, ме юася, кор нин Тэ бурӧдан менӧ.
Ме лои тшынын потласьӧм кучик доз кодь, но Тэнсьыд тшӧктӧмъястӧ ог вунӧд.
Господьӧй, дыр-ӧ на меным, Тэнад кесйӧглы, виччысьнысӧ?
Кор нин Тэ мыждан менӧ дзескӧдысьясӧс?
Вылӧ кыпӧдчысьяс кодйисны меным гу, найӧ оз овны Тэнад Индӧд серти.
Тэнад тшӧктӧмъясыд збыльӧсь.
Отсав меным, ӧд менӧ дзескӧдӧны некутшӧм помкатӧг.
Найӧ ӧдва эз бырӧдны менӧ тайӧ му вывсьыс, но Тэнсьыд тшӧктӧмъястӧ ме ог вунӧд.
Аслад буралӧмыд кузя ловзьӧд менӧ, и ме кута видзны Тэнсьыд индӧдъястӧ.
Господьӧй, Тэнад кывйыд олӧ нэмъяс чӧж, сійӧс вынсьӧдӧма енэжас.
Чужысьяссянь чужысьясӧдз Тэ — эскана Ен, Тэ сувтӧдін мусӧ, и сійӧ сулалӧ.
Тэнад шуӧм серти ӧніӧдз ставыс зумыда сулалӧ, став вӧчӧмторйыс кесъялӧ Тэныд.
Тэнад Индӧдыд кӧ эз бурӧд менӧ, ме эськӧ кулі шогӧйла.
Некор ог вунӧд Тэнсьыд тшӧктӧмъястӧ, на отсӧгӧн Тэ ловзьӧдан менӧ.
Ме — Тэнад, мезды менӧ, ӧд ме кӧсъя овны Тэнад тшӧктӧмъяс серти.
Лёк вӧчысьяс кыйӧдчӧны, медым вины менӧ, но ме тӧдмала-туяла Тэнсьыд индӧдъястӧ.
Ме аддза, мый ставыс помасьӧ, но Тэнад тшӧктӧмъясыд вынаӧсь нэмъяс чӧж.
Тэнад Индӧдыд меным ёна муса, быд лун ме тӧдмала-туяла сійӧс.
Ме мывкыдаджык менӧ мустӧмтысьяс дорысь, ӧд Тэнад тшӧктӧмъясыд пыр мекӧд.
Ме унджык гӧгӧрвоа аслам велӧдысьяс дорысь, ӧд ме тӧдмала-туяла Тэнсьыд индӧдъястӧ.
Ме унджык тӧда олӧмаяс дорысь, ӧд ме кутчыся Тэнад тшӧктӧмъясӧ.
Ме видза ассьым кокӧс лёк туй вылӧ сувтӧмысь, ме кӧсъя кутчысьны Тэнад кывйӧ.
Тэнад веськыда мыждӧмысь ог кеж, Тэ велӧдан менӧ.
Тэнад кывъясыд ёна чӧскыдӧсь, найӧ ма дорысь на юмовджыкӧсь.
Аслад тшӧктӧмъясӧн Тэ вежӧрсьӧдан менӧ, та вӧсна ме мустӧмта ылӧг туйяс.
Тэнад кывйыд — менам кокӧйлы югыдыс, сійӧ югдӧдӧ менсьым туйӧс.
Ме кыв сеті да кута ассьым кывйӧс, кутчыся Тэнад веськыда мыждӧмӧ.
Господьӧй, ме ёна сьӧкыдала, ловзьӧд менӧ Аслад кывйыд серти!
Господьӧй, ас кӧсйӧм серти вайӧм висьӧс моз сибӧд менам вомысь ошкӧмсӧ. Велӧд менӧ Аслад тшӧктӧмъясӧ.
Ме век куланвыйын, но Тэнсьыд Индӧдтӧ ог вунӧд.
Лёк вӧчысьяс меным нальк пуктісны, но ме ог кеж Тэнад тшӧктӧмъясысь.
Ассьыд индӧдъястӧ Тэ вичмӧдін меным пыр кежлӧ, менам сьӧлӧмӧй нимкодясьӧ наӧн.
Ме восьті ассьым сьӧлӧмӧс, медым овны Тэнад тшӧктӧмъяс серти олӧм помӧдз, нэмъяс чӧж.
Кык бана йӧзӧс ме мустӧмта, но Тэнад Индӧдыд меным муса.
Тэ — менам вевттьӧдыс да сайӧдыс, Тэнад кывйыд вылӧ ме лача кута.
Лёк вӧчысьяс, ылыстчӧй ме дінысь! Ме кута кутчысьны менам Енлӧн тшӧктӧмъясӧ.
Ёнмӧд менӧ Аслад кывйыд серти, и ме кута овны.
Эн сет меным янавны сыысь, мый Тэ вылӧ ме лача кута.
Кутышт менӧ, и ме мездма, ме век кута мӧвпавны Тэнад тшӧктӧмъяс йылысь.
Тэнсьыд тшӧктӧмъястӧ вунӧдысьясӧс Тэ ӧтдортан, ӧд найӧ наяна пӧръясьӧны.
Ёгӧс моз Тэ чышкыштан му вылысь став лёк вӧчысьсӧ, та вӧсна меным мусаӧсь Тэнад тшӧктӧмъясыд.
Тэысь полӧмӧйла ставнас вир-яйӧй дзӧрӧ, ме пола Тэнад мыждӧмысь.
Ме ола веськыдлуныд серти, эн коль менӧ дзескӧдысьяслӧн киӧ!
Дорйы менӧ, Ассьыд кесйӧгтӧ, медым меным вӧлі бур. Эн сет вылӧ кыпӧдчысьяслы дзескӧдны менӧ!
Ме гажтӧмтча Тэсянь мездмӧмсӧ виччысигӧн, гажтӧмтча Тэнсьыд веськыд кывтӧ виччысигӧн.
Вӧч меным, Аслад кесйӧглы, буралӧм сертиыд, велӧд менӧ Аслад тшӧктӧмъясӧ.
Вежӧрсьӧд менӧ, Ассьыд кесйӧгтӧ, медым ме гӧгӧрвои Тэнсьыд индӧдъястӧ.
Господьӧй, кад нин вӧчны мыйкӧ, ӧд Тэнсьыд Индӧдтӧ торкалӧны!
А меным мусаӧсь Тэнад тшӧктӧмъясыд, ме радейта найӧс зарни дорысь ёнджыка, сӧстӧм зарниысь на ёнджыка.
Тэнад тшӧктӧмъяс серти ме ола, а ылӧг туйяс мустӧмта.
Тэнад индӧдъясыд шензьӧданаӧсь, та вӧсна ме видза найӧс.
Кор Тэнад кывйыд воссьӧ, сійӧ югдӧдӧ-вежӧрсьӧдӧ мывкыдтӧмӧс.
Кыдзи горш косьмигӧн ме ёна кӧсъя юны ва, тадзи ме гажтӧмтча Тэнад тшӧктӧмъясысь.
abu
Видзӧдлы ме вылӧ да ло бур сьӧлӧма ме дінӧ, кыдзи Тэ буралан Тэнсьыд нимтӧ радейтысьяс дінӧ.
Аслад кывйӧн ёнмӧд менсьым воськовъясӧс, эн лэдз лёкыслы ыджыдавны ме вылын.
Мезды менӧ дзескӧдысьясысь, и ме кута видзны Тэнсьыд тшӧктӧмъястӧ.
Петкӧдлы Аслад кесйӧглы югыд чужӧмбантӧ, велӧд менӧ Аслад тшӧктӧмъясӧ.
Менам синваӧй шорӧн визувтӧ, ӧд йӧзыс оз кутчысьны Тэнад Индӧдӧ.
Господьӧй, Тэ веськыда вӧчан, Тэнад мыждӧмыд веськыд.
Тэ сетін миянлы тшӧктӧмъяс, найӧ тырвыйӧ збыльӧсь да веськыдӧсь.
Скӧрӧйла менам пытшкӧсӧй ставнас пуӧ, ӧд менӧ мустӧмтысьяс вунӧдӧмаӧсь Тэнсьыд кывъястӧ.
Тэнад кывйыд тырвыйӧ сӧстӧм, Тэнад кесйӧгыд радейтӧ сійӧс.
Ме коньӧр да увтыртӧм морт, но Тэнсьыд тшӧктӧмъястӧ ме ог вунӧд.
Тэнад веськыдлуныд олӧ нэмъяс чӧж, Тэнад Индӧдыд — збыль.
Шог да сьӧкыдалӧм суисны менӧ, но Тэнад тшӧктӧмъясыд бурӧдӧны менӧ.
Тэнад индӧдъясыд век веськыдӧсь.
Вежӧрсьӧд менӧ, и ме кута овны.
Господьӧй, став сьӧлӧмсянь ме шыася Тэ дінӧ, вочавидз меным, и ме кута видзны Тэнсьыд тшӧктӧмъястӧ.
Ме кора Тэнӧ: мезды менӧ! И ме кута кутчысьны Тэнад индӧдъясӧ.
Кыа петтӧдз на ме шыася Тэ дінӧ, Тэнад кыв вылӧ лача кута.
Войыс оз на коль, а менам синмӧй восьса нин, медым тӧдмавны Тэнсьыд кывтӧ.
Господьӧй, Аслад буралӧмыд кузя кыв гӧлӧс шыӧс, Аслад веськыда мыждӧмыд серти ловзьӧд менӧ.
Лёксӧ вӧчны кӧсйысьяс матыстчӧны ме дінӧ, найӧ ылынӧсь Тэнад Индӧдысь.
Господьӧй, Тэ матын ме дінӧ. Став Тэнад тшӧктӧмыд — збыль.
Важысянь ме тӧда Тэнсьыд индӧдъястӧ, тӧда, Тэ сетін найӧс пыр кежлӧ.
Видзӧдлы менам сьӧкыдалӧм вылӧ да мезды менӧ, ӧд ме ог вунӧд Тэнсьыд Индӧдтӧ.
Сувт ме дор да мезды менӧ, ловзьӧд менӧ Аслад кывйыд серти.
Ентӧг олысьяс ылынӧсь мездмӧмсьыс, ӧд найӧ оз кутчысьны Тэнад тшӧктӧмъясӧ.
Господьӧй, Тэнад буралӧмыд вывті ыджыд, ловзьӧд менӧ Аслад веськыда мыждӧмыд серти.
Менӧ дзескӧдысьыс да мустӧмтысьыс вывті уна, но Тэнад индӧдъясысь ме ог ылыстчы.
Меным зывӧк аддзыны Тэысь кежысьясӧс, ӧд найӧ оз овны Тэнад кывйыд серти.
Видзӧдлы, кутшӧма ме радейта Тэнсьыд тшӧктӧмъястӧ.
Господьӧй, Аслад буралӧмыд кузя ловзьӧд менӧ.
Тэнад кывйыд подуласьӧ збыль вылас, Тэнад веськыда мыждӧмыд вына нэмъяс чӧж.
Юралысьяс помкатӧг дзескӧдӧны менӧ, но менам сьӧлӧмӧй полӧ-тіралӧ Тэнад кывйысь.
Ыджыд озырлун босьтысь моз ме нимкодяся Тэнад кывйӧн.
Ме мустӧмта-зывӧкта ылӧгсӧ, но Тэнсьыд Индӧдтӧ радейта.
Сизимысь луннас ошка Тэнӧ веськыда мыждӧмсьыд.
Тэнсьыд Индӧдтӧ радейтысьяслӧн эм лӧньлун, найӧ некор оз крукасьны.
Господьӧй, ме лача кута Тэсянь мездмӧм вылӧ, ме ола Тэнад тшӧктӧмъяс серти.
Ме видза Тэнсьыд индӧдъястӧ, найӧ меным ёна мусаӧсь.
Ме кутчыся Тэнад индӧд-тшӧктӧмъясӧ, менам олан туйясӧй Тэнад син водзынӧсь.
Господьӧй, менам кевмысьӧмӧй мед воас Тэ водзӧ, Аслад кывйыд серти вежӧрсьӧд менӧ!
Менам кевмӧмӧй мед воас Тэ водзӧ, Аслад кывйыд серти мезды менӧ!
Менам вомысь кыптӧ Тэныд ошкӧмыс, ӧд Тэ велӧдан менӧ Аслад тшӧктӧмъясӧ.
Аслам вомӧн ме юӧрта Тэнсьыд кывтӧ, ӧд Тэнад тшӧктӧмъясыд веськыдӧсь.
Тэнад киыд мед отсалас меным, ӧд ме бӧрйи Тэнсьыд тшӧктӧмъястӧ.
Господьӧй, ме виччыся Тэсянь мездмӧмсӧ, Тэнад Индӧдыд бурӧдӧ менӧ.
Сет меным овны, медым ме ошки Тэнӧ, Тэнад веськыда мыждӧмыд мед отсалас меным.
Вошӧм ыж моз ме ылалі.
Корсь менӧ, Ассьыд кесйӧгтӧ, ӧд Тэнсьыд тшӧктӧмъястӧ ме ог вунӧд.
{Еврей йӧз (комиӧдіс Kodko) @ 119 псалом @ религ. гижӧд @ Библия @ 2021 @ Лб. .}
119 псалом
Крамӧ мунігӧн сьылӧм.
Аслам шог дырйи ме шыася Господь дінӧ, и Сійӧ вочавидзас меным.
Господьӧй, мезды менӧ пӧръясьысь йӧзысь, ылӧг вомаясысь.
Ылӧг вома мортӧй, мыйӧн лоӧ мынтысьӧма тэныд?
Ёсь йыла ньӧвъясӧн да биа ӧгыръясӧн.
Курыд шог меным, ӧд ме ола Мешек муын, кедарса чомъясын!
Ме дыр нин ола на пӧвстын, кодъяс мустӧмтӧны лӧньлунсӧ.
Ме кӧсъя лӧньлун, но сӧмын шыася на дінӧ, найӧ дасьӧсь нин тышкасьны.
{Еврей йӧз (комиӧдіс Kodko) @ 120 псалом @ религ. гижӧд @ Библия @ 2021 @ Лб. .}
120 псалом
Крамӧ мунігӧн сьылӧм.
Синмӧс лэпта керӧсъяслань. Кысянь воас меным отсӧгыс?
Отсӧгыс воас меным Господьсянь, енэжсӧ да мусӧ Вӧчысьсянь.
Сійӧ оз сет лигышмунны тэнад кокыдлы, тэнӧ Видзысь оз вуграв.
Сійӧ оз вуграв да оз узь, Сійӧ видзӧ Израильӧс.
Господь — тэнӧ Видзысьыс, Господь — тэнад веськыдладорын сайӧдыс.
Луннас шондіыс оз сот тэнӧ, войнас тӧлысьыс оз вӧч тэныд лёксӧ.
Господь видзӧ тэнӧ быд лёкысь, Сійӧ видзӧ тэнсьыд олӧмтӧ.
Господь видзас тэнсьыд мунӧм-локтӧмтӧ ӧні и нэмъяс чӧж.
{Еврей йӧз (комиӧдіс Kodko) @ 121 псалом @ религ. гижӧд @ Библия @ 2021 @ Лб. .}
121 псалом
Крамӧ мунігӧн сьылӧм.
Давидлӧн сьыланкыв.
Ме нимкодяси, кор меным шуисны, мунам пӧ Господьлӧн керкаӧ.
Ерусалим, Тэнад дзиръяяс дорын ми сулалам.
Ерусалим, тэнӧ лэптӧма, медым татчӧ чукӧртчисны йӧзыс. Ерусалимӧ локтӧны израильса чужанкотыръяс, Господьлӧн котыръяс, медым сэні Индӧд серти ошкыны Господьлысь нимсӧ.
Ерусалимын сулалӧны Давид котырлӧн юралан пуклӧсъяс, веськыда мыждан пуклӧсъяс.
Кевмӧй лӧнь олӧм Ерусалимлы! Тэнӧ радейтысьяслӧн олӧмыс мед лоӧ бур.
Тэнад карса стенъяс вылын мед лоӧ лӧнь олӧм, тэнад изкарын — бур олӧм.
Аслам вокъяс да матыссаяс вӧсна ме шуа: «Лӧнь олӧм тэныд!»
Миян Господь Енлӧн керкаыс вӧсна ме сиа тэныд быд бурсӧ.
{Еврей йӧз (комиӧдіс Kodko) @ 122 псалом @ религ. гижӧд @ Библия @ 2021 @ Лб. .}
122 псалом
Крамӧ мунігӧн сьылӧм.
Тэлань кыпӧда синмӧс, енэжъясын Олысьӧй.
Кыдзи кесйӧг видзӧдӧ ыджыдыслӧн ки вылӧ, сідзи ми видзӧдам Господь Енным вылӧ, виччысям Сысянь буралӧмсӧ.
Господьӧй, бурсьӧлӧмтчы, ло бур сьӧлӧма миян дінӧ, ӧд дыр кад чӧж нин миянӧс мустӧмтӧны.
Миянӧс тырмымӧн нин лёкӧдісны ышнясьысьяс, увтыртісны вылӧ кыпӧдчысьяс.
{Еврей йӧз (комиӧдіс Kodko) @ 123 псалом @ религ. гижӧд @ Библия @ 2021 @ Лб. .}
123 псалом
Крамӧ мунігӧн сьылӧм.
Давидлӧн сьыланкыв.
Эз кӧ Господь вӧв миян дор, — мед шуас тадзи Израиль — эз кӧ Господь вӧв миян дор, кор йӧзыс кыпӧдчисны миянлы паныд, сэки эськӧ скӧраліганыс найӧ ловйӧн ньылыштісны миянӧс, ыджыд ваыс эськӧ пӧдтіс миянӧс, визув ваыс кылӧдіс миянӧс, бузгысь ваыс вевттис миянӧс.
Ошкӧм Господьлы! Сійӧ эз сет миянӧс налы косявлыны.
Дзугйӧ шедӧм лэбач моз ми мездмим. Дзугсӧ орӧдӧма, и ми пышйим.
Отсӧгыс воӧ миянлы Господьсянь, енэжсӧ да мусӧ Вӧчысьсянь.
{Еврей йӧз (комиӧдіс Kodko) @ 124 псалом @ религ. гижӧд @ Библия @ 2021 @ Лб. .}
124 псалом
Крамӧ мунігӧн сьылӧм.
Господь вылӧ лача кутысь Сион керӧс кодь, сійӧ некор оз вӧрзьыв, сулалас нэмъяс чӧж.
Кыдзи керӧсъяс кытшалӧны Ерусалим, сідзи Господь видзӧ-кытшалӧ Ассьыс войтырсӧ ӧні и нэмъяс чӧж.
Лёк вӧчысь оз кут ыджыдавны * веськыда олысьяслӧн му вылын, медым веськыда олысьяс эз нюжӧдны кинысӧ лёксӧ вӧчны.
Господьӧй, бур да веськыд сьӧлӧмаяслы вӧч бурсӧ, а лёк туй вылӧ кежысьясӧс да лёк вӧчысьясӧс вӧтлы.
Лӧнь олӧм Израильлы!
{Еврей йӧз (комиӧдіс Kodko) @ 125 псалом @ религ. гижӧд @ Библия @ 2021 @ Лб. .}
125 псалом
Крамӧ мунігӧн сьылӧм.
Кор Господь бӧр вайӧдіс миянӧс пленысь Сионӧ, ми вӧлім мича вӧт аддзысь кодьӧсь.
Сэки ми нимкодясим да гажӧдчим.
Войтыръяс шуисны, Господь пӧ петкӧдліс Израиль войтырлы ыджыд уджъяс.
Господь вӧчис миян пӧвстын ыджыд уджъяс, и ми нимкодясим.
Господьӧй, бергӧд миян войтырлысь коляссӧ пленысь, кыдзи визув ва Тэ веськӧдан Негев кос му вылӧ.
Синва сорӧн кӧдзысьяс пондасны вундыны нимкодьпырысь.
Кӧйдыс нуигӧн бӧрдӧмӧн мунысьяс нимкодясьӧмӧн бергӧдчасны кольтаяс вайигӧн.
{Еврей йӧз (комиӧдіс Kodko) @ 126 псалом @ религ. гижӧд @ Библия @ 2021 @ Лб. .}
126 псалом
Крамӧ мунігӧн сьылӧм.
Соломонлӧн сьыланкыв.
Господь кӧ оз лэпты керкатӧ, весьшӧрӧ мырсьӧны керка лэптысьяс.
Господь кӧ оз видз картӧ, весьшӧрӧ войсӧ узьтӧг олӧны карсӧ видзысьяс.
Ті весьшӧрӧ водз чеччанныд да сёрӧн воданныд, весьшӧрӧ мырсянныд нянь вӧсна, ӧд Аслас мусаяслы Господь сетӧ чӧскыд ун.
Челядьыд — Господьсянь, кагаыд — Сысянь козин.
Том пияныд — вына морт киын ньӧвъяс кодьӧсь.
Шуда сійӧ мортыс, коді татшӧм ньӧвъяснас тыртӧ вӧралан нопсӧ.
Сылы оз ло яндзим, кор мустӧмтысь кутас мыжавны сійӧс карса дзиръя дорын.
{Еврей йӧз (комиӧдіс Kodko) @ 127 псалом @ религ. гижӧд @ Библия @ 2021 @ Лб. .}
127 псалом
Крамӧ мунігӧн сьылӧм.
Шуда сійӧ, коді полӧ Господьысь, ветлӧ Сылӧн туйясӧд.
Тэ кутан пӧткӧдчыны аслад кипом уджъясысь, тэ шуда лоан, тэнад ставыс лоӧ бур.
Тэнад керкаын гӧтырыд лоӧ вотӧс вайысь виноград пу кодь.
Пызан сайын тэнад пияныд лоӧны олив пулӧн вожъяс кодьӧсь.
Тадзи лоӧ бурсиӧма мортӧс, коді полӧ Господьысь.
Господь мед бурсиас тэнӧ Сионсянь, став олӧм чӧжыд мед аддзан Ерусалимын бур олӧмсӧ, аддзан аслад пияныдлысь пиянсӧ.
Лӧнь олӧм Израильлы!
{Еврей йӧз (комиӧдіс Kodko) @ 128 псалом @ религ. гижӧд @ Библия @ 2021 @ Лб. .}
128 псалом
Крамӧ мунігӧн сьылӧм.
Том кадсянь менӧ ёна дзескӧдісны — мед шуас тадзи Израиль — том кадсянь менӧ ёна дзескӧдісны, но менӧ эз вермыны.
Менам мыш вылын быттьӧ гӧрисны гӧрысьяс, вӧчисны сэні кузь бӧрӧздаяс.
Но Господь веськыда вӧчӧ, мездӧ миянӧс лёк вӧчысьяслӧн чепъясысь.
Мед яналасны да пышъясны Сионӧс мустӧмтысьяс, найӧ мед лоӧны керка вевт вылын быдмысь турун кодьӧсь, ытшкытӧдз косьмӧм турун кодьӧсь. Вундысьлы сійӧ киас оз шед, кольта чукӧртысь оз чукӧрт сійӧс.
На дінті мунысьяс оз шуны: «Господьлӧн бурсиӧмыс мед лоӧ тіян вылын, ми бурсиам тіянӧс Господь нимӧн».
{Еврей йӧз (комиӧдіс Kodko) @ 129 псалом @ религ. гижӧд @ Библия @ 2021 @ Лб. .}
129 псалом
Крамӧ мунігӧн сьылӧм.
Господьӧй, пыдӧстӧм гусянь ме шыася Тэ дінӧ.
Господьӧй, кыв менсьым гӧлӧс шыӧс, восьт Ассьыд пельтӧ, кывзы менсьым кевмӧмӧс.
Господьӧй, Тэ кӧ он вунӧд миянлысь мыжъяснымӧс, коді сэки вермас сулавны Тэ водзын, Ыджыдӧй?
Но Тэ — прӧститысь Ен, йӧзыс мед поласны Тэысь.
Ме лача кута Господь вылӧ, став сьӧлӧмсянь лача кута Сы вылӧ да Сылӧн кывйыс вылӧ.
Кар видзысь ёна виччысьӧ асывсӧ, но ме ёнджыка на виччыся Господьӧс.
Израиль, лача кут Господь вылӧ! Господьлӧн киын буралӧмыс, Сысянь воӧ мездмӧмыс. Сійӧ мездас Израиль войтырӧс став мыжсьыс.
{Еврей йӧз (комиӧдіс Kodko) @ 130 псалом @ религ. гижӧд @ Библия @ 2021 @ Лб. .}
130 псалом
Крамӧ мунігӧн сьылӧм.
Давидлӧн сьыланкыв.
Господьӧй, ме эг ышнясьлы, ачымӧс вылӧ эг пуктыв. Мый меным эз вӧв гӧгӧрвоана, мый эг вермы вежӧртны, сэтчӧ ме эг пырӧдчыв.
Ме лӧньӧді ассьым сьӧлӧмӧс да ланьтӧдчи, кыдзи мам ки вылын ланьтӧдчӧ пӧттӧдз вердӧм кага.
Израиль мед лача кутас Господь вылӧ ӧні и нэмъяс чӧж.
{Еврей йӧз (комиӧдіс Kodko) @ 131 псалом @ религ. гижӧд @ Библия @ 2021 @ Лб. .}
131 псалом
Крамӧ мунігӧн сьылӧм.
Господьӧй, эн вунӧд Давидӧс, эн вунӧд сылысь сьӧкыд нуӧмсӧ.
Сійӧ кыв сетіс Господьлы, Яковлӧн вына Енлы кӧсйысьӧмӧн шуис, мый оз пыр аслас керкаӧ, оз вод аслас вольпасьӧ, оз тупкы ассьыс синсӧ да оз кут узьны, кытчӧдз оз аддзы Господьлы овмӧдчанін, Яковлӧн вына Енлы оланін.
Ми кывлім, мый Господьлӧн оланіныс Епрафаын, аддзим сійӧс Ярим эрд вылысь.
Мунамӧй Сылӧн оланін дорӧ, копыртчамӧй Сылӧн кок улӧдз.
Господьӧй, чеччы да лок Аслад шойччанінӧ, Тэ да Тэнад выныдлӧн кудйыс, локтӧй!
Тэнад попъясыд мед вевттьысясны веськыдлунӧн, Тэнад эскана войтырыд мед нимкодясяс.
Аслад Давид кесйӧг вӧсна эн ӧтдорт Ассьыд мавтыштӧматӧ.
Господь сетіс зумыд кыв Давидлы, Сійӧ оз торк Ассьыс кывсӧ.
Сійӧ кӧсйысис: «Тэсянь чужысьӧс Ме пуксьӧда тэнад юралан пуклӧсӧ.
Тэнад пияныд кӧ кутасны видзны Менсьым йитӧдӧс да тшӧктӧмъясӧс, мыйӧ Ме велӧда найӧс, сэки налӧн пияныс тшӧтш кутасны пукавны тэнад юралан пуклӧсын нэмъяс чӧж».
Господь бӧрйис Сион Аслыс оланінӧн, Сійӧ ёна кӧсйис овмӧдчыны сэтчӧ, шуис: «Тайӧ — Менам шойччанінӧй нэмъяс кежлӧ. Ме овмӧдча татчӧ, тані Меным сьӧлӧм серти.
Сэні олысьясӧс Ме озыра бурсиа сёянӧн, сэтчӧс корысьясӧс Ме пӧткӧда няньӧн.
Сионса попъясӧс Ме вевття мездмӧмӧн, эскана войтыр кутас долыда нимкодясьны.
Тані Ме ёнмӧда Давидлысь ыджыдалӧмсӧ, ӧзта югыд би Аслам мавтыштӧмалы.
Сійӧс мустӧмтысьясӧс Ме вевття янӧдӧмӧн, а сылӧн юр вылас кутас дзирдавны юркытш».
{Еврей йӧз (комиӧдіс Kodko) @ 132 псалом @ религ. гижӧд @ Библия @ 2021 @ Лб. .}
132 псалом
Крамӧ мунігӧн сьылӧм.
Давидлӧн сьыланкыв.
Кутшӧм бур да лӧсьыд ӧтвыв овны вокъяслы!
Тайӧ — дона вый кодь, сійӧ визувтӧ юр вывсянь тош кузяыс, визувтӧ Ааронлӧн тошкӧдыс сылӧн паськӧм дорышӧдзыс.
Тайӧ — Ермон керӧсвывса лысва кодь, сійӧ усьӧ сионса керӧсъяс вылӧ. Сионлы Господь сетіс бурсиӧм да помтӧм олӧм.
{Еврей йӧз (комиӧдіс Kodko) @ 133 псалом @ религ. гижӧд @ Библия @ 2021 @ Лб. .}
133 псалом
Крамӧ мунігӧн сьылӧм.
Ошкӧй Господьӧс, став Сылӧн кесйӧгъяс! Ошкӧй Господьӧс ті, кодъяс войся кадӧ кесъяланныд Господьлӧн крамын, [миян Енлӧн йӧръясын]!
Кыпӧдӧй кинытӧ вежаинлань да ошкӧй Господьӧс!
Сионсянь мед бурсиас тэнӧ Господь, енэжсӧ да мусӧ Вӧчысьыс.
{Еврей йӧз (комиӧдіс Kodko) @ 134 псалом @ религ. гижӧд @ Библия @ 2021 @ Лб. .}
134 псалом
Ошкӧй Господьлысь нимсӧ! Господьлӧн кесйӧгъяс, ошкӧй Сійӧс! Ошкӧй Сійӧс, Господьлӧн крамын сулалысьяс, миян Енлӧн йӧръясын кесъялысьяс!
Ошкӧй Господьӧс, ӧд Сійӧ бур.
Сьылӧмӧн ошкӧй Сылысь нимсӧ, ӧд Сылӧн нимыс мича. Господь бӧрйис Аслыс Яковлысь котырсӧ, торйӧдіс аслыс Израиль войтырӧс.
Ме тӧда, мый Господь ыджыд, миян Господь став енсьыс на ыджыдджык.
Господь вӧчӧ, мый кӧсйӧ, енэжын и му вылын, саридзын и пыдӧстӧм ваын.
Му помсяньыс Сійӧ кыпӧдӧ кымӧръяс, зэригӧн сявкйӧ чардбиӧн, Аслас видзанінысь мӧдӧдӧ тӧвныр.
Господь бырӧдіс Египетысь медводдза чужысьясӧс — мортлысь и пемӧсъяслысь чужтассӧ. Сійӧ петкӧдліс индысьпасъяс, вӧчис шензьӧданаторъяс египетса войтыр пӧвстын, фараонлӧн да сылӧн кесйӧгъяслӧн син водзын. Сійӧ бырӧдіс войтыръясӧс, виис вына ӧксыясӧс:
Сигонӧс — аморейяслысь ӧксысӧ, Огӧс — васанса ӧксыӧс. Сійӧ босьтіс Аслыс Ханаан му, сетіс сійӧс Аслас Израиль войтырлы.
Господьӧй, Тэнад нимыд олӧ нэмъяс чӧж, Тэнӧ кутасны казьтывлыны чужысьяссянь чужысьясӧдз.
Господь веськыда мыждӧ Ассьыс войтырсӧ, Сійӧ бурсьӧлӧмтчӧ Аслас кесйӧгъяс дінӧ.
Войтыръяслӧн идолъясыс — эзысьысь да зарниысь киӧн вӧчӧмторъяс.
Налӧн эм вом, но найӧ оз сёрнитны, налӧн эм син, но найӧ оз аддзыны, налӧн эм пель, но найӧ оз кывны, налӧн вомысь оз пет ловшыыс.
На кодьӧсь жӧ лоӧны найӧс вӧчысьяс, тшӧтш на вылӧ лача кутысьяс.
Израиль войтыр, ошкы Господьӧс!
Аарон рӧд, ошкы Господьӧс!
Левий чужанкотыр, ошкы Господьӧс!
Господьысь полысьяс, ошкӧй Господьӧс!
Ошкӧм сионса Господьлы, Ерусалимын Олысьлы!
Аллилуйя!
{Еврей йӧз (комиӧдіс Kodko) @ 135 псалом @ религ. гижӧд @ Библия @ 2021 @ Лб. .}
135 псалом
[Аллилуйя!]
Ошкӧй Господьӧс, ӧд Сійӧ бур, Сылӧн буралӧмыс оз помасьлы.
Ошкӧй енъяслысь Енсӧ, Сылӧн буралӧмыс оз помасьлы.
Ошкӧй ыджыдъяслысь Ыджыдсӧ, Сылӧн буралӧмыс оз помасьлы.
Ошкӧй Сійӧс, коді вӧчӧ ыджыд шензьӧданаторъяс, Сылӧн буралӧмыс оз помасьлы.
Сійӧ бур мывкыдӧн вӧчис енэжъяс, Сылӧн буралӧмыс оз помасьлы.
Сійӧ зумыда сувтӧдіс мусӧ ваяс вылӧ, Сылӧн буралӧмыс оз помасьлы.
Сійӧ вӧчис ыджыд югзьӧданторъяс, Сылӧн буралӧмыс оз помасьлы.
Вӧчис шонді, медым веськӧдлыны лунӧн, Сылӧн буралӧмыс оз помасьлы.
Вӧчис тӧлысь да кодзувъяс, медым веськӧдлыны войӧн, Сылӧн буралӧмыс оз помасьлы.
Сійӧ бырӧдіс Египетысь медводдза чужысьясӧс, Сылӧн буралӧмыс оз помасьлы.
Сійӧ петкӧдіс Израиль войтырӧс Египетысь, Сылӧн буралӧмыс оз помасьлы.
Сійӧ петкӧдіс найӧс вына кисӧ лэптӧмӧн, Сылӧн буралӧмыс оз помасьлы.
Сійӧ шӧрипӧв поткӧдіс Гӧрд саридз, Сылӧн буралӧмыс оз помасьлы.
Сійӧ нуӧдіс Израиль войтырӧс саридз шӧрӧд, Сылӧн буралӧмыс оз помасьлы.
Фараонӧс да сылысь тышкайӧзсӧ Сійӧ пӧдтіс Гӧрд саридзын, Сылӧн буралӧмыс оз помасьлы.
Сійӧ нуӧдіс Ассьыс войтырсӧ овтӧминӧд, Сылӧн буралӧмыс оз помасьлы.
Сійӧ пасьвартіс ыджыд ӧксыясӧс, Сылӧн буралӧмыс оз помасьлы.
Сійӧ виис вына ӧксыясӧс, Сылӧн буралӧмыс оз помасьлы.
Сійӧ виис Сигонӧс, аморейяслысь ӧксысӧ, Сылӧн буралӧмыс оз помасьлы.
Виис Огӧс, васанса ӧксыӧс, Сылӧн буралӧмыс оз помасьлы.
Налысь мусӧ Сійӧ сетіс Израиль войтырлы, Сылӧн буралӧмыс оз помасьлы.
Сійӧ вичмӧдіс налысь мусӧ Аслас Израиль кесйӧглы, Сылӧн буралӧмыс оз помасьлы.
Кор миянӧс увтыртісны, Сійӧ эз вунӧд миянӧс, Сылӧн буралӧмыс оз помасьлы.
Сійӧ мездіс миянӧс дзескӧдысьясысь, Сылӧн буралӧмыс оз помасьлы.
Быд ловъя олысьлы Сійӧ сетӧ сёян, Сылӧн буралӧмыс оз помасьлы.
Ошкӧй енэжвывса Енмӧс, Сылӧн буралӧмыс оз помасьлы.
{Еврей йӧз (комиӧдіс Kodko) @ 136 псалом @ религ. гижӧд @ Библия @ 2021 @ Лб. .}
136 псалом
Ми пукалім вавилонса юяс дорын да бӧрдім, кор казьтывлім Сион йылысь.
Ми ӧшлім ассьыным гуслияснымӧс юдорса бадьяс вылӧ.
Миянӧс пленӧ нуӧдысьяс тшӧктісны миянлы сьывны, миянӧс дзескӧдысьяс тшӧктісны гажӧдчыны. Найӧ шуалісны: «Сьылӧй миянлы сионса сьыланкывъяс!»
Но ми ӧмӧй вермам йӧз муын сьывны Господьлысь сьыланкывъяссӧ?
Ерусалим, ме кӧ вунӧда тэнӧ, менам веськыд киӧй мед вынтӧммас.
Ерусалим, ме кӧ вунӧда тэнӧ, ме кӧ ог кут нимкодясьны тэӧн, менам кывйӧй мед косьмас.
Господьӧй, эн вунӧд, мый Ерусалим кар бырӧдан лунӧ эдом войтыр горӧдіс: «Жугӧдӧй, жугӧдӧй сійӧс подулӧдзыс!»
Вавилон кар, тэнӧ лоӧ бырӧдӧма! Шуда сійӧ, коді водзӧсӧн мынтысяс тэныд сыысь, мый тэ вӧчин миянлы.
Шуда сійӧ, коді босьтас тэнсьыд ныв-питӧ да лясйӧдлас найӧс изйӧ.
{Еврей йӧз (комиӧдіс Kodko) @ 137 псалом @ религ. гижӧд @ Библия @ 2021 @ Лб. .}
137 псалом
Давидлӧн псалом.
Господьӧй, ме ошка Тэнӧ став сьӧлӧмсянь, сьылӧмӧн ошка Тэнӧ енэжвывса олысьяс водзын. [Тэ кылін став менсьым кывйӧс.]
Ме копыртча Тэнад вежа крамлань да ошка Тэнсьыд нимтӧ Тэнад буралӧмысь да збыльысь. Ассьыд нимтӧ да кывтӧ Тэ кыпӧдін ставсьыс вылӧ.
Сійӧ лунӧ, кор ме шыаси Тэ дінӧ, Тэ вочавидзин меным, сетін меным повтӧмлун да ёнмӧдін менсьым лолӧс.
Господьӧй, мед ошкасны Тэнӧ мувывса ӧксыяс, кор кыласны Тэнсьыд кывъястӧ.
Найӧ мед сьыласны Господьлӧн туйяс йылысь, ӧд Господьлӧн дзирдлуныс ыджыд.
Господь олӧ выліын, но рам сьӧлӧмаӧс Сійӧ аддзӧ и вылӧ кыпӧдчысьӧс ылісянь тӧдӧ.
Кор ме пикӧ воа, Тэ ловзьӧдан менӧ, Тэ нюжӧдан китӧ да доръян менӧ мустӧмтысьяслӧн скӧрлунысь, веськыд кинад Тэ мездан менӧ.
Господь мынтысяс ме пыдди.
Господьӧй, Тэнад буралӧмыд оз помасьлы. Аслад киӧн вӧчӧмтортӧ эн эновт!
{Еврей йӧз (комиӧдіс Kodko) @ 138 псалом @ религ. гижӧд @ Библия @ 2021 @ Лб. .}
138 псалом
Сьылысьясӧн веськӧдлысьлы.
Давидлӧн псалом.
Господьӧй, Тэ тӧдмалін менӧ да тӧдан менӧ.
Тэ тӧдан, кор ме пукся и кор чечча.
Тэ ылісянь на тӧдан менсьым мӧвпъясӧс.
Муна-ӧ ме, шойчча-ӧ, Тэ аддзан тайӧс, Тэ тӧдан менсьым туйясӧс.
Ме ог на удит вомӧс восьтны, но Тэ, Господьӧй, тӧдан нин, мый кӧсъя шуны.
Тэ кытшалан менӧ бӧрвывсянь и водзысянь, Тэнад киыд ме вылын.
Тэнад тӧдӧмлуныд шензьӧдӧ менӧ, сійӧ ёна вылын, ме ог вермы сійӧс вежӧрӧ тӧрӧдны.
Кытчӧ ме муна Тэнад Лов дінысь, кытчӧ пышъя Тэнад чужӧмбан водзысь?
Кыпӧдча кӧ енэжас — Тэ сэні, лэчча кӧ пыдӧстӧминас — Тэ тшӧтш сэні.
Лэбзя кӧ кыалӧн бордъяс вылын, овмӧдча кӧ саридз сайӧ, и сэні Тэнад киыд нуӧдас менӧ, Тэнад веськыд киыд кутыштас менӧ.
Шуа кӧ, мый пемыдыс вевттьӧ менӧ, югыдыс лои войӧн, но пемыдыс оз ло Тэныд пемыд, войыс Тэныд лун кодь югыд, пемыдыс и югыдыс Тэныд ӧткодьӧсь.
Тэ вӧчин менсьым пытшкӧсӧс, кыин менӧ мам кынӧмын.
Ме ошка Тэнӧ, ӧд ме шензьӧдана, Тэ вӧчин менӧ шензьӧдана ногӧн.
Тэнад уджъясыд шензьӧданаӧсь, ме бура тӧда тайӧс.
Кор менӧ вӧчӧма вӧлі гусяинын, артмӧдӧма му пытшкын моз, менсьым лыясӧс абу вӧлі дзебӧма Тэнад синмысь. Ме сӧмын на гӧрддзаси мам кынӧмын, но Тэнад синмыд аддзис нин менӧ.
Став менсьым олан лунӧс Тэ урчитін, найӧс водзвыв вӧлі гижӧма Тэнад небӧгӧ.
Енмӧй, Тэнсьыд мӧвпъястӧ ме ог вермы тӧрӧдны, найӧ лыдтӧм-тшӧттӧмӧсь!
Позяс ӧмӧй найӧс лыддьынысӧ, ӧд налӧн лыдыс лыа дорысь на унджык?
Ме садьма, и ме пыр на Тэкӧд.
Енмӧй, Тэ кӧ эськӧ бырӧдін лёк вӧчысьясӧс!
Вешйӧй ме дінысь, вир кисьтысьяс!
Тэнӧ мустӧмтысьяс висьталӧны ылӧгсӧ, Тэнсьыд нимтӧ весьшӧрӧ шуалӧны.
Господьӧй, Тэнӧ мустӧмтысьясӧс ме мустӧмта, Тэныд паныд кыпӧдчысьясӧс зывӧкта.
Ме ёна мустӧмта найӧс, лыддя найӧс аслам вӧрӧгӧн.
Енмӧй, тӧдмав менӧ да видзӧдлы менам сьӧлӧмӧ, тӧдмав менӧ да менсьым мӧвпъясӧс.
Видзӧдлы, ог-ӧ ме ветлы ылӧг туйӧд, да веськӧд менӧ Аслад туйыд вылӧ.
{Еврей йӧз (комиӧдіс Kodko) @ 139 псалом @ религ. гижӧд @ Библия @ 2021 @ Лб. .}
139 псалом
Сьылысьясӧн веськӧдлысьлы.
Давидлӧн псалом.
Господьӧй, мезды менӧ лёк йӧзысь, видз менӧ виалысь-дзескӧдысьясысь!
Ас пытшканыс найӧ мӧвпалӧны лёксӧ вӧчны, быд лун найӧ зыксьӧны. Налӧн кывйыс змейлӧн кодь чушкана, налӧн вомын змей яд.
Господьӧй, видз менӧ лёк вӧчысьясысь, дорйы менӧ виалысь-дзескӧдысьясысь, ӧд найӧ кӧсйӧны уськӧдны менӧ кок йылысь.
Вылӧ кыпӧдчысьяс октісны меным дзуг да лэч, туй вомӧн нюжӧдісны меным тыв да пуктісны нальк.
Ме шуи Господьлы: «Тэ — менам Ен.
Господьӧй, кыв менсьым кевмӧмӧс».
Господьӧй Ыджыдӧй, Тэ — менам вына Мездысьӧй, Тэ вевттян менсьым юрӧс тыш дырйи.
Господьӧй, эн лэдз инны лёк вӧчысьяслӧн кӧсйӧмлы, эн лэдз збыльмыны вылӧ кыпӧдчысьяслӧн наян мӧвпъяслы.
Менӧ дзескӧдысьяслӧн лёк кывъясыс мед бергӧдчасны налы аслыныс паныд.
На вылӧ мед киссясны биа ӧгыръяс!
Найӧс мед шыбитасны би пытшкӧ, гуӧ, кытысь оз вермыны петнысӧ!
Лёк сёрниа морт оз кут овны тайӧ му вылас, виалысь-дзескӧдысьӧс лёкыс бырӧдас.
Ме тӧда, мый Господь дорйӧ коньӧръясӧс, Сійӧ сувтӧ гӧльяс дор.
Збыльысь, веськыда олысьяс ошкӧны Тэнсьыд нимтӧ, сӧстӧм сьӧлӧмаяс олӧны Тэнад чужӧмбан водзын.
{Еврей йӧз (комиӧдіс Kodko) @ 140 псалом @ религ. гижӧд @ Библия @ 2021 @ Лб. .}
140 псалом
Давидлӧн псалом.
Господьӧй, ме шыася Тэ дінӧ, тэрмась отсавны меным! Ме шыася Тэ дінӧ, кыв менсьым кевмӧмӧс!
Менам кевмӧмӧй мед кыптас Тэ водзӧ ладан тшын моз, менам лэптӧм киӧй мед лоӧ Тэныд рытъя вись кодь.
Господьӧй, видз менсьым кывйӧс ковтӧм сёрниысь, кӧртвомав менсьым вомӧс.
Эн лэдз менам сьӧлӧмлы бергӧдчыны ылӧгас, эн сет меным лёк вӧчны мыж вӧчысьяскӧд ӧтвыв, эн сет меным пӧткӧдчыны налӧн чӧсмасян пызанысь.
Веськыда олысь мед чирыштас менӧ — тайӧ лоӧ меным бур вылӧ.
Сійӧ мед янӧдас менӧ, ӧд тайӧ мавтыштан вый менам юрлы.
Ме ог паныд сувт, дугдывтӧг кевмыся, медым мыжаяс эз вӧчны лёксӧ.
Кор налысь юралысьяссӧ лоӧ шыбитӧма изкырта вывсянь, найӧ гӧгӧрвоасны, мый менам кывъясӧй вӧліны небыдӧсь.
Найӧ шуасны, путкылялӧм эжа моз пӧ лыясным куйлӧны пыдӧстӧминлӧн дзиръя дорын.
Господьӧй Ыджыдӧй, ме лэпта синмӧс Тэлань, ме лача кута Тэ вылӧ, эн эновт менӧ!
Меным октӧмаӧсь лэч, видз менӧ сэтчӧ шедӧмысь, мезды менӧ лёк вӧчысьяслӧн налькйысь.
Найӧ мед асьныс шедасны асланыс тывъясӧ, а ме ордъя найӧс.
{Еврей йӧз (комиӧдіс Kodko) @ 141 псалом @ религ. гижӧд @ Библия @ 2021 @ Лб. .}
141 псалом
Давидлӧн сьыланкыв.
Изкыртаын дзебсясигас кевмысьӧм.
Ме гораа шыася Господь дінӧ, гораа кевмыся Господьлы.
Ме восьта Сылы ассьым сьӧлӧмӧс, висьтала Сылы ассьым шогӧс.
Ме ловнам дзикӧдз усьӧма, но Тэ аддзан менсьым олан туйӧс.
Ветлан туй вылӧ меным пуктӧма нальк.
Видзӧд, некод оз кӧсйы тӧдны менӧ, меным некытчӧ пышйыны, ме вӧсна некод оз тӧждысь.
Ме шыася Господь дінӧ, шуа, мый Тэ — менам сайӧдчаніныс, менам пайыс ловъяяслӧн му вылын.
Господьӧй, кыв менсьым бӧрдӧмӧс, ме дзикӧдз жуялӧма!
Мезды менӧ дзескӧдысьясысь, ӧд найӧ меысь вынаджыкӧсь.
Петкӧд менсьым лолӧс пемыдінысь, медым ме верми ошкыны Тэнсьыд нимтӧ.
Кор Тэ петкӧдлан ме дінӧ Ассьыд бурлунтӧ, сэки ме гӧгӧр чукӧртчасны веськыда олысьяс.
{Еврей йӧз (комиӧдіс Kodko) @ 142 псалом @ религ. гижӧд @ Библия @ 2021 @ Лб. .}
142 псалом
Давидлӧн псалом. [Давид лӧсьӧдіс тайӧ сьыланкывсӧ, кор Авессалом пиыс вӧтлысис сы бӧрся.] 
Господьӧй, кыв менсьым кевмысьӧмӧс, кывзы менсьым кевмӧмӧс да вочавидз меным, ӧд Тэ эскана да веськыд! Эн мыжды Ассьыд кесйӧгтӧ, ӧд Тэ водзын веськыд мортыс абу.
Менӧ мустӧмтысь вӧтлысьӧ ме бӧрся, сійӧ няйтӧ талялӧ менсьым олӧмӧс, кулӧмаӧс моз йӧршитӧ менӧ пемыдінӧ.
Менам лолӧй дзикӧдз нюкыртчӧма, менам сьӧлӧмӧй полӧмӧйла топалӧма.
Ме казьтывла важ олӧмӧс, мӧвпала став Тэнад уджъяс йылысь, мый вӧчин Аслад киӧн.
Ме нюжӧда Тэлань ассьым киӧс, косьмӧм му моз менам лолӧй виччысьӧ Тэнӧ.
Господьӧй, тэрмась вочавидзны меным, ӧд ловнам ме дзикӧдз усьӧма.
Эн тупкы меысь Ассьыд чужӧмбантӧ, медым ме эг ло кулӧм морт кодь.
Сет меным водз асывсянь кывны Тэнад буралӧмыд йылысь, ӧд Тэ вылӧ ме лача кута. 
[Господьӧй,] Тэлань ме веськӧда ассьым сьӧлӧмӧс, инды меным мунан туйсӧ.
Господьӧй, мезды менӧ мустӧмтысьясысь, Тэ дінын менам сайӧдчанінӧй.
Велӧд менӧ овны Тэнад кӧсйӧм серти, ӧд Тэ — менам Ен.
Тэнад бур Лолыд мед нуӧдас менӧ веськыд туйӧд.
Господьӧй, Аслад нимыд вӧсна ловзьӧд менӧ, Аслад веськыдлуныд вӧсна петкӧд менӧ шогысь.
Аслад буралӧмыд кузя бырӧд менӧ мустӧмтысьясӧс, бырӧд менӧ дзескӧдысьясӧс, ӧд ме — Тэнад кесйӧг.
{Еврей йӧз (комиӧдіс Kodko) @ 143 псалом @ религ. гижӧд @ Библия @ 2021 @ Лб. .}
143 псалом
Давидлӧн псалом. 
[Голиафлы паныд.] 
Ошкӧм Господьлы! Сійӧ — менам изкыртаыс. Сійӧ велӧдӧ менӧ тышкасьны, ёнмӧдӧ менсьым киӧс вермасьны. Сійӧ буралӧ ме дінӧ. Сійӧ — менӧ Дорйысьыс да Мездысьыс, менам дзебсяніныс да сайӧдыс. Сы вылӧ ме лача кута, Сійӧ сетӧ менам кипод улӧ менсьым войтырӧс.
Господьӧй, мортыс — коді сэтшӧмыс, мый Тэ казьтывлан сійӧс, мортлӧн пиыс — коді сэтшӧмыс, мый Тэ тӧждысян сы вӧсна?
Мортыс тӧвру пӧльыштӧм кодь, сылӧн олан лунъясыс бырӧны вуджӧр моз.
Господьӧй, доровт енэжсӧ да лэччы!
Инмӧдчы керӧсъясӧ, и найӧ пондасны тшынавны.
Мӧдӧд Ассьыд чардбитӧ да разӧд паныд сувтысьясӧс!
Лый Аслад гымньӧвйӧн, шӧйӧвошт найӧс!
Нюжӧд Ассьыд китӧ вылісянь, мезды менӧ да лэпты джуджыд ваысь, мезды менӧ локтысь йӧзлӧн киысь. Налӧн вомысь петӧ ылӧгыс, кинысӧ лэптӧмӧн найӧ ылӧг кыв сетӧны.
Енмӧй, ме сьыла Тэныд выль сьыланкыв, кута ворсны Тэныд дас струнаа арфаӧн. Тэ мездан ӧксыясӧс, Ассьыд Давид кесйӧгтӧ Тэ мездан лэчыд шыпуртысь.
Дорйы да мезды менӧ локтысь йӧз киысь! Налӧн вомысь петӧ ылӧгыс, кинысӧ лэптӧмӧн найӧ ылӧг кыв сетӧны.
Миян пиянным мед лоӧны пашкыр том пуяс кодьӧсь, нывъясным — ӧксылысь керкасӧ мичмӧдысь сюръяяс кодьӧсь.
Миян йӧртӧдъяс мед лоӧны тырӧсь, сэні мед тырыс лоӧ быдпӧлӧс сёяныс.
Миян видзьяс вылын ыжъяс мед рӧдмасны сюрсъясӧн, налӧн лыдыс мед лоӧ лыдтӧм-тшӧттӧм.
Миян ӧшъяс мед лоӧны тшӧгӧсь, найӧс мед оз гусявны, найӧ мед оз вошны. Миян туйяс вылын мед оз кыв бӧрдӧм шы.
Шуда сійӧ войтырыс, кодлӧн ставыс тайӧ эм.
Шуда сійӧ войтырыс, кодлӧн Енмыс эм Господь.
{Еврей йӧз (комиӧдіс Kodko) @ 144 псалом @ религ. гижӧд @ Библия @ 2021 @ Лб. .}
144 псалом
Давидлӧн ошкана сьыланкыв.
Енмӧй, менам Ӧксыӧй, кута ыдждӧдлыны Тэнӧ, кута ошкыны Тэнсьыд нимтӧ нэмъяс чӧж.
Быд лун кута аттьӧавны Тэнӧ, кута ошкыны Тэнсьыд нимтӧ нэмъяс чӧж.
Господь ыджыд да ёна ошкана, Сійӧс шымыртны он вермы.
Чужысьяссянь чужысьясӧдз кутасны ошкыны Тэнсьыд уджъястӧ, кутасны юӧртны Тэнад ыджыд вын йылысь.
Ме тӧдмала-туяла Тэнсьыд дзирдлунтӧ да вынтӧ, Тэнсьыд шензьӧдана уджъястӧ, кута висьтавлыны, кутшӧм Тэ ыджыд. Йӧзыс кутасны сёрнитны Тэнад уджъясыд йылысь, повзьӧдана да вына уджъясыд йылысь, кутасны казьтывлыны Тэнад ыджыд бурлуныд йылысь, кутасны сьывны Тэнад веськыдлуныд йылысь.
Господь бур да мелі сьӧлӧма, Сійӧ дыр терпитӧ да ёна буралӧ.
Господь бур сьӧлӧма быдӧн дінӧ, Сійӧ буралӧ став Аслас вӧчӧмторйыс дінӧ.
Господьӧй, став Тэнад вӧчӧмторйыд мед аттьӧалас Тэнӧ, Тэнад эскана войтырыд мед ошкас Тэнӧ.
Найӧ мед висьталасны Тэнад дзирдлуна юралӧмыд йылысь, мед юӧртасны Тэнад ыджыд выныд йылысь. Сэки йӧзыс тӧдмаласны Тэнсьыд вына уджъястӧ, Тэнсьыд дзирдлуна юралӧмтӧ.
Тэнад юралӧмыд помасьлытӧм, Тэнад ыджыдалӧмыд — чужысьяссянь чужысьясӧдз. 
[Господьлӧн кывъясыс эсканаӧсь, Сылӧн уджъясыс петкӧдлӧны Сылысь вежалунсӧ.]
Господь кутыштӧ нюкыртчӧмаӧс, Сійӧ лэптӧ усьӧмаӧс.
Господьӧй, ставныс видзӧдӧны Тэ вылӧ лача кутӧмӧн, Тэ сетан налы сёянсӧ ас кадӧ.
Тэ нюжӧдан китӧ да Аслад бурлуныд кузя пӧткӧдан став ловъя олысьсӧ.
Господь быдторйын веськыда вӧчӧ, Сійӧ кӧ кӧсйысьӧ, вӧчӧ.
Господь матын Сы дінӧ шыасьысьлы, сьӧлӧмсяньыс Сы дінӧ шыасьысьлы.
Господь вӧчӧ Сыысь полысьяслӧн кӧсйӧм серти, кылӧ налысь бӧрдӧмсӧ да мездӧ найӧс.
Господь видзӧ Сійӧс радейтысьясӧс, а лёк вӧчысьясӧс бырӧдӧ. Менам вомысь мед кыптас Господьлы ошкӧмыс!
Став Сылӧн вӧчӧмторйыс мед ошкас Сылысь вежа нимсӧ нэмъяс чӧж!
{Еврей йӧз (комиӧдіс Kodko) @ 145 псалом @ религ. гижӧд @ Библия @ 2021 @ Лб. .}
145 псалом
[Аггейлӧн да Закарлӧн сьыланкыв.] Аллилуйя!
Ошкы Господьӧс, менам лолӧй!
Кута ошкыны Господьӧс, кытчӧдз ловъя, кута сьывны аслам Енлы, кытчӧдз ола.
Энӧ кутӧй лачанытӧ юралысь вылӧ, морт вылӧ, коді оз вермы мездыны.
Лолыс петас сы пытшкысь, а вир-яйыс бӧр лоӧ муӧн, сійӧ лунӧ бырасны сылӧн мӧвпъясыс.
Шуда сійӧ, коді виччысьӧ отсӧгсӧ Яковлӧн Енсянь, коді лачасӧ кутӧ аслас Господь Ен вылӧ. Господь вӧчис енэжсӧ да мусӧ, саридзсӧ да ставсӧ, мый сэні эм. Сылы пыр позьӧ эскыны. Сійӧ дорйӧ увтыртӧмаӧс, тшыгъялысьлы сетӧ нянь.
Господь мездӧ дорӧмаӧс, восьтӧ синтӧмлысь синсӧ, лэптӧ уськӧдӧмаӧс.
Господь радейтӧ веськыда олысьӧс, видзӧ йӧз муысь локтысьӧс, кутыштӧ батьтӧм-мамтӧмӧс да дӧваӧс, а лёк вӧчысьяслысь туйсӧ Сійӧ вӧчӧ чукляӧн.
Господь ӧксыалӧ нэмъяс чӧж. Сион, тэнад Енмыд юралӧ чужысьяссянь чужысьясӧдз.
Аллилуйя!
{Еврей йӧз (комиӧдіс Kodko) @ 146 псалом @ религ. гижӧд @ Библия @ 2021 @ Лб. .}
146 псалом
Аллилуйя!
Сьывны миян Енлы — бур, Сійӧс ошкӧмыс вайӧ нимкодьлун.
Господь выльысь лэптӧ-кыпӧдӧ Ерусалим, Сійӧ бӧр чукӧртӧ разӧдӧм Израиль войтырӧс.
Сійӧ бурдӧдӧ доймӧм сьӧлӧмаясӧс, кӧрталӧ налысь дойяссӧ.
Сійӧ тӧдӧ кодзувъяслысь лыдсӧ, быдӧнлы сетӧма торъя ним.
Миян Господьным ыджыд да вына, Сылӧн мывкыдлуныс пыдӧстӧм.
Рам сьӧлӧмаӧс Господь кыпӧдӧ, а лёк вӧчысьӧс уськӧдӧ муӧдзыс.
Сьылӧй Господьлы, аттьӧалӧй Сійӧс, ворсӧй миян Енлы гуслиӧн.
Сійӧ вевттьӧ енэжсӧ кымӧръясӧн, мӧдӧдӧ му вылӧ зэр, керӧсъяс вылын быдтӧ турун [и мортлы сетӧ нянь].
Сійӧ пӧткӧдӧ ыж-мӧскӧс, вердӧ кравзысь кырныш пиянӧс.
Сійӧ оз видзӧд вӧвлӧн вынйӧр вылӧ, оз видзӧд мортлӧн ӧдйӧ котӧртӧм вылӧ.
Господьлы мусаӧсь Сыысь полысьяс, Сылӧн буралӧм вылӧ лача кутысьяс.
{Еврей йӧз (комиӧдіс Kodko) @ 147 псалом @ религ. гижӧд @ Библия @ 2021 @ Лб. .}
147 псалом
[Аллилуйя!] 
Ошкы, Ерусалим, Господьӧс, ошкы, Сион, ассьыд Ентӧ! Сійӧ ёнмӧдӧ тэнад дзиръяяслысь иганъяссӧ, бурсиӧ тэнсьыд олысьястӧ.
Сійӧ ыстӧ тэныд лӧнь олӧм, вердӧ тэнӧ медбур шобді няньӧн.
Сійӧ мӧдӧдӧ Ассьыс кывсӧ му вылӧ, Сылӧн кывйыс ӧдйӧ воӧ.
Еджыд вурунӧн моз Сійӧ вевттьӧ мусӧ лымйӧн, пӧимӧс моз коялӧ му вылӧ пуж, ёкмыльясӧс моз шыблалӧ му вылӧ шерсӧ.
Сылӧн кӧдзыдысь коді вермас дзебсьыны?
Сійӧ шуас Ассьыс кывсӧ, и ставыс сылӧ.
Мӧдӧдас тӧвныр, и шоръяс визувтӧны.
Господь юӧртіс Ассьыс кывсӧ Яковлы, висьталіс Ассьыс индӧд-тшӧктӧмъяссӧ Израильлы.
Мукӧд войтырлы Сійӧ эз юӧрт тайӧс, найӧ оз тӧдны Сылысь тшӧктӧмъяссӧ.
Аллилуйя!
{Еврей йӧз (комиӧдіс Kodko) @ 148 псалом @ религ. гижӧд @ Библия @ 2021 @ Лб. .}
148 псалом
Аллилуйя!
Ошкӧй Господьӧс, енэжын олысьяс, ошкӧй Сійӧс выліын!
Ошкӧй Сійӧс, став Сылӧн анделъяс, ошкӧй Сійӧс, став Сылӧн тышкакотыръяс!
Ошкӧй Сійӧс, шонді и тӧлысь, ошкӧй Сійӧс, дзирдалысь кодзувъяс!
Ошкӧй Сійӧс, вылысса енэжъяс, ошкӧй Сійӧс, енэжвевтса ваяс! *
Найӧ мед ошкасны Господьлысь нимсӧ, ӧд [Сійӧ шуис, и найӧ лоины,] Сійӧ тшӧктіс, и найӧ артмисны.
Сійӧ сувтӧдіс найӧс нэмъяс кежлӧ, сетіс вежсьывлытӧм индӧдъяс.
Ошкӧй Господьӧс, му вылын олысьяс, саридзса гундыръяс да пыдӧстӧм ваяс! Ошкӧй Сійӧс, би и шер, лым и ру, ошкы, Сылӧн тшӧктӧм серти пӧльтысь ыджыд тӧвныр! Ошкӧй Сійӧс, керӧсъяс и мылькъяс, вотӧса пуяс и сус пуяс, ыж-мӧс и зверъяс, гаг-веглясьысь и лэбач-пӧтка! Ошкӧй Сійӧс, ӧксыяс и войтыръяс, юралысьяс и мувывса ёрдысьяс, зонъяс и нывъяс, пӧрысьяс и томъяс! Ставныс мед ошкасны Господьлысь нимсӧ, ӧд Сылӧн нимыс ставсьыныс медвылын, Сылӧн дзирдлуныс петкӧдчӧ му вылын и енэжын.
Сійӧ вынсьӧдіс Ассьыс войтырсӧ, медым Сійӧс ошкис Сылӧн эскана войтырыс, Израиль войтыр, коді матын Сылы.
Аллилуйя!
{Еврей йӧз (комиӧдіс Kodko) @ 149 псалом @ религ. гижӧд @ Библия @ 2021 @ Лб. .}
149 псалом
Аллилуйя!
Сьылӧй Господьлы выль сьыланкыв, эскана войтырлӧн чукӧртчӧмын ошкӧй Сійӧс!
Гажӧдчы, Израиль, тэнӧ Вӧчысь йылысь!
Нимкодясьӧй, сионса олысьяс, асланыд Ӧксы йылысь!
Ошкӧй Сылысь нимсӧ йӧктӧмӧн, сьылӧй Сылы тимпанӧн да гуслиӧн ворсӧмӧн. Ӧд Господь радейтӧ Ассьыс войтырсӧ, рам сьӧлӧмаясӧс мичмӧдӧ мездмӧмӧн.
Эскана войтыр мед гажӧдчас Сылӧн дзирдлун вӧсна, найӧ мед нимкодясясны вольпасьын куйліганыс.
Налӧн вомысь мед кыптас Енлы ошкӧмыс, кианыс мед босьтасны кыкнанладорсяньыс лэчтӧм шыпурт, сыӧн мед водзӧс перъясны войтыръяслысь, мыждасны войтыръясӧс. Найӧ мед кӧрталасны войтыръяслысь ӧксыяссӧ, мед дорасны чепъясӧн налысь юралысьяссӧ. Тадзи лоӧ веськыда мыждӧма войтыръясӧс, кыдзи вӧлі гижӧма на йылысь.
Тадзи лоӧ нимӧдӧма эскана войтырӧс.
Аллилуйя!
{Еврей йӧз (комиӧдіс Kodko) @ 150 псалом @ религ. гижӧд @ Библия @ 2021 @ Лб. .}
150 псалом
Аллилуйя!
Ошкӧй Енмӧс Сылӧн вежаинын, ошкӧй Сійӧс енэжъясын!
Ошкӧй Сійӧс вына уджъяссьыс, ошкӧй Сійӧс, ӧд Сійӧ вывті ыджыд!
Ошкӧй Сійӧс буксан шы улӧ, ошкӧй Сійӧс арфаӧн да гуслиӧн ворсӧмӧн!
Ошкӧй Сійӧс тимпан шы улӧ йӧктӧмӧн, ошкӧй Сійӧс струнаа ворсанторйӧн да пӧлянӧн!
Ошкӧй Сійӧс мичаа тіньгысь кимвалӧн, ошкӧй Сійӧс гораа юргысь кимвалӧн!
Став ловъя олысьыс мед ошкас Господьӧс!
Аллилуйя!
{Еврей йӧз (комиӧдіс Kodko) @ 151 псалом @ религ. гижӧд @ Библия @ 2021 @ Лб. .}
151 псалом
[Голиафкӧд тышкасьӧм бӧрын Давидлӧн псалом.
Ме вӧлі медічӧт аслам вокъяс пӧвстысь, медтом — аслам батьлӧн керкаын.
Ме видзи батьлысь ыжъяссӧ.
Аслам киӧн ме вӧчи ворсантор, менам чуньясӧй ворсісны арфаӧн.
Коді висьталіс та йылысь менам Господьлы?
Господь Ачыс, Ачыс кыліс менӧ.
Сійӧ мӧдӧдіс ме дінӧ юӧртысьӧс, босьтіс менӧ батьӧйлӧн ыжъяс дінысь, мавтыштіс менӧ Аслас выйӧн.
Менам вокъясӧй вынаӧсь да статяӧсь, но Господь эз бӧрйы найӧс.
Ме петі тышӧ ентӧдтӧмлы паныд, и сійӧ ёрис менӧ аслас идолъясӧн.
Но ме перйи сылысь шыпуртсӧ да керышті сылысь юрсӧ. Тадзи ме мезді Израиль войтырӧс яналӧмысь.]
{Еврей йӧз (комиӧдіс Kodko) @ Шусьӧгъяс @ религ. гижӧд @ Библия @ 2021 @ Лб. .}
Израильса Соломон ӧксылӧн, Давид пилӧн, шусьӧгъяс.
abu
Тайӧ шусьӧгъясыс велӧдӧны да сетӧны мывкыдлун, отсалӧны гӧгӧрвоны мывкыд шуӧмъяс, велӧдӧны бур оласногӧ, веськыдлунӧ, веськыда вӧчӧмӧ да збыльӧ.
Кага вежӧралы найӧ сетӧны сюсьлун, том мортлы — тӧдӧмлун да вежӧр.
Мывкыда морт кывзас да сюсьджык лоӧ, вежӧра морт аддзас аслыс туйдӧдӧм, гӧгӧрвоас шусьӧгъяссӧ да кывйӧзъяссӧ, мывкыд йӧзлысь шуӧм кывъяссӧ да нӧдкывъяссӧ.
Тӧдӧмлуныс чужӧ Господьысь полӧмсянь, [Сыысь полӧмӧн олысь — вежӧра морт, Господьӧс пыдди пуктӧмсянь чужӧ вежӧрлуныс,] сӧмын вежӧртӧм йӧз мустӧмтӧны мывкыдлунсӧ да велӧдӧмсӧ.
Пиӧй, кывзы батьыдлысь велӧдӧмсӧ, эн ӧтдорт мамыдлысь туйдӧдӧмсӧ. Налӧн велӧдӧмыс — тэнад юр вылӧ пуктӧм мича юркытш кодь, сьылітӧ мичмӧдысь сикӧтш кодь.
Эн сетчы, пиӧй, тэнӧ кӧ мыж вӧчысьяс кутасны ыштӧдны да шуны: «Мунам миянкӧд, кыйӧдам да виам мыжтӧмӧс, пыдӧстӧмин моз ньылыштам ловйӧн, ловъявывсьыс сійӧс гуалам.
Босьтам сылысь быдсяма донаторсӧ, тыртам керканымӧс мырддялӧм эмбурнас, пудъясьӧмӧн юклам ас костаным, миян лоӧ ӧти куд».
Пиӧй, эн мун накӧд, налӧн туй вылӧ весиг кок пӧвнад эн тувччы. Налӧн кокныс котӧртӧ лёксӧ вӧчны, тэрмасьӧ вир кисьтны.
Лэбачыд кӧ аддзылас лэч октӧмсӧ, сэтчӧ оз шедӧдчы, а тайӧ йӧзыс ассьыныс вирсӧ кисьтны дасьӧсь, асланыс ловлы лэчсӧ пуктӧны.
Татшӧм туйыс сылӧн, коді горшасьӧ йӧз эмбур вылӧ, сэті мунысь воштӧ ловсӧ.
Мывкыдлуныс ывлаын юӧртӧ, изэрдъяс вылын шыалӧ-горалӧ, йӧзаинъясын чуксалӧ, карса дзиръя дорын шыасьӧ:
«Дыр-ӧ на ті, мывкыдтӧмъяс, кутанныд овны мывкыдтӧма, ті, омӧльтысьяс, — омӧльтны мывкыдлунсӧ, а ті, вежӧртӧмъяс, — мустӧмтны тӧдӧмлунсӧ?
Кывзӧй менсьым янӧдӧмӧс, ме тырта тіянӧс мывкыдлунӧн, тӧдмӧда тіянӧс аслам кывъясӧн.
Ме кори, но ті энӧ кывзысьӧй, киӧс нюжӧді, но некод меным вочасӧ эз пет.
Ті ӧтдортінныд менсьым туйдӧдӧмӧс, менсьым янӧдӧмӧс энӧ сибӧдӧй.
Та вӧсна ме кута серавны, кор ті кутанныд сьӧкыдсӧ нуны, кута нимкодясьны, кор тіянӧс полӧмыс босьтас, кор полӧмыс гартыштас тіянӧс тӧвныр моз, сьӧкыдыс суас тіянӧс турӧб моз, шогалӧм-дзескӧдӧмыс тіян вылӧ воас.
Сэки ті кутанныд чуксавны менӧ, а ме ог кыв, кутанныд корсьысьны менӧ, но онӧ аддзӧй.
Ӧд тӧдӧмлунсӧ ті мустӧмтінныд, Господьысь полӧмсӧ энӧ бӧрйӧй, менсьым туйдӧдӧмӧс энӧ сибӧдӧй, менсьым янӧдӧмӧс нинӧмӧ пуктінныд.
Та вӧсна понданныд сёйны, мый быдтінныд, кутанныд пӧткӧдчыны асланыд лёк мӧвпъясӧн.
Мывкыдтӧм мортлӧн асныралӧмыс виас сійӧс, вежӧртӧмлӧн кокньыд оласногыс бырӧдас сійӧс. Но менӧ кывзысь пондас овны повтӧг да лӧня, сылы оз ков повны лёксьыс».
Пиӧй, менсьым кывъясӧс кӧ сибӧдан и тшӧктӧмъясӧс видзан сьӧлӧмад, пельтӧ кӧ бергӧдан мывкыдыслань и сьӧлӧмтӧ веськӧдан гӧгӧрвоны, чукӧстан кӧ тӧдӧмлунсӧ и гора шыӧн коран вежӧрсӧ, эзысьӧс моз кӧ кутан корсьны сійӧс и донасьыс-донаторйӧс моз корсьысьны, сэки тӧдмалан, мый сійӧ Господьысь полӧмыс, да гӧгӧрвоан, мый сійӧ Енсӧ тӧдӧмыс.
Ӧд мывкыдлунсӧ сетӧ Господь, тӧдӧмлуныс да вежӧрсялӧмыс локтӧ Сысянь.
Веськыда олысьӧс Енмыс мездӧ, сӧстӧма олысьӧс Сійӧ сайӧдӧ, Веськыд туйяс бӧрся Сійӧ видзӧдӧ, Сылы эскысьлысь туйсӧ видзӧ.
Тэ кӧ кывзан менӧ, сэки гӧгӧрвоан, мый сэтшӧм веськыдлуныс, веськыда вӧчӧмыс да збыльыс, тӧдмалан бурыслысь туйсӧ.
Мывкыдлуныс овмӧдчас сьӧлӧмад, тӧдӧмлуныс долыдмӧдас ловтӧ. Сюсь вежӧрыд пондас видзны тэнӧ, гӧгӧрвоӧмыд тэнӧ доръяс. Мывкыдлуныс мездас тэнӧ лёк туйысь, видзас тэнӧ ылӧг вома мортысь, веськыд туйсӧ эновтысь йӧзысь, пемыдыслӧн туйӧд ветлысь войтырысь.
Найӧ нимкодясьӧны лёк вӧчӧмнас, ошйысьӧны ылӧгнас, налӧн туйясыс чукыльӧсь, та вӧсна найӧ вошӧны.
Мывкыдлуныс видзӧ тэнӧ йӧз гӧтырысь, аньысь, коді небыд кывъяснас кыскӧ ас дінас. Сійӧ эновтӧма томдырся верӧссӧ, вунӧдӧма Ен водзын кӧрталӧм йитӧдсӧ.
Сылӧн керкаыс — кулӧмыслӧн нальк, сылӧн туйыс вайӧдӧ кулӧмаяс дінӧ.
Сы ордӧ пырысь бӧрсӧ оз пет, олӧмыслысь туйсӧ оз нин аддзы.
Сідзкӧ, ветлы бур йӧзлӧн туйӧд, веськыда олысьяс моз ов. Ӧд веськыда олысьяс му вылын водзӧ оласны, сӧстӧмъяс сэні ловъяӧсь кольӧны.
А лёк вӧчысьясӧс лоӧ бырӧдӧма му вывсьыс, ылӧдчысьясӧс лоӧ нетшыштӧма вужнас.
Пиӧй, эн вунӧд менсьым туйдӧдӧмӧс, сьӧлӧмад видз менсьым тшӧктӧмъясӧс, ӧд найӧ содтасны тэнсьыд олан лунъястӧ, ваясны тэныд лӧнь олӧм.
Эн эновт буралӧмсӧ да збыльсӧ, гартышт найӧс сьылі гӧгӧрыд, гиж найӧс сьӧлӧмад. Сэки буралӧмыс да муслуныс Енсянь да йӧзсянь тэныд лоас.
Эскы Господьлы став сьӧлӧмнад, эн аслад вежӧр вылӧ подулась.
Став аслад туйясын Господьӧс тӧдмав, тэнсьыд туйястӧ Сійӧ веськыдӧн вӧчас.
Асьтӧ сюсьӧ эн пукты, Господьысь пов да ылыстчы лёксьыс.
Вир-яйыдлы тайӧ дзоньвидзалун ваяс, тэнсьыд лыястӧ ёнмӧдас.
Пыдди пукты Господьӧс — сет аслад эмбурысь, вай Сылы ассьыд медводдза няньтӧ да вотӧстӧ, сэки тэнад йӧртӧдъясыд чукйӧн тырасны, вийӧданінсьыд пондас тюргыны вина.
Пиӧй, эн ӧтдорт Господьлысь чирыштӧмсӧ, эн дӧзмы Сылӧн ӧлӧдӧмысь.
Ӧд Господь чирыштӧ сійӧс, кодӧс радейтӧ, кыдзи бать чирыштӧ ассьыс муса писӧ.
Шуда сійӧ, коді аддзӧ мывкыдлунсӧ, майбыр сійӧ, коді вежӧрсялӧ.
Мывкыдлуныс ӧд эзысь дорысь бурджык, зарни дорысь сійӧ унджык сетӧ.
Дона изъясысь сійӧ донаджык, некутшӧм кӧсйӧмтор он ӧткодяв сыкӧд. [Лёкыс оз вермы сылы паныд сувтны, сійӧс тӧдӧны сы дінӧ матыстчысьяс.]
Веськыд киас сылӧн — кузь нэм, шуйгаас — озырлун да пыдди пуктӧм.
[Сылӧн вомысь петӧ збыльыс, сійӧ висьталӧ Индӧд да буралӧм йылысь.]
Туйясыс сылӧн бурӧсь, ордымъясыс сылӧн лӧсьыдӧсь.
Мывкыдлуныс — олӧмыслӧн пу налы, кодъяс босьтӧны сійӧс, майбырӧсь найӧ, кодъяс видзӧны сійӧс.
Мывкыдлуннас Господь вӧчис мусӧ, Аслас вежӧрӧн вӧчис енэжсӧ.
Аслас тӧдӧмлуннас Сійӧ восьтіс пыдӧстӧм йиръяс, кымӧръяслы Сійӧ тшӧктіс разӧдны ва.
Пиӧй, видз вежӧртӧ да мывкыдлунтӧ, эн ылыстчы наысь, ӧд наын — тэнад олӧмыд, найӧ мичмӧдӧны тэнсьыд сьылітӧ.
Сэки повтӧг мунан аслад туйӧд, он крукась, он дойд коктӧ, узьны водігад он кут повны, унмыд лоӧ чӧскыд.
Он повзьы, кор лёкыс суас виччысьтӧг, он повзьы, кор мыж вӧчысьясӧс суас бырӧдӧмыс, ӧд тэнад лачаыд — Господь, Сійӧ видзас коктӧ налькйӧ шедӧмысь.
Тэ кӧ верман бурсӧ вӧчны, вӧч, кодлы тайӧ колӧ.
Тэнад кӧ эм мый сетны, эн шу матыссаыдлы: «Ӧні мун да аски волы, аски сета тэныд».
[Тэ ӧд он тӧд, мый аскиа луныс ваяс.]
Матыссаыдлы, коді олӧ тэкӧд лӧня, лёк вӧчны эн мӧвпав.
Мортыс кӧ эз вӧч тэныд лёксӧ, эн вензьы сыкӧд нинӧм абусьыс.
Эн вежав лёк вӧчысьлы, сылысь туйсӧ эн бӧрйы.
Наян сьӧлӧмаыд — зывӧк Господьлы, веськыда олысьыд — Сылӧн ёрт.
Лёк вӧчысьлӧн керкаыс Господьлӧн ёрӧм улын, а веськыда олысьлысь керкасӧ Сійӧ бурсиӧ.
Омӧльтысьясӧс Господь омӧльтӧ, а рамъяс дінӧ Сійӧ буралӧ.
Мывкыд йӧз кутасны нимавны, а вежӧртӧмъяс яналасны.
Пиянӧй, кывзӧй батьнытӧ, кылӧй велӧдӧмсӧ да вежӧрсялӧй. Ме велӧда тіянӧс бурас, энӧ вунӧдӧй менсьым туйдӧдӧмӧс.
Менӧ, ӧтка пиӧс, мамӧй видзис, батьӧй менӧ велӧдіс тадзи: «Менсьым кывъясӧс пукты сьӧлӧмад, тшӧктӧмъясӧс видз да ов на серти.
Мывкыдмы, вежӧрсяв, эн вунӧд менсьым кывъясӧс, эн кеж менам шуӧмысь.
Эн эновт мывкыдлунсӧ, и сійӧ видзас тэнӧ, радейт мывкыдлунсӧ, и сійӧ доръяс тэнӧ.
Олӧмас медся коланаыс — мывкыдлун, корсь сійӧс, ставсӧ сет, медым вежӧрсявны.
Вылӧ пукты мывкыдлунсӧ, и сійӧ кыпӧдас тэнӧ, сибӧд мывкыдлунсӧ, и сійӧ нимӧдас тэнӧ.
Мича юркытш сійӧ пуктас юр вылад, дзирдалана юркытш ваяс тэныд».
Кывзы, пиӧй, сибӧд менсьым кывъясӧс, и тэнад нэмыд нюжалас.
Ме инда тэныд мывкыдлуныслысь туйсӧ, нуӧда тэнӧ веськыд ордымӧд.
Воськовтан да, воськолыд лоӧ зумыд, котӧртан да, он крукась.
Велӧдӧмӧй серти ов, эн коль сійӧс, видз сійӧс, ӧд сэні тэнад олӧмыд.
Мыж вӧчысьяс туйӧд эн ветлы, лёк йӧз туй вылӧ эн сувт.
Ылыстчы налӧн туйысь, эн мун сэті, кеж сэтысь, мун бокиті.
Найӧ оз вермыны унмовсьны, оз кӧ вӧчны лёксӧ, налӧн унмыс вошӧ, оз кӧ дойдны кодӧскӧ.
Ӧд лёк вӧчӧмыс налы нянь сёйӧм кодь, виалӧм-дзескӧдӧмыс — вина юӧм кодь.
Веськыда олысьлӧн туйыс — асъя югӧр кодь, сійӧ ӧтарӧ югдӧ луншӧра югыдӧдз.
Лёк вӧчысьлӧн туйыс — пемыдсьыс-пемыд, сійӧ оз тӧд кытчӧ крукасяс.
Пиӧй, кывзы менсьым кывъясӧс, менам сёрнилань бергӧд пельтӧ.
Эн вешты кывъясӧс син водзсьыд, видз найӧс сьӧлӧмад, ӧд найӧс аддзысь аддзӧ олӧмсӧ, аслас вир-яйыслы — дзоньвидзалунсӧ.
Ставсьыс медъёна видз ассьыд сьӧлӧмтӧ, ӧд сьӧлӧмыд — олӧмыслӧн визувтанін.
Вомсьыд мед пӧръясьӧм оз пет, ылӧг сёрни ас дінсьыд вӧтлы.
Синмыд мед видзӧдас веськыда, видзӧдласыд мед лоӧ сӧстӧм.
Мӧвпышт, кутшӧм туйӧд мунны, воськовъясыд мед лоӧны зумыдӧсь.
Веськыдвылӧ ни шуйгавылӧ эн кеж, кокыд мед лоӧ ылын лёксьыс. [Господь тӧдӧ веськыд туйяссӧ, чукля туйясыд Сылы шогмытӧмӧсь.
Сійӧ веськӧдас тэнсьыд туйтӧ, тэ кутан восьлавны повтӧг.]
Пиӧй, кывзы менсьым мывкыд кывъясӧс, эн тупкы пельтӧ меысь, сэки тэ видзан вежӧртӧ, вомнад висьталан тӧдӧмлунсӧ. 
[Эн кывзы леститчысь аньӧс.]
Йӧз гӧтырыдлӧн сёрниыс ма моз визувтӧ, выйысь небыдджыка на мавтыштӧ, но бӧрыннас курыд быдмӧгысь моз сійӧ курдас тэныд, бытшйӧдлас кыкнанладорсяньыс лэчтӧм шыпурт моз.
Сылӧн кокыс вайӧдӧ кулӧмӧ, воськовъясыс помасьӧны пыдӧстӧминын.
Сійӧ оз кӧсйы тӧдны олан туйсӧ, оз тӧд, кытчӧ вайӧдас сылӧн туйыс.
Пиӧй, кывзы менӧ, эн ӧтдорт менсьым кывъясӧс.
Йӧз гӧтыр дінысь ылыстчы, сылӧн керка ӧдзӧслань эн матыстчы. Матыстчан кӧ, вынтӧ сетан мукӧдлы, олан лунъястӧ — тэнӧ дойдысьлы, озырлуныд вуджас мӧдъяслы, уджыд — йӧз керкалы.
Кор эбӧсыд бырас да вир-яйыд жебмас, сэки тэ ышловзьӧмӧн шуан: «Мыйла нӧ ме мустӧмті велӧдӧмсӧ, мыйла сьӧлӧмӧй нинӧмӧ пуктіс ӧлӧдӧмсӧ? Мыйла эг кывзы, кор менӧ велӧдісны, мыйла пельӧс тупки, кор менӧ туйдӧдісны?
Нӧшта воськов, и ме эськӧ яналі йӧз чукӧр водзын!»
Аслад юкмӧсысь ю васӧ, аслад дзулькйысь — визувтан васӧ.
Тэнад дзулькйысь ваыд мед оз киськась ывлаӧ, мед оз визувт изэрд вылӧ.
Тэнад ӧтнадлӧн сійӧ мед лоас, эн юк сійӧс мукӧдкӧд.
Мед бурсиӧма лоас тэнад ва петаніныд, нимкодясь аслад том кадся гӧтырӧн, аслад сьӧлӧмшӧрӧн, тэрыб вӧраса мича аньӧн. Сылӧн морӧс бердын мед быд кадӧ лоӧ лӧсьыд тэныд, сылӧн муслуныс мед пыр юкталас тэнӧ.
Пиӧй, мыйла тэныд ылавнысӧ, мыйла кутлыны мӧдлысь гӧтырсӧ?
Господь аддзӧ мортлысь туйяссӧ, став туйсӧ сылысь мурталӧ.
Лёк вӧчысьӧс сылӧн вӧчӧмторъясыс кыйӧны, мыжыслӧн кӧртӧдӧ сійӧ ачыс шедӧ.
Сійӧ велӧдтӧгыд кулӧ, аслас йӧйталӧм помысь вошӧ.
Пиӧй, аслад матысса вӧсна кӧ кӧсйысин, кыв сетін йӧзлысь уджйӧзсӧ мынтыны, тэ аслад кывъясӧн асьтӧ кӧрталін, вомсьыд петан кывъясӧн асьтӧ тывъялін.
Пиӧй, мезды асьтӧ матыссалӧн кипод улысь, мун уськӧдчы сылы кок улас да кевмы, синтӧ эн кунь, эн вуграв.
Морт киӧ шедӧм газель моз, кыйсьысь киӧ веськалӧм лэбач моз мезды асьтӧ.
Дышӧдчысь, видзӧд кодзувкот бӧрся, видзӧд, кыдзи сійӧ уджалӧ. Вежӧрсяв!
Юралысьыс сылӧн абу, веськӧдлысьыс ни ыджыдалысьыс абу, но сійӧ гожӧмнас дасьтӧ сёянсӧ, вундан кадӧ чукӧртӧ няньсӧ.
[Либӧ ветлы видзӧдлы мазі вылӧ, кутшӧм сійӧ зіль. Сійӧ вӧчӧ бур удж, вайӧ дзоньвидзалун ӧксыяслы да прӧстӧй йӧзлы.
Быдӧн сійӧс радейтӧ да ошкӧ, мед кӧ сылӧн выныс этша, но мывкыдлуныс уна.]
Дыр-ӧ на тэ, дышӧдчысь, пондан узьны, кор нин палялан аслад унмысь?
Узьыштан, вугралыштан, китӧ сюркнялӧмӧн пукалыштан, да он и казяв, кыдзи шӧйтысь моз гӧльлуныд локтас, гусясьысь моз тшыгъялӧмыд пырас.
[А он кӧ дышӧдчы, ва моз ыльӧбтас-воас вундан кадыд, гӧльлуныд пышъяс тэ дінысь.]
Лёк вӧчысь — шогмытӧм морт, сійӧ ветлӧ-пӧръясьӧ, синсӧ читкыралӧ, ки-кок отсӧгӧн пасъяс петкӧдлӧ.
Сійӧ — ылӧг сьӧлӧма, пыр мӧвпалӧ лёк вӧчны, дугдывтӧг кӧдзӧ зыксьӧм.
Таысь сійӧс виччысьтӧг суас шогыс, тӧдлытӧг сійӧс лоӧ жугӧдӧма, и сійӧ оз нин бурд.
Со, квайттор, мый мустӧмтӧ Господь, весиг сизимтор, мый зывӧктӧ: ыкша * син, пӧръясьысь кыв, мыжтӧмлысь вир кисьтысь ки, лёк вӧчны мӧвпалысь сьӧлӧм, лёк вӧчны котӧртысь кок, ылӧг висьталысьӧс, коді содталӧ-лӧсьӧдлӧ, да сійӧс, коді вокъяс костын панӧ зык-вен.
Пиӧй, видз батьыдлысь тшӧктӧмъяссӧ, эн ӧтдорт мамыдлысь туйдӧдӧмсӧ.
Пыр кежлӧ пукты найӧс сьӧлӧмад, гартышт найӧс сьылі гӧгӧрыд.
Кутан мунны — и найӧ нуӧдасны тэнӧ, водан узьны — и видзасны тэнӧ, садьман — и пондасны сёрнитны тэкӧд.
Тшӧктӧмыс югыд вайӧ, туйдӧдӧмыс югдӧдӧ, ӧлӧдӧмыс олӧмӧ бергӧдӧ. Найӧ видзасны тэнӧ шогмытӧм аньысь, йӧз гӧтырлӧн мавтыштан сёрниысь.
Сьӧлӧмад эн ышты сылӧн мичлуныс вылӧ, [синмыд мед оз корсь сійӧс,] син лапйӧдлӧмнас мед оз тывйышт тэнӧ.
Киысь киӧ ветлысь аньлы няньӧн мынтысян, а йӧз гӧтыр вӧсна тэ меддонаторсӧ, олӧмтӧ, воштан.
Вермас-ӧ кодкӧ питшӧгас би новлӧдлыны ассьыс паськӧмсӧ соттӧг?
Вермас-ӧ кодкӧ биа ӧгыр вывті ветлӧдлыны ассьыс коксӧ соттӧг?
Тадзи лоӧ сыкӧд, коді ветлӧ йӧз гӧтыр дінӧ, мыждытӧг оз коль сійӧ, коді инмӧдчӧ мӧдлӧн гӧтыр дінӧ.
Мустӧмтӧны-ӧ сійӧс, коді гусясьӧ тшыгъялӧм вӧсна?
Но кутасны кӧ сійӧс, вештысяс сизим пӧвстӧн, керкасьыс став эмбурсӧ сетас.
Йӧз гӧтыркӧд кырсалысь воштӧма вежӧрсӧ, кырсалӧмнас сійӧ ассьыс ловсӧ виӧ.
Сійӧс виччысьӧ нӧйтӧм да янӧдӧм, пеж вӧчӧмыс сылӧн оз вушйы. Вежӧгтысь верӧсыд скӧрмӧ, жалиттӧг водзӧссӧ перйӧ, оз босьт некутшӧм дон, оз сайкав, кӧть кутшӧм козин сылы он сет.
Пиӧй, видз менсьым кывъясӧс, тшӧктӧмъясӧс дзеб сьӧлӧмад. 
[Пиӧй, вылӧ пукты Господьӧс, сэки ён лоан, Сыысь кындзи некодысь эн пов.]
Ов менам туйдӧдӧм да тшӧктӧмъяс серти, синтӧ моз найӧс видз, чунькытш моз найӧс новлы, гиж найӧс сьӧлӧмад.
Мывкыдлуныслы шу: «Тэ менам чой», вежӧрсӧ шу аслад рӧдвужӧн. Сэки найӧ видзасны тэнӧ йӧз гӧтырысь, аньысь, коді небыд кывъяснас кыскӧ ас дінас.
Коркӧ ӧшиньӧд ывлаӧ видзӧдіг, ӧшинь тас пырыс ме аддзи: мывкыдтӧм томулов пӧвстын бергаліс вежӧртӧм зон. Туй вывті мунігас туйвежӧ воис да, ань керкалань веськӧдчис рытъя рӧмыднас, пемыд вой пуксигӧн.
Сылы воча петіс аньыс, кырсалан паськӧма, наян сьӧлӧма, этш тӧдтӧм да ӧвсьытӧм, гортас сылы оз овсьы, туй вылӧ, изэрд вылӧ петалӧ, быд пельӧссянь кыйӧдчӧ.
Ань кутліс-окаліс зонмӧс, яндысьтӧг шуаліс сылы:
«Бурасян вись ме вайи, кыв сетан вись талун вайи.
Та вӧсна петі тэнӧ паныдавны, корси тэнӧ да аддзи.
Вольпасьӧс мичмӧді египетса уна рӧма дӧраӧн, узьланінӧс резі смирнаӧн, алоэӧн да корицаӧн.
Лок мунам, асылӧдзыс мусукасям, сьӧлӧм бурмытӧдз гажӧдчам. Верӧсӧй ылі туйын, гортын дыр на оз ло.
Сійӧ босьтӧма аскӧдыс сьӧм, гортӧ воас, кор енэжас тӧлысьыс тырвыйӧ содас».
Ань ылӧдліс зонмӧс мелі сёрнинас, кыскис ас дорас небыд кывъяснас.
Начкыны нуӧдан ӧш моз, [чеп йылӧ домалӧм пон моз,] лыйлыны нуӧдан кӧр моз зонмыд ань бӧрся муніс.
Дзугйӧ шыбитчысь лэбач моз сійӧ эз тӧд, мый олӧмсӧ воштас, мый сылысь муссӧ ньӧв розьӧдас.
Пиянӧй, кывзӧй менӧ, пель саяныд сюркнялӧй менсьым кывъясӧс.
Тэнад сьӧлӧмыд мед оз вӧтлысь йӧз гӧтыр бӧрся, эн шӧйт сылӧн туй вывті. Сійӧ унаӧс нин дойдіс-уськӧдіс, уна мортӧс сійӧ виис.
Сы керкасянь туйыс вайӧдӧ пыдӧстӧминӧ, нуӧдӧ кулӧмыслӧн жыръясӧ.
Мывкыдыс чуксалӧ, вежӧрыс гӧлӧссӧ кыпӧдӧ.
Туйбокса керӧсъяс вылын, туйвежъясын сійӧ сулалӧ.
Карса дзиръя дорын сійӧ чуксалӧ, карӧ пыранінын шыалӧ:
«Дона йӧз, тіян дорӧ шыася, морт пиянлы висьтала.
Кага мывкыдаяс, велӧдчӧй сюсьлунӧ, мывкыдтӧмъяс, вежӧрсялӧй.
Кывзӧй, ӧд ме висьтала коланасӧ, менам вомӧй сёрнитӧ веськыда.
Ме висьтала збыльсӧ, менам вомӧй зывӧктӧ лёксӧ.
Менам кывъясӧй веськыдӧсь, менам сёрниын наянлуныс да ылӧгыс абу.
Вежӧра мортлы найӧ ясыдӧсь, тӧдӧмлунсӧ корсьысьлы — веськыдӧсь.
Энӧ эзысь, а менсьым велӧдӧмӧс босьтӧй, энӧ весалӧм зарни, а тӧдӧмлунсӧ сибӧдӧй, мывкыдлуныс ӧд дона изйысь на бурджык, некутшӧм кӧсйӧмтор оз позь ӧткодявны сыкӧд.
Ме — мывкыдлуныс, ола сюсьлункӧд, тӧдӧмлуныс да вежӧрыс — мекӧд.
Коді Господьысь полӧ, сійӧ мустӧмтӧ лёксӧ.
Тшапитчӧм да асьтӧ вылӧ пуктӧм, лёк оласног да ылӧг сёрни ме мустӧмта.
Туйдӧдӧмыс да мывкыда олӧмыс месянь локтӧ, гӧгӧрвоӧмсӧ да вынсӧ ме сета.
Ме отсӧгӧн ӧксыяс юралӧны, ыджыдалысьяс веськыд индӧдъяс гижӧны.
Ме отсӧгӧн юралӧны юралысьяс, веськӧдлысьяс да ёрдысьяс.
Менӧ радейтысьӧс ме радейта, менӧ корсьысь аддзас менӧ.
Месянь — озырлун да пыдди пуктӧм, бырлытӧм эмбур да веськыда олӧм.
Менам вотӧсӧй сӧстӧм зарниысь бурджык, менам козинӧй весалӧм эзысь дорысь донаджык.
Ме ветла веськыдлуныслӧн туйӧд, веськыда вӧчӧмыслӧн ордымӧд, менӧ радейтысьлы ме озырлун козьнала, сылысь йӧртӧдъяссӧ чукйӧдзыс тырта.
[Быдлунсяыс йылысь висьталігӧн ме ог вунӧдлы и бырлытӧмыс йылысь.]
Ме вӧлі Господькӧд, кор Сійӧ паніс уджсӧ, кор Сылӧн вӧчӧмторъясыс эз на вӧвны.
Кадсӧ арталӧмыс эз на вӧв, а ме вӧлі нин, му пуксьытӧдзыс на ме вӧлі.
Ме чужи йиръяс артмӧдтӧдз, ва петанінъяс вӧчтӧдз.
Ме чужи керӧсъяс сувтӧдтӧдз, кор мылькъяс эз на мыччысьны, кор Енмыс эз на вӧч мусӧ да видзьяссӧ, кор муюгыдас весиг лыа чир на эз вӧв.
Кор Енмыс вӧчис енэжсӧ, ме вӧлі сэні, вӧлі, кор йир весьтас серпасаліс му кытшсӧ, кор выліас сувтӧдіс кымӧръяс, вынаӧн вӧчис йирпытшса ва петанінъяс, кор саридзлы тшӧктіс кутны васӧ, пуктіс муыслы подувсӧ.
Сэки Ен дорын ме киподтуя вӧчасьысьнас вӧлі, быд лун нимкодьлун вайи, Сы водзын дугдывтӧг гажӧдчи, Сылӧн му вӧсна нимкодяси, и морт пиян сетісны меным долыдлун.
Ныв-пиӧй, кывзӧй менӧ!
Майбырӧсь менам туйӧд ветлысьяс.
Кывзӧй велӧдӧмӧс да вежӧрсялӧй, энӧ кежӧй менам туйдӧдӧмысь.
Майбыр менӧ кывзысь, коді быд лун сулалӧ менам дзиръя дорын, видзӧдӧ менам ӧдзӧсӧ.
Менӧ аддзысь аддзӧ олӧм, сылы Господьсянь бурыс вуджӧ.
Меным паныд мыж вӧчысь аслыс лёксӧ вӧчӧ, менӧ мустӧмтысь кулӧмсӧ радейтӧ».
Мывкыдлуныс лэптіс аслыс керка, сувтӧдіс сизим сюръя. Начкис пемӧсъяссӧ, дасьтіс вина да лӧсьӧдіс пызан.
Кесйӧг аньясӧс ыстіс карӧ, вывтасінъяссянь тшӧктіс горӧдны:
«Коді мывкыдтӧм, лок ме ордӧ!»
Гӧгӧрвотӧм йӧзлы тшӧктіс шуны:
«Локтӧй, сёйӧй менсьым няньӧс да юӧй менсьым винаӧс.
Ветлӧй мывкыдлуныслӧн туйӧд, кольӧй мывкыдтӧм оласногнытӧ, медым овны».
Коді велӧдӧ омӧльтысьӧс, ачыс яналӧ, коді чирыштӧ лёк вӧчысьӧс, асьсӧ лякӧсьтӧ.
Эн чирышт омӧльтысьӧс — сійӧ мустӧмтас тэнӧ.
Чирышт мывкыд мортӧс — сылы тэ муса лоан.
Мывкыд мортӧс туйдӧд, и сылӧн содас мывкыдлуныс.
Веськыда олысьӧс велӧд, и сылӧн содас тӧдӧмлуныс.
Мывкыдлуныс чужӧ Господьысь полӧмсянь, вежӧрлуныс — вежа Енмӧс тӧдӧмсянь.
Ме, мывкыдлуныс, олан лунъястӧ тэнсьыд содта, олан воястӧ тэнсьыд нюжӧда.
[Пиӧй!] Тэ кӧ мывкыд морт, тэныд [да матыссаыдлы] таысь бур, мывкыдлунсӧ кӧ омӧльтан, ачыд сьӧкыдсӧ нуан.
[Ылӧдчысьлӧн сёрниыс — тӧв пӧльыштӧм кодь, лэбач бӧрся вӧтлысьӧм кодь, ӧд сійӧ эновтӧ виноград йӧрӧ нуӧдан туйсӧ, вошӧ да ассьыс видз-мусӧ оз аддзы.
Сійӧ ватӧм овтӧминті ветлӧ, косьмӧм муяс вуджӧ, абутӧмторсӧ чукӧртӧ.]
Мывкыдтӧмлуныс — кокни вежӧра ань кодь, гӧгӧрвотӧм, нинӧм оз тӧд. Сійӧ пукалӧ аслас керка ӧдзӧс дорас, сылӧн пуклӧсыс — карса вывтасінын. Ветлысь-мунысьӧс сійӧ коралӧ, асланыс туйӧд мунысьясӧс чуксалӧ:
«Коді мывкыдтӧм, лок ме ордӧ!»
Гӧгӧрвотӧм мортлы сійӧ шуӧ: «Гусялӧм ваыд юмов, дзебӧм няньыд чӧскыд».
Но гӧгӧрвотӧм морт оз тӧд, мый ань чуксалӧ сійӧс кулӧмаяс дінӧ, пыдӧстӧминӧ, кӧні эмӧсь нин сылӧн корӧмаясыс. 
[Но тэ вешйы бокӧ, эн сулав орччӧн, тайӧ аньыс вылӧ эн видзӧд, ӧд тадзи кӧ вӧчан, йӧз ваӧ пыран.
Йӧз ва дорысь ылӧджык мун, йӧз юкмӧсысь васӧ эн ю, медым олан нэмыд вӧлі кузь, медым воясыд тэнад содісны.]
abu
Соломонлӧн шусьӧгъяс.
Мывкыд пи гажӧдӧ батьсӧ, вежӧртӧм пи мамыслы шог вайӧ.
Ылӧдчӧмӧн озырмӧдчӧмыд бурсӧ оз вай, но веськыдлуныд мездӧ кулӧмысь.
Веськыда олысьлы Господь оз сет тшыгъявны, лёк вӧчысьлысь кӧсйӧмсӧ Сійӧ оз збыльмӧд.
Дышӧдчысь киыд гӧльмӧдӧ, а зільыд — озырмӧдӧ.
Вотӧссӧ гожӧмнас чукӧртысь — мывкыд морт, а вундан кадӧ узьысь асьсӧ янӧдӧ.
Бурсиӧмыс — веськыда олысьлӧн юр вылас, лёкыс — Ентӧг олысьлӧн вомас.
Веськыда олысьӧс бурӧн казьтывласны, а лёк вӧчысьлысь нимсӧ вунӧдасны.
Мывкыд мортлӧн сьӧлӧмыс тшӧктӧмъястӧ сибӧдӧ, вежӧртӧм морт сёрнинас асьсӧ крукӧдӧ.
Сӧстӧма олысь повтӧг ветлӧ, а коді чукльӧдлӧ, сійӧс мыждасны.
Синсӧ читкыралысь шог вайӧ, вежӧртӧм морт сёрнинас асьсӧ крукӧдӧ.
Веськыда олысьлӧн вомысь олӧм визувтӧ, а Ентӧг олысьлӧн вомыс лёкӧн тырӧма.
Лӧглуныд зык-вен чужтӧ, а муслуныд вевттьӧ став мыжсӧ.
Вежӧра мортлӧн вомас мывкыдлун, вежӧртӧмлы мышкуас ньӧр инмӧ.
Мывкыдаяс тӧдӧмлунсӧ видзӧны, вежӧртӧм мортлӧн сёрниыс бырӧдӧм вайӧ.
Озырлы аслас эмбурыс изкар кодь, гӧль мортӧс судзсьытӧмлуныс виӧ.
Веськыда олысьлӧн удждоныс — олӧм, лёк вӧчысьлӧн — мыждӧм.
Коді велӧдӧмсӧ кывзӧ, сійӧ олӧмыслӧн туй вылын, коді ӧлӧдӧмсӧ оз кывзы, сійӧ вошӧ.
Лӧгалӧмсӧ дзебысь пӧръясьӧ, суклясьӧмсӧ паськӧдысь — вежӧртӧм.
Бызгысь вомаыд мыжӧ усьӧ, вомсӧ тупкысьыд — вежӧра.
Веськыда олысьлӧн кывйыс весалӧм эзысь кодь, лёк вӧчысьлӧн мӧвпъясыс грӧш ни дон оз сулавны.
Веськыда олысьлӧн кывйыс унаӧс вердӧ, мывкыдтӧмъяс куласны вежӧртӧмлунныс вӧсна.
Господьлӧн бурсиӧмыс озырмӧдӧ, аслад уджӧн тэ нинӧм он содты аслыд.
Вежӧртӧмлы лёк вӧчӧмыс ворсӧдчӧм кодь, вежӧра мортӧс долыдмӧдӧ мывкыдлуныс.
Лёк вӧчысьӧс суас сійӧ, мыйысь полӧ, веськыда олысьлӧн кӧсйӧмыс збыльмас.
Тӧвныр мунас — и лёк вӧчысь бырӧ, а веськыда олысь бырлытӧм подув вылын сулалӧ.
Дыш мортыд аслас веськӧдлысьлы — пинь тшыкӧдысь шома ва кодь, син курӧдысь тшын кодь.
Господьысь полӧмыд нэмтӧ нюжӧдӧ, но лёк вӧчысьлӧн олан луныс чинӧ.
Веськыда олысь долыда виччысьӧ, а лёк вӧчысьлӧн лачаыс абу.
Сӧстӧмъясӧс Господь дорйӧ Аслас туй вылын, а лёк вӧчысьясӧс бырӧдӧ.
Веськыда олысь пыр зумыда сулалӧ, а лёк вӧчысь оз дыр ов му вылын.
Веськыда олысьлӧн вомысь петӧ мывкыдлун, а пеж вомалысь кывсӧ керыштасны.
Веськыда олысьлӧн кывъясыс шогманаӧсь, лёк вӧчысьлӧн — пежӧсь.
Ылӧг вескиыд — Господьлы зывӧк, стӧч вескиыд шогмана Сылы.
Ыкшаасьӧмыд яналӧмӧдз вайӧдӧ, рамъяслы мывкыдлуныс воӧ.
[Веськыда олысь кӧ кувсьӧ, сы вӧсна шогсьӧны, лёк вӧчысь кӧ виччысьтӧг кувсьӧ — нимкодясьӧны.]
Веськыда олысьӧс сӧстӧмлуныс нуӧдӧ, ылӧдчысьӧс наянлуныс бырӧдӧ.
Скӧралан лунӧ озырлуныд оз отсав, но веськыдлуныд кулӧмысь мездас.
Сӧстӧм мортлысь туйсӧ веськыдлуныс шыльӧдӧ, а лёк вӧчысь аслас лёклунӧ усьӧ.
Веськыда олысьӧс сылӧн веськыдлуныс мездӧ, а ылӧдчысьӧс сылӧн кӧсйӧмыс тывйыштӧ.
Лёк вӧчысьлӧн кулӧмкӧд бырас и сылӧн лачаыс, мыж вӧчысьлӧн виччысянаторйыс оз збыльмы.
Веськыда олысь мынӧ шогысь, сы пыдди сэтчӧ усьӧ лёк вӧчысь.
Ентӧг олысь аслас вомнас дойдӧ-бырӧдӧ матыссасӧ, веськыда олысьӧс тӧдӧмлуныс мездӧ.
Веськыда олысьлы кӧ бур, сэки карыс нимкодясьӧ, лёк вӧчысь кӧ кулӧ, карыс долыда гажӧдчӧ.
Веськыда олысьяслӧн бурсиӧм пыр карыс кыптӧ, а лёк вӧчысьяслӧн сёрниӧн сійӧ киссьӧ-бырӧ.
Вежӧртӧм морт лёкӧдӧ ассьыс матыссасӧ, вежӧра — чӧв олӧ.
Суклясьысь морт мӧдлысь гусяторсӧ восьтӧ, эскана * морт — ас пытшкас кутӧ.
Мывкыд веськӧдлысьыд кор абу, войтырыд чинӧ-бырӧ, а туйдӧдысьыд кор уна, войтырыд бура олӧ.
Мӧд морт вӧсна кӧ кывтӧ сетан, аслыд лёксӧ вӧчан, он кӧ тэрмась кывтӧ сетны, оз и ков лёксьыс повны.
Мича гӧтырӧс ошкӧны, [Мича гӧтыр ошкӧм вайӧ верӧсыслы, а коді мустӧмтӧ веськыдлунсӧ, янӧдӧ верӧссӧ.
Дышъяс овлӧны гӧльӧсь,] уджач мортыд озырмӧ.
Бур сьӧлӧма морт аслыс бур вайӧ, а чорыд сьӧлӧма ассьыс вир-яйсӧ жугӧдӧ.
Лёк вӧчысьлӧн удждоныс — ылӧг, а коді веськыдлун кӧдзӧ, вундас збыльсӧ.
Веськыдлуныс вайӧдӧ олӧмӧ, но лёкас сетчысь аслыс кулӧмсӧ корсьӧ.
Наян сьӧлӧма мортыд — Господьлы зывӧк, сӧстӧма олысьыд — шогмана Сылы.
Тӧд, мый лёк морт мыждытӧг оз коль, а веськыда олысьлӧн рӧдыс мездмас.
Мывкыдтӧм аньлӧн мичлуныс порсь нырын югъялысь зарни ныркытш кодь.
Веськыда олысьлӧн кӧсйӧмыс бурӧ вайӧдӧ, лёк вӧчысьлӧн — скӧрлунӧ.
Лышкыда сетысьлы содӧ, топыд морт ӧтарӧ гӧльмӧ.
Лышкыда сетысьлӧн ставыс тырмана, ва сетысьлӧн горшыс оз кут косьмыны.
Няньсӧ дзебысьӧс ёрасны, вузалысьӧс бурсиасны.
Бурсӧ корсьысь шудсӧ аддзӧ, а лёксӧ вӧчны мӧвпалысь дінӧ лёкыс воӧ.
Аслас озырлун вылӧ лача кутысь усяс, а веськыда олысь веж пу моз кутас вежӧдны.
Коді гортсаыслы шог вайӧ, сылы нинӧм оз вичмы, вежӧртӧм морт лоӧ кесйӧгӧн мывкыд мортлы.
Веськыда олысьлӧн вотӧсысь быдмӧ олӧмыслӧн пу, мывкыд морт кыскӧ йӧзӧс ас дінас.
Веськыда олысьлы кӧ му вылас олігӧн на мынтысьӧны, дерт нин, лёк вӧчысьлы да мыжа мортлы мынтысясны.
Кодлы муса тӧдӧмлуныс, сылы муса велӧдӧмыс, но ӧлӧдӧмсӧ мустӧмтысь — вежӧртӧм морт.
Наян мортӧс Господь мыждас, шань мортлы Сысянь бурыс вуджас.
Лёк вӧчӧмнад мортыд асьсӧ оз вынсьӧд, но веськыда олысьлӧн вужйыс зумыд.
Бур гӧтыр аслас верӧслы юркытш, яндысьтӧм гӧтыр верӧсыслысь лыяссӧ сісьтӧ.
Веськыда олысь кӧсйӧ веськыда вӧчны, Ентӧг олысьлӧн мӧвпъясыс наянӧсь.
Лёк вӧчысь вермӧ кывнас вины, а веськыда сёрнитысьӧс кывйыс мездӧ.
Лёк вӧчысь кор усьӧ, сыысь нинӧм оз коль, а веськыда олысьлӧн керкаыс кольӧ сулавны.
Мортӧс ошкӧны сылӧн мывкыдыс серти, лёкӧн тырӧм сьӧлӧмаӧс зывӧктӧны.
Абу тӧдчана, но ас вылас уджалысь мортыд бурджык сы дорысь, коді олӧ-тшыгъялӧ, а асьсӧ ыджыдӧ пуктӧ.
Веськыда олысь аслас ыж-мӧскыс вӧсна тӧждысьӧ, а мыжа мортлӧн сьӧлӧмыс чорыд.
Му вӧдитысь оз кут тшыгъявны, абутӧмсӧ кыйӧдысь — вежӧртӧм морт. 
[Коді кадсӧ коллялӧ вина бӧрся вӧтлысьӧмӧн, янӧдӧ ассьыс керкасӧ.]
Мыж вӧчысь кӧсйӧ лёкыслӧн тывйӧ кыскыны, но веськыда олысь зумыд вужъя.
Лёк мортӧс тывъялӧ вомсьыс петан мыжыс, а веськыда олысь мынӧ шогсьыс.
[Рам морт дінӧ Енмыс буралӧ, а коді мӧдӧс ёрд водзӧ кыскӧ, мыжалӧмнас сійӧс дзескӧдӧ.]
Аслас бур кывъясысь мортыд бурнас пӧтӧ, мортыдлы тырдоныс уджъясыс серти вичмӧ.
Вежӧртӧмыд ассьыс туйсӧ веськыдӧн чайтӧ, мывкыд мортыд туйдӧдӧмсӧ кывзӧ.
Вежӧртӧм мортыд дзик пыр петкӧдлӧ скӧрмӧмсӧ, вежӧра мортыд яналӧмсӧ оз петкӧдлы.
Эскана морт збыльсӧ висьталӧ, наян морт пӧръясьӧ.
Думышттӧг шуӧмыд шыпурт моз сатшкӧ, а мывкыд мортлӧн сёрниыс бурдӧдӧ.
Збыльсӧ висьталысьыд пыр лоӧ, ылӧгсӧ сёрнитысьыд дыр оз ов.
Лёк вӧчны мӧвпалысьлӧн сьӧлӧмыс наян, бурас туйдӧдысьлӧн — долыд.
Веськыда олысьӧс лёкыс оз су, а лёк вӧчысьлӧн олӧмыс тырӧма шогнас.
Пӧръясьысь мортыд Господьлы зывӧк, збыльсӧ висьталысьыд шогмана Сылы.
Вежӧра мортыд тӧдӧмлуннас оз ошйысь, а вежӧртӧмлӧн сьӧлӧмсьыс петӧ йӧйталӧм.
Зіль морт пондас юравны, дыш мортлы быть ковмас уджавны.
Майшасьӧмыд сьӧлӧмтӧ топӧдӧ, а бур кывйыд — гажӧдӧ.
Веськыда олысь аслас матыссаыслы индӧ туй, а лёк вӧчысь ачыс вошӧ.
Дыш мортыд пӧтка яйтӧ оз сёй, а зіль мортыдлӧн эмбурыс вывті уна.
Веськыдлуныслӧн туйыс олӧмӧ нуӧдӧ, сэні кулӧмыс абу.
Мывкыд пи кывзӧ батьыслысь велӧдӧмсӧ, батьсӧ омӧльтысь ӧлӧдӧмсӧ оз кывзы.
Аслас бур кывъясысь мортыд бурнас пӧтӧ, ылӧдчысьыд вины-дзескӧдны видзӧдчӧ.
Топыд вома видзӧ ассьыс ловсӧ, паськыд вома бырӧдас асьсӧ.
Дыш морт унатор кӧсйӧ, но весьшӧрӧ, зіль мортлӧн кӧсйӧмыс збыльмӧ.
Веськыда олысь мустӧмтӧ пӧръясьӧмсӧ, лёк вӧчысь асьсӧ янӧдӧ да пежалӧ.
Сӧстӧм сьӧлӧмаӧс веськыдлуныс видзӧ, а мыжаӧс пежыс виӧ.
Ӧтилӧн нинӧм абу, но асьсӧ озырӧ пуктӧ, мӧдлӧн озырлуныс уна, но асьсӧ гӧльӧ пуктӧ.
Олӧмтӧ видзны озырлуныд отсалӧ, гӧль мортлӧн повзьӧдлысьыс абу.
Веськыда олысьлӧн биыс югыда ломалӧ, лёк вӧчысьлӧн — кусӧ. 
[Наян сьӧлӧма вошӧ мыжас, веськыда олысь жалитӧ да буралӧ.]
Вылӧ пуксьӧмыд сӧмын вензьӧм чужтӧ, мывкыд мортыд туйдӧдӧмсӧ сибӧдӧ.
Кокньыда шедӧм озырлуныд чунь костӧдыд визувтӧ, а удж помысь чукӧртӧмаыд содӧ.
Дыр виччысьӧмысь сьӧлӧмыд нюкыртчӧ, збыльмӧм кӧсйӧмыд олӧмыслӧн пу кодь.
Коді мустӧмтӧ туйдӧдӧмсӧ — аслыс лёксӧ вӧчӧ, а коді пыдди пуктӧ тшӧктӧмъяссӧ — тырдон босьтӧ.
[Наян пилӧн нинӧм бурыс абу, мывкыд кесйӧглӧн уджыс бура мунӧ, сылӧн туйыс веськыд.]
Мывкыд мортлӧн туйдӧдӧмыс вайӧ олӧм, ылыстӧ кулӧмыслӧн тывйысь.
Бур вежӧр козьналӧ пыдди пуктӧм, ылӧдчысьлӧн туйыс кулӧмӧ вайӧдӧ.
Вежӧра морт тӧдӧмлуннас олӧ, а вежӧртӧм петкӧдлӧ ассьыс вежӧртӧмлунсӧ.
Юӧр вайысь кӧ лёк, ачыс лёкас веськалӧ, кывзысьысь кӧ, мездӧм вайӧ.
Велӧдӧмсӧ ӧтдортысьлы вичмӧ гӧльлун да яналӧм, ӧлӧдӧмсӧ сибӧдысьлы — пыдди пуктӧм.
Кӧсйӧмыд кор збыльмӧ, сьӧлӧмыд нимкодясьӧ, вежӧртӧм оз кӧсйы эновтны лёксӧ.
Мывкыд морткӧд кӧ волысян, мывкыд лоан, вежӧртӧмкӧд кӧ ёртасян, аслыд лёксӧ вӧчан.
Мыж вӧчысьӧс лёкыс суӧ, а веськыда олысьлы бурыс вичмӧ.
Бур мортлӧн овмӧсыс кольӧ ныв-пиыслӧн челядьыслы, а мыжа мортлӧн — веськыда олысьлы.
Гӧль мортлӧн муыс вермӧ уна нянь сетны, но Индӧд торкӧм вӧсна сійӧ воштӧ няньсӧ.
Писӧ мустӧмтысь ньӧртӧ оз босьтлы, а писӧ радейтысь ичӧтдырсяньыс чирыштӧ сійӧс.
Веськыда олысь пӧттӧдзыс сёйӧ, а лёк вӧчысьлӧн кынӧмыс пыр сюмалӧ.
Мывкыд гӧтырнад керкаыд сулалӧ, вежӧртӧм гӧтырыд ачыс керкасӧ кисьтӧ.
Господьысь полысь веськыд туйӧд мунӧ, Господьӧс мустӧмтысь вошӧ.
Вежӧртӧмлӧн сӧрӧмыс ньӧрйӧн аслыс бергӧдчас, мывкыд мортӧс кывйыс видзас.
Ӧшкыд кӧ абу, лясниыд куш, ӧшъясыд кӧ ёнӧсь, няньыд уна.
Эскана аддзылысь-висьталысь оз ылӧдчы, пӧръялысь абутӧмсӧ висьталӧ.
Омӧльтысь морт корсьӧ мывкыдлунсӧ да оз аддзы, вежӧра мортлы тӧдӧмлуныс кокньыда шедӧ.
Ылыстчы вежӧртӧм морт дінысь, сылӧн тӧдӧмлуныс абу.
Вежӧра мортлӧн мывкыдлуныс тыдалӧ туйсӧ тӧдӧмас, вежӧртӧмлӧн йӧйталӧмыс тыдалӧ пӧръясьӧмас.
Вежӧртӧм морт сералӧ мыж вылын, веськыда олысьлы бурыс вуджӧ.
Сьӧлӧмыд тӧдӧ ассьыс шогсӧ, и долыдлунсӧ мӧдкӧд оз юк.
Лёк вӧчысьлӧн керкаыс киссяс, веськыда олысьлӧн — кутас дзоридзавны.
Туйтӧ чайтан веськыдӧн, но туй помад виччысьӧ кулӧм.
Сералігад корсюрӧ висьӧ сьӧлӧмыд, и нимкодьлуныд помасьлӧ шогӧн.
Бур морт аслас олӧмысь пӧтас, веськыдлунсӧ ӧтдортысь — асласысь.
Вежӧртӧм морт эскӧ быд кывлы, вежӧра морт мӧвпалӧ, кытчӧ воськовтны.
Мывкыд морт полӧ да ылыстчӧ лёксьыс, вежӧртӧм — ӧдйӧ пузьӧ да аслыс сӧмын эскӧ.
Ӧдйӧ пузьысь уна ковтӧмсӧ вӧчӧ, лёк вӧчны мӧвпалысьӧс мустӧмтӧны.
Вежӧртӧмлӧн олан пайыс — йӧйталӧм, вежӧралӧн юркытшыс — тӧдӧмлун.
Лёк йӧз копыртчасны бур йӧз водзын, мыж вӧчысьяс — веськыда олысьяслӧн дзиръя дорын.
Гӧльӧс мустӧмтӧ весиг аслас матыссаыс, а озырӧс кытшалӧ уна ёрт.
Коді матыссасӧ мустӧмтӧ, сійӧ мыж вӧчӧ, коді гӧль морт дінӧ бур сьӧлӧма, сійӧ — майбыр.
Лёк вӧчны мӧвпалысь вошӧ, [лёк вӧчысь оз тӧд буралӧмсӧ ни збыльсӧ,] а бур вӧчны мӧвпалысьлӧн — буралӧмыс да збыльыс.
Сьӧкыд уджысь эм содтӧд, больгӧмысь — гӧльлун.
Мывкыда мортлӧн юркытшыс — озырлун, вежӧртӧмлӧн мывкыдтӧмлуныс — йӧйталӧм.
Эскана аддзылысь-висьталысь мездӧ мортлысь олӧмсӧ, пӧръясьысь ылӧгнас лолалӧ.
Господьысь полӧмыс — тэнад зумыд лачаыд, Сыысь полӧмыс видзас тшӧтш тэнсьыд ныв-питӧ.
Господьысь полӧмыс вайӧ олӧм, ылыстӧ кулӧмыслӧн тывйысь.
Кор войтырыс уна, ӧксы нималӧ, кор этша, ӧксы бырӧ.
Ӧдйӧ пузьысь петкӧдлӧ ассьыс вежӧртӧмлунсӧ, коді вермӧ кутчысьнысӧ, сійӧ — вежӧра морт.
Лӧнь сьӧлӧмыд вир-яйтӧ бурдӧдӧ, вежӧгтӧмыд лыястӧ сісьтӧ.
Коді дзескӧдӧ коньӧрӧс — омӧльтӧ сійӧс Вӧчысьӧс, коді бурӧ пуктӧ Енсӧ — отсалӧ гӧльяслы.
Лёк вӧчысь аслас лёклуныс вӧсна усьӧ, веськыда олысьлӧн весиг кулігас лачаыс лоӧ.
Мывкыдлуныс олӧ вежӧра сьӧлӧмын, но кӧсйӧ, медым и вежӧртӧм сы йылысь тӧдіс.
Веськыда олӧм кыпӧдӧ войтырсӧ, а мыж вӧчӧм янӧдӧ.
Ӧксыыд бур сьӧлӧма мывкыд кесйӧг дінӧ, но сійӧс янӧдысь кесйӧг вылӧ скӧрмӧ.
[Скӧралӧмыд бырӧдӧ весиг вежӧра йӧзӧс.]
Скӧрмӧм мортлы кӧ лӧня вочавидзан, сійӧс лӧньӧдан, но лэчыд кывъя шуӧмыд сійӧс ыззьӧдас.
Мывкыд морт бурсӧ висьталӧ, вежӧртӧм вомнас быгзьӧ.
Господьлӧн синмыс ставсӧ аддзӧ, лёк йӧзӧс и бур йӧзӧс.
Мелі сёрни олӧм вайӧ, а ылӧг сёрни ловтӧ жугӧдӧ.
Вежӧртӧм нинӧмӧ пуктӧ батьыслысь велӧдӧмсӧ, но коді кывзӧ ӧлӧдӧмсӧ, сійӧ — бур мывкыда. 
[Веськыдлунын — ыджыд вын, а лёк вӧчысьясӧс лоӧ бырӧдӧма му вывсьыс.]
Веськыда олысь керкаын озырлуныс уна, а лёк вӧчысьлӧн удждоныс шогӧдӧ.
Мывкыд мортыд сёрнинас тӧдӧмлун паськӧдӧ, вежӧртӧмыд — оз.
Лёк вӧчысьлӧн вайӧм висьыс Господьлы зывӧк, веськыда олысьлӧн кевмысьӧмыс Сылы шогмана.
Лёк вӧчысьлысь туйсӧ Господь зывӧктӧ, веськыдлунсӧ корсьысьӧс Сійӧ радейтӧ.
Веськыд туйысь кежысь чорыда мыжмас, ӧлӧдӧмсӧ мустӧмтысь кулас.
Пыдӧстӧминсӧ да кулӧмаяслысь оланінсӧ Господь аддзӧ, дерт нин, Сійӧ аддзӧ мортлысь сьӧлӧмсӧ.
Омӧльтысь морт чирыштӧмсӧ мустӧмтӧ, мывкыд морт дінӧ сійӧ оз мун.
Сьӧлӧмыд кӧ долыд, чужӧмыд югыд, сьӧлӧмыд кӧ шогалӧ, лолыд нюкыртчӧ.
Вежӧра мортлӧн сьӧлӧмыс тӧдӧмлун корсьӧ, вежӧртӧм сӧмын йӧйталӧмнас пӧткӧдчӧ.
Шудтӧм мортлӧн став олан луныс шогӧн тырӧма, долыд сьӧлӧмалы быд лун гажа.
Ыджыд озырлун да майшасьӧм дорысь бурджык этшаникыс да Господьысь полӧм.
Тшӧгӧдӧм ӧш яй сёйӧм да лӧгалӧмӧн олӧм дорысь бурджык градвыв пуктас сёйны да овны муслунпырысь.
Скӧралысь мортыд зыксьӧм кӧдзӧ, дӧзмытӧмыд — зык-венсӧ дугӧдӧ.
Дыш мортлӧн туй вылас лежнӧг быдмӧ, веськыда олысьлӧн туйыс шыльыд.
Мывкыд пи батьыслысь сьӧлӧмсӧ гажӧдӧ, мывкыдтӧм — мамсӧ мустӧмтӧ.
Вежӧртӧм морт йӧйталӧмнас нимкодясьӧ, вежӧра морт веськыд туйӧд ветлӧ.
Туйдӧдтӧг вӧчӧмыд киссяс, а туйдӧдысьыс кор уна — артмас.
Нимкодь, вочавидзнытӧ кӧ верман, бур, ас кадӧ кӧ кывтӧ шуны кужан!
Мывкыд мортыд олӧмыслӧн туйӧд кайӧ, кулӧмаяслӧн оланінысь ылӧджык кежӧ.
Ыкша мортлысь керкасӧ Господь куштас, дӧвалысь му юкӧнсӧ Сійӧ доръяс.
Лёк мортлысь мӧвпъяссӧ Господь зывӧктӧ, сӧстӧм мортлӧн кывъясыс Сылы шогманаӧсь.
Горшасьысь аслас керкаӧ шог вайӧ, а коді козинъяс вылӧ абу горш, сійӧ дыр олӧ.
Веськыда олысь мӧвпыштӧмӧн вочавидзӧ, а мыж вӧчысьлӧн вомысь лёкыс петӧ.
[Веськыда олысьлӧн туйыс Господьлы шогмана, веськыда олӧм ӧта-мӧдсӧ мустӧмтысьясӧс ёртъясӧн вӧчас.]
Лёк вӧчысь дінысь Господь ылын, а веськыда олысьлысь кевмысьӧмсӧ Сійӧ кылӧ.
Ясыд видзӧдлас сьӧлӧмтӧ долыдмӧдӧ, бур юӧр лыястӧ ёнмӧдӧ.
Коді ӧлӧдӧмсӧ кывзӧ, сійӧ — мывкыд морт.
Велӧдӧмсӧ ӧтдортысь аслас олӧмыс вӧсна оз тӧждысь, ӧлӧдӧмсӧ кывзысь вежӧрсялӧ.
Господьысь полӧмыд мывкыдлун сетӧ, раммӧдчӧм бӧрти пыдди пуктӧм воӧ.
Мортыд сьӧлӧмас тэчӧ, мый шуны, но кывъясыс Господьсянь воӧны.
Быдӧн чайтӧ ассьыс туйсӧ сӧстӧмӧн, но Господь тӧдмалӧ мортлысь сьӧлӧмсӧ.
Господь вылӧ лача кутӧмӧн ассьыд уджъястӧ вӧч, сэки збыльмас ставыс, мый кӧсъян вӧчнытӧ.
Господь ставсӧ вӧчӧма мыйкӧ могысь, весиг мыж вӧчысьӧс лёк луныс кежлӧ вӧчӧма.
Господь зывӧктӧ ыкша мортӧс, мыждытӧг сійӧс оз коль.
[Бур туйыд веськыда вӧчӧмсянь заводитчӧ, вись вайӧм дорысь Енмыслы тайӧ шогманаджык.
Господьӧс корсьысь аддзас тӧдӧмлун да веськыдлун, сьӧлӧмсяньыс Господьӧс корсьысь аддзас лӧньлун.]
Буралӧм да збыль вештӧны мыжсӧ, Господьысь полӧм ылыстӧ лёксьыс.
Весиг мустӧмтысьяс бурасьӧны сыкӧд, кодлӧн туйыс Господьлы шогмана.
Ылӧдчӧмӧн аслыд куралӧм дорысь бурджык этшаникнас тырмӧдчыны, но веськыда овны.
Мортыд бӧрйӧ ассьыс туйсӧ, а Господь веськӧдлӧ сылӧн воськовъясӧн.
Ӧксылӧн кывъясыс — вылісянь, сійӧ веськыда мыждӧ.
Господь лӧсьӧдӧма стӧча веситчӧмсӧ, Сысянь став вески-гираыс.
Ӧксыяс зывӧктӧны лёк вӧчӧмсӧ, ӧд веськыдлун отсӧгӧн налӧн юралӧмыс вына.
Ӧксылы шогмана веськыда сёрнитысь, сылы муса збыльсӧ висьталысь.
Ӧксылӧн скӧрмӧмыс кулӧм вайӧ, но мывкыд морт вермас лӧньӧдны сійӧс.
Ӧксылӧн югыд видзӧдласын — олӧм, сылӧн бур сьӧлӧмыс тувсов зэр кодь.
Зарни дорысь бурджык мывкыдлун чӧжны, эзысь чӧжӧм дорысь бурджык вежӧрсявны.
Веськыда олысьлӧн туйыс кежӧ лёксьыс, аслас туй бӧрся видзӧдысь олӧмсӧ видзас.
Вылӧ кӧ пуксян — олӧмтӧ жугӧдан, ныртӧ кӧ кутан лэптавны — усян.
Ыкша йӧзкӧд мырддялӧм эмбур юклӧм дорысь бурджык гӧльяс пӧвстын раммӧдчӧмӧн овны.
Мӧвпалӧмӧн уджсӧ вӧчысь бурсӧ аддзас, Господь вылӧ лача кутысь — майбыр.
Мывкыд сьӧлӧмаӧс вежӧра мортӧн шуӧны, бур кывъясӧн велӧдӧмыд вына.
Мывкыд мортлы вежӧрыс вайӧ олӧм, вежӧртӧмлы велӧдчӧмыс — йӧйталӧм.
Мывкыд сьӧлӧмыд кывъястӧ мывкыдӧн вӧчӧ, мывкыд сьӧлӧмӧн велӧдӧмыд вына.
Лӧсьыда шуӧм кывйыд — ма кодь, ловтӧ гажӧдӧ, лыястӧ бурдӧдӧ.
Туйтӧ чайтан веськыдӧн, но туй помад виччысьӧ кулӧм.
Мортыд уджалӧ, медым кынӧмпӧт перйыны, уджавнысӧ сылы рушкуыс тшӧктӧ.
Шогмытӧм мортыд лёксӧ вӧчны мӧвпалӧ, сылӧн сёрниыс сотысь би кодь.
Ылӧдчысь кӧдзӧ зыксьӧм, удтысьысь торйӧдӧ ёртъясӧс.
Лёк вӧчысь кыскӧ матыссасӧ лёкас, нуӧдӧ сійӧс лёк туй вылӧ. Синсӧ читкыралысь гусьӧн пурны мӧвпалӧ, пиньсӧ йирысь лёксӧ вӧчны лӧсьӧдчӧ. [Сійӧ пушкӧ лӧглунӧн.]
Дзор юрсиыд — нималӧмлӧн юркытшыс, сійӧс веськыда олысьлы сетӧны.
Збоялӧм дорысь бурджык терпитны, кар босьтӧм дорысь бурджык асьтӧ кутны.
Паськӧм дорышӧ пудсӧ шыбитан, но кодлы пудйыс усяс — тайӧ Господьсянь.
Тыр пызан да зык-вена олӧм дорысь бурджык кос няньтор да лӧнь олӧм.
Мывкыд кесйӧг веськӧдлӧ ыджыдыслӧн яндысьтӧм пинас, сылы вуджӧ ыджыдыслӧн овмӧсыс пилы моз.
Эзысьтӧ да зарнитӧ биын сывдӧны, а сьӧлӧмтӧ Господь тӧдмалӧ.
Лёк вӧчысь кывзӧ наян сёрнияс, ылӧдчысь кывзӧ лёк вомаӧс.
Коді сералӧ гӧль мортӧс, омӧльтӧ сійӧс Вӧчысьӧс, коді нимкодясьӧ мӧдлӧн шогыслы, сійӧс лоӧ мыждӧма, [а бур сьӧлӧма дінӧ Енмыс буралӧ].
Пӧрысьыдлӧн юркытшыс — ныв-пиыслӧн ныв-пиыс, ныв-пиыдлӧн ошйысянторйыс — бать-мамыс. 
[Эскысьлӧн уна озырлун, эскытӧмлӧн нинӧм абу.]
Вежӧртӧмлы оз лӧсяв тӧдчана сёрни нуӧдны, пыдди пуктана мортлы — пӧръясьны.
Мортыд чайтӧ, мый сылӧн козиныс — шуд вайысь из: быдлаысь, кытчӧ мунас, шуд аддзас.
Коді радейтӧ, сійӧ вунӧдӧ сылы шуӧм лёк кывъяссӧ, коді лёксӧ казьтылӧ, сійӧ воштӧ ассьыс ёртсӧ.
Вежӧртӧмӧс сё пӧв кучкӧм дорысь бурджык вежӧраӧс чирыштны.
Лёк морт Енлы паныд кыпӧдчӧ, та понда Енмыс мӧдӧдас сылы паныд чорыд сьӧлӧма анделӧс.
Йӧй руа вежӧртӧм морткӧд паныдасьӧм дорысь бурджык паныдасьны пиянсӧ воштӧм ошкӧд.
Коді бурсьыс лёкӧн мынтысьӧ, сылысь керкасӧ лёкыс оз эновт.
Пинь-зык панӧмыд ва ызӧбтӧм кодь, пансьытӧдзыс сувтӧд сійӧс.
Лёк вӧчысьӧс дорйысь да мыжтӧм мортӧс мыждысь — Господьлы зывӧктанаӧсь.
Вежӧртӧмлӧн кӧ абу вежӧрыс, медым мывкыдсявны, мый сылы озырлунсьыс?
[Керкасӧ джуджыда лэптысьӧс бырӧдӧм суас, коді оз кӧсйы велӧдчыны, лёкас усьӧ.]
Ёртыдлы тэ быд кадӧ муса, вокыд локтӧ отсавны шог дырйиыд.
Вежӧртӧм мортыд кыв сетӧ — мӧдлысь уджйӧзсӧ мынтыны кӧсйысьӧ.
Вензьыны радейтысь радейтӧ мыж, вылӧ кыпӧдчысь усьӧмсӧ корсьӧ.
Наян сьӧлӧма шудсӧ оз аддзы, ылӧдчысьӧс шог суас.
Вежӧртӧмӧс чужтысь аслыс шог вайӧ, нимкодьлунсӧ батьыслы вежӧртӧмыд оз вай.
Долыд сьӧлӧмыд бурдӧдӧ, нюкыртчӧм лолыд лыястӧ косьтӧ.
Ентӧг олысь гусьӧн козинтӧ босьтӧ, медым торкны веськыда мыждӧмсӧ.
Вежӧра мортлӧн мывкыдлуныс син водзас, вежӧртӧмлӧн синмыс му помъясті ветлӧ.
Вежӧртӧм пи батьсӧ дӧзмӧдӧ, аслас мамыслы курыд шог вайӧ.
Веськыда вӧчысьӧс абу бур мыждыны, пыдди пуктанаӧс — збыльсьыс нӧйтны.
Мывкыд морт кужӧ кывсӧ кутны, вежӧра морт — чӧв овны.
Вежӧртӧм кор чӧв олӧ, мывкыд мортӧн сійӧс чайтӧны, кор вомсӧ тупкӧма, сюсь мортӧн шуӧны.
Асныра мортыд сӧмын асьсӧ тӧдӧ, сійӧ бур велӧдӧмлы паныд сувтӧ.
Вежӧртӧмыд оз кӧсйы гӧгӧрвонысӧ, кӧсйӧ сӧмын ассьыс мӧвпсӧ висьтавны.
Кытчӧ лёк вӧчысь мунӧ, сэтчӧ локтӧ зывӧктӧм, яналӧмкӧд локтӧ лёкӧдӧм.
Морт вомысь петан кывъясыд — джуджыд ва, визув ва моз сэтысь петӧ мывкыдлуныс.
Абу бур сулавны лёк вӧчысь дор да мыжтӧмӧс мыждыны.
Вежӧртӧм морттӧ сёрниыс зык-венӧ кыскас, вомыс тышкасьӧмӧдз вайӧдас.
Вежӧртӧмӧс сёрниыс бырӧдӧ, сылысь ловсӧ вомыс тывйыштӧ.
[Полӧмыс личкӧ дыш мортӧс, нывбаба оласнога айлов тшыгъявны кутас.]
Суклясьысьлӧн кывъясыс чӧскыдӧсь, кынӧм пытшкӧдзыд пырӧны.
Дышпырысь кӧ уджалан, тэ — бырӧдысьлы вок.
Господьлӧн нимыс — зумыд изкар, веськыда олысь пышйӧ сэтчӧ, и лёкыс сійӧс оз су.
Озырлы аслас эмбурыс изкар кодь, озырлуныс сылы джуджыд потшӧс кодь.
Усьӧм водзвылас мортыд вылӧ кыпӧдчӧ, пыдди пуктӧм водзвылас сійӧ раммӧдчӧ.
Мӧдӧс кывзытӧг вочавидзысь — вежӧртӧм, сійӧ асьсӧ янӧдӧ.
Мортыд ловнас кор вына, вермытӧмсӧ вермӧ, а нюкыртчӧм ловнад коді вермас овны?
Вежӧра мортлӧн сьӧлӧмыс тӧдӧмлунсӧ аддзӧ, мывкыд мортлӧн пельыс тӧдӧмлунсӧ корсьӧ.
Козинтӧ сетӧмыд туйяс восьтӧ, ыджыд йӧз дорӧдз вайӧдӧ.
Ёрд водзын веськыд сійӧ, коді медводдзаӧн сёрнитӧ, но локтӧ сыкӧд вензьысь да тӧдмалӧ сійӧс.
Пудъясьӧмыд лӧньӧдӧ вензьӧмтӧ, вына йӧз костын бӧръя кывсӧ шуӧ.
Лӧгасьӧм вокыд — сибавтӧм изкар, зык-вензьӧмыд — дзиръяын тас.
Мортыд сёрнитӧмнас пӧтӧ, вомсьыс петан кывъяснас пӧткӧдчӧ.
Кывйыд ыджыдалӧ олӧмыс и кулӧмыс вылын, сёрнитны радейтысь пӧткӧдчӧ кывйыслӧн вотӧснас.
[Шань] гӧтырӧс аддзысь шуд аддзӧ, сылы Господьсянь бурыс вичмӧ. 
[Шань гӧтырсӧ эновтысь шудсӧ эновтӧ, кырсалысь анькӧд олысь — вежӧртӧм да мыжа.]
Гӧль мортыд кевмӧ-корӧ, озырыд чорыда вочавидзӧ.
Уна йӧзкӧд ёртасян — аслыд лёксӧ вӧчан, но овлӧ, ёртыд вок дорсьыд на ёнджыка радейтӧ.
Гӧль да сӧстӧма олысьыд бурджык ылӧдчысь [озыр] мортысь, коді нӧшта на вежӧртӧм.
Тӧдӧмлунтӧгыд лолыдлы абу бур, тэрмасьӧмӧн мунысьыд вошӧ.
Йӧйлун вӧснаыс мортыдлӧн торксьӧ олӧмыс, а сьӧлӧмыс скӧралӧ Господь вылӧ.
Озырлун помысь содӧны ёртъясыд, а гӧль мортӧс весиг ёртыс эновтӧ.
Ылӧгсӧ висьталысьӧс мыждӧм виччысьӧ, ылӧдчысь оз мездмы.
Унаӧн леститчӧны нималана йӧз водзын, козин сетысьыдлы быдӧн ёрт.
Гӧль морттӧ мустӧмтӧны вокъясыс, бергӧдчӧны сыысь весиг ёртъясыс. Сійӧ кӧсйӧ сёрнитны, но найӧ абуӧсь нин.
Тӧдӧмлун корсьысь радейтӧ олӧмсӧ, вежӧрсӧ видзысь аддзӧ шуд.
Ылӧг висьталысьӧс виччысьӧ мыждӧм, ылӧдчысьӧс — кулӧм.
Вежӧртӧмлы оз лӧсяв красуйтчана да лышкыда олӧм, кесйӧглы — ӧксыяс вылын ыджыдалӧм.
Мортлӧн бур вежӧрыс видзӧ сійӧс скӧрмӧмысь, ошкӧмыс лоӧ сылы, коді лёксӧ вунӧдӧ.
Ӧксылӧн скӧрмӧмыс левлӧн равзӧм кодь, сылӧн бурлуныс турунвыв лысва кодь.
Вежӧртӧм пиыд ыджыд шог вайӧ батьыслы, броткысь гӧтырыд — письтӧм керка вевт кодь.
Керкаыд да озырлуныд бать-мамсянь вуджӧ, а мывкыд гӧтыртӧ Господь сетӧ.
Дышӧдчигад унзіль личкывлӧ, дыш морттӧ тшыгъялӧм суӧ.
Тшӧктӧмъяс серти олысь ассьыс олӧмсӧ видзӧ, веськодя олысь кулӧ.
Гӧль мортлы отсалысь водзӧсӧн сетӧ Господьлы, ӧд Господь мынтысяс сылы бурсӧ вӧчӧмысь.
Эм на кӧ лачаыд, чирышт питӧ, сылӧн горзӧмысь эн скӧрмы.
Лӧгалысьӧс мед мыждӧмыс суӧ, норман кӧ сы дінӧ, чорыдджыка на мыждыны ковмас.
Кывзы туйдӧдӧмсӧ да сибӧд ӧлӧдӧмсӧ, сэки мывкыд лоан.
Мортыд ас водзас уна мог сувтӧдӧ, но инас сӧмын Господьӧн шуӧмаыс.
Мортлысь эскана сьӧлӧмсӧ вылӧ донъялӧны, гӧль мортыд бурджык ылӧг мортысь.
Господьысь полӧмыд олӧмтӧ видзӧ, сэки и чӧскыда узян, и лёкыс оз су тэнӧ.
Дышӧдчысь босьтӧ тасьтісьыс сёянсӧ, но кисӧ вомӧдзыс оз кӧсйы лэптыны.
Омӧльтысьӧс кӧ нӧйтан, мывкыдтӧмъяс вежӧрсяласны, вежӧра мортӧс кӧ ӧлӧдан, сійӧ гӧгӧрвоас велӧдӧмсӧ.
Батьыслысь овмӧссӧ мырддьысь да мамсӧ вӧтлысь — яндысьтӧм пи, сійӧ бур нимсӧ воштӧ.
Пиӧй, дугдан кӧ кывзыны велӧдӧмсӧ, тӧдӧмлунтӧгыд вошан.
Ёрд водзын ылӧдлысь веськыда мыждӧмсӧ омӧльтӧ, лёк вӧчысь ылӧгсӧ сёйӧ-ньылалӧ.
Мывкыдлунсӧ омӧльтысьӧс мыждӧм виччысьӧ, мывкыдтӧмлысь мышкусӧ — орс.
Винаыд дурмӧдӧ, сурыд тышкасьны ыззьӧдӧ, мывкыдтӧм сійӧ, кодӧс юӧмыс ылӧдлӧ.
Ӧксылӧн скӧрлуныс левлӧн равзӧм кодь, сійӧс дӧзмӧдысьыс лёксӧ аслыс вӧчӧ.
Коді вензьытӧг олӧ, сійӧс пыдди пуктӧны, коді зыксьӧмӧ пырӧ, сійӧ — вежӧртӧм.
Дыш мортыд пуктысян кадӧ оз гӧр, и вундан кадӧ нинӧм оз босьт.
Сьӧлӧмпытшса мӧвпъясыд — джуджыд ва, но вежӧра морт вермӧ гумлавны и сэтысь.
Унаӧн шуӧны асьнысӧ бурӧн, но сюрас-ӧ на пӧвстысь эскана мортыс?
Веськыд мортыд сӧстӧм оласнога, майбырӧсь сылӧн ныв-пиыс.
Кор ӧксы пукалӧ ёрдысь пуклӧсын, сылӧн син водзысь став лёкыс разалӧ.
Коді вермӧ шуны, весалі пӧ ассьым сьӧлӧмӧс, сӧстӧмми пӧ аслам мыжъясысь?
Ылӧдлӧмӧн веситӧмыд да пӧръясьӧмӧн мурталӧмыд — Господьлы зывӧк.
Морттӧ томдырсяньыс тӧдмалан уджъяс сертиыс, олӧ-ӧ сійӧ сӧстӧма да веськыда.
Кылысь пельтӧ да аддзысь синтӧ — кыкнансӧ вӧчис Господь.
Узьнытӧ кӧ радейтан — гӧльман, синтӧ кӧ он куньлы — пӧттӧдзыд сёян.
Ньӧбасьысь шуасьӧ, вузӧсыд пӧ шогмытӧм, а муртса вешъяс да, ошйысьӧ нин ньӧбӧмторнас.
Эм зарни, эмӧсь дона изъяс, но медся донаыс — мывкыд сёрни.
Тӧдтӧм морт вӧсна кыв сетысьлысь босьт дӧрӧмсӧ да ас ордад видз, кытчӧдз уджйӧзыс оз ло мынтӧма.
Ылӧдлӧмӧн судзӧдӧм няньыд чӧскыд, но вомад сійӧ дзимбырӧ * пӧрӧ.
Могъястӧ сувтӧд туйдӧдӧмсӧ кывзӧм бӧрын, туйдӧдтӧг тышӧ эн пет.
Суклясьысь морт восьтӧ мӧдлысь гусяторсӧ, паськыд вомакӧд эн волысь.
Коді бать-мамсӧ лёкӧдӧ, сылӧн биыс сап пемыд дырйи кусас.
Батьыдлысь кадысь водз босьтӧм овмӧсыд бурсиӧмсӧ оз вай.
Эн шу: «Лёк вӧчӧмысь лёкӧн мынтыся», Господь вылӧ лачатӧ кут, и Сійӧ доръяс тэнӧ.
Господь зывӧктӧ пӧръясьӧмӧн веситӧмтӧ, ылӧг вески Сылы оз шогмы.
Господь веськӧдӧ мортлысь воськовъяссӧ, ӧд мортыд оз тӧд ассьыс туйсӧ.
Тывйӧ шедан, тэрмасьӧмӧн кӧ Енлы вежа козин кӧсйысян, а сӧмын бӧрыннас мӧвпалан.
Мывкыд ӧксы лёк вӧчысьясӧс тӧлӧдас, вартан гӧгыльӧн на вывті мунас.
Мортлӧн лолыс — Господьлӧн югдӧданторйыс, пыдӧдз тӧдмалӧ мортлысь сьӧлӧмсӧ.
Буралӧмыс да збыльыс ӧксыӧс видзӧны, буралӧмнас ӧксы юралӧмсӧ ёнмӧдӧ.
Том мортлы ошкӧмсӧ вайӧ выныс, пӧрысьӧс мичмӧдӧ дзор юрсиыс.
Нӧйтӧм-ньӧръялӧмыд торйӧдӧ лёксьыс, дойясыд весалӧны сьӧлӧмтӧ.
Ӧксылӧн сьӧлӧмыс Господь киын визувтысь ва кодь, Господь веськӧдӧ сійӧс, кытчӧ кӧсйӧ.
Быдӧн чайтӧ ассьыс туйсӧ веськыдӧн, но Господь тӧдмалӧ сьӧлӧмъяс.
Веськыда олӧмыд да веськыда мыждӧмыд вись вайӧм дорысь Господьлы шогманаджык.
Лёк вӧчысьлӧн биыс — тшаплун да вылӧ кыпӧдчӧм, но тайӧ мыж.
Мортыд мырсьӧм-зільӧмнас унатор судзӧдӧ, а тэрмасьӧмӧн кӧ вӧчӧ, унатор воштӧ.
Ылӧдчӧмӧн озырмӧдчӧмыд тӧвру пӧльыштӧм кодь да кулӧмсӧ корсьӧм кодь.
Ентӧг олысь оз веськыда вӧч, сійӧс бырӧдас аслас лёк вӧчӧмыс.
Мыжа морт чукльӧдлӧмӧн ветлӧ, а сӧстӧм морт веськыда вӧчӧ.
Бурджык ӧтнадлы керка вевт вылын овны пинясьысь гӧтыркӧд керкаын олӧм дорысь.
Ентӧг олысьлӧн лолыс кӧсйӧ лёксӧ, весиг ёртыс дінӧ сійӧ оз бурсьӧлӧмтчы.
Омӧльтысьӧс кӧ мыждан, мывкыдтӧмъяс мывкыдсяласны, а мывкыд мортӧс кӧ велӧдан, сійӧ тӧдныджык кутас.
Веськыда олысь аддзӧ, кыдзи лёк вӧчысь олӧ аслас керкаын, и кыдзи лёк вӧчысьӧс лоӧ бырӧдӧма.
Коді оз кыв гӧль мортлысь бӧрдӧмӧн корӧмсӧ, сійӧс асьсӧ оз кывны, кор кутас бӧрдны-корны.
Гусьӧн сетӧм козин кусӧдӧ лӧглун, питшӧгысь сетӧмтор лӧньӧдӧ ыджыд скӧрлун.
Веськыда олысь веськыда мыждӧмысь долыдмӧ, лёк вӧчысь — полӧ.
Коді кежӧ мывкыдлуныслӧн туйысь, кулӧмаяскӧд куйлыны кутас.
Гажӧдчыны радейтысьыд гӧльмӧ, вина юысьыд да уна вый сёйысьыд оз озырмы.
Лёк вӧчысьӧс лоӧ вузалӧма, медым мездыны веськыда олысьӧс, ылӧдчысьӧс — медым мездыны веськыда вӧчысьӧс.
Зыньгысь да скӧралысь гӧтыркӧд олӧм дорысь бурджык овны овтӧминын.
Мывкыд мортлӧн керкаын уна озырлун да сёян, а вежӧртӧм мортыд ставсӧ лотӧ-шердйӧ.
Коді кӧсйӧ овны веськыда да бур сьӧлӧмӧн, аддзас олӧмсӧ, веськыдлунсӧ да пыдди пуктӧмсӧ.
Мывкыд мортыд босьтӧ вынаяслысь карсӧ, жугӧдӧ стенсӧ, мый вылӧ найӧ лача кутісны.
Коді вомсӧ оз паськӧдлы, ассьыс ловсӧ шогысь видзӧ.
Ыкша да наян мортӧс шуӧны омӧльтысьӧн, этшсьыс петмӧнъя сійӧ вылӧ пуксьӧ.
Дышлӧн кӧсйӧмыс виас сійӧс, ӧд сійӧ кисӧ сюркнялӧмӧн пукалӧ.
Дыш мортыд асланьысджык кыскӧ, а веськыда олысь лышкыда сетӧ.
Лёк вӧчысьлӧн висьыс — зывӧктана, торйӧн нин, наянпырысь кӧ висьсӧ вайӧ.
Ылӧг висьталысь олӧмсӧ воштӧ, а коді висьталӧ сійӧ, мый збыльысь тӧдӧ, сійӧс пыр кывзӧны.
Лёк вӧчысь яндысьтӧг видзӧдӧ, веськыд морт аслас оласногӧ кутчысьӧ.
Господьтӧгыд мывкыдлуныс абу, вежӧрыс абу, и туйдӧдӧмыс абу.
Вӧлӧс дасьтӧны тышкасян лун кежлӧ, но вермӧмсӧ Господь сетӧ.
Бур нимыд бурджык ыджыд озырлунысь, пыдди пуктӧмыд бурджык эзысь-зарниысь.
Озыр да гӧль морт ӧткодьӧсь, кыкнаннысӧ Господь вӧчӧма.
Вежӧра морт казялӧ лёксӧ да дзебсьӧ, вежӧртӧм водзӧ мунӧ да мыждӧма лоӧ.
Раммӧдчӧм да Господьысь полӧм бӧрын тэныд воас озырлун, пыдди пуктӧм да олӧм.
Ылӧдчысьлӧн туйыс лежнӧга, тывъясӧн зэвтӧма, тэныд кӧ олӧмыд дона, эн мун сэтчӧ.
Веськӧд питӧ бур туй вылас ичӧтсяньыс, и весиг пӧрысь каднас сійӧ оз кеж сэтысь.
Гӧль вылын ыджыдалӧ озыр, уджйӧза вылын — сылы водзӧсалысь.
Ылӧгсӧ кӧдзысь вундас шог, пом воас сылӧн чорыд дзескӧдӧмлы.
[Сьӧлӧмсяньыс сетысьӧс Енмыс радейтӧ, содтас сылы, мый оз судзсьы.]
Бур сьӧлӧмаӧс лоӧ бурсиӧма, ӧд юксьӧ гӧльяскӧд няньӧн. 
[Козин сетысьлы локтӧ вермӧм да нималӧм, и козин босьтысь лэдзӧ сійӧс аслас сьӧлӧмас.]
Лӧгалысьӧс вӧтлы, сэки зык-веныд помасяс, лёксьӧмыд да видчӧмыд вунас.
Кодлы муса сӧстӧм сьӧлӧм, коді лӧсьыда-бура сёрнитӧ, сылы ӧксы ёрт лоӧ.
Господь видзӧ збыльсӧ, а ылӧдчысьлысь сёрнисӧ Сійӧ бырӧдӧ.
Дыш мортыд шуӧ: «Ывлаын лев! Изэрд шӧрас менӧ виасны!»
Киысь киӧ ветлысь аньлӧн сёрниыс — джуджыд гу, Господь кодӧс ёрас, сійӧ сэтчӧ усяс.
Зонпилы кӧ йӧйлун кӧвъясьӧма, мезды сійӧс ньӧръялӧмӧн.
Коді дзескӧдӧ гӧльӧс да сетӧ озырлы, сійӧ ачыс гӧльмас, оз озырмы.
Копырт пельтӧ да кывзы мывкыд йӧзлысь кывъяссӧ, бергӧд сьӧлӧмтӧ менам тӧдӧмлунлань. Тэныд нимкодь лоас, менсьым тӧдӧмлунӧс кӧ видзан сьӧлӧмад, мывкыд кывъясӧн кӧ кутан сёрнитны.
Талун ме велӧда тэнӧ, медым Господь вылӧ лачатӧ кутін.
Комын шусьӧг гижи тэныд, медым велӧдны да туйдӧдны тэнӧ, медым тэ тӧдін збыльсӧ, кужин вочавидзны тэнӧ мӧдӧдысьяслы.
Гӧль мортӧс эн дзескӧд сылӧн гӧльлун вӧсна, коньӧрӧс эн кедзовт ёрд водзын. Ӧд Господь сувтас сы дор, сійӧс дзескӧдӧм понда бырӧдас тэнӧ.
Эн ёртась дӧзмысь морткӧд, ӧдйӧ пузьысь морткӧд эн волысь, медым тэ эн велав сылӧн оласногӧ да ассьыд ловтӧ дзугйӧ эн сюй.
Эн вӧч на моз, кодъяс кыв сетӧны да мӧдлысь уджйӧзсӧ ас выланыс босьтӧны, вештысьнытӧ кӧ он кут вермыны, вольпасьтӧ тэ улысь нуасны.
Пӧльясӧн важӧн пуктӧм мудор пассӧ орчча му вылӧ эн вешты.
Сяммысь-кужысь морт вылӧ видзӧд — сійӧ кутас кесъявны ӧксыяслы, оз прӧстӧй йӧзлы.
Юралыськӧд сёйны пуксигӧн видзӧд ныр увсьыд, мый пызан вылас.
Азымлунтӧ потшӧсав, тэ кӧ весиг тшыгъялан.
Эн ышты сылӧн чӧскыд сёян вылӧ — та сайын ылӧдлӧм.
Эн мудзты асьтӧ, медым озырмӧдчыны, эновт татшӧм мӧвпъястӧ.
Чӧвтан синтӧ озырлун вылад, а сійӧ абу нин, сійӧ вӧчӧма аслыс бордъяс да кутш моз лэбзьӧма енэжлань.
Эн мун сёйны лёк сьӧлӧма морт дінӧ, эн ышты сылӧн чӧскыдторъяс вылӧ. Сійӧ шуӧ, сёй пӧ да ю, а сьӧлӧмнас абу тэкӧд.
Сёян кӧ, восан, бур кывъястӧ весьшӧрӧ висьталан.
Вежӧртӧмкӧд эн сёрнит, ӧд сійӧ мустӧмтӧ тэнсьыд мывкыд кывъястӧ.
Важысянь пуктӧм мудор пассӧ эн вешты, батьтӧм-мамтӧмлысь мусӧ эн мырддьы, ӧд найӧс Дорйысьыс вына, Сійӧ доръяс найӧс, а тэныд паныд сувтас.
Ассьыд сьӧлӧмтӧ велӧдӧмлань бергӧд, ассьыд пельтӧ тӧдӧмлунлань чошкӧд.
Питӧ чирышттӧг эн коль, ньӧръялӧмысь сійӧ оз кув.
Ньӧръялан кӧ сійӧс, сылысь ловсӧ мездан кулӧмысь.
Пиӧй, тэ кӧ мывкыд сьӧлӧма, таысь и менам сьӧлӧмӧй нимкодясьӧ.
Менам лолӧй нимкодясьӧ, кор тэ сёрнитан веськыда.
Эн вежав мыж вӧчысьяслы, но став олӧм чӧжыд пов Господьысь. Сэки тэнад лоӧ аскиа луныс, тэнад лачаыд оз кус.
Кывзы, пиӧй, мывкыдсяв, веськыд туй вылӧ бергӧд сьӧлӧмтӧ.
Эн пукав юысь-кодалысьяс пӧвстын да на пӧвстын, кодъяс горша сёйӧны яй.
Юысь-кодалысьяс да восмӧныс сёйысьяс гӧльмӧны, унзіль олӧмыд пасьтӧдас киссьӧм паськӧмӧ.
Кывзысь батьыдлысь, олӧмтӧ сетысьлысь, эн мустӧмт мамтӧ сылӧн пӧрысь кадас.
Ньӧб збыльсӧ, эн вузав мывкыдтӧ, велӧдӧмтӧ да вежӧртӧ.
Веськыда олысь пи вӧсна батьыс нимкодясьӧ, мывкыд пи долыдмӧдӧ батьсӧ.
Мед нимкодясяс батьыд, тэнӧ чужтысь мамыдлы мед лоӧ долыд.
Пиӧй, сьӧлӧмтӧ сет меным, ветлы менам туйӧд. Кырсалысь аньыд — джуджыд гу, йӧз гӧтырыд — векньыд юкмӧс.
Гусясьысь моз пукалӧ кыйӧдчанінын, унаӧс кыскӧ гозъякост олӧм пежалӧмӧ.
Кодлӧн тайӧ ойзӧм-ружтӧмыс? 
Кодлӧн тайӧ зыксьӧм-норасьӧмыс?
Кодлӧн вир-яйыс помкатӧг доймалӧма?
Кодлӧн тайӧ гырдмӧм синмыс?
Сылӧн, коді кадсӧ коллялӧ вина юӧмӧн, коді корсьысьӧ унджык юны.
Эн видзӧд виналӧн гӧрд рӧмыс вылӧ, эн видзӧд юан дозйысь сылысь ворсӧдчӧмсӧ.
Кокньыд сійӧс ньылыштнысӧ, но бӧрыннас змей моз курччас, аспид моз чушкас.
Синмыд пондас вӧтлысьны йӧз гӧтыр бӧрся, сьӧлӧмад чужасны пеж мӧвпъяс. Тэ лоан сэки саридз гыяс шӧрын узьысь кодь, шолга * йылын узьысь кодь.
Тэ шуан: «Нӧйтісны менӧ, а меным эз доймы, кучкалісны менӧ, но ме эг кывлы.
Паляла да, бара тайӧс понда корсьны».
Лёк йӧзлы эн вежав, накӧд эн ӧтувтчы. Найӧ олӧны лёк мӧвпъясӧн, лёк вӧчӧм йылысь сёрнитӧны.
Мывкыдлуныд керкатӧ лэптӧ, вежӧрыд видзӧ-кутӧ сійӧс, тӧдӧмлуныд тыртӧ вежӧсъяссӧ мича дона эмбурӧн.
Мывкыд мортыд вына, вежӧра мортыд асьсӧ ёнмӧдӧ.
Туйдӧдтӧг тышӧ эн пет, туйдӧдысьыд кор уна, верман.
Вежӧртӧмлы мывкыдлуныс гӧгӧрвотӧм, карса дзиръя дорын чукӧртчӧм йӧз водзын сылы нинӧм шунысӧ.
Коді мӧвпалӧ лёк вӧчӧм йылысь, сійӧс шуӧны лӧгалысьӧн.
Вежӧртӧмлӧн кӧсйӧмыс — мыж, Енмӧс омӧльтысь — йӧзыслы зывӧк.
Сьӧкыд кадӧ кӧ лолыд нюкыртчӧ, сідзкӧ, выныд тэнад этша.
Мезды мыжтӧм мортӧс, кодӧс нуӧдӧны вины, дорйы кулӧм вылӧ мыждӧмаӧс.
Тэ шуан: «Ме нинӧм ог тӧд та йылысь», но Енмыс тӧдмалӧ сьӧлӧмъяс.
Сійӧ видзӧ тэнсьыд олӧмтӧ да тӧдӧ тэнӧ, Сійӧ мынтысяс быдӧнлы уджъясыс серти.
Пиӧй, сёй ма, ӧд сійӧ бур, горшыдлы сійӧ юмов. Мывкыдлуныс татшӧм жӧ бур: аддзин кӧ мывкыдлунсӧ, тэнад эм аскиа луныс да лачаыс.
Лёк вӧчысь, эн кыйӧдчы веськыда олысьлӧн керкаыс бӧрся, сылысь оланінсӧ эн кушты. Веськыда олысь сизимысь усьлас, но бӧр чеччас, а мыж вӧчысь лёкас крукасяс.
Эн нимкодясь, тэнӧ мустӧмтысь кӧ усьӧ, сылӧн крукасьӧмысь мед оз долыдмы сьӧлӧмыд, ӧд Господь аддзас тайӧс да чайтас лёкӧн — и вештас сы вылысь Ассьыс скӧрлунсӧ.
Лёк морт вылӧ эн лӧгав, мыж вӧчысьлы эн вежав. Ӧд лёк мортлӧн аскиа луныс абу, мыж вӧчысьлӧн биыс кусӧ.
Пиӧй, Господьысь да ӧксыысь пов, паныд кыпӧдчысьяскӧд эн волысь, ӧд виччысьтӧг найӧс шог суас, и код тӧдас, кыдзи найӧс Господь да ӧксы мыждасны.
Мывкыд йӧзсянь нӧшта шусьӧгъяс. Ёрдысь мед мыждӧ веськыда, оз чужӧм вылӧ видзӧдӧмӧн.
Коді мыжаӧс шуӧ веськыдӧн, сійӧс йӧзыс ёрасны, сійӧс пондасны мустӧмтны чужанкотыръяс.
Веськыда мыждысьлӧн ставыс артмас, сійӧс лоӧ бурсиӧма.
Веськыда вочавидзӧм — вомдортӧ окыштӧм кодь.
Медводз град йӧрад уджав, муястӧ вӧч, сэсся керкатӧ лэпты.
Матыссаыд йылысь ылӧгсӧ эн висьтав — мыйла тэныд пӧръясьнысӧ?
Эн шу: «Кыдзи сійӧ меным вӧчис, ме сылы сідзи жӧ вӧча, мынтыся сылы меным вӧчӧм серти».
Ме муні дыш мортлӧн му бокті, вежӧртӧм мортлӧн виноград йӧр пӧлӧн да аддзи: йӧрыс ставнас вӧлі тырӧма ёгӧн, пасьтала быдмӧма петшӧр, изйысь вӧчӧм потшӧсыс киссьӧма.
Видзӧді-мӧвпалі да со мый гӧгӧрвои: узьыштан, вугралыштан, китӧ сюркнялӧмӧн пукалыштан, да он и казяв, кыдзи шӧйтысь моз гӧльлуныд локтас, гусясьысь моз тшыгъялӧмыд пырас.
Соломонлӧн нӧшта шусьӧгъяс, чукӧртӧмаӧсь найӧс иудаса Езекей ӧксылӧн йӧзыс.
Ошкӧм Енлы, коді гусяторсӧ дзебӧ, ошкӧм ӧксылы, коді гусяторсӧ тӧдмалӧ.
Енэжлысь судтасӧ, мулысь пыдтасӧ да ӧксылысь сьӧлӧмсӧ он вермы тӧдны.
Весав эзысьтӧ, торйӧд сэтысь сорассӧ, та бӧрын позяс дозмуктӧ вӧчны, вӧтлы ӧксы дінысь лёк йӧзӧс, сэки веськыдлуныс вынсьӧдас сылысь юралӧмсӧ.
Ӧксы водзын асьтӧ эн кыпӧд, тӧдчана йӧз пӧвстӧ эн пуксьы. Тӧдчана морт дырйи тэнӧ ылӧджык пуксьӧдӧм дорысь бурджык, пуксьӧдасны кӧ тэнӧ ӧксы дінӧ матӧджык.
Сійӧс, мый аддзылін, эн тэрмась ёрдӧ вайны. Мый кутан вӧчны, янӧдасны кӧ тэнӧ?
Ас кузяыд матыссаыдкӧд вензьы, а мӧдлысь гусяторсӧ эн восьт. Восьтан кӧ — тайӧс кывзысь тэнӧ асьтӧ янӧдас, и лёк сёрни тэ йылысь паськалас.
[Муслун да ёртасьӧм мездӧны: видз найӧс, медым эз увтыртны тэнӧ. Сэки ассьыд туйтӧ видзан, кутан лӧня овны.]
Ас кадӧ шуӧм кывйыд быттьӧ эзысь тасьтіын зарни яблӧг.
Мывкыд мортлӧн ӧлӧдӧмыс сійӧс кывзысьлы пельтӧ мичмӧдысь зарни исерга кодь.
Кӧдзыд ва ыркӧдӧ нянь вундысьӧс — татшӧм жӧ эскана кесйӧг аслас мӧдӧдысьлы, сійӧ вын сетӧ аслас ыджыдыслы.
Коді ошйысьӧ козинъясӧн, но нинӧм оз сет, сійӧ зэртӧм кымӧр да тӧвныр кодь.
Рамлуныд эскӧдӧ юралысьӧс, небыд кывйыд весиг лы чегӧ.
Сюрис кӧ тэныд ма, сёй мыйта колӧ, сӧмын эн восмӧныд.
Ёртыд дінӧ помся эн ветлӧдлы, дышӧдан да, мустӧмман сылы.
Коді матыссаыс йылысь ылӧдчӧмӧн висьталӧ ёрд водзын, сійӧ — кӧрт нӧш, шыпурт да ёсь ньӧв.
Ылӧдчысь морт вылӧ шог дырйи лача кутӧмыд — чегӧм пинь да эбӧстӧм кок.
Коді шог сьӧлӧма мортлы долыд сьыланкыв сьылӧ, сійӧ — кӧдзыд лунӧ паськӧмсӧ пӧрччысь морт кодь, шог сьӧлӧмалысь дойсӧ уксусӧн кисьталысь морт кодь.
[Мортлысь сьӧлӧмсӧ йирысь шогыд — паськӧм сёйысь воз да пу сёйысь номыр кодь.]
Тэнӧ мустӧмтысь кӧ тшыг, верд сійӧс, горшыс кӧ косьмӧ, юктав сійӧс. Тадзи тэ чукӧртан сылы юр вылас биа ӧгыръяс, а Господь тэныд бурӧн мынтысяс.
Вой тӧв вайӧ зэр, гуся сёрни — лӧг чужӧмъяс.
Бурджык ӧтнадлы керка вевт вылын овны пинясьысь гӧтыркӧд керкаын олӧм дорысь.
Ылі муысь бур юӧрыд — горш косьмигӧн ыркыд ва кодь.
Веськыда олысь кӧ тіралӧ мыжа йӧз водзын, сійӧ гудыр ваа дуксьӧм юкмӧс кодь.
Абу бур — уна ма сёйны, абу бур — ошкӧмсӧ корсьны.
Коді оз сяммы асьсӧ кутны, сійӧ — стентӧг сулалысь киссьӧм кар кодь.
Кыдзи гожӧм шӧрын лым да вундан кадӧ зэр — тадзи вежӧртӧмӧс оз лӧсяв ошкынысӧ.
Кыдзи пышкай жбыркнитӧ, кыдзи джыдж лэбзьӧ — тадзи нинӧм абусьыс ёрӧмыс вешйӧ тэ дінысь.
Вӧвлы — орс, осёллы — домповод, а вежӧртӧмлы — ньӧр.
Эн вочавидз вежӧртӧмлы сылӧн йӧйлун серти, медым ачыд эн ло сы кодь. Вочавидз вежӧртӧмлы сылӧн йӧйлун серти, медым асьсӧ мывкыдӧн эз чайт.
Коді мӧдӧдӧ вежӧртӧмӧс юӧр висьтавны, сійӧ ассьыс коксӧ чегӧ да асьсӧ дойдалӧ.
Вежӧртӧмлӧн вомас шусьӧгыд — чотігтырйи мунысь кок кодь.
Коді вежӧртӧмӧс нимӧдӧ, сійӧ лыйсян кӧвйӧ из кӧрталӧ.
Вежӧртӧмлӧн вомас шусьӧгыд — коддзӧм морт киын лежнӧг кодь.
Коді уджавны медалӧ вежӧртӧмӧс либӧ сідз-тадз кодӧскӧ, сійӧ — ньӧввужйӧн кытчӧ веськалӧ лыйысь кодь.
Кыдзи понйыд аслас вос дорӧ бергӧдчӧ, тадзи вежӧртӧм морт ассьыс пыр нырӧ.
Асьсӧ мывкыдӧ пуктысь морт дорысь бурджык вежӧртӧм вылӧ лача кутны.
Дыш мортыд шуӧ: «Туй вылас лев! Ывлаын звер кыйӧдчӧ!»
Ӧдзӧсыд бергалӧ дзир вылас, дыш мортыд — вольпасяс.
Дышӧдчысь босьтӧ тасьтісьыс сёянсӧ, но кисӧ вомӧдзыс сьӧкыд лэптыны.
Дышӧдчысь чайтӧ асьсӧ мывкыдджыкӧн сизим морт дорысь, кодъяс кужӧны сюся вочавидзны.
Мунігкостіыд кӧ йӧзлӧн зык-венӧ ныртӧ сюян, понйӧс пельӧдыс кватитысь кодь лоан.
Кыдзи йӧйталысь лыйӧ ньӧвйӧн да виӧ биа ньӧвъяснас, тадзи вӧчӧ сійӧ, коді ёртсӧ пӧръялӧ, а бӧрыннас шуӧ, ме пӧ шмониті.
Пескыд кор помасяс, биыд кусас, суклясьтӧг зыксьӧмыд лӧняс.
Ӧгыр сетӧ шоныд, пессянь кыптӧ би, а пинясьысь пестӧ лӧглун.
Суклясьысьлӧн кывъясыс чӧскыдӧсь, кынӧм пытшкӧдзыд пырӧны.
Мелі сёрниа, но лёк сьӧлӧма мортыд эзысьӧн эжӧм сёй дозмук кодь.
Мустӧмтысь сайӧдчӧ мелі кывъясыс сайӧ, но сьӧлӧмас ылӧгсӧ лӧсьӧдлӧ.
Эн эскы сылы, мед кӧть и меліа сёрнитӧ, ӧд сійӧ тырӧма лёкнас.
Мед кӧ сійӧ дзебӧ мустӧмтӧмсӧ, но йӧз водзын сылӧн лёклуныс воссяс.
Коді гу кодйӧ мӧдлы, ачыс сэтчӧ усьӧ, коді из быгыльтӧ, ачыс из улас веськалӧ.
Ылӧдчысь мустӧмтӧ мортӧс, кодӧс дойдаліс, леститчан кывйыд бырӧдӧм дасьтӧ.
Аскиа луныс мый ваяс — он тӧд, сідзкӧ, водзвывсӧ эн ошйысь.
Тэнӧ мед ошкӧ мӧд, а он ачыд асьтӧ, мӧд вомсянь мед петӧ тэнӧ ошкӧмыс, а оз аслад вомсянь.
Изйыд сьӧкыд и лыаыд абу кокньыд, но вежӧртӧмлӧн дӧзмӧдӧмыс сьӧкыдджык на.
Чорыда скӧрмӧм-ярмӧмтӧ сувтӧдны сьӧкыд, вежӧгтӧмтӧ нинӧм оз сувтӧд.
Мыж эрдӧдысь бурджык чӧв олысь ёрт дорысь.
Радейтысьлӧн янӧдӧмыс веськыд, мустӧмтысьлӧн окыштӧмыс ылӧг.
Коді пӧт, сылы весиг маыд мустӧм, но коді тшыг, сылы и курыдыс юмов кажитчӧ.
Чужанінсӧ кольысь мортыд позсӧ эновтысь лэбач кодь.
Чӧскыд ӧвтанторъяс да мавтасъяс долыдмӧдӧны сьӧлӧмтӧ, тадзи ёртыдлӧн бур туйдӧдӧмыс долыдмӧдӧ тэнӧ.
Ассьыд ёрттӧ да батьыдлысь ёртсӧ эн вунӧд, шог дырйи вок ордад эн мун, ӧд ылысса вок дорысь бурджык матысса сусед.
Пиӧй, ло мывкыд, сьӧлӧмӧс гажӧд, сэки ме верма воча кыв шуны менӧ лёкӧдысьлы.
Вежӧра морт казялӧ лёксӧ да дзебсьӧ, вежӧртӧм водзӧ мунӧ да мыждӧма лоӧ.
Тӧдтӧм морт вӧсна кыв сетысьлысь босьт дӧрӧмсӧ да ас ордад видз, кытчӧдз уджйӧзыс оз ло мынтӧма.
Водз асывсянь кӧ ёрттӧ гораа бурсиан, кылысьяс чайтасны, мый ёран сійӧс.
Броткысь гӧтырыд — зэра лунӧ письтӧм керка вевт кодь, сійӧс ӧлӧдӧм дорысь кокньыдджык тӧв ӧлӧдны либӧ киад вый чабыртны.
Кӧрт кӧртӧс кеслӧ, морт мортӧс веськӧдӧ.
Коді быдтас инжир пу, вотӧссӧ сэтысь сёяс, коді доръяс ассьыс ыджыдсӧ, сійӧс пыдди пуктасны.
Ваӧ видзӧдігӧн ассьыд чужӧмтӧ аддзан, мӧдлӧн сьӧлӧмӧ видзӧдігӧн — ассьыд сьӧлӧмтӧ.
Пыдӧстӧминыс да кулӧмаяслӧн оланіныс — пӧтлытӧмӧсь, тадзи морт синмыд тшӧтш пӧтлытӧм.
[Господьлы зывӧк ыкшаасьысь морт, ковтӧг ассьыс вомсӧ восьталысь — вежӧртӧм.]
Эзысьтӧ да зарнитӧ биын сывдӧны, а мортӧс тӧдмалӧны сійӧс ошкигӧн. 
[Мыж вӧчысьлӧн сьӧлӧмыс корсьӧ лёксӧ, а веськыд сьӧлӧм корсьӧ тӧдӧмлун.]
Вежӧртӧмӧс кӧть шобді тусьӧс моз гырйын той — йӧйлуныс сыысь оз торъяв.
Видзӧд ыжъясыд бӧрся, бура тӧждысь на вӧсна. Озырлуныд ӧд абу пыр кежлӧ, дай юралан пуклӧсыд оз век аслад рӧдлы вудж.
Кор турун заптӧм бӧрын выль турун петӧ, кор ыбвывса турун ытшкӧма, сэки ыжъястӧ шыран да паськӧмтӧ вуран, кӧзаястӧ вузалан да му ньӧбан, кӧза йӧлыд тырмымӧн лоас аслыд да гортсаясыдлы, сыӧн пӧткӧдчасны тшӧтш кесйӧг аньясыд.
Лёк вӧчысь пышйӧ, весиг кӧ сійӧс оз вӧтӧдны, но веськыда олысь лев кодь повтӧм.
Войтырыс кӧ лёк вӧчӧмӧн олӧ, сэки веськӧдлысьыс уна, но сюсь вежӧра юралысь дырйи канмуыслӧн нэмыс кузь.
Гӧль морт, коді дзескӧдӧ коньӧрӧс, кӧдзӧм нянь кылӧдысь зэр кодь.
Енлысь Индӧдсӧ вунӧдысь лёк вӧчысьясӧс ошкӧ, а Индӧд серти олысь лёк вӧчысьяслы паныд сувтӧ.
Лёк йӧз веськыда мыждӧмсӧ оз гӧгӧрвоны, а Господьӧс корсьысьяс сійӧс бура вежӧртӧны.
Гӧль да сӧстӧма олысьыд бурджык озыр мортысь, коді пежас олӧ.
Индӧд серти олысь пи — вежӧра, но коді ёртасьӧ эмбур лотысьяскӧд, сійӧ янӧдӧ ассьыс батьсӧ.
Уджйӧзалысь содтӧдӧн босьтысь чукӧртӧ сылы, коді отсалӧ гӧльяслы.
Коді оз кӧсйы кывзыны Индӧдсӧ, сылӧн кевмысьӧмыс — зывӧк.
Коді веськыда олысьӧс лёкас кыскӧ, сійӧ ачыс аслас гуӧ усяс, а сӧстӧмъяслы бурыс вичмас.
Озыр мортыд асьсӧ мывкыдӧн чайтӧ, но вежӧра гӧль морт тӧдӧ, кутшӧм сійӧ.
Кор вермӧны веськыда олысьяс, йӧзыс долыдмӧны, но кор лёк вӧчысьяс ыджыдалӧны, йӧзыс дзебсьӧны.
Коді дзебӧ мыжъяссӧ, сылӧн нинӧм оз артмы, но коді висьтасьӧ да дугдӧ мыж вӧчны, сы дінӧ Енмыс буралӧ.
Енмысь полысь — майбыр, сьӧлӧмсӧ чорзьӧдысь лёкас веськалӧ.
Эргысь лев да тшыг ош — татшӧм лёк юралысь гӧль войтырлы.
Вежӧртӧм юралысь дзескӧдӧ войтырсӧ, а коді оз горшась, сылӧн нэмыс кузь.
Вир кисьтысь пондас кувтӧдзыс пышъявны — энӧ кутӧй сійӧс.
Сӧстӧма олысь повтӧг ветлӧ, а коді чукльӧдлӧ, виччысьтӧг усьӧ.
Му вӧдитысь оз кут тшыгъявны, абутӧмсӧ кыйӧдысь дзикӧдз гӧльмас.
Кодлы позьӧ эскыны, сійӧс лоӧ ёна бурсиӧма, но коді тэрмасьӧ озырмыны, мыждытӧг оз коль.
Чужӧм вылӧ видзӧдӧмӧн вӧчны — абу бур, мортыд весиг няньтор вӧсна вермӧ лёксӧ вӧчны.
Колысь морт тэрмасьӧ озырмыны, но оз тӧд, мый гӧльлун суас сійӧс.
Мортыд бӧрыннас пыдди пуктас сійӧс ӧлӧдысьӧс, а оз кывнас мавтыштысьӧс.
Коді гусясьӧ бать-мамыслысь да шуӧ: «Тайӧ абу мыж», сійӧ бырӧдысьлы ёрт.
Ыкша мортыд зык-вен пестӧ, Господь вылӧ лача кутысь пондас бура овны.
Ас вылас лача кутысь — вежӧртӧм, мывкыда олысь повтӧг ветлӧ.
Гӧльлы сетысь оз гӧльмы, а коді оз отсав гӧльлы, сійӧс ёрӧм суас.
Кор лёк вӧчысьяс ыджыдалӧны, йӧзыс дзебсьӧны, а кор лёк вӧчысьяс усьӧны, веськыда олысьяслӧн лыдыс содӧ.
Ӧлӧдӧм бӧрын коді асныралӧ, сійӧс тӧдлытӧг лоӧ жугӧдӧма, и сійӧ оз нин бурд.
Веськыда олысьяслӧн лыдыс кӧ содӧ, йӧзыс нимкодясьӧны, лёк вӧчысь кӧ ыджыдалӧ, йӧзыс ойзӧны.
Мывкыдсӧ радейтысь долыдмӧдӧ батьсӧ, а коді ветлӧ кырсалысь аньяс дінӧ, лотӧ эмбурсӧ.
Веськыда мыждӧмнас ӧксы ёнмӧдӧ ассьыс мусӧ, а козинъяс радейтысь — куштӧ сійӧс.
Коді леститчӧ матыссаыс водзын, тыв зэвтӧ сылӧн коклы.
Лёк мортлӧн мыжыс сійӧс асьсӧ тывйыштӧ, а веськыда олысь гажӧдчӧ да нимкодясьӧ.
Веськыда олысьыд гӧль мортлысь ёрдӧ вайӧм венсӧ тӧдмалӧ-туялӧ, а лёк вӧчысьлы тайӧ веськодь.
Яндысьтӧм йӧз гызьӧдӧны карсӧ, мывкыдаяс скӧрмӧмтӧ лӧньӧдӧны.
Мывкыд морт кор ёрдын вензьӧ вежӧртӧмкӧд, лӧгалӧ ли сералӧ вежӧртӧмыд — лӧньлуныс сылӧн абу.
Вир кисьтысьяс мустӧмтӧны сӧстӧма олысьӧс, веськыда олысьяс тӧждысьӧны сы вӧсна.
Вежӧртӧм морт став ассьыс скӧрлунсӧ ортсӧ кисьтӧ, а мывкыд морт кутчысьӧ скӧрмӧмысь.
Юралысь кӧ кывзӧ ылӧг сёрнияс, сылӧн кесъялысьясыс лёксӧ вӧчны кутасны.
Дзескӧдысь да гӧль морт ӧткодьӧсь, кыкнанныслы Господь югыдсӧ сетӧма.
Ӧксы кӧ гӧльясӧс веськыда мыждӧ, сылӧн пуклӧсыс нэмсӧ зумыд лоас.
Ньӧр да ӧлӧдӧм сетӧны мывкыдлун, дӧзьӧртӧг быдмӧм зон янӧдӧ мамсӧ.
Лёк вӧчысьыс кор уна, мыж вӧчӧмыс содӧ, но веськыда олысьяс аддзасны налысь усьӧмсӧ.
Велӧд питӧ, сэки сы вӧсна он кут майшасьны, мӧдарӧ, кутан нимкодясьны.
Войтырыс лэдзчысьӧ, абу кӧ Енсянь восьтӧмыс, но Индӧд серти олысьяс — майбырӧсь.
Кесйӧгыд кыв шуӧмнад оз велав, сійӧ кывсӧ гӧгӧрвоӧ, но оз кывзысь.
Сы дорысь, коді мӧвпышттӧг кывсӧ шуӧ, бурджык вежӧртӧм вылӧ лача кутны.
Ичӧтдырсяньыс кӧ кесйӧгтӧ вельмӧдан, бурӧн тайӧ оз помась.
Скӧралысь мортыд зыксьӧм кӧдзӧ, ӧдйӧ пузьысь уна мыж вӧчӧ.
Мортлӧн асьсӧ вылӧ пуктӧмыс янӧдӧ сійӧс, рам сьӧлӧма пыдди пуктӧма лоас.
Коді ёртасьӧ гусясьыськӧд, аслыс лёксӧ вӧчӧ — сійӧ кылӧ гусясьысьӧс ёрӧм йылысь, но чӧв олӧ.
Йӧзысь полӧм — лэчкӧ шедӧм кодь, а Господь вылӧ лача кутысь повтӧг олӧ.
Унаӧн виччысьӧны бурсӧ юралысьсянь, но веськыда мыждӧмыс — Господьсянь.
Веськыда олысь зывӧктӧ лёк вӧчысьӧс, а лёк вӧчысь — веськыда олысьӧс.
Якейлӧн Агур пиыс висьталӧма тайӧ кывъяссӧ Итиэллы, висьталӧма Итиэллы и Укаллы.
Збыльысь, йӧз пӧвстын ме медся вежӧртӧмыс, йӧзлӧн кодь сюсьлун менам абу, мывкыдлунсӧ ме эг тӧдмав, вежа Енмӧс ог тӧд.
Коді кыпӧдчывліс енэжас да лэччыліс сэтысь?
Коді киас вермӧ кутны тӧвсӧ?
Коді гартыштіс васӧ дӧраӧн?
Коді доргӧгӧраліс мусӧ?
Кыдзи сійӧс шуӧны?
Кыдзи шуӧны сылысь писӧ?
Тӧдан-ӧ?
Енмыслӧн быд кыв сӧстӧм. Сійӧ дорйӧ быдӧнӧс, коді лача кутӧ Сы вылӧ.
Содтан кӧ мыйкӧ Сылӧн кывъясыс дінӧ, ылӧдчысь лоан — и Сійӧ янӧдас тэнӧ.
Кыктор ме Тэнсьыд кора, вӧч меным тайӧс менам олігӧн: вешты ме дінысь ковтӧм сёрни да пӧръясьӧм, гӧльлун да озырлун эн сет меным, тырмымӧн пӧткӧд менӧ няньӧн. Коланасьыс унджык мед оз ло менам, ӧд сэки ме верма бергӧдчыны Тэысь, верма шуны: «Ог тӧд Господьӧс». А гӧльма кӧ, пета гусясьны да Тэнсьыд нимтӧ, Енмӧй, янӧда.
Кесъялысьӧс ыджыдыс водзын эн лёкӧд, ӧд тэ мыжман, ёрӧмыс ас вылад усяс.
Курыд шог налы, кодъяс батьнысӧ ёрӧны да мамнысӧ оз бурсины.
Курыд шог налы, кодъяс чайтӧны асьнысӧ сӧстӧмӧн, збыльвылас найӧ пежӧсь на.
Курыд шог налы, кодъяс асьнысӧ лэптӧны да вылісянь видзӧдӧны.
Курыд шог налы, кодъяслӧн пиньныс шыпурт кодь, черлыныс пурт кодь, кодъяс бырӧдӧны гӧльясӧс му вылысь, коньӧръясӧс — йӧз пӧвстысь.
Пӧтлытӧм синлӧн кык ныв, найӧ ӧтарӧ горзӧны: «Вай да вай!»
Со куим пӧтлытӧм, весиг нёль, и найӧ оз шуны, тырмас пӧ!
Пыдӧстӧмин да нӧбасьтӧм кынӧм, ваӧн пӧтлытӧм му да би оз шуны, тырмас пӧ!
Коді сералӧ батьсӧ да мустӧмтӧ мамыслысь тшӧктӧмъяссӧ, сылысь синсӧ ковтысын кокаласны кырныш да кутшпиян.
Куимтор шензьӧдӧ менӧ, нёльтор ме ог гӧгӧрво: кутшлысь енэжті лэбалӧмсӧ, змейлысь изъяс вывті кыссьӧмсӧ, корабльлысь саридзті кывтӧмсӧ, айловлысь ань дінӧ сьӧлӧм кыскӧмсӧ.
А киысь киӧ ветлысь аньлӧн туйыс татшӧм: сёяс, вомдорсӧ чышкыштас, сэсся шуас, ме пӧ лёксӧ нинӧм эг вӧч.
Куимторйысь муыс тіралӧ, нёльтор сійӧ оз вермы нунысӧ: ӧксыӧ пуксьысь кесъялысьӧс, пӧттӧдзыс сёйысь вежӧртӧм мортӧс, верӧс сайӧ петысь мустӧм аньӧс да аслас кӧзяйкаыс пыдди пуксьысь кесйӧг аньӧс.
Му вылын эмӧсь нёльӧн, найӧ ичӧтӧсь, но мывкыдаясысь на мывкыдӧсь.
Кодзувкот абу вына, но аслыс сёянсӧ дасьтӧ гожӧмнас.
Даман* абу ён, но поздысьӧ изкыртаӧ.
Саранчалӧн ӧксыыс абу, но найӧ чукӧрӧн-чукӧрӧн кыпӧдчӧны.
Черань кокнас везйӧ кутчысьӧ, но овлӧ ӧксы керкаын.
Со куим, кодлӧн ветласыс лӧсьыд, нёль, коді ветлӧ мичаа: лев, зверъяс пӧвстын медвынаыс, коді туйсӧ некодлы оз сет, [курӧгъяс водзын] восьлалысь петук, [чукӧрыс водзын мунысь] ай кӧза да аслас войтырыс водзын ӧксы.
Тэ кӧ йӧйталігад асьтӧ вылӧ пуктін, мӧвпыштін лёк вӧчны, сэки ӧдйӧджык тупкы вомтӧ. Ӧд йӧвтӧ кӧ гудралан, артмӧ вый, нырад кӧ зургасны, петӧ вир, скӧрлун кӧ кӧдзан, вундан зыксьӧм.
Лемуил ӧксылӧн кывъясыс.
Тайӧ кывъясӧн мамыс велӧдіс сійӧс. Муса пиӧй, ме тэнӧ чужті, тэ йылысь ме кыв сетӧмӧн кевмыси.
Эн сет вынтӧ аньяслы, ӧксыясӧс уськӧдысь аньяс мед оз бергавны тэ гӧгӧр.
Лемуил пиӧй, ӧксыяслы оз позь вина юны, юралысьяслы — сур юны. Код юрнад вунӧдан индӧдсӧ, коньӧръясӧс он веськыда мыжды. 
Сетӧй сурсӧ куланвыйӧдз воӧмалы, сетӧй винасӧ курыд шогас вӧйӧмалы. Мед юас да, вунӧдлас ассьыс гӧльлунсӧ, вунӧдлас ассьыс курыд шогсӧ.
Сёрнит вермытӧм пыдди, дорйы батьтӧм-мамтӧмӧс.
Мыжды веськыда, дорйы гӧльӧс да коньӧрӧс.
Бур гӧтыртӧ аддзыны абу кокньыд! Став дона изйысь на сійӧ дона. Эскӧ сылы верӧсыс став сьӧлӧмнас, верӧсыслы эмбурсӧ сійӧ содтӧ. Бур гӧтыр верӧсыслы бур вайӧ, оз вӧч сылы лёксӧ став олан лунъяс чӧжыс.
Сійӧ судзӧдӧ вурун да шабді, зіля вӧчӧ став кипомса уджсӧ.
Вузӧс новлӧдлысь корабль кодь сійӧ, ылісянь сёян-юансӧ вайӧ.
Водз асывсянь чеччӧ, дасьтӧ гортсаыслы сёян, кесйӧг аньяслы индӧ удж.
Сійӧ видзӧдалӧ муяс, аслас сьӧм вылӧ ньӧбӧ му, пуктӧ сэтчӧ виноград пуяс.
Сійӧ дась вӧчны сьӧкыд удж, ӧд сылӧн киыс вына.
Сійӧ тӧдӧ, мый уджсӧ бура вӧчӧма, войбыд биыс сылӧн оз куслы.
Киыс нюжӧдчӧ печканӧ, чуньясыс чӧрссӧ оз лэдзлыны.
Сійӧ сетӧ гӧльяслы, отсасьӧ коньӧръяслы.
Тӧвся кӧдзыдысь сійӧ оз пов, ӧд став гортсаыслы вурӧма тӧвся паськӧм.
Ачыс шебрасъяс вурӧ, шабді дӧраысь да пемыдгӧрд вурунысь паськӧмсӧ лӧсьӧдӧ.
Верӧсыс сылӧн пыдди пуктана, юрнуӧдысьяслӧн чукӧртчӧмын сійӧ пукалӧ.
Бур гӧтыр вурӧ да вузалӧ дӧрӧмъяс, ханаанса вузасьысьяслы вайӧ вӧньяс.
Выныс да морттуйыс сылӧн тыдалӧ, сійӧ долыда виччысьӧ аскиа лунсӧ.
Вомас сылӧн мывкыд сёрни, шань сьӧлӧмӧн туйдӧдӧ.
Гортас ставыс сылӧн син улас, дась нянь вылын сійӧ оз ов.
Ныв-пиыс чеччӧны да шуӧны сійӧс майбырӧн, верӧсыс ошкӧ сійӧс тадзи: «Шань да зіль аньыс уна, но тэ — ставсьыс медбурыс».
Авъялуныд ылӧдлӧ, мичлуныд бырӧ, а Господьысь полысь гӧтырыд ошкана лоӧ.
Уджыс серти сійӧс нимӧдӧй, йӧз водзын сійӧс ошкӧй!
{Еврей йӧз (комиӧдіс Kodko) @ Еклесиаст @ религ. гижӧд @ Библия @ 2021 @ Лб. .}
abu
abu
Давид пилӧн, ерусалимса ӧксылӧн, еклесиастлӧн * мӧвпалӧм-шуӧмъяс.
abu
Весьшӧрӧ, — шуис еклесиаст, — ставыс весьшӧрӧ, дзик весьшӧрӧ.
Мый бурыс мортыслы сылӧн уджалӧмысь, шонді улас мырсьӧм-пессьӧмысь?
Ӧтияс мунӧны тайӧ олӧмсьыс, мӧдъяс чужӧны, а муыс сулалӧ нэмъяс чӧж.
Шонді петӧ и шонді пуксьӧ, сійӧ тэрмасьӧ аслас пуксянінӧ, сэсся бара петӧ.
Тӧвныр веськӧдчӧ лунвывлань, сэсся бергӧдчӧ войвывлань, сійӧ бергалӧ-кытшлалӧ да бӧр воӧ аслас кытшолӧ.
Став юыс визувтӧ саридзӧ, но саридзыс оз тыр. Ваыс бӧр бергӧдчӧ юлӧн петанінӧ, медым бара визувтны.
Сёрниыд мудзтӧдӧ мортӧс, сійӧ оз вермы ставсӧ шымыртны-висьтавны. Видзӧдӧмысь синмыд оз пӧтлы, кывзӧмысь пельыд оз тырлы.
Мый вӧлі, сійӧ лоӧ на, мый вӧлі вӧчӧма, сійӧс водзӧ кутасны вӧчны, шонді улас нинӧм выльыс абу.
Шулӧны, видзӧдлы пӧ, тайӧ — выльтор. Но тайӧ важӧн нин вӧлӧма, миянӧдз на вӧлӧма.
Мый кольӧма, сійӧ вунӧ, а мый лоас, сійӧс вунӧдасны водзӧ чужысьяс.
Ме, еклесиаст, вӧлі израильса ӧксыӧн Ерусалимын.
Ме став олӧмӧс пукті, медым мывкыдлун отсӧгӧн тӧдмавны-туявны ставсӧ, мый вӧчсьӧ енэж улас. Тайӧ сьӧкыд могсӧ Ен сетӧма мортлы.
Ме видзӧдалі став уджсӧ, мый вӧчсьӧ шонді улас. Вӧлӧмакӧ, ставыс весьшӧрӧ, тӧв бӧрся вӧтлысьӧм кодь.
Чуклятӧ он веськӧд, абутӧмтӧ он артав.
Ме шуи аслым: «Ме лои ыджыд да мывкыд мортӧн. Ме ёна сюсьджык ставныс дорысь, кодъяс меӧдз юравлісны Ерусалимын. Менам сьӧлӧмӧй тырӧма мывкыдлунӧн да тӧдӧмлунӧн». 
Ме шуи тӧдмавны, мый сійӧ мывкыдлуныс, вежӧртӧмлуныс да йӧйлуныс. Но гӧгӧрвои, мый тайӧ тӧв бӧрся вӧтлысьӧм кодь. Кӧні уна мывкыдлун, сэні уна дӧзмӧм. Коді содтӧ тӧдӧмлун, сійӧ содтӧ шог.
Ме кӧсйи тӧдмавны сьӧлӧмӧс гажӧдчӧмын, тшӧкті сылы нимкодясьны бурнас. Но и тайӧ, вӧлӧмакӧ, весьшӧрӧ.
Сералӧм йылысь ме шуи: «Йӧйталӧм», гажӧдчӧм йылысь шуи: «Эм-ӧ сыысь бурыс?»
Ме шуи гажӧдны ассьым вир-яйӧс винаӧн. Ме сетчи тайӧ йӧйталӧмас, но видзи мывкыдлунӧс аслам сьӧлӧмын. Ме кӧсйи тӧдны, мый вайӧ бурсӧ мортлы, да мый сылы колӧ вӧчны енэж улас ассьыс дженьыд нэмсӧ олігӧн.
Ме вӧчи ыджыд уджъяс: лэпті аслым керкаяс, пукті виноград пуяс, лӧсьӧді сад йӧръяс, расъяс да пукті сэтчӧ быдсяма вотӧса пусӧ, кодйи вайӧртӧдъяс, медым киськавны быдмысь пуяссӧ.
Ме ньӧби кесйӧг айуловӧс да кесйӧг аньясӧс, и менам керка помын чужисны кесйӧгъяс.
Ыж-мӧскыс менам вӧлі ёна унджык налӧн дорысь, кодъяс меӧдз юравлісны Ерусалимын.
Ме чукӧрті аслым эзысь-зарни, ӧксыяслысь да мукӧд войтыръяслысь озырлунсӧ.
Чукӧрті ас дінӧ сьылысь аньясӧс да айуловӧс и босьті аслым гӧтырӧ уна аньӧс, медым найӧ гажӧдісны менӧ.
Ме лои ёна ыджыд да озыр на дорысь, кодъяс меӧдз юравлісны Ерусалимын.
Но ме эг вошты мывкыдлунӧс.
Ме лэдзи видзӧдны синлы, мый сійӧ кӧсйис, эг кут сьӧлӧмӧс долыдасьӧмысь. Сьӧлӧмӧй нимкодясис став аслам уджысь, и тайӧ вӧлі меным удждонӧн. 
Ме видзӧдлі став уджыс вылӧ, мый вӧчис менам киӧй. Вӧлӧмакӧ, ставыс весьшӧрӧ, тӧв бӧрся вӧтлысьӧм кодь, и шонді улас таысь нинӧм бурыс абу.
Ме куті мӧвпавны мывкыдлун, вежӧртӧмлун да йӧйлун йылысь. Ме бӧрын ӧксыӧ пуксьысь оз вермы вӧчны ыджыдджыксӧ, мый вӧчӧма нин.
Ме аддзи, мый мывкыдлуныс бурджык вежӧртӧмлунысь, кыдзи югыдыс бурджык пемыдысь. Мывкыд морт аддзӧ, кытчӧ мунӧ, а вежӧртӧм шӧйтӧ пемыдас.
Но ме тӧдмалі, мый кыкнансӧ виччысьӧ ӧтитор.
Ме гӧгӧрвои, мый менӧ виччысьӧ сійӧ жӧ, мый вежӧртӧмӧс. Сідзкӧ, мыйла меным ыджыд мывкыдлуныс?
Вӧлӧмакӧ, и тайӧ весьшӧрӧ.
Мывкыдаӧс оз кутны казьтывлыны вежӧртӧмӧс дорысь дырджык.
Коляс кад, и ставсӧ вунӧдасны.
Мывкыдаӧс и вежӧртӧмӧс ӧтмоза кулӧмыс суӧ.
Ме мустӧмті олӧмӧс, ӧд меным зывӧк лои ставыс, мый вӧчсьӧ шонді улас.
Ставыс весьшӧрӧ, тӧв бӧрся вӧтлысьӧм кодь.
Ме мустӧмті став ассьым уджӧс, мый вӧчи шонді улас. Ӧд меным ставсӧ ковмас кольны сылы, коді кутас веськӧдлыны ме бӧрти.
Код тӧдас, мывкыд морт али вежӧртӧм сійӧ лоӧ.
Но сійӧ пондас вӧдитчыны ставнас, мый ме мывкыдлунӧн да сьӧкыда уджалӧмӧн нажӧвиті шонді улас.
И тайӧ, вӧлӧмакӧ, весьшӧрӧ.
Менам сьӧлӧмӧй нюкыртчис став уджӧй вӧсна, мый ме вӧчи шонді улас. Овлӧ, мый морт мырсьӧ-уджалӧ, пуктӧ та вылӧ став ассьыс мывкыдлунсӧ, тӧдӧмлунсӧ да кужанлунсӧ, а сэсся сылы лоӧ кольны ставсӧ мӧдлы, коді эз мырсьы-уджав.
И тайӧ, вӧлӧмакӧ, весьшӧрӧ да ыджыд лёктор.
Мый сетӧ мортыслы сьӧлӧмсянь тӧждысьӧмыс да став сылӧн мырсьӧм-уджалӧмыс, мый сійӧ вӧчӧ шонді улас?
Став сылӧн олӧмыс — шогсьӧм, сылӧн уджыс — мырсьӧм-пессьӧм, весиг войнас сьӧлӧмыс майшасьӧ.
И тайӧ, вӧлӧмакӧ, весьшӧрӧ.
Мырсян-пессян олӧмас мортлы сёйӧм-юӧм да нимкодясьӧм дорысь бурджыкыс абу.
Ме гӧгӧрвои, мый и тайӧ — Енсянь.
Вермас-ӧ мортыс сёйны-юны да Ентӧгыс нимкодясьны?
Коді шогмана Енмыслы, сылы Енмыс сетӧ мывкыдлун, тӧдӧмлун да долыдлун.
А мыж вӧчысьлы Енмыс сетӧ чӧжны-чукӧртны да кольны мортлы, коді шогмана Енмыслы.
Но и тайӧ, вӧлӧмакӧ, весьшӧрӧ, тӧв бӧрся вӧтлысьӧм кодь.
Быдторлы эм аслас кад, енэж улас ставыс вӧчсьӧ аслас кадӧ.
Эм кад чужны и кувны, пуктысьны и идравны, эм кад виавны и бурдӧдавны, жуглыны и тэчны, эм кад бӧрдны и серавны, шогсьыны и йӧктыны, эм кад шыблавны изъяс и чукӧртны изъяс, сывъясьны и янсӧдчыны, эм кад корсьны и воштыны, видзны и шыбитны, эм кад косявлыны и вурлыны, чӧв овны и сёрнитны, эм кад радейтны и мустӧмтны, эм кад тышлы и лӧньлунлы.
Мый бурыс мортлы сылӧн уджалӧмысь?
Ме аддзылі мырсьӧм-уджалӧм, мый Енмыс сетӧма вӧчны мортыслы.
Ставсӧ Енмыс вӧчӧма ас кадӧ мичаӧн, и морт сьӧлӧмӧ Сійӧ пуктӧма помтӧм олӧм, но помӧдзыс Енмыслысь уджъяссӧ морт оз вермы вежӧртны.
Ме гӧгӧрвои, мый мортыслы бурджык нимкодясьны да вӧчны бурсӧ олӧм чӧжыс.
Мырсян-пессян олӧмас кӧ мортыс сёйӧ-юӧ да нимкодясьӧ, тайӧ сылы — Енсянь козин.
Ме гӧгӧрвои, мый Енлӧн став вӧчӧмторйыс олӧ нэмъяс чӧж, та дорӧ нинӧм он содты и таысь нинӧм он чинты. Енмыс тадзи лӧсьӧдӧма, медым йӧзыс олісны Сыысь полӧмӧн да вежавидзӧмӧн.
Мый ӧні эм, сійӧ водзын вӧлӧма, мый водзӧ лоӧ, сійӧ вӧлӧма нин, Енмыс выльысь бергӧдӧ воддзасӧ.
Нӧшта ме аддзылі шонді улас, мый ёрдын ыджыдалӧ лёкыс, мыжданінын ыджыдалӧ пӧръясьӧм.
Ме мӧвпышті: веськыда олысьӧс и лёк вӧчысьӧс кутас мыждыны Ен, ӧд быд вӧчӧмторлы да лоӧмторлы эм аслас кад.
Морт йылысь ме мӧвпышті: Енмыс тӧдмалӧ мортӧс, медым сійӧ гӧгӧрвоис, мый сійӧ оз торъяв пемӧсысь.
Ӧд мортӧс и пемӧсӧс виччысьӧ ӧти и сійӧ жӧ: ӧтиыс кулӧ, и мӧдыс кулӧ. Ӧтиыс и мӧдыс ловъя дырйиыс лолалӧны, та вӧсна мортыс абу бурджык пемӧсысь — сідзкӧ, ставыс весьшӧрӧ.
Ставыс мунӧ ӧтилаӧ: ставсӧ вӧчӧма муысь, и ставыс бӧр бергӧдчӧ муӧ.
Коді вермас тӧдны, кыпӧдчӧ-ӧ мортлӧн лолыс вывлань, и лэччӧ-ӧ пемӧслӧн лолыс увлань, му пытшкас?
Ме гӧгӧрвои, мый мортлы бурджык нимкодясьны аслас уджъясӧн, ӧд тадзи лӧсьӧдӧма олӧмсӧ.
Коді нӧ бӧр вайӧдас сійӧс, медым видзӧдлыны, мый лоӧ сылӧн олӧм помасьӧм бӧрын?
Ме видзӧдлі быдпӧлӧс дзескӧдӧм вылӧ, мый вӧчсьӧ шонді улас: дзескӧдӧмаяс бӧрдӧны — найӧс бурӧдысьыс абу, найӧ дзескӧдысьлӧн вына киынӧсь, а бурӧдысьыс абу.
Ме шуи, мый кулӧмаяс шудаджыкӧсь ловъяяс дорысь, кодъяс олӧны на. Но ёна шудаӧсь найӧ, кодъяс эз на чужны да эз на аддзывны лёксӧ, мый вӧчсьӧ шонді улас.
Нӧшта ме аддзи, мый быдпӧлӧс удж да быд зільӧм-вермӧм чужтӧ йӧз костын вежалӧм. 
И тайӧ, вӧлӧмакӧ, весьшӧрӧ, тӧв бӧрся вӧтлысьӧм кодь.
Вежӧртӧм морт кисӧ сюркнялӧмӧн пукалӧ, ачыс асьсӧ бырӧдӧ.
Мырсьӧмӧн да тӧв бӧрся вӧтлысьӧмӧн кык китыр чукӧртӧм дорысь бурджык лӧнь сьӧлӧмӧн ӧти китыр чукӧртны.
Ме нӧшта аддзи, мый весьшӧрӧ шонді улас: ӧтка мортлӧн некод абу, пиыс ни вокыс абу.
Сійӧ мырсьӧ-уджалӧ, но озырлуныс сылысь сьӧлӧмсӧ оз гажӧд.
«Кодлы ме уджала? — мӧвпалӧ сійӧ. — Мыйла ме ачымӧс гажӧдчӧмысь кута?»
И тайӧ, вӧлӧмакӧ, весьшӧрӧ да абу буртор.
Кыкнад бурджык ӧтнадлы дорысь, ӧтувъя уджалӧмысь унджык бурыс.
Ӧтиыс кӧ усьӧ, мӧдыс лэптас сійӧс.
Но курыд шог ӧтка мортлы: сійӧ кӧ усьӧ, лэптысьыс оз ло.
Кыкӧн кӧ водасны, налы шоныд лоӧ, а ӧтнад кыдзи шоналан?
Ӧтитӧ вермыны кокньыд, а кыкнад оз сетчыны. Куимпӧвста сунистӧ сьӧкыд орӧдны.
Пӧрысь да вежӧртӧм ӧксы дорысь, коді оз кывзы туйдӧдӧмсӧ, бурджык гӧль, но мывкыда том морт, коді дзескыдінысь петӧм бӧрас ӧксыӧ пуксис, кӧть чужис гӧльӧн мӧдыслӧн ӧксыалӧм дырйи.
Ме аддзи, мый шонді улас став олысьыс сувтіс том морт дор, коді пуксис ӧксыавны пӧрысь ӧксы пыдди.
Лыдтӧм-тшӧттӧм йӧз сувтіс выль ӧксы дор, но сы бӧрын олысьяс бурӧн эз казьтывны сійӧс.
И тайӧ, вӧлӧмакӧ, весьшӧрӧ, тӧв бӧрся вӧтлысьӧм кодь.
Видзӧд ас бӧрсяыд, кор мунан Ен керкаӧ. Бурджык кывзысьны Енлысь вежӧртӧм морт моз вись вайӧм дорысь, ӧд вежӧртӧмыд оз тӧд, мый лёк вӧчӧ.
Кывтӧ шуны эн тэрмась, мӧвпышттӧг Ен водзын эн сёрнит, Енмыс ӧд енэжын, а тэ му вылын.
Сідзкӧ, сёрниыд мед оз ло уна кывъя.
Вӧтъясыд локтӧны уна тӧжд дырйи, вежӧртӧмӧс тӧдмалан уна сёрниыс серти.
Кывтӧ кӧ сетін Ен водзын, тэрмась вӧчнытӧ, ӧд вежӧртӧм абу шогмана Енлы. Сідзкӧ, кӧсйысин кӧ, вӧч.
Кӧсйысин кӧ да эн вӧч — тайӧ лёктор. Бурджык, он кӧ кӧсйысь.
Эн лэдз кывйыдлы кыскыны тэнӧ мыжас, [Енлӧн] юӧртысь водзын эн шу, тӧдлытӧг пӧ тадзи артмис.
Мыйла тэныд дӧзмӧдны Енсӧ кывнад, медым Сійӧ бырӧдіс ставсӧ, мый тэ вӧчин?
Уна вӧтыд да уна сёрниыд — весьшӧрӧ.
Но тэ пов Енмысь!
Аддзан кӧ, мый кӧнкӧ дзескӧдӧны гӧльӧс, торкӧны веськыда мыждӧм, оз вӧчны веськыда, эн шензьы та вылӧ. Ӧд юралысь бӧрся видзӧдӧ ыджыдджык юралысь, а на бӧрся — нӧшта на ыджыдджык.
Канмулы бур, кор ӧксыыс тӧждысьӧ аслас му вӧсна.
Кодлы муса сьӧм, сылы некор оз ло сійӧ тырмымӧн. Кодлы муса озырлун, сійӧ некор оз пӧтлы таысь.
И тайӧ, вӧлӧмакӧ, весьшӧрӧ.
Кор содӧ овмӧс-эмбурыд, сэки содӧ тшӧтш сёйысьлӧн лыдыс.
Мый бурыс таысь овмӧс кутысьлы — сӧмын кольӧ видзӧдны та вылӧ!
Уджалысь чӧскыда узьӧ — пӧт сійӧ али абу, а озыр морт пӧттӧдзыс сёйӧ, но унмовсьнысӧ оз вермы.
Ме аддзи шонді улас ыджыд лёктор — озырлун чукӧртӧмыд бурсӧ оз вай.
Виччысьтӧг суӧм лёктор вӧсна морт воштӧ озырлунсӧ, и пиыслы нинӧм оз вичмы.
Мортыд пасьтӧг петӧ мам кынӧмсьыс, пасьтӧг и мунӧ тайӧ муюгыдсьыс. Сійӧ мырсьӧ-уджалӧ, но нинӧм аскӧдыс оз ну.
Мортыд кутшӧмӧн локтіс муюгыдас, сэтшӧмӧн и эновтас сійӧс. И тайӧ — ыджыд лёктор.
Мый бурсӧ вайис сылы весьшӧрӧ мырсьӧм-уджалӧмыс?
Став олӧмсӧ сійӧ коллялӧ пемыдас, шогсьӧ-майшасьӧ, элясьӧ да скӧралӧ.
Ме аддзи, мый мырсян-пессян олӧмас мортлы сёйӧм-юӧм да нимкодясьӧм дорысь бурджыкыс да лӧсьыдджыкыс абу. Мортыс ӧд мырсьӧ-пессьӧ шонді улас Енмӧн сетӧм олан лунъяс чӧж — татшӧм сылӧн олан пайыс.
Енмыс кӧ сетӧ мортлы озырлун да овмӧс-эмбур, лэдзӧ сы помысь овны-вывны, босьтны ассьыс пайсӧ да нимкодясьны мырсян-пессян олӧмас, тайӧ сылы — Енсянь козин.
Кор Енмыс сетӧ мортлы удж, мортлӧн сьӧлӧмыс нимкодясьӧ, а оз майшась олан лунъяс йылысь.
Ме аддзылі шонді улысь лёктор, мый тшӧкыда овлӧ олӧмас.
Ен сетӧ мортлы озырлун, овмӧс-эмбур да нималӧм — ставсӧ, мый сылы колӧ, и мый сійӧ кӧсйӧ.
Но Ен оз лэдз сылы нимкодясьны тайӧ озырлуннас, ӧд сылӧн озырлуныс вичмӧ йӧзлы.
Тайӧ, вӧлӧмакӧ, весьшӧрӧ да ыджыд шог.
Мортыд вермас дыр овны, сылӧн вермас чужны сё ныв-пи, но сійӧ кӧ оз нимкодясь аслас овмӧс-эмбурнас, и кулӧм бӧрас сійӧс оз дзебны, шуа, мый чӧвтчӧм кага сы дорысь шудаджык. Чӧвтчӧм кагаыд ӧд весьшӧрӧ воліс, сійӧ муніс пемыдас, весиг сылысь нимсӧ пемыдыс тупкис.
Сійӧ эз аддзыв и эз тӧдлы югыд шондісӧ, но сылы лӧньджык мортлы дорысь, коді оліс эськӧ кык сюрс во да эз нимкодясь аслас эмбурӧн. Оз-ӧ ставныс мунны ӧтилаӧ?
Мортыд мырсьӧ-уджалӧ, мед сӧмын мыйкӧ сюйыштны вомас, но сылӧн сьӧлӧмыс таысь оз бурмы.
Мыйын бурыс мывкыдалы вежӧртӧмлы дорысь, мыйын бурыс гӧльлы, коді тӧдӧ, кыдзи колӧ овны йӧз водзын?
Абутӧмсӧ кӧсйӧм дорысь бурджык сійӧ, мый эм син водзад.
Но и тайӧ, вӧлӧмакӧ, весьшӧрӧ, тӧв бӧрся вӧтлысьӧм кодь.
Ставыслы, мый эм, нимсӧ сетӧма нин. Ми тӧдам, коді сэтшӧм мортыс. Сійӧ оз вермы вензьыны сыысь вынаджыккӧд.
Уна сёрни дырйи ставыс весьшӧрӧ. Мый бурыс таысь мортлы?
Коді тӧдӧ, мый бурджык мортыслы, кодлӧн олӧмыс мунӧ вуджӧр моз весьшӧрӧ?
Коді вермас висьтавны мортлы, мый лоӧ сы бӧрын шонді улас?
Бур нималӧмыд бурджык дона выйысь, кулан луныд — чужан лунысь.
Гажӧдчанінӧ мунӧм дорысь бурджык мунны сэтчӧ, кӧні кулӧма вӧсна бӧрдӧны, ӧд сэні ловъя мортыс гӧгӧрвоӧ, мый виччысьӧ быдӧнӧс.
Шогсьӧмыд бурджык сералӧм дорысь, ӧд сьӧлӧмыдлы бур, кор чужӧмыд шог.
Мывкыд мортлӧн сьӧлӧмыс мунӧ сэтчӧ, кӧні кулӧма вӧсна бӧрдӧны, а вежӧртӧмлӧн — гажӧдчанінӧ.
Вежӧртӧмлысь сьылӧмсӧ кывзӧм дорысь бурджык кывзыны мывкыдалысь ӧлӧдӧмсӧ. Вежӧртӧмлӧн серамыс пӧрт улын сотчысь лежнӧглӧн трачкӧдчӧм кодь.
И тайӧ, вӧлӧмакӧ, весьшӧрӧ.
Мӧдӧс дзескӧдӧм вӧсна и мывкыда морт лоӧ вежӧртӧмӧн, козин босьтӧмыд тшыкӧдӧ сьӧлӧмтӧ.
Помалӧмыд бурджык заводитӧм дорысь, терпитӧмыд бурджык вылӧ кыпӧдчӧмысь.
Эн тэрмась скӧрмыны, ӧд скӧрлуныс поздысьӧ вежӧртӧмлӧн сьӧлӧмӧ.
Эн юась, мыйла водзынсӧ вӧлі бурджык, татшӧм юалӧмыс абу мывкыдлунсянь.
Мывкыдлуныд — вичмӧм озырлун кодь, сійӧ бурсӧ вайӧ шонді улын олысьяслы. Мывкыдлуныд сьӧм моз видзӧ-сайӧдӧ, но тӧдӧмлуныд сьӧм дорысь бурджык, ӧд мывкыдалы сійӧ олӧм сетӧ.
Видзӧдлы Енлӧн уджъяс вылӧ. Коді вермас веськӧдны сійӧ, мый Енмыс кусыньтӧма?
Бур кадӧ нимкодясь, а сьӧкыд кадӧ эн вунӧд, мый ӧтиыс и мӧдыс — Енсянь. Енмыс тадзи лӧсьӧдӧма, медым мортыс нинӧм эз вермы шуны Сылы паныд.
Быдторсӧ ме аддзылі аслам весьшӧрӧ олан лунъясӧ: веськыда олысь веськыдлунас кулӧ, лёк вӧчысь лёкас дыр олӧ.
Эн ло вывті веськыда олысьӧн, эн петкӧдлы асьтӧ вывті мывкыдаӧн: мыйла тэныд бырӧдны асьтӧ?
Эн сетчы мыж вӧчӧмас, эн ло вежӧртӧмӧн: мыйла тэныд кадысь водз кувнысӧ?
Бур, тэ кӧ кутчысян воддза тшӧктӧмас и мӧдсьыс он ӧтдортчы, ӧд Енсьыс полысьӧс бырӧдӧмыс оз су.
Мывкыда мортӧс мывкыдлуныс вӧчӧ карса дас юралысь дорысь вынаджыкӧн.
Му вылас абу веськыда олысьыс, коді эськӧ мыжсӧ эз вӧчлы, а сӧмын бурсӧ. Эн чошкӧд пельтӧ быд сёрнилы, медым эн кыв, кыдзи кесйӧгыд лёкӧдӧ тэнӧ.
Тэ ӧд сьӧлӧмад тӧдан, мый тэ ачыд мукӧдсӧ унаысь лёкӧдлін.
Ставсӧ тайӧс ме тӧдмалі мывкыдлунӧн.
Ме шуи, мый кӧсъя лоны мывкыдаӧн, но мывкыдлуныс ылын меысь.
Ставыс ылын да пыдын, зэв пыдын — коді вермас судзӧдны сійӧс?
Ме став сьӧлӧмӧс пукті, медым туявны-тӧдмавны да корсьны мывкыдлунсӧ да вежӧрлунсӧ. Ме гӧгӧрвои, мый лёк вӧчӧмыс петӧ вежӧртӧмлунсянь, мывкыдтӧм олӧмыс — йӧйлунсянь.
Ме гӧгӧрвои, мый кулӧм дорысь курыдджык сэтшӧм нывбаба, коді тыв кодь, кодлӧн сьӧлӧмыс — нальк, кодлӧн киясыс — чепъяс.
Енлы шогмана морт пышйӧ сыысь, а мыжа мортӧс сійӧ тывйыштӧ.
Туялігӧн ме гӧгӧрвои, — шуис еклесиаст, — ме эг аддзы сійӧс, мый дыр корсьыси. 
Сюрс айлов пӧвстысь ме аддзи сӧмын ӧти веськыда олысьӧс, сюрс ань пӧвстысь — некодӧс.
Сӧмын ӧтитор ме гӧгӧрвои: Енмыс вӧчис мортӧс веськыдӧн, но йӧзыс сетчисны уна ковтӧм мӧвпалӧмӧ.
Кодкӧд ӧткодялан мывкыдаӧс? Коді вермас ставсӧ вежӧртны?
Мывкыдлуныд югзьӧдӧ чужӧмтӧ, вештӧ зумышлунтӧ чужӧм вывсьыд.
Вӧч ӧксылӧн шуӧм серти, ӧд тэ кыв сетін Ен водзын.
Эн тэрмась мунны ӧксылӧн чужӧмбан водзысь, эн мӧвпав вӧчны сылы лёксӧ, ӧд ӧксы вермас вӧчны ставсӧ, мый кӧсъяс.
Ӧксылӧн шуӧмыс вына.
Коді вермас шуны сылы: «Мый тэ вӧчан?»
Ӧксылӧн тшӧктӧм серти олысь оз шед лёкас. Мывкыда морт тӧдӧ, кор-мый вӧчнысӧ, ӧд быдторлы эм аслас кад да аслас мунанног.
Мортыд оз тӧд, мый сійӧс виччысьӧ, оз тӧд, кыдзи мый лоӧ. Тӧдтӧмлуныс ёна сьӧктӧдӧ мортӧс.
Коді висьталас сылы локтанасӧ?
Морт оз вермы ыджыдавны лолыс вылын, оз вермы кутны сійӧс, и кулан луныс абу сы киын. Тыш суӧмысь некод оз пышйы, лёк вӧчысьӧс лёкыс оз мезды.
Тайӧс ставсӧ ме казялі, и зіли вежӧртны, мый вӧчсьӧ шонді улас сійӧ кадас, кор морт ыджыдалӧ мӧд морт вылын и вайӧ сылы лёк.
Ме аддзылі, кыдзи дзебисны лёк вӧчысьясӧс. Найӧ ветлывлісны вежаинӧ, но карса олысьяс вунӧдісны та йылысь.
Вӧлӧмакӧ, и тайӧ весьшӧрӧ.
Лёк вӧчысьӧс кӧ дзик пыр оз мыждыны, сэки сійӧ водзӧ кутас лёксӧ вӧчны.
Мыжа морт вӧчӧ лёксӧ сё пӧвстӧн да сирасьӧ сэтчӧ. Но ме тӧда, мый Енсьыс полысьлы аслас вежавидзӧм вӧсна бур лоӧ.
А лёк вӧчысьлы бурыс оз ло, ӧд сійӧ оз пов Енсьыс. Сылӧн олан лунъясыс мыччысьлӧм вуджӧр кодьӧсь.
Му вылас нӧшта эм сэтшӧмтор, мый артмӧ весьшӧрӧ: веськыда олысьӧс суӧ сійӧ, мый колӧ суны лёк вӧчысьӧс сылӧн уджъясыс серти, а лёк вӧчысьлы вичмӧ сійӧ, мый колӧ вичмыны веськыда олысьлы сылӧн уджъясыс серти.
Вӧлӧмакӧ, и тайӧ весьшӧрӧ.
Ме ошки нимкодясьӧм, ӧд мортлы сёйӧм-юӧмысь да нимкодясьӧмысь бурджыкыс шонді улас абу. Нимкодясьӧмыс лоӧ сыкӧд став олан лунъяс чӧжыс, мыйтӧм Енмыс сетӧ сылы мырсьыны-пессьыны шонді улас.
Ме зіли тӧдмавны мывкыдлун да туявны мортлысь уджсӧ, мый сійӧ лун и вой вӧчӧ му вылас синсӧ куньлытӧг. Сэки ме гӧгӧрвои, мый мортыс оз вермы вежӧртны Енлысь уджъяссӧ, ставсӧ, мый вӧчсьӧ шонді улас.
Мыйтӧм кӧть мортыс эз туяв-тӧдмав, сійӧ вежӧртнысӧ оз вермы.
Весиг кӧ мывкыда морт шуас, мый сійӧ тӧдӧ, но збыльвылас сійӧ вежӧртнысӧ оз вермы.
Ме ёна мӧвпалі да гӧгӧрвои, мый веськыда олысьяс, мывкыда йӧз да налӧн уджъясыс — Ен киынӧсь. Мортыс оз тӧд, радейтӧм али мустӧмтӧм сійӧс виччысьӧ.
И тайӧ ӧтмоза инмӧ быдӧнлы: веськыда олысьлы и лёк вӧчысьлы, бур [и лёк] мортлы, сӧстӧм и пеж мортлы, вись вайысьлы и сылы, коді оз вай висьяс. Бур мортӧс суӧ сійӧ жӧ, мый мыж вӧчысьӧс, кыв сетысьӧс — сійӧ жӧ, мый кыв сетны полысьӧс.
Тайӧ и эм лёкыс шонді улас, мый став йӧзыскӧд лоӧ ӧтмоза. Мортлӧн сьӧлӧмыс тырӧма лёкнас, йӧйлуныс олӧ сы пытшкын олӧм чӧжыс, и олӧм бӧрас мортыс мунӧ кулӧмаяс дінӧ — тайӧ тшӧтш лёк.
Ловъя мортлӧн эм лача. Весиг ловъя понлы бурджык кулӧм левлы дорысь.
Ловъяяс тӧдӧны, мый куласны, а кулӧмаяс оз тӧдны нинӧм. Налы оз нин ло удждоныс, ӧд найӧс вунӧдӧма. Налӧн радейтӧмыс, мустӧмтӧмыс да вежӧгтӧмыс бырӧма-кольӧма. Некор и нинӧмторйын оз нин ло налы пайыс шонді улас.
Та вӧсна нимкодясьӧмӧн сёй няньтӧ, долыд сьӧлӧмӧн ю винатӧ, ӧд тайӧс Енмыс сетӧма тэныд.
Мед паськӧмыд пыр лоӧ еджыд, а юрыд — мавтӧма выйӧн.
Нимкодясь муса гӧтырыдкӧд олӧмнас аслад весьшӧрӧ олан лунъяс чӧжыд, мый тэныд сетӧма Енмыс шонді улас.
Татшӧм тэнад пайыд мырсян-пессян олӧмад шонді улас.
Ставсӧ, мый верман, вӧч выныд серти.
Ӧд кулӧмаяслӧн оланінас, кытчӧ тэ мунан, оз ло уджалӧмыс, мӧвпалӧмыс, тӧдӧмлуныс да мывкыдлуныс.
Нӧшта ме аддзылі шонді улас, мый панласигӧн тэрыба котӧртысь оз век ло вермысьӧн, медвына тышкасьысь оз век вермы тышын, мывкыдалӧн абу пыр няньыс, вежӧралӧн абу пыр озырлуныс, кужысь морт дінӧ оз век буравны. Быдӧнлӧн аслас кад да аслас олан туй.
Мортыд оз тӧд ассьыс оландырсӧ.
Тывйыштӧм чериӧс моз, дзугйӧ гартчӧм лэбачӧс моз мортсӧ лоӧ тывйыштӧма сьӧкыд кадӧ, мый виччысьтӧг суас сійӧс.
Ме нӧшта аддзылі ыджыд мывкыдлун шонді улас.
Вӧлі ичӧтик кар. Олысьыс сэні эз вӧв уна.
Вына ӧксы уськӧдчис тайӧ карыс вылӧ, кытшаліс сійӧс да лэптіс сы гӧгӧр джуджыд тымӧд.
Сійӧ карас оліс гӧль, но мывкыд морт. Аслас мывкыдлунӧн сійӧ мездіс карсӧ, но бӧрыннас ставныс вунӧдісны тайӧ гӧль мортсӧ.
Ме шуи, мый вын дорысь мывкыдлуныд бурджык, но гӧль мортлысь мывкыдлунсӧ мустӧмтӧны, сылысь кывъяссӧ оз кывзыны.
Вежӧртӧмъяс вылын ыджыдалысьлӧн горзӧм дорысь мывкыдалысь лӧня шуӧмсӧ кывзӧныджык.
Мывкыдлуныд шыпурт дорысь бурджык, но ӧти мыжа морт бырӧдӧ уна буртор.
Кулӧм гутъяс дукӧсьтӧны чӧскыда ӧвтысь мавтас, вежӧртӧмлуныс чышкыштӧ мывкыдлунсӧ да нималӧмсӧ.
Мывкыдалӧн сьӧлӧмыс кыскӧ веськыдвылӧ, вежӧртӧмлӧн — шуйгавылӧ.
Вежӧртӧмлӧн сямтӧмлуныс тыдовтчӧ весиг туй кузя мунігӧн, ставныслы сійӧ петкӧдлӧ ассьыс вежӧртӧмлунсӧ.
Юралысьыд кӧ скӧрмас тэ вылӧ, эн тэрмась пышйыны, ӧд рамлуныд вевттьӧ ыджыд мыжъяс.
Ме аддзылі шонді улысь лёктор, мыйысь мыжа юралысь: вежӧртӧмлунсӧ вылӧ пуктӧма, а озыръясӧс улӧ лэдзӧма.
Ме аддзылі, мый кесйӧгъяс пукалӧны вӧв вылын, а ӧксыяс кесйӧгъяс моз восьлалӧны подӧн.
Гу кодйысьыд ачыс сэтчӧ усяс, потшӧс кисьтысьӧс змей чушкас.
Из перйысь вермас асьсӧ дойдны, пес поткӧдлысьлы вермас дзенгыны.
Ныжмӧм чертӧ кӧ он лэчты, вынтӧ зэвтны ковмас.
Мывкыдлуныд отсалӧ бурджыка уджтӧ вӧчны.
Тунавтӧдз кӧ змей чушкас, тунасьысьлы сылӧн сямлуныс оз отсав.
Мывкыдалӧн сёрниыс сьӧлӧм вылад воӧ, вежӧртӧмлӧн вомыс асьсӧ виӧ.
Вежӧртӧг сійӧ панӧ сёрнисӧ, йӧйталӧмӧн помалӧ.
Вежӧртӧм морт уна сёрнитӧ, оз тӧд, мый сійӧс виччысьӧ. Коді нӧ висьталас сылы, мый лоӧ сылӧн кулӧм бӧрын?
Вежӧртӧмӧс уджалӧмыс мудзтӧдӧ, сійӧ весиг оз тӧд, кыдзи бӧр воӧдчыны карӧдз.
Курыд шог сійӧ муын, кӧні ӧксыыс том зон, кӧні веськӧдлысьясыс водз асывсяньыс гажӧдчӧны.
Шуда олӧм сійӧ муын, кӧні ӧксыыс бур рӧдысь, кӧні веськӧдлысьясыс ас кадӧ сёйӧны-юӧны, медым ёнмӧдчыны, а оз юӧм-кодалӧм могысь.
Дышлӧн йиркыс ӧшалӧ, кисӧ сюркнялӧмӧн пукалысьлӧн керка вевтыс письтӧ.
Гажтӧ вӧчӧны нимкодясьӧм могысь, и винаыд олӧмтӧ гажӧдӧ, но ставсьыс мынтысьӧ сьӧм.
Эн омӧльт ӧксыӧс весиг мӧвпъяснад, эн лёкӧд озырӧс вольпасяд, ӧд енэжвыв лэбач вермас нуны тэнсьыд кывъястӧ, бордъяснас паськӧдны тэнсьыд сёрнитӧ.
Лэдз ва кузя няньтӧ, кад мысти сійӧ бӧр воас тэныд.
Юк озырлунтӧ сизим либӧ кӧкъямыс пельӧ, он ӧд тӧд, кутшӧм сьӧкыд кад пуксяс му вылас.
Кымӧръяс кӧ польдӧмаӧсь, му вылӧ зэр киссяс.
Лунвывлань либӧ войвывлань кӧ пӧрас пу, сэтчӧ и коляс.
Тӧвныр вылӧ видзӧдӧмнад он кӧдз, кымӧр вылӧ чатрасьӧмнад он вунды.
Тэ он вермы тӧдны тӧврулысь шлывъялӧмсӧ да мам кынӧмын кагалысь лы артмӧмсӧ, тадзи жӧ тэ он вермы тӧдны Енлысь уджъяссӧ — Сылысь, коді вӧчӧ ставсӧ.
Асывнас кӧдз, и рытнас киыдлы эн сет шойччӧгсӧ. Тэ ӧд он тӧд, кодар уджыс лоӧ бурджык, а гашкӧ, кыкнанныс бур.
Югыднад лӧсьыд, нимкодь аддзыны шондісӧ.
Весиг кӧ тэ олан уна во, нимкодясь став олӧм чӧжыд, но эн вунӧд, мый уна пемыд лун на воас. Ставыс, мый тэныд паныдасяс олӧмад, весьшӧрӧ.
Нимкодясь, зонмӧй, аслад том кадӧ, сьӧлӧмыд мед долыдасьӧ томдырйиыд. Ветлы, кытчӧ сьӧлӧмыд кыскӧ, кытчӧ синмыд видзӧдӧ, но тӧд, мый ставсьыс таысь Ен вайӧдас тэнӧ Аслас ёрд водзӧ.
Вӧтлы шогсьӧмсӧ сьӧлӧмсьыд, ылыст сьӧкыдалӧмсӧ вир-яйсьыд, ӧд томлуныд ӧдйӧ кольӧ, пӧрысьлуныд юасьтӧг локтӧ.
Эн вунӧд ассьыд Вӧчысьтӧ том каднад, ӧд кор воасны сьӧкыд лунъяс да вояс, сэки сьӧлӧмтӧ нинӧм оз кут гажӧдны. Сэки шонділӧн, тӧлысьлӧн, кодзувъяслӧн югӧрыс пемдас, зэр бӧрын бара кыпӧдчасны кымӧръяс.
Сійӧ лунӧ керка видзысьясӧс дзӧрӧм босьтас, вынаяс гӧрбыльтчасны, изысьяслӧн лыдыс чинас, налӧн уджыс сувтас, ӧшиньӧ дзоргысьяслы югыдыс пемдас.
Ывлаӧ петан ӧдзӧсъяс тупкысясны, изкилӧн шыыс ланьтас, лэбачлӧн дзользьӧмыс унтӧ пальӧдас, сьылысьяслӧн горыс чинас. Повны кутан выліинӧ кайӧмысь, туй вылын — лёкторъясысь.
Миндаль пондас дзоридзавны, чирк — варгыльтны, каперс вотӧс вынтӧммас.
Мортыс пыр кежлӧ мунӧ кулӧмаяс дінӧ, и бӧрдысьяс колльӧдчӧны туйяс вылын.
Эн вунӧд ассьыд Вӧчысьтӧ, кор эзысь сикӧтшыд эз на ор, зарни дозйыд эз на пот, гырничыд ва босьтанін дорад эз на жугав, юкмӧс гӧгыльыд юкмӧсад эз на усь.
Муысь вӧчӧм вир-яйыд бӧр бергӧдчас муӧ, а лолыд бӧр мунас Ен дінӧ, коді сетіс сійӧс.
Весьшӧрӧ, — шуис еклесиаст, — ставыс весьшӧрӧ.
Еклесиаст вӧлі мывкыд морт, сійӧ юксис тӧдӧмлуннас войтырыскӧд.
Сійӧ унатор туяліс-тӧдмаліс и лӧсьӧдіс уна шусьӧг.
Еклесиаст корсис мича-ёсь шуӧмъяс, веськыда гижис збыльсӧ.
Мывкыдалӧн кывъясыс ӧшкӧн веськӧдлан ёсь бедь кодьӧсь, шусьӧгъясыс — сатшкысь кӧрттув кодьӧсь. Найӧс лӧсьӧдӧма ачыс ыж видзысьыс.
Пиӧй, медводз кут тӧд вылад, мый небӧгъяс лӧсьӧдӧмлы помыс абу, унатор туялӧмыд вир-яйтӧ мудзтӧдӧ.
Ставыслы, мый тэ кылін, кывкӧртӧдыс татшӧм: пов Енсьыс да ов Сылӧн тшӧктӧмъяс серти. Тайӧ тшӧктӧмыс — быд мортлы.
Енмыс веськыда мыждас мортӧс быд уджысь, бурсьыс и лёксьыс, весиг сыысь, мый вӧлі гусьӧн вӧчӧма.
{Еврей йӧз (комиӧдіс Kodko) @ Сьылан @ религ. гижӧд @ Библия @ 2021 @ Лб. .}
Соломонлӧн сьылан.
(Ныв:) — Окав менӧ юмов вомдорнад!
Тэнад муслуныд вина дорысь на чӧскыд.
Тэсянь чӧскыд мавтасӧн ӧвтӧ, тэнад нимыд — визувтысь дона вый, та вӧсна тэнӧ радейтӧны нывъяс.
Босьт менӧ киӧд, вай котӧртам!
Пырт менӧ аслад вежӧсӧ, ӧксыӧй! Пондам долыда нимкодясьны, вина дорысь ёнджыка ошкыны тэнсьыд муслунтӧ.
Оз весьшӧрӧ тэнӧ радейтны.
Ерусалимса нывъяс! Менам кучикӧй кедарсаяслӧн чом кодь мугов, но ме Соломонлӧн дӧраыс кодь мича.
Энӧ видзӧдӧй менам гожъялӧм чужӧм вылӧ, гож водзас сійӧ сотчӧма. Менам вокъяс скӧрмисны ме вылӧ, тшӧктісны видзны виноград йӧръяс. Но ассьым виноград йӧрӧс ме эг видз.
Висьтав меным, мусукӧй, кӧні ыжъястӧ йирсьӧдан, кӧні луншӧрнас найӧс шойччӧдан. Мыйла меным шӧйтны, мыйла корсьны тэнӧ ыж видзысьяс пӧвстысь?
(Зон:) — Он кӧ тӧд, медмича аньӧй, мун ыжъяслӧн кок туйӧд, видз ассьыд кӧзапиянтӧ ыж видзысьяслӧн чом дорын.
Фараон тарантас бердӧ доддялӧм вӧв кодь тэ, мусаӧй.
Тэнад мича бандзибыд мыччысьлӧ юркытш сыръя увсьыд, тэнад сикӧтша сьыліыд мичасьыс-мича.
Ми вӧчам тэныд зарни сикӧтш, эзысь чиръясӧн сійӧс мичмӧдам.
(Ныв:) — Кор ӧксы пукаліс пызан сайын, месянь чӧскыд нард мавтасӧн ӧвтіс.
Смирна ёкмыль моз мусукӧй ляскысьӧ менам морӧс бердӧ.
Менам мусукӧй дзоридзалысь хна кодь, Эн-Гедиын виноград йӧрын быдмысь хна кодь.
(Зон:) — Тэ сэтшӧм мича, мусаӧй, тэнад синмыд гулю кодь.
(Ныв:) — Мусукӧй, тэ медлӧсьыдыс да медмусаыс!
Миян вольпасьным — веж турун, миян сайӧдыс — сус пуяс, миян лэбулыс — кипарис.
(Ныв:) — Ме — шаронса нарцисс, ковтысын быдмысь лилия.
(Зон:) — Нывъяс шӧрын менам мусаӧй быттьӧ лежнӧг пиын дзоридзалысь лилия.
(Ныв:) — Зонъяс пӧвстын менам мусукӧй быттьӧ вӧрса пуяс костын яблӧг пу.
Сылӧн вуджӧр улын меным нимкодь пукавны, сылӧн вотӧсыс юмов менам вомын.
Мусукӧй вайӧдіс менӧ гажӧдчанінӧ, сылӧн муслуныс дӧрапас моз дӧлаліс ме весьтын.
Вайӧй меным изюм, медым ёнмыштны, вайӧй меным яблӧг, медым ловзьыштны, ӧд ме муслунысь эбӧстӧмми.
Сылӧн шуйга киыс менам юр улын, веськыд кинас сійӧ кутлӧ менӧ.
Газель да лань водзын кыв сетӧй, ерусалимса нывъяс, мый онӧ садьмӧдӧй муслунсӧ кадысь водз.
(Ныв:) — Мусукӧй локтӧ, ме кыла сылысь гӧлӧс шысӧ. Сійӧ котӧртӧ керӧсъяс вывті, чеччалӧ мылькъяс вомӧн.
Менам мусукӧй газель кодь, том кӧр кодь.
Сійӧ сулалӧ нин керка дорын, кыйялӧ ӧшиньӧ, видзӧдчӧ ӧшинь тас костӧд.
Меным шуалӧ: «Чеччы, мусаӧй, пет, менам мичаӧй!
Видзӧдлы, тӧлыс кольӧма, зэрыс дугдӧма, зэра кадыс помасьӧма.
Дзоридзьяс мыччысьӧны, миян муын кылӧ гулюлӧн кургӧмыс — воис сьылан кад.
Инжир пулӧн вотӧсыс кисьмӧ, дзоридзалысь виноград чӧскыда ӧвтӧ.
Чеччы, мусаӧй, пет, менам мичаӧй!
Гулюӧй менам, мыйла дзебсясян изкырта потасын, сайӧдчан джуджыд кыр бердын!
Петкӧдлы меным чужӧмбантӧ, сет меным кывны гӧлӧс шытӧ, ӧд тэнад гӧлӧс шыыд — небыд, тэнад чужӧмбаныд — мичасьыс-мича!»
Кыйӧй ручьясӧс, куталӧй ручпиянӧс виноград йӧрысь. Найӧ бырӧдӧны винограднымӧс, а сійӧ миян дзоридзалӧ нин.
Мусукӧй — менам, а ме — сылӧн, лилия дзоридзьяс пӧвстын сылӧн йирсяніныс.
Кор луныс ыркыдӧн лолалӧ, кор вуджӧръяс пышйӧны, тэрмась, мусукӧй! Котӧрт газель моз, том кӧр моз котӧрт керӧс потасӧд.
(Ныв:) — Войнас вольпасьын ме гажтӧмтчи аслам радейтанаысь, ме корси сійӧс, но эг аддзы.
Ме шуи чеччыны, кытшовтны карсӧ, изэрд-улич вылысь корсьны ассьым радейтанаӧс.
Ме корси сійӧс, но эг аддзы.
Меным паныдасисны карсӧ кытшовтысь видзысьяс. Ме юалі налысь: «Аддзылінныд-ӧ менсьым радейтанаӧс?»
Муртса вешйи на дінысь, и ме аддзи ассьым радейтанаӧс. Ме шашаритчи сыӧ, эг лэдз ас дінысь, ме вайӧді сійӧс мам керкаӧ, пырті менӧ чужтысьлӧн вежӧсӧ.
Газель да лань водзын кыв сетӧй, ерусалимса нывъяс, мый онӧ садьмӧдӧй муслунсӧ кадысь водз.
(Мукӧдъяс:) — Коді тайӧ, овтӧминысь локтысьыс? Сійӧ локтӧ тшын сюръя моз, ӧвтӧ сысянь смирнаӧн да ладанӧн, ылі муысь вайӧм чӧскыд ӧвтанторйӧн.
Видзӧдлӧй, тайӧ ӧд Соломонлӧн пуклӧсыс! Сы гӧгӧр квайтымын тышка морт, Израильлӧн медвынаясыс.
Найӧ ставныс шыпуртаӧсь, тышкасьны кужысьяс.
Быдӧнлӧн ки улас шыпурт, медым дорйысьны весиг войнас.
Ассьыс новлӧдлан пуклӧссӧ Соломон ӧксы вӧчӧма ливанса пуысь, потшъяссӧ — эзысьысь, мышсӧ — зарниысь, пукаланінсӧ эжӧма пемыдгӧрд дӧраӧн, пытшкӧсладорсӧ мичмӧдӧма муслунӧн.
Ерусалимса нывъяс, петӧй, сионса нывъяс, видзӧдлӧй Соломон ӧксы вылӧ! Сылӧн юр вылас юркытш — сійӧс мамыс пуктӧма сылӧн гӧтрасян лунӧ, сьӧлӧмсӧ гажӧдан лунӧ.
(Зон:) — Кутшӧм мича тэ, мусаӧй, тэ мичасьыс-мича!
Чужӧмвевттьӧд улад синмыд гулю кодь, юрсиыд Галаад керӧс вывсянь лэччысь кӧза чукӧр кодь.
Тэнад пиньясыд шырӧм ыж чукӧр кодьӧсь, быттьӧ ыжъяс, кодъяс петӧны ваысь мыссьӧм бӧрын. Ставныс двӧйнипӧлаӧсь, весиг ӧти абу вошӧма.
Тэнад вомдорыд гӧрд лента кодь, льӧбъясыд чӧскыдӧсь.
Тэнад бандзибъясыд гранат джын кодьӧсь, дзебсьӧмаӧсь чужӧмвевттьӧд улад.
Тэнад сьыліыд Давидлӧн башня кодь, кӧні ӧшалӧ сюрс мында сайӧдпӧв, тышкайӧзлӧн став сайӧдыс.
Тэнад морӧсыд — двӧйни кӧрпиян, лилия пӧвстын йирсьысь двӧйни газельяс.
Кор луныс ыркыдӧн лолалӧ, кор вуджӧръяс пышйӧны, ме кая смирна керӧс йылӧ, муна ладан ыб вылӧ.
Мусаӧй, тэ сэтшӧм мича, тэнад ставыс тыр-бур!
(Зон:) — Лок, гӧтырпуӧй, ливанса керӧссянь, лок ме дінӧ Ливансянь!
Лэччы Амана керӧс йывсянь, коль Сенир да Ермон керӧсъяс, левлысь сайӧдчанінсӧ, леопардлысь оланінсӧ.
Тэ пӧлӧнитін менсьым сьӧлӧмӧс, чоюкӧй-гӧтырпуӧй, гусялін аслад ӧтчыд видзӧдлӧмӧн, аслад сикӧтш молльӧн.
О, кутшӧм юмов тэнад муслуныд, чоюкӧй-гӧтырпуӧй!
Тэнад муслуныд вина дорысь на чӧскыд! Тэнад мавтасыд став быдмӧгсьыс на чӧскыда ӧвтӧ.
Ма войталӧ тэнад вомдорысь, гӧтырпуӧй, ма да йӧв тэнад вом пытшкын!
Тэнад паськӧмысь ӧвтӧ ливанса вӧрӧн.
Менам чоюкӧй-гӧтырпуӧй йигналӧм сад йӧр кодь, тупкыса юкмӧс кодь, пӧдса ва петанін кодь.
Тэ — сад йӧр, кӧні быдмӧны гранат, чӧскыд вотӧса пуяс, хна да нард, нард да шафран, имбир да корица, чӧскыд дука пуяс, смирна да алоэ — став медбур ӧвтанторйыс.
Тэ — сад йӧрын ва петанін, ловъя ва юкмӧс, кытчӧ Ливан керӧссянь визувтӧ ва.
(Ныв:) — Кыпӧдчы, вой тӧв, пӧльышт, лун тӧв! Пӧльышт менам сад вылӧ, медым паськалас сылӧн чӧскыд дукыс!
Мед локтас менам мусукӧй аслас сад йӧрӧ, мед видлас сэтысь чӧскыд вотӧссӧ.
(Зон:) — Аслам сад йӧрӧ локті ме, чоюкӧй-гӧтырпуӧй, чӧскыд турун да смирна чукӧрті, вина-йӧв ме юи, мазі позйысь ма сёйи.
(Мукӧдъяс:) — Сёйӧй, ёртъяс! Коддзымӧнныд юӧй, радейтчысьяс!
(Ныв:) — Ачым узя, а сьӧлӧмӧй оз узь.
Кыла — мусукӧй игӧдчӧ.
(Зон:) — Чоюкӧй, мусаӧй, сӧстӧм гулюӧй, восьт меным ӧдзӧстӧ! Юрӧй кӧтасис лысвасьыс, юрсиӧй вазис войся уль сынӧдсьыс.
(Ныв:) — Паськӧмӧс ме пӧрччи нин — выльысь ӧмӧй пасьтасьны?
Кокӧс ме мыськи нин — бара ӧмӧй няйтӧсьтны?
Менам мусукӧй ӧдзӧс розьӧдыс кисӧ нюжӧдіс, и менам пытшкӧсӧй пондіс пессьыны.
Ме чеччи восьтны мусуклы, менам киысь смирна войталіс, чуньясысь войталіс ӧдзӧс вуг вылӧ.
Ме восьті ӧдзӧсӧс мусукӧйлы, но сійӧ, вӧлӧм, бӧр нин мунӧма.
Таысь сьӧлӧмӧй кувмӧн жугыльтчис.
Ме сійӧс корси, но эг аддзы, чуксалі, но сійӧ эз вочавидз.
Меным паныдасисны карсӧ кытшовтысь видзысьяс, найӧ нӧйтісны-дойдалісны менӧ, нетшыштісны менсьым вевттьӧдӧс.
Кыв сетӧй меным, ерусалимса нывъяс. Тіянлы кӧ паныдасяс менам мусукӧй, мый ті сылы висьталанныд? Висьталӧй, мый ме эбӧстӧмми муслунысь.
(Мукӧдъяс:) — Мыйӧн тэнад мусукыд бурджык мукӧдсьыс, медмича аньӧй?
Мыйӧн тэнад мусукыд торъялӧ мукӧдсьыс, мыйла тэ кыв сетны коран миянӧс?
(Ныв:) — Менам мусукӧй вына, сійӧ банйӧм чужӧма, дас сюрсысь сы кодьыс оз сюр.
Сылӧн юрыс сӧстӧм зарни кодь, читкыля юрсиыс кырныш кодь сьӧд.
Синмыс ва дорын пукалысь кык гулю кодь, быттьӧ йӧлын мыссьӧм бӧрын шойччысь гулюяс.
Сылӧн бандзибъясысь ӧвтӧ сад йӧрысь моз, кӧні быдмӧны чӧскыда ӧвтысь быдмӧгъяс.
Сылӧн вомдорыс лилия дзоридз кодь, вомдорсьыс войталӧ смирна.
Сылӧн киыс зарни шы кодь, мичмӧдӧма дона изъясӧн.
Сылӧн кынӧмыс слӧн лыысь, вевттьӧма сапфир изъясӧн.
Сылӧн кокыс мрамор сюръя кодь, зарни подув вылӧ сувтӧдӧма.
Сылӧн мыгӧрыс Ливан керӧс кодь, ыджыд сус пу кодь.
Сылӧн вомыс — юмовтор, ставыс сылӧн кыскӧ ас дінас.
Татшӧм менам мусукӧй, татшӧм менам ёртӧй, ерусалимса нывъяс!
(Мукӧдъяс:) — Кытчӧ тэнад мусукыд мунӧма, медмича аньӧй? Кодарланьӧ тэнад сьӧлӧмшӧрыд кежӧма? Висьтав, и ми тэкӧд корсям сійӧс.
(Ныв:) — Менам мусукӧй лэччӧма аслас сад йӧрӧ, кӧні быдмӧны чӧскыда ӧвтысь быдмӧгъяс, сійӧ пӧткӧдчӧ сад йӧр вотӧснас, ӧктӧ сэтысь лилия.
Ме — мусукӧйлӧн, а мусукӧй — менам, сылӧн йирсяніныс лилия дзоридзьяс пӧвстын.
(Зон:) — Мусаӧй, тэ Тирза кар кодь мича, тэнад мичлуныд Ерусалимлӧн кодь, тэ дӧрапасӧн локтысь тышкайӧз кодь шемӧсмӧдана.
Вешты синтӧ ме вылысь, тэнад видзӧдласыд менӧ шӧйӧвоштӧ!
Тэнад юрсиыд Галаад керӧс вывсянь лэччысь кӧза чукӧр кодь.
Тэнад пиньясыд шырӧм ыж чукӧр кодьӧсь, быттьӧ ыжъяс, кодъяс петӧны ваысь мыссьӧм бӧрын. Ставныс двӧйнипӧлаӧсь, весиг ӧти абу вошӧма.
Тэнад бандзибъясыд гранат джын кодьӧсь, дзебсьӧмаӧсь чужӧмвевттьӧд улад.
Мед кӧ ӧксылӧн квайтымын ӧксы-ань, кӧкъямысдас кесйӧг-гӧтыр да унасьыс-уна том ныв, но менам сӧстӧм гулюӧй сӧмын ӧти, мамыслӧн ӧтка ныв, чужтысьыслӧн медся донаыс.
Нывъяс видзӧдӧны сы вылӧ да нимӧдӧны сійӧс, ӧксы-аньяс да ӧксылӧн гӧтыръяс ошкӧны сійӧс:
«Коді тайӧ? Сійӧ асъя кыа моз дзирдалӧ, сійӧ тӧлысь кодь мича, шонді кодь югыд, дӧрапасӧн локтысь тышкайӧз кодь шемӧсмӧдана».
(Ныв:) — Ме муні кольтуся сад йӧрӧ, лэччи веж ковтысӧ видзӧдлыны, эз-ӧ мыччысь виноград кор, оз-ӧ дзоридзав гранат пу.
Эг и тӧдлы, кыдзи сьӧлӧмӧй кыскис менӧ менам войтырысь пыдди пуктанаяслӧн тарантас дорӧ.
(Мукӧдъяс:) — Бергӧдчы, бӧр лок, суламса нылӧй!
Бергӧдчы, бӧр лок, кӧсъям видзӧдлыны тэ вылӧ.
(Ныв:) — Мыйла тіянлы видзӧднысӧ суламса ныв вылӧ, видзӧдны маханаимса йӧктысьяс вылӧ моз?
(Зон:) — Кутшӧм лӧсьыд тэнад сандалиа кокыд, пыдди пуктана нылӧй!
Тэнад коскыд сикӧтш кодь, кужысь киӧн гӧгрӧстӧма.
Тэнад гӧгйыд гӧгрӧс дозмук кодь, кытысь оз чинлы чӧскыд винаыс.
Тэнад кынӧмыд шобді чукӧр кодь, кытшалӧма лилия дзоридзӧн.
Тэнад морӧсыд — двӧйни кӧрпиян, двӧйни газельяс кодьӧсь.
Тэнад сьыліыд слӧн лыысь вӧчӧм сюръя кодь, синмыд хешбонса вайӧртӧд кодь, Бат-Раббим дзиръядорса вайӧртӧд кодь, нырыд Дамасклань видзӧдысь ливанса башня кодь.
Юрыд Кармил керӧс кодь, юрсиыд лӧсталӧ пемыдгӧрд вурун моз, тэнад юрсиыд весиг ӧксыӧс тывйыштӧ.
Кутшӧм мича тэ, мусаӧй, лӧсьыд видзӧдны тэ вылӧ, менсьым сьӧлӧмӧс гажӧдан!
Тэнад мыгӧрыд пальма кодь, морӧсыд виноград роз кодь.
Ме мӧвпышті: кавшася тайӧ пальма вылас, кутчыся сылӧн вотӧса увъясӧ.
Морӧсыд лоӧ меным виноград розйӧн, лолалӧмыд — яблӧг ӧвтӧмӧн, вомдорыд лоӧ бур винаӧн, мый визувтӧ радейтчысьлы, кӧтӧдӧ мудзӧмалысь вомдорсӧ.
(Ныв:) — Ме — мусукӧйлӧн, ме дінӧ сійӧс кыскӧ.
Лок, мусукӧй, мунам видз вылӧ, войсӧ коллялам хна пӧвстын.
Асъядорыс мунам виноград йӧрӧ, видзӧдлам, мыччысьӧма-ӧ виноград корйыс, гӧрддзасьӧма-ӧ сылӧн вотӧсыс, видзӧдлам, дзоридзалӧ-ӧ гранат пу.
Сэні ме козьнала тэныд муслунӧс.
Мандрагора дзоридз чӧскыда нин ӧвтӧ, ӧдзӧс дораным миян быд чӧскыд вотӧсыс — выльыс и важыс. Ме видзи найӧс тэныд, мусукӧй!
(Ныв:) — Тэ кӧ эськӧ вӧлін менам вокӧн, кодӧс мамӧй нёньӧдліс!
Сэки эськӧ ывлаын паныдасигӧн ме окалі тэнӧ, и менӧ некод эз мыжды.
Сэки эськӧ босьті тэнӧ аскӧд, вайӧді тэнӧ аслам мам керкаӧ.
Тэ эськӧ велӧдін менӧ, а ме юктӧді тэнӧ чӧскыд винаӧн, гранат вотӧса ваӧн.
Сылӧн шуйга киыс менам юр улын, веськыд кинас сійӧ кутлӧ менӧ.
Ерусалимса нывъяс, кыв сетӧй, мый онӧ садьмӧдӧй муслунсӧ кадысь водз.
(Мукӧдъяс:) — Коді тайӧ, овтӧминысь локтысьыс? Сійӧ топӧдчӧма мусукыс бердӧ.
(Ныв:) — Яблӧг пу улын ме садьмӧді тэнӧ, сэні коркӧ сьӧктаммис тэнад мамыд, сэні сійӧ чужтіс тэнӧ.
Пукты менӧ печатьӧс моз аслад сьӧлӧмад, чунькытшӧс моз новлы менӧ киад. Муслуныс кулӧм кодь вына, вежӧгтӧмыс ад кодь скӧр.
Сылӧн ньӧвйыс — биа ньӧв, сійӧ ыпъялысь ыджыд би кодь.
Ыджыд ва оз вермы кусӧдны муслунсӧ, юяс оз вермыны пӧдтыны сійӧс.
Мортыс кӧ сетас став ассьыс озырлунсӧ, мед ньӧбны муслунсӧ, сійӧс асьсӧ мустӧмтасны.
(Вокъяс:) — Миян чойным ичӧт на, сылӧн морӧсыс абу на гӧрддзасьӧма.
Мый миянлы вӧчны чойнымкӧд, кор локтасны сійӧс коравны?
Сійӧ кӧ вӧлі карса стенмӧн, ми эськӧ мичмӧдім сійӧс эзысьӧн.
Сійӧ кӧ вӧлі ӧдзӧсӧн, ми эськӧ эжим сійӧс сус пуӧн.
(Ныв:) — Ме — карса стен, менам морӧсӧй быттьӧ сюръяяс, мусукӧйлы ме кисьмӧм-воӧм ань.
(Зон:) Ваал-Гамонын Соломонлӧн вӧлі виноград йӧр.
Йӧрсӧ сійӧ сетіс кӧртымӧ виноград быдтысьяслы, вотӧсысь быдӧн сетіс сылы сюрс эзысь.
А менам виноград йӧрӧй аслам.
Сюрс эзысьыс мед лоӧ тэныд, Соломон, а кыксё эзысьыс — виноград быдтысьяслы.
Сад йӧрын олысь дзоридзӧй, тэнсьыд гӧлӧс шытӧ кывзӧны ёртъясӧй, лэдз меным тшӧтш кывны тэнӧ.
(Ныв:) — Тэрмась, мусукӧй, котӧрт газель моз, котӧрт том кӧр моз чӧскыда ӧвтысь керӧсъяс вывті.
{Еврей йӧз (комиӧдіс Kodko) @ Исай @ религ. гижӧд @ Библия @ 2021 @ Лб. .}
Исай пророклӧн небӧг
Тайӧ небӧгас гижӧма сы йылысь, мый Енмыс петкӧдліс Иуда му да Ерусалим кар йылысь Амослӧн Исай пилы. Тайӧ петкӧдчылӧмъяссӧ сійӧ аддзыліс иудаса Озей, Иотам, Ахаз да Езекей ӧксыяслӧн веськӧдлан кадӧ.
Кывзы, енэжыс, кывзы, муыс! Господь тадзи висьталӧ: — Ме быдті челядьӧс, но найӧ кыпӧдчисны Меным паныд.
Ӧш тӧдӧ, кодлӧн сійӧ, осёл тӧдӧ ассьыс вердысьсӧ, но Израиль оз тӧд [Менӧ], Менам войтырӧй оз гӧгӧрво, коді сійӧс пӧткӧдӧ.
Курыд шог мыжа войтырлы! Налӧн мыжъясыс личкӧны найӧс. Курыд шог лёк вӧчысьяслӧн котырлы, тшыкӧм оласнога йӧзлы!
Найӧ эновтісны Господьӧс, нинӧмӧ пуктісны Израильлысь вежа Енмӧс, дзикӧдз бергӧдчисны Сыысь.
Гашкӧ, бара нӧйтны тіянӧс, ӧд ті пыр на асныраланныд.
Тіян юрныд ставнас доймалӧма, пытшкӧсныд ставнас висьӧ.
Юрсянь кок пыдӧсӧдзныд абу дзониныс: гӧгӧр дой, лӧзӧдӧм да орзьӧм. Найӧс абу весалӧма, абу кӧрталӧма, абу мавтӧма выйӧн.
Тіянлысь мунытӧ куштӧма, каръяснытӧ сотӧма биӧн.
Йӧз муысь локтысьяс тіян син водзын куштӧны тіянлысь пуктас-быдтаснытӧ.
Гӧгӧр эндӧма, йӧз муысь локтысьяс ставсӧ бырӧдӧмаӧсь.
Сион ныв ӧткӧн сулалӧ виноград йӧрса чом моз, град йӧрса лэбув моз, кытшалӧм кар моз.
Господь Саваоф кӧ эз видз коляс войтырсӧ, ми эськӧ бырим Содом моз, миянӧс эськӧ суис сійӧ жӧ, мый Гомораӧс.
Содомса юралысьяс, кывзӧй Господьлысь кывсӧ!
Гомораын олысьяс, кывзӧй миян Енлысь Индӧдсӧ!
Меным абу колана тіян уна вись вайӧмныд, — висьталӧ Господь.
Ме пӧтӧма нин сотӧм межъясӧн да тшӧгӧдӧм ыж-мӧслӧн госӧн. Ӧшъяслысь, ыжъяслысь да кӧзаяслысь вирсӧ Ме ог кӧсйы.
Коді тшӧктіс тіянлы локны Ме водзӧ, коді тшӧктіс талявны Менсьым крамбердса йӧрӧс?
Тырмас нин ваявны Меным ковтӧм висьяснытӧ, Меным зывӧк налӧн тшынӧдчан дукыс!
Ме мустӧмта выль тӧлысь да шойччан лун пасйӧмнытӧ, мустӧмта Ме водзӧ гажӧдчыны чукӧртчӧмнытӧ.
Ті вӧчанныд мыж, но чукӧртчанныд Ме водзӧ гажӧдчыны — тайӧс Ме мустӧмта. Выль тӧлысь да гажӧдчан лунъяс пасйӧмнытӧ Ме мустӧмта.
Найӧ сьӧктӧдӧны Менӧ, Ме ёна мудзи наысь.
Ті нюжӧданныд Мелань кинытӧ, но Ме ог кӧсйы аддзыны тіянӧс.
Ті ёна кевмысянныд, но Ме ог кыв тіянӧс. Тіян киныд вирӧсь.
Сӧстӧммӧдчӧй, весалӧй асьнытӧ, медым водзӧ Ме эг нин аддзы тіянлысь лёк уджъяснытӧ.
Дугдӧй вӧчны лёксӧ, велӧдчӧй вӧчны бурсӧ! Зільӧй вӧчны веськыда, отсалӧй увтыртӧмалы, дорйӧй батьтӧм-мамтӧмӧс, сувтӧй дӧва дор.
Локтӧй да сёрнитчам, — висьталӧ Господь.
Тіян мыжъясныд кӧ пемыдгӧрд рӧмаӧсь, найӧ лоӧны лым кодь еджыдӧсь.
Мыжъясныд кӧ чим гӧрд рӧмаӧсь, найӧ лоӧны еджыд вурун кодьӧсь.
Ті кӧ кӧсйысянныд кывзысьны Менсьым, сэки кутанныд пӧткӧдчыны муыслӧн сетӧмторйӧн.
А онӧ кӧ кывзысьӧй да кутанныд асныравны, сэки шыпурт помысь куланныд. Тадзи висьталӧ Господь.
Тэ вӧлін эскана войтырлӧн карӧн, а ӧні тэ — кырсалысьяслӧн кар.
Водзын тэнад олысьясыд мыждісны да олісны веськыда, а ӧнія олысьясыд — морт виысьяс.
Тэнад эзысьыд лои шыбласӧн, тэнсьыд винатӧ сорлалӧма ваӧн.
Тэнад юралысьясыд — Индӧд торкысьяс, найӧ ӧтувтчӧны гусясьысьяскӧд.
Найӧ радейтӧны козинъяс, босьтӧны бокыса сьӧм.
Батьтӧм-мамтӧмӧс найӧ оз дорйыны, дӧвалысь корӧмсӧ нинӧмӧ пуктӧны.
Вӧрӧгъясӧс Ме верма, паныд сувтысьяслысь Ме водзӧс перъя, — висьталӧ Ыджыдыс, Господь Саваоф, Израильлӧн вына Ен.
Ассьым киӧс Ме лэпта тэ вылӧ, сывда-весала тэнӧ, торйӧда тэысь став сорассӧ.
Ме пукта тэныд воддза кодь ёрдысьясӧс, сувтӧда воддза кодь туйдӧдысьясӧс.
Сэки шуасны тэнӧ веськыда олысьяслӧн карӧн, эскана войтырлӧн юркарӧн.
Сион мездмас веськыда вӧчӧмнас, мыжысь бергӧдчӧм войтыр — веськыда олӧмнас.
Паныд кыпӧдчысьясӧс да мыж вӧчысьясӧс виччысьӧ кулӧм, Господьӧс эновтысьясӧс — бырӧдӧм.
Муса пуясныд вӧсна тіянлы яндзим лоӧ, аслыныд бӧрйӧм расъясныд вӧсна тіянлы юръяндзим лоӧ.
Ӧд ті асьныд лоанныд кортӧм пу кодьӧсь, косьмӧм рас кодьӧсь.
Вына морт лоӧ идзас кодь, сылӧн уджъясыс — бикинь кодь.
Найӧ ӧтвылысь ыпнитасны, и некод оз вермы кусӧдны.
Амослӧн Исай пилы вӧлі Иуда да Ерусалим йылысь восьтӧм.
Тадзи лоӧ бӧръя кадӧ: сійӧ керӧсыс, кӧні сулалӧ Господьлӧн крамыс, лоӧ став керӧссьыс на джуджыдджык, став мыльксьыс на вылынджык.
Сэтчӧ дугдывтӧг кутасны локны войтыръяс. Найӧ чукӧртчасны да шуасны ӧта-мӧдныслы: «Локтӧй, каямӧй Господьлӧн керӧс вылӧ, Яков Енлӧн крамӧ! Господь индас миянлы Ассьыс туйсӧ, медым ми ветлім Сылӧн туйясӧд».
Сионсянь воас Индӧдыс, Ерусалимсянь — Господьлӧн кывйыс.
Господь отсалас воны ӧти кывйӧ войтыръяслы, кутас веськыда мыждыны чужанкотыръясӧс.
Сэки йӧзыс дорасны шыпуртъясысь гӧръяс, шыясысь — чарлаяс. Войтыръяс ӧта-мӧдныслы паныд оз нин лэптыны шыпуртсӧ, водзӧ оз кутны велӧдчыны тышкасьны.
Яковсянь чужысьяс, локтӧй, кутам овны Господьлӧн югыдас!
Господьӧй, Тэ эновтін Ассьыд войтыртӧ, колин Яковсянь чужысьясӧс. Ӧд найӧ унаторйӧ велӧдчисны асыввыв олысьяссянь, филистимсаяс моз найӧ кимӧститчӧны, волысьӧны локтысь йӧзкӧд.
Тэнад войтырлӧн муыс озыр эзысьӧн да зарниӧн, озырлуныс помтӧм-дортӧм.
Налӧн эм уна вӧв, тарантасъяслӧн лыдыс лыдтӧм-тшӧттӧм.
Налӧн муыс тырӧма идолъясӧн, найӧ копрасьӧны асланыс киӧн вӧчӧмторъяслы.
Йӧзыс нюкыртчисны, лэдзисны юрнысӧ. Тэ он прӧстит найӧс.
Пышйӧй изкыртаӧ, дзебсьӧй му пытшкас ӧд тіянӧс полӧм топӧдас Господьлӧн вынысь, Сылӧн дзирдлунысь тіянӧс полӧм босьтас.
Вылӧ кыпӧдчысьяс лэдзасны юрнысӧ, ышнясьысьяс улӧдз копыртчасны, сійӧ лунӧ сӧмын Господь лоӧ медся вылын.
Господь Саваофлӧн дасьтӧма лун, кор Сійӧ кутас мыждыны вылӧ кыпӧдчысьясӧс, ышнясьысьясӧс да вывтіасьысьясӧс, и найӧс лоӧ улӧ лэдзӧма. Сійӧ кутас мыждыны васанса тупуяс, ливанса сус пуяс, джуджыд да вылӧ кыпӧдчысь пуяс, джуджыд керӧсъяс да вылӧ кыпӧдчысь мылькъяс. Кутас мыждыны джуджыд башняяс да зумыда сулалысь карса стенъяс, фарсисса корабльяс да став налысь дона эмбурсӧ.
Вылӧ кыпӧдчысьясӧс лоӧ улӧ лэдзӧма, ышнясьысьяс улӧдз копыртчасны, сійӧ лунӧ сӧмын Господь лоӧ медся вылын, идолъяс дзикӧдз бырасны.
Йӧзыс пышъясны изкыртаясӧ, дзебсясны му горсъясӧ, ӧд найӧс полӧм топӧдас Господьлӧн вынысь, Сылӧн дзирдлунысь найӧс полӧм босьтас. Господь кыпӧдчас, и йӧзсӧ полӧм босьтас!
Сійӧ лунӧ мортыс босьтас зарниысь да эзысьысь вӧчӧм идолъясӧс, кодъясӧс сійӧ вӧчис копрасьӧм вылӧ, да шыбитас найӧс вурдысьяслы да борда шыръяслы. Сійӧ пышъяс изкыртаӧ, дзебсяс керӧс потасӧ, ӧд сійӧс полӧм топӧдас Господьлӧн вынысь, Господьлӧн дзирдлунысь сійӧс полӧм босьтас. Господь кыпӧдчас, и йӧзсӧ полӧм босьтас!
Дугдӧй лача кутны морт вылӧ, кодлӧн олӧмыс лолыштӧм кодь. Мый вермас вӧчны сійӧ?
Со, Ыджыдыс, Господь Саваоф мырддяс Ерусалимлысь да Иудалысь ставсӧ, мый вылӧ найӧ лача кутӧны: став чукӧртӧм няньсӧ да заптӧм васӧ, тышкайӧзсӧ да налысь вына веськӧдлысьяссӧ, ёрдысьяссӧ да пророкъяссӧ, тунасьысьяссӧ да юрнуӧдысьяссӧ, тышкакотырӧн веськӧдлысьяссӧ, юралысьяссӧ да туйдӧдысьяссӧ, тшыкӧдчысьяссӧ да керысьяссӧ.
Сійӧ пуктас том зонъясӧс веськӧдлыны наӧн, челядь кутасны ыджыдавны на вылын.
Йӧзыс кутасны дзескӧдны ӧта-мӧднысӧ, быдӧн — ассьыс матыссасӧ.
Том зон кутас омӧльтны пӧрысь мортӧс, некытчӧ туйтӧм кутас лёкӧдны пыдди пуктанаӧс.
Сэки морт матыстчас аслас матыссаыс дінӧ, шуас аслас вокыслы: «Тэнад эм на мый пасьтавнытӧ, ло миян юралысьӧн, веськӧдлы тайӧ пузувтӧм мунас».
Но сійӧ воча шуас: «Ме ог вермы бурдӧдны тіянӧс!
Менам керкаын абу няньыс ни паськӧмыс, мыйла войтырлы татшӧм юралысьыс?»
Киссис Ерусалим, усис Иуда, ӧд налӧн сёрниныс да уджъясныс — Господьлы паныд, найӧ паныд кыпӧдчӧны дзирдлуна Господьлы.
Налӧн чужӧмас гижӧма, мый найӧ — лёк вӧчысьяс. Содомын олысьяс моз найӧ восьсӧн да яндысьтӧг ошйысьӧны асланыс мыжъясӧн.
Курыд шог налы! Найӧ асьныс ӧшлӧны ас выланыс лёксӧ.
Висьталӧй веськыда олысьлы, мый сылы бур лоӧ, ӧд сійӧ кутас нимкодясьны аслас уджъяслӧн вотӧснас.
Но курыд шог лёк вӧчысьлы! Сылы лоӧ мынтысьӧма уджъясыс серти.
Челядь дзескӧдӧны менсьым войтырӧс, аньяс ыджыдалӧны сы вылын.
Вескӧдлысьяс кежӧдӧны сійӧс ылӧг туй вылӧ, нуӧдӧны чукля туйӧд.
Господь сувтіс, медым ёрд вылын шуны веськыд кыв, Сійӧ чеччис, медым мыждыны войтыръясӧс.
Господь кутас мыждыны Аслас войтырлысь юрнуӧдысьясӧс да веськӧдлысьясӧс: — Ті куштінныд виноград йӧр, гӧльяслысь мырддялӧм эмбурнас тыртінныд керкаяснытӧ.
Кыдзи ті лысьтанныд дзескӧдны Менсьым войтырӧс? Ті нартитанныд гӧльясӧс, — висьталӧ Ыджыдыс, Господь Саваоф.
Господь шуис: сионса нывъяс тшапӧсь, ветлӧдлӧны юрнысӧ чатӧртӧмӧн, ыштӧдӧны видзӧдласнаныс, восьлалӧны дзирнясьӧмӧн, зёльгӧны кокнысӧ мичмӧдан чепъясӧн. Таысь Господь кушӧдз шырас сионса нывъяслысь юрнысӧ, Сійӧ янӧдас найӧс.
Сійӧ лунӧ Господь нетшыштас на вылысь став мичмӧдчанторсӧ: кок мичмӧдан чепъяс, кодзув да тӧлысь сяма вӧчӧмторъяс, исергаяс, сикӧтшъяс, вевттьӧдъяс, юрвевттьӧдъяс, сойкытшъяс, вӧньяс, чӧскыд ӧвтанторъяс, амулетъяс, чунькытшъяс да ныркытшъяс, мича вылыс и улыс паськӧм, чышъянъяс, сьӧм турыш *, югъялысь вӧсни паськӧм, юрвевттьӧдъяс да чужӧмвевттьӧдъяс.
Чӧскыд дук пыдди на дорысь кутас ӧвтны лёк дукӧн, вӧнь пыдди налы лоӧ гез, читкыля юрси пыдди — куш плеш, мича паськӧм пыдди — шогалан паськӧм, мичлун пыдди — юръяндзим.
Сион, тэнад айуловыд куласны шыпуртысь, тэнад тышкайӧзыд усясны тышын.
Сионлӧн дзиръяясыс кутасны шогсьыны-бӧрдны, Сион кар кутас пукавны му вылын эновтӧм ань моз.
Сійӧ лунӧ сизим ань кутчысясны ӧти айлов дінӧ да шуасны: — Ассьыным нянь кутам сёйны, ассьыным паськӧм кутам новлыны, сӧмын гӧтрась миян вылӧ — вешты миян вылысь яналӧмсӧ!
Сійӧ лунӧ Господьлӧн петасыс петкӧдчас став аслас мичлуннас да дзирдлуннас. Мулӧн вотӧсыс лоӧ ошйысянторйӧн да мичмӧданторйӧн Израильлӧн коляс войтырлы.
Сэки Сион-Ерусалимын ловйӧн кольӧмаясӧс кутасны шуны вежаясӧн. Тадзи шуасны Ерусалимын олысьясӧс, кодъясӧс гижӧма ловъяяслӧн небӧгӧ. Господь мыськалас сионса аньясӧс став пежсьыс, весалас Ерусалимӧс вирсьыс веськыда мыждысь ловнас, биӧн сотысь ловнас.
Сэки Господь ставнас Сион керӧссӧ да сэні гажӧдчыны чукӧртчысьясӧс луннас вевттяс кымӧрӧн, а войнас вевттьӧд пыдди лоӧ тшын да ыпъялысь би.
Тадзи ставсӧ лоӧ вевттьӧма дзирдлунӧн.
Тайӧ вевттьӧдыс кутас видзны шонді пӧжӧмысь, сайӧдны зэрысь да ыджыд тӧвнырысь.
Ме сьыла муса Ёрт йылысь, тайӧ сьыланкывйыс менам Ёртӧй да Сылӧн виноград йӧр йылысь.
Бур муа керӧс вылын быдмис менам Ёртлӧн виноградыс. Сійӧ потшис йӧрсӧ, весаліс мусӧ изъясысь да пуктіс сэтчӧ медбур виноград пуяс. Йӧр шӧрас лэптіс башня, вӧчис виноград пычкан гу да кутіс виччысьны вотӧс кисьмӧмсӧ. Но чӧскыд вотӧс пыдди воис курыд вотӧс.
Ерусалимын олысьяс, Иуда войтыр, ӧні шуӧй, коді мыжа.
Ме али Менам виноград йӧрӧй? Ме ставсӧ нин вӧчи виноград йӧрлы.
Мый нӧшта колӧ вӧлі вӧчны Меным? Ме виччыси чӧскыд вотӧс, но воис курыд вотӧс.
Ӧні Ме висьтала тіянлы, мый вӧча Аслам виноград йӧркӧд. Ме кисьта сылысь потшӧссӧ, и сійӧс куштасны.
Ме жугӧда сылысь стенъяссӧ, и сійӧс таляласны. Ме дзикӧдз эновта сійӧс, ог кут тӧждысьны, ог кут весавны, сійӧ тырас йӧнмӧн да ёг турунӧн. Ме шуа кымӧръяслы, и найӧ оз сетны зэрсӧ.
Господь Саваофлӧн виноград йӧрыс — Израиль войтыр. Иуда войтыр — Сылӧн муса быдтасыс.
Сійӧ кӧсйис аддзыны веськыда вӧчӧм, но аддзис вир кисьтӧм.
Кӧсйис аддзыны веськыда олӧм, но аддзис бӧрдӧм-ойзӧм.
Курыд шог налы, кодъяс ньӧбалӧны керка бӧрся керка, му бӧрся му, быттьӧ му вылас сӧмын найӧ олӧны, мукӧдыслы весиг оланін оз коль.
Ме кывлі, кыдзи Господь Саваоф шуис: — Керкаыс уна, но найӧ лоӧны кушӧсь, мича да ыджыд керкаясыс колясны олысьястӧг.
Дас виноград йӧр сетас сӧмын ӧти бӧчка вина, мешӧк тыр кӧдзӧм кӧйдыс сетас сӧмын куд тыр нянь.
Курыд шог налы, кодъяс водз асывсянь корсьысьӧны сур юны да сёр рытӧдз чӧсмӧдлӧны асьнысӧ винаӧн!
Налӧн гажӧдчанінын ворсӧны гуслиӧн да арфаӧн, тимпанӧн да пӧлянӧн. Сэні шорӧн киссьӧ вина!
Но Господьлысь уджъяссӧ найӧ оз аддзыны, Сылысь вӧчӧмторъяссӧ оз казявны.
Та вӧсна менсьым войтырӧс тӧдлытӧг нуӧдасны пленӧ. Налӧн нималана йӧзыс кутасны тшыгъявны, озыръяс нюкыртчасны горш косьмӧмнысла.
Пыдӧстӧминыс воссяс, сійӧ паськыда восьтас ассьыс горшсӧ да ньылыштас нималана йӧзӧс и озыръясӧс, сійӧ ньылыштас став гажӧдчысь йӧзсӧ.
Йӧзыс нюкыртчасны, ӧшӧдасны юрнысӧ, вылӧ кыпӧдчысьяс увлань лэдзасны синнысӧ.
Но Господь Саваоф веськыда мыждӧ, та вӧсна Сійӧс лоӧ ыдждӧдлӧма. Аслас веськыда вӧчӧмнас вежа Ен петкӧдлас Ассьыс вежалунсӧ.
Киссьӧм карас кольӧм йӧзыс йирсьысь ыжъяс моз кутасны корсьны сёян, локтысь йӧз моз найӧ кутасны корсьны кынӧмпӧт жугӧдӧм карас, мый озыр йӧз эновтісны.
Курыд шог налы, кодъяс ылӧг кӧвъясӧн кыскӧны асланьныс лёксӧ, кыз гезйӧн кыскӧны ас бӧрсяньыс мыжсӧ.
Найӧ шуалӧны: «Мед ӧдйӧджык тыдовтчасны Господьлӧн уджъясыс, медым ми аддзим найӧс. Мед ӧдйӧджык инасны Израильлӧн вежа Енлӧн кывъясыс, медым ми казялім тайӧс».
Курыд шог налы, кодъяс лёксӧ шуӧны бурӧн, а бурсӧ — лёкӧн, пемыдсӧ лыддьӧны югыдӧн, а югыдсӧ — пемыдӧн, курыдсӧ лыддьӧны юмолӧн, а юмовсӧ — курыдӧн!
Курыд шог налы, кодъяс лыддьӧны асьнысӧ мывкыдаӧн, пуктӧны асьнысӧ сюсь вежӧраӧ!
Курыд шог налы, кодъяс збойӧсь вина юны, повтӧмӧсь сур дасьтыны. Кор налы сетӧны козин, мыжа мортӧс найӧ лыддьӧны мыжтӧмӧн, а веськыда вӧчысьӧс оз дорйыны.
Но кыдзи би сотӧ идзас да ыпъялӧмӧн сотчӧ турун, тадзи налӧн вужйыс сісьмас, налӧн дзоридзыс бус моз разалас, ӧд найӧ ӧтдортісны Господь Саваофлысь Индӧдсӧ, нинӧмӧ пуктісны Израильлӧн вежа Енлысь кывъяссӧ.
Та вӧсна Господь ёна скӧрмас Аслас войтыр вылӧ, Сійӧ нюжӧдас кисӧ да дойдас найӧс. Весиг керӧсъяс вӧрзясны, йӧзлӧн шойясыс кутасны туплясьны туйяс вылын шыблас моз.
Но тайӧн Господьлӧн скӧралӧмыс оз на помась, Сылӧн киыс пыр на нюжӧдӧма, медым мыждыны.
Господь кыпӧдас дӧрапас да чукӧстас войтыръясӧс ылі муясысь, Сійӧ чукӧстас му помын олысьясӧс, и найӧ кокньыда да тэрыба локтасны.
На пиысь некод оз мудз, оз крукась, некод оз унмовсь, оз вугырт. Налӧн косканыс тасмаыс оз личав, кӧмкот кӧвйыс некодлӧн оз ор.
Налӧн ньӧвъясыс ёсьӧсь, ньӧввужъясыс зэвтчӧмаӧсь, налӧн вӧв кок гыжъясыс биа из кодьӧсь, тарантасъясыс тӧвныр кодьӧсь.
Найӧ равзӧны лев моз, эргӧны том левъяс моз, кыйдӧссӧ кватитӧны равӧстӧмӧн, пышйӧдӧны, и некод оз вермы налысь мырддьыны.
Сійӧ лунӧ найӧ уськӧдчасны тайӧ му вылас, налӧн равзӧмыс лоӧ гызьӧм саридзлӧн шы кодь.
Сэки видзӧдлан му вылас, аддзан сап пемыд да шогсьӧм, и кымӧръяс вевттясны югыдсӧ.
Озей ӧксылӧн кулан воӧ ме аддзылі Господьӧс. Сійӧ пукаліс выліинын сулалысь джуджыд юралан пуклӧсын. Сылӧн паськӧм пӧлаыс вевттис ставнас крам пытшкӧссӧ.
Сы дінын сулалісны серафимъяс.
Налӧн быдӧнлӧн вӧлі квайт борд.
Кык борднас найӧ вевттисны чужӧмнысӧ, мӧд кык борднас — кокнысӧ, и нӧшта кык борднас лэбалісны.
Найӧ чуксасисны ӧта-мӧдныскӧд да сьылісны: «Вежа, вежа, вежа Господь Саваоф, став муыс тырӧма Сылӧн дзирдлунӧн!»
Налӧн гӧлӧс шыысь крам подулыс вӧрзьыліс, и крамыс тырис тшынӧн.
Сэки ме шуи: «Курыд шог меным, менӧ виччысьӧ кулӧм!
Ме ӧд пеж вома морт, ола пеж вома войтыр пӧвстын, но ме аддзылі Ӧксыӧс, Господь Саваофӧс».
Сэки лэбзис ме дінӧ серафимъяс пӧвстысь ӧтиыс. Шом чепӧляӧн сійӧ кутіс киас висьпуктанінысь босьтӧм биа ӧгыр. Биа ӧгырнас сійӧ инмӧдчыліс менам вомдорӧ да шуис: «Тэнсьыд мыжтӧ вештӧма, тэнсьыд лёк вӧчӧмъястӧ прӧститӧма, ӧд тайӧ биа ӧгырыс инмӧдчыліс тэнад вомдорӧ».
Сэсся ме кылі Господьлысь гӧлӧс шысӧ: «Кодӧс Меным мӧдӧднысӧ? Коді мунас миян пыдди?»
Сэки ме шуи: «Со ме, мӧдӧд менӧ!»
Господь шуис: «Мун да висьтав тайӧ войтырыслы: пельнаныд кутанныд кывзыны да онӧ гӧгӧрвоӧй, синнаныд кутанныд видзӧдны да онӧ аддзӧй.
Чорзьӧд тайӧ войтырыслысь сьӧлӧмнысӧ, найӧ мед лоӧны сьӧкыд пеляӧсь, куньса синмаӧсь. Синнаныс мед оз аддзыны, пельнаныс мед оз кывны, сьӧлӧмнаныс мед оз гӧгӧрвоны, Мелань мед оз бергӧдчыны, медым Ме бурдӧді найӧс».
Сэсся ме юалі: «Господьӧй, дыр-ӧ тадзи лоӧ?»
Сійӧ вочавидзис: «Кытчӧдз каръяс оз кушмыны, керкаясын оз коль олысьыс, и муыс дзикӧдз оз энды.
Ме вӧтла татысь йӧзсӧ, и тайӧ мусӧ лоӧ дзикӧдз эновтӧма.
Весиг коляс кӧ тані олысьяс пӧвстысь дасӧд юкӧныс, найӧс тшӧтш лоӧ бырӧдӧма.
Кыдзи кералӧм бӧртиыс тупулӧн да ыджыд пулӧн кольӧ вужйыс, сідзи тайӧ войтырлӧн кольӧ вежа петасыс».
Ахаз, иудаса ӧксы, вӧлі Озей Иотамлӧн пи. Сылӧн веськӧдлан кадӧ арамейяслӧн Рецин ӧксы да израильса Пеках ӧксы, Ремальлӧн пиыс, петісны тышӧ Ерусалимлы паныд, но эз вермыны сійӧс.
Кор ӧксы керкаын кылісны, мый арамейяс локтӧмаӧсь нин Ефрем муӧ *, сэки Ахазлӧн да став войтырыслӧн сьӧлӧмныс вӧрзис, кыдзи вӧрын тӧвнырысь вӧрӧны пуяс.
Сэки Господь шуис Исайлы: «Мун Шеар-Ясув пиыдкӧд да воча пет Ахазлы. Мунӧй вылыс вайӧртӧдсянь визувтысь ва дорӧ, пожъясянінӧ нуӧдан туй вылӧ. Висьтав Ахазлы, мед лӧняс да оз майшась.
Сылӧн лолыс мед оз нюкыртчы тайӧ тшыналысь кык сэрапомлӧн скӧралӧмысь. Мед оз пов Рецинысь да арамейясысь, мед оз пов Ремальлӧн пиысь.
Арамейяс ефремсаяскӧд да Ремальлӧн пикӧд ӧтвыв сёрнитчисны вӧчны сылы лёксӧ. Найӧ шуалӧны:
”Ми уськӧдчам Иуда войтыр вылӧ, повзьӧдам найӧс, и найӧ лоӧны миян кипод улынӧсь. А ӧксыӧ налы ми пуктам Тавеллысь писӧ”.
Но Господь Ыджыдыс висьталӧ: — Оз ло тадзи, оз ло на ног!
Дамаскыс ӧд сӧмын Арамлӧн юркар, и Рециныс ӧд сӧмын Дамаскын юралӧ.
Коляс квайтымын вит во, и Ефрем войтыр оз ло войтырӧн.
Самарияыс сӧмын Ефремлӧн юркар, и Ремальлӧн пиыс сӧмын Самарияын юралӧ.
Онӧ кӧ зумыда эскӧй, онӧ вермӧй зумыда сулавны».
Сэсся Господь водзӧ висьталіс Ахазлы:
«Господьлысь, аслад Енлысь, кор петкӧдлыны индысьпас му пыдӧссянь либӧ вылі енэжсянь».
Но Ахаз вочавидзис: «Ме ог кут корны, ог кут дӧзмӧдны Господьӧс».
Сэки Исай шуис: «Кывзӧй, Давидлӧн рӧдыс!
Тіянлы ӧмӧй этша на, мый ті йӧзсӧ сьӧктӧданныд? Ті кӧсъянныд тшӧтш менсьым Енмӧс сьӧктӧдны?
Но Господь Ачыс петкӧдлас тіянлы пас: со, ныв сьӧктас, сэсся пи чужтас, Эммануил ним Сылы пуктас.
Сійӧ кутас пӧткӧдчыны йӧлӧн да маӧн сійӧ кадӧдзыс, кор велалас ӧтдортны лёксӧ да бӧрйыны бурсӧ.
Но тайӧ кадӧдзыс на, кор Сійӧ велалас ӧтдортны лёксӧ да бӧрйыны бурсӧ, кушмасны муясыс тайӧ кык ӧксыыслӧн, кодъясысь тэ ёна полан.
Тэныд, тэнад войтырлы да тэнад рӧдлы Господь мӧдӧдас сэтшӧм лунъяс, кутшӧмӧсь эз на вӧвны сійӧ кадсяньыс, кор Ефрем торйӧдчис Иудаысь. * Тіянлы паныд Господь мӧдӧдас ассурса ӧксыӧс.
Сійӧ лунӧ Господь чукӧстас Нил ю дорысь гутъясӧс, Ассур муысь мазіясӧс. Найӧ лэбзясны да пуксясны ю ковтысъясӧ да кырта потасъясӧ, найӧ вевттясны став йӧнсӧ да пуяссӧ.
Сійӧ лунӧ Господь кушӧдз шырас юрсинытӧ, тошнытӧ да яндзим гӧннытӧ ю мӧдлапӧлысь медалӧм ассурса ӧксылӧн шыранӧн.
Сійӧ лунӧ ӧти мӧскӧс да кык кӧзаӧс видзысь уна йӧлыс вӧсна пондас пӧткӧдчыны выйӧн.
Тайӧ муас кольысьяс пондасны пӧткӧдчыны выйӧн да маӧн.
Сійӧ лунӧ виноград йӧръясын, кӧні сюрсъясӧн быдмисны виноград пуяс, донасьыс-дона пуяс, кутас быдмыны йӧн да ёг турун.
Сэтчӧ кутасны ветлыны ньӧввужйӧн да ньӧвъясӧн, ӧд муыс ставнас тырас йӧнмӧн да ёг турунӧн.
Йӧн да ёг турун понда тэ он нин пет сійӧ видз-муыс вылӧ, кодӧс гӧрлісны-кӧдзлісны. Сэні пондасны йирсьыны ӧшъяс, сійӧс пондасны талявны ыжъяс».
Господь шуис меным: «Босьт ыджыд пӧв да гиж сэтчӧ гӧгӧрвоана шыпасъясӧн: Магер-Шалал-Хаш-Баз». *
Ме кори кык мортӧс, Урий попӧс да Евереклысь Закар писӧ, медым найӧ эскӧдісны, мый тайӧс ме гижи. Ме узи гӧтыркӧд, и сійӧ сьӧктаммис. Сэсся пи чужтіс.
Господь шуис меным: «Нимсӧ сылы пукты Магер-Шалал-Хаш-Баз. Ӧд сійӧ кадӧдзыс на, кор тайӧ кагаыс велалас “бать” да “мам” кывъяс шуны, Дамаскысь озырлунсӧ да Самарияысь эмбурсӧ ваясны ассурса ӧксы водзӧ».
Господь нӧшта висьталіс меным: — Тайӧ войтырыс нинӧмӧ пуктӧ надзӧ визувтысь Силоам ю, но ошйысьӧ Рецинӧн да Ремальлӧн пиӧн. Та вӧсна Ме, Господь, вайӧда тайӧ войтырыс вылӧ паськыда визувтысь да гораа бузгысь ю — ассурса ӧксыӧс став сылӧн выннас.
Сійӧ паськалас ойдӧм ва моз, петас став аслас берегъясысь, визувтас став Иуда му пасьтала да ойдӧдас сійӧс ставнас, и ваыс лоӧ голявыйӧдз.
Сійӧ паськӧдас ассьыс бордъяссӧ став Тэнад му пасьтала, Эммануил.
Дзӧрӧй-тіралӧй, войтыръяс! Сюся кывзӧй, ылі муын олысьяс!
Дасьтысьӧй тыш кежлӧ, но полӧй-тіралӧй!
Дасьтысьӧй тыш кежлӧ, но полӧй-тіралӧй!
Мӧвпалӧй да дасьтысьӧй, но тіян мӧвпыштӧманыд оз збыльмы.
Сёрнитчӧй ӧта-мӧдныдкӧд, но тіян нинӧм оз артмы. Ӧд миянкӧд Ен!
Тадзи висьталіс меным Господь, коді Аслас вына киӧн кутіс менӧ да эз лэдз ветлӧдлыны тайӧ войтырыслӧн туйӧд. Сійӧ шуис:
— Тайӧ войтырыс мый лыддьӧ гуся сёрнитчӧмӧн, ті тадзи энӧ лыддьӧй.
Мыйысь полӧ тайӧ войтырыс, ті энӧ полӧй да энӧ тіралӧй.
Вежавидзӧмӧн вылӧ пуктӧй Господь Саваофӧс! Сыысь полӧй, Сыысь тіралӧй!
Сійӧ лоӧ вежа крамнас и крукасян изнас, кытчӧ крукасясны Израильлӧн кыкнан ӧксы рӧдыс, сійӧ лоӧ лэчкӧн да тывйӧн Ерусалимын олысьяслы.
Унаӧн крукасясны, усясны да пасьмунасны, дзугсясны тывйӧ, шедасны налькйӧ.
— Гартышт тайӧ гижӧдсӧ, мыйӧ ме велӧді ассьым велӧдчысьясӧс, да тупкы сійӧс сёйысь вӧчӧм печатьӧн.
Ме виччыся Господьӧс, кӧть Сійӧ тупкис Ассьыс чужӧмбансӧ Яковлӧн рӧдысь. Господь вылӧ ме лача кута!
Со, ме да ныв-пи, кодъясӧс сетіс меным Господь, ми — Израильлы пас. Господь Саваоф, Сион керӧс вылын Олысь, водзвыв мӧдӧдіс тайӧ пассӧ Израильлы.
Тіянлы тшӧктасны шыасьны кулӧмаӧс корысьяс да туналысьяс дінӧ, кодъяс вашкӧдчӧны-шӧпкӧдчӧны. Но оз ӧмӧй ков войтырыслы шыасьны асланыс Ен дінӧ! Кулӧмаяслысь ӧмӧй колӧ юасьны ловъяяс йылысь?
Шыасьӧй менам велӧдӧмӧй да гижӧдӧй дінӧ.
Коді висьталӧ мӧд нога, оз тайӧ кывйыс серти, сылы аскиа луныс оз ло.
Тайӧ войтырыс кутас шӧйтны му вывті, найӧс кутасны чорыда дзескӧдны, найӧ пондасны ёна тшыгъявны, а тшыгъяліганыс найӧ пондасны лёкӧдны ассьыныс ӧксысӧ да Енсӧ.
Найӧ видзӧдласны вывлань, синнысӧ чӧвтласны му вылӧ да аддзасны: гӧгӧр шог да сап пемыд, гӧгӧр сьӧд пемыд. Найӧс лоӧ йӧршитӧма пемыдас.
Но оз век ло пемыд сэні, кӧні ӧні сійӧ сукмӧма.
Водзынджык Енмыс ёна увтыртіс Завулон му да Неффалим му, но локтана кадӧ Сійӧ вылӧ кыпӧдас саридзбердса туй, Йӧрдан юсайса му, мукӧд войтыра Галилея му.
Пемыдын олысь войтыр яр биа югыд аддзас, сап пемыдын олысьяслы югыд кыа петас.
Господьӧй, Тэ содтан-рӧдмӧдан тайӧ войтырсӧ, сетан налы ыджыд нимкодьлун.
Найӧ пондасны ёна гажӧдчыны Тэ водзын, кыдзи гажӧдчӧны вундан кадӧ, кыдзи гажӧдчӧны тышын шедӧдӧм эмбур юклігӧн.
Найӧс личкысь сийӧссӧ Тэ жуглан, найӧс нӧйтысь бедьсӧ чегъялан, найӧс дзескӧдысьлысь орссӧ орйӧдлан, кыдзи вӧчин мадиан войтырӧс пасьвартан лунӧ.
Тышкасьысьяслысь вирӧсь паськӧмсӧ, тышын талялӧм кӧмнысӧ лоӧ шыбитӧма биӧ.
Ӧд миянлы чужис кага, миянлы сетӧма пи.
Ыджыдалӧмсӧ пуктӧма Сылы пельпом вылас. Сылы сетӧма ним: Шензьӧдана Туйдӧдысь, Вына Ен, Пыр олысь Бать, Лӧньлунсӧ вайысь Ӧксы.
Сійӧ кутас пукавны Давидлӧн юралан пуклӧсын, Сылӧн ыджыдалӧмлы да лӧньлунлы помыс оз ло. Аслас веськыдлуннас да збыль серти мыждӧмнас Сійӧ ёнмӧдас-вынсьӧдас Ассьыс юралӧмсӧ ӧні и пыр кежлӧ.
Тадзи вӧчас Господь Саваоф, ӧд Сійӧ — вежӧгтысь Ен.
Господь мӧдӧдіс Ассьыс мыждана кывсӧ Яковлы, Сылӧн мыждӧмыс суис Израильӧс. Та йылысь тӧдмаліс став войтырыс, Ефремын да Самарияын олысьяс. Найӧ тшапа да ышнясьӧмӧн сёрнитӧны:
«Кирпичысь вӧчӧм стенъяс киссисны, но ми вӧчам найӧс кералӧм ыджыд изъясысь.
Сикомор пуысь вӧчӧм майӧгъяс кералісны, но ми вежам найӧс сус пу вылӧ».
Господь кыпӧдіс Рецинлы паныд сылысь вӧрӧгсӧ, ышӧдіс сылы паныд сійӧс мустӧмтысьясӧс.
Асыввывсянь локтісны арамейяс, рытыввывсянь — филистимсаяс, найӧ жалиттӧг бырӧдісны Израиль войтырӧс.
Но тайӧн Господьлӧн скӧралӧмыс эз на помась, Сылӧн киыс пыр на нюжӧдӧма, медым мыждыны.
Господь нӧйтіс войтырсӧ, но найӧ эз бергӧдчыны Сы дінӧ, эз шыасьны Господь Саваоф дінӧ.
Сэки Господь керыштіс Израильлысь юрсӧ и бӧжсӧ, ӧти лунӧ Сійӧ керыштіс пальма пу и эжӧр.
Юрыс — тайӧ юрнуӧдысьяс да нималана йӧз, а бӧжыс — тайӧ ылӧгвелӧдысь пророкъяс.
Юрнуӧдысьяс кежӧдісны Израиль войтырӧс ылӧг туй вылӧ, и на бӧрся мунысьяс вошисны.
Господь оз нимкодясь налӧн том йӧз вӧсна, налӧн батьтӧм-мамтӧм челядь дінӧ да дӧваяс дінӧ Сійӧ оз бурав, ӧд найӧ ставныс ылӧдчысьяс да лёк вӧчысьяс, налӧн вомысь петӧ сӧмын пеж сёрни.
Но тайӧн Господьлӧн скӧралӧмыс эз на помась, Сылӧн киыс пыр на нюжӧдӧма, медым мыждыны.
Налӧн лёк вӧчӧмыс ыпъялӧ би моз, ньылалӧ йӧн да ёг турун, сотӧ ставнас вӧрсӧ, и сэтысь сюръя моз кыптӧ сьӧд тшын.
Господь Саваофлӧн скӧрлуныс сотӧ-чишкалӧ мусӧ, войтырыс лои билы сёянторйӧн.
Йӧзыс оз жалитны ӧта-мӧднысӧ.
Найӧ куралӧны веськыдвылысь, но кольӧны тшыгйӧн, сёйӧны шуйгавылысь, но оз пӧтны.
Быдӧн йирӧ ассьыс матыссасӧ: Манассей — Ефремӧс, Ефрем — Манассейӧс, а ӧтвылысь найӧ — Иудаӧс.
Но тайӧн Господьлӧн скӧралӧмыс эз на помась, Сылӧн киыс пыр на нюжӧдӧма, медым мыждыны.
Курыд шог налы, кодъяс лӧсьӧдӧны лёк индӧдъяс, гижӧны чорыд тшӧктӧмъяс, медым гӧльясӧс эз мыждыны веськыда, медым Менам войтыр пӧвстысь коньӧръяслы эз вӧчны веськыда, медым мырддьыны дӧваяслысь эмбурсӧ, медым куштыны батьтӧм-мамтӧмъясӧс.
Мый ті кутанныд вӧчны мыждан лунӧ, кор бырӧдӧмыс ыджыд тӧвныр моз ылісянь суӧдас тіянӧс?
Код дінӧ ті котӧртанныд отсӧгла?
Кытчӧ дзебанныд ассьыныд озырлунтӧ?
Пленӧ босьтӧмаяс пӧвстын ті сувтанныд пидзӧс выланыд, кулӧмаяс моз усянныд.
Но тайӧн Господьлӧн скӧралӧмыс эз на помась, Сылӧн киыс пыр на нюжӧдӧма, медым мыждыны.
Курыд шог Ассурлы, Менам скӧралан бедьлы. Сы киын орсыс — Менам лӧглунӧй.
Ме веськӧда сійӧс тайӧ мыжа войтырыслы паныд, кодъяс вылӧ кыптӧ Менам скӧрлунӧй. Ме тшӧкта сылы куштыны да мырддявны налысь эмбурсӧ, талявны найӧс ывлавывса няйтӧс моз.
Но ачыс сійӧ оз тадзи мӧвпав, сійӧ нӧшта на унджык кӧсйӧ вӧчны, мӧвпалӧ пазӧдны-бырӧдны войтыръясӧс.
Сійӧ шуӧ: «Став менам веськӧдлысыс — ӧксыяс!
Калне усис Каркемис моз, Хамат — Арпад моз, Самария — Дамаск моз.
Менам кипод улӧ шедісны муяс, кӧні олысьясыс копрасисны идолъяслы. Сэні бӧлбаныс вӧлі ёна унджык Ерусалимын да Самарияын дорысь. Ме вӧча Ерусалимлы да сылӧн идолъяслы сійӧ жӧ, мый вӧчи Самариялы да сылӧн идолъяслы».
Кор Господь помӧдз вайӧдас Ассьыс уджсӧ Сион керӧс вылын да Ерусалимын, Сійӧ мынтысяс ассурса ӧксылы сылӧн вылӧ кыпӧдчӧмысь да ышнясьӧмысь.
Ӧд ассурса ӧксы шуис: «Ме сюсь мывкыда морт, ставсӧ тайӧс вӧчи аслам вынӧн да сюсь вежӧрӧн. Ме бырӧді войтыръяслысь мувежтасъяссӧ, кушті налысь озырлунсӧ, вына морт моз шыбиті юралан пуклӧсысь налысь юралысьяссӧ.
Ме озырмӧдчи войтыръяслӧн озырлунӧн, быттьӧ лэбач поз пазӧді.
Кыдзи эновтӧм позйысь чукӧртӧны лэбачлысь колькъяссӧ, тадзи ме курышті аслам кипод улӧ ставнас мусӧ. Весиг борднас некод эз шеныштлы, вомсӧ эз восьтлы да эз чипӧстлы».
Чер ӧмӧй ошйысьӧ чернас керасьысь водзын?
Пила ӧмӧй ошйысьӧ пилитчысь водзын?
Бедь ӧмӧй шенасьӧ мортӧн, коді сійӧс киас кутӧ?
Бедь ӧмӧй лэптӧ мортӧс, кодӧс абу пуысь вӧчӧма?
Та вӧсна Ыджыдыс, Господь Саваоф, жебмӧдас ӧксылысь вынйӧра йӧзсӧ да бипурын моз сотас сылысь нималӧмсӧ.
Сійӧ Ачыс, Израильлӧн Югыдыс, лоӧ биӧн, Израильлӧн вежа Енмыс лоӧ ыпъялысь биӧн, Сійӧ сотас йӧнсӧ да ёг турунсӧ, ӧти лунӧн бырӧдас Ассурӧс.
Ассурлысь медбур вӧръяссӧ да сад йӧръяссӧ лоӧ бырӧдӧма, сэні нинӧм ловъяыс оз коль, Ассур лоӧ кулӧм морт кодь.
Сэні зэв этша кольӧ пуыс, весиг кага вермас найӧс лыддьынысӧ.
Сійӧ лунӧ Израильлӧн коляс войтырыс, Яковсянь чужысьясысь ловйӧн кольӧмаяс, оз нин пондыны лача кутны найӧс дзескӧдысь вылӧ, но став сьӧлӧмсянь пондасны лача кутны Господь вылӧ, Израильлӧн вежа Ен вылӧ.
Коляс войтырыс бӧр бергӧдчас, Яковсянь чужысьясысь ловйӧн кольӧмаяс бӧр бергӧдчасны вына Ен дінӧ.
Израиль, тэнад войтырыдлӧн лыдыс кӧ лоӧ весиг саридздор лыа мында, бергӧдчас сӧмын колясыс.
Бырӧдӧмыс лоӧ веськыдлун серти, сійӧ ыльӧбтас ойдӧм ва моз. Ыджыдыс, Господь Саваоф, вӧчас Аслас шуӧмыс серти — бырӧдӧмыс лоас став му пасьтала.
Та вӧсна Ыджыдыс, Господь Саваоф, тадзи висьталӧ: Менам войтырӧй, Сионын олысьяс, энӧ полӧй Ассурысь!
Сійӧ нӧйтӧ тіянӧс беддьӧн, Египет моз кыпӧдӧ тіян вылӧ ассьыс орссӧ.
Но регыд нин, вывті регыд Менам лӧглунӧй тіян вылӧ кусас. Менам скӧрлунӧй бергӧдчас Ассур вылӧ, медым бырӧдны сійӧс.
Господь Саваоф кыпӧдас сы вылӧ Ассьыс орссӧ, кыдзи вӧчис мадиансаяскӧд, кор пасьвартіс найӧс Орив изкырта дорын. Сійӧ нюжӧдас Ассьыс бедьсӧ саридзлань, кыдзи нюжӧдіс сійӧс египетсаяслань.
Сійӧ лунӧ тіян пельпом вылысь усяс Ассурлӧн сьӧкыд нопйыс, тіян сьылі вылысь жугалас сылӧн сийӧсыс.
Ассурса тышкайӧз локтісны Айят кар пыр, мунісны Мигрон кар бокиті, Микмасын найӧ колисны ассьыныс эмбурнысӧ.
Найӧ мунісны керӧс потасӧд да узьмӧдчисны Геваӧ.
Рама кар дзӧрис полӧмысла, Сауллӧн Гива карын олысьяс пышйисны.
Галлим кар, горзы гораджыка!
Лаис кар мед кылас тэнсьыд горзӧмтӧ, Анатот кар мед локтас тэныд отсӧг вылӧ!
Мадменаын олысьяс пышйисны, Гевимын олысьяс разӧдчисны.
Ассурса тышкайӧз талун нин воӧдчасны Нов кар дорӧ, кинысӧ кыпӧдӧмӧн найӧ пондасны ыршасьны Сион керӧслы паныд, ерусалимса вывтасінлы паныд.
Ӧні Ыджыдыс, Господь Саваоф, ыджыд вынӧн нетшкӧ пу вожъяс. Ыджыд пуяссӧ лоӧ кералӧма, джуджыд пуяс усясны.
Сук вӧрсӧ Сійӧ кералас черӧн, Ставсӧвермысь пӧрӧдас ливанса пуяс.
Ессей вужсянь чужас выль петас, сылӧн вужсянь быдмас вотӧса вож.
Сы вылӧ лэччас Господьлӧн Лов, мывкыдлуныслӧн да гӧгӧрвоӧмлуныслӧн лов, туйдӧдӧмыслӧн да выныслӧн лов, тӧдӧмлуныслӧн да Господьысь полӧмыслӧн лов.
Сылӧн долыдлуныс — Господьысь полӧм. Сійӧ оз мыжды мортӧс ортсысяньыс, оз шу бӧръя кывсӧ йӧзлӧн сёрни серти.
Сійӧ веськыда мыждас коньӧръясӧс, гӧльясӧс доръяс збыльыс серти.
Аслас чорыд кывнас сійӧ чирыштас мувывса олысьясӧс, аслас ловшынас виас лёк вӧчысьясӧс.
Сійӧ вӧнясяс веськыдлуннас, эсканлуныс лоӧ сылы вӧньӧн.
Сэки кӧин кутас ӧтвыв овны баляпикӧд, леопард кутас орччӧн куйлыны кӧзапикӧд.
Кукань, лев да ӧшпи лоасны ӧтлаын, ичӧт зонка пондас видзны найӧс.
Мӧс пондас йирсьыны ошкӧд, кукань да ошпи пондасны орччӧн куйлыны, лев пондас ӧш моз сёйны идзас.
Ичӧт кага пондас ворсны змейлӧн горс дорын, сійӧ нюжӧдас кисӧ змейлӧн позйӧ, но лёкыс сылы оз ло.
Менам вежа керӧс вылын оз нин пондыны вӧчны лёксӧ. Кыдзи саридзыс тырӧма ваӧн, сідзи муыс лоӧ тырӧма Господьӧс тӧдӧмӧн.
Сійӧ лунӧ Ессейлӧн вужйыс лоӧ дӧрапасӧн войтыръяслы, найӧ шыасясны Ессейлӧн вужйыс дінӧ, и сылысь шойччанінсӧ вевттяс дзирдлун.
Сійӧ лунӧ Господь бара нюжӧдас Ассьыс кисӧ да бергӧдас Ассьыс коляс войтырсӧ Ассурысь и Египетысь, Патросысь и Эфиопияысь, Эламысь и Сеннарысь, Хаматысь и саридздорса муясысь.
Сійӧ лэптас дӧрапас войтыръяслы, чукӧртас нёльнан му пельӧссьыс Израильысь вӧтлӧмаясӧс, Иудаысь разалӧм войтырӧс.
Ефремлӧн вежалӧмыс кусас, Иудаӧс мустӧмтысьясӧс лоӧ бырӧдӧма.
Ефрем оз кут вежавны Иудалы, Иуда оз кут мустӧмтны Ефремӧс.
Рытыввылын найӧ уськӧдчасны филистимсаяс вылӧ, асыввывса олысьяслысь куштасны озырлунсӧ.
Эдом да Моав лоӧны налӧн кипод улынӧсь, аммон войтыр сетчас налы.
Господь косьтас Египетса саридзлысь куръясӧ, нюжӧдас юлань Ассьыс кисӧ да кыпӧдас ыджыд тӧвныр, Сійӧ юкас юсӧ сизим шор вылӧ, и йӧзыс сэті подӧн вуджасны.
Сэні лоӧ Ассурысь петан паськыд туй Господьлӧн коляс войтырлы, кыдзи вӧлі Израиль войтырлы Египетысь петігӧн.
Сійӧ лунӧ тэ шуан: «Господьӧй, ме ошка Тэнӧ.
Тэ скӧралін ме вылӧ, но лӧньӧдін Ассьыд скӧрлунтӧ да бурӧдін менӧ.
Енмыс — менӧ Мездысьыс. Сы вылӧ ме лача кута да ог пов.
Господь — менам вынӧй, Сійӧ — менам сьыланкывйӧй.
Господь мездіс менӧ».
Ті нимкодьпырысь понданныд гумлавны васӧ мездлуныслӧн юкмӧсысь. Сійӧ лунӧ ті шуанныд: «Ошкӧй Господьӧс, шыасьӧй Сы дінӧ!
Юӧртӧй войтыръяслы Сылӧн уджъясыс йылысь, висьтавлӧй, кутшӧм ыджыд Сылӧн нимыс.
Сьылӧй Господьлы! Сійӧ вӧчис шензьӧдана уджъяс, на йылысь тӧдӧны став му пасьтала.
Сионын олысьяс, гажӧдчӧй да нимкодясьӧй! Израильлӧн Вежаыс ыджыд, Сійӧ тіян пӧвстын».
Вавилон йылысь водзвыв висьталӧм. Енмыс петкӧдліс тайӧс Амослӧн Исай пилы.
Керӧс йылӧ кыпӧдӧй дӧрапас, кинаныд шенасьӧй, гораа чуксалӧй тышкайӧзӧс, медым найӧ пырасны юралысьяслӧн дзиръяӧд.
Ме тшӧкті Аслам вежаяслы чукӧртчыны, Ме чукӧсті Ассьым вына йӧзӧс, Менам вынӧн нимкодясьысьясӧс, медым найӧ збыльмӧдісны Менсьым скӧрлунӧс.
Керӧсъяс вылын кылӧ гора шы, сійӧ уна йӧзлӧн ызгысь шы кодь, кылӧ ӧтвыв чукӧртчӧм войтыръяслӧн шы. Господь Саваоф чукӧртӧ Ассьыс тышкайӧзсӧ.
Ылі муысь, енэжтас сайысь, локтӧны Господь да Сылӧн скӧрлуна вермасянторъясыс, медым пазӧдны ставнас мусӧ.
Ырзӧмӧн бӧрдӧй, ӧд Господьлӧн луныс матын нин, сійӧ локтӧ Ставсӧвермысьсянь да бырӧдӧ ставсӧ.
Став йӧзыслӧн киясыс вынтӧммасны, быдӧнлӧн сьӧлӧмыс пондас тіравны.
Найӧ ёна повзясны, кага вайысь аньӧс моз найӧс суасны сьӧкыд дойяс.
Шӧйӧвошӧмӧн пондасны видзӧдны ӧта-мӧд выланыс, налӧн чужӧмныс пондас сотчыны.
Господьлӧн мыждан луныс локтӧ ыджыд лӧглунӧн да ыпъялан скӧрлунӧн, медым вӧчны мусӧ овтӧминӧн да бырӧдны му вылысь мыжаясӧс.
Енэжвыв кодзувъяс оз кутны дзирдавны, шондіыс петігас на пемдас, и тӧлысьыс оз сет югыдсӧ.
Ме, Господь, мыжда муюгыдсӧ лёк вӧчӧмсьыс, мыжаясӧс — налӧн мыжсьыныс. Вылӧ кыпӧдчысьяслӧн вывтіасьӧмлы Ме пукта пом, дзескӧдысьяслысь ышнясьӧмсӧ Ме путкыльта.
Ме бырӧда йӧзсӧ, и налӧн лыдыс лоас сорастӧм * зарни дорысь на этшаджык, офирса зарни дорысь на этшаджык.
Енэжсӧ Ме вӧрзьӧда, и муыс вешъяс аслас местаысь. Тадзи лоӧ Господь Саваофлӧн ярлуныс вӧсна Сылӧн скӧралан лунӧ.
Сэки пышйысь газель моз, эновтӧм ыжъяс моз быдӧн бергӧдчас аслас войтыр дінӧ, котӧртас аслас муӧ.
Кодӧс суӧдасны — сійӧс бытшкасны, кодӧс вӧтӧдасны — сійӧс шыпуртӧн виасны.
Налысь кагаяссӧ пасьвартасны налӧн син водзын, керкаяссӧ куштасны, гӧтыръяссӧ мырдӧналасны.
Ме кыпӧда налы паныд Мидия войтырӧс, коді нинӧмӧ пуктӧ зарни, оз донъяв эзысь.
Том зонъясӧс найӧ лыйласны ньӧввужйысь, кагаясӧс найӧ оз жалитны, челядь дінӧ оз бурсьӧлӧмтчыны.
Вавилон — мувывса каръясысь медмичаыс, Калдея войтырлӧн ошйысянторйыс. Содомӧс да Гомораӧс моз Енмыс бырӧдас сійӧс. Сэтчӧ некод оз овмӧдчы, сэні некод оз кут овны нэмъяс чӧж.
Сэні араб оз сувтӧд чомсӧ, ыж видзысь оз понды шойччыны ыжъясыскӧд.
Сэтчӧ овмӧдчасны овтӧминса зверъяс, керкаяс тырасны сюзьясӧн, сэні кутасны овны страусъяс, кӧзаяс кутасны чеччавны сэні.
Шакалъяс пондасны омлявны изкаръясын, кӧинъяс пондасны вурзавны озыръяслӧн керкаясын.
Регыд нин воас сійӧ кадыс, кор лоӧ бырӧдӧма Вавилонӧс. Сэки Господь бурсьӧлӧмтчас Яков дінӧ да выльысь бӧръяс Израильӧс — бергӧдас найӧс асланыс муӧ. Йӧз муысь локтысьяс ӧтувтчасны Израиль войтыркӧд да вайӧдасны найӧс Израиль муӧ.
Сэні, Господьлӧн му вылын, Израиль войтыр босьтас тайӧ йӧзсӧ аслыс кесйӧгӧ. Израиль войтыр босьтас пленӧ дзескӧдысьясӧс да кутас ыджыдавны нартитысьяс вылын.
Господь мездас тэнӧ сьӧкыдалӧмысь, полӧмысь да сьӧкыд нартитана уджысь. Сійӧ лунӧ тэ кутан сьывны вавилонса ӧксы йылысь сералана сьыланкыв: — Со, оз нин ло нартитысьыс, воис пом сылӧн лёкалӧмлы!
Господь чегъяліс лёк вӧчысьяслысь бедьсӧ, жугӧдіс ыджыдалысьяслысь юралан бедьсӧ. Тайӧ бедьнас найӧ лёкысь нӧйтісны войтыръясӧс, дугдывтӧг вачкалісны найӧс, скӧрлунӧн ыджыдалісны на вылын, нем жалиттӧг дзескӧдісны найӧс.
Ӧні муыс ставнас лӧньӧма да шойччӧ, му вылын олысьяс гораа нимкодясьӧны.
Нимкодясьӧны кипарисъяс, нимкодясьӧны ливанса сус пуяс. Найӧ шуалӧны вавилонса ӧксылы: «Тэнӧ вермӧма, миянӧс некод нин оз пӧрӧд».
Пыдӧстӧминыс шызьӧма, воча петӧ паныдавны тэнӧ.
Тэ вӧсна сійӧ садьмӧдіс муюгыдса став кулӧм юралысьсӧ, чеччӧдіс юралан пуклӧсысь войтыръяслысь ӧксыяссӧ.
Найӧ ставныс шуасны вавилонса ӧксылы: «Тэ миян моз жӧ вынтӧммин, лоин миян кодь».
Пыдӧстӧминӧ шыбитӧма тэнсьыд нималӧмтӧ да арфаӧн гажӧдчан ворсӧмтӧ.
Тэнад вольпасьыд вегыльясысь, эшкыныд номыръясысь.
Тэ усин енэжсяньыс, тэ, югыд асъя кодзув, асъя кыаыслӧн пи.
Тэ, войтыръясӧс дзескӧдысь, муас усигӧн тэ пасьмунін.
Тэ мӧвпалін: «Ме кыпӧдча енэжас, сувтӧда ассьым юралан пуклӧсӧс Енлӧн кодзувъясысь вылӧджык на, ме пукся енъяслӧн керӧс вылӧ, ылі войвыв керӧс йылӧ.
Ме кыпӧдча кымӧръясысь вылӧджык на, лоа Медвылысса Ен кодь!»
Но тэнӧ шыбитӧма кулӧмаяслӧн оланінӧ, пыдӧстӧминлӧн пыді гуӧ!
Тэнӧ аддзысьяс сюся видзӧдӧны, шензьӧмӧн шуалӧны: «Тайӧ ӧмӧй вавилонса ӧксы, коді вӧрзьӧдліс муюгыдсӧ, сыркӧдліс ӧксыяслысь муяссӧ, вӧчис кушинӧн муюгыдсӧ, подулӧдзыс жугӧдіс каръяссӧ, пленӧ босьтӧмаясӧс эз лэдз бергӧдчыны гортаныс?»
Быд войтырлӧн ӧксыыс куйлӧ аслас гуын, быдӧнӧс дзебӧма нимӧдӧмӧн.
Сӧмын тэ колин гуавтӧг, тэнӧ шыбитісны ковтӧм увйӧс моз. Тэ куйлан виӧмаяс пӧвстын, шыпуртӧн бытшкӧмаяс пӧвстын, тэнӧ шыбитӧма косьмӧм вайӧртӧдӧ, тэнсьыд шойтӧ талялӧны. Мукӧдсӧ дзебасны, а тэнӧ оз, ӧд тэ куштін ассьыд мутӧ, бырӧдін ассьыд войтыртӧ. Татшӧм лёк мортсянь чужысьлысь нимсӧ оз казьтывлыны.
Батьныслӧн мыж вӧсна дасьтӧй вианін сылӧн пиянлы, медым найӧ эз босьтны асланыс кипод улӧ мусӧ, эз тыртны муюгыдсӧ лёксьысьясӧн.
Ме сувта налы паныд, — висьталӧ Господь Саваоф. — Ме бырӧда Вавилонлысь нимсӧ да коляс войтырсӧ, налысь челядьсӧ да насянь чужысьясӧс, — висьталӧ Господь. — 
Ме вӧча сійӧс ёжъяслы оланінӧн да нюрӧн, чышкышта сійӧс бырӧдан роскӧн, — висьталӧ Господь Саваоф.
Господь Саваоф кыв сетӧмӧн шуис: — Ставыс лоӧ сідзи, кыдзи Ме мӧвпышті.
Менам шуӧмӧй збыльмас. Аслам му вылын Ме пасьварта Ассур тышкайӧзӧс, Аслам керӧсъяс вылын Ме таляла найӧс.
Менам войтырӧй мынас Ассурлӧн сийӧс улысь, налӧн пельпом вылысь усяс сьӧкыд нопйыс.
Господьлӧн татшӧм шуӧмыс став муюгыдыс йылысь, Сылӧн киыс нюжӧдӧма став войтыръяс вылӧ. Господь Саваоф тадзи шуис, и коді вермас вежны тайӧс? Сійӧ нюжӧдӧма кисӧ, и коді вермас вештыны сійӧс?
Ахаз ӧксылӧн кулан воӧ вӧлі водзвыв висьталӧм:
— Эн нимкодясь, Филистим му, мый тэнӧ нӧйтан бедьсӧ чегъялӧма. Змей вужсянь петас аспид, сійӧ чужтас лэбалысь змейӧс.
Сэки Израиль войтырысь гӧльяссӧ лоӧ пӧткӧдӧма, коньӧръясыс кутасны повтӧг шойччыны.
А тэнсьыд вужтӧ Ме тшыглы виа, тэнсьыд коляс войтыртӧ бырӧда.
Сыркъялӧмӧн бӧрдӧй дзиръя дорын, ырзӧмӧн бӧрдӧй, карын олысьяс!
Филистим му, тэ ставнас киссян! Войвывсянь кыптӧ тшын — локтӧны тышкайӧз, и некод на пиысь оз кольччы.
Мый вочавидзны йӧз муысь юӧр вайысьяслы?
Вочавидзӧй налы тадзи: Господь зумыда сувтӧдіс Сион, Сылӧн войтырысь коньӧръяс аддзасны сэні сайӧдчанін.
Моав йылысь водзвыв висьталӧм.
Войнас лоӧ куштӧма-бырӧдӧма Ар-Моавӧс.
Войнас лоӧ куштӧма-бырӧдӧма Кир-Моавӧс.
Сэні олысьяс мунӧны Баитӧ да Дивонӧ, найӧ кайӧны бӧрдны вись ваян мыльк вылӧ.
Моавсаяс бӧрдӧны Нево да Медева вӧсна, налысь ставныслысь шырӧма юрсинысӧ да тошнысӧ.
Найӧ ветлӧны туй вывті шогалан паськӧмӧн, пукалӧны керка вевт вылын да бӧрдӧны, пукалӧны изэрд вылын да бӧрдӧны, бӧрдӧны кыз синваӧн.
Ырзӧмӧн бӧрдӧны Хешбон да Эляле, налӧн бӧрдӧмыс кылӧ Яхацӧдз.
Таысь полӧмнысла горзӧны моавса тышкайӧз, налӧн сьӧлӧмныс тіралӧ.
Менам сьӧлӧмӧй бӧрдӧ Моав вӧсна.
Моавсаяс пышйӧны Цоарӧ, мунӧны Эглат-Шелишияӧдз, найӧ бӧрдӧмӧн кайӧны Лухит керӧсӧ, Хоронаимӧ мунан туй вылын ойзӧны бырӧдӧм вӧсна.
Нимримысь ваыс бырӧма, видзьясыс косьмӧмаӧсь, туруныс сотчӧма, оз тыдав веж быдмӧгыс.
Моавсаяс нуӧны эмбурнысӧ, мый коркӧя чукӧртлӧмысь налӧн колис, вуджӧдӧны сійӧс Аравим ю сайӧ.
Налӧн бӧрдӧмыс кылӧ став Моав му пасьтала, Эглаимсянь Бер-Элимӧдз.
Димонлӧн ваыс сорласис виркӧд. Но Ме дасьта Димонлы нӧшта на мӧдтор — мӧдӧда левъясӧс Моавысь пышйӧмаяс вылӧ, тшӧтш сэні ловйӧн кольӧмаяс вылӧ.
Мӧдӧдӧй иудаса ӧксылы козин пыдди баляясӧс, Селаысь мӧдӧдӧй найӧс овтӧмин пыр Сион нывлӧн керӧс вылӧ!
Арнон ю вуджигӧн моавса нывъяс лоӧны пышйысь лэбачьяс кодьӧсь, позсьыныс шыбитӧмаяс кодьӧсь.
Моавса ӧксы шыасьӧ иудаса ӧксы дінӧ: — Шу, мый миянлы вӧчны, отсав миянлы.
Войся пемыд моз вевттьы миянӧс луншӧрнас, дзеб миянӧс, вӧтлӧмаясӧс, эн вузав пышйысьясӧс.
Сибӧд ас дінад моавсаясӧс, менсьым вӧтлӧм войтырӧс, дзеб найӧс мырддялысьясысь. — Дзескӧдысьяс оз нин лоны, мырддялӧмлы воас пом, керка куштысьясӧс лоӧ бырӧдӧма му вывсьыс.
Сэки лоӧ сувтӧдӧма юралан пуклӧс, юралӧмыс зумыдмас буралӧмӧн. Сэтчӧ пуксяс Давид рӧдысь збыльыс серти юралысь, веськыда мыждысь, веськыдлунсӧ вӧчысь.
Ми кывлім Моавлӧн вылӧ кыпӧдчӧм йылысь — сійӧ этш тӧдтӧг ышнясьӧ! Ми тӧдам сылысь тшаплунсӧ, вывтіасьӧмсӧ да скӧрлунсӧ, сылысь ковтӧм сёрнисӧ.
Та вӧсна Моавлы ковмас бӧрдны ас вӧснаыс, моавсаяс ставныс бӧрдӧны.
Кир-Харешетын ті чукӧртлінныд-косьтылінныд виноград, тайӧс воштӧм вӧсна ӧні ті бӧрданныд.
Хешбонса видз-муяс гӧльмисны, сивмаса виноград пуяс косьмисны.
Войтыръяслӧн ыджыдалысьяс чегъялісны медбур виноград пуяссӧ. Найӧ паськалісны Язерӧдз, быдмисны весиг овтӧминын, вожъясыс нюжалісны саридз сайӧдз.
Та вӧсна Язеркӧд ӧтвыв ме бӧрда сивмаса виноград вӧсна. Кисьта синваӧс тіян вӧсна, Хешбон да Эляле, ӧд вотӧс чукӧртан кадӧ да вундан кадӧ оз пет тіянсянь нимкодясьӧм шы.
Бур вотӧса му вылын оз нин гажӧдчыны-нимкодясьны, виноград йӧръясын оз сьывны, оз нимкодясьны, пычкан гуын оз талявны виноград вотӧс, дугдіс кывны гажӧдчӧм шы.
Та вӧсна менам пытшкӧсӧй гусли моз бӧрдӧ Моав вӧсна, сьӧлӧмӧй бӧрдӧ Кир-Харешет вӧсна.
Моавсаяс кайӧны вись ваян мыльк вылӧ, сэні мудзтӧдзныс копрасьӧны-юрбитӧны, найӧ локтӧны асланыс вежаинӧ кевмысьны, но тайӧ оз отсав налы.
Тадзи Господь водзвыв висьталіс Моав йылысь.
А ӧні Господь тадзи висьталӧ: «Куим во мысти — лыддьыны кӧ сідзи, кыдзи медалӧм морт лыддьӧ ассьыс уджалан вояссӧ — Моавлӧн нималӧмыс бергӧдчас яналӧмӧ. Тайӧ войтырыслӧн лыдыс вӧлі вывті уна, но найӧ колясны зэв этшаӧн».
Дамаск йылысь водзвыв висьталӧм.
Дамаск кар бырас, сійӧ лоӧ киссьӧм карӧн.
Ароэр каръясӧс лоӧ эновтӧма, найӧ вичмасны ыж-мӧслы, ыж-мӧс кутасны шойччыны сэні, и некод оз повзьӧд найӧс.
Ефремын оз нин лоны изкаръяс, Дамаскын оз нин лоны ӧксыяс, арамейяслӧн коляс войтырыс бырас.
Накӧд лоӧ сійӧ жӧ, мый лои Израиль войтырлӧн нималӧмкӧд, — висьталӧ Господь Саваоф.
Сійӧ лунӧ Яков рӧдлысь нималӧмсӧ лоӧ нинӧмӧ пуктӧма, налӧн тшӧгӧм вир-яйыс вӧснялас.
Израилькӧд лоӧ сійӧ жӧ, кыдзи овлӧ нянь вундігӧн. Рефаим ковтысса видз-му вылысь моз ставсӧ лоӧ ӧктӧма-чукӧртӧма, и шептыс этша кольӧ.
Израилькӧд лоӧ сійӧ жӧ, — висьталӧ Господь, Израильлӧн Ен, — кыдзи овлӧ олив чукӧртӧм бӧрын: пу йылас кольӧ сӧмын кык-куим, вож вылас — нёль-ӧ-вит олив.
Сійӧ лунӧ мортыс видзӧдлас сійӧс Вӧчысьыс вылӧ, кыпӧдас синсӧ Израильлӧн вежа Енлань.
Сійӧ оз нин видзӧд аслас киӧн вӧчӧм висьпуктанінъяс вылӧ, оз нин кыпӧд синсӧ аслас киӧн вӧчӧм юрбитан пуяс да тшынӧдчан висьпуктанінъяс вылӧ.
Сійӧ лунӧ Израильлӧн зумыд каръяскӧд лоӧ сідзи жӧ, кыдзи вӧлі сэки, кор мукӧд войтыръяс эновтісны ассьыныс каръяссӧ Израиль войтырлӧн локтігӧн. Израильлӧн зумыд каръясыс лоӧны вӧр кодьӧсь, кӧні некод оз ов. Гӧгӧр лоӧ куш.
Ӧд тэ вунӧдін Ентӧ, ассьыд Мездысьтӧ, он казьтыв тэнӧ сайӧдысь Изкырта йылысь.
Тэ пуктін мича быдмӧгъяс аслад идолъяслы, вужйӧдін йӧз виноград вожъяс.
Найӧс пуктан лунӧ тэ тӧждысин, медым бура быдмисны, медым водз дзоридзалісны.
Но вотӧс чукӧртан кадӧ вотӧсыс оз ло, а дой да висьӧм лоӧ.
Курыд шог! Войтыръяслӧн шызьӧм кылӧ, найӧ шызьӧны саридз моз.
Войтыръяслӧн горзӧм кылӧ, найӧ ызгӧны бузгысь ва моз.
Войтыръяс горзӧны, быттьӧ пыдӧстӧм ваяс бузгӧны.
Но Господь чирыштас найӧс, и найӧ ылӧдз пышъясны. Найӧ тӧвзясны керӧсъяс вывті тӧвнырӧн нӧбӧдан кыд моз, ыджыд тӧвнырӧн нӧбӧдан бус моз.
Рытнас лоӧ ыджыд полӧм, а асъядорыс сійӧ оз нин ло.
Татшӧмтор виччысьӧ миянлысь эмбур мырддялысьясӧс, татшӧм лоӧ миянлысь гусялысьяслӧн пайыс.
Курыд шог дзизгысь гут-гаглӧн мулы, эфиопияса юяс мӧдлапӧлын куйлысь мулы. Сійӧ мӧдӧдӧ йӧзсӧ саридз вывті, юсьпӧлянысь вӧчӧм пыжъясӧн ваяс вывті.
Тэрыб кокаяс, нуӧй юӧр, мунӧй ён вына войтыр дінӧ, ыджыд тушаа йӧз дінӧ, кодъяслысь юрсисӧ да тошсӧ шырӧма. Тайӧ войтырсьыс быдлаын полӧны, найӧ ставнысӧ нартитӧны. Налысь мусӧ вожӧдӧны юяс.
Ті, муюгыдын олысьяс, ті, му вылас олысьяс, ставныд видзӧдӧй, кор керӧсъяс вылӧ кыптас дӧрапас, сюся кывзӧй, кор кылас буксанлӧн гора шыыс.
Господь меным тадзи висьталіс: Аслам оланінсянь Ме лӧня видзӧда луншӧркадся гож моз, вундан кадӧ шонді пӧжигӧн кыптысь ру моз.
Но виноград вотӧдз на, сылӧн дзоридзалӧм бӧрти, кор розйыс заводитас кисьмыны, Господь пуртӧн вундалас вожъяссӧ, Сійӧ кералас да шыбитас выль вожъяссӧ.
Найӧс шыбитасны керӧсвывса кырныш-варышлы да мувывса пемӧсъяслы.
Гожӧмнас наӧн кутасны пӧткӧдчыны кырныш-варыш, а тӧвнас — мувывса пемӧсъяс.
Сэки Господь Саваофлы ваясны козинъяс ён вына да збой войтырсянь, ыджыд тушаа йӧзсянь, кодъясысь быдлаын полӧны, кодъяс ставнысӧ нартитӧны, кодъяслысь мусӧ вожӧдӧны юяс. Козинъяссӧ ваясны Сион керӧс вылӧ, Господь Саваофлӧн оланінӧ.
Египет йылысь водзвыв висьталӧм.
Господь пуксис кокньыд кымӧр вылӧ. Сійӧ локтас Египетӧ, Сы водзын кутасны тіравны египетса идолъяс, повзьӧмнысла египетсалӧн сьӧлӧмныс дугдас тіпкынысӧ.
Ме кыпӧда египетсаясӧс ӧта-мӧдныслы паныд: вокыс уськӧдчас вокыс вылӧ, орччӧн олысьыс — орччаыс вылӧ, ӧти карын олысьяс — мӧд карын олысьяс вылӧ, тайӧ муас олысьяс — мӧд муын олысьяс вылӧ.
Египетсалӧн ловныс жебмас. Ме торка налысь мӧвпыштӧмасӧ, и найӧ шыасясны туйдӧдӧмла идолъяс да тшыкӧдчысьяс дінӧ, кулӧмаӧс корысьяс да туналысьяс дінӧ.
Ме сета египетсаясӧс чорыд сьӧлӧма юралысь киӧ, скӧр ӧксы кутас ыджыдавны на вылын, — висьталӧ Ыджыдыс, Господь Саваоф.
Саридзын ваыс ямас, юын ваыс чинас да косьмас.
Египетса юяс дуксясны, висъяс ляпкаласны да косьмасны, эжӧр да юсьпӧлян нярмасны.
Юдорса быдмӧгъяс косьмасны, ю пӧлӧн быдмысь кӧдзас косьмас.
Тӧлыс разӧдас найӧс, и найӧ бырасны.
Чери кыйысьяс кутасны бӧрдны, Нил ю дорын вуграсьысьяс — синва кисьтны, тывйӧн чери кыйысьяс шогӧ усясны.
Шабді няръялысьяс яналасны, дӧра быгӧдысьяс шӧйӧвошасны.
Печкысьяс шогӧ усясны, медалӧм уджалысьяс нюкыртчасны.
Цоанса веськӧдлысьяс дзик мывкыдтӧмӧсь, фараонлӧн сюсь вежӧра туйдӧдысьяслӧн вӧзйӧмъясыс ковтӧмӧсь.
Ті ӧмӧй верманныд шуны фараонлы: «Ме — мывкыда йӧзлӧн пи, ме — важся ӧксысянь чужысь».
Кӧнӧсь найӧ?
Кӧнӧсь тэнад мывкыда йӧзыд?
Ӧні мед найӧ висьталасны тэныд, ӧні мед тӧдмаласны Господь Саваофлысь водзвыв шуӧмсӧ, мый лоӧ Египеткӧд.
Цоанса веськӧдлысьяс дзикӧдз вежӧртӧммисны, мемфисса ыджыдалысьяс пӧрйӧдлӧны асьнысӧ, чужанкотыръяслӧн юралысьяс кежӧдісны Египетӧс бур туй вывсьыс. Найӧ дзикӧдз кежӧдісны Египетӧс туй вывсьыс.
abu
Господь шӧйӧвоштіс Египетӧс, сійӧ лои код морт кодь, коді ветлӧдлӧ аслас вос вывті.
Египетын некод оз вермы нинӧм вӧчны, ни юр, ни бӧж, ни пальма, ни эжӧр.
Сійӧ лунӧ египетсаяс лоӧны аньяс кодьӧсь. Повзьӧмнысла найӧ пондасны тіравны Господь Саваофысь, кор Сійӧ кисӧ лэптас на вылӧ.
Египетсаяслы Иуда му лоӧ повзьӧдчанторйӧн.
Коді Египетын кылас Иуда йылысь, повзяс, ӧд сылы тӧд вылас усяс, мый Господь Саваоф водзвыв шуліс Египет йылысь.
Сійӧ лунӧ Египетын лоӧ вит кар, кӧні олысьясыс кутасны сёрнитны ханаан кыв вылын да кыв сетӧмӧн кӧсйысясны кесъявны Господь Саваофлы.
Тайӧ каръясысь ӧтиыс кутас шусьыны Шонді карӧн.
Сійӧ лунӧ Египет шӧрын кутас сулавны Господьлы висьпуктанін, а му вежтасас — Господьлӧн вежа из.
Тайӧ изйыс лоӧ египетсаяслы пасӧн, сійӧ кутас висьтавны Господь Саваоф йылысь. Кор найӧс кутасны дзескӧдны, найӧ шыасясны Господь дінӧ, и Сійӧ мӧдӧдас налы мездысьӧс. Сійӧ доръяс да мездас найӧс.
Господь восьтас Асьсӧ египетсалы.
Сійӧ лунӧ найӧ тӧдмаласны Господьӧс, ваясны Сылы начкан висьяс да нянь висьяс и вӧчасны, мый кыв сетӧмӧн кӧсйысясны Сылы.
Господь дойдас Египетӧс.
Сійӧ дойдас и бурдӧдас найӧс.
Кор найӧ шыасясны Господь дінӧ, Сійӧ кылас налысь кевмӧмсӧ да бурдӧдас найӧс.
Сійӧ лунӧ Египетсянь Ассурӧ воссяс ыджыд туй. Ассурса кутасны волывлыны Египетӧ, а египетса — Ассурӧ.
Найӧ ӧтвыв кутасны кесъявны Господьлы.
Сійӧ лунӧ Израиль мусӧ позяс ӧткодявны Египеткӧд да Ассуркӧд.
Найӧ лоӧны бурсиӧмӧн став муюгыдыслы. Господь Саваоф бурсиас найӧс тадзи: «Бурсиа Ассьым Египет войтырӧс, бурсиа Аслам киӧн вӧчӧм Ассур войтырӧс да Ассьым бӧрйӧм Израиль войтырӧс».
Ассурса Саргон ӧксы мӧдӧдіс аслас тышкайӧзӧн веськӧдлысьсӧ босьтны Азот кар. Сійӧ локтіс, уськӧдчис кар вылӧ да босьтіс сійӧс. Дзик тайӧ воас Господь шуис Амослӧн Исай пилы: «Мун да пӧрччы ас вывсьыд шогалан паськӧмтӧ, пӧрччы коксьыд кӧмтӧ».
Сійӧ тадзи и вӧчис: ветлӧдліс пасьтӧг да кӧмтӧг.
Господь шуис: «Менам Исай кесйӧгӧй куим во чӧж ветлӧдліс пасьтӧг да кӧмтӧг. Тайӧ — Египетлы да Эфиопиялы пас. Тадзи ассурса ӧксы нуӧдас Египетысь да Эфиопияысь пленӧ босьтӧмаясӧс. Томъясӧс и пӧрысьясӧс нуӧдасны дзик пасьтӧг-кӧмтӧг, медым янӧдны Египетӧс.
Сэки повзясны да яналасны найӧ, кодъяс лача кутісны Эфиопия вылӧ да ошйысисны Египетӧн.
Сійӧ лунӧ тайӧ саридздорса муас олысьяс шуасны: “Со мый лои накӧд, кодъяс вылӧ ми лача кутім да кодъяссянь отсӧг виччысим, медым найӧ дорйисны миянӧс ассурса ӧксыысь.
Коді ӧні мездас миянӧс?”»
Саридздорса овтӧмин йылысь водзвыв висьталӧм.
Кыдзи Негев муын пӧльтӧ ыджыд тӧвныр, сідзи овтӧминысь, повзьӧдана муысь, сувтіс менам син водзӧ Енсянь повзьӧдана петкӧдчылӧм: ылӧдчысь ылӧдлӧ, бырӧдысь бырӧдӧ.
Элам, уськӧдчы на вылӧ! Мидия, кытшав найӧс!
Ӧні став ойзӧмыслы Ме пукта пом.
Тайӧс аддзылӧмысь менам пытшкӧсӧй кутіс дзӧрны, сьӧкыд дойяс топӧдісны менӧ кага чужтысьӧс моз.
Ме шӧйӧвоши сыысь, мый кывлі, менӧ полӧм босьтіс сыысь, мый аддзывлі.
Менам сьӧлӧмӧй тіралӧ, менӧ дзӧрӧм босьтіс.
Водзынджык ме нимкодьпырысь виччыси рытсӧ, ӧні сійӧ повзьӧдлӧ менӧ.
Пызан дасьтӧма, джодждӧраяс вольсалӧма, юралысьяс сёйӧны-юӧны.
Чеччӧй, юралысьяс, мавтӧй ассьыныд сайӧднытӧ!
Господь меным тадзи висьталіс: — Мун да сувтӧд кар видзысьӧс, медым сійӧ юӧртас, мый аддзӧ.
Сійӧ аддзис, мый верзьӧмаяс кыкӧн-кыкӧн локтӧны вӧвъяс вылын, осёлъяс да верблюдъяс вылын.
Сійӧ кывзіс, сюся кывзіс, сэсся лев моз гораа горӧдіс: «Господьӧй!
Лунысь-лун ме сулалі да видзӧді, войбыд эг вешйывлы аслам места вылысь.
Со, верзьӧмаяс кыкӧн-кыкӧн локтӧны вӧвъяс вылын».
Сэсся кар видзысь юӧртіс: «Киссис, киссис Вавилон. Сылысь бӧлбанъяссӧ жуглӧма, найӧ куйлӧны му вылын».
Менам войтырӧй, тэнӧ вартӧма-изӧма гумла вылын.
Мый ме кывлі Господь Саваофсянь, Израильлӧн Енсянь, сійӧс ӧні висьтала тіянлы.
Думай йылысь водзвыв висьталӧм.
Сеир керӧсвыв мусянь меным горзӧны: «Кар видзысь, дыр-ӧ на асылӧдзыс? Кар видзысь, оз-ӧ на войыс помась?»
Кар видзысь вочавидзӧ налы: «Асылыс матыстчӧ нин, но войыс эз на помась.
Кӧсъянныд кӧ нӧшта юавны — бара на волӧй да юалӧй».
Аравия йылысь водзвыв висьталӧм.
Деданса караванъяс, войсӧ коллялӧй аравияса пуяс улын.
Тема муын олысьяс, юны кӧсйысьяслы сетӧй васӧ, пышйысьясӧс вочаалӧй няньӧн, ӧд найӧ пышйӧны шыпуртысь, пуртӧсысь перйӧм шыпуртысь, пышйӧны зэвтӧм ньӧввужйысь да чорыд тышысь.
Господь меным тадзи висьталіс: «Коляс нӧшта ӧти во — лыддьыны кӧ сідзи, кыдзи медалӧм морт лыддьӧ ассьыс уджалан восӧ — и бырас ставыс, мыйӧн Кедар ошйысьӧ. Кедарса тышкасьысьяслӧн, ньӧввужйысь лыйсьысьяслӧн лыдыс кольӧ зэв этша».
Тадзи висьталӧ Господь, Израильлӧн Ен.
Ковтыс йылысь водзвыв висьталӧм.
Тайӧ ковтыссӧ Исай аддзыліс Енсянь восьтӧмын. 
Мый тэ вӧчан? Мыйла тэнад олысьясыд кайӧмаӧсь керка вевт вылӧ?
Тэ ёна шызьӧмыд, ызгысь-гажӧдчысь кар.
Тэнад тышкайӧзыд эз шыпурт помысь кувны, эз тышын усьны. Тэнад веськӧдлысьясыд ӧтвылысь пышйисны ньӧвъясысь, но найӧс кутісны. Найӧ ылӧдз пышйисны, но найӧс аддзисны да кӧртавлісны.
Та вӧсна ме шуа: — Кольӧй менӧ, ме кута курыда бӧрдны.
Энӧ зільӧй менӧ бурӧдны, ӧд менсьым войтырӧс бырӧдӧма.
Ковтысын шӧйӧвошӧм да шызьӧм, йӧзыс талялӧны ӧта-мӧднысӧ. Тайӧ лунсӧ лӧсьӧдіс Ыджыдыс, Господь Саваоф.
Жуглӧны карса стенъяс, йӧзыслӧн горзӧмыс кылӧ керӧс йылӧдз.
Эламса тышкайӧз босьтісны ассьыныс ньӧвъяссӧ, быдлаын тарантасъяс да верзьӧмаяс. Кирса шыпуртаяс лэптӧмаӧсь ассьыныс сайӧднысӧ.
Тэнад медмича ковтысъясыд тырӧмаӧсь тарантасъясӧн, верзьӧмаяс сулалӧны дзиръяяс дорын. Иудалӧн абу дорйысьыс.
Сійӧ лунӧ ті кыпӧдінныд синнытӧ сус пу керкаын видзан шыпуртъясныд вылӧ.
Ті аддзинныд, мыйта розьыс Давид карлӧн стенъясын. Улыс вайӧртӧдӧ ті чукӧртінныд ва.
Ерусалимын ті видзӧдалінныд керкаяс да кодсюрӧӧс на пӧвстысь кисьтінныд, медым тайӧ изъяснас дзоньтавны карса стенъяс.
Кык стен костӧ ті вӧчинныд ва видзанін, медым чукӧртны сэтчӧ важ йӧртӧдысь васӧ.
Но ті энӧ кыпӧдӧй синнытӧ Сы вылӧ, коді вӧчӧ тайӧс, энӧ видзӧдӧй Сы вылӧ, коді водзысяньыс вӧлі мӧвпыштӧма та йылысь.
Сійӧ лунӧ Ыджыдыс, Господь Саваоф, чуксаліс тіянӧс бӧрдны да шогсьыны, шырны юрсинытӧ да пасьтасьны шогалан паськӧмӧ.
Но ті гажӧдчанныд да нимкодясянныд, начканныд ӧшъясӧс да ыжъясӧс, сёянныд яй да юанныд вина.
Ті шуаланныд: «Кутам сёйны-юны, ӧд аски кулам».
Господь Саваоф висьталіс меным: — Тайӧ мыжнытӧ Ме ог вешты, кулан лунӧдзныд ті лоанныд мыжаӧсь. Тадзи висьталӧ Ыджыдыс, Господь Саваоф.
Ыджыдыс, Господь Саваоф, тадзи висьталіс: «Мун ӧксы керкаын веськӧдлысь Шевнай дінӧ да висьтав сылы:
— Коді тэ сэтшӧмыс? Тані тэнад абу рӧдвужыд, а тэ лысьтін изкыртаын керавны аслыд дзебанін.
Вывтасінын тэ кералін аслыд гуасянін, изкыртаын вӧчин аслыд оланін.
Но Господь вына морт моз ылӧдз шыбитас тэнӧ. Сійӧ ёкмыльӧс моз чабралас тэнӧ, гартыштас тэнӧ тубрасӧ да мачӧс моз шыбитас паськыд муӧ.
Сэні тэ кулан, сэтчӧ колясны тэнад ошйысян тарантасъясыд, аслад ыджыдлӧн керкалы тэ лоан юръянӧдысьӧн.
Ме тойышта тэнӧ места вывсьыд, уськӧда тэнӧ ыджыд чинсьыд.
Сійӧ лунӧ Ме чукӧста Элякимӧс, Хилкилысь писӧ, Ассьым кесйӧгӧс. Ме пасьтӧда сійӧс тэнад паськӧмӧн, вӧньӧда сійӧс тэнад вӧньӧн, пукта сійӧс веськӧдлыны тэ пыдди.
Сійӧ лоӧ батьӧн Ерусалимын олысьяслы да Иуда чужанкотырлы.
Давид керка восьтӧм-йигналӧм вӧсна кывкутӧмсӧ Ме пукта сылы пельпом вылас.
Сійӧ кӧ восьтас, некод оз вермы йигнавнысӧ, йигналас кӧ, некод оз вермы восьтнысӧ.
Ме вӧча сійӧс зумыдінӧ тувъялӧм кӧрттулӧн, сійӧ нимӧдас батьыслысь рӧдсӧ.
Элякимлӧн челядьыс, челядьыслӧн ныв-пиыс да став рӧдвужыс асланыс сьӧктанас кутасны ӧшавны сы вылын зумыд кӧрттув вылын моз, кыдзи кӧрттув вылын ӧшалӧны гортса дозмукъяс да гырничьяс.
Но воас лун, — висьталӧ Господь Саваоф, — кор зумыдінӧ тувъялӧм кӧрттулыс усяс. Сійӧ чегас да усяс, и ставыс, мый кутчысис сы вылын, усяс да жугалас». Тадзи висьталӧ Господь.
Тир йылысь водзвыв висьталӧм.
Ырзӧмӧн бӧрдӧй, фарсисса корабльяс!
Карыс киссьӧма, эз кольны керкаяс.
Та йылысь ті кылінныд Киттим муысь бергӧдчигӧн.
Ланьтӧй, саридз дорын олысьяс, сидонса вузасьысьяс! Тіянлысь карнытӧ озырмӧдлісны саридз вывті кывтысьяс.
Помтӧм-дортӧм ва вывті тіян карӧ вайлісны Шихорысь нянь, Нил ю дорысь быдтӧмторъяс. Тіян карныд вӧлі уна войтырлы вузасянінӧн.
Яндысь, Сидон кар!
Тэныд, саридздорса изкарлы, саридз тадзи висьталӧ: «Ме эг тӧдлы чужтан дойяс, эг чужтывлы, эг быдтывлы пиянӧс, эг туйдӧдлы нывъясӧс».
Кор Тир йылысь юӧрыс воас Египетӧдз, сэні олысьяс сыркмунасны.
Саридз дорын олысьяс, ырзӧмӧн бӧрдӧй, мунӧй да овмӧдчӧй Фарсисӧ!
Мый лои тіян гажӧдчысь карныдкӧд, кодӧс вӧлі сувтӧдӧма важысянь нин, коді вӧлі ылӧдз нюжалӧма саридз пӧлӧн?
Коді шуис, мый Тиркӧд тадзи лоас? Сійӧ индывліс ӧксыясӧс, сылӧн вузасьысьясыс вӧліны веськӧдлысьясӧн, найӧс вылӧ пуктісны став му пасьталаыс.
Господь Саваоф тадзи шуис лоны, медым янӧдны ышнясьысьясӧс да ошйысьысьясӧс, медым улӧ пуктыны найӧс, кодъясӧс вылӧ пуктісны му вылын.
Фарсисын олысьяс, ӧні тіян мытшӧдыс абу, ойдӧм ю моз паськӧдчӧй асланыд муын.
Господь нюжӧдіс Ассьыс кисӧ саридз весьтӧ да пыркнитіс войтыръясӧс.
Господь тшӧктіс жугӧдны Ханаанлысь изкаръяссӧ. Сійӧ шуис: — Сидонын олысьяс, ті, яналӧм войтыр, водзӧ онӧ нин кутӧй нимкодясьны.
Чеччӧй да мунӧй Киттимӧ, но весиг сэні тіянлы шойччӧгыс оз ло!
Со, Калдея му, но сэтчӧс войтырыс абу нин, налысь мусӧ Ассур сетіс овтӧминса зверъяслы.
Ассур лэптіс Калдея муӧ аслыс башняяс, жугліс калдеяса изкаръяс, ставсӧ дзикӧдз пазӧдіс.
Ырзӧмӧн бӧрдӧй, фарсисса корабльяс!
Тіянлысь изкарнытӧ жугӧдӧма.
Сійӧ лунӧ Тир йылысь вунӧдасны сизимдас во кежлӧ — тайӧ ӧти ӧксылӧн олан кадыс.
Сизимдас во кольӧм бӧрти Тиркӧд лоӧ сійӧ жӧ, мый лои кырсалысь анькӧд, код йылысь сьылӧны:
— Босьт ассьыд гуслитӧ, ветлӧдлы карса туйясӧд, эновтӧм кырсалысь ань!
Ворс мичаа, сьыв уна сьыланкыв, гашкӧ, тэнӧ и казьтыштасны!
Сизимдас во кольӧм мысти Господь бара казьтыштас Тир йылысь.
Тир бара кутас озырмӧдчыны. Кырсалысь ань моз сійӧ босьтас став мувывса войтыръяслысь вузасьӧмысь сьӧмнысӧ.
Но Тирлысь сьӧмсӧ, мый сійӧ чукӧртіс асьсӧ вузалысь ань моз, лоӧ торйӧдӧма Господьлы.
Сійӧс оз чукӧртны, оз дзебны амбарӧ. Став сьӧмсӧ лоӧ сетӧма Господь водзын кесъялысьяслы, медым найӧ пӧттӧдзныс сёясны да бура пасьтасясны.
Со, Господь куштӧ мусӧ, бырӧдӧ сэні олысьясӧс, тшыкӧдӧ муыслысь чужӧмбансӧ, разӧдӧ му вылын олысьясӧс.
Ставнысӧ виччысьӧ ӧтитор: войтырӧс и попъясӧс, кесйӧгӧс и ыджыдӧс, кесйӧг аньӧс и сылысь ыджыдсӧ, вузасьысьӧс и ньӧбасьысьӧс, водзӧсӧн сетысьӧс и уджйӧзаӧс.
Муыс дзикӧдз кушмас, сэтысь ставсӧ лоӧ куштӧма, ӧд Господь тадзи шуӧма.
Муыс шогсьӧ, нюкыртчӧма, муюгыдыс шогӧ усьӧма, дзикӧдз нюкыртчӧма, шогӧ усьӧмаӧсь вына веськӧдлысьяс.
Му вылын олысьяс пежалісны мусӧ, ӧд найӧ ӧтдортісны Енлысь Индӧдсӧ, нинӧмӧ пуктісны Сылысь тшӧктӧмъяссӧ, пыр кежлӧ кӧрталӧм йитӧдсӧ торкисны.
Та вӧсна ёрӧмыс бырӧдӧ мусӧ, му вылын олысьяс вештысьӧны асланыс мыжысь.
Му вылын олысьяс бырӧны, йӧзыс коли зэв этша.
Виноград тусь нярмӧ, виноград пуяс косьмӧны, и гажӧдчысьяс сьӧкыда ышлолалӧны.
Дугдіс кывны тимпанлӧн гажа шыыс, ланьтіс гажӧдчысьяслӧн гораа нимкодясьӧмыс, дугдіс кывны гуслилӧн гажа шыыс.
Оз нин сьылігтырйи юны вина, курдіс юысьяслы сурыс.
Карсӧ пазӧдӧма, сійӧ дзикӧдз кушмис. Керка ӧдзӧсъяс йиганаӧсь, он вермы пырнысӧ.
Вина абутӧм вӧсна карса туйяс вылын кылӧ бӧрдӧм, гажӧдчӧмыс кусіс, нимкодьлуныс эновтіс муюгыдсӧ.
Карыс кушмӧма, дзиръяясыс жугалӧмаӧсь.
Став му пасьтала йӧзыс кольӧ сы мында, мыйта вотӧсыс кольӧ олив пу пыркӧдӧм бӧрын, виноград вотӧс чукӧртӧм бӧрын.
Ловйӧн кольӧмаяс гораа ошкӧны Господьӧс, рытыввылын гораа ыдждӧдлӧны Сійӧс.
Асыввылын олысьяс, ошкӧй Господьӧс! Саридз дорын олысьяс, ошкӧй Господьӧс, Израильлысь Енсӧ!
Му помсяньыс ми кылам сьыланкыв, веськыда вӧчысь Енлы ошкӧм.
А ме шуа: «Шог меным, шог меным, курыд шог меным!
Ылӧдчысьяс ылӧдлӧны, ылӧдчысьяс наяна ылӧдлӧны».
Му вылын олысь, тэ кутан повны, тэнӧ виччысьӧ гу да нальк.
Повзьӧм мортлӧн горзӧмысь коді пышъяс, сійӧ гуӧ усяс, коді петас гусьыс, сійӧ налькйӧ веськалас.
Ӧд енэжвыв ӧшиньяс воссясны, муыслӧн подулыс сыркмунлас.
Муыс потласьӧ, муыс жугласьӧ, муыс ёна сыркакылӧ.
Муыс катласьӧ код юра моз, лайкъялӧ тӧлӧн вӧрӧдӧм чом моз. Мусӧ личкӧ мувывса олысьяслӧн мыжыс, сійӧ усяс, и сэсся оз нин чеччы.
Сійӧ лунӧ Господь мыждас енэжвывса тышкакотыръясӧс енэжас, мувывса ӧксыясӧс — му вылас.
Найӧс ставнысӧ чукӧртасны ӧтилаӧ, шыбитасны-йӧртасны гуӧ, йигналасны дзескыдінӧ, а бӧрынджык — чорыда мыждасны.
Кор Господь Саваоф кутас ӧксыавны Сион керӧс вылын, Ерусалимын, да восьтас Ассьыс дзирдлунсӧ Аслас войтырлӧн юрнуӧдысьяслы, сэки тӧлысь яналас, шонділы лоӧ юръяндзим.
Господьӧй, Тэ — менам Енмӧй!
Ме ыдждӧдла Тэнӧ, ошка Тэнсьыд нимтӧ. Тэ вӧчин шензьӧданаторъяс, важысянь мӧвпыштӧмторъяс, Тэнад вӧчӧмторъясыд збыльӧсь да эсканаӧсь.
Карсӧ Тэ кисьтін, сійӧ лои из чукӧрӧн, изкарыс лои лӧп чукӧрӧн.
Нартитысьяслысь керкаяссӧ жуглӧма, найӧс некор нин бӧрсӧ оз лэптыны.
Та вӧсна вына войтыр нимӧдӧ Тэнӧ, скӧр войтырлӧн каръясын полӧны Тэысь. Тэ дорйин гӧльясӧс, видзин коньӧръясӧс налӧн сьӧкыд кадӧ. Тэ вӧлін сайӧдчанінӧн ыджыд тӧвнырысь, вуджӧрӧн — шонді пӧжӧмысь.
Ӧд дзескӧдысьяслӧн ловшыныс стенлы паныд пӧльтысь тӧвныр кодь.
Кыдзи Тэ дугӧдан шонді пӧжӧмсӧ овтӧминын, тадзи Тэ ланьтӧдан паныд сувтысьяслысь шызьӧмсӧ.
Кыдзи кымӧрлӧн вуджӧрыс тупкӧ пӧжысь шондіӧс, тадзи Тэ тупкан дзескӧдысьяслысь гажӧдчӧмсӧ.
Тайӧ керӧс вылас Господь Саваоф дасьтас став войтыръяслы пызан, кӧні лоӧ чӧскыд сёян да медбур вина, пӧтӧса яя вӧлӧга да чӧскыд вина.
Тайӧ керӧс вылас Сійӧ кульыштас став войтыръяс вылысь вевттьӧдсӧ, быд чужанкотыр вылысь тупкӧдсӧ.
Кулӧмсӧ лоӧ бырӧдӧма пыр кежлӧ! Господь Ыджыдыс чышкалас синвасӧ быд мортлӧн чужӧмбанысь, став му пасьтала Аслас войтыр вылысь вештас янӧдӧмсӧ.
Тадзи висьталӧ Господь.
Сійӧ лунӧ шуасны: «Сійӧ — миян Ен!
Ми лача кутім Сы вылӧ, и Сійӧ мездіс миянӧс.
Сійӧ — Господь, Сы вылӧ ми лача кутім!
Кутам нимкодясьны да гажӧдчыны, ӧд Сійӧ мездіс миянӧс».
Аслас киӧн Господь видзӧ тайӧ керӧссӧ. Но Моавӧс лоӧ талялӧма аслас оланінын, кыдзи идзас талялӧны куйӧдын.
Сэні сійӧ вартчысь моз кутас шенасьны кинас.
Но Енмыс улӧ лэдзас сылысь вылӧ кыпӧдчӧмсӧ да сылысь наяна вӧчӧмсӧ.
Тэнсьыд джуджыд да зумыд стенъястӧ Сійӧ жугӧдас, пӧрӧдас-пасьвартас муас.
Сійӧ лунӧ Иуда муын кутасны сьывны татшӧм сьыланкыв: — Миян эм зумыд кар, оз стенъяс да тымӧдъяс видзны сійӧс, а Енмыс видзӧ сійӧс.
Восьтӧй дзиръяястӧ, мед пырас сэті веськыда олысь войтыр, коді кутчысьӧ эсканлунас.
Кодлӧн лолыс зумыд, сійӧс Тэ видзан тырвыйӧ лӧньлунас, ӧд Тэ вылӧ сійӧ лача кутӧ.
Лачанытӧ пыр кутӧй Господь вылӧ, ӧд Господь Ен — нэмъяс чӧж сулалысь изкырта.
Сійӧ уськӧдіс вылын олысьясӧс, муас шыбитіс налысь вылын сулалысь карсӧ.
Ӧні сійӧс талялӧны кокнаныс, гӧльяс ветлӧны сы вывті, коньӧръяс тувччалӧны сэті.
Веськыда олысьлӧн туйыс шыльыд.
Тэ дасьтан сылы веськыд туй.
Тэнад веськыда мыждан туй вывті мунігӧн ми лача кутам Тэ вылӧ, Господьӧй, ёна кӧсъям шыасьны Тэнад нимӧ, казьтывны Тэ йылысь.
Войнас менам сьӧлӧмӧй гажтӧмтчӧ Тэысь, асывнас ме пытшкын лолӧй корсьысьӧ Тэнӧ. Кор му вылас ыджыдалӧ Тэнад веськыда мыждӧмыд, сэки му вылас олысьяс велӧдчӧны веськыдлунас.
Лёк вӧчысь дінӧ кӧ бурсьӧлӧмтчасны, сійӧ оз велӧдчы веськыда овны. Веськыда олысьяслӧн му вылын сійӧ водзӧ кутас лёксӧ вӧчны, оз аддзы, мый Господь ыджыдалӧ.
Господьӧй, Ассьыд китӧ Тэ лэптӧмыд вылӧ, но лёк вӧчысьяс оз аддзыны сійӧс.
А кор аддзасны, лоӧ юръяндзим налы, кодъяс мустӧмтӧны Тэнсьыд войтыртӧ.
Тэныд паныд сувтысьясӧс сотас би.
Господьӧй, Тэ сетан миянлы лӧньлун, ӧд Тэсянь ставыс, мый ми вӧчам да шедӧдам.
Господьӧй, миян Енмӧй, Тэ пыдди миян вылын ыджыдалісны мукӧд ыджыдъяс.
Но ӧні ми шыасям сӧмын Тэ дінӧ.
Найӧ кулӧмаӧсь, оз ловзьыны, гортйын куйлӧны, оз нин чеччыны, ӧд Тэ мыждін да бырӧдін найӧс, бырӧдін весиг на йылысь казьтывлӧмсӧ.
Господьӧй, Тэ содтін Аслад войтырлысь лыдсӧ, налысь лыдсӧ содтӧмӧн Тэ нимӧдін Асьтӧ, Тэ паськӧдін Аслад войтырлысь олан мусӧ.
Господьӧй, сьӧкыдсӧ нуигӧн Тэнад войтырыд корсьысисны Тэнӧ.
Кор Тэ мыждылін найӧс, найӧ ышлолалӧмӧн кевмысьлісны Тэныд.
Кыдзи нӧбасьысь ань сьӧкыдалӧ кага чужтігас да горзӧ дойяссьыс, татшӧмӧсь ми вӧлім Тэ водзын, Господьӧй.
Нӧбасьысь ань моз ми сьӧкыдалім, но чужтім сӧмын тӧвру.
Ми эгӧ вайӧй мездмӧмсӧ муыслы, эгӧ пасьвартӧй муюгыдас олысьясӧс.
Господьӧй, Тэнад кулӧмаясыд ловзясны, шойяс чеччасны дзебанінысь.
Садьмӧй да нимкодясьӧй, му пытшкын куйлысьяс! Тэнад югыд лысваыд юкталӧ мусӧ, и муыс бӧр сетас кулӧмаясӧс.
Менам войтырӧй, мунӧй асланыд гортӧ да йигнасьӧй! Дзебсьӧй дженьыдик кад кежлӧ, кытчӧдз оз лӧнь Господьлӧн скӧрлуныс.
Со, Господь петӧ Аслас оланінысь, медым мыждыны мувывса олысьясӧс налӧн мыжъясысь. Сэки муыс восьтас йӧзлысь кисьтӧм вирсӧ, оз нин кут дзеблавны виӧмаясӧс.
Сійӧ лунӧ Господь мыждас да Аслас повзьӧдана, ыджыд да ён шыпуртӧн пасьвартас левиафанӧс, ӧдйӧ пышйысь да нюглясьысь змейӧс, виас саридзса гундырӧс.
Сійӧ лунӧ сьылӧй бур виноград йӧр йылысь!
Ме, Господь, видза сійӧс, пыр киськала сійӧс.
Ме лун и вой видза сійӧс, медым некод эз вӧч сылы лёксӧ.
Ме ог скӧрав сы вылӧ.
Но сійӧ кӧ быдтас Меным йӧн да ёг турун, Ме тышӧ пета сылы паныд да кушӧдз сота сійӧс.
Но дорйӧмсӧ сійӧ мед Месянь корсьӧ, мед бурасьӧ Мекӧд да дугдӧ тышкасьны.
Локтана кадӧ Яков вужъясяс, Израиль сетас вож да кутас дзоридзавны.
Муюгыдыс тырас вотӧсӧн.
Господь ӧмӧй дойдаліс Израиль войтырӧс найӧс дойдалысьясӧс моз?
Сійӧ ӧмӧй виаліс Израиль войтырӧс найӧс виалысьясӧс моз?
Кор Тэ ӧтдортлін Израиль войтырӧс, Тэ чирыштлін найӧс этш тӧдӧмӧн.
Асыв тӧв моз Тэ вӧтлін найӧс Аслад вына пӧльыштӧмнад.
Яковлысь мыжсӧ лоӧ вештӧма.
Изйысь вӧчӧм висьпуктанінъяссӧ сійӧ жуглас торпыригӧдз, Израиль муын оз нин кутны сулавны юрбитан пуяс да тшынӧдчан висьпуктанінъяс. Тадзи тыдовтчас Яковлӧн олӧмын, мый сылысь мыжъяссӧ вештӧма.
Кушмас-тыртӧммас зумыд кар, оланінъяссӧ йӧзыс колясны-эновтасны, кар пыдди лоӧ овтӧмин.
Сэні пондасны куйлыны да йирсьыны куканьяс, найӧ кушӧдз йирасны пуяслысь коръяссӧ.
Пуяс косьмасны, локтасны аньяс, чегъяласны увъяссӧ да сотасны найӧс.
Тайӧ войтырыс мывкыдтӧм, та вӧсна найӧс Вӧчысь оз бурсьӧлӧмтчы на дінӧ, Сійӧ оз бурав на дінӧ.
Но сійӧ лунӧ ыджыд юсянь Египет мудорса шорӧдз Господь пыркӧдас шепъяссӧ. Сэки тіянӧс, Израиль войтырӧс, лоӧ чукӧртӧма.
Сійӧ лунӧ ыджыд буксан букӧстас, сэки бӧр локтасны Ассур муӧ вошлӧмаяс да Египет муӧ вӧтлӧмаяс. Ерусалимын, вежа керӧс вылын, найӧ ставныс копыртчасны Господь водзӧ.
Курыд шог юркытшлы, мыйӧн ошйысьӧны код юра ефремсаяс. Курыд шог нярмӧм дзоридзлы — ефремсаяслӧн мичмӧданторлы да ошйысянторлы. Курыд шог карлы, коді сулалӧ керӧс вылын, бур муа ковтыс весьтын. Сэтчӧс олысьяссӧ вермӧма винаыс.
Со, Господьлӧн эм вынйӧра да ён морт, коді шерӧн мунысь сувтса зэр моз, путкылялысь тӧвныр моз, паськыда ойдысь ытва моз ыджыд вынӧн шыбитас найӧс муас.
Лоӧ талялӧма юркытшсӧ, мыйӧн ошйысьӧны код юра ефремсаяс.
Нярмӧм дзоридзкӧд, ефремсаяслӧн мичмӧданторкӧд да ошйысянторкӧд, коді быдмӧ керӧс вылын, бур муа ковтыс весьтын, лоӧ кадысь водз воӧм инжиркӧд моз — коді аддзас сійӧс, босьтас киас да дзик пыр ньылыштас.
Сійӧ лунӧ Господь Саваоф лоӧ мича юркытшӧн, ошйысяна мичмӧданторйӧн Аслас коляс войтырлы. Сійӧ велӧдас ёрдысьясӧс веськыда мыждыны, сетас повтӧмлун налы, кодъяс вӧтлӧны вӧрӧгӧс карса дзиръя дорысь.
Поп да пророк тшӧтш шатлалӧны вина юӧмысь, довъялӧны туй вывті сур юӧмысь, найӧ коддзӧмаӧсь да крукасьлӧны.
Винаыс вермӧма найӧс, сурыс пемдӧдӧма вежӧрнысӧ. Пророкъяслӧн аддзылӧмъясыс вайӧдӧны йӧзсӧ ылӧгӧ, попъяс крукасьӧны асланыс кывъясӧ.
Став налӧн пызаныс тырӧма восӧн, абу сӧстӧминыс.
Найӧ шуӧны ме йылысь: «Кодӧс сійӧ вермас вежӧрсьӧдны?
Кодӧс сійӧ вермас туйдӧдны юӧртӧмнас?
Сӧмын найӧс, кодъяс неважӧн на нёнясисны, кодъясӧс сӧмын на торйӧдӧма мам морӧс бердысь, а мукӧдсӧ — оз вермы.
Мый миянлы таысь: тшӧктӧм бӧрся тшӧктӧм, тшӧктӧм бӧрся тшӧктӧм, велӧдӧм бӧрся велӧдӧм, велӧдӧм бӧрся велӧдӧм, татысь мыйкӧ, сэтысь мыйкӧ».
Та вӧсна Господь кутас сёрнитны тайӧ войтырыскӧд гӧгӧрвотӧм кывъясӧн, мукӧд войтырлӧн кывйӧн.
Водзын Сійӧ шуліс налы: «Тані ті аддзанныд шойччанін, сетӧй мудзӧмалы шойччыны. Тані ті аддзанныд лӧньӧм».
Но найӧ эз кӧсйыны кывзыны.
Господьлӧн кывйыс лоӧ налы татшӧм: тшӧктӧм бӧрся тшӧктӧм, тшӧктӧм бӧрся тшӧктӧм, велӧдӧм бӧрся велӧдӧм, велӧдӧм бӧрся велӧдӧм, татысь мыйкӧ, сэтысь мыйкӧ. Найӧ мунасны, усясны да доймасны. Найӧ веськаласны налькйӧ, и найӧс кутасны.
Сідзкӧ, ті, больгысьяс, Ерусалимын веськӧдлысьяс, кывзӧй Господьлысь кывсӧ.
Ті шуанныд: «Ми кӧрталім йитӧд кулӧмыскӧд, ми сёрнитчим пыдӧстӧминыскӧд.
Кор вӧрӧг ыльӧбтас бырӧдны, сійӧ оз суӧд миянӧс, ӧд ылӧгыс лои миянлы сайӧдчанінӧн, пӧръясьӧмыс — вевттьӧдӧн».
Та вӧсна Господь Ыджыдыс тадзи висьталӧ: — Сионӧ Ме пукта подув из. Сійӧ — пельӧс из, кодӧс Ме бӧрйи. Сійӧ — дона из, сулалӧ зумыда. Сылы эскысь оз янав.
Веськыда мыждӧмсӧ Ме вӧча мурталан кӧвйӧн, веськыда вӧчӧмсӧ — вескиӧн.
Ылӧгыслысь сайӧдчанінсӧ лоӧ бырӧдӧма шерӧн, тіянлысь вевттьӧднытӧ кылӧдас ва.
Кулӧмыскӧд тіян йитӧдныд орас, пыдӧстӧминыскӧд тіян сёрнитчӧмныд торксяс.
Кор вӧрӧг ыльӧбтас бырӧдны, сэки тіянӧс лоӧ талялӧма.
Сійӧ кутас локны выльысь и выльысь, асывнас, луннас и рытнас, быд лун сійӧ кутас кылӧдны тіянӧс. Тайӧ висьталӧмсӧ гӧгӧрвоигӧн полӧмныдла ті кутанныд дзӧрны.
Ӧд вывті дженьыд вольпасьыд, медым нюжӧдчыны, вывті векньыд шебрасыд, медым гартыштчыны сэтчӧ.
Господь чеччас Перацим керӧс вылын моз, Сійӧ петкӧдлас Ассьыс скӧрлунсӧ Гаваон ковтысын моз, медым вӧчны Ассьыс уджсӧ, аддзывлытӧмторсӧ, да помӧдз вайӧдны Ассьыс вӧчӧмсӧ, вӧвлытӧмторсӧ.
Сідзкӧ, дугдӧй лёкӧдны тайӧ юӧрсӧ, медым тіян кӧртӧдъясныд эз зэлавны ёнджыка на.
Ӧд ме кывлі Ыджыдсянь, Господь Саваофсянь, мый тайӧ мусьыс ставсӧ лоӧ бырӧдӧма.
Копыртӧй пельнытӧ, кывзӧй менӧ, сюся кывзӧй, мый висьтала тіянлы.
Кор воӧ гӧра-кӧдза кад, му вӧдитысь ӧмӧй сӧмын гӧрӧ-агсалӧ мусӧ?
Оз!
Сійӧ шыльӧдӧ мусӧ, сэсся коялӧ тмин, сьӧд тмин, визьӧн-визьӧн кӧдзӧ шобді, торйӧн — ид, орччӧн — полба.
Енмыс велӧдӧ сійӧс тадзи вӧчнысӧ, сылӧн Енмыс туйдӧдӧ сійӧс.
Ӧд сьӧд тмин оз вартны доддьӧн, тмин вывті оз быгльӧдлыны вартан гӧгыль, но беддьӧн вартӧны тминсӧ, чаптӧн — сьӧд тминсӧ.
Шепсӧ вартӧны, но вартігас тусьяссӧ оз поткӧдлыны.
Шепъяс вывтіыс вӧвъяс ветлӧдлӧны вартан гӧгыльясӧн, но ветлӧдлігас тусьяссӧ оз нырны.
Ставыс тайӧ — Господь Саваофсянь.
Сылӧн велӧдӧмыс шензьӧдана, Сылӧн мывкыдлуныс пыдӧстӧм!
Курыд шог Ариэллы, Ариэл карлы, кӧні оліс Давид!
Олӧй нӧшта во, вогӧгӧрся гажӧдчан лунъясныд бӧрти
Ме дзескӧда Ариэл * карӧс, сэні лоӧ бӧрдӧм да шогсьӧм, сійӧ збыльысь лоӧ Менам висьпуктанінӧн.
Быд боксянь Ме кытшала тэнӧ, сувтӧда башняяс тэ гӧгӧр да уськӧдча тэ вылӧ.
Тэ усян муас, сэсянь тэ кутан сёрнитны, му пытшкӧссяньыс ӧдва кутас кывны тэнад гӧлӧс шыыд. Тэнад гӧлӧс шыыд лоӧ кулӧм мортлӧн кодь, му пытшкӧссяньыс пондас кывны тэнад шӧпкӧдӧмыд.
Тэнад уна лыда вӧрӧгыд лоӧ бусӧн, тэнӧ дзескӧдысьяс — разалӧм кыд кодьӧн.
Зэв ӧдйӧ, виччысьтӧг.
Господь Саваоф локтас тэ дінӧ гым да му вӧрӧм моз, ыджыд шыа бушков да гартчан тӧвныр моз, ставсӧ сотысь би моз.
Войся вӧтын моз уна лыда войтыр петасны тышӧ Ариэллы паныд, уськӧдчасны сы вылӧ, топӧдасны сійӧс да босьтасны сылысь изкарсӧ.
Кыдзи тшыг морт вӧтасьӧ, мый сійӧ сёйӧ, но садьмӧм бӧрас сійӧ пыр на тшыг, кыдзи юны кӧсйысь вӧтасьӧ, мый сійӧ юӧ, но садьмӧм бӧрас сійӧ вынтӧм — сылӧн горшыс пыр на косьмӧ, тадзи жӧ лоӧ уна лыда войтыркӧд, кодъяс тышкасьӧны Сион керӧслы паныд.
Чуймалӧй-шензьӧй, синтӧммӧй, энӧ аддзӧй!
Ті кодаланныд, но онӧ вина понда, довъяланныд, но онӧ сур понда.
Ӧд Господь мӧдӧдіс тіян пытшкӧ унзіль, тупкис тіянлысь синнытӧ — пророкъяснытӧ, вевттис тіянлысь юрнытӧ — тӧдысь-аддзысьяснытӧ.
Енсянь петкӧдчылӧмъяс лоины тіянлы печатя небӧгын гижӧд кодь. Небӧгсӧ кӧ сетасны лыддьысьны кужысьлы да шуасны: «На, лыддьы», сійӧ вочавидзас: «Ме ог вермы, ӧд сійӧс тупкӧма печатьӧн».
Небӧгсӧ кӧ сетасны сылы, коді оз куж лыддьысьнысӧ, да шуасны: «На, лыддьы», сійӧ вочавидзас: «Ме ог куж лыддьысьнысӧ».
Господь шуис: — Тайӧ войтырыс матыстчӧ Ме дінӧ кывнас, вомнас найӧ пыдди пуктӧны Менӧ, но налӧн сьӧлӧмныс ылын Меысь. Меысь налӧн вежавидзӧмыс — тайӧ сӧмын тшӧктӧм серти вӧчӧм — тшӧктӧм, мыйӧ велӧдісны найӧс йӧзыс.
Та вӧсна тайӧ войтырыслы Ме бара кута петкӧдлыны Ассьым чуймӧдана да шензьӧдана уджъясӧс. Сэки на пӧвстысь мывкыда йӧзлӧн мывкыдлуныс бырас, сюсь вежӧра йӧзлӧн вежӧрлуныс вошас.
Курыд шог налы, кодъяс ассьыныс мӧвпъяссӧ кӧсйӧны пыдӧ дзебны Господьысь. Пемыдас найӧ вӧчӧны ассьыныс уджъяссӧ, шуалӧны: «Коді аддзас миянӧс?
Коді тӧдмалас миянӧс?»
Мый ті йӧйталанныд?
Гырнич вӧчысьӧс ӧмӧй позяс ӧткодявны сёйкӧд?
Вӧчӧмторйыс ӧмӧй шуас вӧчысьыс йылысь, эз пӧ сійӧ вӧч менӧ?
Гырничыс ӧмӧй шуас гырнич вӧчысьыс йылысь, сійӧ пӧ нинӧм оз гӧгӧрво?
Этшаник, нӧшта этшаник, и Ливан лоӧ сад йӧрӧн, а сад йӧрыс лоӧ вӧр кодь ыджыдӧн.
Сійӧ лунӧ пельтӧм кылас небӧгысь кывъяссӧ, синтӧмлӧн сап пемыднас тупкӧм синмыс кутас аддзыны.
Коньӧръяс кутасны ёнджыка на нимкодясьны Господьӧн, гӧльяс кутасны кыпыда ошкыны Израильлысь вежа Енмӧс сыысь, мый водзӧ оз нин лоны дзескӧдысьяс, омӧльтысьяс бырасны, лёк вӧчысьясӧс лоӧ бырӧдӧма, ӧд найӧ шуӧны мыжтӧмӧс мыжаӧн, карса мыжданінын пӧрйӧдлӧны ёрдысьӧс, ӧтдортӧны збыльсӧ висьталысьӧс.
Та вӧсна Яковсянь чужысьяс йылысь Господь, Ӧвраамӧс Мездысь, тадзи висьталӧ: — Яковлы оз нин ло яндзим, сылӧн чужӧмыс оз нин гӧрдӧд.
Сійӧ аддзас ас дінсьыс став челядьсӧ — Менам киӧн вӧчӧмторъясӧс. Найӧ вежавидзӧмӧн пондасны пыдди пуктыны Менсьым нимӧс, пыдди пуктыны Яковлысь вежа Енсӧ, пондасны вежавидзны Израильлӧн Енмысь.
Сэки ловнас ылалӧмаяс вежӧрсяласны, ропкысьяс велӧдчасны кывзысьны.
Курыд шог кывзысьтӧмъяслы, — висьталӧ Господь. — Найӧ сёрнитчӧны, но Метӧг, кӧрталӧны йитӧд, но оз Менам кӧсйӧм серти. Тадзи найӧ мыж дінӧ мыж содтӧны.
Менсьым юасьтӧг найӧ мунӧны Египетӧ, медым фараон дорйис найӧс, медым Египетысь аддзыны сайӧдчанін.
Но фараонлысь дорйӧм корӧмысь лоӧ тіянлы яндзим, Египетысь дзебсянін корсьӧмысь лоӧ юръяндзим.
Иудаысь юралысьяс воисны нин Цоанӧ, ӧксылӧн мӧдӧдӧмаяс Ханесынӧсь нин.
Но найӧ ставныс яналасны, ӧд египетсаяс нинӧмӧн оз вермыны налы отсавны, оз вермыны отсӧг сетны. Найӧс виччысьӧ янӧдӧм да юръяндзим.
Негев овтӧминса пемӧсъяс йылысь водзвыв висьталӧм.
Шогнас да сьӧкыднас тырӧм му вывті, кӧні олӧны левъяс, гадюкаяс да лэбалысь змейяс, иудаса юралысьяс нуӧны осёлъяс вылын ассьыныс озырлунсӧ, верблюдъяс вылын — ассьыныс эмбурсӧ сійӧ войтырлы, коді оз вермы налы отсавны.
Египетсянь отсӧгыс весьшӧрӧ, сійӧ нинӧм дон оз сулав.
Та вӧсна Ме нимті Египетӧс лӧня пукалысь Рахавӧн. *
Ӧні мун да гиж тайӧс пӧв вылӧ, гиж тайӧс налы небӧгӧ, медым тайӧ гижӧдыс коляс локтана кад кежлӧ, лоӧ пыр да олас нэмъяс чӧж.
Ӧд тайӧ войтырыс кывзысьтӧм, найӧ пӧръясьысьяс, оз кӧсйыны кывзыны Господьлысь Индӧдсӧ. Тӧдысь-аддзысьяслы найӧ шуалӧны: «Дугдӧй аддзыны, мый водзӧ лоас». Пророкъяслы найӧ шуалӧны: «Энӧ висьтавлӧй миянлы збыльсӧ. Висьтавлӧй миянлы лӧсяланасӧ, висьтавлӧй сійӧ, мый миянлы сьӧлӧм серти.
Вешйӧй туй вылысь, кежӧй ветлан туй вылысь, водзӧ энӧ казьтывлӧй миянлы Израильлӧн вежа Ен йылысь».
Та вӧсна Израильлӧн вежа Ен тадзи висьталӧ: — Ті нинӧмӧ пуктанныд тайӧ кывъяссӧ, но лача кутанныд ылӧг вылӧ да мыджсянныд пӧръясьӧм вылӧ.
Та вӧсна тіян мыжныд лоӧ джуджыд стенмын ыджыд потас кодь — виччысьтӧг, ӧти здукӧн стенмыс усяс.
Сійӧс лоӧ жугӧдӧма, кыдзи гырнич вӧчысь жалиттӧг жугӧдӧ сёй гырничсӧ, мый весиг торпыриг оз сюр жуглассьыс, медым пачысь босьтны биа ӧгыр, гӧптысь гумовтны ва.
Господь Ыджыдыс, Израильлӧн вежа Ен, тадзи висьталӧ: — Ті кӧ бӧр бергӧдчинныд да олінныд лӧня, ті эськӧ мездминныд.
Ӧд тіян вынныд лӧньлунын да Ме вылӧ лача кутӧмын.
Но ті энӧ кӧсйӧй тадзи вӧчны. Ті шуинныд: «Ми котӧртам вӧвъяс вылын», та вӧсна тіянлы и ковмас пышйыны.
Ті шуинныд: «Ми рӧдтам тэрыб вӧвъяс вылын», та вӧсна тіянӧс вӧтӧдысьясныд лоӧны тэрыбӧсь.
Ӧти мортлӧн повзьӧдӧмысь тіян сюрс морт пышъяс, вит мортлӧн повзьӧдӧмысь ті ставныд пышъянныд. А тіян пӧвстысь колясыс лоӧ керӧс йылын сулалысь майӧг кодьӧн, мыльк йылын дӧлалысь дӧрапас кодьӧн.
Но Господь виччысьӧ, медым буравны тіян дінӧ, Сійӧ кыпӧдчӧ, медым бурсьӧлӧмтчыны тіян дінӧ.
Ӧд Господь — веськыда мыждысь Ен.
Шудаӧсь Сы вылӧ лача кутысьяс!
Ерусалимын олысь сионса войтыр, тэ он нин понды бӧрдны. Кор тэ шыасян Сы дінӧ, Сійӧ кутас буравны тэ дінӧ, Сійӧ кылас да вочавидзас тэныд.
Господь пӧткӧдіс тіянӧс шогӧн, юкталіс тіянӧс сьӧкыдалӧмӧн, но тіян Велӧдысьныд оз нин кут дзебсясьны, тіян синныд аддзас Сійӧс.
Ті кӧ кежанныд веськыдвылӧ либӧ шуйгавылӧ, бӧрвывсяньныд ті кыланныд татшӧм кывъяс: «Со туйыс, мунӧй сэті!»
Сэки ті понданныд пежӧн лыддьыны эзысьӧн эжӧм бӧлбанъяснытӧ да зарниӧн эжӧм идолъяснытӧ.
Ті шыбитанныд найӧс пеж шыбласӧс моз да шуанныд налы: «Весасьӧй татысь!»
Господь сетас тэныд кӧдзӧм му вылӧ зэр, муыс сетас нянь, ассьыс быдтассӧ, сійӧ лоӧ озыр да пӧтӧса.
Сійӧ лунӧ тэнад ыж-мӧскыд пондасны йирсьыны паськыд видз вылын.
Видз-му вылын уджалысь ӧшъяс да осёлъяс кутасны сёйны сола сёян — налы шыбитасны сёянсӧ зырйӧн да вилаӧн.
Сійӧ лунӧ, кор вӧрӧгӧс лоӧ пасьвартӧма, кор усясны башняяс, быд джуджыд керӧс вывсянь визувтасны шоръяс.
Сэки тӧлысьлӧн югыдыс лоӧ шонділӧн кодь, а шонділӧн югыдыс лоӧ сизимпӧв югыдджык на, быттьӧ сизим лунлӧн югыдыс. Тадзи лоӧ сійӧ лунӧ, кор Господь кӧрталас Аслас войтырлысь дойяссӧ да бурдӧдас найӧс.
Со, ылісянь локтӧ Господь, ыпъялӧ Сылӧн скӧрлуныс, Сылӧн ыпъялан биыс вына, Сылӧн вомыс тырӧма лӧглунӧн, Сылӧн кывйыс ставсӧ сотысь би кодь. Сылӧн ловшыыс ойдӧм ва кодь, мый кыпӧдчӧ голя помӧдз. Господь кутас пожнавны войтыръясӧс, медым бырӧдны найӧс, Сійӧ кӧртвомалас найӧс, медым бокӧ кежӧдны найӧс туй вылысь.
А ті понданныд сьывны, кыдзи сьыланныд рытнас, вежа гажӧдчан лун пасйигӧн. Тіян сьӧлӧмныд пондас нимкодясьны, кыдзи нимкодясьӧны пӧлян шы улӧ Господьлӧн керӧс вылӧ мунысьяс, Израильлӧн зумыд Из дінӧ ветлысьяс.
Господьлӧн вына шыыс грымӧбтас, Сійӧ петкӧдлас Ассьыс вына кисӧ, Сылӧн скӧрлуныс лоӧ вывті яр, ставсӧ сотысь би кодь, бушков да сувтса зэр кодь, гырысь шер кодь.
Господьлӧн гӧлӧс шыысь пондас тіравны Ассур, Господь кутас нӧйтны сійӧс беддьӧн.
Выльысь и выльысь Господь кутас нӧйтны сійӧс тимпан да гусли ворсан шы улӧ. Аслас кинас повзьӧдӧмӧн Господь петас сылы паныд тышӧ.
Ассурлы важӧн нин дасьтӧма сотанін, сотӧмыс виччысьӧ тшӧтш ӧксыӧс. Джуджыд да паськыд гуын дасьтӧма уна пес, ыджыд бипур. Ыпнитысь тэгйӧс моз Господьлӧн ловшыыс ӧзтас бипурсӧ.
Курыд шог налы, кодъяс мунӧны Египетӧ отсӧгла! Найӧ лача кутӧны вӧвъяс вылӧ, тарантасъяслӧн уна лыдыс вылӧ да верзьӧмаяслӧн выныс вылӧ, а Израильлӧн вежа Ен вылӧ оз видзӧдны, Господь дінӧ отсӧгла оз шыасьны.
Но Господьлӧн мывкыдлуныс ыджыд.
Сійӧ мӧдӧдас сьӧкыдлун, Ассьыс кывсӧ оз веж.
Сійӧ сувтас лёк вӧчысьяслы паныд да налы паныд, кодъяс отсалӧны мыж вӧчысьяслы.
Египетсаяс — йӧз, абу Ен, налӧн вӧвъясыс — вир-яй, абу лов.
Господь лэптас Ассьыс кисӧ, и отсӧг сетысьяс крукасясны, а кодлы отсалісны, найӧ тшӧтш усясны — ставныс ӧтвылысь куласны.
Господь меным тадзи висьталіс: — Кыдзи лев, том лев, равзӧ аслас кыйдӧс весьтын да оз пов ыж видзысьясысь, налӧн уна лыдысь да горзӧмысь, тадзи Господь Саваоф лэччас Сион керӧс вылӧ, медым вермасьны тайӧ керӧсыс вӧсна.
Аслас поз весьтын шевкъялысь лэбач моз Господь Саваоф вевттяс Ерусалим, доръяс и видзас сійӧс, бурсьӧлӧмтчас и мездас сійӧс.
Израиль войтыр, бергӧдчӧй Сы дінӧ, код дінысь ті ёна ылыстчинныд!
Сійӧ лунӧ ті ставныд шыбитанныд ассьыныд эзысь да зарни идолъяснытӧ, мыжа киӧн вӧчӧмторъяснытӧ.
Ассур войтыр шыпуртысь кулас, но оз мортлӧн шыпуртысь. Шыпурт бырӧдас найӧс, но оз мортлӧн шыпуртыс. Найӧ пышъясны шыпуртысь, но налысь зонъяссӧ уджӧдасны вот мынтӧм могысь.
Ёна повзьӧмнысла вошас налӧн зумыд лачаныс, налӧн юралысьясыс повзясны дӧрапасысь да пышъясны, — висьталӧ Господь, кодлӧн биыс ӧзйӧ Сионын, донӧдӧм пачыс — Ерусалимын.
Со, ӧксы кутас юравны веськыдлуныс серти, юралысьяс кутасны веськӧдлыны Индӧдыс серти.
Быдӧн на пиысь лоӧ тӧвнырысь вевттьӧдӧн, бушколысь сайӧдӧн, кос муын ва петанінӧн, пӧжан муын джуджыд керӧслӧн вуджӧрӧн.
Видзӧдысьлӧн синмыс оз нин куньсьы, кывзысьлӧн пельыс кутас сюся кывзыны.
Тэрмасьысь велӧдчас мӧвпавны коланасӧ, пыськыль кывъя морт пондас ясыда сёрнитны.
Мывкыдтӧм мортӧс оз нин кутны шуны пыдди пуктанаӧн, наян мортӧс оз нин шуны веськыдӧн.
Ӧд мывкыдтӧм мортлӧн сёрниыс мывкыдтӧм, сійӧ мӧвпалӧ лёк вӧчӧм йылысь, сылӧн оласногыс шогмытӧм, сійӧ омӧльтӧ Господьӧс, няньтӧг кольӧ тшыг мортӧс, горш косьмысьлы оз сет ва.
Наян морт вӧчӧ наяна, сійӧ мӧвпалӧ лёк вӧчӧм йылысь, ылӧгнас сійӧ бырӧдӧ коньӧр мортӧс, коді збыльсӧ висьталӧ.
А пыдди пуктана морт мӧвпалӧ бур вӧчӧм йылысь, сійӧ зумыда кутчысьӧ бур вӧчӧмас.
Тӧждысьтӧм аньяс, чеччӧй, кывзӧй менӧ!
Шог тӧдтӧм нывъяс, сюся кывзӧй менсьым кывъясӧс!
Коляс во да некымын лун, и ті дзӧрмӧн повзянныд, шог тӧдтӧмъяс!
Ӧд оз нин во виноград чукӧртан кадыс, вотӧс чукӧртан кадыс оз нин ло.
Полӧй-тіралӧй, тӧждысьтӧмъяс, дзӧрмӧн тіралӧй, шог тӧдтӧмъяс!
Пӧрччӧй паськӧмнытӧ, пасьталӧй шогалан паськӧм!
Шогсьӧй да кучкалӧй асьнытӧ морӧсаныд бур видз-му вӧсна, вотӧса виноград пуяс вӧсна, Менам войтырлӧн му вӧсна, ӧд сэні кутас быдмыны йӧн да ёг турун. Шогсьӧй гажӧдчысь керкаяс вӧсна, став гажӧдчысь карыс вӧсна, ӧд ӧксылысь керкасӧ лоӧ эновтӧма, ыджыд шыа карсӧ лоӧ кольӧма.
Керӧс вылын сулалысь изкар пыр кежлӧ лоӧ вӧлявывса осёлъяслы сайӧдчанінӧн, тайӧ керӧс вылын кутасны йирсьыны ыж-мӧс. Тадзи лоӧ, кытчӧдз вылісянь оз лэччы миян вылӧ Енлӧн лолыс. Сэки овтӧмин лоӧ сад йӧрӧн, а сад йӧрыс лоӧ вӧр кодь ыджыдӧн.
Сэки овтӧминын пондас ыджыдавны веськыда мыждӧм, сад йӧрын лоӧ веськыдлун.
Веськыдлуныс ваяс лӧнь олӧм, лӧньлун да повтӧмлун нэмъяс кежлӧ.
Сэки менам войтырӧй кутас овны лӧнинын, оланінын, кӧні нинӧмысь повнысӧ, шойччанінын, кӧні нинӧм вӧсна майшасьнысӧ.
Вӧрсӧ пӧрӧдас шер, карсӧ лоӧ дзикӧдз кисьтӧма, но ті шудаӧсь, ті понданныд кӧдзны быдлаын, кӧні эм ва, тіян ӧшъясныд да осёлъясныд пондасны йирсьыны сэні.
Курыд шог тэныд, бырӧдысь, кодӧс эз на бырӧдны. Курыд шог тэныд, ылӧдчысь, кодӧс эз на ылӧдлыны.
Кор тэ дугдан бырӧднытӧ, тэнӧ асьтӧ бырӧдасны.
Кор тэ дугдан ылӧдчынытӧ, тэнӧ асьтӧ ылӧдласны.
Господьӧй, ло бур сьӧлӧма миян дінӧ!
Тэ вылӧ ми лача кутам.
Водз асывсянь ло миянлы Дорйысьӧн, сьӧкыд кадӧ ло миянлы Мездысьӧн!
Тэнад гора гӧлӧс шыысь пышъясны войтыръяс.
Кор Тэ кыпӧдчан, разаласны чужанкотыръяс. Сійӧ, мый найӧ мырддялісны тыш дырйи, налысь йирасны лёльӧ моз, сы вылӧ уськӧдчасны саранча моз.
Господь медвылын, Сійӧ олӧ выліинын.
Сион вылын Сійӧ зумыдмӧдас веськыда мыждӧм да веськыдлун.
Сійӧ лоӧ тэныд Дорйысьӧн, Сысянь лоӧ тэныд тырвыйӧ мездмӧм, мывкыдлун да тӧдӧмлун.
Тэнад озырлуныд — Господьысь полӧм.
Со, вынаяс горзӧны ывлаын, лӧньлунсӧ юӧртысьяс курыда бӧрдӧны.
Туйяс кушмисны, ветлысь-мунысьыс абу.
Сёрнитчӧм торкӧма, каръяс кисьтӧма, йӧзсӧ увтыртӧма.
Муыс шогсьӧ, косьмӧма, ливанса вӧр нюкыртчӧма, сьӧдасьӧма, Шарон ласта лои кушинӧн. Васан ыб вылын да Кармил керӧсъясын кушмӧмаӧсь пуяс.
Ӧні Ме чечча, — висьталӧ Господь, — ӧні Ме сувта да кыпӧдча.
Ті нӧбасянныд кос турунӧн, чужтанныд идзас.
Тіян ловшыныд би моз сотас асьнытӧ.
Войтыръяс, тіянӧс лоӧ сотӧма, ті лоанныд кориз кодьӧсь, керыштӧм лежнӧгӧс моз тіянӧс лоӧ сотӧма биын.
Ыліын олысьяс, кывзӧй Менам уджъяс йылысь!
Матіын олысьяс, тӧдмалӧй Менсьым вынӧс!
Сионын олысь мыжаяс полӧны, Ентӧг олысьяс тіралӧны. Найӧ шуалӧны: «Коді миян пӧвстысь вермас орччӧн овны ставсӧ сотысь бикӧд?
Коді миян пӧвстысь вермас овны куслытӧм би пытшкын?»
Сійӧ, коді олӧ веськыда да висьталӧ збыльсӧ, коді оз кӧсйы озырмӧдчыны мукӧдсӧ дзескӧдӧмӧн, коді оз босьт козин, а мыждӧ веськыда, коді оз кӧсйы ӧтувтчыны вир кисьтысьяскӧд, коді мустӧмтӧ лёк вӧчысьяслысь уджъяссӧ.
Татшӧм мортыс пондас овны выліинын, сылӧн сайӧдчанінӧн лоӧ керӧсвывса изкар.
Сылӧн няньыс пыр лоӧ, и ваыс сылӧн оз бырлы.
Аслад синмӧн тэ аддзан Ӧксыӧс став сылӧн мичлуннас, тэ аддзан ылӧдз нюжӧдчӧм му.
Тэ казьтыштан бӧрӧ кольӧм полӧмсӧ да шуан: «Кӧні ӧні сійӧ, коді гижавліс вот мынтӧмнымӧс?
Кӧні сійӧ, коді веситліс вот мынтан сьӧмнымӧс?
Кӧні сійӧ, коді видзӧдаліс-лыддис башняяснымӧс?»
Водзӧ тэ он нин аддзы чорыд сьӧлӧма войтырӧс, кодлӧн сёрниыс нума-намакылӧм кодь, кодлӧн кывйыс тешкодь да гӧгӧрвотӧм.
Видзӧдлы Сион кар вылӧ, миян гажӧдчанін вылӧ!
Аслад синмӧн тэ аддзан Ерусалим, сійӧ — лӧнь оланін, вӧрзьывлытӧм дӧрачом.
Сылӧн сюръяясыс сулалӧны зумыда, сылӧн гезъясыс оз орны.
Сэні Господь лоӧ миянлы визув ваӧн да паськыд юӧн.
Сэті оз кут кывтны вӧрӧглӧн пыж, оз кут кывтны ыджыд корабль.
Господь — миян Мыждысьыс, Господь — миян Юралысьыс, Господь — миян Ӧксыыс, Сійӧ мездас миянӧс!
Кор тэнад гезъясыд личаласны, оз нин вермыны кутны шолга да зэвтны тӧвдӧра, сэки кутан юклыны тышын шедӧдӧм ыджыд эмбуртӧ, весиг чотысьяс уськӧдчасны юклыны сійӧс.
Сионын олысьяс пӧвстысь некод оз шу, ме пӧ вися, сэні олысь войтырлысь мыжъяссӧ лоӧ прӧститӧма.
Матыстчӧй, войтыръяс, да кывзӧй, сюся кывзӧй, чужанкотыръяс!
Мед кывзас муыс да ставыс, мый сэні эм, мед кывзас муюгыдыс да став сэні чужысьыс.
Господь скӧрмӧма став войтыръяс вылӧ, Сійӧ лӧгалӧ налӧн тышкайӧз вылӧ.
Господь шуис дзикӧдз бырӧдны найӧс, лэдзис найӧс начкыны.
Налысь виӧмаяссӧ колясны разі-пели куйлыны, налӧн шойясыс пондасны лёк дукӧн ӧвтны, налӧн вирысь ньӧдздасны керӧсъяс.
Енэжвывса югзьӧданторъяс дзикӧдз сотчасны, енэжыс гартыштчас гижӧд тубрас моз.
Енэжвывса став югзьӧданторйыс гылалас, кыдзи гылалӧны виноград пу вылысь коръясыс, кыдзи усьласьӧны инжир пу вылысь косьмӧм коръясыс.
— Енэжысь коланасӧ бырӧдӧм бӧрын Менам шыпуртӧй усяс Эдом вылӧ, медым дзикӧдз бырӧдны войтырӧс, кодӧс Ме мыжді.
Господьлӧн шыпуртыс дзоньнас вирӧсь, сэтчӧ сибдӧма гос — тайӧ ыжъяслӧн да кӧзаяслӧн вирыс да межъяслӧн вӧрквывса госыс. Восораын Господьлы вись вайӧны, Эдом му вылын уна пемӧс начкӧны.
Накӧд тшӧтш начкасны вӧлявывса ӧшъясӧс, ӧшпиянӧс ӧшъяскӧд. Муыс пӧтас налӧн вирӧн, му веркӧсыс йиджтысяс налӧн госӧн.
Ӧд воис Господьлӧн мыждан луныс, Сион вӧсна водзӧс перъян воыс.
Эдомлӧн юясыс лоӧны сирӧн, му веркӧсыс лоӧ тэгйӧн, муыс ставнас лоӧ сотчысь сирӧн.
Сійӧ пондас сотчыны лун и вой, сылӧн тшыныс пондас кыпӧдчыны дугдывтӧг.
Нэмъяссянь нэмъясӧдз некод оз кут овны сэні, мортлӧн кокыс оз тувччыв сэтчӧ нэмъяс чӧж.
Сійӧ лоӧ пеликанъяслӧн да ёжъяслӧн оланінӧн, сэтчӧ овмӧдчасны сюзьяс да кырнышъяс.
Господь мурталас сійӧс кӧвйӧн, веситас вескиӧн, медым вӧчны сійӧс кушӧн да мыгӧртӧмӧн.
Некод оз коль сэні нималана йӧз пӧвстысь, кодӧс эськӧ позис пуктыны ӧксыӧ. Сылӧн юралысьясыс лоӧны нинӧм туйын.
Сылӧн керкаясыс турунзясны бытшкасьысь турунӧн, сылӧн изкаръясыс — петшӧрӧн да йӧнмӧн.
Сійӧ лоӧ шакалъяслӧн оланінӧн, страусъяслӧн шойччанінӧн.
Сэтчӧ чукӧртчасны шакалъяс да овтӧминса зверъяс, вӧлявывса кӧзаяс пондасны чуксасьны ӧта-мӧдныскӧд, войся олысьяс аддзасны сэні аслыныс шойччанін.
Сэтчӧ поздысяс змей, ваяс колькъяс да пондас пӧжны найӧс, пиянсӧ чукӧртас аслас кынӧм улӧ.
Сэні кырнышъяс чукӧртчасны кыкӧн-кыкӧн.
Корсьӧй Господьлӧн небӧгысь да лыддьӧй: став тайӧ пемӧсыс локтас сэтчӧ, ставныс кыкӧн-кыкӧн.
Ӧд Господь Аслас вомӧн тшӧктіс налы тадзи вӧчны, Сылӧн Лолыс чукӧртас найӧс сэтчӧ.
Господь Ачыс пудъяліс налы мусӧ, Аслас киӧн мурталіс да юкліс налы мусӧ.
Тайӧ муыс вичмас налы пыр кежлӧ, найӧ кутасны овны сэні нэмъяс чӧж.
Мед нимкодясясны овтӧмин да кос му, мед нимкодясяс кушин, сійӧ пондас дзоридзавны лилия моз.
Сійӧ пондас мичаа дзоридзавны, нимкодясьны да долыда гажӧдчыны, пондас нимавны Ливан моз, лоӧ Кармил керӧс да Шарон ласта кодь мича.
Став йӧзыс аддзасны Господьлысь дзирдлунсӧ, миян Енлысь вынсӧ.
Ёнмӧдӧй лигышмунӧм кинытӧ, зумыдмӧдӧй жебмӧм кокнытӧ.
Полысь сьӧлӧмаяслы шуӧй: «Лоӧй зумыдӧсь, энӧ полӧй!
Тіян Енныд локтас да водзӧсӧн мынтысяс, Енмыс водзӧс перъяс тіян вӧсна.
Сійӧ локтас да мездас тіянӧс».
Сэки синтӧмъяс пондасны аддзыны, пельтӧмъяс — кывны.
Чотысь пондас кӧр моз чеччавны, сёрнитны вермытӧм морт пондас сьывны.
Кушинын воссясны ва петанінъяс, кос му вывті визувтасны шоръяс.
Пӧсь лыа лоас тыӧн, косьмӧм му — ва петанінӧн.
Шакалъяслӧн оланінын кутас быдмыны эжӧр да юсьпӧлян.
Овтӧминті кутас мунны паськыд туй, сійӧс нимтасны Вежа туйӧн. Пежасьӧм морт оз кут ветлыны сы вывті, сійӧ лоӧ сӧмын Ен войтырлы туйӧн.
Сэті мунысьяс, весиг мывкыдтӧмъяс, оз вошны.
Сэні оз паныдась лев, звер оз тыдовтчы сэні.
Сэті ветлӧны сӧмын мездмӧмаяс.
Господьлӧн мездмӧмаяс бӧр бергӧдчасны, гораа нимкодясьӧмӧн локтасны Сион керӧс вылӧ, налӧн юр весьтын лоӧ помасьлытӧм нимкодясьӧм.
Найӧ пондасны нимкодясьны да гажӧдчыны, а шогсьӧмыс да ышлолалӧмыс ылыстчас на дінысь.
Езекей ӧксылӧн дас нёльӧд веськӧдлан воӧ ассурса Сеннахирим ӧксы уськӧдчис иудаса изкаръяс вылӧ да босьтіс найӧс.
Ассурса ӧксы мӧдӧдіс Лакишысь Ерусалимӧ Езекей ӧксы дінӧ уна тышкайӧзӧс да ассьыс эскана мортӧс.
Сійӧ сувтіс вылыс вайӧртӧдсянь визувтысь ва дорӧ, пожъясянінӧ нуӧдан туй вылӧ.
Сылы воча петісны ӧксы керкаӧн веськӧдлысь Эляким, Хилкилӧн пиыс, Шевнай нима гижалысь да вӧвлӧмторъяс пасъялысь Йоах, Асафлӧн пиыс.
Ассурса ӧксылӧн эскана морт шуис налы: «Висьталӧй Езекейлы, мый ассурса ыджыд ӧксы тадзи шуӧ: “Мый вылӧ тэ лача кутан?
Тэ висьталан нинӧм абусӧ, а тышад колӧны сюсьлун да вын. Тэ кыпӧдчин меным паныд, а ӧні код вылӧ тэ лача кутан?
Тэ лача кутан Египет вылӧ, тайӧ чегӧм беддьыс вылӧ. Но мыджсяс кӧ кодкӧ сы вылӧ, сійӧ сатшас сылы ки пыдӧсас да ки пырыс петас.
Тадзи фараон, египетса ӧксы, вӧчӧ быдӧнкӧд, коді сы вылӧ лача кутӧ.
Гашкӧ, тэ шуан, мый Господь Енныд вылӧ лачанытӧ кутанныд. Но эз ӧмӧй Сылысь вись ваян мылькъяссӧ да висьпуктанінъяссӧ бырӧд Езекей? Эз ӧмӧй сійӧ тшӧкты Иуда войтырлы да Ерусалимын олысьяслы юрбитны сӧмын ӧти висьпуктанін водзын?”»
Ассурса ӧксылӧн эскана морт водзӧ тшӧктіс висьтавны Езекейлы: «Ӧтувтчы менам ыджыдкӧд, ассурса ӧксыкӧд.
Ме сета тэныд кык сюрс вӧв, сюрас кӧ тэнад та мында верзьӧмаыс.
Тэ он вермы вӧтлыны аслад муысь весиг ӧти веськӧдлысьӧс, менам ыджыдлы медічӧт кесъялысьӧс. Но тэ лача кутан Египет вылӧ, сылӧн тарантасъяс да вӧвъяс вылӧ!
Ме ӧд Господьлӧн кӧсйӧм серти локті татчӧ, медым бырӧдны тайӧ мусӧ.
Господь Ачыс шуис меным: “Мун да бырӧд сійӧ мусӧ”».
Эляким, Шевнай да Йоах шуисны ассурса ӧксылӧн эскана мортлы: «Корам тэнӧ, ыджыдӧй, сёрнит миянкӧд арамей кыв вылын, ми ӧд гӧгӧрвоам. Эн сёрнит миянкӧд еврей кыв вылын, ӧд карса стен вылын войтырыс ставсӧ кылӧ».
Но сійӧ вочавидзис: «Менам ыджыдӧй ӧмӧй мӧдӧдіс менӧ висьтавны тайӧ кывъяссӧ сӧмын тэныд да тэнад ӧксыыдлы?
Эз! Менӧ мӧдӧдӧма висьтавны тшӧтш карса стен вылын пукалысь йӧзлы, кодъяс регыд тіян моз пондасны сёйны ассьыныс сітсӧ да юны ассьыныс кудзсӧ».
Ассурса ӧксылӧн эскана морт сувтіс да еврей кыв вылын гораа шуис: «Кывзӧй ассурса ыджыд ӧксылысь кывъяссӧ.
Сійӧ тадзи висьталӧ: “Энӧ кывзӧй Езекейӧс, сійӧ ылӧдлӧ. Сійӧ оз вермы мездыны тіянӧс.
Энӧ эскӧй Езекейлы! Сійӧ ышӧдӧ тіянӧс Господь вылӧ лача кутны да эскӧдӧ, мый Господь мездас тіянӧс, и карнытӧ оз ло сетӧма ассурса ӧксы киӧ”.
Энӧ кывзӧй Езекейӧс! Ассурса ӧксы тадзи висьталӧ: “Сетчӧй меным да локтӧй ме дінӧ! Сэки ті кутанныд сёйны виноград да инжир вотӧс асланыд пуясысь, юны ва асланыд юкмӧсысь. Сэсся ме локта да нуӧда тіянӧс мӧд муӧ, тіян кодь муӧ, кӧні эм нянь, вина да виноград йӧръяс.
Сідзкӧ, энӧ кывзӧй Езекейӧс! Сійӧ пӧръясьӧ, кор шуӧ тіянлы, Господь пӧ мездас миянӧс.
Мукӧд войтыръяслӧн енъяс ӧмӧй мездісны налысь мусӧ ассурса ӧксылӧн кипод улысь?
Кӧнӧсь Хамат да Арпад каръяслӧн енъясыс?
Кӧнӧсь Сепарваим карлӧн енъясыс?
Мездісны ӧмӧй Самарияӧс сылӧн енъясыс менам киысь?
Кутшӧмкӧ ен ӧмӧй мездіс ассьыс мусӧ менам киысь?
Господь сідзжӧ оз вермы мездыны Ерусалимнытӧ менам киысь”».
Но войтырыс чӧв оліс, весиг кыв эз шу сылы. Ӧд буретш тадзи тшӧктіс налы вӧчны Езекей ӧксыныс.
Ӧксы керкаӧн веськӧдлысь Эляким, Хилкилӧн пиыс, гижалысь Шевнай да вӧвлӧмторъяс пасъялысь Йоах, Асафлӧн пиыс, косялісны ассьыныс паськӧмнысӧ, мунісны Езекей дінӧ да висьталісны сылы ассурса ӧксылӧн эскана мортлысь кывъяссӧ.
Кор Езекей ӧксы кыліс та йылысь, сійӧ косяліс ассьыс паськӧмсӧ. Сэсся пасьталіс шогалан паськӧм да муніс Господьлӧн крамӧ.
Езекей мӧдӧдіс Исай пророк дінӧ, Амослӧн пи дінӧ, ӧксы керкаӧн веськӧдлысь Элякимӧс, гижалысь Шевнайӧс да юрнуӧдысь попъясӧс. Ставныс найӧ вӧліны шогалан паськӧмаӧсь.
Езекей тшӧктіс висьтавны Исайлы: «Тайӧ луныс — шогалан да мыждан-янӧдан лун. Чужысь кага дась нин петны мам кынӧмысь, но мамлӧн абу выныс чужтынысӧ.
Гашкӧ, Господь, тэнад Енмыд, кылас ассурса ӧксылӧн эскана мортлысь кывъяссӧ. Сылӧн ыджыдыс, ассурса ӧксы, мӧдӧдіс сійӧс, медым омӧльтны ловъя Енмӧс. Гашкӧ, Господь, тэнад Енмыд, мыждас сійӧс омӧльтана кывъяссьыс.
Кевмысь ловйӧн кольӧмаяс вӧсна».
Езекей ӧксылӧн кесъялысьясыс локтісны Исай дінӧ.
Ӧксылысь кывъяссӧ кылӧм бӧрын Исай шуис налы: «Висьталӧй асланыд ыджыдлы, мый Господь тадзи висьталӧ: “Эн пов тэныд висьталӧм кывъясысь, мыйӧн Менӧ лёкӧдісны ассурса ӧксылӧн кесъялысьясыс.
Ме ыста ассурса ӧксы пытшкӧ сэтшӧм лов, мый юӧр кылӧм бӧрти сійӧ бӧр бергӧдчас аслас муӧ. Сэні Ме вӧча сідзи, мый сійӧ кулас шыпурт помысь”».
Ассурса ӧксылӧн эскана морт кор кыліс, мый сылӧн ӧксыыс эновтӧма Лакиш кар, мӧдӧдчис сы дінӧ. Сэки ӧксы вӧлі тышкасьӧ Ливна карлы паныд.
Ӧксылы юӧртісны, мый сылы паныд тышӧ петӧма Тиргак, эфиопияса ӧксы.
Тайӧ юӧрсӧ кылӧм бӧрын ассурса ӧксы мӧдӧдіс ассьыс йӧзсӧ Езекей дінӧ.
Сійӧ тшӧктіс висьтавны иудаса Езекей ӧксылы: «Тэнад Енмыд, код вылӧ тэ лача кутан, ылӧдлӧ тэнӧ, кор шуӧ, мый Ерусалимӧс оз ло сетӧма ассурса ӧксы киӧ.
Тэ ӧд тӧдан, ассурса ӧксыяс мый вӧчисны став муясыскӧд — дзикӧдз бырӧдісны найӧс.
Тэ чайтан, мый тэ мездман?
Мукӧд войтыръясӧс ӧмӧй мездісны налӧн енъясыс? Менам батьяс бырӧдісны налысь Гозан, Харан да Рецеф каръяс, тшӧтш Телассар муысь Эден карын олысьясӧс.
Кӧнӧсь ӧні Хамат, Арпад, Сепарваим, Ена да Ивва каръяслӧн ӧксыясыс?»
Езекей босьтіс юӧр вайысьяслӧн киысь гижӧдсӧ да лыддис сійӧс. Сэсся муніс Господьлӧн крамӧ да восьтіс гижӧдсӧ Господь водзын.
Езекей пондіс кевмысьны:
«Господь Саваоф, Израильлӧн Ен! Тэ пукалан херувимъяс вылын.
Тэ — ӧти Ен, Тэ ыджыдалан став му пасьталаыс.
Тэ вӧчин енэжсӧ и мусӧ.
Господьӧй, копырт Ассьыд пельтӧ да кывзы.
Господьӧй, восьт Ассьыд синтӧ да видзӧдлы. Кыв Сеннахиримлысь кывъяссӧ — сійӧ омӧльтӧ Тэнӧ, ловъя Енмӧс.
Господьӧй, збыльысь, ассурса ӧксыяс бырӧдісны войтыръясӧс да куштісны налысь муяссӧ, а налысь енъяссӧ шыблалісны биӧ.
Но тайӧ эз вӧвны енъяс, а пуысь да изйысь вӧчӧмторъяс. Та вӧсна и вермисны бырӧдны найӧс.
Ӧні, Господьӧй, миян Енмӧй, мезды миянӧс Сеннахирим киысь.
Мувывса став войтыръяс мед тӧдмаласны, мый Тэ, Господьӧй, ӧти Ен».
Амослӧн Исай пиыс мӧдӧдіс мортӧс да тшӧктіс висьтавны Езекейлы: «Господь, Израильлӧн Ен, тадзи висьталӧ: “Тэ кевмысин Меным, кор ассурса Сеннахирим ӧксы повзьӧдліс тэнӧ”.
Со татшӧм кыв Господь висьталіс ассурса ӧксы йылысь: — Тэнӧ мустӧмтӧ сӧстӧм Сион ныв, сійӧ лёкӧдӧ тэнӧ. Юрнас довкйӧдлӧ, тэ вылын сералӧ Ерусалим ныв.
Кодӧс тэ омӧльтін? Кодӧс тэ лёкӧдін?
Кодлы паныд тэ гӧлӧстӧ кыпӧдін? Код вылӧ ышнясьӧмӧн видзӧдін?
Израильлӧн вежа Ен вылӧ!
Аслад кесъялысьяс пыр тэ омӧльтін Господьӧс. Тэ шуин: “Аслам уна лыда тарантасъясӧн ме кайи джуджыд керӧсъяс вылӧ, ливанса керӧсъяс йылӧдз. Ме кералі сылысь гырысь сус пуяссӧ, пӧрӧді медбур кипарисъяссӧ. Ме кайи сылӧн медджуджыд керӧсӧдз, пыралі сылӧн медпыді раскӧдз. Ме кодйи юкмӧсъяс да юи сэтысь васӧ, ме восьлалі египетса юясӧд, и найӧ косьмисны”.
Но тэ ӧмӧй эн кывлы, мый ставсӧ тайӧс Ме важысянь нин дасьті? Ме водзысяньыс мӧвпышті та йылысь, а ӧні збыльмӧді тайӧс тэ пыр — тэ пазӧдін зумыд каръяс, найӧ лоины из чукӧръясӧн.
Сэтчӧс олысьясыс вынтӧммисны, найӧ яналісны да ёна полӧны.
Найӧ лоины видзвывса турун кодьӧсь, вежӧдысь турун кодьӧсь, керка вевтвывса нявда кодьӧсь, шептасьтӧдзыс на чишкасьӧм нянь кодьӧсь.
Ме тӧда тэ йылысь ставсӧ: пукалан-ӧ, пыран-ӧ, петан-ӧ. Ме тӧда Меным паныд кыпӧдчӧмтӧ.
Тэ кыпӧдчин Меным паныд, тэнад ышнясьӧмыд воис Менам пельӧдз. Таысь Ме сюя тэнад ныр розьӧ кольча да кӧртвомала тэнӧ, сэсся бӧр ыста тэнӧ сійӧ туйӧдыс, кыті тэ локтін.
Со, Езекей, тэныд пас. Тайӧ вонас ті сёянныд усьӧм тусьясысь быдмӧм няньсӧ, мӧд вонас сёянныд, мый ачыс чужас, а коймӧд вонас кӧдзанныд да вунданныд, пуктанныд виноград пуяс да сёянныд налысь вотӧссӧ.
Сэки Иуда чужанкотырлӧн колясыс бара пыдӧдз лэдзас вужсӧ да ваяс вотӧс. Ерусалим карын ловйӧн кольӧмаяс паськӧдчасны кар гӧгӧрыс, мездмӧмаяс паськӧдчасны Сион керӧс гӧгӧр.
Тадзи вӧчас Господь Саваоф, ӧд Сійӧ — вежӧгтысь Ен.
Ассурса ӧксы йылысь Господь тадзи висьталӧ: — Сійӧ оз пыр тайӧ карас, оз лый сэтчӧ ньӧвъяссӧ, оз матыстчы сы дорӧ сайӧдӧн, оз лэпты сы гӧгӧр тымӧд.
Сійӧ бӧр мунас сійӧ туйӧдыс, кыті локтіс, тайӧ карас сійӧ оз пыр, — висьталӧ Господь. — 
Ме видза тайӧ карсӧ, мезда сійӧс Ас ради да Аслам Давид кесйӧгӧй ради».
Локтіс Господьлӧн анделыс да ассурса тышкайӧзлӧн чукӧртчанінын виис сё кӧкъямысдас вит сюрс мортӧс.
Асывнас ловйӧн кольӧм ассурсаяс садьмисны да аддзисны, мый гӧгӧр туплясьӧны шойяс.
Сэки ассурса Сеннахирим ӧксы бӧр бергӧдчис аслас муӧ Ниневия карӧ да кольччис сэтчӧ.
Кор Сеннахирим юрбитіс аслас Нисрох нима енлӧн крамын, сылӧн Адрамелек да Сарецер пияныс виисны сійӧс шыпуртӧн. Сэсся найӧ пышйисны Арарат муӧ.
Сеннахирим пыдди ӧксыӧ пуксис сылӧн Асардан пиыс.
Сійӧ кадас Езекей чорыда висьмис да вӧлі куланвыйын.
Сы дінӧ локтіс Исай пророк, Амослӧн пиыс, да шуис: «Господь тадзи висьталӧ: “Висьтав гортсаыдлы ассьыд бӧръя кӧсйӧмтӧ, ӧд тэ он бурд, но кулан”».
Сэки Езекей бергӧдчис стенланьыс да кевмысис Господьлы:
«Господьӧй, казьтышт, мый ме олі Тэ водзын веськыда, став сьӧлӧмсянь кесъялі Тэныд да вӧчи Тэ водзын шогманасӧ».
Сэсся Езекей ёна бӧрддзис.
Исайлы вӧлі Господьсянь кыв:
«Мун да висьтав Езекейлы, мый Господь, Давид пӧльыдлӧн Ен, тадзи висьталӧ: “Ме кылі тэнсьыд кевмӧмтӧ да аддзи тэнсьыд синватӧ. Ме сета тэныд овны нӧшта дас вит во. Ме мезда тэнӧ да тайӧ карсӧ ассурса ӧксылӧн киысь. Ме видза тайӧ карсӧ”.
Со, Господьсянь тэныд пас, мый Сійӧ вӧчас Аслас кӧсйысьӧм серти:
”Ахазлӧн пос вылӧ шондісянь усьӧм вуджӧрсӧ Ме бӧр бергӧда дас тшупӧдӧн бӧрлань”».
И шондісянь усьӧм вуджӧрыс бӧр бергӧдчис дас тшупӧдӧн бӧрлань.
Со кыдзи кевмысис иудаса Езекей ӧксы, кор сійӧ висис, а сэсся бурдіс.
Ме мӧвпышті: ме олі сӧмын джын нэмӧс на, но меным ковмас мунны пыдӧстӧминлӧн дзиръя пыр, менам эз нин кольны олан лунъясӧй.
Ме мӧвпышті: ме ог нин аддзы Господьӧс, ог аддзы Сійӧс ловъяяслӧн му вылын.
Ме ог нин вермы видзӧдны йӧзыс вылӧ тайӧ му вылас олысьяскӧд ӧтвыв.
Ыж видзысьлысь чомсӧ моз менсьым оланінӧс разьӧма, ылыстӧма ме дінысь.
Ме гартышті ассьым олӧмӧс, кыдзи дӧра кыысь гартыштӧ кыӧм дӧрасӧ, ӧні Господь вундас менӧ кысян стан бердысь.
Лун и вой ме виччыси, мый Тэ мӧдӧдан меным олӧм пом.
Ме виччыси асылӧдз, а Сійӧ лев моз жуглӧ менсьым лыясӧс.
Лун и вой ме виччыси, мый Тэ мӧдӧдан меным олӧм пом.
Ме курликті тури моз, чивзі чикыш моз, гажтӧмтчи гулю моз, син мудзтӧдз видзӧді енэжас. Господьӧй, ме сьӧкыдала, отсав меным!
Мый меным шунысӧ?
Господь мый шуис меным, сійӧс и вӧчис.
Курыда шогсьӧмӧн ме колляла ассьым олан воясӧс.
Господьӧй, йӧзыс тадзи олӧны, татшӧм жӧ менам олӧмӧй.
Но Тэ бурдӧдін менӧ, видзин менсьым олӧмӧс.
Курыд шогыс бергӧдчис меным бур вылӧ, Тэ мездін менӧ кулӧмысь, став менсьым мыжъясӧс Тэ шыбитін Аслад мышку сайӧ.
Оз пыдӧстӧминыс аттьӧав Тэнӧ, оз кулӧмыс ошкы Тэнӧ, оз гортйын куйлысьяс лача кутны Тэнад эсканлуныд вылӧ.
Но сӧмын ловъяяс ошкӧны Тэнӧ, кыдзи ме ӧні ошка. Батьыс висьталас челядьыслы Тэнад эсканлуныд йылысь.
Господь мездас менӧ!
Ми кутам сьывны-ворсны Господьлӧн крамын став олӧм чӧж.
Исай тшӧктіс вайны косьтӧм инжир да пуктыны Езекейлы орзьӧминас, медым сійӧ бурдіс.
А Езекей юаліс: «Мый серти ме тӧдмала, мый ме бара верма мунны Господьлӧн крамӧ?»
Сійӧ кадас вавилонса Меродах-Валадан ӧксы, Валаданлӧн пиыс, тӧдмаліс Езекейлӧн висьмылӧм да бурдӧм йылысь. Та вӧсна сійӧ мӧдӧдіс Езекейлы гижӧд да козинъяс.
Езекей нимкодясис локтысьяс вӧсна. Сійӧ петкӧдліс налы ассьыс озырлун видзанінъяссӧ да ставсӧ, мый сэні вӧлі: эзысь-зарни, чӧскыд ӧвтанторъяс да дона мавтасъяс. Нӧшта петкӧдліс шыпурт видзанінсӧ.
Ӧксы керкаысь да аслас муысь Езекей петкӧдліс налы став озырлунсӧ.
Исай пророк локтіс Езекей ӧксы дінӧ да юаліс: «Мый висьталісны тайӧ йӧзыс?
Кытысь найӧ волісны тэ дінӧ?»
Езекей вочавидзис: «Найӧ волісны ылі муысь, Вавилонысь».
«Мый найӧ аддзылісны тэнад керкаысь?» — юаліс Исай.
Езекей вочавидзис: «Найӧ аддзылісны ставсӧ.
Ме петкӧдлі налы озырлун видзанінъясысь ставсӧ».
Сэки Исай шуис Езекейлы: «Кывзы Господь Саваофлысь кывсӧ.
Воасны лунъяс, кор тэнад керкаысь ставсӧ нуасны Вавилонӧ. Нуасны тшӧтш сійӧ, мый тэнад батьясыд чукӧртісны тайӧ лунӧдзыс.
Нинӧм оз коль, — висьталӧ Господь. — Тэсянь чужысьясӧс нуӧдасны вавилонса ӧксы керкаӧ, и налы ковмас кесъявны сэні евнукъясӧн».
Езекей мӧвпыштіс: «Сідзкӧ, менам олан кадӧ тані лоӧ лӧньлун да бур олӧм».
Та вӧсна сійӧ шуис Исайлы: «Господьлӧн кывйыс, мый ӧні висьталін меным — бур».
Бурӧдӧй, бурӧдӧй Менсьым войтырӧс, — тшӧктӧ тіян Енныд. — Меліа висьталӧй Ерусалимлы, юӧртӧй сылы, мый сылӧн сьӧкыдалан кадлы воис пом, мый сылысь мыжъяссӧ прӧститӧма. Господь мынтысис сылы кык пӧвстӧн став сылӧн мыжъясысь.
Кылӧ горзысьлӧн шы: — Овтӧминын лӧсьӧдӧй туй Господьлы, увтасінын вӧчӧй веськыд туй миян Енлы!
Быд ковтыс мед тырас, быд керӧс да мыльк мед ляпкалас, чукыльяс мед веськаласны, гуранъяс мед шыляласны!
Сэки тыдовтчас Господьлӧн дзирдлуныс, и ставӧн аддзасны, мый Господь висьталіс. *
Ме кылі гӧлӧс шы: — Юӧрт!
Ме юалі: — Мый меным юӧртнысӧ?
— Мортыс — турун кодь, сылӧн мичлуныс — дзоридз кодь.
Господьлӧн пӧльыштӧмысь турун косьмӧ, дзоридз нярмӧ. Збыльысь, йӧзыс турун кодьӧсь.
Турун косьмӧ, дзоридз нярмӧ, а миян Енлӧн кывйыс помтӧг олӧ.
Сион, бур юӧр вайысь, кыпӧдчы джуджыд керӧс вылӧ!
Ерусалим, бур юӧр вайысь, висьтавлы гора шыӧн!
Эн пов, висьтавлы иудаса каръяслы: «Со, тіян Енныд!»
Со, ыджыд вынӧн локтӧ Господь Ыджыдыс, Сійӧ веськӧдлӧ вына кинас.
Сыкӧд ставыс, мый Сійӧ шедӧдіс, Сылӧн син водзын ставыс, мый Сійӧ Аслыс босьтіс.
Ыж видзысь моз Сійӧ видзӧ Ассьыс чукӧрсӧ, баляясӧс босьтӧ ки вылас да новлӧдлӧ Аслас морӧс бердын, вайсьӧм ыжъясӧс нуӧдӧ тӧждысьӧмӧн.
Коді мурталіс васӧ аслас соддзӧн, коді мурталіс енэжсӧ кинас, коді веситіс мувывса буссӧ, вескиӧн тӧдмаліс керӧсъяслысь сьӧктасӧ?
Коді веськӧдліс Господьлӧн лолӧн, туйдӧдіс-велӧдіс Сійӧс?
Кодлысь Сійӧ юасис, коді вежӧрсьӧдіс Сійӧс, велӧдіс ветлыны веськыд туйӧд, коді сетіс Сылы тӧдӧмлун, индіс Сылы мывкыдлуныслысь туйсӧ?
Войтыръяс — пельсаын ва войтъяс кодьӧсь, вески вылын бус чиръяс кодьӧсь.
Лыа чиръясӧс моз Господь кыпӧдӧ діяс.
Ливанса пуяс да пемӧсъяс абу тырманаӧсь, медым пестыны би да вись вайны Господьлы.
Сы водзын мувывса войтыръяс нинӧм кодьӧсь, Сылы найӧ абутӧмысь этшаджык на.
Кодкӧд ті ӧткодяланныд Енсӧ, аддзанныд-ӧ нӧшта Сы коддьӧмсӧ?
Серпасалысь сывдӧ бӧлбанӧс, вӧчасьысь эжӧ сійӧс зарниӧн, вӧчӧ сылы эзысь чепторъяс.
А гӧль морт, коді оз вермы тадзи вӧчнысӧ, бӧрйӧ сісьмытӧм пу, корсьӧ аслыс кужысь вӧчасьысьӧс, медым вӧчны зумыда сулалысь бӧлбанӧс.
Ті ӧмӧй онӧ тӧдӧй, ті ӧмӧй энӧ кывлӧй?
Тіянлы ӧмӧй эз висьтавлыны водзысяньыс, ті ӧмӧй му пуксьӧмсяньыс онӧ вежӧртӧй тайӧс?
Господь пукалӧ му кытш весьтын, а му вылас олысьясыс Сылы чирк кодьӧсь.
Сійӧ шевкнитіс енэжсӧ вонйӧс моз, паськӧдіс сійӧс дӧрачомйӧс моз, медым сэні овны.
Ыджыдалысьясӧс Сійӧ лыддьӧ нинӧмӧн, мувывса юралысьясӧс нинӧмӧ пуктӧ.
Найӧс сӧмын на пуктӧма-кӧдзӧма, найӧ муртса на вужъясьӧмаӧсь му пытшкас, но кор Господь пӧльыштас на вылӧ, найӧ косьмасны, и тӧвнырыс нӧбӧдас найӧс идзасӧс моз.
Кодкӧд ті ӧткодяланныд Менӧ, эм-ӧ кодкӧ Ме кодьыс, — юалӧ вежа Ен.
Лэптӧй синнытӧ вывлань да видзӧдлӧй: коді ставсӧ тайӧс вӧчис?
Сійӧ, коді вӧчис енэжвывса югзьӧданторъяс, тӧдӧ налысь лыдсӧ, ставнысӧ шуӧ нимнас. Найӧ ставныс ӧтитӧг мыччысьӧны — татшӧм ыджыд Сылӧн выныс да вынйӧрыс!
Яков, мыйла тэ шуан, мыйла, Израиль, тэ висьталан, мый Господь оз аддзы тэнсьыд туйтӧ, мый тэнад Енмыд вунӧдіс тэнсьыд могтӧ?
Тэ ӧмӧй он тӧд, тэ ӧмӧй эн кывлы, мый Господь — помтӧг олысь Ен, Сійӧ вӧчис став муюгыдсӧ, Сійӧ оз мудз, оз жебмы.
Сылысь мывкыдлунсӧ он туяв.
Мудзӧмалы Сійӧ сетӧ вын, жебмӧмаӧс ёнмӧдӧ.
Весиг зонъяс мудзлӧны да жебмӧны, том йӧз усьлӧны кок йывсьыныс, а Господь вылӧ лача кутысьяс бара на вынсялӧны: кутш моз найӧ шевкнитасны борднаныс, котӧртасны, но оз мудзны, мунасны, но оз жебмыны.
— Чӧв олӧй, кывзӧй Менӧ, саридз дорын олысьяс! Войтыръяс мед бара на ёнмӧдчасны, найӧ мед матыстчасны да шуасны: «Чукӧртчамӧй ёрд водзӧ».
Коді асыввывсянь вайӧдіс веськыда вӧчысьӧс, чукӧстіс сійӧс Ас бӧрсяыс мунны, сетіс сы киӧ войтыръясӧс, сылӧн кипод улӧ ӧксыясӧс?
Сылӧн шыпуртыс вӧчӧ войтыръясӧс бусӧн, сылӧн ньӧввужйысь найӧ разалӧны, быттьӧ тӧвнырӧн нӧбӧдан идзас.
Сійӧ кокньыда вӧтӧдӧ войтыръясӧс туйӧд, кытчӧ ачыс эз на тувччыв.
Коді вӧчис тайӧс, коді збыльмӧдіс?
Сійӧ, коді му пуксьӧмсяньыс сетӧ олӧм.
Ме, Господь, Ме — Медводдзаыс, и бӧръя олысьяслы Ме — Сійӧ жӧ.
Саридз дорын олысьяс аддзисны, мый Ме вӧчи, найӧ повзисны, мулӧн быд пельӧс пондіс тіравны.
Найӧ матыстчисны ӧта-мӧд дінас да ӧтвывтчисны.
Найӧ отсасьӧны ӧта-мӧдныслы, ышӧдӧны ӧта-мӧднысӧ лоны зумыдӧн.
Дорччысь ышӧдӧ кӧрт сывдысьӧс, кӧрт лист мольӧдысь ышӧдӧ дорччысьӧс, шуалӧ, бура пӧ вӧчӧмыд, сэсся тувъялӧ кӧрттувйӧн, медым вӧчӧмторйыс эз вӧр.
Израиль, тэ — Менам кесйӧгӧй, Яков, тэ — Менам Ӧвраам ёртсянь чужысь, Ме бӧрйи тэнӧ.
Ме босьті тэнӧ му помсьыс, чукӧсті тэнӧ медылі муясысь. Ме шуи тэныд: «Тэ — Менам кесйӧгӧй, Ме бӧрйи тэнӧ и ог ӧтдорт тэнӧ!»
Эн пов, Ме тэкӧд, эн майшась, Ме — тэнад Енмыд.
Ме ёнмӧда тэнӧ, отсала тэныд да кутышта тэнӧ Аслам веськыд киӧн.
Тэнӧ мустӧмтысьяс яналасны, налы лоӧ юръяндзим. Тэныд паныд сувтысьяс лоӧны нинӧмӧн, найӧс лоӧ бырӧдӧма.
Тэ кутан корсьны, но он аддзы тэныд паныд сувтысьясӧс, тэкӧд тышкасьысьыс оз ло.
Ме — Господь, тэнад Енмыд, Ме кута тэнӧ веськыд киӧдыд, шуа: «Эн пов, Ме отсала тэныд».
Эн пов, Яков-номыр, этша лыда Израиль, Ме отсала тэныд, — висьталӧ Господь, тэнад Мездысь, Израильлӧн вежа Ен. — 
Ме вӧча тэнӧ выль да ёсь пиня вартан гӧгыльӧн, тэ пондан вартны да жуглыны керӧсъяс, кыдйӧс моз тэ шердъян-разӧдан мылькъяс.
Тэ кутан шердйыны найӧс, а тӧлыс нӧбӧдас, тӧвнырыс разӧдас найӧс.
Тэ кутан нимкодясьны Господьӧн, кутан ошйысьны Израильлӧн вежа Енмӧн.
Гӧльяс да коньӧръяс корсьӧны ва, но оз аддзыны, налӧн вом пытшкӧсныс пакталӧма. Но Ме, Господь, кыла найӧс, Ме, Израильлӧн Ен, ог эновт найӧс.
Ме вӧча тадзи: изъя керӧсъяссянь визувтасны юяс, ковтысъясын воссясны ва петанінъяс.
Кушин Ме вӧча тыӧн, кос му — ва петанінӧн.
Кушинӧ Ме пукта сус пу, акация, мирт да олив пу, кос муӧ — кипарис, платан да пожӧм, медым йӧзыс аддзасны да тӧдмаласны, видзӧдласны да гӧгӧрвоасны, мый Господьлӧн киыс вӧчис тайӧс, Израильлӧн вежа Ен артмӧдіс тайӧс.
Господь, Яковлӧн Ӧксы, шуӧ войтыръяслӧн енъяслы: — Висьталӧй ёрд водзын ассьыныд могнытӧ, висьталӧй ассьыныд эскӧдана кывъяснытӧ.
Юӧртӧй, мый водзӧ лоӧ, висьталӧй, мый водзынджык вӧлі, сэки ми пондам мӧвпавны да гӧгӧрвоам, мыйӧ тайӧ вайӧдас. 
Юӧртӧй, мый водзӧ лоӧ, висьталӧй локтанаыс йылысь, сэки ми тӧдмалам, мый ті — енъяс. Вӧчӧй бурсӧ либӧ лёксӧ, медым тайӧс аддзӧмысь миянӧс ставнымӧс полӧм босьтіс.
Но ті — нинӧм, ті нинӧм онӧ вермӧй вӧчнысӧ.
Зывӧк сійӧ мортыс, коді бӧрйӧ тіянӧс.
Войвывсянь Ме вайӧді мортӧс, и сійӧ локтіс.
Асыввывсянь сійӧ чукӧстіс Менсьым нимӧс. Сійӧ талялӧ юралысьясӧс нюйтӧс моз, кыдзи гырнич вӧчысь талялӧ сёй.
Коді та йылысь водзвыв висьталіс, медым ми тӧдім? Коді та йылысь водзвыв юӧртіс, медым ми вермим шуны, мый тайӧ збыль?
Но тіян пӧвстысь некод эз висьтав та йылысь, некод эз юӧрт, тіянлысь кывъяснытӧ ми эгӧ кывлӧй.
Ме медводдзаӧн висьталі та йылысь Сионлы, Ме мӧдӧді юӧртысьӧс Ерусалимӧ.
Ме видзӧді, но тіян пиысь эг аддзы некодӧс, коді эськӧ вермис туйдӧдны, кодлысь эськӧ верми юавны, и коді эськӧ вермис вочавидзны.
Войтыръяслӧн енъясыс нинӧм кодьӧсь, бӧлбанъясыс тӧвру кодьӧсь, нинӧм оз вермыны вӧчнысӧ.
Со, Менам Кесъялысьӧй, Ме сета Сылы вын, Ме бӧрйи Сійӧс, Менам сьӧлӧмӧй нимкодясьӧ Сыӧн.
Ме мӧдӧда Сы вылӧ Ассьым лолӧс. Сійӧ ваяс веськыда мыждӧм быд войтырлы.
Сійӧ оз горзы, оз кыпӧд Ассьыс гӧлӧс шысӧ, ывлаын Сійӧс он кыв.
Чегыштӧм идзас Сійӧ оз чег, дзузган би оз кусӧд.
Сійӧ ваяс веськыда мыждӧм.
Сійӧ оз лигышмун, оз жебмы, Сійӧ вынсьӧдас му вылын веськыда мыждӧм. Сылысь велӧдӧмсӧ виччысьӧны саридз дорын олысьяс.
Господь Ен вӧчис енэжсӧ да шевкнитіс сійӧс, вӧчис му да ставсӧ, мый сэні быдмӧ. Мувывса войтырлы Сійӧ сетӧ олӧм, мувывса йӧзлы — ловшы.
Сійӧ тадзи висьталӧ: — Ме, Господь, чукӧсті тэнӧ, медым вайны веськыдлунсӧ. Ме кута тэнӧ киӧдыд, Ме видза тэнӧ. Тэ лоан йитӧдӧн Ме да йӧз костын, лоан югыдӧн став войтыръяслы, медым синтӧмъяслысь восьтны синсӧ, дорӧмаясӧс петкӧдны дзескыдінысь, пемыдын пукалысьясӧс — пемыдінысь.
Ме — Господь, тайӧ Менам нимӧй. Ассьым дзирдлунӧс Ме некодлы ог сет. Ошкӧмсӧ, мый лӧсялӧ Меным, ог сет идолъяслы.
Сійӧ, мый Ме висьталі, збыльмис, а ӧні Ме юӧрта локтанаыс йылысь, висьтала тіянлы, мый эз на ло.
Сьылӧй Господьлы выль сьыланкыв, ошкӧй Сійӧс быд му пельӧсын! Ошкӧй Сійӧс, саридз вывті кывтысьяс и саридзын олысьяс. Ошкӧй Сійӧс, саридздорса муяс и саридз дорын олысьяс.
Мед гораа ошкасны кушинын да сыбердса каръясын олысьяс, сиктъясын олысь Кедарлӧн рӧдыс.
Мед гораа нимкодясясны керӧсвывса олысьяс, налӧн гӧлӧс шыныс мед юргас керӧс вывсянь.
Мед кыпӧдасны ошкӧм Господьлы, мед Сійӧс ошкасны саридз дорын олысьяс!
Господь петас тышкаморт моз, шыпурта моз Сійӧ тырас скӧрлунӧн, Сійӧ гораа горӧдас, чукӧстас тыш вылӧ, Сійӧ петкӧдлас Ассьыс вынсӧ паныд сувтысьяслы.
— Ме дыр чӧв олі, кутчыси, весиг кыв эг шу, но ӧні понда горзыны кага вайысь ань моз, понда апавны сынӧдсӧ.
Ме кушта керӧсъяс да мылькъяс, чишкала сэтысь став быдмӧгсӧ, юяс вӧча діясӧн, тыяс косьта.
Ме нуӧда синтӧмъясӧс сійӧ туйӧдыс, кыті найӧ эз на ветлыны, нуӧда найӧс тӧдтӧм туйӧд.
Пемыдсӧ на водзвылын Ме вӧча югыдӧн, чукля туйяссӧ — веськыдӧн. Тадзи Ме вӧча налы, ог эновт найӧс.
Сэки пышъясны, яналасны идол вылӧ лача кутысьяс, кодъяс шуалӧны бӧлбанъяслы: «Ті — миян енъяс!»
Кывзӧй, пельтӧмъяс! Видзӧдӧй да аддзӧй, синтӧмъяс!
Коді Менам кесйӧг кодь синтӧм, коді Меӧн мӧдӧдӧм юӧртысь кодь пельтӧм, коді Меӧн бӧрйӧма кодь синтӧм, коді Господьлӧн кесйӧг кодь синтӧм?
Тэ унатор аддзылін, но нинӧм эн казяв, тэнад пельыд вӧлі восьса, но тэ эн кыв.
Аслас веськыдлуныс вӧсна Господь нимӧдіс-ыдждӧдліс Ассьыс Индӧдсӧ.
Но тайӧ войтырсӧ куштӧма, налысь ставсӧ мырддьӧма.
Найӧс ставнысӧ кӧрталӧма да шыбитӧма пемыд гуӧ, йӧртӧма дзескыдінӧ.
Найӧ лоины тышын шедӧдӧмторйӧн, некод оз мезды найӧс, некод оз тшӧкты бӧр вайӧдны найӧс.
Коді тіян пӧвстысь кутас кывзыны тайӧс? Водзӧвылӧ коді кутас сюся кывзыны?
Коді лэдзис куштыны Яковӧс, коді сетіс мырддялысьяслы Израильӧс?
Эз-ӧ Господь, кодлы паныд ми мыжсӧ вӧчим?
Найӧ эз кӧсйыны ветлыны Сылӧн туйясӧд, эз овны Сылӧн Индӧдыс серти.
Та вӧсна Господь кисьтіс на вылӧ Ассьыс скӧрлунсӧ да ярлунсӧ — пансис чорыд тыш. Тайӧ биыс чишкаліс найӧс быд боксянь, но найӧ эз гӧгӧрвоны тайӧс, биыс сотіс найӧс, но найӧ нинӧмӧ эз велавны.
Господь, коді вӧчис тэнӧ, Яков, коді вӧчис тэнӧ, Израиль, ӧні тадзи висьталӧ: — Эн пов, Ме ньӧби тэнӧ, чукӧсті тэнӧ нимнад, тэ — Менам.
Кор тэ кутан вуджны ыджыд ва вомӧн, Ме лоа тэкӧд, кор кутан вуджны ю вомӧн, сійӧ оз пӧдты тэнӧ, кор мунан би пыр, сійӧ оз сот и оз чишкав тэнӧ.
Ме — Господь, тэнад Енмыд, Израильлӧн вежа Ен, тэнӧ Мездысь.
Ме ньӧби тэнӧ, сеті тэ пыдди Египет, Эфиопия да Сева муяс.
Тэ ёна дона Менам син водзын, Ме радейта тэнӧ, та вӧсна сета тэ пыдди мукӧд йӧзӧс, сета мукӧд войтырӧс, медым мездыны тэнӧ.
Эн пов, Ме тэкӧд!
Асыввывсянь Ме вайӧда тэсянь чужысьясӧс, рытыввывсянь чукӧрта тэнсьыд войтыртӧ.
Войвывлы Ме тшӧкта: «Сет найӧс!»
Лунвывлы Ме шуа: «Эн кут найӧс!»
Ылі муясысь вайӧдӧй Менсьым пиянӧс, му помысь — Менсьым нывъясӧс, вайӧдӧй быдӧнӧс, кодӧс Ме чукӧсті, кодӧс Ме вӧчи Ачымӧс нимӧдӧм могысь.
Петкӧд синтӧм войтырӧс, налӧн эм синъяс, но оз аддзыны, петкӧд пельтӧмъясӧс, налӧн эм пельяс, но оз кывны.
Став войтыръясыс мед чукӧртчасны ӧтлаӧ.
Коді на пӧвстысь водзвыв юӧртіс, мый ӧні лоӧ, коді водзвыв висьталіс сійӧ, мый вӧлі нин?
Мед найӧ вайӧдасны аддзылысьясӧс висьтавны, мый налӧн водзвыв юӧртӧмыс веськыд, медым кывзысьяс шуасны: «Тайӧ збыль!»
Ті ӧд тӧданныд, мый Ме — Енмыс, — висьталӧ Господь. — Тэ, Израиль, Менам кесйӧгӧй, Ме бӧрйи тэнӧ, медым ті тӧдінныд Менӧ да эскинныд Меным, медым ті гӧгӧрвоинныд, коді Ме.
Меӧдз эз вӧв енмыс, и Ме бӧрти оз ло.
Ме — Господь, Ме кындзи мӧд мездысьыс абу.
Ме водзвыв висьталі да мезді, юӧрті тіянлы, мый лоас.
Тіян пӧвстын эз вӧв мукӧд енмыс. Ті тӧданныд, — висьталӧ Господь, — мый Ме — Енмыс, водзысяньыс Ме — Сійӧ жӧ. Некод оз мезды Менам киысь, некод оз вермы вежны сійӧ, мый Ме вӧча.
Господь, тіянӧс Мездысь, Израильлӧн вежа Ен, тадзи висьталӧ: — Тіян вӧсна Ме мӧдӧда Вавилонӧ тышкайӧзӧс, медым жугӧдны сэні став игансӧ. Калдея войтыр пышъясны корабльяс вылын, кӧні водзынджык гажӧдчисны.
Ме, Господь, тіян вежа Енныд, Израильӧс Вӧчысь, тіян Ӧксыныд!
Господь восьтіс саридз пыр мунан туй, джуджыд ва пыр мунан туй, петкӧдіс тарантасъяс, вӧвъясӧс да вына тышкайӧзӧс — найӧ ставныс усисны, эз чеччыны, найӧ сись моз кусісны-сылісны.
Господь тадзи висьталӧ: — Важсӧ энӧ казьтывлӧй, кольӧмаыс йылысь энӧ мӧвпалӧй.
Со, Ме вӧча выльӧс, ӧні сійӧ тыдовтчас — онӧ ӧмӧй тайӧс казялӧй?
Ме лӧсьӧда овтӧминын туй, кушинын юяс.
Шакалъяс да страусъяс пондасны ошкыны Менӧ, ӧд овтӧминын Ме сета ва, кушинын лӧсьӧда юяс, медым юктӧдны Ассьым бӧрйӧм войтырӧс.
Тайӧ войтырсӧ Ме Аслым вӧчи, сійӧ кутас кыпӧдны Меным ошкӧмсӧ.
Но тэ, Яков, эн шыасьлы Ме дінӧ, эн кесъявлы Меным, Израиль.
Тэ эн вайлы Меным сотан вись пыдди ыжъясӧс, вись вайӧмӧн эн пыдди пукты Менӧ.
Ме эг сьӧктӧдлы тэнӧ, эг тшӧкты вайны Меным нянь, эг тшӧкты вайны чӧскыд ӧвтанторъяс.
Тэ эн ньӧблы Меным чӧскыд дука турунъяс, эн пӧткӧдлы Менӧ пемӧсъяслӧн госӧн.
Но тэ сьӧктӧдлін Менӧ аслад мыжъясӧн, мудзтӧдлін Менӧ аслад лёк вӧчӧмъясӧн.
Ас ради Ме Ачым чышкышта тэнсьыд лёк вӧчӧмъястӧ, тэнсьыд мыжъястӧ ог нин казьтывлы.
Сувтам ёрд водзӧ. Тэ мыжав Менӧ!
Петкӧдлы, мый тэ абу мыжа.
Тэнад батьыд мыж вӧчис, тэнад веськӧдлысьясыд Меным паныд кыпӧдчисны.
Та вӧсна Ме янӧді крамын кесъялысьясӧс, лэдзи бырӧдны Яковӧс, лёкӧдны Израильӧс.
— Ӧні кывзы, Яков, Менам кесйӧгӧй, кывзы, Израиль, Меӧн бӧрйӧмаӧй.
Тэнӧ вӧчысь да тэнӧ артмӧдысь, мам кынӧмсяньыд тэныд отсалысь Господь тадзи висьталӧ: — Яков, Менам кесйӧгӧй, эн пов, Ешурун, [Израиль,] Ме бӧрйи тэнӧ.
Потласьӧм му вылӧ Ме кисьта ва, косьмӧм му вылын писькӧда юяс.
Тэсянь чужысьяс вылӧ Ме кисьта Ассьым лолӧс, тэнад челядь вылӧ — Ассьым бурсиӧмӧс.
Найӧ кутасны быдмыны юдорса эжӧр пытшкын быдмысь бадь моз.
Ӧти шуас: «Ме Господьлӧн», мӧд шуас асьсӧ Яковлӧн нимӧн, а кодкӧ ки вылас гижас: «Ме Господьлӧн», и сійӧ нимтас асьсӧ Израиль нимӧн.
Господь, Израильлӧн Ӧксы да Мездысь, Господь Саваоф тадзи висьталӧ: — Ме — Медводдзаыс и Медбӧръяыс, Меысь кындзи мӧд Енмыс абу. Эм-ӧ кодкӧ Ме кодьыс?
Мед сійӧ юӧртас, ставсӧ сьӧрсьӧн-бӧрсьӧн висьталас сійӧ кадсяньыс, кор Ме вӧчи важся войтырӧс. Мед висьталас локтанаыс йылысь, юӧртас, мый водзӧ лоӧ.
Энӧ полӧй да энӧ майшасьӧй! Ме ӧд важысянь нин тіянлы висьталі, водзысянь юӧрті, мый лоӧ.
Ті ӧд тӧданныд, мый Ме — Енмыс. Эм-ӧ Ме кындзи мӧд Енмыс?
Мӧд зумыд изйыс абу, мӧдӧс Ме ог тӧд.
Идолъясӧс вӧчысьяс — нинӧм кодьӧсь, налӧн муса бӧлбанъясыс нинӧм вылӧ оз шогмыны.
Налы юрбитысьяс оз аддзыны и оз гӧгӧрвоны, та вӧсна найӧс лоӧ янӧдӧма.
Енъясӧс да бӧлбанъясӧс вӧчысьяс нинӧм бурсӧ оз вайны.
Идолъяслы юрбитысьясӧс лоӧ янӧдӧма, ӧд налысь идолъяссӧ вӧчӧма морт.
Мед найӧ ставныс чукӧртчасны, сувтасны ёрд водзӧ, сэки найӧс полӧм босьтас, ставнысӧ лоӧ янӧдӧма.
Дорччысь вӧчӧ кӧрт нӧш, кучкалӧ сыӧн биа ӧгыръяс вылын донӧдӧм вӧчӧмторсӧ, артмӧдӧ бӧлбанӧс аслас вына киӧн. Ачыс сійӧ сёйны кӧсйӧ, вынтӧммӧ, сылӧн горшыс косьмӧ, рудзмунӧ.
Пуысь вӧчасьысь [бӧрйӧм] пусӧ мурталӧ кӧвйӧн, вӧчӧ сэтчӧ серпас, ёсь пуртӧн вундалӧ серпас сертиыс, вӧчӧ пусьыс мича мыгӧра морт кодь идолӧс, пуктӧ сійӧс керка пытшкас.
Морт кералӧ сус пуяс, вӧрын бӧрйӧ пожӧм да тупу, колана кадӧдз кольӧ найӧс быдмыны. Сійӧ пуктӧ пуяс, и зэрыс киськалӧ найӧс.
Ломтас вылӧ сійӧ чукӧртӧ пу, сотӧ пусӧ, медым шонтысьны, пестӧ би да пӧжалӧ сы вылын нянь.
Тайӧ жӧ пусьыс морт вӧчӧ енмӧс да юрбитӧ сылы, вӧчӧ бӧлбанӧс да копрасьӧ сылы.
Пу джынсӧ морт сотӧ биын, дасьтӧ сы вылын яй да пӧттӧдзыс сёйӧ. Шоналӧм бӧрас сійӧ шуӧ: «Бур, ӧні ме шоналі, и биыс югдӧдӧ меным».
Мӧд джынсьыс сійӧ вӧчӧ енмӧс, вӧчӧ аслыс бӧлбанӧс да юрбитӧ сылы, копрасьӧ сылы да кевмысьӧ: «Мезды менӧ, ӧд тэ — менам ен».
Идолъясӧс вӧчысьяс нинӧм оз тӧдны да оз гӧгӧрвоны, налысь синнысӧ да вежӧрнысӧ тупкӧма, найӧ оз аддзыны да оз гӧгӧрвоны.
Мортыс весиг оз мӧвпыштлы, сылӧн оз тырмы вежӧрыс, оз тырмы мывкыдлуныс, медым шуны: «Пу джынсӧ ме соті биын, биа ӧгыръяс вылын ме пӧжалі нянь, дасьті яй да сёйи сійӧс.
А пуыслӧн колясысь ӧмӧй ме вӧча зывӧктор?
Ме ӧмӧй понда юрбитны путорлы?»
Татшӧм мортыс быттьӧ бус бӧрся вӧтлысьӧ, сылӧн вежӧрыс пемдӧма, и сійӧ шедӧма ылӧгас. Сійӧ оз вермы мездыны асьсӧ да шуны: «Менам киӧн вӧчӧмторйыс — ылӧг».
Эн вунӧд, Яков, эн вунӧд, Израиль, мый тэ — Менам кесйӧг, Ме вӧчи тэнӧ. Тэ — Менам кесйӧг, Израиль, эн вунӧд Менӧ.
Руӧс моз Ме разӧда тэнсьыд лёк вӧчӧмъястӧ, кымӧрӧс моз вешта тэнсьыд мыжъястӧ.
Бергӧдчы Ме дінӧ, Ме мезда тэнӧ!
Нимкодясьӧй, енэжъяс, ӧд Господь вӧчис тайӧс.
Гораа горӧдӧй, му пыдӧсъяс, гораа нимкодясьӧй, керӧсъяс, нимкодясьӧй, вӧр да вӧрса пуяс, ӧд Господь ньӧбис Яковӧс, Господьӧс лоӧ нимӧдӧма Израильӧс мездӧм пыр.
Господь, коді ньӧбис тэнӧ, вӧчис тэнӧ мамыдлӧн кынӧмас, тадзи висьталӧ: — Ме — Господь, Ме вӧчи ставсӧ, ӧтнамӧн шевкниті енэжсӧ, Аслам вына киӧн Ме вольсалі мусӧ. Ме нинӧмӧ бергӧда ылӧгпророкъяслысь индысьпасъяссӧ, эрдӧда туналысьяслысь йӧйталӧмсӧ, шӧйӧвошта тӧдысьясӧс, налысь тӧдӧмлунсӧ вӧча нинӧмӧн. Ме збыльмӧда сійӧ, мый юӧртіс Менам кесйӧгӧй, вӧча сійӧ, мый висьталісны Меӧн мӧдӧдӧмаяс. Ме висьтала, мый Ерусалимӧс бара лоӧ овмӧдӧма, Иуда каръясӧс выльысь лоӧ лэптӧма. Ме выльысь кыпӧда бырӧдӧм каръяс. Джуджыд саридзлы Ме тшӧкта косьмыны, Ме косьта сылысь юяссӧ. Кирлы Ме шуа, мый сійӧ — Менсьым войтырӧс видзысь, сійӧ ставсӧ вӧчас Менам кӧсйӧм серти. Сійӧ шуас Ерусалимлы, тэнӧ пӧ выльысь лоӧ лэптӧма, а крамлы шуас, тэнсьыд подувтӧ пӧ выльысь лоӧ пуктӧма.
Господь тадзи висьталӧ Кирлы, Аслас мавтыштӧмалы: — Ме кута тэнӧ веськыд киӧдыд, сета тэнад киӧ войтыръясӧс, тэнад кипод улӧ — ӧксыясӧс, тэ водзвылын восьта ӧдзӧсъяс, ог лэдз пӧдлавны дзиръяяс.
Ме муна тэ водзвывті да шыльӧда керӧсъяс, жугӧда ыргӧн ӧдзӧсъяс да чегъяла кӧрт тасъяс.
Ме сета тэныд пемыдінын видзан озырлун, дзебӧм озырлун, медым тэ тӧдін: Ме — Господь, Израильлӧн Ен, Ме чуксала тэнӧ нимнад.
Аслам Яков кесйӧг понда, Аслам бӧрйӧм Израиль понда, Ме чуксала тэнӧ нимнад, Ме нимӧді тэнӧ, кӧть тэ Менӧ он тӧд.
Ме — Господь, и мӧдыс абу, Ме кындзи мӧд Енмыс абу!
Тэ он тӧд Менӧ, но Ме сета тэныд вын, медым асыввывсянь рытыввылӧдз ставныс тӧдмаласны, мый Ме кындзи мӧд Енмыс абу, Ме — Господь, и мӧдыс абу!
Ме вӧча югыдсӧ и пемыдсӧ, Ме мӧдӧда бурсӧ и лёксӧ.
Ме, Господь, вӧча ставсӧ тайӧс.
Енэжсьыс мед зэрӧн киссяс веськыдлуныс, мед сійӧ киссяс кымӧръяссьыс, муыс мед воссяс да ваяс мездӧм, веськыдлуныс мед кутас дзоридзавны.
Ме, Господь, вӧча тайӧс.
Курыд шог сылы, коді вензьӧ аслас Вӧчыськӧд, сылы, коді сӧмын жугалӧм гырничтор кодь.
Сёйыс ӧмӧй шуас гырнич вӧчысьыслы: «Мый тэ верман вӧчны?»
Тэнад киӧн вӧчӧмторйыд ӧмӧй шуас, тэ пӧ сямтӧм?
Курыд шог сылы, коді батьсӧ шуӧ шогмытӧм батьӧн, мамсӧ шуӧ шогмытӧм чужтысьӧн.
Господь, Израильӧс Вӧчысь, Израильлӧн вежа Ен тадзи висьталӧ: — Энӧ юасьӧй Менсьым, мый лоас Менам челядькӧд, энӧ велӧдӧй Менӧ, мый Меным вӧчны Аслам киӧн вӧчӧмторъяскӧд.
Ме вӧчи мусӧ, вӧчи му вылас йӧзӧс.
Менам киӧй шевкнитіс енэжсӧ, Ме веськӧдла енэжвыв вынъясӧн.
Ме сувтӧді Кирӧс, медым веськыда вӧчны, Ме шыльӧда сылысь став туйсӧ.
Сійӧ выльысь лэптас Менсьым карӧс, мездас Менсьым йӧзӧс пленысь, лэдзас найӧс мунны, оз босьт налысь дон ни козин. Тадзи висьталӧ Господь Саваоф.
Господь тадзи висьталӧ: — Ставыс тайӧ, мый чукӧртісны египетсаяс, мыйӧн вузасьӧм помысь озырмисны эфиопияса олысьяс да саваса гырысь йӧз, вуджас тэныд, Менам войтырӧй, ставыс лоӧ тэнад.
Найӧ, чептӧн дорӧмаяс, мунасны тэ бӧрся, уськӧдчасны тэ водзӧ да кутасны кевмысьӧмӧн шуавны: «Сӧмын тэкӧд Енмыс, и мӧд Енмыс абу!»
Дзик збыльысь Тэ тыдавтӧм Ен, Израильлӧн Ен, Тэ — Мездысь.
Янӧдӧма лоӧ найӧс, юръяндзим лоӧ налы, яналӧмӧн мунасны ставныс, кодъяс вӧчӧны идолъясӧс.
Но Господь мездас Израильӧс, сійӧс лоӧ мездӧма пыр кежлӧ!
Тіянӧс оз ло янӧдӧма, тіянлы некор оз ло юръяндзим.
Господь эм Ен, Сійӧ вӧчис енэжсӧ, вӧчис-артмӧдіс мусӧ, вӧчис сійӧс зумыдӧн, эз вӧч мусӧ кушӧн, но артмӧдіс мусӧ, медым сэні вӧлі олӧм. Господь тадзи висьталӧ: — Ме — Господь, и мӧд Енмыс абу.
Ме эг гусьӧн висьтав, эг пемыдінын сёрнит, Яковсянь чужысьяслы Ме эг тшӧктывлы корсьны Менӧ кушинысь.
Ме — Господь, Ме сёрнита веськыда, висьтала-юӧрта збыльсӧ.
Чукӧртчӧй да локтӧй, матыстчӧй ставныд, кодъяс ловйӧн колинныд войтыръяс пӧвстысь.
Вежӧртӧмӧсь найӧ, кодъяс новлӧдлӧны ассьыныс пу идолъяснысӧ да кевмысьӧны енлы, коді оз мезды.
Сёрнитчӧй ас костаныд, висьталӧй-вочавидзӧй. Коді важысянь юӧртіс та йылысь, водзысянь висьтавліс тайӧс?
Эг-ӧ Ме, Господь?
Меысь кындзи мӧд Енмыс абу! Ме веськыда вӧчысь Ен, Мездысь, Меысь кындзи мӧдыс абу!
Шыасьӧй Ме дінӧ, му помъясын олысьяс, и ті мездманныд. Ӧд Ме — Енмыс, и мӧдыс абу.
Менам вомысь петӧны збыль кывъяс, вежсьывлытӧм кывъяс, Ме Ачым кыв сетӧмӧн шуа, мый быд морт пидзӧсчанясяс Ме водзӧ да кыв сетӧмӧн кӧсйысяс кесъявны Меным.
«Выныс да веськыдлуныс сӧмын Господьлӧн», — шуасны Ме йылысь.
Господьӧс мустӧмтысьяс яналӧмӧн локтасны Сы дінӧ.
А Израильсянь чужысьясӧс Господь вӧчас веськыдӧн, и найӧ кутасны ошйысьны Сыӧн.
Усис Вил, муас усис Нево, тайӧ идолъяссӧ кыскӧны ас выланыс мудзӧм пемӧсъяс, бӧлбанъясныд сьӧктӧдӧны найӧс.
Тайӧ идолъясыс усисны муас, найӧ оз вермыны дорйыны нуысьясӧс, ӧд найӧс асьнысӧ нуӧны пленӧ.
Кывзӧй Менӧ, Яковсянь чужысьяс, кывзӧй, Израильлӧн коляс войтырыс! Ме новлӧдлі тіянӧс чужӧмсяньныд, новлӧдлі тіянӧс мам кынӧмсяньныд.
Тіян пӧрысь кадӧдз Ме лоа Сійӧ жӧ, тіян дзормытӧдзныд Ме новлӧдла тіянӧс.
Ме вӧчи тіянӧс, и нуа тіянӧс, новлӧдла да видза тіянӧс.
Кодкӧд ті ӧткодяланныд Менӧ, эм-ӧ кодкӧ Ме кодьыс? Кодӧс ті орччӧн сувтӧданныд, медым ӧткодявны Мекӧд?
Идолъяслы юрбитысьяс перйӧны зепсьыныс зарни, веситӧны вески вылын эзысь, медалӧны вӧчасьысьӧс, и сійӧ вӧчӧ таысь енмӧс.
Сэсся найӧ уськӧдчӧны муас, копрасьӧны асланыс енлы.
Найӧ лэптӧны ассьыныс енсӧ пельпом выланыс, нуӧны сійӧс да сувтӧдӧны аслас местаӧ.
Сійӧ сулалӧ, оз вешйыв места вывсьыс.
Найӧ горзӧмӧн шыасьӧны сы дінӧ, но сійӧ оз вочавидз, оз мезды шогъясысь.
Энӧ вунӧдӧй тайӧс, мӧвпалӧй та йылысь.
Сибӧдӧй тайӧс сьӧлӧманыд, лёк вӧчысьяс.
Казьтыштӧй, мый вӧлі водзынджык, му пуксьӧмсяньыс. Ме — Енмыс, и мӧдыс абу, Ме — Енмыс, и Ме кодь мӧдыс абу.
Водзысяньыс Ме юӧрта тіянлы, мый лоӧ, водзвыв висьтала тіянлы сы йылысь, мый эз на вӧв. Ме висьтала тіянлы: Менам мӧвпыштӧмӧй збыльмас, Ассьым кӧсйӧмӧс Ме пӧрта олӧмӧ.
Асыввывсянь Ме чукӧсті варышӧс, ылі муысь Ме чукӧсті сійӧс, коді збыльмӧдас Менсьым мӧвпыштӧмӧс. Ме шуи, и вӧча тайӧс, Ме мӧвпышті, и вайӧда помӧдз.
Кывзӧй Менӧ, чорыд сьӧлӧмаяс, кодъяс ылынӧсь веськыдлунсьыс.
Ме мӧдӧді веськыдлунсӧ, сійӧ матын нин. Ме мӧдӧді мездӧмсӧ, сійӧ оз сёрмы.
Ме сета Сионлы мездмӧмсӧ, Израильлы — Ассьым дзирдлунӧс.
— Вавилон ныв, лэччы да пуксьы му вылас, пукав му вылас, калдея войтырлӧн ныв, ӧд юралан пуклӧсыд тэнад абу нин. Водзӧ оз нин шуны, мый тэ мелі да шань войтыр.
Кутчысь изкиӧ да пызьӧдз из тусьсӧ.
Шыбит вевттьӧдтӧ, кусыньт бӧждортӧ, восьт кокчӧртӧ да вудж ва вомӧн.
Мед тыдовтчас тэнад куш яйыд, мед аддзасны тэнсьыд яндзимтӧ.
Ме водзӧс перъя, и некодӧс ог жалит.
Миян Мездысьным — Израильлӧн вежа Ен, Сылӧн нимыс — Господь Саваоф!
Мун пемыдас, калдея войтырлӧн ныв, да чӧла пукав сэні. Водзӧ тэнӧ оз нин шуны войтыръяс вылын ыджыдалысь ӧксы-аньӧн.
Аслам войтыр вылӧ Ме скӧрми, Ассьым бӧрйӧм йӧзӧс Ме янӧді да сеті тэнад кипод улӧ.
Тэ эн вӧв бур сьӧлӧма на дінӧ, весиг пӧрысь йӧзӧс тэ ёна нартитін.
Тэ шуалін: «Ме пыр лоа ӧксы-аньӧн», но тэ эн мӧвпыштлы, эн кӧсйы тӧдны, мый лоӧ бӧрыннас.
Но ӧні кывзы тайӧс, лышкыда да тӧждысьтӧг олысь аньӧй. Тэ шуалан аслыд: «Ме кодь мӧдыс абу, ме некор ог коль дӧваӧн, ог вошты ассьым челядьӧс».
Но ӧти лунӧ, тӧдлытӧг, суас тэнӧ ӧтиыс и мӧдыс: тэ воштан челядьтӧ и колян дӧваӧн.
Ставыс тайӧ воас тэ вылӧ ыджыд шыӧн, кӧть тэ ёна туналан-кимӧститчан.
Лёксӧ вӧчигӧн тэ эн повлы, тэ шуавлін: «Некод оз аддзы менӧ».
Тэнад сюсьлуныд да тӧдӧмлуныд кежӧдісны тэнӧ туй вывсьыд.
Тэ шуалін аслыд: «Ме кодь мӧдыс абу!»
Но тэнӧ суас лёкыс, тэ весиг он тӧдлы, кытысь сійӧ локтас.
Тэнӧ кытшалас ыджыд шог, тэ он вермы сійӧс вештыны. Виччысьтӧг тэнӧ суас бырӧдӧм, мый йылысь тэ весиг эн мӧвпыштлы.
Сідзкӧ, водзӧ кимӧститчы, ёнджыка на тшыкӧдчы, ӧд тэ том кадсяньыд нин ноксян тайӧн. Гашкӧ, тайӧ отсалас тэныд, гашкӧ, тайӧ видзас тэнӧ лёксьыс.
Тэ мудзӧмыд нин помтӧм туйдӧдӧмысь.
Сідзкӧ, мед локтасны енэжсӧ туялысь-видзӧдысьяс да кодзув серти туналысьяс, выль тӧлысь серти найӧ мед висьталасны тэныд лоанасӧ.
Мед найӧ мездасны тэнӧ сыысь, мый шуӧма лоны тэкӧд. Но найӧ идзас кодьӧсь, биыс сотас найӧс, найӧ оз вермыны видзны асьнысӧ ыпъялан биысь.
Наысь весиг ӧгыр оз коль, медым шонтысьыштны. Наысь он песты бипур, медым сы дорын пукалыштны.
Татшӧмӧсь найӧ, кодъяскӧд тэ уджалін, кодъяскӧд том кадсяньыд тэ вузасин-ньӧбасин.
Найӧ быдӧн мунісны асланыс туйӧд, некод оз мезды тэнӧ.
— Кывзӧй тайӧс, Яковсянь чужысьяс! Ті шусянныд Израиль нимӧн, ті петінныд Иуда чужанкотырысь, ті кыв сетӧмӧн кӧсйысянныд Господь нимӧн, шуанныд, мый кесъяланныд Израильлӧн Енлы, но вӧчанныд тайӧс онӧ збыльысь да онӧ веськыда.
Ті шуанныд асьнытӧ вежа карысь петысьясӧн, ті лача кутанныд Израильлӧн Ен вылӧ.
Сылӧн нимыс — Господь Саваоф.
Ме водзвыв висьталі, мый вӧлі нин, Менам вомысь петіс тайӧ, Ме юӧрті та йылысь, Ме вӧчи тайӧс виччысьтӧг, и ставыс збыльмис.
Ме тӧді, мый тэ асныра, мый тэнад сьыліыд кӧртысь, плешкыд ыргӧнысь.
Та вӧсна Ме водзвыв висьтавлі тэныд ставсӧ, Ме водзвыв юӧртлі тэныд, мый лоӧ, медым бӧрыннас эн шу: «Менам идолӧй вӧчис тайӧс, бӧлбанӧй тшӧктіс тадзи лонысӧ».
Ӧні мӧвпав сы йылысь, мый водзынджык кывлін.
Ті ӧмӧй онӧ эскӧй таӧ?
Ӧнісянь Ме висьтала тэныд выльтор, висьтала гусятор, мый йылысь тэ эн на тӧдлы.
Тайӧ инӧ ӧні, а эз коркӧ ин. Та йылысь тэ эн кывлы, та вӧсна он вермы шуны, мый тэ тӧдан нин.
Тэ эн кывлы, эн тӧдлы та йылысь, тэнад пельыд важысянь тупкыса.
Ме тӧді, мый тэ ылӧдчысь, мам кынӧмсяньыд нин тэнӧ шуӧны паныд кыпӧдчысьӧн.
Аслам нимӧй вӧсна Ме ог кисьт Ассьым скӧрлунӧс, Аслам нималӧмӧй вӧсна Ме кута Ачымӧс тэнӧ бырӧдӧмысь.
Ме сывді тэнӧ, но эзысьӧс моз тэнӧ он сӧстӧммӧд, Ме тӧдмалі тэнӧ сьӧкыд нуӧм пыр.
Ас вӧсна, дзик Ас вӧсна Ме вӧча тадзи, Ме ог лэдз янӧдны Ассьым нимӧс, Ассьым дзирдлунӧс Ме некодлы ог сет.
Кывзы Менӧ, Яков, кывзы, Израиль. Ме тэнӧ чукӧсті. Тайӧ — Ме. Ме — Медводдзаыс, Ме — Медбӧръяыс.
Менам киӧй вӧчис мусӧ, Менам веськыд киӧй шевкнитіс енэжсӧ.
Ме чукӧста найӧс, и найӧ ӧтвылысь сувтасны Ме водзӧ.
Чукӧртчӧй ставныд да кывзӧй! Коді на пӧвстысь водзвыв висьталіс та йылысь?
Господь радейтӧ сійӧ мортсӧ, коді збыльмӧдас Господьлысь кӧсйӧмсӧ Вавилон йылысь, петкӧдлас Сылысь вынсӧ калдея войтыр вылын.
Ме Ачым юӧрті тайӧс да чукӧсті сійӧ мортсӧ, Ме вайӧді сійӧс, и сылӧн став уджыс артмӧ.
Матыстчӧй Ме дінӧ да кывзӧй! Водзысяньыс Ме висьтавлі тіянлы восьсӧн.
Сійӧ кадсяньыс, кор ставыс тайӧ заводитчис, Ме вӧлі сэні нин.
Ӧні Господь Ыджыдыс сетіс меным Ассьыс ловсӧ да мӧдӧдіс менӧ.
Господь, тэнӧ Мездысь, Израильлӧн вежа Ен, тадзи висьталӧ: — Ме — Господь, тэнад Енмыд, Ме велӧда тэнӧ бурас, нуӧда тэнӧ сійӧ туйӧдыс, кыті тэныд колӧ муннысӧ.
Тэ кӧ олін Менам тшӧктӧмъясӧй серти, сэки эськӧ тэнад лӧньлуныд ю моз визувтіс, веськыдлуныд саридзвыв гыяс кодь вӧлі, тэнад челядьыд эськӧ вӧлі лыа мында, тэсянь чужысьясыд — лыа чир мында. Налӧн нимныс эськӧ эз вош, найӧ эськӧ эз бырны Менам син водзысь.
Петӧй Вавилонысь, пышйӧй Калдеяысь! Гораа нимкодясьӧмӧн юӧртӧй, висьтавлӧй та йылысь, паськӧдӧй тайӧ юӧрсӧ му помӧдзыс.
Висьтавлӧй тадзи: Господь мездіс Ассьыс Яков кесйӧгсӧ.
Кор Господь нуӧдіс найӧс овтӧминӧд, найӧ эз сьӧкыдавны горш косьмӧмысь. Господь сетіс налы изйысь ва, Сійӧ поткӧдіс изсӧ, и сэтысь визувтіс ва.
Ентӧг олысьяслӧн лӧньлуныс абу, — висьталӧ Господь.
Кывзӧй менӧ, саридз дорын олысьяс, сюся кывзӧй, ылысса войтыръяс! Господь чукӧстіс менӧ чужтӧдз на, мам кынӧмын на сетіс меным ним.
Сійӧ вӧчис менсьым кывйӧс ёсь шыпуртӧн, вевттис менӧ Аслас ки вуджӧрӧн, вӧчис менӧ ёсь ньӧвйӧн, Аслас ньӧвпуртӧсын видзис менӧ.
Сійӧ шуис меным: «Израиль, тэ — Менам кесйӧг, тэ пыр Ме петкӧдла Ассьым дзирдлунӧс».
А ме чайті, мый весьшӧрӧ ме мырси-уджалі, весьшӧрӧ да ковтӧг ассьым вынӧс вошті.
Но Господьсянь лоӧ меным веськыда мыждӧмыс, менам Енсянь лоӧ меным тырдоныс.
Господь вӧчис менӧ Аслас кесъялысьӧн мам кынӧмын на, медым ме Сылань бергӧді Яковӧс, медым Израиль чукӧртчис Сы дінӧ.
Господь нимӧдӧ менӧ Аслас син водзын, менам Енмӧй — менам выныс.
Ӧні Господь тадзи висьталӧ: — Тэ — Менам кесйӧг, тэ выльысь сувтӧдан Яковлысь чужанкотыръяссӧ, бергӧдан Израильлысь коляс войтырсӧ, но тайӧ этша на. Ме вӧча тэнӧ войтыръяслы югыдӧн, медым Меӧн мӧдӧдӧм мездмӧмыс воис му помӧдзыс.
Господь, Израильӧс Мездысь, сылӧн вежа Ен, тадзи висьталӧ ыджыдалысьяслӧн кесйӧглы, кодӧс ставныс увтыртӧны, кодӧс лёкӧдӧны войтыръяс: — Тэнӧ аддзигӧн ӧксыяс сувтасны, юралысьяс копыртчасны муӧдзыс, ӧд Господь эскана, ӧд Израильлӧн вежа Ен бӧрйис тэнӧ.
Господь тадзи висьталӧ: — Ме кылі тэнӧ бур кадӧ, отсалі тэныд мездман лунӧ.
Ме видзи тэнӧ, пукті тэнӧ тайӧ войтырыслы йитӧд пыдди, медым тэ выльысь сӧвмӧдін тайӧ мусӧ, медым тэ юклін кушмӧм муяссӧ, медым тэ шуин дзескыдінӧ йӧршитӧмаяслы: «Петӧй!», пемыдінын пукалысьяслы: «Петкӧдчӧй!»
Туй бокысь найӧ аддзасны сёян, куш мылькъяс лоӧны налы йирсянінӧн.
Найӧ оз кутны тшыгъявны, налӧн оз кут косьмыны горшныс, найӧс оз пӧж шондіыс, ӧд найӧс пондас нуӧдны Сійӧ, коді бур сьӧлӧма на дінӧ, Сійӧ вайӧдас найӧс ва петанінъяс дорӧ.
Став Ассьым керӧсъясӧс Ме вӧча туйясӧн, Менам туйясӧй пондасны мунны выліинті.
Со, Менам войтырӧй локтас ылісянь: ӧтияс — войвывсянь, мӧдъяс — рытыввывсянь, мукӧдыс — Синим муысь.
Нимкодясь, енэжыс, гажӧдчы, муыс, гораа нимкодясьӧй, керӧсъяс!
Ӧд Господь бурӧдіс Ассьыс войтырсӧ, Сійӧ бурсьӧлӧмтчӧ Аслас коньӧръяс дінӧ.
Сион шуліс: «Господь эновтіс менӧ, менам Ыджыдӧй вунӧдіс менӧ!»
Ань ӧмӧй вунӧдас ассьыс пузчужӧм кагасӧ, сійӧ ӧмӧй оз кут жалитны ассьыс чужтӧм кагасӧ?
Но весиг мам кӧ вунӧдас ассьыс кагасӧ, Ме тэнӧ ог вунӧд!
Ме серпасалі тэнӧ Аслам ки пыдӧсӧ, тэнад стенъясыд — век Менам син водзын.
Тэнад пияныд тэрмасьӧны локны тэ дінӧ, а тэнӧ пазӧдысьяс-куштысьяс пышйӧны.
Лэпты синтӧ да гӧгӧр видзӧдлы: тэнад пияныд ставныс чукӧртчӧны, локтӧны тэ дінӧ.
Ме кыв сетӧмӧн кӧсйыся Аслам олӧмӧн, — висьталӧ Господь, — кыдзи гӧтырпулӧн мичмӧдчанторйыс зарни-эзысь, тадзи пияныд лоӧны тэнад мичмӧдчанторйӧн.
Тэнсьыд муястӧ куштӧма, сэні эз коль олысьыс, тэнсьыд мутӧ дзикӧдз пазӧдӧма. Но тэныд дзескыд лоӧ уна лыда олысьяс вӧсна, тэнӧ куштысьяс дзикӧдз ылыстчасны тэ дінысь.
Тэ воштін челядьтӧ, но тэнад нӧшта на лоӧны челядь. Найӧ шуасны тэныд: «Миянлы дзескыд тані, сет миянлы оланін».
Тэ чуйман: «Коді меным чужтіс найӧс?
Менам эз вӧвны челядьӧй, ме вӧлі нӧбасьны вермытӧмӧн, ме вӧлі пленын, чужан муысь ылын.
Коді нӧ быдтіс найӧс?
Ме вӧлі ӧтка — кытысь нӧ лоины найӧ?»
Господь Ыджыдыс тадзи висьталӧ: — Ме нюжӧда киӧс войтыръяслань, лэпта Ассьым дӧрапасӧс чужанкотыръяслы, и найӧ ваясны тэнсьыд пиянтӧ ки выланыс, тэнсьыд нывъястӧ — пельпом выланыс.
Ӧксыяс пондасны тӧждысьны тэнад челядь вӧсна, ӧксыяслӧн гӧтыръясныс пондасны вердны тэнсьыд ныв-питӧ.
Найӧ пондасны муӧдз копрасьны тэныд, тэнад кокысь буссӧ нювны. Сэки тэ тӧдмалан, мый Ме — Господь, и Ме вылӧ лача кутысь оз янав.
Вына тышкамортлысь ӧмӧй позьӧ босьтны тышын мырддьӧмасӧ? Вермысьлысь ӧмӧй позьӧ мырддьыны пленӧ босьтӧмаясӧс?
Но Господь тадзи висьталӧ: — Ӧні вына тышкамортлысь лоӧ мырддьӧма пленӧ босьтӧмаясӧс, дзескӧдысьлысь лоӧ босьтӧма мырддьӧмасӧ.
Ме Ачым кута вермасьны тэныд паныд сувтысьяскӧд, Ме мезда тэнсьыд челядьтӧ.
Тэнӧ нартитысьясӧс Ме пӧткӧда налӧн жӧ вир-яйнас, найӧ пондасны юны ассьыныс вирсӧ да коддзасны, кыдзи коддзӧны выль винаысь.
Сэки ставныс тӧдмаласны, мый Ме — Господь, тэнӧ Мездысь, Яковлӧн вына Ен.
Господь тадзи висьталӧ: — Кӧні тіян мамныдлӧн торйӧдчан гижӧдыс, Ме кӧ эновті сійӧс? Меным водзӧсӧн сетысьяс пӧвстысь кодлы Ме вузалі тіянӧс?
Тіянӧс вузалӧма асланыд мыжъясныд вӧсна, лёк вӧчӧмныд вӧсна вӧтлӧма тіянлысь мамнытӧ.
Мыйла некод эз вӧв, кор Ме волі тіян дінӧ? Мыйла некод эз вочавидз, кор Ме чуксалі тіянӧс?
Менам киӧй ӧмӧй дженьдаммис, Ме ӧмӧй вынтӧмми, медым мездыны тіянӧс?
Менам ӧлӧдӧмысь саридз косьмӧ, юяс лоӧны косінӧн, сэні ватӧмысла чериыс сісьмӧ, горш косьмӧмысла кулӧ.
Енэжсӧ Ме вевття сап пемыдӧн, сылы вевттьӧднас лоӧ шогалан паськӧм.
Господь Ыджыдыс сетіс меным мывкыд сёрни, медым аслам кывйӧн ме верми ёнмӧдны жебмӧмаясӧс.
Быд асыв Сійӧ садьмӧдӧ, садьмӧдӧ менсьым пельӧс, медым бур велӧдчысь моз ме кывзі Сійӧс.
Господь Ыджыдыс восьтіс менсьым пельӧс, и ме эг пыксьы, эг бӧрыньтчы.
Ме сеті кучкавны ассьым мышкӧс, лэдзи нетшкыны тошкӧс.
Ассьым чужӧмӧс эг тупкы менӧ лёкӧдысьясысь да ме вылӧ сьӧлалысьясысь.
Господь Ыджыдыс отсалӧ меным, та вӧсна ме ог яндысь, менам чужӧмӧй из кодь. Ме тӧда, меным оз ло яндзим, ӧд матын Сійӧ, коді петкӧдлӧ, мый ме мыжтӧм.
Коді кӧсйӧ менӧ мыжавны? Сувтам ёрд водзӧ!
Коді кӧсйӧ меным паныд сувтны?
Мед матыстчас!
Господь Ыджыдыс отсалӧ меным. Коді мыждас менӧ?
Найӧ ставныс паськӧм моз важмасны, найӧс воз сёяс.
Коді тіян пӧвстысь полӧ Господьысь, кывзысьӧ Сылӧн кесйӧглысь?
Коді ветлӧ пемыдас, кӧні абу югыдыс, сійӧ мед лача кутӧ Господьлӧн нимыс вылӧ, мед мыджсьӧ аслас Ен вылӧ.
Ыпъялан биас асьныд мунӧй, донӧдӧм ньӧвъяс улас асьныд пырӧй, ті, кодъяс пестанныд би да лыйланныд биа ньӧвъяс.
Со мый вӧчас тіянкӧд Менам киӧй — ті сьӧкыда куланныд.
— Кывзӧй Менӧ, веськыдлунсӧ да Господьӧс корсьысьяс!
Видзӧдлӧй изкыртаыс вылӧ, мыйысь вӧчӧма-кералӧма тіянӧс, видзӧдлӧй му пыдӧсӧ, кытысь кодйӧма-перйӧма тіянӧс.
Видзӧдлӧй Ӧвраам батьныд вылӧ да тіянӧс чужтысь Сарра вылӧ. Кор Ме чукӧсті Ӧвраамӧс, сійӧ вӧлі ныв-питӧм на, но Ме бурсии сійӧс, рӧдмӧді сысянь уна чужысьӧс.
Господь бурӧдас Сион, бурӧдас пазӧдӧм карсӧ, сылысь овтӧминсӧ вӧчас рай кодьӧн, сылысь кушинсӧ вӧчас Господьлӧн сад йӧрӧн.
Сэні пондасны нимкодясьны да гажӧдчыны, кыпыда ошкыны да сьывны.
Кывзы Менӧ, войтырӧй, сюся кывзы Менӧ, войтырӧй! 
Индӧдыс воас Месянь, Менам веськыда мыждӧмӧй лоас югыдӧн войтыръяслы.
Менам веськыдлунӧй матын, Месянь мездмӧмыс регыд нин воас, Менам киӧй мыждас войтыръясӧс.
Саридз дорын олысьяс виччысьӧны Месянь отсӧг, лача кутӧны Менам вынӧй вылӧ.
Лэптӧй синнытӧ енэжланьыс, видзӧдлӧй увлань му вылас. Енэжыс тшын моз бырас, муыс паськӧм моз важмас, му вылын олысьяс геб моз куласны.
Но Меӧн мӧдӧдӧм мездмӧмыс пыр лоӧ, Менам веськыдлунӧй оз вежсьыв.
Кывзӧй Менӧ, веськыда олысьяс, ті, кодъяс видзанныд сьӧлӧманыд Менсьым Индӧдӧс.
Энӧ полӧй йӧзлӧн омӧльтӧмысь, налӧн лёкӧдӧмысь энӧ повзьӧй.
Паськӧмӧс моз найӧс воз сёяс, вурунӧс моз йирас-бырӧдас.
Но Менам веськыдлунӧй пыр лоӧ, Меӧн мӧдӧдӧм мездмӧмыс лоӧ нэмъяс чӧж.
Садьмы, кыпӧдчы, вынсяв, Господьлӧн ки!
Садьмы важся кадӧ моз, кыпӧдчы, кыдзи важӧн вӧчлін.
Эз-ӧ Господьлӧн киыс ви Рахавӧс, зэ-ӧ бытшкы саридзса гундырӧс?
Эз-ӧ Господьлӧн киыс косьты саридзсӧ, пыдӧстӧм васӧ, эз-ӧ вӧч саридз пыдӧссӧ кос туйӧн, кыті мунісны мездмӧмаяс?
Господьлӧн мездмӧмаяс бӧр бергӧдчасны, гораа нимкодясьӧмӧн локтасны Сион керӧс вылӧ, налӧн юр весьтын лоӧ помасьлытӧм нимкодясьӧм.
Найӧ пондасны нимкодясьны да гажӧдчыны, а шогсьӧмыс да ышлолалӧмыс ылыстчас на дінысь.
— Ме, Ме — тэнӧ Бурӧдысьыс!
Мыйла тэ полан мортысь, кодлӧн олӧмыс дженьыд, кодлӧн олан лунъясыс турунлӧн кодь? А Господьӧс тэ вунӧдан. Сійӧ вӧчис тэнӧ, шевкнитіс енэжсӧ, зумыда сувтӧдіс мусӧ.
Мыйла тэ пыр полан дзескӧдысьлӧн скӧралӧмысь, полан сыысь, коді дась тэнӧ бырӧдны?
Но кӧні нӧ тэнӧ дзескӧдысьлӧн скӧралӧмыс?
Пленӧ босьтӧмаӧс регыд лоӧ мездӧма, сійӧ оз кув гуын, оз кут тшыгъявны.
Ме — Господь, тэнад Енмыд, Ме гызьӧда саридзсӧ, и гыясыс ыджыд шыӧн кутасны бузгыны. Менам нимӧй — Господь Саваоф.
Ассьым кывъясӧс Ме пукті тэнад вомӧ, вевтти тэнӧ Аслам ки вуджӧрӧн. Ме шевкниті енэжсӧ, зумыда сувтӧді мусӧ. Ме шуа Сионлы: «Тэ — Менам войтырӧй!»
Садьмы, садьмӧдчы, чеччы, Ерусалим! Господьлӧн киысь тэ босьтін Сылысь скӧрлуна дозсӧ, юин сэтысь, юин кушӧдзыс да кутін довъявны.
Став челядь пӧвстысь, тэнад чужтӧмаясысь, некодлы вӧлі нуӧдны тэнӧ. Став челядь пӧвстысь, тэнад быдтӧмаясысь, некодлы вӧлі кутыштнысӧ киӧдыд.
Кыкпӧвста шог суис тэнӧ: куштӧм да бырӧдӧм, тшыгъялӧм да шыпурт. Коді жалитас тэнӧ? Коді бурӧдас тэнӧ?
Лэчкӧ шедӧм антилопа моз тэнад пияныд вынтӧммисны, куйлӧны быд туйвежын. Найӧ пӧтісны Господьлӧн скӧрлунысь, тэнад Енлӧн чорыда мыждӧмысь.
Тэ, коді коддзӧмыд, но абу винаысь, коньӧр войтырӧй, кывзы тайӧс.
Тэнад Ыджыдыд, Господь Енмыд, коді дорйӧ Ассьыс войтырсӧ, тадзи висьталӧ: — Со, Ме босьта тэнад киысь чашасӧ, Ассьым скӧрлуна дозйӧс. Сэтысь юӧмысь тэ довъялін, но водзӧ сэтысь он нин кут юны. Ме сета сійӧс нартитысьяслы, кодъяс тшӧктісны тэныд нюжӧдчыны му вылас, медым мунны тэ вывті, кодъяс вӧчисны тэнсьыд мышкутӧ кокув муӧн, ветлысь-мунысьяслы туйӧн.
Садьмы, Сион, чеччы, вевттьысь аслад вынӧн!
Ерусалим, вежа кар, пасьтав ассьыд дзирдлуна паськӧмтӧ!
Тэнад туйяс вывті оз нин кут ветлыны вундыштчытӧм да пеж оласнога.
Пыркӧд ас вывсьыд буссӧ, чеччы, пленӧ босьтӧм Ерусалим!
Шыбит сьылі вывсьыд чептӧ, пленӧ босьтӧм Сион ныв!
Господь тадзи висьталӧ: — Дон босьттӧг вӧлі вузалӧма тіянӧс, сьӧм мынтытӧг лоӧ мездӧма-ньӧбӧма тіянӧс!
Господь Ыджыдыс тадзи висьталӧ: — Коркӧ Менам войтырӧй муніс Египетӧ, медым овны сэні. Сэсся Ассур некутшӧм помкатӧг топӧдіс-дзескӧдіс найӧс.
А ӧні мый Ме аддза? — висьталӧ Господь.
— Менсьым войтырӧс босьтісны дон мынтытӧг, налӧн юралысьясыс бӧрдӧны, — висьталӧ Господь. — Менсьым нимӧс быд лун омӧльтӧны.
Но Менам войтырӧй кутас тӧдны Менсьым нимӧс.
Воас лун, и найӧ тӧдмаласны, мый Ме — Сійӧ, коді шуӧ: «Тайӧ Ме».
Кутшӧм шензьӧданаӧсь кокъясыс сылӧн, коді керӧсъяс вывті нуӧ бур юӧр, юӧртӧ лӧнь олӧм йылысь, вайӧ нимкодь юӧр, висьталӧ мездмӧм йылысь, Сионлы шуӧ: «Тэнад Енмыд ӧксыалӧ!»
Тэнад кар видзысьясыд гораа горзӧны, ставныс ӧтвылысь нимкодясьӧны. Асланыс синмӧн найӧ аддзӧны: Господь бӧр локтӧ Сионӧ.
Кыпыда гажӧдчы, пазӧдӧм Ерусалим кар! Сьылӧй ставныд ӧтвылысь, ӧд Господь бурӧдіс Ассьыс войтырсӧ, мездіс Ерусалим.
Став войтыръяслӧн син водзын Господь петкӧдліс Аслас вежа килысь вынсӧ.
Му помын олысьяс ставныс аддзасны миян Енсянь мездӧмсӧ.
Мунӧй, мунӧй, ылыстчӧй сэтысь, энӧ инмӧдчӧй пежас, дзикӧдз ылыстчӧй сэтысь, лоӧй сӧстӧмӧсь, Господьлысь вежа дозъяс новлӧдлысьяс.
Ті петанныд тэрмасьтӧг, онӧ пышйӧй, ӧд тіян водзвылын мунас Господь, Израильлӧн Ен бӧрвывсяньныд кутас видзны тіянӧс.
— Менам кесйӧглӧн ставыс кутас артмыны, Сійӧс кутасны бурӧ пуктыны, ыдждӧдлыны да нимӧдны.
Унаӧн шензисны Сы вылӧ, сэтшӧм ёна вӧлі дойдалӧма Сійӧс, Сійӧ эз нин вӧв морт кодь.
Уна войтыр пондасны шензьыны Сы вылӧ, ӧксыяс тупкасны вомнысӧ Сы водзын, ӧд найӧ аддзасны сійӧ, мый йылысь налы эз висьтавлыны, тӧдмаласны сійӧ, мый йылысь найӧ эз кывлыны.
Коді эскис миян висьталӧмӧ? Кодлы петкӧдчис Господьлӧн вына киыс?
Веж петас моз Сійӧ быдмис Господь водзын, быдмис кос муысь чепӧсйӧм турун моз.
Сылӧн эз вӧв мичлун ни тӧдчанлун, медым ми видзӧдім Сы вылӧ. Чужӧм-мыгӧрнас Сійӧ эз вӧв сэтшӧм морт, коді эськӧ кыскис миянӧс Ас дінас.
Йӧзыс Сійӧс увтыртісны-ӧтдортісны, Сійӧ нуис уна сьӧкыдлун да висьӧм, а ми бергӧдім Сыысь ассьыным чужӧмнымӧс.
Сійӧс увтыртісны, и ми нинӧм туйӧ пуктім Сійӧс.
Сійӧ босьтіс Ас вылас миянлысь висьӧмнымӧс, нуис миянлысь дойяснымӧс.
Ми чайтім, мый Енмыс дойдалӧ, нӧйтӧ да мыждӧ Сійӧс.
Но Сійӧс вӧлі бытшкӧма миян мыжъяс вӧсна, дойдалӧма миян лёк вӧчӧмъяс вӧсна.
Сійӧ нуис мыждӧмсӧ, медым миян вӧлі лӧньлун. Сылӧн дойясӧн ми бурдім.
Ми ставным вӧлім вошӧм ыжъяс кодьӧсь, быдӧн кежим асланым туй вылӧ, но Господь пуктіс Сы вылӧ ставнымлысь мыжъяснымӧс.
Сійӧс нӧйтісны-дойдалісны, Сійӧ сьӧкыдсӧ нуис Ас кӧсйӧм сертиыс, воча эз шуась. Ыжӧс моз Сійӧс нуӧдісны начкыны, шырысь водзын чӧв олысь баля моз Сійӧ эз восьтлы Ассьыс вомсӧ. 
Сійӧс кутісны, мыждісны, нуӧдісны, нетшыштісны ловъяяслӧн му вылысь, но некод эз шогсьы, мый лоӧ Сыкӧд. Менам войтырлӧн мыжъяс вӧсна Сійӧс нӧйтісны кувтӧдзыс.
Сылы дасьтісны дзебанін лёк вӧчысьяскӧд орччӧн, но Сійӧс гуалісны озырлӧн дзебанінӧ. Лёксӧ Сійӧ эз вӧчлы, Сійӧ некор эз пӧръясьлы.
Господьлӧн вӧлі шуӧма дойдны Сійӧс, мӧдӧдны Сылы сьӧкыдлунъяс.
Но кор Сійӧ Асьсӧ ваяс мыж вештан вись пыдди, Сійӧ аддзас Сысянь чужысьясӧс, кодъяс кутасны дыр овны. Господьлӧн кӧсйӧмыс инас Сы пыр.
Аслас уджыс вылӧ видзӧдігӧн Сійӧ кутас нимкодясьны.
Менсьым кӧсйӧмӧс тӧдӧмӧн Менам веськыда олысь Кесйӧгӧй унаӧс вӧчас веськыдӧн, босьтас Ас вылас налысь мыжъяссӧ.
Та вӧсна Ме сета Сылы пай ыджыдъяс пӧвстын, тышын шедӧдӧмасӧ Сійӧ пондас юкны вынаяскӧд, ӧд Сійӧ сетіс Асьсӧ кулӧм вылӧ, Сійӧс пуктісны лёк вӧчысьяс лыдӧ. Сійӧ босьтіс Ас вылас уна йӧзлысь мыжъяссӧ, кевмысис лёк вӧчысьяс вӧсна.
Нимкодясь, сьӧктыны вермытӧм, кага вайлытӧм ань! Гораа нимкодясь да гажӧдчы, чужтан дой тӧдлытӧм ань!
Ӧд эновтӧмалӧн ныв-пиыс уна, ёна унджык верӧсыскӧд олысьлӧн дорысь, — висьталӧ Господь.
Ыдждӧд ассьыд чомтӧ, паськӧд ассьыд лэбувтӧ.
Эн яндысь, кузьджыка нюжӧд чом зэвтан гезъястӧ, зумыдджыка сувтӧд чом кутан майӧгъястӧ.
Тэ паськӧдчан веськыдвылӧ и шуйгавылӧ, тэнад челядьлы вичмас мукӧд войтырлӧн муясыс, найӧ овмӧдчасны кушмӧм каръясӧ.
Эн пов, водзӧ тэнӧ некод оз кут янӧдны, эн майшась, тэныд оз ло юръяндзим.
Тэ вунӧдан томдырся яналӧмтӧ, он нин кут казьтывны дӧва кадся увтыртӧмтӧ.
Ӧд тэнад верӧсыд — тэнӧ Вӧчысьыд, Сылӧн нимыс — Господь Саваоф.
Тэнӧ Мездысьыд — Израильлӧн вежа Ен, Сійӧс шуӧны став му пасьтала ыджыдалысь Енмӧн.
Господь корӧ тэнӧ эновтӧм да ловнас усьӧм гӧтырӧс моз, том кадӧ босьтӧм гӧтырӧс моз, кодӧс вӧлі эновтӧма. Тадзи висьталӧ тэнад Енмыд.
Этшаник кад кежлӧ Ме эновті тэнӧ, но ыджыд муслунӧн Ме бӧр сибӧда тэнӧ.
Скӧрлунӧй ыпнитігӧн Ме кад кежлӧ бергӧдчи тэысь, но Ме кута буравны тэ дінӧ, лоа помтӧг бур сьӧлӧма тэ дінӧ, — висьталӧ Господь, тэнӧ Мездысь.
Ме сета кыв, кыдзи Ной кадӧ ва ойдігӧн. Сэки Ме кыв сеті, мый Ной кадся кодь ва ойдӧмыс оз нин ло му вылын. Тадзи жӧ ӧні Ме сета кыв, мый водзӧ ог нин кут скӧравны тэ вылӧ, ог кут видны тэнӧ.
Керӧсъяс вешъясны, мылькъяс вӧрзьыласны, а Менам буралӧмӧй тэ дінӧ оз вежсьыв, лӧньлун вайысь Менам йитӧдӧй оз вӧрзьыв, — висьталӧ тэнӧ радейтысь Господь.
Коньӧрӧй, тӧвнырыс шатлӧдлӧ тэнӧ, некод оз вермы бурӧдны тэнӧ.
Видзӧдлы, тэнсьыд изъястӧ Ме вевття бирюзаӧн, тэнсьыд подувтӧ Ме вӧча сапфирысь, тэнсьыд башняястӧ — рубинысь, дзиръяястӧ — жемчугысь, стенъястӧ — дона изъясысь.
Ачыс Господь велӧдӧ тэнсьыд пиянтӧ, найӧс виччысьӧ ыджыд шуд да лӧньлун.
Веськыдлуныс ёнмӧдас тэнӧ, тэнӧ оз кутны дзескӧдны, тэ он кут повны таысь, тэныд оз вӧчны лёксӧ — сійӧ оз матыстчы тэ дінӧ.
Уськӧдчас кӧ кодкӧ тэ вылӧ, тайӧ абу Месянь.
Коді уськӧдчас тэ вылӧ, сійӧ ачыс усяс.
Со, Ме вӧчи дорччысьӧс, коді ӧгыръясысь пестӧ би да дорӧ сэні тышкасянторъяс. Ме сідзжӧ вӧчи бырӧдысьӧс, коді гӧгӧр пазӧдӧ-бырӧдӧ.
Но ни ӧти тышкасянтор, мый вӧчӧма тэныд паныд, оз вермы тэнӧ.
Быдӧнӧс, коді мыжалӧ тэнӧ, тэ ачыд мыждан.
Тадзи лоӧ Господьлӧн кесйӧгъяскӧд. Ме вӧча найӧс веськыдӧн, — висьталӧ Господь.
Кывзӧй, кодлӧн горшныд косьмӧ, локтӧй ставныд ва дінӧ!
Весиг ті, кодлӧн абу сьӧмныд, локтӧй, босьтӧй да сёйӧй!
Сьӧмтӧг да дон мынтытӧг босьтӧй вина да йӧв.
Мыйла ті сьӧм мынтанныд сыысь, мый абу сёян? Мыйла ті удждоннытӧ сетанныд сыысь, мый оз пӧткӧд?
Сюся кывзӧй Менӧ да пӧткӧдчӧй бурнас, сэки тіян ловныд пондас нимкодясьны.
Локтӧй Ме дінӧ, сюся кывзӧй Менӧ! Кывзӧй Менӧ, и ті кутанныд овны! Давид дінӧ вежсьывлытӧм буралӧмӧй вӧсна Ме кӧртала тіянкӧд пыр кежлӧ йитӧд.
Давид пыр Ме петкӧдлі войтыръяслы Ассьым вынӧс, пукті сійӧс налы юралысьӧ да веськӧдлысьӧ.
Ті чукӧстанныд ас дінаныд войтырӧс, кодӧс водзынджык энӧ тӧдлӧй. Войтыръяс, кодъяс эз тӧдлыны тіянӧс, тэрмасьӧмӧн локтасны тіян дінӧ Господь Енныд вӧсна, Израильлӧн вежа Ен вӧсна, ӧд Сійӧ нимӧдіс тіянӧс.
Корсьӧй Господьӧс, кор позьӧ на аддзыны Сійӧс, шыасьӧй Сы дінӧ, кор Сійӧ матын.
Лёк вӧчысь мед бергӧдчас аслас лёк туй вылысь, мыж вӧчысь мед эновтчас аслас лёк мӧвпъясысь, сійӧ мед бергӧдчас Господь дінӧ, ӧд Господь бур сьӧлӧма, мед локтас миян Ен дінӧ, ӧд Сійӧ прӧститӧ.
— Тіян мӧвпъясныд абу Менам мӧвпъясӧй, тіян туйясныд абу Менам туйясӧй, — висьталӧ Господь.
Кыдзи енэжыс ёна вылын мусьыс, тадзи Менам туйясӧй ёна вылынӧсь тіян туйясысь, Менам мӧвпъясӧй ёна вылынӧсь тіян мӧвпъясысь.
Кор зэрыс да лымйыс киссьӧны енэжсьыс, сэтчӧ найӧ бӧрсӧ оз нин бергӧдчыны, но найӧ юкталӧны мусӧ, медым сійӧ сетас быдтас, медым сетас кӧйдыс кӧдзысьлы, и нянь — сёйысьлы.
Тадзи жӧ Менам кывйӧй, мый петӧ Менам вомысь, оз бергӧдчы Ме дінӧ кушӧн, а вӧчӧ Менам кӧсйӧм серти, вӧчӧ ставсӧ, мый могысь Ме мӧдӧді сійӧс.
Ті мунанныд нимкодясьӧмӧн, тіянӧс колльӧдасны лӧня.
Керӧсъяс да мылькъяс пондасны нимкодясьны тіян водзвылын, видзвывса пуяс коръяснас пондасны долыда швачӧдчыны.
Йӧн пыдди кутас быдмыны кипарис, петшӧр пыдди — мирт.
Ставыс тайӧ лоӧ Господьӧс нимӧдӧм вылӧ, лоӧ нэмъяс кежлӧ индысьпасӧн.
Господь тадзи висьталӧ: — Мыждӧй веськыда, олӧй веськыда, ӧд регыд воас Месянь мездмӧмыс, регыд воссяс Менам веськыдлунӧй.
Шуда сійӧ мортыс, коді олӧ веськыда, коді кутчысьӧ веськыдлунас, коді пыдди пуктӧ шойччан лун, оз пежав сійӧс, коді видзӧ ассьыс кисӧ лёк вӧчӧмысь.
Йӧз муысь локтысь, коді йитчис Господькӧд, мед оз шу: «Господь торйӧдас менӧ Аслас войтырысь». Евнук мед оз шу: «Ме косьмӧм пу».
Господь тадзи висьталӧ: — Евнукъяслы, кодъяс пыдди пуктӧны шойччан лун, вӧчӧны Меным шогманасӧ да кутчысьӧны Менам йитӧдӧ, Ме сета Аслам керкаын да карын казьтыланпас да ним, и тайӧ лоӧ налы ныв-пи дорысь бурджык на.
Ме сета налы бырлытӧм ним, кодӧс оз вунӧдны.
Йӧз муысь локтысьясӧс, кодъяс йитчисны Господькӧд, кодъяс кесъялӧны да радейтӧны Сійӧс, кодъяс лоӧны Господьлӧн кесйӧгъясӧн, ставнысӧ, кодъяс пыдди пуктӧны шойччан лун, оз пежавны сійӧс, а кутчысьӧны Менам йитӧдӧ, Ме вайӧда Аслам вежа керӧс вылӧ, сета налы нимкодясьны Аслам кевмысян керкаын.
Меным шогманаӧсь лоӧны налӧн сотан да мукӧд висьясыс, висьпуктанін вылӧ вайӧмторъясыс. Менам керкаӧй кутас шусьыны став войтыръяслӧн кевмысян керкаӧн.
На кындзи, кодъясӧс чукӧртӧма нин татчӧ, Ме нӧшта на чукӧрта мукӧдӧс, — висьталӧ Господь Ыджыдыс, разалӧм Израиль войтырӧс чукӧртысь.
Мувывса став зверыс, вӧрса став пемӧсыс, локтӧй, сёйӧй!
Израильӧс видзысьяс синтӧмӧсь, ставныс найӧ мывкыдтӧмӧсь — увтны вермытӧм понъяс, найӧ нюжӧдчӧмаӧсь да вугралӧны, радейтӧны узьны.
Найӧ горш понъяс, некор оз пӧтлыны.
Найӧ мывкыдтӧм ыж видзысьяс, быдӧн мунӧ аслас туйӧд, быдӧн корсьӧ мыйкӧ аслыс курыштны.
Найӧ шуалӧны: «Локтӧй, ме перъя вина, коддзымӧн юам сур.
Аскиа луныс лоӧ татшӧм жӧ, да нӧшта на бурджык!»
Веськыда олысь кулӧ, и некод оз босьт тайӧс сьӧлӧмас.
Вежавидзысь йӧз мунӧны мӧдаръюгыдас, и некод оз мӧвпыштлы та йылысь. Веськыда олысь ылыстчӧ лёксьыс, сылӧн эм лӧньлун.
Веськыд туйӧд ветлысь шойччӧ вольпась вылас.
Матыстчӧй татчӧ, кимӧститчысьлӧн челядь, гозъякост олӧм пежалысьлӧн да кырсалысь аньлӧн чужысьяс.
Код вылын ті сераланныд, кодлы паныд вомнытӧ паськӧдланныд да кывнытӧ петкӧдланныд?
Ті — мыжыслӧн челядь, ылӧгыслӧн йылӧм. Тіян лёкколӧмныд ӧзъялӧ пашкыр пуяс пӧвстын, быд веж пу улын. Ассьыныд челядьнытӧ ті ваянныд вись пыдди шоръяс дорын да керӧс потасъясын.
Шорбокса шыльыд изъяс — тэнад олӧмыдлӧн пайыс да шудыс.
Тэ кисьтан на вылӧ вина вись, вись пыдди ваян налы нянь. Менам сьӧлӧмӧй ӧмӧй лэптас тайӧс?
Джуджыд да ыджыд керӧс вылын тэ дасьтылін аслыд куйланін, тэ кайлін сэтчӧ вись вайны.
Ӧдзӧс саяд да ӧдзӧс курич саяд тэ пуктывлін казьтыланпасъяс.
Тэ эновтін Менӧ, тэ пӧрччысьлін да кайлін аслад куйланінӧ.
Тэ паськӧдлін вольпасьтӧ, сёрнитчин накӧд, кодкӧд радейтан куйлынытӧ да видзӧдін налӧн яндзим вылӧ.
Асьтӧ чӧскыд дука выйӧн ёна мавтӧмӧн тэ ветлывлін Молок идол дінӧ. Тэ ылӧдз мӧдӧдлін ассьыд йӧзтӧ, мӧдӧдлін весиг пыдӧстӧминӧдз.
Тэ мудзлін аслад кузь туйысь, но эн шулі, тайӧ пӧ весьшӧрӧ.
Тэ пыр ёнмӧдчывлін, эн мудзлы.
Кодысь тэ полан, кодысь повзин сэтшӧмасӧ, мый эновтін Менӧ? Тэ вунӧдін Менӧ, он казьтывлы Ме йылысь.
Ме дыр чӧв олі, гашкӧ, та понда тэ дугдін Меысь повнысӧ?
Но Ме петкӧдла тэнсьыд веськыдлунтӧ да тэнсьыд уджъястӧ — таысь тэныд бурыс оз ло.
Кор тэ кутан корны отсӧг вылӧ, тэнӧ оз мездыны идолъясыд.
Найӧс ставнысӧ нӧбӧдас тӧвнырыс, разӧдас тӧв пӧльыштӧмыс.
Но Ме вылӧ лача кутысьлы вичмас му, сылы вичмас Менам вежа керӧсӧй.
Господь шуас: — Дасьтӧй, дасьтӧй, шыльӧдӧй туйсӧ, Менам войтырлӧн туй вылысь вештӧй ставсӧ, мыйӧ найӧ вермасны крукасьны.
Медвылыссаыс да Меднималанаыс, пыр Олысьыс, кодлӧн нимыс — Вежа, Сійӧ тадзи висьталӧ: — Ме ола выліинын да вежаинын, но Ме матын шогӧ усьӧмаяс да рам сьӧлӧмаяс дінӧ, медым ловзьӧдны рам сьӧлӧмаясӧс да бурӧдны шогӧ усьӧмаясӧс.
Ме ог кут помтӧг мыждыны, ог кут пыр скӧравны, ӧд тадзи кӧ кута вӧчны, сэки Ме водзын дзикӧдз нюкыртчас мортлӧн лолыс, нюкыртчас Меӧн вӧчӧм ловъя олысь.
Менам войтырлӧн горшасян мыжысь Ме ёна скӧралі на вылӧ да дойдалі найӧс, чужӧмӧс бергӧді наысь да лӧгалі на вылӧ, но найӧ эновтісны Менӧ, вӧчисны, мый кӧсйисны.
Ме аддзылі, мый найӧ вӧчисны, но Ме бурдӧда найӧс. Ме Ачым кута нуӧдны да бурдӧдны найӧс, Ме бурӧда шогалысьясӧс.
Ме кӧсйыся сетны лӧнь олӧм ылыссалы, лӧнь олӧм матыссалы, — висьталӧ Господь, — Ме бурдӧда найӧс.
Но Ентӧг олысьяс гыалысь саридз кодьӧсь, оз вермыны лӧньнысӧ, гыясыс моз лэптӧны нюйт да няйт.
Ентӧг олысьяслӧн лӧньлуныс абу, — висьталӧ менам Енмӧй.
Горзы гораджыка, эн кут асьтӧ, буксан шы моз гораа горзы! Инды Менам войтырлы налӧн лёк уджъяс вылӧ, инды Яков рӧдлы налӧн мыжъяс вылӧ.
Найӧ быттьӧ веськыда олысь войтыр, коді оз вунӧдлы аслас Енлысь тшӧктӧмъяссӧ, быд лун корсьысьӧ Менӧ, кӧсйӧ тӧдны Менсьым туйясӧс.
Найӧ виччысьӧны Месянь веськыда мыждӧм, кӧсйӧны матыстчыны Ен дінӧ.
Найӧ шуӧны: «Ми видзалам, но Тэ он аддзы тайӧс, ми раммӧдам асьнымӧс, но Тэ он тӧд та йылысь!»
Асланыд видзалігӧн ті вӧчанныд, мый кӧсъянныд, сьӧкыд уджӧн ті дзескӧданныд тіянлы уджалысьясӧс.
Со, ті видзаланныд, но тіян костын содӧ вензьӧм да зыксьӧм, ті чорыда нӧйтанныд ӧта-мӧднытӧ.
Тадзи кӧ ті видзаланныд, тіянлысь гӧлӧс шытӧ оз кывны выліас.
Ме ӧмӧй кӧсъя татшӧм видзалӧмсӧ, кӧсъя ӧмӧй татшӧм раммӧдан лунсӧ, кор эжӧр моз копыртанныд юрнытӧ, вольсаланныд ас уланыд чорыд дӧра, куйланныд пӧим вылын?
Тайӧс ӧмӧй позьӧ шуны видзалӧмӧн, Господьлы шогмана лунӧн?
Ме кӧсъя татшӧм видзалӧм: орӧд ылӧгыслысь кӧртӧдъяссӧ, разь сийӧслысь гӧрӧдъяссӧ, мезды нартитӧмаӧс, жугӧд быдпӧлӧс сийӧссӧ, тшыгъялыськӧд юк няньтӧ, коньӧр шӧйтысьӧс вайӧд гортад, пасьтӧмӧс пасьтӧд, рӧдвужыдлӧн отсӧг корӧмысь эн бергӧдчы.
Сэки тэнад югыдыд тыдовтчас асъя кыа моз, и тэ регыдӧн бурдан. Тэнад веськыдлуныд мунас тэ водзвывті, а бӧрвывсяньыд тэнӧ видзас Господьлӧн дзирдлуныс.
Тэ шыасян Господь дінӧ, и Сійӧ кылас тэнӧ, тэ чукӧстан Сійӧс отсӧг вылӧ, и Сійӧ шуас: «Ме тані».
Бырӧдан кӧ ас пӧвстсьыд быдпӧлӧс сьӧктӧдан сийӧс, дугдан кӧ мӧд вылӧ индавны чуньнад да паськӧдны лёк сёрнияс, тшыгъялысьлы кӧ сетан сьӧлӧмсяньыд, коньӧрӧс кӧ вердан, сэки тэнад югыдыд тыдовтчас пемыдас, и тэнад пемыдыд лоӧ лунъюгыд кодь.
Господь пыр кутас нуӧдны тэнӧ. Кос кадӧ Сійӧ пӧткӧдас тэнӧ, ёнмӧдас тэнсьыд вир-яйтӧ. Тэ лоан киськалӧм сад йӧр кодь, пыр визувтысь ва петанін кодь.
Тэ выльысь кыпӧдан важӧн пазӧдӧм каръяс, лэптан керкаяс важ подувъяс вылӧ. Тэнӧ пондасны шуны карса стенъяс дзоньталысьӧн, туйяс восьтысь-лӧсьӧдысьӧн.
Тэ кӧ видзан коктӧ шойччан лун торкӧмысь, он кӧ ов аслад кӧсйӧм серти Менам вежа лунӧ, шуан кӧ шойччан лунсӧ олан гажӧн, пыдди пуктан кӧ Господьлысь вежа лунсӧ, видзан кӧ асьтӧ быдлунся удж вӧчӧмысь, ас кӧсйӧм серти олӧмысь да нинӧм абусӧ сёрнитӧмысь, сэки Господь лоас тэнад олан гажӧн! Ме нуӧда тэнӧ муыслӧн выліинъясӧд, верда тэнӧ Яков батьыдлӧн му вылын быдмӧм няньӧн. Тадзи висьталӧ Господь.
Господьлӧн киыс эз дженьдаммы, медым мездыны, Сылӧн пельыс эз сьӧктаммы, медым кывны.
Но тіян лёк вӧчӧмъясныд торйӧдісны тіянӧс Енсьыныд, тіян мыжъясныд вӧсна Сійӧ бергӧдчис тіянысь да оз кывзы.
Тіян киясныд пежасьӧмаӧсь вирӧн, тіян чуньясныд — лёк вӧчӧмӧн.
Тіян вомысь петӧ ылӧг, тіян кывныд пӧръясьӧ.
Некод оз мыжды веськыда, ёрд водзын некод оз висьтав збыльсӧ.
Ставныс лача кутӧны абутӧмыс вылӧ, висьталӧны ылӧгсӧ. Найӧ новлӧдлӧны ас пытшканыс лёксӧ, чужтӧны лёк вӧчӧм.
Найӧ пӧжӧны змей колькъяс, кыӧны черань везъяс.
Налысь колькъяссӧ кӧ сёян, кулан, а тувччан кӧ колькйыс вылӧ, сэтысь гадюка петас.
Асланыс везйысь найӧ оз вермыны вурны паськӧм, киӧн вӧчӧмторъясӧн оз вермыны вевттьыны вир-яйнысӧ.
Найӧ вӧчӧны лёксӧ, налӧн киныс виӧ-дойдалӧ.
Налӧн кокныс котӧртӧ лёксӧ вӧчны, найӧ тэрмасьӧны мыжтӧмлысь вир кисьтны.
Налӧн мӧвпъясыс шогмытӧмӧсь, найӧ мырддялӧны да виалӧны.
Найӧ оз тӧдны лӧньлунсӧ, вунӧдісны веськыда мыждӧмсӧ.
Налӧн туйясыс чукляӧсь, сэті ветлысь оз тӧд лӧньлунсӧ.
Та вӧсна веськыда мыждӧмыс ылын миянысь, веськыдлуныс оз во миянӧдз.
Ми виччысям югыдсӧ, но гӧгӧр пемыд, виччысям югдӧмсӧ, но ветлам пемыдас.
Синтӧм моз ми ветлам стен пӧлӧн, аддзытӧм моз ми ветлӧдлам кималасӧн, лунъюгыднас ми крукасьлам пемыдас моз, ловъяяс пӧвстын ми кулӧмаяс кодьӧсь.
Ми ставным равзам ошъяс моз, курксам гулюяс моз.
Ми виччысям веськыда мыждӧмсӧ, но сійӧ абу, виччысям мездмӧмсӧ, но сійӧ ылын миянысь.
Ӧд ми Тэныд паныд уна лёк вӧчим, миян мыжъясным мыждӧны миянӧс, лёк вӧчӧмъясным век миянкӧд, ми тӧдам ассьыным мыжъяснымӧс.
Ми кыпӧдчим Господьлы паныд, пӧрйӧдлім Сійӧс, бергӧдчим асланым Енмысь, ми суклясим-асныралім, новлӧдлім сьӧлӧманым ылӧгсӧ да висьтавлім сійӧс.
Ми ылыстім веськыда мыждӧмсӧ, веськыдлуныс сулалӧ ылын, збыльыс крукасис изэрдйӧ, веськыда вӧчӧмыс оз су миянӧс.
Збыльыс эз ло. Лёксьыс ылыстчысьлысь эмбурсӧ мырддьӧны.
Господь аддзис, мый веськыда мыждӧмыс абу, и тайӧ вӧлі зывӧк Сылы.
Сійӧ аддзис, мый абу мортыс, шензис, мый абу дорйысьыс.
Сійӧ вермис Аслас киӧн, Сылӧн веськыдлуныс лои Сылы отсӧгӧн.
Кӧрт кышӧдӧн моз Сійӧ вевттьысис веськыдлуннас, пуктіс юр вылас мездмӧмыслысь юртупкӧдсӧ, пасьталіс Ас вылас водзӧс перъян паськӧмсӧ, вевттьысис скӧрлуннас кышанӧн моз.
Уджъясныс серти Сійӧ мынтысяс паныд кыпӧдчысьяслы, мынтысяс налы скӧрлунӧн, паныд сувтысьяслы — водзӧс перйӧмӧн, саридз дорын олысьяслы мынтысяс, кыдзи колӧ.
Рытыввылын пондасны повны Господьлӧн нимысь, асыввылын — Сылӧн дзирдлунысь.
Вӧрӧг кӧ ыльӧбтас ю моз, Господьлӧн ловшыыс вӧтлас сійӧс.
Сионӧ локтас Мездысь, Сійӧ локтас Яковсянь чужысьяс дінӧ, кодъяс бергӧдчисны мыжъяссьыныс, — висьталӧ Господь.
Тэкӧд, Менам войтырӧй, Ме кӧртала татшӧм йитӧд, — висьталӧ Господь, — Менам Лолӧй лоас тэ вылын, Менам кывъясӧй, мый пукті тэнад вомӧ, пыр лоӧны тэнад вомын, тэсянь чужысьяслӧн вомын да насянь чужысьяслӧн вомын ӧні и нэмъяс чӧж, — висьталӧ Господь.
Чеччы, югъяв, Ерусалим, ӧд тэнад югыдыд ӧзйис, тэ весьтын Господьлӧн дзирдлуныс тыдовтчис.
Мусӧ вевттяс пемыдыс, сап пемыдыс вевттяс войтыръясӧс, но тэ весьтын петкӧдчас Господь, тэ весьтын тыдовтчас Сылӧн дзирдлуныс.
Войтыръяс локтасны тэнад югыдыд дінӧ, ӧксыяс чукӧртчасны тэнад яръюгыд кыа дінӧ.
Лэпты синтӧ да видзӧдлы гӧгӧр: найӧ ставныс чукӧртчӧмаӧсь, локтӧны тэ дінӧ.
Тэнад пияныд ылісянь локтасны, тэнсьыд нывъястӧ ки вылын ваясны.
Тэ аддзан тайӧс да пондан нимкодясьны, тэнад сьӧлӧмыд пондас чеччыны нимкодьысла, ӧд саридзса озырлун ваясны тэныд, войтыръяслысь озырлунсӧ козьналасны тэныд.
Тэ дінӧ локтас уна верблюд, Мадианысь да Эфаысь локтасны том верблюдъяс.
Саваын олысьяс локтасны тэ дінӧ, ваясны чӧскыд ӧвтанторъяс да зарни, кыпӧдасны Господьлы ошкӧм.
Кедарысь став ыжсӧ вайӧдасны тэ дінӧ, Невайотысь межъяс лоӧны тэнад киынӧсь. Менам висьпуктанін вылын найӧс ваясны вись пыдди, найӧ лоӧны Меным шогмана висьӧн, и Ме нимӧда Ассьым дзирдлуна крамӧс.
Кодъяс тайӧ лэбысьясыс? Найӧ лэбӧны кымӧръяс моз, лэбӧны гулюяс моз асланыс позйӧ.
Саридз дорын олысьяс лача кутӧны Ме вылӧ, фарсисса корабльяс медводзын кывтӧны, ылі муясысь найӧ вайӧны тэнсьыд пиянтӧ да налысь зарни-эзысьсӧ Господьлӧн, тэнад Енлӧн, нимыс вӧсна, Израильлӧн вежа Ен вӧсна, ӧд Сійӧ нимӧдіс тэнӧ.
Йӧз муысь локтысьяс пондасны кыпӧдны тэнсьыд стенъястӧ, налӧн ӧксыясыс пондасны кесъявны тэныд.
Аслам скӧралігӧн Ме нӧйті тэнӧ, но Аслам муслун кузя Ме лоа бур сьӧлӧма тэ дінӧ.
Тэнад дзиръяясыд пыр лоӧны восьсаӧсь, лун и вой найӧс оз кутны пӧдлавны, тэныд пондасны вайны войтыръяслысь озырлунсӧ, тэ дінӧ вайӧдасны налысь ӧксыяссӧ.
Но войтыръясӧс, кодъяс оз кутны кесъявны тэныд, дзикӧдз лоӧ бырӧдӧма.
Кипарис, платан да пожӧм ваясны тэныд, ливанса озырлунӧн мичмӧдасны Менсьым вежаинӧс, Менсьым кок улӧс, мый Ме нимӧда.
Тэнӧ нартитысьяслӧн пияныс локтасны тэ дінӧ да улӧдз копыртчасны тэныд. Тэнӧ мустӧмтысьяс уськӧдчасны тэнад кок улӧ да шуасны тэнӧ Господьлӧн карӧн, шуасны Сионӧн — Израильлӧн вежа Енлӧн оланінӧн.
Тэнӧ вӧлі эновтӧма, тэнӧ ёна мустӧмтісны, некод эз волы тэ дінӧ. Но Ме нимӧда тэнӧ нэмъяс чӧж, вӧча тэнӧ нимкодьлунӧн водзӧ чужысьяслы.
Мукӧд войтыръяс кутасны йӧлӧн пӧткӧдны тэнӧ, налӧн ӧксыясыс — вердны тэнӧ. Сэки тэ тӧдмалан, мый Ме, Господь, — тэнӧ Мездысьыс, Яковлӧн вына Енмыс — тэнӧ Видзысьыс.
Ыргӧн пыдди Ме вая тэныд зарни, кӧрт пыдди — эзысь, пу пыдди — ыргӧн, из пыдди — кӧрт.
Тэнад юралысьӧн Ме инда лӧньлун, тэнад ыджыдалысьӧн — веськыдлун.
Тэнад муын водзӧ оз ло виалӧм-дзескӧдӧм, оз ло мырддялӧм да бырӧдӧм тэнад муын.
Аслад стенъяслы тэ сетан “Мездӧм” ним, аслад дзиръяяслы — “Ошкӧм” ним.
Луннас шондіыс оз нин понды тэныд югдӧдны, тӧлысьыс оз понды дзирдавны, но Ачыс Господь лоӧ тэныд бырлытӧм югыдӧн, тэнад Енмыд лоӧ тэнад дзирдлунӧн.
Тэнад шондіыд оз нин пуксьы, тэнад тӧлысьыд оз нин дзебсьы, ӧд Господь лоӧ тэнад бырлытӧм югыдӧн, и тэнад бӧрдан лунъясыд помасясны.
Тэнад войтырысь ставныс лоӧны веськыда олысьясӧн, налы пыр кежлӧ вичмас тайӧ муыс. Найӧ — Меӧн пуктӧм быдмӧгъяс, Ме вӧчи найӧс Аслам киӧн, медым найӧ ошкисны Менӧ.
На пӧвстысь медічӧтсяньыс чужас сюрс олысь, медся жебсяньыс чужас вына войтыр.
Ме, Господь, тэрмася вӧчны тайӧс ас кадӧ.
Господь Ыджыдлӧн Лолыс Ме вылын, ӧд Господь мавтыштіс Менӧ висьтавны бур юӧр коньӧръяслы. Сійӧ мӧдӧдіс Менӧ бурдӧдны доймӧм сьӧлӧмаясӧс, юӧртны дзескыдінӧ йӧршитӧмаяслы мездлун йылысь, дорӧмаяслы чепъяс орӧдӧм йылысь, юӧртны Господьлӧн буралан во йылысь, миян Енлӧн водзӧс перъян лун йылысь. Господь мӧдӧдіс Менӧ бурӧдны шогсьысьясӧс, Сионын шогсьысьяслы пӧим пыдди сетны мича юрвевттьӧд, бӧрдӧм пыдди — нимкодясьӧм, шогсьӧм пыдди — ошкӧм. Сэки найӧс шуасны зумыда сулалысь веськыда олысьясӧн, пуясӧн, кодъясӧс Господь вужйӧдіс, медым найӧ ошкисны Сійӧс.
Найӧ выльысь кыпӧдасны важӧн пазӧдӧм каръяс, овтӧм каръяс пыдди найӧ кыпӧдасны выльясӧс, выльысь лэптасны киссьӧм каръяс, кӧні важӧн нин некод оз ов.
Йӧз муысь локтысьяс пондасны видзны тіянлысь ыжъяснытӧ, мукӧд войтыр пондас вӧдитны мунытӧ да винограднытӧ.
А тіянӧс пондасны шуны Господьлы кесъялысь попъясӧн, миян Енлӧн кесйӧгъясӧн.
Ті понданныд вӧдитчыны войтыръяслӧн озырлунӧн, налӧн нималӧмыс вичмас тшӧтш тіянлы.
Тіянӧс янӧдӧмысь мынтысясны тіянлы кык пӧвстӧн, увтыртӧм бӧрти ті понданныд нимкодясьны асланыд шудысь, ӧд асланыд муӧ бергӧдчӧм бӧрын тіянлы вичмас кык пӧв унджык му, тіян нимкодясьӧмлы оз ло помыс.
— Ме, Господь, Ме радейта веськыда мыждӧм, мустӧмта мырддялӧм да лёк вӧчӧм. Ме мынтыся Аслам войтырлы збыльыс серти, Ме кӧртала накӧд бырлытӧм йитӧд.
Насянь чужысьясӧс нимӧдасны войтыръяс пӧвстын, найӧс аддзысьяс гӧгӧрвоасны, мый тайӧ войтырсӧ бурсиӧма Господь.
Ме долыда нимкодяся Господь йылысь, менам лолӧй нимкодясьӧ менам Ен йылысь, ӧд Сійӧ пасьтӧдіс менӧ мездмӧмыслӧн паськӧмӧн, вевттис менӧ веськыдлуныслӧн кышанӧн, верӧспулы моз пуктіс менам юр вылӧ мича юрвевттьӧд, гӧтырпуӧс моз мичмӧдіс менӧ мичмӧданторъясӧн.
Кыдзи муыс быдтӧ пуктас-быдтассӧ, кыдзи йӧрын быдмӧны кӧдзӧмторъяс, тадзи Господь Ыджыдыс быдтас веськыдлун, тадзи быдмас-содас Сійӧс ошкӧмыс войтыръяс водзын.
Сион вӧсна ог кут чӧв овны, Ерусалим ради ог дугды висьтавлыны, кытчӧдз сылӧн веськыдлуныс оз воссьы югыд моз, сылӧн мездмӧмыс оз тыдовтчы ӧзъялысь би моз.
Сэки войтыръяс аддзасны тэнсьыд веськыдлунтӧ, став ӧксыяс аддзасны тэнсьыд дзирдлунтӧ, тэнӧ нимтасны выль нимӧн, тайӧ нимсӧ сетас тэныд Господь.
Тэ лоан дзирдалысь юркытшӧн Господьлӧн киын, лоан ӧксылӧн юркытшӧн Аслад Енлӧн ки пыдӧсын.
Тэнӧ оз нин шуны Эновтӧмаӧн, тэнсьыд мутӧ оз шуны Кушинӧн, но тэнӧ нимтасны Господьлӧн олан гажӧн, тэнсьыд мутӧ шуасны Гӧтырӧн, ӧд тэ муса Господьлы, и тэнад муыд оз коль верӧстӧг.
Кыдзи том зон ӧтлаасьӧ том нывкӧд, сідзи тэнад войтырыд ӧтлаасьӧ тэкӧд.
Кыдзи верӧспу нимкодясьӧ гӧтырпуыс вӧсна, сідзи тэнад Енмыд пондас нимкодясьны тэ вӧсна.
Ерусалим, тэнад стенъяс вылӧ Ме сувтӧді кар видзысьясӧс, лун и вой налӧн гӧлӧс шыныс оз ланьтлы.
— Ті, Господь дінӧ шыасьысьяс, энӧ чӧв олӧй!
Дугдывтӧг кевмысьӧй Господьлы, кытчӧдз Сійӧ выльысь оз сувтӧд Ерусалим, кытчӧдз Сійӧ оз нимӧд Ерусалим карсӧ став му пасьталаыс.
Господь сетіс кыв, кӧсйысис Аслас веськыд кинас, Аслас вына кинас Сійӧ кӧсйысис: — Тэнсьыд няньтӧ Ме ог нин сет вӧрӧгыдлы, йӧз муысь локтысьяс оз кутны юны тэнсьыд винатӧ, мый тэ мудзтӧдзыд вӧчин.
Но шобді чукӧртысьяс пондасны сёйны ассьыныс няньсӧ да ошкыны таысь Господьӧс, виноград чукӧртысьяс пондасны юны ассьыныс винасӧ Менам вежаин йӧрын.
Петӧй, петӧй дзиръяясӧд, шыльӧдӧй туйсӧ войтырлы!
Дасьтӧй, дасьтӧй туйсӧ, весалӧй изъясысь, кыпӧдӧй дӧрапас войтыръяслы!
Со, Господь юӧртӧ му помӧдзыс: — Висьталӧй Сион нывлы: видзӧд, локтӧ тэнад Мездысьыд, Сыкӧд ставныс, кодъясӧс Сійӧ шедӧдіс, Сылӧн син водзын ставныс, кодъясӧс Сійӧ Аслыс босьтіс.
Найӧс шуасны Вежа войтырӧн, Господьлӧн мездмӧм йӧзӧн, а тэнӧ шуасны Мусаӧн, Карӧн, мый оз ло эновтӧма.
— Коді тайӧ Эдомсянь локтысьыс, Восорасянь чим гӧрд паськӧма локтысьыс? Коді Сійӧ, мича паськӧмӧн вӧччӧмаыс, Аслас ыджыд вынӧн локтысьыс?
— Тайӧ — Ме, веськыдлунсӧ Юӧртысь, вына Мездысь.
— Мыйла тэнад паськӧмыд гӧрд рӧма, мыйла паськӧмыд пычкан гуын виноград талялысьлӧн кодь?
— Ме ӧтнамӧн таляси пычкан гуын, войтыръяс пӧвстысь некод эз отсась Меным.
Скӧралігӧн Ме талялі войтыръясӧс, ёна лӧгалігӧн талялі найӧс.
Налӧн вирыс резіс Менсьым паськӧмӧс, и Менам паськӧмӧй ставнас няйтчис.
Ме инді водзӧс перъян лун, матыстчис Менсьым войтырӧс мездан воыс.
Ме видзӧдлі гӧгӧр, а отсасьысьыс эз вӧв.
Ме шензи, мый эз вӧв Менӧ кутыштысьыс.
Но Ме верми Аслам киӧн, Менам скӧрлунӧй лои Меным отсӧгӧн.
Ме талялі войтыръясӧс Аслам скӧралігӧн, пазӧді найӧс Аслам лӧгалігӧн, кисьті му вылӧ налысь вирсӧ.
Ме юӧрта Господьлӧн буралӧмыс йылысь, висьтала Господьлӧн ошкана уджъясыс йылысь, мый Господь вӧчис миянлы, висьтала Сылӧн ыджыд бурлун да муслун йылысь, Израиль войтыр дінӧ Сылӧн ыджыд буралӧм йылысь.
Господь шуис: «Тайӧ збыльысь Менам войтырӧй, Менам челядьӧй, кодъяс оз пӧръясьны». Сійӧ лоис налы Мездысьӧн, сьӧкыд кадӧ Сійӧ вӧлі накӧд, Сылӧн анделыс отсаліс налы.
Аслас муслуныс да бурлуныс вӧсна Сійӧ мездывліс найӧс, новлӧдліс найӧс ки вылас став важся лунъясӧ.
Но найӧ паныд кыпӧдчисны да шогӧдісны Господьлысь Вежа Ловсӧ, та вӧсна Сійӧ лӧгаліс на вылӧ, тышкасис налы паныд.
Сэки важся кадсӧ, Мӧисей дырся лунъяссӧ, казьтыштігӧн Господьлӧн войтырыс шуис: — Кӧні Сійӧ, коді петкӧдіс Ассьыс ыж чукӧрсӧ саридзысь, мездіс найӧс да налысь видзысьсӧ? Кӧні Сійӧ, коді сетіс Аслас войтырлы Вежа Ловсӧ? Кӧні Сійӧ, коді нуӧдіс Мӧисейӧс Аслас вына кинас? Кӧні Сійӧ, коді шӧри поткӧдіс саридзсӧ Аслас войтыр водзын, медым нимӧдны Асьсӧ нэмъяс чӧж? Кӧні Сійӧ, коді нуӧдіс найӧс джуджыд саридз пыдӧсӧд? Косінті мунысь вӧв моз найӧ мунісны сэті да эз крукасьлыны.
Ковтысӧ лэччысь ыж-мӧс моз найӧ локтісны шойччанінӧ Господьлӧн Лов нуӧдӧм улын.
Тадзи Тэ нуӧдін Ассьыд войтыртӧ, медым нимӧдны Асьтӧ.
Видзӧдлы енэжсяньыс, видзӧдлы Аслад вежа да дзирдлуна оланінсянь! Кӧні Тэнад вежӧгтӧмыд да вынйӧрыд?
Тэнад сьӧлӧмыд тупкыса меным, Тэ он бурав ме дінӧ.
Господьӧй, Тэ — миян Батьным.
Ӧвраам оз тӧд миян йылысь, Израиль оз тӧд миянӧс, но Тэ — миян Батьным! Важысянь тэнад нимыд — Миян Мездысь.
Господьӧй, мыйла Тэ лэдзан миянлы кежны Тэнад туй вылысь, мыйла лэдзан чорзьыны сьӧлӧмнымлы, медым ми эгӧ полӧй Тэысь?
Бергӧдчы миянлань Аслад кесйӧгъясыд вӧсна, Аслад бӧрйӧм чужанкотыръясыд ради.
Сӧмын дженьыдик кад Тэнад вежа войтырыд ыджыдаліс аслас му вылын, а ӧні Тэнсьыд вежаинтӧ талялӧны миянӧс дзескӧдысьяс.
Ми лоим сэтшӧм войтырӧн, код вылын Тэ быттьӧ некор эн юравлы, коді быттьӧ некор эз вӧв Тэнад войтырӧн.
Господьӧй, косяв енэжсӧ да лэччы!
Керӧсъяс мед дзӧрӧны-тіралӧны Тэ водзын биын сотчысь ув моз, би вылын пузьысь ва моз. Лэччы, Господьӧй, медым Тэнӧ мустӧмтысьяс тӧдісны Тэнсьыд нимтӧ!
Тэ водзын мед дзӧрӧны-тіралӧны войтыръяс.
Тэ вӧчлін повзьӧдана уджъяс, та йылысь ми весиг мӧвпыштнысӧ эгӧ кужлӧй. Тэ лэччин, и керӧсъяс дзӧрисны-тіралісны Тэ водзын.
Му пуксьӧмсяньыс на некод эз тӧдлы, эз кывлы пель, эз аддзывлы син, мый Тэ кындзи эм кутшӧмкӧ мӧд ен, коді эськӧ та мында вӧчис сы вылӧ лача кутысьлы.
Тэ бур сьӧлӧмӧн воча петан сылы, коді нимкодьпырысь веськыда вӧчӧ, коді восьлалӧ Тэнад туйӧд да казьтывлӧ Тэ йылысь.
Но Тэ скӧрмин миян вылӧ, ӧд ми важысянь нин мыжсӧ вӧчам.
Сідзкӧ, мездмам-ӧ ми?
Ми ставным пежӧсь, миян веськыдлунным няйтчӧм паськӧм кодь, ми ставным косьмӧм коръяс кодьӧсь, миян мыжъясным тӧвныр моз нӧбӧдӧны миянӧс.
Некод оз шыась Тэнад нимӧ, некод оз кутчысь Тэ дінӧ.
Та вӧсна Тэ бергӧдін миянысь Ассьыд чужӧмтӧ, эновтін миянӧс кувны асланым мыжъясын.
Но Тэ, Господьӧй, — миян Батьным, ми — сёйыс, а Тэ — миянӧс Вӧчысьыс. Ми ставным — Тэнад киӧн вӧчӧмторъяс.
Господьӧй, эн скӧрав миян вылӧ дугдывтӧг, эн век казьтыв миянлысь мыжъяснымӧс.
Эн вунӧд, мый ми — Тэнад войтырыд!
Тэнад вежа каръясын некод оз ов, Сион лои овтӧминӧн, Ерусалим — кушинӧн.
Ставнас сотісны миянлысь вежа да дзирдлуна крамнымӧс, кӧні миян батьясным ошкисны Тэнӧ. Ставнас пазӧдісны миянлысь мича оланіннымӧс.
Господьӧй, Тэ ӧмӧй водзӧ на кутан видзӧдны та вылӧ? Кутан ӧмӧй чӧв овны да нем жалиттӧг миянӧс мыждыны?
Ме восьті Ачымӧс налы, кодъяс эз корны тайӧс.
Менӧ аддзисны найӧ, кодъяс эз корсьны Менӧ.
«Ме тані! Ме тані!» — шуалі Ме войтырлы, коді эз шыасьлы Ме дінӧ.
Быд лун Ме нюжӧдлі киӧс кывзысьтӧм войтыр дінӧ, коді мунӧ шогмытӧм туйӧд, олӧ аслас колӧм-кӧсйӧм серти.
Ме нюжӧдлі киӧс войтыр дінӧ, коді яндысьтӧг дӧзмӧдліс Менӧ. Расъясын найӧ вайӧны висьяс, тшынӧдчӧны кирпичысь вӧчӧм висьпуктанін вылын, пукалӧны кулӧмаясӧс дзебанінын, коллялӧны войсӧ кырта горсъясын, сёйӧны порсь яй, пуӧны пӧртъясын пеж сёян.
Найӧ шуалӧны: «Сулав, эн матыстчы ме дінӧ, ӧд ме вежа, торйӧдӧма тэысь».
Ставныс найӧ дӧзмӧдӧны Менӧ нырӧс гильӧдысь тшын моз, пыр ӧзйысь би моз.
Ме тӧда налысь уджъяссӧ, та йылысь гижӧма: Ме ог кут чӧв овны, Ме мынтыся тіянлы, мынтыся тіянлы тырвыйӧ тіян мыжъясысь да батьясныдлӧн мыжъясысь, — висьталӧ Господь. — Керӧсъяс вылын найӧ сотісны висьяс, мылькъяс вылын омӧльтісны Менӧ.
Ме мурталӧмӧн мынтыся налы важ уджъяссьыныс.
Господь тадзи висьталӧ: — Кор виноград розйыс кисьмӧма нин, сэки шуӧны: «Энӧ чегӧй сійӧс, ӧд сійӧ вайӧ бурсиӧм».
Ме тадзи жӧ вӧча Аслам кесйӧгъяс ради: ог ставнысӧ бырӧд.
Ме сета Яковсянь чужны войтырлы, Иудасянь чужысьяслы вичмасны Менам керӧсъяс. Найӧ вичмасны Менам бӧрйӧмаяслы, Менам кесйӧгъяс пондасны овны сэні.
Менам войтырлы, коді корсьысьӧ Менӧ, Шарон ласта лоӧ ыжъяслы йирсянінӧн, Акор ковтыс — мӧсъяслы шойччанінӧн.
А тіянӧс, кодъяс эновтінныд Менӧ, Господьӧс, вунӧдінныд Менсьым вежа керӧсӧс, кодъяс дасьтанныд пызан Гад идоллы, тыртанныд вина чаша Мени идоллы, тіянӧс Ме сета шыпурт улӧ, ті ставныд сувтанныд пидзӧс выланыд, и тіянӧс кераласны. Ме чуксалі тіянӧс, но ті энӧ шыасьӧй.
Ме висьталі тіянлы, но ті энӧ кывзӧй. Ті вӧчинныд сійӧ, мый Менам син водзын шогмытӧм, ті бӧрйинныд сійӧ, мый эз вӧв Менам кӧсйӧм серти.
Та вӧсна Господь Ыджыдыс тадзи висьталӧ: — Менам кесйӧгъясӧй кутасны сёйны, а ті кутанныд тшыгъявны, Менам кесйӧгъясӧй кутасны юны, а тіян горшныд пондас косьмыны, Менам кесйӧгъясӧй пондасны нимкодясьны, а тіянлы лоӧ юръяндзим.
Менам кесйӧгъясӧй пондасны сьывны, налӧн сьӧлӧмныс тырас ыджыд нимкодьлунӧн, а ті понданныд горзыны шогсьӧмныдла, понданныд бӧрдны лов топӧдӧмысь.
Тіян нимныд лоас ёран кывйӧн Менам кесйӧгъяс пӧвстын, найӧ шуасны: «Господь Ыджыдыс мед на моз виас тэнӧ». Но Ассьым кесйӧгъясӧс Ме нимта мӧд нимӧн. Коді бурсиас асьсӧ тайӧ муас, сійӧ бурсиас асьсӧ збыль Ен нимӧн.
Коді кыв сетас тайӧ муас, сійӧ кыв сетас збыль Ен водзын. Важ шогъяссӧ лоӧ вунӧдӧма, водзӧ найӧ оз нин лоны Менам син водзын.
Со, Ме вӧча выль енэж да выль му. Важсӧ лоӧ вунӧдӧма, некод оз кут казьтывны сы йылысь.
Но ті понданныд пыр гажӧдчыны-нимкодясьны сыысь, мый Ме кута вӧчны. Со, Ме вӧча Ерусалим гажӧдчанінӧн, сэні олысьясӧс — нимкодясьысь войтырӧн.
Ме понда нимкодясьны Ерусалимӧн, долыда нимкодясьны Аслам войтырӧн.
Сэні некор оз кут кывны бӧрдӧм-горзӧм.
Сэні оз кув пузчужӧм кага, пӧрысь морт кутас тырвыйӧ овны ассьыс олан лунъяссӧ.
Коді кулас сё арӧсаӧн, сійӧс лыддясны том кулысьӧн, а коді оз ов сё арӧсӧдз, сійӧс шуасны ёрӧмаӧн.
Найӧ кыпӧдасны керкаяс, и асьныс пондасны овны сэні, найӧ пуктасны виноград, и асьныс пондасны сёйны вотӧссӧ.
Оз нин ло сэтшӧмыс, мый найӧ кыпӧдасны керкаяс, а сэні мӧдъяс пондасны овны, найӧ пуктасны виноград, а мӧдъяс пондасны сёйны вотӧссӧ.
Менам войтырлӧн олан лунъясыс лоӧны пулӧн кодь кузь нэмаӧсь, Менам бӧрйӧмаясӧй пондасны асьныс вӧдитчыны сыӧн, мый вӧчасны асланыс киӧн.
Найӧ оз пондыны мырсьыны-уджавны весьшӧрӧ, оз кутны чужтыны челядьӧс шог вылӧ.
Ме, Господь, бурсиа найӧс, тшӧтш налысь челядьсӧ.
Найӧ оз на удитны шыасьны Ме дінӧ, а Ме налы вочавидза нин.
Найӧ пондасны на висьтавны, а Ме найӧс кыла нин.
Кӧин да баля пондасны ӧтвылысь йирсьыны, лев пондас ӧш моз турун сёйны, змей пондас пӧткӧдчыны муӧн. Некод оз кут лёксӧ вӧчны Менам вежа керӧс вылын, — висьталӧ Господь.
Господь тадзи висьталӧ: — Енэжыс — Менам юралан пуклӧсӧй, муыс — Менам кок улӧй.
Кутшӧм керка ті вӧчанныд Меным? Кӧні лоӧ Меным шойччаніныс?
Ставсӧ тайӧс вӧчӧма Менам киӧн, ставыс тадзи лои, — висьталӧ Господь.
— Но Ме видзӧдла коньӧр да рам морт вылӧ, коді вежавидзӧ Менам кывйысь.
Ӧшкӧс начкысь да вись пыдди вайысь [коді торкӧ Индӧдсӧ] морт виысь кодь, ыжӧс вись пыдди вайысь понлысь голясӧ песовтысь кодь, нянь вись вайысь порсьлысь вирсӧ вись пыдди вайысь кодь, казьтылан вись пыдди чӧскыд ӧвтанторъяс тшынӧдысь идоллы копрасьысь кодь.
Найӧ бӧрйисны ассьыныс туйнысӧ, найӧ радейтӧны пежсӧ вӧчны.
А Ме бӧръя налы мыждӧм, мӧдӧда налы сійӧ, мыйысь найӧ полӧны. Ӧд Ме чуксалі найӧс, но некод эз шыась, Ме висьталі налы, но найӧ эз кывзыны. Найӧ вӧчисны сійӧ, мый Менам син водзын шогмытӧм, найӧ бӧрйисны сійӧ, мый эз вӧв Менам кӧсйӧм серти.
Кывзӧй Господьлысь кывсӧ ті, кодъяс вежавидзанныд Сылӧн кывйысь: — Тіянӧс мустӧмтысь вокъясныд, Менам ним вӧсна тіянӧс ӧтдортысьяс, шуалӧны: «Мед Господь петкӧдлас Ассьыс дзирдлунсӧ, и ми видзӧдлам тіян гажӧдчӧм вылӧ».
Но тіянӧс мустӧмтысьясӧс лоӧ янӧдӧма.
Со, гора шы кылӧ карысь, шыыс петӧ крамысь, кылӧ Господьлӧн гӧлӧс шыыс, Сійӧ мыждӧ паныд сувтысьясӧс.
Аньлӧн эз на во чужтан кадыс, но сійӧ чужтіс нин, сійӧ эз на кыв чужтан дойсӧ, но чужтіс нин пи кагасӧ.
Коді кывліс татшӧмторйыс йылысь, коді аддзыліс татшӧмторсӧ?
Му ӧмӧй артмӧ ӧти лунӧн, войтыр ӧмӧй чужӧ ӧти здукӧн? Но Сион нывлӧн сӧмын на заводитчис чужтан дойыс, а сійӧ чужтіс нин пиянсӧ.
— Ме ӧмӧй ог сет чужтынысӧ, вайӧда кӧ кагасӧ чужтӧмӧдз? — висьталӧ Господь.
— Ме кӧ чужтысьлы сета вын, тупка ӧмӧй чужысьлы петан туйсӧ? — висьталӧ тэнад Енмыд.
Гажӧдчӧй Ерусалимкӧд, нимкодясьӧй сыӧн ставныд, кодъяс радейтанныд сійӧс. Нимкодясьӧй сыкӧд ставныд, кодъяс бӧрдінныд сы вӧсна. Ті понданныд сёйны да пӧткӧдчыны сылӧн бурӧдан морӧсысь, понданныд нимкодясьны да пӧттӧдзныд юны сылӧн лышкыда вердысь морӧсысь.
Господь тадзи висьталӧ: — Юӧс моз Ме веськӧда Ерусалимлы бур олӧмсӧ, мӧдӧда сылы войтыръяслысь озырлунсӧ ойдӧм ва моз. Сійӧ вердас тіянӧс пӧттӧдзныд, пондас новлӧдлыны ки вылас, лелькуйтны пидзӧс вылас.
Ныв-писӧ бурӧдысь мам моз Ме бурӧда тіянӧс, бурӧда тіянӧс Ерусалимын.
Ті аддзанныд тайӧс, и тіян сьӧлӧмныд пондас нимкодясьны, тіян вир-яйныд пондас дзоридзавны. Быдӧн тӧдмалас, мый Господьлӧн киыс Сылӧн кесйӧгъяс вылын, а скӧралӧмыс — Сылы паныд сувтысьяс вылын.
Со, Господь локтӧ би моз, Сылӧн тарантасъясыс ыджыд тӧвныр кодьӧсь. Сійӧ кисьтас Ассьыс скӧрлунсӧ ыджыд ярлунӧн, петкӧдлас Ассьыс мыждӧмсӧ ыпъялысь биӧн.
Став ловъя олысьсӧ Господь мыждас биӧн, быд мортӧс — Аслас шыпуртӧн, и унаӧс лоӧ бырӧдӧма Господьлӧн ки помысь.
Кодъяс вежӧдӧны-сӧстӧммӧдӧны асьнысӧ, медым сьӧрсьӧн-бӧрсьӧн юрбитны расъясын, кодъяс сёйӧны быдпӧлӧс пежсӧ — порсь яй да шыръясӧс, найӧ ставныс куласны, — висьталӧ Господь.
Ӧд Ме тӧда налысь уджъяссӧ, тӧда налысь мӧвпъяссӧ.
Ме локта да чукӧрта войтыръясӧс да быд кыла йӧзӧс. Найӧ локтасны да аддзасны Менсьым дзирдлунӧс.
Ме петкӧдла налы индысьпас. Кодсюрӧӧс ловйӧн кольӧмаяс пӧвстысь Ме мӧдӧда юӧртны Менам дзирдлун йылысь войтыръяслы Фарсисӧ, Пулӧ да Лудӧ, кӧні лыйсьӧны ньӧввужйысь. Мӧдӧда юӧртысьясӧс тшӧтш Тувалӧ да Яванӧ, ылі саридздорса муясын олысь йӧз дінӧ, кодъяс эз на кывлыны Ме йылысь да эз на аддзывны Менсьым дзирдлунӧс. Сэки тіянлысь вокъяснытӧ, кодъяс олӧны мукӧд войтыр пӧвстын, тарантасъяс да телегаяс вылын, вӧвъяс, мулъяс да верблюдъяс вылын ваясны козин пыдди Господьлы Ерусалимӧ, Менам вежа керӧс вылӧ, — висьталӧ Господь. — Найӧс ваясны сідзи, кыдзи Израиль войтыр сӧстӧм дозмукын вайӧ нянь Господьлӧн крамӧ.
Кодсюрӧӧс на пӧвстысь Ме пукта кесъявны попъясӧн да левитъясӧн, — висьталӧ Господь.
Кыдзи выль енэжыс да выль муыс, кодъясӧс Ме вӧча, пыр лоӧны Ме водзын, тадзи тіянсянь чужысьяс да тіян нимныд пыр лоӧны Ме водзын, — висьталӧ Господь. — 
Сэки быд выль тӧлысь чужигӧн, быд шойччан лунӧ, став йӧзыс локтасны юрбитны Меным, — висьталӧ Господь. — 
Найӧ петасны да аддзасны шойяссӧ налысь, кодъяс кыпӧдчисны Меным паныд. Найӧс сёйысь номырыс оз кувлы, найӧс сотысь биыс оз куслы.
Найӧ лоӧны зывӧкторйӧн став йӧзыслы.
{Еврей йӧз (комиӧдіс Kodko) @ Еремей @ религ. гижӧд @ Библия @ 2021 @ Лб. .}
Еремей пророклӧн небӧг
Тайӧ кывъясыс Еремейлӧн, Хилки пилӧн. Еремей вӧлі поп рӧдысь. Сійӧ оліс Венямин муын, Анатот карын. Иудаса Иосей ӧксылӧн, Амон пилӧн, дас коймӧд веськӧдлан воӧ Еремейлы вӧлі Господьсянь кыв. Господь юӧртліс Ассьыс кывсӧ Еремейлы тшӧтш иудаса Ехояким ӧксылӧн, Иосей пилӧн, веськӧдлан кадсянь да иудаса Седекей ӧксылӧн, Иосей пилӧн, дас ӧтиӧд веськӧдлан во помӧдзыс. Сэки витӧд тӧлысьнас ерусалимса олысьясӧс вӧлі нуӧдӧма пленӧ.
Меным, Еремейлы, вӧлі Господьсянь кыв:
— Сыӧдз, кор Ме вӧчи тэнӧ мам кынӧмад на, Ме вӧлі тӧда нин тэнӧ. Сыӧдз, кор Ме вӧчи тэнӧ, мам кынӧмсьыд петтӧдз на, Ме вежӧді тэнӧ, пукті тэнӧ войтыръяслы пророкӧ.
Ме вочавидзи: — Господьӧй Ыджыдӧй, ме ог куж сёрнитны, ӧд ме том на.
Но Господь шуис меным: — Эн шу, мый тэ том на, а мун, кытчӧ Ме мӧдӧда тэнӧ, висьтав, мый Ме тшӧкта тэныд.
Эн пов некодысь, ӧд Ме тэкӧд, Ме доръя тэнӧ, — висьталӧ Господь.
Господь нюжӧдіс кисӧ, инмӧдчыліс менам вомӧ да шуис меным: — Ассьым кывъясӧс Ме пукті тэнад вомӧ.
Талун Ме пукта тэнӧ войтыръяслы юӧртысьӧ, медым нетшкыны да жуглыны, бырӧдны да пазӧдны, выльысь тэчны да вужйӧдны.
Меным вӧлі Господьсянь кыв: «Еремей, мый тэ аддзан?»
Ме вочавидзи: «Аддза миндаль пулысь вожсӧ».
Господь шуис меным: «Тэ збыльысь сійӧс аддзан, ӧд Ме видзӧда Аслам кыв бӧрся, медым сійӧ иніс».
Меным мӧдысь вӧлі Господьсянь кыв: «Мый тэ аддзан?»
Ме вочавидзи: «Войвывладорысь аддза жваркйӧн пуысь пӧрт».
Господь шуис меным: «Тайӧ муас олысьяс вылӧ шогыс воас войвывсянь.
Ме чукӧста войвылын олысь войтыръясӧс, — висьталӧ Господь. — Найӧ локтасны да ассьыныс юралан пуклӧснысӧ сувтӧдасны Ерусалим карлӧн дзиръя дорӧ да карса стенъяс гӧгӧр, тшӧтш Иуда му пасьтала быд карӧ.
Ме понда мыждыны Иуда муын олысьясӧс став налӧн лёк вӧчӧмысь, ӧд найӧ эновтісны Менӧ, сотісны висьяс мукӧд енъяслы да копрасисны асланыс киӧн вӧчӧмторъяслы.
Но тэ чеччы, вӧнясь да висьтав Иуда муын олысьяслы ставсӧ, мый Ме тшӧкта тэныд.
Эн пов наысь. А повзян кӧ, сэки Ме повзьӧда тэнӧ налӧн син водзын.
Талун Ме вӧчи тэнӧ изкарӧн, кӧрт сюръяӧн да ыргӧн стенмӧн да сувтӧді тайӧ муыслы паныд, иудаса ӧксыяслы да юралысьяслы паныд, попъяслы да войтырлы паныд.
Найӧ кутасны тышкасьны тэкӧд, но тэнӧ оз вермыны, ӧд Ме тэкӧд, — висьталӧ Господь. — Ме мезда тэнӧ».
Меным вӧлі Господьсянь кыв.
Господь тшӧктіс меным мунны Ерусалимӧ да юӧртны сэні, мый Господь тадзи висьталӧ: — Ме эг вунӧд, кыдзи том дырйиыд тэ сьӧлӧмсянь кесъялін Меным, тэ радейтін Менӧ, кор тэ вӧлін Меным гӧтырпуӧн на, тэ мунін Ме бӧрся овтӧминӧд, кӧні нинӧм он кӧдз ни он быдты.
Израиль — Господьлӧн вежаторйыс, Сылӧн медводдза вотӧсыс.
Ставнысӧ, кодъяс ньылыштісны сійӧс, вӧлі мыждӧма, ыджыд шог суис найӧс, — висьталӧ Господь.
Кывзӧй Господьлысь кывсӧ, Яковсянь чужысьяс, Израильлӧн чужанкотыръяс!
Господь тадзи висьталӧ: — Аддзылісны ӧмӧй тіян батьясныд, мый Ме ог веськыда вӧч? Таысь ӧмӧй найӧ ылыстчисны Меысь? Найӧ вӧтчисны идолъяс бӧрся, нинӧм бӧрся моз, и асьныс лоины татшӧмӧсь. Найӧ эз корсьны Господьӧс, коді петкӧдіс миянӧс Египетысь, нуӧдіс миянӧс овтӧминӧд, куш да гурана муӧд, кос да сап пемыд муӧд, муӧд, кыті некод эз ветлы, кӧні морт эз овлы.
Ме вайӧді тіянӧс муӧ, кӧні быдмӧны сад йӧръяс, медым ті пӧткӧдчинныд вотӧснас да бурторъяснас.
Но ті локтінныд да пежалінныд Менсьым муӧс, вӧчинныд сійӧс зывӧкторйӧн.
Попъяс эз корсьны Господьӧс, Индӧдӧ велӧдысьяс эз тӧдны Менӧ, Менсьым войтырӧс видзысьяс кыпӧдчисны Меным паныд, пророкъяс пророкалісны Ваал нимсянь. Найӧ ставныс юрбитісны идолъяслы, кодъяс отсавны оз вермыны.
Та вӧсна Ме мыжала тіянӧс, — висьталӧ Господь, — мыжала тіянлысь челядьнытӧ да налысь челядьнысӧ.
Мунӧй киттимса діяс вылӧ, мӧдӧдӧй Кедарӧ йӧзӧс, сюся видзӧдӧй-тӧдмалӧй, вӧчӧны-ӧ сэтчӧс войтыръяс Менам войтыр моз.
Мукӧд войтыръяслӧн енъясыс — абу збыль Ен, но найӧ оз вежлавны енъяснысӧ.
А Менам войтырӧй вежис Менӧ, найӧ вежисны ассьыныс дзирдлунсӧ идолъяс вылӧ, кодъяс отсавны оз вермыны.
Весьӧпӧрӧй таысь, енэжъяс, ёна дзӧрӧй-тіралӧй, — висьталӧ Господь. — Менам войтырӧй вӧчис кык лёктор: эновтіс Менӧ, ловъя ва петанінсӧ, да кодйис аслыс буждысь юкмӧсъяс, кодъяс оз вермыны ва кутны.
Израиль войтыр ӧд абу кесйӧг, чужӧмсяньыс сійӧ абу киподувса.
Мыйла сійӧ лои кыйдӧсӧн?
Том левъяс эргӧны сы вылӧ, кылӧ налӧн равзӧм шыыс. Израиль мусӧ найӧ вӧчисны овтӧминӧн, сылысь каръяссӧ пазӧдісны, сэні эз коль олысьыс.
Мемфис да Тафнис каръясын олысьяс кушӧдз шырисны тэнсьыд юртӧ.
Но таысь тэ ачыд мыжа, ӧд тэ эновтін Господьӧс, ассьыд Ентӧ, кор Сійӧ нуӧдіс тэнӧ.
Мый бурыс тэныд сыысь, мый тэ мунан Египетӧ, медым юны Нил юысь васӧ?
Мый бурыс тэныд сыысь, мый тэ мунан Ассурӧ, медым юны Ефрат юысь васӧ?
Тэнад лёк вӧчӧмыд мыждас тэнӧ асьтӧ, Менӧ эновтӧмысь тэнӧ лоӧ чирыштӧма.
Сідзкӧ, тӧд да гӧгӧрво, кутшӧм курыд шог тэнӧ суас сыысь, мый тэ эновтін Господьӧс, ассьыд Ентӧ, мый тэ пытшкын Меысь полӧмыс абу, — висьталӧ Ыджыдыс, Господь Саваоф.
Ме важӧн нин жугӧді тэнсьыд сийӧстӧ, орйӧдлі тэнсьыд кӧртӧдъястӧ. Тэ шулін, мый он кут юрбитны идолъяслы, но став джуджыд керӧс вылын, быд пашкыр пу улын тэ куйлін кырсалысь ань моз.
Ме пукті да быдті тэнӧ, тэ вӧлін бур вотӧс вайысь виноград пу кодь, артмин медся бур кӧйдысысь, но лоин мӧд виноград пулӧн вожйӧн.
Дерт, тэ верман мыссьыны кунваӧн, ёна ниртны асьтӧ майтӧгӧн, но тэнад мыжъясыд кольӧны Ме водзын, — висьталӧ Господь Ыджыдыс.
Тэ ӧмӧй верман шуны: «Ме сӧстӧм, ме эг юрбит Ваал идолъяслы».
Видзӧдлы аслад уджъяс вылӧ, мӧвпыштлы, мый тэ вӧчин ковтысын! Тэ вӧлін том энь верблюд кодь, коді рӧдйӧн котралӧ ӧтарӧ-мӧдарӧ.
Тэ вӧлін овтӧминын быдмӧм вӧлявывса энь осёл кодь, лёкколӧмыд дырйи вомтырнад апалін сынӧдсӧ. Коді вермас кутны тэнӧ?
Тэнӧ корсьысьяслы абу колана мудзтӧдзныс котравны, нӧйччигад тэнӧ кокньыда позьӧ аддзыны.
Видзчысь, медым котралігад эн коль кӧмтӧг, медым горшыд дзикӧдз эз косьмы.
Но тэ шуин: «Ог кӧсйы кывзыны тайӧс! Меным мусаӧсь мукӧд енъяс, и налы ме юрбита».
Кыдзи гусясьысьӧс кутӧны да янӧдӧны, тадзи юръяндзим лои Израиль войтырлы, сылӧн ӧксыяслы да веськӧдлысьяслы, попъяслы да пророкъяслы. Пулы войтырыс шуӧ, тэ пӧ менам батьӧй, излы шуӧ, тэ пӧ чужтін менӧ.
Найӧ бергӧдісны Меланьӧ мышнысӧ, а эз чужӧмнысӧ.
Но кор шогыс суӧ найӧс, найӧ шуалӧны: «Лок да отсав миянлы!»
Но кӧні тіян киӧн вӧчӧм енъясныд?
Вермӧны кӧ, найӧ мед отсаласны тіянлы шог дырйиныд.
Ӧд тэнад, Иуда войтыр, сы мында жӧ енмыс, мыйта тэнад карыд.
Мыйла ті мыжаланныд Менӧ?
Ті [шогмытӧма олінныд,] ставныд кыпӧдчинныд Меным паныд, — висьталӧ Господь. — 
Весьшӧрӧ Ме нӧйтлі тіянлысь челядьнытӧ, найӧ эз сибӧдны Менсьым туйдӧдӧмӧс.
Чашйысь лев моз тіян шыпуртныд бырӧдліс пророкъяснытӧ [но тайӧ тіянӧс эз повзьӧд].
Ӧнія олысьяс, гӧгӧрвоӧй Господьлысь кывсӧ: Вӧлі-ӧ Ме Израиль войтырлы овтӧминӧн?
Вӧлі-ӧ Ме сылы пемыд муӧн?
Мыйла Менам войтырӧй шуӧ, ми пӧ мунам, кытчӧ кӧсъям, огӧ пӧ бергӧдчӧй Тэ дінӧ?
Том ныв ӧмӧй вунӧдас пасьтавны мичмӧдчанторъяссӧ, гӧтырпу — кӧлысь паськӧмлысь вӧньсӧ?
Но Менам войтырӧй важӧн нин вунӧдіс Менӧ.
Кутшӧм наяна тэ сибӧдчан муслун корсигад, весиг лёк оласнога аньясӧс аслад туйӧ велӧдан!
Тэ эн су коньӧр йӧзӧс гусясиганыс, но паськӧмыд ляксьӧма тайӧ мыжтӧм йӧзлӧн вирнас. И та вылӧ видзӧдтӧг тэ шуалан: «Ме мыжтӧм, оз су менӧ Енлӧн скӧрлуныс».
Но Ме мыжала тэнӧ сыысь, мый шуан, ме пӧ мыжсӧ эг вӧчлы.
Мыйла тэ дугдывтӧг шӧйтан, ӧтарӧ-мӧдарӧ вежлалан ассьыд туйтӧ?
Ассур моз Египет янӧдас тэнӧ.
Тэ яналӧмӧн кутчысян юрад да петан Египетысь. Ӧд Господь ӧтдортіс найӧс, код вылӧ тэ лача кутан. Найӧ оз отсавны тэныд.
Господь тадзи висьталӧ: «Верӧсыс кӧ вӧтлас ассьыс гӧтырсӧ, и гӧтырыс кӧ верӧс дінсьыс мунӧм бӧрын петас мӧд сайӧ, сэки верӧсыс оз вермы сійӧс бӧр босьтны.
А тадзи кӧ вӧчанныд, мунытӧ пежаланныд.
Тэ, Израиль войтыр, кырсалысь ань моз сетчин мукӧд енъяслы, но ӧні бергӧдчы Ме дінӧ, — висьталӧ Господь. — 
Лэпты синтӧ изъя керӧсъяслань да видзӧдлы, эм-ӧ сэтшӧм керӧсыс, кӧні эськӧ тэ эн сетчы мукӧд енъяслы.
Овтӧминын кыйӧдчысь араб моз тэ пукалін туй бокын да виччысин ветлысь-мунысьясӧс. Мукӧд енъяслы сетчӧмнад да лёк вӧчӧмнад тэ пежалін мусӧ.
Та вӧсна зэрыс эз вӧв, эз киссьы тувсовъя зэр.
Тэнад чужӧмыд кырсалысь аньлӧн кодь, тэ воштӧмыд яндзимтӧ.
Ӧні тэ шыасян Ме дінӧ: “Батьӧй, менам томдырсянь Тэ вӧлін менӧ туйдӧдысьӧн.
Тэ ӧмӧй пыр пондан лӧгавны?
Тэ ӧмӧй помтӧг кутан скӧравны?” 
Тадзи тэ, Израиль войтыр, сёрнитан, но ачыд тэ сы мында лёксӧ вӧчан».
Иосей ӧксылӧн веськӧдлан кадӧ Господь шуис меным: «Аддзылін-ӧ тэ, мый вӧчис Израиль войтыр, коді эновтіс Менӧ?
Сійӧ ветлывліс быд джуджыд керӧс вылӧ да быд пашкыр пу улӧ, и сэні кырсалысь ань моз сетчис мукӧд енъяслы.
Ме чайті, мый тадзи вӧчӧм бӧрас сійӧ бергӧдчас Ме дінӧ, но сійӧ эз бергӧдчы.
Ставсӧ тайӧс аддзыліс Иуда войтыр, сылӧн ылӧдчысь чойыс.
Израиль войтыр эновтіс Менӧ. Тадзи найӧ пежалісны йитӧдӧс, мый Ме кӧрталі накӧд. Та вӧсна Ме сеті Израиль войтырлы торйӧдчан гижӧд да вӧтлі сійӧс Ас дінысь. Ме аддзылі, мый та вылӧ видзӧдтӧг Иуда, сылӧн ылӧдчысь чойыс, эз повзьы, но ачыс кырсалысь ань моз тшӧтш сетчис мукӧд енъяслы.
Яндысьтӧм кырсалӧмнас Иуда пежаліс мусӧ. Изъяслы да пуяслы юрбитӧмнас сійӧ пежаліс йитӧдӧс, мый Ме кӧрталі сыкӧд.
Но весиг та бӧрын Иуда, Израильлӧн ылӧдчысь чойыс, эз сьӧлӧмсяньыс бергӧдчы Ме дінӧ, а сӧмын ылӧдчис», — висьталӧ Господь.
Господь шуис меным: «Менӧ эновтысь Израиль вӧчис веськыдаджык ылӧдчысь Иуда дорысь.
Мун войвывлань да юӧрт тайӧ кывъяссӧ: — Бергӧдчы, Израиль, Менӧ эновтысь, — висьталӧ Господь.
— Ме ог кисьт Ассьым скӧрлунӧс тіян вылӧ, ӧд Ме бур сьӧлӧма, — висьталӧ Господь, — Ме ог скӧрав дугдывтӧг.
Сӧмын гӧгӧрво ассьыд мыжтӧ, мый тэ Господьлы, аслад Енлы, паныд кыпӧдчин, котралін мукӧд енъяс дінӧ быд пашкыр пу улӧ, но Менсьым тэ эн кывзысь, — висьталӧ Господь».
«Бергӧдчӧй Ме дінӧ, кывзысьтӧм войтырӧй, — висьталӧ Господь, — ӧд Ме — тіян Верӧсныд. Весиг кӧ карын коляс ӧти морт, чужанкотырын — кык морт, Ме босьта найӧс да вайӧда Сионӧ.
Ме сета тіянлы видзысьясӧс, кодъяс лоӧны Меным сьӧлӧм серти. Найӧ пондасны видзны тіянӧс мывкыдлунӧн да вежӧрлунӧн.
Кор ті соданныд да рӧдманныд тайӧ му вылас, — висьталӧ Господь, — сэки оз нин кутны сёрнитны Господьлӧн Йитӧд куд йылысь, оз нин кутны мӧвпавны сы йылысь, оз казьтыштны да оз гажтӧмтчыны сы вӧсна. Кудсӧ выльысь оз нин вӧчны.
Сійӧ кадас Ерусалим карсӧ шуасны Господьлӧн юралан пуклӧсӧн.
Став войтыръясыс чукӧртчасны Ерусалимӧ, медым ыдждӧдлыны Господьлысь нимсӧ. Найӧ оз нин кутны овны асланыс лёк да чорыд сьӧлӧмныс серти.
Сійӧ лунъясас Иудалӧн чужанкотыръясыс да Израильлӧн чужанкотыръясыс ӧтвылысь локтасны войвыв муысь сійӧ муас, мый Ме вичмӧді тіян батьяслы».
— Ме, Господь, мӧвпышті, мый войтыръяс пӧвстысь Ме бӧръя тэнӧ, сета тэныд бур му, вичмӧда войтыръяслысь мича мусӧ.
Ме чайті, тэ пондан шуны Менӧ Батьӧн да он бергӧдчы Меысь.
Но кыдзи гӧтырыс ылӧдлӧ ассьыс верӧссӧ, тадзи тэ, Израиль войтыр, ылӧдлін Менӧ, — висьталӧ Господь.
Изъя керӧсъяс вылын кылӧ гӧлӧс шы, Израиль войтырлӧн бӧрдӧм да кевмӧм шы, ӧд найӧ кежисны асланыс туй вылысь, вунӧдісны Господьӧс, ассьыныс Енсӧ.
— Бергӧдчӧй Ме дінӧ, кывзысьтӧм челядьӧй, Ме бурдӧда тіянӧс Менӧ эновтӧмысь.
— Со, ми локтам Тэ дінӧ, ӧд Тэ — Господь, миян Енным.
Збыльысь, идолъяслы юрбитысьяс ылӧдлӧдны асьнысӧ мылькъяс вылын, весьшӧрӧ шызьӧны керӧсъяс вылын.
Збыльысь, Израильлӧн мездмӧмыс Господьсянь, миян Енсянь.
Миян том кадсянь зывӧк Ваал идол сёйис ставсӧ, мый могысь батьясным уджалісны, сёйис налысь ыжъяссӧ да ӧшъяссӧ, пиянсӧ да нывъяссӧ.
Яналӧмӧн уськӧдчамӧй муас, юръяндзим мед вевттяс миянӧс, ӧд томдырсянь да ӧніӧдз ми да миян батьясным мыж вӧчим асланым Господь Енлы паныд. Ми эгӧ кывзӧй Господьӧс, ассьыным Енмӧс.
— Израиль, тэ кӧ бергӧдчан, — висьталӧ Господь, — тэ кӧ бергӧдчан Ме дінӧ да вештан Менам син водзысь зывӧк идолъястӧ, сэки дугдан шӧйтнытӧ.
Тэ кӧ ловъя Господь водзын кыв сетан, сідзкӧ, веськыда да збыльыс серти тайӧс вӧчан, сэки войтыръяслы лоӧ бурсиӧмыс Господьсянь, и найӧ пондасны ошкыны Сійӧс.
Иудаын да Ерусалимын олысьяслы Господь тадзи висьталӧ: — Гӧрӧй аслыныд выль муяс, энӧ йӧн пӧвстӧ кӧдзӧй.
Иудаын да Ерусалимын олысьяс, вундыштчӧм пыр сиӧй асьнытӧ Господьлы, вундыштӧй ассьыныд сьӧлӧмнытӧ, медым тіян лёк вӧчӧмныд вӧсна Менам скӧрлунӧй эз ыпнит би моз, и сійӧс кусӧдны некод эз вермы.
Висьталӧй Иудаын, юӧртӧй Ерусалимын, му пасьтала буксӧй буксанӧн, гораа горзӧй да юӧртӧй: «Локтӧй, чукӧртчамӧй, мунамӧй изкаръясӧ!»
Лэптӧй дӧрапас Сион керӧс вылын, пышйӧй-котӧртӧй тэрмасьӧмӧн, ӧд войвывсянь Ме вайӧда ыджыд шог да бырӧдӧм.
Сук вӧрысь петӧ лев, локтӧ войтыръясӧс бырӧдысь. Сійӧ петӧ аслас оланінысь, медым пазӧдны тэнсьыд мутӧ.
Тэнсьыд каръястӧ лоӧ кисьтӧма-жугӧдӧма, сэні оз коль олысьыс.
Та вӧсна пасьталӧй ассьыныд шогалан паськӧмнытӧ, сыркъялӧй-бӧрдӧй, ӧд Господьлӧн яр скӧрлуныс абу вешйӧма миян дінысь.
«Сійӧ лунӧ, — висьталӧ Господь, — ӧксылысь да юралысьяслысь сьӧлӧмсӧ топӧдас, попъясӧс полӧм босьтас, пророкъяс шӧйӧвошасны».
Сэки ме шуи: «Господьӧй Ыджыдӧй, Тэ пӧръялін тайӧ войтырсӧ да Ерусалимын олысьясӧс. Тэ шуин, мый налӧн лоӧ лӧнь олӧм, но миянӧс бырӧдӧны шыпуртӧн».
Сійӧ кадас тайӧ войтырыслы да Ерусалимын олысьяслы лоӧ висьталӧма: «Овтӧминса керӧсъяс вывсянь сотысь тӧвныр пондас пӧльтны Менам войтыр вылӧ. Татшӧм тӧвныр дырйи он вермы тӧлӧдны-весавны шобді тусь.
Татшӧм ён тӧвныр локтас Менам кӧсйӧм серти, кор Ме понда мыждыны тайӧ войтырсӧ.
Вӧрӧг кыпӧдчас кымӧр моз, сылӧн тарантасъясыс тӧвныр кодь тэрыбӧсь, сылӧн вӧвъясыс кутшъяс дорысь на тэрыбджыкӧсь.
Сэки ті горӧданныд: “Курыд шог миянлы! Миянӧс лоӧ бырӧдӧма!”»
— Ерусалим, сӧстӧммӧд ассьыд сьӧлӧмтӧ лёксьыс, сэки тэ мездман. Дыр-ӧ на тэ пондан видзны сьӧлӧмад лёк мӧвпъястӧ?
Дан чужанкотырлӧн мусянь кылӧ гӧлӧс шы, Ефрем керӧсвыв мусянь — бырӧдӧм йылысь юӧр.
Висьталӧй войтыръяслы, юӧртӧй Ерусалимын олысьяслы, мый ылі муысь локтӧ уна лыда тышкайӧз, горзӧмӧн найӧ уськӧдчӧны иудаса каръяс вылӧ.
Воӧм нянь видзысьяс моз найӧ кытшалісны Ерусалим кар, ӧд сэні олысьяс кыпӧдчисны Меным паныд, — висьталӧ Господь. — 
Тэнад туйясыд да уджъясыд вайисны тэныд шогсӧ, лёк вӧчӧмсьыд сьӧлӧмыд тырӧма курыд шогӧн.
— Меным зэв сьӧкыд, менам сьӧлӧмӧй висьӧ дойысь, сійӧ ставнас тіралӧ, ме ог вермы чӧв овны.
Ме кыла буксан шы — тыш вылӧ чуксалӧм.
Выльысь и выльысь локтӧ бырӧдӧм, мусӧ ставнас куштӧма. Виччысьтӧг пазӧдісны менсьым чомъясӧс, ӧти здукӧн косялісны чом дӧраясӧс.
Дыр-ӧ на меным видзӧдны дӧрапас вылӧ, кывны буксан шы?
— Менам войтырӧй мывкыдтӧм, Менӧ найӧ оз тӧдны. Найӧ мывкыдтӧм челядь кодьӧсь, нинӧм оз вежӧртны, лёксӧ вӧчны сюсьӧсь, а бурсӧ вӧчны оз кужны.
— Ме видзӧдлі му вылас, а сійӧ вӧлі мыгӧртӧм да куш. Видзӧдлі енэжас, а сэні югыдыс эз вӧв.
Видзӧдлі керӧсъяс вылӧ, а найӧ сыркакылісны, став керӧсъясыс дзӧрисны-тіралісны.
Ме видзӧдлі, и весиг ӧти морт эз вӧв, став лэбачыс вӧлі лэбзьӧма.
Ме видзӧдлі, а бур му лоӧма кушинӧн, каръяс киссьӧмаӧсь Господьлӧн кӧсйӧм серти Сылӧн яр скӧрлунысь.
Господь тадзи висьталӧ: — Тайӧ муыс лоӧ кушинӧн, но дзикӧдз ог бырӧд сійӧс.
Муыс пондас бӧрдны, выліын енэжыс пемдас. Ме шуи тадзи, и ог веж Ассьым кывйӧс.
Верзьӧмаяслӧн да ньӧвйӧн лыйсьысьяслӧн горзӧмысь каръясысь пышъясны олысьяс. Найӧ дзебсясны сук вӧрӧ, мунасны изкыртаясӧ.
Каръяссӧ лоӧ эновтӧма, олысьыс сэні оз коль.
А тэ, пазӧдӧм кар, мый вӧчан?
Тэ пасьталан пемыдгӧрд паськӧм, мичмӧдан асьтӧ зарни мичмӧдчанторъясӧн, мавтан синдорыштӧ. Но весьшӧрӧ тэ мичмӧдан асьтӧ, ӧд тэнад мусукъясыд мустӧмтӧны тэнӧ, найӧ кӧсйӧны босьтны тэнсьыд олӧмтӧ.
Ме кыла гӧлӧс шы, сійӧ чужтысь аньлӧн гӧлӧс шы кодь, медводдза кагасӧ сьӧкыда чужтысьлӧн горзӧм шы кодь. Тайӧ — Сион нывлӧн гӧлӧс шыыс.
Кисӧ нюжӧдӧмӧн сійӧ сьӧкыда ойзӧ: «Курыд шог меным! Виавны локтысьяс водзын ме вынтӧм».
— Ветлӧдлӧй ерусалимса уличьясті, видзӧдалӧй да тӧдмалӧй, корсьӧй изэрдъяс вылысь мортӧс, коді олӧ веськыда да кутчысьӧ збыляс.
Аддзанныд кӧ, сэки Ме прӧстита Ерусалимын олысьясӧс.
— Найӧ кыв сетӧны ловъя Господь водзын, но налӧн кыв сетӧмныс — пӧръясьӧм.
Господьӧй, Тэнад синмыд кӧсйӧ аддзыны збыльсӧ.
Тэ нӧйтан найӧс, но налы веськодь.
Тэ бырӧдан найӧс, но найӧ оз кӧсйыны вежӧрсявны.
Найӧ чорзьӧдісны асьнысӧ, лоины изйысь чорыдджыкӧсь на, оз кӧсйыны бергӧдчыны Тэ дінӧ.
Ме шуи, мый найӧ коньӧр да мывкыдтӧм йӧз, найӧ оз тӧдны Господьлысь туйсӧ, оз тӧдны асланыс Енлысь Индӧдсӧ.
Ме шуи, мый муна нималана йӧз дінӧ, понда сёрнитны накӧд, ӧд найӧ тӧдӧны Господьлысь туйсӧ, тӧдӧны асланыс Енлысь Индӧдсӧ.
Но найӧ тшӧтш жугӧдісны сийӧснысӧ, орӧдісны кӧртӧднысӧ.
Та вӧсна сук вӧрысь на вылӧ уськӧдчас лев, овтӧминса кӧин косявлас найӧс, леопард кыйӧдчӧ на бӧрся кар дорын, косявлас найӧс, кодъяс петасны карысь, ӧд налӧн мыжныс лыдтӧм-тшӧттӧм, найӧ унаысь эновтлісны Енсӧ.
— Кыдзи Меным прӧститны Ерусалимын олысьясӧс?
Найӧ эновтісны Менӧ, ылӧг енъяс водзын кыв сетӧны.
Ме пӧткӧді найӧс, а найӧ пежалӧны гозъякост олӧм, чукӧръясӧн ветлӧдлӧны кырсалысь аньяслӧн керкаясӧ.
Найӧ тшӧгӧдӧм вӧвъяс кодьӧсь, на пытшкын ыджыдалӧ лёкколӧм, быдӧн гӧрдлӧ орччӧн олысьлӧн гӧтырыс вылӧ.
Таысь ӧмӧй Ме ог мыжды найӧс? — висьталӧ Господь.
— Ог ӧмӧй водзӧс перйы тадзи вӧчысь войтырлысь?
— Мунӧй виноград йӧръясӧ да пазӧдӧй найӧс, но энӧ дзикӧдз.
Кералӧй вожъяссӧ, ӧд найӧ абу Господьлӧн.
Израиль войтыр да Иуда войтыр эновтісны Менӧ, — висьталӧ Господь. —
Найӧ ылӧгсӧ висьталісны Господь йылысь: «Сійӧ нинӧм миянлы оз вӧч. Шогыс оз су миянӧс, шыпуртыс да тшыглуныс оз инмӧдчы миян дінӧ.
Пророкъяс тӧвныр кодьӧсь, налӧн кывйыс абу Господьсянь.
Шыпуртыс да тшыглуныс мед найӧс асьнысӧ суас!»
Господь Ен Саваоф тадзи висьталӧ: — Сыысь, мый найӧ шуалӧны татшӧм кывъяс, Ме пукта Ассьым кывъясӧс тэнад вомӧ, и вӧча найӧс биӧн. А тайӧ войтырыс лоӧ пескӧн, и биыс ньылыштас найӧс.
Кывзы, Израиль войтыр! Ме вайӧда тэныд паныд ылі муысь войтырӧс, — висьталӧ Господь. — Тайӧ войтырыс вына, сійӧ вӧлі важысянь нин, сылысь кывсӧ тэ он тӧд, сёрнисӧ он гӧгӧрво.
Тайӧ войтырыс — вына тышкасьысьяс, налӧн ньӧвъясысь ті веськаланныд гуӧ.
Найӧ сёясны тэнсьыд кӧдзастӧ и няньтӧ, виасны тэнсьыд пиянтӧ и нывъястӧ, сёясны тэнсьыд ыжъястӧ и ӧшъястӧ, виноградтӧ и инжиртӧ.
Шыпуртӧн найӧ бырӧдасны изкаръяснытӧ, мый вылӧ ті лача кутанныд.
«Но весиг сійӧ лунъясас, — висьталӧ Господь, — ог дзикӧдз бырӧд тіянӧс.
Кор тэнсьыд юаласны, мый вӧсна Господь, тіян Енныд, тадзи вӧчис тіянкӧд, сэки вочавидз: “Ті эновтінныд Енсӧ да асланыд муын кесъялінныд мукӧд енъяслы. Та вӧсна ті понданныд кесъявны йӧз муын мукӧд войтырлы”».
Висьталӧй Яковсянь чужысьяслы, юӧртӧй Иудаын олысьяслы:
— Мывкыдтӧм да вежӧртӧм войтырӧй, кывзы тайӧ кывъяссӧ. Тіян эм синъяс, но ті онӧ аддзӧй, тіян эм пельяс, но ті онӧ кылӧй.
Ті ӧмӧй онӧ полӧй Меысь, — висьталӧ Господь, — ті ӧмӧй онӧ тіралӧй Ме водзын?
Лыасӧ Ме пукті саридзлы вежтасӧн, потши саридзсӧ нэмъяс кежлӧ, сы сайӧ саридз оз вермы вуджнысӧ.
Гыясыс ӧдӧбӧн уськӧдчылӧны, но сэсся бӧр бергӧдчӧны, найӧ ызгӧны, но вежтассӧ вуджны оз вермыны.
Тайӧ войтырыс асныра, найӧ кыпӧдчисны Меным паныд, бергӧдчисны да мунісны Ме дінысь.
Найӧ оз шуны: «Ми полам Господьысь, асланым Енмысь, коді ас кадӧ сетӧ миянлы арся да тувсовъя зэр, индӧ миянлы нянь чукӧртан кад».
Лёк вӧчӧмъясныд гусялісны тіянлысь зэр да нянь, мыжъясныд мырддисны тіянлысь став бурсӧ.
Менам войтыр пӧвстын эмӧсь лёк вӧчысьяс, лэбач бӧрся моз найӧ кыйӧдчӧны, октӧны лэчьяс да кыйӧны йӧзсӧ.
Кыдзи лэбач кыйысьлӧн видзаніныс тырӧма лэбачӧн, сідзи жӧ лёк вӧчысьяслӧн керканыс тырӧма ылӧгӧн.
Найӧ вылӧ кыпӧдчӧны, озырмӧмаӧсь, тшӧгнысла найӧ лӧсталӧны, пӧтлытӧг вӧчӧны лёксӧ, найӧ оз веськыда мыждыны, батьтӧм-мамтӧмъясӧс оз дорйыны, гӧльяслы оз отсавны ёрд вылын.
Таысь ӧмӧй Ме ог мыжды найӧс? — висьталӧ Господь.
— Ог ӧмӧй водзӧс перйы тадзи вӧчысь войтырлысь?
Мыйта зывӧкыс да пежыс вӧчсьӧ тайӧ муас: пророкъяс юӧртӧны ылӧгсӧ, попъяс веськӧдлӧны ас кӧсйӧм сертиныс, и Менам войтырлы тайӧ сьӧлӧм сертиныс.
Но та бӧрти мый виччысьӧ тіянӧс?
Веняминсянь чужысьяс, пышйӧй Ерусалимысь, Текоя карын буксӧй буксанӧн, Бет-Каремын пас пыдди пестӧй би, ӧд войвывсянь локтӧ ыджыд шог да бырӧдӧм.
Ме бырӧда Сион нылӧс, мича да ляб карӧс.
Ыж видзысьяс моз сы дорӧ локтасны ӧксыяс, вайӧдасны ассьыныс тышкайӧз чукӧръяснысӧ, сувтӧдасны сы гӧгӧр чомъяснысӧ, быдӧн босьтас аслыс му юкӧн.
Найӧ шуалӧны: «Дасьтысьӧй Сионлы паныд тыш кежлӧ, уськӧдчамӧй луншӧрнас.
Но нинӧм оз артмы, ӧд луныс колис нин, петкӧдчис рытъя вуджӧр.
Уськӧдчамӧй войшӧрнас, пазӧдам налысь изкаръяссӧ!»
Ӧд Господь Саваоф тадзи висьталӧ: — Кералӧй пуяссӧ, Ерусалимлы паныд кыпӧдӧй тымӧд. Тайӧ карас ыджыдалӧ нартитӧм, та вӧсна сійӧс виччысьӧ мыждӧм.
Кыдзи ва петанінысь ылькйӧ-петӧ ва, тадзи тайӧ карсьыс петӧ лёкыс. Сэні ыджыдалӧ виалӧм-дзескӧдӧм да мырддялӧм, висьӧм да дойяс оз вешйывны Менам син водзысь.
Вежӧрсяв, Ерусалим, медым Ме эг бергӧдчы тэысь, медым Ме эг вӧч тэнӧ овтӧминӧн, сэтшӧм муӧн, кӧні некод оз ов.
Господь Саваоф тадзи висьталӧ: — Кыдзи кушӧдз нетшкӧны-чукӧртӧны виноград вотӧс, тадзи чукӧртасны Израильлысь коляс войтырсӧ.
Виноград чукӧртысь моз нюжӧд китӧ пу вожъяслань.
— Кодлы меным висьтавнысӧ, кодӧс туйдӧднысӧ, коді кывзас менӧ?
Налӧн пельясныс тупкыса, найӧ оз вермыны кывзынысӧ.
Господьлысь кывсӧ найӧ мустӧмтӧны, нинӧмӧ пуктӧны сійӧс.
Та вӧсна ме тырӧма Господьлӧн скӧрлунӧн, ас пытшкам ог вермы кутны сійӧс.
Господьӧй, кисьт скӧрлунтӧ туй вылын ветлӧдлысь челядь вылӧ, чукӧртчӧм зонъяс вылӧ.
Айуловӧс да аньясӧс нуӧдасны пленӧ, нуӧдасны тшӧтш пӧрысь да олӧма йӧзӧс.
Налӧн керкаясныс, видз-муныс да гӧтыръясныс вичмасны йӧз муысь локтысьяслы, ӧд Ме лэпта киӧс тайӧ муас олысьяс вылӧ, — висьталӧ Господь. — Ичӧтсянь гырысьӧдз — ставныс ылӧдлӧмӧн озырмӧдчӧны, пророкъяс и попъяс — ставныс пӧръясьӧны.
Найӧ чайтӧны, мый кокньыда бурдӧдӧны Менам войтырлысь дойяссӧ, шуалӧны: «Лӧнь олӧм, лӧнь олӧм!», а лӧнь олӧмыс абу.
Яндысьтӧг найӧ вӧчӧны зывӧксӧ, нинӧмысь оз повны, весиг оз гӧрдӧдны.
Та вӧсна найӧ усясны усьӧмаяс пӧвстӧ, крукасясны, кор Ме мыжда найӧс, — висьталӧ Господь.
Господь тадзи висьталӧ: — Сувтыштлӧй асланыд туй вылӧ, видзӧдлӧй да юасьӧй важся ордым йылысь, юасьӧй, кӧні веськыд туйыс, сэті и мунӧй, сэки асланыд ловлы ті аддзанныд шойччӧг.
Но ті шуинныд, огӧ пӧ мунӧй.
Ме сувтӧді тіянлы видзысьясӧс, тшӧкті кывзыны буксан шы.
Но ті шуинныд, огӧ пӧ кывзӧй.
«Сідзкӧ, кывзӧй, войтыръяс, тӧдӧй, мый лоӧ тайӧ войтырыскӧд!
Кывзы, муыс! Ме ыста тайӧ войтырыслы шог.
Тайӧ шогыс — налӧн лёк мӧвпъяслӧн вотӧсыс, ӧд Менсьым кывъясӧс найӧ эз кывзыны, Менсьым Индӧдӧс найӧ ӧтдортісны.
Меным оз ков Саваысь вайӧм ладаныс, оз ков ылі муысь вайӧм чӧскыд дука туруныс.
Тіянлысь сотан висьяснытӧ Ме ог кӧсйы, тіян висьясныд Меным абу шогманаӧсь».
Та вӧсна Господь тадзи висьталӧ: «Ме пукта тайӧ войтырыслы мытшӧдъяс. Сэтчӧ крукасясны батьясныс и пиянныс, ёртъясныс и орччӧн олысьясныс, и ставныс найӧ куласны».
Господь тадзи висьталӧ: — Войвыв муысь локтӧны тышкайӧз, му помсянь локтӧ уна лыда войтыр.
Налӧн кианыс ньӧввуж да шы, найӧ скӧрӧсь, некодӧс оз жалитны, налӧн гӧлӧс шыныс бузгысь саридзлӧн кодь. Найӧ рӧдтӧны вӧвъяс вылын, дасьӧсь тышкасьны тэкӧд, Сион ныв.
— Ми кылім на йылысь юӧр, и миян киясным вынтӧммисны, шогыс суис миянӧс, дойыс топӧдіс миянӧс кага чужтысь аньӧс моз.
Энӧ петӧй видз-му вылӧ, энӧ ветлӧдлӧй туй вывті, ӧд вӧрӧг кыйӧдчӧ шыпуртӧн, повзьӧдлӧ быд боксянь.
Менам войтырӧй, пасьтав шогалан паськӧмтӧ, туплясь пӧим пытшкын.
Бӧрд, быттьӧ ӧтка пиыд кулӧма, курыда бӧрд, ӧд виччысьтӧг локтас миянӧс бырӧдысь.
— Ме бӧрйи тэнӧ, Еремей, сувтӧді тэнӧ башня пыдди Аслам войтыр пӧвстӧ, пукті тэнӧ туявны налысь туйсӧ.
Ставныс найӧ — асныраӧсь да кывзысьтӧмӧсь, олӧны суклясьӧмӧн.
Найӧ шогмытӧмӧсь, ыргӧн да кӧрт кодьӧсь.
Эзысь сывдысь пӧльтӧ пушканӧн *, биын сывдӧ эзысь да свинеч, но весьшӧрӧ уджалӧ, ӧд сорасыс оз торъяв.
Найӧс шуасны ковтӧм эзысьӧн, ӧд Господь ӧтдортіс найӧс.
Еремейлы вӧлі Господьсянь кыв:
«Сувт Господьлӧн крам дзиръя дорӧ да юӧрт сэні, мый Ме висьтала.
Кывзӧй Господьлысь кывсӧ, Иуда муын олысьяс, кодъяс ветланныд тайӧ дзиръяӧд копыртчыны Господьлы.
Господь Саваоф, Израильлӧн Ен, тадзи висьталӧ: веськӧдӧй ассьыныд туйяснытӧ да вӧчӧй бурсӧ, сэки Ме сета тіянлы овны тайӧ муас.
Ті шуанныд: “Тані Господьлӧн крамыс, Господьлӧн крамыс, Господьлӧн крамыс”. Тайӧ шуӧмнас энӧ ылӧдлӧй асьнытӧ, мый ставыс бур.
Ті кӧ збыльысь веськӧданныд ассьыныд туйяснытӧ, вӧчанныд бурсӧ да веськыда мыжданныд ӧта-мӧднытӧ, онӧ кӧ дзескӧдӧй йӧз муысь локтысьӧс, батьтӧм-мамтӧмӧс да дӧваӧс, онӧ кӧ кисьтӧй мыжтӧм йӧзлысь вирсӧ тайӧ муас, онӧ кӧ юрбитӧй мукӧд енъяслы аслыныд лёк вылӧ, сэки Ме лэдза тіянлы овны тайӧ муас, мый Ме сеті тіян батьяслы нэмъяс кежлӧ.
Но ті лача кутанныд ылӧгыс вылӧ, мый оз вай тіянлы бурсӧ.
Ті гусясянныд, виаланныд, пежаланныд гозъякост олӧм, кыв сетіганыд пӧръясянныд, сотанныд висьяс Ваал идоллы, юрбитанныд мукӧд енъяслы, кодъясӧс ті онӧ тӧдӧй. А сэсся ті локтанныд, сувтанныд Ме водзӧ тайӧ керкаас, мый сиӧма Менам нимлы, да шуаланныд, ми пӧ мездмӧмаӧсь, и водзӧ вӧчанныд став тайӧ пежсӧ.
Тайӧ керкасьыс, мый сиӧма Менам нимлы, ті вӧчинныд лёк вӧчысьяслы дзебсянін.
Ме ӧд ставсӧ аддза, — висьталӧ Господь.
Мунӧй Силомӧ сійӧ местаас, мый Ме водзынджык бӧрйи Аслам нимлы оланінӧн. Видзӧдлӧй, мый Ме вӧчи Силомкӧд Менам Израиль войтырлӧн лёк вӧчӧмыс вӧсна.
Ті на моз жӧ вӧчанныд пежсӧ, — висьталӧ Господь. — Ме дугдывтӧг висьталі тіянлы, но ті энӧ кывзӧй, Ме чуксалі тіянӧс, но ті энӧ вочавидзӧй. Та вӧсна тайӧ керкаыскӧд, мый сиӧма Менам нимлы, и мый вылӧ ті лача кутанныд, да тайӧ муыскӧд, мый Ме сеті тіянлы да тіян батьяслы, Ме вӧча Силом каркӧд моз.
Ефремсянь чужысь вокъяснытӧ моз Ме вӧтла тіянӧс Аслам син водзысь.
Но тэ, Еремей, эн кевмысь тайӧ войтырыс вӧсна, корӧмӧн эн бӧрд на вӧсна. Эн шыась Ме дінӧ на пыдди, ӧд Ме ог кыв тэнӧ.
Тэ ӧмӧй он аддзы, мый найӧ вӧчӧны иудаса каръясын да ерусалимса уличьяс вылын?
Челядь пес чукӧртӧны, батьяс бипур пестӧны, аньяс няньшом дасьтӧны, медым кӧвдум пӧжавны идоллы, кодӧс шуӧны енэжвывса ӧксы-аньӧн. Найӧ вайӧны вина вись мукӧд енъяслы и тадзи дӧзмӧдӧны Менӧ.
Но Менӧ ӧмӧй найӧ дӧзмӧдӧны? — висьталӧ Господь.
— Найӧ асьнысӧ дӧзмӧдӧны, ӧд налы юръяндзим лоӧ.
Та вӧсна Господь Ыджыдыс тадзи висьталӧ: Менам скӧрлунӧй да ярлунӧй киссяс тайӧ местаыс вылӧ, йӧз и ыж-мӧс вылӧ, пуяс и быдтас-вотӧс вылӧ. Менам скӧрлунӧй ыпнитас и оз кус.
Господь Саваоф, Израильлӧн Ен, тадзи висьталӧ: сотан вись пыдди вайӧм яйнытӧ сёйӧй мукӧд висьяснытӧ моз!
Кор Ме петкӧді тіянлысь батьяснытӧ Египетысь, Ме эг тшӧктывлы вайны сотан висьяс да мукӧд висьяс.
Ме тшӧкті налы кывзысьны Менсьым да овны Менам тшӧктӧм серти, медым налы вӧлі бур. Ме кӧсйыси, мый сэки лоа налӧн Енмӧн, а найӧ лоасны Менам войтырӧн.
Но найӧ эз кывзыны Менӧ, эз сибӧдны Менсьым кывъясӧс. Найӧ олісны асланыс кӧсйӧм серти, лёк да чорыд сьӧлӧмныс серти, бергӧдісны Меланьӧ мышнысӧ, а эз чужӧмнысӧ.
Сійӧ лунсяньыс, кор тіян батьясныд петісны Египетысь, да ӧніӧдз Ме выльысь и выльысь мӧдӧдлі тіян дінӧ Ассьым кесйӧгъясӧс — пророкъясӧс.
Но ті энӧ кывзӧй Менӧ, энӧ сибӧдӧй Менсьым кывъясӧс. Ті асныралінныд да вӧчинныд лёксӧ асланыд батьяс дорысь унджык на.
Кор тэ висьталан тайӧ войтырыслы став тайӧ кывъяссӧ, найӧ оз кывзыны тэнӧ.
Кор тэ чукӧстан найӧс, найӧ оз вочавидзны.
Сэки тэ шу налы: тайӧ войтырыс оз кывзы аслас Господь Енлысь гӧлӧс шысӧ, оз сибӧд Сылысь туйдӧдӧмсӧ.
Збыльыс вошӧма, ӧд тайӧ войтырыс ӧтдортӧма збыльсӧ.
Сион, шыр ассьыд юрситӧ да шыбит, сыркъялӧмӧн бӧрд изъя керӧсъяс вылын, ӧд Господь ӧтдортіс да эновтіс тайӧ войтырсӧ, коді скӧрмӧдіс Сійӧс.
Иуда войтыр вӧчис Менам син водзын шогмытӧмсӧ, — висьталӧ Господь.
— Найӧ сувтӧдісны ассьыныс зывӧк идолъяснысӧ сійӧ керкаас, мый сиӧма Менам нимлы, да пежалісны тайӧ керкасӧ.
Бен-Хинном ковтысын найӧ лэптісны Тофет нима вись ваян мыльк, медым сотны сэні ассьыныс ныв-пинысӧ. Но тайӧс Ме эг тшӧктывлы вӧчнысӧ, тайӧ Меным абу сьӧлӧм серти.
Та вӧсна воасны лунъяс, — висьталӧ Господь, — кор тайӧ висьваянінсӧ оз нин кутны шуны Тофетӧн, а ковтыссӧ — Бен-Хинном ковтысӧн, но кутасны шуны виалан ковтысӧн. Сэтчӧ пондасны дзебны виӧмаясӧс, ӧд мӧдлаын местаыс оз ло.
Тайӧ войтырыслӧн шойясӧн кутасны пӧткӧдчыны кырныш-варыш да зверъяс, и некод оз повзьӧд найӧс.
Иудаса каръясын да ерусалимса уличьяс вылын нимкодясьӧмлы да гажӧдчӧмлы Ме пукта пом, водзӧ оз кут кывны верӧспулӧн да гӧтырпулӧн гӧлӧс шыныс, ӧд тайӧ муыс лоӧ овтӧминӧн.
Сійӧ кадас, — висьталӧ Господь, — иудаса ӧксыяслысь, юралысьяслысь, попъяслысь да пророкъяслысь лыяссӧ и Ерусалим карын олысьяслысь лыяссӧ босьтасны дзебанінъясысь.
Лыяссӧ разӧдасны шонді, тӧлысь да енэжвыв кодзувъяс улӧ, кодъясӧс найӧ радейтісны, кодъяслы кесъялісны да юрбитісны-копрасисны и кодъяссянь корсьысисны туйдӧдӧм.
Налысь лыяссӧ оз чукӧртны, оз гуавны, найӧ кутасны куйлыны му вылас да пӧрасны куйӧдӧ.
А тайӧ лёк йӧз пӧвстсьыс ловйӧн кольӧмаяслы кулӧмыс лоӧ мусаджык олӧм дорсьыс. Тадзи лоӧ быдлаын, кытчӧ Ме вӧтла найӧс, — висьталӧ Господь Саваоф».
Висьтав налы, мый Господь тадзи висьталӧ: — Мортыс кӧ усьӧ, оз ӧмӧй чеччы? Сійӧ кӧ ылалӧ туй вывсьыс, оз ӧмӧй бӧр бергӧдчы?
Мыйла тайӧ войтырыс бергӧдчӧма Меысь, мыйла Ерусалимын олысьяс эновтӧмаӧсь Менӧ?
Найӧ зумыда кутчысьӧны ылӧгас, оз кӧсйыны бӧр бергӧдчыны.
Ме сюся кывза найӧс, но збыльсӧ найӧ оз висьтавны, некод оз каитчы аслас лёк вӧчӧмысь, некод оз шу: «Мый нӧ ме вӧчи!»
Тышӧ петысь вӧв моз быдӧн котӧртӧ аслас туйӧд.
Аист тӧдӧ ассьыс кадсӧ, гулю, чикыш да тури тшӧтш тӧдӧны, кор налы бергӧдчыны гортаныс, но Менам войтырӧй оз тӧд Менсьым Индӧдӧс.
Ті шуаннныд, ми пӧ мывкыда йӧз, миян пӧ эм Господьлӧн Индӧдыс.
Но, збыльвылас, Индӧдӧ велӧдысьяс Индӧдсӧ гижигӧн бергӧдісны сійӧс ылӧгас.
Мывкыдаяс яналасны, повзясны да веськаласны тывйӧ. Налӧн мывкыдлуныс абу, ӧд найӧ ӧтдортісны Господьлысь кывсӧ.
Та вӧсна налысь гӧтырнысӧ Ме сета мукӧдлы, налысь видз-мунысӧ — выль кӧзяинъяслы, ӧд ичӧтсянь гырысьӧдз ставныс найӧ ылӧдлӧмӧн озырмӧдчӧны, пророкъяс и попъяс — ставныс пӧръясьӧны.
Найӧ чайтӧны, мый кокньыда бурдӧдӧны Менам войтырлысь дойяссӧ, шуалӧны: «Лӧнь олӧм, лӧнь олӧм!», а лӧнь олӧмыс абу.
Яндысьтӧг найӧ вӧчӧны зывӧксӧ, нинӧмысь оз повны, весиг оз гӧрдӧдны.
Та вӧсна найӧ усясны усьӧмаяс пӧвстӧ, крукасясны, кор Ме мыжда найӧс, — висьталӧ Господь.
Виноградӧс моз Ме чукӧрта найӧс, медым мӧдӧдны пленӧ, — висьталӧ Господь, — вожъяс вылас оз коль весиг ӧти тусь, инжир пу вылын оз коль вотӧсыс, коръясыс косьмасны. Ставсӧ, мый Ме сеті налы, лоӧ мырддьӧма.
— Мый нӧ ми пукалам? Чукӧртчӧй, мунамӧй изкаръясӧ, и сэні кулам.
Господь, миян Енным, шуис бырӧдны миянӧс, Сійӧ юктӧдӧ миянӧс яд сора ваӧн, ӧд ми мыж вӧчим Господьлы паныд.
Ми виччысим лӧнь олӧм, но бурыс эз во, ми виччысим бурдӧм, но миянӧс полӧм босьтӧ.
Дан чужанкотырлӧн мусянь кылӧ вӧвъяслӧн корскӧмыс, ужъяслӧн гӧрдлӧмысь муыс тіралӧ.
Вӧрӧг локтіс бырӧдны тайӧ мусӧ да ставсӧ, мый тані быдмӧ, сійӧ бырӧдӧ Ерусалим кар да сэні олысьясӧс.
— Ме мӧдӧда тіян пӧвстӧ яда змейясӧс, — висьталӧ Господь, — найӧ пондасны чушкыны тіянӧс, и нимкыв лыддьӧмныд оз вермы сувтӧдны найӧс.
— Шогӧй топӧдӧ менӧ, менам сьӧлӧмӧй бӧрдӧ!
— Ылі муысь Ме кыла Аслам войтырлысь отсӧг йылысь горзӧмсӧ: «Сионын ӧмӧй абу Господьыс, сэні ӧмӧй абу ӧксыыс?»
Мыйла найӧ скӧрмӧдісны Менӧ асланыс идолъясӧн, мукӧд войтыръяслӧн шогмытӧм идолъясӧн?
— Вундан кадыс помасис, гожӧмыс колис, но ми абу на мездмӧмаӧсь.
Менам войтырлӧн дойясыс вайӧны меным дой, менам сьӧлӧмӧй шогсьӧ, полӧмыс топӧдӧ менӧ.
Галаадын ӧмӧй абу бурдӧдчан выйыс, сэні ӧмӧй абу бурдӧдысьыс?
Мыйла менам войтырлӧн оз бурдны дойясыс?
Вӧлі кӧ менам пытшкӧсӧй тырӧма синваӧн, и синваӧй кӧ шорӧн визувтіс, ме эськӧ лун и вой бӧрді аслам войтыр пӧвстысь кулӧмаяс вӧсна.
Сюрис кӧ меным овтӧминын шойччанін, ме эськӧ эновті ассьым войтырӧс да муні на дінысь. — Найӧ ставныс пежалісны йитӧдӧс, мый Ме кӧрталі накӧд, найӧ — ылӧдчысьяс.
Ньӧввужйӧс моз найӧ зэвтӧны кывнысӧ, медым пӧръясьны.
Найӧ оз кутчысьны збыляс, дугдывтӧг вӧчӧны лёксӧ. Менӧ найӧ оз тӧдны, — висьталӧ Господь. — 
Видзчысьӧй ёртъяссьыныд, энӧ эскӧй вокъясныдлы, ӧд вокыс конйыштӧ воксӧ, ёртыс суклясьӧ аслас ёрт йылысь.
Быдӧн пӧрйӧдлӧ ассьыс ёртсӧ, оз висьтав збыльсӧ. Найӧ кывнас пӧръясьӧны, мудзтӧдзныс лёксӧ вӧчӧны.
Тэ олан ылӧдчысьяс пӧвстын, найӧ ылӧдчӧны, оз кӧсйыны тӧдны Менӧ, — висьталӧ Господь.
Та вӧсна Господь Саваоф тадзи висьталӧ: — Ме сывда да тӧдмала Ассьым войтырӧс.
А кыдзи Меным мӧд ногӧнсӧ вӧчны?
Ӧд налӧн кывйыс — виысь ньӧв кодь, найӧ висьталӧны ылӧгсӧ.
Орччӧн олысьяслы найӧ сиӧны лӧньлун, а сьӧлӧманыс дасьтӧны налы нальк.
Таысь ӧмӧй Ме ог мыжды найӧс? — висьталӧ Господь.
— Ог ӧмӧй водзӧс перйы тадзи вӧчысь войтырлысь?
— Ме сыркъялӧмӧн бӧрда керӧсъяс вӧсна, ырзӧмӧн бӧрда видзьяс вӧсна, ӧд туруныс сотчӧма, видзьяс вылын некод оз ветлӧдлы, оз кыв ыж-мӧслӧн баксӧмыс, енэжвывса лэбачьяс лэбзьӧмаӧсь, пемӧсъяс пышйӧмаӧсь.
— Ме вӧча Ерусалим карӧс из чукӧрӧн, шакалъяслы оланінӧн. Иудаса каръясӧс Ме вӧча овтӧминӧн, сэні некод оз кут овны. Мыйла тайӧ мусӧ сотӧма-бырӧдӧма? Мыйла сійӧ лои овтӧминӧн, кӧні некод оз ветлы? Эм-ӧ сэтшӧм мывкыд мортыс, коді эськӧ вермис гӧгӧрвоны тайӧс? Кодлы Господь висьталіс та йылысь, медым сійӧ вермис гӧгӧрвоӧдны мукӧдлы?
Господь шуис: «Тайӧ войтырыс эновтіс Менсьым Индӧдӧс, мый Ме сеті налы. Найӧ эз кывзыны Менӧ, эз овны Менам кӧсйӧм серти.
Найӧ олісны асланыс чорыд сьӧлӧмныс серти да юрбитісны Ваал идолъяслы, кыдзи велӧдісны налӧн батьясныс».
Та вӧсна Господь Саваоф, Израильлӧн Ен, тадзи висьталӧ: «Ме верда тайӧ войтырсӧ курыд быдмӧгӧн, юктӧда найӧс яд сора ваӧн.
Ме разӧда найӧс войтыръяс пӧвстӧ, кодъясӧс эз тӧдлыны ни найӧ, ни батьясныс. Ме мӧдӧда шыпурт виавны найӧс, кытчӧдз ставнысӧ ог бырӧд».
Господь Саваоф тадзи висьталӧ: «Кывзӧй, войтыр! Корӧй бӧрдӧдчысьясӧс. 
Вайӧдӧй аньясӧс, кодъяс кужӧны бӧрдны-лыддьӧдлыны.
Мед найӧ тэрмасьӧмӧн локтасны да бӧрдасны миян вӧсна. Сэки миян синъясысь ыльӧбтас синва, сійӧ шорӧн кутас визувтны».
Сионсянь кылӧ бӧрдӧм шы: «Миянлысь ставсӧ мырддисны, миянлы юръяндзим. Миянлы ковмас эновтны мунымӧс, ӧд керкаяснымӧс пазӧдӧма-кисьтӧма!»
— Аньяс, кывзӧй Господьлысь кывсӧ, пельныд мед сюся кывзас Сылысь кывсӧ.
Нывъяснытӧ велӧдӧй бӧрдӧдчыны, ӧта-мӧднытӧ велӧдӧй сьывны бӧрдан сьыланкыв.
Ӧд кулӧмыс пырӧ ӧшиньӧд, пырӧ миян керкаясӧ. Уличьяс вылын сійӧ бырӧдӧ челядьӧс, изэрдъяс вылын — том зонъясӧс.
Юӧрт тадзи: видз-му вылӧ шыблалӧм куйӧд моз шойясыс кутасны туплясьны му вылын. Вундӧм бӧрти чукӧрттӧм кольтаяс моз шойясыс пондасны сярвидзны му вылын, и некод найӧс оз чукӧрт, — висьталӧ Господь.
Господь тадзи висьталӧ: — Мывкыда морт мед оз ошйысь аслас мывкыдлуннас, вына морт мед оз ошйысь аслас вынйӧрнас, озыр морт мед оз ошйысь аслас озырлуннас.
Но ошйысьысь мед ошйысьӧ сійӧн, мый сылӧн эм гӧгӧрвоӧмлун тӧдны Менӧ. Ӧд Ме — Господь, Ме бурсьӧлӧмтча да веськыда мыжда му вылас.
Ті кӧ тшӧтш тадзи вӧчанныд, тіян уджъясныд лоӧны Меным шогманаӧсь, — висьталӧ Господь.
Матыстчӧны лунъяс, — висьталӧ Господь, — кор Ме кута мыждыны вундыштчӧмаясӧс и вундыштчытӧмъясӧс.
Ме мыжда Египетын, Иудаын да Эдомын олысьясӧс, мыжда аммон войтырӧс, моав войтырӧс да овтӧминын олысьясӧс, кодъяс шырӧны юрсинысӧ пель боксьыныс.
Тайӧ войтыръясыс — вундыштчытӧм войтыръяс, а израильсаяс — сьӧлӧмнаныс вундыштчытӧмӧсь.
Израиль войтыр, кывзы, мый висьталӧ тэныд Господь!
Господь тадзи висьталӧ: — Энӧ олӧй мукӧд войтыръяс моз, на моз энӧ полӧй енэжвывса индысьпасъясысь.
Ӧд войтыръяс эскӧны-юрбитӧны абутӧмыслы. Вӧрын кодкӧ пӧрӧдӧ пу, пуысь вӧчасьысь вӧчӧ бӧлбанӧс, мичмӧдӧ сійӧс эзысьӧн да зарниӧн, тувъялӧ сійӧс кӧрттувйӧн, медым сійӧ эз вӧр.
Бӧлбанъяс — град йӧрын сулалысь повзьӧдчанторъяс кодьӧсь, сёрнитны оз вермыны.
Найӧс новлӧдлӧны, ӧд асьныс ветлыны оз вермыны.
Энӧ полӧй наысь, ӧд лёксӧ вӧчны найӧ оз вермыны, и бурсӧ вӧчны тшӧтш оз вермыны.
Господьӧй, Тэ кодь мӧдыс абу!
Тэ — ыджыд Ен, Тэнад нимыд вына.
Тэ — войтыръяслӧн Ӧксы, ставныс полӧны Тэысь, сӧмын Тэысь колӧ вежавидзнысӧ.
Войтыръяслӧн мывкыдаяс пӧвстын Тэ кодьыс абу!
Став войтыръясыс вежӧртӧмӧсь да мывкыдтӧмӧсь, и пуысь вӧчӧмтор оз вермы велӧдны найӧс.
Фарсисысь вайӧны эзысь, Уфазысь — зарни, вӧчасьысьяс вӧчӧны бӧлбанъясӧс, пасьтӧдӧны найӧс гӧрдовлӧз да пемыдгӧрд паськӧмӧ. Ставыс тайӧ — кужысь мортлӧн вӧчӧмторъяс.
Сӧмын Господь эм збыль Енмыс, Сійӧ — ловъя Ен, помтӧг олысь Ӧксы.
Сылӧн скӧралӧмысь муыс сыркакылӧ, Сылӧн ярлун водзын войтыръяс вынтӧмӧсь.
Висьталӧй мукӧд войтыръяслы, мый му вывсьыс и енэж увсьыс бырасны сійӧ енъясыс, кодъяс эз вӧчны енэжсӧ ни мусӧ.
Аслас вынӧн Господь вӧчис мусӧ, Аслас мывкыдлунӧн муюгыдыслы пуктіс подувсӧ, Аслас вежӧрлунӧн шевкнитіс енэжсӧ.
Кор Сійӧ сетӧ гӧлӧс шысӧ, ваыс енэжас гораа ызгӧ. Му помсяньыс Сійӧ кыпӧдӧ кымӧръяс, мӧдӧдӧ чардби да зэр, Аслас видзанінысь лэдзӧ тӧвныр.
Быд морт мывкыдтӧм, сылӧн тӧдӧмлуныс абу, идолъясӧс сывдысь-вӧчысьӧс лоӧ янӧдӧма, ӧд сылӧн бӧлбанъясыс — ылӧг енъяс, на пытшкын олӧмыс абу.
Найӧ нинӧм дон оз сулавны, найӧ тешкодь вӧчӧмторъяс, мыждан лунӧ найӧ бырасны.
Но Яковлӧн Енмыс абу на кодь, ӧд Сійӧ ставсӧ Вӧчысьыс, Сылӧн нимыс — Господь Саваоф, а Израиль — Сылӧн бӧрйӧм войтырыс.
— Кытшалӧм Ерусалим карын олысьяс, чукӧртӧй эмбурнытӧ!
Ӧд Господь тадзи висьталӧ: тайӧ муас олысьясӧс ӧні Ме вӧтла, дзескӧда найӧс сідзи, медым тӧдісны.
Курыд шог меным!
Менам дойӧй ёна висьӧ, но ме шуи, мый тайӧ дойсӧ ме верма нуны.
Менсьым чомйӧс куштісны, чом зэвтан гезъяссӧ орйӧдлісны.
Менам челядьӧй мунісны ме дінысь, найӧ абуӧсь. Некодлы сувтӧдны менсьым чомйӧс, некодлы зэвтны чом дӧраясӧс. Иуда войтырӧс видзысьяс — мывкыдтӧмӧсь, Господьӧс найӧ эз корсьны, та вӧсна налӧн нинӧм эз артмы, и налӧн войтырыс разаліс.
Кывзӧй, вайӧны юӧр, мый войвыв муысь гора шыӧн локтӧ вӧрӧг, иудаса каръяс сійӧ вӧчӧ овтӧминӧн, шакалъяслы оланінӧн.
Господьӧй, ме тӧда, мый мортыс абу ыджыдыс аслас олӧм вылын, сійӧ оз вермы веськӧдлыны аслас воськовъясӧн.
Господьӧй, мыжды менӧ, но мыжды менӧ веськыда. Эн мыжды менӧ скӧралігад, медым эн бырӧд менӧ!
Кисьт Ассьыд скӧрлунтӧ войтыръяс вылӧ, кодъяс оз тӧдны Тэнӧ, кисьт Ассьыд скӧрлунтӧ чужанкотыръяс вылӧ, кодъяс оз шыасьны Тэ дінӧ.
Найӧ косявлісны Яковлысь рӧдсӧ, пазӧдісны-бырӧдісны сійӧс, куштісны сылысь оланінсӧ.
Еремейлы вӧлі Господьсянь кыв:
«Кывзы, мый йылысь висьталӧ Менам йитӧдӧй. Юӧрт Иуда войтырлы да Ерусалимын олысьяслы, мый тшӧктӧма Менам йитӧдын.
Юӧрт налы, мый Господь, Израильлӧн Ен, тадзи висьталӧ: ёрӧма быдӧнӧс, коді оз кывзы тайӧ йитӧдлысь тшӧктӧмъяссӧ. Тайӧ тшӧктӧмъяссӧ Ме сеті тіян батьяслы, кор петкӧді найӧс Египетысь, кӧрт сывдан пачысь. Ме тшӧкті налы кывзыны Менӧ да ставсӧ вӧчны Менам тшӧктӧм серти, медым найӧ вӧліны Менам войтырӧн, а Ме — налӧн Енмӧн. Сэки эськӧ Ме збыльмӧді Ассьым кыв сетӧмӧс. Ӧд Ме кыв сетӧмӧн кӧсйыси сетны тіян батьяслы му, кӧні визувтӧ йӧв да ма. Ӧні ті оланныд тайӧ муас».
Ме вочавидзи: «Господьӧй, тайӧ збыльысь тадзи!»
Господь шуис меным: «Иудаса каръясын да ерусалимса уличьяс вылын юӧрт тайӧ кывъяссӧ: кывзӧй, мый тшӧктӧма-шуӧма йитӧдас, да олӧй сы серти.
Сійӧ лунсяньыс, кор Ме петкӧді тіянлысь батьяснытӧ Египетысь, Ме тшӧкті налы кывзыны Менӧ.
Ӧнія лунӧдз Ме выльысь и выльысь тадзи жӧ вӧча.
Но найӧ эз кывзыны Менӧ, эз сибӧдны Менсьым кывъясӧс. Найӧ олісны асланыс лёк да чорыд сьӧлӧмныс серти. Та вӧсна Ме налы паныд бергӧді ставсӧ, мый вӧлі шуӧма тайӧ йитӧдас. Ме тшӧктылі налы овны йитӧд серти, но найӧ эз овны».
Господь шуис меным: «Иуда войтыр да ерусалимса олысьяс костын эм гуся сёрнитчӧм.
Найӧ бергӧдчисны Меысь да батьясныс моз мыж вӧчисны. Налӧн батьясныс эз кӧсйыны кывзыны Менсьым кывъясӧс, а юрбитісны да кесъялісны мукӧд енъяслы.
Израиль войтыр да Иуда войтыр торкисны Менсьым йитӧдӧс, мый Ме кӧрталі налӧн батьяскӧд».
Та вӧсна Господь тадзи висьталӧ: «Ме мӧдӧда на вылӧ шог, и найӧ оз вермыны сыысь пышйынысӧ. Найӧ шыасясны Ме дінӧ, но Ме ог кыв найӧс.
Сэки Иуда каръясын да Ерусалимын олысьяс шыасясны енъяс дінӧ, кодъяслы найӧ сотӧны висьяс, но налӧн енъясыс оз мездыны найӧс шог дырйиныс.
Мыйта Иуда муын карыс, сы мында Иуда войтырлӧн и енмыс. Мыйта Ерусалимын уличыс, сы мында жӧ висьпуктанін сувтӧдісны олысьясыс, медым сотны висьяс зывӧк Вааллы.
Но тэ, Еремей, эн кевмысь тайӧ войтырыс вӧсна, корӧмӧн эн бӧрд на вӧсна.
Кор найӧ шог дырйиныс шыасясны Ме дінӧ, Ме ог кыв найӧс».
— Мый вӧчӧ Менам муса войтырӧй Менам керкаын? Найӧ уна лёктор вӧчӧны сэні.
Вись пыдди вайӧм яй оз вешты налысь мыжсӧ, медым шогсьӧм пыдди найӧ вермисны нимкодясьны.
Господь нимтіс Ассьыс войтырсӧ дзоридзалысь олив пуӧн, чӧскыд вотӧса пуӧн.
Но ёна чардалӧм дырйи Господь ыстас сы вылӧ би, и сылӧн увъясыс сотчасны.
Господь Саваоф, коді пуктіс да быдтіс Израиль да Иуда войтыръясӧс, шуис мӧдӧдны на вылӧ шог налӧн лёк уджъясныс понда. Зывӧк Вааллы вись сотӧмнас найӧ скӧрмӧдісны Господьӧс. Тадзи аслыныс вӧчисны лёксӧ.
Менӧ мустӧмтысьяслысь лёк мӧвпъяссӧ Господь восьтіс меным. Сійӧ петкӧдліс, мый найӧ кӧсйӧны вӧчны.
Рам ыж моз, кодӧс нуӧдӧны начкыны, ме эг тӧд, мый найӧ вӧлі мӧвпыштӧмаӧсь вӧчны меным паныд. Найӧ шуисны, пусӧ пӧ вотӧснас кералам, бырӧдам пӧ сійӧс ловъяяс пӧвстысь, медым сылысь нимсӧ дзикӧдз вунӧдасны.
Но Господь Саваоф веськыда мыждӧ, Сійӧ тӧдӧ мортлысь сьӧлӧмсӧ да мӧвпъяссӧ.
Господьӧй, сет меным аддзыны, кыдзи Тэ водзӧс перъян налысь, ӧд ассьым тӧжд-могӧс ме вайи Тэ водзӧ.
Господь тадзи висьталӧ: «Анатот карын олысьяс корсьысьӧны босьтны тэнсьыд олӧмтӧ. Найӧ шуалӧны: “Эн пророкав Господь нимсянь! Кутан кӧ пророкавны, кулан миян ки помысь”.
Но Ме, Господь Саваоф, на йылысь тадзи висьтала: Ме мыжда найӧс. Налӧн зонъясыс куласны шыпуртысь, ныв-пиныс куласны тшыгъялӧмысь.
Анатот карын олысьяс пиысь некод ловйӧн оз коль, ӧд найӧс мыждан воӧ Ме мӧдӧда на вылӧ шог».
— Господьӧй, кор ме вая ассьым могӧс Тэ водзӧ, Тэ веськыда вӧчан.
Но ме юала Тэнсьыд веськыда мыждӧм йылысь. Мыйла лёк вӧчысьяслӧн ставыс артмӧ, мыйла Енсӧ эновтысьяс бура олӧны?
Тэ пуктін найӧс, и найӧ вужъясисны, найӧ быдмӧны да вайӧны вотӧс.
Найӧ сёрнитӧны Тэ йылысь, но сьӧлӧмнаныс ылынӧсь Тэысь.
Господьӧй, Тэ тӧдан да аддзан менӧ, Тэ видзӧдан менам сьӧлӧмӧ да тӧдан, радейта-ӧ ме Тэнӧ.
Торйӧд лёк вӧчысьясӧс начкысян лун кежлӧ, ыжъясӧс моз нуӧд найӧс начкӧм вылӧ.
Дыр-ӧ муыс кутас бӧрдны, дыр-ӧ туруныс кутас косьмыны видз вылын?
Пемӧс-лэбач кулӧ, ӧд мувывса олысьяс лёксӧ вӧчӧны, шуалӧны, Енмыс пӧ оз аддзы, мый лоӧ миянкӧд.
— Еремей, тэ кӧ мудзан подӧн мунысьяскӧд восьлалігӧн, кыдзи тэныд панласьны вӧвъяскӧд?
Тэ кӧ крукасьлан-усьласян шыльыд му вывті восьлалігӧн, мый лоӧ тэкӧд Йӧрдан ю ойдігӧн?
Весиг тэнад вокъясыд да рӧдвужыд ылӧдлӧдны тэнӧ, бӧрвывсяньыд гораа горзӧны тэ вылӧ.
Но найӧ кӧ весиг бурногӧн кутасны сёрнитны тэкӧд, тэ эн эскы налы.
— Ме эновті Ассьым керкаӧс, эновті Ассьым бӧрйӧм войтырӧс, Ассьым муса войтырӧс Ме сеті вӧрӧг киӧ.
Менам бӧрйӧм войтырӧй лев моз равзӧ Ме вылӧ, сійӧ кыпӧдӧ Ме вылӧ ассьыс гӧлӧссӧ, та вӧсна Ме мустӧмта сійӧс.
Менам бӧрйӧм войтырӧй лои уна рӧма лэбач кодь, код вылӧ быд боксянь усьласьӧ кырныш-варыш.
Локтӧй, чукӧртчӧй, зверъяс, локтӧй сёйны!
Йӧз муысь локтӧм ӧксыяс тшыкӧдісны Менсьым виноград йӧрӧс, талялісны Менсьым видз-муӧс, кушинӧн вӧчисны Менсьым бур муӧс, вӧчисны сійӧс овтӧминӧн. Куш муыс бӧрдӧ Ме водзын, сійӧс дзикӧдз куштӧма, некод оз тӧждысь сы вӧсна.
Овтӧминса керӧсъяс вывті локтісны бырӧдысьяс.
Господьлӧн шыпуртыс бырӧдӧ мусӧ помсяньыс помӧдзыс, некод оз мездмы сыысь.
Менам войтырӧй кӧдзис шобді, а вундіс йӧн.
Найӧ ёна мырсисны, но ставыс весьшӧрӧ.
Мед тіянлы яндзим лоӧ нянь чукӧртіганыд, ӧд Господьлӧн яр скӧрлуныс вӧсна суис тіянӧс тайӧ.
Господь тадзи висьталӧ: «Израиль войтыркӧд орччӧн олысь лёк войтыръясӧс Ме нетшышта асланыс муысь, ӧд найӧ уськӧдчисны Израиль му вылӧ, мый Ме вичмӧді Аслам войтырлы. Иуда войтырӧс тшӧтш нетшышта на пӧвстысь.
Но нетшыштӧм бӧрын Ме бара бурсьӧлӧмтча тайӧ войтыръясыс дінӧ да быд войтырӧс бергӧда аслас муӧ.
Найӧ кӧ велӧдчасны овны, кыдзи Ме тшӧкті овны Аслам войтырлы, велӧдчасны кӧ кыв сетны ловъя Господь водзын, кыдзи найӧ велӧдісны Менсьым войтырӧс кыв сетны Ваал идол водзын, сэки найӧ вужъясясны Менам войтыр пӧвстӧ.
А сійӧ войтырсӧ, коді оз кывзысь Менсьым, Ме нетшышта да дзикӧдз бырӧда», — висьталӧ Господь.
Господь меным тадзи висьталіс: «Мун да ньӧб аслыд шабді вӧнь да вӧнясь сыӧн, но вӧньсӧ эн кӧтӧд».
Господьлӧн тшӧктӧм серти ме ньӧби вӧнь да вӧняси сыӧн.
Меным бара вӧлі Господьсянь кыв:
«Босьт ньӧбӧм вӧньтӧ, мый коскад новлан. Мун Ефрат ю дорӧ да дзеб сійӧс кырта потасӧ».
Ме муні Ефрат ю дорӧ да дзеби вӧньӧс Господьлӧн тшӧктӧм серти.
Уна лун мысти Господь шуис меным: «Мун Ефрат ю дорӧ да босьт кырта потасысь вӧньтӧ, кодӧс Ме тшӧкті дзебны».
Ме локті Ефрат ю дорӧ да босьті вӧньӧс сэтысь, кытчӧ дзеблі сійӧс. Но вӧньыс вӧлі сісьмӧма, сійӧ нинӧм вылӧ эз нин шогмы.
Меным вӧлі Господьсянь кыв:
«Господь тадзи висьталӧ: Иуда войтырлӧн ышнясьӧмлы да Ерусалимын олысьяслӧн ёна ышнясьӧмлы Ме тадзи жӧ пукта пом.
Тайӧ лёк войтырыс оз кӧсйы кывзыны Менсьым кывъясӧс. Найӧ олӧны асланыс чорыд сьӧлӧмныс серти, юрбитӧны-копрасьӧны да кесъялӧны мукӧд енъяслы. Найӧ лоӧны сісьмӧм вӧнь кодьӧсь, нинӧм вылӧ оз нин шогмыны.
Кыдзи мортлӧн вӧньыс вир-яй бердас, сідзи Ме босьті Ас бердӧ Израиль да Иуда войтыръясӧс, медым найӧ вӧліны Менам войтырӧн да ошкисны-нимӧдісны Менӧ, — висьталӧ Господь.
— Но найӧ эз кывзыны Менӧ.
Сідзкӧ, висьтав налы, мый Господь, Израильлӧн Ен, тадзи висьталӧ: кучик доз тыртӧны винаӧн.
Найӧ вочавидзасны тэныд: “Ми ӧмӧй огӧ тӧдӧй, мый кучик дозсӧ тыртӧны винаӧн?”
Сэки тэ шу налы, мый Господь тадзи висьталӧ: тайӧ муас став олысьсӧ, Давидлӧн юралан пуклӧсын пукалысь ӧксыясӧс, тшӧтш попъясӧс, пророкъясӧс да Ерусалимын став олысьсӧ Ме юктӧда коддзытӧдзныс. Ме зурӧда найӧс ӧта-мӧдас, зурӧда батьяссӧ пияныскӧд ӧтвыв, — висьталӧ Господь.
— Ме некодӧс ог жалит, некод дінӧ ог бурсьӧлӧмтчы, жалиттӧг бырӧда найӧс».
— Кывзӧй, энӧ ышнясьӧй, сюся кывзӧй, ӧд Господь сёрнитӧ.
Ошкӧй Господьӧс, ассьыныд Еннытӧ, кытчӧдз Сійӧ оз мӧдӧд пемыдсӧ. Сэки ті понданныд крукасьлыны пемыд керӧсъяс вылын, кутанныд виччысьны югыдсӧ, но югыдсӧ Сійӧ вӧчас сап пемыдӧн, сьӧд пемыд войӧн.
Ті кӧ онӧ кывзӧй тайӧ кывъяссӧ, менам сьӧлӧмӧй пондас гусьӧн бӧрдны, кутас курыда бӧрдны тіян ышнясьӧм вӧсна. Менам синваӧй пондас лэччыны шорӧн, ӧд Господьлысь войтырсӧ лоӧ нуӧдӧма пленӧ.
— Висьтав ӧксылы да сылӧн мамыслы: эновтӧй юралан пуклӧснытӧ, ӧд тіян юр вылысь усис дзирдалана юркытшныд.
Негевын пӧдлалӧмаӧсь кар дзиръяяссӧ, некодлы найӧс восьтнысӧ.
Иуда войтырӧс нуӧдӧны пленӧ, ставнысӧ ӧтитӧг босьтӧмаӧсь.
— Ерусалим, лэпты синтӧ да видзӧдлы войвывсянь локтысьяс вылӧ! Кӧні тэныд сетӧм войтырыд, мича ыж чукӧр кодь олысьясыд?
Мый тэ шуан, кор Господь пуктас тэ вылын ыджыдавны найӧс, кодъясӧс тэ лыддин аслад ёртъясӧн?
Кага чужтысьӧс моз тэнӧ сэки топӧдасны дойясыд.
Ас пытшкад тэ шуан: «Мыйысь менӧ суис тайӧ?»
Тэнад лыдтӧм-тшӧттӧм мыжъясыд вӧсна лэптісны тэнсьыд бӧждортӧ, мырдӧналісны-янӧдісны тэнӧ.
— Вермас-ӧ эфиопияса морт вежны аслас кучиклысь рӧмсӧ, леопард — ассьыс чутъяссӧ?
Ті, кодъяс велалінныд вӧчны лёксӧ, верманныд-ӧ вӧчны бурсӧ?
Ме разӧда тіянӧс, кыдзи овтӧминса тӧвныр нӧбӧдӧ идзас.
Со мый виччысьӧ тэнӧ, Ерусалим, со мый Ме дасьті тэныд, — висьталӧ Господь, — ӧд тэ вунӧдін Менӧ, тэ лача кутін ылӧгыс вылӧ.
Таысь Ме чужӧм вылӧдзыд лэпта бӧждортӧ, медым тыдовтчас тэнад яндзимыд.
Ме аддзылі тэнсьыд кырсалӧмтӧ да лёкколӧмтӧ, керӧсъяс да видзьяс вылын зывӧк идолъяслы юрбитӧмтӧ.
Курыд шог тэныд, Ерусалим!
Тэ абу сӧстӧм.
Дыр-ӧ на тадзи лоӧ?
Зэрыс эз вӧв дыр кад чӧж. Та вӧсна Еремейлы вӧлі Господьсянь кыв:
— Иуда му бӧрдӧ, каръяслӧн дзиръяясыс вежыньтчисны, шогсьӧны муыс вӧсна, Ерусалимысь кыптӧ бӧрдӧм шы.
Ыджыдъяс мӧдӧдӧны ассьыныс кесъялысьяссӧ вала, найӧ мунӧны юкмӧс дорӧ, но ваыс сэні абу.
Найӧ бӧр локтӧны куш дозъясӧн, найӧ шӧйӧвошӧмаӧсь, яналӧмӧн вевттьӧны юрнысӧ.
Зэрыс абу дыр кад чӧж нин, муыс косьмӧма, потласьӧма. Му вӧдитысьяс шӧйӧвошӧмаӧсь, вевттьӧмаӧсь юрнысӧ.
Лань чужтӧ видз вылын, но эновтӧ писӧ, ӧд туруныс абу.
Вӧлявывса осёлъяс сулалӧны изъя керӧсъяс вылын, шакалъяс моз горша апалӧны сынӧдсӧ, налӧн синъясыс гудыртчӧмаӧсь, ӧд туруныс абу.
— Мыжъясным мыждӧны миянӧс, но Тэ, Господьӧй, отсав миянлы Аслад нимыд ради.
Ми унаысь эновтлім Тэнӧ, мыж вӧчим Тэныд паныд.
Тэ — Израильлӧн лачаыс, сьӧкыд кадӧ сійӧс Мездысьыс.
Мыйла Тэ тайӧ муас йӧз муысь локтысь кодь, войсӧ коллявны сувтлысь кодь?
Мыйла Тэ шӧйӧвошӧм морт кодь, мездыны вермытӧм вына тышкаморт кодь?
Но Тэ, Господьӧй, миян пӧвстын, миянӧс сиӧма Тэныд, эн эновт миянӧс!
Тайӧ войтырыс йылысь Господь тадзи висьталӧ: «Найӧ ветлӧдлӧны, кытчӧ кӧсйӧны, ассьыныс кокнысӧ оз видзны. Но Ме, Господь, мустӧмта тайӧс. Ме ог вунӧд налысь лёк вӧчӧмнысӧ, а мыжда найӧс мыжъяссьыныс».
Господь шуис меным: «Эн кевмысь тайӧ войтырыс вӧсна, эн кор налы бурсӧ.
Весиг кӧ найӧ кутасны видзавны, Ме ог кыв налысь кевмӧмсӧ.
Весиг кӧ найӧ ваясны сотан вись да нянь вись, Ме ог сибӧд найӧс.
Ме бырӧда найӧс шыпуртӧн, тшыгъялӧмӧн да пӧрӧс висьӧмӧн».
Ме шуи: «Господьӧй Ыджыдӧй!
Пророкъяс висьталӧны тайӧ войтырыслы, мый найӧ оз аддзывны шыпурт, оз кутны тшыгъявны, и Тэ сетан налы тайӧ муас лӧнь олӧм».
Господь шуис меным: «Тайӧ пророкъясыс ылӧгсӧ висьталӧны Менам нимсянь.
Ме найӧс эг мӧдӧдлы, эг пуктывлы пророкъясӧ, эг висьтавлы налы.
Найӧ висьталӧны тіянлы ылӧг аддзылӧмъяс, ковтӧм юӧртӧмъяс да ассьыныс мӧвпъяссӧ.
Та вӧсна тайӧ пророкъясыс йылысь Господь тадзи висьталӧ: найӧ пророкалӧны Менам нимсянь, но Ме эг мӧдӧдлы найӧс.
Найӧ шуалӧны, мый тайӧ муас оз ло тыш ни тшыгъялӧм, но найӧ асьныс куласны шыпурт да тшыгъялӧм помысь. Сійӧ войтырыс, кодъяслы найӧ пророкалӧны, тшӧтш куласны тшыгъялӧм да шыпурт помысь. Найӧс шыбитасны ерусалимса уличьяс вылӧ, и некод оз дзеб найӧс ни налысь гӧтыръяснысӧ да налысь ныв-пинысӧ.
Налысь лёк вӧчӧмнысӧ Ме бергӧда ас выланыс».
— Висьтав налы тайӧ кывъяссӧ: лун и вой мед киссяс менам синваӧй, мед оз дугдыв менам бӧрдӧмӧй, ӧд менсьым войтырӧс пасьвартӧма, сійӧс сьӧкыда дойдалӧма.
Видз-му вылын куйлӧны шыпуртӧн виӧмаяс, карын — тшыгъялӧмысь кулӧмаяс.
Пророк да поп шӧйтӧны-ветлӧны му вывті, оз тӧдны, мый вӧчны.
— Господьӧй, Тэ ӧмӧй дзикӧдз ӧтдортін Иудаӧс?
Тэ ӧмӧй мустӧмтан Сионӧс?
Мыйла Тэ сэтшӧма дойдалін миянӧс, мый огӧ вермӧй бурднысӧ?
Ми виччысим лӧнь олӧм, но нинӧм бурыс эз ло миянлы.
Ми виччысим бурдӧм, но воис повзьӧдан кад.
Господьӧй, ми тӧдам ассьыным лёк уджъяснымӧс, асланым батьяслысь лёк вӧчӧмъяссӧ, ми мыж вӧчим Тэныд паныд.
Аслад нимыд ради эн ӧтдорт миянӧс, Аслад дзирдлуныдлысь юралан пуклӧссӧ эн сет увтыртны, эн вунӧд миянкӧд кӧрталӧм йитӧдтӧ, эн торк сійӧс!
Мукӧд войтыръяслӧн идолъясыс ӧмӧй вермасны мӧдӧдны зэр?
Енэжыс ӧмӧй вермас ачыс кисьтны сувтса зэр?
Господьӧй, миян Енмӧй, он ӧмӧй зэрсӧ Тэ мӧдӧд?
Тэ вылӧ ми лача кутам, ӧд ставсӧ тайӧс Тэ вӧчан!
Господь шуис меным: «Весиг кӧ Мӧисей да Самуил сувтасны Ме водзӧ да кутасны кевмысьны, Ме ог бурсьӧлӧмтчы тайӧ войтырыс дінӧ.
Вӧтлы найӧс Менам син водзысь!
Но найӧ кӧ юаласны тэнсьыд, кытчӧ пӧ миянлы муннысӧ, висьтав налы, мый Господь тадзи висьталӧ: — Кодлы шуӧма кувны, сійӧ мед кулас, кодлы шуӧма шыпуртысь кувны, сійӧ мед шыпуртысь кулас, кодлы шуӧма тшыгла кувны, сійӧ мед тшыгла кулас, кодлы шуӧма пленӧ мунны, сійӧ мед пленӧ мунас.
Ме мӧдӧда тайӧ войтырыс вылӧ нёль мыждӧм, — висьталӧ Господь. — Шыпурт виас найӧс, понъяс кыскаласны шойяссӧ, кырныш-варыш кокаласны, зверъяс бырӧдасны коляссӧ.
Сыысь, мый Езекейлӧн Манассей пиыс, иудаса ӧксы, вӧчис Ерусалимын, Ме вӧча найӧс повзьӧдчанторйӧн, и мукӧд войтыръяс кутасны повны, кор тӧдмаласны, мый накӧд лои.
— Коді жалитас тэнӧ, Ерусалим?
Коді бурсьӧлӧмтчас тэ дінӧ?
Коді локтас юавны тэнад олӧм-вылӧм йылысь?
Тэ эновтін Менӧ, — висьталӧ Господь, — тэ кежин Меысь.
Та вӧсна Ме лэпта тэ вылӧ Ассьым киӧс да бырӧда тэнӧ, Ме мудзи тэ дінӧ буравны.
Тӧлӧдчан зырйӧн Ме шердъя Ассьым войтырӧс, шыблала найӧс каръяссьыныс. Ме виала налысь ныв-пинысӧ, бырӧда Ассьым войтырӧс, ӧд найӧ эз бергӧдчыны асланыс туй вылысь.
Дӧваяслӧн лыдыс лоӧ саридздор лыа дорысь на унджык.
Луншӧр кадӧ Ме мӧдӧда мамъяс дінӧ эмбур мырддялысьясӧс, виччысьтӧг мамъясӧс суас полӧм-тіралӧм.
Сизимӧс чужтысь вынтӧмӧн куйлӧ, сійӧ апалӧ сынӧдсӧ.
Луншӧрнас на лэччас сылӧн шондіыс, и сійӧ яналас.
Ловйӧн кольӧмаясӧс Ме сета вӧрӧглы, найӧс виасны шыпуртӧн, — висьталӧ Господь».
— Курыд шог меным! Мамӧй, мыйла тэ чужтін менӧ, татшӧм мортсӧ, коді вензьӧ-пинясьӧ став йӧзыскӧд? Ме некодлы эг удждывлы, некодлысь эг водзӧсавлы, но ставныс ёрӧны менӧ.
Господь шуис: — Тэнад ставыс лоӧ бур. Ме вӧча сідзи, мый шог дырйи да сьӧкыд кадӧ мустӧмтысьясыд корасны тэнсьыд отсӧг.
Коді вермас жугӧдны кӧрт, войвывсянь локтысь кӧрт да ыргӧн?
Став тэнад мыжысь, мый тэ, Иуда войтыр, вӧчин аслад му пасьтала, тэнсьыд эмбуртӧ да озырлунтӧ Ме сета мырддявны, некод оз вештысь сыысь.
Тэнӧ Ме мӧдӧда пленӧ, тэныд тӧдтӧм муӧ вӧрӧг нуӧдас тэнӧ, ӧд Менам скӧрлунӧй ыпъялӧ би моз, сійӧ сотас тэнӧ.
— Господьӧй, Тэ тӧдан ставсӧ!
Эн вунӧд менӧ, отсав меным, водзӧс перйы менӧ дзескӧдысьяслысь.
Он кӧ ӧдйӧджык водзӧс перйы, найӧ виасны менӧ.
Тэ тӧдан, мый Тэ вӧсна найӧ лёкӧдӧны менӧ.
Кор Тэсянь воисны кывъяс, ме пӧткӧдчи наӧн, Тэнад кывъясыд вайисны меным нимкодьлун, найӧ гажӧдісны менсьым сьӧлӧмӧс, Господьӧй, Тэ — Ен Саваоф, а ме — Тэнад.
Ме эг пукавлы сералысьяслӧн чукӧртчанінын, эг гажӧдчыв накӧд ӧтвыв. Ме пукавлі ӧтнамӧн, ӧд Тэнад киыд личкис менӧ, Тэ тыртін менӧ скӧрлунӧн.
Мыйла менам сьӧлӧмӧй пыр висьӧ, мыйла оз бурд менам дойӧй?
Тэ лоин меным косьмӧм ва петанінӧн, мый ылӧдлӧ юны кӧсйысьӧс.
Господь меным тадзи висьталіс: — Тэ кӧ бергӧдчан Ме дінӧ, Ме сибӧда тэнӧ, и тэ кутан сулавны Ме водзын.
Тэ кӧ кутан висьтавны донаторсӧ, он кӧ кут сёрнитны ковтӧмсӧ, сэки тэ лоан Менам вомӧн.
Йӧзыс бергӧдчасны тэ дінӧ, но тэ эн бергӧдчы на дінӧ.
Ме сувтӧда тэнӧ тайӧ войтырыслы паныд, и тэ лоан зумыд ыргӧн стенмӧн.
Найӧ кыпӧдчасны тэныд паныд, но тэнӧ оз вермыны, ӧд Ме тэкӧд, Ме мезда тэнӧ да видза тэнӧ, — висьталӧ Господь. — 
Ме мезда тэнӧ лёк йӧзлӧн киысь, нетшышта тэнӧ дзескӧдысьяслӧн кабырысь.
Меным вӧлі Господьсянь кыв:
«Эн гӧтрась, мед оз ло тэнад ныв-пиыд тайӧ муас.
Господь тадзи висьталӧ тані чужысь ныв-пи йылысь, найӧс чужтысь мамъяс йылысь да батьясныс йылысь, кодъяссянь найӧ чужасны.
Тайӧ муас олысьяс куласны сьӧкыд висьӧмъясысь, на вӧсна некод оз кут бӧрдны, найӧс некод оз гуав, куйӧд моз найӧ кутасны куйлыны му вылас.
Найӧ куласны тшӧтш шыпурт да тшыгъялӧм помысь, налӧн шойясӧн пондасны пӧткӧдчыны кырныш-варыш да зверъяс.
Господь тадзи висьталӧ: эн мун сійӧ керкаас, кӧні кулӧм морт вӧсна бӧрдӧны.
Эн бӧрд, эн бурӧд шогсьысьясӧс, ӧд Ме ылысті тайӧ войтырыс дінысь Ассьым лӧньлунӧс, буралӧмӧс да бурӧдӧмӧс, — висьталӧ Господь.
Тайӧ муас куласны ичӧтъяс и гырысьяс, но найӧс некод оз гуав, некод оз кут бӧрдны на вӧсна, некод оз вундав ассьыс вир-яйсӧ да оз шыр юрсисӧ на вӧсна.
Кулӧм морт вӧсна шогсьысьлы бурӧдӧм могысь некод оз сет няньтор, бать-мам вӧсна шогсьысьлы некод оз сет юантор, медым бурӧдны сійӧс.
Эн мун гажӧдчанінӧ, эн пуксьы гажӧдчысьяскӧд ӧтвыв сёйны-юны.
Господь Саваоф, Израильлӧн Ен, тадзи висьталӧ: тіян олігӧн на, тіян син водзын, тайӧ муас нимкодясьӧмлы да гажӧдчӧмлы Ме пукта пом, водзӧ оз кут кывны верӧспулӧн да гӧтырпулӧн гӧлӧс шыныс.
Кор тэ висьталан тайӧ войтырыслы тайӧ кывъяссӧ, найӧ юаласны тэнсьыд: “Мый вӧсна Господь шуис мӧдӧдны миян вылӧ тайӧ ыджыд шогсӧ? Кутшӧм лёктор ми вӧчим? Кутшӧм мыж ми вӧчим миян Господь Енлы паныд?” Сэки тэ шу налы: тайӧ лои сы понда, мый тіян батьясныд эновтісны Менӧ, — висьталӧ Господь. — Найӧ юрбитісны-копрасисны мукӧд енъяслы да кесъялісны налы, а Менӧ эновтісны да эз овны Менам Индӧд серти.
Но ті лёксӧ вӧчанныд асланыд батьяс дорысь унджык на! Быдӧн тіян пӧвстысь олӧ лёк да чорыд сьӧлӧмыс серти, оз кывзы Менӧ.
Та вӧсна Ме вӧтла тіянӧс тайӧ мусьыс мӧд муӧ, мый ті ни тіян батьясныд энӧ тӧдлӧй. Сэні лун и вой ті понданныд кесъявны мукӧд енъяслы, ӧд Ме ог ло бур сьӧлӧма тіян дінӧ.
Воасны лунъяс, — висьталӧ Господь, — кор оз кутны кыв сетны ловъя Господь водзын, коді петкӧдіс Израиль войтырӧс Египетысь, а кутасны кыв сетны ловъя Господь водзын, коді петкӧдіс Израиль войтырӧс войвыв муысь да мукӧд муясысь, кытчӧ Сійӧ вӧтліс найӧс. Ме бӧр вайӧда найӧс асланыс муӧ, мый Ме сеті налӧн батьяслы.
Ме мӧдӧда уна чери кыйысьӧс, — висьталӧ Господь, — найӧ пондасны чериӧс моз кыйны Иуда войтырӧс.
Сэсся мӧдӧда уна вӧралысьӧс, кодъяс пондасны вӧтлыны найӧс керӧсъяс да мылькъяс вылысь, тшӧтш кырта потасъясысь.
Ӧд найӧ оз вермыны дзебсьыны Меысь, Менам синмӧй аддзӧ налысь туйяссӧ, и налӧн лёк вӧчӧмъясыс пыр Менам син водзынӧсь.
Налӧн мыжъясысь да лёк вӧчӧмъясысь Ме кык пӧвстӧн налысь водзӧс перъя, перъя сыысь, мый найӧ пежалісны Менсьым муӧс зывӧк идолъяснаныс, тыртісны пежторъяснаныс».
— Господьӧй, Тэ — менам выныс, Тэ — менам изкарыс, менам шог дырйи сайӧдчаніныс.
Му помсяньыс локтасны Тэ дінӧ войтыръяс, найӧ шуасны: «Миян батьяслы вичмис сӧмын ылӧгыс — вичмисны идолъяс, кодъяслы весьшӧрӧ юрбитӧны, ӧд таысь нинӧм бурыс абу».
Вермас-ӧ морт вӧчны аслыс енъясӧс? Ӧд татшӧм енъясыс — абу збыль Ен!
— Та вӧсна Ме ӧні петкӧдла налы Ассьым вынӧс да кыпӧдӧм киӧс, и найӧ тӧдмаласны, мый Менам нимӧй — Господь.
Иуда войтырлысь мыжсӧ гижӧма ёсь кӧрттувйӧн, визьйӧдлӧма ёсь алмазторйӧн налӧн сьӧлӧмӧ да висьпуктанінъяслӧн сюръяс вылӧ.
Пияннысӧ моз найӧ казьтывлӧны висьпуктанінъяс да юрбитан пуяс йылысь, кодъяс сулалӧны пашкыр пуяс улын, джуджыд керӧсъяс вылын да Менам керӧс вылын.
Тіян мыжъяс вӧсна, мый ті вӧчинныд асланыд му пасьтала, Ме сета мырддялысьяслӧн киӧ эмбурнытӧ, озырлуннытӧ да вись ваян мылькъяснытӧ.
Ті воштанныд мунытӧ, мый Ме сеті тіянлы. Ме пукта тіянӧс кесъявны асланыд вӧрӧглы сійӧ муас, мый ті онӧ на тӧдӧй, ӧд ті пестінныд Менам скӧрлунлысь бисӧ, и сійӧ пыр пондас ыпъявны.
Господь тадзи висьталӧ: — Ёрӧма сійӧ мортсӧ, коді лача кутӧ морт вылӧ, коді мыджсьӧ мувывса олысь вылӧ, кодлӧн сьӧлӧмыс ылыстчӧ Господьысь.
Сійӧ лоӧ овтӧминса лежнӧг кодь, бурсӧ оз тӧдлы. Сійӧ кутас овны изъя овтӧминын, солаинын, кӧні некод оз ов.
Бурсиӧма сійӧ мортсӧ, коді лача кутӧ Господь вылӧ, кодлӧн мыджӧдыс — Господь.
Сійӧ лоӧ ва дорын быдмысь пу кодь, визув ю дорӧ вужъясьӧм пу кодь, сійӧ оз пов шонді пӧжӧмысь, сылӧн коръясыс пыр вежӧсь, зэртӧм кадӧ сійӧ оз майшась, оз дугды вайны вотӧс.
Мортлӧн сьӧлӧмыс наян, сійӧс он вермы вежнысӧ.
Коді тӧдӧ мортлысь сьӧлӧмсӧ?
Ме, Господь, видзӧда мортлӧн сьӧлӧмӧ, туяла мортлысь пытшкӧссӧ, Ме мынтыся быдӧнлы сылӧн туйясыс серти, сылӧн уджъяслӧн вотӧсыс серти.
Байдӧг пӧжӧ колькъяс, кодъясӧс сійӧ эз вайлы, татшӧм жӧ сійӧ мортыс, коді ылӧдлӧмӧн озырмӧдчӧ. Олӧм шӧрас сійӧ воштас ставсӧ, кулігас сійӧ лоӧ мывкыдтӧм морт кодь.
— Миян вежаинным — дзирдлуныслӧн юралан пуклӧсыс, кодӧс водзысяньыс сувтӧдӧма выліинын.
Господьӧй, Тэ — Израильлӧн лачаыс!
Тэнӧ эновтысьяс ставныс яналасны, Тэысь кежысьяс бырасны бус вылӧ гижӧм нимъяс моз, ӧд найӧ эновтісны Господьӧс, ловъя ва петанінсӧ.
Господьӧй, бурдӧд менӧ, и ме бурда.
Мезды менӧ, и ме мездма, ӧд ме ошка Тэнӧ!
Йӧзыс шуалӧны меным: «Господь оз збыльмӧд Ассьыс кывсӧ. Мед инас сійӧ!»
Господьӧй, Тэ тӧдан, мый ме эг ӧтдортчы Тэнсьыд войтыртӧ видзӧмысь, ме эг кӧсйы, медым воис бырӧдан луныс.
Тэ водзын восьса ставыс, мый петіс менам вомысь.
Эн повзьӧдлы менӧ, сьӧкыд кадӧ Тэ — менам сайӧдчаніныс.
Менӧ дзескӧдысьяс мед яналасны, а менӧ эн лэдз янӧдны!
Найӧ мед поласны-тіраласны, а менӧ эн лэдз повзьӧдны!
Мӧдӧд налы сьӧкыд кад, дзикӧдз пасьварт-бырӧд найӧс!
Господь меным тадзи висьталіс: «Мун Войтырлӧн дзиръя дорӧ, кыті ветлӧны иудаса ӧксыяс. Мун ерусалимса мукӧд дзиръяяс дорӧ да висьтав сэні: иудаса ӧксыяс, став Иуда войтырыс да Ерусалимын олысьяс, кодъяс пыранныд-петанныд тайӧ дзиръяясӧдыс, кывзӧй Господьлысь кывсӧ.
Господь тадзи висьталӧ: кӧсъянныд кӧ видзны ассьыныд олӧмнытӧ, энӧ новлӧдлӧй ассьыныд нопнытӧ шойччан лунӧ, энӧ пыртӧй сійӧс Ерусалим карса дзиръяӧд. Шойччан лунӧ энӧ петӧй гортсьыныд нопйӧн, энӧ вӧчӧй некутшӧм удж. Шойччан луныс мед лоӧ тіянлы вежа, кыдзи Ме тшӧкті тіян батьяслы. Но тіян батьясныд эз кывзыны, эз сибӧдны Менсьым кывъясӧс, найӧ асныралісны, эз кывзыны, эз сибӧдны Менсьым туйдӧдӧмӧс.
А ті кӧ кутанныд кывзысьны Менсьым, — висьталӧ Господь, — шойччан лунӧ кӧ онӧ кутӧй пыртны нопнытӧ тайӧ карыслӧн дзиръяӧд да онӧ кутӧй вӧчны некутшӧм удж, но шойччан луныс лоӧ тіянлы вежа, сэки тайӧ карас локтасны асланыс йӧзкӧд ӧксыяс, кодъяс пукалӧны Давидлӧн юралан пуклӧсын. Найӧ пырасны карса дзиръяӧд тарантасъясӧн да вӧвъясӧн. Накӧд тшӧтш локтасны Иудаын да Ерусалимын олысьяс, и тайӧ карас пыр лоӧны олысьяс.
Иудаса каръясысь, Ерусалим гӧгӧрысь, Венямин муысь, Негев муысь, керӧсбердса да керӧсвыв муясысь локтасны йӧз да ваясны Господьлӧн керкаӧ сотан да мукӧд висьяс, нянь висьяс, чӧскыд ӧвтанторъяс да Господьӧс аттьӧалӧм могысь вайӧмторъяс.
Но ті кӧ онӧ кывзӧй Менӧ, и шойччан луныс тіянлы оз ло вежа, а кутанныд шойччан лунӧ ветлыны нопйӧн ерусалимса дзиръяӧд, сэки тайӧ дзиръяяссӧ Ме биӧн сота. Биыс ньылыштас Ерусалимлысь керкаяссӧ, и некод оз кусӧд сійӧс».
Еремейлы вӧлі Господьсянь кыв:
«Мун гырнич вӧчысьлӧн керкаӧ, сэні Ме висьтала тэныд Ассьым кывъясӧс».
Ме пыри гырнич вӧчысьлӧн керкаӧ да аддзи, кыдзи сійӧ вӧлі вӧчӧ ассьыс уджсӧ из гӧгыль вылын.
Гырничыс, мый сійӧ вӧлі вӧчӧ, эз артмы, и сійӧ вӧчис тайӧ сёйсьыс мӧд гырнич, кутшӧмӧс сійӧ кӧсйис.
Меным вӧлі Господьсянь кыв:
«Израиль войтыр, Ме ӧмӧй ог вермы вӧчны тэкӧд тайӧ гырнич вӧчысьыс моз? — висьталӧ Господь.
— Кыдзи гырнич вӧчысьлӧн киын сёйыс, тадзи ті, Израиль войтыр, Менам киынӧсь.
Ме верма шуны кутшӧмкӧ войтыр йылысь, мый Ме вужнас нетшышта сійӧс да пазӧда-бырӧда.
Но сійӧ войтырыс кӧ, код йылысь Ме висьталі, эновтчас аслас лёк уджъясысь, сэки Ме вежа Ассьым шуӧмӧс да ог вӧч сійӧ лёксӧ, мый шуи вӧчны налы.
Ме верма шуны кутшӧмкӧ войтыр йылысь, мый вужйӧда да вынсьӧда сійӧс.
Но сійӧ войтырыс кӧ кутас вӧчны Менам син водзын шогмытӧмсӧ, оз кут кывзысьны Менсьым, сэки Ме вежа Ассьым шуӧмӧс да ог вӧч сійӧ бурсӧ, мый шуи вӧчны налы.
Ӧні висьтав Иуда войтырлы да Ерусалимын олысьяслы, мый Господь тадзи висьталӧ: Ме дасьта тіянлы лёксӧ, Ме мӧдӧда тіянлы шог.
Бергӧдчӧй асланыд лёк туйясысь, бӧрйӧй бур туйсӧ да вӧчӧй бурсӧ.
Но найӧ шуасны тэныд: “Эн виччысь!
Ми кутам овны асланым кӧсйӧм серти, лёк да чорыд сьӧлӧмным серти”».
Та вӧсна Господь тадзи висьталӧ: — Израиль ныв вӧчӧ зывӧксьыс-зывӧк уджъяс. Юалӧй войтыръяслысь, кывліс-ӧ кодкӧ сылӧн кодь уджъяс йылысь.
Ливан керӧс вылысь лымйыс ӧмӧй сывлывлӧ?
Керӧс вывсянь визувтысь кӧдзыд ваыс ӧмӧй косьмывлӧ?
Но Менам войтырӧй вунӧдіс Менӧ, найӧ сотӧны висьяс абутӧм енъяслы. Найӧ крукасисны асланыс туй вылын, кежисны важ туй вылысь, ӧні ветлӧдлӧны сэті, кӧні туйыс абу. Ассьыныс мусӧ найӧ вӧчисны овтӧминӧн, сійӧ пыр кежлӧ лои повзьӧдчанторйӧн. Сы дорті мунысьяс пондасны юрнас довкйӧдлыны, найӧс полӧм босьтас.
Асыввывсянь пӧльтысь тӧв моз Ме нӧбӧда Ассьым войтырӧс вӧрӧг водзын.
Войтырлӧн сьӧкыд кадӧ Ме бергӧда налань мышкӧс, а ог чужӧмӧс.
Йӧзыс шуисны: «Локтӧй, сёрнитчамӧй Еремейлы паныд.
Локтӧй, лёкӧдамӧй сійӧс, огӧ кывзӧй сійӧс! Миян эм попъяслӧн велӧдӧм, мывкыда йӧзлӧн туйдӧдӧм, пророкъяслӧн кыв».
— Господьӧй, кыв менӧ, кывзы, мый меным паныд сувтысьяс сёрнитӧны!
Бурсьыс ӧмӧй лёкӧн вештысьлӧны?
Но найӧ кодйӧны меным гу.
Эн вунӧд, кыдзи ме сулалі Тэ водзын да дорйи найӧс, медым вештыны на вылысь Тэнсьыд скӧралӧмтӧ.
Господьӧй, меным паныд сувтысьяслӧн пияныс мед тшыгъяласны, найӧ мед куласны шыпуртысь.
Налӧн гӧтыръясныс мед лоӧны дӧваясӧн, найӧ мед воштасны челядьнысӧ. Меным паныд сувтысьясӧс мед суас кулӧм, налӧн зонъясыс тышын мед куласны шыпуртысь.
Мӧдӧд на дінӧ мырддялысь-пазӧдысьясӧс, налӧн керкаясысь мед кылас бӧрдӧм шы.
Ӧд найӧ кодйисны гу, медым кыйны менӧ, пуктісны нальк менам коклы.
Но, Тэ, Господьӧй, тӧдан, мый найӧ кӧсйӧны вины менӧ.
Эн прӧстит налысь лёк вӧчӧмсӧ, эн вешты налысь мыжсӧ Аслад син водзысь.
Найӧс мед лоӧ шыбитӧма Тэ водзӧ, вӧч накӧд Аслад скӧрлуныд серти.
Господь тадзи висьталіс: «Мун да гырнич вӧчысьлысь ньӧб сёй гырнич.
Аскӧдыд босьт войтырлӧн юрнуӧдысьяс пӧвстысь некымынӧс да попъяс пӧвстысь некымын юрнуӧдысьӧс. Мун Гырничтор дзиръяӧд Бен-Хинном ковтысӧ да юӧрт сэні сійӧ кывъяссӧ, мый Ме висьтала тэныд.
Иудаса ӧксыяслы да Ерусалимын олысьяслы тшӧкты кывзыны Господьлысь кывсӧ.
Юӧрт налы, мый Господь Саваоф, Израильлӧн Ен, тадзи висьталӧ: тайӧ муас Ме мӧдӧда сэтшӧм шог, мый та йылысь кылысьлӧн пеляс кутас тіньгыны. Ерусалимын олысьяс эновтісны Менӧ, пежалісны тайӧ ковтыссӧ, сотӧны тані висьяс мукӧд енъяслы, кодъясӧс эз тӧдлыны ни найӧ, ни налӧн батьясныс, ни иудаса ӧксыяс.
Найӧ тыртісны тайӧ ковтыссӧ мыжтӧм йӧзлӧн вирӧн. Найӧ лэптісны Ваал идоллы вись ваян мылькъяс, медым сотан вись пыдди вайны Вааллы ассьыныс ныв-пинысӧ. Но татшӧмторсӧ Ме эг тшӧктывлы вӧчнысӧ, тайӧ Меным абу сьӧлӧм серти.
Та вӧсна воасны лунъяс, — висьталӧ Господь, — кор тайӧ висьваянінсӧ оз нин кутны шуны Тофетӧн да тайӧ ковтыссӧ — Бен-Хинномӧн, но кутасны шуны виалан ковтысӧн.
Тані Ме бырӧда Иуда войтырлысь да Ерусалимын олысьяслысь кӧсйӧмсӧ. Ме сета найӧс вӧрӧглӧн шыпурт улӧ, и найӧ куласны налысь олӧмсӧ босьтны кӧсйысьяслӧн ки помысь. Налысь шойяссӧ Ме шыбита кырныш-варышлы да зверъяслы.
Тайӧ карсӧ Ме вӧча овтӧминӧн да повзьӧдчанторйӧн.
Сійӧс бырӧдӧмысь сы дорті мунысьясӧс полӧм босьтас.
Ме вӧча сідзи, мый тайӧ карас олысьяс пондасны сёйны асланыс ныв-пилысь яйсӧ.
Ыджыд шог дырйи, кор вӧрӧг кытшалас да дзескӧдас найӧс, и кӧсъяс босьтны налысь олӧмсӧ, найӧ пондасны сёйны ӧта-мӧдныслысь яйсӧ.
Тэкӧд локтысь юрнуӧдысьяслӧн син водзын жугӧд гырничсӧ да шу налы, мый Господь Саваоф тадзи висьталӧ: Ме жугӧда тайӧ войтырсӧ да тайӧ карсӧ, кыдзи вӧлі жугӧдӧма гырнич вӧчысьлысь сёй гырничсӧ, мый дзоньтавны он нин вермы. Тофетӧ пондасны дзебны виӧмаясӧс, ӧд мӧдлаын местаыс оз ло.
Тадзи Ме вӧча Ерусалим каркӧд да сэні олысьяскӧд, — висьталӧ Господь.
— Тайӧ карыс лоӧ Тофет висьваянін кодь.
Ерусалим карлӧн керкаясыс да иудаса ӧксыяслӧн керкаясыс лоӧны Тофет кодь пежӧсь. Тадзи лоӧ став керкаясыскӧд, кӧні вевт вылас тшынӧдчисны енэжвыв кодзувъяслы да вайисны вина вись мукӧд енъяслы».
Еремей бӧр локтіс Тофетысь, кытчӧ Господь мӧдӧдліс сійӧс пророкавны. Сэсся сійӧ сувтіс Господьлӧн крам йӧрӧ да шуис став войтырыслы:
«Господь Саваоф, Израильлӧн Ен, тадзи висьталӧ: тайӧ карыс вылӧ да став иудаса каръяс вылӧ Ме Аслам шуӧм серти мӧдӧда шог, ӧд тайӧ каръясас олысьясыс асныралӧны, оз кывзыны Менсьым кывъясӧс».
Пашхур нима поп, Иммерлӧн пиыс, Господьлысь керкасӧ видзысьяслӧн веськӧдлысь, кыліс Еремейлысь пророкалӧмсӧ, вартіс Еремей пророкӧс да дорис тшемилӧ костӧ Веняминлӧн вылысса дзиръя дорӧ, Господьлӧн крамсянь неылын.
Мӧд луннас Пашхур лэдзис Еремейӧс тшемилӧысь. Еремей шуис сылы: «Господь оз нин нимты тэнӧ Пашхурӧн, а Магор-Миссавивӧн. *
Ӧд Господь тадзи висьталӧ: “Ме вӧча тэнӧ повзьӧдчанторйӧн аслыд и став тэнад ёртъясыдлы. Тэнад син водзын найӧ усясны вӧрӧглӧн шыпуртысь.
Иуда войтырӧс Ме сета вавилонса ӧксы киӧ. Ӧтиясӧс сійӧ нуӧдас Вавилонӧ, а мӧдъясӧс виас шыпуртӧн.
Тайӧ карыслысь озырлунсӧ да эмбурсӧ — ставсӧ, мый могысь тані олысьяс уджалісны, тшӧтш иудаса ӧксыяслысь став донаторсӧ Ме сета вӧрӧг киӧ. Вӧрӧг ставсӧ куштас-мырддялас да нуас аскӧдыс Вавилонӧ.
Тшӧтш тэнӧ, Пашхур, и став тэнсьыд гортсатӧ нуӧдас пленӧ.
Тэ мунан Вавилонӧ да сэні кулан, и сэні гуаласны тэнӧ. Тадзи лоӧ тшӧтш тэнад ёртъясыдкӧд, кодъяслы тэ ылӧдлӧмӧн пророкалін”».
— Господьӧй, Тэ ылӧдлін менӧ, и менӧ лои ылӧдлӧма.
Тэ вермин менӧ, ӧд Тэ меысь вынаджык. Быд лун сералӧны ме вылын, ставныс лёкӧдӧны менӧ.
Быд пӧрйӧ, кор ме сёрнита, ме юӧрта виалӧм-дзескӧдӧм да бырӧдӧм йылысь. Господьлӧн кывйыс вӧсна менӧ лёкӧдӧны, ме вылын быд лун сералӧны.
Ме шуи аслым, мый ог кут казьтывлыны Господь йылысь, ог кут висьтавлыны Сылӧн нимсянь.
Но менам сьӧлӧмӧй биӧн ыпъяліс, менсьым лыясӧс сотіс, ме мудзи кутнысӧ, водзӧ ог вермы.
Ме кыла уна йӧзлысь лёк сёрнияс, быд боксянь повзьӧдлӧны менӧ.
Найӧ ыззьӧдӧны ӧта-мӧднысӧ, медым вузавны менӧ.
Весиг ёртъясӧй виччысьӧны менсьым крукасьӧмӧс, найӧ шуалӧны: «Гашкӧ, сійӧ налькйӧ шедас, сэки ми сійӧс вермам да сылысь водзӧс перъям».
Но мекӧд Господь, Сійӧ дорйӧ менӧ вына тышкасьысь моз.
Та вӧсна менӧ дзескӧдысьяс крукасясны, найӧ менӧ оз вермыны.
Найӧ ёна яналасны, ӧд вӧчисны мывкыдтӧма, найӧс янӧдӧмсӧ некор оз ло вунӧдӧма.
Господь Саваоф, Тэ тӧдмалан веськыда олысьӧс, Тэ аддзан сылысь пытшкӧссӧ да сьӧлӧмсӧ.
Сет меным аддзыны, кыдзи Тэ водзӧс перъян менӧ мустӧмтысьяслысь, ӧд Тэ водзӧ ме вая ассьым тӧжд-могӧс.
Сьылӧй Господьлы, ошкӧй Господьӧс! Сійӧ мездӧ коньӧр мортӧс лёк вӧчысьяслӧн киысь.
Мед лоӧ ёрӧма сійӧ лунсӧ, кор ме чужи!
Мед оз ло бурсиӧма сійӧ лунсӧ, кор чужтіс менӧ мамӧй!
Мед лоӧ ёрӧма сійӧ мортсӧ, коді вайис менам батьлы нимкодь юӧр, мый сылӧн пи чужис.
Сійӧ мортыскӧд мед лоӧ сійӧ жӧ, мый лои каръяскӧд, кодъясӧс нем жалиттӧг пазӧдіс Господь.
Асывнас мед сійӧ кылас ойзӧм, а луннас — тыш вылӧ чуксалӧм сыысь, мый эз ви менӧ мам кынӧмын. Мед эськӧ мам кынӧмӧй вӧлі меным гортйӧн, мед эськӧ мамӧй пыр коли нӧбасьысьӧн.
Мыйла ме петі мам кынӧмысь? Сы могысь ӧмӧй, медым аддзыны мырсьӧм да шог, медым олан лунъясӧй помасисны яналӧмӧн?
Еремейлы вӧлі Господьсянь кыв, кор Седекей ӧксы мӧдӧдіс Еремей дінӧ Малкийлысь Пашхур писӧ да Софоний попӧс, Маасейлысь писӧ. Седекей ӧксы тшӧктіс шуны сылы:
«Еремей, кевмысь Господьлы миян вӧсна, ӧд вавилонса Навукодоносор ӧксы тышӧ петіс миянлы паныд.
Гашкӧ, Господь вӧчас шензьӧданатор, и Навукодоносор вешъяс миян дінысь».
Еремей вочавидзис налы: «Висьталӧй Седекейлы, мый Господь, Израильлӧн Ен, тадзи висьталӧ: тіянлы аслыныд паныд Ме бергӧда шыпуртъяснытӧ, мыйӧн ті тышкасянныд вавилонса ӧксылы паныд да калдеяса тышкайӧзлы паныд, кодъяс кытшалӧмаӧсь тіянӧс. Ме чукӧрта шыпуртъяснытӧ тайӧ кар шӧрас.
Ме Ачым понда тышкасьны тіянлы паныд вына киӧс кыпӧдӧмӧн, скӧрлунӧн, ярлунӧн да ыджыд лӧглунӧн.
Ме бырӧда тайӧ карас став олысьсӧ, йӧзӧс и ыж-мӧскӧс, найӧ куласны пӧрӧс висьӧмысь.
Та бӧрти, — висьталӧ Господь, — иудаса Седекей ӧксыӧс, сылысь кесъялысьяссӧ да став войтырсӧ, кодъяс тайӧ карас оз кувны пӧрӧс висьӧмысь, шыпуртысь да тшыгъялӧмысь, Ме сета вавилонса Навукодоносор ӧксылӧн киӧ да вӧрӧглӧн киӧ, коді кӧсйӧ босьтны налысь олӧмсӧ.
Вавилонса ӧксы виас найӧс шыпуртӧн, оз жалит найӧс, оз бурсьӧлӧмтчы на дінӧ».
Господь шуис меным: «Юӧрт Иуда войтырлы, мый Господь тадзи висьталӧ: Ме сета тіянлы бӧрйыны олӧмыслысь туйсӧ да кулӧмыслысь туйсӧ.
Коді кольччас тайӧ карас, сійӧ кулас шыпуртысь, тшыгъялӧмысь да пӧрӧс висьӧмысь.
Коді петас карсьыс да сетчас калдеяса тышкайӧзлӧн киӧ, кодъяс кытшалӧмаӧсь тіянӧс, сійӧ ловйӧн коляс да видзас ассьыс олӧмсӧ.
Ме шуи вӧчны тайӧ карыслы лёксӧ, а эг бурсӧ, — висьталӧ Господь.
— Тайӧ карсӧ лоӧ сетӧма вавилонса ӧксы киӧ, и сійӧ сотас тайӧ карсӧ».
— Иудаса ӧксы керкаын олысьяслы висьтав: кывзӧй Господьлысь кывсӧ, ті, Давидлӧн рӧдыс!
Господь тадзи висьталӧ: водз асывсяньыс мыждӧй веськыда, увтыртӧмаӧс мездӧй дзескӧдысьлӧн киысь, медым Менам скӧрлунӧй эз ыпнит би моз, медым тіян лёк вӧчӧмъясныд вӧсна Менам скӧрлунӧй эз паськав кусӧдны позьтӧм яр би моз.
Ӧні Ме сувта тэныд паныд, ковтысын сулалысь кар, вывтасінын сулалысь изкырта, — висьталӧ Господь. — Ме сувта тіянлы паныд, кодъяс шуанныд, некод пӧ оз вермы петны тышӧ миянлы паныд, некод пӧ оз пыр миян сайӧдчанінӧ.
Ме мыжда тіянӧс уджъясныдлӧн вотӧсыс серти, — висьталӧ Господь. — Тіян вӧрын Ме песта би, и сійӧ ставсӧ гӧгӧр ньылыштас.
Господь тадзи висьталіс: «Мун иудаса ӧксылӧн керкаӧ да висьтав сэні тайӧ кывъяссӧ: тэ, иудаса ӧксы, Давидлӧн юралан пуклӧсын пукалысь, тэнад кесъялысьясыд да тэнад войтырыд, коді пырӧ-петӧ тайӧ дзиръяӧдыс, кывзӧй Господьлысь кывсӧ!
Господь тадзи висьталӧ: олӧй веськыда да мыждӧй збыльыс серти, увтыртӧмаӧс мездӧй дзескӧдысьлӧн киысь. Йӧз муысь локтысьӧс, батьтӧм-мамтӧмӧс да дӧваӧс энӧ увтыртӧй да энӧ дзескӧдӧй, мыжтӧм мортлысь вирсӧ тайӧ муас энӧ кисьтӧй.
Ті кӧ кутанныд овны тайӧ кывъясыс серти, сэки тайӧ керка дзиръяӧд пырасны ӧксыяс, кодъяс пукалӧны Давидлӧн юралан пуклӧсын. Найӧ локтасны тайӧ карас тарантасъясӧн да вӧвъясӧн. Накӧд тшӧтш локтасны налӧн кесъялысьясыс да налӧн войтырыс.
А ті кӧ онӧ кывзӧй тайӧ кывъяссӧ, Ме Ачым кыв сетӧмӧн шуа, мый тайӧ керкасӧ лоӧ кисьтӧма, — висьталӧ Господь».
Иудаса ӧксылӧн керка йылысь Господь тадзи висьталӧ: — Ме водзын тэ Галаад кодь, ливанса керӧс йыв кодь, но Ме вӧча тэнӧ овтӧминӧн, кушмӧм карӧн.
Ме мӧдӧда тэ дінӧ шыпурта бырӧдысьясӧс, найӧ кераласны тэнсьыд медбур сус пуястӧ да шыбитасны биӧ.
Мукӧд войтыръясысь унаӧн пондасны ветлыны тайӧ карыс дінті да юасьны ӧта-мӧдныслысь: «Мый вӧсна Господь тадзи вӧчис тайӧ ыджыд карыскӧд?»
Налы вочавидзасны: «Господь тадзи вӧчис сы вӧсна, мый тайӧ карас олысьяс вунӧдісны асланыс Господь Енлысь Йитӧдсӧ, мый Сійӧ кӧрталіс накӧд, копрасисны мукӧд енъяслы да кесъялісны налы».
— Энӧ бӧрдӧй кулӧма вӧсна, энӧ жалитӧй сійӧс, но курыда бӧрдӧй пленӧ нуӧдӧма вӧсна, сійӧ ӧд бӧрсӧ оз нин бергӧдчы, ассьыс чужан мусӧ оз нин аддзыв.
Иудаса Шаллум ӧксы йылысь, коді лои ӧксыӧн аслас Иосей батьыс бӧрти, Господь тадзи висьталӧ: «Сійӧс нуӧдісны татысь Египетӧ, и бӧрсӧ сійӧ оз нин бергӧдчы. Сійӧ кулас сэні, кытчӧ нуӧдісны, и тайӧ мусӧ сійӧ оз нин аддзыв».
— Курыд шог сылы, коді лэптӧ ассьыс керкасӧ ылӧг отсӧгӧн, оз лэпты ассьыс жыръяссӧ веськыдлун отсӧгӧн, коді уджӧдӧ матыссасӧ, а удждон оз мынты. Сійӧ шуалӧ, ме пӧ кыпӧда аслым ыджыд керка, вӧча ыджыд жыръяс. Сійӧ вӧчӧ ӧшиньяс, эжӧ керкасӧ сус пуӧн да мавтӧ сійӧс гӧрд краскаӧн.
Тэ ӧмӧй лоин ӧксыӧн, медым ошйысьны сус пу керкаӧн?
Тэнад батьыд тшӧтш пӧттӧдз сёйис-юис, но сійӧ оліс веськыда да мыждіс збыльыс серти, та вӧсна ставыс сылӧн вӧлі бур.
Сійӧ дорйис гӧльясӧс да коньӧръясӧс, та вӧсна сылы вӧлі бур.
Тадзи вӧчысь тӧдӧ Менӧ, — висьталӧ Господь. — 
Но тэнад синмыд да сьӧлӧмыд видзӧдӧны горшасьны, кӧсйӧны мыжтӧм мортлысь вир кисьтны, дзескӧдны да нартитны.
Та вӧсна иудаса Ехояким ӧксы йылысь, Иосейлӧн пиыс йылысь, Господь тадзи висьталӧ: 
— Сы йылысь оз кутны бӧрдны: “Курыд шог, вокӧй!” “Курыд шог, чойӧй!” Сы йылысь оз кутны бӧрдны: “Курыд шог, ыджыдӧй!” “Курыд шог сылӧн юралӧмлы!”
Сійӧс гуаласны осёлӧс моз.
Сылысь шойсӧ кыскасны да шыбитасны ерусалимса дзиръя сайӧ.
Ерусалим, кыпӧдчы Ливан керӧс вылӧ да бӧрд, сыркъялӧмӧн бӧрд Васан ыб вылын, гораа горзы Аварим керӧсъяссянь, ӧд тэнсьыд ёртъястӧ бырӧдӧма.
Бур кадӧ Ме ӧлӧдлі тэнӧ, но тэ шулін, ог пӧ кывзы.
Томдырсяньыд тэ тадзи вӧчин, эн кывзы Менӧ.
Тэнсьыд войтыртӧ видзысьясӧс нӧбӧдас тӧвныр, тэнсьыд ёртъястӧ нуӧдасны пленӧ.
Став тэнад лёк вӧчӧмысь тэнӧ лоӧ янӧдӧма да увтыртӧма.
Тэ ошйысян ливанса сус пуысь вӧчӧм керкаӧн, поздысян сус пу вожъяс вылын. Но чужтысь аньӧс моз тэнӧ топӧдасны сьӧкыд дойяс, и тэ пондан ымзыны!
«Весиг кӧ тэ, Еконей, иудаса ӧксы, Ехоякимлӧн пиыс, вӧлін Менам веськыд киын чунькытшӧн, Ме кыв сета, — висьталӧ Господь, — мый и сэки эськӧ нетшышті тэнӧ Аслам чуньысь. Ме сета тэнӧ сійӧ йӧзлӧн киӧ, кодъяс кӧсйӧны босьтны тэнсьыд олӧмтӧ, сета налӧн киӧ, кодъясысь тэ полан. Ме сета тэнӧ вавилонса Навукодоносор ӧксы киӧ да калдеяса тышкайӧзлӧн киӧ. Ме вӧтла тэнӧ да тэнӧ чужтысь мамтӧ йӧз муӧ. Сэні ті энӧ чужлӧй, но сэні куланныд.
А тайӧ муас, кытчӧ ті став сьӧлӧмсяньныд кӧсъянныд бергӧдчыны, онӧ нин бергӧдчӧй».
«Тайӧ Еконей мортыс ӧмӧй жугалӧм доз, некытчӧ туйтӧм гырнич?
Мыйла нӧ сійӧс да сысянь чужысьясӧс шыбитісны налы тӧдтӧм муӧ?»
— Иуда му да сэні олысьяс, кывзӧй Господьлысь кывсӧ!
Господь тадзи висьталӧ: Еконей йылысь гижӧй, мый сылӧн ныв-пиыс эз вӧв, став олӧм чӧжыс сылӧн нинӧм эз артмы, ӧд сысянь чужысь оз пуксьы Давидлӧн юралан пуклӧсӧ, оз кут юравны Иуда муын.
«Курыд шог Менсьым войтырӧс видзысьяслы, Менсьым ыжъясӧс бырӧдысь-разӧдысьяслы, — висьталӧ Господь. — 
Та вӧсна Ме, Господь, Израильлӧн Ен, тадзи висьтала Менсьым войтырӧс видзысьяслы: ті разӧдінныд-вӧтлінныд Менсьым ыжъясӧс, энӧ тӧждысьӧй на вӧсна.
Ӧні Ме мыжда тіянӧс лёк вӧчӧмъясныд вӧсна, — висьталӧ Господь.
Ме чукӧрта Аслам ыжъяслысь коляссӧ став муяссьыс, кытчӧ Ме вӧтлі найӧс, да бӧр бергӧда асланыс йирсянінӧ.
Сэні найӧ пондасны чужтысьны-рӧдмыны.
Ме бӧръя да сувтӧда налы видзысьясӧс, кодъяс кутасны тӧждысьны на вӧсна, и найӧ оз нин кутны повны-тіравны да оз нин кутны вошны, — висьталӧ Господь».
— Воасны лунъяс, — висьталӧ Господь, — кор Давид рӧдысь Ме бӧръя да сувтӧда веськыда Олысьӧс. Сійӧ лоӧ ӧксыӧн, пондас юравны мывкыда, мыждыны веськыда, Сійӧ ваяс веськыдлунсӧ тайӧ муас.
Сылӧн веськӧдлан лунъясӧ Иуда войтыр мездмас, Израиль войтыр кутас повтӧг овны.
Сылӧн нимыс лоӧ “Господь — миян веськыдлуныс”.
«Воасны лунъяс, — висьталӧ Господь, — кор оз нин кутны кыв сетны ловъя Господь водзын, коді вайӧдіс Израиль войтырӧс Египетысь, а кутасны кыв сетны ловъя Господь водзын, коді вайӧдіс Израиль войтырсянь чужысьясӧс войвыв муысь да став мусьыс, кытчӧ Сійӧ вӧтліс найӧс. Найӧ пондасны овны асланыс муын».
Пророкъяс йылысь Еремейлӧн юӧртӧм: 
— Сьӧлӧмӧй менам жугалӧма, став менам лыясӧй тіралӧны.
Господь вӧсна, Сылӧн вежа кывъясыс вӧсна ме лои винаысь коддзӧм морт кодь. Муыс тырӧма Енсӧ эновтысьясӧн, муыс бӧрдӧ, ӧд сійӧс ёрӧма, овтӧминса йирсянінъяс косьмӧмаӧсь. Йӧзыслӧн кӧсйӧмыс — лёк вӧчны, налӧн выныс — ылӧг.
— Пророкъяс да попъяс пежасьӧмаӧсь, весиг Аслам керкаын Ме аддза налысь лёк вӧчӧмсӧ, — висьталӧ Господь. — 
Та вӧсна налӧн туйыс лоӧ пемыдінын вильыд туй кодь. Найӧс йӧткыштасны, и найӧ усясны тайӧ вильыд туй вылас.
Найӧс мыждан воӧ Ме мӧдӧда налы шог, — висьталӧ Господь.
Ме аддзылі, мый самарияса пророкъяс зывӧка вӧчисны, найӧ пророкалісны Ваал нимсянь, Менсьым Израиль войтырӧс кежӧдісны ылӧгас.
Но ӧні Ме аддза, мый ерусалимса пророкъяс нӧшта на зывӧкджыка вӧчӧны: пежалӧны гозъякост олӧм, олӧны ылӧгас, ыззьӧдӧны йӧзсӧ лёк вылӧ, оз кежӧдны найӧс лёк вӧчӧмысь.
Ме водзын тайӧ пророкъясыс Содом карын олысьяс кодьӧсь, а Ерусалимын олысьяс Гомора карын олысьяс кодьӧсь.
Господь Саваоф ерусалимса пророкъяс йылысь тадзи висьталӧ: Ме верда найӧс курыд быдмӧгӧн, юктӧда найӧс яд сора ваӧн, ӧд ерусалимса пророкъяссянь пежыс паськаліс став тайӧ му пасьталаыс.
Господь Саваоф тадзи висьталӧ: энӧ кывзӧй тайӧ пророкъяссӧ. Найӧ пӧрйӧдлӧны тіянӧс, висьталӧны тіянлы ассьыныс аддзылӧмъяс, а оз Господьсянь петкӧдчылӧмъяс.
Менӧ мустӧмтысьяслы найӧ пыр дольӧны, Господь пӧ висьталӧ, мый тіян век лоӧ лӧнь олӧм.
Налы, кодъяс чорзьӧдӧмаӧсь ассьыныс сьӧлӧмнысӧ, тайӧ пророкъясыс шуӧны, шогыс пӧ оз су тіянӧс.
— Кор Господь туйдӧдіс Ассьыс пророкъяссӧ, коді тайӧ пророкъясысь вӧлі сэні? Коді тайӧ пророкъясысь аддзыліс, коді кывліс Сылысь кывсӧ, коді сюся кывзіс Сійӧс?
Со, Господьсянь кыпӧдчӧ ыджыд тӧвныр, Сылӧн скӧрлуныс локтӧ тӧвныр моз, гартчӧ лёк вӧчысьяслӧн юр весьтын.
Господьлӧн скӧрлуныс оз вешйы, кытчӧдз Сійӧ оз збыльмӧд Ассьыс шуӧмсӧ.
Бӧръя лунъясӧ ті тырвыйӧ гӧгӧрвоанныд тайӧс.
— Ме эг мӧдӧдлы тайӧ пророкъяссӧ, а найӧ котӧртӧны.
Ме эг висьтавлы налы, а найӧ пророкалӧны.
Найӧ кӧ вӧліны Ме дінын, кор Ме туйдӧді пророкъясӧс, найӧ эськӧ Менам войтырлы висьталісны Менсьым кывъясӧс, бергӧдісны эськӧ найӧс лёк туйсьыныс да лёк уджъяссьыныс.
Ме ӧмӧй сӧмын матіын Ен, — висьталӧ Господь, — ыліын ӧмӧй Ме абу Ен?
Вермас ӧмӧй мортыс дзебсьыны, медым Ме эг аддзы сійӧс? — висьталӧ Господь.
— Ме ӧмӧй абу быдлаын, енэжас и му вылас? — висьталӧ Господь.
«Ме кывлі, мый висьталӧны пророкъяс, кодъяс Менам нимсянь юӧртӧны ылӧгсӧ.
Найӧ шуалӧны, ме пӧ вӧтаси, ме пӧ вӧт аддзылі.
Дыр-ӧ найӧ пондасны висьтавлыны ылӧгсӧ, юӧртны пӧръясьӧмсӧ, мый налӧн сьӧлӧманыс?
Найӧ висьтавлӧны вӧтъяснысӧ ӧта-мӧдныслы да кӧсйӧны, медым налӧн вӧтъяс вӧсна Менам войтырӧй вунӧдіс Менсьым нимӧс, кыдзи налӧн батьясныс Ваал идол вӧсна вунӧдісны Менсьым нимӧс.
Пророк, коді аддзыліс вӧт, мед висьталӧ сійӧс вӧтӧс моз, а пророк, кодлы вӧлі Месянь кыв, мед висьталӧ Менсьым кывйӧс веськыда».
Позяс-ӧ идзас ӧткодявны шобді туськӧд? — висьталӧ Господь. — Менам кывйӧй ӧд би кодь, — висьталӧ Господь, — сійӧ изкырта жуглысь ыджыд мӧлӧт кодь.
«Ме сувта сійӧ пророкъяслы паныд, кодъяс ӧта-мӧдныслысь гусялӧны Менсьым кывъясӧс, — висьталӧ Господь. — 
Ме сувта сійӧ пророкъяслы паныд, кодъяс висьталӧны ассяньныс, а шуалӧны, Господь пӧ висьталіс.
Ме сувта сійӧ пророкъяслы паныд, кодъяс висьталӧны ылӧг вӧтъяс, — висьталӧ Господь. — Пӧръясьӧмӧн да ошйысян кывъясӧн найӧ кежӧдӧны Менсьым войтырӧс ылӧгас. Ме эг мӧдӧдлы найӧс, эг тшӧктывлы налы вӧчны тайӧс. Менам войтырлы найӧ бурсӧ оз вайны, — висьталӧ Господь.
Тайӧ войтырысь, пророкъясысь либӧ попъясысь кӧ кодкӧ юалас тэнсьыд, мыйӧн Господь сьӧктӧдӧ миянӧс, сэки шу налы: сьӧктӧда сійӧн, мый эновта найӧс, — висьталӧ Господь. — 
Пророкъясысь, попъясысь либӧ тайӧ войтырысь кӧ кодкӧ шуас, мый Ме, Господь, сьӧктӧда Аслам кывйӧн, сэки Ме мыжда тайӧ мортсӧ да сылысь гортсасӧ».
Ӧта-мӧдныдлысь юалӧй, мый вочавидзис Господь и мый Сійӧ шуис, но энӧ юасьӧй, мыйӧн Господь сьӧктӧдӧ. Ӧд коді юалас тадзи, сійӧс аслас кывйыс кутас сьӧктӧдны. Ті мӧдарӧ бергӧданныд Господь Саваофлысь, миян ловъя Енлысь, кывъяссӧ.
Пророклысь юалӧй, мый сылы вочавидзис Господь и мый Сійӧ шуис.
Ті кӧ шуанныд, мый Господьлӧн кывйыс сьӧктӧдӧ тіянӧс, сэки Господь тадзи висьталӧ: Ме ӧлӧдлі тіянӧс, медым энӧ шуалӧй, мый Господьлӧн кывйыс сьӧктӧдӧ тіянӧс. Но ті тадзи шуаланныд, та вӧсна Ме вунӧда тіянӧс, эновта тіянӧс да тайӧ карсӧ, мый Ме сеті тіянлы да тіян батьяслы. Ме пыр кежлӧ янӧда да нинӧмӧ пукта тіянӧс, и тайӧс некор оз ло вунӧдӧма.
Вавилонса Навукодоносор ӧксы нуӧдіс Ерусалимысь Вавилонӧ пленӧ иудаса Еконей ӧксыӧс, Ехоякимлысь писӧ, тшӧтш иудаса юралысьясӧс, пуысь да кӧртысь вӧчасьысьясӧс. Та бӧрти Господь петкӧдліс меным инжир тыра кык чуман, мый вӧлі пуктӧма Господьлӧн крам водзӧ.
Ӧти чуманас вӧлі зэв бур, водз кисьмӧм инжир вотӧс, а мӧдас вӧлі зэв лёк вотӧс, мый эз позь сёйнысӧ.
Господь шуис меным: «Еремей, мый тэ аддзан?»
Ме вочавидзи: «Аддза инжир вотӧс. Бур инжир вотӧсыс — зэв бур, а лёк вотӧсыс — зэв лёк, весиг оз позь сёйнысӧ».
Меным вӧлі Господьсянь кыв:
«Господь, Израильлӧн Ен, тадзи висьталӧ: тайӧ бур инжир вотӧссӧ моз Ме шогманаӧн лыддя Иуда муысь пленӧ босьтӧмаясӧс, кодъясӧс Ме вӧтлі тайӧ мусьыс Калдея муӧ.
Налы бур вылӧ Ме веськӧда Ассьым синмӧс налань да бӧр бергӧда найӧс тайӧ муас. Ме ёнмӧда найӧс, ог пазӧд, Ме вужйӧда найӧс, ог нетшышт.
Ме сета налы сэтшӧм сьӧлӧм, мый найӧ тӧдмаласны Менӧ, тӧдмаласны, мый Ме — Господь. Найӧ лоӧны Менам войтырӧн, а Ме — налӧн Енмӧн, ӧд найӧ бергӧдчасны Ме дінӧ став сьӧлӧмсяньныс.
Господь тадзи висьталӧ: лёк инжир вотӧслы моз, мый оз позь сёйны, Ме вӧча иудаса Седекей ӧксылы, иудаса юралысьяслы да ерусалимса коляс йӧзлы, кодъяс колясны тайӧ муас либӧ овмӧдчасны Египет муӧ.
Быдлаын, кытчӧ Ме вӧтла найӧс, вӧча найӧс повзьӧдчанторйӧн, и мукӧд войтыръяс кутасны повны, кор тӧдмаласны, мый накӧд лои. Найӧс кутасны лёкӧдны-омӧльтны, серамтуйӧ пуктыны да ёрны.
Ме мӧдӧда на вылӧ шыпурт, тшыглун да пӧрӧс висьӧм, кытчӧдз найӧ оз бырны тайӧ му вывсьыс, кодӧс сеті налы да налӧн батьяслы».
Еремейлы вӧлі Иуда войтыр йылысь Енсянь кыв. Тайӧ вӧлі иудаса Ехояким ӧксылӧн, Иосей пилӧн, нёльӧд веськӧдлан воӧ, а вавилонса Навукодоносор ӧксылӧн медводдза веськӧдлан воӧ.
Со мый Еремей пророк висьталіс став Иуда войтырыслы да Ерусалимын став олысьыслы:
«Иудаса Иосей ӧксылӧн, Амон пилӧн, дас коймӧд веськӧдлан восянь да ӧніӧдз, кызь куим во чӧж меным вӧлі Господьсянь кыв. Выльысь и выльысь ме висьтавлі тіянлы, но ті энӧ кывзӧй.
Господь выльысь и выльысь мӧдӧдліс тіян дінӧ Ассьыс кесйӧгъяссӧ, пророкъясӧс, но ті энӧ кывзӧй да энӧ сибӧдӧй налысь кывъяссӧ.
Найӧ шулісны тіянлы: “Бергӧдчӧй асланыд лёк туй вылысь, эновтчӧй лёк уджъяссьыныд да олӧй тайӧ муас, мый Господь сетіс тіянлы да тіян батьяслы нэмъяс кежлӧ.
Энӧ юрбитӧй мукӧд енъяслы, энӧ кесъялӧй да энӧ копрасьӧй налы, энӧ скӧрмӧдӧй Господьӧс асланыд киӧн вӧчӧмторъясӧн, сэки Сійӧ оз вӧч тіянлы лёксӧ”.
Но ті энӧ кывзӧй Менӧ! — висьталӧ Господь. — Асланыд киӧн вӧчӧмторъясӧн ті скӧрмӧдінныд Менӧ аслыныд жӧ лёк вылӧ.
Та вӧсна Господь Саваоф тадзи висьталӧ: сыысь, мый ті энӧ кывзӧй Менсьым кывъясӧс, Ме чукӧста войвылысь став войтыръяссӧ да мӧдӧда найӧс вавилонса Навукодоносор ӧксы дінӧ, Аслам кесйӧг дінӧ, — висьталӧ Господь. — Ме вайӧда найӧс татчӧ, медым найӧ уськӧдчасны Иуда му вылӧ да иудаса олысьяс вылӧ, тшӧтш орччӧн олысь войтыръяс вылӧ.
Ме дзикӧдз бырӧда тіянӧс да тіянкӧд орччӧн олысь войтыръясӧс, пыр кежлӧ вӧча тайӧ муяссӧ овтӧминӧн, тані олысьясӧс — повзьӧдчанторйӧн.
Тайӧ муясас нимкодясьӧмлы да гажӧдчӧмлы Ме пукта пом, водзӧ оз кут кывны верӧспулӧн да гӧтырпулӧн гӧлӧс шыныс, оз кут кывны изкилӧн шыыс, оз кут тыдавны би дозлӧн югӧрыс.
Тайӧ муыс ставнас лоӧ овтӧминӧн да повзьӧдчанторйӧн.
Татчӧс войтыръяс кутасны кесъявны вавилонса ӧксылы сизимдас во чӧж.
Но сизимдас во кольӧм мысти Ме мыжда вавилонса ӧксыӧс да сылысь войтырсӧ налӧн лёк вӧчӧмъясысь, — висьталӧ Господь. — Налысь Калдея мусӧ Ме пыр кежлӧ вӧча овтӧминӧн.
Ме вӧча Калдея мулы Аслам кывъяс серти, вӧча ставсӧ, мый Еремей водзвыв висьталіс войтыръяс йылысь да мый гижӧма тайӧ небӧгас.
Вавилонсаяслы ковмас кесъявны вына войтыръяслы да ыджыд ӧксыяслы.
Тадзи Ме мынтыся налы лёк вӧчӧмсьыныс».
Господь, Израильлӧн Ен, меным тадзи висьталіс: «Босьт Менам киысь вина чашасӧ, коді тырӧма Менам скӧрлунӧн, да юктӧд сэтысь став войтыръяссӧ, кодъяс дінӧ Ме мӧдӧда тэнӧ.
Найӧ юасны да пондасны шатлавны, найӧ повзясны шыпуртысь, кодӧс Ме мӧдӧда на вылӧ, да повзьӧмнысла садьсӧ воштасны».
Господьлӧн киысь ме босьті чашасӧ да юктӧді сэтысь став войтыръяссӧ, кодъяс дінӧ Господь мӧдӧдіс менӧ.
Ме юктӧді Ерусалимын да Иуда каръясын олысьясӧс, иудаса ӧксыясӧс да юралысьясӧс, медым вӧчны налысь каръяссӧ из чукӧрӧн да повзьӧдчанторйӧн, сетны найӧс ёрны-омӧльтны. Ставыс ӧніӧдз тадзи. Ме юктӧді фараонӧс, египетса ӧксыӧс, сылысь кесъялысьяссӧ, юралысьяссӧ да став сылысь войтырсӧ, юктӧді сорласьӧм войтыръясӧс, Уц да Филистим муясысь ӧксыясӧс, филистимса Аскалон, Газа да Экрон каръясын олысьясӧс, тшӧтш Азот карын ловйӧн кольӧмаясӧс. Ме юктӧді Эдомын да Моавын олысьясӧс, аммон войтырӧс, Тир да Сидон каръясысь ӧксыясӧс, тшӧтш саридз сайын саридздор муясын олысь ӧксыясӧс. Ме юктӧді Деданын, Темаын да Бузын олысьясӧс да ставнысӧ, кодъяс шырӧны юрсинысӧ пель боксьыныс. Ме юктӧді Аравияысь ӧксыясӧс да овтӧминын олысь войтыръяслысь ӧксыяссӧ, юктӧді Зимриысь, Эламысь да Мидияысь ӧксыясӧс, тшӧтш войвылысь став ӧксысӧ, ӧта-мӧдсьыныс матын и ылын олысьясӧс, да став мувывса войтыръяссӧ. Шешакысь* ӧксы юас медбӧръяӧн.
Господь висьталіс меным: «Юӧрт ставныслы, мый Господь Саваоф, Израильлӧн Ен, тадзи висьталӧ: юӧй коддзытӧдзныд, восмӧнныд, да усьӧй кок йывсьыныд. Сэки ті онӧ нин чеччӧй, ӧд Ме мӧдӧда тіян вылӧ шыпуртӧс.
Найӧ кӧ оз босьтны чашасӧ тэнад киысь да оз юны, сэки тэ шу налы, мый Господь Саваоф тадзи висьталӧ: тіянлы быть ковмас юны.
Со, тайӧ карыс вылӧ, мый сиӧма Менам нимлы, Ме мӧдӧда шог.
Гашкӧ, ті чайтанныд, мый тіянӧс оз ло мыждӧма?
Но мыждӧмысь ті онӧ пышйӧй, ӧд му вылас став олысьыс вылӧ Ме мӧдӧда шыпурт, — висьталӧ Господь Саваоф. — 
Юӧрт налы став тайӧ кывъяссӧ: Господь грымӧбтас выліинсянь, Сійӧ гораа горӧдас Аслас вежа оланінсянь, равӧстас Аслас муын олысьяс вылӧ.
Виноград талялысь моз Сійӧ гораа горӧдас мувывса став йӧзыс вылӧ.
Му помӧдзыс кылас Господьлӧн горзӧмыс, ӧд Сійӧ пондас мыждыны войтыръясӧс.
Сійӧ вайӧдас став йӧзсӧ ёрд водзӧ, сетас лёк вӧчысьясӧс шыпурт улӧ, — висьталӧ Господь.
Господь Саваоф тадзи висьталӧ: Со, ӧти войтырсянь мӧд войтыр дінӧ шогыс мунӧ, му помсяньыс ыджыд тӧвныр кыпӧдчӧ.
Сійӧ лунӧ Господьӧн пасьвартӧмаяс кутасны туплясьны му вылын, му помсянь помӧдзыс. На вӧсна некод оз кут бӧрдны, налысь шойяссӧ оз чукӧртны, оз гуавны, куйӧд моз найӧ кутасны куйлыны му вылын.
— Сыркъялӧй-бӧрдӧй, Иуда войтырӧс видзысьяс, туплясьӧй пӧим пытшкын, Иуда войтырлӧн ыджыдъяс.
Воисны тіянӧс начкан да разӧдан лунъяс, ті усянныд-жугаланныд дона дозмук моз.
Иуда войтырӧс видзысьяс оз вермыны пышйыны, Иуда войтырлӧн ыджыдъяслы оз ло мездмӧмыс.
Иуда войтырӧс видзысьяс бӧрдӧны, Иуда войтырлӧн ыджыдъяс сыркъялӧны, ӧд Господь бырӧдіс налысь йирсянінсӧ.
Господьлӧн яр скӧрлунысь бырӧны видзьяс, кӧні повтӧг йирсьӧны налӧн ыжъясыс.
Кыйӧдчанінысь мунысь лев моз Господь эновтіс Иуда войтырлысь мусӧ.
Сылӧн яр скӧрлунысь да ыпъялан лӧглунысь налӧн муыс лои овтӧминӧн».
Кор Иуда муын ӧксыӧ пуксис Иосейлӧн Ехояким пиыс, Еремейлы вӧлі Господьсянь кыв:
«Господь тадзи висьталӧ: сувт Господьлӧн крам йӧрас. Иуда каръясысь олысьяс кор локтасны сэтчӧ, медым юрбитны Господьлӧн крамын, висьтав налы ставсӧ, мый Ме тшӧкта тэныд висьтавны, нинӧм эн чинты.
Гашкӧ, найӧ кывзасны да бергӧдчасны асланыс лёк туй вылысь. Сэки Ме вежа Ассьым шуӧмӧс да ог вӧч сійӧ лёксӧ, мый шуи вӧчны налы лёк уджъяссьыныс.
Висьтав налы, мый Господь тадзи висьталӧ: ті кӧ онӧ кутӧй кывзыны Менӧ, онӧ кутӧй овны Менам Индӧд серти, мый Ме сеті тіянлы, да онӧ кутӧй кывзыны Меным кесъялысь пророкъяслысь кывъяссӧ, сэки тайӧ крамыскӧд Ме вӧча Силом каркӧд моз, а тайӧ карыслысь нимсӧ Ме вӧча ёран кывйӧн мувывса войтыръяслы. Ӧд Ме выльысь и выльысь ыстылі пророкъясӧс тіян дінӧ, но ті энӧ кывзӧй найӧс».
Еремей юӧртіс тайӧ кывъяссӧ Господьлӧн керкаын. Сійӧс кывзісны попъяс, пророкъяс да став войтырыс.
Кор Еремей висьталіс ставсӧ, мый Господь тшӧктіс висьтавны войтырыслы, сэки попъяс, пророкъяс да войтырыс кутісны сійӧс да шуисны: «Тэ кулан!
Мыйла тэ Господь нимсянь пророкалан, мый тайӧ крамыскӧд лоӧ Силом каркӧд моз, а тайӧ карыс кушмас, и сэні олысьыс оз ло?»
Став войтырыс кытшаліс Еремейӧс Господьлӧн крамын.
Кор иудаса юралысьяс кылісны та йылысь, найӧ локтісны ӧксы керкаысь Господьлӧн крам йӧрӧ да пуксисны Выль дзиръя дорӧ.
Попъяс да пророкъяс шуисны юралысьяслы да став войтырыслы: «Тайӧ мортсӧ колӧ мыждыны да вины. Ті ӧд асьныд кывлінныд, мый сійӧ пророкаліс тайӧ карыс йылысь».
Еремей шуис юралысьяслы да став войтырыслы: «Господь мӧдӧдіс менӧ пророкавны тайӧ крамыс да тайӧ карыс йылысь ставсӧ, мый ті кывлінныд.
Веськӧдӧй ассьыныд туйяснытӧ, вӧчӧй бурсӧ да кывзысьӧй Господьлысь, асланыд Енлысь, сэки Господь вежас Ассьыс шуӧмсӧ да оз вӧч сійӧ лёксӧ, мый шуис вӧчны тіянлы.
А ме, со, тіян киын.
Вӧчӧй мекӧд сійӧ, мый тіян серти бур да веськыд.
Сӧмын тӧдӧй, ті кӧ вианныд менӧ, сэки тіянлы, тайӧ карыслы да карас олысьяслы ковмас кывкутны мыжтӧм мортлӧн вирысь.
Тіян дінӧ менӧ збыльысь мӧдӧдіс Господь, медым ме юӧрті став тайӧ кывъяссӧ».
Юралысьяс да став войтырыс шуисны попъяслы да пророкъяслы: «Тайӧ мортсӧ оз ков мыждыны да вины, ӧд сійӧ пророкаліс миян Господь Енлӧн нимсянь».
Сэки войтырлӧн юрнуӧдысьяс пӧвстысь сувтісны некымынӧн да шуисны чукӧртчӧм войтырлы:
«Иудаса Езекей ӧксылӧн веськӧдлан кадӧ пророкавліс морешетса Микей. Сійӧ юӧртліс став Иуда войтырыслы, мый Господь Саваоф тадзи висьталӧ: — Сионӧс лоӧ муӧс моз гӧрӧма, Ерусалимысь кольӧ сӧмын из чукӧр, крамлӧн керӧсыс вӧрсялас.
Но Езекей ӧксы да Иуда войтыр ӧмӧй виисны пророкӧс?
Езекей ӧксы поліс Господьысь да кевмис Господьӧс бурсьӧлӧмтчыны.
Та вӧсна Господь вежис Ассьыс шуӧмсӧ да эз вӧч сійӧ лёксӧ, мый шуис вӧчны налы.
А ми ыджыд лёктор вӧчам аслыным».
Господь нимсянь пророкаліс тшӧтш Шемайлӧн Урий пиыс, сійӧ вӧлі Киръят-Яримысь. Еремей моз Урий пророкаліс тайӧ карыс да тайӧ муыс йылысь.
Кор Ехояким ӧксы, юралысьяс да тышкайӧзӧн веськӧдлысьяс кылісны Урийлысь кывъяссӧ, сэки ӧксы кӧсйис вины сійӧс.
Но Урий кыліс та йылысь да повзьӧмысла пышйис Египетӧ.
Сэки Ехояким ӧксы мӧдӧдіс Египетӧ Акборлысь Элнатан писӧ да мукӧд йӧзӧс.
Найӧ петкӧдісны Урийӧс Египетысь да вайӧдісны Ехояким ӧксы дінӧ. Ӧксы виис сійӧс шыпуртӧн, а шойсӧ шыбитіс войтырлӧн шойна вылӧ.
Но Еремейӧс дорйис Шафанлӧн Ахикам пиыс, эз сет войтырлы вины сійӧс.
Кор Иуда муын ӧксыӧ пуксис Иосейлӧн Ехояким пиыс, Еремейлы вӧлі Господьсянь кыв.
Господь меным тадзи висьталіс: «Вӧч кӧртӧдъяс да сийӧсъяс. Пукты сийӧссӧ аслыд сьылі вылад.
Кӧртӧдъяссӧ да сийӧсъяссӧ мӧдӧд тшӧтш эдомса ӧксылы, моавса ӧксылы, аммон войтырлӧн ӧксылы, тирса ӧксылы да сидонса ӧксылы юӧр вайысьяс пыр, кодъяс локтісны Ерусалимӧ иудаса Седекей ӧксы дінӧ.
Юӧр вайысьяслы тшӧкты висьтавны асланыс ыджыдъяслы, мый Господь Саваоф, Израильлӧн Ен, тадзи висьталӧ: юӧртӧй ыджыдъясныдлы, мый Аслам ыджыд вынӧн да нюжӧдӧм киӧн Ме вӧчи мусӧ, йӧзӧс да мувывса пемӧсъясӧс и сета найӧс кодлы кӧсъя.
Тайӧ муяссӧ ӧні Ме сета вавилонса Навукодоносор ӧксылы, Аслам кесйӧглы. Весиг зверъясӧс Ме сета, медым найӧ кесъялісны сылы.
Став войтыръясыс пондасны кесъявны сылы, сылӧн пиыслы да пиыслӧн пиыслы, кытчӧдз оз во кад, кор сійӧ аслас войтырыскӧд кутас кесъявны мукӧд войтыръяслы да вына ӧксыяслы.
Но сійӧ войтырсӧ, коді оз кут кесъявны вавилонса Навукодоносор ӧксылы да оз лэдз аслас сьылі вылӧ пуктыны вавилонса ӧксылысь сийӧссӧ, Ме мыжда шыпуртӧн, тшыглунӧн да пӧрӧс висьӧмӧн, — висьталӧ Господь. — Сійӧ войтырсӧ Ме дзикӧдз бырӧда вавилонса ӧксы киӧн.
Энӧ кывзӧй ассьыныд пророкъяснытӧ, туналысьяснытӧ, вӧтъяс висьталысьяснытӧ, кимӧститчысьяснытӧ да тшыкӧдчысьяснытӧ, кодъяс шуалӧны тіянлы, ті пӧ онӧ кутӧй кесъявны вавилонса ӧксылы.
Ӧд найӧ юӧртӧны тіянлы ылӧгсӧ, медым ылыстны тіянӧс асланыд муысь. Кывзанныд кӧ найӧс, Ме вӧтла тіянӧс, и ті куланныд.
Сійӧ войтырыслы, коді лэдзас аслас сьылі вылӧ пуктыны вавилонса ӧксылысь сийӧссӧ да пондас кесъявны сылы, Ме лэдза кольччыны аслас муӧ, — висьталӧ Господь. — Найӧ пондасны вӧдитны видз-му да овны сэні».
Став тайӧ кывъяссӧ ме юӧрті тшӧтш иудаса Седекей ӧксылы: «Лэдзӧй асланыд сьылі вылӧ пуктыны вавилонса ӧксылысь сийӧссӧ, кесъялӧй сылы да сылӧн войтырыслы, и ті ловйӧн колянныд.
Мыйла тэныд да тэнад войтырыдлы кувны шыпуртысь, тшыгъялӧмысь да пӧрӧс висьӧмысь? Ӧд Господь висьталіс, мый тадзи лоӧ быд войтыркӧд, коді оз кут кесъявны вавилонса ӧксылы.
Энӧ кывзӧй пророкъясӧс, кодъяс юӧртӧны тіянлы, мый онӧ кутӧй кесъявны вавилонса ӧксылы.
Ӧд тайӧ пророкъясыс тіянлы ылӧгсӧ юӧртӧны.
Ме найӧс эг мӧдӧдлы, — висьталӧ Господь.
— Найӧ Менам нимсянь юӧртӧны ылӧгсӧ. Кывзанныд кӧ найӧс, Ме вӧтла тіянӧс, и ті куланныд, куласны тшӧтш тіянлы пророкалысьяс».
Попъяслы да Иуда войтырлы ме юӧрті: «Господь тадзи висьталӧ: энӧ кывзӧй ассьыныд пророкъяснытӧ, кодъяс юӧртӧны тіянлы, мый Вавилонысь регыд бӧр ваясны Господьлӧн крамлысь дозмук-кӧлуйсӧ.
Ӧд тайӧ пророкъясыс тіянлы ылӧгсӧ юӧртӧны.
Энӧ кывзӧй найӧс, а кесъялӧй вавилонса ӧксылы, и ті ловйӧн колянныд.
Мыйла тайӧ карыслы лоны из чукӧрӧн?
Найӧ кӧ пророкъяс, налӧн кӧ эм Господьсянь кыв, сідзкӧ, найӧ мед кевмӧны Господь Саваофлы, медым дозмук-кӧлуйсӧ, мый эм на Господьлӧн крамын, иудаса ӧксылӧн керкаын да Ерусалимын, эз нуны Вавилонӧ.
Кор вавилонса Навукодоносор ӧксы нуӧдіс Ерусалимысь Вавилонӧ пленӧ иудаса Еконей ӧксыӧс, Ехоякимлысь писӧ, тшӧтш Иудаысь да Ерусалимысь став тӧдчана йӧзсӧ, сійӧ эз босьт аскӧдыс сюръяяс, вайӧртӧд, джекъяс да став дозмук-кӧлуйсӧ. А мый колис Господьлӧн крамын, иудаса ӧксылӧн керкаын да Ерусалимын, сы йылысь Господь Саваоф, Израильлӧн Ен, тадзи висьталӧ: 
ставсӧ тайӧс нуасны Вавилонӧ да колясны сэтчӧ сійӧ лунӧдзыс, кор Ме бара кута тӧждысьны тайӧ вӧчӧмторъясыс вӧсна, — висьталӧ Господь. — Сэки Ме ставсӧ бӧр бергӧда тайӧ карас».
Иудаса Седекей ӧксылӧн нёльӧд веськӧдлан воӧ, витӧд тӧлысьӧ, Господьлӧн крамын попъяс да став войтырыс дырйи Азурлӧн Хананей пиыс, Гаваонысь пророк, шуис меным:
«Господь Саваоф, Израильлӧн Ен, тадзи висьталӧ: Ме жугӧда вавилонса ӧксылысь сийӧссӧ!
Кык во мысти Ме бӧр бергӧда тайӧ карас Господьлӧн крамлысь став дозмук-кӧлуйсӧ, мый вавилонса Навукодоносор ӧксы босьтіс татысь да нуис Вавилонӧ.
Иудаса Еконей ӧксыӧс, Ехоякимлысь писӧ, да ставнысӧ, кодъясӧс Иудаысь вӧлі нуӧдӧма пленӧ Вавилонӧ, Ме бӧр вайӧда тайӧ муас, — висьталӧ Господь, — ӧд Ме жугӧда вавилонса ӧксылысь сийӧссӧ».
Но Еремей пророк вочавидзис Хананей пророклы попъяс да став войтырыс дырйи, кодъяс сулалісны Господьлӧн крамын.
Еремей пророк шуис: «Господь мед вӧчас дзик тадзи.
Господь мед збыльмӧдас тэнсьыд пророкалӧмтӧ да Вавилонысь бӧр бергӧдас татчӧ Господьлӧн керкалысь дозмук-кӧлуйсӧ да пленӧ нуӧдӧмаясӧс.
Но кывзы, мый ме висьтала тэныд да став войтырыслы.
Пророкъяс, кодъяс вӧліны водзысяньыс, тэӧдз и меӧдз на, водзвыв юӧртісны уна муяслы тыш, шог да пӧрӧс висьӧм йылысь.
Пророк кӧ юӧртӧ лӧнь олӧм йылысь, и сылӧн кывъясыс инасны, сӧмын сэки тӧдмаласны, мый сійӧс збыльысь Господь мӧдӧдіс».
Хананей пророк босьтіс Еремей пророк сьылі вылысь сийӧссӧ да жугӧдіс.
Став войтырыс дырйи Хананей шуис: «Господь тадзи висьталӧ: кык во мысти тадзи жӧ Ме жугӧда став войтыръяслӧн сьылі вылысь вавилонса Навукодоносор ӧксылысь сийӧссӧ».
Сэсся Еремей пророк муніс аслас туйӧд.
Сы бӧрти, кор Хананей пророк жугӧдіс Еремей пророк сьылі вылысь сийӧссӧ, Еремейлы вӧлі Господьсянь кыв:
«Мун да шу Хананейлы, мый Господь тадзи висьталӧ: тэ жугӧдін пу сийӧс, но та пыдди тэ вӧчан кӧрт сийӧс.
Ӧд Господь Саваоф, Израильлӧн Ен, тадзи висьталӧ: тайӧ войтыръяслӧн сьылі вылӧ Ме ӧшӧда кӧрт сийӧс, медым найӧ кесъяласны вавилонса Навукодоносор ӧксылы. Весиг зверъясӧс Ме сета сылӧн киӧ».
Еремей пророк шуис Хананей пророклы: «Кывзы, Хананей! Господь тэнӧ эз мӧдӧдлы. Тэ ышӧдан тайӧ войтырсӧ лача кутны ылӧг вылӧ.
Та вӧсна Господь тадзи висьталӧ: Ме чышкышта тэнӧ му вывсьыс.
Тайӧ вонас тэ кулан, ӧд тэ ышӧдін тайӧ войтырсӧ Господьлы паныд кыпӧдчыны».
Сійӧ жӧ вонас, сизимӧд тӧлысьӧ, Хананей пророк куліс.
Еремей пророк мӧдӧдіс Ерусалимысь гижӧд пленӧ нуӧдӧм войтырлӧн юрнуӧдысьяслы, попъяслы, пророкъяслы да став войтырыслы, кодъясӧс Навукодоносор нуӧдіс Ерусалимысь Вавилонӧ. Еконей ӧксыӧс, ӧксылысь мамсӧ, ыджыд чина йӧзӧс, иудаса да ерусалимса юралысьясӧс, пуысь да кӧртысь вӧчасьысьясӧс Ерусалимысь нуӧдӧм бӧрын Еремейлысь гижӧдсӧ вӧлі мӧдӧдӧма Шафанлӧн Элас пиыс да Хилкилӧн Гемарий пиыс пыр, кодъясӧс иудаса Седекей ӧксы мӧдӧдіс Вавилонӧ Навукодоносор ӧксы дінӧ.
Гижӧдас вӧлі гижӧма: «Ставныслы, кодъясӧс Господь мӧдӧдіс Ерусалимысь пленӧ Вавилонӧ, Господь Саваоф, Израильлӧн Ен, тадзи висьталӧ:
— Лэптӧй керкаяс да олӧй сэні, пуктӧй пуяс да сёйӧй сэтысь вотӧссӧ!
Гӧтрасьӧй да чужтӧй ныв-пиӧс, пияннытӧ гӧтрӧдӧй, нывъяснытӧ сетӧй верӧс сайӧ, медым найӧ тшӧтш чужтасны ныв-пиӧс. Рӧдмӧй сэні, а энӧ чинӧй!
Сійӧ карыслы, кытчӧ Ме мӧдӧді тіянӧс пленӧ, сиӧй бурсӧ. Кевмысьӧй Господьлы сійӧ карыс вӧсна, ӧд сэні кӧ лоӧ бур олӧм, сэки и тіянлы бур лоӧ.
Господь Саваоф, Израильлӧн Ен, тадзи висьталӧ: энӧ лэдзӧй тіян пӧвстын олысь пророкъяслы да туналысьяслы ылӧдлыны тіянӧс, энӧ кывзӧй вӧт висьталысьясӧс.
Найӧ юӧртӧны тіянлы ылӧгсӧ Менам нимсянь, но Ме эг мӧдӧдлы найӧс, — висьталӧ Господь.
Господь тадзи висьталӧ: сы бӧрти, кор Вавилонын ті оланныд сизимдас во, Ме бурсьӧлӧмтча тіян дінӧ. Ме збыльмӧда тіян йылысь Ассьым бур кывйӧс да бӧр вайӧда тіянӧс асланыд муӧ.
Ме тӧда, мый Ме кӧсъя вӧчны тіянлы, — висьталӧ Господь. — Ме кӧсъя вӧчны тіянлы бурсӧ, а ог лёксӧ. Ме сета тіянлы лача да бур олӧм.
Ті шыасянныд Ме дінӧ, локтанныд кевмысьны, и Ме кыла тіянӧс.
Ті корсянныд Менӧ, и аддзанныд, корсянныд став сьӧлӧмсяньныд, и аддзанныд, — висьталӧ Господь. — Ме бӧр вайӧда тіянӧс пленысь, чукӧрта тіянӧс быд войтыр пӧвстысь, быд муысь, кытчӧ Ме вӧтлі тіянӧс, — висьталӧ Господь, — и бӧр вайӧда сэтчӧ, кытысь Ме мӧдӧді тіянӧс пленӧ.
Ті шуанныд, мый Господь сетіс тіянлы пророкъясӧс тшӧтш Вавилонын.
Ӧксы йылысь, коді пукалӧ Давидлӧн юралан пуклӧсын, да тайӧ карас олысь войтыр йылысь, тіян вокъясныд йылысь, кодъясӧс эз нуӧдны пленӧ тіянкӧд, Господь Саваоф тадзи висьталӧ: 
Ме мӧдӧда на пӧвстӧ шыпурт, тшыглун да пӧрӧс висьӧм. Ме вӧча найӧс тшыксьӧм инжир кодьӧн, мый оз позь сёйны.
Ме кута дзескӧдны найӧс шыпуртӧн, тшыглунӧн да пӧрӧс висьӧмӧн. Став мувывса войтыръяслы Ме вӧча найӧс повзьӧдчанторйӧн. Найӧс кутасны ёрны да лёкӧдны-омӧльтны быдлаын, кытчӧ Ме вӧтла найӧс. Ӧд найӧ эз кывзыны Менсьым кывъясӧс, — висьталӧ Господь. — Ме выльысь и выльысь ыстылі на дінӧ Меным кесъялысь пророкъясӧс, медым найӧ висьталісны Менсьым кывйӧс. Ті тадзи жӧ энӧ кывзӧй, — висьталӧ Господь.
Ӧні ті ставныд, кодъясӧс Ме мӧдӧді Ерусалимысь Вавилонӧ пленӧ, кывзӧй Господьлысь кывсӧ!
Колайлӧн Ахав пи йылысь да Маасейлӧн Седекей пи йылысь, кодъяс ылӧгсӧ юӧртӧны Менам нимсянь, Ме, Господь Саваоф, Израильлӧн Ен, тадзи висьтала: Ме сета найӧс вавилонса Навукодоносор ӧксы киӧ, и сійӧ виас найӧс тіян син водзын.
Иудаысь Вавилонӧ пленӧ нуӧдӧмаяс пондасны ӧта-мӧднысӧ ёрны тадзи: Господь мед вӧчас тэкӧд сійӧ жӧ, мый вӧчис Седекейкӧд да Ахавкӧд, кодъясӧс вавилонса ӧксы сотіс бипур вылын. Ӧд Израильын найӧ вӧчисны зывӧкторъяс: найӧ пежалісны гозъякост олӧм мукӧдлӧн гӧтыръяскӧд, Менам нимсянь висьтавлісны ылӧгсӧ, мый Ме эг тшӧктывлы висьтавны.
Ме тӧда та йылысь, ӧд Ачым аддзылі тайӧс, — висьталӧ Господь».
Господь тшӧктіс Еремейлы юӧртны Нехеламысь Шемайлы:
«Господь Саваоф, Израильлӧн Ен, тадзи висьталӧ: аслад нимсянь тэ мӧдӧдлін гижӧдъяс ерусалимса став войтырыслы, Софоний поплы, Маасейлӧн пиыслы, да мукӧд попъяслы. Тэ вӧлі гижӧмыд:
”Софоний, Господь пуктіс тэнӧ попӧ Иодай поп пыдди, медым Господьлӧн крамын тэ видзӧдін йӧйталысьяс бӧрся, кодъяс кӧсйӧны пророкавны, дорин найӧс чепъясӧн да топӧдін кокнысӧ тшемилӧ костӧ.
Сідзкӧ, мыйла он ӧлӧд Анатотысь Еремейӧс, медым сійӧ дугдіс пророкавны тіян пӧвстын?
Вавилонӧ сійӧ мӧдӧдіс миянлы татшӧм гижӧд: — Ті лоанныд пленын дыр кад чӧж. Лэптӧй керкаяс да олӧй сэні, пуктӧй пуяс да сёйӧй сэтысь вотӧссӧ”».
Кор Софоний поп лыддис Шемайлысь гижӧдсӧ Еремей пророклы, сэки Еремейлы вӧлі Господьсянь кыв:
«Пленӧ нуӧдӧм став йӧзыслы мӧдӧд гижӧд, мый Нехеламысь Шемай йылысь Господь тадзи висьталӧ: Ме эг мӧдӧдлы Шемайӧс, но сійӧ пророкалӧ тіянлы да ышӧдӧ тіянӧс лача кутны ылӧг вылӧ.
Та вӧсна Господь тадзи висьталӧ: Ме мыжда Нехеламысь Шемайӧс да сысянь чужысьясӧс.
Сысянь чужысьяс пӧвстысь некод оз кут овны тайӧ войтырыс пӧвстын, некод оз аддзы сійӧ бурсӧ, мый Ме вӧча Аслам войтырлы, — висьталӧ Господь, — ӧд Шемай ышӧдіс тайӧ войтырсӧ Господьлы паныд кыпӧдчыны».
Еремейлы вӧлі Господьсянь кыв:
«Господь, Израильлӧн Ен, тадзи висьталӧ: ставсӧ, мый Ме висьтавлі тэныд, гиж небӧгӧ.
Воасны лунъяс, — висьталӧ Господь, — кор Ассьым Израиль да Иуда войтыръясӧс Ме бӧр бергӧда пленысь.
Господь висьталӧ: Ме бӧр вайӧда найӧс сійӧ муас, мый Ме сеті налӧн батьяслы. Найӧ бара босьтасны сійӧс аслыныс».
Со, Израиль да Иуда йылысь Господьлӧн кывъясыс.
Господь тадзи висьталӧ: — Ми кылам полӧмла горзӧм, лӧньлуныс абу.
Мӧвпыштлӧй да гӧгӧрвоӧй: айморт ӧмӧй вермӧ чужтыны?
Но Ме аддза, мый кага чужтысь ань моз айулов кутчысьӧмаӧсь кынӧманыс, налӧн чужӧмныс быгалӧма.
Сійӧ луныс лоӧ зэв повзьӧдана, сэтшӧм луныс эз на вӧвлы!
Яковсянь чужысьяслы сійӧ луныс лоӧ сьӧкыд, но найӧ мездмасны.
Сійӧ лунӧ, — висьталӧ Господь Саваоф, — Ме жугӧда налӧн сьылі вылысь сийӧссӧ, орӧда налысь кӧртӧдъяссӧ.
Найӧ оз нин кутны кесъявны мукӧд войтырлы, а кутасны кесъявны Господьлы, асланыс Енлы, да Давидсянь чужысьлы, кодӧс Ме пукта налы ӧксыӧ.
— Эн пов, Менам Яков кесйӧгӧй, — висьталӧ Господь, — эн пов, Израиль!
Ме вайӧда тэнӧ ылі муысь, мезда тэсянь чужысьясӧс пленысь.
Яковлӧн рӧдыс бӧр локтас, сійӧ кутас овны лӧня да повтӧг, сійӧс некод оз кут повзьӧдлыны. Ме тэкӧд, — висьталӧ Господь, — Ме мезда тэнӧ!
Ме бырӧда став войтыръяссӧ, кодъяс пӧвстӧ разӧді тэнӧ. Тэнӧ Ме ог бырӧд, но мыжда тэнӧ веськыдлунӧй серти, мыждытӧг тэнӧ ог коль.
Господь тадзи висьталӧ: — Тэнад дойыд оз бурд, тэ чорыда доймалӧмыд.
Некод оз тӧждысь тэ вӧсна, медым бурдӧдны тэнӧ, тэнад дойыд оз бурд.
abu
Став тэнад ёртъясыд вунӧдісны тэнӧ, найӧ оз тӧждысьны тэ вӧсна.
Вӧрӧг моз Ме пасьварті тэнӧ, чорыда мыжді тэнӧ уна лёк вӧчӧмсьыд, лыдтӧм-тшӧттӧм мыжъяссьыд.
Мыйла тэ ойзан аслад дойыд вӧсна, бурдлытӧм висьӧмыд вӧсна?
Тэ вывті уна лёксӧ вӧчин, тэнад мыжъясыд лыдтӧм-тшӧттӧмӧсь, та вӧсна Ме вӧчи тэныд тадзисӧ.
Но тэнӧ бырӧдысьясӧс лоӧ бырӧдӧма, тэнӧ дзескӧдысьясӧс лоӧ нуӧдӧма пленӧ, тэнсьыд мырддялысьяслысь лоӧ мырддьӧма, тэнӧ куштысьясӧс Ме кушта.
Ме сета тэныд бурдӧмсӧ, Ме бурдӧда тэнсьыд дойястӧ, — висьталӧ Господь.
— Тэнӧ шулісны эновтӧмаӧн, Сионӧн, код вӧсна некод оз тӧждысь.
Господь тадзи висьталӧ: — Ме выльысь сувтӧда Яковлысь чомъяссӧ, бурсьӧлӧмтча сылӧн оланін дінӧ.
Карсӧ выльысь лоӧ лэптӧма аслас керӧс вылӧ, изкарыс кутас сулавны аслас местаын.
Сэтысь бара кутас кывны аттьӧалӧм да гажӧдчысьяслӧн гӧлӧс шыныс.
Ме рӧдмӧда найӧс, и налӧн лыдыс оз кут чинны. Ме нимӧда найӧс, и найӧс оз кутны увтыртны.
Яковсянь чужысьяс лоӧны воддза кодьӧсь, найӧ лоӧны зумыдӧсь Ме водзын, найӧс дзескӧдысьясӧс Ме мыжда.
Налӧн ыджыдыс лоӧ на пиысь, налӧн юралысьыс лоӧ на пӧвстысь.
Сійӧ матыстчас Ме дінӧ, ӧд Ме матыста сійӧс Ас дінӧ.
Коді нӧ ас кӧсйӧм сертиыс лысьтас матыстчыны Ме дінӧ? — висьталӧ Господь. — Ті лоанныд Менам войтырӧн, а Ме — тіян Енмӧн.
Со, Господьсянь кыпӧдчӧ ыджыд тӧвныр, Сылӧн скӧрлуныс локтӧ тӧвныр моз, гартчӧ лёк вӧчысьяслӧн юр весьтын.
Господьлӧн яр скӧрлуныс оз вешйы, кытчӧдз Сійӧ оз збыльмӧд Ассьыс шуӧмсӧ.
Бӧръя лунъясӧ ті гӧгӧрвоанныд тайӧс.
Сійӧ кадас, — висьталӧ Господь, — Ме лоа израильса быд чужанкотырлӧн Енмӧн, а найӧ — Менам войтырӧн.
Господь тадзи висьталӧ: — Войтыр, коді ловйӧн колис шыпуртысь, овтӧминын аддзис Менсьым буралӧмӧс.
Ме локта лӧньӧдны Израильӧс.
Ылісянь Господь петкӧдчис меным да шуис: — Ме радейта тэнӧ, Израиль, помтӧм муслунӧн, та вӧсна Ме петкӧдла тэныд Ассьым буралӧмӧс.
Ме выльысь кыпӧда тэнӧ, и тэнӧ лоӧ кыпӧдӧма, Израиль ныв. Тэ бара босьтан киад тимпан, кутан йӧктыны гажӧдчысьяскӧд.
Самарияса керӧсъясӧ тэ выльысь пуктан виноград пуяс.
Виноград пуктысьяс асьныс кутасны чукӧртны вотӧссӧ.
Воас лун, кор Ефрем керӧсвыв муын кар видзысьяс горӧдасны: “Чеччӧй, каямӧй Сион керӧс вылӧ Господь Енным дінӧ!”
Господь тадзи висьталӧ: — Долыда сьылӧй Яковлӧн рӧд йылысь, гораа ошкӧй медыджыд войтырӧс. Юӧртӧй, ошкӧмӧн шуалӧй: «Господьӧй, мезды Ассьыд войтыртӧ, Израильлысь коляссӧ!»
Ме вайӧда Ассьым войтырӧс войвыв муысь, чукӧрта найӧс му помъясысь.
На пӧвстын лоасны синтӧмъяс и чотысьяс, нӧбасьысьяс и чужтысьяс, ыджыд чукӧрӧн найӧ бӧр бергӧдчасны татчӧ.
Найӧ петасны бӧрдӧмӧн, а Ме вайӧда найӧс бурӧдӧмӧн, нуӧда найӧс визув ва дінӧ шыльыд туйӧд, кӧні найӧ оз крукасьны, ӧд Ме — Израиль войтырлӧн бать, Ефрем — Менам медводдза чужысьӧй.
Войтыръяс, кывзӧй Господьлысь кывсӧ, саридз сайын олысьяслы юӧртӧй: «Израиль войтырӧс разӧдысь бӧр чукӧртас найӧс, ыж видзысь моз кутас видзны найӧс».
Господь вештысяс Яковлӧн рӧд вӧсна, мездас найӧс вынаджыклӧн киысь.
Найӧ локтасны, кутасны долыда сьывны Сион керӧс вылын, кутасны нимкодясьны, ӧд Господь сетіс налы бур козинъяс: шобді, вина да вый, ыжъясӧс да ӧшъясӧс.
Налӧн олӧмыс лоас ваӧн киськалӧм сад кодь, найӧ оз нин вынтӧммыны.
Нывъяс кутасны долыда йӧктыны, томъяс и пӧрысьяс — ӧтвылысь гажӧдчыны.
Налысь бӧрдӧмсӧ Ме вежа нимкодясьӧм вылӧ, гажӧда-бурӧда найӧс шогсьыныс.
Попъясӧс Ме верда чӧскыд сёянӧн, Менам войтырӧй пӧтас Менам бур сетӧмторъясӧн, — висьталӧ Господь.
Господь тадзи висьталӧ: — Рама карын ырзӧм-бӧрдӧм кылӧ.
Ракель аслас ныв-пи вӧснаыс бӧрдӧ, оз кӧсйы ланьтны бӧрдӧмсьыс, ӧд найӧ абуӧсь нин.
Господь тадзи висьталӧ: — Дугды бӧрднытӧ, тэнад синмысь мед оз визувт синваыд, ӧд уджъяссьыд тэныд лоӧ тырдон, — висьталӧ Господь, — тэнад челядьыд бергӧдчасны вӧрӧглӧн муысь.
Тэнад эм лача локтанаыс вылӧ, — висьталӧ Господь, — тэнад челядьыд бӧр бергӧдчасны асланыс муӧ.
Ме кыла Ефремлысь бӧрдӧмсӧ: «Тэ мыждін менӧ, мыждін менӧ асныра ӧшпиӧс моз.
Бергӧд менӧ Ас дінад, и ме бергӧдча, ӧд Тэ — Господь, менам Енмӧй.
Ме гӧгӧрвои, мый вӧчи, и вачки ачымӧс морӧсам, ме бӧр бергӧдчи и каитчи.
Менӧ янӧдісны-увтыртісны, томдырсянь ме нуа яналӧмӧс».
Но Ефрем — Менам муса пиӧй, сійӧ вайӧ Меным нимкодьлун.
Ме унаысь мыждылі сійӧс, но некор ог вунӧд сійӧс!
Менам сьӧлӧмӧй висьӧ Ефрем понда, Ме бурсьӧлӧмтча сы дінӧ, — висьталӧ Господь.
Сувтӧд туй бокад изъяс, сувтӧд аслыд пасъяс, медым эн вунӧд ветлан туйтӧ.
Бергӧдчы, Израиль ныв, бергӧдчы аслад каръясӧ.
Дыр-ӧ на тэ кутан шӧйтны, нылӧй, тэ, коді кежин Меысь?
Господь выльтор вӧчас му вылын: гӧтырыс кутас видзны-дорйыны верӧссӧ.
Господь Саваоф, Израильлӧн Ен, тадзи висьталӧ: «Кор Ме бӧр бергӧда Иуда войтырӧс пленысь, Иуда муын да иудаса каръясын бара кутасны шуавны: “Мед Господь бурсиас тэнӧ, вежа керӧс, веськыдлуныслӧн оланін!”
Иуда муын да иудаса каръясын кутасны овны му вӧдитысьяс да ыж-мӧс видзысьяс.
Мудзӧмаясӧс Ме юктӧда, вынтӧмъясӧс Ме пӧткӧда».
Ме садьми да восьті синмӧс, менам вӧтӧй вӧлі сьӧлӧм серти.
«Воасны лунъяс, — висьталӧ Господь, — кор Израиль да Иуда муын Ме рӧдмӧда йӧзӧс да пемӧсъясӧс.
Водзын Ме тӧждыси, медым нетшкыны-пазӧдны, жугӧдны-бырӧдны найӧс да лёксӧ вӧчны налы. Ӧні Ме тадзи жӧ тӧждыся, медым лэптыны да быдтыны найӧс, — висьталӧ Господь.
Сійӧ лунъясӧ оз нин кутны шуавны: “Батьяс сёйисны кисьмытӧм виноград, а челядьныслӧн пиньясыс ёнтӧны”. Быдӧн кулас аслас мыж вӧсна.
Коді сёяс кисьмытӧм виноград, сылӧн и пиньясыс кутасны ёнтыны.
Воасны лунъяс, — висьталӧ Господь, — кор Ме кӧртала Израиль да Иуда войтыркӧд выль йитӧд. Тайӧ йитӧдыс оз ло сэтшӧм, кутшӧмӧс Ме кӧрталі налӧн батьяскӧд, кор босьті найӧс киӧдныс да петкӧді Египет муысь.
Ме вӧлі налӧн Ыджыдӧн, но найӧ торкисны йитӧдӧс, мый Ме кӧрталі накӧд, — висьталӧ Господь.
Сійӧ лунъяс бӧрас Ме кӧртала Израиль войтыркӧд татшӧм йитӧд, — висьталӧ Господь. — Ассьым Индӧдӧс Ме пукта налӧн вежӧрӧ, гижа налӧн сьӧлӧмӧ. Ме лоа налӧн Енмӧн, а найӧ — Менам войтырӧн.
Сэки некод оз кут велӧдны матыссасӧ, вокыс оз понды велӧдны воксӧ, оз шу: “Тӧдмав Господьӧс!” Ӧд ставныс, ичӧтсянь ыджыдӧдз, кутасны тӧдны Менӧ, — висьталӧ Господь. — Ме прӧстита налысь лёк вӧчӧмсӧ, налысь мыжъяссӧ водзӧ ог нин казьтыв».
Господь пуктіс шонді югзьӧдны луннас, тшӧктіс тӧлысьлы да кодзувъяслы югзьӧдны войнас, Сійӧ гызьӧдӧ саридз, медым гыясыс ыджыд шыӧн бузгисны.
Сылӧн нимыс — Господь Саваоф.
Сійӧ тадзи висьталӧ: — Шонді, тӧлысь да кодзувъяс кӧ оз кутны югзьӧдны, — висьталӧ Господь, — сэки Израиль войтыр оз нин ло Менам войтырӧн.
Господь тадзи висьталӧ: — Выліын енэжсӧ он вермы муртавны, уліын муюгыдлысь подувсӧ он вермы туявны, тадзи жӧ Ме ог вермы ӧтдортны Израиль войтырӧс сыысь, мый найӧ вӧчисны, — висьталӧ Господь.
Воасны лунъяс, — висьталӧ Господь, — кор тайӧ карсӧ выльысь лоӧ лэптӧма Меным. Сійӧс лэптасны Хананел башнясянь Пельӧс дзиръяӧдз, сэтысянь мурталан кӧвсӧ нюжӧдасны Гарев керӧсӧдз да водзӧ Гоалань.
Став ковтысыс, кытчӧ гуалӧма морт шойяс да шыблалӧма сотӧм висьяслысь пӧимсӧ, тшӧтш асыввылын став видз-муыс Кедрон ковтысӧдз да Вӧв дзиръя пельӧсӧдз лоӧны Господьлӧн вежа карӧн.
Тайӧ карсӧ сэсся некор оз ло пазӧдӧма-бырӧдӧма.
Иудаса Седекей ӧксылӧн дасӧд веськӧдлан воӧ, а Навукодоносорлӧн дас кӧкъямысӧд веськӧдлан воӧ Еремейлы вӧлі Господьсянь кыв.
Тайӧ кадас вавилонса ӧксылӧн тышкайӧзыс вӧлі кытшалӧмаӧсь Ерусалим кар. Еремей пророкӧс вӧлі йӧртӧма иудаса ӧксылысь керкасӧ видзысьяслӧн йӧрӧ.
Еремейӧс йӧртігӧн иудаса Седекей ӧксы шуис сылы: «Тэ пророкалан, Господь пӧ тадзи висьталӧ: “Тайӧ карсӧ Ме сета вавилонса ӧксы киӧ, и сійӧ босьтас тайӧ карсӧ.
Иудаса Седекей ӧксы оз мын калдеяса тышкайӧзлӧн киысь. Сійӧс збыльысь лоӧ сетӧма вавилонса ӧксы киӧ. Сылы ковмас аддзысьны да сёрнитны вавилонса ӧксыкӧд.
Навукодоносор нуӧдас Седекейӧс Вавилонӧ. Седекей лоӧ сэні сэтчӧдз, кытчӧдз Ме ог бурсьӧлӧмтчы сы дінӧ, — висьталӧ Господь.
— Ті кутанныд тышкасьны калдеяса тышкайӧзкӧд, но онӧ вермӧй найӧс”».
Еремей шуис: «Меным вӧлі Господьсянь кыв, мый ме дінӧ локтас Ханамел, Шаллум дядьӧйлӧн пиыс, да шуас меным: “Ньӧб Анатотысь менсьым видз-муӧс, ӧд тэ рӧдвуж морт, кодлы позьӧ сійӧс ньӧбнысӧ”.
Господьлӧн шуӧм серти ме дінӧ ӧксы керка видзысьяслӧн йӧрӧ локтіс дядьӧйлӧн Ханамел пиыс да шуис меным: “Анатотысь, Венямин муысь, ньӧб аслыд менсьым видз-муӧс, ӧд тэныд позьӧ сійӧс ньӧбнысӧ”. 
Ме гӧгӧрвои, мый дзик та йылысь меным висьтавліс Господь.
Ме ньӧби Анатотысь дядьӧйлӧн Ханамел пилысь видз-мусӧ, веситі дас сизим сикель эзысь да сеті сылы.
Ме гижи видз-му ньӧбӧм йылысь кабала да тупки сійӧс сёйысь вӧчӧм печатьӧн. Мекӧд вӧліны аддзылысь-висьталысьяс, кодъяс дырйи вески вылын веситі эзысьсӧ.
Видз-му ньӧбӧм йылысь индӧд-тшӧктӧм серти гижӧм кабалаяссӧ, печатьӧн тупкӧмаӧс и тупкытӧмӧс, ме босьті да сеті Махсей Нирийлӧн Барук пилы. Ме вӧчи тайӧс дядьӧйлӧн Ханамел пиыс дырйи, аддзылысь-висьталысьяс дырйи, кодъяс кырымасисны, да став иудейяс дырйи, кодъяс вӧліны ӧксы керка видзысьяслӧн йӧрын.
На дырйи Баруклы ме шуи, мый Господь Саваоф, Израильлӧн Ен, тадзи висьталӧ: “Босьт видз-му ньӧбӧм йылысь кабалаяс, печатьӧн тупкӧмаӧс и тупкытӧмӧс, да пукты найӧс сёй дозйӧ, медым найӧс позис дыр видзны”.
Ӧд Господь Саваоф, Израильлӧн Ен, тадзи висьталӧ: “Тайӧ муас коркӧ бара кутасны ньӧбавны керкаяс, видз-му да виноград йӧръяс”.
Видз-му ньӧбӧм йылысь кабаласӧ ме сеті Нирийлӧн Барук пилы, сэсся кевмыси Господьлы:
— Господьӧй Ыджыдӧй!
Аслад ыджыд вынӧн да нюжӧдӧм киӧн Тэ вӧчин енэжсӧ и мусӧ, Тэныд нинӧм абу вермытӧмыс!
Сюрсъяслы Тэ петкӧдлан Ассьыд буралӧмтӧ, а батьяслӧн лёк вӧчӧмысь Тэ мынтысян налӧн ныв-пилы. Тэ — ыджыд да вына Ен, Тэнад нимыд — Господь Саваоф.
Тэнад шуӧмъясыд мывкыдӧсь, Тэнад уджъясыд вынаӧсь, Тэ аддзан мортлысь туйяссӧ, быдӧнлы мынтысян сылӧн туйясыс серти, сылӧн уджъяслӧн вотӧсыс серти. Тэ петкӧдлін шензьӧданаторъяс да индысьпасъяс Египет муын, Тэ ӧніӧдз вӧчан тайӧс Израильын да став йӧзыс пӧвстын. Тэ шедӧдін Аслыд нималӧм, и ӧніӧдз Тэ нималан. Тэ петкӧдін Ассьыд Израиль войтыртӧ Египет муысь шензьӧданаторъяс да индысьпасъяс вӧчӧмӧн, Ассьыд вына китӧ нюжӧдӧмӧн да ёна повзьӧдлӧмӧн. Тэ сетін Аслад войтырлы тайӧ мусӧ, кӧні визувтӧ йӧв да ма, мусӧ, мый кыв сетӧмӧн кӧсйысин сетны налӧн батьяслы.
Найӧ локтісны да босьтісны тайӧ мусӧ, но найӧ эз кывзысьны Тэнсьыд, эз овны Тэнад Индӧдыд серти. Найӧ эз вӧчны сійӧ, мый Тэ тшӧктін вӧчны налы, та вӧсна Тэ мӧдӧдін налы став тайӧ шогсӧ.
Со, кар гӧгӧрыс вӧрӧг кыпӧдӧма тымӧд, медым босьтны сійӧс.
Калдеяса тышкайӧз кытшалӧны тайӧ карсӧ, и сійӧс лоӧ сетӧма налӧн киӧ. Карса олысьясӧс лоӧ бырӧдӧма шыпуртӧн, тшыглунӧн да пӧрӧс висьӧмӧн.
Инӧ сійӧ, мый Тэ водзвыв висьтавлін, и ӧні Тэ аддзан тайӧс.
Господьӧй Ыджыдӧй, Тэ тшӧктін меным эзысь вылӧ ньӧбны видз-му да корны аддзылысь-висьталысьясӧс, но тайӧ карсӧ лоӧ сетӧма калдеяса тышкайӧзлӧн киӧ».
Еремейлы вӧлі Господьсянь кыв:
«Ме — Господь, став ловъя олысьыслӧн Ен.
Эм-ӧ мыйкӧ Меным вермытӧмыс?
Та вӧсна Господь тадзи висьталӧ: тайӧ карсӧ Ме сета калдеяса тышкайӧзлӧн киӧ да вавилонса Навукодоносор ӧксы киӧ. Сійӧ босьтас тайӧ карсӧ. Тайӧ карсӧ кытшалысь калдеяса тышкайӧз пырасны татчӧ. Найӧ сотасны карсӧ керкаяснас, кӧні вевт вылас тшынӧдчисны Ваал идоллы да вайисны вина вись мукӧд енъяслы, и тадзи дӧзмӧдісны Менӧ.
Ӧд Израиль войтыр да Иуда войтыр том кадсяньыс вӧчисны сӧмын лёксӧ, вӧчисны Менам син водзын шогмытӧмсӧ.
Израиль войтыр сӧмын дӧзмӧдіс Менӧ аслас уджъясӧн, — висьталӧ Господь.
— Тайӧ карсӧ лэптӧмсянь да ӧніӧдз сэні олысьяс скӧрмӧдісны-дӧзмӧдісны Менӧ. Та вӧсна Ме ӧтдорта тайӧ карсӧ став лёк вӧчӧмсьыныс, мый вӧчисны Израиль войтыр, Иуда войтыр, налӧн ӧксыясныс, юралысьясныс, попъясныс, пророкъясныс, Иуда муын да Ерусалим карын олысьяс.
Найӧ бергӧдісны Меланьӧ мышнысӧ, а эз чужӧмнысӧ.
Ме выльысь и выльысь велӧдлі найӧс, но найӧ эз кывзыны, эз сибӧдны Менсьым туйдӧдӧмӧс. Сійӧ керкаас, мый сиӧма Менам нимлы, найӧ сувтӧдісны ассьыныс зывӧк идолъяснысӧ да пежалісны тайӧ керкасӧ.
Бен-Хинном ковтысын найӧ лэптісны Ваал идоллы вись ваян мылькъяс, медым сотны ассьыныс ныв-пинысӧ Молок идоллы. Но тайӧс Ме эг тшӧктывлы вӧчнысӧ, татшӧм пеж вӧчӧмыс Меным абу сьӧлӧм серти. Тадзи вӧчигӧн найӧ мыжӧ кыскисны Иуда войтырӧс.
Ті шуаланныд тайӧ карыс йылысь, мый сійӧс лоӧ сетӧма вавилонса ӧксы киӧ, и карса олысьясӧс лоӧ бырӧдӧма шыпуртӧн, тшыглунӧн да пӧрӧс висьӧмӧн.
Но Господь, Израильлӧн Ен, тайӧ карыс йылысь тадзи висьталӧ: тайӧ карас олысьясӧс Ме чукӧрта быд муысь, кытчӧ Ме вӧтла найӧс ёна лӧгалігӧн да скӧралігӧн. Ме бӧр вайӧда найӧс тайӧ карас, и найӧ кутасны повтӧг овны.
Найӧ лоӧны Менам войтырӧн, а Ме — налӧн Енмӧн.
Ме сета налы ӧти кӧсйӧм да ӧти туй, медым став олӧм чӧжныс найӧ вежавидзӧмӧн полісны Меысь, ӧд тайӧ лоӧ налы да налӧн челядьлы бур вылӧ.
Ме кӧртала накӧд пыр кежлӧ йитӧд: Ме ог бергӧдчы наысь, а пыр кута вӧчны налы бурсӧ. Ме пукта налӧн сьӧлӧмӧ вежавидзӧм, медым найӧ эз кежны Меысь.
Ме кута нимкодьпырысь вӧчны налы бурсӧ, Ме зумыда вужйӧда найӧс тайӧ муас, и вӧча тайӧс став сьӧлӧмсянь.
Господь тадзи висьталӧ: Тайӧ войтырыслы Ме мӧдӧді уна лёксӧ, но тадзи жӧ Ме мӧдӧда налы бурсӧ, мый Ме кӧсйыси налы.
Ті шуаланныд, мый тайӧ муыс — овтӧмин, тані морт ни ыж-мӧс оз ов, тайӧ мусӧ сетӧма калдеяса тышкайӧзлӧн киӧ.
Но тайӧ муас бара кутасны ньӧбны эзысь вылӧ видз-му, аддзылысь-висьталысьяс дырйи кутасны гижавны видз-му ньӧбӧм йылысь кабалаяс да тупкыны найӧс сёйысь вӧчӧм печатьӧн. Тадзи кутасны вӧчны Венямин муын, Ерусалим кар гӧгӧрын, иудаса, негевса, керӧсвывса да керӧсбердса каръясын.
Ӧд Ме бӧр бергӧда найӧс пленысь, — висьталӧ Господь».
Кор Еремейӧс вӧлі йӧртӧма ӧксы керка видзысьяслӧн йӧрӧ, сылы мӧдысь вӧлі Господьсянь кыв:
«Господь тадзи висьталӧ: Ме вӧчи мусӧ, сеті сылы мыгӧр да зумыдмӧді сійӧс. Менам нимӧй — Господь.
Шыась Ме дінӧ, и Ме вочавидза тэныд, юӧрта тэныд ыджыдторъяс йылысь, мый тэ он на тӧд да он гӧгӧрво.
Господь, Израильлӧн Ен, тадзи висьталӧ: вӧрӧглӧн тымӧдысь да шыпуртысь тайӧ карыслӧн керкаясыс да иудаса ӧксыяслӧн керкаясыс киссясны. Тайӧ карас олысьяс петасны тышкасьны калдеяса тышкайӧзкӧд, но налӧн керкаясныс тырасны шойясӧн. Ӧд Ме бергӧді Ассьым чужӧмӧс тайӧ карас олысьясысь налӧн лёк вӧчӧмныс вӧсна, Ме пасьварта найӧс Аслам скӧрлунӧн да ярлунӧн. Но Ме бурдӧда тайӧ карас олысьясӧс.
Ме бурдӧда налысь дойяссӧ да сета налы тырвыйӧ лӧньлун да веськыдлун. Ме бергӧда пленысь Иуда да Израиль войтырӧс, воддза мозыс Ме вынсьӧда найӧс. Ме прӧстита да весала найӧс став мыжсьыс, мый найӧ вӧчисны Меным паныд. Ме прӧстита налысь Меным паныд кыпӧдчӧмсӧ.
Мувывса став войтыръяс водзын тайӧ карыс ваяс Меным нимкодьлун, ошкӧм да нималӧм. Кор войтыръяс кыласны бурыс да лӧньлуныс йылысь, мый Ме сета тайӧ карас олысьяслы, найӧс полӧм-дзӧрӧм босьтас.
Господь тадзи висьталӧ: ті шуаланныд, мый тайӧ муыс — овтӧмин, тані морт ни ыж-мӧс оз ов. Но тані, иудаса каръясын да ерусалимса уличьяс вылын, кодъяс ӧні кушӧсь, кӧні абу морт ни ыж-мӧс, бара кутас кывны нимкодясьӧм да гажӧдчӧм, кутас кывны верӧспулӧн да гӧтырпулӧн гӧлӧс шыныс. Бара кутас кывны Господьлӧн крамӧ аттьӧалана вись вайысьяслӧн гӧлӧс шыныс. Найӧ кутасны шуавны: “Ошкӧй Господь Саваофӧс, ӧд Сійӧ бур, Сылӧн буралӧмыс оз помасьлы!” Тайӧ муас олысьяслы Ме бара сета воддза кодьыс бур олӧм, — висьталӧ Господь.
Господь Саваоф тадзи висьталӧ: тайӧ овтӧминас, кӧні абу морт ни ыж-мӧс, тайӧ каръяс гӧгӧрыс бара лоӧны йирсянінъяс, кӧні ыж видзысьяс кутасны йирсьӧдны ассьыныс ыжъяссӧ.
Керӧсвывса, керӧсбердса да негевса каръяс гӧгӧр, Венямин муын, Ерусалим да мукӧд иудаса каръяс гӧгӧр ыж видзысьяс бара кутасны лыддьыны ыжъяслысь лыдсӧ, — висьталӧ Господь».
«Воасны лунъяс, — висьталӧ Господь, — кор Ме збыльмӧда Ассьым кӧсйысьӧмӧс, мый шулі Израиль войтырлы да Иуда войтырлы.
Сійӧ кадас Менам кӧсйӧм серти Давид рӧдысь петас веськыда Олысь, Сійӧ кутас веськыда вӧчны да веськыда мыждыны.
Сійӧ лунъясӧ Иуда войтыр мездмас, Ерусалимын олысьяс кутасны повтӧг овны. Сылӧн нимыс лоӧ “Господь — миян веськыдлуныс”.
Господь тадзи висьталӧ: Давид рӧдысь ӧксы кутас пыр пукавны Израильлӧн юралан пуклӧсын. Левитъяс пӧвстысь попъяс кутасны пыр вайны Меным сотан висьяс, нянь висьяс да мукӧд висьяс».
Еремейлы вӧлі Господьсянь кыв:
«Господь тадзи висьталӧ: Ме кӧрталі луныскӧд да войыскӧд йитӧд, и тайӧ йитӧдсӧ ті онӧ вермӧй торкнысӧ. Луныс и войыс локтӧны ас кадӧ. Тадзи жӧ абу вермана торкны Менсьым йитӧдӧс, мый Ме кӧрталі Аслам Давид кесйӧгкӧд. Ӧд Ме кӧсйыси, мый Давидлӧн юралан пуклӧсын пыр кутас пукавны сылӧн пиыс. Тадзи жӧ абу вермана торкны Менсьым йитӧдӧс, мый Ме кӧрталі поп-левитъяскӧд, Аслам кесъялысьяскӧд.
Кыдзи енэжвыв кодзувъяссӧ он вермы лыддьыны, саридздор лыасӧ он вермы муртавны, сідзи жӧ он вермы лыддьыны Менам Давид кесйӧгсянь чужысьясӧс да Меным кесъялысь левитъясӧс, ӧд Ме рӧдмӧда найӧс».
Еремейлы вӧлі Господьсянь кыв:
«Тэ ӧмӧй он аддзы, мый тайӧ йӧзыс шуалӧны, Господь пӧ ӧтдортіс сійӧ кык чужанкотырсӧ, кодӧс водзынджык бӧрйис. Тадзи найӧ увтыртӧны Менсьым войтырӧс, весиг войтырӧн оз лыддьыны.
Господь тадзи висьталӧ: кыдзи Ме ог торк йитӧдӧс, мый кӧрталі луныскӧд да войыскӧд, да ог веж индӧдъяс, мый лӧсьӧді енэжыслы да муыслы, сідзи жӧ Ме ог ӧтдорт Яковсянь чужысьясӧс да Менам Давид кесйӧгсянь чужысьясӧс. Давид рӧдысь Ме кута бӧрйыны юралысьясӧс, медым веськӧдлыны Ӧвраамсянь, Исааксянь да Яковсянь чужысьясӧн. Ме бергӧда Ассьым войтырӧс пленысь да бурсьӧлӧмтча на дінӧ».
Кор вавилонса Навукодоносор ӧксы аслас тышкайӧзкӧд да сылӧн киподувса муясысь тышкайӧзкӧд кытшаліс Ерусалим кар да сы гӧгӧрысь каръяссӧ, сэки Еремейлы вӧлі Господьсянь кыв:
«Господь, Израильлӧн Ен, тадзи висьталӧ: мун да юӧрт иудаса Седекей ӧксылы, мый Господь тадзи висьталӧ: Ме сета тайӧ карсӧ вавилонса ӧксы киӧ, и сійӧ сотас карсӧ биӧн.
Тэ он вермы пышйыны, тэнӧ босьтасны да сетасны сылӧн киӧ. Тэныд ковмас аддзысьны да сёрнитны вавилонса ӧксыкӧд, и тэнӧ нуӧдасны Вавилонӧ.
Но тэ, иудаса Седекей ӧксы, кывзы Господьлысь кывсӧ! Господь тэныд тадзи висьталӧ: 
тэ он кув шыпуртысь, тэ кулан лӧня. Батьясыдлы моз, кодъяс тэӧдз ӧксыалісны, тэныд тшӧтш сотасны чӧскыд ӧвтанторъяс тэнӧ гуалігӧн да кутасны бӧрдны тэ йылысь: “Курыд шог, ыджыдӧй!” Тайӧс Ме кӧсйыся, — висьталӧ Господь».
Тайӧ кывъяссӧ Еремей пророк висьталіс иудаса Седекей ӧксылы Ерусалимын.
Буретш тайӧ кадас вавилонса ӧксылӧн тышкайӧзыс кытшалісны Ерусалим, Лакиш да Азека каръяс.
Иудаса став каръяс пӧвстысь сӧмын тайӧ изкаръяссӧ абу вӧлі пасьвартӧма.
Еремейлы вӧлі Господьсянь кыв сы бӧрти, кор Седекей ӧксы сёрнитчис ерусалимса войтыркӧд кесйӧгъясӧс лэдзӧм йылысь. Ставныслы колӧ вӧлі лэдзны вӧля вылӧ ассьыныс еврей кесйӧгъяснысӧ, тшӧтш кесйӧг аньяснысӧ. Некодлы оз позь вӧлі уджӧдны иудей воксӧ кесйӧгӧс моз.
Став юралысьясыс да став войтырыс, кодъяс сёрнитчисны ӧксыкӧд, мый лэдзасны кесйӧгъяснысӧ вӧля вылӧ да оз кутны уджӧдны найӧс кесйӧгӧс моз, кывзысисны да лэдзисны ассьыныс кесйӧгъяснысӧ.
Но бӧрынджык найӧ вежисны шуӧмнысӧ, бӧр бергӧдісны ассьыныс кесйӧгъяснысӧ, кодъясӧс водзынджык лэдзисны вӧля вылӧ, да уджӧдісны найӧс кесйӧгӧс моз.
Сэки Еремейлы вӧлі Господьсянь кыв:
«Господь, Израильлӧн Ен, тадзи висьталӧ: кор Ме петкӧді тіянлысь батьяснытӧ Египет муысь, кӧні вӧліны найӧ кесйӧг туйынӧсь, Ме кӧрталі накӧд йитӧд.
Ме тшӧкті налы сизимӧд вонас лэдзны вӧля вылӧ ассьыныс еврей вокъяснысӧ, кодъяс асьнысӧ вузалісны кесйӧг пыдди.
Татшӧм мортыс мед кесъялас квайт во, а сэсся сійӧс колӧ лэдзны вӧля вылӧ.
Но тіян батьясныд эз кывзыны Менӧ, эз сибӧдны Менсьым кывъясӧс.
А ті мӧд нога вӧчинныд, вӧчинныд Менам син водзын шогманасӧ: лэдзинныд вӧля вылӧ ассьыныд кесйӧг-вокъяснытӧ, кыдзи сёрнитчинныд Ме водзын Менам нимлы сиӧм керкаын.
Но сэсся ті вежинныд ассьыныд шуӧмнытӧ да янӧдінныд Менсьым нимӧс — ті бӧр бергӧдінныд ассьыныд кесйӧгъяснытӧ, кодъясӧс налӧн кӧсйӧм серти лэдзинныд вӧля вылӧ. Кесйӧгъясӧс моз ті бара уджӧданныд найӧс.
Та вӧсна Господь тадзи висьталӧ: сыысь, мый ті энӧ кывзӧй Менӧ, энӧ лэдзӧй вӧля вылӧ вокъяснытӧ да матыссаяснытӧ, Ме лэдза тіянӧс вӧля вылӧ, — висьталӧ Господь, — ті куланныд шыпуртысь, пӧрӧс висьӧмысь да тшыглунысь. Став мувывса войтыръяслы Ме вӧча тіянӧс повзьӧдчанторйӧн.
Иудаса да ерусалимса юралысьяс, ыджыд чина йӧз, попъяс да тайӧ мусьыс став войтырыс торкисны сёрнитчӧмнысӧ да эз вӧчны сы серти, мый Ме водзын кӧсйысисны вӧчны, кор шӧрипӧв керыштісны ӧшпи туша да мунісны керыштӧм кык юкӧн костӧдыс. Найӧс ставнысӧ Ме сета вӧрӧг киӧ, сійӧ йӧзыслы, кодъяс корсьӧны босьтны налысь олӧмсӧ. Налӧн шойясӧн кутасны пӧткӧдчыны кырныш-варыш да зверъяс.
Иудаса Седекей ӧксыӧс да юралысьясӧс Ме сета вӧрӧг киӧ, сійӧ йӧзыслы, кодъяс корсьӧны босьтны налысь олӧмсӧ, да вавилонса ӧксылӧн тышкайӧзлы, кодъяс ӧні вешйисны тіян дінысь. Ме бӧр вайӧда найӧс тайӧ карыс дорӧ, — висьталӧ Господь.
— Менам тшӧктӧм серти найӧ уськӧдчасны тайӧ карыс вылӧ, босьтасны сійӧс да сотасны биӧн. Иудаса каръясӧс Ме вӧча овтӧминӧн, сэні оз коль олысьыс».
Иудаса Ехояким ӧксылӧн, Иосей пилӧн, веськӧдлан кадӧ Еремейлы вӧлі Господьсянь кыв:
«Мун Рекав рӧд дінӧ, сёрнит накӧд да вайӧд найӧс Господьлӧн крамӧ. Сэні кутшӧмкӧ вежӧсын сет налы юны вина».
Ме муні да кори Язанийӧс, Хавацний Еремейлысь писӧ, сылысь вокъяссӧ да пиянсӧ, тшӧтш Рекавлысь став рӧдсӧ. Ме вайӧді найӧс Господьлӧн крамӧ, Ханан пиянлӧн вежӧсӧ. Ханан вӧлі Енлӧн морт, Игдалийлӧн пи. Вежӧсыс вӧлі юралысьяслӧн вежӧскӧд орччӧн, Маасей вежӧс весьтын. Маасей вӧлі Шаллумлӧн пи, коді видзис крамӧ пыранін.
Рекав рӧд водзӧ ме сувтӧді вина тыра гырничьяс да юан дозъяс, сэсся шуи налы: «Юӧй винасӧ».
Но найӧ вочавидзисны: «Винатӧ ми огӧ юӧй, ӧд Рекавлӧн Ионадав пиыс, миян батьным, ӧлӧдіс миянӧс: “Некор энӧ юӧй винатӧ ни ті, ни тіян челядьныд.
Керкаястӧ энӧ лэптӧй, няньтӧ энӧ кӧдзӧй, виноградтӧ энӧ пуктӧй. Тайӧ мед нинӧм тіян оз ло, а став олӧм чӧжныд олӧй чомъясын, сэки ті дыр кутанныд овны сійӧ муас, кӧні ті локтысь-мунысьяс”.
Ми быдторйын кывзысям миян Ионадав батьнымлысь, ставсӧ вӧчам сылӧн тшӧктӧм серти: ми, миян гӧтыръясным да ныв-пиным огӧ юӧй вина. Ми огӧ лэптӧй аслыным керкаяс, огӧ кӧдзӧй.
Виноград йӧръяс да видз-муяс миян абуӧсь.
Ми олам чомъясын, ми кывзысям да ставсӧ вӧчам сідзи, кыдзи тшӧктіс миянлы Ионадав батьным.
Кор вавилонса Навукодоносор ӧксы уськӧдчис тайӧ муыс вылӧ, ми шуим пышйыны калдеяса да арамса тышкайӧзысь Ерусалимӧ, и ӧніӧдз ми олам тані».
Еремейлы вӧлі Господьсянь кыв:
«Господь Саваоф, Израильлӧн Ен, тадзи висьталӧ: мун да висьтав Иудаын да Ерусалимын олысьяслы: ті ӧмӧй онӧ кӧсйӧй сибӧдны Менсьым туйдӧдӧмӧс, онӧ ӧмӧй кывзӧй Менсьым кывъясӧс? — висьталӧ Господь. — Рекавлӧн Ионадав пиыс аслас пиянлы эз лэдз юны вина, и найӧ ӧнӧдз оз юны вина. Найӧ кывзысьӧны асланыс батьныслысь, олӧны сылӧн кывъясыс серти.
А Ме выльысь и выльысь ӧлӧдлі тіянӧс, но ті энӧ кывзысьӧй Менсьым.
Ме выльысь и выльысь мӧдӧдлі тіян дінӧ Ассьым кесйӧгъясӧс — пророкъясӧс. Ме тшӧкті налы юӧртны тіянлы: бергӧдчӧй асланыд лёк туй вылысь, вӧчӧй бурсӧ, энӧ юрбитӧй мукӧд енъяслы да энӧ кесъялӧй налы, сэки ті кутанныд овны сійӧ муас, мый Ме сеті тіянлы да тіян батьяслы.
Но ті энӧ сибӧдӧй Менсьым кывъясӧс, энӧ кывзӧй Менӧ.
Ионадавлӧн челядьыс олӧны асланыс батьныслӧн тшӧктӧм серти, а тайӧ войтырыс оз кывзысь Менсьым. Та вӧсна Господь Ен Саваоф, Израильлӧн Ен, тадзи висьталӧ: Ме мӧдӧда Иуда войтыр вылӧ да Ерусалимын олысьяс вылӧ став шогсӧ, мый Ме шуи мӧдӧдны. Ме ӧлӧдлі найӧс, но найӧ эз кывзыны, Ме чуксалі найӧс, но найӧ эз вочавидзны».
Рекав рӧдлы Еремей шуис: «Господь Саваоф, Израильлӧн Ен, тадзи висьталӧ: “Ті кывзысинныд Ионадав батьныдлысь, ті оланныд сылӧн тшӧктӧмъяс серти, та вӧсна Ионадавлӧн, Рекав пилӧн, рӧдысь петысь кутас пыр кесъявны Меным”. Тадзи висьталӧ Господь Саваоф, Израильлӧн Ен».
Иудаса Ехояким ӧксылӧн, Иосей пилӧн, нёльӧд веськӧдлан воӧ Еремейлы вӧлі Господьсянь кыв:
«Босьт гижӧд тубрас да гиж сэтчӧ ставсӧ, мый Ме висьтавлі тэныд Израиль войтыр йылысь, Иуда войтыр йылысь да став войтыръяс йылысь сійӧ лунсяньыс, кор Ме шыасьлі тэ дінӧ Иосейлӧн веськӧдлан кадӧ да ӧніӧдз.
Гашкӧ, Иуда чужанкотыр кылас, кутшӧм шог Ме шуи мӧдӧдны налы, да бергӧдчас аслас лёк туй вылысь. Сэки Ме прӧстита налысь лёк вӧчӧмнысӧ да мыжнысӧ».
Еремей корис ас дінас Нирийлысь Барук писӧ. Еремейлӧн висьталӧм серти Барук гижис гижӧд тубрасӧ ставсӧ, мый Господь висьталіс Еремейлы.
Еремей шуис Баруклы: «Менӧ йӧртісны, ме ог вермы мунны Господьлӧн крамӧ.
Но тэ мун Господьлӧн крамӧ видзалан лунӧ да сэтчӧ чукӧртчӧм войтырлы лыддьы гижӧд тубрасысь Господьлысь кывъяссӧ, мый тэ гижин менам висьталӧм серти. Лыддьы тайӧ кывъяссӧ тшӧтш асланыс каръясысь локтысь Иуда войтырлы.
Гашкӧ, найӧ кевмысясны-шыасясны Господь дінӧ да бергӧдчасны асланыс лёк туй вылысь, ӧд Господь ёна скӧралӧ да лӧгалӧ тайӧ войтырыс вылӧ».
Нирийлӧн Барук пиыс ставсӧ вӧчис Еремей пророклӧн тшӧктӧм серти. Господьлӧн крамын гижӧд тубрасысь сійӧ лыддис Господьлысь кывъяссӧ.
Иудаса Ехояким ӧксылӧн, Иосей пилӧн, витӧд веськӧдлан воӧ ӧкмысӧд тӧлысьнас вӧлі юӧртӧма, медым Ерусалимын олысь став войтырыс, тшӧтш иудаса мукӧд каръясысь Ерусалимӧ локтысь став войтырыс видзалісны Господь водзын.
Господьлӧн крамын, Гемарийлӧн вежӧс бердын, Барук лыддис став войтырыслы гижӧд тубрасысь Еремейлысь кывъяссӧ. Гемарий вӧлі ӧксылӧн гижалысь Шафанлӧн пи. Гемарийлӧн вежӧсыс вӧлі крамбердса вылыс йӧрын, крамӧ пыран выль дзиръя дорын.
Гемарийлӧн Микей пиыс кыліс гижӧд тубрасӧ гижӧм Господьлысь кывъяссӧ да муніс ӧксы керкаӧ, гижалысьлӧн вежӧсӧ. Сэні пукалісны юралысьяс: ӧксылӧн гижалысь Элишам, Шемайлӧн Делай пиыс, Акборлӧн Элнатан пиыс, Шафанлӧн Гемарий пиыс, Хананейлӧн Седекей пиыс, тшӧтш мукӧд юралысьяс.
Микей висьталіс налы став кывъяссӧ, мый сійӧ кывліс, кор Барук лыддис войтырыслы гижӧд тубрасысь.
Юралысьяс мӧдӧдісны Барук дінӧ Ехудиӧс. Ехуди вӧлі Нетанийлӧн пи, Нетаний — Шелемейлӧн, Шелемей — Кушилӧн. Ехуди шуис Баруклы: «Босьт аскӧдыд гижӧд тубрастӧ, мый тэ лыддин войтырыслы, да лок мекӧд».
Нирийлӧн Барук пиыс босьтіс аскӧдыс гижӧд тубрассӧ. Кор Барук локтіс юралысьяс дінӧ, найӧ шуисны сылы: «Пуксьы да лыддьы миянлы».
Барук лыддис налы.
Кывзӧм бӧраныс найӧ повзьӧмӧн видзӧдлісны ӧта-мӧдныс вылӧ да шуисны Баруклы: «Миянлы быть колӧ висьтавны ӧксылы став тайӧ кывъяссӧ».
Найӧ юалісны Баруклысь: «Висьтав миянлы, кыдзи тэ гижин тайӧ кывъяссӧ? Еремей-ӧ висьталіс тэныд?»
Барук вочавидзис налы: «Еремей висьталіс, а ме гижи найӧс чернилаӧн гижӧд тубрасӧ».
Сэки юралысьяс шуисны Баруклы: «Мунӧй да дзебсьӧй Еремейкӧд, медым некод эз тӧд, кӧнӧсь ті».
Юралысьяс колисны гижӧд тубрассӧ Элишам гижалысьлӧн вежӧсӧ да мунісны ӧксы керка йӧрӧ. Найӧ висьталісны ӧксылы гижӧд тубрас йылысь.
Ӧксы мӧдӧдіс Ехудиӧс гижӧд тубрасла. Ехуди вайис Элишам гижалысьлӧн вежӧсысь гижӧд тубрассӧ да лыддис ӧксылы да сы дорын сулалысь юралысьяслы.
Сэки ӧксы оліс аслас тӧвся керкаын, ӧд вӧлі ӧкмысӧд тӧлысь нин, и вӧлі кӧдзыд. Ӧксы водзын нажӧгын * ломтысис би.
Кор Ехуди лыддьывліс гижӧд тубрасысь куим-нёль юкӧн, ӧксы вундывліс лыддьӧм юкӧнъяссӧ пуртӧн, кутшӧмӧн гижалысь вӧдитчӧ, да шыбитліс найӧс ломтысьысь нажӧгӧ. Тадзи сійӧ бырӧдіс биын ставнас гижӧд тубрассӧ.
Ни ӧксы, ни сылӧн чина йӧзыс эз повзьыны, эз косявлыны ассьыныс паськӧмнысӧ, кор найӧ кылісны гижӧм кывъяссӧ.
Сӧмын Элнатан, Делай да Гемарий ёна корисны ӧксыӧс, медым сійӧ эз сот гижӧд тубрассӧ, но ӧксы эз кывзы найӧс.
Ӧксы тшӧктіс аслас рӧдысь Ерахмеэллы, Азриэллӧн Серай пилы да Авдиэллӧн Шелемей пилы босьтны Барук гижалысьӧс да Еремей пророкӧс, но Господь дзебис найӧс.
Сы бӧрти, кор ӧксы сотіс гижӧд тубрассӧ, кытчӧ Еремейлӧн висьталӧм серти Барук гижис Господьлысь кывъяссӧ, Еремейлы вӧлі Господьсянь кыв:
«Босьт аслыд мӧд гижӧд тубрас да гиж сэтчӧ став кывъяссӧ, мый вӧлі гижӧма воддза гижӧд тубрасас, кодӧс сотіс иудаса Ехояким ӧксы.
А иудаса Ехояким ӧксылы висьтав, мый Господь тадзи висьталӧ: тэ сотін гижӧд тубрассӧ да юалін Еремейлысь, мыйла сійӧ гижӧма, мый локтас вавилонса ӧксы да пазӧдас тайӧ мусӧ, бырӧдас тайӧ муас олысь йӧзсӧ да ыж-мӧссӧ.
Та вӧсна иудаса Ехояким ӧксы йылысь Господь тадзи висьталӧ: сысянь чужысь оз кут пукавны Давидлӧн юралан пуклӧсын. Сылысь шойсӧ лоӧ шыбитӧма. Луннас гожйыс пондас сотны сійӧс, а войнас кӧдзыдыс — кынтыны.
Ме мыжда Ехоякимӧс, сылысь челядьсӧ да сылы кесъялысьясӧс налӧн лёк вӧчӧмысь. Ме мӧдӧда на вылӧ, Ерусалимын олысьяс да Иуда войтыр вылӧ став сійӧ шогсӧ, мый Ме шуи мӧдӧдны, но найӧ эз кывзыны».
Еремей босьтіс мӧд гижӧд тубрас да сетіс сійӧс Барук гижалысьлы, Нирийлӧн пилы. Еремейлӧн висьталӧм серти Барук гижис сэтчӧ ставсӧ, мый вӧлі гижӧма воддза гижӧд тубрасас, кодӧс биын сотіс иудаса Ехояким ӧксы.
Нӧшта вӧлі содтӧма гижӧдас уна пророкалан кыв.
Ехоякимлӧн Еконей пи пыдди вавилонса Навукодоносор ӧксы пуктіс Иуда муын ӧксыӧ Иосейлысь Седекей писӧ.
Седекей, сылӧн кесъялысьясыс да Иуда войтыр эз кывзыны Господьлысь кывъяссӧ, мый Сійӧ висьталіс Еремей пророк пыр.
Седекей ӧксы мӧдӧдіс Еремей пророк дінӧ Шелемейлысь Ехукал писӧ да Софоний попӧс, Маасейлысь писӧ, медым найӧ шуисны пророклы: «Кевмысь миян вӧсна Господьлы, миян Енлы!»
Еремей сэки оліс войтыр пӧвстын, сійӧс абу на вӧлі пуксьӧдӧма дзескыдінӧ.
Сійӧ кадас фараонлӧн тышкайӧзыс петісны Египетысь. Калдеяса тышкайӧз, кодъяс кытшалісны Ерусалим, кылісны та йылысь да ылыстчисны Ерусалим дорысь.
Еремей пророклы вӧлі Господьсянь кыв:
«Господь, Израильлӧн Ен, тадзи висьталӧ: иудаса ӧксылы, коді мӧдӧдіс юавны Менсьым, висьталӧй, мый фараонлӧн тышкайӧзыс, кодъяс вӧлі локтӧны тіянлы отсӧг вылӧ, бӧр бергӧдчасны асланыс муӧ, Египетӧ.
А калдеяса тышкайӧз бӧр локтасны татчӧ, кытшаласны тайӧ карсӧ, босьтасны сійӧс да сотасны.
Господь тадзи висьталӧ: энӧ ылӧдлӧй асьнытӧ, энӧ шуалӧй, калдеяса тышкайӧз пӧ вешъясны миян дінысь. Найӧ оз мунны.
Ті кӧ весиг пасьвартінныд калдеяса став тышкайӧзсӧ, кодъяс тышкасьӧны тіянлы паныд, и налӧн ловйӧн колины сӧмын доймӧмаяс, найӧ эськӧ чеччисны, петісны асланыс чомъясысь да тайӧ карсӧ сотісны биӧн».
Калдеяса тышкайӧз вешйисны Ерусалим дорысь, ӧд фараонлӧн тышкайӧзыс петісны иудаса тышкайӧзлы отсӧг вылӧ. Сэки Еремей кӧсйис мунны Ерусалимысь Венямин муӧ, медым дзебсьыны войтыр пӧвстӧ.
Еремей вӧлі петӧ Венямин дзиръяӧд, но карсӧ видзысьяслӧн Ирей нима веськӧдлысь, Хананей Шелемейлӧн пиыс, кутіс сійӧс да шуис: «Тэ кӧсъян пышйыны калдеяса тышкайӧз дінӧ!»
Еремей вочавидзис сылы: «Тайӧ ылӧг!
Ме ог кӧсйы пышйыны на дінӧ».
Но Ирей эз кывзы Еремейӧс, а босьтіс да вайӧдіс сійӧс юралысьяс дінӧ.
Найӧ скӧрмисны Еремей вылӧ, нӧйтісны сійӧс да пуксьӧдісны Ионафан гижалысьлӧн керкаӧ, мый вӧлі дзескыдін пыдди.
Еремейӧс пуксьӧдісны гӧбӧч гуӧ да колисны сэтчӧ дыр кад кежлӧ. Седекей ӧксы тшӧктіс вайӧдны Еремейӧс.
Сійӧс вайӧдісны ӧксы керкаӧ, и ӧксы гусьӧн юаліс сылысь: «Вӧлі-ӧ Господьсянь кыв?» 
«Вӧлі, — вочавидзис Еремей.
— Тэнӧ лоӧ сетӧма вавилонса ӧксы киӧ».
Еремей нӧшта шуис Седекей ӧксылы: «Мыйӧн ме мыжми тэ водзын, тэнад кесйӧгъяс водзын да тайӧ войтырыс водзын? Мыйла ті пуксьӧдінныд менӧ дзескыдінӧ?
Кӧні тіян пророкъясныд, кодъяс юӧртлісны тіянлы, мый вавилонса ӧксы оз пет тышӧ тіянлы да тайӧ муыслы паныд?
Ӧні, ӧксыӧй-ыджыдӧй, кывзы менӧ, эн ӧтдорт менсьым корӧмӧс.
Бӧр эн ысты менӧ Ионафан гижалысьлӧн керкаӧ, ӧд ме кула сэні».
Седекей ӧксылӧн тшӧктӧм серти Еремейӧс йӧртісны ӧксы керка видзысьяслӧн йӧрӧ. Нянь пӧжалысьяслӧн улич вылысь ӧтчыдысь луннас вайлісны сылы ӧти кӧрыш нянь, кытчӧдз карас эз помась няньыс.
Тадзи Еремей колис ӧксы керка видзысьяслӧн йӧрӧ.
Маттанлӧн Шефатай пиыс, Пашхурлӧн Гедалий пиыс, Шелемейлӧн Ехукал пиыс да Малкийлӧн Пашхур пиыс кывлісны, мый висьталіс Еремей став войтырыслы:
«Господь тадзи висьталӧ: “Коді кольччас тайӧ карас, сійӧ кулас шыпуртысь, тшыглунысь да пӧрӧс висьӧмысь.
А коді сетчас калдеяса тышкайӧзлӧн киӧ, сійӧ ловйӧн коляс да видзас ассьыс олӧмсӧ”.
Господь тадзи висьталӧ: “Тайӧ карсӧ лоӧ сетӧма вавилонса ӧксылӧн тышкайӧз киӧ. Вавилонса ӧксы босьтас тайӧ карсӧ”».
Юралысьяс шуисны ӧксылы: «Тайӧ мортсӧ колӧ вины. Ӧд сылӧн кывъясысь карас кольӧм тышкайӧз да став войтырыс эбӧссьыс усьӧны.
Тайӧ мортыс оз бурсӧ кӧсйы тайӧ войтырыслы, а сӧмын лёксӧ».
Седекей ӧксы шуис: «Сійӧ тіян киын, ме нинӧм ог вермы вӧчны тіянлы паныд».
Найӧ босьтісны Еремейӧс да гезйӧн лэдзисны сійӧс Малкийлӧн юкмӧсӧ.
Малкий вӧлі ӧксылӧн пиыс, и сылӧн юкмӧсыс сулаліс ӧксы керка видзысьяслӧн йӧрын. Ваыс сэні эз вӧв, вӧлі сӧмын нюйт. Еремей вӧйис тайӧ нюйтас.
Эфиопияса Эведмелек нима ыджыд чина морт, коді кесъяліс ӧксы керкаын, кывліс, мый Еремейӧс шыбитӧмаӧсь юкмӧсӧ.
Ӧксы тайӧ кадас пукаліс Веняминлӧн дзиръя дорын.
Эведмелек петіс ӧксы керкаысь. Сійӧ локтіс ӧксы дінӧ да шуис:
«Ӧксыӧй-ыджыдӧй, тайӧ йӧзыс лёктор вӧчисны Еремей пророклы, шыбитісны сійӧс юкмӧсӧ.
Сійӧ кулас сэні тшыгйысла, ӧд карас няньыс абу нин».
Ӧксы шуис эфиопияса Эведмелеклы: «Босьт аскӧдыд комын мортӧс да лэпты Еремей пророкӧс юкмӧсысь, медым эз кув сэні».
Эведмелек босьтіс аскӧдыс йӧзӧс, локтіс ӧксылӧн керкаӧ да пырис паськӧм видзанінӧ. Сэтысь босьтіс киссьӧм кӧлуй да гезйӧн лэдзис юкмӧсӧ Еремейлы.
Эфиопияса Эведмелек шуис Еремейлы: «Киняулӧдыд гартышт асьтӧ гезнас, а киссьӧм кӧлуйсӧ гез улас сюйышт».
Еремей дзик сідзи и вӧчис.
Еремейӧс гезйӧн кыпӧдісны юкмӧсысь да колисны ӧксы керка видзысьяслӧн йӧрӧ.
Седекей ӧксы мӧдӧдіс мортӧс, коді вайӧдіс Еремей пророкӧс ӧксы дінӧ Господьлӧн крамӧ коймӧд пыранін дорӧ. Сэні ӧксы шуис Еремейлы: «Ме мыйсюрӧ юала тэнсьыд, а тэ меысь нинӧм эн дзеб».
Еремей вочавидзис Седекейлы: «Ме кӧ висьтала тэныд, тэ ӧд сетан менӧ вины.
Ме кӧ туйдӧда тэнӧ, тэ ӧд он кывзы менӧ».
Седекей ӧксы гусьӧн кыв сетіс Еремейлы: «Ловъя Господь водзын, коді сетіс миянлы олӧм, ме кыв сета, мый ог лэдз тэнӧ вины, ог сет тэнӧ налы, кодъяс кӧсйӧны босьтны тэнсьыд олӧмтӧ».
Еремей шуис Седекейлы: «Господь Ен Саваоф, Израильлӧн Ен, тадзи висьталӧ: “Тэ кӧ сетчан вавилонса ӧксылӧн киподувса юралысьяслы, тэ ловйӧн колян, и тайӧ карсӧ оз сотны биӧн. Тэ да тэнад гортсаыд ловйӧн колянныд.
А он кӧ сетчы вавилонса ӧксылӧн киподувса юралысьяслы, сэки тайӧ карсӧ лоӧ сетӧма калдеяса тышкайӧзлӧн киӧ. Найӧ сотасны тайӧ карсӧ биӧн, и тэ он мездмы налӧн киысь”».
Седекей ӧксы шуис Еремейлы: «Ме пола иудаса йӧзысь, кодъяс вуджисны калдеяса тышкайӧз дор. Калдеяса тышкайӧз кӧ сетасны менӧ налӧн киӧ, найӧ косявласны менӧ».
Еремей шуис Седекейлы: «Оз сетны.
Кывзы Господьӧс. Кывзы, мый ме висьтала тэныд. Сэки тэныд бур лоӧ, и тэ ловйӧн колян.
А он кӧ сетчы вавилонса ӧксылӧн киподувса юралысьяслы, сэки инас сійӧ, мый Господь петкӧдліс меным: 
став аньяссӧ, кодъяс колины иудаса ӧксылӧн керкаӧ, нуӧдасны вавилонса ӧксылӧн киподувса юралысьяс дінӧ. Тайӧ аньясыс шуасны иудаса ӧксы йылысь: — Тэнад ёртъясыд ылӧдлісны тэнӧ, найӧ вермисны тэнӧ.
Кор тэнад кокыд вӧйис нюйт пытшкӧ, найӧ бергӧдісны тэлань мышнысӧ.
Став тэнсьыд гӧтыръястӧ да челядьтӧ нуӧдасны калдея войтыр дінӧ, и ачыд тэ он жӧ мездмы налӧн киысь.
Тэ шедан вавилонса ӧксы киӧ, а тайӧ карсӧ сотасны биӧн».
Седекей шуис Еремейлы: «Миян сёрни йылысь мед некод оз тӧд, сэки тэ ловйӧн колян.
Юралысьяс кӧ кывласны, мый ме сёрниті тэкӧд, найӧ локтасны тэ дінӧ да шуасны, висьтав пӧ миянлы, мый тэ шуин ӧксылы, и мый тэныд вочавидзис ӧксы. Миянысь пӧ нинӧм эн дзеб, сэки ми огӧ виӧй тэнӧ. А тэ налы шу, мый тэ ёна корин ӧксыӧс, медым сійӧ эз бергӧд тэнӧ бӧр Ионафанлӧн керкаӧ, медым тэ сэні эн кув».
Юралысьяс локтісны Еремей дінӧ да кутісны юасьны сылысь. Еремей вочавидзис налы сідзи, кыдзи тшӧктіс ӧксы. Кывшутӧг юралысьяс колисны Еремейӧс, ӧд эз тӧдмавны, мый йылысь сійӧ сёрнитіс ӧксыкӧд.
Еремей оліс ӧксы керка видзысьяслӧн йӧрын сійӧ лунӧдзыс, кор калдеяса тышкайӧз босьтісны Ерусалим кар.
Иудаса Седекей ӧксылӧн ӧкмысӧд веськӧдлан воӧ дасӧд тӧлысьӧ вавилонса Навукодоносор ӧксы аслас тышкайӧзкӧд уськӧдчис Ерусалим кар вылӧ да кытшаліс сійӧс.
Седекейлӧн дас ӧтиӧд веськӧдлан воӧ нёльӧд тӧлысьлӧн ӧкмысӧд лунӧ карса стенсӧ жугӧдісны.
Вавилонса ӧксылӧн киподувса юралысьяс пырисны Ерусалимӧ да карса шӧр дзиръясянь пондісны юравны. Тайӧ вӧліны: Сим-Магирысь Нергал-Шар-Эцер, ыджыд чина йӧзӧн веськӧдлысь Неву-Сар-Секим, тышкайӧзӧн веськӧдлысь Нергал-Шар-Эцер да вавилонса ӧксылӧн киподувса мукӧд юралысьяс.
Найӧс аддзигӧн иудаса Седекей ӧксы да сылӧн тышкайӧзыс пышйисны. Войнас найӧ петісны карсьыс дзиръяӧд, мый вӧлі кыкпӧвста стенмас ӧксылӧн сад дорын. Седекей ӧксы аслас йӧзкӧд мӧдӧдчис Йӧрдан ковтыслань.
Но калдеяса тышкайӧз вӧтчисны на бӧрся да суӧдісны Седекейӧс Ерикон кардорса ковтысын.
Седекейӧс кутісны да вайӧдісны вавилонса Навукодоносор ӧксы дінӧ Ривлаӧ, Хамат муӧ. Сэні Навукодоносор мыждіс Седекейӧс.
Ривлаын Седекейлӧн син водзын вавилонса ӧксы виис сылысь пиянсӧ. Виис тшӧтш иудаса став тӧдчана йӧзсӧ.
Вавилонса ӧксы бытшкис Седекейлысь кыкнан синсӧ да дорис сійӧс ыргӧн чепъясӧн, медым нуӧдны Вавилонӧ.
Ӧксылысь керкасӧ да войтырыслысь керкаяссӧ калдеяса тышкайӧз сотісны биӧн, Ерусалим карлысь стенъяссӧ жугӧдісны.
Карсьыс коляс войтырсӧ да вавилонса ӧксы дор вуджысьясӧс Навузардан, ӧксыӧс видзысьяслӧн юралысь, нуӧдіс пленӧ Вавилонӧ.
Сӧмын войтыр пӧвстысь медся гӧльяссӧ, кодъяслӧн нинӧм эз вӧв, Навузардан, ӧксыӧс видзысьяслӧн юралысь, кольӧдіс овны Иуда муӧ да сетіс налы виноград йӧръяс да видз-муяс.
Навузарданлы, ӧксыӧс видзысьяслӧн юралысьлы, вавилонса Навукодоносор ӧксы Еремей йылысь шуис:
«Босьт сійӧс да тӧждысь сы вӧсна, эн вӧч сылы некутшӧм лёктор. Вӧч сідзи, мый шуас сійӧ».
Ӧксыӧс видзысьяслӧн юралысь Навузардан, ыджыд чина йӧзӧн веськӧдлысь Невушазбан, тышкайӧзӧн веськӧдлысь Нергал-Шар-Эцер да вавилонса став юралысьыс мӧдӧдісны йӧзӧс Еремейла. Найӧ вайӧдісны Еремейӧс ӧксы керка видзысьяслӧн йӧрысь да сетісны Гедалийлы, Шафан Ахикамлӧн пилы, кодлы вӧлі тшӧктӧма нуӧдны Еремейӧс ас ордас.
Тадзи Еремей кольччис овны аслас войтыр пӧвстын.
Кор Еремейӧс вӧлі йӧртӧма ӧксы керка видзысьяслӧн йӧрӧ, сылы вӧлі Господьсянь кыв:
«Мун да висьтав эфиопияса Эведмелеклы, мый Господь Саваоф, Израильлӧн Ен, тадзи висьталӧ: Ме збыльмӧда Ассьым кывъясӧс тайӧ карыслы лёк вылӧ, а ог бур вылӧ. Воас лун, кор тэ аддзан тайӧс.
Но сійӧ лунӧ Ме мезда тэнӧ, — висьталӧ Господь, — тэнӧ оз ло сетӧма сійӧ йӧзыслӧн киӧ, кодъясысь тэ полан.
Ме мезда тэнӧ. Тэ он кув шыпуртысь, но видзан ассьыд олӧмтӧ, ӧд Ме вылӧ тэ лача кутан, — висьталӧ Господь».
Еремейӧс вӧлі дорӧма чепъясӧн да нуӧдӧма Рама карӧ. Сійӧ вӧлі пленӧ босьтӧмаяс пӧвстын, кодъясӧс вӧлі нуӧдӧны Ерусалимысь да Иудаысь Вавилонӧ. Рама карын Еремейлы вӧлі Господьсянь кыв сы бӧрти, кор Навузардан, ӧксыӧс видзысьяслӧн юралысь, лэдзис сійӧс вӧля вылӧ.
Ӧксыӧс видзысьяслӧн юралысь корис Еремейӧс да шуис сылы: «Господь, тэнад Енмыд, шуис мӧдӧдны шог тайӧ муыс вылӧ. Ӧні Господь збыльмӧдіс Ассьыс кывсӧ да вӧчис сійӧ, мый шуис.
Ті мыж вӧчинныд Господьлы паныд, ті энӧ кывзысьӧй Сылысь, та вӧсна шогыс суис тіянӧс.
Но талун ме мезда тэнӧ чепъясысь, мыйӧн дорӧма тэнсьыд китӧ. Кӧсъян кӧ мунны мекӧд Вавилонӧ, мунам. Сэні ме тӧждыся тэ вӧсна.
Он кӧ кӧсйы, кольччы татчӧ.
Видзӧд, муыс ставнас тэ водзын: кытчӧ кӧсъян, сэтчӧ и мун. Вӧч, кыдзи тэныд колӧ».
Еремей эз на удит муннысӧ, Навузардан нӧшта содтіс: «Тэ верман мунны Шафан Ахикамлӧн Гедалий пи дінӧ. Вавилонса ӧксы пуктіс сійӧс веськӧдлыны иудаса каръясӧн.
Ов сылӧн веськӧдлӧм улын тайӧ войтырыс пӧвстын либӧ мун, кытчӧ кӧсъян».
Ӧксыӧс видзысьяслӧн юралысь сетіс Еремейлы сёян-юан, козин да лэдзис сійӧс.
Еремей локтіс Ахикамлӧн Гедалий пи дінӧ Миспаӧ да овмӧдчис Иуда муын кольӧм войтыр пӧвстӧ.
Иудаса тышкайӧзӧн веськӧдлысьяс, кодъяс асланыс йӧзкӧд дзебсясисны кар сайын, кылісны, мый вавилонса ӧксы пуктӧма Ахикамлысь Гедалий писӧ веськӧдлыны Иуда муӧн да сетӧма сылӧн кипод улӧ медся гӧль айуловӧс, аньясӧс да челядьӧс, кодъясӧс эз нуӧдны Вавилонӧ.
Тайӧс кылӧм бӧрын Гедалий дінӧ Миспаӧ локтісны асланыс йӧзкӧд Нетанийлӧн Измаил пиыс, Карейлӧн Иоханан да Ионафан пияныс, Танхуметлӧн Серай пиыс, Нетофаысь Эфайлӧн пияныс да Езаний, кодлӧн батьыс вӧлі Маакаысь.
Гедалий, Шафан Ахикамлӧн пиыс, кыв сетӧмӧн шуис веськӧдлысьяслы да налӧн тышкайӧзлы: «Энӧ полӧй кесъявны калдеяса юралысьяслы. Кольччӧй тайӧ муас да кесъялӧй вавилонса ӧксылы. Сэки тіянлы лоӧ бур.
Ачым ме кольчча Миспаӧ да кута висьтавлыны тіян йылысь бурсӧ Калдея муысь миян дінӧ волысьяслы.
А ті чукӧртӧй виноград, яблӧг-груша да олив, заптӧй найӧс асланыд дозъясӧ. Олӧй сійӧ каръясас, кодъясӧс ті босьтінныд аслыныд».
Моав муын, аммон войтыр пӧвстын, Эдом муын да мукӧд муясын олысь иудаса йӧз кылісны, мый вавилонса ӧксы Иуда войтырысь кутшӧмкӧ юкӧн кольӧдӧма Иуда муӧ да наӧн веськӧдлыны пуктӧма Гедалийӧс, Шафан Ахикамлысь писӧ.
Та йылысь кылӧм бӧрын иудаса йӧз бергӧдчисны Иуда муӧ быдлаысь, кытчӧ найӧ пышйылісны. Найӧ локтісны Миспаӧ Гедалий дінӧ. Сійӧ вонас найӧ чукӧртісны зэв уна виноград да яблӧг-груша.
Карейлӧн Иоханан пиыс да тышкайӧзӧн веськӧдлысьяс, кодъяс дзебсясисны кар сайын, локтісны Миспаӧ Гедалий дінӧ. Найӧ шуисны сылы: «Тэ ӧмӧй он тӧд, мый Ваалис, аммон войтырлӧн ӧксы, мӧдӧдіс Нетанийлысь Измаил писӧ, медым вины тэнӧ?»
Но Гедалий, Ахикамлӧн пиыс, эз эскы налы.
Сэки Карейлӧн Иоханан пиыс гусьӧн шуис Гедалийлы: «Лэдз менӧ мунны да вины Нетанийлысь Измаил писӧ. Та йылысь некод оз тӧдлы.
Оз позь лэдзны, медым сійӧ виис тэнӧ. Сэки вавилонсаяс разӧдасны Иуда войтырысь тэ дінӧ чукӧртчӧмаясӧс да бырӧдасны коляс войтырсӧ».
Но Ахикамлӧн Гедалий пиыс шуис Карейлӧн Иоханан пилы: «Эн вӧч тайӧс. Сійӧ, мый тэ висьталан Измаил йылысь, абу збыль».
Сизимӧд тӧлысьӧ Миспаӧ Ахикамлӧн Гедалий пи дінӧ локтіс Элишам Нетанийлӧн Измаил пиыс. Сійӧ вӧлі ӧксы рӧдысь да ӧксылӧн киподувса юралысьяс пӧвстысь. Сыкӧд тшӧтш локтіс дас морт. Кор найӧ ӧтвылысь сёйисны-юисны, Нетанийлӧн Измаил пиыс да сыкӧд локтӧм дас мортыс чеччисны да шыпуртӧн виисны Гедалийӧс, Шафан Ахикамлысь писӧ, кодӧс вавилонса ӧксы пуктіс веськӧдлыны Иуда муӧн.
Сэсся Измаил виис иудаса йӧзӧс, кодъяс вӧліны Гедалийкӧд Миспаын, виис тшӧтш калдеяса тышкайӧзӧс, кодъяс вӧліны сэні.
Гедалийӧс виӧм бӧрти мӧд луннас, кор некод на нинӧм эз тӧд та йылысь, Миспаӧ локтісны Сикемысь, Силомысь да Самарияысь кӧкъямысдас морт. Найӧ вӧліны бритӧм тошкаӧсь да косявлӧм паськӧмаӧсь, вир-яйнысӧ вӧлі вундалӧмаӧсь пуртӧн. Найӧ вайисны аскӧдныс Господьлӧн крамӧ вись пыдди нянь да чӧскыд ӧвтанторъяс.
Нетанийлӧн Измаил пиыс воча петіс налы Миспаысь. Мунігмозыс сійӧ бӧрдіс, а кор паныдасис накӧд, шуис налы: «Локтӧй Ахикамлӧн Гедалий пи дінӧ».
Кор найӧ пырисны карас, Нетанийлӧн Измаил пиыс аслас йӧзкӧд виисны найӧс да шыбитісны шойяссӧ юкмӧсӧ.
Но дас мортӧс Измаил эз удит вины, ӧд найӧ шыасисны сы дінӧ: «Эн ви миянӧс! Кар саяс дзебасын миян эм шобді, ид, олив вый да ма».
Ыджыд юкмӧссӧ, кытчӧ Измаил шыбитіс виӧмаяслысь шойяссӧ, кодйыліс Аса ӧксы, кор тышкасис израильса Ваас ӧксыкӧд.
Нетанийлӧн Измаил пиыс тыртіс тайӧ юкмӧссӧ виӧмаяслӧн шойясӧн.
Измаил босьтіс пленӧ Миспаысь став коляс войтырсӧ, тшӧтш ӧксылысь нывъяссӧ. Буретш тайӧ коляс войтырнас Навузардан, ӧксыӧс видзысьяслӧн юралысь, пуктіс веськӧдлыны Ахикамлысь Гедалий писӧ. Пленӧ босьтӧмаяскӧд Нетанийлӧн Измаил пиыс мӧдӧдчис аммон войтыр дінӧ.
Карейлӧн Иоханан пиыс да тышкайӧзӧн веськӧдлысьяс, кодъяс вӧліны сыкӧд, кылісны став лёктор йывсьыс, мый вӧчис Нетанийлӧн Измаил пиыс. Сэки найӧ босьтісны став ассьыныс йӧзсӧ да мунісны тышкасьны Нетанийлӧн Измаил пикӧд. Найӧ суӧдісны Измаилӧс Гаваонын, ыджыд вайӧртӧд дорын.
Йӧзыс, кодъясӧс Измаил вӧлі босьтӧма пленӧ, кор аддзисны Карейлысь Иоханан писӧ да тышкайӧзӧн веськӧдлысьясӧс, пондісны нимкодясьны.
Миспаысь пленӧ босьтӧмаяс бӧр бергӧдчисны да котӧртісны Карейлӧн Иоханан пи дінӧ, а Нетанийлӧн Измаил пиыс да сылӧн йӧз пӧвстысь кӧкъямыс морт пышйисны Иохананысь аммон войтыр дінӧ.
Сы бӧрти, кор Миспаын Нетанийлӧн Измаил пиыс виис Ахикамлысь Гедалий писӧ, Карейлӧн Иоханан пиыс мездіс Измаиллӧн киысь айуловӧс, тышкайӧзӧс, аньясӧс, челядьӧс да ыджыд чина йӧзӧс. Иоханан да тышкайӧзӧн веськӧдлысьяс босьтісны аскӧдныс тайӧ йӧзсӧ да петкӧдісны найӧс Гаваонысь.
Ставныс мӧдӧдчисны туйӧ. Найӧ сувтісны Виплием дорса Кимхам сиктӧ, медым пышйыны Египетӧ калдеяса тышкайӧзысь, кодъясысь найӧ полісны. Ӧд Нетанийлӧн Измаил пиыс виис Ахикамлысь Гедалий писӧ, кодӧс ачыс вавилонса ӧксы пуктіс веськӧдлыны Иуда муӧн.
Карейлӧн Иоханан пиыс да Хошайлӧн Езаний пиыс, тшӧтш тышкайӧзӧн веськӧдлысьяс да став войтырыс ичӧтсянь гырысьӧдз локтісны да шуисны Еремей пророклы: «Корам тэнӧ, кывзы миянӧс да кевмысь Господьлы, аслад Енлы, миян вӧсна, тайӧ коляс йӧзыс вӧсна. Ми вӧлім унаӧн, а колим этшаӧн, тэ ӧд ачыд аддзан тайӧс. Господь, тэнад Енмыд, мед петкӧдлас миянлы туйсӧ, кыті мунны да мый вӧчны».
Еремей пророк вочавидзис налы: «Ме кылі тіянӧс, ме кевмыся Господьлы, тіян Енлы, тіян корӧмныд серти. Ставсӧ, мый Господь висьталас, ме юӧрта тіянлы, ог дзеб тіянысь ни ӧти кыв».
Найӧ шуисны Еремейлы: «Господь мед лоӧ эскана да збыль аддзылысь-висьталысьӧн. Сійӧ мед висьталас миянлы паныд, ми кӧ огӧ вӧчӧй ставсӧ сідзи, кыдзи тшӧктӧ Господь, тэнад Енмыд.
Лоӧ-ӧ Господьлӧн кӧсйӧмыс миянлы сьӧлӧм серти али оз, но ми кывзысям Господьлысь, миян Енлысь, код дінӧ ми ыстам тэнӧ. Миянлы бур лоӧ, ми кӧ кывзысям Господьлысь, миян Енлысь».
Дас лун мысти Еремейлы вӧлі Господьсянь кыв.
Еремей корис ас дінас Карейлысь Иоханан писӧ, тышкайӧзӧн веськӧдлысьясӧс, кодъяс вӧліны сыкӧд, да став войтырсӧ ичӧтсянь гырысьӧдз. Еремей шуис налы: «Господь, Израильлӧн Ен, код дінӧ ті мӧдӧдлінныд менӧ, медым ме висьталі Сылы тіянлысь корӧмнытӧ, тадзи висьталӧ:
”Ті кӧ кольччанныд тайӧ муас, Ме ёнмӧда тіянӧс, ог пазӧд, Ме вужйӧда тіянӧс, ог нетшышт. Ме вӧчи тіянлы лёксӧ, и шогся та вӧсна.
Ӧні ті поланныд вавилонса ӧксыысь.
Энӧ полӧй сыысь, — висьталӧ Господь, — ӧд Ме тіянкӧд. Ме видза тіянӧс, мезда тіянӧс сылӧн киысь.
Ме петкӧдла тіян дінӧ Ассьым буралӧмӧс — вавилонса ӧксы бурсьӧлӧмтчас тіян дінӧ и бӧр бергӧдас тіянӧс асланыд муӧ”.
Но ті кӧ онӧ кывзысьӧй Господьлысь, асланыд Енлысь, а шуанныд, тайӧ муас пӧ ми огӧ кӧсйӧй овны, мунам пӧ да овмӧдчам Египет муӧ, кӧні оз ло тыш, кӧні огӧ кутӧй кывны буксан шылысь чуксалӧмсӧ да огӧ кутӧй тшыгъявны, сідзкӧ, ті, Иудалӧн коляс войтырыс, кывзӧй ӧні Господьлысь кывсӧ.
Господь Саваоф, Израильлӧн Ен, тадзи висьталӧ: “Ті кӧ шуанныд мунны Египетӧ да овмӧдчанныд сэтчӧ, сідзкӧ, шыпурт, мыйысь ті поланныд, да тшыглун, мыйысь тіянӧс полӧм босьтӧ, суасны тіянӧс Египет муын, и сэні ті куланныд.
Став йӧзыс, кодъяс мунасны да овмӧдчасны Египетӧ, куласны шыпуртысь, тшыглунысь да пӧрӧс висьӧмысь. Некод на пӧвстысь ловйӧн оз коль, некод оз пышйы шогысь, мый Ме мӧдӧда на вылӧ”.
Господь Саваоф, Израильлӧн Ен, тадзи висьталӧ: “Кыдзи Менам скӧрлунӧй да ярлунӧй киссис ерусалимса олысьяс вылӧ, тадзи жӧ Менам скӧрлунӧй киссяс тіян вылӧ, кор ті воанныд Египетӧ. Тіянӧс пондасны ёрны да лёкӧдны-омӧльтны, ті лоанныд повзьӧдчанторйӧн, и водзӧ ті онӧ нин аддзылӧй тайӧ мусӧ”.
Иудалӧн коляс войтырыс, кывзӧй! Господь висьталӧ тіянлы: “Энӧ мунӧй Египетӧ!” 
Тӧдӧй, талун ме ӧлӧді тіянӧс. Ті ылӧдлінныд асьнытӧ.
Ті мӧдӧдінныд менӧ Господь Енныд дінӧ да коринныд кевмысьны ас вӧснаныд. Ті шуинныд, юӧрт пӧ миянлы ставсӧ, мый висьталас Господь, миян Ен, и ми пӧ сідзи вӧчам.
Талун ме юӧрті тіянлы, мый висьталіс Господь, тіян Енныд, но ті энӧ кывзысьӧй Сылысь. Господь мӧдӧдіс менӧ висьтавны тіянлы, но ті энӧ кывзӧй.
Сідзкӧ, тӧдӧй, ті куланныд шыпуртысь, тшыглунысь да пӧрӧс висьӧмысь сійӧ муас, кытчӧ ті кӧсъянныд мунны да овмӧдчыны».
Кор Еремей висьталіс войтырыслы ставсӧ, мый тшӧктіс Господь, налӧн Ен, сэки Хошайлӧн Азарий пиыс, Карейлӧн Иоханан пиыс да мукӧд кывзысьтӧм йӧз шуисны Еремейлы: «Тэ ылӧдчан! Господь, миян Ен, эз мӧдӧдлы тэнӧ ӧлӧдны миянӧс Египетӧ мунӧмысь да сэтчӧ овмӧдчӧмысь.
Нирийлӧн Барук пиыс усйӧдлӧ тэнӧ миян вылӧ. Сійӧ кӧсйӧ сетны миянӧс калдеяса тышкайӧзлӧн киӧ, медым найӧ виасны миянӧс либӧ нуӧдасны пленӧ Вавилонӧ».
Карейлӧн Иоханан пиыс, тышкайӧзӧн веськӧдлысьяс да став войтырыс эз кывзыны Господьӧс, и эз кольччыны Иуда муӧ.
Карейлӧн Иоханан пиыс да тышкайӧзӧн веськӧдлысьяс босьтісны аскӧдныс Иудалысь коляс войтырсӧ, кодъяс вӧлі бӧр бергӧдчӧмаӧсь мукӧд войтыръяслӧн муясысь, кытчӧ найӧс вӧлі вӧтлӧма, да овмӧдчӧмаӧсь Иуда муӧ. Босьтісны аскӧдныс айуловӧс, аньясӧс, челядьӧс, ӧксылысь нывъяссӧ да став йӧзсӧ, кодъясӧс Навузардан, ӧксыӧс видзысьяслӧн юралысь, колис Шафан Ахикамлӧн Гедалий пикӧд. Босьтісны тшӧтш Еремей пророкӧс да Нирийлысь Барук писӧ.
Войтырыс эз кывзы Господьӧс, а мӧдӧдчис Египетӧ да локтіс Тафнис карӧ.
Тафнисын Еремейлы вӧлі Господьсянь кыв:
«Босьт ыджыд изъяс да дзеб найӧс сёй пытшкӧ фараонлӧн тафнисса керкаӧ пыранін дорӧ. Вӧч тайӧс Иуда войтырлӧн син водзын. Шу налы, мый Господь Саваоф, Израильлӧн Ен, тадзи висьталӧ: Ме вайӧда татчӧ Ассьым кесйӧгӧс, вавилонса Навукодоносор ӧксыӧс. Сылысь юралан пуклӧссӧ Ме сувтӧда тайӧ дзебӧм изъясыс вылӧ. На весьтӧ сійӧ шевкнитас ассьыс ӧксыалан дӧрачомсӧ. Сійӧ локтас да пазӧдас Египет му. Кодлы шуӧма кувны, сійӧ кулас.
Кодлы шуӧма пленӧ мунны, сійӧ пленӧ мунас.
Кодлы шуӧма шыпуртысь кувны, сійӧ шыпуртысь кулас.
Египетса енъяслы юрбитанінъяссӧ Ме бырӧда биӧн.
Вавилонса ӧксы сотас юрбитанінъяссӧ, а бӧлбанъяссӧ босьтас аскӧдыс. Кыдзи ыж видзысь босьталӧ аслас паськӧмысь тойяс, тадзи Навукодоносор босьтас Египет. Сэсся сійӧ лӧня мунас. Египет муын Он карысь сійӧ жуглас юрбитан изъяс, а египетса енъяслы юрбитанінъяссӧ сотас биӧн».
Египет муын Мигдолын, Тафнисын, Мемфисын да Патросын олысь Иуда войтыр йылысь Еремейлы вӧлі Господьсянь кыв:
«Господь Саваоф, Израильлӧн Ен, тадзи висьталӧ: ті аддзылінныд став шогсӧ, мый Ме мӧдӧді Ерусалимлы да мукӧд иудаса каръяслы.
Ӧні сэні из чукӧръяс, и олысьыс абу. Тайӧ каръясас олысьясыс кесъялісны да сотісны висьяс мукӧд енъяслы. Татшӧм лёк вӧчӧмнаныс найӧ скӧрмӧдісны Менӧ. Тайӧ енъяссӧ найӧ эз тӧдлыны, энӧ тӧдлӧй ни ті ни тіян батьясныд.
Ме выльысь и выльысь мӧдӧдлі тіян дінӧ Ассьым кесйӧгъясӧс — пророкъясӧс. Ме тшӧкті налы юӧртны тіянлы, мед ті энӧ вӧчӧй татшӧм пежсӧ, ӧд Ме мустӧмта татшӧмторсӧ.
Но ті энӧ кывзӧй да энӧ сибӧдӧй Менсьым кывъясӧс. Ті энӧ бергӧдчӧй асланыд лёк уджъясысь, энӧ дугдӧй сотны висьяс мукӧд енъяслы.
Та вӧсна киссис Менам скӧрлунӧй да ярлунӧй, кутіс ыпъявны иудаса каръясын да ерусалимса уличьяс вылын.
Ӧнӧдз тайӧ каръясыс — из чукӧр да овтӧмин.
Ӧні Господь Ен Саваоф, Израильлӧн Ен, тадзи висьталӧ: ті аслыныд паныд вӧчанныд тайӧ ыджыд лёкторсӧ — бырӧданныд Иуда войтырысь айуловӧс да аньясӧс, челядьӧс да пузчужӧм кагаясӧс. Тадзи тіян пӧвстысь некод ловйӧн оз коль. Ті дӧзмӧданныд Менӧ асланыд киӧн вӧчӧмторъясӧн. Ті сотанныд висьяс мукӧд енъяслы Египет муын, кытчӧ ті овмӧдчинныд. Тадзи ті асьнытӧ бырӧданныд. Мувывса став войтыръяс кутасны ёрны да лёкӧдны тіянӧс.
Ті ӧмӧй вунӧдінныд ассьыныд лёк вӧчӧмнытӧ, батьясныдлысь, иудаса ӧксыяслысь, налӧн да асланыд гӧтыръяслысь лёк вӧчӧмнысӧ — ставсӧ, мый вӧлі вӧчӧма Иуда муын да ерусалимса уличьяс вылын?
Ӧнӧдз ті энӧ раммӧдчӧй. Ті онӧ полӧй да онӧ олӧй Менам Индӧд да тшӧктӧмъяс серти, мый Ме сеті тіянлы да тіян батьяслы.
Та вӧсна Господь Саваоф, Израильлӧн Ен, тадзи висьталӧ: Ме бергӧда чужӧмӧс тіянлы лёк вылӧ да бырӧда став Иуда войтырсӧ. Ме бырӧда Иудалысь коляс войтырсӧ, кодъяс шуисны мунны Египет муӧ да овмӧдчисны сэтчӧ. 
Найӧ ставныс ичӧтсянь гырысьӧдз куласны сэні шыпуртысь да тшыглунысь. Найӧс пондасны ёрны да лёкӧдны-омӧльтны, найӧ лоӧны повзьӧдчанторйӧн.
Кыдзи шыпуртӧн, тшыглунӧн да пӧрӧс висьӧмӧн Ме мыжді Ерусалимын олысьясӧс, тадзи жӧ Ме мыжда найӧс, кодъяс овмӧдчисны Египет муӧ. Иудалӧн коляс войтыр пӧвстысь, кодъяс овмӧдчисны Египетӧ, некод оз мездмы, ловйӧн оз коль. Найӧ бӧр оз бергӧдчыны Иуда муӧ, кытчӧ ёна кӧсйӧны бӧр локны, медым овны сэні. Сӧмын некымын морт пышъясны Египетысь».
Айулов, кодъяс тӧдісны, мый налӧн гӧтыръясныс сотӧны висьяс мукӧд енъяслы, тшӧтш аньяс, кодъяс сулалісны сэні ыджыд чукӧрӧн, да Иуда войтырысь ставныс, кодъяс олісны Патросын, Египет муын, шуисны Еремейлы:
«Ми огӧ кывзӧй тэнсьыд кывъястӧ, мый тэ юӧртін миянлы Господь нимсянь.
Ми водзӧ кутам вӧчны ставсӧ, мый кӧсйысим енэжвывса ӧксы-аньлы. Ми кутам тшынӧдчыны да вайны сылы вина вись, кыдзи ми, миян батьясным, ӧксыясным да юралысьясным вӧчлім иудаса каръясын да ерусалимса уличьяс вылын. Сэки ми пӧттӧдз сёйим-юим, бура олім да шогсӧ эгӧ тӧдлӧй.
Но сійӧ кадсяньыс, кор ми дугдім тшынӧдчыны енэжвывса ӧксы-аньлы да вайны сылы вина вись, миян нинӧм абу, ми кулам шыпуртысь да тшыглунысь».
Аньяс шуисны: «Ми тшынӧдчам енэжвывса ӧксы-аньлы да ваям сылы вина вись. И миян верӧсъяс тӧдӧны, мый ми ваям енэжвывса ӧксы-аньлы вина вись да пӧжалам нянь, кӧні серпасалӧма сылысь мыгӧрсӧ».
Сэки Еремей шуис айуловлы да аньяслы — ставныслы, кодъяс пыксисны сылы:
«Эз-ӧ тіянӧс шогыс су сы вӧсна, мый ті, тіян батьясныд, ӧксыясныд, юралысьясныд да став войтырыс вайинныд висьяс иудаса каръясын да ерусалимса уличьяс вылын?
Господь тӧдӧ, мый ті вӧчинныд, и оз вунӧд.
Господь эз нин вермы терпитны тіянлысь лёк да зывӧк вӧчӧмнытӧ.
Та вӧсна тіян муныд лои овтӧминӧн да повзьӧдчанторйӧн, сійӧс ёрӧма, и ӧні олысьыс сэні абу.
Тайӧ шогыс суис тіянӧс, ӧд ті вайинныд висьяс мукӧд енъяслы, мыж вӧчинныд Господьлы паныд, энӧ кывзысьӧй Сылысь да энӧ олӧй Сылӧн индӧд-тшӧктӧмъяс серти».
Еремей шуис став войтырыслы, торъя нин аньяслы: «Кывзӧй Господьлысь кывсӧ, Египетын олысь Иуда войтыр!
Господь Саваоф, Израильлӧн Ен, тадзи висьталӧ: “Ті да тіян гӧтыръясныд вӧчинныд сійӧ, мый шуалінныд асланыд вомӧн.
Ті шуалінныд, ми пӧ вӧчам сійӧ, мый кыв сетӧмӧн кӧсйысим вӧчны, кутам пӧ тшынӧдчыны енэжвывса ӧксы-аньлы да вайны сылы вина вись. Сідзкӧ, вӧчӧй асланыд кыв сетӧм сертиныд, збыльмӧдӧй, мый кӧсйысинныд!
Египетын олысь Иуда войтыр, кывзӧй Господьлысь кывсӧ! Ме кыв сетӧмӧн кӧсйыся Аслам вына нимӧн, — висьталӧ Господь, — Египетын Иуда войтыр пӧвстысь некод оз нин кыв сет Господь Ыджыдыс водзын.
Ме кута сюся видзӧдны тіян бӧрся, но тайӧ лоӧ тіянлы лёк вылӧ, а оз бур вылӧ.
Египетын олысь Иуда войтыр кулас шыпуртысь да тшыглунысь, кытчӧдз ставнысӧ оз ло бырӧдӧма.
Сӧмын этшаӧн пышъясны шыпуртысь да бергӧдчасны Египетысь Иуда муӧ. Сэки Египетӧ овмӧдчӧм Иуда войтырлӧн колясыс тӧдмалас, кодлӧн кывйыс инӧ: Менам али налӧн.
Ме петкӧдла тіянлы индысьпас, мый Ме мыжда тіянӧс тайӧ муас, — висьталӧ Господь. — Ті тӧдмаланныд, мый тіян йылысь Менам кывъясӧй инасны. Тіянӧс суас шог”.
Господь тадзи висьталӧ: “Ме сеті иудаса Седекей ӧксыӧс вавилонса Навукодоносор ӧксы киӧ, сеті вӧрӧглы, коді корсис босьтны сылысь олӧмсӧ. Тадзи жӧ Ме сета Хофра фараонӧс, египетса ӧксыӧс, вӧрӧг киӧ, сійӧ йӧзыслы, кодъяс корсьӧны босьтны сылысь олӧмсӧ”».
Иудаса Ехояким ӧксылӧн, Иосей пилӧн, нёльӧд веськӧдлан воӧ, кор Нирийлӧн Барук пиыс гижис Еремей пророклӧн висьталӧм серти кывъяссӧ гижӧд тубрасӧ, Еремей шуис:
«Господь, Израильлӧн Ен, тадзи висьталӧ тэныд, Барук:
”Тэ шуан, меным пӧ курыд шог, ӧд Господь содтіс менам висьӧм дінӧ шог, и аслам ойзӧмысь пӧ мудзи нин, ог аддзы шойччӧгсӧ”.
Но Господь тшӧктіс меным юӧртны тэныд, мый Сійӧ тадзи висьталӧ: “Мый Ме лэпті, жугӧда, и мый Ме вужйӧді, нетшка. Вӧча тайӧс став му пасьталаыс.
Тэ коран аслыд унатор. Дугды корнытӧ, ӧд Ме мӧдӧда шог став йӧзыслы, — висьталӧ Господь, — но тэнсьыд олӧмтӧ Ме видза быдлаын, кытчӧ тэ мунан”».
Еремей пророклы вӧлі мукӧд войтыръяс йылысь Господьсянь кыв.
Иудаса Ехояким ӧксылӧн, Иосей пилӧн, нёльӧд веськӧдлан воӧ, кор вавилонса Навукодоносор ӧксы пасьвартіс египетса Неко фараонлысь тышкайӧзсӧ Каркемисын, Ефрат ю дорын, Еремейлы вӧлі Египет йылысь да египетса тышкайӧз йылысь Господьсянь кыв:
— Дасьтӧй ичӧт и ыджыд сайӧдъяс, петӧй тышӧ!
Доддялӧй вӧвъяснытӧ, сӧлӧй тарантасӧ! Пасьталӧй юртупкӧднытӧ, ёсьтӧй шынытӧ, пасьталӧй кӧрт кышӧднытӧ!
Но мый Ме аддза? Найӧ повзьӧмаӧсь, бӧр бергӧдчӧны, налысь вына шыпуртаяссӧ пасьвартӧмаӧсь. Найӧ пышйӧны, бӧрлань оз видзӧдны, найӧс быд боксянь повзьӧдлӧны, — висьталӧ Господь. — Тэрыб кока оз вермы пышйыны, вына морт оз мездмы.
Войвылын, Ефрат ю дорын, найӧ крукасясны да усясны.
Коді нӧ Нил ю моз кыпӧдчӧ, ызгысь ва моз кыпӧдчӧ?
Египет кыпӧдчӧ Нил ю моз, ызгӧ визув ва моз. Сійӧ шуӧ: «Ме кыпӧдча да вевття мусӧ, Ме бырӧда каръяс да сэні олысьяссӧ».
Рӧдтӧй, вӧвъяс, тӧвзьӧй, тарантасъяс! Петӧй тышӧ, вына шыпуртаяс, петӧй сайӧдъясӧн, эфиопияса да ливияса тышкайӧз, петӧй зэвтӧм ньӧввужъясӧн, лудса тышкайӧз!
Тайӧ луныс — Господьлӧн лун, Господь Саваофлӧн водзӧс перъян лун.
Сійӧ мынтысяс Аслас вӧрӧглы, Сылӧн шыпуртыс пондас виавны — пӧттӧдзыс юас налысь вирсӧ.
Ӧд войвыв муын, Ефрат ю дорын, тайӧ вир кисьтӧмыс лоӧ вись вайӧм Ыджыдыслы, Господь Саваофлы.
Египет ныв, мун Галаадӧ, вай сэтысь бурдӧдчан вый.
Но весьшӧрӧ тэ дасьтан бурдӧдчанторъяс, тэнад дойыд оз бурд.
Тэнӧ янӧдӧм йылысь кылісны войтыръяс, тэнад горзӧмыд тыртіс ставнас мусӧ.
Тэнад вына тышкайӧзыд крукасисны ӧта-мӧдас, ставныс ӧтлаын усисны.
Господь висьталіс Еремей пророклы, мый вавилонса Навукодоносор ӧксы локтас да пазӧдас Египет му.
— Висьталӧй Египетын, юӧртӧй Мигдолын, Мемфисын и Тафнисын, тшӧктӧй египетсаяслы чеччыны да дасьтысьны, ӧд шыпурт бырӧдӧ на гӧгӧрысь ставсӧ.
Египет, тэнад вына ыджыдалысьыд усьӧма, ӧд Господь уськӧдіс сійӧс.
Господь унаӧс уськӧдіс, найӧ усьласисны ӧта-мӧд выланыс да шуалісны: «Чеччӧй, бӧр бергӧдчамӧй ас войтыр дінӧ, мунам асланым чужан муӧ, пышъям дзескӧдысьлӧн шыпуртысь».
Фараон йылысь горзӧны: «Фараон, египетса ӧксы, нинӧм абусӧ больгӧ, сійӧ воштіс сылы индӧм кадсӧ».
Ме кыв сета, — висьталӧ Ӧксы, кодлӧн нимыс Господь Саваоф, — мый локтас вӧрӧг, коді керӧсъяс пӧвстын сулалысь Тавор керӧс кодь, саридз весьтын сулалысь Кармил керӧс кодь.
Чукӧрт ассьыд кӧлуйтӧ, Египет ныв, дасьтысьӧй мунны пленӧ, Египетын олысьяс! Ӧд Мемфис лоӧ овтӧминӧн, сэні оз коль олысьыс.
Египет — мичасьыс-мича кукань, войвывсянь лэбзьӧ сыланьӧ лӧдз чукӧр.
Египетлӧн медалӧм тышкайӧзыс тшӧгӧдӧм ӧшпиян кодьӧсь, но весиг найӧ уськӧдчисны пышйыны. Найӧ котӧртӧны, оз сувтлыны, ӧд воис найӧс бырӧдан луныс, воис найӧс мыждан кадыс.
Змей моз чушкӧ Египет, вына вӧрӧг уськӧдчӧ Египет вылӧ, вӧр пӧрӧдысь моз локтӧ черъясӧн.
Вӧрӧг пӧрӧдас Египетлысь сук вӧрсӧ, — висьталӧ Господь.
— Вӧрӧглӧн лыдыс саранча дорысь на унджык, сылысь тышкайӧзсӧ он вермы лыддьынысӧ.
Египет нылӧс лоӧ янӧдӧма, сійӧс лоӧ сетӧма войвывса войтырлӧн киӧ.
Господь Саваоф, Израильлӧн Ен, висьталӧ: Ме мыжда Но карлысь Амон идолсӧ, фараонӧс, Египет му, сылысь енъяссӧ да ӧксыяссӧ. Ме мыжда фараонӧс да сы вылӧ лача кутысьясӧс.
Найӧс Ме сета налысь олӧмсӧ босьтны кӧсйысьяслӧн киӧ, сета вавилонса Навукодоносор ӧксы киӧ да сылы кесъялысьяслӧн киӧ.
Но та бӧрти Египетын воддза мозыс бара кутасны овны, — висьталӧ Господь.
— Эн пов, Менам Яков кесйӧгӧй, эн пов, Израиль! Ме вайӧда тэнӧ ылі муысь, мезда тэсянь чужысьясӧс пленысь.
Яковлӧн рӧдыс бӧр локтас, сійӧ кутас овны лӧня да повтӧг, сійӧс некод оз кут повзьӧдлыны.
Эн пов, Менам Яков кесйӧгӧй, — висьталӧ Господь, — Ме тэкӧд!
Ме бырӧда став войтыръяссӧ, кодъяс пӧвстӧ разӧді тэнӧ. Тэнӧ Ме ог бырӧд, но мыжда тэнӧ веськыдлунӧй серти, мыждытӧг тэнӧ ог коль.
Сыӧдз, кор фараон эз на пазӧд Газа кар, филистимсаяс йылысь Еремей пророклы вӧлі Господьсянь кыв:
— Господь тадзи висьталӧ: Войвывсянь бузгӧ-кыпӧдчӧ ва, сійӧ лоӧ ытва кодь, сійӧ ойдӧдас мусӧ да ставсӧ, мый сэні эм, ойдӧдас каръяс да сэні олысьяссӧ.
Филистим муын олысьяс кутасны горзыны, ставныс кутасны сыркъявны-бӧрдны.
Вӧвъяслӧн рӧдтӧм шыысь, тарантасъяслӧн гольгӧмысь, гӧгыльяслӧн гора шыысь батьяс весьӧпӧрасны, найӧ дугдасны тӧждысьны асланыс челядь вӧсна. Воас лун, кор Филистимын олысьясӧс лоӧ бырӧдӧма, Тирлысь да Сидонлысь кольӧм отсасьысьяссӧ лоӧ босьтӧма. Господь бырӧдас филистимсаясӧс, Кафтор ді вылысь локтӧм войтырлысь коляссӧ.
Газа шырас ассьыс юрсисӧ, Аскалонын олысьясӧс лоӧ бырӧдӧма, лоӧ бырӧдӧма енак войтырлысь коляссӧ.
Дыр-ӧ на ті кутанныд пуртӧн вундавны вир-яйнытӧ? — Господьлӧн шыпуртыс, кор нин тэ ӧвсян?
Бӧр бергӧдчы пуртӧсад, лӧнь да шойччы.
Но тэ он вермы ӧвсьынытӧ, ӧд Господь тшӧктіс тэныд сувтны Аскалон карлы паныд да саридз дорын олысьяслы паныд.
Господь Саваоф, Израильлӧн Ен, Моав йылысь тадзи висьталӧ: — Курыд шог Неволы, сійӧс куштӧма-пазӧдӧма!
Киръятаимӧс янӧдӧма, сійӧс кытшалӧма-босьтӧма, сылысь изкарсӧ янӧдӧма, жугӧдӧма-пазӧдӧма.
Моавӧс оз нин нимӧдны, Хешбонын вӧрӧг дасьтысьӧ Моавлы лёк вӧчны, шуалӧ, мунам пӧ бырӧдны сійӧс войтыръяс пӧвстысь.
Мадмен, тэ кутан чӧв овны, ӧд шыпурт суас тэнӧ.
Хоронаимсянь кылӧ бӧрдӧм шы, сійӧс куштӧны-бырӧдӧны.
Моавӧс пазӧдӧма, сэтысь кылӧ челядьлӧн бӧрдӧм.
Моавсаяс бӧрдӧмӧн кайӧны Лухит керӧсӧ, Хоронаимсянь лэччӧны ойзӧмӧн, бырӧдӧм вӧсна ойзӧм кылӧ.
Пышйӧй, видзӧй олӧмнытӧ, лоӧй овтӧминын быдмысь тусяпу кодьӧсь.
Моав, тэ лача кутін уджъясыд да озырлуныд вылӧ, та вӧсна вӧрӧг кытшалас-босьтас тэнӧ. Кемош идолӧс нуӧдасны пленӧ, тшӧтш сылы кесъялысь попъясӧс да юралысьясӧс.
Вӧрӧг локтас да бырӧдас моавса каръяс, ни ӧти кар оз мездмы.
Ковтыссӧ лоӧ бырӧдӧма, вывтасінсӧ лоӧ куштӧма, — тадзи висьталіс Господь.
Сетӧй Моавлы бордъяс, медым вермис лэбзьыны.
Сылӧн каръясыс лоӧны овтӧминӧн, сэні оз коль олысьыс.
Ёрӧма быдӧнӧс, коді дышпырысь кесъялӧ-уджалӧ Господьлы. Ёрӧма быдӧнӧс, коді падмӧдӧ Господьлысь шыпуртсӧ вир кисьтӧмысь.
Том кадсяньыс Моав оліс лӧня, вина моз сулаліс аслас дозйын, дозйысь дозйӧ сійӧс эз кисьтлыны, пленӧ эз нуӧдлыны.
Та вӧсна сылӧн кӧрыс эз вежсьыв, сысянь ӧвтіс пыр ӧтмоза.
Воасны лунъяс, — висьталӧ Господь, — кор Ме мӧдӧда Моав дінӧ вина кисьталысьясӧс. Винаӧс моз найӧ кисьтасны сійӧс, ректасны да жугӧдасны сылысь дозъяссӧ.
Моав яналас Кемош идол вӧсна, кыдзи Израиль яналіс Вефиль вӧсна, мый вылӧ лачасӧ кутіс.
Ті шуанныд: «Ми вына тышкайӧз, дасьӧсь петны тышӧ!»
Моавӧс лоӧ пазӧдӧма, сылысь каръяссӧ бырӧдасны, медбур зонъяссӧ начкасны, — висьталӧ Ӧксы, кодлӧн нимыс Господь Саваоф. — Моавӧс регыд лоӧ бырӧдӧма, шогыс ёна тэрмасьӧ сы дінӧ.
Бӧрдӧй Моав вӧсна, орччӧн олысьяс, бӧрдӧй ставныд, кодъяс тӧданныд сійӧс! Шуӧй: «Сылысь вына юралан бедьсӧ чегӧма, сылысь нималана бедьсӧ жугӧдӧма!»
Дивонын олысьяс, лэччӧй нималана пукаланінсьыныд, пуксьӧй косьмӧм му вылӧ, ӧд Моавӧс пазӧдысь уськӧдчас тіян вылӧ да бырӧдас изкаръяснытӧ.
Ароэрын олысьяс, сулалӧй туй бокын да видзӧдӧй, юалӧй пышйысьяслысь да ловйӧн кольӧмаяслысь, мый лои.
Моавӧс пазӧдӧма да янӧдӧма.
Сыркъялӧмӧн бӧрдӧй, юӧртӧй Арнон ю бокын, мый Моавӧс пазӧдӧма-куштӧма.
Мыждӧмыс суис вывтасінын сулалысь Холон, Яхац да Мефат каръясӧс, Дивон, Нево да Бет-Дивлатаим каръясӧс, Киръятаим, Бет-Гамул да Бет-Меон каръясӧс, Кериот да Восора каръясӧс, тшӧтш Моав муын сулалысь мукӧд каръясӧс — став матысса и ылысса карсӧ.
Моавлысь сюрсӧ керыштӧма, сылысь кисӧ чегӧма, — висьталӧ Господь.
Юктӧдӧй Моавӧс коддзытӧдзыс, ӧд сійӧ кыпӧдчис Господьлы паныд.
Мед сійӧ туплясяс аслас вос пытшкын, мед ачыс лоӧ серамтуйын.
Моав, эн-ӧ тэ серав Израиль вылын?
Тэ ӧд сійӧс эн кут гусясьысьяс пӧвстысь, но сы йылысь сёрнитігӧн юрнад довкйӧдлан.
Моавын олысьяс, эновтӧй ассьыныд каръяснытӧ, олӧй изкыртаясын, гулюяс моз вӧчӧй познытӧ кырта горсъясӧ.
Ми кывлім Моавлӧн вылӧ кыпӧдчӧм йылысь — сійӧ этш тӧдтӧг ышнясьӧ! Ми тӧдам сылысь тшаплунсӧ да вывтіасьӧмсӧ, тӧдам сылысь ыкша сьӧлӧмсӧ.
— Ме тӧда Моавлысь вывтіасьӧмсӧ, — висьталӧ Господь.
— Сылӧн ошйысьӧмыс больгӧм кодь, сылӧн уджъясыс нинӧм кодьӧсь.
Та вӧсна Ме бӧрда Моав вӧсна, сыркъялӧмӧн бӧрда моавса войтыр вӧсна, шогсьӧмӧн горза Кир-Харешетын олысьяс вӧсна.
Сивмаса виноград, Ме бӧрда тэ вӧсна, кыдзи Ме бӧрді Язер кар вӧсна.
Тэнад вожъясыд нюжалісны саридз сайӧдз, паськалісны Язер саридзӧдз.
Но бырӧдысь уськӧдчис, нетшкис тэнсьыд яблӧг-грушатӧ да виноградтӧ.
— Моавын, бур вотӧса му вылын, оз нин гажӧдчыны-нимкодясьны.
Ме пукті пом пычкан гуын виноград вотӧс талялӧмлы, сэні оз нин сьывны, кылӧ горзӧм, а оз нимкодясьӧм.
Хешбонсянь Элялеӧдз бӧрдӧны моавсаяс, бӧрдӧм шыыс кылӧ Яхацӧдз, Цоарсянь Хоронаимӧдз да Эглат-Шелишияӧдз кылӧ горзӧм шы, ӧд весиг Нимрим юысь ваыс бырас.
Ме бырӧда моавсаясӧс, кодъяс вись вайӧны мылькъяс вылын да тшынӧдчӧны асланыс енъяслы, — висьталӧ Господь.
— Та вӧсна менам сьӧлӧмӧй пӧлян моз бӧрдӧ Моав вӧсна, бӧрдӧ Кир-Харешетын олысьяс вӧсна, ӧд налӧн чукӧртӧм озырлунныс бырис.
Найӧ шырӧмаӧсь юрнысӧ, бритӧмаӧсь тошнысӧ, налӧн ки выланыс пуртӧн вундӧм туйяс, найӧ пасьтасьӧмаӧсь шогалан паськӧмӧ.
Моавын став керка вевт вывсянь, изэрдъяс вывсянь кылӧ бӧрдӧм шы. — Ме пасьварті Моавӧс ковтӧм дозйӧс моз, — висьталӧ Господь. — Моав вӧсна бӧрдӧны, ӧд сійӧс торпыригӧдз жугӧдӧма, сійӧ пышйӧма, сійӧс янӧдӧма.
Моав лоӧ серамтуйын, лоӧ повзьӧдчанторйӧн став орччӧн олысьыслы. Господь тадзи висьталӧ: — Кутш моз вӧрӧг уськӧдчас Моав вылӧ, шевкнитас бордъяссӧ сы весьтын.
Моавса каръясӧс лоӧ босьтӧма, изкаръясӧс — пасьвартӧма. Сійӧ лунӧ моавса тышкайӧзлӧн сьӧлӧмныс лоӧ кага чужтысь аньлӧн кодь.
Моав войтырӧс лоӧ бырӧдӧма, ӧд сійӧ кыпӧдчис Господьлы паныд.
Моавса войтыр, тэнӧ виччысьӧ повзьӧдлӧм, виччысьӧ гу да нальк, — висьталӧ Господь. — Коді пышъяс повзьӧдлӧмысь, сійӧ гуӧ усяс, коді петас гусьыс, сійӧ налькйӧ веськалас. Ме мӧдӧда Моавлы сійӧс мыждан во, — висьталӧ Господь.
Хешбон карлӧн вуджӧр улӧ сувтісны вынтӧм пышйысьяс, но Хешбонысь петіс би, Сигон ӧксылӧн керкаысь — яр би, сійӧ сотіс Моавлысь боксӧ, вылӧ кыпӧдчысьяслысь юрпыдӧссӧ.
Курыд шог тэныд, Моав, Кемош идоллӧн войтырлы воис пом, тэнсьыд ныв-питӧ босьтӧма пленӧ.
Но бӧръя лунъясӧ Ме бергӧда моав войтырӧс пленысь, — висьталӧ Господь.
Та вылын помасьӧ Моавӧс мыждӧм.
Аммон войтыр йылысь Господь тадзи висьталӧ: — Израильлӧн ӧмӧй абу пияныс, сылӧн ӧмӧй абу пиыс, кодлы овмӧсыс вуджас?
Мыйла нӧ Милком идол босьтіс Гад мусӧ, мыйла нӧ сылы юрбитысь войтыр овмӧдчис сэтчӧс каръясӧ?
Воасны лунъяс, — висьталӧ Господь, — кор Ме чукӧста йӧзӧс тышӧ петны аммон войтырлӧн Равва карлы паныд. Сэки Равва кар лоӧ из чукӧрӧн, сыгӧгӧрса сиктъяссӧ биӧн сотасны. Израиль бӧр бергӧдас аслыс мусӧ, мый сылысь босьтісны, — висьталӧ Господь.
Сыркъялӧмӧн бӧрд, Хешбон, ӧд Гай карӧс куштӧма-пазӧдӧма.
Гораа горзӧй, Равва карса нывъяс, пасьталӧй шогалан паськӧм, бӧрдӧй да шӧйтӧй-ветлӧдлӧй йӧр пӧлӧн, ӧд Милком идолӧс нуӧдасны пленӧ, тшӧтш сылы кесъялысь попъясӧс да юралысьясӧс.
Мыйла ті ошйысянныд асланыд ковтысъясӧн?
Эскытӧм войтыр, тіян ковтысын пондас киссьыны вир. Ті лача кутанныд асланыд озырлун вылӧ, шуаланныд, некод пӧ оз уськӧдчы миян вылӧ.
Со, Ме мӧдӧда тіян вылӧ быд боксянь повзьӧдлӧм, — висьталӧ Ыджыдыс, Господь Саваоф.
— Тіянӧс вӧтласны, ті пышъянныд, и некод оз чукӧрт тіянӧс.
Но бӧрынджык Ме бӧр бергӧда пленысь аммон войтырӧс, — висьталӧ Господь.
Эдом войтыр йылысь Господь Саваоф тадзи висьталӧ: — Теманын ӧмӧй абу мывкыдлуныс?
Вежӧра йӧз ӧмӧй оз вермыны туйдӧдны?
Найӧ ӧмӧй воштісны мывкыдлунсӧ?
Деданын олысьяс, бӧр бергӧдчӧй, пышйӧй, дзебсьӧй изкыртаӧ, ӧд Ме мӧдӧда Исавсянь чужысьяслы бырӧдӧм, инда найӧс мыждан кад.
Эдом, тэ дінӧ кӧ локтісны виноград чукӧртысьяс, найӧ эськӧ колисны мыйтакӧ вотӧс.
Войнас кӧ локтісны гусясьысьяс, найӧ эськӧ гусялісны мыйта налы колӧ.
Но Ме дзикӧдз кушта тіянӧс, Исавсянь чужысьяс, восьта гусяинъяснытӧ, и ті онӧ вермӧй дзебсьыны.
Челядьнытӧ да рӧдвужнытӧ лоӧ бырӧдӧма, весиг орччӧн олысьыс оз ло.
Кольӧй ассьыныд батьтӧм челядьнытӧ, Ме видза налысь олӧмсӧ, дӧваясныд мед лача кутасны Ме вылӧ.
Господь тадзи висьталӧ: «Тайӧ чашасьыс кутасны юны весиг найӧ, кодъясӧс абу мыждӧма сэтысь юны. Эдом, тэ ӧмӧй мыждытӧг колян?
Он коль, тэныд ковмас юны тайӧ чашасьыс.
Ме Ачым кыв сетӧмӧн шуа, — висьталӧ Господь, — мый Восора кар лоӧ повзьӧдчанторйӧн да овтӧминӧн, сійӧс кутасны ёрны да лёкӧдны. Сыгӧгӧрса сиктъясыс пыр кежлӧ лоӧны овтӧминӧн».
— Ме кывлі Господьсянь, мый войтыръяс дінӧ мӧдӧдӧма юӧртысьӧс, сійӧс мӧдӧдӧма шуны: «Чукӧртчӧй, петӧй тышӧ, уськӧдчӧй Эдом вылӧ!»
— Эдом, Ме вӧча тэнӧ войтыръяс пӧвстын медічӧтӧн, йӧз пӧвстын мустӧмӧн.
Скӧрлуныд да вылӧ кыпӧдчӧмыд ылӧдлісны тэнӧ. Изкарын моз тэ олан джуджыд керӧсъяс вылын.
Но тэ кӧ кутш моз овмӧдчан-поздысян выліинӧ, весиг сэтысь Ме шыбита тэнӧ, — висьталӧ Господь.
Эдом лоӧ повзьӧдчанторйӧн.
Сійӧс бырӧдӧмысь сы дорті мунысьясӧс полӧм босьтас.
Кыдзи бырӧдӧма Содом, Гомора да орчча каръяссӧ, — висьталӧ Господь, — тадзи жӧ Эдомын оз ло олысьыс, сэтчӧ некод оз овмӧдчы.
Йӧрдан юдорса вӧрысь веж йирсянінӧ петысь лев моз Ме виччысьтӧг вӧтла эдомсаясӧс асланыс муысь.
Ме пукта налы юралысьӧ сійӧс, кодӧс Ме бӧръя.
Эм-ӧ кодкӧ Ме кодьыс?
Коді вермас тшӧктыны Менӧ вочавидзны ёрд водзын?
Сюрас ӧмӧй сэтшӧм юралысь, коді вермас Меным паныд кыпӧдчыны?
Кывзӧй, мый Господь шуис Эдом йылысь, мый шуис вӧчны Теманын олысьяслы. Весиг налысь медічӧтъяссӧ пышйӧдасны, налысь оланінъяссӧ куштасны.
Эдомӧс лоӧ путкыльтӧма, сылӧн усьӧмысь муыс сыркмунлас, Гӧрд саридзӧдз воас эдомсаяслӧн горзӧм шыныс.
Кутш моз вӧрӧг уськӧдчас Восора кар вылӧ, шевкнитас бордъяссӧ сы весьтын.
Сійӧ лунӧ эдомса тышкайӧзлӧн сьӧлӧмныс лоӧ кага чужтысь аньлӧн кодь.
Дамаск йылысь.
— Хамат да Арпад каръясын олысьяс шӧйӧвошӧмаӧсь лёк юӧр кылӧмысь, полӧмнысла найӧ саридз моз шызьӧмаӧсь, оз вермыны лӧньнысӧ.
Дамаскын олысьяс вынтӧммисны, уськӧдчисны пышйыны, найӧс полӧм босьтіс.
Кага чужтысь аньӧс моз найӧс топӧдісны сьӧкыдалӧм да дойяс.
Эновтӧма нималана карӧс, мыйӧн ме нимкодяси.
— Дамаск карлӧн изэрдъяс вылын усясны зонъяс, сійӧ лунӧ став тышкайӧзсӧ лоӧ виӧма, — висьталӧ Господь Саваоф. — Дамаск карлысь стенъяссӧ Ме сота, Бен-Хададлысь изкарсӧ би ньылыштас.
Кедарлӧн рӧд йылысь да хацорса войтыръяс йылысь, кодъясӧс пасьвартіс вавилонса Навукодоносор ӧксы, Господь тадзи висьталӧ: — Чеччӧй, тышӧ петӧй Кедарлы паныд, бырӧдӧй асыввывса олысьясӧс.
Налысь чомъяссӧ, чом дӧраяссӧ да эмбурсӧ мырддясны, ыжъяссӧ да верблюдъяссӧ босьтасны налысь. Налы пондасны горзыны, найӧс пондасны повзьӧдлыны быд боксянь.
Хацорын олысьяс, пышйӧй ӧдйӧджык, дзебсьӧй изкыртаӧ, — висьталӧ Господь. — Ӧд вавилонса Навукодоносор ӧксы мӧвпалӧ тіянлы лёк вӧчны.
Вавилонсаяс, чеччӧй, тышӧ петӧй Хацорын олысьяслы паныд, кодъяс олӧны лӧня да повтӧг, — висьталӧ Господь.
— Налӧн абу дзиръяяс, абу иганъяс, найӧ олӧны мукӧдысь торйӧн.
Налысь верблюдъяссӧ мырддясны, уна лыда ыж-мӧссӧ босьтасны.
Ме разӧда разі-пели тайӧ йӧзсӧ, кодъяс шырӧны юрсинысӧ пель боксьыныс, мӧдӧда налы быдласянь шог, — висьталӧ Господь. — Хацор лоӧ шакалъяслы оланінӧн, пыр кежлӧ овтӧминӧн, сэні оз ло олысьыс, сэтчӧ некод оз овмӧдчы.
Кор Иуда муын ӧксыӧ пуксис Седекей, Еремей пророклы вӧлі Элам му йылысь Господьсянь кыв:
— Господь Саваоф тадзи висьталӧ: Ме чегъяла Эламлысь ньӧввужсӧ — сылысь медыджыд вынсӧ.
Енэжлӧн нёльнан пельӧссянь Ме мӧдӧда Элам вылӧ нёль тӧвныр да разӧда эламсаясӧс. Оз сюр сэтшӧм войтыр, код пӧвстӧ оз локны Эламысь вӧтлӧмаяс.
Ме шӧйӧвошта эламсаясӧс налӧн вӧрӧг водзын, коді кӧсйӧ босьтны налысь олӧмсӧ.
Ме мӧдӧда на вылӧ шог, кисьта на вылӧ Ассьым яр скӧрлунӧс, — висьталӧ Господь. — Ме вӧтла найӧс шыпуртӧн, дзикӧдз бырӧда найӧс.
Эламӧ Ме сувтӧда Ассьым юралан пуклӧсӧс, бырӧда сэтысь ӧксысӧ да юралысьяссӧ, — висьталӧ Господь.
Но бӧръя лунъясӧ Ме бергӧда эламсаясӧс пленысь, — висьталӧ Господь.
Господь висьталіс Еремей пророк пыр Вавилон кар да Калдея му йылысь татшӧм кыв:
— Юӧртӧй войтыръяслы, кыпӧдӧй дӧрапас, юӧртӧй, энӧ дзебӧй, висьталӧй тадзи: Вавилон карӧс босьтӧма, Вил идолӧс янӧдӧма, Мардук идолӧс пасьвартӧма, вавилонса идолъясӧс янӧдӧма, сылысь бӧлбанъяссӧ жугӧдӧма.
Войвывсянь Вавилон вылӧ уськӧдчас войтыр, вӧчас Вавилон му овтӧминӧн. Некод оз кут овны сэні, йӧз и ыж-мӧс пышъясны сэтысь.
Сійӧ лунъясас, сійӧ кадас, — висьталӧ Господь, — локтасны Израиль да Иуда войтыръяс. Найӧ мунасны бӧрдӧмӧн, кутасны корсьны Господьӧс, ассьыныс Енсӧ.
Найӧ пондасны корсьны Сионӧ мунан туй, сылань чужӧмнысӧ бергӧдӧмӧн найӧ шуасны: «Мунамӧй Господь дінӧ, огӧ вунӧдӧй пыр кежлӧ кӧрталӧм йитӧдсӧ».
Менам войтырӧй вӧлі вошӧм ыж чукӧр кодь, видзысьясныс кежӧдісны найӧс туйсьыс, разӧдісны керӧсвыв му пасьтала.
Найӧ шӧйтісны-ветлӧдлісны керӧсъяс да ыбъяс вывті, вунӧдісны ассьыныс оланінсӧ.
Накӧд паныдасьысьяс уськӧдчывлісны на вылӧ, найӧс мустӧмтысьяс шуавлісны, ми пӧ абу мыжаӧсь, ӧд найӧ мыж вӧчисны веськыдлуныслӧн оланінлы паныд да Господьлы паныд, код вылӧ батьясныс лача кутісны.
Пышйӧй Вавилонысь, мунӧй Калдея муысь, кӧзаяс моз мунӧй ыж чукӧр водзын.
Войвыв муысь Ме вайӧда уна лыда войтыръясӧс, и найӧ кытшаласны да босьтасны Вавилон.
Найӧ бура лыйсьӧны ньӧввужйысь, налӧн ньӧвъясыс веськалӧны коланаинӧ.
Калдея муӧс лоӧ куштӧма, и сійӧс куштысьяс пӧтасны, — висьталӧ Господь.
Ті, Менсьым войтырӧс куштысьяс, гажӧдчинныд-нимкодясинныд, видз вылӧ лэдзӧм кукань моз ризъялінныд, тышӧ петысь вӧв моз корскинныд.
Но тіян мамныд ёна яналас, тіянӧс чужтысьлы юръяндзим лоӧ.
Войтыръяс пӧвстын вавилонсаяс лоӧны медічӧт войтырӧн, налӧн муыс лоӧ овтӧмин, кушин да кос му.
Господьлӧн скӧралӧм вӧсна сэні оз ло олысьыс, сійӧ лоӧ овтӧминӧн.
Вавилонӧс бырӧдӧмысь сы дорті мунысьясӧс полӧм босьтас.
Кытшалӧй Вавилон кар, ньӧввужйысь лыйсьысьяс, лыйлӧй сэтчӧ, энӧ жалитӧй ньӧвъяснытӧ, ӧд Вавилон мыж вӧчис Господьлы паныд.
Быд боксянь горзӧмӧн уськӧдчӧй Вавилон вылӧ!
Вавилон сетчӧ, башняясыс усьӧны, стенъяссӧ жуглӧны, ӧд Господь водзӧс перйӧ сылысь.
Водзӧс перйӧй!
Вӧчӧй сылы сійӧ жӧ, мый сійӧ вӧчис.
Бырӧдӧй Вавилонысь нянь кӧдзысьясӧс, бырӧдӧй чарлаӧн вундысьясӧс.
Дзескӧдысьлӧн шыпуртысь быдӧн мед бергӧдчас аслас войтыр дінӧ, пышъяс аслас муӧ.
Израиль войтыр разалӧм ыж чукӧр кодь, левъяс вӧтлісны сійӧс.
Водзынджык сійӧс вильӧдіс ассурса ӧксы, сэсся вавилонса Навукодоносор ӧксы чегъяліс сылысь лыяссӧ.
Та вӧсна Господь Саваоф, Израильлӧн Ен, тадзи висьталӧ: Ассурса ӧксыӧс моз Ме мыжда вавилонса ӧксыӧс да сылысь мусӧ.
Израиль войтырӧс Ме бӧр бергӧда аслас йирсянінӧ, сійӧ пондас йирсьыны Кармил да Васан ыбъяс вылын, кутас пӧткӧдчыны Ефрем да Галаад керӧсвыв муясын.
Сійӧ лунъясас, сійӧ кадас, — висьталӧ Господь, — кутасны корсьны Израиль войтырлысь лёк вӧчӧмъяссӧ, но весьшӧрӧ, кутасны корсьны Иуда войтырлысь мыжъяссӧ, но оз аддзыны, ӧд Ме прӧстита найӧс, кодъясӧс ловйӧн коля.
Тышӧ петӧй Мератаим мулы паныд, Пекодын олысьяслы паныд, виӧй найӧс, бырӧдӧй ставсӧ, мый на бӧрти коляс, — висьталӧ Господь. — Ставсӧ вӧчӧй Менам тшӧктӧм серти.
Тайӧ муас кылӧ тышлӧн шы, ставсӧ жуглӧны-пазйӧны.
Став мусӧ пазӧдысь мӧлӧтӧс жугӧдӧма-чегӧма!
Вавилон лои повзьӧдчанторйӧн войтыръяс пӧвстын.
Ме пукті тэныд нальк, Вавилон, и тэ тӧдлытӧг шедін сэтчӧ.
Тэнӧ аддзисны да кутісны, ӧд тэ кыпӧдчин Господьлы паныд.
Ыджыдыс, Господь Саваоф, восьтіс Ассьыс видзанінъяссӧ, босьтіс сэтысь Ассьыс скӧрлуна тышкасянторъяссӧ, медым Калдея муын вӧчны Ассьыс уджсӧ.
Уськӧдчӧй Калдея му вылӧ быд боксянь, восьтӧй сылысь амбаръяссӧ, босьтӧй сэтысь ставсӧ да чукӧртӧй кольтаясӧс моз, дзикӧдз бырӧдӧй ставсӧ, медым нинӧм эз коль.
Виӧй вавилонса тышкайӧзӧс, ӧшъясӧс моз начкӧй найӧс.
Курыд шог вавилонсаяслы, ӧд воис налӧн луныс, найӧс мыждан кадыс.
Кылӧ пышйӧмаяслӧн гӧлӧс шыныс, найӧ мездмӧмаӧсь Вавилонысь. Сионын найӧ висьталӧны, мый Господь, миян Енным, водзӧс перйис Аслас крамыс вӧсна.
Чуксалӧй Вавилонлы паныд ньӧввужйӧн лыйсьысьясӧс, кытшалӧй Вавилон кар, медым некод эз пышйы сэтысь.
Мынтысьӧй сылы уджъясыс серти, вӧчӧй сыкӧд сідзи, кыдзи сійӧ вӧчис. Ӧд сійӧ кыпӧдчис Господьлы паныд, Израильлӧн вежа Енлы паныд.
Сылӧн изэрдъяс вылын усясны зонъяс, сійӧ лунӧ сылысь тышкайӧзсӧ лоӧ виӧма, — висьталӧ Господь.
Ышнясьысь, Ме сувта тэныд паныд, — висьталӧ Ыджыдыс, Господь Саваоф, — воис тэнад луныд, тэнӧ мыждан кадыд.
Ышнясьысь крукасяс да усяс, некод оз лэпты сійӧс.
Сылысь каръяссӧ Ме сота, на гӧгӧрысь ставсӧ би ньылыштас.
Господь Саваоф тадзи висьталӧ: — Израиль да Иуда войтыръясӧс дзескӧдӧны, пленӧ нуӧдысьяс чорыда чабыртӧмаӧсь найӧс, оз кӧсйыны лэдзны.
Но найӧс Мездысьыс вына, Сылӧн нимыс — Господь Саваоф.
Сійӧ доръяс найӧс да налӧн мулы сетас лӧньлун, а Вавилонын олысьяслы ыстас полӧм-тіралӧм.
Калдея войтыр весьтӧ кыпӧдӧма шыпурт, — висьталӧ Господь, — кыпӧдӧма шыпурт Вавилонын олысьяс весьтӧ, налӧн юралысьяс да тӧдысьяс весьтӧ.
Шыпурт кыпӧдӧма больгысьяс весьтӧ, и найӧ йӧймасны.
Шыпурт кыпӧдӧма вавилонса тышкайӧз весьтӧ, и найӧ шӧйӧвошасны.
Шыпурт кыпӧдӧма вавилонса вӧвъяс да тарантасъяс весьтӧ, йӧз муысь локтӧм шыпуртаяс весьтӧ, и найӧ аньяс моз повзясны.
Шыпурт кыпӧдӧма вавилонсаяслӧн озырлун весьтӧ, и найӧс лоӧ куштӧма.
Юясыс косьмасны, ваыс бырас, ӧд Вавилон — идолъяслӧн му. Идолъяс вӧсна сэні олысьяс вежӧрнысӧ воштӧмаӧсь.
Сэні пондасны овны шакалъяс да овтӧминса зверъяс, сэтчӧ овмӧдчасны страусъяс, йӧзыс сэтчӧ оз нин овмӧдчыны, нэмъяс чӧж сэні некод оз кут овны.
Кыдзи Енмыс бырӧдіс Содом, Гомора да орчча каръяссӧ, — висьталӧ Господь, — тадзи жӧ Вавилонын оз ло олысьыс, сэтчӧ некод оз овмӧдчы.
Войвывсянь локтӧны тышкайӧз, му помсянь ӧксыяскӧд локтӧ уна лыда войтыр.
Налӧн кианыс ньӧввуж да шы, найӧ скӧрӧсь, некодӧс оз жалитны, налӧн гӧлӧс шыныс бузгысь саридзлӧн кодь.
Найӧ рӧдтӧны вӧвъяс вылын, дасьӧсь тышкасьны тэкӧд, Вавилон ныв.
Вавилонса ӧксы кыліс на йылысь юӧр, и сылӧн киыс вынтӧммис, шогыс суис сійӧс, дойыс топӧдіс сійӧс кага чужтысь аньӧс моз.
Йӧрдан юдорса вӧрысь веж йирсянінӧ петысь лев моз Ме виччысьтӧг вӧтла вавилонсаясӧс асланыс муысь. Ме пукта налы юралысьӧ сійӧс, кодӧс Ме бӧръя.
Эм-ӧ кодкӧ Ме кодьыс?
Коді вермас тшӧктыны Менӧ вочавидзны ёрд водзын?
Сюрас ӧмӧй сэтшӧм юралысь, коді вермас Меным паныд кыпӧдчыны?
Кывзӧй, мый Господь шуис Вавилон йылысь, мый шуис вӧчны Калдея муын олысьяслы. Весиг налысь медічӧтъяссӧ пышйӧдасны, налысь оланінъяссӧ куштасны.
Вавилон кар босьтӧм шыысь муыс сыркмунлас, войтыръяс кыласны вавилонсаяслысь горзӧмсӧ.
Господь тадзи висьталӧ: — Ме кыпӧда бырӧдан тӧвныр Вавилон да сэні олысьяс вылӧ, Меным паныд сувтысьяс вылӧ.
Ме мӧдӧда Вавилонӧ йӧз муысь локтысьясӧс, найӧ тӧвйыв разӧдасны вавилонсаясӧс да куштасны налысь мусӧ, бырӧдан лунӧ кытшаласны сійӧс быд боксянь.
Ньӧвйӧн лыйсьысь мед зэвтӧ ассьыс ньӧвсӧ вавилонса тышкайӧзлы паныд, кодъяс лыйсьӧны ньӧвйӧн, пасьтасьӧны кӧрт кышӧдӧ.
Энӧ жалитӧй вавилонса зонъясӧс, дзикӧдз бырӧдӧй вавилонса тышкайӧзӧс.
Калдея муын кутасны куйлыны виӧмаяс, уличьяс вылын — шыпуртӧн бытшкӧмаяс.
Калдея войтыр мыжа Израильлӧн вежа Ен водзын, налӧн муыс тырӧма мыжӧн, но Израиль да Иуда войтыръясӧс Господь Саваоф, налӧн Енмыс, эз эновт.
Пышйӧй Вавилонысь, видзӧй ассьыныд олӧмнытӧ, медым Вавилонлӧн мыжъяс вӧсна энӧ кулӧй, ӧд воис кад, кор Господь мынтысьӧ Вавилонлы, водзӧс перйӧ сылысь.
Господь киын Вавилон вӧлі зарни чашаӧн, Вавилон юктӧдіс му вылын олысь став йӧзсӧ.
Войтыръяс юисны сэтысь вина да воштісны вежӧрнысӧ.
Но виччысьтӧг Вавилон усис-киссис.
Сыркъялӧмӧн бӧрдӧй сы вӧсна, вайӧй бурдӧдчан вый, медым бурдӧдны сылысь дойяссӧ, гашкӧ, сійӧ бурдас.
— Ми зілим бурдӧдны Вавилонӧс, но сійӧ эз бурд.
Эновтӧй сійӧс! Быдӧн мунамӧй асланым муӧ, ӧд Вавилонӧс мыждӧмыс сэтшӧм ыджыд, мый воис енэжӧдз, кыпӧдчис кымӧръясӧдз.
Господь петкӧдліс миянлысь веськыдлуннымӧс.
Мунамӧй, юӧртамӧй Сионын, мый вӧчис Господь, миян Енным.
— Ёсьтӧй ньӧвъяснытӧ, тыртӧй наӧн ньӧвпуртӧснытӧ.
Господь ышӧдіс мидияса ӧксыясӧс тыш вылӧ, ӧд Сійӧ шуис бырӧдны Вавилон. Господь водзӧс перйӧ Вавилонлысь, водзӧс перйӧ Аслас крамыс вӧсна.
Вавилонса стенъяслы паныд кыпӧдӧй дӧрапас, сувтӧдӧй видзӧдысьясӧс, мӧдӧдӧй кыйӧдчысьясӧс. Господь мый мӧвпыштіс, сійӧс и вӧчас. Мый шуис вӧчны вавилонса олысьяслы, сійӧс и збыльмӧдас.
Вавилон, тэ олан уна ва дорын, тэнад эм уна озырлун, но регыд тэныд воас пом, воас пом тэнад горшасьӧмлы.
Господь Саваоф кыв сетӧмӧн шуис: «Вавилон му, саранчаӧн моз Ме тырта тэнӧ йӧзӧн, тэ весьтын кылас налӧн вермӧм йылысь горзӧмныс».
Аслас вынӧн Господь вӧчис мусӧ, Аслас мывкыдлунӧн муюгыдыслы пуктіс подувсӧ, Аслас вежӧрлунӧн шевкнитіс енэжсӧ.
Кор Сійӧ сетӧ гӧлӧс шысӧ, ваыс енэжас гораа ызгӧ. Му помсяньыс Сійӧ кыпӧдӧ кымӧръяс, мӧдӧдӧ чардби да зэр, Аслас видзанінысь лэдзӧ тӧвныр.
Быд морт мывкыдтӧм, сылӧн тӧдӧмлуныс абу, идолъясӧс сывдысь-вӧчысьӧс лоӧ янӧдӧма, ӧд сылӧн бӧлбанъясыс — ылӧг енъяс, на пытшкын олӧмыс абу.
Найӧ нинӧм дон оз сулавны, найӧ тешкодь вӧчӧмторъяс, мыждан лунӧ найӧ бырасны.
Но Яковлӧн Енмыс абу на кодь, ӧд Сійӧ ставсӧ Вӧчысьыс, Сылӧн нимыс — Господь Саваоф, а Израиль — Сылӧн бӧрйӧм войтырыс.
— Вавилон, тэ — Менам мӧлӧтӧй, Менам тышкасянторйӧй, тэӧн Ме пасьвартлі войтыръясӧс, тэӧн пазӧдлі муяс.
Тэӧн Ме пасьвартлі вӧлӧс и верзьӧмаӧс, пасьвартлі тарантас и сыӧн веськӧдлысьӧс.
Тэӧн Ме пасьвартлі айловӧс и аньӧс, пӧрысьӧс и томӧс, зонмӧс и нылӧс.
Тэӧн Ме пасьвартлі ыж-мӧскӧс да найӧс видзысьяссӧ, му вӧдитысьӧс и сылысь уджалан ӧшъяссӧ, ыджыдалысьясӧс и юралысьясӧс.
Израиль войтыр, тіян син водзын Ме мынтыся Вавилонлы да Калдея муын олысьяслы став лёксьыс, мый найӧ вӧчисны Сионын, — висьталӧ Господь.
Ме сувта тэныд паныд, Вавилон, тэ — бырӧдысь керӧс, бырӧдан ставнас мусӧ, — висьталӧ Господь. — Ме лэпта киӧс тэ вылӧ, шыбита тэнӧ изкырта вывсянь, вӧча тэнӧ сотчӧм керӧсӧн.
Оз пуктыны тэнсьыд изтӧ пельӧс из пыдди, оз босьтны тэнсьыд изтӧ подув пуктыны. Тэ пыр кежлӧ лоан овтӧминӧн, — висьталӧ Господь.
Лэптӧй дӧрапасъяс му пасьталаыс, буксӧй буксанӧн войтыръяс пӧвстын, дасьтӧй войтыръясӧс уськӧдчыны Вавилон вылӧ, чуксалӧй сылы паныд Арарат муын олысьясӧс, чуксалӧй Минни да Аскеназ муясын олысьясӧс, индӧй сылы паныд тышкайӧзӧн веськӧдлысьӧс, чукӧртӧй вӧвъясӧс повзьӧдчана саранча мында.
Дасьтӧй войтыръясӧс уськӧдчыны Вавилон вылӧ, дасьтӧй мидияса ӧксыясӧс, ыджыдалысьясӧс да юралысьясӧс, дасьтӧй налӧн киподувса муясын олысьясӧс.
Муыс дзӧрӧ-тіралӧ, ӧд Вавилон йылысь Господьлӧн шуӧмыс инӧ, Господь вӧчӧ Вавилонӧс овтӧминӧн, кӧні олысьыс оз ло.
Вавилонса тышкайӧз дугдісны тышкасьны, найӧ пукалӧны асланыс изкаръясын.
Найӧ вынтӧммисны, лоины аньяс кодьӧсь. Налысь керкаяснысӧ сотӧма, дзиръя иганъяссӧ жуглӧма.
Юӧр вайысь бӧрся мӧд вайӧ юӧр, котӧрӧн юӧр вайысь бӧрся мӧд котӧртӧ, медым висьтавны вавилонса ӧксылы, мый босьтӧма сылысь карсӧ да ю вомӧн вуджанінъяссӧ, сотӧма карса стенъяссӧ, и сылӧн тышкайӧзыс полӧны-тіралӧны.
Господь Саваоф, Израильлӧн Ен, тадзи висьталӧ: — Вавилон ныв гумла кодь, кодӧс талялӧмӧн дасьтӧны вундан кад кежлӧ.
Нӧшта неуна, и воас Вавилонӧс вундан кадыс.
— Вавилонса Навукодоносор ӧксы сёйис-йирис миянӧс, вӧчис Сионӧс куш дозйӧн.
Гундыр моз сійӧ ньылыштіс миянӧс, чӧсмасис миянӧн да тыртіс ассьыс рушкусӧ, а коляссӧ быликтіс.
Вавилон мед мынтысяс миянӧс дзескӧдӧмысь да дойдалӧмысь, — шуасны Сионын олысьяс. Калдеяын олысьяс мед мынтысясны миян вирысь, — шуасны Ерусалимын олысьяс.
Та вӧсна Господь тадзи висьталӧ: — Ерусалимын олысьяс, Ме доръя тіянӧс, водзӧс перъя тіян вӧсна, Ме косьта вавилонсаяслысь юяссӧ, косьта налысь ва петанінъяссӧ.
Вавилон лоӧ из чукӧрӧн, шакалъяслӧн оланінӧн, сійӧ лоӧ повзьӧдчанторйӧн, сійӧс кутасны лёкӧдны, сэні олысьыс оз ло.
Вавилонсаяс пондасны лев моз равзыны, левпиян моз эргыны.
Кор найӧ пузясны, Ме дасьта налы гажӧдчӧм, юктӧда найӧс коддзытӧдзныс, медым найӧ нимкодясисны, сэсся пыр кежлӧ унмовсисны, и эз нин садьмыны, — висьталӧ Господь.
Баляясӧс, межъясӧс да кӧзаясӧс моз Ме нуӧда найӧс начкӧм вылӧ.
Шешакӧс * кытшалӧма, став муюгыдас нималысь карӧс босьтӧма.
Войтыръяс пӧвстын Вавилон лои повзьӧдчанторйӧн.
Саридз ыльӧбтіс Вавилон вылӧ, гыясыс вевттисны сійӧс.
Вавилонса каръяс кушмисны, Вавилон лои кос муӧн да овтӧминӧн, сэні некод оз ов, сэті некод оз ветлы.
Ме мыжда вавилонсаяслысь Вил идолӧс, Ме перъя сылӧн вомысь ньылыштӧмасӧ, войтыръяс оз нин локны сы дінӧ. Вавилонса стенъяс киссясны.
Менам войтырӧй, петӧй Вавилонысь, видзӧй ассьыныд олӧмнытӧ, пышйӧй Господьлӧн яр скӧрлунысь!
Тіян сьӧлӧмныд мед оз тірав, энӧ полӧй юӧрысь, мый разалӧ му пасьталаыс.
Ӧти воӧ локтӧ ӧтипӧлӧс юӧр, мӧд вонас — мӧдпӧлӧс юӧр, му вылын виалӧны-дзескӧдӧны, юралысь кыпӧдчӧ юралысьлы паныд.
Воасны лунъяс, кор Ме мыжда вавилонса идолъясӧс. Вавилон му лоӧ янӧдӧма, быдлаын пондасны куйлыны виӧмаяс.
Енэжыс, муыс и ставыс, мый сэні эм, кутасны нимкодясьны, ӧд войвывсянь Вавилонӧ локтасны куштысь-бырӧдысьяс, — висьталӧ Господь. — 
Кыдзи Вавилон пасьвартіс израильсаясӧс, и найӧ усисны, тадзи Вавилон муын усясны пасьвартӧмаяс.
А ті, шыпуртысь мездмӧмаяс, пышйӧй, энӧ сувтлӧй. Ылі муын энӧ вунӧдӧй Господьӧс, сьӧлӧманыд видзӧй Ерусалим.
— Миянӧс янӧдісны, ми кылім лёкӧдӧм, миянлы лои юръяндзим, ӧд йӧз муысь локтысьяс пырисны Господьлӧн крамса вежаинъясӧ.
— Но воасны лунъяс, — висьталӧ Господь, — кор Ме мыжда вавилонса идолъясӧс, и Вавилон му пасьтала кутасны ойзыны-ымзыны доймалӧмаяс.
Вавилон кӧ кыпӧдчас енэжӧдзыс, лэптас кӧ ассьыс изкарсӧ выліинӧ, весиг сэки Ме мӧдӧда сы дінӧ куштысь-бырӧдысьясӧс, — висьталӧ Господь.
Вавилонысь кылӧ горзӧм шы, Калдея муын ставсӧ кисьтӧма-пазӧдӧма. Господь куштӧ-пазӧдӧ Вавилон, Сійӧ пуктас пом вавилонсаяслӧн шызьӧмлы.
Найӧ ызгӧны ыджыд гыяс моз, кылӧ налӧн гора шыныс.
Куштысь-бырӧдысь уськӧдчас Вавилон вылӧ, вавилонса тышкайӧзӧс лоӧ босьтӧма, налысь ньӧвъяссӧ лоӧ чегъялӧма, ӧд Господь — водзӧс перйысь Ен, Сійӧ мынтысяс налы.
— Ме коддзытӧдзныс юктӧда вавилонса юралысьясӧс, тӧдысьясӧс, ыджыдалысьясӧс да тышкайӧзӧс. Найӧ унмовсясны пыр кежлӧ да оз садьмыны, — висьталӧ Ӧксы, кодлӧн нимыс Господь Саваоф.
Господь Саваоф тадзи висьталӧ: — Вавилон карлысь кыз стенъяссӧ подулӧдзыс жугӧдасны, сылысь джуджыд дзиръяяссӧ биӧн сотасны.
Весьшӧрӧ войтыръяс мырсисны, весьшӧрӧ кок йывсьыныс усьтӧдз уджалісны, ставсӧ лоӧ сотӧма биӧн.
Еремей пророк туйдӧдіс Махсей Нирийлысь Серай писӧ, ӧксылӧн шойччанінъяс вӧсна кывкутысьӧс, кор сійӧ мӧдӧдчис иудаса Седекей ӧксыкӧд Вавилонӧ. Тайӧ вӧлі Седекейлӧн нёльӧд веськӧдлан воӧ.
Еремей гижис гижӧд тубрасӧ став сійӧ шогыс йылысь, мый суас Вавилонӧс, да шуис Серайлы: «Кор тэ локтан Вавилонӧ, лыддьы сэні йӧзыслы став тайӧ кывъяссӧ да шу: 
Господьӧй, Тэ шуин тайӧ муыс йылысь, мый татчӧ оз коль морт ни ыж-мӧс, и сійӧ пыр кежлӧ лоӧ овтӧминӧн.
Кор тэ помалан лыддьыны тайӧ гижӧд тубрассӧ, кӧртав сэтчӧ из да шыбит Ефрат юӧ. Сэсся шу: тадзи жӧ вӧяс Вавилон. Сійӧ оз вермы кыпӧдчыны шог бӧрти, мый Господь мӧдӧдас сылы. Вавилон дзикӧдз усяс».
Тайӧн помасьӧны Еремейлӧн пророкалан кывъясыс.
Ӧксыӧ пуксигас Седекейлы вӧлі кызь ӧти арӧс. Дас ӧти во чӧж сійӧ юраліс Ерусалимын.
Сылӧн мамыс вӧлі Хамуталь, Ливнаысь Еремейлӧн нылыс.
Ехояким моз Седекей вӧчис Господь водзын шогмытӧмсӧ.
Иуда муын да Ерусалим карын олысьяс вылӧ Господьлӧн скӧрлуныс вӧлі сэтшӧм ыджыд, мый вӧтліс найӧс Аслас чужӧмбан водзысь.
Седекей кыпӧдчис вавилонса ӧксылы паныд.
Та вӧсна Седекейлӧн ӧкмысӧд веськӧдлан воӧ дасӧд тӧлысьлӧн дасӧд лунӧ вавилонса Навукодоносор ӧксы аслас тышкайӧзкӧд уськӧдчис Ерусалим кар вылӧ.
Найӧ кытшалісны карсӧ да лэптісны сы гӧгӧр тымӧд. Карыс вӧлі кытшын Седекей ӧксылӧн дас ӧтиӧд веськӧдлан воӧдз.
Нёльӧд тӧлысьлӧн ӧкмысӧд лунӧ, кор карас войтырыс ёна тшыгъяліс, и налы нинӧм вӧлі сёйнысӧ, карсӧ кытшалысь калдеяса тышкайӧз жугӧдісны карса стенсӧ. Войнас иудаса тышкайӧз петісны Ерусалим карысь дзиръяӧд, мый вӧлі кыкпӧвста стенмас ӧксылӧн сад дорын. Найӧ пышйисны Йӧрдан ковтыслань.
Но калдеяса тышкайӧз вӧтчисны Седекей ӧксы бӧрся да суӧдісны сійӧс Ерикон кардорса ковтысын. Ӧксылӧн тышкайӧзыс эновтісны сійӧс да пышйисны-разалісны.
Седекей ӧксыӧс кутісны да вайӧдісны вавилонса ӧксы дінӧ Ривлаӧ, Хамат муӧ. Сэні вавилонса ӧксы мыждіс Седекейӧс.
Ривлаын Седекейлӧн син водзын вавилонса ӧксы виис сылысь пиянсӧ. Виис тшӧтш иудаса став юралысьсӧ.
Вавилонса ӧксы бытшкис Седекейлысь кыкнан синсӧ да дорис сійӧс ыргӧн чепъясӧн.
Сэсся нуӧдіс сійӧс Вавилонӧ да йӧршитіс дзескыдінӧ. Сэні Седекей пукаліс кувтӧдзыс.
Вавилонса Навукодоносор ӧксылӧн дас ӧкмысӧд веськӧдлан воӧ, витӧд тӧлысьлӧн дасӧд лунӧ, Ерусалимӧ локтіс Навузардан, ӧксыӧс видзысьяслӧн юралысь, вавилонса ӧксыӧс туйдӧдысь. Сійӧ сотіс Ерусалимысь Господьлысь крамсӧ, ӧксылысь керкасӧ да став ыджыд керкасӧ.
Навузарданлӧн калдеяса тышкайӧзыс жугӧдісны Ерусалимӧс кытшалысь стенсӧ.
А карас кольӧм войтырсӧ, весиг гӧльясӧс да вавилонса ӧксы дор вуджӧм йӧзӧс, Навузардан, ӧксыӧс видзысьяслӧн юралысь, нуӧдіс Вавилонӧ.
Сӧмын гӧль йӧз пӧвстысь этшаникӧс Навузардан кольӧдіс уджавны виноград йӧрын да видз-му вылын.
Калдеяса тышкайӧз жуглісны Господьлӧн крамысь ыргӧн сюръяяссӧ, мыссян доз улысь джекъяссӧ да ыргӧн вайӧртӧдсӧ. Став ыргӧнсӧ нуисны Вавилонӧ.
Найӧ босьтісны тшӧтш пӧим чукӧртан воръяс, пӧим куралан зыръяс, пуртъяс, вир резан тасьтіяс, кӧшъяс да ыргӧнысь вӧчӧм мукӧд дозмуксӧ, мыйӧн вӧдитчисны крамын кесъялігӧн.
Ӧксыӧс видзысьяслӧн юралысь босьтіс зарниысь да эзысьысь вӧчӧм тасьтіяс, ӧгыр пӧртъяс, вир резан тасьтіяс, пӧим чукӧртан воръяс, бикокъяс, кӧшъяс да дозъяс.
Кык сюръя, вайӧртӧд, сы улын сулалысь дас кык ыргӧн ӧш да джекъяс, мый вылын сулалісны мыссян дозъяс, коркӧ Господьлӧн крамӧ вӧчліс Соломон ӧксы. Тайӧ вӧчӧмторъясас ыргӧныс вӧлі сы мында, мый весиг эз позь веситнысӧ.
Быд сюръя вӧлі дас кӧкъямыс гырддза судта. А гӧгӧртны кӧ сюръясӧ, лоӧ дас кык гырддза. Сюръялӧн пытшкӧсыс вӧлі куш, а стенмыс вӧлі нёль чунь кызта.
Сюръя йылас вӧлі ыргӧнысь вӧчӧм юр, сылӧн судтаыс вӧлі вит гырддза. Юр гӧгӧрыс вӧліны чепъясысь вӧчӧм мичмӧданторъяс да гранат кодь сяръяс. Сюръяясыс вӧліны ӧткодьӧсь. Ставсӧ вӧлі вӧчӧма ыргӧнысь. Чепъясысь вӧчӧм мичмӧданторъяс вылын вӧлі гранат кодь сё сяр, на пиысь ӧкмысдас квайт сярыс ӧшалісны юр бокъясас.
Навузардан, ӧксыӧс видзысьяслӧн юралысь, босьтіс Серай аркирейӧс да сылы отсасьысь Софоний попӧс, тшӧтш крам пыранін видзысь куим попӧс.
Карсьыс босьтіс ыджыд чина мортӧс, коді кывкутіс тышкайӧз вӧсна, босьтіс ӧксылысь сизим туйдӧдысьӧс, кодъяс вӧлі кольӧмаӧсь на карас, тшӧтш тышкайӧзлӧн юралысьлысь гижалысьсӧ, коді пасъяліс небӧгӧ тышӧ мунысьясӧс. Нӧшта Навузардан босьтіс карсьыс квайтымын мортӧс, кодъяс шедісны сы киӧ. Ставнысӧ Навузардан, ӧксыӧс видзысьяслӧн юралысь, вайӧдіс вавилонса ӧксы дінӧ Ривлаӧ.
Ривлаын, Хамат муын, вавилонса ӧксы виис найӧс. Тадзи Иуда войтырӧс вӧлі нуӧдӧма пленӧ аслас муысь.
Аслас сизимӧд веськӧдлан воӧ Навукодоносор нуӧдіс Иуда муысь пленӧ куим сюрс кызь куим мортӧс.
Навукодоносорлӧн дас кӧкъямысӧд веськӧдлан воӧ Ерусалимысь вӧлі нуӧдӧма кӧкъямыссё комын кык мортӧс.
Навукодоносорлӧн кызь коймӧд веськӧдлан воӧ Навузардан, ӧксыӧс видзысьяслӧн юралысь, нуӧдіс Иуда муысь пленӧ сизимсё нелямын вит мортӧс. Ставнас вӧлі нуӧдӧма нёль сюрс квайтсё мортӧс.
Иудаса Еконей ӧксыӧс пленӧ нуӧдӧм бӧрын комын сизимӧд вонас дас кыкӧд тӧлысьлӧн кызь витӧд лунӧ вавилонса Эвил-Меродак ӧксы бурсьӧлӧмтчис иудаса Еконей ӧксы дінӧ да лэдзис сійӧс дзескыдінысь. Буретш тайӧ вонас Эвил-Меродак лоис ӧксыӧн.
Сійӧ бура сёрнитіс Еконейкӧд да пуктіс сійӧс Вавилонын олысь мукӧд ӧксыяс дорысь вылӧджык.
Еконей пӧрччис дзескыдінын пукалан паськӧмсӧ да пасьталіс мӧд паськӧм. Сійӧ кадсяньыс да олӧм помӧдзыс Еконей сёйис-юис вавилонса ӧксылӧн пызан сайын.
Вавилонса ӧксы сетіс сылы быд лун кежлӧ став коланаторсӧ, и тадзи вӧлі Еконейлӧн олӧм помӧдзыс.
{Еврей йӧз (комиӧдіс Kodko) @ Бӧрданкыв @ религ. гижӧд @ Библия @ 2021 @ Лб. .}
Еремейлӧн бӧрданкыв
Ӧтнас сулалӧ кар, а коркӧ вӧлі йӧзӧн тырӧма!
Ӧні сійӧ дӧва кодь, а коркӧ вӧлі войтыръяс пӧвстын ыджыд. Сійӧ ыджыдаліс ӧксыув муяс вылын, а лои вот мынтӧм могысь уджалысьӧн.
Войнас сійӧ ырзӧмӧн бӧрдӧ, синваыс чужӧмбанӧдыс тюрӧ.
Сійӧс бурӧдысьыс абу, весиг на пӧвстын, кодъяслы сійӧ вӧлі муса.
Ёртъясыс пӧрйӧдлісны сійӧс, кутісны мустӧмтны.
Иудаӧс нуӧдісны йӧз муӧ, сійӧ шогсьӧ, нартитӧмсьыс сьӧкыдалӧ. Сійӧ олӧ мукӧд войтыръяс пӧвстын, оз тӧд шойччӧгсӧ.
Дзескӧдысьяс суӧдісны Иудаӧс, сійӧ эз вермы пышйыны.
Сионӧ нуӧдан туйяс бӧрдӧны, некод оз лок гажӧдчан лунъяс кежлӧ, сылӧн дзиръяясӧд пырысьыс абу.
Попъяс сьӧкыда ышлолалӧны, нывъяс шогысла ойзӧны — Сион тырӧма курыд шогӧн.
Дзескӧдысьяс ыджыдалӧны Сион вылын, мустӧмтысьяс гажаа олӧны. Сионлӧн уна мыж вӧсна Господь ыстіс сылы шог.
Сылысь челядьсӧ нуӧдісны пленӧ, дзескӧдысьяс вӧтлісны найӧс водзвыланыс.
Воштіс Сион ныв ассьыс нималӧмсӧ.
Сылӧн юралысьясыс кӧръяс кодьӧсь, кодъяс оз аддзыны йирсянін.
Дзескӧдысь вӧтлӧ найӧс водзвылас, найӧ котӧртӧны эбӧссьыс усьӧмӧн.
Коньӧр туйын олігӧн да оланінтӧг колигӧн Ерусалимлы тӧд вылас уси став бурыс, мый сылӧн водзынсӧ вӧлі. Войтырыс кулӧ дзескӧдысьлӧн киысь, Ерусалимлы некод оз отсав.
Дзескӧдысьяс сералӧмӧн видзӧдӧны, кыдзи сійӧс бырӧдӧны.
Ыджыд мыж вӧчис Ерусалим, та вӧсна сійӧс ӧтдортӧны.
Сійӧс пыдди пуктысьяс ӧні мустӧмтӧны сійӧс, ӧд аддзӧны сылысь яналӧмсӧ.
Чужӧмсӧ бергӧдӧмӧн Ерусалим сьӧкыда ышлолалӧ.
Бӧждорыс сылӧн няйтчӧма пежнас. Сійӧ эз мӧвпав, мый виччысьӧ сійӧс. Сійӧ дзикӧдз усис, но сійӧс бурӧдысьыс эз вӧв.
«Господьӧй, видзӧдлы менам шогсьӧм вылӧ, ӧд вӧрӧг асьсӧ вылӧ кыпӧдӧ».
Дзескӧдысьяс нюжӧдісны кинысӧ, медым петкӧдны Ерусалимысь став донаторсӧ.
Сійӧ аддзис, кыдзи ентӧдтӧмъяс пырисны вежаинӧ, а Тэ ӧд шулін на йылысь, мый налы оз позь лоны Тэнад чукӧртчӧм войтыр пӧвстын.
Ерусалимын олысьяс ойзӧны, корсьӧны нянь, став озырлунсӧ найӧ вежӧны сёян вылӧ, медым ловйӧн кольны.
— Видзӧдлы, Господьӧй! Тэ аддзан, кутшӧма менӧ мустӧмтӧны.
Туй вывті ветлысь-мунысьяс, тіянкӧд тадзи мед оз ло!
Видзӧдлӧй, эм-ӧ менам кодь дойыс, кутшӧм менӧ суис! Господь ыстіс меным сійӧс Аслас скӧралан лунӧ.
Вылісянь Сійӧ ыстіс би, биыс пырис менам лыясӧдз.
Пуктіс менам кок улӧ нальк да кыскыштіс бӧрлань. Сійӧ вӧчис менӧ овтӧм карӧн, став менам олан лунъясӧй тырӧма дойӧн.
Господь Аслас киӧн кыис менам мыжъясысь сийӧс, ӧшӧдіс сійӧс меным сьыліӧ, тадзи уськӧдіс менӧ эбӧсысь.
Господь сетіс менӧ вӧрӧг киӧ, сы водзын ме ог вермы сулавны.
Господь ӧтдортіс менсьым ён йӧзӧс, индіс-юӧртіс кад, медым бырӧдны менсьым зонъясӧс.
Пычкан гуын виноградӧс моз Господь таляліс Иудалысь нывсӧ!
Та вӧсна ме бӧрда, синваӧй шорӧн визувтӧ. Ылын меысь бурӧдысьӧй, коді эськӧ ловзьӧдіс менӧ.
Челядьӧс пасьвартӧма, ӧд вӧрӧг вӧлі вынаджык.
Сион нюжӧдӧма кисӧ, но бурӧдысьыс абу.
Орччӧн олысь войтырлы Господь тшӧктіс дзескӧдны Яковӧс.
Ерусалим лои пежӧн налӧн син водзын.
Господь веськыд, но ме кыпӧдчи Сылы паныд.
Кывзӧй, войтыръяс, видзӧдлӧй менам дой вылӧ: менсьым ныв-зонмӧс нуӧдісны пленӧ.
Ме кори муса ёртъясӧс отсавны, но найӧ пӧрйӧдлісны менӧ.
Попъяс да юрнуӧдысьяс корсьӧны кынӧмпӧт, медым ловйӧн кольны, но тшыгнысла найӧ кулӧны карас.
Господьӧй, видзӧдлы, кутшӧм меным сьӧкыд! Тэныд пыксьӧмӧй вӧсна менам пытшкӧсӧй шызьӧма, сьӧлӧмӧй тіралӧ.
Ывлаын шыпурт бырӧдіс челядьӧс, керкаӧ кулӧм овмӧдчис.
Йӧзыс кылӧны менсьым ойзӧмӧс, но бурӧдысьыс абу.
Вӧрӧг кыліс менам сьӧкыдалӧм йылысь, сійӧ нимкодясьӧ, мый Тэ тайӧс вӧчин.
Мед суас найӧс Тэӧн индӧм луныс, мед лоас накӧд, кыдзи лои мекӧд.
Став налӧн лёк вӧчӧмыс мед сувтас Тэнад чужӧмбан водзӧ.
Вӧч накӧд сійӧ, мый Тэ вӧчин мекӧд став менам мыжъясысь. Ме дугдывтӧг ойза, менам сьӧлӧмӧй дойысла потӧ.
Кымӧрӧн моз скӧрлуннас Господь вевттис Сион нылӧс!
Енэжсянь му вылӧ Сійӧ шыбитіс Израильлысь ошйысянторсӧ, Аслас скӧралан лунӧ эновтіс Ассьыс кокувсӧ.
Господь жалиттӧг бырӧдіс Яковлысь оланінъяссӧ, скӧралігас пасьвартіс Иудалысь изкаръяссӧ, янӧдӧмӧн шыбитіс муас ӧксыӧс да юралысьясӧс.
Скӧрйывсьыс Сійӧ жугӧдіс Израильлысь вынсӧ, вештіс сы вылысь Ассьыс веськыд кисӧ, эз видз сійӧс вӧрӧгысь. Сійӧ сотіс Яковӧс ыпъялысь биӧн, мый ньылыштӧ ставсӧ.
Паныд сувтысь моз Сійӧ зэвтіс Ассьыс ньӧввужсӧ, мустӧмтысь моз веськӧдіс мелань кисӧ. Сійӧ виис-бырӧдіс ставсӧ, мый долыдмӧдӧ синтӧ.
Биӧс моз Сійӧ кисьтіс Ассьыс скӧрлунсӧ Сион нывлӧн оланін вылӧ.
Господь лои вӧрӧг кодь, Сійӧ виис Израильӧс, бырӧдіс сылысь керкаяссӧ, жугліс изкаръяссӧ, содтіс шогсӧ да бӧрдӧмсӧ Иуда нывлы.
Сад йӧрысь чомйӧс моз Сійӧ кисьтіс Ассьыс оланінсӧ, бырӧдіс войтырыслысь вежа чукӧртчанінсӧ. Господь лэдзис вунӧдны Сионын гажӧдчан лунъяс да шойччан лунъяс, ёна скӧралігас янӧдіс ӧксыӧс да попъясӧс.
Ассьыс висьпуктанінсӧ Господь эновтіс, Ассьыс вежаинсӧ колис. Вӧрӧг киӧ сетіс Сион карлысь стенъяссӧ.
Гажӧдчан лунӧ моз вӧрӧг кыпӧдіс гора шы Господьлӧн керкаын.
Господь шуис жугӧдны Сионлысь стенъяссӧ. Сійӧ нюжӧдіс мурталан кӧв, Ассьыс кисӧ бырӧдӧмысь эз вешты.
Ортсы пыкӧдъяссӧ жугліс, найӧ стенмыскӧд тшӧтш киссисны.
Карса дзиръяяс муас вӧйисны, иган-тасъяссӧ Сійӧ пасьйис.
Ӧксы да юралысьяс олӧны мукӧд войтыр пӧвстын, Енлысь Индӧдсӧ оз велӧдны, Господьсянь петкӧдчылӧмыс пророкъяслы абу.
Сионса пӧрысь йӧз чӧла пукалӧны му вылын, юрнысӧ коялӧмаӧсь пӧимӧн, гартыштчӧмаӧсь шогалан паськӧмӧ.
Ерусалимса нывъяс юрнысӧ копыртӧмаӧсь мулань.
Синмӧй пемдіс бӧрдӧмсьыс, пытшкӧсӧй шызьӧма, сьӧлӧмӧй потӧ шогысла, ӧд менсьым войтырӧс бырӧдӧма, челядь да пузчужӧм кагаяс тшыгйысла кулӧны карса изэрдъяс вылын.
Мамныслы шуӧны: «Сёйны кӧсъям! Юны кӧсъям!» Карса изэрдъяс вылын тышын доймалӧмаяс моз найӧ кулӧны, мам ки выланыс ловнысӧ лэдзӧны.
Мый меным шуны тэныд, Ерусалим нылӧй, мыйӧн ӧткодявны тэнӧ?
Кодкӧд ӧткодявны тэнӧ, Сион нылӧй, медым бурӧдны тэнӧ?
Тэнад дойыд саридз кодь ыджыд — коді вермас бурдӧдны тэнӧ?
Пророкъясыд висьтавлісны тэныд ковтӧм да ылӧг восьтӧмсӧ, а тэнсьыд мыжтӧ эз эрдӧдны, эз видзны тэнӧ пленӧ нуӧдӧмысь. Ковтӧм да пӧрйӧдлан аддзылӧмъяс найӧ юӧртісны тэныд.
Туй вывті ветлысь-мунысьяс кинас шлопнитӧмӧн шутьлялӧны, юрнас довкйӧдлӧны да Ерусалим йылысь омӧльтӧмӧн шуалӧны: «Тайӧ ӧмӧй сійӧ карыс, кодӧс шуисны медся мичаӧн, став муюгыдыслӧн гажӧн?»
Тэнӧ мустӧмтысьяс жеръялӧны тэ вылын, шутьлялӧны, пиньнысӧ йирӧмӧн шуалӧны: «Ми ньылыштім сійӧс! Ми ёна виччысим тайӧ лунсӧ, а ӧні аддзам сійӧс!»
Господь вӧчис, мый кӧсйис, збыльмӧдіс Ассьыс кывсӧ, важысянь шуӧмсӧ. Сійӧ жалиттӧг бырӧдіс тэнӧ, вӧрӧглы лэдзис нимкодясьны, тэнӧ мустӧмтысьясӧс вылӧ кыпӧдіс.
Сьӧлӧмсяньыс шыасьӧ Господь дінӧ Сион нывлӧн стен!
Лун и вой шорӧн кисьт синватӧ, ланьтлытӧг мед синмыд бӧрдӧ.
Чеччы войнас да горзы, горзы войбыд, дугдывтӧг!
Господьлӧн чужӧмбан водзын ваӧс моз кисьт сьӧлӧм дойтӧ.
Нюжӧд китӧ Сылань, кевмысь ныв-пиыдлӧн олӧм вӧсна. Найӧ куйлӧны туйвежъясын, тшыгнысла кулӧны.
Видзӧдлы, Господьӧй, видзӧдлы, кодлы Тэ тадзисӧ вӧчин! Мамъяс сёйӧны челядьнысӧ, морӧснас нёньӧдӧм каганысӧ.
Господьлӧн вежаинын куйлӧны виӧм попъяс да пророкъяс.
Челядьлӧн и пӧрысьлӧн шойныс туплясьӧ туйяс вылын, менсьым ныв-зонмӧс шыпурт бырӧдіс.
Тэ виалін найӧс Аслад скӧралан лунӧ, жалиттӧг начкин найӧс.
Гаж вылӧ моз быдласянь Тэ вайӧдін бырӧдысьӧс. Господьлӧн скӧралан лунӧ некод эз мездмы, некод ловйӧн эз коль.
Найӧс, кодъясӧс ме чужті-быдті, бырӧдіс менӧ мустӧмтысь.
Менӧ Господь вачкаліс скӧрлуна бедьнас, ме ёна сьӧкыдала.
Сійӧ вӧтліс менӧ, нуӧдіс пемыдас, эз югыдас.
Сійӧ лэптіс ме вылӧ кисӧ, нӧйтӧ менӧ лунысь-лун.
Сійӧ чашйис менсьым кучикӧс, косявліс вир-яйӧс, жугліс лыясӧс.
Сійӧ кытшаліс менӧ шогӧн, потшис сьӧкыдалӧмӧн.
Важӧн кулӧмаӧс моз Сійӧ йӧршитіс менӧ пемыдінӧ.
Сійӧ лэптіс ме гӧгӧр стен, медым ме эг пет, дорис менӧ кыз сьӧкыд чептӧн. Ме бӧрдӧмӧн горзі, но Сійӧ эз кыв менсьым кевмӧмӧс.
Изъясӧн потшӧсаліс менсьым туйӧс, чукыльтіс менсьым ордымӧс.
Ош моз Господь кыйӧдӧ менӧ, лев моз Сійӧ кыйӧдчӧ дзебсянінсянь.
Сійӧ кежӧдіс менӧ туй вылысь, косявліс да эновтіс менӧ.
Сійӧ зэвтіс Ассьыс ньӧввужсӧ, веськӧдіс мелань ньӧвсӧ.
Пуртӧссьыс перйӧм ньӧвнас Сійӧ лыйис меным вӧркйӧ.
Аслам войтырлы ме лои серамтуйын, найӧ быд лун лӧсьӧдлӧны ме йылысь сьылан.
Господь вердіс менӧ курыд сёянӧн, юкталіс менӧ курыд юанӧн.
Сійӧ изйӧн гирскис менсьым пиньӧс, тыртіс менӧ пӧимӧн.
Ме вошті лӧньлунӧс, вунӧді шудлунӧс.
Ме шуи: «Помасис менам вынӧй, бырис Господь вылӧ лачаӧй».
Эн вунӧд менсьым шогсьӧмӧс да оланінтӧг кольӧмӧс, олӧмыс меным курыд, пагӧдан турун кодь.
Та йылысь вунӧдны ог вермы, ловнам ме дзикӧдз усьӧма.
Но лача кутӧмӧн ме аслым шуала:
— Господьлӧн буралӧмыс вӧсна ми эгӧ бырӧй, Сылӧн буралӧмлы абу помыс.
Господьлӧн буралӧмыс быд асыв выльмӧ, Сійӧ — эскана Ен.
Менам эм Господь, — висьталӧ сьӧлӧмӧй, — та вӧсна ме Сы вылӧ лача кута.
Господь бур Сы вылӧ лача кутысьяс дінӧ, Сійӧс корсьысьяс дінӧ.
Бур, кор чӧла виччысян мездмӧмсӧ Господьсянь.
Мортыслы бур, сьӧкыдсӧ кӧ нуӧ аслас том кадӧ.
Господь сьӧкыдсӧ пуктӧ морт вылӧ, та вӧсна мортыс мед ӧтнасӧн чӧла пукалӧ, мед чужӧмсӧ муӧдз копыртӧ — гашкӧ, сюрас на лача.
Мед чужӧмбансӧ бергӧдӧ кучкысьлань да нуӧ лёкӧдӧмсӧ. Господь оз эновт пыр кежлӧ.
Мӧдӧдӧ кӧ шогсӧ, Сійӧ и бурсьӧлӧмтчӧ, ӧд Сылӧн бурлуныс ыджыд.
Господьлӧн сьӧлӧмыс оз нимкодясь, кор Сійӧ чирыштӧ да шогӧ уськӧдӧ мортӧс.
Кор став му пасьтала нартитӧмаясӧс талялӧны кок улын, оз веськыда мыждыны мортӧс Медвылыссаыс водзын, дзескӧдӧны мортӧс ёрд водзын, Господь ӧмӧй оз аддзы тайӧс?
Кодлӧн шуӧмыс инӧ? Оз-ӧ Господьлӧн, коді тшӧктӧ иннысӧ?
Оз-ӧ Медвылыссалӧн шуӧм серти ло лёкыс да бурыс?
Мыйла нӧ, сідзкӧ, элясьӧ ловъя мортыс?
Сійӧ ӧд сьӧкыдалӧ аслас мыж вӧсна.
Тӧдмаламӧй ассьыным туйнымӧс, медым бергӧдчыны Господь дінӧ.
Восьтамӧй сьӧлӧмнымӧс, лэптамӧй кинымӧс енэжын олысь Енлань.
Ми мыж вӧчим, Тэныд паныд кыпӧдчим, и Тэ миянӧс эн прӧстит.
Тэ скӧралӧмӧн вӧтлін миянӧс, жалиттӧг виалін.
Тэ вевттьысин кымӧрӧн, медым миян кевмысьӧмным эз во Тэӧдз.
Тэ вӧчин миянӧс ёгӧн да няйтӧн мукӧд войтыръяс пӧвстын.
Миянӧс мустӧмтысьяс пиньнысӧ йирӧны.
Повзьӧдлӧм да гуӧ шыбитӧм, куштӧм да бырӧдӧм виччысьӧ миянӧс.
Менсьым войтырӧс бырӧдӧмысь синваӧй шорӧн лэччӧ.
Синваӧй пыр киссьӧ, оз дугды петнысӧ, кытчӧдз Господь оз видзӧдлы да оз аддзы енэжсяньыс.
Менсьым сьӧлӧмӧс шымыртӧ шог аслам карса нывъяс вӧсна.
Менӧ мустӧмтысьяс помкатӧг кӧсйӧны кыйны менӧ лэбачӧс моз.
Найӧ ловйӧн шыбитісны менӧ гуӧ, изъялісны менӧ.
Ваыс юрӧс вевттис, ме шуи: «Меным пом воис».
Господьӧй, джуджыд гу пытшсянь ме чукӧсті Тэнӧ.
Кыв менсьым гӧлӧс шыӧс, эн тупкы пельтӧ менам ойзӧмысь да кевмӧмысь.
Кор ме шыаси Тэ дінӧ, Тэ матыстчин ме дінӧ да шуин: «Эн пов».
Тэ дорйин менӧ, Господьӧй, мездін менсьым олӧмӧс.
Господьӧй, Тэ аддзан меным вӧчӧм лёксӧ, ло веськыда мыждысьӧн.
Тэ аддзан, кыдзи мустӧмтысьяс кӧсйӧны водзӧс перйыны, мӧвпалӧны вӧчны меным лёксӧ.
Господьӧй, Тэ кылан налысь омӧльтӧмсӧ, тӧдан, мый найӧ мӧвпалӧны вӧчны меным лёксӧ. Быд лун найӧ лёкӧдӧны менӧ, шӧпкӧдчӧны ме йылысь.
Видзӧдлы, пукаліганыс и сулаліганыс найӧ сералӧмӧн лӧсьӧдлӧны ме йылысь сьылан.
Господьӧй, мынты налы уджъясныс серти.
Пемдӧд налысь вежӧрсӧ, ысты на вылӧ Ассьыд ёрӧмтӧ.
Вӧтӧд найӧс Аслад скӧрлунӧн, бырӧд найӧс енэж увсьыс, Господьӧй!
Кутшӧма чусмӧма зарниыс, сӧстӧм зарни воштӧма дзирдсӧ!
Вежаинысь изъяссӧ шыблалӧма туйвежъясӧ.
Сионлӧн дона пияныс вӧліны весалӧм зарни кодьӧсь. Ӧні найӧ — сёй дозъяс, гырнич вӧчысьлӧн вӧчӧмторъяс.
Весиг шакал нёньӧдчӧ, вердӧ ассьыс пиянсӧ, а менам войтырлӧн нывъяс сьӧлӧмтӧмӧсь, овтӧминса страус моз найӧ эновтӧны каганысӧ.
Нёньпом кагаяслӧн горшыс косьмӧ, кывйыс ляскысьӧма горш бердас.
Челядь корӧны нянь, но некод налы оз сет.
Водзынсӧ чӧскыда сёйысьяс ӧні тшыгъялӧны туйяс вылын, водзынсӧ мичаа пасьтасьысьяс ӧні гудйысьӧны лӧп чукӧрын.
Менсьым войтырӧс мыждӧма Содомысь чорыдджыка на. Содомӧс вӧлі бырӧдӧма здукӧн, весиг мортлӧн киыс эз инмӧдчыв.
Сионса юралысьяс лымйысь на сӧстӧмӧсь, йӧлысь на еджыдӧсь вӧліны.
Налӧн кучикыс вӧлі коралл рӧма, найӧ дзирдалісны сапфир моз.
Ӧні налӧн чужӧмныс шомысь на сьӧд, найӧс оз тӧдмавны ывлаын.
Кучикыс лы бердас ляскысьӧма, кос кырсь кодь лоӧма.
Шыпурт помысь кулысьяс тшыглы кулысьяс дорысь шудаджыкӧсь, ӧд тшыгъялысь лунысь-лун омӧльтчӧ, нянь абутӧмысла кулӧ.
Небыд сьӧлӧма мамъяс пуисны ассьыныс челядьнысӧ, менсьым войтырӧс бырӧдан кадӧ кагаясныс лоины налы сёянӧн.
Господь койыштіс Ассьыс скӧрлунсӧ, кисьтіс Ассьыс ярлунсӧ, ӧзтіс Сионын би, сотіс сійӧс подулӧдзыс.
Мувывса ӧксыяс эз эскыны, муюгыдын олысьяс эз чайтны, мый дзескӧдысь локтас, вӧрӧг пырас Ерусалим дзиръяӧд.
Тайӧ лои пророкъяслӧн мыж вӧсна, попъяслӧн лёк вӧчӧм вӧсна, ӧд Ерусалим карын найӧ кисьтісны веськыда олысьяслысь вирсӧ.
Ӧні найӧ синтӧмъяс моз шӧйтӧны туй вывті, вирӧн пежасьӧмаӧсь, на дінӧ оз позь инмӧдчыны вирӧсь паськӧмныс вӧсна.
— Вешйӧй, пежасьӧмаяс! — горзӧны налы.
— Вешйӧй, вешйӧй, энӧ инмӧдчӧй!
Найӧ мунӧны да шӧйтӧны мукӧд войтыръяс пӧвстын, но и сэтчӧ найӧс оз лэдзны овмӧдчыны.
Господь Ачыс разӧдіс-вӧтліс найӧс, Сійӧ на вылӧ оз нин видзӧдлы. Попъясӧс мустӧмтӧны, пӧрысьясӧс бурӧ оз пуктыны.
Весьшӧрӧ отсӧгсӧ виччысигӧн миян синным мудзис.
Башня вывсянь ми дзӧргим, виччысим войтырӧс, но сійӧ эз лок миянӧс мездыны.
Дзескӧдысьяс кыйӧдісны миянлысь быд воськов, ми полім весиг ывлаӧ петны.
Пом воис миянлы, олан лунъяснымӧс миянлысь лыддьӧма.
Енэжвыв кутш дорысь тэрыбӧсь вӧліны миянӧс вӧтӧдысьяс, найӧ вӧтлысисны миян бӧрся керӧсъяс вывті, кыйӧдісны миянӧс овтӧминын.
Дзескӧдысьлӧн налькйӧ шедіс ӧксыным, Господьлӧн мавтыштӧмаыс, олӧмным да ловшыным. А ми чайтім, мый сылӧн сайӧд улын олам войтыръяс пӧвстын.
Нимкодясь да гажӧдчы, Уц муын олысь эдом войтыр!
Тэ кутан юны Енлӧн скӧрлуна дозйысь, коддзымӧныд юан да пасьтӧгыд пӧрччысян.
Сион нылӧй, тэнӧ мыждӧмлы воис пом, Господь оз нин вӧтлы тэнӧ аслад муысь.
А тэнӧ, эдом войтыр, Сійӧ мыждас, став тэнсьыд мыжъястӧ эрдӧдас.
Господьӧй, эн вунӧд, мый миянкӧд лоис.
Видзӧдлы, кутшӧма миянӧс увтыртӧны.
Миян муным вуджис мукӧдлы, керкаясным — локтысь йӧзлы.
Ми колим батьястӧг, мамъясным лоины дӧваясӧн.
Асланым юан ваысь ми мынтысям эзысьӧн, песнымӧс судзӧдам сьӧм вылӧ.
Дзескӧдысьяс миянӧс сийӧсалісны, ми мудзӧмаӧсь, шойччӧгыс абу.
Египетлысь ми корим отсӧг, Ассурлысь корим нянь.
Батьясным вӧчисны мыж. Найӧ абуӧсь нин, а налӧн мыж вӧсна ми нуам мыждӧмсӧ.
Миян вылын ыджыдалӧны кесйӧгъяс, налӧн кипод улысь мездысьыс абу.
Ми полӧмӧн шедӧдам нянь, ӧд овтӧминысь локтӧны шыпурта мырддялысьяс.
Кучикным лои биа пач кодь, тшыглуныс сотӧ миянӧс.
Дзескӧдысьяс мырдӧналӧны аньясӧс Сионын, янӧдӧны нывъясӧс Иуда каръясын.
Юралысьяснымӧс найӧ ӧшӧдісны, пӧрысьясӧс пыдди оз пуктыны.
Зонъясӧс изки бердӧ сувтӧдісны, зонпосни кок йывсьыныс усьӧны пес кыскалӧмысь.
Юрнуӧдысьяс оз нин пукавны карса дзиръя дорын, том йӧз оз нин сьывны-ворсны.
Кусі сьӧлӧманым нимкодьлуныс, йӧктӧм пыдди ми бӧрдам.
Юркытшным усис миян юр вылысь.
Курыд шог миянлы мыж вӧснаным!
Сьӧлӧмным тырӧма дойӧн, синмысь югыдыс кусӧма, ӧд Сион керӧс кушмӧма, сэті ветлӧны шакалъяс.
Господьӧй, Тэ олан нэмъяс чӧж, Тэ пукалан юралан пуклӧсын чужысьяссянь чужысьясӧдз.
Мый вӧсна Тэ дзикӧдз вунӧдін миянӧс, мыйла та дыра кежлӧ эновтін миянӧс?
Господьӧй, бергӧд миянӧс Асланьыд, и ми бергӧдчам.
Бара сет миянлы важ кодь лунъяс.
Тэ ӧмӧй дзикӧдз эновтін миянӧс? Тэ ӧмӧй сэтшӧм ёна лӧгалан миян вылӧ?
{Еврей йӧз (комиӧдіс Kodko) @ Езекиль пророклӧн небӧг @ религ. гижӧд @ Библия @ 2021 @ Лб. .}
Езекиль пророклӧн небӧг
Комынӧд воӧ нёльӧд тӧлысьлӧн витӧд лунӧ, кор ме вӧлі Кевар ю бокын пленӧ босьтӧмаяс пӧвстын, енэжыс воссис, и ме аддзылі Енсянь петкӧдчылӧм.
Тайӧ вӧлі Еконей ӧксыӧс пленӧ босьтӧмсянь витӧд воӧ. Калдея муын Кевар ю бокын меным, Езекиль поплы, Буз пилы, вӧлі Господьсянь кыв, и Сылӧн киыс вӧлі ме вылын.
Ме аддзи, мый войвывсянь кыпӧдчис ён тӧвныр. Сійӧ локтіс ыджыд кымӧрӧн да сявкйысь чардбиӧн. Кымӧрыс ставнас югъяліс-дзирдаліс. 
Кымӧр пытшкас вӧлі би, и сэні биас мыйкӧ югъяліс-дзирдаліс. Би пытшкас тыдалісны нёль ловъя олысь. Мыгӧрнас найӧ вӧліны морт кодьӧсь.
Быдӧнлӧн вӧлі нёль чужӧм да нёль борд.
Кокныс вӧлі веськыд, а кок подныс вӧлі ӧшлӧн кодь, югъяліс ыргӧн моз. [Налӧн бордныс вӧлі кокньыд.]
Нёльнан боксяньыс налӧн борд уланыс вӧліны мортлӧн кодь кияс.
Нёльнанныслӧн вӧліны чужӧмъяс да бордъяс.
Борднаныс найӧ инмисны ӧта-мӧдныслы.
Муніганыс налы эз ковмы бергӧдчыны, ӧд найӧ мунісны сэтчӧ, кытчӧ видзӧдіс чужӧмныс.
Быдӧнлӧн вӧлі мортлӧн кодь чужӧм, веськыдладорас левлӧн кодь, шуйгаладорас ӧшлӧн кодь. Нӧшта быдӧнлӧн вӧлі кутшлӧн кодь чужӧм бӧрсяньыс. Татшӧм вӧлі налӧн чужӧмныс.
Борднысӧ найӧ вӧлі шевкнитӧмаӧсь вывлань, и тайӧ кык борднас найӧ инмисны ӧта-мӧдныслы, а мӧд кык борднас вевттисны ассьыныс мыгӧрнысӧ.
Найӧ мунісны сэтчӧ, кытчӧ видзӧдіс чужӧмныс.
Кытчӧ веськӧдіс найӧс Лов, сэтчӧ найӧ и мунісны.
Налы эз ковмыв бергӧдчынысӧ.
Тайӧ ловъя олысьясыс чужӧм-мыгӧрнаныс вӧліны биа ӧгыр кодьӧсь, ӧзъялысь би кывъяс кодьӧсь.
На костті ветлӧдліс ыпъялысь би, а бисьыс петавліс чардби.
Ловъя олысьяс чардби моз тюръялісны ӧтарӧ-мӧдарӧ.
Ме аддзи, мый быд ловъя олысь улын вӧлі гӧгыль.
Гӧгыльяс сулалісны му вылын. Тайӧ нёльнан гӧгыльыс вӧліны ӧткодьӧсь. Найӧ вӧліны хризолитысь вӧчӧмтор кодьӧсь да сы моз югъялісны.
Быд гӧгыль пытшкын вӧлі нӧшта гӧгыль.
Гӧгыльяс вермисны тюрны нёльнанлаӧ, и налы эз ковмыв бергӧдчынысӧ.
Нёльнан гӧгыль кытшыс вӧлі ыджыд да повзьӧдана, и тырӧма синъясӧн.
Ловъя олысьяскӧд тюрисны и гӧгыльясыс.
А ловъя олысьяслӧн му вывсянь кыпӧдчигӧн гӧгыльясыс тшӧтш кыпӧдчисны.
Ловъя олысьяс мунлісны сэтчӧ, кытчӧ Лов кӧсйис мунны.
А ловъя олысьяскӧд тшӧтш кыпӧдчывлісны и гӧгыльяс, ӧд ловъя олысьяслӧн лолыс вӧлі тайӧ гӧгыльясас.
Кор ловъя олысьясыс мунісны, гӧгыльясыс тшӧтш мунісны, а кор сувтісны, гӧгыльясыс тшӧтш сувтісны.
А кор ловъя олысьясыс кыпӧдчисны му вывсянь, накӧд кыпӧдчисны тшӧтш гӧгыльясыс, ӧд гӧгыльясас вӧлі ловъя олысьяслӧн ловныс.
Ловъя олысьяслӧн юр весьтын вӧлі мегыр сяма вевт, сійӧ измар * моз шемӧсмӧданаа дзирдаліс.
Вевт улас быд ловъя олысь вӧлі шевкнитӧма ӧта-мӧдыслы инмысь бордсӧ, а мӧд кык борднас вевттьӧма ассьыс мыгӧрсӧ.
Ме кылі налӧн бордъяслысь шысӧ. Сійӧ вӧлі бузгысь ыджыд ва кодь, Ставсӧвермысьлӧн гӧлӧс шы кодь. Ловъя олысьяслӧн муніганыс борд шыныс вӧлі уна лыда тышкайӧзлӧн восьлалӧм шы кодь.
А кор найӧ сувтлісны, борднысӧ лэдзлісны.
Ловъя олысьяслӧн сувтӧм да борднысӧ лэдзӧм бӧрын налӧн вевт вывсянь юргис гӧлӧс шы.
Тайӧ вевт весьтас тыдаліс сапфирысь вӧчӧм юралан пуклӧс кодь, кӧні пукаліс Кодкӧ морт кодь.
Ме аддзи, мый коссяньыс вылӧджык Сійӧ югъяліс-дзирдаліс, быттьӧ би пытшкын ыпъяліс.
А коссяньыс улӧджык Сійӧ ставнас вӧлі би пытшкын. Сы гӧгӧр ставыс югъяліс-дзирдаліс.
Сійӧс кытшалысь дзирдалӧмыс вӧлі зэр дырйи кымӧръясын мыччысьӧм ӧшкамӧшка кодь.
Татшӧм ногӧн петкӧдчис Господьлӧн дзирдлуныс.
Сійӧс аддзӧмысь ме кымынь уськӧдчи муас. И ме кылі гӧлӧс шы. Сійӧ шуис меным: «Морт пиӧй, чеччы. Ме кута сёрнитны тэкӧд».
Сылӧн сёрнитігӧн ме пытшкӧ пырис Лов да сувтӧдіс менӧ кок вылӧ. Сэсся ме понді кывзыны мекӧд Сёрнитысьӧс.
Сійӧ шуис меным: «Морт пиӧй, Ме мӧдӧда тэнӧ Израиль пиян дінӧ, кывзысьтӧм йӧз дінӧ, кодъяс эновтісны Менӧ.
Асланыс батьяс моз найӧ пыр на Меным паныд кыпӧдчӧны.
Найӧ яндысьтӧмӧсь да чорыд сьӧлӧмаӧсь.
Ме мӧдӧда тэнӧ на дінӧ, медым тэ шуан налы, мый тадзи висьталӧ Господь Ыджыдыс.
Кывзас-ӧ тэнӧ тайӧ асныра войтырыс либӧ оз, но найӧ мед тӧдасны, мый на дінӧ воліс пророк.
Морт пиӧй, тэ эн пов наысь, эн повзьы налӧн сёрниысь, эн пов, весиг кӧ найӧ лоӧны бытшкалысь лежнӧг кодьӧс, весиг кӧ кутан овны на дінын скорпионъяс пӧвстын моз.
Эн пов налӧн сёрниысь, эн повзьы наысь, ӧд найӧ асныра войтыр.
Кывзас-ӧ тэнӧ тайӧ асныра войтырыс либӧ оз, висьтав налы Менсьым кывъясӧс.
Морт пиӧй, кывзы, мый Ме висьтала тэныд.
Эн ло тайӧ войтырыс кодь асныра.
Восьт вомтӧ да сёй, мый Ме сета тэныд».
Сэсся ме аддзи, мый ме дінӧ нюжӧдчис ки, а киас вӧлі гартӧм гижӧд.
Ме водзын Сійӧ разис гижӧдсӧ, кӧні кыкнанладорас вӧлі гижӧма горзӧмъяс да шогсьӧм-бӧрдӧмъяс.
Сійӧ шуис меным: «Морт пиӧй, сёй гартӧм гижӧдсӧ, мый тэ водзын. Сэсся мун да висьтав Израиль войтырлы Менсьым кывйӧс».
Ме восьті вомӧс, и Сійӧ сетіс меным сёйны тайӧ гартӧм гижӧдсӧ.
Сійӧ шуис: «Морт пиӧй, сёй пӧттӧдзыд. Кынӧмыд мед пӧтас тайӧ гартӧм гижӧднас, мый Ме сеті тэныд».
Ме сёйи. Менам вомын сійӧ вӧлі ма кодь юмов.
Сійӧ шуис меным: «Морт пиӧй, мун Израиль войтыр дінӧ да висьтав налы Менсьым кывйӧс.
Тэнӧ мӧдӧдӧма абу тӧдтӧм кывъя да гӧгӧрвотӧм сёрниа войтыр дінӧ, а мӧдӧдӧма Израиль войтыр дінӧ. Тэнӧ мӧдӧдӧма абу тӧдтӧм кывъя да гӧгӧрвотӧм сёрниа войтыръяс дінӧ, кодъяслысь кывъяссӧ тэ он гӧгӧрво.
На дінӧ кӧ мӧдӧді, найӧ эськӧ кывзісны тэнӧ.
Но Израиль войтыр оз кут кывзыны тэнӧ, ӧд найӧ оз кӧсйыны Менӧ кывзыны. Найӧ ставныс асныраӧсь да чорыд сьӧлӧмаӧсь.
Ме вӧча тэнӧ на кодь зумыдӧн да чорыдӧн.
Вӧча тэнӧ алмаз кодьӧн, изйысь на чорыдӧн.
Эн шӧйӧвош, эн пов наысь, тайӧ асныра войтырсьыс».
Сійӧ шуис меным: «Морт пиӧй, кывзы Менсьым кывъясӧс, сибӧд сьӧлӧмад, мый Ме висьтала.
Мун пленын олысь аслад войтырыд дінӧ да шу налы, мый тадзи висьталӧ Господь Ыджыдыс. Ставсӧ висьтав, кывзасны-ӧ либӧ оз кывзыны найӧ тэнӧ».
Та бӧрын Лов кыпӧдіс менӧ.
Ме кылі бӧрвылысь грымакылысь вына гӧлӧс: «Ошкӧй дзирдлуна Господьӧс Сылӧн оланінас!»
Ме кылі ловъя олысьяслысь борд шысӧ, ӧта-мӧдныслы инмалӧмсӧ. Ме кылі гӧгыльяслысь шысӧ да горасьыс-гора грымакылӧм.
Лов кыпӧдіс менӧ да нуӧдіс сэтысь.
Ме муні курыд сьӧлӧмӧн да ёна дӧзмӧмӧн, Господьлӧн киыс личкис менӧ.
Ме бӧр локті пленын олысьяс дінӧ Тел-Авивӧ, Кевар ю бокӧ. Шӧйӧвошӧмаӧн ме олі на пӧвстын сизим лун чӧж.
Сизим лун мысти меным вӧлі Господьсянь кыв:
«Морт пиӧй, Ме пукті тэнӧ Израиль войтырлы видзысьӧ. Кор тэ кылан Менсьым кывйӧс, тэныд ковмас ӧлӧдны Израиль войтырӧс Ме пыдди.
Кор Ме шуа лёк вӧчысьлы, мый сійӧ кулас, а тэ он ӧлӧд, медым сійӧ бергӧдчас лёк туй вывсьыс да ловйӧн коляс, сэки лёк вӧчысь кулас мыж вӧснаыс. Но сылӧн вирысь Ме водзӧс перъя тэнсьыд.
Тэ кӧ ӧлӧдан лёк вӧчысьӧс, а сійӧ оз дугды лёксӧ вӧчны да оз бергӧдчы лёк туй вывсьыс, сэки сійӧ кулас аслас мыж вӧсна, а тэ мездан ассьыд олӧмтӧ.
Веськыда олысь кӧ кежас веськыдлунысь да кутас вӧчны лёксӧ, сэки Ме потшӧсала сылысь туйсӧ, и сійӧ крукасяс да кулас. Тэ кӧ он ӧлӧд сійӧс, сійӧ аслас мыж вӧсна кулас, и сылысь веськыдлуна олӧмсӧ лоӧ вунӧдӧма.
Сылӧн вирысь Ме водзӧс перъя тэнсьыд.
Но тэ кӧ ӧлӧдан веськыда олысьӧс, медым сійӧ мыжсӧ эз вӧч, и сійӧ оз вӧч мыжсӧ, сэки ловйӧн коляс, ӧд кывзіс ӧлӧдӧмсӧ. Тэ тшӧтш мездан ассьыд олӧмтӧ».
Господьлӧн киыс вӧлі ме вылын. Господь шуис меным: «Чеччы да пет ковтысӧ, сэні Ме кута сёрнитны тэкӧд».
Ме чеччи да петі ковтысӧ.
Сэні ме аддзи Господьлысь дзирдлунсӧ, и сійӧ вӧлі дзик сэтшӧм, кутшӧмӧс ме аддзылі Кевар ю бокын.
Ме кымынь уськӧдчи муас.
Ме пытшкӧ пырис Лов да сувтӧдіс менӧ кок вылӧ. Сійӧ сёрнитіс мекӧд да шуис: «Мун да йигнась гортад.
Морт пиӧй, тэнӧ кӧртавласны гезйӧн, и тэ он вермы петны йӧз дінӧ.
Ме вӧча сідз, мый кывйыд ляксяс горш бердад, и тэ он вермы сёрнитнытӧ, он кут ӧлӧдны тайӧ асныра войтырсӧ.
Но кор Ме кута висьтавны тэныд, сэки восьта тэнсьыд кыв-вортӧ, и тэ шуан налы, мый тадзи висьталӧ Господь Ыджыдыс.
Коді кутас кывзыны, мед кывзӧ, а коді оз, мед оз. Ӧд тайӧ войтырыс асныра».
«Морт пиӧй, босьт кирпич, пукты ас водзад да серпасав сэтчӧ Ерусалим кар.
Карсӧ босьт кытшӧ. Кар гӧгӧрыс лэпты тымӧд, сувтӧдав тышкайӧзӧс да стен жуглан керъяс. 
Босьт кӧрт лист, сувтӧд сійӧс тэа-кар костӧ кӧрт стен пыдди да видзӧд карыс вылӧ.
Карсӧ кытшӧ босьтӧмыс Израиль войтырлы лоӧ индысьпасӧн.
Вод шуйга бок вылад да босьт ас вылад Израиль войтырлысь мыжсӧ. Став кад чӧжыс, мый дыра тэ кутан куйлыны шуйга бок вылад, кутан нуны Израиль войтырлысь мыжсӧ.
Ме урчита тэныд нуны Израиль войтырлысь мыжсӧ сы мында лун, кымын во чӧж найӧ мыж вӧчисны — куимсё ӧкмысдас лун.
Тайӧс вӧчӧм бӧрын вод веськыд бок вылад да нелямын лун чӧж ну Иуда войтырлысь мыжсӧ. Быд воысь Ме урчита тэныд ӧти лун.
Видзӧд кытшӧ босьтӧм Ерусалим вылӧ, состӧ пуджӧмӧн кыпӧд веськыд китӧ сылань да пророкав сылы паныд.
Ме кӧртала тэнӧ гезйӧн, и тэ он вермы бергӧдчыны мӧдар бок вылад, кытчӧдз Ерусалим карӧс кытшалан лунъясыд оз помасьны.
Босьт шобді, ид, анькытш, чечевица, проса, полба да кисьт ставсӧ ӧти дозйӧ. Пӧжав наысь аслыд нянь да сёй сійӧс куимсё ӧкмысдас лун чӧж, кор кутан куйлыны бок вылад.
Весит ӧти лун кежлӧ кызь сикель нянь да сёй сійӧс урчитӧм кадӧ.
Ватӧ тшӧтш муртав да урчитӧм кадӧ ю гинлысь квайтӧд пайсӧ.
Пӧжав няньтӧ ид сӧчӧнӧс моз. Пӧжав сійӧс морт сіт вылын став йӧзыслӧн син водзын».
Господь шуис: «Тадзи Израиль пиян тшӧтш кутасны сёйны пеж нянь войтыръяс пӧвстын, кытчӧ вӧтла-разӧда найӧс».
Ме шуи: «Господьӧй Ыджыдӧй! Ме некор эг пежавлы ачымӧс. Том кадсянь талунъя лунӧдз ме эг сёйлы зверӧн косявлӧм пемӧслысь либӧ шой пемӧслысь яй.
Ме вомӧ эг босьтлы пеж яй».
Господь шуис меным: «Ме лэдза тэныд морт сіт пыдди мӧс сіт вылын няньтӧ пӧжавны».
Господь шуис меным: «Морт пиӧй, Ме мырддя ерусалимса олысьяслысь няньсӧ. Няньторсӧ найӧ кутасны сёйны веситӧмӧн да майшасьӧмпырысь, васӧ кутасны юны мурталӧмӧн да полӧмпырысь. Няньыс да ваыс налы оз кут тырмыны.
Ставнысӧ полӧм босьтас, найӧ косьмасны-сісьмасны мыжныс вӧсна».
«Морт пиӧй, шырсьысьлӧн пурт пыдди босьт лэчыд шыпурт да брит юрситӧ да тоштӧ. Босьт вески и веситӧмӧн юклы бритӧм юрситӧ да тоштӧ куим пельӧ.
Кор помасясны Ерусалим карӧс кытшалан лунъясыд, ӧти пайсӧ биын сот кирпич вылӧ серпасалӧм кар шӧрас.
Мӧд пайсӧ керав шыпуртӧн кар саяс, а коймӧд пайсӧ шыбит, мед тӧлыс разӧдас.
Ме перъя шыпуртӧс да вӧтӧда коймӧд пайсӧ.
Шыбитӧм юрсисьыд босьт неуна да кӧртав паськӧм дорышад.
Но и сэтысь мыйтакӧ босьт да шыбит биӧ, мед сотчас.
Тайӧ биыс суас Израиль войтырӧс.
Господь Ыджыдыс тадзи висьталӧ: тайӧ ставыс Ерусалим йылысь.
Ме сувтӧді сійӧс войтыръяс пӧвстӧ, а сы гӧгӧр паськӧді войтыръяслысь муяссӧ.
Но Ерусалимын олысьяс кыпӧдчисны Менам индӧд-тшӧктӧмъяслы паныд, мукӧд войтыръяс дорысь унджык лёксӧ вӧчисны да ёнджыка на Менсьым тшӧктӧмъясӧс торкисны.
Найӧ бокӧ вештӧмаӧсь Менсьым тшӧктӧмъясӧс, оз овны Менам индӧдъяс серти.
Та вӧсна Господь Ыджыдыс тадзи висьталӧ: тіян гӧгӧр олысь войтыръяс дорысь ті ёна асныраӧсь, ӧд Менсьым тшӧктӧмъясӧс вештінныд бокӧ, Менам индӧдъяс серти онӧ олӧй, весиг тіян гӧгӧр олысь войтыръяслӧн индӧдъяс серти онӧ олӧй. Та вӧсна Господь Ыджыдыс тадзи висьталӧ: Ерусалим, Ме сувта тэныд паныд да мыжда тэнӧ мукӧд войтыръяслӧн син водзын.
Став тэнад пеж уджъяссьыд Ме мыжда тэнӧ сідзи, кыдзи некор на эг мыждыв. И водзӧ тадзисӧ Ме ог вӧч.
Батьыс кутас сёйны писӧ, а пияныс кутасны сёйны батьнысӧ.
Ме мыжда тэнӧ, Ерусалим, а тэнсьыд ловйӧн кольӧмаястӧ тӧвйыв разӧда.
Ме Ачым кыв сетӧмӧн шуа, мый кушӧдз шыра тэнӧ, — висьталӧ Господь Ыджыдыс, — ӧд тэ пежалін Менсьым вежаинӧс аслад пеж уджъясӧн да зывӧкторъясӧн. Ме ог жалит тэнӧ, ог бурсьӧлӧмтчы тэ дінӧ.
Тэнад олысьяс пӧвстысь ӧти пайыс кулас пӧрӧс висьӧмысь да тшыгъялӧмысь.
Мӧд пайыс шыпурт помысь кулас тэнад стен сайын.
А коймӧд пайсӧ Ме тӧвйыв разӧда. Ме перъя шыпуртӧс да вӧтӧда найӧс.
Ме кисьта Ерусалимын олысьяс вылӧ Ассьым скӧрлунӧс, койышта на вылӧ Ассьым ярлунӧс, и сӧмын та бӧрын бурмас Менам сьӧлӧмӧй.
Кор Менам скӧрлунӧй мунас на вывті, найӧ тӧдмаласны, мый вежӧгтӧмпырысь Ме, Господь, мыжді найӧс.
Ерусалим, Ме вӧча тэнӧ из чукӧрӧн, тэ гӧгӧр олысь войтыръяслы да тэ дінті ветлысь-мунысьяслы сета тэнӧ лёкӧдны.
Тэ гӧгӧр олысь войтыръяс кутасны лёкӧдны-омӧльтны тэнӧ. Найӧс полӧм босьтас, кор аддзасны, мый Ме мыжді тэнӧ да кисьті тэ вылӧ Ассьым скӧрлунӧс да ярлунӧс.
Тайӧс висьтала Ме, Господь.
Ерусалимын олысьяс, Ме ньӧвъясӧн моз бырӧда тіянӧс тшыгъялӧм помысь. Ме мырддя тіянлысь няньнытӧ, и ті кутанныд ёна тшыгъявны. Тіян тшыгъялӧм дырйи Ме ыста тіян вылӧ зверъясӧс, кодъяс виасны ныв-пинытӧ.
Тіянӧс суас пӧрӧс висьӧм да вир кисьтӧм. Ме вайӧда тіян вылӧ шыпуртӧс.
Тайӧс висьтала Ме, Господь».
Меным вӧлі Господьсянь кыв:
«Морт пиӧй, бергӧд чужӧмтӧ израильса керӧсъяслань да пророкав налы паныд. Тшӧкты налы кывзыны Господь Ыджыдлысь кывсӧ.
Шу, мый Господь Ыджыдыс тадзи висьталӧ тіянлы, керӧсъяс да мылькъяс, ковтысъяс да сёртасъяс: — Шыпурт мӧдӧда тіян вылӧ, бырӧда вись ваян мылькъяснытӧ.
Висьпуктанінъяснытӧ куштасны, тшынӧдчанінъяснытӧ жугласны. Идолъясныд водзӧ Ме шыблала виӧмаясӧс.
Израиль пиянлысь шойяссӧ пукта идолъясныс водзӧ, лыяснысӧ пазӧда налӧн висьпуктанінъяс гӧгӧр.
Быдлаын, кӧні ті оланныд, каръясныд лоасны овтӧминӧн, вись ваян мылькъясныд — кушинӧн. Висьпуктанінъяснытӧ да идолъяснытӧ лоӧ пасьвартӧма, тшынӧдчанінъяснытӧ да киӧн вӧчӧмторъяснытӧ — дзикӧдз бырӧдӧма.
Тіян пӧвстысь унаӧс лоӧ виӧма. Сэки ті тӧдмаланныд, мый Ме — Господь!
Но ӧткымынӧс тіян пиысь Ме коля ловйӧн. Шыпуртысь мездмӧм бӧраныс найӧс лоӧ разӧдӧма мукӧд войтыръяс пӧвстӧ йӧз муясӧ.
Сэні пленын олігӧн найӧ тӧд выланыс уськӧдасны Менӧ, кор Ме жугӧда налысь сьӧлӧмсӧ да пемдӧда налысь синсӧ. Ӧд найӧ эновтісны Менӧ да кырсалысь ань моз сетчисны идолъяслы.
Та бӧрын найӧ зывӧктасны асьнысӧ став пеж вӧчӧмсьыныс и тӧдмаласны, мый Ме — Господь.
Тӧдмаласны, мый Менам вӧлі помка, мыйла Ме шуи шог ыстыны на вылӧ.
Господь Ыджыдыс тадзи висьталӧ: зымӧд кинад-кокнад да горзы: “Курыд шог Израильлы сылӧн став пеж вӧчӧмсьыс”. 
Израиль войтыр кулас шыпурт помысь, тшыгъялӧмысь да пӧрӧс висьӧмысь.
Ылі муын олысьяс пӧрӧс висьӧмысь куласны, матын олысьяс шыпурт помысь усясны, ловйӧн кольӧмаяс тшыгнысла куласны.
Ме кисьта на вылӧ став Ассьым скӧрлунӧс.
Кор налӧн шойясыс кутасны туплясьны налӧн идолъяскӧд орччӧн, висьпуктанінъяс гӧгӧр, быд джуджыд мыльк вылын да быд керӧс йылын, быд пашкыр пу улын да веж коръя тупу улын — быдлаын, кӧні асланыс идолъяслы вайлісны чӧскыда ӧвтан висьяс, сэки ті тӧдмаланныд, мый Ме — Господь.
Ме лэпта на вылӧ Ассьым киӧс да кушта тайӧ муысь налысь оланінъяссӧ овтӧминсянь Ривла карӧдз. Сэки найӧ тӧдмаласны, мый Ме — Господь».
Меным вӧлі Господьсянь кыв:
— Морт пиӧй, [висьтав, мый] Господь Ыджыдыс тадзи висьталӧ: Израиль мулы воис пом. Мусӧ помсянь помӧдз лоӧ бырӧдӧма.
Израиль, тэныд воис пом.
Ме кисьта тэ вылӧ Ассьым скӧрлунӧс, мыжда тэнӧ олан туйыд серти, мынтыся зывӧк вӧчӧмсьыд.
Ме ог жалит тэнӧ, ог бурсьӧлӧмтчы тэ дінӧ. Ме мынтыся тэныд олан туйыд серти, зывӧк вӧчӧмсьыд тэ кывкутан. Сэки ті тӧдмаланныд, мый Ме — Господь.
Господь Ыджыдыс тадзи висьталӧ: шог бӧрся шог локтӧ, тэныд пом воӧ, тэнӧ бырӧдӧм виччысьӧ.
Мыждӧм суис тіянӧс, Израиль муын олысьясӧй.
Воис кад, матын сійӧ луныс, кор шызьӧм кутас кывны керӧсъяс вылын, а оз нимкодясьӧм.
Регыд Ме кисьта тіян вылӧ Ассьым скӧрлунӧс, Ассьым ярлунӧс петкӧдла тіянлы. Ме мыжда тіянӧс олан туйныд серти, мынтыся зывӧк вӧчӧмсьыныд.
Ме ог жалит тіянӧс, ог бурсьӧлӧмтчы тіян дінӧ.
Ме мынтыся тіянлы олан туйныд серти, зывӧк вӧчӧмсьыныд ті кывкутанныд.
Сэки ті тӧдмаланныд, мый Ме — мыждысь Господь.
Матыстчӧ сійӧ луныс, суас тіянӧс мыждӧмыс.
Дзескӧдӧмӧн юралӧм паськалӧ, ыкшалун быдмӧ, виалӧм-дзескӧдӧм содӧ, сійӧ — лёк вӧчысьяс киын бедь.
Весиг морт оз коль налӧн ызгысь чукӧрысь, налӧн озырлунысь нинӧм оз коль, налӧн вылӧ кыпӧдчӧмыс бырас.
Воис кад, матыстчӧ лун.
Ньӧбысь мед оз нимкодясь, вузалысь мед оз бӧрд, ӧд ставныс вылӧ киссьӧ скӧрлунӧй.
Вузалысь кӧть и ловйӧн кольӧ, но вузалӧм муас оз вермы бӧр бергӧдчыны.
Пророклӧн аддзылӧмыс оз вежсьы, мыждӧмыс суас найӧс ставнысӧ. Мыж вӧчысь оз вермы видзны ассьыс олӧмсӧ.
Тутсӧ труба, ставсӧ дасьтӧма, сӧмын тышӧ петысьыс абу, ӧд Менам скӧрлунӧй налӧн ыджыд чукӧр вылӧ киссьӧ.
Ывлаын — шыпурт, керкаын — пӧрӧс висьӧм да тшыгъялӧм.
Видз-му вылын шыпурт виӧ, карын тшыгъялӧм да пӧрӧс висьӧм шырӧ.
Ловйӧн кольысьяс керӧсӧ пышъясны, гулюяс моз кырта потасӧ дзебсясны.
Быдӧн пондас ымзыны-бӧрдны аслас мыж вӧснаыс.
Киныс лёткысяс, пидзӧсныс дзӧрмас-лигышмунас.
Найӧ пасьталасны шогалан паськӧм, бритасны юрнысӧ. Полӧм-тіралӧм босьтас найӧс, яндзим вевттяс чужӧмнысӧ.
Найӧ эзысьнысӧ ывлаӧ шыбитасны, зарнинысӧ пежӧн лыддясны.
Господьлӧн скӧралан лунӧ эзысь ни зарни оз мезды найӧс, ӧд эзысь-зарнитӧ он сёй, кынӧмтӧ наӧн он пӧткӧд.
Буретш эзысь-зарниӧ найӧ крукасисны, мыжас вӧйисны.
Эзысь да зарни мичмӧдчанторъясӧн найӧ ошйысисны, эзысь-зарниысь зывӧк бӧлбанъяс вӧчисны.
Та вӧсна налысь донаторнысӧ Ме пежӧ бергӧда, сета йӧз муысь локтысьяслӧн киӧ. Налысь донаторъяснысӧ мырддяласны да пежаласны лёк вӧчысьяс.
Ме бергӧда Израиль войтырысь чужӧмӧс, и найӧ пежаласны Менсьым дона керкаӧс, мырддялысьяс пырасны сэтчӧ да пежаласны сійӧс.
Найӧ вайӧдасны Израиль войтырӧс шызьӧмӧдз, ӧд муыс тырас вир кисьтӧмӧн, юркарын паськалас виалӧм-дзескӧдӧм.
Ме вайӧда лёксьыс-лёк войтыръясӧс, и найӧ босьтасны Ерусалимын олысьяслысь керкаяссӧ.
Вынаяслӧн ыкшаасьӧмлы Ме пукта пом, вежаинъяснысӧ лоӧ пежалӧма.
Ыджыд бырӧдӧм суас найӧс, найӧ пондасны корсьны лӧньлун, но оз аддзыны.
Шог бӧрся шог локтӧ, юӧр бӧрся — юӧр.
Найӧ кутасны виччысьны, мый висьталасны пророкъяс асланыс аддзылӧм йылысь, кӧсъясны кывны попъяслысь велӧдӧмсӧ, но велӧдӧмыс оз ло, и пӧрысьяс туйдӧдны оз вермыны.
Ӧксы пондас шогсьыны, юралысьяс повзясны, войтырыс весьӧпӧрас.
Ме мынтыся налы олан туйныс серти, мыжда найӧс, кыдзи найӧ мукӧдӧс мыждісны.
Сэки найӧ тӧдмаласны, мый Ме — Господь.
Квайтӧд вонас квайтӧд тӧлысьлӧн витӧд лунӧ ме вӧлі гортын, и меным воча пукалісны иудаса юрнуӧдысьяс. Господь Ыджыдлӧн киыс вӧлі ме вылын.
Ме аддзи морт мыгӧр, коді коссяньыс улӧджык югъяліс би моз, а коссяньыс вылӧджык сійӧ югъяліс-дзирдаліс ыргӧн моз.
Сійӧ нюжӧдіс ки сямаӧс да босьтіс менӧ юрсиӧд. Лов кыпӧдіс менӧ енэжа-муа костас да вайӧдіс Ерусалимӧ. Тайӧ вӧлі Енсянь петкӧдлӧм. Лов сувтӧдіс менӧ пытшкӧс йӧрлӧн войвывса дзиръя дорӧ, кӧні сулаліс Господьлысь вежӧгтӧмсӧ кыпӧдысь бӧлбан.
Сэні ме аддзи Израиль Енлысь сэтшӧм жӧ дзирдлунсӧ, кутшӧмӧс ме аддзылі ковтысын.
Сійӧ шуис меным: «Морт пиӧй, видзӧдлы войвылӧ».
Ме видзӧдлі войвылӧ да аддзи, мый висьпуктанін дзиръя дорын сулалӧ Господьлысь вежӧгтӧмсӧ кыпӧдысь бӧлбан.
Господь шуис меным: «Морт пиӧй, аддзан-ӧ, мый вӧчӧ Израиль войтыр?
Найӧ вӧчӧны зывӧксӧ, та вӧсна Ме эновта Ассьым вежаинӧс. Видзӧд, и унджык на аддзан зывӧксӧ».
Господь вайӧдіс менӧ крам йӧр пыранінӧ, и ме аддзи йӧр стенмысь розь.
Господь шуис меным: «Морт пиӧй, ыдждӧд розьсӧ».
Ме ыдждӧді розьсӧ, мый позис сэті пырны.
Господь шуис меным: «Пыр да видзӧдлы, кутшӧм зывӧк найӧ вӧчӧны тані».
Ме пыри да аддзи, мый стен пасьталаыс вӧлі серпасалӧма гаг-веглясьысьясӧс, пеж пемӧсъясӧс да Израиль войтырлысь идолъяссӧ.
Израиль войтырлӧн сизимдас юрнуӧдысьыс сулалісны серпасъяс водзас. Шафанлӧн Язаний пиыс тшӧтш вӧлі юрнуӧдысьяс пӧвстас.
Быдӧн киас кутіс ассьыс тшынӧдчан дозсӧ, и сэтысь чӧскыд дука тшын кымӧрӧн кыптіс вывлань.
Господь шуис меным: «Морт пиӧй, аддзан-ӧ, мый Израильлӧн юрнуӧдысьясыс вӧчӧны асланыс пемыд жыръясын, кӧні серпасалӧма идолъясӧс?
Найӧ шуӧны, Господь пӧ оз аддзы миянӧс, Сійӧ пӧ эновтӧма тайӧ мусӧ».
Господь шуис меным: «Видзӧд, и унджык на аддзан налысь зывӧк вӧчӧмсӧ».
Господь вайӧдіс менӧ Господьлӧн крамӧ пыран войвыв дзиръя дорӧ. Сэні ме аддзи пукалысь аньясӧс, кодъяс бӧрдісны Таммуз * идол вӧсна. Господь шуис меным: «Аддзан-ӧ, морт пиӧй?
Видзӧд, и унджык на аддзан зывӧксӧ».
Господь вайӧдіс менӧ крамлӧн пытшкӧс йӧрӧ. Крам пыранін дорын, посводз да висьпуктанін костын, сулалісны кызь вит кымын айлов. Найӧ сулалісны Господьлӧн крамлы мышкӧн, чужӧмнаныс асыввылӧ, да копрасисны шонділы.
Сійӧ шуис меным: «Аддзан-ӧ, морт пиӧй?
Иуда войтырлы оз ӧмӧй тырмы зывӧк вӧчӧмыс? Виалӧм-дзескӧдӧмнас найӧ тыртісны мусӧ да ӧтарӧ скӧрмӧдӧны Менӧ, кор Меным ныр улӧ пуктӧны пу вожъяс.
Та вӧсна Ме кисьта на вылӧ Ассьым скӧрлунӧс, ог жалит найӧс да ог бурсьӧлӧмтчы на дінӧ.
Мед гораа горзӧны Меным, но Ме ог кыв найӧс».
Та бӧрын ме кылі, кыдзи Господь гораа горӧдіс: «Локтӧй, Ерусалим карӧс мыждысьяс! Босьтӧй кианыд тышкасянторнытӧ!»
Сэки квайт морт локтісны войвывлань видзӧдысь вылыс дзиръя дорсянь. Быдӧнлӧн киас вӧлі виалӧм могысь тышкасянтор. Накӧд тшӧтш локтіс шабді паськӧма морт, кодлӧн вӧнь бердас вӧлі гижасянтор.
Локтысьяс сувтісны ыргӧн висьпуктанін дорӧ.
Сэки Израиль Енлӧн дзирдлуныс кыпӧдчис херувим вылысь да вуджис крам ӧдзӧслань.
Господь корис шабді паськӧма мортӧс, кодлӧн вӧнь бердас вӧлі гижасянтор, да шуис сылы: «Мун Ерусалим карӧд да пукты плешканыс пас налы, кодъяс сьӧкыда ышлолалӧны да бӧрдӧны тайӧ карас зывӧк вӧчӧм понда».
Ме кылі, кыдзи Господь мукӧдыслы шуис: «Мунӧй сы бӧрся карӧд да жалиттӧг виалӧй йӧзсӧ, энӧ нормӧй сьӧлӧмнаныд.
Виалӧй пӧрысьясӧс и ныв-зонмӧс, челядьӧс и аньясӧс. Бырӧдӧй ставнысӧ, но найӧс, кодлӧн эм пас, энӧ вӧрӧдӧй. Босьтчӧй виавны Менам вежаинсянь».
Медводз найӧ виисны крам водзын сулалысь юрнуӧдысьясӧс.
Сэсся Господь шуис квайт мортыслы: «Тыртӧй крам йӧрсӧ шойясӧн, тадзи пежалӧй крамсӧ, а сэсся петӧй сэтысь».
Найӧ петісны да пондісны виавны карса олысьясӧс.
Кор найӧ мунісны, ме коли ӧтнам да кымынь уськӧдчӧмӧн куті горзыны: «Господьӧй Ыджыдӧй! Ассьыд скӧрлунтӧ Ерусалим кар вылӧ кисьтігӧн Тэ ӧмӧй бырӧдан Израильлысь став коляссӧ?»
Господь шуис меным: «Израиль войтырлӧн да Иуда войтырлӧн мыжыс вывті ыджыд.
Тайӧ муыс тырӧма вирӧн, и тайӧ карас веськыда мыждӧмыс абу.
Йӧзыс шуӧны, Господь пӧ эновтӧма тайӧ мусӧ, Господь пӧ оз аддзы.
Та вӧсна Ме ог жалит найӧс, ог бурсьӧлӧмтчы на дінӧ.
Ме мынтыся налы олан туйныс серти».
Сэки шабді паськӧма морт, кодлӧн вӧнь бердас вӧлі гижасянтор, бӧр локтіс да юӧртіс: «Ме вӧчи ставсӧ, мый Тэ тшӧктін меным».
Ме аддзи, мый херувимъяслӧн юр весьтын вӧлі вевт, а сы вылын сулаліс сапфир изйысь вӧчӧм юралан пуклӧс сяма.
Господь шуис шабді паськӧма мортлы: «Пыр гӧгыльяс костӧ, херувимъяс улӧ. Содз тырыд босьт херувимъяс костысь биа ӧгырсӧ да койышт кар вылас».
Ме аддзи, мый сійӧ муніс.
Херувимъяс сулалісны крам лунвывладорын, кор шабді паськӧма морт пырис на улӧ. Крамлысь пытшкӧс йӧрсӧ вӧлі вевттьӧма кымӧр.
Господьлӧн дзирдлуныс кыпӧдчис херувимъяс вылысь да вуджис крам ӧдзӧслань. Крамсӧ тыртіс кымӧр, а крам йӧрыс тырис Господьлӧн дзирдлунӧн.
Херувимъяслӧн борд шыныс кыліс весиг ортсы йӧрӧдз, сійӧ вӧлі Ставсӧвермысь Енлӧн гӧлӧс шы кодь.
Кор шабді паськӧма мортлы Господь тшӧктіс мунны да босьтны гӧгыльяс костысь, херувимъяс шӧрысь, биа ӧгыр, сійӧ муніс да сувтіс гӧгыль дінас. Херувимъясысь ӧтиыс нюжӧдіс кисӧ на костын ӧзйысь билань, босьтіс биа ӧгырсӧ да пуктіс шабді паськӧма мортлы соддзас. Сійӧ босьтіс ӧгырсӧ да петіс.
Херувимъяслӧн борд улын тыдаліс мортлӧн кодь ки.
Ме аддзи херувимъяс дорысь нёль гӧгыль, быд херувим дорын вӧлі ӧти гӧгыль. Гӧгыльясыс вӧліны хризолит из кодьӧсь.
Тайӧ нёльнан гӧгыльыс вӧліны ӧткодьӧсь, быд гӧгыль пытшкын вӧлі нӧшта гӧгыль.
Гӧгыльяс вермисны тюрны нёльнанлаӧ, и найӧ эз бергӧдчывны. Найӧ тюрисны сэтчӧ, кытчӧ видзӧдісны херувимъяс.
Херувимъяслӧн мыгӧрныс, мышкуныс, киныс, бордныс да став нёльнан гӧгыльыс вӧлі тырӧмаӧсь синъясӧн.
Ме кылі, мый тайӧ гӧгыльяссӧ шуисны галгалӧн.*
Быд херувимлӧн вӧлі нёль чужӧм: херувим чужӧм, морт чужӧм, лев чужӧм да кутш чужӧм. Тайӧ вӧліны сійӧ жӧ ловъя олысьясыс, кодъясӧс ме аддзылі Кевар ю бокысь. Херувимъяс кыпӧдчисны.
Налӧн мунігӧн накӧд тюрисны и гӧгыльясыс.
Кор херувимъяс шевкнитісны борднысӧ да кыпӧдчисны му вывсянь, гӧгыльясыс на бердысь эз торъявны.
Кор херувимъяс сувтісны, гӧгыльясыс тшӧтш сувтісны.
А кор херувимъяс кыпӧдчисны, накӧд кыпӧдчисны тшӧтш гӧгыльясыс, ӧд гӧгыльясас вӧлі ловъя олысьяслӧн ловныс.
Господьлӧн дзирдлуныс вешйис крам ӧдзӧс дорысь да вуджис херувимъяс вылӧ.
Херувимъяс шевкнитісны борднысӧ да менам син водзын кыпӧдчисны му вывсянь.
Гӧгыльясыс кыпӧдчисны накӧд.
Херувимъяс сувтісны Господьлӧн крамӧ пыран асыввыв дзиръя дорӧ, и Израиль Енлӧн дзирдлуныс вӧлі на вылын.
Тайӧ вӧліны сійӧ жӧ ловъя олысьясыс, кодъясӧс ме аддзылі Кевар ю бокын да кодъяс весьтын вӧлі Израильлӧн Ен.
Ме гӧгӧрвои, мый тайӧ херувимъяс.
Быдӧнлӧн вӧлі нёль чужӧм да нёль борд, а борд уланыс вӧлі мортлӧн кодь ки.
Чужӧмнас да мыгӧрнас найӧ вӧліны сэтшӧмӧсь жӧ, кутшӧмъясӧс ме аддзылі Кевар ю бокысь.
Быдӧн муніс сэтчӧ, кытчӧ видзӧдіс чужӧмыс.
Лов кыпӧдіс менӧ да вайӧдіс Господьлӧн крамӧ пыран асыввыв дзиръя дорӧ.
Сэні сулалісны кызь вит морт.
На пӧвстысь ме аддзи Азурлысь Язаний писӧ да Бенайлысь Пелатий писӧ. Найӧ вӧліны войтырлӧн юралысьяс.
Господь шуис меным: «Морт пиӧй, тайӧ йӧзыс мӧвпалӧны лёксӧ вӧчны да карса олысьясӧс веськӧдӧны лёкас. Найӧ шуӧны: “Сійӧ луныс абу на матын.
Вайӧ кыпӧдамӧй керкаяс.
Тайӧ карыс — пӧрт, а ми — яй”.
Та вӧсна, морт пиӧй, налы паныд пророкав, налы паныд водзвыв висьтав!»
Господьлӧн Лолыс лэччис ме вылӧ да тшӧктіс шуны: «Господь тадзи висьталӧ: Израиль войтыр, Ме тӧда тіянлысь сёрнинытӧ, тӧда тіянлысь мӧвпъяснытӧ.
Тіян вӧсна тайӧ карас виӧма уна йӧзӧс да карса туйяссӧ тыртӧма шойясӧн.
Та вӧсна Господь Ыджыдыс тадзи висьталӧ: тайӧ карыс — пӧрт, а карас туплясьысь виӧмаясыс — яй.
Но тіянӧс Ме вӧтла карсьыс.
Ті поланныд шыпуртысь, сідзкӧ, тіян вылӧ шыпурт и вайӧда, — висьталӧ Господь Ыджыдыс. — Ме вӧтла тіянӧс тайӧ карсьыс да сета тіянӧс йӧз муысь локтысьяс киӧ. Ме мыжда тіянӧс, и ті куланныд шыпурт помысь.
Ме мыжда тіянӧс Израиль керӧсъяс вылын, и ті тӧдмаланныд, мый Ме — Господь.
Тайӧ карыс оз ло тіянлы пӧртйӧн, и ті онӧ лоӧй сэні яйӧн.
Ме мыжда тіянӧс Израиль керӧсъяс вылын.
Сэки ті тӧдмаланныд, мый Ме — Господь.
Ті ӧд энӧ олӧй Менам индӧд-тшӧктӧмъяс серти, а олінныд тіян гӧгӧр олысь войтыръяслӧн индӧдъяс серти».
Менам пророкалігкості куліс Бенайлӧн Пелатий пиыс.
Ме кымынь уськӧдчи да понді горзыны: «Господьӧй Ыджыдӧй! Тэ ӧмӧй дзикӧдз бырӧдан Израильлысь коляс войтырсӧ?»
Меным вӧлі Господьсянь кыв:
«Морт пиӧй, Ерусалимын олысьяс сёрнитӧны тэнад матыссаяс, вокъяс да рӧдвуж йылысь, став Израиль войтыр йылысь. Найӧ шуӧны, тайӧ мусӧ пӧ сетӧма миянлы, а найӧ мед олӧны ылын Господьсянь.
Та вӧсна шу, мый Господь Ыджыдыс тадзи висьталӧ: Ме вӧтлі найӧс мӧд муясӧ мукӧд войтыръяс пӧвстӧ, но сэні Ме Ачым лои налы вежаинӧн.
Та вӧсна шу, мый Господь Ыджыдыс тадзи висьталӧ: Ме чукӧрта тіянӧс мукӧд войтыръяс пӧвстысь, вайӧда сійӧ муяссьыс, кытчӧ тіянӧс вӧлі разӧдӧма.
Ме бӧр сета тіянлы Израиль му.
Бӧр локтысьяс бырӧдасны сэтысь став пежторсӧ да зывӧкторсӧ.
Ме сета налы ӧти сьӧлӧм да пукта на пытшкӧ выль лов. Нетшышта морӧс кудсьыныс из сьӧлӧмнысӧ да сы пыдди пукта яй сьӧлӧм, медым найӧ оласны да ставсӧ вӧчасны Менам индӧд-тшӧктӧмъяс серти.
Сэки найӧ лоасны Менам войтырӧн, а Ме лоа налӧн Енмӧн.
Но зывӧкторъяслы юрбитысьяслы Ме мынтыся олан туйныс серти, — висьталӧ Господь Ыджыдыс».
Херувимъяс лэптісны борднысӧ, накӧд тшӧтш кыпӧдчисны гӧгыльясыс, и Израиль Енлӧн дзирдлуныс вӧлі на весьтын.
Господьлӧн дзирдлуныс кыпӧдчис кар весьтысь да сувтіс керӧс весьтӧ, карсяньыс асыввылӧ.
Лов кыпӧдіс менӧ да бӧр нуӧдіс Калдея муӧ пленӧ босьтӧмаяс дінӧ. Тайӧс меным Ен Лов петкӧдліс.
Сэсся петкӧдчылӧмыс вошис менам син водзысь.
Ме висьталі пленӧ босьтӧмаяслы ставсӧ, мый восьтіс-петкӧдліс меным Господь.
Меным вӧлі Господьсянь кыв:
«Морт пиӧй, тэ олан асныра войтыр пӧвстын.
Налӧн эм син, медым аддзыны, но найӧ оз аддзыны.
Налӧн эм пель, медым кывны, но найӧ оз кывны, ӧд найӧ асныра войтыр.
Морт пиӧй, лӧсьӧд ноп да луннас налӧн син водзын пленӧ босьтӧм морт моз мӧдӧдчы мунны мӧдлаӧ.
Гашкӧ, тайӧ войтырыс гӧгӧрвоас, мый найӧ асныраӧсь.
Луннас налӧн син водзын петкӧд кӧлуйтӧ, кутшӧмӧс босьтӧны пленӧ мунігӧн. А рытнас налӧн син водзын пленӧ босьтӧмаяс моз ачыд пет.
Налӧн син водзын керка стенмад вӧч аслыд петан розь да петкӧд сэті ассьыд кӧлуйтӧ.
Пемдігас налӧн син водзын босьт ноптӧ пельпом вылад да петкӧд сійӧс. Шогалысь моз тупкы чужӧмтӧ, медым эн аддзы мусӧ, ӧд тэнӧ Ме пукті Израиль войтырлы пасӧн».
Ме ставсӧ вӧчи сідзи, кыдзи меным вӧлі тшӧктӧма.
Луннас ме петкӧді ассьым кӧлуйӧс, кутшӧмӧс босьтӧны пленӧ мунігӧн. Рытнас аслам киӧн вӧчи керка стенмам петан розь, и пемдігас петкӧді нопйӧс да ставныслӧн син водзын босьті сійӧс пельпом вылам.
Асывнас меным вӧлі Господьсянь кыв:
«Морт пиӧй, юаліс-ӧ тэнсьыд тайӧ асныра Израиль войтырыс, мый тэ вӧчан?
Шу налы, мый Господь Ыджыдыс тадзи висьталӧ сы йылысь, мый виччысьӧ ерусалимса юралысьӧс да сэні олысь израильсаясӧс.
Шу налы, мый тэ эм налы пас, и мый тэ вӧчан, сійӧ накӧд лоӧ. Найӧс босьтасны да нуӧдасны пленӧ.
Накӧд тшӧтш юралысьныс босьтас нопсӧ пельпом вылас да петас карсьыс рытъя пемыднас.
Карса стенмас сылы вӧчасны петан розь.
Сійӧ тупкас чужӧмсӧ, медым оз аддзы мусӧ.
Ме шыбита Ассьым тывйӧс сы вылӧ, и сійӧ веськалас Менам тывйӧ. Ме нуӧда сійӧс Вавилонӧ, калдея войтырлӧн муӧ, но сійӧ оз аддзыв тайӧ мусӧ. Сэні сійӧ кулас.
Юралысьныс дор сулалысьясӧс, сылысь отсасьысьяссӧ да тышкайӧзсӧ, Ме тӧвйыв разӧда и бӧрсяньыс шыпуртӧн вӧтча.
Кор Ме разӧда найӧс войтыръяс пӧвстӧ да шердъя мукӧд муясӧ, сэки найӧ тӧдмаласны, мый Ме — Господь.
Но ӧткымынӧс на пиысь Ме видза шыпуртысь, тшыгъялӧмысь да пӧрӧс висьӧмысь, медым найӧ висьталасны асланыс зывӧк уджъясныс йылысь войтыръяслы, кодъяс пӧвстӧ овмӧдчасны.
Сэки тӧдмаласны, мый Ме — Господь».
Меным вӧлі Господьсянь кыв:
«Морт пиӧй, сёй няньтӧ полӧмпырысь, ю ватӧ тіралӧмӧн да майшасьӧмпырысь.
Тайӧ муас олысь Израиль войтырлы висьтав, мый висьталӧ Господь Ыджыдыс Ерусалимын олысьяс да Израиль му йылысь. Найӧ майшасьӧмпырысь кутасны сёйны ассьыныс няньсӧ, полӧмпырысь юны васӧ. Найӧ виалӧны-дзескӧдӧны, та вӧсна налысь мусӧ ставнас лоӧ куштӧма.
Олан каръясныс киссясны, муныс овтӧммас. Сэки ті тӧдмаланныд, мый Ме — Господь».
Меным вӧлі Господьсянь кыв:
«Морт пиӧй, Израиль муын тіян ветлӧ татшӧм шусьӧг: “Колясны лунъяс, а Енсянь петкӧдчылӧмъяс оз збыльмыны”.
Та вӧсна шу войтырыслы, мый Господь Ыджыдыс тадзи висьталӧ: тайӧ шусьӧг ветлӧмлы Ме пукта пом, и сійӧс вунӧдасны Израильын.
Шу налы, мый матыстчӧны лунъяс, и Енсянь петкӧдчылӧмъяс збыльмасны.
Израиль войтыр пӧвстын оз нин ло петкӧдчылӧмыс да водзвыв юӧртӧмыс, мый эськӧ оз збыльмы.
Мый Ме, Господь, висьтала, сійӧ збыльмас, и дыр виччысьны оз ков.
Асныра войтырӧй, тіян олан лунъясӧ Ме висьтала Ассьым кывйӧс да збыльмӧда сійӧс, — висьталӧ Господь Ыджыдыс».
Меным вӧлі Господьсянь кыв:
«Морт пиӧй, Израиль войтыр шуӧ, мый тэ аддзылан Енсянь петкӧдчылӧмъяс, а найӧ дыр на оз збыльмыны, ӧд тэ пророкалан локтана кадъяс йылысь.
Та вӧсна шу налы, мый Господь Ыджыдыс тадзи висьталӧ: талунсянь Менсьым кывйӧс збыльмӧдӧм оз ло ылыстӧма. Мый висьтала, сійӧ збыльмас, — висьталӧ Господь Ыджыдыс».
Меным вӧлі Господьсянь кыв:
«Морт пиӧй, шу ассяньныс пророкалысь израильса пророкъяслы: кывзӧй Господьлысь кывсӧ.
Господь Ыджыдыс тадзи висьталӧ: курыд шог мывкыдтӧм пророкъяслы, кодъяс эз аддзывны Енсянь петкӧдчылӧмъяс, но ассяньныс пророкалӧны.
Израиль, тэнад пророкъясыд киссьӧм каръясын шӧйтысь шакалъяс кодьӧсь.
Найӧ эз кыпӧдчывны дзоньтавны стенлысь киссьӧминсӧ, медым Господьлӧн лунӧ тыш дырйи Израиль войтыр гӧгӧр стенмыс зумыда сулаліс.
Найӧ аддзӧны абутӧмсӧ, юӧртӧны ылӧгсӧ. Шуӧны, Господь пӧ висьталӧ, но Господь найӧс эз мӧдӧдлы.
Та вылӧ видзӧдтӧг найӧ виччысьӧны, мый шуӧм кывныс инас.
Найӧ аддзӧны абутӧмсӧ да юӧртӧны ылӧгсӧ. Найӧ шуӧны, Господь пӧ висьталӧ, а Ме эг висьтав.
Та вӧсна Господь Ыджыдыс тадзи висьталӧ: абутӧмсӧ юӧртӧмысь да ылӧг аддзылӧмъяс висьталӧмысь Ме паныд сувта налы, — висьталӧ Господь Ыджыдыс. — Ме лэпта киӧс да мыжда пророкъясӧс, кодъяс абутӧмсӧ аддзӧны да ылӧгсӧ юӧртӧны.
Менам войтырлӧн чукӧртчӧмын налы лоны оз позь, Израиль войтырлӧн небӧгӧ найӧс оз гижны, Израиль муӧ найӧ оз пырны.
Сэки ті тӧдмаланныд, мый Ме — Господь Ыджыдыс.
Бур олӧмыс абу, но найӧ шуалӧны, мый ставыс бур, да тадзи кежӧдӧны Менсьым войтырӧс туйсьыс.
Найӧ мавтӧны еджыдӧн войтырлысь омӧлика лэптӧм стен, тадзи кӧсйӧны дзебны тырмытӧмторъяс. Стенсӧ еджыдӧн мавтысьяслы шу, мый стенмыс киссяс.
Кор сувтсӧн зэрас, йиа шер мунас, ыджыд тӧвныр чашъяс стенсӧ, сэки стенмыс киссяс, и налысь юаласны, кӧні налӧн гудрасныс, мыйӧн мавтісны стенсӧ.
Господь Ыджыдыс тадзи висьталӧ: Ме скӧрма да кыпӧда ыджыд тӧвныр, ярлунӧн кисьта сувтса зэр, лӧглунӧн лэдза шер, медым бырӧдны стенсӧ.
Ме жугӧда стенсӧ, налысь еджыдӧн мавтӧм стенсӧ пасьварта, кисьта сійӧс подулӧдзыс. И кор сійӧ жмуткысяс, сыкӧд тшӧтш ылӧг пророкъяс куласны.
Сэки ті тӧдмаланныд, мый Ме — Господь.
Стенмыс вылӧ да сійӧс еджыдӧн мавтысьяс вылӧ Ме кисьта скӧрлунӧс. Сэсся шуа тіянлы: Стенмыс абу, сійӧс мавтысьяс тшӧтш абуӧсь. Абуӧсь Израильлӧн пророкъясыс, кодъяс юӧртлісны Ерусалим йылысь, висьтавлісны Ерусалимын лӧнь олӧм йылысь аддзылӧмъяс, а лӧнь олӧмыс эз вӧв, — висьталӧ Господь Ыджыдыс.
Морт пиӧй, бергӧд чужӧмтӧ аслад войтырлӧн нывъяслань, кодъяс ассяньныс пророкалӧны. Пророкав налы паныд, мый Господь Ыджыдыс тадзи висьталӧ:
курыд шог тіянлы, аньяс, кодъяс вуранныд килутш кӧртӧдъяс, вӧчанныд ыджыд да ичӧт чышъянъяс, медым йӧзӧс ылӧгас тывйыштны.
Менсьым войтырӧс тывйыштанныд, но олӧмнытӧ видзны онӧ вермӧй.
Китыр ид да нянь шӧрӧм вӧсна войтырӧй водзын Менӧ янӧданныд. Мортлы, кодлы абу на кад кувны, висьталанныд, мый сійӧ кулас, а мортлы, кодлы абу шуӧма овны, кӧсйысянныд олӧм. И Менам войтырӧй кывзӧ тіянлысь ылӧг висьталӧмнытӧ!
Та вӧсна Господь Ыджыдыс тадзи висьталӧ: килутш кӧртӧднытӧ, мыйӧн кыянныд йӧзсӧ лэбачӧс моз, Ме нетшка кисьыныд, а кыйӧм йӧзсӧ лэдза вӧля вылӧ.
Ме косявла тіянлысь чышъянъястӧ да мезда Ассьым войтырӧс тіян киысь. Менам войтырӧй оз нин веськав тіян киӧ. Сэки ті тӧдмаланныд, мый Ме — Господь!
Ылӧдлӧмнаныд ті шогӧдінныд веськыда олысьясӧс, кодъясӧс Ме эг кӧсйы шогӧдны. Ті ышӧданныд-ёнмӧданныд лёк вӧчысьясӧс, и найӧ оз бергӧдчыны лёк туйсьыныс, медым ловйӧн кольны. Водзӧ ті онӧ нин кутӧй абутӧмсӧ аддзыны да ылӧгсӧ юӧртны.
Ме мезда Ассьым войтырӧс тіян киысь, сэки ті тӧдмаланныд, мый Ме — Господь».
Израиль войтырлӧн юрнуӧдысьясысь ӧткымынӧн локтісны ме дінӧ да пуксисны меным воча.
Меным вӧлі Господьсянь кыв:
«Морт пиӧй, тайӧ йӧзыс сьӧлӧмнас кӧртасьӧмаӧсь идолъяс дінӧ. Син водзаныс найӧ сувтӧдӧмаӧсь мыжас уськӧданторъяс. Та бӧрти Ме ӧмӧй вочавидза налы?
Шу налы, мый Господь Ыджыдыс тадзи висьталӧ: Израиль войтырысь кӧ кодкӧ сьӧлӧмнас кӧртасяс идолъяс дінӧ да син водзас сувтӧдас мыжас уськӧдантор, а сэсся локтас пророк дінӧ, татшӧм мортлы Ме, Господь, вочавидза сідзи, кыдзи колӧ вочавидзны уна идоллы юрбитысь мортлы.
Израиль войтыр мед сьӧлӧмнас гӧгӧрвоас, мый идолъяс вӧснаыс найӧ ставныс ылыстчисны Меысь.
Та вӧсна шу Израиль войтырлы, мый Господь Ыджыдыс тадзи висьталӧ: бергӧдчӧй Ме дінӧ, эновтӧй идолъяснытӧ, кольӧй зывӧкторъяснытӧ.
Израиль войтыр пӧвстысь либӧ йӧз муысь локтысьяс пӧвстысь кӧ кодкӧ бергӧдчас Меысь, сьӧлӧмнас кӧртасяс идолъяс дінӧ да син водзас сувтӧдас мыжас уськӧдантор, а сэсся локтас пророк дінӧ, медым сы пыр Менсьым юасьны, сэки Ме, Господь, вочавидза тайӧ мортыслы, паныд сувта сылы, вӧча сійӧс пасӧн да сёрнитанторйӧн. Ме бырӧда сійӧс Аслам войтыр пӧвстысь. Сэки ті тӧдмаланныд, мый Ме — Господь.
Но пророк кӧ ылалас да вочавидзас, сідзкӧ, Ме, Господь, лэдзи сылы ылавны. Ме лэпта киӧс сы вылӧ да бырӧда сійӧс Аслам Израиль войтыр пӧвстысь.
Пророклысь юасьысь и пророкалысь ӧтмоза мыжмасны. Кыкнаннысӧ лоӧ мыждӧма, медым Израиль войтыр сэсся эз нин кеж Меысь да эз нин пежав асьсӧ лёк вӧчӧмнас, но вӧлі Менам войтырӧн, а Ме — сылӧн Енмӧн, — висьталӧ Господь Ыджыдыс».
Меным вӧлі Господьсянь кыв:
«Морт пиӧй, кутшӧмкӧ муын олысьяс кӧ Меным паныд мыж вӧчасны да эновтасны Менӧ, сэки Ме на вылӧ киӧс лэпта. Ме мырддя налысь няньсӧ, мӧдӧда налы тшыгъялӧм, бырӧда сэтысь став йӧзсӧ да ыж-мӧссӧ.
Весиг кӧ сэні олісны Ной, Даниил да Иов, найӧ эськӧ асланыс веськыдлунӧн сӧмын асьнысӧ мездісны, — висьталӧ Господь Ыджыдыс. — 
Ме кӧ мӧдӧді сэтчӧс олысьяс вылӧ зверъясӧс, медым муыс овтӧммис да эз ло сэті ветлысь-мунысьыс, весиг сэки, — висьталӧ Господь Ыджыдыс, — тайӧ куим мортыс эськӧ эз вермыны мездыны ныв-пинысӧ. Мездмисны эськӧ сӧмын асьныс, а муыс овтӧммис. Тайӧс Ме Ачым кыв сетӧмӧн шуа.
Ме кӧ мӧдӧді сійӧ му вылас шыпурт, тшӧкті сылы мунны му вывтіыс и бырӧді сэтысь йӧзсӧ да ыж-мӧссӧ, весиг сэки, — висьталӧ Господь Ыджыдыс, — тайӧ куим мортыс эськӧ эз вермыны мездыны ныв-пинысӧ, а мездмисны сӧмын асьныс. Тайӧс Ме Ачым кыв сетӧмӧн шуа.
Ме кӧ мӧдӧді сійӧ му вылас пӧрӧс висьӧм да кисьті Ассьым скӧрлунӧс, медым виавны-бырӧдны сэтысь йӧзӧс да ыж-мӧскӧс, и весиг кӧ сэні олісны Ной, Даниил да Иов, — висьталӧ Господь Ыджыдыс, — найӧ эськӧ эз вермыны мездыны ныв-пинысӧ, а асланыс веськыдлунӧн сӧмын асьнысӧ мездісны. Тайӧс Ме Ачым кыв сетӧмӧн шуа.
Господь Ыджыдыс тадзи висьталӧ: Ме ыста нёль чорыд мыждӧм Ерусалим вылӧ. Мӧдӧда сэтчӧ шыпурт, тшыгъялӧм, зверъясӧс да пӧрӧс висьӧм, медым бырӧдны йӧзӧс да ыж-мӧскӧс. Ерусалимса олысьяс пӧвстысь сӧмын ӧткымын морт ловйӧн колясны, но и найӧс нуӧдасны сэтысь.
Найӧ локтасны тіян дінӧ, и ті аддзанныд налысь олан туйсӧ да уджъяссӧ. Сэки ті онӧ нин кутӧй шогсьыны, мый Ерусалим кар вылӧ Ме мӧдӧді шог.
Тіян сьӧлӧмныд бурмас, кор ті аддзанныд налысь олан туйсӧ да уджъяссӧ.
Ті гӧгӧрвоанныд, мый Менам вӧлі помка, мыйла Ме ставсӧ тайӧс вӧчи Ерусалимкӧд, — висьталӧ Господь Ыджыдыс».
Меным вӧлі Господьсянь кыв:
«Морт пиӧй, вӧрса пуяс дорысь мыйӧн бурджык виноград пу? 
Сыысь ӧмӧй позьӧ мыйкӧ вӧчны?
Весиг кӧлуй ӧшӧдан тув сыысь он вӧч.
Кор сійӧс шыбитӧны биӧ, сійӧ сотчӧ кыкнан помсяньыс, сэсся сотчӧ шӧрыс. А мый кольӧ, сыысь нинӧм он вӧч.
Сотчытӧдзыс кӧ эз шогмы сыысь мыйкӧ вӧчны, сотчӧм бӧрас ӧмӧй шогмас?
Та вӧсна Господь Ыджыдыс тадзи висьталӧ: кыдзи Ме сета билы ньылыштны виноград пу вӧрса пуяскӧд, сідзи Ме сета билы ньылыштны Ерусалимын олысьясӧс.
Ме сувта налы паныд.
Найӧ вермасны петны биысь, но мӧд би ньылыштас найӧс. Кор Ме сувта налы паныд, сэки ті тӧдмаланныд, мый Ме — Господь.
Найӧ эновтісны Менӧ, та вӧсна Ме вӧча налысь мусӧ овтӧминӧн, — висьталӧ Господь Ыджыдыс».
Меным вӧлі Господьсянь кыв:
«Морт пиӧй, уськӧд Ерусалимлы тӧд вылас зывӧк уджъяссӧ. Шу, мый Господь Ыджыдыс тадзи висьталӧ Ерусалимлы: тэ чужин Ханаан муын, и сэні тэнад вужйыд.
Тэнад батьыд аморей войтырысь, а мамыд хеттей войтырысь.
Чужӧм бӧрад тэнсьыд гӧгтӧ эз вундыны, тэнӧ сӧстӧммӧдӧм могысь ваӧн эз мыськыны, солӧн эз ниртны да рузумӧ эз гартыштны.
Мый колӧ вӧлі вӧчны, эз вӧчны тэныд. Некод эз жалит тэнӧ, эз бурсьӧлӧмтчы тэ дінӧ.
Кор тэ чужин, тэнӧ шыбитісны эрд вылӧ, тадзи увтыртісны тэнӧ.
Ме муні тэ бокті да аддзи, кыдзи тэ куйлан вирӧсь да чужъясян. Кор тэ куйлін вирӧсь, Ме шуи тэныд: “Тэ кутан овны!”
Ме быдті тэнӧ видзвыв турунӧс моз.
Тэ быдмин, верстяммин да лоин мичасьыс-мича. Тэнад гӧрддзассис морӧсыд, быдмис юрсиыд, но тэ вӧлін пасьтӧм.
Бӧрынджык, кор Ме муні тэ бокті, Ме аддзи, мый воӧма тэнад мусукасян кадыд.
Ме павкниті тэ вылӧ паськӧм дорышӧс да вевтти тэнсьыд куш яйтӧ.
Ме кыв сеті тэныд, мый тэ лоан Менам, да кӧрталі тэкӧд йитӧд, — висьталӧ Господь Ыджыдыс. — Ме мыськи тэнӧ ваӧн, мыськи тэ вылысь виртӧ да мавтышті тэнӧ олив выйӧн.
Пасьтӧді серлӧдлӧм паськӧмӧн, кӧмӧді медбур кучик кӧмӧн, кӧрталі юртӧ вӧсни шабді дӧраӧн да вевтти тэнӧ шӧвкӧн.
Ме мичмӧді тэнӧ. Ки вылад ӧшӧді сойкытшъяс, сьыліад — сикӧтш, нырад — ныркытш да пеляд — исерга. А юр вылад пукті мичасьыс-мича юркытш.
Тэ зарниӧн да эзысьӧн мичмӧдчин, вӧсни шабді, шӧвк да серлӧдлӧм паськӧмӧ пасьтасин.
Тэ сёйин медбур шобді нянь, ма да олив вый. Тэ вӧлін вывті мича, вӧлін ӧксы-ань кодь.
Мукӧд войтыръяс пӧвстын тэ нималін аслад тыр-бур мичлуннад, мыйӧн Ме вевтти тэнӧ, — висьталӧ Господь Ыджыдыс.
Но тэ лача кутін аслад мичлуныд вылӧ, нималігад тэ пондін кырсавны. Киысь киӧ ветлін да сетчин тэ дінті ветлысь-мунысьяслы.
Аслад уна рӧма паськӧмӧн тэ мичмӧдін вись ваян мылькъястӧ, кӧні тэ кырсалін. Татшӧмторйыс некор на эз вӧвлы, и водзӧ оз ло.
Менам козинъясысь, зарни да эзысь мичмӧдчанторъясысь, тэ вӧчин айлов бӧлбанъясӧс да кырсалін накӧд.
Серлӧдлӧм паськӧмнад тэ вевттин найӧс, Менсьым олив выйӧс да Менсьым тшынӧдчанторйӧс пуктывлін на водзӧ. Шобді пызь, олив вый да ма, мыйӧн Ме верді тэнӧ, тэ вайин налы чӧскыда ӧвтан вись пыдди.
Со мый тэ вӧчин, — висьталӧ Господь Ыджыдыс.
Тэ босьтін пиянтӧ да нывъястӧ, кодъясӧс чужтін Меным, да вайин найӧс вись пыдди идолъяслы сёйны.
Тайӧ уджъясыд вӧліны кырсалӧм кодь жӧ, и тайӧ этша на вӧлі тэныд.
Тэ виалін Менсьым ныв-пиӧс да сотін найӧс вись пыдди идолъяслы.
Зывӧк уджъяс вӧчигад да кырсалігад тэныд юрад эз волы сійӧ кадыс, кор тэ вӧлін пасьтӧм, куйлін вирӧсь да чужъясин.
Курыд шог тэныд, — висьталӧ Господь Ыджыдыс, — ӧд став тайӧ лёк вӧчӧмсьыд ӧтдор тэ кыпӧдін юрбитан мыльк быд изэрд вылӧ да быд туйвежӧ.
Тэ янӧдін ассьыд мичлунтӧ, быд ветлысь-мунысьлы паськӧдлін коктӧ да унджык на кырсалін.
Тэ кырсалін орччӧн олысь египетсаяскӧд, кодъяслӧн яндзимыс ыджыд. Ӧтарӧ кырсалӧмнад тэ ёна скӧрмӧдін Менӧ.
Ме лэпті тэ вылӧ Ассьым киӧс, чинті тэнсьыд мутӧ. Ме сеті тэнӧ филистимса нывъяслӧн киӧ. Найӧ мустӧмтісны тэнӧ, и весиг налы яндзим вӧлі тэнад лэдзчысьӧм оласногысь.
Тэ пӧтлытӧг кырсалін ассурсаяскӧд, но тайӧ тэныд вӧлі этша на. 
Тэ кырсалін нӧшта калдеяса вузасьысьяслӧн муын. Но и тайӧ тэныд вӧлі этша на.
Сьӧлӧмыдлӧн вынтӧмлун вӧсна тэ сетчин кырсалӧмас яндзимсӧ воштӧм ань моз, — висьталӧ Господь Ыджыдыс. — Быд туйвежӧ да быд изэрд вылӧ тэ кыпӧдін юрбитан мыльк.
Тэ кырсалін, но эн босьт сьӧм, кыдзи босьтӧ асьсӧ вузавлысь ань. Тэ — гозъякост олӧм пежалысь гӧтыр, коді ветлӧ верӧсыс вывті.
Кырсалысь аньлы вештысьӧны сьӧмӧн, а тэ ачыд мынтысян мусукъясыдлы. Тэ сетін козинъяс налы, медым найӧ быдласянь волывлісны тэкӧд кырсавны.
Кырсалысь аньяс дорысь тэ лёкджыка на вӧчин: тэ бӧрся мусукъясыд эз вӧтлысьны, а тэ ачыд вӧтлысин на бӧрся, тэныд эз мынтысьны кырсалӧмсьыд, а тэ ачыд мынтысин.
Та вӧсна тэ кырсалысь аньяс дорысь лёкджык на.
Кырсалысь аньӧй, кывзы Господьлысь кывсӧ!
Господь Ыджыдыс тадзи висьталӧ: тэ ӧзъялін лёкколӧмӧн да кырсалігад мусукъясыд водзын да зывӧк идолъясыд водзын петкӧдлін куш яйтӧ, виин пиянтӧ да вайин идолъяслы вись пыдди. Та вӧсна Ме быдласянь чукӧрта тэныд паныд мусукъястӧ, кодъяс нимкодьпырысь волывлісны тэ дінӧ, найӧс, кодъясӧс тэ радейтлін, и кодъясӧс тэ мустӧмтлін. Ме сувтӧда тэнӧ на водзӧ пасьтӧгыд, и найӧ аддзасны тэнсьыд куш яйтӧ.
Ме мыжда тэнӧ верӧс вывті ветлысь гӧтырӧс да морт виысьӧс моз. Скӧралӧмӧн да вежӧгтӧмӧн кисьта тэнсьыд виртӧ.
Ме сета тэнӧ мусукъясыдлӧн киӧ, и найӧ жугласны тэнсьыд юрбитан мылькъястӧ, пӧрччӧдасны тэ вылысь паськӧмтӧ да мичмӧдчанторъястӧ, колясны тэнӧ пасьтӧгыд.
Найӧ кыпӧдасны тэныд паныд йӧзӧс, кодъяс изъяласны да кераласны тэнӧ шыпуртӧн.
Найӧ сотасны керкаястӧ, мыждасны тэнӧ мукӧд аньяслӧн син водзын.
Тадзи Ме пукта пом тэнад кырсалӧмлы, и тэ дугдан мынтысьны мусукъясыдлы.
Ме кисьта тэ вылӧ Ассьым ярлунӧс, и сӧмын та бӧрын Ме лӧня вежӧгтӧмысь да ог нин кут скӧравны.
Сыысь, мый тэ вунӧдін том кадтӧ да скӧрмӧдін Менӧ аслад уджъясӧн, Ме мынтыся тэныд олан туйыд серти, — висьталӧ Господь Ыджыдыс. — Тэнад уджъясыд ӧд пежӧсь да зывӧкӧсь.
Тэ йылысь татшӧм кывйӧз кутас ветлыны: “Кутшӧм мамыс, сэтшӧм и нылыс”.
Тэнад мамыд эновтіс верӧссӧ да челядьсӧ, и тэ мамыд кодь. Чойясыд тшӧтш эновтісны верӧснысӧ да челядьнысӧ, и тэ чойясыд кодь.
Тіян мамныд — хеттей войтырысь, а батьныд — аморей войтырысь.
Ыджыд чойыд — Самария, коді олӧ аслас нывъясыскӧд тэсянь войвылын.
А ичӧтджык чойыд — Содом, коді олӧ аслас нывъясыскӧд тэсянь лунвылын.
Тэ ветлін налӧн туйӧд, тэнад уджъясыд вӧліны налӧн кодь зывӧкӧсь.
Но тайӧ тэныд вӧлі этша на, и тэ наысь унджык пежсӧ вӧчин.
Ме Ачым кыв сетӧмӧн шуа, — висьталӧ Господь Ыджыдыс, — мый Содом чойыд да сылӧн нывъясыс эз вӧчны сэтшӧм пежсӧ, мый вӧчин тэ да тэнад нывъясыд.
Со татшӧм вӧлі Содом чойыдлӧн мыжыс. Содом да сылӧн нывъясыс вӧліны тшапӧсь, найӧ лышкыда да кокньыда олісны, эз отсасьны гӧльяслы да коньӧръяслы.
Найӧ вылӧ кыпӧчисны, Менам чужӧмбан водзын зывӧк уджъяс вӧчисны. Ме аддзи тайӧс да бырӧді найӧс.
Самария тэ дорысь ёна этшаджык мыж вӧчис.
Чойясыд дорысь тэ унджык зывӧк уджъяссӧ вӧчин, и ӧткодявны кӧ тэкӧд, найӧ мыжтӧмӧсь лоӧны.
Тэ мыжалін ассьыд чойястӧ, но тэнӧ асьтӧ лоӧ янӧдӧма, ӧд тэнад мыж вӧчӧмыд налӧн мыж вӧчӧм дорысь ёна зывӧк. Ӧткодявны кӧ тэкӧд, чойясыд мыжтӧмӧсь лоӧны.
Гӧрдӧд яндзимыдла, ӧд тэнад уна мыж вӧсна чойястӧ позьӧ лыддьыны мыжтӧмӧн.
Содомлы да сылӧн нывъяслы, Самариялы да сылӧн нывъяслы пленысь бергӧдӧм бӧрын Ме бара сета бур олӧм. Налы моз тэнӧ пленысь бергӧдӧм бӧрын Ме тшӧтш сета тэныд бур олӧм. Сэки тэныд юръяндзим лоӧ пеж олӧм вӧснаыд, мыйысь асьнысӧ тэкӧд ӧткодялігӧн нимкодясисны тэнад чойясыд.
Тэнад Содом да Самария чойясыд да налӧн нывъясныс лоӧны воддза кодьӧсь, и тэ аслад нывъяскӧд тшӧтш лоан воддза кодьӧн.
Ыкшаасигад тэ Содом йылысь увтыртӧмӧн сёрнитін, ӧд сэки тэнад лёклуныд эз на воссьы. А ӧні тэнӧ асьтӧ лёкӧдӧны арамса нывъяс да накӧд орччӧн олысьяс. Филистимса нывъяс быд боксянь зывӧктӧмӧн видзӧдӧны тэ вылӧ.
Тэныд ковмас нуны мыждӧмсӧ аслад пеж да зывӧк уджъяссьыд, — висьталӧ Господь.
Господь Ыджыдыс тадзи висьталӧ: Ме мынтыся тэныд уджъясыд серти. Тэ нинӧмӧ пуктін кыв сетӧмтӧ да торкин йитӧдӧс, мый Ме кӧрталі тэкӧд.
Ме ог вунӧд Ассьым йитӧдӧс, мый Ме кӧрталі тэкӧд том кадад, а вынсьӧда сійӧс пыр кежлӧ.
Кор Самария да Содом, ыджыд да ичӧт чойясыд, локтасны тэ дінӧ, тэныд тӧд вылад усяс аслад олан туйыд, и тэныд лоӧ юръяндзим. Ме сета чойястӧ тэныд нывъяс пыдди сы вылӧ видзӧдтӧг, мый тайӧ эз пыр Менам тэкӧд кӧрталӧм йитӧдӧ.
Ме вынсьӧда йитӧдӧс, мый Ме кӧрталі тэкӧд, и сэки тэ тӧдмалан, мый Ме — Господь. Тэ уськӧдан тӧд вылад уджъястӧ, и тэныд лоӧ яндзим. Тэ весиг вомтӧ он восьт, кор Ме вешта став мыжтӧ, мый тэ вӧчин, — висьталӧ Господь Ыджыдыс».
Меным вӧлі Господьсянь кыв:
«Морт пиӧй, нӧдкыв нӧд Израиль войтырлы, висьтав велӧданвисьт.
Шу налы: — Господь Ыджыдыс тадзи висьталӧ: Ливан керӧс вылӧ ыджыд кутш пуксис, сійӧ вӧлі ыджыд бордъяса, уна рӧма гӧныс вӧлі пашкыр да кузь. Сійӧ чегис сус пулысь йывсӧ, нетшыштіс медвылыс петассӧ, лэбӧдіс сійӧс Ханаан муӧ, пуктіс вузасьысьяслӧн карӧ.
Кутш босьтіс сэтчӧс муысь кӧйдыс, кӧдзис сійӧс бур муӧ, баддьӧс моз пуктіс ыджыд ва бокӧ.
Кӧйдысысь быдмис виноград пу, пашкыр, но ляпкыд. Сылӧн вожъясыс нюжӧдчисны кутшлань, вужйыс вӧлі му пытшкас. Виноград пу быдмис-туис, петасъясыс паськалісны.
Но сэні вӧлі мӧд ыджыд кутш, сійӧ вӧлі ыджыд бордъяса да пашкыр гӧна. Виноград пу ассьыс вужсӧ сылань веськӧдіс, тшӧтш вожъяссӧ сылань нюжӧдіс, медым тайӧ кутшыс киськалас сійӧс.
Виноградсӧ вӧлі пуктӧма бур муӧ, ыджыд ва бокӧ, медым сійӧ выль вож сетас да уна вотӧс ваяс, медым бур виноград пуӧн лоас.
Шу Израиль войтырлы, мый Господь Ыджыдыс тадзи висьталӧ: — Мый лоас виноград пуыскӧд?
Сылысь вужсӧ перъясны, вотӧссӧ нетшкасны, вожъясыс да петасъясыс косьмасны.
Пуыс ставнас косьмас, и оз ков ыджыд вын, оз ков уна йӧз, медым сійӧс нетшыштны.
Сійӧ вужъясьӧма да быдмӧ. Но мый лоас сыкӧд?
Асыв тӧв петас да косьтас сійӧс.
Кӧні быдмис, сэні и косьмас».
Меным вӧлі Господьсянь кыв:
«Тайӧ асныра войтырыс оз ӧмӧй гӧгӧрво, мый йылысь тайӧ нӧдкывйыс?
Висьтав налы: вавилонса ӧксы локтіс Ерусалимӧ, босьтіс пленӧ ӧксыӧс да юралысьяссӧ и нуӧдіс найӧс Вавилонӧ.
Сійӧ бӧрйис иудаса ӧксы рӧдысь мортӧс, сёрнитчис сыкӧд да тшӧктіс сылы кыв сетны. Вавилонса ӧксы нуӧдіс пленӧ став юралысь-веськӧдлысьсӧ, медым войтырыс эз кыпӧдчы сылы паныд, а кывзысис сылысь да оліс сёрнитчӧм серти.
Но иудаса ӧксы кыпӧдчис вавилонса ӧксылы паныд. Сійӧ мӧдӧдіс ассьыс йӧзсӧ Египетӧ, медым найӧ ваясны сэтысь вӧвъясӧс да уна лыда тышкайӧзӧс.
Но лоӧ-ӧ сылы бур?
Сёрнитчӧмсӧ торкысь морт оз пышйы мыждӧмысь.
Ме Ачым кыв сетӧмӧн шуа, — висьталӧ Господь Ыджыдыс, — мый сійӧ кулас вавилонса ӧксылӧн муын. Ӧд та вылӧ видзӧдтӧг, мый вавилонса ӧксы пуктіс сійӧс Иудалӧн коляс войтырлы ӧксыӧ, сійӧ торкис кыв сетӧмсӧ да вавилонса ӧксыкӧд сёрнитчӧмсӧ.
Кор вавилонсаяс лэптасны Ерусалим кар гӧгӧр тымӧдъяс, медым бырӧдны уна йӧзӧс, фараон аслас уна да вына тышкайӧзыскӧд оз отсав сылы тышын.
Иудаса ӧксы нинӧмӧ пуктіс кыв сетӧмсӧ да торкис вавилонса ӧксыкӧд сёрнитчӧмсӧ, мый ки сетӧмӧн вынсьӧдіс. Та вӧсна сійӧ оз пышйы мыждӧмысь.
Господь Ыджыдыс тадзи висьталӧ: Ме Ачым кыв сетӧмӧн шуа, мый мынтыся сылы уджъясыс серти. Ӧд Ме водзын сетӧм кывсӧ сійӧ нинӧмӧ пуктіс да Ме водзын вынсьӧдӧм сёрнитчӧмсӧ торкис.
Ме шыбита Ассьым тывйӧс сы вылӧ, и сійӧ веськалас Менам тывйӧ. Ме нуӧда сійӧс Вавилонӧ, сэні мыжда сійӧс, ӧд сійӧ эновтіс Менӧ.
Иудаса ӧксылӧн тышкайӧзыс пышъясны, но шыпурт улӧ шедасны, а ловйӧн кольӧмаясӧс разӧдасны нёльнан му пельӧсӧ.
Сэки ті тӧдмаланныд, мый тайӧс висьталі Ме, Господь.
Господь Ыджыдыс тадзи висьталӧ: Ме чега джуджыд сус пулысь туган йывсӧ, сӧмын на мыччысьӧм петассӧ, да пукта сійӧс быдмыны муӧ джуджыд керӧс вылӧ.
Израильса джуджыд керӧс вылын сійӧ пашкыртчас-быдмас, сетас коль, лоас ыджыдсьыс-ыджыд сус пуӧн. Сылӧн увъяс вылас поздысясны лэбачьяс, вожъяслӧн вуджӧр улӧ вӧчасны аслыныс оланін.
Сэки вӧрса став пуыс тӧдмалас, мый Ме — Господь. Джуджыд пуяссӧ вӧча ляпкыдӧн, а ляпкыд пуяссӧ вӧча джуджыдӧн. Ме кӧ кӧсъя, веж пу косьмӧ, а кос пу вежӧдӧ. Тайӧс висьтала Ме, Господь. Мый шуи, вӧча».
Меным вӧлі Господьсянь кыв:
«Израиль муын ветлӧ татшӧм шусьӧг: “Батьяс сёйисны кисьмытӧм виноград, а челядьныслӧн пиньясыс ёнтӧны”. Мыйла ті тадзи шуанныд?
Ме Ачым кыв сетӧмӧн шуа, — висьталӧ Господь Ыджыдыс, — мый тайӧ шусьӧгсӧ Израильын дугдасны дольны.
Став йӧзыс Менам киын. Батьыслӧн и пиыслӧн олӧмыс — Менам киын. Коді мыжсӧ вӧчис, сійӧ и кулас.
Веськыда да Индӧд серти олысь морт оз сёй вись ваян мыльк вылын да оз юрбит Израиль войтырлӧн идолъяслы. Сійӧ оз узьлы мӧдлӧн гӧтыркӧд да оз инмӧдчы аслас гӧтыр дінӧ тӧлысся дырйиыс. Сійӧ некодӧс оз дзескӧд, а бӧр сетӧ, мый босьтліс уджйӧзӧн сетӧмсьыс. Сійӧ оз мырддяв, а тшыгъялысьӧс вердӧ да пасьтӧмӧс пасьтӧдӧ. Сетӧ кӧ уджйӧзӧн, бӧрсӧ содтӧдӧн оз босьт. Лёксӧ сійӧ оз вӧч, а вензьӧмъяс дырйи веськыда мыждӧ. Сійӧ сьӧлӧмсяньыс олӧ Менам индӧд-тшӧктӧмъяс серти. Сійӧ — веськыда олысь, и овны кутас, — висьталӧ Господь Ыджыдыс.
Но веськыда олысьлӧн вермас лоны лёк вӧчысь пи, коді вир кисьтӧ да вӧчӧ, мый батьыс эз вӧчлы: вись ваян мыльк вылын сёйӧ, мӧдлӧн гӧтыркӧд узьлӧ, гӧльӧс да коньӧрӧс дзескӧдӧ, бӧр оз сет, мый босьтіс уджйӧзӧн сетӧмсьыс, мӧдлысь мырддялӧ, идолъяслы юрбитӧ, зывӧксӧ вӧчӧ, уджйӧзӧн сетӧ, а бӧрсӧ содтӧдӧн босьтӧ. Татшӧм мортыс кутас ӧмӧй овны? Оз. Сійӧ оз кут овны. Татшӧм зывӧк ужъяссӧ вӧчысь кулас, сійӧ ачыс лоӧ мыжа аслас кулӧмысь.
Но тайӧ мортыслӧн вермас лоны пи, коді аддзӧ батьыслысь мыжъяссӧ, но ачыс сы моз оз вӧч: 
вись ваян мыльк вылын оз сёй да Израиль войтырлӧн идолъяслы оз юрбит, мӧдлӧн гӧтыркӧд оз узьлы, некодӧс оз дзескӧд, а бӧр сетӧ, мый босьтліс уджйӧзӧн сетӧмсьыс, сійӧ оз мырддяв, а тшыгъялысьӧс вердӧ да пасьтӧмӧс пасьтӧдӧ, гӧльӧс оз дзескӧд, и сетӧ кӧ уджйӧзӧн, бӧрсӧ содтӧдӧн оз босьт. Татшӧм мортыс олӧ Менам индӧд-тшӧктӧмъяс серти. Сійӧ овны кутас, и батьыслӧн мыж вӧсна сылы оз ков кувны.
Но батьыс аслас мыж вӧсна кулас, ӧд чорыда дзескӧдіс мӧдъясӧс, мырддяліс матыссаыслысь, аслас войтыр пӧвстын вӧчис лёксӧ.
Ті юаланныд: “Мыйла оз пиыс кывкут батьыслӧн мыж вӧсна?” 
Пиыс ӧд оліс веськыда да Менам индӧд-тшӧктӧмъяс серти.
Та вӧсна сійӧ кутас овны.
Кулас сӧмын мыж вӧчысьыс.
Пиыс оз кывкут батьыслӧн мыж вӧсна, и батьыс пиыслӧн мыж вӧсна оз кывкут. Енмыс мынтысяс веськыда олысьлы сылӧн веськыдлуныс серти, а лёк вӧчысьлы — сылӧн лёклуныс серти.
Лёк вӧчысь кӧ бергӧдчас мыжсьыс, пондас овны веськыда да Менам индӧд-тшӧктӧмъяс серти, сійӧ оз кув, а кутас овны.
Сылысь став мыжсӧ лоӧ вунӧдӧма, ӧд сійӧ пондіс овны веськыда. Та вӧсна сійӧ кутас овны.
Ме ог кӧсйы, медым лёк вӧчысь куліс, — висьталӧ Господь Ыджыдыс.
— А кӧсъя, медым сійӧ бергӧдчас аслас лёк туй вылысь да кутас овны.
Веськыда олысь кӧ кежас аслас веськыдлунысь да лёк вӧчысь моз пондас вӧчны зывӧксӧ, кутас-ӧ сійӧ овны?
Сылысь веськыд уджъяссӧ лоӧ вунӧдӧма.
Менӧ эновтӧм да мыж вӧчӧм вӧснаыс сійӧ кулас.
Ті шуанныд, Господь пӧ оз веськыда вӧч.
Кывзы Менӧ, Израиль войтыр!
Ме ӧмӧй ог веськыда вӧч?
Ті асьныд онӧ веськыда вӧчӧй.
Веськыда олысь кӧ кежас аслас веськыдлунысь да пондас лёксӧ вӧчны, сійӧ кулас аслас лёк вӧчӧм вӧсна.
А лёк вӧчысь кӧ дугдас вӧчны лёксӧ, кутас овны веськыда да Индӧд серти, сійӧ видзас ассьыс олӧмсӧ. 
Сійӧ кӧ бергӧдчас аслас мыжысь, сійӧ оз кув, а кутас овны.
Израиль войтыр шуӧ, Господь пӧ оз веськыда вӧч.
Израиль войтыр, Ме ӧмӧй ог веськыда вӧч?
Ті асьныд онӧ веськыда вӧчӧй.
Израиль войтыр, Ме кута мыждыны тіянӧс олан туйныд серти, — висьталӧ Господь Ыджыдыс.
— Бергӧдчӧй мыжъяссьыныд, медым энӧ крукасьӧй мыжныд понда.
Дугдӧй мыж вӧчны, олӧй выль сьӧлӧмӧн да выль лолӧн.
Мыйла тіянлы кувнысӧ, Израиль войтыр?
Ме ог кӧсйы, медым кодкӧ куліс, — висьталӧ Господь Ыджыдыс.
— Бергӧдчӧй мыжъяссьыныд, и овны кутанныд».
Сьыв израильса ӧксыяс йылысь тайӧ бӧрдӧдчанкывсӧ: — Энь левъясысь тэнад мамыд вӧлі медбур, сійӧ куйліс левъяс пӧвстын, пиянсӧ быдтіс том левъяскӧд.
Ӧтиӧс тӧждысьӧмӧн вердіс, и сійӧ лои том лев, велаліс кыйсьыны, кутіс сёйны йӧзӧс.
Сы йылысь кылісны войтыръяс, найӧ лӧсьӧдісны сылы гу, и сійӧ усис сэтчӧ, сійӧс дорисны да нуӧдісны Египетӧ.
Лев мам виччысис, сэсся аддзис, мый лачасӧ воштіс, сэки босьтіс мӧд писӧ да быдтіс сійӧс.
Сійӧ лои том лев, ветлӧдліс ыджыд левъяскӧд, велаліс кыйсьыны, кутіс сёйны йӧзӧс. Сійӧ жугліс овтӧм керкаяс, куштіс каръяс, сылӧн равзӧмысь тіраліс став мувывса олысьыс.
Сы вылӧ уськӧдчисны войтыръяс, матігӧгӧр муясын олысьяс, сы вылӧ шыбитісны тывнысӧ, сійӧ шедіс налӧн гуӧ.
Сійӧс дорисны чептӧн да пуксьӧдісны клеткаӧ, вайӧдісны вавилонса ӧксы дінӧ, йӧртісны изкарса дзескыдінӧ, медым израильса керӧсъяс вылын эз нин кыв сылӧн равзӧм шыыс.
Тэнад мамыд вӧлі виноград пу кодь, уна вожа да бур вотӧса, ӧд ыджыд ва дорӧ сійӧс вӧлі пуктӧма.
Ёнӧсь вӧліны вожъясыс, юралан бедьяс наысь вӧчисны. Сійӧ пашкыртчис да вылӧ кыпӧдчис, лои джуджыд да уна вожа, та вӧсна ылӧдз тыдаліс.
Но сійӧс лёкысь нетшыштісны, шыбитісны муӧ, и асыв тӧв косьтіс сылысь вотӧссӧ.
Чегъялӧм ён вожъясыс косьмисны, найӧс би ньылыштіс.
Ӧні сійӧс пуктӧма овтӧминӧ, кос да ватӧм муӧ.
Сылӧн пучӧрысь * ыпнитіс би, кутчысис вожъясас, ньылыштіс вотӧссӧ. Ён вожъясысь нинӧм эз коль, медым юралан бедь вӧчны.
Тайӧ — бӧрдӧдчанкыв, сійӧс сьылӧны шог дырйи.
Сизимӧд воӧ витӧд тӧлысьлӧн дасӧд лунӧ израильса юрнуӧдысьяс пӧвстысь некымын морт локтісны ме дінӧ, медым юасьны Господьлысь. Найӧ пуксисны меным воча.
Меным вӧлі Господьсянь кыв:
«Морт пиӧй, шу израильса юрнуӧдысьяслы, мый Господь Ыджыдыс тадзи висьталӧ: ті локтінныд Менсьым юасьны, но Ме Ачым кыв сетӧмӧн шуа, мый ог вочавидз тіянлы, — висьталӧ Господь Ыджыдыс.
Морт пиӧй, мыжды найӧс. Тӧд выланыс уськӧд батьясныслысь зывӧк уджъяссӧ. Шу налы, мый Господь Ыджыдыс тадзи висьталӧ: сійӧ лунӧ, кор Ме бӧрйи Израиль войтырӧс, Ме восьті Ачымӧс Яков рӧдлы Египет муын да киӧс лэптӧмӧн кыв сеті налы, мый Ме — Господь, налӧн Ен.
Сійӧ лунӧ Ме кыв сеті налы, мый петкӧда найӧс Египет муысь сійӧ муас, мый Ме бӧрйи налы, мича да бур муӧ, кӧні визувтӧ йӧв да ма. Ме тшӧкті налы, медым вештасны син водзсьыныс зывӧкторъяссӧ да дугдасны пежавны асьнысӧ египетса идолъясӧн, ӧд Ме — Господь, налӧн Ен.
Но найӧ кыпӧдчисны Меным паныд, эз кӧсйыны Менӧ кывзыны.
Найӧ эз вештыны син водзсьыныс зывӧкторъяссӧ, эз эновтчыны египетса идолъясысь.
Сэки Ме шуи, мый Египетын кисьта на вылӧ Ассьым скӧрлунӧс, койышта став Ассьым ярлунӧс.
Но Аслам нимӧй вӧсна Ме тайӧс эг вӧч, медым Менсьым нимӧс эз ло янӧдӧма мукӧд войтыръяс водзын, кодъяс пӧвстын найӧ вӧлі олӧны. Ӧд тайӧ войтыръясыслӧн син водзын Ме восьті Ачымӧс Израиль войтырлы, кор петкӧді найӧс Египет муысь.
Ме петкӧді найӧс Египет муысь да вайӧді овтӧминӧ. Сэні Ме сеті налы индӧд-тшӧктӧмъясӧс, и на серти олысь видзас ассьыс олӧмсӧ.
Ме инді налы шойччан лун. Тайӧ луныс лоӧ Ме да на костын пасӧн, медым найӧ тӧдісны, мый Ме — Господь, найӧс Вежӧдысь.
Но Израиль войтыр кыпӧдчис Меным паныд овтӧминын. Найӧ бокӧ вештісны Менсьым индӧд-тшӧктӧмъясӧс, на серти эз овны, медым видзны ассьыныс олӧмнысӧ. Менсьым шойччан лунӧс найӧ пежалісны. Сэки Ме шуи, мый овтӧминын кисьта на вылӧ Ассьым скӧрлунӧс да бырӧда найӧс.
Но Аслам нимӧй вӧсна Ме тайӧс эг вӧч, медым Менсьым нимӧс эз ло янӧдӧма мукӧд войтыръяс водзын, кодъяслӧн син водзын Ме петкӧді найӧс Египетысь.
Овтӧминын Ме киӧс лэптӧмӧн кыв сеті налы, мый ог петкӧд найӧс сійӧ муас, мый кӧсйыси сетны налы, мича да бур муӧ, кӧні визувтӧ йӧв да ма.
Найӧ вештісны Менсьым индӧд-тшӧктӧмъясӧс бокӧ, эз овны на серти, пежалісны Менсьым шойччан лунӧс, ӧд сьӧлӧмнысӧ бергӧдісны идолъяслань.
Но Ме эг бырӧд найӧс овтӧминын, ӧд Ме жалиті найӧс.
Овтӧминын Ме шуи налӧн ныв-пилы: батьясныдлӧн кок туйӧд энӧ мунӧй, налӧн тшӧктӧмъяс серти энӧ олӧй да налӧн идолъясӧн асьнытӧ энӧ пежалӧй.
Ме — Господь, тіян Енныд. Олӧй Менам индӧд-тшӧктӧмъяс серти.
Видзӧй Менсьым вежа шойччан лунӧс. Тайӧ луныс лоӧ Ме да тіян костын пасӧн, медым ті тӧдінныд, мый Ме — Господь, тіян Енныд.
Но найӧ тшӧтш кыпӧдчисны Меным паныд, эз овны Менам индӧд-тшӧктӧмъяс серти, медым видзны ассьыныс олӧмнысӧ. Нӧшта найӧ пежалісны Менсьым шойччан лунӧс. Сэки Ме шуи, мый овтӧминын кисьта на вылӧ Ассьым скӧрлунӧс, койышта став Ассьым ярлунӧс.
Но Аслам нимӧй вӧсна Ме эг лэпты киӧс на вылӧ, медым Менсьым нимӧс эз ло янӧдӧма мукӧд войтыръяс водзын, кодъяслӧн син водзын Ме петкӧді найӧс Египетысь.
Овтӧминын Ме киӧс лэптӧмӧн кыв сеті налы, мый разӧда найӧс войтыръяс пӧвстӧ, шыблала найӧс мукӧд муясӧ сыысь, мый найӧ эз овны Менам индӧд-тшӧктӧмъяс серти, а бокӧ вештісны найӧс, пежалісны Менсьым шойччан лунӧс да синнысӧ бергӧдісны асланыс батьяслӧн идолъяслань.
Та вӧсна Ме сеті налы индӧд-тшӧктӧмъяс, мый оз вай бурсӧ да олӧмсӧ. Найӧ сотлісны биын ассьыныс медводдза чужысь пиянсӧ. Ме лэдзи налы пежавны асьнысӧ татшӧм висьяснас, но ысті на пӧвстӧ ыджыд полӧм да сеті налы тӧдны, мый Ме — Господь.
Морт пиӧй, шу Израиль войтырлы, мый Господь Ыджыдыс тадзи висьталӧ: тіян батьясныд водзӧ мыж вӧчисны Меным паныд да омӧльтісны Менӧ.
Ме вайӧді найӧс муӧ, мый киӧс лэптӧмӧн кӧсйыси сетны налы. Но быдлаын, кӧні аддзисны джуджыд мыльк либӧ пашкыр пу, найӧ кутісны вайны висьяснысӧ да вайӧмторъяснысӧ. Тайӧн найӧ скӧрмӧдісны Менӧ. Найӧ тшынӧдлісны сэні чӧскыд ӧвтанторъяснысӧ да кисьтавлісны вина висьнысӧ.
Ме юалі налысь, мыйсяма мыльк вылӧ найӧ ветлывлӧны.
Та вӧсна татшӧм висьваянінъяссӧ ӧнӧдз шуӧны мылькъясӧн.
Шу Израиль войтырлы, мый Господь Ыджыдыс тадзи висьталӧ: батьясныд моз ті пежаланныд асьнытӧ. Ті сетчинныд батьясныдлӧн зывӧк идолъяслы — тайӧ лоӧ сійӧ жӧ, мый кырсалӧм.
Идолъяслы юрбитӧмнаныд ті ӧнӧдз асьнытӧ пежаланныд, кор ваянныд налы козинъяс да сотанныд вись пыдди ассьыныд пияннытӧ. И та бӧрын ті, израильсаяс, локтанныд юасьны Менсьым!
Ме Ачым кыв сетӧмӧн шуа, — висьталӧ Господь Ыджыдыс, — мый ог вочавидз тіянлы.
Ті шуанныд, мукӧд муясын олысь войтыръяс моз ми пӧ пондам юрбитны пуысь да изйысь вӧчӧмторъяслы. Но тадзи оз ло.
Ме Ачым кыв сетӧмӧн шуа, — висьталӧ Господь Ыджыдыс, — мый Ме кута ӧксыавны скӧрлунӧн, Ассьым вына киӧс да ён сойӧс лэптӧмӧн.
Ме петкӧда тіянӧс йӧз муысь, чукӧрта мукӧд войтыръяс пӧвстысь, кытчӧ тіянӧс вӧлі разӧдӧма. Вӧча тайӧс скӧрлунӧн, Ассьым вына киӧс да ён сойӧс лэптӧмӧн.
Ме вайӧда тіянӧс овтӧминӧ мукӧд войтыръяс пӧвстӧ. Сэні Ме сувтӧда тіянӧс Ас водзам, медым мыждыны тіянӧс.
Кыдзи Ме мыжді батьяснытӧ египетса овтӧминын, тадзи тшӧтш тіянӧс мыжда, — висьталӧ Господь Ыджыдыс. — 
Ыж видзысь моз Ме лыддя-торйӧда тіянӧс.
Ме кӧртвомала тіянӧс, медым олінныд Менам йитӧд серти.
Тіян пӧвстысь торйӧда Меным паныд кыпӧдчысьясӧс да Менсьым кывзысьтӧмъясӧс.
Ме петкӧда найӧс муысь, кӧні найӧ олӧны локтысьяс моз, но Израиль муӧ найӧ оз пырны. Сэки ті тӧдмаланныд, мый Ме — Господь.
Господь Ыджыдыс тадзи висьталӧ: Израиль войтыр, ті кӧ онӧ кӧсйӧй Менсьым кывзысьны, мунӧй асланыд идолъяс дінӧ да юрбитӧй налы. Менсьым вежа нимӧс ті онӧ нин пежалӧй асланыд идолъясӧн да налы вайӧм козинъясӧн. Ӧд Менам вежа керӧс вылын, израильса джуджыд керӧс вылын, ті ставныд, кодъяс оланныд асланыд муын, кутанныд кесъявны Меным, — висьталӧ Господь Ыджыдыс.
— Сэні Ме сибӧда тіянӧс, Израиль войтыр. Ме виччыся, мый ті ваянныд сэтчӧ козинъяснытӧ, мувыв быдтассьыныд медводдза босьтӧмторъяснытӧ да вежа сетӧмторъяснытӧ.
Чӧскыд ӧвтанторйӧс моз Ме сибӧда тіянӧс, кор чукӧрта тіянӧс мукӧд войтыръяс пӧвстысь, вайӧда сійӧ муяссьыс, кытчӧ тіянӧс вӧлі разӧдӧма. Ме петкӧдла тіян пыр Ассьым вежалунӧс мукӧд войтыръяслӧн син водзаныс.
Ті тӧдмаланныд, мый Ме — Господь, кор Ме вайӧда тіянӧс Израиль муӧ, мый киӧс лэптӧмӧн кӧсйыси сетны тіян батьяслы.
Сэні тіянлы тӧд выланыд усьӧ лёк оласногныд да уджъясныд, мыйӧн пежалінныд асьнытӧ. Сэки лёк вӧчӧм вӧснаныд ті зывӧктанныд асьнытӧ.
Кор Ме тадзи вӧча Аслам нимӧй вӧсна, — висьталӧ Господь Ыджыдыс, — а ог вӧч тіян лёк туйныд да пеж уджъясныд серти, сэки ті, Израиль войтыр, тӧдмаланныд, мый Ме — Господь».
Меным вӧлі Господьсянь кыв:
«Морт пиӧй, видзӧдлы лунвылӧ да висьтав лунвыв му йылысь кыв, пророкав лунвылын быдмысь вӧръяслы паныд.
Тшӧкты лунвылын быдмысь вӧрлы кывзыны Господьлысь кывсӧ.
Господь Ыджыдыс тадзи висьталӧ: Ме ӧзта тэ пытшкӧ би, и сійӧ ньылыштас став пусӧ — вежсӧ и косьмӧмасӧ.
Ыпъялысь биыс оз кус, а лунвывсянь войвылӧдз ставсӧ сотас.
Сэки быдӧн аддзас, мый Ме, Господь, ӧзті би, и сійӧ оз кус».
Та бӧрын ме шуи: «Господьӧй Ыджыдӧй, найӧ ӧд ме йылысь шуӧны, шусьӧгъясӧн пӧ сёрнитӧ».
Меным вӧлі Господьсянь кыв:
«Морт пиӧй, бергӧд чужӧмтӧ Ерусалимлань. Пророкав крамлы паныд да Израиль мулы паныд. Израиль мулы шу, мый Господь тадзи висьталӧ: Ме сувта тэныд паныд, перъя Ассьым шыпуртӧс, виа веськыда олысьясӧс да мыжаясӧс.
Ме шуи бырӧдны тэнсьыд веськыда олысьясӧс да мыжаясӧс. Та вӧсна Менам перйӧм шыпуртӧй суас лунвывсянь войвылӧдз став олысьсӧ.
Сэки быдӧн тӧдмалас, мый Ме, Господь, перйи Ассьым шыпуртӧс да пуртӧсас сійӧс бӧрсӧ ог сюй.
Морт пиӧй, ойзы-бӧрд, усь муас, йӧз син водзын ыджыд шогыдла ойзы.
И кор найӧ юаласны тэнсьыд, мыйла тэ ойзан-бӧрдан, налы шу, мый локтана юӧръяс вӧсна бӧрдан. Сэки сьӧлӧмъяс пондасны тіравны, кияс лёткысясны, пидзӧсъяс дзӧрмасны-лигышмунасны. Быд морт весьӧпӧрас.
Тайӧ збыльмас, — висьталӧ Господь Ыджыдыс».
Меным вӧлі Господьсянь кыв:
«Морт пиӧй, пророкав. Господь тадзи висьталӧ: — Шыпуртсӧ лэчтӧма-весалӧма.
Лэчтӧма, медым унаӧс начкыны-керавны, весалӧма, медым сійӧ чардби моз югъялас.
Нимкодясьны-ӧ, мый Менам пилӧн юралан беддьыс мустӧмтӧ мукӧд юралан бедьяс?
Шыпуртсӧ сетӧма, медым весавны сійӧс да киӧ босьтны.
Сійӧс лэчтӧма-весалӧма, медым морт виысьлы кабырас пуктыны.
Горзы, бӧрд, морт пиӧй, ӧд шыпуртыс кыпӧдчис Менам войтырӧй весьтӧ да израильса юралысьяс весьтӧ.
Юралысьясӧс войтырӧйкӧд шыпурт улӧ сетӧма.
Та вӧсна шогыдла кучкав морӧсад.
Менсьым войтырӧс тӧдмалӧма нин.
А войтырыс кӧ мустӧмтӧ юралан бедьсӧ, юралӧмыс оз вермы сулавны, — висьталӧ Господь Ыджыдыс.
А тэ, морт пиӧй, пророкав, скӧрысь вачкы ки пыдӧсад.
Шыпуртыс мед кыкысь кучкас, куимысь бырснитас, мед уна йӧзӧс виас, быд боксянь найӧс кытшалас.
Мед тіраласны-поласны сьӧлӧмъяс, мед унджыкӧн крукасясны. Карса дзиръяяс дорӧ Ме сувтӧда повзьӧдана шыпурт.
Сійӧс весалӧма, медым чардби моз югъялас, лэчтӧма, медым начкас-кералас.
Шыпурт, бырскы веськыдвывсянь, виав шуйгавывсянь — быдласянь, кытчӧ тэнӧ веськӧдӧма.
Ме тшӧтш скӧрысь ки пыдӧсӧ вачка, став Ассьым скӧрлунӧс койышта.
Тайӧс висьтала Ме, Господь».
Меным вӧлі Господьсянь кыв:
«Морт пиӧй, серпасав кык туй, кыті мунас вавилонса ӧксылӧн шыпуртыс. Кыкнан туйыс мед ӧти муысь петӧ.
Кӧні туйяс заводитчӧны, сувтӧд сэтчӧ кык карӧ мунан пас.
Ӧти туйӧдыс шыпурт мед мунас аммон войтырлӧн Равва карӧ, а мӧд туйӧдыс — Иуда муӧ, зумыдмӧдӧм Ерусалим карӧ.
Со вавилонса ӧксы сулалӧ нин туйвежын, кӧні заводитчӧны тайӧ кык туйыс. Сійӧ юасьӧ гортса бӧлбанъяслысь, тунасьӧ ньӧвъяс пыркӧдӧмӧн да виӧм пемӧслысь муссӧ видзӧдалӧмӧн.
Тунасигас сылӧн веськыд киас усьӧ пудъясянтор, мый петкӧдлӧ Ерусалим вылӧ. Сійӧ сувтӧдас жуглан керъяс да лэптас тымӧдъяс, медым кисьтны карса стен да дзиръяяс. Сійӧ тшӧктас аслас тышкайӧзлы гораа горзӧмӧн уськӧдчыны кар вылӧ.
Ерусалимын олысьяс нинӧмӧ пуктӧны тайӧ тунасьӧмсӧ.
Но вавилонса ӧксылы тӧд вылас усяс, мый Ерусалимын олысьяс торкисны кыв сетӧмнысӧ, и сійӧ босьтас найӧс пленӧ.
Господь Ыджыдыс тадзи висьталӧ: ті асьныд Меным тӧд вылӧ уськӧданныд мыжнытӧ да лёк вӧчӧмнытӧ, петкӧдланныд тайӧс уджъяснаныд. Та вӧсна тіянӧс лоӧ пленӧ босьтӧма.
Тэ, Израильлӧн лёк да шогмытӧм ӧксы, тэнӧ мыждан луныс воис, лёк уджъясыдлы воис пом.
Господь Ыджыдыс тадзи висьталӧ: пӧрччы юркӧртӧдтӧ, шыбит юркытштӧ.
Ставыс вежсяс: увтыртӧмаӧс лоӧ лэптӧма, вылӧ кыпӧдчысьӧс лоӧ лэдзӧма.
Жугла-кисьта тайӧ карсӧ, вӧча сійӧс из чукӧрӧн. Тадзи лоас, кытчӧдз оз лок сійӧ, кодлы сетӧма веськыда мыждыны карсӧ. Сэки Ме карсӧ сета сылы.
Морт пиӧй, пророкав. Аммон войтыр йылысь да сылӧн Израильӧс омӧльтӧм йылысь Господь Ыджыдыс тадзи висьталӧ: перйӧма шыпурт, медым унаӧс начкыны-виавны.
Сійӧс весалӧма, медым чардби моз югъялас. Аммон войтырлы висьталӧны абутӧмсӧ да ылӧгсӧ. Вавилонса шыпурт суас найӧс, лёксӧ да пежсӧ вӧчысьясӧс, ӧд воис найӧс мыждан луныс, налӧн лёк уджъяслы воис пом.
Бӧр сюй шыпурттӧ пуртӧсас!
Ме кута мыждыны тэнӧ сэні, кӧні тэ чужин, кытысь тэ петін.
Ме кисьта тэ вылӧ Ассьым скӧрлунӧс, пӧльышта тэ вылӧ Ассьым ярлуна биӧс. Ме сета тэнӧ чорыд йӧзлы, скӧр виысьяслӧн киӧ.
Тэнӧ ньылыштас би, вирыд брызьмунас му вылӧ, и тэнӧ вунӧдасны.
Тайӧс висьталі Ме, Господь».
Меным вӧлі Господьсянь кыв:
«Морт пиӧй, мыжды тайӧ вир кисьтысь карсӧ!
Уськӧд сылы тӧд вылас зывӧк уджъяссӧ.
Шу, мый Господь Ыджыдыс тадзи висьталӧ: курыд шог тэныд, вир кисьтысь кар. Бӧлбанъясӧс вӧчӧмнад тэ асьтӧ пежалан.
Та вӧсна воис кад мыждыны тэнӧ. Тэ мыжа сыысь, мый вир кисьтін. Тэ пежалін асьтӧ бӧлбанъясӧс вӧчӧмнад. Тадзи матыстін мыждан лунтӧ, тэнад олан воясыдлы воис пом.
Ме сета мукӧд войтыръяслы лёкӧдны тэнӧ, мукӧд муясын олысьяслы сета янӧдны тэнӧ.
И орчча и ылі муясын олысьяс кутасны серавны тэ вылын. Тэ ассьыд нимтӧ пежалін, шызьӧмӧн тырӧм кар.
Израильса юралысьяс вир кисьтісны Ерусалимын — быдӧн кисьтіс, мыйта вермис.
Ерусалимын бать-мамӧс пыдди оз пуктыны, йӧз муысь локтысьясӧс топӧдӧны, батьтӧм-мамтӧмӧс да дӧваӧс дзескӧдӧны.
Меным сиӧм вежаторъясӧс нинӧмӧ пуктӧны, Менсьым шойччан лунӧс пежалӧны.
Ӧта-мӧд йылысь суклясьӧны, медым мыжтӧмлысь вир кисьтны. Ерусалимса керӧсъяс вылын сёйӧны идолъяслы вайӧмторъяс, кар шӧрын вӧчӧны пежсӧ.
Айулов узьлӧны батьныслӧн гӧтыркӧд, мырдӧналӧны аньясӧс тӧлысся дырйиныс.
Кодкӧ матыссаыслӧн гӧтыркӧд зывӧксӧ вӧчӧ, кодкӧ моньсӧ пежалӧ, кодкӧ мырдӧналӧ ассьыс чойсӧ, аслас батьыслысь нывсӧ.
Босьтӧны козинъяс, медым вир кисьтны.
Сетӧны уджйӧзӧн, медым бӧрсӧ содтӧдӧн босьтны. Матыссаӧс дзескӧдӧмӧн озырмӧдчӧны. Ерусалим, тэ вунӧдін Менӧ, — висьталӧ Господь Ыджыдыс. — Ме скӧрысь ки пыдӧсӧ вачка, ӧд тэ вир кисьтан да ылӧдлӧмӧн озырмӧдчан.
Сійӧ лунӧ, кор Ме кута мыждыны тэнӧ, тэ повзян да вынтӧмман.
Тайӧс висьтала Ме, Господь. Мый шуи, вӧча.
Ме разӧда тэнӧ войтыръяс пӧвстӧ, шердъя мукӧд муясӧ. Ме пукта пом тэнад пеж уджъяслы.
Тэ ачыд мыжа, мый тэнӧ лоӧ янӧдӧма войтыръяслӧн син водзын. Тэ тӧдмалан, мый Ме — Господь».
Меным вӧлі Господьсянь кыв:
«Морт пиӧй, Израиль войтыр Меным лои шыбласӧн.
Ставныс найӧ ыргӧн, озысь, кӧрт да свинеч кодьӧсь — биын сывдӧм эзысьысь торъялӧм шыблас кодьӧсь.
Господь Ыджыдыс тадзи висьталӧ: Ме чукӧрта тіянӧс Ерусалим кар шӧрӧ, ӧд ті ставныд лоинныд шыбласӧн. Ме яр скӧрлунӧн чукӧрта тіянӧс.
Эзысьӧс, ыргӧнӧс, кӧртӧс, свинечӧс да озысьӧс моз Ме сюя тіянӧс пачӧ, медым би пытшкын сывдыны тіянӧс.
Тіянӧс чукӧртӧм бӧрын Ме пӧльышта тіян вылӧ Ассьым скӧрлуна биӧс, и тіянӧс лоӧ сывдӧма би пытшкас.
Пачын эзысьӧс сывдӧм моз тіянӧс лоӧ сывдӧма Ерусалимын. Сэки ті тӧдмаланныд, мый Ме, Господь, кисьті Ассьым скӧрлунӧс тіян вылӧ».
Меным вӧлі Господьсянь кыв:
«Морт пиӧй, висьтав Израиль мулы, мый сійӧс абу сӧстӧммӧдӧма, сы вылӧ зэрсӧ абу кисьтӧма, ӧд воис Менам скӧралан луныс.
Ерусалимса пророкъяслӧн эм гуся сёрнитчӧм. Левъяс моз найӧ равзӧны, чашйӧны да ньылыштӧны кыйдӧссӧ. Найӧ мырддялӧны йӧзлысь озырлунсӧ да донаторъяссӧ. На вӧсна содӧ дӧваяслӧн лыдыс.
Ерусалимса попъяс торкӧны Менсьым Индӧдӧс, пежалӧны Меным сиӧм вежаторъясӧс. Найӧ оз торйӧдны, мый вежа, а мый абу вежа, оз висьтавны, мый пеж, а мый сӧстӧм. Найӧ оз тӧждысьны Менсьым шойччан лунӧс видзӧм вӧсна. Меысь вежавидзӧмыс налӧн абу.
Ерусалимса юралысьяс кыйдӧс чашйысь кӧинъяс кодьӧсь.
Озырмӧдчӧм могысь найӧ вир кисьтӧны да йӧзӧс виалӧны.
Ерусалимса пророкъяс ставсӧ тайӧс дзебӧны еджыдӧн стенсӧ мавтысьяс моз. Найӧ аддзӧны абутӧмсӧ, висьталӧны ылӧгсӧ. Шуӧны, Господь Ыджыдыс пӧ тадзи висьталӧ, но Господь налы эз висьтавлы.
Войтырыс ӧта-мӧдсӧ дзескӧдӧ, ӧта-мӧдныслысь мырддялӧ, гӧльӧс да коньӧрӧс топӧдӧ, йӧз муысь локтысьясӧс нартитӧ.
Ме корси Ерусалимысь мортӧс, коді эськӧ ёнмӧдіс стенсӧ, сувтіс Ме водзӧ да сулаліс стен киссьӧминын, медым Ме эг бырӧд мусӧ. Но Ме эг аддзы.
Та вӧсна ме кисьта Ассьым скӧрлунӧс на вылӧ да Аслам ярлуна биӧн бырӧда найӧс. Ме мынтыся налы олан туйныс серти, — висьталӧ Господь Ыджыдыс».
Меным вӧлі Господьсянь кыв:
«Морт пиӧй, кывзы. Олісны кык ань, ӧти мамлӧн нывъяс. Том кадсяньыс найӧ кырсалісны Египетын олігас.
Сэні налысь морӧссӧ чабралісны, нывдырся нёньяссӧ шамралісны.
Ыджыд чойсӧ шуисны Огола, а мӧдсӧ — Оголива.
Оголаыс — Самария, а Оголиваыс — Ерусалим. Кыкнанныс найӧ вӧліны Менам, и чужтісны ныв-пиӧс.
Огола вӧлі Менам, но кырсаліс. Сылӧн лёкколӧмыс ӧзъяліс мусукъяс дінас, орччӧн олысь ассурсаяс дінӧ. Найӧ ставныс вӧліны мича том зонъяс, ыджыдалысьяс да юралысьяс, кодъяс новлісны гӧрдовлӧз паськӧм. Тыш дырйи найӧ вӧліны вӧла-тарантаса веськӧдлысьясӧн.
Огола кырсаліс нималана ассурса зонъяскӧд, ӧзъяліс лёкколӧмнас на дінӧ, пежаліс асьсӧ налӧн идолъяслы юрбитӧмнас.
Том кадас на сійӧ пондіс кырсавны Египетын. Египетсаяс узьлісны сыкӧд, шамралісны сылысь нывдырся нёньяссӧ да могмӧдісны ассьыныс колӧм-кӧсйӧмнысӧ.
Тайӧ кадсяньыс Огола эз и дугдывлы кырсавнысӧ. Та вӧсна Ме сеті сійӧс мусукъясыс киӧ, ассурсаяслы, кодъяс дінӧ сійӧ лёкколӧмнас ӧзъяліс.
Найӧ куш яйӧдз пӧрччӧдісны сійӧс да виисны шыпуртӧн, а сылысь ныв-писӧ пленӧ босьтісны.
Тадзи вӧлі мыждӧма сійӧс, и сы йылысь кутісны суклясьӧмӧн сёрнитны.
Оголива чойыс ставсӧ тайӧс аддзыліс, но Огола чойыс дорысь на ёнджыка зывӧксӧ вӧчис да кырсаліс.
Сійӧ ӧзъяліс лёкколӧмнас орччӧн олысь ассурсаяс дінӧ, кодъяс вӧліны ыджыдалысьяс да юралысьяс. Тыш дырйи найӧ вӧліны вӧла-тарантаса веськӧдлысьясӧн. Ставныс найӧ вӧліны мича том зонъяс, новлісны дона паськӧм.
Ме аддзи, мый Оголива пежаліс асьсӧ, и мый тайӧ кыкнан чойыслӧн оласногыс ӧткодь.
Но Оголива ёнджыка на кырсаліс. Сійӧ аддзис стенмӧ серлӧдлӧм серпасъяс, кӧні вӧліны гӧрдӧн мавтӧм калдеяса айулов, пашкыр юркӧртӧдаӧсь да вӧняӧсь. Найӧ вӧліны тышкайӧзӧн веськӧдлысьяс кодьӧсь, Калдея муын чужӧм вавилонсаяс. Серпас вылӧ видзӧдлӧмысь Оголивалӧн лёкколӧмыс ӧзйис вавилонса айулов дінӧ.
Оголива мӧдӧдіс ассьыс йӧзсӧ Калдея муӧ, и вавилонсаяс локтісны сы ордӧ. Найӧ пырисны сылӧн мусукасянінӧ да кырсалӧмнас пежалісны сійӧс.
Асьсӧ пежалӧм бӧрын Оголива кутіс мустӧмтны вавилонса айуловӧс.
Оголива восьсӧн кырсаліс, куш яйсӧ ставныслы петкӧдліс. Чойыс моз сійӧ лоис Меным зывӧк.
Но сійӧ ёнджыка на кырсаліс. Сылы тӧд вылас уси том кадыс, кор сійӧ кырсавліс Египет муын.
Сійӧс ёна кыскис мусукъяс дінас, кодъяслӧн яндзимыс осёллӧн кодь, и кодъяс кӧйдыссӧ кисьтӧны вӧвъяс моз.
Тэ, Оголива, бӧр кӧсйин бергӧдчыны аслад томдырся лэдзчысьӧм олӧмад, кор египетсаяс тэнсьыд нёньястӧ шамралісны, нывдырся морӧстӧ чабралісны.
Та вӧсна Господь Ыджыдыс тадзи висьталӧ тэныд, Оголива: Ме кыпӧда тэныд паныд мусукъястӧ, кодъяс лоины тэныд зывӧкӧсь. Быдласянь Ме вайӧда найӧс, медым уськӧдчасны тэ вылӧ.
Вайӧда йӧзӧс Вавилонысь, Калдеяысь, Пекодысь, Шоаысь да Коаысь. Накӧд локтасны и ассурсаяс, мича том зонъяс. Ставныс найӧ нималана йӧз, ыджыдалысьяс да юралысьяс, тарантаса тышкайӧзӧн веськӧдлысьяс.
Найӧ локтасны тарантасъясӧн да уна тышкайӧзӧн, уськӧдчасны тэ вылӧ шыпуртъясӧн. Юрнысӧ тупкӧмӧн, ыджыд да ичӧт сайӧдъяс босьтӧмӧн тышкайӧзыс кытшаласны тэнӧ быд боксянь. Ме сета налы мыждыны тэнӧ, и найӧ мыждасны тэнӧ асланыс индӧдъяс серти.
Кор найӧ скӧрпырысь мыждасны тэнӧ, Ме сета тэныд тӧдны Ассьым вежӧгтӧмӧс. Найӧ керыштасны тэнсьыд ныртӧ да пельтӧ, а сэсся тэнӧ шыпуртӧн виасны.
Ныв-питӧ найӧ нуӧдасны пленӧ, а коляс войтыртӧ би ньылыштас.
Найӧ пӧрччӧдасны паськӧмтӧ, мырддясны мичмӧдчанторъястӧ.
Ме пукта пом тэнад лэдзчысьӧм олӧмлы да кырсалӧмлы. Египет муысь локтӧмсянь тэ олін лэдзчысьӧмӧн да кырсалӧмӧн, но водзӧ он кӧсйы тадзи овны, Египетын олӧмтӧ он нин кӧсйы казьтывны.
Господь Ыджыдыс тадзи висьталӧ: Ме сета тэнӧ на киӧ, кодъясӧс тэ кутін мустӧмтны-зывӧктыны.
Найӧ скӧрпырысь вӧчасны тэныд лёксӧ, мырддясны тэнсьыд ставсӧ, мый удж помсьыд чукӧртін. Найӧ колясны тэнӧ пасьтӧгыд. Тэнад куш яйыд кутас тыдавны, воссяс тэнад лэдзчысьӧм олӧмыд да кырсалӧмыд.
Тадзи лоӧ тэкӧд, ӧд тэ кырсалін войтыръяскӧд да пежасин налӧн идолъяссянь.
Тэ чойыд моз олін, та вӧсна Ме сета тшӧтш тэныд юны Ассьым скӧрлунӧс сылӧн чашаысь.
Господь Ыджыдыс тадзи висьталӧ: тэ кутан юны чойыдлӧн чашаысь, джуджыд да паськыд дозйысь. Чашаыс тырӧма сералӧмӧн да лёкӧдӧмӧн.
Тэ коддзан, тыран шогӧн, ӧд Самария чойыдлӧн чашаыс — повзьӧдана да бырӧдана.
Тэ чашасӧ кушӧдз юан, торпыригӧдз жуглан, та бӧрын войтъяссӧ сэтысь нюлан, ассьыд морӧстӧ чашъян. Тайӧс шуи Ме, — висьталӧ Господь Ыджыдыс.
Господь Ыджыдыс тадзи висьталӧ: тэ бергӧдчин Меысь да вунӧдін Менӧ, сідзкӧ, лэдзчысьӧм оласногыд да кырсалӧмыд вӧсна ну сьӧкыдтӧ».
Господь шуис меным: «Морт пиӧй, мыжды Оголаӧс да Оголиваӧс!
Уськӧд налы тӧд выланыс зывӧк уджъяснысӧ.
Найӧ ӧд пежалісны йитӧдӧс, мый Ме кӧрталі накӧд. Найӧ сетчисны идолъясныслы, налы вись пыдди биын сотлісны пияннысӧ, кодъясӧс чужтісны Меным. Налӧн киныс вирӧсь.
Со мый нӧшта вӧчисны Меным: ӧти и сійӧ жӧ лунӧ пежалісны Менсьым вежаинӧс да Менсьым шойччан лунӧс.
Ассьыныс пиянсӧ идолъясныслы начкӧм бӧрын найӧ сійӧ жӧ лунӧ локтісны Менам вежаинӧ, тадзи пежалісны сійӧс. Со мый найӧ вӧчисны Менам керкаын.
Но тайӧ абу на ставыс. 
Огола да Оголива, ассьыныд йӧзнытӧ ті мӧдӧдлінныд ылі муясӧ, медым корны сэтысь айуловӧс.
Налӧн локтігкежлӧ ті мыссьывлінныд, мавтлінныд синнытӧ да ӧшлінныд ас выланыд мичмӧдчанторъяс. Ті нюжӧдчывлінныд дона куйланінъяс вылӧ. Тіян водзӧ вӧлі лӧсьӧдӧма пызан, и сэтчӧ ті пуктывлінныд Менсьым тшынӧдчанторйӧс да олив выйӧс.
Тіян дінӧ чукӧртчӧм йӧзыс гораа гажӧдчисны, весиг овтӧминысь вайӧдлісны юысь-кодалысьясӧс.
Гажӧдчысь айулов ӧшӧдлісны тіянлы ки выланыд сойкытшъяс, а юр выланыд пуктылісны мича юркытш.
Кырсалӧм вӧсна бонзьӧм-ропмунӧм аньяс йылысь Ме шуи: татшӧм аньяскӧд найӧ век на кырсалӧны.
Асьсӧ вузалысь ань дінӧ моз айулов волывлісны лэдзчысьӧмӧн олысь Огола да Оголива дінӧ.
Но веськыда олысь айулов мыждасны найӧс гозъякост олӧм пежалӧмысь да вир кисьтӧмысь, ӧд найӧ пежалісны йитӧдӧс, мый Ме кӧрталі накӧд, и налӧн киныс вирӧсь.
Господь Ыджыдыс тадзи висьталӧ: кыпӧдӧй йӧзӧс Оголалы да Оголивалы паныд, медым повзьӧдны найӧс да мырддьыны налысь озырлунсӧ.
Йӧзыс изъяласны найӧс да бытшкасны шыпуртӧн, налысь ныв-пинысӧ виаласны, керкаяснысӧ сотасны.
Лэдзчысьӧм олӧмлы тайӧ муас Ме пукта пом. И мукӧд аньяслы тайӧ лоӧ ӧлӧданторйӧн, медым тіян моз, Огола да Оголива, найӧ оз сетчыны лэдзчысьӧм олӧмӧ. Ті мынтысянныд лэдзчысьӧм оласногсьыныд да идолъяслы юрбитӧмсьыныд. Ме мыжда тіянӧс тайӧ мыжъясысь, и ті тӧдмаланныд, мый Ме — Господь Ыджыдыс».
Ӧкмысӧд вонас дасӧд тӧлысьлӧн дасӧд лунӧ меным вӧлі Господьсянь кыв:
«Морт пиӧй, пасйы-гиж тайӧ лунсӧ, ӧд талун вавилонса ӧксы кытшӧ босьтас Ерусалим кар.
Тайӧ асныра войтырыслы висьтав велӧданвисьт. Шу налы, мый Господь Ыджыдыс тадзи висьталӧ: — Босьт пӧрт, кисьт сэтчӧ ва да пукты сійӧс би вылӧ.
Пукты пӧртйӧ медбур яй — лядьвей да пуліпом. Тырт пӧртсӧ медбур лыясӧн, пукты лыяс вылӧ медбур ыж яй, пу, кытчӧдз весиг лыясыс оз пусьыны.
Господь Ыджыдыс тадзи висьталӧ: — Курыд шог вир кисьтысь карлы!
Курыд шог пӧртйыслы, кодлӧн пытшкӧсыс няйтысла пурзьӧма.
Перъяв пӧртсьыс яйтор бӧрся яйтор, эн пудъясь да эн бӧрйысь.
Ерусалим кар тырӧма вирӧн, вир кисьтісны изъяс вылӧ, муыс эз тупкы сійӧс.
Ме коли вирсӧ изъяс вылас, эг вевттьы сійӧс, медым скӧрмӧмӧн водзӧс перйыны Ерусалимын олысьяслысь.
Господь Ыджыдыс тадзи висьталӧ: — Курыд шог вир кисьтысь карлы!
Ме ӧзта ыджыд бипур.
Содты пессӧ, ёнджыка ӧзты бипурсӧ, пу яйсӧ лысьыс торъявтӧдз.
Ваыс мед бырас, лыыс мед сотчас.
Куш пӧртсӧ пукты ӧгыр вылас, медым ыргӧныс доналас, медым сотчас-сылас сэтысь став пежыс, став пурзьӧм няйтыс.
Ме весьшӧрӧ мырси, а пурзьӧм няйтыс пӧртсьыс эз вушйы, весиг биыс эз весав сійӧс.
Тэнад пежыд зывӧктана. Ме сӧстӧммӧдлі тэнӧ, но тэ эн сӧстӧммы аслад пежсьыд.
Кытчӧдз Ме став скӧрлунӧс тэ вылӧ ог кисьт, тэ он сӧстӧммы.
Тайӧс висьтала Ме, Господь.
Мый шуи, вӧча, ог веж Ассьым шуӧмӧс, ог жалит, ог бурсьӧлӧмтчы.
Тэнӧ лоӧ мыждӧма лёк оласногыд да уджъясыд серти, — висьталӧ Господь Ыджыдыс».
Меным вӧлі Господьсянь кыв:
«Морт пиӧй, Ме виччысьтӧг босьта тэнсьыд сьӧлӧм гажӧдысьтӧ, но тэ эн бӧрд, синватӧ эн кисьт.
Ас кежсьыд сьӧлӧмад шогсьы, кулӧма вӧсна бӧрдӧдчӧм эн вӧч.
Шогалысьяслы вайӧм нянь эн сёй, чужӧмтӧ эн тупкы, быд лунӧ моз ов юркӧртӧдӧн да кӧмӧн».
Асывнас на ме сёрниті войтыркӧд, а рытнас кувсис менам гӧтырӧй. Мӧд луннас ме вӧчи сідзи, кыдзи вӧлі тшӧктӧма меным.
Войтырыс юасис: «Висьтав миянлы, мыйла тэ тадзи вӧчан?»
Ме вочавидзи налы: «Меным вӧлі Господьсянь кыв.
Господь Ыджыдыс тшӧктіс меным висьтавны Израиль войтырлы, мый Сійӧ тадзи висьталӧ: Ме сета пежавны Ассьым вежаинӧс — тіянлысь син гажӧданторнытӧ да сьӧлӧм бурӧданторнытӧ, тіянлысь зумыд пыкӧднытӧ, мыйӧн ті ошйысянныд. Ныв-пиныд, кодъясӧс ті колинныд карас, куласны шыпурт помысь.
Сэки ті вӧчанныд ме моз, кыдзи ме талун вӧчи.
Чужӧмнытӧ онӧ тупкӧй да шогалысьяслы вайӧм нянь онӧ сёйӧй.
Юрвевттьӧдныд лоас юр выланыд, кӧмныд — коканыд, ті онӧ кутӧй шогсьыны-бӧрдны, но асланыд мыжъяс вӧсна косьманныд-сісьманныд, матысса водзаныд кутанныд ышлолавны.
Езекиль лоӧ тіянлы пасӧн. Ставсӧ, мый сійӧ вӧчис, ті тшӧтш кутанныд вӧчны.
Кор тайӧ збыльмас, сэки ті тӧдмаланныд, мый Ме — Господь Ыджыдыс.
А тэ, морт пиӧй, кывзы. Сійӧ лунӧ Ме мырддя Израиль войтырлысь ныв-пинысӧ — зумыд пыкӧднысӧ, лов гажӧдысьнысӧ да сьӧлӧм бурӧдысьнысӧ. Сійӧ жӧ лунӧ локтас тэ дінӧ Ерусалимысь пышйӧм морт, и сійӧ ставсӧ юӧртас тэныд.
Сійӧ лунӧ, кор тайӧ пышйӧм мортыс локтас, воссяс тэнад кыв-ворыд, и тэ пондан сёрнитны. Тэ лоан аслад войтырлы пасӧн, и найӧ тӧдмаласны, мый Ме — Господь».
Меным вӧлі Господьсянь кыв:
«Морт пиӧй, бергӧд чужӧмтӧ аммон войтырлань да пророкав налы паныд. Тшӧкты налы кывзыны Господь Ыджыдлысь кывсӧ. Господь Ыджыдыс тадзи висьталӧ: ті сералінныд, кор Менсьым вежаинӧс пежалісны, Израиль муӧс куштісны да Иуда войтырӧс нуӧдісны пленӧ. Таысь Ме сета тіянӧс асыввывса войтырлӧн киӧ. Тіян муӧ найӧ зэвтасны чомъяснысӧ, овмӧдчасны тіян пӧвстӧ, пондасны сёйны мувыв быдтаснытӧ да юны йӧвнытӧ.
Ме вӧча Равва карнытӧ верблюдъяслы оланінӧн, мунытӧ — ыжъяслы йирсянінӧн. Сэки ті тӧдмаланныд, мый Ме — Господь.
Господь Ыджыдыс тадзи висьталӧ: ті клопайтӧмӧн, чеччалӧмӧн да лёкӧдӧмӧн нимкодясинныд сыысь, мый суис Израиль муӧс. Та вӧсна Ме лэпта киӧс тіян вылӧ, сета тіянӧс войтыръяс киӧ, и ті лоанныд налы тышын шедӧдӧмторйӧн. Ме бырӧда тіянӧс войтыръяс пӧвстысь, вушта тіянлысь мунытӧ муяс лыдысь — дзикӧдз бырӧда тіянӧс.
Сэки ті тӧдмаланныд, мый Ме — Господь.
Господь Ыджыдыс тадзи висьталӧ: моавсаяс да Сеир керӧсвыв муын олысьяс шуӧны, Иуда войтыр пӧ оз торъяв мукӧд войтыръясысь. Та вӧсна Ме восьта Моав муӧс вӧрӧгыслы, бырӧда сылысь мичлунсӧ — мудорын сулалысь Бет-Ешимот, Ваал-Меон да Киръятаим каръясӧс. Ме сета моавсаясӧс асыввывса войтыръяслӧн киӧ аммонсаясӧс моз, кодъясӧс шуӧма вунӧдны войтыръяс пӧвстын.
Кор Ме мыжда моав войтырӧс, найӧ тӧдмаласны, мый Ме — Господь».
«Господь Ыджыдыс тадзи висьталӧ: эдом войтыр ёна мыжмис, ӧд чорыда водзӧс перйис Иуда войтырлысь. Та вӧсна Господь Ыджыдыс тадзи висьталӧ: Ме лэпта киӧс Эдом вылӧ да ӧтитӧг бырӧда сэтысь йӧзӧс да ыж-мӧскӧс, вӧча Эдом муысь овтӧмин.
Теман карсянь Дедан карӧдз ставныс куласны шыпурт помысь.
Аслам Израиль войтыр отсӧгӧн Ме водзӧс перъя эдом войтырлысь.
Найӧ вӧчасны эдом войтырлы Менам скӧрлун да ярлун серти. Сэки эдомсаяс тӧдмаласны Менсьым водзӧс перйӧмӧс, — висьталӧ Господь Ыджыдыс.
Господь Ыджыдыс тадзи висьталӧ: филистимсаяс дугдывтӧг мустӧмтісны да пыр кӧсйисны бырӧдны Иуда войтырӧс. Найӧ увтыртісны да водзӧс перйисны Иуда войтырлысь. Та вӧсна Господь Ыджыдыс тадзи висьталӧ: Ме лэпта киӧс филистимсаяс вылӧ, бырӧда керетса войтырӧс да саридз дорын олысьясӧс.
Ме чорыда водзӧс перъя налысь, скӧрпырысь мыжда найӧс.
И кор Ме вӧча тадзи, найӧ тӧдмаласны, мый Ме — Господь».
Дас ӧтиӧд вонас медводдза тӧлысьлӧн медводдза лунӧ меным вӧлі Господьсянь кыв:
«Морт пиӧй, Ерусалим йылысь Тирын олысьяс нимкодясьӧмӧн шуалӧны, киссьӧма пӧ войтыръяслы пыраніныс, а воссьӧма миянлы. Ми пӧ кутам озырмӧдчыны, а Иерусалимӧс лоӧ куштӧма.
Та вӧсна Господь Ыджыдыс тадзи висьталӧ: Ме сувта тэныд паныд, Тир. Ассьыс гыяссӧ кыпӧдысь саридз моз Ме кыпӧда тэныд паныд войтыръясӧс.
Тир карлысь стенсӧ жугласны, башняяссӧ кисьтасны.
Ме чышка сэтысь весиг мусӧ, кольӧ сӧмын изкырта саридз шӧрын.
Сэні чери кыйысьяс пондасны тӧлӧдны тывъяснысӧ.
Тайӧс шуи Ме, — висьталӧ Господь Ыджыдыс. — Войтыръяс куштасны Тир карӧс, и Тирсянь саридз бокӧ паськӧдчӧм сиктъясын олысьяс шыпурт помысь куласны. Сэки Тирын олысьяс тӧдмаласны, мый Ме — Господь.
Господь Ыджыдыс тадзи висьталӧ: Ме вайӧда Тир вылӧ вавилонса Навукодоносор ӧксыӧс, ӧксыяслысь ӧксыӧс. Сійӧ локтас войвывсянь вӧвъясӧн, тарантасъясӧн да верзьӧмаясӧн — ыджыдсьыс-ыджыд тышкайӧзӧн.
Саридз бокын сулалысь сиктъясын олысьясӧс сійӧ шыпуртӧн виас. Тэ гӧгӧр тымӧд лэптас да водзсасян сайӧдъяс сувтӧдас.
Стентӧ керъясӧн зурйӧдлас-жуглас, башняястӧ кералас-пасьвартас.
Жугӧдӧм карӧ дзиряӧдыд пырасны верзьӧмаяс да вӧла-тарантаса тышкайӧз, и налӧн шыысь стенмыд пондас дзӧрны. Тэ тыран унасьыс-уна вӧлӧн лэптӧм буснас.
Вӧв кок туй коляс уличьяс вылад. Тэнсьыд олысьястӧ виасны шыпуртӧн. Зымвидзысь из сюръяястӧ муас пӧрӧдасны.
Вавилонсаяс мырддяласны тэнсьыд озырлунтӧ да эмбуртӧ. Найӧ жугласны карса стентӧ да мича керкаястӧ, саридзӧ шыблаласны изъястӧ, керъястӧ да весиг мутӧ.
Ме пукта пом сьыланкывъяс юргӧмлы, гуслияслӧн шы оз нин кут кывны.
Ме вӧча тэысь изкырта, кӧні чери кыйысьяс пондасны тӧлӧдны тывъяснысӧ.
Тэнӧ некод выльысь оз лэпты. Тайӧс шуи Ме, Господь, — висьталӧ Господь Ыджыдыс.
Господь Ыджыдыс тадзи висьталӧ Тир карлы: вӧрӧг пондас виавны-бырӧдны тэнсьыд олысьястӧ, и доймалӧм йӧзыд пондасны ойзыны-ымзыны. Тэнад грымгысьӧм-усьӧмысь саридздорса муыс пондас дзӧрны-тіравны.
Саридздор муясын ӧксыяс асланыс юралан пуклӧсысь чеччасны, пӧрччасны вывсьыныс кышансӧ да вежасны серлӧдлӧм паськӧмнысӧ. Паськӧм моз найӧс полӧмыс вевттяс. Найӧ тіралӧмӧн пуксясны му вылӧ, ӧд весьӧпӧрасны сыысь, мый суис тэнӧ.
Тэ йылысь кутасны сьывны татшӧм бӧрдӧдчанкыв: Саридз вывті ветлысьяслӧн кар, тэнӧ бырӧдӧма. Тэ вӧлін нималана кар, саридз вывті ветлӧмсӧ аслад киын кутін, тэнад олысьясысь быдлаын полісны.
Тэнад усьӧмысь дзӧрӧны саридз дорын олысьяс, тэнӧ бырӧдӧмысь повзисны діяс вылын олысьяс.
Господь Ыджыдыс тадзи висьталӧ: Ме кушта тэнӧ, вӧча тэнӧ овтӧм карӧн. Пыдӧстӧм йирлысь васӧ Ме вая тэ вылӧ, ыджыд ва вевттяс тэнӧ.
Ме шыбита тэнӧ пыдӧстӧминӧ, мӧдӧда важӧн нин кулӧмаяс пӧвстӧ, овмӧда му пыдӧсӧ, важӧн нин пазӧдӧм каръяс пӧвстӧ. Тэнад керкаясыд кушмасны, но ловъяяслысь мусӧ Ме мичмӧда.
Ме вӧча тэнӧ повзьӧдчанторйӧн, тэ пыр кежлӧ быран. Тэнӧ пондасны корсьны, но некор оз аддзыны, — висьталӧ Господь Ыджыдыс».
Меным вӧлі Господьсянь кыв:
«Морт пиӧй, сьыв Тир йылысь бӧрдӧдчанкыв. Висьтав саридз шӧрын сулалысь да саридздорса войтыръяскӧд вузасьысь Тир карлы, мый Господь Ыджыдыс тадзи висьталӧ: Тир кар, тэ шуан асьтӧ медмичаӧн.
Тэ сулалан саридз шӧрын, лэптысьясыд вӧчисны тэнӧ вывті мичаӧн.
Тэнсьыд дорыштӧ вӧчисны Сенирысь вайӧм кипарис пуысь, шолгатӧ — ливанса сус пуысь, пелысъястӧ — васанса тупуысь, джоджъястӧ — киттимса діяс вылысь вайӧм бук пуысь, тэнӧ мичмӧдісны слӧн лыӧн.
Тэнсьыд тӧвдӧратӧ вурӧма серлӧдлӧм дӧраысь, Египетысь вайӧм шабді дӧраысь, сійӧ — тэнад пасыд.
Гӧрдовлӧз да пемыдгӧрд дӧраяс вайисны Элиша ді вылысь, наысь вӧчисны тэныд вевттьӧд-лэбувъяс.
Сынысьясыд вӧліны Сидон да Арвад каръясысь, а тэнад кужысь йӧзыд вӧліны бӧжалысьясӧн. *
Гевалса юрнуӧдысьяс да кужысь йӧз дзоньтавлісны письтӧминъястӧ, саридз вывті кывтысь корабльяс локтісны тэ дінӧ вузасьны-ньӧбасьны.
Персияысь, Лудысь да Ливияысь айулов кесъялісны тэнад тышкайӧз пӧвстын.
Сайӧдъяснысӧ да юртупкӧдъяснысӧ найӧ ӧшлывлісны, медым тэ дзирдалін.
Арвадсаяс сулалісны стен вылад, медым тэнад тышкайӧзкӧд видзны тэнӧ, гамадсаяс сулалісны башняяс вылад.
Ньӧвпуртӧснысӧ найӧ ӧшлывлісны стен гӧгӧрыд, ёнджыка на мичмӧдісны тэнӧ.
Тэнад вӧлі уна вузӧс, та вӧсна Фарсис ньӧбасис тэнсьыд. Сійӧ мынтысьліс тэныд эзысьӧн, кӧртӧн, свинечӧн да озысьӧн.
Яван, Тувал да Мешек тэнсьыд ньӧбасигӧн мынтысьлісны тэныд кесйӧгъясӧн да ыргӧн дозмук-кӧлуйӧн.
Тогарма рӧдысь петысьяс вайлісны мулъясӧс, тарантасӧ доддялан вӧвъясӧс да верзьӧмаяслы вӧвъясӧс, медым тэнсьыд ньӧбасигӧн мынтысьны наӧн.
Дедансаяс да діяс вылын олысь войтыръяс вузасисны тэкӧд.
Найӧ мынтысьлісны тэныд слӧн лыӧн да эбен пуӧн.
Арамейяс ньӧбасьлісны тэнсьыд, ӧд тэнад вӧлі уна вузӧс.
Найӧ мынтысьлісны карбункулӧн, пемыдгӧрд да серлӧдлӧм дӧраясӧн, вӧсни шабді дӧраӧн, кораллӧн да рубинӧн.
Иуда да Израиль муяс ньӧбасьлісны тэнсьыд.
Найӧ мынтысьлісны тэныд миннитса шобдіӧн, юмовторъясӧн, маӧн, олив выйӧн да чӧскыд мавтасъясӧн.
Дамаск ньӧбасис тэнсьыд, ӧд тэнад лыдтӧм-тшӧттӧм вузӧсыд кыскис сійӧс тэ дінӧ. Ачыс сійӧ вузаліс тэныд хелбонса вина да еджыд вурун.
Тэнсьыд ньӧбасигӧн дансаяс да Узал муысь явансаяс мынтысьлісны тэныд дорӧм кӧртӧн, кассияӧн да чӧскыда ӧвтысь турунӧн.
Дедансаяс вузалісны тэныд ӧныр улӧ вевттьӧдъяс.
Аравия да кедарса ӧксыяс вузавлісны тэныд ыжъяс, межъяс да кӧзаяс.
Саваса да рамаса вузасьысьяс ньӧбасиганыс мынтысьлісны тэныд медбур чӧскыд ӧвтанторъясӧн, дона изъясӧн да зарниӧн.
Харан, Кане да Эден, Сава, Ассур да Килмад вузасисны тэкӧд.
Найӧ вузавлісны тэныд дона паськӧм, гӧрдовлӧз да серлӧдлӧм дӧраяс, уна рӧма джодждӧраяс, гартӧм ён гезъяс.
Фарсисса корабльяс новлӧдлісны тэнсьыд вузӧстӧ. Тэ вӧлін тырӧдз сӧвтӧма, вӧлін саридз шӧрын кывтысь сьӧкыд корабль.
Тэнад сынысьясыд петкӧдісны тэнӧ восьса саридзӧ, но сэні кыпӧдчис асыв тӧв да жугӧдіс тэнӧ.
Озырлуныд да вузӧсыд, тэнад кывтысьясыд, сынысьясыд да бӧжалысьясыд, тэнсьыд письтӧминъястӧ дзоньталысьясыд, вузасьысьясыд да тышкайӧзыд — ставӧн, коді ветліс корабль вылын, саридз пыдӧсӧ вӧйисны сійӧ лунӧ, кор тэ усин.
Сынысь-бӧжалысьясыд горзӧны, налӧн горзӧмысь саридздорса муяс дзӧрӧны-тіралӧны.
Корабльяс вылысь чеччӧны кывтысьяс, сынысь-бӧжалысьяс сулалӧны саридз дорын.
Найӧ ёна горзӧны, курыда бӧрдӧны тэ вӧсна, юрнысӧ коялӧны муӧн, туплясьӧны пӧим пытшкын.
Юрнысӧ тэ вӧсна кушӧдз шырӧны, пасьталӧны шогалан паськӧм, курыда бӧрдӧны.
Тэ вӧсна ойзӧны-бӧрдӧны, тэ йылысь сьылӧны татшӧм бӧрдӧдчанкыв: — Некутшӧм кар он ӧткодяв Тиркӧд, кодӧс бырӧдӧма саридз шӧрын.
Саридзті тэ новлӧдлін ассьыд вузӧстӧ, вердін-пасьтӧдін войтыръясӧс.
Аслад лыдтӧм-тшӧттӧм озырлунӧн да вузӧсӧн тэ озырмӧдін мувывса ӧксыясӧс.
Но саридзлӧн ыджыд гыыс жугӧдіс тэнӧ, нуис став йӧзтӧ да вузӧстӧ ва пыдӧсӧ.
Тэ йылысь кылігӧн саридз дорын олысьяс весьӧпӧрисны, налысь ӧксыяссӧ тіралӧм босьтіс, чужӧмныс вежсис.
Войтыръяс пӧвстысь вузасьысьяс пондасны шутьлявны сыысь, мый лои тэкӧд.
Ӧд тэ лоин повзьӧдчанторйӧн, тэ пыр кежлӧ бырин».
Меным вӧлі Господьсянь кыв:
«Морт пиӧй, шу тирса юралысьлы, мый Господь Ыджыдыс тадзи висьталӧ: тэ вылӧ кыпӧдчин да шуин, ме пӧ ен, пукала пӧ саридз шӧрын енлӧн пуклӧсын. Но тэ сӧмын морт, абу ен, кӧть ассьыд вежӧртӧ ӧткодялан енлӧн вежӧрыскӧд.
Тэ лоин Даниилысь мывкыдджык на, став гусяторйыс тэныд лои восьса.
Аслад мывкыдлун да вежӧр отсӧгӧн тэ озырмӧдчин, чукӧртін аслыд зарни-эзысь.
Тэ кужӧмӧн вузасин, ёна озырмин да пондін ышнясьны.
Та вӧсна Господь Ыджыдыс тадзи висьталӧ: сы понда, мый тэ ассьыд вежӧртӧ ӧткодялан Енлӧн вежӧрыскӧд, Ме вайӧда тэ вылӧ йӧз муысь скӧрсьыс-скӧр войтырӧс. Найӧ перъясны шыпуртнысӧ, медым бырӧдны тэнсьыд ыджыд мывкыдлунтӧ.
Найӧ няйтӧ таляласны тэнсьыд нималӧмтӧ да шыбитасны тэнӧ пыдӧстӧминӧ, и тэ кулан шыпурт помысь саридз шӧрын.
Шуан-ӧ сэки виысьыдлы, мый тэ ен? Виысь водзын тэ сӧмын морт, абу ен.
Тэ вундыштчытӧм морт моз кулан йӧз муысь локтысьяслӧн киысь.
Тайӧс шуи Ме, — висьталӧ Господь Ыджыдыс».
Меным вӧлі Господьсянь кыв:
«Морт пиӧй, бӧрд тирса ӧксы вӧсна. Шу сылы, мый Господь Ыджыдыс тадзи висьталӧ: тэ вӧлін тыр-бур, зэв мывкыд да вывті мича.
Тэ олін Эдэмын, Енлӧн сад йӧрын.
Тэнӧ мичмӧдісны дона изъяс: рубин, топаз, алмаз, хризолит, оникс, яшма, сапфир, карбункул да изумруд. Паськӧмтӧ вӧлі мичмӧдӧма зарниӧн. Ставыс тайӧ вӧлі дась нин сійӧ лунӧ, кор тэнӧ вӧлі вӧчӧма.
Тэ вӧлін мавтыштӧм херувим. Ме пукті тэнӧ видзысьӧ, и тэ олін Енлӧн вежа керӧс вылын, ветлӧдлін би моз югъялысь дона изъяс пӧвстті.
Тэнӧ вӧчан лунсянь тэ олін веськыда. Тадзи вӧлі сійӧ лунӧдз, кор тэ пытшкысь вӧлі аддзӧма лёксӧ.
Тэ ёна вузасин, тырин виалӧм-дзескӧдӧмӧн. Тэ мыж вӧчин.
Та вӧсна тэ лоин Меным шогмытӧмӧн, и Ме шыбиті тэнӧ, видзысь херувимӧс, Енлӧн керӧс вылысь, би моз югъялысь дона изъяс пӧвстысь.
Мичлун пондаыд тэ вылӧ кыпӧдчин, нималӧм пондаыд воштін мывкыдлунтӧ.
Таысь Ме шыбиті тэнӧ му вылӧ, янӧді ӧксыяс водзын.
Ылӧдчӧмӧн вузасигад тэ уна мыж вӧчин да пежалін ассьыд вежаинъястӧ.
Ме ӧзта тэ пытшкӧ би, и сійӧ ньылыштас тэнӧ.
Ме вӧча тэысь пӧим, и тэ кутан куйлыны му вылын став йӧзыслӧн син водзын.
Тэнӧ тӧдысь войтыръяс весьӧпӧрасны сыысь, мый лоӧ тэкӧд.
Тэ лоан повзьӧдчанторйӧн, тэ пыр кежлӧ быран».
Меным вӧлі Господьсянь кыв:
«Морт пиӧй, бергӧд чужӧмтӧ Сидонлань да пророкав сылы паныд. Шу, мый Господь Ыджыдыс тадзи висьталӧ: Ме паныд сувта тэныд, Сидон, да нимӧда Ачымӧс сы пыр, мый тэныд вӧча. Ме мыжда Сидонӧс да сэні петкӧдла Ассьым вежалунӧс. Сэки тэнад олысьясыд тӧдмаласны, мый Ме — Господь.
Ме мӧдӧда Сидонӧ пӧрӧс висьӧм, сылӧн уличьяс вылын лоӧ вир кисьтӧм. Вӧрӧг уськӧдчас быд боксянь и виалас сидонсаясӧс.
Сэки найӧ тӧдмаласны, мый Ме — Господь.
Израиль войтырлӧн оз нин лоны сійӧс мустӧмтысь орччӧн олысьясыс, кодъяс ёсь лежнӧг моз сутшкалӧны-дойдалӧны. Сэки найӧ тӧдмаласны, мый Ме — Господь Ыджыдыс.
Господь Ыджыдыс тадзи висьталӧ: Ме чукӧрта Израиль войтырӧс мукӧд войтыръяс пӧвстысь, кытчӧ найӧс вӧлі разӧдӧма. Та пыр Ме петкӧдла Ассьым вежалунӧс мукӧд войтыръяслӧн син водзын. Израиль войтыр пондас овны аслас муын, мый Ме сеті Аслам Яков кесйӧглы.
Найӧ кутасны сэні повтӧг овны, лэптасны керкаяс да пуктасны виноград пуяс. Кутасны повтӧг овны, ӧд Ме мыжда на гӧгӧр олысь войтыръясӧс, кодъяс мустӧмтісны найӧс. Сэки найӧ тӧдмаласны, мый Ме — Господь, налӧн Ен».
Дасӧд вонас дасӧд тӧлысьлӧн дас кыкӧд лунӧ меным вӧлі Господьсянь кыв:
«Морт пиӧй, бергӧд чужӧмтӧ фараонлань, египетса ӧксылань, да пророкав сылы паныд да став Египетлы паныд.
Шу, мый Господь Ыджыдыс тадзи висьталӧ: Ме сувта тэныд паныд, фараон, египетса ӧксы. Тэ — ыджыд крокодил, куйлан Нил юын да шуан, юыс пӧ менам, ме пӧ ачым сійӧс аслым вӧчи.
Но Ме тэнад вомкӧтшӧ ыджыд вугыр пысала. Тэнад юысь черисӧ Ме ляска кучик бердад и перъя тэнӧ юсьыд тайӧ чериыскӧд.
Сэсся тэнӧ да тэнад юысь став черисӧ шыбита овтӧминӧ. Тэ кутан куйлыны видз вылын, некод оз вешты тэнӧ сэтысь ни оз дзеб тэнсьыд шойтӧ.
Ме сета тэнӧ мувывса зверъяслы да енэжвывса лэбачьяслы сёян пыдди.
Сэки Египетын став олысьыс тӧдмалас, мый Ме — Господь.
Египет, тэ вӧлін Израиль войтырлы вӧсньыдик бедь кодь мыджӧдӧн.
Кор Израиль войтыр кутчысис тэ дінӧ, тэ чегин да сатшин сылы пельпомас.
Кор сійӧ мыджсис тэ вылӧ, тэ чегин, а сылӧн коскыс орис.
Та вӧсна Господь Ыджыдыс тадзи висьталӧ: Ме вайӧда тэ вылӧ шыпурт, бырӧда тэнсьыд йӧзтӧ да ыж-мӧстӧ.
Египет му лоӧ овтӧминӧн, пазӧдӧм муӧн.
Сэки египетсаяс тӧдмаласны, мый Ме — Господь. Египет, тэ шуан, юыс пӧ менам, ме пӧ сійӧс вӧчи.
Та вӧсна Ме сувта тэныд да тэнад юлы паныд. Ме пазӧда Египет муӧс, вӧча сійӧс овтӧминӧн Мигдолсянь Сиенаӧдз, Эфиопия мудорӧдз.
Морт ни ыж-мӧс оз кут ветлыны сэті, оз ло сэні олысьыс нелямын во чӧж. Египет муӧс Ме вӧча кушмӧм муяс пӧвстын овтӧминӧн. Сылӧн каръясын нелямын во чӧж оз ло олысьыс.
Найӧ лоӧны мукӧд пазӧдӧм каръяс кодьӧсь. Ме разӧда египетса войтырӧс мукӧд войтыръяс пӧвстӧ, шердъя найӧс мукӧд муясӧ.
Господь Ыджыдыс тадзи висьталӧ: нелямын во мысти Ме чукӧрта египетса войтырӧс мукӧд войтыръяс пӧвстысь, кытчӧ найӧс вӧлі разӧдӧма.
Египетса войтырӧс бӧр вайӧда пленысь Патрос муӧ, налӧн чужанінӧ. Сэні налӧн лоӧ жебиник юраланін.
Налӧн юралӧмыс лоӧ медся вынтӧм, найӧ оз нин босьтны мукӧд войтыръясӧс асланыс кипод улӧ.
Ме вӧча найӧс жеб войтырӧн, медым эз вермыны ыджыдавны мукӧд войтыръяс вылын.
Израиль войтыр лачасӧ оз нин кут Египет вылӧ. Египеткӧд лоӧмторйыс кутас казьтывны израильсаяслы мыжныс йылысь, мый отсӧгсӧ корисны Египетлысь.
Сэки найӧ тӧдмаласны, мый Ме — Господь Ыджыдыс».
Кызь сизимӧд вонас медводдза тӧлысьлӧн медводдза лунӧ меным вӧлі Господьсянь кыв:
«Морт пиӧй, Тиркӧд тышкасигӧн вавилонса Навукодоносор ӧксы ёна уджӧдіс ассьыс тышкайӧзсӧ.
Тышкайӧзлӧн юрсиныс гылалӧма, налысь пельпомнысӧ зыртӧма.
Навукодоносорлы да сылӧн тышкайӧзыслы эз вичмы некутшӧм удждон Тиркӧд тышкасьӧмысь.
Та вӧсна Господь Ыджыдыс тадзи висьталӧ: Ме сета вавилонса Навукодоносор ӧксылы Египет муӧс. Сійӧ куштас-мырддяс Египетлысь озырлунсӧ, нуас сэтысь ставсӧ. Тайӧ и лоас сылӧн тышкайӧзыслы удждоннас.
Удждон пыдди Ме сета Навукодоносорлы Египет му, ӧд сылӧн тышкайӧзыс уджалісны Меным, — висьталӧ Господь Ыджыдыс.
Сійӧ лунӧ Ме выльысь ёнмӧда Израиль войтырӧс. Тэныд, морт пиӧй, Ме сета сёрнитны на водзын. Сэки найӧ тӧдмаласны, мый Ме — Господь».
Меным вӧлі Господьсянь кыв:
«Морт пиӧй, пророкав. Шу, мый Господь Ыджыдыс тадзи висьталӧ: ырзӧмӧн бӧрдӧй локтан лун йылысь, ӧд матын Господьлӧн луныс.
Матыстчӧ сьӧд кымӧра лун, войтыръясӧс мыждан кад.
Вӧрӧг уськӧдчас Египет вылӧ, виалас шыпуртӧн египетсаясӧс, босьтас Египетлысь озырлунсӧ да подулӧдзыс кисьтас-бырӧдас сійӧс. Сэки Эфиопияӧс полӧм босьтас.
Эфиопия, Ливия, Луд да Кув муясысь войтыр, Египетын олысь сорласьӧм войтыр да Менам йитӧдлӧн муысь локтӧм войтыр египетсаяскӧд ӧтвылысь шыпурт помысь куласны.
Господь тадзи висьталӧ: Египетлы отсасьысьяс усясны. Бырас Египетлӧн выныс, мыйӧн сійӧ ошйысьӧ.
Мигдолсянь Сиенаӧдз йӧзыс шыпурт помысь куласны, — висьталӧ Господь Ыджыдыс. — 
Кушмӧм муяс лыдын сійӧ лоӧ овтӧминӧн, сылӧн каръясыс лоӧны пазӧдӧм каръяс лыдын.
Кор Ме биӧн сота Египетӧс да пасьварта сылы отсасьысьясӧс, сэки египетсаяс тӧдмаласны, мый Ме — Господь.
Сійӧ лунӧ корабльяс вылын мӧдӧдчасны Менам юӧр вайысьяс, медым повзьӧдны повтӧг олысь эфиопияса войтырӧс. Найӧ весьӧпӧрасны Египетӧс бырӧдан лунӧ, мый регыд нин лоӧ.
Господь Ыджыдыс тадзи висьталӧ: вавилонса Навукодоносор ӧксы киӧн Ме бырӧда уна йӧза Египетӧс.
Ме вайӧда сійӧс да сылысь скӧрсьыс-скӧр войтырсӧ бырӧдны Египет му. Найӧ перъясны ассьыныс шыпуртнысӧ, уськӧдчасны Египет вылӧ да тыртасны Египет му виӧмаясӧн.
Нил юсӧ Ме косьта, а Египет му сета лёк йӧзлӧн киӧ. Йӧз муысь локтысьяс киӧн Ме кушта мусӧ да ставсӧ, мый сэні эм.
Тайӧс висьтала Ме, Господь.
Господь Ыджыдыс тадзи висьталӧ: Мемфисысь Ме бырӧда идолъясӧс да ылӧг енъясӧс, Египетӧс Ме коля ӧксытӧг. Ме повзьӧда-весьӧпӧрта Египетӧс, кушта Патрос му, биӧн сота Цоан кар да мыжда Но нима кар.
Египетса Син изкар вылӧ Ме кисьта Ассьым скӧрлунӧс, бырӧда уна йӧзӧс Но карысь, Египетӧс биӧн сота.
Син кар пондас мучитчыны, Но карлысь стенъяссӧ лоӧ пазӧдӧма, а Мемфис вылӧ луншӧр кадӧ уськӧдчас вӧрӧг.
Он да Пи-Бешет каръясысь том айулов куласны шыпурт помысь, а мукӧдсӧ босьтасны пленӧ.
Тафнис карын луныс пемдас, кор сэні Ме жугӧда Египетлысь сийӧссӧ. Сэки бырас Египетлӧн выныс, мыйӧн сійӧ ошйысьӧ.
Кымӧр вевттяс карсӧ, и сэтысь нывъяссӧ нуӧдасны пленӧ.
Тадзи Ме мыжда Египет войтырӧс. Сэки найӧ тӧдмаласны, мый Ме — Господь».
Дас ӧтиӧд вонас медводдза тӧлысьлӧн сизимӧд лунӧ меным вӧлі Господьсянь кыв:
«Морт пиӧй, Ме чеги фараонлысь, египетса ӧксылысь, кисӧ.
Некод оз гартышт сылысь кисӧ, медым киыс бурдіс. Сылӧн киыс оз вынсяв, оз вермы кутны шыпурт.
Та вӧсна Господь Ыджыдыс тадзи висьталӧ: Ме паныд сувта фараонлы, египетса ӧксылы, да чега сылысь кыкнан кисӧ — дзоньвидзасӧ и чегӧмасӧ. Ме уськӧда шыпуртсӧ сылӧн киысь.
Египетса войтырӧс Ме разӧда мукӧд войтыръяс пӧвстӧ, шердъя найӧс мукӧд муясӧ.
Вавилонса ӧксылысь кисӧ ёнмӧда да сета сылы киас Ассьым шыпуртӧс, а фараонлысь кисӧ чега. Ёна дойдалӧмаӧн сійӧ пондас ымзыны-бӧрдны вавилонса ӧксы водзын.
Вавилонса ӧксылысь кисӧ ёнмӧда, а фараонлӧн киыс вынтӧммас.
Ассьым шыпуртӧс Ме сета вавилонса Навукодоносор ӧксылы киас. Сійӧ лэптас шыпуртсӧ Египет му весьтӧ. Сэки египетсаяс тӧдмаласны, мый Ме — Господь. 
Ме разӧда египетса войтырӧс мукӧд войтыръяс пӧвстӧ, шердъя найӧс мукӧд муясӧ. Сэки найӧ тӧдмаласны, мый Ме — Господь».
Дас ӧтиӧд вонас коймӧд тӧлысьлӧн медводдза лунӧ меным вӧлі Господьсянь кыв:
«Морт пиӧй, висьтав фараонлы, египетса ӧксылы, да сылӧн уна лыда войтырлы: Тэ вына. Кодкӧд ӧткодявны тэнӧ?
Ассуркӧд. Сійӧ коркӧ вӧлі ливанса сус пу кодь, мича вожъяса джуджыд пу, вуджӧрнас сайӧдысь, туганнас быдмис мукӧд пуясысь вылӧджык.
Сус пусӧ ва юкталіс, мупытшса ва быдтіс сійӧс. Визувтысь ва кытшаліс сылысь быдманінсӧ, ваыс вичмывліс тшӧтш мукӧд пуяслы.
Та вӧсна сус пу быдмис, мукӧд пуясысь лои джуджыд. Сылӧн быдмис уна вож, увъясыс нюжалісны, ӧд сылы тырмымӧн вӧлі ваыс.
Вожъясас поздысьлісны енэжвывса лэбачьяс, пу улас пиянасьлісны вӧрса пемӧсъяс, вуджӧр улас олісны вына войтыръяс.
Сійӧ вӧлі джуджыд да мича, вожъясыс нюжалісны, ӧд вужъясьӧма вӧлі ыджыд ва дорӧ.
Весиг Енлӧн сад йӧрын сус пуяс вӧліны ичӧтджыкӧсь, кипарислӧн эз вӧвны сэтшӧм вожъясыс, платан пулӧн — сэтшӧм увъясыс. Енлӧн сад йӧрын ни ӧти пу эз вӧв сы кодь мича.
Ме вӧчи сійӧс мичаӧн, быдті сылы уна вож. Эдэмын, Енлӧн сад йӧрын, быдмысь пуяс вежалісны сылы.
Господь Ыджыдыс тадзи висьталӧ: сус пуыс быдмис джуджыда, мукӧд пуясысь вылӧджык, да ышнясис. Та вӧсна Ме сеті сійӧс войтыръяс вылын ыджыдалысь киӧ, коді мынтысис сылы, кыдзи и коліс.
Сылӧн лёк вӧчӧмыс вӧсна Ме ӧтдорті сійӧс.
Йӧз муысь локтысьяс кералісны сійӧс, скӧрсьыс-скӧр войтыр колис сійӧс куйлыны керӧс вылӧ.
Сылӧн вожъясыс усьласисны ковтысъясӧ, чегъясьӧм увъясыс — сёнъясӧ. Войтыръяс петісны сылӧн вуджӧр улысь, найӧ эновтісны сійӧс.
Пӧрӧдӧм сус пу вылӧ поздысисны енэжвывса лэбачьяс, увъясас овмӧдчисны вӧрса пемӧсъяс.
Тайӧ ставыс лои сы вӧсна, медым ва бокын быдмысь пуяс оз вылӧ кыпӧдчыны да туганнас мед оз нюжӧдчыны мукӧд пуясысь вылӧджык. Ваӧн юкталӧм ыджыд пуяс мед оз быдмыны вывті джуджыда.
Ставныслы шуӧма кувны, найӧс лоӧ шыбитӧма му пыдӧсас, кулӧмаяс пӧвстӧ.
Господь Ыджыдыс тадзи висьталӧ: тайӧ сус пуыслысь пыдӧстӧминӧ мунан лунсӧ Ме вӧчи бӧрдан лунӧн. Ме тупки пыдӧстӧм йир да сувтӧді сылӧн валысь визувтӧмсӧ, и ваыс дугдіс визувтны. Ме пасьтӧді Ливанӧс сьӧд пемыдас, медым сійӧ шогаліс сус пуыс вӧсна. Став вӧрса пуыс косьмис сус пу вӧсна шогсигӧн.
Ме уськӧді сус пуӧс, шыбиті сійӧс пыдӧстӧминӧ кулӧмаяс пӧвстӧ. Сылӧн грымгысьӧм-усьӧмӧн Ме пыркниті войтыръясӧс. Эдэмса пуяс да медбур ливанса пуяс, ваӧн коркӧ юкталӧм пуяс, пондісны нимкодясьны му пыдӧсас.
Ӧд сус пуыскӧд лэччисны пыдӧстӧминӧ шыпурт помысь кулӧмаяс пӧвстӧ тшӧтш найӧ, кодъяс войтыръяс пӧвстысь ёртасисны сыкӧд да дзебсясисны сылӧн вуджӧр улын.
Ӧні тэ вына да нималана, но кутшӧм эдэмса пукӧд тэнӧ позьӧ ӧткодявны?
Эдэмса пуясӧс моз тэнӧ тшӧтш лоӧ шыбитӧма му пыдӧсас, тэ пондан куйлыны вундыштчытӧмъяс пӧвстын да шыпурт помысь кулӧмаяс пӧвстын.
Со мый виччысьӧ фараонӧс да сылысь уна лыда войтырсӧ, — висьталӧ Господь Ыджыдыс».
Дас кыкӧд вонас дас кыкӧд тӧлысьлӧн медводдза лунӧ меным вӧлі Господьсянь кыв:
«Морт пиӧй, сьыв фараон йылысь, египетса ӧксы йылысь, бӧрдӧдчанкыв. Шу сылы: — Войтыръяс пӧвстын тэ том лев, саридзын олысь гундыр. Быгзьӧдан юястӧ, ва пыдӧссӧ талялан, визув васӧ гудыртан.
Господь Ыджыдыс тадзи висьталӧ: Ме шыбита Ассьым тывйӧс тэ вылӧ, и чукӧртчӧм войтыръяс тывъяласны тэнӧ сыӧн.
Ме шыбита тэнӧ видз вылӧ, коля куйлыны сэтчӧ. Ме мӧдӧда тэ вылӧ енэжвыв лэбачьясӧс, верда тэӧн зверъясӧс.
Тэнсьыд яйтӧ керӧсъяс вылӧ шыблала, тэнсьыд шойтӧ ковтыс пасьтала разӧда.
Мусӧ юктала тэнад вирӧн — керӧсъяс вирӧссясны, сёртасъяс тырасны вирӧн.
Тэнӧ кусӧдігӧн-бырӧдігӧн Ме тупка енэжсӧ, пемдӧда кодзувъяссӧ, шондісӧ тупка кымӧрӧн, и тӧлысьыс югзьӧднысӧ дугдас.
Енэжвывса югзьӧданторъяс тэ весьтысь пемдӧда, сап пемыдӧ вӧйта тэнсьыд мутӧ, — висьталӧ Господь Ыджыдыс.
Ме весьӧпӧрта войтыръясӧс, кор тэнӧ бырӧдӧм йылысь юӧрсӧ паськӧда войтыръяс пӧвстын, тэныд тӧдтӧм муясын.
Войтыръяс весьӧпӧрасны, кор тӧдмаласны, мый Ме вӧча тэныд. Налысь ӧксыяссӧ полӧм-тіралӧм босьтас, кор Аслам шыпуртӧн Ме кута шенасьны налӧн чужӧмбан водзын. Тэнӧ бырӧдан лунӧ найӧ пондасны дзӧрны асланыс олӧм вӧсна.
Господь Ыджыдыс тадзи висьталӧ: вавилонса ӧксылӧн шыпуртыс кыптас тэ вылӧ.
Ме бырӧда тэнсьыд уна лыда войтыртӧ вына тышкайӧзлӧн шыпуртӧн.
Скӧрсьыс-скӧр войтыр пуктас пом Египетлӧн вылӧ кыпӧдчӧмлы, и египетса уна лыда войтырыс кулас.
Ме бырӧда Египетысь став ыж-мӧссӧ, кодъяс йирсьӧны сылӧн ыджыд ю бокас. Морт ни ыж-мӧс оз кут водзӧ гудыртны сэтысь васӧ.
Ме сӧдзӧда васӧ, и ваыс пондас вый моз лӧня тюргыны-визувтны, — висьталӧ Господь Ыджыдыс. — 
Ме вӧча Египет муӧс овтӧминӧн, и сійӧс ставнас лоӧ куштӧма.
Кор Ме бырӧда сэтысь став олысьсӧ, сэки найӧ тӧдмаласны, мый Ме — Господь.
Татшӧм бӧрдӧдчанкыв Египет му йылысь да египетса уна лыда войтыр йылысь кутасны сьывны мукӧд войтыръясысь нывъяс, — висьталӧ Господь Ыджыдыс».
Дас кыкӧд вонас медводдза тӧлысьлӧн дас витӧд лунӧ меным вӧлі Господьсянь кыв:
«Морт пиӧй, ырзӧмӧн бӧрд египетса уна лыда войтыр вӧсна. Колльӧд найӧс да мукӧд вына войтыръясӧс, кодъяс мунасны му пыдӧсас, кулӧмаяс дінӧ.
Египет, тэ ӧмӧй мукӧдсьыс бурджык? Лэччы пыдӧстӧминӧ да вод вундыштчытӧмъяс пӧвстӧ.
Египетсаяс куласны шыпурт помысь, найӧс сетӧма шыпурт улӧ, уна лыда египетса войтырӧс кыскасны кулӧмаяс дінӧ.
Кулӧмаяслӧн оланінсянь вына тышкайӧзӧн веськӧдлысьяс шуасны, Египет да сылы отсасьысьяс пӧ усисны шыпурт помысь, тайӧ вундыштчытӧм йӧзыс куйлӧны му пыдӧсас.
Сэні куйлӧ Ассур да став ассурса войтырыс, ставнысӧ шыпуртӧн виӧма, гӧгӧр дзебанінъяс.
Налӧн дзебаніныс пыдӧстӧминын. Сэні куйлӧ ассурса войтыр, гӧгӧр дзебанінъяс. Шыпуртӧн виӧма ставнысӧ, кодъясысь коркӧ полісны ловъяяслӧн му вылын.
Сэні куйлӧ Элам да эламса уна лыда войтыр, ставнысӧ шыпуртӧн виӧма, гӧгӧр дзебанінъяс. Пыдӧстӧминӧ мунісны тайӧ вундыштчытӧм йӧзыс, кодъясысь коркӧ полісны ловъяяслӧн му вылын. А ӧні налы яндзим, найӧ куйлӧны кулӧмаяскӧд му пыдӧсас.
Эламлы да эламса уна лыда войтырлы куйланінсӧ сетісны виӧмаяс пӧвстысь, гӧгӧр дзебанінъяс. Шыпуртӧн виӧма тайӧ вундыштчытӧм йӧзсӧ, кодъясысь коркӧ полісны ловъяяслӧн му вылын. А ӧні налы яндзим, найӧ куйлӧны виӧмаяскӧд му пыдӧсас.
Сэні куйлӧны Мешек да Тувал, мешекса да тувалса уна лыда войтыръяс, гӧгӧр дзебанінъяс. Шыпуртӧн виӧма тайӧ вундыштчытӧм йӧзсӧ, кодъясысь коркӧ полісны ловъяяслӧн му вылын.
Найӧ оз куйлыны виӧм вына тышкайӧзкӧд, вундыштчытӧмъяскӧд, кодъяс тышкасянторъясӧн мунісны кулӧмаяслӧн оланінӧ, шыпуртнысӧ пуктісны юр уланыс. Тайӧ вына тышкайӧзлӧн мыжъясыс личкӧны лыяснысӧ, ӧд наысь коркӧ полісны ловъяяслӧн му вылын.
Египет, тэнӧ тшӧтш лоӧ бырӧдӧма вундыштчытӧмъяскӧд, тэ кутан куйлыны шыпуртӧн виӧмаяс пӧвстын.
Сэні куйлӧ Эдом, куйлӧны эдомса ӧксыяс да юралысьяс. Коркӧ найӧ вӧліны вынаӧсь, а ӧні куйлӧны шыпуртӧн виӧмаяс пӧвстын, вундыштчытӧмъяскӧд му пыдӧсас.
Сэні куйлӧны войвывса юралысьяс да сидонсаяс, кодъяс лэччисны виӧмаяс пӧвстӧ. Коркӧ вӧліны повзьӧдана ёнӧсь, а ӧні янӧдӧма тайӧ вундыштчытӧм йӧзсӧ, кодъяс куйлӧны шыпуртӧн виӧмаяс пӧвстын, налы яндзим, ӧд куйлӧны кулӧмаяскӧд му пыдӧсас.
Ставсӧ тайӧс аддзигӧн фараон да сылӧн тышкайӧзыс дугдасны шогсьыны сыысь, мый египетса уна лыда войтыр куліс шыпурт помысь, — висьталӧ Господь Ыджыдыс.
Ловъяяслӧн му вылын Ме паськӧда Меысь полӧмсӧ, а фараон аслас уна лыда войтырыскӧд пондас куйлыны шыпуртӧн виӧм вундыштчытӧмъяс пӧвстын, — висьталӧ Господь Ыджыдыс».
Меным вӧлі Господьсянь кыв:
«Морт пиӧй, висьтав тадзи аслад войтырыдлы: сійӧ муас, кытчӧ Ме мӧдӧда шыпурт, войтырӧн пуктӧм видзысь аддзас локтысь тышкайӧзӧс да кутас буксыны, медым ӧлӧдны войтырӧс.
Но быдӧн, коді кылас буксан шы, а асьсӧ оз видз, ачыс лоӧ мыжа аслас кулӧмысь, кор вӧрӧг локтас виавны.
Сійӧ ачыс лоӧ мыжа аслас кулӧмысь, ӧд кыліс буксан шы, но асьсӧ эз видз.
А коді асьсӧ видзӧ, сійӧ ловйӧн кольӧ.
Локтысь тышкайӧзӧс аддзигӧн кӧ видзысь оз буксы буксанӧн да оз юӧрт войтырыслы вӧрӧг локтӧм йылысь, сэки вӧрӧг локтас да виас йӧзӧс. Быдӧн кулас аслас мыж вӧсна, но шыпурт улӧ веськалӧм мортлӧн вирысь Ме водзӧс перъя видзысьлысь.
Морт пиӧй, Ме пукті тэнӧ Израиль войтырлы видзысьӧ. Кор тэ кылан Менсьым кывйӧс, тэныд ковмас ӧлӧдны Израиль войтырӧс Ме пыдди.
Кор Ме шуа лёк вӧчысьлы, мый сійӧ кулас, а тэ он ӧлӧд, медым сійӧ бергӧдчас лёк туй вывсьыс, сэки лёк вӧчысь кулас мыж вӧснаыс. Но сылӧн вирысь Ме водзӧс перъя тэнсьыд.
Тэ кӧ ӧлӧдан лёк вӧчысьӧс, медым лёк туй вывсьыс бергӧдчас, а сійӧ оз бергӧдчы, сэки сійӧ кулас аслас мыж вӧсна, а тэ мездан ассьыд олӧмтӧ.
Морт пиӧй, висьтав Израиль войтырлы: ті шуаланныд, мыжъясным да лёк вӧчӧмъясным пӧ личкӧны миянӧс, и на вӧсна пӧ ми косьмам-сісьмам, ловйӧн огӧ кольӧй.
Шу налы, мый Ме ог кӧсйы, медым мыжа морт куліс, — висьталӧ Господь Ыджыдыс. — Но кӧсъя, медым сійӧ бергӧдчис аслас лёк туй вылысь да видзис ассьыс олӧмсӧ. 
Тайӧс Ме Ачым кыв сетӧмӧн шуа.
Бергӧдчӧй асланыд лёк туй вылысь!
Мыйла тіянлы кувнысӧ, Израиль войтыр?
Морт пиӧй, висьтав аслад войтырлы: веськыда олысь кӧ вӧчас мыжсӧ, сылӧн веськыда олӧмыс оз мезды сійӧс. Лёк вӧчысь кӧ дугдас вӧчны мыжсӧ, сійӧ оз кув аслас лёк вӧчӧмысь. И веськыда олысь ловйӧн оз коль, пондас кӧ мыж вӧчны.
Кор Ме шуа веськыда олысьлы, мый сійӧ кутас овны, но сылӧн лачанас лоӧ аслас веськыдлуныс, и сійӧ пондас вӧчны лёксӧ, сэки сылысь веськыдлунсӧ лоӧ вунӧдӧма. Аслас лёк вӧчӧм вӧсна сійӧ кулас.
Кор Ме шуа лёк вӧчысьлы, мый сійӧ кулас, но сійӧ бергӧдчас мыжсьыс да пондас овны веськыда, бӧр сетас, мый босьтліс уджйӧзӧн сетӧмсьыс, вештысяс гусясьӧмсьыс, пондас овны олӧм вайысь индӧд-тшӧктӧмъяс серти да дугдас вӧчны лёксӧ, сійӧ оз кув, а кутас овны.
Сылысь став мыжсӧ лоӧ вунӧдӧма, ӧд сійӧ пондіс овны веськыда. Та вӧсна сійӧ кутас овны.
Тэнад войтырыд шуӧ, Господь пӧ оз веськыда вӧч. Но найӧ асьныс оз веськыда вӧчны.
Веськыда олысь кӧ кежас аслас веськыдлунысь да пондас лёксӧ вӧчны, сійӧ кулас.
А лёк вӧчысь кӧ дугдас вӧчны лёксӧ, кутас овны веськыда да Индӧд серти, сійӧ видзас ассьыс олӧмсӧ.
Но ті шуанныд, Господь пӧ оз веськыда вӧч.
Израиль войтыр, быдӧнӧс тіянӧс Ме мыжда уджъяс сертиныд».
Миянӧс пленӧ нуӧдӧмсянь дас кыкӧд вонас дасӧд тӧлысьлӧн витӧд лунӧ локтіс ме дінӧ морт, коді вӧлі пышйӧма Ерусалимысь. Сійӧ шуис, карыд пӧ киссис.
Рытнас Господьлӧн киыс вӧлі ме вылын, и Сійӧ восьтіс менсьым кыв-ворӧс. А асывнас, кор тайӧ мортыс локтіс, ме верми нин сёрнитны.
Меным вӧлі Господьсянь кыв:
«Морт пиӧй, Израиль муын пазӧдӧм каръясӧ кольӧм йӧзыс шуӧны, Ӧвраамлы пӧ вӧлі вичмӧдӧма нин тайӧ мусӧ, кор сылӧн пиыс эз на вӧв. Ми пӧ унаӧсь, и миянлы сетӧма тайӧ мусӧ.
Та вӧсна шу налы, мый Господь Ыджыдыс тадзи висьталӧ: ті сёянныд яйсӧ вирнас, юрбитанныд идолъясныдлы да вир кисьтанныд.
Тіян-ӧ тайӧ муыс?
Ті лачанытӧ кутанныд шыпурт выланыд, зывӧксӧ вӧчанныд да матыссаыдлӧн гӧтыркӧд узьланныд. Тіян-ӧ тайӧ муыс?
Шу налы, мый Господь Ыджыдыс тадзи висьталӧ: Ме Ачым кыв сетӧмӧн шуа, мый пазӧдӧм каръясӧ кольӧм йӧзыс шыпурт помысь куласны.
Найӧс, кодъяс олӧны видз-му вылын, Ме сета зверъяслы сёйны.
Изкаръясын да кырта горсъясын дзебсясьысьяс куласны пӧрӧс висьӧмысь.
Тайӧ мусӧ Ме кушта, и бырас сылӧн выныс, мыйӧн сійӧ ошйысьӧ. Овтӧммасны Израиль керӧсъяс, сэті ветлысь-мунысьыс оз ло.
Ме вӧча тайӧ мусӧ овтӧминӧн сэні олысьяслӧн зывӧк уджъяс вӧсна. Сэки найӧ тӧдмаласны, мый Ме — Господь.
Морт пиӧй, тэнад войтырыд сёрнитӧ тэ йылысь керка стен да ӧдзӧс дораныс. Вокыс вокыслы шуӧ: “Вай ветламӧй да кывзыштамӧй, мый висьталӧ Господь”.
Менам войтырӧй чукӧртчӧ тэ дінӧ, пуксьӧ тэ водзӧ да кывзӧ тэнсьыд кывъястӧ, но на серти оз ов.
Найӧ мичаа сёрнитӧны, но сьӧлӧмпытшса кӧсйӧмныс — ылӧдлӧмӧн озырмӧдчыны.
Налы тэ — муслун йылысь сьыланкывъяс мичаа сьылысь-ворсысь кодь.
Найӧ кывзӧны тэнсьыд кывъястӧ, но на серти оз овны.
Тэнад кывъясыд регыд инасны. Сэки тайӧ войтырыс тӧдмалас, мый на дінӧ воліс пророк».
Меным вӧлі Господьсянь кыв:
«Морт пиӧй, пророкав Израиль войтырӧс видзысьяслы паныд. Шу налы, мый Господь Ыджыдыс тадзи висьталӧ: 
курыд шог Израиль войтырӧс видзысьяслы, кодъяс тӧждысьӧны сӧмын ас вӧснаныс, а войтыр вӧснаыс оз тӧждысьны.
Ті сэтшӧм ыж видзысьяс, кодъяс начкӧны тшӧг ыжъяссӧ да сёйӧны налысь госсӧ, пасьталӧны вурун паськӧм, но ыж чукӧр вӧсна оз тӧждысьны.
Жебъясӧс ті онӧ ёнмӧдӧй, висьысьясӧс онӧ бурдӧдӧй, доймалӧмаясӧс онӧ кӧртавлӧй, ылалӧмаясӧс бӧр онӧ вайӧдӧй, вошӧмаясӧс онӧ корсьӧй. Ті чорыда да скӧрпырысь веськӧдланныд наӧн. 
Найӧ колисны видзысьтӧг, разалісны да лоины зверъяслы сёянӧн.
Менам ыжъясӧй вошӧмаӧсь, шӧйтӧны керӧсъяс да джуджыд ыбъяс вывті. Менам ыжъясӧй став му пасьталаыс разалӧмаӧсь, и найӧс корсьысьыс абу.
Та вӧсна, Менсьым войтырӧс видзысьяс, кывзӧй Господьлысь кывсӧ.
Менам ыжъяслӧн видзысьыс абу, — висьталӧ Господь Ыджыдыс, — та вӧсна найӧ шедісны зверъяслы гыж уланыс, лоины налы сёянӧн. Менам видзысьяс эз корсьны Менсьым ыжъясӧс, найӧ сӧмын ас вӧснаныс тӧждысисны, а эз Менам ыжъясӧй вӧсна. Та вӧсна, Менсьым войтырӧс видзысьяс, кывзӧй Господьлысь кывсӧ.
Господь Ыджыдыс тадзи висьталӧ: Ме паныд сувта видзысьяслы, босьта ыжъясӧс налӧн киысь. Водзӧ Ме ог сет налы видзны Ассьым ыжъясӧс, и водзӧ найӧ оз нин тӧждысьны ас вӧснаныс. Ме перъя налӧн пинь-гыжйысь Ассьым ыжъясӧс, и Менам ыжъясӧй оз нин лоны налы сёянӧн.
Господь Ыджыдыс тадзи висьталӧ: Ме Ачым корся Ассьым ыжъясӧс да кута тӧждысьны на вӧсна.
Кыдзи ыж видзысь корсьӧ ассьыс разалӧм ыжъяссӧ, тадзи Ме корся Ассьым ыжъясӧс. Ме петкӧда найӧс быдлаысь, кытчӧ найӧ разалісны пемыд да кымӧра лунӧ.
Ме вайӧда найӧс мукӧд войтыръяс пӧвстысь, чукӧрта найӧс мукӧд муясысь асланыс муӧ. Ме кута видзны найӧс Израиль керӧсъяс вылын да визувтысь ва дорын — быдлаын, кӧні найӧ кутасны овны.
Бур турунаинын Ме кута видзны найӧс, израильса джуджыд керӧсъяс лоӧны налы йирсянінӧн.
Найӧ кутасны шойччыны бур видз вылын, йирсьыны израильса веж туруна керӧсъяс вылын.
Ме Ачым кута видзны ыж чукӧрӧс, Ме Ачым шойччӧда найӧс, — висьталӧ Господь Ыджыдыс. — 
Вошӧм ыжӧс Ме корся, ылалӧмаӧс бӧр вайӧда, доймалӧмаӧс кӧртавла, висьысьӧс ёнмӧда, а тшӧгӧмаӧс да ёнӧс бырӧда.
Ме кута видзны ыж чукӧрӧс веськыдлуныс серти.
Господь Ыджыдыс тадзи висьталӧ: ыж чукӧрӧй, Ме лоа ёрдысьӧн ыжъяс, кӧзаяс да межъяс костын.
Тіянлы ӧмӧй этша, мый ті йирсянныд бур видз вылын? Мыйла ті нӧшта кок уланыд турунсӧ таляланныд? Тіянлы ӧмӧй этша, мый юанныд сӧстӧм ва? Мыйла кокнаныд гудыртанныд васӧ? Менам ыжъяслы лоӧ йирсьыны талялӧм видз вылын да юны гудыртӧм ва.
Та вӧсна Господь Ыджыдыс тадзи висьталӧ: Ме Ачым лоа ёрдысьӧн тшӧг ыж да омӧль ыж костын.
Коньӧр ыжъяссӧ ті бокнад да пельпомнад йӧткаланныд, сюрнаныд люкаланныд, кытчӧдз онӧ вӧтлӧй найӧс.
Но Ме мезда Ассьым ыжъясӧс, и найӧ сэсся оз шедны зверъяслӧн гыж улӧ.
Ыжъяс костын Ме Ачым лоа ёрдысьӧн. Ме сувтӧда Аслам ыжъяслы видзысьӧс, Ассьым Давид кесйӧгӧс.
Сійӧ кутас видзны найӧс да тӧждысьны на вӧсна.
Ме, Господь, лоа налӧн Енмӧн, а Менам Давид кесйӧгӧй лоас на пӧвстын ӧксыӧн.
Тайӧс висьталі Ме, Господь.
Ме кӧртала накӧд лӧньлун вайысь йитӧд, бырӧда зверъясӧс налӧн муысь, медым Менам ыжъясӧй вермисны повтӧг овны овтӧминын да узьны вӧрын.
Ме бурсиа найӧс да бурсиа Менам керӧс гӧгӧрысь мусӧ. Ас кадӧ Ме сета налы зэр, и сійӧ ваяс налы бурсиӧм.
Пуяс кутасны вайны вотӧс, муыс сетас ассьыс быдтас.
Менам войтырӧй кутас повтӧг овны аслас му вылын. Ме жугӧда налӧн сьылі вылысь сийӧссӧ да мезда найӧс нартитысьяслӧн кипод улысь. Сэки найӧ тӧдмаласны, мый Ме — Господь.
Найӧ оз нин шедны мукӧд войтыръяслӧн киӧ, и зверъяс оз косявлыны найӧс.
Найӧ кутасны повтӧг овны, ӧд повзьӧдысьыс оз нин ло.
Ме сета бура быдмыны налӧн пуктаслы, и налӧн муын тшыгъялӧм вӧсна некод оз кув. Мукӧд войтыръяс оз нин кутны янӧдны найӧс.
Сэки Израиль войтыр тӧдмалас, мый Ме, налӧн Господь Ен, накӧд, и найӧ — Менам войтыр, — висьталӧ Господь Ыджыдыс. — Ті — Менам ыжъясыс, Менам видз вылысь ыж чукӧрыс.
Ті — мувывса йӧз, а Ме — тіян Ен, — висьталӧ Господь Ыджыдыс».
Меным вӧлі Господьсянь кыв:
«Морт пиӧй, бергӧд чужӧмтӧ Сеир керӧсвыв мулань да пророкав сылы паныд. Шу сылы, мый Господь Ыджыдыс тадзи висьталӧ: 
Ме паныд сувта тэныд, Сеир керӧсвыв му.
Лэпта Ассьым киӧс тэ вылӧ да вӧча тэнӧ овтӧминӧн.
Каръяссьыд вӧча из чукӧръяс, а тэ лоан овтӧминӧн. Сэки тэ тӧдмалан, мый Ме — Господь.
Тэ важысянь мустӧмтан Израиль войтырӧс. Налӧн шог дырйиныс, найӧс мыждан кадӧ, тэ лэптін на вылӧ шыпурттӧ.
Та вӧсна Ме Ачым кыв сетӧмӧн шуа, — висьталӧ Господь Ыджыдыс, — мый Ме вевття тэнӧ вирӧн. Вир кисьтӧмлы оз во помыс, ӧд тэ эн зывӧкты сійӧс.
Сеир керӧсвыв муӧс Ме вӧча овтӧминӧн да бырӧда сэті ветлысь-мунысьясӧс.
Сеирса керӧсъяс Ме тырта шойясӧн.
Шыпурт помысь виӧмаяс пондасны туплясьны сылӧн ыбъяс вылын, ковтысъясын да сёртасъясын.
Тэнӧ, Сеир керӧсвыв му, Ме пыр кежлӧ вӧча овтӧминӧн, тэнсьыд каръястӧ некод выльысь оз овмӧд. Сэки ті тӧдмаланныд, мый Ме — Господь.
Ті шуинныд, Израильлӧн кыкнан муыс да кыкнан войтырыс пӧ миян лоӧны. Ми пӧ босьтам налысь мусӧ, мед кӧ весиг Господь сэні.
Та вӧсна Ме Ачым кыв сетӧмӧн шуа, — висьталӧ Господь Ыджыдыс, — мый Ме мынтыся тэныд сыысь, мый тэ Израиль войтырӧс мустӧмтін, вежалін да лёк вӧчин налы. Ме восьта Ачымӧс Израиль войтырлы, кор тэнӧ кута мыждыны.
Сэки тэ тӧдмалан, мый Ме — Господь. Ме кывлі, кыдзи тэ лёкӧдін-омӧльтін Израиль керӧсъяс, шуалін, керӧсвыв мусӧ пӧ куштӧма, ӧні сійӧ миян киын.
Ті вылӧ кыпӧдінныд асьнытӧ Ме водзын, ышнясьӧмӧн сёрнитінныд Меным паныд.
Ме ставсӧ тайӧс кывлі.
Господь Ыджыдыс тадзи висьталӧ: став муыс пондас нимкодясьны, но тэысь Ме вӧча овтӧмин.
Тэ нимкодясин, кор Израиль войтырлӧн муыс овтӧммис. Но Ме тадзи жӧ вӧча тэныд. Тэ, эдомсаяслӧн Сеир керӧсвыв му, лоан овтӧминӧн. Сэки ставныс тӧдмаласны, мый Ме — Господь».
«Морт пиӧй, пророкав Израиль керӧсъяслы: Израиль керӧсъяс, кывзӧй Господьлысь кывсӧ!
Господь Ыджыдыс тадзи висьталӧ: вӧрӧгыд шуӧ, со ӧд пӧ, тайӧ нэмӧвӧйся керӧсъясыс ӧні миян. Но тэ пророкав налы, мый Господь Ыджыдыс тадзи висьталӧ: тіянӧс куштӧма, и мукӧд войтыръяс быд боксянь кӧсйӧны босьтны тіянӧс аслыныс. Найӧ лёкӧдӧмӧн сёрнитӧны тіян йылысь.
Та вӧсна, Израиль керӧсъяс, кывзӧй Господь Ыджыдлысь кывсӧ, мый Сійӧ висьталӧ керӧс-ыбъяслы, ковтыс-сёнъяслы, овтӧминъяслы да эновтӧм каръяслы — тіянлы, кодъясӧс тіян гӧгӧр олысь войтыръяс куштӧны да сералӧны-лёкӧдӧны.
Господь Ыджыдыс тадзи висьталӧ: Аслам ыпъялан скӧрлунӧн Ме сёрнита Эдом войтырлы паныд да мукӧд войтыръяслы паныд. Менсьым муӧс найӧ босьтісны аслыныс, лӧгпырысь нимкодясьӧмӧн да мустӧмтӧмӧн куштісны сійӧс.
Та вӧсна пророкав Израиль му йылысь, висьтав керӧс-ыбъяслы да ковтыс-сёнъяслы, мый Господь Ыджыдыс тадзи висьталӧ: вежӧгтӧмӧн да скӧрпырысь Ме мыжда мукӧд войтыръясӧс, ӧд найӧ янӧдӧны тіянӧс.
Господь Ыджыдыс тадзи висьталӧ: киӧс лэптӧмӧн Ме кыв сета, мый тіян гӧгӧр олысь войтыръясӧс лоӧ янӧдӧма.
А тіян вылын, Израиль керӧсъяс, пашкыртчасны-быдмасны пуяс да ваясны вотӧс Менам Израиль войтырлы, ӧд найӧ регыд бӧр локтасны.
Ме бергӧдча тіянлань да кута тӧждысьны тіян вӧсна, и мунытӧ бара кутасны гӧрны-кӧдзны.
Ме овмӧда унасьыс-уна йӧзӧс Израиль керӧсъяс вылӧ. Израиль войтыр выльысь овмӧдчас каръясас, из чукӧръясысь лэптас керкаяс.
Ме вайӧда уна йӧзӧс да уна ыж-мӧскӧс, и найӧ кутасны чужтысьны-рӧдмыны. Ме вӧча тіянӧс воддза кодь уна лыда войтырӧн, и воддза дорысь унджык на бурсӧ кута вӧчны тіянлы. Сэки ті тӧдмаланныд, мый Ме — Господь.
Ме вайӧда Израиль керӧсъяс вылӧ йӧзӧс, и найӧ кутасны ветлӧдлыны сэті. Менам Израиль войтыр босьтас аслыс тайӧ мусӧ, мый вичмӧдӧма сылы. Тайӧ муыс оз нин вай сылы кулӧм.
Господь Ыджыдыс тадзи висьталӧ: Израиль му, тэ йылысь шуӧны, тэ пӧ ньылыштан олысьястӧ да ваян кулӧм аслад войтырыдлы.
Но тэ дугдан ньылыштны олысьястӧ да вайны кулӧм аслад войтырыдлы, — висьталӧ Господь Ыджыдыс. — 
Ме ог нин лэдз мукӧд войтыръяслы янӧдны тэнӧ, и тэ он кут кывны налысь увтыртӧмсӧ. Водзӧ тэ он вай кулӧм аслад войтырыдлы, — висьталӧ Господь Ыджыдыс».
Меным вӧлі Господьсянь кыв:
«Морт пиӧй, аслас муын олігӧн Израиль войтыр пежаліс мусӧ аслас оласногнас да уджъяснас.
Менам син водзын налӧн олан туйыс вӧлі аньлӧн тӧлысся кодь пеж.
Ме кисьті на вылӧ скӧрлунӧс сыысь, мый найӧ кисьтісны вир тайӧ му вылас да пежалісны сійӧс асланыс идолъясӧн.
Ме разӧді найӧс мукӧд войтыръяс пӧвстӧ, ӧні найӧ олӧны мукӧд муясын.
Ме мыжді найӧс оласног да уджъяс сертиныс.
Но мукӧд войтыръяс пӧвстын оліганыс найӧ янӧдісны Менсьым вежа нимӧс. На йылысь шуӧны, тайӧ пӧ Господьлӧн войтырыс, но налы ковмис петны Сылӧн муысь.
Ме шогси, мый войтыръяс пӧвстын олігас Израиль войтыр янӧдіс Менсьым вежа нимӧс.
Та вӧсна шу Израиль войтырлы, мый Господь Ыджыдыс тадзи висьталӧ: Израиль войтыр, ог тіян вӧсна вӧч сійӧс, мый водзӧ кута вӧчны, а Аслам вежа нимӧй вӧсна. Ӧд ті янӧдінныд Менсьым нимӧс войтыръяс пӧвстын.
Ме петкӧдла вежалунсӧ Аслам ыджыд нимлысь, кодӧс ті янӧдінныд мукӧд войтыръяс пӧвстын. Кор Ме петкӧдла тіян пӧвстын Ассьым вежалунӧс войтыръяс син водзын, сэки найӧ тӧдмаласны, мый Ме — Господь, — висьталӧ Господь Ыджыдыс. — 
Ме босьта тіянӧс мукӧд войтыръяс пӧвстысь, чукӧрта быд муысь да вайӧда асланыд муӧ.
Реза тіянӧс сӧстӧм ваӧн, и ті сӧстӧмманныд. Ме сӧстӧммӧда тіянӧс став пежсьыныд да идолъяссьыныд.
Ме сета тіянлы выль сьӧлӧм, пукта тіян пытшкӧ выль лов.
Нетшышта морӧс кудсьыныд из сьӧлӧмнытӧ да сы пыдди пукта яй сьӧлӧм.
Ассьым лолӧс пукта тіян пытшкӧ да вӧча сідз, мый ті кутанныд овны Менам индӧд-тшӧктӧмъяс серти.
Ті кутанныд овны сійӧ муас, мый Ме коркӧ сеті тіян батьясныдлы. Ті лоанныд Менам войтырӧн, а Ме лоа тіян Енмӧн.
Мезда тіянӧс став пежсьыныд. Ме сета тіянлы уна нянь, ог лэдз тіянлы тшыгъявны.
Ме лышкыда сета тіянлы пуяслысь вотӧссӧ да видз-мулысь быдтассӧ, медым мукӧд войтыръяс дугдасны тіянӧс янӧдны тшыгъялӧмныд вӧсна.
Сэки тіянлы тӧд выланыд усьӧ пеж оласногныд да лёк уджъясныд, и ті понданныд зывӧктыны асьнытӧ мыжъяссьыныд да пеж уджъяссьыныд.
Тӧдӧй, мый тайӧс вӧча ог тіян ради, — висьталӧ Господь Ыджыдыс.
— Яналӧй-гӧрдӧдӧй асланыд олан туйсьыныд, Израиль войтыр!
Господь Ыджыдыс тадзи висьталӧ: воас лун, кор Ме сӧстӧммӧда тіянӧс став мыжсьыныд, овмӧда каръяснытӧ. Из чукӧръясысь выльысь лэптанныд каръяс, и мунытӧ, мый ветлысь-мунысьяслы вӧлі овтӧминӧн, выльысь гӧранныд-кӧдзанныд. Сэки шуасны, тайӧ овтӧм муыс пӧ Эдэм сад кодь лоӧма, тайӧ кушмӧм-киссьӧм каръяссӧ пӧ зумыдмӧдӧма да овмӧдӧма.
Тіян гӧгӧр олысь войтыръяс тӧдмаласны, мый Ме, Господь, киссьӧм каръяссӧ лэпта, овтӧминсӧ ловзьӧда.
Тайӧс висьтала Ме, Господь. Мый шуи, вӧча.
Господь Ыджыдыс тадзи висьталӧ: нӧшта Ме збыльмӧда Менам Израиль войтырлысь корӧмсӧ да ыж чукӧрлысь моз содта налысь лыдсӧ.
Кыдзи гажӧдчан лунъясӧ Ерусалим кар тырӧма вись пыдди ваян ыжъясӧн, сідзи киссьӧм каръяс тырасны йӧзӧн. Сэки найӧ тӧдмаласны, мый Ме — Господь».
Господьлӧн киыс вӧлі ме вылын. Аслас Ловнас Господь нуӧдіс менӧ да сувтӧдіс ковтыс шӧрӧ. Тайӧ ковтысыс вӧлі тырӧма морт лыясӧн. Господь кытшлӧдліс-новлӧдліс менӧ лыдтӧм-тшӧттӧм лыясыс гӧгӧр. Лыясыс вӧліны дзик косьмӧмаӧсь.
Господь юаліс: «Морт пиӧй, ловзясны-ӧ тайӧ лыясыс?»
Ме вочавидзи: «Господьӧй Ыджыдӧй, тайӧс Тэ Ачыд тӧдан».
Сійӧ шуис меным: «Пророкав тайӧ косьмӧм лыясыслы. Тшӧкты налы кывзыны Господьлысь кывсӧ.
Господь Ыджыдыс тадзи висьталӧ тайӧ лыяслы: Ме пукта тіян пытшкӧ лов, и ті ловзянныд.
Ме зэвта тіянӧс сӧнъясӧн, вевття тіянӧс яйӧн да кучикӧн. Ме пукта тіян пытшкӧ лов, и ті ловзянныд. Сэки ті тӧдмаланныд, мый Ме — Господь».
Ме пророкалі, кыдзи вӧлі меным тшӧктӧма.
Менам висьталігкості кыліс гольгӧм шы, кор лыясыс ӧта-мӧд дінас кутісны матыстчыны да йитчыны. 
Ме аддзи, кыдзи найӧ зэвтчисны сӧнъясӧн, сэсся вевттьысисны яйӧн да кучикӧн. Но лолыс на пытшкын эз вӧв.
Господь шуис меным: «Пророкав ловлы, морт пиӧй! Пророкалӧмӧн шу ловлы, мый Господь Ыджыдыс тадзи висьталӧ: лов, лок нёльнан пельӧссянь да пӧльышт олӧмсӧ тайӧ виӧмаяс пытшкӧ, медым найӧ ловзясны».
Ме пророкалі Господьлӧн тшӧктӧм серти. Лов пырис виӧмаяс пытшкӧ, и найӧ ловзисны да сувтісны кок выланыс. Тайӧ вӧлі лыдтӧм-тшӧттӧм йӧз чукӧр.
Господь шуис меным: «Морт пиӧй, тайӧ лыясыс — Израиль войтыр.
Найӧ шуӧны, миян лыясным пӧ косьмисны, лачаным воши, миянлы воис пом.
Та вӧсна пророкав налы, мый Господь Ыджыдыс тадзи висьталӧ: Менам войтырӧй, Ме восьта тіянлысь гуястӧ, петкӧда тіянӧс сэтысь да вайӧда тіянӧс Израиль муӧ.
Кор Ме восьта тіянлысь гуястӧ да петкӧда тіянӧс сэтысь, ті, Менам войтырӧй, тӧдмаланныд, мый Ме — Господь. Ассьым лолӧс Ме пукта тіян пытшкӧ, и ті ловзянныд. Ме овмӧда тіянӧс асланыд муӧ. Сэки ті тӧдмаланныд, мый тайӧс висьталі Ме, Господь. Мый шуи, вӧча, — висьталӧ Господь».
Меным вӧлі Господьсянь кыв:
«Морт пиӧй, босьт бедь да гиж сэтчӧ: “Иуда чужанкотыр да сыкӧд ӧтувтчӧм израильса чужанкотыръяс”. 
Сэсся босьт мӧд бедь да гиж сэтчӧ: “Ӧсип”. 
Тайӧ лоӧ Ефремлӧн да сыкӧд ӧтувтчӧм израильса чужанкотыръяслӧн бедь.
Бедьяссӧ топӧд ӧта-мӧд бердас, медым тэнад киын найӧ вӧліны кыдзи ӧти бедь.
Кор тэнад войтырыд юалас, мый тайӧ, шу налы, мый Господь Ыджыдыс тадзи висьталӧ: 
Ме босьта Ефремлысь да сыкӧд ӧтувтчӧм израильса чужанкотыръяслысь бедьсӧ, кытчӧ гижӧма “Ӧсип”, да йита сійӧс Иудалӧн беддьыскӧд. Аслам киын Ме вӧча найӧс ӧти беддьӧн.
Тайӧ кык бедьсӧ, кытчӧ тэ гижин, кут киад став йӧзыслӧн син водзын да шу, мый Господь Ыджыдыс тадзи висьталӧ: 
Ме босьта Израиль пиянӧс мукӧд войтыръяс пӧвстысь, чукӧрта найӧс быдлаысь да бӧр вайӧда асланыс муӧ.
Сэні, Израиль керӧсъяс вылын, Ме вӧча найӧс ӧти войтырӧн. Налӧн лоӧ ӧти ӧксы. Найӧ оз нин кутны юксьыны кык войтыр вылӧ да оз нин овны кык ӧксылӧн юралӧм улын.
Найӧ оз нин кутны асьнысӧ пежавны идолъясӧн, зывӧкторъясӧн да быдсяма лёк вӧчӧмӧн. Ме мезда найӧс мыжъяссьыныс да сӧстӧммӧда найӧс. Найӧ лоӧны Менам войтырӧн, а Ме — налӧн Енмӧн.
Менам Давид кесйӧгӧй лоӧ налӧн ӧксынас да видзысьнас. Найӧ пондасны овны Менам индӧд-тшӧктӧмъяс серти.
Найӧ кутасны овны муын, мый Ме сеті Аслам Яков кесйӧглы. Сэні олісны налӧн батьясныс, и сэні пондасны овны найӧ да налӧн ныв-пиныс, и водзӧ нэмъяс чӧж — насянь чужысьяс.
Менам Давид кесйӧгӧй лоӧ налӧн ӧксынас нэмъяс чӧж.
Ме пыр кежлӧ кӧртала накӧд лӧньлун вайысь йитӧд да сета налы тайӧ мусӧ.
Вӧча найӧс уна лыда войтырӧн да пыр кежлӧ сувтӧда на пӧвстӧ Ассьым вежаинӧс.
Сійӧ лоӧ Менам оланінӧн на пӧвстын. Ме лоа налӧн Енмӧн, а найӧ лоӧны Менам войтырӧн.
Менам вежаинӧй нэмъяс чӧж лоӧ на шӧрын. Та серти мукӧд войтыръяс тӧдмаласны, мый Ме, Господь, Израильӧс Вежӧдысь».
Меным вӧлі Господьсянь кыв:
«Морт пиӧй, бергӧд чужӧмтӧ Гоглань, Магог муын олысь мешек да тувал войтыръяслӧн медыджыд юралысьлань. Пророкав сылы паныд, мый Господь Ыджыдыс тадзи висьталӧ: Ме сувта тэныд паныд, Гог, мешек да тувал войтыръяслӧн медыджыд юралысь.
Ме пысала вугыр вомкӧтшад, бергӧда да кыска тэнӧ да став тышкайӧзтӧ вӧвъяснас. Верзьӧмаясыд да мукӧд тышкайӧзыд пасьтасьӧмаӧсь тышкасян кӧлуйӧ, найӧ петасны шыпуртъясӧн, ыджыд да ичӧт сайӧдъясӧн. Накӧд лоӧны Персияысь, Эфиопияысь да Ливияысь сайӧда-юртупкӧда тышкайӧз, нӧшта гомер войтырлӧн тышкайӧзыс да ылі войвылын олысь Тогарма рӧдлӧн тышкайӧзыс. Тэкӧд лоӧны уна войтыръяс.
Дасьтысьӧй тышӧ, тэ да став чукӧртчӧм тышкайӧзыс! Тэ лоан налӧн веськӧдлысьӧн.
Уна кад мысти тэ ковман.
Сэки тэ уськӧдчан сійӧ му вылӧ, кӧні кар-сиктъяссӧ лэптӧма тыш бӧрын, и кытчӧ олысьяссӧ чукӧртӧма мукӧд войтыръяс пӧвстысь. Тэ уськӧдчан Израиль керӧсъяс вылӧ, кӧні дыр кад чӧж некод эз ов, но кытчӧ олысьясыс бергӧдчӧмаӧсь мукӧд войтыръяс пӧвстысь. Найӧ повтӧг олӧны, а тэ тӧвныр моз уськӧдчан на вылӧ. Тэнад тышкайӧзыд да тэкӧд локтысь войтыръяс кымӧр моз вевттясны став мусӧ.
Господь Ыджыдыс тадзи висьталӧ: сійӧ лунӧ тэ кутан мӧвпавны лёк вӧчӧм йылысь да шуан, ме пӧ уськӧдча му вылӧ, кӧні каръяс гӧгӧр стенмыс абу. Йӧзыс пӧ сэні олӧны лӧня да повтӧг, кар гӧгӧрныс стен, дзиръя ни иган абу.
Кушта пӧ найӧс, мырддяла эмбурнысӧ. Тэ лэптан китӧ выльысь кыпӧдӧм да овмӧдӧм каръяс вылӧ, мукӧд войтыръяс пӧвстысь чукӧртӧм войтыр вылӧ. Найӧ олӧны му шӧрас, налӧн эм уна ыж-мӧс да эмбур-озырлун.
Саваын да Деданын олысьяс, тшӧтш фарсисса вузасьысьяс да лев кодь ён йӧз юаласны тэнсьыд, локтін-ӧ куштыны мусӧ, чукӧртін-ӧ тышкайӧзтӧ, медым мырддявны эзысь-зарни, ыж-мӧс да эмбур-озырлун.
Та вӧсна, морт пиӧй, пророкав Гоглы, мый Господь Ыджыдыс тадзи висьталӧ: сійӧ кадас, кор Менам Израиль войтырӧй кутас повтӧг овны, тэ ӧмӧй он кут тӧдны та йылысь?
Тэ петан аслад муысь, ылі войвылысь. Тэкӧд петасны уна войтыръясысь верзьӧмаяс, лыдтӧм-тшӧттӧм вына тышкайӧз.
Бӧръя лунъясӧ тэ, Гог, уськӧдчан Менам Израиль войтыр вылӧ, кымӧр моз вевттян налысь мусӧ. Ме вайӧда тэнӧ Аслам муӧ, медым войтыръяс тӧдмаласны Менӧ. Тэ пыр Ме петкӧдла Ассьым вежалунӧс войтыръяслӧн син водзын.
Господь Ыджыдыс тадзи висьталӧ: Гог, тэ йылысь Ме важӧн висьтавлі Аслам кесйӧгъяслы, израильса пророкъяслы. Найӧ уна во чӧж пророкалісны, мый Ме вайӧда тэнӧ Израиль войтырлы паныд.
Сійӧ лунӧ, кор Гог уськӧдчас Израиль му вылӧ, — висьталӧ Господь Ыджыдыс, — Менам скӧрлунӧй ӧзъяс.
Аслам ярлунӧн, Аслам биа скӧрлунӧн Ме шуа, мый сійӧ лунӧ Израильын муыс кутас ёна вӧрны.
Саридзса черияс, енэжвыв лэбачьяс, мувыв пемӧсъяс да гаг-веглясьысьяс да му вылын олысь став йӧзыс Ме водзын кутасны тіравны. Керӧсъяс усясны, кыртаяс зымгысясны, стенъяс киссясны.
Аслам керӧсъяс вылын Ме лэпта шыпурт Гоглы паныд, — висьталӧ Господь Ыджыдыс, — и Гоглӧн тышкайӧзыс ӧта-мӧднысӧ виаласны.
Ме мыжда Гогӧс да сылысь тышкайӧзсӧ. Мӧдӧда на вылӧ пӧрӧс висьӧм да кисьта налысь вирсӧ. Гог вылӧ, сылӧн тышкайӧз вылӧ да сыкӧд локтӧм войтыръяс вылӧ Ме кисьта сувтса зэр, йиа шер, би да тэг.
Петкӧдла Ассьым вынӧс да вежалунӧс, восьта Ачымӧс уна войтыръяслӧн син водзын. Сэки найӧ тӧдмаласны, мый Ме — Господь».
«Морт пиӧй, пророкав Гоглы паныд. Шу, мый Господь Ыджыдыс тадзи висьталӧ: Ме сувта тэныд паныд, Гог, мешек да тувал войтыръяслӧн медыджыд юралысь.
Ме бергӧда тэнӧ, кыска тэнӧ ылі войвылысь да вайӧда Израиль керӧсъяс вылӧ.
Ме уськӧда шуйга кисьыд ньӧввужтӧ, веськыд кисьыд — ньӧвъястӧ.
Аслад тышкайӧзкӧд да тэкӧд локтысь войтыръяскӧд тэ усян Израиль керӧсъяс вылын.
Ме сета тэнӧ кырныш-варышлы кокавны да зверъяслы сёйны.
Тэ усян ыб вылын.
Тайӧс шуи Ме, — висьталӧ Господь Ыджыдыс.
Ме ыста би Магог му вылӧ да саридздорса муясын повтӧг олысь йӧз вылӧ. Сэки найӧ тӧдмаласны, мый Ме — Господь.
Аслам Израиль войтыр пӧвстын Ме восьта Ассьым вежа нимӧс и водзӧ ог лэдз янӧдны сійӧс. Сэки войтыръяс тӧдмаласны, мый Ме — Господь, Израильлӧн вежа Ен.
Тайӧ ставыс збыльмас, — висьталӧ Господь Ыджыдыс. — Воас сійӧ луныс, мый йылысь Ме висьталі.
Израильсаяс петасны каръяссьыныс, пестасны би да шыбитасны сэтчӧ вӧрӧглысь шыпуртъяссӧ, ичӧт да ыджыд сайӧдъяссӧ, ньӧввужъяссӧ да ньӧвъяссӧ, зоръяссӧ да шыяссӧ.
Сизим во чӧж найӧ кутасны сотны вӧрӧглысь тышкасян кӧлуйсӧ.
Видз-муяс вылысь да вӧрысь налы оз ковмы ваявны пес, ӧд вӧрӧглӧн тышкасянторъясыс лоӧны налы пес пыдди.
Израиль войтыр куштас найӧс, кодъяс сійӧс куштісны, мырддяс мырддялысьяслысь эмбурсӧ, — висьталӧ Господь Ыджыдыс.
Сійӧ лунӧ Ме сета Гоглы дзебанін Израиль муысь, Ветлысь-мунысьяслӧн ковтысысь, саридзсянь асыввылысь. Ковтыссӧ кутасны нимтыны Гог тышкайӧзлӧн ковтысӧн, ӧд найӧс дзебасны сэтчӧ. Налӧн шойнаыс тупкас ветлысь-мунысьяслысь туйсӧ.
Сизим тӧлысь чӧж Израиль войтырлы ковмас дзебны найӧс, медым сӧстӧммӧдны мусӧ.
Став войтырыс кутас дзебны найӧс. Сійӧ лунӧ, кор Ме петкӧдла Ассьым вынӧс, Израиль войтырлы лоӧ нималӧм, — висьталӧ Господь Ыджыдыс.
Сизим тӧлысь кольӧм бӧрын лоӧ индӧма йӧзӧс, кодъяс дугдывтӧг кутасны ветлӧдлыны, корсьны му вылын куйлысь шойяссӧ да дзебны найӧс. Тадзи сӧстӧммӧдасны мусӧ.
Корсьысьяс пӧвстысь кӧ кодкӧ аддзас морт лыяс, сэтчӧ сувтӧдас пас, медым сэсся гуасьысьяс дзебасны шойсӧ Гог тышкайӧзлӧн ковтысӧ, кӧні сулалӧ Хамона * нима кар.
Тадзи лоӧ сӧстӧммӧдӧма мусӧ.
Тэныд, морт пиӧй, Господь Ыджыдыс тадзи висьталӧ: чукӧст быдласянь лэбачьясӧс да вӧрса зверъясӧс. Мед найӧ чукӧртчасны Менам вись дорӧ, мый Ме начка налы Израиль керӧсъяс вылын.
Сэні найӧ кутасны яй сёйны да вир юны.
Найӧ кутасны сёйны вына тышкайӧзлысь яйсӧ, юны мувывса ӧксыяслысь вирсӧ. Тайӧ лоӧ васанса тшӧгӧдӧм межъяслӧн, баляпиянлӧн, кӧзаяслӧн да ӧшъяслӧн яй да вир кодьӧн.
Ме начка налы вись, и найӧ кутасны пӧттӧдзныс сёйны гос да коддзытӧдзныс юны вир.
Менам пызан сайын найӧ пӧттӧдзныс сёясны вӧвъясӧс да верзьӧмаясӧс, вына шыпуртаясӧс да быдсикас тышкайӧзӧс, — висьталӧ Господь Ыджыдыс.
Ме петкӧдла Ассьым дзирдлунӧс войтыръяс пӧвстын. Войтыръяс аддзасны Менсьым мыждӧмӧс да на вылӧ кыпӧдӧм киӧс.
Сійӧ лунсянь и водзӧ Израиль войтыр кутас тӧдны, мый Ме — Господь, налӧн Ен.
Войтыръяс тӧдмаласны, мый Израиль войтырӧс вӧлі нуӧдӧма пленӧ асланыс мыж вӧсна — сыысь, мый эновтісны Менӧ. Та вӧсна Ме дзеби наысь Ассьым чужӧмбанӧс да сеті найӧс вӧрӧг киӧ, и найӧ ставныс кулісны шыпурт помысь.
Налӧн пеж да мыж вӧчӧм вӧсна Ме дзеби Ассьым чужӧмбанӧс наысь.
Та вӧсна Господь Ыджыдыс тадзи висьталӧ: ӧні Ме бӧр вайӧда пленысь Яковлысь рӧдсӧ, бурсьӧлӧмтча став Израиль войтыр дінӧ. Ме вежӧгтысь Ен, Ассьым вежа нимӧс дорйысь.
Израиль войтырлы яндзим лоӧ Менӧ эновтӧмысь, кор асланыс муын найӧ кутасны повтӧг овны, и некод оз нин кут повзьӧдлыны найӧс. Ме бӧр вайӧда найӧс войтыръяс пӧвстысь, чукӧрта вӧрӧгъяслӧн муясысь, тадзи петкӧдла Ассьым вежалунӧс уна войтыръяслӧн син водзын.
Ме некодӧс ог коль, а ставнысӧ бӧр чукӧрта асланыс муӧ мукӧд войтыръяс пӧвстысь, кытчӧ разӧдлі найӧс. Сэки израильсаяс тӧдмаласны, мый Ме — Господь, налӧн Ен. 
Ме ог нин кут дзебны Ассьым чужӧмбанӧс Израиль войтырысь, а кисьта на вылӧ Ассьым Лолӧс, — висьталӧ Господь Ыджыдыс».
Миянӧс пленӧ нуӧдӧмсянь кызь витӧд вонас, во заводитчӧмсянь тӧлысьлӧн дасӧд лунӧ, дзик сійӧ лунӧ, кор Ерусалим кисьтӧмсянь коли дас нёль во, Господьлӧн киыс вӧлі ме вылын. 
Господь нуӧдіс менӧ Израиль муӧ да сувтӧдіс зэв джуджыд керӧс вылӧ. Тайӧ вӧлі Енсянь петкӧдлӧм. Керӧс лунвывладорас сулалісны карлӧн кодь керкаяс.
Господь вайӧдіс менӧ сэтчӧ, и ме аддзи кар дзиръя дорын сулалысь мортӧс. Сійӧ вӧлі быттьӧ ыргӧнысь. Киас сійӧ кутіс шабді кӧв да мурталан бедь.
Сійӧ шуис меным: «Морт пиӧй, бура видзӧд, сюся кывзы да босьт тӧд вылад ставсӧ, мый ме петкӧдла тэныд. Дзик та вӧсна тэнӧ татчӧ вайӧдӧма. Ставсӧ, мый аддзылан, висьтав Израиль войтырлы».
Со, ме аддзи крам да сійӧс кытшалысь стен. Мекӧд сёрнитысь мортлӧн беддьыс вӧлі квайт гырддза кузьта. Гырддза кузьтаас вӧлі пырӧ тшӧтш ки пыдӧс пасьта. Морт мурталіс йӧр стенсӧ, стенлӧн кызтаыс и судтаыс вӧлі ӧти бедь.
Сэсся морт матыстчис асыввыв пыранін дорӧ, кайис содйӧдыс да мурталіс тагӧссӧ, ӧдзӧс воссян пасьтасӧ. Сійӧ вӧлі бедь кузьта. Пыранінлӧн мӧдар помас тагӧсыс вӧлі татшӧм жӧ.
Пыранінын вӧліны бокыса жыръяс, налӧн кузьтаыс и пасьтаыс вӧлі ӧти бедь, а найӧс торйӧдысь стенъяслӧн кызтаыс вӧлі вит гырддза. Пыранін помас вӧлі посводз. Посводзлӧн тагӧсыс, ӧдзӧс воссян пасьтаыс, вӧлі ӧти бедь кузьта.
Сэсся морт мурталіс посводзсӧ. Посводзыс вӧлі кӧкъямыс гырддза кузьта, а сылӧн ӧдзӧсдор стенмыс вӧлі кык гырддза кызта. Посводзсянь петісны крам йӧрӧ.
Асыввыв пыранінын вӧлі ӧтар бокас куим жыр, мӧдар бокас тшӧтш куим жыр. Жыръясыс вӧліны ӧтпасьтаӧсь, а найӧс торйӧдысь стенъясыс вӧліны ӧткызтаӧсь.
Морт мурталіс пыранінсӧ, ӧдзӧс дорын пасьтаыс вӧлі дас гырддза, а бокыса жырсянь паныд сулалысь жырйӧдз — дас куим гырддза.
Быд жыр водзын вӧлі гырддза судта стентор. 
Ачыс жырйыс вӧлі квайт гырддза пасьта да квайт гырддза кузьта.
Сэсся морт мурталіс пыранінлысь йирксӧ. Бокыса жырлӧн ортсы стенсянь сылы паныд сулалысь жырлӧн ортсы стенмӧдз пасьтаыс вӧлі кызь вит гырддза.
Мурталіс пыранінлысь ӧдзӧсдор стенсӧ, сійӧ вӧлі квайтымын гырддза судта. Пыранін сулаліс йӧрын. Пыранінлӧн ӧдзӧссянь йӧрӧ петан ӧдзӧсӧдз вӧлі ветымын гырддза.
Бокыса жыръясын, найӧс торйӧдысь стенъясын да посводзын вӧліны таса ӧшиньяс, найӧ видзӧдісны йӧрлань. Пыранінлӧн стенъясӧ вӧлі серпасалӧма пальмаяс.
Морт вайӧдіс менӧ ортсы йӧрӧ. Йӧр гӧгӧрыс вӧлі вольсалӧма изъяс, и сэні сулаліс керка, кӧні сьӧрсьӧн-бӧрсьӧн вӧлі комын жыр.
Тайӧ улысса изэрдыс заводитчис пыранінлӧн бокыса стен бердсянь. Изэрдлӧн пасьтаыс вӧлі пыранін кузьта кодь.
Морт мурталіс кузьтасӧ улысса пыранін дорсянь пытшкӧс йӧр дорӧдз, сійӧ вӧлі сё гырддза. Асыввыв пыранінсянь и войвыв пыранінсянь пытшкӧс йӧр дорӧдз кузьтаыс вӧлі ӧткодь.
Морт мурталіс ортсы йӧрӧ нуӧдысь войвыв пыранінсӧ. Пыранінын вӧлі ӧтар бокас куим жыр, мӧдар бокас тшӧтш куим жыр. Пыранінлӧн стенъясыс да посводзыс вӧліны асыввыв пыранінлӧн кодьӧсь. Пыраніныс кузьтанас вӧлі ветымын гырддза, а пасьтанас — кызь вит гырддза.
Ӧшиньясыс, посводзыс да пальма серпасъясыс вӧліны асыввыв пыранінлӧн кодьӧсь. Пыранінӧ кайис сизим тшупӧда сод, а мӧд помас вӧлі посводз.
Асыввыв да войвыв пыранінъяслы воча вӧліны пытшкӧс йӧрӧ пырананінъяс. Войвыв пыранінсянь пытшкӧс йӧр пыранінӧдз вӧлі сё гырддза.
Морт нуӧдіс менӧ лунвывладорӧ, и сэтысь ме аддзи лунвыв пыранін. Морт мурталіс пыранінлысь стенъяссӧ да посводзсӧ, и найӧ вӧліны мукӧд пыраніныслӧн кодьӧсь.
Лунвыв пыранінлӧн да посводзыслӧн ӧшиньясыс вӧліны мукӧд пыраніныслӧн кодьӧсь. Пыраніныс кузьтанас вӧлі ветымын гырддза, а пасьтанас — кызь вит гырддза.
Пыранінӧ кайис сизим тшупӧда сод, а мӧд помас вӧлі посводз. Пыранінлӧн ӧтар-мӧдар бок стенъясӧ вӧлі серпасалӧма пальмаяс.
Лунвывладорсянь тшӧтш вӧлі пытшкӧс йӧрӧ пыранін. Морт мурталіс кузьтасӧ лунвыв пыранін дорсянь пытшкӧс йӧр пыранін дорӧдз, сійӧ вӧлі сё гырддза.
Морт вайӧдіс менӧ пытшкӧс йӧрӧ лунвыв пыранінӧд да мурталіс сійӧс. Сійӧ вӧлі мукӧд пыраніныс кодь.
Сылӧн бокыса жыръясыс, стенъясыс да посводзыс вӧліны мукӧд пыраніныслӧн кодьӧсь. Пыранінын да посводзын вӧліны ӧшиньяс быд боксянь. Пыраніныс кузьтанас вӧлі ветымын гырддза, а пасьтанас — кызь вит гырддза.
Быд посводз кузьтанас вӧлі кызь вит гырддза, а пасьтанас — вит гырддза.
Посводзыс видзӧдіс ортсы йӧрӧ. Пыранінлӧн стенъясӧ вӧлі серпасалӧма пальмаяс. Пыранінӧ кайис кӧкъямыс тшупӧда сод.
Морт вайӧдіс менӧ пытшкӧс йӧрӧ асыввыв пыранінӧд да мурталіс сійӧс. Сійӧ вӧлі мукӧд пыраніныс кодь.
Сылӧн бокыса жыръясыс, стенъясыс да посводзыс вӧліны мукӧд пыраніныслӧн кодьӧсь. Пыранінын да посводзын вӧліны ӧшиньяс быд боксянь. Пыраніныс кузьтанас вӧлі ветымын гырддза, а пасьтанас — кызь вит гырддза.
Посводзыс видзӧдіс ортсы йӧрӧ. Пыранінлӧн ӧтар-мӧдар бок стенъясӧ вӧлі серпасалӧма пальмаяс. Пыранінӧ кайис кӧкъямыс тшупӧда сод.
Морт вайӧдіс менӧ войвыв пыранінӧ да мурталіс сійӧс, сійӧ вӧлі мукӧд пыраніныс кодь.
Сэні тшӧтш вӧліны бокыса жыръяс, стенъяс да посводз. Пыранінын вӧліны ӧшиньяс быд боксянь. Пыраніныс кузьтанас вӧлі ветымын гырддза, а пасьтанас — кызь вит гырддза.
Посводзыс видзӧдіс ортсы йӧрӧ. Пыранінлӧн ӧтар-мӧдар бок стенъясӧ вӧлі серпасалӧма пальмаяс. Пыранінӧ кайис кӧкъямыс тшупӧда сод.
Пыранінын вӧлі торъя вежӧс, кӧні мыськалісны сотан висьяс.
Пыранінлӧн посводзын ӧтарладорас сулаліс кык пызан, и мӧдарладорас — кык пызан. На вылын начкылісны сотан висьяс, мыжысь висьяс да мыж вештан висьяс.
Войвыв пыранін ортсыас, посводз стен бокас, сулаліс кык пызан, и мӧдар стен бокас сулаліс кык пызан.
Вись начкан пызаныс ставнас вӧлі кӧкъямыс. Нёль пызан вӧлі пыранін ӧтар стен бокас, и нёль пызан — мӧдар стен бокас.
Нӧшта сэні вӧлі нёль пызан сотан да мукӧд висьяслы, тшӧтш пуртъяслы да мукӧд начкысянторъяслы. Пызанъяссӧ вӧлі вӧчӧма кералӧм изйысь, налӧн кузьтаыс и пасьтаыс вӧлі гырддза да джын, а джудждаыс — ӧти гырддза.
Посводз пытшкӧс стен гӧгӧр вӧлі тувъялӧма ки пыдӧс ыджда кӧрттувъяс. Пызанъяс вылӧ пуктылісны висьяслысь яйсӧ.
Пытшкӧс йӧрын, пыранінъяс сайын, вӧліны сьылысьяслы ӧти вежӧса керкаяс. Ӧти керкаыс вӧлі войвыв пыранін бердын, и сылӧн ӧдзӧсыс видзӧдіс лунвывлань. Мӧд керкаыс вӧлі лунвыв пыранін бердын, и сылӧн ӧдзӧсыс видзӧдіс войвывлань.
Морт шуис меным: «Лунвылӧ видзӧдысь керкаыс — крамын кесъялысь попъяслы. Войвылӧ видзӧдысь керкаыс — висьпуктанін дорын кесъялысь попъяслы, Садок рӧдысь петысьяслы. Левий чужанкотырысь сӧмын найӧ вермӧны матыстчыны Господь дінӧ, медым кесъявны Сылы».
Морт мурталіс пытшкӧс йӧр. Йӧрыс вӧлі нёль пельӧса, сылӧн пасьтаыс и кузьтаыс вӧлі сё гырддза. Крам водзын сулаліс висьпуктанін.
Морт вайӧдіс менӧ крам посводзӧ да мурталіс сылысь ӧдзӧсдор стенсӧ. Ӧтар-мӧдар бокас стенмыс вӧлі вит гырддза кызта да куим гырддза пасьта.
Посводзыс кузьтанас вӧлі кызь гырддза, а пасьтанас — дас ӧти гырддза. Посводзӧ кайис дас тшупӧда сод. Посводз ӧдзӧс дорын сулаліс кык сюръя, ӧтиыс сулаліс ӧтар стен бокас, мӧдыс — мӧдар стен бокас.
Морт пыртіс менӧ крамӧ. Сійӧ мурталіс ӧдзӧсдор стенъяссӧ, и налӧн кызтаыс вӧлі квайт гырддза. Вежа чомлӧн пасьтаыс моз крамлӧн ӧдзӧсыс вӧлі дас гырддза, а ӧдзӧсдор стенъясыс вӧліны вит гырддза пасьта. Морт мурталіс вежӧссӧ, кузьтанас сійӧ вӧлі нелямын гырддза, а пасьтанас — кызь гырддза.
Морт пырис пыді вежӧсӧ да мурталіс ӧдзӧсдор стенъяссӧ, налӧн кызтаыс вӧлі кык гырддза, а пасьтаыс — сизим гырддза. Ӧдзӧсыс вӧлі квайт гырддза пасьта.
Водзӧ мурталіс пыді вежӧссӧ, кузьтанас и пасьтанас сійӧ вӧлі кызь гырддза. Пасьтанас сійӧ вӧлі медводдза вежӧс кодь. Морт шуис меным, тайӧ пӧ Вежасьыс-вежаин.
Морт мурталіс крам стенсӧ, сійӧ вӧлі квайт гырддза кызта. Крам стен бердын куимладор бокас вӧліны жыръяс. Пасьтанас найӧ вӧліны нёль гырддза.
Найӧ вӧліны ӧта-мӧд вылас куим судтаӧн, быд судтаын вӧлі комын жыр. Крам ортсы стенсянь чурвидзисны тшупӧдъяс. На вылӧ мыджсисны жыръяссӧ кутысь брусъясыс. Тадзи брусъяссӧ эз ковмы йитны крам стенмас.
Крамсӧ кытшалысь жыръясыс мӧд судтаас вӧліны паськыдджыкӧсь медводдза судтаас дорысь, а коймӧд судтаас — паськыдджыкӧсь мӧд судтаас дорысь. Улыс судтасянь кайисны шӧр судтаас, а сэсянь кайисны вылыс судтаас.
Ме аддзи крам гӧгӧрысь джуджыд подув, мый вылын сулалісны крамбердса жыръясыс. Подулыс вӧлі мурталан бедь судта, мӧд ногӧн кӧ, квайт гырддза.
Крамбердса жыръяслӧн ортсы стенмыс вӧлі вит гырддза пасьта. Жыръяс водзын вӧлі восьсаин.
Восьсаиныс крамбердса жыръяс да попъяслӧн ӧти вежӧса керкаяс костын вӧлі кызь гырддза пасьта. Восьсаиныс вӧлі крам гӧгӧрыс.
Крамбердса жыръясысь петісны ывлаӧ войвывладор ӧдзӧсӧд да лунвывладор ӧдзӧсӧд. Восьсаинӧдз ветлан туйыс вӧлі вит гырддза пасьта, сійӧ кытшовтіс крам.
Крам сайын, восьсаинсянь рытыввылын, сулаліс керка. Керка пытшкӧсыс вӧлі сизимдас гырддза пасьта да ӧкмысдас гырддза кузьта. Сылӧн стенмыс вӧлі вит гырддза кызта.
Морт мурталіс крам. Крамлӧн кузьтаыс вӧлі сё гырддза. Крам стенсянь сы сайын сулалысь керкалӧн бӧрладор стенмӧдз вӧлі тшӧтш сё гырддза.
Крам водзын асывладорас восьсаиныс вӧлі тшӧтш сё гырддза.
Морт мурталіс крам сайын сулалысь керкасӧ жыръяснас, сійӧ вӧлі сё гырддза кузьта. Крам пытшкӧссӧ да посводзсӧ, пыранінъяслысь посводзьяссӧ, тагӧсъяссӧ, ӧдзӧс куричьяссӧ, таса ӧшиньяссӧ да куимнан судтасьыс крамбердса жыръяссӧ джоджсяньыс ӧшиньӧдзыс вӧлі эжӧма пуӧн. Ӧшиньясыс вӧліны тупкыссянаӧсь.
Крам пытшкысь и ортсыысь ӧдзӧс весьтсянь джоджӧдз став стенмас вӧлі серпасалӧма херувимъяс да пальмаяс. Кык херувим костын вӧлі пальма. Быд херувимлӧн вӧлі кык чужӧм, ӧтар боксяньыс пальма вылӧ видзӧдіс морт чужӧм, а мӧдар боксяньыс — лев чужӧм. Тадзи вӧлі вӧчӧма крам стен пасьтала.
Херувимъясӧс да пальмаясӧс вӧлі серпасалӧма крам стенъясӧ джоджсяньыс ӧдзӧс куричӧдзыс.
Крамлӧн ӧдзӧсыс вӧлі нёль пельӧса, Вежасьыс-вежаинлӧн — сэтшӧм жӧ.
Пуысь вӧчӧм висьпуктаніныс вӧлі куим гырддза судта, кык гырддза кузьта да кык гырддза пасьта. Сылысь пельӧс сюръяссӧ, подувсӧ да стенъяссӧ вӧлі вӧчӧма пуысь. Висьпуктанін йылысь морт шуис меным: «Тайӧ пызаныс сулалӧ Господьлӧн чужӧмбан водзын».
Крамлӧн ӧдзӧсыс да Вежасьыс-вежаинлӧн ӧдзӧсыс вӧліны кыкпӧвстаӧсь. Быд ӧдзӧс пӧлыс воссис кык пельӧ. Крам ӧдзӧсъясӧ стенъясӧ моз вӧлі серпасалӧма херувимъяс да пальмаяс. Посводз ортсыас вӧлі пуысь вӧчӧм пос.
Посводзас ӧтар-мӧдар бокас вӧліны таса ӧшиньяс, стенъясӧ вӧлі серпасалӧма пальмаяс. Тадзи вӧлі серпасалӧма тшӧтш посводзлысь да крамбердса жыръяслысь пу пӧвъясӧн эжӧм стенъяссӧ.
Морт петкӧдіс менӧ ортсы йӧрӧ войвыв пыранінӧд да вайӧдіс керка дорӧ, мый сулаліс крамбокса восьсаин войвывладорын, крам сайын сулалысь керкасянь войвылынджык. Керкалӧн войвыв стенмыс, кӧні вӧлі ӧдзӧсыс, вӧлі сё гырддза кузьта. Пасьтанас керкаыс вӧлі ветымын гырддза.
Керка сайын вӧлі пытшкӧс йӧрлӧн кызь гырддза пасьта восьсаин, а керка водзын вӧлі ортсы йӧрлӧн изэрд. Тайӧ куим судтаа керкаас вӧліны восьса жыръяс, найӧ сулалісны ӧта-мӧд выланыс.
Сё гырддза кузьта керка водзас вӧлі ветланін, сійӧ вӧлі дас гырддза пасьта да сё гырддза кузьта. Керкалӧн ӧдзӧсъясыс видзӧдісны войвывлань.
Восьса жыръяс вӧсна керкалӧн вылысса жыръясыс вӧліны векньыдджыкӧсь улысса да шӧр жыръяс дорысь.
Жыръясыс вӧліны куимнан судтаас, но налӧн эз вӧвны йӧрын сулалысь кодь сюръяяс. Вылыс судтаыс вӧлі векньыдджык улыс да шӧр судтаяс дорысь.
Керка да ортсы йӧр костын вӧлі ветымын гырддза кузьта стен. Жыръясыс видзӧдісны стенлань. Тайӧ керкаыс кузьтанас вӧлі сё гырддза, а керкаыс, мый мышнас сулаліс ортсы йӧрлань, кузьтанас вӧлі ветымын гырддза.
Стенлань видзӧдысь керкаӧ ортсы йӧрсянь локтігӧн керка дінӧ матыстчисны асыввывсянь. Жыръясӧ пырисны улі судтаӧдыс.
Крам сайын сулалысь керка дорын, крамбокса восьсаин лунвывладорын, сулаліс уна жыръя керка.
Керка водзас вӧлі ветланін. Керкаыс кузьта-пасьтанас, жыръяснас да ӧдзӧсъяснас вӧлі войвывладорын сулалысь уна жыръя керка кодь.
Керкаӧ локтігӧн матыстчисны асыввывсянь. Лунвывлань видзӧдысь ӧдзӧсъяс дорын помасис ветланін, мый муніс йӧръяссӧ торйӧдысь стен пӧлӧн.
Морт шуис меным: «Восьсаин войвылын и лунвылын сулалысь керкаяслӧн жыръясыс вежаӧсь. Сэні попъяс, кодъяслы сетӧма матыстчыны Господь дінӧ, сёйӧны вежасьыс-вежаторъяс. Сэтчӧ найӧ вайӧны вежасьыс-вежа висьяс: нянь вись, мыжысь вись да мыж вештан вись. Тайӧ жыръясыс вежаӧсь.
Крамӧ ветлӧм бӧрын попъяс оз петны ортсы йӧрӧ вежсьытӧг. Найӧ кольӧны тайӧ жыръясас ассьыныс кесъялан паськӧмнысӧ, ӧд кесъялан паськӧмыс вежа. Ассьыныс паськӧмсӧ пасьталӧм бӧрын попъяс вермӧны мунны войтыр дінӧ».
Крамсӧ йӧръяснас мурталӧм бӧрын морт петкӧдіс менӧ асыввыв пыранінӧд да мурталіс крамлы торйӧдӧм мусӧ.
Морт мурталіс бедьнас асыввывладорсӧ, сійӧ вӧлі витсё бедь кузьта.
Бедьнас мурталіс войвывладорсӧ, сійӧ вӧлі витсё бедь кузьта.
Бедьнас мурталіс лунвывладорсӧ, сійӧ вӧлі витсё бедь кузьта.
Сэсся бергӧдчис рытыввывлань да мурталіс рытыввывладорсӧ, сійӧ вӧлі витсё бедь кузьта.
Морт мурталіс крамлы торйӧдӧм мусӧ нёльнанладорсяньыс. Сійӧс кытшалысь стен быд боксянь вӧлі витсё бедь кузьта. Стенмыс торйӧдіс вежасӧ сыысь, мый абу вежа.
Морт вайӧдіс менӧ асыввыв пыранін дорӧ. 
Ме аддзи, мый асыввывсянь матыстчӧ Израиль Енлӧн дзирдлуныс. Ме кылі бузгысь ыджыд валысь кодь шы. Господьлӧн дзирдлунысь муыс югдіс.
Татшӧм жӧ петкӧдчылӧмъяс ме аддзылі, кор Господь воліс бырӧдны Ерусалим кар, и кор ме вӧлі Кевар ю бокын. Ме кымынь уси муас.
Господьлӧн дзирдлуныс пырис крамӧ асыввыв пыранінӧд.
Лов кыпӧдіс менӧ да нуӧдіс пытшкӧс йӧрӧ. Ме аддзи, мый Господьлӧн дзирдлуныс тыртіс крамсӧ.
Менӧ нуӧдысь морт сулаліс мекӧд орччӧн, и ме кылі, мый крамысь кодкӧ шуис меным: «Морт пиӧй, тайӧ крамыс Менам юралан пуклӧсӧй да Менам кок улӧй. Тані Ме кута овны Израиль пиян пӧвстын нэмъяс чӧж.
Израиль войтыр да налӧн ӧксыясыс оз нин кутны пежавны Менсьым вежа нимӧс идолъяслы сетчӧмнас да кулӧм ӧксыясныслы ыджыд казьтылан изъяс сувтӧдӧмнас.
Ассьыныс тагӧссӧ найӧ пуктісны Менам тагӧс дінӧ да ассьыныс ӧдзӧс куричьяссӧ сувтӧдісны Менам ӧдзӧс куричьяс бердӧ, медым Меа-на костын сӧмын стен вӧлі. Найӧ пежалісны Менсьым вежа нимӧс асланыс пеж уджъясӧн. Та вӧсна Ме бырӧді найӧс скӧрйывсьым.
Но ӧні найӧ мед ылыстасны Ме дінысь идолъяснысӧ да ӧксыясныслысь шойяссӧ, и Ме кута овны на пӧвстын нэмъяс чӧж.
А тэ, морт пиӧй, юӧрт Израиль войтырлы тайӧ крам йывсьыс. Кор найӧ тӧдмаласны, кутшӧм ыджыд да тыр-бур тайӧ крамыс, налы яндзим лоӧ асланыс мыжъясысь.
Налы кӧ збыльысь яндзим лоӧ, сэки тӧдмӧд найӧс крам балаӧн да тэчасногӧн, пыран-петанінъясӧн да крам йылысь индӧд-тшӧктӧмъясӧн. Гиж налы ставсӧ, медым найӧ оласны став индӧд-тшӧктӧмыс серти.
Со, крам йылысь индӧдыс: керӧс вылын крамлы торйӧдӧм муыс ставнас вежасьыс-вежа.
Тайӧ — крам йылысь индӧд».
Висьпуктанінсӧ мурталӧма гырддза кузьтаӧн, сэтчӧ вӧлі пырӧ тшӧтш ки пыдӧс. Висьпуктанін гӧгӧр вӧлі ворга, джуджданас и пасьтанас ӧти гырддза. Воргасӧ вӧлі гӧгӧртӧма весьт судта дорышӧн.
Висьпуктанінлӧн джудждаыс татшӧм: воргасянь, му веркӧссянь, улыс тшупӧдӧдз вӧлі кык гырддза, тшупӧдлӧн пасьтаыс — ӧти гырддза.
Улыс тшупӧдсянь вылыс тшупӧдӧдз вӧлі нёль гырддза, вылыс тшупӧдлӧн пасьтаыс — ӧти гырддза.
Висьяссӧ сотаніныс вӧлі нёль гырддза судта.
Сотанінсянь чурвидзисны вывланьӧ нёль сюр.
Сотаніныс вӧлі нёль пельӧса, кузьта-пасьтанас — дас кык гырддза.
Сотанін улас тшупӧдыс быд боксянь кузьтанас вӧлі дас нёль гырддза. Сотанінсӧ вӧлі гӧгӧртӧма джын гырддза пасьта дорышӧн да ӧти гырддза джуджда воргаӧн. Висьяссӧ сотанін дорӧдз асыввывсянь кайис сод.
Господь шуис меным: «Морт пиӧй!
Господь Ыджыдыс тадзи висьталӧ: висьпуктанін йылысь тшӧктӧмыс татшӧм. Сійӧ лунӧ, кор кыпӧдасны висьпуктанінсӧ, медым вайны сотан висьяс да резны сійӧс вирӧн, сет ӧшкӧс Левий чужанкотырысь Садок рӧдысь попъяслы, кодъяслы лэдзӧма матыстчыны Ме дінӧ Меным кесъялӧм могысь, — висьталӧ Господь Ыджыдыс. — Найӧ мед начкасны ӧшкӧс мыжысь вись пыдди. 
Босьт ӧшлысь вирсӧ да мавтышт сыӧн висьпуктанінлысь нёльнан сюрсӧ, тшупӧдлысь нёльнан пельӧссӧ да дорышъяссӧ. Тадзи сӧстӧммӧдан висьпуктанінсӧ.
Босьт ӧшкӧс, мыжысь висьсӧ, да сот сійӧс индӧм местаын вежаин ортсыас.
Мӧд луннас мыжысь вись пыдди вай дзоньвидза ай кӧзаӧс, медым ӧш вирӧн моз сӧстӧммӧдны висьпуктанінсӧ.
Сӧстӧммӧдӧм бӧрын вай дзоньвидза ӧшкӧс да дзоньвидза межӧс Господь водзӧ. Попъяс мед койыштасны на вылӧ сов да ваясны сотан вись пыдди Господьлы.
Сизим лун чӧж быд лун вай ай кӧзаӧс мыжысь вись пыдди. Нӧшта быд лун мед вайӧны вись пыдди дзоньвидза ӧшкӧс да дзоньвидза межӧс.
Сизим лун чӧж мед сӧстӧммӧдасны висьпуктанінсӧ, и висьпуктаніныс лоӧ сиӧма вись вайӧмлы.
Сідзкӧ, кӧкъямысӧд луннас и водзӧ быд лун попъяс мед ваясны висьпуктанін вылын тіянлысь сотан да бурасян висьяснытӧ. Сэки Ме бур сьӧлӧмӧн сибӧда тіянӧс, — висьталӧ Господь Ыджыдыс».
Морт бӧр вайӧдіс менӧ вежаинлӧн асыввыв ортсы пыранін дорӧ. Пыраніныс вӧлі пӧдса.
Господь шуис меным: «Тайӧ пыраніныс лоӧ пӧдса. Сійӧс оз восьтны, мортлы сэті пырнысӧ оз позь. Ӧд Господь, Израильлӧн Ен, пырис сэті. Та вӧсна тайӧ пыраніныс лоӧ пӧдса.
Сӧмын ӧксы вермас пукавны сэні, медым сёйны висьсӧ Господь водзын.
Сылы колӧ пырны посводзӧд и петны тадзи жӧ».
Морт вайӧдіс менӧ войвыв пыранінӧд крам водзӧ. Ме аддзи, мый Господьлӧн дзирдлуныс тыртіс крамсӧ, и ме кымынь уськӧдчи муас.
Господь шуис меным: «Морт пиӧй, бура видзӧд, сюся кывзы да босьт тӧд вылад ставсӧ, мый Ме висьтала тэныд Аслам крам да пыран-петанінъяс йылысь. Босьт тӧд вылад на йылысь индӧд-тшӧктӧмсӧ.
Шу асныра Израиль войтырлы, мый Господь Ыджыдыс тадзи висьталӧ: Израиль войтыр, тырмас тіянлы пежсӧ вӧчны. Ті вайӧданныд Менам вежаинӧ йӧз муысь локтысьясӧс, сьӧлӧмнас да вир-яйнас вундыштчытӧмъясӧс. На дырйи Меным гос да вир вайӧмӧн ті пежаланныд Менсьым крамӧс. Асланыд пеж уджъясӧн ті торканныд йитӧдӧс, мый Ме кӧрталі тіянкӧд.
Меным сиӧм вежаторъяс вӧсна онӧ асьныд тӧждысьӧй, а пуктанныд йӧз муысь локтысьясӧс кесъявны Менам вежаинын.
Господь Ыджыдыс тадзи висьталӧ: йӧз муысь локтысьяслы, кодъяс олӧны Израиль войтыр пӧвстын, сьӧлӧмнас да вир-яйнас вундыштчытӧмъяслы, оз позь пырны Менам вежаинӧ.
Левитъясӧс, кодъяс ылыстчисны Меысь, кор Израиль войтыр кежис Меысь да юрбитіс аслас идолъяслы, лоӧ мыждӧма мыжъяссьыныс.
Менам вежаинын найӧ мед кесъяласны пыранін видзысьясӧн да крамбердса кесйӧгъясӧн, мед начкасны войтырлысь сотан да мукӧд висьяс да кесъяласны войтырлы.
Сыысь, мый найӧ кесъялісны Израиль войтырлы идолъяс водзаныс да тайӧн мыжӧ кыскисны войтырӧс, Ме лэпті на вылӧ Ассьым киӧс, — висьталӧ Господь Ыджыдыс. — Мыжныс вӧсна найӧ нуасны мыждӧм.
Ме дінӧ налы оз позь матыстчыны, медым попъясӧн кесъявны Меным. Налы оз позь матыстчыны Меным сиӧм вежаторъяс да вежасьыс-вежаторъяс дінӧ. Найӧ мед яналасны да нуасны мыждӧмсӧ став пеж уджсьыныс.
Ме пукта найӧс тӧждысьны крам вӧсна да уджавны сэні.
Левий чужанкотырысь сӧмын Садок рӧдысь попъяслы, кодъяс эз дугдывны кесъявны Менам вежаинын, кор Израиль пиян кежисны Меысь, позьӧ матыстчыны Ме дінӧ да кесъявны Меным. Найӧ пондасны сулавны Ме водзын да вайны Меным гос да вир, — висьталӧ Господь Ыджыдыс. — 
Найӧ пондасны пырны Менам Вежаинӧ да матыстчыны Менам пызан дорӧ, медым кесъявны Меным.
Попъяс кор пырасны пытшкӧс йӧрлӧн пыранінӧд, налы колӧ пасьтасьны шабді дӧра паськӧмӧ. Пытшкӧс йӧр пыранінъясын да крамын кесъялігӧн найӧ мед эз вӧвны вурун паськӧмаӧсь.
Юр выланыс налӧн мед вӧлі шабді дӧраысь юрвевттьӧд, улыс гачныс мед тшӧтш вӧлі шабді дӧраысь.
Найӧ мед оз пасьтасьны сэтшӧм паськӧмӧ, мыйысь вермасны пӧсявны.
Войтырыс дінӧ ортсы йӧрас петігӧн найӧ мед пӧрччасны кесъялан паськӧмнысӧ, колясны сійӧс вежа жырйӧ да пасьталасны мӧд паськӧм, медым вежа паськӧмнаныс эз инмыны войтырыс дінӧ да тадзи эз вежӧдны найӧс.
Попъяс мед оз кушӧдз шырны юрнысӧ, но и мед оз быдтыны кузь юрси.
Попъяс мед оз юны вина, кор налы ковмас мунны пытшкӧс йӧрӧ.
Поплы оз позь босьтны гӧтырӧ дӧваӧс либӧ верӧсӧн эновтӧм аньӧс. Сылы колӧ босьтны Израиль войтыр пӧвстысь нылӧс либӧ поплысь дӧваӧс.
Попъяс мед велӧдасны Менсьым войтырӧс торйӧдны, мый вежа, а мый абу вежа. Мед гӧгӧрвоӧдасны, мый пеж, а мый сӧстӧм.
Попъяслы колӧ ёрдын видлавны вензьӧмъяс да веськыда мыждыны Менам тшӧктӧмъяс серти. Налы колӧ вежӧдны Менсьым шойччан лунӧс да тӧждысьны, медым Менсьым вежа гажӧдчан лунъяс пасйисны Менам индӧд-тшӧктӧмъяс серти.
Поп мед оз пежав асьсӧ шой дінӧ матыстчӧмӧн.
Но кулас кӧ сылӧн бать-мамыс, ныв-пиыс, вокыс либӧ чойыс, коді эз вӧв верӧс сайын, сэки сылы позьӧ асьсӧ пежавны.
Сӧстӧммӧдчӧм бӧрас сійӧ мед нӧшта виччысьӧ сизим лун, а сійӧ лунӧ, кор локтас кесъявны вежаинлӧн пытшкӧс йӧрӧ, сылы колӧ вайны ас вӧснаыс мыжысь вись, — висьталӧ Господь Ыджыдыс.
Ме — попъяслӧн пайыс, Израиль муысь энӧ сетӧй налы му пай. Ме — налӧн овмӧсыс.
Найӧ мед пӧткӧдчасны нянь висьясӧн, мыжысь висьясӧн да мыж вештан висьясӧн.
Тшӧтш ставыс, мый Израильын сиӧма Меным, вичмӧ попъяслы.
Медводдза быдтасыс да быдсяма вайӧмторйыс вичмӧ попъяслы.
Выль пызьысь медводдза пӧжаснытӧ сетӧй попъяслы, медым тіянлысь керканытӧ вӧлі бурсиӧма.
Попъяслы оз позь сёйны пӧтка-пемӧс шой да зверӧн косявлӧм пӧтка-пемӧс».
«Кор ті понданныд пудъясьӧмӧн юклыны Израиль му, торйӧдӧй вежа юкӧн Господьлы. Кузьтанас сійӧ мед вӧлі кызь вит сюрс гырддза, а пасьтанас — кызь сюрс гырддза.
Тайӧ му юкӧныс ставнас лоӧ вежа.
Торйӧдӧй сэтысь вежаинлы витсё гырддза кузьта да витсё гырддза пасьта му, нӧшта сы гӧгӧрысь ветымын гырддза пасьта видз-му.
Тайӧ мусьыс муртав кызь вит сюрс гырддза кузьта да дас сюрс гырддза пасьта му юкӧн. Сійӧ лоас вежаин, вежасьыс-вежа му.
Тайӧ вежа муыс попъяслӧн, кодъяс кутасны матыстчыны Господь дінӧ, медым вежаинын кесъявны Сылы. Сэні лоӧны налӧн керкаясыс да вежаин.
Мӧд му юкӧныс, мый тшӧтш кызь вит сюрс гырддза кузьта да дас сюрс гырддза пасьта, лоӧ крамын кесъялысь левитъяслы. Сэтчӧ найӧ вермасны лэптыны керкаяснысӧ.
Вежа му юкӧн бокысь торйӧдӧй карлы вит сюрс гырддза пасьта да кызь вит сюрс гырддза кузьта му юкӧн, кӧні лоӧны Израиль войтырлӧн керкаясыс.
Вежа му юкӧн бердысь да карлы торйӧдӧм му юкӧн бердысь му юкӧныс лоӧ ӧксылы. Ӧксылӧн му юкӧныс мед нюжӧдчӧ рытыввылӧ да асыввылӧ — сэтчӧ жӧ, кытчӧ нюжӧдчӧны Израиль чужанкотыръяслӧн му юкӧнъясыс.
Тайӧ му юкӧныс лоӧ Израильлӧн ӧксылы, медым Менам ӧксыяс эз дзескӧдны Менсьым войтырӧс, а лэдзисны Израиль чужанкотыръяслы лӧня овны налы юклӧм муяс вылын.
Господь Ыджыдыс тадзи висьталӧ: ӧвсьӧй, израильса ӧксыяс!
Тырмас виавны-дзескӧдны да бырӧдны! Юралӧй да мыждӧй веськыда, дугдӧй вӧтлавны Менсьым войтырӧс асланыс му юкӧнысь, — висьталӧ Господь Ыджыдыс».
«Вескиныд мед стӧча веситас. Мурталан дозъясныд, ефаныд да батныд, мед стӧча петкӧдласны.
Ыджданас ефа да бат мед вӧліны ӧткодьӧсь. Тайӧ кыкнан мурталан дозйӧ тӧрӧ хомерлӧн дасӧд пайыс.
Хомерыс мед петкӧдлӧ ефалысь да батлысь йӧрыш ыдждасӧ.
Сикельлӧн сьӧктаыс мед лоӧ кызь гера, а квайтымын сикель мед лоӧ ӧти мина.
Хомер мында шобдіысь тіянлы колӧ вайны вись пыдди ефалысь квайтӧд пайсӧ, хомер мында идысь тшӧтш ефалысь квайтӧд пайсӧ.
Бӧчка мында олив выйысь колӧ вайны батлысь дасӧд пайсӧ.
Ӧти хомерӧ моз ӧти бӧчкаӧ тӧрӧ дас бат.
Израильса бур йирсянінъяс вылысь быд кыксё ыжысь колӧ вайны ӧтиӧс. Тайӧ висьясыс лоӧны тіян нянь висьныд, сотан висьныд да бурасян висьныд мыжнытӧ вештӧм могысь, — висьталӧ Господь Ыджыдыс. — 
Став Израиль войтырыс мед сетӧ тайӧ вайӧмторъяссӧ Израиль ӧксылы.
Ӧд Израиль войтырлӧн вежа гажӧдчан лунъяс дырйи, выль тӧлысь чужигӧн да шойччан лунъяс дырйи ӧксы кывкутӧ сотан вись, нянь вись да вина вись вайӧм вӧсна.
Сійӧ мед ваяс мыжысь вись да нянь вись, сотан да бурасян висьяс, медым вештыны Израиль войтырлысь мыжсӧ».
«Господь Ыджыдыс тадзи висьталӧ: медводдза тӧлысьлӧн медводдза лунӧ босьтӧй дзоньвидза ӧшкӧс, медым сӧстӧммӧдны вежаин мыжысь вись вайӧмӧн.
Поп мед босьтас ӧшлысь вирсӧ да мавтас вирнас крам куричьяс, висьпуктанін тшупӧдлысь нёльнан пельӧссӧ да пытшкӧс йӧрӧ пыранінлысь куричьяссӧ.
Тадзи вӧчӧй тшӧтш тӧлысьыслӧн сизимӧд лунӧ на вӧсна, кодъяс мыж вӧчисны мӧвпышттӧг либӧ гӧгӧрвотӧг. Тадзи сӧстӧммӧдӧй крамсӧ.
Медводдза тӧлысьлӧн дас нёльӧд лунӧ тіян мед лоас Ыджыд лун, сэки сизим лун чӧж гажӧдчӧй да сёйӧй шомтӧм нянь.
Ыджыд лунӧ ӧксы мед ваяс мыжысь вись пыдди ӧшкӧс ас вӧснаыс да тайӧ муас олысь став войтырыс вӧсна.
Гаж дырйи сизимнан лун чӧжыс быд лун сійӧ мед вайӧ Господьлы сотан вись пыдди дзоньвидза сизим ӧшкӧс да дзоньвидза сизим межӧс. Мыжысь вись пыдди мед быд лун вайӧ ай кӧзаӧс.
Быд ӧшкӧд да быд межкӧд мед вайӧ нянь вись пыдди ефа мында пызь да гин мында олив вый.
Сизимӧд тӧлысьлӧн дас витӧд лунсянь лоӧны вежа гажӧдчан лунъяс. Сизим лун чӧж ӧксы мед вайӧ мыжысь вись, сотан вись, нянь вись да олив вый, кыдзи мукӧд гажӧдчан лунъяс дырйи».
«Господь Ыджыдыс тадзи висьталӧ: квайт уджалан лун чӧж пытшкӧс йӧрӧ нуӧдысь асыввыв пыранін мед лоӧ пӧдса, а шойччан лунӧ да выль тӧлысь пасъян лунӧ мед лоӧ восьса.
Ӧксылы колӧ пырны посводзӧд тайӧ пыранінас да сувтны ӧдзӧс курич дорӧ.
Попъяс мед ваясны ӧксылысь сотан да бурасян висьяссӧ.
Пыранін тагӧс дорын ӧксы мед копыртчылас Господьлы да бӧр петас. Пыраніныс рытӧдзыс мед лоӧ восьса.
Тайӧ пыраніныслӧн ӧдзӧс дорын войтырыс мед шойччан лунӧ да выль тӧлысь пасъян лунӧ копыртчылас Господьлы.
Шойччан лунӧ ӧксы мед вайӧ Господьлы сотан вись пыдди дзоньвидза квайт баляпиӧс да дзоньвидза ӧти межӧс.
Нянь вись пыдди ӧксы мед вайӧ ефа мында пызь межкӧд, а быд баляпикӧд мед вайӧ пызьсӧ сы мында, мыйта кӧсйӧ. Ефа мында пызькӧд колӧ вайны гин мында олив вый.
Выль тӧлысь пасъян лунӧ ӧксы мед вайӧ сотан вись пыдди дзоньвидза ӧти ӧшкӧс, дзоньвидза квайт баляпиӧс да дзоньвидза ӧти межӧс.
Нянь вись пыдди ӧксы мед вайӧ ефа мында пызь ӧшкӧд да ефа мында пызь межкӧд, а быд баляпикӧд мед вайӧ пызьсӧ сы мында, мыйта кӧсйӧ. Ефа мында пызькӧд колӧ вайны гин мында олив вый.
Ӧксылы колӧ пырны пыранінлӧн посводзӧдыс и петны тадзи жӧ.
Гажӧдчан лунъяс дырйи Израиль войтыр мед локтас Господь водзӧ. Войвыв пыранінӧд юрбитны локтысь мед петас лунвыв пыранінӧд, а лунвыв пыранінӧд локтысь мед петас войвыв пыранінӧд.
Некод мед бӧрсӧ оз пет сійӧ пыранінӧдыс, кыті пырис. Петны колӧ воча сулалысь пыранінӧд.
Ӧксылы колӧ пырны и петны войтырыскӧд ӧтлаын.
Гажӧдчан лунъяс дырйи ӧксы мед вайӧ нянь вись пыдди ефа мында пызь быд ӧшкӧд да быд межкӧд, а быд баляпикӧд мед вайӧ пызьсӧ сы мында, мыйта кӧсйӧ. Ефа мында пызькӧд колӧ вайны гин мында олив вый.
Ӧксы кӧ ас кӧсйӧм серти ваяс Господьлы сотан вись либӧ бурасян вись, сылы мед восьтасны асыввыв пыранінсӧ. Сійӧ мед ваяс сотан да бурасян висьяссӧ шойччан лун дырйи моз. Сэсся мед петас, а пыранінсӧ мед пӧдлаласны.
Быд асыв вайӧй Господьлы сотан вись пыдди дзоньвидза арӧса баляӧс.
Быд асыв балякӧд ӧтлаын нянь вись пыдди вайӧй Господьлы шобді пызь — ефалысь квайтӧд юкӧнсӧ, да олив вый — гинлысь коймӧд пайсӧ, медым гудравны сыӧн шобді пызьсӧ.
Тайӧ тшӧктӧмсӧ лӧсьӧдӧма нэмъяс кежлӧ.
Быд асыв вайӧй сотан вись пыдди баляӧс, нянь вись да олив вый».
«Господь Ыджыдыс тадзи висьталӧ: ӧксы кӧ аслас пиян пӧвстысь кодлыкӧ козьналас му, сэки тайӧ муыс вуджӧ пиыслы, а сы бӧрся — пияныслы.
Ӧксы кӧ аслас кесйӧглы козьналас му, муыс лоӧ кесйӧглӧн тшупӧда воӧдз *, но тшупӧда вонас муыс бӧр вуджӧ ӧксылы.
Ӧксылӧн муыс сылӧн кулӧм бӧрын вичмас пияныслы.
Ӧксылы оз позь мырддьыны войтырыслысь мусӧ да вӧтлыны найӧс сэтысь.
Сійӧ сӧмын аслас юкӧнысь вермӧ мусӧ сетны пияныслы. Менам войтыр пӧвстысь некодӧс мед оз ло вӧтлӧма аслас му юкӧнысь».
Морт вайӧдіс менӧ керкалань, кӧні попъяслӧн вежа жыръясыс видзӧдісны войвылӧ. Сійӧ вайӧдіс менӧ ветлан коластӧд, мый муніс пыранін пӧлӧн. Ветлан коластлӧн рытыввыв пом йылысь морт шуис меным: «Тані попъяс мед пуӧны мыж вештан вись пыдди да мыжысь вись пыдди вайӧм пемӧсъяслысь яйсӧ.
Тані мед пӧжалӧны нянь вись. Яйсӧ да няньсӧ мед оз петкӧдны ортсы йӧрӧ, медым тайӧ вежаторъяснас эз инмыны войтырыс дінӧ да тадзи эз вежӧдны найӧс».
Сэсся морт петкӧдіс менӧ ортсы йӧрӧ да нуӧдіс йӧрлӧн нёльнан пельӧсӧ. Ме аддзи, мый ортсы йӧрлӧн быд пельӧсын вӧлі ичӧтик йӧр.
Быд ичӧтик йӧр вӧлі вевттьӧма, найӧ вӧліны нелямын гырддза кузьтаӧсь да комын гырддза пасьтаӧсь.
Йӧръяссӧ вӧлі кытшалӧма стенмӧн, а стен пӧлӧн вӧлі вӧчӧма пусянінъяс.
Морт шуис меным: «Тайӧ пусянінъясын крамбердса кесйӧгъяс мед пуӧны войтырлысь висьяссӧ».
Морт бӧр вайӧдіс менӧ крам ӧдзӧс дорӧ. Ме аддзи, мый крам тагӧс улысь визувтіс ва асыввывлань, ӧд крамыс видзӧдіс асыввылӧ. Ваыс петіс тагӧс лунвывладорсянь, водзӧ визувтіс висьпуктанін лунвывладортіыс.
Сэсся морт петкӧдіс менӧ войвыв пыранінӧд да кытшолӧн вайӧдіс асыввыв пыранін дорӧ.
Сэні ме аддзи, мый ваыс тюргӧ-визувтӧ пыранін лунвывладорсяньыс.
Морт муніс асыввывлань. Сылӧн киас вӧлі мурталан кӧв, сійӧ мурталіс сюрс гырддза да келӧдіс менӧ визувтысь ва вомӧн.
Ваыс вӧлі кок шегйӧдз.
Бара мурталіс сюрс гырддза да келӧдіс менӧ ва вомӧн.
Ваыс вӧлі пидзӧсӧдз.
Нӧшта мурталіс сюрс гырддза да келӧдіс менӧ ва вомӧн.
Ваыс вӧлі коскӧдз.
Нӧшта мурталіс сюрс гырддза, и тайӧ вӧлі нин сэтшӧм ю, мый вуджнысӧ эг вермы. Ваыс вӧлі кыптӧма, мый позис сӧмын вартчыны, а келӧмнас вуджнысӧ эг нин вермы.
Морт шуис меным: «Морт пиӧй, аддзылін?» Сэсся сійӧ петкӧдіс менӧ ваысь.
Вадорысь ме аддзи зэв уна пу. Найӧ быдмисны ю ӧтар-мӧдар пӧлӧныс.
Морт шуис меным: «Тайӧ ваыс визувтӧ асыввыв муясӧ, лэччӧ Йӧрдан ковтысӧ да усьӧ Сола саридзӧ.
Сэні ваыс бурмас да водзӧ оз нин ло сола.
И кытчӧ визувтас тайӧ ваыс, сэні кутас овны быдсяма ловъя олысьыс.
Ваын лоӧ зэв уна чери, ӧд кытчӧ визувтас тайӧ ваыс, сэні ваыс бурмас да ставыс ловзяс.
Саридз дорын кутасны сулавны чери кыйысьяс. Эн-Гедисянь Эн-Эглаимӧдз найӧ кутасны тӧлӧдны тывъяссӧ.
Ыджыд саридзын моз сэні кутас овны быдсикас чериыс, и сійӧ лоӧ зэв уна.
Нюрын да гӧптаинын ваыс оз бурмы, медым сэтысь позис босьтны сов.
Ю ӧтар-мӧдар пӧлӧныс кутасны быдмыны быдсяма вотӧса пуяс. Налӧн коръясыс оз косьмыны, и налӧн вотӧсыс оз бырлы.
Пуясыс быд тӧлысь вайӧны вотӧс, ӧд найӧс юкталӧ вежаинсянь визувтысь ва.
Тайӧ пуяслысь вотӧссӧ кутасны сёйны, а корнас бурдӧдчыны».
«Господь Ыджыдыс тадзи висьталӧ: со кыдзи тіянлы колӧ юклыны мусӧ Израильлӧн дас кык чужанкотырлы. Ӧсиплы сетӧй кык пай.
Сетӧй быд чужанкотырлы ӧтыджда му.
Ме киӧс лэптӧмӧн кӧсйыси сетны тайӧ мусӧ тіян батьяслы, та вӧсна сійӧ вичмас тіянлы.
Израильлӧн войвыв мудорыс нюжӧдчас Ыджыд саридзсянь Хетлон кар пыр Цедад карӧдз сэтчӧ нуӧдан туйӧд, сэтысянь мунас Берота карӧдз, сэсся мунас Дамаск да Хамат муяс костын сулалысь Сивраим карӧдз, водзӧ — Хавран му дорын сулалысь Хацер-Тикон карӧдз.
Тадзи войвыв мудорыс мунас саридз дорсянь Хацар-Энан карӧдз. Дамаск да Хамат муяс лоӧны мудор войвывладорын.
Асыввылын мудорыс мунас Хавран да Дамаск муяс костті, Галаад да Израиль муяс костын мудорыс мунас Йӧрдан юті асыввыв саридз * дорӧдз.
Тайӧ асыввыв мудор.
Лунвылын мудорыс мунас Тамар карсянь Мериват-Кадеш ваяс дорӧдз, сэтысянь шорті Ыджыд саридз дорӧдз.
Тайӧ лунвыв мудор.
Рытыввыв мудорнас лоӧ Ыджыд саридз. Мудорыс мунас лунвывсянь Лево-Хамат весьтӧдз.
Тайӧ рытыввыв мудор.
Тайӧ мусӧ юклӧй Израиль чужанкотыръяслы.
Тіянлы колӧ пудъясьӧмӧн юклыны мусӧ аслыныд да йӧз муысь локтысьяслы, кодъяслӧн чужасны ныв-пиныс.
Тайӧ йӧзыс мед лоӧны тіянлы израильса вужвойтыр кодьӧсь жӧ. Налы мед тшӧтш вичмас му пай Израиль чужанкотыръяс пӧвстын.
Кутшӧм чужанкотыр пӧвстӧ овмӧдчас йӧз муысь локтысь, сэтысь и сетӧй сылы пайсӧ, — висьталӧ Господь Ыджыдыс».
«Израиль чужанкотыръяслӧн нимъяс серти муясыс татшӧмӧсь.
Войвылын лоӧ Дан чужанкотырлӧн муыс. Сылӧн войвыв мудорыс нюжӧдчас Хетлон туйӧд Лево-Хаматӧдз, водзӧ Хацар-Энан карӧдз. Дамаск да Хамат муяс лоӧны мудор войвывладорын. Тайӧ муыс асыввывсянь саридз дорӧдз лоӧ Данлӧн.
Дан чужанкотырлӧн му лунвывладорын асыввывсянь рытыввылӧдз лоӧ Асир чужанкотырлӧн муыс.
Асир чужанкотырлӧн му лунвывладорын асыввывсянь рытыввылӧдз лоӧ Неффалим чужанкотырлӧн муыс.
Неффалим чужанкотырлӧн му лунвывладорын асыввывсянь рытыввылӧдз лоӧ Манассей чужанкотырлӧн муыс.
Манассей чужанкотырлӧн му лунвывладорын асыввывсянь рытыввылӧдз лоӧ Ефрем чужанкотырлӧн муыс.
Ефрем чужанкотырлӧн му лунвывладорын асыввывсянь рытыввылӧдз лоӧ Рувим чужанкотырлӧн муыс.
Рувим чужанкотырлӧн му лунвывладорын асыввывсянь рытыввылӧдз лоӧ Иуда чужанкотырлӧн муыс.
Иуда чужанкотырлӧн му лунвывладорысь асыввывсянь рытыввылӧдз торйӧдӧй кызь вит сюрс гырддза пасьта му. Кузьтанас асыввывсянь рытыввылӧдз муыс мед лоӧ чужанкотыръяслӧн муяс кодь.
Сэні шӧрас мед лоӧ вежаин.
Тайӧ торйӧдӧм муысь Господьлы торйӧдӧй кызь вит сюрс гырддза кузьта да кызь сюрс гырддза пасьта му.
Тайӧ вежа му юкӧныс лоӧ попъяслы. Сійӧ лоӧ кызь вит сюрс гырддза кузьта да дас сюрс гырддза пасьта. Кузьтасӧ лоӧ мурталӧма рытыввывсянь асыввылӧ, пасьтасӧ войвывсянь лунвылӧ. Попъяслӧн му шӧрас лоӧ Господьлӧн вежаин.
Тайӧ муыс лоӧ Садок рӧдысь вежа попъяслы, кодъяс дугдывтӧг кесъялісны Меным да эз кежны Меысь левитъяс моз, кор Израиль войтыр кежис Меысь.
Садок рӧдысь попъяслы вичмас торйӧдӧм муысь вежасьыс-вежа му юкӧн. Сійӧ лоӧ левитъяслӧн мукӧд орччӧн.
Левитъяслы лоӧ попъяслӧн му бердысь кызь вит сюрс гырддза кузьта да дас сюрс гырддза пасьта му.
Попъяслӧн да левитъяслӧн муясыс ӧтлаын лоӧны кузьтанас кызь вит сюрс гырддза, пасьтанас — кызь сюрс гырддза.
Господьлы торйӧдӧм мусӧ оз позь вузавны ни вежны, оз позь сетны киысь киӧ, ӧд тайӧ медбур му юкӧныс Господьлӧн. Сійӧ — вежа му.
Торйӧдӧм муысь кольӧм вит сюрс гырддза пасьта да кызь вит сюрс гырддза кузьта юкӧныс абу вежа. Сэні лоӧны карса керкаяс, а на гӧгӧрыс — видз-муяс.
Войвывладорсянь, лунвывладорсянь, асыввывладорсянь да рытыввывладорсянь карыс лоӧ нёль сюрс витсё гырддза кузьта.
Кар гӧгӧрыс лоӧны видзьяс. Войвывладорсянь, лунвывладорсянь, асыввывладорсянь да рытыввывладорсянь тайӧ восьсаиныс лоӧ кыксё ветымын гырддза кузьта.
Вежа му юкӧн бокын коляс асыввылын да рытыввылын дас сюрс гырддза кузьта му. Тайӧ видз-муяс вылысь вотӧс-быдтасыс лоӧ карса уджалысьяслы.
Карса уджалысьяс, кодъяс лоӧны став Израиль чужанкотырысь, мед вӧдитӧны тайӧ мусӧ.
Торйӧдӧм муыс, кытчӧ пырӧны вежа му юкӧныс да карса муыс, лоӧ нёль пельӧса, кузьта-пасьтанас кызь вит сюрс гырддза. Ӧксылы вичмас му, мый коляс вежа му юкӧн да карса му ӧтар-мӧдарладорсяньыс. Ӧксылӧн муыс нюжӧдчас Израильлӧн асыввыв мудорӧдз кызь вит сюрс гырддза и рытыввыв мудорӧдз кызь вит сюрс гырддза — сэтчӧ жӧ, кытчӧ чужанкотыръяслӧн муясыс. Тадзи вежа му юкӧныс да крамыс лоӧны ӧксылӧн муяс костын, Израиль му шӧрын.
Левитъяслӧн мусянь да карса мусянь асыввылӧ да рытыввылӧ муыс лоӧ ӧксылӧн.
Сылӧн муыс лоӧ Иуда да Венямин чужанкотыръяслӧн муяс костын.
Мукӧд чужанкотыръяслӧн муясыс лоӧны Израиль асыввыв мудорсянь рытыввыв мудорӧдз, торйӧдӧм му лунвывладорын лоӧ Венямин чужанкотырлӧн муыс.
Венямин чужанкотырлӧн му лунвывладорын асыввывсянь рытыввылӧдз лоӧ Симеон чужанкотырлӧн муыс.
Симеон чужанкотырлӧн му лунвывладорын асыввывсянь рытыввылӧдз лоӧ Иссакар чужанкотырлӧн муыс.
Иссакар чужанкотырлӧн му лунвывладорын асыввывсянь рытыввылӧдз лоӧ Завулон чужанкотырлӧн муыс.
Завулон чужанкотырлӧн му лунвывладорын асыввывсянь рытыввылӧдз лоӧ Гад чужанкотырлӧн муыс.
Гад чужанкотырлӧн лунвыв мудорыс мунас Тамар карсянь Мериват-Кадеш ваяс дорӧдз, сэтысянь шорті Ыджыд саридз дорӧдз.
Тадзи юклӧй му Израиль чужанкотыръяслы. Юклӧй сійӧс пудъясьӧмӧн, — висьталӧ Господь Ыджыдыс».
«Ерусалим кар войвывладорын нёль сюрс витсё гырддза кузьта стенмын карса дзиръяясысь лоӧ куим дзиръя.
Дзиръяяслӧн нимъясыс лоӧны Израиль чужанкотыръяслӧн ним серти.
Войвыв стенмын лоӧны Рувимлӧн, Иудалӧн да Левийлӧн дзиръяяс.
Нёль сюрс витсё гырддза кузьта асыввыв стенмын лоӧ куим дзиръя — Ӧсиплӧн, Веняминлӧн да Данлӧн.
Нёль сюрс витсё гырддза кузьта лунвыв стенмын лоӧ куим дзиръя — Симеонлӧн, Иссакарлӧн да Завулонлӧн.
Нёль сюрс витсё гырддза кузьта рытыввыв стенмын лоӧ куим дзиръя — Гадлӧн, Асирлӧн да Неффалимлӧн.
Ставнас карса стенмыс лоӧ дас кӧкъямыс сюрс гырддза кузьта.
Тайӧ лунсяньыс Ерусалим карлӧн нимыс лоӧ “Тані Господь”».
{Еврей йӧз (комиӧдіс Kodko) @ Даниил пророклӧн небӧг @ религ. гижӧд @ Библия @ 2021 @ Лб. .}
Даниил пророклӧн небӧг
Иудаса Ехояким ӧксылӧн коймӧд веськӧдлан воӧ Ерусалим кар вылӧ уськӧдчис вавилонса Навукодоносор ӧксы да кытшаліс сійӧс.
Навукодоносор киӧ Господь сетіс иудаса Ехояким ӧксыӧс да Енлӧн крамысь дозмук-кӧлуй. Навукодоносор нуис тайӧ дозмук-кӧлуйсӧ Сеннар муӧ, аслас енлӧн крамӧ, да пуктіс найӧс крамса озырлун видзанінӧ.
Ыджыд чинаясӧн веськӧдлысь Ашпеназлы Навукодоносор ӧксы тшӧктіс бӧрйыны израильса ӧксы рӧдысь да нималана йӧз пӧвстысь зонъясӧс, кодъяс чужӧмнас мичаӧсь да вир-яйнас тырвыйӧ бурӧсь, ыджыд мывкыдаӧсь, сюсь вежӧраӧсь да кужӧны пырӧдчыны быдпӧлӧс тӧдӧмлунӧ, медым кесъявны ӧксы керкаын.
Ӧксы тшӧктіс велӧдны найӧс лыддьысьны да сёрнитны калдеяса кыв вылын, тшӧктіс быд лун вердны-юктӧдны найӧс сёянӧн да винаӧн, мый сійӧ ачыс сёйліс-юліс. Куим во чӧж велӧдчӧм бӧрын налы колӧ вӧлі кесъявны ӧксылы.
Бӧрйӧм зонъяс пӧвстын вӧліны Даниил, Хананей, Мисаэл да Азарий. Ставныс найӧ вӧліны Иуда чужанкотырысь.
Ыджыд чинаясӧн веськӧдлысь сетіс налы выль нимъяс: Даниилӧс нимтіс Белтешацарӧн, Хананейӧс — Шадракӧн, Мисаэлӧс — Мешакӧн, Азарийӧс — Аведнегоӧн.
Даниил шуис аслыс, мый оз кут пежавны асьсӧ сёянӧн да винаӧн, мый ӧксы сёйӧ-юӧ. Та вӧсна Даниил корис ыджыд чинаясӧн веськӧдлысьлысь, медым сійӧ лэдзас сёйны-юны мӧдтор, а оз пежалысь сёян-юан.
Енмыс лӧсьӧдіс сідзи, мый ыджыд чинаясӧн веськӧдлысь вӧлі бур сьӧлӧма Даниил дінӧ.
Сійӧ вочавидзис Данииллы: «Ме пола ӧксыысь, аслам ыджыдысь, ӧд сійӧ ачыс индіс, мый тіянлы сёйны-юны.
Сійӧ кӧ аддзас, мый ті асланыд тшӧтшъяяс дорысь омӧльджыкӧсь, сэки тіян вӧсна ӧксы керыштас менсьым юрӧс».
Ыджыд чинаясӧн веськӧдлысь индіс мортӧс видзӧдны Даниил, Хананей, Мисаэл да Азарий бӧрся. На бӧрся видзӧдысьлы Даниил шуис:
«Ме кора тэнӧ, видзӧд миян бӧрся, аслад кесйӧгъяс бӧрся, дас лун чӧж.
Миянлы мед сетасны сёйны-юны сӧмын градвыв пуктас да ва.
А сэсся тэ видзӧдлы миян вылӧ да сійӧ зонъясыс вылӧ, кодъяс пӧткӧдчӧны ӧксы пызан вылысь. Сэки тэ вӧч миянкӧд, аслад кесйӧгъяскӧд, мый кӧсъян».
Сійӧ кывзысис налысь да видзӧдіс на бӧрся дас лун чӧж.
Дас лун кольӧм бӧрын чужӧмнас найӧ вӧліны мичаджыкӧсь да вир-яйнас ёнджыкӧсь сійӧ зонъясыс дорысь, кодъяс пӧткӧдчисны ӧксы пызан вылысь.
Сійӧ кадсяньыс зонъяс бӧрся видзӧдысь эз кут тшӧктыны налы сёйны-юны ӧксы пызан вылысь, а сетіс налы сёйны градвыв пуктас.
Енмыс сетіс тайӧ нёль зонмыслы мывкыдлун, тӧдӧмлун да гижӧмторъяс гӧгӧрвоӧмлун, а Данииллы Енмыс сетіс нӧшта на сямлун гӧгӧрвоны быдпӧлӧс аддзылӧм-петкӧдчылӧм да вӧтъяс.
Ӧксылӧн индӧм кадӧ ыджыд чинаясӧн веськӧдлысь вайӧдіс зонъясӧс Навукодоносор ӧксы дінӧ.
Ӧксы сёрнитіс зонъяскӧд, и на пиысь некодӧс эз позь ӧткодявны Даниилкӧд, Хананейкӧд, Мисаэлкӧд да Азарийкӧд, и найӧс пуктісны кесъявны ӧксылы.
Быд пӧрйӧ, кор ӧксы юасис налысь мый йылысь кӧ, мый вылӧ колана вӧлі мывкыдлун да сюсь вежӧр, сійӧ аддзис, мый найӧ вӧліны дас пӧв мывкыдаӧсь сылӧн муас олысь став туналысь да кимӧститчысь дорысь.
Даниил кесъяліс ӧксы керкаын Кирлӧн медводдза веськӧдлан воӧдз.
Навукодоносор аслас мӧд веськӧдлан воӧ аддзыліс вӧтъяс. Сылӧн лолыс пондіс майшасьны, и сійӧ эз вермы узьнысӧ.
Ӧксы тшӧктіс корны туналысьясӧс, кимӧститчысьясӧс, тшыкӧдчысьясӧс да калдеяса мывкыд йӧзӧс, медым найӧ гӧгӧрвоӧдісны сылысь вӧтъяссӧ.
Найӧ локтісны да сувтісны ӧксы водзӧ.
Ӧксы шуис налы: «Ме аддзылі вӧт, и менам лолӧй майшасьӧ.
Ме кӧсъя гӧгӧрвоны тайӧ вӧтсӧ».
Найӧ шыасисны ӧксы дінӧ арамей кыв вылын: «Мед олас ӧксы нэмъяс чӧж!
Висьтав миянлы, аслад кесйӧгъяслы, вӧттӧ, и ми гӧгӧрвоӧдам сійӧс».
Ӧксы вочавидзис тӧдысь-туналысьяслы: «Кывзӧй менсьым шуӧмӧс.
Ті кӧ онӧ висьталӧй да онӧ гӧгӧрвоӧдӧй менсьым вӧтӧс, тіянӧс торпыригӧдз кераласны и тіянлысь керкаяснытӧ пазӧдасны.
Но ті кӧ висьталанныд да гӧгӧрвоӧданныд менсьым вӧтӧс, сэки ме сета тіянлы козинъяс да кута ошкыны-нимӧдны тіянӧс.
Сідзкӧ, висьталӧй да гӧгӧрвоӧдӧй менсьым вӧтӧс».
Найӧ мӧдысь шуисны: «Ӧксыӧй, висьтав миянлы, аслад кесйӧгъяслы, вӧттӧ, и ми гӧгӧрвоӧдам сійӧс».
Ӧксы вочавидзис налы: «Ме тӧда, мый ті нюжӧданныд кадсӧ, ӧд ті тӧданныд менсьым шуӧмӧс.
Ті кӧ онӧ висьталӧй меным вӧтӧс, тіянӧс ставнытӧ виччысьӧ индӧд серти мыждӧм. Ті сёрнитчӧмныд ылӧдлыны да пӧрйӧдлыны менӧ, виччысянныд, мый мыйкӧ вежсяс.
Висьталӧй менсьым вӧтӧс, сэки ме тӧдмала, мый ті сямманныд гӧгӧрвоӧдны сійӧс».
Тӧдысь-туналысьяс вочавидзисны ӧксылы: «Му вылас оз сюр сэтшӧм мортыс, коді эськӧ вермас висьтавны ӧксылы, мый сійӧ корӧ. Весиг медыджыд да медвына ӧксы некор эз юасьлы татшӧмтор йывсьыс туналысьяслысь, кимӧститчысьяслысь да калдеяса мывкыд йӧзлысь.
Ӧксы юасьӧ сэтшӧм сьӧкыдтор йылысь, мый некод оз вермы вочавидзны сылы енъяс кындзи, кодъяс оз овны йӧз пӧвстын».
Тайӧ кывъяссьыс ӧксы ёна дӧзмис да чорыда скӧрмис, сійӧ тшӧктіс вины Вавилонысь став тӧдысьсӧ.
Кор ӧксысянь петіс татшӧм тшӧктӧмыс, корсисны тшӧтш Даниилӧс да сылысь ёртъяссӧ, медым вины найӧс.
Сэки Даниил мывкыд морт моз шыасис Ариок дінӧ, ӧксыӧс видзысьяслӧн юралысь дінӧ, кодӧс вӧлі мӧдӧдӧма виавны вавилонса тӧдысьясӧс.
Даниил юаліс Ариоклысь: «Мыйла ӧксысянь петіс татшӧм чорыд тшӧктӧм?»
Сэки Ариок ставсӧ висьталіс Данииллы.
Даниил муніс ӧксы дінӧ да корис сетны кад, медым гӧгӧрвоӧдны ӧксылысь вӧтсӧ.
Даниил локтіс гортас да ставсӧ висьталіс аслас ёртъяслы: Хананейлы, Мисаэллы да Азарийлы. Сійӧ корис найӧс кевмысьны енэжвывса Енмыслы, медым Сійӧ лоас бур сьӧлӧма на дінӧ да восьтас тайӧ гусяторсӧ, медым вавилонса мукӧд тӧдысьясӧс моз эз вины Даниилӧс да сылысь ёртъяссӧ.
Войся аддзылӧмын Данииллы вӧлі восьтӧма тайӧ гусяторсӧ. Сэки Даниил ошкис енэжвывса Енмӧс.
Сійӧ шуаліс: — Мед лоӧ ошкӧма Енлысь нимсӧ нэмъяс чӧж, ӧд Сылӧн эм мывкыдлуныс да выныс.
Сійӧ вежлалӧ кадъяс да вояс, вештӧ ӧксыясӧс да сувтӧдӧ выльясӧс, мывкыдаяслы Сійӧ сетӧ мывкыдлун, вежӧраяслы — вежӧрлун.
Сійӧ восьтӧ пыдӧ дзебӧмасӧ да гусяторсӧ, тӧдӧ, мый дзебӧма пемыдас, и югыдыс олӧ Сыкӧд.
Ме ошка-нимӧда Тэнӧ, менам батьяслысь Енмӧс, Тэ сетін меным мывкыдлун да вын. Тэ восьтін меным сійӧ, мый йылысь ми кевмысим Тэныд, Тэ восьтін миянлы ӧксылысь вӧтсӧ.
Та бӧрти Даниил муніс Ариок дінӧ, кодӧс ӧксы мӧдӧдіс виавны вавилонса тӧдысьясӧс. Даниил шуис сылы: «Эн виав вавилонса тӧдысьясӧс.
Нуӧд менӧ ӧксы дінӧ, и ме гӧгӧрвоӧда сылы вӧтсӧ».
Ариок дзик пыр вайӧдіс Даниилӧс ӧксы дінӧ да шуис сылы: «Пленӧ босьтӧм Иуда войтыр пӧвстысь ме аддзи мортӧс, коді вермас гӧгӧрвоӧдны ӧксылы вӧтсӧ».
Ӧксы шуис Данииллы, кодӧс нимтісны Белтешацарӧн: «Верман-ӧ тэ висьтавны меным, мый ме аддзылі вӧтын, да гӧгӧрвоӧдны сійӧс?»
Даниил вочавидзис ӧксылы: «Тайӧ гусяторсӧ, мый йылысь ӧксы юасьӧ, оз вермы восьтны ни тӧдысь, ни кимӧститчысь, ни туналысь, ни пемӧс мускӧн тунасьысь.
Но енэжас эм Ен, коді восьтӧ гусяторъяс.
Сійӧ петкӧдліс Навукодоносор ӧксылы, мый лоӧ бӧръя кадӧ.
Со мый тэ аддзылін вӧтнад, кор тэ куйлін вольпасяд.
Ӧксыӧй, вольпасяд тэ мӧвпалін, мый лоӧ локтана кадӧ.
И гусяторсӧ Восьтысь петкӧдліс тэныд тайӧс.
А меным тайӧ гусяторсӧ восьтӧма абу сы понда, мый ме быттьӧ му вылас став олысьяс дорысь мывкыдаджык, но восьтӧма сы понда, медым тэныд, ӧксыӧй, гӧгӧрвоӧдны вӧттӧ, и медым тэ тӧдмалін, мый йылысь тэ мӧвпалін.
Ӧксыӧй, тэ аддзылін морт мыгӧра ыджыд вӧчӧмторйӧс, сійӧ яръюгыда дзирдаліс и вӧлі ёна повзьӧдана.
Сылӧн юрыс вӧлі сӧстӧм зарниысь, морӧсыс да киясыс — эзысьысь, кынӧмыс да лядьвейясыс — ыргӧнысь. Сылӧн кокчӧръясыс вӧліны кӧртысь, а кокъяссӧ вӧлі вӧчӧма кытсюрӧ сёйысь, кытсюрӧ кӧртысь.
Тэ видзӧдін сы вылӧ, кытчӧдз морт ки отсӧгтӧг керӧсысь эз чукты из. Изйыс тупыльтчис да зурасис кокъясас, кодъяс вӧліны кытсюрӧ сёйысь, кытсюрӧ кӧртысь, да пазӧдіс найӧс.
Ӧти здукӧн кӧртыс, сёйыс, ыргӧныс, эзысьыс и зарниыс торпыригӧдз жугалісны да лоисны гожся гумла вылын кыд кодьӧсь. Тӧлыс нӧбӧдіс найӧс, и весиг бус чир эз коль наысь.
А изйысь, мый жугӧдіс тайӧ вӧчӧмторсӧ, лои ыджыд керӧс, и сійӧ тыртіс ставнас мусӧ.
Татшӧм вӧлі ӧксылӧн вӧтыс, а ӧні ми гӧгӧрвоӧдам сійӧс ӧксылы.
Ӧксыӧй, тэ — ӧксыяслӧн ӧксы. Енэжвывса Енмыс сетіс тэныд юралӧм, ыджыдалӧм, вын да нималӧм. Енмыс сетіс тэнад кипод улӧ быдлаын олысь йӧзӧс, мувывса пемӧсъясӧс, енэжвыв лэбачьясӧс да сувтӧдіс тэнӧ на вылын ыджыдӧн.
Зарни юрыс — тайӧ тэ.
Тэнад юралӧмыд бӧрти лоӧ мӧд юралӧм, но сійӧ оз ло тэнад кодь вына. Ыргӧныс висьталӧ коймӧд юралӧм йылысь, мый лоӧ став му пасьтала.
Нёльӧд юралӧмыс лоӧ кӧрт кодь зумыд.
Кыдзи кӧрт жуглӧ-изӧ да пазӧдӧ ставсӧ, тадзи жӧ сійӧ пондас жуглыны-пазӧдны став воддза юралӧмсӧ.
Нӧшта тэ аддзылін кокъяс да кок чуньяс, кодъясӧс вӧчӧма кытсюрӧ сёйысь, кытсюрӧ кӧртысь. Тайӧ висьталӧ сы йылысь, мый нёльӧд юралӧмыс юксяс. Но сэні лоӧ мыйтакӧ кӧртлӧн чорыдлуныс, кыдзи тэ аддзылін, мый сёй пытшкас вӧлі кӧрт.
Кок чуньясыс тшӧтш вӧліны кыткӧ кӧртысь, кыткӧ сёйысь, тадзи жӧ юралӧмыс лоӧ кыткӧ зумыд, кыткӧ жеб.
Тэ аддзылін, мый кӧртсӧ вӧлі сорлалӧма сёйкӧд. Тайӧ висьталӧ сы йылысь, мый ӧксыяс рӧдвужасясны ӧта-мӧдныскӧд, но войтыръясныслӧн оз ло ӧтувъялуныс, кыдзи кӧрт оз вермы сорласьны сёйкӧд.
Тайӧ юралӧмас ыджыдалысь ӧксыяс дырйи енэжвывса Ен сувтӧдас сэтшӧм юралӧм, кодӧс оз ло бырӧдӧма и оз ло сетӧма мукӧд войтырлы.
Тайӧ юралӧмыс жугӧдас да бырӧдас став воддза юралӧмсӧ, а ачыс лоӧ зумыд нэмъяс чӧж. Сійӧн тэ и аддзылін, мый изйыс чуктіс керӧсысь морт ки отсӧгтӧг да жугӧдіс кӧртсӧ, ыргӧнсӧ, сёйсӧ, эзысьсӧ да зарнисӧ.
Ыджыд Ен сетіс тӧдны ӧксылы, мый лоӧ локтана кадӧ.
Тайӧ вӧтыс збыль, и сійӧс гӧгӧрвоӧдӧмыс веськыд».
Сэки Навукодоносор ӧксы кымынь уськӧдчис Даниил водзӧ да копыртчыліс сылы. Сійӧ тшӧктіс аслас йӧзлы, медым ваясны Данииллы нянь вись да тшынӧдасны сылы чӧскыд ӧвтанторъяс.
Ӧксы шуис Данииллы: «Збыльысь, тіян Енныд — енъяслӧн Ен да ӧксыяслӧн Ыджыдыс. Сійӧ — гусятор Восьтысь, ӧд тэ вермин восьтны тайӧ гусяторсӧ».
Та бӧрти ӧксы вылӧ кыпӧдіс Даниилӧс, сетіс сылы уна дона козин, индіс сійӧс Вавилон нима ӧксыув муын юралысьӧн да вавилонса став тӧдысьыс вылын медыджыдӧн.
Но Данииллӧн корӧм серти ӧксы индіс Шадракӧс, Мешакӧс да Аведнегоӧс веськӧдлыны Вавилон нима ӧксыув муӧн, а ачыс Даниил кольччис кесъявны ӧксы керкаын.
Навукодоносор ӧксы тшӧктіс вӧчны квайтымын гырддза судта да квайт гырддза пасьта зарни бӧлбанӧс да сувтӧдны сійӧс Вавилон муӧ Дура ласта вылӧ.
Сійӧ тшӧктіс чукӧртны сатрапъясӧс*, ӧксыув муясын юралысь-веськӧдлысьясӧс, ӧксыӧс туйдӧдысьясӧс, озырлун видзысьясӧс, ёрдысьясӧс да чина йӧзӧс, медым гажӧдчӧмӧн нимӧдны бӧлбанӧс.
Сатрапъяс, ӧксыув муясын юралысь-веськӧдлысьяс, ӧксыӧс туйдӧдысьяс, озырлун видзысьяс, ёрдысьяс да чина йӧз чукӧртчисны, медым гажӧдчӧмӧн нимӧдны Навукодоносор ӧксыӧн сувтӧдӧм бӧлбанӧс. Найӧ ставныс сувтісны бӧлбан водзӧ.
Сэки юӧртысь гораа горӧдіс: «Кывзӧй, войтыръяс, чужанкотыръяс да быд кыла йӧз!
Кор ті кыланныд буксанлысь, пӧлянлысь, цитралысь, гуслилысь, арфалысь, тутсанлысь да мукӧд ворсанторлысь шысӧ, сэки кымынь уськӧдчӧй муас да копыртчылӧй зарни бӧлбанлы, кодӧс сувтӧдіс Навукодоносор ӧксы.
А коді кымынь уськӧдчӧмӧн оз копыртчыв бӧлбанлы, сійӧс дзик пыр шыбитасны ыпъялысь пачӧ».
Та вӧсна буксанлысь, пӧлянлысь, цитралысь, гуслилысь, арфалысь да мукӧд ворсанторлысь шысӧ кылігӧн войтыръяс, чужанкотыръяс да быд кыла йӧз кымынь уськӧдчӧмӧн копыртчылісны зарни бӧлбанлы, кодӧс сувтӧдіс Навукодоносор ӧксы.
Но тайӧ кадас некымын калдеяса морт локтісны да удтысисны иудейяс вылӧ.
Найӧ шуисны Навукодоносор ӧксылы: «Мед олас ӧксы нэмъяс чӧж!
Ӧксыӧй, тэ сетін сэтшӧм тшӧктӧм, мый быд морт, коді кылас буксанлысь, пӧлянлысь, цитралысь, гуслилысь, арфалысь, тутсанлысь да мукӧд ворсанторлысь шысӧ, мед кымынь уськӧдчӧмӧн копыртчылас зарни бӧлбанлы, а коді кымынь уськӧдчӧмӧн оз копыртчыв бӧлбанлы, сійӧс шыбитасны ыпъялысь пачӧ.
Но Шадрак, Мешак да Аведнего оз кывзысьны тэнсьыд. Тайӧ иудейяссӧ тэ индін веськӧдлыны Вавилон муӧн. Ӧксыӧй, найӧ оз кесъявны тэнад енъяслы да оз копрасьны тэӧн сувтӧдӧм зарни бӧлбанлы».
Навукодоносор ӧксы ёна скӧрмис да тшӧктіс вайӧдны ас дінас Шадракӧс, Мешакӧс да Аведнегоӧс, и найӧс вайӧдісны сы дінӧ.
Навукодоносор юаліс налысь: «Шадрак, Мешак да Аведнего, збыльысь-ӧ ті онӧ кесъялӧй менам енъяслы да онӧ копрасьӧй меӧн сувтӧдӧм зарни бӧлбанлы?
Но талунсянь лоӧй дасьӧсь. Кор ті кыланныд буксанлысь, пӧлянлысь, цитралысь, гуслилысь, арфалысь, тутсанлысь да мукӧд ворсанторлысь шысӧ, сэки кымынь уськӧдчӧмӧн копыртчылӧй меӧн сувтӧдӧм бӧлбанлы.
А онӧ кӧ копыртчылӧй, тіянӧс дзик пыр шыбитасны ыпъялысь пачӧ. Кутшӧм Ен сэки вермас мездыны тіянӧс менам киысь?»
Шадрак, Мешак да Аведнего вочавидзисны Навукодоносор ӧксылы: «Миянлы абу колана вочавидзны тэныд.
Миян Енным, кодлы ми кесъялам, вермас мездыны миянӧс ыпъялысь пачысь. Сійӧ мездас миянӧс и тэнад киысь, ӧксыӧй.
Но весиг кӧ оз мезды, тӧд, ӧксыӧй, мый ми огӧ кутӧй кесъявны тэнад енъяслы и огӧ копыртчылӧй тэӧн сувтӧдӧм зарни бӧлбанлы».
Сэки Навукодоносор ёна скӧрмис Шадрак, Мешак да Аведнего вылӧ, сылӧн весиг чужӧмыс вежсис. Сійӧ тшӧктіс ломтыны пач воддза дорысь сизим пӧв жарджыка на. Тышкайӧз пӧвстысь медся вынаясыслы сійӧ тшӧктіс кӧртавны Шадракӧс, Мешакӧс да Аведнегоӧс да шыбитны найӧс ыпъялысь пачӧ.
Найӧс кӧрталісны, сэсся шыбитісны ыпъялысь пачӧ став паськӧмнас да юрвевттьӧднас.
Ӧксылӧн чорыд тшӧктӧм серти пачсӧ вӧлі ломтӧмаӧсь сэтшӧм жара, мый биыс кувтӧдзныс сотіс сійӧ йӧзсӧ, кодъяс шыблалісны пачӧ Шадракӧс, Мешакӧс да Аведнегоӧс.
А кӧрталӧм Шадрак, Мешак да Аведнего усисны ыпъялысь пачӧ.
[Найӧ ветлӧдлісны би пытшкас, сьылісны-ошкисны Господь Енмӧс.
Азарий сувтіс кевмысьны би пытшкас. Сійӧ шуис:
— Господьӧй, миян батьяслӧн Енмӧй, Тэ ёна ошкана! Мед лоӧ ошкӧма-нимӧдӧма Тэнсьыд нимтӧ нэмъяс чӧж!
Тэ ставсӧ веськыда вӧчин миянкӧд, Тэнад уджъясыд веськыдӧсь, Тэнад туйясыд збыльӧсь, Тэнад мыждӧмыд веськыд.
Тэ веськыда мыждін миянӧс да миян батьяслысь вежа Ерусалим карсӧ, Тэ мыждін Аслад збыльыд серти, миян мыжъяс вӧсна став тайӧ сьӧкыдсӧ Тэ мӧдӧдін миянлы.
Ми мыж вӧчим, лёк вӧчим, Тэысь кежим, быдторйын мыжмим.
Тэнсьыд тшӧктӧмъястӧ ми эгӧ кывзӧй, на серти эгӧ олӧй. Ми эгӧ вӧчӧй Тэнад тшӧктӧмъясыд серти, а вӧчим кӧ, миянлы эськӧ бур вӧлі.
Став сьӧкыдсӧ, мый Тэ мӧдӧдін миянлы, ставсӧ, мый Тэ вӧчин миянкӧд, Тэ вӧчин веськыда мыждӧмыд серти.
Тэ сетін миянӧс лёк вӧрӧглӧн киӧ, Енсӧ ӧтдортысь мустӧм йӧзлӧн киӧ, мувывса медся скӧр ӧксылӧн киӧ, коді оз веськыда мыжды.
Ӧні ми огӧ вермӧй вомнымӧс восьтны.
Тэнад кесйӧгъяс да Тэныд юрбитысьяс водзын ми лоим янӧданторйӧн да лёкӧданторйӧн.
Но Аслад нимыд вӧсна эн сет миянӧс пыр кежлӧ вӧрӧг киӧ, эн орӧд миянкӧд кӧрталӧм йитӧдтӧ.
Эн босьт миянлысь Ассьыд буралӧмтӧ Ӧвраам ради, кодӧс Тэ радейтан, Аслад Исаак кесйӧг ради да Аслад вежа Израиль ради. Налы Тэ висьтавлін, мый Тэ рӧдмӧдан насянь чужысьясӧс, и найӧ лоӧны енэжвыв кодзувъяс мында, саридздор лыа мында.
Господьӧй, став войтыръяс пӧвстысь ми колим медся этшаӧн, став му пасьтала увтыртӧны миянӧс мыжъясным вӧсна. Ӧні миян абу ӧксы, абу пророк ни юралысь, огӧ вайӧй сотан висьяс, мукӧд висьяс ни вайӧмторъяс, огӧ тшынӧдӧй чӧскыд ӧвтанторъяс. Миян абу крам, кӧні эськӧ ми вермим Тэныд вись вайны, медым Тэ вӧлін бур сьӧлӧма миян дінӧ.
Но ми локтам Тэ дінӧ небзьӧм да рам сьӧлӧмӧн, корам Тэнӧ, сибӧд миянӧс.
Кыдзи Тэныд лоӧ сьӧлӧм сертиыд межъясӧс да ӧшъясӧс вись пыдди сотӧм, уна сюрс тшӧгӧдӧм баляясӧс вись пыдди вайӧм, тадзи жӧ миян висьным — небзьӧм да рам сьӧлӧмным — мед лоӧ Тэныд сьӧлӧм сертиыд, ӧд Тэ вылӧ лача кутысь оз янав.
Ӧні ми мунам Тэ бӧрся став сьӧлӧмсянь, Ми полам-вежавидзам Тэысь да корсьысям Тэнсьыд чужӧмбантӧ.
Господьӧй, эн янӧд миянӧс, но вӧч миянлы веськыдлуныд серти да Аслад ыджыд буралӧмыд серти. Мезды миянӧс Аслад шензьӧдана выннад. Господьӧй, Тэнад нимлы мед кыптас ошкӧмыс. Мед яналасны ставныс, Тэнад кесйӧгъяслы лёксӧ вӧчысьяс, найӧ мед ёна яналасны, налысь вынсӧ мед лоӧ жугӧдӧма. Мед найӧ тӧдмаласны, мый Тэ — Господь, ӧти Ен, и Тэнӧ нимӧдӧны ставныс ентыкӧлаас.
Ӧксылӧн кесйӧгъясыс, кодъяс шыбитісны тайӧ куим мортсӧ пачӧ, дугдывтӧг ломтісны пачсӧ мусирӧн, сирӧн, пакляӧн да увъясӧн. Пачсьыс кыпӧдчис нелямын ӧкмыс гырддза судта би сюръя. Биыс паськаліс да сотіс калдеяса йӧзӧс, кодъяс вӧліны пач дорас.
Господьлӧн анделыс вӧлі лэччӧма пачас, кор Азарийӧс да сылысь ёртъяссӧ шыбитісны сэтчӧ. Андел шыбитіс пачсьыс би сюръясӧ, а пач шӧрас мӧдӧдіс жувгысь уль тӧвру. Тадзи биыс эз инмыв на дінӧ, эз вӧч налы лёксӧ да эз шӧйӧвошты найӧс.
Сэки тайӧ куим мортыс быттьӧ ӧти вомӧн сьылісны пачын да ошкисны-нимӧдісны Енмӧс:
— Мед лоӧ ошкӧма Тэнӧ, Господьӧй, миян батьяслӧн Енмӧй! Мед лоӧ нимӧдӧма-ыдждӧдлӧма Тэнӧ нэмъяс чӧж, мед лоӧ ошкӧма Тэнсьыд дзирдлуна нимтӧ, мед лоӧ ыдждӧдлӧма Тэнсьыд вежа нимтӧ нэмъяс чӧж!
Мед лоӧ ошкӧма Тэнӧ вежа дзирдлуна крамад, мед лоӧ ошкӧма-нимӧдӧма Тэнӧ нэмъяс чӧж!
Мед лоӧ ошкӧма Тэнӧ, пыдӧстӧм ва Аддзысьӧс, херувимъяс вылын Пукалысьӧс, мед лоӧ ошкӧма-ыдждӧдлӧма Тэнӧ нэмъяс чӧж!
Мед лоӧ ошкӧма Тэнӧ юралан пуклӧсын пукалігад, мед лоӧ ошкӧма-ыдждӧдлӧма Тэнӧ нэмъяс чӧж!
Мед лоӧ ошкӧма Тэнӧ енэжвевтас, мед лоӧ ошкӧма-ыдждӧдлӧма Тэнӧ нэмъяс чӧж!
Ошкӧй Господьӧс, Сылӧн вӧчӧмторъясыс, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, Сылӧн анделъясыс, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, енэжъяс, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, став ваыс, мый енэжсьыс вылынджык, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, Сылӧн енэжвыв вынъясыс, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, шонді да тӧлысь, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, енэжвыв кодзувъяс, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, зэр да лысва, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, тӧвныр да бушков, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, би да гож, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, тӧвся кӧдзыд да гожся жар, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, лысва да пуж, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, вой да лун, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, югыд да пемыд, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, йи да кӧдзыд, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, пуж да лым, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, чардби да кымӧръяс, сьылӧй-ыдждӧдлӧй Сійӧс нэмъяс чӧж!
Мед ошкас Господьӧс муыс, мед сьылас-ыдждӧдлас Сійӧс нэмъяс чӧж!
Ошкӧй Господьӧс, керӧсъяс да ыбъяс, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, мувывса быдмӧгъяс, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, ва петанінъяс, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, саридзьяс да юяс, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, китъяс да ваын мукӧд уялысьяс, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, енэжвывса лэбачьяс, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, зверъяс да пемӧсъяс, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, став йӧзыс, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, Израиль войтыр, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, Сылы кесъялысь попъяс, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, Сылӧн кесйӧгъясыс, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, веськыда олысьяс, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, веськыд да рам сьӧлӧмаяс, сьылӧй-ыдждӧдлӧй Сійӧс нэмъяс чӧж!
Ошкӧй Господьӧс, Хананей, Азарий да Мисаэл, сьылӧй-ыдждӧдлӧй Сійӧс нэмъяс чӧж!
Сійӧ петкӧдіс миянӧс кулӧмаяслӧн оланінысь, мездіс миянӧс кулӧмыслӧн кабыр улысь. Сійӧ мездіс миянӧс ломтысян пачысь, видзис миянӧс биысь.
Ошкӧй Господьӧс, ӧд Сійӧ бур, Сылӧн буралӧмыс оз помасьлы!
Господьӧс бурӧ пуктысьяс, ошкӧй медыджыд Енмӧс, сьылӧй да ошкӧй Сійӧс, Сылӧн буралӧмыс оз помасьлы!]
Навукодоносор ӧксы [кор кыліс, мый найӧ сьылӧны,] ёна чуймис. Сійӧ зэв ӧдйӧ чеччис да юаліс аслас туйдӧдысьяслысь: «Эг-ӧ куим кӧрталӧм мортӧс ми шыбитӧй биӧ?»
Найӧ вочавидзисны: «Ӧксыӧй, тайӧ збыльысь тадзи!»
Ӧксы шуис: «Но ме аддза нёль мортӧс, найӧ кӧртӧдъястӧг ветлӧдлӧны би пытшкас, и биыс оз вермы вӧчны налы лёксӧ.
А нёльӧд мортыс — Ен Пи кодь».
Навукодоносор матыстчис ыпъялысь пач вом дорӧ да шуис: «Шадрак, Мешак да Аведнего, Медвылысса Енлӧн кесйӧгъяс, петӧй пачсьыс да локтӧй ме дінӧ!»
Сэки Шадрак, Мешак да Аведнего петісны би пытшкысь.
Сатрапъяс, ӧксыув муясын юралысь-веськӧдлысьяс да ӧксыӧс туйдӧдысьяс чукӧртчисны да аддзисны, мый биыс абу сотӧма Шадраклысь, Мешаклысь да Аведнеголысь вир-яйсӧ, абу чишкалӧма налысь юрсисӧ да паськӧмсӧ, весиг тшын дук на дінысь эз кыв.
Сэки Навукодоносор шуис: «Ошкӧм Шадраклӧн, Мешаклӧн да Аведнеголӧн Енлы, коді мӧдӧдіс Ассьыс анделсӧ да мездіс Ассьыс кесйӧгъяссӧ, Сы вылӧ лача кутысьясӧс. Найӧ эз кывзыны ӧксылысь тшӧктӧмсӧ, а сетісны вир-яйнысӧ сотны [биын]. Найӧ эз кутны кесъявны да копрасьны мукӧд енъяслы асланыс Енмыслы кындзи.
Ӧнісянь ме сета татшӧм индӧд войтыръяслы, чужанкотыръяслы да быд кыла йӧзлы: коді пондас омӧльтны Шадраклысь, Мешаклысь да Аведнеголысь Енсӧ, сійӧс мед кераласны, а сылысь керкасӧ мед пазӧдасны. Ӧд мӧд татшӧм Енмыс абу, коді эськӧ вермис тадзи мездыны».
Вылӧ кыпӧдіс ӧксы Шадракӧс, Мешакӧс да Аведнегоӧс Вавилон муын. [Сійӧ ыдждӧдліс найӧс да индіс найӧс веськӧдлыны аслас муын олысь иудейясӧн.]
Навукодоносор ӧксы юӧртіс став му вылас олысь войтыръяслы, чужанкотыръяслы да быд кыла йӧзлы: «Лӧнь олӧмыс мед содас тіян пӧвстын.
Меным нимкодь висьтавны тіянлы индысьпасъяс да шензьӧданаторъяс йылысь, мый Медвылысса Енмыс вӧчис меным.
Кутшӧм шензьӧданаӧсь Сылӧн индысьпасъясыс, кутшӧм вынаӧсь Сылӧн шензьӧданаторъясыс!
Сылӧн юралӧмыс — нэмъяс чӧж, Сылӧн ыджыдалӧмыс — чужысьяссянь чужысьясӧдз.
Ме, Навукодоносор, лӧня олі аслам керкаын, ме вӧлі шуда аслам ӧксы керкаын.
Но ме аддзылі вӧт, и сійӧ ёна повзьӧдіс менӧ. Кор ме куйлі вольпасьын, менам аддзылӧмъясӧй шӧйӧвоштісны менӧ.
Ме тшӧкті вайӧдны ме дінӧ вавилонса став тӧдысьсӧ, медым найӧ гӧгӧрвоӧдісны менсьым вӧтӧс.
Сэки локтісны туналысьяс, кимӧститчысьяс, калдеяса мывкыд йӧз да пемӧс мускӧн тунасьысьяс.
Ме висьталі налы ассьым вӧтӧс, но найӧ эз вермыны гӧгӧрвоӧдны сійӧс.
Медбӧрти локтіс ме дінӧ Даниил, код пытшкын вежа Енлӧн Лолыс. Данииллы вӧлі сетӧма менам Белтешацар енлысь нимсӧ.
Ме висьталі Данииллы ассьым вӧтӧс, шуи: “Белтешацар, тэ туналысьяс вылын ыджыдыс.
Ме тӧда, мый тэ пытшкын вежа Енлӧн Лолыс, и тэ верман восьтны гусяторъяс.
Гӧгӧрвоӧд меным вӧтӧс.
Вольпасьын куйлігӧн менам вӧлі татшӧм аддзылӧм: Му шӧрас сулаліс зэв джуджыд пу, пуыс вӧлі ыджыд да ён, йывнас сійӧ инмис енэжӧдзыс, тыдаліс му помӧдзыс.
Сылӧн коръясыс вӧліны мичаӧсь, сы вылын вотӧсыс вӧлі уна, и сысянь пӧткӧдчисны ставныс.
Сылӧн вуджӧр улӧ сайӧдчывлісны пемӧсъяс, сылӧн вожъяс вылын поздысьлісны енэжвывса лэбачьяс, и сысянь пӧткӧдчис быд ловъя олысь.
Вольпасьын куйлігӧн менам вӧлі нӧшта аддзылӧм, мый енэжсяньыс лэччис вежа андел-видзысь.
Сійӧ гораа юӧртіс: — Керыштӧй тайӧ пусӧ, увъяссӧ кералӧй, коръяссӧ нетшкӧй, вотӧссӧ шыблалӧй.
Сы улысь мед пышъясны пемӧсъяс, увъясыс вылысь мед лэбзясны лэбачьяс.
Но мырсӧ вужъяснас кольӧй муас, дорӧй сійӧс кӧрт да ыргӧн чепъясӧн. Енэжвывса лысваыс мед кӧтӧдас сійӧс видз вылын, пемӧсъяскӧд ӧтлаын мед олас турун пӧвстын.
Сылысь лоӧ босьтӧма морт вежӧрсӧ, а та пыдди лоӧ сетӧма пемӧс вежӧр, тадзи лоӧ сизим во чӧж.
Тадзи лоӧ андел-видзысьяслӧн тшӧктӧм серти, вежа анделъяслӧн шуӧм серти, мед ловъя олысьяс тӧдісны, мый Медвылыссаыс ыджыдалӧ мувывса став йӧзыс вылын, пуктӧ ӧксыӧ, кодӧс кӧсйӧ, пуктӧ юралысьӧ йӧз пӧвстысь медічӧтсӧ.
Со татшӧм вӧт аддзылі ме, Навукодоносор ӧксы.
А тэ, Белтешацар, ӧні гӧгӧрвоӧд меным сійӧс. Менам муын весиг ӧти тӧдысь эз вермы гӧгӧрвоӧдны сійӧс, но тэ верман, ӧд тэ пытшкын вежа Енлӧн Лолыс”».
Сэки Даниил, кодӧс шуисны Белтешацарӧн, кутшӧмкӧ кад кежлӧ шӧйӧвошліс, сылӧн мӧвпъясыс повзьӧдлісны сійӧс.
Ӧксы шуис сылы: «Белтешацар, тайӧ вӧтыс да сійӧс гӧгӧрвоӧдӧмыс мед оз повзьӧдлыны тэнӧ!»
Белтешацар вочавидзис: «Ыджыдӧй, тэнӧ мустӧмтысьяс да тэнад вӧрӧг йылысь кӧ эськӧ вӧлі тайӧ вӧтыс да сійӧс гӧгӧрвоӧдӧмыс!
Тэ аддзылін пу, коді вӧлі ыджыд да ён, йывнас сійӧ инмис енэжӧдзыс, тыдаліс му помӧдзыс. Сылӧн коръясыс вӧліны мичаӧсь, сы вылын вотӧсыс вӧлі уна, и сысянь пӧткӧдчисны ставныс. Сы улын олісны пемӧсъяс, сылӧн вожъяс вылын поздысьлісны енэжвывса лэбачьяс. Ӧксыӧй, тэ — тайӧ пуыс. Тэ лоин ыджыд да вына, тэнад ыджыдалӧмыд инмӧ енэжӧдзыс, тэнад юралӧмыд паськалӧ му помӧдзыс.
Ӧксыӧй, тэ аддзылін вежа андел-видзысьӧс, коді лэччис енэжсяньыс да шуис: “Керыштӧй тайӧ пусӧ да бырӧдӧй сійӧс, но мырсӧ вужъяснас кольӧй муас, дорӧй сійӧс кӧрт да ыргӧн чепъясӧн. Енэжвывса лысваыс мед кӧтӧдас сійӧс видз вылын, пемӧсъяскӧд ӧтлаын мед олас турун пӧвстын. Тадзи лоӧ сизим во чӧж”.
Ӧксыӧй, менам ыджыдӧй, тайӧ висьталӧ сы йылысь, мый дасьтӧма Медвылыссаыс тэныд.
Тэнӧ вӧтласны йӧз дінысь, и тэ пондан овны пемӧсъяскӧд ӧтлаын.
Ӧшкӧс моз тэнӧ пондасны вердны турунӧн, тэнӧ пондас кӧтӧдны лысва. Тадзи лоӧ сизим во чӧж, кытчӧдз тэ он гӧгӧрво, мый Медвылыссаыс ыджыдалӧ мувывса став йӧзыс вылын да пуктӧ ӧксыӧ, кодӧс кӧсйӧ.
А мый пуыслысь мырсӧ вужъяснас вӧлі тшӧктӧма кольны, — тайӧ висьталӧ сы йылысь, мый тэнсьыд юралӧмтӧ бӧр лоӧ бергӧдӧма тэныд, кор тэ гӧгӧрвоан, мый став вылас ыджыдалӧ енэжвывса Ен.
Та вӧсна, ӧксыӧй, кывзы менсьым туйдӧдӧмӧс. Аслад мыжъясысь вештысь веськыда вӧчӧмнад, аслад лёк вӧчӧмъясысь — гӧльяс дінӧ буралӧмнад.
Сэки, гашкӧ, водзӧ кутан бура овны».
Став тайӧ шуӧмыс иніс Навукодоносор олӧмын.
Колис дас кык тӧлысь. Ӧксы ветлӧдліс Вавилонын аслас ӧксы керка вевт вылын да шуаліс: «Со, ыджыд Вавилон кар, ӧксылӧн карыс. Сійӧс ме кыпӧді аслам ыджыд вынӧн, медым сійӧ вайис меным ошкӧм-нимӧдӧм».
Ӧксы эз на удит помавны сёрнисӧ, енэжсяньыс кыліс нин гӧлӧс шы: «Кывзы, Навукодоносор ӧксы, тэ воштан юралӧмтӧ.
Тэнӧ вӧтласны йӧз дінысь, и тэ пондан овны пемӧсъяскӧд ӧтлаын.
Ӧшкӧс моз тэнӧ пондасны вердны турунӧн. Тадзи лоӧ сизим во чӧж, кытчӧдз тэ он гӧгӧрво, мый Медвылыссаыс ыджыдалӧ мувывса став йӧзыс вылын да пуктӧ ӧксыӧ, кодӧс кӧсйӧ».
Дзик пыр инісны тайӧ кывъясыс Навукодоносор олӧмын: сійӧс вӧтлісны йӧз дінысь, ӧш моз сійӧ сёйис турун, сылысь вир-яйсӧ кӧтӧдіс лысва. Сылӧн юрсиыс быдмис да лои кутшлӧн борд кодь кузь, а гыжъясыс лоины лэбачлӧн гыжъяс кодьӧсь.
«Урчитӧм кад кольӧм мысти ме, Навукодоносор, лэпті синмӧс енэжланьыс, и ме бӧр вои ас вежӧрӧ.
Сэки ме аттьӧалі Медвылыссаӧс, ошки-нимӧді пыр Олысьӧс: — Сылӧн ыджыдалӧмыс — нэмъяс чӧж, Сылӧн юралӧмыс — чужысьяссянь чужысьясӧдз.
Мувывса олысьяс Сы водзын — нинӧм кодьӧсь.
Енэжвыв тышкакотыръяскӧд да мувывса олысьяскӧд Сійӧ вӧчӧ, кыдзи кӧсйӧ.
Некод оз вермы кутны Сылысь кисӧ да шуны: “Мый Тэ вӧчан?”
Кор ме бӧр вои ас вежӧрӧ, менӧ бара пондісны нимӧдны-ыдждӧдлыны, менӧ бара вӧлі пуктӧма ӧксыӧ.
Менӧ туйдӧдысьясӧй да менам чина йӧзӧй бӧр бергӧдчисны ме дінӧ. Менам юралӧмӧй зумыдмис, лои важсьыс на вынаджык.
Ӧні ме, Навукодоносор, ошка-нимӧда да ыдждӧдла енэжвывса Ӧксыӧс. Сылӧн уджъясыс збыльӧсь да туйясыс веськыдӧсь. Сійӧ вермӧ раммӧдны вылӧ кыпӧдчысьясӧс».
Валтасар ӧксы дасьтіс ыджыд гаж аслас сюрс чина йӧзлы да накӧд ӧтвылысь юис вина.
Юӧм бӧрас Валтасар тшӧктіс вайны зарни да эзысь дозмукъяс, мый сылӧн Навукодоносор батьыс петкӧдліс ерусалимса крамысь. Валтасар кӧсйис юны тайӧ дозмукъяссьыс аслас чина йӧзкӧд, гӧтыръясыскӧд да кесйӧг-гӧтыръясыскӧд.
Енлӧн крамысь петкӧдӧм зарни дозмукъяссӧ вайӧм бӧрын ӧксы аслас чина йӧзкӧд, гӧтыръясыскӧд да кесйӧг-гӧтыръясыскӧд пондісны юны сэтысь.
Найӧ юисны вина да ошкисны зарниысь да эзысьысь вӧчӧм енъясӧс, ыргӧнысь да кӧртысь вӧчӧм енъясӧс, пуысь да изйысь вӧчӧм енъясӧс.
Дзик сійӧ кадас тыдовтчис морт ки да пондіс гижны ӧксы керкалӧн еджыдӧн мавтӧм стенӧ, кытчӧ усис бисянь югыдыс. Ӧксы кор аддзис гижысь кисӧ, ёна повзис, чужӧмыс сылӧн кельдӧдіс, кокыс лигышмуніс, пидзӧсыс пондіс дзӧрны.
Ӧксы гораа горӧдіс, медым вайӧдісны сы дінӧ кимӧститчысьясӧс, калдеяса мывкыд йӧзӧс да пемӧс мускӧн тунасьысьясӧс.
Сійӧ шуис вавилонса тӧдысь-туналысьяслы: «Коді лыддяс да гӧгӧрвоӧдас стенмӧ гижӧмасӧ, сійӧс пасьтӧдасны пемыдгӧрд паськӧмӧ, сьыліас ӧшӧдасны зарни чеп, и сійӧ лоӧ менам муын чин серти коймӧд юралысьӧн».
Локтісны ӧксылӧн тӧдысьясыс, но эз вермыны лыддьыны гижӧмасӧ, эз вермыны гӧгӧрвоӧдны сійӧс ӧксылы.
Валтасар ӧксы ёна повзис, весиг чужӧмыс вежсис. Сылӧн чина йӧзыс тшӧтш шӧйӧвошисны.
Ӧксылӧн мамыс кывліс, мый йылысь сёрнитӧны ӧксы да сылӧн чина йӧзыс, и локтіс налӧн гажӧдчанінӧ.
Сійӧ шуис: «Мед олас ӧксы нэмъяс чӧж!
Ӧксыӧй, тэнад мӧвпъясыд мед оз майшӧдлыны тэнӧ, тэнад чужӧмыд мед оз кельдӧд!
Тэнад муын олӧ морт, код пытшкын вежа Енлӧн Лолыс. Тэнад батьыдлӧн веськӧдлан кадӧ на аддзисны, мый сы пытшкын эм сюсьлун, вежӧрлун да енъяслӧн кодь мывкыдлун. Навукодоносор ӧксы, тэнад батьыд, пуктіс сійӧс туналысьяс, кимӧститчысьяс, калдеяса мывкыд йӧз да пемӧс мускӧн тунасьысьяс вылын ыджыдӧн. Ӧд тайӧ Даниил пытшкас, кодӧс ӧксы нимтіс Белтешацарӧн, эм ыджыд мывкыдлун, вежӧрлун да сямлун гӧгӧрвоӧдны вӧтъяс, восьтны гусяторъяс да сьӧкыдлунъяс дырйи разьны гӧрӧдъяс.
Мед корасны Даниилӧс гӧгӧрвоӧдны гижӧмасӧ».
Сэки Даниилӧс вайӧдісны ӧксы дінӧ, и ӧксы шуис сылы: «Тэ-ӧ сійӧ Даниилыс, кодӧс Иуда муысь пленӧ босьтӧмаяскӧд вайӧдіс ӧксы, менам батьӧй?
Ме кывлі, мый тэ пытшкын Енлӧн Лолыс, и тэнад эм сюсьлун, вежӧрлун да ыджыд мывкыдлун.
Ме дінӧ вайӧдлісны тӧдысьясӧс да кимӧститчысьясӧс, медым лыддьыны тайӧ гижӧмасӧ да гӧгӧрвоӧдны сійӧс меным, но найӧ эз вермыны гӧгӧрвоӧднысӧ.
Но тэ йылысь ме кывлі, мый тэ верман гӧгӧрвоӧдны вӧтъяс да сьӧкыдлунъяс дырйи разьны гӧрӧдъяс.
Тэ кӧ верман лыддьыны тайӧ гижӧмасӧ да гӧгӧрвоӧдны сійӧс, тэнӧ пасьтӧдасны пемыдгӧрд паськӧмӧ, сьыліад ӧшӧдасны зарни чеп, и тэ лоан менам муын чин серти коймӧд юралысьӧн».
Даниил вочавидзис ӧксылы: «Козинъястӧ коль ас ордад либӧ сет мукӧдлы, а гижӧмасӧ ме лыддя тэныд, ӧксыӧй, да гӧгӧрвоӧда сійӧс.
Ӧксыӧй, Медвылысса Ен сетіс тэнад Навукодоносор батьлы юралӧм, ыджыдалан вын да ошкӧм-нимӧдӧм.
Сылӧн ыджыдалан вынысь, мый сетіс сылы Енмыс, полісны-тіралісны войтыръяс, чужанкотыръяс да быд кыла йӧз. Кодӧс ӧксы кӧсйис, сійӧс и виис, кодӧс кӧсйис, сійӧс ловйӧн колис, кодӧс кӧсйис, сійӧс кыпӧдіс, кодӧс кӧсйис, сійӧс лэдзис.
Но ачыс сійӧ вылӧ кыпӧдчис, чорзьӧдіс сьӧлӧмсӧ да пондіс этш тӧдтӧг ышнясьны, и сійӧс вӧлі шыбитӧма ӧксылӧн юралан пуклӧсысь, сійӧ воштіс ассьыс нималӧмсӧ. Сійӧс вӧтлісны йӧз дінысь, и сылӧн вежӧрыс лои пемӧслӧн кодь. Сійӧ оліс вӧлявывса осёлъяскӧд, ӧш моз сёйис турун, сылысь вир-яйсӧ кӧтӧдіс лысва. Тадзи вӧлі сыкӧд, кытчӧдз сійӧ эз гӧгӧрво, мый Медвылысса Енмыс ыджыдалӧ мувывса став йӧзыс вылын да пуктӧ ӧксыӧ, кодӧс кӧсйӧ.
Тэ, Валтасар, Навукодоносорлӧн пиыс, тӧдін ставсӧ тайӧс, но тэ эн раммӧдчы. Тэ кыпӧдчин енэжвывса Господьлы паныд. Тэныд вайисны Господьлӧн крамысь босьтӧм дозмукъяс, и тэ да тэнад чина йӧзыд, гӧтыръясыд да кесйӧг-гӧтыръясыд юинныд сэтысь вина. Тэ ошкин эзысьысь да зарниысь, ыргӧнысь да кӧртысь, пуысь да изйысь вӧчӧм енъясӧс, кодъяс оз аддзыны, оз кывны да оз гӧгӧрвоны.
А Енсӧ, кодлӧн киын тэнад олӧмыд да тэнад туйясыд, тэ эн ошкы.
Та вӧсна Сысянь вӧлі мӧдӧдӧма ки, коді гижис тайӧ кывъяссӧ.
Стенӧ гижӧма: “Мене, мене, текел, у-парсин”.
Тайӧ кывъясыслӧн вежӧртасыс татшӧм: “Мене” — Енмыс арталіс тэнсьыд юралан лунъястӧ да пуктіс налы пом.
”Текел” — тэнӧ веситӧма вески вылын и казялӧма, мый тэ кокньыд.
”У-парсин” — тэнсьыд мутӧ лоӧ юкӧма кык пельӧ да сетӧма Мидия да Персия войтыръяслы».
Та бӧрти Валтасарлӧн тшӧктӧм серти Даниилӧс пасьтӧдісны пемыдгӧрд паськӧмӧ, сьыліас ӧшӧдісны зарни чеп да юӧртісны, мый сійӧ лоӧ тайӧ муас чин серти коймӧд юралысьӧн.
Сійӧ жӧ войнас калдеяса Валтасар ӧксыӧс виисны, а ӧксыӧ пуктісны мидияса Дарийӧс, кодлы вӧлі квайтымын кык арӧс.
Дарий ӧксылы воис сьӧлӧм вылас кӧсйӧм индыны сё кызь сатрапӧс, кодъяс кутасны веськӧдлыны сылӧн муӧн. Наӧн веськӧдлыны сійӧ индіс куим ыджыдалысьӧс, кодъяс пӧвстысь ӧтиыс вӧлі Даниил. Сатрапъяслы колӧ вӧлі висьтавны вӧчӧм уджныс йылысь ыджыдалысьяслы, медым ӧксыӧс эз вӧв сьӧктӧдӧма.
Даниил торъяліс мукӧд ыджыдалысьясысь да сатрапъясысь, ӧд сы пытшкын вӧлі ыджыд мывкыдлун. Та вӧсна ӧксы мӧвпаліс индыны Даниилӧс веськӧдлыны став аслас муӧн.
Сэки ыджыдалысьяс да сатрапъяс пондісны корсьны помка, медым мыжавны Даниилӧс сыысь, мый оз колана ногӧн юрав.
Но найӧ нинӧм эз аддзыны, ӧд Даниил эз пӧръясь, а ставсӧ вӧчис веськыда. 
Найӧ шуисны, ми пӧ эгӧ аддзӧй некутшӧм помка мыжавны Даниилӧс, но, гашкӧ, сылӧн Енлӧн Индӧдысь мыйкӧ аддзам.
Ыджыдалысьяс да сатрапъяс ӧтвылысь локтісны ӧксы дінӧ да шуисны сылы: «Мед олас Дарий ӧксы нэмъяс чӧж!
Ӧксылӧн муын ыджыдалысьяс, ӧксыув муясын юралысь-веськӧдлысьяс, сатрапъяс да ӧксыӧс туйдӧдысьяс ас костаныс сёрнитчисны корны, медым ӧксы сетас-вынсьӧдас тшӧктӧм, мый комын лун чӧж колӧ кевмысьны сӧмын ӧксылы. А коді пондас кевмысьны мукӧд енлы либӧ мортлы, сійӧс мед шыбитасны левъяслӧн гуӧ.
Сідзкӧ, ӧксыӧй, сет да кырымав сэтшӧм тшӧктӧм, мый мидияса да персияса индӧдӧс моз сійӧс оз позь вежны-бырӧдны».
Дарий ӧксы кырымаліс тшӧктӧмсӧ.
Кор Даниил тӧдмаліс, мый ӧксы сетӧма татшӧм тшӧктӧм, сійӧ муніс гортас да кайис вылыс вежӧсас, кӧні ӧшиньясыс видзӧдісны Ерусалимлань. Воддза мозыс куимысь луннас сійӧ пидзӧсчанясьӧмӧн кевмысис аслас Енлы да ошкис Сійӧс.
Ыджыдалысьяс да сатрапъяс локтісны сэтчӧ да аддзисны, мый Даниил корӧ-кевмысьӧ аслас Енлы. Сэсся найӧ мунісны ӧксы дінӧ да шуисны сылы:
«Эн-ӧ тэ кырымав татшӧм тшӧктӧмсӧ, мый комын лун чӧж колӧ кевмысьны сӧмын тэныд, ӧксыӧй? А коді пондас кевмысьны мукӧд енлы либӧ мортлы, сійӧс мед шыбитасны левъяслӧн гуӧ».
Ӧксы вочавидзис: «Тайӧ тшӧктӧмыс вына, мидияса да персияса индӧдӧс моз сійӧс оз позь бырӧдны».
Сэки найӧ шуисны ӧксылы: «Иуда муысь пленӧ вайӧдӧм Даниил нинӧмӧ пуктӧ тэнӧ, ӧксыӧй. Сійӧ нинӧмӧ пуктӧ тэнсьыд кырымалӧм тшӧктӧмтӧ, куимысь луннас кевмысьӧ аслас Енлы».
Кор ӧксы кыліс тайӧ кывъяссӧ, сійӧ шогӧ усис да мӧвпыштіс мездыны Даниилӧс. Шонді пуксьытӧдзыс сійӧ корсьысис позянлун, медым мездыны сійӧс.
Но ыджыдалысьяс да сатрапъяс матыстчисны ӧксы дінӧ да шуисны сылы: «Тэ ӧд тӧдан, ӧксыӧй, мый мидияса да персияса индӧд серти ӧксыӧн вынсьӧдӧм тшӧктӧмсӧ оз позь вежны».
Сэки ӧксы тшӧктіс вайӧдны Даниилӧс да шыбитны сійӧс левъяслӧн гуӧ.
Ӧксы шуис Данииллы: «Тэнад Енмыд, кодлы тэ дугдывтӧг кесъялан, мед мездас тэнӧ!»
Вайисны ыджыд из да тупкисны гу вомсӧ. Аслас чунькытшнас да чина йӧзыслӧн чунькытшӧн ӧксы пуктіс сэтчӧ печать, медым Даниил йылысь шуӧм кывкӧртӧдсӧ эз вежны.
Ӧксы муніс аслас керкаӧ да сёйтӧгыс водіс узьны, весиг нинӧм эз тшӧкты вайны. Но унмовсьнысӧ эз вермы.
Асъя кыа петігӧн ӧксы чеччис да тэрмасьӧмӧн муніс левъяслӧн гу дорӧ. Гу дорӧ матыстчигӧн сійӧ нориник гӧлӧсӧн шыасис Даниил дінӧ: «Даниил, ловъя Енлӧн кесйӧг!
Вермис-ӧ Тэнад Енмыд, кодлы тэ дугдывтӧг кесъялан, мездыны тэнӧ левъясысь?»
Даниил вочавидзис ӧксылы: «Мед олас ӧксы нэмъяс чӧж!
Менам Енмӧй мӧдӧдіс Ассьыс анделсӧ, и сійӧ тупкис левъяслысь вомсӧ. Найӧ эз вермыны вӧчны меным лёксӧ, ӧд Ен водзас ме сӧстӧм, и тэ водзын, ӧксыӧй, ме нинӧмӧн эг мыжмы».
Даниил вӧсна ӧксы ёна нимкодясис да тшӧктіс лэптыны сійӧс гусьыс.
Сійӧс лэптісны, и сылӧн вир-яйысь эз аддзыны некутшӧм дойдалӧм, ӧд сійӧ лача кутіс аслас Ен вылӧ.
Ӧксы тшӧктіс вайӧдны сійӧ йӧзсӧ, кодъяс мыжалісны Даниилӧс. Найӧс, налысь челядьсӧ да гӧтыръяснысӧ шыбитісны левъяслӧн гуӧ.
Найӧ эз на воны гу пыдӧсӧдзыс, левъяс уськӧдчисны на вылӧ, косявлісны найӧс да вильӧдісны налысь лыяссӧ.
Та бӧрти Дарий ӧксы гижис став му вылас олысь войтыръяслы, чужанкотыръяслы да быд кыла йӧзлы: «Лӧнь олӧмыс мед содас тіянлы!
Ме тшӧкта, мый быдлаын менам юраланінын мед поласны-тіраласны Данииллӧн Енмысь. Сійӧ — Ловъя Ен, помтӧг олысь Ен, Сылӧн юралӧмыс зумыд, Сылӧн ыджыдалӧмыс помасьлытӧм.
Сійӧ мездӧ и дорйӧ, вӧчӧ шензьӧданаторъяс да индысьпасъяс енэжас и му вылас.
Сійӧ мездіс Даниилӧс левъяслӧн гыж улысь».
Дарий ӧксылӧн веськӧдлан кадӧ и персияса Кир ӧксылӧн веськӧдлан кадӧ Данииллӧн ставыс артмис.
Вавилонса Валтасар ӧксылӧн медводдза веськӧдлан воӧ, кор Даниил куйліс аслас вольпасьын, вӧтнас сылы вӧліны аддзылӧм-петкӧдчылӧмъяс.
Сійӧ гижис ассьыс вӧтсӧ.
Войся аддзылӧмын меным, Данииллы, вӧлі петкӧдлӧма, кыдзи енэжыслӧн нёль тӧв гызьӧдісны ыджыд саридз. Саридзсьыс петісны ыджыд нёль звер, мыгӧрнас найӧ торъялісны ӧта-мӧдсьыныс.
Медводдзаыс вӧлі лев кодь, сылӧн вӧліны кутшлӧн кодь бордъяс.
Ме аддзи, мый сылысь бордъяссӧ орӧдісны, сійӧс кыпӧдісны да мортӧс моз сувтӧдісны кок йылас, и сылы сетісны морт сьӧлӧм.
Мӧд зверыс вӧлі ош кодь. Сійӧ сулаліс бӧр кокъяс вылас, сылӧн вомас пинь костъясас чурвидзис куим ордлы.
Сылы вӧлі шуӧма: «Чеччы да сёй яйсӧ пӧттӧдзыд!»
Сэсся ме аддзи коймӧд зверӧс. Сійӧ вӧлі леопард кодь, мыш вылас сылӧн вӧлі лэбачлӧн кодь нёль борд. Тайӧ зверыслӧн вӧлі нёль юр, сылы вӧлі сетӧма ыджыдавны му вылын.
Нӧшта ме аддзи нёльӧд зверӧс. Сійӧ вӧлі зэв скӧр, ёна повзьӧдлана да ыджыд вынйӧра, сылӧн вӧліны ыджыд кӧрт пиньяс.
Сійӧ ставсӧ косявліс-ньылаліс, а коляссӧ таляліс кокъяснас.
Сійӧ торъяліс мукӧд воддза зверсьыс, сылӧн вӧлі дас сюр.
Менам видзӧдігкості тайӧ сюръяс пӧвстас быдмис ӧти ичӧт сюр. Дас сюр пӧвстсьыс куимсӧ вӧлі нетшыштӧма, медым сетны места быдмыны ичӧт сюрыслы. Тайӧ сюрыслӧн вӧліны мортлӧн кодь синъяс да ышнясьӧмӧн сёрнитысь вом.
Сэсся ме аддзи сувтӧдӧм юралан пуклӧсъяс, и важысянь Олысь пуксис.
Сылӧн паськӧмыс вӧлі лым кодь еджыд, юрсиыс — еджыд вурун кодь.
Сылӧн юралан пуклӧсыс вӧлі ыпъялысь би кодь, пуклӧс гӧгыльясыс вӧліны яра сотчысь би кодьӧсь.
Сы дінысь петіс-визувтіс биӧн ыпъялысь ю, Сылы кесъялісны сюрсъясӧн, Сы водзын сулалісны лыдтӧм-тшӧттӧм йӧз.
Ёрдысьяс пуксисны, и воссисны небӧгъяс.
Ме аддзи, мый ичӧт сюрыслӧн ышнясян кывъяс вӧсна тайӧ зверсӧ виисны, а сылысь шойсӧ шыбитісны биӧ.
Мукӧд зверыслысь тшӧтш вӧлі мырддьӧма юралӧмсӧ, но налы сетісны на овны урчитӧм кадӧдз.
Войся аддзылӧмын меным нӧшта вӧлі петкӧдлӧма, мый енэжвывса кымӧръяс вылын локтіс Морт Пи кодь. Сійӧ матыстчис важысянь Олысь дінӧ, Сійӧс вайӧдісны важысянь Олысь водзӧ.
Локтысьлы вӧлі сетӧма юралӧм да нималӧм, Сійӧс вӧлі пуктӧма ӧксыӧ, медым войтыръяс, чужанкотыръяс да быд кыла йӧз кесъялісны Сылы.
Сылӧн ыджыдалӧмыс — нэмъяс чӧж, Сылысь юралӧмсӧ некор оз ло вештӧма-бырӧдӧма.
Ме, Даниил, шӧйӧвоши. Тайӧ аддзылӧмъясыс повзьӧдісны менӧ.
Ме матыстчи сэні сулалысьяс пӧвстысь ӧти дінӧ да юалі сылысь, мый ставыс тайӧ лоӧ. Сійӧ висьталіс меным да гӧгӧрвоӧдіс тайӧ аддзывлӧмторсӧ.
«Тайӧ нёль ыджыд зверыс — нёль ӧксы, кодъяс му вылас сувтасны юравны.
Но юралӧмсӧ босьтас Медвылыссалӧн вежа войтырыс, и найӧ пондасны юравны помтӧг и нэмъяс чӧж».
Ме кӧсйи бурджыка тӧдмавны нёльӧд зверыс йылысь, коді торъяліс мукӧд зверсьыс. Сійӧ вӧлі ёна повзьӧдлана, сылӧн вӧліны кӧрт пиньяс да ыргӧн гыжъяс. Сійӧ ставсӧ косявліс-ньылаліс, а коляссӧ таляліс кокъяснас. Ме нӧшта кӧсйи тӧдны дас сюрыс йылысь, кодъяс вӧліны сылӧн юр вылас, да куим усьӧм сюр пыдди быдмӧм сюр йылысь. Тайӧ сюрыс лои мукӧд сюр дорысь ыджыдджык, и сылӧн вӧліны синъяс да ышнясьӧмӧн сёрнитысь вом.
Ме аддзи, мый тайӧ сюрыс тышӧ петіс вежа войтырлы паныд да вермис найӧс. Но локтіс важысянь Олысь да Медвылыссалысь вежа войтырсӧ суис веськыда мыждӧм. Сэсся воис кад налы юравны.
Сійӧ, кодлысь ме юаси, вочавидзис: «Нёльӧд зверыс висьталӧ нёльӧд юралӧм йылысь, сійӧ кутас торъявны став воддза юралӧмсьыс. Сійӧ пондас косявлыны-ньылавны ставнас мусӧ, талялас да пазӧдас сійӧс.
А дас сюрыс висьталӧны сы йылысь, мый тайӧ юраланінас пондасны юравны дас ӧксы. На бӧрти кутас юравны нӧшта ӧти ӧксы, сійӧ пондас торъявны воддза ӧксыясысь да чӧвтас куим ӧксыӧс. Сійӧ кутас сёрнитны Медвылыссалы паныд, кутас дзескӧдны Медвылыссалысь вежа войтырсӧ.
Сійӧ мӧвпыштас вежны вежа войтырлысь гажӧдчан лунъяссӧ да Индӧдсӧ. Вежа войтырӧс лоӧ сетӧма сылӧн кипод улӧ ӧти кадколаст кежлӧ, сэсся кык кадколаст кежлӧ да нӧшта кадколаст джын кежлӧ.
Сэсся пуксясны ёрдысьяс, и мырддясны сылысь юралӧмсӧ. Тайӧ юралӧмсӧ пыр кежлӧ лоӧ бырӧдӧма.
Енэжувса ӧксыяслысь юралӧмсӧ да ыджыдалан вынсӧ лоӧ сетӧма Медвылыссалӧн вежа войтырлы. Медвылыссалӧн юралӧмыс лоӧ нэмъяс чӧж, и став юралысьясыс пондасны кесъявны Сылы да кывзысьны Сылысь».
Та вылын помасьӧ менам висьталӧмӧй.
Ме, Даниил, ёна повзи, мӧвпъясӧй повзьӧдісны менӧ, весиг чужӧмӧй кельдӧдіс.
Но сійӧс, мый вӧлі восьтӧма меным, ме видзи аслам сьӧлӧмын.
Валтасар ӧксылӧн коймӧд веськӧдлан воӧ меным, Данииллы, воддза аддзылӧмыс бӧрын вӧлі нӧшта аддзылӧм.
Ме аддзи ачымӧс Суза изкарын, Элам нима ӧксыув муын, Улай ю дорын.
Ме лэпті синмӧс да аддзи ю дорын сулалысь межӧс.
Сылӧн вӧлі кык ыджыд сюр, сёрӧнджык быдмӧм сюрыс вӧлі ыджыдджык.
Ме аддзылі, мый тайӧ межыс люкасис рытыввывлань, войвывлань да лунвывлань, и мукӧд пемӧсъяс эз вермыны водзсасьны сыкӧд, некод эз вермы мездысьны сыысь.
Сійӧ вӧчис, мый кӧсйис, да ёна ышнясис.
Менам видзӧдігкості рытыввывсянь локтіс ай кӧза, кодлӧн кык син костас вӧлі ыджыд сюр. Муас инмавтӧг сійӧ котӧртіс му весьтӧдыс.
Ай кӧза веськӧдчис кык сюра межлань, коді сулаліс ю дорын, да скӧрпырысь котӧртіс сылы паныд.
Ме аддзылі, мый меж дінӧ матыстчигӧн сійӧ нӧшта на пузис скӧрысла, уськӧдчис меж вылӧ да чегис сылысь кыкнан сюрсӧ.
Межлӧн эз вӧв выныс водзсасьны ай кӧзакӧд. Ай кӧза уськӧдіс межӧс муас да таляліс сійӧс. Некод эз вермы мездыны сійӧс ай кӧзаысь.
Ай кӧза пондіс ёна ышнясьны.
Но кор сійӧ лои вынйӧра, сэки чегис да усис сылӧн ыджыд сюрыс, а сы пыдди петіс нёль сюр, найӧ чурвидзисны нёльнан му пельӧслань.
Ӧти сюрсянь петіс нӧшта ичӧт сюр. Сійӧ ыджыда быдмис да нюжаліс лунвывлань, асыввывлань да мича мулань.* Сюрыс быдмис енэжвывса тышкакотыръясӧдз, сэсся тышкакотыръяслысь юкӧнсӧ да кодзувъяслысь юкӧнсӧ шыбитіс му вылӧ да таляліс найӧс. Сюрыс ышнясьӧмӧн кыпӧдчис весиг тышкакотыръяслӧн Юралысьлы паныд, дугӧдіс йӧзсӧ Юралысьлы быдлунся вись вайӧмысь да куштіс-пазӧдіс Сылысь вежаинсӧ.
Быдлунся вись вайӧмысь ӧтдор тшӧтш тышкайӧзӧс налӧн лёк вӧчӧмныс вӧсна вӧлі сетӧма сы киӧ. Збыльсӧ нинӧмӧ пуктӧмӧн сійӧ вӧчис ассьыс уджсӧ, и сылӧн ставыс артмис.
Ме кывлі кык вежалысь сёрнисӧ. Ӧтиыс юаліс мӧдыслысь: «Дыр-ӧ на тадзи лоӧ? Быдлунся вись вайӧмсӧ дугӧдӧма, вежаинсӧ да тышкайӧзсӧ талялӧма, и лёкыс куштӧ-пазӧдӧ».
Мӧдыс вочавидзис меным: «Тайӧ нюжалас кык сюрс куимсё рыт да асыв, сэсся вежаинсӧ лоӧ сӧстӧммӧдӧма».
Кор ме, Даниил, кӧсйи гӧгӧрвоны тайӧ аддзылӧмсӧ, сэккості кодкӧ морт кодь сувтіс ме водзӧ.
Улай ю весьтысь ме кылі мортлысь гӧлӧс шысӧ. Сійӧ шуис: «Гавриил, гӧгӧрвоӧд сылы аддзылӧмсӧ!»
Гавриил матыстчис сэтчӧ, кӧні ме сулалі. Сэки ме ёна повзи да кымынь уськӧдчи муас.
Сійӧ шуис меным: «Мортӧй, тӧд, мый тэнад аддзылӧмыд бӧръя кад йылысь».
Кор сійӧ сёрнитіс мекӧд, ме садьӧс воштӧм морт моз кымынь куйлі му вылас.
Но сійӧ инмӧдчис ме дінӧ да сувтӧдіс менӧ кок йылӧ. Сійӧ шуис меным: «Ме восьта тэныд, мый лоӧ бӧръя скӧралан лунъясӧ.
Ӧд сійӧ, мый тэ аддзылін, висьталӧ урчитӧм бӧръя кад йылысь.
Тэныд петкӧдлӧм кык сюра межыс — тайӧ мидияса да персияса ӧксыяс.
Ай кӧзаыс — тайӧ грецияса ӧксы. Кык син костас ыджыд сюрыс — тайӧ грецияса медводдза ӧксы.
Кор тайӧ сюрыс чегис, сы пыдди петіс нёль сюр. Тайӧ петкӧдлӧ, мый тайӧ войтыр пӧвстсьыс петас нёль юралӧм, но найӧ оз лоны медводдза ӧксылӧн юралӧмыс кодь вынаӧсь.
Кор тайӧ юралӧмъясыс матыстчасны помлань да Енлы паныд кыпӧдчысьяс тыртасны лёк уджъясныслысь лыдсӧ, сэки локтас яндысьтӧм да наян ӧксы.
Сійӧ лоӧ зэв вына, но оз аслас вынӧн сійӧ вынсяв. Сылӧн ставыс кутас артмыны, сійӧ куштас-пазӧдас ставсӧ, бырӧдас вынаясӧс да вежа войтырӧс. Вежӧрлун да наянлун вӧсна сылӧн ставыс кутас артмыны, и сійӧ асьсӧ вылӧ кыпӧдас. Виччысьтӧг сійӧ унаӧс бырӧдас, тшӧтш ыджыдъяслӧн Ыджыдлы паныд кыпӧдчас. Но тайӧ ӧксысӧ лоӧ бырӧдӧма, сӧмын оз морт киӧн.
Сійӧ, мый тэ аддзылін рыт да асыв йылысь, — збыль.
Но тэ некодлы тайӧс эн восьт, ӧд аддзылӧмыс локтана кад йылысь».
Ме, Даниил, дзикӧдз эбӧсысь уси да виси некымын лун чӧж.
Сэсся чеччи да бара понді кесъявны ӧксылы.
Сійӧ, мый ме аддзылі, ёна чуймӧдіс менӧ, и гӧгӧрвоны эг вермы.
Мидияса Дарийӧс, Ахашверошлысь писӧ, вӧлі пуктӧма ӧксыӧ Калдея муын. Сылӧн медводдза веськӧдлан воӧ ме, Даниил, гӧгӧрвои Гижӧдысь, мый Ерусалим кар лоӧ овтӧминӧн сизимдас во чӧж. Та йылысь Господь водзвыв висьтавліс Еремей пророклы.
Ме шыаси Господь Ен дінӧ, кевмыси да видзалі, пасьталі шогалан паськӧм да коялі юрӧс пӧимӧн.
Ме кевмыси Господьлы, аслам Енлы, да висьтаси Сылы: «Господьӧй Енмӧй, Тэ ыджыд да повзьӧдана, Тэ видзан Ассьыд йитӧдтӧ да буралӧмтӧ на дінӧ, кодъяс радейтӧны Тэнӧ да олӧны Тэнад тшӧктӧмъяс серти.
Ми мыж вӧчим да лёкнога олім. Ми лёксӧ вӧчим да кыпӧдчим Тэныд паныд, ми ӧтдортім Тэнсьыд индӧд-тшӧктӧмъястӧ.
Ми эгӧ кывзӧй Тэныд кесъялысь пророкъясӧс, кодъяс шыасьлісны Тэнад нимӧн миян ӧксыяс дінӧ, юралысь-веськӧдлысьяс дінӧ, миян батьяс дінӧ да миян муын олысь став войтырыс дінӧ.
Господьӧй, Тэ веськыда вӧчан, а миянлы ставнымлы ӧні юръяндзим. Ми эновтім Тэнӧ, та вӧсна Тэ вӧтлін миянӧс Иуда муысь, Ерусалимысь да став Израиль муысь ылі да маті муясӧ.
Господьӧй, миянлы, миян ӧксыяслы, юралысь-веськӧдлысьяслы да миян батьяслы юръяндзим, ӧд ми мыж вӧчим Тэныд паныд.
Но Тэ, Господьӧй, миян Енмӧй, бур сьӧлӧма миян дінӧ. Ми кыпӧдчим Тэныд паныд, но Тэ прӧститан миянӧс. Ми эгӧ кывзысьӧй Тэнсьыд, Господьӧй, миян Енмӧй, эгӧ олӧй Тэнад тшӧктӧмъяс серти, мый Тэ сетін пророкъяс пыр, кодъяс кесъялісны Тэныд.
Ми, Израиль войтыр, торким Тэнсьыд Индӧдтӧ, бергӧдчим Тэысь да эгӧ кывзӧй Тэнӧ.
Миянӧс суис ёрӧм да мыждӧм, мый йылысь гижӧма Ен кесйӧг Мӧисейлӧн Индӧдын, ӧд ми мыж вӧчим Тэныд паныд.
Тэ збыльмӧдін Ассьыд кывтӧ, мый Тэ шуин миян йылысь да миян юралысь-веськӧдлысьяс йылысь. Тэ ыстін миян вылӧ ыджыд шог, татшӧм шогыс эз на вӧвлы му вылас, мый суис Ерусалим карӧс.
Миянӧс суисны сійӧ сьӧкыдлунъясыс, мый йылысь висьталӧма Мӧисейлӧн Индӧдын, но ми эгӧ шыасьӧй Тэ дінӧ, Господьӧй, миян Енмӧй, эгӧ дугдӧй вӧчны мыжсӧ, эгӧ кутчысьӧй Тэнад збыляд.
Господьӧй, Тэ видзӧдін миян бӧрся да ыстін тайӧ шогсӧ миян вылӧ. Господьӧй, миян Енмӧй, Тэ ставсӧ вӧчан веськыда, но ми эгӧ кывзысьӧй Тэнсьыд.
Господьӧй, миян Енмӧй, Аслад вына кинад Тэ петкӧдін Ассьыд войтыртӧ Египетысь. Тэ шедӧдін Аслыд нималӧм, и ӧніӧдз Тэ нималан, но ми мыж вӧчим да олім лёкнога.
Господьӧй, Аслад веськыдлуныд ради вешты Ассьыд скӧрлунтӧ да ярлунтӧ Аслад Ерусалим кар дорысь да Тэнад вежа керӧс дорысь.
Миян мыжъяс вӧсна да батьяснымлӧн лёк вӧчӧм вӧсна орччӧн олысь войтыръяс лёкӧдӧны Ерусалим карӧс да Тэнсьыд войтыртӧ.
Миян Енмӧй, ӧні кыв Аслад кесйӧглысь кевмӧм-корӧмсӧ. Господьӧй, Тэнад чужӧмбаныд мед югдӧдас пазӧдӧм вежаинтӧ. Вӧч тадзи Ас радиыд.
Енмӧй, копырт Ассьыд пельтӧ да кывзы, восьт Ассьыд синтӧ да видзӧдлы пазӧдӧм карным вылӧ, мый сиӧма Тэнад нимлы.
Ми кевмысям Тэныд огӧ асланым веськыдлун вылӧ лача кутӧмӧн, а Тэнад ыджыд буралӧмыд вылӧ лача кутӧмӧн.
Господьӧй, кывзы миянӧс!
Господьӧй, прӧстит миянӧс!
Господьӧй, кыв миянӧс да вӧч корӧмным серти! Аслад нимыд ради эн ньӧжмась, Енмӧй, ӧд Тэнад нимлы сиӧма Тэнсьыд картӧ да Тэнсьыд войтыртӧ».
Ме кевмыси да висьтаси аслам мыжъясысь да Израиль войтырӧйлӧн мыжъясысь, кевмыси Господьлы, аслам Енлы, Сылӧн вежа керӧс йылысь.
Менам кевмысигӧн петкӧдчис Гавриил, кодӧс ме водзынджык аддзылі. Рытъя вись ваян кадӧ сійӧ зэв ӧдйӧ лэбзис мелань да инмӧдчис ме дінӧ. Сійӧ сёрнитіс мекӧд да туйдӧдіс менӧ: «Даниил, ме локті, медым вежӧрсьӧдны тэнӧ.
Кор тэ пондін кевмысьны, Енмыс мӧдӧдіс кыв, и ме локті юӧртны сійӧс тэныд, ӧд тэ муса Енмыслы.
Сідзкӧ, сибӧд сьӧлӧмад тайӧ кывсӧ да гӧгӧрво сійӧ, мый аддзылін.
Сизимдасысь сизим во индӧма тэнад войтырлы да тэнад вежа карлы, медым дугӧдны лёкнога олӧмсӧ, пуктыны пом лёк вӧчӧмлы да вештыны мыжсӧ, медым пыр ыджыдаліс веськыдлун, медым вынсьӧдны аддзылӧм-петкӧдчылӧмъяс да пророклысь кывсӧ, мавтыштны Вежасьыс-вежаинсӧ.
Тӧд да гӧгӧрво, мый сійӧ кадсяньыс, кор петас тшӧктӧм выльысь сувтӧдны Ерусалим кар, да сійӧ кадӧдзыс, кор локтас мавтыштӧм Ӧксы, коляс сизимысь сизим во да квайтымын кыкысь сизим во.
Сьӧкыд кадӧ Ерусалим карсӧ лоӧ выльысь кыпӧдӧма, изэрдъяссӧ да стенъяссӧ лоӧ выльысь вӧчӧма.
Квайтымын кыкысь сизим во мысти Мавтыштӧмаӧс лоӧ виӧма, и Сыкӧд некод оз коль.
А карсӧ да вежаинсӧ бырӧдас локтана юралысьлӧн войтырыс. Тайӧ юралысьлӧн помыс лоӧ ва ойдӧм кодь, и тыш помӧдзыс лоӧ пазӧдӧм-бырӧдӧм.
Локтана юралысьыс унакӧд кӧрталас йитӧд сизим во кежлӧ. Сизим воыслӧн джын кадас сійӧ дугӧдас вись вайӧм. Вежаинлӧн вевт вылас пеж зывӧкыс лоӧ сэтчӧдз, кытчӧдз Енлӧн водзвыв шуӧмыс серти оз ло бырӧдӧма асьсӧ бырӧдысьсӧ».
Персияса Кир ӧксылӧн коймӧд веськӧдлан воӧ Данииллы, кодӧс шуисны Белтешацарӧн, вӧлі Енсянь восьтӧм.
Тайӧ восьтӧмыс вӧлі збыль, но сійӧс сьӧкыд вӧлі гӧгӧрвоны.
Даниил гӧгӧрвоис восьтӧмсӧ аддзылӧм пыр.
Сійӧ кадас ме, Даниил, шогси куим вежон чӧж.
Тайӧ куим вежон чӧжыс чӧскыд сёян эг сёйлы, яй да вина вомам эг босьтлы, юрӧс выйӧн эг мавтлы.
Медводдза тӧлысьлӧн кызь нёльӧд лунӧ ме вӧлі ыджыд Тигр ю дорын. Ме лэпті синмӧс да аддзи шабді паськӧма мортӧс, кодлӧн коскыс вӧлі вӧнялӧма зарни вӧньӧн. Зарниыс вӧлі Уфазысь вайӧм зарни кодь.
Сылӧн вир-яйыс вӧлі хризолит из кодь, чужӧмыс — чардби кодь, синмыс — би кодь, киыс да кокыс югъялісны весалӧм ыргӧн моз, гӧлӧс шыыс вӧлі уна лыда йӧзлӧн шы кодь.
Ме, Даниил, сӧмын ӧтнамӧн аддзылі тайӧ петкӧдчылӧмсӧ, а мекӧд орччӧн сулалысь йӧзыс эз аддзывны сійӧс, но найӧс ыджыд полӧм босьтіс, и найӧ котӧртісны да дзебсисны.
Ме коли ӧтнамӧн. Тайӧ ыджыд петкӧдчылӧмсӧ аддзылігӧн ме дзикӧдз вынтӧмми да лигышмуні, менам чужӧмӧй быгаліс.
Сылысь гӧлӧс шысӧ кылігӧн ме садьӧс вошті да кымынь уси муас.
Но кодлӧнкӧ киыс инмӧдчис меӧ да лэптіс менӧ, ме сувті пидзӧс вылӧ да киӧн мыджси муас.
Сійӧ шуис меным: «Даниил, тэ муса Енмыслы.
Гӧгӧрво сійӧ кывъяссӧ, мый ме висьтала тэныд. Чеччы да сувт кок вылад, ӧд менӧ мӧдӧдӧма тэ дінӧ».
Кор сійӧ шуис тайӧ кывъяссӧ, ме чеччи дзӧригтыр.
Сійӧ шуис меным: «Эн пов, Даниил!
Тэнсьыд кевмӧмтӧ кылӧма медводдза лунсяньыс, кор тэ раммӧдін сьӧлӧмтӧ аслад Ен водзын, медым гӧгӧрвоны сійӧ, мый тэ аддзылін. И ме локті тэнад кевмӧм вӧсна.
Но Персия муын юралысь андел кызь ӧти лун чӧж водзсасис мекӧд, и меным ковмис кольччыны сэтчӧ персияса ӧксыяс дінӧ. Сэсся Микаил, медыджыд юралысь анделъясысь ӧти, локтіс отсавны меным.
Ӧні ме локті, медым юӧртны тэныд, мый лоӧ тэнад войтырыдкӧд бӧръя кадӧ. Ӧд сійӧ, мый тэ аддзылін, висьталӧ бӧръя кад йылысь».
Кор сійӧ висьталіс меным тайӧс, ме эг лысьт юрӧс лэптыны, эг вермы весиг кыв шуны.
Но кодкӧ морт кодь инмӧдчис менам вомдорӧ, и ме понді сёрнитны. Ме шуи ме водзын сулалысьлы: «Ыджыдӧй, сыысь, мый ме аддзылі, менӧ топӧдіс чорыд дой, и ме дзикӧдз вынтӧмми.
Ыджыдӧй, кыдзи нӧ меным, тэнад кесйӧглы, сёрнитны тэкӧд?
Ме дзикӧдз вынтӧмми, весиг лолӧй оз шед».
Сэки сійӧ, коді вӧлі морт кодь, бара инмӧдчис меӧ да вынсьӧдіс менӧ. Сійӧ шуис меным: «Эн пов, тэ муса Енмыслы! Лӧнь олӧм тэныд, ёнмӧдчы!»
Кор сійӧ сёрнитіс мекӧд, ме вынсялі да шуи сылы: «Ыджыдӧй, водзӧ висьтав меным, тэ ӧд вынсьӧдін менӧ».
Сійӧ шуис: «Тӧдан-ӧ, мыйла ме локті тэ дінӧ?
Ӧні ме бӧр муна, медым вермасьны Персия муын юралысь анделкӧд.
А кор ме верма сійӧс, сэки мекӧд вермасьны локтас Греция муын юралысь андел.
И тайӧ тышас некод оз отсав меным Микаил, тіян юралысь анделныд, кындзи. Но ме висьтала тэныд, мый гижӧма Збыльыслӧн небӧгас.
Мидияса Дарийлӧн медводдза веськӧдлан воӧ ме отсалі Микаиллы да дорйи сійӧс.
Ӧні ме висьтала тэныд збыльсӧ. Персия муын пондасны сьӧрсьӧн-бӧрсьӧн юравны нӧшта куим ӧксы, а сэсся лоӧ нёльӧд, и сійӧ лоӧ медся озыр. Озырлуныс вӧчас сійӧс вынаӧн, и став йӧзсӧ сійӧ кыпӧдас Грециялы паныд.
Сійӧ кадас кыпӧдчас вына ӧксы, коді пондас юравны ыджыд вынӧн да кутас вӧчны, мый кӧсъяс.
Но сылӧн юралӧмыс ӧдйӧ киссяс да разалас нёльнан му пельӧсӧ. Сылӧн юралӧмыс оз вудж сысянь чужысьяслы, и оз нин ло сэтшӧм вына, кутшӧм вӧлі сылӧн юралігӧн.
Сылысь юралӧмсӧ лоӧ вужнас нетшыштӧма да сетӧма мукӧдыслы.
Лунвывса ӧксы лоӧ зэв вына, но сылӧн тышкайӧзӧн веськӧдлысьяс пӧвстысь ӧти лоӧ сыысь на вынаджык, и тайӧ веськӧдлысьлӧн кипод улын муыс лоӧ лунвывса ӧксылӧн дорысь унджык на.
Коляс мыйтакӧ во, и найӧ кӧрталасны йитӧд. Медым вынсьӧдны тайӧ йитӧдсӧ, лунвывса ӧксылӧн нылыс петас верӧс сайӧ войвывса ӧксы сайӧ. Но тайӧ аньыс оз вермы видзны тайӧ йитӧдсӧ, и сылӧн верӧсыс, войвывса ӧксы, воштас юралӧмсӧ. Бӧрынджык тайӧ аньсӧ, сылысь отсасьысьяссӧ да сылысь батьсӧ лоӧ бырӧдӧма.
Но тайӧ аньыслӧн чужанвужйысь петӧм морт лоӧ лунвывса ӧксыӧн, и сійӧ петас тышӧ войвывса ӧксылӧн тышкайӧзлы паныд. Сійӧ пырас налӧн изкарӧ, уськӧдчас на вылӧ да вермас найӧс. 
Налысь енъяссӧ, бӧлбанъяссӧ да эзысь-зарниысь вӧчӧм дона дозмук-кӧлуйсӧ сійӧ босьтас аскӧдыс да нуас Египетӧ. Та бӧрын некымын во чӧж сійӧ оз петавлы тышӧ войвывса ӧксылы паныд.
Войвывса ӧксы уськӧдчас лунвывса ӧксылӧн му вылӧ, но бӧр бергӧдчас аслас муӧ.
Сэсся войвывса ӧксылӧн пияныс чукӧртасны уна лыда тышкайӧзӧс, и на пиысь ӧти тайӧ тышкайӧзыскӧд петас тышӧ. Ойдӧм ва моз найӧ ыльӧбтасны-уськӧдчасны лунвывса ӧксылӧн изкар вылӧ.
Лунвывса ӧксы ёна скӧрмас да тышӧ петас войвывса ӧксылы паныд. Войвывса ӧксы чукӧртас уна лыда тышкайӧзӧс, но лунвывса ӧксы аслас тышкайӧзкӧд пасьвартас найӧс.
Вӧрӧгсӧ пасьвартӧм бӧрын лунвывса ӧксы пондас ышнясьны. Сы вылӧ видзӧдтӧг, мый лунвывса ӧксы бырӧдас дас сюрсъясӧс, сылӧн оз ло тырвыйӧ вермӧм.
Войвывса ӧксы выльысь чукӧртас воддза дорсьыс на унджык тышкайӧзӧс. Кымынкӧ во мысти бура дасьтысьӧмӧн сійӧ бара уськӧдчас аслас уна лыда тышкайӧзкӧд лунвывса ӧксы вылӧ.
Сійӧ кадас унаӧн кыпӧдчасны лунвывса ӧксылы паныд. Тэнад Израиль войтырыд пӧвстысь тшӧтш кыпӧдчасны сылы паныд лёк вӧчысьяс, медым иніс Енсянь восьтӧмыс. Но найӧс лоӧ вермӧма.
Сэсся локтас войвывса ӧксы, кар гӧгӧрыс вӧчас тымӧд да босьтас изкарсӧ. Лунвывса ӧксылӧн тышкайӧзыс, весиг медвынаясыс, оз вермыны водзсасьны сыкӧд.
Войвывса ӧксы кутас вӧчны, мый кӧсъяс, и некод оз вермы сылы паныд сувтны. Аслас тышкайӧзкӧд сійӧ локтас мича муӧ да бырӧдас сійӧс.
Сійӧ мӧвпыштас уськӧдчыны аслас став тышкайӧзкӧд лунвывса му вылӧ. Медым бырӧдны лунвывса ӧксылысь юралӧмсӧ, войвывса ӧксы кӧрталас йитӧд лунвывса ӧксыкӧд да сетас сылы гӧтыр пыдди нывсӧ. Но войвывса ӧксылӧн мӧвпыштӧмаыс оз артмы, оз вай сылы бурсӧ.
Войвывса ӧксы мӧдӧдчас саридздорса муясӧ и уна му босьтас аслас кипод улӧ. Но мукӧд тышкайӧзлӧн юралысь пуктас пом войвывса ӧксылӧн вывтіасьӧмлы и сылысь вывтіасьӧмсӧ бергӧдас сылы паныд.
Сэсся войвывса ӧксы бӧр бергӧдчас аслас муӧ да уськӧдчас изкаръяс вылӧ, но сійӧс пасьвартасны, и сійӧ кулас.
Сы пыдди ӧксыӧ пуксяс мӧд морт, коді мӧдӧдас нартитысьӧс мича муӧ, медым чукӧртны вот. 
Дженьыд кад мысти тайӧ ӧксысӧ лоӧ бырӧдӧма, но оз тышын, оз сылы паныд кыпӧдчӧм дырйи.
Бырӧдӧм ӧксы пыдди пуксяс юравны мустӧм морт, кодӧс ӧксы туйӧ оз пуктыны. Сійӧ локтас виччысьтӧг да наянлунӧн пуксяс ӧксыӧ.
Ойдӧм ва моз локтысь тышкайӧзӧс лоӧ кылӧдӧма сы водзысь. Тадзи лоӧ пасьвартӧма найӧс. Лоӧ пасьвартӧма тшӧтш Енлӧн йитӧд вӧсна кывкутысьӧс. *
Войвывса ӧксы кӧрталас йитӧд мукӧд войтыръяскӧд, сэсся ылӧдлас найӧс. Сійӧ петас тышӧ этша лыда йӧзкӧд, но шедӧдас вермӧм да зумыдмӧдас ассьыс юралӧмсӧ.
Сійӧ уськӧдчас вотӧса муясын лӧня олысь войтыръяс вылӧ да пондас вӧчны сійӧ, мый эз вӧчлыны сылӧн батьясыс да пӧльясыс. 
Войтыръяслысь мырддялӧм эмбурсӧ да озырлунсӧ сійӧ юклас аслас йӧзлы. Сійӧ мӧвпыштас уськӧдчыны изкаръяс вылӧ. Но тадзи лоӧ сӧмын дженьыд кад чӧж.
Войвывса ӧксы чукӧртас уна лыда тышкайӧзӧс да став выннас повтӧг петас тышӧ лунвывса ӧксылы паныд. Лунвывса ӧксы чукӧртас нӧшта на унджык да вынаджык тышкайӧзӧс, но сылы паныд гуся сёрнитчӧм вӧсна оз вермы войвывса ӧксыӧс.
Ӧд лунвывса ӧксыкӧд ӧти пызан сайын пукалысьяс кыпӧдчасны сылы паныд, медым бырӧдны сійӧс. Сылӧн тышкайӧзыс разаласны, и унаӧс лоӧ виӧма.
Ӧти пызан сайын пукалӧмӧн кык ӧксы кутасны ылӧдлыны ӧта-мӧднысӧ, ӧд налӧн сьӧлӧмныс тырӧма лёк мӧвпъясӧн. Налӧн нинӧм оз артмы, ӧд нэм помыс лоӧ сӧмын индӧм кадӧ.
Войвывса ӧксы бӧр мӧдӧдчас аслас муӧ ыджыд озырлунӧн. Сійӧ збыльмӧдас вежа йитӧдлы паныд мӧвпыштӧмасӧ, а сэсся бӧр бергӧдчас аслас муӧ.
Урчитӧм кадӧ войвывса ӧксы бара мӧдӧдчас лунвыв муӧ, но сылӧн нинӧм оз артмы. Сы вылӧ уськӧдчасны киттимса корабльяс вылын локтысьяс, сійӧ повзяс наысь да бӧр бергӧдчас. Ассьыс скӧрлунсӧ сійӧ кисьтас вежа йитӧд вылӧ. Гортас бергӧдчӧм бӧрын сійӧ сёрнитчас вежа йитӧд эновтысьяскӧд.
Сійӧ мӧдӧдас ассьыс тышкайӧзсӧ, и найӧ пежаласны ыджыд да вежа крамсӧ. Найӧ дугӧдасны сэні быдлунся вись вайӧм да сувтӧдасны сэтчӧ пеж зывӧксӧ.
Йитӧд торкысьясӧс сійӧ ылӧдлӧмӧн кыскас ас дінас. 
А найӧ, кодъяс тӧдӧны ассьыныс Енсӧ, лоӧны зумыдӧсь да кутчысясны Енлӧн Индӧдас.
Израиль войтырлӧн мывкыд веськӧдлысьяс унаӧс туйдӧдасны-велӧдасны, но дженьыд кадӧн на пиысь кодсюрӧӧс виасны шыпуртӧн, сотасны, нуӧдасны пленӧ, налысь мырддясны эмбурнысӧ. 
Сьӧкыдсӧ нуигӧн найӧ оз кольны отсӧгтӧг, но уна йӧз наянпырысь ӧтувтчасны накӧд.
Мывкыд веськӧдлысьясысь кодсюрӧ куласны, медым на пиысь ловйӧн кольӧмаясӧс тӧдмавны да весавны-сӧстӧммӧдны бӧръя кад кежлӧ, ӧд урчитӧм кадыс эз на во.
Войвывса ӧксы пондас вӧчны, мый кӧсъяс. Сійӧ пондас ышнясьны да пуктас асьсӧ став енъяссьыс вылӧджык на, пондас лёкӧдны-омӧльтны медыджыд Енмӧс. Сылӧн ставыс кутас артмыны, кытчӧдз оз кус Енлӧн скӧрлуныс. Ӧд мый вӧлі водзвыв шуӧма, ставыс збыльмас.
Сійӧ оз кут пыдди пуктыны аслас батьяслысь енъяссӧ, аньяслысь муса енсӧ и некутшӧм енмӧс, но асьсӧ пуктас ставсьыныс медвылӧ.
Сійӧ пондас ыдждӧдлыны изкаръяслысь енсӧ, кодӧс эз тӧдлыны сылӧн батьясыс. Тайӧ енмыслы сійӧ ваяс зарни, эзысь, дона изъяс да мукӧд дона козинъяс. На отсӧгӧн, кодъяс юрбитӧны тайӧ енмыслы, сійӧ ёнмӧдас ассьыс изкаръяссӧ. Сійӧ кутас нимӧдны тайӧ енмыслы юрбитысьясӧс, пуктас найӧс веськӧдлысьясӧ да сетас налы козин пыдди муяс.
Бӧръя кадас лунвывса ӧксы петас тышӧ войвывса ӧксылы паныд. Ыджыд тӧвныр моз войвывса ӧксы уськӧдчас сы вылӧ аслас тарантасъясӧн, вӧвъясӧн да корабльясӧн. Ойдӧм ва моз сійӧ ыльӧбтас-уськӧдчас уна му вылӧ.
Сэсся сійӧ петас тышӧ мича мулы паныд, и унаӧн куласны. Сылӧн киысь мездмасны сӧмын Эдомын да Моавын олысьяс, тшӧтш унаӧн аммон войтыр пӧвстысь.
Сійӧ нюжӧдас ассьыс кисӧ уна му вылӧ. 
Сылӧн киысь оз мездмы весиг Египет.
Сійӧ босьтас Египетысь зарни, эзысь да став мукӧд озырлунсӧ. 
Ливияса да эфиопияса войтыр сетчасны сылӧн кипод улӧ.
Но войвывсянь да асыввывсянь воӧм юӧръяс повзьӧдасны сійӧс, и сійӧ петас ыджыд скӧрлунӧн, медым вины да дзикӧдз бырӧдны унаӧс. Сійӧ сувтӧдас ассьыс дӧрачомъяссӧ саридз да мича вежа керӧс костӧ. 
Но сылы воас пом, и некод сылы оз отсав.
Сійӧ кадас локтас Микаил, ыджыд юралысь андел, тэнсьыд войтыртӧ дорйысь.
Сэки пуксяс сьӧкыд кад, кутшӧм эз на вӧвлы войтыръяслӧн олан кадӧ.
Но тэнад войтыр пӧвстысь мездмасны ставныс, кодъяслысь нимсӧ гижӧма Небӧгӧ.
Сэки гуалӧмаяс пӧвстысь унаӧн ловзясны: ӧтияс — помтӧм олӧм вылӧ, мӧдъяс — янӧдӧм да помтӧм мустӧмтӧм вылӧ.
Нэмъяс чӧж мывкыдаяс пондасны дзирдавны югыд кыа моз, веськыдлунас унаӧс туйдӧдысьяс — кодзувъяс моз.
Но тэ, Даниил, эн восьт тайӧ кывъяссӧ, а тупкы тайӧ небӧгсӧ печатьӧн, кытчӧдз оз во бӧръя кадыс.
Сэки унаӧн лыддясны сійӧс, и налӧн тӧдӧмлуныс содас».
Сэсся ме, Даниил, аддзи кык сулалысьӧс: ӧтиыс сулаліс ю таладорас, мӧдыс — ю мӧдлапӧлас.
Ӧтиыс на пиысь юаліс шабді паськӧма анделлысь, коді сулаліс ю весьтын: «Дыр-ӧ на виччысьны сійӧ кадсӧ, кор помасясны тайӧ шензьӧданаторъясыс?»
Ме аддзи шабді паськӧма анделӧс, коді сулаліс ва весьтын. Веськыд да шуйга кисӧ енэжланьыс кыпӧдӧмӧн сійӧ кыв сетіс помтӧг Олысь водзын: «Коляс ӧти кадколаст, сэсся кык кадколаст да нӧшта кадколаст джын. Кор вежа войтырӧс лоӧ разӧдӧма, сэки ставыс тайӧ инас».
Ме кывзі тайӧ кывъяссӧ, но эг гӧгӧрво. Ме юалі: «Ыджыдӧй, а мый лоӧ та бӧрти?»
Но сійӧ шуис меным: «Мун, Даниил.
Тайӧ кывъяссӧ оз позь восьтны, найӧс лоӧ тупкӧма печатьӧн бӧръя кадӧдзыс.
Унаӧс лоӧ весалӧма-сӧстӧммӧдӧма да тӧдмалӧма, но лёк йӧз кутасны водзӧ вӧчны лёксӧ.
Лёк йӧз оз гӧгӧрвоны тайӧс, а мывкыдаяс гӧгӧрвоасны.
Сійӧ кадсяньыс, кор дугӧдасны быдлунся вись вайӧм да сувтӧдасны крамӧ пеж зывӧксӧ, коляс сюрс да кыксё ӧкмысдас лун.
Шуда сійӧ, коді помӧдзыс виччысяс сюрс да куимсё комын вит лунсӧ.
А тэ мун аслад туйӧд помӧдзыс. Тэ кутан шойччыны, а сэсся ловзян, медым босьтны тэныд вичманасӧ нэм помасигӧн».
[Вавилонын оліс Йояким нима морт.
Сійӧ босьтіс гӧтырӧ Хилкилысь Сусанна нывсӧ. Сусанна вӧлі зэв мича, Енсьыс полысь ань.
Сылӧн бать-мамыс вӧліны веськыда олысьяс, и ассьыныс нывсӧ найӧ велӧдісны Мӧисейлӧн Индӧдӧ.
Йояким вӧлі зэв озыр, сылӧн керка дорас вӧлі сад йӧр.
Йояким ордӧ чукӧртчывлісны иудейяс, ӧд сійӧ вӧлі мукӧд дорсьыс медся нималана.
Сійӧ вонас иудейяс пӧвстысь кык юрнуӧдысьӧс индісны ёрдысьясӧн. Найӧ вӧліны сэтшӧм йӧз, кодъяс йылысь Господь висьталіс: «Лёк вӧчӧмыс петіс Вавилонысь ёрдысь-юрнуӧдысьяссянь, кодъяс эз сяммыны веськӧдлыны войтырнас».
Тайӧ ёрдысьясыс тшӧкыда волывлісны Йояким ордӧ, и на дінӧ волывлісны ставныс, кодъяслӧн вӧліны могъяс-вензьӧмъяс.
Луншӧр каднас, кор йӧзыс разӧдчывлісны, Сусанна пырджык ветлӧдліс верӧсыслӧн сад йӧрын.
Кыкнан юрнуӧдысьыс быд лун видзӧдісны сад йӧрын ветлӧдлысь Сусанна вылӧ. На пытшкын кыптіс лёкколӧм Сусанна дінӧ. Налӧн пемдіс вежӧрныс, найӧ эз лэптыны синсӧ енэжланьыс, тӧд выланыс эз кутны веськыда мыждӧмсӧ.
Найӧ вӧлі тырӧмаӧсь лёкколӧмӧн Сусанна дінӧ, но ӧта-мӧдсьыс дзебисны тайӧс. Налы вӧлі яндзим висьтавны сы йылысь, мый кӧсйӧны узьны Сусаннакӧд.
Быд лун найӧ сюся кыйӧдісны Сусанна бӧрся. Ӧтчыд найӧ шуисны ӧта-мӧдныслы:
«Мунам гортӧ, пажын кад нин». И быдӧн мӧдӧдчис гортланьыс. Сэсся найӧ бӧр бергӧдчисны, локтісны сэтчӧ жӧ да юалісны ӧта-мӧдныслысь, мыйла пӧ тэ бергӧдчин. Найӧ висьталісны ӧта-мӧдныслы асланыс лёкколӧм йылысь да сёрнитчисны, коді кутшӧм кадӧ локтас, медым суны Сусаннаӧс ӧтнассӧ.
Найӧ виччысисны лӧсялана кадсӧ. Мукӧд лунъясӧ моз Сусанна бара локтіс сад йӧрӧ кык кесйӧг анькӧд, медым мыссьыны, ӧд ывлаас ёна пӧжис.
Сад йӧрын некод сэсся эз вӧв кык юрнуӧдысь кындзи, кодъяс дзебсьӧмӧн кыйӧдісны аньӧс.
Сусанна шуис кесйӧг аньяслы: «Вайӧй меным вый да майтӧг, йигналӧй сад йӧрсьыс дзиръяяссӧ, и ме кута мыссьыны».
Найӧ вӧчисны сылӧн шуӧм серти: йигналісны сад йӧрлысь дзиръяяссӧ да петісны бокыса ӧдзӧсӧд, медым вайны сійӧ, мый вӧлі тшӧктӧма вайны. Кык дзебсьӧм юрнуӧдысьӧс кесйӧг аньяс эз аддзывны.
Кор кесйӧг аньяс мунісны, юрнуӧдысьяс чеччисны да котӧртісны Сусанна дінӧ. Найӧ шуисны сылы:
«Сад йӧрлысь дзиръяяссӧ йигналӧма, и некод оз аддзы миянӧс. Ми кӧсъям узьны тэкӧд, эн пыксьы миянлы, узь миянкӧд.
А он кӧ вӧч тадзи, сэки ёрд водзын ми висьталам, мый тэ вӧлін зонкӧд, та вӧсна тэ ыстін ас дінсьыд кесйӧг аньястӧ».
Сусанна сьӧкыда ымӧстіс да шуис: «Ме налькйӧ шеді!
Ме кӧ вӧча тадзи, менӧ виччысьӧ кулӧм, а ог кӧ вӧч, сэки ме ог мын тіян киысь.
Но бурджык лоӧ, ме кӧ ог вӧч тадзи. Господь водзын мыж вӧчӧм дорысь бурджык веськавны тіян мыждӧм улӧ».
Сусанна мыйвынсьыс горӧдіс.
Юрнуӧдысьяс тшӧтш горӧдісны. Ӧтиыс котӧртіс да восьтіс сад йӧрлысь дзиръясӧ.
Керкаын вӧлысьяс кылісны сад йӧрысь горзӧм. Найӧ котӧрӧн локтісны да пырисны сад йӧрӧ бокыса ӧдзӧсӧд, медым видзӧдлыны, мый лои Сусаннакӧд.
Юрнуӧдысьяс пондісны мыжавны Сусаннаӧс. Сусанналӧн кесйӧгъясыс весьӧпӧрисны, налы яндзим лои, ӧд водзынджык нинӧм татшӧмторсӧ эз кывлыны сы йылысь.
Мӧд луннас, кор войтырыс чукӧртчис Сусанналӧн Йояким верӧсыс ордӧ, сэтчӧ тшӧтш локтісны тайӧ кык юрнуӧдысьыс. Найӧ кӧсйисны сетны Сусаннаӧс кулӧм вылӧ, ӧд вӧлі тырӧмаӧсь лёкнас.
Найӧ тшӧктісны вайӧдны Хилкилысь Сусанна нывсӧ, Йоякимлысь гӧтырсӧ.
Сусаннаӧс вайӧдны мӧдӧдісны йӧзӧс, и сійӧ локтіс аслас бать-мамыскӧд, челядьыскӧд да став рӧдвужыскӧд.
Сусанна вӧлі зэв мича да муса чужӧма, и сылӧн чужӧмыс вӧлі тупкӧма. Но тайӧ лёк вӧчысьясыс тшӧктісны сылы восьтны чужӧмсӧ, медым пӧткӧдчыны сылӧн мичлуннас.
Сылӧн рӧдвужыс и ставныс, сы вылӧ видзӧдысьяс, бӧрдісны.
А тайӧ кык юрнуӧдысьыс сувтісны войтыр водзас да пуктісны кинысӧ Сусанналӧн юр вылас.
Сусанна бӧрдігтырйи видзӧдіс енэжас, ӧд сійӧ лача кутіс Господь вылӧ.
Юрнуӧдысьяс висьталісны: «Кор ми ӧтнаным ветлӧдлім сад йӧрӧд, тайӧ аньыс локтіс сэтчӧ кык кесйӧг анькӧд. Сійӧ йигналіс сад йӧрлысь дзиръяяссӧ, а кесйӧг аньяссӧ бӧр мӧдӧдіс.
Сы дінӧ локтіс зон, коді вӧлі дзебсьӧма сад йӧрас, да водіс сыкӧд.
Ми вӧлім сад йӧр пельӧсын, но кор аддзим тайӧ мыж вӧчӧмсӧ, котӧртім на дінӧ. Найӧ вӧлі ӧтлаын куйлӧны. Зонсӧ ми эгӧ вермӧй кутны, ӧд сійӧ вӧлі миянысь вынаджык. Сійӧ восьтіс дзиръясӧ да пышйис.
Но тайӧ аньсӧ ми кутім да юалім сылысь: “Коді вӧлі тайӧ зонмыс?” 
Но сійӧ эз кӧсйы висьтавны миянлы.
Ми аддзылім ставсӧ тайӧс да ӧні висьталам та йылысь».
Йӧзыс эскисны налы, ӧд найӧ вӧліны войтырлӧн юрнуӧдысьясӧн да ёрдысьясӧн, и Сусаннаӧс мыждісны кулӧм вылӧ.
Сэки Сусанна гора гӧлӧсӧн шыасис: «Помтӧг олысь Енмӧй, Тэ тӧдан став гусяторсӧ, Тэ водзвыв ставсӧ тӧдан!
Тэ тӧдан, мый найӧ ылӧгсӧ висьталісны ме йылысь. Ме эг вӧч сійӧ, мыйысь тайӧ юрнуӧдысьясыс мыжалӧны менӧ, но ӧні меным ковмас кувны».
Господь кыліс сылысь гӧлӧс шысӧ.
Кор Сусаннаӧс нуӧдісны виӧм вылӧ, Енмыс ышӧдіс том Данииллысь вежа ловсӧ, и Даниил гораа горӧдіс: «Ме абу мыжа тайӧ аньлысь вирсӧ кисьтӧмысь!»
Сэки став войтырыс бергӧдчис Данииллань да юаліс: «Мый тэ шуин?»
Сэки Даниил сувтіс войтыр пӧвстас да шуис: «Израиль войтырӧй, ті ӧмӧй сэтшӧм мывкыдтӧмӧсь? Ті збыльсӧ тӧдмавтӧг мыжданныд израильса аньӧс.
Бӧр бергӧдчӧй, медым веськыда мыждыны! Тайӧ кык мортыс ылӧгсӧ висьталісны сы йылысь».
Став войтырыс тэрмасьӧмӧн бӧр бергӧдчис. Войтырлӧн юрнуӧдысьяс шуисны Данииллы: «Пуксьы миян шӧрӧ, ӧд Енмыс пуктіс тэнӧ юрнуӧдысьӧ. Висьтав миянлы, мый тэнад сьӧлӧмад».
Даниил шуис налы: «Тайӧ кык мортсӧ ылӧджык торйӧдӧй ӧта-мӧдсьыныс, и ме юася найӧс быдӧнӧс торйӧн».
Найӧс торйӧдісны ӧта-мӧдсьыныс. Та бӧрын Даниил корис на пиысь ӧтисӧ да шуис сылы: «Тэ пӧрысь нин, но пыр на вӧчан лёксӧ.
Ӧні воссисны тэнад воддза мыжъясыд: тэ эн веськыда мыждыв, мыжтӧмъясӧс мыждылін, а мыжаясӧс лэдзлін. Но Господь висьталӧ: “Мыжтӧмӧс да веськыда олысьӧс кулӧм вылӧ эн мыжды”.
Тэ кӧ аддзылін тайӧ аньсӧ, сідзкӧ, висьтав, кутшӧм пу улын найӧ куйлісны».
Сійӧ шуис: «Фисташ пу улын».
Даниил шуис сылы: «Дзик збыльысь. Тайӧ ылӧгсьыс тэ вештысян аслад юрнад.
Енлӧн тшӧктӧм серти Сылӧн анделыс керыштас тэнӧ шӧрипӧв».
Тайӧ мортсӧ нуӧдісны. Даниил тшӧктіс вайӧдны мӧдсӧ да шуис сылы: «Тэ ханаан войтырысь, абу Иуда войтырысь.
Аньлӧн мичлуныс ыштӧдіс тэнӧ, тэнад лёкколӧмыд тшыкӧдіс тэнӧ.
Тадзи ті вӧчлінныд израильса аньяскӧд, и найӧ полӧмнысла узьлісны тіянкӧд.
Но тайӧ иудаса аньыс эз сетчы, медым мыж вӧчны тіянкӧд.
Ӧні висьтав меным, кутшӧм пу улын найӧ куйлісны, кор тэ суин найӧс».
Сійӧ вочавидзис: «Тупу улын».
Даниил шуис сылы: «Тайӧ ылӧгсьыс тэ вештысян аслад юрнад.
Енлӧн анделыс виччысьӧ шыпуртӧн, медым керыштны тэнӧ шӧрипӧв. Сійӧ дзикӧдз бырӧдас тіянӧс кыкнаннытӧ».
Став чукӧртчӧм йӧзыс гораа горӧдісны да ошкисны Енмӧс, коді мездӧ Сы вылӧ лача кутысьясӧс. Йӧзыс кыпӧдчисны тайӧ кык юрнуӧдысьыслы паныд, ӧд Даниил налӧн жӧ кывъясӧн петкӧдліс, мый найӧ висьталісны ылӧгсӧ.
Накӧд вӧчисны сідзи, кыдзи найӧ кӧсйисны вӧчны асланыс матыссакӧд. Мӧисейлӧн Индӧд серти йӧзыс виисны найӧс.
Сійӧ лунӧ вӧлі мездӧма мыжтӧм мортӧс.
Хилки да сылӧн гӧтырыс ёна ошкисны Енмӧс Сусанна нывсьыс. Сусанналӧн Йояким верӧсыс да став рӧдвужыс тшӧтш ошкисны Енмӧс сыысь, мый Сусанна вӧлі мыжтӧм — эз вӧч яндысьтӧмтор.
Сійӧ лунсяньыс и водзӧ Даниилӧс пондісны ёна ыдждӧдлыны войтыр пӧвстын.]
[Астиаг ӧксы куліс да вуджис батьясыс дінӧ. Сы пыдди ӧксыӧ пуксис Персияысь Кир.
Даниил вӧлі ӧксылӧн медматысса ёрт, и ӧксылӧн ёртъяс пӧвстысь сійӧ вӧлі медся нималана.
Вавилонсаяслӧн вӧлі Вил нима идол. Быд лун сылы вайлісны дас кык мешӧк шобді пызь, нелямын ыжӧс да кыксё литра гӧгӧр вина.
Ӧксы юрбитіс Вил идоллы, быд лун ветлӧдліс копрасьны сылы.
А Даниил юрбитіс аслас Енлы.
Ӧксы юаліс Данииллысь: «Мыйла тэ он юрбит Виллы?»
Даниил вочавидзис: «Ме ог юрбит киӧн вӧчӧм енъяслы. Ме юрбита ловъя Енлы, коді вӧчис енэжсӧ да мусӧ, и коді ыджыдалӧ быд ловъя олысь вылын».
Ӧксы шуис Данииллы: «Вил ӧмӧй абу ловъя ен?
Тэ ӧмӧй он аддзы, мыйта сійӧ быд лун сёйӧ-юӧ?»
Даниил нюмдӧмӧн вочавидзис: «Ӧксыӧй, эн ылӧдлы асьтӧ.
Сылысь пытшкӧссӧ ӧд вӧчӧма сёйысь, а вывтырсӧ — ыргӧнысь, сійӧ некор эз сёйлы-юлы».
Сэки ӧксы скӧрмис. Сійӧ корис Вил идоллы кесъялысь попъясӧс да шуис налы: «Ті кӧ онӧ висьталӧй меным, коді сёйӧ став тайӧ сёянсӧ, сэки куланныд.
А ті кӧ верманныд эскӧдны менӧ, мый ставсӧ тайӧс Вил сёйӧ, сэки кулас Даниил, ӧд сійӧ омӧльтіс Вилӧс».
Даниил шуис ӧксылы: «Мед лоӧ тэнад шуӧм серти».
Вил идоллы кесъялысь попъяслӧн лыдыс вӧлі сизимдас морт, и налӧн вӧліны гӧтыръяс да челядь.
Ӧксы Даниилкӧд локтісны Вил идоллы юрбитанінӧ. Сэні кесъялысь попъяс шуисны: «Ми ӧні петам татысь. А тэ, ӧксыӧй, пукты татчӧ сёян да кисьт вина, а сэсся пет, йигнав ӧдзӧссӧ да аслад чунькытшӧн пукты сэтчӧ печать.
Тэ кӧ аски локтан да аддзан, мый Вил абу ставсӧ сёйӧма, сэки ми кулам, а сёйӧма кӧ, сэки кулас Даниил, коді висьталіс миян йылысь ылӧгсӧ».
Попъяс эз майшасьны, ӧд пызан улас вӧлі вӧчӧма гуся пыранін. Сэті найӧ волывлісны да сёйлісны став вайӧм сёянсӧ.
Кор попъяс петісны, ӧксы пуктіс Вил идол водзӧ сёян. А Даниил тшӧктіс аслас кесйӧгъяслы вайны пӧим да ӧксы дырйи разӧдны сійӧс джодж пасьталаыс. Та бӧрын ставныс петісны да йигналісны ӧдзӧссӧ. Ӧксы чунькытшнас пуктіс печать, и ставныс мунісны.
Войнас, кыдзи пыр вӧчлісны, Вил идоллы кесъялысь попъяс локтісны юрбитанінӧ гӧтыръясныскӧд да челядьныскӧд да ставсӧ сёйисны-юисны.
Мӧд луннас ӧксы да Даниил чеччисны водз асывнас. Ӧксы юаліс: «Даниил, дзоньӧсь-ӧ печатьясыс?»
Даниил вочавидзис: «Дзоньӧсь, ӧксыӧй».
Юрбитанінлысь ӧдзӧсъяссӧ восьтісны. Ӧксы дзик пыр синсӧ чӧвтліс пызан вылӧ да гораа горӧдіс: «Вил, тэ вына, тэ некодӧс он пӧрйӧдлы!»
Даниил нюмдіс да сувтӧдіс ӧксыӧс, медым сійӧ оз пыр юрбитанін пытшкӧсас. Сійӧ шуис: «Видзӧдлы джоджас. Кодлӧн тайӧ кок туйыс?»
Ӧксы шуис: «Ме аддза айуловлысь, аньяслысь да челядьлысь кок туйсӧ».
Ӧксы ёна скӧрмис да тшӧктіс вайӧдны Вил идоллы кесъялысь попъясӧс, налысь гӧтыръяснысӧ да челядьнысӧ. Попъяс петкӧдлісны гуся пыранін, кыті найӧ пыравлісны юрбитанінӧ да сёйлісны-юлісны ставсӧ, мый вӧлі пызан вылас.
Сэки ӧксы тшӧктіс вины найӧс, а Вил бӧлбанӧс сетіс Данииллы. Даниил пазӧдіс бӧлбанӧс да юрбитанінсӧ.
Вавилонын вӧлі ыджыд гундыр, и вавилонсаяс юрбитісны сылы.
Ӧксы шуис Данииллы: «Гашкӧ, тайӧ гундырыс йылысь тэ тшӧтш шуан, мый сійӧс ыргӧнысь вӧчӧма?
Сійӧ ловъя. Сійӧ сёйӧ-юӧ, и тэ он вермы шуны, мый тайӧ енмыс абу ловъя.
Сідзкӧ, копыртчыв сылы».
Даниил вочавидзис: «Ме копрася сӧмын Господьлы, аслам Енлы, ӧд Сійӧ — ловъя Ен.
Но ме кора тэнсьыд, ӧксыӧй, лэдз меным вины гундырӧс шыпурттӧг да зортӧг».
Ӧксы шуис Данииллы: «Ви».
Сэки Даниил босьтіс сир, гос да гӧн, пуис ставсӧ ӧти пӧртйын, вӧчис ёкмыль да шыбитіс гундырлы вомас. Ёкмыльсӧ ньылыштӧм бӧрын гундыр шӧри потіс.
Даниил шуис: «Со, татшӧм вежаторлы ті юрбитанныд!»
Кор вавилонсаяс кылісны тайӧ лоӧмторйыс йылысь, найӧ ёна скӧрмисны да кыпӧдчисны ӧксылы паныд. Найӧ шуисны: «Ӧксы лои иудейӧн. Сійӧ пазӧдіс Вилӧс, виис гундырӧс да попъясӧс». Найӧ локтісны ӧксы дінӧ да шуисны сылы: «Сет миянлы Даниилӧс. А он кӧ сет, ми виам тэнӧ да тэнсьыд гортсаястӧ».
Кор ӧксы аддзис, мый найӧ сувтісны сылы паныд, сылы быть ковмис сетны Даниилӧс. Найӧ шыбитісны Даниилӧс левъяслӧн гуӧ. Сійӧ вӧлі сэні квайт лун чӧж.
Гуас вӧлі сизим лев. Быд лун налы сетлісны кык морт шой да кык ыжӧс.
Но тайӧ лунъясас левъяслы эз сетны сёянсӧ, медым найӧ сёйисны Даниилӧс.
Иуда муын оліс Аввакум нима пророк. Сійӧ пуис шыд, тасьтіӧ пуктіс нянь торъяс да мӧдӧдчис видз-му вылӧ нуны шыдсӧ нянь вундысьяслы.
Но Господьлӧн андел шуис Аввакумлы: «Ну шыдтӧ Вавилонӧ Данииллы, коді ӧні левъяслӧн гуын».
Аввакум шуис: «Ыджыдӧй, Вавилонас ме некор эг вӧвлы, и ог тӧд, кӧні гуыс».
Сэки Господьлӧн анделыс босьтіс сійӧс юр пыдӧсӧдыс, кыпӧдіс сійӧс юрсиӧдыс да тӧвныр моз лэбӧдіс-вайӧдіс сійӧс Вавилонӧ левъяслӧн гу дорӧ.
Аввакум чукӧстіс: «Даниил, Даниил, босьт тайӧ сёянсӧ, мый Енмыс мӧдӧдіс тэныд».
Даниил вочавидзис: «Енмӧй, Тэ абу вунӧдӧмыд менӧ! Тэ он эновт найӧс, кодъяс радейтӧны Тэнӧ».
Даниил чеччис да пондіс сёйны.
А Енлӧн андел дзик пыр бӧр вайӧдіс Аввакумӧс аслас местаӧ.
Сизимӧд луннас левъяслӧн гу дорӧ локтіс ӧксы, медым бӧрдны Даниил вӧсна. Сійӧ матыстчис гу дорас, видзӧдліс сэтчӧ да аддзис, мый Даниил пукалӧ сэні.
Ӧксы гораа горӧдіс: «Господьӧй, Данииллӧн Енмӧй, Тэ — ыджыд Ен, Тэысь кындзи мӧдыс абу!»
Ӧксы тшӧктіс лэптыны Даниилӧс, а найӧс, кодъяс кӧсйисны вины Даниилӧс, тшӧктіс шыбитны левъяслӧн гуӧ. Ӧксылӧн син водзын левъяс дзик пыр косявлісны-сёйисны найӧс.
{Еврей йӧз (комиӧдіс Kodko) @ Осий @ религ. гижӧд @ Библия @ 2021 @ Лб. .}
Осий пророклӧн небӧг
Берлӧн Осий пилы вӧлі Господьсянь кыв, кор Иуда муын сьӧрсьӧн-бӧрсьӧн юралісны Озей, Иотам, Ахаз да Езекей ӧксыяс, а Израиль муын юраліс Еровам ӧксы, Йоаслӧн пиыс.
Кор Господь кутіс сёрнитны Осий пыр, Сійӧ шуис Осийлы: «Мун да босьт аслыд гӧтырӧ кырсалысь аньӧс. Босьт ас дінад тшӧтш сылысь чурка ныв-писӧ.
Израиль му кырсалысь ань кодь, ӧд израильсаяс эновтісны Господьӧс, юрбитӧны мукӧд енъяслы».
Осий муніс да босьтіс гӧтырӧ Дивлаимлысь Гомера нывсӧ.
Гомера пондіс нӧбасьны да чужтіс Осийлы пиӧс.
Господь шуис Осийлы: «Пукты пиыдлы Изреель ним, ӧд Изреель ковтысын вир кисьтӧмысь регыд Ме водзӧс перъя Еху рӧдлысь да пукта пом израильса ӧксыяслӧн юралӧмлы. Сійӧ лунӧ Изреель ковтысын Ме чега Израильлысь ньӧввужсӧ».
Гомера бара кутіс нӧбасьны да чужтіс нылӧс. Господь шуис Осийлы: «Пукты сылы Ло-Рухама * ним, ӧд водзӧ Ме ог ло бур сьӧлӧма Израиль войтыр дінӧ да ог прӧстит сійӧс.
А Иуда войтыр дінӧ Ме лоа бур сьӧлӧма. Ме мезда найӧс, ӧд Ме Господь, налӧн Ен. Мезда найӧс, но ог ньӧввуж-шыпурт помысь, ог тыш пыр да ог вӧв-верзьӧма отсӧгӧн».
Ло-Рухамаӧс морӧсысь дугӧдӧм бӧрын Гомера бара пондіс нӧбасьны да чужтіс пиӧс.
Господь шуис Осийлы: «Пукты сылы Ло-Амми * ним, ӧд ті абу Менам войтыр, и Ме ог ло тіян Енмӧн».
— Израиль войтырлӧн лыдыс лоӧ саридздор лыа мында, найӧс некод оз вермы лыддьыны-артавны.
Кӧні вӧлі шуӧма налы: «Ті абу Менам войтыр», сэні налы шуасны: «Ті — ловъя Енлӧн ныв-пи».
Иуда да Израиль войтыр ӧтлаӧ чукӧртчасны, аслыныс ӧти юралысьӧс пуктасны, мунысӧ бӧр босьтасны.
Тайӧ луныс Изреельлы лоӧ тӧдчана-ыджыд.
Вокъясныдлы шуӧй, мый найӧ Менам войтыр, чойясныдлы, мый найӧс буралӧма.
— Мыжалӧй ассьыныд мамнытӧ, мыжалӧй, ӧд сійӧ Меным абу гӧтыр, и Ме сылы абу верӧс.
Мед сійӧ пӧрччас чужӧм вывсьыс кырсалысь аньлысь вевттьӧдсӧ, мед шыбитас морӧс бердсьыс гозъякост олӧм пежалысьлысь мичмӧдчанторъяссӧ. Оз кӧ, Ме сійӧс кушӧдз пӧрччӧда, пузчужӧм кагаӧс моз пасьтӧгыс коля. Ме вӧча сійӧс овтӧминӧн, вӧча сійӧс кос муӧн, горш косьмӧмысла сійӧ кулас.
Сылӧн ныв-пи дінӧ Ме ог ло бур сьӧлӧма, ӧд найӧ кырсалысь аньлӧн челядь.
Налӧн мамныс кырсаліс, найӧс чужтысьыс асьсӧ янӧдіс.
Сійӧ шуліс: «Муна аслам мусукъяс бӧрся. Найӧ сетӧны меным сёян-юан, вурун да шабді, вый да вина».
Та вӧсна Ме тупка сылысь туйсӧ лежнӧгӧн, кытшала сійӧс джуджыд потшӧсӧн, медым сійӧ эз аддзы ассьыс ордымъяссӧ. Сійӧ котӧртас аслас мусукъяс бӧрся, но оз суӧд, пондас корсьны найӧс, но оз аддзы. Сэки шуас: «Бӧр муна аслам верӧсӧй дінӧ.
Ӧнія дорысь сэки меным бурджык вӧлі».
Сійӧ эз гӧгӧрво, мый няньсӧ, винасӧ да выйсӧ сылы Ме сеті. Ме сійӧс озырмӧді эзысь-зарниӧн, но таысь найӧ вӧчисны Ваал бӧлбанӧс.
Та вӧсна вундан кадӧ Ме бӧр босьта Ассьым няньӧс, вотӧс чукӧртан кадӧ босьта Ассьым винаӧс. Ме мырддя Ассьым вурунӧс да шабдіӧс, мыйӧн сійӧ вевттьӧ ассьыс куш яйсӧ.
Ме пӧрччӧда сійӧс да янӧда мусукъясыс водзын, и некод оз вермы мездыны сійӧс Менам киысь.
Ме пукта пом сылӧн нимкодясьӧмлы, гажӧдчан да шойччан лунъяслы, выль тӧлысь пасйӧмлы.
Бырӧда сылысь виноград да инжир пуяссӧ, мый йылысь сійӧ шуліс, тайӧн пӧ мусукъясӧй мынтысьлісны меным.
Ме лэдза вӧрсявны сад йӧръясыслы, зверъяс куштасны-сёясны сэтысь ставсӧ.
Ме мыжда сійӧс лунъясысь, кор сійӧ вись сотліс Ваал идолъяслы, мичмӧдліс асьсӧ исергаясӧн да сикӧтшъясӧн, ветліс аслас мусукъяс бӧрся, а Менӧ вунӧдіс, — висьталӧ Господь.
— Ме ышӧда сійӧс Ме бӧрся мунны, нуӧда сійӧс овтӧминӧ, понда сёрнитны сыкӧд меліа.
Сэні Ме бӧр сета сылы ассьыс виноград йӧръяссӧ, Акор ковтыс лоӧ сылы лачасӧ сетысьӧн.
Сэні сійӧ кутас кывзысьны томдырйиыс моз, Египетысь петігӧныс моз.
Сійӧ лунӧ, — висьталӧ Господь, — Израиль шыасяс Ме дінӧ: «Верӧсӧй», и водзӧ оз нин шу Меным: «Ваалӧй». *
Ме бырӧда сылӧн сёрниысь идолъяслысь нимъяссӧ, сійӧ пыр кежлӧ вунӧдас найӧс.
Сійӧ лунӧ Аслам войтырлы бур вылӧ Ме кӧртала йитӧд зверъяскӧд, енэжвыв лэбачьяскӧд да мувыв гаг-веглясьысьяскӧд.
Ме чегъяла ньӧввуж-шыпуртъяс, ылыста налӧн муысь тышъяс да сета налы повтӧг овны.
Ме кӧсйыся босьтны тэнӧ гӧтырӧ пыр кежлӧ, чунькытшӧда тэнӧ веськыдлунӧн да веськыда мыждӧмӧн, муслунӧн да буралӧмӧн.
Ме кикута тэкӧд да кывйӧс ог вудж, и тэ тӧдмалан Менӧ, Господьӧс.
Сійӧ лунӧ Ме вочавидза, — висьталӧ Господь, — Ме вочавидза енэжыслӧн корӧм вылӧ, а енэжыс вочавидзас муыслӧн корӧм вылӧ. Муыс быдтас нянь, сетас вина да вый, тайӧ лоӧ Изреельлӧн корӧм вылӧ вочавидзӧм.
Ме кӧдза Ассьым войтырӧс тайӧ муас, бурсьӧлӧмтча Ло-Рухама дінӧ, Ло-Аммилы шуа: «Тэ — Менам войтырӧй», а сійӧ шуас: «Менам Енмӧй!»
Господь шуис меным: «Мун да бара радейт гӧтыртӧ, коді мусукыскӧд пежалӧ гозъякост олӧмнытӧ. Радейт, кыдзи Ме, Господь, радейта Израиль войтырӧс, коді кежис мукӧд енъяс дінӧ и окотапырысь сёйӧ идолъяслы вайӧм изюм».
Ме ньӧби ассьым гӧтырӧс, сеті сыысь дас вит эзысь сьӧм, нӧшта ӧти да джын хомер мында ид. Ме шуи сылы: «Ов ме ордын дыр кад чӧж.
Эн кырсав, мукӧдъяс дінӧ эн ветлы — и ме лоа тэнад».
Израиль войтыр дыр кад чӧж кутас овны ӧксытӧг да юралысьтӧг. Висьяс, юрбитан изъяс, ефод да гортса бӧлбанъяс оз лоны налӧн.
Но сэсся Израиль войтыр бӧр бергӧдчас да корсяс ассьыс Господь Енсӧ да Давид ӧксысӧ. Бӧръя лунъясӧ найӧ пондасны полӧмӧн пыдди пуктыны Господьӧс да Сылысь бурлунсӧ.
— Израиль войтыр, кывзӧй Господьлысь кывсӧ!
Господь мыжалӧ тайӧ муас олысьясӧс, ӧд збыльсӧ найӧ бокӧ вештісны, кывнысӧ вуджисны, Енсӧ оз тӧдны.
Сетӧм кывнысӧ торкӧны, пӧръясьӧны, виӧны да гусясьӧны, гозъякост олӧм пежалӧны, вир кисьтӧмлы помыс абу.
Та вӧсна муыс косьмас, став олысьыс сэні эбӧстӧммас. Зверъяс да енэжвыв лэбачьяс куласны, весиг саридзын чериыс пӧдас.
Но некод мед оз мыжав мӧдӧс, оз норась мӧд вылӧ.
Ме мыжала тэнӧ, поп, тэ крукасян лунъюгыднас, войнас тэкӧд тшӧтш крукасяс пророк, тэнсьыд мамтӧ * Ме бырӧда.
Бырӧдӧма лоӧ Менсьым войтырӧс, ӧд найӧ оз тӧдны Менӧ. Тэ нинӧмӧ пуктін тӧдӧмлунсӧ, та вӧсна Ме вешта тэнӧ Ме водзын кесъялӧмысь.
Тэ вунӧдін аслад Енлысь Индӧдсӧ, а Ме вунӧда тэнсьыд ныв-питӧ.
Кымын содӧ попъяслӧн лыдыс, сымын содӧ Меным паныд мыжныс.
Налысь нималӧмсӧ Ме бергӧда яналӧмӧ.
Найӧ пӧткӧдчӧны Менам войтырлӧн мыжъясӧн, нимкодясьӧны войтырлӧн лёк вӧчӧмысь.
Мый суас войтырсӧ, суас тшӧтш попӧс.
Ме мыжда найӧс ставнысӧ олан туйсьыныс, мынтыся налы уджъясныс серти.
Найӧ пондасны сёйны, но оз пӧтны, пондасны кырсавны, но оз кутны рӧдмыны, ӧд найӧ эновтісны Господьӧс.
Кырсалӧмыс да вина юӧмыс пемдӧдіс налысь вежӧрсӧ.
Менам войтыр шыасьӧ путор дінӧ, и бедь сетӧ сылы вочавидзӧмсӧ.
Кырсалан руыс кежӧдіс найӧс ылӧгас, кырсалысь ань моз найӧ эновтісны ассьыныс Енсӧ.
Керӧсъяс вылын найӧ вайӧны висьяс, мылькъяс вылын тшынӧдчӧны, вӧчӧны тайӧс тупу да оржы вуджӧр улын, тшӧтш мукӧд ыджыд пуяслӧн вуджӧр улын.
На моз тіян нывъясныд сетчӧны кырсалӧмӧ, моньясныд — гозъякост олӧм пежалӧмӧ.
Но Ме ог кут мыждыны тіянлысь нывъяснытӧ кырсалӧмысь, моньяснытӧ — гозъякост олӧм пежалӧмысь, ӧд айуловныд асьныс ветлӧны кырсалысь аньяс дінӧ, кырсалысь аньяскӧд ӧтвылысь висьяс вайӧны. Вежӧртӧм войтырӧс лоӧ бырӧдӧма!
Тэ, Израиль, кырсалан, но Иуда мед оз кырсав.
Энӧ мунӧй Галгалӧ, энӧ кайӧй Бет-Авенӧ, энӧ сетӧй кывнытӧ ловъя Господь водзын.
Израиль лои асныра мӧс кодь.
Кутас-ӧ Господь ыжъясӧс моз ӧні видзны найӧс паськыд видз вылын?
Ефрем кутчысьӧ идолъясӧ — мед вӧчасны, кыдзи кӧсйӧны!
Налӧн кодалӧмыс — зывӧк, найӧ сетчисны кырсалӧмӧ, налӧн юралысьяслы муса яндысьтӧм олӧмыс.
Ыджыд тӧвныр чышкыштас найӧс, асланыс вись вайӧмысь налы яндзим лоӧ.
— Кывзӧй, попъяс! Сюся кывзы, Израиль войтыр! Пельнытӧ чошкӧдӧй, ӧксы да тэнад котырыд!
Тіянӧс лоӧ веськыда мыждӧма, ӧд ті вӧлінныд налькйӧн Миспаын, паськӧдӧм тывйӧн Тавор керӧсын.
Меным паныд кыпӧдчысьяс сетчисны пеж вӧчӧмас, та вӧсна Ме мыжда найӧс ставнысӧ.
Ме тӧда Ефремӧс, Израиль оз вермы дзебсьыны Меысь.
Ефрем кырсалӧ, Израиль пежасьӧма.
Налӧн уджъясныс оз лэдзны налы бергӧдчыны асланыс Ен дінӧ, ӧд на пытшкын кырсалан ру, найӧ оз тӧдны Господьӧс.
Израильлӧн вылӧ кыпӧдчӧмыс бергӧдчӧ аслыс паныд.
Израиль да Ефрем усясны мыжныс понда, накӧд тшӧтш усяс Иуда.
Асланыс ыжъясӧн да ӧшъясӧн найӧ мунасны корсьны Господьӧс, но оз аддзыны Сійӧс, ӧд Сійӧ ылыстчис наысь.
Найӧ эскытӧмлунныс вӧсна эновтісны Господьӧс, чужтісны челядьнысӧ мӧдсянь.
Ӧні выль тӧлысь пасйӧмнаныс найӧ бырӧдасны асьнысӧ да видз-мунысӧ.
Буксӧй буксанӧн Гиваын, тутсӧй трубаӧ Рамаын!
Юӧртӧй Бет-Авенын: «Венямин, локтӧ вӧрӧгыд!»
Ефремӧс лоӧ куштӧма мыждан лунӧ, тайӧс Ме юӧрта Израиль чужанкотыръяслы.
Иудаса юралысьяс мыжмисны, найӧ лоины орчча му вылӧ мудор пассӧ вештысьяс кодьӧсь. Ва моз Ме кисьта на вылӧ Ассьым скӧрлунӧс.
Ефремӧс лямӧдӧма, веськыда мыждӧмыс пасьвартӧма сійӧс, ӧд сійӧ шуис овны мортлӧн тшӧктӧмъяс серти.
Ефремлы Ме лои бырӧдысь воз кодь, Иудалы — сёйысь вегыль кодь.
Кор Ефрем аддзис ассьыс висьӧмсӧ, а Иуда — ассьыс дойяссӧ, сэки Ефрем муніс Ассурӧ, ыстіс ассьыс йӧзсӧ Ярев ӧксы дінӧ.
Но сійӧ оз вермы сетны тіянлы дзоньвидзалун, оз вермы бурдӧдны дойяснытӧ.
Лев моз Ме уськӧдча Ефрем вылӧ, том лев моз чеччышта Иуда чужанкотыр вылӧ.
Ме косявла найӧс, пышйӧда кыйдӧсӧс моз, и некод найӧс оз мезды.
Ме бӧр локта Аслам оланінӧ да кута виччысьны, кытчӧдз найӧ оз гӧгӧрвоны мыжнысӧ да оз пондыны корсьны Менӧ.
Сьӧкыдаліганыс найӧ пондасны корсьны Менӧ, шуасны: «Бӧр мунамӧй Господь дінӧ!
Сійӧ косявліс миянӧс, но Сійӧ и бурдӧдас, Сійӧ дойдаліс миянӧс, но Сійӧ и кӧрталас дойяснымӧс.
Кык лун мысти Сійӧ ловзьӧдас миянӧс, коймӧд луннас сувтӧдас кок выланым. Сэки ми пондам овны Сылӧн чужӧмбан водзын.
Сідзкӧ, тӧдмаламӧй Господьӧс, сьӧлӧмсянь зілямӧй тӧдны Сійӧс. 
Сійӧ локтас, и тайӧ збыль, кыдзи асъя кыалӧн петӧмыс збыль. Сійӧ локтас миян дінӧ зэр моз, мусӧ киськалысь тувсовъя зэр моз».
— Мый Меным вӧчны тэкӧд, Ефрем, мый Меным вӧчны тэкӧд, Иуда?
Ме дінӧ тіян муслунныд асъя ру кодь, ӧдйӧ бырысь лысва кодь.
Та вӧсна Ме нӧйтлі тіянӧс пророкъяс пыр, Аслам кывъясӧн виавлі тіянӧс. Менам веськыда мыждӧмӧй югдӧдысь югӧр кодь.
Ас дінӧ муслун тіянсянь кӧсъя, ог вись вайӧм, Менӧ тӧдӧм, а ог сотан висьяс.
Адам карын ті торкинныд йитӧдсӧ, сэні эскытӧмлунныд вӧсна эновтінныд Менӧ.
Галаад — лёк вӧчысьяслӧн кар, сэні кок туйясыс вирӧсь.
Кыдзи мырддялысь-пазӧдысьяс кыйӧдӧны да виалӧны ветлысь-мунысьясӧс, тадзи жӧ попъяс вӧчӧны Сикемӧ мунан туй вылын, и тайӧ — зывӧктана.
Израиль войтыр пӧвстын Ме аддза пежторъяс: Ефрем кырсалӧ, Израиль пежалӧма асьсӧ.
А тэнӧ, Иуда, виччысьӧ вундан кад, кор Аслам войтырлы Ме бара сета бур олӧм.
Кор Ме бурдӧда Израильӧс, тыдовтчас Ефремлӧн мыжыс, мыччысясны Самариялӧн лёк уджъясыс, ӧд йӧзыс пӧръясьӧны, гусясьысьяс керкаяс куштӧны, туйяс вылын мырддялӧны.
Найӧ оз вежӧртны, мый налысь лёк уджъяссӧ Ме тӧд вылын кута.
Ӧні налӧн уджъясныс кытшалӧмаӧсь найӧс, налӧн лёк вӧчӧмныс Менам чужӧмбан водзын.
— Ӧксы нимкодясьӧ, мый йӧзыс лёксӧ вӧчӧны, юралысьяс нимкодясьӧны, мый йӧзыс пӧръясьӧны.
Ставныс найӧ гозъякост олӧм пежалысьяс, донӧдӧм пач кодьӧсь — пӧжасьысьлы няньлысь кыптӧмсӧ виччысигӧн ломтыны-донӧдны сійӧс оз нин ков.
Ӧксынымлӧн гажӧдчан лунӧ юралысьяс висьмытӧдзныс вина юӧны, ӧксы кисӧ нюжӧдӧ сылы паныд кыпӧдчысьяслань.
Ставныс найӧ ломтӧны сьӧлӧмнысӧ наянлуннас, и накӧд лоӧ пачкӧд моз: пӧжасьысь кӧть войсӧ узьӧ, асъядорыс пачыс ыпъялӧ ыджыд биӧн.
Ставныс найӧ донӧдӧм пач кодьӧсь, би моз найӧ ньылыштӧны юралысьяснысӧ.
Налӧн ӧксыясыс усьӧны, но некод оз шыась Ме дінӧ.
— Ефрем сорласис мукӧд войтыръяскӧд. Сійӧ лои сотчӧм нянь кодь, кодӧс вунӧдісны бергӧдны.
Локтысьяс чурскисны сылысь вынсӧ, а сійӧ эз казявлы тайӧс.
Юрсиыс сылӧн дзормис, а сійӧ оз и тӧд та йылысь.
Израильлӧн вылӧ кыпӧдчӧмыс ас вылас усьӧ, но сійӧ оз бергӧдчы Господь дінӧ, оз корсь ассьыс Енсӧ.
Ефрем лои вежӧртӧм гулю кодь, нинӧм оз гӧгӧрво: отсӧг корӧ Египетлысь, мунӧ Ассурӧ.
Муніганыс Ассьым тывйӧс Ме шыбита на вылӧ, кыя найӧс лэбачӧс моз.
Ме мыжда найӧс, кыдзи вӧлі шуӧма налы чукӧртчӧм дырйиныс.
Курыд шог Израиль войтырлы, ӧд найӧ ылыстчисны Меысь!
Найӧ бырасны, ӧд кыпӧдчисны Меным паныд!
Ме кӧсйи мездыны найӧс, но найӧ ылӧгсӧ висьтавлісны Ме йылысь.
Ме дінӧ став сьӧлӧмнас шыасьӧм пыдди найӧ бӧрдісны асланыс вольпась вылын, нянь да вина понда найӧ вундалісны * асьнысӧ, но Меысь ылыстчисны.
Ме быдті найӧс, ёнмӧді налысь кияссӧ, но найӧ водзӧ мӧвпалісны Меным паныд лёк вӧчны.
Найӧ оз кӧсйыны бергӧдчыны Медвылыссаыс дінӧ, найӧ лоины личалӧм ньӧввуж кодьӧсь.
Налӧн юралысьясныс шыпурт помысь усясны, лёк кывныс вӧсна куласны, и Египет муын найӧс кутасны лёкӧдны.
— Матыст вом дорад буксантӧ!
Лёкыс кутш моз гӧгралӧ Господьлӧн керка весьтын, ӧд Менам войтырӧй торкисны йитӧдӧс, мый Ме кӧрталі накӧд, кыпӧдчисны Менам Индӧдлы паныд.
Найӧ горзӧны Меным: «Енмӧй, ми тӧдам Тэнӧ! Ми — Израиль войтыр».
Но Израиль ӧтдортіс бурсӧ, та вӧсна вӧрӧг вӧтлӧ сійӧс.
Метӧг найӧ асьныс пуктісны ӧксыясӧс, Менсьым юасьтӧг бӧрйисны юралысьясӧс.
Асланыс эзысь-зарниысь найӧ вӧчисны бӧлбанъясӧс — тадзи вӧчӧмӧн найӧ бырӧдасны асьнысӧ.
Самария, тэнсьыд ӧштӧ вештӧма.
Менам скӧрлунӧй ыпъялӧ Израиль вылӧ — дыр-ӧ на оз сӧстӧммыны найӧ пежсьыс?
Израиль вӧчис ӧшкӧс, дорччысь вӧчис бӧлбанӧс, но сійӧ абу Ен.
Самариялысь ӧшсӧ лоӧ торпыригӧдз жуглӧма!
Найӧ кӧдзӧны тӧвныр, вундӧны бушков. Няньыс налӧн оз шептась, пызьыс налӧн оз ло.
А шептасяс кӧ, няньсӧ мукӧдъяс сёясны.
Израильӧс ньылыштӧма!
Войтыръяс пӧвстын ӧні сійӧ ковтӧм дозмук кодь.
Ӧткӧн шӧйтысь осёл моз Израиль войтыр муніс Ассурӧ.
Ефрем ньӧбис аслыс мусукъясӧс.
Сійӧ ньӧбис муслунсӧ войтыръяслысь, но регыд Ме чукӧрта найӧс ставнысӧ. Найӧ пондасны сьӧкыдавны ассурса ӧксылӧн да юралысьяслӧн нартитӧмысь.
Ефрем сувтӧдіс уна висьпуктанін, медым мыж вӧчны, та вӧсна сійӧ мыжмис.
Ме гижи сылы унасьыс-уна тшӧктӧм, но сійӧ ковтӧмӧн лыддис найӧс.
Сійӧ висьяс вайӧ, сэсся яйсӧ сёйӧ, но Господьлы тайӧ висьясыс абу шогманаӧсь.
Господь казьтыштас Ефремлысь лёк вӧчӧмсӧ да мыждас сійӧс мыжъяссьыс, сэки сылы бӧр ковмас мунны Египетӧ.
Израиль вунӧдіс ассьыс Вӧчысьсӧ, кыпӧдаліс юрбитанінъяс.
Иуда лэптіс уна зумыд кар, но Ме ыста сылӧн каръяс вылӧ би, и биыс ньылыштас сылысь изкаръяссӧ.
— Эн нимкодясь, Израиль, эн гажӧдчы мукӧд войтыръяс моз. Кырсалысь ань моз тэ эновтін ассьыд Ентӧ, быд гумла вылын вузалан асьтӧ, таысь босьтӧм удждонтӧ тэ радейтан.
Гумлаыд да виноград пычкан гуыд оз пондыны вердны тэнӧ, выль винаыд тэнад оз нин ло.
Водзӧ тэ он понды овны Господьлӧн муын — Ефремлы бӧр ковмас мунны Египетӧ, Ассурын сійӧ пондас сёйны пеж сёян.
Найӧ оз пондыны вайны Господьлы вина вись, налӧн висьясыс Господьлы оз лоны шогманаӧсь, а ваясны налы кулӧм да пежаласны сёйысьясӧс. Висьяссӧ найӧ асьныс кутасны сёйны, Господьлӧн керкаӧ оз вайны.
Мый ті кутанныд вӧчны гажӧдчан лунӧ, Господьлы торйӧдӧм лунӧ?
Ті пышйинныд бырӧдӧмысь, но Египет чукӧртас тіянӧс, Мемфис кар гуалас тіянӧс.
Тіянлысь эзысьнытӧ пӧдтас петшӧр, чомъяснытӧ кытшалас лежнӧг.
Воис мыждан лун, матысмис мынтысян лун — Израиль мед тӧдӧ тайӧс. Ме, пророк, лои вежӧртӧм, ӧд ті уна лёк вӧчанныд, ме, Ловсянь сёрнитысь, лои йӧй, ӧд ті пыр меным паныд сувтанныд.
Ме, пророк, аслам Енкӧд ӧтвыв видза Ефремӧс, но менам став туйяс вылӧ пукталӧма дзуг, весиг Ен керкаын меным паныд сувтӧны.
Израиль дзикӧдз вӧйис пежас, кыдзи коркӧ Гиваын олысьяс.
Енмыс казьтыштас налысь лёк вӧчӧмсӧ, мыждас найӧс мыжъяссьыныс.
Ме аддзи Израильӧс овтӧминысь — сійӧ вӧлі виноград вотӧс кодь.
Ме аддзи Израильлысь батьяссӧ — найӧ вӧліны инжир пулӧн медводдза вотӧс кодьӧсь. Но найӧ мунісны Ваал-Пеорӧ, сетчисны яндысьтӧм олӧмас, лоины пежӧсь, радейтана идолъясныс кодьӧсь.
Ефремлӧн [рӧдмӧмнас] нималӧмыс жбырмунас лэбач моз: чужтӧмыс, нӧбасьӧмыс, сьӧктӧмыс оз нин ло.
Весиг кӧ быдтасны челядьнысӧ, Ме босьта найӧс.
Курыд шог лоӧ Ефремлы, кор Ме бергӧдча сыысь.
Кор Ме аддзи Ефремӧс, сійӧ вӧлі бур муӧ вужйӧдӧм пу кодь, но ӧні Ефрем нуӧдӧ ассьыс челядьсӧ виысь дінӧ.
Сет налы, Господьӧй, — но мый эськӧ Тэ кӧсъян налы?
Сет налы нӧбасьтӧм кынӧм да косьмӧм морӧс.
Быд лёксӧ найӧ вӧчисны Галгалын, сэні Ме понді мустӧмтны найӧс.
Налӧн лёк уджъясысь Ме вӧтла найӧс Аслам керкаысь, дугда радейтны найӧс, ӧд налӧн юралысьясныс асныраӧсь.
Ефремӧс пасьвартӧма!
Сылӧн вужйыс косьмӧма, вотӧссӧ сійӧ оз кут вайны. Но весиг кӧ найӧ пондасны чужтыны, Ме виа налысь дона чужтӧмторъяснысӧ.
Менам Енмӧй эновтас найӧс, ӧд найӧ эз кывзысьны Сылысь, найӧ лоӧны мукӧд войтыръяс пӧвстын шӧйтысьясӧн.
— Израиль вӧлі уна вожа виноград пу кодь, сійӧ вайис уна вотӧс. Кымын унджык сылӧн вӧлі вотӧсыс, сымын унджык сійӧ лэптіс висьпуктанінъяс.
Кымын бурджыка сылӧн муыс быдтіс нянь, сымын ёнджыка сійӧ мичмӧдіс юрбитан изъяс.
Кык пельӧ торъяліс налӧн сьӧлӧмыс, та вӧсна найӧс лоӧ мыждӧма. Господь пазӧдас налысь висьпуктанінъяссӧ, жуглас юрбитан изъяссӧ.
Ӧні найӧ шуалӧны: «Миян абу ӧксыным, ӧд Господьысь ми эгӧ полӧй.
А вӧлі кӧ, мый бурсӧ эськӧ сійӧ вермис вӧчны миянлы?»
Ӧксыяс висьталӧны нинӧм абусӧ, ылӧдчӧмӧн кыв сетӧны, кӧрталӧны йитӧдъяс.
Та вӧсна локтас на вылӧ мыждӧмыс гӧрӧм му вылӧ петысь пагӧдан турун моз.
Самарияын олысьяс полӧны Бет-Авенӧ сувтӧдӧм кукань идол вӧсна.
Самария войтыр бӧрдӧ кукань вӧсна, бӧрдӧны тшӧтш идоллӧн попъяс, кодъяс нимкодясьлісны сыӧн, ӧд Самариялӧн нималӧмыс вешйӧ сы дінысь.
Найӧ нуасны бӧлбансӧ Ассурӧ Ярев ӧксылы козин пыдди.
Ефремлы яндзим лоӧ, Израиль яналас аслас лӧсьӧдӧмторъясысь.
Ва вылысь быг моз бырас Самария аслас ӧксыкӧд.
Бырӧдӧма лоӧ Авенысь * вись ваян мылькъяс, ӧд тайӧ мылькъясыс — Израильлӧн мыжыс.
Йӧн да ёг турун кутас быдмыны налӧн висьпуктанінъяс вылын. Йӧзыс шуасны керӧсъяслы: «Вевттьӧй миянӧс!» Мылькъяслы шуасны: «Усьӧй миян вылӧ!»
Израиль, тэ мыж вӧчин Гиваын, и сійӧ кадсянь ӧнӧдз мыж вӧчан.
Сэні жӧ, Гиваын, тышыс суас мыж вӧчысьясӧс.
Ме мыжда тэнӧ Аслам кӧсйӧм серти. Тэныд паныд чукӧртчасны мукӧд войтыръяс, тэнӧ кыкпӧвста мыжсьыд лоӧ дорӧма.
Ефрем — велӧдӧм кукань, окотапырысь вартӧ. Ме Ачым пукті сийӧссӧ сылӧн вына сьылі вылӧ.
Ефремӧс Ме доддяла, Иуда пондас гӧрны, Яков — агсасьны.
Кӧдзӧй аслыныд веськыдлунсӧ, сэки вунданныд буралӧм.
Гӧрӧй аслыныд выль муяс, воис кад корсьны Господьӧс. Господь локтас да зэр моз кисьтас тіян вылӧ веськыдлунсӧ.
Ті кӧдзинныд пежсӧ, вундінныд лёксӧ, ті сёйинныд ылӧгыслысь вотӧссӧ, ӧд ті лача кутінныд асланыд туй вылӧ, уна лыда тышкайӧзныд вылӧ.
Тэнад войтыр пӧвстын кыптас шызьӧм, став тэнсьыд изкаръястӧ лоӧ бырӧдӧма, кыдзи тыш дырйи Шалман бырӧдіс Бет-Арбел. Сэні вӧлі виӧма мамъясӧс челядьныскӧд.
Тадзи лоас тіянлы Вефиль вӧсна, тіян пежсьыс-пеж уджъяссьыныд.
Кыа петігӧн Израильлысь ӧксыӧс лоӧ виӧма.
— Кор Израиль вӧлі том на, сійӧ вӧлі муса Меным. Египет муысь Ме кори пиӧс.
Сійӧс чукӧстісны, и сійӧ муніс Ме дінысь, пондіс вись вайны Ваал идолъяслы, сотны висьяс бӧлбанъяслы.
Ме велӧді Ефремӧс ветлӧдлыны, новлӧдлі сійӧс Аслам ки вылын, но сійӧ эз гӧгӧрво, мый Ме тӧждыси сы вӧсна.
Муслуныслӧн кӧвъясӧн морт моз Ме кыски найӧс Ас дінӧ. Ме босьтлі на вылысь сийӧссӧ, копыртчӧмӧн пуктывлі на водзӧ сёян.
Найӧ эз кӧсйыны бергӧдчыны Ме дінӧ, та вӧсна налы бӧр ковмас мунны Египетӧ, Ассур кутас ыджыдавны на вылын.
Шыпурт кутас ӧвтчыны налӧн каръясын, сійӧ жуглас налысь иганъяссӧ, бырӧдас найӧс сыысь, мый найӧ кӧсйисны вӧчны лёксӧ.
Менам войтыр пыр бергӧдчӧ Меысь. Налы шуӧны: «Шыасьӧй Медвылыссаыс дінӧ», но найӧ оз шыасьны, оз нимӧдны-кыпӧдны Менӧ.
Верма-ӧ Ме эновтны тэнӧ, Ефрем?
Верма-ӧ Ме кольны тэнӧ, Израиль?
Верма-ӧ эновтны тэнӧ Адмаӧс моз, вӧчны тэкӧд Севоимкӧд моз?
Менам сьӧлӧмӧй небзьӧ, Менам пытшкӧсӧй нормӧ.
Ме ог лэдз ыпъявны Аслам скӧрлунӧйлы, Ме ог нин бырӧд Ефремӧс, ӧд Ме — Ен, абу морт.
Ме, Вежаыс, тэ пӧвстын, скӧрлунӧн тэ дінӧ ог лок.
Господь равӧстас лев моз, и Ефрем мунас Сы бӧрся. Господь равӧстас — сэки тіралӧмӧн локтасны рытыввывсянь Сылӧн пияныс, повзьӧдӧм лэбачьяс моз найӧ жбыркнитасны Египетысь, гулюяс моз — Ассур муысь. Ме овмӧда найӧс асланыс керкаясӧ, — висьталӧ Господь.
— Ефрем кытшаліс Менӧ аслас пӧръясьӧмӧн, Израиль — аслас ылӧдчӧмӧн.
А Иуда кутчысьӧ на Ен дорас, эскӧ на вежа Енлы.
Ефрем кыйӧдӧ тӧвныр, вӧтлысьӧ асыв тӧв бӧрся, быд лун содтӧ пӧръясьӧмсӧ да виалӧмсӧ, Ассуркӧд кӧрталӧ йитӧдъяс, Египетӧ нуӧ вый.
Господь мыжалӧ Иудаӧс, Сійӧ мыждас Яковӧс олан туйсьыс, мынтысяс сылы уджъясыс серти.
Мам кынӧмас нин Яков конйыштіс воксӧ, а верстяммис да, вермасис Енкӧд.
Сійӧ вермасис анделкӧд да вермис сійӧс, бӧрдӧмӧн корис бурсьӧлӧмтчыны сы дінӧ.
Вефильын сійӧ паныдасис Енкӧд, сэні Енмыс сёрнитіс сыкӧд.
Господь эм Ен Саваоф, Сылӧн нимыс — Господь!
Израиль, бергӧдчы аслад Ен дінӧ.
Видз Ен дінӧ муслунтӧ да ов веськыда, быд кадӧ лача кут аслад Ен вылӧ.
Ефрем — ылӧг вески кутысь ханаанса кодь, сійӧ радейтӧ дзескӧдны.
Ефрем ошйысьӧ: «Ме зэв озыр, уна эмбур аслым чукӧрті!
Менам уджъясысь некод оз аддзы лёксӧ, мыжсӧ менсьым некод оз аддзы».
Но Ме, Господь, Египетысь петігад нин вӧлі тэнад Енмӧн. Чом вӧчан лунъяс дырйи моз Ме бара овмӧда тэнӧ чомъясӧ.
Ме шыасьлі пророкъяс дінӧ, петкӧдлі налы уна аддзылӧм, на пыр сёрнитлі велӧданвисьтъясӧн.
Галаад тырис лёкнас, сэтчӧс олысьяс лоины шогмытӧмӧсь. Галгалын начкисны ӧшъясӧс, медым вись вайны, но налысь висьпуктанінъяссӧ жугласны, найӧ лоӧны гӧрӧм му вылын туплясьысь из чукӧръяс кодьӧсь.
Яков пышйис Арам муӧ, Израиль кесъяліс гӧтырпуыс вӧсна, гӧтырпуыс вӧсна сійӧ видзис ыжъясӧс.
Господь петкӧдіс Израиль войтырӧс Египетысь, пророк нуӧдіс найӧс, пророк пыр Господь видзис найӧс.
Ефрем ёна дӧзмӧдіс Господьӧс. Та вӧсна вир кисьтӧмысь мыжсӧ Господь коляс сы вылӧ, Господьӧс омӧльтӧмсӧ бергӧдас сылы аслыс.
— Ефремлӧн сёрнитігӧн йӧзыс тіралісны.
Израиль чужанкотыръяс пӧвстын сійӧ вӧлі медтӧдчана, но Ваал вӧсна сійӧ мыжмис да куліс.
Водзӧ мыж вӧчӧ Ефрем, сывдӧ аслыс эзысь бӧлбанъясӧс, аслас мывкыд серти вӧчӧ идолъясӧс — ставыс тайӧ дорччысьлӧн удж. Вись вайысьяс йылысь шуалӧны, найӧ пӧ ӧшсӧ окалӧны.
Та вӧсна найӧ асъя ру кодьӧсь, ӧдйӧ бырысь лысва кодьӧсь, гумла вылын тӧвнырӧн нӧбӧдан кыд кодьӧсь, пачысь пуркйысь тшын кодьӧсь.
Но Ме, Господь, Египетысь петігад нин вӧлі тэнад Ен. Меысь ӧтдор мӧд енмыс тэнад абу, Меысь кындзи мӧд мездысьыс абу.
Ме тӧждыси тэ вӧсна овтӧминын, ватӧм муын.
Но кор тэнад вӧліны йирсянінъяс, тэ пӧттӧдз сёйлін.
А кор пӧтлін, сьӧлӧмад ыкшаасин да вунӧдлін Менӧ.
Та вӧсна Ме лоа тэныд лев кодьӧн, туй дорын кыйӧдчысь леопард кодьӧн.
Пиянсӧ воштӧм ош моз Ме уськӧдча тэ вылӧ, косявла морӧс кудсьыд сьӧлӧмтӧ, лев моз сёя тэнӧ, звер моз чашъя тэнӧ.
Тэ ачыд асьтӧ бырӧдан, Израиль, ӧд тэ кыпӧдчин Меным паныд, тэныд отсӧг Сетысьлы паныд.
Кӧні ӧні тэнад ӧксыыд, коді мездас тэнӧ став тэнад каръясын?
Кӧнӧсь тэнад юралысьясыд, кодъясӧс тэ корин Менсьым, шуин, сет пӧ миянлы ӧксыӧс да юралысьясӧс?
Скӧрмӧмпырысь Ме сеті тэныд ӧксыӧс, лӧгалӧмпырысь бӧр босьті сійӧс.
Ефремлысь лёк вӧчӧмсӧ гартыштӧма ёкмыльӧ, сылысь мыжсӧ видзӧны, оз вунӧдны.
Чужтан дойяс топӧдӧны сійӧс, но сійӧ вежӧртӧм кага кодь, кодлы воис кад чужны, но сійӧ оз пет.
Мезда-ӧ Ме сійӧс кулӧмыслӧн кабыр улысь, ньӧба-ӧ сійӧс кулӧмыслысь?
Кулӧм, кӧні тэнад чушканыд? Кулӧм, кӧні тэнад вермӧмыд?
Жалитӧмыс Менам оз ло.
Мед кӧ Ефрем аслас вокъяс пӧвстын вайӧ вотӧс, но петас асыв тӧв, овтӧминсянь пондас пӧльтны Господьлӧн тӧвнырыс, и Ефремлӧн юкмӧсыс кушмас, ва петаніныс косьмас.
Сылысь озырлунсӧ петкӧдасны, став донаторсӧ мырддяласны.
Самарияӧс лоӧ мыждӧма, ӧд сійӧ кыпӧдчис аслас Енлы паныд.
Сылӧн йӧзыс усясны шыпурт помысь, кагаяссӧ налысь виаласны, нӧбасьысьяслысь кынӧмсӧ вожӧдасны.
— Израиль, бӧр бергӧдчы Господь дінӧ, аслад Ен дінӧ, ӧд тэ усин аслад мыжыд вӧсна.
Кевмысьӧмӧн бергӧдчӧй Господь дінӧ, шуӧй Сылы: прӧстит миянлысь мыжъяснымӧс да сибӧд миянлысь козиннымӧс, ӧш пыдди ми ваям Тэныд кевмысьӧмнымӧс.
Ассур миянӧс оз мезды, вӧвъяс вылӧ лачанымӧс огӧ нин кутӧй, киӧн вӧчӧмторъяснымӧс ми огӧ нин шуӧй асланым енмӧн, ӧд Тэ дінысь батьтӧмъяс аддзӧны буралӧмсӧ.
— Найӧ Менӧ эновтісны, но Ме бурдӧда найӧс таысь, Ме бара понда сьӧлӧмсянь радейтны найӧс, скӧрлунӧс Ме вешта на дінысь.
Ме лоа Израильлы лысваӧн, сійӧ пондас дзоридзавны лилия моз, ливанса пуяс моз пыдӧ лэдзас вужъяссӧ и паськалас гӧгӧр.
Сійӧ лоӧ олив пу кодь мича, ливанса вӧр моз пондас ӧвтны чӧскыд дукӧн.
Израиль войтыр бара овмӧдчас олив пуяслӧн вуджӧр улӧ, найӧ пондасны быдтыны нянь, кутасны дзоридзавны виноград моз, нимавны ливанса вина моз.
Ефрем, Менӧ-ӧ тэ ӧткодялан идолъяскӧд?
Ме кыла тэнӧ да вочавидза тэныд, Ме тӧждыся тэ вӧсна.
Ме лоа тэныд веж кипарисӧн, Месянь лоӧ тэнад вотӧсыд.
Коді мывкыдаыс, медым гӧгӧрвоны тайӧс?
Коді вежӧраыс, медым тӧдмавны тайӧс?
Господьлӧн туйясыс веськыдӧсь, сэті мунӧны веськыда олысьяс, а лёк вӧчысьяс крукасьӧны.
{Еврей йӧз (комиӧдіс Kodko) @ Йоиль @ религ. гижӧд @ Библия @ 2021 @ Лб. .}
Йоиль пророклӧн небӧг
Петуэллӧн Йоиль пилы вӧлі Господьсянь кыв.
— Кывзӧй, юрнуӧдысьяс, кывзӧй, тайӧ муас олысьяс!
Вӧлі-ӧ татшӧмторйыс тіян олан лунъясӧ либӧ батьясныдлӧн олігӧн?
Висьтавлӧй та йылысь асланыд ныв-пилы, тіян ныв-пиныд мед висьталасны асланыс ныв-пилы, а найӧ мед юӧртасны водзӧ чужысьяслы.
Лёльӧяс бӧрся коляссӧ сёйис саранча, саранча бӧрся сёйисны чиркъяс, чиркъяс бӧрся сёйисны гагъяс.
Садьмӧй, кодалысьяс, ырзӧмӧн бӧрдӧй, сыркъялӧмӧн бӧрдӧй, вина юысьяс, ӧд босьтӧма тіян вомдорысь винанытӧ.
Менам му вылӧ уськӧдчис вына войтыр, лыдтӧм-тшӧттӧм войтыр.
Сылӧн пиньясыс ай левлӧн кодьӧсь, черлыыс энь левлӧн кодь.
Сійӧ бырӧдіс Менсьым виноград пуӧс, йирис Менсьым инжир пуӧс, сылысь кырсьсӧ чашйис да шыбитіс, колины сӧмын кульӧм вожъяс.
Пасьталӧй шогалан паськӧм, бӧрдӧй верӧспусӧ воштӧм том ныв моз.
Господьлӧн крамӧ оз нин вайны нянь вись ни вина вись.
Попъяс — Господьлӧн кесъялысьяс — ыджыд шогынӧсь.
Видз-муяс кушмисны, муыс бӧрдӧ, ӧд воӧм няньсӧ бырӧдӧма, виноград косьмӧма, олив пуяс нярмӧмаӧсь.
Шогсьӧй, нянь быдтысьяс, бӧрдӧй, виноград йӧрын уджалысьяс. Шобді да ид нянь кулӧма, виноград косьмӧма, инжир нярмунӧма, гранат, финик да яблӧг пуяс нюкыртчӧмаӧсь — став пуыс косьмӧма.
Йӧзыс воштісны гажлунсӧ.
Попъяс, пасьталӧй шогалан паськӧм да бӧрдӧй, ырзӧмӧн бӧрдӧй, висьпуктанін дорын кесъялысьяс!
Пырӧй крамӧ, менам Енлы кесъялысьяс, весиг войнас энӧ пӧрччӧй шогалан паськӧмнытӧ, ӧд тіян Енлӧн крамӧ оз нин вайны нянь вись да вина вись.
Урчитӧй вежа видзалан лунъяс, юӧртӧй ыджыд чукӧртчӧм йылысь. Коралӧй юрнуӧдысьясӧс да став войтырсӧ Господьлӧн, асланыд Енлӧн, крамӧ, сэні шыасьӧй Господь дінӧ.
Повзьӧдана лун миянӧс виччысьӧ, Господьлӧн луныс матын, Ставсӧвермысьсянь сійӧ локтас, медым бырӧдны.
Син водзаным бырис сёянным, Енлӧн крамын ланьтіс нимкодясьӧм-гажӧдчӧм.
Кӧдзӧм кӧйдыс сісьмис муас, жытникъяс кушмисны, нянь йӧртӧдъяс киссисны, ӧд няньыс эз ло.
Пемӧсъяс ружтӧны, мӧсъяс шӧйтӧны, абутӧм турунсӧ корсьӧны, весиг ыж чукӧръясӧс суис бырӧдӧмыс.
Тэ дінӧ, Господьӧй, ме шыася!
Веж туруныс сотчис миян видзьяс вылын, став пуяссӧ биыс чишкаліс.
Весиг вӧлявывса пемӧсъяс Тэсянь отсӧг виччысьӧны, ӧд юяс косьмисны, йирсянінъяс би улӧ веськалісны.
— Буксӧй буксанӧн Сионын, гораа горзӧй Менам вежа керӧс вылын!
Тіралӧй-дзӧрӧй, тайӧ муас олысьяс, ӧд Господьлӧн луныс локтӧ, сійӧ матын нин.
Тайӧ луныс сап пемыдӧн вевттьысьӧма, сійӧс кытшалӧма сьӧд кымӧр да сук ру. Асъя югӧр моз паськалӧ керӧсъяс вылын лыдтӧм-тшӧттӧм да вына войтыр. Татшӧм войтырыс эз на вӧвлы, и некор оз ло.
Сы водзвылын мунӧ бырӧдана би, бӧрсяньыс — ыпъялысь би.
Водзвылас муыс Эдэм сад кодь, бӧрвылас — кушмӧм овтӧмин. Некод оз вермы мездмынысӧ.
Уськӧдчысьяс вӧвъяс кодьӧсь, чукӧрӧн тӧвзьӧны.
Найӧ чеччалӧны керӧсъяс вывті, кылӧ тарантас гӧгыльяслӧн кодь шы, сотчысь идзаслӧн кодь шы. Найӧ тышӧ петысь вына тышкайӧз кодьӧсь.
Найӧс аддзӧмысь войтыръяс тіралӧны, йӧзыслӧн чужӧмныс быгалӧма.
Найӧ котӧртӧны тышкайӧз моз, вермасьысьяс моз кавшасьӧны карса стен вылӧ. Быдӧн мунӧ аслас нырвизьӧд, оз кеж аслас туйысь.
Ӧта-мӧдсӧ оз тойлавны, быдӧн кутӧ ассьыс нырвизьсӧ. Найӧ котӧртӧны ёсь шыяслы паныд, найӧс нинӧм оз сувтӧд.
Найӧ уськӧдчӧны кар вылӧ, кавшасьӧны карса стен вылӧ, гусясьысь моз ӧшиньӧд пырӧны керкаясӧ.
На водзын муыс дзӧрӧ, енэжыс сыркакылӧ.
Шондіыс да тӧлысьыс пемдасны, кодзувъяс югӧрсӧ воштасны.
Гораа чуксалӧмӧн Господь веськӧдлӧ тышкайӧзнас, Сылӧн тышкайӧзыс лыдтӧм-тшӧттӧм, Сылӧн тшӧктӧм серти вӧчысь вына.
Господьлӧн луныс ыджыд да повзьӧдана, вермас-ӧ кодкӧ ловйӧн кольны?
— Бергӧдчӧй Ме дінӧ став сьӧлӧмнаныд, видзалӧй да сыркъялӧмӧн бӧрдӧй, — висьталӧ Господь весиг талун.
Энӧ паськӧмнытӧ косялӧй, а сьӧлӧмнытӧ. Бергӧдчӧй Господьлань, асланыд Енлань, ӧд Сійӧ бур да мелі сьӧлӧма, Сылӧн терпитӧмыс ыджыд, Сылӧн буралӧмлы абу помыс, Сійӧ дась бӧр босьтны Ассьыс мыждана шуӧмсӧ.
Гашкӧ, Сійӧ вештас скӧрлунсӧ да бурсиас, сэки ті бара верманныд вайны Господьлы, асланыд Енлы, нянь вись да вина вись.
Буксӧй буксанӧн Сионын, урчитӧй вежа видзалан лунъяс, юӧртӧй ыджыд чукӧртчӧм йылысь!
Чукӧртӧй войтырӧс, вежӧдӧй чукӧртчӧмаясӧс, корӧй пӧрысьясӧс, вайӧдӧй челядьӧс, вайӧй пузчужӧм кагаясӧс.
Верӧспу мед эновтас узьлан жырсӧ, гӧтырпу мед петас аслас шойччан вежӧсысь.
Бӧрдӧй, попъяс, крам посводз да висьпуктанін костын. Господьлӧн кесъялысьяс, шуӧй: «Господьӧй, ло бур сьӧлӧма Аслад войтыр дінӧ. Эн сет янӧдны Ассьыд войтыртӧ, эн лэдз мукӧд войтырлы омӧльтны миянӧс.
Мед найӧ оз шуны, кӧні Израильлӧн Енмыс».
Сэки Господь сувтас дорйыны Ассьыс мусӧ, Сійӧ бурсьӧлӧмтчас Аслас войтырыс дінӧ.
Господь шуас Аслас войтырлы: — Ме сета тіянлы нянь, вина да вый, ті пӧттӧдзныд понданныд сёйны. Водзӧ ог лэдз мукӧд войтырлы янӧдны тіянӧс.
Войвывсянь уськӧдчысьясӧс Ме ылыста тіян дінысь, вӧтла найӧс ватӧм куш муӧ, водзвылас мунысьясӧс Ме вӧйта асыввыв саридзӧ, бӧрвылас мунысьясӧс — рытыввыв саридзӧ. Унасьыс-уна лёктор вӧчӧмсьыс налӧн шойысь пондас ӧвтны сісьмӧм лёк дук.
Эн пов, муӧй, гажӧдчы да нимкодясь, ӧд Господьлӧн уджъясыс ыджыдӧсь.
Энӧ полӧй, пемӧсъяс, овтӧминса йирсянінъяс вылын бара петас веж турун, пуяс пондасны вотӧсавны, инжир да виноград ваясны уна вотӧс.
Гажӧдчӧй, Сионын олысьяс, нимкодясьӧй Господь Енныд вӧсна!
Сійӧ сетас тіянлы тырмымӧн зэр, воддза мозыс ыстас тіянлы арся да тувсовъя зэр.
Вартанінъяс тырасны няньӧн, пычкан гуяс — винаӧн да выйӧн.
Ме вештыся тіянлы сійӧ вояссьыс, кор Ме ыстылі тіян вылӧ саранча, чиркъясӧс, гагъясӧс да лёльӧясӧс, медым тайӧ ыджыд тышкачукӧрыс сёйис быдтаснытӧ.
Ті понданныд пӧттӧдзныд сёйны, понданныд ошкыны Господьӧс, ассьыныд Ентӧ, коді вӧчис тіянлы шензьӧданаторъяс. Менсьым войтырӧс некор оз ло янӧдӧма.
Сэки ті тӧдмаланныд, мый Ме ола Израиль войтыр пӧвстын, мый Ме — Господь, тіян Енныд, и Меысь кындзи мӧд Енмыс абу. Менсьым войтырӧс некор оз ло янӧдӧма.
— Тайӧ лунъяс бӧрын Ме кисьта Ассьым Лолӧс быд морт вылӧ. Тіян пиянныд да нывъясныд пондасны пророкавны, олӧмаяс пондасны вӧтавны збыльмана вӧтъяс, зонъясныд кутасны аддзыны Енсянь петкӧдчылӧмъяс.
Сійӧ лунъясӧ Ме кисьта Ассьым Лолӧс тшӧтш кесйӧгъяс да кесйӧг аньяс вылӧ.
Енэжын и му вылын петкӧдла индысьпасъяс: вир, би да тшын.
Шондіыс пемдас, тӧлысьыс вирӧн ойдас Господьлӧн ыджыд да повзьӧдана луныс вотӧдз.
И быдӧн, коді шыасяс Господь дінӧ, мездмас.
Господьлӧн шуӧм серти мездмӧмыс лоӧ Сион керӧсын да Ерусалимын. Мездмасны найӧ, кодъясӧс корас Господь.
— Сійӧ лунъясӧ Ме бара сета Иудалы да Ерусалимлы воддза кодьыс бур олӧм. Ме чукӧрта войтыръясӧс да вайӧда найӧс Иосафат ковтысӧ. Сэні Ме кута мыждыны найӧс Аслам Израиль войтыр вӧсна да Аслам му вӧсна сыысь, мый войтыръяс пӧвстӧ разӧдісны Менсьым войтырӧс, юклісны Менсьым муӧс.
Пудъясьӧмӧн найӧ юклісны Менсьым войтырӧс, зонмӧс вузалісны сійӧ жӧ донсьыс, мый мынтылісны кырсалысь аньлы, нылӧс вузалісны, медым вина ньӧбны да юны.
Тир, Сидон да Филистим му, мый ті Месянь кӧсъянныд?
Гашкӧ, ті кӧсъянныд водзӧс перйыны Менсьым?
Тадзи кӧ, регыд Ме бергӧда водзӧс перйӧмнытӧ ас выланыд. Ті гусялінныд Менсьым эзысь-зарниӧс, нуинныд Менсьым донаторъяс асланыд юрбитанінъясӧ. Иудаын да Ерусалимын олысьясӧс ті вузалінныд грек войтырлы, медым ылӧджык нуӧдны найӧс чужан мусьыныс.
Но Ме бӧр вайӧда найӧс сэтысь, кытчӧ ті найӧс вузалінныд. Ме бергӧда лёк вӧчӧмнытӧ ас выланыд.
Тіянлысь ныв-пинытӧ Ме вузала Иуда войтырлы, а найӧ вузаласны ылын олысь Сава войтырлы.
Тадзи висьталӧ Господь.
Юӧртӧй войтыръяс пӧвстын: — Дасьтысьӧй ыджыд тыш кежлӧ, чукӧртӧй тышкайӧзӧс!
Петӧй тышӧ, вермасьысьяс!
Асланыд гӧръясысь дорӧй шыпуртъяс, чарлаясысь — шыяс.
Вынтӧм мед шуас: «Ме вына тышкасьысь».
Войтыръяс, тэрмасьӧй локны быдласянь, чукӧртчӧй ковтысӧ!
Господьӧй, вайӧд сэтчӧ Ассьыд вермасьысьястӧ!
Мед кыпӧдчасны войтыръяс, мед локтасны Иосафат ковтысӧ.
Сэні Ме пукся, медым мыждыны войтыръясӧс.
Босьтӧй чарла, ӧд воис вундан кад.
Талялӧй войтыръясӧс виноградӧс моз, ӧд пычкан гуыс тыр, вийӧдчанінысь вина моз визувтӧ налӧн вирыс, ӧд лёкыс налӧн вывті ыджыд.
Унасьыс-уна йӧз чукӧртчӧма мыждан ковтысӧ, ӧд Господьлӧн луныс матыстчӧ ковтыслань.
Шондіыс да тӧлысьыс пемдасны, кодзувъяс югӧрсӧ воштасны.
Господь равӧстас-горӧдас Сионсянь, Ассьыс гӧлӧс шысӧ сетас Ерусалимсянь.
Сэки енэжыс да муыс сыркмунасны.
Но Господь доръяс Ассьыс войтырсӧ, Сійӧ видзас Израиль пиянӧс.
— Сэки ті тӧдмаланныд, мый Ме — Господь, тіян Енныд, Ме ола Сионын, Аслам вежа керӧсын.
Ерусалим лоӧ вежаинӧн, и мукӧд войтыр сэтчӧ оз пыр.
Сійӧ лунӧ керӧсъяс вывсянь пондас войтавны вина, мылькъяс вывті визувтны йӧв, Иуда муын сёртасъяс тырасны ваӧн. Господьлӧн крамысь визувтас ва, сійӧ пондас юктавны Ситтим ковтыс.
Иуда войтырӧс виалӧм-дзескӧдӧм понда, налӧн муын мыжтӧм вир кисьтӧм понда Египет му лоӧ кушинӧн, Эдом — овтӧминӧн.
Но Иуда муын пыр лоӧ олысьыс, Ерусалимын пондасны овны нэмъяс чӧж.
Налысь вирсӧ кисьтӧмысь Ме водзӧс перъя, Египетӧс да Эдомӧс ог коль мыждытӧг. Господь олӧ Сионын!
{Еврей йӧз (комиӧдіс Kodko) @ Амос @ религ. гижӧд @ Библия @ 2021 @ Лб. .}
Амос пророклӧн небӧг
Тайӧ кывъясыс Амослӧн, коді рӧдмӧдіс ыжъясӧс Текояын. Сійӧ аддзыліс Израиль йылысь петкӧдчылӧм, тайӧ вӧлі му вӧрӧмӧдз кык воӧн водзджык. Сэки Иуда муын юраліс Озей ӧксы, а Израиль муын — Еровам ӧксы, Йоаслӧн пиыс.
Амос шуис: — Господь равӧстас-горӧдас Сионсянь, Ассьыс гӧлӧс шысӧ сетас Ерусалимсянь. Сэки ыж видзысьяслӧн йирсянінъяс косьмасны, Кармил керӧс вылын ставыс нярмас.
Господь тадзи висьталӧ: — Дамаск карын олысьяс мыж бӧрся мыж вӧчисны, та вӧсна Ме ог веж Ассьым мыждана шуӧмӧс. Найӧ ӧд кӧртысь вӧчӧм вартан гӧгыльӧн Галаад му вывті мунісны.
Та понда Азаиллысь керкасӧ Ме биӧн сота, Бен-Хададлысь изкарсӧ би ньылыштас.
Дамасклысь иганъяссӧ жугла, бырӧда Авен ковтысын юралысьӧс, Бет-Эденын юралан бедьсӧ кутысьӧс. Арам войтырӧс пленӧ нуӧдасны Кирӧ, — висьталӧ Господь.
Господь тадзи висьталӧ: — Газа карын олысьяс мыж бӧрся мыж вӧчисны, та вӧсна Ме ог веж Ассьым мыждана шуӧмӧс. Найӧ ӧд уна войтырӧс нуӧдісны пленӧ, вузалісны найӧс эдом войтырлы.
Та понда Газа карлысь стенъяссӧ Ме биӧн сота, сылысь изкарсӧ би ньылыштас.
Бырӧда Азотын юралысьӧс, Аскалонын юралан бедьсӧ кутысьӧс. Экрон вылӧ киӧс лэпта, и филистимсалӧн колясыс бырас, — висьталӧ Господь Ыджыдыс.
Господь тадзи висьталӧ: — Тир карын олысьяс мыж бӧрся мыж вӧчисны, та вӧсна Ме ог веж Ассьым мыждана шуӧмӧс. Найӧ ӧд пленӧ босьтӧмаясӧс вузалісны эдом войтырлы, вокыскӧд кӧрталӧм йитӧдсӧ вунӧдісны.
Та понда Тир карлысь стенъяссӧ Ме биӧн сота, сылысь изкарсӧ би ньылыштас.
Господь тадзи висьталӧ: — Эдом войтыр мыж бӧрся мыж вӧчисны, та вӧсна Ме ог веж Ассьым мыждана шуӧмӧс. Найӧ ӧд шыпуртӧн дзескӧдісны вокъяснысӧ, эз жалитны найӧс, налӧн ыпъялан скӧрлуныс эз дугдыв, лӧгалӧмыс эз куслы.
Та понда Теман карӧс Ме биӧн сота, Восора изкарӧс би ньылыштас.
Господь тадзи висьталӧ: — Аммон войтыр мыж бӧрся мыж вӧчисны, та вӧсна Ме ог веж Ассьым мыждана шуӧмӧс. Найӧ ӧд виисны йӧзсӧ Галаадын, весиг кынӧма аньяслысь рушкунысӧ вожӧдісны, медым паськӧдны ассьыныс оланінсӧ.
Та понда Равва карлысь стенъяссӧ Ме биӧн сота. Тышкайӧзлӧн горзӧм улӧ, ыджыд тӧвнырлӧн омлялӧм улӧ изкарсӧ би ньылыштас.
Налысь ӧксысӧ пленӧ нуӧдасны, сыкӧд тшӧтш став юралысьсӧ босьтасны, — висьталӧ Господь.
Господь тадзи висьталӧ: — Моав войтыр мыж бӧрся мыж вӧчисны, та вӧсна Ме ог веж Ассьым мыждана шуӧмӧс. Найӧ ӧд эдомса ӧксылысь лыяссӧ коризӧдз сотісны.
Та понда Моавӧс Ме биӧн сота, Кериот изкарӧс би ньылыштас.
Моавӧс лоӧ бырӧдӧма тыш дырйи, тышкайӧзлӧн горзӧм да буксан шы улӧ. Моавса ыджыдалысьӧс бырӧда, сэтчӧс юралысьясӧс виа, — висьталӧ Господь.
Господь тадзи висьталӧ: — Иуда войтыр мыж бӧрся мыж вӧчисны, та вӧсна Ме ог веж Ассьым мыждана шуӧмӧс. Найӧ ӧд эновтісны Менсьым Индӧдӧс, Менам тшӧктӧмъяс серти эз овны. Батьясныс моз найӧ юрбитісны ылӧг енъяслы, кодъяс кежӧдісны найӧс туйсьыс.
Та понда Иудаӧс Ме биӧн сота, Ерусалим изкарӧс би ньылыштас.
Господь тадзи висьталӧ: Израиль войтыр мыж бӧрся мыж вӧчисны, та вӧсна Ме ог веж Ассьым мыждана шуӧмӧс. Найӧ ӧд вузалӧны веськыда олысьӧс эзысь сьӧмысь, гӧльӧс — кӧмкот гозйысь.
Гӧль йӧзӧс найӧ талялӧны кок уланыс, коньӧръяслы туйсӧ тупкӧны.
Батьыс да пиыс ӧти ань дінӧ ветлӧны — тадзи янӧдӧны Менсьым вежа нимӧс.
Уджйӧзӧн сетӧмысь коньӧръяслысь босьтӧны паськӧм, сы вылын куйлӧны быд висьпуктанін дорын, юрбитанінын юӧны мыжалӧм йӧзлысь перйӧм винасӧ.
Тіян вӧсна Ме бырӧді аморейясӧс, кодъяс вӧліны сус пу кодь кузьӧсь, тупу кодь ёнӧсь.
Ме бырӧді найӧс вужвыйӧдзныс, ӧти вотӧс эг коль.
Ме петкӧді тіянӧс Египет муысь, нелямын во чӧж нуӧді овтӧминті, медым сетны тіянлы аморейяслысь мусӧ.
Пиян пӧвстсьыныд Ме бӧрйи пророкъясӧс, том зонъяс пӧвстысь — назорейясӧс.
Абу-ӧ тайӧ тадзи, Израиль войтыр? — висьталӧ Господь. — А ті юкталінныд назорейясӧс винаӧн, пророкъясӧс ӧлӧдінныд, энӧ пӧ пророкалӧй.
Регыд Ме личка тіянӧс, кыдзи кольта тыра тарантас личкӧ мусӧ.
Тэрыба котралысь оз вермы пышйыны, вына морт эбӧссӧ воштӧ, повтӧм морт оз вермы мездыны асьсӧ. Ньӧввужйӧн лыйсьысь усьӧ, пода тышкаморт оз вермы пышйыны, верзьӧма оз вермы мездыны ассьыс олӧмсӧ.
Сійӧ лунӧ весиг медся повтӧм тышкамортыс пасьтӧгыс пышъяс, — висьталӧ Господь.
Израиль войтыр, кывзӧй, мый висьталӧ Господь тіян йылысь, кывзӧй, чужанкотыръяс, кодъясӧс Сійӧ петкӧдіс Египет муысь. Сійӧ шуӧ:
— Сӧмын тіянӧс Ме бӧрйи мувывса войтыръяс пӧвстысь, та вӧсна Ме мыжда тіянӧс мыжъяссьыныд.
— Петасны-ӧ туйӧ кык морт ӧта-мӧдыскӧд сёрнитчытӧг?
Равзӧ ӧмӧй вӧрын лев, абу кӧ сылӧн кыйдӧсыс?
Кутас ӧмӧй равзыны том лев аслас позйын, эз кӧ нинӧм кый?
Шедас ӧмӧй пӧтка лэчкӧ, оз кӧ некод лэчсӧ окты?
Вӧрзьылас ӧмӧй дзугйыс, нинӧм кӧ сэтчӧ оз шед?
Карас кӧ кылӧ буксан шы, войтырыс ӧмӧй оз повзьы?
Суас-ӧ карӧс шог, оз кӧ Господь тайӧс лэдз?
Господь Ыджыдыс нинӧм оз вӧч, оз кӧ восьт гусяторсӧ Аслас кесйӧгъяслы, пророкъяслы.
Лев кӧ равӧстас, коді нӧ оз повзьы?
Господь Ыджыдыс кӧ висьталас, коді нӧ оз пророкав?
Юӧртӧй Азот изкарын олысьяслы, египетса каръясын олысьяслы шуӧй: 
— Чукӧртчӧй Самария керӧсъяс вылӧ, видзӧдлӧй, кутшӧм шызьӧм да дзескӧдӧм сэні!
Дзескӧдӧмӧн да мырддялӧмӧн найӧ чукӧртӧны озырлун асланыс ыджыд керкаясӧ, веськыда вӧчны найӧ оз кужны, — висьталӧ Господь. — Та вӧсна Господь Ыджыдыс тадзи висьталӧ: — Мутӧ кытшалас вӧрӧг, вӧчас тэнӧ вынтӧмӧн, куштас ыджыд керкаястӧ.
Господь тадзи висьталӧ: — Кыдзи ыж видзысь нетшыштӧ лев вомысь сӧмын ыжлысь коксӧ либӧ пельсӧ, тадзи мездмас сӧмын колясыс сійӧ израильсаясысь, кодъяс Самарияын пукалӧны небыд пуклӧсын, Дамаскысь вайӧм юрлӧсъяс вылын.
Кывзӧй да ӧлӧдӧй Яковлысь рӧдсӧ, — висьталӧ Господь Ыджыдыс, Ен Саваоф.
— Сійӧ лунӧ, кор Ме мыжда Израиль войтырӧс налӧн мыжъясысь, Ме бырӧда Вефильысь висьпуктанінъяс.
Висьпуктанінлысь сюръяссӧ керыштасны да шыбитасны муӧ. Ме бырӧда тӧвся и гожся керкаяс, слӧн лыӧн мичмӧдӧм керкаяс киссясны. Уна керка жмуткысяс, — висьталӧ Господь.
Кывзӧй, ті, васанса мӧсъяс, Самария керӧс вылын олысь аньяс! Ті дзескӧданныд гӧльясӧс, топӧданныд коньӧръясӧс, верӧсныдлы тшӧктанныд: «Вай юны!»
Господь Ыджыдыс кыв сетіс, Аслас вежалунӧн кӧсйысис, мый воасны лунъяс, кор тіянӧс вугырӧ пысалӧмӧн нуӧдасны, дзик ставнытӧ кыйӧм чериӧс моз кыскасны.
Ті петанныд жугалӧм карса стен пыр, быдӧн петас сэті, кӧні лоӧ. Тіянӧс шыбитасны Хармонӧ, — висьталӧ Господь.
Мунӧй Вефильӧ да водзӧ мыж вӧчӧй, мунӧй Галгалӧ да содтӧй мыж вӧчӧмнытӧ.
Кӧть быд асыв вайӧй висьяснытӧ, быд куим лун мысти вайӧй дасӧд юкӧннытӧ!
Аттьӧалана вись пыдди сотӧй шоммӧдӧм нянь, ас кӧсйӧм серти вайӧм вись йывсьыныд юӧртӧй-ошйысьӧй. Ӧд ті, Израиль войтыр, радейтанныд тадзи вӧчны, — висьталӧ Господь Ыджыдыс.
— Таысь Ме мынтыси тіянлы, и сиктсаяслӧн эз вӧв нянь, карсаяслӧн пиньныс нянь курччалӧмысь шойччис.
Но ті энӧ бергӧдчӧй Ме дінӧ, — висьталӧ Господь. — 
Ме зэрсӧ тіянлы эг сет, кор вундан кадӧдз вӧлі куим тӧлысь на.
Ӧти кар вылӧ кисьті зэрсӧ, а мӧд кар вылӧ — эг.
Кӧнкӧ зэрліс, а кӧнкӧ зэртӧмысла муыс косьмис.
Кык-ӧ-куим карысь йӧзыс ветлісны орчча карӧ, медым ва юны, сӧмын пӧттӧдзныс юны налы эз вӧв ваыс.
Но ті энӧ бергӧдчӧй Ме дінӧ, — висьталӧ Господь. — 
Сотысь тӧвруӧн да висьӧмӧн Ме бырӧдлі тіян видз-му вылысь няньнытӧ, косьті расъяснытӧ да виноград йӧрнытӧ. Инжир да олив пуястӧ сёйис лёльӧ. Но ті энӧ бергӧдчӧй Ме дінӧ, — висьталӧ Господь. — 
Ме ысті тіян вылӧ пӧрӧс висьӧм, кыдзи коркӧ ысті Египет вылӧ. Ме виалі шыпуртӧн зонъяснытӧ, вӧрӧгныдлы сеті вӧвъяснытӧ. Тышкайӧзныдлӧн чукӧртчанінын шойяссянь дукыс пуркйис тіян ныр-вомӧдз.
Но ті энӧ бергӧдчӧй Ме дінӧ, — висьталӧ Господь. — 
Содом да Гомора каръяслы моз Ме вайи тіян пӧвстӧ бырӧдӧм, и ті лоинныд биысь перйӧм сэрапом кодьӧсь. Но ті энӧ бергӧдчӧй Ме дінӧ, — висьталӧ Господь. — 
Та вӧсна, Израиль, виччысь, мый Ме вӧча тэныд!
Дасьтысь аддзысьны Мекӧд, Аслад Енкӧд, ӧд Ме кута мыждыны тэнӧ, Израиль! Со, Сійӧ вӧчис керӧсъяссӧ, артмӧдіс тӧвсӧ. Сійӧ висьталӧ мортлы Ассьыс кӧсйӧмсӧ. Асъя югыдсӧ Сійӧ вежӧ пемыдӧн, ветлӧдлӧ керӧсъяс вывті.
Сылӧн нимыс — Господь, Ен Саваоф.
Кывзӧй, Израиль войтыр, тіян йылысь сьыла тайӧ бӧрдӧдчанкывсӧ.
Усьӧма Израиль ныв, чеччынысӧ оз вермы!
Аслас му вылӧ сійӧс шыбитӧма, сійӧс лэптысьыс абу.
Господь Ыджыдыс тадзи висьталӧ: — Израильса карысь кӧ тышӧ петас сюрс морт, ловйӧн кольӧ сӧмын сёыс. Петас кӧ сё морт, ловйӧн кольӧ дасыс.
Господь тадзи висьталӧ Израиль войтырлы: — Корсьӧй Менӧ, и ловйӧн колянныд.
Энӧ Вефильысь Менӧ корсьӧй, энӧ мунӧй юрбитны Галгалӧ, энӧ ветлӧдлӧй Бер-Шеваӧ. Ӧд Галгалын олысьясӧс пленӧ нуӧдасны, Вефиль нинӧмӧдз воас.
Корсьӧй Господьӧс, и ловйӧн колянныд. Онӧ кӧ корсьӧй, Сійӧ биӧн уськӧдчас Ӧсиплӧн рӧд вылӧ, и биыс ньылыштас ставсӧ, сотчас Вефиль — и сійӧс кусӧдысьыс оз ло.
Со, веськыда мыждӧмсӧ ті бергӧдінныд курыд зелляӧ, веськыдлунсӧ муӧ талялінныд!
Сійӧ вӧчис Корӧся да Куима кодзув чукӧръяс, сап пемыдсӧ вежӧ асъя югыдӧ, лунсӧ — войӧ. Саридзысь Сійӧ чукӧстӧ васӧ да мусӧ киськалӧ.
Сылӧн нимыс — Господь!
Вынаясӧс Сійӧ бырӧдӧ, налысь изкарсӧ кисьтӧ.
Коді ёрд вылын веськыда мыждыны корӧ, сійӧс ті мустӧмтанныд, збыльсӧ висьталысьӧс зывӧктанныд.
Ті дзескӧданныд гӧльясӧс, босьтанныд налысь няньсӧ. Та вӧсна лоас тадзи: ті лэптанныд керкаяс кералӧм ыджыд изъясысь, но сэтчӧ онӧ овмӧдчӧй, ті пуктанныд бур виноград йӧръяс, но сэтчӧс вотӧсысь пычкӧм винасӧ онӧ юӧй.
Ме тӧда, кутшӧм уна тіян лёк вӧчӧмныд, тӧда, кутшӧм уна тіян мыжъясныд.
Веськыда олысьӧс ті дзескӧданныд, козинъяс босьтанныд, ёрд вылын коньӧрӧс мыжтӧгыс мыжданныд.
Та вӧсна вежӧра морт татшӧм кадӧ чӧв олӧ, ӧд тайӧ лёк кад.
Бурсӧ корсьӧй, а эн лёксӧ, медым ті ловйӧн колинныд. Сэки Господь Ен Саваоф лоас тіянкӧд, кыдзи ті и шуанныд.
Мустӧмтӧй лёксӧ да радейтӧй бурсӧ, веськыда мыждӧй ёрд вылын.
Гашкӧ, Господь Ен Саваоф бурсьӧлӧмтчас Ӧсип рӧдысь ловйӧн кольӧмаяс дінӧ.
Господь Ыджыдыс, Ен Саваоф тадзи висьталӧ: — Быд изэрд вылын кутас кывны бӧрдӧм шы, быд туй вылын — ойзӧм.
Му вӧдитысьясӧс ӧтвылысь бӧрдӧдчысьяскӧд корасны бӧрдӧдчыны-сьывны. Быд виноград йӧрын кутасны синва кисьтны, ӧд Ме муна тіян пӧвстті, — висьталӧ Господь.
Курыд шог сылы, коді Господьлысь лунсӧ виччысьӧ!
Бур вылӧ-ӧ тіянлы Господьлӧн луныс лоӧ?
Сійӧ пемыд лоӧ, оз югыд. Сійӧ лунӧ ті лоанныд морт кодь, коді пышйӧ левысь, но паныдасьӧ ошкӧд, котӧртӧ гортӧдзыс да кутчысьӧ кинас стенмӧ, но сійӧс змей чушкӧ.
Господьлӧн луныс пемыд, абу югыд.
Сылӧн луныс сап пемыд, весиг чут мында абу югыдыс.
Ме мустӧмта гажӧдчан лунъяснытӧ, зывӧкта гажӧдчыны чукӧртчӧмнытӧ.
Ваянныд кӧ Меным сотан да нянь висьяс, Ме ог сибӧд найӧс. Бурасян вись пыдди кӧ ваянныд тшӧгӧдӧм куканьясӧс, Ме ог видзӧдлы на вылӧ.
Ылыст Ме дінысь гора сьыланкывъястӧ, арфа шыястӧ Ме ог кӧсйы кывзыны.
Но веськыда мыждӧмыс мед визувтас ва моз, веськыдлуныс — ю моз.
Израиль войтыр! Нелямын во чӧжнас овтӧминын вайлінныд-ӧ ті Меным начкӧм ыж-мӧскӧс да мукӧд вись?
Ті новлӧдлінныд Молок идоллысь чомсӧ да Ремфан енлысь кодзувсӧ — ас киӧн вӧчӧм бӧлбанъясӧс.
Та вӧсна Ме вӧтла тіянӧс Дамаскысь на ылӧджык, — висьталӧ Господь.
Сылӧн нимыс — Ен Саваоф.
Курыд шог тіянлы, войтыр пӧвстысь медтӧдчанаяслы, кодъяс вылӧ став Израиль лача кутӧ. Ті тӧждысьтӧг оланныд Сионын да Самария керӧс вылын.
Мунӧй Калне карӧ да видзӧдлӧй, сэтысянь мунӧй ыджыд Хамат карӧ, лэччӧй филистимса Геф карӧ. Ті ӧд наысь абу ёнджыкӧсь. Налӧн ӧмӧй муныс тіянысь ыджыдджык?
Ті кӧсъянныд ылыстны сійӧ лунсӧ, кор лёкыс суас тіянӧс, но ті асланыд виалӧм-дзескӧдӧмӧн матыстанныд сійӧс.
Ті куйланныд слӧн лыысь вӧчӧм узьланін вылын, жуйвидзанныд юрлӧсъяс вылын пукалӧмӧн. Ті босьтанныд ыж чукӧрысь баляясӧс, йирсянінысь куканьясӧс, и сёянныд найӧс. Ті лӧвтанныд-сьыланныд арфа улӧ, чайтанныд, мый Давид моз кужанныд ворсны. Вись ваян дозйысь ті юанныд вина, мавтчанныд медбур мавтасъясӧн. Но тіянлы веськодь, мый Ӧсиплысь рӧдсӧ суас бырӧдӧм.
Та вӧсна ті медводдзаясӧн мунанныд пленӧ — помасяс жуйвидзысьяслӧн гажӧдчӧмыс!
Яков рӧдлӧн вылӧ кыпӧдчӧмыс Меным зывӧк, сылысь изкарсӧ Ме мустӧмта, — висьталӧ Господь Ен Саваоф. — Та вӧсна Ме, Господь Ыджыдыс, кыв сета, мый карсӧ ставнас вӧрӧглы коля.
Весиг дас морт кӧ ӧти керкаӧ дзебсясны, найӧ тшӧтш куласны. Кор шойысла локтас рӧдвужсьыс кодкӧ али шойяс сотысь да юалас керкаас пукалысьлысь: «Эм-ӧ на кодкӧ тэкӧд?», мӧдыс вочавидзас: «Абу».
Локтысь содтас: «Чӧв ов!
Господьлысь нимсӧ тані эн казьтыв».
Ӧд Господь тшӧктас пазӧдны ыджыд керкаяс, дзикӧдз жуглыны ичӧт керкаяс.
Изкырта вывті ӧмӧй котралӧны вӧвъяс?
Верман ӧмӧй ӧшъясӧн гӧрны сэті?
А ті бергӧдінныд веськыда мыждӧмсӧ пагӧдан быдмӧгӧ, веськыдлуныслысь вотӧссӧ — курыд зелляӧ.
Ті нимкодясянныд Ло-Девар* кар босьтӧмысь, шуанныд, асланым вынӧн пӧ Карнаим босьтім.
Израильсаяс, кывзӧй, — висьталӧ Господь Ен Саваоф. — Ме кыпӧда тіянлы паныд войтырӧс. Найӧ кутасны дзескӧдны тіянӧс быдлаын Лево-Хаматсянь Арава сёнӧдз.
Со мый петкӧдліс меным Господь Ыджыдыс. Сійӧ вӧчис саранча чукӧр буретш сэки, кор ӧксылысь турунсӧ вӧлі ытшкӧма, и петіс выль турун.
Саранча сёйис став турунсӧ. Сэки ме шуи: «Господьӧй Ыджыдӧй, прӧстит!
Яков рӧд оз вермы водзсасьны, сійӧ ӧд этша лыда».
Господь вежис кывсӧ.
«Оз ло тайӧ», — шуис Господь.
Со мый петкӧдліс меным Господь Ыджыдыс. Сійӧ мӧдӧдіс мыждӧм могысь би. Биыс ньылыштіс пыдӧстӧм йирлысь васӧ да мулысь юкӧнсӧ.
Сэки ме шуи: «Господьӧй Ыджыдӧй, эн вӧч тайӧс!
Яков рӧд оз вермы водзсасьны, сійӧ ӧд этша лыда».
Господь вежис кывсӧ.
«Тайӧ тшӧтш оз ло», — шуис Господь Ыджыдыс.
Со мый петкӧдліс меным Господь Ыджыдыс. Сійӧ сулаліс карса стен вылын, киас кутіс изъя кӧв. *
Господь юаліс менсьым: «Мый тэ аддзан, Амос?»
Ме вочавидзи: «Изъя кӧв».
Господь шуис: «Тайӧ изъя кӧвнас Ме тӧдмала Ассьым Израиль войтырӧс, медым аддзыны, веськыдӧсь-ӧ найӧ.
Водзӧ найӧс ог прӧстит».
Исаак рӧдлӧн вись ваян мылькъясыс кушмасны, Израильлысь вежаинъяссӧ лоӧ жуглӧма, Ме сувта шыпуртӧн Еровам рӧдлы паныд.
Вефильса Амасей поп мӧдӧдіс мортӧс израильса Еровам ӧксы дорӧ висьтавны: «Амос кыпӧдӧ Израиль войтырӧс тэныд паныд.
Сылӧн сёрниыс бырӧдас мутӧ.
Амос весиг шуис, мый Еровам кулас шыпурт помысь, а Израиль войтырӧс нуӧдасны пленӧ».
Амасей шуис Амослы: «Тӧдысь-аддзысь, мун Иуда муӧ.
Сэні кынӧмпӧттӧ перйы да сэні пророкав, а Вефильын эн пророкав. Тані ӧксылӧн вежаин да войтырлӧн вежа керка».
Амос вочавидзис Амасейлы: «Ме абу пророк и абу пророклӧн пи.
Ме рӧдмӧда ыжъясӧс да чукӧрта инжир.
Но Господь босьтіс менӧ ыжъяс дорысь да шуис: “Мун да пророкав Менам Израиль войтырлы”.
Ӧні кывзы Господьлысь кывсӧ.
Тэ шуан: “Эн пророкав Израиль йылысь, эн юӧрт Исаак рӧд йылысь”.
Та вӧсна Господь тадзи висьталӧ: — Тайӧ карас гӧтырыд лоас кырсалысь аньӧн, ныв-пиыд кулас шыпурт помысь, мутӧ мурталӧмӧн юкласны. Пеж муын тэ кулан, а Израиль войтырӧс нуӧдасны пленӧ».
Господь Ыджыдыс петкӧдліс меным кисьмӧм яблӧг-груша тыра куд.
Господь юаліс: «Мый тэ аддзан, Амос?»
Ме вочавидзи: «Кисьмӧм яблӧг-груша тыра куд».
Господь шуис меным: «Менам Израиль войтырлы пом воис. Водзӧ найӧс ог прӧстит».
Сійӧ лунӧ гажӧдчан сьыланкывъяс вежсясны бӧрдӧмӧн, — висьталӧ Господь Ыджыдыс.
— Быдлаын кутасны туплясьны шыбитӧм шойяс. Чӧв олӧй!
Кывзӧй, гӧльясӧс талялысьяс да коньӧръясӧс дзескӧдысьяс!
Ті шуанныд: «Кор нин помасяс выль тӧлысь пасйӧмыс, медым вермим бара вузавны нянь? Кор нин помасяс шойччан луныс, медым вермим восьтны нянь видзанінъяс? Сэки ичӧтджык мурталан доз босьтам, а донсӧ содтам, вескиӧн пӧръялам. Тадзи гӧльясӧс ньӧбам эзысь сьӧмысь, коньӧръясӧс — кӧм гозйысь. Нянь пыдди весиг кыдсӧ вузалам».
Но Господь кыв сетіс, Яков рӧдлӧн нималӧмнас кӧсйысис: — Ме некор ог вунӧд, мый найӧ вӧчисны.
На вӧсна ӧд муыс вӧрӧ, му вылын став олысьыс бӧрдӧ.
Муыс ставнас ю моз гызьӧ, кыптылӧ да ляпкалӧ Нил ю моз.
Сійӧ лунӧ, — висьталӧ Господь Ыджыдыс, — Ме тшӧкта шонділы пуксьыны луншӧр кадӧ, лунъюгыднас вевття мусӧ пемыдӧн.
Гажӧдчӧмнытӧ бергӧда шогсьӧмӧ, сьыланкывъястӧ — бӧрдӧмӧ. Ставнытӧ пасьтӧда шогалан паськӧмӧ, юрсинытӧ лоӧ шырӧма.
Бӧрдӧмныд лоӧ ӧтка пи вӧсна бӧрдӧм кодь, тайӧ луныс лоӧ курыд шогӧн.
Воасны лунъяс, — висьталӧ Господь Ыджыдыс, — кор Ме мӧдӧда тіян муӧ тшыгъялӧм, ог нянь вӧсна, ог ва вӧсна, а Господьлысь кывсӧ кылӧм вӧсна тшыгъялӧм.
Йӧзыс кутасны шӧйтны саридзсянь саридзӧдз, ветлыны войвывсянь асыввылӧдз, кутасны корсьны Господьлысь кывсӧ, но оз аддзыны.
Сійӧ лунӧ горш косьмӧмнысла вынтӧммасны весиг мича нывъяс да том зонъяс, кодъяс кыв сетӧны Самарияӧс мыжӧ вайӧдысь идол водзын, кыв сетӧны Данлӧн ен водзын, кӧсйысьӧны Бер-Шеваӧ мунан туйӧн — та вӧсна найӧ усясны да бӧрсӧ оз чеччыны.
Ме аддзылі висьпуктанін дорын сулалысь Господьӧс. Сійӧ шуис: — Кучкы вылісяньыс сюръяясӧ, медым ӧдзӧс тагӧсъяс вӧрзясны. Пӧрӧд сюръяяссӧ йӧзыслы юр выланыс. Коді ловйӧн кольӧ, сійӧс Ме шыпуртӧн виа — некод оз вермы пышйыны-мездысьны.
Весиг кӧ найӧ мырдӧн пырасны пыдӧстӧминӧ, и сэтысь босьта найӧс.
Весиг кӧ кыпӧдчасны енэжӧдз, и сэтысь лэдза найӧс.
Кармил керӧсӧ кӧ дзебсясны, и сэтысь корся да босьта найӧс.
Саридз пыдӧсӧ кӧ дзебсясны Меысь, сэні уялысь змейлы тшӧкта чушкыны найӧс.
Вӧрӧг кӧ нуӧдас найӧс пленӧ, и сэні шыпуртлы тшӧкта виавны найӧс.
Видзӧдла на вылӧ шог вайӧм могысь, бурсӧ налы ог вай.
Ыджыдыс, Господь Саваоф, инмӧдчӧ муас, и муыс вӧрзьылӧ, сэтчӧс став олысьыс бӧрддзӧ.
Муыс кыптылӧ Нил моз, ляпкалӧ египетса ю моз.
Енэжас Сійӧ сувтӧдіс Аслыс оланін, му весьтын вынсьӧдіс Ассьыс вевттьӧдсӧ. Сійӧ чукӧстӧ васӧ саридзысь да киськалӧ мусӧ.
Сылӧн нимыс — Господь!
— Израиль войтыр, Меным ті ӧткодьӧсь Эфиопия войтыркӧд, — висьталӧ Господь.
— Израильӧс Ме петкӧді Египет муысь, филистимсаӧс — Кафторысь, арамейясӧс — Кирысь.
Ме, Господь Ыджыдыс, видзӧдла мыжа войтыр вылӧ да бырӧда найӧс му вылысь.
Но Яковлысь рӧдсӧ Ме ог ставнас бырӧд, — висьталӧ Господь. — 
Ме тшӧкта мукӧд войтыръяслы шердйыны Израиль войтырӧс, пызьӧс моз Ме пожнала найӧс сэтшӧм пож пыр, мый весиг ӧти лыа чир оз усь.
Шыпурт помысь куласны Менам войтыр пӧвстысь став мыжа йӧзыс, кодъяс шуӧны: «Оз су миянӧс лёкыс, оз во сійӧ миянӧдз!»
Сійӧ лунӧ Ме выльысь сувтӧда Давидлысь киссьӧм керкасӧ. Стен потасъяссӧ Ме дзоньтала, жугласьӧминъяссӧ лӧсьӧда, выльпӧв лэпта сійӧс важ мозыс. Сэки Израиль кутас ыджыдавны Эдомлӧн коляс войтырыс вылын да став войтыръяс вылын, кодъясӧс Ме шуа Асламӧн, — висьталӧ Господь, ставсӧ тайӧс Вӧчысь.
Воасны лунъяс, — висьталӧ Господь, — кор гӧрысь суас вундысьӧс, виноград талялысь — виноград пуктысьӧс.
Керӧсъяс да мылькъяс вывсянь кутас визувтны виноград вотӧслӧн ва.
Ме бӧр вайӧда пленысь Ассьым Израиль войтырӧс. Найӧ выльысь лэптасны кушмӧм каръяснысӧ да овмӧдчасны сэтчӧ. Найӧ пуктасны виноград пуяс, ассьыныс винасӧ кутасны юны.
Сад йӧръясӧ пуктасны пуяс, налысь вотӧссӧ кутасны сёйны. Ме вужйӧда найӧс асланыс муӧ, и некод сэсся оз нетшышт найӧс асланыс муысь, мый Ме сеті налы, — висьталӧ Господь, тэнад Енмыд.
{Еврей йӧз (комиӧдіс Kodko) @ Авдий @ религ. гижӧд @ Библия @ 2021 @ Лб. .}
Авдий пророклӧн небӧг
Авдийлы Енсянь восьтӧм.
Ми кывлім Господь Ыджыдсянь, Сійӧ Эдом йылысь висьталіс, мый войтыръяс дінӧ мӧдӧдӧма юӧртысьӧс, сійӧс мӧдӧдӧма шуны: «Чеччӧй, петамӧй тышӧ Эдомлы паныд!»
— Эдом, Ме вӧча тэнӧ войтыръяс пӧвстын медічӧтӧн, тэнӧ ставныс пондасны ёна мустӧмтны.
Вылӧ кыпӧдчӧмыд ылӧдліс тэнӧ.
Изкарын моз тэ олан джуджыд керӧсъяс вылын, тэ мӧвпалан ас йывсьыд: «Некод оз вермы шыбитны менӧ му вылӧ».
Но тэ кӧ кутш моз лэбзян выліинӧ, овмӧдчан-поздысян кодзувъяс пӧвстӧ, весиг сэтысь Ме шыбита тэнӧ, — висьталӧ Господь.
Тэ дінӧ кӧ локтісны гусясьысьяс, войся куштысь-мырддялысьяс, найӧ эськӧ бырӧдісны тэнӧ, но гусялісны эськӧ сӧмын мыйта налы колӧ.
Тэ дінӧ кӧ локтісны виноград чукӧртысьяс, найӧ эськӧ колисны мыйтакӧ вотӧс.
Но тіянлысь, Исавсянь чужысьяс, ставсӧ лоӧ гусялӧма, весиг дзебӧм озырлуннытӧ лоӧ корсьӧма-петкӧдӧма.
Тэкӧд йитӧд кӧрталысьяс вӧтласны тэнӧ аслад муысь, тэнад ёртъясыд пӧръяласны да вермасны тэнӧ, тэнсьыд няньтӧ найӧ пуктасны тэ водзӧ нальк пыдди. Но Исавсянь чужысьяс тайӧс оз гӧгӧрвоны.
— Сійӧ лунӧ, — висьталӧ Господь, — Ме бырӧда Эдомысь мывкыд йӧзӧс, бырӧда Исав керӧс вылысь вежӧра йӧзӧс.
Теман, тэнад тышкайӧзыд кутасны дзӧрны-тіравны, Исав керӧс вылын ставнысӧ лоӧ виӧма-бырӧдӧма.
Ассьыд Яков воктӧ дзескӧдӧм вӧсна тэнӧ лоӧ янӧдӧма, Исав, тэнӧ лоӧ пыр кежлӧ бырӧдӧма.
Кор локтысь йӧз нуӧдісны пленӧ Яковлысь тышкайӧзсӧ, кор йӧз муысь локтысьяс пырисны дзиръяӧд Ерусалимӧ да пудъясисны Ерусалим вӧсна, сійӧ лунӧ тэ сулалін бокын, тэ вӧлін на кодь жӧ.
Тэ лёка вӧчин, кор нимкодясин вокыдлӧн сьӧкыдалан лунӧ, кор нимкодясин Иуда войтырӧс бырӧдан лунӧ, кор омӧльтін найӧс шог дырйиныс.
Тэ лёка вӧчин, кор пырин Менам войтырлӧн дзиръяӧд сылӧн шог дырйи, кор видзӧдін сылӧн сьӧкыдалӧм вылӧ, кор куштін сылысь эмбурсӧ сылӧн шог дырйи. Тэ лёка вӧчин, кор сулалін туйвежын да виалін пышйысьясӧс, кор ловйӧн кольӧмаясӧс сетін шог дырйиныс вӧтлысьяслӧн киӧ.
Но матыстчӧ Господьлӧн луныс, став войтыръясӧс мыждан лун.
Кыдзи тэ, Эдом, вӧчин, сідзи жӧ тэкӧд вӧчасны, тэнад вӧчӧмторъясысь водзӧс перъясны.
Кыдзи Менам вежа керӧс вылын ті юинныд Менам скӧрлуна дозйысь, тадзи войтыръяс век кутасны юны Менам скӧрлуна дозйысь. Найӧ пӧттӧдзныс юасны да бырасны, быттьӧ найӧ эз и вӧвны.
А Сион керӧс вылӧ пышйысьяс мездмасны, сійӧ лоӧ вежаинӧн.
Яковсянь чужысьяслы бӧр вуджас налӧн муыс.
Яковлӧн рӧдыс лоӧ биӧн, Ӧсиплӧн рӧдыс — ыпъялан биӧн, а Исавлӧн рӧдыс — идзасӧн.
Исавлысь рӧдсӧ сотасны-бырӧдасны, сылӧн рӧдысь некод оз коль. Тадзи висьталӧ Господь.
Негевын олысьяс босьтасны Исав керӧс, керӧсбердса муын олысьяс босьтасны Филистим му.
Иуда войтыр босьтас Ефрем да Самария муяс, Венямин чужанкотыр босьтас Галаад му.
Израильысь пленӧ нуӧдӧм тышкайӧз бӧр бергӧдчасны да босьтасны Ханаан му Сарепта карӧдз, Ерусалимысь Сефарадӧ пленӧ нуӧдӧмаяс бӧр локтасны да босьтасны негевса каръяс.
Вермысьяс каясны Сион керӧс вылӧ, медым ыджыдавны Исав керӧс вылын. И Господь лоас сэні ӧксыӧн.
{Еврей йӧз (комиӧдіс Kodko) @ Иона @ религ. гижӧд @ Библия @ 2021 @ Лб. .}
Иона пророклӧн небӧг
Амиттайлӧн Иона пилы вӧлі Господьсянь кыв:
«Мун Ниневияӧ, тайӧ ыджыд карас, да юӧрт сэні йӧзыслы, мый Ме мыжда найӧс. Налӧн лёк вӧчӧмъяс йылысь юӧрыс воис Менам пельӧдз».
Иона шуис пышйыны Господьысь Фарсисӧ. Локтіс Иоппия карӧ. Сэні корсис Фарсисӧ мунысь корабль, мынтысис туйысь да пуксис сы вылӧ, мед кывтны Господьысь ылӧджык.
Но Господь ыстіс саридз вылӧ ыджыд тӧвныр. Кыптіс бушков, саридз гызис, и корабль вӧлі жугласянвыйын.
Кывтысьяс ёна повзисны. Быдӧн кутіс кевмысьны аслас енлы. Корабльсӧ кокньӧдӧм могысь шыблалісны саридзӧ ставсӧ, мый позис шыбитны.
А Иона сійӧ кадас чорыда узис корабль пытшкын.
Корабльӧн веськӧдлысь локтіс сы дінӧ да шуис: «Мый тэ узян?
Чеччы да кевмысь аслад Енлы.
Гашкӧ, тӧд вылас усям Сылы да ловйӧн колям».
Кывтысьяс шуисны ӧта-мӧдныслы: «Пудъясям, мед тӧдны, код вӧсна миянӧс суис тайӧ шогыс».
Пудъясисны да, петкӧдліс Иона вылӧ.
Сэки юалісны сылысь: «Висьтав, тэ вӧсна-ӧ суис миянӧс тайӧ шогыс?
Кытысь тэ локтін? Кутшӧм могӧн?
Кутшӧм муысь да кутшӧм войтырысь тэ?»
Иона вочавидзис: «Ме — еврей. Юрбита Господьлы, енэжвывса Енлы, саридзсӧ да мусӧ Вӧчысьлы».
Кывтысьясӧс ыджыд полӧм босьтіс. Найӧ тӧдісны, мый Иона пышйӧ Господьысь, ӧд сійӧ висьтавліс налы та йылысь. Та вӧсна пондісны шуасьны Иона вылӧ: «Мый тэ вӧчин!»
Саридз вылын гыяс ыдждісны. Та вӧсна юалісны: «Мый миянлы вӧчны тэкӧд, мед саридзыс лӧнис?»
Иона шуис: «Шыбитӧй менӧ саридзӧ, сэки сійӧ лӧняс. Ме тӧда, мый тайӧ ыджыд бушколыс кыптіс ме понда».
Йӧзыс мыйвынсьыс пондісны сынны вадорлань, но эз вермыны, ӧд саридзыс ӧтарӧ гызис.
Сэки найӧ шыасисны Господь дінӧ: «Господьӧй, корам Тэнӧ, эн бырӧд миянӧс тайӧ мортыс вӧсна, эн перйы миянлысь водзӧс мыжтӧмӧс виӧмысь.
Господьӧй, Тэ вӧчин, мый кӧсйин».
Сэсся босьтісны Ионаӧс да шыбитісны саридзӧ. Саридз пырысьтӧм-пыр лӧнис.
Корабль вылын ставнысӧ босьтіс Господьысь полӧм. Найӧ вайисны Господьлы вись да нӧшта кӧсйисны вайны кыв сетан висьяс.
Господь тшӧктіс ыджыд черилы ньылыштны Ионаӧс.
Куим лун да куим вой Иона вӧлі чери рушкуын.
Сэні сійӧ кевмысис Господьлы, аслас Енлы: — Сьӧкыд дырйи ме шыаси Тэ дінӧ, Господьӧй, и Тэ вочавидзин меным.
Горзі пыдӧстӧминсянь, и Тэ кылін менӧ.
Пыдӧстӧминӧ, саридзлӧн джуджыд ваӧ, Тэ шыбитін менӧ. Визулыс новлӧдліс менӧ, Тэнад гыясыд мунісны ме вывті.
Ме шуи: «Ӧні менӧ шыбитӧма Тэнад син водзысь. Но ме бара на аддза Тэнсьыд вежа крамтӧ».
Ваыс горшӧдз пырис, пыдӧстӧм йирыс кыскис менӧ, саридз туруныс гартчис юр гӧгӧр.
Му пыдӧсӧдзыс уси, керӧсъяслӧн подулӧдзыс. Мулӧн дзиръяыс пӧдласис ме бӧрся пыр кежлӧ.
Но Тэ, Господьӧй, менам Енмӧй, ловйӧн лэптін менӧ пемыд гуысь.
Кор нюкыртчис менам лолӧй, сэки тӧд вылӧ усин меным, Господьӧй. Менам кевмӧмӧй воис Тэӧдз, Тэнад вежа крамӧдз.
Ковтӧм ылӧг енъяслы юрбитысьяс эновтісны Тэнӧ, буралысь Енмӧс. А ме ошкана кывъясӧн Тэныд вись вая да вӧча, мый кӧсйыси. Господь — Мездысьыс!
Сэсся Господь тшӧктіс черилы быликтыны Ионаӧс му вылӧ.
Сэсся Ионалы бара вӧлі Господьсянь кыв:
«Мун Ниневияӧ, тайӧ ыджыд карас, да юӧрт сэні, мый Ме тшӧкта».
Иона кывзысис Господьлысь да муніс Ниневияӧ.
Ниневия вӧлі зэв ыджыд кар. Куим лун колӧ вӧлі, мед мунны помсянь помӧдзыс.
Иона лунтыр ветлӧдліс карӧд да юӧртіс йӧзыслы, мый нелямын лун мысти Ниневия карнысӧ лоӧ бырӧдӧма.
Ниневияын олысьяс та бӧрын кутісны эскыны Енлы. Найӧ шуисны видзавны, и ставныс ичӧтсянь ыджыдӧдз пасьталісны шогалан паськӧм.
Кор ниневияса ӧксы кыліс та йылысь, сійӧ чеччис юралан пуклӧсысь, пӧрччис ӧксы паськӧмсӧ, пасьталіс шогалан паськӧм да пуксис пӧим пытшкӧ. Ӧксы да сылӧн киподувса юралысьяс тшӧктісны юӧртны Ниневияын олысьяслы: 
«Энӧ сёйӧй-юӧй да энӧ йирсьӧдӧй-юкталӧй ыж-мӧснытӧ да мукӧд пемӧснытӧ. Пасьталӧй шогалан паськӧм да вевттьӧй наӧн тшӧтш пемӧсъяснытӧ. Горзӧмӧн шыасьӧй Ен дінӧ, бергӧдчӧй мыжъяссьыныд да эновтчӧй виалӧм-дзескӧдӧмсьыныд.
Гашкӧ, Енмыс бурсьӧлӧмтчас да вештас Ассьыс ыпъялан скӧрлунсӧ миян вылысь, и ми ловйӧн колям».
Ен аддзис, мый ниневияса олысьяс эновтчисны лёксьыс. Сэки Сійӧ вештіс мыждӧмсӧ на вылысь да эз бырӧд Ниневия карӧс.
Иона шогӧ усис таысь да ёна скӧрмис.
Сійӧ кевмысьӧмӧн норасис Господьлы: «Господьӧй, кор ме вӧлі на аслам муын, ме тӧді нин, мый тадзи лоас.
Ме та понда и пышйи Фарсисӧ. Ме тӧді, мый Тэ бур да мелі сьӧлӧма Ен, Тэнад терпитӧмыд ыджыд, Тэнад буралӧмлы абу помыс. Тэ дась бӧр босьтны Ассьыд мыждана шуӧмтӧ.
Та вӧсна, Господьӧй, босьт менсьым лолӧс — бурджык меным кувны олӧм дорысь».
Господь юаліс: «Тайӧ ӧмӧй тэнӧ сэтшӧма скӧрмӧдіс?»
Иона петіс карысь да кольччис кар асывладорӧ. Сэні вӧчис аслыс лэбувтор да пуксис вуджӧр улӧ. Виччысис, мый лоӧ карыскӧд.
Сэки Господь Ен быдтіс ыджыд коръя быдмӧг, медым вуджӧрнас сайӧдны Ионаӧс да лӧньӧдны сійӧс дӧзмӧмсьыс.
Иона ёна нимкодясис быдмӧглы.
Мӧд луннас кыа петігӧн Ен ыстіс вегыльӧс. Вегыль кутіс сёйны быдмӧгсӧ, и сійӧ косьмис.
А кор петіс шонді, Ен ыстіс чизыр асыв тӧв. Шонді пӧжис Ионалысь юрсӧ. Сійӧ дзикӧдз лёшмуніс да виччысис кулӧм. Иона шуаліс: «Бурджык меным кувны олӧм дорысь».
Ен юаліс Ионалысь: «Быдмӧгыс понда ӧмӧй татшӧма скӧрмин?»
Мӧдыс вочавидзис: «Да. Весиг овнысӧ ог кӧсйы».
Сэки Господь шуис: «Тэ шогсян быдмӧг вӧсна, кодӧс тэ эн быдты, эн дӧзьӧрит. Сійӧ быдмис ӧти войӧн, и ӧти войӧн косьмис.
Менам сьӧлӧмӧй тшӧтш шогсьӧ Ниневия вӧсна, тайӧ ыджыд карыс вӧсна. Сэні сё кызь сюрсысь унджык олысь, кодъяс оз кужны торйӧдны шуйга кинысӧ веськыдсьыныс. Нӧшта сэні уна пемӧс на эм».
{Еврей йӧз (комиӧдіс Kodko) @ Микей @ религ. гижӧд @ Библия @ 2021 @ Лб. .}
Микей пророклӧн небӧг
Морешетса Микейлы вӧлі Господьсянь кыв. Сійӧ кадӧ иудаса ӧксыӧн вӧлі Иотам, сэсся — Ахаз, а Ахаз бӧрын — Езекей. Микей аддзыліс Самария да Ерусалим йылысь петкӧдчылӧм.
— Кывзӧй, войтыръяс! Кывзы, му! Кывзӧй, сэні олысьяс!
Господь Ыджыдыс ставсӧ аддзӧ — Сійӧ локтас Аслас вежа крамысь да мыжалас тіянӧс.
Аслас оланінсянь локтас Господь, Сійӧ лэччас да талялас мувыв керӧсъяс.
Сы кок улын керӧсъяс сыласны ӧзъялысь сись моз, ковтысъяс воссясны кыркӧтшсянь визувтысь ва моз.
Яковлӧн лёкас вӧйӧм вӧсна, Израиль войтырлӧн мыж вӧсна ставыс тайӧ лоӧ.
Коді мыжа Яковлӧн лёк вӧчӧмысь? Абу-ӧ Самария?
Коді мыжа, мый Иуда муын кыптісны вись ваян мылькъяс? Абу-ӧ Ерусалим?
— Ме кисьта Самария кар, сыысь коляс сӧмын из чукӧр, кытчӧ пуктасны виноград.
Изъяссӧ ковтысӧ шыблала, карсӧ подулӧдзыс кисьта-бырӧда.
Идолъяссӧ жугласны, кырсалӧмысь сетӧм козинъяссӧ сотасны. Ме бырӧда сылысь идолъяссӧ, ӧд кырсалӧмысь босьтӧм дон вылӧ сійӧ сувтӧдіс найӧс, и кырсалӧмысь бара лоӧ мынтысьӧма наӧн.
— Та вӧсна ме кута ырзӧмӧн бӧрдны, кута ветлыны кӧмтӧг-пасьтӧг, шакал моз понда омлявны, страус моз — ымзыны. Самариялӧн дойыс бурдлытӧм, сійӧ вуджас Иуда муӧдз, менам войтырлӧн дзиръяӧдз, воас Ерусалим карӧдз.
Энӧ висьталӧй та йылысь Гефын, гораа сэні энӧ бӧрдӧй.
Бет-Леафраын туплясьӧй му вылас, тадзи петкӧдлӧй шогалӧмнытӧ.
Петӧй карсьыныд, Шафирын олысьяс, пасьтӧгныд петӧй, янӧдӧмаӧн мунӧй.
Цаананын олысьяслы некытчӧ пышйыны.
Бет-Эцелын бӧрдӧм кылӧ, та вӧсна ті, Шафирысь петысьяс, сэтчӧ онӧ овмӧдчӧй.
Маротын олысьяс оз нин виччысьны бурсӧ, ӧд Господь мӧдӧдіс шог Ерусалим дзиръя дорӧ.
Лакишын олысьяс, доддялӧй вӧвъяснытӧ тарантасӧ!
Тіянсянь Сион нывлӧн мыжыс, тіянсянь Израиль войтырлӧн лёк вӧчӧмыс.
Сетӧй козинъястӧ Морешет-Гефын олысьяслы.
Шӧйӧвошисны израильса ӧксыяс, ӧд весьшӧрӧ виччысисны Акзив карсянь отсӧгсӧ.
Марешын олысьяс, тіян дінӧ Ме вайӧда карнытӧ босьтысьӧс, израильса нималана йӧз мунӧны Адуллам карӧ.
Иуда войтыр, шыр юрситӧ, шогсьы муса ныв-пиыд вӧсна!
Шырсьы, мед лоан кондор лэбач кодь куш юра, ӧд ныв-питӧ пленӧ нуӧдасны.
Курыд шог налы, кодъяс дасьтысьӧны лёксӧ вӧчны, весиг вольпасяс куйлігӧн мӧвпалӧны та йылысь. Асывводзнас найӧ збыльмӧдӧны мӧвпъяснысӧ, лёксӧ вӧчны налӧн киныс вына.
Ковмас кӧ налы му — мырддясны, ковмас кӧ керка — босьтасны.
Найӧ дзескӧдӧны мортӧс да сылысь гортсаяссӧ, куштӧны керка-овмӧссӧ.
Та вӧсна Господь тадзи висьталӧ: — Ме шуи ыстыны лёксӧ тайӧ йӧзыс вылӧ. Ті онӧ вермӧй мынны сылӧн сийӧс улысь, онӧ вермӧй веськӧдчӧмӧн ветлӧдлыны, ӧд лёкыс кутас ыджыдавны.
Сійӧ лунӧ тіянӧс кутасны лёкӧдны, тіян йылысь кутасны сьывны бӧрдӧдчанкыв: — Миянӧс дзикӧдз куштісны, войтырнымлысь мусӧ босьтісны, миянлысь ставсӧ мырддисны, муяснымӧс мукӧд войтырлы сетісны.
Та вӧсна, кор Господьлӧн войтырыс чукӧртчас, тіянлы оз пудъявны да оз муртавны му.
Тайӧ йӧзыс шуӧны: — Энӧ быгзьӧй, пророкъяс, энӧ лӧвтӧй татшӧмторсӧ!
Миянӧс янӧдӧмыс оз су.
Яков рӧд, тадзи-ӧ тэ чайтан? Господь ӧмӧй оз скӧрав? Аслас шуӧм серти ӧмӧй оз вӧч?
Менам кывъясӧй ӧмӧй оз вайны бурсӧ веськыда олысьлы?
Ті вӧлінныд Менам войтырӧн, но сувтінныд Меным паныд. Ті мырддялінныд вылыс и улыс паськӧмсӧ тыш вылысь локтысьяслысь, повтӧг тіян муӧд мунысьяслысь.
Менам войтырлысь аньяссӧ ті вӧтланныд гортсьыныс, налысь ныв-писӧ Меысь пыр кежлӧ торйӧданныд.
Чеччӧй, мунӧй татысь! Шойччаніныс тані тіянлы оз ло, ӧд пежасьӧмыс вӧсна мусӧ куштасны, мусӧ лоӧ дзикӧдз бырӧдӧма.
Нинӧм абусӧ бызгысь кӧ ылӧдчӧмӧн шуас: «Юӧрта тіянлы, мый вина-сурныд тіян визувтны кутас», сійӧс эськӧ пророк пыдди сибӧдіс тайӧ войтырыс.
Яковлысь рӧдсӧ Ме чукӧрта, Израильлысь коляс войтырсӧ Ме ӧтвывта. Ыжъясӧс моз Ме чукӧрта найӧс, ыж чукӧрӧс моз вайӧда йирсянінӧ.
Унасьыс-уна йӧз чукӧрмӧм вӧсна ыджыд шы кылас.
На водзын мунас туйсӧ писькӧдысьыс, найӧ бырӧдасны мытшӧдъяс и петасны дзиръяӧд.
На водзын мунас ӧксыныс, и нуӧдас найӧс Господь.
Ме шуи: — Кывзӧй, Яков рӧдлӧн юралысьяс, Израиль войтырлӧн веськӧдлысьяс! Тіянлы колӧ тӧдны веськыдлунсӧ.
Но ті мустӧмтанныд бурсӧ, а лёксӧ радейтанныд.
Ті йӧзыслысь кучиксӧ кулянныд, лы вылас весиг яйсӧ онӧ кольӧй. Ті сёянныд Менам войтырлысь вир-яйсӧ, кулянныд кучиксӧ, налысь лыяссӧ чегъяланныд, вундаланныд яйсӧ, медым пӧртйӧ тэчны, рач вылӧ пуктавны.
Сэсся ті шыасянныд Господь дінӧ, но Сійӧ оз кыв тіянӧс, Сійӧ тупкас чужӧмсӧ тіян лёк вӧчӧмныд понда.
Господь тадзи висьталӧ пророкъяс йылысь, кодъяс кежӧдӧны Сылысь войтырсӧ туйсьыс: найӧ кӧсйысьӧны лӧньлун мортлы, коді налы сёян сетӧ, а коді вомас налы нинӧм оз пукты, сійӧс тышӧн повзьӧдлӧны.
Таысь найӧс виччысьӧ пемыд, кӧні абу Енсянь петкӧдчылӧмыс, виччысьӧ сап пемыд, кӧні абу водзвыв юӧртӧмыс.
Татшӧм пророкъяслы шондіыс пуксяс, лунъюгыдыс лоӧ пемыд.
Яндзим лоӧ тӧдысь-аддзысьяслы, яналасны водзвыв висьталысьяс, найӧ ставныс тупкасны чужӧмнысӧ, ӧд Енсянь вочавидзӧмыс оз ло.
А ме тырӧма вынӧн да Господьлӧн Лолӧн, веськыдлунӧн да вынйӧрӧн, медым Яков рӧдлы юӧртны сылӧн лёк вӧчӧм йылысь, Израиль войтырлы — сылӧн мыж йылысь.
Кывзӧй тайӧс, Яков рӧдлӧн юралысьяс, Израиль войтырлӧн веськӧдлысьяс! Веськыда мыждӧмсӧ ті нинӧмӧ пуктанныд, став веськыдсӧ чукльӧдланныд. Вир отсӧгӧн кыпӧданныд Сион, ылӧдчӧмӧн — Ерусалим.
Ёрд вылын юралысьяс козин босьтӧны, попъяс сьӧм вылӧ велӧдӧны, водзвыв висьталӧмысь пророкъяс сьӧм корӧны. Найӧ мӧвпалӧны, мый Господь отсалӧ налы, шуалӧны, Господь пӧ миянкӧд, шогыс пӧ оз су миянӧс.
Тіян вӧсна Сионӧс лоӧ муӧс моз гӧрӧма, Ерусалимысь кольӧ сӧмын из чукӧр, крамлӧн керӧсыс вӧрсялас.
Тадзи лоӧ бӧръя кадӧ: сійӧ керӧсыс, кӧні сулалӧ Господьлӧн крамыс, лоӧ став керӧссьыс на джуджыдджык, став мыльксьыс на вылынджык. Сэтчӧ дугдывтӧг кутасны локны войтыръяс.
Найӧ чукӧртчасны да шуасны ӧта-мӧдныслы: «Локтӧй, каямӧй Господьлӧн керӧс вылӧ, Яков Енлӧн крамӧ! Господь индас миянлы Ассьыс туйсӧ, медым ми ветлім Сылӧн туйясӧд». Сионсянь воас Индӧдыс, Ерусалимсянь — Господьлӧн кывйыс.
Господь отсалас воны ӧти кывйӧ войтыръяслы, кутас веськыда мыждыны ылі муясысь вына чужанкотыръясӧс. Сэки йӧзыс дорасны шыпуртъясысь гӧръяс, шыясысь — чарлаяс.
Войтыръяс ӧта-мӧдныслы паныд оз нин лэптыны шыпуртсӧ, водзӧ оз нин кутны велӧдчыны тышкасьны.
Но быдӧн кутас пукавны аслас виноград йӧрын, аслас инжир пу улын, некод оз кут найӧс повзьӧдлыны. Тадзи висьталіс Господь Саваоф.
Быд войтыр юрбитӧ аслас енлы, а ми юрбитам Господьлы, асланым Енлы, нэмъяс чӧж.
Сійӧ лунӧ, — висьталӧ Господь, — Ме чукӧрта чотысьясӧс, ӧтлаӧ вайӧда вошӧмаясӧс, найӧс, кодъяслы Ме мӧдӧдлі шогсӧ.
Чотысьясӧс вӧча бӧрйӧм коляс войтырӧн, разалӧмаясӧс — вына войтырӧн. Господь лоӧ налӧн ӧксыӧн Сион керӧсын ӧні да нэмъяс чӧж.
А тэ, Сион нывлӧн керӧсыс, кытысянь Ме ыжъяс бӧрся моз видзӧда Ассьым войтырӧс, тэныд бӧр бергӧдчас ыджыдалӧмыс, Ерусалим нывлы — юралӧмыс.
Мыйла тэ ӧні гораа горзан?
Тэнад ӧмӧй абу ӧксыыд? 
Воштін ӧмӧй ассьыд туйдӧдысьтӧ? Кага чужтысьӧс моз тэнӧ топӧдӧ дойыд.
Кага чужтысь ань моз ойзы, дойыдла нюглясь, Сион нылӧй, ӧд ӧні тэ петан карсьыс, кутан овны видз-му вылын, мунан Вавилонӧдз. Но сэтысь тэнӧ лоӧ мездӧма, Господь мездас тэнӧ вӧрӧгыдлӧн киысь.
Ӧні тэныд паныд чукӧртчисны войтыръяс, найӧ шуалӧны: «Вай янӧдам Сион нылӧс, кутам видзӧдны сійӧс бырӧдӧмсӧ».
Но найӧ оз тӧдны Господьлысь мӧвпъяссӧ, оз гӧгӧрвоны Сылысь кӧсйӧмсӧ, мый Сійӧ чукӧртіс найӧс гумла вылӧ кольтаясӧс моз.
Чеччы вартнытӧ, Сион нылӧй! Тэнсьыд сюртӧ Ме вӧча кӧртысь, кок гыжтӧ — ыргӧнысь. Войтыръясӧс тэ пасьвартан, налысь эмбурсӧ Господьлы сиан, налысь озырлунсӧ став муӧн Ыджыдалысьлы торйӧдан.
Ерусалимын олысьяс, петӧй тышӧ, ӧд миянӧс кытшалісны! Израильлысь ёрдысьӧс кутасны кучкавны, беддьӧн кучкаласны чужӧмбанас.
Виплием-Епрафа, тэ Иуда рӧдысь медічӧтыс! Но Виплием карысь петас Меным Сійӧ, коді лоӧ Израильын Юралысьӧн. Сылӧн петӧм-чужӧмыс важысянь на, нэмъяс пуксьытӧдз.
Господь эновтас Ассьыс войтырсӧ кад кежлӧ, кытчӧдз чужтысьыс оз чужты.
Сэки вокъяслӧн колясыс бӧр локтас Израиль пиян дінӧ.
И локтас Сійӧ, коді кутас видзны Господь вынӧн, Аслас Господь Енлӧн медыджыд нимнас. Найӧ кутасны повтӧг овны, ӧд Сійӧ кутас ыджыдавны став му пасьтала.
Сійӧ ваяс лӧнь олӧм.
Кор ассурса тышкайӧз пырасны миян муӧ да кутасны талявны миянлысь изкаръяс, ми кыпӧдам налы паныд сизим веськӧдлысьӧс, кӧкъямыс юралысьӧс.
Найӧ кутасны шыпуртӧн веськӧдлыны Ассур муӧн, веськӧдлыны Нимродлӧн муӧн карса дзиръя дорын. Лӧнь олӧм вайысь мездас миянӧс ассурсаяслӧн кипод улысь, кор найӧ пырасны миян муӧ, кор кутасны талявны мунымӧс.
Яков рӧдлӧн колясыс лоӧ войтыръяс пӧвстын Господьсянь мӧдӧдӧм лысва кодь, турунсӧ киськалӧм зэр кодь. Найӧ оз нин пондыны видзӧдны морт вылӧ, оз нин пондыны лача кутны йӧз вылӧ.
Войтыръяс пӧвстын Яков рӧдлӧн колясыс лоӧ вӧрса зверъяс пӧвстын олысь лев кодь, ыж чукӧр вылӧ уськӧдчысь том лев кодь. Сійӧ уськӧдчӧ, талялӧ-косявлӧ, и сыысь мездысьны некод оз вермы.
Дзескӧдысьлы паныд сувтӧй, и вӧрӧгнытӧ лоӧ бырӧдӧма.
Сійӧ лунӧ, — висьталӧ Господь, — Ме бырӧда тіянлысь вӧвъяснытӧ, жугла тарантасъяснытӧ, бырӧда тіянлысь каръяснытӧ, кисьта изкаръяснытӧ. Ме бырӧда тіянлысь тунасьӧмнытӧ, кимӧститчысьяс оз лоны тіян пӧвстын.
Ме бырӧда идолъяснытӧ да юрбитан изъяснытӧ, ті онӧ кутӧй сэсся копрасьны киӧн вӧчӧмторъяслы.
Ме вужнас нетшышта юрбитан пуяснытӧ, бырӧда каръяснытӧ.
Скӧралӧмӧн да лӧгпырысь Ме водзӧс перъя кывзысьтӧм войтыръяслысь.
Кывзӧй, мый висьталӧ Господь: — Сувт ёрд водзӧ, висьтась керӧсъяс водзын, мылькъяс мед кыласны тэнсьыд гӧлӧс шытӧ!
Кывзӧй, керӧсъяс, Господьлысь мыжалӧмсӧ! Кывзӧй, муыслӧн вешйывтӧм подувъяс! Ӧд Господь мыжалӧ Ассьыс войтырсӧ, корӧ Израильӧс ёрд водзӧ.
— Войтырӧй, мый Ме тэныд вӧчи? Мыйӧн сьӧктӧді тэнӧ, вочавидз Меным!
Ме петкӧді тэнӧ Египет муысь, мезді тэнӧ нартитӧм улысь, водзвылад ысті Мӧисейӧс, Ааронӧс да Мирьямӧс.
Войтырӧй, эн вунӧд, мый мӧвпыштіс вӧчны моавса Валак ӧксы, мый сылы вочавидзис Веорлӧн Валаам пиыс, мый вӧлі тіянкӧд Ситтимсянь Галгалӧдз. Ставсӧ тайӧс уськӧд тӧд вылад, медым тӧдін Господьлысь веськыдлунсӧ.
— Мый меным вайны Господьлы, кор локта Сы водзӧ, кор копыртча енэжвывса Енлы?
Гашкӧ, сотан вись вая, арӧса ӧшпиӧс вая?
Шогмана-ӧ лоӧ Господьлы, вая кӧ сюрс межӧс, вая кӧ ю моз визувтысь олив вый?
Сета ӧмӧй ассьым медводдза чужысьӧс лёк вӧчӧмӧй вӧсна, сьӧлӧмувса кагаӧс — мыжӧй вӧсна?
Мортӧй, тэныд юӧртӧма, мый бурыс да мый виччысьӧ тэсянь Господь.
Сійӧ кӧсйӧ, медым уджъясыд вӧліны веськыдӧсь, медым вӧлін бур сьӧлӧма да раммӧдчӧмӧн олін Ен водзын.
Мывкыд морт вежавидзӧ Господьысь. Господь шыасьӧ кар дінӧ, кывзӧй Сійӧс, карса олысьяс да веськӧдлысьяс!
Тіян керкаясын ӧнӧдз на эм ылӧдчӧмӧн нажӧвитӧм озырлун, пӧръясьӧмӧн муртасян доз.
Ог ӧмӧй мыжды тіянӧс ылӧдчан вескиныд да пӧръясян гираныд вӧсна?
Татчӧс карса озыръяс виалӧны-дзескӧдӧны, олысьясыс пӧръясьӧны, оз сёрнитны веськыда. Та вӧсна Ме ёна дойдала тіянӧс, мыжъясныд вӧсна кушта карнытӧ.
Ті сёянныд, но онӧ пӧтӧй, кынӧмныд пыр лоӧ куш.
Мый чукӧртанныд, онӧ вермӧй видзнысӧ, а мый видзанныд, тыш дырйи лоӧ бырӧдӧма.
Ті кӧдзанныд, но онӧ вундӧй, олив тусьтӧ пычканныд, но выйнас онӧ мавтчӧй, виноград вотӧстӧ таляланныд, но винасӧ онӧ юӧй.
Ті вӧчанныд Омрилӧн тшӧктӧмъяс серти, оланныд Ахав рӧд моз, ветланныд налӧн лёк туйӧд.
Та вӧсна Ме кушта карнытӧ, сэні олысьясӧс серамвыв лэпта. Менам войтырӧй вӧсна ті кутанныд нуны янӧдӧмсӧ.
Курыд шог меным! Воис кад — вотӧс чукӧртӧм бӧрын кодь, виноград ӧктӧм бӧрын кодь: сёйыштны виноградыс абу, корся инжир вотӧс, а сійӧ абу.
Му вылын бур сьӧлӧмаыс абу, абу веськыда олысьыс.
Ставныс кыйӧдчӧны ӧта-мӧдныслысь вир кисьтны, быдӧн кӧсйӧ тывйыштны ассьыс воксӧ.
Налӧн киныс кыптӧ лёк вӧчны, найӧ кужӧмӧн лёксӧ вӧчӧны.
Веськӧдлысь козин корӧ, ёрдысь сьӧм босьтӧ, юралысь аслас лёк кӧсйӧмъяс йылысь сёрнитӧ. Найӧ ставныс збыльсӧ гугӧдӧны.
На пӧвстысь медбурыс лежнӧг кодь, веськыд мортыс йӧн кодь. Тэ мыждан найӧс, и найӧ шӧйӧвошасны, кор воас сійӧ луныс, мый йылысь видзысьясныд * висьтавлісны.
Ёртыдлы эн эскы, матыссаыд вылӧ лачатӧ эн кут.
Вомтӧ каличав весиг гӧтырыд водзын, коді тэкӧд ӧти вольпасьын куйлӧ.
Ӧд пиыс батьсӧ янӧдӧ, нылыс паныд сувтӧ мамыслы, моньыс — энькаыслы.
Мортӧс мустӧмтӧны сылӧн гортсаясыс.
А ме видзӧда Господь вылӧ, виччыся мездӧмсӧ аслам Енсянь. Менам Енмӧй кылас менӧ.
Менӧ мустӧмтысь, эн серав ме вылын!
Ме усьӧма, но ме чечча.
Ме ола пемыдын, но Господь — менам югыдыс.
Ме мыжа Господь водзын, та вӧсна меным колӧ нуны Сылысь скӧрлунсӧ, кытчӧдз Сійӧ оз видлав менсьым мыжӧс да оз бурсьӧлӧмтчы ме дінӧ.
Сэки Сійӧ петкӧдас менӧ югыдас, и ме аддза Сылысь веськыдлунсӧ.
Тайӧс аддзас менӧ мустӧмтысь, коді шуавліс меным, кӧні пӧ Господь, тэнад Енмыд.
Сійӧ яналас, а ме аддза, кыдзи туйвыв няйтӧс моз сійӧс таляласны.
Воас сійӧ луныс, кор ті лэптанныд карса стенъяснытӧ, кор тіян муныд паськалас.
Сэки тіян дінӧ локтасны Ассурысь да египетса каръясысь йӧз, кодъяс олӧны Египетсянь да Ефрат юӧдз, саридз дорсянь да саридз дорӧдз, керӧсъяссянь да керӧсъясӧдз.
А сэтчӧс муыс лоӧ овтӧминӧн сэні олысьяслӧн лёк уджъясныс вӧсна.
Аслад бедьнад видз Ассьыд войтыртӧ, Ассьыд ыжъястӧ, кодъяс ас кежысь олӧны Кармил вӧрын.
Лэдз налы важ мозыс йирсьыны Васан ыб вылын да Галаад муын.
Египет муысь петіганыд ті аддзылінныд шензьӧданаторъяс.
Ме тайӧс вӧчи, и ӧні бара вӧча.
Тайӧс аддзасны войтыръяс, и яналасны асланыс вынысь, тупкасны вомнысӧ, лоӧны пельтӧмӧсь.
Змейяс моз найӧ пондасны нювны мусӧ, мувывса веглясьысьяс моз петасны асланыс изкаръясысь, тіралӧмӧн локтасны Господь Енным дінӧ. Найӧс полӧм босьтас Тэысь!
Тэ кодь мӧд енмыс абу! Тэ прӧститан мыжъяс, Ассьыд коляс войтыртӧ лёк вӧчӧмысь он мыжды.
Тэ он скӧрав нэмъяс чӧж, ӧд Тэ бур сьӧлӧма.
Тэ бара на буралан миян дінӧ, вештан миянлысь мыжнымӧс.
Саридз пыдӧсӧ Тэ шыбитан мыжъяснымӧс.
Яковлы сетӧм кывтӧ Тэ кутан, Тэ бур сьӧлӧма Ӧвраам дінӧ. Та йылысь Тэ водзысяньыс кыв сетін миян батьяслы.
{Еврей йӧз (комиӧдіс Kodko) @ Наум @ религ. гижӧд @ Библия @ 2021 @ Лб. .}
Наум пророклӧн небӧг
Ниневия йылысь водзвыв висьталӧм.
Элкошысь Наумлы Енсянь восьтӧм йылысь небӧг.
Господь — вежӧгтысь Ен, Сійӧ — водзӧс перйысь Ен.
Господь водзӧс перйӧ, Сійӧ тырӧма скӧрлунӧн. Господь мынтысьӧ Сійӧс мустӧмтысьяслы, Сійӧ дугдывтӧг скӧралӧ паныд сувтысьяс вылӧ.
Господь дыр терпитӧ, Сылӧн выныс помтӧм-дортӧм, Сійӧ оз коль лёксӧ мыждытӧг.
Господь локтӧ тӧвныр да бушков моз, Сылӧн воськовъясысь бус моз кыпӧдчӧны кымӧръяс.
Сійӧ тшӧктӧ, и саридзыс косьмӧ, юяс косьмӧны, Васан ыб да Кармил керӧс вылысь быдмӧгъяс нярмӧны, нярмӧны ливанса дзоридзьяс.
Сы водзын дзӧрӧны керӧсъяс, тіралӧны мылькъяс. Муыс тіралӧ Сы водзын, дзӧрӧны муюгыдыс да став сэні олысьыс.
Коді вермас паныд сувтны Сылӧн лӧглунлы, коді вермас ловйӧн кольны Сылӧн ыпъялан скӧрлунысь?
Сылӧн скӧрлуныс би моз разалӧ, Сы водзын потласьӧны-жугалӧны изкыртаяс.
Господь — бур, Сійӧ дорйӧ сьӧкыд кадӧ, Сійӧ тӧдӧ Сы вылӧ лача кутысьясӧс.
Ыджыд ытваӧн Сійӧ подулӧдзыс жугӧдас Ниневия кар, Ассьыс вӧрӧгсӧ Сійӧ вӧтлас пемыдінӧ.
Мыйла ті мӧвпаланныд кыпӧдчыны Господьлы паныд?
Сійӧ бырӧдас паныд сувтысьясӧс, и сьӧкыд кадыс сэсся оз нин ло. Найӧ коддзӧм морт кодьӧсь, дзугсьӧмаӧсь бытшкасьысь турун пӧвстӧ, найӧ сотчасны кос идзас моз.
Ниневия карысь петіс Господьлы паныд кыпӧдчысь, лёксӧ-шогмытӧмсӧ вӧчны мӧвпалысь.
Господь тадзи висьталӧ: — Вӧрӧглӧн лыдыс лыдтӧм-тшӧттӧм, найӧ вынаӧсь, но найӧс кераласны, и найӧ бырасны.
Иуда, тэныд Ме мӧдӧдлі уна сьӧкыдлун, но водзӧ ог кут сьӧктӧдны тэнӧ.
Ӧні Ме босьта тэнад сьылі вылысь налысь сийӧссӧ да жугӧда сійӧс, орӧда тэнсьыд чепъястӧ.
Ниневия кар йылысь Господь тадзи шуӧ: — Тэнад нимыд бырас, водзӧ чужысьясыд оз лоны.
Тэнад крамысь Ме жугла идолъястӧ да бӧлбанъястӧ, дасьта тэнӧ гуаланін, ӧд тэ нинӧм кодь.
Со, керӧсъяс вывті локтӧ бур юӧр вайысь. Сійӧ лӧнь олӧм йылысь юӧртӧ: — Иуда, пасйы гажӧдчан лунъястӧ, вай кыв сетан висьястӧ. Лёк йӧз оз нин мунны тэнад муӧд, найӧс дзикӧдз бырӧдӧма!
Ниневия кар, тэныд паныд кыпӧдчӧ жугӧдысь-пазӧдысь. Видз изкартӧ да туйтӧ, дасьтысь тыш кежлӧ, ёнмӧд асьтӧ!
Господь бӧр бергӧдас Яков рӧдлы нималӧмсӧ, бергӧдас Израиль войтырлы нималӧмсӧ, кӧть мырддялысьяс куштісны сійӧс, талялісны сылысь виноград йӧрсӧ.
Тэнӧ пазӧдысь тышкайӧз пасьтасьӧмаӧсь пемыдгӧрд паськӧмӧ, налӧн сайӧдъясыс гӧрд рӧмаӧсь, тышӧ дасьтӧм тарантасъясыс югъялӧны би моз, налӧн ёсь шыясыс гыалӧны вӧр моз.
Туйяс вывті тӧвзьӧны тарантасъяс, найӧ грымакылӧны изэрд вылын, югъялӧны би моз, дзирдалӧны чардби моз.
Ӧксылы тӧд вылас усьӧны тышкайӧзӧн веськӧдлысьяс. Найӧ котӧртӧны, крукасьлӧны, тэрмасьӧмӧн кайӧны карса стен вылӧ, но вӧрӧг дась нин жугӧдны карса дзиръяяс.
Воссьӧны ю кутӧдъяс, ваыс ыльӧбтӧ, и ӧксылӧн керкаыс киссьӧ.
Шуӧма, мый карсӧ куштасны, олысьяссӧ нуӧдасны пленӧ. Кесйӧг аньяс ойзӧны-ружтӧны гулюяс моз, вачкалӧны асьнысӧ морӧсаныс.
Ниневия водзысяньыс вӧлі вайӧртӧд кодь, но ӧні сэтысь ваыс пышйӧ.
«Сувтӧй, сувтӧй!» — горзӧны, но некод оз бергӧдчыв.
Куштӧй сылысь эзысь-зарнисӧ!
Сылӧн озырлуныс лыдтӧм-тшӧттӧм, весиг лыддьынысӧ он вермы.
Ниневия карӧс куштӧма-бырӧдӧма. Сьӧлӧмъяс висьӧны, пидзӧсъяс тіралӧны.
Дойысла йӧзыс куснясьӧны, налӧн чужӧмныс быгалӧма.
Кӧні ӧні левъяслӧн оланіныс, том левъяслӧн пӧткӧдчаніныс? Кӧні левъяслӧн ветлан-шӧйтаніныс, левпиянлӧн лӧнь оланіныс?
Лев кыйліс кыйдӧс аслас пиянлы, вайліс кыйӧмтор налӧн мамъяслы, тыртліс ассьыс позсӧ кыйдӧсӧн, кырта горссӧ — виӧм пемӧсӧн.
— Ме сувта тэныд паныд, — висьталӧ Господь Саваоф.
— Ме тшынйыв лэпта тэнсьыд тарантасъястӧ, шыпурт бырӧдас том левъястӧ. Ме бырӧда му вылысь ставсӧ, мый тэ мырддялін, дугдас кывны тэнад мӧдӧдӧмаяслӧн гӧлӧс шыныс.
Курыд шог вир кисьтысь карлы!
Сійӧ тырӧма ылӧгӧн, виалӧмӧн, сэні дугдывтӧг куштӧны-мырддялӧны.
Сэні кылӧ орсӧн швичйӧдлӧм, гӧгыльяслӧн грымгӧм.
Вӧвъяс гӧрдлӧны, тарантасъяс грымакылӧны. Тӧвзьӧны вӧвъяс вылын верзьӧмаяс, лӧсталӧны шыпуртъяс, югъялӧны шыяс.
Виӧмаясӧс он вермы лыддьыны, налӧн шойясыс лыдтӧм-тшӧттӧмӧсь, йӧзыс крукасьлӧны тайӧ шойясас.
Ставыс тайӧ суис кырсалысь карӧс сылӧн ёна кырсалӧмысь. Сійӧ вӧлі мича, кужис тшыкӧдчыны, кырсалӧмнас сійӧ ылӧдліс войтыръясӧс, тшыкӧдчӧмнас — чужанкотыръясӧс.
Ме сувта тэныд паныд, — висьталӧ Господь Саваоф.
— Ме лэпта тэнсьыд паськӧм пӧлатӧ да плавга сійӧс чужӧм вылад. Тэнсьыд куш яйтӧ Ме петкӧдла войтыръяслы, тэнсьыд яндзимтӧ — йӧз муын олысьяслы.
Ме лыйла тэнӧ пежторъясӧн, зывӧкта тэнӧ да янӧда йӧз водзын.
Тэнӧ аддзысьяс пышъясны тэ дінысь да шуасны: «Ниневия карӧс бырӧдӧма!»
Некод оз кут бӧрдны сы вӧсна, некод оз бурӧд сійӧс.
Тэ нинӧмӧн абу бурджык Но-Аммонысь, египетса юркарысь, коді сулаліс Нил ю дорын. Сійӧс быдладорсянь кытшаліс ва, юыс видзис сійӧс, вӧлі сылы зумыд стенмӧн.
Эфиопия да Египет вӧліны сылӧн ыджыд вынӧн, Пут да Ливия муясын олысьяс отсалісны сылы.
Но сійӧс тшӧтш нуӧдісны пленӧ, сылысь кагаяссӧ виисны туйвежъясын, сылӧн нималана йӧзыс вӧсна пудъясисны, став сылысь тӧдчана йӧзсӧ дорисны чепъясӧн.
Тэ тшӧтш коддзытӧдзыд юан тайӧ чашасӧ, тэ тшӧтш пондан корсьны вӧрӧгысь дорйӧм.
Тэнад изкаръясыд — кисьмӧм инжир пу кодьӧсь. Пусӧ кӧ пыркнитан, вотӧсыс веськыда вомас усяс сёйны кӧсйысьлы.
Тэнад тышкайӧзыд аньяс кодьӧсь, тэнад муын дзиръяясыд гурйыв восьсаӧсь вӧрӧгыдлы, биыс сотӧма тэнсьыд тасъястӧ.
Дасьты ватӧ, ӧд тэнӧ лоӧ кытшалӧма, ёнмӧд ассьыд изкаръястӧ, мун да таляв сёйтӧ, дасьты пачтӧ, вӧч кирпичьястӧ.
Но тэнӧ бырӧдас би, виас шыпурт. Весиг кӧ тэ рӧдман саранча мында, биыс бырӧдас тэнӧ.
Тэнад вузасьысьыд енэжвыв кодзув дорысь на унджык, но найӧ саранча моз разаласны-бырасны.
Тэнад чина йӧзыд — саранча мында, тэнад тышкайӧзӧн веськӧдлысьясыд — геб мында. Кӧдзыд дырйи найӧ дзебсьӧны стен костӧ, а кор петӧ шондіыс, найӧ лэбзьӧны, и он нин тӧд, кӧнӧсь найӧ.
Ассурса ӧксы, тэнсьыд войтыртӧ видзысьясыд узьӧны, тэнад тышкайӧзӧн веськӧдлысьясыд куйлӧны.
Тэнад войтырыд разалӧма керӧсъяс пасьтала, некодлы найӧс чукӧртнысӧ.
Тэнсьыд дойястӧ некод оз бурдӧд, найӧ ёна висьӧны.
Тэ йылысь юӧрсӧ кылысьяс кутасны клопайтны, ӧд унаӧн тӧдлісны тэнсьыд куслытӧм скӧрлунтӧ.
{Еврей йӧз (комиӧдіс Kodko) @ Аввакум @ религ. гижӧд @ Библия @ 2021 @ Лб. .}
Аввакум пророклӧн небӧг
Водзвыв висьталӧм. Аввакум пророклы Енсянь восьтӧм.
— Господьӧй, дыр-ӧ на меным отсӧгсӧ корны? Мыйла Тэ он кыв менӧ? Дыр-ӧ на меным горзынысӧ Тэ водзын? Мыйла Тэ он мезды миянӧс виалӧм-дзескӧдӧмысь?
Мыйла Тэ сетан меным аддзыны лёк вӧчӧмсӧ, видзӧдны шогыс вылӧ?
Быдлаын гусясьӧны-мырддялӧны, виалӧны-дзескӧдӧны, лӧгалӧны да зыксьӧны.
Индӧдыс лои вынтӧм, веськыда мыждӧмыс абу. Лёк вӧчысь дзескӧдӧ мыжтӧмӧс, ёрдысьяс оз веськыда мыждыны.
— Видзӧдӧй войтыръяс вылӧ, сюся видзӧдӧй да шензьӧй!
Тіян олан лунъясӧ Ме вӧча сэтшӧмтор, мый тіянлы кӧ висьталасны та йылысь, ті онӧ эскӧй.
Ме кыпӧда калдея войтырӧс, скӧр да этш тӧдтӧм войтырӧс. Найӧ мунасны став му пасьталаыс, мед босьтны йӧз муяс.
Тайӧ войтырыс лёксьыс-лёк, сыысь ставныс полӧны, сійӧ — бӧръя кывсӧ шуысь, сійӧ вӧчӧ, мый кӧсйӧ.
Сылӧн вӧвъясыс леопард дорысь тэрыбӧсь, тэрыбӧсь войся кӧинъясысь.
Сылӧн вӧвъясыс кыккокйыв тӧвзьӧны, найӧ локтӧны ылісянь, лэбӧны кыйдӧс вылӧ уськӧдчысь кутш моз.
Сылӧн тышкайӧзыс локтӧны вины-дзескӧдны, ыджыд вынӧн уськӧдчӧны, саридздор лыа мында йӧзӧс пленӧ босьтӧны.
Тайӧ войтырыс ӧксыясӧс серамтуйӧ пуктӧ, юралысьясӧс омӧльтӧ, изкаръяс вылын тешитчӧ: лэптӧ на гӧгӧр тымӧд да босьтӧ найӧс.
Сійӧ тӧвзьӧ ыджыд тӧвныр моз, мунӧ ыджыд ӧдӧн да ставсӧ бырӧдӧ, сылӧн енмыс — аслас выныс.
— Господьӧй, менам вежа Енмӧй, важысянь Тэ — Ен.
Ми огӧ кулӧй.
Господьӧй, Тэ мӧдӧдін калдея войтырӧс, мед мыждыны миянӧс.
Дорйысьӧй, Тэ вайӧдін найӧс, мед чирыштны миянӧс.
Тэнад синмыд — сӧстӧм, лёкыс да ылӧгыс вылӧ Тэ он вермы видзӧдны.
Мыйла Тэ нинӧм он вӧч, а сӧмын видзӧдан ылӧдчысьяс вылӧ? Мыйла Тэ чӧв олан, кор лёк вӧчысь ньылыштӧ веськыда олысьӧс? Тэ вӧчин йӧзсӧ саридзса чери кодьӧн, юралысьтӧг олысь гагъяс кодьӧн.
Калдея войтыр кыйӧ йӧзсӧ вугырӧн, кӧвтӧ ботанӧн, тывйыштӧ тывйӧн, сэсся таысь нимкодясьӧ-гажӧдчӧ.
Сійӧ вись вайӧ аслас ботанлы, тшынӧдчӧ аслас тыв водзын, ӧд на отсӧгӧн сійӧ лышкыда олӧ, пӧттӧдзыс сёйӧ.
Дугдывтӧг ӧмӧй сійӧ кутас тывъявны, жалиттӧг бырӧдны войтыръясӧс?
Пророк шуис: — Кар видзысь моз ме вешйывтӧг сулала, виччыся, мый шуас меным Господь, менам норасьӧм вылӧ мый вочавидзас.
Господь вочавидзис меным: — Гиж тайӧ аддзылӧмсӧ изпӧвъяс вылӧ, гиж ясыда, медым гижӧдсӧ позис кокньыда лыддьыны. Тайӧ аддзылӧмыс локтана кад йылысь, кадлӧн пом йылысь, тайӧ абу ылӧг.
Тайӧ кадыс кӧ дыр на оз во, виччысь, ӧд тайӧ аддзылӧмыс инас, оз вежсьы.
Эскытӧм морт абу веськыд, а веськыда олысь эскӧмнас кутас овны.
Вылӧ кыпӧдчысь пӧрйӧдлысь вина кодь, сійӧ оз лӧнь, пыдӧстӧминыс моз паськӧдӧ вомсӧ, кулӧмыс моз оз пӧтлы, босьтӧ аслас кипод улӧ войтыръясӧс, пуксьӧ ыджыдавны на вылын.
Но ставныс найӧ лэптасны сійӧс серамвыв, лӧсьӧдласны сы йылысь омӧльтана сьыланкывъяс: 
— Курыд шог сылы, коді горшсӧ паськӧдӧ йӧз эмбур вылӧ, коді озырмӧдчӧ водзӧс сетӧмӧн. Тадзи оз дыр ло!
Тӧдлытӧг тэ вылӧ уськӧдчасны найӧ, кодлы тэ уджйӧза, найӧ повзьӧдасны тэнӧ тіравмӧныд, и тэ шедан налӧн гыж улӧ.
Кыдзи тэ куштін войтыръясӧс, тадзи жӧ войтыръяс пӧвстысь колясыс вӧчас тэкӧд. Йӧзлысь вирсӧ кисьтӧмысь, муяссӧ, каръяссӧ да сэтчӧс олысьяссӧ бырӧдӧмысь найӧ тэнӧ асьтӧ куштасны.
Курыд шог сылы, коді ылӧдлӧмӧн шедӧдӧ аслыс озырлунсӧ, коді лӧсьӧдӧ ассьыс позсӧ кыдз позьӧ вылӧджык, медым лёкыс эз судзӧд сійӧс.
Уна войтырӧс бырӧдӧмнад тэ янӧдін ассьыд рӧдтӧ, тэ мыж вӧчин, и таысь мынтысян олӧмнад.
Кар стенлӧн изъясыс пондасны горзыны, керкаяслӧн матичьясыс — шуавны:
— Курыд шог сылы, коді вир кисьтӧмӧн лэптӧ кар, ылӧг помысь кыпӧдӧ изкарсӧ.
Господь Саваоф шуӧма, мый йӧзыслӧн став уджыс сотчас, мый войтыръяс весьшӧрӧ мырсьӧны.
Кыдзи саридзыс тырӧма ваӧн, сідзи муыс лоӧ тырӧма Господьлысь дзирдлунсӧ тӧдӧмӧн.
— Курыд шог сылы, коді юкталӧ матыссасӧ скӧрлунӧн, юкталӧ коддзытӧдзыс, медым аддзыны сійӧс пасьтӧгыс.
Тэ пӧтмӧныд яналан, ошкӧмыс тэныд оз ло.
Ӧні ю — мед пасьтӧгыд тэнӧ аддзасны. Господь кисьтас Ассьыс скӧрлуна дозсӧ тэ вылӧ, нималӧм пыдди тэныд лоӧ яналӧм.
Ливанӧс куштӧм-бырӧдӧмыд бергӧдчас ас вылад, пемӧсъясӧс виалӧмсьыд кутан повны-дзӧрны. Йӧзлысь вирсӧ кисьтӧмысь, муяс да каръяс пазӧдӧмысь, сэні став олысьсӧ виалӧмысь асьтӧ лоӧ бырӧдӧма.
Вермас-ӧ отсавны бӧлбан — пуысь вӧчӧмторйыс? Вермас-ӧ отсавны идол — сывдӧмӧн вӧчӧм ылӧгвелӧдысьыс? Но вӧчасьысь лача кутӧ аслас идол вылӧ, сёрнитны вермытӧм ен вылӧ.
Курыд шог сылы, коді пуысь вӧчӧмторлы шуӧ: «Садьмы!» и сёрниттӧм излы: «Чеччы!»
Вермасны-ӧ найӧ мыйӧкӧ велӧдны?
Найӧс эжӧма эзысь-зарниӧн, но на пытшкын ловшыыс абу.
А Господь — Аслас вежа крамын. Став муюгыдыс мед ланьтас Сы водзын!
Аввакум пророклӧн кевмысьӧм, бӧрдан сьыланкыв.
Господьӧй, ме кылі Тэ йылысь, ме повзи Тэнад уджъясысь.
Вӧч Ассьыд уджъястӧ тшӧтш миян лунъясӧ, сет бара аддзывны найӧс талун.
Скӧралігад ло бур сьӧлӧма миян дінӧ.
Енмыс локтӧ Темансянь, Вежа Ен локтӧ Паран керӧссянь.
Сылӧн дзирдлуныс вевттьӧ енэжсӧ, Сійӧс ошкӧмыс тыртӧ мусӧ.
Сійӧ югъялӧ шонді моз, Сылӧн киысь вартӧ югӧрыс — Ассьыс вынсӧ сэтчӧ дзебӧма.
Сы водзвылын мунӧ пӧрӧс висьӧм, бӧрсяньыс локтӧ кулӧм.
Кор Сійӧ сувтӧ, муыс вӧрзьылӧ.
Кор Сійӧ видзӧдлӧ, войтыръясӧс дзӧрӧм босьтӧ.
Нэмӧвӧйся керӧсъяс потласьӧны-киссьӧны, важдырся мылькъяс муас пырӧны, а Господьлӧн туйясыс — бырлытӧмӧсь.
Ме аддза, мый кушанса чомъясын шогсьӧны, мадианса чомъясын полӧны-тіралӧны.
Господьӧй, Тэ пуксин Аслад вӧвъяс вылӧ, Аслад тарантасъясӧн петін, медым вермыны. Юяс вылӧ ӧмӧй Тэ скӧралан, шоръяс вылӧ ӧмӧй лӧглуныд петӧ, саридз вылӧ ӧмӧй скӧрлуныд киссьӧ?
Кыв сетӧмыд серти Тэ зэлӧдан ньӧвтӧ, ва визувъясӧн вожӧдан мусӧ.
Тэнӧ аддзӧмысь керӧсъяс вӧрзьӧны, сувтса зэр енэжсянь ыльӧбтӧ, пыдӧстӧм ваыс равӧстӧ, ассьыс ыджыд гыяссӧ кыпӧдӧ.
Тэнад ыпъялысь ньӧвъясысь, Тэнад чардби моз сявкйысь шы помысь шондіыс да тӧлысьыс сувтӧны.
Тэ талялан мусӧ скӧрлуннад, войтыръясӧс — лӧглуннад.
Тэ петан мездыны Ассьыд войтыртӧ, дорйыны Ассьыд мавтыштӧматӧ.
Тэ пасьвартан лёк вӧчысьяслысь юралысьсӧ, колян сійӧс нинӧмтӧг.
Кор вӧрӧгъяс ыджыд тӧвныр моз уськӧдчӧны да разӧдӧны миянӧс, кор найӧ нимкодясьӧны да гусьӧн ньылыштӧны коньӧрӧс, сэки Тэ асланыс шыӧн бытшкан налысь юралысьсӧ.
Аслад вӧвъясӧн Тэ вуджан саридз вомӧн, Ас бӧрсяыд быгзьӧдан-шызьӧдан васӧ.
Ме шызьӧмсӧ кылі да, пытшкӧсӧй тіравны пондіс, вомдорӧй вӧрны кутіс, дойыс лыясӧдз пырис, кокӧй дзӧрны пондіс.
Но ме лӧня виччыся сійӧ лунсӧ, кор шогыс суас менам войтыр вылӧ уськӧдчысьясӧс.
Весиг кӧ инжир оз понды дзоридзавны, виноград оз сет вотӧссӧ, олив оз гӧрддзась, кӧдзӧм му вылын оз во нянь, гидын оз ло ыж-мӧс, и сэки ме кута нимкодясьны Господьӧн, Енмӧн, коді мездӧ менӧ.
Господь Ыджыдыс — менам вынӧй! Сійӧ вӧчӧ менсьым кокӧс кӧрлӧн кодь тэрыбӧн, нуӧдӧ менӧ выліинъясӧ.
Сьылысьясӧн веськӧдлысьлы.
{Еврей йӧз (комиӧдіс Kodko) @ Софоний @ религ. гижӧд @ Библия @ 2021 @ Лб. .}
Софоний пророклӧн небӧг
Софоний вӧлі Кушилӧн пи. Кушилӧн батьыс вӧлі Гедалий, Гедалийлӧн — Амарей, Амарейлӧн — Езекей. Иудаса Иосей ӧксылӧн, Амон пилӧн, веськӧдлан кадӧ Софонийлы вӧлі Господьсянь кыв:
— Ме ставсӧ бырӧда му вывсьыс, — висьталӧ Господь, — бырӧда йӧзӧс и ыж-мӧскӧс, бырӧда енэжвыв лэбачьясӧс и саридзса чериясӧс, бырӧда лёк вӧчысьясӧс да ставсӧ, мый ыштӧдіс найӧс Енсьыс кежны, бырӧда му вывсьыс став йӧзсӧ, — висьталӧ Господь. — 
Ме лэпта Ассьым киӧс Иуда вылӧ, Ерусалимын олысьяс вылӧ, бырӧда тайӧ карсьыс ставсӧ, мый казьтывлӧ Ваал идол йылысь, бырӧда тшыкӧдчысьяслысь нимсӧ, ылӧг енъяслы юрбитысь попъяслысь нимсӧ, бырӧда найӧс, кодъяс керка вевт вылын юрбитӧны енэжвыв вынъяслы, кодъяс юрбитӧны да кыв сетӧны Ме водзын да асланыс Молок идол водзын, бырӧда найӧс, кодъяс кежисны Меысь, оз корсьны Менӧ, оз кӧсйыны аддзыны Менӧ, Господьӧс.
Ланьтӧй ставныд Господь Ыджыдыс водзын! Ӧд Господьлӧн луныс матын, Сійӧ дасьтӧма начкӧм вылӧ вись, вежӧдӧма корӧмаясӧс.
Вись ваян лунӧ Ме, Господь, мыжда юралысьясӧс, ӧксылысь пиянсӧ да быдӧнӧс, коді пасьтасьӧ йӧз муын олысьяс ног.
Ме мыжда сійӧ лунӧ быдӧнӧс, коді воськовтігас полӧ тувччыны тагӧс вылӧ, коді ыджыдыслысь керкасӧ тыртӧ виалӧм-дзескӧдӧмӧн да ылӧгӧн.
Сійӧ лунӧ, — висьталӧ Господь, — Чери дзиръя дорсянь кутас кывны ойзӧм, мукӧд дзиръя дорсянь — ырзӧм-бӧрдӧм, а керӧсъяс вывсянь — грыма-грамакылӧм.
Сыркъялӧй, Мактешын * олысьяс, ӧд ханаансаясӧс лоӧ бырӧдӧма, став вузасьысьсӧ лоӧ виӧма.
Сійӧ кадас Ме би ӧзтӧмӧн кытшовта Ерусалим, корся да мыжда найӧс, кодъяс дундӧмаӧсь вина-сурысь, кодъяс мӧвпалӧны: «Бурсӧ ни лёксӧ оз вӧч миянлы Господь».
Но налысь озырлунсӧ мырддясны, налысь керкаяссӧ куштасны.
Найӧ лэптасны керкаяс, но овны сэні оз кутны, пуктасны виноград, но винасӧ юны оз кутны.
Матын нин Господьлӧн торйӧдӧм луныс, сійӧ матын нин, регыд воас. Кыланныд-ӧ, мый Господьлӧн луныс воӧ нин?
Весиг медся повтӧм тышкамортыс курыда бӧрддзас.
Сійӧ луныс лоӧ скӧралан лунӧн, сьӧкыдалан да шогалан лунӧн, бырӧдан да куштан лунӧн, пемыд да сап пемыд лунӧн, сьӧд кымӧра да сук руа лунӧн. Сійӧ лунӧ чукӧстас буксан шы, и тышкайӧз горӧдӧмӧн уськӧдчасны изкаръяс вылӧ, джуджыд башняяс вылӧ.
Ме дзескӧда йӧзсӧ, найӧ кутасны шӧйтны-ветлыны синтӧм моз, ӧд найӧ мыж вӧчисны Господьлы паныд. Налысь вирсӧ кояласны пӧимӧс моз, налысь вир-яйсӧ разӧдасны куйӧдӧс моз.
Господьлӧн скӧралан лунӧ налӧн эзысь-зарниныс оз вермы мездыны найӧс, Господьлӧн скӧрлуна биыс бырӧдас ставнас мусӧ, Сійӧ виччысьтӧг бырӧдас му вылас став олысьсӧ.
Тӧдмалӧй, тӧдмалӧй асьнытӧ, яндысьтӧм йӧз, кытчӧдз оз во индӧм кад, кытчӧдз лунъясыс оз лэбны кыд моз, кытчӧдз оз киссьы тіян вылӧ Господьлӧн яр скӧрлуныс, кытчӧдз оз су тіянӧс Господьлӧн скӧралан луныс.
Корсьӧй Господьӧс, мувывса рам сьӧлӧмаяс, Сылӧн Индӧд серти олысьяс.
Корсьӧй веськыдлунсӧ, корсьӧй рамлунсӧ, сэки, гашкӧ, ті верманныд дзебсьыны Господьлӧн скӧралан лунӧ.
Газаӧс эновтасны, Аскалон кушмас, Азотын олысьясӧс луншӧрнас вӧтласны, Экронӧс вужнас нетшыштасны.
Курыд шог саридздор муын олысьяслы, керетса войтырлы.
Господь висьталӧ Ханаан му йылысь, шуӧ Филистим му йылысь: 
— Ме бырӧда тэнӧ, тэнад оз коль олысьыс.
Саридздорса му лоӧ йирсянінӧн, ыжъяслы йӧртӧдӧн.
Сійӧ муыс вичмас Иуда чужанкотырлӧн коляслы, сэні найӧ пондасны видзны ыж-мӧснысӧ, войнас найӧ пондасны узьны-шойччыны аскалонса керкаясын. Ӧд Господь Ен кутас тӧждысьны на вӧсна, Сійӧ бара сетас налы бур олӧм.
Ме кывлі Моавлысь омӧльтӧмсӧ, кывлі аммон войтырлысь лёкӧдӧмсӧ, кыдзи найӧ увтыртісны Менсьым войтырӧс, кыдзи повзьӧдлісны, мый уськӧдчасны на вылӧ.
Та вӧсна Ме кыв сетӧмӧн кӧсйыся Аслам олӧмӧн, — висьталӧ Господь Саваоф, Израильлӧн Ен, — Моав лоӧ Содом кодь, аммон войтыр лоӧ Гомора кодь, налӧн муясыс тырасны ёг турунӧн, лоӧны сола гуӧн, пыр кежлӧ лоӧны овтӧминӧн.
Менам коляс войтырӧй куштас найӧс, Менам войтырысь ловйӧн кольӧмаяс босьтасны налысь мусӧ.
Тайӧ суас найӧс вылӧ кыпӧдчӧмысь, суас сыысь, мый найӧ омӧльтісны да повзьӧдлісны Господь Саваофлысь войтырсӧ.
Найӧ кутасны ёна повны Господьысь, ӧд Господь бырӧдас мувывса став енсӧ. Став йӧзыс кутасны копрасьны Господьлы, быд морт копыртчас Сылы аслас муын.
Ті, Эфиопия войтыр, куланныд Менам шыпуртысь.
Господь нюжӧдас Ассьыс кисӧ войвывлань да бырӧдас Ассур му, Сійӧ пазӧдас Ниневия кар, вӧчас сійӧс кос муӧн, овтӧминӧн. Сэні кутасны узьны-шойччыны пемӧс чукӧръяс да вӧлявывса зверъяс, ёж да пеликан кутасны узьны усьӧм сюръяяс дорын, стен розьясысь кутас кывны налӧн гӧлӧс шыныс. Ӧдзӧс тагӧсъяссӧ лоӧ жугӧдӧма, сус пу эжӧдсӧ стенъяссьыс лоӧ кульӧма.
Татшӧмӧн лоӧ кар, кӧні йӧзыс гажӧдчылісны, тӧждысьтӧг олісны, ас пытшканыс шуалісны: «Миян кар кодь мӧдыс абу».
Но ӧні сійӧ лои киссьӧм карӧн, зверъяслы — дзебсянінӧн.
Сы дінті мунысьяс пондасны шутьлявны, кинас швачӧдны боканыс.
Курыд шог пежасьӧм карлы, асныралысьяслӧн да дзескӧдысьяслӧн карлы!
Сэні олысьяс оз кывзысьны, оз сибӧдны туйдӧдӧмсӧ, Господь вылӧ лача оз кутны, оз локны асланыс Ен дінӧ.
Сэтчӧс юралысьясыс — равзысь лев кодьӧсь, ёрдысьясыс — войся кӧин кодьӧсь, асылӧдзыс весиг лытор оз коль кыйдӧссьыс.
Сэні олысь пророкъяс — ылӧдчысь да шогмытӧм йӧз.
Попъясыс пежалӧны вежаинсӧ, нинӧмӧ пуктӧны Енлысь Индӧдсӧ.
Но Господь веськыд, Сійӧ веськыда вӧчӧ тайӧ карас. Быд асыв Сійӧ петкӧдлӧ Ассьыс веськыда мыждӧмсӧ, но лёк вӧчысь яндзим оз тӧд.
— Ме бырӧді войтыръясӧс, налысь изкаръяссӧ жугӧдӧма-пазӧдӧма.
Ме кушті налысь туй вывъяссӧ, ветлысь-мунысьыс сэні эз коль.
Налысь каръяссӧ кисьтӧма-пазӧдӧма, эз ло сэні олысьыс, эз коль весиг ӧти морт.
Ме шулі тэныд Ерусалим, медым тэ сӧмын Меысь полін, Менсьым туйдӧдӧмӧс сибӧдін. Сэки эськӧ тэнсьыд оланінтӧ эз вӧв бырӧдӧма, сэки эськӧ Менам мыждӧмӧй эз су тэнӧ.
Но ті зілинныд вӧчны сӧмын лёксӧ.
Сідзкӧ, виччысьӧй Менӧ, — висьталӧ Господь, — виччысьӧй сійӧ лунсӧ, кор Ме сувта мыждыны. Ӧд Ме шуи, мый чукӧрта войтыръясӧс, медым кисьтны на вылӧ Ассьым лӧглунӧс, ыпъялысь скӧрлунӧс.
Менам скӧрлуна биӧн лоӧ сотӧма став мусӧ.
Сэки войтыръяслы Ме выльысь сета сӧстӧм вом, медым ставныс шыасисны Ме дінӧ да ӧти сьӧлӧмӧн кесъялісны Меным.
Эфиопиялӧн юсайса муясысь ваясны Меным козинъяс Менам разӧдӧмаяс, Меным юрбитысьяс.
Сійӧ лунӧ тэ он нин кут янӧдны асьтӧ лёк уджъясӧн, мый тэ вӧчлін Меным паныд, ӧд сэки Ме ылыста тэ пӧвстысь вылӧ кыпӧдчысьясӧс, тэ он нин понды ышнясьны Менам вежа керӧс вылын.
Тэ пӧвстысь Ме кольӧда коньӧр да рам сьӧлӧма войтырӧс, найӧ пондасны лача кутны Менам нимӧй вылӧ.
Израильлӧн коляс войтырыс оз нин кут лёксӧ вӧчны, найӧ оз кутны пӧръясьны, налӧн вомысь оз нин петны ылӧг кывъяс. Ыжъяс моз найӧ пондасны йирсьыны-шойччыны, и некод оз вӧрзьӧд найӧс.
Нимкодясь, Сион нылӧй, гажӧдчы, Израиль!
Гажӧдчы, Ерусалим нылӧй, став сьӧлӧмсяньыд нимкодясь!
Господь вештіс тэ вылысь Ассьыс мыждӧмсӧ, Сійӧ вӧтліс тэнӧ мустӧмтысьясӧс.
Господь, Израильлӧн Ӧксы, тэ пӧвстын, тэныд оз нин ков повны, мый вӧчасны лёксӧ.
Сійӧ лунӧ Ерусалимлы шуасны: «Эн пов, Сион! Тэнад киыд мед оз жебмы!»
Господь, тэнад Енмыд, тэ пӧвстын, Сійӧ вына мездыны тэнӧ.
Тэ вӧсна Сійӧ кутас долыда нимкодясьны, кыпыда гажӧдчыны. Сійӧ лоӧ бур сьӧлӧма тэ дінӧ, ӧд тэ Сылы муса.
— Ме чукӧрта найӧс, кодъяс шогсьӧны гажӧдчан лунъяс вӧсна, ӧд найӧс нуӧдісны Ерусалимысь, найӧс личкӧ лёкӧдӧм-омӧльтӧмыс.
Сійӧ кадас Ме мыжда ставнысӧ, кодъяс дзескӧдісны тэнӧ, Сион. Ме мезда чотысьясӧс, чукӧрта вӧтлӧмаясӧс. Быд муын, кӧні вӧлі найӧс янӧдӧма, Ме нимӧда найӧс, быдлаын найӧс кутасны ошкыны.
Сійӧ кадас Ме чукӧрта тіянӧс да бӧр вайӧда гортаныд. Ме нимӧда тіянӧс, и войтыръяс кутасны ошкыны тіянӧс, кор бара сета тіянлы бур олӧм. Асланыд синмӧн ті аддзанныд тайӧс, — висьталӧ Господь.
{Еврей йӧз (комиӧдіс Kodko) @ Аггей @ религ. гижӧд @ Библия @ 2021 @ Лб. .}
Аггей пророклӧн небӧг
Дарий ӧксылӧн мӧд веськӧдлан воӧ, квайтӧд тӧлысьлӧн медводдза лунӧ, Шеалтиэллӧн Зоровавель пилы, Иуда муын юралысьлы, да Иоседеклӧн Исус пилы, аркирейлы, Аггей пророк пыр вӧлі Господьсянь кыв:
«Господь Саваоф тадзи висьталӧ: тайӧ войтырыс шуалӧ, эз пӧ на во кадыс Господьлысь крамсӧ выльысь лэптыны».
Та вӧсна Аггей пророк пыр вӧлі Господьсянь кыв:
— Тіянлы ӧмӧй кад овны мичмӧдӧм керкаясын, кор тайӧ крамсӧ пазӧдӧма?
Господь Саваоф тадзи висьталӧ: — Видзӧдлӧй, кыдзи ті оланныд!
Ті уна кӧдзанныд, но этша вунданныд, ті сёянныд, но онӧ пӧтӧй, ті юанныд, но горшныд оз веськав, ті пасьтасянныд, но онӧ шоналӧй, ті мырсянныд-уджаланныд, но зепныд век куш.
Господь Саваоф тадзи висьталӧ: — Видзӧдлӧй, кыдзи ті оланныд!
Кайӧй керӧс вылӧ, вайӧй сэтысь пуяс да Менӧ пыдди пуктӧм могысь лэптӧй Менам сьӧлӧм серти крам, — висьталӧ Господь.
— Ті виччысянныд уна, а чукӧртанныд этша.
Мый ваянныд гортаныд — сійӧс Ме шердъя.
Мыйла тадзи артмӧ? — висьталӧ Господь Саваоф.
— Сы вӧсна, мый Менсьым крамӧс пазӧдӧма, а ті асланыд керкаяс вӧсна тӧждысянныд.
Та вӧсна енэжыс оз сет тіянлы зэрсӧ, муыс оз сет быдтассӧ.
Ме мӧдӧді зэртӧм кад му вылӧ, керӧсъяс да кӧдзасъяс вылӧ, виноград да олив пуяс вылӧ, мувывса став быдтас вылӧ, йӧз вылӧ да ыж-мӧс вылӧ, видз-му уджъяс вылӧ.
Зоровавель, Шеалтиэллӧн пиыс, да Исус аркирей, Иоседеклӧн пиыс, тшӧтш пленысь воӧм коляс войтырыс кывзысисны Господьлысь, асланыс Енлысь. Найӧ сибӧдісны-кывзісны Аггей пророклысь кывъяссӧ, ӧд Господь, налӧн Енмыс, мӧдӧдіс сійӧс на дінӧ. Войтырыс поліс-вежавидзис Господьысь.
Сэки Аггей, кодӧс Господь мӧдӧдіс, юӧртіс войтырыслы: «Ме тіянкӧд! — висьталӧ Господь».
Господь ышӧдіс Шеалтиэллысь Зоровавель писӧ, Иуда муын юралысьӧс, да Иоседеклысь Исус писӧ, аркирейӧс, тшӧтш коляс войтырсӧ, и найӧ локтісны да кутісны лэптыны Господь Саваофлысь, асланыс Енлысь, крамсӧ. Тайӧ вӧлі Дарий ӧксылӧн мӧд веськӧдлан воӧ, квайтӧд тӧлысьлӧн кызь нёльӧд лунӧ.
Дарий ӧксылӧн мӧд веськӧдлан воӧ, сизимӧд тӧлысьлӧн кызь ӧтиӧд лунӧ* Аггей пророк пыр вӧлі Господьсянь кыв:
«Висьтав Шеалтиэллӧн Зоровавель пилы, Иуда муын юралысьлы, да Иоседеклӧн Исус пилы, аркирейлы, тшӧтш коляс войтырыслы:
— Коді тіян пӧвстысь аддзыліс воддза крамлысь мичлунсӧ? Кутшӧмӧн ті ӧні аддзанныд сійӧс?
Абу-ӧ сійӧ тіян син водзын нинӧм кодь?
Но тэ, Зоровавель, ёнмӧдчы, — висьталӧ Господь, — ёнмӧдчы, Исус аркирей, Иоседеклӧн пиыс!
Ёнмӧдчы, тайӧ муас олысь войтыр, — висьталӧ Господь. — Вӧчӧй ассьыныд уджнытӧ, ӧд Ме тіянкӧд, — висьталӧ Господь Саваоф. — 
Египетысь тіян петігӧн Ме кӧсйысьлі, мый Менам Лолӧй лоӧ тіянкӧд. Сідзкӧ, энӧ полӧй!
Господь Саваоф тадзи висьталӧ: — Регыд Ме нӧшта ӧтчыдысь вӧрзьӧда енэжсӧ и мусӧ, саридзсӧ и косінсӧ. Ме пыркнита став войтыръяссӧ, и найӧ ваясны ассьыныс озырлунсӧ крамӧ.
Ассьым крамӧс Ме тырта дзирдлунӧн, — висьталӧ Господь Саваоф. — Став эзысь-зарниыс — Менам, — висьталӧ Господь Саваоф. — Тайӧ крамыслӧн дзирдлуныс лоӧ воддза дорсьыс на мичаджык, — висьталӧ Господь Саваоф. — Тані Ме сета лӧньлун да бур олӧм, — висьталӧ Господь Саваоф».
Дарийлӧн мӧд веськӧдлан воӧ, ӧкмысӧд тӧлысьлӧн кызь нёльӧд лунӧ Аггей пророклы вӧлі Господьсянь кыв:
«Господь Саваоф тадзи висьталӧ: юав попъяслысь, мый Индӧдыс висьталӧ та йылысь.
Шуам, паськӧм дорышас гартыштӧмӧн морт нуӧ вежӧдӧм яй. Сылӧн паськӧм дорышыс кӧ инмылас няньӧ, пуӧмторйӧ, винаӧ, выйӧ либӧ мукӧд сёянӧ, лоӧ-ӧ тайӧ сёяныс вежа?»
Попъяс вочавидзисны: «Оз».
Аггей водзӧ юаліс: «А тайӧ сёяныс дінӧ кӧ инмӧдчылас морт, коді пежасис кулӧм морт дінӧ инмӧдчылӧм вӧсна, лоӧ-ӧ тайӧ сёяныс пеж?»
Попъяс вочавидзисны: «Лоӧ».
Сэки Аггей шуис: «Дзик татшӧм жӧ Ме водзын тайӧ войтырыс, — висьталӧ Господь.
— Татшӧмӧсь жӧ налӧн уджъясныс да вайӧмторъясныс, ставыс пеж».
— Ӧні видзӧдлӧй, мый лоӧ тайӧ лунсяньыс да водзӧ. Видзӧдлӧй, мый вӧлі тайӧ кадӧдзыс, кор Господьлӧн крамын абу на вӧлі пуктӧма из вылӧ из.
Ті вӧлі мунанныд нянь йӧртӧдӧ, медым босьтны сэтысь кызь куд мында шобді, а сэні сӧмын дас куд мында.
Ті вӧлі мунанныд виноград пычкан гу дорӧ, медым гумовтны сэтысь ветымын литра вина, а сэні сӧмын кызь литра.
Сотысь тӧвруӧн, висьӧмӧн да шерӧн Ме бырӧдлі тіян видз-му вылысь няньнытӧ да став быдтаснытӧ, но ті энӧ бергӧдчӧй Ме дінӧ, — висьталӧ Господь.
Ӧні видзӧдлӧй, мый водзӧ лоӧ тайӧ лунсяньыс, ӧкмысӧд тӧлысьлӧн кызь нёльӧд лунсянь, кор вӧлі пуктӧма подувсӧ Господьлӧн крамлы.
Нянь йӧртӧдын ӧмӧй эм на кӧйдысыс?
Виноград да инжир пу, гранат да олив пу ӧнӧдз на эз вайлыны вотӧссӧ, но ӧнісянь Ме бурсиа тіянӧс.
Ӧкмысӧд тӧлысьлӧн кызь нёльӧд лунӧ Аггейлы мӧдысь вӧлі Господьсянь кыв:
— Висьтав Зоровавельлы, Иуда муын юралысьлы: Ме вӧрзьӧда енэжсӧ и мусӧ, путкыльта ӧксыяслысь юралан пуклӧснысӧ, мукӧд войтыръясӧс вӧча вынтӧмӧн. Ме путкыльта тарантасъяс да сэні пукалысьясӧс, вӧвъяс да верзьӧмаяс усясны тышын.
Сійӧ лунӧ, — висьталӧ Господь Саваоф, — Ме босьта тэнӧ, Шеалтиэллӧн Зоровавель пи, босьта тэнӧ, Ассьым кесйӧгӧс, — висьталӧ Господь, — да вӧча тэнӧ чунькытшӧн, кӧні лоӧ Менам пасӧй, ӧд Ме бӧрйи тэнӧ, — висьталӧ Господь Саваоф.
{Еврей йӧз (комиӧдіс Kodko) @ Закар @ религ. гижӧд @ Библия @ 2021 @ Лб. .}
Закар пророклӧн небӧг
Дарий ӧксылӧн мӧд веськӧдлан воӧ, кӧкъямысӧд тӧлысьӧ * Закар пророклы, Иддо Береклӧн пилы, вӧлі Господьсянь кыв:
«Господь чорыда скӧрмӧма тіян батьяс вылӧ. Висьтав войтырыслы Господь Саваофлысь шуӧмсӧ.
Бергӧдчӧй Ме дінӧ, и Ме бергӧдча тіян дінӧ, — висьталӧ Господь Саваоф. — 
Энӧ лоӧй батьясныд кодьӧсь, кодъяс дінӧ водзынджык шыасьлісны пророкъяс. Найӧ юӧртлісны: “Господь Саваоф тадзи висьталӧ: бергӧдчӧй асланыд лёк туй вылысь да эновтчӧй пеж уджъяссьыныд”. 
Но тіян батьясныд эз кывзыны Менӧ да эз сибӧдны Менсьым кывъясӧс, — висьталӧ Господь. — Кӧнӧсь ӧні тіян батьясныд?
Пророкъяс тшӧтш оз овны нэмъяс чӧж.
Но Менам кывъясӧй инісны. Сійӧ, мый йылысь Ме ӧлӧдӧмӧн висьтавлі Меным кесъялысь пророкъяс пыр, суис батьяснытӧ.
Сэки найӧ бергӧдчывлісны мыжсьыныс шуалӧмӧн: “Господь Саваоф кыдзи шуис, сідзи и вӧчис. Сійӧ вӧчис миянкӧд асланым бӧрйӧм туйным да лёк вӧчӧмным серти”».
Дарий ӧксылӧн мӧд веськӧдлан воӧ, шеват нима дас ӧтиӧд тӧлысьлӧн кызь нёльӧд лунӧ * Закар пророклы, Иддо Береклӧн пилы, вӧлі Господьсянь кыв.
Войнас ме аддзылі петкӧдчылӧм. Ковтысын мирт пуяс пӧвстын сулаліс гӧрд вӧла верзьӧма. Сы бӧрвылын сулалісны гӧрд, пегана да еджыд вӧвъяс.
Ме юалі: «Ыджыдӧй, тайӧ кодъяс?»
Мекӧд сёрнитысь андел шуис меным: «Ме тэныд петкӧдла, кодъяс найӧ».
Мирт пуяс пӧвстын сулалысь верзьӧма шуис: «Тайӧ вӧлаяссӧ Господь мӧдӧдіс кытшовтны мусӧ».
Сэки вӧлаяс шуисны Господьлӧн анделлы, мирт пуяс пӧвстын сулалысь верзьӧмалы: «Ми кытшовтім мусӧ. Гуын моз гӧгӧр лӧнь».
Сэки андел шыасис Господь дінӧ: «Господь Саваоф, дыр-ӧ на Тэ он бурсьӧлӧмтчы Ерусалим да мукӧд Иуда каръяс дінӧ? Сизимдас во нин Тэ скӧралан на вылӧ».
Господь лӧньӧдіс мекӧд сёрнитысь анделӧс бур кывъясӧн.
Та бӧрын мекӧд сёрнитысь андел шуис меным: «Юӧрт йӧзыслы, мый Господь Саваоф тадзи висьталӧ: — Ме вежӧгтӧмӧдз радейта Ерусалимӧс, ёна вежӧгтӧмӧй вӧсна доръя Сионӧс.
Но Ме чорыда скӧрала сійӧ войтыръяс вылӧ, кодъяс олӧны ышнясьӧмӧн.
Кор Ме эг ёна скӧрав Аслам войтыр вылӧ, сэки войтыръяс уна лёксӧ вӧчисны Менам войтырлы.
Та вӧсна Господь тадзи висьталӧ: Ме бӧр бергӧдча Ерусалим дінӧ да лоа бур сьӧлӧма сы дінӧ.
Сэні выльысь лэптасны Менсьым крамӧс, — висьталӧ Господь Саваоф, — мурталӧм бӧрын выльысь лэптасны Ерусалим кар.
Нӧшта юӧрт, мый Господь Саваоф тадзи висьталӧ: — Менам каръясын бара пуксяс бур олӧм. Господь бара бурӧдас Сионӧс, выльысь бӧръяс Ерусалим кар».
Ме лэпті синмӧс да аддзи нёль сюр.
Ме юалі мекӧд сёрнитысь анделлысь: «Мый тайӧ?»
Андел вочавидзис: «Тайӧ сюръясыс найӧ, кодъяс вӧтлісны-разӧдісны Иудаысь, Израильысь да Ерусалимысь олысьяссӧ мукӧд муясӧ».
Сэсся Господь петкӧдліс меным нёль дорччысьӧс.
Ме юалі: «Мый найӧ лӧсьӧдчӧны вӧчны?»
Господь вочавидзис: «Сюръясыс вӧтлісны-разӧдісны Иуда войтырӧс сідз, мый некод юрсӧ эз лысьт кыпӧдны.
А тайӧ дорччысьясыс локтісны, мед повзьӧдны вӧтлысьясӧс-разӧдысьясӧс да чегъявны сюръяссӧ сійӧ войтыръяслысь, кодъяс уськӧдчисны Иуда му вылӧ да разӧдісны сэтчӧс олысьясӧс».
Ме бара лэпті синмӧс да аддзи мортӧс, коді киас кутіс мурталан кӧв.
Ме юалі сылысь: «Кытчӧ тэ мунан?»
Сійӧ вочавидзис: «Муртавны Ерусалимлысь пасьта-кузьтасӧ».
Буретш сэки мыччысис андел, коді водзынсӧ сёрнитіс мекӧд. Мӧд андел локтіс сылы воча да шуис: «Мун ӧдйӧджык да висьтав мурталысь том мортлы: Ерусалим гӧгӧр оз нин кутны лэптыны стен, ӧд сы мында сэні олысьыс да ыж-мӧскыс лоӧ.
Ме лоа сы гӧгӧр биа стенмӧн, — висьталӧ Господь. — Лоа сы пытшкын дзирдлунӧн».
— Тэрмасьӧй, тэрмасьӧй! Пышйӧй войвыв муысь, — висьталӧ Господь. — Ӧд тӧвруӧс моз Ме разӧді тіянӧс нёльнан му пельӧсӧ, — висьталӧ Господь. — Эновт вавилонса оланінъястӧ, Сион! Пет сэтысь!
Господь Саваоф Ассьыс дзирдлунсӧ петкӧдлӧм могысь мӧдӧдіс менӧ войтыръяс дінӧ, кодъяс куштісны тіянӧс. Сійӧ тадзи висьталӧ на йылысь: — Коді инмӧдчас Менам войтыр дінӧ, сійӧ инмӧдчас Менам донатор дінӧ.
Регыд Ме лэпта киӧс тіянӧс куштысь войтыръяс вылӧ, и налӧн жӧ кесйӧгъясыс куштасны найӧс. Сэки ті тӧдмаланныд, мый Господь Саваоф мӧдӧдіс менӧ.
Нимкодясь да гажӧдчы, Сион ныв!
Ме локта да овмӧдча тэ ордӧ, — висьталӧ Господь.
Сійӧ лунӧ уна мукӧд войтыр локтасны Господь дінӧ да лоӧны Сылӧн войтырӧн.
Господь кутас овны тэ ордын, и тэ тӧдмалан, мый Господь Саваоф мӧдӧдіс менӧ тэ дінӧ.
Вежа муын Господь вӧчас Иудаӧс Аслас войтырӧн, бара бӧръяс Аслыс Ерусалим кар.
Господь водзын мед ланьтас быд морт, ӧд Господь петӧ Аслас вежа оланінысь.
Сэсся Господь петкӧдліс меным Исус нима аркирейӧс, коді сулаліс Господьлӧн андел водзын. Исуслӧн веськыдладорын сулаліс сӧтана да мыжаліс сійӧс.
Господь шуис сӧтаналы: «Господь ӧлӧдӧ тэнӧ, сӧтана. Господь, коді бӧрйис Ерусалимӧс Аслас карӧн, тшӧктӧ ланьтны тэныд.
Абу-ӧ тайӧ мортыс биысь перйӧм сэрапом кодь?»
Исус сулаліс андел водзын няйт паськӧма. Андел шуис аслас отсасьысьяслы: «Пӧрччӧдӧй сы вылысь няйт паськӧмсӧ».
Исуслы андел шуис: «Видзӧд, ме босьті тэ вылысь мыжтӧ, ӧні пасьтӧда тэнӧ гажӧдчан паськӧмӧ».
Нӧшта Господьлӧн андел тшӧктіс пуктыны Исуслы юр вылас сӧстӧм юркӧртӧд.
Андел сулаліс орччӧн, а отсасьысьясыс пуктісны Исуслы юр вылас сӧстӧм юркӧртӧд да пасьтӧдісны сійӧс гажӧдчан паськӧмӧ.
Господьлӧн андел туйдӧдіс Исусӧс:
«Господь Саваоф тадзи висьталӧ: тэ кӧ пондан ветлыны Менам туйясӧд да овны Менам тшӧктӧмъяс серти, сэки кутан веськӧдлыны Менам керкаӧн, юравны Менам йӧрын. Ме лэдза тэнӧ Ас дінӧ тані сулалысь анделъясӧс моз».
Кывзӧй, Исус аркирей да тэкӧд кесъялысь попъяс! Ті — сійӧ пасыс, мый регыд Ме мӧдӧда Ассьым кесйӧгӧс, коді эм Выль Вож.
Со, Ме пукті Исус водзӧ сизим синма из.
Ме вундалӧмӧн гижа сэтчӧ кывъяс, — висьталӧ Господь Саваоф, — да ӧти здукӧн босьта тайӧ муыслысь мыжсӧ.
Сэки, — висьталӧ Господь Саваоф, — ті коранныд ёртъяснытӧ да орччӧн олысьяснытӧ ас орданыд, медым виноград да инжир пуяс улын рытпукны.
Андел, коді водзынсӧ сёрнитіс мекӧд, бӧр локтіс да узян унмысь моз садьмӧдіс менӧ.
Сійӧ юаліс менсьым: «Мый тэ аддзан?»
Ме вочавидзи: «Аддза зарни бикок. Бикок вылас вый доз. Доз дорыш гӧгӧрыс — сизим би петанін, быд би петанінын ӧзъялӧ сизим петель.
Бикокыскӧд орччӧн сулалӧны кык олив пу: ӧтиыс — веськыдладорас, мӧдыс — шуйгаладорас».
Ме юалі мекӧд сёрнитысь анделлысь: «Мый тайӧ татшӧмыс, ыджыдӧй?»
«Тэ он тӧд, мый тайӧ?» — воча юаліс андел.
«Ог, ыджыдӧй», — шуи ме.
Андел шуис меным: — Тайӧ Господьлӧн кывйыс Зоровавельлы: он тышкайӧзӧн, он аслад вынӧн тэ вермы, а Менам Лолӧн, — висьталӧ Господь Саваоф. —
Коді тэ, джуджыд керӧсӧй? Шыльӧдӧм муӧн тэ лоан Зоровавель водзын. Йӧзлӧн гораа ошкигтырйи сійӧ пуктас крамлы пельӧс изсӧ.
Меным вӧлі Господьсянь кыв:
— Зоровавель пуктіс подувсӧ крамлы, сійӧ помӧдзыс и лэптас сійӧс.
Сэки ті тӧдмаланныд, мый Господь Саваоф мӧдӧдіс менӧ тіян дінӧ.
Весиг найӧ, кодъяс нинӧмӧ пуктісны крам панӧмсӧ, кутасны нимкодясьны, кор Зоровавельлӧн киысь аддзасны изъя кӧв. «Сизим биыс — тайӧ Господьлӧн синъясыс, кодъяс видзӧдӧны став муюгыд бӧрсяыс».
Ме юалі анделлысь: «А мый лоӧ тайӧ кык олив пуыс, кодъяс сулалӧны бикок веськыдладорын да шуйгаладорын?»
Нӧшта юалі: «Мый лоӧ олив пулӧн кык вожйыс, кытысь тюргӧ зарни вый кык зарни воргаӧд?»
«Тэ он тӧд, мый тайӧ?» — юаліс андел.
«Ог, ыджыдӧй», — шуи ме.
Андел висьталіс: «Тайӧ индӧ кык мавтыштӧм морт вылӧ. Найӧ кесъялӧны Господьлы, коді ыджыдалӧ став му вылас».
Ме бара лэпті синмӧс да аддзи лэбысь гартӧм гижӧд.
Андел юаліс: «Мый тэ аддзан?»
Ме вочавидзи: «Аддза, мый гартӧм гижӧд лэбӧ.
Сійӧ — кызь гырддза кузьта да дас гырддза пасьта».
Андел шуис меным: «Сэні гижӧма, мый тайӧ мусӧ суас ёрӧм.
Ӧтарладорас гижӧма, мый став гусясьысьсӧ лоӧ бырӧдӧма. Мӧдарладорас гижӧма, мый сетӧм кывсӧ торкысьясӧс тшӧтш лоӧ бырӧдӧма».
Тайӧ ёрӧмсӧ мӧдӧді Ме, — висьталӧ Господь Саваоф. — Ёрӧмыс пырас гусясьысьлӧн керкаӧ да сы ордӧ, коді пӧръясьӧмӧн кӧсйысьӧ Менам нимӧн. Ёрӧмыс овмӧдчас сылӧн керкаӧ, ставнас пазӧдас сійӧс, весиг пусӧ и изсӧ жуглас.
Андел, коді водзынсӧ сёрнитіс мекӧд, матыстчис ме дінӧ да шуис: «Видзӧдлы! Мый тэ ӧні аддзан?»
Ме юалі: «Мый тайӧ?»
Андел вочавидзис: «Тайӧ ыджыд пельса». Сэсся содтіс: «Сійӧ петкӧдлӧ тайӧ муас олысьяслысь мыжсӧ».
Сэки пельсалӧн свинеч вевтыс воссис. Пельсаас пукаліс ань.
Андел шуис: «Тайӧ аньыс эм ачыс мыжыс». Сэсся йӧткыштіс аньсӧ пельса пыдӧсас да тупкис пельсасӧ свинеч вевтнас.
Та бӧрын ме лэпті синмӧс да аддзи кык аньӧс. Налӧн вӧліны аистлӧн кодь бордъяс, и тӧвруыс новлӧдліс найӧс.
Аньяс босьтісны пельсасӧ да лэбӧдісны енэжлань.
Ме юалі анделлысь: «Кытчӧ найӧ нуӧны пельсасӧ?»
Андел вочавидзис: «Сеннар муӧ. Сэні найӧ лэптасны тайӧ аньыслы крам да пуктасны сэтчӧ пельсасӧ тшупӧд вылӧ».
Ме бара лэпті синмӧс да аддзи: кык ыргӧн керӧс костысь петісны нёль тарантас.
Медводдза тарантассӧ кыскисны гӧрд вӧвъяс, мӧдсӧ — сьӧд вӧвъяс, коймӧдсӧ — еджыд вӧвъяс, а нёльӧдсӧ — пегана вӧвъяс. Ставныс найӧ вӧліны ёнӧсь.
Ме юалі мекӧд сёрнитысь анделлысь: «Мый тайӧ, ыджыдӧй?»
Андел вочавидзис: «Тайӧ — енэжыслӧн нёль тӧв. Найӧ петӧны Господьсянь, коді ыджыдалӧ став му вылас».
Сьӧд вӧвъяс мунасны войвыв муӧ, еджыдъяс — на бӧрся, пегана вӧвъяс — лунвыв муӧ.
Тайӧ ён вӧвъясыс педзисны, медым ӧдйӧджык котӧртны да кытшовтны муяссӧ.
Господь шуис налы: «Мунӧй, кытшовтӧй». Вӧвъяс мӧдӧдчисны.
Господь корис менӧ да шуис: «Видзӧд, войвыв муӧ мунысь вӧвъяс лӧньӧдісны войвыв му дінӧ Менсьым скӧрлунӧс».
Меным вӧлі Господьсянь кыв:
«Мун Софонийлӧн Иосий пи ордӧ. Сэтысь аддзан Вавилон пленысь локтӧмаясӧс — Хелдайӧс, Товиӧс да Едайӧс. Босьт налысь эзысь-зарнисӧ да вӧч юркытш, сэсся пукты сійӧс юр вылас Исус аркирейлы, Иоседеклӧн пилы.
Шу сылы, мый Господь Саваоф тадзи висьталӧ: Выль Вож нима морт петас тайӧ муысь да лэптас Господьлысь крамсӧ.
Сійӧ кыпӧдас Господьлысь крамсӧ, Сійӧс нимӧдасны ӧксыӧс моз, Сійӧ юравны-ыджыдавны пондас.
Сійӧ пуксяс юралан пуклӧсӧ, Сыкӧд ыджыдавны пуксяс поп, и найӧ пондасны овны ӧти сьӧлӧмӧн.
Юркытшыс кольӧ Господьлӧн крамын, мед казьтывны Хелдайлысь, Товилысь, Едайлысь да Софонийлӧн Иосий пилысь бур вӧчӧмнысӧ».
Йӧзыс ылісянь локтасны, мед отсавны лэптыны Господьлысь крамсӧ. Сэки ті тӧдмаланныд, мый Господь Саваоф мӧдӧдіс менӧ тіян дінӧ. Тайӧ ставыс инас, ті кӧ понданныд сьӧлӧмсяньныд кывзысьны Господьлысь, асланыд Енлысь.
Дарий ӧксылӧн нёльӧд веськӧдлан воӧ, ӧкмысӧд кислев тӧлысьлӧн нёльӧд лунӧ * Закарлы вӧлі Господьсянь кыв. Сэки Вефильын олысьяс мӧдӧдісны Сарецерӧс да Регем-Мелекӧс сылӧн йӧзкӧд кевмысьны Господьлы да юавны пророкъяслысь да Господь Саваоф крамын кесъялысь попъяслысь, колӧ-ӧ миянлы витӧд тӧлысьнас видзалӧмӧн пасйыны бӧрдан лун, кыдзи уна во чӧж нин ми вӧчам.
Сэки меным вӧлі Господь Саваофсянь кыв:
— Висьтав тайӧ муас олысьяслы да попъяслы: кор ті шогалінныд да видзалінныд сизимдас во чӧж витӧд да сизимӧд тӧлысьясӧ, Меным-ӧ тайӧс ті вӧчинныд?
А кор ті сёянныд-юанныд, онӧ ӧмӧй аслыныд тайӧс вӧчӧй?
Та йылысь Господь важӧн нин висьтавліс пророкъяс пыр, кор Ерусалим вӧлі уна йӧза да лӧнь карӧн, и кор сыгӧгӧрса каръясын, Негев муын да керӧсбердса муын олісны йӧз.
Закарлы вӧлі Господьсянь кыв:
— Господь Саваоф тадзи висьталӧ: веськыда мыждӧй, лоӧй бур сьӧлӧмаӧсь да меліӧсь ӧта-мӧдныд дінӧ.
Дӧваясӧс да батьтӧм-мамтӧмъясӧс, йӧз муысь локтысьясӧс да гӧльясӧс энӧ дзескӧдӧй, ӧта-мӧдныдлы лёксӧ вӧчны энӧ мӧвпалӧй.
Но тіян батьясныд эз кӧсйыны кывзыны, пельнысӧ тупкісны да бергӧдісны Меланьӧ мышнысӧ.
Сьӧлӧмнысӧ чорзьӧдісны, эз кутны кывны Индӧдсӧ да сійӧ, мый Господь Саваофлӧн Лолыс висьтавліс воддза пророкъяс пыр.
Таысь найӧс суис Господь Саваофлӧн ыджыд скӧрлуныс.
Ме шыасьлі на дінӧ, но найӧ эз кывзыны Менӧ. Тадзи жӧ Ме найӧс эг кывзы, кор найӧ шыасьлісны Ме дінӧ, — висьталӧ Господь Саваоф. — 
Ме разӧді найӧс войтыръяс пӧвстӧ, кодъясӧс найӧ эз тӧдлыны водзын. Налӧн эновтӧм муыс кушмис, сэтчӧ некод эз кут волыны. Тадзи на вӧсна бур муныс пӧри овтӧминӧ.
Меным вӧлі Господь Саваофсянь кыв:
— Господь Саваоф тадзи висьталӧ: Ме вежӧгтӧмӧдз радейта Сионӧс, ёна вежӧгтӧмӧй вӧсна доръя сійӧс, Ме скӧрала сійӧс мустӧмтысьяс вылӧ.
Господь тадзи висьталӧ: Ме бӧр локта Сионӧ, бара овмӧдча Ерусалимӧ. Ерусалимӧс шуасны эскана войтырлӧн карӧн, Господь Саваофлысь керӧссӧ — вежа керӧсӧн.
Господь Саваоф тадзи висьталӧ: Ерусалим изэрдъяс вылын бара пондасны пукавны пӧрысь айулов да аньяс, найӧ локтасны бедь вылӧ мыджсьӧмӧн.
Изэрдъяс тырасны челядьӧн, найӧ пондасны ворсны ывлаын.
Господь Саваоф тадзи висьталӧ: коляс войтырлы талун сьӧкыд эскыны, мый тадзи вермас лоны, но Меным абу сьӧкыд тайӧс вӧчны, — висьталӧ Господь Саваоф.
Господь Саваоф тадзи висьталӧ: Ме мезда Ассьым войтырӧс, вайӧда найӧс асыввыв да рытыввыв муясысь, овмӧда найӧс Ерусалимӧ. Найӧ лоӧны Менам войтырӧн, а Ме лоа налӧн Енмӧн — эскана да веськыда вӧчысь Енмӧн.
Господь Саваоф тадзи висьталӧ: лоӧй зумыдӧсь! Ӧні ті кыланныд сійӧ жӧ кывъяссӧ, мый висьтавлісны пророкъяс Господь Саваофлысь крам подувсӧ пуктігӧн.
Сыӧдз эз вермыны мынтысьны уджалысьлы, нинӧмӧн вӧлі вердны ыж-мӧскӧс. Ме кыпӧді йӧзӧс ӧта-мӧдныслы паныд, дзескӧдӧм вӧсна найӧ полісны петны ывлаӧ.
Ӧні тайӧ коляс войтырыслы Ме ог ло сэтшӧмӧн, кутшӧмӧн вӧлі водзынсӧ, — висьталӧ Господь Саваоф. — 
Кӧдзӧмаыс быдмас, виноград пу ваяс вотӧс, муыс сетас быдтас, енэжыс юкталас лысваӧн. Ставсӧ тайӧс Ме сета Аслам коляс войтырлы.
Иуда войтыр да Израиль войтыр, ті вӧлінныд мукӧд войтыръяс пӧвстын ёрӧмӧн, но Ме мезда тіянӧс, и ті лоанныд бурсиӧмӧн.
Энӧ полӧй, лоӧй зумыдӧсь!
Господь Саваоф тадзи висьталӧ: кор тіян батьяс скӧрмӧдісны Менӧ, Ме шуи мыждыны тіянӧс и эг веж Ассьым кывйӧс, — висьталӧ Господь Саваоф. — Но ӧні Ме шуи бурсӧ вӧчны Ерусалимлы да Иуда войтырлы.
Энӧ полӧй!
Со мый тіянлы колӧ вӧчны: висьталӧй збыльсӧ ӧта-мӧдныдлы, бурасьӧм могысь веськыда мыждӧй ёрд выланыд.
Энӧ мӧвпалӧй лёксӧ вӧчны ӧта-мӧдныдлы, кыв сетіганыд энӧ пӧръясьӧй, ӧд ставсӧ тайӧс Ме мустӧмта, — висьталӧ Господь.
Меным вӧлі Господь Саваофсянь кыв:
— Господь Саваоф тадзи висьталӧ: нёльӧд, витӧд, сизимӧд да дасӧд тӧлысьясӧ видзалан лунъясыс лоӧны нимкодясян лунъясӧн, шуда гажӧдчан лунъясӧн Иуда войтырлы.
Кутчысьӧй збыляс да лӧнь олӧмас!
Господь Саваоф тадзи висьталӧ: войтыръяс локтасны, уна карысь локтасны йӧз.
Ӧти карын олысьяс мунасны мӧд карын олысьяс дорӧ да шуасны: «Мунамӧй кевмысьны Господьлы, юрбитны Господь Саваофлы».
Быдӧн та вылӧ горӧдас: «Ме тшӧтш муна».
Вына войтыръяс локтасны Ерусалимӧ, медым юрбитны Господь Саваофлы, кевмысьны Господьлы.
Господь Саваоф тадзи висьталӧ: сійӧ лунъясӧ быд иудейлӧн паськӧм бӧждорӧ кутчысясны мукӧд войтыръясысь дас морт, ас кыв вылас найӧ шуасны: «Ми тэкӧд мунам, ӧд ми кывлім, мый тэнад войтыркӧд Ен».
Водзвыв висьталӧм. Господьлӧн кывйыс олӧ Хадрак муын, шойччӧ Дамаск карын. Господь видзӧдӧ мувывса став олысьыс бӧрся: Израиль чужанкотыръяс бӧрся, Дамасккӧд орччӧн сулалысь Хамат кар бӧрся, зэв сюсь Тир да Сидон каръяс бӧрся.
Тир лэптіс аслыс изкар, чукӧртіс эзысьсӧ лыа мында, зарнисӧ — ывлавыв няйт мында.
Но Господь босьтас сылысь озырлунсӧ, вӧйтас сылысь тышкайӧзсӧ саридзӧ, а карсӧ биӧн сотас.
Тайӧс аддзӧмысь Аскалон повзяс, Газа ёна тіравны пондас, Экронӧс тшӧтш тіралӧм босьтас, ӧд сылӧн лачаыс серамтуйын лоӧ. Газаысь ӧксыӧс петкӧдасны, Аскалонын олысьыс оз ло, Азотӧ овмӧдчасны сорласьӧм вира йӧз. Филистимсаяслӧн вывтіасьӧмлы Ме, Господь, пукта пом, весала налысь вом пытшсӧ вир сора яйысь, перъяла пинь костсьыс пеж сёянсӧ. Филистим войтырлӧн колясыс лоӧ Менам, сійӧс лоӧ пыртӧма Иудаын олысь чужанкотыръяс лыдӧ, Экронын олысьяс евуссаяс моз лоӧны Менам войтырӧн.
Ме понда видзны Ассьым керкаӧс тышкайӧзысь, кодъяс ветлӧны тайӧ муыс пыр. Водзӧ некод нин оз дзескӧд Менсьым войтырӧс, ӧд Ме Ачым кута видзӧдны сы бӧрся.
Долыда нимкодясь, Сион ныв, кыпыда гажӧдчы, Ерусалим ныв! Видзӧд, Ӧксыыд локтӧ тэ дінӧ! Сійӧ веськыда вӧчысь да вына мездысь, Сійӧ рам сьӧлӧма, локтӧ осёл вылын, пукалӧ осёл чань вылын.
Сійӧ пасьвартас Ефремысь тарантасъяссӧ, бырӧдас Ерусалимысь вӧвъяссӧ, чегъялас тышкасян ньӧввужъяссӧ.
Сійӧ юӧртас войтыръяслы лӧнь олӧм йылысь, пондас юравны саридзсянь саридзӧдз, Ефрат юсянь му помӧдз.
Вирӧн вынсьӧдӧм йитӧд вӧсна Ме мезда пленӧ босьтӧмаястӧ, петкӧда найӧс ватӧм гуысь.
Бӧр локтӧй асланыд изкарӧ, пленӧ босьтӧмаяс, помӧдзыс лача кутысьяс.
Талун Ме юӧрта, мый кык пӧвстӧн тэныд ставсӧ бӧр бергӧда.
Ме зэвта Иудаӧс ньӧввужйӧс моз, Ефремӧс босьта ньӧв пыдди. Тэнсьыд пиянтӧ, Сион, Ме паныд кыпӧда яванса пиянлы, вӧча тэнӧ тышкасян шыпуртӧн.
Господь петкӧдчас, медым отсавны Аслас войтырлы, Сійӧ чардби моз лыйыштас Ассьыс ньӧвсӧ. Господь Ыджыдыс букӧстас буксанӧн, Сійӧ кыпӧдчас лунвыв ыджыд тӧвнырӧн.
Господь Саваоф доръяс Ассьыс войтырсӧ. Найӧ ньылыштасны вӧрӧгнысӧ, кок уланыс таляласны вӧрӧглысь лыйсян изъяссӧ, пондасны равзыны вина юысьяс моз, вир резан тасьті моз вирӧссясны, лоӧны вирӧн резӧм висьпуктанін пельӧс кодьӧсь.
Сійӧ лунӧ Господь, налӧн Ен, мездас найӧс, чукӧртас Ассьыс войтырсӧ ыж чукӧрӧс моз.
Юркытшса дона изъяс моз найӧ пондасны дзирдавны Сылӧн му вылын.
Кутшӧм бур да мича йӧзӧн найӧ лоӧны!
Муыс сетас нянь да вина, и ныв-зон пондасны дзоридзавны.
Корӧй Господьлысь тувсовъя зэр, кор сійӧ вермӧ лоны.
Господь кыпӧдӧ сьӧд кымӧръяс, кисьтӧ му вылӧ сувтса зэр, сетӧ быдӧнлы мувыв быдтас.
Гортса бӧлбанъяс висьталӧны нинӧм абусӧ, туналысьяс аддзӧны ылӧгторъяс, висьталӧны пӧръясяна вӧтъяс, ышӧдӧны нинӧм абунас.
Та вӧсна войтырыс шӧйтӧ вошӧм ыж чукӧр моз, сьӧкыдалӧ видзысьтӧгыс.
— Ме чорыда скӧрми найӧс видзысьяс вылӧ, найӧс нуӧдысьясӧс Ме мыжда.
Господь Саваоф тӧждысяс Аслас ыжъяс вӧсна, Иуда чужанкотыр вӧсна, вӧчас найӧс тышӧ петысь вына вӧвъяс кодьӧн.
Иуда чужанкотырысь сувтас пельӧс изйыс, сысянь кыпӧдчас чом зэвтан майӧгыс, сысянь петас тышкасян ньӧввужйыс, сысянь петасны юралысьяс.
Найӧ лоӧны вына тышкайӧз кодьӧсь, таляласны вӧрӧгӧс кокувса няйтӧс моз. Найӧ вермасны тышын, ӧд накӧд лоӧ Господь, найӧ янӧдасны вӧрӧглысь верзьӧмаяссӧ.
Ме вынаӧн вӧча Иуда чужанкотырӧс, мезда Ӧсиплысь рӧдсӧ, Ме бурсьӧлӧмтча на дінӧ да бӧр вайӧда найӧс. Найӧ бара Менам лоӧны, быттьӧ Ме некор эг и эновтлы найӧс. Ме ӧд Господь, налӧн Ен, Ме кыла налысь кевмӧмсӧ.
Ефрем чужанкотыр лоӧ вына тышкаморт кодьӧн, сылӧн сьӧлӧмыс гажмас винаысь моз. Ныв-пиныс аддзасны тайӧс да пондасны гажӧдчыны, налӧн сьӧлӧмныс кутас нимкодясьны Господьӧн.
— Ме чукӧста найӧс, чукӧрта ставнысӧ, ӧд Ме ньӧби найӧс, и найӧ важ мозыс бара лоӧны уна лыда войтырӧн.
Ме разӧді найӧс мукӧд войтыръяс пӧвстӧ, но ылі муясын найӧ казьтыштасны Менӧ. Найӧ ловйӧн колясны асланыс челядькӧд, бӧр локтасны накӧд.
Ме бӧр вайӧда найӧс Египетысь, чукӧрта найӧс Ассурысь. Ме овмӧда найӧс Галаад муӧ да Ливанӧ, но весиг сэні налы оз кут тырмыны оланіныс.
Найӧ вуджасны саридзті сьӧкыдыслӧн топӧдӧмысь, найӧ пасьвартасны саридзлысь гыяссӧ, Нил ю кушӧдз косьмас. Ассурлысь вылӧ кыпӧдчӧмсӧ лоӧ улӧ лэдзӧма, Египетлысь ыджыдалан вынсӧ лоӧ мырддьӧма.
Ме, Господь, ёнмӧда найӧс Аслам вынӧн, и найӧ пондасны овны Менӧ пыдди пуктӧмӧн, — висьталӧ Господь.
Восьт ассьыд дзиръяястӧ, Ливан, мед биыс ньылыштас тэнсьыд сус пуястӧ.
Сыркъялӧмӧн бӧрд, кипарис, ӧд сус пуыд пӧрис, ыджыд пуястӧ бырӧдӧма.
Сыркъялӧмӧн бӧрдӧй, васанса тупуяс, ӧд сук вӧрыд пӧрласис.
Кылӧ ыж видзысьяслӧн бӧрдӧм, ӧд налысь йирсянінъяссӧ бырӧдӧма.
Кылӧ левъяслӧн равзӧм, ӧд Йӧрдан ю бокысь вӧрсӧ куштӧма.
Господь, менам Ен, тадзи висьталӧ: «Видз ыжъясӧс, кодъясӧс шуӧма начкыны. Ыжъясӧс ньӧбысь кор начкӧ найӧс, таысь оз кыв асьсӧ мыжаӧн. Ыжъясӧс вузалысь шуалӧ: “Аттьӧ Господьлы! Ме озырми”.  Ыжъяс понда весиг видзысьныслӧн сьӧлӧмыс оз нормы.
И Ме ог нин бурсьӧлӧмтчы тайӧ муас олысьяс дінӧ, — висьталӧ Господь.
— Ме сета найӧс ӧта-мӧдныслӧн киӧ да ӧксыныслӧн кабыр улӧ. Найӧ пасьясны-куштасны ассьыныс мусӧ, и Ме некодӧс ог мезды налӧн киысь».
Вузасьысьяс медалісны менӧ, медым ме видзи начкыны шуӧм ыжъясӧс.
Ме босьті кык бедь, ӧтиыслы сеті Буралӧм ним, мӧдыслы — Ӧтувъялун ним. Наӧн ме видзи ыжъясӧс.
Ӧти тӧлысьӧн ме вӧтлі куим видзысьӧс, дӧзми тшӧтш ыжъяс вылӧ, и найӧ мустӧмтісны менӧ.
Ме шуи ыжъяслы: «Водзӧ ме ог кут видзны тіянӧс. Коді тіян пиысь кулас, мед кулас. Коді вошас, мед вошас. Ловйӧн кольысьяс мед сёясны ӧта-мӧднысӧ».
Ме босьті Буралӧм нима бедьсӧ да чеги. Тадзи ме пом пукті став войтыръяскӧд кӧрталӧм йитӧдлы. Сійӧ лунӧ йитӧдсӧ вӧлі орӧдӧма.
Кор вузасьысьяс аддзисны, мый ме вӧчи, найӧ гӧгӧрвоисны, мый тадзи вӧчнысӧ тшӧктӧма Господь.
Ме шуи налы: «Кӧсъянныд кӧ, мынтӧй меным ассьым удждонӧс, онӧ кӧ кӧсйӧй — энӧ мынтӧй».
Найӧ сетісны меным комын эзысь сьӧм.
Господь шуис меным: «Мун да шыбит тайӧ сьӧмсӧ гырнич вӧчысьлы». Та донысь найӧ и донъялісны менӧ!
Ме босьті комын эзысь сьӧмсӧ да шыбиті Господьлӧн крамӧ гырнич вӧчысьлы.
Сэсся ме чеги Ӧтувъялун нима бедьсӧ. Тадзи орӧді Иуда да Израиль костын воклунсӧ.
Господь шуис меным: «Нӧшта босьт сійӧ, мый колана мывкыдтӧм ыж видзысьлы.
Со, Ме сувтӧда тайӧ муас олысьяслы видзысьӧс, коді оз кут тӧждысьны кулысь ыжъяс вӧсна, оз кут корсьны вошӧмаясӧс, оз кут бурдӧдавны доймалӧмаясӧс да оз кут вердны ёнъясӧс. Но сійӧ чегъялас тшӧгӧм ыжъяслысь гыжъяссӧ, а яйсӧ сёяс.
— Курыд шог шогмытӧм видзысьлы, коді эновтіс ыж чукӧрсӧ!
Шыпурт мед керыштас сылысь кисӧ да перъяс сылысь веськыд синсӧ!
Мед сылӧн киыс дзикӧдз косьмас да сылӧн веськыд синмыс пемдас!»
Водзвыв висьталӧм. Израиль йылысь Господьлӧн кыв.
Господь, коді шевкнитіс енэжсӧ, пуктіс мулы подувсӧ да артмӧдіс морт пытшкын ловсӧ, висьталӧ:
«Ме вӧча Ерусалимӧс сы гӧгӧр олысь войтыръяслы вина тыра дозйӧн. Найӧ пондасны юны сэтысь да кодавны. Иуда тшӧтш кутас юны-кодавны, кор Ерусалимӧс лоӧ кытшалӧма.
Сійӧ лунӧ, кор войтыръяс чукӧртчасны Ерусалимлы паныд, Ме вӧча Ерусалимӧс налы сьӧкыд изйӧн.
Коді вӧрзьӧдас изсӧ, асьсӧ вирӧдз дойдалас.
Сійӧ лунӧ, — висьталӧ Господь, — Ме дурмӧда вӧрӧглысь вӧвъяссӧ, а вӧв вылын пукалысьяссӧ йӧймӧда. Иудаӧс ог лэдзлы син улысь, а паныд сувтысь войтыръяслысь вӧвъяссӧ синтӧммӧда.
Иуда войтырлӧн юралысьяс мӧвпыштасны: “Ерусалимын олысьяскӧд Господь Саваоф, налӧн Енмыс. Та вӧсна найӧ вынаӧсь да вермӧны отсавны миянлы”.
Сійӧ лунӧ Ме вӧча иудаса юралысьясӧс вӧрын ыпъялысь биӧн да кольтаяс костын ӧзтӧм бипурӧн. Найӧ бырӧдасны став войтыръяссӧ Ерусалим гӧгӧрысь — шуйгаладорсьыс и веськыдладорсьыс. А Ерусалимын олысьяс кольччасны овны асланыс карӧ».
Господь медводз мездас Иудалысь оланінсӧ, медым Давидлӧн рӧдыс да Ерусалимын олысьяс эз нимавны Иуда войтырысь ёнджыка.
Сійӧ лунӧ Господь доръяс Ерусалимын олысьясӧс, и жебъяс лоӧны Давид кодь вынаӧсь. Ерусалимын олысьяслы Давидлӧн рӧдыс лоӧ Ен кодьӧн, Господьлӧн андел кодьӧн.
Сійӧ лунӧ Ме бырӧда войтыръясӧс, кодъяс петасны Ерусалимлы паныд.
Ме сета Давид рӧдлы да Ерусалимын олысьяслы буралана да кевмысяна лов. Найӧ видзӧдласны Сы вылӧ, кодӧс бытшкисны. Найӧ пондасны бӧрдны Сы вӧсна, кыдзи бӧрдӧны ӧтка пи вӧсна, пондасны шогсьыны, кыдзи шогсьӧны медводдза пи вӧсна.
Сійӧ лунӧ Ерусалимын кутас кывны гораа ырзӧм-бӧрдӧм, сэтшӧм бӧрдӧм, кутшӧмӧс кывлісны Хадад-Риммонын Мегиддо ковтысын.
Став муыс пондас сыркъялӧмӧн бӧрдны. Быд рӧд торйӧн и быд рӧдысь аньяс торйӧн кутасны бӧрдны. Кутасны бӧрдны Давидлӧн, Нафанлӧн, Левийлӧн да Шимейлӧн рӧдъясыс, тшӧтш мукӧд рӧдъяс пондасны бӧрдны.
Сійӧ лунӧ Давид рӧдлы да Ерусалимын олысьяслы воссяс ва петанін, медым мыськавны найӧс мыжысь да пежысь.
«Сійӧ лунӧ, — висьталӧ Господь Саваоф, — Ме бырӧда тайӧ мусьыс идолъясӧс, весиг налысь нимъяссӧ вунӧдасны. Нӧшта Ме бырӧда тайӧ мусьыс ылӧгпророкъясӧс да пеж лолӧс.
Пондас кӧ кодкӧ ылӧдлӧмӧн пророкавны, сэки сылӧн бать-мамыс шуасны сылы, тэ пӧ ылӧгсӧ висьталан Господь нимсянь, та вӧсна тэ он кут овны.
Аслас бать-мамыс кувмӧныс бытшкасны сійӧс ылӧг пророкалӧмсьыс.
Сэки мукӧд ылӧгпророкъяслы яндзим лоӧ асланыс восьтӧмъясысь. Найӧ оз нин кутны пророкавны да пророк моз оз кутны пасьтасьны гӧнысь кыӧм паськӧмӧ, мед ылӧдлыны йӧзсӧ.
Быдӧн шуас, ме пӧ абу пророк, ме пӧ му вӧдитысь. Менӧ пӧ ичӧтдырйи на ньӧблӧмаӧсь кесйӧг туйӧ.
Сылысь кӧ юаласны, мыйсяма дойяс морӧс вылад, мӧдыс вочавидзас, менӧ пӧ дойдалісны ёртъясӧй ордын».
— Ырыштчы, шыпуртӧй, Менам видзысь вылӧ, Аслам медматысса вылӧ, — висьталӧ Господь Саваоф. — Кувмӧн дойд видзысьсӧ, и ыжъясыс разаласны.
Ичӧт баляяс вылӧ Ме лэпта Ассьым киӧс.
— Тайӧ муас олысьясысь, — висьталӧ Господь Саваоф, — кык юкӧныс кулас-бырас, сӧмын коймӧд юкӧныс ловйӧн коляс.
Тайӧ коймӧд юкӧнсӧ Ме нуӧда би пыр, сывда эзысьӧс моз, весала зарниӧс моз.
Найӧ шыасясны Ме дінӧ, и Ме вочавидза налы. Шуа: «Ті — Менам войтыр», а найӧ воча шуасны: «Господь — миян Ен!»
Господьлӧн луныс кор воас, тэнсьыд мырддьӧм эмбуртӧ, Ерусалим, юкласны тэ дырйи.
— Ме чукӧрта войтыръясӧс, мед тышкасьны Ерусалимкӧд. Найӧ босьтасны карсӧ, керкаяссӧ куштасны, аньяссӧ мырдӧналасны-янӧдасны. Карсьыс джын олысьсӧ нуӧдасны пленӧ, мукӧдсӧ колясны карас.
Сэки Господь кутас тышкасьны тайӧ войтыръясыскӧд, кыдзи Сійӧ водзын тышкасьліс.
Сійӧ лунӧ Господь тувччас Олив керӧс вылӧ, Ерусалимсянь асыввылӧ.
Олив керӧс асыввывсянь рытыввывлань кык пельӧ потас. Керӧс джынйыс вешъяс войвывлань, мӧдыс — лунвывлань, а на костын артмас паськыд ковтыс.
Ті котӧрӧн пышъянныд керӧсъяс костӧд тайӧ ковтысӧдыс, коді нюжӧдчас Асилӧдз.
Ті понданныд пышйыны на моз, кодъяс иудаса Озей ӧксыалан кадӧ пышйисны му вӧрӧмысь.
Сэки локтас Господь, менам Ен, став Аслас вежаяскӧд.
Сійӧ лунӧ оз югды, кодзувъяс оз тыдовтчыны.
Сійӧ луныс лоӧ аслыспӧлӧс: луныс ни войыс оз пуксьы, рытнас оз пемды. Тайӧ луныс йылысь тӧдӧ сӧмын Господь.
Сійӧ лунӧ Ерусалимсянь пондас визувтны ловъя ва. Визулыс юксяс кык пельӧ: ӧтиыс визувтас асыввыв саридзӧ, мӧдыс — рытыввыв саридзӧ. Ваыс кутас визувтны тӧв и гожӧм.
Господь лоӧ став му пасьталаыс ӧксыӧн.
Сійӧ лунӧ Господь лоӧ ставныслы Енмӧн, и сӧмын Сы дінӧ пондасны шыасьны.
Ерусалимсянь лунвыв муыс Гевасянь Риммонӧдз лоӧ ластаӧн. Ерусалим кар сувтас важ местаас, кыптас ставсьыс вылӧ. Сійӧ паськӧдчас Венямин дзиръясянь Воддза да Пельӧс дзиръяясӧдз, Хананел башнясянь ӧксылӧн виноград пычкан гуӧдз.
Йӧзыс сэні кутасны повтӧг-тӧждысьтӧг овны. Ерусалимӧс оз нин ло дзикӧдз бырӧдӧма.
Но войтыръясӧс, кодъяс петісны Ерусалимлы паныд тышӧ, Господь мыждас. Найӧ ловъявывсьыныс сісьмасны, син гуранас синныс да вом пытшканыс кывныс сісьмас.
Сійӧ лунӧ Господь кыпӧдас войтыръяс костын ыджыд шызьӧм. Найӧ уськӧдчасны ӧта-мӧд выланыс, лэптасны кинысӧ асланыс матысса вылӧ.
Иуда войтыр тшӧтш петас тышӧ Ерусалимлы паныд. Ерусалимын олысьяс босьтасны на гӧгӧр олысь войтыръяслысь став озырлунсӧ: зэв уна эзысь, зарни да паськӧм.
Ерусалимлы паныд тышӧ петысьяслӧн чукӧртчанінын Господь бырӧдас тшӧтш налысь вӧвъяссӧ, мулъяссӧ, верблюдъяссӧ, осёлъяссӧ да став пемӧссӧ.
Ерусалим вылӧ уськӧдчӧм войтыръясысь ловйӧн кольӧмаяс быд во кутасны волыны Ерусалимӧ, медым юрбитны Ӧксылы, Господь Саваофлы, да пасйыны Чом вӧчан лунъяс.
А войтырлы, коді оз лок Ерусалимӧ юрбитны Ӧксылы, Господь Саваофлы, Сійӧ оз сет зэрсӧ. 
Египет войтыр кӧ оз лок Ерусалимӧ, налы тшӧтш Господь оз сет зэрсӧ. Господь мыждас найӧс мукӧд войтыръясӧс моз, кодъяс оз локны пасйыны Чом вӧчан лунъяс.
Татшӧм мыждӧм суас египетсаӧс да мукӧд войтыръясӧс, кодъяс оз локны пасйыны Чом вӧчан лунъяс.
Сійӧ лунӧ весиг вӧв тіньган вылын лоӧ гижӧма: «Вежӧдӧма-торйӧдӧма Господьлы». Господьлӧн крамын став пӧртйыс лоӧ вежа, висьпуктаніндорса вир резан тасьті кодь вежа.
Ерусалимын да Иуда муын став пӧртсӧ лоӧ вежӧдӧма-торйӧдӧма Господь Саваофлы. Вись вайиганыс йӧзыс босьтасны пӧртъяссӧ да пуасны сэні висьлысь яйсӧ. Сійӧ лунӧ Господь Саваофлӧн крамын оз ло весиг ӧти вузасьысь.
{Еврей йӧз (комиӧдіс Kodko) @ Малакий @ религ. гижӧд @ Библия @ 2021 @ Лб. .}
Малакий пророклӧн небӧг
Водзвыв висьталӧм. Малакий пыр Израильлы вӧлі Господьсянь кыв.
— Ме радейта тіянӧс, — шуӧ Господь.
— А ті шуанныд: «Петкӧдлы Ассьыд муслунтӧ миян дінӧ».
Исав вӧлі Яковлӧн вок, — висьталӧ Господь, — но Яков вӧлі Меным муса, а Исавӧс Ме мустӧмті. Исавлысь керӧсвыв мусӧ Ме вӧчи овтӧминӧн, сеті сійӧс шакалъяслы.
Эдом войтыр кӧ шуас, миянлысь каръяснымӧс пӧ жугӧдӧма-пазӧдӧма, но ми пӧ выльысь лэптам найӧс, Господь Саваоф сэки воча шуас: — Мед найӧ выльысь лэптасны, а Ме жугӧда. Налысь мусӧ нимтасны пеж муӧн, найӧс шуасны войтырӧн, кодӧс Господь ёрӧма пыр кежлӧ.
Ті асланыд синмӧн аддзанныд тайӧс да шуанныд, Господь пӧ ыджыдалӧ тшӧтш Израильӧс кытшалысь муяс вылын!
— Пиыс ассьыс батьсӧ пыдди пуктӧ, кесйӧг — ассьыс ыджыдсӧ.
Ме кӧ тіян Бать, мыйла ті онӧ пыдди пуктӧй Менӧ?
Ме кӧ тіян Господь, кӧні Меысь вежавидзӧмныд?
Тайӧс Ме, Господь Саваоф, юала тіянлысь, попъяс, кодъяс нинӧмӧ пуктанныд Менӧ.
Ті юаланныд: «Мыйӧн ми нинӧмӧ пуктам Тэнӧ?»
Ті ваянныд Менам висьпуктанін вылӧ пеж нянь. Ті юаланныд: «Мыйӧн ми увтыртам Тэнӧ?»
Ті нинӧмӧ пуктанныд Господьлысь висьпуктанінсӧ.
Кор вись пыдди ваянныд синтӧм пемӧсӧс, абу-ӧ тайӧ лёктор?
Чотысь да висьысь пемӧсӧс кор ваянныд, абу-ӧ тайӧ лёктор?
Нуан кӧ татшӧм козинсӧ аслад юралысьлы, пондас-ӧ сійӧ нимкодясьны, сибӧдас-ӧ тэнӧ бурпырысь? — висьталӧ Господь Саваоф.
А ӧні ті нярганныд-кевманныд, медым Енмыс бурсьӧлӧмтчас миян дінӧ!
Бурпырысь-ӧ Сійӧ сибӧдас тіянӧс татшӧм вайӧмторъяссьыныд? — висьталӧ Господь Саваоф. — 
Бурджык, тіян пиысь кӧ кодкӧ йигналас крамлысь ӧдзӧссӧ, медым весьшӧрӧ энӧ сотӧй бисӧ Менам висьпуктанін вылын.
Ті Меным абу шогманаӧсь, — висьталӧ Господь Саваоф, — и тіянлысь вайӧмторъяснытӧ Ме ог сибӧд.
Асыввылын и рытыввылын войтыръяс нимӧдӧны Менӧ, быдлаын тшынӧдчӧны Меным, вайӧны Меным сӧстӧм вись.
Менӧ ыдждӧдлӧны войтыръяс, — висьталӧ Господь Саваоф. — 
А ті янӧданныд Менсьым нимӧс, кор нинӧмӧ пуктанныд Господьлысь пызансӧ, вись пыдди ваянныд сэтчӧ шогмытӧм сёян.
Ті шуасянныд, ноксьӧмыс пӧ мыйта, тадзи увтыртанныд кесъялан уджнытӧ, — висьталӧ Господь Саваоф. — Кор вись пыдди ті ваянныд гусялӧм, чотысь да висьысь пемӧсӧс, ті чайтанныд, мый Ме сибӧда сійӧс? — висьталӧ Господь.
— Ёрӧма пӧръясьысьӧс, коді дзоньвидза ай пемӧссӧ кӧсйысьӧ вись пыдди вайны Господьлы, но вайӧ висьысьӧс. Тӧдӧй, Ме — ыджыд Ӧксы, — висьталӧ Господь Саваоф, — и Менам нимысь полӧны войтыръяс.
Попъяс, тайӧ ӧлӧдӧмыс тіянлы.
— Ті кӧ онӧ кутӧй кывзысьны Менсьым, онӧ кӧ кутӧй сьӧлӧмсяньныд пыдди пуктыны Менӧ, — висьталӧ Господь Саваоф, — Ме ыста тіян вылӧ ёрӧм, бурсиӧм пыдди ёра тіянӧс. Но Ме тіянӧс ёри нин, ӧд ті онӧ сьӧлӧмсяньныд пыдди пуктӧй Менӧ.
Тіян кесъялӧмлы Ме пукта пом, гажӧдчан лунӧ ваян висьныдлысь сітсӧ Ме шыблала чужӧманыд, сэсся тіянӧс сітыскӧд шыбитасны ортсӧ.
— Сэки ті гӧгӧрвоанныд, мый тайӧ вӧлі Менам ӧлӧдӧм, медым Левий чужанкотыркӧд кӧрталӧм йитӧдӧй вына коли, — висьталӧ Господь Саваоф. — 
Менам йитӧдӧй накӧд вӧлі татшӧм: Ме сеті налы олӧм да лӧньлун, а найӧ пыдди пуктісны Менӧ да вежавидзисны Меысь.
Найӧ велӧдісны збыляс, налӧн вомысь эз петавлы ылӧгыс.
Найӧ олісны Ме водзын веськыда да кывзысьӧмӧн, унаӧс найӧ бергӧдісны мыж вӧчӧмысь.
Поплӧн вомысь мед петас Ен йылысь тӧдӧмлуныс, сысянь йӧзыс виччысьӧны велӧдӧмсӧ, сійӧ ӧд Господь Саваофсянь юӧр вайысьыс.
— Но ті кежинныд тіянлы индӧм туй вылысь, тіян велӧдӧм вӧсна унаӧн крукасисны. Ті торкинныд Менсьым йитӧдӧс, мый Ме кӧрталі Левийкӧд, — висьталӧ Господь Саваоф. — 
Ме янӧда тіянӧс, став войтырыс кутас увтыртны тіянӧс, ӧд ті онӧ ветлӧй Менам туйӧд, а велӧдіганыд кӧсъянныд шогмыны мортлы.
Абу-ӧ миян ставнымлӧн ӧти Бать?
Эз-ӧ ӧти Ен вӧч миянӧс ставнымӧс?
Мыйла, сідзкӧ, ми пӧръясьӧмӧн олам ӧта-мӧдкӧд, пежалам йитӧдсӧ, мый Енмыс кӧрталіс батьяснымкӧд?
Иуда войтыр пӧръясьӧ, Израиль муын да Ерусалим карын вӧчсьӧны зывӧкторъяс.
Господь радейтӧ Ассьыс вежаинсӧ, но Иуда войтыр пежаліс Сылысь вежаинсӧ, ӧтувтчис идолкӧд.
Господь мед бырӧдас Яков рӧдысь быдӧнӧс, коді дорйӧ татшӧмтор вӧчысьӧс. Мед оз сюр некод, коді эськӧ сы вӧсна вись ваяс Господь Саваофлы.
Со мый ті нӧшта вӧчанныд: кыз синваӧн бӧрданныд Господьлӧн висьпуктанін дорын, сыркъялӧмӧн бӧрданныд, ӧд Господь бергӧдчис тіян вись дорысь, эз сибӧд вайӧмторнытӧ.
Ті юаланныд: «Мый понда оз сибӧд?»
Сыысь, мый тэ эновтін том кадӧ босьтӧм гӧтыртӧ, кодкӧд тэнад вӧлі йитӧд. Ӧні тэ да гӧтырыд костын мыжалысьыс — Господь.
Тадзи оз вӧч сійӧ, код пытшкын Енлӧн лолыс.
Мый сійӧ корсьӧ? Медым вӧліны Енсянь чужысьяс.
Сідзкӧ, видзӧй ловнытӧ, энӧ эновтӧй том кадӧ босьтӧм гӧтырнытӧ.
Ме мустӧмта, кор эновтӧны, — шуӧ Господь, Израильлӧн Ен.
Гӧтырсӧ эновтысь мыжмӧ вир кисьтысь моз, — висьталӧ Господь Саваоф.
— Та вӧсна видзӧй ловнытӧ, энӧ эновтӧй гӧтырнытӧ.
Ті дӧзмӧданныд Господьӧс асланыд сёрниӧн и та дырйи юасянныд, мыйӧн пӧ ми Сійӧс дӧзмӧдам.
Дӧзмӧданныд сійӧн, мый шуаланныд, лёк вӧчысь пӧ шогмана Господьлы, татшӧм мортыс пӧ муса Сылы. Нӧшта дӧзмӧданныд сійӧн, мый шуаланныд, кӧні пӧ веськыда мыждысь Енмыс.
Ме ыста Ассьым юӧртысьӧс, сійӧ Меным туй дасьтас. Виччысьтӧг локтас Аслас крамӧ Господь, кодӧс ті корсянныд, локтас йитӧд йылысь юӧртысь, кодӧс ті виччысянныд.
Со, Сійӧ локтӧ нин, — висьталӧ Господь Саваоф. — 
Коді вермас ловйӧн кольны Сылӧн локтігӧн? Коді вермас сулавны Сылӧн петкӧдчигӧн?
Зарни сывдысь моз Сійӧ весалӧ биӧн, песласьысь моз — кунваӧн. Сійӧ пуксяс, медым сывдыны-весавны эзысь. Сійӧ весалас Левийлысь пиянсӧ, сывдас найӧс эзысь-зарниӧс моз, медым найӧ торкавтӧг вайисны Господьлы вись.
Сэки Иуда войтырлӧн висьясыс, Ерусалимын олысьяслӧн вайӧмторъясыс важ мозыс лоӧны шогманаӧсь Господьлы.
— Ме локта тіян дінӧ, медым мыждыны! Ме нюжмасьтӧг мыжда тунасьысьясӧс, гозъякост олӧм пежалысьясӧс, пӧръясьӧмӧн кыв сетысьясӧс, найӧс, кодъяс оз мынтысьны уджалысьлы, дзескӧдӧны дӧваӧс да батьтӧм-мамтӧмӧс, ӧтдортӧны йӧз муысь локтысьӧс — ставнысӧ, кодъяс оз повны Меысь, — висьталӧ Господь Саваоф.
Ме — Господь, Ме ог вежлась!
И ті, Яковлӧн пиян, абу вежсьӧмныд.
Батьясныдлӧн кадсянь ті бергӧдчанныд Менам тшӧктӧмъясысь, онӧ олӧй на серти.
Ӧні бӧр бергӧдчӧй Ме дінӧ, и Ме бергӧдча тіян дінӧ, — висьталӧ Господь Саваоф.
— Но ті юаланныд, мыйла пӧ миянлы колӧ бӧрсӧ бергӧдчыны.
Вермас-ӧ морт мыйкӧ гусявны Енмыслысь?
А ті гусяланныд Менсьым.
Ті юаланныд, мый пӧ ми гусялам Тэнсьыд.
Ті гусяланныд дасӧд юкӧннытӧ да мукӧд вайӧмторсӧ.
Ёрӧмӧн ёрӧма тіянӧс, ӧд ті, Израиль войтыр, гусяланныд Менсьым.
— Став дасӧд юкӧннытӧ вайӧй видзанінъясӧ, медым Менам керкаын вӧлі сёян. Татшӧм ногӧн тӧдмалӧй Менӧ, — висьталӧ Господь Саваоф. — Ме ӧмӧй ог восьт тіянлы енэжвыв ӧшиньяссӧ, ог ӧмӧй лышкыда кисьт тіян вылӧ бурсиӧмсӧ?
Ме ог лэдз гагъяслы сёйны быдмӧгъяснытӧ, тіян виноградныд ӧтитӧг вотӧсалас, — висьталӧ Господь Саваоф. — 
Сэки войтыръяс шуасны тіянӧс майбыръясӧн, ӧд тіян муын олӧмыс лоӧ вывті бур, — висьталӧ Господь Саваоф.
Ті вежавидзтӧг сёрнитанныд Меным паныд, — висьталӧ Господь Саваоф.
— Ті юаланныд, мый пӧ ми сёрнитам Тэныд паныдсӧ.
Ті шуанныд, Енлы кесъялӧмным пӧ миян весьшӧрӧ. Мый бурыс пӧ вӧлі сыысь, мый ми кутчысим Сылӧн тшӧктӧмъясӧ да ветлім шогалӧмӧн Господь Саваоф водзын.
Ми пӧ аддзам мӧдтор: вылӧ кыпӧдчысьяс шудаӧсь, лёк вӧчысьяслӧн олӧмас ставыс артмӧ, найӧ дӧзмӧдӧны Енсӧ, но кольӧны мыждытӧг.
Господьысь полысьяс кор сёрнитӧны ӧта-мӧдныскӧд, Господь аддзӧ да кылӧ тайӧс. Сылӧн чужӧмбан водзын казьтылан небӧгӧ гижӧны на йылысь, кодъяс полӧны Господьысь, кодъяс пыдди пуктӧны Сылысь нимсӧ.
Менам индӧм лунӧ найӧ лоӧны Менам войтырӧн, — висьталӧ Господь Саваоф. — Ме лоа на дінӧ бур сьӧлӧма, кыдзи бать бур сьӧлӧма аслас кывзысьысь пи дінӧ.
Сэки ті бара аддзанныд веськыда олысь да лёк вӧчысь костын торъялӧмсӧ, аддзанныд, коді кесъяліс Енмыслы, а коді эз кесъяв.
Сійӧ луныс воас ыпъялысь би моз, идзасӧс моз сотас вылӧ кыпӧдчысьясӧс, сотас лёк вӧчысьясӧс, — висьталӧ Господь Саваоф, — оз коль наысь весиг вуж ни ув.
А тіянлы, Меысь полысьяслы, петас веськыдлуныслӧн шонді, и сылӧн югӧр улын ті бурданныд. Ті петанныд да понданныд чеччавны видз вылӧ лэдзӧм куканьяс моз. Менам индӧм лунӧ ті понданныд талявны лёк вӧчысьясӧс, бус чирӧдз ниртанныд найӧс кок уланыд, — висьталӧ Господь Саваоф.
Энӧ вунӧдӧй Менам Мӧисей кесйӧглысь Индӧдсӧ, мый Ме сеті сылы Хорив керӧсын, энӧ вунӧдӧй тшӧктӧмъяссӧ, мый Ме сеті став Израиль войтырлы.
Господьлӧн ыджыд да повзьӧдана луныс вотӧдз Ме ыста тіян дінӧ Илля пророкӧс.
Сійӧ бергӧдас батьяслысь сьӧлӧмсӧ пиянлань, пиянлысь сьӧлӧмсӧ — батьяслань, медым локтігӧн Ме эг ёр да эг бырӧд мусӧ.
{Kodko @ Выль кӧсйысьӧм @ религия @ Выль кӧсйысьӧм @ 2008 @}
Выль кӧсйысьӧм.
Матвей серти бур юӧр
1 юр.
Исус Кристослӧн ордпуыс петӧ Ӧвраамсянь, сэсся Давидсянь. Сылӧн чужанвужйыс татшӧм:
Ӧвраамлӧн чужӧма Исаак, Исааклӧн — Яков, Яковлӧн чужӧмаӧсь Иуда да сылӧн вокъясыс.
Иудалӧн чужӧмаӧсь Фарес да Зарей, налӧн мамныс вӧлӧма Фамар.
Фареслӧн чужӧма Есром, Есромлӧн — Арам, Арамлӧн — Аминадав, Аминадавлӧн — Наассон, Наассонлӧн — Салмон.
Салмонлӧн чужӧма Вооз, сылӧн мамыс вӧлӧма Ракав.
Воозлӧн чужӧма Овид, сылӧн мамыс вӧлӧма Руфа.
Овидлӧн чужӧма Ессей, Ессейлӧн чужӧма Давид ӧксы.
Давид ӧксылӧн чужӧма Соломон, сылӧн мамыс вӧлӧма Урийлӧн гӧтыр.
Соломонлӧн чужӧма Ровоам, Ровоамлӧн — Авей, Авейлӧн — Аса, Асалӧн — Иосафат, Иосафатлӧн — Иорам, Иорамлӧн — Озей.
Озейлӧн чужӧма Иоафам, Иоафамлӧн — Аказ, Аказлӧн — Езекей.
Езекейлӧн чужӧма Манассей, Манассейлӧн — Амон, Амонлӧн — Иосей.
Иосейлӧн чужӧма Иоаким, Иоакимлӧн чужӧмаӧсь Еконей да сылӧн вокъясыс. Тайӧ вӧлӧма Израиль войтырӧс Вавилон муӧ вӧтлытӧдз на.
Вавилонӧ вӧтлӧм бӧрын Еконейлӧн чужӧма Салафиль, Салафильлӧн — Зоровавель, Зоровавельлӧн — Авиуд, Авиудлӧн — Елиаким, Елиакимлӧн — Азор.
Азорлӧн чужӧма Садок, Садоклӧн — Аким, Акимлӧн — Елиуд, Елиудлӧн — Елеазар, Елеазарлӧн — Матфан, Матфанлӧн — Яков.
Яковлӧн чужис Ӧсип. Сылӧн Мария гӧтырыс чужтіс Исусӧс, кодӧс шуисны Кристосӧн.
Тадзи Ӧвраамсянь Давидӧдз ставнас вӧлі дас нёль чужанвуж.
Вавилонӧ вӧтлытӧдз Давидсянь дас нёль чужанвуж.
Вавилонӧ вӧтлӧмсянь Кристосӧдз бара дас нёль чужанвуж.
Исус Кристос чужис тадзи.
Исуслӧн Мария мамыс вӧлі кикутӧма Ӧсипкӧд. Ӧтлаасьтӧдзныс на тӧдмалісны Мариялӧн Вежа Ловсянь сьӧктӧм йылысь.
Ӧсип вӧлі веськыда олысь морт. Сійӧ эз кӧсйы йӧзӧдны Марияӧс, та вӧсна шуис гусьӧн лэдзны сійӧс.
Кор Ӧсип мӧвпаліс тадзи, Господьлӧн андел петкӧдчис сылы вӧтас да шуис: «Ӧсип, Давид пи, эн пов босьтны Мариятӧ гӧтырӧ. Сьӧлӧм улас сылӧн кагаыс Вежа Ловсянь.
Марияыд ваяс пи, пуктан Сылы Исус ним, Сійӧ мездас Ассьыс войтырсӧ мыжъяссьыныс».
Ставыс тадзи артмис, медым иніс пророк пыр Господьлӧн шуӧмыс: — Ныв сьӧктас, сэсся пи чужтас.
Эммануил ним Сылы пуктасны. Нимыс висьталӧ: миянкӧд Ен.
Садьмӧм бӧрас Ӧсип вӧчис Господьлӧн андел тшӧктӧм серти: босьтіс Марияӧс гӧтырӧ, но эз инмӧдчыв сы дінӧ.
Мария чужтіс пи, ассьыс медводдза кагасӧ, и Ӧсип пуктіс Сылы Исус ним.
2 юр.
Исус чужис Юдея муын, Виплием карын, Ирӧд ӧксы веськӧдлан кадӧ. Исуслӧн чужӧм мысти асыввылысь Ерусалим карӧ воисны кодзув тӧдысьяс. Найӧ юалісны: «Кӧні юдейяслӧн пузчужӧм ӧксыыс? Асыввылысь ми аддзылім Сылысь кодзувсӧ да локтім Сылы копыртчывны».
Тайӧс кылӧмысь Ирӧд ӧксы инас эз кут ӧшйыны, шызис тшӧтш дзоньнас Ерусалим карыс.
Ирӧд корис аркирейясӧс Индӧдӧ велӧдысьяскӧд да юаліс налысь: «Кӧні Кристос чужас?» Найӧ вочавидзисны: «Юдея муын, Виплием карын. Тадзи пророклӧн гижӧма: — Тэ, Иуда муын Виплием кар, Иудалӧн мукӧд юрнуӧдан каръясысь абу ичӧтджык. Тэнад карысь буретш юралысь петас, Менсьым ыжъясӧс, Израиль войтырӧс, Сійӧ видзны кутас».
Тӧдысьясӧс ас дінас гусьӧн корӧмӧн Ирӧд юаліс налысь кодзув петан кадсӧ. Сэсся мӧдӧдіс найӧс Виплиемӧ да шуис: «Ветлӧй, кага йывсьыс ставсӧ тӧдмалӧй. Кагасӧ аддзӧм бӧрын юӧртӧй меным, ме тшӧтш вола копыртчывны Сылы».
Ӧксылӧн шуӧм бӧрын тӧдысьяс петісны туйӧ.
Асыввылысь аддзылӧм кодзулыс кывтіс на водзвылын. Сэсся сійӧ сувтіс буретш сэтчӧ, кӧні вӧлі кагаыс.
Кодзув аддзӧмысь тӧдысьяслы лои зэв нимкодь. Керкаӧ пырӧм бӧрын найӧ аддзисны кагаӧс Мария мамыскӧд. Пидзӧс выланыс уськӧдчӧмӧн найӧ копыртчылісны кагалы да сетісны Сылы дона козинъяс: зарни, ладан да смирна.
Узиганыс Ен ӧлӧдіс тӧдысьясӧс Ирӧд дінӧ бӧр мунӧмысь, та вӧсна найӧ мӧдісны ас муаныс мӧд туйӧд.
Тӧдысьяслӧн мунӧм бӧрын Господьлӧн андел петкӧдчис Ӧсиплы вӧтас да шуис: «Чеччы, босьт кагатӧ мамыскӧд да пышйы Египет муӧ, ов сэні менам шутӧдз. Ирӧд кутас корсьны кагатӧ, мед вины Сійӧс».
Ӧсип садьмис, босьтіс кагасӧ мамыскӧд да войнас мӧдӧдчис Египет муӧ. Сэні сійӧ оліс Ирӧд кувтӧдз. Тадзи иніс пророк пыр Господьлӧн шуӧмыс: «Египет муысь Ме кори Пиӧс».
Ирӧд тӧдмаліс тӧдысьяслысь ылӧдлӧмсӧ да ёна скӧрмис таысь. Сійӧ мӧдӧдіс шыпуртаясӧс, тшӧктіс вины Виплием карысь да сы гӧгӧрысь кык арӧса да ичӧтджык став пи кагасӧ, тӧдысьяссянь тӧдмалӧм кадӧ чужӧмаясӧс.
Тадзи иніс Еремей пророклӧн шуӧмыс: — Рама карын ырзӧм-бӧрдӧм кылӧ. Ракель аслас ныв-пи вӧсна бӧрдӧ, оз кӧсйы ланьтны бӧрдӧмсьыс, ӧд найӧ абуӧсь нин.
Ирӧд кулӧм бӧрын Египет муын Господьлӧн андел петкӧдчис Ӧсиплы вӧтас да шуис: «Чеччы, босьт кагатӧ мамыскӧд да бӧр мун Израиль муӧ. Кагатӧ вины кӧсйысьяс абу нин ловъяӧсь».
Ӧсип чеччис, босьтіс кагасӧ мамыскӧд да муніс Израиль муӧ.
Сэки Юдея муын веськӧдліс Ирӧд ӧксылӧн Аркелай пиыс. Тайӧс кывлӧм бӧрын Ӧсип повзис сэтчӧ мунӧмысь. Сэки вӧтас сылы вӧлі шуӧма мунны Галилея муӧ. Сэтчӧ воӧм бӧрын Ӧсип овмӧдчис Назарет карӧ. Тадзи иніс пророкъяс пыр шуӧмыс: «Назаретсаӧн Сійӧс шуасны».
3 юр.
Сійӧ кадӧ локтіс Пыртысь Иоан да юӧртіс Юдея овтӧминын: «Бергӧдчӧй мыжъяссьыныд. Енэжвыв Юралӧмыс матын нин».
Иоан йылысь Исай пророк висьтавлӧма тадзи: — Овтӧминын кылӧ горзысьлӧн шы: «Лӧсьӧдӧй туйсӧ Господьлы, веськӧдӧй-шыльӧдӧй ордымъяс Сылы.».
Иоан новліс верблюд гӧнысь кыӧм паськӧм да коскас кучик тасма, сёйліс чирк да видзвыв ма.
Сы дінӧ локтіс уна йӧз Ерусалим карысь, Юдея му пасьталаысь да Йӧрдан ю пӧлӧнысь. Асланыс мыжъясысь висьтасьӧм бӧрын Иоан пыртіс йӧзсӧ Йӧрдан юын.
Уна фарисей да саддукей локтісны Иоан дінӧ пыртчыны. Иоан аддзис найӧс да шуис: «Вижля йылӧм. Коді туйдӧдіс тіянӧс пышйыны локтана скӧрлунысь? Олӧмнад петкӧдлӧй мыжъяссьыныд бергӧдчӧмнытӧ. Энӧ лысьтӧй мӧвпавны, мый тіян батьныд Ӧвраам. Висьтала тіянлы: тайӧ изъясысь Ен вермӧ вӧчны Ӧвраамлы ныв-писӧ.
Черыс пу вужйыс дорын нин куйлӧ. Пуыс кӧ оз вай бур вотӧс, сійӧс кералӧны да шыбитӧны биӧ.
Ме пырта тіянӧс ваӧн. Тайӧ петкӧдлас мыжъяссьыныд бергӧдчӧмнытӧ. Ме бӧрын Локтысьыс ме дорысь вынаджык, ме ог шогмы пӧрччӧдны Сылысь кӧмсӧ. Сійӧ пыртас тіянӧс Вежа Лолӧн да биӧн. Сы киын тӧлӧдчан зырйыс. Сійӧ весалас гумласӧ: шобдісӧ йӧртӧдӧ чукӧртас, кыдсӧ куслытӧм биын сотас».
Сэки Исус локтіс Галилеяысь Йӧрдан ю дорӧ, мед Иоан пыртас Сійӧс.
Иоан ӧлӧдіг шуис: «Тэ-ӧ локтан ме дінӧ? Тэныд колӧ менӧ пыртнысӧ.» Исус шуис: «Эн сувт паныд.Миянлы колӧ вӧчны веськыдлуныс серти».
Сэки Иоан пыртіс Сійӧс.
Пыртчӧм бӧрас Исус петіс васьыс. Сэки енэжыс воссис, и Исус аддзис: Енлӧн Лолыс гулю моз лэччис Сы вылӧ.
Енэжсянь кыліс гӧлӧс шы: «Тайӧ Менам муса Пиӧй, Ме нимкодяся Сыӧн».
4 юр.
Та бӧрын Лов нуӧдіс Исусӧс овтӧминӧ, медым омӧльыс ыштӧдіс Сійӧс. Нелямын лун да нелямын вой видзалӧм бӧрын Исуслӧн кынӧмыс сюммис.
Сэки Сы дінӧ локтіс ыштӧдысь да шуис: «Тэ кӧ Ен Пи, пӧрт тайӧ изъяссӧ няньӧ».
Исус воча шуис: «Гижӧма: “Оз куш няньӧн мортыд ов, а Енсянь быд шуӧм кывйӧн”».
Сэсся омӧль нуӧдіс Исусӧс вежа карӧ, сувтӧдіс Сійӧс крам вевт вылӧ да шуис: «Тэ кӧ Ен Пи, шыбитчы увлань. Ӧд гижӧма: “Аслас анделъяслы Сійӧ тшӧктӧ видзны Тэнӧ. Найӧ нуасны Тэнӧ ки выланыс, видзасны изйӧ крукасьӧмысь”».
Исус воча шуис: «Гижӧма тшӧтш: “Эн дӧзмӧд ассьыд Господь Ентӧ.”»
Омӧль бара вайӧдіс Исусӧс зэв джуджыд керӧс йылӧ да петкӧдліс Сылы таладор югыдсьыс став мусӧ, налысь мичлун-озырлунсӧ. Сэсся шуис: «Ставсӧ тайӧс сета Тэныд, копыртчылан кӧ меным».
Исус шуис сылы: «Вешйы Ме дінысь, сӧтана. Гижӧма: “Аслад Господь Енлы копрась да сӧмын Сылы кесъяв”».
Сэки омӧль эновтіс Исусӧс. Сэсся воисны анделъяс да кесъялісны Исуслы.
Кор Исус тӧдмаліс Иоанӧс дзескыдінӧ пуксьӧдӧм йылысь, муніс Галилеяӧ. Сійӧ колис Назарет карсӧ да овмӧдчис тыдорса Капернаум карӧ, Завулон да Неффалим муӧ. Тадзи иніс Исай пророклӧн шуӧмыс: — Завулон му, Неффалим му, саридз туй вылын, Йӧрдан ю сайын мукӧд войтыра Галилея му. Пемыдын олысь войтыр яр биа югыд аддзис. Кулан вуджӧр улын олысьяслы югыд кыа петіс.
Тайӧ кадсянь Исус пондіс юӧртны-висьтавлыны: «Бергӧдчӧй мыжъяссьыныд. Енэжвыв Юралӧмыс матын нин».
Галилея ты пӧлӧн мунігӧн Исус аддзис кык вокӧс: Симонӧс, кодӧс нимтісны Петырӧн, да сылысь Ӧндрей воксӧ. Найӧ вӧліны чери кыйысьяс. Кык вок буретш вӧйтасисны ты вылын. Исус шуис налы: «Локтӧй Ме бӧрся. Ме вӧча тіянысь морт кыйысьясӧс».
Кык вок дзик пыр эновтісны тывъяснысӧ да мунісны Исус бӧрся.
Исус муніс водзӧ да аддзис пыжысь мӧд кык вокӧс: Яковӧс да Иоанӧс. Зеведей батьныскӧд найӧ дзоньталісны тывъяс. Исус чукӧстіс вокъясӧс.
Найӧ дзик пыр колисны пыжсӧ, батьнысӧ да мунісны Исус бӧрся.
Исус ветлӧдліс Галилея му пасьтала. Сійӧ велӧдіс синагогаясын, висьтавліс Ен Юралӧм йылысь Евангелльӧ да бурдӧдаліс йӧзӧс быд висьӧм-доймӧмысь.
Сы йылысь юӧрыс разаліс Сирия му пасьтала. Исус дінӧ вайӧдлісны быдсикас висьысьӧс-вермытӧмӧс, пеж лолӧн кутӧмаясӧс, шыблалан висьӧмӧн висьысьясӧс, ки-коксӧ вӧрзьӧдны вермытӧмъясӧс. Сійӧ быдӧнӧс бурдӧдіс.
Исус бӧрся муніс зэв уна йӧз Галилеяысь, Даскарысь, Юдеяысь, Ерусалим карысь да Йӧрдан ю сайысь.
5 юр.
Уна йӧзӧс аддзӧм бӧрын Исус кайис керӧсӧ да пуксис. Сы дінӧ матыстчисны велӧдчысьяс.
Исус пондіс велӧдны:
«Шудаӧсь ловныслы корысьяс, ӧд налӧн эм Енэжвыв Юралӧм.
Шудаӧсь шогсьысьяс, ӧд найӧс шогсьыс пальӧдасны.
Шудаӧсь рамъяс, ӧд налы вуджас кӧсйысьӧм муыс.
Шудаӧсь веськыдлуннас пӧткӧдчыны кӧсйысьяс, ӧд найӧс пӧткӧдасны.
Шудаӧсь бур сьӧлӧмаяс, ӧд налы бур сьӧлӧмсянь вӧчасны.
Шудаӧсь сӧстӧм сьӧлӧмаяс, ӧд найӧ Енмӧс аддзасны.
Шудаӧсь йӧзӧс бурӧдысьяс, ӧд найӧс Енлӧн ныв-пиӧн шуасны.
Шудаӧсь веськыдлун вӧсна вӧтлӧмаяс, ӧд налӧн эм Енэжвыв Юралӧм.
Ті шудаӧсь, Ме вӧсна кӧ тіянӧс лёкӧдӧны, вӧтлӧны да быдногыс омӧльтӧны-суклялӧны.
Долыда нимкодясьӧй, ӧд ыджыд тырдон виччысьӧ тіянӧс енэжас. Тадзи войдӧр тшӧтш вӧтлісны пророкъясӧс».
«Ті муюгыдыслы сов.
Солыс кӧ воштас ассьыс вынсӧ, кыдзи сійӧс бӧр соланас вӧчан?
Сэки сійӧ нинӧм вылӧ оз шогмы, сійӧс сӧмын койыштӧны ветлысьяс кок улӧ.
Ті йӧзыслы югыд.
Керӧсын сулалысь кар оз вермы саявны.
Ӧзтӧм битӧ оз пуктыны доз улӧ, сійӧс пуктӧны бикок вылӧ. Сэки керкаын югыдыс быдлаӧ веськалӧ.
Тадзи мед югдӧдас тіян югыдныд, медым йӧзыс аддзасны тіянлысь бур вӧчӧмнытӧ да ошкасны енэжвыв Батьнытӧ».
«Ті чайтанныд, Ме локті бырӧдны Индӧдсӧ да пророк гижӧдъяс? Энӧ мӧвпалӧй тадзи. Ме эг лок бырӧдны, а локті олӧмӧ пӧртны.
Веськыда висьтала тіянлы: енэжыс да муыс быртӧдз да ставыс збыльмытӧдз весиг ӧти ичӧт шыпас да чуттор оз вош Индӧдысь.
Коді торкас Ен тшӧктӧмъясысь весиг ӧти ичӧттор да велӧдас тадзи вӧчны мукӧдӧс, Енэжвыв Юраланінын сійӧс медічӧтӧ пуктасны.
Коді олас тшӧктӧмъясыс серти да велӧдас тадзи овны мукӧдӧс, Енэжвыв Юраланінын сійӧс ыджыд мортӧ пуктасны.
Висьтала тіянлы: тіян веськыда олӧмныд кӧ оз ло Индӧдӧ велӧдысьяслӧн да фарисейяслӧн дорысь бурджык, Енэжвыв Юраланінӧ онӧ пырӧй».
«Ті кывлінныд, важ йӧзлы вӧлі шуӧма: “Эн ви”, и нӧшта шуӧма: “Виысьӧс мыждасны”.
Ме шуа тіянлы: коді лӧгалӧ вокыс вылӧ нинӧм абусьыс, сійӧс мыждасны.
Коді вокыслы шуас: “Тэ бӧб”, сійӧс вылыс ёрд мыждас.
Коді йӧйӧн шуас, сійӧ куслытӧм биӧ веськалас.
Сетантортӧ вайигад кӧ висьпуктанін дорын тӧд вылад усяс, мый вокыд лӧгалӧ тэ вылӧ, сэки коль висьпуктанін дорӧ сетантортӧ. Мун, водзджык бурась вокыдкӧд, сэсся лок да пукты висьпуктанінӧ сетантортӧ.
Тэнӧ мыжалыськӧд бурась ӧдйӧджык, ёрдӧ вотӧдз на. Он кӧ вӧч тадзи, сійӧ сетас тэнӧ ёрдысьлы, ёрдысь сетас тэнӧ видзысьлы, сэсся тэнӧ йӧртасны дзескыдінӧ. Веськыда висьтала тэныд: бӧръя сьӧмтӧ сеттӧдз он пет сэтысь».
«Ті кывлінныд, важ йӧзлы вӧлі шуӧма: “Гозъя олӧмтӧ эн пежав.”
Ме шуа тіянлы: ань вылӧ ыштӧмӧн видзӧдысь сьӧлӧмас гозъя олӧмсӧ пежаліс нин.
Веськыд синмыд кӧ ыштӧдӧ тэнӧ, перйы сійӧс да шыбит. Бурджык син пӧвтӧ воштыны вир-яйтӧ дзоньнас куслытӧм биӧ шыбитӧм дорысь.
Веськыд киыд кӧ ыштӧдӧ тэнӧ, керышт сійӧс да шыбит. Бурджык ки пӧвтӧ воштыны вир-яйтӧ дзоньнас куслытӧм биӧ шыбитӧм дорысь.
Нӧшта шуӧма: “Гӧтырсӧ эновтысь мед сетас сылы торйӧдчан гижӧд”.
Ме шуа тіянлы: верӧсыс кӧ эновтӧ гӧтырсӧ, а гӧтырыс оз кырсав, сійӧ сетӧ помка гӧтырыслы пежавны гозъя олӧмсӧ. Юксьӧм аньӧс гӧтырӧ босьтысь тшӧтш пежалӧ».
«Ті кывлінныд, важ йӧзлы вӧлі шуӧма: “Сетӧм кывтӧ эн торк. Господь водзын сетӧм кывтӧ кут.
” Шуа тіянлы: кыв сеттӧг ов.
Эн сет кывтӧ енэж водзын — сійӧ Енлӧн пукаланіныс.
Эн сет кывтӧ му водзын — сійӧ Енлӧн кок улыс.
Эн сет кывтӧ Ерусалим кар водзын — сійӧ ыджыд Ӧксылӧн кар.
Аслад юрӧн эн кӧсйысь, ӧд тэ весиг ӧти юрси сі он вермы пӧртны еджыдӧ либӧ сьӧдӧ.
Тіян “да”-ныд мед лоӧ сӧмын “да”, тіян “ог”-ныд мед лоӧ сӧмын “ог”, а содтӧд кывъясыс — омӧльсяньыс».
«Ті кывлінныд, вӧлі шуӧма: “Син понда син, пинь понда пинь”.
Ме шуа тіянлы: тэныд лёксӧ вӧчысьлы паныд эн сувт.
Веськыд банад кӧ кучкасны, лӧсьӧд шуйгасӧ.
Зільӧ кӧ кодкӧ ёрд пыр дӧрӧмтӧ босьтны, сет сылы тшӧтш вылыс паськӧмтӧ.
Тшӧктӧ кӧ кодкӧ мунны сыкӧд ӧти верст, мун сыкӧд кыкӧс.
Тэнсьыд корысьлы сет, водзӧсӧн босьтысьӧс эн вӧтлы».
«Ті кывлінныд, вӧлі шуӧма: “Радейт матыссатӧ да мустӧмт тэныд паныд мунысьӧс”.
Ме шуа тіянлы: радейтӧй тіянлы паныд мунысьясӧс, бурсиӧй тіянӧс ёрысьясӧс, бурсӧ вӧчӧй тіянӧс мустӧмтысьяслы, кевмысьӧй тіянӧс ӧтдортысьяс да вӧтлысьяс вӧсна. Сэки лоанныд енэжвыв Батьныдлы ныв-пиӧн. Сійӧ тшӧктӧ шондіыслы ӧтмоза шонтыны лёк да бур йӧзӧс, сетӧ зэрсӧ веськыда да лёк нога олысьяслы.
Радейтанныд кӧ тіянӧс радейтысьясӧс, мыйысь удждонсӧ виччысянныд?
Оз ӧмӧй тадзи вӧчны тшӧтш вот перйысьяс?
Ті кӧ чолӧмаланныд-сибӧданныд сӧмын вокъяснытӧ, ті ӧмӧй бурджыка вӧчанныд?
Оз ӧмӧй тадзи вӧчны тшӧтш ентӧдтӧмъяс?
Лоӧй енэжвыв Батьныд моз тырвыйӧ бурӧсь».
6 юр.
«Видзчысьӧй, тіян бур вӧчӧмныд мед оз ло йӧз водзын петкӧдлӧм могысь. Тадзи кӧ, оз ло тіянлы енэжвыв Батьныдсянь удждон.
Корысьлы кӧ сетан, эн йӧзӧд тайӧс. Тадзи вӧчӧны кык бана шаньгаяс синагогаясын да йӧзаинъясын, ӧд найӧ йӧзсянь ошкӧм виччысьӧны.
Веськыда висьтала тіянлы: найӧ босьтӧны нин ассьыныс удждонсӧ.
Корысьлы сетігад шуйга киыд мед оз тӧд веськыд киыдлысь вӧчӧмсӧ. Тэнад бур вӧчӧм йылысь мукӧдлы тӧднысӧ оз ков. Гусясӧ аддзысь Батьыд сетас тэныд аддзымӧнъя».
«Эн кевмысь кык бана шаньгаяс моз. Асьнысӧ йӧз водзын петкӧдлӧм могысь найӧ радейтӧны синагогаясын да туйвежъясын сулалӧмӧн кевмысьны.
Веськыда висьтала тіянлы: найӧ босьтӧны нин ассьыныс удждонсӧ.
Но тэ пыр аслад вежӧсӧ, ӧдзӧстӧ пӧдлав да кевмысь тыдавтӧм Батьыдлы. Гусясӧ аддзысь Батьыд сетас тэныд аддзымӧнъя.
Кевмысиганыд ентӧдтӧмъяс моз энӧ шуалӧй ковтӧмсӧ. Найӧ чайтӧны, мый уна кыв шуӧмнысла Енмыс кылас найӧс. Энӧ лоӧй на кодьӧсь. Тіян кортӧдз на Батьныд тӧдӧ тіянлы коланасӧ.
Кевмысьӧй тадзи: — Батьӧй миян, Тэ енэжъяс вылын олан.
Мед лоӧ вежаӧн Тэнад нимыд.
Мед воас Тэнад Юралӧмыд.
Мед инас Тэнад кӧсйӧмыд му вылын енэжын моз.
Сет миянлы талун кежлӧ няньнымӧс.
И прӧстит миянлысь мыжъяснымӧс, кыдзи ми прӧститам миян водзын мыжаясӧс.
Эн сет миянлы ылавны, но видз миянӧс омӧльысь.
Ӧд Тэнад Юралӧмыд, выныд да дзирдлуныд помасьлытӧм.
Аминь.
Прӧститанныд кӧ мӧдлысь мыжъяссӧ, сэки енэжвыв Батьныд прӧститас тіянӧс.
Онӧ кӧ прӧститӧй, сэки Батьныд тіянлысь мыжъяснытӧ оз прӧстит».
«Видзаліганыд энӧ лоӧй жугыльӧсь кык бана шаньгаяс моз. Найӧ ветлӧны шог чужӧмӧн видзалӧмсӧ петкӧдлӧм могысь.
Веськыда висьтала тіянлы: найӧ босьтӧны нин ассьыныс удждонсӧ.
Мӧдарӧ, видзалігад юрситӧ шыльӧд, чужӧмтӧ мыськы, йӧзыс мед оз тӧдлыны тэнсьыд видзалӧмтӧ. Видзав аслад тыдавтӧм Батьыд водзын. Гусясӧ аддзысь Батьыд сетас тэныд аддзымӧнъя».
«Энӧ чӧжӧй аслыныд озырлун му вылын. Тані воз да сім сійӧс сёйӧ, гусясьысьяс пырӧны да нуӧны ставсӧ.
Мӧдарӧ, чӧжӧй озырлунтӧ енэжӧ. Сэні воз да сім оз сёй сійӧс, гусясьысьяс оз пырны да оз нуны.
Кӧні озырлунныд, сэні лоӧ и сьӧлӧмныд.
Синмыд — вир-яйтӧ югдӧдысь.
Синмыд кӧ бур, став вир-яйыд югыдын.
Синмыд кӧ лёк, став вир-яйыд пемыдын.
Югыдыс кӧ тэ пытшкын пемыд, сэки кутшӧм ачыс пемыдыс?
Морт оз вермы кесъявны кык ыджыдлы. Ӧтисӧ кӧ радейтӧ, мӧдсӧ мустӧмтӧ. Ӧтисӧ кӧ пыдди пуктӧ, мӧдсӧ увтыртӧ.
Ті онӧ вермӧй кесъявны Енлы, кесъяланныд кӧ озырлунлы».
«Та вӧсна шуа тіянлы: энӧ майшасьӧй сёян-юан да паськӧм вӧсна.
Олӧмныд абу ӧмӧй донаджык сёян-юанысь да вир-яйныд паськӧмысь?
Видзӧдлӧй енэжвыв лэбачьяс вылӧ: найӧ оз кӧдзны, оз вундыны, оз чукӧртны йӧртӧдъясӧ, но енэжвыв Батьныд вердӧ найӧс.
Ті ӧмӧй наысь абу донаджыкӧсь?
Вермас-ӧ тіян пиысь кодкӧ зільӧмӧн-тӧждысьӧмӧн нюжӧдыштны ассьыс олан нэмсӧ?
Мыйла паськӧмныд вӧсна майшасянныд?
Видзӧдлӧй видзвыв дзоридзьяслӧн быдмӧм вылӧ: найӧ оз мырсьыны, оз печкыны.
Висьтала тіянлы: ачыс Соломон став озырлун дырйиыс эз пасьтасьлы весиг ӧти татшӧм дзоридзысь мичаджыка.
Енмыс кӧ тадзи пасьтӧдӧ видзвыв турунӧс, коді талун быдмӧ, а аски шыбитасны пачӧ, оз ӧмӧй Сійӧ пасьтӧд тіянӧс, этша эскысьяс.
Та вӧсна энӧ шуалӧй: “Мый сёйны-юны да мый пасьтавны?
” Тайӧ ставыс майшӧдлӧ ентӧдтӧмъясӧс.
Но енэжвыв Батьныд тӧдӧ, мый ставыс тайӧ колӧ тіянлы.
Медводз корсьӧй Енлысь Юралӧмсӧ да Сылысь веськыдлунсӧ, сэки тіян ставыс тайӧ лоӧ.
Энӧ майшасьӧй аскиа луныс вӧсна, аскиыс ас вӧснаыс тӧждысяс. Быд лунлы аслас тӧждыс тырмӧ».
7 юр.
«Энӧ мыждӧй, сэки тіянӧс оз мыждыны. Ӧд тіян мыждӧмныд ас выланыд бӧр воас.
Асланыд мурталӧм серти тіянлы мурталасны.
Кыдзи тэ верман вокыд синмысь ёгторсӧ аддзыны, аслад синмысь кӧ керсӧ он казяв?
Кыдзи тэ верман шуны вокыдлы: “Вай перъя синсьыд ёгторсӧ”, аслад синмад кӧ кер?
Кык бана шаньга.
Водзджык аслад синмысь керсӧ перйы, сэки вокыдлӧн синмысь ёгторсӧ верман перйыны.
Вежасӧ энӧ сетӧй понъяслы да донаторнытӧ энӧ коялӧй порсьяслы. Вӧчанныд кӧ тадзи, понъяс уськӧдчасны да косявласны тіянӧс, а порсьяс ставсӧ таляласны».
«Корӧй, и тіянлы сетасны, корсьӧй, и ті аддзанныд, игӧдчӧй, и тіянлы восьтасны.
Ӧд корысьлы сетӧны, корсьысьлы сюрӧ да игӧдчысьлы восьтӧны.
Коді тіян пӧвстысь пиыслы сетас из, корас кӧ сійӧ нянь?
Сетас-ӧ змейӧс, корас кӧ пиыс чери?
Ті лёкӧсь, а сямманныд бурсӧ сетны асланыд ныв-пилы. Дерт нин, енэжвыв Батьныд уна пӧвстӧн бурсӧ сетас Сылысь корысьяслы.
Мый кӧсъянныд, медым йӧзыс вӧчисны тіянлы, сійӧс и ті вӧчӧй налы.
Тадзи Индӧд да пророк гижӧдъяс велӧдӧны».
«Пырӧй векньыд ӧдзӧсӧд. Ӧд паськыд ӧдзӧсыс да паськыд туйыс кулӧмӧ нуӧдӧны, и унаӧн сэті мунӧны. Векньыд ӧдзӧсыс да векньыд туйыс олӧмӧ нуӧдӧны, и тайӧс аддзысьыс этша».
«Видзӧй асьнытӧ ылӧгпророкъясысь. Найӧ локтӧны тіян дінӧ ыжъяс кодьӧн, а збыльвылас найӧ горш кӧинъяс.
Вотӧсныс серти ті тӧдмаланныд найӧс.
Чукӧртлӧны ӧмӧй лежнӧг вылысь виноград да тусяпу вылысь инжир?
Бур пу вайӧ бур вотӧс, лёк пу — лёкӧс.
Бур пу оз вермы вайны лёк вотӧс, лёк пу — бур вотӧс.
Пуыс кӧ оз вай бур вотӧс, сійӧс кералӧны да шыбитӧны биӧ.
Тадзи вайӧм вотӧс сертиыс ті тӧдмаланныд ылӧгпророкъясӧс.
Оз быдӧн, коді шуӧ Меным: “Господьӧй, Господьӧй”, пыр Енэжвыв Юраланінӧ. Пырас сӧмын Менам енэжвыв Батьлӧн кӧсйӧм серти олысь.
Сійӧ лунӧ Меным унаӧн шуасны: “Господьӧй, Господьӧй, эг-ӧ Тэнад нимсянь ми пророкалӧй?
Эг-ӧ Тэнад нимӧн пеж ловъясӧс вӧтлалӧй?
Эг-ӧ Тэнад нимӧн шензьӧданаторъяс вӧчалӧй?
” Сэки Ме вочавидза налы: “Ог тӧд тіянӧс.
Мунӧй Ме дорысь, лёксӧ вӧчысьяс.”»
«Коді кылӧ Менсьым кывъясӧс да олӧ на серти, сійӧ из вылӧ керкасӧ лэптысь сюсь вежӧра морт кодь. Чорыда кӧ зэрмас, юяс ойдасны, ыджыд тӧвныр петас да керкасӧ мӧдас пӧрӧдны, тайӧ керкаыс сэки оз пӧр, ӧд сійӧс из вылӧ лэптӧма.
А коді кылӧ Менсьым кывъясӧс да оз ов на серти, сійӧ лыа вылӧ керкасӧ лэптысь вежӧртӧм морт кодь. Чорыда кӧ зэрмас, юяс ойдасны, ыджыд тӧвныр петас да керкасӧ мӧдас пӧрӧдны, тайӧ керкаыс сэки дзоньнас киссяс».
Исусӧс кывзӧм бӧрын йӧзыс ёна шензисны Сылӧн велӧдӧмысь.
Ӧд Исус велӧдіс ыджыдалысьӧ пуктӧм морт моз, эз Индӧдӧ велӧдысьяс да фарисейяс моз.
8 юр.
Кор Исус лэччис керӧсысь, уна йӧз вӧтчис Сы бӧрся.
Проказаӧн висьысь матыстчис Исус дінӧ да Сы водзӧ уськӧдчӧмӧн шуис: «Господьӧй, кӧсъян кӧ, верман менӧ сӧстӧммӧдны».
Исус нюжӧдіс кисӧ, инмӧдчыліс сы дінӧ да шуис: «Кӧсъя. Сӧстӧммы».
Висьысьлӧн дойясыс дзик пыр бырисны, да сійӧ бурдіс.
Исус шуис сылы: «Та йылысь некодлы эн висьтав. Мун, петкӧдлы асьтӧ поплы, сэсся Мӧисей тшӧктӧм серти вай вись. Тадзи тӧдмаласны тэнад бурдӧм йылысь».
Исус пырис Капернаум карӧ. Сы дінӧ локтіс шыпуртаяслӧн веськӧдлысь да корис отсавны: «Господьӧй, менам кесйӧгӧй гортам куйлӧ, ки-коксӧ вӧрзьӧдны оз вермы, вывті сьӧкыда висьӧ».
Исус шуис сылы: «Ме локта, бурдӧда сійӧс».
Веськӧдлысь воча шуис: «Господьӧй, ме ог сулав сы доныс, медым Тэ пырин менам керка вевт улӧ. Сӧмын кыв шу, и кесйӧгӧй бурдас.
Ме ачым киподувса морт, но и менам кипод улын эмӧсь шыпуртаяс. Ӧтилы шуа: “Мун”, и сійӧ мунӧ. Мӧдлы тшӧкта локны, и сійӧ локтӧ. Кесйӧглы шуа: “Вӧч тайӧс”, и сійӧ вӧчӧ».
Тайӧ мортыслӧн висьталӧмыс шензьӧдіс Исусӧс. Сійӧ шуис Ас бӧрсяыс мунысьяслы: «Веськыда висьтала тіянлы: татшӧм ыджыд эскӧмсӧ Ме весиг Израильысь эг аддзыв.
Висьтала тіянлы: унаӧн локтасны асыввылысь да рытыввылысь Енэжвыв Юраланінӧ. Найӧ ӧти пызан сайӧ пуксясны Ӧвраамкӧд, Исааккӧд да Яковкӧд. А кодлы водзысяньыс вӧлі дасьтӧма Енлысь Юраланінсӧ, найӧс шыбитасны пемыдас. Сэні лоӧ бӧрдӧм да пинь йирӧм».
Сэсся шыпуртаяслӧн веськӧдлысьлы Исус шуис: «Мун гортад. Мед лоас эскӧмыд серти».
Веськӧдлысьлӧн кесйӧгыс дзик пыр бурдіс.
Исус локтіс Петыр ордӧ. Сэні аддзис, мый Петыр гӧтырлӧн мамыс куйлӧ вольпасьын биа висьӧмӧн. Исус инмӧдчыліс висьысьлы киас, и биа висьӧмыс эновтіс сійӧс. Ань чеччис да пондіс кесъявны налы.
Рытнас Исус дінӧ вайӧдісны пеж лолӧн кутӧм уна йӧзӧс.
Исус кыв шуӧмӧн вӧтлаліс пеж ловъясӧс, бурдӧдаліс висьысьясӧс, медым иніс Исай пророклӧн шуӧмыс: — Миянлысь нёрпалӧмъяс Сійӧ босьтіс да миянлысь висьӧмъяс Сійӧ вештіс.
Ас гӧгӧрсьыс уна йӧзӧс казялӧм бӧрын Исус тшӧктіс велӧдчысьясыслы вуджны ты мӧдлапӧлӧ.
Индӧдӧ велӧдысьясысь ӧти матыстчис Сы дінӧ да шуис: «Велӧдысьӧй, ме быдлаӧ Тэ бӧрся муна».
Исус шуис сылы: «Ручьяслӧн эмӧсь пырмӧсъяс, и енэжвыв лэбачьяслӧн эмӧсь позъяс, сӧмын Морт Пилӧн шойччаніныс абу».
Исуслӧн ӧти велӧдчысь корис: «Господьӧй, лэдзлы менӧ медводз батьӧс дзебны».
Исус шуис сылы: «Лок Ме бӧрся, кулӧмаяс мед дзебасны кулӧмаяснысӧ».
Исус пуксис пыжӧ, велӧдчысьясыс Сы бӧрся.
Виччысьтӧг ты вылын кыптіс ыджыд тӧвныр, ёна гызис, да пыжыс кутіс тырны ванас. Исус вӧлі узьӧ.
Велӧдчысьяс садьмӧдісны Сійӧс шуалӧмӧн: «Господьӧй, мезды миянӧс. Вӧям.»
Исус шуис: «Мыйла ті сэтшӧм полысьӧсь, этша эскысьяс?»
Сэсся Исус чеччис, ӧлӧдіс тӧвсӧ да васӧ, и вӧвлытӧм чӧв-лӧнь пуксис.
Велӧдчысьяс чуймисны, ӧта-мӧдныслысь пондісны юасьны: «Коді Сійӧ? Весиг тӧлыс да ваыс кывзысьӧ Сылысь».
Та бӧрти Исус вуджис ты мӧдлапӧлӧ, Гергесин муӧ. Сылы воча петісны шойгу кыртаысь кык морт, пеж ловъясӧн кутӧмаяс. Найӧ вӧліны лёксьыс-лёкӧсь, та вӧсна йӧзыс полісны ветлыны тайӧ туйӧдыс.
«Мый Тэныд миянсянь колӧ, Исус, Ен Пи?
Локтін-ӧ индӧм кадысь водзджык песны миянӧс?» — горзісны найӧ.
Ылынкодь йирсис ыджыд порсь чукӧр.
Пеж ловъяс корисны Исусӧс: «Вӧтлан кӧ миянӧс, ысты порсьяс пытшкӧ».
Исус шуис налы: «Мунӧй.»
Пеж ловъяс петісны да пырисны порсьяс пытшкӧ.
А порсьяс кыр йывсянь уськӧдчисны тыӧ да ставныс пӧдісны.
Порсь видзысьяс котӧрӧн пышйисны сэтысь карӧ да висьталісны сэні аддзывлӧмтор йывсьыс, пеж ловъясӧс вӧтлӧм йылысь.
Сэки став карыс петіс Исуслы воча.
Исусӧс аддзӧм бӧрын йӧзыс корисны Сійӧс мунны налӧн муысь.
9 юр.
Исус пуксис пыжӧ, бӧр вуджис тысӧ да воис Аслас карӧ.
Сэні вайисны Сы дінӧ вольпасьын куйлысь, вӧрзьӧдчыны вермытӧм мортӧс.
Налысь эскӧмсӧ аддзӧмӧн Исус шуис висьысьлы: «Эн пов, пиӧй.
Тэнсьыд мыжъястӧ прӧститӧма».
Индӧдӧ велӧдысьясысь кодсюрӧ ас пытшканыс мӧвпалісны: «Сійӧ Енмӧс омӧльтӧ».
Налысь мӧвпъяссӧ тӧдӧмӧн Исус шуис: «Мыйла сьӧлӧманыд лэдзанныд лёк мӧвпъяссӧ?
Мый кокньыдджык шуны: “Тэнсьыд мыжъястӧ прӧститӧма” либӧ “Чеччы да ветлы”?
Ӧні ті тӧдмаланныд: Морт Пи вермӧ прӧститны мыжъяс му вылын». Сэсся шуис висьысьлы: «Чеччы, босьт вольпасьтӧ да мун гортад».
Сійӧ чеччис да муніс гортас.
Тайӧс аддзӧм бӧрын йӧзыс шензьӧмӧн ошкисны Енмӧс, ӧд та ыджда вын сетӧма мувывса йӧзлы.
Исус водзӧ муніс да аддзис вотчукӧртанінын пукалысь Матвей нима мортӧс. Исус шуис сылы: «Лок Ме бӧрся».
Сійӧ чеччис да муніс Исус бӧрся.
Исус сёйӧ вӧлі Матвей ордын, кор сэтчӧ локтісны вот перйысьяс да мукӧд мыжа йӧз. Исускӧд да Сылӧн велӧдчысьяскӧд найӧ пукалісны ӧти пызан сайын.
Тайӧс аддзисны фарисейяс да юалісны Исуслӧн велӧдчысьяслысь: «Мыйла тіян Велӧдысьныд сёйӧ-юӧ вот перйысьяскӧд да мыжа йӧзкӧд?»
Исус кыліс тайӧс да шуис налы: «Дзоньвидзалы бурдӧдысьыд оз ков, сійӧ висьысьлы колӧ. “Буралӧм тіянсянь кӧсъя, ог вись вайӧм” — мунӧй да гӧгӧрвоӧй тайӧ кывъяссӧ.
Ме локті корны Ен дінӧ мыжаясӧс, эг веськыда олысьясӧс».
Иоанлӧн велӧдчысьясыс локтісны Исус дінӧ да юалісны: «Ми уна видзалам, фарисейяс тшӧтш уна видзалӧны. Мыйла Тэнад велӧдчысьясыд оз?»
Исус вочавидзис: «Вермӧны-ӧ ёртъясыс шогавны кӧлысь вылын, кор верӧспуыс накӧд?
Воасны на сійӧ лунъясыс, кор колясны верӧспутӧг, сэки и видзаласны.
Важ паськӧмтӧ оз дӧмны выль дӧра дӧмасӧн. Тадзи кӧ вӧчан, выль дӧмас дортіыс нёйдас-косяссяс паськӧмыд, розьыс ёнджыка на ыдждас.
Выль винатӧ оз кисьтны важ кучик дозйӧ.
Тадзи кӧ вӧчан, кучик дозйыс потас, и винаыс киссяс.
Выль винатӧ кисьтӧны выль кучик дозйӧ. Сэки кыкнанныс дзонь колясны».
Исуслӧн сёрнитігкості локтіс Сы дінӧ ӧти юралысь да пидзӧс вылас уськӧдчӧмӧн корис: «Менам нылӧй муртса на куліс. Лок, пуктыв сы вылӧ китӧ, мед сійӧ ловзяс».
Исус чеччис да муніс велӧдчысьясыскӧд юралысь бӧрся.
Исус дінӧ мышсяньыс матыстчис ань да инмӧдчыліс Исуслы паськӧм дорышас. Дас кык во чӧж тайӧ аньыс висьӧма вир мунӧмӧн. Сійӧ мӧвпаліс: «Сӧмын инмӧдчыла кӧ Сылӧн паськӧмӧ, бурда».
Исус бергӧдчис, аддзис аньӧс да шуис: «Эн пов, нылӧй.
Эскӧмыд мездіс тэнӧ».
Аньыс дзик пыр бурдіс.
Юралысь керкаӧ воӧм мысти Исус аддзис пӧлянӧн ворсысьясӧс да гораа бӧрдысь йӧзӧс. Исус шуис налы: «Мунӧй татысь. Нылыс эз кув, сійӧ узьӧ».
Исус вылын пондісны серавны.
Йӧзӧс вӧтлӧм бӧрын Исус пырис нывка дінӧ да босьтіс сійӧс киӧдыс. Нывка чеччис.
Та йылысь юӧрыс разаліс сэтчӧс му пасьтала.
Сэтысь мунігӧн Исус бӧрся вӧтчисны кык синтӧм морт. Найӧ горӧдісны: «Ло бур сьӧлӧма миян дінӧ, Давид Пи.»
Исус пырис керкаӧ, синтӧмъяс Сы бӧрся.
Исус юаліс налысь: «Эсканныд-ӧ, мый Ме верма бурдӧдны тіянӧс?»
Найӧ шуисны: «Эскам, Господьӧй.»
Сэки Исус инмӧдчыліс налы синмас да шуис: «Мед лоӧ тіянлы эскӧм сертиныд».
Найӧ кутісны аддзыны.
Исус кыкнаннысӧ чорыда ӧлӧдіс: «Та йылысь некодлы энӧ висьтавлӧй».
Но керкаысь петӧм бӧрын найӧ висьтавлісны Исус йылысь сэтчӧс му пасьталаыс.
Бурдӧмаяслӧн мунӧм бӧрын Исус дінӧ вайӧдісны пеж лолӧн кутӧм сёрниттӧм мортӧс.
Исус вӧтліс сы пытшкысь пеж ловсӧ, да мортыс пондіс сёрнитны.
Йӧзыс шензисны, татшӧмторйыс пӧ Израиль муын эз на вӧвлы.
А фарисейяс шуисны, Сійӧ пӧ вӧтлалӧ пеж ловъясӧс налӧн юралысь вынӧн.
Исус ветліс-кытшовтіс став сикт-карсӧ. Сійӧ велӧдіс синагогаясын, висьтавліс Ен Юралӧм йылысь Евангелльӧ да бурдӧдаліс йӧзсӧ быд висьӧм-доймӧмысь.
Йӧз вылӧ видзӧдігӧн Исуслӧн сьӧлӧмыс нормис, ӧд найӧ вӧліны сэтшӧм мудзӧсь, эбӧстӧм-вынтӧмӧсь, видзысьтӧг кольӧм ыжъяс кодьӧсь.
Сійӧ шуис велӧдчысьясыслы: «Вунданыс уна, а вундысьыс этша. Кевмӧй вунданінын Ыджыдыслы, мед ыстас Аслас вунданінӧ уджалысьясӧс».
10 юр.
Исус корис дас кыкнан велӧдчысьсӧ да сетіс налы вын вӧтлавны пеж ловъясӧс да бурдӧдавны йӧзӧс быд висьӧм-доймӧмысь.
Дас кык апостолсӧ шуисны тадзи: Симон, кодӧс шуисны Петырӧн, сылӧн Ӧндрей вокыс, Зеведей Яков да сылӧн Иоан вокыс, Филип, Варфоломей, Фома, вот перйысь Матвей, Алфей Яков, Леввей, кодӧс шуисны Фаддейӧн, Кананит Симон да Искариот Иуда, Исусӧс вузалысь.
Тайӧ дас кыксӧ мӧдӧдігӧн Исус велӧдіс найӧс:
«Йӧз муясӧ энӧ мунӧй, Самария каръясӧ энӧ пырӧй.
Мунӧй израильса вошӧм ыжъяс дінӧ да юӧртӧй: “Енэжвыв Юралӧмыс матын нин”.
Висьысьясӧс бурдӧдалӧй, кулӧмаясӧс ловзьӧдӧй, проказаысь сӧстӧммӧдӧй, пеж ловъясӧс вӧтлалӧй.
Дон мынтытӧг босьтінныд, дон босьттӧг и сетӧй.
Туяныд энӧ босьтӧй зарни, эзысь, ыргӧн, ноп, вежан кӧм-пась да бедь. Ӧд уджалысь кынӧмпӧттӧг оз коль.
Сиктӧ-карӧ пыриганыд корсьӧй туяна-шогмана мортӧс, мунтӧдзныд олӧй сы ордын.
Керкаас пыриганыд сиӧй лӧнь олӧм.
Олысьясыс кӧ шогмӧны, бурсиӧмныд коляс налы.
Оз кӧ шогмыны, бурсиӧмныд бергӧдчас тіянлы.
Оз кӧ сибӧдны-кывзыны тіянӧс, сэки сійӧ керкасьыс либӧ карсьыс петіганыд пыркӧдӧй коксьыныд буссӧ.
Веськыда висьтала тіянлы: Мыждан лунӧ Содом да Гомора каръяслы лоас кокньыдджык сійӧ карыслы дорысь.
Ме мӧдӧда тіянӧс ыжъясӧс моз кӧинъяс пӧвстӧ. Лоӧй змей кодь сюсьӧсь да гулю кодь рамӧсь.
Видзчысьӧй йӧзысь, ӧд найӧ кыскасны тіянӧс ёрдӧ да асланыс синагогаясын нӧйтасны тіянӧс. Ме вӧсна нуӧдасны тіянӧс юралысьяс да ӧксыяс водзӧ, медым найӧ да ентӧдтӧмъяс тӧдісны Ме йылысь.
Кор нуӧдасны тіянӧс ёрдӧ, энӧ майшасьӧй, кыдзи да мый шуны, ӧд сійӧ кадас тіянлы воасны колана кывъяс. Сэки онӧ ті кутӧй сёрнитны, но Ен Батьныдлӧн Лолыс сёрнитас тіян пыр.
Вокыс воксӧ сетас вины, батьыс — писӧ.
Ныв-пи сувтасны бать-мамыслы паныд да виасны найӧс. Менам ним вӧсна унаӧн мустӧмтасны тіянӧс, но сьӧкыдсӧ помӧдз нуысь мездмас.
Ӧти карысь кӧ тіянӧс вӧтласны, пышйӧй мӧдӧ.
Веськыда висьтала тіянлы: Израильысь став карсӧ кытшовттӧдзныд на Морт Пи локтас.
Велӧдчысь абу ыджыдджык велӧдысьысь, да кесйӧг абу ыджыдджык аслас ыджыдысь. Велӧдчысьлы тырмымӧн быдмыны велӧдысьыс кодьӧдз, кесйӧглы — ыджыдыс кодьӧдз.
Керка кутысьӧс кӧ Вельзевулӧн шуасны, сылысь гортсасӧ лёкджыка на нимтасны.
Энӧ полӧй тіянӧс мустӧмтысьясысь. Став дзебӧмаыс тыдовтчас да став гусяыс йӧзасяс.
Мый Ме шуа тіянлы пемыдын, висьталӧй югыдын.
Пеляныд вашкӧдӧмасӧ юӧртӧй керка вывсянь.
Энӧ полӧй вир-яйтӧ виысьясысь, ловтӧ найӧ вины оз вермыны.
Полӧй Сыысь, коді вермӧ бырӧдны ловтӧ да вир-яйтӧ куслытӧм биын.
Оз-ӧ сӧмын ӧти урысь вузавны кык пышкайӧс?
На пиысь весиг ӧти оз усь муӧ тіян Батьлӧн шутӧг.
А тіянлысь став юрсинытӧ лыддьӧма.
Сідзкӧ, энӧ полӧй, ті ӧд донаджыкӧсь пышкайясысь».
«Коді оз яндысь Меысь йӧз водзын, сыысь Ме ог яндысь Аслам енэжвыв Бать водзын.
Коді соссяс Меысь йӧз водзын, сыысь Ме сосся Аслам енэжвыв Бать водзын.
Энӧ мӧвпалӧй, мый Ме локті вайны му вылӧ лӧнь олӧм.
Локті вайны эг лӧнь олӧм, но шыпурт.
Ме локті торйӧдны писӧ батьсьыс, нывсӧ мамсьыс, моньсӧ энькасьыс.
Мортлы паныд мунысьыс — сылӧн гортсаяс.
Кодлы бать-мамыс Ме дорысь мусаджык, Меным сійӧ оз шогмы.
Кодлы ныв-пиыс Ме дорысь мусаджык, Меным сійӧ оз шогмы.
Коді оз босьт ассьыс крестсӧ да оз мун Ме бӧрся, Меным сійӧ оз шогмы.
Ассьыс олӧмсӧ видзысь воштас сійӧс, Ме вӧсна олӧмсӧ воштысь аддзас сійӧс.
Тіянӧс сибӧдысь Менӧ сибӧдӧ, а Менӧ сибӧдысь сибӧдӧ Менӧ Мӧдӧдысьӧс.
Коді пророкӧс сибӧдас пророкӧс моз, сылы сетасны пророклы кодь удждон.
Коді веськыда олысьӧс сибӧдас веськыда олысьӧс моз, сылы сетасны веськыда олысьлы кодь удждон.
Веськыда висьтала тіянлы: коді кӧдзыд ваӧн юкталас тайӧ медічӧтъясысь ӧтиӧс Менсьым велӧдчысьӧс моз, сійӧ оз коль удждонтӧг».
11 юр.
Дас кыкнан велӧдчысьсӧ велӧдӧм-туйдӧдӧм бӧрын Исус муніс юӧртны да велӧдны мукӧд каръясӧ.
Дзескыдінын пукалігас Иоан кывліс Кристослӧн уджъяс йылысь. Сійӧ мӧдӧдіс ассьыс кык велӧдчысьсӧ юавны Исуслысь: «Тэ-ӧ сійӧ Локтысьыс? Колӧ-ӧ миянлы мӧдӧс виччысьны?»
Исус вочавидзис: «Мунӧй, висьталӧй Иоанлы, мый кыланныд да аддзанныд:
— Синтӧмъяс аддзӧны, коктӧмъяс ветлӧны, проказаысь сӧстӧммӧны, пельтӧмъяс кылӧны, кулӧмаяс ловзьӧны, коньӧръяслы Бур Юӧр висьтавлӧны. Шуда сійӧ, коді оз ылав Меысь».
Кор Иоанлӧн велӧдчысьясыс мунісны, Исус пондіс висьтавны йӧзыслы Иоан йылысь: «Мый видзӧдны ветлінныд овтӧминас?
Тӧлӧн вӧрӧдысь идзас-ӧ?
Мый видзӧдны ветлінныд?
Мича да озыр паськӧма мортӧс?
Татшӧм паськӧма йӧзыс олӧны ӧксы оланінъясын.
Кодӧс видзӧдны ветлінныд?
Пророкӧс-ӧ?
Шуа тіянлы: ті аддзылінныд пророкысь ыджыдӧс.
Сы йылысь гижӧма:
— Ыста Ассьым юӧртысьӧс Тэ водзвылын, сійӧ Тэныд туйсӧ дасьтас.
Веськыда висьтала тіянлы: му вылын чужысьясысь эз вӧвлы Пыртысь Иоанысь ыджыдджыкыс, но Енэжвыв Юраланінын медічӧтыс сы дорысь ыджыдджык.
Пыртысь Иоан лунъяссянь да ӧнӧдз Енэжвыв Юралӧмсӧ дзескӧдӧны, и паныд мунысьяс зільӧны мырддьыны сійӧс. Став пророкыс да Индӧдыс Иоанӧдз на юӧртлісны Енлӧн Юралӧм йылысь.
Кӧсъянныд кӧ тӧдны, сійӧ буретш Илля, кодлы колӧ вӧлі локны.
Кодлӧн эм пель, мед кылӧ.
Кодкӧд Ме ӧткодяла ӧнія олысьясӧс?
Найӧ изэрд вылын пукалысь челядь кодьӧсь, кодъяс ёртъясыслы шуалӧны: “Ми ворсім тіянлы пӧлянӧн, а ті энӧ йӧктӧй. Ми сьылім тіянлы бӧрдӧдчанкывъяс, а ті энӧ бӧрдӧй”.
Иоан локтіс, оз сёй, вина оз ю, шуӧны, сы пытшкын пӧ пеж лов.
Морт Пи локтіс, сёйӧ-юӧ, Сы йылысь шуӧны, рушку тыртысь да вина юысь пӧ, вот перйысьяскӧд да мыжаяскӧд ёртасьысь пӧ.
Мывкыдлунсӧ пыдди пуктӧны мывкыдлуныслӧн челядьыс».
Сэсся Исус пондіс мыжавны каръяс сыысь, мый сэтчӧс йӧзыс эз бергӧдчыны мыжъяссьыныс, ӧд тайӧ каръясас Исус вӧчис медуна шензьӧданатор.
«Курыд шог тэныд, Коразин кар.
Курыд шог тэныд, Випсаида кар.
Тир да Сидон каръясын кӧ аддзылісны тіянын кодь вӧчӧм шензьӧданаторъяссӧ, сэки эськӧ сэтчӧс олысьясыс важӧн нин бергӧдчисны мыжъяссьыныс, шогалан паськӧм пасьталісны да юрнысӧ пӧимӧн киськалісны. Висьтала тіянлы: Мыждан лунӧ Тир да Сидон каръяслы лоас кокньыдджык тіянлы дорысь.
Тэ, Капернаум кар, чайтан енэжӧдз кыпӧдчыны? Ад пыдӧсӧдз усян. Содом карын кӧ аддзылісны тіянын кодь вӧчӧм шензьӧданаторъяссӧ, сійӧ эськӧ ӧні на сулаліс. Висьтала тіянлы: Мыждан лунӧ Содом мулы лоас кокньыдджык тэныд дорысь».
Сэки Исус шуис: «Ошка Тэнӧ, Батьӧй, енэжыс да муыс вылын Ыджыдалысьӧс. Тэ дзебин тайӧс сюсь вежӧраясысь да восьтін кага коддьӧмлы.
Татшӧм вӧлі Тэнад бур кӧсйӧмыд, Батьӧй.
Батьӧй ставсӧ сетіс Меным. Сӧмын Батьыс тӧдӧ Писӧ, да сӧмын Пиыс тӧдӧ Батьсӧ, и нӧшта сійӧ, кодлы Пиыс кӧсйӧ восьтны.
Локтӧй Ме дінӧ мудзӧмаяс да сьӧкыда мырсьысьяс, Ме тіянӧс шойччӧда.
Босьтӧй Менсьым сийӧсӧс да велӧдчӧй Месянь, ӧд Ме рам да небыд сьӧлӧма. Сэки тіян ловлы сюрас шойччӧг. Ӧд Менам сийӧсӧй оз личкы, да Менам нӧбйӧй оз сьӧктӧд».
12 юр.
Шойччан лунӧ Исус мунӧ вӧлі кӧдзӧм муяс вомӧн.
Велӧдчысьяслӧн кынӧмыс кутіс сюмавны, и мунігмозныс найӧ пондісны нетшкыны шепсӧ да сёйны.
Тайӧс аддзылісны фарисейяс да шуисны Исуслы: «Видзӧдлы, мый Тэнад велӧдчысьясыд вӧчӧны. Тайӧс оз позь вӧчны шойччан лунӧ».
Исус воча шуис: «Ті ӧмӧй энӧ лыддьылӧй, мый вӧчис Давид, кор тшыгъяліс аслас йӧзкӧд?
Сійӧ пырис Ен керкаӧ да сёйис аслас йӧзкӧд Енлы вайӧм няньсӧ. Тайӧс налы вӧчнысӧ эз позь, сӧмын попъяслы позис.
Ті ӧмӧй энӧ лыддьылӧй Индӧдысь, мый шойччан лунӧ попъяс уджалӧны крамын, но шойччан лунсӧ торкалӧмысь найӧ абу мыжаӧсь.
Висьтала тіянлы: тані Сійӧ, коді крам дорысь ыджыдджык. Тӧдінныд кӧ тайӧс, мый “буралӧм тіянсянь кӧсъя, ог вись вайӧм”, сэки эськӧ энӧ мыжалӧй мыжтӧмъясӧс. Морт Пи шойччан лун вылын ыджыдыс».
Сэтысь мунӧм бӧрын Исус пырис синагогаӧ.
Сэні вӧлі косьмӧм киа морт.
Фарисейяс корсисны помка мыжавны Исусӧс да юалісны Сылысь: «Позьӧ-ӧ шойччан лунӧ бурдӧднысӧ?»
Исус вочавидзис: «Тіян ыжныд кӧ шойччан лунӧ усяс гуӧ, онӧ ӧмӧй лэптӧй сійӧс сэтысь?
Мортыс абу ӧмӧй донаджык ыжысь?
Сідзкӧ, бурсӧ позьӧ вӧчны шойччан лунӧ».
Сэсся Исус шуис висьысьлы: «Нюжӧд китӧ».
Сійӧ нюжӧдіс, и киыс пырысь-пыр бурдіс, лои мӧдыс кодь.
Сэки фарисейяс петісны да панісны сёрни Исусӧс виӧм йылысь.
Кор Исус тӧдмаліс та йылысь, муніс сэтысь.
Сы бӧрся вӧтчис уна йӧз.
Исус бурдӧдаліс висьысьясӧс да ӧлӧдіс найӧс Сы йылысь висьтавлӧмысь. Тадзи иніс Исай пророклӧн шуӧмыс:
— Тайӧ Менам бӧрйӧм кесъялысьӧй, сьӧлӧм бурӧдысьӧй да олан гажӧй.
Ме сета Сылы Ассьым Лолӧс. Сійӧ юӧртас Менсьым веськыда мыждӧмӧс быд кыла войтырлы.
Оз вензьы, оз горзы Сійӧ, ывлаысь Сійӧс он кыв.
Веськыда мыждӧмсӧ пӧрттӧдз Сійӧ идзастор оз чег да дзузган би оз кусӧд. Сы вылӧ лача пондас кутны быд кыла войтыр.
Исус дінӧ вайӧдісны пеж лолӧн кутӧмаӧс. Тайӧ мортыс вӧлі синтӧм да эз сёрнит.
Исус бурдӧдіс сійӧс, мӧдыс пондіс сёрнитны да аддзыны.
Став йӧзыс чуймисны, ӧта-мӧдныслысь юасисны: «Збыльысь-ӧ сійӧ Давид Пи?»
Тайӧс кывлісны фарисейяс да шуисны, Сійӧ пӧ вӧтлалӧ пеж ловъясӧс налӧн Вельзевул юралысь вынӧн.
Налысь мӧвпъяссӧ тӧдӧмӧн Исус шуис: «Ас муын олысьяс кӧ ас костаныс тышкасьӧны, тайӧ муыс кушмас.
Зыксьӧмӧн олысь карыд да керкаыд дыр оз сулав.
Сӧтанаыс кӧ сӧтанасӧ вӧтлӧ, сійӧ аслыс паныд тышкасьӧ. Дыр-ӧ кутчысяс сылӧн ыджыдалӧмыс?
Ме кӧ вӧтлала пеж ловъясӧс Вельзевул вынӧн, кутшӧм вынӧн, сідзкӧ, тіян йӧзыд вӧтлалӧны?
Найӧ тіянӧс мыждасны.
Ме кӧ Ен Лолӧн вӧтлала пеж ловъясӧс, сідзкӧ, Енлӧн Юралӧмыс воис тіянӧдз.
Вермас-ӧ кодкӧ пырны вына мортлӧн керкаӧ да сійӧс кӧртавтӧг босьтны сылысь эмбурсӧ? Вына мортӧс кӧрталӧм бӧрын сӧмын вермас босьтны эмбурсӧ.
Коді абу Мекӧд, сійӧ Меным паныд, коді оз чукӧрт Мекӧд, сійӧ разӧдӧ.
Та вӧсна висьтала тіянлы: мортлысь быд мыж да быд омӧльтӧм лоӧ прӧститӧма, но Вежа Лолӧс омӧльтӧм оз ло прӧститӧма.
Лёкӧдан кӧ Морт Пиӧс, лоан прӧститӧма.
Лёкӧдан кӧ Вежа Лолӧс, он ло прӧститӧма тайӧ олӧмас, весиг локтанаас».
«Бур пу вайӧ бур вотӧс, лёк пу — лёкӧс. Путӧ донъялӧны вотӧс сертиыс.
Вижля йылӧм.
Верманныд-ӧ бурсӧ висьтавны, асьныд кӧ лёкӧсь?
Ӧд мыйӧн тырӧма мортыслӧн сьӧлӧмыс, сійӧ вомсьыс и петӧ.
Бур морт аслас бур видзанінысь бурсӧ петкӧдӧ, лёк морт аслас лёк видзанінысь лёксӧ петкӧдӧ.
Шуа тіянлы: быд ковтӧм кывйысь Мыждан лунӧ ковмас кывкутны. Аслад кывъясысь мыжман, аслад кывъясысь мездман мыждӧмысь».
Сэки фарисейяс да Индӧдӧ велӧдысьяс пиысь кодсюрӧ корисны: «Велӧдысь, петкӧдлы миянлы индысьпас».
Исус воча шуис: «Лёк да пежас ылалӧм йӧз кӧсйӧны аддзывны индысьпас, но Иона пророк пасысь кындзи оз ло налы мӧдыс. Куим лун да куим вой Иона вӧлі ыджыд чери рушкуын. Тадзи Морт Пи лоӧ му пыдӧсын куим лун да куим вой.
Ниневия карын олысьяс сувтасны Мыждан лунӧ ӧнія олысьяскӧд да мыжаласны найӧс. Ӧд Ионалӧн юӧртӧм бӧрын ниневияса йӧз бергӧдчисны асланыс мыжъясысь. Тані Иона дорысь ыджыдджык.
Лунвыв муысь ӧксы-ань сувтас Мыждан лунӧ ӧнія олысьяскӧд да мыжалас найӧс. Ӧд сійӧ му помсяньыс воліс кывзыны Соломонлысь мывкыд сёрнисӧ. Тані Соломон дорысь ыджыдджык».
«Морт пытшкысь петӧм бӧрын пеж лов шӧйтӧ ватӧминъясті, корсьӧ шойччанін да оз аддзы.
Сэки шуӧ: “Бӧр муна важ оланінӧ, кытысь петі”.
Локтӧм бӧрас аддзӧ: оланінсӧ чышкӧма-пелькӧдӧма, и олысьыс сэні абу.
Сэки мунӧ да босьтӧ аскӧдыс сизим пеж лолӧс, ассьыс на лёкджыкъясӧс, сэсся ставныс найӧ овмӧдчӧны важ оланінас. Тайӧ мортыслы воддза дорсьыс нӧшта на лёкджык лоӧ.
Тадзи жӧ лоӧ ӧнія лёк йӧзлы».
Йӧзкӧд сёрнитігкостіыс локтісны Исуслӧн мамыс да вокъясыс. Найӧ сулалісны ывлаас да кӧсйисны сёрнитыштны Сыкӧд.
Ӧти морт шуис Исуслы: «Мамыд вокъясыдкӧд ывлаасӧсь, Тэкӧд кӧсйӧны сёрнитны».
Исус воча шуис: «Коді Меным мамыс?
Кодъяс Меным вокъясыс?»
Велӧдчысьяс вылас индӧмӧн шуис: «Найӧ Менам вокъясӧй да Менам мамӧй. Енэжвыв Батьлӧн кӧсйӧм серти олысь — Меным вок, чой да мам».
13 юр.
Сійӧ лунӧ керкаысь петӧм бӧрын Исус лэччис ты дорӧ да пуксис.
Зэв уна йӧз чукӧртчис Исус дінӧ, Сылы весиг ковмис пуксьыны пыжӧ, а йӧзыс сулалісны вадорас.
Исус висьталіс налы уна велӧданвисьт: «Морт кӧдзны петас. Кӧдзигас кымынкӧ кӧйдыс усяс туй бокӧ. Сэтчӧ воасны лэбачьяс да кокаласны. Кымынкӧ кӧйдыс усяс изъяинӧ. Этша муыс вӧсна ляпкыдінад найӧ ӧдйӧ чужасны.
Петас шонді, пӧжны пондас, и омӧль вужъя петасыд косьмас. Кымынкӧ кӧйдыс усяс лежнӧг пӧвстӧ. Быдмигас лежнӧгыс пӧдтас петассӧ. Мукӧд кӧйдысыс усяс бур муӧ да ваяс уна тусь: ӧтияс — сё пӧв, мӧдъяс — квайтымын пӧв, коймӧдъяс — комын пӧв.
Кодлӧн эм пель, мед кылӧ.»
Велӧдчысьяс матыстчисны Исус дінӧ да юалісны: «Мыйла Тэ сёрнитан йӧзыскӧд велӧданвисьтъясӧн?»
Исус вочавидзис: «Енэжвыв Юралӧмлысь гусяторъяссӧ тіянлы сетӧма тӧдны, а налы абу. Кодлӧн эм, сылы коланасьыс унджык на сетасны. Кодлӧн абу, сылысь бӧръясӧ босьтасны. Найӧ видзӧдӧны да оз аддзыны, кывзӧны да оз кывны и оз гӧгӧрвоны. Та вӧсна сёрнита накӧд велӧданвисьтъясӧн.
Исай пророклӧн шуӧмыс инӧ: — Пельнаныд кутанныд кывзыны да онӧ гӧгӧрвоӧй, синнаныд кутанныд видзӧдны да онӧ аддзӧй.
Чорзьӧма тайӧ войтырыслӧн сьӧлӧмыс, сьӧкыд пеляӧсь, куньса синмаӧсь. Аддзынысӧ оз зільны, кывзынысӧ оз кӧсйыны, сьӧлӧмнаныс оз гӧгӧрвоны. Мелань бергӧдчынысӧ оз кӧсйыны, медым Ме бурдӧді найӧс.
Ті шудаӧсь, ӧд тіян синныд аддзӧ да пельныд кылӧ. Веськыда висьтала тіянлы: уна пророк да веськыда олысь кӧсйисны аддзывны, мый ті аддзанныд, но эз аддзывны. Кӧсйисны кывны, мый ті кыланныд, но эз кывлыны».
«Кывзӧй, Ме гӧгӧрвоӧда тіянлы кӧдзысь йылысь велӧданвисьтӧс.
Мортыс кылӧ Енлӧн Юралӧм йылысь да оз гӧгӧрво. Сы дінӧ локтӧ омӧльыс да гусялӧ сьӧлӧмас кӧдзӧмасӧ. Тайӧс петкӧдлӧ туй бокӧ усьӧм кӧйдыс.
Изъяинӧ усьӧм кӧйдысыс петкӧдлӧ: мортыс кылӧ Кывсӧ да дзик пыр долыдпырысь босьтӧ сійӧс сьӧлӧмас, но вужъясьтӧмысла оз дыр эскы, Ен Кыв вӧсна дзескӧдігӧн-вӧтлігӧн сійӧ эновтчӧ эскӧмсьыс.
Лежнӧг пӧвстӧ усьӧм кӧйдысыс петкӧдлӧ: мортыс кылӧ Кывсӧ, но быдлунъя тӧждыс да озырмыны ыштӧмыс пӧдтӧ кӧдзӧм Кывсӧ, и сійӧ оз вай вотӧссӧ.
Бур муӧ кӧдзӧм кӧйдысыс петкӧдлӧ: мортыс кылӧ Кывсӧ, гӧгӧрвоӧ сійӧс да вайӧ вотӧс: ӧтияс — сё пӧв, мӧдъяс — квайтымын пӧв, коймӧдъяс — комын пӧв».
Исус висьталіс мӧд велӧданвисьт: «Енэжвыв Юралӧмыс татшӧм. Морт кӧдзас аслас муӧ бур кӧйдыс. Войнас узигкостіыс локтас паныд мунысь да шобді кӧйдыс костас ёг турун кӧдзас, сэсся мунас. Шобді петас, кутас шептасьны, ёг турун тшӧтш мыччысяс.
Кесйӧгъяс локтасны овмӧс кутысьныс дінӧ да шуасны: “Ыджыдӧй, эн-ӧ бур кӧйдыс тэ кӧдзлы муад?
Кытысь нӧ ёг туруныс сэтчӧ петӧма?
” Сійӧ вочавидзас: “Паныд мунысь тайӧс вӧчӧма”.
Кесйӧгъяс шуасны: “Кӧсъян кӧ, ёг турунсӧ ми нетшкам”.
Мӧдыс вочавидзас: “Оз ков. Ёг турун сорнас шобді петассӧ тшӧтш верманныд нетшыштны. Кольӧй, мед быдмасны ӧтлаын вундан кадӧдзыс.
Сэки ме тшӧкта вундысьяслы: медводз ёг турунсӧ чукӧртӧй, сэсся кольтаясӧ кӧртавлӧй да сотӧй, а шобдісӧ идралӧй менам йӧртӧдӧ”».
Мӧд велӧданвисьт Исус висьталіс налы: «Енэжвыв Юралӧмыс муӧ кӧдзӧм горчица тусь кодь. Став кӧйдыссьыс сійӧ медпосни. Сійӧ быдмӧ да лоӧ пу кодь, став пуктассьыс ыджыд, весиг енэжвыв лэбачьяс поздысьӧны вожъясас».
Исус нӧшта ӧти велӧданвисьт висьталіс: «Енэжвыв Юралӧмыс няньшом кодь. Ань гудралас сэтчӧ куим шомӧс тыр пызь, кад мысти няньыс ловзяс».
Ставсӧ тайӧс Исус висьталіс йӧзыслы велӧданвисьтъясӧн. Висьтъястӧг эз сёрнитлы накӧд, медым иніс пророклӧн шуӧмыс:
— Ме велӧданвисьтъясӧн сёрнита, му пуксьӧмсяньыс дзебӧмасӧ юӧрта.
Йӧзсӧ кольӧм бӧрын Исус пырис керкаӧ.
Сэтчӧ локтісны велӧдчысьясыс да найӧ корисны: «Гӧгӧрвоӧд миянлы ёг турун йылысь висьттӧ».
Исус висьталіс: «Бур кӧйдыссӧ кӧдзысьыс — Морт Пи. Кӧдза муыс — муюгыд. Бур кӧйдысыс — Енлӧн йӧзыс, ёг туруныс — омӧльлӧн йӧзыс. Паныд мунысьыс, ёг турунсӧ кӧдзысьыс, — омӧль. Вундан кадыс — нэм пом, вундысьясыс — анделъяс.
Кыдзи чукӧртӧм ёг турунсӧ сотӧны, тадзи лоӧ нэм помасигӧн. Морт Пи Ассьыс анделъяссӧ мӧдӧдас чукӧртны Аслас Юраланінысь став ыштӧдысьсӧ да лёк вӧчысьсӧ. Сэсся шыбитасны найӧс биӧ. Сэні лоӧ бӧрдӧм да пинь йирӧм. Веськыда олысьяс сэки Батьныс Юраланінын шонді моз кутасны югъявны.
Кодлӧн эм пель, мед кылӧ.»
«Енэжвыв Юралӧмыс муӧ дзебӧм озырлун кодь. Морт аддзас муысь озырлун да сійӧс бӧр гуалас. Нимкодьысла сійӧ мунас, вузалас ассьыс став овмӧссӧ да ньӧбас тайӧ мусӧ.
Енэжвыв Юралӧмыс татшӧм. Дона изъясӧн вузасьысь мунас корсьны мича изъяс да аддзас донасьыс-дона из. Сійӧ мунас, вузалас ассьыс став овмӧссӧ да ньӧбас тайӧ изсӧ».
«Енэжвыв Юралӧмыс саридзӧ вӧйталӧм тыв кодь. Быдсяма чериыс сэтчӧ шедас. Тывсӧ вадорӧ лэптӧм бӧрын чери кыйысьяс бур черисӧ дозйӧ чукӧртасны, лёксӧ шыблаласны.
Тадзи лоӧ нэм помасигӧн: анделъяс локтасны, торйӧдасны лёк йӧзӧс веськыда олысьясысь да биӧ шыбитасны. Сэні лоӧ бӧрдӧм да пинь йирӧм».
Исус юаліс: «Ставсӧ-ӧ гӧгӧрвоинныд?»
Велӧдчысьяс вочавидзисны: «Гӧгӧрвоим, Господь».
Исус шуис налы: «Индӧдӧ велӧдысь, коді тӧдӧ Енлысь Юралӧмсӧ, керка кутысь кодь, коді аслас видзанінысь выльсӧ и важсӧ петкӧдӧ».
Тайӧ велӧданвисьтъяссӧ висьталӧм бӧрын Исус муніс сэтысь Аслас карӧ. Сэні велӧдіс йӧзсӧ синагогаын. Кывзысьяс шензьӧмӧн шуалісны: «Кытысь Сылӧн татшӧм мывкыдлуныс да татшӧм выныс?
Абу-ӧ Сійӧ тшупсьысьлӧн пи?
Абу-ӧ Сылӧн мамыс Мария, а вокъясыс — Яков, Иосей, Симон да Иуда?
Оз-ӧ тані овны Сылӧн чойясыс?
Кытысь Сылӧн ставыс тайӧ?»
Тадзи Сійӧс ӧтдортісны.
Исус шуис налы: «Пророкӧс пыдди пуктӧны быдлаын, сӧмын ас карас да ас гортас оз».
Йӧзыслӧн эскытӧм вӧсна Исус эз вӧч сэні уна шензьӧданаторсӧ.
14 юр.
Сійӧ кадӧ Ирӧд ӧксы кыліс Исус йылысь. Аслас кесъялысьяслы Ирӧд шуис: «Тайӧ Пыртысь Иоан, сійӧ ловзьӧма, та вӧсна вермӧ вӧчны шензьӧданаторъяс».
Филип вокыслӧн Ирӧдиада гӧтырыс вӧсна Ирӧд тшӧктыліс босьтны Иоанӧс да дорӧмӧн пуксьӧдны дзескыдінӧ. Ӧд Иоан ӧлӧдліс Ирӧдӧс: «Тайӧ аньыскӧд тэныд оз позь овнытӧ».
Ирӧд кӧсйис вины Иоанӧс, сӧмын йӧзсьыс поліс, ӧд найӧ пуктісны Иоанӧс пророкӧ.
Ирӧд нимлунасигӧн Ирӧдиадалӧн нылыс йӧктіс гажӧдчысьяс водзын. Тайӧ воис Ирӧдлы сьӧлӧм вылас. Сійӧ кыв сетіс нывлы: «Сета тэныд, мый коран».
Мамыс велӧдӧм серти ныв шуис: «Вай меным тасьтіын Пыртысь Иоанлысь юрсӧ».
Ӧксы шогӧ усис. Гажӧдчысьяс водзын сетӧм кывйыс вӧсна сійӧ тшӧктіс вӧчны нывлӧн корӧм серти. Ирӧд ыстіс ассьыс йӧзсӧ дзескыдінӧ керыштны Иоанлысь юрсӧ.
Сэсся вайисны тасьтіын юрсӧ да сетісны нывлы, нылыс нуис сійӧс мамыслы.
Иоанлӧн велӧдчысьясыс локтісны шойысла да дзебисны сійӧс.
Сэсся мунісны да юӧртісны лоӧмтор йывсьыс Исуслы.
Тайӧс кылӧм бӧрын Исус ӧтнас пыжӧн мӧдіс овтӧминӧ.
Йӧзыс тӧдмалісны та йылысь да подӧн мунісны каръяссьыныс Сы бӧрся.
Пыжысь чеччигӧн Исус аддзис уна йӧзӧс. Сылӧн сьӧлӧмыс нормис на вӧсна, и Сійӧ бурдӧдіс висьысьясӧс.
Рытнас матыстчисны Исус дінӧ велӧдчысьясыс да шуисны: «Тані овтӧмин, и кадыс сёр нин.
Ысты йӧзсӧ сиктъясӧ сёянтор ньӧбны».
Исус шуис: «Оз ков налы муннысӧ. Ті сетӧй налы сёянсӧ».
Велӧдчысьяс воча шуисны: «Миян сьӧраным сӧмын вит нянь да кык чери».
Исус шуис: «Вайӧй меным татчӧ».
Сійӧ тшӧктіс йӧзыслы пуксявны муас. Ачыс босьтіс вит няньсӧ да кык черисӧ, видзӧдліс енэжӧ да Енмӧс аттьӧалӧмӧн чегис няньсӧ, сэсся сетіс велӧдчысьясыслы. Велӧдчысьяс разӧдісны йӧзыслы.
Ставныс пӧттӧдзныс сёйисны, коляссӧ дас кык куд тыр чукӧртісны.
Аньясысь да челядьысь ӧтдор сёйысьыс вӧлі вит сюрс гӧгӧр.
Та бӧрын Исус тшӧктіс велӧдчысьясыслы пуксьыны пыжӧ да вуджны Сытӧг ты мӧдлапӧлӧ. Ачыс кольччис да мӧдӧдаліс йӧзсӧ.
Йӧзӧс ыстӧм бӧрын Исус кайис керӧсӧ кевмысьны да рытсӧ сэні вӧлі ӧтнас.
Сійӧ кадӧ пыжаяс вӧліны ты шӧрасӧсь, вермасисны гыяскӧд да паныд тӧвкӧд.
Асъядорыс Исус мӧдӧдчис ва вывті велӧдчысьяс дінас.
Кор найӧ аддзисны ва вывті восьлалысь Исусӧс, повзьӧмнысла горӧдісны: «Тайӧ орт.»
Исус шуис: «Лӧньӧй, тайӧ Ме. Энӧ полӧй».
Сэки Петыр шуис: «Господьӧй, тайӧ кӧ Тэ, тшӧкты меным ва вывтіыс локны Тэ дінӧ».
Исус шуис: «Лок».
Пыжсьыс воськовтӧмӧн Петыр мӧдіс ва вывтіыс Исус дінӧ. Ыджыд тӧвнырысь Петырӧс полӧм босьтіс. Сійӧ вӧйны пондіс да горӧдіс: «Господьӧй, мезды менӧ.»
Исус дзик пыр нюжӧдіс кисӧ Петырлы, кутіс сійӧс да шуис: «Этша эскысьӧй, мыйла падъялан?»
Пыжӧ пуксиганыс тӧлыс лӧнис.
Пыжын пукалысьяс уськӧдчисны Исус водзӧ да шуисны: «Тэ збыльысь Ен Пи».
Тысӧ вуджӧм бӧрын найӧ воисны Генесарет муӧ.
Сэтчӧс йӧзыс тӧдмалісны Исусӧс да юӧртісны та йылысь матігӧгӧрас олысьяслы. Найӧ вайӧдісны Исус дінӧ став висьысьсӧ да корисны, мед висьысьяслы Исус лэдзас инмӧдчывны паськӧм дорышас. Инмӧдчылысьяс ставӧн бурдісны.
15 юр.
Сэки Ерусалимысь Исус дінӧ воисны фарисейяс Индӧдӧ велӧдысьяскӧд да шуисны Сылы: «Мыйла велӧдчысьясыд пӧрысьяслысь шуӧмсӧ торкӧны: сёйӧм водзвылас кинысӧ оз мыськавны?»
Исус воча шуис налы: «Асьныд ті мыйла кутчысянныд батьяслӧн шуӧмӧ да торканныд Енлысь тшӧктӧмсӧ?
Енмыс шуӧма: “Пыдди пукты ассьыд бать-мамтӧ”, “Омӧльтан кӧ бать-мамтӧ, тэнӧ кулӧм вылӧ мыждасны”.
А ті велӧданныд: морт кӧ бать-мамыслы сетӧм пыдди кӧсйысяс сетны Енлы, тайӧн бать-мам пыдди пуктӧмсӧ сійӧ оз торк. Батьяслӧн шуӧм вӧсна ті вештанныд Енлысь тшӧктӧмсӧ.
Кык бана шаньгаяс.
Бура шуӧма тіян йылысь Исай пророк:
— Тайӧ йӧзыс вомнас пыдди пуктӧны Менӧ, но налӧн сьӧлӧмыс ылын Меысь. Весьшӧрӧ ыдждӧдлӧны Менӧ мортсянь тшӧктӧмъясӧ велӧдігӧн».
Ас дінас йӧзӧс корӧмӧн Исус шуис: «Кывзӧй да гӧгӧрвоӧй.
Мортӧс оз пежав сійӧ, мый вомас пырӧ, а пежалӧ, мый вомсьыс петӧ».
Велӧдчысьясыс матыстчисны Исус дінӧ да шуисны: «Тӧдан-ӧ Тэ, мый фарисейяс дӧзмӧмаӧсь Тэнад сёрнияссьыд?»
Сійӧ вочавидзис: «Быдмӧгсӧ кӧ абу енэжвыв Батьӧй пуктӧма, сійӧс вужнас нетшыштасны.
Кольӧй найӧс, найӧ синтӧмъясӧс синтӧм нуӧдысьяс.
Синтӧм кӧ нуӧдӧ синтӧмӧс, кыкнанныс гуранӧ усясны».
Петыр шуис: «Гӧгӧрвоӧд миянлы висьталӧмтӧ».
Исус вочавидзис: «Весиг ті онӧ на гӧгӧрвоӧй.
Онӧ ӧмӧй вежӧртӧй: мый пырӧ вомӧ, сійӧ веськалӧ кынӧмӧ, сэсся ортсӧ петӧ.
Мый петӧ вомысь, сійӧ петӧ сьӧлӧмысь да пежалӧ мортӧс.
Буретш сьӧлӧмысь петӧны лёк мӧвпъяс, морт виӧм, гозъя олӧм пежалӧм, кырсалӧм, гусясьӧм, пӧръясьӧм да омӧльтӧм. Тайӧ пежалӧ мортсӧ.
А мыськавтӧм киӧн сёйӧмыд морттӧ оз пежав».
Сэсся Исус муніс Тир да Сидон муясӧ.
Сы дінӧ локтіс сэні олысь ханаанса ань да пондіс горзыны: «Господьӧй, Давид Пи. Ло бур сьӧлӧма ме дінӧ. Пеж лов пырӧма менам ныв пытшкӧ да чорыда песлӧдлӧ сійӧс».
Исус кыв эз шу аньлы.
Велӧдчысьясыс матыстчисны Исус дінӧ да шуисны: «Лэдз аньсӧ, сійӧ горзӧмӧн бӧрсяньным ветлӧдлӧ».
Исус шуис: «Менӧ мӧдӧдӧма сӧмын израильса вошӧм ыжъяс дінӧ».
Ань матыстчис да Исус водзӧ уськӧдчӧмӧн корис: «Господьӧй, отсав меным.»
Исус шуис: «Абу бур мырддьыны ныв-пилысь няньсӧ да шыбитны сійӧс понпиянлы».
Ань воча шуис: «Сідз, Господьӧй.
Но понъяс тшӧтш сёйӧны кӧзяиныслӧн пызан вылысь гылалӧм торпыригсӧ».
Исус шуис: «Ыджыд тэнад эскӧмыд, аньӧй. Мед лоӧ тэнад кӧсйӧм сертиыд».
Аньлӧн нылыс дзик пыр бурдіс.
Сэтысь Исус водзӧ мӧдіс. Сійӧ муніс Галилея ты пӧлӧн, сэсся кайис керӧсӧ да пуксис.
Сы дінӧ чукӧртчис уна йӧз. На пӧвстын вӧліны китӧм-коктӧмъяс, синтӧмъяс, сёрниттӧмъяс да мукӧд висьысьяс. Найӧс вайӧдісны Исус водзӧ, и Сійӧ бурдӧдаліс найӧс. Йӧзыс чуймисны, кор налӧн син водзын сёрниттӧмъяс кутісны сёрнитны, китӧмъяс бурдны, коктӧмъяс ветлыны да синтӧмъяс аддзыны. Ставӧн ошкисны Израильлысь Енмӧс.
Исус корис велӧдчысьяссӧ да шуис: «Менам сьӧлӧмӧй висьӧ тайӧ йӧзыс вӧсна. Найӧ куим лун нин танӧсь, а налӧн сёяныс абу.
Ог кӧсйы мӧдӧдны найӧс сёйтӧгыс, мед туяс дзикӧдз оз эбӧстӧммыны».
Велӧдчысьяс шуисны: «Кытысь босьтны овтӧминас сы мында няньсӧ, медым вердны та мындасӧ?»
Исус юаліс: «Уна-ӧ тіян няньныд?»
Найӧ вочавидзисны: «Сизим. Кымынкӧ посни чери на эм».
Исус тшӧктіс йӧзыслы пуксявны муас.
Ачыс босьтіс сизим няньсӧ да черисӧ, Енмӧс аттьӧалӧмӧн чегис няньсӧ да сетіс велӧдчысьясыслы, а велӧдчысьяс — йӧзыслы.
Ставӧн пӧттӧдзныс сёйисны, коляссӧ сизим куд тыр чукӧртісны. Аньясысь да челядьысь ӧтдор сёйысьыс вӧлі нёль сюрс морт.
Йӧзсӧ мӧдӧдалӧм бӧрын Исус пуксис пыжӧ да кывтіс Магдала муӧ.
16 юр.
Фарисейяс да саддукейяс локтісны Исус дінӧ да Сійӧс кыйӧм могысь корисны петкӧдлыны енэжсянь индысьпас.
Исус шуис налы: «Рытнас ті шуанныд: “Енэжыс гӧрд — аски лоӧ мича”. Асывводзнас шуанныд: “Енэжыс пемыдгӧрд — кыптас бушков”.
Кык бана шаньгаяс.
Енэжлысь чужӧмбансӧ кужанныд тӧдмавны, а кадлысь пасъяссӧ онӧ.
Лёк да пежас ылалӧм йӧз кӧсйӧны аддзывны индысьпас, но Иона пророк пасысь кындзи оз ло налы мӧдыс».
Сэсся Исус колис найӧс да муніс сэтысь.
Ты мӧдлапӧлӧ вуджиганыс велӧдчысьяс казялісны, мый вунӧдӧмаӧсь босьтны няньсӧ.
Исус шуис налы: «Видзчысьӧй фарисей да саддукей няньшомысь».
Велӧдчысьяс ас костаныс сёрнитісны: «Няньтӧ тай босьтны вунӧдім».
Тайӧс казялӧмӧн Исус шуис налы: «Этша эскысьяс. Мый нӧ сёрнитанныд нянь абутӧм йывсьыд?
Онӧ ӧмӧй гӧгӧрвоӧй? Вунӧдінныд ӧмӧй вит сюрс мортӧс вит няньӧн вердӧм йылысь? Кымын куд тыр сэки коляссӧ чукӧртінныд?
А нёль сюрс мортӧс сизим няньӧн вердігӧн, кымын куд тыр чукӧртінныд?
Кыдзи ті онӧ гӧгӧрвоӧй, эг ӧд нянь йылысь Ме тіянлы висьтав, мися, видзчысьӧй фарисей да саддукей няньшомысь.»
Сэки найӧ гӧгӧрвоисны, мый Исус тшӧктіс видзчысьны налы фарисейяслӧн да саддукейяслӧн велӧдӧмысь, эз няньшомысь.
Исус воис Филиплӧн Кесария муӧ да юаліс велӧдчысьясыслысь: «Код туйӧ йӧзыс пуктӧны Менӧ, Морт Пиӧс?»
Найӧ вочавидзисны: «Ӧтияс шуӧны, Пыртысь Иоан пӧ, мӧдъяс шуӧны, Илля пӧ, кодсюрӧ шуӧны, Еремей пӧ, а гашкӧ, нӧшта на мӧд пророк».
Исус юаліс: «Код туйӧ ті Менӧ пуктанныд?»
Симон-Петыр вочавидзис: «Тэ — Кристос, ловъя Енлӧн Пи».
Исус шуис Петырлы: «Тэ шуда, Симон, Ионалӧн пи. Ӧд тайӧс тэныд эз морт висьтав, но Менам енэжвыв Батьӧй восьтіс тэныд.
Ме шуа тэныд: Тэ — Петыр, из. Тайӧ из вылас Ме лэпта Ассьым Вичко, да сійӧс адлӧн выныс оз вермы. Ме сета тэныд Енэжвыв Юраланінысь восьтанъяс. Мый кӧрталан му вылын, сійӧ кӧрталӧма лоӧ енэжын. Мый разян му вылын, сійӧ разьӧма лоӧ енэжын».
Исус ӧлӧдіс велӧдчысьяссӧ, медым некодлы эз висьтавны, мый Сійӧ — Кристос.
Тайӧ кадсянь Исус кутіс висьтавлыны велӧдчысьясыслы, мый Сылы ковмас мунны Ерусалимӧ да уна сьӧкыд сэні нуны пӧрысьяссянь, аркирейяссянь да Индӧдӧ велӧдысьяссянь. Сійӧс виасны, но коймӧд луннас Сійӧ ловзяс.
Исусӧс бокӧ корӧмӧн Петыр шуис: «Ен мед видзас Тэнӧ, Господьӧй.
Мед оз ло тайӧ.»
Бергӧдчӧмӧн Исус шуис Петырлы: «Вешйы Ме дінысь, сӧтана.
Тэ Менӧ крукӧдан, ӧд тэнад мӧвпъясыд мортсянь, абу Енсянь».
Исус шуис велӧдчысьясыслы: «Коді кӧсйӧ мунны Ме бӧрся, мед вунӧдас асьсӧ, мед босьтас ассьыс крестсӧ да локтас Ме бӧрся.
Коді кӧсйӧ видзны ассьыс олӧмсӧ, воштас сійӧс. Ме вӧсна олӧмсӧ воштысь аддзас сійӧс.
Лоас-ӧ мортыслы бур, босьтас кӧ аслыс став муюгыдсӧ, а олӧмсӧ воштас?
Вермас-ӧ бӧр ньӧбны ассьыс олӧмсӧ?
Морт Пи локтас Батьыслӧн дзирдлунӧн Сылӧн анделъяскӧд да быдӧнлы уджъяс сертиыс мынтас.
Веськыда висьтала тіянлы: кодсюрӧ тані сулалысьяс пиысь кувтӧдзныс на аддзасны юравны локтысь Морт Пиӧс».
17 юр.
Квайт лун мысти Исус босьтіс Аскӧдыс Петырӧс да Яковӧс Иоан вокыскӧд да кайис накӧд джуджыд керӧсӧ. Велӧдчысьяс син водзын Исуслӧн мыгӧрыс вежсис: чужӧмыс пондіс шонді моз югъявны, паськӧмыс лои дзирдалана еджыд.
Сэки велӧдчысьяс аддзисны Мӧисейӧс да Илляӧс, найӧ сёрнитісны Исускӧд.
Петыр шуис Исуслы: «Господьӧй, миянлы тані лӧсьыд.
Кӧсъян кӧ, куим чом татчӧ сувтӧдам: Тэныд, Мӧисейлы да Иллялы».
Петырлӧн сёрнитігкості югыд кымӧр вевттис найӧс, кымӧрсянь кыліс гӧлӧс шы: «Тайӧ Менам муса Пиӧй, Ме нимкодяся Сыӧн. Сійӧс кывзӧй».
Тайӧс кылӧмысь велӧдчысьяс ёна повзисны, чужӧмнысӧ тупкӧмӧн уськӧдчисны муас.
Исус матыстчис, инмӧдчыліс на дінӧ да шуис: «Чеччӧй, энӧ полӧй».
Юрнысӧ лэптӧм бӧрын найӧ аддзисны сӧмын Исусӧс.
Керӧсысь лэччиганыс Исус шуис налы: «Морт Пилӧн ловзьытӧдз некодлы энӧ висьталӧй, мый аддзылінныд».
Велӧдчысьяс юалісны Исуслысь: «Мыйла Индӧдӧ велӧдысьяс шуӧны, Иллялы пӧ колӧ водзджык локны?»
Сійӧ вочавидзис: «Дерт, Иллялы колӧ водзджык локны да ставсӧ лӧсьӧдны. Висьтала тіянлы: Илля локтіс нин. Сӧмын йӧзыс сійӧс эз тӧдны, сыкӧд вӧчисны, мый кӧсйисны.
Тадзи тшӧтш Морт Пилы уна сьӧкыд насянь вичмас».
Велӧдчысьяс сэки гӧгӧрвоисны, мый Исус висьталіс налы Пыртысь Иоан йылысь.
Найӧ мӧдӧдчисны йӧз чукӧрлань. Муніганыс матыстчис Исус дінӧ морт, сійӧ пидзӧс вылас сувтӧмӧн корис: «Господьӧй, ло бур сьӧлӧма менам пи дінӧ.
Сійӧ шыблалан висьӧмӧн висьӧ, тшӧкыда биӧ-ваӧ усьлӧ, таысь сылы ёна сьӧкыд. Ме вайӧдлі сійӧс велӧдчысьяс дінад, но найӧ бурдӧднысӧ эз вермыны».
Исус шуис: «Эскытӧм-ылалӧм йӧз.
Дыр-ӧ на Меным овнысӧ тіянкӧд?
Дыр-ӧ на Меным видзӧдны тіянӧс?
Вайӧдӧй Ме дінӧ зонкасӧ».
Исус ӧлӧдіс пеж лолӧс. Сэки пеж лов петіс зонка пытшкысь, и зонка пырысьтӧм-пыр бурдіс.
Ас кежаныс кольӧм бӧрын велӧдчысьяс юалісны Исуслысь: «Мыйла ми эгӧ вермӧй вӧтлыны пеж ловсӧ?»
Исус шуис: «Онӧ эскӧй да.
Веськыда висьтала тіянлы: лоас кӧ тіян эскӧмныд горчица тусь ыджда, верманныд шуны тайӧ керӧсыслы: “Вешйы тасянь сэтчӧ” — и сійӧ вешъяс.
Тіянлы нинӧм вермытӧмыс оз ло.
Видзавтӧг да кевмысьтӧг татшӧм пеж ловъяссӧ вӧтлыны онӧ вермӧй».
Галилеяӧ локтӧм бӧрын Исус шуис велӧдчысьясыслы: «Морт Пиӧс сетасны йӧзлӧн киӧ. Сійӧс виасны, но коймӧд луннас Сійӧ ловзяс».
Велӧдчысьяс шогӧ усисны.
Исус велӧдчысьясыскӧд локтіс Капернаум карӧ. Сэні Петыр дінӧ матыстчисны крамлы вот чукӧртысьяс да юалісны: «Мынтӧ-ӧ тіян Велӧдысьныд вотсӧ?»
Петыр вочавидзис: «Мынтӧ».
Кор Петыр пырис керкаӧ, Исус дзик пыр юаліс: «Симон, тэ ногӧн, кодлысь ӧксыяс вотсӧ перйӧны: ас войтырыслысь али мукӧдлысь?»
Сійӧ вочавидзис: «Мукӧдлысь».
Исус шуис: «Сідзкӧ, ас войтырыс вотсӧ оз мынтыны. Мед оз дӧзмыны найӧ, мун ты дорас да чӧвт вугыртӧ. Медводдза шедӧм чери вомсьыс тэ аддзан эзысь сьӧм. Босьт сійӧс да мынты налы Ме пыдди и ас пыддиыд».
18 юр.
Сэки локтісны Исус дінӧ велӧдчысьясыс да юалісны Сылысь: «Коді Енэжвыв Юраланінас ыджыдджыкыс?»
Исус корис кагаӧс да на шӧрӧ сійӧс сувтӧдӧмӧн шуис: «Веськыда висьтала тіянлы: онӧ кӧ вежсьӧй да лоӧй челядь кодьӧсь, Енэжвыв Юраланінӧ онӧ пырӧй.
Тайӧ кага кодьӧ асьсӧ пуктысь лоас Енэжвыв Юраланінын ыджыдджык.
Коді Менам ним вӧсна сибӧдӧ ӧти татшӧм кагаӧс, сійӧ сибӧдӧ Менӧ».
«Коді ыштӧдас тайӧ ичӧтъясысь ӧтикӧс, Меным эскысьӧс, сылы бурджык лоӧ, сьыліас кӧ ыджыд изки ӧшӧдасны да вӧйтасны джуджыд саридзӧ.
Курыд шог муюгыдыслы ыштӧдӧмъясысь. Ыштӧдӧмъяслы колӧ локнысӧ, но курыд шог сійӧ мортлы, код пыр локтӧны ыштӧдӧмъясыс.
Ки-кокыд кӧ ыштӧдӧ тэнӧ, керышт да шыбит сійӧс.
Бурджык пырны помтӧм олӧмӧ ки пӧлаӧн либӧ кок пӧлаӧн куслытӧм биӧ тэнӧ киа-кокаӧн шыбитӧм дорысь.
Синмыд кӧ ыштӧдӧ тэнӧ, перйы да шыбит сійӧс.
Бурджык пырны помтӧм олӧмӧ син пӧлаӧн куслытӧм биӧ тэнӧ синмаӧн шыбитӧм дорысь».
«Кывзӧй, тайӧ ичӧтъясысь весиг ӧтикӧс энӧ ӧтдортӧй.
Висьтала тіянлы: енэжын налӧн анделъясныс пыр енэжвыв Батьлӧн чужӧмбан водзынӧсь.
Морт Пи локтіс корсьны да мездыны вошӧмаясӧс.
Мый ті шуанныд?
Мортлӧн кӧ сё ыжсьыс ӧти вошас, оз-ӧ сійӧ коль ӧкмысдас ӧкмыссӧ керӧсӧ да мун корсьны вошӧмасӧ?
Веськыда висьтала тіянлы: аддзас кӧ сійӧс, ёнджыка нимкодясяс ӧти вӧснаыс вошлытӧм ӧкмысдас ӧкмысыс дорысь.
Тадзи енэжвыв Батьныд оз кӧсйы, медым тайӧ ичӧтъясысь весигтӧ ӧти вошис».
«Вокыд кӧ мыж вӧчас тэныд паныд, мун да ас кежаныд янӧд сійӧс.
Кывзас кӧ тэнӧ, сійӧ тэныд вокӧн кольӧ.
Оз кӧ кывзы тэнӧ, босьт аскӧдыд ӧти-кык мортӧс, ӧд “ставсӧ колӧ подулавны кык либӧ куим мортлӧн висьталӧмӧн”.
Оз кӧ сійӧ кывзы найӧс, висьтав вичко водзын.
Весиг кӧ найӧс оз кывзы, лыддьы сійӧс ентӧдтӧмӧн, вот перйысьяс лыдӧ пукты.
Веськыда висьтала тіянлы: мый кӧрталанныд му вылын, сійӧ кӧрталӧма лоӧ енэжын. Мый разянныд му вылын, сійӧ разьӧма лоӧ енэжын.
Висьтала тіянлы: тіян пиысь кӧ кыкӧн ӧтвыв корасны мыйкӧ, енэжвыв Батьӧй сетас налы. Ӧд кӧні кыкӧн-куимӧн чукӧртчасны Менам нимӧн, сэні Ме на шӧрын лоа».
Сэки Петыр матыстчис Исус дінӧ да юаліс: «Господьӧй, меным кӧ вокӧй лёк вӧчӧ, кымынысь колӧ сійӧс прӧститнысӧ?
Сизимысь-ӧ?»
Исус вочавидзис: «Оз сизимысь, а сизимдас пӧв сизимысь.
Енэжвыв Юралӧмыс татшӧм. Ӧксы шуис артавны аслас кесйӧгъяслысь уджйӧзсӧ. Арталігас ӧксы водзӧ вайӧдісны ӧти кесйӧгӧс, кодлӧн уджйӧзыс вӧлі дас сюрс талант. Мынтынысӧ сійӧ эз вермы. Сэки ӧксы тшӧктіс вузавны тайӧ кесйӧгсӧ, сылысь гӧтырсӧ, ныв-писӧ да овмӧссӧ, медым тадзи бергӧдны уджйӧзсӧ. Кесйӧг уськӧдчис ӧксы водзӧ да пондіс корны: “Ыджыдӧй, ло бур сьӧлӧма. Ме ставсӧ тэныд мынта”.
Ӧксылӧн сьӧлӧмыс небзис. Сійӧ шуис лэдзны кесйӧгсӧ да вунӧдны уджйӧзсӧ.
Ывлаӧ петӧм бӧрын кесйӧг аддзис уджъёртсӧ. Ёртыс вӧлі уджйӧза сылы сё динар. Сійӧс джагӧдӧмӧн шуаліс: “Мынты уджйӧзтӧ.
” Ёртыс пидзӧс вылас уськӧдчӧмӧн корис: “Ло бур сьӧлӧма. Ставсӧ мынта”.
Мӧдыс эз кӧсйы виччысьнысӧ да йӧртіс ёртсӧ дзескыдінӧ уджйӧзсӧ мынтытӧдзыс.
Тайӧс аддзылӧмысь мукӧд кесйӧгыс шогӧ усисны. Найӧ мунісны ӧксы дінӧ да висьталісны сылы ставсӧ.
Ӧксы корис ас дінас сійӧ кесйӧгсӧ да шуис: “Лёк морт тэ вӧлӧмыд. Тэнад корӧм серти ме вунӧді тэнсьыд став уджйӧзтӧ. Эз ӧмӧй ков тэныд ме моз лоны бур сьӧлӧмаӧн?
” Скӧрмӧм ӧксы чорыда мыждіс кесйӧгсӧ да йӧртіс сійӧс дзескыдінӧ уджйӧзсӧ дзоньнас вештытӧдзыс.
Тадзи Менам енэжвыв Бать вӧчас тіянлы, онӧ кӧ сьӧлӧмсяньныд прӧститӧй вокнытӧ».
19 юр.
Тайӧс висьталӧм бӧрын Исус петіс Галилея муысь да муніс Йӧрдан ю мӧдлапӧлӧд Юдея муӧ.
Зэв уна йӧз вӧтчис Сы бӧрся, и Сійӧ бурдӧдаліс найӧс.
Исус дінӧ матыстчисны фарисейяс да Сійӧс кыйӧм могысь юалісны: «Быд помка вӧсна-ӧ морт вермас юксьыны гӧтырыскӧд?»
Исус вочавидзис: «Энӧ ӧмӧй лыддьылӧй, мый медводз Ен вӧчис аймортӧс да аньӧс?
Сійӧ шуис: “Та вӧсна морт кольӧ бать-мамсӧ да ӧтлаасьӧ гӧтырыскӧд, и тайӧ кыкыс лоӧны ӧти вир-яйӧн”.
Сідзкӧ, найӧ абу нин кык, а ӧти вир-яй. Мый йитӧма Енмыс, морт мед оз торйӧд».
Фарисейяс шуисны: «Мыйла нӧ Мӧисей тшӧктіс гӧтыртӧ эновтігӧн сетны сылы торйӧдчан гижӧд?»
Исус вочавидзис: «Чорыд сьӧлӧмныд вӧсна Мӧисей лэдзис тіянлы эновтны гӧтыръяснытӧ. Водзынсӧ эз вӧв тадзи.
Ме шуа тіянлы: верӧсыс кӧ эновтӧ гӧтырсӧ, а гӧтырыс оз кырсав, да гӧтрасьӧ мӧдкӧд, сійӧ гозъя олӧм пежалӧ.
Юксьӧм аньӧс гӧтырӧ босьтысь тшӧтш пежалӧ».
Велӧдчысьясыс шуисны: «Бурджык, сідзкӧ, гӧтрасьтӧг овны».
Исус шуис: «Оз быдӧн вермы тадзи овнысӧ, сӧмын кодлы тайӧс сетӧма. Уна помка вӧсна морт оз вермы гӧтрасьны: ӧтияс мам кынӧмсяньыс нин татшӧмӧсь, мӧдъясӧс вӧчисны татшӧмъясӧн, коймӧдъяс Енлы кесъялӧм вӧсна гӧтрасьтӧг олӧны.
Верман кӧ тадзи овны, ов».
Исус дінӧ вайӧдісны челядьӧс, медым Сійӧ кисӧ пуктылӧмӧн кевмысис. Велӧдчысьяс шуасисны вайӧдысьяс вылӧ.
Исус шуис: «Лэдзӧй челядьсӧ. Энӧ кутӧй найӧс Ме дінӧ локтӧмысь. Енэжвыв Юраланінсӧ ӧд на коддьӧмлы лӧсьӧдӧма».
Исус пуктыліс на вылӧ кисӧ, сэсся муніс сэтысь.
Ӧти морт локтіс Исус дінӧ да юаліс: «Бур Велӧдысьӧй, кутшӧм буртор меным колӧ вӧчны, мед менам вӧлі помтӧм олӧм?»
Исус вочавидзис: «Мыйла тэ шуан Менӧ бурӧн?
Некод абу бурыс, сӧмын Енмыс бур.
Кӧсъян кӧ пырны помтӧм олӧмӧ, ов тшӧктӧмъяс серти».
Мортыс юаліс: «Кутшӧм тшӧктӧмъяс серти?»
Исус вочавидзис: «Эн ви, гозъя олӧмтӧ эн пежав, эн гусясь, эн пӧръясь, пыдди пукты ассьыд бать-мамтӧ, радейт матыссатӧ асьтӧ моз».
Том морт шуис: «Ме ола тайӧ тшӧктӧмъяс сертиыс. Мый нӧшта оз тырмы?»
Исус шуис: «Кӧсъян кӧ тырвыйӧ бурӧн лоны, мун, овмӧстӧ вузав да сьӧмсӧ сет гӧльяслы. Сэки тэныд енэжын озырлуныс вичмас. Сэсся лок Ме бӧрся».
Тайӧ кывъяссӧ кылӧм бӧрын том морт жугыля муніс, ӧд сылӧн озырлуныс вӧлі уна.
Велӧдчысьясыслы Исус шуис: «Веськыда висьтала тіянлы: озырлы сьӧкыд пырны Енэжвыв Юраланінӧ.
Нӧшта шуа: озырлы Енлӧн Юраланінӧ пырӧм дорысь верблюдлы кокньыдджык пырны ем пысӧд».
Велӧдчысьясӧс тайӧ чуймӧдіс, и найӧ юалісны: «Коді нӧ, сідзкӧ, вермас мездмынысӧ?»
На вылӧ видзӧдлӧмӧн Исус шуис: «Мортлы тайӧ вермытӧмтор, но Енмыслы ставыс вермана».
Сэки Петыр шуис: «Ми ставсӧ эновтім да мунім Тэ бӧрся. Мый миянлы вичмас таысь?»
Исус шуис: «Веськыда висьтала тіянлы: выль олӧмын Морт Пи пуксяс дзирдлуныслӧн юралан пуклӧсӧ. Тшӧтш ті, Ме бӧрся мунысьяс, пуксянныд дас кык юралан пуклӧсӧ мыждыны израильса дас кык чужанкотырӧс.
Коді Менам ним вӧсна коляс керкасӧ, чой-воксӧ, бать-мамсӧ, гӧтырсӧ, ныв-писӧ, видз-мусӧ, сылы сё пӧвстӧн бӧр воас, нӧшта помтӧм олӧм сылы вичмас.
Воддзаясысь унаӧн лоӧны бӧръяӧн, бӧръяясысь — воддзаӧн».
20 юр.
«Енэжвыв Юралӧмыс татшӧм. Овмӧс кутысь водз асывнас мунас медавны аслас виноград йӧрӧ уджалысьясӧс. Уджалысьяскӧд сёрнитчас лунысь динар мынтыны, сэсся мӧдӧдас найӧс виноград йӧрас.
Ӧкмыс часын овмӧс кутысь петас да аддзас медасянінысь уджтӧг сулалысь йӧзӧс. Сійӧ шуас налы: “Мунӧй менам виноград йӧрӧ. Ме мынта тіянлы лӧсялан удждонсӧ”.
Найӧ мунасны.
Дас кыкын, сэсся куим часын овмӧс кутысь бара петас да воддза мозыс вӧчас.
Сэсся вит час гӧгӧрын петас да аддзас, кодсюрӧ сулалӧны на. Сійӧ юалас налысь: “Мый тані сулаланныд кузь лунтырсӧ?
” Найӧ вочавидзасны: “Миянӧс эз медавны”.
Сэки сійӧ шуас налы: “Мунӧй менам виноград йӧрӧ. Ме мынта тіянлы лӧсялан удждонсӧ”.
Рытнас овмӧс кутысь шуас уджӧн веськӧдлысьыслы: “Кор уджалысьястӧ да мынтысь налы. Бӧрынджык локтӧмаяслы мынты водзджык, сэсся воддзаясыслы”.
Вит часын локтӧмаяс босьтісны динарӧн.
Воддза локтӧмаяс мӧвпыштісны, мый унджык босьтасны, но налы тшӧтш динар мынтісны.
Удждон босьтӧм бӧрын найӧ элясясны овмӧс кутысьлы: “Ми кузь лунтыр гож водзын мырсим, а бӧрынджык локтӧмаяс сӧмын час уджалісны, да налы тэ дзик миянлы моз мынтін”.
Овмӧс кутысь на пиысь ӧтилы шуас: “Ёртӧй, ме эг пӧрйӧдлы тэнӧ.
Тэ ӧмӧй эн динарысь сёрнитчыв мекӧд?
Босьт динартӧ да мун.
Ме кӧсъя бӧрынджык локтӧмалы мынтыны тшӧтш тэныд моз.
Ог ӧмӧй ме вермы ассьым сьӧмӧс видзны ас кӧсйӧм серти?
Тэнад ӧмӧй вежыд петӧ, мый ме бур сьӧлӧма?”
Тадзи бӧръяяс лоӧны воддзаӧн, а воддзаяс — бӧръяӧн. Унаӧс корӧма, но этшаӧс бӧрйӧма».
Ерусалимӧ кайигӧн Исус корис дас кыкнан велӧдчысьсӧ да мунігмозыс висьталіс налы: «Ӧні ми мунам Ерусалимӧ. Сэні Морт Пиӧс сетасны аркирейяслы да Индӧдӧ велӧдысьяслы. Найӧ шуасны вины Сійӧс, сетасны ентӧдтӧмъяс киӧ. Найӧ сераласны Сійӧс, чорыда нӧйтасны, сэсся тувъяласны крестӧ. Но коймӧд луннас Сійӧ ловзяс».
Зеведей пиянлӧн мамыс пияныскӧд локтіс аслас корӧмӧн Исус дінӧ. Ань копыртчис Исус водзӧ.
Исус юаліс: «Мый тэ кӧсъян?»
Ань вочавидзис: «Пуксьӧд Аскӧдыд Юраланінад менсьым кыкнан пиӧс, ӧтисӧ веськыдладорад, мӧдсӧ шуйгаладорад».
Исус шуис: «Онӧ тӧдӧй, мый коранныд.
Верманныд-ӧ юны Меным лӧсьӧдӧм чашасӧ да Менам пыртчӧмӧн пыртчыны?»
Найӧ вочавидзисны: «Вермам».
Исус шуис: «Менсьым чашасӧ понданныд юны да Менам пыртчӧмӧн понданныд пыртчыны. Но мед пуксьӧдны веськыдладорам да шуйгаладорам — тайӧ абу Ме сайын. Менам Бать сэтчӧ пуксьӧдысьыс».
Кык воклӧн сёрниыс дӧзмӧдіс мукӧд дас велӧдчысьсӧ.
Исус корис велӧдчысьяссӧ да шуис: «Ті тӧданныд, мый юралысьяс ыджыдалӧны йӧз вылын, да веськӧдлысьяс кипод улас кутӧны йӧзӧс. Но ті тадзи энӧ вӧчӧй.
Кӧсъян кӧ ыджыдӧ пуксьыны — кесъяв, кӧсъян кӧ юралысьӧ пуксьыны — ло кесйӧг туйын. Ӧд Морт Пи эз лок, медым Сылы кесъялісны. Сійӧ локтіс кесъявны да сетны Ассьыс олӧмсӧ унаӧс ньӧбӧм могысь».
Ерикон карысь петіганыс Исус бӧрся вӧтчис зэв уна йӧз.
Туй дорас пукалісны кык синтӧм морт. Кор кылісны Исуслысь на дорті мунӧмсӧ, горӧдісны: «Господьӧй, Давид Пи. Ло бур сьӧлӧма миян дінӧ.»
Йӧзыс ӧлӧдісны найӧс горзӧмысь, но найӧ ёнджыка на пондісны горзыны: «Господьӧй, Давид Пи. Ло бур сьӧлӧма.»
Исус сувтіс, корис найӧс да юаліс: «Мый ті кӧсъянныд?»
Найӧ вочавидзисны: «Господьӧй, кӧсъям аддзыны».
Исуслӧн сьӧлӧмыс нормис на вӧсна. Сійӧ инмӧдчыліс налы синмас, да найӧ дзик пыр кутісны аддзыны. Сэсся кыкнанныс мунісны Исус бӧрся.
21 юр.
Ерусалимлань матыстчигӧн Исус велӧдчысьясыскӧд воис Олив керӧсын сулалысь Виффагия сикт дорӧ. Ассьыс кык велӧдчысьсӧ мӧдӧдігӧн Исус шуис: «Мунӧй тайӧ сиктас. Сэтчӧ пыриганыд аддзанныд домалӧм чаня осёлӧс. Разьӧй да вайӧдӧй найӧс Ме дінӧ. Тіянлы кӧ мыйкӧ шуасны, вочавидзӧй, мый найӧ колӧны Господьлы. Сэки тіянлы дзик пыр сетасны».
Ставыс тадзи артмис, медым иніс пророклӧн шуӧмыс:
— Висьталӧй Сион нывлы: Видзӧд, Ӧксыыд локтӧ тэ дінӧ. Сійӧ рам, пукалӧ осёл вылын, сийӧсалӧм осёллӧн чань вылын.
Велӧдчысьяс мунісны да вӧчисны Исуслӧн тшӧктӧм серти. Вайӧдісны осёлӧс чаньыскӧд да пукталісны на вылӧ паськӧмнысӧ, сэсся Исус пуксис.
Унаӧн вольсавлісны ассьыныс паськӧмнысӧ туй вылас, мукӧдыс чегъялісны пу вожъяс да тшӧтш пукталісны туй вылас. Водзас да бӧрас мунысьяс горзісны:
— Осанна. Ошкӧм Давид Пилы.
Бурсиӧма Господь нимӧн Локтысьӧс.
Ошкӧм Медвылыссалы.
Кор Исус пырис Ерусалимӧ, став карыс шызис, быдӧн юасис: «Коді тайӧ?»
Йӧзыс шуалісны: «Тайӧ Исус, Галилеяса Назарет карысь Пророк».
Исус пырис Енлӧн крамӧ да вӧтлаліс сэтысь став вузасьысь-ньӧбасьысьсӧ, пӧрлӧдліс сьӧм вежысьяслысь пызанъяссӧ да гулюӧн вузасьысьяслысь пуклӧсъяссӧ. Сійӧ шуис налы: «Гижӧма: “Менам керкаӧй кевмысян керка лоӧ”. А ті сыысь вӧчинныд лёк вӧчысьяслы дзебсянін».
Крамын матыстчисны Исус дінӧ синтӧмъяс да коктӧмъяс. Исус бурдӧдаліс найӧс.
Кор аркирейяс Индӧдӧ велӧдысьяскӧд аддзисны Сылысь шензьӧданаторъяс вӧчӧмсӧ да кылісны крамын челядьлысь горзӧм: «Ошкӧм Давид Пилы.», ёна дӧзмисны. Исуслы шуисны: «Кылан-ӧ, мый найӧ шуалӧны?»
Исус вочавидзис: «Кыла.
Ті ӧмӧй энӧ лыддьылӧй: “Тэ лӧсьӧдін, медым кагаяс да челядь ошкисны Тэнӧ”».
Сэсся Исус эновтіс найӧс, петіс карсьыс да муніс вой кежлас Вифания сиктӧ.
Асывводзнас карӧ бӧр локтігас Исуслӧн кынӧмыс пондіс сюмавны. Туй дорсьыс Сійӧ аддзис инжир пу. Матыстчис да аддзис сы вылысь сӧмын коръяссӧ. Исус шуис пуыслы: «Пыр кежлӧ вотӧстӧг колян».
Инжир пуыс пырысь-пыр косьмис.
Тайӧс аддзылісны велӧдчысьяс да чуймӧмӧн шуисны: «Мыйла пуыс татшӧм ӧдйӧ косьмис?»
Исус вочавидзис: «Веськыда висьтала тіянлы: эсканныд кӧ да онӧ майшасьӧй, сэки онӧ сӧмын тайӧс вӧчӧй. Шуанныд кӧ тайӧ керӧсыслы: “Кыпӧдчы да шыбитчы саридзас”, лоӧ тадзи. Мый коранныд эскӧмӧн кевмысигад, лоӧ тіянлы».
Исус локтіс крамӧ. Сэні велӧдігас Сы дінӧ матыстчисны аркирейяс пӧрысьяскӧд да юалісны: «Кутшӧм вынӧн Тэ ставсӧ тайӧс вӧчан?
Коді Тэнӧ пуктіс тайӧс вӧчнысӧ?»
Исус воча шуис: «Ме тшӧтш тіянлысь ӧтитор юала.
Вочавидзанныд кӧ, висьтала, кутшӧм вынӧн ставсӧ тайӧс вӧча.
Иоанлӧн пыртӧмыс кодсянь вӧлі? Енсянь али мортсянь?»
Найӧ ас костаныс сёрнитісны: «Шуам кӧ: “Енсянь”, Сійӧ миянлы шуас: “Мыйла сылы энӧ эскӧй?
” Шуам кӧ: “Мортсянь”, йӧзсьыс ковмас повны, ӧд Иоанӧс ставныс пророкӧ пуктӧны».
Найӧ вочавидзисны: «Огӧ тӧдӧй».
Сэки Исус шуис: «Сідзкӧ, Ме тшӧтш ог висьтав, кутшӧм вынӧн ставсӧ тайӧс вӧча».
«Мый ті шуанныд та йылысь?
Ӧти мортлӧн вӧлі кык пи.
Ӧти пи дінас матыстчӧмӧн сійӧ шуас: “Пиӧй, мун талун уджышт виноград йӧрын”.
Пиыс вочавидзас: “Ог кӧсйы”. Бӧрынджык вежас мӧвпсӧ да мунас.
Батьыс матыстчас мӧд пиыс дінӧ да тшӧтш тадзи шуас.
Пиыс вочавидзас: “Батьӧй, муна, дерт”, но ачыс оз мун.
Кодныс нӧ батьыслӧн кӧсйӧм сертиыс вӧчис?»
Вочавидзисны: «Воддзаыс».
Исус шуис: «Веськыда висьтала тіянлы: вот перйысьяс да кырсалысь аньяс тіян водзвылын мунӧны Енлӧн Юраланінӧ. Иоан локтіс индыны тіянлы веськыдлуныслысь туйсӧ, а ті сылы энӧ эскӧй. Вот перйысьяс да кырсалысь аньяс эскисны сылы. Ті весиг тайӧс аддзылӧм бӧрын энӧ бергӧдчӧй мыжъяссьыныд да энӧ эскӧй сылы».
«Кывзӧй мӧд велӧданвисьт.
Овмӧс кутысь пуктас аслас йӧрӧ виноград, гӧгӧрыс потшас, вотӧс ныранін кодъяс да джуджыд лэбув лэптас. Сэсся йӧрсӧ виноград быдтысьяслы кӧртымӧ сетас, ачыс мунас.
Вотӧс чукӧртан кадӧ овмӧс кутысь мӧдӧдас кесйӧгъяссӧ босьтны вотӧсысь ассьыс пайсӧ.
Виноград быдтысьяс кутасны кесйӧгъяссӧ: ӧтиӧс нӧйтасны, мӧдӧс виасны, мукӧдсӧ изъяласны.
Овмӧс кутысь мӧдӧдас мукӧд кесйӧгъясӧс, воддза сертиыс унджыкӧс. Накӧд тшӧтш сідзи вӧчасны.
Медбӧрти виноград быдтысьяс дінӧ овмӧс кутысь мӧдӧдас ассьыс писӧ, мӧвпыштас: “Менам пиысь, гашкӧ, яндысясны”.
Писӧ аддзӧм бӧрын виноград быдтысьяс шуасны ӧта-мӧдныслы: “Тайӧ мортыслы вуджас овмӧсыс. Мунам да виам сійӧс, медым овмӧсыс миянлы коляс”.
Найӧ кутасны сійӧс, петкӧдасны виноград йӧрсьыс да виасны.
Мый вӧчас овмӧс кутысь виноград быдтысьяскӧд локтӧм мыстиыс?»
Вочавидзисны: «Тайӧ лёк йӧзсӧ сійӧ лёк нога виас. Виноград йӧрсӧ кӧртымӧ сетас мукӧдлы, кодъяс индӧм кадӧ сетасны сылы вотӧсысь пайсӧ».
Исус шуис: «Энӧ ӧмӧй Гижӧдсьыс лыддьылӧй: — Изйыс, кодӧс шыбитісны керка лэптысьяс, лоис пельӧс изйӧн.
Тайӧ Господьсянь да шензяна миян синъяслы.
Та вӧсна шуа тіянлы: Енсянь Юралӧмсӧ мырддясны тіянлысь да сетасны войтырлы, коді вайӧ Ен Юралӧмлысь вотӧссӧ.
Коді усяс тайӧ изйыс вылӧ, сійӧ пасьмунас. Код вылӧ изйыс усяс, сійӧс лямӧдас».
Тайӧ велӧданвисьтъяссӧ кылӧм бӧрын аркирейяс да фарисейяс гӧгӧрвоисны, мый Исус висьталіс на йылысь. Найӧ кӧсйисны кутны Сійӧс, но полісны йӧзсьыс, ӧд йӧзыс Сійӧс пророкӧ пуктісны.
22 юр.
Исус висьталіс нӧшта ӧти велӧданвисьт:
«Енэжвыв Юралӧмыс татшӧм. Ӧксы аслас пиыслы кӧлысь вӧчас. Сійӧ ыстас ассьыс кесйӧгъяссӧ корны йӧзӧс кӧлысь вылӧ. Корӧмаяс оз кӧсйыны локнысӧ.
Ӧксы бара мӧдӧдас мукӧд кесйӧгъясӧс да тшӧктас висьтавны корӧмаяслы: “Сёян-юан менам дасьтӧма, ӧшъяс-куканьяс начкӧма, ставыс дась. Локтӧй кӧлысясьны.
” Корӧмаяс пыдди оз пуктыны корӧмсӧ: ӧтияс мунасны видз-му выланыс, мӧдъяс вузасьны. Мукӧдыс кутасны ӧксылысь кесйӧгъяссӧ да кувтӧдзыс найӧс нӧйтасны.
Ӧксы кывлас та йылысь да ёна скӧрмас. Сійӧ мӧдӧдас ассьыс шыпуртаяссӧ вины морт виысьясӧс, а карсӧ тшӧктас сотны.
Сэсся аслас кесйӧгъяслы шуас: “Кӧлысь дась. Корӧмаясыд вӧлӧмкӧ шогмытӧмӧсь. Мунӧй туйвежъясӧ да корӧй кӧлысь вылӧ быдӧнӧс”.
Кесйӧгъяс мунасны да корасны быдӧнӧс: лёкъясӧс и буръясӧс. Кӧлысь гажӧдчанін тырас.
Ӧксы пырас гажӧдчанінӧ видзӧдлыны воӧмаясӧс да аддзас мортӧс, коді абу кӧлысь паськӧма. Ӧксы юалас сылысь: “Ёртӧй, кыдзи тэ пырин татчӧ кӧлысь паськӧмтӧгыс?
” Сійӧ кыв оз шу.
Сэки ӧксы тшӧктас кесйӧгъясыслы: “Ки-коксӧ кӧрталӧмӧн шыбитӧй сійӧс пемыдас.
Сэні лоӧ бӧрдӧм да пинь йирӧм”. Шуа тіянлы: унаӧс корӧма, но этшаӧс бӧрйӧма».
Фарисейяс мунісны да ас костаныс сёрнитчисны кыйны Исусӧс сёрниас.
Найӧ мӧдӧдісны Сы дінӧ Ирӧдлысь йӧзсӧ да ассьыныс велӧдчысьяссӧ. Локтӧмаяс шуисны: «Велӧдысь, ми тӧдам, мый Тэ веськыда сёрнитан да веськыда велӧдан Енлӧн туйӧ. Тэ он пов йӧзлӧн шуасьӧмысь, он видзӧд морт вылӧ.
Висьтав, колӧ-ӧ кесарлы вот мынтыны?»
Налысь наянлунсӧ тӧдӧмӧн Исус шуис: «Кык бана шаньгаяс. Мыйла ті зілянныд кыйны Менӧ? Петкӧдлӧй Меным вот мынтан сьӧмнытӧ».
Найӧ мыччисны Сылы динар.
Исус юаліс: «Кодлӧн тані чужӧмыс-нимыс?»
Найӧ вочавидзисны: «Кесарлӧн».
Исус шуис налы: «Кесарлысь сетӧй кесарлы, а Енлысь — Енлы».
Тайӧс кылӧмысь найӧ чуймисны, сэсся колисны Исусӧс да мунісны.
Сійӧ лунӧ локтісны Исус дінӧ саддукейяс, кодъяс шуӧны, ловзьӧмыс пӧ абу. Найӧ юалісны Исуслысь: «Велӧдысь, Мӧисей шулӧма, мый “ныв-питӧм морт кӧ кулас, вокыслы колӧ босьтны сылысь гӧтырсӧ да нюжӧдны аслас вокыслысь рӧдсӧ”.
Тані миян вӧлі сизим вок.
Ыджыдыс гӧтрасис, сэсся куліс, ныв-пиыс эз коль. Гӧтырсӧ вокыс босьтіс.
Тадзи лои мӧд вокыскӧд, коймӧдыскӧд, став сизимнанныскӧд.
Медбӧрын аньыс куліс.
Ловзьӧм бӧрас кодлы сійӧ гӧтырӧн лоас, ӧд сизим верӧс сылӧн вӧлі?»
Исус вочавидзис: «Ті ылалӧмныд Гижӧдъяссӧ да Енлысь вынсӧ тӧдтӧмныдла.
Ловзьӧмаяс оз гӧтрасьны да верӧс сайӧ оз мунны.
Найӧ Енлӧн енэжвыв анделъяс кодьӧсь.
Ловзьӧм йылысь шуа — ті ӧмӧй энӧ лыддьылӧй, Енмыс ӧд шуӧма: “Ме Ӧвраамлӧн Ен, Исааклӧн Ен да Яковлӧн Ен”?
Енмыс абу кулӧмаяслӧн Ен, Сійӧ ловъяяслӧн Ен».
Йӧзыс шензисны Сылӧн велӧдӧмысь.
Фарисейяс кор кылісны, мый Исус ланьтӧдӧма саддукейясӧс, чукӧртчисны ӧтлаӧ.
На пиысь ӧти, Индӧдӧ велӧдысь, Исусӧс кыйӧм могысь юаліс: «Велӧдысь, Индӧдас кутшӧм тшӧктӧм медыджыд?»
Исус шуис: «Радейт ассьыд Господь Ентӧ став сьӧлӧмнад, став олӧмнад да став мывкыднад.
Тайӧ медыджыд да медтӧдчана тшӧктӧм.
Сы кодь мӧд тшӧктӧмыс: радейт матыссатӧ асьтӧ моз.
Тайӧ кык тшӧктӧмыс вылӧ подуласьӧ став Индӧдыс да пророк гижӧдъяс».
Исус юаліс чукӧртчӧм фарисейяслысь: «Мый шуанныд Кристос йылысь?
Кодлӧн Сійӧ пи?»
Найӧ вочавидзисны: «Давидлӧн».
Сэки Исус юаліс: «Мыйла нӧ Ловсянь сёрнитігас Давид шуӧ Сійӧс Господьӧн:
— Господь шуис менам Господьлы: “Пукав Менам веськыдладорын, кытчӧдз ог пукты Тэнад кок улӧ Тэныд паныд мунысьясӧс”.
Давид кӧ шуӧ Сійӧс Господьӧн, кыдзи нӧ Сійӧ сылы пиӧн лоӧ?»
Исуслы некод эз вермы воча кыв шуны.
Сійӧ лунсянь некод нин эз лысьт юасьны Сылысь.
23 юр.
Йӧз чукӧрлы да велӧдчысьясыслы Исус висьталіс: «Мӧисей пуклӧсӧ пуксисны Индӧдӧ велӧдысьяс да фарисейяс.
Кывзӧй найӧс да вӧчӧй ставсӧ налӧн шуӧм серти.
Сӧмын на ног энӧ олӧй: найӧ ӧтитор шуӧны, а мӧдтор вӧчӧны.
Найӧ кӧртавлӧны сьӧкыд, нуны вермытӧм нӧбъяс да пуктӧны йӧзлы пельпом вылас. Но асьныс весиг чунь помнас вӧрзьӧдны оз кӧсйыны.
Найӧ ставсӧ вӧчӧны йӧзлы петкӧдлӧм могысь: ӧшлӧны ас выланыс ыджыд кудъяс, кузьмӧдӧны паськӧм дорыш тугъяссӧ.
Найӧ радейтӧны гажӧдчанінын бурджыклаӧ пуксьыны, синагогаын водзын пукавны да йӧзаинын чолӧмалӧмъяс кывзыны. Налы сьӧлӧм вылас воӧ, ыдждӧдлӧны кӧ найӧс велӧдысьӧн.
Но ті энӧ пуксьӧй велӧдысьӧ, ӧд Велӧдысьыс тіян ӧти — Кристос, а ті ӧта-мӧдныдлы вокъяс.
Тайӧ му вылас некодӧс энӧ ыдждӧдлӧй батьӧн, ӧд Батьыс тіян ӧти — енэжъяс вылын.
Энӧ пуксьӧй туйдӧдысьӧ, ӧд Туйдӧдысьыс тіян ӧти — Кристос.
Тіян пӧвстысь ыджыдджыкыс мед лоӧ тіянлы кесъялысьӧн. Ӧд асьсӧ вылӧ пуктысьӧс лэдзасны, асьсӧ улӧ пуктысьӧс кыпӧдасны».
«Курыд шог тіянлы, Индӧдӧ велӧдысьяс да фарисейяс. Кык бана шаньгаяс. Ті Енэжвыв Юраланінысь ӧдзӧссӧ йӧз водзын пӧдлаланныд. Асьныд онӧ пырӧй да пырны кӧсйысьясӧс онӧ лэдзӧй.
Курыд шог тіянлы, Индӧдӧ велӧдысьяс да фарисейяс. Кык бана шаньгаяс. Ті дӧваяслысь керкасӧ куштанныд да асьнытӧ петкӧдлӧм могысь дыр кевмысянныд. Таысь тіянӧс чорыда мыждасны.
Курыд шог тіянлы, Индӧдӧ велӧдысьяс да фарисейяс. Кык бана шаньгаяс. Ті мусӧ да васӧ вуджанныд, медым аддзыны тіян бӧрся ӧти мунысьӧс. А сюрас кӧ, ті вӧчанныд сыысь куслытӧм биӧ мунысьӧс, кык пӧв лёкджыкӧс на ас дорсьыныд.
Курыд шог тіянлы, синтӧм нуӧдысьяс. Ті шуанныд: “Мортыс кӧ крам водзын кыв сетас, тайӧ кывсӧ позьӧ торкны. Сетас кӧ кывсӧ крамлӧн зарни водзын, таысь кывкутас”.
Синтӧмъяс да мывкыдтӧмъяс.
Мый ыджыдджык: зарниыс али зарнисӧ вежӧдысь крамыс?
Ті шуанныд: “Мортыс кӧ висьпуктанін водзын кыв сетас, тайӧ кывсӧ позьӧ торкны. Сетас кӧ кывсӧ висьпуктанінӧ вайӧмтор водзын, таысь кывкутас”.
Синтӧмъяс.
Мый ыджыдджык: вайӧмторйыс али вайӧмторсӧ вежӧдысь висьпуктаніныс?
Мортыс кӧ висьпуктанін водзын кыв сетӧ, сійӧ кыв сетӧ тшӧтш став вайӧмторйыс водзын.
Крам водзын кӧ кыв сетӧ, сійӧ кыв сетӧ тшӧтш сэні Олысьыс водзын.
Мортыс кӧ енэж водзын кыв сетӧ, сійӧ кыв сетӧ Ен пуклӧс водзын да Пукалысьыс водзын.
Курыд шог тіянлы, Индӧдӧ велӧдысьяс да фарисейяс. Кык бана шаньгаяс. Ті сетанныд исань турунысь, укропысь да тминысь дасӧд юкӧнсӧ. А Индӧдысь коланаджыкторсӧ эновтінныд: веськыда мыждӧмсӧ, буралӧмсӧ да эскӧмсӧ.
Тайӧс колӧ вӧчны да мукӧдторсӧ оз ков вунӧдны.
Синтӧм нуӧдысьяс. Номйӧс сӧдзӧданныд да верблюдӧс ньылаланныд.
Курыд шог тіянлы, Индӧдӧ велӧдысьяс да фарисейяс. Кык бана шаньгаяс. Ті тасьті-дозмуклысь ортсысӧ весаланныд, а пытшкӧсыс гусясьӧмӧн да ылӧдчӧмӧн тырӧма.
Синтӧм фарисей, медводз пытшкӧссяньыс весав тасьті-дозмуктӧ, сэки ортсысяньыс тшӧтш сӧстӧммас.
Курыд шог тіянлы, Индӧдӧ велӧдысьяс да фарисейяс. Кык бана шаньгаяс. Ті еджыдӧн мавтӧм гортъяс кодьӧсь. Ортсысяньыс сійӧ мича, а пытшкӧсас тырыс шой лы да быд пежыс.
Ортсысяньныд, видзӧдны кӧ, веськыда олысьяс кодьӧсь, а пытшкӧсныд пӧръясьӧмӧн да лёк вӧчӧмӧн тырӧма.
Курыд шог тіянлы, Индӧдӧ велӧдысьяс да фарисейяс. Кык бана шаньгаяс. Ті сувтӧданныд пророкъяс дзебанінӧ казьтылан изъяс да мичмӧданныд веськыда олысьяслысь дзебанінъяссӧ. Ті шуанныд: “Овлім кӧ ми батьяслӧн кадӧ, эгӧ эськӧ ӧтувтчӧй накӧд кисьтны пророкъяслысь вирсӧ”.
Ті асьныд висьталанныд, мый ті пророк виысьяслӧн пиян.
Тыртӧй батьясныдлысь лыдсӧ.
Змейяс. Вижля йылӧм.
Мынанныд-ӧ куслытӧм биӧ мыждӧмысь?
Ме мӧдӧда тіян дінӧ пророкъясӧс, сюсь вежӧра йӧзӧс да велӧдысьясӧс.
Ӧтиясӧс вианныд да крестӧ тувъяланныд, мӧдъясӧс синагогаын чорыда нӧйтанныд да карысь карӧ вӧтланныд.
Тадзи тіянӧс мыждасны став веськыда олысьыслӧн вирысь: веськыда олысь Авель вирсянь Варакейлӧн Закар пи вирӧдз, кодӧс ті виинныд крам да висьпуктанін костын.
Веськыда висьтала тіянлы: таысь ставсьыс мыжыс усьӧ ӧнія олысьяс вылӧ.»
«Ерусалим, Ерусалим. Пророкъясӧс виалысь да тэ дінӧ ыстӧмаясӧс изъялысь.
Кымынысь Ме кӧсйи чукӧртны тэнсьыд ныв-питӧ, кыдзи лэбач чукӧртӧ ассьыс пиянсӧ борд улас, но ті энӧ кӧсйӧй.
Со, тіян крамныд тыртӧммас.
Шуа тіянлы: онӧ аддзӧй Менӧ тайӧ кывъяссӧ шутӧдз: “Бурсиӧма Господь нимӧн Локтысьӧс”».
24 юр.
Исус петіс крамысь да мӧдӧдчис мунны. Сы дінӧ матыстчисны велӧдчысьясыс, медым петкӧдлыны Сылы крамсӧ.
Исус шуис налы: «Аддзанныд-ӧ ставсӧ тайӧс?
Веськыда висьтала тіянлы: татчӧ из вылӧ из оз коль, ставсӧ жугӧдасны».
Кор Исус вӧлі пукалӧ Олив керӧсын, Сы дінӧ локтісны велӧдчысьясыс да юалісны: «Висьтав, кор ставыс тайӧ лоас?
Мый серти ми тӧдмалам Тэнсьыд локтӧмтӧ да нэм помасьӧмсӧ?»
Исус шуис: «Видзчысьӧй, мед эз ылӧдны тіянӧс. Унаӧн Менам нимӧн локтасны да шуасны, ме пӧ Кристос, да унаӧс ылӧдасны.
Ті кыланныд тыш мунӧмъяс да тыш йылысь юӧръяс, сӧмын энӧ полӧй.
Тайӧ ставыслы колӧ лонысӧ, сӧмын тайӧ абу на пом.
Войтыр войтырлы паныд сувтас, муяс ӧта-мӧдныслы паныд кыпӧдчасны.
Уналаын лоас му вӧрӧм да тшыгъялӧм, йӧзсӧ суас кулан висьӧм. Но тайӧ ставыс чужтӧм водзвывса дойяс на.
Тіянӧс пондасны дзескӧдны да унаӧс виасны.
Менам ним вӧсна став йӧзыс мустӧмтасны тіянӧс.
Сэки унаӧн эновтчасны эскӧмсьыс, ӧта-мӧднысӧ вузаласны да мустӧмтасны.
Уна ылӧгпророк локтас, унаӧс найӧ ылӧдасны.
Лёкыс содӧм вӧсна уналӧн муслуныс кӧдзалас.
Но сьӧкыдсӧ помӧдз нуысь мездмас.
Ен Юралӧм йылысь Евангелльӧсӧ висьталасны муюгыд пасьтала, быд кыла войтырлы тӧдмӧнъя.
Сэсся воас пом».
«Кор ті аддзанныд вежаинсьыс пеж зывӧксӧ, мый йылысь Даниил пророк на висьтавліс, — лыддьысьысь мед гӧгӧрвоӧ — сэки Юдея муын олысьяс мед пышъясны керӧсъясӧ.
Коді лоас керка вылас, мед оз пыр керкаас босьтны мыйкӧ.
Коді лоас видз-му вылас, мед оз кос гортас паськӧмысла.
Сійӧ лунъясӧ ёна сьӧкыд лоӧ нӧбасьысьяслы да нёньӧдчысьяслы.
Кевмысьӧй, мед эз ковмы пышйынытӧ тӧлын либӧ шойччан лунӧ.
Сэки ыджыд шог суас йӧзсӧ, татшӧмыс му пуксьӧмсяньыс эз на вӧвлы да оз нин ло.
Енмыс кӧ тайӧ кадсӧ оз дженьдӧд, ловъя морт оз коль.
Но Аслас бӧрйӧмаяс вӧсна Сійӧ дженьдӧдас тайӧ кадсӧ.
Сэки шуасны кӧ тіянлы: “Кристос тані”, либӧ шуасны: “Кристос сэні”, энӧ эскӧй.
Ӧд ылӧгкристосъяс да ылӧгпророкъяс локтасны да пондасны вӧчны ыджыд шензьӧданаторъяс, медым ылӧдны, позяс кӧ, весиг бӧрйӧмаясӧс.
Со, Ме водзвыв висьталі тіянлы.
Тіянлы кӧ шуасны: “Сійӧ овтӧминын”, энӧ мунӧй.
Шуасны кӧ: “Сійӧ керка пытшкын”, энӧ эскӧй.
Енэжсӧ асыввывсянь рытыввылӧдз югдӧдысь чардби моз Морт Пи локтас.
Кӧні шой, сэтчӧ чукӧртчасны кутшъяс».
«Регыд тайӧ шог лунъяс бӧрын шондіыс пемдас, тӧлысьыс кусас, енэжысь кодзувъяс усясны, енэжвыв вынъяс вӧрзясны.
Сэки енэжас тыдовтчас Морт Пилӧн пас.
Мувывса став йӧзыс ырзӧмӧн бӧрддзасны, кор аддзасны кымӧръяс вылын ыджыд вынӧн да дзирдлунӧн локтысь Морт Пиӧс.
Кор кылас трубалӧн гора шыыс, Сійӧ мӧдӧдас анделъяссӧ нёльнан му вежтасас, медым чукӧртны Ассьыс бӧрйӧмаяссӧ став му пельӧссьыс.
Инжир пу вылӧ кӧ видзӧдам, аддзам: вожъясыс кӧ ловзьӧны да коръясыс потӧны, сідзкӧ, гожӧмыс матын.
Тадзи, ставсӧ тайӧс аддзигӧн тӧдӧй: сійӧ кадыс матын, ӧдзӧс дорад нин.
Веськыда висьтала тіянлы: ставыс тайӧ лоас ӧнія олысьяс дырйи на.
Енэжыс да муыс бырас, а Менам кывъясӧй оз бырны.
Сійӧ лунсӧ да сійӧ кадсӧ некод оз тӧд. Анделъяс оз тӧдны, сӧмын Батьӧй тӧдӧ.
Кыдзи вӧлі Ной лунъяс дырйи, сідзи лоӧ Морт Пи локтігӧн.
Ыджыд ойдӧм водзвылас, ковчегӧ Нойлӧн пыртӧдз йӧзыс сёйисны-юисны, гӧтрасисны да верӧс сайӧ мунісны. Кытчӧдз эз су найӧс ойдӧмыс да ваӧ пӧдӧмыс, найӧ эз вежӧртны, мый виччысьӧ найӧс. Тадзи жӧ лоас Морт Пи локтігӧн.
Сэки видз-му вылын лоасны кыкӧн: ӧтисӧ босьтасны, мӧдсӧ колясны.
Изанінын лоасны кык ань: ӧтисӧ босьтасны, мӧдсӧ колясны.
Лоӧй дасьӧсь, ӧд онӧ тӧдӧй Господьныдлысь локтан кадсӧ.
Ті тӧданныд: керка кутысь кӧ тӧдіс гусясьысьлысь локтан кадсӧ, сэки эськӧ эз узь да эз лэдз керкаас.
Лоӧй дасьӧсь, ӧд Морт Пи локтас виччысьтӧг».
«Лоӧй эскана да мывкыда кесйӧг кодьӧсь. Татшӧмсӧ ыджыдыс пуктас веськӧдлыны мукӧд кесйӧгъясӧн, медым ас кадӧ налы сёян-юан сетны.
Кесйӧгыс шуда, ыджыдыс кӧ гортас воигӧн аддзас сійӧс тадзи вӧчӧмӧн.
Веськыда висьтала тіянлы: ыджыдыс пуктас сійӧс веськӧдлыны став аслас овмӧсӧн.
Шогмытӧм кесйӧг вермас мӧвпыштны: “Ыджыдӧй дыр на оз лок”. Сійӧ пондас нӧйтны уджъёртъяссӧ да сёйны-юны кодалысьяскӧд. Но виччысьтӧм лунӧ, лӧсявтӧм кадӧ кесйӧглӧн ыджыдыс воас. Сійӧ кералас кесйӧгсӧ да шыбитас сійӧс кык бана шаньгаяс дінӧ.
Сэні лоӧ бӧрдӧм да пинь йирӧм».
25 юр.
«Енэжвыв Юралӧмыс татшӧм. Дас ныв биясӧн верӧспулы воча петасны.
Витыс вӧлі мывкыдтӧм, мӧд витыс — мывкыда.
Мывкыдтӧмъяс бинысӧ босьтасны, а выйсӧ оз.
Мывкыдаяс биысь ӧтдор вый тыра дознысӧ босьтасны.
Верӧспуыс дыр оз во, и ставныс вугыртасны да унмовсясны.
Вой шӧрнас кылас горӧдӧм: “Верӧспу локтӧ. Петӧй сылы воча.
” Нывъяс садьмасны да лӧсьӧдасны бияснысӧ.
Мывкыдтӧм нывъяс шуасны мывкыдаяслы: “Миян биным кусӧ, вайыштӧй выйнытӧ.
” Мывкыдаяс шуасны: “Огӧ. Ставнымлы выйыс оз тырмы. Мунӧй да ньӧбӧй вузалысьяслысь”.
Мывкыдтӧм нывъяслӧн выйла ветлігкості верӧспуыд воас. Нывъяс, кодъяс вӧліны дасьӧсь, пырасны сыкӧд кӧлысь вылӧ, да на бӧрся ӧдзӧссӧ йигналасны.
Сёрӧнджык мӧд витыс локтас. Найӧ пондасны вӧзйысьны: “Ыджыдӧй, ыджыдӧй, восьт миянлы.
” Сійӧ вочавидзас: “Веськыда висьтала тіянлы: ог тӧд тіянӧс”.
Лоӧй дасьӧсь, ӧд онӧ тӧдӧй Морт Пилысь локтан лунсӧ да кадсӧ».
«Ӧти морт ылі туйӧ мӧдӧдчигас корас ас дорас кесйӧгъяссӧ да коляс налы ассьыс овмӧссӧ.
Быдӧнлы сямыс-выныс серти сетас зарни сьӧм: ӧтилы вит талант, мӧдлы кык, коймӧдлы ӧти талант. Сэсся мунас.
Вит талант босьтысь пырысь-пыр сьӧмсӧ уджӧ бергӧдас да содтӧд босьтас вит талант.
Тадзи вӧчас тшӧтш мӧдыс да содтӧд босьтас кык талант.
Ӧти талант босьтысь мунас, кодъяс гу да аслас ыджыдлысь сьӧмсӧ гуалас.
Дыр мысти кесйӧгъяслӧн ыджыдыс локтас да юалас найӧс сьӧм йывсьыс.
Вит талант босьтысь содтӧд ваяс вит талант да шуас: “Ыджыдӧй, тэ меным витӧс сетлін. Видзӧдлы, нӧшта менам вит содіс”.
Ыджыдыс шуас: “Бура вӧчин. Тэ бур да эскана кесйӧг.
Ичӧтас тэ эскана вӧлін, уна вылӧ тэнӧ пукта.
Лок, ӧтлаын гажӧдчам-нимкодясям”.
Кык талант босьтысь локтас да шуас: “Ыджыдӧй, тэ меным кык талант сетлін.
Видзӧдлы, нӧшта менам кык содіс”.
Ыджыдыс шуас сылы: “Бура вӧчин. Тэ бур да эскана кесйӧг.
Ичӧтас тэ эскана вӧлін, уна вылӧ тэнӧ пукта.
Лок, ӧтлаын гажӧдчам-нимкодясям”.
Сэсся ӧти талант босьтысь локтас да шуас: “Ыджыдӧй, ме тӧда, тэ чорыд морт: вундан, кытчӧ эн кӧдзлы, да чукӧртан, кытчӧ кӧйдыссӧ эн шыбитлы. Тэысь полӧмӧйла ме муні да гуалі таланттӧ.
Со, тэнад сьӧмыд”.
Ыджыдыс шуас сылы: “Тэ шогмытӧм дыш кесйӧг.
Тэ тӧдін, мый ме вунда, кытчӧ эг кӧдзлы, да чукӧрта, кытчӧ кӧйдыссӧ эг шыбитлы.
Тэныд колӧ вӧлі менсьым талантӧс сьӧмчукӧртанінӧ пуктыны, локтӧм бӧрам эськӧ содтӧдӧн босьті.
Мырддьӧй сылысь талантсӧ да сетӧй дас талантаыслы.
Кодлӧн эм, сылы коланасьыс унджык на сетасны. Кодлӧн абу, сылысь бӧръясӧ босьтасны.
Тайӧ шогмытӧм кесйӧгсӧ шыбитӧй пемыдас. Сэні лоӧ бӧрдӧм да пинь йирӧм”».
Тайӧс висьталӧм бӧрын Исус горӧдӧмӧн шуис: «Кодлӧн эм пель, мед кылӧ.»
«Морт Пи локтас Аслас дзирдлунӧн вежа анделъяскӧд да пуксяс дзирдлуныслӧн юралан пуклӧсӧ. Сэки чукӧртчас Сы водзӧ быд кыла войтыр, да Сійӧ торйӧдас найӧс, кыдзи видзысь торйӧдӧ ыжъяссӧ кӧзаяссьыс.
Ыжъяссӧ сувтӧдас веськыдладорас, кӧзаяссӧ шуйгаладорас.
Сэки веськыдладорын сулалысьяслы Ӧксы шуас: “Локтӧй, менам Батьлӧн бурсиӧмаяс. Тіянлы вуджӧ Енлӧн Юраланіныс, кодӧс дасьтӧма тіянлы му пуксьӧмсяньыс.
Кор Менам кынӧмӧй сюмаліс, ті Менӧ вердінныд, кор горшӧй косьмис, ті Менӧ юкталінныд.
Кор Ме локті мӧд муысь, ті Менӧ керкаад сибӧдінныд, кор вӧлі пасьтӧм, ті Менӧ пасьтӧдінныд. Висигӧн ті видлалінныд Менӧ, дзескыдінын пукалігӧн волывлінныд Ме дінӧ”.
Сэки веськыда олысьяс Сылы шуасны: “Господьӧй, кор ми аддзылім Тэнӧ тшыгъялӧмӧн да вердім, горш косьмӧмӧн да юкталім?
Кор ми аддзылім Тэнӧ мӧд муысь локтысьӧн да сибӧдім, пасьтӧмӧн да пасьтӧдім?
Кор ми аддзылім Тэнӧ висьӧмӧн да видлалім, дзескыдінын пукалысьӧн да волывлім Тэ дінӧ?
” Ӧксы шуас налы: “Веськыда висьтала тіянлы: тайӧс кӧ ті вӧчинныд Менам ичӧт вокъясысь ӧтилы, сідзкӧ, вӧчинныд Меным”.
Сэсся Сійӧ шуйгаладорын сулалысьяслы шуас: “Вешйӧй Ме дінысь, ёрӧмаяс. Мунӧй омӧльыслы да сылӧн анделъяслы дасьтӧм куслытӧм биӧ. Кор Менам кынӧмӧй сюмаліс, ті Менӧ энӧ вердӧй, кор горшӧй косьмис, ті Менӧ энӧ юкталӧй.
Кор Ме локті мӧд муысь, ті Менӧ энӧ сибӧдӧй, кор вӧлі пасьтӧм, ті Менӧ энӧ пасьтӧдӧй. Висигӧн ті энӧ видлалӧй Менӧ, дзескыдінын пукалігӧн энӧ волывлӧй Ме дінӧ”.
Сэки найӧ юаласны Сылысь: “Господьӧй, кор ми аддзылім Тэнӧ тшыгъялӧмӧн, горш косьмӧмӧн, мӧд муысь локтысьӧн, пасьтӧмӧн, висьӧмӧн, дзескыдінын пукалысьӧн да эгӧ отсалӧй Тэныд?
” Сэки Сійӧ вочавидзас: “Веськыда висьтала тіянлы: тайӧс кӧ ті энӧ вӧчӧй ичӧтъяс пиысь ӧтилы, сідзкӧ, энӧ вӧчӧй Меным”.
Сэсся найӧ мунасны помтӧм мучитчӧмӧ, а веськыда олысьяс — помтӧм олӧмӧ».
26 юр.
Тайӧс ставсӧ висьталӧм бӧрын Исус шуис велӧдчысьясыслы: «Кык лун мысти, ті тӧданныд, Ыджыд лун лоӧ. Тайӧ кадӧ Морт Пиӧс вузаласны да крестӧ тувъяласны».
Аркирейяс, Индӧдӧ велӧдысьяс да пӧрысьяс чукӧртчисны Каиаф нима аркирей керкаӧ. Найӧ сёрнитчисны ылӧдлӧмӧн босьтны Исусӧс да вины.
Но шуисны, Ыджыд лунӧ пӧ оз ков, ӧд йӧзыс вермасны шызьыны.
Исус вӧлі Вифания сиктын, проказаысь бурдӧм Симон ордын. Исус дінӧ локтіс ань, сійӧ вайис вальді дозйын дона вый. Исуслӧн сёйигӧн ань кисьталіс выйсӧ Исуслы юр вылас.
Велӧдчысьяс аддзисны да пондісны шуасьны: «Мыйла, бара, лотӧ-а?
Тайӧ выйсӧ позис ыджыд донысь вузавны да сьӧмсӧ сетны гӧльяслы».
Тайӧс казялӧмӧн Исус шуис налы: «Мыйла ті шӧйӧвоштанныд аньсӧ?
Сійӧ буртор вӧчис Меным. Гӧльяс пыр лоасны тіянкӧд, а Ме тіянкӧд ог пыр ло. Выйӧн киськалӧмнас аньыс дасьтіс Менӧ дзебигкежлӧ.
Веськыда висьтала тіянлы: муюгыд пасьтала, кӧні висьталасны тайӧ Евангелльӧсӧ, сэні казьтыштасны тайӧ аньсӧ да висьталасны, мый сійӧ вӧчис».
Искариот Иуда вӧлі дас кык велӧдчысьысь ӧти. Сійӧ муніс аркирейяс дінӧ да шуис: «Мый сетанныд, вузала кӧ тіянлы Исусӧс?»
Найӧ вӧзйисны сылы комын эзысь сьӧм.
Сэксянь Иуда пондіс корсьны лӧсялан кад, медым вузавны Исусӧс.
Шомтӧм нянь сёян лунъяс дырйи медводдза лунӧ Исус дінӧ локтісны велӧдчысьясыс да юалісны: «Кӧні кӧсъян сёйны Ыджыд лунся ыжӧс? Ми мунам да дасьтам».
Исус шуис: «Мунӧй карӧ сэтшӧмтӧ морт дінӧ да висьталӧй сылы: “Велӧдысь шуис: Менам кадӧй матысмӧ. Тэ ордын велӧдчысьяскӧд пасъя Ыджыд лунсӧ”».
Велӧдчысьяс вӧчисны Исуслӧн тшӧктӧм серти, дасьтісны Ыджыд лунся сёян.
Рытнас Исус пуксис дас кыкнан велӧдчысьыскӧд сёйны.
Сёйиганыс шуис налы: «Веськыда висьтала тіянлы: тіян пиысь ӧти вузалас Менӧ».
Шогӧ усьӧмӧн быдӧн кутіс юасьны: «Ог-ӧ ме, Господьӧй?»
Исус вочавидзис: «Менӧ вузалысь Мекӧд ӧти тасьтіысь сёйӧ. Морт Пи мунӧ, кыдзи гижӧма Сы йылысь. Но курыд шог Сійӧс вузалысьлы. Бурджык сылы вӧлі, эз кӧ чужлы».
Сэки Сійӧс вузалысь Иуда шыасис: «Велӧдысьӧй, абу-ӧ ме?»
Исус вочавидзис: «Тэ шуин».
Сёйиганыс Исус босьтіс нянь, Енмӧс аттьӧалӧмӧн чегис няньсӧ да велӧдчысьяслы сетігас шуис: «Босьтӧй, сёйӧй, тайӧ Менам Яй».
Сэсся босьтіс чаша, аттьӧаліс Енмӧс да велӧдчысьяслы сетігас шуис: «Юӧй татысь быдӧн. Тайӧ Менам Вир — Выль Йитӧдлӧн Вир — киссьӧ уналысь мыжъяссӧ прӧститӧм вӧсна.
Висьтала тіянлы: ӧнісянь ог понды юны тайӧ виноград юансӧ сійӧ лунӧдз, кор понда юны тіянкӧд выльӧс Менам Батьлӧн Юраланінын».
Енлы сьылӧм бӧрын найӧ кайисны Олив керӧсӧ.
Исус шуис велӧдчысьясыслы: «Тавой ті ставныд эновтанныд Менӧ. Гижӧма: “Видзысьсӧ кувмӧн дойда, да ыжъясыс разаласны”. Ловзьӧм бӧрам Ме виччыся тіянӧс Галилеяын».
Петыр шуис: «Ставныс кӧ эновтасны Тэнӧ, ме ог».
Исус вочавидзис: «Веськыда висьтала тэныд: тавой петук чукӧсттӧдз на тэ куимысь соссян Меысь».
Петыр шуис: «Весиг кӧ кувны ковмас Тэкӧд, ог соссьы».
Тадзи шуалісны тшӧтш мукӧд велӧдчысьыс.
Сэсся Исус велӧдчысьясыскӧд локтіс Гефсиманӧ. Сійӧ шуис налы: «Пукалыштӧй тані, Ме ветла кевмысьны».
Аскӧдыс босьтіс Петырӧс да Зеведейлысь кыкнан писӧ. Исусӧс гажтӧм да шогалӧм босьтіс.
Сійӧ шуис: «Шогӧй кувмӧн топӧдӧ лолӧс. Олыштӧй тані Мекӧд да энӧ узьӧй».
Ачыс водзлань муныштіс да чужӧмнас муӧ уськӧдчӧмӧн кевмысис: «Батьӧй, позьӧ кӧ, вешты Ме дінысь тайӧ чашасӧ. Сӧмын мед лоас Тэнад кӧсйӧм серти, а оз Менам».
Исус матыстчис велӧдчысьяс дінас да аддзис: найӧ унмовсьӧмаӧсь. Петырлы шуис: «Ӧти час весиг энӧ вермӧй узьтӧг олыштны Мекӧд.
Энӧ узьӧй, кевмысьӧй, мед ыштӧдӧмыс эз вермы тіянӧс. Лолыд ӧд пыр дась, а вир-яйыд жеб».
Исус мӧдысь муніс да бара кевмысис: «Батьӧй, Ме дінысь кӧ оз позь вештыны тайӧ чашасӧ, а Меным кӧ колӧ юны сійӧс, мед лоас Тэнад кӧсйӧм серти».
Локтӧм бӧрас бара аддзис: велӧдчысьяссӧ унмыс топыда личкӧма.
Исус колис найӧс да бара муніс, воддза мозыс коймӧдысь кевмысис.
Сэсся локтіс велӧдчысьяс дінас да шуис налы: «Пыр на узянныд да шойччанныд?
Кадыс воис. Морт Пиӧс мыжаяс киӧ сетӧны. Чеччӧй, мунамӧй. Менӧ вузалысь матын нин».
Исуслӧн сёрнитігкості локтіс Иуда, дас кык велӧдчысьысь ӧти. Сыкӧд тшӧтш локтісны зоръясӧн да шыпуртъясӧн уна йӧз. Найӧс мӧдӧдӧмаӧсь аркирейяс да пӧрысьяс.
Исусӧс вузалысь шуӧма локтӧмаяслы, кодӧс пӧ окышта, Сійӧс и босьтӧй.
Иуда веськыда муніс Исус дінӧ да шуис: «Видза олан, Велӧдысьӧй», сэсся окыштіс Сійӧс.
Исус шуис сылы: «Ёртӧй, та понда-ӧ тэ локтін.»
Сэки кытшалісны да босьтісны Исусӧс.
Исускӧд вӧлысьясысь ӧти перйис шыпуртсӧ да керыштіс аркирей кесйӧглысь пельсӧ.
Исус шуис сылы: «Бӧр сюй шыпурттӧ. Шыпурт босьтысь шыпурт помысь кулас. Он ӧмӧй тӧд, Ме кӧ ӧні кора Батьӧйлысь, Сійӧ вермас мӧдӧдны уна дас сюрс анделӧс.
Кыдзи нӧ сэки Гижӧдъясыс инасны? Сэні шуӧма, тадзи колӧ лоны».
Йӧз чукӧрлы Исус шуис: «Лёк вӧчысьӧс моз зорйӧн-шыпуртӧн локтінныд босьтны Менӧ. Ме быд лун тіян крамын пукалі-велӧді, да ті энӧ босьтӧй Менӧ.
Ставыс тадзи артмис, медым инісны пророк гижӧдъяс».
Сэки велӧдчысьяс ставныс эновтісны Исусӧс да пышйисны.
Исусӧс кутысьяс вайӧдісны Сійӧс Каиаф аркирей ордӧ, кӧні вӧлі чукӧртчӧмаӧсь Индӧдӧ велӧдысьяс пӧрысьяскӧд.
Петыр бӧрӧ кольччӧмӧн вӧтчис Исус бӧрся аркирей керка дорӧдз. Пырис йӧрас да пуксис кесйӧгъяскӧд орччӧн — кӧсйис помсӧ аддзывны.
Аркирейяс, пӧрысьяс да став веськӧдлан котырыс корсисны Исуслы паныд ылӧгвисьталысьясӧс, медым сэсся мыждыны да вины Сійӧс. Уна пӧръясьысь воліс, но колана висьталысьыс эз сюр.
Бӧрынджык нӧшта кык ылӧгвисьталысь локтісны. Найӧ висьталісны: «Сійӧ шуліс, верма пӧ Енлысь крамсӧ жугӧдны, сэсся пӧ куим лунӧн сійӧс бӧр лэптыны».
Сэки аркирей сувтіс да юаліс Исуслысь: «Мый воча шуан?» Исус чӧв оліс.
Аркирей шуис: «Ловъя Ен водзын висьтав миянлы, Тэ-ӧ Кристос, Ен Пи».
Исус вочавидзис: «Тэ шуин. Висьтала тіянлы: ӧнісянь аддзанныд Морт Пиӧс, Ставсӧвермысьлӧн веськыдладорас пукалысьӧс да кымӧръяс вылын локтысьӧс».
Сэки аркирей косяліс ассьыс паськӧмсӧ да шуис: «Сійӧ Енмӧс омӧльтӧ.
Висьталысьяс миянлы оз нин ковны, ті асьныд кывлінныд Сылысь омӧльтӧмсӧ.
Мый шуанныд?»
Вочавидзисны: «Мыжа. Вины Сійӧс.»
Сэсся сьӧлалісны Исуслы чужӧмас, нӧйтісны Сійӧс да чужӧмас кучкалӧмӧн шуалісны: «Висьтав, Кристос, коді кучкис Тэнӧ?»
Петыр пукаліс йӧрас.
Ӧти кесйӧг ань матыстчис сы дінӧ да шуис: «Тэ тшӧтш галилеяса Исускӧд вӧлін».
Петыр став йӧз водзас соссис: «Ог гӧгӧрво, мый висьталан», сэсся вешйис дзиръя дорӧ.
Петырӧс казяліс мӧд ань да шуис сэні сулалысьяслы: «Тайӧ мортыс Назаретса Исускӧд вӧлі».
Петыр бара соссис, чорыда шуис: «Ме ог тӧд тайӧ Мортсӧ.»
Бӧрынджык сэні сулалысьяс матыстчисны да шуисны Петырлы: «Тэ дзик на пиысь, сёрниыд на кодь».
Петыр енмасьӧмӧн пондіс соссьыны: «Ог тӧд тайӧ Мортсӧ».
Дзик пыр кыліс петуклӧн чукӧстӧм.
Сэки Петырлы уси тӧд вылас Исуслӧн шуӧмыс: «Петук чукӧсттӧдз на тэ куимысь соссян Меысь».
Петыр петіс да курыда бӧрддзис.
27 юр.
Асывводзнас чукӧртчисны став аркирейыс пӧрысьяскӧд, сёрнитчӧмӧн найӧ воисны ӧти кывйӧ: вины Исусӧс. Сійӧс кӧрталӧмӧн нуӧдісны юралысь Понтий Пилат дінӧ да сетісны сылы.
Исусӧс мыждӧм йылысь тӧдмалӧм бӧрын Иуда, Сійӧс вузалысь, гӧгӧрвоис ассьыс мыжсӧ. Сэки бӧр нуис комын эзысь сьӧмсӧ аркирейяслы да пӧрысьяслы да шуис налы: «Ме мыж вӧчи, мыжтӧм мортӧс вузалі».
Найӧ вочавидзисны: «Миянлы нӧ мый? Ачыд ӧд тӧдін».
Иуда шыбитіс сьӧмсӧ крамас, сэсся петіс сэтысь, муніс да джагӧдчис.
Аркирейяс сьӧмсӧ чукӧртӧм бӧрын шуисны: «Оз позь тайӧ сьӧмсӧ пуктыны крамса сьӧм видзанінӧ, сійӧ вирлӧн дон».
Сёрнитчӧм бӧрын найӧ ньӧбисны гырнич вӧчысьлысь мусӧ, шуисны вӧчны сэтчӧ йӧз муысь воӧмаяслы шойна.
Та вӧсна тайӧ муыслы пуктісны “Вир му” ним, тадзи ӧнӧдз на нимтӧны. Тадзи иніс Еремей пророклӧн шуӧмыс:
— Босьтісны найӧ комын эзысь сьӧмсӧ, Израиль войтырӧн тайӧ Мортысь шуӧм донсӧ, да ньӧбисны сы вылӧ гырнич вӧчысьлысь мусӧ. Тадзи шуис меным Господь.
Исусӧс вайӧдісны юралысь водзӧ.
Юралысь юаліс: «Тэ-ӧ юдейяслӧн Ӧксыыс?»
Исус вочавидзис: «Тэ шуан».
Аркирейяс да пӧрысьяс мыжалісны Исусӧс, но Сійӧ чӧв оліс.
Пилат сэки шуис Сылы: «Тэ ӧмӧй он кыв, кымынӧн висьталӧны Тэныд паныд?»
Исус весиг воча кыв эз шу. Юралысьӧс тайӧ ёна шензьӧдіс.
Быд во Ыджыд лунӧ йӧз корӧм серти юралысь лэдзліс дзескыдінысь ӧти мортӧс.
Сэки дзескыдінын пукаліс ставлы тӧдса Варавва нима морт. Чукӧртчӧм йӧзлысь Пилат юаліс: «Кодӧс кӧсъянныд, мед ме лэдза, Варавваӧс али Исусӧс, кодӧс шуӧны Кристосӧн?»
Пилат тӧдіс, мый Исусӧс вайӧдісны вежалӧмныс понда.
Сэки Пилатлӧн гӧтырыс мӧдӧдас мыжданінӧ висьтавны верӧсыслы: «Тайӧ веськыда олысьыслы лёксӧ эн вӧч. Тавой вӧтын ме ёна шогси Сы понда».
Аркирейяс пӧрысьяскӧд ыззьӧдісны йӧзсӧ, мед корасны лэдзны Варавваӧс, а Исусӧс вины.
Пилат юаліс: «Кодӧс на пиысь шуанныд лэдзны?»
Воча шуисны: «Варавваӧс».
Пилат юаліс: «Мый шуанныд вӧчны Исускӧд, кодӧс Кристосӧн шуӧны?»
Ставныс горӧдісны: «Тувъявны.»
«Мый лёксӧ Сійӧ вӧчис?» — юаліс Пилат.
Йӧзыс гораджыка на горӧдісны: «Тувъявны Сійӧс.»
Пилат аддзис: йӧзыс оз лӧньны, мӧдарӧ, ёнджыка на шызьӧны. Сэки налӧн син водзын Пилат мыськис кисӧ да шуис: «Ме абу мыжа тайӧ веськыда олысь мортсӧ виӧмысь. Видзӧдӧй асьныд».
Став йӧзыс воча горӧдісны: «Мед Сылӧн вирыс миян вылӧ да миян челядьным вылӧ коляс».
Сэки Пилат лэдзис Варавваӧс, а Исусӧс нӧйтӧм бӧрын сетіс тувъявны.
Шыпуртаяс нуӧдісны Исусӧс юралысьлӧн керкаӧ, сэтчӧ чукӧртісны и мукӧд шыпуртаясӧс. Сэсся пӧрччӧдісны Исусӧс да пасьтӧдісны Сійӧс гӧрд кышанӧ, юрас пуктісны лежнӧгысь кыӧм юркытш, веськыд киас сетісны бедь.
Сэсся пидзӧс выланыс Сы водзӧ сувтӧмӧн шуалісны сералігтырйи: «Мед олас юдейяслӧн Ӧксы.»
Сьӧлалісны Сійӧс да кучкалісны юрас беддьӧн.
Сералӧм-лёкӧдӧм бӧраныс найӧ босьтісны Исус вылысь гӧрд кышансӧ да бӧр пасьтӧдісны Сійӧс Аслас паськӧмӧ, сэсся нуӧдісны тувъявны.
Карсьыс петіганыс налы вочаасис киринеяса Симон, сылы тшӧктісны нуны Исуслысь крестсӧ.
Сэсся воисны Голгопа керӧсӧ, нимыслӧн вежӧртасыс лоӧ “Юр лы”. Сэні Исуслы сетісны юны сӧп сора вина, но видлӧм бӧрас Сійӧ эз кут юны.
Исусӧс тувъялӧм бӧрын шыпуртаяс пудъясьӧмӧн юкисны Сылысь паськӧмсӧ.
Сэсся пуксисны видзны Сійӧс.
Юр весьтас ӧшӧдісны мыжалан пасйӧд: «Тайӧ Исус, юдейяслӧн Ӧксы».
Сыкӧд орччӧн тувъялісны кык лёк вӧчысьӧс: ӧтисӧ веськыдладорас, мӧдсӧ шуйгаладорас.
Сэті мунысьяс лёкысь видзӧдӧмӧн омӧльтісны Исусӧс: «Крам жугӧдысь да куим лунӧн сійӧс лэптысь, мезды Асьтӧ.
Тэ кӧ Ен Пи, лэччы крест вывсьыд.»
Сійӧс лёкӧдісны тшӧтш аркирейяс, Индӧдӧ велӧдысьяс, пӧрысьяс да фарисейяс: «Мукӧдӧс мездіс, а Асьсӧ мездыны оз вермы.
Сійӧ кӧ Израиль Ӧксы, мед лэччас крест вывсьыс, сэки эскам Сылы. Сійӧ Ен вылӧ лачаӧн оліс.
Мед Енмыс мездас ӧні, дона кӧ Сылы.
Шуліс ӧд, Ме пӧ Ен Пи».
Тадзи тшӧтш лёкӧдісны Исусӧс орччӧн тувъялӧм лёк вӧчысьяс.
Лун шӧр кадӧ пемдіс став му пасьталаыс, пемыдыс сулаліс куим часӧдз. Куим час гӧгӧрын Исус ыджыд шыӧн горӧдіс: «Эли, Эли, лама сабактани? Енмӧй, Енмӧй, мыйла Тэ колин Менӧ?»
Сэні сулалысьясысь кодсюрӧ шуисны, Илляӧс пӧ корӧ.
На пиысь ӧти дзик пыр котӧртіс, босьтіс губка да кӧтӧдіс шома винаӧн, сэсся бедь помӧ сатшкӧмӧн мыччис сійӧс Исуслы.
Мукӧдыс шуисны: «Энлы. Видзӧдлам, локтас оз Илля мездыны Сійӧс».
Исус ыджыд шыӧн горӧдӧм бӧрын лэдзис ловсӧ.
Сэки крамын ӧшалысь дӧраыс вывсяньыс улӧдзыс кык пельӧ косяссис. Муыс вӧрзис, из керӧсъяс потісны.
Шойгу кыртаяс воссялісны, уна вежа войтырлӧн шойыс ловзис, да найӧ петісны дзебанінъясысь. Исуслӧн ловзьӧм бӧрын найӧ пырисны вежа карӧ, унаӧн аддзылісны найӧс.
Му вӧрӧмысь да став лоӧмторсӧ аддзӧмысь Исусӧс видзысьяс веськӧдлысьныскӧд ёна повзисны да шуисны: «Тайӧ Мортыс збыльысь Ен Пи вӧлӧма».
Сэні вӧлі уна ань, кодъяс ылісянь видзӧдісны. Найӧ Галилеясянь ветлӧдлісны Исускӧд да кесъялісны Сылы.
На пӧвстын вӧліны Магдала Марья, Яковлӧн да Иосейлӧн Марья мамныс да Зеведей пиянлӧн мамныс.
Рытнас Аримафея карысь воис Ӧсип нима озыр морт, Исуслӧн велӧдчысь. Сійӧ муніс Пилат дінӧ да корис Исуслысь шойсӧ.
Пилат тшӧктіс сетны.
Ӧсип босьтіс шойсӧ, гартыштіс сӧстӧм шабді дӧраӧ да пуктіс кыртаӧ кералӧм выль дзебанінӧ. Пыранінас путкыльтіс ыджыд из, сэсся муніс.
Дзебанінлы воча пукаліс Магдала Марья мӧд Марьякӧд.
Мӧд луннас, шойччан лунӧ, аркирейяс фарисейяскӧд локтісны Пилат дінӧ да шуисны: «Ыджыдӧй, миянлы тӧд выланым усис: ловъя дырйиыс на эсійӧ пӧръясьысьыс шуліс, куим лун мысти пӧ ловзя.
Тшӧкты видзны дзебанінсӧ коймӧд лунӧдзыс. Велӧдчысьясыс вермасны локны войнас да гусявны шойсӧ, сэсся шуны йӧзыслы, Сійӧ пӧ ловзьӧма. Тайӧ бӧръя пӧръялӧмыс лоас воддзасьыс на лёкджык».
Пилат шуис: «Босьтӧй видзысьясӧс да видзӧй, колӧкӧ».
Найӧ мунісны, пасйисны пыранінысь изсӧ печатьӧн да тшӧктісны шыпуртаяслы видзны.
28 юр.
Шойччан лун бӧрын водз асывнас Магдала Марья да мӧд Марья локтісны видзӧдлыны дзебанінсӧ.
Виччысьтӧг муыс ёна вӧрзис: Господьлӧн андел лэччис енэжсяньыс. Сійӧ вештіс изсӧ пыранінсьыс да пуксис сы вылӧ. Андел югъяліс чардби моз, паськӧмыс вӧлі лым кодь еджыд. Видзысьяс кувмӧныс повзисны, найӧс дзӧрӧм босьтіс.
Андел шыасис аньяс дінӧ: «Энӧ полӧй. Ме тӧда, ті корсянныд тувъявлӧм Исусӧс.
Сійӧ тані абу. Сійӧ ловзис Аслас шуӧм серти.
Локтӧй, видзӧдлӧй Господьлысь куйланінсӧ. Мунӧй ӧдйӧджык да юӧртӧй велӧдчысьясыслы, мый Исус ловзьӧма да виччысьӧ найӧс Галилеяын, сэтысь найӧ аддзасны Сійӧс.
Татшӧм юӧр менам тіянлы».
Аньяс пырысьтӧм-пыр петісны дзебанінысь да полігтыр, но ёна нимкодясьӧмӧн, котӧртісны юӧртны та йылысь Исуслӧн велӧдчысьяслы.
Туй выланыс аньяскӧд паныдасис Исус да шуис: «Нимкодясьӧй.»
Найӧ уськӧдчисны Сы водзӧ да кутчысисны кокас.
Исус шуис: «Энӧ полӧй.
Мунӧй, висьталӧй вокъяслы, мед мунасны Галилеяӧ, сэтысь аддзасны Менӧ».
Аньяслӧн мунӧм бӧрын дзебанін видзысьясысь кодсюрӧ мунісны карас да висьталісны став лоӧмтор йывсьыс аркирейяслы.
Аркирейяс чукӧртчисны пӧрысьяскӧд, сёрнитчӧм бӧраныс сетісны шыпуртаяслы уна сьӧм да шуисны: «Висьталӧй, мый войнас тіян узигкості велӧдчысьясыс волӧмаӧсь да гусялӧмаӧсь шойсӧ.
Кывсяс кӧ тайӧ юралысьӧдз, ми сійӧс эскӧдам да тіянӧс доръям».
Шыпуртаяс босьтісны сьӧмсӧ да вӧчисны аркирейяслӧн тшӧктӧм серти.
Тайӧ юӧрыс паськаліс юдейяс пӧвстын, весиг ӧнӧдз на олӧ.
Исуслӧн тшӧктӧм серти дас ӧти велӧдчысьыс мунісны Галилеяӧ да кайисны керӧсӧ. Исусӧс аддзӧм бӧрын найӧ муӧдзыс копыртчылісны Сы водзӧ, кодсюрӧлы сьӧкыд вӧлі эскынысӧ.
Велӧдчысьяс дінӧ матыстчӧмӧн Исус шуис: «Меным сетӧма ыджыдавны енэжын да му вылын.
Мунӧй быд кыла войтыр дінӧ, вӧчӧй найӧс Менам велӧдчысьясӧн да пыртӧй найӧс Бать, Пи да Вежа Лов нимӧн. Велӧдӧй найӧс овны став Менам тшӧктӧм серти. Тӧдӧй: Ме пыр тіянкӧд нэмъяс помасьтӧдз».
Аминь.
Марк серти бур юӧр
1 юр.
Исус Кристос, Ен Пи йылысь Евангелльӧ пансьӧ, кыдзи висьталӧма пророк гижӧдъясын: — Ыста Ассьым юӧртысьӧс Тэ водзвылын, сійӧ Тэныд туйсӧ дасьтас.
Овтӧминын кылӧ горзысьлӧн шы: «Лӧсьӧдӧй туйсӧ Господьлы, веськӧдӧй-шыльӧдӧй ордымъяс Сылы.»
Локтіс Иоан. Сійӧ пыртіс йӧзӧс овтӧминын да юӧрталіс: «Бергӧдчӧй мыжъяссьыныд да пыртчӧй, медым Ен прӧститас мыжъяснытӧ».
Иоан дінӧ локтіс уна йӧз Юдея му пасьталаысь да Ерусалим карысь. Асланыс мыжъясысь висьтасьӧм бӧрын Иоан пыртіс найӧс ставнысӧ Йӧрдан юын.
Иоан новліс верблюд гӧнысь кыӧм паськӧм да коскас кучик тасма, сёйліс чирк да видзвыв ма.
Сійӧ юӧртіс: «Ме бӧрын локтӧ меысь вынаджык, ме ог шогмы копыртчыны да разьны Сылысь кӧмкот кӧвсӧ.
Ме пырті тіянӧс ваӧн, а Сійӧ пыртас тіянӧс Вежа Лолӧн».
Сійӧ лунъясӧ локтіс Галилеяса Назарет карысь Исус. Иоан пыртіс Сійӧс Йӧрдан юын.
Ваысь петігас Исус аддзис: енэжыс воссис да Сы вылӧ гулю моз лэччис Лов.
Енэжсянь кыліс гӧлӧс шы: «Тэ Менам муса Пиӧй, Ме нимкодяся Тэӧн».
Дзик пыр Лов нуӧдіс Исусӧс овтӧминӧ.
Сэні нелямын лун чӧж сӧтана ыштӧдіс Сійӧс. Исус оліс вӧрса пемӧсъяс пӧвстын, Сылы кесъялісны анделъяс.
Иоанлӧн дзескыдінӧ веськалӧм бӧрын Ен Юралӧм йылысь Евангелльӧ висьталігтыр Исус муніс Галилеяӧ. Сійӧ юӧртіс: «Воис кад. Енлӧн Юралӧмыс матын нин. Бергӧдчӧй мыжъяссьыныд да эскӧй Евангелльӧӧ».
Галилея ты пӧлӧн мунігӧн Исус аддзис Симонӧс да сылысь Ӧндрей воксӧ. Найӧ вӧліны чери кыйысьяс. Кык вок буретш вӧйтасисны ты вылын.
Исус шуис налы: «Локтӧй Ме бӧрся. Ме вӧча тіянысь морт кыйысьясӧс».
Кык вок дзик пыр эновтісны тывъяснысӧ да мунісны Исус бӧрся.
Исус муртса муныштіс да аддзис пыжысь Зеведей Яковӧс Иоан вокыскӧд. Найӧ дзоньталісны тывъяс. Исус чукӧстіс вокъясӧс.
Найӧ колисны пыжас Зеведей батьнысӧ меда йӧзкӧд да мунісны Исус бӧрся.
Воисны Капернаум карӧ. Медводдза шойччан лунӧ Исус пырис синагогаӧ да пондіс велӧдны.
Йӧзыс шензисны Сылӧн велӧдӧмысь, ӧд Сійӧ велӧдіс ыджыдалысьӧ пуктӧм морт моз, эз Индӧдӧ велӧдысьяс моз.
Синагогаын вӧлі пеж лолӧн кутӧм морт. Сійӧ горӧдіс: «Мый Тэныд колӧ миянсянь, Назаретса Исус?
Тэ локтін бырӧдны миянӧс?
Тӧда, коді Тэ. Тэ — Енлӧн Вежаыс.»
Исус ӧлӧдіс пеж лолӧс: «Ланьт. Пет сы пытшкысь».
Пеж лов песовтіс мортсӧ, лёкысь горӧдіс да петіс сы пытшкысь.
Став йӧзыс весьӧпӧрисны, ӧта-мӧдныслысь юасисны: «Мый тайӧ?
Мыйсяма выль велӧдӧм? Сылысь кывзысьӧны весиг пеж ловъяс».
Исус йылысь сёрниыс ӧдйӧ паськаліс став Галилея му пасьтала.
Синагогаысь петӧм бӧрын Исус локтіс Яковкӧд да Иоанкӧд Симон да Ӧндрей ордӧ.
Симон гӧтырлӧн мамыс куйліс биа висьӧмӧн. Та йылысь дзик пыр висьталісны Исуслы.
Исус матыстчис ань дінӧ да киӧдыс босьтӧмӧн чеччӧдіс сійӧс. Биа висьӧмыс дзик пыр эновтіс аньӧс, и сійӧ пондіс кесъявны налы.
Рытнас, шонді лэччӧм бӧрын, Исус дінӧ вайӧдісны став висьысьсӧ да пеж лолӧн кутӧмасӧ.
Став карыс чукӧртчис керка ӧдзӧс дорӧ.
Исус унаӧс бурдӧдіс быдпӧлӧс висьӧмысь да вӧтліс уна пеж лолӧс. Сійӧ эз лэдз сёрнитны пеж ловъясӧс, ӧд найӧ тӧдісны, мый Сійӧ — Кристос.
Аскинас, югдытӧдзыс на, Исус чеччис да муніс кевмысьны овтӧминӧ.
Симон да сыкӧд вӧлысьяс мунісны Исус бӧрся. Исусӧс аддзӧм бӧрын висьталісны: «Ставныс корсьӧны Тэнӧ».
Исус шуис налы: «Мунамӧй маті сиктъясӧ. Меным тшӧтш сэні колӧ висьтавлыны Бур Юӧрсӧ, ӧд та могысь Ме локті».
Сійӧ ветлӧдліс Галилея му пасьтала, висьтавліс синагогаясын Бур Юӧр да вӧтлаліс пеж ловъясӧс.
Исус дінӧ локтіс проказаӧн висьысь да Сы водзӧ пидзӧс вылас сувтӧмӧн корис: «Кӧсъян кӧ, верман менӧ сӧстӧммӧдны».
Исуслӧн сьӧлӧмыс нормис. Сійӧ нюжӧдіс кисӧ, инмӧдчыліс висьысь дінӧ да шуис: «Кӧсъя. Сӧстӧммы».
Висьысьлӧн дойясыс дзик пыр бырисны, сійӧ бурдіс.
Исус пырысьтӧм-пыр ыстіс сійӧс да чорыда ӧлӧдіс: «Та йылысь некодлы эн висьтав. Мун, петкӧдлы асьтӧ поплы, сэсся Мӧисей тшӧктӧм серти аслад сӧстӧммӧмысь вай вись. Тадзи тӧдмаласны тэнад бурдӧм йылысь».
Мунӧм бӧрас бурдӧм морт пондіс висьтавлыны лоӧмтор йывсьыс. Та вӧсна Исус эз нин вермы восьсӧн пырны карӧ. Сійӧ оліс кар саяс, овтӧминын, и Сы дінӧ быдласянь волісны йӧзыс.
2 юр.
Кымынкӧ лун мысти Исус бара локтіс Капернаумӧ.
Йӧзыс кылісны, мый Сійӧ гортас, и дзик пыр уна йӧз чукӧртчис Сы ордӧ, весиг пыранінас сулалісны.
Исус висьталіс налы Енлысь Кывсӧ.
Сэки нёльӧн вайисны вӧрзьӧдчыны вермытӧм мортӧс.
Уна йӧз вӧсна найӧ эз вермыны матыстчыны Исус дінӧ. Сэки найӧ разисны керка вевтсӧ да Исус весьтті лэдзисны висьысьӧс вольпасьнас.
Налысь эскӧмсӧ аддзӧмӧн Исус шуис висьысьлы: «Пиӧй, тэнсьыд мыжъястӧ прӧститӧма».
Сэні пукалісны Индӧдӧ велӧдысьясысь кодсюрӧ да мӧвпалісны ас кежас: «Мыйла Сійӧ Енмӧс омӧльтӧ?
Ен кындзи вермас-ӧ кодкӧ прӧститны мыжъяс?»
Исуслӧн лолыс дзик пыр тӧдіс налысь мӧвпъяссӧ. Сійӧ шуис: «Мыйла ті мӧвпаланныд тадзи?
Мый кокньыдджык шуны вӧрзьӧдчыны вермытӧмлы: “Тэнсьыд мыжъястӧ прӧститӧма” либӧ “Чеччы, босьт вольпасьтӧ да ветлы”?
Ӧні ті тӧдмаланныд: Морт Пи вермӧ прӧститны мыжъяс му вылын». Сэсся шуис висьысьлы: «Тэныд шуа: чеччы, босьт вольпасьтӧ да мун гортад».
Сійӧ дзик пыр чеччис, босьтіс вольпасьсӧ да ставныслӧн син водзын петіс. Йӧзыс шензьӧмӧн ошкисны Енмӧс да шуалісны, татшӧмсӧ пӧ ми эгӧ на аддзылӧй.
Исус бара муніс ты дорӧ. Йӧзыс ставныс локтісны Сы дінӧ, и Сійӧ велӧдіс найӧс.
Сэтысь мунігас Исус аддзис Алфей Левийӧс, сійӧ пукаліс вотчукӧртанінын. Исус шуис сылы: «Лок Ме бӧрся».
Левий чеччис да муніс Исус бӧрся.
Сэсся Исус локтіс Левий ордӧ. Сэні Исускӧд да Сылӧн велӧдчысьяскӧд сёйисны тшӧтш вот перйысьяс да мукӧд мыжа йӧз.
Унаӧн на пиысь вӧліны Исус бӧрся мунысьяс.
Индӧдӧ велӧдысьяс да фарисейяс аддзисны, мый Исус сёйӧ мыжа йӧзкӧд да вот перйысьяскӧд. Сэки юалісны Исуслӧн велӧдчысьяслысь: «Мыйла Сійӧ сёйӧ-юӧ вот перйысьяскӧд да мыжа йӧзкӧд?»
Исус кыліс тайӧс да шуис налы: «Дзоньвидзалы бурдӧдысьыд оз ков, сійӧ висьысьлы колӧ.
Ме локті корны Ен дінӧ мыжаясӧс, эг веськыда олысьясӧс».
Иоанлӧн да фарисейяслӧн велӧдчысьясыс вӧлі видзалӧны.
Йӧзыс локтісны Исус дінӧ да юалісны: «Иоанлӧн да фарисейяслӧн велӧдчысьяс видзалӧны. Мыйла Тэнад оз?»
Исус вочавидзис: «Вермӧны-ӧ видзавны кӧлысь вылын верӧспукӧд гажӧдчысь ёртъяс?
Верӧспуыс кӧ накӧд, найӧ оз вермыны видзавнысӧ. Воасны на сійӧ лунъясыс, кор колясны верӧспутӧг, сэки и видзаласны.
Важ паськӧмтӧ оз дӧмны выль дӧра дӧмасӧн. Тадзи кӧ вӧчан, выль дӧмас дортіыс нёйдас-косяссяс паськӧмыд, розьыс ёнджыка на ыдждас.
Выль винатӧ оз кисьтны важ кучик дозйӧ. Тадзи кӧ вӧчан, кучик дозйыс потас, и винаыс киссяс. Выль винатӧ кисьтӧны выль кучик дозйӧ».
Шойччан лунӧ Исус мунӧ вӧлі кӧдзӧм муяс вомӧн. Сылӧн велӧдчысьясыс мунігмозныс нетшкисны шепсӧ.
Фарисейяс шуисны Исуслы: «Видзӧдлы, мый Тэнад велӧдчысьясыд вӧчӧны. Тайӧс оз позь вӧчны шойччан лунӧ».
Исус воча шуис: «Ті ӧмӧй энӧ лыддьылӧй, мый вӧчис Давид, кор тшыгъяліс аслас йӧзкӧд да налӧн эз вӧв сёяныс?
Авиафар аркирей дырйи сійӧ пырис Ен керкаӧ, сёйис Енлы вайӧм няньсӧ да аслас йӧзлы тшӧтш сетіс. Тайӧ няньсӧ сӧмын попъяслы позис сёйны».
Сэсся Исус шуис фарисейяслы: «Шойччан лунсӧ лӧсьӧдӧма мортлы, абу мортсӧ шойччан лунлы.
Та вӧсна Морт Пи шойччан лун вылын ыджыдыс».
3 юр.
Исус бара локтіс синагогаӧ.
Сэні вӧлі косьмӧм киа морт.
Исус бӧрся сюся видзӧдісны, бурдӧдас-ӧ шойччан лунӧ, ӧд корсисны помка мыжавны Сійӧс.
Исус тшӧктіс косьмӧм киа мортлы: «Сувт шӧрас».
Сэсся юаліс мукӧдыслысь: «Мый позьӧ вӧчны шойччан лунӧ: бурсӧ али лёксӧ, мездыны мортӧс али вины сійӧс?»
Найӧ чӧв олісны.
Исус шогсис налӧн чорзьӧм сьӧлӧмныс вӧсна да чорыда видзӧдліс на вылӧ. Сэсся шуис висьысьлы: «Нюжӧд китӧ».
Сійӧ нюжӧдіс, и киыс пырысь-пыр бурдіс, лои мӧдыс кодь.
Сэки фарисейяс петісны да Ирӧдлӧн йӧзкӧд дзик пыр панісны сёрни Исусӧс виӧм йылысь.
Исус муніс велӧдчысьясыскӧд ты дорӧ.
Сы бӧрся вӧтчис унасьыс-уна йӧз Галилеяысь, Юдеяысь, Ерусалим карысь, Идумеяысь, Йӧрдан ю сайысь, Тир да Сидон каръясысь. Найӧ локтісны Исус дінӧ, ӧд кывлӧмаӧсь, мый Сійӧ вӧчӧ.
Исус тшӧктіс велӧдчысьясыслы лӧсьӧдны Сылы пыж, медым йӧзыс эз дзескӧдны Сійӧс.
Исус унаӧс бурдӧдіс сэні. Та вӧсна висьысьяс сюйсьӧмӧн сюйсисны, медым инмӧдчывны Сы дінӧ.
Исусӧс аддзигӧн пеж ловъяс уськӧдчылісны Сы водзӧ да горзісны: «Тэ Ен Пи.»
Исус чорыда ӧлӧдіс найӧс Сы йылысь висьтавлӧмысь.
Исус кайис керӧсӧ. Сійӧ корис Ас дінас, кодӧс кӧсйис, и найӧ локтісны Сы дінӧ.
Сійӧ бӧрйис дас кыкӧс лоны Сыкӧд, медым мӧдӧдны найӧс висьтавны Бур Юӧр да сетны налы вын бурдӧдавны висьысьясӧс да вӧтлавны пеж ловъясӧс. Дас кыкыс вӧліны: Симон, кодлы сетіс Петыр ним, Зеведей Яков да сылӧн Иоан вокыс, кодъяслы сетіс Воанергес ним, вуджӧдны кӧ: гым пиян, Ӧндрей, Филип, Варфоломей, Матвей, Фома, Алфей Яков, Фаддей, Кананит Симон да Искариот Иуда, Исусӧс вузалысь.
Кор найӧ бӧр локтісны гортас, бара чукӧртчисны йӧз. Исуслы да велӧдчысьясыслы эз вӧв позянлуныс весиг сёйыштнысӧ.
Та йылысь кылісны Исуслӧн матыссаясыс. Найӧ локтісны Сыла, ӧд сёрнитісны, Сійӧ пӧ абу Ас вежӧрас.
Ерусалимысь локтысь Индӧдӧ велӧдысьяс сёрнитісны, Сы пытшкын пӧ Вельзевул, вӧтлалӧ пӧ пеж ловъясӧс налӧн юралысь вынӧн.
Исус корис йӧзсӧ да висьталіс налы велӧданвисьтъясӧн:
«Вермас-ӧ сӧтана вӧтлыны сӧтанаӧс?
Ас муын олысьяс кӧ ас костаныс тышкасьӧны, сэні олӧмыс киссяс.
Зыксьӧмӧн олысь керка дыр оз сулав.
Сӧтанаыс кӧ аслыс паныд кыпӧдчӧ-тышкасьӧ, сійӧ вынсӧ воштас, сылы воас пом.
Некод оз вермы пырны вына мортлӧн керкаӧ да сійӧс кӧртавтӧг босьтны сылысь эмбурсӧ. Вына мортӧс кӧрталӧм бӧрын сӧмын вермас босьтны эмбурсӧ.
Веськыда висьтала тіянлы: мортлысь быд мыж да быд омӧльтӧм лоӧ прӧститӧма.
Коді омӧльтас Вежа Лолӧс, сылысь мыжсӧ некор оз ло прӧститӧма. Сылӧн мыжыс пыр кежлӧ кольӧ».
Исус висьталіс тайӧс, ӧд сёрнитісны, мый Сы пытшкын пеж лов.
Локтісны Исуслӧн мамыс да вокъясыс. Ывлаас сулалігӧн найӧ мӧдӧдісны корны Сійӧс.
Исус гӧгӧр пукалысь йӧз шуисны Сылы: «Мамыд да чой-вокыд ывлаасӧсь, Тэнӧ юасьӧны».
Исус воча шуис: «Коді Меным мамыс да вокыс?»
Ас гӧгӧрыс пукалысьяс вылӧ видзӧдлӧмӧн шуис: «Найӧ Менам вокъясӧй да Менам мамӧй. Ен кӧсйӧм серти олысь — Меным вок, чой да мам».
4 юр.
Исус бара велӧдіс ты дорын.
Сы дінӧ чукӧртчис зэв уна йӧз, Сылы весиг ковмис пуксьыны пыжӧ. Пыжыс сулаліс ва вылын, а йӧзыс — вадорас.
Исус висьталіс налы уна велӧданвисьт: «Кывзӧй. Морт кӧдзны петас.
Кӧдзигас кымынкӧ кӧйдыс усяс туй бокӧ. Сэтчӧ воасны лэбачьяс да кокаласны.
Кымынкӧ кӧйдыс усяс изъяинӧ. Этша муыс вӧсна ляпкыдінад найӧ ӧдйӧ чужасны.
Петас шонді, пӧжны пондас, и омӧль вужъя петасыд косьмас.
Кымынкӧ кӧйдыс усяс лежнӧг пӧвстӧ. Быдмигас лежнӧгыс пӧдтас петассӧ, и сійӧ оз вай тусьсӧ.
Мукӧд кӧйдысыс усяс бур муӧ. Петас, быдмас да ваяс уна тусь: ӧтияс — комын пӧв, мӧдъяс — квайтымын пӧв, коймӧдъяс — сё пӧв».
Сэсся Исус шуис: «Кодлӧн эм пель, мед кылӧ.»
Ас кежаныс кольӧм бӧрын дас кыкыс мукӧд велӧдчысьыскӧд пондісны юасьны Исуслысь велӧданвисьт йылысь.
Исус шуис: «Тіянлы сетӧма тӧдны Ен Юралӧмлысь гусяторъяссӧ, а мукӧдыс кылӧны та йылысь сӧмын велӧданвисьтъясысь.
— Найӧ видзӧдӧны, аддзӧны — да оз казявны, кывзӧны, кылӧны — да оз гӧгӧрвоны. Оз бергӧдчыны Енланьӧ, и налысь мыжъяссӧ оз ло прӧститӧма».
Исус шуис налы: «Энӧ ӧмӧй гӧгӧрвоӧй тайӧ велӧданвисьтсӧ?
Кыдзи нӧ мукӧд велӧданвисьтсӧ гӧгӧрвоанныд?
Кӧдзысь Ен Кыв кӧдзӧ.
Туй бокӧ усьӧм кӧйдыс петкӧдлӧ: мортыс кылӧ Кывсӧ, но дзик пыр локтӧ сӧтана да гусялӧ сьӧлӧмас кӧдзӧм Кывсӧ.
Изъяинӧ усьӧм кӧйдысыс петкӧдлӧ: мортыс кылӧ Кывсӧ да дзик пыр долыдпырысь босьтӧ сійӧс сьӧлӧмас, но вужъясьтӧмысла оз дыр эскы, Ен Кыв вӧсна дзескӧдігӧн-вӧтлігӧн сійӧ эновтчӧ эскӧмсьыс.
Лежнӧг пӧвстӧ усьӧм кӧйдысыс петкӧдлӧ: мортыс кылӧ Кывсӧ, но быдлунъя тӧждыс, озырмыны ыштӧмыс да мукӧд кӧсйӧмыс пӧдтӧ кӧдзӧм Кывсӧ, и сійӧ оз вай вотӧссӧ.
Бур муӧ кӧдзӧм кӧйдысыс петкӧдлӧ: мортыс кылӧ Кывсӧ, босьтӧ сійӧс сьӧлӧмас да вайӧ вотӧс: ӧтияс — комын пӧв, мӧдъяс — квайтымын пӧв, коймӧдъяс — сё пӧв».
Исус висьталіс: «Ӧзтӧм битӧ ӧмӧй пыртлӧны керкаӧ, мед доз улӧ пуктыны либӧ лабич улӧ сувтӧдны?
Оз ӧмӧй сійӧс бикок вылӧ пуктыны?
Став гусяыс воссяс да став дзебӧмаыс йӧзасяс.
Кодлӧн эм пель, мед кылӧ.»
Исус шуис: «Тӧд выланыд босьтӧй, мый кыланныд. Асланыд мурталӧм серти тіянлы мурталасны, нӧшта содтасны на тіянлы, кывзысьяслы.
Кодлӧн эм, сылы сетасны. Кодлӧн абу, сылысь бӧръясӧ босьтасны».
Исус шуис: «Енлӧн Юралӧмыс татшӧм. Морт кӧдзӧ кӧйдыс муӧ. Войсӧ сійӧ узьӧ, лунсӧ олӧ, а кутшӧм ногӧн няньыс чужӧ-быдмӧ, оз тӧд. Муыс ачыс быдтӧ: медводз петӧ веж турун, сэсся сійӧ шептасьӧ, а сэсся нин шепъясас артмӧны тусьяс.
Кор няньыс воас, дзик пыр сійӧ мӧдӧдӧ вундысьясӧс, ӧд вундан кадыс воис».
Исус шуис: «Мыйкӧд ӧткодялам Енлысь Юралӧмсӧ?
Кутшӧм велӧданвисьтӧн петкӧдлам сійӧс?
Сійӧ муӧ кӧдзӧм горчица тусь кодь. Став кӧйдыссьыс сійӧ медпосни.
Кӧдзӧм бӧрас быдмӧ да став пуктассьыс ыджыд лоӧ, весиг енэжвыв лэбачьяс вермӧны поздысьны гырысь вожъясыслӧн вуджӧр улӧ».
Уна татшӧм велӧданвисьтӧн Исус юӧртіс налы Енлысь Кывсӧ, мыйта найӧ вермисны гӧгӧрвоны.
Велӧданвисьтъястӧг эз сёрнитлы йӧзыскӧд, а велӧдчысьясыслы ас кежаныс гӧгӧрвоӧдліс ставсӧ.
Сійӧ лунӧ, рытнас, Исус шуис велӧдчысьясыслы: «Вуджамӧй ты мӧдлапӧлӧ».
Найӧ колисны йӧзсӧ, асьныс пуксисны пыжӧ Исус дінӧ.
Накӧд вӧліны тшӧтш мукӧд пыжаяс.
Кыптіс ыджыд тӧвныр, ёна гызис, да пыжыс кутіс тырны ванас.
Юрлӧс вылӧ нёровтчӧмӧн Исус узис пыж бӧжас.
Сійӧс садьмӧдісны да шуисны: «Велӧдысь.
Тэныд ӧмӧй веськодь, мый ми вӧям?»
Исус чеччис, ӧлӧдіс тӧвсӧ да тшӧктіс ваыслы: «Ланьт, лӧнь.»
Тӧлыс ланьтіс, и вӧвлытӧм чӧв-лӧнь пуксис.
Исус шуис велӧдчысьясыслы: «Мыйла ті сэтшӧм полысьӧсь?
Кӧні тіян эскӧмныд?»
Найӧ ыджыд полӧмӧн тырисны, ӧта-мӧдныслысь пондісны юасьны: «Коді Сійӧ? Весиг тӧлыс да ваыс кывзысьӧ Сылысь».
5 юр.
Та бӧрти найӧ вуджисны ты мӧдлапӧлӧ, Гадара муӧ.
Пыжсьыс чеччӧм бӧрын Исуслы дзик пыр паныд петіс шойнаысь пеж лолӧн кутӧм морт.
Сійӧ оліс шойгу кыртаын, сійӧс сьӧкыд вӧлі кӧртавны весиг чепъясӧн. Унаысь дорлісны сылысь ки-коксӧ, но сійӧ орйӧдлывліс чепсӧ да жугӧдліс дорӧмсӧ. Некод сійӧс лӧньӧдны эз вермы.
Лун и вой сійӧ дугдывтӧг горзіс шойгу кыртаын да керӧсъясын, дойдаліс асьсӧ изйӧн.
Сійӧ ылісянь аддзис Исусӧс, котӧрӧн локтіс да уськӧдчис Сы водзӧ, сэсся лёк горшӧн горӧдіс: «Мый Тэныд месянь колӧ, Исус, Медвылысса Енлӧн Пи?
Енмӧн кора, эн пес менӧ.»
Тадзи шуаліс, ӧд Исус тшӧктіс пеж ловлы петны морт пытшкысь.
Исус юаліс сылысь: «Мый тэнад нимыд?»
Сійӧ вочавидзис: «Легион менам нимӧй, ми ӧд унаӧнӧсь».
Сійӧ ёна корис Исусӧс, мед эз вӧтлы найӧс тайӧ муысь.
Сэні керӧс бокын йирсис ыджыд порсь чукӧр.
Пеж ловъяс корисны Исусӧс: «Лэдз миянӧс пырны порсьяс пытшкӧ».
Исус лэдзис.
Пеж ловъяс петісны да пырисны порсьяс пытшкӧ.
А порсьяс кыр йывсянь уськӧдчисны тыӧ да пӧдісны. Порсьыс вӧлі кык сюрс гӧгӧр.
Порсь видзысьяс пышйисны сэтысь, котӧрӧн мунісны карӧ да орчча сиктъясӧ висьтавны аддзывлӧмтор йывсьыс.
Йӧзыс петісны видзӧдлыны, мый лоӧма.
Найӧ локтісны Исус дінӧ да аддзисны коркӧя пеж лолӧн кутӧм мортӧс, код пытшкысь петіс дзонь легион. Сійӧ, паськӧма да ас вежӧра, пукаліс сэні. Йӧзыс ёна повзисны.
Аддзылысьяс висьталісны локтӧмаяслы, мый лоис пеж лолӧн кутӧм морткӧд да порсь чукӧркӧд.
Йӧзыс пондісны корны Исусӧс мунны налӧн муысь.
Кор Исус пуксис пыжӧ, пеж лолысь мездмӧм морт вӧзйысис мунны Сыкӧд.
Исус эз лэдз, а шуис: «Мун гортад да висьтав гортсаыдлы, мый вӧчис тэныд Господь да кутшӧм бур сьӧлӧма Сійӧ вӧлі тэ дінӧ».
Сійӧ муніс да Даскар му пасьтала пондіс висьтавны, мый сылы вӧчис Исус. Став йӧзыс шензисны.
Исус бӧр вуджис пыжӧн ты мӧдлапӧлӧ. Сы дінӧ чукӧртчис уна йӧз.
Кор Сійӧ вӧлі вадорас, локтіс Явир нима морт, синагогаса юралысь. Исусӧс аддзӧм бӧрын Явир уськӧдчис Сы водзӧ да ёна корис: «Менам нылӧй кулан выйын.
Лок, пуктыв сы вылӧ китӧ, мед бурдас да коляс ловйӧн».
Исус муніс юралыськӧд.
Уна йӧз вӧтчис Исус бӧрся да дзескӧдіс Сійӧс.
Йӧз чукӧрын вӧлі ань, сійӧ дас кык во чӧж висьӧма вир мунӧмӧн да уна сьӧкыд нуӧма бурдӧдысьяссянь. Сійӧ видзӧма ставсӧ, мый сылӧн вӧлӧма, но отсӧг пыдди сылы нӧшта на лёкджык лоӧма. Ань водзынджык нин кывлӧма Исус йылысь. Йӧз пӧвсттіыс сійӧ матыстчис Исус дінӧ мышсяньыс да инмӧдчыліс Сылы паськӧмас. Ань мӧвпаліс: «Сӧмын инмӧдчыла кӧ Сылӧн паськӧмӧ, бурда».
Вир мунӧмыс пырысьтӧм-пыр дугдіс, сійӧ ас пытшкас кыліс бурдӧмсӧ.
Исус дзик пыр казяліс, мый Сы пытшкысь петіс вын. Сійӧ бергӧдчис йӧз чукӧрлань да юаліс: «Коді инмӧдчыліс Менам паськӧмӧ?»
Велӧдчысьясыс шуисны: «Тэ аддзан, йӧзыс дзескӧдӧны Тэнӧ, и юасян, коді инмӧдчыліс Тэ дінӧ».
Исус видзӧдліс гӧгӧрбок, медым аддзыны инмӧдчылысьӧс.
Ань гӧгӧрвоис, мый сыкӧд лои. Повзьӧмысла дзӧригтыр сійӧ матыстчис да уськӧдчис Исус водзӧ, висьталіс ставсӧ веськыда.
Исус шуис аньлы: «Нылӧй, эскӧмыд мездіс тэнӧ.
Мун повтӧг да ло дзоньвидза, тэ мынін висьӧмсьыд».
Исуслӧн сёрнитігӧн локтісны синагогаса юралысьлӧн гортсяньыс да шуисны: «Нылыд кулі, эн мудзтӧд Велӧдысьсӧ».
Исус кыліс тайӧс да шуис синагогаса юралысьлы: «Эн пов, сӧмын эскы».
Сэсся босьтіс Аскӧдыс Петырӧс, Яковӧс да сылысь Иоан воксӧ, мукӧдсӧ эз лэдз локнысӧ.
Юралысь керкаӧ воӧм мысти Исус аддзис: йӧзыс шызьӧмаӧсь, сыркъялӧмӧн бӧрдӧны.
Исус пырис керкаӧ да шуис налы: «Мыйла нӧ шызьӧмныд да бӧрданныд?
Нывкаыс эз кув, сійӧ узьӧ».
Исус вылын пондісны серавны.
Сійӧ вӧтліс керкаысь ставнысӧ, босьтіс Аскӧдыс сӧмын нывкалысь бать-мамсӧ да Сыкӧд локтысьясӧс.
Исус пырис нывка дінӧ, босьтіс сійӧс киӧдыс да шуис: «Талита куми». Тайӧ лоӧ: «Нылӧй, тэныд шуа: чеччы».
Нывка дзик пыр чеччис да пондіс ветлӧдлыны; сылы вӧлі дас кык арӧс.
Аддзылысьяс ёна чуймисны.
Исус чорыда ӧлӧдіс найӧс та йылысь мукӧдлы висьтавлӧмысь, а нывкаӧс Сійӧ тшӧктіс вердны.
6 юр.
Сэтысь Исус муніс Аслас карӧ, Сылӧн велӧдчысьясыс мунісны Сы бӧрся.
Шойччан лунӧ Сійӧ велӧдіс синагогаын.
Кывзысьяс пиысь унаӧн шензьӧмӧн шуалісны: «Кытысь Сылӧн тайӧ?
Мыйсяма мывкыдлун Сылы сетӧма? Сійӧ вӧчӧ татшӧм шензьӧданаторъяс.
Абу-ӧ Сійӧ тшупсьысь? Абу-ӧ Мариялӧн пиыс, Яковлӧн, Иосейлӧн, Иудалӧн да Симонлӧн вокыс?
Оз-ӧ тані овны Сылӧн чойясыс?»
Тадзи Сійӧс ӧтдортісны.
Исус шуис налы: «Пророкӧс пыдди пуктӧны быдлаын, сӧмын ас карас, ас рӧдвужас да ас гортас оз».
Исус эз вермы сэні вӧчны шензьӧданаторъяс, сӧмын кымынкӧ висьысь вылӧ кисӧ пуктылӧмӧн бурдӧдіс найӧс.
Йӧзлӧн эскытӧмлуныс шензьӧдіс Сійӧс. Исус ветлӧдліс матігӧгӧр сиктъясӧд да велӧдіс йӧзсӧ.
Сійӧ корис дас кыкнан велӧдчысьсӧ да сетіс налы вын вӧтлавны пеж ловъясӧс. Сэсся кыкӧн-кыкӧн мӧдӧдаліс найӧс.
Исус шуис налы: «Туяныд бедь кындзи нинӧм энӧ босьтӧй, весиг нянь, ноп, сьӧм да вежан кӧм-пась».
Нӧшта Исус висьталіс: «Кутшӧм керкаӧ пыранныд, водзӧ мунтӧдзныд олӧй сэні.
Оз кӧ сибӧдны-кывзыны тіянӧс, сэтысь петіганыд пыркӧдӧй коксьыныд буссӧ. Тайӧ лоӧ найӧс ӧлӧдӧм.
Веськыда висьтала тіянлы: Мыждан лунӧ Содом да Гомора каръяслы лоас кокньыдджык сійӧ карыслы дорысь».
Велӧдчысьяс мунісны да юӧрталісны, йӧзыс мед бергӧдчисны мыжъяссьыс.
Найӧ вӧтлісны уна пеж лолӧс да выйӧн мавтӧмӧн бурдӧдісны уна висьысьӧс.
Ирӧд ӧксы кыліс Исус йылысь, ӧд тайӧ нимыс быдлаын вӧлі тӧдса. Сійӧ шуис, Пыртысь Иоан пӧ ловзьӧма, та вӧсна вермӧ вӧчны шензьӧданаторъяс.
Мукӧдыс шуалісны, тайӧ пӧ Илля, кодсюрӧ шуисны, Сійӧ пӧ пророкъясысь ӧти.
Татшӧм сёрнияс бӧрын Ирӧд шуис, тайӧ пӧ Иоан, кодлысь ме юрсӧ керышті, ловзьӧма.
Ӧд Филип вокыслӧн Ирӧдиада гӧтырыс вӧсна Ирӧд тшӧктіс босьтны Иоанӧс да дорӧмӧн пуксьӧдны дзескыдінӧ.
Ирӧдиадаӧс гӧтырӧ босьтӧмысь Иоан ӧлӧдліс Ирӧдӧс: «Вок гӧтырыдкӧд тэныд оз позь овнытӧ».
Ирӧдиада скӧраліс Иоан вылӧ да кӧсйис вины сійӧс, но эз вермы.
Ирӧд поліс Иоанысь, ӧд тӧдіс, мый Иоан веськыда олысь да вежа морт. Ирӧд дорйис Иоанӧс, унатор вӧчис сылысь кывзысьӧмӧн да окотапырысь кывзіс сійӧс.
Ирӧд чужан лунӧ Ирӧдиадалы лоис позянлун вины Иоанӧс. Тайӧ лунӧ Ирӧд котыртіс гаж юралысьяслы, тышкайӧзӧн веськӧдлысьяслы да галилеяса пыдди пуктана войтырлы. Ирӧдиадалӧн нылыс пырис да йӧктіс гажӧдчысьяс водзын. Тайӧ воис Ирӧдлы да сыкӧд пукалысьяслы сьӧлӧм вылас.
Ӧксы шуис нывлы: «Кор менсьым, мый кӧсъян, и ме сета тэныд». Ирӧд кыв сетіс: «Сета, мый сӧмын коран, весиг аслам веськӧдлан мулысь джынсӧ».
Ныв петіс да юаліс мамыслысь: «Мый эськӧ корны?»
Мамыс шуис: «Пыртысь Иоанлысь юрсӧ».
Ныв дзик пыр тэрмасьӧмӧн муніс ӧксы дінӧ да шуис: «Кӧсъя, мед дзик ӧні сетін меным тасьтіын Пыртысь Иоанлысь юрсӧ».
Ӧксы шогӧ усис, но гажӧдчысьяс водзын сетӧм кывйысь эз вермы соссьыны.
Дзик пыр сійӧ ыстіс шыпуртаӧс да тшӧктіс вайны Иоанлысь юрсӧ.
Шыпурта муніс дзескыдінӧ да керыштіс Иоанлысь юрсӧ. Сэсся вайис тасьтіын юрсӧ да сетіс нывлы, а нылыс — мамыслы.
Та йылысь кывлісны Иоанлӧн велӧдчысьясыс. Найӧ локтісны шойысла да нуисны дзебанінӧ.
Апостолъяс чукӧртчисны Исус дінӧ. Найӧ висьталісны Сылы ставсӧ, мый вӧчисны да мыйӧ велӧдісны.
Исус шуис налы: «Мунӧй овтӧминӧ да шойччыштӧй сэні». Йӧзыс век ӧтарӧ локтіс-муніс, велӧдчысьяслы весиг некор вӧлі сёйыштнысӧ.
Та вӧсна найӧ ӧтнаныс мӧдӧдчисны пыжӧн овтӧминӧ.
Йӧзыс аддзылісны налысь мунӧмсӧ да тӧдісны найӧс.
Котӧрӧн петісны каръяссьыныс да воисны сэтчӧ на дорысь водзджык.
Пыжысь чеччигӧн Исус аддзис уна йӧзӧс. Сылӧн сьӧлӧмыс нормис, ӧд найӧ вӧліны видзысьтӧг кольӧм ыжъяс кодьӧсь. Сэки Исус пондіс велӧдны найӧс, Сійӧ унатор йылысь висьталіс налы.
Сёр рытнас матыстчисны Исус дінӧ велӧдчысьясыс да шуисны: «Тані овтӧмин, и кадыс сёр нин. Ысты йӧзсӧ матігӧгӧр сикт-грездӧ сёянтор ньӧбны».
Исус воча шуис: «Ті сетӧй налы сёянсӧ».
Велӧдчысьяс шуисны: «Миянлы-ӧ колӧ ветлынысӧ? Та мындаыслы нянь вылад кыксё динар ковмас».
Исус юаліс налысь: «Уна-ӧ тіян няньныд?
Мунӧй видзӧдлӧй».
Тӧдмалӧм бӧрын найӧ висьталісны: «Вит нянь да кык чери».
Исус тшӧктіс велӧдчысьясыслы пуксьӧдавны йӧзсӧ чукӧръясӧ веж турун вылӧ.
Йӧзыс пуксялісны сёӧн да ветымынӧн.
Исус босьтіс вит няньсӧ да кык черисӧ, видзӧдліс енэжӧ да Енмӧс аттьӧалӧмӧн чегис няньсӧ, сэсся сетіс велӧдчысьясыслы. Велӧдчысьяс разӧдісны йӧзыслы.
Кык черисӧ тшӧтш юкис ставныслы.
Ставныс пӧттӧдзныс сёйисны, а нянь да чери коляссӧ дас кык куд тыр чукӧртісны.
Сёйысьыс вӧлі вит сюрс гӧгӧр морт.
Исус дзик пыр тшӧктіс велӧдчысьясыслы пуксьыны пыжӧ да вуджны Сытӧг мӧдлапӧлӧ, Випсаидаӧ. Сэккості Исус мӧдӧдаліс йӧзсӧ.
Йӧзӧс ыстӧм бӧрын Ачыс кайис керӧсӧ кевмысьны.
Рытнас пыжаяс вӧліны ты шӧрын, а Исус ӧтнас сулаліс вадорын.
Сійӧ аддзис: паныда тӧлыс вӧсна велӧдчысьяслы сьӧкыд вӧлі сыннысӧ.
Асъядорыс Исус мӧдӧдчис ва вывті велӧдчысьяс дінас да кӧсйис ордйыны найӧс.
Кор велӧдчысьяс аддзисны ва вывті восьлалысь Исусӧс, чайтісны, мый тайӧ орт, и кутісны горзыны.
Ставныс ёна повзисны.
Исус дзик пыр шыасис на дінӧ: «Лӧньӧй, тайӧ Ме. Энӧ полӧй».
Сійӧ пуксис на дінӧ пыжас. Тӧлыс лӧнис.
Велӧдчысьяс ёна шензисны. Няньӧн вердӧм шензьӧданаторйыс, буракӧ, нинӧм эз висьтав налӧн измӧм сьӧлӧмлы.
Тысӧ вуджӧм бӧрын найӧ сувтісны Генесарет муӧ.
Кор найӧ чеччисны пыжсьыс, йӧзыс дзик пыр тӧдмалісны Исусӧс. Тайӧ юӧрнас найӧ котӧрӧн кытшовтісны став матігӧгӧрсӧ да, кӧні кывсис Исус, сэтчӧ пондісны вольпасьӧн вайны висьысьясӧс.
Быдлаын, кытчӧ воліс Исус — сиктӧ, карӧ, грездӧ — эрдъяс вылӧ водтӧдавлісны висьысьясӧс да корисны Исусӧс, мед висьысьяслы лэдзас инмӧдчывны паськӧм дорышас. Сы дінӧ инмӧдчылысьяс ставӧн бурдісны.
7 юр.
Исус дінӧ локтісны фарисейяс да Ерусалимысь воӧм Индӧдӧ велӧдысьяс. Кор найӧ аддзисны, мый кодсюрӧ Сылӧн велӧдчысьясыс сёйӧны няньсӧ мыськытӧм пеж киӧн, кутісны шуасьны на вылӧ.
Юдейяс, торйӧн нин фарисейяс, кутчысисны пӧрысьяслӧн шуӧмӧ: кинысӧ мыськытӧг эз пуксьывны сёйны и вузасянінысь локтӧм бӧрын эз сёйлыны мыссьытӧг.
Нӧшта уна мукӧдторйӧ на кутчысисны: дозмук, тасьті-пӧрт да вольпась мыськалӧмӧ.
Фарисейяс да Индӧдӧ велӧдысьяс юалісны Исуслысь: «Мыйла велӧдчысьясыд оз овны пӧрысьяслӧн шуӧм серти: мыськытӧм киӧн нянь сёйӧны?»
Исус шуис налы: «Кык бана шаньгаяс. Бура шуӧма Гижӧдас тіян йылысь Исай пророк:
— Тайӧ йӧзыс вомнас пыдди пуктӧны Менӧ, но налӧн сьӧлӧмыс ылын Меысь. Весьшӧрӧ ыдждӧдлӧны Менӧ мортсянь тшӧктӧмъясӧ велӧдігӧн.
Ті эновтінныд Енлысь тшӧктӧмсӧ, кутчысянныд мортлӧн шуӧмъясӧ: тасьті-дозмук мыськалӧмӧ да уна мукӧдторйӧ на».
Исус водзӧ висьталіс: «Сюся ті вештанныд Енлысь тшӧктӧмсӧ, медым кутчысьны батьяслӧн шуӧмӧ.
Мӧисей шуӧма: “Пыдди пукты ассьыд бать-мамтӧ”.
“Омӧльтан кӧ бать-мамтӧ, тэнӧ кулӧм вылӧ мыждасны”.
А ті мӧдарӧ велӧданныд. Морт кӧ бать-мамыслы сетӧм пыдди шуас: “Корбан, Енлы тайӧс кӧсйыси”, сэки ті онӧ нин лэдзӧй вӧчны бурсӧ бать-мамыслы. Тадзи батьяслӧн шуӧмӧ кутчысьӧмӧн да велӧдӧмӧн ті вештанныд Енлысь Кывсӧ.
Уна татшӧмтор на ті вӧчанныд».
Исус бара корис йӧзсӧ да шуис налы: «Кывзӧй Менӧ ставныд да гӧгӧрвоӧй. Мортӧс оз пежав сійӧ, мый пытшкас пырӧ, а пежалӧ, мый сы пытшкысь петӧ.
Кодлӧн эм пель, мед кылӧ.»
Исус колис йӧзсӧ да пырис керкаӧ. Велӧдчысьясыс корисны Сійӧс гӧгӧрвоӧдны висьталӧмсӧ.
Сійӧ шуис налы: «Весиг ті онӧ гӧгӧрвоӧй.
Онӧ ӧмӧй вежӧртӧй: мортӧс оз вермы пежавны сійӧ, мый пытшкас пырӧ, ӧд сійӧ оз сьӧлӧмас пыр, а веськалӧ кынӧмас, сэсся ортсӧ петӧ». Тадзи Исус гӧгӧрвоӧдіс, мый став сёяныс сӧстӧм.
Водзӧ висьталіс: «Мый петӧ морт пытшкысь, сійӧ пежалӧ мортсӧ.
Буретш морт пытшкысь, сылӧн сьӧлӧмысь, петӧны лёк мӧвпъяс, гозъя олӧм пежалӧм, кырсалӧм, морт виӧм, гусясьӧм, горшасьӧм, лёк вӧчӧм, ылӧдчӧм, лэдзчысьӧм оласног, колысь син, омӧльтӧм, асьсӧ вылӧ пуктӧм да мывкыдтӧмлун. Став тайӧ лёкыс петӧ морт пытшкысь да пежалӧ сійӧс».
Сэтысь Исус муніс Тир да Сидон муясӧ. Сійӧ пырис ӧти керкаӧ да эз кӧсйы, мед кодкӧ тӧдіс та йылысь, но тӧдмалісны Сылӧн воӧм йылысь.
Кывліс Сы йылысь ӧти ань, кодлысь нывсӧ вӧлі кутӧма пеж лов. Ань локтіс да уськӧдчис Исус водзӧ.
Тайӧ аньыс вӧлі Сирияысь, финикияса, сійӧ сёрнитіс грек кывйӧн. Ань корис Исусӧс вӧтлыны ныв пытшкысь пеж ловсӧ.
Исус шуис: «Медводз мед ныв-пи пӧттӧдзныс сёясны. Абу бур мырддьыны ныв-пилысь няньсӧ да шыбитны сійӧс понпиянлы».
Ань воча шуис: «Сідз, Господьӧй.
Но понъяс тшӧтш пызан улысь сёйӧны ныв-пилысь нянь торпыригсӧ».
Исус шуис сылы: «Тадз кӧ мӧвпалан, мун, пеж лов петіс тэнад ныв пытшкысь».
Гортас локтӧм бӧрын ань аддзис: нылыс куйлӧ вольпасьын, пеж лов петӧма сы пытшкысь.
Тир да Сидон муясысь петӧм бӧрын Исус локтіс Даскар му пыр Галилея ты дорӧ.
Сы дінӧ вайӧдісны пыскыль кывъя пельтӧм мортӧс да корисны Исусӧс пуктывны кисӧ тайӧ мортыс вылӧ.
Исус нуӧдіс сійӧс йӧз дінсьыс бокӧ, пуктіс чуньяссӧ сылы пеляс да сьӧлыштӧмӧн инмӧдчис сылы кывъяс. Сэсся енэжӧ видзӧдлӧмӧн ышловзис да шуис пельтӧмлы: «Эффата.» Тайӧ лоӧ: «Воссьы.»
Дзик пыр тайӧ мортыслӧн пельыс воссис да кыв-ворыс разьсис, сійӧ пондіс ясыда сёрнитны.
Исус ӧлӧдіс йӧзсӧ та йылысь мукӧдлы висьталӧмысь.
Но кымын ёна ӧлӧдіс, сымын ёнджыка найӧ висьтавлісны.
Йӧзыс шензьӧмӧн шензисны да шуалісны: «Сійӧ уна бурсӧ вӧчӧ. Пельтӧмъяслы сетӧ кывны, кывтӧмъяслы сёрнитны».
8 юр.
Сійӧ лунъясӧ бара чукӧртчис зэв уна йӧз. Налӧн эз вӧв аскӧдныс сёяныс. Исус корис велӧдчысьяссӧ да шуис:
«Менам сьӧлӧмӧй висьӧ тайӧ йӧзыс вӧсна. Найӧ куим лун нин танӧсь, а налӧн сёяныс абу.
Сёйтӧгыс кӧ мӧдӧда найӧс гортаныс, туяс дзикӧдз эбӧстӧммасны, ӧд кодсюрӧ локтісны ылісянь».
Велӧдчысьяс шуисны: «Кытысь босьтны овтӧминас няньсӧ, медым вердны найӧс?»
Исус юаліс: «Уна-ӧ тіян няньныд?»
Найӧ вочавидзисны: «Сизим».
Исус тшӧктіс йӧзыслы пуксявны муас. Ачыс босьтіс сизим няньсӧ, Енмӧс аттьӧалӧмӧн чегис няньсӧ да сетіс велӧдчысьясыслы, а велӧдчысьяс — йӧзыслы.
Налӧн вӧлі нӧшта кымынкӧ посни чери. Бурсиӧм бӧрын Исус тшӧктіс сетавны черисӧ.
Ставӧн пӧттӧдзныс сёйисны, коляссӧ сизим куд тыр чукӧртісны.
Сёйысьыс вӧлі нёль сюрс гӧгӧр морт.
Йӧзсӧ мӧдӧдалӧм бӧрын Исус велӧдчысьясыскӧд дзик пыр пуксис пыжӧ да кывтіс Далманута муӧ.
Локтісны фарисейяс да пондісны вензьыны Исускӧд. Сійӧс кыйӧм могысь корисны петкӧдлыны енэжсянь индысьпас.
Исус сьӧкыда ышловзис да шуис: «Мыйла ӧнія олысьяслы колӧ индысьпасыс?
Веськыда висьтала тіянлы: оз ло налы индысьпасыс».
Сэсся Исус колис найӧс, бӧр пуксис пыжӧ да вуджис мӧдлапӧлӧ.
Велӧдчысьяс вунӧдісны босьтны аскӧдныс няньсӧ, а пыжас вӧлі сӧмын ӧти няньтор.
Исус шуис налы: «Видзчысьӧй фарисей да Ирӧд няньшомысь».
Велӧдчысьяс ас костаныс сёрнитісны: «Няньыс ӧд миян абу».
Тайӧс казялӧмӧн Исус шуис налы: «Мый нӧ сёрнитанныд нянь абутӧм йывсьыд?
Онӧ ӧмӧй вежӧртӧй?
Измӧма ӧмӧй сьӧлӧмныд?
Синмаӧсь да, онӧ аддзӧй?
Пеляӧсь да, онӧ кылӧй?
Вунӧдінныд ӧмӧй вит сюрс мортӧс вит няньӧн вердӧм йылысь? Кымын куд тыр сэки коляссӧ чукӧртінныд?»
Шуисны: «Дас кыкӧс».
«А нёль сюрс мортӧс сизим няньӧн вердігӧн, кымын куд тыр коляссӧ чукӧртінныд?»
Шуисны Сылы: «Сизимӧс».
Исус шуис налы: «Кыдзи ті онӧ вежӧртӧй?»
Исус воис Випсаидаӧ.
Сы дінӧ вайӧдісны синтӧмӧс да корисны инмӧдчывны сы дінӧ.
Исус босьтіс синтӧмӧс киӧдыс да петкӧдіс сиктсьыс. Синмас сьӧлыштӧм бӧрын пуктіс кисӧ сы вылӧ да юаліс: «Аддзан-ӧ мыйкӧ?»
Синтӧм видзӧдліс да шуис: «Аддза ветлӧдлысь йӧзӧс, найӧ пуяс кодьӧсь».
Исус бара пуктыліс кисӧ сылы синмас да тшӧктіс видзӧдлыны.
Синтӧм бурдіс да ставсӧ аддзис ясыда.
Исус мӧдӧдіс сійӧс гортас да шуис: «Сиктас эн пыр».
Исус муніс велӧдчысьясыскӧд Филиплӧн Кесария сиктъясӧ.
Муніганыс юаліс налысь: «Код туйӧ йӧзыс пуктӧны Менӧ?»
Найӧ вочавидзисны: «Ӧтияс шуӧны, Пыртысь Иоан пӧ, мӧдъяс шуӧны, Илля пӧ, кодсюрӧ шуӧны, пророкъясысь пӧ ӧти».
Исус юаліс: «Код туйӧ ті Менӧ пуктанныд?»
Петыр вочавидзис: «Тэ — Кристос».
Исус ӧлӧдіс найӧс, мед эз висьтавны Сы йылысь мукӧдлы.
Исус пондіс висьтавны велӧдчысьясыслы: «Морт Пилы уна сьӧкыд ковмас нуны. Пӧрысьяс, аркирейяс да Индӧдӧ велӧдысьяс пондасны вӧтлыны да виасны Сійӧс, но коймӧд луннас Сійӧ ловзяс».
Та йылысь Исус сёрнитіс восьсӧн.
Сійӧс бокӧ корӧмӧн Петыр паныд шуасьны пондіс.
Велӧдчысьяслань бергӧдчӧмӧн Исус чорыда вомаліс Петырӧс: «Вешйы Ме дінысь, сӧтана. Тэнад мӧвпъясыд мортсянь, абу Енсянь».
Исус чукӧстіс йӧзсӧ да велӧдчысьяссӧ да шуис налы: «Коді кӧсйӧ мунны Ме бӧрся, мед вунӧдас асьсӧ, мед босьтас ассьыс крестсӧ да локтас Ме бӧрся.
Коді кӧсйӧ видзны ассьыс олӧмсӧ, воштас сійӧс. Ме вӧсна да Евангелльӧ вӧсна олӧмсӧ воштысь видзас сійӧс.
Лоас-ӧ мортыслы бур, босьтас кӧ аслыс став муюгыдсӧ, а олӧмсӧ воштас?
Вермас-ӧ бӧр ньӧбны ассьыс олӧмсӧ?
Коді тайӧ мыжа да пежас ылалӧм йӧз пӧвстын яндысяс Меысь да Менам кывъясысь, сыысь яндысяс Морт Пи, кор локтас вежа анделъяскӧд Батьыслӧн дзирдлунӧн».
9 юр.
Исус шуис налы: «Веськыда висьтала тіянлы: кодсюрӧ тані сулалысьяс пиысь кувтӧдзныс на аддзасны Ен Юралӧмлысь вына локтӧмсӧ».
Квайт лун мысти Исус босьтіс Аскӧдыс Петырӧс, Яковӧс, Иоанӧс да кайис накӧд джуджыд керӧсӧ. Велӧдчысьяс син водзын Исуслӧн мыгӧрыс вежсис,
паськӧмыс лои лым кодь дзирдалана еджыд. Татшӧм еджыд дӧрасӧ му вылын он аддзы.
Велӧдчысьяс аддзисны Илляӧс да Мӧисейӧс, найӧ сёрнитісны Исускӧд.
Петыр шуис Исуслы: «Велӧдысьӧй, миянлы тані лӧсьыд, сувтӧдам куим чом: Тэныд, Мӧисейлы да Иллялы».
Петыр ачыс эз гӧгӧрво, мый висьталіс, ӧд ставныс найӧ вӧлі ёна повзьӧмаӧсь.
Сэки локтіс кымӧр да вевттис найӧс, кымӧрсянь кыліс гӧлӧс шы: «Тайӧ Менам муса Пиӧй, Сійӧс кывзӧй».
Велӧдчысьяс видзӧдлісны гӧгӧрбок да аддзисны, мый накӧд сӧмын Исус.
Керӧсысь лэччиганыс Исус ӧлӧдіс велӧдчысьяссӧ, мед эз висьтавны аддзывлӧм йывсьыс Морт Пилӧн ловзьытӧдз.
Найӧ тӧд выланыс босьтісны тайӧ кывъяссӧ да ӧта-мӧдныслысь юасисны, кыдзи гӧгӧрвоны ловзьӧмсӧ.
Велӧдчысьяс юалісны Исуслысь: «Мыйла Индӧдӧ велӧдысьяс шуӧны, Иллялы пӧ колӧ водзджык локны?»
Сійӧ вочавидзис: «Дерт, Иллялы колӧ водзджык локны да ставсӧ лӧсьӧдны.
А Морт Пи йылысь гижӧма, мый уна сьӧкыд Сылы ковмас нуны да лоны увтыртӧмаӧн.
Висьтала тіянлы: Илля локтіс нин. Сыкӧд вӧчисны, мый кӧсйисны. Тадзи вӧлі водзвыв гижӧма сы йылысь».
Исус локтіс велӧдчысьяс дінӧ да аддзис на дінысь уна йӧзӧс да накӧд вензьысь Индӧдӧ велӧдысьясӧс.
Исусӧс аддзӧм бӧрын став йӧзыс чуймисны да котӧрӧн матыстчисны чолӧмасьны Сыкӧд.
Исус юаліс Индӧдӧ велӧдысьяслысь: «Мый йылысь вензянныд?»
Йӧз пӧвстысь ӧти шуис: «Велӧдысьӧй, ме вайӧді Тэ дінӧ ассьым пиӧс. Сійӧ оз сёрнит, сы пытшкын пеж лов. Кор пеж лов топӧдӧ сійӧс, шыбитӧ муас. Сэки пиӧй пиньсӧ йирӧ, сійӧс йӧрсӧналӧ, да вомсьыс быг петӧ.
Ме кори Тэнсьыд велӧдчысьястӧ вӧтлыны пеж ловсӧ, но найӧ эз вермыны».
Исус шуис: «Эскытӧмъяс.
Дыр-ӧ на Меным овнысӧ тіянкӧд?
Дыр-ӧ на Меным видзӧдны тіянӧс?
Вайӧдӧй Ме дінӧ зонкасӧ».
Сійӧс вайӧдісны Исус дінӧ.
Исусӧс аддзӧм бӧрын пеж лов дзик пыр кутіс песлӧдлыны зонкасӧ.
Сійӧ усис муас, пондіс туплясьны, вомсьыс кутіс быг петны.
Исус юаліс зонка батьлысь: «Важысянь-ӧ тайӧ пиыдлӧн?»
Сійӧ вочавидзис: «Кагадырсяньыс.
Унаысь сійӧс пеж лов биӧ-ваӧ шыбитліс, мед вины.
Верман кӧ, отсав миянлы, ло бур сьӧлӧма».
Исус шуис сылы: «Эскан кӧ, эскысьлы ставыс вермана».
Зонкалӧн батьыс дзик пыр бӧрдӧмӧн горӧдіс: «Эска, Господьӧй.
Отсав меным эскыны.»
Исус аддзис: йӧзыс котӧрӧн чукӧртчӧны. Сэки ӧлӧдӧмӧн шуис пеж ловлы: «Кыв-вор кутысь, пельяс тупкысь пеж лов, тшӧкта тэныд: пет зонка пытшкысь да бӧрсӧ эн лысьт пырны сы пытшкӧ».
Пеж лов горӧдіс, песовтіс зонкасӧ да петіс сы пытшкысь.
Зонка куйліс шой кодь, унаӧн весиг шуисны, куліс пӧ.
Исус босьтіс зонкаӧс киӧдыс, и сійӧ чеччис.
Керкаӧ пырӧм бӧрын велӧдчысьяс ас кежаныс юалісны Исуслысь: «Мыйла ми эгӧ вермӧй вӧтлыны пеж ловсӧ?»
Исус шуис налы: «Видзавтӧг да кевмысьтӧг татшӧм пеж ловъяссӧ вӧтлыны онӧ вермӧй».
Сэтысь петӧм бӧрын найӧ мунісны Галилея пыр.
Исус эз кӧсйы, медым кодкӧ тӧдліс та йылысь.
Сэні Сійӧ велӧдіс Ассьыс велӧдчысьяссӧ. Сійӧ шуис налы: «Морт Пиӧс сетасны йӧзлӧн киӧ. Сійӧс виасны, но коймӧд луннас Сійӧ ловзяс».
Велӧдчысьяс эз гӧгӧрвоны, мый йылысь Исус висьталӧ, а юавнысӧ полісны.
Исус воис Капернаумӧ. Гортас пырӧм мысти Сійӧ юаліс велӧдчысьясыслысь: «Мый йылысь ті сёрнитінныд локтігмозныд?»
Найӧ чӧв олісны. Локтіганыс найӧ вензисны, коді на пиысь ыджыдджыкыс.
Исус пуксис, корис дас кыкнансӧ да шуис налы:
«Коді кӧсйӧ лоны медводдзаӧн, мед лоас став пиас медбӧръяӧн да быдӧнлы кесъялысьӧн».
Сійӧ босьтіс кагаӧс, сувтӧдіс на шӧрӧ да сійӧс кутыштлӧмӧн шуис: «Коді Менам ним вӧсна сибӧдӧ ӧти татшӧм кагаӧс, сійӧ сибӧдӧ Менӧ.
А Менӧ сибӧдысь сибӧдӧ Менӧ Мӧдӧдысьӧс, оз сӧмын Менӧ».
Иоан шуис: «Велӧдысьӧй, ми аддзылім мортӧс, сійӧ Тэнад нимӧн пеж ловъясӧс вӧтлалӧ.
Ми ӧлӧдім сійӧс, ӧд сійӧ абу миян пӧвстысь».
Исус шуис: «Энӧ ӧлӧдӧй сійӧс. Менам нимӧн кӧ шензьӧданаторсӧ вӧчӧ, сійӧ оз вермы пырысь-пыр омӧльтны Менӧ.
Коді абу тіянлы паныд, сійӧ тіян дор.
Веськыда висьтала тіянлы: коді юкталас тіянӧс ваӧн, сы вӧсна мый ті Кристослӧн, сійӧ оз коль удждонтӧг».
«Коді ыштӧдас тайӧ ичӧтъясысь ӧтикӧс, Меным эскысьӧс, сылы бурджык лоӧ, сьыліас кӧ ыджыд изки ӧшӧдасны да шыбитасны саридзӧ.
Киыд кӧ ыштӧдӧ тэнӧ, керышт сійӧс.
Бурджык пырны помтӧм олӧмӧ ки пӧлаӧн куслытӧм биӧ киаӧн веськалӧм дорысь. Сэні “номырыс оз кувлы да биыс оз куслы”.
Кокыд кӧ ыштӧдӧ тэнӧ, керышт сійӧс.
Бурджык пырны помтӧм олӧмӧ кок пӧлаӧн куслытӧм биӧ тэнӧ кокаӧн шыбитӧм дорысь. Сэні “номырыс оз кувлы да биыс оз куслы”.
Синмыд кӧ ыштӧдӧ тэнӧ, шыбит сійӧс.
Бурджык пырны Енлӧн Юраланінӧ син пӧлаӧн куслытӧм биӧ тэнӧ синмаӧн шыбитӧм дорысь. Сэні “номырыс оз кувлы да биыс оз куслы”.
Быдӧнӧс сӧстӧммӧдасны биӧн да солаласны висьӧс моз.
Солыд — буртор.
Но солыс кӧ лоас дуб, кыдзи сійӧс бӧр соланас вӧчан?
Тіян пытшкын мед пыр лоӧ солыс, лӧня олӧй ас костаныд».
10 юр.
Сэтысь Исус муніс Йӧрдан ю мӧдлапӧлӧд Юдея муӧ.
Сы дінӧ бара чукӧртчис уна йӧз. Сійӧ велӧдіс найӧс, кыдзи пыр вӧчліс.
Исус дінӧ матыстчисны фарисейяс да Сійӧс кыйӧм могысь юалісны: «Позьӧ-ӧ верӧслы юксьыны гӧтырыскӧд?»
Исус воча шуис: «Мый тіянлы гижӧма Мӧисей?»
Найӧ вочавидзисны: «Мӧисей лэдзис верӧслы эновтны гӧтырсӧ, сӧмын верӧсыслы колӧ вӧлі сетны гӧтырыслы торйӧдчан гижӧд».
Исус шуис налы: «Тіян чорыд сьӧлӧмныд вӧсна Мӧисей гижис тайӧ тшӧктӧмсӧ.
Му пуксьӧмсяньыс Ен вӧчис аймортӧс да аньӧс.
“Та вӧсна морт кольӧ бать-мамсӧ да ӧтлаасьӧ гӧтырыскӧд, и тайӧ кыкыс лоӧны ӧти вир-яйӧн”.
Сідзкӧ, найӧ абу нин кык, а ӧти вир-яй.
Мый йитӧма Енмыс, морт мед оз торйӧд».
Керкаӧ пырӧм бӧрын велӧдчысьяс та йылысь юалісны Исуслысь.
Исус шуис налы: «Верӧсыс кӧ эновтӧ гӧтырсӧ да гӧтрасьӧ мӧдкӧд, сійӧ гозъя олӧм пежалӧ.
Гӧтырыс кӧ юксьӧ верӧсыскӧд да мунӧ мӧд сайӧ, сійӧ тшӧтш гозъя олӧм пежалӧ».
Исус дінӧ вайӧдісны челядьӧс, медым Сійӧ инмӧдчыліс на дінӧ. Велӧдчысьяс шуасисны вайӧдысьяс вылӧ.
Исус казяліс тайӧс да чорыда шуис налы: «Лэдзӧй челядьсӧ локны Ме дінӧ. Энӧ кутӧй найӧс. Енлысь Юраланінсӧ ӧд на коддьӧмлы лӧсьӧдӧма.
Веськыда висьтала тіянлы: коді оз сибӧд Енлысь Юралӧмсӧ кага моз, сійӧ оз пыр Енлӧн Юраланінӧ».
Исус кутыштліс челядьӧс да кисӧ пуктылӧмӧн бурсиис найӧс.
Туйӧ петігас Исус дінӧ котӧрӧн локтіс ӧти морт да Исус водзӧ пидзӧс вылас сувтӧмӧн юаліс: «Бур Велӧдысьӧй, мый меным колӧ вӧчны, мед вичмис меным помтӧм олӧм?»
Исус вочавидзис: «Мыйла тэ шуан Менӧ бурӧн?
Некод абу бурыс, сӧмын Енмыс бур.
Тэ ӧд тӧдан тшӧктӧмъяссӧ: гозъя олӧмтӧ эн пежав, эн ви, эн гусясь, эн пӧръясь, эн мырддьы мукӧдлысь, пыдди пукты ассьыд бать-мамтӧ».
Сійӧ шуис: «Велӧдысьӧй, том кадсянь ме ола тайӧ тшӧктӧмъяс сертиыс».
Исус видзӧдліс сы вылӧ мусапырысь да шуис: «Ӧтитор оз тырмы тэныд: мун, вузав ставсӧ, мый тэнад эм, да сьӧмсӧ сет гӧльяслы.
Сэки тэныд енэжын озырлуныс вичмас.
Сэсся босьт кресттӧ да лок Ме бӧрся».
Исуслӧн кывъясыс шӧйӧвоштісны морттӧ. Сійӧ жугыля муніс, ӧд сылӧн озырлуныс вӧлі уна.
Исус видзӧдліс велӧдчысьясыс вылӧ да шуис налы: «Кутшӧм сьӧкыд озырлы пырны Енлӧн Юраланінӧ.»
Велӧдчысьяс чуймисны Сылӧн кывъясысь.
Исус выльысь шуис: «Челядь, кутшӧм сьӧкыд пырны Енлӧн Юраланінӧ сылы, коді озырлун вылӧ лачаӧн олӧ.
Озырлы Енлӧн Юраланінӧ пырӧм дорысь верблюдлы кокньыдджык пырны ем пысӧд».
Велӧдчысьяс ёнджыка на чуймисны, юасисны ӧта-мӧдныслысь: «Коді нӧ вермас мездмынысӧ?»
На вылӧ видзӧдлӧмӧн Исус шуис: «Мортлы тайӧ вермытӧмтор, но абу Енлы. Енмыслы ставыс вермана».
Петыр шуис Исуслы: «Ми ставсӧ эновтім да мунім Тэ бӧрся».
Исус шуис: «Веськыда висьтала тіянлы: коді Ме вӧсна да Евангелльӧ вӧсна коляс керкасӧ, чой-воксӧ, бать-мамсӧ, гӧтырсӧ, ныв-писӧ, видз-мусӧ, сылы тайӧ олӧмас на вӧтлӧмъяс дырйи керкаыс, чой-вокыс, мамыс, ныв-пиыс да видз-муыс сё пӧвстӧн бӧр воас, нӧшта локтан нэмас сылы помтӧм олӧм вичмас.
Воддзаясысь унаӧн лоӧны бӧръяӧн, бӧръяясысь — воддзаӧн».
Ерусалимӧ кайигӧн Исус муніс водзвыланыс. Велӧдчысьяс шензисны, а мукӧдыслӧн, Исус бӧрся мунысьяслӧн, вӧлі полӧм.
Исус корис Ас дінас дас кык велӧдчысьсӧ да пондіс висьтавны, мый Сійӧс виччысьӧ: «Ӧні ми мунам Ерусалимӧ.
Сэні Морт Пиӧс сетасны аркирейяслы да Индӧдӧ велӧдысьяслы. Найӧ шуасны вины Сійӧс, сетасны ентӧдтӧмъяс киӧ. Найӧ сераласны Сійӧс, сьӧлаласны да чорыда нӧйтасны, сэсся виасны.
Но коймӧд луннас Сійӧ ловзяс».
Исус дінӧ матыстчисны Зеведейлӧн Яков да Иоан пияныс. Найӧ шуисны: «Велӧдысь, миян эм корӧм Тэ дінӧ».
Исус юаліс: «Мый ті кӧсъянныд?»
Найӧ вочавидзисны: «Пуксьӧд миянӧс Аскӧдыд Юраланінад, ӧтинымӧс веськыдладорад, мӧднымӧс шуйгаладорад».
Исус шуис налы: «Онӧ тӧдӧй, мый коранныд.
Верманныд-ӧ юны Менсьым чашасӧ да Менам пыртчӧмӧн пыртчыны?»
Найӧ вочавидзисны: «Вермам».
Исус шуис: «Менсьым чашасӧ понданныд юны да Менам пыртчӧмӧн понданныд пыртчыны.
Но мед пуксьӧдны веськыдладорам да шуйгаладорам — тайӧ абу Ме сайын. Сэтчӧ пуксясны найӧ, кодлы лӧсьӧдӧма».
Яковлӧн да Иоанлӧн сёрниыс дӧзмӧдіс мукӧд дас велӧдчысьсӧ.
Исус корис велӧдчысьяссӧ да шуис: «Ті тӧданныд, мый юралысьяс ыджыдалӧны йӧз вылын, да веськӧдлысьяс кипод улас кутӧны йӧзӧс.
Но ті тадзи энӧ вӧчӧй. Кӧсъян кӧ ыджыдӧ пуксьыны — кесъяв, кӧсъян кӧ юралысьӧ пуксьыны — ло кесйӧг туйын.
Ӧд Морт Пи эз лок, медым Сылы кесъялісны. Сійӧ локтіс кесъявны да сетны Ассьыс олӧмсӧ унаӧс ньӧбӧм могысь».
Исус велӧдчысьясыскӧд воис Ерикон карӧ.
Карысь петіганыс накӧд вӧлі уна йӧз. Туй дорас пукаліс синтӧм корысь Вартимей, Тимейлӧн пиыс.
Сійӧ кыліс, Назаретса Исус пӧ локтӧ, да пондіс горӧдны: «Исус, Давид Пи. Ло бур сьӧлӧма ме дінӧ.»
Унаӧн ӧлӧдісны сійӧс горзӧмсьыс, но сійӧ ёнджыка на пондіс горзыны: «Давид Пи, ло бур сьӧлӧма.»
Исус сувтіс да шуис: «Корӧй сійӧс».
Синтӧмӧс корисны, шуисны сылы: «Эн пов, чеччы. Исус корӧ тэнӧ».
Сійӧ шыбитіс ассьыс вылыс паськӧмсӧ, чеччис да локтіс Исус дінӧ.
Исус юаліс: «Мый тэ кӧсъян?»
Синтӧм вочавидзис: «Велӧдысьӧй, кӧсъя аддзыны».
Исус шуис: «Мун, эскӧмыд мездіс тэнӧ».
Синтӧм дзик пыр кутіс аддзыны да муніс Исус бӧрся.
11 юр.
Ерусалимлань матыстчигӧн Исус велӧдчысьясыскӧд воис Олив керӧсын сулалысь Виффагия да Вифания сиктъяс дорӧ. Ассьыс кык велӧдчысьсӧ мӧдӧдігӧн Исус шуис: «Мунӧй тайӧ сиктас. Сэтчӧ пыриганыд аддзанныд домалӧм том осёлӧс, сы вылӧ некод на эз пуксьыв. Разьӧй сійӧс да вайӧдӧй татчӧ.
Юаласны кӧ, мыйла тайӧс вӧчанныд, вочавидзӧй, мый сійӧ колӧ Господьлы, и дзик пыр мӧдӧдасны осёлсӧ татчӧ».
Мӧдӧдӧмаяс мунісны, аддзисны дзиръя дорӧ домалӧм том осёлӧс да разисны сійӧс.
Кодсюрӧ сэні сулалысьяс пиысь юалісны: «Мый вӧчанныд?
Мыйла разянныд осёлсӧ?»
Велӧдчысьяс вочавидзисны, кыдзи Исус тшӧктіс.
Сэки лэдзисны босьтны осёлӧс.
Том осёлӧс вайӧдісны Исус дінӧ. Шлапкисны осёл вылӧ паськӧмнысӧ, сэсся Исус пуксис сы вылӧ.
Унаӧн вольсавлісны ассьыныс паськӧмнысӧ туй вылас, мукӧдыс чегъялісны туй бокысь пу вожъяс да тшӧтш пукталісны туй вылас.
Водзас да бӧрас мунысьяс горзісны: — Осанна.
Бурсиӧма Господь нимӧн Локтысьӧс.
Бурсиӧма Господь нимӧн миян Давид батьлысь локтан юралӧмсӧ.
Ошкӧм Медвылыссалы.
Ерусалимӧ воӧм мысти Исус пырис крамӧ.
Ставсӧ видзӧдалӧм бӧрын сёр рытнас муніс дас кыкнан велӧдчысьыскӧд Вифанияӧ.
Мӧд луннас Вифанияысь мунігас Исуслӧн кынӧмыс пондіс сюмавны. Ылысянь Сійӧ аддзис коръя инжир пу да муніс видзӧдлыны, оз-ӧ сюр сэтысь тусьтор.
Матыстчис пу дінас да аддзис сӧмын коръяссӧ, ӧд эз на во тусь гӧрддзасян кадыс.
Исус шуис пуыслы: «Ӧнісянь оз пондыны сёйны тэнсьыд вотӧстӧ».
Велӧдчысьясыс кывлісны тайӧс.
Сэсся найӧ локтісны Ерусалимӧ.
Крамӧ пырӧм бӧрын Исус пондіс вӧтлавны сэтысь вузасьысь-ньӧбасьысьясӧс. Пӧрлӧдліс сьӧм вежысьяслысь пызанъяссӧ да гулюӧн вузасьысьяслысь пуклӧсъяссӧ, эз лэдз крам пырыс нуны нинӧмтор.
Сійӧ велӧдіс найӧс шуалӧмӧн: «Абу-ӧ гижӧма, мый “Менам керкаӧй быд кыла войтырлы кевмысян керка лоӧ”?
А ті сыысь вӧчинныд лёк вӧчысьяслы дзебсянін».
Аркирейяс Индӧдӧ велӧдысьяскӧд кывлісны тайӧс да кутісны мӧвпавны, кыдзи эськӧ вины Исусӧс. Найӧ полісны Сыысь, ӧд став йӧзыс шензисны Сылӧн велӧдӧмысь.
Рытнас Исус петіс карсьыс.
Асывводзнас инжир пу дінті мунігӧн аддзисны: сійӧ вужйӧдзыс косьмӧма.
Петырлы тӧд вылас уси Исуслӧн шуӧмыс. Сійӧ шуис Исуслы: «Велӧдысьӧй, видзӧдлы. Инжир пуыд, кодӧс Тэ ёрин, косьмӧма».
Исус шуис налы: «Эскӧй Енлы. Веськыда висьтала тіянлы: шуас кӧ кодкӧ тайӧ керӧсыслы: “Кыпӧдчы да шыбитчы саридзас”, лоӧ тадзи. Сӧмын мед став сьӧлӧмнас майшасьтӧг эскас, мый шуӧмыс инас.
Та вӧсна висьтала тіянлы: мый коранныд кевмысигад, эскӧй, мый сійӧ лоӧ тіянлы, и лоӧ тадзи.
Кевмысьны сувтіганыд прӧститӧй тіян водзын мыжмӧмаӧс, медым енэжвыв Батьныд прӧститас тіянлысь мыжъястӧ.
Онӧ кӧ прӧститӧй, сэки енэжвыв Батьныд тіянлысь мыжъястӧ оз прӧстит».
Найӧ бара локтісны Ерусалимӧ.
Кор Исус ветлӧдліс крамӧд, Сы дінӧ матыстчисны аркирейяс, Индӧдӧ велӧдысьяс да пӧрысьяс. Найӧ юалісны: «Кутшӧм вынӧн Тэ ставсӧ тайӧс вӧчан?
Коді Тэнӧ пуктіс тайӧс вӧчнысӧ?»
Исус воча шуис: «Ме тшӧтш тіянлысь ӧтитор юала. Вочавидзанныд кӧ, висьтала, кутшӧм вынӧн ставсӧ тайӧс вӧча.
Иоанлӧн пыртӧмыс вӧлі Енсянь али мортсянь?
Вочавидзӧй Меным».
Найӧ ас костаныс сёрнитісны: «Шуам кӧ: “Енсянь”, Сійӧ шуас: “Мыйла сылы энӧ эскӧй?
” Шуам-ӧ: “Мортсянь”?» Но найӧ полісны йӧзсьыс, ӧд Иоанӧс ставныс збыльысь пуктісны пророкӧ.
Найӧ вочавидзисны: «Огӧ тӧдӧй».
Сэки Исус шуис: «Сідзкӧ, Ме тшӧтш ог висьтав, кутшӧм вынӧн ставсӧ тайӧс вӧча».
12 юр.
Исус кутіс висьтавны налы велӧданвисьтъясӧн: «Морт пуктас аслас йӧрӧ виноград, гӧгӧрыс потшас, вотӧс ныранін кодъяс да джуджыд лэбув лэптас. Сэсся йӧрсӧ виноград быдтысьяслы кӧртымӧ сетас, ачыс мунас.
Вотӧс чукӧртан кадӧ овмӧс кутысь мӧдӧдас кесйӧгсӧ босьтны вотӧсысь ассьыс пайсӧ.
Виноград быдтысьяс кутасны кесйӧгсӧ, нӧйтасны да вӧтласны сійӧс куш киӧн.
Овмӧс кутысь мӧд кесйӧгӧс мӧдӧдас.
Сійӧс вачкаласны изйӧн юрас, лёкысь сераласны сы вылын да вӧтласны.
Мӧдӧдас коймӧдӧс, а сійӧс виасны.
Уна мукӧдӧс на мӧдӧдас, но ӧтиясӧс нӧйтасны, мӧдъясӧс виасны.
Овмӧс кутысьлӧн нӧшта вӧлі ӧти, аслас муса пиыс. Медбӧрти виноград быдтысьяс дінӧ мӧдӧдас писӧ, мӧвпыштас: “Менам пиысь, гашкӧ, яндысясны”.
Виноград быдтысьяс шуасны ӧта-мӧдныслы: “Тайӧ мортыслы вуджас овмӧсыс. Мунам да виам сійӧс, медым овмӧсыс миянлы коляс”.
Найӧ кутасны сійӧс да виасны, шойсӧ виноград йӧр сайӧ шыбитасны.
Мый вӧчас овмӧс кутысь?
Сійӧ локтас, виноград быдтысьясӧс виас, а йӧрсӧ мукӧдлы сетас.
Энӧ ӧмӧй Гижӧдсьыс лыддьылӧй тайӧс:
— Изйыс, кодӧс шыбитісны керка лэптысьяс, лоис пельӧс изйӧн.
Тайӧ Господьсянь да шензяна миян синъяслы».
Найӧ гӧгӧрвоисны, мый велӧданвисьтыс вӧлі на йылысь. Кӧсйисны кутны Исусӧс, но полісны йӧзсьыс. Сэки эновтісны Сійӧс да мунісны.
Сэсся найӧ мӧдӧдісны Исус дінӧ Ирӧдлысь йӧзсӧ да фарисейяс пиысь кодсюрӧӧс, медым кыйны Исусӧс сёрниас.
Найӧ локтісны да шуисны Сылы: «Велӧдысь, ми тӧдам, мый Тэ веськыда сёрнитан да он пов йӧзлӧн шуасьӧмысь. Тэ он видзӧд морт вылӧ, а веськыда велӧдан Енлӧн туйӧ.
Висьтав, колӧ-ӧ кесарлы вот мынтыны?»
Исус тӧдіс, мый найӧ кык бана шаньгаяс, да шуис налы: «Мыйла ті зілянныд кыйны Менӧ?
Петкӧдлӧй Меным динартӧ».
Найӧ вайисны.
Исус юаліс: «Кодлӧн тані чужӧмыс-нимыс?»
Найӧ вочавидзисны: «Кесарлӧн».
Исус шуис налы: «Кесарлысь сетӧй кесарлы, а Енлысь — Енлы».
Исус шемӧсмӧдіс найӧс.
Исус дінӧ локтісны саддукейяс, кодъяс шуӧны, ловзьӧмыс пӧ абу.
Найӧ юалісны Исуслысь: «Велӧдысь, Мӧисей гижӧма, мый “ныв-питӧм морт кӧ кулас, вокыслы колӧ босьтны сылысь гӧтырсӧ да нюжӧдны аслас вокыслысь рӧдсӧ”.
Сизим вок вӧлі.
Ыджыдыс гӧтрасис, сэсся куліс, ныв-пиыс эз коль.
Гӧтырсӧ мӧд вокыс босьтіс, сійӧ тшӧтш ныв-питӧг куліс.
Сэсся коймӧдыс босьтіс.
Тадзи сизимнанныс гӧтрасисны да кулісны ныв-питӧг.
Медбӧрын аньыс куліс.
Ловзьӧм бӧрас кодлы сійӧ гӧтырӧн лоас, ӧд сизим верӧс сылӧн вӧлі?»
Исус вочавидзис: «Ті ылалӧмныд Гижӧдъяссӧ да Енлысь вынсӧ тӧдтӧмныдла.
Ловзьӧмаяс оз гӧтрасьны да верӧс сайӧ оз мунны. Найӧ енэжвыв анделъяс кодьӧсь.
Ловзьӧм йылысь шуа — ті ӧмӧй энӧ лыддьылӧй Мӧисей небӧгысь сотчысь лежнӧг дорын вӧвлӧмтор йылысь? Ен шуис Мӧисейлы: “Ме Ӧвраамлӧн Ен, Исааклӧн Ен да Яковлӧн Ен”.
Енмыс абу кулӧмаяслӧн Ен, Сійӧ ловъяяслӧн Ен.
Ті ёна ылалӧмныд».
Индӧдӧ велӧдысьясысь ӧти казяліс вензьӧмсӧ да кыліс Исуслысь бура вочавидзӧмсӧ. Сійӧ матыстчис Исус дінӧ да юаліс: «Став тшӧктӧм пиысь кутшӧм медыджыдыс?»
Исус вочавидзис: «Медыджыд тшӧктӧмыс: Кывзы, Израиль.
Господь, миян Ен, Сійӧ ӧти Господь.
Радейт ассьыд Господь Ентӧ став сьӧлӧмнад, став олӧмнад, став мывкыднад да став выннад. Тайӧ медыджыд тшӧктӧм.
Сы кодь мӧд тшӧктӧмыс: радейт матыссатӧ асьтӧ моз.
Тайӧ тшӧктӧмъясысь ыджыдджыкыс абу».
Индӧдӧ велӧдысь шуис Исуслы: «Тадз, Велӧдысьӧй.
Тэ веськыда висьталін, эм ӧти Ен, мӧдыс абу.
Енмӧс колӧ радейтны став сьӧлӧмнад, став мывкыднад, став олӧмнад, став выннад да матыссатӧ радейтны асьтӧ моз. Тайӧ сотӧм пемӧсъясысь да став мукӧд вись дорысь коланаджык».
Исус аддзис, мый сійӧ сюся сёрнитӧ, да шуис: «Тэ абу ылын Енлӧн Юралӧмысь».
Та бӧрын некод нин эз лысьт юасьны Исуслысь.
Крамын велӧдігӧн Исус шуис: «Мыйла нӧ Индӧдӧ велӧдысьяс шуӧны, Кристос пӧ Давид пи?
Вежа Ловсянь сёрнитігас Давид ачыс шуӧ:
— Господь шуис менам Господьлы: “Пукав Менам веськыдладорын, кытчӧдз ог пукты Тэнад кок улӧ Тэныд паныд мунысьясӧс”.
Давид шуӧ Сійӧс Господьӧн.
Кыдзи нӧ Сійӧ сылы пиӧн лоӧ?»
Унаӧн окотапырысь кывзісны Исусӧс.
Велӧдігас Сійӧ висьтавліс: «Видзчысьӧй Индӧдӧ велӧдысьясысь. Найӧ радейтӧны кузь паськӧмӧн ветлыны, йӧзаинын чолӧмалӧмъяс кывзыны, синагогаын водзын пукавны да гажӧдчанінын бурджыклаӧ пуксьыны. Найӧ куштӧны дӧваяслысь керкасӧ да асьнысӧ петкӧдлӧм могысь дыр кевмысьӧны. Но найӧс лоӧ чорыда мыждӧма».
Исус пуксис сьӧм чукӧртан кудлы паныд да видзӧдіс, кыдзи йӧзыс пуктісны сэтчӧ сьӧм.
Озыръяс уна пуктісны.
Локтіс гӧль дӧва да пуктіс кык ыргӧн сьӧм, тайӧ лоӧ ӧти ур мында.
Исус корис велӧдчысьяссӧ да шуис налы: «Веськыда висьтала тіянлы: тайӧ гӧль дӧваыс быдӧнысь унджык пуктіс.
Ставныс унасьыс чуктӧдісны, а тайӧ дӧваыс этшасьыс сетіс ставсӧ, мый сылӧн вӧлі кынӧмпӧт вылас».
13 юр.
Кор Исус вӧлі петӧ крамсьыс, ӧти велӧдчысь шуис: «Велӧдысьӧй, видзӧдлы, кутшӧм изъясысь тэчӧма керкаяссӧ.»
Исус шуис: «Аддзан тайӧ ыджыд керкаяссӧ?
Татчӧ из вылӧ из оз коль, ставсӧ жугӧдасны».
Кор Исус вӧлі пукалӧ Олив керӧсын, крамлы паныд, Петыр, Яков, Иоан да Ӧндрей ас кежаныс юалісны Сылысь: «Висьтав, кор ставыс тайӧ лоас? Мый серти ми тӧдмалам сійӧ кадсӧ?»
Исус шуис: «Видзчысьӧй, мед эз ылӧдны тіянӧс.
Унаӧн Менам нимӧн локтасны да шуасны, ме пӧ Сійӧ, да унаӧс ылӧдасны.
Кор кыланныд тыш мунӧмъяс да тыш йылысь юӧръяс, энӧ полӧй.
Тайӧ ставыслы колӧ лонысӧ, сӧмын тайӧ абу на пом.
Войтыр войтырлы паныд сувтас, муяс ӧта-мӧдныслы паныд кыпӧдчасны.
Уналаын лоас му вӧрӧм, тшыгъялӧм да шызьӧм.
Но тайӧ ставыс чужтӧм водзвывса дойяс на.
Видзӧдӧй ас бӧрсяныд. Тіянӧс кыскасны ёрдӧ да нӧйтасны синагогаясын. Ме вӧсна нуӧдасны тіянӧс юралысьяс да ӧксыяс водзӧ, медым найӧ тӧдісны Ме йылысь.
Помыс вотӧдз Евангелльӧсӧ колӧ висьтавны быд кыла войтырлы.
Кор нуӧдасны тіянӧс ёрдӧ, водзвыв энӧ майшасьӧй, мый шуны. Висьталӧй сійӧ, мый лоӧ сетӧма тіянлы сійӧ кадас, ӧд Вежа Лов пондас сёрнитны, онӧ ті.
Вокыс воксӧ сетас вины, батьыс — писӧ.
Ныв-пи сувтасны бать-мамыслы паныд да виасны найӧс.
Менам ним вӧсна унаӧн мустӧмтасны тіянӧс, но сьӧкыдсӧ помӧдз нуысь мездмас».
«Кор ті аддзанныд пеж зывӧксӧ сэтысь, кӧні сылы оз позь лоны, — та йылысь Даниил пророк на висьтавліс; лыддьысьысь мед гӧгӧрвоӧ — сэки Юдея муын олысьяс мед пышъясны керӧсъясӧ.
Коді лоас керка вылас, мед оз пыр керкаас босьтны мыйкӧ. Коді лоас видз-му вылас, мед оз кос гортас паськӧмысла.
Сійӧ лунъясӧ ёна сьӧкыд лоӧ нӧбасьысьяслы да нёньӧдчысьяслы.
Кевмысьӧй, мед эз ковмы пышйынытӧ тӧлын.
Сійӧ лунъясӧ ыджыд шог суас йӧзсӧ, татшӧмыс Енмӧн муюгыдсӧ вӧчӧмсянь эз на вӧвлы да оз нин ло.
Господь кӧ тайӧ кадсӧ эз дженьдӧд, ловъя морт эськӧ эз коль.
Но Аслас бӧрйӧмаяс вӧсна Сійӧ дженьдӧдіс тайӧ кадсӧ.
Сэки шуасны кӧ тіянлы: “Кристос тані”, либӧ шуасны: “Кристос сэні”, энӧ эскӧй.
Ӧд ылӧгкристосъяс да ылӧгпророкъяс локтасны да пондасны вӧчны шензьӧданаторъяс, медым ылӧдны, позяс кӧ, весиг бӧрйӧмаясӧс.
Видзчысьӧй наысь.
Ме тіянлы ставсӧ водзвыв висьталі».
«Сійӧ лунъясӧ, тайӧ шог бӧрас, шондіыс пемдас, тӧлысьыс кусас, енэжысь кодзувъяс усясны, енэжвыв вынъяс вӧрзясны.
Сэки аддзасны кымӧръяс вылын ыджыд вынӧн да дзирдлунӧн локтысь Морт Пиӧс.
Сійӧ мӧдӧдас анделъяссӧ нёльнан му вежтасас да чукӧртас Ассьыс бӧрйӧмаяссӧ став му пельӧссьыс.
Инжир пу вылӧ кӧ видзӧдам, аддзам: вожъясыс кӧ ловзьӧны да коръясыс потӧны, сідзкӧ, гожӧмыс матын.
Тадзи, ставсӧ тайӧс аддзигӧн тӧдӧй: сійӧ кадыс матын, ӧдзӧс дорад нин.
Веськыда висьтала тіянлы: ставыс тайӧ лоас ӧнія олысьяс дырйи на.
Енэжыс да муыс бырас, а Менам кывъясӧй оз бырны.
Сійӧ лунсӧ да сійӧ кадсӧ некод оз тӧд. Анделъяс оз тӧдны, весиг Пиыс оз тӧд, сӧмын Батьыс тӧдӧ.
Видзчысьӧй, мед энӧ унмовсьӧй, да пыр кевмысьӧй, ӧд онӧ тӧдӧй, кор сійӧ кадыс воас.
Тайӧс позьӧ ӧткодявны морткӧд, коді гортсьыс мунігӧн кольӧ ассьыс керкасӧ кесйӧгъяслы да быдӧнлы сетӧ удж, а керкасӧ видзысьлы тшӧктӧ лоны дасьӧн.
Сідзкӧ, лоӧй дасьӧсь, ӧд онӧ тӧдӧй, рытын-ӧ, вой шӧрын-ӧ, петук чуксасигӧн-ӧ, асывводзын-ӧ локтас керка кутысь. Мед эз су тіянӧс узьӧмӧн тӧдлытӧг локтӧмнас.
Мый висьтала тіянлы, висьтала быдӧнлы: лоӧй дасьӧсь».
14 юр.
Ыджыд лунӧдз, Шомтӧм нянь сёян лунъясӧдз кык лун на вӧлі.
Аркирейяс да Индӧдӧ велӧдысьяс корсисны, кыдзи эськӧ ылӧдлӧмӧн босьтны Исусӧс да вины.
Но шуисны, Ыджыд лунӧ пӧ оз ков, ӧд йӧзыс вермасны шызьыны.
Исус вӧлі Вифания сиктын, Сійӧ сёйис проказаысь бурдӧм Симон ордын. Сэтчӧ локтіс ань, сійӧ вайис вальді дозйын зэв дона нард вый. Ань жугӧдіс дозсӧ да кисьталіс выйсӧ Исуслы юр вылас.
Кодсюрӧ дӧзмӧмпырысь шуасисны ас костаныс: «Мыйла, бара, лотӧ-а?
Тайӧ выйсӧ позис вузавны куимсё динарысь донаджыка да сьӧмсӧ сетны гӧльяслы».
Тадзи найӧ шуасисны аньыс вылӧ.
Исус шуис: «Ӧвсьӧй сыысь.
Мыйла ті сійӧс шӧйӧвоштанныд?
Сійӧ буртор вӧчис Меным.
Гӧльяс пыр лоасны тіянкӧд, и ті верманныд вӧчны налы бурсӧ, кор кӧсъянныд, а Ме тіянкӧд ог пыр ло.
Тайӧ аньыс вӧчис, мый вермис: дасьтіс Менӧ дзебигкежлӧ.
Веськыда висьтала тіянлы: муюгыд пасьтала, кӧні висьталасны тайӧ Евангелльӧсӧ, сэні казьтыштасны тайӧ аньсӧ да висьталасны, мый сійӧ вӧчис».
Искариот Иуда вӧлі дас кык велӧдчысьысь ӧти. Сійӧ муніс аркирейяс дінӧ вузавны налы Исусӧс.
Тайӧс кылӧм бӧрын найӧ нимкодьпырысь кӧсйысисны сетны сылы сьӧм.
Иуда пондіс корсьны лӧсялан кад, медым вузавны Исусӧс.
Шомтӧм нянь сёян лунъяс дырйи медводдза лунӧ, кодыр начкисны Ыджыд лунся ыжӧс, велӧдчысьяс юалісны Исуслысь: «Кӧні кӧсъян сёйны Ыджыд лунся ыжӧс?
Ми мунам да дасьтам».
Кык велӧдчысьӧс мӧдӧдіг Исус шуис налы: «Мунӧй карас.
Тіянлы паныдасяс гырничын ва нуысь морт, мунӧй сы бӧрся. Кытчӧ сійӧ пырас, висьталӧй сэні керка кутысьыслы: “Велӧдысь юасьӧ, кутшӧм вежӧсын Аслас велӧдчысьяскӧд вермас сёйны Ыджыд лунся ыжӧс”.
Сійӧ петкӧдлас тіянлы вылыс судтасьыс ыджыд вежӧс, кодӧс дасьтӧма да вольсавлӧма. Сэні и лӧсьӧдӧй».
Велӧдчысьяс мунісны, воисны карас да аддзисны: ставыс лои Исуслӧн висьталӧм серти. Найӧ дасьтісны Ыджыд лунся сёян.
Рытнас Исус локтіс дас кыкнан велӧдчысьыскӧд.
Сёйиганыс шуис налы: «Веськыда висьтала тіянлы: тіян пиысь ӧти, Мекӧд тшӧтш сёйысь, вузалас Менӧ».
Шогӧ усьӧмӧн быдӧн кутіс юасьны Сылысь: «Ог-ӧ ме?»
Исус вочавидзис: «Тіян пӧвстысь, дас кыксьыс ӧти, сійӧ Мекӧд ӧти тасьтіысь сёйӧ.
Морт Пи мунӧ, кыдзи гижӧма Сы йылысь.
Но курыд шог Сійӧс вузалысьлы.
Бурджык сылы вӧлі, эз кӧ чужлы».
Сёйиганыс Исус босьтіс нянь, Енмӧс аттьӧалӧмӧн чегис няньсӧ да велӧдчысьяслы сетігас шуис: «Босьтӧй, сёйӧй, тайӧ Менам Яй».
Сэсся босьтіс чаша, аттьӧаліс Енмӧс да сетіс велӧдчысьясыслы. Ставныс юисны сэтысь.
Исус шуис налы: «Тайӧ Менам Вир — Выль Йитӧдлӧн Вир — киссьӧ уна вӧсна.
Веськыда висьтала тіянлы: Енлӧн Юраланінын выльӧс ютӧдз ог понды юны виноград юансӧ».
Енлы сьылӧм бӧрын найӧ кайисны Олив керӧсӧ.
Исус шуис велӧдчысьясыслы: «Тавой ті ставныд эновтанныд Менӧ.
Гижӧма: “Видзысьсӧ кувмӧн дойда, да ыжъясыс разаласны”.
Ловзьӧм бӧрам Ме виччыся тіянӧс Галилеяын».
Петыр шуис: «Ставныс кӧ эновтасны Тэнӧ, ме ог».
Исус вочавидзис: «Веськыда висьтала тэныд: тавой петуклӧн кыкысь чукӧсттӧдз на тэ куимысь соссян Меысь».
Петыр ёнджыка на шуаліс: «Весиг кӧ кувны ковмас Тэкӧд, ог соссьы».
Тадзи шуалісны тшӧтш мукӧд велӧдчысьыс.
Исус велӧдчысьясыскӧд локтіс Гефсиманӧ.
Сійӧ шуис налы: «Пукалыштӧй тані Менам кевмысигкості».
Аскӧдыс босьтіс Петырӧс, Яковӧс да Иоанӧс. Исусӧс полӧм да шогалӧм босьтіс.
Сійӧ шуис: «Шогӧй кувмӧн топӧдӧ лолӧс. Кольччӧй татчӧ да энӧ узьӧй».
Ачыс водзлань муныштіс да муӧ уськӧдчӧмӧн пондіс кевмысьны, медым, позис кӧ, тайӧ кадыс ордйис Сійӧс.
Сійӧ шуаліс: «Авва, Батьӧй.
Тэныд ставыс вермана.
Вешты Ме дінысь тайӧ чашасӧ. Сӧмын мед лоас Тэнад кӧсйӧм серти, а оз Менам».
Исус бӧр локтіс да аддзис: велӧдчысьясыс унмовсьӧмаӧсь. Петырлы шуис: «Симон, узян-ӧ?
Ӧти час весиг эн вермы узьтӧг олыштны.
Энӧ узьӧй, кевмысьӧй, мед ыштӧдӧмыс эз вермы тіянӧс. Лолыд ӧд пыр дась, а вир-яйыд жеб».
Исус мӧдысь муніс да воддза мозыс кевмысис.
Локтӧм бӧрас бара аддзис: велӧдчысьяссӧ унмыс топыда личкӧма. Найӧ эз тӧдны, мый вочавидзны Сылы.
Коймӧдысь локтігас Исус шуис налы: «Пыр на узянныд да шойччанныд?
Тырмас. Кадыс воис. Морт Пиӧс мыжаяс киӧ сетӧны.
Чеччӧй, мунамӧй.
Менӧ вузалысь матын нин».
Исуслӧн сёрнитігкості локтіс Иуда, дас кык велӧдчысьысь ӧти.
Сыкӧд тшӧтш локтісны зоръясӧн да шыпуртъясӧн уна йӧз. Найӧс мӧдӧдӧмаӧсь аркирейяс, Индӧдӧ велӧдысьяс да пӧрысьяс.
Исусӧс вузалысь шуӧма локтӧмаяслы, кодӧс пӧ окышта, Сійӧс босьтӧй да нуӧдӧй, син увсьыныд энӧ лэдзӧй.
Иуда веськыда муніс Исус дінӧ да шуис: «Велӧдысьӧй», сэсся окыштіс Сійӧс.
Сэки кытшалісны да босьтісны Исусӧс.
Сэні сулалысьясысь ӧти перйис шыпуртсӧ да керыштіс аркирей кесйӧглысь пельсӧ.
Исус шуис: «Лёк вӧчысьӧс моз зорйӧн-шыпуртӧн локтінныд босьтны Менӧ.
Ме быд лун тіян крамын велӧді, да ті энӧ босьтӧй Менӧ.
Тадзи инӧны Гижӧдъяс».
Сэки велӧдчысьяс ставныс эновтісны Исусӧс да пышйисны.
Ӧти зон вӧтчис Исус бӧрся, но сійӧс кутісны. Зонка нетшыштчис да пасьтӧгыс пышйис. Куш яй вылас плавгӧм дӧраыс колис шыпуртаяслӧн киӧ.
Исусӧс вайӧдісны аркирей ордӧ.
Сэтчӧ чукӧртчисны пӧрысьяс, Индӧдӧ велӧдысьяс да став аркирейыс.
Петыр бӧрӧ кольччӧмӧн вӧтчис Исус бӧрся аркирей керка дорӧдз. Пырис йӧрас да пуксис кесйӧгъяскӧд орччӧн би дорӧ шонтысьны.
Аркирейяс да став веськӧдлан котырыс корсисны Исуслы паныд висьталысьясӧс, медым сэсся мыждыны да вины Сійӧс. Но колана висьталысьыс эз сюр.
Унаӧн пӧръясьӧмӧн висьталісны Исус йылысь, но налӧн висьталӧмыс торъяліс ӧта-мӧдсьыс.
Кодсюрӧ висьталісны: «Ми кывлім: Сійӧ шуліс, жугӧда пӧ киӧн вӧчӧм тайӧ крамсӧ, сэсся пӧ куим лунӧн лэпта мӧдӧс, киӧн вӧчтӧмӧс».
Но весиг налӧн висьталӧмыс торъяліс ӧта-мӧдсьыс.
Сэки аркирей сувтіс шӧрас да юаліс Исуслысь: «Мый воча шуан?»
Исус чӧв оліс, нинӧм эз вочавидз.
Аркирей юаліс Сылысь: «Тэ-ӧ Кристос, Ошканаыслӧн Пиыс?»
Исус вочавидзис: «Ме.
И ті аддзанныд Морт Пиӧс, Ставсӧвермысьлӧн веськыдладорас пукалысьӧс да кымӧръяс вылын локтысьӧс».
Ассьыс паськӧмсӧ косяліг аркирей шуис: «Висьталысьяс миянлы оз нин ковны, ті асьныд кывлінныд, Сійӧ Енмӧс омӧльтӧ. Мый шуанныд?»
Ставныс мыжалісны Исусӧс да ӧти вомӧн шуисны вины Сійӧс.
Кодсюрӧ пондісны сьӧлавны Сылы, Сылысь чужӧмсӧ вевттьӧмӧн нӧйтісны да шуалісны: «Висьтав, Пророк, коді кучкис?»
Видзысьяс тшӧтш кучкалісны Сылы чужӧмас.
Петыр вӧлі керка йӧрас. Аркирейлӧн кесйӧгъяс пиысь ӧти ань локтіс сэтчӧ. Сійӧ аддзис би дорын шонтысьысь Петырӧс да сы вылӧ видзӧдлӧмӧн шуис: «Тэ тшӧтш Назаретса Исускӧд вӧлін».
Петыр соссис: «Ог тӧд Сійӧс. Ог гӧгӧрво, мый висьталан»,
сэсся петіс водз йӧрас.
Кыліс петуклӧн чукӧстӧм.
Аньыс бара казяліс Петырӧс да пондіс висьтавлыны сэні сулалысьяслы, тайӧ мортыс пӧ на пиысь.
Петыр бара соссис.
Бӧрынджык сэні сулалысьяс шуисны Петырлы: «Тэ дзик на пиысь.
Тэ Галилеяысь, сёрниыд на кодь».
Петыр енмасьӧмӧн пондіс соссьыны: «Ог тӧд тайӧ Мортсӧ, код йылысь висьталанныд».
Кыліс петуклӧн мӧдысь чукӧстӧм.
Сэки Петырлы уси тӧд вылас Исуслӧн шуӧмыс: «Петуклӧн кыкысь чукӧсттӧдз на тэ куимысь соссян Меысь». Петыр ырзӧмӧн бӧрддзис.
15 юр.
Асывводзнас аркирейяс, пӧрысьяс, Индӧдӧ велӧдысьяс да став веськӧдлан котырыс чукӧртчисны ӧтлаӧ. Сёрнитчӧм бӧрын Исусӧс кӧрталӧмӧн нуӧдісны Пилат дінӧ да сетісны сылы.
Пилат юаліс Исуслысь: «Тэ-ӧ юдейяслӧн Ӧксыыс?»
Исус вочавидзис: «Тэ шуан».
Аркирейяс унаторйысь мыжалісны Исусӧс.
Пилат бара юаліс Сылысь: «Он тай нӧ нинӧм шу?
Кылан, кутшӧма Тэнӧ мыжалӧны».
Исус весиг воча кыв эз шу. Пилатӧс тайӧ шензьӧдіс.
Быд во Ыджыд лунӧ йӧз корӧм серти Пилат лэдзліс дзескыдінысь ӧти мортӧс.
Сэки дзескыдінын пукалісны зык лэптысьяс. На лыдын тшӧтш вӧлі Варавва. Зык дырйиыс найӧ мортӧс виӧмаӧсь.
Чукӧртчӧм йӧз пондісны горзӧмӧн корны Пилатӧс вӧчны налы сійӧ, мый пыр вӧчлывліс.
Пилат юаліс: «Кӧсъянныд-ӧ, медым ме лэдзи тіянлы юдейяслысь Ӧксысӧ?»
Пилат тӧдіс, мый аркирейяс вайӧдісны Исусӧс вежалӧмныс понда.
Аркирейяс ыззьӧдісны йӧзсӧ, мед Исус пыдди корасны лэдзны Варавваӧс.
Пилат юаліс: «Мый шуанныд вӧчны Сыкӧд, кодӧс юдейяслӧн Ӧксыӧн нимтанныд?»
Найӧ горӧдісны: «Тувъяв Сійӧс.»
«Мый лёксӧ Сійӧ вӧчис?» — юаліс Пилат.
Йӧзыс гораджыка на горӧдісны: «Тувъяв Сійӧс.»
Йӧзлы шогмӧм могысь Пилат лэдзис Варавваӧс, а Исусӧс нӧйтӧм бӧрын сетіс тувъявны.
Шыпуртаяс нуӧдісны Исусӧс римса юралысьлӧн керка йӧрӧ, сэтчӧ чукӧртісны и мукӧд шыпуртаясӧс. Найӧ пасьтӧдісны Исусӧс пемыдгӧрд кышанӧ, юрас пуктісны лежнӧгысь кыӧм юркытш, сэсся пондісны нимӧдны Сійӧс: «Мед олас юдейяслӧн Ӧксы.»
Кучкалісны юрас беддьӧн, сьӧлалісны Сійӧс да пидзӧсчанясьӧмӧн копрасисны Сы водзын.
Сералӧм-лёкӧдӧм бӧраныс найӧ босьтісны Исус вылысь пемыдгӧрд кышансӧ да бӧр пасьтӧдісны Сійӧс Аслас паськӧмӧ, сэсся нуӧдісны тувъявны.
Исуслысь крестсӧ тшӧктісны нуны видз-му вылысь локтысь киринеяса Симонлы, Ӧльӧксанлӧн да Руфослӧн батьлы.
Исусӧс вайӧдісны Голгопа керӧсӧ, нимыслӧн вежӧртасыс лоӧ “Юр лы”.
Сэні Сылы сетісны смирна сора вина, но Сійӧ эз ю.
Исусӧс тувъялӧм бӧрын шыпуртаяс пудъясьӧмӧн юкисны Сылысь паськӧмсӧ.
Исусӧс тувъялісны ӧкмыс час асылӧ.
Юр весьтас ӧшӧдісны мыжалан пасйӧд: «Юдейяслӧн Ӧксы».
Сыкӧд орччӧн тувъялісны кык лёк вӧчысьӧс: ӧтисӧ веськыдладорас, мӧдсӧ шуйгаладорас.
Тадзи иніс Гижӧдыс: «Сійӧс пуктісны Индӧдтӧг олысьяс лыдӧ».
Сэті мунысьяс лёкысь видзӧдӧмӧн омӧльтісны Исусӧс: «Крам жугӧдысь да куим лунӧн сійӧс лэптысь, мезды Асьтӧ, лэччы крест вывсьыд».
Сійӧс лёкӧдісны тшӧтш аркирейяс да Индӧдӧ велӧдысьяс: «Мукӧдӧс мездіс, а Асьсӧ мездыны оз вермы.
Кристос, Израиль Ӧксы, мед лэччас крест вывсьыс. Аддзылам кӧ тайӧс, сэки эскам».
Исусӧс лёкӧдісны тшӧтш орччӧн тувъялӧмаяс.
Лун шӧр кадӧ пемдіс став му пасьталаыс, пемыдыс сулаліс куим часӧдз.
Куим час гӧгӧрын Исус ыджыд шыӧн горӧдіс: «Эли, Эли, ламма сабактани? Енмӧй, Енмӧй, мыйла Тэ колин Менӧ?»
Сэні сулалысьясысь кодсюрӧ шуисны, Илляӧс пӧ корӧ.
Ӧти морт котӧртіс, кӧтӧдіс шома винаӧн губка, сэсся бедь помӧ сатшкӧмӧн мыччис сійӧс Исуслы да шуис: «Энлӧй. Видзӧдлам, локтас оз Илля лэдзны Сійӧс».
Исус горӧдіс ыджыд шыӧн, сэсся лолыс петіс.
Сэки крамын ӧшалысь дӧраыс вывсяньыс улӧдзыс кык пельӧ косяссис.
Шыпуртаяслӧн веськӧдлысь сулаліс Исуслы воча. Кор сійӧ аддзис, кыдзи Исуслӧн горӧдӧм бӧрын лолыс петіс, шуис: «Тайӧ Мортыс збыльысь Ен Пи вӧлӧма».
Сэні вӧліны аньяс, кодъяс ылісянь видзӧдісны.
На пӧвстын вӧліны Магдала Марья, томджык Яковлӧн да Иосейлӧн Марья мамныс да Саломия. Галилеяын найӧ ветлывлісны Исускӧд да кесъявлісны Сылы. Нӧшта сэні вӧлі уна мукӧд ань, кодъяс локтісны Исускӧд Ерусалимӧ.
Вӧлі рыт, шойччан лунлы паныд. Аримафея карысь воис Ӧсип, веськӧдлан котырысь пыдди пуктана морт. Сійӧ виччысис Ен Юралӧмлысь воӧмсӧ. Сійӧ повтӧг муніс Пилат дінӧ да корис Исуслысь шойсӧ.
Пилат чуймис, мый Исус кулӧма нин. Сійӧ корис шыпуртаяслысь веськӧдлысьӧс да тӧдмаліс, важӧн-ӧ куліс.
Кор Пилат тӧдмаліс Исуслӧн кулӧм йылысь, лэдзис Ӧсиплы босьтны шойсӧ.
Ӧсип ньӧбис шабді дӧра, босьтіс крест вылысь шойсӧ, гартыштіс дӧраӧ да пуктіс кыртаӧ кералӧм дзебанінӧ. Пыранінас путкыльтіс из.
Магдала Марья да Иосейлӧн Марья мамыс видзӧдісны, кытчӧ дзебасны Исусӧс.
16 юр.
Шойччан лун бӧрын Магдала Марья, Яковлӧн Марья мамыс да Саломия ньӧбисны чӧскыд дука выйяс, медым мавтны Исусӧс.
Шойччан лун бӧрын водз асывнас, шонді петігӧн, найӧ мунісны дзебанінӧ, ас костаныс сёрнитісны: «Коді путкыльтас изсӧ пыранінсьыс?»
Воиганыс найӧ аддзисны: изсӧ вӧлі вештӧма. Изйыс вӧлі зэв ыджыд.
Дзебанінӧ пыриганыс найӧ аддзисны веськыдладорсьыс еджыд паськӧма пукалысь зонмӧс да ёна повзисны.
Сійӧ шуис налы: «Энӧ полӧй.
Ме тӧда, ті корсянныд тувъявлӧм Назаретса Исусӧс.
Сійӧ ловзис.
Сійӧ тані абу.
Видзӧдлӧй куйланінсӧ, татчӧ Сійӧс пуктылісны.
Мунӧй, юӧртӧй велӧдчысьясыслы, тшӧтш Петырлы: Исус виччысьӧ найӧс Галилеяын.
Сэтысь аддзасны Сійӧс, тадзи Сійӧ Ачыс висьтавліс налы».
Аньяс петісны да шӧйӧвошӧмӧн котӧртісны дзебанінысь.
Найӧс тіралӧм босьтіс. Найӧ нинӧм эз висьтавлыны, полісны да.
Шойччан лун бӧрын водз асывнас ловзьӧм Исус медводз петкӧдчис Магдала Марьялы, код пытшкысь Сійӧ вӧтліс коркӧ сизим пеж лолӧс.
Марья муніс да юӧртіс лоӧм йывсьыс Исускӧд ветлысьяслы, кодъяс ӧні шогсисны да бӧрдісны. Кор кылісны, мый Исус ловъя да Марья аддзылӧма Сійӧс, найӧ эз эскыны.
Та бӧрти Исус петкӧдчыліс мӧд мыгӧрӧн на пиысь кыклы, кодъяс вӧлі мунӧны орчча сиктӧ.
Найӧ бӧр косісны да юӧртісны мукӧдыслы, но весиг налы эз эскыны.
Медбӧрын Исус петкӧдчис дас ӧти велӧдчысьыслы, кор найӧ вӧлі сёйӧны. Сійӧ янӧдіс найӧс эскытӧмсьыс да сьӧлӧмнысӧ чорзьӧдӧмысь, ӧд найӧ эз эскыны налы, кодъяс аддзылісны Сійӧс ловзьӧм бӧрас.
Сэсся шуис налы: «Мунӧй став муюгыд пасьтала да висьталӧй Евангелльӧсӧ ставныслы.
Коді эскас да пыртчас, сійӧ мездмас.
Коді оз эскы, сійӧс лоӧ мыждӧма.
Эскысьяслӧн лоасны татшӧм индысьпасъяс: Менам нимӧн пондасны вӧтлавны пеж ловъясӧс да сёрнитны выль кывъяс вылын.
Босьтасны кӧ кианыс змейӧс да юасны кӧ мыйкӧ кулантор, таысь налы лёкыс оз ло.
Найӧ пуктасны кинысӧ висьысьяс вылӧ, да найӧ бурдасны».
Тайӧс висьталӧм бӧрын Господь кыпӧдчис енэжӧ да пуксис Ен веськыдладорӧ.
А велӧдчысьясыс мунісны да быдлаын висьтавлісны Бур Юӧр. Господь отсаліс налы да вынсьӧдіс Юӧрсӧ индысьпасъясӧн.
Аминь.
Лука серти бур юӧр
1 юр.
Дона Феофил. Унаӧн нин босьтчылісны гижны миянын вӧвлӧмторъяс йылысь. Тайӧ лоӧмторъяс йылысь миянлы юӧртісны найӧ, кодъяс ставсӧ тайӧс аддзылісны да лоисны сэсся Ен Кывлы кесъялысьясӧн. Водзысяньыс ставсӧ лючки-бура туялӧм бӧрын тшӧтш ме шуи гижны тэныд став йывсьыс сьӧрсьӧн-бӧрсьӧн. Тэныд вӧлі висьталӧма тайӧ вӧвлӧмторъяс йывсьыс, но ме кӧсъя подулалӧмӧн петкӧдлыны тэныд Бур Юӧрлысь збыльсӧ.
Ирӧд ӧксыалан лунъясӧ Юдея муын оліс Закар нима поп, сійӧ вӧлі Авей поп котырысь. Закарлӧн Елизавета гӧтырыс вӧлі Аарон чужанвужйысь.
Найӧ кыкнанныс олісны Ен водзын веськыда, ставсӧ вӧчисны Господьлӧн тшӧктӧм серти.
Челядьыс налӧн эз вӧв, ӧд Елизавета эз вермы вайны кагасӧ, и кыкнанныс вӧліны ыджыд арлыдаӧсь нин.
Воис кад Закар котырлы кесъявны Ен водзын. Попъяслӧн лӧсьӧдӧм серти пудъясисны, и Закар пырис Господьлӧн крамӧ тшынӧдны. Закарлӧн тшынӧдігкості став йӧзыс кевмысисны ортсыас. Сэки петкӧдчис Закарлы Господьлӧн андел. Сійӧ сулаліс тшынӧдчан пызан веськыдладорын.
Анделӧс аддзӧмысь Закар шӧйӧвошис, сійӧс полӧм босьтіс.
Андел шуис: «Эн пов, Закар. Енмыс кылӧма тэнсьыд кевмӧмтӧ.
Елизавета гӧтырыд чужтас тэныд пи. Пукты сылы Иоан ним. Долыд гажӧн тырас тэнад сьӧлӧмыд, да уна йӧзлы нимкодьлун ваяс сылӧн чужӧмыс. Господь водзын сійӧ лоас ыджыд мортӧн, вина-сур оз кут юны, мам кынӧмас на сійӧ тырас Вежа Лолӧн. Израиль войтырысь сійӧ унаӧс бергӧдас налӧн Господь Енлань. Сійӧ мунас Господь водзын Илля лов-вынӧн, бергӧдас батьяслысь сьӧлӧмсӧ ныв-пиланьыс, кывзысьтӧмъясӧс — веськыда олысьлӧн мывкыдлунӧ, медым дасьтыны войтырсӧ Господьлы».
Закар юаліс анделлысь: «Кыдзи ме тӧдмала тайӧс?
Ачым пӧрысь, дай гӧтырӧй абу нин том».
Андел вочавидзис: «Ме, Гавриил, сулала Ен водзын. Менӧ мӧдӧдӧма сёрнитны тэкӧд, висьтавны тайӧ Бур Юӧрсӧ тэныд. Но меным эскытӧмыдла тэ воштан кыв-вортӧ, он вермы сёрнитнытӧ менам кывъяслӧн ас кадӧ интӧдз».
Сэккості йӧзыс виччысисны Закарӧс да шензисны крамын сылӧн дыр олӧмысь.
Сэтысь петӧм бӧрын Закар эз вермы сёрнитнысӧ. Йӧзыс гӧгӧрвоисны, мый сійӧ аддзылӧма Енсянь петкӧдчылӧм. Закар сёрнитіс йӧзыскӧд пасъясӧн.
Кесъялан лунъяс бӧрын Закар локтіс гортас.
Елизавета гӧтырыс регыд пондіс нӧбасьны. Вит тӧлысь чӧж сійӧ эз петкӧдчыв йӧз син водзӧ, оліс татшӧм мӧвпъясӧн: «Господь вӧчис тайӧс. Сійӧ видзӧдліс мелань да вештіс менсьым йӧз водзын яналӧмӧс».
Квайтӧд тӧлысьнас Ен мӧдӧдіс Гавриил анделӧс Галилеяса Назарет карӧ Мария нима ныв дінӧ. Мария вӧлі кикутӧма Давид чужанвужйысь Ӧсип нима морткӧд.
Мария дінӧ пырӧм бӧрын андел шуис: «Нимкодясь, бурсиӧм аньӧй. Господь тэкӧд.»
Мария чуймис анделӧс аддзӧмысь да сылӧн кывъясысь. Сійӧ мӧвпаліс, мый водзын нӧ сылы татшӧм чолӧмалӧмыс.
Андел шуис сылы: «Эн пов, Мария, тэныд вичмис Енсянь буралӧмыс.
Тэ сьӧктан, чужтан пи да пуктан Сылы Исус ним.
Ыджыд морт Сыысь петас, Сійӧс шуасны Медвылыссалӧн Пиӧн. Господь Ен сетас Сылы Давид батьыслысь юралан пуклӧссӧ. Сійӧ кутас ыджыдавны Яков котырын нэмъяс чӧж, да Сылӧн Юралӧмлы оз ло помыс».
Мария юаліс анделлысь: «Вермас ӧмӧй тадзисӧ лоны, ме ӧд ныв на?»
Андел вочавидзис: «Вежа Лов лэччас тэ вылӧ, Медвылыссалӧн выныс вевттяс тэнӧ.
Та вӧсна тайӧ чужысьыс вежа, Сійӧс шуасны Ен Пиӧн.
Тэнад рӧдвужыд, ныв-питӧм Елизавета, пӧрысьӧ-нэмӧ квайтӧд тӧлысь нин пиӧн нӧбасьӧ.
Енлы нинӧм вермытӧмыс абу».
Сэки Мария шуис: «Ме Господьлӧн кесйӧг, мед лоас тэнад висьталӧм серти».
Сэсся андел муніс.
Кымынкӧ лун мысти Мария тэрмасьӧмӧн мӧдӧдчис керӧсвыв муӧ, Иуда карӧ. Закар керкаӧ пыригӧн сійӧ чолӧмаліс Елизаветаӧс.
Мариялӧн чолӧмалӧмысь Елизаветалӧн кынӧмас кагаыс чеччыштіс.
Елизавета тырис Вежа Лолӧн и гораа шыасис: «Бурсиӧма тэнӧ аньяс пиысь, бурсиӧма сьӧлӧмув кагатӧ.
Коді нӧ ме, мый Господьӧйлӧн мамыс локтӧ ме ордӧ?
Мыйӧн сӧмын кылі чолӧмасьӧмтӧ, кагаӧй долыда чеччыштіс кынӧмын.
Тэ шуда, эскин да, ӧд Господьлӧн тэныд шуӧмыс инас».
Мария шуис: — Ошкӧ сьӧлӧмӧй Господьӧс, нимкодясьӧ лолӧй Ен вӧсна, Мездысьӧй вӧсна, ӧд Сійӧ видзӧдліс Аслас коньӧр кесйӧглань. Ӧнісянь став чужысьыс шуас менӧ шудаӧн, ӧд татшӧм ыджыдтор вӧчис меным Вына Енмыс. Вежа Сылӧн нимыс. Нэмсянь нэмӧдз Сійӧ буралӧ Сыысь полысьяс дінӧ. Сылӧн киыс вӧчис ыджыдсьыс-ыджыд уджъяс: разӧдіс вылӧ кыпӧдчысь сьӧлӧмаясӧс, юралан пуклӧсъясысь юралысьясӧс чӧвтіс, улӧ пуктӧмаясӧс кыпӧдіс, тшыгъялысьясӧс пӧттӧдзныс вердіс, озыръясӧс куш киӧн мӧдӧдіс. Сибӧдіс Израильӧс, Ассьыс кесъялысьсӧ, да казьтыштіс миян батьяслы, Ӧвраамлы да сысянь чужысьяслы нэмъяс кежлӧ кӧсйысьӧм буралӧмсӧ.
Мария оліс Елизавета ордын тӧлысь куим, сэсся бӧр муніс гортас.
Елизаветалы воис кад чужтыны, да сійӧ чужтіс пи.
Матігӧгӧр олысьяс да рӧдвужыс тӧдмалісны Господьлысь буралӧмсӧ Елизавета дінӧ да тшӧтш нимкодясисны сыкӧд.
Кӧкъямысӧд луннас локтісны вундыштны кагасӧ да кӧсйисны сетны сылы Закар батьыслысь нимсӧ.
Мамыс шуис: «Энӧй. Пуктам сылы Иоан ним».
Сылы шуисны: «Тэнад рӧдвужын татшӧм нимаыс некод абу».
Сэсся пасъяс отсӧгӧн юалісны батьыслысь, кутшӧм ним сійӧ кӧсйӧ сетны кагаыслы.
Закар корис пӧвтор да сэтчӧ гижис: «Иоан лоӧ нимыс».
Ставныс чуймисны.
Сэки воссис Закарлӧн кыв-ворыс, да сійӧ кутіс ошкыны Енмӧс.
На гӧгӧр олысьясӧс полӧм босьтіс. Став тайӧ лоӧмтор йывсьыс сёрниыс паськаліс керӧсвыв Юдея му пасьтала.
Тайӧс кывлысьяс чуймӧмӧн юасисны: «Кодӧн лоӧ тайӧ кагаыс?»
Господьлӧн киыс збыльысь вӧлі сы вылын.
Кагалӧн Закар батьыс тырис Вежа Лолӧн да пондіс пророкавны:
— Ошка Господьӧс, Израильлысь Енмӧс. Сійӧ бергӧдчис Аслас войтырлань, дасьтіс сылы мездмӧм. Давид кесъялысьлӧн чужанвужйысь Сійӧ сетіс миянлы Вына Мездысьӧс. Тадзи важысянь Сійӧ кӧсйысьліс Аслас вежа пророкъяс пыр. Сійӧ кӧсйысис мездыны миянӧс паныд мунысьясысь, дорйыны мустӧмтысьяслӧн киысь, лоны бур сьӧлӧмаӧн миян батьяс дінӧ да кутны тӧд вылас Ассьыс вежа йитӧдсӧ, Ӧвраам батьнымлы Ассьыс сетӧм кывсӧ. Паныд мунысьяс киысь мездмӧм бӧрын ми вермам повтӧг кесъявны Сылы вежалунӧн да веськыда став олӧм чӧжным.
Тэнӧ, кагаӧй, пуктасны Медвылыссалӧн пророкӧ. Тэ мунан Господь водзын дасьтыны туйяс Сылы, юӧртны Сылӧн войтырлы мездмӧм йылысь да налысь мыжъяссӧ прӧститӧм йылысь. Миян бур сьӧлӧма Ен ыстас миянлы енэжсянь асъя кыа, сетас югыдсӧ пемыдын да кулан вуджӧр улын олысьяслы, Сійӧ веськӧдас кокнымӧс лӧньлуна туй вылӧ.
Кага быдмис да ловнас вынсяліс. Израильлы аслас петкӧдчан лунӧдз сійӧ оліс овтӧминъясын.
2 юр.
Сійӧ лунъясӧ Римын ыджыдалысь Август кесар тшӧктіс гижавны ас мусьыс став йӧзсӧ.
Тайӧ медводдза гижалӧмыс вӧлі Сирияын Квириний ыджыдалан кадӧ.
Быдӧн муніс гижасьны аслас чужан карӧ.
Ӧсип вӧлі Давид чужанвужйысь. Та вӧсна аслас Мария гӧтырпукӧд, коді вӧлі нӧбасьӧ, сійӧ муніс гижасьнысӧ Галилеяса Назарет карысь Юдея муӧ, Виплием нима Давид карӧ.
Виплиемӧ воӧм мысти Мариялы воис кад чужтыны. Сійӧ чужтіс Пи, ассьыс медводдза кагасӧ. Рузумӧ гартыштӧмӧн Мария пуктіс кагасӧ лясниӧ, ӧд туйморт керкаын налы узяніныс эз сюр.
Сэні матігӧгӧрас вӧліны ыж видзысьяс. Войнас найӧ видзисны ыжъяснысӧ видз вылын.
Виччысьтӧг на водзӧ сувтіс Господьлӧн андел. Господьлӧн дзирдлуныс югзьӧдіс ыж видзысьясӧс, да найӧ ёна повзисны.
Андел шуис налы: «Энӧ полӧй.
Ме висьтала тіянлы нимкодьсьыс-нимкодь юӧр, тайӧ ваяс ыджыд долыдлун став войтырлы. Талун Давид карын тіянлы чужис Мездысь — Господь Кристос. Лясниысь ті аддзанныд рузумӧ гартыштӧм кагаӧс — тайӧ лоӧ тіянлы пасӧн».
Виччысьтӧг анделкӧд орччӧн тыдовтчис лыдтӧм-тшӧттӧм андел чукӧр. Найӧ ошкисны Енмӧс:
— Ошкӧм Медвылысса Енлы. Му вылын лӧнь олӧм, йӧз костын бур кӧсйӧм.
Анделъяслӧн енэжӧ кайӧм бӧрын ыж видзысьяс шуисны ӧта-мӧдныслы: «Мунамӧй Виплиемӧ, видзӧдлам Господьсянь миянлы юӧртӧм лоӧмторсӧ».
Найӧ тэрмасьӧмӧн мунісны сэтчӧ да аддзисны сэтысь Марияӧс, Ӧсипӧс да лясниын куйлысь кагаӧс.
Сэсся висьталісны кага йылысь кывлӧмторсӧ.
Кывзысьясӧс шензьӧдіс ыж видзысьяслӧн висьталӧмыс.
Мария видзис тайӧ висьталӧмсӧ сьӧлӧмас да мӧвпаліс та йылысь.
Ыж видзысьяс бӧр мунісны Енмӧс ошкӧмӧн да аттьӧалӧмӧн ставсьыс, мый кывлісны да аддзылісны. Ставыс лои анделлӧн висьталӧм серти.
Кӧкъямыс лун мысти воис кад вундыштны кагаӧс. Сылы сетісны Исус ним, ӧд Мариялӧн нӧбасьтӧдз на тадзи нимтіс Сійӧс андел.
Мӧисей Индӧд серти сӧстӧммӧдчан лунӧ Исусӧс вайисны Ерусалимӧ Господь водзӧ. Ӧд Господьлӧн Индӧд серти медводдза чужысьӧс, пи кагаӧс, колӧ вӧлі сины Господьлы. Господьлӧн Индӧд серти нӧшта колӧ вӧлі вайны вись: кык гулюӧс, абу кӧ, кык гулюпиӧс.
Сэки Ерусалимын вӧлі Симеон нима вежавидзысь морт.
Сійӧ оліс веськыда да виччысис Израильӧс мездӧм.
Вежа Лов вӧлі сы вылын.
Вежа Лов водзвыв висьтавліс сылы, Господьлысь Кристосӧс аддзывтӧдз пӧ он кув.
Вежа Лов нуӧдӧмӧн Симеон локтіс крамӧ.
Кор Исуслӧн бать-мамыс пыртісны сэтчӧ кагасӧ, медым ставсӧ вӧчны Индӧд серти, Симеон босьтіс Сійӧс киас да Енмӧс ошкигтырйи шуис:
— Ыджыдӧй, Аслад шуӧмыд серти ӧні лэдзан Ассьыд кесйӧгтӧ лӧня мунны. Аслам синмӧн аддзылі став йӧзлы Тэнсьыд дасьтӧм мездӧмтӧ: ентӧдтӧмъяслы вайӧм югыдтӧ, Тэнад Израиль войтырлы восьтӧм дзирдлунтӧ.
Кага йылысь висьталӧмыс шензьӧдіс Сылысь мамсӧ да Ӧсипӧс.
Симеон бурсиис найӧс да шуис Мариялы, Исус мамлы: «Тайӧ кагаыс понда Израильын унаӧн усясны да унаӧн сувтасны. Сійӧ — Енсянь индысьпас. Унаӧн кутасны мунны Сылы паныд, и тадзи воссясны налӧн гуся мӧвпъясыс. Тэнсьыд сьӧлӧмтӧ шогыс шыпуртӧн моз бытшкас».
Сэні вӧлі Анна нима пророк, Фануил ныв, Асир чужанкотырысь. Тайӧ пӧрысь аньыс ныв кадсяньыс сизим во олӧма верӧсыскӧд, сэсся кӧкъямысдас нёль арӧсӧдз олӧма дӧваӧн. Сійӧ эз петавлы крамысь, видзалӧмӧн-кевмысьӧмӧн кесъяліс Енлы лун и вой.
Буретш тайӧ кадӧ Анна матыстчис, пондіс ошкыны Енмӧс да висьтавлыны кага йылысь ставныслы, Ерусалимын мездмӧмсӧ виччысьысьяслы.
Господьлӧн Индӧд серти ставсӧ вӧчӧм бӧрын Ӧсип да Мария бӧр мунісны Галилеяӧ, асланыс Назарет карӧ.
Кага быдмис, ловнас вынсяліс, Сылӧн мывкыдлуныс содіс. Енлӧн бурсиӧмыс вӧлі Сы вылын.
Быд во Ыджыд лун кежлӧ Исуслӧн бать-мамыс ветлісны Ерусалимӧ.
Исуслы дас кык арӧс тырӧм бӧрын найӧ мукӧд воясӧ моз бара мунісны сэтчӧ.
Ыджыд лун бӧрын Ӧсип да Исуслӧн мамыс бӧр мӧдӧдчисны гортаныс. Зонка кольччис Ерусалимӧ. Та йылысь найӧ эз тӧдны, чайтісны, мый Сійӧ мунӧ мукӧдыскӧд.
Лунтыр мунӧм бӧрын пондісны корсьны Исусӧс рӧдвуж да тӧдсаяс пӧвстысь, но эз аддзыны. Сэки бӧр косісны Ерусалимӧ корсьны Сійӧс.
Куим лун мысти найӧ аддзисны Исусӧс крамысь. Сійӧ пукаліс велӧдысьяс пӧвстын, кывзіс-юасис найӧс. Сылӧн мывкыдлуныс да вочавидзӧмъясыс шензьӧдісны кывзысьясӧс.
Исусӧс аддзӧм бӧрын бать-мамыс чуймисны.
Мамыс шуис Сылы: «Пиӧй, мыйла нӧ Тэ тадзи вӧчин?
Ми батьыдкӧд сьӧлӧм потмӧн корсим Тэнӧ».
Сійӧ шуис налы: «Мыйла ті корсинныд Менӧ?
Энӧ ӧмӧй тӧдӧй, мый Меным колӧ лоны Бать керкаын?»
Но Сылысь кывъяссӧ найӧ эз гӧгӧрвоны.
Исус бӧр локтіс бать-мамыскӧд Назаретӧ да быдторйын кывзысис налысь.
Сылӧн мамыс ставсӧ тайӧс видзис сьӧлӧмас.
Исус сӧвмис, мывкыдлуныс содіс. Сійӧ вӧлі муса Енмыслы, и йӧзыс бурӧ пуктісны Сійӧс.
3 юр.
Тайӧ вӧлі Тиверий нима кесарлӧн дас витӧд веськӧдлан воӧ. Сэки Юдея муӧн веськӧдліс Понтий Пилат. Ирӧд веськӧдліс Галилея муӧн, сылӧн Филип вокыс веськӧдліс Итурея-Траконит муясӧн, Лисаний веськӧдліс Авилинея муӧн. Аннас да Каиаф вӧліны аркирейясӧн. Тайӧ кадӧ Енсянь кыв воис Иоанлы, Закар пилы, коді оліс овтӧминын.
Йӧрдан юдорса став муӧд ветлӧдлігӧн Иоан юӧрталіс: «Бергӧдчӧй мыжъяссьыныд да пыртчӧй, медым Ен прӧститас мыжъяснытӧ». Исай пророк небӧгын тадзи гижӧма:
— Овтӧминын кылӧ горзысьлӧн шы: «Лӧсьӧдӧй туйсӧ Господьлы, веськӧдӧй-шыльӧдӧй ордымъяс Сылы.
Быд увтасін мед тырас, быд керӧс да мыльк мед ляпкалас, чукыльяс мед веськаласны, гуранъяс мед шыляласны.
Сэки ставӧн аддзасны Енлысь мездӧмсӧ».
Иоан шуаліс сы дінӧ пыртчыны воӧмаяслы: «Вижля йылӧм.
Коді туйдӧдіс тіянӧс пышйыны локтана скӧрлунысь?
Олӧмнад петкӧдлӧй мыжъяссьыныд бергӧдчӧмнытӧ. Энӧ лысьтӧй мӧвпавны, мый тіян батьныд Ӧвраам. Висьтала тіянлы: тайӧ изъясысь Ен вермӧ вӧчны Ӧвраамлы ныв-писӧ.
Черыс пу вужйыс дорын нин куйлӧ.
Пуыс кӧ оз вай бур вотӧс, сійӧс кералӧны да шыбитӧны биӧ».
Йӧзыс юасисны Иоанлысь: «Мый миянлы колӧ вӧчнысӧ?»
Сійӧ вочавидзис: «Тэнад кӧ кык дӧрӧм, ӧтисӧ сет, кодлӧн абу. Тэнад кӧ эм сёян, тшӧтш тадзи вӧч».
Пыртчыны воисны тшӧтш вот перйысьяс, найӧ юалісны: «Велӧдысь, мый миянлы колӧ вӧчнысӧ?»
Сійӧ вочавидзис налы: «Энӧ босьтӧй тіянлы тшӧктӧмасьыс унджыксӧ».
Шыпуртаяс тшӧтш юалісны сылысь: «Мый нӧ миянлы колӧ вӧчнысӧ?»
Иоан шуис налы: «Мырдысьӧн да повзьӧдлӧмӧн энӧ босьтӧй йӧзлысь сьӧм, тырмӧдчӧй асланыд удждонӧн».
Йӧзыс мӧвпалісны, абу-ӧ Иоаныс Кристос, ӧд найӧ виччысисны Кристосӧс. Иоан шуис налы: «Ме пырта тіянӧс ваӧн, но локтӧ меысь вынаджык, ме ог шогмы разьны Сылысь кӧмкот кӧвсӧ.
Сійӧ пыртас тіянӧс Вежа Лолӧн да биӧн.
Сы киын тӧлӧдчан зырйыс.
Сійӧ весалас гумласӧ: шобдісӧ йӧртӧдӧ чукӧртас, кыдсӧ куслытӧм биын сотас».
Уна ногӧн велӧдӧмӧн Иоан висьтавліс Бур Юӧрсӧ йӧзыслы.
Иоан янӧдіс Ирӧд ӧксыӧс вокыслӧн Ирӧдиада гӧтырыс вылӧ гӧтрасьӧмысь да мукӧд лёкторйысь. Таысь Ирӧд пуксьӧдіс Иоанӧс дзескыдінӧ, тадзи содтіс аслас лёк вӧчӧмъяслысь лыдсӧ.
Уна йӧз пыртчис, и тшӧтш Исус пыртчис. Пыртчӧм бӧрас Исуслӧн кевмысигӧн енэжыс воссис. Вежа Лов гулю кодьӧн лэччис Сы вылӧ. Енэжсянь кыліс гӧлӧс шы:
«Тэ Менам муса Пиӧй, Ме нимкодяся Тэӧн».
Комын арӧссянь Исус пондіс кесъявны. Йӧзыс лыддисны Сійӧс Ӧсиплӧн пиӧн. Ӧсип вӧлі Илийлӧн пи, Илий — Матфатлӧн, Матфат — Левийлӧн, Левий — Мелкийлӧн, Мелкий — Яннайлӧн, Яннай — Ӧсиплӧн, Ӧсип — Маттафейлӧн, Маттафей — Амослӧн, Амос — Наумлӧн, Наум — Еслилӧн, Если — Наггейлӧн, Наггей — Маафлӧн, Мааф — Маттафейлӧн, Маттафей — Семейлӧн, Семей — Ӧсиплӧн, Ӧсип — Иудалӧн, Иуда — Иоаннанлӧн, Иоаннан — Рисайлӧн, Рисай — Зоровавельлӧн, Зоровавель — Салафильлӧн, Салафиль — Нирийлӧн, Нирий — Мелкийлӧн, Мелкий — Аддийлӧн, Аддий — Косамлӧн, Косам — Елмодамлӧн, Елмодам — Ирлӧн, Ир — Иосейлӧн, Иосей — Елиезерлӧн, Елиезер — Иоримлӧн, Иорим — Матфатлӧн, Матфат — Левийлӧн, Левий — Симеонлӧн, Симеон — Иудалӧн, Иуда — Ӧсиплӧн, Ӧсип — Ионанлӧн, Ионан — Елиакимлӧн, Елиаким — Мелеайлӧн, Мелеай — Маинанлӧн, Маинан — Маттафайлӧн, Маттафай — Нафанлӧн, Нафан — Давидлӧн, Давид — Ессейлӧн, Ессей — Овидлӧн, Овид — Воозлӧн, Вооз — Салмонлӧн, Салмон — Наассонлӧн, Наассон — Аминадавлӧн, Аминадав — Арамлӧн, Арам — Есромлӧн, Есром — Фареслӧн, Фарес — Иудалӧн, Иуда — Яковлӧн, Яков — Исааклӧн, Исаак — Ӧвраамлӧн, Ӧвраам — Фарлӧн, Фар — Накорлӧн, Накор — Серуклӧн, Серук — Рагавлӧн, Рагав — Фалеклӧн, Фалек — Еверлӧн, Евер — Саллӧн, Сал — Каинанлӧн, Каинан — Арфаксадлӧн, Арфаксад — Симлӧн, Сим — Нойлӧн, Ной — Ламеклӧн, Ламек — Мафусаллӧн, Мафусал — Еноклӧн, Енок — Яредлӧн, Яред — Малелеиллӧн, Малелеил — Каинанлӧн, Каинан Енослӧн, Енос — Сифлӧн, Сиф — Адамлӧн, Адам — Енлӧн.
4 юр.
Исус муніс Йӧрдан ю дорысь Вежа Лолӧн тыр. Лов нуӧдіс Сійӧс овтӧминӧ.
Сэні нелямын лун чӧж омӧль ыштӧдіс Сійӧс. Став тайӧ кадсӧ Исус нинӧм эз сёй, бӧрыннас кынӧмыс сюммис.
Сэки омӧль шуис Сылы: «Тэ кӧ Ен Пи, пӧрт тайӧ изсӧ няньӧ».
Исус воча шуис: «Гижӧма: “Оз куш няньӧн мортыд ов, а Енсянь быд шуӧм кывйӧн”».
Омӧль вайӧдіс Исусӧс джуджыд керӧс йылӧ да петкӧдліс Сылы син лапнитігкості таладор югыдсьыс став мусӧ.
Сэсся шуис: «Сета Тэныд став мусӧ мичлун-озырлуннас, ӧд ставсӧ тайӧс сетӧма меным. Ме верма сетны сійӧс кодлы кӧсъя. Копыртчылан кӧ меным, ставыс тайӧ лоӧ Тэнад».
Исус вочавидзис: «Вешйы Ме дінысь, сӧтана.
Гижӧма: “Аслад Господь Енлы копрась да сӧмын Сылы кесъяв”».
Омӧль нуӧдіс Исусӧс Ерусалимӧ, сувтӧдіс Сійӧс крам вевт вылӧ да шуис: «Тэ кӧ Ен Пи, шыбитчы тасянь.
Ӧд гижӧма: “Аслас анделъяслы Сійӧ тшӧктӧ видзны Тэнӧ. Найӧ нуасны Тэнӧ ки выланыс, видзасны изйӧ крукасьӧмысь”».
Исус воча шуис: «Шуӧма: “Эн дӧзмӧд ассьыд Господь Ентӧ.”».
Быдногыс ыштӧдӧм бӧрын омӧльыс кад кежлӧ эновтіс Исусӧс.
Исус бӧр локтіс Галилеяӧ, Сійӧ вӧлі тырӧма Лов вынӧн.
Сы йылысь сёрниыс паськаліс сэтчӧс му пасьтала.
Исус велӧдіс синагогаясын, став йӧзыс ошкисны Сійӧс.
Исус локтіс Назаретӧ, кӧні Сійӧ быдмис.
Шойччан лунӧ, кыдзи пыр вӧчліс, Сійӧ муніс синагогаӧ. Сэні сувтіс лыддьыны Гижӧд.
Сылы сетісны Исай пророклысь небӧг. Исус восьтіс небӧгсӧ, корсис тайӧ кывъяссӧ да лыддис:
— Господьлӧн Лолыс Ме вылын.
Сійӧ мавтіс Менӧ висьтавны коньӧръяслы Бур Юӧр. Сійӧ мӧдӧдіс Менӧ бурдӧдны доймӧм сьӧлӧмаясӧс, юӧртны дзескӧдӧмаяслы мездлун йылысь, восьтны синтӧмъяслысь синъяссӧ, мездыны нартитӧмаясӧс, юӧртны Господьлӧн буралан кад йылысь.
Исус тупкис небӧгсӧ да сетіс синагогаса кесъялысьлы, Ачыс пуксис.
Синагогаын ставӧн сюся видзӧдісны Сы вылӧ.
Сэки Исус пондіс висьтавны налы: «Ӧні, тіян кывзігӧн, иніс тайӧ гижӧдыс».
Ставӧн ошкисны Исусӧс да шензисны Сы вомысь петӧм буралан кывъясысь да шуалісны: «Абу-ӧ Сійӧ Ӧсиплӧн пи?»
Исус шуис налы: «Ті, дерт, Меным шуанныд тайӧ кывйӧзсӧ: “Бурдӧдысь, бурдӧд Асьтӧ”, да шуанныд: “Ми кывлім Капернаум карын лоӧмтор йылысь. Вӧч сійӧс тшӧтш тані, Аслад карын”».
Исус водзӧ шуис: «Веськыда висьтала тіянлы: пророкӧс ас муас оз сибӧдны.
Збыльысь висьтала тіянлы: уна дӧва вӧлі Израильын Илля пророк дырйи. Сэки куим во да джын зэр тусь эз усьлы енэжсьыс, та вӧсна унаӧн тшыгъялісны му пасьталаыс. На пиысь весиг ӧти дінӧ эз вӧв мӧдӧдӧма Илляӧс, сӧмын Сидонса Сарепта карын олысь дӧва дінӧ. Елисей пророк дырйи Израильын унаӧн висисны проказаӧн, но сирияса Нееманысь кындзи некод эз бурд».
Тайӧс кылӧм бӧрын синагогаын ставныс пузисны. Найӧ сувтісны да вӧтлісны Исусӧс карсьыс, нуӧдісны Сійӧс кыр йылӧ, кӧні сулаліс карыс, да сэсянь кӧсйисны йӧткыштны Сійӧс увлань.
Но Исус муніс на шӧрӧд да ылыстчис.
Сэсся Исус локтіс Галилеяса Капернаум карӧ. Шойччан лунӧ Сійӧ велӧдіс сэні.
Йӧзыс шензисны Сылӧн велӧдӧмысь, ӧд Сійӧ сёрнитіс ыджыдалысьӧ пуктӧм морт моз.
Синагогаын вӧлі пеж лолӧн кутӧм морт.
Сійӧ ыджыд шыӧн горӧдіс: «Мый Тэныд колӧ миянсянь, Назаретса Исус?
Тэ локтін бырӧдны миянӧс?
Тӧда, коді Тэ. Тэ — Енлӧн Вежаыс.»
Исус ӧлӧдіс пеж лолӧс: «Ланьт. Пет сы пытшкысь».
Пеж лов шыбитіс мортсӧ синагога джодж шӧрӧ, сэсся сійӧс дойдавтӧг петіс сы пытшкысь.
Ставныс чуймисны да ӧта-мӧдныслы шуалісны: «Мый тайӧ? Сылӧн сэтшӧм вын. Весиг пеж ловъяс петӧны Сылӧн тшӧктӧмысь».
Исус йылысь сёрниыс паськаліс сэтчӧс му пасьтала.
Синагогаысь петӧм бӧрын Исус локтіс Симон ордӧ.
Симон гӧтырлӧн мамыс ёна висис биа висьӧмӧн. Исусӧс корисны отсавны сылы.
Ань дінӧ матыстчӧмӧн Исус ӧлӧдіс биа висьӧмсӧ, и биа висьӧмыс эновтіс аньӧс.
Сійӧ дзик пыр чеччис да пондіс кесъявны налы.
Шонді лэччигӧн вайӧдісны Исус дінӧ быдсикас висьысьӧс. Сійӧ бурдӧдаліс найӧс кисӧ быдӧн вылӧ пуктылӧмӧн.
Уна пытшкысь пеж ловъяс петісны да горзісны: «Тэ Кристос, Ен Пи.»
Исус ӧлӧдіс найӧс тайӧс висьтавлӧмысь, ӧд найӧ тӧдісны, мый Сійӧ — Кристос.
Асывводзнас Исус муніс сэтысь овтӧминӧ.
Йӧзыс корсисны Сійӧс да аддзӧм бӧраныс эз лэдзны Сійӧс мунны на дінысь.
Исус шуис налы: «Мукӧд каръясын Меным тшӧтш колӧ висьтавлыны Ен Юралӧм йылысь Бур Юӧрсӧ, ӧд та могысь Менӧ мӧдӧдӧма».
Сійӧ ветлӧдліс Галилея муӧд да висьтавліс Бур Юӧр синагогаясын.
5 юр.
Ӧтчыд Исус сулаліс Генесарет ты дорын. Сійӧс кытшалісны йӧз, мед кывзыны Енлысь Кывсӧ. Вадорысь Исус аддзис кык пыж. Чери кыйысьяс чеччисны пыжъясысь да мыськалісны тывъяснысӧ.
Исус пуксис Симон пыжӧ да корис сійӧс йӧткыштчыны вадорсьыс. Пыжын пукалӧмӧн Исус велӧдіс йӧзсӧ.
Велӧднысӧ помалӧм бӧрын Исус шуис Симонлы: «Сын джуджыдінас. Сэтчӧ чӧвтӧй тывъяснытӧ».
Симон воча шуис: «Велӧдысьӧй, ми войбыд мырсим, весиг ӧти чери эз шед, но Тэнад тшӧктӧм серти чӧвта».
Тывсӧ чӧвтлӧм бӧрын тыв косясьмӧн чериыс шеді.
Сэки кинас ӧвтыштісны мӧд пыжын пукалысьяслы, корисны ёртъяссӧ отсавны.
Найӧ локтісны, сэсся кыкнан пыжсӧ вӧян выйӧдзыс тыртісны чериӧн.
Тайӧс аддзӧм бӧрын Симон-Петыр уськӧдчис Исус водзӧ да шуис: «Господьӧй, мун ме дінысь. Ме мыжа морт».
Симонӧс да сыкӧд вӧлысьясӧс, тшӧтш сылысь ёртъяссӧ, Зеведейлысь Яков да Иоан пиянӧс, шемӧсмӧдіс та мында чери шедӧмыс.
Исус шуис Симонлы: «Эн пов. Ӧнісянь пондан кыйны йӧзӧс».
Пыжъяснысӧ вадорӧ кыскӧм бӧрын найӧ колисны ставсӧ да мунісны Исус бӧрся.
Ӧти карын локтіс Исус дінӧ проказаӧн висьысь, сылӧн кучикыс дзоньнас уляліс. Сійӧ кымыньӧн уськӧдчис Исус водзӧ да корис: «Господьӧй, кӧсъян кӧ, верман менӧ сӧстӧммӧдны».
Исус нюжӧдіс кисӧ, инмӧдчыліс сы дінӧ да шуис: «Кӧсъя. Сӧстӧммы».
Висьысьлӧн дойясыс дзик пыр бырисны.
Исус ӧлӧдіс сійӧс мукӧдлы та йылысь висьталӧмысь да тшӧктіс: «Мун, петкӧдлы асьтӧ поплы, сэсся Мӧисей тшӧктӧм серти аслад сӧстӧммӧмысь вай вись. Тадзи тӧдмаласны тэнад бурдӧм йылысь».
Исус йылысь сёрниыс паськаліс пыр ёнджыка.
Зэв уна йӧз воліс кывзыны Сійӧс да бурдӧдчыны.
Ачыс Исус тшӧкыда мунлывліс овтӧминӧ да сэні кевмысьліс.
Ӧтчыд Исус вӧлі велӧдӧ.
Сэні пукалісны фарисейяс да Индӧдӧ велӧдысьяс. Найӧ вӧлі локтӧмаӧсь Галилея да Юдея сиктъясысь, тшӧтш Ерусалим карысь. Исус бурдӧдаліс висьысьясӧс Господь вынӧн. Кодъяскӧ сэтчӧ вольпасьнас вайисны вӧрзьӧдчыны вермытӧм мортӧс. Найӧ кӧсйисны пыртны сійӧс керкаӧ да пуктыны Исус водзӧ. Но уна йӧз вӧсна пыртнысӧ эз вермыны. Сэки кайисны керка вылӧ, разисны вевтсӧ да сэті лэдзисны висьысьӧс вольпасьнас Исус водзӧ.
Налысь эскӧмсӧ аддзӧмӧн Исус шуис висьысьлы: «Мортӧй, тэнсьыд мыжъястӧ прӧститӧма».
Индӧдӧ велӧдысьяс да фарисейяс мӧвпалісны: «Коді тайӧ? Сійӧ Енмӧс омӧльтӧ.
Ен кындзи вермас-ӧ кодкӧ прӧститны мыжъяс?»
Налысь мӧвпъяссӧ тӧдӧмӧн Исус шуис: «Мыйла ті мӧвпаланныд тадзи?
Мый кокньыдджык шуны: “Тэнсьыд мыжъястӧ прӧститӧма” либӧ “Чеччы да ветлы”?
Ӧні ті тӧдмаланныд: Морт Пи вермӧ прӧститны мыжъяс му вылын». Сэсся шуис висьысьлы: «Тэныд шуа: чеччы, босьт вольпасьтӧ да мун гортад».
Ставныслӧн син водзын сійӧ чеччис, босьтіс вольпасьсӧ да муніс гортас Енмӧс ошкигтырйи.
Йӧзыс чуймисны да полӧмӧн тырины.
Найӧ ошкисны Енмӧс да шуалісны, талун пӧ ми вӧвлытӧмтор аддзылім.
Сэтысь мунігас Исус аддзис вотчукӧртанінысь Левий нима вот перйысьӧс. Исус шуис сылы: «Лок Ме бӧрся».
Левий чеччис, ставсӧ колис да муніс Исус бӧрся.
Сэсся Левий корис Исусӧс ас ордас гажӧдчыны. Сэтчӧ локтісны тшӧтш вот перйысьяс да мукӧд корӧмаяс. Найӧ ставныс пукалісны ӧти пызан сайын.
Фарисейяс да Индӧдӧ велӧдысьяс шуасисны Исуслӧн велӧдчысьяс вылӧ: «Мыйла ті сёянныд-юанныд вот перйысьяскӧд да мыжа йӧзкӧд?»
Исус вочавидзис налы: «Дзоньвидзалы бурдӧдысьыд оз ков, сійӧ висьысьлы колӧ.
Ме локті корны Ен дінӧ мыжаясӧс, эг веськыда олысьясӧс».
Найӧ шуисны Исуслы: «Мыйла нӧ Иоанлӧн велӧдчысьясыс тшӧкыда видзалӧны-кевмысьӧны, фарисейяслӧн велӧдчысьясыс тшӧтш, а Тэнад сёйӧны-юӧны?»
Исус вочавидзис: «Верманныд-ӧ тшӧктыны видзавны кӧлысь вылын верӧспукӧд гажӧдчысь ёртъясӧс?
Воасны на сійӧ лунъясыс, кор колясны верӧспутӧг, сэки и видзаласны».
Исус висьталіс налы велӧданвисьт: «Важ паськӧмтӧ оз дӧмны выль паськӧмысь вундӧм дӧмасӧн. Тадзи кӧ вӧчан, выльсӧ тшыкӧдан, и важас выль дӧмасыс оз туй.
Выль винатӧ оз кисьтны важ кучик дозйӧ. Тадзи кӧ вӧчан, кучик дозйыс потас, и винаыс киссяс. Выль винатӧ кисьтӧны выль кучик дозйӧ. Сэки кыкнанныс дзонь колясны.
Сулӧдӧм винатӧ юӧм бӧрын мортыс оз кӧсйы юны выль винатӧ, шуас, сулӧдӧмыс пӧ бурджык».
6 юр.
Ыджыд лун бӧрын медводдза шойччан лунӧ Исус мунӧ вӧлі кӧдзӧм муяс вомӧн. Сылӧн велӧдчысьясыс мунігмозныс нетшкисны шепсӧ да кианыс ниртӧмӧн сёйисны тусьсӧ.
Фарисейясысь кодсюрӧ шуисны: «Мый ті вӧчанныд? Тайӧс оз позь вӧчны шойччан лунӧ».
Исус воча шуис: «Ті ӧмӧй энӧ лыддьылӧй, мый вӧчис Давид, кор тшыгъяліс аслас йӧзкӧд?
Сійӧ пырис Ен керкаӧ, босьтіс Енлы вайӧм няньсӧ да сёйис, и аслас йӧзлы тшӧтш сетіс. Тайӧ няньсӧ сӧмын попъяслы позис сёйны».
Исус шуис фарисейяслы: «Морт Пи шойччан лун вылын ыджыдыс».
Мӧд шойччан лунӧ Исус пырис синагогаӧ да велӧдіс.
Сэні вӧлі морт, кодлӧн веськыд киыс вӧлі косьмӧма.
Индӧдӧ велӧдысьяс да фарисейяс сюся видзӧдісны Исус бӧрся, бурдӧдас-ӧ шойччан лунӧ, ӧд корсисны помка мыжавны Сійӧс.
Налысь мӧвпъяссӧ тӧдӧмӧн Исус шуис косьмӧм киа мортлы: «Чеччы да пет шӧрас».
Сійӧ чеччис да воськовтіс водзлань.
Исус шуис: «Вочавидзӧй, мый позьӧ вӧчны шойччан лунӧ: бурсӧ али лёксӧ, мездыны мортӧс али вины сійӧс?»
Найӧ чӧв олісны.
Исус синнас кытшовтіс ставнысӧ, сэсся шуис висьысьлы: «Нюжӧд китӧ».
Сійӧ нюжӧдіс, и киыс пырысь-пыр бурдіс, лои мӧдыс кодь.
Фарисейяс да Индӧдӧ велӧдысьяс скӧрысла пузисны, ас костаныс пондісны сёрнитны, мый вӧчны Исускӧд.
Сійӧ лунъясӧ Исус кайис керӧсӧ кевмысьны да войбыд кевмысис сэні Енмыслы.
Луннас Сійӧ корис Ассьыс велӧдчысьяссӧ да бӧрйис на пӧвстысь дас кыкӧс, кодъясӧс нимтіс апостолъясӧн. Тайӧ вӧліны: Симон, кодлы сетіс Петыр ним, сылӧн Ӧндрей вокыс, Яков, Иоан, Филип, Варфоломей, Матвей, Фома, Алфей Яков, Симон, кодӧс нимтісны Зилотӧн, Яков Иуда да Искариот Иуда, Исусӧс вузалысь.
Велӧдчысьясыскӧд керӧсысь лэччӧм бӧрын Исус сувтіс шыльыдінӧ. Сэні вӧлі чукӧртчӧмаӧсь Сылӧн уна велӧдчысь, нӧшта став Юдея муысь, Ерусалим карысь, саридздорса Тир да Сидон каръясысь унасьыс-уна йӧз. Ставныс найӧ вӧлі локтӧмаӧсь кывзыны Исусӧс да бурдӧдчыны асланыс висьӧмъясысь. Весиг пеж лолӧн кутӧмаяс бурдалісны.
Йӧз чукӧрысь быдӧн зілис инмӧдчывны Исус дінӧ, ӧд Сысянь петіс вын да тайӧ выныс бурдӧдіс быдӧнӧс.
Аслас велӧдчысьяс вылӧ видзӧдлӧмӧн Исус висьталіс:
«Шудаӧсь ті, ловныдлы корысьяс, ӧд тіян эм Енлӧн Юралӧм.
Шудаӧсь ті, ӧні тшыгъялысьяс, ӧд ті пӧтанныд.
Шудаӧсь ті, ӧні бӧрдысьяс, ӧд ті понданныд серавны.
Ті шудаӧсь, Морт Пи вӧсна кӧ йӧзыс тіянӧс мустӧмтӧны, вӧтлӧны, лёкӧдӧны да няйтӧсьтӧны тіянлысь нимнытӧ. Налӧн батьясныс тадзи вӧчлісны пророкъяслы.
Нимкодясьӧй да чеччалӧй долыда, ӧд ыджыд тырдон виччысьӧ тіянӧс енэжас.
Курыд шог тіянлы, озыръяс.
Ті курыштінныд нин аслыныд олан гажсӧ.
Курыд шог тіянлы, ӧні пӧтӧмаяс. Ті кутанныд на пыкны тшыглунсӧ.
Курыд шог тіянлы, ӧні сералысьяс. Ті понданныд на шогсьыны-бӧрдны.
Курыд шог тіянлы, став йӧзыс кӧ сёрнитӧны тіян йылысь бура.
Налӧн батьясныс тадзи вӧчлісны ылӧгпророкъяслы».
«Тіянлы, Менӧ кывзысьяслы, шуа: радейтӧй тіянлы паныд мунысьясӧс, бурсӧ вӧчӧй тіянӧс мустӧмтысьяслы, бурсиӧй тіянӧс ёрысьясӧс да кевмысьӧй тіянӧс ӧтдортысьяс вӧсна.
Чужӧмбанад кучкысьлы бергӧд тшӧтш мӧдарсӧ. Вылыс паськӧмтӧ мырддьысьлы лэдз босьтны тшӧтш дӧрӧмтӧ.
Тэнсьыд корысьлы сет, тэнсьыд босьтысьлысь бӧр эн кор.
Мый кӧсъянныд, медым йӧзыс вӧчисны тіянлы, сійӧс и ті вӧчӧй налы.
Радейтанныд кӧ тіянӧс радейтысьясӧс, мыйсяма ошкӧм тіянлы таысь?
Мыжаяс ӧд тшӧтш радейтӧны найӧс радейтысьясӧс.
Вӧчанныд кӧ бурсӧ тіянлы бур вӧчысьяслы, мыйсяма ошкӧм тіянлы таысь?
Тадзи вӧчӧны тшӧтш мыжаяс.
Водзӧсаланныд кӧ бӧр виччысьӧмӧн, мыйсяма ошкӧм тіянлы таысь?
Мыжаяс тшӧтш водзӧсалӧны мыжаяслы ставсӧ бӧр босьтӧм могысь.
Ті, мӧдарӧ, радейтӧй тіянлы паныд мунысьясӧс, вӧчӧй бурсӧ да водзӧсалӧй, но энӧ виччысьӧй бӧрсӧ.
Сэки вичмас тіянлы ыджыд тырдон. Ті лоанныд Медвылыссалы ныв-пиӧн, ӧд Сійӧ бур сьӧлӧма бурсӧ вунӧдысьяс дінӧ да лёкъяс дінӧ.
Лоӧй Батьныд моз бур сьӧлӧмаӧсь».
«Энӧ мыждӧй, сэки тіянӧс оз мыждыны. Энӧ мыжалӧй, и тіянӧс оз мыжавны.
Прӧститӧй, и тіянӧс прӧститасны.
Сетӧй, сэки тіянлы сетасны. Сетасны бур муртӧсӧн, топыда тувкӧдӧмӧн, моздор тырныд сӧвтӧмӧн. Асланыд мурталӧм серти тіянлы мурталасны».
Исус висьталіс налы нӧшта велӧданвисьт:
«Вермас-ӧ синтӧм нуӧдны синтӧмӧс?
Оз-ӧ кыкнанныс усьны гуранӧ?
Велӧдчысь абу ыджыдджык аслас велӧдысьысь.
Но сӧмын велӧдчӧм бӧрас сійӧ лоас аслас велӧдысь кодьыс.
Кыдзи тэ верман вокыд синмысь ёгторсӧ аддзыны, аслад синмысь кӧ керсӧ он казяв?
Кыдзи тэ верман шуны вокыдлы: “Вай перъя синсьыд ёгторсӧ”, аслад синмысь кӧ керсӧ он аддзы?
Кык бана шаньга.
Водзджык аслад синмысь керсӧ перйы, сэки вокыдлӧн синмысь ёгторсӧ верман перйыны».
«Бур пу оз вай лёк вотӧс, лёк пу оз вай бур вотӧс. Путӧ донъялӧны вотӧс сертиыс. Лежнӧг вылысь ӧд оз чукӧртны инжир да тусяпу вылысь виноград.
Бур морт аслас бур сьӧлӧмысь бурсӧ петкӧдӧ, лёк морт аслас лёк сьӧлӧмысь лёксӧ петкӧдӧ. Ӧд мыйӧн тырӧма мортыслӧн сьӧлӧмыс, сійӧ вомсьыс и петӧ».
«Мыйла ті шуанныд Меным: “Господьӧй, Господьӧй”, но онӧ вӧчӧй Менам висьталӧм серти?
Висьтала тіянлы, кутшӧм сійӧ мортыс, коді локтӧ Ме дінӧ, кылӧ Менсьым кывъясӧс да олӧ на серти.
Сійӧ керка лэптысь кодь, коді джуджыда кодйысяс да пуктас керка подувсӧ из вылӧ.
Ытва дырйи ойдӧм ваыс оз вермы вӧрзьӧдны тайӧ керкасӧ, ӧд сійӧс из вылӧ лэптӧма.
А коді кылӧ Менсьым кывъясӧс да оз ов на серти, сійӧ подувтӧм керка лэптысь кодь. Ытва дырйи сылӧн керкаыс дзик пыр дзоньнас киссяс».
7 юр.
Йӧзкӧд сёрнисӧ помалӧм бӧрын Исус мӧдӧдчис Капернаум карӧ.
Сэні оліс шыпуртаяслӧн веськӧдлысь, кодлӧн кесйӧгыс вӧлі кулан выйын. Веськӧдлысьлы сійӧ вӧлі зэв дона.
Исус йылысь кылӧм бӧрын веськӧдлысь мӧдӧдіс юдейяслысь пӧрысьясӧс корны Сійӧс, медым локтас да бурдӧдас кесйӧгсӧ.
Найӧ локтісны Исус дінӧ да сьӧлӧмсяньыс корисны Сійӧс: «Тайӧ бур мортыслы колӧ отсавны. Сійӧ радейтӧ войтырнымӧс. Буретш сійӧ лэптіс миянлы синагогасӧ».
Исус муніс накӧд.
Керка дорас вотӧдз на Сылы паныдасисны веськӧдлысьлӧн ёртъясыс. Сійӧ мӧдӧдӧма найӧс висьтавны: «Господьӧй, эн мудзты Асьтӧ.
Ме ог сулав сы доныс, медым Тэ пырин менам керка вевт улӧ. Ачымӧс эг лыддьы шогманаӧн локны Тэ дінӧ.
Сӧмын кыв шу, и кесйӧгӧй бурдас.
Ме ачым киподувса морт, но и менам кипод улын эмӧсь шыпуртаяс. Ӧтилы шуа: “Мун”, и сійӧ мунӧ. Мӧдлы тшӧкта локны, и сійӧ локтӧ. Кесйӧглы шуа: “Вӧч тайӧс”, и сійӧ вӧчӧ».
Исус чуймис тайӧ кывъясысь. Сэсся бӧрсяньыс мунысь йӧзлань бергӧдчӧмӧн шуис: «Висьтала тіянлы: татшӧм ыджыд эскӧмсӧ Ме весиг Израильысь эг аддзыв».
Керкаӧ пырӧм бӧраныс веськӧдлысьлӧн ёртъясыс аддзисны: кесйӧгыс вӧлі бурдӧма.
Регыд мысти Исус муніс Наин карӧ, Сыкӧд тшӧтш мунісны Сылӧн велӧдчысьяс да уна мукӧд йӧз.
Исус матыстчис карса дзиръя дорӧ. Сэтысь вӧлі петкӧдӧны кулӧм мортӧс, дӧвалысь ӧтка писӧ. Уна йӧз анькӧд тшӧтш петіс карсьыс.
Господьлӧн сьӧлӧмыс нормис дӧва вӧсна, Сійӧ шуис аньлы: «Эн бӧрд».
Сэсся матыстчис да инмӧдчис гортъяс, нуысьяс сувтісны. Исус шуис: «Зонмӧй, тэныд шуа: чеччы.»
Кулӧм морт пуксис да пондіс сёрнитны.
Сэки Исус сетіс сійӧс мамыслы.
Ставнысӧ полӧм босьтіс. Енмӧс ошкигтыр шуалісны: «Ыджыд пророк миян пӧвстын. Ен локтіс отсавны Аслас войтырлы.»
Татшӧм сёрниыс Исус йылысь паськаліс Юдея му пасьтала да быдлаын матігӧгӧрас.
Иоанлӧн велӧдчысьясыс висьталісны став йывсьыс велӧдысьныслы.
Иоан корис ас дінас на пиысь кыкӧс да мӧдӧдіс найӧс юавны Исуслысь: «Тэ-ӧ сійӧ Локтысьыс? Колӧ-ӧ миянлы мӧдӧс виччысьны?»
Исус дінӧ локтӧм бӧрын найӧ шуисны: «Пыртысь Иоан мӧдӧдіс миянӧс Тэ дінӧ юавны: “Тэ-ӧ сійӧ Локтысьыс? Колӧ-ӧ миянлы мӧдӧс виччысьны?”»
Буретш тайӧ кадӧ Исус унаӧс бурдӧдіс висьӧм-вермытӧмысь, вӧтліс пеж ловъясӧс, уна синтӧмлысь синсӧ восьтіс.
Исус вочавидзис: «Мунӧй, висьталӧй Иоанлы, мый аддзанныд да кыланныд:
— Синтӧмъяс аддзӧны, коктӧмъяс ветлӧны, проказаысь сӧстӧммӧны, пельтӧмъяс кылӧны, кулӧмаяс ловзьӧны, коньӧръяслы Бур Юӧр висьтавлӧны. Шуда сійӧ, коді оз ылав Меысь».
Кор Иоанлӧн велӧдчысьясыс мунісны, Исус пондіс висьтавны йӧзыслы Иоан йылысь:
«Мый видзӧдны ветлінныд овтӧминас?
Тӧлӧн вӧрӧдысь идзас-ӧ?
Мый видзӧдны ветлінныд?
Мича да озыр паськӧма мортӧс?
Татшӧм паськӧма да лышкыда олысь йӧзыс олӧны ӧксы оланінъясын.
Кодӧс видзӧдны ветлінныд?
Пророкӧс-ӧ?
Шуа тіянлы: ті аддзылінныд пророкысь ыджыдӧс.
Сы йылысь гижӧма:
— Ыста Ассьым юӧртысьӧс Тэ водзвылын, сійӧ Тэныд туйсӧ дасьтас.
Висьтала тіянлы: му вылын чужысь пророкъясысь эз вӧвлы Пыртысь Иоанысь ыджыдджыкыс, но Енлӧн Юраланінын медічӧтыс сы дорысь ыджыдджык.
Иоанӧс кывзӧм бӧрын став йӧзыс, весиг вот перйысьяс, эскисны Ен веськыдлунӧ да пыртчисны Иоан пыртӧмӧн. А фарисейяс Индӧдӧ велӧдысьяскӧд паныд сувтісны Ен кӧсйӧмлы да эз пыртчыны Иоан пыртӧмӧн».
Господь шуис: «Кодкӧд Ме ӧткодяла ӧнія олысьясӧс?
Код кодьӧсь найӧ?
Найӧ изэрд вылын пукалысь челядь кодьӧсь, кодъяс ӧта-мӧдныслы шуалӧны: “Ми ворсім тіянлы пӧлянӧн, а ті энӧ йӧктӧй. Ми сьылім тіянлы бӧрдӧдчанкывъяс, а ті энӧ бӧрдӧй”.
Пыртысь Иоан локтіс, нянь оз сёй, вина оз ю, ті шуанныд, сы пытшкын пӧ пеж лов.
Морт Пи локтіс, сёйӧ-юӧ, Сы йылысь шуанныд, рушку тыртысь да вина юысь пӧ, вот перйысьяскӧд да мыжаяскӧд ёртасьысь пӧ.
Мывкыдлунсӧ пыдди пуктӧны мывкыдлуныслӧн челядьыс».
Ӧти фарисей корис Исусӧс гортас сёйны. Исус пырис фарисей керкаӧ да пуксис.
Та йылысь тӧдмаліс сійӧ карас олысь мыжа ань. Сійӧ вайис вальді дозйын чӧскыд дука вый. Исуслӧн кок дорӧ копыртчӧмӧн сійӧ бӧрдіс, сылӧн синваыс визувтіс Исуслы кок вылас. Сійӧ чышкаліс Исуслысь коксӧ аслас юрсиӧн да окалігмоз мавтіс выйӧн.
Исусӧс корысь фарисей аддзис тайӧс да мӧвпыштіс: «Вӧлі кӧ тайӧ Мортыс пророк, тӧдіс эськӧ, мыйсяма ань инмӧдчӧ Сы дінӧ. Тайӧ аньыс ӧд мыжа».
Фарисейлань бергӧдчӧмӧн Исус шуис: «Симон, Ме тэныд ӧтитор кӧсъя висьтавны».
«Висьтав, Велӧдысь», — шуис мӧдыс.
Исус шуис: «Ӧти мортлы кыкӧн вӧліны уджйӧзаӧсь: ӧтиыс — витсё динар, мӧдыс — ветымын. Мынтынысӧ найӧ эз вермыны, та вӧсна тайӧ мортыс шуис вунӧдны кыкнанныслысь уджйӧзсӧ.
Висьтав, кодныс ёнджыка кутас радейтны сійӧс?»
Симон вочавидзис: «Чайта, унджык уджйӧзаыс».
Исус шуис сылы: «Тэ веськыда мӧвпалан».
Аньлань бергӧдчӧмӧн Исус шуис Симонлы: «Аддзан-ӧ тайӧ аньсӧ?
Ме локті тэ ордӧ, да тэ Меным ватор эн сет кокӧс мыськыны, а сійӧ синванас киськаліс Менсьым кокӧс да юрсинас чышкаліс.
Тэ эн окышт Менӧ, а сійӧ локтӧмсяньыс эз на дугдыв окавны кокӧс.
Тэ Менсьым юрӧс выйнад эн мавтышт, а сійӧ чӧскыд дука выйнас кокӧс мавтіс.
Висьтала тэныд, мыйла сійӧ ёна радейтӧ — уна мыж сылысь прӧститӧма. Кодлысь этша прӧститӧма, сійӧ этша радейтӧ».
Сэсся Исус шуис аньлы: «Прӧститӧма тэнсьыд мыжъястӧ».
Сыкӧд сёйысьяс сёрнитісны ас костаныс: «Коді Сійӧ, мый весиг мыжъяс прӧститӧ?»
Исус шуис аньлы: «Эскӧмыд мездіс тэнӧ. Мун повтӧг».
8 юр.
Та бӧрын Исус ветлӧдліс карысь карӧ, сиктысь сиктӧ да висьтавліс Ен Юралӧм йылысь Бур Юӧр.
Сыкӧд ветлӧдлісны дас кыкнан велӧдчысьыс да нӧшта аньяс, кодъясӧс Сійӧ бурдӧдіс висьӧмъясысь да мездіс пеж ловъясысь. Тайӧ вӧліны: Магдала Марья, код пытшкысь петіс сизим пеж лов, Иоанна — Ирӧд овмӧсӧн веськӧдлысь Кузлӧн гӧтырыс, Сусанна да мукӧдъяс. Овмӧснаныс найӧ отсасисны Исуслы.
Уна карысь локтісны йӧзыс Исус дінӧ. Сійӧ шыӧдчис на дорӧ велӧданвисьтӧн: «Морт кӧдзны петас. Кӧдзигас кымынкӧ кӧйдыс усяс туй бокӧ. Сэні найӧс таляласны, да енэжвыв лэбачьяс кокаласны.
Кымынкӧ кӧйдыс усяс изъяинӧ, но ваыс тырмытӧмла петалігмозыс найӧ косьмасны.
Кымынкӧ кӧйдыс усяс лежнӧг пӧвстӧ. Быдмигас лежнӧгыс пӧдтас петассӧ.
Мукӧд кӧйдысыс усяс бур муӧ, быдмас да ваяс тусьсӧ сё пӧвстӧн».
Тайӧс висьталӧм бӧрын Исус горӧдӧмӧн шуис: «Кодлӧн эм пель, мед кылӧ.»
Велӧдчысьяс юалісны Исуслысь, кыдзи гӧгӧрвоны тайӧ велӧданвисьтсӧ.
Исус шуис: «Тіянлы сетӧма тӧдны Ен Юралӧмлысь гусяторъяссӧ, а мукӧдыс кылӧны та йылысь велӧданвисьтъясысь: найӧ видзӧдӧны да оз аддзыны, кывзӧны да оз гӧгӧрвоны.
Тайӧ велӧданвисьтыс петкӧдлӧ: кӧйдысыс — тайӧ Ен Кыв. Туй бокӧ усьӧм кӧйдысыс петкӧдлӧ: мортыс кылӧ Кывсӧ, но сэсся локтӧ омӧльыс да гусялӧ сьӧлӧмсьыс Кывсӧ, медым мортыс эз эскы да эз мездмы.
Изъяинӧ усьӧм кӧйдысыс петкӧдлӧ: мортыс кылӧ Кывсӧ да долыдпырысь босьтӧ сійӧс сьӧлӧмас, но вужъясьтӧмысла оз дыр эскы, ыштӧдӧмъяс дырйи сійӧ кежӧ эскӧмсьыс.
Лежнӧг пӧвстӧ усьӧм кӧйдысыс петкӧдлӧ: мортыс кылӧ Кывсӧ, но быдлунъя тӧждыс, озырлуныс да лышкыда олӧмыс пӧдтӧ кӧдзӧм Кывсӧ, и сійӧ оз вай вотӧссӧ.
Бур муӧ кӧдзӧм кӧйдысыс петкӧдлӧ: мортыс кылӧ Кывсӧ, видзӧ сійӧс бур-сӧстӧм сьӧлӧмас да сьӧкыдлунсӧ венӧмӧн вайӧ вотӧс».
Тайӧс висьталӧм бӧрын Исус горӧдӧмӧн шуис: «Кодлӧн эм пель, мед кылӧ.»
«Ӧзтӧм битӧ оз вевттьывны дозйӧн да оз сувтӧдны лабич улӧ. Сійӧс пуктӧны бикок вылӧ, медым пырысьяс аддзисны югыдсӧ.
Став гусяыс воссяс да став дзебӧмаыс йӧзасяс, петас ортсӧ.
Видзӧдӧй, кыдзи кывзанныд. Кодлӧн эм, сылы сетасны. Кодлӧн абу, сылысь весиг чайтанасӧ босьтасны».
Исус дінӧ локтісны мамыс да вокъясыс, но уна йӧз вӧсна найӧ эз вермыны матыстчыны Сы дінӧ.
Исуслы висьталісны: «Мамыд вокъясыдкӧд ывлаасӧсь, Тэнӧ кӧсйӧны аддзӧдлыны».
Исус шуис: «Енлысь Кывсӧ кывзысьяс да сы серти олысьяс — Меным мам да вокъяс».
Ӧтчыд Исус Аслас велӧдчысьясыскӧд пуксис пыжӧ да шуис налы: «Вуджамӧй ты мӧдлапӧлӧ».
Найӧ мӧдӧдчисны.
Вуджиганыс Исус унмовсис.
Ты вылын кыптіс ыджыд тӧвныр, да пыжыс кутіс тырны ванас. Найӧ вӧліны вӧян выйынӧсь.
Велӧдчысьяс садьмӧдісны Исусӧс шуалӧмӧн: «Велӧдысь, Велӧдысь. Вӧям.»
Исус чеччис, ӧлӧдіс тӧвсӧ да гызьӧм васӧ. Ставыс ланьтіс, пуксис чӧв-лӧнь.
Исус шуис велӧдчысьясыслы: «Кӧні тіян эскӧмныд?»
Найӧ полӧмӧн-шензьӧмӧн ӧта-мӧдныслысь пондісны юасьны: «Коді Сійӧ? Весиг тӧлыс да ваыс кывзысьӧ Сылысь».
Та бӧрти найӧ вуджисны Галилеялы паныда Гадара муӧ.
Пыжсьыс чеччӧм бӧрын Исуслы паныдасис карсьыс пеж ловъясӧн кутӧм морт. Сійӧ пыр ветліс пасьтӧг, керкаын пыдди оліс шойгу кыртаын.
Исусӧс аддзӧм бӧрын сійӧ горзӧмӧн уськӧдчис Сы водзӧ да горӧдіс: «Мый Тэныд месянь колӧ, Исус, Медвылысса Енлӧн Пи?
Кора Тэнӧ, эн пес менӧ.»
Тадзи шуаліс, ӧд Исус тшӧктіс пеж ловлы петны морт пытшкысь. Пеж лов унаысь песлӧдлывлӧма тайӧ мортсӧ. Сійӧс кӧртавлісны чепъясӧн да видзисны дорӧмӧн, но сійӧ орйӧдлывліс кӧртӧдъяссӧ. Сэки пеж лов нуӧдлывліс сійӧс овтӧминӧ.
Исус юаліс сылысь: «Мый тэнад нимыд?»
Сійӧ вочавидзис: «Легион», ӧд сы пытшкын вӧлі уна пеж лов.
Пеж ловъяс корисны Исусӧс, мед эз ысты найӧс пыдӧстӧминӧ.
Сэні керӧсын йирсис ыджыд порсь чукӧр.
Пеж ловъяс корисны Исусӧс, мед лэдзас найӧс пырны порсьяс пытшкӧ.
Исус лэдзис.
Сэки морт пытшкысь петӧм пеж ловъяс пырисны порсьяс пытшкӧ. А порсьяс кыр йывсянь уськӧдчисны тыӧ да пӧдісны.
Порсь видзысьяс пышйисны сэтысь, котӧрӧн мунісны карӧ да орчча сиктъясӧ висьтавны аддзывлӧмтор йывсьыс.
Йӧзыс петісны видзӧдлыны лоӧмторсӧ.
Найӧ локтісны Исус дінӧ да аддзисны сійӧ мортсӧ, код пытшкысь петісны пеж ловъяс. Сійӧ, паськӧма да ас вежӧра, пукаліс Исуслӧн кок дорын. Йӧзыс ёна повзисны.
Аддзылысьяс висьталісны локтӧмаяслы, кыдзи бурдіс пеж лолӧн кутӧм мортыс.
Сэки Гадара муын олысьяс корисны Исусӧс мунны на дінысь, сэтшӧм ыджыд полӧм босьтіс найӧс.
Исус пуксис пыжӧ да бӧр мӧдӧдчис.
Пеж лолысь мездмӧм морт вӧзйысис мунны Исускӧд,
но Исус шуис сылы: «Мун гортад да висьтав, мый Енмыс вӧчис тэныд».
Сійӧ муніс да висьталіс став карыслы, мый сылы вӧчис Исус.
Ты мӧдлапӧлын Исусӧс паныдаліс уна йӧз, найӧ виччысьӧмаӧсь Сійӧс.
Сэтчӧ локтіс Явир нима морт, синагогаса юралысь.
Исус водзӧ уськӧдчӧмӧн Явир корис Сійӧс волыны сы ордӧ. Сылӧн дас кык арӧса ӧтка нылыс вӧлі кулан выйын. Исус муніс Явиркӧд.
Муніганыс йӧзыс быдласянь топӧдісны Исусӧс.
Йӧз чукӧрын вӧлі ань, сійӧ дас кык во чӧж висьӧма вир мунӧмӧн. Ассьыс став эмбурсӧ сійӧ сеталӧма бурдӧдысьяслы, но найӧ абу вермӧмаӧсь отсавны сылы. Сійӧ матыстчис Исус дінӧ мышсяньыс да инмӧдчыліс паськӧм дорышас.
Вир мунӧмыс пырысьтӧм-пыр дугдіс.
Исус юаліс: «Коді инмӧдчыліс Ме дінӧ?»
Ставӧн соссисны. Петыр да мукӧдыс шуисны: «Велӧдысь, йӧзыс быдласянь топӧдӧны Тэнӧ, а Тэ юасян, коді инмӧдчыліс Тэ дінӧ».
«Кодкӧ инмӧдчыліс Ме дінӧ. Ме кылі, мый Ме пытшкысь петіс вын», — шуис Исус.
Ань гӧгӧрвоис, мый сійӧс казялісны. Дзӧригтыр сійӧ матыстчис да уськӧдчис Исус водзӧ. Став йӧз водзас висьталіс Исуслы, мыйла инмӧдчыліс Сы дінӧ да кыдзи дзик пыр бурдіс.
Исус шуис аньлы: «Нылӧй, эскӧмыд мездіс тэнӧ. Мун повтӧг».
Исуслӧн сёрнитігӧн синагогаса юралысь дінӧ матыстчис гортсяньыс локтысь морт да висьталіс сылы: «Нылыд кулі, эн мудзтӧд Велӧдысьсӧ».
Исус кыліс тайӧс да шуис Явирлы: «Эн пов, сӧмын эскы, нылыд ловъя лоас».
Явир керка дорӧ воӧм бӧрын Исус босьтіс Аскӧдыс Петырӧс, Иоанӧс, Яковӧс да нывкалысь бать-мамсӧ, мукӧдсӧ эз лэдз пырнысӧ.
Ставныс сыркъялӧмӧн бӧрдісны кулӧм нывка вӧсна.
Исус шуис: «Энӧ бӧрдӧй, сійӧ эз кув, сійӧ узьӧ».
Исус вылын пондісны серавны, ӧд тӧдісны, мый нывкаыс куліс.
Ставнысӧ вӧтлӧм бӧрын Исус босьтіс нывкаӧс киӧдыс да гораа шуис: «Нылӧй, чеччы.»
Сэки лолыс бӧр пырис нывка пытшкӧ, да сійӧ пырысь-пыр чеччис.
Исус тшӧктіс вердны нывкаӧс.
Бать-мамыс чуймисны, но Исус ӧлӧдіс найӧс, медым эз висьтавлыны лоӧмтор йывсьыс мукӧдыслы.
9 юр.
Исус корис дас кыкнан велӧдчысьсӧ да сетіс налы вын вӧтлавны пеж ловъясӧс да бурдӧдавны йӧзӧс висьӧмъясысь. Сійӧ мӧдӧдіс найӧс юӧртны Енлӧн Юралӧм йылысь да бурдӧдавны висьысьясӧс.
Исус шуис налы: «Туяныд нинӧм энӧ босьтӧй, весиг бедь, ноп, нянь, эзысь да вежан паськӧм.
Кутшӧм керкаӧ пыранныд, водзӧ мунтӧдзныд олӧй сэні.
Оз кӧ сибӧдны тіянӧс, сэки карсьыс петіганыд пыркӧдӧй коксьыныд буссӧ. Тайӧ лоӧ найӧс ӧлӧдӧм».
Велӧдчысьяс петісны туйӧ. Найӧ ветлӧдлісны сиктысь сиктӧ, быдлаын висьтавлісны Бур Юӧр да бурдӧдалісны висьысьясӧс.
Ирӧд ӧксы кор кыліс тайӧ ставыс йылысь, шӧйӧвошис.
Ӧтияс сёрнитісны, Пыртысь Иоан пӧ ловзьӧма.
Мӧдъяс шуалісны, Илля пӧ локтӧма, кодсюрӧ шуисны, важ пророкъясысь пӧ ӧти ловзьӧма.
Ирӧд шуис: «Иоанлысь юрсӧ ме керышті.
Но коді нӧ тайӧ мортыс, мый татшӧмторъяс кыла Сы йылысь?»
Ирӧд ёна кӧсйис аддзывны Исусӧс.
Локтӧм бӧраныс апостолъяс висьталісны Исуслы, мый найӧ вӧчисны.
Исус босьтіс найӧс Аскӧдыс, медым олыштны накӧд ас кежаныс овтӧминын, коді вӧлі Випсаида карсянь матын.
Тайӧс кылӧм бӧрын йӧзыс мӧдӧдчисны Исус бӧрся.
Сійӧ сибӧдіс найӧс, сёрнитіс накӧд Енлӧн Юралӧм йылысь да бурдӧдаліс висьысьясӧс.
Луныс нёровтчис рытлань.
Сэки дас кыкнан велӧдчысьыс матыстчисны Исус дінӧ да шуисны: «Ми тані овтӧминынӧсь. Ысты йӧзсӧ вой кежлас матігӧгӧр сикт-грездӧ, мед нуръясьыштасны».
Исус шуис: «Ті сетӧй налы сёянсӧ».
Найӧ воча шуисны: «Миян сӧмын вит нянь да кык чери.
Ми ӧмӧй вермам ньӧбны та мындаыслы сёянсӧ?»
Сэні вӧлі вит сюрс гӧгӧр морт.
Исус шуис велӧдчысьясыслы: «Пуксьӧдалӧй йӧзсӧ чукӧръясӧ, морт ветымынӧн».
Найӧ тадзи и вӧчисны, пуксьӧдалісны ставнысӧ.
Исус босьтіс вит няньсӧ да кык черисӧ, видзӧдліс енэжӧ да Енмӧс аттьӧалӧмӧн чегис няньсӧ, сэсся сетіс велӧдчысьясыслы. Велӧдчысьяс разӧдісны йӧзыслы.
Ставныс пӧттӧдзныс сёйисны, коляссӧ дас кык куд тыр чукӧртісны.
Ӧтчыд Исус кевмысис йӧзтӧминын. Сыкӧд тшӧтш сэні вӧліны велӧдчысьясыс.
Исус юаліс налысь: «Код туйӧ йӧзыс пуктӧны Менӧ?»
Найӧ вочавидзисны: «Ӧтияс шуӧны, Пыртысь Иоан пӧ, мӧдъяс шуӧны, Илля пӧ, кодсюрӧ шуӧны, важ пророкъясысь пӧ ӧти ловзьӧма».
Исус юаліс: «Код туйӧ ті Менӧ пуктанныд?»
Петыр вочавидзис: «Тэ — Енлӧн Кристос».
Исус чорыда ӧлӧдіс найӧс, мед эз висьтавны та йылысь мукӧдлы. Сэсся шуис: «Морт Пилы уна сьӧкыд ковмас нуны. Пӧрысьяс, аркирейяс да Индӧдӧ велӧдысьяс пондасны вӧтлыны да виасны Сійӧс, но коймӧд луннас Сійӧ ловзяс».
Исус шуис ставныслы: «Коді кӧсйӧ мунны Ме бӧрся, мед вунӧдас асьсӧ, мед босьтас ассьыс крестсӧ да локтас Ме бӧрся.
Коді кӧсйӧ видзны ассьыс олӧмсӧ, воштас сійӧс. Ме вӧсна олӧмсӧ воштысь видзас сійӧс.
Лоас-ӧ мортыслы бур, босьтас кӧ аслыс став муюгыдсӧ, а асьсӧ бырӧдас да олӧмсӧ воштас?
Коді яндысяс Меысь да Менам кывъясысь, сыысь яндысяс Морт Пи, кор локтас Аслас дзирдлунӧн, Батьыслӧн да вежа анделъяслӧн дзирдлунӧн.
Збыльысь висьтала тіянлы: кодсюрӧ тані сулалысьяс пиысь кувтӧдзныс на аддзасны Енлысь Юралӧмсӧ».
Тайӧ сёрни бӧрас лун кӧкъямыс мысти Исус босьтіс Аскӧдыс Петырӧс, Иоанӧс, Яковӧс да кайис накӧд керӧсӧ кевмысьны.
Кевмысигас Исуслӧн чужӧмыс вежсис, паськӧмыс лои дзирдалана еджыд.
Сэки тыдовтчисны кык морт: Мӧисей да Илля. На вылын вӧлі Енлӧн дзирдлуныс. Найӧ сёрнитісны Исускӧд Сылӧн мунӧм йылысь, коді збыльмас Ерусалимын.
Петыр ёртъясыскӧд чорыда узисны. Садьмӧм бӧраныс аддзисны Исуслысь дзирдлунсӧ да Сыкӧд сулалысь кык мортӧс.
Кор тайӧ кык мортыс кутісны ылыстчыны Исусысь, Петыр шуис Исуслы: «Велӧдысьӧй, миянлы тані лӧсьыд, сувтӧдам куим чом: Тэныд, Мӧисейлы да Иллялы». Петыр ачыс эз гӧгӧрво, мый висьталіс.
Петырлӧн сёрнитігкості локтіс кымӧр да вевттис найӧс. Велӧдчысьяс ёна повзисны.
Кымӧрсянь кыліс гӧлӧс шы: «Тайӧ Менам муса Пиӧй, Сійӧс кывзӧй».
Тайӧ кывъяс бӧрас найӧ аддзисны сӧмын Исусӧс.
Велӧдчысьяс сійӧ кадас некодлы эз висьтавлыны аддзывлӧм йывсьыс, найӧ чӧв олісны та йылысь.
Аскинас керӧсысь лэччиганыс Исусӧс паныдаліс уна йӧз.
Йӧз пӧвстысь ӧти горӧдіс: «Велӧдысьӧй, кора Тэнӧ, видзӧдлы менсьым пиӧс, сійӧ менам ӧтка пи. Пеж лов топӧдлӧ сійӧс. Сэки сійӧ лёкысь горзӧ, чашйысьӧ, да вомсьыс быг петӧ. Ёна песӧм бӧрын пеж лов вӧлисти эновтӧ сійӧс.
Ме кори Тэнсьыд велӧдчысьястӧ вӧтлыны пеж ловсӧ, но найӧ эз вермыны».
Исус шуис: «Эскытӧм-ылалӧм йӧз.
Дыр-ӧ на Меным овнысӧ тіянкӧд? Дыр-ӧ на Меным видзӧдны тіянӧс?
Вайӧд татчӧ питӧ».
Кор зонка вӧлі матыстчӧ Исус дінӧ, пеж лов шыбитіс зонкаӧс муас да кутіс песлӧдлыны.
Исус ӧлӧдіс пеж лолӧс, бурдӧдіс зонкаӧс да сетіс сійӧс батьыслы.
Ставнысӧ шензьӧдіс Енлӧн ыджыд выныс.
Йӧзыс шензисны Исуслӧн уджъясысь. Сэки Сійӧ шуис велӧдчысьясыслы: «Пель саяныд сюркнялӧй Менсьым кывъясӧс: Морт Пиӧс сетасны йӧзлӧн киӧ».
Велӧдчысьяс эз тӧдны, мый йылысь Исус висьталӧ, Сылӧн кывъясыс вӧліны налы пӧдсаӧсь. Найӧ эз гӧгӧрвоны Сійӧс, а юавнысӧ полісны.
Велӧдчысьяс костын чужис вен, коді на пиысь ыджыдджыкыс.
Налысь мӧвпъяссӧ тӧдӧмӧн Исус босьтіс кагаӧс да сувтӧдіс сійӧс Аскӧдыс орччӧн. Велӧдчысьясыслы шуис: «Коді Менам ним вӧсна сибӧдӧ тайӧ кагасӧ, сійӧ сибӧдӧ Менӧ. А Менӧ сибӧдысь сибӧдӧ Менӧ Мӧдӧдысьӧс. Медся ичӧтыс тіян пиысь лоас медыджыдӧн».
Сэки Иоан шуис: «Велӧдысьӧй, ми аддзылім мортӧс, сійӧ Тэнад нимӧн пеж ловъясӧс вӧтлалӧ. Ми ӧлӧдім сійӧс, ӧд сійӧ абу миян пӧвстысь».
Исус шуис: «Энӧ ӧлӧдӧй. Коді абу тіянлы паныд, сійӧ тіян дор».
Кор матыстчис Исусӧс енэжӧ босьтан луныс, Сійӧ шуис мунны Ерусалимӧ. Водзвылас Сійӧ ыстіс юӧртысьясӧс.
Найӧ мунісны самарияса сиктӧ, медым ставсӧ лӧсьӧдны Исус локтігкежлӧ. Сэтчӧс олысьяс эз сибӧдны Исусӧс, ӧд Сійӧ вӧлі Ерусалимӧ мунысь.
Яков да Иоан — Исуслӧн велӧдчысьясыс — тайӧс кылӧм бӧрын шуисны: «Господьӧй, кӧсъян кӧ, ми би корам енэжсяньыс, мед бырӧдны найӧс? Буретш тадзи Илля вӧчліс».
Велӧдчысьяслань бергӧдчӧмӧн Исус ӧлӧдіс найӧс. Сійӧ шуис: «Ті онӧ тӧдӧй, мыйсяма лов тіян пытшкын. Морт Пи эз лок бырӧдны мортлысь олӧмсӧ, Сійӧ локтіс мездыны».
Сэсся найӧ мунісны мӧд сиктӧ.
Муніганыс ӧти морт шыасис Исус дінӧ: «Господьӧй, ме быдлаӧ Тэ бӧрся муна».
Исус шуис сылы: «Ручьяслӧн эмӧсь пырмӧсъяс, и енэжвыв лэбачьяслӧн эмӧсь позъяс, сӧмын Морт Пилӧн шойччаніныс абу».
Мӧдлы Исус шуис: «Лок Ме бӧрся».
Сійӧ воча шуис: «Господьӧй, лэдзлы менӧ медводз батьӧс дзебны».
Исус шуис сылы: «Кулӧмаяс мед дзебасны кулӧмаяснысӧ. Тэ мун да юӧрт Енлысь Юралӧмсӧ».
Нӧшта ӧти морт шуис: «Господьӧй, ме муна Тэ бӧрся, сӧмын лэдзлы менӧ колльӧдчыны гортсаяскӧд».
Сылы Исус вочавидзис: «Гӧрйӧ кутчысьысь кӧ видзӧдӧ бӧрлань, сійӧ оз шогмы пырны Енлӧн Юраланінӧ».
10 юр.
Та бӧрын Господь бӧрйис нӧшта сизимдас велӧдчысьӧс, сэсся кыкӧн-кыкӧн мӧдӧдіс найӧс сикт-каръясӧ, кытчӧ кӧсйис Ачыс ветлыны. Сійӧ шуис налы:
«Вунданыс уна, а вундысьыс этша. Кевмӧй вунданінын Ыджыдыслы, мед ыстас Аслас вунданінӧ уджалысьясӧс.
Мунӧй.
Ме мӧдӧда тіянӧс баляпиянӧс моз кӧинъяс пӧвстӧ.
Энӧ босьтӧй аскӧдныд сьӧм, ноп да кӧм. Туй выланыд энӧ сувтӧй чолӧмасьны йӧзкӧд.
Керкаӧ пыриганыд медводз шуӧй: “Лӧнь олӧм тайӧ керкаыслы.
” Сэні кӧ олӧ бур сьӧлӧма морт, бурсиӧмныд коляс сылы. Оз кӧ, бурсиӧмныд бергӧдчас тіянлы.
Кольччӧй сійӧ керкаас, сёйӧй-юӧй мый тіянлы сетасны, ӧд уджалысьыд сулалӧ удждоныс.
Энӧ вуджӧй мӧд керкаӧ.
Карӧ пыриганыд кӧ тіянӧс сибӧдасны, сёйӧй мый тіянлы сетасны. Бурдӧдалӧй сэні висьысьясӧс да юӧртӧй: “Енлӧн Юралӧмыс воис тіянӧдз”.
Оз кӧ сибӧдны карас, туйяс кузя ветлӧмӧн юӧртӧй: “Буссӧ, мый кӧласис коканым тіян карын, ми бӧр пыркӧдам тіянлы. Тӧдӧй: Енлӧн Юралӧмыс воис тіянӧдз”.
Висьтала тіянлы: Мыждан лунӧ Содом карлы лоас кокньыдджык сійӧ карыслы дорысь».
«Курыд шог тэныд, Коразин кар. Курыд шог тэныд, Випсаида кар.
Тир да Сидон каръясын кӧ аддзылісны тіянын кодь вӧчӧм шензьӧданаторъяссӧ, сэки эськӧ сэтчӧс олысьясыс важӧн нин бергӧдчисны мыжъяссьыныс, шогалан паськӧм пасьталісны да юрнысӧ пӧимӧн киськалісны. Мыждан лунӧ Тир да Сидон каръяслы лоас кокньыдджык тіянлы дорысь.
Тэ, Капернаум кар, чайтан енэжӧдз кыпӧдчыны? Ад пыдӧсӧдз усян.
Тіянӧс кывзысь Менӧ кывзӧ, тіянӧс ӧтдортысь Менӧ ӧтдортӧ, а Менӧ ӧтдортысь ӧтдортӧ Менӧ Мӧдӧдысьӧс».
Сизимдас велӧдчысь бӧр воисны нимкодясигтыр да шуисны: «Господьӧй, Тэнад нимӧн тшӧктігӧн весиг пеж ловъяс кывзысьӧны миянлысь».
Исус шуис налы: «Ме аддзылі сӧтаналысь чардби моз енэжсянь усьӧмсӧ. Со, Ме сета тіянлы вын талявны змейясӧс, скорпионъясӧс да омӧльыслысь став вынсӧ, и тіянӧс нинӧм оз дойд. Энӧ нимкодясьӧй сыысь, мый пеж ловъяс кывзысьӧны тіянлысь, а нимкодясьӧй сыысь, мый тіянлысь нимъяснытӧ гижӧма енэжас».
Сэки Исус тыри Вежа Ловсянь нимкодьлунӧн. Сійӧ шуис: «Ошка Тэнӧ, Батьӧй, енэжыс да муыс вылын Ыджыдалысьӧс. Тэ дзебин тайӧс сюсь вежӧраясысь да восьтін кага коддьӧмлы.
Татшӧм вӧлі Тэнад бур кӧсйӧмыд, Батьӧй».
Исус висьталіс велӧдчысьясыслы: «Батьӧй ставсӧ сетіс Меным.
Сӧмын Батьыс тӧдӧ, коді Пиыс, да сӧмын Пиыс тӧдӧ, коді Батьыс, и нӧшта сійӧ, кодлы Пиыс кӧсйӧ восьтны».
Сэсся велӧдчысьясыс дінӧ бергӧдчӧмӧн Исус торйӧн шуис налы: «Шудаӧсь найӧ, кодъяслӧн синмыс аддзӧ, мый ті аддзанныд. Висьтала тіянлы: уна пророк да ӧксы кӧсйисны аддзывны, мый ті аддзанныд, но эз аддзывны. Кӧсйисны кывны, мый ті кыланныд, но эз кывлыны».
Индӧдӧ велӧдысьясысь ӧти Исусӧс кыйӧм могысь юаліс: «Велӧдысь, мый меным колӧ вӧчны, мед вичмис меным помтӧм олӧм?»
Исус юаліс сылысь: «Мый гижӧма Индӧдас?
Мый сэтысь лыддян?»
Индӧдӧ велӧдысь вочавидзис: «Радейт ассьыд Господь Ентӧ став сьӧлӧмнад, став олӧмнад, став выннад, став мывкыднад да радейт матыссатӧ асьтӧ моз».
Исус шуис сылы: «Бура вочавидзин.
Вӧч тадзи, сэки кутан овны».
Асьсӧ дорйӧм могысь Индӧдӧ велӧдысь юаліс Исуслысь: «Коді меным матыссаыс?»
Исус вочавидзис тадзи:
«Ӧти морт ветлас Ерусалимысь Ерикон карӧ. Туяс сійӧ веськалас лёк вӧчысьяс киӧ. Найӧ пӧрччӧдасны сійӧс, вирӧдз нӧйтасны да колясны туй вылас кулан выйын.
Сійӧ туйӧдыс мунас поп, казялас нӧйтӧм мортӧс да туй мӧдарас вуджас.
Сы моз вӧчас тшӧтш левит: воас сэтчӧ, аддзас нӧйтӧм мортӧс да вуджас туй мӧдарас.
Сэсся локтас сэтчӧ самарияса морт. Кор аддзас нӧйтӧм мортӧс, сылӧн сьӧлӧмыс нормас. Матыстчас сы дінӧ, дойяссӧ мыськалас винаӧн, мавтас выйӧн да кӧртавлас.
Пуксьӧдас сійӧс аслас осёл вылӧ да ваяс туйморт керкаӧ, сэні тӧждысяс сы вӧсна.
Аскинас самарияса морт сетас туйморт керка кутысьлы кык динар да шуас: “Тӧждысь сы вӧсна.
Оз кӧ тырмы, локтӧм бӧрын содтӧд мынтыся”.
Тэ ногӧн, коді тайӧ куим письыс нӧйтӧм мортыслы матыссаыс?»
Индӧдӧ велӧдысь вочавидзис: «Сылы бур вӧчысьыс».
Исус шуис сылы: «Мун да тшӧтш тадзи вӧч».
Исус велӧдчысьясыскӧд муніс водзӧ да пырис ӧти сиктӧ.
Сэні Марпа нима ань корис Исусӧс гортас. Марпалӧн вӧлі Марья нима чой. Сійӧ пуксис Господь Исуслӧн кок дорӧ да кутіс кывзыны Сылысь висьталӧмсӧ.
Марпа унатор вӧсна котраліс-тӧждысис. Сэсся Исус дінӧ матыстчӧмӧн шуис: «Господьӧй, Тэныд ӧмӧй веськодь, мый чойӧй менӧ ӧтнамӧс колис тӧждысьнысӧ.
Висьтав сылы, мед отсалас меным».
Господь Исус вочавидзис: «Марпа, Марпа, тэ тӧждысян-мырсян унатор вӧсна, а коланаыс сӧмын ӧтитор.
Марья бӧрйис бурджыксӧ, и тайӧс сылысь оз мырддьыны».
11 юр.
Ӧтчыд Исус кевмысис. Кевмысьӧм бӧрас велӧдчысьяс пиысь ӧти шуис Сылы: «Господьӧй, велӧд миянӧс кевмысьны, кыдзи Иоан велӧдіс ассьыс велӧдчысьяссӧ».
Исус шуис налы: «Кевмысиганыд шуӧй: — Батьӧй миян, Тэ енэжъяс вылын олан. Мед лоӧ вежаӧн Тэнад нимыд. Мед воас Тэнад Юралӧмыд. Мед инас Тэнад кӧсйӧмыд му вылын енэжын моз. Сет миянлы быд лун кежлӧ няньнымӧс. И прӧстит миянлысь мыжъяснымӧс, ӧд ми прӧститам миян водзын мыжаясӧс. Эн сет миянлы ылавны, но видз миянӧс омӧльысь».
Исус нӧшта шуис: «Шуам, кодкӧ тіян пиысь вой шӧр кадӧ мунас ёртыс ордӧ да шуас: “Ёртӧй, водзӧсав меным няньтор. Ӧд менам ёртӧй пырис ме ордӧ туй вывсянь, да нинӧмӧн верднысӧ”.
Мӧдыс воча шуас ӧдзӧс сайсяньыс: “Эн дӧзмӧдчы. Ме йигнаси нин, и ныв-пиӧй узьӧны нин. Ог вермы чеччыны няньтӧ сетны”.
Висьтала тіянлы: сійӧ кӧ оз чеччы да оз сет сылы ёртасьӧмыс понда, вӧчас тайӧс ёртыслӧн мырдӧн корӧмыс вӧсна да сетас сылы колана мындасӧ.
Висьтала тіянлы: корӧй, и тіянлы сетасны, корсьӧй, и ті аддзанныд, игӧдчӧй, и тіянлы восьтасны.
Ӧд корысьлы сетӧны, корсьысьлы сюрӧ да игӧдчысьлы восьтӧны.
Эм-ӧ тіян пӧвстын бать, коді пиыслы сетас из, корас кӧ сійӧ нянь?
Сетас-ӧ змейӧс, корас кӧ пиыс чери?
Сетас-ӧ скорпионӧс, корас кӧ пиыс кольк?
Ті лёкӧсь, а сямманныд бурсӧ сетны асланыд ныв-пилы. Дерт нин, енэжвыв Батьныд сетас Вежа Ловсӧ Сылысь корысьяслы».
Исус вӧтліс сёрниттӧм морт пытшкысь пеж лолӧс. Пеж ловлӧн петӧм бӧрын мортыс пондіс сёрнитны.
Йӧзсӧ тайӧ шензьӧдіс, а кодсюрӧ шуисны, Сійӧ пӧ вӧтлалӧ пеж ловъясӧс налӧн Вельзевул юралысь вынӧн.
Мукӧдыс Исусӧс кыйӧм могысь корисны петкӧдлыны енэжсянь индысьпас.
Налысь мӧвпъяссӧ тӧдӧмӧн Исус шуис:
«Ас муын олысьяс кӧ ас костаныс тышкасьӧны, тайӧ муыс кушмас, да керкаясыс сэні киссясны.
Сӧтанаыс кӧ аслыс паныд тышкасьӧ, дыр-ӧ кутчысяс сылӧн ыджыдалӧмыс?
Менӧ ті мыжаланныд пеж ловъясӧс Вельзевул вынӧн вӧтлӧмысь.
Ме кӧ вӧтлала пеж ловъясӧс Вельзевул вынӧн, кутшӧм вынӧн, сідзкӧ, тіян йӧзыд вӧтлалӧны? Найӧ тіянӧс мыждасны.
Ме кӧ Ен вынӧн вӧтлала пеж ловъясӧс, сідзкӧ, Енлӧн Юралӧмыс воис тіянӧдз.
Вына морт кӧ видзӧ керкасӧ шыпуртӧн, сылӧн эмбурыс дзонь коляс.
Но сы вылӧ кӧ уськӧдчас сыысь вынаджык, дерт, вынаджыкыс вермас сійӧс, мырддяс шыпуртсӧ, мый вылӧ сійӧ лача кутіс, да юклас босьтӧм эмбурсӧ.
Коді абу Мекӧд, сійӧ Меным паныд, коді оз чукӧрт Мекӧд, сійӧ разӧдӧ».
«Морт пытшкысь петӧм бӧрын пеж лов шӧйтӧ ватӧминъясті, корсьӧ шойччанін да оз аддзы. Сэки шуӧ: “Бӧр муна важ оланінӧ, кытысь петі”. Локтӧм бӧрас аддзӧ: оланінсӧ чышкӧма-пелькӧдӧма. Сэки мунӧ да босьтӧ аскӧдыс сизим пеж лолӧс, ассьыс на лёкджыкъясӧс, сэсся ставныс найӧ овмӧдчӧны важ оланінас. Тайӧ мортыслы воддза дорсьыс нӧшта на лёкджык лоӧ».
Исуслӧн сёрнитігӧн йӧз чукӧрысь ӧти ань гораа шуис: «Шуда тэнӧ кынӧмас новлӧдлысь да морӧснас нёньӧдысь.»
Исус шуис: «Шудаӧсь Енлысь Кывсӧ кылысьяс да Ен Кыв серти олысьяс.»
Йӧзыс чукӧрмис пыр унджык и унджык. Исус висьталіс налы: «Ӧнія олысьяс — лёкас сетчӧм йӧз. Найӧ кӧсйӧны аддзывны индысьпас, но Иона пророк пасысь кындзи оз ло налы мӧдыс.
Ниневия карын олысьяслы индысьпасӧн вӧлі Иона, ӧнія олысьяслы — Морт Пи.
Лунвыв муысь ӧксы-ань сувтас Мыждан лунӧ ӧнія олысьяскӧд да мыжалас найӧс. Ӧд сійӧ му помсяньыс воліс кывзыны Соломонлысь мывкыд сёрнисӧ. Тані Соломон дорысь ыджыдджык.
Ниневия карын олысьяс сувтасны Мыждан лунӧ ӧнія олысьяскӧд да мыжаласны найӧс. Ӧд Ионалӧн юӧртӧм бӧрын ниневияса йӧз бергӧдчисны асланыс мыжъясысь.
Тані Иона дорысь ыджыдджык».
«Ӧзтӧм битӧ оз дзебны да оз пуктыны доз улӧ. Сійӧс пуктӧны бикок вылӧ, медым пырысьяс аддзисны югыдсӧ. Синмыд — вир-яйтӧ югдӧдысь. Синмыд кӧ бур, став вир-яйыд югыдын. Синмыд кӧ лёк, вир-яйыд пемыдын.
Видзӧд, мед югыдыс тэ пытшкын эз вӧв пемыд.
Тэнад кӧ став вир-яйыд югыдын, и весиг ӧти юкӧн абу пемыдын, сэки тэ ставнас пондан югъявны югдӧдысь би моз».
Кор Исус помаліс сёрнисӧ, ӧти фарисей корис Сійӧс гортас пажнайтны.
Исус локтіс фарисей ордӧ да пуксис сёйны.
Исуслӧн мыссьытӧг сёйны пуксьӧмыс шензьӧдіс фарисейӧс.
Господь шуис сылы: «Ті, фарисейяс, тасьті-дозмуклысь ортсысӧ весаланныд, а пытшкӧсныд горшлунӧн да лёкӧн тырӧма.
Вежӧртӧмъяс.
Эз-ӧ ортсысӧ вӧчысьыс вӧч тшӧтш пытшкӧссӧ?
Сетӧй корысьяслы, мый дозмук пытшкас. Сэки ставыс тіян лоӧ сӧстӧм.
Курыд шог тіянлы, фарисейяс. Ті сетанныд исань турунысь, рута корйысь да став пуктасысь дасӧд юкӧнсӧ, а веськыда мыждӧмсӧ да Енмӧс радейтӧмсӧ бокӧ вештанныд. Тайӧс колӧ вӧчны да мукӧдторсӧ оз ков вунӧдны.
Курыд шог тіянлы, фарисейяс. Ті радейтанныд синагогаын водзын пукавны да йӧзаинын чолӧмалӧмъяс кывзыны.
Курыд шог тіянлы, Индӧдӧ велӧдысьяс да фарисейяс. Кык бана шаньгаяс. Ті пасйытӧм шойгуяс кодьӧсь, йӧзыс тӧдтӧгныс ветлӧны на вывті».
Сэки Индӧдӧ велӧдысьясысь ӧти шуис Сылы: «Велӧдысь, татшӧм сёрнинад тэ дойдан тшӧтш миянӧс».
Исус воча шуис: «Курыд шог тшӧтш тіянлы, Индӧдӧ велӧдысьяс. Ті пуктанныд йӧзлы пельпом вылас нуны вермытӧм нӧбъяс, но асьныд весиг чунь помнытӧ онӧ инмӧдлӧй сэтчӧ.
Курыд шог тіянлы. Ті сувтӧданныд изъяс пророкъяслы, кодъясӧс батьясныд виисны. Тайӧн ті петкӧдланныд, мый ӧтувтчанныд батьясныдлӧн уджъясӧ: найӧ виисны пророкъясӧс, а ті сійӧ пророкъясыслы изъяс сувтӧданныд.
Та вӧсна Енлӧн мывкыдлуныс висьталӧ: “Мӧдӧда на дінӧ пророкъясӧс да апостолъясӧс. Ӧтиясӧс найӧ виасны, мӧдъясӧс вӧтласны”. Тадзи ӧнія олысьяслы ковмас мынтысьны став пророкыслӧн вирысь, кодӧс кисьтӧма му пуксьӧмсяньыс: Авель вирсянь Закар вирӧдз, кодӧс виисны висьпуктанін да крам костын.
Висьтала тіянлы: ӧнія олысьяслы ковмас мынтысьны таысь.
Курыд шог тіянлы, Индӧдӧ велӧдысьяс. Ті босьтінныд тӧдӧмлуныслысь восьтансӧ. Асьныд энӧ пырӧй и пырны кӧсйысьяслы потшинныд туйсӧ».
Исуслӧн сёрнитігӧн Индӧдӧ велӧдысьяс да фарисейяс пондісны ёна топӧдны Сійӧс юалӧмъясӧн, найӧ зілисны крукыштны Сійӧс, корсисны помка мыжавны Сійӧс.
12 юр.
Сэккості чукӧрмис уна сюрс морт, найӧ весиг дзескӧдісны ӧта-мӧднысӧ. Исус медводз шыасис велӧдчысьяс дінас: «Видзчысьӧй фарисей няньшомысь, налӧн кодь кык бана оласногысь.
Став дзебӧмаыс тыдовтчас да став гусяыс йӧзасяс.
Пемыдын шуӧмтӧ кыласны югыдын, керка пытшкын пельӧ вашкӧдӧмтӧ юӧртасны керка вывсянь».
«Висьтала тіянлы, менам ёртъясӧй: энӧ полӧй вир-яйтӧ виысьясысь, унджыксӧ найӧ сэсся вӧчны оз вермыны.
Висьтала, кодысь колӧ повнысӧ. Полӧй Сыысь, коді виӧм бӧрас вермӧ шыбитны куслытӧм биӧ. Шуа тіянлы: Сыысь полӧй.
Оз-ӧ сӧмын кык урысь вузавны вит пышкайӧс?
На пиысь весиг ӧтиӧс абу вунӧдӧма Енмыс.
А тіянлысь став юрсинытӧ лыддьӧма.
Сідзкӧ, энӧ полӧй, ті ӧд донаджыкӧсь пышкайясысь».
«Висьтала тіянлы: коді оз яндысь Меысь йӧз водзын, сыысь Морт Пи оз яндысь Енлӧн анделъяс водзын.
Коді соссяс Меысь йӧз водзын, сыысь Ме сосся Енлӧн анделъяс водзын.
Лёкӧдан кӧ Морт Пиӧс, лоан прӧститӧма.
Омӧльтан кӧ Вежа Лолӧс, он ло прӧститӧма.
Кор тіянӧс нуӧдасны синагогаясӧ да юралысь-веськӧдлысьяс водзӧ, энӧ майшасьӧй, кыдзи дорйыны асьнытӧ да мый шуны. Сійӧ кадас Вежа Лов туйдӧдас тіянӧс, мый колӧ шунысӧ».
Йӧз чукӧрысь ӧти морт шуис Исуслы: «Велӧдысь, шу вокӧйлы, мед бать-мамсянь кольӧм овмӧссӧ юкас мекӧд».
Исус шуис: «Коді сувтӧдіс Менӧ ёрдысьнас, мед тіянлысь овмӧснытӧ юкны?»
Сэсся шуис ставныслы: «Видзчысьӧй горшасьӧмысь, ӧд мортыдлӧн олӧмыс абу сылӧн ыджыд озырлун сайын».
Исус висьталіс налы велӧданвисьт:
«Озыр мортлӧн муыс бур быдтас сетас. Сійӧ мӧвпыштас: “Мый вӧчны? Быдтасӧй видзанінъясӧ оз тӧр”.
Сэсся шуас: “Косяла йӧртӧдъясӧс да вӧча гырысьджыкъясӧс, чукӧрта сэтчӧ став няньӧс да ассьым став эмбурӧс. Сэки шуа аслым: уна буртор уна во кежлӧ чӧжӧма тэнад — шойччы, сёй, ю да гажӧдчы.
”А Ен шуас сылы: “Вежӧртӧмӧй, тавой босьтасны тэнсьыд ловтӧ.
Кодлы коляс тэнад чӧжӧмаыд?”
Тадзи лоӧ быдӧнкӧд, коді аслыс чукӧртӧ озырлунсӧ, а оз Енсянь озырмӧдчы».
Исус шуис велӧдчысьясыслы: «Та вӧсна шуа тіянлы: энӧ майшасьӧй сёян да паськӧм вӧсна. Олӧмныд ӧд донаджык сёянысь да вир-яйныд паськӧмысь.
Видзӧдлӧй кырнышъяс вылӧ: найӧ оз кӧдзны, оз вундыны, налӧн абу йӧртӧдъяс, абу эмбур видзанінъяс. Енмыс вердӧ найӧс.
Кымын пӧв ті донаджыкӧсь лэбачьясысь.
Вермас-ӧ тіян пиысь кодкӧ зільӧмӧн-тӧждысьӧмӧн нюжӧдыштны ассьыс олан нэмсӧ?
Ті кӧ весиг ичӧтикторсӧ онӧ вермӧй, мыйла мукӧдторйыс вӧсна майшасянныд?
Видзӧдӧй дзоридзьяслӧн быдмӧм вылӧ: найӧ оз мырсьыны, оз печкыны. Висьтала тіянлы: ачыс Соломон став озырлун дырйиыс эз пасьтасьлы весиг ӧти татшӧм дзоридзысь мичаджыка.
Енмыс кӧ тадзи пасьтӧдӧ видзвыв турунӧс, коді талун быдмӧ, а аски шыбитасны пачӧ, оз ӧмӧй Сійӧ пасьтӧд тіянӧс, этша эскысьяс.
Энӧ корсьысьӧй, мый сёйны-юны. Энӧ майшасьӧй та вӧсна. Тайӧ ставыс майшӧдлӧ ентӧдтӧмъясӧс.
Но тіян Батьныд тӧдӧ, мый тайӧ колӧ тіянлы. Корсьӧй Енлысь Юралӧмсӧ, сэки тіян ставыс тайӧ лоӧ.
Эн пов, ичӧт чукӧр.
Ӧд тіян Батьныд шуис сетны тіянлы Юралӧм.
Вузалӧй ассьыныд овмӧстӧ, сьӧмсӧ сетӧй гӧльяслы.
Лӧсьӧдӧй аслыныд важмытӧм видзанінъяс да чӧжӧй бырлытӧм озырлун енэжӧ. Сэтчӧ гусясьысь оз пыр да сэні воз оз сёй. Кӧні озырлунныд, сэні лоӧ и сьӧлӧмныд».
«Вӧнясьӧй да ӧзтӧй бинытӧ.
Лоӧй кесйӧгъяс кодьӧсь, кодъяс виччысьӧны асланыс ыджыдлысь кӧлысь вылысь локтӧмсӧ. Воӧм бӧрас ыджыдныс тотшкӧдчас ӧдзӧсас, да найӧ пырысь-пыр восьтасны.
Кесйӧгъяс шудаӧсь, ыджыдыс кӧ гортас воигӧн аддзас, мый найӧ виччысьӧны сійӧс. Веськыда висьтала тіянлы: ыджыдыс сэки вӧнясяс, корас кесйӧгъяссӧ пызан сайӧ да ачыс пондас кесъявны налы.
Ыджыдыс кӧ воас весиг вой шӧрнас либӧ вой шӧр бӧрас да аддзас, мый кесйӧгъясыс виччысьӧны сійӧс — тайӧ кесйӧгъясыс шудаӧсь.
Ті тӧданныд: керка кутысь кӧ тӧдіс гусясьысьлысь локтан кадсӧ, сэки эськӧ эз узь да эз лэдз керкаас.
Лоӧй дасьӧсь, ӧд Морт Пи локтас виччысьтӧг».
Петыр юаліс: «Господьӧй, тайӧ велӧданвисьтсӧ висьталан миянлы али быдӧнлы?»
Господь шуис: «Лоӧй эскана да мывкыда кесйӧг кодьӧсь. Татшӧмсӧ ыджыдыс пуктас веськӧдлыны мукӧд кесйӧгъясӧн, медым ас кадӧ налы сёян-юан сетны.
Кесйӧгыс шуда, ыджыдыс кӧ гортас воигӧн аддзас сійӧс тадзи вӧчӧмӧн.
Збыльысь висьтала тіянлы: ыджыдыс пуктас сійӧс веськӧдлыны став аслас овмӧсӧн.
Но кесйӧгыс вермас мӧвпыштны: “Ыджыдӧй дыр на оз лок”. Сійӧ пондас нӧйтны мукӧд кесйӧгъясӧс, сёйны-юны да кодавны. Но виччысьтӧм лунӧ, лӧсявтӧм кадӧ кесйӧглӧн ыджыдыс воас. Сійӧ кералас кесйӧгсӧ да шыбитас сійӧс эскытӧмъяс дінӧ.
Кесйӧг кӧ тӧдӧ ыджыдыслысь кӧсйӧмсӧ да оз дасьтысь-вӧч сы ног, сійӧс чорыда нӧйтасны. А тӧдтӧг кӧ вӧчас мыжсӧ, сійӧс нӧйтасны этшаджык.
Кодлы уна сетӧма, сылысь уна корасны. Кодлы уна эскӧма, сылысь уна юаласны».
«Ме локті би вайны му вылӧ да ёна кӧсъя, медым сійӧ ӧзйис нин.
Пыртчӧмӧн колӧ Меным пыртчыны, и Ме ёна сьӧкыдала, кытчӧдз тайӧ оз ло.
Ті ног, Ме локті вайны му вылӧ лӧнь олӧм?
Эг. Ме локті торйӧдны йӧзсӧ.
Ӧнісянь ӧти керкаын вит олысь ӧта-мӧдныслы паныд сувтасны: куимыс — кыкыслы паныд, кыкыс — куимыслы.
Батьыс паныд сувтас пиыслы, пиыс — батьыслы, мамыс — нылыслы, нылыс — мамыслы, энькаыс — моньыслы, моньыс — энькаыслы».
Исус висьталіс йӧзыслы: «Рытыввывсянь кыпӧдчысь кымӧр аддзигӧн ті шуанныд: “Зэрмас”. Тайӧ тадзи. Лун тӧв кӧ петас, шуанныд: “Пӧжны кутас”. Тадзи и эм.
Кык бана шаньгаяс. Енэжлысь да мулысь чужӧмбансӧ кужанныд тӧдмавны, мыйла ӧнія кадсӧ онӧ вермӧй тӧдны?»
«Мыйла асьныд онӧ вермӧй гӧгӧрвоны, кыдзи колӧ вӧчнысӧ?
Ковмас кӧ мунны ёрдӧ, зіль бурасьны тэнӧ мыжалыськӧд ёрдӧ вотӧдз на. Он кӧ вӧч тадзи, сійӧ нуӧдас тэнӧ ёрдысь дінӧ, ёрдысь сетас тэнӧ видзысьлы, а видзысь йӧртас тэнӧ дзескыдінӧ.
Висьтала тэныд: бӧръя сьӧмтӧ сеттӧдз он пет сэтысь».
13 юр.
Сэки матыстчисны Исус дінӧ кодсюрӧ да висьталісны галилеясаясӧс крамын виӧм йылысь. Найӧс виӧмаӧсь вись вайиганыс Пилат тшӧктӧм серти, да налӧн вирыс сорласьӧма вись виркӧд.
Исус шуис: «Ті ног, найӧ вӧліны мыжаджыкӧсь мукӧд галилеясаяс дорысь, тадзи кӧ кулісны?
Эз. Шуа тіянлы: на моз ті ставныд куланныд, онӧ кӧ бергӧдчӧй мыжъяссьыныд.
Мый шуанныд дас кӧкъямысыс йылысь, кодъяс вылӧ Силоамын уси башня да лямӧдіс кувтӧдзныс? Вӧліны-ӧ найӧ мыжаджыкӧсь Ерусалимын мукӧд олысьяс дорысь?
Эз. Шуа тіянлы: на моз ті ставныд куланныд, онӧ кӧ бергӧдчӧй мыжъяссьыныд».
Исус висьталіс татшӧм велӧданвисьт: «Ӧти мортлӧн виноград йӧрас вӧлі быдмӧ инжир пу. Сійӧ локтас инжирла, но вотӧсыс оз сюр. Сэки сійӧ шуас виноград йӧрын уджалысьлы: “Куим во чӧж нин виччыся тайӧ инжир пуыслысь вотӧссӧ, но аддза, мый весьшӧрӧ. Керышт сійӧс, ӧд сӧмын муыслысь вынсӧ босьтӧ”.
Уджалысь вочавидзас: “Ыджыдӧй, коль на сійӧс тайӧ во кежлас. Ме сійӧс мудъя да мусӧ куйӧдала. Локтан вонас кӧ оз вай вотӧссӧ, сэки керыштан сійӧс”».
Шойччан лунӧ Исус велӧдіс синагогаын.
Сэні вӧлі мышкыртчӧм, веськӧдчыны вермытӧм ань. Дас кӧкъямыс во чӧж пеж лов кутӧма сійӧс тайӧ висьӧмнас.
Исус аддзис аньӧс, корис сійӧс да шуис: «Аньӧй, тэ мездмин висьӧмсьыд».
Исус пуктыліс кисӧ ань вылӧ, и сійӧ дзик пыр веськӧдчис да пондіс ошкыны Енмӧс.
Шойччан лунӧ висьысьӧс бурдӧдӧмыс скӧрмӧдіс синагогаса юралысьӧс. Сійӧ шуис йӧзыслы: «Вежонас квайт лун сетӧма уджавнысӧ, сэки локтӧй бурдӧдчынытӧ, а энӧ шойччан лунӧ».
Господь воча шуис: «Кык бана шаньга. Шойччан лунӧ онӧ ӧмӧй разьлӧй лясни дорысь ӧш-осёлнытӧ да онӧ ӧмӧй нуӧдлӧй найӧс юктавны?
Ӧвраамлысь тайӧ нывсӧ сӧтана кӧрталӧмӧн кутіс дас кӧкъямыс во чӧж. Эз ӧмӧй ков мездыны сійӧс шойччан лунӧ?»
Исуслӧн кывъясысь яналісны Сылы паныд мунысьяс. Йӧзыс, мӧдарӧ, нимкодясисны Сылӧн чуймӧдана уджъясысь.
Сэсся Исус шуис: «Кутшӧм Енлӧн Юралӧмыс?
Мыйкӧд ӧткодяла сійӧс?
Сійӧ муӧ кӧдзӧм горчица тусь кодь. Сійӧ быдмӧ да лоӧ ыджыд пу кодь, весиг енэжвыв лэбачьяс поздысьӧны вожъясас».
Исус бара шуис: «Мыйкӧд ӧткодяла Енлысь Юралӧмсӧ?
Сійӧ няньшом кодь. Ань гудралас сэтчӧ куим шомӧс тыр пызь, кад мысти няньыс ловзяс».
Исус мӧдӧдчис Ерусалимӧ. Сикт-каръяс пыр мунігӧн Сійӧ велӧдіс йӧзсӧ.
Кодкӧ юаліс Исуслысь: «Господьӧй, этшаӧн ӧмӧй мездмасны?»
Исус вочавидзис: «Став вынтӧ пуктӧй, медым пырны векньыд ӧдзӧсӧд. Висьтала тіянлы: унаӧн зілясны пырны, сӧмын оз вермыны.
Воас кад, кор керка кутысь чеччас да йигналас ӧдзӧссӧ. Ывласяньыс ӧдзӧсӧ игӧдчӧмӧн понданныд вӧзйысьны: “Ыджыдӧй, Ыджыдӧй, восьт миянлы.” Сійӧ вочавидзас: “Кодъяс ті? Ме ог тӧд тіянӧс”.
Ті шуанныд: “Ми тэкӧд ӧтлаын сёйлім-юлім. Тэ велӧдлін миян каръясын”.
Сійӧ шуас: “Висьтала тіянлы: ог тӧд тіянӧс. Кытысьӧсь ті? Мунӧй Ме дорысь, ставныд ті лёк вӧчысьяс.”
Кор ті аддзанныд Енлӧн Юраланінысь Ӧвраамӧс, Исаакӧс, Яковӧс да став пророксӧ, а асьнытӧ ортсыас шыбитӧмаӧн, сэки лоӧ бӧрдӧм да пинь йирӧм.
Асыввылысь да рытыввылысь, войвылысь да лунвылысь локталасны Енлӧн Юраланінӧ да пуксясны пызан сайӧ.
Сэки бӧръяяс лоӧны воддзаӧн, а воддзаяс — бӧръяӧн».
Сійӧ лунӧ фарисейясысь кодсюрӧ локтісны да шуисны Исуслы: «Тэныд колӧ мунны татысь, Ирӧд кӧсйӧ вины Тэнӧ».
Исус воча шуис налы: «Мунӧй, висьталӧй тайӧ ручыслы: талун да аски Ме вӧтлала пеж ловъясӧс да бурдӧда йӧзӧс, а коймӧд луннас эштӧда уджӧс. Но талун, аски да аскомысь Меным колӧ водзӧ мунны, ӧд оз овлы, медым пророкӧс виисны Ерусалимысь кындзи мӧдлаын.
Ерусалим, Ерусалим. Пророкъясӧс виалысь да тэ дінӧ ыстӧмаясӧс изъялысь.
Кымынысь Ме кӧсйи чукӧртны тэнсьыд ныв-питӧ, кыдзи лэбач чукӧртӧ ассьыс пиянсӧ борд улас, но ті энӧ кӧсйӧй.
Со, тіян крамныд тыртӧммас.
Шуа тіянлы: онӧ аддзӧй Менӧ тайӧ кывъяссӧ шутӧдз: “Бурсиӧма Господь нимӧн Локтысьӧс”».
14 юр.
Шойччан лунӧ Исус муніс фарисейяслӧн ӧти юралысь ордӧ сёйны. Сэні ставӧн сюся видзӧдісны Исус бӧрся.
Сы дінӧ локтіс ва пыкталӧмӧн висьысь морт.
Исус юаліс Индӧдӧ велӧдысьяслысь да фарисейяслысь: «Позьӧ-ӧ шойччан лунӧ бурдӧднысӧ?»
Найӧ чӧв олісны.
Исус инмӧдчылӧмӧн бурдӧдіс висьысьӧс да ыстіс сійӧс гортас.
Исус бара юаліс: «Шойччан лунӧ кӧ тіян осёлныд либӧ ӧшныд усяс юкмӧсӧ, онӧ ӧмӧй пырысь-пыр лэптӧй сійӧс сэтысь?»
Найӧ нинӧм эз вермыны воча шуны.
Исус казяліс, мый пызан сайӧ пуксигӧн корӧмаяс корсисны бурджыкинсӧ. Сэки Сійӧ шыасис на дінӧ велӧданвисьтӧн: «Корасны кӧ тэнӧ кӧлысь вылӧ, эн пуксьы бурджыкинас. Сэні вермас лоны тшӧтш кодкӧ, коді корӧмаяс пиысь пыдди пуктанаджык тэысь. Сэки кӧлысь вылӧ корысь матыстчас тэ дінӧ да шуас: “Тайӧ мортыс мед пуксяс татчӧ”. Сэки тэ яналан, ӧд тэныд ковмас вуджны пызан помас.
Кор тэ локтан кӧлысь вылӧ, пуксьы пызан помланьыс. Тэнӧ корысь кӧ матыстчас да шуас: “Ёртӧй, пуксьы матӧджык”, сэки тэ лоан корӧмаяс водзын пыдди пуктӧмаӧн.
Ӧд асьсӧ вылӧ пуктысьӧс лэдзасны, асьсӧ улӧ пуктысьӧс кыпӧдасны».
Сэсся Исус шуис Сійӧс корысьлы: «Лӧсьӧдан кӧ пызан, эн корав ёртъястӧ, вокъястӧ, рӧдвужтӧ, орччӧн озыра олысьястӧ. Ӧд найӧ сэсся коркӧ асьныс корасны тэнӧ, тадзи мынтысясны тэныд.
Мӧдарӧ, лӧсьӧдан кӧ пызан, кор гӧльясӧс, доймалӧмаясӧс, коктӧмъясӧс да синтӧмъясӧс. Тэ шуда лоан, ӧд найӧ оз вермыны мынтысьнысӧ тэныд. Тэныд лоӧ мынтӧма веськыда олысьяслӧн ловзьӧм дырйи».
Тайӧс кылӧм бӧрын сёйысьясысь ӧти шуис: «Шуда Енлӧн Юраланінын пызан сайӧ пуксьысь.»
Исус воча шуис: «Ӧти морт ыджыд пызан лӧсьӧдас да унаӧс корас. Пызан сайӧ пуксян кад матыстчигӧн сійӧ мӧдӧдас ассьыс кесйӧгсӧ висьтавны корӧмаяслы: “Локтӧй, ставыс нин дась”.
Водзвыв сёрнитчӧмӧн моз ставныс шуасны, огӧ пӧ вермӧй локнысӧ.
Ӧти шуас: “Ме му ньӧби, колӧ ветлыны видзӧдлыны сійӧс. Эн дӧзмы, ог эшты”.
Мӧд шуас: “Дас ӧш ньӧби, муна видлыны найӧс. Эн дӧзмы”.
Коймӧд шуас: “Ме гӧтраси да, ог вермы локнысӧ”.
Кесйӧг бӧр локтас да висьталас та йылысь ыджыдыслы.
Сійӧ ёна скӧрмас да шуас кесйӧгыслы: “Мун дзик пыр туйвежъясӧ да йӧзаинъясӧ, вайӧд татчӧ гӧльясӧс, доймалӧмаясӧс, коктӧмъясӧс да синтӧмъясӧс”.
Локтӧм бӧрас кесйӧг шуас: “Ыджыдӧй, тэнсьыд тшӧктӧмтӧ вӧчи, но пызан саяд эм на пуксяніныс”.
Мӧдыс вочавидзас: “Пет карсьыс, ветлы туйяс-потшӧсъяс пӧлӧн да тшӧкты локнысӧ, медым менам керкаӧй вӧлі тыр.
Висьтала тіянлы: воддза корӧмаясысь весиг ӧти морт оз видлы менсьым пызанвыв сёянӧс”.
Унаӧс корӧма, но этшаӧс бӧрйӧма». Уна йӧз муніс Исускӧд. Налань бергӧдчылӧмӧн Сійӧ шуис:
«Ме дінӧ локтысьлы кӧ бать-мамыс, гӧтырыс, ныв-пиыс, чой-вокыс да аслас олӧмыс Ме дорысь мусаджык, сійӧ оз вермы лоны Менам велӧдчысьӧн. Коді оз ну ассьыс крестсӧ да оз лок Ме бӧрся, сійӧ оз вермы лоны Менам велӧдчысьӧн.
Кодкӧ тіян пиысь кӧ мӧвпыштас ыджыд керка лэптыны, оз-ӧ сійӧ водзджык пуксьы да артышт, тырмас-ӧ сылӧн сьӧмыс керкасӧ лэптыны. Вермас артмыны, мый подувсӧ пуктас, а помавнысӧ оз вермы. Сэки пондасны серавны сійӧс: “Видзӧдлӧй, лэптынысӧ босьтчис, а помавнысӧ эз вермы.”
Ӧксылы кӧ ковмас тышӧ петны мӧд ӧксылы паныд, оз-ӧ сійӧ водзджык пуксьы да бура мӧвпышт, вермас-ӧ сійӧ дас сюрса тышкайӧзнас водзсасьны кызь сюрса тышкайӧзкӧд. Оз кӧ вермы, сійӧ мӧдӧдас сёрнитчысьясӧс паныд локтысь ӧксы дінӧ, мед бурасьны сыкӧд.
Ті кӧ онӧ кольӧй ставсӧ, мый тіян эм, онӧ вермӧй лоны Менам велӧдчысьясӧн».
«Солыд — буртор.
Но солыс кӧ воштас ассьыс вынсӧ, кыдзи сійӧс бӧр соланас вӧчан?
Сійӧс весиг оз шогмы муӧ сюйны, сӧмын кольӧ шыбитны.
Кодлӧн эм пель, мед кылӧ.»
15 юр.
Вот перйысьяс мукӧд мыжаяскӧд локтісны Исус дінӧ кывзыны Сійӧс.
Фарисейяс да Индӧдӧ велӧдысьяс шуасисны: «Сійӧ ветлӧ мыжаяскӧд, весиг ӧтлаын сёйӧ накӧд».
Сэки Исус висьталіс налы велӧданвисьт: «Мый вӧчас морт, вошас кӧ сылӧн сё ыжсьыс ӧти? Оз-ӧ сійӧ коль ӧкмысдас ӧкмыссӧ овтӧминӧ да мун корсьны вошӧмасӧ?
Аддзӧм бӧрас долыдпырысь босьтас ыжсӧ пельпом вылас. Локтас гортас, корас ёртъяссӧ, орччӧн олысьяссӧ да шуас налы: “Нимкодясьӧй. Ме аддзи ассьым вошлӧм ыжӧс”.
Висьтала тіянлы: енэжын нимкодясьӧмыс ӧти морт вӧсна, коді бергӧдчис мыжъяссьыс, лоӧ ёна ыджыдджык ӧкмысдас ӧкмыс веськыда олысь дорысь, кодъяслӧн абу коланлуныс бергӧдчыны мыжъяссьыс».
«Ань кӧ воштас дас эзысь сьӧмсьыс ӧтикӧс, оз-ӧ биасьӧмӧн сійӧ кут чышкыны джоджсӧ да корсьны вошӧмторсӧ. Аддзӧм бӧрас корас нывъёртъяссӧ, орччӧн олысь аньяссӧ да шуас налы: “Нимкодясьӧй. Ме аддзи воштылӧм сьӧмӧс”.
Висьтала тіянлы: тадзи тшӧтш нимкодясьӧны Енлӧн анделъяс мыжъяссьыс бергӧдчысь ӧти морт вӧсна».
Нӧшта Исус висьталіс: «Ӧти мортлӧн вӧлі кык пи.
Ичӧтыс шуас батьыслы: “Батьӧй, сет овмӧссьыд менсьым пайӧс”.
Батьыс юкас овмӧссӧ кыкнан пиыслы.
Кымынкӧ лун мысти ичӧт пиыс став аслас овмӧснас мунас ылі муӧ, сэні кокньыд оласногысла лотас ставсӧ.
Сэки тайӧ муас пуксяс тшыг олӧм. Тшыглуныс топӧдас сійӧс. Сійӧ медасяс сэтчӧс ӧти морт дінӧ видзны порсьяссӧ. Сійӧ дась вӧлі пӧткӧдчыны быдмӧгӧн, мый сёйлісны порсьяс, но весиг тайӧ сылы эз вичмыв.
Ас садяс воӧм бӧрын сійӧ шуас: “Батьӧлӧн меда йӧзыс пӧттӧдзныс сёйӧны, а ме тані тшыглы кула.
Чечча да муна бать дінӧ, шуа сылы: Батьӧй, ме мыжа енэжыс водзын да тэ водзын. Ме ог шогмы шусьыны тэнад пиӧн, босьт менӧ медалӧм уджалысь пыдди”.
Сійӧ чеччас да мӧдӧдчас батьыс ордӧ.
Ылісянь на батьыс аддзас писӧ, да сылӧн сьӧлӧмыс нормас. Сійӧ котӧрӧн уськӧдчас пиыслы паныд, сывйыштас да окалас писӧ.
Пиыс шуас: “Батьӧй, ме мыжа енэжыс водзын да тэ водзын. Ме ог шогмы шусьыны тэнад пиӧн”.
Батьыс тшӧктас кесйӧгъясыслы: “Вайӧй медбур паськӧмсӧ да пасьтӧдӧй менсьым пиӧс, чунькытшӧдӧй да кӧмӧдӧй сійӧс. Начкӧй тшӧгӧдӧм кукань.
Пондам сёйны-гажӧдчыны талун.
Менам пиӧй вӧлі кулӧма, а ӧні ловъя, вӧлі вошӧма, а ӧні сюрис”.
Ставныс пондасны гажӧдчыны.
Ыджыд пиыс вӧлі видз вылын. Керка дорас матыстчигӧн сійӧ кылас сьылӧм-гажӧдчӧмсӧ, чукӧстас ӧти кесйӧгӧс да юалас: “Мый тані?”
Сійӧ вочавидзас: “Тэнад вокыд бӧр локтіс. Батьыд тшӧктіс начкыны тшӧгӧдӧм куканьӧс, ӧд вокыд ловйӧн воис”.
Ыджыд пиыс ёна скӧрмас, весиг оз пыр керкаас.
Батьыс петас корны сійӧс.
Пиыс шуас батьыслы: “Кымын во ме тэныд уджала, тэнсьыд пыр кывзыся, но тэ весиг кӧзапитӧ эн сет меным, медым ёртъясӧйкӧд гажӧдчыштны.
Тэнад тайӧ пиыд лотіс став овмӧссӧ кырсалысь аньяскӧд. Ӧні локтіс, да тшӧгӧдӧм куканьӧс начкин сылы”.
Батьыс шуас: “Пиӧй, тэ ӧд пыр вӧлін мекӧд. Ставыс мый менам — тэнад. Вокыд вӧсна колӧ гажӧдчыны-нимкодясьны, ӧд сійӧ вӧлі кулӧма, а ӧні ловъя, вӧлі вошӧма, а ӧні сюрис”».
16 юр.
Исус висьталіс велӧдчысьясыслы:
«Ӧти озыр мортлӧн вӧлі овмӧс нуӧдысь. Озыр мортлы норасясны, овмӧс нуӧдысьыд пӧ куштӧ овмӧстӧ.
Сійӧ корас овмӧс нуӧдысьсӧ ас дінас да шуас сылы: “Тӧдан-ӧ, мый кывсьӧ тэ йылысь?
Петкӧдлы удж нуӧдӧмтӧ, талунсянь тэ он кут веськӧдлыны менам овмӧсӧн”.
Овмӧс нуӧдысь кутас мӧвпавны: “Ыджыдӧй вӧтлӧ менӧ. Мый вӧчны?
Му бергӧдлыны ог вермы, корысьӧдз усьны яндзим.
Со мый колӧ вӧчны, медым мукӧдыс сибӧдасны менӧ асланыс керкаӧ”.
Сійӧ корас ӧти бӧрся мӧдӧс ыджыдыслы уджйӧзаясӧс. Ӧтилысь юалас: “Уна-ӧ тэ уджйӧза?”
Сійӧ вочавидзас: “Сё пельса вый”.
Овмӧс нуӧдысь шуас: “Тані тэнад уджйӧз гижӧдыд. Пуксьы да гиж ветымынӧс”.
Сэсся мӧдлысь юалас: “Тэ уна-ӧ уджйӧза?”
Сійӧ вочавидзас: “Сё мешӧк шобді”.
Овмӧс нуӧдысь шуас: “Тані уджйӧз гижӧдыд. Гиж кӧкъямысдасӧс”.
Ыджыдыс ошкыштас пӧръялысь овмӧс нуӧдысьӧс сылӧн сюсьлунысь. Тайӧ муюгыдса пияныс ас костаныс сюсьджыкӧсь югыдыслӧн пиян дорысь.
Висьтала тіянлы: лӧсьӧдӧй аслыныд ёртъяснытӧ мувывса ылӧг озырлун отсӧгӧн, медым озырлунныд бырӧм бӧрын найӧ сибӧдасны тіянӧс бырлытӧм оланінӧ».
«Коді эскана ичӧтас, сійӧ лоӧ эскана ыджыдас. Ичӧтас ылӧдлысь ылӧдлас и ыджыдас.
Ті кӧ лёка веськӧдланныд мувывса ылӧг озырлуннас, сетасны-ӧ тіянлы збыльысь донасӧ?
Ті кӧ лёка веськӧдланныд йӧз озырлунӧн, сетасны-ӧ тіянлы ассьыныд?
Кесйӧг оз вермы кесъявны кык ыджыдлы. Ӧтисӧ кӧ радейтӧ, мӧдсӧ мустӧмтӧ. Ӧтисӧ кӧ пыдди пуктӧ, мӧдсӧ увтыртӧ.
Ті онӧ вермӧй кесъявны Енлы, кесъяланныд кӧ озырлунлы».
Тайӧс кывлісны фарисейяс. Найӧ сералісны Исусӧс, ӧд налы вӧлі муса озырлуныс.
Исус шуис налы: «Йӧз водзын ті петкӧдланныд асьнытӧ веськыда олысьясӧн, но Енмыс тӧдӧ тіянлысь сьӧлӧмнытӧ. Мый йӧзыс донъялӧны вылӧ, сійӧ Енмыслы зывӧк».
«Индӧдыс да пророкъяс вӧліны Иоанӧдз. Ӧні юӧртӧны Енлӧн Юралӧм йылысь, да быдӧн ёна зільӧ пырны сэтчӧ.
Индӧдысь ӧти чуттор вошӧм дорысь енэжыс да муыс ӧдйӧджык бырас.
Гӧтырсӧ эновтысь да мӧдкӧд гӧтрасьысь гозъя олӧм пежалӧ. Юксьӧм аньӧс гӧтырӧ босьтысь тшӧтш пежалӧ».
«Вӧлі озыр морт. Сійӧ новліс дона мича паськӧм да быд лун лышкыда гажӧдчис.
Лазар нима корысь куйліс сылӧн дзиръя дорын да виччысис, оз-ӧ вичмы сылы озыр мортлӧн пызан вывсьыс гылалӧм торпыригыс. Лазарлӧн кучикыс ставнас вӧлі лӧмӧсь, весиг понъяс волывлісны нювны лӧмсӧ.
Лазар кулі, и анделъяс нуисны сійӧс Ӧвраам дінӧ.
Куліс тшӧтш озыр морт, и сійӧс дзебисны.
Адын мучитчигӧн озыр морт лэптіс синсӧ да аддзис ылынкодь Ӧвраамӧс да сы дорысь Лазарӧс. Озыр морт горӧдіс: “Ӧвраам батьӧй, ло бур сьӧлӧма ме дінӧ. Мӧдӧд Лазарӧс, мед кӧтӧдас чунь помсӧ да кӧдзӧдас менсьым кывйӧс, ӧд ме мучитча тані би пытшкас”.
Ӧвраам шуис: “Пиукӧй, тӧд вылад уськӧд: тэ босьтін нин бурсӧ, а Лазарлы лёкыс уси.
Ӧні сійӧ сьӧлӧмсӧ бурмӧдӧ тані, а тэ мучитчан.
Таысь ӧтдор миянӧс торйӧдӧ ыджыд пыдӧстӧмин — тадзи миянсянь тіян дінӧ кӧсйысьяс вуджны оз вермыны, тшӧтш тіянсянь миян дінӧ оз вермыны вуджны”.
Сэки озыр морт шуис: “Кора тэнӧ, Ӧвраам батьӧй, мӧдӧд сійӧс менам бать керкаӧ, мед ӧлӧдас менсьым витнан вокӧс тайӧ мучитчанінас веськалӧмысь”.
Ӧвраам шуис сылы: “Налӧн эм Мӧисей да пророкъяс, мед найӧс кывзасны”.
Сійӧ шуис: “Оз кывзыны, Ӧвраам батьӧй. Но найӧ бергӧдчасны мыжъяссьыныс, локтас кӧ на дінӧ кодкӧ кулӧмаясысь”.
Сэки Ӧвраам шуис сылы: “Мӧисейӧс да пророкъясӧс кӧ оз кывзыны, найӧ оз эскыны весиг кулӧмаясысь ловзьысьлы”».
17 юр.
Исус висьталіс велӧдчысьяслы: «Ыштӧдӧмъяслы колӧ локнысӧ, но курыд шог сылы, код пыр локтӧны ыштӧдӧмъясыс.
Бурджык сылы, сьыліас кӧ ыджыд изки ӧшӧдасны да шыбитасны саридзӧ, тайӧ ичӧтъясысь ӧтикӧс ыштӧдӧм дорысь.
Видзчысьӧй таысь.
Вокыд кӧ мыж вӧчас тэныд паныд, ӧлӧд сійӧс. Ассьыс мыжмӧмсӧ кӧ восьтас, прӧстит сійӧс.
Сизимысь кӧ луннас тэ водзын мыжмас да сизимысь кӧ тэ дінӧ локтӧмӧн шуас: “Ме мыжа”, прӧстит сійӧс».
Апостолъяс шуисны Господьлы: «Содты миянлы эскӧмсӧ».
Господь шуис: «Лоас кӧ тіян эскӧмныд горчица тусь ыджда, верманныд шуны тайӧ пуыслы: “Нетшыштчы вужнад да вужъясь саридзас” — и сійӧ кывзысяс тіянлысь».
«Гӧрӧм бӧрын либӧ пемӧсъясӧс видзӧм бӧрын кӧ кесйӧгныд локтас, шуанныд-ӧ сылы: “Медводз пуксьы да сёй”.
Дерт, онӧ. Ті шуанныд: “Дасьты меным сёян-юан, вӧнясь да кесъяв меным. А меным кесъялӧм бӧрын ачыд верман сёйны-юны”.
Кесйӧг кӧ вӧчӧ тшӧктӧм серти, сэки сійӧс оз аттьӧавлыны.
Тадзи тшӧтш ті, вӧчанныд кӧ тшӧктӧм серти, вӧчӧм бӧраныд шуӧй: “Ми сӧмын кесйӧгъяс. Мый колӧ вӧлі вӧчны, ми вӧчим”».
Ерусалимӧ мунігӧн Исус муніс Самария да Галилея муяс пыр.
Ӧти сиктӧ воигӧн Сійӧс паныдалісны проказаӧн висьысь дас морт. Ылӧ сувтӧмӧн найӧ горзісны: «Исус, Велӧдысь, ло бур сьӧлӧма миян дінӧ.»
Исус видзӧдліс на вылӧ да шуис: «Мунӧй да петкӧдлӧй асьнытӧ попъяслы».
Муніганыс найӧ сӧстӧммисны.
Ассьыс бурдӧмсӧ казялӧм бӧрын ӧти косіс Енмӧс гораа ошкигтырйи. Сійӧ кымынь уськӧдчис Исус водзӧ да аттьӧаліс Сійӧс. Тайӧ мортыс вӧлі Самарияысь.
Исус юаліс: «Эз ӧмӧй даснаныс сӧстӧммыны?
Кӧнӧсь нӧ ӧкмысыс?
Тайӧ бокыса мортысь кындзи некод эз лок ошкыны Енмӧс».
Исус шуис сылы: «Чеччы да мун. Эскӧмыд мездіс тэнӧ».
Фарисейяс юалісны, корджык воас Енлӧн Юралӧмыс. Исус вочавидзис: «Енлӧн Юралӧмыс оз во тыдалана ногӧн. Он вермы шуны: “Видзӧд, сійӧ тані” либӧ “Сійӧ сэні”.
Енлӧн Юралӧмыс ӧд тіян пытшкын».
Исус шуис велӧдчысьясыслы: «Воас кад, кор ті кӧсъянныд аддзывны Морт Пилӧн лунъясысь ӧтиӧс, но онӧ аддзылӧй.
Тіянлы кӧ шуасны: “Сійӧ тані”, либӧ шуасны: “Сійӧ сэні”, энӧ мунӧй да энӧ вӧтчӧй на бӧрся. Енэж ӧтар помсяньыс мӧдарӧдзыс югнитысь чардби моз Морт Пи тыдовтчас Аслас лунӧ.
Но таӧдз Сылы ковмас нуны уна сьӧкыд да ӧтдортӧм ӧнія олысьяссянь.
Кыдзи вӧлі Ной лунъяс дырйи, сідзи лоӧ Морт Пи локтігӧн. Ковчегӧ Нойлӧн пыртӧдз йӧзыс сёйисны-юисны, гӧтрасисны да верӧс сайӧ мунісны. Сэки ыджыд ойдӧм дырйи ваыс пӧдтіс ставнысӧ.
Тадзи вӧлі тшӧтш Лот лунъясӧ: йӧзыс сёйисны-юисны, ньӧбасисны-вузасисны, кӧдзисны да керкаяс лэптісны. Содом карысь Лотлӧн петан лунӧ енэжсянь киссис тэгъя биа зэр да бырӧдіс ставнысӧ.
Тадзи лоас Морт Пилӧн петкӧдчан лунӧ.
Коді сійӧ лунӧ лоас керка вылас, мед оз пыр керкаас босьтны мыйкӧ.
Коді лоас видз-му вылас, мед оз кос гортас.
Энӧ вунӧдӧй, мый лои Лот гӧтыркӧд.
Коді зільӧ видзны ассьыс олӧмсӧ, воштас сійӧс.
Ассьыс олӧмсӧ воштысь видзас сійӧс.
Висьтала тіянлы: сійӧ войӧ ӧти вольпасьын лоасны кыкӧн: ӧтисӧ босьтасны, мӧдсӧ колясны.
Ӧтлаын пондасны изны кык ань: ӧтисӧ босьтасны, мӧдсӧ колясны.
Видз-му вылын лоасны кыкӧн: ӧтисӧ босьтасны, мӧдсӧ колясны».
«Кӧні тайӧ лоӧ, Господьӧй?» — юалісны велӧдчысьясыс.
Сійӧ вочавидзис: «Кӧні шой, сэтчӧ чукӧртчасны кутшъяс».
18 юр.
Исус висьталіс пыр кевмысьӧм йылысь велӧданвисьт: «Ӧти карын вӧлі ёрдысь, сійӧ Енсьыс эз пов да йӧзысь эз яндысь.
Сійӧ карас оліс дӧва, коді волывліс ёрдысь дінӧ да корис: “Дорйы менӧ дзескӧдысьысь”.
Ёрдысь дыр эз босьтчы дорйынысӧ.
Сэсся шуис: “Дерт, ме Енсьыс ог пов да йӧзысь ог яндысь. Но тайӧ дӧваыс дзикӧдз менӧ дӧзмӧдіс — ковмас дорйыны. Ог кӧ дорйы, бурӧн ог мын сыысь”».
Господь шуис: «Кыланныд, мый шуӧ шогмытӧм ёрдысь?
А Енмыс ӧмӧй оз дорйы Ассьыс бӧрйӧмаяссӧ, кодъяс лун и вой корӧны отсӧгсӧ Сылысь? Сёрмас ӧмӧй Сійӧ сетны отсӧгсӧ?
Висьтала тіянлы: Сійӧ регыдӧн доръяс найӧс.
Но аддзас-ӧ Морт Пи му вылысь татшӧм эскӧмсӧ локтӧм бӧрас?»
Асьнысӧ веськыда олысьӧ пуктысьяслы да мукӧдӧс увтыртысьяслы Исус висьталіс татшӧм велӧданвисьт:
«Кык морт пырисны крамӧ кевмысьны: ӧтиыс вӧлі фарисей, мӧдыс — вот перйысь.
Фарисей сувтӧмӧн кевмысис вомгорулас: “Енмӧй, аттьӧала Тэнӧ, мый ме абу мукӧдыс кодь: ог горшась, ог пӧръясь, гозъя олӧм ог пежав. Ме абу тайӧ вот перйысьыс кодь. Видзала вежоннас кыкысь, ставсьыс дасӧд юкӧнсӧ сета Енлы”.
А вот перйысь сулаліс бокын да весиг синсӧ эз лысьт лэптывны енэжланьыс, сӧмын морӧсас кучкалӧмӧн шуаліс: “Енмӧй, ло бур сьӧлӧма ме дінӧ, мыжа морт дінӧ.”
Висьтала тіянлы: Ен водзын веськыдӧн муніс гортас вот перйысь, эз фарисей.
Ӧд асьсӧ вылӧ пуктысьӧс лэдзасны, асьсӧ улӧ пуктысьӧс кыпӧдасны».
Исус дінӧ вайӧдісны посни челядьӧс, медым Сійӧ инмӧдчыліс на дінӧ. Велӧдчысьяс аддзисны тайӧс да пондісны шуасьны вайӧдысьяс вылӧ.
Исус корис челядьӧс Ас дінас да шуис: «Лэдзӧй челядьсӧ локны Ме дінӧ. Энӧ кутӧй найӧс. Енлысь Юраланінсӧ ӧд на коддьӧмлы лӧсьӧдӧма.
Веськыда висьтала тіянлы: коді оз сибӧд Енлысь Юралӧмсӧ кага моз, сійӧ оз пыр Енлӧн Юраланінӧ».
Ӧти юралысь юаліс Исуслысь: «Бур Велӧдысьӧй, мый меным колӧ вӧчны, мед вичмис меным помтӧм олӧм?»
Исус вочавидзис: «Мыйла тэ шуан Менӧ бурӧн?
Некод абу бурыс, сӧмын Енмыс бур.
Тэ ӧд тӧдан тшӧктӧмъяссӧ: гозъя олӧмтӧ эн пежав, эн ви, эн гусясь, эн пӧръясь, пыдди пукты ассьыд бать-мамтӧ».
Юралысь шуис: «Том кадсянь ме ола тайӧ тшӧктӧмъяс сертиыс».
Тайӧс кылӧм бӧрын Исус шуис сылы: «Ӧтитор оз тырмы тэныд: вузав ставсӧ, мый тэнад эм, да сьӧмсӧ сет гӧльяслы. Сэки тэныд енэжын озырлуныс вичмас. Сэсся лок Ме бӧрся».
Тайӧс кылӧм бӧрын юралысь шогӧ усис, ӧд сійӧ вӧлі зэв озыр.
Исус аддзис юралысьлысь шогӧ усьӧмсӧ, сэсся шуис: «Кутшӧм сьӧкыд озырлы пырны Енлӧн Юраланінӧ.
Озырлы Енлӧн Юраланінӧ пырӧм дорысь верблюдлы кокньыдджык мунны ем пысӧд».
Тайӧс кылысьяс юалісны: «Коді нӧ вермас мездмынысӧ?»
Исус шуис: «Мортлы вермытӧмыс — вермана Енлы».
Сэки Петыр шуис: «Ми ставсӧ эновтім да мунім Тэ бӧрся».
Исус шуис налы: «Веськыда висьтала тіянлы: коді Енлӧн Юралӧм вӧсна коляс керкасӧ, бать-мамсӧ, чой-воксӧ, гӧтырсӧ, ныв-писӧ, сылы тайӧ олӧмас на уна пӧвстӧн бӧр воас, нӧшта локтан нэмас сылы помтӧм олӧм вичмас».
Исус корис дас кыкнан велӧдчысьсӧ да шуис налы: «Ӧні ми мунам Ерусалимӧ. Сэні инас пророкъяслӧн Морт Пи йылысь став гижӧмаыс.
Сійӧс сетасны ентӧдтӧмъяс киӧ. Найӧ сераласны, увтыртасны да сьӧлаласны Сійӧс. Чорыда нӧйтасны, сэсся виасны, но коймӧд луннас Сійӧ ловзяс».
Велӧдчысьяслы тайӧ вӧлі гӧгӧрвотӧм, кывъясыс вӧліны налы пӧдсаӧсь. Найӧ эз вермыны гӧгӧрвоны Исуслысь висьталӧмсӧ.
Исус матыстчис Ерикон карлань. Туй дорас пукаліс синтӧм корысь морт. Сійӧ кыліс йӧзлысь сы дорті мунӧмсӧ да юаліс: «Мый тайӧ?»
Сылы висьталісны, Назаретса Исус пӧ локтӧ.
Сэки синтӧм горӧдіс: «Исус, Давид Пи. Ло бур сьӧлӧма ме дінӧ.»
Исус водзвылын мунысьяс ӧлӧдісны синтӧмӧс горзӧмсьыс, но сійӧ ёнджыка на пондіс горзыны: «Давид Пи, ло бур сьӧлӧма.»
Исус сувтіс да тшӧктіс вайӧдны синтӧмсӧ, сэсся юаліс сылысь: «Мый тэ кӧсъян?»
Сійӧ вочавидзис: «Господьӧй, кӧсъя аддзыны».
Исус шуис: «Аддзы. Эскӧмыд мездіс тэнӧ».
Синтӧм дзик пыр кутіс аддзыны да Енмӧс ошкигтыр муніс Исус бӧрся.
Тайӧс аддзӧм бӧрын став йӧзыс аттьӧалісны-ошкисны Енмӧс.
19 юр.
Ериконӧ воӧм бӧрын Исус муніс кар пырыс.
Сэні оліс Заккей нима озыр морт, вот перйысьяслӧн юралысьыс. Сійӧ ёна кӧсйис аддзывны Исусӧс да тӧдмавны, коді Сійӧ сэтшӧмыс.
Но ичӧт тушаыс вӧсна йӧз сайсяньыс эз вермы аддзынысӧ. Заккей котӧртіс водзӧ да кавшасис пу вылӧ, медым аддзыны Исусӧс. Буретш сійӧ туйӧдыс локтӧ вӧлі Исус.
Пу весьтӧ воигӧн Исус видзӧдліс вывлань, аддзис Заккейӧс да шуис: «Заккей, лэччы ӧдйӧджык.
Талун Меным колӧ лоны тэ ордын».
Заккей тэрмасьӧмӧн лэччис да долыдпырысь сибӧдіс Исусӧс гортас.
Тайӧс аддзылысьяс шуасисны, мыжа морт ордӧ пӧ муніс.
Заккей сувтіс да шуис: «Господьӧй, овмӧслысь джынсӧ сета гӧльяслы да кодлысь ылӧдлӧмӧн босьті, сылы нёль пӧвстӧн вешта».
Исус шуис сылы: «Талун воис мездмӧм тайӧ керкаас. Ӧд сійӧ тшӧтш Ӧвраам пи.
Морт Пи локтіс корсьны да мездыны вошӧмаӧс».
Кывзысьяслы Исус висьталіс нӧшта ӧти велӧданвисьт, ӧд Сійӧ матыстчис Ерусалимлань, и унаӧн чайтісны, мый регыд нин воас Енлӧн Юралӧмыс.
Исус висьталіс: «Ӧксы рӧдысь ӧти морт мӧдӧдчас ылі муӧ, медым сэні ӧксы ним босьтны да бӧр локны аслас муӧ ӧксыӧн. Сійӧ корас ас дорас дас кесйӧгӧс, быдӧнлы сетас зарни сьӧм да шуас: “Менам локтӧдз тайӧ сьӧмсӧ уджӧ бергӧдӧй”.
Ас войтырыслы тайӧ мортыс вӧлі мустӧм, та вӧсна бӧрсяньыс найӧ мӧдӧдасны юӧртысьясӧс висьтавны, огӧ пӧ кӧсйӧй, медым сійӧ вӧлі миян ӧксыӧн.
Ӧксыӧн локтӧм бӧрын сійӧ тшӧктас корны кесйӧгъяссӧ, кодъяслы сетліс сьӧмсӧ. Кӧсъяс тӧдмавны, уна-ӧ найӧ содтӧд босьтісны.
Ӧти локтас да шуас: “Ыджыдӧй, тэнад зарни сьӧмыд вайис содтӧд дасӧс”.
Ӧксы шуас: “Бура вӧчин. Тэ бур кесйӧг.
Ичӧтас тэ эскана вӧлін, дас карӧн веськӧдлыны кутан”.
Локтас мӧд кесйӧг да шуас: “Ыджыдӧй, тэнад зарни сьӧмыд вайис содтӧд витӧс”.
Сылы ӧксы шуас: “Вит карӧн веськӧдлыны кутан”.
Локтас коймӧд кесйӧг да шуас: “Ыджыдӧй, со, тэнад сьӧмыд, чышъянӧ гартыштӧмӧн видзи сійӧс.
Ме полі тэысь, тэ ӧд чорыд морт: босьтан, мый эн пуктывлы, да вундан, мый эн кӧдзлы”.
Ӧксы шуас сылы: “Шогмытӧм кесйӧг. Аслад кывъясыд серти ме мыжда тэнӧ.
Тэ тӧдін, мый ме чорыд морт, босьта, мый эг пуктывлы, да вунда, мый эг кӧдзлы.
Мыйла сьӧмчукӧртанінӧ эн пукты менсьым сьӧмӧс, локтӧм бӧрам эськӧ содтӧдӧн босьті?”
Ӧксы шуас сыкӧд сулалысьяслы: “Мырддьӧй сылысь сьӧмсӧ да сетӧй дас сьӧмаыслы”.
Найӧ шуасны: “Ыджыдӧй, сылӧн эм нин дас сьӧмыс”.
Ӧксы шуас: “Висьтала тіянлы: кодлӧн эм, сылы сетасны.
Кодлӧн абу, сылысь бӧръясӧ босьтасны.
Меным паныд мунысьясӧс, менам юралӧмлы паныд сувтысьясӧс вайӧдӧй татчӧ да виӧй найӧс менам син водзын”».
Тайӧс висьталӧм бӧрын Исус муніс водзӧ Ерусалимлань.
Олив керӧсын сулалысь Виффагия да Вифания сиктъяслань матыстчигӧн Исус мӧдӧдіс Ассьыс кык велӧдчысьсӧ да шуис: «Мунӧй тайӧ сиктас. Сэтысь аддзанныд домалӧм том осёлӧс, сы вылӧ некод на эз пуксьыв. Разьӧй сійӧс да вайӧдӧй татчӧ.
Юаласны кӧ, мыйла разянныд, вочавидзӧй, мый сійӧ колӧ Господьлы».
Мӧдӧдӧмаяс мунісны да аддзисны: ставыс вӧлі Исуслӧн висьталӧм серти.
Том осёлӧс разиганыс видзысьыс юаліс: «Мыйла разянныд?»
Велӧдчысьяс вочавидзисны: «Сійӧ колӧ Господьлы».
Том осёлӧс вайӧдісны Исус дінӧ. Сэсся шлапкисны осёл вылӧ паськӧмнысӧ да отсалісны Исуслы пуксьынысӧ.
Кор Сійӧ муніс осёл вылын, йӧзыс вольсавлісны паськӧмнысӧ туй вылас.
Кор Исус матыстчис Олив керӧсысь лэччанінӧ, став Сылӧн велӧдчысьыс кыпыда да гора шыӧн пондісны ошкыны Енмӧс став аддзылӧм шензьӧданаторсьыс. Найӧ шуалісны:
— Бурсиӧма Господь нимӧн локтысь Ӧксыӧс.
Лӧнь олӧм енэж вылын, ошкӧм Медвылыссалы.
Йӧз чукӧрысь фарисейясысь кодсюрӧ шуисны Исуслы: «Велӧдысь, ӧлӧд велӧдчысьястӧ.»
Исус воча шуис: «Висьтала тіянлы: найӧ кӧ ланьтасны, изъяс шыасясны».
Ерусалимлань матыстчигӧн Исус видзӧдліс кар вылас да бӧрдӧмӧн шуаліс: «Тӧдін кӧ эськӧ тэ талун, мый вайӧ тэныд лӧнь олӧмсӧ.
Ӧні тайӧ тупкыса тэнад синлы. Воас лун, кор тэныд паныд мунысьяс лэптасны тэ гӧгӧр тымӧд, кытшаласны тэнӧ да быд боксянь дзескӧдасны. Тэнӧ жугӧдасны дзоньнас, олысьястӧ виаласны — из вылӧ из оз кольны, ӧд тэ эн кӧсйы тӧдны тэ дінӧ Енлысь волӧмсӧ».
Исус пырис крамӧ да пондіс вӧтлавны сэтысь вузасьысь-ньӧбасьысьясӧс. Сійӧ шуис налы: «Гижӧма: “Менам керкаӧй — кевмысян керка”.
А ті сыысь вӧчинныд лёк вӧчысьяслы дзебсянін».
Исус быд лун велӧдіс крамын.
Аркирейяс, Индӧдӧ велӧдысьяс да веськӧдлысьяс кӧсйисны вины Сійӧс. Сӧмын эз тӧдны, кыдзи тайӧс вӧчны, ӧд став йӧзыс вешйывтӧг кывзісны Исусӧс.
20 юр.
Ӧтчыд Исус велӧдіс йӧзсӧ крамын, висьталіс налы Бур Юӧр. Аркирейяс, Индӧдӧ велӧдысьяс да пӧрысьяс матыстчисны Исус дінӧ да юалісны: «Висьтав миянлы, кутшӧм вынӧн Тэ ставсӧ тайӧс вӧчан? Коді Тэнӧ пуктіс тайӧс вӧчнысӧ?»
Исус воча шуис: «Ме тшӧтш тіянлысь ӧтитор юала. Висьталӧй Меным, Иоанлӧн пыртӧмыс вӧлі Енсянь али мортсянь?»
Найӧ ас костаныс сёрнитісны: «Шуам кӧ: “Енсянь”, Сійӧ шуас: “Мыйла сылы энӧ эскӧй?”
Шуам кӧ: “Мортсянь”, йӧзыс изъяласны миянӧс, ӧд Иоанӧс збыльысь пророкӧ пуктӧны».
Найӧ вочавидзисны: «Огӧ тӧдӧй кодсянь».
Сэки Исус шуис: «Сідзкӧ, Ме тшӧтш ог висьтав, кутшӧм вынӧн ставсӧ тайӧс вӧча».
Сэсся Исус висьталіс йӧзыслы татшӧм велӧданвисьт:
«Морт пуктас аслас йӧрӧ виноград, сэсся йӧрсӧ виноград быдтысьяслы кӧртымӧ сетас, ачыс дыр кад кежлӧ мунас. Вотӧс чукӧртан кадӧ овмӧс кутысь мӧдӧдас кесйӧгсӧ босьтны вотӧсысь ассьыс пайсӧ.
Виноград быдтысьяс нӧйтасны кесйӧгсӧ да вӧтласны сійӧс куш киӧн.
Овмӧс кутысь мӧд кесйӧгӧс мӧдӧдас.
Сійӧс тшӧтш нӧйтасны, лёкысь сераласны сы вылын да вӧтласны куш киӧн.
Мӧдӧдас нӧшта коймӧдӧс. Сійӧс вирӧдз дойдаласны да шыбитасны ортсӧ.
Сэки овмӧс кутысь шуас: “Мый вӧчны?
Мӧдӧда ассьым муса пиӧс, гашкӧ, сыысь яндысясны”.
Писӧ аддзӧм бӧрын виноград быдтысьяс пондасны сёрнитны ас костаныс: “Тайӧ мортыслы вуджас овмӧсыс. Мунам да виам сійӧс, медым овмӧсыс миянлы коляс”.
Найӧ петкӧдасны сійӧс виноград йӧрсьыс да виасны.
Мый вӧчас накӧд овмӧс кутысь?
Сійӧ локтас, виноград быдтысьясӧс виас, а йӧрсӧ мукӧдлы сетас».
Тайӧс кылысьяс шуисны: «Мед оз ло тадзи».
На вылӧ видзӧдлӧмӧн Исус шуис: «Мый йылысь висьталӧны Гижӧдас тайӧ кывъясыс:
— Изйыс, кодӧс шыбитісны керка лэптысьяс, лоис пельӧс изйӧн.
Коді усяс тайӧ изйыс вылӧ, сійӧ пасьмунас. Код вылӧ изйыс усяс, сійӧс лямӧдас».
Индӧдӧ велӧдысьяс да аркирейяс гӧгӧрвоисны, мый велӧданвисьтыс вӧлі на йылысь. Найӧ кӧсйисны босьтны Исусӧс, но полісны йӧзсьыс.
Индӧдӧ велӧдысьяс да аркирейяс помся кыйӧдісны Исусӧс. Найӧ мӧдӧдісны Сы дінӧ веськыда олысьӧ пуксьысь наян йӧзӧс, медым кыйны Сійӧс сёрниас да сетны Сійӧс юралысь киӧ.
Локтӧмаяс шуисны Исуслы: «Велӧдысь, ми тӧдам, мый Тэ веськыда сёрнитан-велӧдан. Тэ он видзӧд морт вылӧ, а веськыда велӧдан Енлӧн туйӧ. Висьтав, колӧ-ӧ кесарлы вот мынтыны?»
Налысь наянлунсӧ казялӧмӧн Исус шуис: «Мыйла ті зілянныд кыйны Менӧ?
Петкӧдлӧй Меным динартӧ. Кодлӧн сэні чужӧмыс-нимыс?»
Найӧ вочавидзисны: «Кесарлӧн».
Исус шуис налы: «Кесарлысь сетӧй кесарлы, а Енлысь — Енлы».
Тадзи найӧ эз вермыны став йӧз водзас кыйны Исусӧс. Сылӧн воча кывйысь найӧ чуймисны да ланьтісны.
Исус дінӧ локтісны саддукейяс, кодъяс шуӧны, ловзьӧмыс пӧ абу. Найӧ юалісны Исуслысь:
«Велӧдысь, Мӧисей гижӧма, мый “ныв-питӧм морт кӧ кулас, вокыслы колӧ босьтны сылысь гӧтырсӧ да нюжӧдны аслас вокыслысь рӧдсӧ”.
Сизим вок вӧлі. Ыджыдыс гӧтрасис, сэсся куліс, ныв-пиыс эз коль.
Гӧтырсӧ мӧд вокыс босьтіс, сійӧ тшӧтш ныв-питӧг куліс.
Сэсся коймӧдыс босьтіс.
Тадзи сизимнанныс кулісны ныв-питӧг.
Медбӧрын аньыс куліс.
Ловзьӧм бӧрас кодлы сійӧ гӧтырӧн лоас, ӧд сизим верӧс сылӧн вӧлі?»
Исус вочавидзис: «Тайӧ муюгыдас йӧзыс гӧтрасьӧны да верӧс сайӧ мунӧны.
А мӧдаръюгыдас веськавны да ловзьыны шогманаяс оз гӧтрасьны да верӧс сайӧ оз мунны.
Найӧ оз нин кувны, а лоӧны анделъяс кодьӧсь. Найӧ Енлӧн ныв-пи, ӧд найӧс ловзьӧдӧма.
Сотчысь лежнӧг дорын вӧвлӧмторйыс петкӧдлӧ, мый кулӧмаяс ловзьӧны. Мӧисей шуӧ Господьӧс Ӧвраамлӧн Енмӧн, Исааклӧн Енмӧн да Яковлӧн Енмӧн.
Енмыс абу кулӧмаяслӧн Ен, Сійӧ ловъяяслӧн Ен. Сылы ставыс ловъя».
Индӧдӧ велӧдысьясысь кодсюрӧ шуисны: «Велӧдысь, бура висьталін».
Водзӧ найӧ эз нин лысьтны мыйкӧ юасьны Сылысь.
Исус шуис налы: «Мыйла нӧ шуӧны, Кристос пӧ Давид пи?
Давид ачыс шуӧ Псалом небӧгын:
— Господь шуис менам Господьлы: “Пукав Менам веськыдладорын, кытчӧдз ог пукты Тэнад кок улӧ Тэныд паныд мунысьясӧс”.
Давид шуӧ Сійӧс Господьӧн.
Кыдзи нӧ Сійӧ сылы пиӧн лоӧ?»
Став йӧзыс кывзісны Исусӧс.
Сійӧ шуис велӧдчысьясыслы: «Видзчысьӧй Индӧдӧ велӧдысьясысь. Найӧ радейтӧны кузь паськӧмӧн ветлыны, йӧзаинын чолӧмалӧмъяс кывзыны, синагогаын водзын пукавны да гажӧдчанінын бурджыклаӧ пуксьыны. Найӧ куштӧны дӧваяслысь керкасӧ да асьнысӧ петкӧдлӧм могысь дыр кевмысьӧны. Но найӧс лоӧ чорыда мыждӧма».
21 юр.
Исус видзӧдліс да аддзис, кыдзи озыръяс пуктісны сьӧм чукӧртан кудйӧ сьӧм. Сэтысь аддзис тшӧтш гӧль дӧваӧс. Сійӧ пуктіс кудйӧ кык ыргӧн сьӧм.
Исус шуис: «Збыльысь висьтала тіянлы: тайӧ гӧль дӧваыс быдӧнысь унджык пуктіс.
Ставныс унасьыс чуктӧдісны Енлы, а тайӧ дӧваыс этшасьыс сетіс ставсӧ, мый сылӧн вӧлі кынӧмпӧт вылас».
Ӧткымынӧн сёрнитісны мича изъясӧн да донаторъясӧн мичмӧдӧм крам йылысь. Исус шуис: «Воас лун, татчӧ из вылӧ из оз коль, ставсӧ жугӧдасны».
Исуслысь юалісны: «Велӧдысь, кор ставыс тайӧ лоас?
Мый серти ми тӧдмалам сійӧ кадсӧ?»
Исус шуис: «Видзчысьӧй, мед эз ылӧдны тіянӧс. Унаӧн Менам нимӧн локтасны да шуасны, ме пӧ Сійӧ, кадыс пӧ воис нин. Энӧ мунӧй на бӧрся.
Кор кыланныд тышъяс да шызьӧмъяс йылысь, энӧ повзьӧй. Тадзи водзджык колӧ лонысӧ, сӧмын тайӧ абу на пом».
Сэсся Исус шуис налы: «Войтыр войтырлы паныд сувтас, муяс ӧта-мӧдныслы паныд кыпӧдчасны. Уналаын лоас му вӧрӧм да тшыгъялӧм, йӧзсӧ суас кулан висьӧм. Лоасны повзьӧдана петкӧдчӧмъяс да енэжсянь индысьпасъяс.
Но таӧдз пондасны вӧтлысьны тіян бӧрся да дзескӧдны тіянӧс, вайӧдасны синагогаясӧ мыждыны, йӧртасны дзескыдінӧ да Менам ним вӧсна нуӧдасны ӧксыяс да юралысьяс водзӧ. Тайӧ лоӧ, медым ті висьталінныд Ме йылысь.
Кутӧй тӧд выланыд: водзвыв энӧ тӧждысьӧй, мый шуны асьнытӧ дорйӧм могысь.
Ме сета тіянлы мывкыдлун сёрнитны. Мыжалысьяс оз вермыны паныд сувтны тіянлы да налы оз сюр воча кывйыс.
Бать-мамныд, вокныд, рӧдвужныд да ёртъясныд вузаласны тіянӧс, кодсюрӧӧс весиг виасны. Менам ним вӧсна унаӧн мустӧмтасны тіянӧс.
Но тӧдӧй, весиг юрси сі оз усь юр вывсьыныд. Сьӧкыдлунсӧ венӧмӧн ті мезданныд ловнытӧ».
«Кор ті аддзанныд, мый Ерусалимсӧ кытшалӧма, тӧдӧй: матыстчис сійӧс бырӧдӧмыс.
Сэки Юдея муын олысьяс мед пышъясны керӧсъясӧ.
Коді лоӧ кар пытшкас, мед петас сэтысь; коді лоӧ кар саяс, мед оз пыр сэтчӧ.
Тайӧ мынтысян лунъяс, сэки став гижӧмаыс инас.
Сійӧ лунъясӧ ёна сьӧкыд лоӧ нӧбасьысьяслы да нёньӧдчысьяслы.
Тайӧ мусӧ ыджыд шог суас, да тайӧ войтыр вылас киссяс скӧрлуныс. Ӧтияс куласны шыпурт помысь, мӧдъясӧс мырдӧн нуӧдасны йӧз муӧ. Ерусалим карсӧ индӧм кадӧдз пондасны талявны мукӧд войтыр».
«Шондіын, тӧлысьын да кодзувъясын тыдовтчасны индысьпасъяс. Саридз ыджыд шыӧн гызяс, йӧзыс му вылын шызясны да шӧйӧвошасны. Енэжвыв вынъяс вӧрзясны, сьӧкыдлунъяс суӧмысь йӧзыс повзьӧмнысла кутасны садьсӧ воштыны. Сэки аддзасны кымӧр вылын ыджыд вынӧн да дзирдлунӧн локтысь Морт Пиӧс.
Кор ставыс тайӧ пондас инны, сэки веськӧдчӧй да лэптӧй юрнытӧ, ӧд матысмӧ тіян мездмӧмныд».
Исус висьталіс налы велӧданвисьт:
«Инжир пу да мукӧд пуяс вылӧ кӧ видзӧдам, аддзам: корйыс кӧ потӧ, сідзкӧ, гожӧмыс матын.
Тадзи, ставсӧ тайӧс аддзигӧн тӧдӧй: Енлӧн Юралӧмыс матын нин.
Веськыда висьтала тіянлы: ставыс тайӧ лоас ӧнія олысьяс дырйи на. Енэжыс да муыс бырас, а Менам кывъясӧй оз бырны.
Видзчысьӧй, медым сьӧлӧмныд эз кӧртась кодалӧм-гажӧдчӧмас да олӧм тӧждас, ӧд ставыс тайӧ чорзьӧдӧ тіянлысь сьӧлӧмнытӧ.
Мед сійӧ луныс оз су тіянӧс виччысьтӧг. Ӧд кыдзи налькйӧ шедӧны, сідзи жӧ сійӧ луныс суас став мувывса олысьсӧ.
Лоӧй дасьӧсь да пыр кевмысьӧй, медым верминныд мынны ставсьыс, мый виччысьӧ тіянӧс, да сувтны Морт Пи водзӧ».
Луннас Исус велӧдіс крамын, а войяссӧ колляліс Олив керӧсын.
Йӧзыс водз асывсяньыс волісны крамӧ кывзыны Сійӧс.
22 юр.
Матыстчисны Шомтӧм нянь сёян лунъяс, мӧд ногӧн кӧ, Ыджыд лун.
Аркирейяс да Индӧдӧ велӧдысьяс корсисны, кыдзи эськӧ вины Исусӧс, сӧмын полісны йӧзсьыс.
Сӧтана пырис Искариот Иуда пытшкӧ, сійӧ вӧлі дас кык велӧдчысьысь ӧти. Иуда муніс аркирейяс да крам видзысьяслӧн веськӧдлысьяс дінӧ да сёрнитчис накӧд Исусӧс вузалӧм йылысь.
Найӧ нимкодьпырысь кӧсйысисны сетны сылы сьӧм. Иуда налы кыв сетіс, сэсся кутіс корсьны лӧсялан кад, медым вузавны Исусӧс йӧз тӧдлытӧг.
Воис Шомтӧм нянь сёян лун, кодыр колӧ вӧлі начкыны Ыджыд лунся ыжӧс.
Петырӧс Иоанкӧд мӧдӧдіг Исус шуис налы: «Мунӧй, лӧсьӧдӧй миянлы Ыджыд лунся сёян».
Найӧ юалісны: «Кытчӧ шуан лӧсьӧднысӧ?»
Исус шуис: «Карас пыриганыд тіянлы паныдасяс гырничын ва нуысь морт.
Мунӧй да пырӧй сы бӧрся керкаас. Керка кутысьыслы висьталӧй: “Велӧдысь юасьӧ, кутшӧм вежӧсын Аслас велӧдчысьяскӧд вермас сёйны Ыджыд лунся ыжӧс”.
Сійӧ петкӧдлас тіянлы вылыс судтасьыс вольсалӧм ыджыд вежӧс. Сэні и лӧсьӧдӧй».
Найӧ мунісны да аддзисны: ставыс лои Исуслӧн висьталӧм серти. Найӧ дасьтісны Ыджыд лунся сёян.
Кор воис кадыс, Исус пуксис дас кыкнан апостолыскӧд сёйны.
Сійӧ шуис налы: «Сьӧкыдсӧ нутӧдз Ме ёна кӧсйи сёйны тіянкӧд тайӧ Ыджыд лунся ыжсӧ. Висьтала тіянлы: ог нин понды сёйны тайӧ сёянсӧ сійӧ лунӧдз, кор тайӧс лоӧ пӧртӧма Енлӧн Юраланінын».
Исус босьтіс чаша да Енмӧс аттьӧалӧмӧн шуис: «Босьтӧй да юӧй татысь быдӧн.
Висьтала тіянлы: Енлӧн Юралӧмыс вотӧдз ог понды юны виноград юансӧ».
Сэсся Исус босьтіс нянь, Енмӧс аттьӧалӧмӧн чегис няньсӧ да велӧдчысьяслы сетігас шуис: «Тайӧ Менам Яй, кодӧс лоӧ сетӧма тіян вӧсна.
Вӧчӧй тайӧс Менӧ казьтывлӧм могысь».
Сёйӧм бӧрас босьтіс чаша да сійӧс сетігас шуис: «Тайӧ чашаыс — Выль Йитӧд, кӧрталӧма Менам Вирӧн, сійӧ киссьӧ тіян вӧсна.
Со, Менӧ вузалысьлӧн киыс Мекӧд ӧти пызанысь судзӧдӧ.
Дерт, Морт Пи мунӧ водзвыв лӧсьӧдӧм туйӧдыс.
Но курыд шог Сійӧс вузалысьлы.»
Сэки велӧдчысьяс пондісны юасьны ӧта-мӧдныслысь, коді тайӧ на пиысь.
Велӧдчысьяс вензисны ас костаныс, коді на пиысь ыджыдджыкыс.
Исус висьталіс налы: «Ӧксыяс ыджыдалӧны йӧз вылын, юралысьяс бур вӧчысь ним шедӧдӧны. Но ті тадзи энӧ вӧчӧй. Тіян пиысь ыджыдыс мед лоас ичӧт. Юралысь кӧ, мед лоас кесъялысьӧн.
Пызан сайын пукалысьыс али кесъялысьыс ыджыдджык?
Абу-ӧ пызан сайын пукалысьыс?
Ме тіян пӧвстын кесъялысь.
Ті энӧ эновтӧй Менӧ сьӧкыдлунъяс дырйи.
Та вӧсна Ме сета тіянлы Юралӧм, кыдзи Батьӧй сетіс Меным. Менам Юраланінын ті понданныд сёйны-юны Мекӧд ӧти пызан сайын да пуксянныд юралан пуклӧсӧ мыждыны израильса дас кык чужанкотырӧс».
Господь шуис: «Кылан, Симон.
Сӧтана корис шердйыны тіянӧс шобдіӧс моз.
Но Ме кевмыси тэ вӧсна, медым эскӧмыд эз быр. Кор тэ бергӧдчан бӧр, ёнмӧд вокъястӧ».
Петыр шуис Исуслы: «Господьӧй, Тэкӧд ме дась пуксьыны дзескыдінӧ, весиг кувны».
Исус вочавидзис: «Петыр, тэныд шуа: талун петук чукӧсттӧдз на тэ куимысь соссян, мый тӧдан Менӧ».
Исус юаліс велӧдчысьяслысь: «Кор Ме мӧдӧдлі тіянӧс сьӧмтӧг, ноптӧг да кӧмтӧг, тіянлы ӧмӧй эз тырмывлы мыйкӧ?»
Найӧ шуисны: «Ставыс вӧлі».
Исус шуис налы: «Ӧні мӧдарӧ. Сьӧмыд кӧ эм, босьт сійӧс сьӧрсьыд, тшӧтш ноптӧ босьт. Абу кӧ, вузав вылыс паськӧмтӧ да ньӧб шыпурт.
Висьтала тіянлы: Ме йылысь гижӧма: “Сійӧс пуктісны Индӧдтӧг олысьяс лыдӧ”. Тайӧ гижӧмыслы колӧ инны.
Ме йылысь став шуӧмыс ӧні инӧ».
Найӧ шуисны: «Господьӧй, тані кык шыпурт».
Исус шуис: «Тырмас».
Карысь петӧм бӧрын Исус, кыдзи пыр вӧчліс, мӧдӧдчис Олив керӧсӧ. Велӧдчысьяс мунісны Сы бӧрся.
Сэтчӧ воӧм бӧрын Исус шуис налы: «Кевмысьӧй, мед ыштӧдӧмыс эз вермы тіянӧс».
Ачыс ылыстчис наысь из шыбитӧм ылнаӧ да пидзӧс вылас сувтӧмӧн кевмысис: «Батьӧй, кӧсъян кӧ, вешты Ме дінысь тайӧ чашасӧ. Сӧмын мед лоас Тэнад кӧсйӧм серти, а оз Менам».
Сэки андел лэччис енэжсянь да ёнмӧдіс Сійӧс.
Шогыскӧд вермасигӧн Исус ёнджыка на кевмысис. Сылӧн пӧсьыс вирӧн войталіс муӧ.
Кевмысьӧм бӧрас Исус чеччис да локтіс велӧдчысьяс дінас. Аддзис: найӧ шогысла унмовсьӧмаӧсь.
Сэки шуис налы: «Мый ті узянныд?
Чеччӧй, кевмысьӧй, мед ыштӧдӧмыс эз вермы тіянӧс».
Исуслӧн сёрнитігкості сэтчӧ локтісны йӧз. Найӧс вайӧдіс Иуда, дас кык велӧдчысьысь ӧти. Сійӧ матыстчис Исус дінӧ, медым окыштны Сійӧс.
Ӧд Иуда шуӧма локтӧмаяслы, кодӧс пӧ окышта, Сійӧ — Исус.
Исус шуис сылы: «Иуда, окыштӧмнад тай вузалан Морт Пиӧс».
Исускӧд вӧлысьяс гӧгӧрвоисны, мый водзӧ лоӧ, сэсся шуисны Сылы: «Господьӧй, перйыны-ӧ шыпуртнымӧс?»
На пиысь ӧти керыштіс аркирей кесйӧглысь веськыд пельсӧ.
Исус шуис: «Тырмас. Дугдӧй.»
Кесйӧглы пеляс инмӧдчылӧмӧн Исус бурдӧдіс сійӧс.
Сэсся аркирейяслы, крам видзысьяслӧн веськӧдлысьяслы да пӧрысьяслы, кодъяс локтісны кутны Сійӧс, шуис: «Лёк вӧчысьӧс моз зорйӧн-шыпуртӧн локтінныд босьтны Менӧ.
Ме быд лун вӧлі тіянкӧд крамын, но ті энӧ лэптылӧй кинытӧ Ме вылӧ. Ӧні тіян кадыс да пемыдыслӧн ыджыдалӧмыс».
Исусӧс кутысьяс вайӧдісны Сійӧс аркирей керкаӧ.
Петыр бӧрӧ кольччӧмӧн вӧтчис на бӧрся.
Йӧр пытшкас ӧзтісны бипур, йӧзыс пуксялісны сы гӧгӧр. Петыр тшӧтш пуксис.
Ӧти кесйӧг ань аддзис Петырӧс бипур дорысь да сы вылӧ сюся видзӧдлӧмӧн шуис: «Тайӧ мортыс тшӧтш Сыкӧд вӧлі».
Петыр соссис: «Ме ог тӧд Сійӧс, дона аньӧй».
Недыр мысти мӧд морт аддзис сійӧс да шуис: «Тэ дзик на пиысь».
Петыр шуис сылы: «Абу».
Час мысти нӧшта ӧти морт эскӧдӧмӧн шуис: «Тайӧ мортыс збыльысь вӧлі Сыкӧд. Сійӧ тшӧтш Галилеяысь».
Петыр шуис: «Бур мортӧй, ог гӧгӧрво, мый висьталан».
Тайӧс шуигӧн кыліс петуклӧн чукӧстӧм.
Бергӧдчылӧмӧн Господь видзӧдліс Петыр вылӧ. Сэки Петырлы уси тӧд вылас Господьлӧн шуӧмыс: «Петук чукӧсттӧдз на тэ куимысь соссян Меысь».
Петыр петіс да курыда бӧрддзис.
Исусӧс видзысьяс сералісны-лёкӧдісны да нӧйтісны Сійӧс. Сылысь чужӧмсӧ вевттьӧмӧн найӧ кучкалісны Сылы чужӧмас да шуалісны: «Висьтав, Пророк, коді кучкис Тэнӧ?»
Сэсся ёна на омӧльтісны Сійӧс.
Асывнас чукӧртчисны пӧрысьяс, аркирейяс да Индӧдӧ велӧдысьяс. Исусӧс вайӧдісны веськӧдлан котыр водзӧ. Найӧ шуисны: «Висьтав миянлы, Тэ-ӧ Кристос?»
Исус воча шуис: «Висьтала кӧ тіянлы, ті онӧ эскӧй.
Юала кӧ, онӧ вочавидзӧй да онӧ лэдзӧй Менӧ.
Ӧнісянь Морт Пи пондас пукавны Ставсӧвермысь Ен веськыдладорын».
Ставӧн шуисны: «Сідзкӧ, Тэ Ен Пи?»
Исус вочавидзис: «Ті асьныд тайӧс шуанныд».
Сэки найӧ шуисны: «Висьталысьяс миянлы оз нин ковны, ми асьным кылім тайӧс Сы вомсянь».
23 юр.
Сэки чукӧртчӧмаяс чеччисны да нуӧдісны Исусӧс Пилат дінӧ. Найӧ мыжалӧмӧн висьталісны: «Ми аддзылім: тайӧ Мортыс шызьӧдӧ миянлысь войтырӧс, ӧлӧдӧ кесарлы вот мынтӧмысь, асьсӧ ыдждӧдлӧ ӧксыӧн да Кристосӧн».
Пилат юаліс Исуслысь: «Тэ-ӧ юдейяслӧн Ӧксыыс?»
Исус вочавидзис: «Тэ шуан».
Пилат шуис аркирейяслы да став йӧзыслы: «Ог аддзы помкасӧ, мед мыждыны тайӧ Мортсӧ».
Но найӧ ӧтарӧ мыжалісны: «Велӧдӧмнас Сійӧ шызьӧдӧ йӧзсӧ став Юдея му пасьтала. Пондіс Галилеяын, ӧні татчӧ воис».
Галилея йылысь кылӧм бӧрын Пилат юаліс: «Сійӧ ӧмӧй Галилеяысь?»
Кор тӧдмаліс, мый Исус Ирӧд веськӧдлан муысь, мӧдӧдіс Сійӧс сы дінӧ. Буретш сійӧ лунъясӧ Ирӧд вӧлі Ерусалимын.
Исусӧс аддзӧмысь Ирӧдлы нимкодь лои, ӧд сійӧ важӧн нин кӧсйис аддзывны Сійӧс. Ирӧд уна кывліс Сы йылысь да виччысис аддзывны шензьӧданатор. Ирӧд ёна юасис Исусӧс, но Сійӧ воча кыв эз шу.
Сэні сулалысь аркирейяс да Индӧдӧ велӧдысьяс ӧтарӧ мыжалісны Исусӧс.
Ирӧд аслас шыпуртаяскӧд сераліс-лёкӧдіс Исусӧс, пасьтӧдіс Сійӧс озыр паськӧмӧ да бӧр мӧдӧдіс Пилат дінӧ.
Водзынсӧ Ирӧд да Пилат лӧгалісны ӧта-мӧд вылас, но тайӧ лунсяньыс найӧ кутісны ёртасьны.
Пилат чукӧртіс аркирейясӧс, юралысьясӧс да войтырсӧ, сэсся шуис налы: «Ті вайӧдінныд тайӧ Мортсӧ ме водзӧ да мыжаланныд Сійӧс йӧзсӧ шызьӧдӧмысь.
Ме тіян дырйи юаси Сійӧс да эг аддзы мыжсӧ. Сійӧ абу мыжа, мыйысь ті Сійӧс мыжаланныд. Ме мӧдӧді Сійӧс Ирӧд дінӧ, но Ирӧд тшӧтш абу аддзӧма Сылысь мыжсӧ. Сійӧ эз вӧч сэтшӧм мыжсӧ, мыйысь эськӧ колӧ вины Сійӧс. Тшӧкта нӧйтны, сэсся лэдза».
Быд во Ыджыд лунӧ йӧз корӧм серти Пилатлы колӧ вӧлі лэдзны дзескыдінысь ӧти мортӧс.
Став йӧзыс горӧдісны: «Вины Сійӧс.
Лэдз миянлы Варавваӧс.»
Варавва пукаліс дзескыдінын карас зык лэптӧмысь да мортӧс виӧмысь.
Пилат бара шыасис йӧз дінӧ, ӧд кӧсйис мездыны Исусӧс.
Но найӧ горӧдісны: «Тувъяв. Тувъяв Сійӧс.»
Пилат коймӧдысь шыасис на дінӧ: «Мый лёксӧ Сійӧ вӧчис?
Ме ог аддзы сэтшӧм мыжсӧ, мыйысь эськӧ колӧ вины Сійӧс. Тшӧкта нӧйтны, сэсся лэдза».
Йӧзыс лёкысь горзісны, тшӧктісны тувъявны Исусӧс. Йӧзыслӧн да аркирейяслӧн горзӧмыс веніс.
Пилат шуис вӧчны на ног. Налӧн корӧм серти сійӧ лэдзис дзескыдінысь зык лэптысьӧс, коді виис тшӧтш мортӧс. Исусӧс сетіс тувъявны, тадзи могмӧдіс йӧзыслысь кӧсйӧмсӧ.
Исусӧс нуӧдігӧн паныдасис киринеяса Симон, сійӧ локтӧ вӧлі видз-му вылысь. Сы вылӧ пуктісны крестсӧ да тшӧктісны мунны Исус бӧрся.
Уна йӧз муніс Исус бӧрся. Аньяс сыркъялӧмӧн бӧрдісны Сы вӧсна.
На дінӧ бергӧдчӧмӧн Исус шуис: «Ерусалимса аньяс, энӧ бӧрдӧй Ме вӧсна.
Бӧрдӧй ас вӧснаныд да ныв-пиныд вӧсна.
Воасны лунъяс, кор шуасны: “Шудаӧсь нӧбасьлытӧмъяс, кага вайлытӧмъяс да морӧснас нёньӧдлытӧмъяс”.
Сэки шуасны керӧсъяслы: “Усьӧй миян вылӧ.”
Мылькъяслы шуасны: “Вевттьӧй миянӧс.”
Тадзи кӧ вӧчӧны веж пуыскӧд, косыскӧд мый лоас.»
Исускӧд тшӧтш вины нуӧдісны кык лёк вӧчысьӧс.
Воисны Юр лы нима керӧсӧ. Сэні тувъялісны Исусӧс да Сыкӧд орччӧн лёк вӧчысьясӧс: ӧтисӧ веськыдладорас, мӧдсӧ шуйгаладорас.
Исус кевмис: «Батьӧй, прӧстит тайӧ йӧзсӧ, ӧд найӧ оз тӧдны, мый вӧчӧны».
Шыпуртаяс пудъясьӧмӧн юкисны Исуслысь паськӧмсӧ.
Йӧзыс сулалісны да видзӧдісны.
Юралысьяс накӧд сералӧмӧн шуалісны: «Мукӧдӧс мездіс — мед Асьсӧ ӧні мездас, Сійӧ кӧ Кристос, Енлӧн бӧрйӧмаыс».
Сералісны-лёкӧдісны Исусӧс тшӧтш шыпуртаяс. Найӧ матыстчӧмӧн мыччывлісны Сылы шома вина да шуалісны: «Тэ кӧ юдейяслӧн Ӧксы, мезды Асьтӧ».
Исус юр весьтын грек, латин да еврей кывйӧн вӧлі гижӧма: «Тайӧ юдейяслӧн Ӧксы».
Крестӧ тувъялӧм лёк вӧчысьясысь ӧтиыс Исусӧс омӧльтігмоз шуаліс: «Тэ кӧ Кристос, мезды Асьтӧ да миянӧс.»
Мӧдыс ӧлӧдіс сійӧс: «Тэ ӧмӧй Енсьыс он пов? Тэнӧ ӧд Сы моз жӧ тувъялӧма.
Миянӧс веськыда мыждӧма, асланым лёк вӧчӧмъясысь, а тайӧ Мортыс лёксӧ эз вӧчлы».
Сэсся шуис Исуслы: «Господьӧй, казьтышт менӧ, кор воан Аслад Юраланінӧ.»
Исус шуис: «Веськыда висьтала тэныд: талун лоан Мекӧд райын».
Лун шӧр кадӧ пемдіс став му пасьталаыс, пемыдыс сулаліс куим часӧдз.
Шонді югыдыс быри, крамын ӧшалысь дӧраыс шӧрипельӧ косяссис.
Исус ыджыд шыӧн горӧдіс: «Батьӧй, Тэнад киӧ сета Ассьым лолӧс.»
Тайӧс шуӧм бӧрын лолыс петіс.
Ставсӧ тайӧс аддзӧм бӧрын шыпуртаяслӧн веськӧдлысь Енмӧс ошкигтырйи шуис: «Тайӧ Мортыс збыльысь веськыда олысь вӧлӧма».
Став йӧзыс, кодъяс вӧлі чукӧртчӧмаӧсь видзӧдны ыджыд ворсӧм, ставсӧ тайӧс аддзӧм бӧрын морӧсаныс кучкалігтыр пондісны мунавны.
Исуслӧн тӧдсаясыс ылісянь видзӧдісны ставсӧ тайӧс. Сэні вӧліны тшӧтш Галилеяысь Сыкӧд ветлысь аньяс.
Сэні вӧлі Юдеяысь, Аримафея карысь Ӧсип нима морт. Тайӧ бур да веськыда олысь мортыс виччысис Енлысь Юралӧмсӧ. Ӧсип вӧлі веськӧдлан котырысь, но паныд сулаліс Исусӧс виӧмлы. Сійӧ муніс Пилат дінӧ да корис Исуслысь шойсӧ.
Ӧсип босьтіс крест вылысь шойсӧ, гартыштіс дӧраӧ да пуктіс кыртаӧ кералӧм дзебанінӧ, кытчӧ некодӧс на эз дзеблыны.
Вӧлі рыт, шойччан лунлы паныд.
Ӧсипкӧд тшӧтш вӧліны Галилеяысь Исускӧд локтӧм аньяс. Найӧ аддзылісны, кыдзи пуктісны Исуслысь шойсӧ дзебанінӧ. Дзебанінысь воӧм бӧрын аньяс дасьтісны чӧскыд дука мавтасъяс, а шойччан лунӧ Индӧд серти найӧ шойччисны.
24 юр.
Шойччан лун бӧрын водз асывнас аньяс дасьтӧм мавтасъясӧн да накӧд нӧшта кодсюрӧяс локтісны дзебанінӧ. Найӧ аддзисны: изсӧ вӧлі вештӧма пыранінсьыс.
Кор пырисны пытшкас, эз аддзыны Господь Исуслысь шойсӧ.
Аньяс шӧйӧвошисны. Виччысьтӧг на водзӧ сувтісны дзирдалан паськӧма кык морт.
Повзьӧмнысла аньяс копыртісны юрнысӧ. Тайӧ кык мортыс шуисны налы: «Мый ті корсянныд ловъяӧс кулӧмаяс пӧвстысь?
Сійӧ тані абу.
Сійӧ ловзис.
Уськӧдӧй тӧд выланыд, мый Сійӧ шуліс тіянлы Галилеяын на: “Талы колӧ лоны: Морт Пиӧс сетасны мыжаяс киӧ да тувъяласны крестӧ, но коймӧд луннас Сійӧ ловзяс”».
Сэки тӧд вылас уси налы Исуслӧн висьтавлӧмыс. Дзебанінысь локтӧм бӧрын аньяс висьталісны ставсӧ тайӧс дас ӧти велӧдчысьыслы, тшӧтш мукӧдыслы.
Тайӧ аньясыс вӧліны Магдала Марья, Иоанна, Яковлӧн Марья мамыс да нӧшта мукӧд аньяс на. Аньяс юӧртісны лоӧмтор йывсьыс апостолъяслы,
но найӧ эз эскыны, чайтісны, мый лӧсьӧдлӧны.
Петыр котӧрӧн уськӧдчис дзебанінӧ. Видзӧдліс пытшкас да аддзис сӧмын дзебан дӧраяссӧ. Петыр муніс сэтысь тайӧ лоӧмторсьыс ёна шензьӧмӧн.
Сійӧ лунӧ Исуслӧн кык велӧдчысь мунісны Эммаус нима сиктӧ, коді вӧлі Ерусалимсянь дас верст ылнаын. Найӧ сёрнитісны ас костаныс став тайӧ лоӧмтор йывсьыс.
Сёрнитіганыс Ачыс Исус матыстчис да пондіс мунны накӧд.
Но найӧ эз тӧдны Сійӧс, синнысӧ вӧлі пӧртӧма.
Исус юаліс налысь: «Мый йылысь сёрнитанныд, туй йӧз?
Мыйла ті жугыльӧсь?»
На пиысь Клеоп нима вочавидзис: «Буракӧ, Тэ дзик ӧтнад Ерусалимӧ локтысьясысь он тӧд, мый сэні лои тайӧ лунъясӧ?»
Исус юаліс: «Мый лои?»
Найӧ вочавидзисны: «Лёктор лои Назаретса Исускӧд. Тайӧ Мортыс Ен водзын да йӧз водзын кывнас и уджнас вӧлі вына пророк. Аркирейясным юралысьяскӧд мыждісны сійӧс да сетісны тувъявны крестӧ.
Ми лача кутім, мый Сійӧ мездас Израильӧс. Но тайӧ абу на ставыс. Талун коймӧд лун нин лоӧмторсяньыс.
Миян пиысь кодсюрӧ аньяс чуймӧдісны миянӧс. Водз асывнас найӧ ветлӧмаӧсь дзебанінас да шойсӧ абу аддзӧмаӧсь сэтысь. Локтӧм бӧрас висьталісны, аддзылім пӧ анделъясӧс. Анделъяс шуӧмаӧсь, Исус пӧ ловъя.
Миян пиысь кодсюрӧ тшӧтш ветласны дзебанінас да аддзасны, мый аньясыд збыль вӧлӧм висьталӧны. Исустӧ сэтысь оз аддзыны».
Исус шуис налы: «Гӧгӧрвотӧмӧсь тай ті. Сьӧкыда эсканныд пророк кывъясӧ.
Эз-ӧ тайӧ сьӧкыдыс пыр ков мунны Кристослы да пырны Аслас дзирдлунӧ?»
Мӧисей да пророк небӧгъяссянь Исус пондіс гӧгӧрвоӧдны налы став Гижӧдсьыс Ас йывсьыс шуӧмсӧ.
Найӧ матыстчисны сиктлань, кытчӧ мунісны.
Исус петкӧдліс, быттьӧ кӧсйӧ водзӧ мунны.
Но найӧ эз лэдзны Сійӧс, шуалісны: «Кольччы миянкӧд. Луныс рытлань нёровтчӧ».
Исус пырис накӧд керкаӧ да кольччис сэтчӧ.
Сёйиганыс Исус босьтіс нянь, Енмӧс аттьӧалӧмӧн чегис няньсӧ да сетіс налы.
Сэки налӧн синныс воссис, и найӧ тӧдісны Сійӧс.
Тайӧ здукас Исус лои налы тыдавтӧм.
Сэки найӧ шуисны: «Эз-ӧ сьӧлӧмным ыпъяв, кор Сійӧ сёрнитіс миянкӧд туй вылын да гӧгӧрвоӧдіс миянлы Гижӧдсӧ?»
Найӧ дзик пыр чеччисны да бӧр мунісны Ерусалимӧ. Сэні аддзисны дас ӧтикнан велӧдчысьсӧ да накӧд тшӧтш мукӧдсӧ. Велӧдчысьяс шуисны воӧмаяслы: «Господьным збыльысь ловзьӧма. Сійӧ петкӧдчылӧма Симонлы».
Тайӧ кыкыс висьталісны, мый лои туйын, да кыдзи тӧдісны Исусӧс нянь чегигас.
Сёрнитіганыс Ачыс Исус сувтіс на шӧрӧ да шуис: «Лӧнь олӧм тіянлы.»
Повзьӧмнысла найӧ мӧвпыштісны, мый тайӧ орт.
Исус шуис налы: «Мый ті поланныд? Мый тіянӧс майшӧдлӧ?
Видзӧдлӧй Менам ки-кок вылӧ, тайӧ Ме Ачым.
Инмӧдчылӧй Ме дінӧ, и ті асьныд аддзанныд.
Ӧд ловлӧн лы-яйыс абу, а Менам, видзӧдлӧй, эм».
Тайӧс шуӧм бӧрын Сійӧ петкӧдліс налы Ассьыс ки-коксӧ.
Найӧ ёна шензисны, нимкодьнысла эз вермыны эскыны.
Исус юаліс налысь: «Эм-ӧ тіян мыйкӧ сёйыштны?»
Сылы сетісны пӧжалӧм чери да малязі ма.
Сійӧ босьтіс да налӧн син водзын сёйис.
Сэсся Исус шуис налы: «Кор на Ме вӧлі тіянкӧд, Ме висьтавлі, мый инас ставыс, мый гижӧма Ме йылысь Мӧисей Индӧдын, пророк гижӧдъясын да псаломъясын».
Сэки Исус восьтіс налысь вежӧрсӧ гӧгӧрвоны Гижӧдъяс.
Сійӧ шуис налы: «Тадзи гижӧма: Кристослы колӧ мунны сьӧкыдыс пыр, кувны да коймӧд луннас ловзьыны, сэсся колӧ юӧртны Сы нимӧн Ерусалимын и водзӧ быд кыла войтырлы мыжъясысь бергӧдчӧм да мыжъяс прӧститӧм йылысь.
Ті асьныд ставсӧ кывлінныд да аддзылінныд.
Ме мӧдӧда тіянлы Батьӧйлысь кӧсйысьӧмасӧ.
Ті кольччӧй Ерусалимӧ, кытчӧдз тіян вылӧ оз лэччы енэжсянь выныс».
Исус петкӧдіс велӧдчысьяссӧ Вифаниялань, сэсся кисӧ лэптӧмӧн бурсиис найӧс.
Бурсиигмозыс Сійӧ кутіс ылыстчыны наысь да кыпӧдчыны енэжӧ.
Найӧ муӧдзыс копыртчылісны Сылы, сэсся ёна нимкодясигтыр локтісны бӧр Ерусалимӧ.
Енмӧс ошкӧмӧн найӧ пыр вӧліны крамынӧсь.
Аминь.
Иоан серти бур юӧр
1 юр.
Медводз вӧлі Кыв. Кывйыс вӧлі Енкӧд. Кывйыс вӧлі Ен.
Кывйыс водзысяньыс вӧлі Енкӧд.
Ставсӧ Сы пыр вӧчӧма. Сытӧг немтор абу вӧчӧма.
Сы пытшкын вӧлі олӧм. Олӧмыс йӧзыслы вӧлі югыдӧн.
Пемыдас югдӧдӧ югыдыс, эз пӧдты сійӧс пемыдыс.
Ен мӧдӧдіс Иоан нима мортӧс.
Сійӧ локтіс висьтавны Югыдыс йылысь, медым быдӧн эскис Югыдыслы.
Ачыс сійӧ эз вӧв югыдыс, сійӧ локтіс висьтавны Югыдыс йылысь.
Збыль Югыдыс, быд мортӧс Югдӧдысь, локтіс муюгыдас.
Сійӧ вӧлі муюгыдас, Сы пыр вӧчӧма муюгыдсӧ, но муюгыдыс эз тӧд Сійӧс.
Сійӧ локтіс Ас йӧз дінас, но найӧ эз сибӧдны Сійӧс.
Сійӧс сибӧдысьяслы, Сылы эскысьяслы, Сійӧ сетіс позянлун лоны Енлӧн ныв-пиӧн. Найӧ чужисны эз вирсянь, эз морт кӧсйӧмсянь да верӧс кӧсйӧмсянь, найӧ чужисны Енсянь.
Кывйыс лоис мортӧн, Сійӧ оліс миянкӧд буралӧм-збыльнас тыр.
Ми аддзылім Сылысь дзирдлунсӧ. Сӧмын ӧтка Пиыслы вуджӧ татшӧм дзирдлуныс Батьсяньыс.
Иоан гораа юӧртліс Сы йылысь: «Тайӧ дзик сійӧ Мортыс, код йылысь ме висьтавлі, мый ме бӧрся Локтысьыс меысь ыджыдджык, ӧд Сійӧ меысь водзджык вӧлӧма».
Миянлы быдӧнлы Сы озырлунысь вичмис буралӧм вылӧ буралӧм.
Индӧдсӧ вӧлі сетӧма Мӧисей пыр, а буралӧмыс да збыльыс воис Исус Кристос пыр.
Йӧзыс Енсӧ эз аддзывлыны, сӧмын ӧтка Пиыс, Бать дінас олысьыс, восьтіс Сійӧс миянлы.
Юдейяслӧн веськӧдлысьяс мӧдӧдісны Ерусалимысь попъясӧс да левитъясӧс юавны Иоанлысь: «Коді тэ?»
Иоан соссьытӧг веськыда шуис: «Ме абу Кристос».
Сэки сылысь юалісны: «Коді нӧ тэ? Илля?»
Сійӧ шуис: «Абу».
Найӧ бара юалісны: «Пророк-ӧ тэ?»
Сійӧ вочавидзис: «Абу».
Сэки сылы шуисны: «Коді нӧ тэ?
Мый миянлы вочавидзны миянӧс мӧдӧдысьяслы? Мый шуан ас йывсьыд?»
Иоан вочавидзис налы: «Ме овтӧминын горзысьлӧн шыыс: “Веськӧдӧй-шыльӧдӧй туйсӧ Господьлы”. Тадзи коркӧ висьталіс Исай пророк».
Фарисейяссянь мӧдӧдӧмаяс юалісны Иоанлысь: «Тэ кӧ абу Кристос, абу Илля, абу пророк, мыйла, сідзкӧ, йӧзсӧ пыртан?»
Иоан вочавидзис налы: «Ме пырта сӧмын ваӧн, но тіян пӧвстын эм морт, кодӧс ті онӧ тӧдӧй.
Сійӧ ме бӧрын локтӧ, но Сійӧ меысь водзджык нин вӧлӧма.
Ме ог шогмы разьны Сылысь кӧмкот кӧвсӧ».
Тайӧ вӧлі Вифаварын, Йӧрдан ю сайын, кӧні Иоан пыртліс йӧзсӧ.
Аскинас Иоан аддзис сы дінӧ локтысь Исусӧс да шуис: «Видзӧдлӧй, тайӧ Енлӧн Баля. Сійӧ вештӧ йӧзлысь мыжъяссӧ.
Сы йылысь ме висьтавлі нин, мый ме бӧрся локтӧ Морт, коді меысь ыджыдджык, ӧд Сійӧ меысь водзджык вӧлӧма.
Сійӧс ме эг тӧдлы, но локті ваӧн пыртны, медым Израиль тӧдмаліс Сійӧс».
Иоан веськыда висьталіс: «Ме аддзылі, кыдзи енэжсянь гулю моз лэччис Лов да кольччис Сы вылӧ.
Ме эг тӧдлы Сійӧс, но ваӧн пыртны менӧ Мӧдӧдысь шуис меным: “Кор Тэ аддзан, мый код вылӧ кӧ лэччас Лов да кольччас Сы вылӧ, буретш Сійӧ кутас пыртны Вежа Лолӧн”.
Ме аддзылі тайӧс да эскӧда тіянӧс: Сійӧ — Ен Пи».
Мӧд луннас Иоан аслас кык велӧдчыськӧд бара сулаліс ю дорын.
Локтысь Исусӧс аддзигӧн сійӧ шуис: «Видзӧдлӧй, тайӧ Енлӧн Баля.»
Тайӧс кылӧм бӧрын кыкнан велӧдчысьыс мӧдӧдчисны Исус бӧрся.
Исус бергӧдчыліс, аддзис Сы бӧрся локтысьясӧс да юаліс налысь: «Мый тіянлы колӧ?»
Найӧ вочавидзисны: «Велӧдысь, кӧні Тэ олан?»
Исус шуис налы: «Локтӧй да видзӧдлӧй».
Найӧ мунісны, аддзисны Сылысь оланінсӧ да кольччисны сэтчӧ лунтыр кежлӧ.
Вӧлі нёль час гӧгӧр.
Иоанлӧн велӧдчысьяс да Исус бӧрся мунысьяс пиысь ӧтиыс вӧлі Ӧндрей, Симон-Петырлӧн вокыс.
Сійӧ медводз корсис Симон воксӧ да висьталіс сылы: «Ми аддзим Мессияӧс.» Мӧд ногӧн кӧ, тайӧ лоӧ Кристос. Ӧндрей вайӧдіс воксӧ Исус дінӧ.
Исус видзӧдліс сы вылӧ да шуис: «Тэ Симон, Ионалӧн пи. Тэнад нимыд лоас Кифа». Сылӧн вежӧртасыс — из, мӧд ногӧн кӧ — Петыр.
Аскинас Исус мӧдӧдчис Галилея муӧ. Сэтысь аддзис Филипӧс да шуис сылы: «Лок Ме бӧрся».
Ӧндрей да Петыр моз Филип вӧлі Випсаида карысь.
Филип аддзис Нафанаилӧс да шуис сылы: «Ми аддзим Сійӧс, код йылысь вӧлі висьталӧма Мӧисей Индӧдын да пророк гижӧдъясын. Тайӧ Назаретысь Исус, Ӧсиплӧн пи».
Нафанаил шуис Филиплы: «Вермас-ӧ мыйкӧ бурыс лоны Назаретысь?»
Филип вочавидзис: «Лок да ачыд видзӧдлы».
Исус аддзис Сы дінӧ локтысь Нафанаилӧс да шуис сы йылысь: «Тайӧ збыльысь израильса морт, сійӧ оз ылӧдчы».
Нафанаил юаліс Сылысь: «Кытысь Тэ тӧдан менӧ?»
Исус вочавидзис: «Филип кортӧдз на Ме аддзылі тэнӧ инжир пу улысь».
Нафанаил шуис: «Велӧдысьӧй, Тэ Ен Пи, Тэ Израиль Ӧксы.»
Исус шуис сылы: «Ме шуи, мый аддзылі тэнӧ инжир пу улысь, да та вӧсна тэ эскан. Но таысь ыджыдджыкӧс на тэ аддзан».
Сэсся содтіс: «Веськыда, веськыда висьтала тіянлы: ӧнісянь ті кутанныд аддзыны восьса енэжсӧ да Енлысь анделъяссӧ, кодъяс лэччӧны Ен Пи дінӧ да кыпӧдчӧны енэжас».
2 юр.
Кык лун мысти Галилеяса Кана карын вӧлі кӧлысь. Сэні вӧлі Исуслӧн мамыс.
Исусӧс да велӧдчысьяссӧ тшӧтш вӧлі корӧмаӧсь кӧлысь вылас.
Кор винаыс помасис, Исуслӧн мамыс шуис Сылы: «Налӧн винаыс бырӧма».
Исус вочавидзис: «Аньӧй, мый Меным таӧдз, ӧд Менам кадыс эз на во».
Мамыс шуис кесйӧгъяслы: «Ставсӧ вӧчӧй Сылӧн шуӧм серти».
Сэні вӧлі изйысь вӧчӧм квайт ва доз, быд дозйӧ ваыс вӧлі тӧрӧ сё литра гӧгӧр. Тайӧ дозъяснас юдейяс вӧдитчисны сӧстӧммӧдчӧм могысь.
Исус шуис кесйӧгъяслы: «Тыртӧй дозъяссӧ ваӧн».
Найӧ тырысӧдзыс кисьталісны васӧ дозъясас.
Сэсся шуис налы: «Ӧні гумовтӧй васӧ да мыччӧй сійӧс кӧлысь нуӧдысьлы».
Найӧ мыччисны.
Кӧлысь нуӧдысь видліс ваысь артмӧм винасӧ, но сійӧ эз тӧд, кытысь тайӧ винаыс. Та йылысь тӧдісны сӧмын ва дозъяссӧ тыртысьяс. Сэки кӧлысь нуӧдысь корис верӧспусӧ да шуис сылы: «Ставныс медводз бур винанас юктасьӧны, сэсся йӧз коддзӧм бӧрас лёкджыкнас.
А тэ ӧнӧдз бур винасӧ видзӧмыд».
Тайӧ медводдза шензьӧданаторсӧ Исус вӧчис Галилеяса Кана карын. Тадзи петкӧдліс Сійӧ Ассьыс дзирдлунсӧ, и велӧдчысьясыс кутісны эскыны Сылы.
Та бӧрти Исус мамыскӧд, вокъясыскӧд да велӧдчысьясыскӧд мунісны Капернаум карӧ.
Сэтчӧ найӧ кольччисны лун-мӧд кежлӧ.
Матыстчис юдейяслӧн Ыджыд лун, и Исус локтіс Ерусалимӧ. Сійӧ аддзис: крамын вузалӧны ӧшъясӧс, ыжъясӧс, гулюясӧс да вежлалӧны сьӧм.
Исус кӧвъясысь кыыштіс орс да кутіс вӧтлавны сійӧн крамысь вузасьысьяссӧ, тшӧтш налысь ыжъяссӧ да ӧшъяссӧ. Сійӧ пӧрлӧдліс сьӧм вежысьяслысь пызанъяссӧ да кисьталіс налысь сьӧмнысӧ.
Гулюӧн вузасьысьяслы Сійӧ шуис: «Босьтӧй найӧс татысь. Энӧ пӧртӧй Менам Батьлысь керкасӧ вузасянінӧ.»
Сэки Исуслӧн велӧдчысьяслы тӧд выланыс уси Гижӧдас висьталӧмыс: «Тэнад керка вӧсна вежӧгтӧмыс топӧдӧ Менсьым сьӧлӧмӧс».
Юдейяслӧн веськӧдлысьяс шуисны Исуслы: «Кутшӧм ногӧн Тэ эскӧдан миянӧс, мый Тэныд позьӧ тадзи вӧчнысӧ?»
Исус вочавидзис: «Жугӧдӧй тайӧ крамсӧ, и Ме куим лунӧн выльысь лэпта сійӧс».
Найӧ воча шуисны Исуслы: «Тайӧ крамсӧ лэптісны нелямын квайт во чӧж, а Тэ куим лунӧн кӧсъян лэптыны сійӧс?»
Крам йылысь сёрнитігӧн збыльвылас Исус висьталіс Аслас вир-яй йылысь.
Исуслӧн ловзьӧм бӧрын велӧдчысьясыслы усины тӧд выланыс Сылӧн кывъясыс.
Сэки найӧ эскисны Гижӧдӧ да Исуслӧн кывъясӧ.
Ерусалимын Ыджыд лун дырйи унаӧн аддзылісны Исуслысь шензьӧданаторъяс вӧчӧмсӧ да эскисны Сылы.
Но Исус эз эскы налы, ӧд Сійӧ тӧдіс найӧс ставнысӧ. Сылы эз ковны йӧз йылысь висьталысьяс, ӧд Сійӧ тӧдіс быд мортлысь сьӧлӧмсӧ.
3 юр.
Юдейяслӧн веськӧдлысьяс пӧвстын вӧлі Никодим нима фарисей.
Войнас сійӧ локтіс Исус дінӧ да шуис Сылы: «Велӧдысьӧй, ми тӧдам: Тэ Енсянь локтӧм Велӧдысь.
Ӧд Тэ моз некод оз вермы вӧчны шензьӧданаторъяссӧ, оз кӧ ло сыкӧд Ен».
Исус вочавидзис: «Веськыда, веськыда висьтала тэныд: мортыс оз вермы аддзыны Енлысь Юраланінсӧ, оз кӧ сійӧ выльысь чуж».
Никодим юаліс Сылысь: «Вермас-ӧ мортыс выльысь чужны, пӧрысь кӧ нин сійӧ?
Ӧд сійӧ оз вермы мам кынӧмас бӧр пырны да мӧдысь чужны».
Исус вочавидзис: «Веськыда, веськыда висьтала тэныд: мортыс кӧ оз чуж васянь да Ловсянь, сійӧ оз вермы пырны Енлӧн Юраланінӧ.
Вир-яйсянь чужысь эм вир-яй, а Ловсянь чужысь эм лов.
Эн шензьы, Ме кӧ висьтала, мый тіянлы колӧ выльысь чужны.
Тӧв пӧльтӧ, кӧні кӧсйӧ. Сылысь шысӧ кылан, сӧмын он тӧд, кысянь сійӧ локтӧ да кытчӧ мунӧ. Ловсянь чужыськӧд тшӧтш тадзи овлӧ».
Никодим юаліс Сылысь: «Вермас ӧмӧй тадзи лоны?»
Исус вочавидзис: «Ачыд тэ — Израиль войтырӧс велӧдысь, а тайӧс весиг он тӧд?
Веськыда, веськыда висьтала тэныд: ми сёрнитам сы йылысь, мый тӧдам, да висьталам сы йылысь, мый аддзылім, но ті миян висьталӧмӧ онӧ эскӧй.
Ме висьталі тіянлы мувывсаыс йылысь, но ті энӧ эскӧй Меным. Эсканныд-ӧ, висьтала кӧ тіянлы енэжвывсаыс йылысь?
Енэжас олысь да енэжсянь лэччӧм Морт Пиысь кындзи енэжас некод на эз кыпӧдчыв.
Кыдзи овтӧминын Мӧисей вывлань кыпӧдіс змейӧс, тадзи лоӧ кыпӧдӧма тшӧтш Морт Пиӧс, медым Сылы эскысь эз быр, а помтӧг оліс.
Ӧд Енмыслы сэтшӧм мусаӧсь йӧзыс, мый сетіс Ассьыс ӧтка писӧ, медым Сылы эскысь эз быр, а помтӧг оліс.
Енмыс мӧдӧдіс Ассьыс Писӧ муюгыдас йӧзӧс мездыны, а эз мыждыны.
Сылы эскысьӧс оз ло мыждӧма, а эскытӧмӧс мыждӧма нин, ӧд сійӧ эз эскы Енлӧн ӧтка Пилы.
Мыждӧмыс сыын, мый му вылас локтіс югыдыс, но йӧзыслы мусаджык вӧлі пемыдыс, ӧд налӧн уджъясыс лёкӧсь.
Лёксӧ вӧчысь мустӧмтӧ югыдсӧ. Сійӧ оз лок югыдас, медым сылӧн лёк уджъясыс эз йӧзасьны. Збыль серти олысь локтӧ югыдас, медым тыдовтчисны сылӧн Енсянь уджъясыс».
Та бӧрти Исус локтіс велӧдчысьясыскӧд Юдея муӧ, сэні оліс накӧд да пыртіс йӧзсӧ.
Иоан тшӧтш пыртіс йӧзсӧ Енонын, Салимсянь матын, ӧд ваыс сэні уна вӧлі. Йӧзыс волісны сэтчӧ пыртчыны.
Сэки Иоанӧс абу на вӧлі пуксьӧдӧмаӧсь дзескыдінӧ.
Ӧтчыд Иоанлӧн велӧдчысьясыс венӧ воисны юдейяскӧд сӧстӧммӧдчӧм йылысь.
Велӧдчысьясыс локтісны Иоан дінӧ да шуисны: «Велӧдысь, сійӧ Мортыс, коді вӧлі тэкӧд Йӧрдан ю мӧдлапӧлын да код йылысь тэ висьтавлін, ӧні Сійӧ тшӧтш пыртӧ. Сы дінӧ ставныс мунӧны».
Иоан вочавидзис: «Мортыс нинӧм оз вермы босьтны аслыс, оз кӧ ло сетӧма сылы енэжсянь.
Ті асьныд кывлінныд менсьым висьталӧмӧс: “Ме абу Кристос, ме сӧмын Сы водзвылын мӧдӧдӧмаыс”.
Верӧспуӧн шуӧны сійӧс, кодлӧн эм гӧтырпу. Верӧспулӧн ёртыс орччӧн сулалӧ да нимкодясьӧмӧн кывзӧ сылысь сёрнисӧ.
Ме тшӧтш тадзи нимкодяся, и менам нимкодьлунӧй помтӧм-дортӧм.
Кристослы колӧ быдмыны, а меным ичӧтмыны».
Вылісянь Локтысьыс ставсьыс вылын.
Мувывса мортсӧ вӧчӧма муысь, сійӧ сёрнитӧ мувывсаыс йылысь.
А енэжсянь Локтысьыс ставсьыс вылын. Сійӧ висьталӧ, мый аддзыліс да кывліс, но Сылысь висьталӧмсӧ йӧзыс сьӧлӧманыс оз сибӧдны.
Мортыс кӧ сибӧдӧ Сылысь кывъяссӧ, тайӧн петкӧдлӧ, мый Енмыс висьталӧ збыльсӧ. Кодӧс Енмыс мӧдӧдіс, Сійӧ Енлысь кывъяссӧ висьталӧ, ӧд Енмыс Сылы лышкыда Ловсӧ сетӧ.
Пиыс муса Батьыслы, и Батьыс ставсӧ сетіс Сы киӧ.
Коді эскӧ Пиыслы, сылӧн эм помтӧм олӧм. Коді оз эскы Пиыслы, сылӧн оз ло олӧмыс, но Енлӧн скӧрлуныс лоас сы вылын.
4 юр.
Фарисейяс кывлӧмаӧсь, Исуслӧн пӧ Иоан дорысь унджык нин велӧдчысьыс, Сійӧ пӧ унджык йӧзӧс пыртӧ. Дерт, Исус эз Ачыс пырт, а пыртісны Сылӧн велӧдчысьясыс. Кор Исус тӧдмаліс, мый фарисейяс кывлӧмаӧсь та йылысь, Сійӧ эновтіс Юдея му да бӧр муніс Галилеяӧ.
Сылы ковмис мунны Самария му пыр.
Исус воис Самария муӧ, Сикар нима карӧ. Тайӧ карсяньыс матын вӧлі му, кодӧс Яков сетлӧма Ӧсип пиыслы.
Сэні вӧлі Яковлӧн юкмӧс.
Дыр мунӧмысла Исус мудзис да пуксис шойччыштны юкмӧс дорас.
Вӧлі лун шӧр гӧгӧр.
Самарияса ань локтіс сэтчӧ вала.
Исус шыасис сы дінӧ: «Юктӧдышт Менӧ ванад».
Исуслӧн велӧдчысьясыс вӧлі мунӧмаӧсь карӧ сёян ньӧбны.
Ань шуис Исуслы: «Ачыд Тэ юдей, а коран менсьым, самарияса аньлысь, ва юны?»
Юдейяс ӧд самарияса войтыркӧд оз волысьны.
Исус вочавидзис аньлы: «Тэ кӧ тӧдін Енлысь сетӧмторсӧ да Сійӧс, коді шуӧ тэныд тайӧ кывъяссӧ: “Юктӧдышт Менӧ ванад”, тэ эськӧ ачыд корин Сылысь васӧ, и Сійӧ сетіс тэныд ловъя ва».
Ань шуис Сылы: «Господьӧй, юкмӧсыс ӧд джуджыд, мыйӧн нӧ Тэ сэтысь гумовтан? Кытысь Тэ ловъя васӧ босьтан?
Тэ ӧмӧй Яков батьным дорысь ыджыдджык? Тайӧ юкмӧссӧ сійӧ сетӧма миянлы. Татысь сійӧ ачыс юлӧма, тшӧтш сылӧн пияныс да пемӧсъясыс».
Исус вочавидзис: «Тайӧ васӧ юысьлӧн горшыс бара на косьмас. Но Ме сета ва, и коді кутас юны тайӧ васӧ, сылӧн горшыс некор оз кут косьмыны.
Ваыс, кодӧс Ме сета сылы, лоӧ сы пытшкын помтӧм олӧмӧ визувтысь дзулькйӧн».
Ань шуис Сылы: «Господьӧй, вай меным тайӧ васӧ, медым менам горшӧй эз нин косьмы. Сэки татчӧ ваысла волыны оз ковмы».
Исус шуис аньлы: «Ветлы, кор верӧстӧ да лок татчӧ».
Ань вочавидзис: «Верӧсӧй менам абу».
Исус шуис: «Тэ веськыда висьталін, мый тэнад верӧсыд абу. Тэ витысь верӧс сайын вӧлін, но сійӧ мортыс, кодкӧд тэ ӧні олан, абу верӧс тэныд. Тэ збыльсӧ висьталан».
Ань шуис Сылы: «Господьӧй, ме аддза, мый Тэ — пророк.
Миян батьяс копрасисны-кевмысисны Енмыслы тайӧ керӧсас. А ті, юдейяс, шуанныд, колӧ пӧ копрасьны Енмыслы сӧмын Ерусалимын».
Исус шуис сылы: «Аньӧй, эскы Меным, воас кад, кор ті онӧ кутӧй копрасьны Батьлы тайӧ керӧсас да Ерусалимын.
Ті, самарияса войтыр, копрасянныд Сылы, кодӧс онӧ тӧдӧй. А ми копрасям Сылы, кодӧс тӧдам, ӧд мездмӧмыс воӧ юдейяссянь.
Воас кад да воис нин, кор Батьлы збыльысь копрасьысьяс кутасны кевмысьны Сылы Ловсянь да збыльыс серти. Татшӧм кевмысьысьясӧс корсьӧ Аслыс Бать.
Енмыс эм Лов. Сідзкӧ, Енлы кевмысьысьяслы колӧ кевмысьны Ловсянь да збыльыс серти».
Ань шуис Исуслы: «Тӧда, мый локтас Мессия-Кристос.
Сійӧ локтас да, ставсӧ висьталас миянлы».
Исус шуис аньлы: «Тайӧ Ме, тэкӧд Сёрнитысьыс».
Сійӧ кадас воисны велӧдчысьясыс. Найӧ шензисны, мый Исус сёрнитӧ анькӧд.
Сӧмын некод на пиысь эз юав, мыйла да мый йылысь Сійӧ сёрнитӧ анькӧд.
Сэки ань колис ва дозсӧ, муніс карас да шуис йӧзыслы: «Локтӧй, видзӧдлӧй тайӧ Мортыс вылӧ. Сійӧ висьталіс меным ставсӧ, мый ме вӧчлі.
Абу-ӧ Сійӧ Кристос?»
Йӧзыс петісны карсьыс да локтісны Исус дінӧ.
Сэккості велӧдчысьясыс корисны Исусӧс: «Велӧдысь, лок сёйны.»
Исус шуис налы: «Менам эм сёян, код йылысь ті онӧ тӧдӧй».
Велӧдчысьясыс ас костаныс шензисны: «Эз-ӧ кодкӧ вай Сылы сёянсӧ?»
Исус шуис налы: «Менам сёянӧй — ставсӧ вӧчны Менӧ Мӧдӧдысьлӧн кӧсйӧм серти да эштӧдны Сылысь уджсӧ.
Ті шуанныд, нёль тӧлысь мысти пӧ воас вундан кад.
Висьтала тіянлы: видзӧдлӧй кӧдзӧм муяс вылӧ. Найӧ кельдӧдӧмаӧсь нин вундігкежлӧ.
Вундысь босьтӧ удждонсӧ ӧні нин, сійӧ чукӧртӧ няньсӧ помтӧм олӧмӧ.
Та вӧсна кӧдзысь да вундысь ӧтвыв нимкодясьӧны. Кывйӧз веськыда висьталӧ: “Ӧти кӧдзӧ, а мӧд вундӧ”.
Ме мӧдӧді тіянӧс вундыны му вылӧ, кытчӧ ті энӧ кӧдзлӧй. Сэні мырсисны мукӧдыс, но ті накӧд тшӧтш идраланныд быдтӧмторсӧ».
Ань шуис сійӧ карас олысьяслы: «Исус висьталіс меным ставсӧ, мый ме вӧчлі». Та вӧсна самарияса йӧз унаӧн пондісны эскыны Исуслы.
Найӧ локтісны Исус дінӧ да корисны олыштны Сійӧс на ордын.
Сійӧ кольччыліс сэтчӧ кык лун кежлӧ.
Ачыс Исус сёрнитіс накӧд, та вӧсна нӧшта на унджыкӧн эскисны Сылы.
Найӧ шуисны аньлы: «Ӧні ми эскам огӧ сӧмын тэнад висьталӧм вӧсна. Ми эскам сы понда, мый асьным кывлім Сійӧс да тӧдам: Сійӧ збыльысь муюгыдсӧ Мездысь, Кристос».
Кык лун мысти Исус муніс сэтысь Галилея муӧ.
Исус шуліс, пророкӧс пӧ ас муас оз пыдди пуктыны.
Кор Исус локтіс Галилеяӧ, сэтчӧс йӧзыс сибӧдісны Сійӧс. Ӧд найӧ тшӧтш ветлісны Ерусалимӧ Ыджыд лун кежлӧ да аддзылісны, мый Исус вӧчліс сэні.
Исус бара локтіс Галилеяса Кана карӧ, кӧні Сійӧ васӧ пӧртліс винаӧ.
Галилеяса Капернаум карын оліс ӧксылӧн отсасьысь, кодлӧн пиыс вӧлі висьӧ.
Отсасьысь кывліс, мый Исус локтӧма Юдея муысь Галилеяӧ. Сійӧ локтіс Исус дінӧ да корис Сійӧс бурдӧдны писӧ, коді вӧлі кулан выйын.
Исус шуис сылы: «Ті онӧ эскӧй, онӧ кӧ аддзылӧй индысьпасъяс да шензьӧданаторъяс.»
Ӧксылӧн отсасьысь шуис Исуслы: «Господьӧй, волы кытчӧдз пиӧй ловъя на.»
Исус шуис сылы: «Мун, тэнад пиыд бурдіс».
Ӧксылӧн отсасьысь эскис Исуслӧн кывъясӧ да муніс гортас.
Туяс сылы паныдасисны кесйӧгъясыс. Найӧ шуисны: «Тэнад пиыд бурдіс.»
Сійӧ юаліс налысь, корджык пиыслы кокньӧдіс.
Найӧ вочавидзисны: «Тӧрыт, час лунӧ, биа висьӧмыс эновтіс сійӧс».
Сэки батьыс гӧгӧрвоис, мый буретш сійӧ кадас воис бурдӧмыс, кор Исус шуис сылы: «Тэнад пиыд бурдіс». Сэки батьыс да став сылӧн гортсаыс эскисны Исуслы.
Тайӧ вӧлі мӧд шензьӧданатор, кодӧс вӧчис Исус Юдея муысь Галилеяӧ воӧм бӧрын.
5 юр.
Исус мӧдӧдчис Ерусалимӧ, сэки вӧлі юдейяслӧн гажӧдчан кад.
Ерусалимын, Ыж дзиръя дорын, вӧлі ва йӧртӧд. Юдейяс ва йӧртӧдлы сетлӧмаӧсь Вифезда ним. Ва йӧртӧд дінас вӧлі вит пыранін, найӧ вӧліны вевт улынӧсь.
Пыранінъясас куйлісны уна висьысь: синтӧмъяс, коктӧмъяс, косьмӧм ки-кокаяс. Найӧ виччысисны ва гызьӧм.
Господьлӧн анделыс корсюрӧ лэччывліс йӧртӧдӧ гызьӧдны васӧ.
Гызьӧм ваӧ медводдза пырысьыс быдпӧлӧс висьӧмысь бурдліс.
Сэні пыранінас куйліс комын кӧкъямыс во чӧж висьысь морт.
Исус тӧдіс, мый тайӧ мортыс дыр нин висьӧ. Исус аддзис сійӧс да юаліс: «Кӧсъян-ӧ тэ бурдны?»
Висьысь вочавидзис: «Господьӧй, гызьӧм ваас пырнысӧ отсалысьыс меным абу. Менам пыртӧдз кодкӧ мӧд нин удитӧ пырны».
Исус шуис сылы: «Чеччы, босьт вольпасьтӧ да ветлы».
Сійӧ дзик пыр бурдіс, босьтіс вольпасьсӧ да пондіс ветлӧдлыны.
Тайӧ вӧлі шойччан лунӧ.
Та вӧсна юдейяслӧн веськӧдлысьяс шуисны бурдӧм мортлы: «Талун шойччан лун, тэныд оз позь вольпасьтӧ нуны».
Сійӧ вочавидзис: «Бурдӧдысьӧй шуис меным: “Босьт вольпасьтӧ да ветлы”».
Сылысь юалісны: «Коді тэныд тшӧктіс босьтны вольпасьтӧ да ветлыны?»
Но бурдӧм мортыс эз тӧд, коді Сійӧ, ӧд Исус саяліс йӧз пӧвстас.
Та бӧрти Исус аддзис бурдӧм мортӧс крамысь да шуис сылы: «Ӧні тэ бурдін.
Водзӧ эн вӧч мыжсӧ, медым тэныд лёкджык эз ло».
Мортыс муніс да висьталіс юдейяслӧн веськӧдлысьяслы, мый сійӧс бурдӧдіс Исус.
Шойччан лунӧ татшӧмторсӧ вӧчӧмысь юдейяслӧн веськӧдлысьяс пондісны дзескӧдны Исусӧс да кӧсйисны вины Сійӧс.
Исус шуис налы: «Менам Батьӧй дугдывтӧг уджалӧ, и Ме уджала».
Сэки юдейяслӧн веськӧдлысьяс ёнджыка на кӧсйисны вины Исусӧс, ӧд Сійӧ торкис шойччан лунсӧ да шуис Енсӧ Аслас Батьӧн. Тадзи ӧткодяліс Асьсӧ Енкӧд.
Исус шуис налы: «Веськыда, веськыда висьтала тіянлы: Пиыс нинӧм оз вермы вӧчны Ассяньыс, оз кӧ аддзыв Батьыслысь вӧчӧмсӧ.
Ӧд мый Батьыс вӧчӧ, сійӧс тшӧтш Пиыс вӧчӧ.
Пиыс муса Батьыслы. Ставсӧ, мый вӧчӧ Батьыс, Пиыслы петкӧдлӧ. Батьыс нӧшта на ыджыдджык уджъяс Пиыслы петкӧдлас, ті весиг чуйманныд.
Батьыс ловзьӧдӧ кулӧмаясӧс да сетӧ налы олӧм. Пиыс тшӧтш сетӧ олӧм, кодлы кӧсйӧ.
Батьыс некодӧс оз мыжды. Мыждан вынсӧ Сійӧ сетіс Пиыслы, медым став йӧзыс бурӧ пуктісны Писӧ Батьсӧ моз.
Коді оз бурӧ пукты Писӧ, сійӧ оз бурӧ пукты и Батьсӧ, коді мӧдӧдіс Писӧ.
Веськыда, веськыда висьтала тіянлы: коді кывзӧ Менсьым кывъясӧс да эскӧ Менӧ Мӧдӧдысьлы, сылӧн эм помтӧм олӧм. Сійӧс оз кутны мыждыны, но кулӧмсьыс сійӧ вуджис нин олӧмас.
Веськыда, веськыда висьтала тіянлы: воас кад да воис нин, кор кулӧмаяс кыласны Ен Пилысь гӧлӧс шысӧ. Сэки Сійӧс кылысьяс ловзясны.
Батьыс сетӧ олӧм быдӧнлы, Пиыслы Сійӧ тшӧтш сетіс вын — сетны олӧм быдӧнлы.
Батьыс сетіс Пиыслы вын мыждыны, ӧд сійӧ Морт Пи.
Энӧ шензьӧй, мый воас кад, кор гуын куйлысьяс кыласны Морт Пилысь гӧлӧс шысӧ да найӧ ловзясны.
Бур вӧчысьяс кутасны овны, а лёк вӧчысьясӧс лоӧ мыждӧма.
Ме нинӧм ог вӧч Ассянь.
Ме мыжда сы серти, мый кыла Батьсянь, та вӧсна Менам мыждӧмӧй веськыд.
Ӧд Ме вӧча ог Ас кӧсйӧм серти, а Менӧ мӧдӧдысь Батьлӧн кӧсйӧм серти».
«Ме кӧ Ачым Ас йылысь висьтала, сэки Менам висьталӧмӧй абу эскана. Но Ме йылысь мӧд висьталӧ. Ме тӧда, мый сылӧн висьталӧмыс веськыд.
Ті мӧдӧдлінныд йӧзӧс Иоан дінӧ, медым тӧдмавны Ме йылысь. Сійӧ збыльсӧ висьталіс.
Дерт, меным оз ков йӧзлӧн висьталӧмыс. Ме шуа тайӧс сы могысь, медым ті мездминныд.
Иоан вӧлі яръюгыда ӧзъялысь би, сӧмын этша кад ті кӧсйинныд нимкодясьны сылӧн югӧр улын.
Но Ме йылысь висьталӧ мӧдтор, Иоан висьталӧмысь на мӧрччанаджык. Батьлӧн тшӧктӧм серти вӧчӧм уджъясӧй петкӧдлӧны, мый Менӧ Батьӧй мӧдӧдіс.
Менӧ мӧдӧдысь Батьӧй Ачыс висьталӧ Ме йылысь.
Ті Сылысь гӧлӧс шысӧ некор энӧ кывлӧй, Сылысь чужӧмсӧ энӧ аддзылӧй, Сылысь кывъяссӧ сьӧлӧманыд онӧ видзӧй, ӧд ті онӧ эскӧй Сысянь Мӧдӧдӧмалы.
Ті тӧдмаланныд-туяланныд Гижӧдъяссӧ, медым тіянлы вичмис помтӧм олӧм, а Гижӧдъясыс висьталӧны Ме йылысь.
Но ті онӧ кӧсйӧй локны Ме дінӧ, медым тіянлы вичмис олӧм.
Йӧзлӧн ошкӧмыс Меным оз ков. Ме тӧда тіянӧс: Енмыс тіянлы абу муса.
Ме локті тіян дінӧ Бать нимсянь, но ті онӧ сибӧдӧй Менӧ.
Локтас кӧ кодкӧ ас нимсяньыс, сійӧс ті сибӧданныд. Ті сибӧданныд ошкӧмсӧ ӧта-мӧдсяньныд, но ӧти Енсянь петысь ошкӧмсӧ онӧ корсьӧй. Сідзкӧ, кыдзи ті верманныд эскыны.
Энӧ мӧвпалӧй, мый Бать водзын кута мыждыны тіянӧс.
Тіянӧс мыждысьыс — Мӧисей, код вылӧ ті лача кутанныд.
Ті кӧ эсканныд Мӧисейлы, эскинныд эськӧ тшӧтш Меным, ӧд сійӧ гижис Ме йылысь.
Но сылӧн гижӧдъясӧ кӧ онӧ эскӧй, верманныд-ӧ эскыны Менам кывъясӧ?»
6 юр.
Сэсся Исус вуджис Галилея ты, мӧд ногӧн кӧ, Тиверия ты, мӧдлапӧлӧ.
Сы бӧрся муніс уна йӧз, ӧд найӧ аддзылісны, кыдзи Исус вӧчис шензьӧданаторъяс висьысьясӧс бурдӧдігӧн.
Исус кайис керӧсӧ да пуксис сэтчӧ велӧдчысьясыскӧд.
Матыстчис Ыджыд лун, юдейяслӧн гажӧдчан кад.
Исус видзӧдліс да аддзис, мый Сы дінӧ локтӧ уна йӧз.
Сійӧ шуис Филиплы: «Кытысь миянлы ньӧбны найӧс вердмӧн няньсӧ?»
Исус шуис тайӧс, медым тӧдмавны Филиплысь эскӧмсӧ.
Но Ачыс Сійӧ тӧдіс нин, мый вӧчны.
Филип вочавидзис: «Кыксё динар вылӧ ньӧбӧм няньыс этша лоӧ, весиг ичӧтиктор оз вичмы быдӧнлы».
Ӧндрей нима велӧдчысь, Симон-Петырлӧн вокыс, шуис Исуслы: «Тані ӧти зонкалӧн эм вит ид нянь да кык чери.
Тайӧ ӧмӧй тырмас та мындаыслы?»
Исус шуис: «Тшӧктӧй йӧзыслы пуксявны».
Сійӧ местаыс вӧлі туруна.
Йӧзыс пуксялісны, вӧлі вит сюрс гӧгӧр морт.
Исус босьтіс няньсӧ, аттьӧаліс Енмӧс да сетіс велӧдчысьясыслы. Велӧдчысьяс разӧдісны няньсӧ пукалысьяслы. Черисӧ тшӧтш разӧдісны быдӧнлы, коді мыйта кӧсйис.
Кор йӧзыс пӧтісны, Исус шуис велӧдчысьясыслы: «Чукӧртӧй коляссӧ, нинӧм энӧ воштӧй».
Велӧдчысьяс чукӧртісны вит ид няньысь коляссӧ да тыртісны дас кык куд.
Сэки найӧ, кодъяс аддзылісны Исуслысь шензьӧданатор вӧчӧмсӧ, шуисны: «Тайӧ збыльысь сійӧ Пророкыс, кодлы колӧ вӧлі локны муюгыдас».
Исус тӧдіс, мый йӧзыс мырдӧн кӧсйӧны пуктыны Сійӧс ӧксыӧ, та вӧсна ӧтнас бӧр кайис керӧсӧ.
Рытнас велӧдчысьясыс лэччисны ты дорӧ, пуксисны пыжӧ да мӧдӧдчисны ты мӧдлапӧлӧ, Капернаум карӧ.
Пемдіс нин, но Исус пыр на эз лок на дінӧ.
Пӧльтіс ыджыд тӧв, тыыс ёна гызис.
Нёль-ӧ-вит верст сынӧм бӧрын велӧдчысьясыс аддзисны Исусӧс: Сійӧ ва вывті матыстчис налӧн пыж дінӧ. Найӧ ёна повзисны.
Исус шуис: «Энӧ полӧй, тайӧ Ме».
Найӧ кӧсйисны босьтны Исусӧс пыжас, но пыжыс пырысь-пыр матыстчис мӧдлапӧлас, кытчӧ найӧ кывтісны.
Мӧд луннас, ты дорын сулалігӧн йӧзыслы тӧд выланыс уси, мый тӧрыт тані вӧлі сӧмын ӧти пыж, и тайӧ пыжнас велӧдчысьясыс вуджисны ӧтнаныс, Исус эз вӧв накӧд.
Тиверия карсянь локтісны пыжаяс да сувтісны сэтчӧ, кӧні Енмӧс аттьӧалӧмӧн Господь водзынджык вердіс йӧзсӧ.
Кор йӧзыс аддзисны, мый Исус да велӧдчысьясыс абуӧсь сэні, найӧ пуксисны пыжъясӧ да вуджисны Капернаумӧ корсьны Исусӧс.
Найӧ аддзисны Исусӧс ты мӧдлапӧвсьыс да юалісны Сылысь: «Велӧдысь, Тэ нӧ кор татчӧ вуджин?»
Исус вочавидзис: «Веськыда, веськыда висьтала тіянлы: ті корсянныд Менӧ онӧ шензьӧданаторъяс аддзылӧм вӧсна, а сы понда, мый пӧттӧдзныд няньсӧ сёйинныд.
Энӧ тӧждысьӧй бырана сёян вӧсна, а тӧждысьӧй помтӧм олӧмсӧ сетысь сёян вӧсна. Тайӧ сёянсӧ сетас тіянлы Морт Пи, кодӧс пасйӧма Ачыс Ен Бать».
Йӧзыс юалісны Исуслысь: «Мый миянлы вӧчны, медым уджъясным вӧліны шогманаӧсь Енмыслы?»
Исус вочавидзис: «Эскӧй Енсянь Мӧдӧдӧмалы. Тайӧ шогмана Енмыслы».
Найӧ шуисны Исуслы: «Кутшӧм шензьӧданатор Тэ вӧчан, медым сійӧс аддзылӧм бӧрын ми эским Тэныд?
Мый Тэ вӧчан?
Миян батьяс овтӧминын сёйисны манна. Та йылысь висьталӧ Гижӧдыс: “Енэжсянь Сійӧ сетіс налы сёйны нянь”».
Исус шуис налы: «Веськыда, веськыда висьтала тіянлы: эз Мӧисей сет тіянлы няньсӧ енэжсянь, но Менам Батьӧй сетӧ тіянлы збыль няньсӧ енэжсянь.
Енлӧн няньыс лэччӧ енэжсянь да сетӧ йӧзыслы олӧм».
Найӧ шуисны Исуслы: «Господьӧй, татшӧм няньсӧ пыр сет миянлы».
Исус шуис: «Ме олӧмыслӧн нянь.
Ме дінӧ локтысь некор оз кут тшыгъявны, Меным эскысьлӧн горшыс некор оз кут косьмыны.
Тіянлы Ме висьтавлі нин: ті аддзылінныд Менӧ, сӧмын онӧ эскӧй.
Быдӧн, кодӧс сетӧ Меным Бать, локтас Ме дінӧ.
Ме дінӧ локтысьӧс ог вӧтлы.
Ме ӧд лэччи енэжсянь эг Ас кӧсйӧм серти вӧчны, но лэччи, медым вӧчны Менӧ мӧдӧдысь Батьлӧн кӧсйӧм серти.
Менӧ мӧдӧдысь Батьӧй кӧсйӧ, медым Меным сетӧмаясысь весиг ӧтикӧс эг вошты да ставнысӧ найӧс ловзьӧді медбӧръя лунӧ.
Менӧ Мӧдӧдысьӧй кӧсйӧ, медым быдӧнлы, коді аддзӧ Писӧ да эскӧ Сылы, вичмис помтӧм олӧм. Медбӧръя лунӧ Ме ловзьӧда найӧс».
Юдейяс дӧзмисны, мый Исус шуис: «Ме енэжсянь лэччӧм нянь».
Найӧ сёрнитісны: «Абу-ӧ тайӧ Исус, Ӧсиплӧн пи? Ми ӧд тӧдам Сылысь бать-мамсӧ.
Мыйла нӧ Сійӧ шуӧ, Ме пӧ лэччи енэжсянь?»
Исус шуис налы: «Энӧ шуасьӧй ас костаныд.
Некод оз вермы локны Ме дінӧ, оз кӧ вайӧд сійӧс Менӧ мӧдӧдысь Батьӧй. Ме дінӧ локтысьӧс Ме ловзьӧда медбӧръя лунӧ.
Пророкъяслӧн гижӧма: “Енмыс быдӧнӧс велӧдас”.
Быдӧн, коді кывзӧ Батьӧс да Сысянь велӧдчӧ, локтӧ Ме дінӧ.
Йӧзыс эз аддзывлыны Батьӧс, сӧмын Енсянь Локтысь аддзыліс Батьӧс.
Веськыда, веськыда висьтала тіянлы: Меным эскысьлӧн эм помтӧм олӧм.
Ме олӧмыслӧн нянь.
Тіян батьясныд овтӧминын сёйлісны манна, но найӧ кулісны.
А енэжсянь лэччӧм няньсӧ сёйысь оз кув.
Ме енэжсянь лэччӧм ловъя нянь, тайӧ няньсӧ сёйысь помтӧг олӧ.
Няньыс, кодӧс Ме сета, — тайӧ Менам Яй. Ме сета сійӧс йӧзыслӧн олӧм вӧсна».
Сэки юдейяс пондісны вензьыны ас костаныс: «Кыдзи Сійӧ вермас сетны Ассьыс Яйсӧ сёйны миянлы?»
Исус шуис налы: «Веськыда, веськыда висьтала тіянлы: онӧ кӧ сёйӧй Морт Пилысь Яйсӧ да юӧй Сылысь Вирсӧ, тіян пытшкын олӧмыс оз ло.
Менсьым Яйӧс сёйысь да Менсьым Вирӧс юысь помтӧг олӧ, и сійӧс Ме ловзьӧда медбӧръя лунӧ.
Менам Яйӧй ӧд збыльысь сёян, Менам Вирӧй ӧд збыльысь юан.
Менсьым Яйӧс сёйысь да Менсьым Вирӧс юысь олӧ Ме пытшкын, а Ме — сы пытшкын.
Менӧ мӧдӧдіс ловъя Бать, Меным олӧмыс вичмис Батьсянь. Тадзи Месянь олӧмыс вичмас Менӧ сёйысьлы.
Тайӧ енэжсянь лэччӧм нянь, тайӧ мӧдсикас сёян.
Тіян батьясныд сёйисны манна да кулісны, а тайӧ няньсӧ сёйысь помтӧг олӧ».
Исус висьталіс тайӧс Капернаумын, синагогаын велӧдігӧн.
Исуслысь висьталӧмсӧ кывзігӧн велӧдчысьяс пӧвстысь унаӧн шуасисны: «Кутшӧм гӧгӧрвотӧмторъяс Сійӧ висьталӧ.
Коді вермас кывзыны тайӧс?»
Исус тӧдіс, мый велӧдчысьясыс шуасьӧны, да шуис налы: «Тіянӧс ӧмӧй дӧзмӧдӧ Менам висьталӧмӧй?
Мый эськӧ шуанныд, аддзанныд кӧ Морт Пилысь кыпӧдчӧмсӧ сэтчӧ, кӧні Сійӧ вӧлі водзынджык?
Сӧмын Лов вермӧ ловзьӧдны, а вир-яй тайӧс вӧчны оз вермы.
Менам кывъясӧй сетӧны тіянлы Лов да олӧм.
Но кодсюрӧ тіян пиысь оз эскыны».
Исус водзвыв тӧдіс, коді оз эскы Сылы да коді вузалас Сійӧс.
Исус водзӧ сёрнитіс: «Та понда Ме висьтавлі тіянлы, мый некод оз вермы Ме дінӧ локнысӧ, оз кӧ ло тайӧ Батьсянь».
Та бӧрти уна велӧдчысь эновтісны Сійӧс, эз нин ветлӧдлыны Сыкӧд.
Сэки Исус юаліс дас кык велӧдчысьыслысь: «Гашкӧ, ті тшӧтш кӧсъянныд эновтны Менӧ?»
Симон-Петыр вочавидзис: «Господьӧй, код дінӧ миянлы муннысӧ?
Ӧд Тэнад кывъясыд сетӧны помтӧм олӧмсӧ.
Ми эскам да тӧдам: Тэ — Кристос, ловъя Енлӧн Пи».
Исус шуис налы: «Эг ӧмӧй Ме бӧрйы тіянӧс дас кыкнаннытӧ?
Но тіян пиысь ӧтиыс — сӧтана».
Тайӧс шуигӧн Исус кутіс тӧд вылас Иудаӧс, Симон-Искариот пиӧс. Сійӧ вӧлі дас кыксьыс ӧтиыс, коді сэсся вузалас Исусӧс.
7 юр.
Та бӧрти Исус ветлӧдліс Галилеяті. Юдея муӧд Сійӧ эз кӧсйы ветлӧдлыны, ӧд юдейяслӧн веськӧдлысьяс кӧсйисны вины Сійӧс.
Матыстчис юдейяслӧн гажӧдчан кад, чомъяс вӧчан лунъяс.
Исуслӧн вокъясыс шуисны Сылы: «Эн кольччы татчӧ, мун Юдея муӧ, медым велӧдчысьясыд тшӧтш аддзисны Тэнсьыд уджъястӧ.
Ӧд мортыс кӧ кӧсйӧ, медым тӧдісны сы йылысь, сійӧ оз кут дзебны ассьыс уджъяссӧ.
Тэ сы ыджда уджъяс вӧчан, сідзкӧ, петкӧдчы йӧзыслы».
Исуслӧн вокъясыс эз эскыны Сылы.
Исус шуис налы: «Менам кадӧй эз на во, а тіянлы быд кад лӧсялӧ.
Тіянӧс йӧзыс оз мустӧмтны, а Менӧ мустӧмтӧны, ӧд Ме висьтала, мый налӧн уджъясыс лёкӧсь.
Ті мунӧй гажӧдчанінас, а Ме ог на мун, ӧд Менам кадӧй эз на во».
Тайӧс шуӧм бӧрын Исус кольччис Галилеяӧ,
но кор вокъясыс мунісны гажӧдчанінӧ, Исус тшӧтш муніс сэтчӧ гусьӧн.
Юдейяслӧн веськӧдлысьяс корсисны Исусӧс гажӧдчанінысь да юасисны: «Кӧні Сійӧ?»
Йӧз пӧвстын унаӧн вензисны Сы йылысь.
Ӧтияс сёрнитісны, Сійӧ пӧ бур, мӧдъяс шуисны, Сійӧ пӧ ылӧдлӧ йӧзсӧ.
Но йӧзыс сёрнитісны Исус йылысь гусьӧн, ӧд найӧ полісны юдейяслӧн веськӧдлысьясысь.
Гажӧдчан кад шӧрас Исус пырис крамӧ да кутіс велӧдны.
Юдейяслӧн веськӧдлысьяс шензисны: «Кытысь Сійӧ велӧдчытӧгыс тӧдӧ Гижӧдъяссӧ?»
Исус вочавидзис: «Менам велӧдӧмӧй абу Месянь, но Менӧ Мӧдӧдысьсянь.
Коді кӧсйӧ вӧчны Ен кӧсйӧм серти, сійӧ тӧдмалас, Енсянь-ӧ тайӧ велӧдӧмыс, либӧ Ассянь Ме висьтала.
Коді ассяньыс висьталӧ, сійӧ аслыс ошкӧмсӧ корсьӧ.
Коді тӧждысьӧ, медым ошкӧмыс вичмис Сійӧс Мӧдӧдысьлы, Сійӧ збыльсӧ висьталӧ да оз ылӧдчы.
Эз-ӧ Мӧисей сет тіянлы Индӧдсӧ?
Но некод тіян пиысь оз ов Индӧд сертиыс.
Сідзкӧ, мыйла кӧсъянныд Менӧ винысӧ?»
Йӧзыс шуисны: «Пеж лов Тэ пытшкын.
Коді кӧсйӧ Тэнӧ винысӧ?»
Исус вочавидзис: «Ме вӧчи ӧтитор, да ті ставныд шензянныд.
Мӧисей тшӧктіс тіянлы вундыштчыны. Дерт, тайӧ тшӧктӧмыс абу Мӧисейсянь, а батьяссяньныд. Ті весиг шойччан лунӧ вундыштанныд мортсӧ.
Ті кӧ вундыштанныд мортсӧ шойччан лунӧ, медым энӧ торкӧй Мӧисейлысь Индӧдсӧ, сідзкӧ, мыйла Ме вылӧ скӧраланныд, Ме кӧ дзоньнас мортсӧ бурдӧді шойччан лунӧ?
Энӧ мыждӧй чужӧм вылӧ видзӧдӧмӧн, а мыждӧй веськыда».
Кодсюрӧ ерусалимсаяс пӧвстысь сёрнитісны: «Абу-ӧ тайӧ сійӧ Мортыс, кодӧс вины кӧсйӧны?
Сійӧ сёрнитӧ восьсӧн, и некод весиг оз ӧлӧд Сійӧс. Гашкӧ, веськӧдлысьяс збыльысь Сійӧс Кристос туйӧ пуктӧны?
Ми тӧдам, кытысь тайӧ Мортыс.
А кор локтас Кристос, некод оз кут тӧдны, кытысь Сійӧ».
Крамын велӧдігӧн Исус гораа шуис: «Ті тӧданныд Менӧ, и тӧданныд, кытысь Ме.
Ме локті эг Ассянь. Менӧ мӧдӧдіс Сійӧ, коді эм Збыльыс, сӧмын Сійӧс ті онӧ тӧдӧй.
А Ме тӧда Сійӧс, ӧд Сы дорысь локті, Сійӧ мӧдӧдіс Менӧ».
Сэки кӧсйисны кутны Исусӧс, но некод эз лысьт инмӧдчыны Сы дінӧ, ӧд Сылӧн кадыс эз на во.
Йӧзыс унаӧн эскисны Исуслы. Найӧ сёрнитісны: «Кор локтас Кристос, Сійӧ ӧмӧй тайӧ Мортыс дорысь унджык шензьӧданаторсӧ вӧчас?»
Кор фарисейяс кылісны Исус йылысь татшӧм сёрнисӧ, аркирейяскӧд ӧтвыв найӧ мӧдӧдісны крам видзысьясӧс кутны Исусӧс.
Исус шуис налы: «Ме ог нин дыр ло тіянкӧд, регыд муна Менӧ Мӧдӧдысь дінӧ.
Ті кутанныд корсьны Менӧ, но онӧ аддзӧй.
Кӧні Ме лоа, сэтчӧ ті онӧ вермӧй локнысӧ».
Юдейяслӧн веськӧдлысьяс ас костаныс сёрнитісны: «Кытчӧ Сійӧ кӧсйӧ мунны, мый огӧ вермӧй аддзыны Сійӧс?
Оз-ӧ кӧсйы мунны миян йӧз дінӧ, кодъяс олӧны грекъяс пӧвстын? Оз-ӧ кӧсйы грек войтырӧс велӧдны?
Кыдзи гӧгӧрвоны Сылысь кывъяссӧ: “Ті кутанныд корсьны Менӧ, но онӧ аддзӧй.
Кӧні Ме лоа, сэтчӧ ті онӧ вермӧй локнысӧ”?»
Бӧръя медыджыд гажӧдчан лунӧ Исус сувтіс да гораа шуис: «Кодлӧн горшыс косьмӧ, мед локтӧ Ме дінӧ да юӧ.
Коді эскӧ Меным, сылӧн пытшкӧсысь визувтасны ловъя валӧн юяс. Тадзи висьталӧ Гижӧдыс».
Исус висьталіс тайӧс Лов йылысь, кодӧс сибӧдасны Сылы эскысьяс.
Ӧд Вежа Ловсӧ эз на вӧв сетӧма налы, Исуслӧн дзирдлуныс эз на воссьы да.
Тайӧ кывъяссӧ кылӧм бӧрын йӧз пӧвстысь унаӧн шуалісны: «Сійӧ збыльысь пророк».
Ӧтияс шуисны: «Тайӧ Кристос».
Мӧдъяс сёрнитісны: «Локтас ӧмӧй Кристос Галилеяысь?
Оз ӧмӧй висьтав Гижӧдыс, мый Кристос петас Давид вужйысь, Виплием карысь, Давид чужанінысь?»
Тадзи йӧзыс кутісны вензьыны Сы йылысь.
Кодсюрӧ кӧсйисны кутны Исусӧс, но некод эз лысьт инмӧдчыны Сы дінӧ.
Исусӧс кутны мӧдӧдлӧмаяс бӧр локтісны аркирейяс да фарисейяс дінӧ. Найӧ юалісны: «Мыйла ті энӧ вайӧдӧй Сійӧс?»
Мӧдӧдлӧмаяс вочавидзисны: «Тайӧ Мортыс моз ӧнӧдз на некод эз сёрнитлы».
Фарисейяс шуисны налы: «Гашкӧ, тіянӧс тшӧтш ылӧдліс да?
Эскӧ-ӧ Сылы кодкӧ веськӧдлысьяс да фарисейяс пӧвстысь?
Но йӧзыс оз тӧдны Индӧдсӧ, найӧс ставнысӧ ёрӧма».
Никодим нима фарисей, коді войнас воліс Исус дінӧ, шуис аркирейяслы да фарисейяслы: «Миян Индӧд серти позьӧ ӧмӧй мыждыны мортсӧ, оз кӧ медводз кывзыны сійӧс да тӧдмавны, мый сійӧ вӧчис?»
Сылы вочавидзисны: «Гашкӧ, тэ тшӧтш Галилеяысь?
Лыддьы Гижӧдсӧ да тэ аддзан, мый Галилеяысь пророкыд оз лок».
Сэки ставныс муналісны гортаныс.
8 юр.
Исус кайис Олив керӧсӧ.
Асывводзнас Сійӧ бара локтіс крамӧ. Сы гӧгӧр чукӧртчис уна йӧз.
Исус пуксис да кутіс велӧдны найӧс.
Индӧдӧ велӧдысьяс да фарисейяс вайӧдісны Исус дінӧ аньӧс, кодӧс вӧлі кутӧмаӧсь гозъя олӧм пежалӧмысь. Йӧз водзӧ сійӧс сувтӧдӧмӧн найӧ шуисны Исуслы:
«Велӧдысь, тайӧ аньсӧ кутӧма гозъя олӧм пежалӧмысь. Мӧисей Индӧдас тшӧктӧма вины татшӧмъяссӧ изъясӧн.
Мый Тэ шуан?»
Найӧ шуалісны тадзи, медым кыйны да мыжавны Исусӧс.
Но Исус эз кывзы найӧс, а улӧ копыртчӧмӧн чуньнас кутіс гижны муас.
Найӧ водзӧ дӧзмӧдісны Исусӧс юасьӧмъяснас. Сэки Сійӧ веськӧдчис да шуис налы: «Тіян пӧвстысь мыжтӧмыс медводз мед лыяс аньсӧ изнас».
Сэсся копыртчис да бара кутіс гижны муас.
Исуслысь кывъяссӧ кылӧм бӧрын йӧзыс кутісны разӧдчыны сьӧрсьӧн-бӧрсьӧн, ӧд налӧн сьӧлӧмыс мыждіс найӧс. Медводз мунісны пӧрысьджыкъяс, сэсся мукӧдыс.
Колис сӧмын Исус, и Сы водзын сулалысь ань.
Исус веськӧдчис да аддзис сӧмын аньӧс. Сійӧ юаліс: «Аньӧй, кӧнӧсь тэнӧ мыждысьясыд?
Мыждіс-ӧ кодкӧ тэнӧ?»
Ань вочавидзис: «Эз, Господьӧй.»
Исус шуис сылы: «Ме тшӧтш ог мыжды.
Мун да водзӧ мыжтӧ эн нин вӧч».
Исус бара сёрнитіс йӧзыскӧд. Сійӧ шуис: «Ме йӧзыслы югыдыс.
Ме бӧрся мунысь оз кут ветлыны пемыдас, сылӧн лоӧ олӧмыслӧн югыдыс».
Фарисейяс шуисны: «Тэ Ачыд Ас йывсьыд висьталан, та вӧсна Тэнад висьталӧмыд абу эскана».
Исус вочавидзис: «Ме кӧ висьтала Ас йылысь, Менам висьталӧмӧй веськыд, ӧд Ме тӧда, кытысь локті да кытчӧ муна.
А ті онӧ тӧдӧй, кытысь Ме локті да кытчӧ муна.
Ті мыжданныд мортсӧ йӧзыс моз. Ме некодӧс ог мыжды.
А мыжда кӧ, мыжда веськыда, ӧд Ме абу ӧтнам. Мекӧд Менӧ мӧдӧдысь Батьӧй.
Тіян Индӧдын гижӧма, мый кык мортлӧн висьталӧмыс эскӧдана.
Ме Ачым висьтала Ас йылысь. Ме йылысь висьталӧ тшӧтш Менӧ мӧдӧдысь Батьӧй».
Сэки юалісны Исуслысь: «Кӧні Тэнад Батьыд?»
Исус вочавидзис: «Ті онӧ тӧдӧй Менӧ и онӧ тӧдӧй Менсьым Батьӧс.
Ті кӧ эськӧ тӧдінныд Менӧ, сэки тӧдінныд тшӧтш Менсьым Батьӧс».
Тайӧ кывъяссӧ Исус висьталіс крамын велӧдігӧн, сьӧм чукӧртан куд дорын.
Сійӧс некод эз кут, ӧд Сылӧн кадыс эз на во.
Исус бара висьталіс йӧзыслы: «Ме регыд муна.
Ті кутанныд корсьны Менӧ, но мыж пытшканыд куланныд.
Кытчӧ Ме муна, сэтчӧ ті онӧ вермӧй локнысӧ».
Юдейяслӧн веськӧдлысьяс шензисны: «Гашкӧ, Сійӧ кӧсйӧ вины Асьсӧ, ӧд шуалӧ, кытчӧ пӧ Ме муна, сэтчӧ ті онӧ вермӧй локнысӧ».
Исус шуис налы: «Ті улісянь, а Ме вылісянь.
Ті тайӧ муюгыдсьыс, а Ме абу тайӧ муюгыдсьыс.
Ме шуи тіянлы: ті куланныд мыж пытшканыд.
Онӧ кӧ эскӧй, мый Ме збыльысь Сійӧ, кодӧн шуа Ачымӧс, куланныд мыж пытшканыд».
Найӧ юалісны: «Коді нӧ Тэ?»
Исус вочавидзис: «Ме — Сійӧ, кодӧн шулі Ачымӧс водзысяньыс.
Ме унатор на верма висьтавны тіян йылысь, унаторйысь мыждыны тіянӧс.
Но Ме юӧрта муюгыдыслы сӧмын сійӧ, мый кывлі Менӧ Мӧдӧдыссянь, ӧд Сійӧ збыльсӧ висьталӧ».
Найӧ эз гӧгӧрвоны, мый Исус висьталӧ Батьыс йылысь.
Исус шуис налы: «Морт Пиӧс кыпӧдӧм бӧрын ті тӧдмаланныд: Ме збыльысь Сійӧ, кодӧн шуа Ачымӧс. Ме нинӧм ог вӧч Ассянь, Ме висьтала сӧмын сійӧ, мыйӧ велӧдіс Менӧ Батьӧй.
Менӧ Мӧдӧдысьӧй Мекӧд.
Батьӧй эз коль Менӧ ӧтнамӧс, ӧд Ме ставсӧ вӧча Сылӧн кӧсйӧм серти».
Тайӧ висьталӧмсӧ кывзігӧн унаӧн эскисны Исуслы.
Сэки Исус шуис Сылы эскысь юдейяслы: «Менам кывъяс серти кӧ оланныд, ті збыльысь Менам велӧдчысьяс.
Ті тӧдмаланныд збыльсӧ, и збыльыс мездас тіянӧс».
Найӧ вочавидзисны: «Ми Ӧвраамсянь чужысьяс, некор эгӧ вӧлӧй кесйӧг туйынӧсь.
Сідзкӧ, мыйла Тэ шуан, мый ми мездмам?»
Исус вочавидзис: «Веськыда, веськыда висьтала тіянлы: мыжсӧ вӧчысь — мыжыслӧн кесйӧг.
Кесйӧг оз вермы кольччыны керкаас пыр кежлӧ, а пиыс олӧ сэні помтӧг.
Пиыс кӧ мездас тіянӧс, ті збыльысь мездманныд.
Ме тӧда: ті Ӧвраамсянь чужысьяс, но кӧсъянныд вины Менӧ, ӧд тіян сьӧлӧмӧ оз тӧрны Менам кывъясӧй.
Ме висьтала сы йылысь, мый аддзылі Аслам Бать ордысь.
А ті вӧчанныд сы серти, мый аддзылінныд асланыд бать ордысь».
Найӧ вочавидзисны: «Миян батьным Ӧвраам».
Исус шуис налы: «Ті кӧ Ӧвраамлӧн ныв-пи, вӧчинныд эськӧ Ӧвраам ног.
Ме висьталі тіянлы Енсянь кывлӧм збыльсӧ, а ті кӧсъянныд вины Менӧ.
Ӧвраам тадзи эз вӧчлы.
Ті вӧчанныд батьныд ног».
Юдейяс шуисны Исуслы: «Ми абу чуркаяс.
Миян эм ӧти Бать, тайӧ Ен».
Исус шуис: «Енмыс кӧ тіянлы Бать, Ме эськӧ муса вӧлі тіянлы, ӧд Ме Енсянь локті.
Ме эг Ассянь лок, Енмыс мӧдӧдіс Менӧ.
Мыйла ті онӧ гӧгӧрвоӧй Менсьым висьталӧмӧс?
Ті онӧ гӧгӧрвоӧй, ӧд онӧ сибӧдӧй Менсьым кывъясӧс.
Омӧльыс — тіян батьныд.
Ті ставсӧ кӧсъянныд вӧчны сы моз.
Сійӧ водзысяньыс вӧлі морт виысь. Збыльсьыс сійӧ ылын, збыльыс сы пытшкын абу.
Кор сійӧ ылӧдлӧ, висьталӧ ассяньыс, ӧд сійӧ ылӧдчысь, ылӧгыслӧн бать.
Ті онӧ эскӧй Меным, ӧд Ме збыльсӧ висьтала.
Коді тіян пиысь вермас мыждыны Менӧ лёк вӧчӧмысь?
Ме кӧ збыльсӧ висьтала, мыйла онӧ эскӧй Меным?
Коді Енсянь, сійӧ кывзӧ Енлысь кывъяссӧ.
А ті онӧ кывзӧй, ӧд ті абу Енсянь».
Юдейяс шуисны Исуслы: «Ми веськыда висьталам: Тэ Самарияысь, Тэ пытшкын пеж лов».
Исус вочавидзис: «Ме пытшкын пеж лолыс абу.
Ме бурӧ пукта Ассьым Батьӧс, но ті Менӧ омӧльтанныд.
Ме ог корсь Аслым ошкӧмсӧ. Эм Сійӧ, коді сетас Меным ошкӧмсӧ. Сійӧ — веськыда Мыждысьыс.
Веськыда, веськыда висьтала тіянлы: Менам кывъяс серти олысь некор оз кув».
Юдейяс шуисны Исуслы: «Ӧні ми тӧдам, мый Тэ пытшкын пеж лов.
Ӧвраам куліс, пророкъяс кулісны, а Тэ шуан: “Менам кывъяс серти олысь некор оз кув”.
Тэ ӧмӧй Ӧвраам батьным дорысь ыджыдджык? Сійӧ куліс, пророкъяс тшӧтш кулісны.
Тэ нӧ Асьтӧ код туйӧ пуктан?»
Исус вочавидзис: «Ме кӧ ошка Ачымӧс, Менам ошкӧмӧй нинӧм дон оз сулав.
Менӧ ошкӧ Менам Батьӧй, код йылысь ті шуанныд, мый Сійӧ тіян Ен.
Ті онӧ тӧдӧй Сійӧс, а Ме тӧда Сійӧс.
Ме кӧ шуа, мый ог тӧд Сійӧс, сэки лоа тіян кодь пӧръясьысьӧн.
Но Ме тӧда Сійӧс да ола Сылӧн кывъясыс серти.
Тіян Ӧвраам батьныд нимкодьпырысь виччысис Менсьым локтан лунӧс. Сійӧ аддзис тайӧ лунсӧ да ёна нимкодясис».
Юдейяс шуисны Исуслы: «Тэ аддзылін Ӧвраамӧс? Тэныд ӧд ветымын арӧсыс на абу».
Исус шуис налы: «Веськыда, веськыда висьтала тіянлы: Ӧвраам чужтӧдз на Ме вӧлі».
Сэки найӧ босьтісны изъяс да кӧсйисны лыйлыны Исусӧс, но Исус саймовтчӧмӧн петіс крамсьыс да муніс сэтысь.
9 юр.
Мунігмозыс Исус аддзис чужӧмсяньыс синтӧм мортӧс.
Велӧдчысьяс юалісны Исуслысь: «Велӧдысь, кодлӧн мыж вӧсна сійӧ синтӧмӧн чужӧма? Ачыс-ӧ сійӧ мыжа, бать-мамыс-ӧ?»
Исус вочавидзис: «Сійӧ абу мыжа, бать-мамыс тшӧтш абу мыжаӧсь. Сійӧ синтӧм, медым сы пыр петкӧдчасны Енлӧн уджъясыс.
Ӧні, лунъюгыднас, Меным колӧ вӧчны Менӧ Мӧдӧдысьлысь уджъяссӧ.
Пуксяс вой, сэки некод оз вермы уджавны.
Му вылын олігӧн Ме йӧзыслы югыдыс».
Тайӧс шуӧм бӧрын Исус сьӧлыштіс муас, сьӧлыштӧмсьыс вӧчис ляти да синтӧм мортлысь синсӧ мавтіс лятинас.
Сэсся шуис: «Мун да мыссьы Силоам ва йӧртӧдын». Силоам нимыс, вуджӧдны кӧ: мӧдӧдӧма.
Синтӧм морт муніс, мыссис да кутіс аддзыны.
Сыкӧд орччӧн олысьяс да сійӧс синтӧмӧн аддзылысьяс шензисны: «Абу-ӧ тайӧ сійӧ мортыс, коді пукаліс да сьӧм корис?»
Ӧтияс шуалісны: «Тайӧ дзик сійӧ мортыс», мӧдъяс шуалісны: «Абу, тайӧ сӧмын сы вылӧ мунӧ».
Ачыс сійӧ висьталіс: «Тайӧ ме».
Сэки юалісны сылысь: «Кыдзи нӧ тэ аддзыны кутін?»
Сійӧ вочавидзис: «Исус нима морт вӧчис ляти, мавтіс сійӧн менсьым синмӧс да шуис: “Мун да мыссьы Силоам ва йӧртӧдын”.
Ме муні да мысси, ӧні аддза».
Сэки юалісны сылысь: «Кӧні тэнӧ Бурдӧдысьыд?»
Мӧдыс вочавидзис: «Ог тӧд».
Мортӧс, коді водзынджык эз аддзы, нуӧдісны фарисейяс дінӧ.
Тайӧ вӧлі шойччан лунӧ, кор Исус вӧчис ляти да бурдӧдіс синтӧмӧс.
Фарисейяс тшӧтш юалісны синтӧм мортлысь, кыдзи сійӧ кутіс аддзыны.
Сійӧ вочавидзис: «Исус пуктіс син вылам ляти, сэсся ме мысси да куті аддзыны».
Сэки фарисейяс пӧвстысь кодсюрӧ шуисны: «Тайӧ Бурдӧдысьыс абу Енсянь, ӧд Сійӧ торкӧ тшӧктӧмсӧ — уджалӧ шойччан лунӧ».
Мукӧдыс сёрнитісны: «Вермас ӧмӧй мыжа морт вӧчны татшӧм шензьӧданаторъяссӧ?»
Тадзи лыбис на костын вен.
Синтӧм мортлысь бара юалісны: «Тэ шуан, мый Сійӧ бурдӧдіс тэнсьыд синтӧ? Коді Сійӧ тэ ногӧн?»
Морт вочавидзис: «Пророк».
Юдейяслӧн веськӧдлысьяс эз эскыны, мый тайӧ мортыс вӧлі синтӧм да пондіс аддзыны. Сэки найӧ корисны сылысь бать-мамсӧ да юалісны налысь: «Тайӧ тіян пиныд? Ті шуанныд, сійӧ пӧ чужӧмсяньыс синтӧм.
Кыдзи нӧ сійӧ аддзӧ ӧні?»
Бать-мамыс вочавидзисны: «Ми тӧдам: тайӧ миян пиным. Сійӧ чужис синтӧмӧн, но кыдзи кутіс аддзыны да коді бурдӧдіс сійӧс, тайӧс ми огӧ тӧдӧй.
Юалӧй сылысь, ӧд сійӧ тыр арлыда нин, вермас ачыс вочавидзны».
Бать-мамыс шуисны тадзи, ӧд найӧ полісны юдейяслӧн веськӧдлысьясысь.
Веськӧдлысьяс водзджык нин сёрнитчисны, мый быдӧнӧс, коді Исусӧс пуктӧ Кристос туйӧ, вӧтласны синагогаысь.
Та вӧсна бать-мамыс шуисны: «Юалӧй сылысь, ӧд сійӧ тыр арлыда нин».
Сэсся мӧдысь корисны сійӧ мортсӧ, коді вӧлі синтӧм, да шуисны сылы: «Кӧсйысь Ен водзын, мый збыльсӧ висьталан. Ми тӧдам: тэнӧ Бурдӧдысьыс — мыжа морт».
Сійӧ вочавидзис: «Мыжа-ӧ Сійӧ, ме ог тӧд.
Но ӧтитор тӧда: ме вӧлі синтӧм, а ӧні аддза».
Сылысь выльысь юалісны: «Мый Сійӧ вӧчис тэныд?
Кыдзи Сійӧ бурдӧдіс тэнӧ?»
Мортыс вочавидзис: «Ме тіянлы висьталі нин, сӧмын ті энӧ кывзӧй.
Мый нӧшта кӧсъянныд кывны месянь?
Гашкӧ, ті тшӧтш кӧсъянныд лоны Сылӧн велӧдчысьясӧн?»
Юдейяслӧн веськӧдлысьяс кутісны видны тайӧ мортсӧ да шуисны сылы: «Тэ Сылӧн велӧдчысь, а ми — Мӧисейлӧн.
Ми тӧдам, мый Ачыс Енмыс сёрнитіс Мӧисейкӧд. А кытысь тайӧ Мортыс, ми огӧ тӧдӧй».
Бурдӧм морт вочавидзис: «Тайӧ ёна шензьӧдӧ. Сійӧ бурдӧдіс менсьым синмӧс, а ті онӧ тӧдӧй, кытысь Сійӧ.
Ми тӧдам, мый Ен оз кывзы мыжаясӧс.
Но коді бурӧ пуктӧ Енсӧ да олӧ Сылӧн кӧсйӧм серти, Енмыс кывзӧ сійӧс.
Му пуксьӧмсяньыс эз на вӧв татшӧмыс, мый чужӧмсяньыс синтӧмӧс кодкӧ бурдӧдіс.
Менӧ Бурдӧдысьыс кӧ эз вӧв Енсянь, нинӧм эськӧ вӧчны эз вермы».
Сылы вочавидзисны: «Тэ дзоньнас мыж пытшкын чужӧмыд, а лысьтан миянӧс велӧдны.»
Сэсся вӧтлісны сійӧс.
Исус кывліс бурдӧдӧм мортӧс вӧтлӧм йылысь, корсис сійӧс да шуис: «Эскан-ӧ тэ Ен Пилы?»
Мӧдыс вочавидзис: «Господьӧй, коді нӧ Сійӧ? Висьтав, медым ме верми эскыны».
Исус шуис: «Тэ аддзылін Сійӧс, Сійӧ сёрнитӧ тэкӧд».
Бурдӧм мортыс шуис: «Эска, Господьӧй.»
Сэсся копыртчыліс Сылы.
Исус шуис: «Ме локті муюгыдас мыждыны, медым синтӧмъяс аддзисны да аддзысьяс синтӧммисны».
Тайӧс кылӧм бӧрын ӧткымын фарисей, кодъяс вӧліны Исус дінын, юалісны Сылысь: «Гашкӧ, ми тшӧтш синтӧмӧсь да?»
Исус вочавидзис: «Вӧлінныд кӧ ті синтӧмӧсь, сэки эськӧ энӧ мыжмӧй.
Но ті шуанныд, аддзам пӧ. Сідзкӧ, мыжныд ас выланыд кольӧ».
10 юр.
«Веськыда, веськыда висьтала тіянлы: коді пырӧ ыж йӧрӧ оз ӧдзӧсӧд, а мӧдлаті, сійӧ — гусясьысь да лёк вӧчысь.
Ӧдзӧсӧд пырысьыс — ыж видзысь,
сылы йӧр видзысь восьтӧ ӧдзӧссӧ. Ыжъяс кывзӧны ыж видзысьлысь гӧлӧс шысӧ.
Сійӧ чуксалӧ ыжъяссӧ нимъяснас да петкӧдӧ найӧс йӧр ортсыӧ.
Ыжъяссӧ лэдзалӧм бӧрын сійӧ мунӧ водзвыланыс. Ыжъясыс локтӧны бӧрсяньыс, ӧд найӧ тӧдӧны сылысь гӧлӧс шысӧ. А тӧдтӧм бӧрся ыжъяс оз мунны. Найӧ пышйӧны сыысь, ӧд найӧ оз тӧдны сылысь гӧлӧс шысӧ».
Исус висьталіс фарисейяслы тайӧ велӧданвисьтсӧ, сӧмын найӧ эз гӧгӧрвоны, мый йылысь сёрнитіс Исус.
Сэки Исус водзӧ висьталіс налы:
«Веськыда, веськыда висьтала тіянлы: Ме — ыжъяслы ӧдзӧсыс.
Меӧдз волысьяс — ставныс гусясьысьяс да лёк вӧчысьяс.
Ыжъяс эз кывзыны найӧс.
Ме — ӧдзӧсыс.
Меӧд пырысьыс мездмас. Сійӧ пырас, петас да йирсянін аддзас.
Гусясьысь локтӧ сӧмын гусявны, вины да бырӧдны.
А Ме локті сетны олӧм, тырвыйӧ олӧм.
Ме — ыжъяслы бур видзысь.
Бур видзысь сетӧ ассьыс олӧмсӧ ыжъясыс вӧсна.
Меда морт оз ассьыс ыжъяссӧ видз. Кор аддзӧ локтысь кӧинӧс, сійӧ эновтӧ ыжъяссӧ да пышйӧ.
Сэки кӧин косявлӧ ыжъяссӧ, да найӧ разалӧны.
Меда морт пышйӧ, ӧд сійӧс сӧмын медалӧма, сылы веськодь, мый лоӧ ыжъясыскӧд.
Ме — ыжъяслы бур видзысь.
Ассьым ыжъясӧс Ме тӧда, и Менам ыжъясӧй тӧдӧны Менӧ.
Кыдзи Батьӧй тӧдӧ Менӧ, сідзи Ме тӧда Батьӧс.
Ассьым олӧмӧс Ме сета ыжъясӧй вӧсна.
Тайӧ йӧрас кындзи Менам эмӧсь мукӧд ыжъяс, Меным тшӧтш колӧ вайӧдны найӧс.
Найӧ кыласны Менсьым гӧлӧс шыӧс, сэки лоас ӧти чукӧр да ӧти видзысь.
Батьӧйлы Ме муса, ӧд Ме сета Ассьым олӧмӧс, медым бӧр босьтны сійӧс.
Менсьым олӧмӧс некод оз вермы мырддьыны, Ме Ачым сета сійӧс.
Ме верма сетны сійӧс, и верма бӧр босьтны.
Тадзи тшӧктіс вӧчны Менам Батьӧй».
Тайӧ кывъясысь юдейяс венӧ воисны.
Унаӧн на пӧвстысь шуалісны: «Сійӧс пеж лов кутӧма, Сійӧ йӧйталӧ.
Мыйла Сійӧс кывзанныд?»
Мукӧдыс шуалісны: «Пеж лолӧн кутӧм морт оз вермы тадзи сёрнитны.
Вермас ӧмӧй пеж лов синтӧмъясӧс бурдӧдны?»
Вӧлі тӧв. Ерусалимын вӧлі гажӧдчан кад — крам вежӧдӧмсӧ казьтылӧм.
Исус ветлӧдліс крамдорса Соломон йӧрӧд.
Сэки юдейяс кытшалісны Исусӧс да шуисны: «Тэ дыр на кутан миянӧс бӧбйӧдлыны?
Тэ кӧ Кристос, веськыда висьтав миянлы».
Исус вочавидзис: «Ме висьталі нин тіянлы, но ті онӧ эскӧй.
Менам уджъясӧй, кодъясӧс Ме вӧча Бать нимсянь, висьталӧны Ме йылысь.
Но ті онӧ эскӧй, ӧд ті абу Менам ыжъяс. Тайӧс Ме висьтавлі нин тіянлы.
Менам ыжъясӧй кывзӧны Менсьым гӧлӧс шыӧс, и найӧс Ме тӧда. Найӧ локтӧны Ме бӧрся.
Ме сета налы помтӧм олӧм, и найӧ некор оз бырны.
Некод оз мырддьы найӧс Менам киысь.
Менам Батьӧй, коді сетіс Меным найӧс, ставсьыс медыджыд.
Некод оз вермы мырддьыны найӧс Менам Батьлӧн киысь.
Ме да Бать — ми ӧти».
Сэки юдейяс босьтісны изъяс, медым лыйлыны Исусӧс.
Сійӧ шуис налы: «Батьлӧн тшӧктӧм серти уна бур удж Ме вӧчи тіян пӧвстын. Кутшӧм уджысь нӧ кӧсъянныд изъявны Менӧ?»
Юдейяс вочавидзисны: «Огӧ бур уджысь Тэнӧ изъялӧй, изъялам Енмӧс омӧльтӧмысь. Тэ морт, а Енмӧ пуксян».
Исус вочавидзис: «Абу-ӧ гижӧма тіян Индӧдын, мый “Ме шуи: ті — енъяс”?
Гижӧдыс оз вежсьы. Енмыс кӧ шуис енъясӧн найӧс, кодъяслы сетіс Ассьыс Кывсӧ, сідзкӧ, мыйла ті шуанныд Менӧ Енмӧс омӧльтысьӧн, Ме кӧ шуа ачымӧс Ен Пиӧн? Ӧд Менӧ Батьӧй вежӧдіс да мӧдӧдіс муюгыдас.
Ме кӧ ог вӧч Батьлысь уджъяссӧ, энӧ эскӧй Меным.
А вӧча кӧ, эскӧй кӧть Менам уджъясӧ, Меным онӧ эскӧй да. Сэки ті тӧдмаланныд да эсканныд, мый Батьӧй Ме пытшкын, а Ме — Сы пытшкын».
Сэки юдейяс бара кӧсйисны кутны Исусӧс, но Сійӧ эз сетчы налы. Исус бара вуджис Йӧрдан ю мӧдлапӧлӧ, кӧні Иоан пыртліс йӧзсӧ, да кольччис сэтчӧ.
Сы дінӧ локтіс уна йӧз. Найӧ шуалісны: Иоан шензьӧданаторсӧ эз вӧчлы, но ставыс, мый Иоан висьтавліс тайӧ Мортыс йылысь — тайӧ збыль.
Сэні унаӧн эскисны Исуслы.
11 юр.
Вифания сиктын оліс Лазар нима морт, сійӧ висис. Сэні олісны тшӧтш Лазарлӧн Марья да Марпа чойясыс.
Буретш тайӧ Марьяыс бӧрынджык мавтас Господьӧс чӧскыд дука выйӧн да чышкалас Сылысь коксӧ аслас юрсиӧн. Висьысь Лазар вӧлі Марьялӧн вокыс.
Чойяс мӧдӧдісны мортӧс висьтавны Исуслы: «Господьӧй, Тэнад муса ёртыд висьӧ».
Тайӧс кылӧм бӧрын Исус шуис: «Тайӧ висьӧмыс абу кулӧм вылӧ, но Енмӧс ошкӧм вылӧ. Та пыр воссяс Ен Пилӧн дзирдлуныс».
Лазар, Марпа да сылӧн чойыс вӧліны мусаӧсь Исуслы.
Кор Исус тӧдмаліс Лазарлӧн висьӧм йылысь, Сійӧ кольччыліс на кык лун кежлӧ сэтчӧ, кӧні вӧлі.
Сэсся шуис велӧдчысьясыслы: «Бӧр мунамӧй Юдеяӧ».
Велӧдчысьясыс шуисны Исуслы: «Велӧдысь, Юдея муын сӧмын на кӧсйисны вины Тэнӧ изъясӧн, а Тэ бара нин мунан сэтчӧ?»
Исус вочавидзис: «Лунын ӧмӧй абу дас кык час?
Луннас ветлысь оз крукась, ӧд сійӧ аддзӧ тайӧ мувывса югыдсӧ.
Войнас ветлысь крукасьӧ, ӧд сылӧн югыдыс абу».
Тайӧс шуӧм бӧрын Исус содтіс: «Миян Лазар ёртным унмовсьӧма.
Ме муна сійӧс садьмӧдны».
Велӧдчысьясыс шуисны Сылы: «Господьӧй, унмовсьӧма кӧ, бурдас».
Исус сёрнитіс Лазарлӧн кулӧм йылысь, а велӧдчысьясыс мӧвпалісны, мый Исус сёрнитӧ узьӧм йылысь.
Сэки Исус веськыда шуис налы: «Лазар кулӧма.
Ме нимкодяся тіян вӧсна, мый эг вӧв сэні, ӧд ӧні ті понданныд эскыны. Локтӧй, мунамӧй сы дінӧ».
Сэки Фома, кодӧс шуисны Двӧйнипӧлӧн, шуис мукӧд велӧдчысьыслы: «Мунам да Сыкӧд ӧтлаын кулам».
Локтӧм бӧрас Исуслы висьталісны, Лазарӧс пӧ нёль лун сайын нин дзебисны.
Вифания сикт вӧлі Ерусалимсянь матын, кык-куим верст ылнаын.
Уна йӧз вӧлі локтӧмаӧсь Марпа да Марья ордӧ, медым пальӧдны кулӧм вок вӧснаыс налысь шогсӧ.
Марпа кыліс Исуслӧн локтӧм йылысь да петіс Сылы воча.
Марья пукаліс гортас.
Марпа шуис Исуслы: «Господьӧй, вӧлін кӧ Тэ тані, менам вокӧй эськӧ эз кув.
Но весиг ӧні тӧда: мый коран Енмыслысь, Сійӧ сетас Тэныд».
Исус вочавидзис: «Ловзяс тэнад вокыд».
Марпа шуис Сылы: «Тӧда, сійӧ ловзяс медбӧръя лунӧ, кор ловзясны кулӧмаяс».
Исус шуис: «Ме — Ловзьӧдысьыс да Олӧмыс.
Меным эскысь весиг кулӧм бӧрас кутас овны.
Быдӧн, коді олігас эскӧ Меным, некор оз кув.
Эскан-ӧ таӧ?»
Марпа шуис: «Эска, Господьӧй.
Ме эска, мый Тэ — Кристос, Ен Пи, кодлы колӧ вӧлі локны муюгыдас».
Тайӧс шуӧм бӧрын Марпа муніс Марья чойыс дінӧ да гусьӧн висьталіс сылы: «Велӧдысьным тані, тэнӧ корӧ».
Тайӧс кылӧм мысти Марья дзик пыр чеччис да муніс Исус дінӧ.
Исус абу на вӧлі пырӧма сиктас. Сійӧ вӧлі сэні, кӧні паныдасис Марпакӧд.
Йӧзыс, кодъяс вӧліны Марьякӧд керкаын да пальӧдісны сылысь шогсӧ, аддзисны Марьялысь тэрмасьӧмӧн мӧдӧдчӧмсӧ да петісны сы бӧрся. Найӧ чайтісны, мый сійӧ мунӧ дзебанінӧ бӧрдны.
Кор Марья локтіс Исус дінӧ да аддзис Сійӧс, уськӧдчис Сы водзӧ да шуис: «Господьӧй, вӧлін кӧ Тэ тані, вокӧй эськӧ эз кув».
Марьялысь да сыкӧд локтысь йӧзлысь бӧрдӧмсӧ аддзӧмысь Исуслӧн сьӧлӧмыс нормис. Сійӧ сьӧкыда ышловзис да юаліс: «Кытчӧ ті пуктінныд сійӧс?»
Сылы вочавидзисны: «Господьӧй, лок видзӧдлы».
Исуслӧн синваыс петіс.
Сэки йӧзыс сёрнитісны: «Видзӧдлӧй, кутшӧм муса вӧлӧм Сылы Лазарыс».
Ӧткымынӧн шуисны: «Сійӧ бурдӧдіс синтӧмӧс. Эз ӧмӧй Сійӧ вермы видзны Лазарӧс кулӧмысь?»
Исус локтіс дзебанінас нормӧм сьӧлӧмӧн.
Дзебаніныс вӧлі кырта горсйын, а пыранінсӧ вӧлі тупкӧма изйӧн.
Исус шуис: «Вештӧй изсӧ».
Марпа, кулӧм мортлӧн чойыс, шуис: «Господьӧй, сійӧ дуксьӧма нин, ӧд нёльӧд лун нин дзебанінын».
Исус шуис Марпалы: «Эг ӧмӧй тэныд шулы, мый эскан кӧ, аддзан Енлысь дзирдлунсӧ?»
Сэки вештісны изсӧ дзебанінысь, кӧні куйліс кулӧм Лазар.
Енэжӧ видзӧдлӧмӧн Исус шуис: «Батьӧй, Ме аттьӧала Тэнӧ, мый кылін Менӧ.
Ме тӧда: Тэ пыр кылан Менӧ. Тайӧс Ме шуи тані сулалысь йӧзыс вӧсна, медым найӧ эскисны, мый Тэ Менӧ мӧдӧдін».
Тайӧс шуӧм бӧрын Исус гораа шыасис: «Лазар, пет сэтысь.»
Кулӧм Лазар петіс. Сылысь ки-коксӧ вӧлі гартлӧма дзебан дӧраясӧн, чужӧмсӧ гартыштӧма чышъянӧн.
Исус шуис: «Разьӧй дӧраяссӧ, мед мунас».
Унаӧн, кодъяс волісны Марья дінӧ да аддзылісны, мый Исус вӧчис, пондісны эскыны Исуслы.
Мукӧдыс мунісны фарисейяс дінӧ да висьталісны налы, мый Исус вӧчис.
Аркирейяс да фарисейяс чукӧртісны веськӧдлан котыр да сёрнитісны: «Мый миянлы вӧчны?
Тайӧ Мортыс уна шензьӧданатор вӧчӧ.
Лэдзам кӧ Сылы водзӧ тадзи вӧчны, ставныс кутасны эскыны Сылы.
Сэки локтасны римсаяс да бырӧдасны миянлысь вежаиннымӧс да войтырнымӧс».
Каиаф нима морт, коді сійӧ вонас аркиреяліс, шуис налы: «Ті нинӧм онӧ вежӧртӧй. Ті ӧмӧй онӧ гӧгӧрвоӧй, мый миянлы лоӧ бурджык, ӧти морт кӧ кулас войтыр вӧсна, дзоньнас войтырыс бырӧм дорысь».
Тайӧ кывъяссӧ сійӧ шуис эз ассяньыс. Тайӧ вонас сійӧ аркиреяліс, та вӧсна водзвыв висьталіс, мый Исус кулас войтырыс вӧсна. Кулас оз сӧмын тайӧ войтырыс вӧсна, но медым ӧтлаӧ чукӧртны Енлысь разалӧм ныв-писӧ.
Тайӧ лунсяньыс найӧ шуисны вины Исусӧс.
Та вӧсна Исус эз нин ветлы восьсӧн Юдея муӧд.
Сійӧ муніс сэтысь овтӧминланьӧ, Ефраим карӧ, да кольччис сэтчӧ велӧдчысьясыскӧд.
Матыстчис юдейяслӧн Ыджыд лун. Сиктъясысь унаӧн локтісны Ерусалимӧ, медым сӧстӧммӧдчыны Ыджыд лун водзвылын.
Найӧ корсисны Исусӧс, крамын сулаліганыс сёрнитісны ӧта-мӧдныскӧд: «Кыдзи ті чайтанныд, локтас оз Сійӧ татчӧ Ыджыд лун кежлӧ?»
Аркирейяс да фарисейяс водзвыв тшӧктісны йӧзыслы: аддзас кӧ кодкӧ Исусӧс, мед юӧртас та йылысь, медым кутны Исусӧс.
12 юр.
Ыджыд лунысь квайт лун водзджык Исус воис Вифания сиктӧ, кӧні оліс Лазар. Буретш сійӧс Исус ловзьӧдіс.
Сэні Исуслы лӧсьӧдісны рытъя сёян. Марпа кесъяліс.
Исускӧд сёйысьяс пӧвстын вӧлі и Лазар.
Марья босьтіс литра джын зэв дона нард вый да мавтіс Исуслысь коксӧ, сэсся чышкаліс найӧс юрсинас.
Керкаас ӧвтіс чӧскыд дукӧн.
Велӧдчысьяс пӧвстын вӧлі Иуда, Симон-Искариотлӧн пиыс, коді сэсся вузалас Исусӧс. Сійӧ шуис: «Мыйла тайӧ выйсӧ эз вузавны куимсё динарысь? Сьӧмсӧ эськӧ позис сетавны гӧльяслы».
Дерт, Иуда эз тӧждысь гӧльяс вӧсна. Сійӧ шуис тадзи, ачыс вӧлі гусясьысь да.
Сы ордын вӧлі ӧтувъя сьӧм куд, кытысь сійӧ босьтлывліс аслыс.
Исус шуис: «Ӧвсьӧй сыысь.
Сійӧ видзис тайӧ выйсӧ Менӧ дзебигкежлӧ.
Гӧльяс пыр лоасны тіянкӧд, а Ме ог пыр ло».
Йӧзыс унаӧн тӧдмалісны Исуслӧн Вифания сиктӧ воӧм йылысь. Найӧ локтісны сэтчӧ эз сӧмын Исус понда, но медым аддзывны тшӧтш Лазарӧс, кодӧс Исус ловзьӧдіс кулӧмысь.
Аркирейяс шуисны вины тшӧтш Лазарӧс.
Ӧд Лазар вӧсна йӧзыс унаӧн ӧтдортчисны наысь да кутісны эскыны Исуслы.
Мӧд луннас гажӧдчанінӧ чукӧртчӧм йӧз кылісны, мый Исус локтӧ Ерусалимӧ. Пальма росъяс босьтӧмӧн найӧ петісны Исуслы воча да горзісны:
— Осанна.
Бурсиӧма Господь нимӧн Локтысьӧс, Израиль Ӧксыӧс.
Исус аддзис том осёлӧс да пуксис сы вылӧ. Ӧд тадзи гижӧма:
— Эн пов, Сион ныв.
Видзӧд, Ӧксыыд локтӧ осёл чань вылын пукалӧмӧн.
Сэки велӧдчысьясыс эз на гӧгӧрвоны тайӧс.
Но Исуслӧн дзирдлуныс воссьӧм бӧрын налы уси тӧд выланыс, мый тадзи вӧлі гижӧма Сы йылысь, и тадзи найӧ паныдалісны Сійӧс.
Найӧ, кодъяс вӧліны Исускӧд, кор Сійӧ чукӧстіс Лазарӧс дзебанінысь да ловзьӧдіс сійӧс, висьталісны йӧзыслы тайӧ шензьӧданатор йывсьыс.
Та вӧсна йӧзыс чукӧрӧн петісны Исуслы воча.
Фарисейяс сёрнитісны ас костаныс: «Аддзанныд-ӧ, ми нинӧм огӧ вермӧй вӧчны.
Став йӧзыс мунӧны Сы бӧрся».
Гажӧдчан кад дырйи Енлы юрбитны локтіс тшӧтш кымынкӧ грек.
Найӧ матыстчисны Филип дінӧ, коді вӧлі Галилеяса Випсаидаысь, да корисны: «Ыджыдӧй, ми кӧсъям аддзывны Исусӧс».
Филип муніс да висьталіс та йылысь Ӧндрейлы.
Сэсся Ӧндрей Филипкӧд висьталісны та йылысь Исуслы.
Исус шуис налы:
«Воис кад — воссьыны Морт Пилӧн дзирдлунлы.
Веськыда, веськыда висьтала тіянлы: шобді тусь кӧ муӧ усьӧм бӧрас оз кув, сэки ӧтнас кольӧ.
Кулас кӧ, уна тусь ваяс.
Тэныд кӧ муса олӧмыд, воштан сійӧс. Мустӧмтан кӧ ассьыд олӧмтӧ тайӧ муюгыдас, видзан сійӧс помтӧм олӧмӧ.
Меным кесъялысь мед локтӧ Ме бӧрся.
Кӧні Ме лоа, сэні тшӧтш лоӧ Менам кесъялысьӧй.
И Меным кесъялысьӧс Батьӧй бурӧ пуктас.
Ӧні Менам сьӧлӧмӧй ёна майшасьӧ.
Мый Меным шуны?
Батьӧй, мезды Менӧ тайӧ кадсьыс.
Но дзик тайӧ кад кежлас Ме локті.
Батьӧй, восьт Аслад нимлысь дзирдлунсӧ.»
Сэки енэжсянь кыліс гӧлӧс шы: «Ме восьті нин да нӧшта на восьта».
Сэні сулалысь йӧзыс тайӧс кылӧм бӧрын шуалісны: «Тайӧ гым».
Мӧдъяс шуалісны: «Андел Сыкӧд сёрнитіс».
Исус шуис: «Тайӧ висьталӧмыс эз вӧв Меным, а тіянлы.
Ӧні тайӧ муюгыдсӧ лоӧ мыждӧма.
Ӧні тайӧ муюгыдас ыджыдалысьсӧ лоӧ вӧтлӧма.
Му вылысь Менӧ кыпӧдӧм бӧрын Ме ставнысӧ Ас дінӧ сибӧда».
Тайӧ висьталӧмнас Сійӧ гӧгӧрвоӧдіс, кутшӧм ногӧн Сійӧ кулас.
Йӧзыс шуисны Сылы: «Ми тӧдам Индӧдысь, мый Кристос помтӧг олӧ.
Сідзкӧ, мыйла Тэ шуан, Морт Пиӧс пӧ кыпӧдасны?
Коді сійӧ Морт Пиыс?»
Сэки Исус шуис налы: «Этшаник кад югыдыс лоас на тіянкӧд.
Сідзкӧ, ветлӧй югыдыс дырйи, медым пемыдыс эз пӧдты тіянӧс. Ӧд пемыдас ветлысь оз тӧд, кытчӧ мунӧ.
Кытчӧдз югыдыс тіянкӧд, эскӧй югыдыслы. Сэки лоанныд югыдыслӧн ныв-пиӧн».
Тайӧс висьталӧм бӧрын Исус ылыстчис на дінысь да саяліс.
Сы мында шензьӧданатор Исус вӧчис йӧзыс водзын, но найӧ эз эскыны Сылы. Тадзи инісны Исай пророклӧн кывъясыс:
— Господьӧй, коді эскис миянсянь кывлӧмас?
Кодлы петкӧдчис Господьлӧн вына киыс?
Найӧ эз вермыны эскыны, кыдзи висьтавліс на йылысь Исай:
— Енмыс тупкис налысь синнысӧ, чорзьӧдіс налысь сьӧлӧмнысӧ, медым эз аддзыны синнаныс, эз гӧгӧрвоны сьӧлӧмнаныс да эз бергӧдчыны Мелань, медым Ме бурдӧді найӧс.
Исай шуис тайӧ кывъяссӧ Исуслысь дзирдлунсӧ аддзылігас, да висьталіс Сы йылысь.
Веськӧдлысьяс пӧвстысь унаӧн эскисны Исуслы.
Сӧмын фарисейясысь полӧмнысла найӧ эз лысьтны висьтавны та йылысь веськыда, медым эз вӧтлыны найӧс синагогаысь. Ӧд Енлӧн ошкӧм дорысь налы мусаджык вӧлі йӧзлӧн ошкӧмыс.
Исус гораа шыасис: «Меным эскысь оз Меным эскы, а Менӧ Мӧдӧдысьлы.
Менӧ аддзысь аддзӧ Менӧ Мӧдӧдысьӧс.
Ме — югыдыс. Ме локті му вылӧ, медым Меным эскысь эз коль пемыдас.
Менсьым кывъясӧс кылысь кӧ оз эскы, Ме сійӧс ог мыжды. Ме ӧд локті муюгыдсӧ мездыны, а эг мыждыны.
Коді оз сибӧд Менӧ да оз босьт Менсьым кывъясӧс, сылӧн эм аслас мыждысь: Менам висьталӧм кывйӧй медбӧръя лунӧ мыждас сійӧс.
Ме висьталі эг Ассянь.
Менӧ мӧдӧдысь Батьӧй Ачыс велӧдіс Менӧ, мый шуны да юӧртны.
Ме тӧда: Сылӧн тшӧктӧмыс вайӧ помтӧм олӧм.
Сідзкӧ, Менам висьталӧмӧй — Батьлӧн шуӧм серти висьталӧм».
13 юр.
Тайӧ вӧлі Ыджыд лун водзвылын. Исус тӧдіс, мый Сылы воис кад мунны тайӧ муюгыдсьыс Батьыс дінӧ. Исуслы вӧлі мусаӧсь найӧ, кодъяс эскисны Сылы, Сійӧ помӧдз петкӧдліс налы Ассьыс муслунсӧ.
Рытнас найӧ чукӧртчисны сёйны. Омӧльыс вӧлі ышӧдӧма нин Иудаӧс, Симон-Искариот пиӧс, вузавны Исусӧс.
Исус тӧдіс, мый Батьыс ставсӧ сетіс Сы киӧ, и мый Сійӧ локтіс Енсянь да бӧр Сы дінӧ мунӧ. Сёйигас Исус чеччис, пӧрччис вылыс паськӧмсӧ да вӧнясис ки чышкӧдӧн.
Кисьтіс дозйӧ ва да кутіс мыськавны велӧдчысьяслысь кокнысӧ, а вӧнялӧм чышкӧднас чышкаліс найӧс.
Исус матыстчис Симон-Петыр дінӧ. Петыр шуис: «Господьӧй, Тэ-ӧ менсьым кокӧс мыськан?»
Исус вочавидзис: «Тэ ӧні он на гӧгӧрво, мый Ме вӧча, но бӧрынджык гӧгӧрвоан».
Петыр шуис Сылы: «Некор он мыськав менсьым кокӧс.»
Исус воча шуис: «Ог кӧ мыськав тэнӧ, он ло Мекӧд».
Симон-Петыр шуис Сылы: «Господьӧй, мыськы тшӧтш менсьым киӧс да юрӧс, эн сӧмын кокӧс.»
Исус вочавидзис: «Мыськалӧмалысь колӧ мыськавны сӧмын коксӧ, ӧд дзоньнассӧ сійӧ сӧстӧм нин.
Ті сӧстӧмӧсь нин, сӧмын абу ставныд».
Исус тӧдіс, коді Сійӧс вузалас, та вӧсна шуис, абу пӧ ставныд сӧстӧмӧсь.
Налысь кокнысӧ мыськалӧм бӧрын Исус пасьтасис да бара пуксис сёйны. Сійӧ шуис велӧдчысьясыслы: «Гӧгӧрвоанныд-ӧ, мый Ме ӧні вӧчи?
Ті шуанныд Менӧ Велӧдысьӧн да Господьӧн.
Ті веськыда шуанныд, Ме буретш сійӧ.
Ме кӧ, тіян Господь да Велӧдысь, мыськалі тіянлысь кокнытӧ, сідзкӧ, тіянлы тшӧтш колӧ мыськавны ӧта-мӧдныдлысь кокнытӧ.
Тадзи Ме вӧчи, медым ті вӧчинныд Ме моз.
Веськыда, веськыда висьтала тіянлы: кесйӧг абу ыджыдджык аслас ыджыдысь, да мӧдӧдӧм морт абу ыджыдджык сійӧс мӧдӧдысьысь.
Тайӧс кӧ тӧданныд да та серти оланныд, ті шудаӧсь.
Ме ог висьтав ставныд йылысь, ӧд Ассьым бӧрйӧмаясӧс Ме тӧда.
Но Гижӧдыслы колӧ инны: “Мекӧд сёйысьыс мунас Меным паныд”.
Ме водзвыв висьтала тайӧс, медым лоӧм бӧрас ті эскинныд, мый Ме збыльысь Сійӧ, кодӧн шуа Ачымӧс.
Веськыда, веськыда висьтала тіянлы: коді сибӧдӧ Месянь мӧдӧдӧмаӧс, сійӧ сибӧдӧ Менӧ. А Менӧ сибӧдысь сибӧдӧ Менӧ Мӧдӧдысьӧс».
Тайӧс висьталӧм бӧрын Исуслӧн нормис сьӧлӧмыс.
Сійӧ шуис: «Веськыда, веськыда висьтала тіянлы: тіян пиысь ӧти вузалас Менӧ».
Сэки велӧдчысьясыс видзӧдлісны ӧта-мӧдныс вылӧ. Найӧ эз гӧгӧрвоны, код йылысь Сійӧ сёрнитӧ.
Велӧдчысьяс пиысь ӧти, коді вӧлі муса Исуслы, нёровтчӧмӧн пукаліс Исус бердын.
Симон-Петыр довкнитіс сылы, юав пӧ Исуслысь, код йылысь Сійӧ сёрнитӧ.
Исуслы морӧс бердас топӧдчӧмӧн велӧдчысьыс шуис: «Господьӧй, коді нӧ сійӧ?»
Исус вочавидзис: «Сійӧ мортыслы Ме сета кӧтӧдӧм нянь тор».
Исус кӧтӧдіс нянь тор да сетіс сійӧс Симон-Искариот Иудалы.
Тайӧ нянь тор бӧрас Иуда пытшкӧ пырис сӧтана.
Исус шуис Иудалы: «Мый кӧсъян вӧчны, вӧч ӧдйӧджык».
Сёйысьяс пӧвстысь некод эз гӧгӧрво, мыйла Исус шуис тадзи.
Кодсюрӧ чайтісны, мый Исус тшӧктіс ньӧбны коланаторсӧ Ыджыд лун кежлӧ либӧ сетны мыйкӧ гӧльяслы. Ӧд сьӧм кудйыс вӧлі Иуда ордын.
Нянь торсӧ босьтӧм бӧрын Иуда дзик пыр петіс ывлаӧ.
Вӧлі вой.
Иудалӧн петӧм бӧрын Исус шуис: «Ӧні воссис Морт Пилӧн дзирдлуныс, а Пиыс пыр воссис Енлӧн дзирдлуныс.
Енлӧн дзирдлуныс кӧ воссис Пиыс пыр, сэки Енмыс Ас пытшкас восьтас Пиыслысь дзирдлунсӧ. Тайӧ лоӧ регыд нин.
Челядь, Меным этша нин колис овны тіянкӧд,
сэсся кутанныд корсьны Менӧ. Ӧні висьтала тіянлы сійӧ, мый коркӧ висьтавлі мукӧдыслы: кытчӧ Ме муна, сэтчӧ ті онӧ вермӧй локнысӧ.
Выль тшӧктӧм сета тіянлы: радейтӧй ӧта-мӧднытӧ.
Кыдзи Ме радейта тіянӧс, сідзи ті радейтӧй ӧта-мӧднытӧ.
Радейтанныд кӧ ӧта-мӧднытӧ, сэки быдӧн аддзас, мый ті — Менам велӧдчысьяс».
Симон-Петыр юаліс: «Господьӧй, кытчӧ Тэ мунан?»
Исус вочавидзис: «Кытчӧ Ме муна, сэтчӧ тэ ӧні он вермы муннысӧ.
Локтан Ме бӧрся бӧрынджык».
Петыр шуис: «Господьӧй, мыйла ӧні ог вермы Тэ бӧрся муннысӧ?
Ме ассьым олӧмӧс сета Тэ вӧсна.»
Исус вочавидзис: «Тэ шуан, мый ассьыд олӧмтӧ сетан Ме вӧсна.
Веськыда, веськыда висьтала тэныд: петук чукӧсттӧдз на тэ куимысь соссян Меысь».
14 юр.
«Мед оз майшась тіян сьӧлӧмныд.
Эскӧй Енлы да эскӧй Меным.
Менам Бать керкаын вежӧсыс уна.
Эз кӧ вӧв сідзи, Ме эськӧ эг шу: муна дасьтыны тіянлы оланін.
Ме дасьта оланін да бӧр локта босьтны тіянӧс Ас дінӧ, медым ті вӧлінныд Мекӧд.
Ті тӧданныд, кытчӧ Ме муна, туйсӧ тшӧтш тӧданныд».
Фома шуис Сылы: «Господьӧй, ми огӧ тӧдӧй, кытчӧ Тэ мунан.
Кыдзи нӧ ми вермам туйсӧ тӧдны?»
Исус шуис сылы: «Ме — туйыс, збыльыс да олӧмыс.
Бать дінӧ позьӧ локны сӧмын Ме пыр, мӧд туйыс абу.
Ті кӧ тӧданныд Менӧ, тӧданныд тшӧтш Менсьым Батьӧс.
Ӧні ті тӧданныд Сійӧс, весиг аддзылінныд Сійӧс».
Филип шуис Сылы: «Господьӧй, петкӧдлы миянлы Батьтӧ. Унджыксӧ ми огӧ кӧсйӧй».
Исус вочавидзис: «Он ӧмӧй тӧд Менӧ, Филип, Ме ӧд сы дыра нин ола тіянкӧд?
Менӧ аддзылысь и Батьӧс аддзыліс.
Мыйла тэ шуан, петкӧдлы пӧ миянлы Батьтӧ?
Ме — Бать пытшкын, а Бать — Ме пытшкын. Эскан-ӧ таӧ?
Сійӧ кывъяссӧ, мый висьтала тіянлы, ог Ассянь висьтав.
Тайӧ Ме пытшкын олысь Батьӧй вӧчӧ уджъяссӧ.
Эскӧй Менам кывъясӧ: Ме — Бать пытшкын, а Бать — Ме пытшкын. Онӧ кӧ эскӧй таӧ, эскӧй Меным уджъясӧй серти.
Веськыда, веськыда висьтала тіянлы: Меным эскысь кутас вӧчны Ме кодь жӧ уджъяс, весиг наысь ыджыдджыкӧс на, ӧд Ме муна Батьӧй дінӧ.
Мый коранныд Батьлысь Менам нимӧн, сійӧс Ме вӧча, медым Батьлӧн дзирдлуныс воссис Пиыс пыр.
Мый коранныд Менам нимӧн, сійӧс Ме вӧча».
«Ме кӧ муса тіянлы, олӧй Менам тшӧктӧмъяс серти.
Ме кора Батьлысь, и Бать сетас тіянлы мӧд Дорйысьӧс.
Сійӧ пыр лоас тіянкӧд. Тайӧ Дорйысьыс — Збыльыслӧн Лолыс. Муюгыдыс оз аддзы да оз тӧд Сійӧс, та вӧсна оз вермы сибӧдны.
Ті тӧданныд Сійӧс, ӧд Сійӧ тіянкӧд да тіян пытшкын.
Ӧтнанытӧ ог коль тіянӧс, Ме бӧр локта тіян дінӧ.
Регыд муюгыдыс оз нин аддзы Менӧ, а ті кутанныд аддзыны Менӧ. Ме ола, та вӧсна ті тшӧтш кутанныд овны.
Сійӧ лунӧ ті тӧдмаланныд, мый Ме — Бать пытшкын, ті — Ме пытшкынӧсь, а Ме — тіян пытшкын.
Коді видзӧ сьӧлӧмас Менсьым тшӧктӧмъясӧс да олӧ на серти, сійӧ радейтӧ Менӧ.
Коді Менӧ радейтӧ, сійӧс Менам Батьӧй радейтӧ.
Ме сійӧс тшӧтш радейта да восся сылы».
Мӧд Иуда, абу Искариот, шуис Исуслы: «Господьӧй, мыйла Тэ кӧсъян воссьыны миянлы, а он муюгыдыслы?»
Исус вочавидзис:
«Коді радейтӧ Менӧ, сійӧ олӧ Менам кывъяс серти.
Менам Батьӧй радейтӧ сійӧс.
Ми локтам Батькӧд да овмӧдчам сы дінӧ.
Коді оз радейт Менӧ, сійӧ оз ов Менам кывъяс серти.
Сійӧ кывъясыс, мый ті кыланныд, абу Месянь, найӧ — Менӧ мӧдӧдысь Батьсянь.
Тайӧс висьталі тіянлы, кор Ме ӧні тіянкӧд на.
Менам Батьӧй мӧдӧдас Менам ним кузя Дорйысьӧс — Вежа Лолӧс. Сійӧ велӧдас тіянӧс быдторйӧ да казьтыштас тіянлы ставсӧ, мый Ме висьтавлі тіянлы.
Лӧньлун коля тіянлы. Ассьым лӧньлунӧс сета тіянлы, сійӧ абу муюгыдыслӧн лӧньлун кодь.
Энӧ майшасьӧй да энӧ полӧй.
Ті ӧд кывлінныд Менсьым кывъясӧс: “Ме муна да бӧр локта тіян дінӧ”.
Ме кӧ муса тіянлы, ті эськӧ нимкодясинныд Бать дінӧ Менам мунӧмысь, ӧд Батьӧй Меысь ыджыдджык.
Ме водзвыв висьтала тайӧс, медым лоӧм бӧрас ті эскинныд Меным.
Ог нин уна сёрнит тіянкӧд, ӧд тайӧ муюгыдас ыджыдалысьыс локтӧ нин. Ме вылын сійӧ ыджыдавны оз вермы.
Но медым муюгыдыс тӧдіс, мый Бать Меным муса, ставсӧ вӧча Батьлӧн тшӧктӧм серти.
Чеччӧй, мунамӧй татысь».
15 юр.
«Ме — збыль виноград пуыс, Менам Батьӧй — виноград быдтысьыс.
Вотӧс вайтӧм увъяссӧ Сійӧ кералӧ, а вотӧс вайысь увсӧ Сійӧ весалӧ, медым вайис унджык вотӧс на.
Ті сӧстӧмӧсь нин, ӧд Менам кывъясӧй весалісны тіянӧс.
Лоӧй Ме пытшкын, и Ме лоа тіян пытшкын.
Увйыс кӧ абу йитчӧма пуыскӧд, ачыс сійӧ оз вермы вайны вотӧссӧ.
Ті тшӧтш онӧ вермӧй вайны вотӧссӧ, онӧ кӧ лоӧй Ме пытшкын.
Ме — пуыс, ті — увъясыс.
Коді олӧ Ме пытшкын, а Ме сы пытшкын, сійӧ вайӧ уна вотӧс.
Ӧд Метӧг ті нинӧм онӧ вермӧй вӧчнысӧ.
Коді оз ло Ме пытшкын, увйӧс моз сійӧс шыбитасны ортсӧ. А косьмӧм увъяссӧ чукӧртӧны да шыбитӧны биӧ.
Лоанныд кӧ Ме пытшкын, да Менам кывъясӧй кӧ лоӧны тіян пытшкын, сэки корӧй, мый кӧсъянныд, и лоас тіянлы.
Ті кӧ ваянныд уна вотӧс да лоанныд Менам велӧдчысьясӧн, сэки воссяс Батьлӧн дзирдлуныс.
Батьлы Ме ёна муса, ті Меным тшӧтш ёна мусаӧсь.
Сідзкӧ, олӧй Менам муслун пытшкын.
Ме ставсӧ вӧча Батьлӧн тшӧктӧм серти да ола Сылӧн муслун пытшкын. Ті кӧ вӧчанныд Менам тшӧктӧм серти, сэки тшӧтш кутанныд овны Менам муслун пытшкын.
Тайӧс Ме висьталі тіянлы, медым Менам нимкодьлунӧй вуджис тіянлы да тыртіс сьӧлӧмнытӧ.
Менам тшӧктӧмӧй татшӧм: радейтӧй ӧта-мӧднытӧ, кыдзи Ме радейта тіянӧс.
Мортыс кӧ сетас олӧмсӧ ёртыс вӧсна, таысь ыджыдджык муслуныс абу.
Оланныд кӧ Менам тшӧктӧм серти, ті — Менам ёртъяс.
Ме ог нин шу тіянӧс кесйӧгъясӧн.
Ӧд кесйӧг оз тӧд, мый ыджыдыс вӧчӧ.
Ме шуа тіянӧс ёртъясӧн, ӧд Ме висьталі тіянлы ставсӧ, мый кывлі Батьсянь.
Энӧ ті Менӧ бӧрйӧй.
Ме бӧрйи тіянӧс да мӧдӧді, медым вайинныд бырлытӧм вотӧс. Тадзи кӧ вӧчанныд, Батьӧй сетас тіянлы ставсӧ, мый коранныд Сылысь Менам нимӧн.
Ме тшӧкта тіянлы: радейтӧй ӧта-мӧднытӧ».
«Муюгыдыс кӧ мустӧмтӧ тіянӧс, тӧдӧй: тіянысь водзджык на сійӧ мустӧмтіс Менӧ.
Ті кӧ вӧлінныд муюгыдсьыс, сэки эськӧ мусаӧсь вӧлінныд муюгыдыслы.
Но ті абу муюгыдсьыс, ӧд Ме бӧрйи тіянӧс сэтысь, сійӧн муюгыдыс мустӧмтӧ тіянӧс.
Кутӧй тӧд выланыд Менсьым кывъясӧс: кесйӧг абу ыджыдджык аслас ыджыдысь.
Менӧ кӧ вӧтлісны, вӧтласны тшӧтш тіянӧс.
Менсьым кывъясӧс кӧ кывзісны, кывзасны тшӧтш тіянлысь.
Ставсӧ тайӧс найӧ вӧчасны Менам ним вӧсна, ӧд найӧ оз тӧдны Менӧ Мӧдӧдысьӧс.
Эг кӧ Ме лок да сёрнит накӧд, найӧ эськӧ эз вӧвны мыжаӧсь.
Ӧні найӧ оз вермыны шуны, мый абу мыжаӧсь.
Менӧ мустӧмтысь Менсьым Батьӧс тшӧтш мустӧмтӧ.
Ме кӧ эг вӧч налӧн син водзын сійӧ уджъяссӧ, кодъясӧс некод эз вӧчлы, сэки эськӧ найӧ эз вӧвны мыжаӧсь.
Ӧні найӧ аддзылісны Менсьым уджъясӧс, но Менӧ да Менсьым Батьӧс мустӧмтӧны.
Тадзи инӧ налӧн Индӧдын гижӧмаыс: “Мустӧмтӧны Менӧ весьшӧрӧ”.
Ме мӧдӧда тіянлы Батьсянь Дорйысьӧс, Сійӧ — Збыльыслӧн Лолыс. Сійӧ локтас Батьсянь да висьталас Ме йылысь.
Ті тшӧтш кутанныд висьтавны Ме йылысь, ӧд ті водзысяньыс Мекӧд».
16 юр.
«Тайӧс висьталі тіянлы, медым ті энӧ эновтчӧй эскӧмысь.
Тіянӧс вӧтласны синагогаысь.
Весиг воас сэтшӧм кад, кор тіянӧс виысьяс кутасны чайтны, мый татшӧм ногӧн найӧ кесъялӧны Енмыслы.
Найӧ вӧчасны тадзи, ӧд Батьӧс да Менӧ найӧ оз тӧдны.
Тайӧс Ме висьталі тіянлы, медым сійӧ кадыс воигӧн ті тӧд выланыд уськӧдінныд Менсьым кывъясӧс.
Водзынсӧ тайӧс эг висьтавлы тіянлы, ӧд Ме вӧлі тіянкӧд».
«Ӧні муна Менӧ Мӧдӧдысь дінӧ.
Но некод тіян пиысь оз юав Менсьым, кытчӧ Ме муна.
Ӧд Менам висьталӧмысь тіян сьӧлӧмныд тырис шогӧн.
Ме висьтала тіянлы збыльсӧ: бурджык лоӧ, Ме кӧ муна.
Ӧд ог кӧ мун, сэки Дорйысь оз лок тіян дінӧ, а муна кӧ, мӧдӧда Сійӧс тіян дінӧ. Дорйысьыс локтас да эрдӧдас муюгыдыслысь ылалӧмсӧ — Сійӧ висьталас налы мыж йылысь, веськыдлун йылысь да мыждӧм йылысь.
Мыжыс сыын, мый оз эскыны Меным.
Веськыдлуныс сыын, мый Ме муна Батьӧй дінӧ да ті онӧ нин аддзӧй Менӧ.
Мыждӧмыс сыын, мый тайӧ муюгыдас ыджыдалысьсӧ мыждӧма нин.
Унатор на верма висьтавны тіянлы, но ӧні ті онӧ вермӧй ставсӧ тӧрӧдны.
Збыльыслӧн Лолыс локтас да велӧдас тіянӧс збыляс.
Сійӧ оз Ассяньыс кут висьтавны, а висьталас кывлӧмсӧ да юӧртас тіянлы водзӧ лоанасӧ.
Сійӧ нимӧдас Менӧ, ӧд Месянь кывлӧмсӧ тіянлы юӧртас.
Ставыс, мый Батьлӧн, тшӧтш Менам.
Сійӧн Ме шуи, мый Месянь кывлӧмсӧ тіянлы юӧртас».
«Регыд ті онӧ аддзӧй Менӧ, сэсся регыд бара аддзанныд Менӧ, ӧд Ме муна Бать дінӧ».
Велӧдчысьяс пиысь кодсюрӧ сёрнитісны ӧта-мӧдныскӧд: «Мыйла Сійӧ шуӧ: “Регыд ті онӧ аддзӧй Менӧ, сэсся регыд бара аддзанныд Менӧ?” Мыйла Сійӧ висьталӧ, Ме пӧ муна Бать дінӧ?» Найӧ шензисны: «Кыдзи гӧгӧрвоны Сылысь кывъяссӧ, кор шуӧ, регыд пӧ?
Ми огӧ гӧгӧрвоӧй Сылысь висьталӧмсӧ».
Исус тӧдіс, мый йылысь велӧдчысьясыс кӧсйӧны юавны Сылысь, да шуис налы:
«Сы йылысь-ӧ ті сёрнитанныд ӧта-мӧдныдкӧд, мый Ме кӧсйи висьтавны тайӧ кывъяснас: “Регыд ті онӧ аддзӧй Менӧ, сэсся регыд бара аддзанныд Менӧ”?
Веськыда, веськыда висьтала тіянлы: ті кутанныд сыркъялӧмӧн бӧрдны, а муюгыдыс кутас нимкодясьны. Ті шогӧ усянныд, но тіян шогныд бергӧдчас нимкодьлунӧ.
Кага вайысь ань шогсьӧ, кор воас кад чужтыны.
Но чужтӧм бӧрас сылӧн шогыс вунӧ нимкодьысла, ӧд муюгыдас морт чужис.
Ӧні ті тшӧтш шогсянныд, но Ме бара аддзыся тіянкӧд. Сэки тіян сьӧлӧмныд тырас нимкодьлунӧн, и тіянлысь нимкодьлунтӧ некод оз мырддьы.
Сійӧ лунӧ ті нинӧм нин онӧ юалӧй Менсьым.
Веськыда, веськыда висьтала тіянлы: Бать сетас тіянлы ставсӧ, мый коранныд Сылысь Менам нимӧн.
Ӧнӧдз ті нинӧм энӧ корлӧй Менам нимӧн.
Корӧй, и лоӧ сетӧма тіянлы. Сэки тіян нимкодьлунныд лоӧ помтӧм-дортӧм.
Ме висьтавлі тіянлы велӧданвисьтъясӧн.
Но воас кад, кор ог нин кут тадзи сёрнитны. Сэки веськыда висьтала тіянлы Бать йылысь.
Сійӧ лунӧ ті асьныд кутанныд корны Батьлысь Менам нимӧн. Меным абу нин колана кевмысьны Батьлы тіян вӧсна.
Ті асьныд мусаӧсь Батьлы, ӧд ті радейтанныд Менӧ да эсканныд, мый Ме локті Енсянь.
Ме локті муюгыдас Бать дінсянь. Ӧні Ме коля муюгыдсӧ да бӧр муна Бать дінӧ».
Велӧдчысьясыс шуисны Исуслы: «Ӧні Тэ веськыда висьталан, он нин сёрнит велӧданвисьтъясӧн.
Ӧні ми аддзам, мый Тэ тӧдан ставсӧ.
Миян юавтӧдз на Тэ тӧдан нин, мый вочавидзны. Та вӧсна эскам: Тэ локтін Енсянь».
Исус шуис: «Ӧні ті эсканныд?
Воас кад да воис нин, кор ті ставныд разаланныд, Менӧ ӧтнамӧс колянныд.
Но Ме абу ӧтнам, ӧд Мекӧд Батьӧй.
Тайӧс висьталі тіянлы, медым тіян вӧлі лӧньлун Ме пытшкын.
Муюгыдас лоӧ сьӧкыд тіянлы, но энӧ полӧй, ӧд Ме верми муюгыдсӧ».
17 юр.
Тайӧс висьталӧм бӧрын Исус видзӧдліс енэжас да шуис: «Батьӧй, воис кад восьтны Пиыдлысь дзирдлунсӧ, медым Пиыд вермис восьтны Тэнсьыд дзирдлунтӧ. Тэ индін Питӧ ыджыдавны быдӧн вылын. Сійӧ сетас помтӧм олӧм быдӧнлы, кодӧс Тэ сетін Сылы.
Помтӧм олӧмыс — тайӧ тӧдны Тэнӧ, ӧти збыль Енмӧс, да Тэӧн мӧдӧдӧм Исус Кристосӧс.
Му вылас олігӧн Ме восьті Тэнсьыд дзирдлунтӧ да вӧчи Меным сетӧм уджтӧ.
Батьӧй, ӧні сет Меным сійӧ жӧ дзирдлунсӧ, кутшӧм вӧлі Менам дзирдлунӧй му пуксьытӧдзыс на, кор Ме вӧлі Тэкӧд.
Ме восьті Тэнсьыд нимтӧ йӧзыслы, кодъясӧс Тэ сетін Меным муюгыдсьыс.
Найӧ — Тэнадӧсь, Тэ Меным сетін найӧс.
Найӧ видзисны Тэнсьыд Кывтӧ.
Ӧні найӧ гӧгӧрвоӧны: ставыс, мый Тэ сетін Меным, тайӧ — Тэсянь. Ме висьталі налы Тэнсьыд кывъястӧ. Найӧ сибӧдісны тайӧ кывъяссӧ да збыльысь тӧдӧны, мый Ме Тэсянь локті. Найӧ эскӧны, мый Тэ Менӧ мӧдӧдін.
Ме кевмыся на вӧсна.
Ог став йӧзыс вӧсна кевмысь, кевмыся сӧмын Меным сетӧмаясыд вӧсна, ӧд найӧ Тэнадӧсь.
Ставыс, мый Менам, сійӧ Тэнад, а мый Тэнад — сійӧ Менам. Менам дзирдлунӧй воссяс на пыр.
Ме абу нин муюгыдас, но найӧ муюгыдасӧсь на. Ме Тэ дінӧ локта.
Вежа Батьӧй, видз Меным сетӧмаясӧс Аслад нимӧн, медым найӧ вӧліны Миян моз ӧтвыв.
Накӧд муюгыдас олігӧн Ме видзи найӧс, Меным сетӧмаясӧс, Тэнад нимӧн.
Ме видзи найӧс, да некод эз вош на пиысь сы кындзи, кодлы колӧ вӧлі вошнысӧ. Тадзи иніс Гижӧдыс.
Ӧні локта Тэ дінӧ.
Ме висьтала тайӧс муюгыдас олігӧн на, медым Менам нимкодьлунӧй тыртіс налысь сьӧлӧмнысӧ.
Ме висьталі налы Тэнсьыд кывтӧ.
Муюгыдыс мустӧмтӧ найӧс, ӧд найӧ Ме моз абу тайӧ муюгыдсьыс.
Ог кевмы босьтны найӧс муюгыдсьыс, кевма видзны найӧс омӧльысь.
Найӧ Ме моз абу тайӧ муюгыдсьыс.
Вежӧд найӧс збыльыд пыр.
Збыльыс — тайӧ Тэнад кывйыд.
Тэ мӧдӧдін Менӧ муюгыдас.
Тэ моз жӧ Ме мӧдӧді найӧс муюгыдас. На вӧсна Ме сета Тэныд Ачымӧс, медым збыльыс вежӧдіс найӧс.
Кевмыся ог сӧмын на вӧсна, кевмыся тшӧтш мукӧдыс вӧсна, кодъяс эскӧны Меным налӧн висьталӧм пыр. Кевмыся, мед найӧ ставныс лоасны ӧтвыв. Кыдзи Тэ, Батьӧй, Ме пытшкын, а Ме — Тэ пытшкын, тадзи мед найӧ лоасны ӧтвыв Миян пытшкын. Сэки муюгыдыс эскас, мый Тэ Менӧ мӧдӧдін.
Меным сетӧм дзирдлунтӧ Ме сеті тшӧтш налы, медым найӧ вӧліны Миян моз ӧтвыв.
Ме кӧ на пытшкын, а Тэ — Ме пытшкын, сэки найӧ ставныс лоасны ӧтвыв.
Тадзи муюгыдыс тӧдмалас, мый Тэ Менӧ мӧдӧдін, и найӧ мусаӧсь Тэныд, кыдзи Ме муса Тэныд.
Батьӧй, Ме кӧсъя, медым Меным сетӧмаясыд лоасны сэні, кӧні Ме лоа, да аддзасны Менсьым дзирдлунӧс, кодӧс Тэ сетін Меным. Ӧд Ме муса вӧлі Тэныд му пуксьытӧдзыс на.
Веськыда вӧчысь Батьӧй, муюгыдыс оз тӧд Тэнӧ, а Ме тӧда Тэнӧ. Ӧні Тэнад сетӧмаясыд тшӧтш тӧдӧны, мый Тэ Менӧ мӧдӧдін.
Ме велӧді найӧс тӧдны Тэнсьыд нимтӧ да нӧшта на велӧда, медым Ме вӧлі на пытшкын, да медым на пытшкын вӧлі сэтшӧм муслун, кутшӧм Тэнад муслуныд Ме дінӧ».
18 юр.
Тайӧс шуӧм бӧрын Исус муніс велӧдчысьясыскӧд Кедрон ю сайӧ да пырис накӧд сад йӧрӧ.
Найӧ унаысь чукӧртчылісны сэтчӧ, сійӧн тайӧ йӧрсӧ тӧдіс тшӧтш Иуда, Исусӧс вузалысь.
Иуда вайӧдіс сэтчӧ шыпуртаясӧс да крам видзысьясӧс, кодъясӧс мӧдӧдісны аркирейяс да фарисейяс. Найӧ локтісны пӧнаръясӧн, биясӧн да шыпуртъясӧн.
Исус тӧдіс нин, мый лоӧ Сыкӧд, да воча петіс налы. Сійӧ юаліс: «Кодӧс ті корсянныд?»
Сылы вочавидзисны: «Назаретса Исусӧс».
Исус шуис: «Тайӧ Ме».
Накӧд орччӧн сулаліс тшӧтш Иуда, Исусӧс вузалысь.
Кор Исус шуис: «Тайӧ Ме», шыпуртаяс бӧрыньтчисны да усисны муас.
Исус бара юаліс: «Кодӧс ті корсянныд?»
Найӧ вочавидзисны: «Назаретса Исусӧс».
Исус шуис налы: «Ме висьталі нин тіянлы, тайӧ Ме.
Менӧ кӧ корсянныд, лэдзӧй мукӧдсӧ мунны». Исус шуис тадзи, медым инісны Сылӧн кывъясыс: «Меным сетӧмаясысь весиг ӧтикӧс эг вошты».
Симон-Петырлӧн вӧлі шыпурт. Сійӧ кыскис шыпуртсӧ да керыштіс аркирей кесйӧглысь веськыд пельсӧ.
Кесйӧглӧн нимыс вӧлі Малк.
Исус шуис Петырлы: «Бӧр пукты шыпурттӧ пуртӧсас.
Ог ӧмӧй Ме ю сійӧ чашасӧ, кодӧс сетіс Меным Батьӧй?»
Сэки шыпуртаяс, налӧн веськӧдлысьыс да крам видзысьяс босьтісны Исусӧс.
Сійӧс кӧрталӧмӧн нуӧдісны медводз Аннас дінӧ, Каиаф гӧтырлӧн бать дінӧ. Сійӧ вонас Каиаф аркиреяліс.
Буретш сійӧ шуліс юдейяслӧн веськӧдлысьяслы, бурджык пӧ ӧти мортлы кувны войтырыс вӧсна.
Симон-Петыр да нӧшта ӧти велӧдчысь мунісны Исус бӧрся.
Аркирейлы тӧдса вӧлі тайӧ велӧдчысьыс, та вӧсна сійӧ пырис Исускӧд аркирей йӧр пытшкӧ.
Петыр сулаліс йӧр ортсыас, дзиръя дорас.
Аркирейлы тӧдса велӧдчысьыс петіс, сёрнитыштіс дзиръя восьталысь анькӧд да вайӧдіс Петырӧс йӧр пытшкас.
Сэки аньыс юаліс Петырлысь: «Абу-ӧ тэ тшӧтш тайӧ Мортыслӧн велӧдчысь?»
Петыр шуис: «Абу».
Кӧдзыд вӧлі, та вӧсна кесйӧгъяс да крам видзысьяс пестісны бипур да сы гӧгӧр сулалӧмӧн шонтысисны.
Петыр тшӧтш сулаліс накӧд да шонтысис.
Аркирей юаліс Исуслысь Сылӧн велӧдӧмыс да велӧдчысьясыс йылысь.
Исус вочавидзис: «Ме ставсӧ висьтавлі восьсӧн.
Ме велӧді йӧзсӧ синагогаясын да крамын, кӧні найӧ пыр чукӧртчывлӧны. Ме нинӧм эг висьтавлы гусьӧн.
Мыйла тэ Менсьым юасян?
Юав Менӧ кывзысьяслысь, мый Ме висьтавлі налы.
Найӧ тӧдӧны Менсьым висьтавлӧмӧс».
Кор Исус шуис тайӧс, орччӧн сулалысь видзысьыс кучкис Сылы чужӧмас да шуис: «Тадзи тэ сёрнитан аркирейкӧд?»
Исус вочавидзис: «Шуи кӧ мыйкӧ лёка, висьтав, мый лёксӧ шуи. Шуи кӧ веськыда, мыйла Менӧ нӧйтан?»
Исусӧс кӧртавлӧмӧн Аннас мӧдӧдіс Сійӧс Каиаф аркирей дінӧ.
Симон-Петыр сулаліс бипур дорын да шонтысис.
Сылысь юалісны: «Абу-ӧ тэ тшӧтш Сылӧн велӧдчысь?»
Сійӧ соссис: «Абу».
Сэні вӧлі аркирейлӧн кесйӧг. Тайӧ кесйӧгыс вӧлі рӧдвуж сылы, кодлысь пельсӧ Петыр керыштіс. Сійӧ юаліс Петырлысь: «Эн-ӧ тэ вӧв Сыкӧд тшӧтш сад йӧрас?»
Петыр бара соссис.
Дзик пыр кыліс петуклӧн чукӧстӧм.
Асывводзнас Каиафсянь Исусӧс нуӧдісны римса юралысьлӧн керкаӧ.
Юдейяслӧн веськӧдлысьяс эз пырны керка пытшкас, медым эз пежасьны да вермисны сёйны Ыджыд лунся сёян.
Пилат петіс на дінӧ да шуис: «Мыйысь ті мыжаланныд тайӧ Мортсӧ?»
Найӧ вочавидзисны: «Эз кӧ вӧв Сійӧ лёк вӧчысь, ми эськӧ эгӧ вайӧдӧй Сійӧс тэ дінӧ».
Пилат шуис налы: «Босьтӧй Сійӧс да мыждӧй асланыд Индӧд серти».
Юдейяслӧн веськӧдлысьяс шуисны сылы: «Миянлы оз позь мыждыны мортӧс кулӧм вылӧ».
Тадзи инісны Исуслӧн кывъясыс, кутшӧм ногӧн Сійӧ кулас.
Пилат бара пырис керкаӧ, корис ас дінас Исусӧс да юаліс: «Тэ-ӧ юдейяслӧн Ӧксыыс?»
Исус воча шуис: «Ачыд-ӧ тэ тадзи мӧвпалан, либӧ мукӧдыс тадзи шуӧны Ме йылысь?»
Пилат шуис: «Ме ӧд абу юдей.
Тэнад войтырыд да аркирейяс сетісны Тэнӧ менам киӧ. Мый Тэ вӧчин?»
Исус вочавидзис: «Менам Юралӧмӧй абу тайӧ муюгыдсьыс.
Вӧлі кӧ тадзи, Менам кесъялысьясӧй эськӧ тышкасисны Ме вӧсна, медым эг шед веськӧдлысьяслӧн киӧ.
Но Менам Юралӧмӧй абу татысь».
Пилат шуис Сылы: «Сідзкӧ, Тэ Ӧксы?»
Исус вочавидзис: «Тэ ачыд шуан, мый Ме Ӧксы.
Ме чужи да локті муюгыдас, медым висьтавны збыль йывсьыс.
Коді збыльыслӧн, сійӧ кывзӧ Менсьым кывъясӧс».
Пилат юаліс: «Мый сійӧ збыльыс?»
Тайӧс шуӧм бӧрын Пилат петіс юдейяс дінӧ да шуис налы: «Ме некутшӧм мыж Сылысь ог аддзы.
Тіян кӧсйӧм серти Ыджыд лун водзвылын быд во ме лэдза дзескыдінысь ӧти мортӧс.
Кӧсъянныд-ӧ, медым ме лэдзи тіянлы юдейяслысь Ӧксысӧ?»
Сэки ставныс горӧдісны: «Эн Сійӧс, а Варавваӧс лэдз.»
Варавва вӧлі лёк вӧчысь.
19 юр.
Сэки Пилат тшӧктіс чорыда нӧйтны Исусӧс.
Шыпуртаяс пуктісны Исуслы юрас лежнӧгысь кыӧм юркытш, пасьтӧдісны Сійӧс пемыдгӧрд паськӧмӧ да шуалісны: «Мед олас юдейяслӧн Ӧксы.»
Сэсся кучкалісны чужӧмас.
Пилат бара петіс йӧзыс дінӧ да шуис: «Ме петкӧда Сійӧс тіян дінӧ, медым тӧдінныд: ме некутшӧм мыж Сылысь ог аддзы».
Исус петіс пемыдгӧрд паськӧма, юр вылас вӧлі лежнӧгысь юркытш.
Пилат шуис йӧзыслы: «Со, тайӧ Мортыс».
Исусӧс аддзигӧн аркирейяс да крам видзысьяс горӧдісны: «Тувъяв. Тувъяв Сійӧс.»
Пилат шуис налы: «Ті асьныд босьтӧй да тувъялӧй Сійӧс.
Ме некутшӧм мыж Сылысь ог аддзы».
Найӧ вочавидзисны: «Миян эм Индӧд.
Индӧдным серти Сылы колӧ кувны, ӧд Асьсӧ Сійӧ Ен Пиӧн шуӧ».
Тайӧс кылӧм мысти Пилат ёнджыка на повзис.
Сійӧ пырис керкаас да юаліс Исуслысь: «Тэ кытысь?»
Исус сылы нинӧм эз вочавидз.
Пилат шуис: «Он кӧсйы сёрнитны мекӧд?
Он ӧмӧй Тэ тӧд, мый ме верма тувъявны Тэнӧ, верма и мездыны?»
Исус вочавидзис: «Тэ эськӧ нинӧм эн вермы вӧчны Мекӧд, эз кӧ вӧв сетӧма тэныд вылісянь.
Та вӧсна Менӧ вузалысь ёнджыка на мыжа».
Та бӧрти Пилат ёнджыка на кӧсйис лэдзны Исусӧс,
но юдейяс горзісны: «Сійӧс кӧ лэдзан, кесарлы тэ абу ёрт.
Ӧд коді пуктӧ асьсӧ ӧксыӧ, сійӧ паныд мунӧ кесарлы».
Тайӧс кылӧм бӧрын Пилат петкӧдіс Исусӧс ывлаӧ, ачыс пуксис мыждан пуклӧсӧ, коді сулаліс Изэрд вылын. Юдейяс тайӧ Изэрдсӧ шуисны Гаввафаӧн.
Тайӧ вӧлі Ыджыд лунлы паныд, лун шӧрнас.
Пилат шуис юдейяслы: «Со, тіян Ӧксыныд.»
Найӧ горӧдісны: «Босьт, тувъяв Сійӧс.»
Пилат юаліс: «Тіянлысь Ӧксытӧ тувъяла?»
Аркирейяс вочавидзисны: «Кесарысь кындзи миян ӧксыыс абу».
Сэки Пилат сетіс Исусӧс тувъявны крестӧ.
Исусӧс нуӧдісны сэтысь.
Крестсӧ нуигтыр Исус кайис Юр лы нима керӧсӧ, юдейяс тайӧ керӧссӧ шуисны Голгопаӧн. Сэні Сійӧс тувъялісны крестӧ. Сыкӧд орччӧн ӧтар-мӧдарсяньыс тувъялісны кык мортӧс, а шӧракостаныс — Исусӧс.
Пӧвтор вылӧ Пилат тшӧктіс гижны: «Назаретса Исус, юдейяслӧн Ӧксы». Гижӧдсӧ ӧшӧдісны крестас.
Тайӧ гижӧдсӧ унаӧн лыддисны, ӧд Исусӧс тувъяланіныс вӧлі карсянь матын. Гижӧдсӧ вӧлі гижӧма еврей, грек да латин кывйӧн.
Аркирейяс шуисны Пилатлы: «Эн гиж: “Юдейяслӧн Ӧксы”. Гиж, мый Сійӧ шуліс: “Ме — юдейяслӧн Ӧксы”».
Пилат вочавидзис: «Мый гижи, сійӧс гижӧма нин».
Исусӧс тувъялӧм бӧрын шыпуртаяс босьтісны Сылысь паськӧмсӧ да юкисны нёль пельӧ, быдӧнлы вичмис ӧти тор. Босьтісны тшӧтш дӧрӧмсӧ. Дӧрӧмыс вӧлі вурыстӧм, дзоньнас кыӧма.
Найӧ шуисны ӧта-мӧдныслы: «Огӧ косявлӧй дӧрӧмсӧ, вай пудъясям, кодлы сійӧ вичмас».
Тадзи иніс Гижӧдыс:
— Юкисны ас костаныс Менсьым паськӧмӧс, пудъясисны Менам дӧрӧм вӧсна.
Тадзи вӧчисны шыпуртаяс.
Крест дорын сулалісны Исуслӧн мамыс, мамыслӧн чойыс, Клопаслӧн Марья нима гӧтырыс да Магдала Марья.
Сэні сулалысь мамсӧ да муса велӧдчысьсӧ аддзигӧн Исус шуис мамыслы: «Аньӧй, тайӧ тэнад пиыд».
Сэсся шуис велӧдчысьыслы: «Тайӧ тэнад мамыд».
Сэксянь тайӧ велӧдчысьыс босьтіс Марияӧс ас дінас.
Исус тӧдіс, мый ставсӧ нин вӧчӧма. Сійӧ шуис: «Горшӧй косьмӧ». Тадзи иніс Гижӧдыс.
Сэні сулаліс шома вина тыра доз.
Шыпуртаяс кӧтӧдісны винаӧн губка, сэсся иссоп бедь помӧ сатшкӧмӧн матыстісны сійӧс Исуслы вомдорас.
Винасӧ видлӧм бӧрын Исус шуис: «Ставсӧ вӧчӧма.»
Сэсся нёровтіс юрсӧ да лэдзис ловсӧ.
Ставыс тайӧ вӧлі Ыджыд лунлы паныд лунӧ. Юдейяслӧн веськӧдлысьяс эз кӧсйыны, медым шойясыс колисны крестын ӧшавны шойччан лун кежлӧ, ӧд матыстчис Ыджыд лун. Та вӧсна корисны Пилатӧс, медым тшӧктіс чегъявны тувъялӧмаяслысь кокчӧр лыяссӧ да лэдзны найӧс крест вылысь.
Шыпуртаяс локтісны да чегъялісны Исускӧд орччӧн тувъялӧмаяслысь кокчӧр лыяссӧ.
Исус дінӧ матыстчӧм бӧрын найӧ аддзисны, мый Сійӧ кулӧма нин. Та вӧсна кокчӧр лыяссӧ Сылысь эз чегъявны.
Шыпуртаяс пиысь ӧти бытшкис Исуслы шынас ордлы костас, сэтысь чепӧсйис вир да ва.
Тайӧс аддзылысь висьталӧ та йылысь, медым ті эскинныд. Ӧд сылӧн висьталӧмыс веськыд. Сійӧ тӧдӧ, мый висьталӧ збыльсӧ.
Ставыс артмис Гижӧдыс серти: «Сылысь лысӧ оз ло чегъялӧма».
Мӧдлаын тшӧтш гижӧма: «Кутасны видзӧдны Сы вылӧ, кодӧс бытшкасны».
Аримафея карысь Ӧсип вӧлі Исуслӧн гуся велӧдчысь, ӧд сійӧ поліс юдейяслӧн веськӧдлысьясысь. Сійӧ муніс Пилат дінӧ да корис Исуслысь шойсӧ.
Пилат тшӧктіс босьтны.
Ӧсип муніс да босьтіс Исуслысь шойсӧ.
Сэтчӧ локтіс тшӧтш Никодим, коді водзынджык воліс Исус дінӧ войнас.
Сійӧ вайис комын кило кымын смирнаысь да алоэысь вӧчӧм мавтас.
Найӧ босьтісны Исуслысь шойсӧ да гартыштісны сійӧс дзебан дӧраӧ, кодӧс вӧлі кӧтӧдӧма чӧскыд дука мавтасӧн. Тадзи дзеблісны юдейяс кулӧмаясӧс.
Исусӧс тувъяланінсянь матын вӧлі сад йӧр, сэні вӧлі выль дзебанін. Сэтчӧ некодӧс на эз дзеблыны.
Матыстчис юдейяслӧн шойччан лун, та вӧсна Исуслысь шойсӧ пуктісны тайӧ дзебанінас, ӧд дзебаніныс вӧлі матын.
20 юр.
Шойччан лун бӧрын асъя рӧмыдас Магдала Марья локтіс дзебанінӧ.
Сійӧ аддзис: изсӧ вӧлі вештӧма пыранінсьыс.
Сэки котӧртіс Симон-Петыр дінӧ да мӧд велӧдчысь дінӧ, коді вӧлі муса Исуслы, да шуис налы:
«Господьтӧ нуӧмаӧсь дзебанінсьыс, но огӧ тӧдӧй, кытчӧ Сійӧс пуктӧмаӧсь».
Петыр мӧд велӧдчыськӧд мӧдӧдчисны дзебанінас.
Найӧ кыкнанныс котӧртісны.
Мӧд велӧдчысьыс котӧртіс Петырысь тэрыбджыка да водзджык воис дзебанін дорас.
Сійӧ копыртчис да аддзис дзебан дӧраяссӧ, но пытшкас эз пыр.
Сы бӧрся локтіс Симон-Петыр, пырис дзебанінас да аддзис сэтысь дзебан дӧраяссӧ. Юрсӧ гартыштан чышъянсӧ вӧлі тубыртӧма, да куйліс мӧдлаын, дӧраясысь торйӧн.
Дзебанінас пырис тшӧтш мӧд велӧдчысьыс, коді водзджык воис. Сійӧ аддзис тайӧс да эскис.
Ӧд найӧ эз на гӧгӧрвоны Гижӧдсьыс, мый Исус ловзяс.
Сэсся велӧдчысьяс бӧр мунісны гортаныс.
Марья бӧрдігтыр сулаліс дзебанін дорас.
Бӧрдігмозыс сійӧ копыртчӧмӧн видзӧдліс дзебанін пытшкас да аддзис сэтысь еджыд паськӧма кык анделӧс. Ӧтиыс пукаліс шой вӧвлӧминас юрладорас, а мӧдыс — кокладорас.
Найӧ юалісны: «Аньӧй, мыйла тэ бӧрдан?»
Марья вочавидзис: «Нуӧмаӧсь менсьым Господьӧс, и ог тӧд, кытчӧ Сійӧс пуктӧмаӧсь».
Тайӧс шуӧм бӧрын Марья бергӧдчис бӧрланьыс да аддзис сулалысь Исусӧс, сӧмын эз тӧд Сійӧс.
Исус юаліс: «Аньӧй, мыйла тэ бӧрдан?
Кодӧс корсян?»
Марья чайтіс, мый сыкӧд сёрнитӧ сад йӧрын уджалысь, да шуис сылы: «Ыджыдӧй, тэ кӧ петкӧдін Сійӧс, висьтав, кытчӧ пуктін.
Ме босьта Сійӧс».
Исус шуис: «Марья.»
Марья бергӧдчис да шуис: «Раввуни.» Тайӧ лоӧ: «Велӧдысьӧй.»
Исус шуис сылы: «Эн инмӧдчы Ме дінӧ, Ме ӧд эг на кыпӧдчы Батьӧй дінӧ.
Мун Менам вокъяс дінӧ да висьтав налы: Ме кыпӧдча Аслам Батьӧй да тіян Батьныд дінӧ, Аслам Енмӧй да тіян Енныд дінӧ».
Магдала Марья муніс да юӧртіс велӧдчысьяслы, мый аддзыліс Господьӧс, да висьталіс налы Исуслысь кывъяссӧ.
Шойччан лун бӧрын рытнас велӧдчысьяс чукӧртчисны ӧтлаӧ. Найӧ полісны юдейяслӧн веськӧдлысьясысь да йигналісны ӧдзӧсъяссӧ. Виччысьтӧг локтіс Исус, сувтіс на шӧрӧ да шуис: «Лӧнь олӧм тіянлы.»
Тайӧс шуӧм бӧрын Сійӧ петкӧдліс налы Ассьыс кисӧ да ордлыяссӧ.
Господьӧс аддзигӧн велӧдчысьяс долыдмисны.
Исус шуис налы мӧдысь: «Лӧнь олӧм тіянлы.
Кыдзи Бать мӧдӧдіс Менӧ, сідзи Ме мӧдӧда тіянӧс».
Тайӧс шуӧм бӧрын Сійӧ пӧльыштіс налань да шуис: «Сибӧдӧй Вежа Лолӧс.
Кодлысь мыжъяссӧ прӧститанныд, сійӧс лоӧ прӧститӧма. Кодлысь онӧ прӧститӧй, сы вылӧ мыжыс коляс».
Исус волігӧн дас кыксьыс ӧти, Двӧйнипӧв Фома, эз вӧв накӧд.
Мукӧд велӧдчысьыс висьталісны сылы: «Ми аддзылім Господьӧс».
Фома воча шуис: «Ог кӧ аддзыв кисьыс кӧрттув дойяссӧ да ог пуктыв сэтчӧ чуньӧс, да ог кӧ пуктыв ассьым киӧс сылы ордлыас, ог эскы».
Вежон мысти велӧдчысьясыс бара вӧліны керкаынӧсь, Фома тшӧтш вӧлі накӧд.
Ӧдзӧсъясыс вӧліны йиганаӧсь. Исус сувтіс на шӧрӧ да шуис: «Лӧнь олӧм тіянлы.»
Сэсся шуис Фомалы: «Нюжӧдлы чуньтӧ да видзӧдлы Менсьым киӧс.
Нюжӧдлы китӧ да пуктыв Менам ордлыӧ.
Эн ло эскытӧмӧн, но ло эскысьӧн».
Фома вочавидзис: «Господьӧй, менам Енмӧй.»
Исус шуис сылы: «Тэ эскан, Менӧ аддзылін да.
Шудаӧсь найӧ, кодъяс оз аддзыны, но эскӧны.»
Исус вӧчис велӧдчысьясыс дырйи уна мукӧд шензьӧданатор. На йылысь абу гижӧма тайӧ небӧгас.
Тайӧс гижӧма, медым ті эскинныд, мый Исус эм Кристос, Ен Пи. Эсканныд кӧ, Сылӧн нимыс пыр тіянлы вичмас олӧм.
21 юр.
Та бӧрти Исус петкӧдчис велӧдчысьясыслы Тиверия ты дорын.
Сійӧ петкӧдчис тадзи.
Симон-Петыр, Двӧйнипӧв Фома, Галилеяса Канаысь Нафанаил, Зеведейлӧн пияныс да нӧшта кык велӧдчысь вӧліны ӧтлаынӧсь.
Симон-Петыр шуис: «Ме муна чери кыйны».
Сылы шуисны: «Ми тшӧтш тэкӧд мунам».
Найӧ дзик пыр пуксисны пыжӧ да петісны ва вылӧ.
Сійӧ войнас налы нинӧм эз шед.
Водз асывнас Исус сулаліс вадорас.
Велӧдчысьясыс эз тӧдны Сійӧс.
Исус юаліс налысь: «Ёртъясӧй, шедіс-ӧ тіянлы чериныд?»
Исус шуис: «Чӧвтӧй тывнытӧ пыж веськыдладорас, сэки шедас».
Найӧ чӧвтісны. Чериыс шедіс сэтшӧм уна, весиг васьыс тывсӧ эз вермыны кыскыны.
Сэки велӧдчысьыс, коді вӧлі муса Исуслы, шуис Петырлы: «Тайӧ Господь».
Симон-Петыр сэки вӧлі пӧрччысьӧма. Кор кыліс, мый тайӧ Господь, сійӧ ӧдйӧ пасьтасис да чеччыштіс ваас.
Мукӧд велӧдчысьыс локтісны пыжнас да кыскисны чери тыра тывсӧ. Найӧ вӧліны матынӧсь вадорсяньыс, воськов кыксё сайын.
Вадорас матыстчӧм бӧрын ӧгыръяс вылысь аддзисны чери, орччӧн вӧлі нянь.
Исус шуис налы: «Вайыштӧй кыйӧм черинытӧ».
Симон-Петыр муніс да кыскис му вылас тывсӧ. Сэні тырыс вӧлі гырысь чери. Чериыс вӧлі сё ветымын куим, но тывйыс эз косяссьы.
Исус шуис налы: «Локтӧй, сёйӧй».
Велӧдчысьясыс эз лысьтны юавны Сылысь: «Коді Тэ?» Найӧ тӧдісны, мый Сійӧ Господь.
Исус локтіс, босьтіс нянь да сетіс сійӧс велӧдчысьясыслы, сетіс тшӧтш черисӧ.
Тайӧ вӧлі коймӧдысь нин, кор Исус петкӧдчис Аслас велӧдчысьяслы ловзьӧм бӧрас.
Сёйӧм бӧраныс Исус шуис Симон-Петырлы: «Симон, Ионалӧн пи, мусаджык-ӧ Ме тэныд налы дорысь?»
Петыр шуис Сылы: «Мусаджык, Господьӧй.
Тэ тӧдан, мый Тэ меным муса».
Исус шуис сылы: «Йирсьӧд Менсьым баляясӧс».
Сэсся мӧдысь юаліс Петырлысь: «Симон, Ионалӧн пи, муса-ӧ Ме тэныд?»
Петыр шуис Сылы: «Муса, Господьӧй.
Тэ тӧдан, мый Тэ меным муса».
Исус шуис сылы: «Видз Менсьым ыжъясӧс».
Сэсся коймӧдысь юаліс: «Симон, Ионалӧн пи, муса-ӧ Ме тэныд?»
Петыр шогӧ усис, мый Исус коймӧдысь юаліс сылысь: «Муса-ӧ Ме тэныд?»
Сійӧ вочавидзис: «Господьӧй, Тэ ставсӧ тӧдан.
Тэ тӧдан, мый Тэ меным муса».
Исус шуис сылы: «Йирсьӧд Менсьым ыжъясӧс.
Веськыда, веськыда висьтала тэныд: том дырйиыд тэ ачыд вӧнясьлін да ветлін, кытчӧ кӧсйин.
Пӧрысьмӧм бӧрад нюжӧдан китӧ, сэки мӧд тэнӧ вӧньӧдас да нуӧдас, кытчӧ он кӧсйы».
Тайӧс висьталӧмнас Исус сетіс тӧдны, кутшӧм ногӧн ковмас кувны Петырлы да нимӧдны Енмӧс.
Сэсся шуис Петырлы: «Лок Ме бӧрся».
Петыр бергӧдчис бӧрланьыс да аддзис: на бӧрся локтіс сійӧ велӧдчысьыс, коді вӧлі муса Исуслы. Рытъя сёйигӧн Исуслы морӧс бердас топӧдчӧмӧн буретш сійӧ юавліс: «Господьӧй, коді нӧ Тэнӧ вузалас?»
Сійӧс аддзигӧн Петыр юаліс Исуслысь: «Господьӧй, а сійӧс мый виччысьӧ?»
Исус шуис Петырлы: «Ме кӧ кӧсъя, медым сійӧ оліс Менам локтӧдз, мый тэ майшасян та вӧсна?
Тэ лок Ме бӧрся».
Та вӧсна эскысьяс пӧвстын паськаліс сёрни, мый тайӧ велӧдчысьыс оз кув.
Исус эз шу Петырлы, мый тайӧ велӧдчысьыс оз кув. Сійӧ шуис сӧмын: «Ме кӧ кӧсъя, медым сійӧ оліс Менам локтӧдз, мый тэ майшасян та вӧсна?»
Буретш сійӧ велӧдчысьыс висьталӧ та йылысь да гижис тайӧс. Ми тӧдам, мый сылӧн висьталӧмыс веськыд.
Уна мукӧдтор на вӧчис Исус.
Но гижны кӧ та йылысь ставсӧ, сэки, ме чайта, муюгыдас эськӧ эз тӧр та мында небӧгыс.
Аминь.
Апостолъяслӧн уджъяс
1 юр.
Воддза небӧгас, дона Феофил, ме гижи тэныд ставсӧ, мый Исус вӧчис да мыйӧ велӧдіс водзысяньыс сійӧ лунӧдзыс, кор кыпӧдчис енэжӧ. Кыпӧдчытӧдзыс на Сійӧ Вежа Ловсянь сетіс Аслас бӧрйӧм апостолъяслы тшӧктӧмъяс. Сьӧкыда кулӧм бӧрас Сійӧ уна эскӧданторйӧн петкӧдліс налы, мый Сійӧ ловзис. Нелямын лун чӧж Сійӧ петкӧдчывліс да висьтавліс Енлӧн Юралӧм йылысь.
Апостолъяскӧд ӧтлаын сёйигӧн Исус шуис: «Ерусалимысь энӧ мунӧй.
Виччысьӧй Батьлысь кӧсйысьӧмасӧ, мый йылысь Ме висьтавлі тіянлы.
Иоан пыртіс ваӧн, но кымынкӧ лун мысти тіянӧс лоӧ пыртӧма Вежа Лолӧн».
Чукӧртчӧмаяс юалісны Исуслысь: «Господьӧй, он-ӧ тайӧ кадӧ Тэ бӧр сувтӧд Израильлы юралӧмсӧ?»
Сійӧ вочавидзис: «Абу тіян мог тӧдны кадъяс йылысь, Бать индӧ кадъяссӧ.
Но кор лэччас тіян вылӧ Вежа Лов, тіянлы лоӧ сетӧма вын.
Сэки понданныд висьтавлыны Ме йылысь Ерусалимын, став Юдеяын, Самарияын да став му пасьталаыс».
Тайӧс висьталӧм бӧрын налӧн син водзын Исус кыпӧдчис енэжӧ, да кымӧрыс вевттис Сійӧс.
Найӧ синнысӧ эз лэдзлыны енэжысь, пыр видзӧдісны Сылысь ылыстчӧмсӧ. Виччысьтӧг на водзӧ сувтісны еджыд паськӧма кык морт.
Найӧ шуисны: «Галилея войтыр, мый ті сулаланныд да видзӧданныд енэжас?
Ті асланыд синмӧн аддзылінныд Исуслысь енэжӧ кыпӧдчӧмсӧ, тадзикӧн Сійӧ бӧр локтас».
Сэсся найӧ бӧр мунісны Ерусалимӧ Олив керӧсысь, тайӧ керӧсыс вӧлі верст ылнаын Ерусалимсянь.
Локтӧм бӧраныс найӧ пырисны керкаӧ да кольччисны сэні вылыс судтаас. Тайӧ вӧліны: Петыр, Яков, Иоан, Ӧндрей, Филип, Фома, Варфоломей, Матвей, Алфей Яков, Симон Зилот да Яков Иуда.
Найӧ ставныс аньяскӧд, Исуслӧн вокъяскӧд да Сылӧн Мария мамыскӧд ӧти сьӧлӧмӧн дугдывтӧг кевмысисны.
Сійӧ лунъясӧ чукӧртчис сё кызь гӧгӧр велӧдчысь. На шӧрӧ сувтӧмӧн Петыр шуис: «Вокъясӧй, Гижӧдыслы колӧ вӧлі инны. Ӧд Давид пыр на Вежа Лов висьтавліс Иуда йылысь, коді вайӧдіс Исус дінӧ Сійӧс босьтысьясӧс.
Иуда вӧлі миян пиысь ӧти, сійӧс миянӧс моз тшӧтш вӧлі бӧрйӧма кесъявны.
Лёк уджсьыс босьтӧм сьӧм вылас сійӧ ньӧбис му. Сэні лёк ногӧн уси, кынӧмыс поті, весиг гырк пытшкӧсыс ортсӧ петіс.
Та йылысь тӧдмаліс став Ерусалимыс.
Та вӧсна муыслы сетісны Акелдама ним, мый лоӧ: вир му.
Псалом небӧгын гижӧма: “Сылӧн оланіныс мед кушмас, мед оз ло сэні олысьыс”.
Нӧшта гижӧма: “Сылысь кесъялӧмсӧ мед босьтас мӧд”.
Та вӧсна миянлы колӧ бӧрйыны ӧтиӧс на пиысь, кодъяс вӧліны миянкӧд да Господь Исускӧд Иоанлӧн пыртӧмсянь Исуслӧн енэжӧ кыпӧдчытӧдзыс. Мед тайӧ мортыс сэсся миянкӧд тшӧтш висьталас Исуслӧн ловзьӧм йылысь».
Сэки вӧзйисны кыкӧс: Ӧсип-Варсаваӧс, кодӧс шуисны Юстӧн, да Матфийӧс.
Кевмысиганыс шуисны: «Господьӧй, Тэ быдӧнлысь тӧдан сьӧлӧм.
Инды тайӧ кык пытшсьыс Ассьыд бӧрйӧматӧ, медым сійӧ тшӧтш кесъяліс да вӧчис апостоллысь уджсӧ, ӧд Иуда кежис таысь да муніс сэтчӧ, кӧні сылы колӧ лонысӧ».
Сэсся пудъясисны на вӧсна.
Пудйыс уси Матфийлы, сійӧс и индісны дас кыкӧд апостолнас.
2 юр.
Воис Ветымынӧд лун. Найӧ ставныс вӧліны ӧтлаынӧсь да ӧти сьӧлӧмаӧсь.
Виччысьтӧг енэжсянь кыліс ыджыд тӧвнырлӧн кодь шы. Шыыс тыртіс ставнас керкасӧ, кӧні найӧ пукалісны.
Найӧ аддзисны ыпъялысь би кывъяс. Тайӧ би кывъясыс торъялісны да лэччисны быдӧн вылӧ.
Сэки ставныс найӧ тырисны Вежа Лолӧн да пондісны сёрнитны мукӧд кывъяс вылын, кыдзи Лов сетіс налы висьтавнысӧ.
Тайӧ кадӧ Ерусалимын вӧліны му пасьталаысь воӧм вежавидзысь юдейяс.
Тайӧ шыыс вылӧ чукӧртчис уна йӧз. Найӧс шемӧс босьтіс, ӧд быдӧн кыліс ас кыв вылас сёрни.
Ставныс шензьӧмӧн шензисны да ас костаныс шуалісны: «Абу-ӧ сёрнитысьясыс ставныс Галилеяысьӧсь?
Быдӧн тай нӧ ми кылам ас чужан кывнымӧс?
Ми ӧд уналаысь воим: Парфияысь, Мидияысь, Еламысь, Месопотамияысь, Юдеяысь, Каппадокияысь, Понтысь, Асияысь, Фригияысь, Памфилияысь, Египетысь, Римысь да Ливияса Киринея бердысь. Кодсюрӧ миян пӧвстысь чужӧмсяньныс юдейяс, а кодсюрӧ юдей эскӧмӧ бергӧдчӧмаяс. Нӧшта эмӧсь тані Критысь да Аравияысь локтысьяс.
Быдӧн тай нӧ ми асланым кыв вылын Енлӧн ыджыд уджъяс йылысь кылам».
Ставныс шензисны да шӧйӧвошӧмӧн ӧта-мӧдныслысь юасисны: «Мый нӧ тайӧ?»
А мукӧдыс сералісны, юмов винаысь пӧ коддзӧмаӧсь.
Петыр дас ӧтиыскӧд сувтӧмӧн гораа шыасис:
«Юдей войтыр да Ерусалимын мукӧд олысьяс.
Кывзӧй менӧ да тӧд выланыд босьтӧй менсьым висьталӧмӧс.
Найӧ абу юӧмаӧсь, кыдзи ті чайтанныд, ӧд кадыс ӧкмыс час асыв.
Та йылысь Иоиль пророк на висьтавліс:
— Бӧръя лунъясӧ, — висьталӧ Ен, — кисьта Ассьым Лолӧс быд морт вылӧ. Тіян пиянныд да нывъясныд пондасны пророкавны,
зонъясныд кутасны аддзывны Енсянь петкӧдчылӧмъяс,
а олӧмаяс пондасны вӧтавны збыльмана вӧтъяс.
Сійӧ лунъясӧ кисьта Ассьым Лолӧс Аслам кесйӧгъяс да кесйӧг аньяс вылӧ, найӧ пондасны пророкавны.
Енэжсянь петкӧдла шензьӧданаторъяс, му вылын — индысьпасъяс: вир, би да тшын.
Шондіыс пемдас, тӧлысьыс вирӧн ойдас Господьлӧн ыджыд да югыд луныс вотӧдз.
И быдӧн, коді шыасяс Господь нимӧ, мездмас.
Израиль войтыр, кывзӧй.
Назаретса Исусӧс сувтӧдіс тіянлы Ачыс Енмыс. Сійӧ петкӧдліс тайӧс тіянлы шензьӧданаторъясӧн да индысьпасъясӧн, кодъясӧс вӧчис тіян пӧвстын Исус пыр. Тайӧс ті асьныд тӧданныд. Енлӧн шуӧм серти Сійӧс вӧлі сетӧма тіян киӧ. Индӧдтӧг олысьяс киӧн ті Сійӧс тувъялінныд-виинныд.
Но Енмыс ловзьӧдіс Сійӧс да мездіс кулӧмыслӧн вын улысь, ӧд кулӧмыс эз вермы Сійӧс кутны.
Давид висьтавліс Сы йылысь:
— Господь быд кадӧ менам син водзын, Сійӧ менам веськыдладорын, медым ме эг лигышмун.
Та вӧсна сьӧлӧмӧйлы долыд, кывйӧй нимкодясьӧ, да менам вир-яйӧй шойччӧ лача кутӧмас.
Ӧд Тэ он коль менсьым лолӧс адӧ, он сет Аслад вежалы аддзывны сісьмӧмсӧ.
Тэ петкӧдлін меным олӧмыслысь туйсӧ, Аслад чужӧмбан водзын Тэ тыртан менӧ нимкодьлунӧн.
Вокъясӧй.
Кӧсъя веськыда висьтавны тіянлы Давид айным йылысь. Сійӧ куліс да сійӧс гуалісны, сылӧн гуыс ӧнія лунӧдз на эм миян.
Давид вӧлі пророкӧн. Енмыс сылы кыв сетӧмӧн кӧсйысис, мый пуксьӧдас Давидлӧн юралан пуклӧсӧ сысянь чужысьӧс — Кристосӧс. Давид тӧдіс тайӧс, ӧд сійӧ сэки нин аддзис Кристослысь ловзьӧмсӧ. Та йылысь сійӧ висьталіс, мый Кристослӧн лолыс оз коль адӧ да Сылӧн шойыс оз аддзыв сісьмӧмсӧ.
Дзик тайӧ Исусӧс Енмыс ловзьӧдіс, и ми ставным тайӧс аддзылім.
Енмыс кыпӧдіс Сійӧс да пуксьӧдіс веськыдладорас. Батьсяньыс Сійӧ босьтіс кӧсйысьӧм Вежа Лолӧс да кисьтіс миян вылӧ, кыдзи ті ӧні аддзанныд да кыланныд.
Давид эз кыпӧдчы енэжас, сійӧ сӧмын висьталіс:
— Господь шуис менам Господьлы:
“Пукав Менам веськыдладорын, кытчӧдз ог пукты Тэнад кок улӧ Тэныд паныд мунысьясӧс”.
Бура тӧдӧй ставныд, Израиль войтыр: Ен пуктіс Господьӧн да Кристосӧн тайӧ Исусӧс, кодӧс ті тувъялінныд».
Петырлӧн кывъясыс вӧрзьӧдісны йӧзыслысь сьӧлӧмсӧ.
Найӧ шуисны Петырлы да мукӧд апостолъяслы: «Вокъяс, мый миянлы вӧчнысӧ?»
Петыр шуис налы: «Бергӧдчӧй мыжъяссьыныд да пыртчӧй Исус Кристос нимӧн, медым Ен прӧститас мыжъяснытӧ.
Сэки Ен сетас тіянлы Вежа Лолӧс.
Ӧд тайӧс кӧсйысьӧма тіянлы, тіян ныв-пилы да став ылісаыслы — дзик быдӧнлы, кодӧс корас Господь, миян Ен».
Тадзи унатор на Петыр висьталіс да ышӧдӧмӧн шуаліс: «Мездысьӧй тайӧ нэмса тшыксьӧм йӧзысь, мед эз су тіянӧс мыждӧмыс».
Унаӧн долыдпырысь сибӧдісны сьӧлӧманыс Петырлысь кывъяссӧ да пыртчисны. Сійӧ лунӧ ӧтувтчис эскысьяс дінӧ куим сюрс гӧгӧр морт.
Эскысьяс став сьӧлӧмнас кутчысисны апостолъяслӧн велӧдӧмӧ. Найӧ пыр ӧтлаын чукӧртчывлісны, чегисны нянь да кевмысисны.
Йӧз пӧвстын паськаліс полӧм.
Енмыс уна шензьӧданатор да индысьпас петкӧдліс апостолъяс пыр Ерусалимын.
Эскысьяс олісны ӧти сьӧлӧмӧн, налӧн ставыс вӧлі ӧтувъя.
Найӧ вузавлісны ассьыныс овмӧс-эмбурнысӧ да сьӧмсӧ юклісны быдӧнлы колана мында.
Быд лун найӧ ӧти сьӧлӧмӧн чукӧртчывлісны крамӧ, а гортаныс чегисны нянь, сёйисны нимкодьпырысь да восьса сьӧлӧмӧн. Найӧ ставсьыс ошкисны Енмӧс. Йӧзыс найӧс бурӧ пуктісны,
а Господь быд лун содтіс Вичкоӧ мездмӧмаясӧс.
3 юр.
Ӧтчыд кевмысян кадӧ куим часын Петыр да Иоан мунісны крамӧ.
Сэні вӧлі чужӧмсяньыс коктӧм морт. Сійӧс быд лун вайлісны крамӧ да пуксьӧдлісны сідз шусяна “Мича ӧдзӧс” дорӧ, медым сійӧ корис пырысьяслысь.
Сійӧ аддзис Петыр да Иоанлысь крамӧ пырӧмсӧ да пондіс корны налысь.
Петыр да Иоан сюся видзӧдлісны сы вылӧ, сэсся Петыр шуис: «Видзӧдлы миян вылӧ».
Сійӧ синсӧ лэптіс на вылӧ да виччысис, оз-ӧ сетны мыйкӧ.
Петыр шуис: «Эзысь-зарни менам абу, но мый эм, сета тэныд.
Назаретса Исус Кристос нимӧн чеччы да ветлӧдлы».
Петыр босьтіс сійӧс веськыд киӧдыс да лэптіс.
Дзик пыр вынсялісны сылӧн кокъясыс да пидзӧсъясыс. Сійӧ чеччыштігмоз сувтіс да кутіс ветлӧдлыны, сэсся пырис накӧд крамӧ. Сэні чеччалӧмӧн ветлӧдліс да ошкис Енмӧс.
Став йӧзыс аддзылісны сылысь ветлӧдлӧмсӧ да Енмӧс ошкӧмсӧ.
Йӧзыс тӧдісны сійӧс, мый тайӧ сійӧ корысьыс, коді пукавліс крамын “Мича ӧдзӧс” дорын. Тайӧ лоӧмторйыс ёна шензьӧдіс йӧзсӧ, да найӧс полӧм босьтіс.
Бурдысь эз вешйыв Петыр да Иоан дінысь.
Йӧзыс шензигтыр чукӧртчисны на дінӧ Соломон йӧрӧ.
Петыр аддзис тайӧс да шуис йӧзыслы: «Израиль войтыр, мый ті шензьӧмӧн видзӧданныд миян вылӧ? Чайтанныд, ми ас вынӧн тайӧс вӧчим да миян вежавидзӧм понда сійӧ ветлӧдлӧ?
Ӧвраамлӧн, Исааклӧн да Яковлӧн Ен, миян батьяслӧн Ен, восьтіс Исус Пиыслысь дзирдлунсӧ. Ті вузалінныд да соссинныд Исусысь Пилат водзын, Пилат ӧд кӧсйис лэдзны Сійӧс.
Ті соссинныд Вежаысь да Веськыда Олысьысь, коринныд лэдзны морт виысьӧс.
Ті олӧм Сетысьӧс виинныд,
но Енмыс ловзьӧдіс Сійӧс. Тайӧс ми аддзылім да висьталам та йылысь.
Исуслӧн нимыс да Сылӧн нимӧ эскӧмыс ёнмӧдіс тайӧ мортсӧ, кодӧс ті ӧні аддзанныд да бура тӧданныд. Исус сетіс сылы эскӧм, и тайӧ эскӧмыс бурдӧдіс сійӧс тіян син водзын.
Ме тӧда, вокъяс, ті асланыд веськӧдлысьяс моз вӧчинныд тайӧс гӧгӧрвотӧг.
Енмыс водзвыв висьталіс Аслас пророкъяс пыр Кристослӧн сьӧкыд нуӧмыс йылысь. И тайӧ иніс.
Бергӧдчӧй мыжъяссьыныд Енлань, медым Сійӧ вештас тіянлысь мыжъяснытӧ. Сэки Господь сетас тіянлы ловнытӧ выльмӧдан кад, да мӧдӧдас тіянлы водзвыв бӧрйӧм Исус Кристосӧс. Енмыс босьтіс Сійӧс енэжас, и Сійӧ лоӧ сэні, кытчӧдз ставсӧ оз ло лӧсьӧдӧма воддза мозыс. Та йылысь важысянь Енмыс висьтавліс Аслас вежа пророкъяс пыр.
Мӧисей шулӧма батьяслы: “Господь, тіян Ен, менӧ моз сувтӧдас асланыд вокъяс пӧвстысь Пророкӧс.
Кывзысьӧй Сылысь быдторйын, мый шуас.
Коді оз кывзысь тайӧ Пророкыслысь, сійӧс бырӧдасны Ас войтырыс пӧвстысь”.
Самуил да сы бӧрти став мукӧд пророкыс тшӧтш водзвыв висьтавлісны тайӧ лунъясыс йылысь.
Ті пророкъяслӧн ныв-пи, тіянлы вуджӧ йитӧдыс, кодӧс Ен кӧрталіс тіян батьяскӧд, кор шуис Ӧвраамлы: “Тэсянь чужысь пыр вуджас бурсиӧмыс му вылын быд войтырлы”.
Ен ловзьӧдіс Ассьыс Писӧ, Исусӧс, да мӧдӧдіс Сійӧс медводз тіян дінӧ, медым лёксьыс бергӧдчӧм бӧраныд бурсины тіянӧс».
4 юр.
Кор Петыр да Иоан сёрнитісны йӧзыскӧд, на дінӧ матыстчисны попъяс, крам видзысьяслӧн веськӧдлысьыс да саддукейяс. Найӧ скӧралісны, мый апостолъяс велӧдӧны йӧзсӧ да висьтавлӧны, Исус пӧ ловзис, и кулӧмаяс пӧ тшӧтш ловзясны.
Сэки найӧ босьтісны Петырӧс да Иоанӧс да йӧртісны асылӧдзыс дзескыдінӧ, ӧд вӧлі рыт нин.
А кывзысьяс пӧвстысь унаӧн эскисны да вокъяслӧн лыдыс содіс вит сюрсӧдз.
Мӧд луннас чукӧртчисны Ерусалимӧ юдейяслӧн веськӧдлысьяс, пӧрысьяс да Индӧдӧ велӧдысьяс. Сэні вӧліны тшӧтш Аннас аркирей, Каиаф, Иоан, Ӧльӧксандр да аркирей рӧдвужысь мукӧдъяс.
Найӧ сувтӧдісны апостолъясӧс шӧрас да юалісны: «Кутшӧм вынӧн да код нимӧн ті тайӧс вӧчинныд?»
Сэки Петыр, коді вӧлі тырӧма Вежа Лолӧн, шуис налы: «Войтырлӧн веськӧдлысьяс да Израильлӧн пӧрысьяс.
Миянлысь кӧ талун ті коранныд воча кыв, мый ми бурдӧдім висьысь мортӧс да сылы бур вӧчим, кывзӧй да тӧдӧй, ті да став Израиль войтыр: ми вӧчим тайӧс Назаретса Исус Кристос нимӧн. Бурсӧ вӧчим Исуслӧн вын отсӧгӧн, и тайӧ мортыс сулалӧ тіян водзын дзоньвидза. Ті тувъялінныд Сійӧс крестӧ, но Енмыс ловзьӧдіс.
Сійӧ — из, кодӧс ті, керка лэптысьяс, шыбитінныд. Но тайӧ изйыс лоис пельӧс изйӧн. И абу мӧд Мездысьыс, да абу сетӧма йӧзлы енэж улас мӧд нимсӧ, код пыр миянлы позьӧ мездмыны».
Кор йӧзыс аддзисны Петыр да Иоанлысь повтӧмлунсӧ да казялісны, мый найӧ велӧдчытӧм йӧз, ёна шензисны.
Гӧгӧрвоисны, мый найӧ вӧлӧмаӧсь Исускӧд.
Но накӧд сулалысь бурдӧм мортӧс аддзигӧн нинӧм паныд шуны эз вермыны.
Сэсся тшӧктісны петавны найӧс, асьныс пондісны сёрнитны ас костаныс: «Мый кутам вӧчны тайӧ йӧзыскӧд?
Ӧд став Ерусалимыс тӧдӧ налысь шензьӧданатор вӧчӧмсӧ, ми огӧ вермӧй соссьыны таысь.
Медым юӧрыс водзӧ эз паськав войтырным пӧвстын, чорыда ӧлӧдам найӧс, медым эз висьтавлыны Исус йылысь».
Сэсся бӧр корисны апостолъясӧс да тшӧктісны, мед дугдасны висьтавлыны да велӧдны Исус йылысь.
Петыр да Иоан воча шуисны налы: «Мӧвпыштлӧй асьныд, бур-ӧ тайӧ Ен водзын, ми кӧ Енмӧс дорысь ёнджыка кутам кывзыны тіянӧс.
Ми огӧ вермӧй чӧв овны сы йылысь, мый аддзылім да кывлім».
Чорыда чирыштӧм бӧрын веськӧдлан котыр лэдзис апостолъясӧс. Йӧз вӧснаыс эз вермыны мыждыны найӧс, ӧд ставныс ошкисны Енмӧс тайӧ лоӧмторсьыс.
Шензяна ногӧн бурдӧм мортлы вӧлі нелямын сайӧ арӧс.
Дзескыдінысь петӧм бӧрын Петыр да Иоан мунісны вокъясныс дінӧ. Сэні найӧ висьталісны аркирейяслӧн да пӧрысьяслӧн ӧлӧдӧм йылысь.
Найӧс кывзӧм бӧрын ставныс ӧтвылысь шыасисны Ен дінӧ: «Енмӧй, Ыджыдӧй, Тэ вӧчин енэжсӧ и мусӧ, васӧ да ставсӧ, мый сэні эм.
Миян Давид батьным пыр, Тэнад кесъялысь пыр, Тэ Вежа Ловнад шуин:
— Мыйысь скӧралӧны ентӧдтӧмъяс, мыйла мӧвпалӧны ковтӧмторсӧ войтыръяс?
Юралысьяс ӧтувтчӧны, мувывса ӧксыяс сувтӧны Господьлы да Сылӧн Кристослы паныд.
Тайӧ карас Ирӧд да Понтий Пилат збыльысь ӧтувтчисны ентӧдтӧмъяскӧд да Израиль войтыркӧд, сувтісны Тэнад Мавтыштӧмалы, Тэнад вежа Исус Пиыдлы паныд. Найӧ олӧмӧ пӧртісны Тэнсьыд водзвыв шуӧмтӧ да вына лӧсьӧдӧмтӧ.
Ӧні, Господьӧй, видзӧдлы налӧн повзьӧдлӧм вылӧ, отсав Аслад кесйӧгъяслы повтӧг висьтавны Тэнсьыд кывтӧ. Нюжӧд китӧ, медым висьысьяс Тэнад вежа Исус Пи нимӧн бурдасны, шензьӧданаторъяс да индысьпасъяс тыдовтчасны».
Кевмысьӧм бӧрас чукӧртчанінын муыс вӧрзис. Ставныс тырины Вежа Лолӧн да повтӧг пондісны висьтавны Енлысь Кывсӧ.
Эскысьяс ставныс вӧліны ӧти лолаӧсь да ӧти сьӧлӧмаӧсь.
Некод ассьыс эмбурсӧ эз лыддьы асласӧн, ставыс налӧн вӧлі ӧтувъя.
Апостолъяс ыджыд вынӧн висьтавлісны Господь Исус Кристослӧн ловзьӧм йылысь.
Енлӧн ыджыд буралӧмыс вӧлі ставныс вылын. Налы ставыс вӧлі тырмана.
Кодлӧн вӧлі керка, видз-му, найӧ вузалісны, да сьӧмсӧ вайисны апостолъяслы, а найӧ быдӧнлы юклісны тырмымӧн.
Ёсей, Кипрын чужлӧм левит, кодӧс апостолъяс шуисны Варнава нимӧн, мый лоӧ: бурӧдысь, тшӧтш вузаліс ассьыс видз-мусӧ да вайис сьӧмсӧ апостолъяслы.
5 юр.
Ананий нима морт Сапфира гӧтырыскӧд вузаліс овмӧссӧ. Босьтӧм сьӧмсьыс Ананий мыйтакӧ торйӧдіс аслыс, гӧтырыс тшӧтш тӧдіс та йылысь. Коляссӧ Ананий вайис апостолъяслы.
Петыр шуис сылы: «Ананий, мыйла тэ лэдзин сӧтанаыслы ыджыдавны сьӧлӧмад? Вузалӧм муыдлысь донсӧ дзебӧмнад тэ пӧръялін Вежа Лолӧс.
Эз ӧмӧй ас киад вӧв овмӧсыд да босьтӧм сьӧмыд?
Мыйла тэ лэдзин тайӧ лёк уджсӧ сьӧлӧмад?
Тэ эн мортӧс пӧръяв, тэ пӧръялін Енмӧс».
Тайӧс кылӧм бӧрын Ананий усис да сылӧн лолыс петіс.
Та йылысь кывлысьясӧс ставнысӧ ыджыд полӧм босьтіс.
Том йӧз пасьтӧдісны Ананийӧс дзебан паськӧмӧн, сэсся петкӧдісны да гуалісны сійӧс.
Час куим мысти локтіс Ананийлӧн гӧтырыс, дерт, лоӧмтор йывсьыс сійӧ нинӧм эз тӧд.
Петыр юаліс сылысь: «Висьтав меным, та донысь-ӧ мутӧ вузалінныд?»
Сійӧ шуис: «Та донысь».
Петыр шуис: «Мыйла нӧ сёрнитчӧмныд пӧрйӧдлыны Господьлысь Ловсӧ?
Кылан-ӧ ӧдзӧс сайысь кок шыяссӧ? Тэнсьыд верӧстӧ гуалысьяс локтӧны, ӧні тэнӧ тшӧтш петкӧдасны».
Дзик пыр Сапфира усис Петыр кок дорӧ да сылӧн лолыс петіс.
Пырысьяс аддзисны сійӧс кулӧмаӧн, сэки петкӧдісны да гуалісны сійӧс верӧсыскӧд орччӧн.
Ыджыд полӧм босьтіс став эскысьясӧс да быдӧнӧс, коді та йылысь кывліс.
Уна шензьӧданатор индысьпасъясӧн вӧчисны апостолъяс йӧз пӧвстын.
Эскысьяс ӧти сьӧлӧмӧн чукӧртчывлісны Соломон йӧрӧ.
Йӧзыс полісны ӧтувтчыны накӧд, но ошкисны найӧс.
Тадзи Господьлы эскысьяслӧн лыдыс пыр содіс, на пӧвстын вӧліны айулов и аньяс. Йӧзыс петкӧдлісны висьысьясӧс вольпасьнас ывлаӧ да водтӧдавлісны туй бокӧ, медым мунігас Петырлӧн вуджӧрыс веськаліс на вылӧ.
Уна йӧз воліс Ерусалимӧ матігӧгӧр каръясысь. Найӧ вайӧдлісны висьысьясӧс да пеж лолӧн кутӧмаясӧс. И ставныс найӧ бурдісны.
Аркирейлӧн да сы дор сулалысь саддукейяслӧн чужис ыджыд лӧглун апостолъяс дінӧ. Найӧ босьтісны апостолъясӧс да йӧртісны дзескыдінӧ.
Войнас Господьлӧн андел восьтіс дзескыдінысь ӧдзӧсъяссӧ да петкӧдіс найӧс сэтысь. Сійӧ шуис налы: «Мунӧй крамӧ да висьталӧй йӧзыслы тайӧ выль олӧм йывсьыс ставсӧ».
Апостолъяс кывзысисны да асывводзнас мунісны крамӧ, сэні пондісны велӧдны.
Сійӧ кадас аркирей аслас йӧзкӧд корис веськӧдлан котыр да Израиль войтырлысь пӧрысьясӧс, сэсся найӧ тшӧктісны вайӧдны дзескыдінысь апостолъясӧс.
Дзескыдінӧ воӧм мысти мӧдӧдӧмаяс эз аддзыны найӧс. Найӧ бӧр локтісны да юӧртісны: «Ми асланым синмӧн аддзылім, дзескыдінсӧ вӧлі бура йигналӧма, и ӧдзӧс водзас сулалісны видзысьяс. Но кор ми восьтім, некодӧс эгӧ аддзӧй сэтысь».
Тайӧс кылӧмысь крам видзысьяслӧн веськӧдлысь да аркирейяс шай-паймунісны, кыдзи пӧ тайӧ вермис лоны.
Сэки локтіс ӧти морт да висьталіс, дзескыдінӧ йӧртӧмаясыд пӧ крамынӧсь, йӧзсӧ велӧдӧны.
Крам видзысьяслӧн веськӧдлысь муніс аслас йӧзкӧд да вайӧдіс апостолъясӧс. Но найӧс эз вӧрӧдны, йӧзсьыс полісны, ӧд найӧс асьнысӧ вермисны изъявны.
Апостолъясӧс вайӧдісны да сувтӧдісны веськӧдлан котыр водзӧ.
Аркирей юаліс налысь: «Ми ӧмӧй эгӧ чорыда ӧлӧдлӧй тіянӧс тайӧ нимнас велӧдӧмысь?
Став Ерусалимсӧ шызьӧдінныд асланыд велӧдӧмӧн, нӧшта миянӧс мыжданныд сійӧ Мортсӧ виӧмысь».
Петыр да мукӧд апостолъяс вочавидзисны: «Мортыслы ёнджыка колӧ кывзыны Енмӧс, а оз мортӧс.
Миян батьяслӧн Ен ловзьӧдіс Исусӧс, кодӧс ті ӧшӧдінныд пу вылӧ да виинныд.
Ен пуксьӧдіс Сійӧс Аслас веськыдладорӧ Юрнуӧдысьӧн да Мездысьӧн, медым Израиль вермис бергӧдчыны мыжъяссьыс да босьтны прӧститӧмсӧ.
Ми тӧдам тайӧс, та вӧсна и висьталам. Висьталӧ та йылысь тшӧтш Вежа Лов, кодӧс Енмыс сетӧ Сылысь кывзысьысьяслы».
Тайӧс кылӧм бӧрын став веськӧдлан котырыс пузис скӧрысла, найӧ дасьӧсь вӧліны вины апостолъясӧс.
Сэки сувтіс веськӧдлан котырысь Гамалиил нима фарисей, Индӧдӧ велӧдысь, кодӧс пыдди пуктісны став йӧзыс.
Сійӧ тшӧктіс кад кежлӧ петкӧдны сэтысь апостолъясӧс.
Сэсся шуис веськӧдлан котырлы: «Израиль войтыр.
Энӧ тэрмасьӧй тайӧ йӧзыскӧд мыйкӧ вӧчны.
Та водзвылын, эз на ёна важӧн, кыпӧдчыліс Февдас, асьсӧ сійӧ зэв ыджыдӧн лыддис. Сы бӧрся муніс нёльсё гӧгӧр морт.
Но сійӧс виӧм бӧрын сы бӧрся мунысьяс ставныс разалісны-вошисны.
Та бӧрти вӧлі йӧз лыд пасъялӧм, буретш сэки кыпӧдчис Галилеяысь Иуда. Ас бӧрсяыс сійӧ бура уна йӧзӧс кыскис.
Но сійӧ куліс, и сы бӧрся мунысьяс ставныс разалісны.
Ӧні кӧсъя шуны тіянлы: ӧвсьӧй тайӧ йӧзсьыс, лэдзӧй найӧс.
Мортсянь кӧ тайӧ уджыс, сійӧ киссяс, а Енсянь кӧ, ті онӧ вермӧй кисьтнысӧ.
Видзчысьӧй, мед энӧ лоӧй Енлы паныд мунысьясӧн».
Веськӧдлан котыр кывзысис Гамалииллысь. Сэки корисны апостолъясӧс да чорыда ӧлӧдісны, медым эз висьтавлыны Исус йылысь, сэсся нӧйтӧм бӧрын лэдзисны найӧс.
Веськӧдлан котыр дорысь апостолъяс мунісны долыдпырысь, ӧд Господь Исуслӧн ним вӧсна найӧ шогмисны увтыртӧм туйӧ.
Быд лун крамын да гортъясаныс найӧ велӧдісны да висьтавлісны Исус Кристос йылысь Бур Юӧр.
6 юр.
Велӧдчысьяслӧн лыдыс лунысь-лун содіс. Грек кывйӧн сёрнитысь юдейяс пондісны шуасьны сэтчӧс олысь юдейяс вылӧ, мыйла пӧ быдлунъя коланатор юклігӧн ӧтдортанныд миянлысь дӧваясӧс.
Сэки дас кык апостол корисны став велӧдчысьсӧ да шуисны налы: «Миянлы абу бур кольны Енлысь Кывсӧ да сёян-юан вӧсна тӧждысьны.
Та вӧсна, вокъяс, бӧрйӧй ас пӧвстсьыныд сизим мортӧс, кодъяс мывкыдаӧсь да тырӧмаӧсь Вежа Лолӧн.
Найӧс пуктам тайӧ уджсӧ вӧчны.
Асьным ми водзӧ пондам кевмысьны да висьтавлыны Енлысь Кывсӧ».
Тайӧ вӧзйӧмыс ставныслы воис сьӧлӧм вылас.
Бӧрйисны Степанӧс, сійӧ вӧлі зумыд эскӧма да тырӧма Вежа Лолӧн. Нӧшта бӧрйисны Филипӧс, Прокорӧс, Никанорӧс, Тимонӧс, Парменӧс да Антиокияысь Николайӧс, коді вӧлі бергӧдчӧма юдей эскӧмӧ.
Найӧс сувтӧдісны апостолъяс водзӧ. Апостолъяс на вылӧ кинысӧ пуктылӧмӧн кевмысисны на вӧсна.
Енлӧн Кывйыс паськаліс да велӧдчысьяслӧн лыдыс Ерусалимын ёна содіс, весиг попъяс унаӧн кутісны эскыны.
Степан вӧлі тырӧма Енсянь вынӧн да эскӧмӧн, сійӧ вӧчис йӧз пӧвстын ыджыд шензьӧданаторъяс.
Киринеяысь да Александрияысь сідз шусяна вӧвлӧм кесйӧгъяслӧн синагогаысь кодсюрӧ, нӧшта Киликияысь да Асияысь кодсюрӧ панісны вен Степанкӧд. Степан сёрнитіс ыджыд мывкыдлунӧн да Лов вынӧн, та вӧсна эз вермыны венны сійӧс.
Сэки найӧ кодсюрӧӧс ыззьӧдісны висьтавны, мый сійӧ лёка сёрнитӧ Мӧисей да Ен йылысь, мый найӧ тайӧс асьныс кывлісны.
Тадзи найӧ кыпӧдісны йӧзсӧ, пӧрысьясӧс да Индӧдӧ велӧдысьясӧс Степанлы паныд. Сэсся босьтісны сійӧс да вайӧдісны веськӧдлан котыр водзӧ.
Сэтчӧ корисны ылӧгвисьталысьясӧс. Найӧ шуисны: «Тайӧ мортыс век омӧльтӧ миянлысь вежаинӧс да Индӧдӧс.
Ми асьным кывлім, кыдзи сійӧ шуліс, Назаретса Исус пӧ жугӧдас тайӧ вежаинсӧ да вежас Мӧисейӧн важысянь лӧсьӧдӧм оласногсӧ».
Веськӧдлан котырын пукалысьяс синсӧ вештывтӧг видзӧдісны Степан вылӧ, сылӧн чужӧмыс вӧлі анделлӧн кодь.
7 юр.
Сэки аркирей юаліс: «Тайӧ тадз?»
Степан шуис: «Вокъясӧй да батьясӧй, кывзӧй.
Дзирдлуныслӧн Ен петкӧдчыліс Ӧвраам батьнымлы Месопотамияын, Харранӧ мунтӧдзыс на. Ен шуис сылы: “Коль ассьыд чужан мутӧ, ассьыд рӧдвужтӧ да бать керкатӧ. Ме инда тэныд му — сэтчӧ мун”.
Сэки Ӧвраам петіс Калдея муысь да овмӧдчис Харранӧ.
Батьыс кулӧм бӧрын Ен вайӧдіс сэтысь Ӧвраамӧс тайӧ муас, кӧні ті ӧні оланныд.
Енмыс эз сет Ӧвраамлы татысь весиг кок пыдӧс пасьта му. Но кор Ӧвраам вӧлі ныв-питӧм на, Енмыс кӧсйысис сетны сылы да сысянь чужысьяслы мусӧ.
Ен шуис сылы: “Тэсянь чужысьяс овмӧдчасны йӧз муӧ. Найӧс пондасны видзны кесйӧг туйын да дзескӧдны нёльсё во чӧж.
Но Ме мыжда сійӧ войтырсӧ, коді нартитӧ найӧс.
Та бӧрти найӧ петасны сэтысь да пондасны кесъявны Меным тайӧ муас”.
Ен кӧрталіс Ӧвраамкӧд йитӧд, кодӧс вынсьӧдіс вундыштчӧмӧн.
Ӧвраамлӧн чужис Исаак, кӧкъямысӧд луннас Ӧвраам вундыштіс сійӧс.
Исаак вундыштіс Яковӧс, а Яков вундыштіс ассьыс дас кыкнан писӧ, миянлысь айяснымӧс.
Найӧ вежалісны Ӧсиплы, та вӧсна вузалісны сійӧс Египетӧ.
Но Енмыс вӧлі сыкӧд да дорйис сійӧс быд сьӧкыдыс дырйи.
Енмыс сетіс сылы ыджыд мывкыдлун, та вӧсна сійӧ сьӧлӧм вылас воис фараонлы, египетса ӧксылы. Фараон весиг пуктіс сійӧс веськӧдлыны Египетӧн да аслас став овмӧсӧн.
Тшыгъялӧм да ыджыд шог сэки суис став Египетсӧ да Ханаан мусӧ.
Миян батьяслы нинӧм вӧлі сёйнысӧ.
Кор Яков кыліс, мый Египетын эм нянь, мӧдӧдіс сэтчӧ миянлысь батьяснымӧс. Тайӧ вӧлі налӧн Египетӧ медводдза ветлӧм.
Мӧдысь ветліганыс Ӧсип восьтіс асьсӧ вокъясыслы. Тадзи фараон тӧдмаліс Ӧсиплысь рӧдвужсӧ.
Ӧсип мӧдӧдіс корны ассьыс Яков батьсӧ да став рӧдвужсӧ, ставнас вӧлі сизимдас вит морт.
Тадзи Яков вуджис Египетӧ, сэні сійӧ куліс, батьясным тшӧтш сэні кулісны.
Сэсся вайисны найӧс Сикемӧ да гуалісны. Гусӧ Ӧвраам ньӧблӧма эзысь вылӧ Сикемын олысь Еммор пиянлысь.
Египетын войтырным ӧтарӧ содіс. Матысмис сійӧ кадыс, мый йылысь Енмыс кыв сетӧмӧн кӧсйысьліс Ӧвраамлы. Сэки юралысьӧ пуксис выль ӧксы, коді Ӧсип йылысь нинӧм эз тӧд.
Сійӧ наяна пӧрйӧдліс миянлысь войтырнымӧс, дзескӧдіс батьяснымӧс, тшӧктіс налы эновтны ассьыныс пузчужӧм кагаяссӧ, медым найӧ эз кольны ловйӧн.
Сійӧ кадӧ чужис Мӧисей. Ен син водзын сійӧ вӧлі зэв мича.
Куим тӧлысь чӧж сійӧс быдтісны бать керкаас.
Кор вӧлі кольӧма Мӧисейӧс, фараонлӧн нылыс босьтіс сійӧс да быдтіс пи пыдди.
Мӧисейӧс велӧдісны египетса став мывкыдлунӧ, сійӧ вӧлі вына сёрнинас да уджъяснас.
Нелямын арӧс тыригас Мӧисейлӧн чужис кӧсйӧм видлыны ассьыс войтырсӧ, Израиль пиянӧс.
Кор Мӧисей аддзис, мый ӧтиӧс на пиысь чорыда нӧйтӧны, уськӧдчис дорйыны да водзӧс перйӧм могысь виис египетсаӧс.
Мӧисей чайтіс, вокъясыс гӧгӧрвоасны, мый Енмыс кӧсйӧ мездыны найӧс сы пыр, но найӧ тайӧс эз гӧгӧрвоны.
Мӧд луннас Мӧисей аддзис: кык израильса ӧта-мӧдныскӧд тышкасьӧны. Мӧисей кӧсйис, медым найӧ бурасисны да шуис налы: “Кывзӧй, ті ӧд вокъяс.
Мыйла нӧ ӧта-мӧднытӧ увтыртанныд?”
Тышсӧ панысь тойыштіс Мӧисейӧс да шуис: “Коді тэнӧ пуктіс миян вылын ыджыдалысьнас да мыждысьнас?
Гашкӧ, тӧрытъя египетсаӧс моз тэ тшӧтш кӧсъян вины менӧ?”
Тайӧ шуӧмсьыс Мӧисей пышйис Египетысь да овмӧдчис Мадиам муӧ, сэні сылӧн чужис кык пи.
Нелямын во мысти овтӧминын, Синай керӧс дорын, ӧзъялысь лежнӧг пытшкын петкӧдчис Мӧисейлы Господьлӧн андел.
Аддзӧмторйыс шемӧсмӧдіс Мӧисейӧс.
Лежнӧг дорӧ матыстчигӧн сійӧ кыліс Господьлысь гӧлӧс шысӧ: “Ме тэнад батьяслӧн Ен, Ӧвраамлӧн Ен, Исааклӧн Ен да Яковлӧн Ен”.
Мӧисейӧс тіралӧм босьтіс, сійӧ эз лысьт весиг видзӧдлынысӧ.
Господь шуис сылы: “Пӧрччы кӧмтӧ, ӧд муыс, кӧні тэ сулалан, вежа.
Ме аддза Аслам войтырлысь Египетын сьӧкыдалӧмсӧ да кыла налысь ойзӧмсӧ.
Ме лэччи мездыны найӧс.
Ӧні мун, Ме мӧдӧда тэнӧ Египетӧ”.
Ен мӧдӧдіс Мӧисейӧс, но Израиль пиян ӧтдортісны сійӧс, шуисны, коді пӧ тэнӧ пуктіс ыджыдалысьнас да мыждысьнас.
Енмыс пуктіс сійӧс ыджыдалысьнас да мездысьнас. Вӧчис тайӧс андел пыр, коді петкӧдчис сылы лежнӧг пытшкын.
Мӧисей петкӧдіс найӧс Египетысь. Уна шензьӧданатор да индысьпас сійӧ вӧчис Египет муын, Гӧрд саридзын да нелямын во чӧж овтӧминын.
Ӧд буретш Мӧисей висьтавліс Израиль пиянлы: “Господь, тіян Ен, менӧ моз сувтӧдас тіянлы асланыд вокъяс пӧвстысь Пророкӧс.
Кывзӧй Сійӧс”.
Ӧд Мӧисей, коді вӧлі овтӧминын миян батьяскӧд да кодкӧд сёрнитіс андел Синай керӧсын, босьтіс Енсянь ловъя кывъяссӧ, медым висьтавны миянлы. Но миян батьяс эз кӧсйыны кывзынысӧ, ӧтдортісны сійӧс да сьӧлӧмнысӧ бӧр бергӧдісны Египетлань. Ааронлы шуисны: “Вӧч миянлы енъясӧс, кодъяс мунасны миян водзвылын. Ми огӧ тӧдӧй, мый лои Мӧисейкӧд, миянӧс Египетысь петкӧдысьнымкӧд”.
Сэки найӧ вӧчисны ӧшпиӧс, вайисны тайӧ идолыслы вись да нимкодясисны киӧн вӧчӧмторныс водзын.
Енмыс бергӧдчис на дінысь да эновтіс найӧс юрбитны тӧлысь-кодзувъяслы. Та йылысь гижӧма пророкъяслӧн небӧгын:
— Израиль войтыр.
Нелямын во чӧжнас вайлінныд-ӧ ті Меным овтӧминас начкӧм пемӧсъясӧс да мукӧд висьяс?
Ті новлӧдлінныд Молоклысь чомсӧ Ремфан енлысь кодзувсӧ. Ас киӧн вӧчинныд тайӧ серпасъяссӧ да юрбитінныд налы.
Та вӧсна Ме вӧтла тіянӧс Вавилонысь на ылӧджык.
Овтӧминын миян батьяслӧн вӧлі Висьталан скиния. Ен петкӧдліс Мӧисейлы скиниялысь серпассӧ да тшӧктіс вӧчны дзик жӧ сідзи.
Миян батьяс колисны скиниясӧ асланыс пиянлы. Сэсся Исус Навинкӧд найӧ пыртісны сійӧс йӧз муӧ. Ачыс Енмыс вӧтліс сэтчӧс олысьяссӧ.
Скинияыс вӧлі сэні Давид лунъясӧдз.
Давид воис Енлы сьӧлӧм вылас. Сійӧ кевмысис, медым вермис вӧчны Яковлӧн Енлы оланін.
Но Енлы керкасӧ лэптіс Соломон.
А Медвылысса оз ов киӧн вӧчӧм крамын.
Пророк висьталӧ:
— Енэжыс Менам пукаланін, муыс Менам кокув.
Кутшӧм керка ті вӧчанныд Меным? Кӧні лӧсьӧданныд Меным шойччанінсӧ? — шуӧ Господь.
Эг-ӧ Аслам киӧн Ме вӧч тайӧс ставсӧ?
Асныралысьяс, тіян сьӧлӧмныд оз тӧд Енсӧ да тіян пельныд оз кыв Сійӧс.
Асланыд батьяс моз ті пыр паныд мунанныд Вежа Ловлы.
Эз вӧв пророк, кодӧс эськӧ эз вӧтлыны тіян батьяс.
Найӧ виисны пророкъясӧс, кодъяс висьталісны Веськыда Олысьлӧн локтӧм йылысь. Тайӧ Веськыда Олысьсӧ ті вузалінныд да виинныд. Анделъяс вайисны тіянлы Индӧдсӧ, но ті энӧ олӧй сы серти».
Тайӧс кывзігӧн веськӧдлан котырӧ чукӧртчӧмаяс пузисны скӧрысла, пондісны пиньнысӧ йирны.
Вежа Лолӧн тырӧм Степан видзӧдліс енэжӧ. Сійӧ аддзис Енлысь дзирдлунсӧ да Сы веськыдладорын сулалысь Исусӧс. Степан шуис: «Ме аддза восьса енэж да Ен веськыдладорын сулалысь Морт Пиӧс».
Сэки чукӧртчысьяс пельнысӧ тупкӧмӧн лёк горшӧн пондісны равзыны, ставныс уськӧдчисны Степан вылӧ. Сэсся петкӧдісны сійӧс кар сайӧ да пондісны изъявны.
Изъялысьяс пукталісны вылыс паськӧмнысӧ Савл нима том мортлӧн кок дорӧ. Изъялігӧн Степан кевмысис: «Исусӧй, Господьӧй, босьт менсьым лолӧс».
Сэсся пидзӧс вылас усьӧмӧн гораа горӧдіс: «Господьӧй, эн мыжды найӧс таысь».
Тайӧс шуӧм бӧрын Степанлӧн лолыс петіс.
8 юр.
Степанӧс виӧмсӧ Савл лыддис буртор вӧчӧмӧн.
Сійӧ лунсянь Ерусалимын ёна кутісны вӧтлыны эскысьясӧс.
Апостолъясысь кындзи ставныс найӧ разӧдчисны Юдея да Самария пасьтала.
Вежавидзысь йӧз гуалісны Степанӧс, ыджыд бӧрдӧмӧн колльӧдісны сійӧс.
Савл жӧ зілис бырӧдны эскысьясӧс, ветліс керкаысь керкаӧ да мырдысьӧн йӧрталіс айуловӧс да аньясӧс дзескыдінӧ.
Разӧдчӧм эскысьяс ветлӧдлісны да висьтавлісны Бур Юӧр.
Самарияын Филип локтіс ӧти карӧ да сэні висьтавліс Кристос йылысь.
Кор йӧзыс кылісны Филиплысь висьталӧмсӧ, да аддзисны шензьӧданаторъяс вӧчӧмсӧ, пондісны сюся кывзыны сійӧс.
Уна пытшкысь лёкысь горзӧмӧн петісны пеж ловъяс, унаӧн вӧрзьӧдчыны вермытӧмъяс да чотысьяс бурдісны.
Став карыс ёна нимкодясис.
Тайӧ карас оліс Симон нима морт. Аслас туналӧмӧн сійӧ шензьӧдліс Самарияын олысьясӧс. Асьсӧ сійӧ ыджыд мортӧ пуктіс.
Быдӧн ичӧтсянь гырысьӧдз сюся кывзіс сійӧс, сы йылысь шуисны: «Сійӧ — Енлӧн ыджыд выныс».
Йӧзыс кывзісны сійӧс, ӧд дыр кад чӧж сійӧ шензьӧдіс найӧс тунасьӧмнас.
Но кор кылісны Енлӧн Юралӧм йылысь да Исус Кристос йылысь Бур Юӧр, эскисны Филиплы, сэсся айулов да аньяс ставныс пыртчисны.
Ачыс Симон тшӧтш эскис. Пыртчӧм бӧрас сійӧ эз вешйыв Филип дінысь, ёна шензис ыджыд вынӧн вӧчӧм шензьӧданаторъяс вылӧ.
Ерусалимын апостолъяс кор кылісны, мый Самарияын сибӧдӧмаӧсь Енлысь Кывсӧ, мӧдӧдісны сэтчӧ Петырӧс да Иоанӧс. Самарияӧ воӧм бӧрын найӧ кевмысисны, медым эскысьяс сибӧдасны Вежа Лолӧс.
На вылӧ абу на вӧлі лэччӧма Вежа Лолыс, найӧс сӧмын пыртӧма вӧлі Господь Исус нимӧн.
Апостолъяс пуктылісны на вылӧ кинысӧ, сэки Вежа Лов лэччис на вылӧ.
Симон аддзис, мый апостолъяслӧн ки пуктылӧм пыр эскысьяс тырӧны Вежа Лолӧн, сэки вайис апостолъяслы сьӧм да шуис: «Сетӧй меным татшӧм вынсӧ, медым менам ки пуктылӧм пыр тшӧтш тырисны Вежа Лолӧн».
Петыр шуис сылы: «Тэнад эзысьыд мед сісьмас тэкӧд тшӧтш. Тэ мӧвпыштін ньӧбны Енмыслысь козинсӧ.
Тэныд весиг гыж ыджда пай оз вичмы таысь, ӧд тэнад сьӧлӧмыд абу веськыд Ен водзас.
Бергӧдчы аслад лёк вӧчӧмысь да кевмысь Енлы, гашкӧ, Сійӧ прӧститас тэнсьыд лёк мӧвптӧ.
Ме аддза, тэ курыд сӧптӧн тырӧмыд, лёкыс кӧрталӧма тэнӧ».
Симон воча шуис: «Кевмысьӧй ме вӧсна Господьлы, медым эз су менӧ тіян шуӧмныд».
Господь йылысь да Сылысь велӧдӧмсӧ висьталӧм бӧрын апостолъяс бӧр мунісны Ерусалимӧ. Мунігмозыс висьтавлісны Евангелльӧ Самария сиктъясын.
Господьлӧн андел шуис Филиплы: «Лун шӧр кадӧ чеччы да мун Ерусалимысь Газаӧ мунан эновтӧм туй вылӧ».
Филип чеччис да петіс туйӧ.
Сійӧ кадас сэті муніс эфиопияса ыджыд чина морт, евнук, коді вӧлі эфиопияса кандакиялӧн — ӧксы-аньлӧн — став овмӧснас веськӧдлысьӧн. Сійӧ вӧлі волӧма Ерусалимӧ юрбитны. Ӧні бӧр муніс гортланьыс. Евнук пукаліс тарантасын да лыддис Исай пророклысь гижӧд.
Вежа Лов шуис Филиплы: «Матыстчы тарантас дорас да мун орччӧн».
Филип котӧрӧн матыстчис да кыліс, тарантасын пукалысь лыддис Исай пророклысь гижӧд.
Филип юаліс: «Гӧгӧрвоан-ӧ, мый лыддян?»
Мӧдыс шуис: «Кыдзи нӧ верма гӧгӧрвонысӧ, гӧгӧрвоӧдысьыс кӧ абу?»
Сійӧ корис Филипӧс пуксьыны орччӧн.
Гижӧдсьыс сійӧ лыддис татшӧм кывъяс:
— Сійӧс вайӧдісны начкыны ыжӧс моз. Шы лэдзлытӧм баля моз Сійӧ эз восьтлы шырысь водзын Ассьыс вомсӧ.
Сійӧс вӧлі увтыртӧма, да мыждӧма абу веськыд ёрд водзын.
Коді висьталас Сысянь водзӧ чужысьяс йылысь, мувывса олӧмсӧ кӧ Сылысь орӧдасны?
Евнук шуис Филиплы: «Висьтав, код йылысь пророкыс шуӧма тайӧс?
Ас йывсьыс али мӧд йылысь?»
Сэки Филип тайӧ гижӧдсяньыс пондіс висьтавны сылы Исус йылысь Бур Юӧрсӧ.
Сэккості найӧ воисны вадорӧ, евнук шуис: «Со ваыс.
Мый менӧ кутӧ пыртчӧмысь?»
Филип шуис сылы: «Став сьӧлӧмсяньыд кӧ эскан, позьӧ».
Евнук вочавидзис: «Эска, мый Исус Кристос — Ен Пи».
Сэсся тшӧктіс сувтӧдны тарантассӧ да найӧ кыкнанныс пырисны ваӧ. Филип пыртіс сійӧс.
Ваысь петӧм бӧрын Вежа Лов лэччис евнук вылӧ.
А Господьлӧн андел босьтіс Филипӧс, и евнук эз нин аддзы сійӧс. Евнук долыдпырысь муніс водзӧ аслас туйӧд.
Бӧрынджык Филипӧс аддзисны Азот карын. Кесарияӧ мунігӧн сійӧ быд карын висьтавліс Бур Юӧр.
9 юр.
Савл скӧрысла пыр на пуис Господьлӧн велӧдчысьяс вылӧ, зілис бырӧдны найӧс. Сійӧ локтіс аркирей дінӧ да корис сысянь эскӧдан гижӧд Дамаск синагогаясӧ, медым Исус велӧдӧмӧ кутчысьысь айуловӧс да аньясӧс позис кӧртавны да вайӧдны Ерусалимӧ.
Дамаскӧ матыстчигӧн туй вылас Савлӧс виччысьтӧг кытшаліс енэжсяньыс югыд.
Сійӧ уси муас да кыліс гӧлӧс шы: «Савл, Савл, мыйла вӧтлан Менӧ?»
Сійӧ юаліс: «Коді Тэ, Господьӧй?»
Господь шуис сылы: «Ме — Исус, кодӧс тэ вӧтлан.
Сьӧкыд тэныд мунны ёсь зорлы паныд».
Савлӧс полӧм босьтіс, тіралӧмӧн сійӧ юаліс: «Господьӧй, мый кӧсъян, мед ме вӧчи?»
Господь шуис сылы: «Чеччы да мун карас.
Сэні висьталасны, мый тэныд колӧ вӧчнысӧ».
Савлкӧд ӧтлаын локтысьяс шӧйӧвошӧмӧн сулалісны: найӧ кылісны сёрни, а висьталысьсӧ эз аддзыны.
Савл чеччис муысь, восьтіс синсӧ, но нинӧм эз аддзы.
Киӧдыс кутӧмӧн сійӧс вайӧдісны Дамаскӧ.
Куим лун чӧж сійӧ нинӧм эз аддзы да оліс сёйтӧг-ютӧг.
Дамаскын оліс Ананий нима велӧдчысь.
Господь петкӧдчис сылы да шуис: «Ананий.»
Сійӧ вочавидзис: «Тані ме, Господьӧй».
Господь шуис сылы: «Чеччы да мун Веськыд нима туй вылӧ. Юав Иуда керкаысь Тарсын чужлӧм Савл нима мортӧс.
Ӧні сійӧ кевмысьӧ. Сійӧ аддзыліс Енсянь петкӧдчылӧм, мый Ананий нима морт локтас, пуктылас сы вылӧ кисӧ, да сійӧ кутас аддзыны».
Ананий вочавидзис: «Господьӧй, ме унасянь кывлі тайӧ мортыс йылысь, мыйта лёк сійӧ вӧчис Тэнад вежа войтырлы Ерусалимын.
Сылӧн эм аркирейяссянь гижӧд, та вӧсна вермас босьтны быдӧнӧс, коді шыасьӧ Тэнад нимӧ».
Господь шуис: «Мун. Ме бӧрйи сійӧс кесъявны Меным, юӧртны Менсьым нимӧс мукӧд войтырлы да ӧксыяслы, тшӧтш Израиль войтырлы.
Ме петкӧдла сылы, мыйта сьӧкыд ковмас нуны сылы Менам ним вӧсна».
Ананий муніс, пырис Иуда керкаӧ да Савл вылӧ кисӧ пуктӧмӧн шуис: «Савл вокӧй.
Менӧ мӧдӧдіс тэ дінӧ Господь Исус, коді петкӧдчис тэныд туй вылын. Сійӧ мӧдӧдіс менӧ, медым тэ бара кутін аддзыны да тырин Вежа Лолӧн».
Пырысь-пыр Савл синъясысь быттьӧ чери сьӧм усис, да сійӧ пондіс аддзыны.
Сэсся дзик пыр чеччис да пыртчис. Та бӧрын сёйыштіс да ёнмис.
Кымынкӧ лун Савл оліс Дамаскын велӧдчысьяскӧд.
Савл дзик пыр пондіс юӧртны-висьтавны синагогаясын, мый Исус — сійӧ Ен Пи.
Кывзысьяс ёна шензисны: «Эз-ӧ тайӧ мортыс бырӧдав Ерусалимын Исус нимӧ шыасьысьясӧс?
Эз-ӧ сійӧ лок татчӧ, медым босьтны найӧс да нуӧдны аркирейяс водзӧ?»
Савл лунысь-лун висьталіс вынаджыка да эскӧдіс, мый Исус — сійӧ Кристос. Тайӧн весьӧпӧртіс Дамаскын олысь юдейясӧс.
Кад мысти юдейяс сёрнитчисны вины Савлӧс.
Тайӧ кывсис Савллы.
Юдейяс лун и вой кыйӧдчисны карса дзиръя дорын, медым вины сійӧс.
Войнас велӧдчысьяс пуксьӧдісны Савлӧс ыджыд чуманӧ да лэдзисны карса стен бердӧд.
Ерусалимӧ воӧм бӧрын Савл зілис ӧтувтчыны велӧдчысьяскӧд.
Но найӧ ставныс полісны сыысь, эз эскыны, мый сійӧ тшӧтш велӧдчысь.
Сэки Варнава отсаліс Савллы, вайӧдіс сійӧс апостолъяс дінӧ да висьталіс налы, мый Савл аддзылӧма Господьӧс, да Господь сёрнитӧма сыкӧд. Нӧшта висьталіс, кыдзи Савл Дамаскын повтӧг юӧртӧма Исус йылысь.
Та бӧрти Савл оліс да ветлӧдліс накӧд Ерусалимын да повтӧг висьтавліс Господь Исус йылысь.
Сійӧ сёрнитліс грек кывйӧн сёрнитысь юдейяскӧд да вензьывліс накӧд, а найӧ пыр кӧсйисны вины сійӧс.
Тайӧс тӧдмалӧм бӧрын вокъяс нуӧдісны Савлӧс Кесарияӧ, сэсянь мӧдӧдісны Тарсӧ.
Став Юдея, Галилея да Самария пасьтала вичкояс олісны лӧня. Найӧ олісны Господьысь полӧмӧн да лунысь-лун ёнмисны.
Вежа Лов ышӧдӧм улын вичкоясын эскысьяслӧн лыдыс содіс.
Вичкояс кытшовтігӧн Петыр локтіс Лиддаын олысь вежа войтыр дінӧ.
Сэтысь сійӧ аддзис Эней нима мортӧс, коді кӧкъямыс во нин куйлӧма чеччывтӧг.
Петыр шуис сылы: «Эней, Исус Кристос бурдӧдӧ тэнӧ.
Чеччы да лӧсьӧд вольпасьтӧ».
Сійӧ дзик пыр чеччис.
Лиддаын да Саронын олысьяс ставныс аддзылісны тайӧс да бергӧдчисны Господьлань.
Иоппияын оліс Тавита ань, сылӧн нимыс лоӧ: серна. Сійӧ тшӧтш вӧлі велӧдчысьяс лыдын.
Уна бур сійӧ вӧчис йӧзыслы, отсасис гӧльяслы.
Сійӧ лунъясӧ Тавита висьмис да куліс.
Сійӧс мыськалісны да пуктісны вылыс вежӧсас.
Велӧдчысьяс кор кылісны, мый Петыр Лиддаын, Иоппияысь неылын, мӧдӧдісны кык мортӧс корны Петырӧс, мед сійӧ дзик пыр локтас на дінӧ.
Петыр чеччис да локтіс накӧд.
Воӧм мыстиыс Петырӧс нуӧдісны вылыс вежӧсас.
Дӧваяс кытшалісны сійӧс да бӧрдӧмсорӧн петкӧдлісны Тавита киӧн вурӧм дӧрӧм-паськӧмъяс.
Петыр тшӧктіс петны ставныслы, ачыс пидзӧс вылас сувтӧмӧн кутіс кевмысьны. Сэсся шойланьыс бергӧдчӧмӧн шуис: «Тавита, чеччы.»
Тавита восьтіс синсӧ, видзӧдліс Петыр вылӧ да пуксис.
Петыр мыччис сылы кисӧ да отсаліс чеччыны. Сэсся корис дӧваясӧс да мукӧд эскысьясӧс, да сувтӧдіс на водзӧ ловъя Тавиваӧс.
Та йылысь кывсис став Иоппия пасьтала, и унаӧн сэки эскисны Господьлы.
Петыр дыркодь на оліс Иоппияын кучик вӧчысь Симон ордын.
10 юр.
Кесарияын оліс Корнилий нима морт. Сійӧ веськӧдліс италияса сё шыпурта чукӧрӧн. Сійӧ вӧлі вежавидзысь морт, ачыс да сылӧн гортсаыс олісны Енмысь полӧмӧн, сійӧ отсасис гӧль юдейяслы да пыр кевмысис Енлы.
Луннас куим часын сійӧ вемӧсӧн аддзис Енлысь анделӧс, коді пырис сы дінӧ да шыасис: «Корнилий.»
Повзигтыр андел вылӧ видзӧдӧмӧн Корнилий шуис: «Мый, Ыджыдӧй?»
Андел шуис сылы: «Енмыс кылӧма тэнсьыд кевмысьӧмтӧ да аддзӧма гӧльяслы отсасьӧмтӧ.
Дзик пыр мӧдӧд йӧзтӧ Иоппияӧ Симонла, кодӧс шуӧны Петырӧн.
Ӧні сійӧ кучик вӧчысь Симон ордын, сылӧн керкаыс сулалӧ саридз дорас.
Сійӧ висьталас тэныд юӧр, код пыр мездман тэ и став тэнад гортсаыд».
Андел мунӧм бӧрын Корнилий корис ассьыс кык кесйӧгсӧ да вежавидзӧмӧн олысь шыпуртаӧс. Висьталіс налы ставсӧ да мӧдӧдіс Иоппияӧ.
Мӧд луннас найӧ вӧлі матыстчӧны карланьыс. Буретш сэки, лун шӧр кадӧ, Петыр кайис керка вылас кевмысьны.
Петырлӧн кынӧмыс кутіс сюмавны, сійӧ кӧсйис сёйны.
Кор сёянсӧ дасьтісны на, Петыр быттьӧ ас садьсьыс петіс да аддзис: восьса енэжсяньыс сы дінӧ лэччис паськыд дӧра сяма. Нёльнан пельӧсӧдыс кутӧмӧн сійӧс лэдзисны му вылӧ.
Сэні вӧліны мувывса быдпӧлӧс нёль кока пемӧсъяс, веглясьысьяс да енэжвыв лэбачьяс.
Сэки Петыр кыліс гӧлӧс шы: «Чеччы, Петыр, начкы да сёй».
Петыр шуис: «Ог, Господьӧй. Ме некор эг сёйлы нинӧм шогмытӧмсӧ да пежсӧ».
Сэсся бара кыліс: «Енмыс мый весалӧма, эн лыддьы сійӧс пежӧн».
Тадзи вӧлі куимысь, сэсся дӧрасӧ бӧр кыпӧдісны енэжас.
Петыр шӧйӧвошӧмӧн мӧвпаліс, мый эськӧ лоӧ тайӧ аддзывлӧмторйыс. Сійӧ кадас Корнилийлӧн мӧдӧдӧмаяс Симонлысь керкасӧ аддзӧм бӧрын сувтісны потшӧс дорас да гораа юалісны: «Тані-ӧ Симоныс, кодӧс шуӧны Петырӧн?»
Кор Петыр мӧвпаліс на аддзывлӧм йывсьыс, Лов шуис сылы: «Тэнӧ корсьӧны куимӧн.
Лэччы да майшасьтӧг мун накӧд, ӧд найӧс Ме мӧдӧді».
Петыр лэччис воӧмаяс дінӧ да шуис: «Ме сійӧ мортыс, кодӧс ті корсянныд. Мый могӧн локтінныд?»
Найӧ висьталісны: «Миянӧс мӧдӧдіс Корнилий, сёӧн веськӧдлысьным. Сійӧ веськыда олысь да Енмысь полысь морт, юдей войтыр пыдди пуктӧ сійӧс.
Вежа андел тшӧктӧма сылы корны тэнӧ гортас, мед кывзыны тэнсьыд висьталӧмтӧ».
Петыр корис найӧс керкаас, вердіс-юкталіс, сэсся мӧд луннас петіс накӧд туйӧ. Сыкӧд тшӧтш мунісны Иоппияысь кодсюрӧ вокъяс.
Лун мысти воисны Кесарияӧ.
Корнилий виччысис найӧс. Сійӧ вӧлі корӧма ассьыс рӧдвужсӧ да матысса ёртъяссӧ.
Пыриганыс Корнилий воча петіс Петырлы да копыртчылӧмӧн уськӧдчис сы водзӧ.
Петыр сійӧс лэптігмоз шуис: «Чеччы, ме ӧд морт жӧ».
Сэсся сыкӧд сёрнитігтырйи пырис керкаӧ да аддзис керка тыр йӧзӧс.
Петыр шуис налы: «Ті тӧданныд, мый юдейяслы оз позь ӧтувтчыны да волысьны мукӧд войтыркӧд.
Но Ен меным петкӧдліс, мед ме некодӧс эг пукты шогмытӧмӧ да пеж туйӧ.
Та вӧсна ме кывшутӧг локті тіян дінӧ.
Кӧсъя тӧдны, мый могӧн ті коринныд менӧ?»
Корнилий висьталіс: «Куим лун сайын дзик тайӧ кадас куим часын ме видзалӧмӧн кевмыси гортын. Сэки сувтіс ме водзӧ дзирдалан паськӧма морт да шуис, Корнилий, Енмыс пӧ кылӧма тэнсьыд кевмысьӧмтӧ да аддзӧма гӧльяслы отсасьӧмтӧ.
Мӧдӧд пӧ йӧзтӧ Иоппияӧ корны Симонӧс, кодӧс шуӧны Петырӧн.
Ӧні пӧ сійӧ кучик вӧчысь Симон керкаын, а керкаыс пӧ саридз дорас.
Сійӧ пӧ локтас да висьталас тэныд ставсӧ.
Сэки ме дзик пыр мӧдӧді тэ дінӧ ассьым йӧзӧс. Тэ бура вӧчин, мый локтін.
Ми ставным ӧні Ен водзынӧсь да дасьӧсь кывзыны ставсӧ, мый Енмыс тшӧктіс висьтавны тэныд».
Петыр шуис: «Ме збыльысь ӧні гӧгӧрвоа, мый Енмыслы став йӧзыс ӧткодьӧсь. Быд войтыр пӧвстысь Сійӧ сибӧдӧ найӧс, кодъяс олӧны веськыда да Сыысь полӧмӧн.
Сійӧ мӧдӧдіс Израиль войтырлы Ассьыс кывсӧ, лӧньлун йылысь Бур Юӧрсӧ, кодӧс вайис Исус Кристос.
Сійӧ ставныслы Господь.
Ті тӧданныд, мый вӧлі Галилеяын, сэсся став Юдея пасьтала сійӧ пыртчӧм бӧрын, мый йылысь висьтавліс Иоан.
Ен мавтыштіс Назаретса Исусӧс Вежа Лолӧн да вынӧн. Исус быдлаті ветлӧдліс, уна бур вӧчис йӧзыслы, бурдӧдаліс да мездіс йӧзсӧ омӧльыслӧн киысь. Енмыс вӧлі Сыкӧд.
Ми асланым синмӧн аддзылім ставсӧ, мый Сійӧ вӧчис Юдея муын да Ерусалимын. Сійӧс пу вылӧ ӧшӧдӧмӧн виисны.
Но Енмыс ловзьӧдіс Сійӧс коймӧд луннас да сетіс Сылы петкӧдчывны, но эз став йӧзыслы, а миянлы, кодъясӧс Енмыс водзысяньыс бӧрйис висьтавны та йылысь.
Сійӧ тшӧктіс миянлы, кодъяс ӧтлаын сёйим-юим Сыкӧд ловзьӧм бӧрас, юӧртны йӧзыслы да висьтавны, мый Ен пуктіс Сійӧс ловъяяслы да кулӧмаяслы Мыждысьӧн.
Сы йылысь став пророкыс висьталӧ, мый быдӧнлысь, коді эскӧ Сылы, лоӧ прӧститӧма мыжъяссӧ Сы нимӧн».
Петырлӧн сёрнитігӧн Вежа Лов лэччис ставныс вылӧ, кодъяс сэні кывзісны.
Петыркӧд локтӧм эскысь юдейяс чуймисны, мый Вежа Ловсӧ сетӧма тшӧтш ентӧдтӧмъяслы.
Ӧд асланыс пельӧн найӧ кылісны ентӧдтӧмъяслысь мукӧд кывъяс вылын сёрнитӧмсӧ да Енмӧс ошкӧмсӧ.
Сэки Петыр шуис: «Вермас-ӧ кодкӧ кутны найӧс пыртчӧмысь, налы кӧ миянлы моз тшӧтш сетӧма Вежа Ловсӧ?»
Сэсся Петыр тшӧктіс налы пыртчыны Исус Кристос нимӧн.
А найӧ корисны Петырӧс олыштны на ордын нӧшта кымынкӧ лун.
11 юр.
Апостолъяслы да мукӧд вокъяслы Юдеяын кывсис, мый ентӧдтӧмъяс сибӧдӧмаӧсь Енлысь Кывсӧ.
Кор Петыр локтіс Ерусалимӧ, вундыштчӧмаяс вомалісны сійӧс, шуисны: «Тэ ветлӧмыд вундыштчытӧмъяс дінӧ да весиг ӧтлаын сёйӧмыд накӧд».
Сэки Петыр пондіс висьтавны налы ставсӧ сьӧрсьӧн-бӧрсьӧн:
«Ме вӧлі Иоппия карын. Сэні кевмысигӧн быттьӧ ас садьысь петі да аддзи Енсянь петкӧдчылӧм:
енэжсяньыс лэччис паськыд дӧра сяма, нёльнан пельӧсӧдыс кутӧмӧн сійӧс лэдзисны ме водзӧ.
Ме видзӧдлі да аддзи сэтысь мувывса нёль кока пемӧсъясӧс, веглясьысьясӧс да енэжвыв лэбачьясӧс.
Сэки ме кылі гӧлӧс шы: “Чеччы, Петыр, начкы да сёй”.
Ме шуи: “Ог, Господьӧй. Ме некор эг босьтлы вомӧ нинӧм шогмытӧмсӧ да пежсӧ”.
Сэсся енэжсяньыс ме бара кылі: “Енмыс мый весалӧма, эн лыддьы сійӧс пежӧн”.
Тадзи вӧлі куимысь, сэсся ставсӧ бӧр кыпӧдісны енэжас.
Буретш сійӧ каднас куим морт сувтісны керка дорӧ, кӧні ме вӧлі. Найӧс вӧлӧмкӧ Кесариясянь мӧдӧдӧмаӧсь ме дінӧ.
Лов шуис меным, мед ме майшасьтӧг муні накӧд.
Мекӧд тшӧтш мунісны тайӧ квайт вокыс. Кор ми локтім сійӧ мортыс ордӧ, сійӧ висьталіс миянлы, мый аддзылӧма анделӧс. Андел сувтӧма керка шӧрас да шуӧма сылы, мӧдӧд пӧ йӧзтӧ Иоппияӧ Симонла, кодӧс шуӧны Петырӧн.
Сійӧ пӧ висьталас тэныд юӧр, код пыр мездман тэ да став тэнад гортсаыд.
И кор ме куті сёрнитны, на вылӧ лэччис Вежа Лов, кыдзи водзынсӧ миян вылӧ.
Сэки тӧд вылӧ меным уси Господьлӧн шуӧмыс: “Иоан пыртіс ваӧн, но тіянӧс лоӧ пыртӧма Вежа Лолӧн”.
Енмыс кӧ миянлы моз и налы сетіс тайӧ козинсӧ, кор найӧ эскисны Господь Исус Кристослы, сідзкӧ, коді ме сэтшӧмыс, медым паныд сувтны Енмыслы?»
Тайӧс кылӧм бӧрын найӧ лӧнисны да ошкисны Енмӧс шуалӧмӧн: «Тыдалӧ, Енмыс ентӧдтӧмъяслы тшӧтш сетӧма бергӧдчыны мыжъяссьыс, мед и налӧн вӧлі олӧм».
Степанӧс виӧм бӧрын дзескӧдӧм вӧсна разалӧмаяс мунісны Финикияӧдз, Кипрӧдз да Антиокияӧдз.
Енлысь Кывсӧ юдейяслы кындзи найӧ некодлы эз висьтавлыны.
На пӧвстын тшӧтш вӧліны Кипрысь да Киринеяысь кодсюрӧ. Антиокияӧ локтӧм бӧраныс найӧ висьтавлісны грекъяслы Господь Исус йылысь Бур Юӧр.
Господь вӧлі накӧд, та вӧсна унаӧн эскисны да бергӧдчисны Господь дінӧ.
Та йылысь кывсис Ерусалимын эскысьяслы.
Сэки найӧ мӧдӧдісны Антиокияӧ Варнаваӧс.
Воӧм бӧрас Варнава аддзис, мый сэні Енлӧн буралӧмыс да ёна нимкодясис. Сійӧ ышӧдіс быдӧнӧс кутчысьны став сьӧлӧмнас Господьӧ.
Варнава вӧлі бур морт, сійӧ вӧлі тырӧма Вежа Лолӧн да эскӧмӧн.
Унаӧн сэки бергӧдчисны Господь дінӧ.
Сэсся Варнава муніс Тарсӧ корсьны Савлӧс и аддзӧм бӧрас локтіс сыкӧд Антиокияӧ.
Во чӧж найӧ чукӧртчывлісны сэні эскысьяскӧд да велӧдісны бура уна йӧзӧс.
Антиокияын велӧдчысьясӧс медводдзаысь шуисны Кристос войтырӧн.
Сійӧ лунъясӧ Антиокияӧ локтісны Ерусалимысь пророкъяс.
На пиысь Агав нима пророк Ловсянь водзвыв висьталіс, ыджыд тшыгъялӧм пӧ лоӧ став му пасьтала. Клавдий кесар дырйи тадзи и лои.
Велӧдчысьяс шуисны отсавны Юдеяын олысь вокъяслы, коді мыйта вермас. Тадзи и вӧчисны: Варнавакӧд да Савлкӧд мӧдӧдісны вичкоса юрнуӧдысьяслы сьӧм.
12 юр.
Тайӧ кадӧ Ирӧд ӧксы пондіс ёна дзескӧдны вичкоысь кодсюрӧӧс. Сійӧ тшӧктіс вины Иоанлысь Яков воксӧ.
Ирӧд аддзис, мый тайӧ сьӧлӧм вылас воис юдейяслы, сэки тшӧктіс босьтны тшӧтш Петырӧс. Сэки буретш пасйисны Шомтӧм нянь сёян лунъяс. Петырӧс босьтісны да пуксьӧдісны дзескыдінӧ.
Шыпуртаяслы тшӧктісны видзны сійӧс нёльӧн-нёльӧн да нёльысь вежласьӧмӧн. Ирӧд шуис Ыджыд лун бӧрын петкӧдны сійӧс йӧз водзӧ.
Петырӧс видзисны дзескыдінын, а вичко дугдывтӧг кевмысис сы вӧсна Енлы.
Петкӧдан лунлы паныда войӧ Петыр узис кык шыпурта костын. Сійӧс вӧлі дорӧма кык чептӧн, нӧшта дзескыдін ӧдзӧс дорын сулалісны видзысьяс.
Виччысьтӧг Господьлӧн андел сувтіс сы водзӧ и гӧгӧр югдіс.
Петырлы инмӧдчиг андел садьмӧдіс сійӧс да шуис: «Чеччы ӧдйӧджык».
Петырлӧн киыс дзик пыр мыніс чепъясысь.
Андел шуис: «Вӧняв костӧ да кӧмась».
Петыр кывзысис.
Сэсся андел шуис: «Пасьтав вылыс паськӧмтӧ да лок ме бӧрся».
Петыр муніс андел бӧрся, но чайтіс, мый ставыс тайӧ абу збыль, а сӧмын Енсянь петкӧдчылӧм.
Воддза да мӧд видзысьяс дінті мунӧм бӧрын найӧ воисны карсьыс петан кӧрт ӧдзӧс дорӧ. Ӧдзӧсыс ачыс воссис, да найӧ петісны. Туй вывті мунігӧн андел виччысьтӧг вошис.
Сэки Петыр воис ас садяс да шуис: «Ӧні ме збыльысь тӧда, мый Господь мӧдӧдіс Ассьыс анделсӧ, мед мездыны менӧ Ирӧд киысь да юдей войтырлӧн лӧсьӧдӧм лёкторъясысь».
Тайӧс гӧгӧрвоӧм бӧрын Петыр мӧдӧдчис Иоанлӧн Марья мамыс ордӧ. Тайӧ Иоансӧ шуисны Маркӧн. Сэні вель унаӧн вӧлі чукӧртчӧмаӧсь кевмысьны.
Петыр игӧдчис ӧдзӧсас. Рода нима кесйӧг ань петіс восьтнысӧ. Петырлысь гӧлӧссӧ кылӧм бӧрын сійӧ нимкодьысла весиг вунӧдіс восьтны ӧдзӧссӧ, котӧрӧн бӧр пырис да висьталіс, ӧдзӧс саяс пӧ Петыр сулалӧ.
Ставныс шуисны: «Ас вежӧрад-ӧ тэ?»
Но сійӧ пыр ассьыс долис.
Сэки найӧ шуисны: «Гашкӧ, тайӧ Петырлӧн анделыс?»
А Петыр пыр на игӧдчис.
Кор восьтісны да аддзисны сійӧс, ёна чуймисны.
Петыр сетіс кинас пас, медым ланьтісны ставныс.
Сэки висьталіс налы, кыдзи Господь петкӧдіс сійӧс дзескыдінысь. Сэсся шуис: «Юӧртӧй та йылысь Яковлы да мукӧд вокъяслы».
Та бӧрын петіс на дінысь да муніс мӧдлаӧ.
Асывнас Петырлӧн вошӧмысь шыпуртаяс ёна шызисны.
Ирӧд корсис Петырӧс, но ставыс вӧлі весьшӧрӧ. Видзысьясӧс юасьӧм бӧрын сійӧ тшӧктіс вины найӧс.
Сэсся Ирӧд муніс Юдеяысь Кесарияӧ да кольччис сэтчӧ.
Ирӧд вӧлі скӧрмӧма Тирын да Сидонын олысьяс вылӧ.
Найӧ ӧтвыв сёрнитчӧмӧн локтісны Ирӧд дінӧ бурасьӧм могысь, ӧд ӧксылӧн муыс вердіс найӧс. Найӧ эскӧдісны Властӧс, ӧксы керкаӧн веськӧдлысьӧс, мед сувтас на дор.
Индӧм лунӧ Ирӧд пасьталіс ӧксы паськӧм, пуксис юралан пуклӧсӧ да пондіс сёрнитны.
Йӧзыс гораа шуалісны, тайӧ пӧ Ен сёрнитӧ, оз морт.
Сэки Господьлӧн андел чорыда дойдіс Ирӧдӧс, ӧд Енлы пыдди сійӧ аслыс босьтіс ошкӧмсӧ.
Сійӧс ловъявывсьыс сёйисны номыръяс.
А Енлӧн Кывйыс ёна паськаліс.
Варнава да Савл вайӧм сьӧмсӧ сетісны вичколы, сэсся бӧр мунісны Ерусалимысь Антиокияӧ. Аскӧдныс найӧ босьтісны тшӧтш Иоанӧс, кодӧс шуисны Маркӧн.
13 юр.
Антиокия вичкоын вӧліны кодсюрӧ пророкъяс да велӧдысьяс: Варнава, Симеон, кодӧс шуисны Нигерӧн, Киринеяысь Луций, Манаил, сійӧ тшӧтш быдмылӧма Ирӧд ӧксыкӧд, да Савл.
Кор найӧ видзалӧмӧн кесъялісны Господьлы, Вежа Лов шуис: «Торйӧдӧй Меным Варнаваӧс да Савлӧс, Ме кори найӧс торъя удж вӧчны».
Сэсся видзалӧм да кевмысьӧм бӧрын найӧ пуктылісны кинысӧ на вылӧ да мӧдӧдісны найӧс.
Тадзи Варнава да Савл, Вежа Лолӧн мӧдӧдӧмаяс, локтісны Селевкияӧ.
Сэсянь кывтісны Кипрӧ.
Сэтчӧ воӧм бӧрын Саламинӧ сувтліганыс висьтавлісны Енлысь Кывсӧ синагогаясын.
Накӧд тшӧтш вӧлі Иоан, коді отсасис налы.
Дісӧ кытшовтігӧн воисны Пафӧ, сэні налы паныдасис Варисус нима сэтчӧс тун да ылӧгпророк, ачыс сійӧ вӧлі юдей. Сійӧ оліс діӧн веськӧдлысь Сергий Павел ордын. Веськӧдлысьыс вӧлі сюсь вежӧра морт.
Сійӧ кӧсйис кывны Енлысь Кывсӧ, та вӧсна корис Варнаваӧс да Савлӧс ас ордас.
Елим тун — тадзи Варисусӧс нимтісны грек кывйӧн — паныд сувтіс локтысьяслы. Сійӧ эз кӧсйы, мед діӧн веськӧдлысьыс эскис.
Савл, мӧд ногӧн Павел, Вежа Лолӧн тырӧмӧн веськыда сылы синмас видзӧдӧмӧн шуис: «Тэ, омӧльыслӧн пи, быд бурыслы паныд мунысь, тырӧмыд быдпӧлӧс лёкнас да пӧръясьӧмнас.
Чайтан, и водзӧ верман пӧръясьӧмнад чукльӧдлыны Господьлысь веськыд туйсӧ?
Господьлӧн киыс ӧні тэ вылын: тэ синтӧмман да индӧм кадӧдз он кут аддзыны шонді югӧрсӧ».
Дзик пыр сылӧн синмыс пемдіс.
Сійӧ пондіс бергавны ӧтарӧ-мӧдарӧ, корсьны нуӧдысьӧс.
Діӧн веськӧдлысь кор аддзис тайӧ лоӧмторсӧ, шензис Господьлӧн велӧдӧмысь да кутіс эскыны.
Пафысь Павел мукӧдыскӧд тшӧтш кывтіс Памфилияӧ, Пергия карӧ.
Сэні Иоан колис найӧс да бӧр косіс Ерусалимӧ.
А найӧ Пергиясянь мунісны Писидияса Антиокия карӧ. Шойччан лунӧ найӧ пырисны синагогаӧ да пуксисны.
Индӧд да пророк гижӧдъяс лыддьӧм бӧрын синагогаса юралысьяс ыстісны кодсюрӧӧс юавны, эм-ӧ вокъяслӧн ышӧдана кыв йӧзыслы. Эм кӧ, мед висьталасны.
Сэки Павел сувтіс, сетіс кинас пас да шуис: «Израиль войтыр да Енмысь полысьяс, кывзӧй:
Израиль войтырлӧн Ен бӧрйис миянлысь батьяснымӧс, рӧдмӧдіс тайӧ войтырсӧ Египет муын да вына кинас петкӧдіс найӧс сэтысь.
Нелямын во чӧж Сійӧ вердіс найӧс овтӧминын.
Сэсся бырӧдіс Ханаан муысь сизим пӧлӧс войтырӧс да налысь муяссӧ юкліс миян батьяслы.
Ставыс тайӧ кыссис матӧ нёльсё ветымын во. Та бӧрти сетіс налы ёрдысьясӧс Самуил пророкӧдз.
Сэсся найӧ корисны ӧксыӧс, сэки Енмыс сетіс налы Саулӧс, Вениамин чужанкотырысь Кислысь писӧ.
Сійӧ веськӧдліс нелямын во чӧж.
Саулӧс вештӧм бӧрын сувтӧдіс налы ӧксыӧн Давидӧс. Сы йылысь шуӧма: “Ме аддзи Давидӧс, Ессейлысь писӧ, сійӧ Меным сьӧлӧм серти. Сійӧ пӧртас олӧмӧ Менсьым став кӧсйӧмӧс”.
Сылӧн кӧйдыссянь Ен сетіс Израильлы кӧсйысьӧм Мездысьӧс, Исусӧс.
Сылӧн локтӧм водзвылын Иоан юӧртіс став Израиль войтырлы, мед бергӧдчасны мыжъяссьыныс да пыртчасны.
Олан туй помасигас Иоан висьтавліс: “Ме абу сійӧ, код туйӧ ті менӧ пуктанныд.
Сійӧ локтӧ ме бӧрся, и ме ог шогмы пӧрччӧдны Сылысь кӧмсӧ”.
Вокъясӧй, Ӧвраам пиянӧй да Енмысь полысьяс.
Тіянлы мӧдӧдӧма тайӧ мездан кывсӧ.
Ерусалимын олысьяс да налӧн веськӧдлысьяс эз тӧдны Сійӧс, босьтісны да мыждісны. Тадзи инісны пророкъяслӧн кывъяс, кодъясӧс лыддьӧны быд шойччан лунӧ. Налы эз сюр мыжыс, мед вины Сійӧс. Сэки корисны Пилатӧс, мед сійӧ тшӧктас винысӧ.
Найӧ вӧчисны ставсӧ, мый гижӧма Сы йылысь. Сэсся лэдзисны Сійӧс крест вывсьыс да пуктісны дзебанінӧ.
Но Енмыс ловзьӧдіс Сійӧс.
Уна лун чӧж Сійӧ петкӧдчывліс налы, кодъяс Сыкӧд тшӧтш локтісны Галилеясянь Ерусалимӧдз. Ӧні найӧ висьтавлӧны Сы йылысь Израиль войтырлы.
Ми висьталам тіянлы Бур Юӧр, мый батьяслы сетӧм кӧсйысьӧмсӧ Ен пӧртіс олӧмӧ миянлы, налӧн ныв-пилы, Исусӧс ловзьӧдӧм пыр. Мӧд псаломын гижӧма:
— Тэ Менам Пи, Ме ӧні чужті Тэнӧ.
Енмыс ловзьӧдіс Исусӧс, и Сійӧ оз нин бӧр бергӧдчы сісьмӧмас. Шуӧма:
— Ме пӧрта олӧманыд Давидлы сетӧм вежа да вежсьывтӧм кӧсйысьӧмӧс.
Мӧдлаын шуӧма:
— Тэ аслад Вежалы он сет аддзывны сісьмӧмсӧ.
Давид аслас кадӧ пӧртіс олӧмас Енлысь кӧсйӧмсӧ. Сэсся сійӧ куліс, да сійӧс гуалісны батьяскӧд орччӧн. Давидным аддзыліс сісьмӧмсӧ, а Сійӧ, кодӧс Ен ловзьӧдіс, эз аддзыв сісьмӧмсӧ.
Тӧдӧй, вокъяс: Исус пыр Енмыс юӧртӧ тіянлы, мый прӧститӧма тіянлысь мыжъяснытӧ.
Сы пыр быд эскысь лоӧ веськыдӧн да мездмас ставсьыс, мыйысь эз вермы мездмыны Мӧисейлӧн Индӧд пыр.
Видзчысьӧй, медым эз су тіянӧс пророкъяслӧн шуӧмыс:
— Видзӧдӧй, сералысьяс, да шензьӧй, тіянӧс лоӧ бырӧдӧма.
Тіян лунъясӧ Ме вӧча сэтшӧмтор, та йылысь кӧ висьталасны тіянлы, ті онӧ эскӧй».
Синагогаысь петігӧн ентӧдтӧмъяс корисны Павелӧс да Варнаваӧс нӧшта висьтавны та йылысь локтан шойччан лунӧ.
Синагогаысь разӧдчигӧн юдейяс да юдей эскӧмӧ бергӧдчысьяс пиысь унаӧн мунісны Павел да Варнава бӧрся. Апостолъяс сёрнитісны накӧд да ышӧдісны, медым кутчысясны Енлӧн буралӧмас.
Локтан шойччан лунӧ пӧшти став карыс чукӧртчис кывзыны Енлысь Кывсӧ.
Кор юдейяс аддзисны уна йӧзӧс, тырины лӧглунӧн. Найӧ пондісны паныд шуасьны да омӧльтны Павеллысь велӧдӧмсӧ.
Сэки Павел да Варнава повтӧг шуисны: «Медводз тіянлы шуӧма кывны Енлысь Кывсӧ.
Но ті кӧ онӧ сибӧдӧй тайӧс да лыддянныд асьнытӧ шогмытӧмӧн, мед пырны помтӧм олӧмӧ, ми мунам ентӧдтӧмъяс дінӧ.
Тадзи Ачыс Господь висьтавліс:
— Ме сувтӧді Тэнӧ ентӧдтӧмъяслы югыдӧн, став му пасьтала олысьяслы Мездысьӧн».
Тайӧс кылӧм бӧрын ентӧдтӧмъяс пондісны нимкодясьны да ошкыны Господьӧс Сылӧн Кывйысь.
Эскисны ставныс, кодъяслы шуӧма пырны помтӧм олӧмӧ.
Господьлӧн кывйыс паськаліс сэтчӧс му пасьтала.
Юдейяс жӧ паныд ыззьӧдісны Енсьыс полысь да пыдди пуктана аньясӧс да карӧн веськӧдлысьясӧс.
Найӧ пондісны дзескӧдны Павелӧс да Варнаваӧс, сэсся вӧтлісны асланыс муысь.
Апостолъяс пыркӧдісны коксьыныс буссӧ сэні да мунісны Иконияӧ.
Антиокияын жӧ велӧдчысьяс тырины нимкодьлунӧн да Вежа Лолӧн.
14 юр.
Иконияын Павел да Варнава мунісны синагогаӧ да висьталісны сэні Енлысь Кывсӧ. Юдейяс да грекъяс пиысь сэки унаӧн эскисны.
Юдейяс, кодъяс эз эскыны, паныд кыпӧдісны ентӧдтӧмъясӧс, кӧдзисны налы сьӧлӧманыс скӧралӧм вокъяс вылӧ.
Вокъяс дыркодь олісны сэні да повтӧг висьтавлісны Господь йылысь. Господь вӧчис на пыр шензьӧданаторъяс да петкӧдліс индысьпасъяс, тайӧн вынсьӧдіс Аслас буралӧм йылысь висьталӧмсӧ.
Йӧзыс карас юксисны кык пельӧ: ӧтияс вӧліны юдейяс дор, мӧдъяс — апостолъяс дор.
Ентӧдтӧмъяс да юдейяс асланыс веськӧдлысьяскӧд шуисны уськӧдчыны Павел да Варнава вылӧ да изъявны найӧс.
Та йылысь тӧдмалӧм бӧрын апостолъяс пышйисны Ликаонияӧ. Сэні Листра да Дервия каръясын, тшӧтш матігӧгӧрас, висьтавлісны Бур Юӧр.
Листраын оліс кокнас висьысь морт, чужӧмсяньыс сійӧ абу на сувтлӧма кок вылас. Сійӧ пукаліс да кывзіс Павеллысь висьталӧмсӧ.
Павел видзӧдліс сы вылӧ да аддзис, мый сылӧн эм эскӧм бурднысӧ. Сэки Павел гораа шуис: «Господь Исус Кристос нимӧн шуа тэныд: “Сувт кок вылад.”»
Сійӧ дзик пыр чеччыштіс да пондіс ветлӧдлыны.
Тайӧс аддзӧм бӧрын йӧзыс асланыс Ликаония кыв вылын пондісны гораа шуавны, енъяс пӧ морт кодьӧн лэччисны миян дінӧ.
Варнаваӧс шуисны Зевсӧн, а Павелӧс Гермесӧн, ӧд ёнджыкасӧ сійӧ сёрнитіс.
Зевс енлы налӧн юрбитаніныс сулаліс карӧ пыранінас. Сэки Зевслӧн тун вайис сикӧтшъяс да вайӧдіс дзиръя дорӧ ӧшъясӧс, кӧсйис йӧзыскӧд ӧтлаын вись вайны апостолъяслы.
Тайӧс кылӧм бӧрын апостолъяс, Варнава да Павел, косялісны паськӧмнысӧ да котӧрӧн уськӧдчисны йӧз чукӧр пытшкӧ, пондісны гораа шуавны: «Мый ті вӧчанныд?
Ми ӧд тіян кодь жӧ мортъяс. Ми вайим Бур Юӧр тіянлы, медым ті бергӧдчинныд ковтӧм енъяссьыныд ловъя Ен дінӧ, коді вӧчис енэжсӧ, мусӧ, васӧ да ставсӧ, мый сэні эм. Воддза кадъясӧ Сійӧ быд войтырлы лэдзис ветлыны асланыс туйясӧд. Но бур вӧчӧмнас Сійӧ век казьтывліс да казьтывлӧ Ас йывсьыс: ыстӧ миянлы енэжсяньыс зэр, сетӧ ас кадӧ вотӧс-быдтас, пӧткӧдӧ миянӧс да гажӧдӧ миянлысь сьӧлӧм».
Тадзи висьталӧмнас найӧ ӧдва ӧлӧдісны йӧзсӧ налы вись вайӧмысь да мӧдӧдісны гортаныс.
Павел да Варнава кольччисны Листраӧ да велӧдісны сэні йӧзсӧ.
Антиокияысь да Иконияысь локтісны сэтчӧ кодсюрӧ юдейяс.
Кор апостолъяс повтӧг бурвисьтавлісны, юдейяс эскӧдісны йӧзсӧ, мед найӧ ылыстчасны апостолъясысь.
Юдейяс шуисны: «Налӧн висьталӧмныс абу збыль, найӧ сӧмын пӧръясьӧны».
Тадзи найӧ кыпӧдісны йӧзсӧ апостолъяслы паныд, йӧзыс изъялісны Павелӧс да кыскисны кар саяс, чайтісны, мый кулӧма нин.
Но кор велӧдчысьяс чукӧртчисны Павел гӧгӧр, сійӧ чеччис да бӧр локтіс карас.
Сэсся мӧд луннас Варнавакӧд Павел муніс Дервияӧ.
Дервияын Павел да Варнава висьтавлісны Евангелльӧ став карыслы, бура уна велӧдчысь сэні лои.
Сэсся бӧрсӧ локтісны Листра, Икония да Антиокия пыр. Сэні найӧ ёнмӧдісны сэтчӧс велӧдчысьясӧс да тшӧктісны зумыда кутчысьны эскӧмас. Казьтыштісны, мый уна сьӧкыд пыр ковмас мунны, мед пырны Енлӧн Юраланінӧ.
Быд вичкоын ки пуктылӧмӧн индісны юрнуӧдысьясӧс. Сэсся кевмысьӧм да видзалӧм бӧрын сетісны эскысьясӧс Господь киӧ, кодлы найӧ и эскисны.
Сэсся Писидия пыр мунісны Памфилияӧ.
Сэні Пергия карын Господьлысь кывсӧ висьталӧм бӧрын мунісны Атталияӧ.
Сэсянь кывтісны Антиокияӧ, ӧд буретш тані найӧс вӧлі сетӧма Енлӧн буралан киӧ, мед вӧчны Енлысь уджсӧ, кодӧс помӧдз вайӧдісны.
Воӧм бӧраныс найӧ чукӧртісны эскысьясӧс да висьталісны ставсӧ, мый вӧчис на пыр Енмыс, да кыдзи Сійӧ восьтіс ентӧдтӧмъяслы эскӧмас ӧдзӧссӧ.
Сэсся дыркодь на олісны найӧ сэтчӧс велӧдчысьяскӧд.
15 юр.
Юдеяысь локтысьясысь кодсюрӧ велӧдісны вокъясӧс, онӧ кӧ пӧ вундыштчӧй Мӧисей Индӧд серти, онӧ мездмӧй.
Павел да Варнава паныд сувтісны налы да дыр вензисны накӧд. Сэки шуисны мӧдӧдны Павелӧс, Варнаваӧс да ас йӧзсьыс кодсюрӧӧс апостолъяс да юрнуӧдысьяс дінӧ Ерусалимӧ, медым тайӧ сёрнинас воны ӧти кывйӧ.
Вичкосянь мӧдӧдӧмаяс, Финикияті да Самарияті мунігӧн, висьтавлісны Ен дінӧ ентӧдтӧмъяслӧн бергӧдчӧм йылысь. Тайӧ юӧрсӧ кылӧмысь сэтчӧс вокъяс ставныс ёна нимкодясисны.
Ерусалимын апостолъяс да юрнуӧдысьяс став вичконас сибӧдісны воӧмаясӧс. Локтысьяс висьталісны ставсӧ, мый вӧчис на пыр Енмыс.
Сэки кодсюрӧ эскысьяс, кодъяс кутчысисны фарисейяслӧн велӧдӧмӧ, шуисны, мый ентӧдтӧмъяслы колӧ вундыштчыны да овны Мӧисей Индӧд серти.
Сэки апостолъяс юрнуӧдысьяскӧд чукӧртчисны, медым сёрнитны та йылысь.
Дыр вензьӧм бӧрын Петыр сувтіс да шуис налы: «Вокъяс, ті тӧданныд, мый Енмыс водзысяньыс бӧрйис менӧ миян пӧвстысь, медым менам вомсянь ентӧдтӧмъяс кылісны Евангелльӧсӧ да эскисны.
Сьӧлӧмтӧдысь Ен сетіс налы миянлы моз Вежа Ловсӧ, тайӧн петкӧдліс, мый Сійӧ сибӧдӧ найӧс.
Сылӧн син водзын миян да на костын абу некутшӧм торъялӧм, эскӧм понданыс Сійӧ весаліс налысь сьӧлӧмнысӧ.
Мыйла нӧ ті ӧні дӧзмӧданныд Енсӧ, кӧсъянныд сийӧсавны велӧдчысьясӧс? Тайӧ сийӧссӧ миян батьяс дай ми эгӧ вермӧй новлӧдлынысӧ.
Но ми эскам: Господь Исус Кристослӧн буралӧмсянь ми мездмам на моз».
Сэсся ставныс ланьтӧмӧн кывзісны Варнаваӧс да Павелӧс. А найӧ висьталісны, кыдзи Енмыс ентӧдтӧмъяс пӧвстын вӧчис на пыр шензьӧданаторъяс да петкӧдліс индысьпасъяс.
Налӧн сёрнитӧм бӧрын шыасис Яков: «Вокъяс, кывзӧй менӧ.
Симон висьталіс миянлы, мый Енмыс медводдзаысь бергӧдіс чужӧмбансӧ ентӧдтӧмъяслань, медым на пӧвстысь торйӧдны Аслыс войтырӧс.
Тадзи висьталӧны тшӧтш пророклӧн кывъясыс, ӧд гижӧма:
— Сэсся Ме бӧр бергӧдча да выльысь сувтӧда Давидлысь киссьӧм керкасӧ. Жугласьӧмасӧ лӧсьӧда, да выльпӧв сійӧс лэпта. Сэки кутасны корсьны Господьӧс мукӧд йӧз да быд войтыр, кодӧс Ме шуа Асламӧн.
Тадзи висьталӧ Господь, ставсӧ тайӧс Вӧчысь.
Нэмъяс пуксьытӧдзыс на Сійӧ тӧдіс став Ассьыс уджъяссӧ. Та вӧсна ме чайта, оз ков сьӧктӧдны Енлань бергӧдчӧм ентӧдтӧмъясӧс. Сӧмын колӧ гижны налы, медым видзасны асьнысӧ идоллы вайӧм пеж сёянысь, кырсалӧмысь, джагалӧм пемӧс яй сёйӧмысь да вир юӧмысь, нӧшта, мед оз вӧчны мукӧдыслы сійӧ, мый оз кӧсйыны аслыныс.
Мӧисейлысь Индӧдсӧ ӧд важысянь висьталӧны быд карын да быд шойччан лунӧ лыддьӧны синагогаын».
Сэки апостолъяс да юрнуӧдысьяс став вичкоыскӧд шуисны бӧрйыны ас пӧвстсьыныс вокъясӧс да мӧдӧдны найӧс Павелкӧд да Варнавакӧд Антиокияӧ. Бӧрйисны пыдди пуктана вокъясӧс: Иудаӧс, кодӧс шуисны Варсаваӧн, да Силаӧс. Накӧд ыстісны татшӧм гижӧд:
«Ми, апостолъяс, юрнуӧдысьяс да вокъяс, чолӧмалам тіянӧс, Антиокияын, Сирияын да Киликияын ентӧдтӧмъясысь бергӧдчӧм вокъясӧс.
Ми кывлім, мый кодсюрӧ миян йӧз шӧйӧвоштӧны тіянӧс асланыс велӧдӧмӧн, шуӧны, колӧ пӧ вундыштчыны да кутчысьны Индӧдӧ. Тадзи велӧднысӧ ми эгӧ тшӧктылӧй налы. Та вӧсна ми ӧтвылысь бӧрйим да шуим мӧдӧдны тіян дінӧ миян муса Варнавакӧд да Павелкӧд кодсюрӧӧс. Павел да Варнава вокъяс дасьӧсь олӧмнысӧ сетны миян Господь Исус Кристос вӧсна.
Накӧд ми мӧдӧдам Иудаӧс да Силаӧс, найӧ ставсӧ висьталасны.
Вежа Лов да ми тшӧтш огӧ кӧсйӧй сьӧктӧдны тіянӧс, тшӧктам вӧчны сӧмын коланасӧ.
Ми корам: видзӧй асьнытӧ идоллы вайӧм сёянысь, вир юӧмысь, джагалӧм пемӧс яй сёйӧмысь да кырсалӧмысь, и нӧшта: энӧ вӧчӧй мукӧдлы сійӧ, мый онӧ кӧсйӧй аслыныд.
Тайӧ тшӧктӧмъяс сертиыс кӧ оланныд, бур лоас.
Олӧй бура.»
Мӧдӧдӧмаяс мунісны Антиокияӧ. Сэні чукӧртісны эскысьясӧс да сетісны гижӧднысӧ.
Лыддьӧм бӧраныс эскысьяс ёна долыдмисны нимкодь юӧрысь.
Иуда да Сила вӧліны пророкъясӧн, найӧ ёна ышӧдісны да ёнмӧдісны вокъясӧс.
Мыйтакӧ кад олыштӧм бӧрын вокъяс бӧр мӧдӧдісны найӧс лӧнь сьӧлӧмӧн апостолъяс дінӧ.
Но Сила шуис кольччывны на сэтчӧ,
сэки Иуда ӧтнас муніс Ерусалимӧ.
Павел да Варнава олісны Антиокияын, велӧдісны да мукӧдыскӧд тшӧтш юӧртісны Господьлысь кывсӧ.
Кутшӧмкӧ кад мысти Павел шуис Варнавалы: «Мунам выльысь кытшовтам сійӧ каръяссӧ, кӧні ми висьтавлім Господьлысь кывсӧ, тӧдмалам, кыдзи олӧны миян вокъяс».
Варнава кӧсйис босьтны аскӧдыс Иоанӧс, кодӧс шуисны Маркӧн.
Но Павел паныд сувтіс, ӧд Марк коркӧ эновтіс найӧс Памфилияын, эз мун накӧд водзӧ ӧтвылысь вӧчны уджсӧ, мый вылӧ найӧс вӧлі мӧдӧдӧма.
Павел да Варнава весиг вензьӧмӧдз воисны да тадзикӧн торйӧдчисны.
Варнава босьтіс аскӧдыс Маркӧс да кывтіс сыкӧд Кипрӧ.
А вокъяс сетісны Павелӧс Енлӧн буралан киӧ. Сійӧ босьтіс аскӧдыс Силаӧс да муніс Сирия да Киликия муясӧ. Сэні ветлӧдліс да ёнмӧдіс вичкояс.
16 юр.
Павел воис Дервияӧдз, сэсся и Листраӧдз.
Сэні оліс Тимофей нима велӧдчысь. Мамыс сылӧн вӧлі юдей, эскысь ань, батьыс вӧлі грек. Листраын да Иконияын вокъяс бура сёрнитісны Тимофей йылысь.
Павел шуис босьтны Тимофейӧс аскӧдыс да вундыштіс сійӧс сэтчӧс юдейяс понда, ӧд найӧ тӧдісны, мый Тимофейлӧн батьыс грек.
Каръясті ветлігӧн найӧ висьтавлісны эскысьяслы апостолъяслысь да юрнуӧдысьяслысь Ерусалимын шуӧм тшӧктӧмъяссӧ да тшӧктісны овны на серти.
Вичкояс ёнмисны эскӧмас, эскысьяслӧн лыдыс лунысь-лун содіс.
Асияын Вежа Лов эз сет налы висьтавны Кывсӧ, та вӧсна найӧ мунісны Мисияӧ Фригия да Галатия муяс пыр.
Мисиясянь найӧ кӧсйисны мунны Вифинияӧ, но Вежа Лов эз лэдз.
Сэки Мисия пыр найӧ мунісны Троадаӧ.
Войнас Павел аддзылас Енсянь петкӧдчылӧм: македонияса морт сулалӧ сы водзын да корӧ, лок пӧ Македонияӧ да отсав миянлы.
Тайӧ петкӧдчылӧм бӧрас ми дзик пыр шуим мунны сэтчӧ. Ми гӧгӧрвоим: Господьным корӧ миянӧс висьтавны сэні Бур Юӧр.
Троадаысь ми кывтім веськыда Самофракияӧ, мӧд луннас Неапольӧ, сэсянь мунім Филипӧ.
Македониялӧн сэтчӧс юкӧнын тайӧ медводдза кар, сэтчӧ коркӧ овмӧдчылӧмаӧсь Римысь локтысьяс.
Сэні ми вӧлім кымынкӧ лун.
Шойччан лунӧ ми петім кар саяс да лэччим ю дорӧ, буретш сэтчӧ чукӧртчывлісны кевмысьны. Ми пуксим сэтчӧ локтысь аньяс дорӧ да пондім сёрнитны накӧд.
Сэні вӧлі Фиатираысь пурпур дӧраӧн вузасьысь Лидия нима ань, сійӧ оліс Енсьыс полӧмӧн.
Господь восьтіс сылысь сьӧлӧмсӧ сибӧдны Павеллысь кывъяссӧ, да сійӧ став гортсаыскӧд пыртчис.
Сэсся шуис миянлы: «Ті кӧ лыддянныд менӧ Господьлы эскысьӧн, пырӧй менам керкаӧ да олӧй ме ордын».
Сійӧ корӧмӧн корис миянӧс ас дорас.
Ӧтчыд кевмысьны муніганым паныдасис миянлы ӧти кесйӧг ань, код пытшкын вӧлі тунасян лов. Туналӧмнас сійӧ уна сьӧм вайис аслас ыджыдъяслы.
Тайӧ аньыс вӧтчис Павел да миян бӧрся да горзӧмӧн шуаліс: «Тайӧ йӧзыс Медвылысса Енлӧн кесйӧгъяс. Найӧ юӧртӧны миянлы, кыдзи мездмынысӧ».
Тадзи сійӧ вӧчис уна лун чӧж.
Павел скӧрмис таысь, сэсся ань дінӧ бергӧдчӧмӧн шуис тунасян ловлы: «Тшӧкта тэныд Исус Кристос нимӧн, пет сы пытшкысь».
И сійӧ дзик пыр петіс.
Кесйӧг аньлӧн ыджыдъяс аддзисны, мый воштісны озырмӧдчанторнысӧ, сэки босьтісны Павелӧс да Силаӧс да нуӧдісны йӧзаинӧ юралысьяс водзӧ.
Вайӧдісны юралысьяс дінӧ да пондісны мыжавны: «Тайӧ юдей йӧзыс шызьӧдӧны карнымӧс, велӧдӧны йӧзсӧ овны мӧд ног. Но миянлы, римса войтырлы, оз позь на ног овнысӧ».
Сэки йӧзыс накӧд тшӧтш сувтісны Павеллы да Силалы паныд. Юралысьяс тшӧктісны кучкавны найӧс бедьясӧн. Сэки нетшыштісны на вылысь паськӧмнысӧ да бура дыр кучкалӧм бӧрын шыбитісны найӧс дзескыдінӧ. Видзысьлы тшӧктісны, мед синсӧ оз лэдзлы на вылысь.
Пуксьӧдӧмаясӧс видзысь йӧртіс найӧс медпыдіас да топӧдіс кокъяснысӧ тшемилӧ костӧ.
Вой шӧр кадӧ Павел да Сила сьылісны да кевмысисны Енлы.
Мукӧд пукалысьяс кывзісны найӧс.
Тӧдлытӧг лои ыджыд му вӧрӧм, дзескыдінлӧн подулыс вӧрзис,
ӧдзӧсъяс воссисны, пукалысьяслӧн ки-коксьыныс кӧртӧдъяс разьсисны.
Пуксьӧдӧмаясӧс видзысь садьмис да аддзис, мый ӧдзӧсъяс восьсаӧсь. Сэки перйис шыпуртсӧ да кӧсйис вины асьсӧ, чайтіс, мый пышйӧмаӧсь ставныс.
Павел горӧдіс: «Нинӧм эн вӧч аскӧдыд. Ми ставным танӧсь».
Видзысь корис би, котӧрӧн пырис Павел да Сила дінӧ да тіралӧмӧн уськӧдчис на водзӧ. Сэсся петкӧдіс найӧс ортсӧ да шуис:
«Бур йӧзӧй, мый меным вӧчны, мед мездмыны?»
Найӧ воча шуисны: «Эскы Господь Исус Кристослы, сэки мездман тэ да став тэнад гортсаыд».
Сэсся вокъяс висьталісны сылы да сылӧн гортсаыслы Господьлысь кывъяссӧ.
Сійӧ войнас видзысь петкӧдіс вокъясӧс дзескыдінысь да мыськаліс налысь дойяссӧ, сэсся гортсаыскӧд дзик пыр пыртчис.
Сэсся вайӧдіс найӧс гортас да лӧсьӧдіс налы пызан. Аслас гортсакӧд сійӧ долыда нимкодясис, мый эскис Енлы.
Асывнас юралысьяс мӧдӧдісны отсасьысьяснысӧ висьтавны, мед лэдзасны пуксьӧдӧмаясӧс дзескыдінысь.
Видзысь висьталіс та йылысь Павеллы: «Юралысьяс тшӧктісны лэдзны тіянӧс.
Верманныд петны да мунны лӧня».
Павел шуис юралысьяслӧн отсасьысьяслы: «Миянӧс, римса йӧзӧс, найӧ мыждытӧг став йӧз водзас нӧйтісны да шыбитісны дзескыдінӧ, а ӧні кӧсйӧны гусьӧн лэдзны.
Огӧ петӧй. Мед асьныс локтасны да петкӧдасны миянӧс татысь».
Мӧдӧдӧмаяс висьталісны Павеллысь кывъяссӧ юралысьяслы. Юралысьяс повзисны, кор кылісны, мый найӧ римсаяс.
Сэсся локтісны да корисны налысь прӧща, а дзескыдінысь петкӧдігӧн корисны найӧс эновтны карнысӧ.
Дзескыдінысь петӧм бӧрын Павел да Сила мунісны Лидия ордӧ, сэні аддзысисны вокъяскӧд. Найӧс ышӧдӧм бӧрын мунісны карсьыс.
17 юр.
Павел да Сила мунісны Амфиполь да Аполония пыр Фессалоникаӧ. Сэні вӧлі юдейяслӧн синагога.
Павел, кыдзи и век, муніс сэтчӧ да куим шойччан лун дорвыв сёрнитіс йӧзыскӧд. Вежа Гижӧдъяс вылӧ подуласьӧмӧн гӧгӧрвоӧдіс да эскӧдіс найӧс, мый Кристослы колӧ вӧлі сьӧкыдсӧ нуны да ловзьыны. Павел шуис: «Тайӧ Кристосыс — Исус, Сы йылысь ме и висьтала тіянлы».
Кодсюрӧ на пиысь эскисны да ӧтувтчисны Павелкӧд да Силакӧд. Эскисны тшӧтш Енсьыс полысь грекъяс пиысь да тӧдчана аньяс пиысь унаӧн.
А юдейяс, кодъяс эз эскыны, тырины лӧглунӧн. Найӧ босьтісны аскӧдныс изэрд вылын весьшӧрӧ бовъялысь айуловӧс, чукӧртісны уна йӧзӧс да пондісны шызьӧдны карсӧ. Сэсся локтісны Ясон керкаӧ, корсисны сэтысь Павелӧс да Силаӧс, мед петкӧдны найӧс йӧз водзӧ, но эз аддзыны.
Сэки босьтісны Ясонӧс, нӧшта кодсюрӧ вокъясӧс да вайӧдісны карӧн веськӧдлысьяс дінӧ. Налы горзігтыр висьталісны: «Тайӧ йӧзыс, став муюгыдсӧ гудыртысьясыс, миянӧдз воисны. Ясон овмӧдӧма найӧс ас ордас. Найӧ ставныс торкалӧны кесарлысь тшӧктӧмъяссӧ, ӧксынас шуӧны мӧдӧс — Исусӧс».
Тайӧс кылӧмысь йӧзыс да карӧн веськӧдлысьяс шӧйӧвошисны.
Сэсся Ясонлы да мукӧд вокъяслы тшӧктісны вештысьны лэдзӧмсьыс, сӧмын та бӧрын лэдзисны.
Вокъяс сійӧ жӧ войнас мӧдӧдісны Павелӧс да Силаӧс Верияӧ. Сэтчӧ воӧм мысти Павел да Сила мунісны синагогаӧ.
Фессалоникасаяс дорысь татчӧс юдейяс вӧліны восьса сьӧлӧмаӧсь.
Найӧ сибӧдісны Кывсӧ став сьӧлӧмнас, быд лун лыддьысисны, видзӧдісны Гижӧдъясысь, збыльысь-ӧ ставыс тадз.
На пиысь унаӧн бергӧдчисны эскӧмас, эскисны тшӧтш грек войтырса айулов да пыдди пуктана аньяс пиысь унаӧн.
Кор Фессалоникаын юдейяс кылісны, мый Павел Верияын висьтавлӧ Енлысь Кывсӧ, локтісны сэтчӧ да пондісны шызьӧдны сэтчӧс йӧзсӧ.
Сэки вокъяс дзик пыр ыстісны Павелӧс саридз дорӧ, а Сила да Тимофей кольччисны карас.
Вокъяс колльӧдісны Павелӧс Афинӧдз да бӧр бергӧдчисны. Павел корис найӧс висьтавны, мед Сила да Тимофей кыдз позьӧ ӧдйӧджык локтасны сы дінӧ.
Павел виччысис вокъясӧс Афинын. Тайӧ карыс вӧлі тырӧма идолъясӧн. Кор Павел аддзис тайӧс, сійӧ ловнас пузис.
Синагогаын Павел ёна сёрнитіс юдейяскӧд да Енсьыс полысь мукӧд войтыркӧд. Быд лун сійӧ сёрнитіс йӧзыскӧд ывла вылын.
Кодсюрӧ философъяс, эпикура да стоика велӧдӧмӧ кутчысьысьяс, вензисны Павелкӧд.
Ӧтияс шуалісны, сійӧ пӧ нинӧм абусӧ сӧрӧ.
Мӧдъяс шуалісны, кутшӧмкӧ пӧ тӧдтӧм енъяс йылысь висьталӧ. Павел жӧ висьталіс налы Исус йылысь да кулӧмысь ловзьӧм йылысь.
Сэки босьтісны да вайӧдісны Павелӧс Ареопагӧ.
Сэні пондісны юасьны: «Вермам-ӧ ми тӧдны, мыйсяма выль велӧдӧм тэ висьталан?
Мыйкӧ тешкодьтор тэ тэчан миян пельясӧ.
Кӧсъям тӧдны, мый тайӧ».
Афинын олысьяс да сэтчӧ локтысь йӧз каднысӧ ёнджыка коллявлісны сёрнитӧмъясӧн, ёна радейтісны кывзыны мыйкӧ выльтор.
Павел сувтіс Ареопаг шӧрӧ да шуис: «Афинса войтыр.
Став сертиыс ме аддза, мый ті ёна юрбитысь йӧз.
Ветлӧдлігӧн ме видзӧдалі тіянлысь юрбитанінъястӧ да аддзи “тӧдтӧм енлы” гижӧда висьпуктанін.
Буретш тайӧ тӧдтӧм Ен йывсьыс, кодлы ті юрбитанныд, ме и висьтала.
Муюгыдсӧ да ставсӧ вӧчысь Ен, енэжыслӧн да муыслӧн Господь, оз ов киӧн вӧчӧм крамъясын. Сылы оз ков мортсянь отсӧг, Сылӧн ставыс эм. Сійӧ Ачыс сетӧ быдӧнлы олӧм, ловшы да ставсӧ.
Ӧти вирсянь Сійӧ вӧчис став мувывса йӧзсӧ да овмӧдіс найӧс му пасьтала, торйӧдіс налы муяс да индіс налысь олан кадъяс, мед найӧ корсисны Енсӧ, гашкӧ, кималасӧн корсьӧмӧн аддзасны Сійӧс, ӧд Сійӧ абу ылын миянысь быдӧнысь.
Сыӧн ми олам, Сысянь лолалам да Сы улын ветлам. Тіян гижысьяс кодсюрӧ весиг шулӧмаӧсь: “Ми ставным Сысянь чужысьяс”.
Ми кӧ Енсянь чужысьяс, миянлы оз ков ӧткодявны Енсӧ зарни, эзысь либӧ изйысь вӧчӧмторъяскӧд, мый мӧвпыштӧма ачыс мортыс да вӧчӧма аслас кужысь киясӧн.
Енмыс дыр кад чӧж терпитіс йӧзлысь гӧгӧрвотӧмлунсӧ. Ӧні Сійӧ тшӧктӧ быдлаын да быдӧнлы бергӧдчыны мыжъяссьыс.
Ӧд Сійӧ индіс лун, кор пондас веськыда мыждыны став муюгыдсӧ водзвыв индӧм Морт пыр, да вынсьӧдіс Ассьыс шуӧмсӧ быдӧнлы тӧдмӧн, кор ловзьӧдіс Сійӧс».
Кулӧмысь ловзьӧм йылысь кылӧм бӧрын ӧтияс пондісны серавны, мӧдъяс шуисны, та йылысь пӧ коркӧ мӧдысь тэнӧ кывзам.
Сэки Павел муніс на дінысь.
Кодсюрӧ эскисны да ӧтувтчисны Павелкӧд.
Тайӧ вӧліны Ареопагысь Дионисий, Дамарь нима ань да мукӧдъяс.
18 юр.
Сэсся Афинысь Павел муніс Коринфӧ.
Сэні паныдасис Акил нима юдейкӧд, коді чужлӧма Понтын, да сылӧн Прискилла гӧтырыскӧд. Найӧ регыд на вӧлі локтӧмаӧсь Италияысь, сы вӧсна мый Клавдий кесар тшӧктӧма став юдейыслы эновтны Рим.
Павел муніс на ордӧ да кольччис сэтчӧ, мед тшӧтш уджавны накӧд, ӧд сійӧ на моз жӧ вурис дӧрачомъяс.
Быд шойччан лунӧ Павел сёрнитіс синагогаын, ышӧдіс юдейясӧс да грекъясӧс эскыны.
Кор Сила да Тимофей локтісны Македонияысь, Павел ловнас кыліс, мый колӧ висьтавны юдейяслы, мый Исус — сійӧ Кристос.
Юдейяс сувтісны Павеллы паныд, пондісны омӧльтны сійӧс. Сэки Павел паськӧмсӧ пыркнитӧмӧн шуис:
«Тіян вирныд ас выланыд кольӧ, а ме сӧстӧм. Ӧні ме муна ентӧдтӧмъяс дінӧ».
Сэсся Павел муніс Юст ордӧ, сійӧ вӧлі Енсьыс полысь морт. Сылӧн керкаыс сулаліс синагогакӧд орччӧн.
Синагогаса юралысь Крисп став гортсаыскӧд эскис Господьлы.
Нӧшта унаӧн на Коринфын Павелӧс кывзӧм бӧрын тшӧтш эскисны да пыртчисны.
Войнас Господь петкӧдчис Павеллы да шуис: «Эн пов, водзӧ висьтав.
Ме тэкӧд, тэныд некод оз вӧч лёксӧ. Тайӧ карас Менам уна йӧз».
Павел кольччис сэтчӧ во да джын кежлӧ, велӧдіс да висьталіс йӧзыслы Енлысь Кывсӧ.
Кор Акайяын пуксис веськӧдлыны Галлион, юдейяс сёрнитчисны босьтны Павелӧс. Найӧ вайӧдісны Павелӧс ёрдӧ. Сэні шуисны, тайӧ мортыс пӧ велӧдӧ йӧзсӧ юрбитны Енлы оз Индӧд сертиным.
Павел кӧсйис шыасьны, но сэки Галлион шуис юдейяслы:
«Юдейяс. Вӧлі кӧ сёрниыс кутшӧмкӧ лёктор вӧчӧм йылысь, ме эськӧ тіянӧс кывзі.
А кор ті вензянныд кывъяс, нимъяс да асланыд Индӧд йылысь, ме тані абу ёрдысь. Асьныд сёрнитчӧй».
Сэсся вӧтліс найӧс ёрдысь.
Сэки грекъяс ставныс уськӧдчисны синагогаса юралысь Сосфен вылӧ да ёрд водзын чорыда нӧйтісны сійӧс, а Галлион весигтӧ эз видзӧдлы на вылӧ.
Павел бура дыр на оліс Коринфын. Сэсся вокъяскӧд колльӧдчӧм бӧрын кывтіс Прискилла да Акилкӧд Сирияӧ. Кенкреяын сійӧ шырис юрсӧ, ӧд сылӧн вӧлі Ен водзын кӧсйысьӧм.
Ефесӧ воӧм бӧрын Павел янсӧдчис Акилкӧд да Прискиллакӧд. Ачыс муніс синагогаӧ да сёрнитіс сэні юдейяскӧд.
Найӧ корисны Павелӧс олыштны на ордын дырджык на, но сійӧ эз кӧсйысь. Колльӧдчигас Павел шуис: «Меным быть колӧ лоны Ерусалимын гажӧдчан лунъяс дырйи.
Но Ен кӧ сетас, ме бара на вола тіян дінӧ».
Павел кывтіс Ефесысь Кесарияӧ, сэсянь муніс Ерусалимӧ да аддзысьліс сэні эскысьяскӧд, а сэсся нин муніс Антиокияӧ.
Сэні олыштӧм бӧрын бара петіс туйӧ, кытшовтіс Галатия да Фригия муяс, ёнмӧдіс сэні велӧдчысьясӧс.
Ефесӧ сэки локтіс Аполос нима юдей, ачыс чужлӧма Александрияын. Аполос кужис мичаа сёрнитны да зэв бура тӧдіс Гижӧдъяс.
Сійӧ сибӧдіс “Господь туй” йылысь велӧдӧмсӧ да сьӧлӧмсяньыс висьтавліс-велӧдіс Господь йылысь ставсӧ веськыда. Но ачыс тӧдіс сӧмын Иоанлысь пыртӧмсӧ.
Сійӧ повтӧг сёрнитіс синагогаын.
Акил да Прискилла сійӧс кывзӧм бӧрын корисны ас ордас да стӧчджыка висьталісны сылы Господьлӧн туй йылысь.
Кор Аполос мӧдӧдчис мунны Акайяӧ, вокъяс ышӧдісны сійӧс да гижисны сэтчӧс велӧдчысьяслы, медым сибӧдасны сійӧс. Акайяын Аполос Ен буралӧмсянь ёна отсаліс эскысьяслы. Став йӧз водзас сійӧ кужис венны юдейясӧс. Гижӧдъяс вылӧ мыджсьӧмӧн эскӧдіс найӧс, мый Исус — сійӧ Кристос.
19 юр.
Кор Аполос вӧлі Коринфын на, Павел вуджис керӧсвыв муяс пыр да локтіс Ефесӧ.
Сэтысь аддзис кодсюрӧ велӧдчысьясӧс да юаліс налысь: «Сибӧдінныд-ӧ ті Вежа Лолӧс эскӧм бӧраныд?»
Найӧ шуисны: «Ми весиг эгӧ на кывлӧй Вежа Лов йылысь».
Павел юаліс налысь: «Кутшӧм пыртчӧмӧн нӧ ті пыртчинныд?»
Найӧ вочавидзисны: «Иоан пыртчӧмӧн».
Павел шуис: «Иоан пыртіс найӧс, кодъяс бергӧдчисны мыжъяссьыныс, да висьталіс, медым эскасны сы бӧрся Локтысьлы, Исус Кристослы».
Тайӧс кылӧм бӧрын найӧ пыртчисны Господь Исус нимӧн.
Кор Павел пуктіс кисӧ на вылӧ, сэки лэччис на вылӧ Вежа Лов.
Найӧ пондісны сёрнитны мукӧд кывъяс вылын да пророкавны.
Ставныс найӧ вӧліны морт дас кык.
Куим тӧлысь чӧж Павел ветлӧдліс синагогаӧ да повтӧг сёрнитіс сэні, эскӧдӧмӧн висьтавліс Енлӧн Юралӧм йылысь.
Но эскӧм пыдди кодсюрӧ чорзьӧдчисны да став йӧз водзас омӧльтісны “Господь туй” йылысь велӧдӧмсӧ. Сэки Павел эновтіс тайӧ йӧзсӧ да велӧдчысьясыскӧд муніс на дорысь. Тайӧ кадсяньыс сійӧ быд лун сёрнитіс-велӧдіс Тиранлӧн велӧданінын.
Кык во чӧж Павел велӧдіс сэні. Тадзи Асияын став олысьыс, юдейяс и грекъяс, кылісны Господь Исус йылысь бурвисьталӧмсӧ.
Павел пыр Енмыс вӧчис уна шензьӧданатор. Павеллысь юр чышъянсӧ да мукӧд паськӧмсӧ пуктывлісны висьысьяс вылӧ, и найӧ дзик пыр бурдлісны да пеж ловъяс петалісны на пытшкысь.
Весиг ветлысь-мунысь юдей тунъяс пиысь кодсюрӧ пондісны вӧтлавны пеж ловъясӧс Господь Исус нимӧн. Шуалісны: «Пет. Тшӧктам Исус нимӧн, кодӧс висьталӧ Павел».
Тадзи тшӧтш вӧчисны юдейяслӧн Скева аркирейлӧн сизимнан пиыс.
Но пеж лов воча шуис: «Исусӧс бура тӧда, Павелӧс тшӧтш тӧда, а ті кодъяс?»
Сэсся пеж лолӧн кутӧм морт уськӧдчис на вылӧ ыджыд вынӧн да вирӧдз чашйис найӧс. Дзик пасьтӧгныс налы ковмис пышйыны сійӧ керкасьыс.
Та йылысь тӧдмалісны Ефесын ставныс, юдейяс и грекъяс.
Ыджыд полӧм босьтіс ставнысӧ, найӧ пондісны ошкыны Господь Исуслысь нимсӧ.
Унаӧн эскӧм бӧраныс волісны да висьтасисны асланыс лёк уджъясысь.
Тшыкӧдчысьяс пиысь унаӧн вайисны небӧгъяснысӧ да став йӧз водзас сотісны.
Небӧгъяслӧн доныс, артыштісны да, ветымын сюрс эзысь лои.
Тадзи ыджыд вынӧн паськаліс да зумыда вужъясис Господьлӧн кывйыс.
Тайӧ лоӧмторъяс бӧрын Павел кыліс ловнас, мый сылы колӧ мунны Македония да Акайя пыр Ерусалимӧ. Сэсся шуис Ерусалим бӧрын ветлыны Римӧ.
Тимофейӧс да Ерастӧс, ассьыс отсасьысьясӧс, сійӧ мӧдӧдіс Македонияӧ, ачыс кольччыліс на Асияӧ.
Сійӧ кадӧ “Господь туй” йылысь велӧдӧм понда ыджыд зык кыптіс. Ефесын оліс эзысьӧн вӧчасьысь Димитрий. Сійӧ вӧчаліс эзысьысь Артемида крам серпаса киӧн вӧчӧмторъяс да аслас уджалысьяслы бура мынтысис. Сійӧ чукӧртіс ассьыс уджалысьяссӧ, корис нӧшта мукӧд вӧчасьысьясӧс да шуис:
«Ёртъяс, ті тӧданныд, мый тайӧ уджыс вайӧ миянлы уна сьӧм.
Ті асьныд аддзанныд да кыланныд, мый вӧчӧ тайӧ Павелыс. Сійӧ висьтавлӧ, киӧн вӧчӧмторъясыд пӧ абу енъяс, и уна йӧзӧс нин эскӧдіс Ефесын да став Асияын.
Мыйкӧ колӧ вӧчны миянлы. Артемида енлысь крамсӧ кӧ кутасны нинӧм туйӧ пуктыны, миян уджным лоас ковтӧм. Миян ыджыд енным, кодӧс ыдждӧдлӧ став Асия да став муюгыдыс, вермас воштыны нималӧмсӧ».
Тайӧс кылӧм бӧрын чукӧртчысьяс тырины скӧрлунӧн да пондісны горзыны: «Ефесса Артемида — медыджыдыс.»
Карыс ставнас шызис.
Йӧзыс котӧртісны ывлавыв театрӧ да вайӧдісны сэтчӧ македонияса Гайӧс да Аристаркӧс, Павелкӧд локтысьясӧс.
Павел тшӧтш кӧсйис мунны сэтчӧ, но велӧдчысьяс эз лэдзны сійӧс.
Весиг асияса веськӧдлысьясысь кодсюрӧ, Павеллӧн ёртъясыс, мӧдӧдісны висьтавны, мед сійӧ весиг оз петкӧдчыв сэні.
Чукӧртчӧм йӧз ставныс вӧлі ёна шызьӧмаӧсь: ӧтияс горзісны ӧтитор, мӧдъяс — мӧдтор. Унджыкыс весиг эз тӧд, мыйла и локтісны.
Сэні вӧліны тшӧтш юдейяс. Найӧ мырдӧн тшӧктісны Ӧльӧксандрлы петны йӧз водзӧ.
Ӧльӧксандр сетіс кинас пас, мед ланьтасны, да кӧсйис нин сёрнитны.
Но кор йӧзыс тӧдмалісны, мый сійӧ юдей, ӧти вомӧн горӧдісны да кык час чӧж ӧтарӧ горзісны: «Ефесса Артемида — медыджыдыс.»
Йӧзсӧ ӧлӧдӧм бӧрын карса кывкутысь шыасис: «Ефесса войтыр.
Быдӧн тӧдӧ, мый Ефес кар видзӧ-дӧзьӧритӧ ыджыд Артемида енлысь крамсӧ да енэжсянь усьӧм сылысь изсерпассӧ.
Таысь некод оз вермы соссьыны. Та вӧсна лӧньӧй, энӧ лоӧй юртӧм петукъяс кодьӧсь.
Мыйла тайӧ кыксӧ вайӧдінныд? Найӧ эз гусясьны Артемида крамын, эз омӧльтны тіянлысь ентӧ.
Димитрийлӧн да сылӧн вӧчасьысьяслӧн кӧ эм норасьӧм кодкӧ вылӧ, мед шыасясны ёрдӧ да веськӧдлысьяс дінӧ, мед на водзын норасясны ӧта-мӧдныс вылӧ.
Тіян кӧ эм кутшӧмкӧ мӧд помка, сэки чукӧртасны йӧзӧс да видлаласны миян индӧд серти.
Тайӧ шызьӧмсӧ лэптӧмысь миянӧс ставнымӧс ӧні вермасны мыждыны. Миянлы весиг нинӧмӧн дорйысьнысӧ, ӧд помкаыс некутшӧм абу».
Сёрнитӧм бӧрас карса кывкутысь тшӧктіс разӧдчыны йӧзыслы.
20 юр.
Шызьӧм помасьӧм бӧрын Павел чукӧртіс велӧдчысьяссӧ да ышӧдіс найӧс. Сэсся кольӧдчӧм бӧрын мӧдӧдчис Македонияӧ.
Мунігас быдлаын ышӧдіс-ёнмӧдіс эскысьясӧс. Сэсся локтіс Грецияӧ да оліс сэні куим тӧлысь.
Павел кӧсйӧ нин вӧлі кывтны Сирияӧ, но кор тӧдмаліс, мый юдейяс сёрнитчӧмаӧсь вины сійӧс, бӧрсӧ шуис мунны Македония пыр.
Асияӧдз Павелӧс колльӧдісны Верияысь Пирлӧн Сосипатр пиыс, Фессалоникаысь Аристарк да Секунд, Дервияысь Гай, Тимофей да Асияысь Тихик Трӧпимкӧд.
Найӧ водзджык мунісны Троадаӧ да виччысисны миянӧс сэні.
Ми Шомтӧм нянь сёян лунъяс бӧрын петім Филип карысь да вит лунӧн воӧдчим на дінӧ Троадаӧ. Сэні олім вежон чӧж.
Вежонса медводдза лунӧ сэтчӧс велӧдчысьяс чукӧртчисны нянь чегны. Павеллы аскинас колӧ вӧлі петны туйӧ, та вӧсна сійӧ дыркодь сёрнитіс накӧд. Сёрниыс нюжаліс вой шӧрӧдз.
Вылі судтаас, кӧні ми пукалім, бура уна би ӧзйис.
Ӧшинь вылас пукаліс Евтик нима том морт. Павеллӧн дыр сёрнитӧмысь сійӧ чорыда унмовсис да ун йывсьыс усис коймӧд судтасяньыс. Муысь лэптігӧн аддзисны, мый сійӧ кулӧма.
Павел лэччис, водіс том морт вылӧ, шымыртіс сійӧс да шуис: «Энӧ шогсьӧй, лолыс сылӧн абу петӧма».
Сэсся Павел бӧр кайис вылі судтаас. Нянь чегӧм бӧрын сійӧ сёйыштіс да бура дыр на, югдытӧдзыс, сёрнитіс велӧдчысьяскӧд, сэсся муніс.
А том мортӧс ёна нимкодясьӧмӧн колльӧдісны гортас дзоньвидзаӧн.
Сэсся ми пуксим корабль вылӧ да кывтім Ассӧ, медым босьтны сэтысь Павелӧс.
Сійӧ ачыс тадзи тшӧктіс, шуис, мый локтас сэтчӧ подӧн.
Ассын аддзысьӧм бӧрын ми босьтім Павелӧс да кывтім Митилинаӧ.
Сэсянь мӧдӧдчим бара водзӧ. Лун мысти ми кывтім нин Киос дінті. Сэсся мӧд луннас ми вуджим Самосӧ, кысянь мунім Трогилияӧ. Нӧшта лун мысти воим Милитӧ. Ми кывтім Ефесӧ сувтлытӧг, тадзи Павел шуис, мед Асияын эз ковмы воштыны кадсӧ. Сійӧ ёна тэрмасис, мед эськӧ Ветымынӧд лун кежлӧ воӧдчыны Ерусалимӧ.
Милитсянь Павел ыстіс юӧр, мед корны Ефесысь вичкоса юрнуӧдысьясӧс. Ефесысь воӧмаяслы сійӧ шуис:
«Ті асьныд тӧданныд, медводдза лунсяньыс Асияӧ воӧмсянь ме пыр вӧлі тіянкӧд. Ме кесъялі Господьлы рам сьӧлӧмӧн да синва сорӧн, кор ёна сьӧкыдалі юдейяссянь.
Йӧз водзын да тіян гортъясын велӧдігӧн ме висьталі тіянлы став коланасӧ. Висьталі юдейяслы и грекъяслы, мед бергӧдчасны мыжъяссьыныс Ен дінӧ да эскасны миян Господь Исус Кристослы.
Ӧні Лов нуӧдӧм серти ме муна Ерусалимӧ. Мый менӧ виччысьӧ сэні, ме ог тӧд.
Тӧда сӧмын, Вежа Лов быд карын эскӧдӧ, мый дзескыдін да сьӧкыдлунъяс виччысьӧны менӧ.
Ме нинӧм вылӧ ог видзӧд, меным олӧмӧй абу дона.
Сӧмын кӧсъя долыд сьӧлӧмӧн помӧдз мунны лӧсьӧдӧм туйӧдыс да помавны кесъялӧмӧс, Господь Исуслысь тшӧктӧмсӧ — висьтавны Енлӧн буралӧм йылысь Евангелльӧсӧ.
Ӧні ме тӧда: ті, кодъяс пӧвстын ме олі да висьтавлі Енлӧн Юралӧм йылысь, онӧ нин аддзылӧй менсьым чужӧмӧс.
Та вӧсна талун шуа тіянлы: кодкӧ вошас кӧ туй вывсьыс, ме абу мыжа.
Ме ӧд ланьтлытӧг висьтавлі тіянлы Енлысь став кӧсйӧмсӧ.
Тӧждысьӧй ас вӧснаныд да став чукӧрыс вӧсна. Ӧд Вежа Лов пуктіс тіянӧс, мед видзны Господь Енлысь Вичкосӧ. На вӧсна Сійӧ мынтысис Аслас Вирӧн.
Ме тӧда: менам мунӧм бӧрын пырасны тіян пӧвстӧ горш кӧинъяс да пондасны усьласьны чукӧрныд вылӧ.
Весиг тіян пӧвстысь петасны йӧз, кодъяс пондасны мӧдарӧ велӧдны да кыскыны ас бӧрсяыс велӧдчысьясӧс.
Та вӧсна лоӧй дасьӧсь да энӧ вунӧдӧй, кыдзи ме куим во чӧж лун и вой синва сорӧн дугдывтӧг велӧді быдӧнӧс тіянӧс.
Ӧні, вокъяс, коля тіянӧс Енкӧд да Сылӧн буралан кывйыскӧд. Тайӧ кывйыс вермӧ ёнмӧдны тіянӧс да сетны тіянлы кӧсйысьӧмасӧ, мый вичмас став вежа войтырлы.
Ме некодсянь эг виччысь эзысь-зарни либӧ кӧм-пась.
Ті асьныд тӧданныд: ме ас киясӧн уджалі, медым аслам да тшӧтш ёртъяслӧн вӧлі став коланаыс.
Ме быдторйын петкӧдлі тіянлы, мый татшӧм ногӧн — уджалӧмӧн да Господь Исуслысь кывъяссӧ тӧд вылын кутӧмӧн — колӧ тӧждысьны вынтӧмъяс вӧсна.
Сійӧ Ачыс шуліс: “Босьтӧм дорысь бурджык сетны”».
Тайӧс шуӧм бӧрын Павел сувтіс пидзӧс вылас да ставныскӧд кевмысис.
Ставныс кутісны бӧрдны да Павеллы сьылі вылас уськӧдчӧмӧн окавны сійӧс. Торъя нин шогсисны Павеллӧн шуӧм кывъясысь, мый найӧ оз нин аддзывны сійӧс.
Сэсся колльӧдісны Павелӧс корабль вылӧ.
21 юр.
Янсӧдчӧм бӧрын ми веськыда кывтім Косӧ, мӧд луннас Родосӧ, сэсся Патараӧ. Сэні ми аддзим Финикияӧ мунысь корабль, пуксим сы вылӧ да кывтім водзӧ.
Ми кывтім Кипр дінті, сійӧ коли шуйгавылас. Сэсся воим Сирияӧ да сувтім Тирӧ, кӧні колӧ вӧлі ректыны корабльсӧ.
Сэні ми корсим велӧдчысьясӧс да олім на дінын вежон.
Найӧ Вежа Ловсянь ышӧдӧмӧн висьталісны Павеллы, медым сійӧ эз мун Ерусалимӧ.
Вежон мысти ми бара петім туйӧ.
Ставныс гӧтыръясныскӧд да челядьныскӧд колльӧдісны миянӧс кар сайӧдзыс.
Сэні вадорас ми сувтім пидзӧсъяс вылӧ да кевмысим.
Янсӧдчӧм бӧрын ми сӧлім корабль вылӧ, а колльӧдысьяс мунісны гортаныс.
Тирсянь ми кывтім Птолемаидаӧ, тані помасис миян кывтӧмным. Сэні аддзысим вокъяскӧд да кольччим на ордӧ ӧти лун кежлӧ.
Аскинас ми, Павелкӧд ветлысьяс, мунім сыкӧд Кесарияӧ. Сэні пырим буръюӧртысь Филип ордӧ да кольччим сэтчӧ. Филипӧс вӧлі бӧрйӧма Ерусалимын сизим отсасьысь лыдӧ.
Сылӧн вӧлі нёль ныв, ставныс найӧ пророкалісны.
Уна лун ми вӧлім на дінын.
Сійӧ кадӧ локтіс Юдеяысь Агав нима пророк. Кор сійӧ пырис миян дінӧ, босьтіс Павеллысь тасмасӧ да кӧрталіс ассьыс ки-коксӧ, сэсся шуис: «Тадзи висьталӧ Вежа Лов: тайӧ тасма новлысьсӧ юдейяс тадзи жӧ кӧрталасны Ерусалимын да сетасны ентӧдтӧмъяс киӧ».
Тайӧс кылӧм бӧрын сэтчӧс эскысьяскӧд ми ставным корим, медым Павел эз мун Ерусалимӧ.
Павел воча шуис: «Мый ті бӧрданныд, менсьым сьӧлӧмӧс дойдаланныд?
Ме дась лоны кӧрталӧмаӧн, весиг дась кувны Ерусалимын Господь Исус ним вӧсна».
Павелӧс кутны ми эгӧ вермӧй, сэки лӧнь сьӧлӧмӧн шуим: «Мед лоас Господьлӧн кӧсйӧм серти».
Та бӧрын ми лӧсьӧдчим туйӧ да мӧдӧдчим Ерусалимӧ.
Колльӧдігмоз миянкӧд тшӧтш мунісны Кесарияысь кодсюрӧ велӧдчысьяс. Найӧ вайӧдісны миянӧс кипрса Мнасон дінӧ, медым сувтны сы ордӧ. Мнасон важысянь нин вӧлі велӧдчысьяс лыдын.
Кор ми воим Ерусалимӧ, вокъяс нимкодя сибӧдісны миянӧс.
Аскинас ми Павелкӧд мунім Яков дінӧ, кытчӧ локтісны тшӧтш вичкоса юрнуӧдысьяс.
Найӧс чолӧмалӧм бӧрын Павел сьӧрсьӧн-бӧрсьӧн висьтавліс ставсӧ, мый Енмыс вӧчис ентӧдтӧмъяс пӧвстын сылӧн кесъялӧм пыр.
Павелӧс кывзӧм бӧрын юрнуӧдысьяс ошкисны Енмӧс, сэсся шуисны: «Тӧдан, вокӧй, юдейяс дас сюрсъясӧн бергӧдчисны эскӧмас, и ставныс найӧ кутчысьӧны Индӧдӧ.
Тэ йылысь найӧ кывлӧмаӧсь, тэ пӧ ентӧдтӧмъяс пӧвстын олысь юдейясӧс велӧдан эновтчыны Мӧисей Индӧдысь, ӧлӧдан найӧс пияннысӧ вундыштӧмысь да батьяслӧн оласногӧ кутчысьӧмысь.
Мый нӧ кутам вӧчны?
Збыльысь ӧд йӧзыд чукӧртчасны, кор тӧдмаласны тэнсьыд локтӧмтӧ.
Вӧч, кыдзи ми шуам.
Миян пӧвстын эм нёль морт, кодъяс кыв сетӧмаӧсь Ен водзын.
Босьт найӧс аскӧдыд да сӧстӧммӧдчы накӧд. Мынтысь на вӧсна, мед шырасны юрнысӧ. Сэки ставныс тӧдмаласны, мый тэ кутчысян Индӧдӧ, да тэ йылысь кывлӧмторйыс абу збыль.
А эскӧмӧ бергӧдчӧм ентӧдтӧмъяслы ми гижлім, мед видзасны асьнысӧ идоллы вайӧм сёянысь, вир юӧмысь, джагалӧм пемӧс яй сёйӧмысь да кырсалӧмысь. Мукӧд тшӧктӧмас налы оз ков кутчысьны».
Сэки Павел босьтіс аскӧдыс тайӧ йӧзсӧ да мӧд луннас сӧстӧммӧдчис накӧд. Сэсся муніс крамӧ да висьталіс, кор помасясны налӧн сӧстӧммӧдчан лунъясыс да кор лоӧ вайӧма быдӧн вӧсна вись.
Сизимӧд луннас, сӧстӧммӧдчӧм помасигӧн Асияысь воӧм юдейяс аддзисны Павелӧс крамысь. Найӧ шызьӧдісны став йӧзсӧ да Павелӧс босьтігӧн горзісны: «Израиль войтыр, отсалӧй босьтны тайӧ мортсӧ.
Сійӧ быдлаын велӧдӧ-сёрнитӧ миян войтырлы паныд, Индӧдлы паныд да тайӧ вежаиныслы паныд.
Весиг грекъясӧс вайӧдӧма татчӧ, пежалӧ вежаинсӧ».
Та водзвылын найӧ аддзылӧмаӧсь карсьыс Павелӧс Ефесысь воӧм Трӧпимкӧд. Найӧ чайтісны, мый Павел сыкӧд локтіс крамӧ.
Став карыс шызис, йӧзыс локтӧмӧн локтіс.
Павелӧс босьтісны да кыскисны крамсьыс ортсӧ, ӧдзӧсъяссӧ дзик пыр йигналісны.
Павелӧс кӧсйисны нин вины, но буретш сэки сюрсӧн веськӧдлысьлы кывсис, мый став Ерусалимыс шызьӧма.
Сійӧ дзик пыр босьтіс аскӧдыс шыпуртаясӧс, сёӧн веськӧдлысьясӧс да тэрмасьӧмӧн локтіс чукӧртчӧминӧ.
Кор йӧзыс аддзисны сюрсӧн веськӧдлысьӧс шыпуртаяскӧд, дугдісны нӧйтны Павелӧс.
Сюрсӧн веськӧдлысь матыстчис Павел дінӧ, сэсся тшӧктіс босьтны сійӧс да дорны чепъясӧн. Ачыс юасис, коді сійӧ да мый сійӧ вӧчис.
Ӧтияс ӧтитор горзісны, мӧдъяс — мӧдтор.
Йӧзлӧн горзӧмысь сюрсӧн веськӧдлысь нинӧм эз гӧгӧрво, та вӧсна тшӧктіс нуӧдны Павелӧс изкарӧ.
Содйӧд кайигӧн йӧзлӧн дзескӧдӧм вӧсна шыпуртаяслы ковмис нуны Павелӧс ки выланыс.
Йӧзыс вӧтчисны на бӧрся да горзісны: «Вины сійӧс.»
Изкарӧ пыригӧн Павел шуис сюрсӧн веськӧдлысьлы: «Позьӧ-ӧ меным сёрнитны тэкӧд?»
Мӧдыс шуис: «Тэ грек кыв тӧдан?
Абу-ӧ тэ сійӧ египетсаыс, неважӧн тай зык лэптіс да петкӧдіс овтӧминӧ нёль сюрс лёк вӧчысьӧс?»
Павел шуис: «Ме юдей, Киликияын нималана Тарс карысь.
Кора, лэдз меным кыв шуны йӧзыслы».
Павеллы лэдзисны сёрнитны. Павел сулаліс сод вылас, кисӧ лэптылӧмӧн корис лӧньны.
Кор йӧзыс ланьтісны, сійӧ пондіс сёрнитны накӧд еврей кыв вылын:
22 юр.
«Вокъясӧй да батьясӧй, кывзӧй. Ачымӧс дорйӧм могысь ме кӧсъя мыйкӧ шуны тіянлы».
Кор найӧ кылісны Павеллысь еврей кыв вылын шыасьӧмсӧ, чӧв ланьтісны.
Павел шуис: «Ме ачым юдей, чужи Киликияын Тарс карын, но быдми тайӧ карас. Гамалиил дорын менӧ велӧдісны батьяслӧн Индӧдӧ да тіян моз ме чорыда сулалі Ен дор.
Ме весиг виавмӧн вӧтлывлі “Господь туйӧд” мунысьясӧс, айуловӧс да аньясӧс кӧртавлӧмӧн пуксьӧдавлі дзескыдінӧ. Та йылысь вермас висьтавны ачыс аркирей пӧрысьяскӧд. Насянь менам вӧлі гижӧд Дамаскын олысь вокъяслы. Тайӧ гижӧднас ме муні сэтчӧ, медым кутавны Исуслы эскысьясӧс да вайӧдны найӧс Ерусалимӧ мыждыны.
Дамаскӧ воигӧн лун шӧр кадӧ виччысьтӧг енэжсяньыс кытшаліс менӧ югыд.
Ме уси муас да кылі шыасьӧм: “Савл, Савл, мыйла вӧтлан Менӧ?”
Ме юалі: “Коді Тэ, Господьӧй?”
Сійӧ шуис меным: “Ме Назаретса Исус, кодӧс тэ вӧтлан”.
Мекӧд локтысьяс кор аддзӧмаӧсь югыдсӧ, ёна повзьӧмаӧсь, а ме дінӧ шыасьӧмсӧ найӧ абу кывлӧмаӧсь.
Ме шуи: “Господьӧй, мый Тэ шуан меным вӧчны?”
Господь шуис: “Чеччы да мун Дамаскӧ, сэні висьталасны, мый тэныд вӧчнысӧ”.
Дзирдалана югыдсьыс менам синмӧй пемдіс. Та вӧсна мекӧд локтысьяс киӧд кутӧмӧн нуӧдісны менӧ Дамаскӧ.
Сэні ме дінӧ локтіс Ананий нима вежавидзысь да Индӧд серти олысь морт. Дамаскын олысь юдейяс пыдди пуктісны сійӧс. Ме дінӧ матыстчӧмӧн сійӧ шуис: “Савл вок. Мед аддзас тэнад синмыд.”
И ме дзик пыр аддзи сійӧс.
Сійӧ шуис меным: “Миян батьяслӧн Ен бӧрйӧма тэнӧ, медым тэ тӧдін Сылысь кӧсйӧмсӧ, аддзин Веськыда Олысьсӧ да кылін Сы вомсянь шуӧмсӧ. Та вӧсна тэ кутан юӧртны Сы йылысь став йӧзыслы, висьталан, мый тэ аддзылін да кывлін.
А ӧні эн нюжмась, чеччы да пыртчы. Господь нимӧ шыасьӧмӧн лэдз мыськавны ассьыд мыжъястӧ”. Сэсся ме бӧр локті Ерусалимӧ. Крамын кевмысигӧн ме быттьӧ ас садьысь петі да аддзи Господьӧс. Сійӧ шуис, тэрмасьӧмӧн пӧ пет Ерусалимысь, тані пӧ оз сибӧдны Ме йылысь тэнсьыд висьталӧмтӧ.
Ме шуи: “Господьӧй, найӧ ӧд тӧдӧны, мый ме ветлӧдлі синагогаысь синагогаӧ, пуксьӧдавлі Тэныд эскысьясӧс дзескыдінӧ да чорыда нӧйтлі найӧс. Тэ йылысь висьталысь Степанӧс виигӧн ме ачым вӧлі сэні, видзи виысьяслысь паськӧмсӧ да лыдди виӧмсӧ бурторйӧн”.
Господь шуис меным: “Мун, Ме мӧдӧда тэнӧ ылӧ ентӧдтӧмъяс дінӧ”».
Тайӧ кывъясӧдз кывзісны Павелӧс, сэсся пондісны горзыны: «Татшӧмсӧ колӧ бырӧдны му вывсьыс.
Сійӧс оз позь ловйӧн кольны.»
Йӧзыс ӧтарӧ горзісны, шенасисны паськӧмнаныс да коялісны кок увсьыныс буссӧ вывлань.
Сэки сюрсӧн веськӧдлысь тшӧктіс пыртны Павелӧс изкарӧ да нӧйтны орсӧн. Сэні кӧсйис тӧдмавны, мыйысь юдейяс татшӧмасӧ горзӧны сы вылӧ.
Кор Павелӧс кӧртавлісны тасмаясӧн, сійӧ шуис сёӧн веськӧдлысьлы: «Тіянлы ӧмӧй позьӧ мыждытӧгыс нӧйтны римса мортӧс?»
Тайӧс кылӧм бӧрын сёӧн веськӧдлысь матыстчис сюрсӧн веськӧдлысь дінӧ да шуис: «Тэ збыльысь кӧсъян нӧйтны тайӧ мортсӧ?
Сійӧ ӧд римса».
Сюрсӧн веськӧдлысь матыстчис Павел дінӧ да юаліс: «Висьтав, тэ римса?»
Павел вочавидзис: «Да».
Веськӧдлысь содтіс: «Ме ыджыд дон мынті, мед лоны римсаӧн».
Павел шуис сылы: «А ме чужи нин римсаӧн».
Сэки нӧйтысьяс дзик пыр вешйисны Павел дінысь.
А сюрсӧн веськӧдлысь кор тӧдмаліс, мый Павел римса, ёна повзис, мый кӧртавліс римсаӧс.
Сюрсӧн веськӧдлысь кӧсйис збыльысь тӧдмавны, мыйысь юдейяс мыжалӧны Павелӧс. Та вӧсна аскинас тшӧктіс разьны Павеллысь кӧртӧдъяссӧ да чукӧртны аркирейясӧс да став веськӧдлан котырсӧ. Сэсся петкӧдіс Павелӧс на водзӧ.
23 юр.
Павел сюся видзӧдліс веськӧдлан котыр вылӧ да шуис: «Вокъяс.
Тайӧ лунӧдзыс ме пыр олі Ен водзын сӧстӧм сьӧлӧмӧн».
Сэки Ананий нима аркирей тшӧктіс Павел дінын сулалысьӧс кучкыны сылы вомас.
Павел шуис сылы: «Тэнӧ Енмыс пондас нӧйтны, еджыдӧн мавтӧм стен.
Тэ пуксин мыждыны менӧ Индӧд серти, но ачыд Индӧдыслы паныд мунан, тшӧктан нӧйтны менӧ».
Сэні сулалысьяс шуисны Павеллы: «Енлысь аркирейӧс лёкӧдан?»
Павел воча шуис: «Ме эг тӧд, вокъяс, мый сійӧ аркирей.
Дерт, гижӧма: “Эн лёкӧд ас войтырлысь юралысьӧс”».
Веськӧдлан котырын вӧліны саддукейяс да фарисейяс. Тайӧс казялӧм бӧрын Павел гораа шыасис: «Вокъяс.
Ме ачым фарисей, фарисейлӧн пи.
Менӧ мыждӧны, кулӧмысь ловзьӧмӧ эска да».
Тайӧс кылӧм бӧрын фарисейяс да саддукейяс вензьыны пондісны, тадзи чукӧртчӧмаяс юксисны кык пельӧ.
Ӧд саддукейяс шуӧны, мый ловзьӧмыс абу, весиг анделъяс и ловъяс абуӧсь, а фарисейяс шуӧны, ставыс пӧ тайӧ эм.
Вензьысьяс лёкысь горзыны пондісны.
Сэки фарисейяс лыдысь Индӧдӧ велӧдысьяс сувтісны да шуисны: «Тайӧ мортыслысь ми нинӧм лёксӧ огӧ аддзӧй.
Гашкӧ, збыльысь сыкӧд сёрнитіс Лов либӧ андел. Вайӧ, огӧ пондӧй паныд мунны Енмыслы».
Но вензьӧмыс ӧтарӧ ӧддзис, сюрсӧн веськӧдлысь весиг повзис, мый косявласны Павелӧс. Та вӧсна тшӧктіс шыпуртаяслы босьтны Павелӧс веськӧдлан котыр водзысь да нуӧдны изкарӧ.
Сійӧ войнас Господь сувтіс Павел водзӧ да шуис: «Эн пов, Павел. Ӧні тэ Ерусалимын висьталін Ме йылысь, тадзи тэныд ковмас висьтавны тшӧтш Римын».
Асывнас юдейяс пӧвстысь кодсюрӧ ас костаныс сёрнитчӧмӧн сетісны кыв, мый Павелӧс витӧдз оз кутны сёйны ни юны.
Тадзи шуисны вӧчны нелямын сайӧ морт.
Найӧ локтісны аркирейяс да пӧрысьяс дінӧ да шуисны: «Ми кыв сетім Ен водзын: Павелӧс витӧдз воманым дзик нинӧм огӧ босьтӧй.
Ӧні тіянлы веськӧдлан котыркӧд колӧ юӧртны сюрсӧн веськӧдлысьлы, медым сійӧ аски вайӧдас Павелӧс тіян дінӧ. Шуӧй, мый ті кӧсъянныд бурджыка тӧдмавны, мыйысь сійӧс мыжалӧны.
А ми вайӧдігас виям Павелӧс».
Та йылысь кывліс Павел чойлӧн пиыс. Сійӧ муніс изкарӧ, пырис Павел дорӧ да ставсӧ висьталіс.
Сэки Павел корис сёӧн веськӧдлысьӧс да шуис: «Тайӧ том мортсӧ колӧ нуӧдны сюрсӧн веськӧдлысь дінӧ, сійӧ мыйкӧ кӧсйӧ висьтавны сылы».
Сёӧн веськӧдлысь вайӧдіс том мортӧс сюрсӧн веськӧдлысь дінӧ да шуис: «Миянын пукалысь Павел корис вайӧдны тайӧ том мортсӧ тэ дінӧ, сійӧ кӧсйӧ мыйкӧ висьтавны».
Сюрсӧн веськӧдлысь босьтіс том мортӧс киӧдыс, сэсся бокӧ вешйӧмӧн юаліс сылысь: «Мый тэ кӧсъян висьтавны?»
Сійӧ шуис: «Юдейяс сёрнитчӧмаӧсь корны тэнӧ, медым тэ аски вайӧдін Павелӧс веськӧдлан котыр водзӧ. Найӧ ылӧдласны, кӧсъям пӧ бурджыка тӧдмавны, мыйысь Павелыс мыжа.
Тэ найӧс эн кывзы.
На чукӧрысь нелямын сайӧ морт кыйӧдӧмӧн лӧсьӧдчӧны вины Павелӧс. Найӧ кыв сетӧмаӧсь, мый сійӧс витӧдз оз кутны сёйны ни юны.
Найӧ ӧні дасьӧсь нин, виччысьӧны сӧмын тэнсьыд шуӧмтӧ».
Сюрсӧн веськӧдлысь лэдзис том мортӧс да ӧлӧдіс: «Некодлы эн висьтав, мый тэ меным юӧртін тайӧс».
Сюрсӧн веськӧдлысь корис сёӧн веськӧдлысьясысь кыкӧс да шуис: «Дасьтӧй кыксё пода шыпуртаӧс, сизимдас верзьӧмаӧс да кыксё шы новлӧдлысьӧс. Ӧкмыс час рытын лоӧй дасьӧсь мӧдӧдчыны Кесарияӧ.
Павеллы тшӧтш дасьтӧй вӧвъяссӧ да лючки-бура вайӧдӧй сійӧс Феликс юралысь дінӧ».
Сюрсӧн веськӧдлысь мӧдӧдіс накӧд татшӧм гижӧд: «Пыдди пуктана Феликс юралысьӧс чолӧмалӧ Клавдий Лисий.
Юӧрта: тайӧ мортсӧ босьтісны юдейяс да кӧсйисны вины сійӧс. Кор ме тӧдмалі, мый сійӧ римса, муні шыпуртаяскӧд да мырдди сійӧс на киысь.
Нӧшта кӧсйи тӧдмавны, мыйысь сійӧс мыжалӧны. Тайӧ могнас нуӧді сійӧс налӧн веськӧдлан котыр водзӧ. Тӧдмалі да, вӧлӧмкӧ, мыжалӧны сійӧс асланыс Индӧд понда вензяна видзӧдласъясысь. Ме ог аддзы сылысь мыжсӧ, мыйысь эськӧ колӧ сійӧс пуксьӧдны дзескыдінӧ да вины.
Сэсся кывсис меӧдз, мый юдейяс кыйӧдӧмӧн лӧсьӧдчӧны вины тайӧ мортсӧ. Та вӧсна дзик пыр мӧдӧді сійӧс тэ дінӧ. Мыжалысьяслы тшӧкті тэ водзын висьтавны, мыйысь найӧ мыжалӧны сійӧс.
Ло дзоньвидза.»
Тшӧктӧм серти шыпуртаяс босьтісны Павелӧс да нуӧдісны войнас Антипатридаӧ.
Асьныс мӧд луннас бӧр локтісны изкарӧ, а Павелӧс верзьӧмаяскӧд мӧдӧдісны водзӧ.
Кесарияӧ воысьяс вайӧдісны Павелӧс сэтчӧс юралысь дінӧ да сетісны сылы гижӧдсӧ.
Сійӧс лыддьӧм бӧрын юралысь юаліс Павеллысь, кытысь сійӧ. Кор тӧдмаліс, мый Павел Киликияысь, шуис: «Кор локтасны тэнӧ мыжалысьяс, сэки кывза тэнӧ».
Сэсся тшӧктіс нуӧдны Павелӧс Ирӧдлӧн дзескыдінӧ.
24 юр.
Вит лун мысти локтісны Ананий аркирей да пӧрысьяс. Накӧд тшӧтш локтіс Тертул нима налӧн дорйысь. Локтысьяс асланыс мыжалӧмъясӧн шыӧдчисны юралысь дінӧ.
Павелӧс вайӧдӧм бӧрын Тертул сувтіс мыжавны:
«Пыдди пуктана Феликс. Быд кадӧ да быдлаын ми бур ногӧн казьтылам тэнӧ. Ми уджйӧзаӧсь тэныд миян лӧньлуна олӧмысь, тэнад тӧждысьӧмысь да войтырлысь олӧмсӧ бурмӧдӧмысь.
Ог кӧсйы ёна сьӧктӧдны тэнӧ, кора сӧмын лоны бур сьӧлӧмаӧн да дженьыдика кывзыштны миянӧс.
Ми аддзылім: тайӧ мортыс пежалӧ гӧгӧр да став му пасьтала шызьӧдӧ юдей войтырӧс. Сійӧ назаретса велӧдӧмӧ кутчысьысьяслӧн веськӧдлысь. Сійӧ кӧсйис пежавны крамнымӧс, таысь ми и босьтім сійӧс да кӧсйим мыждыны Индӧдным серти.
Но локтіс сюрсӧн веськӧдлысь Лисий шыпуртаяскӧд да мырддьӧмӧн-мырддис сійӧс миян киысь, сэсся мӧдӧдіс тэ дінӧ. Тшӧтш миянлы, сійӧс мыжалысьяслы, тшӧктіс локны татчӧ.
Тэ верман ачыд бура тӧдмавны ставсӧ, мыйысь ми мыжалам сійӧс».
Юдейяс сэні тшӧтш шуисны, дзик тадзи пӧ ставыс вӧлі.
Кор Феликс сетіс кыв Павеллы, Павел воча шуис: «Ме тӧда, тэ уна во чӧж нин веськыда мыждан тайӧ муын олысьясӧс. Та вӧсна меным кокньыд тані дорйысьнысӧ.
Тэ верман ачыд тӧдмавны, мый дас кык лун сайын ме локті Ерусалимӧ, мед юрбитны Енлы.
Найӧ эз вермыны аддзывнысӧ, мед ме крамын вензи, синагогаын либӧ карын шызьӧді йӧзсӧ, та вӧсна оз вермыны подулавны ассьыныс мыжалӧмъяссӧ.
Но веськыда висьтала тэныд: ме кутчыся тайӧ велӧдӧмас, мый найӧ шуӧны пӧръясьӧмӧн, тадзи кесъяла миян батьяслӧн Енлы. Ме эска ставас, мый гижӧма Индӧдын да пророк гижӧдъясын. Тані пукалысь юдейяс моз ме тшӧтш лача кута Ен вылӧ, эска, мый лоӧ ловзьӧмыс, ловзясны веськыда олысьяс и лёк нога олысьяс. Менӧ мыжалысьяс ӧд тшӧтш тайӧс виччысьӧны.
Ме век зіля овны Ен водзын да йӧз водзын сӧстӧм сьӧлӧмӧн.
Уна во бӧрын ме локті Ерусалимӧ, медым ас войтырлы сетны чукӧртӧм сьӧм да вайны Енлы вись.
Менӧ аддзылісны крамысь сӧстӧммӧдчӧм бӧрын. Йӧз чукӧрыс да шызьӧмыс сэні матӧ эз вӧв.
Сэні вӧліны Асияысь кодсюрӧ юдейяс. Налы эськӧ колӧ вӧлі сувтны тэ водзӧ да мыжавны менӧ, дерт, вӧлі кӧ мыйысь?
Тайӧ йӧзыс мед асьныс висьталасны, кутшӧм мыж найӧ аддзисны менсьым, кор ме сулалі веськӧдлан котыр водзын. Ме сэні шуи налы: “Ті талун мыжаланныд менӧ сыысь, мый ме эска кулӧмаяслӧн ловзьӧмӧ”. Гашкӧ, тайӧ шуӧмсьыс ме мыжми на водзын».
Феликс бура тӧдіс “Господь туй” йылысь велӧдӧмсӧ. Ставсӧ кывзӧм бӧрын сёрнисӧ тупкис да шуис: «Кор сюрсӧн веськӧдлысь Лисий локтас, сэки шуа бӧръя кывсӧ».
Сёӧн веськӧдлысьлы тшӧктіс нуӧдны Павелӧс дзескыдінӧ да видзны сійӧс дзескӧдтӧг, лэдзны ёртъясыслы видлавны сійӧс да тӧждысьны сы вӧсна.
Кымынкӧ лун мысти Феликс локтіс Друзилла гӧтырыскӧд. Сылӧн гӧтырыс вӧлі юдей войтырысь. Феликс тшӧктіс вайӧдны Павелӧс, медым кывзыны Исус Кристослы эскӧм йылысь.
Но кор Павел висьталіс веськыда олӧм, асьтӧ кутӧм да локтана мыждӧм йылысь, Феликсӧс полӧм босьтіс. Сійӧ шуис: «Ӧні мун. Кад кӧ лоӧ, корла на».
Сійӧ виччысис Павелсянь, гашкӧ, сетас сьӧм, мед лэдзасны сійӧс.
Та вӧсна тшӧкыда корлывліс Павелӧс да сёрнитліс сыкӧд.
Кык во мысти Феликс пыдди юралысьӧ пуксис Порций Фест.
И медым шогмыны юдейяслы, Феликс колис Павелӧс дзескыдінӧ.
25 юр.
Юралысьӧ пуксьӧмсянь куим лун мысти Фест муніс Кесарияысь Ерусалимӧ.
Сэні аркирей да юдейяслӧн веськӧдлысьяс норасисны Павел вылӧ да корисны, мед Фест вӧчас налы буртор: тшӧктас вайӧдны Павелӧс Ерусалимӧ.
Ас костаныс найӧ сёрнитчисны, мый кыйӧдасны Павелӧс да вайӧдігас виасны.
Фест вочавидзис: «Павелӧс видзӧны Кесарияын, ме ачым сэтчӧ регыд муна.
Тіян пиысь тӧдчанаджыкъясыс мед мунасны мекӧд.
Сійӧ мортыс сайын кӧ збыльысь мыйкӧ эм, мед мыжаласны».
Лун кӧкъямыс-дас мысти Фест бӧр муніс Кесарияӧ.
Мӧд луннас пуксис ёрдӧ да тшӧктіс вайӧдны Павелӧс.
Кор сійӧс вайӧдісны, Ерусалимысь воӧм юдейяс Павелӧс кытшалӧмӧн пондісны чорыда мыжавны сійӧс унаторйысь, но подулавнысӧ эз вермыны.
Павел асьсӧ дорйӧм могысь шуис: «Ме некутшӧм мыж эг вӧч юдей Индӧдлы, крамлы да кесарлы паныд».
Мед бурӧн кольны юдейяс водзын, Фест шуис Павеллы:
«Кӧсъян-ӧ мунны Ерусалимӧ, мед сэні менам ёрд водзӧ сувтны?»
Павел шуис: «Ме сулала кесар ёрд водзын, тані колӧ менӧ мыждынысӧ.
Юдейяслы ме нинӧм лёксӧ эг вӧч, тэ ачыд тайӧс бура тӧдан.
Но ме кӧ мыжа вимӧн, ме дась кувны.
Абу кӧ мыжа, мыйысь тайӧ йӧзыс мыжалӧны менӧ, сідзкӧ, некод оз вермы сетны менӧ налы.
Ме кора кесарлысь мыждӧм».
Сэки аслас отсасьысьяскӧд сёрнитчӧм бӧрын Фест шуис: «Тэ корин кесарлысь мыждӧм, сідзкӧ, сувтан кесар водзӧ».
Кымынкӧ лун мысти локтісны Кесарияӧ Агриппа ӧксы да Вереника, мед чолӧмавны Фестӧс.
Найӧ олісны сы ордын уна кодь лун. Сэки Фест висьталіс ӧксылы Павел йылысь: «Тані пукалӧ морт, сійӧс Феликс кольӧма дзескыдінӧ. Ерусалимӧ ветлігӧн юдейяслӧн аркирейяс да пӧрысьяс норасисны меным сы вылӧ, корисны мыждыны сійӧс.
Ме шуи налы, мый римсаяс оз сетны вины мортӧс, кытчӧдз сійӧс оз сувтӧдны мыжалысьяс водзӧ, медым мортыс вермис паныд дорйысьны.
Кор найӧ локтісны татчӧ, ме дзик пыр мӧд луннас пукси ёрдӧ да тшӧкті вайӧдны тайӧ мортсӧ.
Мыжалысьяс сувтісны гӧгӧрыс. Ме виччыси, гашкӧ, кутшӧмкӧ лёкторйысь пондасны мыжавны, но тайӧс ме эг кыв насянь.
Найӧ вензисны асланыс эскӧм кузя да кутшӧмкӧ кувлӧм Исус понда. Но Павеллӧн висьталӧм серти, Сійӧ ловъя.
Та кузя ме эг вермы некодарӧ нинӧм шуны. Та вӧсна юалі Павеллысь, оз-ӧ сійӧ кӧсйы мунны Ерусалимӧ, медым сэні сувтны ёрд водзӧ.
Но Павел корис, мед сійӧс нуӧдасны кесар дінӧ. Сэтчӧ нуӧдтӧдз ме тшӧкті видзны сійӧс дзескыдінын».
Агриппа шуис Фестлы: «Ме тшӧтш кӧсъя кывзыштны тайӧ мортсӧ».
«Аски кывзыштан», — вочавидзис Фест.
Аскинас Агриппа да Вереника локтісны мичаа вӧччӧмӧн. Найӧ пырисны чукӧртчанінӧ сюрсӧн веськӧдлысьяскӧд да карса тӧдчана йӧзкӧд. Фест тшӧктіс вайӧдны Павелӧс,
сэсся шыасис: «Агриппа ӧксы да ставныд локтысьяс.
Ті асьныд аддзанныд тайӧ мортсӧ. Ерусалимын да тані юдейяс норасисны меным сы вылӧ, ӧти вомӧн горзісны, колӧ пӧ вины сійӧс.
Но ме эг аддзи мыжсӧ, мыйысь эськӧ позис вины сійӧс.
Сылӧн корӧм серти ме шуи мӧдӧдны сійӧс кесар дінӧ.
Меным весиг нинӧм гижнысӧ ыджыднымлы, та вӧсна вайӧді сійӧс тіян водзӧ. Торйӧн нин, Агриппа ӧксы, тэ водзӧ, медым тэнад донъялӧм бӧрын вӧлі, мый гижнысӧ.
Ме чайта, мывкыдтӧг лоӧ вӧчӧма, мӧдӧдам кӧ пуксьӧдӧм мортӧс мыжсӧ индытӧг».
26 юр.
Агриппа шуис Павеллы: «Тэ верман сёрнитны ас кузяыд».
Павел кисӧ лэптылӧм бӧрын заводитіс дорйысяна сёрнисӧ:
«Агриппа ӧксы.
Ме шуда, мый талун верма дорйысьны тэ водзын юдейяслӧн став мыжалӧмысь. Тэ ӧд бура тӧдан юдей войтырлысь оласногсӧ да налысь вензяна видзӧдлассӧ.
Та вӧсна кора тэнӧ терпитӧмӧн кывзыштны менӧ.
Менсьым олӧмӧс тӧдӧ став юдейыс, ӧд ме том кадсянь олі ас войтыр пӧвстын Ерусалимын.
Найӧ важысянь тӧдӧны менӧ. Ме вӧлі кутчысьӧма фарисейяслӧн чорыд велӧдӧмӧ да оласногӧ. Та йылысь, кӧсъясны кӧ, асьныс вермасны висьтавны.
Ӧні ме сулала ёрд водзын, сы вӧсна мый кута лача кӧсйысьӧмас, кодӧс Енмыс сетіс миян батьяслы. Тайӧ кӧсйысьӧмыслысь збыльмӧмсӧ лача кутӧмӧн виччысьӧны миян войтырлӧн дас кыкнан чужанкотырыс, лун и вой юрбитӧны Енлы.
Та вылӧ лача кутӧмысь и мыжалӧны менӧ юдейяс, Агриппа ӧксы.
Мыйла ті онӧ эскӧй, мый Енмыс вермӧ ловзьӧдны кулӧмаясӧс?
Ме ачым коркӧ быдногыс паныд муні Назаретса Исус нимлы. Чайті, тадзи и колӧ.
Тадзи вӧчлі Ерусалимын: ме босьті аркирейяссянь гижӧд да вежа войтырӧс унаӧс пуксьӧдалі дзескыдінӧ, ме вӧлі найӧс виӧм дор.
Ме унаысь чорыда нӧйтлі найӧс синагогаясын, медым найӧ омӧльтісны Исусӧс. Ме вӧлі тырӧма скӧрлунӧн, вӧтлыси на бӧрся весиг мукӧд каръясӧдз.
Та могӧн аркирейяс нимсянь ме муні Дамаскӧ. Лун шӧр кадӧ, кор ме вӧлі туйын на, аддзи, ӧксыӧй, енэжсяньыс лэччис югыд, сійӧ вӧлі шонді югӧрысь на яр.
Тайӧ югыдыс кытшаліс менӧ да мекӧд мунысьясӧс да ставным ми усим муас. Сэки ме кылі еврей кыв вылын ме дінӧ шыасьӧм: “Савл, Савл, мыйла вӧтлан Менӧ?
Сьӧкыд тэныд мунны ёсь зорлы паныд”.
Ме юалі: “Коді Тэ, Господьӧй?”
Сійӧ шуис: “Ме — Исус, кодӧс тэ вӧтлан.
Ӧні чеччы да сувт кок вылад.
Ме петкӧдчи тэныд, мед тэ кесъялін Меным да висьталін, мый тэ аддзылін да мый на Ме восьта тэныд. Ме видза тэнӧ аслад войтырысь да ентӧдтӧмъясысь, кодъяс дінӧ ӧні мӧдӧда тэнӧ, мед восьтны налысь синсӧ да бергӧдны найӧс пемыдсьыс югыдӧ, сӧтана кипод улысь Ен дінӧ, медым Меным эскӧмӧн найӧ босьтасны мыжъясысь прӧститӧмсӧ да вежа войтырлы Енсянь вичмӧдӧмасӧ”.
Та вӧсна, Агриппа ӧксы, ме эг кут паныд мунны енэжсянь петкӧдчылӧмлы.
Медводз Дамаскын да Ерусалимын, сэсся став Юдея му пасьтала, сэсся нин ентӧдтӧмъяслы висьтавлі, мед бергӧдчасны мыжъяссьыныс Енлань да олӧмнас петкӧдласны тайӧс.
Таысь юдейяс и босьтісны менӧ крамын да кӧсйисны вины.
Но Енмыс пыр на отсаліс меным тайӧ лунӧдзыс, та вӧсна ме ӧнӧдз сулала да висьтала быдӧнлы: прӧстӧй и чина йӧзлы. Висьтала сӧмын сійӧ, мый йылысь водзвыв висьтавлісны Мӧисей да пророкъяс. Найӧ висьталісны, мый Кристос сьӧкыда кулас и лоас медводдза Ловзьысьӧн, медым восьтны югыдсӧ юдей войтырлы да ентӧдтӧмъяслы».
Кор Павел тадзи дорйысис, Фест гораа шуис: «Тэ дзикӧдз йӧймӧмыд, Павел.
Ыджыд тӧдӧмлуныд вӧсна вежӧртӧ воштӧмыд».
Павел шуис: «Ме эг йӧймы, пыдди пуктана Фест.
Ме бур мывкыдсянь висьтала збыльсӧ.
Та йылысь бура тӧдӧ ачыс ӧксы, та вӧсна ме восьсӧн сёрнита сы водзын.
Эска, тайӧ сылы абу гусятор, ӧд ставыс тайӧ эз гусьӧн вӧчсьы, кӧнкӧ пельӧс сайын.
Эскан-ӧ, Агриппа ӧксы, пророкъяслы?
Тӧда, мый эскан».
Агриппа шуис Павеллы: «Зэв тай ӧдйӧ кӧсъян вӧчны менӧ Кристослы эскысьӧн».
«Ӧдйӧ ли, ог ли», — шуис Павел, — «но кевма Енлы, мед тэ да ставныс тані менӧ кывзысьяс лоинныд ме кодьӧсь, сӧмын тайӧ чепъястӧгыс».
Кор Павел помаліс сёрнисӧ, ӧксы чеччис, сы бӧрся тшӧтш чеччисны Фест юралысь, Вереника да мукӧдыс.
Муніганыс найӧ сёрнитісны ас костаныс: «Тайӧ мортыс абу мыжа, мед вины сійӧс либӧ видзны дзескыдінын».
Агриппа шуис Фестлы: «Позьӧ эськӧ вӧлі лэдзны сійӧс, эз кӧ кор кесарлысь мыждӧмсӧ».
27 юр.
Кор шуӧма вӧлі кывтны Италияӧ, Павелӧс да мукӧд пукалысьясӧс сетісны кесар полкын Юлий нима сёӧн веськӧдлысьлы.
Ми сӧлім Адрамитияысь кывтысь корабль вылӧ, сійӧ лӧсьӧдчис кывтны Асия муясті.
Миянкӧд тшӧтш вӧлі Фессалоникаысь македонияса Аристарк.
Мӧд луннас ми сувтім Сидонӧ.
Юлий вӧлі бур сьӧлӧма Павел дінӧ, лэдзис сылы ветлыны ёртъяс дінас да босьтны став коланаторсӧ туйӧ.
Сидонысь петӧм бӧрын паныда тӧлыс вӧсна миянлы ковмис кывтны Кипрӧ. Киликия да Памфилияті кывтігӧн ми вуджим саридзсӧ да воим Ликияӧ, Мира карӧ.
Сэні сёӧн веськӧдлысь аддзис Александрияысь Италияӧ кывтысь корабль да пуксьӧдіс миянӧс сы вылӧ.
Ми кывтім ньӧжйӧ уна лун чӧж, ӧдва воим Книд карӧдз. Паныда тӧлыс эз лэдз кывтны водзӧ, та вӧсна Салмонаті кытшовтӧмӧн пондім кывтны Крит пӧлӧн.
Вадор пӧлӧныс кывтӧмӧн ми сьӧкыдпырысь воӧдчим сідз шусяна “Бур Сувтанінӧ”. Тасянь матын вӧлі Ласея кар.
Уна кад ми сэні воштім, весиг Видзалан лун нин коли бӧрӧ, и татшӧм тӧланас водзӧ кывтны эз позь. Сэки Павел шыасис: «Войтырӧй, ме аддза, водзӧ кывтны лоас вывті сьӧкыд, вермам воштыны груз тыра корабльнымӧс, весиг ассьыным олӧмнымӧс».
Но сёӧн веськӧдлысь Павеллы дорысь ёнджыка эскис корабльвывса ыджыдыслы да корабль нуӧдысьлы.
Тӧвйыны тайӧ сувтанінас эз позь, та вӧсна унаӧн шуисны кывтны татысь, кыдзкӧ воӧдчыны Финик карӧдз да тӧвйыны сэні. Тайӧ критса ӧзыныс видзӧдіс рытыв-лунвывлань да рытыв-войвывлань.
Пӧльыштіс лун тӧв. Чайтісны, мый кывтӧмыс артмас, та вӧсна мӧдӧдчисны Крит пӧлӧн.
Регыд мысти асыв-войвывсянь кыпӧдчис ыджыд тӧвныр, сійӧ пӧльтіс ді вывсянь.
Корабль эз вермы водзсасьны тӧвныркӧд. Тӧвныр нетшыштіс да пондіс новлӧдлыны корабльнымӧс гыяс вывті.
Клавда ді весьтті кывтігӧн ми кыдзкӧ вермим видзны корабльлысь пыжсӧ.
Пыжсӧ лэптісны корабль вылӧ, а корабльсӧ кӧртавлісны гезъясӧн.
Тӧвдӧрасӧ лэдзисны, полісны, мед оз шыбит миянӧс ляпкыдінӧ. Тадзи ёна на новлӧдліс миянӧс.
Тӧвнырлӧн ланьтӧмыс эз на тыдав, та вӧсна мӧд луннас пондісны ректыны корабльсӧ саридзӧ. Коймӧд луннас шыблалім корабль вылысь весиг став кӧрта кӧлуйсӧ.
Уна лун чӧж эз петкӧдчыв шонді да эз тыдавны кодзувъяс, тӧвнырлӧн помыс эз тыдав. Миян воши став лача ловйӧн кольны.
Ми дыр кад олім сёйтӧг. Сэки Павел сувтіс на шӧрӧ да шуис: «Войтырӧй, колӧ вӧлі кывзыны менӧ да эз ков петны Критысь, сэки эськӧ эз су тіянӧс тайӧ сьӧкыдыс да лёкторйыс.
А ӧні кора, энӧ шогсьӧй. Тіян пиысь весиг ӧти ловъя лов оз вош, сӧмын корабльнымӧс воштам.
Тайӧ войнас петкӧдчыліс меным андел, сійӧс мӧдӧдіс Ен, кодлы ме сеті ачымӧс да кодлы ме кесъяла. Андел шуис: “Эн пов, Павел.
Тэныд ковмас на сувтны кесар водзӧ. Тэ вӧсна Енмыс тшӧтш видзас тэкӧд кывтысьясӧс”.
Энӧ шогсьӧй, войтыр. Ме эска Енмыслы да тӧда, анделлӧн шуӧмыс инас.
Миянӧс шыбитас кутшӧмкӧ ді вылӧ».
Дас нёль лун нин миянӧс новлӧдліс Адрия саридзті.
Вой шӧр гӧгӧрын корабльвывса уджалысьяс казялісны, мый кутшӧмкӧ му дінӧ матыстчам.
Видлісны джудждасӧ да, кызь сыв джуджда лои.
Муныштӧм бӧрын бара видлісны, дас вит сывйӧдз вӧлі ляпкалӧма.
Полісны изъяинӧ тшукӧмысь. Та вӧсна лэдзисны бӧжладорсяньыс нёль якӧр да ёна кевмисны, мед эськӧ югдытӧдзыс вермисны кутчысьны.
Но корабльвывса уджалысьяс шуисны пышйыны. Пондісны лэдзны корабль вылысь пыжсӧ саридзӧ, быттьӧ нӧшта кӧсйӧны чӧвтны якӧръяс нырладорсяньыс.
Сэки Павел шуис сёӧн веськӧдлысьлы да шыпуртаяслы: «Найӧ кӧ оз лоны корабль вылас, ті онӧ кольӧй ловйӧн».
Сэки шыпуртаяс керыштісны пыжлысь гезъяссӧ да пыжыс уси саридзӧ.
Асъядорыс Павел тшӧктіс ставныслы сёйыштны: «Ті дас нёль лун нин майшасьӧмныдла нинӧм энӧ сёйлӧй.
Колӧ сёйыштны, мед ловйӧн колинныд.
Тіян пиысь некодлӧн весиг юрси сі оз усь юр вывсьыныд».
Тайӧс шуӧм бӧрын босьтіс нянь, ставныслӧн син водзын Енмӧс аттьӧалӧмӧн чегис да пондіс сёйны.
Ставныс долыдмисны да тшӧтш пондісны сёйны.
Корабль вылас ми вӧлім кыксё сизимдас квайт морт.
Пӧттӧдзныс сёйӧм бӧрын пондісны шыблавны саридзӧ шобді мешӧкъяснысӧ, мед кокньӧдны корабльсӧ.
Кор дзикӧдз югдіс, тыдовтчис алькӧса куръя, муыс вӧлі тӧдтӧм. Шуисны пырны куръяас.
Якӧръяссӧ орйӧдлісны да вӧйтісны саридзӧ, личӧдісны веськӧдлан пелысъяслысь гезъяссӧ да тӧв ньылыдыс зэвтісны ичӧт тӧвдӧра. Тадзи ми сетчим вадорланьыс.
Сэсся веськалім ляпкыдінӧ да корабльным сибдіс.
Нырнас сатшис да некодарӧ эз вӧр, а бӧжыс гыяслӧн лёкысь швачкӧдӧмысь пондіс чуктавны-жугласьны.
Шыпуртаяс кӧсйисны нин вины пукалысьясӧс, медым вартчиганыс некод эз пышйы.
Но медым видзны Павеллысь олӧмсӧ сёӧн веськӧдлысь ӧлӧдіс шыпуртаясӧс тайӧ уджсьыс. Сійӧ медводз тшӧктіс шыбитчыны ваӧ вартчыны кужысьяслы да уйны вадорас.
Мукӧдыслы тшӧктіс воӧдчыны пӧвъяс отсӧгӧн либӧ кодлы мый сюрас корабль вывсьыс.
Тадзи ставныс петісны му вылӧ.
28 юр.
Ваысь петӧм бӧрын тӧдмалісны, вӧлӧмакӧ, Мальта ді.
Сэтчӧс олысьяс бура сибӧдісны миянӧс. Найӧ пестісны бипур да корисны миянӧс шонтысьны зэрысь-кӧдзыдысь.
Павел чукӧртіс росъяс да пуктіс бипур вылӧ. Сэки жара сотчысь биысь чепӧсйис змей да шашаритчис Павеллы киас.
Сэтчӧс олысьяс аддзисны Павел ки вылысь ӧшалысь змейӧс да шуалісны ӧта-мӧдныслы: «Тыдалӧ, сійӧ морт виысь, вӧйӧмысь кӧ мездмӧм бӧрын Водзӧсперйысьыс кӧсйӧ босьтны сылысь олӧмсӧ».
Но Павел кисӧ пыркнитӧмӧн шыбитіс змейӧс биӧ да сылы некутшӧм лёк эз ло.
Йӧзыс чайтісны, мый Павеллӧн киыс пыктас либӧ сійӧ шойӧн усяс му вылас.
Дыркодь виччысисны, мый лоӧ. Но кор аддзисны, мый сыкӧд нинӧм лёкыс эз ло, вежисны мӧвпнысӧ да шуалісны, сійӧ пӧ ен.
Сэні матын вӧлі діӧн веськӧдлысь Публийлӧн оланіныс.
Сійӧ нимкодьпырысь сибӧдіс миянӧс ас ордас да куим лун чӧж бура вердіс-юкталіс.
Сійӧ кадас Публийлӧн батьыс куйліс биа висьӧмӧн да кынӧм висьӧмӧн.
Павел пырис сы дінӧ, кевмысис да сы вылӧ кисӧ пуктылӧмӧн бурдӧдіс сійӧс.
Тайӧ лоӧмторйыс бӧрын ді вылысь тшӧтш мукӧд висьысьяс пондісны локны, и ставныс бурдісны.
Найӧ быдногыс аттьӧалісны миянӧс, муніганым весиг сетісны миянлы став коланаторсӧ.
Куим тӧлысь мысти Диоскур нима александрияса корабль вылын ми мӧдӧдчим водзӧ. Тайӧ корабльыс тӧвйис ді вылын. Ми воим Сиракузаӧ, сэні олім куим лун.
Сэтысь кывтӧм бӧрын воим Ригияӧ.
Лун мысти петіс лун тӧв, и мӧд луннас нин ми воим Путеолӧ. Сэтысь ми аддзим вокъясӧс, найӧ корисны миянӧс олыштны на ордын вежон. Та бӧрын сэсся мунім Римӧ.
Сэні вокъяс кывлӧмаӧсь миян локтӧм йылысь. Найӧ воча локтісны миянлы, ӧтияс Аппия вузасянінӧдз, мӧдъяс — “Куим шойччан керка” нима сиктӧдз.
Найӧс аддзӧм бӧрын Павел долыдмис да аттьӧаліс Енмӧс.
Римӧ воӧм мысти сёӧн веськӧдлысь сетіс пукалысьясӧс тышкайӧзӧн веськӧдлысьлы.
А Павеллы лэдзисны овны торйӧн сійӧс видзысь шыпуртакӧд.
Куим лун мысти Павел корис юдейяслысь веськӧдлысьясӧс. Кор найӧ чукӧртчисны, Павел шыасис на дінӧ: «Вокъяс, ме нинӧм эг вӧч ас войтырлы паныдсӧ да эг торк батьяслысь оласногсӧ. Но менӧ пуксьӧдісны Ерусалимын дзескыдінӧ да сетісны римсаяслы.
Найӧ кывзісны менӧ да эз аддзыны мыжсӧ, мед позис вины менӧ. Кӧсйисны весиг лэдзны, но юдейяс паныд сувтісны талы. Та вӧсна меным ковмис корны кесарлысь мыждӧм. Дерт, эг сы вӧсна, медым мыжавны мыйыськӧ ассьым войтырӧс.
Та понда ме и кӧсйи аддзӧдчывны да сёрнитыштны тіянкӧд, ӧд ме пукала сійӧ Мортыс вӧсна, код вылӧ Израиль кутӧ лачасӧ».
Юдейяслӧн веськӧдлысьяс шуисны: «Миянлы нинӧм эз гижлыны Юдеясянь, весиг вокъяс воліганыс нинӧм эз юӧртны да нинӧм лёксӧ эз висьтавлыны тэ йылысь.
Ми кӧсъям кывны, мый тэ ачыд мӧвпалан.
Ми тӧдам, мый тайӧ велӧдӧмыслы быдлаын паныд сувтӧны».
Урчитӧм лунӧ локтіс Павел ордӧ зэв уна йӧз.
Павел асывсяньыс рытӧдзыс висьтавліс налы Енлӧн Юралӧм йылысь. Мӧисей Индӧд да пророк гижӧдъяс вылӧ мыджсьӧмӧн эскӧдіс найӧс Исус йылысь.
Ӧтияс эскисны, мӧдъяс эз эскыны.
Тадзи найӧ ас костаныс эз вермыны воны ӧти кывйӧ. Муналігас Павел шуис налы татшӧм кывъяс: «Бура шулӧма Вежа Лов миян батьяслы Исай пророк пыр:
— Мун да висьтав тайӧ войтырыслы:
Пельнаныд кутанныд кывзыны да онӧ гӧгӧрвоӧй, синнаныд кутанныд видзӧдны да онӧ аддзӧй.
Чорзьӧма тайӧ войтырыслӧн сьӧлӧмыс, сьӧкыд пеляӧсь, куньса синмаӧсь. Аддзынысӧ оз зільны, кывзынысӧ оз кӧсйыны, сьӧлӧмнаныс оз гӧгӧрвоны. Мелань бергӧдчынысӧ оз кӧсйыны, медым Ме бурдӧді найӧс.
Тӧдӧй, Ен мӧдӧдӧма мездмӧмсӧ ентӧдтӧмъяслы, найӧ и кыласны».
Тайӧс кылӧм бӧрын юдейяс мунісны ас костаныс ёна вензьӧмӧн.
Аслас нянь-сов вылын Павел оліс сэні кык во чӧж да сибӧдліс ас дорас быдӧнӧс. Сійӧ повтӧг да восьсӧн висьтавліс волысьяслы Енлӧн Юралӧм йылысь да велӧдіс Господь Исус Кристос йылысь.
Апостол Яковлӧн мӧдӧдӧм гижӧд
1 юр.
Гижӧ Яков, Енлӧн да Господь Исус Кристослӧн кесйӧг. Чолӧмала дас кык чужанкотырӧс, кодъяс разалӧмаӧсь став му пасьталаыс.
Вокъяс, долыда нимкодясьӧй, кор тіянлы ковмас нуны быдпӧлӧс сьӧкыдсӧ. Ті ӧд тӧданныд: эскӧмӧн кӧ нуанныд сьӧкыдсӧ, ті лоанныд зумыдӧсь.
А зумыдлуныс мед вайӧдас ассьыс уджсӧ тіян пытшкын помӧдз, медым ті вӧлінныд дзоньнас тыр-бурӧсь, да тіян эз вӧв некутшӧм тырмытӧмтор.
Тіян пиысь кӧ кодлыкӧ оз тырмы мывкыдлуныс, мед корӧ Енмыслысь, и сылы лоӧ сетӧма. Ӧд Енмыс быдӧнлы сетӧ лышкыда да шуасьтӧг.
Сӧмын корӧй эскӧмӧн да майшасьтӧг. Ӧд майшасьысь морт — саридзвывса гы кодь, кодӧс кыпӧдӧ тӧвнырыс да новлӧдлӧ ӧтарӧ-мӧдарӧ.
Мортыс кӧ кык ногӧн мӧвпалӧ ӧтитор йывсьыс, сійӧ нинӧм оз вӧч зумыдпырысь.
Татшӧм мортыс мед оз чайт босьтны мыйкӧ Енсяньыс.
Гӧль вок мед ошйысьӧ вылӧ пуктӧмнас. Озыр вок мед ошйысьӧ улӧ пуктӧмнас, ӧд сійӧ турунвывса дзоридз моз бырас.
Шонді петас, пӧжас да косьтас турунсӧ. Дзоридзыс сылӧн усьӧ и мичлуныс бырӧ.
Дзик тадзи кусӧ озыр мортлӧн мырсян-пессян олӧмыс.
Шуда сійӧ, коді вермӧ венны ыштӧдӧмсӧ, ӧд та бӧрти сылы лоӧ сетӧма Олӧмыслысь юркытш. Тайӧ юркытшсӧ Господь кӧсйысис сетны Сійӧс радейтысьяслы.
Ыштӧдӧм дырйи некод мед оз шу: «Енмыс менӧ ыштӧдӧ». Ӧд лёк вылас Енсӧ некод оз вермы ыштӧдны, и Ачыс Енмыс некодӧс оз ыштӧд.
Но быд мортӧс ыштӧдӧ сылӧн лёк кӧсйӧмыс, ӧд сійӧ ылӧдлӧ мортсӧ да кыскӧ сійӧс лёкас.
Лёк кӧсйӧмыс содӧ-быдмӧ да чужтӧ мыж, а вӧчӧм мыжыс чужтӧ кулӧм.
Муса вокъяс, некодлы энӧ сетӧй асьнытӧ ылӧдлыны.
Быдпӧлӧс бурсетӧмыс да тыр-бур козиныс воӧ вылісянь, югыдыслӧн Батьсянь. Сійӧ некор оз вежсьыв, Сылӧн югыдыс некор оз кус.
Ас кӧсйӧм сертиыс Сійӧ чужтіс миянӧс Збыльыслӧн Кывнас, медым Сылӧн вӧчӧмторъясысь ми вӧлім медводдзаясӧн.
Муса вокъяс, быдӧн мед лоӧ тэрыб кывзыны, но ньӧжмыд сёрнитны да скӧрмыны.
Ӧд мортлӧн скӧралӧмыс оз вай Ен нога веськыд олӧмсӧ.
Та вӧсна эновтчӧй быдпӧлӧс пежсьыс да лёк вӧчӧмысь, рам сьӧлӧмӧн сибӧдӧй тіянлы висьталӧм Кывсӧ, ӧд сійӧ вына мездыны тіянлысь ловнытӧ.
Энӧ лоӧй сӧмын кывзысьясӧн, но Кывйыс серти олысьясӧн. Ӧд куш кывзӧмнад сӧмын ылӧдланныд асьнытӧ.
Коді кылӧ Енлысь Кывсӧ, но оз ов сы серти, сійӧ рӧмпӧштанӧ чужӧмсӧ видзӧдысь кодь.
Сійӧ видзӧдлас ас вылас, а вешйӧм бӧрас дзик пыр вунӧдас чужӧмсӧ.
Но коді видзӧдӧ мездлунсӧ сетысь тыр-бур Индӧд вылӧ да олӧ сы серти, сійӧс лоӧ бурсиӧма уджъясыс пыр. Ӧд сійӧ оз вунӧд кывлӧмасӧ, но олӧ сы серти.
Кодкӧ тіян пиысь кӧ лыддьӧ асьсӧ вежавидзысьӧн, но быдлаӧ вомсӧ восьтӧ, сійӧ ылӧдлӧ асьсӧ. Татшӧм мортыслӧн вежавидзӧмыс нинӧм оз сулав.
Мортыс кӧ тӧждысьӧ батьтӧм-мамтӧм челядь вӧсна да дӧваяс вӧсна налӧн сьӧкыд нуигӧн, да видзӧ асьсӧ тайӧ мувывса пежсьыс, — тайӧ эм Ен Бать водзын сӧстӧм да пежасьтӧм вежавидзӧм.
2 юр.
Вокъяс, ті эсканныд Исус Кристослы, миян дзирдлуна Господьлы. Сідзкӧ, энӧ торйӧдӧй йӧзсӧ чужӧм вылӧ видзӧдӧмӧн.
Шуам, тіян чукӧртчанінӧ пырас озыр паськӧма, зарни чунькытша морт, пырас тшӧтш омӧлик паськӧма гӧль морт, и озыр паськӧмыс вылӧ видзӧдӧмӧн ті шуанныд сылы: «Пуксьы татчӧ, тані бурджык местаыс», а гӧль мортлы шуанныд: «Тэ сэтчӧ сувт» либӧ «Татчӧ пуксьы, менам кок дорӧ». Но тадзи вӧчигӧн ті юкланныд йӧзсӧ бурджык да лёкджык вылӧ да лоанныд лёк нога мыждысьясӧн.
Кывзӧй, муса вокъяс. Енмыс бӧрйис тайӧ муюгыдсьыс гӧльясӧс, медым озырмӧдны найӧс эскӧмӧн да вичмӧдны налы Юраланінсӧ, кодӧс Енмыс кӧсйысис сетны Сійӧс радейтысьяслы.
Но ті увтыртанныд гӧльясӧс.
Оз ӧмӧй озыръяс дзескӧдны тіянӧс да кыскыны тіянӧс ёрдӧ?
Оз ӧмӧй озыръяс лёкӧдны бур нимнытӧ, кодӧс сетӧма тіянлы?
Ті кӧ збыльысь оланныд Гижӧдыслӧн медыджыд Индӧд серти: «Радейт матыссатӧ асьтӧ моз», — бура вӧчанныд.
Но ті кӧ торйӧданныд йӧзсӧ чужӧм вылӧ видзӧдӧмӧн, сэки мыж вӧчанныд, тіянӧс мыждасны Индӧдсӧ торкалысьӧс моз.
Коді олӧ Индӧдыс серти, но торкӧ Индӧдсьыс кӧть ӧти тшӧктӧм, сійӧ лоӧ дзоньнас Индӧдсӧ торкалысьӧн.
Коді шуис: «Гозъя олӧмтӧ эн пежав», Сійӧ тшӧтш шуис: «Эн ви». Та вӧсна, гозъя олӧмтӧ кӧ он пежав, но виан кодӧскӧ, — лоан Индӧдсӧ торкалысьӧн.
Сідзкӧ, олӧй да сёрнитӧй на моз, кодъясӧс кутасны мыждыны мездлунсӧ сетысь индӧд серти.
Ӧд бурсьӧлӧмлун ёна ыджыдджык мыждӧм дорысь. Но коді оз ло бур сьӧлӧма мӧд дінӧ, сійӧс лоӧ мыждӧма бур сьӧлӧмтӧг.
Вокъяс, коді шуӧ «ме эска», а уджъясыс сылӧн абуӧсь, мый нӧ таысь бурыс?
Вермас-ӧ татшӧм эскӧмыс мездыны сійӧс?
Шуам, кутшӧмкӧ чойлӧн либӧ воклӧн кӧ абу колана паськӧмыс, весиг лун кежлӧ сёяныс, а тіян пиысь кодкӧ шуас сылы: «Мун лӧнь сьӧлӧмӧн, шонтысь да пӧткӧдчы», но ачыс оз сет сылы коланаторсӧ олӧм вылӧ, мый таысь бурыс?
Тайӧс позьӧ шуны тшӧтш эскӧм йылысь: мортыслӧн уджъясыс кӧ абуӧсь, сылӧн эскӧмыс кулӧма.
Дерт, кодкӧ вермас шуны: «Ӧтилӧн эм эскӧм, а мӧдлӧн — уджъяс».
Сылы тадзи вочавидза: «Петкӧдлы ассьыд эскӧмтӧ уджъястӧгыд, а ме петкӧдла ассьым эскӧмӧс уджъясын».
Тэ эскан: Енмыс ӧти, тэ бура вӧчан.
Весиг пеж ловъяс тадзи эскӧны да тіралӧны полӧмнысла.
Но кӧсъян-ӧ тӧдны, мывкыдтӧм мортӧй, мый уджъястӧм эскӧмыд — кулӧм эскӧм.
Миян батьным, Ӧвраам, вайис Исаакӧс, ассьыс писӧ, висьпуктанінӧ. Эз-ӧ тадзи вӧчигӧн сійӧ ло Ен водзын веськыдӧн?
Тэ аддзан, мый сылӧн эскӧмыс вӧлі йитчӧма уджъяскӧд, а уджыс пыр сылӧн эскӧмыс лои тыр-бурӧн.
Тадзи инісны Гижӧдысь кывъясыс: «Ӧвраам эскис Енлы, та вӧсна Енмыс шуис сійӧс веськыдӧн». Та вӧсна сійӧс шуӧма Енлӧн ёртӧн.
Ті аддзанныд, мый мортыс лоӧ веськыдӧн оз сӧмын эскӧмыс пыр, но и уджъясыс пыр.
Тадзи вӧлі тшӧтш Раавкӧд, кырсалысь анькӧд. Сійӧ сибӧдіс гортас израильса кыйӧдчысьясӧс да отсаліс налы пышйыны мӧд туйӧд. Тайӧ бур вӧчӧмыс вӧсна Енмыс лыддис сійӧс веськыдӧн.
Кыдзи вир-яйыс ловтӧг кулӧма, тадзи эскӧмыс уджъястӧг кулӧма.
3 юр.
Вокъяс, энӧ унаӧн зільӧй лоны велӧдысьясӧн. Ті ӧд тӧданныд, мый миянӧс, велӧдысьясӧс, кутасны чорыдджыка на мыждыны мукӧдыс дорысь.
Ми ставным унаторйын мыжмам.
Коді оз мыжмы сёрнинас, сійӧ тыр-бур морт да вермӧ дзоньнас кутны ассьыс вир-яйсӧ.
Ми кӧртвомалам вӧлӧс, медым сійӧ кывзысис миянлысь. Тадзи ми веськӧдлам сылӧн став вир-яйнас.
Босьтны кӧ корабльяс, найӧ сэтшӧм ыджыдӧсь, найӧс новлӧдлӧ ыджыд тӧвныр, но ичӧтик руль отсӧгӧн бӧжалысьыс веськӧдлӧ корабльнас кытчӧ кӧсйӧ. Тадзи артмӧ и кывнымкӧд: миян вир-яйын кывным — ичӧтик юкӧн, но сійӧ вермӧ ошйысьны ыджыд уджъясӧн.
Ичӧтик би вермӧ бырӧдны уна вӧр.
Миян кывным — тайӧ би. Миян вир-яйын сійӧ — лёк чукӧртанін, сійӧ пежалӧ дзоньнас вир-яйнымӧс. Ад бисянь ӧзйӧмӧн сійӧ сотӧ миянлысь став олӧмнымӧс.
Мортыс вермӧ лӧньӧдны быдпӧлӧс олысьӧс: пемӧсӧс, лэбачӧс, нюглясьысьӧс да саридзын уялысьӧс. Мортыс найӧс лӧньӧдӧма нин, а кывсӧ лӧньӧдны некод оз вермы. Лёкыс вӧсна кывсӧ лӧньӧдны он вермы, сійӧ тырӧма виана ядӧн.
Кывйӧн ми ошкам Ен Батьӧс, кывйӧн и ёрам Ен нога вӧчӧм мортӧс.
Ӧти вомысь петӧ ошкӧм и ёрӧм.
Вокъяс, тадзи оз вермы лоны.
Вермас ӧмӧй ӧти визувтанінысь петны юмов да курыд ва?
Вокъяс, инжир пу оз вермы вайны выя вотӧс, либӧ виноград пу — инжир вотӧс.
Ӧти визувтанінысь оз вермы петны сола да юмов ва.
Эм-ӧ тіян пӧвстын мывкыда да сюсь вежӧра морт? Эм кӧ, сійӧ мед петкӧдлас ассьыс мывкыдлунсӧ рам сьӧлӧмыс да бур оласногыс пыр.
Но тіян сьӧлӧмын кӧ эм курыд вежалӧм да асьтӧ радейтӧм, сідзкӧ, энӧ ошйысьӧй да асланыд ылӧгӧн энӧ вевттьӧй збыльсӧ.
Ӧд татшӧм мывкыдыс — абу вылісянь сетӧм мывкыд, сійӧ — мувывса, мортсянь да пеж ловъяссянь.
Кӧні вежалӧм да сӧмын асьтӧ радейтӧм, сэні кывзысьтӧмлун да быдпӧлӧс лёкыс.
Но вылісянь сетӧм мывкыдлуныс — медвойдӧр сӧстӧм, сэсся лӧнь, рам, кывзысьысь, тырӧма буралӧмӧн да бур уджъясӧн. Сійӧ оз торйӧд мортсӧ чужӧм вылӧ видзӧдӧмӧн, сійӧ ставсӧ вӧчӧ сьӧлӧмсяньыс.
Лӧньлунсӧ вайысьяс кӧдзӧны лӧньлунлысь кӧйдыс, а тайӧ кӧйдысыс вайӧ веськыда олӧмыслысь вотӧс.
4 юр.
Кытысь артмӧ тіян пӧвстын лёксьӧмыс да вензьӧмыс?
Оз-ӧ чужны найӧ тіян ыштӧмъяссянь, кодъяс дугдывтӧг ыпъялӧны-тышкасьӧны тіян вир-яйын?
Ті ыштанныд мый вылӧ кӧ, но нинӧм онӧ босьтӧй.
Ті виаланныд да вежаланныд, но тіянлы нинӧм оз вичмы.
Ті вензянныд да лёксянныд, но тіян нинӧм абу, ӧд ті онӧ корӧй.
А коранныд кӧ, тіянлы оз ло сетӧма, ӧд ті онӧ бур вылӧ корӧй. Ті кӧсъянныд могмӧдны сӧмын ассьыныд ыштӧмтӧ.
Енсӧ эновтысьяс, ті ӧмӧй онӧ тӧдӧй, мый мувывсакӧд ӧтувтчысь — Енлы паныд мунӧ?
Сідзкӧ, коді кӧсйӧ ӧтувтчыны мувывсакӧд, сійӧ Енлы паныд мунӧ.
Гашкӧ, ті чайтанныд, мый Гижӧдыс весьшӧрӧ висьталӧ: «вежӧгтӧмӧн радейтӧ лолыс, коді олӧ миян пытшкын».
Но Енлӧн буралӧмыс миян дінӧ ёна ыджыдджык.
Ӧд Гижӧдыс висьталӧ:
— Вылӧ кыпӧдчысьяслы Енмыс паныд мунӧ, а рамъяс дінӧ Сійӧ буралӧ.
Сідзкӧ, сетчӧй Енмыслы, паныд сувтӧй омӧльыслы, и сійӧ пышъяс тіян дінысь.
Матыстчӧй Ен дінас, и Сійӧ матыстчас тіян дінӧ.
Мыськӧй кинытӧ, мыж вӧчысьяс. Кык бана шаньгаяс, сӧстӧммӧдӧй сьӧлӧмнытӧ.
Шогсьӧй, сыркъялӧй да бӧрдӧй.
Тіян серамныд мед пӧрас бӧрдӧмӧ, а гажӧдчӧмныд — шогсьӧмӧ.
Раммӧдчӧй Господь водзын, и Сійӧ кыпӧдас тіянӧс.
Вокъяс, энӧ лёкӧдӧй ӧта-мӧднытӧ.
Лёкӧдӧ кӧ кодкӧ либӧ мыждӧ ассьыс воксӧ, сійӧ паныд мунӧ Индӧдыслы да мыждӧ Индӧдсӧ.
Но тэ кӧ мыждан Индӧдсӧ, сідзкӧ, тэ абу Индӧд серти олысь, а мыждысь.
Но Индӧдсӧ Сетысьыс да Мыждысьыс — ӧти. Сійӧ вермӧ мездыны и бырӧдны.
А тэ коді сэтшӧмыс, медым мӧдсӧ мыждыны?
Ӧні висьтала тіянлы, тадзи шуысьяслы: «Талун-аски ми мӧдӧдчам сэтшӧмтӧ карӧ да олам сэні во чӧж. Сэні кутам вузасьны да озырмӧдчыны».
Но ті весиг онӧ тӧдӧй, мый ваяс тіянлы аскиа луныс.
Ӧд тіян олӧмныд ру кодь, петкӧдчылас дженьыдик кад кежлӧ, а сэсся бырас.
Бурджык тайӧ кывъясыс пыдди шуны тіянлы: «Шогмана кӧ Господьлы да ловъяӧсь лоам, вӧчам сійӧ либӧ тайӧ». А ті сӧмын вылӧ кыпӧдчанныд да ошйысянныд аснаныд.
Но став тайӧ ошйысьӧмыс — лёктор.
Сідзкӧ, коді тӧдӧ, мый колӧ бурсӧ вӧчны, но оз вӧч, сійӧ мыжмӧ.
5 юр.
Ӧні висьтала тіянлы, озыръяс: сыркъялӧмӧн бӧрдӧй ыджыд шогъясысь, кодъяс суасны тіянӧс.
Тіян озырлунныд сісьмӧма, паськӧмнытӧ воз сёйӧма.
Тіян зарниныд да эзысьныд сімӧма. Тайӧ сімыс кутас висьтавны тіян мыжлун йылысь. Сійӧ би моз сотас тіянлысь вир-яйнытӧ.
Тайӧ бӧръя кадас ті чукӧртінныд аслыныд озырлунсӧ.
Со, кылӧ горзӧмыс тіян му вылын уджалысьяслӧн, кодъяслы ті энӧ мынтысьӧй. Ӧні найӧ гораа горзӧны, и налӧн горзӧмыс воис Господь Саваоф пельясӧдз.
Ті олінныд тайӧ му вылас лышкыда да быдторнас чӧсмасинныд. Ті тшӧгӧдінныд асьнытӧ, кыдзи пемӧсъясӧс тшӧгӧдӧны весиг начкысян лунӧ.
Ті мыждінныд да виинныд веськыда олысьӧс, сійӧ оз нин водзсась тіянлы.
Вокъяс, терпитӧмӧн виччысьӧй Господьлысь локтӧмсӧ.
Видзӧдлӧй, кутшӧм терпитӧмӧн виччысьӧ му вӧдитысь, медым босьтны мулысь дона быдтассӧ. Сійӧ виччысьӧ арся да тувсов зэръяс.
Ті тшӧтш дыр терпитӧй да лоӧй зумыдӧсь, ӧд Господьлӧн локтӧмыс матын нин.
Вокъяс, энӧ мыжалӧй ӧта-мӧднытӧ, медым Енмыс эз мыжды тіянӧс.
Ӧд Мыждысьыс сулалӧ нин ӧдзӧс дорын.
Вокъяс, видзӧдӧй пророкъяс вылӧ, кодъяс сёрнитісны Господь нимсянь. Найӧ терпитӧмӧн нуисны сьӧкыдсӧ.
Ми лыддям шудаӧн найӧс, кодъяс зумыда сулалісны помӧдз.
Ті, дерт, кывлінныд Иовлӧн зумыдлун йылысь да тӧданныд, мый Господь дасьтіс сылы.
Ӧд Господь мелі да бур сьӧлӧма.
Вокъясӧй, медвойдӧр кора тіянӧс, энӧ кӧсйысьӧй ни енэжӧн, ни муӧн, ни мукӧдторйӧн.
Тіян “да”-ныд мед лоӧ сӧмын “да”, тіян “ог”-ныд мед лоӧ сӧмын “ог”. Сэки тіянӧс оз мыждыны.
Тіян пиысь кӧ кодкӧ сьӧкыдалӧ, мед кевмысьӧ.
Нимкодясьӧ кӧ, мед сьылӧ Енмӧс ошкана сьыланкывъяс.
Висьӧ кӧ кодкӧ, мед корӧ вичкоса юрнуӧдысьясӧс. Найӧ мавтыштасны висьысьӧс выйӧн Господь нимсянь да кевмысясны сы вӧсна.
Сэки эскӧмӧн кевмысьӧмыс отсалас висьысьлы, и Господь бурдӧдас сійӧс.
А вӧчис кӧ сійӧ мыжъяс, сылысь мыжъяссӧ лоӧ прӧститӧма.
Висьталӧй ӧта-мӧд водзаныд ассьыныд мыжъястӧ да кевмысьӧй ӧта-мӧд вӧснаныд, медым бурдінныд.
Ӧд веськыда олысьлӧн кевмысьӧмыс вына, сійӧ вермӧ вӧчны унатор.
Илля вӧлі миян кодь морт. Сійӧ сьӧлӧмсяньыс кевмысис, медым эз зэр, и му вылас эз вӧв зэрыс куим во да джын.
Сэсся бара кевмысис, и енэжсяньыс киссис зэр. Сэки муыс сетіс быдтас.
Вокъяс, тіян пиысь кӧ кодкӧ кежас збыльсьыс, а мӧд морт бӧр бергӧдас сійӧс збыляс, тӧдӧй, мый мыжа мортӧс ылӧг туй вылысь бергӧдысь мездӧ сійӧс кулӧмысь да вевттьӧ сылысь уна мыж.
Апостол Петырлӧн медводдза мӧдӧдӧм гижӧд
1 юр.
Гижӧ Петыр, Исус Кристослӧн апостол. Чолӧмала йӧз муын олысьясӧс, Понтӧ, Галатияӧ, Каппадокияӧ, Асияӧ да Вифинияӧ разалӧм войтырӧс. Ен Бать водзысяньыс бӧрйӧма да вежӧдӧма тіянӧс Аслас Ловнас, медым ті кывзысинныд Исус Кристослысь да сӧстӧмминныд Сылӧн Вирнас.
Буралӧмыс да лӧньлуныс мед содас тіянлы.
Ошкӧм Енлы, миян Господь Исус Кристослӧн Батьлы. Ыджыд буралӧмыс вӧсна Исус Кристосӧс ловзьӧдӧм пыр Енмыс сетіс миянлы выль олӧм. Та вӧсна ми кутам ловъя лача босьтны сӧстӧм, сісьмытӧм да бырлытӧм озырлун, кодӧс видзӧма тіянлы енэжын. Эскӧмныд пыр Енлӧн выныс видзӧ тіянӧс мездмӧм вылӧ, и тайӧ мездмӧмыс воссяс бӧръя кадас.
Сідзкӧ, нимкодясьӧй, весиг ковмас кӧ ӧні шогсьыштны быдпӧлӧс сьӧкыд нуӧмысь. Зарниыс тӧдмавсьӧ биӧн. Тіян эскӧмныд, коді бырана зарниысь донаджык, тӧдмавсьӧ сьӧкыдлунъяс дырйи, медым Исус Кристос локтігӧн вичмис тіянлы ошкӧм, нимӧдӧм да дзирдлун. Кристосӧс ті энӧ аддзылӧй, но Сійӧ муса тіянлы. Ті онӧ на аддзӧй Сійӧс, но эсканныд Сылы. Тіян сьӧлӧмныд тырӧма ыджыдсьыс-ыджыд нимкодьлунӧн, та йылысь он вермы весиг висьтавнысӧ. Ӧд эскӧмныдлӧн медшӧр могыс — воӧдчыны мездмӧмас.
Пророкъяс пыдісянь тӧдмалісны-туялісны тайӧ мездмӧмсӧ. Найӧ водзвыв висьтавлісны тіянлы дасьтӧм буралӧм йылысь. Найӧ кӧсйисны тӧдмавны, кутшӧм кад вылӧ да мый вылӧ индіс на пытшкын олысь Кристослӧн Лолыс, кор Сійӧ водзвыв висьтавліс Кристослӧн сьӧкыдалӧмыс да Сійӧс виччысьысь дзирдлуныс йылысь.
Енмыс восьтіс пророкъяслы, мый тайӧс юӧртігӧн найӧ кесъялісны миянлы, а эз аслыныс. Ӧні тайӧс юӧртісны найӧ, кодъяс висьталісны тіянлы Бур Юӧрсӧ енэжсянь мӧдӧдӧм Вежа Лов вынӧн. Весиг анделъяс кӧсйӧны тӧдны тайӧ гусяторсӧ.
Сідзкӧ, лоӧй дасьӧсь да олӧй садь вежӧрӧн. Кутӧй зумыд лача Енлӧн буралӧм вылӧ, коді вичмас тіянлы Исус Кристос локтігӧн.
Лоӧй кывзысьысь челядь кодьӧн. Збыльсӧ тӧдтӧдз тіянӧн веськӧдлісны асланыд кӧсйӧмъясныд, но ӧні энӧ лэдзӧй налы веськӧдлыны аснаныд. Тіянӧс Корысьыс вежа. Сы моз лоӧй вежаӧсь быдторйын.
Гижӧма: «Лоӧй вежаӧсь, ӧд Ме вежа».
Ті кӧ шуанныд Батьӧн Сійӧс, коді чужӧм вылӧ видзӧдтӧг мыждӧ быдӧнӧс уджъясыс серти, сідзкӧ, олӧй тайӧ му вылас Енсьыс полӧмӧн. Ті ӧд тӧданныд, мый тіянӧс ньӧбӧма абу бырана эзысь да зарни вылӧ, медым мездыны тіянӧс весьшӧрӧ олӧмысь, коді вуджис тіянлы батьяссяньныд. Тіянӧс ньӧбӧма Кристослӧн дона Вир вылӧ. Сійӧ вӧлі тыр-бур да сӧстӧм Баля. Енмыс бӧрйис Сійӧс му пуксьытӧдзыс на да мӧдӧдіс тіян вӧсна бӧръя кадас. Сы пыр ті эсканныд Енмыслы, коді ловзьӧдіс Сійӧс да сетіс Сылы дзирдлунсӧ, медым ті эскинныд да кутінныд лача Енмыс вылӧ.
Лов отсӧгӧн збыльыслысь кывзысьӧмӧн ті сӧстӧмминныд, медым восьса сьӧлӧмӧн верминныд радейтны мукӧд эскысьӧс. Сідзкӧ, сьӧлӧмсяньныд радейтӧй ӧта-мӧднытӧ. Ті выльысь чужинныд энӧ сісьмана кӧйдыссянь, а сісьмытӧмсянь — Енлӧн ловъя да бырлытӧм Кывсянь.
Гижӧдыс висьталӧ: — Мортыс — турун кодь, сылӧн мичлуныс — дзоридз кодь.
Турун косьмӧ, дзоридз усьӧ,
а Господьлӧн Кывйыс помтӧг олӧ.
Тайӧ Кывйыс — Бур Юӧр, кодӧс висьталӧма тіянлы.
2 юр.
Ӧвсьӧй быдсяма лёк вӧчӧмысь, ылӧдчӧмысь, вежалӧмысь, суклясьӧмысь да энӧ лоӧй кык бана шаньгаясӧн. Зільӧй пӧткӧдчыны Ен Кывйӧн, кыдзи пузчужӧм кагаяс пӧткӧдчӧны йӧлӧн, медым сы отсӧгӧн быдминныд да лоинныд мездмӧмаӧсь.
Ті ӧд тӧданныд: Господь бур сьӧлӧма.
Сійӧ — ловъя из, Енмыслы зэв дона. Йӧзыс Сійӧс ӧтдортісны, но Енмыс бӧрйис Сійӧс. Локтӧй Сы дінӧ да вайӧй асьнытӧ ловъя из пыдди, медым Ен вӧчас тіянысь Аслас Ловлы оланін. Сэки лоанныд вежа кесъялысьясӧн да кутанныд вайны Ловсянь вись, коді шогмана Енмыслы Исус Кристос пыр.
Гижӧдыс висьталӧ:
— Сионӧ Ме пукта пельӧс из. Сійӧ — дона из, кодӧс Ме бӧрйи. Сылы эскысь оз янав.
Сідзкӧ, тіянлы, эскысьяслы, Сійӧ дона из. А эскытӧмъяслы — тайӧ изйыс, кодӧс шыбитісны керка лэптысьяс, лоис пельӧс изйӧн. Тайӧ изъяс найӧ крукасьӧны да усьӧны. Найӧ крукасьӧны, ӧд Ен Кывйыслысь оз кывзысьны. Тадзи налы шуӧма лоны.
Но ті — бӧрйӧм йӧз, Ӧксылӧн вежа кесъялысьяс. Ті — вежа войтыр, Енлӧн йӧз. Сійӧ бӧрйис тіянӧс, медым висьтавлінныд Сылӧн тыр-бурыс йылысь. Енмыс корис тіянӧс пемыдсьыс Аслас шензьӧдана югыдӧ.
Водзынсӧ ті энӧ вӧлӧй Ен войтырӧн, ӧні ті — Ен войтыр.
Водзынсӧ олінныд Енлӧн бурсетӧмтӧг, ӧні ті босьтінныд сійӧс.
Мусаяс, тайӧ му вылас ті ветлысь-мунысьяс кодьӧсь. Ёна кора тіянӧс: энӧ кывзысьӧй асланыд вир-яйлӧн лёк кӧсйӧмъяслысь, ӧд найӧ тышкасьӧны тіян ловкӧд. Ентӧдтӧмъяс пӧвстын олӧй бур ногӧн. Сэки найӧ, кодъяс лёкӧдӧны тіянӧс лёк вӧчысьясӧс моз, аддзасны бур вӧчӧмнытӧ да ошкасны Енсӧ Сылӧн локтігас.
Господьӧс пыдди пуктӧмӧн кывзысьӧй мортӧн индӧм быдпӧлӧс веськӧдлысьяслысь: ӧксылысь, ӧд сійӧ став вылас ыджыдыс, юралысьяслысь, ӧд ӧксы найӧс пуктӧма мыждыны лёк вӧчысьясӧс да ошкыны бур вӧчысьясӧс. Енмыс кӧсйӧ, медым ті бур вӧчӧмнаныд тупкинныд мывкыдтӧм йӧзлысь вомсӧ. Тіянлы сетӧма мездлун, сӧмын мездлунныд мед оз ло вевттьӧдӧн лёк вӧчӧмныдлы, но олӧй Енлӧн кесйӧгъяс моз.
Быдӧнӧс пыдди пуктӧй, вокъясӧс радейтӧй, Енсьыс полӧй, ӧксыӧс бурӧ пуктӧй.
Кесйӧгъяс, Енсьыс полӧмӧн кывзысьӧй асланыд ыджыдъяслысь. Кывзысьӧй энӧ сӧмын буръяслысь да рамъяслысь, а тшӧтш скӧръяслысь.
Мортыс кӧ кутӧ тӧд вылас Енлысь кӧсйӧмсӧ да нуӧ сьӧкыдсӧ лёксӧ вӧчтӧг — тайӧ шогмана Енмыслы.
Тіянӧс кӧ нӧйтӧны мыж вӧчӧмысь да терпитанныд тайӧс, сэки мыйысь тіянӧс ошкынысӧ?
Но ті кӧ сьӧкыдаланныд бурсӧ вӧчигӧн да терпитанныд тайӧс — тайӧ шогмана Енмыслы.
Дзик та вылӧ тіянӧс корӧма, ӧд Кристос нуис сьӧкыдсӧ тіян вӧсна. Тадзи Сійӧ петкӧдліс, медым ті олінныд Сы моз.
— Мыжсӧ Сійӧ эз вӧчлы, Сійӧ некор эз пӧръясьлы.
Сійӧс лёкӧдігӧн Сійӧ воча эз лёкӧд.
Сьӧкыдсӧ нуигӧн эз кӧсйысь мынтысьны лёк вӧчӧмӧн, а ставсӧ сетіс веськыда Мыждысьлы.
Миянлысь мыжъяснымӧс Аслас вир-яйын Сійӧ кыпӧдіс крест вылӧ, медым ми дугдім вӧчны мыжсӧ да олім веськыда. Сылӧн дойясӧн ті бурдінныд.
Ті вӧлінныд вошӧм ыжъяс кодьӧсь, но ӧні бергӧдчинныд тіянӧс Видзысь да тіян вӧсна Тӧждысьысь дінӧ.
3 юр.
Гӧтыръяс, кывзысьӧй асланыд верӧсъяслысь. Сэки верӧсъяс, кодъяс оз эскыны Енлӧн Кывлы, тіян олӧм вылӧ видзӧдӧмӧн висьтавтӧг-велӧдтӧг кутасны эскыны. Ӧд найӧ аддзасны тіянлысь сӧстӧм да Енсьыс полана оласногнытӧ.
Энӧ тӧждысьӧй мичмӧдны асьнытӧ ортсысанас: юрсинытӧ баситӧмӧн, зарни ӧшлӧмӧн да дона паськӧмӧн. Тіян мичлунныд мед лоӧ пытшкӧсса: рам да лӧнь сьӧлӧм. Тайӧ мичлуныс бырлытӧм, сійӧ дона Енмыслы.
Тадзи асланыс верӧсъяслысь кывзысьӧмӧн важӧн мичмӧдлісны асьнысӧ вежа аньяс, Ен вылӧ лача кутысьяс.
Сарра кывзысис Ӧвраамлысь да шуис сійӧс аслас ыджыдӧн.
Ті кӧ вӧчанныд бурсӧ нинӧмысь повтӧг, сідзкӧ, ті — Сарралӧн нывъяс.
Верӧсъяс, пыдди пуктӧй ассьыныд гӧтыръястӧ, олӧй накӧд бур мывкыдӧн. Дерт, найӧ тіян дорысь жебджыкӧсь, но налы тшӧтш вичмӧ Енсянь буралӧмыс да олӧмыс. Тадзи кӧ вӧчанныд, кевмысиганыд оз ло мытшӧдыс.
Медбӧрти кӧсъя шуны тіянлы: олӧй ӧти сьӧлӧмӧн да ӧти лолӧн, радейтӧй ӧта-мӧднытӧ, лоӧй меліӧсь да рамӧсь.
Лёк вӧчӧмысь энӧ мынтысьӧй лёкӧн да омӧльтӧмысь омӧльтӧмӧн.
Мӧдарӧ, бурсиӧй, ӧд ті тӧданныд, мый та вылӧ корӧма тіянӧс. Сэки тіянлы вичмас бурсиӧмыс.
— Кодлы муса олӧмыс, коді кӧсйӧ аддзыны шуда лунъяс, сійӧ мед видзас ассьыс кывсӧ лёк сёрниысь да вомсӧ ылӧдчӧмысь, мед ылыстчас лёксьыс да вӧчас бурсӧ, корсяс лӧньлунсӧ да кутчысяс сэтчӧ.
Ӧд Господь видзӧдӧ веськыда вӧчысьяс вылӧ да кылӧ налысь кевмӧмсӧ, а лёк вӧчысьяслы Господь паныд мунӧ, медым бырӧдны найӧс му вывсьыс.
Коді вӧчас тіянлы лёксӧ, ті кӧ сьӧлӧмсяньныд вӧчанныд бурсӧ?
Ті кӧ нуанныд сьӧкыдсӧ веськыда олӧм вӧснаныд, сідзкӧ, ті шудаӧсь.
Энӧ полӧй некодысь да энӧ майшасьӧй нинӧмысь.
Господь Енмӧс медвылӧ пуктӧй сьӧлӧманыд.
Юалас кӧ кодкӧ лачаныд йылысь, пыр лоӧй дасьӧсь вочавидзны сылы. Вочавидзӧй рам сьӧлӧмӧн да Енсьыс полӧмӧн.
Олӧй сідзи, мед сьӧлӧмныд эз мыжды тіянӧс. Сэки найӧ, кодъяс лёкӧдӧны тіянӧс лёк вӧчысьясӧс моз Кристоскӧд бур нога олӧмысь, яналасны асланыс кывъясысь.
Енмыс кӧ кӧсйӧ, мед ми нуим сьӧкыдсӧ, бурджык сьӧкыдавны бур вӧчӧмысь лёк вӧчӧм дорысь.
Кристос ӧтчыдысь нуис сьӧкыдсӧ миян мыжъяс вӧсна, медым вайӧдны миянӧс Ен дінӧ. Сійӧ, веськыда олысь, куліс лёк нога олысьяс вӧсна. Сылысь вир-яйсӧ вӧлі виӧма, но ловсӧ вӧлі ловзьӧдӧма. Ловнас Сійӧ муніс пемыдінын олысь ловъяс дінӧ да висьталіс налы юӧрсӧ. Тайӧ ловъясыс эз кывзысьны Енмыслысь, но Сійӧ дыр виччысис налысь кывзысьӧмсӧ Нойлӧн ковчег вӧчигдырйи. Сэні этшаӧн, сӧмын кӧкъямыс морт, мездмисны ва пыр.
Тайӧ лоӧмторйыс индӧ миян пыртчӧм вылӧ, сы пыр ми мездмам Исус Кристослӧн ловзьӧм вӧсна. Пыртчӧмыс — абу вир-яй вылысь няйт мыськӧм, но Ен водзын сӧстӧм сьӧлӧмӧн кӧсйысьӧм. Кристос кыпӧдчис енэжас да пуксис Ен веськыдладорӧ, Кристослысь кывзысьӧны анделъяс, енэжвыв ыджыдалысьяс да вынъяс.
4 юр.
Кристос вир-яйнас нуис сьӧкыдсӧ миян вӧсна. Сідзкӧ, ті тшӧтш лоӧй дасьӧсь нуны сьӧкыдсӧ, медым коляс кадсӧ тайӧ му вылас олінныд Ен кӧсйӧм серти, энӧ нин асланыд кӧсйӧм серти. Ӧд вир-яйнас сьӧкыдалысь ылыстчӧ мыж вӧчӧмысь.
Водзынсӧ ті вӧчинныд ентӧдтӧмъяс моз: олінныд лэдзчысьӧмӧн да лёк кӧсйӧмныд серти, кырсалінныд, кодалінныд-гажӧдчинныд да юрбитінныд зывӧк идолъяслы. Тырмас нин тадзи овнытӧ.
Ӧні ентӧдтӧмъяс шензьӧны, ӧд ті онӧ нин олӧй на моз лэдзчысьӧмӧн. Та вӧсна найӧ лёкӧдӧны тіянӧс.
Но налы ковмас вочавидзны Сылы, коді регыд кутас мыждыны ловъяясӧс да кулӧмаясӧс.
Дзик та могысь вӧлі висьталӧма Бур Юӧрсӧ тшӧтш кулӧмаяслы. Дерт, вир-яйнас найӧс лоӧ мыждӧма став йӧзсӧ моз. Но Бур Юӧрсӧ налы вӧлі висьталӧма, медым ловнас найӧ олісны Ен ногӧн.
Регыд ставыслы воас пом.
Сідзкӧ, олӧй бур мывкыдӧн да садь вежӧрӧн, медым верминныд кевмысьны.
Сьӧлӧмсяньныд радейтӧй ӧта-мӧднытӧ, ӧд муслуныс вевттьӧ уна мыж.
Сибӧдӧй ӧта-мӧднытӧ шуасьтӧг.
Енмыслӧн сетӧмторйыс унапӧлӧс. Сійӧ быдӧнлы козьналіс сетӧмторсӧ, медым ті кесъялінныд ӧта-мӧдныдлы. Сідзкӧ, бур ногӧн вӧдитчӧй Енсянь сетӧмторнас.
Коді висьталӧ, мед висьталӧ Енсянь.
Коді кесъялӧ, мед кесъялӧ Ен вынӧн. Сэки быдторйын лоӧ ошкӧмыс Енлы Исус Кристос пыр. Сылы ошкӧмыс, Сылӧн ыджыдалӧмыс нэмъяс чӧж.
Аминь.
Мусаяс, тіянлы кӧ паныдасьӧны топӧдан сьӧкыдлунъяс, тайӧ мед оз шензьӧд тіянӧс. Ӧд сьӧкыдлуныс паныдасьӧ, медым тӧдмавны тіянӧс. Мӧдарӧ, нимкодясьӧй, ӧд ті тшӧтш нуанныд Кристослысь сьӧкыдсӧ. Сэки Кристослӧн дзирдлуныс воссигӧн ті кутанныд ёна нимкодясьны.
Тіянӧс кӧ лёкӧдӧны Кристос ним вӧсна, ті шудаӧсь.
Ӧд Енлӧн дзирдлуна Лолыс тіянкӧд.
Йӧзыс омӧльтӧны Сійӧс, а ті ошканныд.
Сӧмын тіян пиысь некод мед оз сьӧкыдав морт виӧмысь либӧ гусясьӧмысь, лёк вӧчӧмысь либӧ суклясьӧмысь.
Но сьӧкыдалӧ кӧ кодкӧ Кристослы эскӧмысь, мед оз яндысь. Мӧдарӧ, мед ошкӧ Енсӧ таысь.
Мыждан кадыс матын нин. Медводз Енмыс кутас мыждыны Ассьыс войтырсӧ. Сідзкӧ, медводз кӧ кутас мыждыны миянӧс, сэки мый виччысьӧ найӧс, кодъяс оз кывзысьны Енлӧн Евангелльӧлысь?
— Веськыда олысь кӧ ӧдва мездмӧ, мый виччысьӧ Ентӧг олысьӧс да мыжаӧс?
Сідзкӧ, Ен кӧсйӧм серти сьӧкыдсӧ нуысьяс, сетӧй асьнытӧ дзоньнас эскана Ставсӧвӧчысьлы да водзӧ вӧчӧй бурсӧ.
5 юр.
Ӧні ме шыася вичкоса юрнуӧдысьяс дінӧ, ӧд ачым ме тшӧтш вичкоса юрнуӧдысь. Ме аддзылі Кристослысь сьӧкыдалӧмсӧ, да меным тшӧтш вичмас дзирдлуныс, коді воссяс Сылӧн локтігас. Ме ёна кора тіянӧс: видзӧй тіянлы сетӧм Енлысь йӧз чукӧрсӧ. Тӧждысьӧй на вӧсна нимкодьпырысь да Енлы шогмана ногӧн, энӧ мырдӧнпырысь. Вӧчӧй тайӧс сьӧлӧмсяньныд, а энӧ аслыныд мыйкӧ куралӧм могысь. Энӧ ыджыдалӧй Енлӧн йӧз чукӧр вылын, но асланыд оласногӧн петкӧдлӧй налы, кыдзи колӧ овны.
Медыджыд Видзысьыс локтас да козьналас тіянлы дзирдалан юркытш, коді оз сісьмы.
Томджыкъяс, кывзысьӧй вичкоса юрнуӧдысьяслысь.
Ставныд кывзысьӧй ӧта-мӧдныдлысь да лоӧй рам сьӧлӧмаӧсь.
Ӧд вылӧ кыпӧдчысьяслы Енмыс паныд мунӧ, а рамъяс дінӧ Сійӧ буралӧ.
Сідзкӧ, сетчӧй Енлӧн вына кипод улӧ, и ас кадӧ Сійӧ кыпӧдас тіянӧс.
Ассьыныд став тӧжд-могтӧ вайӧй Сылы, ӧд Сійӧ тӧждысьӧ тіян вӧсна.
Олӧй садь вежӧрӧн да пыр лоӧй дасьӧсь. Ӧд тіянлы паныд мунысьыс, омӧльыс, ветлӧ равзысь лев моз да корсьысьӧ, кодӧс эськӧ ньылыштны.
Сувтӧй сылы паныд зумыд эскӧмӧн. Тӧдӧй, мый став му пасьталаыс вокъясныд тшӧтш тіян моз нуӧны сьӧкыдсӧ. Тіянлы этша нин колис сьӧкыдавны.
Та бӧрти буралӧмнас озыр Ен, коді корис тіянӧс Исус Кристос пыр Аслас бырлытӧм дзирдлунӧ, мед ёнмӧдас да зумыдмӧдас тіянӧс да вӧчас тыр-буръясӧн.
Сылы ошкӧмыс, Сылӧн ыджыдалӧмыс нэмъяс чӧж.
Аминь.
Силуан отсӧгӧн ме гижи тіянлы тайӧ дженьыдик гижӧдсӧ. Сійӧс ме лыддя эскана вокӧн. Кӧсъя эскӧдны да ышӧдны тіянӧс: кутчысьӧй Енлӧн збыль буралӧмас, кодӧс сетӧма тіянлы.
Тіянӧс чолӧмалӧ вавилонса вичко. Енмыс бӧрйӧма сійӧс тіянӧс моз. Тіянӧс чолӧмалӧ тшӧтш Марк пиӧй.
Чолӧмалӧй ӧта-мӧднытӧ мусапырысь окыштӧмӧн.
Лӧнь олӧм ставныдлы, кодъяс Исус Кристос пытшкынӧсь.
Аминь.
Апостол Петырлӧн мӧд мӧдӧдӧм гижӧд
1 юр.
Гижӧ Симон-Петыр, Исус Кристослӧн кесйӧг да апостол. Чолӧмала тіянӧс, миян моз сьӧлӧманыд эскӧмсӧ босьтысьясӧс. Тайӧ донаторсӧ ми босьтім Исус Кристослӧн, миян Ен Мездысьнымлӧн веськыдлун вӧсна.
Буралӧмыс да лӧньлуныс мед содас тіянлы Енмӧс да Исус Кристос Господьнымӧс тӧдмалігӧн.
Ми тӧдмалім Сійӧс, коді корис миянӧс Аслас дзирдлунӧ да тыр-бурӧ. Сылӧн Ен вынсянь сетӧма миянлы став коланасӧ, медым ми олім вежавидзӧмӧн. Миянлы сетӧма зэв дона да ыджыд кӧсйысьӧмъяс, медым на отсӧгӧн ті верминныд ылыстчыны мувывса пежалана ыштӧмъясысь, да медым тіян пытшкын вӧлі енмалуныс. Та могысь зільӧй петкӧдлыны эскӧманыд бур вӧчӧм, бур вӧчӧманыд — тӧдӧмлун, тӧдӧмлунаныд — асьтӧ кутӧм, асьтӧ кутӧманыд — зумыдлун, зумыдлунаныд — вежавидзӧм, вежавидзӧманыд — воктӧ радейтӧм, воктӧ радейтӧманыд — муслун.
Тайӧ кӧ тіян эм да содӧ, сідзкӧ, Исус Кристос Господьнымӧс тіян тӧдмалӧмныд оз ло весьшӧрӧ да ті онӧ кольӧй вотӧстӧг.
Кодлӧн тайӧ абу, сійӧ синтӧм, нинӧм оз аддзы, сійӧ вунӧдӧма, мый сійӧс мыськалӧма важ мыжъяссьыс.
Вокъяс, тіянӧс корӧма-бӧрйӧма. Сідзкӧ, тӧждысьӧй, мед тайӧ лунысь-лун зумыдмас тіян пытшкын. Тадзи вӧчиганыд некор онӧ крукасьӧй. Сэки ті восьса ӧдзӧсӧд верманныд пырны миян Мездысь Господь Исус Кристослӧн помтӧм Юраланінӧ.
Та вӧсна ме быдпӧрйӧ кута казьтывны тіянлы та йылысь, кӧть эськӧ ті тӧданныд да зумыда сулаланныд тіянлы висьталӧм збыляс.
Тайӧ вир-яй чомъяс олігӧн ме лыддя коланаӧн садьмӧдны тіянӧс аслам казьтылӧмъясӧн. Тӧда, меным регыд ковмас кольны чомйӧс. Тайӧс восьтіс меным Исус Кристос Господьным.
Кута тӧждысьны, медым менам мунӧм бӧрын ставсӧ тайӧс пыр кутінныд тӧд выланыд.
Ми висьталім тіянлы миян Господь Исус Кристослӧн выныс да локтӧмыс йылысь. Тайӧ абу кутшӧмкӧ лӧсьӧдӧм мойд, ми ӧд асланым синмӧн аддзылім Сылысь ыджыд вынсӧ.
Ен Батьыс сетіс Сылы нимӧдӧмсӧ да дзирдлунсӧ, кор Вылысса дзирдлунсяньыс кыліс гӧлӧс шы: «Тайӧ Менам муса Пиӧй, Ме нимкодяся Сыӧн».
Тайӧ шуӧмсӧ ми кылім енэжсянь, кор вӧлім Исускӧд вежа керӧсын.
Нӧшта на, миян эм пророкъяслӧн веськыд кыв.
Ті бура вӧчанныд, кутчысянныд кӧ тайӧ кывъяс, ӧд сійӧ кыдзи пемыдінын ӧзйысь би. Сійӧ югдӧдас лунъюгыд пуксьытӧдзыс да сьӧлӧманыд асъя кодзув мыччысьтӧдзыс. Тӧдӧй, пророк гижӧдсӧ ачыс мортыс оз вермы гӧгӧрвоӧдны.
Ӧд пророк юӧрсӧ некор абу вӧлі висьталӧма мортлӧн кӧсйӧмсянь. Сійӧс висьтавлісны Вежа Лов ышӧдӧмсянь Енлӧн вежа йӧз.
2 юр.
Израиль войтыр пӧвстын вӧліны ылӧгпророкъяс, тадзи тіян пӧвстын тшӧтш лоасны ылӧгвелӧдысьяс. Найӧ ваясны тіянлы бырӧдан ылӧгвелӧдӧмъяс, весиг соссясны Ыджыдысь, коді ньӧбис найӧс. Тадзи найӧ кӧлаласны ас выланыс виччысьтӧм бырӧдӧмсӧ.
Унаӧн на вылӧ видзӧдӧмӧн пондасны овны лэдзчысьӧм оласногӧн. Татшӧмъясыс вӧсна збыль туйыс лоӧ серам туйын.
Медым курыштны мыйкӧ аслыныс, найӧ тывйыштасны тіянӧс мудер сёрнинаныс.
Но налы мыждӧмыс важӧн нин дась, найӧс бырӧдӧмыс матын нин.
Енмыс мыжӧ усьӧм анделъясӧс эз видз, шыбитіс найӧс пемыд адӧ да дорис Мыждан лунӧдз. Эз видз Сійӧ и Ентӧг олысьясӧн тырӧм воддза муюгыдсӧ — бырӧдіс ыджыд ваӧн.
Колис ловъяӧн сӧмын кӧкъямысӧс, ӧтиыс на пиысь вӧлі веськыдлун йылысь юӧртысь Ной. Ен мыждіс Содом да Гомора каръяс, биӧн бырӧдіс пӧимӧдз. Тайӧн петкӧдліс, мый жӧ виччысьӧ водзӧ Ентӧг олысьясӧс. Но веськыда олысь Лотӧс Енмыс мездіс. Лот ёна сьӧкыдаліс Ентӧг олысьяслӧн лэдзчысьӧм оласногысь. Быд лун тайӧ веськыда олысьыслӧн лолыс горзіс сы гӧгӧр олысь йӧзлысь лёк вӧчӧмсӧ аддзӧмысь-кылӧмысь. Господь тӧдӧ, кыдзи мездыны вежавидзысьӧс сьӧкыдалӧмсьыс, а лёк вӧчысьӧс Сійӧ видзӧ, мед чорыда мыждыны сійӧс Мыждан лунӧ. Торъя нин тайӧ инмӧ вир-яйлӧн лёкколӧмнас пежасьӧмаяслы да Енлысь Юралӧмсӧ мустӧмтысьяслы. Найӧ яндысьтӧмӧсь, асныраӧсь да оз повны лёкӧдны енэжвывса вынъясӧс. Анделъяс ёна вынаджыкӧсь да ёнджыкӧсь на дорысь, но найӧ оз мыжавны да оз лёкӧдны татшӧмъяссӧ Ен водзын.
Тайӧ йӧзыс асьныс оз гӧгӧрвоны, кодӧс лёкӧдӧны. Найӧ вӧрын шӧйтысь вежӧртӧм пемӧсъяс кодьӧсь, кодъясӧс лӧсьӧдӧма кыйӧм-виӧм вылӧ. Пемӧсъясӧс моз найӧс и лоӧ бырӧдӧма.
Лёк вӧчӧмсьыныс найӧ босьтасны водзӧс. Найӧ радейтӧны гажӧдчыны лунъюгыднас, яндысьтӧг пукалӧны тіянкӧд ӧти пызан сайын да пӧръясьӧмнас пежалӧны ставсӧ. Тайӧ налӧн чӧсмасянторйыс.
Налӧн синныс пыр ӧзъялӧ нывбабаяс вылӧ, найӧ оз пӧтлыны мыжсӧ вӧчӧмсьыс, ылӧдлӧны жеб эскысьясӧс.
Сьӧлӧмныс налӧн тырӧма горшлунӧн, найӧ ёрӧмыслӧн пиян.
Найӧ кежисны веськыд туйсьыс да ылалісны. Найӧ мунӧны Восорлӧн Валаам пиыс кок туйӧд, кодлы лёк ногӧн шедӧдны озырлунсӧ вӧлі сьӧлӧм сертиыс. Но сійӧс янӧдӧма вӧлі лёктор вӧчӧмсьыс: осёл, кывтӧм пемӧс, шыасис морт моз да ӧлӧдіс пророкӧс йӧйталӧмсьыс.
Тайӧ ылӧгвелӧдысьясыс косьмӧм юкмӧс да тӧвнырӧн новлӧдлан кымӧръяс кодьӧсь. Татшӧмъясыслы век кежлӧ дасьтӧма сап сьӧд пемыдін.
Тшап да ковтӧм сёрнинаныс найӧ ӧзтӧны вир-яйлысь лёкколӧмсӧ да зільӧны кыскыны лэдзчысьӧм оласногӧ найӧс, кодъяс муртса на мынӧмаӧсь ылалӧмаясысь.
Ылӧгвелӧдысьяс кӧсйысьӧны сетны налы мездлун, кӧть асьныс найӧ пежыслӧн кесйӧгъяс.
Ӧд коді мортсӧ вермӧма, сылӧн сійӧ и кесйӧг.
Мездысь Исус Кристос Господьнымӧс тӧдмалӧм бӧрын кӧ мувывса пежсьыс ылыстчысьяс бара бергӧдчӧны важас, да лёкыс кӧ вермӧ найӧс, сэки татшӧмъясыслы воддза дорсьыс ёна лёкджык лоӧ.
Бурджык эськӧ вӧлі, найӧ кӧ эз тӧдлыны веськыдлуныслысь туйсӧ. Ӧд найӧ тӧдісны тайӧс, но бӧр бергӧдчисны налы сетӧм вежа тшӧктӧмысь.
Татшӧмъясыслы бура лӧсялӧ тайӧ шусьӧгыс: «Пон бергӧдчӧ аслас вос дорӧ», да нӧшта: «Мыськӧм порсь бӧр мунӧ туплясьны няйтӧ».
3 юр.
Донаясӧй, тайӧ менам мӧд гижӧд нин тіянлы. Кыкнан гижӧдас аслам казьтылӧмъясӧн зіли ышӧдны тіянӧс мӧвпавны сӧстӧма. Кутӧй тӧд выланыд вежа пророкъяслысь важысянь шуӧмсӧ да Мездысь Господьлысь апостолъяс пыр сетӧм тшӧктӧмсӧ.
Тӧдӧй, бӧръя кадӧ локтасны тіянӧс серам туйӧ пуктысьяс, асланыс лёк кӧсйӧмӧ сетчӧмаяс. Найӧ пондасны шуны: «Кӧні нӧ сійӧ Локтысьыс, коді кӧсйысьліс тай?
Ӧд миян батьяс кулісны нин, но ставыс коли важ мозыс: му пуксьӧмсяньыс нинӧм эз вежсьы».
Тадзи мӧвпалысьяс быттьӧ оз тӧдны, мый Ен Кывйӧн артмӧдӧма енэжсӧ да мусӧ, вӧчӧма ваысь да ва отсӧгӧн, и сэкся муюгыдсӧ вӧлі бырӧдӧма ваӧн.
Ӧнія енэжсӧ да мусӧ сійӧ жӧ Кывйыс кутӧ да видзӧ биӧн бырӧдӧм вылӧ. Тайӧ лоӧ Мыждан лунӧ, кор Ентӧг олысьясӧс лоӧ бырӧдӧма.
Мусаясӧй, кутӧй тӧд выланыд: Господьлӧн ӧти луныс сюрс во кодь, сюрс воыс — ӧти лун кодь.
Кодсюрӧ чайтӧны, мый Господьным нюжмасьӧ олӧмӧ пӧртны кӧсйысьӧмсӧ, но Сійӧ оз нюжмась, а терпитӧ миянӧс. Сійӧ оз кӧсйы, мед кодкӧ вошис, но кӧсйӧ, мед быдӧн бергӧдчис мыжъяссьыс.
Господьлӧн луныс воас виччысьтӧг, войся гусясьысь моз. Сэки енэжыс ыджыд шыӧн бырас, став ентыкӧлаыс ыпъялана биысь киссяс, а муыс да ставыс, мый сы вылын, сотчас.
Ставыс кӧ тадзи киссяс, сэки кутшӧм вежаӧн да веськыдӧн колӧ лоны тіянлы. Ті ӧд ёна кӧсъянныд да виччысянныд, мед ӧдйӧджык нин воас Енлӧн луныс. Сійӧ лунӧ енэжыс ыпъялан биысь сотчас да киссяс, доналӧм ентыкӧлаыс сылас.
Но Енлӧн кӧсйысьӧмыс серти ми виччысям выль енэж да выль му, кӧні кутас ыджыдавны веськыдлун.
Сідзкӧ, мусаясӧй, тайӧс виччысиганыд тӧждысьӧй, медым сувтны Ен водзӧ сӧстӧмӧн да мыжтӧмӧн, мед тіян сьӧлӧмын вӧлі лӧньлун.
Енлысь терпитӧмсӧ лыддьӧй аслыныд мездмӧмӧн. Та йылысь гижліс тіянлы Ен вежӧра дона Павел вокным. Татшӧмторъяссӧ сійӧ висьталӧ быд гижӧдын. Мыйсюрӧ сэтысь сьӧкыд гӧгӧрвонысӧ. Та вӧсна унаӧн ичӧт мывкыднысла да жеб эскӧмнысла сылысь гижӧдъяссӧ мукӧд Гижӧдсӧ моз бергӧдӧны мӧдарӧ. Тадзи кӧлалӧны ас выланыс бырӧдӧмсӧ.
Та вӧсна, мусаясӧй, водзвыв тайӧс тӧдӧмӧн видзчысьӧй, медым энӧ шедӧй Ентӧг олысьяслӧн ылӧдӧмӧ да энӧ усьӧй зумыд подув вывсьыс. Быдмӧй буралӧмас да миян Мездысь Исус Кристос Господьнымӧс тӧдмалӧмас.
Сылы ошкӧмыс ӧні да нэмъяс чӧж.
Аминь.
Апостол Иоанлӧн медводдза мӧдӧдӧм гижӧд
1 юр.
Ми висьталам сы йылысь, мый вӧлі водзысяньыс, мый кывлім, мый аддзылім ас синмӧн, мый видзӧдалім да мый видлалім ас киӧн — ми висьталам олӧмыслӧн Кыв йылысь. Олӧмыс петкӧдчис, да ми аддзылім Сійӧс. Ӧні висьталам Сы йылысь, юӧртам тіянлы помтӧм Олӧмыс йылысь. Сійӧ вӧлі Батьыскӧд, ӧні Сійӧс восьтӧма миянлы. Аддзывлӧм-кывлӧмыс йылысь висьталам тіянлы, мед эськӧ ті вӧлінныд миянкӧд ӧтув. А ми ӧтувъяӧсь Батьыскӧд да Сылӧн Исус Кристос Пиыскӧд.
Ми гижам та йылысь, медым ті верминныд тырвыйӧ нимкодясьны.
Енмыс эм югыд, Сы пытшкын пемыдыс абу. Тайӧ юӧрсӧ ми кывлім Ен Писянь, ӧні юӧртам сійӧс тіянлы.
Шуам кӧ: “Ми ӧтув Сыкӧд”, а асьным ветлам пемыдас, сідзкӧ, пӧръясям да огӧ олӧй збыльыс серти.
Сы моз кӧ югыдас ветлам, сэки миян эм ӧта-мӧдкӧд ӧтувтчӧм, сэки Исус Кристос Ен Пилӧн Вирыс сӧстӧммӧдӧ миянӧс быдпӧлӧс мыжысь.
Шуам кӧ: “Миян мыжыс абу”, ми пӧрйӧдлам асьнымӧс, и збыльыс абу миян пытшкын.
Ми кӧ висьталам мыжнымӧс, сэки веськыд да эскана Ен прӧститӧ миянлысь мыжсӧ да весалӧ миянӧс быд лёкысь.
Шуам кӧ: “Ми эгӧ вӧчӧй мыжсӧ”, петкӧдлам Енсӧ пӧръясьысьӧн, да Сылӧн кывйыс оз ов миян пытшкын.
2 юр.
Менам челядь.
Гижа тайӧс тіянлы, медым ті энӧ вӧчӧй мыжсӧ.
А мыжмас кӧ кодкӧ, тӧдӧй: Бать водзын миян эм веськыд Дорйысь — Исус Кристос.
Сійӧ — миян мыжъясысь вештысян вись, и абу сӧмын миян, а став муюгыдыслӧн мыжъясысь.
Олам кӧ Сылӧн тшӧктӧмъяс серти, тайӧн петкӧдлам, мый ми тӧдам Сійӧс.
Коді шуӧ: “Ме тӧда Сійӧс”, но тшӧктӧмъяссӧ Сылысь торкӧ, сійӧ пӧръясьӧ, да сы пытшкын збыльыс абу.
Коді олӧ Сылӧн Кывйыс серти, сы пытшкын збыльысь Енлӧн муслуныс воӧма тыр-бурӧдз. Та серти тӧдам, мый ми Сы пытшкынӧсь.
Коді шуӧ: “Ме Сы пытшкын”, сылы колӧ овны Сы моз.
Мусаяс, гижа тіянлы ог выль, а важ тшӧктӧм. Сійӧс ті тӧданныд водзысяньыс нин.
Тайӧ кывсӧ, важ тшӧктӧмсӧ, ті кывлінныд водзынджык нин.
Збыльвылас, ме гижа выль тшӧктӧм. Сійӧ збыльмӧ Кристос пытшкын да тіян пытшкын, ӧд пемыдыс вешйӧ, а збыль югыдыс югдӧдӧ нин.
Коді шуӧ: “Ме ветла югыдас”, а воксӧ ассьыс мустӧмтӧ, сійӧ пемыдас на.
Воксӧ радейтысь ветлӧ югыдас, да сы пытшкын крукӧдыс абу.
Воксӧ мустӧмтысь ветлӧ пемыдас, сійӧ оз тӧд, кытчӧ мунӧ, ӧд пемыдыс тупкӧма сылысь синсӧ.
Челядь, тіянлы гижа, ӧд Кристос ним вӧсна прӧститӧма мыжнытӧ.
Батьяс, тіянлы гижа, ӧд ті тӧданныд Водзысянь Олысьсӧ.
Том войтыр, тіянлы гижа, ӧд ті верминныд омӧльсӧ.
Челядь, тіянлы гижа, ӧд ті тӧданныд Ен Батьӧс.
Гижи тіянлы, батьяс, ӧд ті Водзысянь Олысьсӧ тӧданныд.
Гижи тіянлы, том войтыр, ӧд ті ёнӧсь, Енлӧн Кывйыс олӧ тіян пытшкын да ті верминныд омӧльсӧ.
Энӧ радейтӧй муюгыдсӧ да мый сэні эм. Кодлы муса муюгыдыс, сылы Батьыс абу муса.
Ӧд тайӧ муюгыдас ыджыдалӧ вир-яйлӧн кӧсйӧм, синъяслы колӧм да ыкшаасьӧм. Тайӧ абу Батьсянь, ставыс тайӧ муюгыдыслӧн.
Муюгыдыс став аслас колӧм-кӧсйӧмнас бырас, а Ен кӧсйӧм серти олысь пондас овны помтӧг.
Челядь, ӧні бӧръя кад.
Ті кывлінныд, антикрист пӧ локтас.
Ӧні уна антикрист нин петкӧдчис. Та серти тӧдам, мый бӧръя кад пуксис.
Найӧ петісны миян пӧвстысь, но найӧ эз вӧвны миянкӧд ӧтув.
Вӧліны кӧ миянкӧд ӧтув, кольччисны эськӧ миянкӧд.
Но налӧн петӧмыс висьталӧ, мый найӧ абу миянкӧд.
А тіянӧс мавтыштӧма Вежаыс, да ті тӧданныд ставсӧ.
Ме гижа тіянлы ог сы вӧсна, мый ті онӧ тӧдӧй збыльсӧ, мӧдарӧ, ті сійӧс тӧданныд да. Ті ӧд тӧданныд: збыльсяньыс ылӧгыс оз лок.
Коді нӧ ылӧдчысьыс? Абу-ӧ сійӧ, коді шуӧ, Исус пӧ абу Кристос.
Татшӧмыс антикрист. Сійӧ соссьӧ Батьсьыс да Письыс.
Коді соссьӧ Письыс, сылӧн абу и Батьыс.
Коді сибӧдӧ Писӧ, сылӧн и Батьыс эм.
Сідзкӧ, мый ті кывлінныд водзысяньыс, сійӧ мед олас тіян пытшкын.
Тайӧ кӧ лоӧ тіян пытшкын, сэки Пиыс да Батьыс пытшкын лоанныд.
Сійӧ кӧсйысис сетны миянлы помтӧм олӧм.
Вылынджык ме гижи тіянӧс ылӧдысьяс йылысь.
Но тіян эм Вежасянь мавтыштӧм. Та вӧсна абу колана, мед кодкӧ велӧдіс тіянӧс.
Ӧд мавтыштӧмыс велӧдӧ тіянӧс быдторйӧ, висьталӧ збыльсӧ да оз пӧръясь. Сідзкӧ, олӧй велӧдӧм сертиыс.
Челядь, лоӧй Сы пытшкынӧсь, медым Сылӧн локтігӧн ми вӧлім повтӧмӧсь, мед эз вӧв яндзим миянлы сувтны Сы водзӧ.
Ті кӧ тӧданныд, мый Сійӧ веськыд, тӧдӧй: веськыда вӧчысь Сысянь чужӧма.
3 юр.
Видзӧдӧй, кутшӧм мусаӧсь ми Батьлы: Сійӧ сетіс миянлы шусьыны да лоны Енлӧн ныв-пиӧн.
Муюгыдсаыс оз тӧд миянӧс, Сійӧс оз тӧд да.
Мусаясӧй, ӧні ми Енлӧн ныв-пи.
Кодӧн лоам, тайӧ эз на воссьы.
Тӧдам сӧмын, кор воссяс, лоам Сы кодьӧсь, ӧд сэки аддзам Сійӧс сэтшӧмӧн, кутшӧм Сійӧ эм.
Сы вылӧ татшӧм лача кутысь сӧстӧммӧдӧ асьсӧ, мед лоны Сы кодь сӧстӧмӧн.
Мыжсӧ вӧчысь мунӧ Индӧдлы паныд, ӧд мыжыс — тайӧ Индӧдлы паныд мунӧм.
Ті тӧданныд, мый Кристос локтіс босьтны миянлысь мыжъяс.
Сы пытшкын мыжыс абу.
Сы пытшкын олысь мыжсӧ оз вӧч, а мыжсӧ вӧчысь эз аддзыв да оз тӧд Сійӧс.
Челядь, энӧ сетӧй ылӧдны тіянӧс некодлы.
Веськыда вӧчысь — сійӧ Кристос кодь веськыд.
А мыжсӧ вӧчысь — омӧльсянь, ӧд омӧльыс водзысянь мыжсӧ вӧчӧ.
Та вӧсна Ен Пи и локтіс, мед жугӧдны омӧльыслысь уджъяссӧ.
Енсянь чужысь мыжсӧ оз вӧч, сы пытшкӧ бур кӧйдыс вужъясьӧма.
Татшӧмыс мыжсӧ вӧчны оз вермы, ӧд сійӧ Енсянь чужӧма.
Коді оз веськыда вӧч, да коді мустӧмтӧ воксӧ, сійӧ абу Енсянь. Та серти тӧдмалам Енлысь ныв-писӧ да омӧльлысь йылӧмсӧ.
Миянлы колӧ радейтны ӧта-мӧдӧс. Тайӧ юӧрсӧ ті кывлінныд водзысяньыс. Огӧ лоӧй Каин кодьӧсь, ӧд сійӧ вӧлі омӧльсяньыс, да виис ассьыс воксӧ.
Мыйла виис?
Каинлӧн уджъясыс вӧліны лёкӧсь, а вокыслӧн — веськыдӧсь.
Энӧ шензьӧй, вокъясӧй, муюгыдсаыс кӧ мустӧмтӧ тіянӧс.
Ми тӧдам: ми вуджим кулӧмсьыс олӧмӧ, ӧд радейтам вокъяснымӧс.
Коді оз радейт воксӧ — кольӧ кулӧмас.
Воксӧ мустӧмтысь — сійӧ морт виысь.
Ті тӧданныд, мый морт виысь пытшкын помтӧм олӧмыс абу.
А муслунсӧ ми тӧдмалім сы серти, мый Кристос сетіс Ассьыс олӧмсӧ миян вӧсна.
Сідзкӧ, миянлы тшӧтш колӧ сетны олӧмнымӧс вокъясным вӧсна.
Мортыс кӧ вокыслысь гӧльлунсӧ аддзигӧн чорзьӧдӧ сьӧлӧмсӧ да оз отсав сылы, кӧть сылӧн аслас ставыс эм, вермас-ӧ татшӧм морт пытшкас лоны Енлӧн муслуныс?
Челядьӧй, кутам радейтны ӧта-мӧднымӧс огӧ кывъясӧн да сёрниӧн, но збыль сертиыс да уджъясӧн.
Та серти тӧдмалам, мый ми збыльыслӧн. Сьӧлӧм кӧ мыждӧ миянӧс, ми вермам лӧньӧдны сьӧлӧмнымӧс Ен водзын. Енмыс ӧд ыджыдджык миян сьӧлӧмысь, Сійӧ ставсӧ тӧдӧ.
Мусаясӧй, сьӧлӧмным кӧ оз мыжды миянӧс, ми вермам повтӧг локны Ен водзӧ. Сэки мый корам, босьтам Сысянь, ӧд олам Сылӧн тшӧктӧмъяс серти да вӧчам Сылы шогманасӧ.
А Сійӧ тшӧктіс, медым ми эским Сылӧн Пилы, Исус Кристослы, да тшӧктӧмыс серти радейтім ӧта-мӧдӧс.
Коді кутчысьӧ Сылӧн тшӧктӧмъясӧ, сійӧ олӧ Кристос пытшкын, а Кристос — сы пытшкын.
А мый Сійӧ миян пытшкын, тӧдам Ловсяньыс, кодӧс Сійӧ сетіс миянлы.
4 юр.
Мусаясӧй, энӧ эскӧй быд ловлы, тӧдмалӧй, Енсянь-ӧ сійӧ. Ӧд уна ылӧгпророк ӧні муюгыдас.
Енсянь-ӧ лолыс, тӧдмаланныд тадзи: висьталӧ кӧ лолыс, мый Исус Кристос локтіс вир-яйын, сійӧ Енсянь. Оз кӧ висьтав, мый Исус Кристос локтіс вир-яйын, сійӧ абу Енсянь, сійӧ антикристсянь. Тайӧ — антикристлӧн лолыс, код йылысь ті кывлінныд, мый сійӧ локтас, и ӧні сійӧ муюгыдас нин.
Челядь, ті Енсянь. Ті верминныд ылӧгпророкъясӧс, ӧд тіян пытшкын Олысьыс ёна ыджыдджык муюгыдсасьыс.
Найӧ муюгыдсьыс, та вӧсна и сёрнитӧны муюгыдсаыс моз, и муюгыдыс кывзӧ найӧс.
А ми Енсянь.
Енсӧ тӧдысь кывзӧ миянӧс, а коді абу Енсянь, сійӧ оз кывзы миянӧс.
Та серти тӧдмалам збыльыслысь ловсӧ да ылӧгыслысь ловсӧ.
Мусаясӧй, кутам радейтны ӧта-мӧднымӧс, ӧд муслуныс Енсянь.
Коді радейтӧ, сійӧ Енсянь чужӧма да тӧдӧ Енсӧ.
Коді оз радейт, сійӧ оз тӧд Енсӧ, ӧд Енмыс эм муслун.
Енмыс мӧдӧдіс тайӧ муюгыдас Ассьыс ӧтка Писӧ, медым Сы пыр сетны миянлы олӧм.
Тадзи Сійӧ петкӧдліс миян дінӧ Ассьыс муслунсӧ. Муслуныс абу сыын, мый Енмыс вӧлі муса миянлы, но — сыын, мый ми вӧлім мусаӧсь Сылы. Сійӧ сетіс Ассьыс Писӧ вись пыдди, мед вештысьны миян мыжъясысь.
Мусаясӧй, Енмыс кӧ татшӧма радейтіс миянӧс, миянлы тшӧтш колӧ радейтны ӧта-мӧдӧс.
Енсӧ некод некор эз аддзыв.
Ӧта-мӧдӧс кӧ радейтам, сідзкӧ, Енмыс миян пытшкын да Сылӧн муслуныс тыр-бурӧдз воис сьӧлӧманым.
Ен сетіс миянлы Ассьыс Ловсӧ. Та серти тӧдам, мый ми Сы пытшкынӧсь, а Сійӧ миян пытшкын.
Батьыс мӧдӧдіс Писӧ мездыны муюгыдсӧ. Ми ас синмӧн аддзылім тайӧс, и ӧні висьталам та йылысь.
Коді шуӧ Исусӧс Ен Пиӧн, Енмыс сы пытшкын, а сійӧ Ен пытшкын.
Ми тӧдмалім Енлысь миян дінӧ муслунсӧ да эским Сылӧн муслунас.
Енмыс эм муслун. Коді олӧ муслун пытшкас, сійӧ Ен пытшкын, а Енмыс сы пытшкын.
Сідзкӧ, муслуныс тыр-бурӧдз воӧма миян пытшкын. Та вӧсна вермам повтӧг сувтны Мыждан лунӧ, ӧд ми тайӧ муюгыдас Кристос кодьӧсь.
Муслунас абу полӧмыс, ӧд тыр-бур муслуныс вӧтлӧ полӧмсӧ.
Полӧмас олӧ мыждӧм, та вӧсна полысьлӧн муслуныс абу на тыр-бур.
Кутамӧй радейтны Енмӧс, ӧд медводз Сійӧ радейтіс миянӧс.
Коді шуӧ: “Ме Енсӧ радейта”, а воксӧ ассьыс мустӧмтӧ, сійӧ пӧръясьӧ.
Оз кӧ радейт воксӧ, кодӧс аддзӧ, вермас-ӧ радейтны Енсӧ, кодӧс оз аддзы?
Миян эм Енсянь тшӧктӧм: «Енмӧс радейтысь, радейт тшӧтш воктӧ ассьыд».
5 юр.
Эскам кӧ, мый Исус — сійӧ Кристос, ми Енсянь чужӧмаӧсь. Муса кӧ миянлы Чужтысьыс, муса и Сысянь чужысьыс.
Радейтам кӧ Енсӧ да олам Сылӧн тшӧктӧмъяс серти, та серти тӧдам, мый ми Ен челядьӧс тшӧтш радейтам.
Тшӧктӧмъяс серти олӧмыс — тайӧ Енсӧ радейтӧм, а Сылӧн тшӧктӧмъясыс абу сьӧкыдӧсь.
Ӧд Енсянь чужысь вермӧ муюгыдсӧ.
Тайӧ вермӧмыс — миян эскӧм, кодӧн муюгыдсӧ вермӧма.
Коді нӧ вермӧ муюгыдсӧ? Сійӧ, коді эскӧ, мый Исус — Енлӧн Пи.
Исус Кристос локтіс ваӧн, вирӧн да Лолӧн, эз сӧмын ваӧн, но ваӧн да вирӧн.
Та йылысь Лов висьталӧ, ӧд Лолыс эм збыльыс.
Енэжас эм куим висьталысь: Бать, Кыв да Вежа Лов.
Тайӧ куимыс ӧти.
Му вылас тшӧтш куим висьталысь: Лов, ва да вир.
Тайӧ куимыс висьталӧ ӧтитор йылысь.
Ми сибӧдам мортлысь висьталӧмсӧ, но Енлӧн висьталӧмыс ёна ыджыдджык, ӧд сійӧс Ачыс Енмыс висьталӧ. Сійӧ висьталӧ Аслас Пи йылысь.
Коді эскӧ Ен Пилы, сылӧн сьӧлӧмас эм тайӧ висьталӧмыс.
Коді оз эскы Енмыслы, пуктӧ Сійӧс пӧръясьысь туйӧ, ӧд тайӧ мортыс оз эскы Пи йывсьыс Енлӧн висьталӧмыслы.
А висьталӧмыс татшӧм: Ен сетӧма миянлы помтӧм олӧм, и тайӧ олӧмыс Пиыс пытшкын.
Кодлӧн эм Пиыс, сылӧн эм олӧмыс.
Кодлӧн абу Ен Пиыс, сылӧн олӧмыс абу.
Тайӧс гижи тіянлы, Ен Пи нимӧ эскысьяслы, мед ті тӧдінныд, мый Ен Пилы эскӧмныд вӧсна тіян эм помтӧм олӧм.
Ми вермам повтӧг локны Ен водзӧ, ми ӧд тӧдам: корӧмным кӧ лӧсялӧ Сылӧн кӧсйӧмлы, Сійӧ кылӧ миянӧс.
А тӧдам кӧ, мый Сійӧ кылӧ миянлысь быд корӧм, тӧдам тшӧтш, мый Сійӧ сетас корӧмасӧ.
Кор аддзан, мый вокыд мыжӧ усьӧма, но мыжыс оз вайӧд кулӧмӧ, кевмысь сы вӧсна. Ен сетас сылы олӧм, дерт, мыжыс кӧ оз кулӧмӧ вайӧд.
Эм кулӧмӧ вайӧдысь мыж, но ме ог кор кевмысьны татшӧм мыжсӧ вӧчысь вӧсна.
Быд лёк вӧчӧм эм мыж, но оз став мыжыс вайӧд кулӧмӧ.
Ми тӧдам: Енсянь чужысьяс мыжсӧ оз вӧчны.
Енсянь чужысь видзӧ асьсӧ, да омӧльыс оз вермы инмӧдчыны сы дінӧ.
Тӧдам, мый ми Енсянь, а став муюгыдыс омӧльыслӧн кипод улын.
Нӧшта тӧдам, мый Ен Пи локтіс да сетіс миянлы мывкыдлун, мед ми тӧдім збыль Енсӧ. И ми олам тайӧ збыльыс пытшкын, Исус Кристос Пиыс пытшкын.
Сійӧ эм збыль Енмыс да помтӧм олӧмыс.
Челядь, видзӧй асьнытӧ идолъясысь.
Аминь.
Апостол Иоанлӧн мӧд мӧдӧдӧм гижӧд
1 юр.
Ме, пӧрысь морт, гижа Енмӧн бӧрйӧм аньлы да сылӧн челядьлы. Ті меным збыльысь мусаӧсь. Мусаӧсь абу сӧмын меным, но быдӧнлы, коді тӧдӧ збыльсӧ. Ті меным мусаӧсь збыльыс вӧсна, ӧд сійӧ олӧ миян пытшкын да лоӧ миянкӧд нэмъяс чӧж.
Бурсетӧм, буралӧм да лӧнь олӧм тіянлы, збыляс да муслунас кутчысьысьяслы, Ен Батьсянь да Господь Исус Кристоссянь — Батьыслӧн Писянь.
Меным лои зэв нимкодь, кор аддзи, мый тэнад челядь пиысь кодсюрӧ ветлӧны збыляс, Батьлӧн тшӧктӧмыс серти.
Ӧні менам татшӧм корӧм, дона аньӧй, медым ми радейтім ӧта-мӧднымӧс. Тайӧ тшӧктӧмыс абу выль, сійӧ миян водзысяньыс нин вӧлі.
Радейтны, сідзкӧ, овны Ен тшӧктӧмъяс серти.
Дзик тайӧ тшӧктӧмсӧ ті кывлінныд водзысяньыс, сы серти и колӧ овны.
Ӧні муюгыдас уна ылӧдысьыс. Найӧ оз эскыны, мый Исус Кристос локтіс вир-яйын. Татшӧм мортыс — ылӧдысь да антикрист.
Видзӧдӧй ас бӧрсяныд, медым ми эгӧ воштӧй сійӧ, мый вӧсна миян уджалӧма, мед эськӧ ми вермим босьтны удждонсӧ дзоньнас.
Коді торкӧ Кристослысь велӧдӧмсӧ да оз кутчысь сэтчӧ, сыкӧд Енмыс абу.
Коді кутчысьӧ Кристослӧн велӧдӧмас, сыкӧд Батьыс и Пиыс.
Тіян дінӧ локтысь кӧ вайӧ мӧд велӧдӧм, энӧ сибӧдӧй сійӧс керка помад, весиг энӧ чолӧмасьӧй сыкӧд.
Сыкӧд чолӧмасьысь ӧтувтчӧ сылӧн лёк уджъясӧ.
Унатор на эм гижнысӧ тіянлы, но ӧні ог кут ставсӧ гижны кабала вылӧ чернилаӧн.
Чайта, артмас волыны тіян дінӧ да воча пуксьӧмӧн сёрнитны, медым ті верминныд тырвыйӧ нимкодясьны.
Чолӧм тэныд ыстӧны бӧрйӧм чойыдлӧн челядьыс.
Аминь.
Апостол Иоанлӧн коймӧд мӧдӧдӧм гижӧд
1 юр.
Ме, пӧрысь морт, гижа муса Гайлы. Сійӧ меным збыльысь муса.
Муса вокӧй, ме тӧда: ловнад тэ ён. Кевмыся, мед вир-яйнад тшӧтш вӧлін ён, да ставыс тэнад вӧлі бур.
Меным лои зэв нимкодь, кор вокъяс локтісны да висьталісны, тэ пӧ кутчысян збыляс да олан сы серти.
Меным вывті нимкодь кывны, мый менам челядь ветлӧны збыляс.
Муса вокӧй, вокъяс да локтысьяс вӧсна тэнад тӧждысьӧмыд петкӧдлӧ, мый тэ эскана морт.
Вичко водзын вокъяс висьталісны тэнад муслун йылысь.
Бур лоӧ, тэ кӧ Енмыслы колана ногӧн дасьтан да мӧдӧдан найӧс. Найӧ Кристос ним вӧсна петісны туяс, нинӧм эз босьтны ентӧдтӧмъяслысь.
Миянлы колӧ сибӧдны татшӧмъяссӧ, ӧд тадзи вӧчигӧн ми накӧд ӧтвыв кесъялам збыльыслы.
Ме гижлі вичкоас, но сэні асьсӧ ыджыдӧ пуктысь Диотреф оз кывзы миянӧс.
Та вӧсна, кор ме локта, казьтышта сылы уджъясыс йылысь: сійӧ ӧд паськӧдӧ миян йылысь лёк сёрни. Но тайӧ этша на, сійӧ вокъясӧс оз сибӧд, тшӧтш мукӧдыслы оз лэдз тайӧс вӧчны. А сибӧдны кӧсйысьясӧс весиг вӧтлӧ вичкосьыс.
Муса вокӧй, видзӧд бурсӧ вӧчысь вылӧ, а эн лёксӧ вӧчысь вылӧ.
Бурсӧ вӧчысь — сійӧ Енсянь, лёксӧ вӧчысь эз аддзыв Енсӧ.
Димитрий йылысь ставныс бура сёрнитӧны. Сы йылысь ачыс збыльыс висьталӧ, ми тшӧтш тадзи висьталам. Тэ ӧд тӧдан: миян висьталӧмыс збыль.
Унатор на эм гижнысӧ, но чернилаа перӧӧн ӧні ог кут тайӧс вӧчнысӧ. Чайта, регыд аддзысьлам тэкӧд да воча пуксьӧмӧн сёрнитам.
Лӧнь олӧм тэныд.
Чолӧм ыстӧны ёртъясыд.
Висьтав чолӧм миян ёртъяслы быдӧнлы торйӧн.
Аминь.
Апостол Иудалӧн мӧдӧдӧм гижӧд
1 юр.
Гижӧ Иуда, Исус Кристослӧн кесйӧг, Яковлӧн вок. Чолӧмала тіянӧс, Енмӧн корӧмаясӧс. Ен Бать вежӧдіс тіянӧс, да Исус Кристос видзӧ тіянӧс. Буралӧм, лӧньлун да муслун мед уна пӧвстӧн содас тіянлы.
Мусаяс, ме ёна кӧсйи гижны тіянлы миян ӧтувъя мездмӧм йылысь, но лыдди коланаӧн водзджык туйдӧдны тіянӧс, медым ті вӧлінныд дасьӧсь дорйыны ассьыныд эскӧмнытӧ. Тайӧ эскӧмсӧ Енмыс сетіс вежа войтырлы ӧтчыд да пыр кежлӧ.
Тіян пӧвстӧ наяна сюйсисны Ентӧг олысьяс. Татшӧм йӧзыслы важӧн нин дасьтӧма мыждӧмсӧ. Миян Енлысь буралӧмсӧ найӧ бергӧдӧны лэдзчысьӧм оласногӧ. Найӧ соссьӧны ӧти Ен Ыджыдысь да миян Господь Исус Кристосысь.
Ті, дерт, та йылысь тӧданныд нин, но кӧсъя казьтыштны тіянлы: Енмыс мездіс Ассьыс войтырсӧ Египет муысь, но бӧрыннас на пӧвстысь бырӧдіс эскытӧмъясӧс. Анделъясӧс, кодъяс эз донъявны Енсянь сетӧм ыджыдалан вынсӧ да эновтісны енэжвывса оланінсӧ, Енмыс помтӧг видзӧ сап пемыдас чепъясын ыджыд Мыждан лун кежлӧ.
Тадзи лои тшӧтш Содомын, Гомораын да на гӧгӧр каръясын олысьяскӧд. Тайӧ анделъясыс моз найӧ кырсалісны да сетчисны зывӧк оласногӧ, та вӧсна тайӧ олысьяссӧ вӧлі сотӧма куслытӧм биын. Тайӧ висьталӧ миянлы Енлӧн мыждӧм йылысь. Дзик тадзи лоӧ тайӧ Ентӧг олысьясыскӧд. Найӧ ылӧдлӧны тіянӧс асланыс вӧтъясӧн, пежалӧны ассьыныс вир-яйнысӧ, нинӧм туйӧ пуктӧны юралысьясӧс да лёкӧдӧны енэжвывса юралысь-веськӧдлысьясӧс.
Кор Микаил архангел вензис омӧлькӧд Мӧисей шой йылысь, сійӧ эз лысьт лёкӧдны-мыждыны омӧльӧс.
Сӧмын шуис: «Господь мед ӧлӧдас тэнӧ».
Тайӧ йӧзыс лёкӧдӧны сійӧ, мый асьныс оз гӧгӧрвоны, а мый вежӧртӧм пемӧсъяс моз кылӧны асланыс вир-яйын, сійӧ кыскӧ найӧс бырӧдӧмӧ.
Курыд шог налы. Найӧ мунӧны Каин туйӧд, горшасьӧны сьӧм вылӧ, Валаам моз ылалӧмаӧсь. Корей моз найӧ паныд мунӧны, та вӧсна Корейӧс моз найӧс лоӧ бырӧдӧма.
Чукӧртчиганыд татшӧм йӧзыс овлӧны тіянлы крукӧдӧн. Кор ті мусапырысь чукӧртчанныд ӧтвыв сёйны, найӧ яндысьтӧг тшӧгӧдӧны асьнысӧ да тӧждысьӧны сӧмын ас вӧснаныс.
Найӧ — тӧвнырӧн новлӧдлан ватӧм кымӧръяс, вотӧс вайтӧм арся пуяс, вужнас нетшыштӧмаяс, кык пӧв кулӧмаяс. Найӧ — саридзвывса гыяс, кодъяс лёкысь быгзьӧны асланыс янӧдан уджъясӧн. Найӧ — ылалӧм кодзувъяс, кодъяслы век кежлӧ дасьтӧма сап пемыдсӧ.
Тайӧ йӧзыс йылысь водзвыв висьтавліс Енок, Адамсянь сизимӧд чужанвужйысь петысь: «Со, локтӧ Господь Аслас лыдтӧм-тшӧттӧм вежа анделъяскӧд, медым мыждыны став йӧзсӧ. Сійӧ мыждӧ став Ентӧг олысьяссӧ налӧн лёк уджъясысь да янӧдӧ мыж вӧчысьясӧс, кодъяс шуасисны Ен вылӧ лёкӧдан кывъясӧн».
Тайӧ йӧзыс век шуасьӧны да элясьӧны. Найӧ кывзысьӧны асланыс лёк кӧсйӧмлысь, паныд мунӧны Ен Индӧдлы да олӧны лёк нога. Найӧ тшапа сёрнитӧны да ошкӧны мукӧдсӧ, медым аслыныс мыйкӧ курыштны.
Но ті, мусаяс, энӧ вунӧдӧй миян Господь Исус Кристослӧн апостолъяслысь водзвыв висьталӧмсӧ.
Найӧ шулісны тіянлы, мый бӧръя кадас лоӧны сэтшӧм йӧз, кодъяс быдтор вылын сералӧны да олӧны асланыс лёк кӧсйӧмлысь кывзысьӧмӧн. Татшӧм йӧзыс вайӧны тіян костӧ юксьӧм.
Найӧ олӧны вир-яй сертиныс, Енлӧн Лолыс на пытшкын абу.
Но ті, мусаяс, ёнмӧдӧй асьнытӧ вежа эскӧмнаныд, кевмысьӧй Вежа Лов нуӧдӧм улын. Видзӧй асьнытӧ Ен муслунас. Виччысьӧй сійӧ кадсӧ, кор миян Господь Исус Кристос Аслас буралӧмнас вайӧдас миянӧс помтӧм олӧмӧ.
Ӧтияс дінӧ лоӧй бур сьӧлӧмаӧсь, сюся видзӧдӧмӧн, а мукӧдсӧ мездӧй повзьӧдлӧмӧн, перйӧй найӧс би пытшсьыс. Янӧдӧй найӧс повзьӧдлӧмӧн, зывӧктӧй весиг паськӧмнысӧ, коді пежасьӧма налӧн вир-яйысь.
Енмыс вына видзны тіянӧс усьӧмысь да вайӧдны тіянӧс Аслас дзирдлунӧ нимкодясьысь да сӧстӧм войтырӧн. Ыджыд мывкыда ӧти Енмыс мездіс миянӧс Исус Кристос Господьным пыр. Сылы ошкӧм-нимӧдӧмыс, Сылӧн выныс-ыджыдалӧмыс му пуксьытӧдз, ӧні да нэмъяс чӧж.
Аминь.
Апостол Павеллӧн Римӧ мӧдӧдӧм гижӧд
1 юр.
Гижӧ Павел, Исус Кристослӧн кесйӧг, Енмӧн корӧм апостол. Менӧ бӧрйӧма висьтавлыны Енлысь Бур Юӧрсӧ. Тайӧ Юӧрыс йылысь Енмыс важысянь кӧсйысьӧма Аслас пророкъяс пыр вежа Гижӧдъясын. Бур Юӧрас висьтавсьӧ Сылӧн Пи йылысь, коді чужис мортӧн да вӧлі Давид чужанвужйысь. Кулӧмысь ловзьӧмнас Сійӧ воссис Вына Ен Пиӧн да Ловсянь вежаӧн. Сійӧ — Исус Кристос, миян Господь. Сы пыр ми босьтім бурсетӧмсӧ: апостолавны Кристос ним вӧсна, медым вайӧдны быд кыла войтырӧс эскӧмас да Енлы кывзысьӧмас. Тайӧ войтыр лыдӧ пыранныд тшӧтш ті, Исус Кристосӧн корӧмаяс. Ставныдлы, Римын олысьяслы, буралӧм да лӧнь олӧм Ен Батьнымсянь да Господь Исус Кристоссянь. Енмыслы ті мусаӧсь, ті Сылӧн корӧм вежа войтыр.
Медводз, Исус Кристос нимӧн аттьӧала Енмӧс ставсьыныд, ӧд тіян эскӧм йылысь висьталӧны став му пасьталаыс.
Енмыс аддзӧ, мый ме став сьӧлӧмӧн кесъяла Сылы, висьтала Пиыс йылысь Бур Юӧр да пыр казьтывла тіянӧс кевмысигъясӧн. Быдпӧрйӧ кевма Енлы, медым коркӧ верми волыны тіян дінӧ, но тайӧ мед Сылӧн кӧсйӧм серти вӧлі. Ёна кӧсъя аддзӧдчывны тіянкӧд да юксьыштны Ловсянь бурсетӧмӧн, медым ёнмӧдны тіянӧс. Тадзи ми ышӧдам ӧта-мӧдӧс эскӧмнаным: ме — тіянӧс, а ті — менӧ.
Вокъяс, тӧдӧй: ме унаысь лӧсьӧдчывлі волыны тіян дінӧ, но пыр кутшӧмкӧ мытшӧдъяс паныдасьӧны. Мукӧд войтыр пӧвстын моз тшӧтш тіянын ме кӧсъя аддзыны бурвисьталӧмлысь вотӧссӧ.
Ме уджйӧза грекъяслы и варваръяслы, вежӧраяслы и вежӧртӧмъяслы.
Ёна кӧсъя висьтавны Бур Юӧрсӧ тшӧтш тіянлы, Римын олысьяслы.
Ме ог яндысь висьтавлыны Кристослысь Бур Юӧрсӧ, ӧд сійӧ Енлӧн выныс, мездӧ быд эскысьӧс: медводз юдейясӧс, сэсся грекъясӧс.
Бур Юӧрыс восьтӧ Енлысь веськыдлунсӧ эскӧмсянь да эскӧм пыр. Гижӧма: «Веськыда олысь эскӧмнас пондас овны».
Йӧзлӧн Ентӧг олӧм да лёк вӧчӧм вылӧ лэччӧ енэжсянь Енлӧн скӧрлуныс, ӧд найӧ лёк вӧчӧмнас пӧдтӧны збыльсӧ.
Найӧ тӧдӧны Ен йылысь тӧдны позянасӧ, ӧд тайӧс налы Енмыс восьтіс.
Му пуксьӧмсяньыс Енлӧн став вӧчӧмторйысь позьӧ аддзыны тыдавтӧмсӧ: Енлысь помтӧм вынсӧ да Сылысь енмалунсӧ. Та вӧсна налы дорйысьнысӧ нинӧмӧн.
Но Енсӧ тӧдігӧн найӧ эз пуктыны Сійӧс Ен туйӧ да эз аттьӧавны Сійӧс, мӧвпалісны ковтӧмсӧ да налӧн вежӧрыс пемдіс. Асьнысӧ мывкыдаӧн шуигӧн вежӧртӧмъясӧ пӧрины. Пыр олысь Енмӧс нимӧдӧм пыдди пондісны юрбитны быранаыслы: морт, лэбач, пемӧс да веглясьысь сяма вӧчӧмторъяслы. Та вӧсна Енмыс колис найӧс асланыс лёкколӧмӧ. Ыштӧмнаныс найӧ пежалісны ассьыныс вир-яйсӧ.
Енлысь збыльсӧ бергӧдісны пӧръясьӧмӧ, юрбитісны вӧчӧмторъяслы, а эз Ставсӧвӧчысьлы. Ошкӧм Сылы нэмъяс чӧж. Аминь.
Та вӧсна Ен эновтіс найӧс янӧдана ыштӧмас. Найӧ пондісны овны мӧдарӧ: нывбаба пондіс узьлыны нывбабакӧд, айулов эновтчис нывбабакӧд узьлӧмысь, ӧзйис лёкколӧмӧн ӧта-мӧд дінас да пондіс вӧчны быдпӧлӧс зывӧксӧ. Асланыс ылалӧмысь найӧ босьтӧны нин лӧсялана водзӧссӧ.
Найӧ эз лыддьыны коланаӧн тӧдны Енсӧ, та вӧсна Ен колис найӧс торксьӧм вежӧрас вӧчны ковтӧмторсӧ. Найӧ тырӧмаӧсь быдпӧлӧс ылӧгнас да лёкнас. Кырсалӧны, горшасьӧны, лӧгалӧны, вежалӧны, виӧны, вензьӧны, пӧръясьӧны да лёксьӧны. Найӧ лёк сёрниаӧсь, удтысьӧны, Енсӧ мустӧмтӧны, мукӧдӧс дӧзмӧдӧны, асьнысӧ вылӧ пуктӧны да ошйысьӧны. Найӧ зільӧсь лёксӧ вӧчны, бать-мамныслысь оз кывзысьны, найӧ мывкыдтӧмӧсь, кывсӧ оз кутны, оз бурасьны, кын сьӧлӧмаӧсь да чорыдӧсь.
Найӧ тӧдӧны Енлысь веськыда мыждӧмсӧ, мый татшӧмтор вӧчысьӧс виччысьӧ кулӧм.
Но та вылӧ видзӧдтӧг найӧ вӧчӧны лёксӧ, весиг ошкӧны тадзи вӧчысьясӧс.
2 юр.
Тӧд, мортӧй, мӧдӧс мыждігӧн тэныд оз сюр дорйысян кывйыд. Мӧдӧс мыждӧмнад ачыд мыжман, ӧд ачыд тшӧтш сы моз вӧчан.
Ми тӧдам, мый Енмыс веськыда мыждӧ тадзи вӧчысьясӧс.
Мортӧй, тэ чайтан, тадзи вӧчысьӧс мыждӧмнад пышъян Енлӧн мыждӧмысь? Ачыд ӧд сійӧ жӧ вӧчан.
Гашкӧ, тэ нинӧм туйӧ пуктан Енлысь ыджыд бурлунсӧ, мелілунсӧ да терпитӧмсӧ? Он ӧмӧй гӧгӧрво, мый Енлӧн бурлуныс вайӧдӧ тэнӧ мыжъяссьыд бергӧдчӧмӧ.
Но чорыд сьӧлӧмыд вӧсна тэ он кӧсйы бергӧдчыны мыжъяссьыд, тадзи ас вылад чукӧртан Енлысь скӧрлунсӧ. Сійӧ киссяс тэ вылӧ Скӧралан лунӧ Енмыслӧн веськыда мыждігӧн. Сэки Енмыс быдӧнлы мынтас уджыс серти.
Помтӧм олӧм налы, кодъяс бур вӧчӧмнас мудзлытӧг корсьӧны бырлытӧмсӧ, дзирдлунсӧ да нимӧдӧмсӧ.
Асьсӧ сӧмын радейтысьясӧс да збыляс пыдди ылӧгас сетчысьясӧс виччысьӧ чорыд скӧрлун.
Ыджыд шог да сьӧкыдалӧм быдӧнлы, коді вӧчӧ лёксӧ: медводз юдейлы, сэсся греклы.
Мӧдарӧ, дзирдлун, нимӧдӧм да лӧньлун быдӧнлы, коді вӧчӧ бурсӧ: медводз юдейлы, сэсся греклы.
Енмыс оз видзӧд чужӧм вылӧ.
Мыжсӧ кӧ вӧчӧма Индӧдсӧ тӧдтӧг, Индӧдтӧгыс и бырӧдасны.
Вӧчӧма кӧ мыжсӧ Индӧдсӧ тӧдӧмӧн, Индӧд сертиыс и мыждасны. Ен водзын веськыдӧсь абу Индӧдсӧ кывлысьяс, а сы серти олысьяс. Мукӧд войтырлӧн Индӧдыс абу, но Индӧд нога вӧчӧмыс тыдалӧ налӧн оласногысь. Найӧ асьныс аслыныс индӧдыс.
Тайӧ петкӧдлӧ, мый Индӧдсӧ гижӧма налӧн сьӧлӧмас. Буретш та йылысь и висьталӧ налӧн сьӧлӧмыс да мӧвпъясыс, найӧ либӧ мыждӧны, либӧ дорйӧны найӧс. Но воас лун, кор Исус Кристос пыр Ен кутас мыждыны мортлысь гусяторъяссӧ. Та йылысь ме висьтавлі нин буръюӧртігӧн.
Со, тэ шусян юдейӧн, кутчысян Индӧдас да ошйысян Енмӧн. Индӧдсьыс тэ тӧдмалін Сылысь кӧсйӧмсӧ да велӧдчин торйӧдны медбурсӧ. Индӧдас гижӧм збыльсӧ тӧдӧмнад тэ лыддян асьтӧ синтӧмъясӧс нуӧдысьӧн, пемыдас олысьяслы югыдӧн, вежӧртӧмъясӧс туйдӧдысьӧн да гӧгӧрвотӧмъясӧс велӧдысьӧн. Мӧдӧс велӧдан, а асьтӧ он велӧд?
Тэ висьталан: «Гусясьны оз позь», ачыд гусясян.
Шуан: «Гозъя олӧмтӧ эн пежав», ачыд пежалан.
Идолъясӧс мустӧмтан, ачыд налысь крамсӧ куштан.
Ошйысян Индӧднас, ачыд сійӧс торкалӧмнад Енсӧ нинӧмӧ пуктан.
Гижӧма: «Тіян вӧсна ентӧдтӧмъяс омӧльтӧны Енлысь нимсӧ».
Вундыштчӧмыд бур, олан кӧ Индӧдыс серти.
Он кӧ ов Индӧдыс серти, сэки тэнад вундыштчӧмыд нинӧм.
Вундыштчытӧм кӧ олӧ Индӧд сертиыс, оз-ӧ сійӧс лыддьыны вундыштчӧмаӧн?
Индӧд серти олысь, коді абу вундыштчӧма, кутас мыждыны тэнӧ, вундыштчӧмаӧс да Индӧд тӧдысьӧс, ӧд тэ торкалан Индӧдсӧ.
Юдейыд абу сійӧ, коді чужӧма юдейӧн, да вундыштчӧмыд абу яй вылад вундыштӧм пас.
Юдейыд сійӧ, коді сьӧлӧмнас юдей. Вундыштӧм пассӧ пуктӧма сылы сьӧлӧмас абу Индӧд серти, сійӧс Лов пуктӧма. Татшӧмыслы ошкӧмыс лоӧ Енсянь, а оз мортсянь.
3 юр.
Мый бурыс, тэ кӧ юдей? Мый сетӧ вундыштчӧмыс?
Унатор сетӧ, да быд боксянь бур. Медводз, налы вӧлі сетӧма Ен Кывсӧ.
На пӧвстысь кӧ кодсюрӧ эз эскыны, налӧн эскытӧмысь ӧмӧй бырӧ Енлӧн эсканлуныс?
Дерт, оз.
Енмыс эскана, а мортыс пӧръясьысь.
Гижӧма: — Шуӧмыд Тэнад веськыд. Аслад ёрд вылын Тэ верман.
Миян лёк вӧчӧм кӧ восьтӧ Енлысь веськыдлунсӧ, сэки мый миянлы шуны?
Енмыс ӧмӧй абу веськыд, кисьтӧ кӧ миян вылӧ Ассьыс скӧрлунсӧ?
Тадзи мортыс мӧвпалӧ.
Дерт, тайӧ абу тадз.
Енмыс кӧ оз ло веськыд, вермас-ӧ Сійӧ мыждыны муюгыдсӧ?
Менам ылалӧмысь кӧ тыдовтчӧ Енлӧн збыльыс да Сійӧс ошкӧмыс содӧ, сідзкӧ, мыйла менӧ мыждынысӧ мыжаӧс моз?
Гашкӧ, пондам вӧчны лёксӧ, мед вӧлі бур? Кодсюрӧ омӧльтӧны миянӧс да шуӧны, мый ми тадзи велӧдам.
Татшӧмъяссӧ виччысьӧ веськыда мыждӧм.
Сідзкӧ, ми, юдейяс, бурджыкӧсь ӧмӧй мыйӧнкӧ?
Нинӧмӧн абу.
Ме водзынджык нин висьтавлі: юдейяс, кӧть грекъяс — ставныс мыжыслӧн кипод улынӧсь.
Гижӧма:
— Веськыда олысьыс весиг ӧти абу, абу гӧгӧрвоысьыс, некод оз корсь Енсӧ.
Ставныс кежӧмаӧсь, ӧтитӧг шогмытӧмӧсь, бурсӧ вӧчысьыс весиг абу.
Горшныс налӧн восьса гу, кыв вылас налӧн сӧмын пӧръясьӧм, льӧб выланыс змей яд.
Вомныс курдӧма ёрччӧмысь, кокныс тэрыб вир кисьтны, ветлан туйыс налӧн — бырӧдӧм да пикӧ воштӧм.
Найӧ оз тӧдны бурасян туйсӧ, налӧн абу Енсьыс полӧмыс.
Ми тӧдам, мый Индӧдыс висьталӧ Индӧд улын олысьяслы.
Та вӧсна некод оз вермы мыйкӧ паныд шуны, ӧд став муюгыдыс Ен мыждӧм улын. Индӧд серти уджъяс некодӧс оз вӧчны Ен водзас веськыдӧн.
Индӧдыс сӧмын восьтӧ мыжсӧ.
Ӧні Индӧд вылӧ видзӧдтӧг воссис Енлӧн веськыдлуныс. Та йылысь висьталӧ Индӧдыс да пророк гижӧдъяс. Исус Кристослы эскӧм пыр сетӧма веськыдлунсӧ быд эскысьлы, Енмыс некодӧс оз торйӧд.
Ӧд ставныс мыжмисны да олӧны Ен дзирдлунтӧг. Но Сылӧн буралӧмсянь, дон мынтытӧг найӧ лоӧны веськыдӧн, ӧд Исус Кристос став пыддиыс вештысис. Енмыс сетіс Кристосӧс бурасян вись пыдди, Сылӧн Вирыс мездӧ быдӧнӧс эскӧм пырыс. Терпитӧмнас Ен петкӧдліс Ассьыс веськыдлунсӧ: прӧститіс йӧзлысь важся мыжъяссӧ. Ӧні Енмыс петкӧдлӧ Ассьыс веськыдлунсӧ сыын, мый Сійӧ Ачыс веськыд да вӧчӧ веськыдӧн Исуслы эскысьясӧс.
Сюрас-ӧ миян ошйысянторйыс?
Оз. Сійӧс бырӧдӧма.
Мыйӧн?
Индӧд серти уджъясӧн?
Абу. Эскӧмӧн.
Ми аддзам, мый мортсӧ веськыднас вӧчӧ эскӧмыс, а оз Индӧд серти уджъясыс.
Енмыс ӧмӧй сӧмын юдейяслӧн Ен, абу-ӧ тшӧтш мукӧд войтырлӧн?
Дерт, тшӧтш мукӧд войтырлӧн. Енмыс ӧти. Сійӧ вундыштчӧмаӧс и вундыштчытӧмӧс вӧчӧ веськыдӧн эскӧм пырыс.
Сідзкӧ, мый артмӧ? Эскӧмнаным ми бырӧдам Индӧдсӧ?
Огӧ.
Мӧдарӧ, вынсьӧдам.
4 юр.
Мый шуам Ӧвраам батьным йылысь? Мый сійӧ босьтіс олігас на?
Ӧвраамӧс кӧ вӧлі шуӧма веськыдӧн уджъясыс серти, сэки сійӧ вермис тайӧн ошйысьны, сӧмын эз Ен водзын.
Гижӧдас мый висьталӧма?
«Ӧвраам эскис Енлы, та вӧсна Енмыс шуис сійӧс веськыдӧн».
Уджалысьлы ӧд удждонсӧ оз козьнавны, а уджсьыс мынтӧны.
Мортыс кӧ уджъястӧг эскӧ Енмыслы, коді Ентӧг олысьӧс вӧчӧ веськыдӧн, сэки сылысь эскӧмсӧ Енмыс лыддьӧ веськыдлунӧн.
Тадзи Давид лыддьӧ шудаӧн сійӧс, кодӧс уджъястӧгыс Енмыс шуӧ веськыдӧн:
— Шудаӧсь найӧ, кодъяслысь вунӧдӧма став лёк вӧчӧмсӧ да вевттьӧма мыжъяссӧ.
Шуда сійӧ, кодлы Господь оз казьтышт мыжсӧ.
Шудаӧн шуӧмыс сӧмын вундыштчӧмаяслы али вундыштчытӧмъяслы тшӧтш лӧсялӧ?
Ми висьталам: «Ӧвраамӧс вӧлі шуӧма веськыдӧн эскӧм вӧснаыс».
Кор шуӧма?
Вундыштчытӧдзыс либӧ вундыштчӧм бӧрас?
Вундыштчытӧдзыс.
Вундыштӧм пасыс Ӧвраамлы висьталіс, мый сійӧ вундыштчытӧдзыс на эскис, та вӧсна лои веськыдӧн. Тадзи Ӧвраам лои батьӧн став вундыштчытӧм эскысьыслы, медым и найӧ эскӧм пырыс вермисны лоны веськыдӧн. Сійӧ бать тшӧтш вундыштчӧмаяслы, кодъяс эз сӧмын вундыштчыны, но Ӧвраам батьным моз ветлӧны эскӧмыслӧн туйӧд, кыті ветліс сійӧ вундыштчытӧдзыс на.
Ен кӧсйысис сетны Ӧвраамлы да сысянь чужысьяслы муюгыдсӧ. Кӧсйысис сылы эз Индӧд серти олӧм вӧснаыс, но эскӧм вӧснаыс сійӧ лои веськыдӧн да.
Кӧсйысьӧмасӧ кӧ позис босьтны сӧмын Индӧд отсӧгӧн, сэки эскӧмыс ковтӧм да кӧсйысьӧмыс вынтӧм.
А Индӧдсӧ торкалӧмысь лэччӧ Енлӧн скӧрлун. Эз кӧ вӧв Индӧдыс, эз вӧв и Индӧдсӧ торкалӧмыс.
Кӧсйысьӧмыс подуласьӧ эскӧм вылӧ, медым сійӧ вӧлі бурсетӧмӧн. Тадзи кӧсйысьӧмыс вына Ӧвраамсянь став чужысьыслы, абу сӧмын Индӧд улын олысьяслы, но и Ӧвраам моз эскысьяслы. Ӧвраам — ставнымлы бать. Гижӧма: «Ме пукті тэнӧ уна войтырлы батьӧн». Сійӧ Ен водзын миянлы бать. Ӧвраам эскис Енлы, кулӧмаӧс Ловзьӧдысьлы да вӧвлытӧмторсӧ олӧмӧ Пӧртысьлы.
Ӧвраамлӧн эз нин вӧв некутшӧм лача, но сійӧ эскис, мый лоас уна войтырлы на батьӧн, да та дырйи эз вошты лачасӧ. Шуӧма вӧлі: «Унасьыс унаӧн тэсянь чужасны.»
Ӧвраам эз лигышмун эскӧмас, мед кӧть и матӧ сё арӧсалӧн вир-яйыс ёна нин вӧлі пӧрысьмӧма, и Сарра гӧтырыслӧн гырк пытшкӧсыс вӧлі нин шоймӧма.
Ӧвраам эз вошты эскӧмсӧ, но падъявтӧг эскис Енлӧн кӧсйысьӧмӧ да ошкис Енмӧс. Эскӧмыс ёнмӧдіс сійӧс. Ӧвраам зумыда эскис, мый Енмыс вына пӧртны олӧмӧ Ассьыс кӧсйысьӧмсӧ.
Та вӧсна сійӧс шуӧма веськыдӧн.
“Сійӧс шуӧма веськыдӧн” кывъяссӧ гижӧма абу сӧмын Ӧвраам йылысь, тшӧтш миян йылысь.
Ен шуас веськыда олысьясӧн тшӧтш миянӧс, эскам кӧ Сылы, Исус Господьнымӧс Ловзьӧдысьлы. Енмыс сетіс миян мыжъяс вӧсна Кристосӧс да ловзьӧдіс Сійӧс, медым ми вӧлім веськыдӧсь.
5 юр.
Тадзи, эскӧмным вӧсна миянӧс шуӧма веськыдӧн да Исус Кристос Господьным пыр миян эм Енкӧд бурасьӧм. Эскӧмным пыр Кристос восьтіс миянлы Ен буралӧмӧ ӧдзӧссӧ. Буралӧмас олігӧн ми лача кутӧмӧн нимкодясям, ӧд лоам Енлӧн дзирдлунас.
Сьӧкыдсӧ нуигӧн тшӧтш нимкодясям, ӧд тӧдам: сьӧкыдсӧ нуӧмыс чужтӧ зумыдлун, зумыдлуныс — сьӧкыдсӧ венӧм, сьӧкыдсӧ венӧмыс — лача. А лачаыс миян абу весьшӧрӧ, ӧд Ен сетіс миянлы Вежа Ловсӧ да Сы пыр кисьтіс сьӧлӧманым Ассьыс муслунсӧ.
Кор на ми вӧлім жебӧсь, индӧм кадӧ Кристос куліс ми коддьӧм Ентӧг олысьяс вӧсна.
Ӧдвакӧ, кодкӧ сетас олӧмсӧ веськыда вӧчысь вӧсна. Гашкӧ, бурсӧ вӧчысь вӧсна и вермас на сетны олӧмсӧ.
Но кор ми олім мыжас на, Кристос куліс миян вӧсна. Тайӧн Енмыс петкӧдліс миян дінӧ Ассьыс муслунсӧ.
Ӧні Кристослӧн Вирыс пыр миянӧс шуӧма веськыдӧн, сідзкӧ, дерт нин, Кристос пыр ми мынам локтана скӧрлунысь.
Ми кӧ, Енмыслы коркӧя паныд мунысьяс, бурасим Сыкӧд Пиыслӧн кулӧм пыр, дерт нин, ӧні ми, бурасьӧмаяс, мездмам Кристослӧн олӧм пыр.
Но тайӧ абу на ставыс. Ми нимкодясям нӧшта Енмӧн, ӧд Исус Кристос Господьным пыр миян эм Енкӧд бурасьӧм.
Ӧти морт пыр муюгыдас пырис мыжыс, мыжнас — кулӧмыс. Тадзи кулӧмыс вуджис быд морт вылӧ, ӧд ставныс мыжмисны.
Дерт, Индӧдсӧ сеттӧдз мыжыс вӧлі нин муюгыдас, но Индӧдтӧгыс мыж вӧчӧмыс оз лыддьыссьы мыжӧн.
Кулӧмыс ыджыдаліс Адамсянь Мӧисейӧдз. Ыджыдаліс весиг на вылын, кодъяс эз вӧчны Адам моз мыжсӧ. Адам вӧлі Локтысьыслӧн пертас.
Бурсетӧмыс ӧд абу мыж вӧчӧмыс кодь.
Ӧти мортлӧн мыжыс кӧ вайис ставныслы кулӧм, дерт нин, ӧти морт пыр, Исус Кристос пыр, дзик ставныслы да уна пӧвстӧн вичмас Енлӧн буралӧмыс да бурсетӧмыс.
Бурсетӧмсӧ оз позь ӧткодявны ӧтилӧн мыж вӧчӧмкӧд.
Ӧд ӧтилӧн мыж вӧчӧм вӧсна локтіс мыждӧм, а уналӧн мыж вӧчӧм вӧсна сетӧма буралӧм. Буралӧмыс вӧчӧ мортсӧ веськыдӧн.
Ӧтилӧн мыж вӧчӧм вӧсна кӧ пондіс ыджыдавны кулӧм, сэки, дерт нин, ӧти морт пыр, Исус Кристос пыр, Енсянь ыджыд буралӧмсӧ да веськыдлунсӧ босьтысьяс пондасны ыджыдавны олӧмас.
Ӧтилӧн мыж вӧчӧм вӧсна кӧ мыждӧма став мувывса йӧзсӧ, тадзи ӧтилӧн веськыда вӧчӧм вӧсна став йӧзсӧ шуӧма веськыдӧн да сетӧма налы олӧм.
Ӧтилӧн кывзысьтӧм вӧсна кӧ ставӧн лоисны мыжаӧсь, тадзи ӧтилӧн кывзысьӧм вӧсна ставӧн лоасны веськыдӧсь.
Индӧдсӧ сетӧма, медым петкӧдлыны, кутшӧм уна мыж вӧчӧмыс.
Кӧні мыж вӧчӧмыс уна, сэні ёнджыка на петкӧдчӧ буралӧмыс. Кыдзи мыжыс ыджыдаліс да кыскис кулӧмас, тадзи буралӧмыс тшӧтш пондас ыджыдавны веськыдлуннас да вайӧдас миянӧс Исус Кристос Господьным пыр помтӧм олӧмас.
6 юр.
Мый нӧ шуам?
Пондам-ӧ водзӧ овны мыжас, медым буралӧмыс содіс?
Дерт, огӧ.
Ми кулім мыжыслы, позьӧ ӧмӧй водзӧ овны мыжас?
Онӧ ӧмӧй тӧдӧй, мый ми ставным пыртчиганым йитчим Кристоскӧд да Сылӧн кулӧмкӧд?
Пыртчӧмнаным ми кулім Кристоскӧд да миянӧс вӧлі гуалӧма Сыкӧд. Но Батьыслӧн дзирдлунӧн Кристосӧс вӧлі ловзьӧдӧма, та вӧсна, ми тшӧтш вермам овны выль олӧмӧн.
Ми кӧ йитчим Сылӧн кулӧмкӧд, сідзкӧ, йитчам тшӧтш Сылӧн ловзьӧмкӧд. Ми тӧдам: миянлысь важ мортсӧ тувъялӧма Кристоскӧд, медым тайӧ мыжа вир-яйыс эз нин ыджыдав, и ми эгӧ нин вӧлӧй мыжыслӧн кипод улынӧсь. Ӧд коді куліс, сійӧ мыніс мыжыслӧн кипод улысь.
Ми кӧ кулім Кристоскӧд, эскам, мый пондам и овны Сыкӧд. Ми тӧдам: ловзьӧм бӧрас Кристос оз нин кув, ӧд кулӧмыс Сы вылын оз нин ыджыдав.
Сійӧ куліс мыжыслы ӧтчыдысь да пыр кежлӧ.
Ӧні Сійӧ ловъя да олӧ Енмыслы.
Тадзи ті, миян Господь Исус Кристос пытшкын олысьяс, лыддьӧй асьнытӧ мыжыслы кулӧмаӧн, а Енмыслы ловъяӧн.
Энӧ лэдзӧй мыжсӧ ыджыдавны тіян кулана вир-яйын да ыштӧдны тіянӧс аслас лёк кӧсйӧмъясӧн.
Вир-яйныдлысь весиг ӧти юкӧн энӧ сетӧй мыжыслы лёксӧ вӧчӧм вылӧ. Ӧні ті — кулӧмысь ловзьӧмаяс. Сідзкӧ, сетӧй асьнытӧ да вир-яйныдлысь быд юкӧн Енмыслы, мед вӧчны веськыд уджъяс.
Мыжыс оз вермы ыджыдавны тіян вылын, ӧд ті буралӧм улынӧсь, абу Индӧд улынӧсь.
Мый артмӧ?
Ми кӧ абу Индӧд улынӧсь, а буралӧм улынӧсь, пондам-ӧ вӧчны лёксӧ?
Огӧ.
Ті ӧмӧй онӧ тӧдӧй: кодлы ті сетанныд асьнытӧ кесъявны, сылӧн ті и кесйӧгъяс. Кывзысянныд кӧ мыжыслысь — куланныд, Енмыслысь кӧ кывзысянныд — веськыдӧн лоанныд.
Ошкӧм Енлы, ӧд коркӧ ті вӧлінныд мыжыслӧн кесйӧгъяс, ӧні кывзысьӧмӧн став сьӧлӧмнад кутчысянныд тіянлы висьталӧм велӧдӧмас.
Мыжысь мынӧм бӧраныд ті лоинныд веськыдлуныслӧн кесйӧгъяс.
Ме сёрнита тіянкӧд быдлунъя олӧмсьыс босьтӧм кывъясӧн, медым ті верминныд гӧгӧрвоны менӧ.
Водзын кӧ ті вир-яйныдлысь быд юкӧн сетінныд пежыслы вӧчны лёк уджъяс, ӧні быд юкӧн сетӧй веськыдлуныслы вӧчны вежа уджъяс.
Мыжыслы кесъяліганыд ті энӧ вермӧй кесъявны веськыдлуныслы.
Кутшӧм вотӧс ті сэки чукӧртінныд?
Ӧні сыысь весиг аслыныд яндзим, ӧд сійӧ вайӧ кулӧм.
Ті мынінныд мыжсьыс, ӧні ті Енлӧн кесйӧгъяс. Тіян вотӧсныд — вежалун, и тайӧ вайӧдас тіянӧс помтӧм олӧмӧ.
Мыжыс ӧд мынтысьӧ кулӧмӧн, а Енмыс — помтӧм олӧмӧн миян Мездысь Исус Кристос пыр.
7 юр.
Вокъяс, висьтала тіянлы, Индӧдсӧ тӧдысьяслы. Ті бура тӧданныд, мый Индӧдыс вына морт вылын ловъя дырйиыс.
Верӧс сайӧ петӧм аньӧс Индӧдыс кӧрталӧ ловъя верӧсыскӧд.
Верӧсыс кӧ кулӧ, сійӧ мынӧ кӧрталан Индӧдсьыс.
Ловъя верӧс дырйиыс кӧ петас мӧд сайӧ, лоӧ гозъя олӧмсӧ пежалысьӧн.
Верӧсыс кӧ кулӧ, сійӧ мынӧ гозъя олӧм индӧдсьыс. Сэки петас кӧ мӧд сайӧ, оз ло гозъя олӧмсӧ пежалысьӧн.
Тадзи тшӧтш тіянкӧд, вокъясӧй: Кристос вир-яйӧ йитчӧмнаныд ті кулінныд Индӧдыслы да лоинныд Мӧдыслӧн, кулӧмаясысь Ловзьысьыслӧн, медым вайны Енлы вотӧс.
Тшыкӧм вир-яйын оліганым лёк кӧсйӧмыс ыджыдаліс миян пытшкын Индӧдыс отсӧгӧн, сэки ми вайим вотӧс кулӧмыслы.
Ӧні ми кулім Индӧдыслы, мынім сылӧн став кӧртӧдысь. Ми кесъялам Енмыслы выль ногӧн, Лов серти, а огӧ важ мозыс, Индӧдлӧн шыпас серти.
Мый шуам татчӧ?
Индӧдыс ӧмӧй мыжыс?
Дерт, абу.
Индӧдыс восьтіс меным мыжсӧ.
Индӧдыс кӧ эз висьтав: «Эн ышты», ме эськӧ эг и гӧгӧрволы ыштӧмсӧ.
Тадзи мыжыс Индӧдысь тшӧктӧмсӧ босьтӧмӧн кыпӧдіс ме пытшкын быдпӧлӧс ыштӧмсӧ.
Мыжыс ӧд Индӧдтӧгыс кулӧма.
Водзынсӧ ме олі Индӧдсӧ тӧдтӧг, но Индӧдысь тшӧктӧмсӧ кор кылі, сэки мыжыс ловзис, а ме кулі.
Тадзи олӧмсӧ сетысь Индӧдыс вайис меным кулӧм. Индӧдлӧн тшӧктӧмыс пыр мыжыс кежӧдіс менӧ да виис сы отсӧгӧн.
Но Индӧдыс вежа, тшӧктӧмыс тшӧтш вежа, веськыд да бур.
Сідзкӧ, бурыс вайис меным кулӧмсӧ?
Эз. Мыжыс вайис. Сійӧ веськӧдіс бурсӧ, мед вины менӧ. Тадзи мыжыс восьтіс ачыс асьсӧ, и тшӧктӧмыс пыр ми аддзим мыжсӧ лёксьыс-лёкӧн.
Ми тӧдам: Индӧдыс Ловсянь, а менӧ, тшыкӧм вир-яйын олысьӧс, вузалӧма мыжыслы.
Ачым ог гӧгӧрво, мый вӧча: кӧсъянасӧ ог вӧч, а мустӧмсӧ вӧча.
Вӧча кӧ сійӧ, мый ог кӧсйы, сэки гӧгӧрвоа, мый Индӧдыс бур вылӧ. Збыльвылас, ог ме тайӧс вӧч, но ме пытшкын олысь мыжыс вӧчӧ.
Тӧда, мый ме пытшкын, менам тшыкӧм вир-яйын, бурыс абу. Бурсӧ вӧчны кӧсйӧмыс эм, но сійӧ оз артмы.
Бурсӧ кӧсъя да, ог вӧч, лёксӧ ог кӧсйы да, вӧча.
Ме кӧ вӧча кӧсйытӧмсӧ, сідзкӧ, сійӧс ог нин ме вӧч, но ме пытшкын олысь мыжыс вӧчӧ.
Казяла ас пытшкысь татшӧм индӧд: кӧсъя кӧ вӧчны бурсӧ, менам артмӧ лёкыс.
Менам пытшкӧсса мортыс нимкодьпырысь сибӧдӧ Енлысь Индӧдсӧ, но вир-яйысь ме аддза мӧдпӧлӧс индӧд. Сійӧ паныд сувтӧ пытшкӧсса индӧдлы да кӧрталӧ менӧ вир-яйын олысь мыжыслӧн индӧдӧн.
Коньӧр ме морт.
Коді мездас менӧ тайӧ кулана вир-яйсьыс?
Аттьӧала Енмӧс миян Господь Исус Кристосысь.
Тадзи менам пытшкӧсса мортыс кывзысьӧ Ен Индӧдлысь, а тшыкӧм вир-яйыс — мыжыслӧн индӧдлысь.
8 юр.
Сідзкӧ, ӧні абу некутшӧм мыждӧм Исус Кристос пытшкын олысьяслы, кодъяс олӧны Лов серти, а оз вир-яй серти. Ӧд Ловлӧн индӧдыс, коді сетӧ олӧм Исус Кристос пытшкын, мездіс менӧ мыжыслӧн да кулӧмыслӧн индӧдысь.
Ен вӧчис сійӧ, мый эз вӧв вермана Индӧдыслы, ӧд мортлӧн тшыкӧм вир-яй вӧсна Индӧдыс вӧлі вынтӧм. Миян мыжъяс вӧсна Енмыс мӧдӧдіс Ассьыс Писӧ мыжа морт кодьӧн. Тадзи морт вир-яйын Сійӧ мыждіс мортлысь мыжсӧ, медым Индӧдас висьталӧм веськыдлуныс збыльмис миян пытшкын, кодъясӧн веськӧдлӧ Лолыс, а оз вир-яйыс.
Вир-яй серти олысьлӧн — тшыкӧм мӧвпъяс, а Лов серти олысьлӧн — Ловсянь мӧвпъяс.
Вир-яйсянь мӧвпалӧмыд вайӧ кулӧм, а Ловсянь мӧвпалӧмыд сетӧ олӧм да лӧньлун. Вир-яйсянь мӧвпалӧмыд эм Енлы паныд мунӧм.
Татшӧм мортыс оз сетчы Ен Индӧдлы, да и оз вермы.
Вир-яй серти олысьяс Енмыслы оз шогмыны.
Тіян пытшкын кӧ збыльысь олӧ Енлӧн Лолыс, сідзкӧ, ті Лов веськӧдлӧм улынӧсь, абу вир-яйлӧн ыджыдалӧм улынӧсь.
Код пытшкын абу Кристослӧн Лолыс, сійӧ абу Сылӧн.
Кристос кӧ тіян пытшкын, сэки ловныд олӧ веськыдлуныс вӧсна, кӧть вир-яйныд кулӧма мыжыс вӧсна.
Тіян пытшкын кӧ олӧ Енлӧн Лолыс, коді ловзьӧдіс Исусӧс кулӧмысь, сідзкӧ, Кристосӧс Ловзьӧдысь ловзьӧдас тшӧтш тіянлысь кулана вир-яйтӧ сійӧ Ловнас, коді олӧ тіян пытшкын.
Вокъяс, сідзкӧ, ми абу уджйӧзаӧсь тшыкӧм вир-яйлы, и миянлы оз ков овны сы ног.
Оланныд кӧ вир-яй серти, куланныд, а Ен Лолӧн кӧ вианныд тшыкӧм уджъяснытӧ, понданныд овны.
Кодъясӧс нуӧдӧ Енлӧн Лолыс, найӧ Енлӧн ныв-пи.
Ті ӧд энӧ сибӧдӧй нартитысь лолӧс, медым бара овны полӧм улын, мӧдарӧ, ті сибӧдінныд тіянӧс ныв-пиӧ босьтысь Лолӧс. Тайӧ Лолӧн ми шыасям: «Авва, Батьӧй.»
Ачыс Лолыс висьталӧ миян ловлы, мый ми Енлӧн ныв-пи.
Ми кӧ Енмыслӧн ныв-пи, сідзкӧ, Кристоскӧд босьтам Енсянь вичмӧдӧмасӧ. Сыкӧд ӧтвыв кӧ сьӧкыдсӧ нуам, ӧтвыв Сыкӧд и дзирдлунас лоам.
Ме тадзи мӧвпала: ӧнія сьӧкыд нуӧмсӧ кӧ ӧткодявны сійӧ дзирдлуныскӧд, мый воссяс миянлы, тайӧ сьӧкыд нуӧмыс нинӧм оз сулав.
Енлӧн став вӧчӧмторйыс ёна виччысьӧ Ен ныв-пилысь воссьӧмсӧ. Ӧд став вӧчӧмторйыс эз ас кӧсйӧмсяньыс веськав сісьмӧм-бырӧм улӧ. Тадзи вӧлі шуӧма Енмыслӧн. Сідзкӧ, эм лача, мый став вӧчӧмторйыс мынас сісьмана-бырана кутӧдысь да воас Ен ныв-пилӧн мездлунӧ да дзирдлунӧ.
Ми тӧдам: став вӧчӧмторйыс ӧнӧдз на сьӧкыда ружтӧ-ойзӧ кага вайӧм дырйи моз.
Да оз сӧмын найӧ, тшӧтш ми, кодъяслӧн эм Енсянь Лолыс, тайӧ медводдза сетӧмторйыс, ружтӧмӧн-ойзӧмӧн виччысям Енлӧн ныв-пиӧн лоӧмсӧ, вир-яйнымӧс мездӧмсӧ.
Дерт, ми мездмӧмаӧсь нин лача кутӧмным пыр.
Но лачаыд кӧ збыльмӧма, сэки сійӧ абу нин лача.
Кутӧны ӧмӧй лачасӧ аддзана-лоӧма вылас?
Ми кӧ лача кутам аддзытӧм вылас, сэки виччысям терпитӧмӧн.
Жеблун дырйиным Лолыс отсалӧ миянлы.
Ми весиг огӧ тӧдӧй мый йылысь да кыдзи колӧ кевмысьнысӧ.
Сэки Ачыс Лолыс ышлолалӧмӧн кывъяс шутӧг кевмысьӧ миян вӧсна.
Енмыс ставсӧ аддзӧ миян сьӧлӧмысь да тӧдӧ Лолыслысь мӧвпъяссӧ. Ӧд Енлӧн кӧсйӧм серти Лолыс корӧ-кевмӧ вежа войтыр вӧсна.
Ми тӧдам, мый Енсӧ радейтысьяслы, Сылӧн шуӧм сертиыс корӧмаяслы, Сійӧ ставсӧ бергӧдӧ бур вылӧ.
Сідзкӧ, кодъясӧс Енмыс водзысяньыс тӧдіс, найӧс и лӧсьӧдіс лоны Аслас Пи кодьӧн, медым Пиыс вӧлі медводдза чужысьӧн уна вок пӧвстын.
Кодъясӧс Сійӧ водзысяньыс лӧсьӧдіс, найӧс и корис, кодъясӧс корис, найӧс и вӧчис веськыдӧн, кодъясӧс вӧчис веськыдӧн, найӧс и мичмӧдіс Аслас дзирдлунӧн.
Мый та вылӧ шуам?
Енмыс кӧ миян дор, коді миянлы паныд?
Ӧд Енмыс Ассьыс Писӧ эз жалит, а сетіс Сійӧс ставным вӧсна. Сыкӧд тшӧтш оз ӧмӧй сет миянлы и став мукӧдторсӧ?
Коді вермас мыжавны Енлысь бӧрйӧмаяссӧ?
Сӧмын Енмыс. Но Сійӧ шуӧ миянӧс веськыдӧн.
Коді вермас мыждыны найӧс?
Сӧмын Кристос. Но Сійӧ куліс, ловзис да ӧні Ен веськыдладорын кевмысьӧ миян вӧсна.
Мый вермас торйӧдны миянӧс Енлӧн муслунысь? Гашкӧ, шог, дзескӧдӧм, вӧтлӧм? Гашкӧ, тшыгъялӧм, кӧм-пасьтӧг кольӧм? Гашкӧ, неминуча суӧм, шыпуртысь кулӧм?
Гижӧма: «Тэ вӧсна быд лун миянӧс виӧны, лыддьӧны начкыны дасьтӧм ыжъясӧн».
Но став тайӧ сьӧкыдлун дырйиыс миянӧс Радейтысь сетӧ миянлы тырвыйӧ вермӧм.
Ме тӧда: кулӧмыс ни олӧмыс, анделъяс ни енэжвыв юралысьяс да вынъяс, ӧніяыс ни локтанаыс, пыдтаыс ни судтаыс, — некутшӧм вӧчӧмтор оз вермы торйӧдны миянӧс Ен муслунысь, мый восьтӧма миянлы Исус Кристос Господьным пыр.
9 юр.
Кристос водзын шуа: ме висьтала збыльсӧ, сьӧлӧмӧй Вежа Ловкӧд оз сетны меным пӧръявны. Менам сьӧлӧмӧй ёна шогсьӧ да дугдывтӧг бӧрдӧ ас войтырса вокъясӧй вӧсна.
Ме весиг дась лоны на вӧсна ёрӧмаӧн, Кристосысь торйӧдӧмаӧн. Израиль войтырӧс ӧд шуӧма Ен пиянӧн, восьтӧма налы Ен дзирдлунсӧ, кӧрталӧма накӧд йитӧдъяс, сетӧма налы Индӧд, сувтӧдӧма найӧс Енлы кесъявны, налы уна кӧсйысьӧма, и налӧн эмӧсь батьяс. Тайӧ войтырысь петіс Кристос, Сійӧ чужис морт кодьӧн. Сійӧ став вылас медыджыд Ен. Ошкӧм Сылы нэмъяс чӧж. Аминь.
Енмыслӧн кывйыс эз вожав. Ӧд абу став израильсаыс Израильлӧн, Ӧвраамсянь чужысьяс абу ставныс Ӧвраамлӧн ныв-пи. Вӧлі шуӧма: «Исааксянь чужысьясӧс шуасны тэнад ныв-пиӧн».
Сідзкӧ, Енлӧн ныв-пиыс абу мортсянь, но Ен кӧсйысьӧмсянь чужысьяс.
А кӧсйысьӧмыс вӧлі татшӧм: «Дзик тайӧ кадас бӧр локта, да Сарралӧн чужас пи».
Тадзи вӧлі тшӧтш Ревеккакӧд. Сійӧ сьӧктіс Исаак батьнымсянь кык пиӧн.
Пияныслӧн чужтӧдз на, бурсӧ-лёксӧ налӧн вӧчтӧдз на, Енмыс шуис Ревеккалы: «Ыджыдджыкыс пондас кесъявны ичӧтджыкыслы». Енмыс тайӧн петкӧдліс, мый бӧрйӧмыс Сы сайын. Сійӧ бӧрйӧ оз мортлӧн уджъяс серти, но Аслас лӧсьӧдӧм да корӧм сертиыс. Гижӧма: «Яков Меным муса, а Исавӧс Ме мустӧмті».
Мый шуам?
Енмыс оз веськыда вӧч?
Дзик веськыда.
Мӧисейлы Енмыс шуӧ: «Код дінӧ кӧ лоа бур сьӧлӧма, код дінӧ кӧ небзьӧда сьӧлӧмӧс».
Тадзи ставыс Енлӧн буралӧм сайын, абу мортлӧн кӧсйӧм-зільӧм сайын.
Гижӧдас шуӧма фараонлы: «Ме пукті тэнӧ, мед петкӧдлыны тэ вылын Ассьым вынӧс, медым Менсьым нимӧс тӧдісны став му пасьталаыс».
Тадзи Енмыс код дінӧ кӧ бур сьӧлӧма, а кодӧс кӧ Сійӧ чорзьӧдӧ.
Гашкӧ, тэ юалан: «Мыйысь нӧ Енмыс, сідзкӧ, мыжалӧ?
Вермас-ӧ кодкӧ паныд сувтны Енмыслӧн кӧсйӧмлы?»
Мортӧй, коді тэ сэтшӧмыс, мый Енкӧд вензян?
Вӧчӧмторйыс ӧмӧй вермас шуны вӧчысьыслы: «Мыйла тэ менӧ татшӧмнас вӧчин?»
Гырнич вӧчалысь абу ӧмӧй вына сёй вылас? Оз-ӧ сійӧ ӧти лятисьыс вермы вӧчны быд лунӧ вӧдитчан и торъя лунъясӧ вӧдитчан доз?
Тадзи Енмыс кӧсйӧ петкӧдлыны Ассьыс скӧрлунсӧ да вынсӧ. Ыджыд терпитӧмыс вӧсна Сійӧ видзӧ на бырӧдны шуӧм “скӧрлуныслысь дозъяссӧ”, медым петкӧдлыны Ассьыс помасьлытӧм дзирдлунсӧ “буралӧмыслӧн дозъяс” вылын, кодъясӧс дасьтӧма дзирдавны. “Буралӧмыслӧн дозъясыс” — тайӧ ми, ӧд Ен корис миянӧс. Корис эз сӧмын юдейясӧс, но тшӧтш мукӧд войтырӧс.
Осия небӧгын Сійӧ висьталӧ:
— Кодъяс эз вӧвны Менам войтырӧн, шуа Асламӧн, мустӧмӧс шуа мусаӧн.
Кӧні шуӧма вӧлі: «Ті абу Менам войтыр», сэні шуасны найӧс ловъя Енлӧн ныв-пиӧн.
Израиль йылысь Исай тадзи висьталӧ:
— Израиль войтырлӧн лыдыс кӧ лоас весигтӧ саридздор лыа мында, мездмас сӧмын колясыс.
Регыд Господь эштӧдас му вылын веськыда вӧчӧмсӧ, Ассьыс шуӧмсӧ пӧртас олӧмӧ.
Исай водзвыв висьтавліс:
— Господь Саваоф кӧ эз коль миянлы чужан кӧйдыссӧ, ми эськӧ бырим Содом моз да вӧлім Гомора кодьӧсь.
Сідзкӧ, мый артмӧ?
Мукӧд войтыр эз корсьлыны веськыдлунсӧ, да босьтісны сійӧс. Найӧ босьтісны веськыдлунсӧ эскӧмныс пыр.
Израиль, мӧдарӧ, Индӧд отсӧгӧн корсис веськыдлунсӧ, да тайӧ эз ло сылы.
Мыйла?
Веськыдлунсӧ сійӧ зілис шедӧдны Индӧд серти уджъяснас, эз эскӧмнас.
Тадзи сійӧ изйӧ крукасис. Та йылысь гижӧма:
— Ме пукта Сионӧ из, унаӧн сэтчӧ крукасясны да унаӧн сы вылӧ усясны.
Но Сылы эскысь оз янав.
10 юр.
Вокъяс, ме сьӧлӧмсянь кора да кевмыся Енлы Израильлӧн мездмӧм вӧсна.
Ме тӧда: налӧн сьӧлӧмыс ӧзъялӧ Енмыслы, но налы оз тырмы гӧгӧрвоӧмлуныс.
Найӧ оз гӧгӧрвоны Енмыслысь веськыдлунсӧ да зільӧны сувтӧдны ассьыныс веськыдлун. Та вӧсна найӧ эз сетчыны Ен веськыдлунлы. Кристос — Индӧдыслӧн пом. Сідзкӧ, быдӧн, коді эскӧ Сылы, лоӧ веськыдӧн.
Индӧд серти веськыдлун йылысь Мӧисей гижӧ: «Индӧд серти олысь Индӧднас пондас овны».
Эскӧмсянь веськыдлуныс висьталӧ: «Эн мӧвпав сьӧлӧмад: “Коді каяс енэжӧ?”» — мед лэччӧдны Кристосӧс.
«Либӧ: “Коді лэччас пыдӧстӧминӧ?”» — мед кыпӧдны Кристосӧс кулӧмысь.
Гижӧдыс мый висьталӧ?
— Матын тэныд кывйыс, тэнад вомын да тэнад сьӧлӧмын.
Тайӧ эскӧмыслӧн кыв, мый йылысь ми висьталам. Ӧд вомнад кӧ висьталан Исусӧс Господьӧн да сьӧлӧмнад кӧ эскан, мый Енмыс ловзьӧдіс Сійӧс кулӧмысь, мездман. Сьӧлӧмнад эскӧмыд вӧчӧ веськыдӧн, вомнад висьталӧмыд — мездӧ.
Гижӧдыс висьталӧ: «Сылы эскысь оз янав».
Юдейяс да грекъяс костын торъялӧмыс абу. Быдӧнлӧн ӧти Господь. Сійӧ лышкыда сетӧ быдӧнлы, коді шыасьӧ Сы дінӧ.
Ӧд быдӧн, коді шыасяс Господь нимӧ, мездмас.
Кыдзи нӧ шыасясны Господь дінӧ, оз кӧ эскыны Сылы?
Кыдзи нӧ эскасны, эз кӧ кывлыны Сы йылысь?
Кыдзи нӧ кывласны, абу кӧ висьталысьыс?
Кыдзи нӧ висьталасны, абу кӧ мӧдӧдӧма висьтавнысӧ?
Гижӧма: «Майбырӧсь кокъясыс лӧнь олӧм да бур юӧр вайысьлӧн».
Но эз ставныс кывзыны Бур Юӧрсӧ.
Исай шуӧ: «Господьӧй, коді нӧ эскис миян висьталӧмӧ?»
Эскӧмыс ӧд кылӧмсянь, а кылӧмыс Ен Кывсянь.
Юала: «Найӧ ӧмӧй эз кывлыны?»
Кывлісны, дерт.
— Став му пасьталаыс кыліс налӧн висьталӧм шыыс, став му пельӧсӧдзыс воис налӧн кывйыс.
Нӧшта юала: «Израиль ӧмӧй эз гӧгӧрво?»
Ӧд Мӧисей пыр на Енмыс шуліс:
— Ме кыпӧда тіян пытшкын вежалӧм сійӧ войтыр дінӧ, кодӧс оз позь шуны войтырӧн. Дӧзмӧда тіянӧс вежӧртӧм йӧз пыр.
Исай повтӧг висьталӧ Енлысь шуӧмсӧ:
— Менӧ аддзисны найӧ, кодъяс эз корсьлыны Менӧ, восьті Ачымӧс налы, кодъяс эз юасьлыны Ме йылысь.
Израиль йылысь Енмыс тадзи шуӧ:
— Ме лунтыр сулалі кывзысьтӧм да асныра войтырлы киӧс нюжӧдӧмӧн.
11 юр.
Юала: «Енмыс ӧмӧй эновтіс Ассьыс йӧзсӧ?»
Дерт, эз.
Ме ачым израильса, Ӧвраам чужанвужйысь, Вениамин чужанкотырысь.
Енмыс эз эновт Ассьыс водзвыв бӧрйӧм войтырсӧ.
Онӧ ӧмӧй тӧдӧй, мый висьталӧма Гижӧдас Илля йылысь?
Сійӧ норасьӧ Енлы Израиль вылӧ: «Господьӧй, Тэнсьыд пророкъястӧ виисны, висьпуктанінъястӧ жугӧдісны.
Ме ӧтнамӧн коли, тшӧтш менам олӧм вылӧ ыштӧны».
Мый сылы Енмыс воча шуӧ?
«Ме коли Аслым сизим сюрс мортӧс. Найӧ эз пидзӧсчанясьны Ваал водзӧ».
Тадзи и ӧні: Енмыс буралӧмыс кузя видзӧма коляссӧ, Ассьыс бӧрйӧмаясӧс.
Бӧрйӧма буралӧмыс вӧсна, абу мортлӧн уджъяс серти.
Бӧрйӧма кӧ вӧлі уджъяс серти, сэки эськӧ буралӧмыс эз вӧв буралӧмӧн.
Сідзкӧ, мый артмӧ?
Израиль эз аддзы, мый корсис, сӧмын бӧрйӧмаяс аддзисны. Мукӧдыс чорзьӧдчисны, ӧд гижӧма:
— Енмыс сетіс налы чорзьӧм лов. Налӧн синныс куньса, пельныс тупкыса, и ӧнӧдз на тадз.
Давид висьталӧ:
— Мед чӧсмасян пызанныс лоӧ налы тывйӧ дзугсьӧмӧн, налькйӧ шедӧмӧн, изйӧ крукасьӧмӧн. Тайӧ лоӧ налы водзӧс пыдди. Синмыс налӧн мед бердас, аддзыны оз кут, сюрса лыыс мед кусыньтчас пыр кежлӧ.
Сідзкӧ, юала: «Найӧ ӧмӧй усьмӧныс крукасисны?»
Эз.
Налӧн крукасьӧмыс вайис мездмӧм мукӧд войтырлы. Та вӧсна на пытшкын кыптіс мукӧд войтыр дінӧ вежалӧм.
Налӧн крукасьӧмыс кӧ вайис озырлун муюгыдыслы да Енсьыс кежӧмыс кӧ озырмӧдіс мукӧд войтырӧс, сэки мыйта озырлун ваяс став Израильлӧн Ен дінӧ бергӧдчӧмыс?
Тіянлы, мукӧд войтырлы, висьтала:
менӧ сувтӧдӧма апостолавны тіянлы, и ме ошйыся аслам кесъялӧмӧн.
Гашкӧ, верма кыпӧдны ас войтыр пытшкын веж петӧмсӧ да отсавны мездмыны кодсюрӧлы.
Найӧс ӧтдортӧмыс кӧ вайис бурасьӧм муюгыдыслы, сэки мый ваяс найӧс сибӧдӧмыс? Оз-ӧ кулӧмысь ловзьӧм?
Медводдза пӧжасыс кӧ вежа, сідзкӧ, кӧтасыс ставнас вежа.
Пулӧн вужйыс кӧ вежа, вожъясыс тшӧтш вежаӧсь. Быдтӧм вый пуысь кӧ ӧткымын вож чегисны, а тэнӧ, вӧрса вый пу вожӧс, йитісны чегӧминас, да тэ мукӧд вожыскӧд ӧти вужсянь кутін босьтны быдман вынсӧ, сэки эн ошйысь мукӧд вожыс водзын.
А кӧсъян кӧ ошйысьны, тӧд: он тэ кут вужсӧ, а вужйыс — тэнӧ.
Гашкӧ, тэ шуан: «Менӧ йитӧм могысь вожъяссӧ чегисны».
Тайӧ тадз.
Найӧс чегисны эскытӧмысла, а тэ кутчысян эскӧмнад. Асьтӧ вылӧ эн пукты, но полӧмпырысь ов.
Енмыс кӧ эз жалит быдтӧм вый пулысь вожъяссӧ, жалитас-ӧ тэнӧ?
Тӧд: Енмыс бур сьӧлӧма, но вермӧ лоны и чорыдӧн. Чорыд усьӧмаяс дінӧ, бур сьӧлӧма тэ дінӧ, сӧмын кутчысян кӧ Сылӧн бурлунӧ. Он кӧ, тэнӧ тшӧтш керыштасны.
Юдейяс кӧ оз кольччыны эскытӧмлунас, найӧс лоӧ йитӧма. Енмыс вына бӧр йитны найӧс.
Тэнӧ ӧд керыштӧма вӧлі вӧрса пуысь да йитӧма быдтӧм пуыс дінӧ. А быдтӧм пу вожлы ёна кокньыдджык бӧр йитчыны мам пуыс дінӧ.
Вокъяс, мед ті энӧ мӧвпалӧй ас мывкыдсяньныд, висьтала тіянлы тайӧ гусяторсӧ: Израиль войтырысь сӧмын кутшӧмкӧ юкӧн чорзьӧдчис. Налӧн чорзьӧдчӧмыс кыссяс сэтчӧдз, кытчӧдз оз мездмы мукӧд войтырыс колана лыдӧдз. Сэки став Израиль мездмас.
Ӧд гижӧма:
— Сионсянь локтас Мездысь, Сійӧ бырӧдас Яков чужанвужйысь Ентӧг олӧмсӧ.
Ме босьта налысь мыжъяссӧ, тайӧ лоӧ Менам йитӧд накӧд.
Найӧ эз сибӧдны Бур Юӧрсӧ, Енлы паныд мунісны. Тайӧ лои тіян вӧсна. Но найӧ бӧрйӧм войтыр, и Енмыс радейтӧ найӧс батьясныс вӧсна.
Енмыс Ассьыс корӧмаяссӧ оз вунӧд, Сійӧ бӧр оз босьт сетӧмасӧ.
Коркӧ ті, мукӧд войтыр, энӧ кывзысьӧй Енмыслысь, но Израильлӧн кывзысьтӧмлун вӧсна Енмыс вӧлі бур сьӧлӧма тіян дінӧ. Ӧні найӧ оз кывзысьны, медым тіян дінӧ моз Сійӧ вӧлі бур сьӧлӧма тшӧтш на дінӧ.
Енмыс ставнысӧ кӧрталіс кывзысьтӧмлуннас, медым ставныс дінӧ лоны бур сьӧлӧмаӧн.
Енлӧн озырлуныс пыдӧстӧм, Сылӧн мывкыдлуныс да тӧдӧмлуныс шымыртны вермытӧм.
Шуӧм кывйыс вежӧрӧ тӧрӧдтӧм, туйыс Сылӧн туявтӧм.
Коді вермас тӧдны Господьлысь мӧвпъяссӧ?
Коді вермас Сійӧс туйдӧдны?
Кодлы Сійӧ уджйӧза, медым мынтысьны?
Ӧд ставыс Сысянь, Сы пыр да Сылы.
Ошкӧм Сылы нэмъяс чӧж. Аминь.
12 юр.
Вокъяс, Енлӧн ыджыд буралӧмыс вӧсна кора тіянӧс: сетӧй асьнытӧ Енлы ловъя, вежа да шогмана вись пыдди. Тайӧ лоӧ бур мывкыда кесъялӧм Енмыслы. Энӧ вужъясьӧй тайӧ мувывса оласногас. Лэдзӧй Енмыслы вежны тіянӧс, выльмӧдны вежӧрнытӧ, медым тӧдны тіянлы Сылысь кӧсйӧмсӧ: мый колана, шогмана да тыр-бур.
Енсянь меным бурсетӧм вӧсна висьтала тіянлы быдӧнлы: энӧ мӧвпалӧй ас йывсьыныд вывті, коланасьыс унджык, но мӧвпалӧй ышнясьтӧг, Енмӧн сетӧм эскӧм сертиныд.
Кыдзи ӧти вир-яйлӧн эм уна юкӧн, и быд юкӧн вӧчӧ ассьыс удж, тадзи Кристос пытшкын ставным ми ӧтлаынсӧ — ӧти вир-яй, а торйӧнсӧ — ӧта-мӧдлы юкӧн.
Енмыс Аслас буралӧмнас быдӧнлы миянлы сетӧма торъя бурсетӧм: пророкавны кӧ — пророкав эскӧм сертиыд, кесъявны кӧ — кесъяв, велӧдны кӧ — велӧд, ышӧдны кӧ — ышӧд, сетны кӧ — сет сьӧлӧмсяньыд, веськӧдлыны кӧ — веськӧдлы тӧждысьӧмӧн, бур вӧчны кӧ — вӧч долыд сьӧлӧмӧн.
Радейтӧй восьса сьӧлӧмӧн, ылыстчӧй лёксьыс да кутчысьӧй бурас. Радейтӧй ӧта-мӧднытӧ чой-вокӧс моз, пуктӧй ӧта-мӧднытӧ ассьыд вылӧджык. Тӧждысиганыд энӧ дышмӧй, ловнад ӧзъялӧй, Енмыслы кесъялӧй. Лачанытӧ кутӧй нимкодьпырысь, шогъястӧ нуӧй терпитӧмӧн, дугдывтӧг кевмысьӧй. Вежа войтырлы отсалӧй абутӧмлун дырйиныс, сибӧдӧй ветлысь-мунысьясӧс, бурсиӧй тіянӧс вӧтлысьясӧс, бурсиӧй найӧс, а энӧ ёрӧй.
Нимкодясьысьяскӧд нимкодясьӧй, бӧрдысьяскӧд бӧрдӧй.
Ас костаныд лоӧй ӧти сьӧлӧмаӧсь, энӧ лыддьӧй асьнытӧ бурджыкӧн, коньӧръясӧс энӧ ӧтдортӧй да сюсьӧ энӧ пуксьӧй.
Лёк вӧчӧмысь лёкӧн энӧ мынтысьӧй, йӧзыс водзын ставсӧ зільӧй вӧчны веськыда. Верманныд кӧ, олӧй лӧня ставныскӧд.
Мусаяс, энӧ перйӧй водзӧс ас вӧснаныд, сетӧй тайӧс вӧчны Енлӧн скӧрлунлы.
Ӧд гижӧма: «Ме мынтыся, Ме перъя водзӧссӧ», — висьталӧ Господь.
«Тэныд паныд мунысь кӧ тшыгъялӧ, верд сійӧс, горшыс кӧ косьмӧ, юктав сійӧс.
Тадзи тэ чукӧртан сылы юр вылас биа ӧгыръяс».
Эн сет лёкыслы вермыны тэнӧ, но вермы лёксӧ бурнас.
13 юр.
Быдӧн мед кывзысьӧ аслас юралысьыслысь, ӧд юралӧмсӧ Ен лӧсьӧдӧма, и юралысьсӧ тшӧтш Ен пуктӧма.
Юралысьлы паныд сувтысь паныд сувтӧ Енмыслӧн лӧсьӧдӧмлы.
Тадзи вӧчысь кӧлалӧ ас вылас мыждӧм.
Юралысьясысь полӧны лёктор вӧчигӧн, а оз бурсӧ вӧчигӧн.
Кӧсъян кӧ наысь повтӧг овны, вӧч веськыда, сэки лоӧ насянь ошкӧмыс.
Юралысь — сійӧ Енлӧн кесйӧг, сійӧс пуктӧма тэныд бур вылӧ.
Вӧчан кӧ лёксӧ, пов.
Оз ӧд весьшӧрӧ сійӧ новлӧдлы шыпурт.
Сійӧ Енлӧн кесйӧг, вермӧ чорыда дойдны лёк вӧчысьӧс.
Сідзкӧ, кутам кывзысьны юралысьяслысь огӧ мыждӧмысь полӧм вӧсна, но сьӧлӧмным висьталӧм серти.
Тайӧ уджыс налӧн Енлы кесъялӧм, та вӧсна ті мынтанныд налы вотсӧ.
Сідзкӧ, сетӧй быдӧнлы коланасӧ: кодлы вот сетны — сылы вот сетӧй, кодлы руга — сылы руга, кодысь колӧ повны — сыысь полӧй, кодӧс колӧ пыдди пуктыны — сійӧс пыдди пуктӧй.
Энӧ кольӧй некодлы уджйӧзаӧн, ӧта-мӧдтӧ радейтӧм кындзи.
Ӧд мӧдӧс радейтӧмнад тэ тырвыйӧ пӧртан олӧмӧ Индӧдсӧ.
Тайӧ тшӧктӧмъяссӧ: «Гозъя олӧмтӧ эн пежав», «Эн ви», «Эн гусясь», «Эн пӧръясь», «Эн ышты» да став мукӧд тшӧктӧмсӧ шымыртӧма ӧти тшӧктӧмӧ: «Радейт матыссатӧ асьтӧ моз».
Муслуныс оз вай лёксӧ матыссаыдлы.
Муслуныс — тайӧ Индӧдсӧ тырвыйӧ олӧмӧ пӧртӧм.
Тадзи вӧчӧй, ті ӧд тӧданныд, мый воис нин кад садьмыны миянлы.
Мездмӧмыс ӧні ёна нин матын сэкъя дорысь, кор ми сӧмын на пондім эскыны.
Войыс кольӧ, луныс матыстчӧ.
Сідзкӧ, шыбитам пемыдыслысь уджъяссӧ да пасьтасям югыдыслӧн вермасянторйӧ.
Лунъюгыдын моз пондам овны бур ногӧн. Огӧ сетчӧй гажӧдчӧмӧ да кодалӧмӧ, гозъя олӧм пежалӧмӧ да лэдзчысьӧм оласногӧ, вензьӧмӧ да вежалӧмӧ.
Мед тіян паськӧмӧн лоӧ Исус Кристос Господьным. Вир-яйныд вӧсна тӧждысьӧмсӧ энӧ бергӧдӧй сылысь лёк кӧсйӧмсӧ могмӧдӧмӧ.
14 юр.
Жеб эскысьӧс сибӧдӧй, энӧ вензьӧй, сылӧн видзӧдласыс кӧ торъялӧ.
Ӧти эскӧ, мый позьӧ сёйны быдтор, а мӧдыс, жеб эскысьыс, сёйӧ сӧмын быдмӧг.
Быдтор сёйысь, эн увтырт быдмӧг сёйысьӧс, и тэ, быдмӧг сёйысь, эн мыжав быдтор сёйысьӧс. Енмыс ӧд кыкнаннытӧ сибӧдӧ.
Коді тэ сэтшӧмыс, мый йӧз кесйӧгӧс мыжалан?
Сулалӧ-ӧ, усьӧма-ӧ сійӧ, сылӧн Ыджыдыс тӧдӧ.
Сійӧ кутас сулавны, ӧд Енмыс вына сувтӧдны сійӧс.
Кодкӧ торйӧдӧ лунъяс, а кодлыкӧ став луныс ӧткодь.
Быдӧн вӧч аслад гӧгӧрвоӧмлун серти.
Лунъяс торйӧдысь — Господь понда найӧс торйӧдӧ, коді оз торйӧд — Господь понда оз торйӧд.
Быдтор сёйысь — Господь понда сёйӧ да Енсӧ аттьӧалӧ, коді оз сёй быдторсӧ — Господь понда оз сёй да тшӧтш Енсӧ аттьӧалӧ.
Ӧд некод миян пиысь оз ов да оз кув ас пондаыс.
Та вӧсна, олам кӧ — Енлы олам, кулам кӧ — Енлы кулам.
Ловъяӧсь-ӧ, кулӧмаӧсь-ӧ — ми Енмыслӧн.
Кристос ӧд куліс, ловзис да олӧ, медым ыджыдавны кулӧмаяс да ловъяяс вылын.
Мый тэ мыжалан воктӧ?
Мыйла нинӧм туйӧ пуктан сійӧс?
Ставным ӧд сувтам Кристослӧн ёрд водзӧ.
Гижӧма:
— Ме ловъя, висьталӧ Господь, — Ме водзӧ пидзӧсчанясяс быд морт, да быд вомсянь кыптас ошкӧм Енлы.
Тадзи быдӧн ас вӧснаыс кывкутас Ен водзын.
Водзӧ огӧ кутӧй мыжавны ӧта-мӧдӧс.
Мӧдарӧ, видзӧдӧй, мед эськӧ энӧ крукӧдӧй да уськӧдӧй вокнытӧ.
Ме бура тӧда да эска Господь Исуслы, мый, збыльвылас, нинӧм абу пежа.
Сӧмын сылы лоӧ пежа, коді лыддьӧ мыйкӧ пежаӧн.
Тэ кӧ шогӧ уськӧдан воктӧ сёян вӧсна, сідзкӧ, тэ он вӧч мусапырысь.
Эн жугӧд сійӧс аслад сёянӧн, ӧд сы вӧсна куліс Кристос.
Энӧ лэдзӧй серамвыв лэптыны сійӧ, мый ті лыддянныд бурӧн.
Ӧд Енлӧн Юралӧмыс абу сёйӧм да юӧм, тайӧ Вежа Ловсянь веськыдлун, лӧньлун да нимкодьлун.
Кристослы тадзи кесъялысь шогмана Енмыслы да пыдди пуктана йӧзӧн.
Зілямӧй овны лӧня ӧта-мӧдӧс ёнмӧдӧмӧн.
Сёян вӧсна эн жугӧд Енлысь уджсӧ.
Ставыс сӧстӧм, но мортыслы лёк, крукӧдӧ кӧ аслас сёянӧн мӧдсӧ.
Бурджык, он кӧ сёй яй, он ю вина, он вӧч нинӧм сэтшӧмсӧ, мыйӧ вокыд крукасьӧ да усьӧ.
Тэнад эм эскӧм?
Видз сійӧс сьӧлӧмад Ен водзын.
Шуда сійӧ, коді оз мыжав асьсӧ сыысь, мый бӧрйӧ.
Майшасьӧмӧн сёйысь мыжмӧ, ӧд сійӧ эскытӧг вӧчӧ.
А эскытӧг вӧчӧмыд эм мыж.
Ошкӧм Сылы, коді сетӧ тіянлы зумыда кутчысьны меӧн висьталӧм Бур Юӧрӧ, Исус Кристослӧн велӧдӧмӧ. Сэні висьталӧма важысянь дзебӧм гусяторсӧ. Тайӧ Бур Юӧрсӧ ӧні восьтӧма пророк гижӧдъяс пыр да помтӧг олысь Енлӧн тшӧктӧмыс серти висьталӧма быд кыла войтырлы, медым вайӧдны найӧс кывзысьӧмас да эскӧмас. Дзик ӧти ыджыд мывкыда Енлы ошкӧмыс Исус Кристос пыр нэмъяс чӧж.
Аминь.
15 юр.
Миянлы, вынаяслы, колӧ лоны бур сьӧлӧмаӧн вынтӧмъяс дінӧ налӧн вермытӧмлун дырйи, оз ков мӧвпавны куш ас йывсьыным.
Быдӧнлы колӧ мӧвпавны матыссалы бур вӧчӧм йылысь, сійӧс ёнмӧдӧм могысь.
Ӧд Кристос эз Ас йывсьыс мӧвпав. Гижӧма: «Тэнӧ омӧльтысьяслӧн лёкӧдӧмыс уси Ме вылӧ».
Став воддза гижӧдсӧ вӧлі гижӧма миянӧс велӧдӧм да бурӧдӧм могысь, медым Гижӧд пырыс ми вермим ёнмыны да зумыд лача кутны.
Бурӧдӧмсӧ да зумыдлунсӧ сетысь Ен мед сетас тіянлы ӧти сьӧлӧм. Ӧд Исус Кристос велӧдӧ, мед ті ӧти лолӧн да ӧти вомӧн ошкинныд Енсӧ, миян Господь Исус Кристослысь Батьсӧ.
Сідзкӧ, сибӧдӧй ӧта-мӧднытӧ Кристос сибыдлунӧн, медым ошкыссис Енмыс.
Ме тадзи гӧгӧрвоа: Исус Кристос локтіс кесъявны юдейяслы, медым збыльмӧдны батьяслы кӧсйысьӧмсӧ да петкӧдлыны, мый Енмыс кутӧ Ассьыс кывсӧ. Кристос локтіс кесъявны тшӧтш мукӧд войтырлы, мед и найӧ вермисны ошкыны Енсӧ на дінӧ буралӧмысь.
Та йылысь гижӧма:
— Таысь ме кута нимӧдны Тэнӧ мукӧд войтыр пӧвстын, понда сьылӧмъясӧн ошкыны Тэнсьыд нимтӧ.
Нӧшта гижӧма:
— Нимкодясьӧй, мукӧд войтыр, Сылӧн войтыркӧд.
И нӧшта на:
— Ошкӧй Господьӧс, быд кыла войтыр. Нимӧдӧй Сійӧс, став мувывса йӧз.
Исай висьталӧ:
— Ессей вужсянь петас вож.
Сійӧ кутас веськӧдлыны быд войтырӧн, найӧ Сы вылӧ лача кутны пондасны.
Лачасӧ сетысь Ен мед тыртас тіянӧс нимкодьлунӧн да лӧньлунӧн эскӧманыд, медым Вежа Лов вынӧн ті зумыда сулалінныд лача кутӧмас.
Вокъяс, ме тӧда, тіян бурлуныс да тӧдӧмлуныс тырвыйӧ, ті верманныд туйдӧдны ӧта-мӧднытӧ.
Но тіянлы казьтыштӧм могысь ме мыйсюрӧ гижи повтӧг. Тадзи вӧчи, ӧд Енмыс Аслас буралӧмнас корис менӧ кесъявны Исус Кристослы ентӧдтӧмъяс пӧвстын. Менӧ сувтӧдӧма вӧчны вежа удж: висьтавны Енлысь Бур Юӧрсӧ да вайны ентӧдтӧмъясӧс Ен водзӧ шогмана да Вежа Лолӧн вежӧдӧм вись пыдди.
Исус Кристос пытшкын ме верма ошйысьны Енлы кесъялӧмӧн. Лысьта висьтавны сӧмын сы йылысь, мый Кристос вӧчис ме пыр, медым вайӧдны ентӧдтӧмъясӧс Енлысь кывзысьӧмас. Сійӧ вӧчис тайӧс Енмыслӧн Лов вынӧн менам сёрниӧй да уджӧй пыр, индысьпасъяс да шензьӧданаторъяс пыр. Ерусалимсянь да водзӧ ме паськӧді Кристос йылысь Бур Юӧрсӧ, весиг Иллирикӧдз вои.
Мед эз ло вӧчӧма мукӧдлӧн подув вылын, ме зіли висьтавны Бур Юӧрсӧ сэні, кӧні Кристос нимсӧ эз на кывлыны.
Та йылысь гижӧма:
— Кодъяслы эз висьтавлыны Сы йылысь, найӧ аддзасны, кодъяс эз на кывлыны, найӧ тӧдмаласны.
Тайӧ уджыс унаысь кутіс менӧ тіян дінӧ волӧмысь.
Ӧні менам помалӧма тані уджсӧ. Гашкӧ, уна вося кӧсйӧмӧй волыны тіян дінӧ сэсся збыльмас. Испанияӧ мунігӧн пырала тіян дінӧ.
Ёна кӧсъя аддзысьлыны тіянкӧд, медым кӧть этшаник вермим ӧтлаын нимкодясьыштны. Лача кута, мый сэсся отсаланныд меным водзӧ туйӧ петны.
Ӧні ме мӧдӧдча Ерусалимӧ кесъявны вежа войтырлы. Македонияса да акайяса эскысьяс шуисны сетны кутшӧмсюрӧ отсӧг ерусалимса гӧль эскысьяслы.
Тадзи шуисны вӧчны, ӧд найӧ уджйӧзаӧсь юдейяслы: юдейяс пыр налы вичмис енэжвывса бурсиӧмыс.
Сідзкӧ, налы тшӧтш колӧ отсавны вежа войтырлы налӧн быдлунъя олӧмын.
Тайӧ отсӧгсӧ нуӧм бӧрын вӧлисти муна Испанияӧ. Сэтчӧ мунігмоз кежала тіян дінӧ. Ме тӧда: ме локта тіян дінӧ Кристос Бур Юӧрсянь тыр бурсиӧмӧн.
Вокъяс, миян Господь Исус Кристос нимӧн да Вежа Ловсянь муслунӧн кора тіянӧс: ӧтвывтчӧй менам тышъясӧ да кевмысьӧй ме вӧсна Енмыслы, медым эг веськав Юдеяын эскытӧмъяс киӧ, да вайӧм отсӧгыс мед шогмас ерусалимса вежа войтырлы. Ен кӧ сетас, нимкодьпырысь локта тіян дінӧ да шойччышта тіян ордын.
Лӧньлунсӧ сетысь Ен ставныдкӧд тіянкӧд. Аминь.
16 юр.
Ме тӧдмӧда тіянӧс Фива чойкӧд. Сійӧ Кенкреяын вичкоса отсасьысь.
Сибӧдӧй сійӧс Господь нимсянь, кыдзи лӧсялӧ вежа войтырлы, ковмас кӧ, отсыштӧй сылы. Ачыс сійӧ уналы отсаліс, тшӧтш меным.
Висьталӧй чолӧм Прискиллалы да Акиллы. Найӧ мекӧд ӧтвыв кесъялӧны Исус Кристослы. Найӧ вӧліны дасьӧсь олӧмнысӧ сетны ме вӧсна. Да ог сӧмын ӧтнам ме аттьӧав найӧс, тшӧтш мукӧд войтырса вичкояс. Чолӧм тшӧтш на ордын чукӧртчысь эскысьяслы.
Чолӧм менам муса Епенетлы, Акайяын сійӧ медводз эскис Кристослы.
Чолӧм Мариамлы, сійӧ уна уджаліс-отсасис миянлы.
Чолӧм менам ас войтырсалы: Андрониклы да Юниялы, накӧд ме пукавлі дзескыдінын. Найӧ пыдди пуктана йӧз апостолъяс пӧвстын, и найӧ меысь водз эскисны Кристослы.
Чолӧм Амплийлы, сійӧ менам муса вок.
Чолӧм Урбанлы, сійӧ миян моз тшӧтш кесъялӧ Кристослы. Чолӧм муса Стакий ёртлы.
Чолӧм Апелеслы. Сійӧ Кристос вӧсна уна сьӧкыд пыр муніс.
Чолӧм Аристовуллӧн гортсалы.
Чолӧм менам Иродион рӧдвужлы.
Висьталӧй чолӧм Наркислӧн гортсаяс пиысь налы, кодъяс эскӧны Господьлы.
Чолӧм тшӧтш мӧдӧда Енлысь уджсӧ вӧчысьяслы: Трифеналы да Трифосалы.
Чолӧм муса Персида чойлы, сійӧ ёна уджаліс Господьлы.
Чолӧм Руфослы, Господьӧн бӧрйӧмалы, да сылӧн мамыслы, ӧд сійӧ меным тшӧтш мам кодь.
Чолӧм Асинкритлы, Флегонтлы, Ермлы, Патровлы, Ермийлы да накӧд уджалысь вокъяслы.
Чолӧм Филологлы да Юлиялы, Нирейлы да сылӧн чойыслы, Олимпанлы да накӧд сэні став вежа войтырлы.
Чолӧмалӧй ӧта-мӧднытӧ вежа окыштӧмӧн.
Кристослӧн быд вичкосянь тіянлы чолӧм.
Вокъяс, кора тіянӧс, видзчысьӧй наысь, кодъяс пыртӧны вичкоад вензьӧмъяс, да кежӧдӧны эскӧмсьыс. Ылыстчӧй татшӧмъяссьыс.
Татшӧм йӧзыс кесъялӧны оз Исус Кристос Господьнымлы, но асланыс рушкулы. Мича сёрнинас найӧ кокньыда ылӧдлӧны восьса сьӧлӧмаясӧс.
Тіян кывзысяна олӧмныд быдӧнлы бура тӧдса.
Таысь меным нимкодь. Кӧсъя, мед эськӧ ті вӧлінныд тэрыбӧсь бурыс вылӧ, но ньӧжмыдӧсь лёкыс вылӧ.
Лӧньлунсӧ сетысь Ен регыд песовтас сӧтанасӧ тіян кокъяс улӧ.
Миян Господь Исус Кристослӧн буралӧмыс тіянкӧд.
Аминь.
Тіянлы ыстӧны чолӧм менам Тимофей уджъёртӧй да ас войтырысь Луций, Ясон да Сосипатр вокъяс.
Чолӧмала тіянӧс тшӧтш ме, Тертий, тайӧ гижӧдсӧ гижысь.
Чолӧм Гайсянь. Сійӧ сибӧдӧ ас ордас став эскысьсӧ, тшӧтш и менӧ.
Тіянлы ыстӧны чолӧм Кварт вок да карса сьӧм видзысь Ераст.
Миян Господь Исус Кристослӧн буралӧмыс ставныдкӧд тіянкӧд.
Аминь.
Апостол Павеллӧн Коринфӧ медводдза мӧдӧдӧм гижӧд
1 юр.
Гижӧ Павел, Енлӧн корӧм-кӧсйӧм серти Исус Кристослӧн апостол. Сосфен воккӧд ми чолӧмалам тіянӧс, коринфса Ен вичкоӧс. Исус Кристос пыр Енмыс вежӧдіс тіянӧс да корис лоны Аслас вежа войтырӧн. Ми чолӧмалам быдӧнӧс, коді быдлаын миян моз шыасьӧ Исус Кристос Господьным нимӧ. Буралӧм да лӧнь олӧм тіянлы миян Ен Батьсянь да Господь Исус Кристоссянь.
Быд кадӧ ошка ассьым Енмӧс тіян дінӧ Сылӧн буралӧмысь. Тайӧ буралӧмсӧ Сійӧ петкӧдліс Исус Кристос пыр. Сы пыр Енмыс озырмӧдіс тіянӧс быдторнас, ті кужанныд бура сёрнитны, тіян эм быдпӧлӧс тӧдӧмлун. Кристос йылысь висьталӧмыс зумыда вужъясис тіян сьӧлӧмӧ, та вӧсна миян Господь Исус Кристослысь локтӧмсӧ виччысигӧн ті озырӧсь быдпӧлӧс бурсетӧмнас. Енмыс ёнмӧдас тіянӧс зумыда сулавны помӧдз, медым миян Господь Исус Кристослӧн лунӧ ті вӧлінныд сӧстӧмӧсь.
Енмыс эскана, Сійӧ корис ӧтувтчыны тіянӧс Аслас Пиыскӧд — миян Господь Исус Кристоскӧд.
Вокъяс, кора тіянӧс миян Господь Исус Кристос нимӧн: ас костаныд энӧ юксьӧй, олӧй ӧти мӧвпъясӧн, ӧти видзӧдласӧн да ӧти могӧн.
Вокъяс, Клоялӧн гортсасянь ме кывлі, ті пӧ вензянныд ӧта-мӧдныдкӧд.
Ме сёрнита сы йылысь, мый ті быдӧн ас йывсьыныд шуанныд: «Ме — Павеллӧн», «ме — Аполослӧн», «ме — Кифалӧн», а «ме — Кристослӧн».
Гашкӧ, Кристосӧс вӧлі юклӧма?
Гашкӧ, Павелӧс вӧлі тувъялӧма тіян вӧсна?
Гашкӧ, Павел нимӧн ті пыртчинныд?
Ошка Енмӧс, Крисп да Гай кындзи некодӧс эг пырт тіян пиысь. Сідзкӧ, некод оз вермы шуны, мый ме пырті кодӧскӧ аслам нимӧн.
Нӧшта Степанӧс пырті да сылысь гортсасӧ, сэсся пырті-ӧ кодӧскӧ — ог тӧд.
Ӧд Кристос мӧдӧдіс менӧ эз пыртны, а висьтавлыны Ассьыс Бур Юӧрсӧ. Тайӧ Юӧрсӧ ме висьтала ог мывкыд кывъясӧн, медым Кристослӧн крестыс эз вошты ассьыс вынсӧ.
Ӧд вошӧмаяслы крест йылысь висьталӧмыс — йӧйталӧм, а миянлы, мездмӧмаяслы — Енлӧн выныс.
Гижӧма: «Мывкыда йӧзлысь мывкыдлунсӧ бырӧда, вежӧра йӧзлысь вежӧрлунсӧ ӧтдорта».
Коді нӧ мывкыда йӧзыс?
Коді велӧдчӧмаыс?
Коді нӧ тайӧ му вылас вежӧра йӧзыс?
Эз-ӧ тайӧ мувывса мывкыдлунсӧ Енмыс йӧйталӧмӧ бергӧд?
Енмыс Ассьыс мывкыдлунсӧ петкӧдліс мувывса йӧзлы, но йӧзыс асланыс мывкыдлунӧн Енсӧ эз гӧгӧрвоны. Сэки Енмыс мӧвпыштіс мездыны найӧс, кодъяс эскӧны миян висьталӧмлы. Тайӧ висьталӧмсӧ йӧзыс шуӧны йӧйталӧмӧн.
Юдейяс корӧны вӧчны шензьӧданаторъяс, грекъяс — петкӧдлыны мывкыдлун, а ми висьталам тувъялӧм Кристос йылысь. Юдейяс крукасьӧны тайӧ висьталӧмас, а грекъяс лыддьӧны тайӧс йӧйталӧмӧн. Но Енлӧн корӧмаяслы, юдейяслы да грекъяслы, Кристос — Енлӧн выныс да мывкыдлуныс.
Ӧд Енлӧн “мывкыдтӧмлуныс” ёна ыджыдджык морт мывкыдысь, да Енлӧн “жеблуныс” ёна вынаджык морт вынысь.
Вокъяс, видзӧдлӧй ас выланыд, кутшӧмӧсь ті, Енлӧн корӧмаяс. Морт видзӧдлас серти этша тіян пӧвстын мывкыдаыс, этша юралысьыс да бур рӧдысь петысьыс. Но Енмыс бӧрйис тайӧ муюгыдсьыс мывкыдтӧмсӧ, медым янӧдны мывкыдасӧ, бӧрйис жебсӧ, медым янӧдны вынасӧ, бӧрйис тайӧ муюгыдсьыс медся шогмытӧмсӧ, коньӧрсӧ да увтыртӧмсӧ, медым нинӧм туйӧ пуктыны нималанасӧ, медым Ен водзын некод эз ошйысь аснас.
Енмыс йитіс тіянӧс Исус Кристоскӧд, коді лои миянлы мывкыдлуннас. Сы пыр Енмыс мездіс миянӧс, вӧчис веськыдӧн да вежа войтырӧн. Ӧд гижӧма: «Ошйысьысь мед ошйысьӧ Господьӧн».
2 юр.
Вокъяс, кор ме волі тіян дінӧ висьтавны Енсянь юӧр, сэки сёрниті тіянкӧд эг мича да мывкыд кывъясӧн. Ме мӧвпышті, мый тіянын олігӧн кӧсъя тӧдны сӧмын Исус Кристосӧс — тувъялӧм Кристосӧс. Тіян дінӧ ме локті жебӧн да полысьӧн, сьӧлӧмӧй ёна тіраліс.
Ме висьтавлі тіянлы да сёрниті тіянкӧд эг аслам мывкыдлунсянь, эг эскӧдан кывъясӧн, но менам кывъясын вӧлі Ловлӧн выныс. Ме сёрниті тадзи, медым тіян эскӧмныд подуласис Енлӧн вын вылӧ, а эз мортлӧн мывкыдлун вылӧ.
Мывкыдлун йылысь ми висьталам зумыда эскысьяслы. Ми висьталам огӧ тайӧ муюгыдас олысьяслӧн да юралысьяслӧн мывкыдлун йылысь, ӧд тайӧ юралысьяссӧ лоӧ бырӧдӧма. Ми висьталам Енлӧн гуся мывкыдлуныс йылысь, кодӧс быдӧнысь вӧлі дзебӧма. Но олӧм пуксьытӧдзыс на Енмыс вӧлі мӧвпыштӧма, мый Сылӧн мывкыдлуныс ваяс миянлы дзирдлун. Тайӧ муюгыдас юралысьяс пӧвстысь некод эз тӧд Енлӧн мывкыдлуныс йылысь.
Тӧдісны кӧ, найӧ эськӧ эз тувъявны дзирдлуна Господьӧс.
Ӧд гижӧма:
— Эз аддзывлы син, эз кывлы пель, весиг юрас мортлы эз волы, мый Енмыс дасьтӧма Сійӧс радейтысьяслы.
Енмыс восьтіс тайӧс миянлы Аслас Ловнас, ӧд Лолыс ставсӧ тӧдӧ. Сійӧ тӧдӧ Енлысь став пыдта-судтасӧ.
Вермас-ӧ кодкӧ тӧдны мортлысь мӧвпъяссӧ сылӧн лолыс кындзи?
Тадзи Енлысь мӧвпъяссӧ некод оз тӧд Енлӧн Лолыс кындзи.
Ми сибӧдім эгӧ тайӧ муюгыдсалысь ловсӧ, а Енлысь Ловсӧ, медым вермим тӧдны Енлысь сетӧмторъяссӧ. Ми висьталам та йылысь огӧ асланым мывкыдлунсянь, огӧ ас кывъясӧн, а Вежа Ловсянь сетӧм кывъясӧн. Ловсянь висьталӧмсӧ ми гӧгӧрвоӧдам Лов отсӧгӧн. Морт пытшкас кӧ абу Енлӧн Лолыс, сійӧ оз вермы сибӧдны Ловсянь висьталӧмсӧ да лыддьӧ тайӧс йӧйталӧмӧн.
Мортыс оз вермы гӧгӧрвоны висьталӧмсӧ, ӧд тайӧс позьӧ донъявны сӧмын Енлӧн Лолыс отсӧгӧн.
Морт пытшкас кӧ эм Енлӧн Лолыс, татшӧм мортыс вермӧ донъявны быдтор, а сійӧс донъявны некод оз вермы.
— Коді гӧгӧрвоас Господьлысь мывкыдсӧ? Коді вермас туйдӧдны Сійӧс?
Но миян пытшкын Кристослӧн мывкыдыс.
3 юр.
Вокъяс, ме эг вермы сёрнитны тіянкӧд Лов серти олысьяскӧд моз. Ме сёрниті тіянкӧд вир-яй серти олысьяскӧд моз, ӧд ті быттьӧ век на кагаяс Кристослы эскӧмын.
Ме верді тіянӧс йӧлӧн, а эг чорыд сёянӧн, ӧд ті энӧ на вермӧй сёйны чорыдсӧ. Ті ӧнӧдз онӧ вермӧй сёйны сійӧс, ӧд ті вир-яй серти на оланныд.
Тіян костын пыр на овлӧ вежалӧм, вензьӧм да юксьӧм. Сідзкӧ, ті вир-яй серти на оланныд, ті пыр на тайӧ муюгыдсаыс кодьӧсь.
Ӧти шуӧ: «Ме — Павеллӧн», мӧд шуӧ: «ме — Аполослӧн». Тадзи кӧ сёрнитанныд, сідзкӧ, ті дзик на тайӧ муюгыдсаыс кодьӧсь.
Коді нӧ Павелыс?
Коді Аполосыс?
Найӧ сӧмын кесъялысьяс, кодъяс пыр ті эскинныд Кристослы. На пиысь быдӧн Господьсянь сетӧм удж вӧчис.
Ме кӧдзи, Аполос киськаліс, а быдтіс Енмыс.
Сідзкӧ, кӧдзысьыс да киськалысьыс нинӧм, ӧд быдтысьыс — Енмыс.
Кӧдзысьыс да киськалысьыс ӧти удж вӧчӧны, но быдӧн на пиысь удждонсӧ уджыс серти босьтас.
Ми — Енкӧд ӧтвыв уджалысьяс, а ті — Сылӧн кӧдзӧм муыс, Сылӧн тэчасыс.
Енлӧн бурсетӧмыс вӧсна ме лои бур тэчысьӧн да пукті подувсӧ, а мӧд лэптӧ сы вылӧ.
Но быдӧн мед видзӧдӧ аслас удж бӧрся.
Подувсӧ пуктӧма нин, тайӧ — Исус Кристос. Тайӧ подулыс кындзи мӧд подув некод оз вермы пуктыны.
Тайӧ подув вылас мортыс вермӧ лэптыны тэчассӧ зарниысь, эзысьысь, дона изйысь, пуысь, турунысь либӧ идзасысь, но уджыс быдӧнлӧн ас кадӧ тыдовтчас.
Тайӧс Мыждан луныс петкӧдлас, ӧд сійӧ биӧн локтас. Сэки биыс быдӧнлысь уджсӧ тӧдмалас.
Кодлӧн вӧчӧмторйыс кутас зумыда сулавны, сійӧ ассьыс удждонсӧ босьтас.
А сотчас кӧ, сэки удждонсӧ воштас.
Дерт, асьсӧ сійӧс лоӧ мездӧма, быттьӧ биысь перъясны.
Ті ӧмӧй онӧ тӧдӧй: ті — Енлӧн оланін, Енлӧн Лолыс олӧ тіян пытшкын.
Коді жугӧдас Енлысь оланінсӧ, Енмыс сійӧс асьсӧ жугӧдас.
Ӧд ті — Енлӧн оланін, а Енлӧн оланіныс вежа.
Асьнытӧ энӧ ылӧдлӧй.
Тайӧ муюгыдас кӧ лыддьӧ кодкӧ асьсӧ мывкыдаӧн, медводз сійӧ мед лоӧ мывкыдтӧмӧн. Сэки сійӧ збыльысь лоӧ мывкыда.
Ӧд Ен син водзын тайӧ му вылас олысьяслӧн мывкыдлуныс — йӧйталӧм.
Гижӧма: «Енмыс кыйӧ мывкыдаясӧс асланыс наянлунӧ».
Нӧшта гижӧма:
— Господь тӧдӧ мывкыда йӧзлысь мӧвпъяссӧ, налӧн мӧвпъясыс ковтӧмӧсь.
Сідзкӧ, некод мед оз ошйысь мортӧн, ӧд ставыс тіян: Павел-ӧ, Аполос-ӧ, Кифа-ӧ, муюгыдыс-ӧ, олӧмыс-ӧ, кулӧмыс-ӧ, ӧніяыс-ӧ, локтанаыс-ӧ — ставыс тайӧ тіян.
Ті — Кристослӧн, а Кристос — Енлӧн.
4 юр.
Сідзкӧ, лыддьӧй миянӧс Кристослы кесъялысьясӧн, кодъяс кывкутӧны Енлӧн гусяторъяс вӧсна.
Сӧмын татшӧм кывкутысьяслы колӧ лоны эсканаӧн.
Дерт, меным дзик веськодь, ті-ӧ менӧ мыжданныд, йӧзыс-ӧ.
Ме весиг ачым ачымӧс ог мыжды.
Сьӧлӧмӧй оз мыжды менӧ, но тайӧ оз на висьтав менам веськыдлун йылысь.
Ӧд менӧ мыждысьыс — Господь.
Та вӧсна Господь локтӧдз, кадысь водз, некодӧс энӧ мыждӧй. Сійӧ югдӧдас пемыдас дзебӧмасӧ да восьтас мортлысь мӧвпъяссӧ. Сэки быдӧнлы вичмас Енсянь ошкӧмыс.
Вокъяс, ставсӧ тайӧс ме серпасалӧмӧн висьталі тіянлы ас йылысь да Аполос йылысь, медым миян вылӧ видзӧдӧмӧн ті велӧдчинныд гӧгӧрвоны тайӧ кывъяссӧ: «Кутчысьӧй Гижӧдас». Сэки ті онӧ кутӧй ышнясьны, ӧтиӧс вылӧ кыпӧдны, а мӧдӧс увтыртны.
Тэ ӧмӧй бурджык мукӧдсьыс?
Енлӧн сетӧмыс кындзи тэнад ӧмӧй эм мыйкӧ аслад?
Абу кӧ, сідзкӧ, мыйла ошйысян, мый ставыс тэнад.
Тіян ставыс эм, ті ёна нин озырминныд. Ӧні ті — ӧксыяс, а ми — некод.
Дерт, ме ёна кӧсъя, медым ті збыльысь вӧлінныд ӧксыясӧн. Сэки эськӧ тіянкӧд ӧтвыв вермим ӧксыавны.
Но ме чайта, Енмыс пуктіс миянӧс, апостолъясӧс, медбӧръя лыдас, быттьӧ кулӧм вылӧ мыждӧмаясӧс. Ӧд муюгыдас быд олысьлы — анделъяслы и йӧзыслы — ми лоим видзӧданторйӧн.
Кристос вӧсна ми йӧйӧсь, а ті Кристос пытшкын мывкыдаӧсь.
Ми жебӧсь, а ті вынаӧсь.
Миянӧс лёкӧдӧны, а тіянӧс ошкӧны.
Ми ӧнӧдз сёйтӧг-ютӧг олам да лёкиник паськӧмӧн ветлам. Миянӧс нӧйтӧны, ми пыр туйынӧсь. Кок йылысь усьтӧдз уджалам, ас ки помысь кынӧмпӧт перъям.
Миянӧс лёкӧдӧны, а ми бурсиам, миянӧс вӧтлӧны, а ми терпитам.
Миянӧс омӧльтӧны, а ми бур ногӧн сёрнитам.
Тайӧ му вылас олысьяслы ми ёг пыдди, найӧ ӧнӧдз лыддьӧны миянӧс шыбласӧн.
Гижа тайӧс тіянӧс туйдӧдӧм могысь, а ог янӧдӧм могысь, ӧд ті менам муса ныв-пи.
Дерт, тіян вермас лоны Кристос йылысь уна сюрс велӧдысь, но батьыс сӧмын ӧти, ӧд Бур Юӧрсӧ тіянлы ме висьтавлі. Тадзи чужті тіянӧс Исус Кристослы эскысьясӧн.
Сідзкӧ, кора тіянӧс: видзӧдӧй ме вылӧ, ӧд ме видзӧда Кристос вылӧ.
Ме мӧдӧді тіян дінӧ Тимофейӧс. Господь пытшкын сійӧ менам муса пи да эскана кесъялысь. Сійӧ казьтыштас тіянлы Кристоскӧд менам ӧтувъя олӧм йылысь. Та йылысь ме велӧда быдлаын, быд вичкоын.
Ӧткымынӧн тіян пиысь кутісны вывтіасьны, чайтӧны, мый ог лок тіян дінӧ.
Но Енмыс кӧ сетас, регыд локта да тӧдмала тайӧ йӧзыслысь вынсӧ, ог кут налӧн сёрни вылӧ видзӧдны.
Ӧд Енлӧн Юралӧмыс абу кывъясын, а вынын.
Сідзкӧ, мыйӧн локны тіян дінӧ: беддьӧн али рам сьӧлӧмӧн да муслунӧн? Мый бӧръянныд?
5 юр.
Ме кывлі, ӧткымынӧн пӧ тіян пӧвстысь кырсалӧны, и сідзи, мый татшӧмыс оз овлы весиг ентӧдтӧмъяс пӧвстын. Кодкӧ пӧ тіян пиысь узьлӧ весиг батьыслӧн гӧтырыскӧд.
Оз ӧмӧй тіянлы ков шогсьыны та вӧсна да вӧтлыны ас дорсьыныд тайӧ мортсӧ? А ті пыр на ышнясянныд.
Дерт, вир-яйӧн ме абу тіянкӧд, но ловнам тіянкӧд. Ме быттьӧ ачым вӧлі тіянкӧд да мӧвпышті, мый вӧчны тайӧ мортыскӧд. Кор ті чукӧртчанныд миян Господь Исус Кристос нимӧн, ловнам лоа тіянкӧд, миян Господь Исус Кристослӧн выныс тшӧтш лоӧ тіянкӧд. Сэки тайӧ мортсӧ сетӧй сӧтана киӧ вир-яйсӧ жугӧдӧм вылӧ, мед лолыс сылӧн мездмас миян Господь Исус Кристослӧн лунӧ.
Тіянлы нинӧмӧн ошйысьнысӧ.
Ті ӧмӧй онӧ тӧдӧй, мый этшаник няньшом шоммӧдӧ дзоньнас кӧтассӧ.
Сідзкӧ, весалӧй ас пытшсьыныд няньшомнытӧ, медым лоинныд выль кӧтасӧн. Дерт, тіян пытшкын шоммӧданторйыс абу нин, ӧд Кристосӧс, Ыджыд лунся Балянымӧс, вайӧма нин вись пыдди миян вӧсна.
Сідзкӧ, огӧ кутӧй пасйыны Ыджыд лунсӧ важ няньшомӧн: лёклунӧн да наянлунӧн. Кутам пасйыны сійӧс шомтӧм няньӧн: сӧстӧмлунӧн да збыльӧн.
Водзынджык ме тіянлы гижлі нин: энӧ кутӧй некутшӧм йитӧд кырсалысьяскӧд. Ме ог сёрнит тайӧ мувывса кырсалысьяс, горшасьысьяс, гусясьысьяс да идоллы юрбитысьяс йылысь. Сэки эськӧ ковмис эновтны тіянлы тайӧ муюгыдсӧ.
Но ме сёрнита сэтшӧм морт йылысь, коді шуӧ асьсӧ эскысьӧн, но ачыс кырсалӧ, горшасьӧ, суклясьӧ, гусясьӧ, кодалӧ да идоллы юрбитӧ — татшӧмыскӧд энӧ кутӧй некутшӧм йитӧд. Весиг энӧ сёйӧй сыкӧд ӧтлаын.
Меным ӧмӧй мыждыны вичкоысь ортсысасӧ?
Енмыс найӧс мыждас.
А вичкосаӧс — тіянлы мыждыны.
«Вӧтлӧй ас дінсьыныд лёк оласногаӧс».
6 юр.
Ті кӧ мыйыськӧ вензянныд ӧта-мӧдныдкӧд, сэки кыдзи лысьтанныд шыасьны мувывса мыждысьяс дінӧ? Оз ӧмӧй вежа войтыр дінӧ ков шыасьны?
Ті ӧмӧй онӧ тӧдӧй, мый вежа войтыр кутас мыждыны муюгыдсасӧ?
Кутанныд кӧ мыждыны муюгыдсасӧ, мыйла тайӧ ичӧтикторъясыс кузя онӧ вермӧй ӧти кывйӧ воны?
Ті ӧмӧй онӧ тӧдӧй: ми весиг анделъясӧс кутам мыждыны? Сідзкӧ, дерт нин, быдлунъя могъяс кузя вермам ӧти кывйӧ воны.
Кор ті вензянныд ӧта-мӧдныдкӧд быдлунъя могъяс йылысь, сэки ті шыасянныд на дінӧ, кодъяс абу вичкосаяс.
Шуа тайӧс тіянӧс янӧдӧм могысь. Оз ӧмӧй тіян пӧвстысь сюр мывкыда морт, коді эськӧ бурӧдіс эскысьясӧс ӧта-мӧдныскӧд?
Мӧдарӧ, ті ӧта-мӧднытӧ мыжданныд да шыасянныд та могысь эскытӧмъяс дінӧ.
Ті кӧ мыжданныд ӧта-мӧднытӧ, тайӧн сӧмын янӧданныд асьнытӧ.
Оз-ӧ бурджык ло, кутасны кӧ вӧчны тіянлы лёксӧ да мырддявны тіянлысь?
Но ті асьныд лёка вӧчанныд да мырддяланныд мукӧдлысь, весиг эскысьяслысь.
Ті ӧмӧй онӧ тӧдӧй, мый лёксӧ вӧчысьяслы оз вичмы Енлӧн Юраланіныс.
Энӧ ылӧдлӧй асьнытӧ. Ӧд кырсалысьлы, идоллы юрбитысьлы, гозъя олӧм пежалысьлы, пеж оласногалы, ӧта-мӧдныскӧд узьлысь айуловлы, гусясьысьлы, горшасьысьлы, кодалысьлы, суклясьысьлы да мырддялысьлы — некодлы оз вичмы Енлӧн Юраланіныс.
Кодсюрӧ тіян пӧвстысь тшӧтш вӧлінныд татшӧмӧсь.
Но миян Господь Исус Кристос нимӧн да Ен Лов вынӧн ті лоинныд сӧстӧмӧсь, вежаӧсь да веськыдӧсь.
«Меным ставсӧ позьӧ», но абу ставыс бур вылӧ.
«Меным ставсӧ позьӧ», но ме ог лэдз, медым мыйкӧ ыджыдаліс ме вылын.
Сёяныс — кынӧмлы, а кынӧмыс — сёянлы.
Но Енмыс бырӧдас ӧтисӧ и мӧдсӧ.
Вир-яйыс абу кырсалӧм вылӧ, сійӧ — Господьлы, а Господь — вир-яйлы.
Енмыс ловзьӧдіс Господьӧс, Аслас вынӧн Енмыс ловзьӧдас тшӧтш миянӧс.
Ті ӧмӧй онӧ тӧдӧй, мый тіян вир-яйныд — Кристос вир-яйлӧн юкӧн?
Сідзкӧ, верма ӧмӧй Кристослысь юкӧнсӧ кырсалысь анькӧд йитны?
Ен мед видзас.
Ті ӧд тӧданныд, мый кырсалысь анькӧд ӧтувтчысь лоӧ сыкӧд ӧти вир-яйӧн.
Гижӧма: «Кыкыс лоӧны ӧти вир-яйӧн».
А Господькӧд ӧтувтчысь лоӧ Сыкӧд ӧти лола.
Сідзкӧ, энӧ кырсалӧй.
Мукӧд мыжсӧ вӧчысь оз аслас вир-яйлы паныд вӧч, а кырсалысь аслас вир-яйлы паныд мыж вӧчӧ.
Ті ӧмӧй онӧ тӧдӧй, мый тіян вир-яйныд — Вежа Ловлӧн крамыс, Сійӧ олӧ тіян пытшкын. Тайӧ Ловсӧ Енмыс сетіс тіянлы, ӧні ті абу нин асланыдӧсь.
Енмыс ньӧбис тіянӧс ыджыд дон вылӧ.
Сідзкӧ, ошкӧй Енсӧ вир-яйнад и ловнад, ӧд ставыс Сылӧн.
7 юр.
Ті меным гижлінныд да юалінныд гӧтрасьӧм йылысь. Та вылӧ вочавидза тадзи: дерт, тайӧ бур, мортыс кӧ оз гӧтрась,
но медым некод эз кырсав, быд мортлӧн мед лоӧ аслас гӧтыр да быд аньлӧн — аслас верӧс.
Вольпасьын верӧс сет асьтӧ гӧтырлы, а гӧтыр сет асьтӧ верӧслы.
Абу гӧтыр аслас вир-яй вылын ыджыдыс, а верӧс.
Абу верӧс аслас вир-яй вылын ыджыдыс, а гӧтыр.
Энӧ ылыстчӧй ӧта-мӧдсьыныд, а ылыстчанныд кӧ, вӧчӧй тайӧс сёрнитчӧмӧн, сӧмын кутшӧмкӧ кад кежлӧ, медым ёнджыка на верминныд видзавны да кевмысьны.
Сэсся бӧр ӧтлаын лоӧй, медым сӧтана эз ыштӧд тіянӧс кутчысьтӧм вӧснаныд.
Дерт, тайӧ абу тшӧктӧм, но ті верманныд тадзи вӧчны.
Ме кӧсйи эськӧ, медым быдӧн оліс ме моз.
Но Енмыс быдӧнлы вичмӧдӧ торъя бурсетӧм: ӧтилы — сэтшӧмӧс, мӧдлы — татшӧмӧс.
Гӧтыртӧмъяслы да дӧваяслы тадзи висьтала: бурджык тіянлы ме моз ӧткӧн овны,
но онӧ кӧ вермӧй кутны асьнытӧ, гӧтрасьӧй либӧ верӧс сайӧ петӧй.
Ӧд бурджык гӧтрасьны либӧ верӧс сайӧ петны, медым лёкколӧмыс эз ыджыдав тіян вылын.
Гозйӧн олысьяслы тадзи висьтала: гӧтыр мед оз юксьы аслас верӧскӧд. Тайӧ абу менам тшӧктӧм, а Господьлӧн. А юксяс кӧ, мед ӧтнасӧн олӧ либӧ бӧр бурасьӧ верӧсыскӧд. Верӧс мед тшӧтш оз юксьы аслас гӧтыркӧд.
Мукӧдыслы висьтала ме, оз Господь: кутшӧмкӧ эскысьлӧн кӧ гӧтырыс оз эскы, но кӧсйӧ овны верӧсыскӧд, тайӧ эскысьыс мед оз юксьы аслас гӧтыркӧд.
Тайӧс висьтала тшӧтш эскысь аньлы: сылӧн верӧсыс кӧ оз эскы, но кӧсйӧ овны сыкӧд, тайӧ аньыс мед оз юксьы аслас верӧскӧд.
Тадзи эскысь гӧтырыс пыр Енмыс вежӧдӧ эскытӧм верӧссӧ, и мӧдарӧ, эскысь верӧсыс пыр вежӧдӧ эскытӧм гӧтырсӧ.
Эз кӧ вӧв тадзи, тіян ныв-пиныд эськӧ вӧліны пежӧсь, но ӧні найӧ вежаӧсь.
Эскытӧм верӧс либӧ эскытӧм гӧтыр кӧ кӧсйӧ юксьыны, мед юксьӧ.
Сэки эскысь верӧсӧс либӧ эскысь гӧтырӧс нинӧм оз кут, ӧд Енмыс тшӧктіс овны миянлы лӧня.
Гӧтыр, тэ ӧмӧй верман тӧдны, мый мездан ассьыд верӧстӧ, а тэ, верӧс, ассьыд гӧтыртӧ?
Быдӧн тіян пиысь мед олӧ Енлӧн шуӧм серти да лоӧ сэтшӧмӧн, кутшӧмӧн вӧлі Господьлӧн коригас.
Тадзи ме велӧда быд вичкоын.
Енлӧн коригас кӧ вӧлі вундыштӧма кодӧскӧ, сійӧ мед оз дзеб тайӧс.
Эз кӧ вӧв вундыштӧма — мед оз вундыштчы. Вундыштӧмыс нинӧм, и вундыштчытӧмыс нинӧм, но медшӧр могыс — овны Енлӧн тшӧктӧм серти.
Быдӧн мед лоӧ сэтшӧмӧн, кутшӧмӧн вӧлі Енлӧн коригас.
Енлӧн коригас кӧ вӧлін кесйӧгӧн, эн майшась, но позьӧ кӧ мездмыны, бурджыксӧ бӧрйи.
Ӧд Господьлӧн коригас кӧ мортыс кесйӧгӧн вӧлі, ӧні сійӧ Господьлӧн мездлуна морт.
А мездлуна кӧ вӧлі, ӧні сійӧ Кристослӧн кесйӧг.
Енмыс ньӧбис тіянӧс ыджыд дон вылӧ, сідзкӧ, энӧ лоӧй мортлӧн кесйӧгӧн.
Вокъяс, быдӧн лоӧй Ен водзын сэтшӧмӧн, кутшӧмӧн вӧлінныд Енлӧн коригас.
Ӧні висьтала верӧс сайӧ мунтӧмъяслы. Тайӧ абу Господьлӧн тшӧктӧм, ме висьтала ассьым видзӧдласӧс. Ӧд Господьлӧн буралӧмыс кузя меным позьӧ эскыны.
Ме чайта, тайӧ сьӧкыд кадас мортлы бурджык ӧткӧн кольччыны.
Тэ кӧ гӧтыра — эн юксьы.
Гӧтыртӧм кӧ — эн гӧтрась.
Дерт, гӧтрасян кӧ, он мыжмы.
Ныв кӧ петас верӧс сайӧ, тшӧтш оз ло мыжа.
Но гозъя олӧмас виччысьӧ тіянӧс уна сьӧкыдлун, да таысь кӧсъя видзны тіянӧс.
Вокъяс, кӧсъя шуны тіянлы, мый кадыс коли этша нин.
Та вӧсна гӧтыра морт мед олӧ гӧтыртӧм моз, бӧрдысь — бӧрдтӧм моз, гажӧдчысь — гажӧдчытӧм моз, а ньӧбасьысь — быттьӧ нинӧм эз ньӧб. Тайӧ мувывса озырлуннас вӧдитчысь мед олӧ сідзи, быттьӧ сылӧн нинӧм абу.
Ӧд став тайӧ мувывсаыс регыд бырас.
Кӧсъя, медым ті нинӧм вӧсна энӧ тӧждысьӧй.
Гӧтыртӧм морт тӧждысьӧ Господьлӧн уджъяс вӧсна, медым Господьлы шогмыны, а гӧтыра морт тӧждысьӧ быдлунъя могъяс вӧсна, медым гӧтырыслы шогмыны.
Верӧс сайӧ петӧм да верӧстӧм ань ӧта-мӧдсьыс тшӧтш торъялӧны.
Верӧстӧм ань тӧждысьӧ Господьлӧн уджъяс вӧсна, медым вир-яйнас да ловнас Сы водзын вежаӧн лоны.
А верӧс сайӧ петӧм ань тӧждысьӧ быдлунъя могъяс вӧсна, медым верӧсыслы шогмыны.
Ме висьтала тайӧс тіянлы бур вылӧ. Ме ог кӧсйы тіянӧс нинӧмӧн сьӧктӧдны. Кӧсъя, медым ті олінныд шогмана ногӧн да некытчӧ ылавтӧг сьӧлӧмсяньныд кесъялінныд Господьлы.
Шуам, мортыслӧн эм гӧтырпу. Сійӧ оз гӧтрась сы вылӧ, но асьсӧ кутны оз вермы, да лыддьӧ тайӧс лёкторйӧн, сійӧ мед ас кӧсйӧм сертиыс вӧчӧ, мед гӧтрасьӧ, тайӧ абу мыж.
Но мортыс кӧ зумыда кутӧ ассьыс кывсӧ — вермӧ кутны асьсӧ да шуис овны гӧтрасьтӧг, сійӧ бура вӧчӧ.
Та вӧсна, мортыс кӧ гӧтрасьӧ — бура вӧчӧ, а оз кӧ — нӧшта на бурджыка.
Индӧд серти гӧтыр кӧртасьӧма верӧсыскӧд, кытчӧдз верӧсыс ловъя.
Кулӧ кӧ верӧсыс, гӧтыр вермӧ петны верӧс сайӧ, код сайӧ кӧсйӧ, сӧмын верӧсыс мед Господьлы эскис.
Но бурджык лоӧ, оз кӧ пет верӧс сайӧ.
Чайта, Енлӧн Лолыс эм и ме пытшкын, сійӧн тадзи шуа.
8 юр.
Ӧні кӧсъя сёрнитыштны идоллы вайӧм сёян йылысь. Дерт, ми быдӧн тӧдам та йылысь.
Но тӧдӧмлуныс вайӧдӧ ышнясьӧмӧдз, а муслуныс ёнмӧдӧ.
Мортыс кӧ чайтӧ, мый сійӧ тӧдӧ мыйкӧ, збыльвылас сійӧ нинӧм на оз тӧд.
Но Енмыс кӧ муса мортыслы, Енмыс сійӧс тӧдӧ.
Ӧні висьтышта идоллы вайӧм сёян йылысь. Ми тӧдам, мый идолыс збыльвылас абу, эм сӧмын ӧти Ен.
Дерт, енэжас да му вылас эмӧсь сідз шусяна “енъяс”. Ӧд татшӧм “енмыс” да “ыджыдалысьыс” зэв уна, но миян эм сӧмын ӧти Ен Бать. Сійӧ сетӧ олӧм быдӧнлы, Сылы ми олам. Миян эм сӧмын ӧти Господь — Исус Кристос. Сы пыр вӧчӧма ставсӧ, и Сы пыр сетӧма миянлы олӧм.
Но оз быдӧн тӧд та йылысь. Ӧткымынӧн вӧліны ёна велалӧмаӧсь сёйны идоллы вайӧм яй. Та вӧсна ӧні, яй сёйигӧн, найӧ лыддьӧны сійӧс идоллы вайӧм сёянӧн, и налӧн сьӧлӧмыс мыждӧ найӧс, ӧд найӧ жебӧсь на.
Но сёяныс оз матыст миянӧс Ен дінӧ.
Ӧд ми кӧ огӧ сёйӧй — нинӧм огӧ воштӧй, а сёям кӧ — тайӧ нинӧм оз содты миянлы.
Дерт, ті верманныд сёйны ставсӧ, но видзчысьӧй, медым энӧ лоӧй крукӧдӧн жеб эскысьяслы.
Ӧд жеб эскысь кӧ аддзас, мый тэ тӧдӧмӧн сёян идоллы вайӧм сёян, сэки сійӧ тшӧтш кутас сёйны татшӧм сёянсӧ, весиг сылӧн сьӧлӧмыс кӧ мыждӧ сійӧс.
И тэнад тӧдӧмлун вӧсна вошас тайӧ жеб эскысьыс, тэнад вокыд, код вӧсна куліс Кристос.
Тадзи ті дойданныд жеб вокныдлысь сьӧлӧмсӧ да вӧчанныд мыж сылы паныд. Сідзкӧ, ті вӧчанныд мыж Кристослы паныд.
Та вӧсна менам сёянӧй кӧ уськӧдӧ вокӧс, ме некор ог кут сёйны яй, медым менам вокӧй эз усь.
9 юр.
Ме ӧмӧй абу апостол?
Ме ӧмӧй кӧртасьӧма мыйӧнкӧ?
Ме ӧмӧй эг аддзыв Исус Кристосӧс, миянлысь Господьӧс?
Ті — Господь пытшкынӧсь. Тайӧ ӧмӧй абу менам уджлӧн вотӧсыс?
Гашкӧ, мукӧдыслы ме абу апостол, но тіянлы апостол.
Ті — Господь пытшкынӧсь, и тайӧ висьталӧ, мый ме збыльысь апостол.
Менӧ мыждысьяс водзын ме тадзи дорйыся.
Гашкӧ, миянлы оз позь сёйны-юнысӧ?
Гашкӧ, миянлы оз позь босьтны аскӧд эскысь гӧтырӧс? Ӧд тадзи вӧчӧны мукӧд апостолыс: Господьлӧн вокъяс да Кифа.
Гашкӧ, сӧмын меным да Варнавалы колӧ уджавнысӧ, медым аслыным кынӧмпӧт перйыны?
Шыпурта морт ӧмӧй ас тшӧт весьтас олӧ?
Виноград быдтысь ӧмӧй оз виноград вотӧссӧ сёй?
Пемӧс видзысь ӧмӧй оз пемӧслысь йӧвсӧ ю?
Тадзи мӧвпалӧны оз сӧмын йӧзыс, тадзи висьталӧ тшӧтш Индӧдыс.
Мӧисейлӧн Индӧдас гижӧма: «Вартысь ӧшлысь вомсӧ эн тупкы».
Енмыс ӧмӧй ӧш вӧсна тӧждысьӧ?
Абу ӧмӧй тайӧс миянлы висьталӧма?
Ӧд миянлы гижӧма: «Гӧрысь да вартысь уджалӧны лачаӧн, медым босьтны ассьыныс пай».
Ми кӧдзам тіян сьӧлӧмӧ Ловсянь кӧйдыс. Гашкӧ, тіянлы вывті сьӧкыд, вичмӧданныд кӧ миянлы быдлунъя олӧм вылӧ?
Ӧд мукӧдыслы кӧ ті вичмӧданныд, сідзкӧ, ми ёнджыка на вермам та вылӧ лача кутны.
Но ми нинӧм эгӧ корлӧй тіянлысь. Мӧдарӧ, ми нуам став сьӧкыдсӧ, медым эгӧ вӧлӧй крукӧдӧн Кристослӧн Бур Юӧрлы.
Ті ӧд тӧданныд, мый крамын кесъялысьяс пӧткӧдӧны асьнысӧ крамӧ вайӧмторйӧн, а висьпуктанінын кесъялысьяс босьтӧны аслыныс пай висьпуктанінӧ вайӧмторйысь.
Евангелльӧ висьталысьяслы Господь тшӧтш тадзи тшӧктіс вӧчны: пӧткӧдчыны Бур Юӧр висьталӧм помысь.
Но ме некор тадзи эг вӧчлы.
Ме гижа та йылысь ог аслым мыйкӧ босьтӧм могысь, ӧд бурджык кувны тадзи вӧчӧм дорысь. Но тайӧн ошйысьӧмысь некод оз вермы дугӧдны менӧ.
Ме кӧ висьтавла Бур Юӧр, меным нинӧмӧн ошйысьнысӧ, ӧд тайӧс меным Енмыс тшӧктіс вӧчны.
Курыд шог меным, ог кӧ висьтавлы сійӧс.
Ме кӧ висьтавла Бур Юӧрсӧ ас кӧсйӧм серти, сэки меным удждон лоӧ.
Ог кӧ ас кӧсйӧм серти, сэки индӧм удж вӧча.
Сідзкӧ, кутшӧм менам удждонӧй?
Удждонӧй менам — висьтавлыны Кристос йылысь Бур Юӧрсӧ дон босьттӧг. Дерт, ме верма Бур Юӧр висьтавлӧмысь дон босьтны, но ог кӧсйы тадзи вӧчны.
Ме некодлы абу кесйӧг, но лои кесйӧгӧн быдӧнлы, медым унджык йӧзӧс вайӧдны Кристос дінӧ.
Юдейяскӧд ме куті ачымӧс юдей моз, медым вайӧдны найӧс Кристос дінӧ.
Индӧд серти олысьяскӧд куті ачымӧс на моз, медым вайӧдны найӧс Кристос дінӧ.
Индӧдтӧг олысьяскӧд куті ачымӧс тшӧтш на моз, медым вайӧдны найӧс Кристос дінӧ. Дерт, ме абу Индӧдтӧг олысь, ӧд ме ола Кристослӧн индӧд серти.
Жеб эскысьяскӧд куті ачымӧс тшӧтш на моз, медым вайӧдны найӧс Кристос дінӧ.
Ме вӧчи став позянасӧ, медым эськӧ кымынкӧ мортӧс верми мездыны.
Ставсӧ тайӧс вӧча Евангелльӧ вӧсна, мед меным тшӧтш вичмис сылӧн бурсиӧмыс.
Ті ӧмӧй онӧ тӧдӧй, мый панласигӧн котӧртӧны унаӧн, но тырдоныс вичмӧ сӧмын ӧтилы.
Сідзкӧ, котӧртӧй, медым тайӧ тырдоныс вичмис тіянлы.
Быд панласьысь ёна зільӧ да кутӧ асьсӧ киас, медым котӧртӧм бӧрас сылы вичмис юркытш. Но тайӧ юркытшыс сісьмана. Ми кутам асьнымӧс киын, медым миянлы вичмис сісьмытӧм юркытш.
Та вӧсна некытчӧ кежтӧг котӧрта помӧдз да тышкася ог весьшӧрӧ, менам быд вартӧм веськалӧ коланаинӧ. Ме топӧда ассьым вир-яйӧс да тшӧкта сійӧс кывзысьны, медым мукӧдлы Бур Юӧр висьтавлігӧн ачым вӧлі шогманаӧн.
10 юр.
Вокъяс, кӧсъя казьтыштны тіянлы, мый миян батьяс ставныс ветлісны кымӧр улын да вуджисны саридз вомӧн.
Найӧ ставныс пыртчисны кымӧрын да саридзын да лоисны Мӧисей бӧрся мунысьясӧн.
Найӧ ставныс пӧткӧдчисны ӧти сёянӧн — Ловсянь сёянӧн, ставныс юисны ӧти ва — Ловсянь ва.
Ӧд найӧ юисны Ловсянь сетӧм изйысь, коді ветлӧдліс накӧд.
Тайӧ изйыс вӧлі Кристос.
Но унджыкыс на пиысь эз шогмыны Енмыслы да кулісны овтӧминын.
Ставыс тайӧ велӧдӧ миянӧс, медым миян сьӧлӧмын эз вӧв кӧсйӧм — на моз вӧчны лёксӧ.
Энӧ юрбитӧй идолъяслы, кыдзи вӧчисны кодсюрӧ миян батьяс пӧвстысь. Гижӧдыс висьталӧ: «Йӧзыс сёйисны-юисны, сэсся кутісны ворсны».
Энӧ кырсалӧй, кыдзи вӧчисны кодсюрӧ миян батьяс пӧвстысь.
Сэки ӧти лунӧ куліс на пиысь кызь куим сюрс морт.
Энӧ дӧзмӧдӧй Кристосӧс, кыдзи дӧзмӧдісны кодсюрӧ миян батьяс пӧвстысь, сэсся найӧ кулісны змейяс помысь.
Энӧ шуасьӧй, кыдзи шуасисны кодсюрӧ миян батьяс пӧвстысь. Сэсся Андел-Бырӧдысь виис найӧс.
Ставыс тайӧ вӧлі накӧд, медым ӧлӧдны йӧзсӧ.
Тайӧс гижӧма, медым велӧдны миянӧс, бӧръя кадас олысьясӧс.
Сідзкӧ, чайтан кӧ, мый зумыда сулалан — видзчысь усьӧмысь.
Тіянӧс кӧ суис сьӧкыдлун, тайӧ быд морткӧд вермӧ лоны.
Но Енмыс эскана, Сійӧ оз сет сьӧкыдсӧ вынысь унджык нуны.
Мӧдарӧ, сьӧкыдлун дырйи Сійӧ индас тіянлы петан туй, да ті венанныд сьӧкыдсӧ.
Сідзкӧ, мусаяс, энӧ юрбитӧй идолъяслы.
Ме сёрнита тіянкӧд мывкыда йӧзкӧд моз.
Ӧні ті асьныд мӧвпалӧй, мый йылысь висьтала тіянлы.
Ми бурсиам чашасӧ да чегъялам няньсӧ. Оз-ӧ тайӧ чашаыс йит миянӧс Кристос Виркӧд?
Оз-ӧ тайӧ няньыс йит миянӧс Кристос Вир-яйкӧд?
Няньыс ӧти. Ми тшӧтш ӧти вир-яй, ӧд ми ставным тайӧ ӧти няньсӧ сёям, кӧть ми унаӧн.
Видзӧдлӧй Израиль войтыр вылӧ: найӧ сёйӧны крамӧ вайӧм вись. Тадзи вӧчигӧн оз-ӧ найӧ висьпуктанінкӧд ӧтувтчыны?
Сідзкӧ, мый кӧсъя шуны тайӧн?
Гашкӧ, идолыс либӧ идоллы вайӧм висьыс мыйӧнкӧ тӧдчана?
Абу. Кор ентӧдтӧмъяс вайӧны вись, найӧ вайӧны пеж ловъяслы, а оз Енлы.
Но ме ог кӧсйы, медым ті ӧтувтчинныд пеж ловъяскӧд.
Ті онӧ вермӧй ӧтпырйӧ юны Господьлӧн чашаысь да пеж ловъяслӧн чашаысь.
Ті онӧ вермӧй ӧтпырйӧ сёйны Господькӧд да пеж ловъяскӧд.
Гашкӧ, Господьӧс кӧсъям дӧзмӧдны?
Ми ӧмӧй вынаджыкӧсь Сыысь?
«Меным ставсӧ позьӧ», но абу ставыс бур вылӧ.
«Меным ставсӧ позьӧ», но оз ставыс велӧд бур вылӧ.
Энӧ тӧждысьӧй сӧмын ас вӧснаныд, быдӧн тӧждысьӧй вӧчны бурсӧ мӧд мортлы.
Ті кӧ ньӧбанныд вузасьысьлысь яй, сёйӧй сійӧс повтӧг. Нинӧм энӧ юасьӧй, медым тіян сьӧлӧмныд эз мыжды тіянӧс.
Ӧд муыс, и ставыс, мый эм сы вылын — Господьлӧн.
Эскытӧмъяс пиысь кӧ кодкӧ корас тіянӧс, да ті мунанныд сы ордӧ, сёйӧй сэні ставсӧ. Нинӧм энӧ юасьӧй сёяныс йылысь, медым тіян сьӧлӧмныд эз мыжды тіянӧс.
Но висьталасны кӧ тіянлы: «Тайӧ сёянсӧ вӧлі вайӧма идоллы вись пыдди», сэки энӧ сёйӧй тайӧ сёянсӧ висьталысьыс вӧсна, медым сылӧн сьӧлӧмыс эз мыжды сійӧс.
Ӧд муыс, и ставыс, мый эм сы вылын — Господьлӧн.
Ме сёрнита ог тіян, а мӧд мортлӧн сьӧлӧм мыждӧм йылысь.
Ме нинӧмӧн абу кӧртасьӧма, сідзкӧ, мӧд мортлӧн сьӧлӧмыс оз вермы мыждыны менӧ.
Ме кӧ аттьӧала Енсӧ, сідзкӧ, мыйла менӧ мыждынысӧ, ӧд ме аттьӧала Енсӧ сёянысь?
Та вӧсна сёянныд-ӧ, юанныд-ӧ али нӧшта мыйкӧ вӧчанныд — ставсӧ вӧчӧй Енмӧс ошкӧм могысь.
Энӧ лоӧй крукӧдӧн некодлы: ни юдейяслы, ни грекъяслы, ни Енлӧн Вичколы. Олӧй ме моз, ӧд ме быдторйын зіля шогмыны быдӧнлы. Ме ог тӧждысь ас вӧсна, а тӧждыся мукӧдыс вӧсна, мед найӧ мездмисны.
11 юр.
Видзӧдӧй ме вылӧ, ӧд ме видзӧда Кристос вылӧ.
Вокъяс, ошка тіянӧс, ӧд ті нинӧм абу вунӧдӧмныд менам висьтавлӧмысь. Ті ставсӧ вӧчанныд менам велӧдӧм серти.
Кӧсъя, мед ті тӧдінныд, мый быд верӧслы юрыс — Кристос, гӧтырлы юрыс — верӧс, а Кристослы юрыс — Ен.
Айлов кӧ кевмысьӧ либӧ пророкалӧ юрсӧ вевттьӧмӧн, сійӧ ассьыс юрсӧ янӧдӧ.
Ань кӧ кевмысьӧ либӧ пророкалӧ юрсӧ вевттьытӧг, сійӧ тшӧтш ассьыс юрсӧ янӧдӧ. Ӧд сійӧ нинӧмӧн оз торъяв куш юра аньысь.
Та вӧсна ань кӧ оз вевттьы ассьыс юрсӧ, мед шырсьӧ.
А яндзим кӧ сылы лоны шырӧмаӧн либӧ куш юраӧн, мед вевттьысьӧ.
Айловлы оз ков вевттьыны юрсӧ. Ӧд сійӧ Енлӧн пертасыс. Сійӧ Енмыслы ошкӧм вайӧ, а гӧтыр — верӧслы.
Эз айлов артмы аньсянь, но ань — айловсянь.
Абу айловӧс вӧчӧма аньлы, но аньӧс — айловлы.
Та вӧсна аньлы колӧ вевттьыны юрсӧ. Тайӧ лоӧ пасӧн, мый сы вылын эм ыджыдалан вын, медым тӧдісны та йылысь анделъяс.
Но Господь пытшкын айлов оз вермы лоны аньтӧг, и ань — айловтӧг.
Ӧд ань артмис айловсянь, айлов чужӧ аньсянь, но ставыс Енсянь.
Асьныд мӧвпыштлӧй, бур-ӧ тайӧ, ань кӧ кевмысьӧ Енмыслы юрсӧ вевттьытӧг?
Оз ӧмӧй олӧмыс петкӧдлы, мый айловӧс кузь юрсиыс янӧдӧ, а аньӧс — мичмӧдӧ. Ӧд юрсисӧ аньлы сетӧма вевттьӧд пыдди.
Кӧсйӧ кӧ кодкӧ вензьыны та йылысь, сылы тадзи шуа: ни миянын, ни Енлӧн мукӧд вичкоясын мӧд нога велӧдӧмыс абу.
Таысь кындзи нӧшта шуа тіянлы: меным нинӧмысь тіянӧс ошкынысӧ, ӧд тіян чукӧртчӧмныд бурыс дорысь унджык лёксӧ вайӧ.
Ӧти-кӧ, ме кывлі, мый вичкоӧ чукӧртчигӧн тіян костын овлӧны вензьӧмъяс. Ме мыйтакӧ эска татчӧ.
Дерт, тіян костын коланаӧсь торъя мӧвпалӧмъясыс, медым тӧдмавны, коді тіян пиысь шогмана Енмыслы.
Но кор ті чукӧртчанныд ӧтвыв сёйны, тайӧс оз позь шуны Господьлӧн рытйӧмӧн.
Ӧд быдӧн тіян пиысь тэрмасьӧ сёйны ассьыс сёянсӧ. Тадзи кодкӧ тшыгйӧн кольӧ, а кодкӧ коддзӧма нин.
Ті ӧмӧй онӧ вермӧй гортаныд сёйны-юнысӧ?
Мыйла нӧ нинӧм туйӧ пуктанныд Енлысь Вичкосӧ да увтыртанныд гӧльясӧс?
Мый меным шуны тіянлы?
Гашкӧ, ошкыны тіянӧс?
Ог кут.
Ме висьтавлі нин тіянлы, мый Ачыс Господь меным висьталіс. Господь Исус, Сійӧс вузалан войӧ, босьтіс нянь, Енмӧс аттьӧалӧмӧн чегис няньсӧ да шуис: «Босьтӧй, сёйӧй, тайӧ Менам Яй, чегъялӧма тіян вӧсна. Вӧчӧй тайӧс Менӧ казьтывлӧм могысь».
Сёйӧм бӧрас босьтіс тшӧтш чаша да шуис: «Тайӧ чашаыс — Выль Йитӧд, кӧрталӧма Менам Вирӧн. Быдпӧрйӧ, тайӧ чашасьыс юигӧн, казьтывлӧй Менӧ».
Тадзи быдпӧрйӧ, сёянныд-ӧ тайӧ няньсӧ, юанныд-ӧ тайӧ чашасьыс, ті висьтавланныд Господьлӧн кулӧм йылысь, кытчӧдз оз лок Сійӧ.
Сідзкӧ, коді шогмытӧма сёйӧ Господьлысь няньсӧ да юӧ Сылӧн чашаысь, сійӧ Господьлӧн Яйлы да Вирлы паныд мыж вӧчӧ.
Та вӧсна, быдӧн мед асьсӧ тӧдмалӧ, сэсся сёйӧ тайӧ няньсӧ да юӧ тайӧ чашасьыс.
Ӧд мортыс кӧ сёйӧ да юӧ шогмытӧма, Господьлӧн Вир-яй йылысь мӧвпавтӧг, тайӧс сійӧ вӧчӧ асьсӧ мыждӧм вылӧ.
Та вӧсна унаӧн тіян пӧвстысь жебӧсь, унаӧн висьӧны да унаӧн нин кулісны.
Ми кӧ водзвыв тӧдмалам асьнымӧс, сэки Господь оз кут мыждыны миянӧс.
А мыждӧ кӧ, миянӧс бур вылӧ велӧдӧ, медым тайӧ муюгыдсаыскӧд ӧтвыв эгӧ веськалӧй мыждӧм улӧ.
Та вӧсна вокъяс, кор ті чукӧртчанныд сёйны, виччысьӧй ӧта-мӧднытӧ.
А тшыг кӧ кодкӧ, мед гортас сёйӧ, сэки тіян чукӧртчӧмныд оз ло мыждӧм вылӧ.
Мукӧдторсӧ висьтала тіянӧ локтӧм бӧрын.
12 юр.
Вокъяс, кӧсъя, мед ті тӧдінныд Ловсянь сетӧмторъяс йылысь.
Кор ті вӧлінныд ентӧдтӧмъясӧн на, тіянӧс ёна кыскис сёрниттӧм идолъяс дінӧ. Ті асьныд тӧданныд та йылысь.
Та вӧсна висьтала тіянлы: морт пытшкас кӧ эм Енлӧн Лолыс, сійӧ некор оз кут ёрны Исусӧс.
И мӧдарӧ, некод оз вермы шуны Исусӧс Господьӧн, абу кӧ сы пытшкын Вежа Лов.
Сетӧмторйыс унапӧлӧс, но Лолыс ӧти.
Кесъялӧмыс унапӧлӧс, но Господь ӧти.
Вӧчанногыс унапӧлӧс, но быдӧн пытшкын ставсӧ вӧчӧ ӧти Ен.
Сійӧ сетӧ Ловлы быдӧн пыр петкӧдчыны ас ногыс, ӧта-мӧдлы бур вылӧ.
Ӧтилы Лолыс сетӧ мывкыд кывъяс, мӧдлы — тӧдӧмлун, мед юксьыны мукӧдкӧд, кодлыкӧ Лолыс сетӧ эскӧм, кодлыкӧ — сямлун бурдӧдны. Мукӧдыслы Лолыс сетӧ вын вӧчны шензьӧданаторъяс, кодлыкӧ — пророкавны, кодлыкӧ — сямлун тӧдмавны быдпӧлӧс ловсӧ. Мукӧдыслы Лолыс сетӧ сямлун сёрнитны мукӧд кывъяс вылын, а кодлыкӧ — гӧгӧрвоӧдны тайӧ сёрнисӧ.
Ставсӧ тайӧс вӧчӧ ӧти Лов. Ас кӧсйӧм сертиыс Сійӧ быдӧнлы торйӧн юклӧ тайӧ сетӧмторъяссӧ.
Босьтны кӧ мортлысь вир-яйсӧ, сійӧ артмӧма уна юкӧнысь, но ӧтвылысь найӧ артмӧдӧны ӧти вир-яй. Тайӧс позьӧ шуны тшӧтш Кристос йылысь.
Ӧд ми: юдейяс и грекъяс, кесйӧгъяс и мездлуна йӧз — ставным пыртчим ӧти Лов отсӧгӧн ӧти вир-яйӧ, ставным юим ӧти Ловсянь.
Мортлӧн вир-яйыс артмӧма уна юкӧнысь, абу ӧтиысь.
Шуас кӧ кок: «Ме абу ки, сідзкӧ, ме абу вир-яйлӧн юкӧн». Сійӧ ӧмӧй абу тайӧ вир-яйлӧн юкӧныс?
Шуас кӧ пель: «Ме абу син, сідзкӧ, ме абу вир-яйлӧн юкӧн». Сійӧ ӧмӧй абу тайӧ вир-яйлӧн юкӧныс?
Вир-яйлӧн кӧ эм сӧмын син, сэки мыйӧн кутас кывзыны?
Вир-яйлӧн кӧ эм сӧмын пель, сэки мыйӧн кутас исавны?
Но Енмыс Ас кӧсйӧм сертиыс быд юкӧн пуктіс вир-яяс коланаинӧ.
Ӧд быд юкӧн кӧ вӧлі сӧмын ӧтипӧлӧс, сэки эськӧ вир-яйыс эз артмы.
Та вӧсна юкӧныс уна, а вир-яйыс ӧти.
Син оз вермы шуны килы: «Тэ меным ковтӧм».
Юр оз вермы шуны коклы: «Тэ меным ковтӧм».
Мӧдарӧ, вир-яйлӧн жебджык юкӧнъясыс ёнджыка на коланаӧсь. Вир-яйлысь ӧткымын юкӧнсӧ ми огӧ ёна донъялӧй, но найӧс бура вевттям. Ми зілям бура вевттьыны миянӧс янӧдысь юкӧнъяссӧ, а мичаджык юкӧныслы вевттьӧдыс абу колана.
Но Енмыс вир-яйсӧ тадзи лӧсьӧдӧма: Сійӧ ёнджыка на донъялӧ сійӧ юкӧнсӧ, кодӧс ми огӧ ёна донъялӧй, медым вир-яй пытшкын эз вӧвны вензьӧмъяс.
Сэки быд юкӧн кутас ӧтмоза тӧждысьны ӧта-мӧд вӧснаыс.
Та вӧсна, сьӧкыдалӧ кӧ вир-яйлӧн ӧти юкӧн, сыкӧд тшӧтш сьӧкыдалӧ мукӧд юкӧныс.
Но ошкӧны кӧ вир-яйлысь ӧти юкӧн, сыкӧд тшӧтш нимкодясьӧ мукӧд юкӧныс.
Ӧтвылысь ті лоанныд Кристослӧн вир-яйӧн, а торйӧнсӧ — Сылӧн юкӧнъясӧн.
Вичкоын Енмыс медводз сувтӧдіс апостолъясӧс, сэсся пророкъясӧс, сэсся велӧдысьясӧс.
Мукӧдыслы Енмыс сетіс вын вӧчны шензьӧданаторъяс, мукӧдыслы — сямлун бурдӧдны, кодлыкӧ — отсасьны йӧзыслы, кодлыкӧ — веськӧдлыны, а кодлыкӧ — сёрнитны мукӧд кывъяс вылын.
Гашкӧ, ми быдӧн апостол?
Гашкӧ, быдӧн пророк либӧ велӧдысь?
Гашкӧ, быдӧн вӧчам шензьӧданаторъяс?
Гашкӧ, быдӧн вермам бурдӧдны?
Гашкӧ, быдӧн сёрнитам мукӧд кывъяс вылын да вермам сійӧс гӧгӧрвоӧдны?
Сідзкӧ, зільӧй босьтны Ловсянь медбур сетӧмторсӧ. Ӧні ме петкӧдла тіянлы медбур туйсӧ.
13 юр.
Ме кӧ сёрнита морт кывйӧн, весиг анделъяслӧн кывйӧн, а муслуныс кӧ ме пытшкын абу, сідзкӧ, ме троньгысь ыргӧн да брунгысь жыннян.
Ме кӧ пророкала да тӧда став гусяторсӧ, менам кӧ эм быдпӧлӧс тӧдӧмлун да зумыд эскӧм, верма весиг керӧсъяс вештавны, а муслуныс кӧ ме пытшкын абу, сідзкӧ, ме нинӧм.
Ме кӧ разӧда став ассьым эмбурӧс да сета ассьым вир-яйӧс сотны, а муслуныс кӧ ме пытшкын абу, тайӧ меным нинӧм оз сет.
Муслуныс дыр терпитӧ, мелі сьӧлӧма, оз вежав, оз ошйысь, оз вылӧ кыпӧдчы, оз вӧч шогмытӧма, аслыс нинӧм оз курав, оз дӧзмы, оз казьтыв лёксӧ, оз нимкодясь лёкыслы, нимкодясьӧ збыльыслы. Муслуныс ставсӧ вевттьӧ, быд кадӧ эскӧ да лача кутӧ, ставсӧ венӧ.
Муслуныс некор оз бырлы. Пророкъяс дугдасны висьтавлыны, йӧзыс дугдасны сёрнитны мукӧд кывъяс вылын, и тӧдӧмлуныс бырӧ,
ӧд миян тӧдӧмлуныс абу тырвыйӧ, пророкалӧмыс тшӧтш абу тырвыйӧ.
Но тырвыйӧлуныс воас да, сэки ставыс, мый абу тырвыйӧ, бырас.
Ичӧт дырйи ме сёрниті, вежӧрті да мӧвпалі кага моз.
А верстямми да, коли ассьым кага оласногӧс.
Ӧні ми аддзам Енсӧ ылӧсас, чусмӧм рӧмпӧштанысь моз, а бӧрыннас воча синмӧн аддзысям Енмыскӧд.
Ӧні сӧмын мыйтакӧ тӧда Енмыс йылысь, а бӧрыннас кута тырвыйӧ тӧдны Сы йылысь, кыдзи Енмыс тырвыйӧ тӧдӧ ме йылысь.
Ӧні кольӧ куимтор: эскӧм, лача да муслун. Но муслуныс на пиысь медыджыд.
14 юр.
Зільӧй кутчысьны муслунас, тӧждысьӧй босьтны Ловсянь сетӧмторъяссӧ, торйӧн нин, медым верминныд пророкавны.
Коді сёрнитӧ мукӧд кывъяс вылын, сійӧ сёрнитӧ Енмыскӧд, а оз йӧзкӧд. Сійӧс некод оз гӧгӧрво, ӧд сійӧ висьтавлӧ гусяторсӧ Лов вынӧн. А пророкалысь висьтавлӧ йӧзыслы. Сійӧ ёнмӧдӧ, ышӧдӧ да бурӧдӧ найӧс.
Мукӧд кывъяс вылын сёрнитысь ёнмӧдӧ сӧмын асьсӧ, а пророкалысь ёнмӧдӧ вичкосӧ.
Ме кӧсъя, медым ті быдӧн сёрнитінныд мукӧд кывъяс вылын.
Но вӧлі эськӧ бурджык, ті кӧ пророкалінныд.
Ӧд пророкалысь ыджыдджык мукӧд кывъяс вылын сёрнитысь дорысь. Но мукӧд кывъяс вылын сёрнитысь кӧ вермӧ гӧгӧрвоӧдны ассьыс висьталӧмсӧ, и тайӧ ёнмӧдӧ вичкосӧ, сэки сійӧ оз ло ичӧтджык пророкалысь дорысь.
Вокъяс, ме кӧ локта тіян дінӧ да кута сёрнитны мукӧд кывъяс вылын, но ог вай тіянлы Енсянь восьтӧм да тӧдӧмлун, ог пророкав да велӧд тіянӧс, — тайӧ нинӧм оз сет тіянлы.
Шуам, босьтны кӧ ворсанторъяс: пӧлян либӧ арфа, да налӧн ворсігӧн кӧ кылӧ ӧткодь шы, сэки вермам-ӧ тӧдмавны, мыйӧн ворсӧны?
А труба кӧ сетӧ гӧгӧрвотӧм шы, сэки коді дасьтысяс тыш кежлӧ?
Тадзи артмӧ тшӧтш тіянкӧд: ті кӧ кутанныд сёрнитны гӧгӧрвотӧм кывйӧн, сэки коді гӧгӧрвоас тіянӧс?
Тіян сёрниныд лоӧ весьшӧрӧ.
Му вылас сёрнитӧны унапӧлӧс кывйӧн, но быд кыв позьӧ гӧгӧрвоны.
А ме кӧ ог гӧгӧрво сёрнитысьлысь висьталӧмсӧ, сэки ме сылы локтысь морт кодь, сійӧ меным тшӧтш.
Ті ёна кӧсъянныд босьтны Ловсянь сетӧмторъяс, сідзкӧ, тӧждысьӧй унджык босьтны сетӧмторсӧ, медым найӧ ёнмӧдісны вичко.
Та вӧсна мукӧд кывъяс вылын сёрнитысьлы колӧ кевмысьны, медым сійӧ вермис гӧгӧрвоӧдны ассьыс висьталӧмсӧ.
Ӧд ме кӧ кевмыся мукӧд кывйӧн, сэки кевмысьӧ сӧмын лолӧй, а вежӧрӧй нинӧм оз гӧгӧрво.
Сідзкӧ, мый меным вӧчны?
Кута кевмысьны лолӧн, кута кевмысьны тшӧтш вежӧрӧн.
Кута сьывны лолӧн, кута сьывны тшӧтш вежӧрӧн.
Тэ кӧ кутан ошкыны Енсӧ сӧмын ловнад, сэки орччӧн сулалысь морт гӧгӧрвотӧгыс вермас ӧмӧй шуны “аминь” тэнад ошкӧм вылӧ?
Ӧд сійӧ оз гӧгӧрво тэнсьыд висьталӧмтӧ.
Гашкӧ, тэ бура ошкан, но мӧд мортлы тайӧ нинӧм оз сет.
Ошка Енмӧс, ме быдӧн дорысь на ёнджыка сёрнита мукӧд кывъяс вылын.
Но мукӧдсӧ туйдӧдӧм могысь бурджык лоӧ, шуа кӧ вичкоын вит гӧгӧрвоана кыв уна сюрс гӧгӧрвотӧм кыв дорысь.
Вокъяс, энӧ мӧвпалӧй челядь моз, мӧвпалӧй верстьӧ моз. Но лёксӧ вӧчны лоӧй кага кодьӧсь.
Индӧдас гижӧма:
— Кута сёрнитны тайӧ войтырыскӧд мукӧд кывъяс вылын, кута висьтавны налы локтысь йӧз вомӧн, но весиг сэки найӧ оз кывзыны Менӧ. Тадзи висьталӧ Господь.
Сідзкӧ, мукӧд кывъяс вылын сёрнитӧмыс — тайӧ эскытӧмъяслы пас, абу эскысьяслы.
А пророкалӧмыс — эскысьяслы пас, абу эскытӧмъяслы.
Ті кӧ ставныд ӧтвыв чукӧртчанныд вичкоӧ, да быдӧн кутас сёрнитны мукӧд кывъяс вылын, и сэтчӧ пырасны тӧдтӧм йӧз да эскытӧмъяс, сэки найӧ шуасны, ті пӧ йӧйталанныд.
Но ті кӧ быдӧн пророкаланныд, да пырас тіян дінӧ эскытӧм либӧ тӧдтӧм морт, сэки Енмыс быдӧн пыр янӧдас да мыждас сійӧс, сэки сылӧн гуся мӧвпъясыс воссясны.
Тайӧ мортыс кымынь уськӧдчӧмӧн копыртчылас Енлы да шуас: «Енмыс збыльысь тіянкӧд.»
Вокъяс, мый нӧшта шуны тіянлы?
Ӧтлаӧ чукӧртчигӧн быдӧн тіян пиысь вермӧ вӧчны мыйкӧ: кодкӧ сьылӧ, кодкӧ велӧдӧ, кодлӧнкӧ эм Енсянь восьтӧм, кодкӧ сёрнитӧ мукӧд кывъяс вылын, кодкӧ гӧгӧрвоӧдӧ сійӧс. Но ставыс мед лоӧ вичко ёнмӧдӧм могысь.
Эмӧсь кӧ тіян пӧвстын мукӧд кывъяс вылын сёрнитысьяс, мед сёрнитӧны кыкӧн либӧ уна вылӧ куимӧн. Найӧ мед сёрнитӧны сьӧрсьӧн-бӧрсьӧн, а кодкӧ мед гӧгӧрвоӧдӧ налысь сёрнисӧ.
Абу кӧ гӧгӧрвоӧдысьыс, сідзкӧ, вичкоын мукӧд кывъяс вылын мед оз сёрнитны, а сёрнитӧны ас кежас да Енмыскӧд.
Пророкъяс пиысь мед тшӧтш висьтавлӧны кыкӧн либӧ куимӧн, а мукӧдыс мед донъялӧны налысь висьталӧмсӧ.
Пукалысьяс пӧвстысь кӧ кодлыкӧ лоӧ Енсянь восьтӧм, сэки воддза висьталысьыс мед дугдас сёрнитнысӧ.
Ті быдӧн верманныд пророкавны сьӧрсьӧн-бӧрсьӧн, медым быдӧнӧс мыйӧкӧ велӧдны-ышӧдны.
Пророкъяс вермӧны веськӧдлыны Ловсянь сетӧм сёрнинас. Ӧд Енмыс абу торкалысь Ен, Сійӧ — лӧньлунсӧ сетысь Ен.
Ен войтырлӧн вичкоясын тадзи лӧсьӧдӧма:
вичкоӧ чукӧртчигӧн аньясныд мед чӧла пукалӧны, налы оз позь сёрнитны. Ӧд Индӧдыс велӧдӧ найӧс кывзысьны.
Найӧ кӧ кӧсйӧны тӧдмавны мыйкӧ, та йылысь мед юалӧны гортаныс асланыс верӧслысь.
Ӧд аньяслы абу лӧсьыд вичкоын сёрнитны.
Гашкӧ, чайтанныд, Енлӧн Кывйыс тіянсянь петіс?
Гашкӧ, сӧмын тіянӧдз воис?
Коді лыддьӧ асьсӧ пророкӧн либӧ Лов серти олысьӧн, сійӧ мед тӧдӧ, мый тайӧ велӧдӧмыс — Енлӧн тшӧктӧм.
Коді оз кӧсйы гӧгӧрвоны тайӧс, мед оз гӧгӧрво.
Вокъяс, тӧждысьӧй, медым ті верминныд пророкавны, но энӧ ӧлӧдӧй мукӧд кывъяс вылын сёрнитӧмысь. Ӧд ставсӧ колӧ вӧчны бура да колана ногӧн.
15 юр.
Вокъяс, ӧні казьтышта тіянлы Евангелльӧ йылысь, кодӧс висьтавлі нин тіянлы. Ті сибӧдінныд сійӧс да зумыда кутчысянныд сэтчӧ. Тайӧ Евангелльӧыс пыр ті мездманныд, кутанныд кӧ зумыда кутчысьны менам висьтавлӧмӧ. Онӧ кӧ, тіян эскӧмныд весьшӧрӧ.
Ме висьтавлі тіянлы медколанаторсӧ, мый ачым босьті сьӧлӧмӧ: Гижӧдыс серти Кристос куліс миян мыжъяс вӧсна. Сійӧс вӧлі гуалӧма, но коймӧд луннас Енмыс ловзьӧдіс Сійӧс. Тадзи висьталӧма Гижӧдас. Сійӧ петкӧдчис Кифалы, сэсся дас кык велӧдчысьыслы, сэсся ӧтпырйӧ петкӧдчис витсёысь унджык воклы. На пиысь унджыкыс ловъяӧсь на, ӧткымынӧн мӧдар югыдас нин вуджисны. Та бӧрти Исус петкӧдчис Яковлы, сэсся став апостолыслы. Медбӧрти петкӧдчис меным, апостолъяс пиысь медічӧтыслы. Ӧд на пӧвстын ме медшогмытӧмыс.
Ме ог шогмы весиг шусьыны апостолӧн, Енлысь Вичкосӧ вӧтлі да.
Но Енлӧн буралӧмыс вӧсна ме сэтшӧм, кутшӧм эм.
Сылӧн буралӧмыс ме дінӧ эз вӧв весьшӧрӧ, ӧд ме уджалі мукӧд апостол дорысь ёнджыка на.
Дерт, ме эг ачым уджав, а ме пытшкын олысь Енлӧн буралӧмыс уджаліс.
Та вӧсна оз ков торйӧдны, коді висьтавлӧ тіянлы юӧрсӧ: ме либӧ найӧ, ӧд ми быдӧн ӧти юӧр висьтавлам. И тайӧ юӧрас ті эскинныд.
Ми висьтавлам ловзьӧм Кристос йылысь. Сідзкӧ, мыйла тіян пиысь ӧткымынӧн шуӧны, кулӧмаяс пӧ оз ловзьыны?
Ӧд кулӧмаяс кӧ оз ловзьыны, сідзкӧ, Кристос тшӧтш эз ловзьы.
Кристос кӧ эз ловзьы, сідзкӧ, миян висьтавлӧмыс весьшӧрӧ, и тіян эскӧмныд тшӧтш весьшӧрӧ.
Сідзкӧ, ми лоам Ен йылысь ылӧгсӧ висьталысьясӧн, ӧд ми висьтавлам, мый Енмыс ловзьӧдіс Кристосӧс. Но ті кӧ шуанныд, кулӧмаяс пӧ оз ловзьыны, сідзкӧ, Енмыс эз ловзьӧд Кристосӧс.
Ӧд кулӧмаяс кӧ оз ловзьыны, сідзкӧ, Кристос тшӧтш эз ловзьы.
Но Кристос кӧ эз ловзьы, сідзкӧ, ті эсканныд весьшӧрӧ, и тіян мыжъясныд пыр на тіян вылын.
Сідзкӧ, Кристослы эскысьяс, кодъяс кулісны нин, пыр кежлӧ вошисны.
Ми кӧ Кристос вылӧ лача кутам сӧмын тайӧ мувывса олӧмас, сідзкӧ, ми став йӧзсьыс на коньӧрӧсь.
Но Кристос ловзис кулӧмысь, Сійӧ медводдзаӧн ловзис кулӧмаяс пӧвстысь.
Кулӧмыс мортсянь лоис, кулӧмысь ловзьӧмыс тшӧтш мортсянь лоис.
Адамсянь лоис став йӧзлы кулӧмыс, Кристоссянь лоӧ став йӧзлы ловзьӧмыс. Но быдӧн ас кадӧ ловзяс: медводз ловзис Кристос, сэсся Сылӧн локтігас ловзясны Кристослӧн войтырыс.
Кор Кристос бырӧдас быдпӧлӧс ыджыдалысьясӧс, веськӧдлысьясӧс да вынаясӧс, сэки Ассьыс ыджыдалан вынсӧ сетас Ен Батьыслы. Та бӧрти лоӧ пом.
Ӧд Енмыс шуис ыджыдавны Кристослы сэтчӧдз, кытчӧдз Енмыс оз пукты Сы кок улӧ став паныд мунысьсӧ.
Медбӧръя паныд мунысьыс — кулӧм, и сійӧс лоӧ бырӧдӧма. Ӧд «Енмыс ставсӧ пуктіс Сы кок улӧ».
Кӧть шуӧма “ставсӧ пуктіс”, но Ачыс Енмыс оз пыр тайӧ “став” лыдас. Ӧд Ачыс Сійӧ ставсӧ пуктіс Кристос кок улӧ.
Кор Енмыс ставсӧ сетас Кристос кипод улӧ, сэки Ачыс Пиыс сетас Ассьыс ыджыдалан вынсӧ Енмыслы, коді ставсӧ пуктіс Сы кок улӧ. Тадзи Енмыс кутас ыджыдавны быдӧн вылын да быдлаын.
Мыйла йӧзыс кулӧмаяс пыдди пыртчӧны?
Ӧд кулӧмаяс кӧ оз ловзьыны, сідзкӧ, мыйла на пыдди пыртчынысӧ?
Сідзкӧ, мыйла быд кадӧ ми паныдасям кулӧмыскӧд?
Вокъяс, ме быд лун кулан выйын — тайӧ збыль, кыдзи збыль и сійӧ, мый ме ошйыся тіянӧн Исус Кристос Господьным водзын.
Ме кӧ мӧвпалі тайӧ мувывса йӧзыс моз, Ефес карын эськӧ эг кут тышкасьны зверъяскӧд, ӧд тайӧ меным нинӧм оз сет. Кулӧмаяс кӧ оз ловзьыны,
сідзкӧ, «кутам сёйны-юны, ӧд аски кулам.»
Видзчысьӧй, мед некод оз ылӧдлы тіянӧс. «Ӧд лёк оласногаяс тшыкӧдӧны бур оласногаӧс».
Пальӧдчӧй да олӧй бур ногӧн, дугдӧй вӧчны мыжсӧ.
Ӧд ӧткымынӧн тіян пӧвстысь оз тӧдны Енсӧ, ме шуа тайӧс тіянӧс янӧдӧм могысь.
Кодкӧ вермас юавны: кыдзи нӧ ловзяс кулӧм мортыс?
Кутшӧм лоӧ сылӧн вир-яйыс?
Вежӧртӧмӧй.
Кӧйдысыс кӧ оз кув, сэки нинӧм оз ловзьы.
Кӧдзигад тэ он асьсӧ быдтассӧ кӧдз, а сӧмын кӧйдыссӧ. Тайӧ вермас лоны шобділӧн либӧ кутшӧмкӧ мӧд быдмӧглӧн кӧйдыс.
Сэсся Енмыс Ас кӧсйӧм сертиыс сетӧ тайӧ кӧйдысыслы аслыспӧлӧс паськӧм. Быдпӧлӧс кӧйдыслы Сійӧ сетӧ аслыспӧлӧс паськӧм.
Быд ловъя олысьлӧн аслыспӧлӧс вир-яй. Шуам, мортлӧн вир-яйыс торъялӧ пемӧсысь, черилӧн — лэбачысь.
Эмӧсь енэжвывсаторъяс, эмӧсь и мувывсаторъяс, но налӧн вир-яйыс торъялӧ ӧта-мӧдсьыныс.
Енэжвывсалӧн дзирдлуныс ӧтипӧлӧс, а мувывсалӧн — мӧдпӧлӧс.
Шонді ӧти ногӧн дзирдалӧ, тӧлысь да кодзувъяс — мӧд ногӧн, но быд кодзув ас ногыс дзирдалӧ.
Тадзи артмӧ тшӧтш кулӧмаяслӧн ловзигӧн: гуавсьӧ сісьмана вир-яй, ловзьӧ сісьмытӧм.
Гуавсьӧ мисьтӧм вир-яй, ловзьӧ дзирдалана,
гуавсьӧ жеб вир-яй, ловзьӧ вына вир-яй.
Гуавсьӧ мувывса вир-яй, ловзьӧ енэжвывса.
Эм кӧ мувывса вир-яй, эм и енэжвывса.
Гижӧдыс висьталӧ: «Медводдза мортыс, Адам, лоис ловъя олысьӧн», а мӧд Адамыс лоис олӧмсӧ сетысь Лолӧн.
Медводдза олысьыс вӧлі мувывса, эз енэжвывса, сэсся енэжвывсаыс локтіс.
Медводдза мортыс вӧлі мувывса, сійӧс вӧлі муысь вӧчӧма.
Мӧд мортыс — Господь, коді локтіс енэжсянь.
Сідзкӧ, мувывса олысьяс ӧткодьӧсь муысь вӧчӧмторйыскӧд. А енэжвывса олысьяс ӧткодьӧсь енэжсянь Локтысьыскӧд.
Ӧні ми ӧткодьӧсь муысь вӧчӧмторйыскӧд, коркӧ лоам ӧткодьӧсь енэжсянь Локтысьыскӧд.
Вокъяс, кӧсъя висьтавны тіянлы, мый тайӧ мувывса вир-яйлы оз вичмы Енлӧн Юраланіныс, ӧд тайӧ вир-яйыс сісьмана.
Висьтала тіянлы гусятор: ми огӧ ставным кулӧй, но ставным вежсям. Тайӧ лоӧ зэв ӧдйӧ, син лапнитігкості, трубалӧн бӧръя букӧстігӧн.
Труба букӧстас, и кулӧмаяс ловзясны сісьмытӧмӧн, а ми — вежсям.
Ӧд тайӧ сісьмана вир-яйлы колӧ вежсьыны сісьмытӧмӧ, да кулана вир-яйлы — кувлытӧмӧ.
Кор тайӧ сісьмана вир-яйыс вежсяс сісьмытӧмӧ да кулана вир-яйыс — кувлытӧмӧ, сэки инасны Гижӧдысь кывъясыс:
— Кулӧмсӧ бырӧдӧма, вермӧма пыр кежлӧ.
Кулӧм, кӧні тэнад чушканыд?
Ад, кӧні тэнад вермӧмыд?
Кулӧмыслӧн чушканыс — мыж, а вынсӧ мыжыслы сетӧ Индӧд.
Ошкӧм Енлы. Миян Господь Исус Кристос пыр Сійӧ сетӧ миянлы вермӧм.
Муса вокъяс, сулалӧй зумыда да вӧрзьывтӧг. Быд кадӧ кесъялӧй Господьлы сьӧлӧмсяньныд. Тӧдӧй, мый ті кесъяланныд Господьлы онӧ весьшӧрӧ.
16 юр.
Ӧні сёрнитышта вежа войтырлы сьӧм чукӧртӧм йылысь. Та йылысь ме висьтавлі нин галатияса вичкоясын.
Сідзкӧ, вӧчӧй менам висьталӧм серти: вежонса медводдза лунӧ быдӧн торйӧдӧй сьӧмнытӧ мыйта верманныд да видзӧй сійӧс ас орданыд. Сэки менам локтігкежлӧ тіян лоӧ чукӧртӧма нин.
Бӧрйӧй ас пӧвстсьыныд некымын мортӧс. Кор воа тіянӧ, сета налы эскӧдан гижӧд да мӧдӧда найӧс Ерусалимӧ, медым нуны сэтчӧ чукӧртӧм сьӧмнытӧ.
Ковмас кӧ аслым сэтчӧ муннысӧ, накӧд тшӧтш муна.
Македония кытшовтӧм бӧрын локта тіян дінӧ, ӧд ме бӧрсӧ кӧсъя локны Македония пыр.
Гашкӧ, мыйтакӧ олышта тіян дінын, гашкӧ, тӧвъя весиг. Сэсся водзӧ менӧ мӧдӧданныд.
Ме ог кӧсйы аддзӧдчывны тіянкӧд сӧмын мунігмоз. Ен кӧ сетас, кӧсъя дырджык олыштны тіян дінын.
Ефес карӧ ме кольчча Ветымынӧд лунӧдз. Ӧд Енмыс меным паськыда восьтіс ӧдзӧсъяс уджавны. Дерт, паныд мунысьыс уна жӧ.
Локтас кӧ тіян дінӧ Тимофей, тӧждысьӧй сы вӧсна, медым сылы нинӧмысь эз ковмы майшасьны, ӧд сійӧ ме моз кесъялӧ Господьлы.
Энӧ увтыртӧй сійӧс. Отсалӧй сылы лӧнь сьӧлӧмӧн бӧр локны ме дінӧ. Тані мукӧд вокъяскӧд ме виччыся сійӧс.
Ме ёна кори Аполос вокӧс, медым вокъяскӧд тшӧтш муніс тіян дінӧ, но ӧні оз на кӧсйы. Вермыны кутас да, локтас.
Лоӧй дасьӧсь да зумыда эскӧй. Лоӧй вынаӧсь да повтӧмӧсь.
Ставсӧ вӧчӧй мусапырысь.
Вокъяс, ті тӧданныд, мый Степан да сылӧн гортсаыс лоины Акайяын медводдза эскысьясӧн. Найӧ сетісны асьнысӧ кесъявны вежа войтырлы. Кора тіянӧс: кывзысьӧй налысь, тшӧтш накӧд ӧтвыв уджалысьяслысь да кесъялысьяслысь.
Степан, Фортунат да Акаик воисны татчӧ. Меным зэв нимкодь таысь, ӧд найӧ ӧні тіян пыдди. Найӧ кыпӧдісны менсьым лолӧс, тшӧтш тіянлысь.
Вылӧ пуктӧй татшӧм йӧзсӧ.
Тіянлы ыстӧны чолӧм асияса вичкояс. Господь нимӧн сьӧлӧмсяньныс чолӧмалӧны тіянӧс Акил, Прискилла да на ордӧ чукӧртчысьяс.
Тіянлы ыстӧны чолӧм став вокъяс.
Чолӧмалӧй ӧта-мӧднытӧ вежа окыштӧмӧн.
Ме, Павел, аслам киӧн гижа тіянлы чолӧмӧс.
Коді оз радейт Господь Исус Кристосӧс, сійӧс лоӧ ёрӧма. Маран-афа.
Миян Господь Исус Кристослӧн буралӧмыс тіянкӧд. Менам муслунӧй ставныдкӧд, кодъяс Исус Кристос пытшкынӧсь.
Аминь.
Апостол Павеллӧн Коринфӧ мӧд мӧдӧдӧм гижӧд
1 юр.
Гижӧ Павел, Ен кӧсйӧм серти Исус Кристослӧн апостол. Тимофей воккӧд ми чолӧмалам тіянӧс, коринфса вичкоӧс, да Акайя пасьтала став вежа войтырӧс.
Буралӧм да лӧнь олӧм тіянлы Ен Батьнымсянь да миян Господь Исус Кристоссянь.
Ошкӧм Енлы, миян Господь Исус Кристослӧн Батьлы. Сійӧ — бур сьӧлӧма Бать да быдторйын бурӧдысь Ен. Сійӧ бурӧдӧ миянӧс быд шог дырйи, медым ми тшӧтш вермим бурӧдны шогӧ усьӧмаясӧс Енсянь бурӧдӧмӧн.
Ми уна нуам Кристослысь сьӧкыдсӧ, но та дырйи ми уна и босьтам Кристоссянь бурӧдӧмсӧ.
Ми кӧ сьӧкыдалам — тіянӧс бурӧдӧм да мездмӧм вылӧ. А мездмӧмныд лоӧ тырвыйӧ сэки, кор миян моз венанныд сьӧкыдлунсӧ.
Та вӧсна ми кутам тіян вылӧ зумыд лача.
Енмыс кӧ бурӧдӧ миянӧс — тіянлы тшӧтш вичмӧ бурӧдӧмыс да мездмӧмыс. Ми тӧдам, ті кӧ миян моз нуанныд сьӧкыдсӧ, сідзкӧ, миянлы моз тіянлы тшӧтш вичмас бурӧдӧмыс.
Вокъяс, ми кӧсъям, мед ті тӧдінныд, кутшӧм сьӧкыдлунъяс суисны миянӧс Асияын. Миянлы вӧлі сэтшӧм сьӧкыд, эгӧ чайтӧй весиг ловйӧн кольны.
Асьнымӧс лыддим нин кулӧмаясӧн, эз вӧв некутшӧм лача ас выланым, сӧмын Ен вылӧ, кулӧмаясӧс Ловзьӧдысь вылӧ. Сійӧ видзис миянӧс кулӧмысь да водзӧ на видзас. Ті кӧ отсаланныд миянлы кевмысьӧмъяснаныд, ми лача кутам, мый Енмыс нӧшта на видзас. Сэки унаӧн кутасны ошкыны Енсӧ миян дінӧ буралӧмысь.
Ми ошйысям, мый тайӧ муюгыдас олысьяскӧд, торйӧн нин тіянкӧд, вӧлім восьсаӧсь да веськыдӧсь, олім Енлысь кывзысьӧмӧн. Та вӧсна миян сьӧлӧмным оз мыжды миянӧс. Ми ӧд эгӧ асланым мывкыд серти олӧй, миянӧн веськӧдліс Енлӧн буралӧмыс.
Ми гижам тіянлы сӧмын сійӧ, мый лыддянныд да гӧгӧрвоанныд. Кута лача, ті понданныд тырвыйӧ гӧгӧрвоны миянӧс. Дерт, ті мыйтакӧ ӧні гӧгӧрвоанныд нин миянӧс. Сідзкӧ, миян Господь Исус Кристослӧн лунӧ ми вермам ӧтмоза ошйысьны ӧта-мӧдӧн.
Татчӧ зумыда эскӧмӧн ме водзынджык нин кӧсйи волыны тіян дінӧ, медым Енлӧн буралӧмыс кыкысь вичмис тіянлы. Ме ӧд кӧсйи кежавны тіян дінӧ Македонияӧ мунігӧн, тшӧтш бӧрсӧ локтігӧн.
Сэсся ті эськӧ водзӧ мӧдӧдінныд менӧ Юдеяӧ.
Гашкӧ, тадзи мӧвпалігӧн ме кокньыд мывкыда вӧлі?
Гашкӧ, чайтанныд, тайӧ кӧсйӧмыс менам ассянь вӧлі? Гашкӧ, менам ӧтпырйӧ артмӧ “сідз” и “абу сідз”?
Ен тӧдӧ, мый тайӧ збыль: ме некор эг шулы ӧтпырйӧ “сідз” и “абу сідз”.
Силуанкӧд да Тимофейкӧд ми висьтавлім тіянлы Ен Пи йылысь — Исус Кристос йылысь. Сійӧ некор эз шулы ӧтпырйӧ “сідз” и “абу сідз”. Сы пытшкын ставыс вӧлі “сідз”. Енлӧн став кӧсйысьӧмыс збыльмис Исус Кристос пыр. Та вӧсна Енмӧс ошкӧмӧн ми шуам Сылы Исус Кристос пыр “Аминь”.
Енмыс, коді топыда йитӧ миянӧс да тіянӧс Кристос пытшкын, мавтыштіс миянӧс: Сійӧ пасйис миянӧс да мӧдӧдіс миян пытшкӧ Ассьыс Ловсӧ, коді эскӧдӧ миянӧс, мый Енлӧн став кӧсйысьӧмыс збыльмас.
Ме висьтала тайӧс Ен водзын: сӧмын тіянӧс жалитӧм вӧсна ме ӧнӧдз эг волы Коринфӧ. Ми огӧ кӧсйӧй веськӧдлыны тіян эскӧмӧн, сӧмын кӧсъям отсавны тіянлы, мед ті верминныд нимкодясьны. Ӧд ми тӧдам, мый тіян эскӧмныд зумыд.
2 юр.
Ме ог кӧсйы бара шогӧдны тіянӧс. Та вӧсна шуи аслым, мый ӧні ог на лок тіян дінӧ.
Ӧд ме кӧ шогӧда тіянӧс, коді менӧ гажӧдас? Оз-ӧ сійӧ, кодӧс ме шогӧді.
Дзик та йылысь ме гижлі тіянлы, медым тіянӧ воа да, меным эз ковмы шогсьыны сійӧ йӧзыс вӧсна, код вӧсна колӧ нимкодясьны.
Ӧд ме тӧда, меным кӧ нимкодь, долыд тшӧтш ставныдлы тіянлы.
Воддза гижӧдсӧ ме гижи тіянлы ёна шогсьӧмӧн, сьӧлӧм дойӧн да кыз синваӧн. Ме гижи сійӧс эг тіянӧс шогӧдӧм понда, но медым ті гӧгӧрвоинныд, кутшӧм ті мусаӧсь меным.
Кодкӧ шогӧдіс кӧ менӧ, сійӧ эз сӧмын менӧ шогӧд. Содтавтӧг шуа, сійӧ шогӧдіс мыйтакӧ тшӧтш ставнытӧ тіянӧс.
Сэтшӧмыслы тырмана нин тіянсянь мыждӧмыс. Бурджык, ті кӧ прӧститанныд да бурӧданныд сійӧс, медым ёна шогсьӧмысла дзикӧдз эз нюкыртчы.
Та вӧсна кора тіянӧс: петкӧдлӧй сы дінӧ ассьыныд муслунтӧ.
Сійӧ гижӧдсӧ ме гижлі тіянлы, медым тӧдмавны, быдторйын-ӧ ті кывзысянныд.
Ті кӧ прӧститанныд кодӧскӧ, ме тшӧтш.
Ме ӧд прӧстита сійӧс Кристос водзын, эм кӧ мыйысь прӧститнысӧ. Ме вӧча тайӧс тіян вӧсна, медым сӧтана эз ылӧдлы миянӧс, ми ӧд тӧдам сылысь наян мӧвпъяссӧ.
Кор локті Троада карӧ висьтавлыны Кристос йылысь Бур Юӧрсӧ, Господь восьтіс меным ӧдзӧс сэні уджавны. Но сьӧлӧмӧй ёна майшасис, Тит вокӧс сэтысь эг аддзы да. Сэки ме янсӧдчи сэтчӧс йӧзкӧд да мӧдӧдчи Македонияӧ.
Ошкӧм Енлы. Кристос пыр Сійӧ быд кадӧ сетӧ миянлы вермӧм да миян пыр быдлаын паськӧдӧ Кристос йылысь чӧскыд дука тӧдӧмлунсӧ.
Енмыслы ми — Кристослӧн чӧскыд дука ӧвтанторъяс. Тайӧ дуксӧ тӧдӧны мездмӧмаяс и вошӧмаяс. Ӧтияслы тайӧ дукыс вайӧ кулӧм, а мӧдъяслы — олӧм.
Но коді шогмас та вылӧ?
Мукӧдыс моз ми огӧ висьтавлӧй Енлысь Кывсӧ дон вылӧ. Ми висьтавлам сійӧс Ен водзын веськыда, ӧд ми — Кристослӧн кесъялысьяс да Енсянь мӧдӧдӧмаяс.
3 юр.
Гашкӧ, миянлы выльысь тӧдмасьны тіянкӧд?
Гашкӧ, мукӧдыслы моз миянлы тшӧтш колӧ вайны тіянлы эскӧдан гижӧдсӧ? Гашкӧ, асьныд сійӧс сетанныд?
Миян эскӧдан гижӧдыс — ті. Тайӧ гижӧдсӧ гижӧма миян сьӧлӧмӧ, сійӧс тӧдӧны да лыддьӧны став йӧзыс.
Быдӧнлы тыдалана, мый ті — Кристослӧн гижӧдыс. Сійӧс гижӧма Ен Лолӧн, абу чернилаӧн, гижӧма морт сьӧлӧмӧ, абу шыльӧдӧм из вылӧ. Татшӧм гижӧднас ті лоинныд миян кесъялӧм пыр.
Татшӧм зумыд лача ми кутам Ен вылӧ Кристос пыр. Ми лыддям, мый асьным ми нинӧм вылӧ огӧ туйӧй, нинӧм огӧ сяммӧй вӧчнысӧ, но Енмыс сетӧ миянлы сямлунсӧ.
Сійӧ сетіс миянлы сямлун кесъявны Выль Йитӧдлы, кӧні веськӧдлӧ Лов, а оз шыпаса Индӧд. Ӧд шыпаса Индӧдыс вайӧ кулӧм, а Лолыс сетӧ олӧм.
Индӧдсӧ вӧлі гижӧма шыльӧдӧм из вылӧ. Тайӧ Индӧдсӧ Мӧисейлы сетігӧн Енмыслӧн дзирдлуныс сэтшӧма югдӧдіс Мӧисейлысь чужӧмсӧ, мый Израиль войтыр весиг эз вермыны видзӧдны сы вылӧ. Но тайӧ дзирдлуныс вӧлі сӧмын регыдъя. Сідзкӧ, кулӧмӧ вайӧдысь Индӧдлы кесъялӧмыс кӧ вӧлі сэтшӧм дзирдалана, сэки кымын пӧв дзирдаланаджык Ловлы кесъялӧмыс?
Мыждана Индӧдлы кесъялӧмыс кӧ вӧлі дзирдалана, сэки кымын пӧв дзирдаланаджык веськыдлуныслы кесъялӧмыс.
Та вӧсна ӧнія дзирдлуныс вевттьӧ воддзасӧ.
Сідзкӧ, воддзаыс, быранаыс кӧ вӧлі сэтшӧм дзирдалана, сэки кымын пӧв дзирдаланаджык ӧніяыс, бырлытӧмыс.
Та вылӧ лача кутӧмӧн ми сёрнитам повтӧг. Ми огӧ вӧчӧй Мӧисей моз. Сійӧ тупкыліс ассьыс чужӧмсӧ вевттьӧдӧн, медым Израиль войтыр эз аддзы дзирдлуныслысь бырӧмсӧ.
Налӧн пемдӧма вежӧрныс. Важ Йитӧд йылысь Гижӧдсӧ лыддигӧн на вылын ӧнӧдз куйлӧ тайӧ вевттьӧдыс, ӧд сійӧс вештӧ сӧмын Кристос.
Мӧисейлысь Индӧдсӧ лыддигӧн вевттьӧдыс ӧнӧдз на куйлӧ сьӧлӧм выланыс.
Но мортыс кӧ бергӧдчӧ Господь дінӧ, сэки вевттьӧдыс босьтсьӧ.
Господь эм Лов.
Кӧні Господьлӧн Лолыс, сэні мездлун.
Ми ставным чужӧмнымӧс вевттьытӧг видзӧдам Господьлӧн дзирдлун вылӧ да рӧмпӧштанысь моз аддзам Сылысь дзирдлунсӧ. Сы вылӧ видзӧдӧмӧн ми лунысь-лун вежсям да кутам дзирдавны Сы моз жӧ. Татшӧмнас вӧчӧ миянӧс Господьлӧн Лолыс.
4 юр.
Аслас буралӧмыс кузя Енмыс сетіс миянлы тайӧ кесъялӧмсӧ, та вӧсна ми огӧ ӧшӧдӧй юрнымӧс.
Ми огӧ вӧчӧй гусясӧ да янӧданасӧ, огӧ ылӧдчӧй, Енлысь Кывсӧ висьтавлам торкавтӧг. Ми восьсӧн висьталам збыльсӧ да быдӧнлы сетам донъявны асьнымӧс Ен водзын.
Кодлыкӧ тупкыса кӧ миян буръюӧртӧмыс, сійӧ тупкыса вошӧмаяслы. Найӧ оз эскыны, ӧд тайӧ муюгыдас ыджыдалысь омӧльыс пемдӧдӧма налысь вежӧрсӧ, мед найӧ эз аддзыны Бур Юӧрлысь югыдсӧ, коді восьтӧ Кристослысь дзирдлунсӧ, а Кристос — Енлӧн пертасыс.
Ми огӧ ас йылысь висьтавлӧй, а висьтавлам Исус Кристос йылысь, мый Сійӧ — Господь.
Сійӧ мӧдӧдіс миянӧс кесъявны тіянлы. Енмыс, коді тшӧктіс пемыдас ӧзйыны югыдыслы, югдӧдіс миянлысь сьӧлӧмнымӧс, медым ми вермим аддзыны Енлысь дзирдлунсӧ Исус Кристос чужӧмбанысь.
Тайӧ озырлунсӧ ми новлӧдлам ас пытшканым, кыдзи сёй дозъясын, медым петкӧдлыны, мый тайӧ ыджыдсьыс-ыджыд выныс Енмыслӧн, а абу миян.
Миянӧс быд боксянь топӧдӧны, но йӧршитны оз вермыны.
Ми шӧйӧвошлам, но лачанымӧс огӧ воштӧй.
Миянӧс вӧтлӧны, но Енмыс оз эновт миянӧс.
Миянӧс омӧльтӧны, но бырӧдны оз вермыны.
Асланым вир-яйын ми пыр новлӧдлам Господь Исуслысь кулӧмсӧ, медым миян вир-яйын тыдовтчис тшӧтш Сылӧн олӧмыс.
Ми ловъяӧсь, но быд кадӧ кулан выйынӧсь Исус вӧсна, медым миян кулана вир-яйын тыдовтчис Сылӧн олӧмыс. Тадзи кулӧмыс вӧчӧ ассьыс уджсӧ миян пытшкын, а олӧмыс — тіянын.
Гижӧдыс висьталӧ: «Ме эски, та вӧсна и висьталі». Миян пытшкын тайӧ жӧ эскан лолыс. Ми тшӧтш эскам, та вӧсна и висьталам. Ми тӧдам, мый Господь Исусӧс Ловзьӧдысь Исус пыр ловзьӧдас тшӧтш миянӧс да сувтӧдас тіянкӧд Ас водзас.
Став сьӧкыдсӧ ми нуам тіян вӧсна, медым Енлӧн буралӧмыс содіс да вичмис уналы на. Сэки унаӧн кутасны аттьӧавны да ошкыны Енсӧ.
Та вӧсна ми огӧ ӧшӧдӧй юрнымӧс.
Кӧть миян ортсысаыс, вир-яйным, сісьмӧ, но пытшкӧссаыс лунысь-лун выльмӧ.
Миян сьӧкыдалӧмыс кокньыд, сӧмын регыдъя, но таысь вичмас миянлы помтӧм-дортӧм да бырлытӧм дзирдлун. Ми видзӧдам тыдавтӧмыс вылӧ, огӧ тыдаланаыс вылӧ.
Ӧд тыдавтӧмыс бырлытӧм, а тыдаланаыс бырана.
5 юр.
Ми тӧдам: тайӧ мувывса чомйыс, миян вир-яйным, кӧ киссяс, Енмыс сетас миянлы енэжас оланін — киӧн вӧчтӧмӧс, бырлытӧмӧс.
Ӧні ми сьӧкыда ышлолалам, ӧд ёна кӧсъям овмӧдчыны енэжвыв оланінӧ да пасьтавны выльсӧ.
Сэки ми огӧ лоӧй пасьтӧмӧсь.
Тайӧ вир-яй чомъяс олігӧн ми сьӧкыда ышлолалам, ӧд огӧ кӧсйӧй пӧрччысьны, но кӧсъям пасьтавны выльсӧ, медым олӧмыс вевттис куланасӧ.
Дзик та вылӧ Енмыс дасьтіс миянӧс да сетіс миянлы Ассьыс Ловсӧ.
Тайӧ Лолыс эскӧдӧ миянӧс, мый Енлӧн став кӧсйысьӧмыс збыльмас. Сійӧн ми пыр повтӧмӧсь, кӧть тӧдам, мый тайӧ вир-яяс олігӧн ми ылынӧсь Господьысь. Ӧд ми олам эскӧмӧн, огӧ аддзананас. Та вӧсна ми збыльысь повтӧмӧсь. Ми кӧсъям ӧдйӧджык петны тайӧ вир-яйсьыс да овмӧдчыны гортӧ, Господь дінӧ.
Та вӧсна, олам-ӧ Сы дінын али огӧ на, сьӧлӧмсянь зілям шогмыны Господьлы.
Ӧд миянлы быдӧнлы ковмас сувтны Кристослӧн ёрд водзӧ. Сэки быдӧнӧс лоӧ мыждӧма уджъясыс серти: бурсӧ али лёксӧ мортыс вӧчис вир-яйын олігас.
Ми тӧдам, мый сэтшӧм Господьысь полӧмыс, та вӧсна зілям эскӧдны тшӧтш мукӧдсӧ. Енмыслы ми восьсаӧсь, чайтам, тіян сьӧлӧмлы тшӧтш восьсаӧсь.
Ми огӧ кӧсйӧй выльысь петкӧдлыны асьнымӧс тіян водзын, сӧмын сетам тіянлы позянлун ошйысьны миянӧн, мед ті верминныд вочавидзны налы, коді ошйысьӧ мыйӧнкӧ ортсысанас, а оз пытшкӧссанас.
Ми кӧ ас вежӧрынӧсь — тайӧ тіянлы, абу кӧ — Енмыслы.
Миянӧн веськӧдлӧ Кристослӧн муслуныс, сійӧн тадзи мӧвпалам, мый ӧти кӧ куліс ставныс вӧсна, сідзкӧ, ставныс кулісны.
Кристос куліс ставныс понда, медым олысьяс эз нин ас вӧснаныс овны, но олісны на понда Кулысь да Ловзьысь вӧсна.
Ӧнісянь ми некодӧс огӧ донъялӧй морт видзӧдлас серти.
Водзын кӧ Кристосӧс донъялім морт видзӧдлас серти, ӧні огӧ.
Сідзкӧ, коді Кристос пытшкын — сійӧ выль олысь.
Важыс кольӧма, ӧні ставыс выль.
Ставыс Енсянь. Исус Кристос пыр Енмыс бурӧдіс миянӧс Аскӧдыс да мӧдӧдіс миянӧс висьтавлыны бурасьӧмыс йылысь. Исус Кристос пыр Енмыс бурӧдіс Аскӧдыс став йӧзсӧ да оз нин лыддьы найӧс мыжаӧн. Енмыс сетіс миянлы бурасьӧмыс йылысь кывсӧ.
Сідзкӧ, ми — Кристослӧн мӧдӧдӧмаяс, и Ачыс Енмыс шыасьӧ миян пыр йӧзыс дінӧ.
Кристос нимӧн ми корам: бурасьӧй Енмыскӧд.
Кристослӧн эз вӧв некутшӧм мыж, но Енмыс пуктіс Сы вылӧ миянлысь мыжъяснымӧс, медым Сы пыр ми лоим Ен водзын веськыдӧн.
6 юр.
Ми, Енкӧд ӧтвыв уджалысьяс, корам тіянӧс: сибӧдӧй Енлысь буралӧмсӧ, мед сійӧ эз ло весьшӧрӧ.
Ӧд Енмыс висьталӧ:
— Ме кылі тэнӧ бур кадӧ, отсалі тэныд мездман лунӧ.
Со ӧні бур кадыс, со ӧні мездман луныс.
Ми некодлы огӧ сетӧй помка шуасьны миян вылӧ, медым эз ло лёкӧдӧма кесъялӧмнымӧс.
Мӧдарӧ, ми быдторйын петкӧдлам асьнымӧс Енлӧн кесъялысьясӧн: ми нуам сьӧкыдсӧ, шогсӧ, дзескӧдӧмсӧ. Ми зумыдӧсь, кор миянӧс нӧйтӧны, пуксьӧдӧны дзескыдінӧ, вӧтлӧны, кор ми уджалам ныр вылӧ усьтӧдз, видзалам, коллялам узьтӧм войяс. Ми олам сӧстӧма. Миян эм тӧдӧмлун, терпитӧм, бурлун. Миянӧн веськӧдлӧ Вежа Лов да сьӧлӧмсянь муслун. Ми висьталам збыльсӧ, ставсӧ вӧчам Ен вынӧн. Миян вермасянторным — веськыдлун. Сійӧн вермасям и водзсасям. Ми дасьӧсь сибӧдны ошкӧмсӧ и янӧдӧмсӧ, нимӧдӧмсӧ и лёкӧдӧмсӧ. Миянӧс лыддьӧны пӧръясьысьясӧн, но ми веськыда сёрнитам.
Ми огӧ нималӧй, но миянӧс ставныс тӧдӧны.
Миянӧс лыддьӧны кулӧмаясӧн, но ми ловъяӧсь.
Миянӧс нӧйтӧны, но огӧ кулӧй.
Миянӧс шогӧ вӧйтӧны, а ми пыр нимкодясям.
Ми гӧльӧсь, но унаӧс озырмӧдам.
Миян нинӧм абу, но ставыс эм.
Коринфсаяс, ми сёрнитам тіянкӧд веськыда, миян сьӧлӧмным восьса тіянлы.
Ми восьтім тіянлы сьӧлӧмнымӧс, но тіян сьӧлӧмныд тупкыса миянлы.
Ме шуа тіянлы аслам ныв-пилы моз: воча восьтӧй сьӧлӧмнытӧ миянлы.
Энӧ сюйӧй юрнытӧ ӧти сийӧс улӧ эскытӧмъяскӧд. Вермас ӧмӧй йитны мыйкӧ веськыдлунсӧ лёкыскӧд?
Эм-ӧ ӧткодьлуныс югыдыслӧн пемыдыскӧд?
Вермас ӧмӧй воны ӧти кывйӧ Кристос Велиаркӧд?
Мый вермас йитны эскысьӧс эскытӧмкӧд?
Вермасны ӧмӧй сулавны идолъяс Енлӧн крамын?
Ӧд ті — ловъя Енлӧн крамыс.
Енмыс шуӧ:
— Овмӧдча на пытшкӧ да понда ветлыны накӧд.
Ме лоа налӧн Енмӧн, а найӧ — Менам войтырӧн.
Сідзкӧ:
— Петӧй на пӧвстысь да ылыстчӧй наысь, — висьталӧ Господь.
— Энӧ инмӧдчӧй пежас, сэки Ме сибӧда тіянӧс.
Ме лоа тіянлы Батьӧн, а ті — Меным ныв-пиӧн, — висьталӧ Господь, Ставсӧкутысь.
7 юр.
Мусаяс, со мыйта кӧсйысьӧм Енмыс сетӧма миянлы. Сідзкӧ, весалам ассьыным вир-яйнымӧс да ловнымӧс став пежсьыс. Кутам овны Енсьыс полӧмӧн, Сылӧн вежалуныс мед тырвыйӧ лоӧ миян пытшкын.
Восьтӧй миянлы сьӧлӧмнытӧ,
ӧд ми некодӧс эгӧ дӧзмӧдӧй, некодлы лёксӧ эгӧ вӧчӧй, некод помысь эгӧ озырмӧдчӧй.
Тайӧс висьтала ог тіянӧс мыждӧм могысь.
Ӧд водзынджык тіянлы шулі нин: ті миян сьӧлӧмынӧсь, ми дасьӧсь овны и кувны тіянкӧд ӧтвылысь.
Ме ёна эска тіянлы да ошйыся тіянӧн.
Шогъяс вылӧ видзӧдтӧг ме ёна нимкодяся, ӧд ті ёна бурӧданныд менӧ.
Македонияӧ воӧм бӧрын миян эз вӧв некутшӧм шойччӧг. Миянлы быд боксянь вӧлі сьӧкыд: ортсысянь — усьласисны, а пытшкӧсаным вӧлі полӧм.
Но Енмыс, ловнас усьӧмаясӧс Ышӧдысь, ышӧдіс миянӧс Тит воӧмӧн, и эз сӧмын тайӧн. Миян ловным кыпаліс тшӧтш сыысь, мый ті ышӧдӧмныд Титӧс. Сійӧ висьталіс миянлы, ті пӧ ёна гажтӧмтчанныд меысь, ёна шогсянныд да доръянныд менӧ. Таысь меным нӧшта на нимкодь лои.
Дерт, менам сьӧлӧмӧй нормыліс, мый аслам гижӧдӧн шогӧ уськӧді тіянӧс. Но ӧні ог нин шогсьы, ӧд ме аддза, мый гижӧдыс шогӧдліс тіянӧс сӧмын кад кежлӧ.
Ме нимкодяся ог тіян шогӧ усьлӧм понда, а нимкодяся сы понда, мый тіян шогсьӧмныд бергӧдіс тіянӧс мыжъяссьыныд.
Тайӧ шогсьӧмыс вӧлі Ен кӧсйӧм серти, сідзкӧ, нинӧм лёксӧ ми эгӧ вӧчӧй тіянлы.
Ӧд Ен кӧсйӧм серти шогсьӧмыс бергӧдӧ мыжъясысь, а тасянь — мездмӧмыс. Сідзкӧ, та йылысь жалитны оз ков. А мувывса шогъясыс вайӧдӧны кулӧмӧдз.
Видзӧдлӧй, мый вайис тіянлы Ен кӧсйӧм серти шогсьӧмыс: кутшӧма ті зілянныд петкӧдлыны ассьыныд мыжтӧмлуннытӧ, дӧзманныд лёк вӧчысь вылӧ да поланныд лёк вӧчӧмысь. Кутшӧма ті гажтӧмтчанныд миянысь, ловнаныд ыпъяланныд да кӧсъянныд мыждыны лёк вӧчысьӧс.
Ті быд боксянь петкӧдлінныд ассьыныд сӧстӧмлуннытӧ.
Ме гижи тіянлы эг сы вӧсна, коді вӧчис лёксӧ либӧ кодлы вӧчисны лёксӧ, а гижи тіянлы, медым ті гӧгӧрвоинныд Ен водзын, кутшӧма ми тӧждысям тіян вӧсна.
Сідзкӧ, тіян долыдлунныд долыдмӧдіс и миянӧс.
Но нӧшта на долыд лоис Титлӧн нимкодясьӧмысь, ӧд сылӧн сьӧлӧмыс оз нин майшась тіян вӧсна.
Ме ошйысьлі Тит водзын тіянӧн, да меным абу яндзим таысь. Ми ставсӧ висьтавлім тіянлы веськыда, и Тит водзын миян ошйысьӧмным тшӧтш вӧлі веськыд.
Ӧні, тіянӧс казьтылігӧн, сылӧн сьӧлӧмас ёнджыка на содӧ тіян дінӧ муслуныс, ӧд ті ёна кывзысьӧмныд сылысь, полӧмӧн да пыдди пуктӧмӧн сибӧдӧмныд сійӧс.
Меным нимкодь, мый быдторйын верма тіян вылӧ лача кутны.
8 юр.
Вокъяс, ми кӧсъям, мед ті тӧдінныд Енлысь ыджыд буралӧмсӧ македонияса вичкояс дінӧ.
Налы ёна сьӧкыд, но та вылӧ видзӧдтӧг найӧ ёна нимкодясьӧны.
Найӧ вывті гӧльӧсь, но та дырйи найӧ зэв лышкыдӧсь.
Ме тӧда: найӧ сетӧны мыйтӧм вермӧны, весиг верманасьыс унджык на.
Найӧ ёна корисны миянӧс босьтны насянь сетӧмторсӧ, медым отсавны вежа войтырлы.
Найӧ сетісны ёна унджык миян виччысьӧм дорысь. Ен кӧсйӧм серти найӧ сиисны асьнысӧ медводз Господьлы, сэсся миянлы.
Та вӧсна ми корим Титӧс водзӧ вӧчны тайӧ бур уджсӧ тіян пӧвстын да вайӧдны сійӧс помӧдз.
Ті озырӧсь быдторнас: эскӧмӧн, сёрнитны кужӧмӧн, тӧдӧмлунӧн, зільӧмӧн, миян дінӧ муслунӧн. Сідзкӧ, лоӧй лышкыдӧсь тшӧтш отсӧг сетігӧн. Тайӧ абу тшӧктӧм.
Ме висьтала тіянлы мукӧдыслӧн зільӧм йылысь, медым тӧдмавны, сьӧлӧмсянь-ӧ ті радейтанныд йӧзсӧ.
Ті тӧданныд миян Господь Исус Кристослысь буралӧмсӧ. Сійӧ вӧлі озыр, но гӧльмис тіян вӧсна, медым Аслас гӧльлунӧн озырмӧдны тіянӧс.
Ме туйдӧда тіянӧс, ӧд тайӧ тіянлы бур вылӧ. Ті кольӧм воӧ нин кутінныд вӧчны тайӧ уджсӧ, и вӧчинныд сійӧс окотапырысь.
Ті ёна кӧсйинныд вӧчны тайӧ уджсӧ, сідзкӧ, вӧчӧй сійӧс позянлун сертиныд да вайӧдӧй сійӧс помӧдзыс.
Мортыс кӧ сетӧ сьӧлӧмсяньыс, сылысь сетӧмторсӧ донъялӧны эмлуныс серти, а оз абутӧмлуныс серти.
Ме ог кӧсйы сьӧктӧдны тіянӧс, медым мукӧдыслы вӧлі кокньыдджык, но кӧсъя, медым быдӧнлы вӧлі ӧтмоза.
Ӧні тіян озырлунныд вевттяс налысь тырмытӧмсӧ, а мӧдысь налӧн озырлунныс вевттяс тіянлысь тырмытӧмсӧ. Тадзи быдӧнлы лоӧ ӧтмоза.
Гижӧдыс висьталӧ:
Уна чукӧртысьлӧн эз вӧв вывтіыс, этша чукӧртысьлӧн эз вӧв тырмытӧмыс.
Ошкӧм Енлы. Сійӧ пуктӧма Тит сьӧлӧмӧ тіян вӧсна ме кодь жӧ тӧждысьӧм.
Тит мунӧ тіян дінӧ оз сӧмын менам корӧм вӧсна. Сійӧ ёна тӧждысьӧ тіян вӧсна, та понда сійӧ мунӧ ас кӧсйӧм сертиыс.
Сыкӧд ми мӧдӧдам нӧшта ӧти вокӧс. Быд вичко ёна ошкӧ сійӧс Бур Юӧр висьтавлӧмысь. Вичкояс бӧрйисны тайӧ воксӧ ветлыны миянкӧд, медым чукӧртны сетӧмтор. Тайӧ уджсӧ ми вӧчам Господьӧс ошкӧм могысь. Тайӧн петкӧдлам, мый ми дасьӧсь отсасьны тіян моз. Ми огӧ кӧсйӧй, медым тайӧ уна сетӧмторсӧ чукӧртігӧн кодкӧ шуасис миян вылӧ.
Ми ставсӧ зілям вӧчны веськыда огӧ сӧмын Господь водзын, тшӧтш йӧзыс водзын.
Тит да тайӧ вокыскӧд ми мӧдӧдам нӧшта ӧтиӧс. Ассьыс зільӧмсӧ сійӧ петкӧдліс унаысь да унаторйын. Сійӧ кутӧ тіян вылӧ ыджыд лача, та вӧсна ӧні ёнджыка на зільӧ отсасьны тіянлы.
Шуны кӧ Тит йылысь, сійӧ — менам уджъёрт, сыкӧд ӧтвыв ми кесъялам тіянлы.
Мукӧд вокъяссӧ мӧдӧдісны вичкояс. Налӧн олӧмыс вайӧ Кристослы ошкӧм.
Сідзкӧ, петкӧдлӧй на дінӧ ассьыныд муслунтӧ. Сэки быд вичко аддзас, мый ми ошйысям тіянӧн огӧ весьшӧрӧ.
9 юр.
Чайта, меным оз ков гижны тіянлы, мед отсасинныд вежа войтырлы. Ме тӧда тіянлысь зільӧмтӧ. Македонияса водзын ме ошйыси, мый ті, акайяса, дасьӧсь сетны отсӧг кольӧм восянь нин.
Тіян сьӧлӧмсянь тӧждысьӧмныд унаӧс ышӧдіс та вылӧ.
Ме мӧдӧда тіян дінӧ вокъясӧс, медым тіянӧн ошйысьӧмӧй эз ло весьшӧрӧ. Ме тіянлы шулі нин: лоӧй дасьӧсь. Ӧд мекӧд тшӧтш локтасны кӧ Македонияысь эскысьяс, а ті абу на дасьӧсь, миянлы юр яндзим лоӧ, ог нин шу тіян йылысь. Ми ӧд ёна ошйысим тіянӧн.
Та вӧсна лыдди коланаӧн водзвыв мӧдӧдны тіян дінӧ вокъясӧс, медым чукӧртны кӧсйысьӧм сетӧмторнытӧ. Сэки тайӧ лоӧ ас кадӧ дасьтӧм да сьӧлӧмсянь сетӧмтор, а оз мырдӧн перйӧмтор.
Тӧдӧй: этша кӧдзысь — этша вундас, уна кӧдзысь — уна вундас.
Быдӧн сетӧй сьӧлӧм тшӧктӧм сертиныд: энӧ мырдӧн, энӧ шогпырысь.
Ӧд долыда сетысь муса Енмыслы.
Енмыс вына озырмӧдны тіянӧс быдпӧлӧс сетӧмторнас, медым быд кадӧ да быдторйын тіян вӧлі став коланаыс, да нӧшта на верминныд вӧчны быдпӧлӧс бур уджсӧ.
Гижӧдыс висьталӧ:
— Сійӧ лышкыда сеталіс гӧльяслы, Сылӧн веськыда вӧчӧмыс некор оз вун.
Кӧдзысьлы кӧйдыссӧ Сетысьыс да няньӧн Пӧткӧдысьыс сетӧ кӧйдыссӧ тшӧтш тіянлы. Сійӧ быдтӧ тіянлысь пуктастӧ да уна пӧв содтӧ тіян веськыда олӧмлысь вотӧссӧ, медым ті вӧлінныд озырӧсь быдторнас да верминныд лышкыда юксьыны быдӧнкӧд. Сэки йӧзыс кутасны аттьӧавны Енсӧ миян отсӧгысь.
Ми отсалам вежа войтырлы огӧ сӧмын налӧн гӧльлун вӧсна. Ми отсалам, медым унаӧн аттьӧалісны Енсӧ.
Тіянлысь бур вӧчӧмнытӧ аддзигӧн вежа войтыр кутас ошкыны Енсӧ, ӧд ті кывзысьӧмӧн оланныд Кристослӧн Евангелльӧ серти, мый висьтавланныд. Найӧ ошкӧны Енсӧ, ӧд ті лышкыда юксянныд накӧд, тшӧтш мукӧдыскӧд. Найӧ кевмысьӧны тіян вӧсна да ёна кӧсйӧны аддзысьлыны тіянкӧд, ӧд тіян пытшкын сы ыджда Енлӧн буралӧмыс.
Ошкӧм Енлы шуны вермытӧм сетӧмторсьыс.
10 юр.
Ӧткымынӧн ме йылысь шуӧны, мый миян дінын сійӧ рам, а ылын кӧ — чорыд. Но ме, Павел, шыася тіян дінӧ Кристос бурлунӧн да мелілунӧн.
Кора тіянӧс: кывзӧй менӧ, мед тіянӧ локтігӧн меным эз ковмы чорзьӧдчыны. Дерт, ӧткымынкӧд ковмас чорыда сёрнитны, ӧд найӧ шуӧны, мый ми олам тайӧ муюгыдсаыс моз.
Кӧть ми олам тайӧ муюгыдас, но вермасям огӧ муюгыдсаыс моз.
Миян вермасянторным абу мортсянь, а Енсянь, сыын эм Енлӧн выныс. Ми жугӧдам сійӧн чорыд мытшӧдъяс, ковтӧм мӧвпъяс, да став кыпӧдчӧмсӧ, мый паныд сувтӧ Енсӧ тӧдмалӧмлы. Ми топӧдам быдпӧлӧс мӧвпъяс, медым найӧ кывзысисны Кристослысь. Ми дасьӧсь мыждыны быдпӧлӧс кывзысьтӧмлунысь, но сӧмын сэки, кор ті асьныд кутанныд тырвыйӧ кывзысьны.
Видзӧдлӧй ас выланыд: коді зумыда эскӧ, мый сійӧ Кристослӧн, мед тӧдӧ: ми тшӧтш Кристослӧн.
Меным оз ло яндзим, кута кӧ ошйысьны миянлы сетӧм ыджыдалан вынӧн. Ӧд Господь сетіс тайӧ вынсӧ тіянӧс ёнмӧдӧм вылӧ, а эз жугӧдӧм вылӧ.
Ме ог кӧсйы, мед ті мӧвпалінныд, быттьӧ аслам гижӧдъясӧн повзьӧдла тіянӧс.
Ӧд кодсюрӧ шуӧны: «Гижӧдъясас сійӧ чорыд да вына, а миян дінын — жеб, да сёрниыс сылӧн вынтӧм». Татшӧмыс мед тӧдӧ: кутшӧмӧсь ми гижӧдын, сэтшӧмӧсь и тіян дінын.
Ми огӧ лысьтӧй орччӧдны асьнымӧс либӧ ӧткодявны асьнымӧс вывтіасьысьяскӧд.
Ӧд найӧ видзӧдӧны сӧмын ас выланыс да донъялӧны асьнысӧ ас сертиныс. Тадзи вӧчигӧн найӧ петкӧдлӧны ассьыныс мывкыдтӧмлунсӧ.
Ми огӧ ошйысьӧй этш тӧдтӧг. Ошйысям сӧмын сійӧн, мый Енмыс шуис вӧчны миянлы. Сійӧ тшӧктіс уджавны тшӧтш тіян пӧвстын.
Ми огӧ торкалӧй Енлысь шуӧмсӧ. Ми кӧ эськӧ эгӧ локтӧй тіян дінӧ, артмис торкалӧм, но ми локтім тіян дінӧ Кристослӧн Бур Юӧрнас.
Ми огӧ ошйысьӧй этш тӧдтӧг, огӧ ошйысьӧй мукӧдлӧн уджъясӧн, но лача кутам, кор тіян эскӧмныд ёнмас, сэки миян уджыс ёнджыка на паськалас тіян пӧвстын. Сэки ми водзӧ мунам висьтавлыны Евангелльӧсӧ, огӧ кутӧй мукӧдлӧн уджъясӧн ошйысьны.
Ӧд шуӧма: «Ошйысьысь мед ошйысьӧ Господьӧн.»
Шогмана абу сійӧ, коді асьсӧ ошкӧ, а кодӧс ошкӧ Господь.
11 юр.
Кора тіянӧс, терпитыштӧй менсьым мывкыдтӧмлунӧс.
Чайта, ті терпитыштанныд менӧ,
ӧд ме тӧждыся тіян вӧсна Енлӧн тӧждысьӧмӧн. Ме кӧсйыси сетны тіянӧс дзик ӧти верӧспулы — Кристослы. Кӧсъя, мед ті сувтінныд Сы водзӧ сӧстӧм нылӧн.
Коркӧ змей наяна ылӧдліс Еваӧс. Ме пола, мый ті сы моз жӧ ылаланныд да воштанныд ассьыныд восьса йитӧднытӧ Кристоскӧд.
Ӧд тіян дінӧ кӧ локтас кодкӧ да кутас висьтавлыны мӧд Исус йылысь, код йылысь ми эгӧ висьтавлӧй, либӧ мӧд лов йылысь, кодӧс ті энӧ сибӧдлӧй, либӧ мӧдпӧлӧс бур юӧр, кодӧс энӧ босьтлӧй, сэки ті кокньыда терпитанныд сійӧс.
Чайта, ме нинӧмӧн абу лёкджык тайӧ “ыджыд апостолъясысь”.
Гашкӧ, ме ог сяммы мичаа сёрнитны, но тӧдӧмлунӧй менам тырмымӧн.
Тайӧс ме петкӧдлі тіянлы унаысь да уна ногӧн.
Медым тіянӧс вылӧ пуктыны, ме улӧ пукті ачымӧс. Гашкӧ, ме мыжа таысь, мый Енлысь Евангелльӧсӧ висьтавлі тіянлы дон босьттӧг?
Мед кесъявны тіянлы, мукӧд вичкояслысь ме босьтлі сьӧм, позьӧ шуны, куштылі найӧс. Кӧть меным эз вӧв ставыс тырмана, тіянын олігӧн ме некодӧс эг сьӧктӧдлы. Ӧд став коланаторсӧ меным сетісны Македонияысь локтӧм вокъяс. Ме некор эг сьӧктӧдлы, и ог кут сьӧктӧдны тіянӧс.
Ме пытшкын Кристослӧн збыльыс. Та вӧсна верма шуны, мый менсьым ошйысьӧмӧс став Акайя пасьтала некод оз вермы мырддьынысӧ.
Мыйла ог кӧсйы сьӧктӧдны тіянӧс?
Гашкӧ, чайтанныд, ог радейт тіянӧс?
Енмыс тӧдӧ, ті меным мусаӧсь.
Но кыдзи вӧча ӧні, сідзи и водзӧ кута вӧчны. Ме ог сет некутшӧм помка налы, кодъяс ошйысьӧны, мый найӧ кесъялӧны Енмыслы миян моз.
Тайӧ ылӧгапостолъясыс сӧмын пӧръясьӧны, шуӧны асьнысӧ Кристослӧн апостолъясӧн.
Но тайӧ абу шензьӧданатор, ӧд ачыс сӧтана петкӧдлӧ асьсӧ югыдыслӧн анделӧн. Сідзкӧ, нинӧмла шензьынысӧ, сылӧн кесйӧгъясыс кӧ петкӧдлӧны асьнысӧ веськыда вӧчысьясӧн.
Но налӧн помыс лоӧ уджныс серти.
Нӧшта висьтала тіянлы: энӧ лыддьӧй менӧ йӧйӧн.
А лыддянныд кӧ, сибӧдӧй менӧ татшӧмнас, мед ме верми на мыйтакӧ ошйысьны.
Дерт, тайӧ абу Енсянь, но ме кута ошйысьны тіян водзын мывкыдтӧм морт моз.
Тайӧ муюгыдас олысьяс унаӧн ошйысьӧны, сідзкӧ, ме тшӧтш ошйыся.
Ӧд ті, мывкыда йӧз, кокньыда терпитанныд мывкыдтӧмъясӧс.
Ті терпитанныд, кор кесйӧдлӧны тіянӧс, мырддялӧны да куралӧны тіянлысь, ыджыдалӧны тіян вылын да кучкалӧны чужӧманыд.
Меным зэв яндзим, эгӧ лысьтӧй тадзи вӧчнысӧ да.
Кодкӧ лысьтӧ кӧ ошйысьны мыйӧнкӧ, шуа мывкыдтӧм морт моз: ме тшӧтш ошйыся.
Найӧ юдейяс? Ме тшӧтш.
Израиль войтыр? Ме тшӧтш.
Ӧвраамсянь чужысьяс? Ме тшӧтш.
Кристослӧн кесъялысьяс? Гашкӧ, менӧ лыддянныд дзик йӧйӧн, но висьтала тіянлы: ме кесъялі Кристослы наысь ёнджыка на.
Уджалі ныр вылӧ усьтӧдз, менӧ ёна нӧйтлісны, на дорысь унджыкысь вӧлі дзескыдінын, унаысь кулан выйын.
Юдейяс вит пӧрйӧ нӧйтлісны менӧ орсӧн комын ӧкмысысь вартӧмӧн, римсаяс куимысь кучкавлісны беддьӧн, ӧтчыдысь изъялісны.
Куимысь веськавлі корабль вӧйигӧн, лун да вой вӧлі саридзын.
Ме пыр туйын. Менӧ унаысь сулісны виччысьтӧмторъяс ю вылын, каръясын, овтӧминъясын, саридз вылын. Меным унаысь ковмис видзчысьны лёк вӧчысьясысь, ас йӧзысь, мукӧд войтырысь да ылӧгвокъясысь. Ме сьӧкыда уджавлі, кок йылысь усьтӧдз, тшӧкыда коллявлі узьтӧм войяс, овлі сёйтӧг-ютӧг, унаысь видзавлі да пасьтӧг кынмавлі.
Став тайӧ сьӧкыдлунъясыс кындзи меным быд лун лоӧ сибӧдны ас дінӧ уна йӧзӧс, тӧждысьны быд вичко вӧсна.
Лигышмунӧма кӧ кодкӧ, ме тшӧтш.
Усьӧма кӧ кодкӧ, менам сьӧлӧмӧй ёна висьӧ сы вӧсна.
Колана кӧ меным ошйысьны мыйӧнкӧ, кута ошйысьны аслам жеблунӧн.
Енмыс, миян Господь Исус Кристослӧн Бать, тӧдӧ: ме ог пӧръясь. Ошкӧм Сылы нэмъяс чӧж.
Дамаск карын Арета ӧксылӧн му юкӧнӧн веськӧдлысь тшӧктіс видзны карсьыс став петанінсӧ, медым кутны менӧ, но ыджыд чуманын менӧ лэдзисны ӧшиньӧд стен бердӧдыс. Тадзи ме мыні сы киысь.
12 юр.
Тайӧ, дерт, нинӧм оз содты меным, но ме водзӧ кута ошйысьны. Ӧні ме висьтала Господьсянь восьтӧм-аддзылӧм йылысь.
Тӧда ӧти мортӧс, Кристослы эскысьӧс, кодӧс дас нёль во сайын вӧлі кыпӧдӧма коймӧд енэжас. Вир-яйын-ӧ вӧлі сійӧ, лолын-ӧ, ме ог тӧд, Ен тӧдӧ.
Ме тӧда: тайӧ мортсӧ вӧлі кыпӧдӧма райӧ. Сэні сійӧ кывлӧма шуны вермытӧм кывъяс, тайӧс оз позь висьтавнысӧ. Вир-яйын-ӧ вӧлі сійӧ, лолын-ӧ, ме ог тӧд, Ен тӧдӧ.
Татшӧм мортнас кута ошйысьны, но ог аснам. А ошйыся кӧ, сӧмын аслам вынтӧмлунӧн.
Дерт, ме ог ло мывкыдтӧмӧн, кута кӧ ошйысьны, ме ӧд збыльсӧ висьтала.
Но ме ог кут ошйысьны, медым кодкӧ эз мӧвпав ме йылысь унджык сыысь, мый аддзӧ ме пытшкысь либӧ кылӧ месянь.
Медым тайӧ ыджыд восьтӧмъясысь эг вылӧ кыпӧдчы, менам вир-яйӧ сетӧма чушкысьӧс — сӧтаналысь анделсӧ. Сійӧ дойдалӧ менӧ, оз сет вылӧ кыпӧдчынысӧ.
Ме куимысь кори Господьӧс, медым мездіс сыысь,
но Сійӧ шуис: «Тырмана тэныд Менам буралӧмӧй, ӧд Менам вынӧй медъёна тыдовтчӧ вынтӧмлун дырйи».
Та вӧсна нимкодьпырысь ошйыся аслам вынтӧмлунӧн, медым Кристослӧн выныс тыдаліс ме пыр.
Ме нимкодяся вынтӧмлун дырйи, менӧ лёкӧдігӧн, дзескӧдігӧн, вӧтлігӧн да Кристос вӧсна сьӧкыдсӧ нуигӧн.
Ӧд кор ме вынтӧм, сэки ён.
Тіян водзын ошйысигӧн ме вӧлі мывкыдтӧм морт кодь, ті ӧд асьныд менӧ вайӧдінныд та выйӧдзыс.
Дерт, ме нинӧм кодь, но тіянлы аслыныд колӧ вӧлі ошкыны менӧ, ме ӧд нинӧмӧн абу лёкджык “ыджыд апостолъясысь”.
Ме мудзлытӧг вӧчи тіян водзын индысьпасъяс, шензьӧданаторъяс да ыджыд уджъяс. Ставыс тайӧ петкӧдлӧ, мый ме збыльысь апостол.
Мый тіянлы оз тырмы? Ӧд мукӧд вичколы моз ме сеті тіянлы ставсӧ. Гашкӧ, сӧмын эг сьӧктӧд тіянӧс?
Энӧ мыждӧй менӧ таысь.
Ӧні коймӧдысь нин мӧдӧдча тіян дінӧ, но ме ог кӧсйы сьӧктӧдны тіянӧс. Меным ӧд тіянсянь нинӧм оз ков, ті асьныд меным коланаӧсь.
Оз ныв-пиыс чукӧртны эмбурсӧ бать-мамыслы, а мӧдарӧ, бать-мамыс — ныв-пиыслы.
Тіян вӧсна ме нимкодьпырысь сета ассьым ставсӧ, весиг ачымӧс. Ті менӧ омӧля радейтанныд, гашкӧ, тіянӧс вывті ёна радейта да?
Ме некор эг сьӧктӧдлі тіянӧс, тайӧ тадзи. Гашкӧ, ті лыддянныд менӧ пӧръясьысьӧн да наян мортӧн?
Гашкӧ, ме аслым мыйкӧ курышті тіян дінӧ мӧдӧдӧмаяс пыр?
Ме кори Титӧс мунны тіян дінӧ, сыкӧд тшӧтш мӧдӧді ӧти вокӧс.
Гашкӧ, Тит мыйкӧ аслыс курыштіс?
Ми ӧмӧй сыкӧд абу ӧти лолаӧсь?
Эг ӧмӧй ӧти туй талялӧй?
Гашкӧ, чайтанныд, ми дорйысям тіян водзын? Огӧ.
Ми сёрнитам Ен водзын кыдзи Кристослы кесъялысьяс. Мусаяс, ми ставсӧ тайӧс висьталам тіянӧс ёнмӧдӧм могысь.
Ме пола, мый тіянӧ воа да, аддза тіянӧс сэтшӧмӧн, кутшӧмӧн ог кӧсйы аддзынысӧ. Сідзкӧ, ті тшӧтш аддзанныд менӧ сэтшӧмӧн, кутшӧмӧн онӧ кӧсйӧй аддзынысӧ. Ме пола аддзыны тіян костысь зыксьӧм, вежалӧм, скӧралӧм, асьтӧ радейтӧм, удтысьӧм, суклясьӧм, вылӧ кыпӧдчӧм да кывзысьтӧмлун. Ме ог кӧсйы, медым тіянӧ выльысь локтігӧн Енмыс янӧдіс менӧ тіян понда. Сэки меным ковмас бӧрдны уна мыж вӧчысь вӧсна, кодъяс ӧнӧдз на эз бергӧдчыны пеж вӧчӧмысь, кырсалӧмысь да лэдзчысьӧм оласногысь.
13 юр.
Ме коймӧдысь нин мӧдӧдча тіян дінӧ.
Гижӧдыс висьталӧ: «Ставсӧ колӧ подулавны кык либӧ куим мортлӧн висьталӧмӧн».
Водзынсӧ волігӧн ме ӧлӧдлі нин мыжсӧ вӧчысьясӧс. Ӧні, кор тіянысь ылын, нӧшта на гижа налы, тшӧтш мукӧдыслы: выльысь локтігӧн ог жалит тіянӧс.
Ті кӧсъянныд тӧдны, збыльысь-ӧ Кристос сёрнитӧ ме пыр.
Сійӧ абу вынтӧм тіян водзын, Ассьыс вынсӧ Сійӧ петкӧдлӧ тіян пӧвстын.
Крестӧ тувъялігӧн Сійӧ вӧлі вынтӧм, ӧні Ен вынӧн Сійӧ ловъя.
Ми Кристос пытшкынӧсь, сідзкӧ, ми тшӧтш вынтӧмӧсь, но Сыкӧд олам Ен вынӧн, медым кесъявны тіянлы.
Тӧдмалӧй асьнытӧ, эм-ӧ тіян эскӧмныд?
Видзӧдлӧй сьӧлӧманыд.
Ті ӧмӧй онӧ тӧдӧй, мый Исус Кристос тіян пытшкын.
Абу кӧ тадз, сідзкӧ, ті абу найӧ, кодъясӧн колӧ лоны тіянлы.
Но ме чайта, мый ті тӧданныд: ми найӧ, кодъясӧн колӧ лоны миянлы.
Ми кевмам Енлы, медым ті энӧ вӧчӧй некутшӧм лёктор. Ми огӧ кевмӧй сы могысь, медым петкӧдлыны асьнымӧс сэтшӧмӧн, кутшӧмӧн колӧ лонысӧ, но кевмам, медым ті вӧчинныд бурсӧ весиг сэки, ми кӧ абу сэтшӧмӧсь, кутшӧмӧн колӧ лоны миянлы.
Ми нинӧм огӧ вермӧй вӧчны збыльыслы паныд, ми сулалам збыльыс дор.
Ми нимкодясям, ті кӧ вынаӧсь, а ми вынтӧмӧсь.
Дзик та вӧсна кевмысям, мед ті быдторйын вежсинныд бурланьыс.
Ставсӧ тайӧс водзвыв гижа, мед тіянӧ воа да, эз ковмы петкӧдлыны тіянлы ассьым чорыдлунӧс да ыджыдалан вынӧс. Ӧд Енмыс сетіс тайӧ вынсӧ тіянӧс ёнмӧдӧм вылӧ, а эз жугӧдӧм вылӧ.
Вокъяс, нӧшта висьтала тіянлы: нимкодясьӧй, вежсьӧй бурланьыс, сибӧдӧй менсьым ышӧдана кывъясӧс, олӧй лӧня да ӧти сьӧлӧмӧн. Сэки муслунсӧ да лӧньлунсӧ сетысь Ен лоас тіянкӧд.
Чолӧмалӧй ӧта-мӧднытӧ вежа окыштӧмӧн.
Тіянлы ыстӧ чолӧм став вежа войтырыс.
Миян Господь Исус Кристослӧн буралӧмыс, Ен Батьлӧн муслуныс да Вежа Ловлӧн ӧтувтӧмыс ставныдкӧд тіянкӧд.
Аминь.
Апостол Павеллӧн Галатияӧ мӧдӧдӧм гижӧд
1 юр.
Гижӧ Павел, Исус Кристосӧн да Сійӧс ловзьӧдысь Ен Батьӧн пуктӧм апостол. Эз морт менӧ пукты, да абу йӧзлӧн кӧсйӧм серти тайӧ. Вокъяскӧд ми ставӧн чолӧмалам галатияса вичкояс.
Буралӧм да лӧнь олӧм тіянлы Ен Батьсянь да миян Господь Исус Кристоссянь. Ен Батьнымлӧн кӧсйӧмыс серти Кристос сетіс Асьсӧ миян мыжъяс вӧсна, медым мездыны миянӧс лёкнас тырӧм муюгыдсьыс.
Ошкӧм Сылы нэмъяс чӧж.
Аминь.
Ме шензя: ті сэтшӧм ӧдйӧ кежинныд Сыысь, коді Кристослӧн буралӧмнас корис тіянӧс. Кутшӧм тэрыба ті сибӧданныд мӧдпӧлӧс юӧрсӧ. Збыльвылас кӧ, мӧд бур юӧрыс абу, эмӧсь сӧмын тіянӧс шӧйӧвоштысьяс. Найӧ зільӧны мӧдарӧ бергӧдны Кристос йылысь Бур Юӧрсӧ.
Но весиг кӧ ми либӧ енэжсянь андел пондам висьтавны мӧд нога, огӧ сійӧ Бур Юӧрсӧ, мый водзынсӧ тіянлы висьтавлім — мед лоӧ ёрӧма.
Водзынсӧ ми шулім нин, ӧні нӧшта шуа: пондас кӧ кодкӧ висьтавны оз сійӧ Бур Юӧрсӧ, мый ті миянсянь сибӧдінныд, мед лоӧ ёрӧма сійӧс.
Йӧзсянь-ӧ, Енсянь-ӧ виччыся ме ошкӧмсӧ?
Йӧзлы ӧмӧй зіля шогмынысӧ?
Ме кӧ зіли шогмыны йӧзлы, сэки эськӧ эг вӧв Кристослӧн кесйӧг.
Вокъяс, тӧдӧй: меӧн висьталӧм Евангелльӧыс абу мортсянь. Эг мортсянь ме сійӧс босьт, эз морт менӧ велӧд, но ачыс Исус Кристос восьтіс меным сійӧс.
Ті, дерт, кывлінныд, мый водзынсӧ ме юдей эскӧм дор вӧлі, ёна вӧтлі Енлысь Вичкосӧ да зіли бырӧдны сійӧс. Юдей эскӧмын ме пановті тшӧтшъяясӧс, ме вӧлі чорыда кутчысьӧма батьяслӧн шуӧмӧ.
Но Енмыс менӧ мам кынӧмсянь нин бӧрйӧма да Аслас буралӧмнас корӧма. Сійӧ восьтіс меным Ассьыс Писӧ, медым ме висьтавлі Сы йылысь Бур Юӧрсӧ ентӧдтӧмъяслы. Сэки ме эг кут корсьны мортсянь туйдӧдӧм, весиг эг мун Ерусалимӧ меӧдз на пуктӧм апостолъяс дінӧ. Ме муні Аравияӧ, сэсянь бӧр локті Дамаскӧ.
Сӧмын куим во мысти ветлі Ерусалимӧ тӧдмасьны Петыркӧд, кык вежон олі сы ордын.
Мукӧд апостолсӧ ме эг аддзыв Господьлысь Яков воксӧ кындзи.
Ен водзын шуа: мый гижа тіянлы, ставыс збыль.
Сэсся ме муні Сирия да Киликия муясӧ.
Юдеяын Кристослӧн вичкояс менӧ весиг эз на аддзывны. Сӧмын кывлӧмаӧсь ме йылысь, миянӧс пӧ вӧтлысь, эскӧмсӧ бырӧдысь ӧні ачыс ышӧдӧ эскыны. Найӧ аттьӧалісны да ошкисны Енсӧ меысь.
2 юр.
Дас нёль во мысти Варнавакӧд ме бара ветлі Ерусалимӧ, аскӧд тшӧтш босьті Титӧс.
Муні сэтчӧ Енлӧн восьтӧмыс серти. Сэні ме сёрниті вичкоса пыдди пуктана йӧзкӧд да тӧдмӧді найӧс ентӧдтӧмъяслы висьталӧм Бур Юӧрӧн, мед кывны, мый ог весьшӧрӧ уджав.
Весиг мекӧд локтысь Титӧс, кӧть сійӧ грек войтырысь, найӧ эз тшӧктыны вундыштчыны. Тайӧс ёна кӧсйисны ылӧгвокъяс. Найӧ сибӧдчисны миян дінӧ кыйӧдчысьяс моз, мед тӧдмавны, мыйсяма мездлун миян эм Исус Кристоссянь. Найӧ зілисны бӧр сюйны миянӧс Индӧд улӧ. Но ми весиг ӧти здук кежлӧ эгӧ сетчылӧй налы, медым Бур Юӧрлӧн збыльыс коли торкавтӧг тіянын.
Вичкоса пыдди пуктана йӧз — налӧн нималӧм-тӧдчанлун вылӧ ме ог видзӧд, Ен водзын ми ставным ӧткодьӧсь — эз лыддьыны коланаӧн мыйкӧ содтыны меӧн висьталӧм Бур Юӧр дінӧ.
Найӧ аддзисны, мый менӧ Петырӧс моз Енмыс сувтӧдӧма буръюӧртнысӧ: Петырӧс — юдейяслы, менӧ — мукӧд войтырлы. Енмыс Петырлы сетіс вын апостолавны юдейяс пӧвстын, меным — мукӧд войтыр пӧвстын. Яков, Петыр да Иоан, кодъясӧс лыддисны зумыд сюръяясӧн, гӧгӧрвоисны, мый менӧ Енмыс корӧма. Сэки миянлы Варнавакӧд кинысӧ сетісны, медым вӧчны ӧтувъя удж. Сёрнитчим, мый найӧ мунасны юдейяс дінӧ, ми — мукӧд войтыр дінӧ. Сӧмын найӧ корисны, медым ми эгӧ вунӧдӧй ерусалимса гӧль эскысьясӧс. Ме пыр зіля тӧждысьны на вӧсна.
Петырлӧн Антиокияӧ волігас ме став дырйиыс паныд сувті сылы, ӧд сійӧ эз веськыда ов.
Яковсянь мӧдӧдӧмаяс вотӧдз Петыр ӧтлаын сёйис мукӧд войтырсакӧд, а Яковлӧн йӧз локтӧм бӧрын сійӧ пондіс сайласьны да ӧтдортчыны. Ӧд сійӧ поліс вундыштчӧм дор сулалысьясысь.
Сы моз тшӧтш вӧчисны мукӧд юдейяс, весиг Варнава вӧлі ылалӧма на моз.
Ме аддзи, мый найӧ оз овны Евангелльӧлӧн збыльыс серти. Сэки ставныс дырйи шуи Петырлы: «Тэ, юдей, ачыд кӧ олан мукӧд войтыр моз, а он юдей ног, мыйла мукӧд войтырсӧ тшӧктан кутчысьны юдей оласногӧ?»
Ми чужӧмсяньным юдейяс, абу мыжа ентӧдтӧмъяс.
Ми тӧдам, мый мортсӧ веськыднас вӧчӧ Исус Кристослы эскӧм, а оз Индӧд серти уджъясыс. Ми эским Исус Кристослы, медым вӧлім веськыдӧсь Кристослы эскӧмӧн, а эгӧ Индӧд серти уджъясӧн.
Ӧд Индӧд серти уджъяс некодӧс оз вӧчны Ен водзас веськыдӧн.
Кристослӧн веськыдлунӧ нырччиганым кӧ ми мыжмам Индӧдыс водзын, сідзкӧ, Кристос ӧмӧй мыжаыс?
Абу.
Ме кӧ выльысь лӧсьӧда мый жугӧдлі, ме, сідзкӧ, Индӧд торкысь.
Мед овны Енкӧд, Индӧдыс пыр ме кулі Индӧдыслы.
Менӧ тувъялӧма Кристоскӧд. Ӧні ог нин ме ов, но ме пытшкын олӧ Кристос.
Ме кӧ ола тайӧ вир-яяс на, ола Ен Пилы эскӧмӧн. Сійӧ сетіс Асьсӧ ме вӧсна, ӧд ме Сылы муса.
Енлысь буралӧмсӧ ме ог ӧтдорт.
Ӧд веськыдлунсӧ кӧ вермим босьтны Индӧдыс пыр, сідзкӧ, Кристос весьшӧрӧ куліс.
3 юр.
Ті, галатиясаяс, дзикӧдз вежӧртӧ воштӧмныд.
Коді тіянлысь синнытӧ пӧртіс, медым энӧ кывзысьӧй збыльыслысь? Ӧд тіян син водзын, позьӧ шуны, вӧлі тувъялӧма Исус Кристосӧс.
Ӧтитор кӧсъя юавны: Индӧд серти уджъясӧн али кывлӧм Бур Юӧрӧ эскӧмӧн ті сибӧдінныд Вежа Ловсӧ?
Сы выйӧдз-ӧ ті вежӧртӧмӧсь? Лов вынӧн панінныд, ас вынӧн помаланныд?
Ті ӧмӧй весьшӧрӧ нуинныд сы мында сьӧкыдсӧ?
Дерт, энӧ весьшӧрӧ.
Енмыс ӧмӧй Индӧд серти уджъясныд вӧсна сетӧ Вежа Ловсӧ да вӧчӧ тіян пӧвстын шензьӧданаторъяссӧ? Оз ӧмӧй кывлӧм Бур Юӧрӧ эскӧмныд вӧсна?
Ӧвраам эскис Енлы, та вӧсна Енмыс шуис сійӧс веськыдӧн.
Тӧдӧй: эскысьяс — найӧ Ӧвраамлӧн ныв-пи.
Гижӧдас водзвыв висьталӧма, мый эскӧмныс вӧсна Ен шуас веськыдӧн быд войтырӧс. Медводз Ӧвраамлы вӧлі юӧртӧма: «Тэ пыр вуджас бурсиӧмыс быд войтырлы».
Тадзи эскысь Ӧвраамкӧд бурсиӧма быд эскысьӧс.
А Индӧдӧ кутчысьысьяс ёрӧм улынӧсь.
Ӧд гижӧма: «Ёрӧма быдӧнӧс, коді оз ов став тшӧктӧмыс серти, мый гижӧма Индӧд небӧгӧ».
Индӧд пыр мортыс оз ло веськыднас Ен водзын — тайӧ гӧгӧрвоана. Ӧд «веськыда олысь эскӧмнас пондас овны».
Индӧдыс оз подулась эскӧм вылӧ.
Гижӧма: «Индӧд серти олысь Индӧднас пондас овны».
Кристос ньӧбис миянӧс Индӧдыслӧн ёрӧм улысь. Сійӧс лои ёрӧма миян пыдди.
Ӧд гижӧма: «Ёрӧма быдӧнӧс, коді ӧшалӧ пу вылын».
Тадзи лои, медым Ӧвраамлы кӧсйысьӧм бурсиӧмыс вуджис быд войтырлы Исус Кристос пыр, да медым кӧсйысьӧм Ловсӧ ми сибӧдім эскӧмӧн.
Вокъяс, весигтӧ олӧмас тадзи: мортыс кӧ кольӧ ас бӧрсяыс вынсьӧдӧм кӧсйысян гижӧд, сэки некод оз вермы торкны гижӧмасӧ да мыйкӧ содтыны сэтчӧ.
Кӧсйысьӧмсӧ вӧлі сетӧма Ӧвраамлы да сысянь чужысьлы.
Абу шуӧма “чужысьяслы”, шуӧма “тэсянь чужысьлы”. Тайӧ шуӧма Кристос йылысь.
Ме кӧсъя шуны: нёльсё комын во бӧрын петӧм Индӧдыс оз вермы бокӧ вештыны Кристос йылысь Енлысь кӧсйысьӧмсӧ да бырӧдны сійӧс.
Индӧд пыр кӧ вуджӧ вичмӧдӧмаыс, сэки сійӧ оз ло кӧсйысьӧм пыр.
Ӧвраамлы Енмыс сетіс вичмӧдӧмасӧ кӧсйысьӧм пыр.
Мыйла, сідзкӧ, колӧ Индӧдыс?
Сійӧс сетӧма вӧлі бӧрынджык йӧзыслӧн мыж вӧчӧм вӧсна, да сійӧ вӧлі вына кӧсйысьӧм серти чужысьлӧн локтӧдз. Индӧдсӧ сетӧма анделъяс пыр да шӧракостас сулалысьлӧн киӧн.
Но ӧти дырйи шӧракостас сулалысьыс оз овлы, а Енмыс — ӧти.
Индӧдыс ӧмӧй паныд Ен кӧсйысьӧмлы?
Абу.
Индӧдыс кӧ вермис сетны олӧм, сэки веськыдлунсӧ эськӧ босьтім Индӧдыс пыр.
Гижӧдыс йӧртіс ставнысӧ мыж улас. Та вӧсна кӧсйысьӧмасӧ эскысьяс вермасны босьтны Исус Кристослы эскӧм пыр.
Эскан кадыс вотӧдз ми вӧлім Индӧдлӧн синъялӧм улынӧсь, вӧлім кӧртӧдынӧсь эскӧм воссьытӧдзыс.
Тадзи Индӧдыс быдтіс-видзис миянӧс Кристос локтӧдз, медым эскӧмным пыр ми лоим веськыдӧсь.
Кор воис эскан кадыс, ми мынім видзысьлӧн синъялӧмысь.
Исус Кристослы эскӧм пыр ті ставныд — Енлӧн ныв-пи.
Ті пыртчинныд Кристосӧ, сідзкӧ, тіян паськӧмӧн лои Кристос.
Юдей-ӧ, грек-ӧ, кесйӧг-ӧ, мездлуна морт-ӧ, айлов-ӧ, ань-ӧ — Исус Кристос пытшкын торъялӧмыс абу.
Ті кӧ Кристослӧн, сідзкӧ, Ӧвраамсянь чужысьяс да кӧсйысьӧмасӧ босьтысьяс.
4 юр.
Нӧшта висьтала: пиыс, кодлы вуджӧ бать овмӧсыс, ичӧт арлыднас нинӧмӧн оз торъяв кесйӧгысь, кӧть сійӧ став вылас нин ыджыд. Батьыслӧн урчитӧм кадӧдз керканас веськӧдлӧны мукӧдъяс, ачыс пиыс кага видзысь киын.
Кодыр ми вӧлім кага кодьӧсь, вӧлім муюгыд вынъяслӧн кабыр улынӧсь.
Кор воис урчитӧм кадыс, Енмыс мӧдӧдіс Ассьыс Писӧ, кодӧс ань чужтіс. Ен Пи оліс Индӧд улын, медым ньӧбны Индӧд улын олысьясӧс, босьтны миянӧс ныв-пи пыдди.
Ӧні ті Енмыслӧн ныв-пи. Та вӧсна Ен сетіс сьӧлӧманыд Пиыслысь Ловсӧ. Тайӧ Лолыс шыасьӧ: «Авва, Батьӧй.»
Сідзкӧ, ті абу нин кесйӧгъяс, ті — ныв-пи.
Ныв-пи кӧ, сідзкӧ, Исус Кристос пыр Енсянь вичмӧдӧмасӧ босьтысьяс.
Кор ті энӧ на тӧдӧй Енсӧ, вӧлінныд мукӧд енъяслӧн кипод улынӧсь. Збыльвылас, найӧ абу енъяс.
Но ӧні ті тӧданныд Енсӧ, бурджык шуны, Енмыс тӧдӧ тіянӧс. Сідзкӧ, мыйла ті бӧр бергӧдчанныд муюгыдса ковтӧм жеб вынъяс дінӧ да важ мозыс бара кӧртасянныд сэтчӧ?
Кутчысянныд торъя лунъясӧ, тӧлысьясӧ, воясӧ да кадъясӧ.
Пола тіян вӧсна, весьшӧрӧ, буракӧ, менам мырсьӧма-уджалӧма.
Вокъяс, кора тіянӧс, лоӧй ме кодь, ӧд ме тіян кодь жӧ.
Ті менӧ нинӧмӧн энӧ дӧзмӧдӧй.
Тӧданныд, мый тіян дінӧ волігӧн ме висьми, но тайӧ сетіс позянлун медводдзаысь висьтавны тіянлы Бур Юӧрсӧ. Висьӧмӧй вылӧ видзӧдтӧг ті сибӧдінныд менӧ, энӧ кедзовтӧй да энӧ эновтӧй. Сибӧдінныд Ен анделӧс моз, Исус Кристосӧс моз.
Кутшӧм шудаӧсь ті сэки вӧлінныд.
А ӧні мый лои? Тіян йылысь верма шуны: позис кӧ, ті ассьыныд синтӧ эськӧ перйинныд да сетінныд меным.
Збыльсӧ висьталӧм вӧсна ме ӧмӧй тіянлы паныд мунысьӧн лои?
Кодсюрӧ оз бур могысь тӧждысьны тіян вӧсна. Найӧ кӧсйӧны янсӧдны миянӧс, медым ті тӧждысинныд на вӧсна.
Тӧждысьӧмыд бур, вӧчанныд кӧ тайӧс пыр, онӧ сӧмын ме дырйи.
Челядь, меным бара лоӧ сьӧкыда чужтыны тіянӧс, кытчӧдз Кристос оз тыдовтчы тіян олӧмын.
Кӧсйи эськӧ ӧні лоны тіян дінын, мед тӧдны, кутшӧм ногӧн сёрнитны тіянкӧд. Ме ог гӧгӧрво тіянӧс.
Висьталӧй меным, Индӧд улын овны кӧсйысьяс, гӧгӧрвоанныд-ӧ ті, мый висьталӧ Индӧдыс?
Сэні гижӧма, мый Ӧвраамлӧн вӧлі кык пи: ӧтисӧ чужтіс кесйӧгыс, мӧдсӧ — гӧтырыс.
Кесйӧглӧн пиыс чужис морт кӧсйӧмсянь, гӧтырыслӧн — Енлӧн кӧсйысьӧм серти.
Тайӧ висьталӧ кык йитӧд йылысь.
Ӧти йитӧдсӧ вӧлі кӧрталӧма Синай керӧсын — тайӧ Агар, сылӧн ныв-пиыс кесйӧгъяс.
Агарыс индӧ Аравияын Синай керӧс вылӧ да лӧсялӧ ӧнія Ерусалимлы. Сійӧ аслас челядькӧд кесйӧг туйын.
Енэжвыв Ерусалимыс — мездлуна кар, сійӧ миян ставнымлӧн мам.
Гижӧма:
— Нимкодясь, сьӧктыны вермытӧм да кага вайлытӧм.
Гораа нимкодясь, долыда гажӧдчы, чужтан дойсӧ тӧдлытӧм.
Ӧд эновтӧмаыслӧн ныв-пиыс ёна уна, унджык верӧсыскӧд олысьлӧн дорысь.
Вокъяс, ми Исаак моз кӧсйысьӧм серти чужысь ныв-пи.
Сэки вир-яй кӧсйӧмсянь чужысьыс вӧтліс Ловсянь чужысьсӧ. Тадзи тшӧтш ӧні.
Гижӧдыс мый висьталӧ?
Вӧтлы кесйӧг мамсӧ пиыскӧд, медым кесйӧг пиыслы тшӧтш эз вудж гӧтыр пилы кольӧм овмӧсыс.
Вокъяс, ми абу кесйӧглӧн ныв-пи, ми — гӧтырыслӧн.
5 юр.
Кристос мездіс миянӧс. Сідзкӧ, зумыда сулалӧй сетӧм мездлунас да энӧ бара пырӧй сийӧс улӧ.
Ме, Павел, шуа тіянлы: вундыштчанныд кӧ, Кристос тіянлы абу колана.
Нӧшта шуа: вундыштчӧмалы колӧ овны Индӧдлӧн став тшӧктӧмыс серти.
Ті корсинныд веськыдлунсӧ Индӧдӧ кутчысьӧмӧн да колинныд Кристостӧг, вешйинныд буралӧмсьыс бокӧ.
Но миянлы эскӧмным пыр Енлӧн Лолыс сетіс лача воӧдчыны веськыдлунас.
Тэ кӧ Исус Кристос пытшкын, вундыштчӧмыд-ӧ, абу-ӧ вундыштчӧмыд, тайӧ нинӧм оз сет. Колана сӧмын муслуна эскӧм.
Ті бура мунінныд.
Коді нӧ падмӧдіс тіянӧс збыльыслысь кывзысьӧмысь?
Тайӧ абу Сысянь, коді корис тіянӧс.
Этшаник няньшом шоммӧдӧ дзоньнас кӧтассӧ.
Господь вылӧ лача кутӧмӧн эска, мый онӧ кутӧй мӧвпавны мӧд ног.
Тіянӧс падмӧдысьясӧс Енмыс мыждас.
Вокъяс, ме кӧ ӧні важ мозыс на сулалі вундыштчӧм дор, менӧ нинӧмысь вӧлі вӧтлынысӧ.
Сэки эськӧ крестыс некодлы эз ло мытшӧдӧн.
Тіянӧс падмӧдысьяс, колӧ кӧ, мед кодзасны асьнысӧ.
Вокъяс, тіянӧс корӧма мездлунас. Сӧмын мездлунсӧ энӧ бергӧдӧй вир-яйлысь кӧсйӧмсӧ могмӧдӧмӧ, но мусапырысь кесъялӧй ӧта-мӧдныдлы.
Ӧд став Индӧдсӧ шымыртӧма ӧти шуӧмӧ: «Радейт матыссатӧ асьтӧ моз».
Ті кӧ йиранныд-пуранныд ӧта-мӧднытӧ, видзчысьӧй, мед ӧта-мӧдтӧ дзикӧдз энӧ бырӧдӧй.
Висьтала тіянлы: олӧй Лов серти, сэки вир-яйлысь кӧсйӧмсӧ онӧ могмӧдӧй.
Ӧд вир-яй кӧсйӧ, мый Лов оз кӧсйы, а Лов кӧсйӧ, мый вир-яй оз кӧсйы.
Найӧ паныд сувтӧны ӧта-мӧдныслы. Та вӧсна ті онӧ вермӧй вӧчны кӧсъянасӧ.
Тіянӧн кӧ Лов веськӧдлӧ, сідзкӧ, ті абу Индӧдыс улынӧсь.
Вир-яйлӧн уджыс тӧдса: гозъя олӧм пежалӧм, кырсалӧм, пеж вӧчӧм, лэдзчысьӧм оласног, идоллы юрбитӧм, тшыкӧдчӧм, лӧгалӧм, пинясьӧм, вежӧгтӧм, скӧралӧм, асьтӧ радейтӧм, юксьӧм, ылӧгвелӧдӧм, вежалӧм, виӧм, кодалӧм-гажӧдчӧм да мукӧд шогмытӧмтор на.
Водзынсӧ висьтавлі нин, ӧні нӧшта висьтала: татшӧмторсӧ вӧчысьлы Енлӧн Юраланіныс оз вичмы.
Ловлӧн вотӧсыс — муслун, нимкодьлун, лӧньлун, терпитӧм, мелілун, бурлун, эскӧм, рамлун, асьтӧ кутӧм.
Таысь Индӧдыс оз мыжды.
Кодъяс Кристослӧн, найӧ тувъялісны вир-яйсӧ став сылӧн лёк кӧсйӧмнас.
Олам кӧ Лов серти, Ловлысь кӧсйӧмсӧ вӧчам.
Огӧ пондӧй вывтіасьны, ӧта-мӧдӧс дӧзмӧдны да ӧта-мӧдлы вежавны.
6 юр.
Вокъяс, кодкӧ кӧ мыжмас, ті, Лов серти олысьяс, веськӧдӧй сэтшӧмсӧ рам сьӧлӧмӧн. Видзӧдӧй ас бӧрсяныд, мед асьныд энӧ шедӧй ылӧгас.
Нуӧй ӧта-мӧдныдлысь сьӧкыдсӧ, тадзи пӧртанныд олӧмӧ Кристослысь тшӧктӧмсӧ.
Ас йывсьыс вывтіа мӧвпалысь, коді збыльвылас нинӧм, ылӧдлӧ ачыс асьсӧ.
Видзӧдлы аслад уджъяс вылӧ, сэки мукӧд водзын кыпӧдчытӧг верман донъявны асьтӧ.
Ӧд быдӧн нуӧ ассьыс нӧб.
Ен Кывйӧн туйдӧдӧмаыс мед юксяс быд бурнас туйдӧдысьыскӧд.
Асьнытӧ энӧ ылӧдлӧй — Енмыс серам туйын оз ло.
Мортыд мый кӧдзас, сійӧс и вундас.
Кӧдзас кӧ вир-яяс, вундас сысянь кулӧм. Лолас кӧ кӧдзас, вундас Ловсянь помтӧм олӧм.
Бурсӧ вӧчигӧн огӧ сетчӧй мудзӧмас, ӧд ас кадӧ вундам, огӧ кӧ лэдзӧй кинымӧс.
Эм кӧ на позянлун, вӧчамӧй бурсӧ быдӧнлы, торъя нин эскысь чой-воклы.
Гижа тіянлы аслам киӧн, ті аддзанныд менсьым гырысь шыпасъяссӧ.
Найӧ, кодъяс кӧсйӧны шогмыны йӧзлы, тшӧктӧны тіянӧс вундыштчыны сӧмын сы могысь, медым найӧс эз вӧтлыны Кристос крест вӧсна. Ӧд вундыштчӧмаяс асьныс оз овны Индӧд сертиыс. Тіян вундыштчӧмныд налы сӧмын помка ошйысьны.
Ме ог кӧсйы ошйысьны нинӧмӧн, сӧмын миян Господь Исус Кристослӧн крестӧн. Сэні тувъялӧма муюгыдсӧ меным да менӧ — муюгыдыслы.
Тэ кӧ Исус Кристос пытшкын, вундыштчӧмыд-ӧ, абу-ӧ вундыштчӧмыд, тайӧ нинӧм оз сет. Колӧ, мед тэ выль морт вӧлін.
Буралӧм да лӧньлун тайӧс тӧд выланыс кутысьяслы да Енлӧн Израильлы.
Водзӧ энӧ сьӧктӧдӧй менӧ, ӧд вир-яйын ме нуа Господь Исуслысь дойяссӧ.
Вокъяс, миян Господь Исус Кристослӧн буралӧмыс тіянкӧд.
Аминь.
Апостол Павеллӧн Ефесӧ мӧдӧдӧм гижӧд
1 юр.
Гижӧ Павел, Ен кӧсйӧм серти Исус Кристослӧн апостол. Чолӧмала тіянӧс, Ефес карын олысьясӧс, Исус Кристослы эскысь вежа войтырӧс.
Буралӧм да лӧнь олӧм тіянлы Ен Батьнымсянь да миян Господь Исус Кристоссянь.
Ошкӧм Енлы, миян Господь Исус Кристослӧн Батьлы. Сійӧ бурсиӧма миянӧс Кристос пыр Ловсянь быдпӧлӧс бурсиӧмнас, мый эм енэжас.
Сійӧ бӧрйӧма миянӧс Кристос пытшкын му пуксьытӧдзыс на, медым вӧлім Сы водзын вежаӧсь да сӧстӧмӧсь. Ми ёна мусаӧсь Енмыслы. Та вӧсна, Исус Кристос пыр Енмыс водзвыв шуис босьтны миянӧс Аслыс ныв-пи пыдди. Татшӧм Енмыслӧн бур кӧсйӧмыс. Сідзкӧ, ошкамӧй Енсӧ дзирдлуна буралӧмсьыс, кодӧс Сійӧ козьналіс миянлы Аслас муса Пиыс пыр. Кристос ньӧбис миянӧс Вирыс вылӧ да прӧститіс мыжъяснымӧс. Сэтшӧм ыджыд Енмыслӧн буралӧмыс. Енмыс лышкыда козьналіс миянлы мывкыдлунсӧ да гӧгӧрвоӧмлунсӧ. Бур кӧсйӧмыс вӧсна Сійӧ восьтіс миянлы Ассьыс гусяторсӧ — водзвыв мӧвпыштӧмсӧ. Тайӧ гусяторсӧ Сійӧ восьтіс миянлы Кристос пыр, медым колана кадӧ ӧтувтны став енэжвывсасӧ да мувывсасӧ Кристос веськӧдлӧм улӧ.
Кристос пыр ми лоим Ен войтырӧн, тадзи водзвыв вӧлі мӧвпыштӧма Енмыслӧн. Ӧд Сійӧ ставсӧ вӧчӧ Ас кӧсйӧм сертиыс. Енмыс бӧрйис миянӧс, Кристос вылӧ медводдзаясӧн лача кутысьясӧс, медым миян олӧм пыр ошкыссис Сылӧн дзирдлуныс.
Кор ті кылінныд збыльсӧ, тіянӧс мездӧм йылысь Бур Юӧрсӧ, ті тшӧтш кутінныд эскыны Кристослы. Сэки Енмыс пасйис тіянӧс кӧсйысьӧм Вежа Лолӧн. Тайӧ Лолыс эскӧдӧ миянӧс, мый миянлы вичмас Енлӧн кӧсйысьӧмыс, кор Сійӧ дзикӧдз мездас Ассьыс йӧзсӧ.
Сідзкӧ, ошкам Енсӧ Сылӧн дзирдлунысь. Ме кывлі, мый ті эсканныд Господь Исуслы да радейтанныд став вежа войтырсӧ. Та вӧсна дугдывтӧг аттьӧала Енсӧ тіянысь да казьтывла тіянӧс аслам кевмысьӧмъясын. Ме кора, мед миян Господь Исус Кристослӧн Ен, дзирдлуныслӧн Бать, сетас тіянлы мывкыдлуныслысь да восьтӧмыслысь Ловсӧ, медым ті верминныд тӧдны Сійӧс. Сійӧ мед югдӧдас тіянлысь сьӧлӧмнытӧ, медым ті гӧгӧрвоинныд, кутшӧм лачаӧ Сійӧ корӧма тіянӧс, кутшӧм ыджыд озырлун вичмӧ вежа войтырлы, да кутшӧм ыджыд Сылӧн вермана выныс, коді уджалӧ миян пытшкын, Сылы эскысьясын. Тайӧ жӧ вынсӧ Енмыс петкӧдліс Кристос пыр, кор ловзьӧдіс Сійӧс кулӧмысь да пуксьӧдіс енэжас, Ас веськыдладорас, медся вылӧ: быдпӧлӧс юралысь-веськӧдлысьясысь, вынаяс-ыджыдалысьясысь да быд нимысь тайӧ нэмас и локтанаас. Енмыс ставсӧ пуктіс Кристос кок улӧ да индіс Сійӧс медыджыдӧн, Вичколы юрӧн. Вичкоыс — Кристослӧн Вир-яйыс да Сылӧн тырвыйӧлуныс, Сійӧ тыртӧ Аснас ставсӧ.
2 юр.
Енмыс ловзьӧдіс тіянӧс, мыжъясныд да лёк вӧчӧмныд вӧсна кулӧмаясӧс. Ӧд водзынсӧ ті олінныд тайӧ муюгыдсаыс моз, енэж улас ыджыдалысь антуслысь кывзысьӧмӧн. Тайӧ пеж лолыс ӧнӧдз на веськӧдлӧ кывзысьтӧмъясӧн. Коркӧ ми ставным вӧлім на кодьӧсь: олім шогмытӧма, вир-яйлӧн кӧсйӧм серти. Татшӧм оласногысь миянӧс мукӧдсӧ моз виччысис Енлӧн скӧрлуныс. Но буралӧмнас озыр Ен петкӧдліс Ассьыс ыджыд муслунсӧ миян дінӧ. Миянӧс, лёк вӧчӧм вӧсна кулӧмаясӧс, Сійӧ ловзьӧдіс Кристоскӧд тшӧтш. Сылӧн буралӧмыс мездіс тіянӧс. Сійӧ ловзьӧдіс миянӧс Исус Кристоскӧд да пуксьӧдіс Сыкӧд енэжас, медым локтан нэмъясӧ олысьяслы петкӧдлыны Исус Кристос пыр миян дінӧ Ассьыс помтӧм-дортӧм буралӧмсӧ да бурлунсӧ.
Ӧд Енмыслӧн буралӧмыс мездіс тіянӧс эскӧмныд пыр. Мездмӧмыс абу тіянсянь, сійӧ Енсянь козин. Бур вӧчӧмыд оз мезды, медым некод эз ошйысь тайӧн.
Ми — Енлӧн вӧчӧмторъяс. Сійӧ ӧтувтӧма миянӧс Исус Кристоскӧд, медым ми вӧчим бур уджъяс, кодъясӧс Енмыс водзвыв нин вӧлі дасьтӧма миянлы. Кристос ӧтувтӧ став эскысьсӧ
Кутӧй тӧд выланыд, мый ті чужӧмсяньныд вӧлінныд ентӧдтӧмъясӧн да вундыштчытӧмъясӧн. Тадзи нимтылісны тіянӧс юдейяс, вундыштчӧмаяс, кодъясӧс вӧлі морт вундыштӧ. Сэки ті олінныд Кристостӧг, энӧ вӧлӧй Израиль войтырӧн. Енма-тіа костын йитӧдыс эз вӧв, тіянлы эз вичмыв Сылӧн кӧсйысьӧмыс, ті олінныд тайӧ муюгыдас Енсӧ тӧдтӧг да лачатӧг.
Коркӧ ті вӧлінныд ылынӧсь Енсьыс, ӧні ті — Кристоскӧд олысьяс.
Сылӧн Вирыс матыстіс тіянӧс Ен дінас. Кристос — миянлы бурасян йитӧдыс. Сійӧ ӧтувтіс юдейясӧс да мукӧд войтырӧс ӧти войтырӧ да жугӧдіс шӧракостсьыс мытшӧдсӧ, тадзи Аслас Вир-яйнас бырӧдіс на костысь лёксьӧмсӧ. Сійӧ пуктіс пом Индӧдлы да сэтчӧ пырысь быд тшӧктӧмлы да велӧдӧмлы, медым юдейясӧс да мукӧд войтырӧс бурӧдны ӧта-мӧдныскӧд. Сійӧ йитіс найӧс Аскӧдыс да вӧчис наысь ӧти выль олысьӧс. Крест вылын кувлӧмнас Сійӧ бырӧдіс лёксьӧмсӧ. Тадзи ӧти вир-яйын Кристос бурӧдіс Енмыскӧд кыкнан войтырсӧ.
Сійӧ локтіс юӧртны бурасьӧм йылысь тіянлы, кодъяс вӧлінныд ылынӧсь Енсьыс, и налы, кодъяс матынӧсь Ен дінас. Та вӧсна ми быдӧн, юдейяс да мукӧд войтыр, Кристос пыр вермам локны Бать дінӧ, ӧд миянӧс ставнымӧс йитӧ ӧти Лов.
Сідзкӧ, ті абу нин бокысаяс да кыськӧ локтысьяс, ті — ас йӧз вежа войтырлы да ныв-пи Енмыслы. Тіянӧс сувтӧдӧма сійӧ подув вылас, мый пуктісны апостолъяс да пророкъяс. Тайӧ тэчасас пельӧс изйыс — Ачыс Исус Кристос. Сійӧ йитӧ Аснас став тэчассӧ, тадзи тэчасыс кыптӧ да лоӧ Господьлӧн вежа крамӧн. Ті — Кристос пытшкынӧсь. Сідзкӧ, Ен Лов отсӧгӧн ті тшӧтш лоанныд Енмыслы оланінӧн.
3 юр.
Та вӧсна ме, Павел, Исус Кристослӧн кесъялысь, пукала дзескыдінын тіян вӧсна, мукӧд войтыр вӧсна.
Дерт, ті кывлінныд нин, мый буралӧмыс кузя Енмыс сетіс меным удж — кесъявны тіянлы. Восьтӧмыс пыр Енмыс сетіс меным тӧдны Ассьыс гусяторсӧ. Та йылысь ме вылынджык дженьыдика гижи нин. Тайӧ гижӧдсӧ лыддигӧн ті верманныд тӧдмавны, кутшӧм бура ме гӧгӧрвоа Кристослысь гусяторсӧ. Водзын олысьяс эз тӧдлыны тайӧ гусяторйыс йылысь. Ӧні Вежа Лов восьтіс сійӧс Кристослӧн апостолъяслы да пророкъяслы. Тайӧ гусяторйыс татшӧм: мукӧд войтыр юдейяс моз тшӧтш босьтасны Енсянь вичмӧдӧмасӧ, ӧд Бур Юӧр кылӧм бӧрын найӧ ӧтувтчисны Исус Кристоскӧд. Сідзкӧ, найӧ — ӧти вир-яйлӧн юкӧнъяс, налы тшӧтш вичмӧ Енлӧн кӧсйысьӧмыс. Енлӧн бурсетӧмыс да выныс отсӧгӧн ме лои тайӧ Бур Юӧрыслы кесъялысьӧн.
Меным, став вежа войтыр пиысь медся тӧдчытӧмыслы, уси шуд висьтавлыны мукӧд войтырлы Кристослӧн помтӧм-дортӧм озырлун йылысь Бур Юӧрсӧ да восьтны быдӧнлы Енмыслысь водзвыв мӧвпыштӧм гусяторсӧ. Енмыс, коді вӧчис ставсӧ Исус Кристос пыр, видзис тайӧ гусяторсӧ Ас пытшкас нэмъяс пуксьытӧдзыс на, медым Вичкоыс пыр ӧні петкӧдлыны енэжвывса ыджыдалысь-веськӧдлысьяслы Ассьыс уна ногӧн петкӧдчысь мывкыдлунсӧ. Тадзи нэмъяс пуксьытӧдз на лӧсьӧдӧм-мӧвпыштӧмсӧ Енмыс пӧртіс олӧмӧ миян Господь Исус Кристос пыр. Ми — Кристос пытшкынӧсь, Сылы эскӧм пыр ми повтӧг-майшасьтӧг вермам локны Ен дінӧ.
Вокъяс, кора тіянӧс: энӧ ӧшӧдӧй юрнытӧ, кор ме сьӧкыдала тіян вӧсна. Ӧд та пыр вичмӧ тіянлы ошкӧмыс.
Ме сувта пидзӧс вылӧ, миян Господь Исус Кристослӧн Бать водзӧ. Сійӧ сетӧ ним быд чужанкотырлы енэжас и му вылас. Ме кора, мед дзирдлуннас озыр Ен Аслас Ловнас да выннас ёнмӧдас тіянлысь пытшкӧсса морттӧ, да эскӧмныд пыр Кристос овмӧдчас тіян сьӧлӧмӧ. Ме кевма, медым муслуныс вужъясяс тіян сьӧлӧмӧ да лоас тіянлы подулӧн. Сэки став вежа войтыркӧд ӧтвыв верманныд шымыртны Кристос муслунлысь кузьта-пасьтасӧ, пыдта-судтасӧ, да гӧгӧрвоны Сылысь вежӧрӧ тӧртӧм муслунсӧ. Сэки тіян пытшкын лоӧ Енлӧн став тыр-бурыс. Ошкӧм Енлы.
Аслас вынӧн, коді уджалӧ миян пытшкын, Сійӧ вӧчӧ ёна унджык миян корӧмъяс да мӧвпалӧмъяс дорысь. Ошкӧм Сылы Вичкоын, коді Исус Кристос пытшкын, быд кадӧ олысь йӧзсянь нэмъяс чӧж.
Аминь.
4 юр.
Ме, Господьлы кесъялӧм вӧсна дзескыдінын пукалысь, кора тіянӧс: олӧй сідзи, кыдзи колӧ овны Енлӧн корӧмаяслы. Пыр лоӧй меліӧсь, рамӧсь, терпитӧмӧн да мусапырысь бурӧ пуктӧй ӧта-мӧднытӧ. Зільӧй видзны Ловсянь сетӧм ӧтувъялуннытӧ да тіянӧс йитысь лӧньлуннытӧ.
Вир-яйыс ӧти, Лолыс ӧти, лачаыс, кытчӧ тіянӧс корӧма, тшӧтш ӧти.
Господьыс ӧти, эскӧмыс ӧти, и пыртчӧмыс ӧти. Енмыс ӧти, Сійӧ быдӧнлы Бать. Сійӧ веськӧдлӧ ставнас, уджалӧ ставыс пыр да олӧ ставным пытшкын.
Кристос Ас кӧсйӧм сертиыс миянлы быдӧнлы лышкыда козьналіс бурсетӧмсӧ.
Ӧд Гижӧдыс висьталӧ:
— Сійӧ кыпӧдчис вылісьыс-вылӧ, босьтіс Аскӧдыс кӧрталӧмаясӧс, йӧзлы сеталіс козинъяс.
Мый лоӧ “кыпӧдчӧмыс”? Оз-ӧ сійӧ, мый водзынджык Сійӧ лэччыліс му пыдӧсӧдзыс.
А лэччыліс кӧ, сідзкӧ, кыпӧдчис став енэжсьыс вылӧ, медым тыртны Аснас ставсӧ.
Ӧтиясӧс Сійӧ сувтӧдіс апостолъясӧн, мӧдъясӧс — пророкъясӧн, коймӧдъясӧс — буръюӧртысьясӧн, нёльӧдъясӧс — вичкоса веськӧдлысьясӧн, витӧдъясӧс — велӧдысьясӧн, медым дасьтыны вежа войтырӧс кесъявны да сӧвмӧдны Кристослысь Вир-яйсӧ. Сэки ми ставным воам ӧти эскӧмӧ, кутам тӧдны Ен Пиӧс, быдмам да воӧдчам Кристослӧн тыр арлыдӧдз да Сылӧн тырвыйӧлунӧдз.
Сідзкӧ, миянлы оз нин ков ылавны кагаяс моз быдпӧлӧс тӧвйыв велӧдӧмӧ. Ӧд татшӧм велӧдӧмыс петӧ наян да ылӧдчысь йӧзсянь. Мӧдарӧ, збыляс да муслунас кутчысьӧмӧн, кутам пыр быдмыны да воӧдчыны Кристосӧдз, ӧд Сійӧ — юрыс. Сійӧ йитӧ вир-яйлысь став юкӧнсӧ ӧтиӧ, тадзи артмӧ ӧти вир-яй. Юкӧнъясыс топыда йитчӧмаӧсь ӧта-мӧдныскӧд, и быд юкӧн вӧчӧ ассьыс удж. Тадзи муслуныс отсӧгӧн ставнас вир-яйыс быдмӧ-сӧвмӧ.
Та вӧсна, ме ёна кора тіянӧс Господь нимӧн: водзӧ энӧ нин олӧй ентӧдтӧмъяс моз. Налӧн мӧвпъясыс ковтӧмӧсь, вежӧрныс пемдӧма, найӧ ылынӧсь Ен нога олӧмсьыс, ӧд налӧн чорзьӧма сьӧлӧмныс, да Енсӧ найӧ оз тӧдны.
Найӧ воштӧмаӧсь яндзимнысӧ, лэдзчысьӧмаӧсь олӧмсьыс да быдпӧлӧс пежсӧ вӧчӧны пӧтлытӧг.
Но тіянӧс эз тадзи велӧдны Кристос йылысь, медым ті олінныд татшӧм ногӧн.
Ті кывлінныд Сы йылысь, тіянӧс велӧдісны сійӧ збыльыс серти, мый эм Исусын. Тіянӧс велӧдісны: эновтӧй важ оласногтӧ да ыштана лёк кӧсйӧмъястӧ, ӧд найӧ тшыкӧдӧны тіянӧс. Выльмӧдчӧй ловнаныд да вежӧрнаныд. Вежсьӧй Ен нога выль мортӧ, кутчысьӧй збыляс, веськыдлунас да вежалунас.
Сідзкӧ, дугдӧй пӧръясьнытӧ да сёрнитӧй ӧта-мӧдныдкӧд веськыда, ӧд ми — ӧта-мӧдлы юкӧнъяс.
Скӧраліганыд энӧ мыжмӧй: бурасьӧй ӧта-мӧдныдкӧд шонді пуксьытӧдзыс на.
Энӧ сетӧй омӧльыслы кутчысянін.
Гусясьысь — водзӧ эн гусясь. Бурджык, уджав да вӧч аслад киӧн коланасӧ, медым вермин чуктӧдны сэтысь корысьяслы.
Некутшӧм пеж кыв мед оз пет тіян вомысь, а сӧмын бурыс. Ӧд тайӧ ёнмӧдӧ йӧзыслысь эскӧмсӧ да вайӧ налы нимкодьлун.
Энӧ шогӧдӧй Ен Вежа Лолӧс, кодӧн пасйӧма тіянӧс мездана лун кежлӧ.
Пыр кежлӧ ӧвсьӧй дӧзмӧмысь, лёксьӧм-скӧралӧмысь, зыксьӧм-суклясьӧмысь да быдсяма лёк вӧчӧмысь.
Ӧта-мӧдныд дінӧ лоӧй бур сьӧлӧмаӧсь да меліӧсь. Енмыс Кристос пыр прӧститіс тіянӧс, сідзкӧ, ті тшӧтш прӧститӧй ӧта-мӧднытӧ.
5 юр.
Ті — Енлӧн муса ныв-пи, сідзкӧ, олӧй Сы вылӧ видзӧдӧмӧн. Кристослы ми мусаӧсь, ті тшӧтш лоӧй мусаӧсь ӧта-мӧдныдлы. Кристос сетіс Ассьыс олӧмсӧ миян вӧсна да вайис Асьсӧ Енлы чӧскыд дука вись пыдди. Ті — вежа войтыр.
Сідзкӧ, некутшӧм кырсалӧм, пеж оласног да горшасьӧм мед эз вӧв тіян пӧвстын. Весиг энӧ сёрнитӧй та йылысь.
Ковтӧм сёрнияс, пеж кывъяс да мисьтӧм шмоньяс мед эз петны тіян вомысь. Мӧдарӧ, аттьӧалӧй Енсӧ.
Тӧдӧй, мый ни ӧти кырсалысьлы, пеж оласногалы да горшасьысьлы, коді копрасьӧ озырлунлы Енмыслы пыдди, — Кристослӧн да Енлӧн Юраланіныс оз вичмы.
Некод мед оз ылӧдлы тіянӧс ковтӧм сёрниясӧн, ӧд таысь кывзысьтӧмъясӧс суас Енлӧн скӧрлуныс.
Татшӧмъясыскӧд энӧ ӧтувтчӧй.
Коркӧ ті вӧлінныд пемыдӧн, ӧні ті Господь пытшкынӧсь да лоинныд югыднас.
Сідзкӧ, олӧй югыдыслӧн ныв-пи моз. Ӧд Ловлӧн вотӧсыс — бурлун, веськыдлун да збыльлун.
Зільӧй тӧдмавны Енмыслы шогманасӧ. Энӧ ӧтувтчӧй пемыдас олысьяслӧн ковтӧм уджъясӧ, мӧдарӧ, янӧдӧй найӧс.
Ӧд яндзим весиг висьтавнысӧ налӧн гуся уджъяс йылысь.
Но югыдас став гусяыс тыдовтчӧ, ӧд югыдыс ставсӧ восьтӧ.
Сійӧн и шуӧма:
— Садьмы, узьысь, ловзьы кулӧмысь, и тэнӧ югдӧдас Кристос.
Сідзкӧ, сюся видзӧдӧй ас бӧрсяныд: олӧй мывкыдаяс моз, а энӧ вежӧртӧмъяс моз. Энӧ коллялӧй каднытӧ весьшӧрӧ, ӧд тайӧ лунъясыс тырӧмаӧсь лёкнас.
Энӧ лоӧй мывкыдтӧмӧн, а тӧдмалӧй Енлысь кӧсйӧмсӧ.
Энӧ коддзӧдчӧй винаӧн, ӧд тасянь овлӧ олӧмас лэдзчысьӧмыс.
Мӧдарӧ, сетӧй Ловлы тыртны асьнытӧ. Сьылӧй ӧтвылысь псаломъяс, Енмӧс ошкана сьыланкывъяс да бурсьылӧмъяс. Сьылӧй Господьлы да ошкӧй Сійӧс став сьӧлӧмсяньныд. Быд кадӧ ставсьыс аттьӧалӧй Ен Батьӧс миян Господь Исус Кристос нимӧн. Енсьыс полӧмӧн кывзысьӧй ӧта-мӧдныдлысь.
Гӧтыръяс, кывзысьӧй асланыд верӧсъяслысь Господьлысь моз. Ӧд гӧтырлы юрыс — верӧс, кыдзи Вичколы юрыс — Кристос. Вичколы — Сійӧ Мездысь, а Вичкоыс — Сылӧн вир-яйыс.
Кыдзи Вичкоыс кывзысьӧ Кристослысь, сідзи гӧтыръяс быдторйын кывзысьӧй асланыд верӧсъяслысь.
Верӧсъяс, радейтӧй ассьыныд гӧтыртӧ, кыдзи Кристос радейтӧ Вичкосӧ. Ӧд Кристос сетіс Ассьыс олӧмсӧ Вичкоыс вӧсна, медым вежӧдны сійӧс. Сійӧ сӧстӧммӧдіс Вичкосӧ ваӧн да кывнас, медым сувтӧдны сійӧс Ас водзас быд боксянь мичаӧн: сӧстӧмӧн, вежаӧн, медым сылӧн эз вӧв некутшӧм няйттор, чукыр да тырмытӧмтор.
Верӧсъяс, радейтӧй ассьыныд гӧтырнытӧ вир-яйтӧ моз, ӧд гӧтырсӧ радейтысь — асьсӧ радейтӧ.
Некод оз мустӧмт ассьыс вир-яйсӧ, мӧдарӧ, шонтӧ-пӧткӧдӧ сійӧс, кыдзи Господь тӧждысьӧ Аслас Вичкоыс вӧсна. Ӧд ми — Сы вир-яйлӧн юкӧнъяс.
Гижӧдыс висьталӧ: «Та вӧсна морт кольӧ бать-мамсӧ да ӧтлаасьӧ гӧтырыскӧд, и тайӧ кыкыс лоӧны ӧти вир-яйӧн».
Тайӧ — ыджыд гусятор.
Ме висьтала тайӧс Кристос да Вичко йылысь.
Сідзкӧ, быдӧн мед радейтӧ гӧтырсӧ асьсӧ моз, а гӧтыр мед пыдди пуктӧ верӧссӧ.
6 юр.
Челядь, кывзысьӧй бать-мамныдлысь Господь вӧсна, ӧд тайӧ лоӧ веськыд Сы водзын.
«Пыдди пукты ассьыд бать-мамтӧ» — тайӧ медводдза тшӧктӧм, кытчӧ пырӧ татшӧм кӧсйысьӧм: «сэки ставыс тэнад лоӧ бур да олӧмыд кузь нэма».
Батьяс, энӧ дӧзмӧдӧй ассьыныд челядьтӧ, но быдтӧй-велӧдӧй найӧс Господьлӧн кӧсйӧм серти.
Кесйӧгъяс, кывзысьӧй асланыд мувывса ыджыдъяслысь Кристослысь моз. Кесъялӧй налы восьса сьӧлӧмӧн, полігтырйи да пыдди пуктӧмӧн. Энӧ вӧчӧй тадзи асьнытӧ йӧз водзын ошкӧм-петкӧдлӧм могысь, но Кристослӧн кесйӧгъяс моз кывзысьӧй Енмыслысь став сьӧлӧмсяньныд. Кесъялӧй налы нимкодьпырысь Господьлы моз, а энӧ йӧзлы моз. Тӧдӧй, мый быдӧн, кесйӧг кӧть мездлуна морт, босьтас Господьсянь удждонсӧ бур вӧчӧмыс серти.
Ыджыдъяс, ті тшӧтш бура кутӧй асьнытӧ асланыд кесйӧгъяскӧд: энӧ лоӧй чорыдӧсь накӧд. Тӧдӧй, мый тіян вылын, и на вылын ӧти Ыджыдыс енэжас. Сійӧ оз видзӧд морт чужӧм вылӧ.
Нӧшта вокъясӧй, ёнмӧдӧй асьнытӧ Господькӧд ӧтувъя олӧмас Сылӧн вермана выннас.
Пасьталӧй Енсянь став вермасянторсӧ. Сэки ті верманныд сувтны омӧльыслӧн наяна лёк вӧчӧмъяслы паныд. Ӧд миян тышыс абу мортлы паныд, ми тышкасям енэжувса юралысь-ыджыдалысь пеж ловъяскӧд да тайӧ мувывса пемыд олӧмнас веськӧдлысь ловъяскӧд.
Та вӧсна, босьтӧй Енсянь став вермасянторсӧ. Сэки тышкасиганыд верманныд водзсасьны лёкыслы паныд да петанныд вермысьясӧн. Сулалӧй зумыда.
Вӧнясьӧй збыльнас да пасьтасьӧй веськыдлуныслӧн кӧрт кышӧдӧ. Кӧмкотасьӧй да лоӧй дасьӧсь висьтавлыны лӧньлун йылысь Бур Юӧрсӧ. Та кындзи, топыда кутӧй кианыд эскӧмлысь сайӧдсӧ, кодӧн ті верманныд кусӧдны омӧльлысь став донӧдӧм ньӧвъяссӧ. Нӧшта босьтӧй юр вевттьӧд пыдди мездмӧмсӧ да Ловлысь шыпуртсӧ — Енлысь Кывсӧ.
Вӧчӧй тайӧс кевмӧмъясӧн да корӧмъясӧн, быд кадӧ кевмысьӧй Лов нуӧдӧм улын. Лоӧй дасьӧсь да зільӧй дугдывтӧг кевмысьны став вежа войтыр вӧсна. Кевмысьӧй тшӧтш ме вӧсна, медым сёрнитігӧн Енмыс сетіс меным колана кывъяс повтӧг висьтавлыны Бур Юӧрлысь гусяторсӧ. Енмыс мӧдӧдіс менӧ висьтавлыны Бур Юӧрсӧ, та понда ӧні дзескыдінын. Кевмысьӧй ме вӧсна, медым висьтавлі сійӧс повтӧг да колана ногӧн.
Медым ті тӧдінныд менам олӧм-вылӧм йылысь, ставсӧ тіянлы висьталас Тихик. Сійӧ — менам муса вок, Господьлӧн эскана кесъялысь. Ме мӧдӧда сійӧс тіян дінӧ, медым висьталас миян олӧм йылысь да ышӧдас тіянӧс.
Вокъяс, сиа тіянлы лӧнь олӧм, муслун да эскӧм Ен Батьсянь да Господь Исус Кристоссянь.
Енлӧн буралӧмыс быдӧнкӧд, коді радейтӧ миян Господь Исус Кристосӧс бырлытӧм муслунӧн.
Аминь.
Апостол Павеллӧн Филипӧ мӧдӧдӧм гижӧд
1 юр.
Павел да Тимофей, Исус Кристослӧн кесйӧгъяс, чолӧмалӧны Филип карын олысь да Исус Кристослы эскысь став вежа войтырӧс, вичкоса веськӧдлысьясӧс да отсасьысьясӧс. Буралӧм да лӧнь олӧм тіянлы Ен Батьнымсянь да Господь Исус Кристоссянь.
Тіян йылысь казьтывлігӧн быдпӧрйӧ аттьӧала ассьым Енмӧс да нимкодьпырысь кевмыся ставныд вӧсна. Ӧд ті медводдза лунсяньыс да ӧнӧдз на отсаланныд меным паськӧдны Бур Юӧрсӧ. Енмыс панӧма нин бур уджсӧ тіян пытшкын, и ме эска, мый Исус Кристослӧн локтан лунӧдз Сійӧ вайӧдас уджсӧ помӧдз. Дерт, меным тадзи и колӧ мӧвпавны тіян йылысь, ӧд ті менам сьӧлӧмынӧсь. Пукала-ӧ ме дзескыдінын, доръя-ӧ Бур Юӧрсӧ али висьтавла сійӧс эскӧдӧмӧн, ті ставныд мекӧд ӧтвыв босьтанныд Енсянь бурсетӧмсӧ.
Ен тӧдӧ, ме ёна радейта тіянӧс Исус Кристослӧн муслунӧн.
Ме кевмыся, мед тіян муслунныд ёнджыка на содас да сетас тіянлы быдпӧлӧс тӧдӧмлунсӧ да мывкыдлунсӧ, медым верминныд тӧдмавны медбурсӧ. Сэки Кристослӧн лунӧ ті лоанныд сӧстӧмӧсь да мыжтӧмӧсь да кутанныд вайны веськыда олӧмыслысь вотӧссӧ Енсӧ ошкӧм да аттьӧалӧм могысь. Тайӧ уджсӧ кутас вӧчны тіян пытшкын Исус Кристос.
Вокъяс, кӧсъя, мед ті тӧдінныд, мый мекӧд лоӧмторъясыс ёнджыка на отсалісны меным висьтавлыны Бур Юӧрсӧ. Кристос вӧсна ме ӧні дзескыдінын. Та йылысь тӧдӧны ставныс: кесарлысь керка видзысьяс, тшӧтш мукӧдыс. Унджыксӧ вокъяс пиысь ышӧдіс менам дзескыдінын пукалӧмӧй, да найӧ ёнджыка на повтӧг кутісны висьтавлыны Ен Кывсӧ.
Кодсюрӧ висьтавлӧны Кристос йылысь вежалӧмныс понда, мед вензьыны миянкӧд, а мукӧдыс висьтавлӧны сьӧлӧмсяньныс.
Кодсюрӧ висьтавлӧны Кристос йылысь оз сьӧлӧмсяньныс, а асьнысӧ петкӧдлӧм могысь. Тадзи найӧ кӧсйӧны сьӧктӧдны менӧ дзескыдінын пукалігӧн.
Мукӧдыс висьтавлӧны муслунныс вӧсна, ӧд найӧ тӧдӧны, мый Енмыс сувтӧдіс менӧ дорйыны Сылысь Бур Юӧрсӧ.
Наянпырысь-ӧ, восьса сьӧлӧмӧн-ӧ найӧ висьтавлӧны Кристос йылысь, меным веськодь. Мед сӧмын висьтавласны-а. Ме и таысь нимкодяся да водзӧ кута нимкодясьны, ӧд ме тӧда, мый тіян кевмысьӧмъясныд да Исус Кристослӧн Лолыс отсаласны меным мездмыны. Лача кута, мый меным нинӧмысь лоӧ яндысьнысӧ, но воддза мозыс лоа повтӧмӧн да кута водзӧ вайны Кристослы ошкӧмсӧ аслам вир-яйын олӧмӧн али кулӧмӧн.
Ӧд менам олӧмӧй — Кристос, а кулӧмӧй — вермӧм.
Кута кӧ водзӧ вир-яйын овны, унатор на верма вӧчны. Мый бӧрйыны — ог тӧд.
Кӧсъя ӧтисӧ и мӧдсӧ: кӧсъя ӧдйӧджык мунны тайӧ муюгыдсьыс да лоны Кристоскӧд, ӧд тайӧ ёна бурджык, но олышта кӧ на тайӧ му вылас, тіянлы бурджык.
Ме зумыда эска таӧ, та вӧсна тӧда: ме кольчча на му вылас да лоа ставныдкӧд, ёнмӧда тіянлысь эскӧмнытӧ, медым сы пыр верминныд нимкодясьны. Сэки, тіян дінӧ выльысь локтігӧн, Исус Кристос пытшкын ті верманныд ёнджыка на ошйысьны меӧн.
Сӧмын олӧй шогмана ногӧн, Кристослӧн Евангелльӧыс серти. Ме ог тӧд, верма-ӧ локны тіян дінӧ али ог вермы, аддза-ӧ тіянӧс али ог аддзы, но кӧсъя кывны, мый ті оланныд ӧти лолӧн да ӧтвылысь тышкасянныд Бур Юӧр да эскӧм вӧсна. Энӧ полӧй тіянлы паныд мунысьясысь, ӧд тіян повтӧмлунныд — налы пас кулӧм вылӧ, а тіянлы — мездмӧм вылӧ.
Ставыс тайӧ Енсянь. Ӧд Енмыс сетіс тіянлы эз сӧмын Кристослы эскыны, тшӧтш Сы понда сьӧкыдсӧ нуны да ме моз вермасьны. Ті аддзылінныд, кыдзи ме водзынсӧ вермаси да ӧнӧдз на вермася. Тайӧс ті тӧданныд.
2 юр.
Кристоскӧд олӧмыс кӧ ышӧдӧ тіянӧс, Сылӧн муслуныс кӧ бурӧдӧ тіянӧс, Енлӧн Лолыс кӧ ӧтвывтӧ тіянӧс, да ті кӧ меліӧсь да бур сьӧлӧмаӧсь ӧта-мӧдныд дінӧ, сідзкӧ, отсалӧй меным ёнджыка на нимкодясьны: радейтӧй ӧта-мӧднытӧ ӧтмоза, олӧй ӧти сьӧлӧмӧн да ӧти мӧвпъясӧн, тіян костын мед лоӧ ӧтувъялун. Нинӧм энӧ вӧчӧй асьнытӧ петкӧдлӧм могысь да вылӧ кыпӧдчӧм могысь. Быдӧн мед рам сьӧлӧмӧн пуктӧ мӧдсӧ ассьыс вылӧджык
да тӧждысьӧ оз сӧмын ас вӧснаыс, тшӧтш мукӧдыс вӧсна.
Мӧвпалӧй да вӧчӧй Исус Кристос моз. Сійӧ вӧлі дзик Енмыс кодь, но эз кутчысь тайӧ ӧткодьлунас.
Асьсӧ Сійӧ увтыртіс да кесйӧг туйӧ пуктіс. Чужис морт кодьӧн да морт вир-яйын оліс.
Асьсӧ Сійӧ улӧ пуктіс да кывзысис весиг кувтӧдзыс, крест вылын кувтӧдзыс.
Та вӧсна Енмыс кыпӧдіс Сійӧс ставсьыс медвылӧ да сетіс Сылы ним — став нимсьыс медыджыдӧс, медым Исус ним водзын копыртчис енэжас, му вылас да му пыдӧсас быд олысь, да Ен Батьӧс ошкӧм могысь быд морт шуис: «Исус Кристос эм Господь».
Мусаяс, кор ме вӧлі тіян дінын, ті пыр кывзысинныд менсьым. Сідзкӧ, ӧні, кор абу тіянкӧд, ёнджыка на кывзысьӧй да тӧждысьӧй асланыд мездмӧм вӧсна полӧмӧн да тіралӧмӧн. Ӧд Ачыс Енмыс уджалӧ тіян пытшкын, медым ті кӧсйинныд вӧчны да вӧчинныд Сылӧн бур кӧсйӧмыс серти.
Ставсӧ вӧчӧй шуасьтӧг да зыксьытӧг, медым ті вӧлінныд Енлӧн сӧстӧм, мыжтӧм да пежасьтӧм челядьӧн. Сэки тайӧ тшыксьӧм да пежасьӧм йӧз пӧвстас ті лоанныд дзирдалысь кодзувъяс кодьӧсь. Кутчысьӧй Олӧмыслӧн Кывйӧ, сэки Кристослӧн лунӧ ме верма ошйысьны, мый эг весьшӧрӧ уджав да мырсьы тіян пӧвстын.
Весиг ковмас кӧ кисьтны ассьым вирӧс да вайны ачымӧс вись пыдди тіян эскӧмныд вӧсна, тіянкӧд ӧтвыв кута нимкодясьны.
Сідзкӧ, ті тшӧтш нимкодясьӧй, мекӧд ӧтвыв нимкодясьӧй.
Господь Исус вылӧ лача кутӧмӧн чайта регыдъя кадӧ мӧдӧдны тіян дінӧ Тимофейӧс. Сійӧ висьталас меным тіян олӧм-вылӧм йылысь да ёнмӧдас менӧ.
Тимофей сьӧлӧмсяньыс тӧждысьӧ тіян вӧсна, мӧдыс сы кодьыс абу. Ӧд ставныс сӧмын ас вӧснаныс тӧждысьӧны, оз Исус Кристослы кесъялӧм вӧсна.
Ті тӧданныд Тимофейлысь зільӧмсӧ. Бур Юӧр висьтавлігӧн сійӧ отсасис меным пи моз.
Лача кута дзик пыр мӧдӧдны сійӧс тіян дінӧ, кор тӧдмала, мый лоӧ мекӧд водзӧ.
Эска Господьлы, мый регыд ме тшӧтш локта тіян дінӧ.
Но медводз лыддя коланаӧн мӧдӧдны тіян дінӧ Епафродит вокӧс, мекӧд ӧтвыв уджалысьӧс да отсасьысьӧс. Ті мӧдӧдлінныд сійӧс, медым сетны меным колана отсӧг. Сійӧ ёна гажтӧмтчӧ тіян вӧсна да шогсьӧ, мый ті тӧданныд сылӧн висьӧм йылысь.
Епафродит ёна висис да вӧлі кулан выйын, но Енмыс вӧлі бур сьӧлӧма сы дінӧ, и эз сӧмын сы дінӧ, тшӧтш ме дінӧ, медым менам шогӧй эз сод.
Та вӧсна ӧдйӧджык мӧдӧда сійӧс тіян дінӧ, медым бара верминныд аддзысьны сыкӧд да нимкодясьны. Сэки ме этшаджык кута шогсьыны.
Сибӧдӧй Епафродитӧс нимкодьпырысь, ӧд сійӧ кесъялӧ Господьлы. Татшӧм йӧзсӧ вылӧ донъялӧй. Кристослы кесъялігӧн сійӧ ӧдва эз кув, ӧдва эз вошты ассьыс олӧмсӧ да отсасис меным, кор ті энӧ вермӧй отсасьнысӧ.
3 юр.
Нӧшта вокъясӧй, нимкодясьӧй Господь пытшкын.
Та йылысь меным абу сьӧкыд казьтывлыны тіянлы, ӧд тайӧ видзас тіянӧс лёкысь.
Видзчысьӧй “понъясысь”, ӧд тайӧ лёк вӧчысьясыс тшӧктӧны вундыштчыны. Збыль вундыштчӧмаясыс — тайӧ ми, ӧд ми кесъялам Енлы Сылӧн Лов нуӧдӧм улын. Ми ошйысям Исус Кристосӧн, огӧ ас выланым лача кутӧй, кӧть ме эськӧ верми ас вылӧ лача кутны.
Кодкӧ мӧвпалӧ кӧ ас вылас лача кутны, мукӧд дорсьыс ме ёнджыка на верма тадзи вӧчны. Ӧд менӧ вундыштӧма кӧкъямысӧд лунӧ, петі Израиль войтырысь, Вениамин чужанкотырысь. Бать-мамӧй — юдейяс, Индӧд серти ме — фарисей. Ен вӧсна тӧждысьӧмӧй петкӧдчис сыын, мый вӧтлі Енлысь Вичкосӧ. Индӧд серти ме вӧлі веськыдӧн да мыжтӧмӧн.
Водзынсӧ ставсӧ тайӧс лыдди медколанаӧн, ӧні Кристос вӧсна лыддя нинӧмӧн.
Ставсӧ тайӧс пукта нинӧм туйӧ, ӧд Исус Кристосӧс, ассьым Господьӧс, тӧдӧм дорысь нинӧм абу ыджыдджыкыс. Кристос вӧсна эновті ставсӧ, ставсӧ лыддя ёгӧн, медым ме озырми Кристосӧн да лои Сы пытшкын веськыдӧн эг Индӧд серти уджъясӧй вӧсна, а Кристослы эскӧм вӧсна. Ӧд веськыдлунсӧ Енмыс сетӧ мортлы сӧмын Кристослы эскӧм пыр. Кӧсъя тӧдны Кристосӧс да Сійӧс ловзьӧдысь вынсӧ, кӧсъя тшӧтш юкны Сылысь сьӧкыдалӧмсӧ да кувны Сы моз, медым верми ловзьыны кулӧмысь.
Ме ог шу, мый вои нин тыр-бурас, но зіля воны тыр-бурас, ӧд татчӧ менӧ корис Исус Кристос.
Вокъяс, ме ог шу, мый вои нин тыр-бурас, но важсӧ вунӧдӧмӧн зіля мунны водзӧ да воны помӧдз, мед босьтны тырдонсӧ — енэжвывса олӧм, кытчӧ Енмыс корӧма миянӧс Исус Кристос пыр.
Сідзкӧ, коді миян пиысь лыддьӧ асьсӧ тыр-бурас воысьӧн, сійӧ мед мӧвпалӧ миян моз.
А мӧвпаланныд кӧ мӧд ногӧн, Енмыс восьтас тайӧс тіянлы.
Но мыйӧдз воим нин, кутам водзӧ тадзи мӧвпавны да овны.
Вокъяс, видзӧдӧй ме вылӧ да велӧдчӧй овны на моз, кодъяс олӧны миян моз.
Ӧд Кристослӧн крестлы унаӧн паныд мунӧны. Та йылысь висьтавлі нин тіянлы, ӧні нӧшта на синва сорӧн казьтышта.
Налӧн помыс — кулӧм, налӧн енмыс — рушкуныс, найӧ ошйысьӧны асланыс янӧдан уджъясӧн. Найӧ мӧвпалӧны сӧмын мувывсаыс йылысь.
Но миян оланінным енэжас. Сэсянь виччысям Мездысьӧс — миян Господь Исус Кристосӧс. Енмыс сетіс Сылы вын веськӧдлыны ставнас. Тайӧ выннас Кристос вежас миянлысь кулана вир-яйнымӧс да сетас миян вир-яйлы Ассьыс дзирдлунсӧ.
4 юр.
Муса вокъясӧй, ме ёна гажтӧмтча тіянысь. Ті — менам нимкодьлунӧй да ошйысян юркытшӧй. Мусаяс, зумыда кутчысьӧй Господькӧд ӧтувъя олӧмас.
Кора Еводияӧс да Синтикияӧс: воӧй ӧти кывйӧ, ӧд ті Господьлӧн.
Кора тэнӧ, менам збыль уджъёртӧй: отсав тайӧ аньясыслы. Кор ме висьтавлі Бур Юӧрсӧ, найӧ пыр вӧліны мекӧд, кыдзи и Климент да мукӧд уджалысьяс, кодъяслысь нимъяссӧ гижӧма Олӧмыслӧн небӧгӧ.
Дугдывтӧг нимкодясьӧй Господь пытшкын. Нӧшта шуа: нимкодясьӧй.
Тіян рамлунныд мед тыдалас быдӧнлы.
Господь матын нин.
Нинӧм вӧсна энӧ майшасьӧй. Енсӧ аттьӧалӧмӧн да Сылы кевмысьӧмӧн вайӧй Сы водзӧ став ассьыныд корӧм-кӧсйӧмнытӧ. Сэки вежӧрӧ тӧртӧм Енлӧн лӧньлуныс видзас тіянлысь сьӧлӧмнытӧ да мӧвпъяснытӧ Исус Кристос пытшкын.
Вокъяс, нӧшта кора тіянӧс: мӧвпалӧй сӧмын збыльыс, шогманаыс, веськыдыс, сӧстӧмыс, бурыс, мичаыс, ошканаыс да нимкодьыс йылысь.
Вӧчӧй сійӧ, мый ті кывлінныд, мыйӧ велӧдчинныд, мый тӧдмалінныд да месянь босьтінныд. Сэки лӧньлуныслӧн Ен лоӧ тіянкӧд.
Господь водзын ме ёна нимкодяся, ӧд ті бара кутінныд тӧждысьны ме вӧсна.
Дерт, ті век кӧсйинныд тӧждысьны ме вӧсна, но водзынсӧ тіян эз вӧв позянлуныс.
Висьтала тайӧс ог сы понда, быттьӧ меным мыйкӧ оз тырмы, ӧд ме велалі овны сійӧн, мый эм.
Кужа овны гӧля, кужа овны и лышкыда.
Ставсӧ видлі да тӧдлі: пӧтлунсӧ и тшыглунсӧ, лышкыда олӧмсӧ и гӧльлунсӧ.
Ставсӧ верма менӧ ёнмӧдысь Исус Кристоскӧд.
Дерт, ті бура вӧчинныд, мый ті юкинныд менсьым сьӧкыдлунӧс.
Филипса эскысьяс, ті ӧд тӧданныд, мый Македонияысь мунӧм бӧрын, Бур Юӧрсӧ висьтавлыны заводитігӧн, весиг ӧти вичко эз отсав меным сьӧмӧн. Сӧмын ті отсалінныд.
Весиг Фессалоникаӧ гоз-мӧдысь мӧдӧдлінныд меным олӧм вылӧ.
Дерт, ме ог виччысь тіянсянь сетӧмторсӧ, сӧмын кӧсъя, медым тіян сетӧмторныд уна пӧвстӧн бӧр бергӧдчис тіянлы.
Епафродит сетіс тіянлысь мӧдӧдӧмторнытӧ, ӧні ставыс эм. Эм став коланаыс, весиг коланасьыс унджык на. Тіян сетӧмторныд — Енлы шогмана чӧскыд дука вись, Сылы сьӧлӧм сертиыс.
Менам Енмӧй мед сетас тіянлы Исус Кристос пыр Аслас дзирдлуна озырлунысь став коланаторсӧ.
Ен Батьнымлы ошкӧм нэмъяс чӧж.
Аминь.
Чолӧмалӧй Исус Кристослы став эскысьсӧ.
Мекӧд олысь вокъяс ыстӧны тіянлы чолӧм.
Нӧшта ыстӧны чолӧм став вежа войтырыс, торъя нин, кесар керкаысь кесйӧгъяс.
Господь Исус Кристослӧн буралӧмыс ставныдкӧд тіянкӧд.
Аминь.
Апостол Павеллӧн Колосӧ мӧдӧдӧм гижӧд
1 юр.
Гижӧ Павел, Ен кӧсйӧм серти Исус Кристослӧн апостол. Тимофей воккӧд ми чолӧмалам колосса вежа войтырӧс, Исус Кристослы эскысь вокъясӧс.
Буралӧм да лӧнь олӧм тіянлы Ен Батьнымсянь да Господь Исус Кристоссянь.
Тіян вӧсна кевмысигъясӧн ми пыр аттьӧалам Енмӧс, миян Господь Исус Кристослысь Батьсӧ. Ми кывлім Кристослы тіян эскӧм йылысь да став вежа войтыр дінӧ муслунныд йылысь. Тайӧ тіян эм, ӧд ті оланныд енэжас дасьтӧмаыс вылӧ лачаӧн. Лача йывсьыс ті кывлінныд нин, кор тіянӧдз воис Бур Юӧрлӧн збыль кывйыс. Тайӧ кывйыс паськалӧ став му пасьталаыс да вайӧ вотӧс. Ӧні сійӧ паськалӧ да вайӧ вотӧссӧ тшӧтш тіян пӧвстын. Бур Юӧрсӧ кылӧм бӧрын ті збыльысь гӧгӧрвоинныд Енлысь буралӧмсӧ. Ті кылінныд тайӧс миян муса Епафрас уджъёртсянь, коді уджалӧ тіян пӧвстын. Сійӧ — Кристослӧн эскана кесъялысь. Епафрас висьталіс миянлы Ловсянь чужӧм муслунныд йылысь.
Ставсӧ тайӧс кылӧмсянь ми дугдывтӧг кевмысям тіян вӧсна. Кевмам, медым тіян вӧлі Ловсянь мывкыдлун да гӧгӧрвоӧм, медым ті бура тӧдінныд Енлысь кӧсйӧмсӧ. Кевмысям, мед эськӧ тіян олӧмын ошкыссис Господь, медым ті быдторйын шогминныд Сылы, бурсӧ вӧчӧмӧн вайинныд вотӧс да быдминныд Енсӧ тӧдмалӧмас. Енмыс мед ёнмӧдас да вынсьӧдас тіянӧс дзирдлуна выннас, медым ті быдторйын вӧлінныд зумыдӧсь да терпитӧмӧн нуинныд быдпӧлӧс сьӧкыдсӧ. Долыда ошкӧй Ен Батьӧс, ӧд Сійӧ вӧчис миянӧс шогманаясӧн, медым ми тшӧтш вермим босьтны Югыдінас вежа войтырлы вичмӧдӧмасӧ. Сійӧ мездіс миянӧс пемыдыслӧн вын улысь да пыртіс муса Пиыслӧн Юраланінӧ. Ӧд Пиыслӧн Вирӧн миянӧс мездӧма да мыжъяснымӧс прӧститӧма. Сійӧ тыдавтӧм Енмыслӧн пертас, чужӧма став вӧчӧмторсьыс медводз.
Сы пыр вӧчӧма став енэжвывсасӧ да мувывсасӧ, аддзанасӧ да аддзытӧмсӧ: юралӧм-ӧ, ыджыдалӧм-ӧ, веськӧдлӧм-ӧ, вынъяс-ӧ, — ставсӧ вӧчӧма Сы пыр да Сылы.
Сійӧ ставсьыс Медводдзаыс, Сы вылын кутчысьӧ ставыс.
Сійӧ вир-яйыслӧн, Вичколӧн, Юрыс.
Сійӧ эм Панасыс. Сійӧ кулӧмаясысь медводдза Ловзьысь, медым быдторйын лоны медводдзаӧн. Тадзи Енмыс лӧсьӧдіс, медым Пиыс пытшкын оліс став тыр-бурыс, медым Сы пыр сетны бурасьӧм, да Сылӧн крествывса Вирнас бурӧдны Аскӧдыс мувывсасӧ да енэжвывсасӧ.
Коркӧ ті вӧлінныд Енмыслы паныд мунысьяс, лёк вӧчӧмныд вӧсна Сыысь ылынӧсь. Ӧні Сійӧ бурӧдіс тіянӧс Аскӧдыс Кристос Вир-яйын, Сылӧн кулӧмыс пыр, медым сувтӧдны тіянӧс Ас водзас вежаӧн, сӧстӧмӧн да мыжтӧмӧн. Сӧмын тіянлы колӧ вӧрзьывтӧг сулавны эскӧмас да зумыда кутны лача Бур Юӧрас. Бур Юӧрсӧ ті кывлінныд, сійӧс юӧртӧма енэж улын став олысьыслы. Ме, Павел, лои тайӧ Бур Юӧрыслы кесъялысьӧн.
Ӧні ме нимкодяся тіян вӧсна сьӧкыдалігӧн. Кристослӧн Вир-яйыс вӧсна, Сылӧн Вичко вӧсна, аслам вир-яйын сьӧкыдсӧ нуигӧн ме тырта Кристос шогъяслысь лыдсӧ. Енмыс пуктіс менӧ кесъявны вичкоыслы, сетіс меным удж: тырвыйӧ юӧртны тіянлы Ен Кывсӧ. Сылӧн Кывйыс нэмсӧ вӧлі мувывса чужысьяслы гусяторйӧн, ӧні сійӧс восьтӧма Сылӧн вежа войтырлы. Енмыс кӧсйис, мед найӧ тӧдісны, кутшӧм ыджыд озырлун вайӧ тайӧ гусяторйыс быд войтырлы. Гусяторйыс — тайӧ Кристос тіян пытшкын, локтана дзирдлуныс вылӧ лачаныд. Сы йылысь ми висьтавлам быдӧнлы, велӧдам-туйдӧдам став мывкыдлунӧн, медым сувтӧдны быдӧнӧс Ен водзӧ Кристос пытшкын сӧвмӧмаясӧн. Та могысь ме уджала да вермася ме пытшкын олысь Кристос вынӧн.
2 юр.
Кӧсъя, мед ті тӧдінныд, кутшӧм ыджыд тыш мунӧ менам тіян вӧсна да лаодикияса вӧсна, тшӧтш на вӧсна, кодъяс менӧ весиг эз на аддзывны. Ме вермася, медым налӧн муслунӧн ӧтувтӧм сьӧлӧманыс вӧлі повтӧмлун, медым найӧ вӧліны озырӧсь тырвыйӧ тӧдӧмлунӧн. Сэки найӧ вермасны гӧгӧрвоны Ен Батьлысь гусяторсӧ — Кристосӧс. Сы пытшкын мывкыдлуныслӧн да тӧдӧмлуныслӧн став озырлуныс.
Висьтала тайӧс, медым некод эз кежӧд тіянӧс аслас эскӧдана сёрниӧн.
Кӧть ме вир-яйӧн абу тіянкӧд, но лолӧн тіянкӧд. Меным зэв нимкодь аддзыны, мый ті оланныд ӧти сьӧлӧмӧн да зумыда эсканныд Кристослы.
Ті кӧ сибӧдінныд Господь Исус Кристосӧс, сідзкӧ, олӧй Сы пытшкын. Быдмӧй-сӧвмӧй Сы пытшкӧ вужъясьӧмӧн, ёнмӧй эскӧмас, кыдзи тіянӧс велӧдӧма. Сьӧлӧмныд мед век вӧлі тыр аттьӧалӧмнас.
Видзчысьӧй, мед кодкӧ эз тывйышт тіянӧс мувывса мывкыдлуннас да ылӧг сёрнинас. Найӧ подуласьӧны мортлӧн велӧдӧм вылӧ да муюгыд вынъяс вылӧ, а оз Кристос вылӧ.
Кристосын, Сылӧн морт вир-яйын, тыдовтчис Енлӧн став тырвыйӧлуныс. Кристос пытшкын тіян тшӧтш эм тырвыйӧлуныс. Сійӧ быд ыджыдалысьлы да быдпӧлӧс вынъяслы Юр.
Сы пытшкын тіянӧс вундыштӧма, но вундыштӧма абу морт киӧн. Кристослӧн вундыштӧмыс мездіс тіянӧс мыжа тшыкӧм вир-яйысь. Пыртчиганыд тіянӧс гуалӧма Кристоскӧд, да Сійӧс Ловзьӧдысьыслӧн вынӧ эскӧмныд пыр тіянӧс ловзьӧдӧма Сыкӧд. Тіянӧс, вундыштчытӧмныд да мыжъясныд вӧсна кулӧмаясӧс, Енмыс ловзьӧдіс Кристоскӧд. Сійӧ прӧститіс миянлысь став лёк вӧчӧмнымӧс, вуштыштіс мыжалан гижӧдсӧ став тшӧктӧмъяснас, кодъяс сьӧктӧдісны миянӧс, бырӧдіс сійӧс крестӧ тувъялӧмӧн. Сійӧ песовтіс ыджыдалысьясӧс да вынаясӧс, шыбитіс найӧс яналӧмас да вермис Кристос пыр.
Сідзкӧ, некод мед оз мыжав тіянӧс сёян-юанысь, вежа лунъясысь, тӧлысь чужӧм пасйӧмысь да шойччан лунӧ кутчысьӧмысь, ӧд ставыс тайӧ сӧмын локтанаыслӧн вуджӧр, а збыльыс — Кристос.
Некод мед оз ылӧд тіянӧс аслас рамлунӧн, анделъяслы юрбитӧмӧн да ылӧг аддзылӧмъяснас ошйысьӧмӧн. Морт вежӧрнаныс мӧвпалігӧн найӧ вылӧ пуктӧны асьнысӧ. Тайӧ йӧзыс абу йитчӧмаӧсь Юрыскӧд. Юрыс ӧд веськӧдлӧ став вир-яйнас, кӧні быд юкӧн йитӧма-тэчӧма сӧн-лутш отсӧгӧн. Тадзи вир-яйыс быдмӧ-сӧвмӧ Ен ногӧн.
Ті кӧ кулінныд Кристоскӧд, мынінныд муюгыд вынъясысь, сідзкӧ, мыйла мувывсаяс моз кутчысянныд тайӧ шуӧмъясас: “эн инмӧдчы”, “эн сёй”, “эн вӧрзьӧд”?
Тайӧ сӧмын мортсянь тшӧктӧм-велӧдӧм, шуӧма быранаторъяс йылысь. Ылӧг вежавидзӧмнас, рамлуннас, вир-яйсӧ тшыгйӧдӧмнас найӧ петкӧдлӧны асьнысӧ мывкыдаӧн. Но тайӧ оз отсав вермыны вир-яйлысь колӧм-кӧсйӧмсӧ.
3 юр.
Ті кӧ ловзинныд Кристоскӧд, корсьӧй енэжвывсасӧ. Ӧд енэжас, Ен веськыдладорын, пукалӧ Кристос. Мӧвпалӧй енэжвывсаыс йылысь, а энӧ мувывсаыс йылысь.
Ті ӧд кулінныд, да тіянлысь олӧмнытӧ дзебӧма Кристоскӧд Ен пытшкӧ.
Тіян олӧмыс — Кристос. Кор Сійӧ локтас, Сыкӧд тшӧтш и ті тыдовтчанныд Сылӧн дзирдлунас.
Та вӧсна бырӧдӧй ас пытшсьыныд мувывсасӧ: кырсалӧм, пеж оласног, лёкколӧм, лёк вылӧ ыштӧм, горшасьӧм — ставыс тайӧ идоллы юрбитӧм. Таысь кывзысьтӧм йӧз вылӧ лэччӧ Енлӧн скӧрлуныс. Коркӧ ті асьныд татшӧмӧсь вӧлінныд да тадзи олінныд.
Ӧні шыбитӧй ставсӧ тайӧс: скӧралӧм, лёксьӧм, лӧгалӧм, омӧльтӧм, пеж сёрни.
Энӧ пӧръясьӧй, ті ӧд пӧрччинныд важ мортсӧ став сылӧн уджнас да пасьтасинныд выль мортӧ, коді выльмӧ Ставсӧвӧчысьӧс тӧдмалӧмнас да лоӧ Сы кодь. Грек-ӧ, юдей-ӧ, вундыштчӧма-ӧ, абу-ӧ вундыштчӧма, варвар-ӧ, скиф-ӧ, кесйӧг-ӧ, мездлуна морт-ӧ — торъялӧмыс абу. Ставыс да ставас Кристос.
Сідзкӧ, лоӧй бур сьӧлӧмаӧсь, меліӧсь, авъяӧсь да рамӧсь, терпитӧй ӧта-мӧднытӧ. Ті ӧд Енлӧн бӧрйӧмаяс, вежаяс да Сылӧн мусаяс. Дӧзмытӧг сибӧдӧй ӧта-мӧднытӧ. Эм кӧ код вылӧ норасьӧм, прӧститӧй сійӧс. Кристос ӧд тіянӧс прӧститіс, ті тшӧтш Сы моз прӧститӧй.
Медыджыдтор — кутчысьӧй муслунас, ӧд муслуныс ставсӧ йитӧ да вайӧдӧ тыр-бурӧдз.
Тіян сьӧлӧмын мед ыджыдалас Енлӧн лӧньлуныс, кытчӧ корӧма тіянӧс, ті ӧд ӧти вир-яйынӧсь. Быд кадӧ ошкӧй Енмӧс.
Кристослӧн кывйыс мед озыра овмӧдчас тіян пытшкӧ.
Велӧдӧй-туйдӧдӧй ӧта-мӧднытӧ став мывкыдлуннас. Господьӧс аттьӧалӧмӧн сьӧлӧмсяньныд сьылӧй псаломъяс, ошкана сьыланкывъяс да бурсьылӧмъяс.
Кывйӧн-ӧ, уджӧн-ӧ мыйкӧ вӧчанныд, ставсӧ вӧчӧй Господь Исус Кристос нимӧн да ошкӧй Сы пыр Ен Батьӧс.
Гӧтыръяс, кывзысьӧй верӧсныдлысь, ӧд тадзи лӧсялӧ вӧчны Господь войтырлы.
Верӧсъяс, радейтӧй гӧтырнытӧ, энӧ лоӧй накӧд чорыдӧсь.
Челядь, быдторйын кывзысьӧй бать-мамныдлысь, ӧд Господьлы нимкодь таысь.
Батьяс, энӧ дӧзмӧдӧй ныв-пинытӧ, медым найӧ эз жугыльмыны.
Кесйӧгъяс, быдторйын кывзысьӧй асланыд мувывса ыджыдъяслысь. Кесъялӧй налы восьса сьӧлӧмӧн да Енмысь полӧмӧн, а энӧ йӧз водзын асьнытӧ петкӧдлӧм могысь.
Ставсӧ вӧчӧй сьӧлӧмсяньныд Господьлы моз, энӧ мортлы моз. Тӧдӧй, тіянлы вичмас Господьсянь тырдон, ӧд ті кесъяланныд Кристослы, асланыд Господьлы.
А лёксӧ вӧчысь аслас уджъяс серти босьтас, ӧд Енмыс оз видзӧд морт чужӧм вылӧ.
4 юр.
Ыджыдъяс, лоӧй веськыдӧсь кесйӧгныдкӧд, быдӧнӧс сибӧдӧй ӧтмоза. Тӧдӧй, енэжас тіян вылын тшӧтш эм Ыджыдыс.
Дугдывтӧг кевмысьӧй. Вӧчӧй тайӧс садьмӧдчӧмӧн да Енмӧс аттьӧалӧмӧн.
Кевмысьӧй тшӧтш миян вӧсна, Енмыс мед восьтас миянлы ӧдзӧсъяс висьтавны Кристос йылысь гусяторсӧ. Дзик та вӧсна ме и пукала дзескыдінын. Кевмысьӧй, медым ме верми восьтны гусяторсӧ да колана ногӧн висьтавны сійӧс.
Лоӧй мывкыдаӧсь эскытӧмъяскӧд, эм кӧ позянлун, сёрнитӧй накӧд быд кадӧ.
Сёрнитӧй бур сьӧлӧмӧн, сёрниныд мед век вӧлі солыштӧма, сэки быдӧнлы кужанныд вочавидзны колана ногӧн.
Ме йылысь ставсӧ тіянлы висьталас муса Тихик вок, миян уджъёртным, сійӧ — Господьлӧн эскана кесъялысь. Мӧдӧда сійӧс тіян дінӧ, медым тӧдмавны олӧм-вылӧмныд йылысь, нӧшта ышӧдны тіянӧс. Сыкӧд тшӧтш мӧдӧда миян муса да эскана Ӧнисим вокӧс, сійӧ ӧд тіянысь петіс.
Найӧ висьталасны ставсӧ, мый миян вӧчсьӧ тані.
Чолӧм тіянлы Аристарксянь, сійӧ мекӧд ӧтлаын пукалӧ дзескыдінын. Чолӧм ыстӧ тшӧтш Варнавалӧн Марк нима воча вокыс. Тіянлы ме гижлі сы йылысь, мися, локтас кӧ, сибӧдӧй сійӧс. Чолӧм Исуссянь, кодӧс нимтӧны Юстӧн.
Вундыштчӧмаяс пиысь сӧмын найӧ мекӧд уджалӧны Енлӧн Юралӧм вӧсна. Найӧ ёна отсасьӧны меным.
Чолӧм ыстӧ тіян Епафрас, Исус Кристослӧн кесйӧг. Кевмысигас сійӧ пыр тышын тіян вӧсна, мед эськӧ ті век сулалінныд зумыда да быдторйын тӧдінныд Енлысь кӧсйӧмсӧ.
Висьтала тіянлы, сійӧ ёна уджалӧ-шогсьӧ тіян вӧсна, тшӧтш лаодикияса да иерапольса вӧсна.
Чолӧм ыстӧны миян дона бурдӧдысь Лука да Димас.
Чолӧм висьталӧй лаодикияса вокъяслы, тшӧтш Нимфалы да сы ордын чукӧртчысь эскысьяслы.
Тайӧ гижӧдсӧ лыддьӧм бӧраныд тӧждысьӧй, медым Лаодикия вичкоын сійӧс тшӧтш лыддясны. А ті лыддьӧй Лаодикияӧ мӧдӧдӧм гижӧдсӧ.
Аркиплы висьталӧй, мед бура уджалас да помӧдз вайӧдас Енсянь сетӧм уджсӧ.
Ме, Павел, аслам киӧн гижа тіянлы чолӧмӧс.
Тӧд выланыд кутӧй менсьым дзескыдінын пукалӧмӧс.
Енлӧн буралӧмыс ставныдкӧд тіянкӧд.
Аминь.
Апостол Павеллӧн Фессалоникаӧ медводдза мӧдӧдӧм гижӧд
1 юр.
Павел, Силуан да Тимофей чолӧмалӧны тіянӧс, Ен Батьлысь да Господь Исус Кристослысь фессалоникаса вичкоӧс.
Буралӧм да лӧнь олӧм тіянлы Ен Батьнымсянь да Господь Исус Кристоссянь.
Быд кадӧ ошкам Енмӧс тіянысь быдӧнысь да казьтывлам тіянӧс кевмысигъяс дырйи. Ен Батьным водзын ми век казьтывлам тіянӧс, ӧд тіян эскӧмныд петкӧдчис уджъясын, а муслунныд — сьӧлӧмсянь вӧчӧмъясын, ті кутанныд зумыд лача миян Господь Исус Кристос вылӧ. Вокъяс, ті мусаӧсь Енмыслы. Ми тӧдам, Сійӧ бӧрйис тіянӧс. Ми висьтавлім тіянлы Бур Юӧрсӧ ыджыд эскӧмлунӧн. Висьтавлім эгӧ сӧмын кывйӧн, сійӧ воссис тшӧтш Вежа Лов вынсянь вӧчӧмторъясын. Ті бура тӧданныд, кыдзи ми кутім асьнымӧс тіянын олігӧн да отсасим тіянлы.
Уна сьӧкыдлун вылӧ видзӧдтӧг ті сибӧдінныд Бур Юӧрсӧ Вежа Ловсянь нимкодьлунӧн да кутінныд вӧчны миян моз да Господь моз. Тадзи ті лоинныд Македонияын да Акайяын став эскысьыслы бурсӧ петкӧдлысьясӧн.
Ен Кывсӧ ті паськӧдінныд энӧ сӧмын Македонияын да Акайяын, тіян эскӧм йылысь тӧдӧны быдлаын. Сідзкӧ, та йылысь миянлы абу нин колана висьтавлыны.
Миянлы быдлаын висьтавлӧны, кыдзи ті сибӧдінныд миянӧс, бергӧдчинныд идолъясысь да кутінныд кесъявны збыль да ловъя Енлы. Ті кутінныд виччысьны енэжсянь Енлысь Писӧ — Исусӧс, кодӧс Енмыс ловзьӧдіс кулӧмысь. Сійӧ мездас миянӧс локтана скӧрлунысь.
2 юр.
Вокъяс, ті асьныд тӧданныд, мый ми волім тіян дінӧ эгӧ весьшӧрӧ.
Ті тӧданныд, мый таысь водзджык Филип карын ми уна сьӧкыд нуим, миянӧс ёна лёкӧдісны да нӧйтісны. Но та вылӧ видзӧдтӧг, Ен отсӧгӧн, восьсӧн да повтӧг висьтавлім тіянлы Сылысь Бур Юӧрсӧ.
Ӧд миян велӧдӧмын эз вӧвны наян да пеж мӧвпъяс, ми некодӧс эгӧ кӧсйӧй ылӧдлыны.
Енмыс водзвыв тӧдмаліс миянӧс да лыддис шогманаясӧн висьтавлыны Сылысь Бур Юӧрсӧ, та вӧсна и висьтавлам. Ми зілям шогмыны Енмыслы, а огӧ йӧзыслы, ӧд Сійӧ тӧдӧ миянлысь сьӧлӧмнымӧс.
Ми некор эгӧ сёрнитлӧй мавтан кывъясӧн, ті тӧданныд тайӧс. Нинӧм эгӧ вӧчӧй горшасьӧмӧн, Ен тӧдӧ.
Ми эгӧ виччысьӧй ошкӧмсӧ йӧзсянь, тіянсянь либӧ мукӧдсянь.
Ми, Кристослӧн апостолъяс, вермим эськӧ локны тіян дінӧ юрнымӧс чатӧртӧмӧн, но ми вӧлім меліӧсь тіянкӧд да тӧждысим тіян вӧсна, кыдзи мам тӧждысьӧ аслас кагаыс вӧсна.
Ми ёна радейтам тіянӧс, та вӧсна вӧлім дасьӧсь юксьыны тіянкӧд Енлӧн Бур Юӧрнас, весиг сетны ассьыным олӧмнымӧс. Ӧд ті сэтшӧм мусаӧсь миянлы.
Вокъяс, ті тӧданныд, Енлысь Бур Юӧрсӧ висьтавлігӧн ми уджалім кок йылысь усьтӧдз. Мырсим лун и вой, ӧд тіян пӧвстысь некодӧс эгӧ кӧсйӧй сьӧктӧднысӧ.
Ті тӧданныд, и Енмыс тӧдӧ, мый тіян дінын, эскысьяс пӧвстын олігӧн, ми ставсӧ вӧчим веськыда да вежавидзӧмӧн, миянӧс нинӧмысь вӧлі мыждынысӧ. Тіянлы быдӧнлы ми вӧлім бать пыдди, ті асьныд тайӧс тӧданныд. Ми туйдӧдім-ышӧдім тіянӧс да корим овны Ен ногӧн. Ӧд Енмыс корис тіянӧс Аслас Юраланінӧ да дзирдлунӧ.
Дугдывтӧг ошкам Енмӧс, ӧд миян висьталӧм бӧрын ті сибӧдінныд Енлысь Кывсӧ сьӧлӧманыд. Ті сибӧдінныд сійӧс энӧ мортлысь висьталӧмсӧ моз, а Енлысь Кывсӧ моз. Тайӧ збыльысь Енлӧн Кыв, сійӧ вына тіян пытшкын, эскысьясын.
Вокъяс, мый вӧлі Юдеяын Исус Кристослы эскысь Ен вичкояскӧд, тайӧ лои тшӧтш тіянкӧд. Найӧ уна сьӧкыд нуисны юдейяссянь, а ті — ас войтырсянь. Господь Исусӧс да Сылысь пророкъяссӧ юдейяс виисны, а миянӧс вӧтлісны. Найӧ дӧзмӧдӧны Енсӧ да став йӧзыслы паныд мунӧны. Найӧ оз лэдзны миянлы бурвисьтавлыны мукӧд войтырлы, медым найӧ мездмисны. Тадзи найӧ содтӧны ассьыныс мыжъяссӧ. Но Енлӧн скӧрлуныс суис нин найӧс.
Вокъяс, ми янсавлім тіянкӧд дженьыдик кад кежлӧ, но сьӧлӧмӧн пыр вӧлім тіянкӧд. Ми ёна гажтӧмтчим тіянысь да ёнджыка на кӧсйим аддзысьлыны тіянкӧд.
Ми ёна кӧсйим волыны тіян дінӧ. Ме, Павел, эг ӧтчыдысь мӧдӧдчыв тіян дінӧ, но сӧтана тупкис туйнымӧс.
Миян Господь Исус Кристос локтігӧн ог ӧмӧй тіянӧн кутӧй ошйысьны Сы водзын?
Абу-ӧ ті миян лачаыс, нимкодьлуныс да ошйысян юркытшыс?
Ӧд ті — миян ошйысянторйыс да нимкодьлуныс.
3 юр.
Миянлы вӧлі вывті сьӧкыд тіянкӧд янсалӧмысь. Та вӧсна ми шуим, мый асьным кольччам Афин карӧ, а Тимофей вокнымӧс мӧдӧдам тіян дінӧ. Сійӧ миянкӧд ӧтвыв кесъялӧ Енмыслы да отсалӧ висьтавлыны Кристослысь Бур Юӧрсӧ. Ми мӧдӧдім сійӧс тіян дінӧ, медым ышӧдны тіянӧс да ёнмӧдны эскӧмнытӧ, медым сьӧкыдсӧ нуигӧн тіян пӧвстысь некод эз усь. Ӧд ті асьныд тӧданныд, мый миянлы ковмас нуны сьӧкыдсӧ.
Тіянӧ волігӧн ми висьтавлім нин, мый ковмас нуны сьӧкыдсӧ. Ті тӧданныд: дзик тадзи и лоис.
Та вӧсна, водзӧ эг нин вермы виччысьнысӧ да мӧдӧді тіян дінӧ Тимофейӧс, медым тӧдмавны тіян эскӧмныд йылысь, эз-ӧ ылӧдлы тіянӧс омӧльыс, эз-ӧ ло весьшӧрӧ миян уджным.
Тимофей сӧмын на воис тіян дінысь да вайис тіян эскӧмныд да муслунныд йылысь нимкодь юӧр, ті пӧ век бур ногӧн казьтывланныд миянӧс да миян моз ёна кӧсъянныд аддзысьлыны миянкӧд. Та вӧсна, вокъяс, став тайӧ сьӧкыдсӧ нуигӧн да миянӧс вӧтлігӧн тіян эскӧмныд ышӧдіс миянӧс.
Ӧні миян сьӧлӧмын лӧнь, ӧд ті зумыда кутчысянныд Господь дінӧ.
Ми ёна аттьӧалам Енсӧ тіянысь, ӧд ті сетанныд миянлы позянлун ёна нимкодясьны Ен водзын. Ми лун и вой сьӧлӧмсянь кевмысям, медым аддзысьлыны тіянкӧд да сетны тіян эскӧмлы тырмытӧмсӧ.
Ачыс Енмыс, миян Бать, да миян Господь Исус Кристос мед веськӧдасны миянлысь туйнымӧс тіян дінӧ.
Господь мед уна пӧв содтас ӧта-мӧдныд дінӧ да став йӧзыс дінӧ муслуннытӧ. Тіян муслунныд мед лоӧ сэтшӧм жӧ вына, кутшӧм вына тіян дінӧ миян муслунным. Господь мед ёнмӧдас сьӧлӧмнытӧ, медым ті вӧлінныд вежаӧсь да сӧстӧмӧсь Ен Батьным водзын, кор миян Господь Исус Кристос локтас став Аслас вежа войтыркӧд.
Аминь.
4 юр.
Вокъяс, тіянлы висьтавлім нин, медым олінныд Ен водзын шогмана ногӧн. Дерт, ті дзик тадзи и оланныд. Но Исус Кристос нимӧн ышӧдам да корам тіянӧс: олӧй нӧшта на бурджыка. Ті ӧд тӧданныд, кутшӧм тшӧктӧмъяс ми сетім тіянлы Господь Исуссянь.
Енмыс кӧсйӧ, медым ті вӧлінныд вежаӧсь да видзинныд асьнытӧ кырсалӧмысь.
Тіян пиысь быдӧн мед видзӧ ассьыс вир-яйсӧ вежаӧн да шогмана ногӧн, медым ентӧдтӧмъяс моз некод оз сетчы ыпъялан лёкколӧмас, ӧд Енсӧ найӧ оз тӧдны.
Эскысь мед оз вӧч лёксӧ мӧд эскысьлы, оз ылӧдлы сійӧс, ӧд Господь мыждас таысь. Та йылысь висьтавлім нин тіянлы да ӧлӧдлім тіянӧс.
Ӧд Енмыс корис миянӧс овны вежа оласногӧн, а эз пеж оласногӧн.
Сідзкӧ, тайӧ тшӧктӧмсӧ ӧтдортысь оз мортӧс ӧтдорт, а Енсӧ, коді сетіс миянлы Ассьыс Вежа Ловсӧ.
Эскысьяс дінӧ муслун йылысь абу колана гижны тіянлы, ӧд Ачыс Енмыс велӧдіс тіянӧс радейтны ӧта-мӧднытӧ. Ті збыльысь радейтанныд Македония пасьтала став эскысьсӧ.
Вокъяс, корам тіянӧс: радейтӧй ӧта-мӧднытӧ нӧшта на ёнджыка. Зільӧй овны лӧня. Быдӧн мед вӧчӧ ассьыс удж, ас ки помысь шедӧдӧ олӧм вылас. Тадзи ми велӧдлім тіянӧс. Сэки эскытӧмъяс тшӧтш кутасны пыдди пуктыны тіянӧс, тіян ставыс лоӧ тырмымӧн.
Вокъяс, кӧсъя, мед ті тӧдінныд, мый лоӧ кулӧмаяскӧд. Сэки эскытӧмъяс моз онӧ кутӧй шогсьыны кулӧмаяс йылысь, ӧд эскытӧмъяслӧн лачаныс абу.
Ми кӧ эскам, мый Исус куліс и ловзис, сідзкӧ, Исускӧд Енмыс вайӧдас Ас дінас тшӧтш найӧс, коді эскис Исуслы, но куліс нин.
Ӧні висьталам тіянлы Господьлысь кывъяссӧ: ми, кодъяс ловъяӧсь на Господь локтӧдз, огӧ пановтӧй кулӧмаясӧс. Кор кылас чукӧстӧм шы, кор шыасяс архангел да кылас Енлӧн труба шыыс, Ачыс Господь лэччас енэжсяньыс. Сэки медводз ловзясны кулӧмаяс, кодъяс эскисны Кристослы. Сэсся миянӧс, ловъяясӧс, накӧд тшӧтш лоӧ кыпӧдӧма кымӧръяс вылын сынӧдас, медым аддзысьны сэні Господькӧд. Тадзи пыр лоам Господькӧд.
Сідзкӧ, ышӧдӧй ӧта-мӧднытӧ тайӧ кывъяснас.
5 юр.
Вокъяс, урчитӧм кад йывсьыс абу колана гижны тіянлы. Ті ӧд асьныд бура тӧданныд, мый Господьлӧн луныс войся гусясьысь моз воас.
Кор йӧзыс кутасны шуавны: «Гӧгӧр лӧнь, повнысӧ нинӧмысь», сэки тӧдлытӧг суас найӧс кулӧм, кыдзи тӧдлытӧг суӧ кага чужтысьӧс дой. Сэки некод оз вермы пышйынысӧ.
Вокъяс, ті онӧ пемыдас олӧй. Сідзкӧ, сійӧ луныс оз лок тіян дінӧ гусясьысь моз тӧдлытӧг.
Ӧд быдӧн ті — луныслӧн да югыдыслӧн ныв-пи.
Ми абу пемыдыслӧн, абу войыслӧн ныв-пи.
Сідзкӧ, мукӧдыс моз огӧ кутӧй узьны. Садьмӧдчам да кутам овны садь вежӧрӧн.
Ӧд узьысьяс войнас узьӧны, да юысьяс войнас кодалӧны.
Ми — луныслӧн ныв-пи. Сідзкӧ, кутам овны садь вежӧрӧн. Пасьталам ас выланым муслуныслысь да эскӧмыслысь кӧрт кышӧдсӧ, а юр вевттьӧд пыдди босьтам мездмӧм вылӧ лачасӧ. Ӧд Енмыс бӧрйис миянӧс эз сы могысь, медым Сылӧн скӧрлуныс суис миянӧс, но сы могысь, медым Исус Кристос Господьным пыр ми босьтім мездмӧмсӧ. Кристос куліс миян вӧсна, медым ми, ловъяӧсь али кулӧмаӧсь, олім Сыкӧд.
Сідзкӧ, ӧнія моз водзӧ ышӧдӧй да ёнмӧдӧй ӧта-мӧднытӧ.
Вокъяс, корам тіянӧс: пыдди пуктӧй тіян пӧвстын уджалысьясӧс, Господькӧд ӧтувъя олӧмас тіянӧс туйдӧдысьясӧс да тіянӧн веськӧдлысьясӧс. Вылӧ пуктӧй татшӧм йӧзсӧ, радейтӧй найӧс налӧн уджысь.
Ас костаныд олӧй лӧня.
Вокъяс, корам тіянӧс: дышъясӧс туйдӧдӧй, полысьясӧс ышӧдӧй, жебъясӧс кутыштӧй, быдӧнӧс терпитӧй.
Видзчысьӧй, мед некод лёксьыс эз мынтысь лёкӧн.
Мӧдарӧ, зільӧй вӧчны бурсӧ ӧта-мӧдныдлы да став йӧзыслы.
Пыр нимкодясьӧй.
Дугдывтӧг кевмысьӧй.
Ставсьыс аттьӧалӧй Енсӧ, ӧд татшӧмъясӧн Енмыс кӧсйӧ аддзыны тіянӧс, Исус Кристослы эскысьясӧс.
Ловлысь ыпъялӧмсӧ энӧ кусӧдӧй.
Пророкъяслысь висьталӧмсӧ энӧ ӧтдортӧй.
Ставсӧ тӧдмалӧй, бурас кутчысьӧй.
Ылыстчӧй быдпӧлӧс лёксьыс.
Лӧньлуныслӧн Ен мед Ачыс тырвыйӧ вежӧдас тіянӧс да видзас тіянлысь ловнытӧ, олӧмнытӧ да вир-яйнытӧ сӧстӧмӧн миян Господь Исус Кристос локтігкежлӧ.
Сійӧ, коді корис тіянӧс, эскана. Сідзкӧ, вӧчас шуӧм сертиыс.
Вокъяс, кевмысьӧй миян вӧсна.
Став вокъясӧс чолӧмалӧй вежа окыштӧмӧн.
Кора тіянӧс Господь нимӧн: лыддьӧй тайӧ гижӧдсӧ став вежа вокъяслы.
Миян Господь Исус Кристослӧн буралӧмыс тіянкӧд.
Аминь.
Апостол Павеллӧн Фессалоникаӧ мӧд мӧдӧдӧм гижӧд
1 юр.
Павел, Силуан да Тимофей чолӧмалӧны тіянӧс, миян Ен Батьлысь да Господь Исус Кристослысь фессалоникаса вичкоӧс.
Буралӧм да лӧнь олӧм тіянлы Ен Батьнымсянь да Господь Исус Кристоссянь.
Вокъяс, миянлы век колӧ ошкыны Енсӧ тіянысь, ӧд тіян эскӧмныд лунысь-лун ёнмӧ да ӧта-мӧд костаныд муслунныд ёнджыка на содӧ. Та вӧсна ми ошйысям тіянӧн Ен вичкоясын, ӧд быдпӧлӧс сьӧкыдсӧ нуигӧн да тіянӧс вӧтлігӧн ті зумыда эсканныд. Енмыс лыддьӧ тіянӧс шогманаясӧн пырны Аслас Юраланінӧ, ӧд дзик та понда ті нуанныд сьӧкыдсӧ. Таын тыдалӧ Енлӧн веськыдлуныс. Енмыс веськыда вӧчӧ: тіянӧс дзескӧдысьяслы Сійӧ мынтысьӧ дзескӧдӧмӧн.
А тіянлы да миянлы, сьӧкыдсӧ нуысьяслы, Енмыс сетас шойччӧг, кор Господь Исус Аслас вына анделъяскӧд лэччас енэжсянь ыпъялан би пытшкын да мыждас найӧс, кодъяс оз тӧдны Енсӧ да оз кывзыны миян Господь Исус Кристослысь Бур Юӧрсӧ. Найӧс лоӧ мыждӧма пыр кежлӧ кулӧм вылӧ, торйӧдӧма Господьысь, Сылӧн дзирдлунысь да вынысь. Тайӧ лоӧ сійӧ лунӧ, кор Господь локтас. Сэки Сылӧн став вежа войтырыс кутас ошкыны Господьӧс да став эскысьыс кутас шензьыны Сы вылӧ. Ті тшӧтш лоанныд на лыдын, ӧд ті эскинныд миян висьталӧмӧ.
Та вӧсна, дугдывтӧг кевмысям тіян вӧсна, медым Енным лыддяс тіянӧс шогманаясӧн лоны Аслас корӧмаяс лыдын, медым Аслас вынӧн Сійӧ ёнмӧдас тіянлысь бур кӧсйӧмнытӧ да эскӧмныд пыр отсалас помӧдз вайӧдны бур уджъяснытӧ. Сэки миян Господь Исус Кристослӧн нимыс ошкыссяс тіян пыр, а ті — Сы пыр, миян Ен да Господь Исус Кристослӧн буралӧмыс кузя.
2 юр.
Ӧні гижам тіянлы миян Господь Исус Кристослӧн локтӧм йылысь да Сы дінӧ миян чукӧртчӧм йылысь. Вокъяс, корам тіянӧс: энӧ майшасьӧй некутшӧм гижӧдысь либӧ кодлӧнкӧ сёрниысь, быттьӧ сійӧ Ловсянь висьталӧ, мый Кристослӧн луныс воис нин. Энӧ полӧй, весиг висьталасны кӧ тіянлы, мый тайӧс ми гижим.
Энӧ сетӧй асьнытӧ ылӧдлыны некодлы, ӧд сійӧ луныс воас сӧмын сэки, кор йӧзыс кежасны Енсьыс. Сэки локтас мыжыслӧн морт, кулӧмыслӧн пи, Енлы паныд мунысь. Сійӧ пуктас асьсӧ ставсьыс вылӧ, мый йӧзыс Енмӧн лыддьӧны да шуӧны вежаӧн. Сійӧ пуксяс Енлӧн крамӧ быттьӧ Ен да кутас шуны асьсӧ Енмӧн.
Тіянӧ волігӧн ме висьтавлі нин та йылысь, ті ӧмӧй вунӧдінныд?
Ӧні ті тӧданныд, мый кутӧ паныд мунысьӧс кадысь водз воссьӧмысь.
Ен Индӧдлы паныд мунысь вӧчӧ нин ассьыс гуся уджъяссӧ. Кор лоӧ босьтӧма сылӧн туй вылысь сійӧс кутысьӧс,
сэки паныд мунысь воссяс. Но Господь Исус локтігас виас сійӧс Аслас лолыштӧмнас да бырӧдас сійӧс Аслас дзирдлуннас. Паныд мунысьыс локтас сӧтанасянь. Ыджыд вынӧн сійӧ кутас петкӧдлыны индысьпасъяс да вӧчны ылӧг шензьӧданаторъяс. Сійӧ быдногыс кутас ылӧдлыны найӧс, кодъяс мунӧны кулӧмас. Ӧд найӧ мустӧмтісны мездана збыльсӧ.
Та вӧсна Енмыс лэдзас ылӧдлыны найӧс, медым найӧ эскисны ылӧгыслы. Тадзи лоӧ мыждӧма быдӧнӧс, коді радейтӧ ылӧгсӧ да оз эскы збыльыслы.
Вокъяс, миянлы дугдывтӧг колӧ ошкыны Енсӧ тіянысь. Ті ёна мусаӧсь Господьлы, ӧд Енмыс водзысяньыс бӧрйис тіянӧс мездмӧм вылӧ. Тайӧ мездмӧмсӧ Сійӧ сетӧ тіянлы Ловлӧн вежӧдӧмыс пыр да збыльыслы эскӧмныд пыр. Ми висьтавлім тіянлы Бур Юӧрсӧ, код пыр Енмыс корис тіянӧс мездмӧмас, мед миян Господь Исус Кристослӧн дзирдлуныс вичмис тіянлы.
Сідзкӧ, вокъяс, зумыда сулалӧй да кутчысьӧй сэтчӧ, мыйӧ велӧдім тіянӧс да мый гижим тіянлы.
Ен Батьнымлы ми ёна мусаӧсь. Буралӧмыс вӧсна Сійӧ сетіс миянлы пыр кежлӧ бурӧдӧм да зумыд лача. Ачыс Исус Кристос Господьным да Ен Батьным мед бурӧдасны тіянлысь сьӧлӧмнытӧ да ышӧдасны тіянӧс бур уджъяс вылӧ да бур сёрни вылӧ.
3 юр.
Вокъяс, медбӧрти корам тіянӧс: кевмысьӧй миян вӧсна, мед Господьлӧн Кывйыс ӧдйӧ паськалас, медым йӧзыс тіян моз сибӧдасны сійӧс пыдди пуктӧмӧн. Нӧшта кевмысьӧй, мед Ен видзас миянӧс шогмытӧм да лёк йӧзысь, ӧд оз быдӧн эскы.
Но Господь эскана, Сійӧ ёнмӧдас тіянӧс да видзас омӧльысь.
Господь эскӧдӧ миянӧс, мый ті вӧчанныд нин миян тшӧктӧм серти да водзӧ на сідзи кутанныд вӧчны.
Ачыс Господь мед веськӧдас тіянлысь сьӧлӧмнытӧ Енлӧн муслунас да Кристослӧн зумыдлунас.
Вокъяс, миян Господь Исус Кристос нимӧн тшӧктам тіянлы: ылыстчӧй эскысь вокысь, коді весь олӧ да оз ов миян велӧдӧм серти. Ті ӧд асьныд тӧданныд, мый тіянлы колӧ овны миян моз.
Тіян дінын ми весь эгӧ олӧй, некодлысь дась нянь эгӧ сёйӧй. Лун и вой пӧсь петтӧдз уджалім, ӧд некодӧс тіян пӧвстысь эгӧ кӧсйӧй сьӧктӧднысӧ. Дерт, ми вермим весь овны, но тадзи эгӧ вӧчӧй. Ми кӧсйим, мед ті видзӧдінныд миян вылӧ да олінныд миян моз.
Ӧд тіянӧ волігӧн ми шулім нин: «Коді оз кӧсйы уджавны, сійӧ мед оз сёй».
Миянлы кывсис, тіян пӧвстысь пӧ ӧткымынӧн весьшӧрӧ кадсӧ коллялӧны. Найӧ оз уджавны да нырсӧ быдлаӧ сюйӧны.
Татшӧм йӧзсӧ миян Господь Исус Кристос нимӧн корам да ышӧдам: уджалӧй рам сьӧлӧмӧн да ас ки помысь шедӧдӧй аслыныд кынӧмпӧттӧ.
Вокъяс, бурсӧ вӧчигӧн энӧ лигышмунӧй.
Коді оз вӧч тайӧ гижӧдас висьталӧм серти, сійӧс кутӧй тӧд выланыд. Татшӧм мортыскӧд энӧ кутӧй некутшӧм йитӧд. Тадзи ті янӧданныд сійӧс.
Сӧмын энӧ лыддьӧй сійӧс паныд мунысьӧн, а туйдӧдӧй сійӧс вокӧс моз.
Ачыс Господь, лӧньлунсӧ Сетысь, мед быд кадӧ да быдторйын сетас тіянлы лӧньлунсӧ.
Господь мед лоас ставныдкӧд тіянкӧд.
Ме, Павел, аслам киӧн гижа тіянлы чолӧмӧс, коді лоӧ пасӧн, мый гижӧдыс месянь.
Ме гижа тадзи быд гижӧдын: миян Господь Исус Кристослӧн буралӧмыс ставныдкӧд тіянкӧд.
Аминь.
Апостол Павеллӧн Тимофейлы медводдза мӧдӧдӧм гижӧд
1 юр.
Гижӧ Павел, Исус Кристослӧн апостол. Миянӧс мездысь Ен да Господь Исус Кристос, код вылӧ ми кутам лача, индісны менӧ апостолӧн. Тимофей, эскӧмыд вӧсна тэ меным збыльысь пи кодь.
Бурсетӧм, буралӧм да лӧнь олӧм тэныд Ен Батьнымсянь да миян Господь Исус Кристоссянь.
Македонияӧ мӧдӧдчигӧн ме кори тэнӧ олыштны Ефесын кодсюрӧӧс ӧлӧдӧм могысь, медым найӧ эз велӧдны ылӧгас, эз кутчысьны мойдъясӧ да дугдісны корсьысьны, коді кутшӧм чужанвужйысь петіс. Ӧд тасянь сӧмын вензьӧм артмӧ Енлы кесъялӧм пыдди.
Енмыслы позьӧ кесъявны сӧмын эскӧмӧн. Миян ӧлӧдӧмлӧн медшӧр могыс — радейтӧм. Сійӧ петӧ сӧстӧм да мыжтӧм сьӧлӧмсянь да восьса сьӧлӧмӧн эскӧмсянь. Кодсюрӧ кежисны таысь да сетчисны ковтӧм сёрниясӧ. Найӧ пуктӧны асьнысӧ Индӧдӧ велӧдысьясӧ, но асьныс оз гӧгӧрвоны, мый висьталӧны да мыйӧ велӧдӧны.
Ми тӧдам: Индӧдыс бур, вӧдитчыны кӧ сыӧн бур ногӧн. Гӧгӧрвоам, мый Индӧдсӧ лӧсьӧдӧма абу веськыда олысьлы, а сійӧс торкалысьлы да кывзысьтӧмлы, Ентӧг олысьлы да мыж вӧчысьлы, эскытӧмлы да Енмӧс омӧльтысьлы, бать-мам вылӧ ки лэптысьлы да морт виысьлы, кырсалысьлы да ӧта-мӧдыскӧд узьлысь айуловлы, мортӧн вузасьысьлы, пӧръясьысьлы, ылӧгвисьталысьлы да быдӧнлы, коді паныд мунӧ веськыд велӧдӧмлы. Ӧд тадзи висьталӧ ошкана Енлӧн дзирдлун йылысь Бур Юӧрыс, и тайӧ Юӧрсӧ висьтавлыны Енмыс мӧдӧдіс менӧ.
Ме аттьӧала миянлысь Господь Исус Кристосӧс, ӧд Сійӧ ёнмӧдіс менӧ да лыддис менӧ шогманаӧн кесъявны Сылы. Водзынсӧ ме омӧльті Кристосӧс, вӧтлі-дзескӧді Сылы эскысьясӧс да лёк вӧчи налы. Но Кристос вӧлі бур сьӧлӧма ме дінӧ, ӧд тадзисӧ ме вӧчи гӧгӧрвотӧмла да эскытӧмла.
Миян Господь озыра тыртіс менӧ Аслас буралӧмнас. Исус Кристос пыр Сійӧ сетіс меным эскӧм да муслун.
Мый ӧні висьтала тіянлы — тайӧ эскана, сійӧс шогмӧ сибӧдны сьӧлӧманыд. Исус Кристос локтіс муюгыдас, медым мездыны мыжаясӧс, и на пиысь ме медся мыжаыс. Енмыс вӧлі бур сьӧлӧма ме дінӧ.
Ӧд ме пыр, медся мыжаыслӧн олӧм пыр, Исус Кристос петкӧдліс Ассьыс терпитӧмсӧ налы, кодъяс эскасны Сылы да босьтасны помтӧм олӧмсӧ.
Енмыс пыр олысь, Сійӧ ыджыдалӧ помтӧг. Ыджыд мывкыда тыдавтӧм ӧти Енлы ошкӧм-нимӧдӧмыс нэмъяс чӧж.
Аминь.
Тимофей, муса пиӧй, кутчысь пророкъяслӧн тэ йылысь висьталӧмас да вермась бур тышкасьысь моз. Видз эскӧмтӧ да ов сідзи, мед сьӧлӧмыд эз мыжды тэнӧ. Ӧд кодсюрӧ вунӧдісны тайӧс, и налӧн эскӧмыс пасьмуніс. Татшӧмӧсь Именей Ӧльӧксанкӧд. Найӧс ме сеті сӧтана киӧ, медым дугдісны омӧльтны Енсӧ.
2 юр.
Медводз кора тіянӧс: кевмысьӧй Енмыслы, шыасьӧй Сы дінӧ корӧм-кевмӧмӧн да аттьӧалӧмӧн став йӧзыс вӧсна. Кевмысьӧй юралысьяс да ыджыдалысьяс вӧсна, медым ми олім лӧня да зыксьытӧг, вежавидзӧмӧн да шогмана ногӧн. Ӧд тайӧ бур да шогмӧ Енмыслы, миян Мездысьлы. Сійӧ кӧсйӧ, медым став йӧзыс мездмисны да тӧдісны збыльсӧ.
Енмыс ӧти. Ен да морт костын сулалысьыс тшӧтш ӧти: Морт, Исус Кристос. Сійӧ сетіс Асьсӧ, медым ньӧбны став йӧзсӧ.
Тайӧ петкӧдлӧ, мый мездана кадыс воис нин. Енмыс сувтӧдіс менӧ, медым юӧртны та йылысь. Кристос водзын ме збыльысь висьтала, ог пӧръясь: менӧ индӧма апостолӧн да ентӧдтӧмъясӧс збыляс-эскӧмас велӧдысьӧн.
Ме кӧсъя, медым айулов быдлаын кевмысисны кинысӧ кыпӧдӧмӧн, сӧстӧм сьӧлӧмӧн, лӧгавтӧг да майшасьтӧг.
Кӧсъя, медым аньяс пасьтасисны лючки-бура, мичмӧдісны асьнысӧ рамлунӧн да вежавидзӧмӧн, а эз юрсинысӧ баситӧмӧн, зарни-жемчуг ӧшлӧмӧн да дона паськӧмӧн. Найӧ мед мичмӧдасны асьнысӧ бур уджъясӧн. Тадзи колӧ вӧчны Ен водзын вежавидзысь аньяслы.
Аньяс мед чӧла да кывзысьӧмӧн велӧдчасны.
Аньлы ог лэдз велӧдны айловӧс либӧ ыджыдавны сы вылын, ань мед чӧв олӧ.
Ӧд водзджык вӧлі вӧчӧма Адамӧс, сэсся Еваӧс.
Эз Адам ылав, но ань ыштӧмыс вӧсна ылаліс да мыж вӧчис.
Но ань мездмас кага чужтӧм пыр, кутчысяс кӧ эскӧмас, муслунас, вежавидзӧмас да бур оласногас.
3 юр.
Тайӧ збыль: коді кӧсйӧ вичкоӧн веськӧдлыны, сійӧ бур удж кӧсйӧ вӧчны.
Вичкоӧн веськӧдлыны вермӧ сӧстӧм оласнога, ӧти гӧтыра, садь да сюсь вежӧра, бур оласнога морт. Ветлысь-мунысьӧс сибӧдӧ, кужӧ велӧдны, оз ю, оз тышкась, аслыс оз курав, рам сьӧлӧма, оз пинясь, сьӧм вылӧ оз горшась, бура веськӧдлӧ аслас гортнас. Сылӧн ныв-пиыс кывзысьӧны сылысь да пыдди пуктӧны сійӧс.
Ӧд сійӧ кӧ оз сяммы веськӧдлыны гортнас, вермас-ӧ тӧждысьны Енлӧн Вичкоыс вӧсна?
Вичкоса веськӧдлысьнас оз вермы лоны морт, коді сӧмын на бергӧдчис Ен дінӧ. Ӧд сійӧ вермас вылӧ кыпӧдчыны да омӧльыс моз веськалас мыждӧм улӧ.
Зэв колана, медым вичкоысь ӧтдор мукӧдыс тшӧтш пыдди пуктісны сійӧс. Сэки лёк сёрниыс сы йылысь оз паськав, да сійӧ оз шед омӧльлӧн налькйӧ.
Вичкоса отсасьысьяс мед лоасны мывкыдаӧсь, сёрнитасны веськыда, оз кодавны, аслыныс оз куравны, кутчысясны эскӧмлӧн гусяторйӧ да видзасны сьӧлӧмнысӧ сӧстӧмӧн.
Найӧс колӧ водзвыв тӧдмавны, сэсся, шогманаӧсь кӧ, мед кесъялӧны.
Аньяс мед тшӧтш лоасны мывкыдаӧсь, садь вежӧраӧсь, быдторйын эсканаӧсь да оз суклясьны.
Вичкоса отсасьысь мед вӧлі ӧти гӧтыра, бура веськӧдліс гортнас да ныв-пинас.
Ӧд бура кесъялысьӧс вылӧ донъяласны, сійӧ кутас повтӧг висьтавлыны Исус Кристослы эскӧм йылысь.
Лача кута, мый регыд локта тэ дінӧ. Гижа тайӧс, медым, падма кӧ, тэ тӧдін, кыдзи кутны асьтӧ Ен керкаын, ловъя Енлӧн Вичкоын. Ӧд Вичкоыс — збыльыслӧн сюръяыс да подулыс.
Кывшутӧг, миян эскӧмлӧн гусяторйыс ыджыд:
Енмыс восьтіс Асьсӧ вир-яйын, Лолыс петкӧдліс Сылысь веськыдлунсӧ, Сійӧс аддзылісны анделъяс, Сы йылысь юӧртісны мукӧд войтырлы, Сылы эскисны муюгыдас, Сійӧ кыпӧдчис дзирдлунас.
4 юр.
Лов веськыда висьталӧ, мый бӧръя кадас кодсюрӧ кежасны эскӧмысь. Найӧ пондасны кывзыны ылӧдчысь ловъясӧс да кутчысясны пеж ловъяслӧн велӧдӧмӧ. Татшӧм велӧдӧмыс петӧ пӧръясьысьяссянь, кык бана шаньгаяссянь, кодъяс воштӧмаӧсь яндзимнысӧ. Найӧ оз лэдзны гӧтрасьны да сёйны сійӧ, мый Енмыс вӧчис. Но Енмыс вӧчис сёянсӧ, медым эскысьяс, збыльсӧ тӧдысьяс, сёйисны сійӧс Енсӧ аттьӧалӧмӧн.
Ӧд Енмыслӧн став вӧчӧмторйыс бур. Сёян кӧ аттьӧалӧмӧн, сэки нинӧмысь повнысӧ. Ӧд кевмысьӧм да Енлӧн Кывйыс вежӧдӧны сійӧс.
Туйдӧд тадзи вокъястӧ, сэки тэ лоан Исус Кристослӧн бур кесъялысьӧн. Ӧд тэ пӧткӧдан асьтӧ эскӧмлӧн кывъясӧн да бур велӧдӧмӧн, мый серти олан.
Ылӧг да ковтӧм мойдъясысь ылыстчы, велӧдчы овны вежавидзӧмӧн. Ӧд вир-яйтӧ ёнмӧдӧмысь бурыс этша, а вежавидзана олӧмысь — уна. Сійӧ сетӧ лача ӧнія да локтана олӧм вылӧ.
Тайӧ висьталӧмыс эскана, сійӧс шогмӧ сибӧдны сьӧлӧмад.
Ми ёна мырсям да нуам лёкӧдӧмсӧ, ӧд лачанымӧс кутам ловъя Ен вылӧ. Сійӧ — быдӧнлы Мездысь, торйӧн нин эскысьяслы.
Туйдӧд-велӧд татчӧ.
Некод мед оз увтырт тэнӧ томлун вӧснаыд.
Тэнад сёрниыд, оласногыд, муслуныд, сьӧлӧмыд, эскӧмыд да сӧстӧмлуныд мед лоӧ шогмана, мед эскысьяс вермисны овны тэ моз.
Менам локтӧдз лыддьы Енлысь Кывсӧ да туйдӧд-велӧд йӧзсӧ.
Видз Енсянь сетӧмторсӧ, кодӧс вӧлі сетӧма тэныд пророклӧн висьталӧмыс пыр вичкоса юрнуӧдысьяслӧн ки пуктылігӧн.
Тӧждысь та вӧсна, ставсӧ вӧч сьӧлӧмсяньыд, сэки быдӧн аддзас тэнсьыд вермӧмтӧ.
Видзӧд ас бӧрсяыд: кыдзи олан да мыйӧ велӧдан.
Вӧч тайӧс дугдывтӧг, ӧд тадзи вӧчигӧн тэ асьтӧ мездан, тшӧтш тэнӧ кывзысьясӧс.
5 юр.
Пӧрысьясӧс чорыда эн ӧлӧд, туйдӧд найӧс батьтӧ моз, томджыкъясӧс — воктӧ моз. Олӧма аньясӧс туйдӧд мамтӧ моз, томджыкъясӧс велӧд сӧстӧм сьӧлӧмӧн чойтӧ моз.
Тӧждысь ӧткӧн олысь дӧваяс вӧсна.
Эм кӧ дӧвалӧн ныв-пи либӧ налӧн ныв-пи, найӧ мед вежавидзӧмӧн тӧждысясны гортсаыс вӧсна да бурӧн мынтысясны бать-мамыслы да пӧль-пӧчыслы. Ӧд тайӧ шогмӧ Енмыслы.
Дзик ӧткӧн олысь дӧва лача кутӧ Ен вылӧ да лун и вой кевмысьӧ Енмыслы.
А лышкыда олысь — ловъявывсьыс кулӧма.
Туйдӧд тадзи дӧваясӧс, медым найӧ олісны сӧстӧма.
Коді оз тӧждысь матыссаыс вӧсна, торйӧн нин гортсаыс вӧсна, сійӧ эновтӧма эскӧмсӧ да эскытӧм дорысь лёкджык на.
Дӧва лыдӧ позьӧ пыртны сӧмын квайтымын арӧсаӧс да сыысь ыджыдджык арлыда аньӧс, вӧлӧма кӧ сійӧ ӧтчыдысь верӧс сайын, да тӧдӧны сійӧс бур уджъясыс серти: бур ногӧн быдтӧма-велӧдӧма ныв-писӧ, сибӧдӧма ветлысь-мунысьӧс, мыськалӧма вежа войтырлысь кокнысӧ, отсалӧма сьӧкыдалысьяслы да вӧчӧма быд бурсӧ.
Томджыкъясӧс эн пырт дӧваяс лыдӧ. Кор найӧ сетчӧны ыштӧмас, сэки ылыстчӧны Кристосысь да тэрмасьӧны петны верӧс сайӧ.
Найӧ мыжмӧны, ӧд найӧ ӧтдортчӧны эскӧмысь. Керкаысь керкаӧ ветлігӧн найӧ весьшӧрӧ кад коллялӧны, суклясьӧны, быдлаӧ сюйсьӧны да паськӧдӧны ковтӧм сёрнияс.
Та вӧсна кӧсъя, медым том дӧваяс петісны верӧс сайӧ, кага чужтісны да тӧждысисны гортныс вӧсна. Сэки найӧ оз сетны помкасӧ паныд мунысьяслы омӧльтны эскысьясӧс.
Ӧд кодсюрӧ кежисны веськыд туй вывсьыс да мунӧны сӧтана бӧрся.
Эскысьлӧн кӧ матыссаяс пӧвстас эм дӧва, сылы колӧ тӧждысьны дӧваыс вӧсна, оз ков Вичкосӧ сьӧктӧдны. Сэки Вичкоыс вермас тӧждысьны збыль дӧваяс вӧсна.
Вичкоса юрнуӧдысьясӧс, кодъяс бура уджалӧны, колӧ вылӧ донъявны, торйӧн нин Ен Кыв висьталысьясӧс да велӧдысьясӧс. Налы колӧ бура мынтысьны.
Ӧд Гижӧдыс висьталӧ: «Вартысь ӧшлысь вомсӧ эн тупкы» и «Уджалысьлы колӧ мынтыны уджыс серти».
Вичкоса юрнуӧдысьӧс кӧ мыждӧны мыйыськӧ, тайӧ мыждӧмсӧ эн кывзы, оз кӧ сійӧс вынсьӧдны кык-куим аддзылысь-висьталысь.
Мыж вӧчысьӧс янӧд ставныс водзын, медым мукӧдыс тшӧтш полісны мыжсӧ вӧчны.
Кора тэнӧ Ен водзын, Господь Исус Кристос водзын да бӧрйӧм анделъяс водзын: кутчысь тайӧ туйдӧдӧмъясас. Нинӧм эн вӧч ассяньыд, чужӧм вылӧ видзӧдӧмӧн.
Эн тэрмась ки пуктывны кодкӧ вылӧ, медым эн мыжмы сылӧн мыж вӧчӧм вӧсна.
Видз асьтӧ сӧстӧма.
Гырк висьӧмыд да тшӧкыда нёрпалӧмыд вӧсна ваысь ӧтдор юышт тшӧтш винатор.
Ӧтияслӧн мыжыс тыдалӧ, и найӧс мыждӧны нин. Мӧдъяслӧн мыжыс воссяс бӧрыннас.
Бур уджъясыд тшӧтш тыдалӧны, а оз на кӧ, бӧрыннас воссясны.
6 юр.
Сийӧсувса кесйӧгъяс, быдторйын пыдди пуктӧй ыджыдъяснытӧ, медым эз вӧв лёкӧдӧма Енлысь нимсӧ да Сылысь велӧдӧмсӧ.
Кесйӧглӧн ыджыдыс кӧ эскысь, и эскӧм сертиныс найӧ вокъяс, кесйӧг мед оз пукты ыджыдсӧ нинӧм туйӧ.
Мӧдарӧ, мед ёнджыка на кесъялӧ ыджыдыслы, ӧд сійӧ кесъялӧ муса эскысь мортлы.
Тадзи велӧд-туйдӧд.
Коді велӧдӧ мӧдторйӧ да оз кутчысь миян Господь Исус Кристослӧн веськыд кывъясас да велӧдӧмас, мый вайӧдӧ вежавидзана оласногӧ, татшӧм мортыс вылӧ пуктӧ асьсӧ да нинӧм оз гӧгӧрво. Сійӧ пыр кӧсйӧ вензьыны да зыксьыны. А тасянь артмӧ вежалӧм, пинясьӧм, лёкӧдӧм, гусьӧн мыждӧм да помтӧм вензьӧм на костын, кодъяслӧн пемдӧма вежӧрыс. Найӧ кежӧмаӧсь збыльсьыс да вежавидзана оласногыс пыр кӧсйӧны озырмыны сьӧмӧн.
Татшӧмъяссьыс ылыстчы.
Вежавидзӧмыс збыльысь озырмӧдӧ найӧс, кодъяс олӧны нинӧм вылӧ шуасьтӧг.
Ӧд ми нинӧм эгӧ вайӧй тайӧ муюгыдас, и нинӧм огӧ нуӧй татысь.
Эм кӧ сёян-юан да кӧм-пась, сідзкӧ, тырмӧдчам таӧн.
Озырмыны кӧсйысьяс сетчӧны ыштӧмас да шедӧны налькйӧ, сетчӧны быдпӧлӧс мывкыдтӧмлунас да лёк кӧсйӧмас, кодъяс бырӧдӧны йӧзсӧ да вайӧдӧны найӧс кулӧмӧ.
Ӧд став лёкыслӧн вужйыс — сьӧм радейтӧм. Сьӧм бӧрся вӧтлысигӧн кодсюрӧ кежисны эскӧмысь да кӧлалісны ас выланыс уна шог.
Но тэ, Ен мортӧй, ылыстчы таысь. Кутчысь веськыдлунас, вежавидзана оласногас, эскӧмас, муслунас, зумыдлунас да рамлунас.
Зумыда вермась эскӧмыд вӧсна, кутчысь помтӧм олӧмас, кытчӧ Енмыс корис тэнӧ. Ӧд уна йӧз водзын тэ восьсӧн висьтасин аслад эскӧм йылысь.
Ставыслы олӧм сетысь Ен водзын да Исус Кристос водзын, коді восьсӧн висьталіс збыльсӧ Понтий Пилатлы, ме кора тэнӧ: миян Господь Исус Кристос локтӧдз ставсӧ вӧч менам тшӧктӧм серти, сӧстӧма да веськыда. Кристослысь локтӧмсӧ ас кадӧ восьтас миянлы ошкана Ен. Сійӧ — ӧти вына Веськӧдлысь, ӧксыяслӧн Ӧксы, ыджыдъяслӧн Ыджыдыс. Сійӧ ӧтнас кувлытӧм, олӧ югыдас, кытчӧ матыстчыны он вермы. Морт Сійӧс эз аддзыв, и аддзыны оз вермы.
Сійӧс нимӧдӧмыс, Сылӧн ыджыдалӧмыс помтӧм.
Аминь.
Тайӧ нэмас озыра олысьясӧс велӧд, медым найӧ эз вылӧ кыпӧдчыны, эз кутны лачанысӧ бырана озырлун вылӧ, а ловъя Ен вылӧ. Ӧд Сійӧ лышкыда сетӧ миянлы ставсӧ, медым ми вермим овны нимкодясьӧмӧн. Велӧд озыръясӧс, медым вӧчисны бурсӧ, озырмисны бур уджъясӧн, вӧліны лышкыдӧсь да юксисны мукӧдкӧд. Тадзи вӧчигӧн найӧ чукӧртӧны аслыныс озырлун — зумыд подув локтанаыслы, медым налы вичмис помтӧм олӧм.
Тимофей, видз тэныд сетӧмасӧ. Эн кывзы йӧзыслысь ковтӧм сёрнияс да вензьӧмъяс, кодъяс петӧны ылӧг тӧдӧмлунсянь. Ӧд кодсюрӧ кутчысисны татшӧм тӧдӧмлунас да кежисны эскӧмысь.
Енлӧн буралӧмыс тэкӧд.
Аминь.
Апостол Павеллӧн Тимофейлы мӧд мӧдӧдӧм гижӧд
1 юр.
Гижӧ Павел, Ен кӧсйӧм серти Исус Кристослӧн апостол. Менӧ мӧдӧдӧма висьтавны кӧсйысьӧм пыр сетӧм олӧм йылысь. Тайӧ олӧмыс Исус Кристос пытшкын.
Бурсетӧм, буралӧм да лӧнь олӧм тэныд, муса Тимофей пиӧй, Ен Батьсянь да миян Господь Исус Кристоссянь.
Лун и вой аслам кевмысьӧмъясын ме пыр казьтывла тэнӧ да ошка Енмӧс, ме кесъяла Сылы батьясным моз сӧстӧм сьӧлӧмӧн. Тэнад синваыд оз вунлы менам. Та вӧсна ёна кӧсъя аддзӧдчывны тэкӧд, медым тырны нимкодьлунӧн. Казьтывла тэнсьыд сьӧлӧмсянь эскӧмтӧ. Тадзи эскылісны тэнад Лоида пӧчыд да Евника мамыд. Тӧда, тэ тшӧтш на моз эскан.
Та вӧсна, казьтышта тэныд: эн кусӧд Енсянь сетӧмторлысь бисӧ. Тайӧ сетӧмторсӧ тэ сибӧдін менам ки пуктылӧм пыр.
Енмыс ӧд сетіс миянлы эз полӧмыслысь лов, а выныслысь, муслуныслысь да бур мывкыдыслысь лов.
Сідзкӧ, эн яндысь висьтавлыны Господьным йылысь. Эн яндысь и меысь, Кристос вӧсна дзескыдінӧ йӧртӧмаысь.
Мӧдарӧ, Ен вынӧн тэ тшӧтш ну Бур Юӧр вӧсна сьӧкыдсӧ. Енмыс ӧд мездіс миянӧс да корис вежа олӧмас эз миян уджъясным вӧсна, а Аслас шуӧмыс да буралӧмыс вӧсна, кодӧс Сійӧ сетӧма миянлы олӧм пуксьытӧдзыс на Исус Кристос пытшкын. Ӧні миян Мездысь Исус Кристослӧн локтӧмыс восьтіс буралӧмсӧ. Кристос бырӧдіс кулӧмсӧ да Бур Юӧр пыр восьтіс олӧмсӧ да бырлытӧмсӧ. Та вылӧ менӧ и пуктӧма, медым висьтавлыны Бур Юӧрсӧ, апостолавны да велӧдны мукӧд войтырӧс.
Дзик та вӧсна ме ӧні сьӧкыдсӧ нуа да ог яндысь таысь, ӧд ме тӧда, кодлы ме эска.
Тӧда, Сійӧ вына видзны меным сетӧмасӧ Аслас локтан лунӧдз.
Кутчысь месянь кывлӧм веськыд велӧдӧмас Исус Кристоссянь босьтӧм эскӧмнад да муслуннад.
Видз тэныд сетӧм бурсӧ Вежа Лов отсӧгӧн, коді олӧ сьӧлӧманым.
Тэ тӧдан, Асияын ставныс эновтісны менӧ, весиг Фигел Ермогенкӧд.
Господь мед лоас бур сьӧлӧма Ӧнисифорлӧн гортса дінӧ, ӧд сійӧ унаысь ышӧдліс менӧ да эз яндысьлы менам пукалӧмысь. Римӧ волігас сійӧ быдлаысь корсис менӧ да аддзис.
Мед Господь лоас бур сьӧлӧма сы дінӧ Аслас локтан лунӧ. Мыйтӧм сійӧ отсасис меным Ефесын, тэ бурджыка тӧдан.
2 юр.
Ёнмӧдчы, муса пиӧй, Исус Кристослӧн буралӧмнас. Ставсӧ, мый тэ кывлін месянь уна йӧз дырйи, юксьы эскана йӧзкӧд, кодъяс сяммасны велӧдны мукӧдӧс.
Исус Кристослӧн бур тышкасьысь моз ло дась нуны сьӧкыдсӧ.
Шыпурта морт кольӧ быдлунъя тӧждъяссӧ, медым шогмыны веськӧдлысьыслы.
Панласьысь кӧ торкас ордйысянногсӧ, сылы оз шед вермысьлӧн нимыс.
Быдтасысь пайсӧ медводз босьтӧ сьӧкыд удж вӧчысь.
Вежӧрт, мый висьтала.
Господь мед отсалас тэныд ставсӧ гӧгӧрвоны.
Кут тӧд вылад Исус Кристосӧс, Давид вужйысь Чужысьӧс да кулӧмысь Ловзьысьӧс. Тадзи висьталӧ меӧн юӧртӧм Бур Юӧрыс. Тайӧ юӧр вӧснаыс ме и нуа сьӧкыдсӧ. Менӧ дорисны лёк вӧчысьӧс моз, но Енлысь Кывсӧ абу дорӧма.
Та вӧсна ме муна став сьӧкыд пырыс. Вӧча тайӧс Енлӧн бӧрйӧмаяс вӧсна, медым найӧ тшӧтш босьтісны Исус Кристоссянь мездмӧмсӧ да помасьлытӧм дзирдлунсӧ.
Тайӧ кывйыс эскана:
— Ми кӧ кулім Сыкӧд, Сыкӧд пондам овны.
Мунам кӧ сьӧкыдыс пыр, Сыкӧд пондам ыджыдавны.
Соссям кӧ Сыысь, Сійӧ соссяс миянысь.
Ми кӧ эновтам Сійӧс, Сійӧ оз эновт миянӧс, ӧд Ачыс Ассьыс соссьыны оз вермы.
Казьтыв тайӧс да Господь водзын ӧлӧд кывъяс понда венӧ пырӧмысь. Ӧд тайӧ бурсӧ оз вай, сӧмын виӧ кывзысьясӧс.
Тӧждысь шогмыны Енлы, аслад уджысь эн яндысь, збыльсӧ висьтав веськыда.
Ковтӧм сёрниысь ылыстчы, ӧд татшӧмъясыс лунысь-лун пондасны ёнджыка сетчыны Ентӧг олӧмас. Налӧн велӧдӧмыс рак висьӧм моз паськалӧ.
Именей да Филит тшӧтш на лыдынӧсь. Найӧ кежисны збыльсьыс, висьталӧны, ловзьӧмыс пӧ вӧлі нин. Татшӧм сёрнинас найӧ жугӧдӧны кодсюрӧлысь эскӧмсӧ.
Но Енмӧн пуктӧм подулыс вӧрзьывтӧм. Сэтчӧ пасйӧма: «Господь тӧдӧ Ассьыс йӧзсӧ», нӧшта пасйӧма: «Господьлысь нимсӧ висьталысь мед эновтчас лёксьыс».
Ыджыд керкаад абу сӧмын зарни да эзысь дозъяс, эмӧсь и пу да сёй дозъяс.
Ӧтияснас вӧдитчӧны торъя лунъясӧ, мӧдъяснас — быд лун.
Коді весалӧма асьсӧ став пежсьыс, сійӧ зарни да эзысь доз кодь: вежа, ыджыдыслы ёна колана да бур уджъяс вылӧ шогмана.
Ылыстчы томдырся ыштӧмъясысь. Ен дінӧ сьӧлӧмсяньыс шыасьысьяскӧд кутчысь веськыдлунас, эскӧмас, муслунас да лӧньлунас.
Ковтӧм да мывкыдтӧм вензьӧмъясысь ылыстчы. Тӧд, тайӧ вайӧдӧ зыксьӧмӧдз.
Господьлӧн кесйӧг оз вензьы, мӧдарӧ, сійӧ быдӧнкӧд мелі, кужӧ велӧдны да оз дӧзмы. Сійӧ рам сьӧлӧмӧн туйдӧдӧ паныд мунысьясӧс, гашкӧ, Енмыс сетас налы позянлун бергӧдчыны мыжъяссьыныс да тӧдмавны збыльсӧ. Сэки найӧ казяласны да мынасны омӧльыслӧн налькйысь, ӧд омӧльыс кыйӧма найӧс, медым веськӧдлыны.
3 юр.
Тӧд, бӧръя лунъясӧ пуксяс сьӧкыд кад.
Йӧзыс пондасны радейтны сӧмын асьнысӧ, ыштыны сьӧм вылӧ, пондасны ошйысьны, асьнысӧ вылӧ пуктыны, Енсӧ омӧльтны, бать-мамсӧ оз кутны кывзыны. Найӧ ӧдйӧ вунӧдӧны бурсӧ, эскытӧмӧсь, чорыд сьӧлӧмаӧсь, оз бурасьны, суклясьӧны, асьнысӧ оз кутны, скӧрӧсь, бурсӧ мустӧмтӧны, ӧта-мӧдсӧ вузалӧны, этшсӧ оз тӧдны да тшапӧсь. Енмыс дорысь налы мусаджык лышкыда олӧмыс. Ортсысяньыс видзӧдны кӧ, найӧ кутчысьӧны вежавидзӧмӧ, но, збыльвылас, найӧ оз эскыны Енмыслӧн вынӧ.
Татшӧмъяссьыс ылыстчы.
Кодсюрӧ на пӧвстысь наяна пырӧны керкаясӧ да кыскӧны асланьыс коньӧр аньясӧс, кодъяс оз вермыны мынтӧдчыны асланыс мыжъясысь да кокньыда сетчӧны асланыс кӧсйӧмъясӧ. Найӧ ӧтарӧ велӧдчӧны, но збыльыс налы оз пуксьы вежӧрас.
Кыдзи коркӧ Янний да Ямврий паныд сувтісны Мӧисейлы, ӧні тайӧ йӧзыс паныд сувтӧны збыльыслы. Налӧн вежӧрыс торксьӧма да эскӧмыс абу шогмана.
Но найӧ оз кутны дыр нимавны, Мӧисейлы паныд сувтысьяслӧн моз налӧн йӧйталӧмыс тыдовтчас.
Тэ став сьӧлӧмнад йитчин менам велӧдӧмӧ, менам олӧмӧ да менам могъясӧ. Мекӧд тшӧтш тэ эскин, терпитін, радейтін да зумыда сулалін, кор менӧ суисны Антиокияын, Иконияын да Листраын вӧтлӧмъяс да сьӧкыдлунъяс. Ме муні сэки ыджыд вӧтлӧмъяс пыр, и Господь ставсьыс менӧ мездіс.
Быдӧнӧс, коді кӧсйӧ овны вежа олӧмӧн Исус Кристос пытшкын, пондасны вӧтлыны.
А лёк да пӧръясьысь йӧзлӧн лёк вӧчӧмыс кутас содны. Найӧ унаӧс ылӧдасны, асьныс тшӧтш ылаласны.
А тэ зумыда кутчысь сэтчӧ, мыйӧ тэнӧ велӧдӧма да мыйӧ тэ эскин. Тэ ӧд тӧдан, коді велӧдіс тэнӧ.
Тэ ичӧтсяньыд тӧдан вежа Гижӧдъяс. Гижӧдыс сетӧ мывкыдлун, медым Исус Кристослы эскӧмӧн тэ вермин мездмыны.
Ставнас Гижӧдыс Ен Ловсянь да вайӧ сӧмын бур. Сійӧ велӧдӧ, янӧдӧ, вежӧ да туйдӧдӧ веськыд олӧмас, медым Енлӧн морт вӧлі тыр-бур да вӧлі дась вӧчны быдпӧлӧс бур уджсӧ.
4 юр.
Ен водзын да Господь Исус Кристос водзын, коді кутас мыждыны ловъяясӧс да кулӧмаясӧс, Сылысь локтӧмсӧ да Юралӧмсӧ тӧд вылын кутӧмӧн кора тэнӧ: ло дась висьтавны Енлысь Кывсӧ лӧсялан и лӧсявтӧм кадӧ. Бур велӧдысь моз терпитӧмӧн янӧд, ӧлӧд да туйдӧд.
Ӧд воас кад, веськыд велӧдӧмсӧ оз пондыны кывзыны. Бӧръясны аслыныс сьӧлӧм сертиыс велӧдысьясӧс, медым найӧс кывзыны. Пельнысӧ тупкасны збыльыслы да бергӧдчасны мойдъяслань.
Но мед тэнад вежӧрыд лоӧ ясыд быдторйын, сьӧкыд нуигъясад кутчысь, висьтавлы Бур Юӧрсӧ да кесъяв помӧдз.
Ӧні ме Ен водзӧ вайӧм вись кодь, воис кад меным мунны.
Ме бура вермаси, помӧдзыс котӧрті, эскӧмӧс видзи.
Ӧні менӧ виччысьӧ веськыдлуныслӧн юркытш. Веськыда мыждысь Господь Аслас лунӧ сетас сійӧс меным да быдӧнлы, коді став сьӧлӧмнас виччысьӧ Сылысь локтӧмсӧ.
Тэрмась локны ме дінӧ регыдъя кадӧ.
Димас колис менӧ да муніс Фессалоникаӧ. Сылы тайӧ мувывса олӧмыс мусаджык вӧлӧма. Крискент муніс Галатияӧ, Тит — Далматияӧ, ӧтнас Лука мекӧд.
Босьт аскӧдыд Маркӧс, сійӧ бур отсасьысь менам уджын.
Тихикӧс ме мӧдӧді Ефесӧ.
Локтігад вай менсьым кышанӧс, сійӧс ме коли Троадӧ Карп ордӧ. Босьт нӧшта менсьым небӧгъясӧс, торйӧн нин кучик вылӧ гижӧмасӧ.
Уна лёк меным вӧчис кузнеч Ӧльӧксан.
Господь Ачыс мед перъяс сылысь водзӧссӧ став уджсьыс.
Видзчысь сыысь. Сійӧ ёна паныд муніс миян велӧдӧмлы.
Ёрдын медводдза дорйысигӧн некод эз сувт ме дор, ставныс эновтісны менӧ.
Мед оз ло лыддьӧма тайӧс налы мыжӧн.
Ачыс Господь вӧлі ме дор. Сійӧ ёнмӧдіс менӧ, медым ме верми тырвыйӧ буръюӧртны, медым став кыла войтырыс кылісны тайӧ Бур Юӧрсӧ. Господь мездіс менӧ весиг лев вомысь.
Тӧда, Сійӧ видзас менӧ став лёксьыс, мездас да вайӧдас Аслас енэжвыв Юраланінӧ. Ошкӧм Сылы нэмъяс чӧж.
Аминь.
Висьтав чолӧм Прискиллалы да Акиллы, тшӧтш Ӧнисифорлӧн гортсалы.
Ераст кольччис Коринфӧ, Трӧпимӧс ме кольӧді Милитӧ, висьмис да.
Вермӧдчы локны тӧлӧдзыс.
Тэныд ыстӧны чолӧм Еввул, Пуд, Лин, Клавдия да став вокъяс.
Господь Исус Кристос тэкӧд.
Енлӧн буралӧмыс тіянкӧд.
Аминь.
Апостол Павеллӧн Титлы мӧдӧдӧм гижӧд
1 юр.
Гижӧ Павел, Енлӧн кесйӧг да Исус Кристослӧн апостол. Менӧ мӧдӧдӧма, мед отсавны Енлӧн бӧрйӧмаяслы эскыны да тӧдны збыльсӧ, медым эськӧ найӧ вермисны овны вежавидзӧмӧн да помтӧм олӧм вылӧ лачаӧн. Помтӧм олӧмсӧ Ен кӧсйысис му пуксьытӧдзыс на, и Ассьыс кывсӧ Сійӧ оз веж. Ас кадӧ Сійӧ сетіс тӧдны кывсӧ бурвисьталӧм пыр, та вылӧ менӧ и сувтӧдіс. Тайӧ вӧлі Ен Мездысьнымлӧн тшӧктӧм. Чолӧмала тэнӧ, Тит. Ӧтувъя эскӧманым тэ меным збыльысь пи кодь.
Бурсетӧм, буралӧм да лӧнь олӧм тэныд Ен Батьсянь да миян Мездысь Исус Кристос Господьсянь.
Ме коли тэнӧ Критӧ, мед тэ эштӧдін сэні помавтӧмторсӧ да быд карын индін вичкоса юрнуӧдысьясӧс, кыдзи тай ме тэныд тшӧктылі. Юрнуӧдысь мед вӧлі бур оласнога, ӧти гӧтыра, ныв-пиыс мед эскисны, быдторйын кывзысисны да лэдзчысьӧмӧн эз овны, на йылысь мед эз кыв лёк сёрни.
Вичкоса веськӧдлысьӧн вермӧ лоны сӧмын бур оласнога морт, ӧд сылы сетӧма вӧчны Енлысь удж. Мед сійӧ эз вӧв асныра, эз вӧв дӧзмысь, эз ю, эз усьлась мукӧд вылӧ, аслыс эз курав, ветлысь-мунысьӧс мед сибӧдіс, бурсӧ радейтіс, вӧлі сюсь вежӧра, быдторйын веськыд, вежавидзысь да кужис асьсӧ кутны. Сійӧ мед вӧлі зумыда кутчысьӧма велӧдӧмыслӧн збыль кывъясӧ, кужис веськыд велӧдӧмнас туйдӧдны мукӧдӧс да вермис янӧдны паныд мунысьӧс.
Ӧд унаӧн аснырасьӧны, ковтӧмсӧ сёрнитӧны да мукӧдсӧ пӧрйӧдлӧны, и унджыкыс найӧ вундыштчӧмаяс пӧвстысь. Татшӧмъясыслысь колӧ тупкыны вомсӧ.
Яндысьтӧм горшлунныс вӧсна найӧ асланыс велӧдӧмӧн шӧйӧвоштӧны дзонь керкаяс, мыйӧ оз ков велӧдӧны.
Налӧн асланыс гижысьыс весиг шулӧма:
— Критсаяс — пӧръясьысьяс, скӧр понъяс, горш кӧинъяс да дыш руньӧяс.
Веськыда шуӧма.
Та вӧсна чорыда янӧд татшӧм йӧзсӧ, медым налӧн эскӧмыс вӧлі веськыд. Найӧ мед оз кывзыны юдейяслысь мойдъяссӧ да йӧзлысь ас лӧсьӧдӧм тшӧктӧмъяссӧ. Татшӧм йӧзыс ӧд кежӧмаӧсь збыльсьыс.
Сӧстӧмлы ставыс сӧстӧм, а пежасьӧмалы да эскытӧмлы нинӧм абу сӧстӧм. Налӧн пежасьӧма вежӧрыс, весиг сьӧлӧмыс.
Найӧ шуӧны, тӧдам пӧ Енсӧ, но уджыс налӧн мӧдтор йылысь висьталӧ. Найӧ мустӧмӧсь, кывзысьтӧмӧсь и бурсӧ вӧчны оз сяммыны.
2 юр.
Тэ висьтавлы веськыд велӧдӧмыслы лӧсяланасӧ. Олӧма айуловӧс велӧд лоны авъяӧн, садь да сюсь вежӧраӧн. Мед найӧ топыда кутчысясны эскӧмас, муслунас да зумыдлунас. Олӧма аньяс мед оласны вежавидзӧмӧн, оз суклясьны, вина оз юны, туйдӧдасны томджыкъясӧс бурас, велӧдасны найӧс радейтны верӧснысӧ да ныв-писӧ, медым эськӧ том аньяс вӧліны сюсь вежӧраӧсь, сӧстӧм сьӧлӧмаӧсь, шаньӧсь, мед тӧждысясны гортныс вӧсна да кывзысясны верӧсныслысь. Сэки Ен Кывсӧ оз ло омӧльтӧма.
Зонъясӧс тшӧтш велӧд лоны сюсь вежӧраӧн.
Вӧч быд бурсӧ, мед мукӧдыс тэ вылӧ видзӧдӧмӧн тшӧтш велаласны татчӧ. Велӧд сӧстӧм сьӧлӧмӧн, вежавидзӧмӧн да Кывсӧ торкавтӧг. Сёрнит веськыда да тырвыйӧ эскӧд, медым паныд мунысь яналас да оз вермы шуны миян йылысь нинӧм лёксӧ.
Кесйӧгъяс мед быдторйын кывзысясны асланыс ыджыдныслысь, зілясны кывшутӧг шогмыны сылы. Мед оз гусясьны, мӧдарӧ, быдторйын мед петкӧдласны, мый налы позьӧ тырвыйӧ эскыны. Сэки на пыр пыдди пуктӧма лоӧ Ен Мездысьнымлысь велӧдӧмсӧ.
Енмыс петкӧдліс Ассьыс буралӧмсӧ, медым став йӧзсӧ мездыны. Буралӧмыс велӧдӧ миянӧс, мед ми эновтчим Ентӧг олӧмсьыс да быдпӧлӧс мувывса ыштӧмсьыс, вӧлім сюсь вежӧраӧсь тайӧ нэмас, олім веськыда да вежавидзӧмӧн, виччысим вына Енлысь да миян Мездысь Исус Кристослысь дзирдлуна воссьӧмсӧ да шуда лачанымлысь збыльмӧмсӧ. Кристос сетіс Асьсӧ миян вӧсна, медым мездыны миянӧс быд лёксьыс, сӧстӧммӧдны миянӧс да торйӧдны Аслыс войтырӧс, коді сьӧлӧмсяньыс пондас вӧчны бурсӧ.
Тадзи велӧд, ышӧд да янӧд тэныд сетӧм вынӧн. Эн сет асьтӧ некодлы увтыртны.
3 юр.
Казьтыв эскысьяслы, медым кывзысясны юралысьяслысь да пуктӧм йӧзлысь, пыдди пуктасны налысь веськӧдлӧмсӧ да лоасны дасьӧсь вӧчны быд бурсӧ. Мед оз омӧльтны некодӧс, зыкӧ оз пырны, лоасны шаньӧсь да быдӧнкӧд рамӧсь.
Ми ӧд асьным коркӧ вӧлім вежӧртӧмӧсь да кывзысьтӧмӧсь, вошӧмаӧсь олӧмас, сетчӧмаӧсь ыштӧмас да быдпӧлӧс ковтӧм гажӧдчӧмас. Олім лёк пытшкас, вежалім, вӧлім мустӧмӧсь, да мукӧдсӧ тшӧтш мустӧмтім.
Но Ен Мездысьным петкӧдліс миян дінӧ Ассьыс бурлунсӧ да муслунсӧ. Сійӧ мездіс миянӧс. Мездіс эз веськыд уджъясным серти, но Аслас буралӧмыс вӧсна. Ен мыськаліс миянӧс да сетіс миянлы выльысь чужны. Сійӧ выльмӧдіс миянӧс Вежа Ловнас. Исус Кристос Мездысьным пыр Сійӧ лышкыда кисьтіс миян пытшкӧ Вежа Ловсӧ, медым Сылӧн буралӧмсянь ми лоим веськыдӧсь да миянлы вичмис помтӧм олӧм. Тайӧ и эм миян лачаным.
Тайӧ кывъясыс эсканаӧсь. Ме кӧсъя, мед тэ тӧдчӧдӧмӧн пыр казьтылін тайӧс, медым Енлы эскысьяс тӧждысисны бурсӧ вӧчны. Тайӧ бур да йӧзыслы колана.
Тӧлктӧм вензяна сёрниысь, ордпу да Индӧд кузя зыксьӧм-пинясьӧмысь ылыстчы. Ставыс тайӧ ковтӧмтор да весьшӧрӧ.
Ылӧгас кежӧдысьӧс ӧтчыд да мӧдысь ӧлӧдӧм бӧрын эновт. Тӧд, татшӧм мортыс тшыкӧма, мыж вӧчӧмнас сійӧ ачыс асьсӧ мыждӧм улас сюйӧ.
Артемӧс либӧ Тихикӧс кор мӧдӧда тэ дінӧ, тэрмась волыны ме дінӧ Никопольӧ. Сэні тай шуи тӧвйынысӧ.
Отсав петны туйӧ оланпас тӧдысь Зинейлы да Аполослы, медым налы ставыс вӧлі судзсяна-тырмана.
Миян эскысьяс мед тшӧтш велӧдчасны бурсӧ вӧчны, сетны колана отсӧг, сэки найӧ вотӧстӧг оз кольны.
Чолӧм тэныд ыстӧны тані ставныс.
Висьтав чолӧм миянӧс радейтысь эскысь чой-воклы.
Енлӧн буралӧмыс ставныдкӧд тіянкӧд.
Аминь.
Апостол Павеллӧн Филимонлы мӧдӧдӧм гижӧд
1 юр.
Гижӧ Павел. Исус Кристос вӧсна ме пукала дзескыдінын. Тимофей воккӧд ми чолӧмалам муса Филимон уджъёртнымӧс. Чолӧмалам дона Апфия чойӧс да миянкӧд ӧтвыв вермасьысь Аркип ёртӧс да сы ордын чукӧртчысь эскысьясӧс.
Буралӧм да лӧнь олӧм тіянлы Ен Батьнымсянь да Господь Исус Кристоссянь.
Кевмысигам пыр казьтывла тэнӧ да аттьӧала Енмӧс. Ме кывлі Исус Господьлы тэнад эскӧм йылысь да став вежа войтыр дінӧ муслуныд йылысь. Кевмыся, медым миян ӧтувъя эскӧмным отсалас тэныд тӧдны быд бурсӧ, кодӧс сетӧма тіянлы Исус Кристос пытшкын.
Вокӧй, тэнад муслуныд ёна долыдмӧдӧ да ышӧдӧ миянӧс, ӧд тэ лӧньӧдан вежа войтырлысь сьӧлӧмсӧ.
Ме, дерт, верма Кристос нимӧн тшӧктыны тэныд вӧчны коланасӧ, но муслунӧй вӧсна шыася тэ дінӧ корӧмӧн. Ме, пӧрысь Павел, Исус Кристос вӧсна пукалысь, кора тэнӧ Ӧнисим пиӧй вӧсна. Сійӧс ме чужті тані дзескыдінын. Коркӧ сійӧ ковтӧм вӧлі тэныд, ӧні ёна колана тэныд да меным.
Ме бӧр мӧдӧда сійӧс тэ дінӧ.
Сибӧд сійӧс сьӧлӧм бердысь чуктӧдӧмторйӧс моз.
Кӧсйи сійӧс кольӧдны ас дінӧ, мед тэ пыдди отсасьыштас меным Бур Юӧр вӧсна пукалігӧн.
Но тэнад шутӧг нинӧм ог кӧсйы вӧчны, мед эськӧ тэ бурсӧ вӧчин ас кӧсйӧмӧн, а эн мырдӧн.
Гашкӧ, и колӧ вӧлі сылы кад кежлӧ тэкӧд янсӧдчывнысӧ, медым сэсся тэ сибӧдін сійӧс пыр кежлӧ. Сибӧдін эн нин кесйӧгӧс моз, но кесйӧгысь донаджыкӧс — муса вокӧс моз. Меным сійӧ ёна муса. Но тэныд сійӧ, кыдзи ас морт да нӧшта Господьсянь вок, ёна мусаджык на.
Тэ кӧ шуан менӧ аслад вокӧн, сибӧд сійӧс менӧ моз.
Тэнӧ кӧ сійӧ мыйӧнкӧ дойдіс-дӧзмӧдіс либӧ уджйӧза тэныд, ӧшӧд ставсӧ ме вылӧ.
Ме, Павел, аслам киӧн пасъя: «Ме мынтыся».
Шуны кӧ, тэ ачыд став олӧмнад меным уджйӧза.
Вокӧй, Господь нимсянь вӧч меным тайӧ бурторсӧ, лӧньӧд менсьым сьӧлӧмӧс Господь вӧсна.
Ме эска, тэ кывзысян, та вӧсна и гижа. Тӧда, тэ вӧчан унджык на менам корӧм дорысь.
Нӧшта кора, корсьлы меным оланін.
Лача кута, тіян кевмысьӧм отсӧгӧн Енмыс бӧр вайӧдас менӧ тіян дінӧ.
Чолӧм Епафрассянь, сійӧ мекӧд пукалӧ Кристос вӧсна. Марк, Аристарк, Димас да Лука, менам уджъёртъяс, тшӧтш ыстӧны чолӧм.
Миян Господь Исус Кристослӧн буралӧмыс тіянкӧд.
Аминь.
Апостол Павеллӧн еврейяслы мӧдӧдӧм гижӧд
1 юр.
Енмыс важысянь унаысь да уна ногӧн шыасьліс миян батьяс дінӧ пророкъяс пыр. Тайӧ бӧръя кадас Сійӧ шыасьліс миян дінӧ Пиыс пыр. Енмыс сетіс Сылы ставсӧ, Сы пыр вӧчис ентыкӧласӧ.
Пиыс — Енлӧн яръюгыд дзирдлуныс, Сылӧн пертасыс. Сійӧ ставсӧ кутӧ Аслас вына кывнас. Аслас Вирнас Сійӧ мыськаліс миянлысь мыжъяснымӧс, пуксис Вына Енлӧн веськыдладорӧ енэжас да лои анделъясысь вылынджык на. Сылӧн нимыс ёна тӧдчанаджык налӧн нимысь.
Ӧд ни ӧти анделлы Енмыс эз шулы:
— Тэ — Менам Пи, талун Ме лои Тэнад Батьӧн.
Ни ӧти андел йылысь Енмыс эз шулы:
— Ме лоа Сылӧн Батьӧн, Сійӧ — Менам Пиӧн.
Муюгыдас Ассьыс медводдза Чужысьсӧ пыртігӧн Енмыс шуӧ:
— Копыртчылӧй Сылы ставныд, Енлӧн анделъяс.
Анделъяс йылысь Енмыс висьталӧ:
— Ассьыс анделъяссӧ Енмыс вӧчӧ тӧвнырӧн, Ассьыс кесъялысьяссӧ — ыпъялан биӧн.
Пиыс йылысь Енмыс тадзи висьталӧ:
— Енмӧй, Тэнад юралан пуклӧсыд нэмъяс чӧж.
Тэнад веськӧдлан беддьыд — веськыдлун.
Веськыдлуныс Тэныд муса, а лёксӧ Тэ мустӧмтан.
Та вӧсна, Енмӧй, Тэнад Енмыд мавтыштіс Тэнӧ нимкодьлунӧн мукӧд дорысь ёнджыка на.
Нӧшта Енмыс шуӧ:
— Господьӧй, медводз Тэ вӧчин мусӧ, енэжыс тшӧтш Тэнад вӧчӧмтор, найӧ бырасны, а Тэ помтӧг олан. Ставыс тайӧ паськӧм моз важмас. Кӧлуйӧс моз Тэ гартыштан найӧс, да найӧ вежсясны, а Тэ некор он вежсьы. Тэнад олан лунъяслы помыс оз ло.
Некутшӧм анделлы Енмыс эз шулы:
— Пукав Менам веськыдладорын, кытчӧдз ог пукты Тэнад кок улӧ Тэныд паныд мунысьясӧс.
Анделъяс — тайӧ кесъялысь ловъяс. Енмыс мӧдӧдӧ найӧс кесъявны налы, кодъяслы вичмас мездмӧмыс.
2 юр.
Та вӧсна, миянлы ёнджыка на колӧ кутчысьны кывлӧмаыс дінӧ, медым эгӧ ылалӧй.
Ӧд анделъяс пыр висьталӧм юӧрыс кӧ вӧлі вына, да быд кывзысьтӧмлунысь да лёк вӧчӧмысь кӧ мыждылісны веськыда, сідзкӧ, мынам-ӧ ми мыждӧмсьыс, кутам кӧ нинӧм туйӧ пуктыны тайӧ ыджыдторсӧ — мездмӧмсӧ? Тайӧ мездмӧмыс йылысь медводз висьталіс Господь, сэсся Сысянь кылысьяс эскӧдісны миянӧс, мый тайӧ висьталӧмыс збыль. Тайӧ висьталӧмсӧ Енмыс ёнмӧдіс тадзи: висьталысьяс пыр Сійӧ петкӧдліс индысьпасъяс, вӧчис шензьӧданаторъяс да быдпӧлӧс ыджыд уджъяс, Ас кӧсйӧм сертиыс Сійӧ юкліс Вежа Ловсянь сетӧмторъяс.
Енмыс эз сет анделъяслы веськӧдлыны локтана муюгыднас, мый йылысь ми сёрнитам.
Кодкӧ гижлӧма та йылысь:
— Мортыс — коді сэтшӧмыс, мый Тэ казьтывлан сійӧс?
Мортлӧн пиыс — коді сэтшӧмыс, мый Тэ тӧждысян сы вӧсна?
Сӧмын дженьыд кад кежлӧ Тэ пуктін мортсӧ анделъяс дорысь улӧджык, мичмӧдін сійӧс дзирдлунӧн да нимӧдӧмӧн, сувтӧдін сійӧс веськӧдлыны Аслад вӧчӧмторнад. Тэ ставсӧ пуктін сы кок улӧ.
Енмыс ставсӧ сетіс морт кипод улӧ, сылы нинӧм эз коль сеттӧмыс.
Дерт, ӧні оз на тыдав, мый ставсӧ нин сетӧма морт кипод улӧ.
Но ми аддзам Исусӧс, кодӧс дженьыд кад кежлӧ вӧлі улӧджык пуктӧма анделъяс дорысь. Енлӧн буралӧмыс вӧсна Сійӧ куліс став йӧзыс понда. Тайӧ сьӧкыда кулӧм вӧснаыс Исусӧс ӧні мичмӧдӧма дзирдлунӧн да нимӧдӧмӧн.
Енмыс, Ставсӧвӧчысь да Ставсӧкутысь, уна ныв-пиӧс кӧсйӧ вайӧдны Аслас дзирдлунӧ. Та вӧсна Исуслы, мездмӧмас Нуӧдысьлы, Енмыс лэдзис нуны сьӧкыдсӧ, медым Сы пыр помӧдз вайӧдны Ассьыс мӧвпыштӧмсӧ.
Вежӧдысьыс да вежа войтырыс — ӧти Батьсянь.
Та вӧсна Исус оз яндысь шуны вежа войтырӧс Аслас вокъясӧн. Сійӧ шуӧ:
— Ме висьтала Тэ йылысь Аслам вокъяслы, нимӧда Тэнӧ вичко водзын.
Нӧшта шуӧ:
— Ме кута лача Ен вылӧ,
да содтӧ:
— Со, Ме да ныв-пи, кодъясӧс сетіс Меным Ен.
Тайӧ ныв-пиыслӧн эм вир-яй. Та вӧсна Кристос тшӧтш лоис на кодьӧн, медым кувлӧмнас бырӧдны омӧльӧс, кулӧмыс вылын ыджыдалысьӧс, да мездыны кулӧмысь полысьясӧс. Ӧд став олӧм чӧжныс найӧ вӧліны полӧмыслӧн кӧртӧд улынӧсь.
Кристос тӧждысьӧ Ӧвраамсянь чужысьяс вӧсна, а оз анделъяс вӧсна.
Кристослы ковмис лоны морт кодьӧн, Аслас вокъяс кодьӧн, медым лоны Сылы бур сьӧлӧма да Енлысь кывзысьысь Аркирейӧн, да медым босьтны Ас вылас йӧзлысь мыжъяссӧ.
Кристос Ачыс нуис сьӧкыдсӧ да ыштӧдӧмсӧ, та вӧсна вермӧ отсавны ыштӧдӧмаяслы.
3 юр.
Вокъяс, ме шыася тіян дінӧ, вежа войтыр да Енлӧн корӧмаяс дінӧ: видзӧдӧй Исус Кристос вылӧ. Сійӧ — Енсянь Локтысь, Аркирей, Сылы ми эскам. Енмыс сувтӧдіс Сійӧс Аркирейӧн. Сійӧ кесъяліс Енмыслы кывзысьӧмӧн, кыдзи Мӧисей «быд кадӧ кывзысьӧмӧн кесъяліс Ен керкаын».
Керка вӧчысьсӧ ёнджыка ошкӧны керкасӧ дорысь. Тадзи Исусӧс ёнджыка шогмӧ ошкыны Мӧисейӧс дорысь. Быд керкалӧн эм аслас вӧчысь, но Ставсӧвӧчысьыс — Ен.
Мӧисей «кывзысьӧмӧн кесъяліс Ен керкаын», но сійӧ вӧлі сӧмын кесъялысь. Аслас олӧмнас сійӧ водзвыв петкӧдліс, мый Енмыс кӧсйис висьтавны бӧрынджык. Ен керкаын Пиыс — Кристос, Сійӧ кывкутӧмӧн веськӧдлӧ ставнас Ен керканас. Ен керкаыс — тайӧ ми, лоам кӧ повтӧмӧсь да помӧдз кутам зумыда кутчысьны лачаас, мыйӧн ошйысям.
Вежа Лов висьталӧ:
— Талун, Енлысь гӧлӧс шысӧ кылігӧн, энӧ чорзьӧдӧй сьӧлӧмнытӧ, кыдзи ті вӧчинныд овтӧминын: кыпӧдчинныд Меным паныд да дӧзмӧдінныд Менӧ. Сэні тіян батьясныд нелямын во чӧж аддзылісны Менсьым уджъясӧс, да ыштӧдісны-дӧзмӧдісны Менӧ.
Сэки Ме дӧзми на вылӧ да шуи: «Найӧ пыр ылалӧмаӧсь», Менам туйӧд оз ветлыны.
Та вӧсна Ме дӧзми на вылӧ да сеті кыв: «Найӧ оз пырны Менам шойччанінӧ».
Вокъяс, видзчысьӧй, тіян пиысь мед некод эз вӧв эскытӧмӧн, эз ов лёк мӧвпъясӧн, медым энӧ кежӧй ловъя Енсьыс.
Быд лун ышӧдӧй ӧта-мӧднытӧ, кытчӧдз позьӧ на шуны “талун”, мед тіян пиысь некодлӧн эз чорзьы сьӧлӧмыс мыжлӧн ылӧдлӧм вӧсна.
Ми кӧ водзысяньыс моз помӧдз кутам эскыны зумыда, сэки миянлы тшӧтш вичмас Кристослӧн озырлуныс.
Та йылысь шуӧма:
— Талун, Енлысь гӧлӧс шысӧ кылігӧн, энӧ чорзьӧдӧй сьӧлӧмнытӧ, кыдзи ті вӧчинныд Меным паныд сувтігӧн.
Ӧд Енлысь гӧлӧс шысӧ кылысьяс пиысь кодсюрӧ паныд сувтісны Енмыслы, но эз ставныс, кодъяс петісны Мӧисейкӧд Египетысь.
Код вылӧ нӧ Енмыс скӧраліс нелямын во чӧжсӧ?
Эз-ӧ мыж вӧчысьяс вылӧ, кодъяслӧн лыясыс колины овтӧминӧ?
Кодлы нӧ Енмыс кыв сетіс, мый найӧ оз пырны Сылӧн шойччанінӧ? Эз-ӧ кывзысьтӧмъяслы?
Ми аддзам, мый эскытӧм вӧснаныс найӧ эз пырны Ен шойччанінӧ.
4 юр.
Енлӧн кӧсйысьӧмыс, мый ми вермам пырны Сылӧн шойччанінӧ, ӧнӧдз на вына. Сідзкӧ, кутам тӧждысьны, мед тіян пиысь некод эз сёрмы пырны Ен шойччанінӧ.
Египетысь петысьяслы вӧлі висьталӧма Бур Юӧрсӧ миянлы моз, но тайӧ нинӧм эз сет налы, ӧд найӧ эз эскыны тайӧ юӧрыслы да эз сибӧдны сійӧс сьӧлӧманыс.
Ми эским тайӧ юӧрыслы, сідзкӧ, пырам Ен шойччанінӧ.
Тайӧ шойччанін йывсьыс шуӧма:
— Ме скӧрми тайӧ йӧзыс вылӧ да сеті кыв: «Найӧ оз пырны Менам шойччанінӧ».
Енмыс шуис тадзи, кӧть муюгыдсӧ вӧчӧм бӧрын Сылӧн дасьтӧма нин вӧлі шойччанінсӧ.
Ӧд сизимӧд лун йывсьыс Гижӧдыс тадзи висьталӧ: «Сизимӧд луннас Енмыс шойччис став Аслас уджъясысь».
Но вылынджыксӧ вӧлі шуӧма нин: «Найӧ оз пырны Менам шойччанінӧ».
Но кодсюрӧ пырасны на Ен шойччанінӧ. А найӧ, кодъяслы медводз вӧлі висьталӧма Ен шойччанін йывсьыс, эз пырны сэтчӧ кывзысьтӧмлун вӧснаныс. Та вӧсна Енмыс индіс торъя лун — “талун”, ӧд уна во мысти Давид казьтыштіс Енлысь водзынджык шуӧм кывъяссӧ:
— Талун, Енлысь гӧлӧс шысӧ кылігӧн, энӧ чорзьӧдӧй сьӧлӧмнытӧ.
Исус Навин кӧ вермис сетны шойччӧг Египетысь петысьяслы, Енмыс эськӧ эз нин казьтыв кутшӧмкӧ мӧд шойччӧг йылысь.
Сідзкӧ, Ен войтырлӧн шойччӧгыс водзын на.
Ӧд мортыс кӧ пырӧма нин Ен шойччанінӧ, сійӧ Енмыс моз шойччӧ аслас уджъясысь.
Сідзкӧ, кутам зільны пырны Ен шойччанінӧ, медым тайӧ кывзысьтӧм йӧзыс моз эгӧ кольӧй Ен шойччанінӧ пыртӧг.
Енлӧн Кывйыс ловъя да вына. Сійӧ ёсьджык на кыкнанладорсяньыс лэчтӧм шыпуртысь.
Сійӧ пыдӧдз мӧрччӧ, торйӧдӧ мортлысь ловсӧ да олӧмсӧ, лысӧ да вемсӧ, восьтӧ мортлысь сьӧлӧмпытшса мӧвпъяссӧ да кӧсйӧмсӧ.
Енсьыс некод оз дзебсьы, Сылы ставыс восьса, ставыс тыдалана. Сылы ставсьыс сетам воча кыв.
Миян эм ыджыд Аркирей — Исус, Енлӧн Пи, коді муніс став енэжыс пыр. Сідзкӧ, зумыда кутчысям эскӧмас.
Миян эм Аркирей, коді бура гӧгӧрвоӧ миянӧс жеблун дырйи. Миянӧс моз Сійӧс быдторйын вӧлі ыштӧдӧма, но мыжсӧ Сійӧ эз вӧчлы.
Та вӧсна ми повтӧг матыстчам бур сьӧлӧма Енлӧн юралан пуклӧс дінӧ, медым колана кадӧ босьтны Енсянь буралӧмсӧ да бурсетӧмсӧ отсӧг вылӧ.
5 юр.
Быд аркирейӧс бӧрйӧны йӧз пӧвстысь да сувтӧдӧны кесъявны Енлы, медым вайны висьяс да сетӧмторъяс йӧзлӧн мыжъяс вӧсна. Татшӧм аркирейыс вермӧ гӧгӧрвоны мывкыдтӧмъясӧс да ылалӧмаясӧс, ӧд ачыс сійӧ на кодь жӧ вынтӧм. Та вӧсна сылы колӧ вайны вись оз сӧмын йӧзлӧн мыжъяс вӧсна, тшӧтш аслас мыжъяс вӧсна.
Морт оз вермы ачыс асьсӧ индыны аркирейӧн, тайӧс вермӧ вӧчны сӧмын Ен. Сійӧ сувтӧдіс Ааронӧс аркирейӧн.
Тадзи и Кристос: эз Ачыс Асьсӧ сувтӧд тайӧ ошкана уджыс вылӧ — лоны Аркирейӧн. Енмыс индіс Сійӧс да шуис Сылы:
— Тэ — Менам Пи, талун Ме лои Тэнад Батьӧн.
Мӧдлаын Енмыс нӧшта висьталӧ: — Мелкиседек моз Тэ пыр кежлӧ Аркирей.
Му вылын олігӧн Исус кыз синваӧн да гораа бӧрдӧмӧн корис-кевмысис Сылы, коді вермис мездыны Сійӧс кулӧмысь.
Ен кыліс Сылысь кевмӧмсӧ, ӧд Исус кывзысис Сылысь. Исус — Енлӧн Пи, но сьӧкыдсӧ нуигӧн Сійӧ велӧдчис кывзысьны. Сійӧ помӧдз вайӧдіс Енлысь мӧвпыштӧмсӧ да пыр кежлӧ лои мездмӧмсӧ Сетысьӧн быдӧнлы, коді кывзысьӧ Сылысь. Мелкиседекӧс моз Енмыс индіс Исусӧс Аркирейӧн.
Та йылысь эськӧ уна на позьӧ висьтавны, но сьӧкыд висьтавнысӧ, ӧд ті онӧ кӧсйӧй кывзынысӧ.
Видзӧдлыны кӧ кадыс вылӧ, тіянлы важӧн нин колӧ лоны велӧдысьясӧн, но миянлы выльысь лоӧ висьтавны тіянлы Енлысь Кывсӧ водзысяньыс.
Тіянӧс пыр на колӧ вердны йӧлӧн, а оз чорыд сёянӧн. Ӧд йӧлӧн пӧткӧдчысь — кага на, сійӧ оз на гӧгӧрво веськыдлун йылысь велӧдӧмсӧ. Но тыр арлыдаяслы колӧ пӧткӧдчыны чорыд сёянӧн, ӧд найӧ вермӧны нин торйӧдны бурсӧ да лёксӧ.
6 юр.
Сідзкӧ, огӧ кольччӧй Кристослӧн велӧдӧмын медводдза воськовъясас, но кутам быдмыны-верстяммыны тыр арлыдаӧдз. Миянлы абу нин колана выльысь велӧдны тіянӧс лёк уджъясысь бергӧдчӧм да Енлы эскӧм йылысь, пыртчӧм да ки пуктылӧм йылысь, кулӧмысь ловзьӧм да пыр кежлӧ мыждӧм йылысь.
Ен кӧ сетас, мунам водзӧ.
Найӧ, кодъяс тӧдлісны нин Бур Юӧрлысь югыдсӧ, босьтісны Енсянь сетӧмторсӧ, сибӧдісны сьӧлӧмас Вежа Лолӧс, тӧдмалісны Ен Кывлысь бурсӧ да аддзылісны локтана нэмлысь вынсӧ, а сэсся бӧр кежисны Кристосысь — татшӧм йӧзсӧ он нин вермы бергӧдны Ен дінӧ. Ӧд найӧ выльысь тувъялӧны Ен Пиӧс да пуктӧны Сійӧс серам туйӧ.
Зэрӧн унаысь кӧтӧдлӧм му кӧ вайӧ му вӧдитысьлы бур быдтас — Енмыс тайӧ мусӧ бурсиӧ. Муыс кӧ быдтӧ сӧмын йӧн да ёг турун — татшӧм муыс шогмытӧм, сійӧс лоӧ ёрӧма да сотӧма.
Мусаяс, кӧть ми тадзи шуам, но лача кутам, мый ті — бур муыс, ті кутчысянныд мездмӧмас.
Енмыс — веськыд, Сійӧ оз вунӧд тіянлысь уджъяснытӧ да Сылӧн нимыс дінӧ муслуннытӧ. Ӧд тайӧ муслунсӧ ті петкӧдлінныд вежа войтырлы кесъялігӧн.
Ми кӧсъям, медым ті помӧдз тадзи вӧчинныд, сэки тіян лачаныд збыльмас. Энӧ дышӧдчӧй, но лоӧй на кодьӧсь, кодъяс эскӧмӧн да терпитӧмӧн босьтӧны Енсянь кӧсйысьӧмасӧ.
Ӧвраамлы кӧсйысигӧн Енмыс Аслас нимӧн кӧсйысис, ӧд Сылӧн нимысь ыджыдджыкыс абу. Енмыс кӧсйысис: «Ме тэнӧ озыра бурсиа да сета тэныд уна чужысьӧс».
Тадзи Ӧвраам терпитӧмыс пыр босьтіс Енсянь кӧсйысьӧмасӧ.
Кыв сетігӧн йӧзыс кӧсйысьӧны мыйӧнкӧ ас дорсьыс ыджыдджыкӧн. Тайӧ кыв сетӧмыс вынсьӧдӧ налысь шуӧмсӧ да пуктӧ пом став вензьӧмлы.
Та вӧсна Ассьыс кӧсйысьӧмсӧ Енмыс вынсьӧдіс кыв сетӧмӧн, медым Сысянь кӧсйысьӧмсӧ босьтысьяслы бурджыка петкӧдлыны, мый Сылӧн мӧвпъясыс вежсьывлытӧмӧсь. Тайӧ кыкторйыс: Енлӧн кӧсйысьӧмыс да кыв сетӧмыс — вежсьывлытӧмӧсь, ӧд Енмыс оз вермы ылӧдлыны. Тайӧ кыкторйыс ышӧдӧ миянӧс да отсалӧ кутчысьны сетӧм лачаас. Миян олӧмын тайӧ лачаыс зумыд якӧр кодь, сійӧ видзӧ миянӧс да отсалӧ пырны миянлы крамын ӧшалысь дӧра сайӧ, Вежасьыс-вежаинӧ. Миянысь водзджык сэтчӧ пырис Исус да восьтіс миянлы туй. Мелкиседек моз Сійӧ пыр кежлӧ лоис Аркирейӧн.
7 юр.
Мелкиседек вӧлі Салим карса ӧксы да Медвылысса Енлӧн Аркирей. Сійӧ бурсиис Ӧвраамӧс сыкӧд паныдасигӧн, кор Ӧвраам локтӧ вӧлі ӧксыясӧс вермӧм бӧрын. Ӧвраам торйӧдіс Мелкиседеклы тышын шедӧдӧмысь дасӧд юкӧнсӧ. Мелкиседек нимлӧн вежӧртасыс — «веськыдлуныслӧн ӧксы». Сійӧ вӧлі Салим карса ӧксы, та вӧсна нӧшта сійӧс шуӧны «лӧньлуныслӧн ӧксы». Мелкиседеклӧн эз вӧв бать-мамыс, эз вӧв чужанвужйыс. Сійӧ эз чужлы ни эз кувлы. Ен Пи моз сійӧ пыр кежлӧ Аркирей.
Аддзанныд, кутшӧм сійӧ ыджыд. Ӧд ачыс Ӧвраам, миян айным, сетіс сылы дасӧд юкӧнсӧ, тышын шедӧдӧмысь медбурсӧ.
Левий чужанвужйысь бӧрйӧм попъяслы Индӧд серти колӧ вӧлі босьтны йӧзлӧн эмбурысь дасӧд юкӧнсӧ. Тайӧ юкӧнсӧ найӧ босьтлісны асланыс вокъяслысь, Ӧвраамсянь чужысьяслысь.
Мелкиседек эз вӧв Левий чужанвужйысь, но сійӧ босьтіс Ӧвраамсянь дасӧд юкӧнсӧ. Сійӧ бурсиис Ӧвраамӧс, кодлӧн вӧлі нин Енсянь кӧсйысьӧмыс.
Кывшутӧг, тайӧ тадзи: ыджыдджык бурсиӧ ичӧтджыкӧс.
Дасӧд юкӧн босьтысь попъяс кулӧны, а Мелкиседек йылысь гижӧма, мый Сійӧ ловъя.
Позьӧ шуны, мый ачыс Левий, дасӧд юкӧнсӧ босьтысь, Ӧвраам пыр сетіс дасӧд юкӧнсӧ Мелкиседеклы.
Ӧд Ӧвраамлӧн Мелкиседеккӧд паныдасигӧн Левий вӧлі нин Ӧвраам айыс пытшкын.
Левий чужанвужйысь попъяслӧн кесъялӧм йылысь вӧлі гижӧма Индӧдас. Тайӧ попъяслӧн кесъялӧм пыр кӧ вӧлі позьӧ воны тыр-бурас, сэки эськӧ эз вӧв колана локны мӧд Аркирейлы, коді Мелкиседек кодь, абу Аарон кодь.
Попъяслӧн кесъяланногыс кӧ вежсьӧ, сідзкӧ, Индӧдсӧ тшӧтш колӧ вежны.
Но Сійӧ, код йылысь тані висьталӧма, вӧлі мӧд чужанкотырысь. На пиысь некод эз кесъявлы висьпуктанін дорын.
Ми тӧдам, мый миян Господь петіс Иуда чужанкотырысь. Но Мӧисей нинӧм эз висьтав тайӧ чужанкотыр йывсьыс, мый сэтысь петасны попъяс.
Тайӧ бурджыка на лои гӧгӧрвоана, кор локтіс мӧд Аркирей, Мелкиседек кодь. Сійӧ лоис Аркирейӧн эз морт чужанвужйысь, эз Индӧд тшӧктӧм серти, Сійӧ лоис Аркирейӧн помтӧм олӧмлӧн вынсянь.
Ӧд Гижӧдыс висьталӧ Сы йылысь:
— Мелкиседек моз Тэ пыр кежлӧ Аркирей.
Тадзи воддза тшӧктӧмсӧ вынтӧмлуныс да ковтӧмлуныс вӧсна лои бырӧдӧма. Ӧд Индӧдыс нинӧм эз вермы вайӧдны тыр-бурӧдз.
Та вӧсна, миянлы сетӧма лача, коді ёна бурджык Индӧдыс дорысь. Тайӧ лачаыс отсӧгӧн ми матыстчам Ен дінӧ.
Тайӧ лачасӧ вӧлі вынсьӧдӧма Енлӧн кыв сетӧмӧн. Левий чужанвужйысь попъясӧс сувтӧдігӧн эз вӧв некутшӧм кыв сетӧм, а Исусӧс Аркирейӧн сувтӧдігӧн Енмыс кыв сетіс. Сійӧ шуис:
— Господь кыв сетіс да оз веж сійӧс.
Мелкиседек моз Тэ пыр кежлӧ Аркирей. Тайӧ кывъясыс висьталӧны, кутшӧм вына сійӧ йитӧдыс, кодӧс кӧрталӧма Исус пыр.
Водзынсӧ вӧлі уна поп, ӧд кулӧм вӧснаныс найӧ эз вермыны дыр кесъявны. Но Исус — Помтӧг Олысь, Сійӧ пыр кежлӧ Аркирей. Та вӧсна Сійӧ быд кадӧ вермӧ мездыны Сы пыр Ен дінӧ локтысьясӧс. Сійӧ — Помтӧг Олысь, Сійӧ пыр кевмысьӧ на вӧсна.
Дзик татшӧм аркирей колӧ миянлы: вежа, сӧстӧм да мыжтӧм, кодӧс торйӧдӧма мыжа йӧзысь да кыпӧдӧма енэжсьыс вылӧджык на. Мукӧд аркирейлы моз Сылы абу колана быд лун вись вайны медводз аслас мыжъяс вӧсна, сэсся йӧзлӧн мыжъяс вӧсна. Ӧд Сійӧ вайис нин Асьсӧ вись пыдди ӧтчыдысь да пыр кежлӧ.
Индӧд серти аркирейӧн вермис лоны морт, кодлӧн эмӧсь тырмытӧмторъяс. Но Индӧдыс бӧрын Енмыс сетіс кыв да сувтӧдіс Аркирейӧн Писӧ. Сійӧ — тыр-бур Аркирей пыр кежлӧ.
8 юр.
Миян висьталӧмлӧн медшӧр мӧвпыс татшӧм: миян эм Аркирей, коді пукалӧ енэжын, Вына Енлӧн пуклӧс веськыдладорын да кесъялӧ енэжвывса вежаинын, Енлӧн збыль скинияын. Тайӧ скиниясӧ сувтӧдіс Господь, а эз морт.
Быд аркирейӧс сувтӧдӧны сы могысь, медым вайны вись да сетӧмтор Енмыслы.
Сідзкӧ, миян Аркирейлы, Исуслы, тшӧтш колӧ вӧлі вись вайны Енмыслы.
Сійӧ кӧ кольччис му вылас, сэки эськӧ эз вӧв аркирейӧн, ӧд тані эмӧсь нин Индӧд серти вись вайысьяс. Найӧ кесъялӧны крамын, кодӧс вӧчӧма енэжвывсаӧс моз. Крамыс — енэжвывса скиниялӧн вуджӧрыс, сылӧн серпасыс. Та вӧсна, мувывса скиниясӧ вӧчтӧдз на Енмыс висьталіс Мӧисейлы: «Видзӧд да ставсӧ вӧч дзик сідзи, кыдзи петкӧдлі тэныд керӧс вылын».
Мукӧд аркирейлы дорысь Исуслы вӧлі сетӧма ёна бурджык кесъялӧм. Сійӧ йитӧдыс, кодӧс кӧрталӧма Исус пыр, тшӧтш ёна бурджык, ӧд тайӧ йитӧдыс подуласьӧ бурджык кӧсйысьӧм вылӧ.
Воддза йитӧдыс кӧ вӧлі тырвыйӧ бур, сэки эськӧ мӧд йитӧдыс эз ковмы.
Но Енмыс аддзис йӧзлысь кывзысьтӧмлунсӧ, та вӧсна шуис налы:
— Со, матысмӧны лунъяс, кор Ме кӧртала Израиль да Иуда войтыркӧд выль йитӧд, — висьталӧ Господь.
Тайӧ йитӧдыс абу сэтшӧм, кутшӧмӧс Ме кӧрталі налӧн батьяскӧд, кор петкӧді найӧс Египет муысь киӧдныс кутӧмӧн. Найӧ торкисны Мекӧд йитӧдсӧ, та вӧсна Ме бергӧдчи наысь, — висьталӧ Господь.
Сійӧ лунъяс бӧрас Ме кӧртала Израиль войтыркӧд татшӧм йитӧд: пукта Ассьым Индӧдӧс налӧн вежӧрӧ да гижа налӧн сьӧлӧмӧ.
Ме лоа налы Енмӧн, а найӧ — Менам войтырӧн, — висьталӧ Господь.
Сэки некод оз кут велӧдны матыссасӧ, вокыс оз понды велӧдны воксӧ: «Тӧдмав Господьӧс.»
Ӧд быдӧн, ичӧтсянь ыджыдӧдз, пондас тӧдны Менӧ. Ме прӧстита налысь мыжъяссӧ, некор ог казьтыв налысь лёк вӧчӧмсӧ.
Тайӧ йитӧдсӧ Енмыс шуис Выль Йитӧдӧн. Тадзи Енмыс петкӧдліс, мый воддза йитӧдыс важмис. А ставыс, мый важмӧма да ковтӧм, регыд бырӧ.
9 юр.
Важ Йитӧдас вӧлі сетӧма Енлы кесъялӧм да мувывса скиния йылысь индӧдъяс. Мувывса скиниясӧ вӧлі вӧчӧма тадзи: скиния воддза вежӧсас вӧлі бикок, пызан да сы вылын Енлы вайӧм няньяс. Тайӧ вежӧсыс шусис “Вежаин”.
Скиниялысь мӧд вежӧссӧ вӧлі торйӧдӧма ӧшӧдӧм дӧраӧн. Тайӧ вежӧсыс шусис “Вежасьыс-вежаин”. Сэні вӧліны зарниӧн эжӧм тшынӧдчан пызан да Йитӧдлӧн куд. Тайӧ кудсӧ вӧлі быд боксянь эжӧма зарниӧн. Куд пытшкас вӧліны манна тыра зарни доз, Ааронлӧн дзоридзалысь бедь да Йитӧдлӧн изпӧвъяс. Куд вевт вылас сулалісны херувимъяс, Ен дзирдлуна анделъяс. Налӧн бордъясыс вевттисны куд вевтсӧ — мыж лэдзанінсӧ.
Но унасӧ та йылысь ӧні огӧ кутӧй сёрнитны.
Тадзи вӧлі лӧсьӧдӧма скиниясӧ. Скиния воддза вежӧсас быд лун пыравлісны попъяс кесъявны Енлы.
Мӧд вежӧсас сӧмын ӧтчыдысь вонас пырліс аркирей. Аскӧдыс сійӧ вайліс вир аслас мыжъяс вӧсна да йӧзлӧн тӧдтӧг вӧчӧм мыжъяс вӧсна.
Тайӧн Вежа Лов петкӧдлӧ, мый кытчӧдз сулалӧ скиниялӧн воддза вежӧсыс, Вежасьыс-вежаинӧ туйыс тупкыса на.
Ставыс тайӧ висьталӧ талунъя лун йылысь, мый Енлы вайӧм вись да сетӧмтор оз вермы тырвыйӧ сӧстӧммӧдны йӧзлысь сьӧлӧмсӧ. Ӧд став тайӧ вайӧмторйыс вӧлі йитчӧма сӧмын вир-яйкӧд: сёян-юанкӧд да мыссьӧмкӧд. Татшӧм кесъялӧмсӧ Енмыс лӧсьӧдіс сӧмын кад кежлӧ, выль кесъяланногсӧ лӧсьӧдтӧдз.
Кор локтіс Кристос, бурсӧ Вайысь Аркирей, Сійӧ кутіс кесъявны ёна бурджык да ыджыдджык скинияын, кодӧс вӧчӧма абу киӧн, абу мувывса ног. Кристос пырис Вежасьыс-вежаинӧ эз кӧза вирӧн, эз ӧшпи вирӧн, а Аслас Вирӧн. Тадзи Сійӧ ӧтчыдысь да пыр кежлӧ мездіс миянӧс мыжъясысь.
Ӧшпи вирӧн, кӧза вирӧн да сотӧм куканьлӧн пӧимӧн кӧ резлісны пежасьӧмаясӧс, медым сӧстӧммӧдны налысь вир-яйсӧ, сідзкӧ, кымын пӧв ёнджыка сӧстӧммӧдӧ Кристослӧн Вирыс. Вежа Лов вынӧн Кристос вайис Асьсӧ Енлы сӧстӧм вись пыдди. Та вӧсна Сылӧн Вирыс мыськалӧ миянлысь сьӧлӧмнымӧс кулӧмӧ вайӧдысь лёк вӧчӧмъясысь, медым ми вермим кесъявны збыль да ловъя Енлы.
Сійӧн Кристос лои Енма-морта костын Выль Йитӧд Кӧрталысьӧн. Аслас кулӧмӧн Кристос мездіс йӧзсӧ воддза йитӧд дырйи вӧчӧм мыжъясысь, медым Енлӧн корӧмаяслы пыр кежлӧ вичмис Енсянь кӧсйысьӧмыс.
Мортыс кӧ кольӧ ас бӧрсяыс кӧсйысян гижӧд, сійӧ лоӧ вына сӧмын мортыслӧн кулӧм бӧрын. Ӧд мортыс кӧ ловъя на, гижӧдыс вынтӧм. Сійӧ лоӧ вына сӧмын мортыслӧн кулӧм бӧрын.
Та вӧсна воддза йитӧдсӧ вӧлі вынсьӧдӧма вирӧн.
Мӧисей висьталіс йӧзыслы Индӧдысь став тшӧктӧмсӧ. Сэсся босьтіс ӧшпиянлысь да кӧзаяслысь ваӧн соралӧм вир, югыдгӧрд вурун, иссоп бедь да резіс тайӧн медводз Индӧд небӧгсӧ, сэсся став йӧзсӧ. Сійӧ шуис: «Тайӧ вирыс — йитӧдлӧн вир, Енмыс тшӧктіс видзны тайӧ йитӧдсӧ».
Сэсся Мӧисей резіс вирнас тшӧтш скиниясӧ да став кесъялан кӧлуй-дозмуксӧ.
Индӧд серти ставыс сӧстӧммӧ сӧмын вирӧн, вир кисьттӧг оз вермы лоны мыжсӧ прӧститӧмыс.
Сідзкӧ, мувывсасӧ, кодӧс вӧчӧма енэжвывсаӧс моз, колӧ вӧлі сӧстӧммӧдны татшӧм ногӧн. А енэжвывсаыслы колана бурджык вись.
Ӧд Кристос пырис эз киӧн вӧчӧм скинияӧ, кодӧс вӧлі вӧчӧма збыль скиния серти. Сійӧ пырис дзик енэжас, медым сувтны Ен водзӧ миян пыдди да дорйыны миянӧс. Сійӧ пырис енэжас эз сы могысь, медым выльысь вайны Асьсӧ вись пыдди. Ӧд тадзи вӧчӧ аркирей: сійӧ воысь-во пырӧ Вежасьыс-вежаинӧ пемӧс вирӧн. Кристос кӧ вӧчис тадзи, му пуксьӧмсяньыс эськӧ унаысь нин ковмыліс Сылы кувны. Но бӧръя кадӧ Сійӧ сӧмын ӧтчыдысь вайис Асьсӧ вись пыдди мыж бырӧдӧм могысь.
Мортыслы шуӧма кувны ӧтчыдысь, сэсся лоӧ мыждӧм. Тадзи Кристос ӧтчыдысь вайис Асьсӧ вись пыдди, медым бырӧдны мыжсӧ став йӧзыслысь. Мӧдысь Сійӧ локтас оз мыж бырӧдӧм могысь, а медым мездыны найӧс, кодъяс виччысьӧны Сійӧс.
10 юр.
Индӧдыс — сӧмын локтана бурыслӧн вуджӧрыс, абу ачыс бурыс. Та вӧсна Индӧдыс некор оз вермы вӧчны тыр-бурӧн Ен водзӧ локтысьясӧс, кодъяс воысь-во вайӧны ӧтипӧлӧс вись.
Индӧдыс кӧ вермис вӧчны найӧс тыр-бурӧн, найӧ эськӧ дугдісны вайны висьсӧ. Ӧд висьсӧ ӧтчыдысь вайӧмнас найӧ эськӧ сӧстӧммисны пыр кежлӧ, да налӧн сьӧлӧмыс эз мыжды найӧс.
Но быд во вайӧм висьыс казьтывлӧ мыж йылысь. Ӧд ӧшпилӧн да кӧзалӧн вирыс оз вермы бырӧдны мортлысь мыжъяссӧ.
Та вӧсна муюгыдас локтігӧн Кристос шуӧ:
— Вись да ваянтор Тэныд оз ков, Тэ дасьтін Меным вир-яй.
Сотӧм пемӧс да мыж вӧсна вись абу шогмана Тэныд.
Сэки Ме шуи: «Со, Ме локті, Енмӧй, збыльмӧдны Тэнсьыд кӧсйӧмтӧ. Тадзи водзысяньыс вӧлі висьталӧма Ме йылысь небӧгас».
Висьсӧ вайӧны Индӧд серти, но Кристос шуӧ: «Вись да ваянтор, сотӧм пемӧс да мыж вӧсна вись Тэныд оз ков, тайӧ абу шогмана Тэныд».
Сэсся содтӧ: «Со, Ме локті, Енмӧй, збыльмӧдны Тэнсьыд кӧсйӧмтӧ».
Тадзи Кристос бырӧдіс воддзасӧ — вись вайӧмсӧ, да вежис сійӧс мӧдӧн — Ен кӧсйӧмӧн.
Ен кӧсйӧм серти ми лоим вежаӧсь, ӧд Кристос вайис Ассьыс вир-яйсӧ вись пыдди ӧтчыдысь да пыр кежлӧ.
Крамын кесъялігӧн попъяс быд лун вайӧны ӧтипӧлӧс вись. Но тайӧ висьыс оз вермы бырӧдны мортлысь мыжъяссӧ.
Кристос вайис мыж вӧсна висьсӧ ӧтчыдысь да пуксис Ен веськыдладорӧ пыр кежлӧ. Ӧні Сійӧ виччысьӧ сійӧ кадсӧ, кор Енмыс пуктас Сы кок улӧ паныд мунысьяссӧ.
Висьсӧ ӧтчыдысь вайӧмнас Кристос вӧчис вежа войтырӧс тыр-бурӧн пыр кежлӧ.
Та йылысь висьталӧ миянлы Вежа Лов:
— Сійӧ лунъяс бӧрас Ме кӧртала накӧд татшӧм йитӧд, — висьталӧ Господь.
Ассьым Индӧдӧс Ме пукта налӧн сьӧлӧмӧ, да гижа налӧн вежӧрӧ. Налысь мыжъяссӧ да лёк вӧчӧмсӧ водзӧ ог нин казьтыв.
Сідзкӧ, мыжъяссӧ кӧ прӧститӧма, сэки висьсӧ вайны оз нин ков.
Вокъяс, Исус Кристослӧн Вирӧн ми вермам повтӧг пырны Вежасьыс-вежаинӧ, ӧд Сійӧ восьтіс миянлы выль туй, олӧмас нуӧдысь туй. Тайӧ туйыс вайӧдӧ миянӧс Вежасьыс-вежаинӧ ӧшӧдӧм дӧра пыр — Кристослӧн вир-яйыс пыр. Миян эм ыджыд Аркирей, Сійӧ кывкутӧмӧн веськӧдлӧ ставнас Ен керканас. Сідзкӧ, локтам Ен водзӧ восьса сьӧлӧмӧн да зумыд эскӧмӧн, ӧд миян сьӧлӧмным сӧстӧм да мыжтӧм, миянлысь вир-яйнымӧс мыськалӧма сӧстӧм ваӧн. Ми висьталам, мый миян эм лача. Сідзкӧ, зумыда кутчысям тайӧ лачаас, ӧд миянлы Кӧсйысьысьыс эскана.
Кутам тӧждысьны ӧта-мӧдным вӧсна, ышӧдны ӧта-мӧдӧс муслун да бур уджъяс вылӧ.
Кодсюрӧ дугӧдчӧмаӧсь ӧтвыв чукӧртчӧмысь, но ми тадзи огӧ вӧчӧй.
Мӧдарӧ, кутам ёнджыка на ышӧдны ӧта-мӧднымӧс, ӧд Господьлӧн луныс матын нин.
Ми кӧ тӧдам збыльсӧ, но тӧдӧмӧн мыж вӧчам, сэки некутшӧм вись оз вешты миянлысь мыжнымӧс. Сӧмын ыджыд полӧмӧн ковмас виччысьны мыждӧмсӧ да яр бисӧ, коді бырӧдас Енлы паныд мунысьясӧс.
Мӧисейлысь Индӧдсӧ торкысьӧс кӧ кык либӧ куим мортлӧн висьталӧм серти нем жалиттӧг мыждылісны кулӧм вылӧ, сідзкӧ, кымын пӧв чорыдджыка лоӧ мыждӧма сійӧс, коді талялӧ Енлысь Писӧ, оз лыддьы вежаӧн Енкӧд йитысь да эскысьӧс вежӧдысь Вирсӧ, да нӧшта лёкӧдӧ Ловсӧ, коді восьтӧ Енлысь буралӧмсӧ.
Ми тӧдам тайӧ кывъяссӧ Шуысьӧс:
— Ме — водзӧс Перйысьыс, Ме мынтыся ставсьыс, — шуӧ Господь.
Нӧшта содтӧ:
— Господь кутас мыждыны Ассьыс войтырсӧ.
Ёна повзьӧдлӧ веськавны ловъя Енлӧн киӧ.
Видзӧдлӧй бӧрвыланыд: Бур Юӧрлысь югыдсӧ тӧдмалӧм бӧрын ті верминныд мунны уна сьӧкыд да тыш пыр. Тіянӧс вӧтлігӧн-лёкӧдігӧн ті унаысь вӧлінныд серам туйынӧсь. Тіян моз сьӧкыдсӧ нуысьяскӧд ті вӧлінныд орччӧн. Кор ме пукалі дзескыдінын, ті нуинныд сьӧкыдсӧ мекӧд ӧтвыв. Тіянлысь эмбуртӧ мырддялігӧн ті нимкодясинныд, ӧд ті тӧдінныд, мый енэжас тіян эм ёна бурджык да бырлытӧм эмбур.
Сідзкӧ, лоӧй повтӧмӧсь. Ӧд таысь тіянлы вичмас ыджыд тырдон.
Тіянлы колӧ зумыдлун, медым верминныд збыльмӧдны Енлысь тшӧктӧмсӧ да босьтны Сысянь кӧсйысьӧмасӧ.
Ӧд гижӧма: — Регыд, вывті регыд, и Локтысьыс нюжмасьтӧг воас.
Веськыда олысь эскӧмнас кутас овны, а кежас кӧ Меысь, Меным сійӧ оз шогмы.
Но ми абу на пӧвстысь, коді Енсьыс кежӧ да кулӧ. Ми на пӧвстысь, коді эскӧ да босьтӧ мездмӧмсӧ.
11 юр.
Эскӧмыс — виччысянторлӧн збыльмӧм да аддзытӧмсӧ аддзӧм.
Миян батьяс эскисны, та вӧсна найӧ шогмисны Енлы.
Эскӧмӧн ми гӧгӧрвоам, мый ентыкӧлаыс артмӧма Ен Кывйӧн. Тадзи аддзытӧмсьыс лои аддзанаыс.
Эскӧмӧн Авель вайис Енлы бурджык вись Каин дорысь. Авельлӧн эскӧм вӧсна Енмыс сибӧдіс сылысь висьсӧ да лыддис сійӧс веськыдӧн. Эскӧмнас Авель весиг кулӧм бӧрас сёрнитӧ.
Эскӧмыс вӧсна Енокӧс вӧлі кыпӧдӧма енэжас кулӧмсӧ тӧдлытӧг: «Сійӧ эз ло, ӧд Енмыс кыпӧдіс сійӧс енэжас».
Кыпӧдтӧдзыс на Еноклы вӧлі шуӧма, мый «сійӧ шогмана Енмыслы».
Эскытӧгыд Енмыслы он шогмы.
Ӧд Ен дінӧ локтысьлы колӧ эскыны, мый Енмыс эм, да Сійӧс корсьысьлы Енмыс сетӧ тырдон.
Эскӧмыс вӧсна Нойлы вӧлі водзвыв сетӧма тӧдны аддзытӧмсӧ. Сійӧ кывзысис Енмыслысь да вӧчис ковчег, медым мездыны ассьыс гортсасӧ.
Эскӧмнас сійӧ мыждіс муюгыдсӧ, эскӧмыс вӧсна сылы вичмис Енсянь веськыдлун.
Эскӧмыс вӧсна Ӧвраам кывзысис Енмыслысь да муніс кӧсйысьӧм муӧ. Сійӧ эз тӧд, кытчӧ мунӧ, но муніс.
Эскӧмӧн Ӧвраам овмӧдчис кӧсйысьӧм муӧ да локтысь моз оліс сэні чомъясын. Сы моз олісны чомъясын Исаак да Яков, кодъяслы тшӧтш вӧлі сетӧма Енлысь кӧсйысьӧмсӧ.
Ӧвраам виччысис зумыд подула кар, кодӧс Серпасалысьыс да Вӧчысьыс — Ачыс Енмыс.
Сарра эз вермы вайны кага, но эскӧмыс вӧсна сійӧ пондіс нӧбасьны, да ыджыд арлыдыс вылӧ видзӧдтӧг чужтіс кага. Ӧд сійӧ тӧдіс, мый сылы Кӧсйысьысьыс — эскана.
Та вӧсна ӧти мортсянь, Ӧвраамсянь, коді вӧлі пӧрысь нин, чужис сы мында олысь. Тайӧ лыдсӧ позьӧ ӧткодявны лыдтӧм-тшӧттӧм енэжвывса кодзувъяскӧд да саридздорса лыакӧд.
Став тайӧ йӧзыс эз удитны босьтны Енсянь кӧсйысьӧмасӧ, но найӧ помӧдз видзисны эскӧмсӧ. Найӧ сӧмын ылісянь аддзылісны Енсянь кӧсйысьӧмасӧ да нимкодясисны сыӧн. Ас йывсьыныс найӧ шуалісны, ми пӧ тайӧ му вылас ветлысь-мунысьяс.
Тадзи шуӧмнас найӧ петкӧдлісны, мый корсьӧны чужан мунысӧ.
Найӧ кӧ мӧвпалісны чужан муныс йылысь, кытысь петісны, эськӧ бӧр на вермисны бергӧдчыны сэтчӧ.
Но найӧ кӧсйисны овмӧдчыны бурджык чужан муӧ — енэжӧ.
Та вӧсна Енмыс оз яндысь шуны Асьсӧ налӧн Енмӧн, ӧд Сійӧ дасьтіс налы кар.
Эскӧмӧн Ӧвраам вайис вись пыдди Исаакӧс, кор Енмыс кӧсйис тӧдмавны сылысь эскӧмсӧ. Ӧвраам дась вӧлі сетны вись пыдди ассьыс ӧтка писӧ, кодӧс Енмыс сылы кӧсйысьліс. Исаак йылысь вӧлі шуӧма: «Исааксянь паськалас тэнад чужанвужйыд».
Ӧвраам эскис, мый Енмыс вына ловзьӧдны весиг кулӧмысь. Дзик тадзи и артмис. Исаакӧс вӧлі бӧр сетӧма Ӧвраамлы, быттьӧ сійӧ ловзис кулӧмысь.
Эскӧмӧн Исаак бурсиис Яковӧс да Исавӧс водзӧ олӧмас.
Эскӧмӧн Яков бурсиис кулігас Ӧсиплысь пиянсӧ да бедь вылас мыджсьӧмӧн копыртчыліс Енмыслы.
Эскӧмӧн Ӧсип кулӧм водзвылас висьталіс пияныслы Израиль войтырлӧн Египетысь петӧм йылысь да тшӧктіс петкӧдны налы ассьыс лыяссӧ.
Эскӧмӧн Мӧисейлӧн бать-мамыс дзеблалісны сійӧс чужӧм бӧрас куим тӧлысь чӧж. Найӧ аддзисны, мый кагаыс зэв мича, да эз повзьыны весиг ӧксылӧн тшӧктӧмысь.
Эскӧмӧн Мӧисей быдмӧм бӧрас дугдіс шуны асьсӧ фараон нывлӧн пиӧн. Сійӧ лыддис, мый бурджык Ен войтыркӧд нуны сьӧкыдсӧ, дженьыдик кадся мыжа олӧм дорысь. Кристос вӧсна лёкӧдӧмсӧ Мӧисей лыддис ыджыдджык озырлунӧн египетса став озырлун дорысь.
Ӧд сійӧ тӧдіс, мый сылы лоӧ сетӧма тырдон.
Эскӧмӧн Мӧисей петіс Египетысь, эз повзьы ӧксылӧн скӧрлунысь. Сійӧ вӧлі зумыд, ӧд видзӧдіс Тыдавтӧмыс вылӧ.
Эскӧмӧн Мӧисей тшӧктіс пасйыны Израиль войтырлы Ыджыд лун да мавтыштны ӧдзӧс куричьяссӧ вирӧн, медым Андел-Бырӧдысь эз ви Израиль войтырлысь медводдза чужысьяссӧ.
Эскӧмӧн Израиль войтыр вуджис Гӧрд саридз вомӧн. Найӧ мунісны сэті косінті моз. Египетсаяс тшӧтш на моз кӧсйисны вуджны, но ставныс вӧйисны.
Эскӧм пыр киссисны Ерикон карса стенъяс сійӧс сизим лун кытшовтӧм бӧрын.
Эскӧмыс вӧсна Раав, кырсалысь ань, эз кув эскытӧмъяскӧд ӧтвыв, ӧд сійӧ бур сьӧлӧмӧн сибӧдіс израильса кыйӧдчысьясӧс.
Мый нӧшта содтыны татчӧ?
Кадыс меным оз тырмы висьтавны Гедеон, Варак, Самсон, Еффай, Давид, Самуил да мукӧд пророк йылысь. Эскӧмӧн найӧ тышкасьӧм бӧрын босьтісны йӧз муяс, ставсӧ вӧчисны веськыда, сибӧдісны Енсянь кӧсйысьӧмасӧ, лӧньӧдісны левъясӧс, кусӧдісны яр би, видзисны асьнысӧ шыпуртысь, вынтӧммиганыс найӧ ёнмылісны, тышын вӧліны вынаӧсь, йӧз муысь воысь тышкасьысьясӧс бӧр вӧтлісны асланыс муысь, ӧткымын аньлысь матыссасӧ ловзьӧдісны кулӧмысь. Тайӧ йӧз пӧвстысь мукӧдсӧ вӧлі дойдалӧма кувтӧдзыс, ӧд найӧ эз кӧсйыны босьтны мортсянь вӧзйӧм мездлунсӧ, но кӧсйисны босьтны бурджыксӧ — ловзьӧмсӧ. На пиысь мукӧдсӧ нӧйтісны орсӧн, лёкӧдісны, да чептӧн дорӧмӧн видзисны дзескыдінын. Мукӧдсӧ изъялісны, быдногыс дойдалісны, пилитісны шӧрипӧв да виисны шыпуртӧн. Найӧ ветлісны кӧза да ыж ку паськӧмӧн, пыкисны гӧльлун, найӧс нӧйтісны да вӧтлісны. Муюгыдыс эз сулав тайӧ йӧзыс дон, кодъяслы ковмис овны овтӧминын да керӧсын, кырта горсйын да му потасын.
Эскӧмныс вӧсна став тайӧ йӧзыс вӧліны шогманаӧсь Енмыслы, но некод на пиысь эз босьт Енлысь кӧсйысьӧмасӧ, ӧд Енмыс дасьтӧма миянлы ёна бурджыктор. Та вӧсна найӧ сӧмын миянкӧд ӧтвыв воасны тыр-бурас.
12 юр.
Ті аддзанныд: миян гӧгӧр сы мында эскӧм йылысь висьталысьыс. Сідзкӧ, эновтам ставсӧ, мый сьӧктӧдӧ миянӧс, да мыжсӧ, мый крукӧдӧ миянӧс. Кутам помӧдз зумыда котӧртны миянлы индӧм туйӧд да видзӧдны Исус вылӧ. Сійӧ — миянлы эскӧмсӧ Сетысьыс да тырвыйӧ эскӧмас Вайӧдысьыс. Локтана нимкодьлун понда Сійӧ нуис крест вылын дойсӧ, нинӧм туйӧ пуктіс лёкӧдӧмсӧ да пуксис Ен пуклӧс веськыдладорӧ.
Сідзкӧ, мӧвпалӧй Сы йылысь, коді нуис сы мында лёкӧдӧм мыжа йӧзсянь, медым энӧ жебмӧй да ловнаныд энӧ усьӧй.
Ті энӧ на вирӧдз тышкасьӧй мыжыслы паныд. Ті дзикӧдз вунӧдӧмныд Енсянь ышӧдӧмсӧ, ӧд Сійӧ ышӧдӧ тіянӧс пиянӧс моз:
— Пиӧй менам.
Господьсянь чирыштӧмсӧ эн увтырт, тэнӧ янӧдігӧн ловнад эн усь.
Коді Енмыслы муса, сійӧс чирыштӧ, кодӧс пи туйӧ пуктӧ, сійӧс нӧйтӧ.
Ті кӧ сибӧданныд Енсянь чирыштӧмсӧ, сідзкӧ, Енмыс лыддьӧ тіянӧс Аслас пиянӧн.
Сюрас-ӧ сэтшӧм пи, кодӧс эськӧ батьыс эз чирыштлы?
Тіянӧс кӧ эз чирыштлыны мукӧд челядьӧс моз, сідзкӧ, ті бокысаяс, абу ас ныв-пи.
Мувывса батьяс миянӧс ставнымӧс чирыштлісны, но ми пыдди пуктім найӧс. Сідзкӧ, кымын пӧв ёнджыка на колӧ кывзысьны енэжвыв Батьлысь, медым вермим овны?
Мувывса батьяс чирыштлісны миянӧс ас кӧсйӧм сертиныс регыдик кад кежлӧ, а Енмыс чирыштӧ миянӧс бур вылӧ, медым вӧлім Сы кодь вежаӧсь.
Дерт, быдпӧлӧс чирыштӧм вайӧ шогсьӧм, а оз нимкодьлун.
Но бӧрыннас татшӧм чирыштӧмыс вайӧ мортлы бур вотӧс: лӧньлун да веськыдлун.
Сідзкӧ, ёнмӧдӧй лигышмунӧм кинытӧ да жебмӧм кокнытӧ. Ветлӧй шыльыд туйӧд, медым чотысь кокныд эз музгыльтчы, а бурдіс.
Тӧждысьӧй быдӧнкӧд овны лӧня, лоӧй вежаӧсь, ӧд вежалунтӧг некод оз аддзы Господьӧс.
Видзчысьӧй, мед тіян пӧвстысь некод эз вошты Енлысь буралӧмсӧ. Некутшӧм курыд вуж мед оз вужъясь тіян пӧвстӧ, оз вай тіянлы лёксӧ да оз пежав некодӧс. Тіян пӧвстын мед оз ло ни ӧти кырсалысь да Исав моз Енсьыс кежысь. Ӧти шыд тасьті вылӧ сійӧ вежис ассьыс медводдза чужысьлысь нимсӧ.
Ті ӧд тӧданныд, мый бӧрыннас Исав ёна корис батьсяньыс бурсиӧмсӧ, но сылысь корӧмсӧ вӧлі ӧтдортӧма. Исав бӧрдӧмӧн корис та йылысь, но эз нин вермы вежны батьыслысь мӧвпъяссӧ.
Ті матыстчинныд энӧ мувывса ыпъялысь керӧс дінӧ, паныдасинныд энӧ бушковкӧд да сап пемыдыскӧд, локтінныд энӧ труба шы улӧ да гора сёрни шы улӧ. Тайӧ шысӧ кылӧм бӧрын йӧзыс корисны Енсӧ, медым дугдіс накӧд сёрнитны. Ӧд найӧ эз вермыны кывзыны татшӧм тшӧктӧмсӧ: «Весиг пемӧс кӧ инмӧдчас тайӧ керӧсас, сійӧс лоӧ виӧма изъясӧн либӧ ньӧвйӧн».
Тайӧ аддзывлӧмторйыс вӧлі сэтшӧм повзьӧдана, весиг ачыс Мӧисей шуис: «Менӧ дзӧрӧдӧ полӧмӧйла».
Мӧдарӧ, ті матыстчинныд Сион керӧс дінӧ да ловъя Енлӧн карыс, енэжвыв Ерусалим, дінӧ. Ті локтінныд лыдтӧм-тшӧттӧм анделъяс дінӧ да гажӧдчысь йӧз чукӧр дінӧ. Найӧ — Енлӧн медводдза чужысьяс, налысь нимъяссӧ гижӧма енэжас. Ті матыстчинныд став йӧзсӧ мыждысь Ен дінӧ да тыр-бурас воӧм веськыда олысьяслӧн ловъяс дінӧ. Ті матыстчинныд Выль Йитӧдсӧ Кӧрталысь Исус дінӧ да Сылӧн сӧстӧммӧдысь Вир дінӧ. Сылӧн Вирыс бурджыксӧ висьталӧ Авельлӧн вирыс дорысь.
Видзчысьӧй, медым энӧ бергӧдчӧй тіянлы Висьталысьысь.
Енмыс сёрнитіс му вылас Израиль войтыркӧд, но найӧ бергӧдчисны Енсьыс. Та вӧсна найӧс вӧлі мыждӧма. Сідзкӧ, миянӧс ёнджыка на лоӧ мыждӧма, огӧ кӧ кывзӧй енэжсянь Висьталысьӧс. Сэки Енлӧн гора сёрниыс вӧрзьӧдліс мусӧ, но ӧні Сійӧ кӧсйысис:
— Нӧшта ӧтчыдысь вӧрзьӧда мусӧ, ог сӧмын мусӧ, вӧрзьӧда тшӧтш енэжсӧ.
“Нӧшта ӧтчыдысь” шуӧмыс висьталӧ, мый став вӧчӧмторсьыс вӧрзянаыс бырас, коляс сӧмын вӧрзьывтӧмыс.
Миянлы сетӧма вӧрзьывтӧм Юраланін. Сідзкӧ, аттьӧалам Енсӧ да кесъялам Сылы шогмана ногӧн, Сыысь полӧмӧн да вежавидзӧмӧн. Ӧд миян Енным — ставсӧ сотысь би.
13 юр.
Тіян костын мед пыр лоӧ муслун.
Энӧ вунӧдӧй сибӧдны ветлысь-мунысьясӧс. Ӧд тадзи вӧчигӧн ӧткымынӧн сибӧдісны анделъясӧс, весиг асьныс та йылысь эз тӧдны.
Тӧждысьӧй дзескыдінын пукалысьяс вӧсна, быттьӧ ті на моз пукаланныд дзескыдінын. Энӧ вунӧдӧй найӧс, кодъясӧс нӧйтӧны, ті ӧд асьныд тӧданныд, мый сэтшӧм дойыс.
Гозъя олӧмныд мед быдӧнлӧн лоӧ сӧстӧм, да вольпасьныд пежасьтӧм. Ӧд кырсалысьӧс да гозъя олӧм пежалысьӧс мыждас Ен.
Сьӧм вылӧ энӧ горшасьӧй, тырмӧдӧй сійӧ, мый эм.
Ӧд Ачыс Енмыс шуис:
— Ог коль тэнӧ, ог эновт тэнӧ.
Та вӧсна, ми повтӧг шуам: — Господь — менам отсӧгыс, меным нинӧмысь повнысӧ. Мый вӧчас меным морт?
Энӧ вунӧдӧй ассьыныд веськӧдлысьяснытӧ, ӧд найӧ висьтавлісны тіянлы Ен Кывсӧ. Видзӧдӧй налӧн олӧм пом вылӧ да эскӧй на моз.
Исус Кристос тӧрыт, талун да нэмъяс чӧж Сійӧ жӧ.
Энӧ лэдзӧй кежӧдны асьнытӧ быдпӧлӧс ылӧгвелӧдӧмас.
Бурджык, ті кӧ ёнмӧданныд сьӧлӧмнытӧ Енлӧн буралӧмӧн, а онӧ сёян-юан йылысь велӧдӧмӧн. Ӧд татшӧм велӧдӧмыс сы серти олысьяслы нинӧм бурсӧ оз сет.
Миян эм сэтшӧм висьпуктанін, кытчӧ вайӧм висьсӧ оз позь сёйны скинияын кесъялысьяслы.
Пемӧсъяслысь вирсӧ аркирей пыртӧ Вежасьыс-вежаинӧ, тайӧ вирыс эм йӧзлӧн мыжъяс вӧсна вайӧм вись. А пемӧсъяслысь шойсӧ сотӧны кар ортсыас. Исус тшӧтш куліс кар ортсыас, медым Аслас Вирӧн вежӧдны йӧзсӧ.
Сідзкӧ, петам Исус дінӧ кар ортсыас да Сы моз нуам лёкӧдӧмсӧ.
Ӧд пыр кежлӧ олӧм вылӧ миянлы абу тані карыс, ми виччысям выль кар.
Сідзкӧ, Исус пыр кутам дугдывтӧг вайны Енлы аттьӧалана вись, асланым вомӧн кутам ошкыны Сылысь нимсӧ.
Энӧ вунӧдӧй вӧчны бурсӧ, юксьӧй сійӧн, мый эм. Ӧд татшӧм висьыс шогмана Енмыслы.
Кывзысьӧй вичкоса веськӧдлысьяслысь, кывзӧй найӧс, ӧд найӧ дугдывтӧг тӧждысьӧны тіян вӧсна. Налы ковмас вочавидзны Ен водзын тіян вӧсна. Кывзысьӧй налысь, медым тайӧ уджсӧ найӧ вӧчисны долыдпырысь, а эз ышлолалӧмӧн. Ӧд таысь тіянлы бурыс оз ло.
Кевмысьӧй миян вӧсна.
Ми тӧдам, мый миян сьӧлӧмным оз мыжды миянӧс, ӧд ми ставсӧ кӧсъям вӧчны веськыда.
Торйӧн кора кевмысьны, медым ме ӧдйӧджык бӧр верми локны тіян дінӧ.
Лӧньлунсӧ сетысь Ен бырлытӧм йитӧдлӧн Вирӧн ловзьӧдіс кулӧмысь миян Господь Исус Кристосӧс, ыжъяслысь вына Видзысьсӧ. Енмыс мед дасьтас тіянӧс быдпӧлӧс бур удж вылӧ, медым збыльмӧдны Ассьыс кӧсйӧмсӧ, да Исус Кристос пыр мед вӧчас тіян пытшкын Аслыс шогманасӧ.
Енлы ошкӧм нэмъяс чӧж.
Аминь.
Вокъяс, кора тіянӧс: терпитӧмӧн сибӧдӧй менсьым ышӧдана кывъясӧс, ӧд ме гижи тіянлы дженьыдика.
Кӧсъя, мед ті тӧдінныд: Тимофей вокным петӧма дзескыдінысь. Регыд кӧ воас, сыкӧд ӧтвыв локтам тіян дінӧ.
Висьталӧй чолӧм вичкоса веськӧдлысьяслы да став вежа войтырлы.
Тіянлы ыстӧны чолӧм италияса эскысьяс.
Енлӧн буралӧмыс ставныдкӧд тіянкӧд.
Аминь.
Иоанлы восьтӧм
1 юр.
Тайӧ гижӧдыс — Исус Кристослы Енсянь восьтӧм. Енмыс восьтіс тайӧс, медым петкӧдлыны Аслас кесйӧгъяслы, мый колӧ лоны регыдъя кадӧ.
Кристос мӧдӧдіс Ассьыс анделсӧ, медым висьтавны тайӧс Аслас кесйӧглы — Иоанлы. Ӧні Иоан аслас висьталӧмӧн эскӧдӧ Енлысь Кывсӧ, Исус Кристослысь висьталӧмсӧ да ставсӧ, мый аддзыліс.
Шуда сійӧ, коді лыддьӧ да кывзӧ тайӧ водзвыв висьталӧмыслысь кывъяссӧ да олӧ на серти.
Ӧд кадыс матын нин.
Иоан чолӧмалӧ асияса сизим вичкоӧс: буралӧм да лӧнь олӧм тіянлы Сысянь, Коді эм, вӧлі да локтас, тшӧтш Сылӧн пуклӧс водзын олысь сизим ловсянь да Исус Кристоссянь. Сійӧ — эскана Висьталысь, Сійӧ медводдзаӧн ловзис кулӧмысь да юралӧ мувывса ӧксыяс вылын.
Сылы ми ёна мусаӧсь. Аслас Вирӧн Сійӧ мыськаліс миянӧс мыжъясысь, пуктіс миянӧс ӧксыясӧ да вежа кесъялысьясӧ Енмыслы, Аслас Батьлы. Сылы ошкӧмыс, Сылӧн ыджыдалӧмыс нэмъяс чӧж. Аминь.
— Со, Сійӧ локтӧ кымӧръяс вылын, Сійӧс аддзас быд син. Сійӧс аддзасны тшӧтш найӧ, кодъяс бытшкисны Сійӧс. Сэки Сы водзын ырзӧмӧн бӧрддзас мувывса быд кыла войтыр.
Тайӧ тадзи. Аминь.
«Ме — Альфа и Омега, Панасыс и Помыс», — шуӧ Господь. Сійӧ эм, вӧлі и локтас, Сійӧ — Ставсӧкутысьыс.
Ме, Иоан, тіян вокныд, тіянкӧд ӧтвыв нуа сьӧкыдсӧ. Тіянлы моз меным тшӧтш вичмӧ Енлӧн Юралӧмыс да Исус Кристоссянь зумыдлуныс. Ен Кыв вӧсна да Исус Кристос йылысь висьталӧм вӧсна ме вӧлі Патмос ді вылын.
Господьлӧн лунӧ ме вӧлі тырӧма Лолӧн. Сэки мыш сайсянь ме кылі гора шы, тайӧ вӧлі труба шы кодь. Сійӧ шуис: «Ме — Альфа и Омега, Медводдзаыс и Медбӧръяыс. Сійӧ, мый аддзан, гиж да мӧдӧд асияса вичкоясӧ: Ефесӧ, Смирнаӧ, Пергамӧ, Фиатираӧ, Сардисӧ, Филадельфияӧ да Лаодикияӧ».
Ме бергӧдчи видзӧдлыны мекӧд сёрнитысь вылӧ да аддзи сизим зарни бикок. Сизим бикок пӧвстас быттьӧ Морт Пи сулаліс. Сійӧ вӧлі кузь паськӧма да морӧс весьтӧдыс вӧлі вӧнясьӧма зарни вӧньӧн. Сылӧн юрыс да юрсиыс вӧліны дзик еджыдӧсь, быттьӧ еджыд вурун, быттьӧ лым, а синъясыс ыпъялісны би моз. Сылӧн кокъясыс дзирдалісны пачын донӧдӧм ыргӧн моз, а гӧлӧс шыыс Сылӧн вӧлі бузгысь ва шы кодь.
Веськыд киас Сійӧ кутіс сизим кодзув, а Сылӧн вомысь петіс кыкнанладорсяньыс лэчтӧм ёсь шыпурт. Сылӧн чужӧмыс дзирдаліс яръюгыд шонді моз.
Сійӧс аддзӧм бӧрын ме уси Сы кок улӧ да вӧлі кулӧм морт кодь.
Но Сійӧ пуктіс ме вылӧ веськыд кисӧ да шуис:
«Эн пов, Ме — Медводдзаыс и Медбӧръяыс. Ме ловъя.
Ме вӧлі кулӧма, но ӧні ловъя нэмъяс чӧж. Аминь.
Менам киын адысь да кулӧмысь восьтаныс.
Сідзкӧ, гиж, мый аддзылін, мый эм да мый лоӧ бӧрыннас.
Тэ аддзылін сизим кодзув, кодъяс вӧліны Менам веськыд киын, да сизим зарни бикок. Налӧн гусяторйыс татшӧм: сизим кодзулыс — тайӧ сизим вичколӧн анделъяс, а сизим бикокыс, кодъясӧс тэ аддзылін, — тайӧ сизим вичко».
2 юр.
«Ефес вичкоса анделлы тадзи гиж:
— Со мый висьталӧ Сійӧ, коді кутӧ веськыд киас сизим кодзув да ветлӧдлӧ сизим зарни бикок пӧвстӧд.
Ме тӧда тэнсьыд уджъястӧ, мырсьӧмтӧ да зумыдлунтӧ. Тӧда, тэ он терпит лёк йӧзӧс. Тэ тӧдмалін найӧс, кодъяс нимтӧны асьнысӧ апостолъясӧн, но збыльвылас найӧ абу апостолъяс. Тэ аддзин, мый найӧ — пӧръясьысьяс. Тэ уна нуин сьӧкыдсӧ, но сулалан зумыда. Менам ним вӧсна тэ ёна уджалін, но эн лигышмун.
Но тэныд паныд кӧсъя шуны со мый: тэ эновтін ассьыд медводдза муслунтӧ.
Сідзкӧ, мӧвпышт, кысянь тэ усин, бергӧдчы да вӧч ассьыд медводдза уджъястӧ.
Он кӧ бергӧдчы, регыд локта тэ дінӧ да вешта тэнсьыд бикоктӧ места вывсьыс.
Но ӧтитор тэ вӧчан бура: тэ мустӧмтан николаитъяслысь уджъяссӧ. Налысь уджъяссӧ Ме тшӧтш мустӧмта.
Кодлӧн эм пель, мед кылӧ, мый Лов висьталӧ вичкояслы.
Вермысьлы Ме сета сёйны вотӧс Олӧмыслӧн пуысь, коді сулалӧ Енлӧн рай шӧрын».
«Смирна вичкоса анделлы тадзи гиж:
— Со мый висьталӧ тіянлы Медводдзаыс и Медбӧръяыс, коді вӧлі кулӧма, но ӧні ловъя.
Ме тӧда тэнсьыд уджъястӧ, сьӧкыдалӧмтӧ да гӧльлунтӧ, но тэ — озыр. Тӧда, кыдзи тэнӧ лёкӧдӧны асьнысӧ юдейӧн шуысьяс, но найӧ абу юдейяс, найӧ — сӧтана йӧз чукӧр.
Некутшӧм локтана сьӧкыдысь эн пов.
Ӧткымынӧс тіян пиысь омӧльыс йӧршитас дзескыдінӧ, медым тӧдмавны тіянӧс. Сэки дас лун чӧж ті кутанныд сьӧкыдавны.
Но тэ помӧдзыс ло эскана, и Ме сета тэныд Олӧмыслысь юркытш.
Кодлӧн эм пель, мед кылӧ, мый Лов висьталӧ вичкояслы.
Вермысьлы мӧд кулӧмыс нинӧм оз вӧч».
«Пергам вичкоса анделлы тадзи гиж:
— Со мый висьталӧ тіянлы Сійӧ, кодлӧн эм кыкнанладорсяньыс лэчтӧм ёсь шыпурт.
Ме тӧда тэнсьыд уджъястӧ. Тэ олан сэні, кӧні сӧтаналӧн юралан пуклӧсыс, но тэ зумыда кутчысян Менам нимӧ. Тэ эн соссьы Меным эскӧмысь весиг сэки, кор тіянын, сӧтана оланінын, виисны Антипаӧс — Менсьым эскана висьталысьӧс.
Но Менам эм мыйсюрӧ тэныд паныд: тіян пӧвстын эмӧсь найӧ, кодъяс кутчысьӧны Валаамлӧн велӧдӧмӧ. Сійӧ велӧдіс Валакӧс кежӧдны Израиль войтырӧс ылӧгас, медым найӧ сёйисны идоллы вайӧм сёян да кырсалісны.
Тіян пӧвстын эмӧсь тшӧтш найӧ, кодъяс кутчысьӧны николаитъяслӧн велӧдӧмӧ. Татшӧм велӧдӧмсӧ Ме мустӧмта.
Бергӧдчы таысь.
Он кӧ бергӧдчы, регыд локта тэ дінӧ да тышкася накӧд Менам вомысь петысь шыпуртӧн.
Кодлӧн эм пель, мед кылӧ, мый Лов висьталӧ вичкояслы.
Вермысьлы Ме сета сёйны дзебӧм манна, сета сылы еджыд из, код вылын лоӧ гижӧма вермысьлысь выль нимсӧ. Тайӧ нимсӧ кутас тӧдны сӧмын тайӧ изсӧ босьтысьыс».
«Фиатира вичкоса анделлы тадзи гиж:
— Со мый висьталӧ Ен Пи, кодлӧн синъясыс ыпъялӧны би моз, а кокъясыс дзирдалӧны донӧдӧм ыргӧн моз.
Ме тӧда тэнсьыд уджъястӧ, муслунтӧ, кесъялӧмтӧ, эскӧмтӧ да зумыдлунтӧ. Тӧда, мый воддзаыс дорысь тэ ӧні ёнджыка на уджалан.
Но Менам эм мыйсюрӧ тэныд паныд: тэ лэдзан Езавель аньлы, асьсӧ пророкӧн шуысьлы, велӧдны да кежӧдны ылӧгас Менсьым кесйӧгъясӧс. Тайӧ аньыс велӧдӧ найӧс кырсавны да сёйны идоллы вайӧм сёян.
Ме сеті сылы кад бергӧдчыны кырсалӧмсьыс, но сійӧ эз бергӧдчы.
Со, ме топӧда сійӧс сьӧкыд висьӧмӧн, а сыкӧд кырсалысьяслы ме мӧдӧда уна сьӧкыдлун, оз кӧ найӧ бергӧдчыны асланыс уджъясысь.
Езавельлӧн челядьлы Ме мӧдӧда кулӧм. Сэки быд вичко кутас тӧдны, мый Ме — сьӧлӧм пытшкӧс да мӧвпъяс Тӧдысь, Ме быдӧнлы мынтыся уджъясныд серти.
Тіянлы да фиатираса мукӧд олысьяслы, кодъяс эз сетчыны Езавельлӧн велӧдӧмӧ да эз пырӧдчыны сідз шусяна “сӧтаналӧн гуся велӧдӧмӧ”, висьтала со мый: ме ог сьӧктӧд тіянӧс мукӧд тшӧктӧмъясӧн.
Шуа сӧмын: видзӧй Менам локтӧдз сійӧ, мый тіян эм нин.
Вермысьлы, коді помӧдз вӧчас Менам тшӧктӧм серти, Ме сета вын ыджыдавны быд войтыр вылын. Сійӧ кутас видзны найӧс кӧрт беддьӧн да сёй дозъясӧс моз сійӧ жуглас найӧс торпыригӧдз сійӧ жӧ выннас, кутшӧм вын Меным сетіс Батьӧй. Вермысьлы Ме сета асъя кодзув.
Кодлӧн эм пель, мед кылӧ, мый Лов висьталӧ вичкояслы».
3 юр.
«Сардис вичкоса анделлы тадзи гиж:
— Со мый висьталӧ Сійӧ, кодлӧн эм Енлӧн сизим лолыс да сизим кодзув.
Ме тӧда тэнсьыд уджъястӧ. Тэнӧ лыддьӧны ловъяӧн, но тэ кулӧмыд.
Садьмӧдчы да ёнмӧд сійӧ, мый тэнад эм, но мый кулан выйын нин. Ме ӧд аддза, мый тэнад уджъясыд Менам Ен водзын абу тыр-бурӧсь.
Эн вунӧд сійӧ, мый кывлін да сибӧдін. Видз сійӧс сьӧлӧмад да бергӧдчы мыжъяссьыд.
Он кӧ садьмӧдчы, локта тэ дінӧ гусясьысь моз тӧдлытӧг. Тэ весиг он тӧдлы, кутшӧм кадӧ локта тэ дінӧ.
Дерт, Сардис карын тэнад эм кымынкӧ морт, кодъяс видзисны ассьыныс паськӧмнысӧ пежасьӧмысь. Найӧ кутасны ветлыны Мекӧд еджыд паськӧмаӧсь, ӧд найӧ шогмӧны та вылӧ.
Вермысь пасьтасяс еджыд паськӧмӧ, и сылысь нимсӧ ог вушты Олӧмыслӧн небӧгысь. Аслам Бать водзын да Енлӧн анделъяс водзын Ме висьтала, мый сійӧ — Менам.
Кодлӧн эм пель, мед кылӧ, мый Лов висьталӧ вичкояслы».
«Филадельфия вичкоса анделлы тадзи гиж: — Со мый висьталӧ Вежаыс да Збыльыс, код ордын Давидлӧн восьтаныс. Сійӧ восьтӧ, и некод оз вермы тупкыны. Сійӧ тупкӧ, и некод оз вермы восьтны. Сійӧ висьталӧ:
“Ме тӧда тэнсьыд уджъястӧ. Со, Ме восьті тэ водзын ӧдзӧс, и некод оз вермы тупкыны сійӧс.
Дерт, тэ жеб, но видзин Менсьым кывъясӧс да эн соссьы Менам нимысь.
Со, Ме сета тэныд сӧтана йӧз чукӧрысь найӧс, кодъяс шуӧны асьнысӧ юдейясӧн, но найӧ абу юдейяс, а пӧръясьысьяс. Ме вӧча тадзи: найӧ локтасны да уськӧдчасны тэнад кок улӧ. Сэки тӧдмаласны, мый тэ — Меным муса.
Ме тшӧкті тэныд зумыда сулавны, и тэ видзин Менсьым тшӧктӧмӧс. Та вӧсна видза тэнӧ локтана сьӧкыд кадас. Тайӧ кадыс лоӧ став му пасьталаыс, медым тӧдмавны мувывса олысьясӧс.
Регыд Ме локта. Бура видз сійӧ, мый тэнад эм, медым некод эз мырддьы тэнсьыд юркытштӧ.
Вермысьӧс Ме сувтӧда зумыд сюръя пыдди Менам Енлӧн крамын, сійӧ пыр лоас сэні.
Ме гижа сы вылӧ Менам Енлысь нимсӧ, Ассьым выль нимӧс да Менам Ен карлысь нимсӧ. Тайӧ карыс — выль Ерусалим, коді лэччас енэжсяньыс, Менам Енсянь”.
Кодлӧн эм пель, мед кылӧ, мый Лов висьталӧ вичкояслы».
«Лаодикия вичкоса анделлы тадзи гиж:
— Со мый висьталӧ Аминь, эскана да збыль Висьталысь, Енлӧн став вӧчӧмторлы Подулыс.
Ме тӧда тэнсьыд уджъястӧ. Тэ абу пӧсь ни абу кӧдзыд.
Вӧлін кӧ эськӧ пӧсьӧн либӧ кӧдзыдӧн.
Но тэ абу пӧсь ни абу кӧдзыд, тэ муртса дэбыд. Та вӧсна быликта тэнӧ Аслам вомысь.
Тэ шуан: “Ме озыр. Ме ёна нин озырми, менам ставыс эм”.
Но тэ ӧмӧй он гӧгӧрво, мый тэ — коньӧрсьыс-коньӧр, шудтӧм, гӧль, синтӧм да пасьтӧм.
Ме туйдӧда тэнӧ. Ньӧб Менсьым зарни, биын весалӧмаӧс, да озырмы. Ньӧб Менсьым еджыд паськӧм, медым вермин вевттьысьны, медым эз тыдав тэнӧ янӧдан пасьтӧм вир-яйыд. Ньӧб Менсьым мавтантор да мавт сійӧн синтӧ, медым аддзин.
Коді муса Меным, сійӧс ме янӧда-чирышта.
Сідзкӧ, сьӧлӧмсяньыд зіль бергӧдчыны мыжъяссьыд.
Со, Ме сулала ӧдзӧс дорад да игӧдча.
Коді кылас Менсьым гӧлӧс шыӧс да восьтас Меным, пыра сы ордӧ да кутам ӧтвыв сёйны.
Ме лои Вермысьӧн да пукси Аслам Батькӧд орччӧн Сылӧн пуклӧсӧ. Сідзкӧ, вермысьӧс ме тшӧтш пуксьӧда Аскӧд орччӧн Менам пуклӧсӧ.
Кодлӧн эм пель, мед кылӧ, мый Лов висьталӧ вичкояслы».
4 юр.
Сэсся ме видзӧдлі енэжас да аддзи сэтысь восьса ӧдзӧс. Сэсянь ме кылі гӧлӧс шы, сійӧ вӧлі труба шы кодь. Тайӧ гӧлӧс шысӧ ме водзынджык кывлі нин. Сійӧ шуис меным: «Кыпӧдчы татчӧ. Ме петкӧдла тэныд, мый лоӧ та бӧрти».
Дзик пыр ме тыри Лолӧн да аддзи енэжсьыс пуклӧс да сы вылын Пукалысьӧс. Сылӧн чужӧмыс дзирдаліс дона изъяс моз, яшма да сердолик моз. А пуклӧс весьтас югъяліс изумруд рӧма ӧшкамӧшка.
Пуклӧс гӧгӧрыс вӧлі нӧшта на кызь нёль пуклӧс. Сэні пукалісны кызь нёль пӧрысь. Найӧ вӧліны еджыд паськӧмаӧсь, а юр выланыс вӧліны зарни юркытшъяс.
Пуклӧс дінас чардаліс-гымаліс, да кылісны гора шыяс. Пуклӧс водзас ӧзйис сизим би, тайӧ Енлӧн сизим лолыс. Пуклӧс водзас вӧлі стеклӧысь саридз, сійӧ югъяліс крусталь моз. Пуклӧс водзас да сы гӧгӧрыс вӧлі нёль енэжвыв олысь. Водзладорсяньыс да бӧрладорсяньыс найӧ дзоньнас вӧлі тырӧмаӧсь синъясӧн.
Ӧтиыс на пиысь вӧлі лев кодь, мӧдыс — ӧшпи кодь, коймӧдыс вӧлі быттьӧ морт чужӧма, а нёльӧдыс вӧлі лэбысь кутш кодь.
Быдӧн на пиысь вӧлі квайт бордъя, а налӧн борд ортсыыс да пытшкӧсыс вӧлі тырӧмаӧсь синъясӧн.
Лун и вой найӧ дугдывтӧг шуалӧны:
— Вежа, вежа, вежа Господь Ен, Ставсӧкутысь, Коді вӧлі, эм и локтас.
Кор енэжвыв олысьяс ошкӧны-нимӧдӧны да аттьӧалӧны пуклӧс вылын Пукалысьӧс, Помтӧг Олысьӧс, сэки кызь нёль пӧрысьыс уськӧдчӧны пуклӧс вылын Пукалысь водзӧ да копыртчылӧны Помтӧг Олысьлы. Ассьыныс юркытшсӧ пуклӧс водзӧ пуктӧмӧн найӧ шуалӧны:
— Господьӧй. Тэ шогман сибӧдны ошкӧм-нимӧдӧмсӧ да вынсӧ, ӧд Тэ вӧчин ставсӧ. Тэнад кӧсйӧм серти вӧчӧма ставсӧ, да ставыс олӧ.
5 юр.
Юралан пуклӧс вылын Пукалысьлӧн веськыд киысь ме аддзи гартӧм гижӧд. Сэтчӧ вӧлі гижӧма ӧтарсяньыс и мӧдарсяньыс, да пуктӧма сы вылӧ сизим печать.
Нӧшта ме аддзи вына анделӧс, сійӧ гораа юаліс: «Коді шогмас разьны тайӧ гартӧм гижӧдсӧ да жугӧдны печатьяссӧ?»
Но енэжас, му вылас да му пыдӧсас некод эз вермы разьны тайӧ гижӧдсӧ либӧ видзӧдлыны сэтчӧ.
Ме ёна бӧрді, ӧд некод эз сюр шогманаыс разьны тайӧ гижӧдсӧ либӧ видзӧдлыны сэтчӧ.
Сэки пӧрысьяс пиысь ӧти шуис меным: «Эн бӧрд.
Со, Лев, Иуда чужанкотырысь, Давид чужанвужйысь. Сійӧ — Вермысь, Сійӧ разяс тайӧ гижӧдсӧ да жугӧдас сизимнан печатьсӧ».
Сэсся ме видзӧдлі да аддзи Баляӧс. Сійӧ сулаліс юралан пуклӧс водзын, нёль енэжвыв олысь да пӧрысьяс шӧрын. Балясӧ вӧлі быттьӧ начкӧма. Сылӧн вӧлі сизим сюр да сизим син. Сизим синмыс — тайӧ Енлӧн сизим лолыс, кодъясӧс мӧдӧдӧма став му пасьталаыс.
Баляыс матыстчис пуклӧс вылын Пукалысь дінӧ да босьтіс Сылӧн веськыд киысь гартӧм гижӧдсӧ.
Гижӧдсӧ босьтӧм бӧрын нёль енэжвыв олысьыс да кызь нёль пӧрысьыс уськӧдчисны Баля водзӧ. Быдӧн на пиысь киас кутіс арфа да ладан тыра зарни доз. Ладан тшыныс — тайӧ вежа войтырлӧн кевмысьӧмъясыс.
Найӧ сьылісны выль сьыланкыв:
— Тэ шогман босьтны гартӧм гижӧдсӧ да жугӧдны печатьсӧ, ӧд Тэнӧ вӧлі начкӧма. Вирыд вылӧ Тэ ньӧбин миянӧс Енмыслы быд чужанвужйысь да чужанкотырысь, быд кыла йӧз пытшкысь да войтырысь. Тэ пуктін миянӧс ӧксыясӧ да вежа кесъялысьясӧ миян Енлы. Ми кутам ыджыдавны му вылас.
Ме видзӧдлі да кылі уна анделлысь гӧлӧс шысӧ. Найӧ кытшалісны Енлысь пуклӧссӧ, нёль енэжвыв олысьӧс да пӧрысьясӧс. Анделъяслӧн лыдыс вӧлі лыдтӧм-тшӧттӧм — сё миллионъясӧн. Найӧ гораа шуалісны:
— Начкӧм Баляыс шогмана сибӧдны вынсӧ, озырлунсӧ, мывкыдлунсӧ, ёнлунсӧ, ошкӧм-нимӧдӧмсӧ да дзирдлунсӧ.
Ме кылі, мый став олысьыс енэжас, му вылас, му пыдӧсас да саридзас шуалісны:
— Юралан пуклӧс вылын Пукалысь лыда Балялы ошкӧм-нимӧдӧмыс, дзирдлуныс да ыджыдалӧмыс нэмъяс чӧж.
Сэки енэжвыв нёль олысьыс шуисны: «Аминь.»
А кызь нёль пӧрысьыс уськӧдчисны да копыртчылісны Помтӧг Олысьлы.
6 юр.
Ме аддзи: Баля жугӧдіс сизим печать пиысь медводдзасӧ. Сэсся ме кылі гым кодь гора шы: «Лок да видзӧд.» Тайӧс шуис нёль енэжвыв олысь пӧвстысь ӧтиыс.
Ме видзӧдлі да аддзи еджыд вӧлӧс, а сы вылын верзьӧма пукаліс. Сылӧн киас вӧлі ньӧввуж, сылы вӧлі сетӧма юркытш.
Сійӧ муніс вермысь моз, да бара на вӧлі дась вермыны.
Кор Баля жугӧдіс мӧд печатьсӧ, ме кылі мӧд енэжвыв олысьлысь шуӧмсӧ: «Лок да видзӧд.»
Сэки петіс мӧд вӧв, сійӧ вӧлі би гӧрд рӧма.
Сы вылын пукалысьлы вӧлі сетӧма вын — босьтны му вылысь лӧньлунсӧ, медым йӧзыс виалісны ӧта-мӧднысӧ.
Сылы вӧлі сетӧма ыджыд шыпурт.
Кор Баля жугӧдіс коймӧд печатьсӧ, ме кылі коймӧд енэжвыв олысьлысь шуӧмсӧ: «Лок да видзӧд.»
Ме видзӧдлі да аддзи сьӧд вӧлӧс. Сы вылын пукалысьлӧн киас вӧлі вески.
Сэсся нёль енэжвыв олысь шӧрысь ме кылі кодлыськӧ гӧлӧс шысӧ. Сійӧ шуис: «Ӧти хиникс шобдіысь — ӧти динар. Куим хиникс идйысь — тшӧтш сы мында.
Но выйсӧ да винасӧ эн тшыкӧд.»
Кор Баля жугӧдіс нёльӧд печатьсӧ, ме кылі нёльӧд олысьлысь шуӧмсӧ: «Лок да видзӧд.»
Ме видзӧдлі да аддзи быгалӧм рӧма вӧлӧс да сы вылын пукалысьӧс, кодлӧн нимыс — Кулӧм.
Сы бӧрся вӧтчис ачыс Адыс.
Налы вӧлі сетӧма ыджыдалан вын мулӧн нёльӧд юкӧныс вылын: виавны йӧзсӧ шыпуртӧн да тшыгйӧдӧмӧн, кулан висьӧмъясӧн да зверъяс отсӧгӧн.
Кор Баля жугӧдіс витӧд печатьсӧ, висьпуктанін улысь ме аддзи ловъяссӧ налысь, кодъясӧс вӧлі виӧма Ен Кыв вӧсна да Ен йылысь висьталӧм вӧсна.
Найӧ гораа горӧдісны: «Вежа да збыль Ыджыдӧй. Кор нин Тэ мыждан мувывса олысьясӧс да перъян налысь водзӧссӧ миян вир вӧсна?»
Сэки быдӧнлы налы сетісны еджыд паськӧм да тшӧктісны на виччысьыштны, кытчӧдз оз тыр на моз виӧмаяслӧн лыдыс — налӧн вокъяслӧн да ӧтвыв уджалысьяслӧн лыдыс.
Кор Баля жугӧдіс квайтӧд печатьсӧ, ме аддзи: муыс кутіс ёна вӧрны, шондіыс пемдіс да лои сьӧд дӧра кодь, а тӧлысьыс лои вир гӧрд рӧма.
Енэжсьыс кодзувъясыс усины му вылӧ инжир вотӧс моз, кор найӧ гылалӧны пу вывсьыс ён тӧвнырысь.
Енэжыс гартыштчис тубрасӧ да саяліс, а керӧсъяс да діяс вешйисны асланыс местаысь.
Мувывса ӧксыяс, юралысьяс, озыръяс, тышкайӧзӧн веськӧдлысьяс, ыджыдалысьяс, кесйӧгъяс да мездлуна йӧз, — ставныс дзебсисны кырта горсъясӧ да керӧс потасъясӧ. Керӧсъяслы да кырталы найӧ шуалісны:
«Усьӧй миян вылӧ да дзебӧй миянӧс юралан пуклӧс вылын Пукалысьлӧн синъясысь да Балялӧн скӧрлунысь.
Ӧд Сылӧн ыджыд Скӧралан луныс воис нин. Коді вермас Сылы паныд сувтны?»
7 юр.
Та бӧрти ме аддзи нёль анделӧс. Найӧ сулалісны мулӧн нёльнан пельӧсас да кутісны мулысь нёльнан тӧвнырсӧ, медым тӧлыс эз пӧльт му вылӧ, саридз вылӧ да некутшӧм пу вылӧ.
Сэсся ме аддзи нӧшта ӧти анделӧс. Сійӧ кыпӧдчис асыввывсянь, а киас кутіс ловъя Енлысь пас пуктансӧ.
Сійӧ гораа шыасис нёль андел дінӧ, кодъяслы вӧлі сетӧма вын вӧчны лёксӧ мулы да саридзлы. Андел шуис: «Энӧ вӧчӧй лёксӧ мулы, саридзлы да пуяслы, кытчӧдз огӧ пуктӧй плешканыс пас миян Енлӧн кесйӧгъяслы».
Сэсся ме кылі пасйӧмаяслысь лыдсӧ.
Тайӧ лыдыс вӧлі сё нелямын нёль сюрс морт. Найӧ вӧліны Израиль войтырлӧн быд чужанкотырысь:
Иуда чужанкотырысь — дас кык сюрс морт,
Рувим чужанкотырысь — дас кык сюрс,
Гад чужанкотырысь — дас кык сюрс,
Асир чужанкотырысь — дас кык сюрс,
Неффалим чужанкотырысь — дас кык сюрс,
Манассей чужанкотырысь — дас кык сюрс,
Симеон чужанкотырысь — дас кык сюрс,
Левий чужанкотырысь — дас кык сюрс,
Иссакар чужанкотырысь — дас кык сюрс,
Завулон чужанкотырысь — дас кык сюрс,
Ӧсип чужанкотырысь — дас кык сюрс
да Вениамин чужанкотырысь — дас кык сюрс морт.
Сэсся ме видзӧдлі да аддзи: юралан пуклӧс водзын да Баля водзын сулаліс лыдтӧм-тшӧттӧм йӧз чукӧр. Найӧ вӧліны быд чужанвужйысь да чужанкотырысь, быд кыла йӧз пытшкысь да войтырысь. Найӧ вӧліны еджыд паськӧмаӧсь, а кианыс кутісны пальма росъяс
да гораа горзісны:
— Мездмӧмыс — миян Енсянь — юралан пуклӧс вылын Пукалыссянь да Балясянь.
Сэки став анделыс, кодъяс кытшалісны юралан пуклӧссӧ, пӧрысьясӧс да нёль енэжвыв олысьсӧ, кымынь уськӧдчисны пуклӧс водзӧ да копыртчылісны Енмыслы. Найӧ шуалісны:
— Аминь.
Дзирдлуныс да мывкыдлуныс, выныс да ёнлуныс, ошкӧм-нимӧдӧмыс да аттьӧалӧмыс миян Енлы нэмъяс чӧж.
Аминь.
Сэки пӧрысьяс пӧвстысь ӧти юаліс менсьым: «Тайӧ еджыд паськӧмаясыс — найӧ кодъяс? Кытысь найӧ локтісны?»
«Ыджыдӧй, тэ ачыд тӧдан», — вочавидзи ме.
Сэки сійӧ шуис меным:
— Тайӧ йӧзыс мунісны уна сьӧкыд пыр.
Найӧ мыськисны ассьыныс паськӧмсӧ Баля Вирӧн, да налӧн паськӧмыс лои еджыд.
Та вӧсна найӧ сулалӧны Ен пуклӧс водзын да лун и вой кесъялӧны Енмыслы Сылӧн крамын.
Пуклӧс вылын Пукалысьыс пыр лоӧ накӧд да видзӧ найӧс.
Найӧ оз нин кутны тшыгъявны, налӧн оз косьмы горшыс, найӧс оз пӧж шондіыс да оз сот гожйыс.
Ӧд Баляыс, пуклӧс водзын Сулалысьыс, кутас видзны найӧс, Сійӧ вайӧдас найӧс ловъя ва визувтанінӧ, да Енмыс чышкас налысь став синвасӧ.
8 юр.
Кор Баля жугӧдіс сизимӧд печатьсӧ, енэжас час джын мында кежлӧ лои чӧв-лӧнь.
Ме аддзи Ен водзын сулалысь сизим анделӧс, налы вӧлі сетӧма сизим труба.
Сэсся матыстчис нӧшта ӧти андел да сувтіс тшынӧдчан пызан водзӧ. Киас сійӧ кутіс зарни тшынӧдчан доз.
Сылы вӧлі сетӧма уна ладан, медым тшынӧдны сійӧс став вежа войтырлӧн кевмысьӧмъяснас зарни тшынӧдчан пызан вылын, коді сулаліс юралан пуклӧс водзын.
Сэки андел киысь кыптіс Енмыслы вежа войтырлӧн кевмысьӧмъяснас ладан тшын.
Сэсся андел босьтіс тшынӧдчан доз, пуктіс сэтчӧ висьпуктанінысь бисӧ да шыбитіс сійӧс му вылӧ.
Сэні кылісны гора шыяс, чардаліс-гымаліс, да муыс вӧрис.
Сэки сизимнан анделыс, кодъяслӧн вӧлі сизим труба, дасьтысисны трубитны.
Кор трубитіс медводдза анделыс, му вылӧ киссис вир сора биа шер.
Сэки сотчис пуяслӧн коймӧд юкӧныс да став веж туруныс.
Кор трубитіс мӧд анделыс, быттьӧ ыджыд сотчысь керӧс уси саридзас, да саридзлӧн коймӧд юкӧныс пӧри вирӧ. Сэки саридзын олысьяслӧн коймӧд юкӧныс куліс, да корабльяслӧн коймӧд юкӧныс вӧйис.
Кор трубитіс коймӧд анделыс, енэжсьыс уси ыджыд кодзув, коді ыпъяліс яръюгыд би моз. Сійӧ уси юяслӧн коймӧд юкӧныс вылӧ да ва петанінъясӧ.
Тайӧ кодзулыслӧн нимыс Курыд турун.
Ваыслӧн коймӧд юкӧныс лои зэв курыд, та вӧсна уна йӧз кулісны.
Кор трубитіс нёльӧд анделыс, шонділӧн, тӧлысьлӧн да кодзувъяслӧн коймӧд юкӧныс кусіс, налӧн коймӧд юкӧныс пемдіс. Та вӧсна луныслӧн да войыслӧн коймӧд юкӧныс вӧлі пемыд.
Сэсся ме аддзи енэж шӧрӧдыс лэбысь анделӧс. Сійӧ гораа горзіс: «Шог, шог, шог тіянлы, мувывса олысьяслы, мукӧд куим анделлӧн трубитӧмысь, ӧд найӧ регыд нин пондасны трубитны.»
9 юр.
Кор трубитіс витӧд анделыс, ме аддзи: енэжсянь му вылӧ усис кодзув. Сылы вӧлі сетӧма пыдӧстӧминысь восьтансӧ.
Кор сійӧ восьтіс пыдӧстӧминсӧ, сэтысь ыджыд пачысь моз пуркнитіс тшын.
Тайӧ тшынсьыс пемдіс шондіыс и сынӧдыс.
Тшын пытшсьыс петіс му вылӧ саранча чукӧр. Налы вӧлі сетӧма мувывса скорпионъяслӧн кодь вын.
Налы вӧлі шуӧма, медым эз вӧчны некутшӧм лёктор турунлы, быдмӧглы либӧ пулы, сӧмын йӧзыслы, кодъяслӧн плешкас абу Енлӧн пасыс.
Саранчаяслы вӧлі шуӧма, медым найӧ эз виавны йӧзӧс, сӧмын мучитісны найӧс вит тӧлысь чӧж.
Налысь мучитӧмсӧ позьӧ ӧткодявны скорпионлӧн чушкӧмкӧд.
Сійӧ лунъясӧ йӧзыс кутасны корсьны кулӧмсӧ, но оз аддзыны сійӧс, кӧсъясны кувны, но кулӧмыс пышъяс наысь.
Саранчаясыс вӧліны тышӧ петысь вӧвъяс кодьӧсь.
Юр выланыс налӧн вӧлі зарни юркытш сяма, а чужӧмыс налӧн вӧлі мортлӧн кодь.
Налӧн вӧлі аньлӧн кодь юрси, а налӧн пиньясыс вӧліны левлӧн пиньяс кодьӧсь.
На вылын вӧлі кышӧд, быттьӧ кӧртысь дорӧма. Налӧн бордъясыс швачкисны сэтшӧм гораа, быттьӧ зэв уна телегаа вӧв чукӧр котӧртіс тышӧ.
Налӧн бӧжъясыс вӧліны скорпионлӧн кодьӧсь, а бӧжъясас вӧліны чушканъяс.
Налӧн вӧлі вын вӧчны йӧзыслы лёксӧ вит тӧлысь чӧж.
Налӧн ӧксынас вӧлі пыдӧстӧминысь андел.
Сылӧн нимыс еврей ногӧн лоӧ Авадон, а грек ногӧн — Аполион.
Ӧти шог муніс, сы бӧрся нӧшта кык шог локтӧ.
Кор трубитіс квайтӧд анделыс, ме кылі гӧлӧс шы. Сійӧ кыліс зарни висьпуктанінлӧн нёль сюрсянь. Тайӧ висьпуктаніныс сулаліс Ен водзын. Тайӧ гӧлӧс шыыс шуис квайтӧд анделыслы, кодлӧн вӧлі труба:
«Мезды нёльнан анделсӧ, кодъясӧс кӧрталӧма ыджыд Евфрат ю дорӧ».
Сэки нёльнан анделсӧ вӧлі мездӧма. Найӧс вӧлі дасьтӧма тайӧ часыс, луныс, тӧлысьыс да воыс кежлӧ, медым вины йӧзыслысь коймӧд юкӧнсӧ.
Тайӧ анделъясыслӧн вӧлі кыксё миллион тышка морт вӧвъяснас.
Тайӧ лыдсӧ ме ачым кывлі.
Тайӧ вӧвъяссӧ да тышкайӧзсӧ ме аддзылі вемӧсӧн. Найӧ вӧліны татшӧмӧсь: верзьӧмаяс вылын вӧліны би гӧрд, пемыдлӧз да кольквиж рӧма кӧрт кышӧдъяс. Вӧвъяслӧн юрныс вӧлі левъяслӧн юр кодьӧсь, налӧн вомысь петіс би, тшын да сера.
Тайӧ куим бырӧданторсьыс: биысь, тшынысь да сераысь, кодъяс петісны вӧвъяслӧн вомысь, куліс йӧзлӧн коймӧд юкӧныс.
Вӧвъяслӧн выныс вӧлі налӧн вомас да бӧжас.
Налӧн бӧжъясыс вӧліны змей кодьӧсь, ӧд бӧжъясыс вӧліны юраӧсь. Тайӧ юрнас найӧ чушкисны.
Мукӧд йӧзыс, кодъяс колины ловйӧн тайӧ бырӧданторъяссьыс, эз бергӧдчыны асланыс лёк уджъясысь. Найӧ важ мозыс копрасисны мутияслы да зарниысь, эзысьысь, ыргӧнысь, изйысь да пуысь вӧчӧм идолъяслы, кодъяс оз вермыны аддзыны, кывны ни ветлыны.
Найӧ эз бергӧдчыны морт виӧмысь, тшыкӧдчӧмысь, кырсалӧмысь да гусясьӧмысь.
10 юр.
Ме аддзи нӧшта ӧти вына анделӧс, коді лэччис енэжсяньыс. Сійӧс кытшаліс кымӧрыс, сы юр весьтын вӧлі ӧшкамӧшка. Сылӧн чужӧмыс вӧлі шонді кодь, а кокъясыс вӧліны биа сюръяяс кодьӧсь. Киас сійӧ кутіс неыджыд восьса гижӧд.
Веськыд кокнас сійӧ сувтіс саридз вылӧ, а шуйганас — му вылӧ, сэсся горӧдіс ыджыд шыӧн, быттьӧ лев равӧстіс.
Сылӧн горӧдӧм бӧрын сизим гым кутісны гораа сёрнитны.
Сизим гым сёрнитӧм бӧрын ме кӧсйи гижны налысь сёрнисӧ, но енэжсяньыс ме кылі гӧлӧс шы. Сійӧ шуис меным:
«Сизим гымлысь сёрнисӧ эн гиж, дзеб сійӧс».
Сэки андел, кодӧс ме аддзылі саридз да му вылын ӧтпырйӧ сулалысьӧн, лэптіс веськыд кисӧ енэжланьыс да кӧсйысис Помтӧг Олысьӧн, коді вӧчис енэжсӧ да сэні олысьясӧс, мусӧ да сы вылын олысьясӧс, саридзсӧ да сы пытшкын олысьясӧс. Сійӧ сетіс кыв: «Кадыс оз нин ло. Но сійӧ лунӧ, кор кылас сизимӧд анделлӧн трубитӧм шыыс, сэки збыльмас Енлӧн гуся мӧвпыштӧмыс, мый йылысь Енмыс водзвыв висьталіс пророкъяслы — Аслас кесйӧгъяслы».
Сэсся енэжсяньыс бара кыліс гӧлӧс шы, кодӧс ме кывлі нин. Сійӧ шуис меным: «Мун андел дінӧ, коді сулалӧ саридз да му вылын, да босьт сылӧн киысь восьса гижӧдсӧ».
Ме матыстчи андел дінӧ да кори сылысь гижӧдсӧ.
Сійӧ шуис меным: «Босьт да сёй тайӧ гижӧдсӧ.
Сійӧ лоӧ юмов ма кодь вом пытшкад, но гырк пытшкад лоӧ курыд».
Андел киысь ме босьті гижӧдсӧ да сёйи.
Менам вомын сійӧ вӧлі юмов ма кодь.
Но бӧрыннас менам гырк пытшкӧй ёна курдіс сыысь.
Сэсся андел шуис меным: «Тэныд бара на ковмас водзвыв висьтавлыны, мый лоӧ уна войтыркӧд да чужанкотыркӧд, уна йӧзкӧд да ӧксыяскӧд».
11 юр.
Меным сетісны кузь мурталан бедь да шуисны: «Мун да муртав Енлысь крамсӧ, висьпуктанінсӧ да лыддьы крамас юрбитысьяслысь лыдсӧ.
Крамлысь ортсы йӧрсӧ эн муртав, сійӧс оз ков муртавны, ӧд сійӧс сетӧма ентӧдтӧмъяслы.
Найӧ кутасны талявны вежа карсӧ нелямын кык тӧлысь чӧж.
Ме мӧдӧда Ассьым кык висьталысьӧс. Чорыд дукӧсӧ пасьтасьӧмӧн найӧ кутасны пророкавны сюрс кыксё квайтымын лун чӧж».
Тайӧ висьталысьясыс — кык выя пу да кык бикок, кодъяс сулалӧны став мунас веськӧдлысь Ен водзын.
Кодкӧ кӧсъяс кӧ налы лёк вӧчны, на вомысь петас би да ньылыштас налы паныд мунысьясӧс.
Тадзи быдӧнӧс, налы лёк вӧчысьясӧс, лоӧ бырӧдӧма.
Налӧн эм вын тупкыны енэжсӧ, медым налӧн висьтавлігӧн эз зэр. Налӧн эм вын пӧртны васӧ вирӧ да тшыкӧдны мусӧ быдпӧлӧс бырӧданторнас, кор сӧмын кӧсъясны.
Кор найӧ дугдасны висьтавлыны, сэки пыдӧстӧминысь петас звер да кутас тышкасьны накӧд. Зверыс вермас найӧс да виас. Налӧн шойясыс кутасны куйлыны ыджыд карлӧн туй вылас. Тайӧ карсӧ позьӧ ӧткодявны Содомкӧд да Египеткӧд, ӧд тайӧ карас вӧлі тувъялӧма налысь Господьӧс.
Быд кыла йӧз пытшкысь да войтырысь, быд чужанвужйысь да чужанкотырысь унаӧн кутасны видзӧдны налӧн шойяс вылӧ куим лун да джын, но оз лэдзны гуавны найӧс.
Мувывса йӧзыс кутасны нимкодясьны да гажӧдчыны, весиг козьналасны ӧта-мӧдныслы козинъяс, ӧд тайӧ кык висьталысьыс ёна мучитісны найӧс.
Но куим лун да джын мысти Енмыс пӧльыштіс тайӧ кык висьталысьыс пытшкӧ олӧмыслысь ловсӧ, да найӧ чеччисны.
Сэки на вылӧ видзӧдысьяс ёна повзисны.
Висьталысьяс кылісны енэжсяньыс гора шы. Сійӧ шуис налы: «Кыпӧдчӧй татчӧ.»
Сэки найӧ кыпӧдчисны енэжас кымӧр вылын, а налы паныд мунысьяс видзӧдісны на вылӧ.
Дзик пыр муыс кутіс ёна вӧрны, да карыслӧн дасӧд юкӧныс киссис. Му вӧригас куліс сизим сюрс морт, а мукӧдыс ёна повзисны да ошкисны енэжвывса Енмӧс.
Мӧд шогыс помасис, но матысмӧ нин коймӧд шог.
Сизимӧд анделыс трубитіс, и енэжас кылісны гора шыяс. Найӧ шуалісны:
— Став муюгыдыс лои миян Господьлӧн да Сылӧн Мавтыштӧмалӧн юраланінӧн. Сійӧ кутас юравны нэмъяс чӧж.
Сэки кызь нёль пӧрысьыс, кодъяс пукалісны Ен водзын юралан пуклӧсъяс вылын, кымынь уськӧдчӧмӧн копыртчылісны Енмыслы. Найӧ шуалісны:
— Господьӧй Енмӧй, Ставсӧкутысьӧй. Ми аттьӧалам Тэнӧ. Тэ эм, вӧлін и лоан. Тэ босьтін ыджыдалан вынсӧ Аслад киӧ, кутін веськӧдлыны ставнас.
Ентӧдтӧмъяс ёна скӧралісны, но ӧні воис Тэнад скӧрлуныд. Воис кад мыждыны кулӧмаясӧс да сетны тырдон Тэнад кесйӧгъяслы — пророкъяслы да вежа войтырлы, да Тэнад нимысь полысьяслы — ичӧтъяслы и гырысьяслы. Воис кад бырӧдны найӧс, кодъяс тшыкӧдісны мусӧ.
Енэжас воссис Енлӧн крамыс, и сэтысь тыдовтчис Йитӧдлӧн куд. Сэки кутіс чардавны-гымавны, кылісны гора шыяс, муыс кутіс вӧрны, да киссис гырысь шер.
12 юр.
Сэсся енэжсьыс ме аддзи ыджыд индысьпас.
Ань вӧлі гартыштчӧма шондіӧн.
Сылӧн кок улас вӧлі тӧлысь, а юр вылас — дас кык кодзулысь юркытш.
Сійӧ вӧлі кынӧма, да ёна горзіс чужтан дойсьыс.
Сэсся енэжас лои мӧд индысьпас. Ме аддзи би гӧрд рӧма ыджыд гундырӧс. Сійӧ вӧлі сизим юра да дас сюра, а быд юр вылын вӧлі юркытш.
Бӧжнас сійӧ чышкыштіс енэжсьыс кодзувъяслысь коймӧд юкӧнсӧ да шыбитіс найӧс му вылӧ.
Сэсся гундыр сувтіс чужтысь аньлы воча, медым чужтӧм бӧрас сёйны сылысь пузчужӧм кагасӧ.
Ань чужтіс пиӧс, тайӧ кагаыс кутас веськӧдлыны кӧрт беддьӧн став йӧзнас.
Аньлысь кагасӧ вӧлі кыпӧдӧма Ен дінӧ, Сылӧн юралан пуклӧс дінӧ.
Ачыс аньыс пышйис овтӧминӧ. Сэні Енмыс дасьтӧма вӧлі оланін, медым вердны тайӧ аньсӧ сюрс кыксё квайтымын лун чӧж.
Сэсся енэжас пансис тыш.
Микаил аслас анделъяскӧд тышкасис гундырлы паныд, а гундыр аслас анделъяскӧд — налы паныд. Но гундырӧс вӧлі вермӧма, и сылы да сылӧн анделъяслы эз ло местаыс енэжас.
Ыджыд гундырӧс, важ змейӧс, вӧлі шыбитӧма му вылӧ. Сылӧн нимыс — омӧль да сӧтана. Сійӧ ылӧдлӧ муюгыдас став олысьсӧ. Сыкӧд тшӧтш вӧлі шыбитӧма му вылас сылысь анделъяссӧ.
Сэки ме кылі енэжсянь гора шы:
— Ӧні воис мездмӧмыс, выныс, миян Енлӧн юралӧмыс да Сылӧн Мавтыштӧмалӧн ыджыдалӧмыс. Ӧд енэжсьыс шыбитӧма мыждысьӧс. Лун и вой сійӧ мыждіс вокъяснымӧс миян Ен водзын.
Миян вокъяс вермисны мыждысьӧс Балялӧн Вирӧн да збыльсӧ висьталӧмӧн. Найӧ дасьӧсь вӧлі сетны ассьыныс олӧмнысӧ да эз повны кулӧмысь.
Сідзкӧ, енэжыс да став сэні олысьыс, нимкодясьӧй.
Но курыд шог тіянлы, му вылын да саридзын олысьяслы, ӧд тіян дінӧ лэччис омӧльыс. Сійӧ тырӧма ыджыд скӧрлунӧн, ӧд сійӧ тӧдӧ, мый сылӧн кадыс этша нин.
Кор гундыр аддзис, мый сійӧс шыбитӧма му вылӧ, сійӧ кутіс вӧтлысьны пи чужтысь ань бӧрся.
Аньлы вӧлі сетӧма ыджыд кутшлысь кык борд, медым сійӧ лэбзис змейысь овтӧминӧ, сылы дасьтӧминӧ. Сэні кутасны вердны сійӧс куим во да джын.
Аньӧс вӧтӧдігӧн змей быликтіс аслас вомысь ю мында ва, медым кылӧдны аньӧс,
но муыс отсаліс аньлы. Муыс воссис да ньылыштіс гундыр вомысь петӧм юсӧ.
Гундыр ёна скӧрмис ань вылӧ да муніс тышкасьны сылӧн мукӧд челядькӧд, кодъяс олӧны Ен тшӧктӧм серти да кутчысьӧны Исус Кристослӧн висьталӧмӧ.
13 юр.
Сэсся ме сувті саридз дорӧ да аддзи саридзысь петӧм зверӧс. Сійӧ вӧлі сизим юра да дас сюра.
Быд сюрын вӧлі ӧти юркытш, а юръясас вӧлі гижалӧма Енмӧс лёкӧдана нимъяс.
Зверыс, кодӧс ме аддзылі, вӧлі леопард кодь.
Сылӧн кокъясыс вӧліны ошлӧн кодьӧсь, а вомыс — левлӧн кодь.
Гундыр сетіс сылы ассьыс вынйӧрсӧ, юралан пуклӧссӧ да ыджыдалан вынсӧ.
Ме аддзи: зверлӧн ӧти юрыс вӧлі кувмӧн доймӧма, но тайӧ кулан дойыс бурдіс.
Став мувывса йӧзыс таысь ёна шензисны да вӧтчисны звер бӧрся.
Найӧ копыртчылісны гундырлы, коді сетіс зверлы ыджыдалан вынсӧ.
Сэсся найӧ копыртчылісны зверлы да шуалісны:
— Кодӧс позьӧ ӧткодявны тайӧ зверыскӧд?
Коді вермас тышкасьны сыкӧд?
Зверлы вӧлі сетӧма позянлун тшапа сёрнитны да омӧльтны Енмӧс лёкӧдана кывъясӧн. Сылы вӧлі сетӧма вын вӧчны тадзи нелямын кык тӧлысь чӧж.
Сійӧ паськӧдіс вомсӧ да кутіс лёкӧдны Енмӧс, Сылысь нимсӧ, оланінсӧ да енэжвыв олысьясӧс.
Сылы вӧлі сетӧма вын тышкасьны вежа войтыркӧд да вермыны найӧс.
Сылӧн вӧлі вын ыджыдавны быдпӧлӧс чужанвуж да чужанкотыр вылын, быд кыла йӧз да быд войтыр вылын.
Сылы копыртчыласны мувывса став йӧзыс, кодъяслысь нимсӧ му пуксьӧмсяньыс абу гижӧма начкӧм Балялӧн небӧгӧ — Олӧмыслӧн небӧгӧ.
Кодлӧн эм пель, мед кылӧ тайӧ кывъяссӧ:
Коді мӧд мортсӧ дзескыдінӧ пуксьӧдас, ачыс сэтчӧ веськалас.
Коді шыпуртӧн виас, ачыс шыпуртсянь кулас.
Татшӧм кадас вежа войтырлы колӧ зумыдлун да эскӧм.
Сэсся ме аддзи мӧд зверӧс, коді петіс му пытшкысь.
Сылӧн вӧлі балялӧн кодь кык сюр, но сёрнитіс сійӧ гундыр моз.
Сійӧ ставсӧ вӧчӧ воддза зверыслӧн син водзын, сылӧн ыджыдалан выннас. Став мусӧ да сэні олысьясӧс сійӧ тшӧктӧ копрасьны воддза зверыслы, кодлӧн бурдіс кулан дойыс.
Сійӧ вӧчӧ ыджыд шензьӧданаторъяс: йӧз син водзын сійӧ енэжсяньыс уськӧдӧ би му вылӧ.
Став шензьӧданаторсӧ сійӧ вӧчӧ воддза зверыслӧн син водзын. Тайӧ шензьӧданаторъяснас сійӧ ылӧдлӧ мувывса йӧзсӧ. Сійӧ тшӧктӧ йӧзыслы вӧчны воддза зверыслысь серпассӧ. Тайӧ зверсӧ вӧлі дойдӧма шыпуртӧн, но сійӧ ловзис.
Мӧд зверыслы вӧлі сетӧма вын: ловзьӧдны воддза зверыслысь серпассӧ, медым тайӧ серпасыс сёрнитіс да тшӧктіс виавны быдӧнӧс, коді оз копыртчыв тайӧ серпасыслы.
Сійӧ тшӧктӧ быдӧнлы — ичӧтлы и гырысьлы, озырлы и гӧльлы, мездлуна мортлы и кесйӧглы — пуктыны пас налӧн веськыд киас либӧ плешкас. Сэки некод оз вермы ньӧбны ни вузавны, оз кӧ ло сылӧн тайӧ пасыс: зверлӧн нимыс либӧ сы нимлӧн лыдпасыс.
Тані колӧ мывкыдлун.
Кодлӧн эм вежӧр, сійӧ мед гӧгӧрвоӧ звер нимлысь лыдпассӧ, ӧд тайӧ мортлӧн лыдпасыс.
Тайӧ лыдпасыс — квайтсё квайтымын квайт.
14 юр.
Сэсся ме видзӧдлі да аддзи: Сион керӧс вылын сулалісны Баля да Сыкӧд орччӧн сё нелямын нёль сюрс морт. Налӧн плешканыс вӧлі гижӧма Сылӧн Батьлысь нимсӧ.
Ме кылі енэжсяньыс шы. Сійӧ вӧлі уна валӧн бузгысь шы кодь да чорыд гым шы кодь. Сійӧ юргис, быттьӧ арфаӧн ворсісны.
Тайӧ йӧзыс сьылісны выль сьыланкыв юралан пуклӧс водзын, нёль енэжвыв олысь да пӧрысьяс водзын.
Тайӧ сьыланкывсӧ некод эз куж сьывнысӧ. Сійӧс сьылісны сӧмын сё нелямын нёль сюрс морт, кодъясӧс ньӧбӧма му вывсьыс.
Тайӧ йӧзыс эз пежавны асьнысӧ аньяскӧд узьлӧмӧн, найӧ сӧстӧмӧсь.
Найӧ мунӧны Баля бӧрся быдлаӧ, кытчӧ Сійӧ мунӧ.
Найӧс ньӧбӧма мувывса йӧз пӧвстысь, найӧ — медводдза вайӧмтор Енмыслы да Балялы. Налӧн вомысь некор эз петлыны пӧръясян кывъяс, Ен пуклӧс водзын найӧ мыжтӧмӧсь.
Сэсся ме аддзи нӧшта ӧти анделӧс, коді лэбис енэж шӧрӧдыс. Сылӧн вӧлі помасьлытӧм Евангелльӧ, медым висьтавлыны сійӧс мувывса олысьяслы: быд чужанвужлы да чужанкотырлы, быд кыла йӧзлы да войтырлы.
Сійӧ гораа шуаліс: «Полӧй Енсьыс да ошкӧй Сійӧс.
Ӧд воис Сылӧн Мыждан луныс. Копыртчылӧй Сылы, коді вӧчис енэжсӧ да мусӧ, саридзсӧ да ва петанінъяссӧ.»
Воддза анделыс бӧрся лэбис мӧд андел да горзіс: «Киссис, киссис Вавилон, ыджыд кар, ӧд сылӧн кырсалӧм понда став йӧзыслы ковмис юны Ен скӧрлуна вина».
Кык андел бӧрся лэбис нӧшта ӧти андел. Сійӧ гораа шуаліс:
«Коді копыртчылас зверлы да сылӧн серпаслы да сетас пуктыны зверлысь пассӧ плешкас либӧ ки вылас, сійӧ кутас юны Ен скӧрлуна вина, соравтӧм вина, кодӧс сулӧдӧма Ен скӧрлуна чашаын. Сійӧ кутас мучитчыны биын да сотчысь сераын вежа анделъяс водзын да Баля водзын. Найӧс мучитан билӧн тшыныс кутас кыпӧдчыны нэмъяс чӧж. Найӧ, кодъяс копыртчыласны зверлы да сылӧн серпаслы да сетасны пасйыны асьнысӧ сылӧн нимӧн, оз кутны тӧдны шойччӧгсӧ лунын ни войын.
Сідзкӧ, вежа войтырлы — Ен тшӧктӧм серти олысьяслы да Исуслы эскысьяслы — колӧ лоны зумыдӧн».
Сэсся ме кылі енэжсянь гӧлӧс шы. Сійӧ шуис меным:
«Гиж тайӧс: “Шудаӧсь найӧ, кодъяс ӧнісянь куласны Господьлы эскӧмӧн.
Тайӧ тадзи, — шуӧ Лов.
Найӧ кутасны шойччыны асланыс сьӧкыд уджъясысь, ӧд налӧн уджъясыс мунӧны на бӧрся”».
Ме видзӧдлі да аддзи еджыд кымӧр, а сы вылын кодкӧ Морт Пи кодь пукаліс.
Сылӧн юр вылас вӧлі зарни юркытш, а киас — лэчыд чарла.
Сэсся крамсьыс петіс ӧти андел да гораа горӧдіс кымӧр вылын Пукалысьлы:
«Босьт ассьыд чарлатӧ да вунды, ӧд вундан кадыс воис нин. Му вылын кӧдзасыс воӧма».
Кымӧр вылын Пукалысь шыбитіс ассьыс чарласӧ му вылӧ, и кӧдзасыс лои вундӧма.
Енэжвыв крамысь петіс мӧд андел, сылӧн тшӧтш вӧлі лэчыд чарла.
Сэсся висьпуктанінсянь петіс нӧшта ӧти андел, сылӧн вӧлі вын би вылын. Сійӧ гораа горӧдіс лэчыд чарлаа анделлы: «Босьт лэчыд чарлатӧ да вунды му вылысь виноград розъяссӧ, ӧд сылӧн вотӧсыс кисьмӧма нин».
Андел шыбитіс ассьыс чарласӧ му вылӧ да вундіс му вылысь виноград розъяссӧ. Сійӧ шыбитіс найӧс ыджыд гуӧ, Ен скӧрлуна пычкан гуӧ.
Виноград вотӧссӧ вӧлі талялӧма кар ортсыас, пычкан гуын. Сэтысь вирыс петіс ортсӧ да визувтіс сюрс квайтсё стадий ылнаӧдз, а джуджтаыс сылӧн вӧлі вӧв домӧдз.
15 юр.
Сэсся енэжсьыс ме нӧшта на аддзи шензьӧдана да ыджыд индысьпас. Ме аддзи сизим анделӧс, кодъяслӧн вӧлі бӧръя сизим бырӧданторйыс. Тайӧ бырӧданторъяснас помасис Енлӧн скӧрлуныс.
Ме аддзи саридз, сійӧ вӧлі стеклӧ кодь да пӧртмасис биӧн. Стеклӧ саридз дорас сулалісны найӧ, кодъяс тышкасисны зверкӧд, сылӧн серпасыскӧд да сы нимлӧн лыдпасыскӧд да петісны вермысьясӧн. Найӧ кутісны кианыс Енлысь арфаяссӧ да сьылісны Ен кесйӧг Мӧисейлысь да Балялысь сьыланкывсӧ:
— Господьӧй Енмӧй, Ставсӧкутысьӧй. Тэнад уджъясыд ыджыдӧсь да шензьӧданаӧсь,
Тэнад туйясыд веськыдӧсь да збыльӧсь. Тэ — Ӧксыыс вежа войтырлы.
Господьӧй, сюрас-ӧ сэтшӧм морт, коді оз повзьы Тэысь да оз ошкы Тэнсьыд нимтӧ?
Ӧд Тэ ӧтнадӧн — вежаыс.
Быд войтырысь локтасны да копыртчыласны Тэныд, ӧд воссис Тэнад веськыда мыждӧмыд.
Сэсся ме видзӧдлі да аддзи: енэжас воссис крам — Енлӧн скинияыс.
Крамысь петісны сизим андел, кодъяслӧн вӧлі сизим бырӧданторйыс. Найӧ вӧлі пасьтасьӧмаӧсь сӧстӧм да лым еджыд шабді паськӧмӧ, а морӧс весьтӧдыс вӧлі вӧнясьӧмаӧсь зарни вӧньӧн.
Нёль енэжвыв олысь пӧвстысь ӧтиыс сетіс сизим анделлы сизим зарни чаша. Тайӧ чашаяссӧ вӧлі тыртӧма Помтӧг Олысь Енлӧн скӧрлунӧн.
Енлӧн дзирдлунысь да Сылӧн вынысь крамыс тырис тшынӧн. Крамас некод эз вермы пырнысӧ, кытчӧдз эз помась сизим анделлӧн сизим бырӧданторйӧн удж вӧчӧмыс.
16 юр.
Сэсся крамсьыс ме кылі гора гӧлӧс шы. Сійӧ шуис сизим анделлы:
«Мунӧй да кисьтӧй Ен скӧрлуна сизим чашасӧ му вылӧ».
Медводдза анделыс петіс да кисьтіс ассьыс чашасӧ му вылӧ.
Сэки найӧ, кодъяс новлӧдлісны зверлысь пассӧ да копрасисны сылӧн серпаслы, вевттьысисны чорыд орзьӧм дойясӧн.
Мӧд анделыс кисьтіс ассьыс чашасӧ саридзӧ.
Сэки саридзыс лои кулӧм мортлӧн вирыс кодь, да саридзын став олысьыс куліс.
Коймӧд анделыс кисьтіс ассьыс чашасӧ юясӧ да ва петанінъясӧ, и ваыс пӧри вирӧ.
Сэсся ме кылі ваяслӧн анделлысь шуӧмсӧ:
— Господьӧй, Тэ вӧлін и эм, Тэ веськыд да вежа, Тэ ӧд веськыда мыждан.
Йӧзыс кисьтісны вежа войтырлысь да пророкъяслысь вирсӧ, та вӧсна Тэ юктӧдан найӧс вирӧн. Тэ мынтысян налы уджъясныс серти.
Ме кылі висьпуктанінсянь мӧд гӧлӧс шы. Сійӧ шуис:
— Господьӧй Енмӧй, Ставсӧкутысьӧй, Тэнад мыждӧмыд збыль да веськыд.
Нёльӧд анделыс кисьтіс ассьыс чашасӧ шонді вылӧ, и шондіыслы вӧлі сетӧма вын сотны йӧзсӧ биӧн.
Ёна пӧжӧмысла йӧзыс сотчисны да лёкӧдісны Енлысь нимсӧ, ӧд Сійӧ веськӧдліс тайӧ бырӧданторъяснас. Но йӧзыс эз бергӧдчыны Енлань да эз ошкыны Сійӧс.
Витӧд анделыс кисьтіс ассьыс чашасӧ зверлӧн юралан пуклӧс вылӧ, и зверлӧн юраланінын лои пемыд. Чорыд дойяссьыс йӧзыс курччалісны ассьыныс кывсӧ да лёкӧдісны енэжвыв Енмӧс тайӧ дойяссьыс да мучитчӧмсьыс, но асланыс лёк уджъясысь эз бергӧдчыны.
Квайтӧд анделыс кисьтіс ассьыс чашасӧ ыджыд Евфрат юӧ, и ваыс сэтысь косьмис. Тадзи вӧлі дасьтӧма туйсӧ асыввывсянь локтысь ӧксыяслы.
Сэсся ме аддзи: гундыр вомысь, звер вомысь да ылӧгпророк вомысь петісны куим пеж лов, найӧ вӧліны жаба кодьӧсь.
Тайӧ — мутияслӧн ловъясыс, кодъяс вӧчисны шензьӧданаторъяс.
Найӧ мунісны мувывса став ӧксыыс дінӧ, медым чукӧртны найӧс Ставсӧкутысь Енлӧн ыджыд лунся тыш вылӧ.
«Со, Ме локта гусясьысь моз.
Шуда сійӧ, коді оз узь да видзӧ ассьыс паськӧмсӧ, медым эз коль пасьтӧг да некод эз янӧд сійӧс».
Пеж ловъяс чукӧртісны мувывса ӧксыясӧс ӧти местаӧ. Тайӧ местаыс шусьӧ еврей ногӧн Армагеддон.
Сизимӧд анделыс кисьтіс ассьыс чашасӧ сынӧдас.
Сэки енэжвыв крамысь, юралан пуклӧс дінысь, кыліс гора гӧлӧс шы: «Ставсӧ вӧчӧма.»
Сэсся кутіс чардавны-гымавны, кылісны гора шыяс, да муыс кутіс ёна вӧрны. Олӧм пуксьӧмсяньыс та ыджда му вӧрӧмыс некор на эз вӧвлы.
Сэки Вавилон, ыджыд кар, киссис куим пельӧ, и мукӧд войтырлӧн каръясыс тшӧтш киссисны.
Енмыс ставсӧ кутіс тӧд вылас тайӧ ыджыд карыс йылысь да сетіс сылы юны вина чашасӧ, коді вӧлі тырӧма Сылӧн скӧрлунӧн.
Став діыс вошис, а керӧсъяс бырисны.
Йӧзыс вылӧ енэжсянь киссис зэв гырысь, комын кило сьӧкта шер.
Йӧзыс лёкӧдісны Енсӧ тайӧ шерсьыс, ӧд тайӧ бырӧданторйыс вайис налы уна сьӧкыдлун.
17 юр.
Ме дінӧ матыстчис андел. Сійӧ вӧлі на пӧвстысь, кодъяслӧн вӧлі сизим чаша. Сійӧ шуис меным: «Лок татчӧ, ме петкӧдла тэныд, кутшӧм мыждӧм виччысьӧ уна вадорын пукалысь аньӧс, коді ёна кырсаліс.
Мувывса ӧксыяс кырсалісны сыкӧд, а мувывса олысьяс винаысь моз коддзисны сылӧн кырсалӧмысь».
Сэсся ме вӧлі тырӧма Лолӧн, и андел вайӧдіс менӧ овтӧминӧ.
Сэтысь ме аддзи аньӧс, коді пукаліс чим гӧрд рӧма звер вылын.
Сылӧн вӧлі сизим юр да дас сюр. Тайӧ зверсӧ вӧлі дзоньнас гижалӧма Енмӧс лёкӧдана кывъясӧн. Аньыс вӧлі пасьтасьӧма пурпур рӧма да чим гӧрд рӧма паськӧмӧ. Сы вылын югъялісны зарниысь, дона изъясысь да жемчугысь мичмӧданторъяс. Киас сійӧ кутіс зарни доз, коді вӧлі тырӧма сылӧн кырсалӧмысь зывӧкнас да пежнас.
Плешкас сылӧн вӧлі гижӧма гуся вежӧртаса ним: «Ыджыд Вавилон — мувывса став зывӧкыслӧн да кырсалысьяслӧн мам».
Ме аддзи: аньыс вӧлі коддзӧма вежа войтырлӧн да Исус йылысь висьталысьяслӧн вир юӧмысь. Сійӧс аддзӧм бӧрын ме ёна шензи.
Андел шуис меным: «Мый тэ шензян?
Ме висьтала тэныд гусятор тайӧ аньыс йылысь да сійӧс новлӧдлысь зверыс йылысь, кодлӧн эм сизим юр да дас сюр.
Зверыс, кодӧс тэ аддзылін, коркӧ вӧлі, но ӧні абу. Сійӧ петас пыдӧстӧминысь, но сійӧс лоӧ бырӧдӧма.
Сэки мувывса олысьяс, кодъяслысь нимсӧ му пуксьӧмсяньыс абу гижӧма Олӧмыслӧн небӧгӧ, зверсӧ аддзигӧн кутасны шензьыны. Ӧд сійӧ вӧлі, но ӧні абу, и бара лоас.
Тані колӧ гӧгӧрвоӧмлун да мывкыдлун.
Сизим юрыс — тайӧ сизим мыльк, кодъяс вылын пукалӧ аньыс. Сизим юрыс индӧны сизим ӧксы вылӧ: витыс на пиысь кулісны нин, ӧтиыс веськӧдлӧ, а бӧръяыс эз на лок. Кор сійӧ локтас, оз кут дыр веськӧдлыны.
Зверыс, коді вӧлі, но ӧні абу, — кӧкъямысӧд ӧксы, сійӧ тшӧтш тайӧ сизим ӧксыыс пӧвстысь, сійӧс лоӧ бырӧдӧма.
Дас сюрыс, кодӧс тэ аддзылін, — тайӧ дас ӧксы. Налы абу на сетӧма ыджыдалан вынсӧ, но зверыскӧд тшӧтш налы лоӧ сетӧма ыджыдалан вынсӧ сӧмын недыр кад кежлӧ.
Налӧн ставныслӧн ӧти мог, та вӧсна став ассьыныс вынйӧрсӧ да ыджыдалан вынсӧ найӧ сетасны зверыслы.
Найӧ кутасны тышкасьны Балякӧд, но Баля вермас найӧс.
Ӧд Сійӧ — ыджыдъяслӧн Ыджыдыс да ӧксыяслӧн Ӧксыыс. Сыкӧд тшӧтш лоӧны Сылӧн корӧмаясыс, бӧрйӧмаясыс да эскана йӧз».
Сэсся андел шуис меным: «Ваыс, кодӧс тэ аддзылін да кӧні пукалӧ кырсалысь аньыс, — тайӧ мувывса йӧз да быдпӧлӧс войтыр, быд чужанкотыр да быд кыла йӧз.
Зверыслӧн дас сюрыс, кодъясӧс тэ аддзылін, мустӧмтасны кырсалысь аньӧс. Найӧ мырддясны сылысь ставсӧ да пӧрччӧдасны сы вылысь став паськӧмсӧ, сёясны сылысь вир-яйсӧ да сотасны би пытшкын.
Ӧд Енмыс пуктіс налӧн сьӧлӧмӧ, мед вӧчны Сылӧн кӧсйӧм серти да ӧти кывйӧ воӧмӧн сетны зверыслы ассьыныс ыджыдалан вынсӧ сэтчӧдз, кытчӧдз оз инны Енлӧн кывъясыс.
Аньыс, кодӧс тэ аддзылін, — тайӧ ыджыд кар, сійӧ ыджыдалӧ мувывса став ӧксыяс вылын».
18 юр.
Сэсся ме аддзи: енэжсянь лэччис нӧшта ӧти андел. Сылӧн вӧлі ыджыд вын, и муыс ставнас югдіс сылӧн дзирдлунысь.
Андел зэв гораа горӧдіс:
— Киссис, киссис ыджыд Вавилон. Сійӧ лоис оланінӧн мутияслы да быдпӧлӧс пеж лолыслы, лоис позйӧн быдпӧлӧс пеж да зывӧк лэбачыслы. Аслас кырсалӧм вӧсна сійӧ юктӧдіс став йӧзсӧ Ен скӧрлуна винаӧн. Мувывса ӧксыяс кырсалісны сыкӧд, а вузасьысьяс озырмисны сылӧн лышкыдлунысь.
Сэсся ме кылі енэжысь мӧд гӧлӧс шы. Сійӧ шуис:
— Войтырӧй Менам, петӧй тайӧ карсьыс, медым энӧ ӧтувтчӧй сылӧн мыж вӧчӧмас, медым сійӧс моз эз су тіянӧс бырӧданторйыс. Ӧд сылӧн мыжъясыс кыптісны енэжӧдзыс. Енмыс кутӧ тӧд вылас став сылысь лёк вӧчӧмсӧ.
Мынтысьӧй сылы сійӧн жӧ, мыйӧн мынтысис тіянлы. Мынтысьӧй сылӧн уджъясысь кык пӧв унджык на.
Сылӧн чашаӧ, кытысь сійӧ юкталіс тіянӧс, дасьтӧй сылы винасӧ кык пӧв курыдджыкӧс на.
Мӧдӧдӧй сылы шогсӧ да мучитчӧмсӧ сы мында, мыйта сійӧ курыштіс аслыс озырлунсӧ да ошкӧмсӧ.
Ӧд сійӧ ошйысьӧ ас йывсьыс:
«Ме пукала юралан пуклӧс вылын ӧксы-ань моз. Ме абу дӧва, ме некор ог тӧдлы шогсӧ.»
Та вӧсна, став бырӧданторйыс: кулӧмыс, шогыс да тшыгъялӧмыс суас сійӧс ӧти лунӧ. Сійӧс сотасны биын, ӧд Господь Ен, сійӧс Мыждысьыс, — вына.
Кор мувывса ӧксыяс аддзасны сылысь сотчӧмсӧ да тшынсӧ, кутасны сыркъялӧмӧн бӧрдны сы вӧсна. Ӧд найӧ кырсалісны да лышкыда гажӧдчисны сыкӧд. Найӧ повзясны сылӧн мучитчӧмысь да ылыстчасны сыысь и кутасны шуавны:
— Шог, шог тэныд Вавилон, ыджыд да вына кар.
Ӧти здукӧн суис тэнӧ мыждӧмыс.
Став му пасьтала вузасьысьяс кутасны бӧрдны да шогсьыны сы понда, ӧд налысь вузӧссӧ некод оз кут босьтны. Оз босьтны налысь зарнисӧ, эзысьсӧ, дона изъяс да жемчугъяс, шабді да шӧвк дӧраяс, пурпур да чим гӧрд рӧма дӧраяс. Оз босьтны налысь чӧскыд дука пуяс, слӧн лыысь, дона пуысь, ыргӧнысь, кӧртысь да мраморысь вӧчӧмторъяс. Некод оз босьт налысь корица, ладан, чӧскыд дука вый да миро, вина да вый, пызь да шобді, ыжъясӧс, мӧсъясӧс да вӧвъясӧс, телегаяс, кесйӧгъясӧс да мукӧд йӧзсӧ.
— Став тэнад сьӧлӧм бурмӧданторйыд быри, став тэнад озырлуныд да мичлуныд воши, тайӧ тэнад некор нин оз ло.
Найӧ, кодъяс вузасисны тайӧн ставнас да озырмисны сы помысь, ёна повзясны Вавилон карлӧн мучитчӧмысь да ылыстчасны сыысь. Найӧ кутасны бӧрдны да шогсьыны:
— Шог, шог тэныд, ыджыд кар. Тэ вӧлі пасьтасьӧмыд шабді дӧраӧ, пурпур да чим гӧрд рӧма паськӧмӧ. Тэнӧ вӧлі мичмӧдӧма зарниӧн, дона изъясӧн да жемчугӧн. Но став тайӧ озырлуныс ӧти здукӧн быри.
Сэки саридз вылын кывтысьяс, корабльӧн веськӧдлысьяс, налы отсасьысьяс да вузасьысьяс — ставныс ылыстчисны тайӧ карсьыс. Найӧ видзӧдісны сотчысь карлӧн тшыныс вылӧ да горзісны: «Позяс ӧмӧй ӧткодявны тайӧ ыджыд карсӧ кутшӧмкӧ мӧд каркӧд?»
Найӧ коялісны юрсӧ пӧимӧн, бӧрдісны да шогсисны:
— Шог, шог тэныд, ыджыд кар. Аслад озырлунӧн тэ озырмӧдін ставнысӧ, саридз вылын кывтысьясӧс. Ӧти здукӧн тэ воштін ставсӧ.
— Нимкодясь, енэжыс. Нимкодясьӧй, вежа апостолъяс да пророкъяс. Енмыс мыждіс тайӧ карсӧ тіянлы лёк вӧчӧмысь.
Сэсся вына андел босьтіс изки кодь ыджыд из да шыбитіс сійӧс саридзас. Сійӧ шуис:
— Дзик тадзи лоӧ шыбитӧма Вавилонӧс, ыджыд карӧс, сійӧ вошас пыр кежлӧ.
Тэнад туй вылын некор оз кут кывны сьылӧм шы, пӧлян да труба шы, некод оз кут ворсны арфаӧн.
Некор оз кут уджавны тані киподтуя морт, некор оз кут кывны тані изки шы.
Некор оз кут ӧзйыны тані би, некор оз кут кывны верӧспулӧн да гӧтырпулӧн гӧлӧс шыныс.
Тэнад вузасьысьяс ыджыдалісны тайӧ му вылас. Аслад тшыкӧдчӧмӧн тэ кыскин став йӧзсӧ ылӧгас.
Тайӧ карас вӧлі кисьтӧма вирсӧ пророкъяслысь, вежа войтырлысь, да став йӧзыслысь, кодъясӧс вӧлі виӧма му вылас.
19 юр.
Та бӧрти ме кылі енэжсьыс гора шы, быттьӧ ыджыд йӧз чукӧр ызгис-сёрнитіс. Найӧ шуалісны: — Аллилуйя.
Мездмӧмыс, дзирдлуныс, нималӧмыс да выныс — миян Господьлӧн.
Сылӧн мыждӧмыс збыль да веськыд. Енмыс мыждіс ыджыд карӧс, кырсалысь аньӧс, ӧд сійӧ пежаліс ставнас мусӧ аслас пеж оласногӧн. Енмыс перйис водзӧссӧ тайӧ аньыслысь Аслас кесйӧгъяслӧн вирысь.
Сэки бара шуалісны: — Аллилуйя.
Сылӧн тшыныс кутас кыпӧдчыны нэмъяс чӧж.
Та бӧрти кызь нёль пӧрысьыс да нёльнан енэжвыв олысьыс кымынь уськӧдчӧмӧн копыртчылісны юралан пуклӧс вылын пукалысь Енлы да шуисны: — Аминь. Аллилуйя.
Сэсся Ен пуклӧссянь кыліс гӧлӧс шы:
— Ошкӧй миян Енмӧс ставныд: Сылӧн кесйӧгъяс да Сыысь полысьяс, ичӧтъяс и гырысьяс.
Сэсся ме кылі шы, быттьӧ ыджыд йӧз чукӧр ызгис-сёрнитіс, быттьӧ уна шор бузгис-визувтіс, быттьӧ чорыда гымаліс. Найӧ шуалісны: — Аллилуйя.
Господь, Ставсӧкутысь Ен, ӧні лоис Юралысьӧн.
Кутам нимкодясьны да гажӧдчыны, кутам ошкыны Енмӧс.
Ӧд Баля ӧні гӧтрасьӧ, Сылӧн гӧтырпуыс дась нин:
сійӧ пасьтасьӧма сӧстӧм да югъялан шабді паськӧмӧ. Шабді паськӧмыс — тайӧ вежа войтырлӧн веськыд уджъясыс.
Сэсся андел шуис меным: «Гиж: “Шудаӧсь найӧ, кодъясӧс корӧма Балялӧн кӧлысь вылӧ.”»
Сэсся содтіс: «Тайӧ Енлӧн збыль кывъясыс».
Ме уськӧдчи андел кок дорӧ, медым копыртчывны сылы, но сійӧ шуис меным: «Эн вӧч тайӧс.
Ӧд ме кесъяла Енмыслы, кыдзи тэ да тэнад вокъясыд, кодъяс висьтавлӧны Исус йылысь.
Енмыслы копыртчыв.
Ӧд Исус йылысь висьталысьяс сёрнитӧны пророкалан Ловсянь».
Енэжыс воссис менам син водзын, и сэтысь ме аддзи еджыд вӧлӧс да сы вылын Пукалысьӧс. Сылӧн нимыс Эскана да Збыль, Сійӧ тышкасьӧ да мыждӧ веськыда.
Сылӧн синъясыс ыпъялісны биӧн, а юр вылас вӧлі уна юркытш.
Пукалысь вылӧ вӧлі гижӧма Сылысь нимсӧ, и тайӧ нимсӧ Сыысь кындзи некод эз тӧд.
Сы вылын вӧлі вирӧсь паськӧм, и нимыс Сылӧн — Ен Кыв.
Сы бӧрся еджыд вӧвъяс вылын мунісны енэжвывса тышка котыръяс, найӧ вӧлі пасьтасьӧмаӧсь еджыд да сӧстӧм шабді паськӧмӧ.
Вӧв вылын Пукалысьлӧн вомысь петіс ёсь шыпурт, медым сійӧн бытшкыны мувывса йӧзӧс.
Сійӧ кутас веськӧдлыны наӧн кӧрт беддьӧн да пычкас Ставсӧкутысь Енлысь скӧрлуна винасӧ пычкан гуын.
Сылӧн паськӧмас да лядьвеяс гижӧма ним: “Ӧксыяслӧн Ӧксы, ыджыдъяслӧн Ыджыд”.
Сэсся ме аддзи шонді вылын сулалысь анделӧс.
Сійӧ гораа горӧдіс став лэбачыслы, кодъяс лэбисны енэж шӧрӧдыс: «Локтӧй-чукӧртчӧй Енлӧн ыджыд гаж вылӧ. Ті кутанныд сёйны шойяссӧ ӧксыяслысь, тышкайӧзӧн веськӧдлысьяслысь, юралысьяслысь, вӧвъяслысь, верзьӧмаяслысь да став йӧзыслысь: мездлуна йӧзлысь и кесйӧгъяслысь, ичӧтлысь и гырысьлысь».
Сэсся ме аддзи зверӧс, мувывса ӧксыясӧс да налысь тышка котыръяссӧ. Найӧ вӧлі чукӧртчӧмаӧсь, медым тышкасьны вӧв вылын Пукалыськӧд да Сылӧн тышка котырыскӧд.
Зверӧс да ылӧгпророкӧс вӧлі кутӧма. Ылӧгпророкыс вӧчліс шензьӧданаторъяс звер нимсянь. Тадзи сійӧ ылӧдліс найӧс, кодъяс сетісны пуктыны аслыныс зверлысь пассӧ, и найӧс, кодъяс копрасисны сылӧн серпаслы. Зверӧс да ылӧгпророкӧс — кыкнаннысӧ ловйӧн вӧлі шыбитӧма биӧн да сераӧн сотчысь тыӧ, а мукӧдсӧ вӧлі виӧма шыпуртӧн. Тайӧ шыпуртыс петіс вӧв вылын Пукалысьлӧн вомысь. И став лэбачыс сэсся пӧткӧдчисны виӧмаяслӧн шойясӧн.
20 юр.
Ме аддзи анделӧс, коді лэччис енэжсянь. Киас сійӧ кутіс пыдӧстӧминысь восьтансӧ да ыджыд чеп.
Сійӧ тшапнитіс гундырӧс, важ змейӧс, да дорис сійӧс сюрс во кежлӧ. Тайӧ гундырыс — омӧль да сӧтана. Андел шыбитіс сійӧс пыдӧстӧминӧ да йигналіс сэтчӧ. А петанінас пуктіс печать, медым гундыр эз пет да эз ылӧдлы йӧзсӧ, кытчӧдз оз помась сюрс воыс. Та бӧрти сійӧс лоӧ лэдзӧма дженьыд кад кежлӧ.
Сэсся ме аддзи юралан пуклӧсъяс. Сэні пукалысьяслы вӧлі сетӧма мыждан вын. Ме аддзи ловъяссӧ налысь, кодъяслысь юрсӧ керыштісны Исус йылысь висьталӧм вӧсна да Ен Кыв вӧсна. Найӧ эз копыртчывны зверлы да сылӧн серпаслы, эз сетны пуктыны зверлысь пассӧ плешканыс да кианыс.
Найӧ ловзисны да юралісны Кристоскӧд сюрс во чӧж.
А мукӧд кулӧмаясыс эз ловзьыны, кытчӧдз эз помась сюрс воыс.
Тайӧ — кулӧмаясӧс медводдза ловзьӧдӧм.
Шудаӧсь да вежаӧсь найӧ, кодъяс ловзясны медводдза ловзьӧдігӧн.
Мӧд кулӧмыслӧн выныс оз нин ло на вылын. Найӧ лоӧны Енлӧн да Кристослӧн вежа кесъялысьясӧн, найӧ кутасны ыджыдавны Кристоскӧд сюрс во чӧж.
Сюрс во помасьӧм бӧрын сӧтанаӧс лоӧ лэдзӧма аслас пыдӧстӧминысь. Сійӧ мунас мулӧн нёльнан пельӧсас ылӧдлыны йӧзӧс, Гог да Магог войтырӧс, да чукӧртны найӧс тыш вылӧ.
Налӧн лыдыс лоӧ саридздорса лыа мында.
Найӧ паськӧдчасны став му пасьтала да кытшаласны вежа войтырлысь оланінсӧ да Енлысь муса карсӧ.
Но енэжсяньыс, Енсянь, усяс би да бырӧдас найӧс.
Сэки омӧльӧс, коді ылӧдліс найӧс, лоӧ шыбитӧма биӧн да сераӧн сотчысь тыӧ. Сэтчӧ вӧлі шыбитӧма тшӧтш зверӧс да ылӧгпророкӧс. Найӧ кутасны мучитчыны лун и вой, нэмъяс чӧж.
Сэсся ме аддзи ыджыд да еджыд юралан пуклӧс да сы вылын Пукалысьӧс. Енэжыс да муыс пышйисны Сылӧн син водзысь, налы некытчӧ вӧлі дзебсьынысӧ.
Ме аддзи кулӧмаясӧс: гырысьясӧс да ичӧтъясӧс, найӧ сулалісны Ен водзын. Сэні вӧліны восьса небӧгъяс. Сэсся восьтісны нӧшта ӧти небӧг — Олӧмыслысь небӧг.
Кулӧмаясӧс мыждісны налӧн уджъясныс серти, мый вӧлі гижӧма небӧгъясас.
Сэки саридзыс, кулӧмыс да адыс сетісны ассьыныс кулӧмаяссӧ, и быдӧнӧс найӧс вӧлі мыждӧма уджъясныс серти.
Кулӧмсӧ да адсӧ вӧлі шыбитӧма биа тыӧ.
Тайӧ мӧд кулӧм.
Быдӧнӧс, кодлысь нимсӧ эз вӧв гижӧма Олӧмыслӧн небӧгӧ, вӧлі шыбитӧма биа тыӧ.
21 юр.
Сэсся ме аддзи выль енэж да выль му. Медводдза енэжыс да муыс бырины, и саридзыс эз нин вӧв.
Ме, Иоан, аддзи вежа кар — выль Ерусалим. Сійӧ лэччис енэжсяньыс, Енсянь. Сійӧс вӧлі мичмӧдӧма, быттьӧ гӧтырпуӧс верӧспуыслы.
Ме кылі енэжсянь гора шы. Сійӧ шуис:
— Со, мувывса йӧз пӧвстын Енлӧн оланін. Енмыс кутас овны накӧд, найӧ лоӧны Сылӧн войтырӧн. Ачыс Енмыс лоас накӧд, да лоӧ налӧн Енмӧн,
Сійӧ чышкас налысь став синвасӧ.
Кулӧмыс оз нин ло, оз ло шогсьӧм, бӧрдӧм ни висьӧм, ӧд важыс кольӧма.
Юралан пуклӧс вылын Пукалысь шуис: «Видзӧд, Ме ставсӧ вӧча выльӧс.»
Сэсся содтіс: «Гиж тайӧс, ӧд тайӧ кывъясыс веськыдӧсь да збыльӧсь».
Сійӧ шуис меным: «Ставсӧ вӧчӧма.
Ме — Альфа и Омега, Панасыс и Помыс.
Кодлӧн косьмӧ горшыс, сійӧс дон босьттӧг юктӧда ваӧн, коді петӧ ловъя ва визувтанінысь.
Вермысьлы Ме сета тайӧс ставсӧ. Ме лоа сылы Енмӧн, а сійӧ — Меным пиӧн.
Полысьясӧс, эскытӧмъясӧс, зывӧк оласногаясӧс, морт виысьясӧс, кырсалысьясӧс, тшыкӧдчысьясӧс, идоллы юрбитысьясӧс да став ылӧдчысьсӧ лоӧ шыбитӧма биӧн да сераӧн сотчысь тыӧ.
Тайӧ мӧд кулӧм».
Ме дінӧ матыстчис андел. Сійӧ вӧлі сизим андел пӧвстысь, кодъяслӧн вӧлі сизим чаша сизим бӧръя бырӧданторнас. Андел шуис меным:
«Лок татчӧ, ме петкӧдла тэныд Балялысь гӧтырпусӧ, коді лоас Сылы гӧтырӧн».
Ме вӧлі тырӧма Лолӧн, и андел вайӧдіс менӧ ыджыд да джуджыд керӧс вылӧ да петкӧдліс меным ыджыд кар — вежа Ерусалим, коді лэччис енэжсяньыс, Енсянь.
Сійӧ югъяліс Ен дзирдлунӧн
да дзирдаліс дона из моз, югъялысь яшма моз.
Карсӧ кытшаліс кыз да джуджыд стен. Сэні вӧлі дас кык дзиръя, на дорын сулалісны дас кык андел.
Дзиръяяс вылас вӧлі гижӧма израильса дас кык чужанкотырлысь нимъяссӧ. Куим дзиръяыс видзӧдісны асыввылӧ, куимыс — войвылӧ, куимыс — лунвылӧ да куимыс — рытыввылӧ.
Карыслӧн стеныс подуласис дас кык из вылӧ, а изъяс вылас вӧлі гижӧма Балялӧн дас кык апостоллысь нимъяссӧ.
Мекӧд сёрнитысь анделлӧн вӧлі зарни бедь, медым муртавны карсӧ, сылысь дзиръяяссӧ да стенсӧ.
Карыс вӧлі нёль пельӧса, сылӧн кузьтаыс да пасьтаыс вӧлі ӧткодь.
Андел мурталіс карсӧ бедьнас, и карлӧн кузьтаыс лои дас кык сюрс стадий.
А карыслӧн судта-пасьтаыс вӧлі ӧткодь карыслӧн кузьтакӧд.
Сэсся андел мурталіс карлысь стенсӧ, кыдзи мувывса йӧз мурталӧны, да стенлӧн джуджтаыс лои сё нелямын нёль гырддза.
Карлысь стенсӧ вӧлі вӧчӧма яшмаысь, а асьсӧ карсӧ — сӧстӧм зарниысь, сійӧ югъяліс стеклӧ моз.
Стеныслысь подув изъяссӧ вӧлі мичмӧдӧма быдпӧлӧс дона изъясӧн.
Медводдза подув изйыс вӧлі яшмаысь, мӧдыс — сапфирысь, коймӧдыс — халцедонысь, нёльӧдыс — изумрудысь, витӧдыс — сардониксысь, квайтӧдыс — сердоликысь, сизимӧдыс — хризолитысь, кӧкъямысӧдыс — бериллысь, ӧкмысӧдыс — топазысь, дасӧдыс — хризопразысь, дас ӧтиӧдыс — гиацинтысь, дас кыкӧдыс — аметистысь.
Дас кыкнан дзиръясӧ вӧлі вӧчӧма дас кык жемчугысь, быд дзиръя — ӧти жемчугысь.
Карыслӧн паськыд туйыс вӧлі сӧстӧм зарниысь, сійӧ югъяліс стеклӧ моз.
Крамсӧ тайӧ карсьыс ме эг аддзыв, ӧд крамыс сэні — Ставсӧкутысь Господь Ен да Баля.
Карыслы оз ков шонді ни тӧлысь югзьӧдӧм вылӧ, ӧд Енлӧн дзирдлуныс югзьӧдӧ сійӧс, а Баля — сылӧн биыс.
Быд кыла войтырысь мездмӧмаяс кутасны овны сылӧн югыдас. Мувывса ӧксыяс ваясны тайӧ карас ассьыныс ошйысянторсӧ да нимӧданторсӧ.
Карыслӧн дзиръяясыс лоӧны пыр восьсаӧсь, ӧд войыс сэні оз ло.
Сэтчӧ быд войтырысь лоӧ вайӧма ошйысянторсӧ да нимӧданторсӧ.
Нинӧм пежыс оз пыр тайӧ карас, некутшӧм пӧръясьысь да зывӧксӧ вӧчысь оз пыр сэтчӧ. Сэтчӧ пырасны сӧмын найӧ, кодъяслысь нимсӧ гижӧма Балялӧн небӧгӧ — Олӧмыслӧн небӧгӧ.
22 юр.
Сэсся андел петкӧдліс меным ю, сэні визувтіс сӧстӧм ловъя ва. Сійӧ вӧлі крусталь кодь югыд. Ваыс петіс Енлӧн да Балялӧн юралан пуклӧссянь.
Карлӧн паськыд туй шӧрас, ю ӧтар-мӧдар бокас, быдмис Олӧмыслӧн пу, коді вайӧ вотӧссӧ быд тӧлысь, вонас — дас кыкысь. Сылӧн коръясыс бурдӧдӧны йӧзӧс.
Нинӧм ёрӧмаыс оз ло тайӧ карас.
Сэні лоӧ Енлӧн да Балялӧн юралан пуклӧсыс, и Сылӧн кесйӧгъясыс кутасны кесъявны Сылы.
Найӧ аддзасны Енлысь чужӧмбансӧ, да Сылысь нимсӧ гижасны налӧн плешканыс.
Войыс сэні оз ло. Налы оз нин ков бисянь либӧ шондісянь югыдыс, ӧд налӧн югзьӧдысьнас лоас Господь Ен.
Найӧ кутасны ыджыдавны нэмъяс чӧж.
Андел шуис меным: «Тайӧ кывъясыс веськыдӧсь да збыльӧсь.
Вежа пророкъяслӧн Господь Ен мӧдӧдіс Ассьыс анделсӧ, медым петкӧдлыны Аслас кесйӧгъяслы, мый колӧ лоны регыдъя кадӧ».
«Со, Ме регыд локта. Шуда сійӧ, коді олӧ тайӧ небӧгас водзвыв висьталӧмыс серти.»
Ме, Иоан, ставсӧ тайӧс кывлі да аддзылі.
А кывлӧм да аддзылӧм бӧрас ме уськӧдчи муас, медым копыртчывны анделлы, коді петкӧдліс меным ставсӧ тайӧс.
Но андел шуис меным: «Эн вӧч тайӧс, ӧд ме кесъяла Енмыслы тэ моз да тэнад вокъясыд — пророкъяс моз, да на моз, кодъяс олӧны тайӧ небӧгас гижӧм серти.
Енмыслы копыртчыв.»
Сэсся содтіс: «Эн тупкы печатьӧн тайӧ небӧгас водзвыв висьталӧмасӧ, ӧд кадыс матын нин».
Лёксӧ вӧчысь мед водзӧ вӧчас лёксӧ, пеж оласнога мед водзӧ на вӧчас пежсӧ, веськыда олысь мед водзӧ вӧчас веськыда, а вежа морт мед водзӧ на вежаммас.
«Со, Ме регыд локта да вая Аскӧд удждон, медым быдӧнлы мынтысьны сылӧн уджъясыс серти.
Ме — Альфа и Омега, Панасыс и Помыс, Медводдзаыс и Медбӧръяыс».
Шудаӧсь найӧ, кодъяс олӧны Енлӧн тшӧктӧм серти, ӧд Енмыс сетас налы пӧткӧдчыны Олӧмыслӧн пуысь да пырны тайӧ карас дзиръяӧдыс.
А понъяс, тшыкӧдчысьяс, кырсалысьяс, мортвиысьяс, идоллы юрбитысьяс, ылӧгсӧ радейтысьяс да пӧръясьысьяс колясны кар ортсыас.
«Ме, Исус, мӧдӧді Ассьым анделӧс висьтавны тайӧс тіянлы вичкоясын.
Ме — Давид чужанвужйысь да чужанкотырысь, Ме — асъя югыд кодзулыс».
Лов да гӧтырпу шуӧны: «Лок.»
Тайӧс кылысь мед тшӧтш шуӧ: «Лок.»
Кодлӧн косьмӧ горшыс, мед локтӧ. Коді кӧсйӧ юны, мед босьтӧ ловъя васӧ дон мынтытӧг.
Ме эскӧда быдӧнӧс, коді кылӧ тайӧ небӧгсьыс водзвыв висьталӧмасӧ: коді содтас мыйкӧ тайӧ кывъясыс дінӧ, Енмыс мӧдӧдас сылы бырӧданторъяс, мый йылысь гижӧма тайӧ небӧгас.
Коді чинтас мыйкӧ тайӧ небӧгас водзвыв висьталӧмсьыс, Енмыс босьтас сылысь пайсӧ Олӧмыслӧн небӧгысь, вежа карысь да сыысь, мый йылысь гижӧма тайӧ небӧгас.
Тайӧ кывъяссӧ Висьталысьыс шуӧ: «Ме регыд локта, тайӧ тадзи.»
Аминь.
Лок, Господьӧй Исусӧй.
Миян Господь Исус Кристослӧн буралӧмыс ставныдкӧд тіянкӧд.
Аминь.