==МЕДВОДДЗА ВОСЬКОВ==

<Моторина Л. А. @ Медводдза воськов : велӧдан гижӧд // Любовь Моторина. Медводдза воськов : велӧдан пособие. Сыктывкар, 2005. Лб. 6-190.>

Оланныд-выланныд, Александр Евгеньевич.

Бур асыв, Надюк.

Олан-вылан, Ӧньӧ.

Бур лун, Опонь дядь.

Видза оланныд, Надежда Ивановна.

Видза олан, бабӧ.

Бур рыт.

Бур вой, Васьӧ.

▸ олан-вылан

▸ чолӧм

▸ бур асыв

▸ бур лун

▸ бур рыт

▸ видза олан

▸ видза оланныд

▸ олан-выланныд

— Бур лун, Наста!

— Чолӧм, Ира!

— Тӧдмась, тайӧ Олег.

— Зэв нимкодь.

— Кыдзи олан-вылан?

— Аттьӧ, бура. А тэ?

— Сідз-тадз.

✓ — Менӧ шуӧны Наташаӧн.

✓ — Нимӧй Наташа.

✓ — Мый нимыд?

✓ — Кыдзи тэнӧ шуӧны?

— Вай тӧдмасям!

— Меным зэв нимкодь Тіянкӧд тӧдмасьны!

— Бур!

— Бур лун, ёртъяс!

— Менӧ шуӧны Александр Евгеньевичӧн.

— Тайӧ тай Александр Евгеньевич вӧлӧма.

— Кутшӧм нин мог суис?

— А ме шойчча.

— Быдлаын тай верман аддзысьны!

— Ме кӧсъя тӧдмӧдны тіянӧс ёртъяскӧд.

— Тайӧ Владимир Пыстин. Сійӧ Ухтаысь. Уджалӧ геологӧн.

— Зэв нимкодь Тіянкӧд тӧдмасьны.

— Ме тшӧтш рад.

— Кӧсъя тӧдмӧдны Тіянӧс Алексей Степановичкӧд.

— Кӧні уджалӧ Алексей Степановичыд?

— Сійӧ архитектор.

— Кытысь сійӧ?

— Сійӧ Печӧраысь.

— Чолӧм!

— Ті тшӧтш тані шойччанныд?

— Мыйла Ті танӧсь?

— Мыйла? Выйла.

✓ — Кытысь тэ?

✓ — Ме Эжваысь.

— Ме Ухтаысь. А кытысь тэ?

— Ме тшӧтш Ухтаысь.

а) Ме Интаысь. А кытысь тэ?

б) Ме Емваысь. А кытысь тэ?

в) Ме Микуньысь. А кытысь тэ?

г) Ме Вуктылысь. А кытысь тэ?
д) Ме Сосногорскысь. А кытысь тэ?

— Тэ сиктысь?

— Абу. Ме абу сиктысь.

а) Тэ карысь?

б) Тэ Сыктывкарысь?

в) Тэ Емдінысь?

г) Тэ Чилимдінысь?

д) Тэ Айкатылаысь?

— Сійӧ Кулӧмдінысь?

— Да. Сійӧ Кулӧмдінысь.

а) Сійӧ Емдінысь?

б) Сійӧ Шойнатыысь?

в) Сійӧ Изьваысь?

г) Сійӧ Мылдінысь?

д) Сійӧ Койгортысь?

— Сійӧ Изьваысь?

— Абу. Сійӧ абу Изьваысь.

а) Сійӧ Кӧрткерӧсысь?

б) Сійӧ Позтыкерӧсысь?

в) Сійӧ Баяркерӧсысь?

г) Сійӧ Гажакерӧсысь?

д) Сійӧ Туискерӧсысь?

▸ аддзысьлытӧдз

▸ видзаӧн коль

▸ видзаӧн кольӧй

▸ став бурсӧ

▸ бур вой

Кӧні Ті оланныд?

— Мый нимыд?

— Нимӧй Ӧньӧ. Ме — Андрей Батиев. Кыдзи тэнӧ шуӧны?

— Менӧ шуӧны Настаӧн. Ме — Анастасия Изъюрова.

— Ті гӧгӧрвоанныд комиӧн? Эн шогсьӧй. Миянкӧд эм морт, коді тӧдӧ коми кывсӧ.

— Сійӧ кутас вуджӧдны, ковмас кӧ.

— Сійӧ Сыктывкарысь?

— Ассьыс юалӧй.

— Зэв нимкодь ставныдкӧд тӧдмасьны.

— Кутшӧм Тіян чужан кывныд?

— Коми.

— Мый нимныд?

— Менӧ шуӧны Анастасия Ивановнаӧн. А тӧдсаяс шуӧны прӧстӧ Настаӧн.

— Зэв бур, мый ми тӧдмасим.

— Ті шойччыны воинныд?

— Эг. Ме тані удж кузя, командировкаын.

— Коді сійӧ: физик али биолог? Сійӧ велӧдысь али серпасалысь?

— Абу.

— Ті шофёр али лётчик?

— Ме думысь, сійӧ бизнесмен.

— Бара на эн тӧдмалӧй. Ме — маркетолог.

— Со Рочев локтӧ. Сійӧ ыджыд морт.

— Кытысь ті, Рочев ӧксай? Изьваысь? Гашкӧ, Чилимдінысь?

Ме ола.

Тэ олан.

Сійӧ олӧ.

Ми олам.

Ті оланныд.

Найӧ олӧны.

— Ме ола Ухтаын. А тэ?

— Ме тшӧтш ола Ухтаын.

а) Ме ола Интаын. А тэ?

б) Ме ола Емваын. А тэ?

в) Ме ола Микуньын. А тэ?

г) Ме ола Вуктылын. А тэ?

д) Ме ола Сосногорскын. А тэ?

— Тэ олан сиктын?

— Ог. Ме ог сиктын ов.

а) Тэ олан карын?

б) Тэ олан Сыктывкарын?

в) Тэ олан Емдінын?

г) Тэ олан Чилимдінын?

д) Тэ олан Айкатылаын?

— Сійӧ олӧ Кулӧмдінын?

— Да. Сійӧ олӧ Кулӧмдінын.

а) Сійӧ олӧ Емдінын?

б) Сійӧ олӧ Шойнатыын?

в) Сійӧ олӧ Изьваын?

г) Сійӧ олӧ Мылдінын?

д) Сійӧ олӧ Койгортын?

— Сійӧ олӧ Изьваын?

— Оз. Сійӧ оз Изьваын ов.

а) Сійӧ олӧ Кӧрткерӧсын?

б) Сійӧ олӧ Позтыкерӧсын?

в) Сійӧ олӧ Баяркерӧсын?

г) Сійӧ олӧ Гажакерӧсын?

д) Сійӧ олӧ Туискерӧсын?

— Бур рыт, Света.

— Видза оланныд, Надежда Ивановна.

— Кыдзи олан?

— Аттьӧ. Ола бура. Тӧдмась, тайӧ Сергей Николаевич.

— Меным зэв нимкодь тӧдмасьны Тіянкӧд!

Степан — серпасалысь.

Ӧньӧ — газетса корреспондент.

Ирина — менеджер.

Лидия ӧксань — сьылысь.

Василей — велӧдысь.

Рочев ӧксай — муниципалитетса веськӧдлысь.

Рома — асшӧр уджалысь.

Татьяна — бурдӧдчысь.

Настук — вуджӧдчысь.

— Кӧні тэ уджалан?

— Ме уджала университетын. А тэ?

— А ме уджала пединститутын.

— Кӧні уджалӧ Владимир Александрович?

— Сійӧ уджалӧ милицияын. Владимир Александрович — полковник.

✓ — Кыйсьысьлӧн сям ноп сертиыс тыдалӧ.

— Коді тайӧ?

— Позьӧ кӧ, ме ачым висьтася. Андрей Батиев, корреспондент. Ме уджала «Коми му» газетын. Ме Сыктывкарысь.

— Нимкодь Тіянкӧд тӧдмасьны.

— Ме кӧсъя босьтны интервью.

— Ёртъяс! Тайӧ Лидия Петрунева. Сійӧс унаӧн тӧдӧны. Сійӧ — сьылысь.

— Аттьӧ, донаяс. Зэв нимкодь тіянкӧд тӧдмасьны.

— Сэтшӧм лӧсьыд, мый Ті миянкӧд, Лидия ӧксань. Ме кӧсъя юавны. Позьӧ оз? Мый Ті тані вӧчанныд?

— Ме прӧстӧ шойчча тані.

— Мый Ті эськӧ кутанныд вӧчны, кушмас кӧ верӧсныдлӧн юрыс?

— Ме кута видзӧдчыны сэтчӧ рӧмпӧштанӧ моз.

— Ті, вӧлӧмкӧ, и шмонитны кужанныд. Кутшӧм рӧм медся ёна кажитчӧ Тіянлы?

— Ме радейта гӧрд рӧм. Кельыдлӧз рӧмыс меным тшӧтш кажитчӧ. Енэж кодь лӧз. Турунвиж рӧмсӧ ме тшӧтш радейта. Кольквижыс, лыа кодь, менам медся радейтана рӧм. Ме радейта и еджыд рӧм. Лым кодь еджыдыс.

— Кажитчӧ-ӧ сьӧд да руд?

— Меным оз кажитчы ни сьӧд, ни руд рӧм

— Кутшӧм кывъяс вылын Ті сёрнитанныд?

— Комиӧн да рочӧн.

— Ме сьыла удмурт, коми-перым, финн, эст да мари кывъяс вылын.

— Тіян ыджыд репертуарныд. А коми анбурсӧ Ті тшӧтш верманныд сьывны?

— Дерт! Со и став анбурыс.

— Позьӧ пырны? Эн дӧзмӧй, ме сёрмышті.

— Нинӧм, ставыс овлӧ.

— Ті директор жӧ?

— Абу. Ме — доктор. Но ме некодӧс ог бурдӧд. Таво ме дорйи диссертация. Ме — техника наукаса доктор.

— Ыджыд шуд миянлы усис — тӧдмасьны Тіянкӧд.

— Збыль ӧмӧй?

— Ме — веськӧдлысь. А тэ?

— Ме тшӧтш веськӧдлысь.

а) Ме — велӧдысь. А тэ?

б) Ме — шофёр. А тэ?

в) Ме — тренер. А тэ?

г) Ме — банкир. А тэ?

д) Ме — врач. А тэ?

— Тэ — веськӧдлысь?

— Абу. Ме абу веськӧдлысь.

а) Тэ — юрист?

б) Тэ — биолог?

в) Тэ — филолог?

г) Тэ — артист?

д) Тэ — менеджер?

— Сійӧ — вузасьысь?

— Да. Сійӧ — вузасьысь.

а) Сійӧ — доктор?

б) Сійӧ — директор?

в) Сійӧ — журналист?

г) Сійӧ — министр?

д) Сійӧ — политик?

— Сійӧ — вузасьысь?

— Абу. Сійӧ абу вузасьысь.

а) Сійӧ — веськӧдлысь?

б) Сійӧ — велӧдысь?

в) Сійӧ — журналист?

г) Сійӧ — министр?

д) Сійӧ — математик?

Ме уджала.

Тэ уджалан.

Сійӧ уджалӧ.

Ми уджалам.

Ті уджаланныд.

Найӧ уджалӧны.

Ме ог уджав.

Тэ он уджав.

Сійӧ оз уджав.

Ми огӧ уджалӧй.

Ті онӧ уджалӧй.

Найӧ оз уджавны.

— Ме уджала вузасянінын. А тэ?

— Ме тшӧтш уджала вузасянінын.

а) Ме уджала театрын. А тэ?

б) Ме уджала библиотекаыс А тэ?

в) Ме уджала музейын. А тэ?

г) Ме уджала редакцияын. А тэ?

д) Ме уджала ФСБ-ын. А тэ?

— Ме кывлі, тэ пӧ уджалан вузасянінын. Тайӧ збыль?

— Абу. Ме ог уджав вузасянінын.

а) Ме кывлі, тэ пӧ уджалан МЧС-ын. Тайӧ збыль?

б) Ме кывлі, тэ пӧ уджалан «Коми гор» ГТРК-ын. Тайӧ збыль?

в) Ме кывлі, тэ пӧ уджалан Коми банкын. Тайӧ збыль?

г) Ме кывлі, тэ пӧ уджалан «Войвыв кодзув» журнал редакцияын. Тайӧ збыль?

д) Ме кывлі, тэ пӧ уджалан муниципалитетса администрацияын. Тайӧ збыль?

— Видза оланныд, Ирина Валерьевна.

— Видза олан, Толя. Тэ — студент на?

— Да, студент. А Ті — бухгалтер?

— Абу. Ме — экономист.

— Кӧні Ті уджаланныд?

— Министерствоын. А тэ он уджав?

— Ме ог на уджав.

▸ сё зӧлӧта, сё муса друг

▸ сё ен могысь

▸ сё майбыр

▸ сё мокасьт

— А коді тайӧ?

— Тайӧ менам ёртӧй — Валентин Николаевич. Сійӧ Интаысь.

— Видза оланныд, Валентин Николаевич! Меным нимкодь тӧдмасьны Тіянкӧд. Висьталӧй, пӧжалуйста, кӧні Ті уджаланныд?

— Ме — лётчик. Тайӧ менам нывъёртӧй. Шуӧны Аннаӧн.

— Сійӧ актриса?

— Да. Нёбдінса Виттор театрысь.

— Тӧдмасьӧй, тайӧ Олег Алексеевич.

— Кӧні Ті уджаланныд?

— Ме уджала банкын.

— Сідзкӧ, Ті кужанныд ӧдйӧ лыддьысьны? Кымынӧн ми танӧсь?

— Позьӧ кӧ, ме отсала.

— Ті — математик?

— Абу. Но ме тшӧтш кужа комиӧн артасьны. Ме кужа содтавны да юклыны. Ми дас витӧнӧсь: ӧти, кык, куим, нёль, вит, квайт, сизим, кӧкъямыс, ӧкмыс, дас, дас ӧти, дас кык, дас куим, дас нёль, дас вит. Миян пӧвстын кӧкъямыс айморт да сизим ань.

— Аттьӧ, зэв бур. Кӧні Ті уджаланныд?

— Ме — инженер. Ме Вӧркутаысь. Татчӧ вои командировкаӧ, удж кузя.

— Ті тӧданныд тайӧ том аньсӧ?

— Да. Ме тӧда тайӧ мича аньсӧ. Сійӧс шуӧны Еленаӧн. Сійӧ муниципалитетса веськӧдлысь Кузивановлӧн гӧтырыс. Сійӧ гижӧ кывбуръяс. Чолӧм, Елена! Кыдзи олан-вылан?

— Аттьӧ, бура.

— Коді тайӧ том мортыс?

— Тайӧ Сырчиков Василий.

— Кӧні Ті уджаланныд?

— Ме — композитор. Гижа сьыланкывъяс. Ме Визинысь.

— Ми вунӧдім тӧдмасьны тайӧ муса том нывбабаыскӧд. Кыдзи Тіянӧс шуӧны? Кытысь Ті? Кӧні Ті уджаланныд?

— Менӧ шуӧны Галинаӧн. Ме Выльгортысь. Ме — велӧдысь. Меным зэв долыд, мый ми тӧдмасим.

— Аттӧ дивӧ! Уна-ӧ нин кадыс?

— Ӧні куим час нин.

— Меным мунны нин колӧ. Ме сэсся ог эшты. Аддзысьлытӧдз, дона ёртъяс!

— Аскиӧдз!

— Аски ми бара на аддзысям.

✓ — Кымын арӧс тэныд? Кымын арӧса тэ?

✓ — Меным 25 арӧс (Ме 25 арӧса).

✓ — Тэныд 25 арӧс (Тэ 25 арӧса).

✓ — Сылы 25 арӧс (Сійӧ 25 арӧса).

— Меным 25 арӧс. А тэныд?

— Меным тшӧтш 25 арӧс.

а) Меным 46 арӧс. А тэныд?

б) Меным 51 арӧс. А тэныд?

в) Меным 38 арӧс. А тэныд?

г) Меным 29 арӧс. А тэныд?

д) Меным 18 арӧс. А тэныд?

— Ме чайта, тэныд 36 арӧс?

— Абу. Меным абу 36 арӧс.

а) Ме чайта, тэныд 80 арӧс?

б) Ме чайта, тэныд 65 арӧс?

в) Ме чайта, тэныд 53 арӧс?

г) Ме чайта, тэныд 27 арӧс?

д) Ме чайта, тэныд 41 арӧс?

— Ме 45 арӧса. А тэ?

— Ме тшӧтш 45 арӧса.

а) Ме 46 арӧса. А тэ?

б) Ме 51 арӧса. А тэ?

в) Ме 38 арӧса. А тэ?

г) Ме 29 арӧса. А тэ?

д) Ме 18 арӧса. А тэ?

— Ме думысь, сійӧ 55 арӧса?

— Абу. Сійӧ 56 арӧса.

а) Ме думысь, сійӧ 33 арӧса?

б) Ме думысь, сійӧ 44 арӧса?

в) Ме думысь, сійӧ 26 арӧса?

г) Ме думысь, сійӧ 39 арӧса?

д) Ме думысь, сійӧ 20 арӧса?

— Кутшӧм тэнад телефон номерыд?

— 97 64 21. А тэнад?

— Менам важ номерыс на: 285815.

— Тайӧ — гортса номерыд?

— Абу. Тайӧ сотӧвӧй. Гортын телефоныс абу.

— Звӧнитла сотӧвӧй вылад?

— Звӧнит. Кута виччысьны.

— Тэнад телефон номерыд, буракӧ, 85 64 09?

— Сідз. Менам телефон номерӧй — 85 64 09.

а) Тэнад телефон номерыд, буракӧ, 65 01 91?

б) Тэнад телефон номерыд, буракӧ, 24 72 90?

в) Тэнад телефон номерыд, буракӧ, 54 67 83?

г) Тэнад телефон номерыд, буракӧ, 61 76 98?

д) Тэнад телефон номерыд, буракӧ, 12 54 03?

— Тэнад телефон номерыд — 64 00 77?

— Абу. Тэ, буракӧ, вунӧдӧмыд.

а) Тэнад телефон номерыд — 54 00 76?

б) Тэнад телефон номерыд — 90 65 88?

в) Тэнад телефон номерыд — 43 67 22?

г) Тэнад телефон номерыд — 55 70 01?

д) Тэнад телефон номерыд — 63 90 70?

✓ — Энӧ дивитӧй.

✓ — Кора прӧща.

✓ — Энӧ скӧралӧй.

✓ — Ме абу мыжа.

— Кора прӧща, меным Сыктывкарӧдз ӧти билет колӧ.

— Ті кор кӧсъянныд лэбзьыны?

— Талун.

— Талун оз нин артмы.

— Но меным зэв ёна колӧ билетыс талун кежлӧ. Он ӧмӧй вермӧй меным отсавны?

— Час видла. Виччысьлӧй муртса. Алло, тайӧ Мария. Гашкӧ, меным отсаланныд? Гашкӧ, кодкӧ бӧр сдайтіс Сыктывкарӧдз билетсӧ?

— Эм билетыс?

— Ме чолӧмала Тіянӧс. Тіянлы мойвиис. Эм пӧ гоз-мӧд.

— Аттьӧ.

— А бӧрсӧ воны билетыд тшӧтш колӧ?

— Оз ков.

— Став бурсӧ.

— Ме аскӧд босьті сӧмын киын кутантор. Чемоданӧс восьтывлыны колӧ?

— Да. Колӧ.

— Ме тай нӧ ключӧс ог аддзы. Зептам сійӧ абу.

— Видзӧдлӧй сьӧм кӧшельсьыд.

— Кӧн нӧ эськӧ сійӧ вермас лоны?

— Энӧ шогсьӧй.

— Шӧпей кодь ме. Энӧ дивитӧй. Чемоданӧй тай восьса вӧлӧма. Но и сісь юр!

— Самолётыс Сыктывкарӧ лэбзяс нелямын вит минут мысти.

— Телефоныс звӧнитӧ, босьт трубкасӧ.

— Тайӧ пошта?

— Ті мӧдлаӧ веськалінныд.

— Енмӧй, бара на звӧнитӧны!

— Алло, тайӧ Коля.

— Коді тайӧ? Кора сёрнитны гораджыка. Ме лёка кыла Тіянӧс.

— Ме выльысь висьтала: Костя, Олег, Лёша, Яша. Ті менӧ кыланныд?

— Да. А код нӧ тіян пӧвстысь сёрнитӧ?

— Мый нӧ лоис?

— Кодкӧ тешитчӧ миян вылын.

— Пукты трубкатӧ. Эн майшась.

— Бара на сійӧ.

— Алло! Тайӧ 353 — 190?

— Тайӧ бара на, Ті, Коля?

— Ме абу мыжа. Миянлысь сёрнинымӧс торкисны. Гӧлӧс шы:

— Тані кутшӧмкӧ гӧгӧрвотӧмтор. Сёрнитӧ Сергей. Ме звӧнитлі нин тіянлы некымынысь. Век кодкӧ сёрнитӧ. Ме кӧсъя сёрнитны Тіян веськӧдлысьныдкӧд. Кӧсъя тӧдмавны выль тӧвар вылӧ донсӧ.

— Ме думысь, Тіян нинӧм оз артмы.

— Эн пуктӧй трубканытӧ. Тайӧ зэв колана сёрни.

— Звӧнитлӧй, пӧжалуйста, выль пӧв. Ті сорасьӧмныд номернад.

— Прӧститӧй.

— Нинӧм.

— Дзикӧдз дӧзмӧдісны!

✓ — Талун кымынӧд лун?

✓ — Талун октябр дас ӧтиӧд лун.

✓ — Кутшӧм воын тэ чужин?

✓ — Кор тэ чужин?

Ме чужи.

Тэ чужин.

Сійӧ чужис.

Ми чужим.

Ті чужинныд.

Найӧ чужисны.

— Ме чужи 1972-ӧд воын. А тэ?

— Ме тшӧтш чужи 1972-ӧд воын.

а) Ме чужи 1955-ӧд воын. А тэ?

б) Ме чужи 1960-ӧд воын. А тэ?

в) Ме чужи 1967-ӧд воын. А тэ?

г) Ме чужи 1970-ӧд воын. А тэ?

д) Ме чужи 1978-ӧд воын. А тэ?

— Тэ чужин 1975-ӧд воын?

— Эг. Ме чужи эг 1975-ӧд воын.

а) Тэ чужин 1957-ӧд воын?

б) Тэ чужин 1963-ӧд воын?

в) Тэ чужин 1980-ӧд воын?

г) Тэ чужин 2000-ӧд воын?

д) Тэ чужин 2005-ӧд воын?

— Сійӧ чужис 1999 воын?

— Да. Сійӧ чужис 1999 воын.

а) Сійӧ чужис 2000 воын?

б) Сійӧ чужис 1986 воын?

в) Сійӧ чужис 1976 воын?

г) Сійӧ чужис 2005 воын?

д) Сійӧ чужис 1992 воын?

— Кӧні тэ олан?

— Ме ола тані, Куратов улича вылын. Оланінпасӧй — 20-ӧд номера керка, 53-ӧд номера патера, кодыс — 164.

— А кутшӧм телефон номерыд?

— Сотӧвӧй али гортса?

— Сотӧвӧй.

— 26 78 42. Звӧнит. Аддзысьлытӧдз.

— Аддзысьлытӧдз.

✓ — Кутшӧм бать-мам, сэтшӧм и ныв-пи.

— Тіян эм семья?

— Эм. Гӧтырӧйлӧн арлыдыс кык пӧв ыджыдджык ныв дорысь. А гӧтырӧй томджык меысь вит воӧн. Нывным дас куим арӧсӧн ыджыдджык пиысь, коді мӧд во мунас школаӧ.

— Тайӧ задачасӧ вермас решитны сӧмын математик. Ме ог вермы. Меным вывті сьӧкыд.

— Мый нӧ лоис?

— Коля вокӧс суӧма неминуча.

Кодкӧ лыйӧма сылы помидорӧн.

— Но помидорыс ӧд небыд, сыысь он доймы.

— Найӧ вӧлӧмаӧсь кӧрт банкаын.

— Такси! Такси! Тіян места эм?

— Эм. Пуксьӧй. Кытчӧдз?

— Кора нуны гортӧдз. Быд пӧткалӧн аслас поз. Ме тэрмася.

Вай, кыдз позьӧ ӧдйӧджык мунам.

— Тані машинаясыд зэв ӧдйӧ ветлӧны.

Нинӧм шензьынысӧ, ӧд ӧні сэтшӧм кадыс.

— Вай кежам шуйгавылас.

Видзӧдлӧй светофор вылас.

— Турунвиж тай ӧзйӧ.

Эн дӧзмӧдӧй менӧ.

Коді нуӧдӧ машинасӧ?

Тіян асланыд удж, менам тшӧтш аслам.

Экма, со милиционер!

Эз артмы миян нинӧм.

— Эн шогсьӧй.

Ме сёрнитча сыкӧд.

— Петкӧдлӧй, пӧжалуйста, правонытӧ.

— Со видзӧдлӧй.

— Мынтӧй штраф.

— Ме ӧдйӧ вӧлі муна али мый?

— Тайӧ менам гӧтырӧй.

— Кыдзи сійӧс шуӧны?

а) — Тайӧ менам верӧсӧй.

б) — Тайӧ менам нылӧй.

в) — Тайӧ менам пиӧй.

г) — Тайӧ менам чойӧй.

д) — Тайӧ менам вокӧй.

— Тайӧ тэнад гӧтырыд?

— Да. Тайӧ менам гӧтырӧй.

а) Тайӧ тэнад верӧсыд?

б) Тайӧ тэнад нылыд?

в) Тайӧ тэнад пиыд?

г) Тайӧ тэнад чойыд?

д) Тайӧ тэнад вокыд?

— Тэнад чойыд велӧдчӧ институтын?

— Да. Менам чойӧй велӧдчӧ институтын.

а) Тэнад вокыд уджалӧ министерствоын?

б) Тэнад нылыд олӧ Айкатылаын?

в) Тэнад гӧтырыд уджалӧ бурдӧдчанінын?

г) Тэнад пиыд олӧ Вежайкаын?

д) Тэнад верӧсыд уджалӧ вузасянінын?

а) Тайӧ Катьӧ.

Сылӧн эм гӧрд платтьӧ.

Сылӧн эм еджыд свитер.

Сылӧн эм лӧз пальто.

Сылӧн эм кольквиж халат.

Сылӧн эм руд сарапан.

б) Тайӧ Петьӧ.

Сылӧн эм турунвиж галстук.

Сылӧн эм лӧз футболка.

Сылӧн эм руд костюм.

Сылӧн эм гӧрд шарп.

Сылӧн эм сьӧд шапка.

Кутшӧм рӧма сылӧн платтьӧыс?

— Сылӧн платтьӧыс турунвиж?

— Да. Сылӧн платтьӧыс турунвиж.

а) Сылӧн гачыс сьӧд?

б) Сылӧн пасьыс еджыд?

в) Сылӧн дӧрӧмыс руд?

г) Сылӧн кепысьыс гӧрд?

д) Сылӧн чышъяныс кольквиж?

— Сылӧн эм ныла-пиа?

— Да. Сылӧн эм ныла-пиа.

а) Сылӧн эм бать-мам?

б) Сылӧн эм пӧч-пӧль?

в) Сылӧн эм чоя-вока?

г) Сылӧн эм челядь?

д) Сылӧн эм рӧдвуж?

Ме гуляйті лун да вой,
Гортӧ локті — яръюгыд,
Гортӧ локті — яръюгыд,
Мамлӧн пачыс ваймӧма.

Мамлӧн пачыс ваймӧма,
Пӧсь пирӧгыс петӧма.
Пӧсь пирӧгыс петӧма,
Самӧварыс пузьӧма.

Самӧварыс пузьӧма,
Батьӧ локтӧ удж вылысь,
Батьӧ локтӧ удж вылысь,
Чойӧй локтӧ войпукысь.

Чойӧй локтӧ войпукысь,
Вокӧй локтӧ ворсанысь.

Сьывны да овны!

✓ — Ме радейта тэнӧ.

— Чолӧм, Настук.

— Бур лун, Рома.

— Гашкӧ, ветлам кытчӧкӧ?

— Позьӧ. Вай ветлам «Ошпи» кафеӧ. Сэні зэв лӧсьыд.

— А кодкӧд тэ вӧлін сэні? Ме — вежӧгтысь!

— Нывъёрткӧд. Ме тэнӧ радейта.

— Тэ тшӧтш меным сьӧлӧм вылӧ воан. Тэ кӧсъян петны верӧс сайӧ?

— Вай гӧтрасям!

— Нэмтӧ коллялӧмыд — абу ва вомӧн вуджӧм.

✓ — Гӧтрасян кӧ, котырыд лоӧ: кыкӧн водан, а куимӧн чеччан.

— Саньӧ, отсав меным пелькӧдчыны. Керкаыс тырӧма няйтнас.

— Вешйы татысь. Эн дӧзмӧд менӧ. Ме ог кӧсйы.

— Кӧть нин тасьті-паньсӧ мыськы.

— Ме бара-й ог. Дыш.

— Тырмас туплясьны вольпась вылад. Чеччы да идрав вольпасьӧ.

— Дыш меным.

— Дышлы ньӧр, зільлы зӧр.

— Бур рыт, челядь. Гортса уджнытӧ вӧчинныд?

— Эг на удитӧй. Меным колӧ Иван Куратовлысь кывбур велӧдны.

— А меным колӧ физикаысь задача решитны.

— Нылукӧй да пиукӧй, тӧдмалӧй нӧдкывсӧ:

Асывнас нёль кока, луннас кык кока, а рытнас куим кока.

— Ме ог тӧд. Гашкӧ, пызан?

— Абу. Эн тӧдмалӧй.

— Сетчам.

— Ог висьтав. Думайтӧй. Ов да выв, да век велӧдчы.

▸ сьӧлӧмсянь чолӧмавны

✓ — Юбилей вылӧ ме муна верӧскӧд.

— Кодкӧд тэ мунан кафеӧ?

— Ме муна кафеӧ ёрткӧд.

а) Кодкӧд ті ветлінныд ресторанӧ?

б) Кодкӧд сійӧ мунӧ барӧ?

в) Кодкӧд ми мунам театрӧ?

г) Кодкӧд тэ мунан свадьба вылӧ?

д) Кодкӧд найӧ мунӧны кинотеатрӧ?

— Театрысь ме локта бать-мамкӧд. А тэ?

— Ме тшӧтш локта бать-мамкӧд.

а) Карысь ме воа гӧтыркӧд. А тэ?

б) Кинотеатрысь ме петі верӧскӧд. А тэ?

в) Сиктысь ме локта пӧль-пӧчкӧд. А тэ?

г) Ресторанын сійӧ локтіс ёртыскӧд. А тэ?

д) ЦУМ-ысь тэ петін вокыдкӧд. А тэ?

Прӧст кадӧ

— Мый тэ вӧчан удж бӧрад?

— Ме шойчча. Сёя гортын. Тшӧкыдджыка видзӧда телевизор либӧ лыддьыся.

— Кутшӧм небӧгъяс радейтан лыддьыны?

— Пемӧс йылысь. А тэ кыдзи коллялан прӧст кадтӧ?

— Ветла ӧтчыдысь вежоннас варччанінӧ. Мукӧд лунас велӧда курс вылын коми кыв. Быд гожӧм ме ветла саридз дорӧ.

— Ме радейта пусьыны. Кутшӧм рок пуан, сэтшӧмӧс и сёян.

— Менам гӧтырӧй радейтӧ кысьыны да вурсьыны. Ачым компьютерӧн радейта ворсны. Пиӧй спортсмен. Лыжиӧн котралӧ. Ордйысьӧм вылас ми гӧтыркӧд тшӧтш ветлывлам.

— Миян эм дача. Ми сэні гожӧмнас шойччам. Быдтам град выв пуктас да дзоридзьяс.

Таво чужис уна сёркни да кушман. Став рӧдвужлы тырмис.

— Ми, буракӧ, Тіянкӧд тӧдсаӧсь. Санюк? Тӧді, эг?

— Сё морӧ, вот тэныд на, тайӧ тай тэ вӧлӧмыд, Галюк! Кутшӧм важӧн нин ме эг аддзывлы тэнӧ.

— Корсянь нин ми эг аддзысьлӧй? Кыдзи олан-вылан?

— Аттьӧ, бура. Тэ век на эн гӧтрась?

— Дерт нин! Ме важӧн гӧтыра. Менам ныла-пиа нин эм.

— Кымын арӧсаӧсь найӧ?

— Нывлы куим арӧс. Пиӧй сӧмын на чужис.

— Кыдзи бать-мамыд олӧны?

— Аттьӧ, олӧны-вылӧны тай. Лун да вой коллялӧны.

— Но, ставыс, сідзкӧ, бур.

— Ичӧтджык вокӧй гӧтрасис жӧ нин. А ыджыдджык чойӧй век на олӧ бать-мамкӧд.

— Збыль ӧмӧй?

✓ — Менам эм пиук.

✓ — Менам ыджыд мам абу.

— Тіян вокъяс эмӧсь?

— Да. Эмӧсь.

а) Тіян чойяс эмӧсь?

б) Тіян кагаяс эмӧсь?

в) Тіян нывъяс эмӧсь?

г) Тіян уджалысьяс эмӧсь?

д) Тіян небӧгъяс эмӧсь?

— Сылӧн вокъяс абуӧсь?

— Абуӧсь.

а) Сылӧн дӧрӧмъяс абуӧсь?

б) Сылӧн чышъянъяс абуӧсь?

в) Сылӧн пасьяс абуӧсь?

г) Сылӧн гачьяс абуӧсь?

д) Сылӧн чойяс абуӧсь?

— Мый тэнад нимыд?

— Менам нимӧй Маша.

— Кутшӧм тэнад овыд?

— Менам овӧй Вокуева.

— Кутшӧм тэнад вичыд?

— Менам вичӧй Алексеевна.

Сылӧн нимыс Ӧлексан?

Да. Сылӧн нимыс Ӧлексан.

а) Сылӧн нимыс Ӧльӧш?

б) Сылӧн нимыс Ольга?

в) Сылӧн нимыс Ӧгаш?

г) Сылӧн нимыс Дашӧ?

д) Сылӧн нимыс Надьӧ?

— Тіян вичныд Петрович?

— Абу. Менам вичӧй Иванович.

а) Тіян вичныд Степанович?

б) Тіян вичныд Сергеевич?

в) Тіян вичныд Петровна?

г) Тіян вичныд Николаевна?

д) Тіян вичныд Алексеевна?

Тутуруту Семӧ сайӧ
Ӧгрӧ Марпа верӧс сайӧ,
Майбыр, муніс,
Майбыр, муніс.
Семӧ ордын пируйтӧны,
Пызан сайын пукалӧны
Став рӧдвужыс,
Став рӧдвужыс:
Ласей Мӧсей, Чукля Педӧр,
Пӧрысь Ярӧ, Ныртӧм Петыр,
Варгыль Кӧсьта,
Варгыль Кӧсьта,
Гӧгрӧс Ӧгрӧ, Куран Марья,
Кекур Надьӧ, Бырган Дарья, —
Дона гӧсьтъяс,
Дона гӧсьтъяс.
Сват да сваття, кум да кума,
Ыджыд зыкӧн, гажа шумӧн
Мунӧ пирыс,
Мунӧ пирыс.

— Коді тайӧ нылыс?

Ме, буракӧ, сійӧс ог тӧд?

— Он тӧд?

— Сійӧ збыль вылӧ статя да мича ныв.

— Збыльысь.

Но ӧні сылы унджык кад колӧ, медым ас бӧрсяыс видзӧдны да век лоны мичаӧн.

— А кытысь нӧ тэ тӧдан?

— Сійӧ менам гӧтыр.

Уджыс ӧні сылӧн юрвывтыр.

Сійӧ — асшӧр уджалысь.

Гӧтырлӧн эм аслас бизнес.

— Гӧгӧрвоа, ме ӧд тшӧтш асшӧр уджалысь.

— Таысь ӧтдор ми тшӧкыда сиктӧ ветлывлас

Отсасям бать-мамлы.

— Тайӧ серпасыс меным ёна кажитчӧ.

Кыдзи овлӧ олӧмас, сідзи и петкӧдлӧма.

— Меным сійӧ тшӧтш сьӧлӧм вылӧ воис.

Ме тӧда зэв бур серпасалысьӧс.

Ӧтчыд сійӧ вӧлі серпасалӧма пӧтӧлӧкас черань вез.

Гӧтырыслы ковмӧма некымын час весавны пӧтӧлӧксӧ.

— Ме ог эскы талы.

— Мыйла он?

Художникыд вермӧ тадзисӧ вӧчны.

— Художникыдтӧ вермас, а гӧтырыс оз.

— Кора гладитны менсьым костюмӧс.

— Дӧрӧмъястӧ колӧ жӧ гладитны?

— И кӧмӧс кора весавны.

— Нӧшта мый?

— Ме галстукӧс ог аддзы.

Кытчӧ сійӧ вошӧма?

— Гашкӧ, чемоданад али шкапад?

— Сэні сійӧ абу.

— А, гашкӧ, тувъяс ӧшалӧ?

Вай ме диван увсьыс видзӧдла.

— Йӧймыны тані позьӧ!

А мый тані тешкодьыс?

— Ура! Ме тӧда, кӧні сійӧ.

— Кӧні нӧ?

— Сійӧс, буракӧ, пылесосыс ньылыштӧма.

Лена Каневалӧн эм вок?

Да. Лена Каневалӧн эм вок.

а) Ваньӧ Кузькоковлӧн эм пи?

б) Тольӧ Кузивановлӧн эм пӧч?

в) Борис Кушмановлӧн эм пӧль?

г) Зина Кырнышевалӧн эм ыджыд бать?

д) Арина Кузьвасевалӧн эм ыджыд мам?

— Изьва районлӧн юрсиктыс — Айкатыла?

— Абу. Изьва районлӧн юрсиктыс — Изьва.

а) Мылдін районлӧн юрсиктыс — Эжва?

б) Кулӧмдін районлӧн юрсиктыс — Емва?

в) Койгорт районлӧн юрсиктыс — Москва?

г) Сыктывдін районлӧн юрсиктыс — Кедвавом?

д) Луздор районлӧн юрсиктыс – Усвавом?

— Россиялӧн юркарыс — Мӧскуа?

— Да. Россиялӧн юркарыс — Мӧскуа.

а) Киров обласьтлӧн юркарыс — Киров?

б) Коми Республикалӧн юркарыс — Сыктывкар?

в) Марий Эллӧн юркарыс — Йошкар-Ола?

г) Удмуртиялӧн юркарыс — Ижевск?

д) Финляндиялӧн юркарыс — Хельсинки?

— Тэнад нывлӧн нимыс Гальӧ?

— Абу. Сылӧн нимыс Машӧ.

а) Тэнад пиыдлӧн нимыс Сашӧ?

б) Тэнад вокыдлӧн нимыс Мишӧ?

в) Тэнад гӧтырпуыдлӧн нимыс Катьӧ?

г) Тэнад верӧспуыдлӧн нимыс Гришӧ?

д) Тэнад батьыдлӧн нимыс Ӧльӧ?

— Кодлӧн тайӧ гӧрд дӧрӧмыс?

— Тайӧ гӧрд дӧрӧмыс менам.

а) Кодлӧн тайӧ руд гачыс?

б) Кодлӧн тайӧ сьӧд пасьыс?

в) Кодлӧн тайӧ кольквиж кепысьыс?

г) Кодлӧн тайӧ еджыд чышъяныс?

д) Кодлӧн тайӧ лӧз платтьӧыс?

а) Со Настуклӧн олан жырйыс.

— Кодлӧн тайӧ кучик креслӧыс?

— Тайӧ кучик креслӧыс Настуклӧн.

— Кодлӧн тайӧ пызаныс?

— Тайӧ пызаныс Настуклӧн.

— Кодлӧн тайӧ улӧсыс?

— Тайӧ улӧсыс Настуклӧн.

б) Со Ӧньӧлӧн узьлан вежӧсыс.

— Кодлӧн тайӧ крӧватьыс?

— Тайӧ крӧватьыс Ӧньӧлӧн.

— Кодлӧн тайӧ шкапыс?

— Тайӧ шкапыс Ӧньӧлӧн.

— Кодлӧн тайӧ улӧсыс?

— Тайӧ улӧсыс Ӧньӧлӧн.

а) Тайӧ вокӧй.

Тайӧ кучик сапӧгыс воклӧн.

Тайӧ чуня кепысьыс воклӧн.

Тайӧ тасмаыс воклӧн.

б) Тайӧ чойӧй.

Тайӧ ковтаыс чойлӧн.

Тайӧ туплиыс чойлӧн.

Тайӧ пимиыс чойлӧн.

а) Мамлӧн эм ныв.

Ыджыд батьлӧн эм внук.

Внучкалӧн эм пӧль.

Воклӧн эм чой.

Челядьлӧн эм мам.

Батьлӧн эм пи.

б) Мамлӧн эмӧсь нывъяс да пиян.

Ыджыд батьлӧн эмӧсь внукъяс да внучкаяс.

Воклӧн эмӧсь чойяс.

в) Ваньӧлӧн абу вокыс.

Сылӧн эм ичӧт чой.

Катьӧлӧн абу чойыс.

Сылӧн эм ыджыд вок.

Васьӧлӧн ни чой, ни вок абу.

Алӧй ленточка

Менам вӧлі алӧй ленточка,
Воши сійӧ озъя тылаӧ.

Менам вӧлі гӧрд шӧвк ленточка,
Воши сійӧ пувъя ягӧ.

Менам вӧлі лӧз шӧвк ленточка,
Воши сійӧ чӧдъя раскӧ.

Менам вӧлі алӧй шӧвк ленточка,
Воши сійӧ озъя ягӧ.

Менам вӧлі виж шӧвк ленточка,
Воши сійӧ мырпома нюрӧ.

Менам вӧлі еджыд шӧвк ленточка,
Воши сійӧ ялаа ягӧ.

Менам вӧлі сьӧд шӧвк ленточка,
Воши сійӧ сьӧд вӧр шӧрӧ.

Менам вӧлі муса, муса друг,
Уси сійӧ война вылӧ.

Уна-ӧ ӧні кадыс?

Уна-ӧ кадыс? Кымын час?

Сизим час.

Сизим час да джын.

Сизим час да комын минут.

Сизим час да дас вит минут.

Сизим час да нелямын вит минут.

Дас вит минуттӧм кӧкъямыс.

✓ — Ӧні стӧч куим час.

✓ — Ме локта кӧкъямыс час гӧгӧр.

✓ — Ме локта удж вылысь сизим час бӧрын.

✓ — Ме уджала ӧкмыссянь витӧдз.

— Мый тэ вӧчан?

— Ме виччыся Ельӧӧс.

— Уна-ӧ кадыс?

— Сизим час нин.

— Аттьӧ.

Кора Тіянӧс Лидия Петруневалӧн концерт вылӧ.

— Кымынсянь концертыс?

— Концертыс заводитчӧ кӧкъямысын.

— А кор помасьӧ?

— Дасын. Дас бӧрын лоӧ дискотека.

— Гашкӧ, йӧктыштам «Шондібан»?

— Сёрнитчим!

✓ — Тӧлысь — эзысь, шонді — зарни.

✓ — Ветлы, шондібанӧй, няньла.

✓ — Шондібанӧй-олӧмӧй, том олӧмӧй, том гажӧй.

✓ — Шонді горулыс кӧ мисьтӧм, аски зэрас.

— Кытысь босьтчин?

Кытысь усин?

Некыдз эг виччысь, мый ми тані паныдасям.

Кытчӧ ӧні мӧдан?

— Ме талун лэбзя Сыктывкарӧ.

Ме тшӧкыда ветла юркарӧ удж кузя. Ӧні ме тэрмася аэропортӧ.

Уна-ӧ кадыс?

— Регыд лоӧ кык час.

Ме верма нуны тэнӧ сэтчӧ машинаӧн.

Ёрта-ёртлы век колӧ отсавны.

— Ме кӧсъя ньӧбны «Компьютерный мир» вузасянінысь техника.

— Выль модельяссӧ?

— Да. Ме аддзылі найӧс бӧръя выставка вылысь.

Налӧн компьютеръясыс медся бурӧсь.

И доныс абу зэв ыджыд.

— Компьютерыс колӧ уджаланінад али аслыд?

— Уджаланінӧ.

— Ме муна велӧдчыны 16.00. А тэ?

— Ме тшӧтш муна велӧдчыны 16.00.

— Я иду учиться в 16.00. А ты?

— Я тоже иду учиться в 16.00.

а) Ме локта гортӧ 6 час рытын. А тэ?

б) Ме воа удж вылӧ 8.50. А тэ?

в) Ме муна удж вылысь 17.15. А тэ?

г) Ме муна уджавны 8.30. А тэ?

д) Ме ветла вузасянінӧ 19.00. А тэ?

— Ме уджала ӧкмыссянь витӧдз. А тэ?

— Ме тшӧтш уджала ӧкмыссянь витӧдз.

а) Ме уджала 10-сянь 6-ӧдз. А тэ?

б) Ме уджала 8-сянь 4-ӧдз. А тэ?

в) Ме уджала 12-сянь 8-ӧдз. А тэ?

г) Ме уджала 11-сянь 7-ӧдз. А тэ?

д) Ме уджала 7-сянь 3-ӧдз. А тэ?

— Пажын кадыс дас куимсянь?

— Да, дас куимсянь.

а) Ми аддзысям вит часын?

б) Самолётыд лэбӧ куим часын?

в) Вузасяніныс воссьӧ кӧкъямыс часын?

г) Спектакльыс помасьӧ дас ӧти часын?

д) Концертыс заводитчӧ сизим часын?

Ӧні час. — Кор векджык пажнайтӧ Настук?

— Настук векджык пажнайтӧ часын.

а) Ӧні куим час. — Кор звӧнитас Ӧньӧ?

б) Ӧні квайт час. — Кор ті ужнайтанныд?

в) Ӧні кӧкъямыс час. — Кор заводитчас «Войтъяс» телепередача?

г) Ӧні ӧкмыс час. — Кор векджык локтӧ гортас Васьӧ?

д) Ӧні нёль час. — Кор заводитчӧ коми кывйысь урок?

— Ӧні куим час. Сійӧ локтас час мысти.

— Сійӧ локтас нёль часын?

а) Ӧні ӧкмыс час. Ме локта кык час мысти.

б) Ӧні кӧкъямыс час. Саньӧ мунас час мысти.

в) Ӧні квайт час. Поезд воас куим час мысти.

г) Ӧні вит час. Гӧсьтъяс локтасны час мысти.

д) Ӧні кык час. Ми локтам час мысти.

а) — Дыр-ӧ ті оланныд Комиын?

— Ми олам ӧкмыс во чӧж.

б) — Дыр-ӧ сійӧ сёрнитіс телефон пыр?

— Сійӧ сёрнитіс телефон пыр дас минут чӧж.

а) Минутын квайтымын секунда?

б) Лунын кызь нёль час?

в) Вежонын дас кык лун?

г) Тӧлысьын сизим лун?

д) Воын комын тӧлысь?
— Пиыд дыр вӧчис гортса уджсӧ?

— Пиӧй вӧчис гортса уджсӧ час чӧж.

— Мишӧ дыр оліс пӧль ордас?

— Пашӧ дыр вӧлі командировкаын?

— Сашӧ дыр шойччис саридз дорын?

— Гришӧ дыр висис?

— Ті важӧн гӧтрасинныд?

— Вит во сайын нин.

— Ті важӧн велӧданныд университетын?

— Ті важӧн оланныд Выльгортын?

— Ті важӧн уджаланныд редакцияын?

— Ті важӧн тӧдсаӧсь?

а) Войбыд зэрис.

б) Лунтыр лымъяліс.

в) Гожӧмбыд челядь вӧліны сиктын.

г) Тӧлысь чӧж ме вӧлі командировкаын.

д) Ми век олім карын.

Шондібанӧй-олӧмӧй да,
Том олӧмӧй, том гажӧй.

Том олӧмӧй, том гажӧй да,
Том пӧра коллялӧмӧй.

Том пӧра коллялӧмӧй да,
Дас квайт арӧс тыртӧмӧй.

Дас квайт арӧс тыртӧмӧй да,
Кызь арӧс виччысьӧмӧй.

Кызь арӧс виччысьӧмӧй да,
Том зонмӧс радейтӧмӧй.

Том зонмӧс радейтӧмӧй да,
Лямпа туй талялӧмӧй.

Лямпа туй талялӧмӧй да,
Лӧсас кузьта ветлӧмӧй.

Лӧсас кузьта ветлӧмӧй да,
Тувччигтырйи йӧктӧмӧй.

Тувччигтырйи йӧктӧмӧй да,
Йӧктігтырйи тувччӧмӧй.

Йӧктігтырйи тувччӧмӧй да,
Кытчӧ бара кольӧма?..

Кытчӧ бара кольӧма да,
Шондібанӧй-олӧмӧй?

Шондібанӧй-олӧмӧй да,
Том олӧмӧй, том гажӧй!

Нянь да сов!

Ӧньӧ завтракайтӧ

Ӧньӧ сёйӧ кольк

Ӧньӧ юӧ йӧв

Ӧньӧ пажнайтӧ

Ӧньӧ сёйӧ шыд

Ӧньӧ юа йӧла кофе

Ӧньӧ ужнайтӧ

Ӧньӧ сёйӧ картупель да чери

Ӧньӧ юӧ вотӧса ва

✓ — Шыд да рок — медбур вок.

✓ — Няня кынӧм век пӧт.

— Бур асыв! Сёяныд дась?

— Абу на. Рок пусьӧ.

— Ме ог кут сёйны роктӧ.

— Мыйла? Мый кутан сёйны?

— Ме кӧсъя нӧкъя рысь.

— Мый кутан юны?

— Йӧв.

— А кутшӧм нянь тэныд колӧ, сьӧд али еджыд?

— Меным колӧ небыд сьӧд нянь. Аттьӧ.

— Нянь да сов!

— Ме тшыгъялі.

Гашкӧ, сёянінӧ ветлам?

— Ог мун. Ме абу на тшыг.

Сёянінын сёрни:

— Меным, пӧжалуйста, яя салат, тасьті юква да пельмень нӧкйӧн.

Юны кута ырӧш.

Дона-ӧ сувтіс?

— Мынтӧй нелямын кӧкъямыс шайт.

— Меным колӧ нӧшта вилки, пурт да ыджыд пань.

Аттьӧ.

— Гашкӧ, кофе чашка юам?

Юигмоз эськӧ и сёрнитыштам.

— Позьӧ.

Кодкӧ радейтӧ чай юны, а кодкӧ — кофе.

— Кофесӧ Ті йӧлӧн юад?

— Йӧвтӧг.

— А, гашкӧ, «Олӧм вын» бальзам румка колӧ?

— Позьӧ. Ӧти румкатӧ позьӧ.

Ывлаас кынмышті неуна.

— Ме тшӧтш румкатӧ юа.

— Корам нӧшта кык румка.

Бальзамыд тай чӧскыд вӧлӧма.

— Ті тшӧкыда пажнайтанныд сёянінын?

— Сӧмын уджалан лунъясӧ.

Мукӧд луннас сёя гортын.

— Буракӧ, рытнас йӧзыс тан тыр.

Куш местаыс абу.

— Тадзисӧ тшӧкыдджыка овлӧ шойччан либӧ праздник лунъясӧ.

Чужан лун дырйи гажӧдчам гортын.

Кӧлысясям ресторанъясын.

Пӧшти быд семьяын тадзи.

— Ті меным казьтыштінныд козинъяс йылысь.

— Миянлы колӧ тэрмасьыштны.

Регыд став вузасяніныс кутас пӧдласьны.

— Уна-ӧ кадыс?

— Сизим час гӧгӧр.

— Ми бура коллялім кадсӧ.

— Бура шойччӧй туй водзад.

Неылын эм сауна да варччанін.

— Гижа адрессӧ. Аттьӧ юӧрысь.

— Став бурсӧ.

— Ме радейта юны маа чай. А тэ?

— Ме тшӧтш радейта юны маа чай.

а) Ме радейта юны ырӧш. А тэ?

б) Ме радейта сёйны риса рок. А тэ?

в) Ме радейта сёйны сола тшак. А тэ?

г) Ме радейта сёйны черинянь. А тэ?

д) Ме радейта сёйны йӧла кушман. А тэ?

— Тэ он радейт черинянь?

— Ог. Ме ог радейт черинянь.

а) Тэ он радейт чеснӧк?

б) Тэ он радейт сур?

в) Тэ он радейт сукар?

г) Тэ он радейт картупель?

д) Тэ он радейт калбас?

— Шыдыс пӧсь?

— Пӧсь.

а) Йӧлыс шома?

б) Кампетыс юмов?

в) Шаньгаыс небыд?

г) Лукыс курыд?

д) Няньыс чорыд?

— Яйыс кын?

— Абу кын.

а) Чериыс сола?

б) Шыдыс дуб?

в) Йӧлыс пуӧм?

г) Чипан колькйыс уль?

д) Рыська шаньгаыс чӧскыд?

Шыд век сёйӧны солӧн.

Шыд оз сёйны совтӧг.

— Тэ роксӧ сёян сакартӧг?

— Да. Ме роксӧ сёя сакартӧг.

а) Тэ шыдсӧ сёян няньтӧг?

б) Тэ роксӧ сёян варенньӧтӧг?

в) Тэ котлетсӧ сёян картупельтӧг?

г) Тэ рысьсӧ сёян нӧктӧг?

д) Тэ чайсӧ юан йӧвтӧг?

— Сійӧ сёйӧ юквасӧ вилкиӧн?

— Оз. Сійӧ оз сёй юквасӧ вилкиӧн.

а) Сійӧ сёйӧ няньсӧ йӧлӧн?

б) Сійӧ сёйӧ пельменьсӧ нӧкйӧн?

в) Сійӧ сёйӧ шыдсӧ вилкиӧн?

г) Сійӧ сёйӧ тшаксӧ выйӧн?

д) Сійӧ сёйӧ черисӧ паньӧн?

Чужан лунӧн!

Настук вӧччис

Настук ветліс шырсянінӧ

Настук ньӧбис козин да дзоридз

Настук чолӧмаліс ыджыд мамсӧ

Настук кутліс сійӧс

Настук чӧсмасьыштіс

Настук сьылыштіс

Настук йӧктыштіс

✓ — Чужан лунӧн!
✓ — Чолӧмала Тіянӧс чужан лунӧн!
✓ — Чолӧмала праздникӧн!
✓ — Выль воӧн!
✓ — Рӧштвоӧн!

✓ — Сиа Тіянлы

— Пӧжасин?

— Да, ньӧби торт.

Муна гӧститны рӧдвуж ордӧ.

— Кутшӧм гаж вылӧ мӧдӧдчин?

— Ыджыд мамлӧн чужан лун.

— Гӧститігад коскӧ оз кучкы.

— Шойччы да шонтысь, рочаканьӧй.

— Чолӧмала тэнӧ, муса ыджыд мамӧй, чужан лунӧн.

Кузь нэм да бур шуд!

— Матыстчы пызанлань, Настук.

— Первой колӧ киӧс мыськыны.

Мыйта чӧскыдсӧ дасьтӧмыд!

— Тэ ӧд миян чӧскыд вома.

Бобӧ, пуксьы мекӧд орччӧн.

Чӧсмась. Видлы йӧлӧн пражитӧм черисӧ.

— Ме черитӧ ог кӧсйы.

— Дивӧ тай! Кӧть сола выйчерисӧ видлы.

— Меным сола тшак нӧкйӧн колӧ.

Сэтшӧм чӧскыд, мый дульваыд петӧ.

— Ми сёям, медым овны, а ог олӧй, медым сёйны.

— Вайӧй комиӧн сьылыштам.

«Маръямоль» сьыланкывсӧ ставӧн тӧдӧны?

Да и йӧктыштам тшӧтш.

— Тӧдан, мый ме ог вермы терпитны командировка дырйи?

— Тэныд лёк овлӧ самолёт пуксигӧн?

— Тэ эн гӧгӧрво менӧ.

Ме терпитны ог вермы довъявны вузасянінъясті.

— Коді нӧ тшӧктӧ?

— Некод эськӧ да.

Кокӧй тай ачыс нуӧ.

— Ставсӧ ӧд позьӧ ньӧбны аслад карын.

— Ме ӧд сёрнита козинъяс йылысь.

Тэ, гашкӧ, тшӧтш мекӧд вузасянінӧ ветлан?

Эштан он?

— Ме кӧсйыси ӧти морткӧд аддзысьлыны.

Ог кӧсйы сёрмыны.

— Кодкӧдкӧ аддзӧдчыны?

Сідзкӧ, бура колляв кадтӧ.

— Тэ тшӧтш.

Рытнас аддзысям.

— Висьталӧй, пӧжалуйста, кыдзи воӧдчыны «Козинъяс» вузасянінӧдз?

— Ті абу татчӧс?

— Ме сӧмын войдорлун на вои татчӧ.

— Мунӧй неуна водзӧджык.

Сэсся вуджӧй туйсӧ.

Кежӧй шуйгавылас.

Сэні пельӧсас и сулалӧ вузасяніныд.

— Ме чайта, мый воша.

— Верма колльӧдны Тіянӧс.

— Эштанныд кӧ эськӧ, бур лоӧ.

— Эшта. Дерт, колльӧда.

— Ті зэв бура сёрнитанныд комиӧн и рочӧн.

— Збыльысь?

— Ме эськӧ тадзи жӧ кӧсйи сёрнитны комиӧн.

Ті, буракӧ, сёрнитанныд кутшӧмкӧ диалект вылын?

Ме ог ставсӧ велав.

Кора сёрнитны надзӧнджык.

— Ме кута сёрнитны надзӧнджык.

Ті тӧданныд коми кывпесанъяс?

— Мый сэтшӧмыс?

— Кывзӧй:

Пӧчӧлы пӧльӧ
Вӧчӧма гӧлик.
Пӧльӧлы пӧчӧ
Вӧчӧма сӧчӧн.

— Кора Тіянӧс отсавны меным.

— Мыйын колӧ отсӧгыс?

— Гӧтырлӧн регыд чужан лун.

Меным колӧ бӧрйыны козин, но ог тӧд кутшӧмӧс.

— Дерт, отсала.

Ньӧбӧй мича серпаса небӧг и сувениръяс.

Позьӧ козьнавны пуысь либӧ кучикысь вӧчӧмтор.

— Гӧтырӧйлы воас сьӧлӧм вылас пуысь вӧчӧм тайӧ дозмукыс.

Ыджыд аттьӧ.

— Бур лун! Тіянлы отсавны?

— Ме кӧсъя козьнавны радейтана нывлы мичмӧдчантор.

— Сылы кымын арӧс?

— Надюклы 20 арӧс.

Ме, чайта, сылы воас сьӧлӧм вылас тайӧ эзысь чусіыс да чунькытшыс.

— А, гашкӧ, зарни чусі да чунькытш видзӧдланныд?

— Найӧ зэв мичаӧсь.

Босьта мӧдысь. Аттьӧ.

— Аттьӧ ньӧбӧмысь!

✓ — Кытчӧ тэ мунан?

— Ме муна пӧль ордӧ.

✓ — Кытчӧ ті мунанныд?

— Ми мунам ыджыд бать ордӧ.

✓ — Кытчӧ тэ мунан?

— Ме муна гӧститны нывъёрт ордӧ.

— Ті ветланныд аски вок ордӧ?

— Да, ми ветлам аски вок ордӧ.

а) Тэ ветлан асывнас бать ордӧ?

б) Найӧ ветласны рытнас пӧч ордӧ?

в) Ті мунанныд гожӧмнас рӧдвуж ордӧ?

г) Ми кежалам луннас тэ ордӧ?

д) Ті пыранныд ӧні сы ордӧ?

— Кытчӧ мунӧ Мишӧ?

— Ёрт ордӧ.

— Кытчӧ мунӧ Машӧ?

— Кытчӧ ті мунанныд Сашӧкӧд?

— Кытчӧ найӧ мунӧны Пашакӧд?

— Кытчӧ тэ мунан Дашӧкӧд?

— Кытчӧ сійӧ мунӧ Гришакӧд?

— Кӧні вӧлі Митрей?

— Нывъёрт ордын.

— Кӧні вӧлі верӧспу?

— Кӧні вӧлі зять?

— Кӧні вӧлі монь?

— Кӧні вӧлі айка?

— Кӧні вӧлі ныв?

— Тэ куим тӧлысь чӧж олін пи ордын?

— Да. Ме олі пи ордын куим тӧлысь чӧж.

а) Ті во чӧж олінныд энька-айка ордын?

б) Тэ кык вежон чӧж вӧлін бать-мам ордын?

в) Тэ лунтыр гӧститін тьӧща ордын?

г) Ті войбыд гуляйтінныд ёрт ордын?

д) Тэ тӧлысь чӧж олін чой-вок ордын?

Поводдя йылысь сёрни.

✓ — Кутшӧм талун поводдяыс?
✓ — Шоныд али кӧдзыд?

✓ — Меным кӧдзыд.
✓ — Кокӧй кынмӧ.
✓ — Киӧй кынмӧ.

— Ӧшиньсӧ восьта?

Тані зэв жар.

— Ме думысь, лоӧ вывті шума.

— Ӧшиньыс видзӧдӧ йӧрас.

Тані зэв лӧнь.

— Но восьт, колӧкӧ.

— Туй морт керкаыс тай паркын вӧлӧма.

Видзӧдлы ӧшиньӧ.

— Тані тай зэв гажа да мича.

А сынӧдыс кутшӧм!

Гӧгӧр быдмӧ дзоридз.

И юыс со неылын.

Рестораныс восьса нин?

— Да, дерт жӧ.

Сійӧ мӧд судтаас, шуйгавылас.

— Тэныд письмӧ воӧма.

— Кодсянь?

— Тӧдмав.

— Кыськӧ ылысь али татысь?

— А тэ кыдзи чайтан?

Буракӧ, абу заказнӧй.

— А тэ збыль шуан, мый сійӧ меным?

— Збыльысь.

— Кӧні письмӧӧй?

Кӧсъя лыддьыны сійӧс.

Тайӧ гижӧдторйыс миян тӧдсаяссянь.

Найӧ пыралӧмаӧсь миян ордӧ, медым корны гӧститны.

Жаль, мый ми эг аддзысьлӧй.

— А, гашкӧ, пыраласны на?

— Найӧ кӧсйӧмаӧсь пыравны квайт час гӧгӧр.

— Зэв бур! Кутшӧм шань йӧз.

— Ме чайта, мый ми накӧд лӧсялам.

Ме думысь, став комиыс шаньӧсь.

Найӧ гӧсьтыдлы кужӧны пызантӧ лӧсьӧдны.

Ме эськӧ кӧсъя мыйкӧ налы козьнавны.

Гашкӧ, козьналам тайӧ Бурдин сьылысьлысь дисксӧ?

— Бур мӧвп!

— Тӧдан мый?

Ме сэтшӧма мудзи тайӧ котралӧмсьыс.

— Ме тшӧтш.

— Но меным колӧ на пошта вылӧ ветлыны.

Кӧсъя посылка мӧдӧдны.

— А ме кӧсъя ньӧбны конвертъяс да содтӧд открыткаяс.

— Открыткаястӧ гижин нин?

А посылкатӧ чукӧртін?

— Мыйла юасян?

— Прӧста кӧсъя тӧдмавны.

— Шунытӧ кокни, а вӧчнытӧ сьӧкыд.

Вай ӧтлаын чукӧртам.

— Виччысь!

Эн уськӧд сійӧс джоджас!

Чашкаыс вермас жугавны.

— Экма! Удитіс усьны!

Но и мед, тайӧ шуд вылам.

— Сідзкӧ ачыд и чукӧрт торпыригсӧ.

Менам юрӧй нин кутіс бергавны.

— Тэ помнитан поштасьыс пӧльсӧ?

Сійӧ юаліс: «Меным письмӧ эм?»

«Кутшӧм овныд?» — юалӧны сылысь.

«Конверт вылас ӧд гижӧма», — вочавидзис пӧль.

— Тырмас сӧрнытӧ.

— Сьӧкыд посылкаыд?

— Ме бара ог тӧд.

Вай мӧдӧдчам нин пошта вылад.

— А сэсся кытчӧ?

— Менам эм дум ветлыны вӧрӧ, шойччыштны.

Поводдяыс тай зэв мича.

— Ывлаын шоныд?

— Да. Ывлаын шоныд.

а) Тані ыркыд?

б) Сэні пемыд?

в) Сылы жар?

г) Тэныд кӧдзыд?

д) Талун шондіа?

— Ывлаын кӧдзыд?

— Абу. Ывлаын абу кӧдзыд.

а) Талун шондіа?

б) Тані пемыд?

в) Сэні ыркыд?

г) Сылы кӧдзыд?

д) Тэныд жар?

— Тӧрыт вӧлі кутшӧм поводдя?

— Шондіа.

— Войдӧрлун вӧлі кутшӧм поводдя?
— Аски лоӧ кутшӧм поводдя?
— Тӧрыт вӧлі кутшӧм поводдя?
— Аскомысь лоӧ кутшӧм поводдя?
— Талун лоӧ кутшӧм поводдя?

— Пекничаӧ лоӧ ыркыд?

— Да. Пекничаӧ лоӧ ыркыд.

а) Выльлунӧ зэрис?

б) Субӧтаӧ лымъяліс?

в) Вежалунӧ вӧлі зэв лӧсьыд поводдя?

г) Середаӧ лоӧ кӧдзыд?

д) Воторникӧ вӧлі зэра поводя.

— Гожӧмнас лоӧ кӧдзыд?

— Оз ло кӧдзыд.

а) Тӧвнас лоӧ шоныд?

б) Арнас лоӧ жар?

в) Тулыснас лоӧ кӧдзыд?

г) Войнас лоӧ шондіа?

д) Рытнас лоӧ ыркыд?

Ичӧт сиктӧй, олан гажӧй,
Мича тэнад чужӧмбан.
Эжва юӧй, парма вӧрӧй,
Чужанінӧй менам тан.

Ой, ой, шоныд вой,
Мусаяслӧн небыд сой.
Шондібанӧй, олӧманӧй,
Зарни югӧръястӧ кой.

Джуджыд мыльк и гажа нӧрыс,
Чоййыв, чуркйыв, катыдпом.
Чӧдъя керӧс ягӧ корас,
Вотчӧ сэні дзор и том.

Мен кӧть ветымынӧд арӧс,
Чожа восьлала, ог пов.
Чужан муысь эг мун карӧ,
Сиктын медся кыпыд лов.

Муса верӧс, зумыд пиян,
Статя моньяс, ставыс бур.
Чужан муын шудыс миян,
Сэсся некытысь оз сюр.

Видза корам!

✓ — Позьӧ юавны?

✓ — Пӧжалуйста!

✓ — Ен могысь!

— Позьӧ юавны?

— Кывза Тіянӧс.

Мый кӧсъянныд тӧдмавны?

— Меным колӧ ӧти местаа номер.

Кӧні Ті оланныд?

Кор да кӧні Ті чужлінныд?

— Чужи, быдми сьӧд вӧр шӧрын,

Деревняысь петі.

Новлі чорыд сера дӧрӧм,

Визя гач да кӧті.

— Мый нӧ Ті татчӧ кывбуръяс лыддьыны воинныд?

— Кор Ті воинныд?

— Ме вои тӧрыт.

— Тӧрыт?

Но тӧрыт миян ни ӧти прӧст места эз вӧв.

Талун абу жӧ.

— А меным оз и ков некутшӧм номер.

— Мый нӧ эськӧ сэки колӧ?

— Кывзӧй менӧ.

— Кывза.

— Ме вои тӧрыт.

— Бур, водзӧ висьталӧй.

— Та бӧрын ме кайи номерӧ.

Мысси душ улын.

Дас час рытын воді узьны.

— А меным нӧ таӧдз кутшӧм делӧ?

— Вайӧ ме мӧвпӧс помала.

Кӧкъямыс час асылын ме чеччи.

Кӧкъямыс час да джынйын бритчи.

Да, дзик тадзи и вӧлі ставыс.

— Но и мый сэсся?

Ті мыйкӧ гӧгралад, а помавны он вермӧй.

— Сэсся ме лэччи ресторанӧ.

Сёйи сэні.

— Сэні мыйкӧ лоис?

— Сёйны ме босьті риса рок, вый да йӧв.

— Чӧскыда вердісны?

— Эз, меным эз кажитчы.

— Ме вӧлі кӧсъя петавны ывлаӧ ыркӧдчыштны.

— Но и мый?

Мыйла Ті энӧ петӧй?

— Меным вӧлі колӧ зонтик, и ме кайи номерӧ.

Мый ме сэтысь аддзи!

— И мый Ті сэтысь аддзинныд?

— Менам номерын вӧлі нывбаба.

— Том али пӧрысь?

— Нывбабалы сы мында арӧс, кутшӧм сійӧ чужӧм вылас.

Аймортлы сы мында арӧс, мыйта сыын вынйӧрыс.

— Мый вӧлі вӧчӧ нывбаба?

— Сійӧ вӧлі видзӧдӧ жыр пытшкӧсӧс.

Бергӧдлӧ ваннӧйын кранъяссӧ.

Видлалӧ крӧвать вылысь узьлан кӧлуйсӧ, юрлӧссӧ да шебрассӧ.

— А ӧні кӧні сійӧ?

— Со сійӧ.

— Ті инданныд тайӧ нывбаба вылас?

— Да. Сійӧ и вӧлі пырӧма менам номерӧ.

— Но ӧд сійӧ — миян туй морт керкаса директор.

— Ті звӧнитлінныд?

— Да.

— Мыйӧн отсавны верма?

— Телевизорӧй жугаліс.

— Мый нӧ сыкӧд лоис?

— Оз тай тыдав-а.

Телевизорыд орчча вежӧсас.

Пырӧй татчӧ, пӧжалуйста.

Бисӧ ӧзта?

— Позьӧ, ме видла?

Кыдзи?!

Да уджалӧ жӧ сійӧ!

Сӧмын колӧ таті вӧрзьӧдны.

А индӧдыс Тіян абу ӧмӧй?

— Эм. Со пызан вылас куйлӧ.

— Ме муна удж вылӧ 8 часын. А тэ?

— Ме тшӧтш муна удж вылӧ 8 часын.

а) Ме локта удж вылысь 6 часын. А тэ?

б) Ме удж вылын 9-сянь 5-ӧдз. А тэ?

в) Ми олам Куратов улича вылын. А ті?

г) Найӧ велӧдчӧны коми кыв курс вылын. А ті?

д) Ми ветлам рынокӧ. А ті?

✓ — Кайны вӧрӧ.

✓ — Кайны гортӧ ю дорысь.

✓ — Кайны поскӧд.

✓ — Лэччыны ва дорӧ.

✓ — Лэччыны вӧрысь гортӧ.

✓ — Лэччыны карӧ.

— Ме лэччыла карӧ вежалунӧ. А тэ?

— Ме тшӧтш лэччыла карӧ вежалунӧ.

а) Суботаӧ ме лэччыла Кӧрткерӧсӧ. А тэ?

б) Выльлунӧ ме лэччыла Айкатылаӧ. А тэ?

в) Пекничаӧ ме лэччыла Шойнатыӧ. А тэ?

г) Воторникӧ ме лэччыла Сыктывкарӧ. А тэ?

д) Середаӧ ме лэччыла Визябӧжӧ. А тэ?

— Шойччанлунӧ тэ каян вӧрӧ?

— Ог. Ме ог кай вӧрӧ.

а) Аскомысь тэ каян сиктӧ?

б) Аски тэ каян Кулӧмдінӧ?

в) Асывнас тэ каян Одыбӧ?

г) Луннас тэ каян грездӧ?

д) Рытнас тэ каян посёлокӧ?

— Пиӧй, пиӧй, чеччы, чеччы!

— Кӧть ӧд чечча, ог жӧ мыссьы.

— Пиӧй, пиӧй, мыссьы, мыссьы!

— Кӧть ӧд мысся, ог жӧ пасьтась.

— Пиӧй, пиӧй, пасьтась, пасьтась!

— Кӧть ӧд пасьтася, ог жӧ кӧмась.

— Пиӧй, пиӧй, кӧмась, кӧмась!

— Кӧть ӧд кӧмася, ог жӧ мун.

— Пиӧй, пиӧй, мун, мун!

— Кӧть ӧд муна, ог жӧ уджав.

Ло дзоньвидзаӧн!

— Тэ он-ӧ вись?

— Менам висьӧ юрӧй.

Менӧ кызӧдӧ да несйӧдлӧ.

— Тэ, буракӧ, тӧрыт варччанінад кынмӧмыд.

— Гашкӧ, сэні. Гашкӧ, ывлаын.

— Талун удж вылад эн мун.

— Кор бурдӧдчысьӧс.

— Кора. Тэ вод да мерайт температуратӧ.

Тӧждысь аслад дзоньвидзалун вӧсна.

— Мый вӧзйис бурдӧдчысьыд?

— Колӧ пӧ шонтӧм йӧв унджык юны.

Либӧ юны ӧмидз варенньӧа чай.

— Кутшӧмкӧ лекарство колӧ ньӧбны аптекаысь?

— Колӧ. Витамин да антигриппин куимысь лун колӧ юны.

— А укол колӧ вӧчны?

— Оз. Ог на сэтшӧм чорыда вись.

— Ме ветла аптекаӧ.

А тэ синтӧ кунь да узь.

— Чӧскыд ун да бур вӧт!

— Менам висьӧ горшӧй. А тэнад?

— Менам тшӧтш висьӧ горшӧй.

а) Менам висьӧ коскӧй. А тэнад?

б) Менам висьӧ мышкӧй. А тэнад?

в) Менам висьӧ кынӧмӧй. А тэнад?

г) Менам висьӧ юрӧй. А тэнад?

д) Менам висьӧ пельпомӧд А тэнад?

— Тэнад висьӧ пельыд?

— Оз. Менам некыті оз вись.

а) Тэнад висьӧ пидзӧсыд?

б) Тэнад висьӧ гырддзаыд?

в) Тэнад висьӧ чуньыд?

г) Тэнад висьӧ кокыд?

д) Тэнад висьӧ киыд?

▸ куран ки

▸ кын ки

▸ нӧш юр

▸ веськыд сювъя

▸ горш косьмӧ 

▸ кынӧм сюмалӧ

▸ пель сьӧдмӧдны

▸ пель сайӧ сюркнявны

▸ кыккирудз пукавны

Ме пывся

Тэ пывсян

Сійӧ пывсяс

Ми пывсям

Ті пывсянныд

Найӧ пывсясны

— Сійӧ велӧдас коми кыв?

— Да. Сійӧ велӧдас коми кыв.

а) Анна Штайн велӧдас коми кыв?

б) Ренат Хайруллин велӧдас коми кыв?

в) Марите Зариня велӧдас коми кыв?

г) Юрий Росляк велӧдас коми кыв?

д) Сара Пискун велӧдас коми кыв?

Батиев ӧксай

Батиева ӧксань

Пыдди пуктана ... !
Дона ёрт!
Дона ёртъяс!
Видза олан!
Видза оланныд!
Олан-вылан!
Олан-выланныд!
Бур асыв!
Бур лун!
Бур рыт!
Чолӧм!
Вот тэныд и на!
Радпырысь корам! Видза корам! Видза локтӧй!
Зэв нимкодь ставныдкӧд тӧдмасьны.
Зэв нимкодь тіянкӧд тӧдмасьны.
Меным зэв нимкодь тіянкӧд тӧдмасьны!
Нимкодь Тіянкӧд тӧдмасьны.
Ме кӧсъя тӧдмӧдны тіянӧс ёртъяскӧд.
Позьӧ кӧ, ме ачым висьтася.
Бур вой!
Бур туй!
Мунысьлы туй!
Лоӧй шудаӧн!
Мед тэнӧ ен видзас!
Став бурсӧ!
Аддзысьлытӧдз!
Видзаӧн коль!
Видзаӧн кольӧй!
Висьталӧй чолӧм ... !
Висьталӧй быдӧнлы чолӧм!
Выльысь аддзысьлытӧдз!
Выльысь волӧй!
Ыджыд аттьӧ!
Бур кыв вылад аттьӧ!
Сьӧлӧмсянь аттьӧ!
Сьӧлӧмсянь аттьӧавны!

Нинӧмысь аттьӧавны.

Ен могысь!

Позьӧ корны тіянӧс ... ?

Кора пырны.
Кора пуксьыны.
Волӧй миянӧ нӧшта.
Эн вунӧдӧй миянӧс. Пыралӧй тшӧкыдджыка.

Ме сӧглас.
Да, тадз и эм.
Ме пайысь ӧткодь.
Ме ті дор сулала.
Зэв бур! Зэв лӧсьыд!
Нимкодьпырысь!
Кыв шутӧг!
Сідз и эм
Дзик збыль!
Ог, аттьӧ.
Кора прӧща, но ме абу сӧглас.
Кора прӧща, но ме мӧд ног думайта.
Жаль, но ме ог вермы.
Ме ог кӧсйы.
Кора прӧща, но ме ог эшты.
Тайӧ абу тадзи.
Эн лысьт!
Меным зэв жаль.
Меным шог.
Ме шогӧ уси.
Ме тіянкӧд тшӧтш шогся.
Энӧ дивитӧй.
Кора прӧща.
Энӧ скӧралӧй.

Чолӧмала Тіянӧс чужан лунӧн.
Чолӧмала праздникӧн!
Чужан лунӧн!
Выль воӧн!

Войяс руаӧсь.
Нывъяс мичаӧсь.
Челядь вежӧраӧсь.
Ми олам керкаын.
Кӧч пырис толаӧ.
Ош пырӧ юас.
сёрнитны гораа.
серпасавны мичаа.