2-15-2
Юн мылкыдо кышномурт

Асьме шудбурмес сайяны ӧдъяса,
Шаер вадьсамы сьӧд пилем люкаськиз,
Шудо улонмес лёганы малпаса,
Виресь пыдъёсын сьӧд тушмон лёгиськиз.
М. Петрос. "Кырӟан улоз".
1950-тӥ арын Михаил Петров нимысьтыз книгаен печатлаз "Кырӟан улоз" поэмазэ. Со 
сӥземын Быдӟым ожын геройлыко бырем удмурт поэтлы Ф. Кедровлы. Поэмаын кылбурчи 
Кедров малпанъёсыз, тушмонэн ваче гадь вуылонъёсыз пыр син азе яркыт пуксе. 
Петров вера кадь: поэт бырыны ке но шедиз, солэн кылбуръёсыз калыклэн сюлэмаз 
уло.
кылтуссэ (образзэ). Соин ик поэмалэн действиез отын но, татын но, Удмуртиын, 
ортче.
Меми - дышетскымтэ огшоры нылкышно. Быдӟым ож вакытэ со кадьёс "бадӟым" 
кышномурт радын ветлӥзы. Со огназ курадӟыса будэтэ пиоссэ. Революция бере гинэ 
огъя ужын шедьтэ аслэсьтыз шудбурзэ. Тылож аръёсы вань кужымзэ сётэ шудбурмес 
утёнлы: уйёсы пыдвыл но пӧзь керттэ. Таин ӵош фронтэ сыӵе ик шуныт гожтэтъёс 
ысъя.
Оля ЗАБИРОВА,
9-тӥ класс.
Варзи-Ятчи школа.
Алнаш ёрос. 
( "Кырӟан улоз" поэмалэн авторез М. Петров.
Суредаз Артём ВАСИЛЬЕВ.
Кыква гурт.
Якшур-Бодья ёрос. 
3-14-2
Нош ик, ява, лымыям,
Лопата кутӥ киям.
Жадьытозям мычиськи
Собере капчи лулски:
Берлозэ, луоз, ужай,
Сюресэз чылк-чылк сузяй.
Уть, шунды ни мынекъя,
Липет йылысь ву вия.
Суредаз Веселина МАНАПОВА,
4-тӥ класс.
Бальзюга гурт.
Татышлы ёрос.
Башкирия. 
3-15-3
Лидия ЧЕРНОВА
Кезьытъёс чигназы.
Писпуос сайказы.
Пурысьтам вылтуссы
Зор вуэн гылтэмын.

Вайёсын, вайёсын
Пучыос сюосын!
Вешаны таосыз 
Мычисько киосы!..

Ой! Азьпалтӥз ук майсы! -
Пучыез мусоя.
Оло со мӧль бича?
Куноя?
3-15-4
Лидия ЧЕРНОВА
Шумпотэм
Кин-о сыӵе тюргетэ,
Чебер крезьгур кылдытэ?
Укноез усьтӥ - учки:
Шырчикез садысь адӟи,
Шумпотэм луоз укыр,
Уть, кыӵе кырӟа шулдыр:
- Тю-ю-р-ри! Тю-юр!
Тю-юр! Тю-юр-ри!..
Кузьымед туж ӟеч, Юри!
Уморто ӟеч лэсьтэмед,
Кылзы ни бен кырӟанме:
- Тю-ю-р-ри!
		Тю-ю-р-ри!
Тю-юр! Тю-юр!
Тю-юр-ри!!!

* * *
Песяймы но, уть, потэм
Гын ныдалитэк*.
Тулысэз со но шӧдэм:
Пилешсэ шунтэ.

Кучапимы вушйылэ
Паськыт ӟус улын.
Чус-чус кӧл ини вылэм
Но уг лэзь тулыс:
Ӟузыри улӟиз, лыдъя
Пызьыроась синвуоссэ...
Инкуазьмы тӧлэз медъя,
Ӵыжты, улля лымыез!
* ган сапег.

Мудрон маке
Лымы шупаз гинэ, быриз -
Пальккес губи муэз пориз.
Ой, ой, ой! Мудрон маке!
Чын песяй кадь ик адске.
Мур гожмо, кисыриё, 
Такъяез вогыриё.

3-15-5
Лидия ЧЕРНОВА
Уй суред

Толэзед -
		куалдэм питыран.
Пилемъёс сьӧры
		питыраз.
Ӟичыед потаз
		шыран -
Кабанэ кужен
		пыраз.
Тыбыкен шудэм музэн
Бызьылӥз 
	шыръёс сьӧры...
Акыльтӥз, лэся,
бӧрысь
Ӝог ышиз
куакъёс сьӧры.
... Толэзед учкиз
		музэ,
Ӟичылэсь адӟиз
быжзэ. 
	
3-16-4
Тюльпанъёс
Милям укно уламы
Тюльпанъёс будо.
Вазь тулыс сяськаясько,
Укно улэз шулдырто..

Соос уно пӧртэмесь:
Гордэсь, ӵужесь, лемлетэсь.
Пӧлаз вань на сьӧдъёсыз,
Чагыр-чагыр лызъёсыз.
Оля ДАНИЛОВА,
3-тӥ класс.
Удмурт Тоймобаш школа.
Алнаш ёрос.
( Та чебер сяськаос, тыныд мусое!
Суредаз Люба РОМАНОВА.
Пычас школа.
Можга ёрос.

( Чебер...
Суредаз Аня МАКАРОВА.
Выль Монья школа.
Селта ёрос. 
3-16-5
Южтолэзь
Южтолэзь ини вуиз,
Шунды мусо пальпотӥз.
Нылпиос серекъяло,
Шунытлы туж шумпото.
Мон но потӥ ураме,
Кутӥ ӵыж-выль куасъёсме.
Туби каллен гурезе,
Нискылтӥ... Чигтӥ куасме.
Эх, бӧрдэм потӥз мынам,
Выль куасме чигтэм понна!
Нош шунды шорам учке,
Бӧрдыны уг лэзь монэ.
Со пальыша, буйгатэ,
Эн бӧрд, пе, Олён, юнме.
Ведь тулыс вуэ ини,
Лымы шуналоз тани.
Вуозы ни шырчикъёс -
Соку вунозы куасъёс.
Алёна СЕМЁНОВА,
5-тӥ "б" класс.
Шор Постол школа.
Завьял ёрос. 
3-16-9
Аслаз сайкыт дуннеяз
Оля Иванова ассэ ултӥяны пичи дырысеныз ик дышемын ини. Школаын дышетскыкуз, 
пиналъёс сое ас пӧлазы ӧз пыртылэ. Аляк-бер, лӧптэм пияшъёс но чапкыса лэзёзы я 
мыжгозы, урод но лек кылъёсын вазёзы. Нош Оля ас кылзэ верам интые, шып пукоз 
яке бӧрдыса дораз бертоз. Берло дышетӥсьёс азьын но со ӧз ӝожтӥськылы ни. 
Дышетӥсьёслэн 2Эн исалэ" шуэмзы номыр пайда уг вайы. Дурбасьтӥсьёсыз кошкыса 
гинэ вутто - нылашлы нош ик тыш сюре ини.
Валантэм, мар уродзэ лэсьтӥз Оля? Со янгыш шат, синъёсыз ляб адӟо, пельёсыз 
алама кыло шуыса? Яра шат адямиез сокем ултӥяны?
Полиомилитэн висьыны Оля куинь арес дыръяз кутскиз. Пӧртэм эмъяськонниосы 
ветлыны, капельницаос улын кылльыны, таблеткаосты юыны - ваньмызлы нылаш пичи 
дырысеныз ик дышиз ини. Тодэ, кӧня возёзы, ку нош вуоно. Оло, соин но Олялэн чик 
но ӧй вал матысь эшъёсыз. Кылдылӥзы ке но, кӧня ке дырлы гинэ. Нош улн мукет 
сюлмаськон но дася вылэм ини. Будэмезъхя нылаш ас вылаз шӧдӥз нырысь 
синмаськонлэсь куректонзэ, кӧня ке улыса, яратон но вуиз. Кинлы сюлэмдэ усьтод, 
кинлы льӧль малпанъёстэ вералод? Анвайлы - возьытгес, сузэрлы - пичигес на ай. 
Озьы Оля выйиз ас пуш дуннеяз. Угось отын солы нокин ӧз люкетылы, нокин сое ӧз 
ултӥялля.Сайкыт но шулдыр со дунне. Гажано пияшез нылашлэн яратэмез сярысь ӧз 
тодылы ке но, Оля сокем ӧз чигиськылы. Вӧзтӥз ортчыкуз адӟемезлы гинэ но туж 
шумпотылӥз. Уно пол ини аслэсьтыз ачиз юалляз: "Уйвӧтъёсам но мон котьку сое 
адӟылӥсько. Но малы ке ӵукна султыса вунэтӥсько"...
Корка пушез утялтон, мисьтаськон, пудоез утялтон - ваньмыз Оля вылын. Анай-
атаез, угось, вазь ӵукна ик ужаны нош сузэрез дышетскыны кошко. Тазьы ортче 
солэн котькуд нуналэз, толэзез - егит дырыз. Нош кыӵе куриське вылэм мылкыд 
шулдыръяськыны, лӧптылыны, егит улонлэсь ческытсэ шӧдыны.
Но Олялэн соин гинэ мылкыдыз уг быры. Вань ужъёссэ лэсьтэмез бере кыштыр гинэ 
пуке аслаз дуннеяз, тетрадяз маке гожъя... Оске со, улоназ одно ик пумиталоз 
аслэсьтыз гажанзэ. Тани-тани бадӟым самолёт вуоз но нуоз сое шуныт палъёсы, 
зарезь дуре. Нош отын витёз сое нокыӵе шуг-секытъёстэк, яратонэн гинэ пачылмем 
улон. Юн оске со...
Оля НИКИТИНА,
УдГУ-ын дышкетскись.
3-17-6
Эх, бызе ук сьӧрамы
Кырӟало бурдоосмы,
Чир! потто ук соосмы.
Пиштэ зарни шундымы,
Макем шулдыр ваньмылы.
Жильыртэ шунам лымы,
Эх! бызе ук сьӧрамы.
Кошкисько, пе, дыртӥсько,
Бадӟым шурозь вуоно.
Женя ВАСИЛЬЕВА,
6-тӥ класс.

Ӟечбур, тулыс крезьгур!
Ӟечбур, тулыс,
Ӟечбур, улос,
Чагыр инбам,
Шулдыр бамал,
Шырчик, уӵы,
Ненег пучы,
Яркыт шунды,
Паськыт бусы.
Ӟечбур, ӟечбур,
Тулыс крезьгур!
Лена ПЕТРОВА,
6-тӥ класс.

Кучапи
Кытчы мынӥськод, кучае?
Кытчы дыртӥськод, кучае?
- Мон мынӥсько "Ӟечбурлы!"
Гожтӥськыны куинь арлы.
Веросъёссэ лыдӟыло,
Суредъёссэ учкыло.
Кылбуръёссэ дышето,
Визьмогес, оло, луо?
Валя ПЕРЕВОЩИКОВА.
5-тӥ "б" класс.

Мерттомы выль писпу
Шур дурын, нюк вӧзын,
Шыпытын, салкымын
Одӥгназ будэмын
Пуштырес беризьмы.
Туж мӧзмыт, дыр, солы
Шур дурын огназлы.
Мерттомы со вӧзы
Выль писпу ми эшлы. 
Наташа ПЕТРОВА,
6-тӥ класс.

Выль ручка
Ваем Катя выль ручка, 
Вуюись кадь ик, эсьма.
Туж чебер, нылаш ушъя,
Эшъёсызлы возьматъя.
Поттӥз нылаш тетрадьзэ.
Эскеро, пе, ручказэ.
Кӧня выриз гожъяны,
Ӧз, ӧз яра ужаны.
Вылтусыз вылэм чебер,
Нош пушкыз тӥни -
Тырттэм.
Лилия ЕКИМОВА,
6-тӥ "б" класс.
Вуж Монья школа.
Пичи Пурга ёрос.

3-18-1
"Ӟечбур!"-ез туэ басьтӥсько
Мон улӥсько Татышлы ёросысь Юда гуртын. Вордскем интые бадӟым ӧвӧл, соин ик 
дышетскыны матысь бигер Бадряш гуртэ ветлӥсько. Школамы туж паймымон. Отын 
дышетско пӧртэм выжыысь потэм нылпиос: бигеръёс, удмуртъёс, башкиръёс. Куспамы 
бигер но ӟуч сямен лабыртӥськом. 5-тӥ классысен ик бигер сямен вераськыны 
дышетскиськом.
Мон яратӥсько удмурт литературая урокъёсыз. Кельшо анай кылыным гожтэм 
произведениос. Алигес лыдӟи П. Черновлэсь "Бектыш нюлэс буйга" повестьсэ но Н. 
Васильевлэсь "Бадӟым кызлэн вужерез" прозаен сборниксэ.
Удмурт кылъя дышетӥсьмы "Ӟечбур!" газетэз кабинетамы басьтэ. Та газет кельшиз но 
туэ ар понна солы гожтӥськи. Туж потэ вал редакциен ортчытэм лотереяен кузьым 
утэме. Но мыным ӧз удалты. Кӧня ке ӝожгес луиз ке но, газет басьтэмелы 
шумпотӥсько. Котькуд номерзэ чидатэк возьмасько. Яратӥсько пиналъёслэсь 
выжыкылъёссэс, веросъёссэс, кылбуръёссэс лыдӟыны. Эшшо яратӥсько на 
кроссвордъёс, ребусъёс, пӧртэм йыртӥянъёс бордын пукыны.
Владик ШАЙДУЛЛИН, Башкортостан.
3-18-2
Бен, космосын тунсыко вылэм. Но асьмелэн дормы - Музъем. Кӧня ке дырлы гинэ 
кошкылӥмы ке но, мӧзмыны кутскиськеммы кадь ини. Ойдолэ берытскоме. Паймымонэз 
Музъем выламы но трос али. Тани лыдӟе ай, кыӵе тунсыко заметка ыстэм Лена 
Шувалова. Тӥляд но, оло, та выллем веранъёсты кылылэмды вань, гожтэ милемлы. 
Дӥгош нюк
Вордскем гуртэ котырын вань пӧртэм нюкъёс, нюлэсъёс, шуръёс. Котькудӥзлэн нимыз 
герӟаськемын кыӵе ке но веранэн. Кылсярысь, гуртмес котыртэ Ушков нюлэс. Азьло 
солэн кузёез Ушков фамилиё узыр адями вылэм. Нюлэс котырын уно нюкъёс пумисько. 
Соос пӧлысь одӥгзэ Дӥгош нюк шуо. Со туж мур, турынэз но татын кускозь ик будэ. 
Нош бамалаз боры удалтэ. Пиналъёс вожмаськыса бичало. Борылэн дырыз ортче ке, 
пудоез возьмало: та нюк уго гуртлы но, шурлы но матын. Одӥг пол, боры бичакумы, 
песяе мыным мадиз Дӥгош нюклэн кылдэмез сярысь. Вашкала дыръёсы артысь гуртын 
пересь пиосмурт - Дӥгош улэм. Урод ужъёс лэсьтылэм. Соин ик гурт калык Дигошез 
ведӥн шуэм. Дыр ортчем. Пересь кулэм. Гуртоосыз сое нюке ватӥллям. Озьы ке но 
адямиослы каньылак шокчыны кылдымтэ: огезлэн пудоез быре, мукетызлэн юртэз ӝуа, 
куинетӥосызлэн пиналъёссы черлало, пе. Паймем но шуге-леке вуэм гурт калык 
малпаськонэ усем: Дӥгошлэн со сьӧд ужъёсыз. Куспазы кенешыса, юн сӥльвиро 
воргоронъёс ведӥнлэн шайгу вылаз мынӥллям. Гудыса сое поттӥллям но адӟо, пе: 
Дӥгош шоразы мыняса учке. Воргоронъёс кышкаллямтэ, тыл вылын ӟырдатэм амезен 
сюлмаз бышкалтӥллям. Дӥгош туж зол черектӥськем, музъем ик зуркам. Со дырысен 
гурт калык капчияк шокчем: улон-вылонзы умой пала воштӥськем.
Таӵе мадёсэз кылзыса, мон кышканы кутски но песяйме доре ӧти. Нош со монэ 
буйгатӥз: эн, пе, кышка, нокин но, пе, уг ни тоды сыӵе учырлэсь вылэмзэ яке 
вылымтэзэ.
Лена ШУВАЛОВА.
Выль Утчан гурт.
Алнаш ёрос. 
3-18-3
Зарни тысьёс
ВЫЖЫКЫЛ
Шундыё одӥг гужем нуналэ кык эшъёс, Оля но Нина, узы-боры бичаны мынӥллям. 
Нюлэскын, пе, шулдыр: тылобурдоос чирдо, сяськаос вылысь мушъёс чечы бичало. 
Ӵапак та шулдырлы паймыса вамышъянъязы, соос доры пересь потэм. Пересьлэн кияз, 
пе, боды, тушызх но туж кузь, ӧжыт гинэ музъем вылэ уг йӧты. Нылъёс кышкаллям 
солэсь, пегӟыны туртто ни вылэм. Нош пересь тазьы шуэм: 
- Эн кышкалэ мынэсьтым, нылокъёсы. 
Каньыл куаразэ кылыса, нылъёс интыысьтызы вырӟиллямтэ ни. 
- Куинь нунал мон ӧй ни сиськы. Оло, маиныды ке но утялтоды?
Оля, сиемез потоз шуыса, сьӧраз ву но ӵапак басьтэм вылэм. Пересьлы со соку ик 
гусъяськонзэ сётэм. Соиз, кӧтсэ пумен тырыса, каньыл мылкыдын шуэм:
- Тау тӥледлы, нылъёсы понна. Нош мон тӥледлы одӥг тысь сёто, куректонме верало.
- Кыӵе-мар тысь со? - юам Нина.
- Я, ваньзэ радызъя верало. Мон татчы вуи туж кыдёкысь, уйвӧтады но уд адӟе со 
паймымон шулдыр интыез. Отын шунды интые вуюись ворекъя, писпуосмы но таӵе 
вожесь ӧвӧл, пӧртэм тусоесь. Нош кивалтэ со шаерен Ита нимо королевамы. 
Королевамы монэ куинь зарни тысь утчаны косӥз, нош мон одӥгзэ гинэ шедьтӥ. Сон 
со монэ шаерысьтыз улляз, туше но ялан кузь мед будоз шуиз. Тушме вандӥсько но 
соку ик будэ. Мар карыны ик уг тодӥськы ни, - котькин мынэсьтым кышка. Нош та 
зарни тысез тӥледлы сётӥсько. Мерттэ та тысез, ву киськалэ. Собере вераськись 
писпу будоз, шуг-секытъёс дыръя тӥледлы юрттоз.
- Тау, песятай, тысед понна, - вераллям нылъёс.
Кык эшъёс буш ведраосынызы ик дор палазы дыртӥллям. Нош пересь нюлэскы кылдем.
Оляен Нина гуртэ пырон азязы ведраязы учкиллям но отын, пе, тыраз узы-боры. 
Нылъёс воксё лӧптӥллям. Собере тысьсэс мерттӥллям но ву кисьтӥллям. Пумен 
олокыӵе но буёлъёсын кисьтаськись писпу ӝужам. Нылъёс чабкиськиллям.
- Та паймымон писпу зэмзэ ик-а меда вераськыны быгатэ? - Нина юам.
- Быгатӥсько, - вазем писпу.
- Нош милесьтым куронмес быдэстыны быгатод-а?
- Быдэсто. Я, кыӵе-о ужды вань?
- Монэ анае ву вайыны косӥз, - верам Оля.
- Нош монэ выж миськыны, - вазем Нина.
- Ярам, кыктылэсь ик уждэс быдэсто. Бертэ дорады, - серектэм писпу.
Оля дораз бертыса вуэм но, вуэз ваемын ини, нош Ниналэн выжез но миськемын.
Мукет нуналаз Оляен Нина нош ик писпузы доры мынӥллям. Оля юам: 
- Шедьтыны быгатод-а куинь зарни тысь?
Писпу мур лулӟем:
- Мынам туж бадӟым куректонэ вань. Ӝытазе, адямиос изьыны выдэм бере, мон одӥг 
пыдо тылобурдолы пӧрмсько, лобӟыны уг быгатӥськы. Кыӵе ке но пудо животлэсь 
вирзэ выжыям кисьтоно вал. 
Ӵапак со нуналэ Ниналэн атаез ыжпи вандэм. Нылаш вирез одӥг тэркые люкаса 
кельтэм. Нуназе кык эшъёс писпу доры мынӥллям, вирез выжыяз кисьтӥллям. Собере 
бертӥллям
Ӵуказеяз писпузы соку ик мыло-кыдо вазем:
- Басьтэ та зарни тысьёсты, соос табере тӥляд.
Мукет нуналаз Оляен Нина нюлэскы мынӥллям. Кема утчаллям пересез. Собере сое 
шедьтӥллям.
- Тау тӥледлы, нылъёсы! Табере монэ шаерысьтым уз ни уллялэ. Туж бадӟым тау!
Собере пересь ас шаераз дыртэм. Со дырысен нылъёс пересен ялан эшъяськыса 
улӥллям.
Наташа ШЕСТАКОВА.
Карык-Серма гурт.
Балтась ёрос.
Татарстан. 
3-19-5
* * *
Уй. Ческыт уммен изисько.
Уйвӧтам мон поръясько
Небыт пилемъёс пӧлтӥ,
Чагыр-лыз инбаметӥ.
Капчи мынам мылкыды,
Жадёнэ вунэтэмын,
Шуг-секытъёс быремын.
Нош азьпалан ма меда
Монэ чидатэк возьма?
Котьма мед луоз, ойдо, 
Каньылля лобо - тодо.
Елена ШУВАЛОВА.
Выль Утчан гурт.
Алнаш ёрос.

* * * 
Котькуд нунал ӧвӧл куректоно,
Дугдылытэк ӧвӧл ни бӧрдоно,
Музъем вылын улэ на шумпотон,
Инмысь шунды кадь пальпотон.

Эше, тон оскы Инмарлы,
Эн сётскы сьӧд куректонлы.
Жаль-жаль зоре ни ке педлон,
Медло тыныд со шумпотон.

Инмын шунды ке пальпотэ,
Тонэ озьы со сайкатэ.
Шырчик укно улад чирдэ -
Шудо нунал тыныд сӥзе.

Туннэ кизем кидысэдлэсь
Мед ӝужалоз тыр шеп.
Туннэ лэсьтэм ужъёсыдлэсь
Мед пушъёз садэд. 
Лариса БЕЛЫХ.
Мукши гурт.
Як.-Бодья ёрос. 
* * *
Чагыр инбам,
Шулдыр нунал,
Пиштӥсь шунды...
Нош мар сыӵе?
Капчи лулме
Сьӧд бурдыныз
Ӵоксаз пилем
Сьӧд малпанэн...
Надя ИМПОЛИТОВА.
Вуж Монья гурт.
Пичи Пурга ёрос.
3-19-6
Анай! Кыӵе мусо но дуно та кыл. Анай асьмелы улон сётэ, шумпотон вае, шунды 
сямен, быдэс семьяез шунтэ. Со асьмемыз вордэ, утялтэ, эркия. Нылпиез кузь сюрес 
вылэ потыку но анай сюлмаське. Кызьы-о сотэк? Тылобурдо но аслэсьтыз пиоссэ 
будэтэ но шумпотыса лобаны дышетскемзэс чакла.
Мынам но анае Галина Николаевна Шестакова ӟеч сюлэмо, лякыт сямо адями. Мусо но 
дуно анае, тау тыныд вордэмед но утялтэмед понна!
Наташа ШЕСТАКОВА.
Карык-Серма гурт.
Балтась ёрос.
Татарстан.
* * *
Мынам нэнэе Фекла Романовна Коновалова вордӥськиз Улын Юри гуртын, 1931-тӥ арын. 
Пинал дыръяз ужаз фермаын, ошъёсты сюдӥз, собере ыжъёсты утялтӥз. Пенсие потэм 
бераз но клубын выж миськиз на. Нош али гуртын шутэтске, милемлы шуныт пыдвылъёс 
но пӧзьёс керттэ.
Мон нэнэме туж зол яратӥсько, кема аръёслы шудбур но тазалык сӥзисько.
Саша КОНОВАЛОВ.
Улын Юри гурт.
Пичи Пурга ёрос.

3-20-2
Выль сумка
ВЕРОС
Садике вуэмез бере ик, ньыль аресъем Ксюша Катялэн пельпумысьтыз чебер сумкаез 
синйылтӥз. Горд басма вылэ бубылиос вуремын. Лобӟыны туртто кадь соос. Катялэн 
семьяез бай, соин ик сумкаез но сыӵе тузӥ, пӧртэм шудонъёсыз но вань. Нош 
Ксюшалэн семьяез узыр ӧвӧл, анаез но атаез колхозын куссэс тӥямон ужало, нош 
коньдонэз йӧн-йӧн уг адӟо.
Быдэс нунал Катя яратоно эшеныз, Машаен, шудӥз. Сумказэ но нуллыны кӧня солы 
сётъяз. Нош мукетъёссэ ӵыж выль мар ке борды йӧттӥськыны но ӧз лэзьы. 
Тани вуиз гуртэ бертон дыр. Сое возьмаса Ксюшалэн сюлмыз потэ ни вал кадь: со 
уго ас кожаз Катялэсь но чебергес сумка вурыны малпаз. 
Дораз вуэмез бере, анаезлы нырысь-валысь вазиськиз: "Мама, нош кытын асьмелэн 
вуж басмаосмы, мон сумка вурыны малпасько".- "Сумка? Ма тон уд быгаты ук! Тани 
пудоез сюдо но ачим ик вуро", - серектӥз Аннапай но кыре потӥз.
Нош нылашлэн нокыӵе чиданэз ӧвӧл ни, али ик сумка вуремез потэ. Соку солэн йыраз 
одӥг малпан чилектӥз. Шкафазы яратоно чебер дэремез вань ук. Гадяз ик бадӟым 
кисы, тӥни мар луоз сумка!
Ксюша дыртыса шкафе чуртнаськиз но дэремзэ поттӥз. Ох, кыӵе тузӥ та дэремез! 
Сое нырысьсэ дӥсямез бере, Ксюша ассэ бубыли кожаз вал. Нош табере нылаш со 
сярысь уг ни малпаськы. Качы вайыса, кисыез кырыж-мерыж вандӥз. Кутон интые 
кускерттонэз вурӟиз, чиньызэ но бышкалтыса вуттӥз. Ойдо ӵок, вӧсь луэмез ортчоз 
ай. 
Тани анаез корка пыриз. "Нылы, лык ай дорам". - "Мар луиз?" - паймиз нылаш. - 
"Ма, ачид сумка вуроно шуид вал ук. Я, вера, кыӵе сумка вуром?" - "Мама, мон 
вури ни". - "Ачид-а? Ойдо, возьматы", - паймиз Аннапай. - "Тани", - нылаш 
сумказэ мычиз.
Дэремысь вандэм кисыез адӟыса, Аннапай воксё паймиз: "Малы дэремдэ вандылӥд, сое 
туж куаныса нуллӥськод вал ук?" - "Табере солэсь туж чебер сумка пӧрмиз", - 
аслэсьтыз каре нылаш. - "Нош мар каром кылем дэременыд?" - "Кызьы мар, юбка 
лэсьты".- "Яралоз, вай ай сумкадэ, эсьмаса, ачим умойгес вуро, тупатъяло". 
Ксюшалэн мамаез туж усто вуриське, соин ик сумказы Катялэнлэсь но чебер пӧрмиз.
Лена ЗАМЯТИНА.
Азамат гурт.
Алнаш ёрос. 
3-20-4
Сӧзнэт
Малпанъёссэ лыдӟисьлы вуттыны быгатэм
"Чагыр-чагыр дыдыке" нылпи радиопередачалэн 10 ар тырмон юбилеяз пумиськи азьвыл 
тодмоеным, эшеным Сергей Антоновен. Нырысь-валысь сое ӧй тодма: сомында ар 
ортчиз ни ук берпуметӥ пумиськеммы бере. Но со, монэ тодмаса, улон-вылон, уж, 
дышетскон сярысь вераськон мытӥз.
Али Серёжа дышетске Казаньысь консерваторилэн театр ёзэтаз. Но тросэз лыдӟисьёс 
сое тодо юнкорен, тодо солэсь егитъёслы но яратонлы сӥзем веросъёсын сузьетсэ, 
тодо Митрей нимо геройзэ...
1996-тӥ арын А. Ермолина Сергей сярысь "Митрей яке Сергей" ужаз гожтӥз вал: 
"Азьвыл та пияшлэн гожъямъёсыз мукетъёсызлэсь ӧз ик висъяськылэ кадь, нош али 
солэн кылдӥз ини аслаз гожъяськон манерез, автор учке но шедьтэ аслэсьтыз 
куаразэ". Мон соглаш та кылъёсын. Соосты юнмато Сергейлэн Митрей нимо пияш 
сярысь веросъёсыз. Но авторлэсь будэмзэ, кыдамзэ тужгес но возьматӥз 2000-тӥ 
арын, гужем, "Ӟечбур!"-лэн бамъёсаз печатласькем "Йӧспӧртэм час" фантастической 
кузьверосэз. Зэмзэ верано ке, фантастикаез мон уг яратӥськы: со возьматэ 
улонысьтымы ноку луонтэм учыръёсты, ужъёсты. Но Сергейлэсь кузьвероссэ ӧй 
палэнты: кызьы бен уд лыдӟы тодмоедлэсь ужзэ. Вылаз ик, таиз гожтэмез солэн 
сокем тунсыко, аспӧртэм но йӧспӧртэм. 
Верослэн валтӥсь героез нош ик Дима нимо луэ, асьмелы со тодмо С. Антоновлэн 
мукет веросъёсызъя но. Татын но Дима котьмаин тунсыкъяськисен, шаплыен, чупресэн 
возьматэмын. Соин ӵош ик автор асьмеды вуттэ ортчем дыре но, вуонояз но... "Малы 
бен?" - амалтэк юаськод аслэсьтыд. Мон малпамъя, С. Антонов котькуд адямиез 
улонын ас интызэ шедьтыны ӧте кадь. Тӥни ук Дима нокыӵе вакытысь ассэ ӧз шедьты. 
Адямиослы со кулэ али, та дыре, та нуналъёсы.
Фантастической кузьверосаз автор ӝутэ астэ ачид гинэ яртон но мукет муртэ валаны 
быгатон ужпумъёсты. Димаез нырысь-валысь эгоист шуыны луоз: чечымъяськон понна, 
дырез со олокӧня пол но берыкъя. Нош бӧрысь ини матысь адямиосызлы юрттон понна 
дырез вошъя. 
Фантастика зэмос учыр ӧвӧл ке но, автор асьмеды кыске ас дуннеяз. Мон огвакытлы 
вуылӥ кадь со ӧвӧлтэм дуннее, улӥ кадь геройлэн улонэныз, соин ӵош шумпотылӥ но 
керӟегъяськылӥ, оски со улонлы, фантастикалы. Озьыен, автор быгатӥз кузьверосэз 
пыр лыдӟисез дорозь вуттыны аслэсьтыз малпанъёссэ, мылкыдъёссэ, возьматыны 
аслэсьтыз лулпушсэ, йӧн-йӧн гожъяськон но ӧвӧлтэмзэ малпан устолыксэ.
Можга музъеммы узыр тодмо прозаикъёсын но поэтъёсын. Мон шумпото, Сергей но соос 
радэ султӥз ке, уго тодмое матысь дыре аслэсьтыз книгазэ поттыны малпа.
Мар бен, Сергей, книгаед ӝог мед вуоз лыдӟисьёс кие.
Света КОНОНОВА.
Быдӟым Кибья черкогурт.
Можга ёрос.

3-22-1
Конкурс! Конкурс! Конкурс!
Дышетӥсь, тодосчи, кылбурчи

Нырысетӥ удмурт кылбурчилэн, тодосчилэн Г. Е. Верещагинлэн вордӥськемез дырысен 
150 ар тырмонэзлы сӥзьыса, Удмурт Элькунысь Калыкез дышетонъя министерство но 
"Ӟечбур!" газетлэн редакциез конкурс яло. Нырысь ик, тӥледлы, пиналъёс, 
викториная йырдэс тӥяно луоз. Со понна котькуд юанлы сётэм ньыль валэктонъёс 
пӧлысь одӥгзэ быръёно но ответъёстэс редакцие ыстоно. 
Со сяна, бадӟым саклык висъяськоз аспӧртэмлыко ыстэм уждылы. Луоз-а со Г. Е. 
Верещагинлэн юбилееныз герӟаськем школаяды ортчем ужрадъёс сярысь заметка 
(луонлыкты вань ке, туспуктэмъёстэс но лэзьыны быгатӥськоды), сочинение, та 
авторлэсь ужъёссэ лыдӟемды бере кылдэм малпанъёстыя гожтэм пӧртэм чуръёс но 
суредъёс - со ини тӥляд творчестводы. Но йылпумъянъёс лэсьтыку одно ик лыдэ 
басьтӥськозы викториналы сётэм валэктонъёсты но редакцие ыстэм уждылэн 
аспӧртэмлыко но тунсыко луэмез.

Викториналы юанъёс

1. Удмурт шаерлэн кыӵе сэрегаз вордӥськиз Г. Е. Верещагин?
а) Алнаш ёросысь Ляли гуртын
б) Яр ёросысь Бердыши гуртын
в) Игра ёросысь Верх.-Нязь гуртын
г) Шаркан ёросысь Полом черкогуртын

2. Дышетскемез бере нырысетӥ аръёссэ кытын ужаз Г. Е. Верещагин?
а) школаын
б) черкын
в) Императорской Ӟуч географической обществоын
г) типографиын

3. "Мултан удмуртъёслэн ужзыя" судъёсы защита ласянь кыӵе аръёсы пыриськиз?
а) 1892, 1893 аръёсы
б) 1893, 1894 аръёсы
в) 1894, 1895 аръёсы
г) 1895, 1896 аръёсы

4. Кӧня ар тыршиз Г. Е. Верещагин тодос (наука) удысын?
а) 25 ар
б) 30 ар
в) 40 ар
г) 50 ар
5. Г. Е. Верещагинлэн нырысетӥ тодос ужъёсыз:
а) "Очерки религиозных представлений вотяков", "Из воспоминаний 
этнографа"
б) "Вотские легенды и сказки", "Традиции удмуртской народной поэзии"
в) "Очерки воспитания детей у вотяков Вятской губернии", "Христианство у 
вотяков со времён первых исторических известий о них до ЪИЪ века"
г) "Вотяки Сарапульского края", "Вотяки Сарапульского уезда Вятской губернии"

6. Этнография удысэн сяна, кыӵе тодосъёсын выриз на Г. Е. Верещагин?
а) фольклорен
б) географиен
в) математикаен
г) естествознаниен

7. 1995-тӥ арысен печатласькыны кутскизы Г. Е. Верещагинлэн люкам сочинениосыз. 
Удмурт тодосчиос пӧлысь кин та ужен кивалтэ?
а) К. Куликов 
б) В. Ванюшев
в) В. Владыкин
г) Л. Христолюбова

8. Кызьы нимаське Г. Е. Верещагинлэн нырысетӥ поэтической произведениез?
а) "Изь ини, покчи пие..."
б) "Я, нылы, чебер нылы..."
в) "Чагыр, чагыр дыдыке..."
г) "Уроме, уроме..."

9. А. С. Пушкинлэн кыӵе произведениезъя гожтэмын Г. Е. Верещагинлэн "Зарни 
чорыг" поэмаез?
а) "Евгений Онегин"
б) "Капитанская дочка"
в) "Сказка о рыбаке и рыбке"
г) "Полтава"

10. Кӧня поэмаосыз Г. Е. Верещагинлэн?
а) укмыс
б) кык
в) дас одӥг
г) ньыль

11. Г. Е. Верещагинлэсь тодос ужъёссэ лыдӟыса, кыӵе удмурт писатель гожтӥз 
автобиографической повесть?
а) Кедра Митрей
б) Иван Соловьёв
в) Кузёбай Герд
г) Иоанн Васильев

12. Г. Е. Верещагинлэн поэтической произведениосыз улэ гожтӥськылэм одӥгез 
кушем нимыз:
а) Мон - А-чим
б) Удморт
в) Эрик
г) Шамардан

13. Кӧняетӥ арын Г. Е. Верещагин удмурт калыклэн кылдэмез сярысь Удмуртиысь 
писательёслэн съездазы вераськиз?
а) 1921
б) 1918
в) 1925
г) 1920

14. 1984-тӥ арын удмурт лыдӟисьёс доры нырысетӥзэ вуттӥзы Г. Е. Верещагинлэсь 
кылбуръёсын но поэмаосын нимысьтыз сборниксэ. Кин сое дасяз?
а) А. Уваров
б) И. Тукаев
в) П. Поздеев
г) Г. Архипов

15. Кыӵе крезьгур инструментъёсын шудыны быгатылӥз Г. Е. Верещагин?
а) пианиноен
б) скрипкаен
в) гитараен
г) крезен

Та конкурсэ пыриськыны быгатозы 5-11-тӥ классъёсын дышетскись пиналъёс. 
Конкурс кыстӥськоз 25-тӥ куартолэзёзь (маёзь). Вормисьёс луозы конкурслэсь 
куронъёссэ тужгес усто быдэстэмъёс. Соослы кузьымъёс сётоз Калыкез дышетонъя 
министерство.
Озьыен, уж борды, пиналъёс. Дыр трос ӧз кыльы, соин али ик чырмыт басьтӥське но 
Г. Е. Верещагинлэсь творчествозэ ӟеч тодэмдэ возьматэ. 
3-23-7
Тазьы кылдӥз нырысетӥ кылбуре
"Удмуртия" издательство али поттыны дасяз мынэсьтым "Заповеданная песня" ӟуч 
кылын нырысетӥ книгаме. Отчы пыртэмын одӥг веросэ, очеркъёсы, эссеосы но 
кылбуръёсы. Со сӥземын 70 аресэлы но умой-умой печатласькыны кутскеме дырысен 50 
ар тырмонлы. Солэн азькылаз Зоя Алексеевна Богомолова вера улэм-вылэм сюресэ 
сярысь но пумаз нимысьтыз пусъе, та дыр ӵоже потылэм трос книгаосы пӧлысь 
нокудзэ но тыпак вужмемъёсыз пӧлы пыртыны уг луы шуыса.
Таӵе дунъет котькудзэ авторез шумпоттоз. Уго, адямиос сямен ик, тросэз книгаос 
но, аръёс ортчемъя, пересьмо, калык понна пайдаё луонзэс ышто. Лыдӟись ке 
тодматске вужмисьтэм книгаен, солэн автореныз но тунсыкъяськыны кутске. Со 
тодыны тырше та авторлэн кыӵе арлыдысеныз, кызьы гожъяськыны, печатласькыны 
ӧдъямез сярысь но. Сыӵе тунсыкъяськон тужгес но "улӟе" юбилейёссэ пусйылон 
вакытъёсаз.
Мынам сыӵе юбилее луоз туэ 10-тӥ оштолэзе (апреле). Соин ик вань гожъямъёсы, ас 
кожам но мукет авторъёсын ӵош поттылэм книгаосы сярысь номыр уг вераськы. 
Луэмезъя вакчиякгес мадё нырысетӥ кылбурелэн кызьы кылдэмез но калык пӧлы вуэмез 
сярысь гинэ.
1950-тӥ арын 24-т южтолэзе (мартэ) "Лоза тымемын" - нимын сое печатлаз 
"Советской Удмуртия" газет. Та газетлэн редакцияз ужась тодмо кылбурчи Тимофей 
Иванович Шмаков кылбурме кӧня ке тупатъям, кык строфазэ куштэм, нимзэ но, 
"Шербет ГЭС" интые, "Лоза тымемын" карем. Со кылбуре тани таӵе:
Ми палась колхозъёс
Кемалась малпазы
Лозалэсь кужымзэ
Ужазы кутыны.

Лозаез тымыку,
Поръясь ву мытылӥз,
Ляб азьзэ шедьтыкуз,
Тыметсэ кырылӥз.

Нош кужмо калыкъёс
Уг тодо секытэз -
Ӧз сётэ ву ӧрлы
Нуыны тыметэз.

Лоза ву табере
Станцие ӧръяське,
Ильичлэсь лампазэ
Гуртъёсы ӝуатэ.

Югдытэ шаерез
Яркытэсь тылъёсын,
Ток сётэ кыскем ез
Трос пӧртэм ужъёсы.
Кызьы кылдӥзы та дыги-моги чуръёс?
Толалтэ вал со учыр. Школаысен. Англи кылъя урокын. Ми, 10-тӥ классын 
дышетскисьёс, книгаысь бадӟымос текстэз тетрадьёсамы ӟуч кылэ берыктыса 
гожъяськомы. Англи кыл мыным кельше вал бере, берыктон ласянь сокем ӧй 
моггетылы. Таяз учыре но ужме мукетъёслэсь азьлогес быдэстӥ. Сое шӧдыса, лэся, 
дышетӥсе мон шоры учкиз. "О,- малпасько, - та ведь мыным дышем сямызъя эшшо 
таӵезэгес ик уж сётоз на". Йырме мыкыртӥ, ручкаме кутӥ, тетраделэсь мыш палзэ 
берыктӥ но Шербет ГЭС-мы ужаны ӧдъям сярысь шумпотэмме кылбурен ӧръяны кутски. 
Урок бырытозь но Герейгуртам 10 иськемез куасэн бертыны потытозям кылбур нергеме 
борӟай-кутай кадь.
Дорын сое выльысь лыдӟи на. Кытӥзэ-отӥзэ тупатъяй, чылкыт кагаз вылэ гожъяй но 
малпаськонэ уси: "Мар кароно табере таин?"
Ыстӥ "Советской Удмуртия" газетэ. Отын ужасьёс мар шуозы меда кылбуре пумысен? 
Потоз шуыса ивор сётӥз Т. И. Шмаков. Сыӵе гожтэт вуэм бере, кык, оло нош, куинь 
арня ортчыса ини, кылбуре югыт дуннеез зэмзэ ик адӟиз. Шумпотонэ соку пумтэм-
йылтэм вал ке но, одӥгаз кылбур книгаям но мон сое ӧй пырты: укыр сырк но ляб со 
потылӥз. Ӟуч кылэ, удмуртэзлэсь трослы чебергес карыса, печатласькиз 1955-тӥ 
арын Москваын потӥсь "Молодая гвардия" альманахлэн (берло со журнал луиз) 14-тӥ 
номераз. Туэ со выльысь печатласькоз "Заповеданная песня" книгаям. Кылбурелэн 
отчы пыремез берыктӥсезлы Константин Николаевич Шишлолы, кулэмез бере ке но, тау 
каронэ луоз, шуыса малпасько.
Гожтэмме умойгес луоз, дыр, тазьы йылпумъяны. Мыным, ас дыраз гожъяськыны 
кутскисьёслы сямен ик, чеберлыко литературае сюрес усьтӥз Т. И. Шмаков. Отӥяз 
ини мукет иськемъёсме ортчыны, кужым люканы юрттӥз ми вакытысез Кузёбай Герд - 
Михаил Петрович Петров. Нош кылбур гожтыны монэ лӧпкытӥз яратоно калыке. Зэмзэ 
ик со - калык - ГЭС-эз ӧй лэсьтысал ке, таӵе яке та выллем кылбур гожтыны тодам 
ик ӧй лыктысал.
Пётр ПОЗДЕЕВ.
( Пётр Поздеев.
( УдНИИ-лэн калык кылос люканъя экспедициез Можга ёросысь Пазял гуртлэн возь 
вылаз. Бурысен паллянэ: П. Поздеев (экспедицилэн кивалтӥсез), Елена Релина 
(Пазялысь усто кырӟась), Р. Чуракова (Иж музучилищеысь дышетӥсь), П. Кузнецов, 
М. Азьмакова, Е. Печникова (УГПИ-ысь студентъёс).
П. Кузнецовлэн туспуктэмез.

3-14-2
Нош ик, ява, лымыям,
Лопата кутӥ киям.
Жадьытозям мычиськи
Собере капчи лулски:
Берлозэ, луоз, ужай,
Сюресэз чылк-чылк сузяй.
Уть, шунды ни мынекъя,
Липет йылысь ву вия.
Суредаз Веселина МАНАПОВА,
4-тӥ класс. 
Бальзюга гурт.
Татышлы ёрос.
Башкирия.
3-26-3
Таиз номермы сӥземын спортлы. Южтолэзьлэн кутсконаз уго школаын дышетскисьёс 
куспын ӵошатсконъёс ортчизы. Ваньзэ-ӧвӧлзэ отын 238 егит спортсменъёс кужымзэс 
мертазы. Со сярысь лыдӟыны быгатоды 2-тӥ, 3-тӥ, 6-тӥ но 7-тӥ бамъёсысь. 
Тодматӥськом на спортлы сӥзем мукет ужъёсын.
Номерез дасязы корреспондент А. СЕРГЕЕВ но туспуктӥсь Ю.ИВАНОВ. Суредъёсын 
шудыртӥзы УдГУ-ысь студентъёс.
3-26-4
Доразы кыскозы шуръёс, тыметъёс
Шур дурын чорыгаса ортчытэм минутъёсты, часъёсты номырин уд ӵошаты, уд вошты. 
Зэмос чорыгась, пукыосыз шоры учкыса, уен-нуналэн сиськытэк-юытэк ярдурын пукыны 
дась. Шеде-а чорыг, уг-а, но огпол зыгатэм гинэ чорыгасез вожомытэ ни. Чорыганэз 
спортэн юнме уг ӵошато. Татын но адями но чорыг куспын аспӧртэм нюръяськон-
ӵошатскон мынэ. Огвилы бере кылид ке, кескич чорыг соку ик куриктэ бушатоз. Но 
амало чорыгасьёс ма но уг лэсьто, кыӵе но чорыган тӥрлык уг малпало, 
чорыгъёслэсь сямъёссэс эскеро-чаклало. Тани котькуд чорыг ас сяменыз зыгатэ. 
Кылсярысь, чабак лушкаськысагес, пичен-пичиен кокчаса иса, карака - бырйиськись, 
нош чипей, уля юш, уралтэмъёс кадь, нумырез, курике тэчем улэп векчи чорыгез 
соку ик ньылыны дасесь. 
Валаса ик уд вутты шуныт гужем нуналъёслэсь вуэмзэс. Соку ини тӥлесьтыд 
сюлэмъёстэс, пиналъёс, бордазы кыскозы шуръёс, тыметъёс. Мултэс уз луы, 
дыр,чорыгъёсын, соослэн сямъёсынызы, чорыгасьёслэн амалъёсынызы, эскерем-
чакламъёсынызы тодматэммы. Нош али нимысьтыз тодматском сон (язь) чорыген.
Сон - кышкась, чакласькись чорыг. Визнан ньӧрлэн ву вылэ усем вужерезлэсь но 
кышкатске, кыӵе ке куараез кылэмез бере, соку ик интызэ воштэ. Яратоно интыосыз: 
тыос, мур кожъёс, чылкыт тыметъёс. Ӵемысь пыре пуръёс улэ, выж юбоос, усем 
писпуос вискын но силё-сюрно пӧлын улэ. Сумедо, горд сюё пыдэсъёсты яратэ. 
Вылтусызъя чебер чорыг. Гужем шорын шур пыдэслэсь вылӥегес тубе, шуныт ӝытъёсы 
куддыр вуысь пота, йырзэ но быжзэ возьматъя. Сыӵе интыосты санэ басьтоно. 
Мотыль, нумыр, тэчкы, тордытэм кӧжы, кыӵ (жмых), вукарнан, ӟоз, бӧчыос, 
вунумыр... Шуг вераны, мае со уг яраты. Бырйиськыса уг улы - ваньзэ сие. 
Бадӟымъёсыз векчи чорыген, блеснаен но шедё, умой зыгатэ шу сяськаяськыку.
Сонэз огшоры визнан ньӧрен кутыло, сиез - 0,2-0,3 мм, курикез - 7-тӥ номер мед 
луоз. Зыгатыкуз, пукы куддыр шуак ыше. Курике шедем сон зол пыкиське, мозмытскон 
утчаса, солань-талань кыстаське. Сюдэм интыосы сонъёс трос кузя люкасько. Сюдон 
понна кӧжы, сезьы, йыды пӧзьтоно но яратоно чорыган интыосы пазяно. Соку вазь 
ӵукна но ӝытазе чорыгакуды, дырдэс мӧзмыса уд ортчытэ. Кезьытъёс вуэмъя 
зыгатэмысь чутрак дугдэ. Толшоре - тулыспалэ сиён солы воксё кулэ ӧвӧл, нош 
южтолэзе ини гуосысьтыз потэ, чидатэк йӧ кошкемез вите. Мукет сьӧмо чорыгъёсын 
ӵошатыса, мызьзэ вазьгес лэзе, бӧрысь сиён утчаны кутске.

Чорыгъёслэн мызь лэзён вакытсы 
Подуст мызьзэ лэзе ву 6 градус шуныт луэм бере, юш -7, чабак - 8, жерех -9, 
мыйыко (усач) -11, судак - 12, карака - 14, гордбурд - 16, сазан - 18, тыпарсь 
(линь) -19, сом - 20, чипей - 7, пая - 12. Карп куартолэзе ик шедьыны кутске 
ни.

Картошка юдэслы
Карпез картошка юдэсэн но кутыло. Но чӧлтыку, курикысь медаз усьы шуыса, тросэз 
уг тодо, кызьы юдэсэз курике тэчоно. Нырысь ик, картошкаез пӧзьтыны быгатэм 
кулэ. Кема пӧзьтыны уг яра, гырезьгес кельтоно. Кема пӧзьтэмез пырдӥсь луоз. 
Куриктылэн быдӟалаезъя кубикъёс вандылэ. Нош тэчыло озьы, кызьы возьматэмын 
суредын.
Мае возьматэ маркировка

Магазинъёсын али трос пӧртэм кунсьӧр чорыган тӥрлыкъёсын вузкаро. Нош 
валэктонъёссы кунсьӧр кылъёсын ик гожъямын. Мае меда возьматэ маркировка?
Ци
( Ӵӥсӵ - 2,5 лбс. Озьыен, си 2,5 фунтэз (1 килограммлэсь кӧнялы ке секытгес) 
чидатэ. лб фунтэз возьматэ (англи).
( Ӵӥсӵ - 9,8 Н. Ци 1 кг чидатэ. Одӥг Н (ньютон))100 г возьматэ. 
Одӥг метр одӥг но одӥг дасмос ярд мында луэ. Катушкаын возьматэм 110 удс (ярд) 
100 метр луэ. 
Эскером си лэсьтонъя "Сануо" япон фирмалэсь гожтэмъёссэ.
."Данду, 0,325 мм, 11 лбс,100 м (110 ыдс), Нулон монофиламӥнӵ, Софӵ анд супӥӧ, 
Сануо". Лыдӟоно тазьы:
."Данбу ("Денди") - силэн маркаез
. Зӧкталаез - 0,325 мм
. 11 фунт (5 кг) чидатэ
. Кузьдалаез - 110 ярд (100 метр)
. Нейлон монолит
. Элацтиклэсь лэсьтэм зол чидатӥсь си
. Сануо - фирмалэн нимыз.
Курикъёс
Япониын поттэм курикъёслэн коробка вылазы гожтэмын: "Ӥаглӥ, Маӧуӵо фисх хоок 
ӟоӧкс, Ӝуалиӵу Но.1095, Супеӧиоӧ Сӵеел, Тӧеблӥ Хоокс Вӧонзед, � 5, 100 рсс.
Еаӝле "Орёл" - курикъёс лэсьтӥсь фабрикалэн маркаез.
. Ма лэсьтон бордын ужа фирма
. Ӝуалиӵу Но, 1095 -курикъёслэн ӟечлыксы
. Супеӧиоӧ Сӵеел - вылӥ ӟечлыко корт
. Тӧебле Хоокс Вгонзед - туйен шобыртэм тройникъёс.
. 5-тӥ номеро тройник асьмелэн 12-тӥ номерлы тупа.
. 100 пцс - коробкаысь курикъёслэн лыдзы.

Санэ басьтэ
. Позыръяськись нумырез, вырись бӧчыез, кутэз, ӟозэз, вукарнанэз чорыг ӝог 
синйылтэ. Соин ик чорыгаку пӧртэм сиёнъёсты тэчылыса эскероно.
. Пӧсь куазен чорыг куак саюлъёсын улэ, нош сӥзьыл - ву вылэ усем куаръёс улын.
. Ву пож дыръя, сиёнэн курикез ву пыдсозь ик лэзёно.
. Кулэм чорыгез вуын уг возё - шашы яке пушнер пӧлын.
. Кутэм чипеедлэн шакасъёсыз борды эн кырмиськы - векчи веньёсыз вӧсь карозы.
. Чорыглэсь уян пуйыоссэ лым пӧлы поныса, чорыг лым эшшо ческытгес луэ.

Вылӥысез суред Саша БЕЛОСЛУДЦЕВЛЭН.
Пажман школа.
Кез ёрос.

Улӥысез суред Иван ЛЕКОМЦЕВЛЭН.
Пипиё гурт. 
Шаркан ёрос.
3-28-1
Ижысь 57 номеро школаын вань асьсэлэн эктӥсьёссы, кырӟасьёссы, каратистъёссы, 
гимнастъёссы... Нош туэ кылдӥзы на МЧС дӥсен ветлӥсь пиналъёс. Соостэк уг ортчы 
одӥгез ужрад но. Вӧзазы шаян пиос но чусомо, вамышъёссы воштӥсько, мугорзы ик 
шонерске кадь. Мукет классъёсысь нылъёс, пиос синмаськыса но вожъяськыса учкыло 
соос шоры. Кыӵе пияшлэн уг поты, дыр, ассэ кужмоен шӧдэмез. Котькудӥз одӥг пол 
ке но пырысалыз, дыр, МЧС-лэн "куаз" ке ӧвӧл, дӥсяз ке но. Ваньмызлы шуд уг 
усьы. Котыр ласянь визьмо, кужмо, ӟеч сямо луыны кулэ татчы шедён понна, 
нимысьтыз тестэз но ортчыны быгатоно на. Нош вань та куронъёслы тупаськод ке, 
присяга сётыса пырод МЧС-ёслэн радазы.
Кинъёс меда со МЧС-ёс? Шугадӟонъёслэсь утиськонъя министерство - озьы сое шуыны 
луоз, дыр, быдэсак берыктыса. Нош мар каро, малы дышетско татын, маин соос 
висъясько мукет пиналъёслэсь? Юанъёслы валэктон сётэ ОБЖ но физкультура 
урокъёсты нуись В. П. Башорин.
- Валерий Петрович, ку но кызьы кылдӥз та классты, кинлэн малпанэз бордысен?
- Дышетӥсьёсын кенешыса вуимы та малпанэ. Элькунысьтымы граждан оборона 
ужпумъёсъя но шуг-адӟонъёслэсь утиськонъя кун комитет милесьтым ӵектонмес кулэен 
лыдъяз. Озьы тӥни туэ нырысетӥ арзэ 7-тӥ но 9-тӥ классъёсмес кадетской каримы. 
Сӥзьыл дорамы вуылӥз МЧС-лэн министрез Т. Г. Габричидзе. Пиналъёс присяга 
сётӥзы.
- Присягалэн текстэныз мон тодматски. Укыр юнэсь кадь куронъёс потӥзы. Ваньмыз 
чидало-а? Тамак кыскыны, вина юыны уг яра. Тӥ соосты чакласа-а возиськоды?
- Куронъёсмы зэмзэ но чурытэсь. Ваньмыз уг чидало. Уката ик мукет школаосысь 
лыктэмъёс. Одӥгзэ уллямы ини дышетсконын бере кылемысьтыз. Урод сямъёс сярысь 
ке верано , спортэн эшъяскись муртлэн соосын выремезт уг поты ни. Спорт 
адямилэсь улонзэ радъяны юрттэ. Физкультураез гажась мурт мукет удысъёсъя но 
азьпалан мынэ.
- Нош формаостэс вурытӥды-а?
- Бен, юри вурытэмын соос. Анай-атайёс асьсэос коньдон тыризы.
- Дышетскемзы ке но дунтэк, дыр, ук?
- Соиз дунтэк. Университетлэн бассейназ пыласькыны ветлӥськомы, отчы дун 
тыроно.
- Куинь ар талэсь азьло Удмурт кун университетын усьтӥськиз МЧС люкетэз. Тӥ 
соосын кусып тупатыны малпаськоды-а?
- Ми соосын огкыл гожтӥмы. Университетысь дышетӥсьёс ужало милям пиналъёсынымы, 
азьбланяз огазеям экзаменъёс луозы, соосъя пиналъёсмес УдГУ-лэн МЧС люкетаз 
кутозы. Университетысь студентъёсын ӵош пӧртэм ужрадъёс ортчытъяськомы. 
- Эшшо маин выро на тӥляд пиналъёсты?
- Ми ӟеч кусып возиськом пинал лётчикъёслэн школаенызы. Парашютэн тэтчаны 
дышетскиськом, ыбылӥськыны ветлӥськом. Кадетъёс пӧлын ӵошатскон радъямын вал. 
Милемлы "Калашников" автоматлэсь макетсэ кузьмазы. 7-тӥ классъёсмы гужем лымшоре 
шутэтскыны мынозы. Морякъёслэн клубенызы ӵош лагерьлэсь ужзэ радъяны малпаськом.
- Тӥляд классады нылъёсты но вань. Секыт уг поты-а соослы татын, яке нылъёслы 
куронъёсты мукетэсьгес-а?
- Нылъёсмы милям ньыль гинэ. Ваньзы ик пичи дырысенызы спортэн эшъясько. Саша 
Елькина но Оксана Фафанова - художественной гимнастикая спортэ мастере 
кандидатъёс. 
- МЧС-лэн дӥсязы пырыса, улонды воштӥськиз-а?-юасько нылъёслэсь.
- Ӧжытак воштӥськиз, шуыны луоз. 
- Пиос пӧлын мӧзмыт ӧвӧл-а?
- Ӧвӧл. Соос милям оскымонэсь.
- Строен ветлонлы дышетыны шуггес вал соосты, - серекъя дышетӥсьсы. Соослэн 
тренерзы Татьяна Тихоновна Востренцова. Кызь тямыс ар ӵоже ужам адями вӧзын вань 
марлы дышетскыны.
- Нош пиосты пӧлын ӵошатсконъёсын висъяськылӥсьёсыз вань-а?
- Вань. Кызь пиосмы пӧлысь куинез шаермылэн чемпионъёсыз луо. Капчи атлетика 
удысын соос шӧртчиос. Роман Щетников ӝуждалае но кузьдалае тэтчанъя элькунмылэн 
чемпионэз. Туэ со географиен но висъяськиз, олимпиадаын вормисе потӥз. Роман 
котькуд удысъя "5"-лы дышетске, школазэ зарни медален йылпумъяны чакла. Куинетӥ 
классысен со тэтчаны кутскиз, солэн 58-тӥ школаысь В. М. Охотников. Костя Шутов 
но Андрей Попов бызьылонъя висъясько. Дышетсконын но адӟем карымонэсь.
- МЧС-ёс школадылэн осконэз кадь, котькыӵе ужрад ортчыку, соосты адӟыны луэ.
- Бен, соос дисциплинаез чаклало, пӧртэм шуге-леке сюро учыръёс медаз луэ шуыса 
сюлмасько. Алигес тани "Зарница" шудон ортчытӥмы школаямы. Нуонэз но радъянэз 
МЧС-ёс вылэ усиз.
- МЧС-ёс мукет школаосын вань-а?
- Республикаямы кык школаосын туэ нырысьсэ усьтӥськизы таӵе классъёс. Милям но 
32-тӥ школаын.
- Ма бен, нырысьёсызлы котьку но секыт. Ваньзэ ӟечсэ, бадӟымесь вормонъёс 
тӥледлы сӥзисько. Шуге-леке сюрон учыръёсысь капчиен мед потоды, соос чик но ӧз 
луэ ке, эшшо умойгес, озьы-а?
- Озьы. Милям школамылы туэ "Кылем даурысь устоез школа" ним сётӥзы. Огъя 
Российской ӵошатсконъёсын вить пол "Арлэн устоез школаез" нимез басьяллямы. Сое 
чакласа, тӥни сыӵе вылӥ дунъет сётӥзы. Та ниммес возьыны тыршом ини. Асьтэлы но 
ваньзэ умойзэ сӥзисько. Лыдӟисьёсты трос мед луозы.
- Тау.
Школаосамы та выллем классъёс тросгес луысалзы ке, оло, пӧртэм йыруж 
лэсьтӥсьёслэн, юись-кыскисьёслэн лыдзы кулэсмысал. Тросгес луысалзы таза, 
оскымон пиналъёсмы.
А. ЕРМОЛИНА. 
. Присяга сётон дыръя.
. В. П. Башорин физкультура урокез нуэ.
. Андрей Попов - капчи атлетикая чемпион.
. МЧС-ысь кышкасьтэм но етӥз нылъёс.
. Роман Щетников - кузьдалае но ӝуждалае тэтчанъя чемпион.
Туспуктэмъёсыз Ю. Ивановлэн.

3-28-2
Тон уӵы ик кылёд пыраклы
Кырӟан. Мон паймисько солэн кужымезлы. Шундыё ӵукналы шумпотыса султыку ик со 
сюлэме куриське ини. Зор ултӥ вамышъяку но ымдуръёс асьсэос "зоры, зорые..." 
кырӟанэз шыпырто. Сюлэмез куректон зӥбыку, "Ой, мар-о, сюлэм, тон сыӵе..." 
кылӥськод ини аслэсьтыд лушкем сипыртэмдэ. Пумен куараед кужмоя но кужмоя. 
Собере кырӟанэдлэн берпуметӥ кылъёсаз вуытозяд, малы кайгыремдэ ик вунэтӥськод 
ини. Гадь тырад омыр басьтыса, нош ик лэсьтоно ужъёсыд дорозь вамыштӥськод.
Котьма шу но, кырӟан адямилэн улоназ туж бадӟым инты басьтэ. Соин ик котьку но 
шумпотоно, кырӟанлэсь сюрессэ азинтӥсьёслы, калык сюлэм доры вуттӥсьёслы.
Тани "Ӝужась кизилиос" конкурсэз но кемалась возьмай вал ини. Вань учкисьёслэн 
сямен ик, мынам но адӟеме потӥз туэоссэ "ӝужась кизилиосты". Асьсэлэн ёросазы 
вормисе потыса, 17-тӥ южтолэзе соос люкаськылӥзы Ижкарысь "Аксион" культура 
двореце.
"Шунды" дэменлыклэн, Егитъёсын ужанъя кун комитетлэн, Калыкез дышетонъя, 
Нациосын ужанъя министерстволэн нимынызы ӵошатскисьёсты ӟечкылаз Культурая 
министрлэн воштӥсез А. Т. Христофоров.
Ӵошатсконэ пыриськись пиналъёс аресъёссыя люкылэмын вал. "Ойдолэ "Остэ!" шуыса 
кутском", - кыл сётӥз 6-9 аресъем кырӟасьёслы ужрадэз нуись Татьяна Денисова.

Синмаське Алсулы
Кудзы меда бадӟымгес: нылаш-а яке микрофон-а? - сцена вылэ потыкуз ик учки вал 
мон Таня Пономарёва шоры "Мемиелы" но "Чипуос" кырӟанъёсты быдэстыкуз. Но 
аслэсьтыз но микрофонлэсь но бадӟымгес вылэм слонпи. Со небыт шудонэз Танялы 
нырысетӥ интые потэмез понна сётӥзы. Слонпиеныз сцена вылысь васькыкуз ик ми 
пумиськылӥм Таня Пономарёваен но анаеныз Ирина Аполлосовнаен.
Таня Дэбесысь 1 номеро школаын дышетске. Куать аресъем нылаш нырысетӥ классэ 
ветлэ ини. "Шундыос-а", пилемъёс-а" дорад вайылӥськод? - юасько мон зэмос 
дышетскисьлэсь.
- Тетрадьёсам мыным "кизилиос", "квадратъёс" пуктыло, эшшо вӧзаз "Молодец" 
гожто на ай.
- Тӥ-ни кызьы. Бадӟым будыса, одно ик кырӟась луэмед потэ, дыр, ини. Валентина 
Пудова-а, Надежда Уткина-а кадь кырӟамед потэ?
- Алсу кадь.
- Вань кырӟасьёс пӧлысь нылы Алсуэз яратэ, - вераськонамы итӥське Ирина 
Аполлосовна. - Тужгес но "Иногда" кырӟанэз кельше. Магнитофон шудэмъя дышетӥз но 
табере микрофон кутыса ик кырӟамъяське. 
Ижкарысь сцена вылэ Таня нырысетӥзэ потаз ай, нош Дэбесазы "Зарни италмас", 
"Дэбес кизили", "Чингыли" конкурсъёсазы, оло, ӧз но вала ай, но кузьымезлы 
ортчыт шумпотӥз. "Ойдо ни, анай, ӝоггес", - слонпизэ ӟыгыртыса, дораз чортӥськиз 
пичиез кизилимы.

Уг вера ку лыктонзэ
10-14 аресъем учкисьёслэсь мылкыдзэс ӝутыны быгатӥз Ува ёросысь Коля Нефёдов. 
"Мон шоры сокем эн учке", - сыӵе кылъёсыз вал Колялэн одӥгаз частушкаяз. "Кызьы 
уд учкы", - частушкаезлэн кылъёсыныз ик шуизы, дыр, ас понназы учкисьёс но. 
Колялэн жингрес куараез но гармошкаен усто шудэмез вань люкаськемъёслэсь 
мылкыдзэс ӝутӥз. Дунъясьёс но сое синйылтытэк ӧз кельтэ. Сцена вылын ассэ 
аспӧртэмлыко воземез понна Колялы "Шундыкар" лагере путёвка сётӥзы. 
Глаз ёросысь Гулёково школаысь Сергей Юферев но кыкетӥ категориысь кырӟасьёс 
пӧлын ӵошатскиз. Сергеез дипломен пусйизы. Бадӟым вормонъёс сярысь пияш 
малпаськыса ик ӧз улы. Мылкыдыз сотэк но капчи. Анаез но атаез пизэс чильк-чильк 
сьӧд костюмен дӥсяса лэзизы, нош эшъёсыз ӟеч мылкыд сӥзьыса келязы.
Сергей "Куноын" но "Вай ошмесэ" кырӟанъёсты быдэстӥз. Та пияшлэн ваньмыз 
азьпалан ай. Тужгес пусйымонэз со: 7-тӥ классысь пияш туж яратэ кырӟаны. Кырӟаса 
ик гурт котырысь ужъёсты быдэсъя: пу,ву пыртылэ, сиён пӧзьтэ. Картошкаез яке 
макаронэз таба вылын пурсатонлэсь Сергей номыр секытсэ уг адӟы. Одӥг но сузэрзы 
ӧвӧл бере, кык вынъёсыз сямен ик, анаез вӧзын со котьма карыны быгатэ. Огназ уг, 
кырӟанэныз ӵош. Нош куддыръя... куддыръя Сергей урокъёсын но, пе, кырӟаны 
кутскылэ. Та сярысь со мыным ачиз вераз. Тужгес но математикаын, примеръёссэ но 
задачаоссэ лэсьтыны быгатыкуз сыӵе мылкыдъёсыз луыло. Кырӟанлэсь ку лыктонзэ 
ачиз йырвизь но уг тоды вылэм.

Светалэн малпанъёсыз
Алнаш ёросысь Ручкина Светалэн вормонэз нырысетӥ кырӟанзэ быдэстыкуз ик 
шӧдӥськиз ини. Куараез туж кужмо, сцена вылын но ассэ капчи, йӧн-йӧн возе. "Вань 
мынам выжыкыл дуннее" но "Тынэсьтыд пыд куарадэ" кырӟанъёсыныз Света зэмзэ но 
аслэсьтыз учкисьёссэ огдырлы кыӵе ке но выжыкыл дуннее выжтылӥз кадь. Быдэсак 
кырӟанъёсызлэнлэн пуштросаз пыртылӥз. Озьыен, кырӟась аслэсьтыз ужзэ быдэстӥз.
Светалэсь мылкыдзэ ӝутыны сьӧраз лыктӥллям анаез, агаез но апаез. Анаез Людмила 
Николаевна совхоз-техникумысь школаын географиен дышетэ. Та удысын со 25-тӥ арзэ 
ужа ини. Людмила Николаевна ачиз но туж яратэ кырӟаны, ансамблязы ветлэ.
Света понна "висьыны" лыктэм крезьгуръя школазылэн кивалтӥсез Людмила 
Анатольевна но.
- Светалы кырӟанъёс мон ачим бырйи, - шуэ Людмила Анатольевна. - Туж кема 
утчаськоно луим. Пичи нылпиослы сӥземъёсыз вань, нош 12-16 аресъемъёсызлы 
кырӟанъёс ӧвӧл. Кырӟан бырйыку, угось, котьмае чаклано: кырӟанлэсь пуштроссэ 
но, аслэсьтыз кырӟасьлэсь мылкыдзэ но. 
Света яратэ шулдыр кырӟанъёсты. Та нылашлэн вань улонэз крезьгурен, кырӟанэн 
герӟаськемын. Одӥгаз школаын тодон-валанъёс басьтыны тыршонэз, мукетаз - 
крезьгурлы дышетсконэз - ваньмыз одӥг бугоре биниськемын, татын нокудӥз но 
мултэс ӧвӧл. Но вань на ай Светалэн азьланез сярысь бадӟым малпанъёсыз.Туж потэ 
"Утренняя звезда" конкурсэ пыриськемез.

Катя ветлӥз Москвае
Игралась дас куинь аресъем Катя Поповалэн та нуналъёсы туж трос сюлмаськонъёсыз 
вал. Та конкурсын Катялы вылӥ дунъет сётӥзы калык кырӟанъёсты вӧлмытыны усто 
быгатэмез понна. Нош 21 южтолэзе со нош ик сюрес вылэ потаз: Москваысь "Утренняя 
звезда" передачалэн конкурсаз пырисьткылӥз. Отчы сюрон понна Катялы трос ужано 
луиз. "Утренняя звезда" передачалэн конкурсэз, угось, Удмуртиямы но вуылӥз. Со 
ортчиз Уваын, собере Можгалан. Асьме доры вуылӥз та передачалэн крезьгуръя 
редакторез Кира Чен. Катя отын "Мемие но вордэм" кырӟанэз быдэстӥз вал. Собере 
Катялы ӧтён вуиз.Сюрес вылэ коньдонэн юрттӥзы му вӧй поттӥсьёс.
Кырӟанэн эшъяськыны Катялы туж бадӟым юрттэт сётэ анаез Наиля Григорьевна. 
Культурая юртазы со калык кырӟанъёсъя кружок нуэ, ачиз но кырӟаны яратэ. 
Катялэн быгатонлыкъёсыз син куспын будо, баянэн шудыны быгатэ. Нош ваньмон 
дыръяз пужыятске, керттӥське. 
* * *
Дас ньыльысен дас укмыс часозь кыстӥськись концертын туж интыяз луизы 
учкисьёслэн кичабонъёссы. Кырӟасьёслэн асьсэлэн ик мылкыдзы ӝутӥське, сцена 
вылын но кузё сяменгес ветлыны кутско. Ужрад кӧснуналэ ортчиз бере, учкисьёс 
ӧжытгес вал. Ижкарысь пиналъёс мылкыд карисьёсыз но лыктыны ӧз быгатэ, луоз. 
Нош кырӟасьёсмес дышетскисьёслы учкыны туж пайдаё луысал. 
Дунъясьёслы но капчи ик ӧй вал, дыр, устоосыз пӧлысь устооссэ бырйыны. 
Конкурслэн ортчемез сярысь дунъясьёс пӧлысь одӥгез Н. Н. Чиркова, "Эктон корка" 
студилэн кивалтӥсез, тазьы вераз: "Мукет аръёсын ӵошатыса, мон ӧжытак пайми но 
кырӟасьёсмылэн устозылы. Куараенызы гинэ ӧвӧл, асьсэлэн выросъёсынызы но соос 
кырӟанлэсь пуштроссэ возьматыны йӧндыро, костюмъёс но бырйыны тыршо ини. 
Нимысьтыз пусйимы Ува ёросысь Оля Рябининалэсь аспӧртэмлыко дӥсьсэ. Азьланяз, та 
выллем конкурсъёсы дасяськись пиналъёслы тросгес ужано луоз сцена вылын асьсэды 
возён бордын,, вазиськылоно хореографъёслы, балетмейстеръёслы.
Нош дунъясьёслэсь тӧрозэс Н. Э. Уткинаез сюлмаськытӥз мукетыз но. "Конкурсэ 
ӧжытгес пыриськыны кутскизы бадӟым классъёсын дышетскисьёс, ӧжыт удмурт эстрадая 
кырӟанъёс. Соин ик кырӟанъёс но бырйыны курадӟо, радиоысь, телевидениысь мар 
кыло - со кырӟанъёсын ик конкурсэ пырисько. Тросэз мынам кырӟанъёсыным пото", - 
шуэ Надежда Эдуардовна. 
Ма бен, сюлэмез уд алда ук, кыӵе кырӟан солы кельше, сое ик быръе.
Конкурсын озьы ик чузъяськизы Г. Ганьковлэн, Г. Бекмановлэн, В. Пудовалэн, но 
мукетъёсызлэн быдэсъяно кырӟанъёссы. Шумпотоно пиналъёслэн сцена вылэ потаны 
дӥсьтэмзылы, кырӟан борды пиналысен ик кыстӥськемзылы. "Тон уӵы ик кылёд табере" 
- чузъяськиз вал огаз кырӟанын. Зэм но, котькыӵе удысын соос мед ужалозы, нош 
кырӟаны яратэмзы улоназы котьку но юрттоз. Тӥни озьы кырӟасьёсмы будо но будо. 
Крезьгурчиосмы шулдыр гуръёссэс, нош кылбурчиосмы жингрес чуръёсэс гинэ гожъяса 
мед вуттозы.

Ӟечкыласьком вормисьёсты
6-10 аресъемъёс пӧлын:
Таня Пономарёва - Дэбес ёрос,
Оля Ипатова - Юкаменск ёрос,
Аня Щуклина - Можга ёрос. 
10-14 аресъемъёс пӧлын:
Света Ручкина, Алнаш ёрос;
Лейла но Милана Захваткинаос,Шаркан ёрос;
Юля Никитина, Шаркан ёрос;
15-20 аресъемъёс пӧлын:
Оля Рябинина, Ува ёрос;
Ирина Букранова, Шаркан ёрос;
Снежана Прохорова, Завьял ёрос.
21-25 аресъенмъёс пӧлын:
Сергей Кайсин, Можга ёрос;
Ольга Еляева но Светлана Пислегина, Завьял ёрос;
Ольга Андреева, Кизнер ёрос. 
А. АЙМАНОВА.
. Таня Пономарёва.
. Катя Попова.
. Света Ручкина.
Туспуктэмъёсыз Ю. Ивановлэн.

3-28-3
Тэшкам очки
ВЕРОС
Оля али гинэ городысь бертӥз. Анаез сое чупаз, ӟыгыртӥз но пырыны косӥз.
Нылаш мумизлэн кисыриосыз борды йӧтскиз, шумпотыса но мар ке сярысь малпаськыса 
кадь, шораз учкиз но мынектыса корка вамыштӥз.
Пырем бераз ик Олялэсь нырзэ пыжиськем зын бичатыны кутскиз. 
- Я, ӝӧк сьӧры пуксьы, нылы, кокрокме, табаньме веръя.
- Анай, вить ӧжыт, мон пырыса ӧй на вутты, нош тон - "пуксьы".
Озьы вераськон куспазы гур сьӧрысь Иван дядиез потӥз.
- А! Вуид-а, калтак!
- Дядяй... Мон...
- Мар-о "дядяй", ӝыны ар мында нырдэ ӧд возьматъя, нош табере бертыны возьытэд 
тырмиз-а?
- Ма, мон дышетскисько ук, дядяй, - ӝож куараен вазиз Оля.
- Дышетскисько... Шутэтскон нуналъёсы но пересьёстэ чакланы ӧд бертылы! Ми кулом 
но кошком, нош тон?!
- Дядяй, бертыны коньдон кулэ ук, нош мынам кисыям тӧл шула.
- Тон кыӵе ке кагазъёс-гожтэтъёс ыстылӥд. Тодӥськод ук, синъёсмы уг ни адӟы. 
Очки шуонзэ коть вай вал-а мар-а.
- Бен мон ваи ук! Кыкнадылы но! Отын, пакетам.
- Ваид-а? Зэм-а? - Иван дядиез сумкаын бугыръяськыны кутскиз, отысь кык "пияла 
синъёс" поттӥз. Одӥгзэ бырттыса, синучкон доры мынӥз. Чеберъяськиз-чеберъяськиз 
но нылыз доры вамыштӥз.
- Бен вуид бере, ӟыгырты ук дядяйдэ! 
Оля шумпотыса дядяезлэн чыртыяз ошиськиз. Собере чмок! гинэ чупаз.
Семья ӝӧк сьӧры пуксиз. Иван, очкизэ кияз бергатыса, маке сярысь малпаськыны 
ӧдъяз. Жальмаса улэмзэ, Марья синйылтӥз но малэсь ке кышкаса кадь шуиз:
- Иван, Иван! Мар тонэн? Мар-о луиз?
- Мар?.. Кин?.. - шуак луиз Иван.
- Мар-о озьы пукиськод? Я, шуак эн луы, сотэк но сюлэмыд ляб. Тӥни сиськы.
Иван, кылзӥськыса кадь, табаньзэ зыретэ веттӥз но ымаз донгиз... 
... Гужем ортчиз, сӥзьыллэн пумыз ини. Музъем лымыен шобырскиз, улосэ уйпал 
кезьытъёс лэзькизы. Иван "пияла синзэ" куятэк нуллэ. 
Очкиен со аслыз выль дуннез усьтӥз кадь. Ваньзэ умой, чылкыт адӟыны кутскиз. 
Одӥг пол ӝыт, тамак кысконъяз, инбаме учкиз. Отын кизилиос ворекъяло, нош 
толэзез, оло, шайтан ньылэм, нокытын но уг адӟиськы. Кизилиосты мыр-мыр 
учконъяз, пӧлысьтызы тужгес яркытсэ шедьтыса, малпаськонэ усиз...
... Егит дыръяз солэн Надя нимо "кизилиез" вал. Ымнырыз чебер, ортчытъяз? 
Собере со олокытчы луиз, кытчы кариськемзэ нокин вераны ӧз толы ни.
Али гинэ Иван агай валаз юн сьӧлыкамзэ. Бам вылтӥз шапык гылӟиз. Сюлмыз дыг! 
дыг! йыгаськыны кутскиз но, ӧз чида, дугдӥз. Пересь усиз, нош кияз тэшкам очки 
кылиз.
Дима КАБАНОВ.
Бобья-Уча гурт.
Пичи Пурга ёрос. 
3-29-0
Урыман лымы усе,
Гур вылын писэй пуке.
Кезьытэн пельзэ кынтэм,
Быж йылыз кылем гонтэм.
Гын сапег пушкысь табре
Со лушкем ишке гонзэ.
Валя СЕМЁНОВА.
Арлян гурт.
Алнаш ёрос.

Алдай?!
Огпол дорамы бускель пияш Коля кунояны лыктӥз. Со вакытэ ик гурт пумын улӥсь 
двоюродной Артём выны но васькиз. Пияшъёс соку ик огъя кыл шедьтӥзы, эшъяськизы. 
Кема шудӥзы. Мырдэм но кызьы люкиськыса, доразы бертӥзы.
Ӵуказеяз мон Артёмъёс доры тубоно кариськи. Коля сое тодыса, сьӧрам улляськыны 
кутскиз. Та нокызьы уз кыльы шуыса, соглаш кариськи. Нош ураметӥ мынон сяменым 
ас поннам малпасько: "Коляез Артём доры нуи ке, анай-атайёсыз куаретозы, дыр. 
Кызьы меда талэсь мозмытсконо? Вай ай кин ке доры алдаса пырто но ачим пегӟо". 
Озьы ик лэсьтӥ.
Нош ӝытпал доре бертыкум, алдаса пыртэм Коля пумитам шаньги сиыса потэ. Мон 
воксё пайми. Мынон сяменымы со валэктӥз: та коркан ӵыжы-выжыосмы уло, пе, 
лыктэмелы шумпотыса, куно каризы.
Диана АФАНАСЬЕВА.
Н. Юри гурт.
Можга ёрос.

3-30-1
Сӥлы карим пересьёсмес
Алигес Вуж Монья гуртамы ортчиз Пичи Пургаысь ветеранъёсын пумиськон. Сое дасязы 
клубын ужасьёсмы но гуртысьтымы ик ветеранъёсмы. Культура юртмы азьын куноосты 
пумитазы сылалэн нянен но шулдыр кырӟанэн.
Люкаськемъёсты ӟечкылазы ветеранъёслэн тӧрозы М. С. Петров но Вуж Монья 
администрацилэн тӧроез Н. Н. Филимонов. Кыл сётӥзы дано дышетӥсьмылы М. М. 
Кузьминалы. Со лыдӟиз аслэсьтыз но дышетӥсьёслэсь сочинениоссэс. Пукисьёс туж 
сак кылзӥзы, шыпыртэм но ӧз кылӥськы. Собере асьсэлэсь быгатэмзэс возьматӥзы 
Пичи Пургаысь ветеранъёс. Кыӵе шулдыр кырӟало, кыӵе чебересь адӟисько соос! 
"Пересьёс" кыл но соослы уг тупа ай. Пинал нылъёс кадь шудоесь адӟисько. 
Кырӟаны, пе, пӧртэм удысъёсын ужасьёс ветло. Одӥгез артистказы Венгрие но, 
Финляндие но вуылэм ини. Нош В. С. Зорина Пичи Пурга музеен кивалтэ. Музее 
арбериос бичамез сярысь Валентина Спиридоновна туж тунсыко мадиз. Бадӟым тау 
кариз Мария Михайловнамылы музеез узырмытыны юрттэмез понна. Та паймымон 
дышетӥсьмы пенсиын ке но, тэк улонэз уг тоды. Сельсоветысьтымы котькуд семьяе 
вуылэм. Очеркъёсыз кык книга тыр люкаськизы. Со книгаоссэ поттыны Валентина 
Спиридоновна туж сюлмаськиз. Книгаысь геройёс - ожысь но ужысь ветеранъёс, оже 
быремъёс, пал кылем кышноос. Гожтэм чуръёс сюлэмез вырӟыто, синкылиез потто. 
Тани одӥгез героез Е. Ф. Тарасова та нуналъёсы 88 арессэ пусйиз. 1939-тӥ арын 
пал кышно кылиз, картэз финнъёсын ожмаськыку быриз. . .
Паймымон пумиськон, малпасько, ваньмызлы кельшиз, ми, пиналъёс, асьмелы трос 
гинэ адӟем карымонзэ басьтӥмы Дун тырытэк но, "Италмас" ансамбльлэн концертаз 
сямен ик, уӵы кадь кырӟаны быгатӥсьёсты кылзӥм. Та ужрадэз ортчытыны юрттӥзы 
Монья кооперативъёсысь кивалтӥсьёс. Тау тӥледлы, юрттӥсьёс, пурга но монья 
ветеранъёслы сӥзем ужрадэз радъямды понна.
.
Ирина ЕФРЕМОВА.
Пичи Пурга ёрос. 
3-5-1
Шахерезада
Мон - Шеаерезада, мон - Шахерезада,
Шунджы ӝужан палась принцесса мон.
Тон сыӵе кезьыт, оло йӧ сюлмад-а,
Но мынам пушкам ӝуа оскон.

Сектало тонэ хрусталь бокалысь мон,
Веръято тыныд коньыт виноград.
Векчи чиньыен крезь си шудо но,
Оло пальпотон кенӝытод сюлэмад.

Мон - Шахерезада, мон - Шахерезхада,
Шунды ӝужан палась принцесса мон.
Тон сыӵе кезьыт, оло йӧ сюлмад-а?
Но мынам пушкам ӝуа оскон.

Ческыт духиен йырдэ берыктӥ ке:
Нокытчы уд кошкы ни палэнэ.
Зарни жильыен дорам думылӥ ке,
Тон луод мынам ляльчие.
* * *

Веттасько кӧкыын 
Аслэсььтым малпанме,
Малпанэн ӵош лэйка
Мынам вужере.
Бездыт синмыным
Улонме чакласько,
Дырекъясь киыным
Вужерме изьтӥсько.
Улонэ - пытсэтын,
Сьӧд гуын костаське,
Эрике лобӟыны-
Бурдъёстэк вордскиськем.
Мылкыдме ӝутыны -
Кырӟаса пукисько,
Огнам кылёнтэм -
Вужмерме эш каро.
Аня КОНДРАТЬЕВА.
Пычанки гурт.
Завьял ёрос.
3-5-2
* * *
Веттасько кӧкыын 
Аслэсььтым малпанме,
Малпанэн ӵош лэйка
Мынам вужере.
Бездыт синмыным
Улонме чакласько,
Дырекъясь киыным
Вужерме изьтӥсько.
Улонэ - пытсэтын,
Сьӧд гуын костаське,
Эрике лобӟыны-
Бурдъёстэк вордскиськем.
Мылкыдме ӝутыны -
Кырӟаса пукисько,
Огнам кылёнтэм -
Вужмерме эш каро.
4-1-6 
Пайми дуннелэн чеберезлы
Кез ёросысь Александрово школаын дышетскисьёслы шара гожтэт

Вуимы Можга палъёсысь
1956-тӥ арысен 1961-тӥ арозь ми кузпалэным Геннадий Иванович Павловен улӥм но 
ужам Кез ёросысь Александрово черкогуртын. Черклэн бервылыз гинэ ӧжыт тодматске 
на вал, нош черксэ кесяса, пе, Кезэ нуиллям. Та гуртын соку ваньмыз-ӧвӧлэз 
Кезысь Олыпе мынӥсь сюреслэн паллян палаз сизьым-тямыс корка сылэ вал, но кык 
корка - сюреслэн бур палаз. Кык корка - со ветпункт но отын ужась Чупин 
ветфельдшерлэн улон коркаез. 
Школа интыяськемын вал поплэн, дьяконлэн улон коркаосазы. Одӥгез юрт школалы 
шуыса ик лэсьтэмын вылэм, но отын ньыль классъем гинэ комната вал. Перемена 
куспын дышетӥсьёслы одӥг юртысь мукетаз ветлоно луылӥз. Та юртъёс пуктылэмын вал 
шур дурысен ӝутӥськись бамалын нюлэс дурын. 
Нош кыӵе писпуос со нюлэскын! Куинь кузя киостэ вӧлъяса кутӥськид ке но, 
котыртыны уд быгаты соослэсь зӧкталазэс.
Ми асьмеос вордскемын но будэмын Можга ёросын. Милям но нюлэсъёсмы бадӟымесь но 
чебересь. Но такем зӧкесь писпуосты мынам адӟылэме ӧй вал. Нош кӧня узыез, 
эмезез, губиез вал со нюлэскын. Улонмес ик эмезь волиын (вӧльыын) улӥмы кадь. 
Дас вамыш лэсьтыса сюрес сьӧры потӥськод но - бича ини кӧня потэ бичамед ӵыж 
кисьмам эмезез. 
Школалэн вылӥязгес сылэ вал медпункт. Медпунктлэн азбараз, укно улаз небыт вож 
гуждор, гуждор пӧлын пӧртэм сяськаос будо. Медпункт вадьсытӥ Безег шур дуре 
ваське сюбег гинэ пыдын ветлон сюрес. 
Кызьы ке зор бере тупаз мыным со сюрестӥ ветлыны. Яркыт шунды аслэсьтыз зарни 
сиоссэ пазьгиз зор вуэн мисьтӥськем чылкыт дунне вылэ. Макем чебер луиз котыр 
инкуазь. Котькуд писпу выль арлы кадь дасяськем. Кин ке соосты чилясь арбериосын 
чеберъям. Турын-куар вылысь котькуд шапык пичи шунды луэм. Кыӵе гинэ тылсиос уг 
пишто соос бордысь: горд, вож, ӵуж, лыз... Мон мынэмъя, со буёлъёс вошъясько. 
Купанча, инвожо, тӧдьы но ӵуж ромашкаос пальпотыса учко шунды шоры. Кыл уг тырмы 
сыӵе чеберез вераны! Азвесь но, зарни но, алмаз но, рубин но - кыӵе гинэ дуно 
арбериос ӧвӧл отын! Турын нюжаос някыртӥськиллям - соос борды сузьямын 
хрустальлэсь лэсьтэм векчи весь. Соос но вуюись кадь буёлъёсын чиляло. Быдэс 
дунне - дуно но чебер чилясь тӥрлыкен тырмытэм бадӟым шыкыс. Сыӵе вал милям Кез 
улосмы шулдыр гужем куазен. 
Мукет луылӥз шаермы бер сӥзьыл. Дугдылытэк пелля кезьыт тӧл. Шонасько, сэзъясько 
бадӟым кызъёслэн кузь вайёссы. Кышкыт куашетэ, ӝуштэ дауръёсын будэм нюлэс, 
пеймыт уйёсы вузо кионъёс. Пиналъёс школае лыкто но верало: "Безег дурысь нюке 
кионъёс толэсэз кесяллям". Мукет нуналаз нош шуо: "Нош ик кионъёс 
эрказъяськиллям. Та уе соос ветылэз кесяллям". Зэм вал соослэн верамзы. Ми улӥм 
дышетӥсьёслы пуктэм кык этажъем коркан, улӥ этажаз. одӥг Корказьмы директорлэн 
квартираеныз одӥг вал. Лусьтро пуны возьылӥз Лазарь Игнатьевич. Пуныез корказьын 
кӧлалляз. Одӥг уе кионъёс корказьысь лусьтро пуныез но нуиллям. Шимес 
кылӥськылӥз шурали кесяськем куара. Туж мӧзмыт вал мыным сыӵе ӝытъёсы: радио 
ӧвӧл, ӧвӧл электротыл но.
Кыкетӥ араз ужакум, вуиз Геннадий Иванович. Со шимес уйёс кыдёке кылизы. Дыши 
кадь мон нюлэс куашетэмлы но, кион вузэмлы но, шуралилэн шимес куараезлы но. Нош 
Геннадий Ивановичлы туж кельшиз татын нюлэсканы, чорыганы. Школа дорысь пичи 
тыметысь ик трос чорыг кутылӥз. Мон паймисько вал: кызьы сыӵе пичигес гинэ 
прудын сомында чорыгез?

Ковалёво тымет
Одӥг пол Геннадий Иванович мыным шуиз: 
- Мон тыныд Ковалёво тыметэз возьмато али. Сыӵе чебер дуннеез мынам но адӟеме ӧй 
вал на. Дасяськы, ӵуказе мыном.
Ӵукна вазь султӥм. Шунды но нюлэс сьӧрысь ӧз возьматскы на, ми Ковалёво пруд 
пала вамыштӥм. Шурлэн уйшор палтӥз шур кузя ваським. Ярдурысен ик ӝутӥське 
гурезь. Нош гурезь бамын узыез кӧня! Мон тэбинисько сое бичаны, нош эше азьлань 
ӧте, вуом ай, пе,октыны. Пруд доры чальгес, пе, вуыны кулэ. 
Кыӵе ке векчи пуӵъёслэсь лэсьтэм выж вылтӥ шурлэн лымшор палаз потӥм. Шур кузя 
мынэ сюбег гинэ пыдын ветлон сюрес. Интыен-интыен шашы басьтэм шур дурез, нош 
куд-ог интыын вольыт гумы, колыс гумы мынэсьтым но вылӥе ӝутӥсько. Дырын-дырын 
пыд улысь, турын пӧлысь, кыӵе ке тылобурдо ӝутӥське но мон куалектӥсько. Кытӥяз 
нош вуэ я чипей, я эбек жомбыляк тэтчо. 
Вуиськом ни пруд доры. Шыпыт мыныны косэ монэ Геннадий Иванович, вераськытэк, 
пыд куара гинэ ӧвӧл, шокам куара но медаз кылӥськы, пе. Нюжтӥськыса кадь 
ӝутӥським прудлэн плотинаез вылэ, ӧм султэ, йырмес гинэ ӧжыт ӝутӥм. О, мае мон 
адӟи! Син сузёнтэм кыстӥське бадӟым зарезь кадь яплак ву. Ӝужась шунды инбамез 
но пумтэм-йылтэм вӧлдӥськем вуэз льӧльмам. Ву вылтӥ каньылля ӝутӥське льӧль бус. 
Нош плотина дурын ву куар вылын уяло тӧдья лилияос, нош кыдёкынгес - льӧль 
сяськаос. Шурлэн ярез чик ӧвӧл ни. Лымшор палтӥз ву бордысен ик кутске дауръёсын 
будэм сьӧд нюлэс. Писпуос вуын уяло кадь. Нош тыметлэн уйшор палтӥз кыдёке 
кыстӥське пумтэм-йылтэм возь. Вож турын но льӧлектэм, вуэз но возез шуг висъяны. 
Кытын но отын возь вылын семьяен-семьяен пичи куакъёс сыло. Геннадий Иванович 
мынэсьтым юа : 
- Учкы ай со куакъёс пала. Адӟиськод-а мае ке?
Мон уг адӟиськы на вылэм. Вить кузя лосьёс уяло прудын. Одӥгез пур-пур бадӟым 
сюро кужмо лось, кыкез - шоро-куспо, нош кыкез пичиесь лосьпиос. Бадӟымез 
палэнынгес, нош таосыз уллань вуэ лэзисько, собере ӝутӥсько, йырзэс сэзъяло, 
вуэз пазяло, прудлэн шор палазгес мыно. Милемлы соос ог 200 метр кемын. Ми шыпак 
интыямы ик пумимы кадь, шоканы но ум дсьтӥське ни. Но нюлэс кузёос шӧдӥзы, лэся, 
соос шоры учкеммес. Вуиысь дыртыса потӥзы. О, кыӵе мотор нуэ лось атай пур-пур 
бадӟым сюръёсын, выллань урдэм чебер но кужмо йырзэ. Лосьёс вуысь потӥзы но 
турын пӧлтӥ ворттыса кошкизы...
Талэсь азьло но, берло но сыӵе улэп суредэз мон ӧй адӟылы ни. Нокыӵе африканской 
прериос кулэ ӧвӧл, асьмелэн вань сыӵе чебер интыосмы, соосты утялтыны гинэ 
быгатыны гинэ кулэ.
Собере Геннадий Иванович монэ нуиз на пруд дуртӥ нюлэскытӥ мынӥсь пыдэн сюрес 
вылтӥ. Паймымон сюрес! Нюлэс ву вылын будэ кадь. Писпуослэнь выжыоссы вылэ гинэ 
лёгаськыса мынӥчькод, писпу выжыос вискын яплак пеймыт ву. Писпуос ӝужытэсь, 
ӵемесь. Татчы ноку но шунды сиос уг вуо, дыр. Мыным туж кышкыт потӥз отӥ мыныны, 
тани-тани пыд гылӟоз кадь писпу выжы вылысь но пыдэстэм мур сьӧд ву гопе усёд, 
выжыос бинятозы тонэ, ноку но отысь потыны уд быгаты ни. Нош кызъёс туж зӧкесь, 
ӝужытэсь! Коръёс кузя ӝутӥське вож ӝуй, вайёс бордын но ӝуй ошиськылэмын. Оло, 
вумурт вайёс кузя аслэсьтыз кузь тушсэ лэзьям, оло мон вуылӥ Черноморлэн 
царствояз...

Эшшо огпол вуысал на...
40 ар пала луэ ини Кез ёросысь кошкеммы, нош мылкыд весь кыске на кадь со чебер 
интыосты адӟыны, отысь калыкен пумиськыны.
Мон ӵемысь ветлылӥ нюлэскы вазь тулыс, сӥзьыл пал но гужем. Бичалляй я узы, я 
эмезь, я губи. Мынылӥ мон котьку но бичаськон муген. "Тон сое тыршиськод учкыны, 
ма понна лыктэмын нюлэскы. Но потэ на, потэ мынэме нюлэскы нокыӵе мугтэк! 
Дыртытэк каньылля лёгасал вож мускыт гуждорез, со небыт сюресэз, капчиен гадь 
тырам кыскысал нюлэслэсь йӧнатӥсь омырзэ. Тузь зынэн, сяськаё омырен шокасал, 
нюлэслэсь мускытсэ шӧдысал. Кылысал куажилэсь куажгес куаразэ, эмъяськись 
бурдолэсь нюлэс тыр кокамзэ. Пиякуш вылӥын лобалоз, шуныт зор курыса кесяськоз.
Ӵем дыръя малпалляй: дыр ке шедиз, одно ик огпол ветло на, адӟо на Александрово 
палъёсты, нош табере валасько - отчы мыныны уг быгаты ни. Геннадий Иванович но 
улонысь кошкиз ини, ӵош ужам эшъёс но тросэз люкиськиллям ини та ӵыдонтэм 
дуннелэсь. Нош кыӵе умоесь адямиос уло вылэм Кез ёросысь Александрово палъёсын. 
Котьку дасесь вал соос юрттыны, утялтыны. Тани Галина Васильевна, ӟуч кылъя 
дышетӥсьмы, бадӟым тэркыен сылалтэм губизэ йӧлвылын карыса ваем ми доры, нош 
Зинаида Ивановна Емельянова (картэзъя Белослудцева) быдэс мискаен сылалтэм 
кубистазэ ваем. Лазарь Игнатьевич Поздеевлэн кузпалыз Ефремовна вашкала сямен 
туж ческыт мусур лэсьтылӥз но милемлы удылӥз. Азарий Трофимович 
Константиновлэн, ми ужаку завучлэн семьяез но, туж шырытэсь адямиос вал. Али 
дышетскись пиналъёслы тодмотэм нимъёсты мон верасько ини. Но соос ужазы та 
школаын, дышетӥзы али дышетскись пиналъёслэсь анай-атайёссэс. Сыӵе ик умоесь 
адямиос улӥзы Кузямувырын, Александроволы самой матысь гуртын. Кӧня кеми но 
улӥмы та гуртын Настя апай дорын. Настя апай чылкак паймытӥз монэ. Маин шуоды-а?
Одӥг пол мон киям кырӟанъёсын книгаен бергасько, кырӟан дышетыны вырисько. 
Нокыӵе крезьгур шудон инструмент ӧвӧл. Нотаосъя гур пуктыны вырисько, уг 
быгатӥськы. Настя апай шӧдӥз, лэся, мынэсьтым уйгыртэмме. 
- Мар-о тон озьы выриськод? - вазиськиз со мон шоры. - Вай али книгадэ, учко.
Сётӥ. Нотаосъя ӝог гинэ гур пуктӥз, мыным кырӟаса сётӥз.
- Бен кытын тон дышетскид, Настя апай, кытын сольфеджировать карыны дышид?
- Елабугаысь семинариын, - шуиз Настя апай. 
Пайми. Нош кыӵе мусоесь но тыршисесь вал дышетскись пиналъёсмы. Али ке но син 
азям уло Дьяконов Рудольфлэн, Наговицына Риталэн, Иванова Розалэн, Ворончихина 
Светалэн, Васильева Геталэн, Мироноваослэн, Васильевъёслэн (кык братъёслэн), 
Бутолин Игорьлэн но мукетъёсызлэн (ваньзэс вераны уг луы пичи гожтэтын) 
тусъёссы. Кыӵе соос ваньзы визьмоесь, кылзӥськисесь вал. Соослэн пыдзы капчи 
вылэм. Быдэс улытозям котьку но сыӵе умой пиналъёс тупаллязы мынам классам.
Кез ёросын Александрово школаысь пиналъёсын смотръёс дыръя нырысетӥ интыосты 
басьтылӥм. Нош 1961-тӥ арын Ижевске асьмелэсь быгатонлыкмес возьматыны ветлӥм. 
Отын вал быдэс республикаысьтымы устоосыз хоръёс. Ми кыкетӥ инты басьтӥмы, 
нырысетӥ луизы Сарапулысь 16 номеро школаысь пиналъёс. Кыкетӥ инты басьтэммы 
понна сётӥзы вал 2000 манет премия. Со туж бадӟым узырлык вал соку. Ма басьтӥзы 
со коньдонэн школалы, ми ӧм тодэ ни. Со аре ик ми бертӥмы Можга ёросамы.
Али но Александрово шор ёзо школаын сыӵе ик быгатӥсесь, кылзӥськисесь но 
визьмоесь дышетсксьёс будо, дыр. Оло, соос мыным вазиськозы газет яке гожтэт 
пыр, вералозы асьсэлэн ӟеч ужъёссы, дышетскемзы сярысь. Меда пиналъёс инкуазез 
утён вылысь? 
Тодэ ваёнъёссэ гожтӥз 
ужысь ветеран, 
пиналъёсты дышетон удысысь отличник
Е. В. ПАВЛОВА. 
Б. Сибы гурт.
Можга ёрос.
4-11-1
Дышетӥсь - со артист
Постолысь туж трос гожтэтъёс вуылыны кутскизы редакциямы. Нош мугез дышетӥсьсы 
бордын вылэм. Н. В. Кабанова азьвыл драматической кружок бордын ужам, туэ 
литературно-творческой кружок но усьтоно кариськем. Нош пиналъёс тае гинэ 
возьмаса улӥллям, шӧдске. Мылысь-кыдысь кыстӥськизы соос выль удысэ. 
Газетысьтымы асьсэлэсь ужъёссэс адӟыса, мылкыдзы эшшо но бурдъяськиз. Нош 
библиотекаязы одӥг гинэ газет вуэ, сое шори уд люкылы ук. Трос малпаськыса ӧз 
улэ ни, ваньзы ик "Ӟечбур!" газетлы гожтӥськизы. Тӥни озьы Постолысь 
лыдӟисьёсмылэн лыдзы шуак йылӥз.
"Кылем арын "Ӟечбур!" кык адресъя гинэ вуэ вал, - шуэ Надежда Васильевна. - 
Одӥгез - милям семьяямы, мукетыз - библиотекае. Нош туэ та газет Постоламы ог 
ньыльдон пала вуэ, лэся".
Пусйымон соиз но, Надежда Васильевна - газетмылэн азьвыл юнкорез. Соин ик 
литературно-творческой кружок усьтыны малпанэз шӧдтэк шорысь ӧз кылды, дыр. 
Нош университетын ӵош дышетскем эшъёсыз сое тодо сцена вылын улӟытэм ролёсызъя. 
Со туж быгатыса шудылӥз Лазарь Перевощиковлэн "Ӧрӟипи" пьесаысьтыз Уӵы Колялэсь 
рользэ. Азьвыл тунсыкъяськем удысъёсыз али ке но соин ӵош вамышъяло, дышетӥсьлэн 
уроказ юртто. "Дышетӥсь - со артист ук. Котьмае тодыны, быгатыны кулэ", - шуэ 
Надежда Васильевна. Сыӵе луэмез понна ик ярато сое пиналъёсыз но. Котыр ласянь 
дышетӥсьсы кадь луыны тыршо. Школаязы соослэн арлы быдэ "Ӵук кизили" ужрад 
ортчытъяське. Пӧлазы тужгес но висъяськылэ 5-тӥ "б" классысь Алёна Семёнова. Со 
куинь пол финалэ потылӥз ини. Паймытъя кырӟаны, сценкаосын шудыны быгатэменыз. 
Нош Алёна Кабанова (Надежда Васильевналэн нылыз) гожъяз вал "Сяртчы луоз выль 
сямен" ужзэ. Та спектакленызы соос финалэ потӥллям.
Тӥни озьы бурдъяськем мылкыд пӧртэм вырйылъёсты басьтыны быгатэ.
А. ЕРМОЛИНА.
Туспуктэмез Ю. Ивановлэн.

4-12-1 
Ассэ ачиз дышетэ
Саша Шутовез Можга ёросысь Бадӟым Сибы гуртын Сашка гинэ шуо. Кин бен со сыӵе?, 
11-тӥ классысь дас сизьым аресъем огшоры пияш. Нош малы мынам соин тодматэме 
потэ тӥледыз? Малы ке шуоно, со туж тунсыко адями. Фамилиез но аслыз тупа, уга: 
удмурт сямен "маскарчи" шуэмез возьматэ. Сцена вылын быгатыса шудэмезлы тросэз 
синмасько. Таӵе адямиосты шер пумиталод. Саша арганэн но шудоз, ымзэ бадӟым 
усьяса, кырӟаса но лэзёз, резинкаен яке электротылэн шуккем мурт сямен, тэтчаса 
но кошкоз, Жириновский, Ельцин кариськоз.
Тани пиослы сӥзем ӝытын но ассэ умой ласянь гинэ возьматӥз. Серекъяса-серекъяса 
гуртоосызлэн кӧтъёссы ик шугомизы, лэся. Концерт бырем бере, ӧй чида ни, 
артистэн асэныз вераськоно кариськи.
- Саша, сцена вылын тон астэ дорад кадь возиськод. Кин луыны малпаськод 
азьланяз? 
- Актёр луэме потэ. Спектакльёсын но, киноосын но шудысал. 11-тӥ класс 
йылпумъяса, культурая училищеын дышетскыны малпасько.
- Нош маскаръяськон ужедлы кружоке ветлыса дышетскиськод-а?
- Мон асме ачим дышетӥсько, клубын ужасьёс но юртто. Мон серекъятӥсь передачаос 
вылын будӥ.. Али кельшо "Аншлаг" но "Шурики" телепередачаос. Удмуртъёс пӧлысь 
адӟем карисько Александр Баймурзинлэсь, ӟучъёс пӧлысь, Саша Бадровлэсь, 
бигеръёслэсь уг тодӥськы (серекъя.)
- Саша, кыӵе ролез шудэмед потэ?
- Адямиос шуо, тынад, пе, серекъятӥсьёссэ гинэ шудэмед луоз. Нош мон киллерез 
шудысал. Оскисько, тазэ эшшо но ӟечгес возьмато шуыса. 
- Нош ачид мар ке гожъяськод-а?
- Кылбуръёс гожъясько. 
- Школаын кыӵе урокъёс тужгес но кельшо, кудъёсыз уг?
- Физикаез, алгебраез яратӥсько, соосын ик малы ке журналын "куиньёсы" тросгес. 
Химиез уг яратӥськы - "витьёс" октӥсько, оломар ваньмыз йырин-чукин кошке, уг 
валаськы.
- Ма кариськод ваньмон дыръёсад?
- Гитараен, балалайкаен, гармошкаен шудыны моггетӥсько (йӧндырисько).
- Мар бен, Саша, туж бадӟым тау вераськемеддлы. Ӟеч йылпумъя школадэ, азьланьты 
дышетскондэ. Тон бордысь одно ик дано артист пӧрмоз.
Тӥни сыӵе тунсыко пияш будэ Сибы гуртын, ассэ ачиз дышетыса, гитараен шудыса но 
кылбуръёс гожъяса. Улонын таӵеослэсь адӟем кароно. Кинлэсь ке мае ке возьмаса, 
ӝӧлмаса ветлоно ӧвӧл. Аслыд бергано, котькытчы вуттӥськоно.
Света ИВАНОВА,
УдГУ-ысь студентка.
4-12-7
Ӟардонэн пумиськон
Мынам атае шунды ӝужамлэсь азьло султэ. Ӵемысь маде ӟардонлэн чеберез сярысь. 
Нош мынам сое адӟылэме ик ӧвӧл. Соин ик огпол, вазь ӵукна султыса, бакчаямы 
потӥ.
Лыз инмез пужыятэм кизилиос, толэзь бездӥллям ини. Огвакытлы дыр интыяз пумиз 
кадь: пуксиз тӧл, чалмиз омыр, атасъёс но чоръямысь дугдӥзы. Шокчыны ик кышкаса 
сылӥсько. 
Инкуазь озьы Шунды мумыез пумита, выль нуналэз ӟечкыла вылэм.
Тани шунды сайказ. Зарни сиосыныз синзэ зыраз. Собере пальпотӥсь ымнырыз ӝужыт 
гурезь сьӧрысь адӟиськиз.
Ваньмыз сое чидатэк витизы, шӧдске, ошмесъёс но тулобурдоос шулдыр гурен 
кырӟало, сяськаос ымнырзэс лысвуэн мисько. Бус шур сьӧры каллен выдэ. Кема сылӥ 
мон инкуазьлэн чеберезлы паймыса. Ӟардонэн нырысьсэ пумиськемме табере ноку уг 
вунэты ни, дыр.
Авторез нимтулзэ гожтымтэ. 
4-12-8 
Мынам убое
Сяська будэтӥсьёслы дэмланъёсы
Сяська - инкуазьлэн, музъемлэн чеберез. Но сое сад-бакчаын будэтон шундыен зорез 
гинэ уг, трос тодэмез кулэ каре. Трос аръем сяськаостэс лымы шунам бере 
ӝикыталэ: мимала куаръёслэсь сузялэ, котырысьтыз жуг-жагзэ октэ, выжыоссэ вӧсь 
карытэк, музъемзэ бугыртэ. Модосаз бычыосыз кылдӥзы ке, будослэсь, выжы котырзэ 
пенен пазялэ, со утёз сяськадэс губи висёнъёслэсь.
* * *
Сяськаостэс кидысэн кизьыны малпаськоды ке, шуныт азе инты висъяса, оштолэзь 
пумын яке куартолэзь кутсконын убо дасялэ. Гыбед сюй понэ, пень пазялэ но копам 
интыдэс мажсалэ. (Выль кыед сяськаослы уг тупа.) Кидыстэс озьы кизе, ӵем но шер 
но медаз лу. Ву кисьталэ. Тулыс куазь кӧс улӥз ке, сюй тӧламлэс, убодэс 
плёнкаен шобыртэ. 
* * *
Нырысетӥ сентябре георгинъёстэк сяська керттэт бездыт адӟиське. Кызьы утялтоно, 
будэтоно та йӧноосты? Тол ӵоже тӥ выжыоссэ гулбечын (мурӝолын) возиды. Оштолэзе 
соосты шунды шоры поттон дыр вуиз, кынманы медаз шеде. Выжыос вылэ кӧня ке сюй 
пазьгоно. Шуныт азьын бычыос нырсалозы. Уйёсы кынтылэмысь, пужмертэмысь дугдӥз 
ке, сяська выжыостэс убое мерттоно. 
* * *
Бакчаын будӥсь узыез котькин но яратэ, дыр. Но со дырез, утялтэмез кулэ каре.
Лымы шунам бере, узы убодэс вуж пудъёсызлэсь, куаръёсызлэсь сузяно, сюйзэ 
бугыртоно. Шуныт вуэмъя, кузь ныро бӧчыос (долгоносикъёс) узы пудлэн сюлмаз ик 
каръясько. Сяська бычыос кылдо ке, соосты шырӟыло, сюпсё. Сыӵе узы трос емыш 
сётоз на меда? Соин ик узы модосъёсты лябгес марганцовка суретэн пазяно. 
Тушмонъёсты кышкатыны яралозы пӧсьтурын яке тамак пызь но. Нымы-кибыос медаз 
алялэ шуыса, бакчадэс жаг-турынлэсь уте, ӵемгес урылэ. Сяськаосыз пезьдэмлэсь 
азьло кыед ву кисьталэ.
Нош кызьы нюръяськоно узыез пиртэш карись сад куалялюльыосын? Узы модосъёс вискы 
интыен-интыен толь юдэсъёс, пыкмем ӟустариос тырылэ. Уин узы котырын йыртэмась 
куалялюльыос нуназе зын ӟустари улын шутэтско, пеймытэз, нюрез ярато. Соосты 
толь улысь октэ но курегъёстылы сётэ.
В. И. КОЛЕСНИКОВА.
Куртчум-Норья гурт.
Пичи Пурга ёрос. 
4-13-1
Студентъёслэн тулыссы
Удмурт кун университетлэн "Студентъёслэн тулыссы - 2001" нимо фестиваляз 
учкисьёс ӝутскем мылкыдын лыктӥллям. Шумпотон кизилиосын тырмем синъёсазы учкыса 
ик шӧдӥське ини соос маке но туж тунсыкозэ но паймымонзэ витё шуыса. Кылсярысь, 
1-тӥ курсын филологе дышетскись Гуля Касимовалэн пыр-почгес тодматскемез потэм 
студентъёслэн улонэнызы, "висьыны" лыктэм "Кыкетӥ ӝуждала" командаысь эшъёсыз 
понна.
Ӝытэз нуисьёс Миша Пименов (психолого-педагогической факультетысь 4-тӥ курсын 
дышетскись) но Жанна Павловская (социологияя факультетысь 5-тӥ курсэз 
йылпумъясь) сцена вылын асьсэды туж капчи возьыны быгатӥзы. Сценарий гожтыны 
милемлы юрттӥз тодмо "Орлёнок" лагерь вӧзыгес ик интыяськем "Комсомольской" 
нылпи лагерьын организатор луыса гужем ужаммы,", - серектӥзы Мишаен Жанна.
Жюриын вал УдГУ-лэн проректорез В. А. Байметов, Ижевскысь П. И. Чайковский нимо 
муниципальной камерной хорысь кырӟась О. В. Разина, Удмуртиысь калык культурая 
но творчествоя центрысь министрлэн воштӥсез Н. М. Колчина но та удысын ик 
ужась Е. П. Бывальцева, Егитъёсын ужанъя кун комитетысь валтӥсь специалистъёс 
В. Г. Ашихмин но Н. А. Мохова.
Фестивалез усьтӥз Катя Вараксина (ИИЯЛ) "Одӥг музъем вылын" кырӟанэн. Та нуналэ 
кырӟазы на Настя Черняева (ИСК), Виолетта Набиева (удмурт филология), Саша 
Санников (ИЭиУ), шоу-группа "Студэс" но Костя Козлов (ППФ), кудӥз быдэстӥз 
аслэсьтыз бырем "Курсклы" сӥзем гожтэм кырӟанзэ.
Учкисьёсты паймытӥзы "Каприз" нимо эктонъя театр (ИЭиУ) но Коля Ильин (ИФ). Коля 
вераськиз Ленинлэн, Сталинлэн, Брежневлэн, Горбачёвлэн, Ельцинлэн, 
Жириновскийлэн, Гайдарлэн, Лебедьлэн, Явлинскийлэн, Путинлэн но покчиезлэн 
Пресняковлэн куараосынызы.
Учкыны лыктэмъёс малпаськонэ усемын вал: кинлы меда шедёзы вормон лавр куаръёс? 
Но фестиваль йылпумъяськытозь эшшо кык нунал кылиз на вал.
Мукет нуналаз паймытӥзы сьӧд дӥсен потэм "Орлёнокъёс". Таиз вожатойёслэн 
командазы. Эктэмзы мылкыдэз ик лӧпкытӥз. Бератаз ваньзэсты ик абдратӥз на 
пуньыосын гуръёс пуктылэмзы но. Огезлэн, шудӥсьсылэн ӟырдам киосызлы чидатэк, 
лэся, пуньыез ик шори чигиз. Озьы ке но, артист ӧз йыромы - выж вылэ йыгаса 
шудыны ӧдъяз.
Кӧтъёссы ик шуг луытозь серекъязы журналист Маша Пушкарёвалэсь но Оксана 
Метелёвалэсь сцена вылэ потамзэс. Соос возьматӥзы "Пинал ӧвӧл" нимо диалогзэс.
Фестивальлэн берпуметӥ ӝытаз ошмес кадь жильыртӥсь кичабонъёсын пумитазы УдГУ-
лэсь ректорзэ В. А. Журавлёвез. Студентъёслы со сӥзиз выль азинсконъёс, капчиесь 
вормонъёс, тазалык, быдэс тулыслы капчи но задор мылкыд. Студентъёслэн кыкетӥ 
сессизы ортче арлэн самой шулдыр вакытаз - гужем. Соку егит мылкыд лопыръя, 
сюлэм яратонэн пачыла. Та вакытэз но возьматытэк ӧз кельтэ социальной 
коммуникацияя ёзын дышетскисьёс. Собере кырӟаз Наташа Полякова, филология 
факультетлэн "Кыкетӥ ӝуждала" командаез мунчо сярысь йӧспӧртэм возьматонэн 
тодматӥз.
Куинь нунал кыстӥськись ӵошатсконлэн вормисьёсыныз тодматӥз В. А. Байметов.
Кырӟасьёс пӧлын висъяськизы Катя Вараксина, Олеся Мохова, Наташа Полякова, 
Альбина Равилова, Костя Козлов, Саша Санников но Женя Обухов. Эктонын ушъямонэсь 
луизы шоу-группа "Студэс", "Орлёнок" но "Миф" (МФ) командаос. Вераськон жанрын 
нырысетӥ инты сётӥзы журналистъёслы, кыкетӥ - Ирина Мерзляковалы, куинетӥзэ - 
Коля Ильинлы. Аспӧртэмлыко луэмзыя нош ик вормизы "Орлёнокъёс" но "Студэс" шоу-
группа. Зэмос актёръёсын лыдъязы ФСК-лэн, ИСК-лэн театрысьтыз студентъёсты, 
"Кыкетӥ ӝуждалаез", "Альянс С"-эз (таосыз кыкетӥ арзэ ини азьпал радэ потӥзы, 
Чебоксарыын ортчись егитъёслэн фестивалязы но пыриськизы. Вормисьёс "Аксион" 
культура юртын ортчоно гала-концертэ билетъёс сётӥзы. 
Вератэк кельтэме уг поты шумпотэмме но: кыкез журналистэ дышетскисьёсмы вормисе 
потӥзы. Табере Маша Пушкарёва но Оксана Метелёва республикамылэн фестиваляз 
ӵошатскозы.
Света НИКИТИНА.
УдГУ-ын душетскись.

4-15-1
Эктӥсько вить арескысен
Маша Грязеваез нырысьсэ адӟылӥ. редакциямы вуылыкуз (анаез соку "Ӟечбурын!" ужа 
вал). Соку ик туж синмаськи но яратӥ та етӥз, кыллы шаплы, муспотон нылашез. 
Куинь аресказ удмурт кылын но, ӟуч кылын но чебер вераськемез, котьмаин 
тунсыкъяськемез, ассэ возьыны быгатэмез монэ соку туж паймытӥз.
Али Маша дышетске ни 5-тӥ классын Ижысь 86 номеро школаын. Азьвыл кадь ик чебер, 
учкымон, сямыз но воштӥськымтэ, сыӵе ик чупрес, котькытчы вутске.
Лыдӟисьёсмылы но та нылаш тодмо ни, дыр, солэн куараез ӵем гинэ радио пыр 
чузъяське. Анаеныз Людмила Грязеваен (Вахрушеваен) ӵош соос "Тазалык" 
радиопередачаез нуо.
- Пиналъёслы та выллем передачаос ӧй вал на. Сое ми анаен нылыныз вераськон 
выллем ортчытыны малпам. Нырысь Маши ӧзгес дӥсьты, уг быгаты шуыса кышкатскиз, - 
тодаз вае Людмила, - али дышиз ни кадь.
- Анае шуиз, ойдо, пе, вакчияк сценка пуктом, пӧрмиз ке, куараед радио пыр 
чузъяськоз. Нош ужамед понна мон тыныд ӧжытак коньдон тыро. Соглаш кариськи. 
Уждунэлы но шумпотӥсько, журналъёслы, закладкаослы, заколкаослы, значокъёслы 
анайлэсь уксё куроно ӧвӧл ни.
- Передачаостэс дасякуды, аслыд маке выльзэ усьтӥськод-а? Кыӵе темая вераськонды 
тужгес тунсыко потӥз?
- Адямиослэн уйвӧт адӟемзы сярысь. Изисьлэн пыдъёсыз шобыртымтэ ке, со ӵемысь 
кот турын пӧлтӥ, я кезьыт вуэтӥ мынэшуыса вӧта, пе. Мыным со тунсыко потӥз. 
Котькуд передачаысь маке выльзэ, аспӧртэмзэ тодӥсько.
- Анаед ӝожтӥське, ваньмон дырыд туж ӧжыт шуыса. Радиоын ужамед сяна, бальной 
эктонъёсын выриськод, шутэтскон нуналъёсы но конкурсъёсы ветлоно луиськод.
- Бен. Эктӥсько ни вить арескысен. Арнялы быдэ сямен пӧртэм конкурсъёсы 
пыриськиськом. Санкт-Петерьурге, Набережные Челные но мукет городъёсы вуылӥ ни. 
Тужгес бадӟым вормонэ герӟаськемын Воткинскен. Отын ортчем бальной эктонъёсъя 
элькун ӵошатсконын 1-тӥ инты басьтӥм.
- Котькытчы вутскыны тыршемед дышетсконад уг-а люкеты?
- Туж ик уг кадь. Дышетскисько "4"-лы но "5"-лы. Кельше физкультура, секытэнгес 
сётӥсько естествознание но математика.
- Будэм берад кин луыны малпаськод: атаедлэн пытьы кузяз мынод но, тележурналист 
луод-а яке, анаед сямен, радиоын ужалод? Оло нош мукетызлы улондэ сӥзёд?
- Туж тросэз удысъёс сюлэмыя: визажист, парикмахер, юрист, хореограф. Кудзэ 
быръёно, уг тодӥськы. Но улонме журналистикаен герӟаме уг поты, анае, атае шоры 
учкыса адӟисько, макем секыт ужзы, ӵемысь доре вуыса но со сярысь 
малпанъёссылэсь мозмытскыны уг быгато.
- Ваньмон дырдэ кызьы ортчытӥськод?
- Лыдӟиськисько. Туж кельшо приключенческой произведениос. Яратӥсько А. 
Преображенскийлэсь, Э. Успенскийлэсь гожъямъёссэс. Ксюша эше доры ветлӥсько, со 
милесьтым кыдёкын уг улы, мон сямен ик, бальной эктонъёсын выре. Ог-огмылы 
мылкыдмес, сюлэмшугъяськонъёсмес усьтӥськом, оломар сярысь но вераськиськом.
- Анаед, атаед гуртын вордӥськемын. Нош тыныд бырйыны луонлык сётысалзы ке, 
городын-а, гуртын-а улысалыд?
- Гуртэ песянае доры ӵем бертылӥсько, эшъёсы но отын трос гинэ. Дэмен шудӥськом, 
пыласькыны ветлӥськом, толалтэ куасэн нискыласьком. Пудо возьманы косэмзы гинэ 
уг кельшы, лумбыт соосты чакласа, сьӧразы ветлыса жадиське. Гуртын омыр чылкыт, 
инкуазез чебер, но улысал мон городын. Ваньмыз матын: магазинъёс, театр, школа. 
Кытчы ке мынэмед потӥз - троллейбус, автобус вуттозы. Вуэд - коркаяд, пу 
пыртонэз ӧвӧл. Нош гуртысь эшъёсылы школае кӧня ке иськеме пыдын мыноно, гуртэ 
сётэм ужзэс быдэстэм сяна, юрт котырын ужано, пудоосты утялтоно луэ на. 
- Синмаськылэмед вань-а ни?
- Вань. Али но кык пияшъёслы синмаськисько, кудзылы юнгес, уг валаськы. Куспамы 
эшъяськиськом, но мылкыдме соослы уг вераськы, кельши ке, асьсэос сюлэмзэс мед 
усьтозы. 
И. ЛУКИНА.
4-20-3
Вунонтэм нуналъёс
Али гинэ вал кадь со. Ӵукнаысен ӝытозь книгаос, тетрадьёс сьӧрын пукылӥ, Можга 
педучилищее пырыны дасяськи. Сюлмаськеме юнме ӧз луы. Мыным удалтӥз, студентка 
луи. Педучилищеын мон поннап ваньтмыз выль вал: дышетӥсьёс, эшъёс, урокъёс, 
сюлмын но выль кырӟан чузъяськиз.
Дыр каллен ӧз вамышъя, дыртӥсь тудву сямен бызиз, ӝоген 4-тӥ курсэ вуттӥз. 
Эшъёсынымы ӵош ӧм шӧдылэ могӟетъёсты, лек сӥльтӧлъёсты. Тани кун практикамес но 
ортчим ини, дышетӥсьлэсь ужзэ рос-прос шӧмъямы. Азьпалан витё кун экзаменъёс. 
Нош тужгес но секытэз - люкиськон: яратоно дышетӥсеныд, эшъёсыныд. Тае малпаса 
ик пушкын маке но бугырске кадь. Нуналъёсмы туж шулдыр ортчылӥзы. Котькуд сэрег 
маке но тодэ вайытэ. Дышетӥсьёсын одӥг кыл шедьтылӥм, соос ми шоры оскыса 
учкылӥзы.
Педколледж студентъёслы туж трос сётэ: улонэз но валаны, нылпиосты гажаны но 
яратыны дышетэ. Нош нылпиос со асьмелэн ӵуказе нуналмы.
Дышетӥсь луыса ужаны ке ӧз кылды, мон ноку но уг жаля Можга педколледжын 
дышетскемме. Со пыраклы мынам сюлмам кылёз. Та юртын ортчытэм вунонтэм 
нуналъёсме котьку но шуныт, югыт малпанъёсын гинэ тодам ваё.
Оля БАЙСАРОВА,
4-тӥ курс.
Можга педлколледж.

4-20-4
Шонер вамыш лэсьтӥ
Дышетскон удысам йлпумъяськиз берпуметӥез кужымме эскерон. Кык толэзь ас школаям 
дышетӥ, пиналъёслы пичи ке но выль тодон-валанъёс сётӥ. Вань классъёсын 
шаертодонъя урокъёс ортчытӥ, нош нырысетӥ классысь пиналъёслы огдырлы кыкетӥ 
анай но луылӥ. Нош али мынам тӥледлы но пиналъёс пӧлын ужам мылкыдме гожтэме 
потэ. Туж кельшиз мыным дышетӥсь-шаерчи луыса бадӟым классъёсын ужаны. Школаын 
дышетскыкум ик мыным та предмет кельше ни вал, тунсыко потыса кылзӥськылӥ 
дышетӥсьмылэсь асьме шаермы, вашкала улон, адямиос сярысь верамзэ. Син азям ӧй 
пуктылы вал аслам дышетскем школаям, урокъёсме вераны доска доры потам интыям 
куке но ачим пиналъёсты дышето шуыса. Маиз мыным кельшиз таяз практикаын?
Можга школаын урокъёс сётъякум куалекъясько на вал, гуртын с ямы ышиз кадь. Ӵош 
будэм эшъёсы, бадӟым классъёсын дышетскисьёс, монэ сак кылзӥзы, урок нуыны 
юрттӥзы. Дас одӥгети классысь пиосын гинэ шуггес вал. Егит практикантка соосты 
дышетэ бере, пичияк ке но чеберъяськоно ук. Ма соос мынэсьтым кык арлы гинэ 
егитэсь ай. Озьы ке но, тунсыко мадемез кылыса, ымзэс усьтыса ик кылзо. Дас 
одӥгетӥ классысь пиос гинэ ӧвӧл, мукет классъёсысь но пиналъёс шып сылӥзы. Нош 
макем кельшылӥз дышетскисьёслы ортчемзэ тодэ ваён дыръя яке выль темаез 
юнматыку, пӧртэм шудонъёсын шудыны, командаосын ӵошатскыны. Шудонъёсты уже 
кутыса, пиналъёс выль темаез ӟечгес валало. Дышетскитсьёслы кельшиз кузэн-кузэн 
ужаны, тектъёс гожъяны, кроссвордъёс лэсьтыны, мадиськонъёс тодылыны, легендаос, 
выжыкылъёс кылзыны. Урокын, ялан дышетӥсь гинэ вераськыса, пиналъёс жадё. Соин 
ик вань темаосты валэктыны нылпиосты асьсэды дышетылӥ, куд-ог классъёсын 
докладъёс лэсьтылӥзы. Озьы пиналъёслэн вераськон кылзы узырме но воля. Валаса но 
ӧй вуы ужан нуналъёсылэсь ортчемзэс. Пиналъёсын люкиськыны туж ӝож вал. Эшшо но 
эшшо соосын ужасал на.
Мон туж шумпотӥсько дышетӥсьлэсь ужзэ быръемелы. Солэн удысэз туж секыт ке но, 
мынам сюлэмыя. Оскисько, шонер сюрес кузя вамыштӥсько шуыса.
Таня ХОДЫРЕВА.
Можга педколледж.
4-20-6
Владимир КОТКОВ
ВЕРОСЪЁС
Туспуктон
"Туспуктон" кылэз туж капчиен малпаз "Инвожо" журналын ӵош ужась эше, суредась 
Юра Лобанов. Тодӥськоды ук - куншетлэн но кунпуслэн авторзы, со понна ик солы 
сётӥзы Кун премилэн лауреатэз ним но, "Куншет" но "кунпус" кылъёс - солэн ик 
малпамез, дыр. Пумиськыку юано вал. Нош "туспуктон" - ӵап солэн! Ка-ак лякиз 
Лобанов со кылэз, таки нокин воштыны но, ишкалтыны но ӧз быгаты ни удмурт 
кылысь. Алнаш ёросысь Байтэрек школаын дышетскыкумы ик та кылэз малпано ни вылэм 
солы. Соку веросам но ас вакытаз "туспуктон" шуонэз пыртысал. Но азьлон со 
патретэ пуктон вал, фотоаппарат, иське. Нош снимокез партрет шуылӥзы. Таиз но 
сокем урод уг кылӥськы, но ӟуч шӧмо.
Гидкуазьысь курегъёсмес партретэ пуктылыса поттылыны дышем берам семья котыре 
кутски. Таоссэ но туспуктыны пӧрмытэм берам ини фотоаппаратме сьӧрам, школае 
нуи. Соку луэм учыр сярысь ик таӵе верос гожтӥ. Али мон сое "Дась лу!" газетысь 
вандэмысьтым, одӥг буквазэ но кельтытэк, татын сётӥсько. Малызэ бӧрысь валэкто.

Бордгазетысь снимок
Мишалы анаез фотоаппарат басьтэм: мед, пе, пиез дышетскоз снимать карыны. Сюлмо 
дышетскиз, юрттӥзы эшъёсыз но. 
Огпол, снимать карыны дышем бераз, пияш фотоаппаратсэ школае нуиз. Пиналъёс 
тросэз киязы кутылыса учкизы сое. Собере Мишаез асьсэды снимать карыны куризы.
- Тонэ фотографировать уз каре, - шудыса вазиз Коля Мишаез ёртыса улӥсь Женя 
шоры. - Бамыд укыр лемлет. Партретад сьӧд потоз.
- Мар тон али шуид? Ну-ну, выльысь вера-ай (ай частицаен кылъёс со вакытэ тазьы 
гожтӥсько вылэм ай), - мыжыксэ юн кырмиз пияш.
- Тонэ снимать уз каре шуисько, - кӧбератэк вераз Коля, Женялэсь жугиськон сямзэ 
тодэ ке но вал.
- Монэ, монэ уз каре? Косо. Дышето! - Колялэн гадь бордаз кырмиськиз эрказмем 
пи. Шонерзэ верано ке, Коллялэн но пурӟылӥсь сямыз вань. Куд-ог дыръя сир кадь 
лякиське со. Женяез донгыса лэзиз ини.
Жугиськонм пурӟиз. Атасъёс кадь тэтчась пиосты пиналъёс люкыны тыршо. Нош Миша 
жугиськисьёсты лушкемак гинэ фотографировать кариз но парта сьӧраз пуксиз: 
мынам, пе, уж лэсьтэмын.
Ӵуказеяз бордгазетысь наштаськем ымнырзэ адӟыса, кӧбераз Женя: "Бен, снимать 
карыса, ымныры сьӧд луэ вылэм".
Со дырысен та пиос востэммизы.
Соку мон куатетӥ классын дышетскисько вал. Нош фотоаппарат сярысь малпаськылыны 
кутски начальной школаез быдтэм берам ик, дышетӥсьмылэн пиезлэсь партретэ 
пуктонзэ адӟеме бӧрсьы. Соберегес ик тодӥ на, солэн таӵе сюлэм вӧсь карись 
арбериез кык шуыса. Одӥгез - "Смена", мукетыз - "Чайка". "Чайкаен" воксё но 
сизьымдон кык кадр лэсьтыны луэ! Соиныз - куамын куать гинэ! Ваньзэ тае тодӥсько 
ни мон Олег сьӧры (озьы солэн нимыз) ветлон сямен. Соку ик со одӥгзэ 
фотоаппаратсэ вузало шуиз.
Олег бензовозын ужа. Котькуд нунал ми вадьсытӥ кык пол ортче. Со пала но та 
пала, уже но ужысь, иське. Ми дортӥ каллен гинэ мынэ. Урамысьтымы дэриез уго 
ноку но уг бырылы. Тӥни соку, дэриетӥ каллен мыныкуз, солэн кабинаяз тэтчисько. 
Олег туж умой адями. Со дядяеным огъёз ке но, монэн эшеныз кадь вераське. Тужгес 
но яратӥськомы фотоаппарат сярысь бӧтьыртыны. Мое сое киям кутылытэк но дышисько 
ни кадь туспуктылыны. Олег тодэ ни, одӥгзэ фотоаппаратсэ басьтыны турттэмме. 
"Сменаез" вузало шуиз. Дас манет со сылэ. Нош "Чайкаез" воксё но кызь куинь 
манет! Малпанме анаелы но поттылӥ ини. Туж паймиз огшоры кортлэн сомында 
саламезлы. Коньдонмы люкаськиз ке, басьтом, дыр, шуиз. Нош малы ке со мында 
коньдон люканы ар но ӝыны куспын но ӧм быгатэ. 
Тани нош ик сӥзьыл вуиз. Урамысь дэри нош ик бензовоз колёса ышымон луиз. Нош 
Олег, дышем маке, отӥ жур! гинэ ортче. Кабинаяз пуксьыса но вуоно ӧвӧл. Мон сое 
огдырлы дугдытыны малпай. Лопата кутыса, поглян пытьые гу копай. Вот так! Татӥ 
озьы гинэ уд лоба. Точно! Бертыкуз тёп! пуксиз. Монэ но юрттыны ӧтиз на: донга, 
пе. Ма, донгасько. Лопата но поттӥ, гудэмъяськисько. Ачим быдэсак дэри луи ини. 
Глушительысь потӥсь ӵынэн йыры но усыкмиз - весь донгасько. Табере ини аслым 
ачим йыры кур луыны ӧдъяз. Мар-о карод на, асме ачим кутчай. Озьы ке но, собыдӟа 
бензовозэз гутёе пыртыны быгатӥ бере, поттыны но быгатоно. Поттӥ веть! 
Какалмеменым Олег ваӧзы но ӧй пуксьы ни, дорам пыри. Дядяе (агае) юа: "Мар, 
шедьтӥд-а фотоаппарат?" - "Кытысь?" - юасько. - "Колёса улысь..." - серекъя 
дядяй.
Со ӝыт оломарлы туж ӝог умме усиськем, но Олеглэсь куаразэ кылыса, соку ик 
сайкай. "Тани, ме, - койка вылам "Сменазэ" понӥз. - Коньдонэд луиз ке, тырод ай. 
Мынам со так улэ." Мон сокем соку шумпотӥ, Олеглэсь мынэсьтым но зол шумпотэмзэ 
бӧрысь гинэ валай.
Со мыным ваньзэ тупен-тупен валэктӥз - диафрагма, выдержка, 
светочувствительность сярысь... - дядяе сьӧры клубе но ӧз поты, ява. Ӝытбыт 
валэктӥз. Ваньмыз валамон кадь, табере практика кулэ.
Практикае кема кыстӥськиз. "Смена" бере кызё пала фотоаппаратъёсы вал ини. Но 
соос ваньмыз кулэтэм луизы, "Кодак" сянаез. Химикатъёс магазинысь уд шедьты ни. 
Ӧвӧл ни сьӧд-тӧдьы плёнкаос но. Ма, собере партрет пуктонлэн но шумпотонэз 
быриз. Соин вож нуны гинэ но вырыны быгатоз. Кнопказэ зӥб но - тӥни. Ваньмыз 
отӥыз - автомат. Пуктылэм плёнкадэ почтае сётӥськод но, кӧня ке улыса, тыныд 
туспуктэмъёс ваё. Тӥни озьы фотобумага вылэ тодмо ымнырзэн каллен но каллен 
потыкуз дыръя кадь шумпотон ӧвӧл ни. Мыным куддыр ӝожмыт луэ6 пие сыӵе 
шумпотонэз уз тоды ни шуыса. Оло нош, солы пичи дырысьтым выллем мурӝолысь 
фотолаборатория нерге лэсьтоно?

Пунэмзэ берыктон
Пичи дыры туспуктогн котырын быдэсак ортчиз.Соин но соку ини котьма шоры мукет 
синмын учкыны кутски. Тӥни со тузон пушкын пыласькись курегъёс шоры гинэ но. 
Яратоно уже ке ӧй луысал, мон соосты кышкатысал ни. Куд-огзэ снайпер синмыным 
мертаськыса, маин ке лэзем берам йӧттысал но, дыр. Нош али фотоаппаратлэсь 
кнопказэ ку зӥбонэз чакласько - йырзэ курег пушказ ватыку яке бурдыныз 
шонскыку, яке сое атас зӥбыку. Азбарысьтымы котькуд курегез тодмасько ини. Ма, 
соос ваньмыз патретэ уськытэмын ни. Ваньмыз ки пыртӥм потэмын, проявитель-
закрепитель пыртӥ, шуисько. 
Тӥни со фотоаппарат улон шоры учконме воштӥз. Умойзэ но, уродзэ но синйылтыны 
кутски. Сыӵе шедьтосъёсме мед тодозы шуыса, лэся, снимокъёсме газетэ лэзьяны 
кутски. Тани куашкан калэ вуэм кебитмес туспуктӥ вал, "Шекыче" порттӥзы. Куака 
кар тус липетэз, куашкан калэ вуэм борддоръёсыз... Текст шуонзэ но ачим ик 
гожъяй. Шекычъёс сое эшшо но серемесгес кариллям на ай. Колхоз бригадирмес туж 
зол серекъяллям. Ма, нимтулзэ поттылӥ вал. Эшшо ке олокытысь-марысь тодӥллям на 
бригадирмы аслыз сандык кадь корка пуктэмез сярысь. Тӥни со котыртӥ ик 
"бергаллям", кебитэз тупатон борды ке киыз уг вуы шуиллям. 
Сыӵе адями, бригадир Покей, йырсиезлэсь но ӵыжыт ымныро воргорон, ымысьтыз шукы 
потымон кесяськыса, дорамы пыриз. Кияз - векчи ньӧр.
- Татын-а тон, кучапи!?
Вань кесяськемысьтыз та кылъёсты гинэ гожтыны быгатӥсько. Кылемез пельдэс 
вандоз. Нош мыным ваньзэ кылзоно луиз. Огкутскемен ньӧрзэ но веръяй на. Тӥни 
озьы со мыным пунэмзэ берыктӥз. Бӧрысь но соин вожминъяськылӥм на. 
Огнуналэ вань дышетскисьёсты бусые картофка октыны поттӥзы. Бригадир но, ява, 
чакласькыны лыктӥз. Та вакытэ со выль корказэ быдэстӥз ни вал, корка пырон но 
кариз. Табере мотоциклэныз гань-гань ворттылэ. Ай, уд но оске, ява, корка пырон 
вакытаз воргоронъёсты кебитэз выльдыны косэм. Со вал мынам нырысетӥ вормонэ. Нош 
Покей озьы уг лыдъя вылэм. Тани со куинь муртэ трактор уробое пуктӥз но картофка 
гуэ келяз: тырмем тракторъёсты ӝоктоно, пе. Быръем пиналъёс пӧлын мон но вал. 
"Татын ужалоды, шуг ӧвӧл", - кескич учкиз со шорамы. 
Тыро тракторъёс туж шер вуо. Асьтэос тодӥськоды ук кыӵе со колхоз ужез. Одӥг 
чурзэ потӥзы ке, одӥг час шутэтскозы. Нокин дыртытӥсь ӧвӧл. Зоред но али уг 
адскы. Тӥни озьы ми но гыльым-гальым выриськом. Тэк улэмлэсь картофка но пыжыны 
кутскимы. Мон эшъёсме партретэ пуктылӥсько. Бригадир вуылэ, номыр уг шуы, кошке. 
Тӥни озьы быдэс арнязэ ужамы. Эшъёсмы бусыын бичасько, нош ми соослэсь октэм 
картофказэс гуэ ӝоктӥськомы. Бригадир ваньмызлы - пичиезлы но, пересезлы но - 
ужан нунал пусйылӥз. Нош картофкамес быдтэм берамы, ваньместы люкаса, лычсузьыса 
ялӥз:
- Картофка октонмес нокыӵе ыштонъёстэк быдтӥм. Ваньдылы тау! Ужамды пусъемын, 
коньдон басьтоды. Куинезлэсь гинэ ужамзэс пусйыны уг быгатӥськы.
Милемыз калык азе поттэ но валэктэ:
- Картофка гу котырын шудыса гинэ улӥзы: картофка пыжизы, партрет пуктонэн 
выризы, оло нош, чекарджаен но шудӥзы. Озьы ужаса кыдёке уд вуы. Мон таослы одӥг 
нуналзылы но коньдон тырыны уг быгатӥськы.
Эшъёсылэн анайёссы маке вераны турттӥзы ик, картофка ас понназ гуэ ӧз пыры но 
шуизы, но соосты нокин кылзӥсь ӧз луы ни. Нош анае воксё но синвуаськиз. Пал кыл 
но куаретыны ӧз быгаты. Асме но тышкаськиз, капчизэ, пе, утчаса ветлськод. Мон 
отчы ӧй куриськы ук. Собере кин-о секытсэ гинэ утчаса улэ? Таӵе малпанме верай 
но, анае еэн йӧттӥз на. Мон сое валасько: анае нырысьсэ вите вал уго кык мурт 
понна коньдон басьтонэз. Малпанэз ӧз быдэсмы бере, е бычыен дышетоно кожаз.
Тӥни озьы юригадир Покей пунэмзэ анайлэн киосыныз мыным берыктӥз.
Нош трудодень-коньдон сярысь ке верано, эшъёсылэн ужамзы тетрадь-ручка басьтыны 
гинэ тырмиз. Нош газетысь гонорар сомында вуиз - анае шумпотэменыз мыным кык 
дэрем басьтӥз.

4-23-3
Абитуриентъёс, малпаське!
Удмурт кун университетын арысь аре абитуриентъёсын пумиськонъёс ортчытъясько. 
Вуоно студентъёс тодматско пӧртэм факультетъёсын, экзаменъёслы куронъёсын, 
сюлэмшугъяськытӥсь юанъёссылы валэктонъёс утчало. 
Мон но кык ар талэсь азьло востэм гинэ ветлӥ университетлэн коридоръёстӥз, куке 
одно ик соос мынам луозы шуыса, борддоръёс шоры юн оскыса учкылӥ. Соос выллем ик 
тунсыкъяськыса лыдӟылӥ бордгазетысь ялонъёсты но куронъёсты, вожъяськыса учкылӥ 
туспуктэмъёсысь студентъёс шоры.
Абитуриентъёс шоры учконъям, кин ке но вазись луиз: "Не подскажите, где 
находится 108 кабинет?" Удмурт акцентэз шӧдыса, вордскем кылыным вази. Кыл 
бӧрсьы кыл, веран бере веран - тӥни озьы журналистика факультетлэн удмурт 
отделенияз пырыны малпась студенткаен тодматски. Оля шоры учкисько но асме тодам 
ваисько. Мон но сыӵе ик буяськымтэ вал, кузь йырсие огшоры гинэ заколкаен 
кутэмын, модалы тупасьтэм дӥсе но кремен ӵушылымтэ пыдкутчанэ... Мон но могаса-
могаса вераськи, мае ке шонертэм верамелы быдэ ӵыжектылӥ, возьдаськеменым йырме 
ошыса, кыштыр гинэ студентъёс шоры учкылӥ. 
Оля монэ эшеныз тодматӥз. Лена удмурт филологияя факультетэ пырыны малпа.
Вуоно улон но ужан интызы сярысь нылашъёс уг сюлмасько на. Соос азьын одӥг 
малпан: эшъёсыдлэсь бере кылёнтэм вылысь, одно ик кытчы ке но дышетскыны пыроно.
Люда нимо тодмое 5-тӥ курсын дышетскыкуз гинэ аслэсьтыз янгышсэ валаз. 
Филологияя факультетэ анай-атаезлэн но дышетӥсьёсызлэн косэмзыя пырем вылэм со.
Соин ик, гажано абитуриентъёс, быръем удысты сярысь эшшо огпол туж юн малпаське 
на: кулэ-а со тӥледлы? Цюлэмдыя бырйиды-а? Чидалоды-а азьпал улондэс солы 
сӥзьыны?
Света КАЛУГИНА,
УдГУ-ысь студентка,
ИИ курс.
4-9-1 
Кизили гуръёс эпофинъёсты вырӟытӥзы
Оштолэзьлэн кызь тямысэтӥ нуналаз Пичи Пургаысь библиотекаын "кизилиос" 
воректӥзы. Ӵап та нуналэ асьсэлэсь "вордскемзэс" пусйыны чаклаллям нылпиослы 
потӥсь "Кизили" журнал но "Пурга кизилиос" огазеяськон. Пургаысь кизилиосты 
бӧрысь "Пурга гуръёс" шуыса нимазы ке но, 10 ар талэсь азьло нырысетӥ 
вамышъёссэс соос кизили нимын мытӥзы. Оло нош та нимзы ик сокем яркыт воректыны 
юрттӥз. Огшоры литературно-творческой кружок лулчеберетъя огазеяськонлы пӧрмиз. 
Бӧрысь татын усьтӥзы на "художественной искусство", "театр", "крезьгур" 
ёзэтъёсты...
Нырысь ик та лыдӟиськон залын "Кизили" журналлэсь ӝужан но пиштон сюрессэ 
югдытӥзы. Люкаськемъёс видеофильм учкизы, нылпиослы пӧртэм аръёсы потэм 
журналъёсын тодматскизы. Нырысетӥ нылпи журналлы инъет сётӥз Кузебай Герд. "Муш" 
нимын со вуиз пиналъёс кие. Бӧрысь кылдӥз на вал "Кузили" журнал. Со вить арзэ 
гинэ но пусйыса ӧз вутты. 1935-тӥ арын потыны кутскиз "Пичи дэменчи" журнал, 
солэн но улон сюресэз вакчи вал. Та бӧрсьы витьтон куать ар витёно луизы удмурт 
пиналъёс "Кизили" журналлэсь ӝужамзэ. Туэ со тани 15 арзэ пусъе ини. Редакциын 
ужасьёс асьсэлэн ужамзы сярысь мадизы. Журналлэн валтӥсь редакторез, писатель 
Ульфат Бадретдинов математика но грамматика удысъёсын герӟаськем шудонъёсты, 
задачаосты тодэ вайытӥз. Тужгес но визьмоосызлы, шаплыосызлы книга-приз басьтыны 
луонлык шедиз татын.
Редакторлэн воштӥсезлэн, тодмо удмурт кылбурчилэн Алексей Ельцовлэн улонэз юн 
герӟаськемын Пурга музъемен. Татысь со шедьтэм матысь но яратоно эшсэ - 
кузпалзэ. Пургаос сое кылбур гожъяны но бурдъяло вылэм. Та музъем вылын 
вордскем чуръёсыныз тодматӥз со люкаськемъёсты.
Нош суредась Василий Мустаев Пургала нырысьсэ вуэм. "Туннэ толалтэ сямен 
пелляське, буран. Тӥни малы Пурга шуо вылэм та черко гуртэз", - озьы пусйиз 
суредась син азяз пуксем суредэз.
Кылкутӥсь секретарьлэсь ужзэ быдэсъясь Люза Бадретдинова падежъёслы сӥзем 
кылбурзэ лыдӟиз. "Милям редакциямы сюрслэсь уно гожтэтъёс вуо, тросэз соос - 
Пургалась, - шуиз со. - "Малпанэн - 2100 аре", "Шаермылы - 80" конкурсын 
вормисьёс но та ёросысь". Яган-Докьяысь Юля Посадова, Улын Юриысь Катя 
Коновалова но куд-ог мукет юнкоръёс книга кузьымъёсын пусъемын вал.
Бен, синмаськымон усточиосты будэто Пургалан. Ваньзы соос асьсэлэсь 
кизилиоссэс, оло, ӧй но шедьтысалзы, ӧй но воректысалзы, ӧй ке луысалыз "Пурга 
гуръёс" центр. Кызьы меда со кылдӥз? Та сярысь маде Зинаида Яковлевна Титова: 
"Мылкыды мынам туннэ тудӟемын. 10 ар талэсь азьло тазьы ик люкаськимы вал. Кыӵе 
шаплы ортчо аръёс! Татын вордскем но будэм писательмы Семён Самсонов одӥг пол 
редакциямы пыриз но юаз: "Малы удмурт пиналъёслы одӥг но сэрегды ӧвӧл?" Пичи ке 
но сэрег усьтыны косыса, тышкаськыса кельтӥз со милемды. Соку ик удмурт кылъя 
дышетӥсьёслы вазиськи. Соосын кенешыса малпамы литературно-творческой кружок 
усьтыны. Ӵапак соку Никвлад Самсонов пыриз дорамы. Со тудву кужымо! Бордамы 
итӥськиз но валтӥз милемды. Табере бурдъёсмы паськытазы ни. Мукет удысъёсъя но 
интыосын факультативъёс кылдытӥмы. Милемын ужало артистъёс Раиса Нефёдова, 
Василий Ушаков, крезьгурчиос Николай Шабалин, Екатерина Антонова, кылбурчи 
Анатолий Перевозчиков. Таӵе центр шаерамы нырысетӥез луэ. Милесьтым адӟем карыны 
кутскизы ни алнашъёс, шарканъёс но дебесъёс.
10 ар ӵоже кизиличиос будӥзы ни. Тросэз соос журналистика удысэз бырйизы. УдГУ-
ысь студентка Лена Никитина вань юнкоръёслэн нимынызы тау кариз дышетӥсьёссылы.
Куноос пӧлысь тужгес но мӧйыез дышетӥсь В. И. Колесникова радлыко вераськонэз 
капчи но шулдыр ӧре выжтӥз. "Егит дыры тӥ пӧлын ортчиз, мусоосы. Ымныры гинэ 
кисыриё, нош сюлэмы мынам кабыз тӥляд кадь ик. Аляктэмды но мусо потэ. Мусо 
шузияськонды урод аляктонэ медаз выжы", - таӵе кылъёссэ вераз вань даурзэ 
пиналъёс пӧлын ортчытэм кышномурт. Мылкыдыз солэн зэмзэ но егит вылэм. Иваново-
Самарскысь кык пичиесь нылъёс кырӟанзэс мытэмзы бере, Вера Ивановна ӧз ни чида, 
соосын ӵош эктыны потӥз. Эктыку, пе, адямилэн мугорысьтыз эпофинъёсыз пото. Тӥни 
сыӵе капчиен котькыӵе удысысь тодон-валанъёссэ калыке вӧлмытыны быгатэ дышетӥсь.
Таня Соловьёва но Ирина Тёмкина песянай сярысь кырӟанэнызы ваньмызлэсь 
сюлэмъёссэс вырӟытӥзы. Соосын ужа ас удыссэ умой валась В. А. Эркишев. Виктор 
Анатольевич котькыӵе крезьгур инструментэн паймымон усто шудыны быгатэ. Тужгес 
но сэлэмызлы матын луо арган но баян гуръёс. Тросэзлы тодмо, дыр, солэн "Ялыке" 
ансамблез. Удмурт эстрадаын шӧдскымон чебересь вамышъёс лэсьтэ ини солэн пиез 
Анатолий Эркишев. Сыӵе ик усто кырӟаны быгатэменыз паймытэ Андрей Смагин. Туэ со 
"Ӝужась кизилиос" конкурсын дипломант луиз. Самарскъёслы кык полэс шуд зориз, 
шуыны луоз. Соос дорын усьтӥзы театральной искусствоосъя факультатив. Татын ужа 
тодмо удмурт режиссёр Василий Ушаков. Солэн театраз ветлӥсьёс И. Гавриловлэн 
"Эктытӥсь пастух" выжыкылэзъя сценка возьматӥзы.
Ужрадэз йылпумъязы Бобья-Учаысь арганчиос. Соос та нуналэ Ханты-Мансийскысь 
вуизы. Кузь сюрес но соосты жадьытымтэ, шӧдске. Екатерина Леонидовналэсь Надя 
нылзэ кампетэн алдаса гинэ сцена вылэ поттыло вылэм. Нош табере со кампеттэк но 
кампет кадь кырӟа. Быгатонлыкъёссэ азинтэ культурая училищеын. Бобья-Учаын выль 
арганчиоссы но будӥллям ини. Соос пӧлысь мон тодмай юнкормес Оля Фоминаез.
- Гожъяськондэ арганэн воштӥд-а, Оля? - юасько мон солэсь. 
- Олокытчы но вутскисько, - серекъя нылаш. - Мон али 10-тӥ классын дышетскисько 
ни бере, профессия быръён сярысь но малпаськисько. Сельхозакадемие дышетскыны 
ветлӥсько.
- Нош кырӟан но гожъяськон - со сюлэм буйгатонэд гинэ-а?
- Озьы кадь.
- Котькуд мылкыд карись муртэ арган кысканы дышетыны луэ-а мар-а?
- Милям Екатерина Леонидовнамы котькудзэ арганчи карыны быгатэ. 
Та вӧзы мар ватсалод на? Тӥни сыӵе усточиос уло Пургалан. Котькудзы соос - 
кизилиос.
А. ЕРМОЛИНА.
. Ӝытэз нуись Т. Маштакова, "Пурга гуръёс" центрлэн директорез А. Андрианов, 
"Кизили" журналлэн редакторез У. Бадретдинов. 
. 
Туспуктэмъёсыз Ю. Ивановлэн.
4-9-3
Ӝоген - Пасха

Шупа лымы бусыосын,
Визыласа шуръёс бызё,
Тӧдьы, бабля пилемъёсын
Яркыт шунды сиос шудо.

Ваньмыз туннэ чылкыт, югыт
Ваньмыз шудэн пачылмемын.
Пасха туннэ - Быдӟым нунал,
Оскисезлы юрттоз Инмар. 
* * *

Жингыртӥз гырлы
Быдӟым нуналэ.
Улӟем Христослы
Со сётӥз данзэ.

Гырлы куарая
Сайкиськиз дунне,
Шулдыр синъёсын
Учкиз котырзэ.

Вожектэ нюлэс
Бусыос сьӧрын,
Шулдыртэ инмез 
Зарниям шунды.

Вань улос туннэ
Данъя Иисусэз.
Быдӟым Арняе:
"Христос воскрес!"
Аня КОНДРАТЬЕВА.
Пычанка гурт.
Завьял ёрос. 

4-9-5
Быжме кыске, пельме чепыльтэ, кымысам чупа...
Коӵышлэн бӧтьыртэмез
Мяу! Кыӵе султэме уг поты шуныт азьысь. Пинал кузёе тани шобретсэ вылысьтыз 
сэрпалтӥз ини, озьыен, султоз. Собере валессэ утялтыны кутскоз но монэ, быжтӥм 
кыскыса, интыысьтым уллялоз. Котькуд ӵукна озьы дауртэ. Я, мон сыӵе 
шузияськонъёсызлы дыши ини. Быжы гинэ жаль потэ. 
Куддыръя пельме но чепыльтэ, кияз кутыса, топ-топ веша но быдэс мугоры ик зурка, 
собере йырме кырме но кымысам чоп! чупа.
Вӧсь каремезлы чидасько: пинал кузёме яратӥсько. Ма, кызьы,пе, уд яраты? Со ке 
ӧй луысалыз, кемалась сопал дуннее вуысал ни. Кузёе монэ пичи дыръям вукыремысь 
шедьтӥз но дораз ваиз. Сюдӥз, шуныт инты сётӥз, вӧзаз кӧлтӥз... Ми, коӵышъёс, 
быдэс даурмы ӵоже тодамы возиськомы ӟечез. 
Тӥни, кузёе синучкон азьын сылэ, ӵужалэс йырсизэ сына. Куке но солэн йырсиез 
сьӧд вал, кылем арын йыраз оломар шуккиз - кутӥз но буяз. Кельшем-а, мар-а аслаз 
тусыз: котькуд толэзь буяське, йырыз ӵуж чипылы укша.
Али сиськоз но школаяз кошкоз. Эх, монэ нош ик огнаме кельтоз ини. Куддыр отын 
быдэс нунал улэ, оломар лэсьтэ, соку мон ӧжыт гинэ мӧзмыса уг кулӥськы. Нош 
бертэ ке, дораз бызьыса мынӥсько но пыд бордаз зыраськисько. Пинал кузёе монэ 
ӝутэ но веша ук, веша... Асме вань коӵышъёслэсь шудоенгес лыдъясько.
- Комик!
Монэ чортэ, сиён сётоз, дыр. Ма, зэмзэ ик тӥни тусьтыям йӧл кисьтӥз. Мар меда 
йӧллэсь ческытэз вань та дуннеын? Сое куальккыса кӧт но тыре, сюлмаськонэ но 
кӧнякелы быре. Коӵышлэн сюлмасконэз ӧвӧл-а малпаськоды? Вань!, Коӵыш ке ӧз, 
сюлмаськы, кин-о сюлмаськоз кузёезлэн ческыт уммез пумысен? Пуны?! Ма, со ымзэ 
огпол усьтэ ке ни, вань калыкез сайкатэ. Возьмаськисько, пе, озьы. Кыӵе 
визьтэмез уйбыт утыса возьмаськоз? Тани ми, коӵышъёс, чалмытэз зэмзэ ик 
утиськом. Мон, кылсярысь, уез но уг изиськы, кузеё вӧзын кыллисько, нош ачим 
шыръёслэсь шоккетэмзэс пумен чакласько. Ӵаштыртыны кутскизы ке, кузёме сайкатозы 
ук!
Нош кытын-о со, школае кошкем, лэся, шӧдытэк но кыли. Мар-о табере каром? Уже 
но ӧвӧл, отчы-татчы ветлон сяна. Кыре потоно ке шат? 
- Мяу! Ӧсэз уксьтэ, бадӟым кузёос!
Осто, кыӵе шуныт ульчаын туннэ, шунды пиштэ! Тулыслэн кузёяськемез котькытын 
шӧдӥське ини: тӥни лымы шунам но, интыяз дэри потэм. Табере мыным музъем вылтӥ 
ветлыны уз яра ни ай: пыдъёсме саптало. Липет йылэ тубоно, отысен ваньмыз 
адӟиське.
- Эй, Тимофей! Мар-о ыргетӥькод? Ымдэ пытса!
Пинал кузёелы сое сётӥллям. Ми дорын кема уг на улы. Арлыдызъя мынэсьтым пичи. 
Вожъяське, вылды, шуныт коркан улэмелы: тӥни кыӵе шорам сиымон учке. Кузёе сое 
веть вешаса возе. Ох, мынам йыры кур луэ ук! Марзэ меда солэсь шедьтэ?
- Петруха! Чоръян гурдэ кисьты ай! 
Вот тазэ яратӥсько: усто кырӟа, сюлэмез ик бугыртэ, ява. Дораз васьконо, лэся, 
ӟечгес мед кыло. Ну, чоръяло атасъёсыд: огез кутске, мукетыз азьланьтэ, 
куинетӥез нош ик мытэ. Чылкак хорын кырӟасьёс кадь. 
- Эй, Варвара, тон мар эшъёстэ кокчаськод? Вӧсь уг луо кожаськод-а?
Петялэн кышноосыз пӧлысь со тужгес шаплыез. Олокытчы но нырзэ вуттэ. 
Тӥни отын дэриен-лымыен сураськем музъемез парсь мудэ, отын ик погылляське. Одӥг 
чылкыт интыез но кыльымтэ ни, копак нӧдэм. 
- Хрюшкина, о ини со гудэм сюеныд!
"Апчхи!" Тӧл шуккиз, лэся, та. Эшшо висьыны усёд, сэрытгес корка пыроно. Кытчы-о 
тазьы пыдме саптаськем?
Ух, кыӵе шуныт гур вылын! Тазьы нясь-нясь выдо но умме усё, собере сайкало но, 
кузёе бертэмын луоз ини. Тани вушйылӥсько-о-о...
Кӧня меда изиськем? Пинал кузёе но бертэм, шӧдске. Тӥни со, кыӵе ке книга 
лыдӟыса пуке. Мур-р-р! Веша ук монэ, кузёе! Ма, уг но шӧдылы-а мар-а монэ? 
Бордаз кӧня зыраськыса сылӥсько ни! Гижыосме мертчытӥ ке, тодо, тани. Мяу, ме 
тыныд!
Ой! Ӵыжыса лэзиз ук таид! Синъёсыз урмем кионлэн кадесь. Йыр быремлэсь азьло 
пегӟоно татысь.
Мар понна али монэ со обидиз? Та кузёослы умойзэ гинэ лэсьтыны тыршиськод, нош 
соос тыныд уродэн берыкто.
Я, телевизорез табере лэзиз, лэся. Мон яратӥсько рекламаез учкыны, уката ик - 
"Китикетэз". Отысь Борис нимо коӵышлы синмаськисько, ачим но тусыя солы укшасько 
уго.
Телевизор пыр мар-о меда али возьмато? "Простые истины", пе. Тьфу! Мынам кузёе 
яратэ со киноез, нош мыным копак уг кельшы.
Я, кӧты но тани "вераськыны" кутскиз ини, сиськыны мыноно. Учкы ай, кыӵе бадӟым 
творог юдэс сётӥзы! Яратӥсько мон сое, йӧлэз кадь ик. Ма, мон чылкак 
вегетарианец выллем, йӧл-вӧй но бакча сиён гинэ сиисько. 
Я, кӧты тыриз, табере мар кароно? Кузёе доры уг мыны, нош ик ӵыжыса лэзёз. Укно 
дуре пуксё ай, мынӥсь-ветлӥсьёсты учко.
Кин сыӵе лошъяське урамын? Кыӵе ке тордос, лэся. Тӥни ньыльпыдъяськем, нош 
султэмез уг луы. Выросэз чылкак али вордскем кунянлэн кадь. Ма, со бускельёслэн 
Петровичсы ук! Мар меда сокем кисьматэм?
Кин ке но дорамы лыктэ. Э-э-э, бен со кузёелэн эшез ук - Таня. Та адями мыным 
кельше: дораз лыктӥсько ке, монэ веша. Корка пыриз ни со тӥни. Чырткем, Таня! 
Мон дорад лыктӥсько! Ой, та небыт киостэ яратӥсько! Вешамедъя мургетыны 
кутскисько, синъёсы кынисько-о...
Нылъёслэсь ма сярысь вераськонзэс азьло ик тодӥськео ни. Ма, соослэн зулёнзы 
яратон но пиос котырын ялан берга. Огез ушъяське, мукетыз солы вожъяське, но 
сыӵе мылкыдзэ уг возьматы. "Шумпотӥсько тон понна", - шуэ. Нош мон шузи ӧвӧл ук, 
ваньзэ шӧдӥсько. 
Таня таяз учыре кема ӧз улы, кошке ини. Мон сое ӧс дорозь ик келяй. Мяу! Ӟеч лу, 
шуисько.
Пинал кузёе изьыны дасяське ини. Учком, монэ дораз чортоз-а, уз-а. Чортӥз ке, уг 
мыны: мон куатаськемын.
- Комик!
Монэ ӧтё. Нокызьы но дораз уг мыны.
- Комик, пие, чаль татчы!
Эх, малы меда магнитэн кадь бордаз кыске? Лобӟыса ик вуисько тон доры!
Тани со монэ шобыртӥз, быжме кыскиз, пельёсме чепыльтӥз но кымысам чупаз.
Ох, яратӥсько та пинал кузёме!
Света ЧУВАШОВА.
Юськи школа.
Завьял ёрос.

Юрттэ пересьлы
Пилиськиз ини тусез,
Чигиське ни ӵужонэнз,
Кесяськиз ни дэремез...
Кин жалялоз пересез?

Куректэ Баба Яга:
Погра ини коркае.
Кукъёсыз мырдэм сыло -
Ёзвиосыз висьыло.

Юрттоно вал пересьлы,
Кузьмано "лобась тэркы"
Керттоно кышет вылэм,
Вуроно удмурт дэрем.

Ма, очки но кулэ, дыр,
Синъёсыз ведь ляб укыр.
Яке линза басьтоно,
Но соиз усёз дуно.

Пылесос но кузьмано -
Мед лобалоз на эшшо.
Спонсоръёс но шедьтоно,
Выль корка, пе, жутоно.

Вӧзаз дача пуктоно,
Ву бассэйнэ лэзёно,
Кысконо на телефон,
А эшшшо магнитофон...

Ваньзэ тае лэсьтоно,
Шедьтоно но басьтоно,
Пересьмылы юрттоно -
Сюлэмзэ шумпоттоно.
Наташа ГЛЕБОВА.
УдГУ.