1-29-8 Сӧзнэт Ыштэм шудэз уд берыкты Мынам киям сюриз пеймыт-лыз книга. Вылаз кӧшкемыт сьӧд суред лэсьтэмын но векчи шрифтэн авторлэн нимыз гожтэмын - Геннадий Мадьяров. Улӥысьтыз пеймыт-ӵуж буёл книгалэсь нимзэ шарая: "Аналтэм сяська". Пеймыт-лыз, ӵуж но сьӧд буёлъёс усьто повестьлэсь быдэсак пуштроссэ. Лызэз, кылсярысь, кезьыт малпанъёсты бугыртэ, сьӧдэз - ваньзэ уродзэ, ӵужез - тодэ уськытэ висёнэз но люкиськонэз. Геннадий Мадьяров асьмелы зэмзэ ик мӧзмыт учырез маде. Дарья Марковалэн улонэз умой мытӥськиз. Яратыса бызиз, нылыз вордскиз - Галя. Картэз кулӥз. Юыны кутскыса, Даша нылзэ ыштӥз, тюрьмаын пукиз. Отысь потыса но лушкаськиз на. Выльысь пытсэт сьӧры сюриз.... ...Кин тодэ вал Галя, адями радэ потоз, хирург луоз шуыса. Сомында ар ортчыса, шедьтэ анайзэ, сузэрзэ... Улон кузьма на Дарьялы шудо нуналъёс. Но кемалы уг, кулон дораз басьтэ. Дарьяез быдтэ Гриша эшез но аракы... Калыкын шонер вараллям: ыштэм шудэз уд берыкты ни... "Котькуд нунал адямиез нуэ кытчы ке тодыны луонтэм дуннее. Адями нош, мынэмез потэ-а, уг-а, ачиз но сое валатэк, улонлэн сьӧраз амалтэк вамыштэ аслаз утчам но шедьтэм сюрестӥз. Ляб сямо, шулдыр улонэз яратӥсь адями бадӟым зарезьын рульзэ ыштэм суднолы укша. Кужмо тулкымъёсын нюръяськытэк ветлэ со ву вылтӥ, бадӟымесь изъёс борды мырӟылӥськыса пазьгиськытозяз. Судно, шори пилиськыса, ву пыдсы вые. Со пумысь вераськонъёс вакчи дыр куспын чалмо. Уг луы отын улэп кыльыса солэсь мозмисез, выльысь со судноын уяны малпасез. Чылкак мукет суред луэ, куке судно, ярдурлы матэ вуыса, вырӟемез луонтэм дугдэ. Со кема сылэ отын, калыклэн син шораз, бордаз кыскись кужымез дыр ортчыса но уг лябомы. Солэсь мӧзмо, со доры сюлмынызы кыстӥсько, нош со сылэ, котыр дуннелэсь шулдырзэ но чеберзэ валатэк. Озьы луэ асьсэлэн улонзы шоры ӟенелик пыртӥ учкись адямиосын. Я, шуом, адями пумаз вуыса кулэ яке ассэ быдтэ. Со сярысь кӧня ке нунал ортчыса вунэто. Туж умойтэм, куке солэн аслаз вордэм пуныез вань. Тордос уг вала куректонэз, возьдаськонэз. Со уг малпаськы, мар быдӟа кайгу вае пиналэзлы. Секыт югдуре шедьыса гинэ, сайкиськем бераз валаны кутске мар лэсьтэмзэ. Ассэ кияз кырмыса, трос адямиослэн юрттэменызы, оло, тупатскоз на. Нош луоз на-а юнманы вуымтэ пинал сюлмысь сьӧд виштызэ быдтыны?" - малпаське Геннадий Мадьяров. Ӵап та чуръёс ик луо произведенилэн шорсюлмыз но. Повестез пырпотэм бере, авторез гажан мылкыд кылдӥз. Шӧдӥське, Геннадий Мадьяров адямилэсь психологизэ ӟеч тодэ. Произведение пыртэмын туж трос чеберман кылъёс, визькылъёс, меӵкыт кылъёс, пӧртэм чсакланъёс... Писатель гожъя юон, куштэм нылпиос, вордӥськем шаер, анай сюлэм сярысь. Книгаез лыдӟыса йылпумъям бере, трос юанъёс кылдо, огез бӧрсьы мукетыз малпанъёс сюлэмез бугырто. Анна ИЛЬИНА. Пичи Пурга черкогурт. 10-10-1 Кезьытлы уг сётско Гордъярысь пиналъёс ог-дасо иськемез лёгаса лыкто Слудка школаязы. "Мискиньёс" - жаляса малпай мон соосты. Но соку ик озьы малпаме сярысь ӧпкели. Угось соос котькуд нунал дэриез лёгаса, зор-кот ултӥ уг ветло вылэм, интернатазы кӧлыны кылё. "Ма, интернатын улон - со умой шат?" - юалоды тӥ. Кинлы кызьы, дыр. Нош татысь пиналъёслэсь улонзэс шулдыр карон понна дышетӥсьёссы сюлмасько. Технологиен дышетӥсьсы Сергей Николаевич Вагин пиналъёслы шахмат шудон лэсьтэм, ӝытъёсы пиналъёс со шахмат ӝӧк сьӧры пуксё но йырвизьзэс сынало. Пиос Сергей Николаевичлэн кружоказ но ветло, пулэсь соос пӧртэм шудонъёс, паймымон чебересь арбериос лэсьтыло. Нош нылъёсты киужлы дышетэ Ирина Михайловна Боталова. Татын соос керттӥсько, чильпасько, пужыятско, фитодизайнъя кружоке ветло. Ирина Михайловна пиналъёслы гуртысь ужзэс но лэсьтыны юрттэ. Юанъёссылы валэктон понна, котькыӵе предметэз умой тодыны кулэ солы. Пиналъёслэн малпамзыя, дышетӥсь угось - со дунне вылысь самой визьмоез адями. Шонер валэктон ӧд ке шедьты, пиналъёслэн син азязы бездод, соос тонэ гажамысь дугдозы. Соин ик Ирина Михайловна котыр ласянь адӟем карымон луыны тырше. Школа борды туэ выль юрт пуктӥзы. Нырысетӥ куарусёнэ сое усьтӥз нырысетӥ классысь Дима Булдаков. Дима - со быдэс класс. Нырысетӥ классэ со туэ огназ лыктӥз. Таӵе югдурлы паймемысь но дугдӥмы ни. Угось шаерамы таӵе учыръёс ӧжыт ӧвӧл. Мӧзмыт ик, дыр, оген дышетскыны. Но Дима валаса ӧз вутты на, дышетӥсез со котыртӥ гинэ берга, солы умой. Мукет классъёсысь пиналъёс но соин эшъясько. Слудка школаысь пиналъёс одӥг семья кадь уло. Дневникъёсазы соослэн быдэн 2-3 сяна оценкаоссы но ӧвӧл ай. Быдэс толэзь картошка вылын, пришкольной участоказы ужазы. Гумыостӥзы шуныт ву но уг бызь на, школаязы кезьыт. - Кынмиськоды-а?- юасько пиналъёслэсь. - Ум! - шулдырак вазё соос. - Кызьы бен шунскиськоды? - Бызьылӥськом, шудӥськом. Задор ӵыжыт бамъёссы шоры учкыса валаськод: соослэн зэмзэ но кынмыны но мӧзмыны но дырзы ӧвӧл. Озьы ке но, шуныт сётыны кузёоссы мед дыртозы ни вылэм. Сотэк дышетсконзы ас ӧраз уз пыры. Ульчаын - сӥзьыл. А. ЕРМОЛИНА. . Туспуктэм вылын интернатын улӥсь пиналъёс шахматэн шудо. . И. М. Боталова пиналъёслы гуртысь ужзэс лэсьтыны юрттэ. 10-10-2 Валче ужаса Кӧня юанъёсты, лэсьтоно ужпумъёсты ӵош сэрттоно-пертчоно луо та куинь воргоронъёс. - Раис Аюпович, кытысь сомында пиналъёсты олимпиадаосы, ӵошатсконъёсы шедьтом, мынам соос сизьымдон куинь кузя гинэ ук, нош мукет школаосын кык сюлэсь ятыръёсын, - телефон пыр кылӥське Дондыкар школалэн кивалтӥсезлэн Н. П. Васильевлэн (шоретӥез) куараез. Николай Петрович оске уго, ронолэн кивалтӥсез одно ик маке но ӵектоз, юанэз выльысен эскероз шуыса. Соос ог-огзэсты кемалась тодо ини. Р. А. Абашев (бурысез), Глазов пединститутэз йылпумъяса, Гулёково школаен кивалтӥз, Пониноысь школа-интернатын ужаз. Ужзэ ӟеч, валаса быдэсъямез понна сое 1988-тӥ арын роноен кивалтыны пуктӥзы. "Милям пиналъёсмы ужаны ярато, вордӥськем палъёссэс гажало, - шуэ со. Роноен кивалтӥсь ӟеч вала дышетскисьёслэсь куронъёссэс, тыршисьёссэ син улаз возе. Тани кылем дышетскон арын но олимпиадаосы пыриськем пиналъёслы котькудӥзлы кузьымъёс сётъяз. - Николай Петрович, школаяды ёрос дышетӥсьёсмес люкано вал, пумиталоды-а? - Глазкарысен жингыртэ ни со Дондыкар школае, Н. П. Васильевлы. Кызьы уд пумита? Ас школаяд ужрадъёсты ортчытъянлы роноысь кивалтӥсь оске бере, ваньмыз ӟеч пӧрмоз. Николай Петровичлы юрттозы школаысьтыз ик дышетӥсьёс, пиналъёс. Юрттэт куремзэ возьматэк ик школае лыктоз Дондыкар гурт кенешлэн тӧроез В. Е. Богданов (паллянысез). Быгатэ угось Василий Егорович мӧйы калыкен но, пиналъёсын но огкыл шедьтыны. 10-10-3 Дондыкармы - яратоно гуртмы Кылъёсыз С. Ложкиналэн. Крезьгурез Н. Ельцовалэн. Уно удмурт чебер гуртъёс пӧлын Вань милям яратоно гуртмы. Дондыкармы милям / 2 пол Ушъямон яратоно гуртмы. Татын уло ужасесь калыкъёс, Пуктӥсько чебер выль коркаос. Дондыкармы милям /2 пол Данъяськымон яратоно гуртмы. Мед сяськаялоз но улоз гуртмы, Ӝӧк выл тыр мед луоз сиёнмы. Дондыкармы милям/ 2 пол Сиё-дано яратоно гуртмы. Мемие Кылъёсыз Ст. Широбоковлэн. Крезьгурез Н. Ельцовалэн. Вазь ӵукна гурт сьӧры потыса, Мемие тон монэ но келяд. Люкиськын, лэся, жаль потыса, Киосме тон кема маялляд. Кышетэн шонаса тон эн сыл. Нырысьсэ-а монэ келяськод? Тон эн утча мыным шуныт кыл, Мон озьы но ваньзэ валасько. Тон эн мӧзмы, дуно мемие, Тон эн вера: "Огнам кылисько..." Аслэсьтым мон сюлэм шунытме Тон доры, мемие, кельтӥсько. Гурт сьӧрын, мемие, тон эн сыл, Нырысьсэ-а монэ келяськод? Тон эн утча мыным шуныт кыл, Мон озьы но ваньзэ валасько. 10-10-4 Ма сярысь маде* сюлэм? Глаз ёросысь пиналъёсын тодматонмес Дондыкар школа бордысен кутскыны малпамы. Малы меда? Оло Донды батырлэсь карзэ адӟыса ассэ адӟем кадь луомы кожамы-а яке солэсь ветлэм сюресъёссэ адӟеммы потӥз-а? Дондыкар школалэн азбараз пырыса, машинаысь гинэ потыса вуттӥм - азямы олоку гинэ сьӧд костюмен, галстукен, тӧдьы дэремен шоро-куспо мугоро пиосмурт кылдӥз. - Ӟеч-а вуиды, сюрес вылын ӧд жаде-а? Пыре, пыре, дуно куноос, ми тӥледыз кемалась витиськомы ини. Тӥ али школамылэн мышказ сылӥськоды, мынэ школаямы пырон бадӟым ӧсмы доры, мон тӥледыз отӥ пумитало. - Тӥ школалэн кузёез-а? - пичи ӧсэтӥ пырисьлэн бӧрсяз гинэ юаса вуттӥм на огминут куспын ӟечъяськыса, мылкыдмес юаса, кемалась тодмооссэ кадь пумитам адямилэсь. Паймыса вамыштӥм возьматэм сюрестӥз. Вӧл-вӧл ӧсъёс доры вуытозямы, со отын сылэ вал ини - Николай Петрович Васильев, школалэн кивалтӥсез. Куно вӧзы куно, пумиськон борды пумиськон тупа вылэм сыӵе дыръёсы. Николай Петрович школаяз быдэс ёросысьтызы пенсие потэм дышетӥсьёсты люкам вылэм. Татысен ик кутскиз милям Николай Петровичен тодматсконмы. Дшетӥсьёслэн но пересьёслэн нуналэнызы ӟечкыласа, Николай Петрович тодаз ваиз аслэсьтыз дышетӥсьсэ, пичи дырзэ. "Дышетӥсьёсты огшоры адямиосын ӧй лыдъялля, - шуиз со, - сиемзы но, юэмзы но потэ шуыса ӧй валалля. Кыӵе гажай мон Портьяновоысь ӟуч кылъя дышетӥсьме Анна Павловна Максимоваез. Одӥг пол солэн уроказ маке мында дышетӥсьёс пукизы. Анна Павловна доре сётэм ужез, ӟуч веросысь оглюкетсэ, вераны куриз: нокин но кизэ ӝутыны уг дӥсьты. Мон но, туж умой тодӥсько вал ке но, уг дӥсьтӥськы. Нош шораз сыӵе жальмыт учкисько: киме ӝутытэк ке но мед юалоз вал со монэ. Но ӧз юа, ӧз валатскы син шорам учкыны, ӟуч нылаш вераз. Аръёс ортчыса но со учырез, дышетӥсьме уг вунэтӥськы. Кивалтӥсьын ужакум ини ялан малпалляй, школаям ӧтё, пумиськон дыръя ке но со верамтэ веранме тодаз вайыто шуыса. Я со ӧз быгатылы лыктылыны, я мукет муген ӧм пумиськылэ. Дораз но ветлыны ноку но дыр ӧй шедьтылы. Со азьын мон асме ялан дшетскись интыын лыдъялляй. Туэ тулыс гинэ мон со доры мынӥ - пыраклы люкиськыны. Син азям таӵе ик йыг-йыг вамышъясь егит дышетӥсе. Нош кызьы мон солэсь коросын кыллемзэ учком? Мылкыдме вормыны турттыса, корказ вамыштӥ. Тани кылле со - мон понна чик тодмотэм адями кадь, кышетсэ со ноку но озьы ачиз ӧз керттылы, озьыен, со мон понна ӧз кулы". Та тодэ ваёнэныз Николай Петрович вань люкаськем дышетӥсьёсызлы дунъет сётӥз, ӟеч кылъёссэ вераз, "пӧечи гинэ, сямаз гинэ поном шуыса, ӝӧк вылазы пуктылэм сиён- юонзэс веръяны куриз. Нош вераськонзы мукет ӧре выжиз. Ёросысь лыктэм мӧйы дышетӥсьёс огез бӧрсьы мукетыз Николай Петровичлы ӟеч кылъёссэс вераны кутскизы. Сокем трос, сокем шунытэсь со кылъёс мӧйы дышетӥсьёслэсь егит директор понна. "Данъяське таӵе директореныды", - огымысь кадь шуизы соос. Уг тодӥськы мар луиз соку Николай Петровичлэн лул пушказ, оло, выльысен дышетскись интыын ассэ пуктыны кутскиз-а, но солы юрттӥз Инмарен сётэм быгатонлыкез: кырӟанэз яратон. "Занӥ, занӥ вераса гинэ", - гуртоосылэсь 1920-30- тӥ аръёсы куно пумитан гурзэс мытӥз со. Нош бӧрсяз соку ик Гурт кенешлэн тӧроез, Василий Егорович, итӥськиз. Огзы бӧрсьы мукетыз Глаз, Пурга, Алнаш, чиган гуръёс кисьтӥськизы. Собере Василий Егорович огназ кутскиз. Василий Егоровичлэсь но Николай Петровись сыӵе быгатонлыксэс ёросазы но, быдэс шаерамы но кемалась тодо вылэм ини. 1996-тӥ арын Дунай котырысь калыкъёслэн фестивалязы Венгрие ветлӥзы. Ми но соослэсь ужамзэс кырӟанъёссы пыр усьтӥмы, малы ке шуоно, валамы, соослэн улоназы кырӟан но уж артэ ветло шуыса. - Тӥледыз ялан концертъёсы ӧтьыло. Нош, ӵош пуксьыса, кырӟан дыръёсты луыло-а? - юасько мон Николай Петровичлэсь. - 11 час котырын, школаын. - Нуназе-а? - Ма, ма. Соку пиналъёс дышетско ук. Ӝытазе, со нуналлы ужъёсме йылпумъяме бере, шуисько, "Лык ай дорам, маке юн кырӟам потыны кутскиз", - телефон пыр ӧтисько. - Нош кызьы тӥ ог-огдэс шедьтӥды, одӥг гуртын улӥды-а? - Прочь ӧм. Мамаосмы ӵош будӥллям. Мынам анае ялан вера вал Василий Егоровичлэн анаез туж визьмо вал шуыса. - Пичи дыръям вал шаракаын (гидын) шудыны юн яратылӥ, - пинал дырзэ тодаз вайыны кутскиз Василий Егорович, - пеймытэн куке-соку доре вуисько ини, сапегъёсы, пӧзьыосы котмемын. "Э, Вася, Вася, адями сиись, тазьы-а, пӧй ветлоно?" - пумита ини анае. Нош куинь часын ӵукна султэ но дӥсьме куасьтэ, лампа югытъя киужзэ ужа, умйылам мон солэсь кырӟан нёжъямъёссэ кылӥсько. Озьы вань кырӟанъёссэ тодыса будӥ. Со дырысен ик ялан мадисько ини. Тужгес но Зыкиналэсь адӟем карылӥ. Кыӵе яратылӥ "Сказала мать..." шуыса кырӟанзэ. Со дырысен сюрес вылын но, ужаку но - ялан мадисько. - Ма, бен, ялан кыкетӥ куарае выжиськод? Мыным кызьы мадёно на сыӵе дыръя? Нырысетӥ куараен кутскиськод ке, мадь ни вал пумозяз. - Иське, Николай Петрович, эшты куаразэ воштэ ке, тӥ кутэ но ужан интыеныды воштӥське. Тӥ - тӧро, нош Василий Егорович - школалэн директорез. - Пиналъёсын ужаны ваньмыз ик уз быгатэ, - эшезлэсь быгатонлыкъёссэ соку ик вераны кутскиз ини Василий Егорович. - Со та ужлы вордӥськемын. - Ма прочь дышетӥсь сярысь малпанам но ӧй вал. 8-тӥ классэз йылпумъякум, люкиськон ӝытамы со дышетӥсе ик вальсэ ӧтиз. Возьдаськыса, мырдэм но кызьы эктонъям, со мыным шуиз: "Ми тонэ Яр педучилищее келяны малпаськом". Туж кылзӥськись вал бере - мынӥ. Аслам малпанъёсы озьы ик кылизы, табере соос но улонам юн ярало". Люм школаын ужакум, Дондыкаре директоре кутскыны косӥзы. Кытчы пырод, семьяме но куштыса мыноно луи. Пичи пие, шер адӟылэмысьтыз, дорам ик уг лыкты ни вал. Нырысь интыын - школа. Кезьыт, пу юртын дышетскисьёслэсь пукемзэс адӟыса, сюлэм ик шымырске вал. Дышетӥсьёс но каникулъёсы, шутэтскон нуналъёсы пу дасяло, пильыло. Роноын, министерствоын выль школа пуктыны черодды ӧвӧл на, шуо. Комиссия люкай. Москвае гожты, шуизы. Москваысь "Секыт югдурзэс чакласа пуктоно" шуыса гожтэт вуиз. Табере одӥг малпан - школалы проект кулэ, Ижысь, архитекторъёслэсь но утчасько - одӥгез но уг кельшо, ваньмыз бадӟым школаослы. Тодмое пыр Новосибирске курон гожтӥ. Вань, пе, 162 интылы. Мыным со туж кельшиз. Витисько - уг лыкты. Куке-соку вуиз, нош басьтыны коньдон уг сёто. Кутски но аслэсьтым отпуске понна коньдонме тыри. Кыӵе ке одӥг бадӟым-бадӟым бумага луоз кожасько вал, нош мыным со проектэз пачкаосын-пачкаосын сётӥзы. Озьы Удмуртиын нырысетӥзэ нимысьтыз проектъя школа пуксиз. Ярам, ӧз ке но берыктэ ни проект понна аслэсьтым кутэм коньдонме, сыӵе школаос табере пуксьылӥзы ни мукет ёросъёсын но. Шуныт, югыт, вӧл-вӧл школазэс учконъямы, актовой залзылэсь, кылиськон интызылэсь аспӧртэмзэ адӟеммес шӧдыса, Николай Петрович соку ик "дышетӥсьёсы мынам юн ӟеч ужало" шуыса валэктон шедьтэ ини. - Пиналъёс но, дышетӥсьёс но сьӧраз кыстӥсько, мукетъёсыныз но ужасьёсыныд кыл шедьтӥськод, - ачиз сярысь юалляськыкум, востэм луэмзэ тодыса, ӝоггес ватсаны тыршиз эшез сярысь Василий Егорович. Нош Николай Петрович пумитаз вераз: "Мӧйыосын вераськыны мынам тынад кадь быгатонлыке ӧвӧл. Учкы ай, пересьёс вичак дорад лыкто ук вераськыны, адӟиськыны шуыса, кыӵе ке магнитэд-а, оло, вань? Одӥг пол Глазов пумын доре бертыны автобус витиськом. Нош автобус ӧвӧл но ӧвӧл - кутским кырӟаны. Кема кырӟаса сылэммы бере, дорамы кышномурт лыктӥз но Василий Егоровичлы шуэ: "Мыным туж яра тӥляд кырӟамды, концертын но адӟеме вань. Нокинлы но телефонме сётъяме ӧвӧл, тӥледлы гинэ - нырысьсэ сётӥсько". Таиз ке утӥз ук со бумагаез, розаосты сямен, паймем, шумпотэм мылкыдзэ возьматыса. Кытысь но кылъёс шедьтӥз со пумитаз. - Кызьы тӥ тамында кырӟанъёсты йырады возиськоды, ӟучъёссэ гинэ ог дасозэ ӝыт куспын кырӟады ни ук яке репетициос но ӵошеннады ортчытъяськоды-а? - Кызьы сотэк, куддыръя магнитофонэ гожтэммес но дышетӥськом. Репетициос тросгес ортчытъяно вал но, ма таин луоз-а? Одӥг пол концерт дыръя потонмы азьын выль мадёнмес эскером на шуисько, нош со ачиз концерт пушкы выиз, учкисьёс пӧлы пуксем, мыным кизэ гинэ шоналтӥз на. Ма сямыз меда кизэ чабыса пукыны? Учкись ачиз но вала ук. Соин ик кутскиз кыкетӥ куплетысен мадьыны, нош мон - нырысетӥзэ. Кызьы дугдытоно тае? Кизэ чепыллясько ни. Нош баянистмы баянзэ няк гинэ кеся. Учкисьёс чабо. Мед мадёз ни огназ, шуисько. Куинетӥ куплетысен гинэ ӵош пӧрмытӥм. Ма карод на, аптекае мынӥм. Кускам сётӥз, сюлэмы но, вылды, кутӥз, шуисько. Сётӥзы, мылкыдме либатӥзы, - тунсыко учыръёссы пӧлысь одӥгзэ тодаз вае Николай Петрович. Николай Петрович вань ӟеч сямъёсты, ужъёсты аслаз школаяз синчеберез кадь уте, азинтон амалъёс утча, секыт югдурысь потыны быгатэ, - эшез сярысь веранзэ азьланьтэ Василий Егорович. - Кутскиз но аслэсьтыз скалзэ школае ваиз. Со дырысен пиналъёс школаын йӧлын ӝук сиё. Каль куинь йыр ини соос, нош кайта сизьым йыр луозы. Табере мини-аппарат утча. Курон но лэзиз ини, пырак Курганэ. Я, кутскы ай созэ, мае мон уг тодӥськы... Николай Петрович дышемын ини эшезлэн, оскымон юрттӥсезлэн, вераськон сямъёсызлы, вераськон куспаз кырӟаны кутскемезлы. Ог-огзэс синкаш выретэмзыя гинэ но валало бере, со курем кырӟанзэ но Николай Петрович тодаз ваиз, кутскиз. Кырӟакузы-а ужало, ужакузы-а кырӟало меда та адямиоц? Нош ӟеч ужъёс огзы бӧрсьы мукетсы быдэсмо но быдэсмо. А. АЙМАНОВА. . Н. П. Васильев. В. Е. Богданов. 10-10-5 Ошмес Жильыртэ, бызе ошмес, Кисьтаське солэн вуэз. Дун, чылкыт, укыр кезьыт. Кӧльыез но юн вольыт. Тани нош дораз вуи, Ымнырме мон пылатӥ. Ӝог гинэ мылкыд ӝутскиз - Ошмесэж озьы кариз. Омыртӥ мон ведрае Ошмеслэсьб луло вузэ. Кӧня ке гучык юи, Висисьтэм, таза луи. Тау, ӟеч лу, ошмесэ, Кыдёке тон ну вудэ. Эмъя удмурт калыкез, Медаз луы висисез! Снежана ХУДЯКОВА. Ягошур гурт. Глазов ёрос. Люкизы Шур дурын кызьпу сылэ, Нош вӧзяз губи будэ. Отӥ пичи пи ортчиз, Губиез аслыз басьтӥз. - Кытчы, кытчы бызиськод? Малы сое нуиськод, Ведь кызьпу огназ кылёз, Мӧзмыса куасьмоз, быроз. Шумпотто Вазь ӵукна шунды ӝужа, Гидамы атас чоръя. Сайкатэ со милемыз Жингрес, шулдыр гуреныз. Собере бӧксо ыжъёс, Юыны куро соос. Мынам но пичи эше Сиён куре, ыргетэ. Мон солы пӧсь шыд потто. Тузикме туж шумпотто. Лена ИВАНОВА. Куреггурт школа. 1996-тӥ ар. 10-10-6 "Нырысетӥ интыын мед луоз" - Мон дышетскыку, удмурт кыл кыкетӥ интыын но ӧй вал, - школаын ортчытэм аръёссэ тодаз вае Т. С. Тихонова, роноын удмурт кылэз дышетон бордын ужась. Ачиз Тамара Семёновна вордӥськемын Кез ёросысь Тортым гуртын. Пичи дырыз ортчиз Кез посёлокын. Отын ик дышетскиз. Ӟуч кылъя дышетӥсез солэн вал тодмо ӟуч кылбурчимы О. А. Поскребышев. Тамара Семёновна али но тодаз вае на, туж яркыт син азяз пуктэ со урокъёсты. Олег Алексеевичлэн мылкыдыз ик пыӵаз, дыр, аслаз дышетскисезлы. Тамара Семёновна йылпумъяз Глазов пединститутысь филология факультетэз, ӟуч кылъя но литературая дышетӥсь луиз. Ужан удыссэ со кутскиз Вылӥ Слудка гуртын, завуч луыса но ужаз. Но Глазове семьяеныз улыны лыктэмзы бере, роноын ужаны кутскыса, солы удмурт кылэз но сётӥзы. Анай кылзэ дышетыны ӧз кылдылы ке но, Тамара Семёновна ӟеч вераське ас кылыныз, семья пушказы но та кыл ик валтӥсь инты басьтэ. Сюлмыныз но визьмыныз висе со понна. Роза Ивановна Яшиналэн ӵыжы-выжыез луыса, со азьын но кыл кутэмзэ шӧдэ кадь. "Мон валасько, - шуэ со, - пинал, аслэсьтыз кылзэ дышетытэк, йыромыса медаз ветлы". Со понна ик Тамара Семёновна сюлмаськиз ини Глазовысь школаын но удмурт клдсс усьтыны. Куинь ар со ёросысьтыз удмурт кылъя дышетӥсьёсын ӵош ужаз "Урокъёсын но ужрадъёсын анай кылзылы яратон мылкыд пыӵатон" темая. Пиналъёс пӧртэм адӟытонъёс ортчытъязы, кылбуръёс лыдӟылӥзы, "Иднакар" музее ветлӥзы. Нош туэ соос выжо ини "Удмурт кылэз но литератураез дышетонъя выль амалъёс" темая ужаны. 10-11-1 Ёросын улэ 21,1 сюрс адями. Соос пӧлын 79 % удмуртъёс, 17 % ӟучъёс, 2,0 % бигеръёс лыдъясько. Интыяськемын 215914 гектар музъем вылэ. Пиналъёс дышетско 22 школаосын: 16-ез - шор ёзо, 4-ез - 9-тӥ классозь, 2-ез - пичи классъёслы, анай-атайтэм нылпиослы Пониноысь школа-интернат, 23 нылпи садъёс. 10-11-4 Паньтэмъёс Мынам нимы Алёнка. Огпол ветлӥ Женя эше доры куное. Солэн вань писяез (коӵышез). Нимыз кызьы-о шуоды? Бен, Алёнка. Женялэн анаез кухняын пӧра, нош ми телевизор учкыса пукиськом. Алёнка коӵыш люкетыны кутскем. Эшелэн анаез вера: - Алёнка! Мон шуисько: "Мар?" Визьмо писяй но "мяу" шуэ. - Мын шыръёсты кутылы! Мон ас поннам малпасько: мар ай та эшелэн анаеныз луэм, монэ шыръёсты кутылыны ыстэ. Пайми, ява. Эше валэктӥз. Ма, паймонэз, пе, анае коӵышлы озьы шуэ ук, нош тон кожад тыныд-а? Кӧня серекъям. Тӥни кыӵеесь ми паньтэмъёс вылӥськеммы. Алёна ОГОРЕЛЬЦЕВА. Удмурт Ключи школа. 2-10-4 Вашкалаез уз вуны Школаосын ужась музейёс но тодон-валан басьтонын бадӟым юрттэт сёто. Кема ужамзы, тыоршемзы бере, Уразгильды школаын но шаертодонъя сэрегмы усьтӥськиз. Туннэ нуналлы отын сюрс пала экспонатъёс сизьым экспозициосы интыямын. Ваньмыз со пиналъёслэн но дышетӥсьёслэн кужыменызы люкамын. Кичӧлтӥсез - ужысь но олжысь ветеран Фатих Гаянович Сагадиев. Музей ужаны кутскиз 1976-тӥ арын. Интыяськиз со география кабинет вӧзысь пичи комнатаын. Нош 1981-тӥ арын "Краеведческий музей" ним сётӥзы. Музеймфы сярысь кылэмзы бере, дорамы кыдёкысь куноос но вуылыны кутскизы. Та дырлы пырам куноосмылэн лыдзы 1000-лэсь ятыр люкаськиз ини. Котькуд 2-14-3 Стеньгуртэ салам Катя Иванова Ижкаре ветлӥз вал ини тол каникулъёсаз. Стеньгурт школаысь пиналъёсты соку ваньзэс ӵош автобусэн нуллӥзы. Эшъёсыныз ӵош Катя пыраз музейёсы, паркъёсы. Удмурт шаермылэн столицаяз тужгес но паймымон потӥз солы городмылэн шораз ик сылӥсь крезьгуръя театр. Бадӟымесь укноосы ошем тулкымъёс выллем штораос, артистъёслэн чебер дӥсьёссы, вӧлдэтозь ик чузъяськись куараоссы - ваньмыз Катялэн сюлэмаз огинэ люкаськиз. "Волшебник из страны Ө" спектаклез учкыса, со зэмзэ но выжыкылэ вуылӥз кадь. Алигес Катя нош ик Ижез адӟиз. Таяз радэ сое атаез асьсэ машинаенызы вайылӥз. Лыктонзылэн мугъёсыз трос люкаськизы. Одӥгез соос пӧлысь - редакциысьтымы кузьымзэс басьтон. Таяз арлы газетмылы гожтӥськисьёс пӧлын соослэн семьязы термос утӥз. Та кузьыменызы ӵош Павел Валентиновичез но Катяез ми туспуктыса кельтӥм. Павел Валентинович ужа шофёр луыса, "КамАЗ"-эз нуллэ. - Иське тон, Кати, бадӟым машинаен но ворттылӥськод? - юамы ми нылашлэсь. - Бен, - вазиз со. - Сергей, Саша вынъёсы но атай вӧзын ветло. Собере ми юалляським Катялэн школаын дышетскемез сярысь. Выль тодмомы дышетске 8-тӥ классын. Класцазы соос 6 кузя. Ӧжыт кузя шуыса уг уло. Ӵош пусъё вордӥськем нуналъёссэс, пӧртэм праздникъёсты. Нош мукет ужрадъёсты соос быдэс школаенызы ортчытъяло. Озьы шулдыргес, соослэн школазы угось 9-тӥ классозь гинэ. Озьыен, Павел Валентиновичлы ӝоген нылызлэсь дышетсконзэ азьланьтон сярысь сюлмаськоно луоз ини. А. АЙМАНОВА. Туспуктэмез Ю. ИВАНОВЛЭН. 2-20-1 Коӵышпи клоун Милям коӵышпимы вордӥськиз. Ми солы Пушок ним сётӥм. Вордӥськем бераз ик солэн небыт, пуштрес гонэз вал ни. Нош кӧня ке улыса, бадӟымгес будӥз, бызьылыны кутскиз. Солэн соку тужгес но мусо дырыз вал. Коӵышпимес ми туж яратӥмы, вешаса гинэ возимы, ышемезлэсь туж кышкаса улӥм. Тани одӥг кӧснуналэ атае Пушокмес, эшлы шуыса, мунчое поттӥз. Нош мунчоысь пырыкуз, милемлы шуиз: "Коӵышпиды ӧвӧл, ышиз". Атае утчам-утчам но шедьтымтэ. Бӧрысь нош мунчое потаз на. Ми сузэреным чылкак ӝожомим ни вал. Атаймес куаретӥськом. Атаймы бадӟым пала потӥз но, штани кисыысьтыз Пушокмы йырзэ мычиз. Ми тэтчаса коӵышпимес вешаськом, серекъяськом. Чылкак паймим: кызьы со отчы вуэм? Со учыр бере ми туж кема серекъямы на ай. Собере валатским: со пӧсьлы чидатэк дӥськут пушкы пырем. Тӥни сыӵе вунонтэм учыр луиз милемын. Надя НИКИТИНА. Муважи школа. Алнаш ёрос. 2-20-2 Со монэн шудо Мынам вань Тоська нимо мусо писэйпие. Со монэн шудыны яратэ. Тэтчаны кутскисько ке, скакалкаме тала но ымаз кутчыса кошке. Утчаса но шедьтыны уг луы ни. Одӥг пол писэёпие пислэг кутэм но корка пыртӥз. Мон солэн ымысьтыз тылобурдоез басьтӥ, кыре лэзи. Нош вордосэ монэ ӵабыштӥз. Со мыным урокме лсьтыны но уг сёты. Ручка пумме куртче но тӥялтэ. Озьы со монэн шудэ. Изьыны выдӥсько ке, вӧзам мургетыса улэ. Тоськаелэн вордскем нуналэз 2-тӥ южтолэзе. Мон сое туж яратӥсько. Алина МАКАРОВА. 3-тӥ класс. Карамас-Пельга гурт. Кияса ёрос. 2-20-3 Кулэ-а дан но данъяськон? Кулэ. Соиз но таиз но. Дано шаер. Дано адями. Адямилы Инкуазь ачиз йырвизь сётэм. Ас улонзэ гинэ валаса ӧръяны ӧвӧл! Улоссэ, шаерзэ ӟеч ужъёсыныз узыргес, чебергес карыны. Инкуазен тупаса, валаса улонэз азинэс, пайдаё ӧръяны. Ӟеч мылкыдъем но задор кужымен ужась адямилы капчи луэ улонысь шуг-секытъёсты вормыны, адӟнъёсты чиданы. Со уг азгынмы эли-кеби улонамы, со уг чӧлскы гольтрес улонэ, уг выйы юон бекче пыдсы. Со ужа но ужа. Ушъян понна уг! Ужысь со емыш сяна, туж трос шумпотон шедьтэ. Тыршись, вань кужымзэ сётыса ужась адями данэ поттэ ас гуртсэ, ёроссэ, республиказэ. Ачиз но уженыз дано луэ. "Тынад вань ке шаердэ данэ поттыны луонлыкез, потты. Иське малы тон та дуннеын кулэ?" - гожтэ Юрий Тымянов. Покчиос, дышетскисьёс, мӧйыос но! Дан но данъяськон - со ушъяськем ӧвӧл. Данэз сётэ калык, кивалтэт. Гажалэ котырысьтыды адямиосты! Эн вунэтэ соослэсь ӟеч ужъёссэс. В. И. КОЛЕСНИКОВА. 2-20-4 Возьдаськон но керпотон Та кык кылъёс одӥг валан сёто. Артэ, китӥзы кутскыса ветло. Огез кытчы ёриське, соиз со борды ик дэмӟытске. Но таос кин борды шедем уг лякисько. Тодо кыӵе адями котыре ӝабырскыны. Нылпиос пӧлын но, мӧйыос пӧлын но уло. Шуом, дышетскисьлэн урокын тодэмзэ верамез потэ. Нош кизэ ӝутыны керпотэ. Дас тямыс аресъем пияш нылэз яратэ, нош пумиськыны но вераны возьдаське. Мӧйы адямиос пӧлын но та сям ӵемысь пумиськылэ. Шуом, кибашлы, тыршись, котьмае ӝикыт лэсьтэ - нош вераны, валэктыны возьдаське. Кулэ-а меда улонын та сям? Куке кулэ, куке ӧвӧл. Тодэм-валамез вераны, ӟеч амалъёсты мадьыны - одно кулэ. Сотэк улон азьлань мыноз шат? Со возьыт ӧвӧл. Эрказъяським, пож, юрӟым кылъёсын вераськыны - туж возьыт. Соос та чебер югыт дуннеез саптало. Азьтэмъяськыса, мурт чотын улыны возьыт но сьӧлык но. Керпотӥсьтэм адями ассэ ачиз акылес, адӟемпотостэм каре. Сыӵе пиналъёсты шаян яке аляк шуозы вал вазен. Нош ас нылпизы калык син азьын возьытэ медаз уськыты шуыса, ураме, школае келякузы индылозы вал: "Озьы эн кары, тазьы уг яра, калыклэсь возьыт! Бускель ма шуыса учкоз!" Туала егитъёс пӧлын туж трос визьмоесь асьсэды кытын кызьы возьыны быгатӥсьёс. Шумпотӥсько. Куректӥсько но. Керпотонэн-возьдаськонэн куд-огез пиналъёс дырыз дыръя эшъяськиллямтэ. Пушказы эрказъяськон кузёяське. Соин йырин шудтэм учыре сюро. Малы озьы луэ? Керпотымтэенызы. Мотор атас кадь выремзэс анай-атай нырысь-валысь серекъяса, мусо потыса учко. "Ох, будӥз ке, нокинлы уз сётскы", - малпа. Возьдаськись адями маолпанъёссэ пушказ возе. Умойтэм со. Ма, пиналъёс, тӥ асьтэос тодӥськоды ма умой но ма урод, малэсь возьыт, ма данъяськымон. Малпаське. Йыр со понна сётэмын. В. И. КОЛЕСНИКОВА. 2-20-6 Куасьмонэз валасьтэм ошмес кадь Мон туэ 12-тӥ арзэ ни "Пурга кизилиос" Центрын литературая факультативен кивалтӥсько. Та дыр ӵоже литературае но журналистикае та ёросысь данак выль нимъёс вуизы. Шумпотон Е. Миннигараевалэн, Е. Пикулевалэн, Е. Никитиналэн но мукетъёсызлэн азинсконъёссы. Нош кӧня авторъёс возьмало на ай асьсэлэсь "зарни нуналъёссэс"?! Куасьмонэз валасьтэм ошмес кадь Пичи Пурга музъем вылысь творческой кужымъёс. Арысь аре паймемысь уг дугдӥськы пиналъёслэн быгатэмзылы, литература котыре кыстӥськемзылы. Шонер верало: узыр, байлыко Пурга палъёс котьмар ласянь! Туннэ ӵектоно авторъёс пӧртэм ардыдоесь (вань соос пӧлын 6-тӥ классэ но, 11-тӥ классэ но ветлӥсьёс - "Пурга кизилиосы" данак аръёс ӵоже сюрес лёгисьёс). Огез шумпоттэ: соослэн литература удысын быгатонзы вань. Тани асьтэос учке, чаклалэ, дунъялэ... Никвлад САМСОНОВ, писатель. Итэш гуртэ Итэш гуртэ, Пичи юртэ, Вакчи сюрес, Пичи шурез. Бусы вылын Кизем ю-нянь Вуэм бераз Лэзьке уллань. Гуртмы пумын Школа сылэ. Отын калык Визьмо луэ. Катя ДМИТРИЕВА. Итэш гурт. Пичи Пурга ёрос. Мынам мунёе, Возьмам дыдые Тузонын кыллем Котмыса бырем. Мон сое мисько, Чылк-чылк утялто. Собере гинэ Мон соин шудо. Эн бӧрды, ӟече, Тон луод шудо. Света ЧУРАШОВА. Вуж Монья школа. Пичи Пурга ёрос. Малпанэ Ӵукна. Сайкыт инбам. Шунды пиштэ, Нош сюлэмам сильтӧл ветлэ. Поръя-поръя со лул пушкам, Пыре-потэ малпанъёсам. Малы кырын сыӵе сайкыт, Нош мылкыды весяк секыи?.. Кизилие ӝуатскоз, Уг куректы сокем Вуж малпанэ тӧлӟоз, Вылез воштоз сое. * * * Мон выдӥ кӧлыны, Ворсасько синъёсы. Нош йырам малпанъёс Малпанъёс, малпанъёс... Йырвизьме сурало - Олокытчы вутто. - Ма луоз азьланяз? Аслэсьтым юасько. Султыса ӵуказе, Монэ мар бен вите? ...Сайкай, султӥ Укно доры вамыштӥ. Котыр учки, Синйылтӥ.э Юг-юг тӧдьы Лымы усем. Быдэс музъем Чылкыт луэм. * * * Мылкыд секыт, Макем мӧзмыт. Малы, эше, Ӧд синйылты монэ? Мон синмаськи тыныд Ӧй вала ку. Уг вунэты тонэ Ноку, ноку. Оля АЛЕКСЕЕВА. Вуж Монья школа. Пичи Пурга ёрос. Кунян Туж бадӟым шумпотонмы - Вордӥськемын кунянмы. Бызьылэ, тэтча, шудэ, Анаез веша, нюлэ. Адӟисько соос мусо, Кыкназы одӥг тусо. Валя ПЕРЕВОЩИКОВА. Вуж Монья школа. Буртчин кышет Буртчин кышет кутӥ киям, Понӥ сое пельпум вылам. Синучконэ учки - пайми, Ӧй тодма ни асме ачим. * * * Чиги италмас сяськаез, Быльыраз солэн синвуэз. Малы луиськем укылтэм? Сяськалэн но лулз вылэм. Света МИТРОФАНОВА. Вуж Монья школа. Вумульы Тӧдьы вумульы мычиське. Ой, чебер ик со адӟиське! Уяса эктэ, веттаське. Мынам мылкыды ик лӧптэ! Италмас Мынам садам будэ ӵуж италмас, Ӟечбуръяське мынӥсь-ветлӥсьёсын. Котькудӥзлы со пальпотон кузьмаз, Солэн ӟечез шудэ сюлэмъёсын. Наташа МИРАЕВА. Вуж Монья школа. Уй Пеймыт. Мӧзмыт. Нош но нош Кисьтӥсько синкылиос. Мон уг ваты соосты, Кин адӟоз? Мынэсьтым курадӟемме Дунъялоз? Лыдъянтэм кизилиос Адӟозы, Монэн ӵош соос Бӧрдозы. Толэзь но мӧзмыт учкоз, Валес дорам со лэзькоз. Лӥятоз, вешалоз, Кошкон азяз шобыртоз, Но ышоз... Таня НИКОЛАЕВА. Выль Монья гурт. Пӧрмымтэ яратон Яркыт пиштӥсь толэзь улын Асьмеос тонэн пумиськимы. Верад соку шуныт, мусо кылъёс отын Сюлэм пушкы со кылъёсыд мур пыӵазы. Нош мон оски чебер кылъёсыдлы, Арня но, кык но возьмалляй, Ӧд лу кузё тон ас кылъёсыдлы, Юме тонэ мон малпалляй. Малы меда мон пумитай тонэ? Малы верад соку шуныт кылъёс? Ялан йырысь уг кошко юанъёс. Кытчы меда ышид тон, гажанэ? Тонэ мон уйвӧтам но адӟисько, Уг ваты, туж мон мӧзмсько Сюлэм возьма нва лыктэмдэ, Нош мар карод, вунэтоно тонэ. Оля ВЛАДИМИРОВА. Ильинск школа. 2-21-9 "Почтальонтэк - одӥг вамыш но..." Конкурслы йылпумъянъёс сярысь Газетъёслы но журналъёслы 2002-тӥ ар понна гожтӥськон мыныку, ми лыдӟисьёсмылы таӵе юанъёсын вазиським вал: - Кин сюлмаське газетмес лыдӟисьёс доры дыраз но ӝог вуттон сярысь? - Кин лыдӟисьёсын кусыпъёсмес радъясь гожтэтъёсты нуэ-вае? - Кин малпаське лыдӟисьёсмылэсь лыдзэс будэтон сярысь? Но... собере асьмеос ик валэктон но сётӥм: почтальон со. Зэм но, почтальонтэк - одӥг вамыш но... Ма, газетмылэн лыдӟись доры вуон сюресэз сярысь гожъякумы (� 36, 2001 ар), "Ӟечбур!" ачиз вераз вал ук: "Почтовой поездъёс но машинаос ӝог ветло. Одӥг уй-нунал куспын шаермылэн пӧртэм ёросъёсаз, почта отделениосы, вуисько. Татысен монэ почтальонъёслы сёто но, соос ини монэ лыдӟисьёсы доры вутто". Озьы бере, кызьы почтаосын тыршисьёслэсь ужзэс пусйытэк кельтод? Тодӥськоды на ке, кылем арын аспӧртэм ӵошатскон ялӥм вал. Табере тани тодмо луизы вормисьёс но. Соос - "Ӟечбур!" газетлы 15 муртлэсь тросгес адямиез гожтӥськытыны быгатэм почтальонъёс. Тужгес зол тыршем газетмес вӧлмытонын Пичи Пурга ёросысь Бобья-Уча почта ёзысь А. П. ПАНФИЛОВ эш. Со газетмылы 52 гожтӥськисьёс люкам. Озьыен, тужгес бадӟымез коньдон премимы но - 500 манет - солы. Ӟеч-кы-лась-ком! Быдэн 38 лыдӟисьёс милемлы шедьтӥллям Шаркан ёросысь Вортчино почта ёзысь Т. В. ПИСЛЕГИНА но Пичи Пурга ёросысь Баграш-Биграысь Е. А. ИСАЕВА. Соослы - быдэн 300 манет. 250 манет утӥз Вавож ёросысь Зямбайысь М. С. МЕДВЕДЕВА но 200 манет - Можга ёросысь Б.Кибья почта ёзысь В. Н. ЮШКОВА. Озьы ик кузьымъёсын пусйиськом Завьял ёросысь Шор Постолысь но Татарстанысь Агрыз ёросысь Сарсак-Омгаысь почтальонъёсты. Туж бадӟым тау тӥледлы ваньдылы, кин юрттӥз но юрттэ газетмес лыдӟисьёсмы доры вуттыны. Тӥляд тыршеменыды (озьы ик дышетӥсьёслэн сюлмаськеменызы) "Ӟечбур!" газетлы элькунамы тросгес гожтӥськизы, тужгес но со шӧдӥськиз Алнаш, Пичи Пурга, Шаркан, Можга, Вавож но Ува ёросъёсын. Куд-огезлы вылӥ верам почтальонъёслы ӟеч кылъёсын но премиен конвертъёсмес сётӥм ини подпиская инструкторъёслэн Ижевскын ортчем семинарзы дыръя. Нош мукетъёсыз доры ми асьмеос вуылыны, соосын пумиськылыны тыршом, угось пиналъёслы но лотерея дыръя утэм кузьымъёссэс нуон мугмы вань. Гажано почтальонъёс! Тӥ газет но лыдӟись кусыпъёсты герӟась выж выллем луиськоды. Озьыен, валче ужаммы котьку но умоен гинэ берытскоз. Редакциын ужасьёс. 2-22-5 Конкурс-Конкурс-Конкурс Инкуазь но улон Мон туж шумпотӥсько тӥ, пиналъёс, конкурсэ мыло-кыдо пыриськиськоды шуыса: тросгес но тросгес гожтэтъёс вуо редакцие. Юанъёслы шонересь валэктонъёс сётыны тыршиськоды. "Кызьы вашкалаос пиньёссэс сузязы?" юан нокуддэс но шугъяськытымтэ. Тани ма гожтэ Максим Миронов: "Вазен трос коньыт сиён ӧй вал, соин ик адямиослэн пиньёссы ӧз лябомылэ. Емышъёс но турын-куар (курегпыд, ӵушни, пешник) сиылӥзы. Бӧрысьгес пиньёссэс сузязы пенен, тӧдьы сюен, собере лэсьтыны кутскизы нимысьтыз пинь сузян порошок". "Вашкала дыръя ми палан улӥсьёс, пиньзэс сузян понна, писпуослэсь сирзэс пӧзьтӥллям но сое йырйиллям (сыскиллям, дыр - авт.) Озьы ик кызьпулэсь туйзэ но пӧзьтыса йырйиллям", - гожтэ Станислав Трефилов. Туж тунсыко валэктонзы Таня но Света Перевозчиковаослэн: "Археологъёс вашкала адямиослэсь лысьӧмъёссэс шедьто ке, музъем вылын сомында ар кылльыса, кызьы соослэн пиньёссы тӧдьыесь но юнэсь кылемын шуыса паймо. Вашкалаос наркотикъёсты, тамак кысконэз уг тодо вал уго. Пиньёссэс суэн миськыса, кыз, ньылпу лысэз сыскыса тазатылӥллям". Нош Балезино ёросысь Исаково гуртысь Юлия Сунцова (нырысьсэ конкурсэ пыриске) весь тодаз возе песятаезлэсь верамзэ: "Туала песянайёслэн но песятайёслэн пиньёссы лябесь ни. Азьвыл пинь сузян пастаос ӧй вал, соин, дыр. Нош мынам песятаелэн мӧйы дыръяз но пиньёсыз туж золэсь вал, со монэ конфет сиыны ӧз лэзьылы, вералляз: "Ми пичи дыръя конфет али мында ӧй вал. Бакча сиёнъёс но ческыт потылӥзы. Тужгес но калягаез яратылӥмы. Соин пиньёсмы юнэсь луизы. Шудылӥмы нюлэскын, отын сир сыскылӥм. Сирез йыръем бере, пиньёс но чурытэсьгес луо вал, куд-ог дыръя сыскиськемлэсь йыр ик жадьылӥз". Вакчияк гинэ валэктон ыстӥз Марина Шарыпова но. Табере ӵошатэ асьтэлэсь валэктонъёстэс мынаменыз. Туж вашкала дыръя улӥсьёс пиньёсэс номырин но уг сузяло вылэм, малы ке шуоно, асьмелэн сямен, соослэн пиньёссы уг висё вылэм. Али стоматологъёс одӥг ымысь кадь верало: трос ческыт (коньыт) сиён пиньёсты быдтэ, пе. Кызьы? Ческыт но шуныт азьын пичи улэпосъёс (микробъёс но бактериос) улӟо но йылыны кутско, туж трос луо, неорганической кислота потто, со пинь эмалез сӧре. Нырысьсэ пинь сузян щёткаез кӧня ке сюрс ар талэсь азьло малпаллям Китайын улӥсьёс. Нош солэсь азьло адямиос пинь сузяны кутылӥллям ньӧръёсты, пу сирез, пенез, горд но тӧдьы сюез, эгырез, пӧртэм будосъёсты: чеснокез, шалфеез, календулаез но трос мукетъёссэ. Бадӟым изъян вае адямилэн тазалыкезлы но, пиньёсызлы но туала экологилэн огъя уродмемез: кырсёмытэм омыр, ву, музъем, урод сямъёс: тамак кыскон, вина юон, наркомания, йыркуро но лек луон. "Кызьы миське майтал?" юанлы нокин но шонер ӧз валэкты. Тросэз гожтӥзы малэсь но ку со нырысьсэ лэсьтэмын вал, кыӵе луыны быгатэ. Валамон, та юанлы книгаосысь валэктон шедьтыны туж шуг, малы ке шуоно, со майтал лэсьтон фабрикаослэн коммерческой тайназы. Мугор яке дӥсь вылысь мултэс кӧйзэ, курмемзэ мед быдтозы шуыса, майтал пушкы органической но неорганической веществоос сурамын. Майталысь органической вещество, ӵемысь - пудо-живот, будос кӧй яке мувӧй, дӥсь яке мугор вылысь кӧй- вӧен "эшъяське", бордаз кыске, нош нерганической вещество - ӵемысь со инкуазьын пумиськись (тӧдьы сюй, пень) яке химия амалэн поттэм щелочь "эшъяськем" кӧй молекулаосты (аминокислотаосты) "улля". Озьыен, ортче химической реакциос пӧлысь одӥгез секытэз. "Ма со тыл но кызьы со ӝуа?" юанлы но меӵак шонер валэктон сётӥсь ӧз луы. Но тыршемды, утчаськемды шӧдӥськиз. Максимлэн гожтэмез тунсыко: "Тазьы тыл поттылӥзы: кӧс пуэ гоп лэсьтылӥзы но отчы кӧс ӝуйы понылӥзы. Собере кӧс пуосты ваче зыраллязы, озьы гопысь ӝуйы кенжылӥз. Собере кӧльыосты ваче шуккылыса поттэм тылгизьыез сеньки борды кенжытыны дышизы. Аратэм тылзэс кысылытэк возьыны тыршизы. Вашкала дырысен адями тылэн эшъяськиз, сое ас вылаз "ужатыны" дышиз. Но тыл пумен тросгес но тросгес "сиён" куре: дуно нюлэсэз, музъем пушкысь курадӟыса поттэм эгырез, торфез, мувӧез. Вылаз ик, омырез кырсёмытэ. Озьы тыл адямилы изъян вайыны кутске. Адями кема малпаськиз тыллы тырмыт но дунтэм "сиён" шедьтон пумысен. Шедьтӥз: со - газ. Газ ӵынтэк, небыт чагыр тылын, зол ӝуа. Ӝуась газ мартен гуръёсын корт, чугун, андан ӵыжатэ, улон юртъёсты шунтэ, сиён-юон пӧзьтыны юрттэ". Максимлэсь малпанзэ азинтыса кадь, тазьы гожтэ Марина: "Тыл - со адямилэн юрттӥсез но, тушмонэз но, малы ке шуоно, тыл сутэ уно пу коркаосты, куроез". Шонер валэктэм Марина тыллэсь кызьы ӝуамзэ: "Тыл пушкын пу тачыртыны кутске, озьы тыл пулэсь вузэ басьтэ, кыске. Дыр ортчыса, пу сьӧдэктэ. Соку солэн лобась веществоосыз пото. Тыл омырысь кислотаосын сураське но золгес ӝуаны кутске". Мариналэсь та малпанзэ азинтэ шуыны луоз Юлия: "Тыллэн бервылэз углекислой газ но ву шапыкъёс. Со ӝуасьтэм веществоос. Тыл ӝуа кислородын гинэ". Станислав но сузэръёс Таня но Света тыл электрической луэ на шуыса пусъё. Станислав гожтэ: электротыл омыртэм азьын (лампочкаын) но ӝуа. Таиз тыл шунтэ ӧжытгес, нош югытсэ тросгес поттэ. Лампочкаосысь вольфрамовой анданлэсь лэсьтэм кык проводкаостӥ электроток ветлэ, одигетӥз положительной, мукеттӥз - отрицательной. Огазеям интыын соос пумисько но, тыл потэ." Мон тазьы валэктысал. Тыл - со энергилэн одӥг арбериысь мукет арберие выжемез, физикъёслэн кылынызы вераса - "окисление". Куд-ог дыръя адямилы та реакция адӟиське, югыт луэ, "ӝуа" шуиськом соку. Адӟиське, куке пу, мувӧй, газ, эгыр, кӧс турын-куар пеньлы, углекислой газлы, вулы, шунытлы пӧрмо. Адӟиське, куке кык пилемъёс огзы борды огзы шуккӥсько но - чилектэ, гудыртэ. Адӟиське, куке ву кужым, турбинаос пыр потыса, яке уран кужым, атомъёслы люкиськыса, югдытӥсь электрокужымлы пӧрме. Сыӵе кужым шунытлы но, кезьытлы но пӧрмыны, куараез, суредэз но машинаез "нуыны" быгатэ (микроволновка, электроплита, холодильник, радиоприёмник, телевизор, трллейбус, трамвай но мукет арбериос). Уг адӟиськы, кылсярысь, куке пудо-живот яке адями сюл пушкын сиён-юон "пӧзе", куке турын-куарын фотосинтез мынэ, куке турын, писпу яке лысьӧмъёс сисьмо. Вуоно толэзьлы юанъёс: 1. Ма со алкоголь, малы сое малпазы? 2. Ма со - наркомания? 3. Ма со СПИД? Кызьы со кылдэ? Тырше, пиналъёс, утчаське, бугыръяське. Визь ноку но мултэс уз луы. С. ПЕТРОВА. 2-26-4 Шундымы ӵемгес ини кутскиз Кисьтыны небыт тылсиоссэ, Соин ик шупаз ини лымы, Азбарысь шуназ мунё нылмы. Тол, кема улӥд ни дорамы, Вуоно арозь люкиськомы. Кеньылля тон вамышты дорад, Анаед возьма ни, дыр, гуртад. Ӟеч-а, бур-а, дуно тулыс куазь! Витисько тонэ мон кемалась. Усьяло ӧсме, укноосме - Я, бен, кузьма жингрес крезьгурдэ! Лена БОБРОВА. Секыт малпанъёс Липет йылысь пичи шырчик Вазиз мыным: "Чик-чирик!" "Бен, мылкыдыз солэн капчи",- Малпаса, секыи шокчи. Нош мынам тани али Мылкыды ӧвӧл капчи: Школаысь мон бертӥсько - Сумкаям "2" ваисько. "Ну, йӧтоз ини дорам", - Со малпан берга йырам. Мар бен таре кароно? Оло нош тетрадьысьтым Листоксэ ишкалтоно?.. Эх, вуиськем капказям, Пыроно луи дорам... Марианна ИВАНОВА, 8-тӥ класс. Яратон Возняковъя Кезьыт тол куазен-а, Небыт тулысэн-а Лыктоз тон доры яратон. Кезьыт пужмерен-а, Льӧмпу сяськаен-а Быдэс дуннеез возъялоз. Котькытчы тон кошкы, Котькытчы тон ватскы - Со тонэ одно ик шедьтоз. Чебер малпанэн но, Курыст синвуэн но Улонад сюрес со лёгоз. Егит пи куке но Дӥсьтытэк гин но "Тонэ яратоско" шыпыртоз. Оло огдырлы-а, Оло весяклы-а Сюлэмдэ аслыз лушкалоз... Лена СЕВАСТЬЯНОВА. 8-тӥ класс. Вуж Шудья гурт. Алнаш ёрос. 2-27-2 Сюресъёс, кожонъёс но пумиськонъёс Александрово шор ёзо школа бадӟым сюреслэсь палэнын ӧвӧл. Соин ик, вылды, командировкаосы потакумы та школае ӵемысь пыралляськомы. Татчы зэмзэ но котькинлэн пыдыз кыске, дыр. Угось со туж югыт, валаса чеберъямын, котьку шуныт. Кызь ар гинэ ай та школалы. Азьвыл директорзылэн В. Ф. Черновлэн кичӧлтэмез улсын но солэн тыршеменыз, сюлмаськеменыз валче та гуртэ шор ёзо школа пуксиз. Виктор Филиппович сярысь татын котькин ӟеч кылын гинэ вера. Ачиз со Алнаш ёросысь Улын Котныр гуртын вордскемын. Йылпумъямын Можга педучилищеез но Удмурт кун университетлэсь физикая но математикая люкетсэ. Берло аръёссэ школаязы технологияя урокъёсты нуэ, пиосты киужлы дышетэ. Тыршемезлэн емышез адӟиськытэк уг кыльы. Котькытын шӧдӥське пиослэн кибервылзы: чебер лусйыса, вӧлыса лэсьтэм пулэсь гардинаос, орнаментъёс но мукет арбериос чебермало школаез. Коридорысь шахмат шудонъёсты но ачиз Виктор Филиппович лэсьтэм. Технологияя ёрос олимпиадаез но та школаын ортчытӥзы туэ. Ми ӵапак ӵошатсконэз ортчытон нуналэ лыктыны тупамы. Пӧртэм школаосысь 8-тӥ классын дышетскись 23 пиналъёс люкаськизы татчы южтолэзьлэн 13-тӥ нуналаз. Пиослы но нылъёслы нимысьтыз юанъёс дасяллям Калыкез дышетонъя министерствоын но Дышетӥсьёслэсь тодонлыксэс йылэтонъя институтын ужасьёс. Пиналъёс азьвыл ик дасям проектъёссэс, асьсэлэсь лэсьтэм киужъёссэс вуттӥллям татчы. Озьы ик тест амалэн но тодон- валанзэс эскеризы на соослэсь. Александрово школаын трос гинэ усточиоссы. Та выллем ӵошатсконъёсын соос асьсэды возьматыны быгато. Кылем арын тани Костя Четкерев паймытӥз пулэсь чеберъяса лэсьтэм курег пузъёсын. Нош туэ со тэркы пишмытӥз, дуръёсаз бакча сиёнъёс суредаз. Нылъёс пӧлын Ксюша Собина школазылэсь данзэ утиз туэ. Со гужем нуллон дӥсь вурем. Кызьы кесэглаз, кӧня басма, сӥньыс быдтӥз та костюмзэ вурон понна, сое ваньзэ гожъяз. Мукетъёсыз но олимпиадае пыриськисьёс ужъёссэс та амалъя ик быдэстоно луизы. Трос гинэ кибашлыоссы вылӥллям Можга ёросын. Ваньзэ лэсьтэм ужъёссэс дунъяса но юанъёслы валэктон сётэмъёссэс чакласа, пиос пӧлын нырысетӥ интыез сётӥзы Ныша школаысь Сергей Лукиновлы, нош нылъёс пӧлын вормисе потӥз Можга черко гуртысь Вера Морозова. Та выллем ӵошатсконъёс нылъёслы но пиослы быгатонлыкъёссэс азинтыны, тодон- валанзэс йылэтыны юртто. Нош кин ӵошатсконэ ӧз пыриськы, соос "Ӟечбур!" газетын ужасьёсынымы пумиськонэ дыртӥзы. Та школаын трос гинэ юнкоръёс. Шӧдскымон вамышъёс лэсьто ини Лиля Тарасова, Женя Власов, Руслан Рылов, Ирина Красова но мукетъёсыз. Асьсэлэсь ужъёссэс ыстылэм сяна, соос пӧртэм ӵошатсконъёсамы но пыриськыло. Кылем арын но, туэ но та школаысь пиналъёс лотереяен шудонамы шудоосыз пӧлы сюризы, кузьым басьтӥзы. Руслан Рылов выль ар азьын ялэм "Тол бабайлы гожтэт" конкурсамы вормисе потӥз. Та пияш мукет удысъёсын но ассэ умой ласянь возьматыны быгатэ. Школаязы ортчытъяськись ужрадъёсы пыриськылэ, пӧртэм кружокъёсы ветлэ, ӟеч дышетске, спорт удысэз но уг палэнты. Ваньзэ тае лыдэ басьтыса ик, роноын ужасьёс солы Венгрие мыныны путёвка висъязы. Ма бен, сӥзёмы солы ӟеч сюрес но азьланьын эшшо но бадӟымесь вормонъёс. Аспӧртэмлыко гожъяськеменыз паймытэ 8-тӥ классысь Ирина Красова но. Нырысь кылбурзэ со гожтэм школалэн завучезлы Надежда Андреевна Драгомировалы сӥзьыса. "Туж сабырлы, ӟеч сямо, визьмо",- шуэ со дышетӥсьсы сярысь. Та кылъёс аслыз Ириналы но тупало кадь потӥз мыным. Кылбуръёс гожъям сяна, Ирина кырӟаны но яратэ. Гуртысьтызы фольклоръя ансамбле ветлэ. Алигес соос "Лейся, песня" фестивальын лауреатъёс луизы. Ириналэн мамаез Елена Афанасьевна но ветлэ та ансамбле, со быгатыса шудэ мандолинаен. Нош Ириналы сюлэмызъя матынгес - гитара. Соин шудыны нылашез дышетӥз Дима агаез. Газетмылэн "Сётэ тунсыко юан. Вормисьлы - автограф" рубрикаез улын лыдӟисьёсмес сӥё-дано кырӟасенымы Валентина Пудоваен тодматӥмы. Артисткалы тужгес но кельшиллям Ириналэн юанъёсыз. Солы со аслаз кырӟанъёсыныз кассетазэ но автографсэ кузьмаз. Та кузьымез но ми пумиськон нуналамы сётӥмы Ириналы. Озьы ик та нуналэ газетэн герӟаськем юанъёсмылы но шонересь валэктонъёс шедьтылӥз, та понна но со редакцимылэсь пичияк кузьым басьтӥз. Малпаськомы, азьланяз но Александрово школаын усточиоссы уз кулэсме, татчы котьку но сюлэм кыскоз. А. ЕРМОЛИНА. Туспуктэмъёсыз А. Сергеевлэн. . В. Ф. Чернов но Костя Четкерев олимпиада пумысен кенешо. . Ксюша Собина аслэсьтыз ужзэ возьматэ. Е. И. Беляева - технологиен дышетӥсь. . Саша Андрианов (Вуж Какся школа) аслаз уженыз тодматэ. . Руслан Рылов выль чуръёс кылдытэ. . Ирина Красова кузьымъёсыныз. 2-27-6 Шырчик Шырчике, шырчике, Тон кузьма бурддэ! Пилемозь ӝутӥсько, Поръяло но экто. Тон сьӧры лымшоре Тӧлпери кадь лобо! Элеонора НИКОЛАЕВА. Вуж Шудья школа. Алнаш ёрос. Юбер Юбер вуиз! Юбер вуиз! Вань калыкез шулдыртӥз. Быжзэ лэзиз, Бурдзэ ӝутӥз. Нош собере гурзэ кисьтӥз. Наташа ЖУЙКОВА. Ушур школа. Балезино ёрос. 2-28-2 Солэсь дуноез ӧвӧл Анайлэсь дуноез нокин ӧвӧл, дыр. Ӵукна ваньмызлэсь вазь султыса, со гурзэ эстэ, пӧраське, юртъер котырын берга. Изись пиез доры каллен гинэ мыныса, синъёссэ вошъятэк, шораз кема учкыса сылэ. Учке но пайме: ку меда такем бадӟым будыса вуиз? Син азяз пуктэ пичи гинэ тӧдьы кысъем пияшез, сое кӧкыын веттамзэ тодаз вае но шумпотэ. Тылобурдо гинэ но, пиоссэ карысьтыз поттэ ке, соослэсь ас кожазы лобаны дышетскемзэс шумпотыса учке уго. Уг ӵыды пиосыныз люкиськыны, соосты весь ас дораз воземез потэ. Вуиз ни 8-тӥ оштолэзь, анаелэн праздникез. Мон ӟечкыласько сое но сӥзисько андан кадь юн тазалык, капчи мылкыд, нуналлы быдэ шумпотон, ужаз выль азинсконъёс. Денис КОРОЛЁВ. Ромашкино гурт. Алнаш ёрос. 2-28-3 Дунне вылын ваньмыз яратонэн герӟамын Людмила Хрулёва, тодмо удмурт кылбурчи, журналист, туэ, 8-тӥ южтолэзе, 60 арес тырмонзэ пусъе. Таин валче солы кӧня ке юанъёсын вазиським: - Кыӵе мылкыдын пумитаськоды та юбилейдэс, Людмила Яковлевна? Али гинэ 55 арестэс пусйиды вал кадь. Удмурт драмая кун театре тӥледыз ӟечкыланы туж трос калык люкаськылӥз соку. Озьы лыдӟисьёсты юн гажамзэс но яратэмзэс возьматӥзы. Ужамдылы йылпумъянъёс лэсьтон выллем но со луиз. Та арлыддэс пусйыса угось тӥ шутэтскыны кошкиды. Гань-гань шутэтскемды луэ-а? Мар кариськоды ни та вакытэ? - Мон туннэ нуналэн улӥсько. Ортчемзэ малпаса уг пукиськы. Улон азьлань мынэ, воштӥське. Туала вакытлэн куронъёсызъя улыны тыршисько. 60 арес тырмонме туж паськыт пусйыны уг чакласькы. Солы коньдон но трос кулэ ук. Нош 55 аресам сомында калык люкаськоз шуыса ӧй ик малпа вал. Паймымон но шумпотымон вал со мон понна. - Тӥ уно аръёс ӵоже "Удмурт дунне" газетлэн редакцияз ужамын. Журналистлэн ужез котьку калык пӧлын. Нош али вӧзады кинды вань? - Кузпалэным кыкнамы гинэ кылимы куинь бӧлетъем квартираямы. Кык нылъёс будэтӥмы. Соос асьсэ семьяен уло ни. Кузпалы ужа на ай бере, ачим но тэк уг пукиськы. Межбанковской региональной страховой компаниын консультант луыса ужасько. Калыкен пумиськылыны, вераськыны яратӥсько. "Удмурт дуннеын" ужакум но шаермылэн котькуд сэрегаз вуылӥ, трос ӟеч калыкен пумиськылӥ. Очеркъёсы понна тау карыса вазиськылӥзы. Редакциын ужам аръёсме котьку ӟечен гинэ тодам ваисько. Али но берозь погылляськыса уг улӥськы. "Кин вазь султэ, солы Инмар сётэ" шуэмзы шонер. Лул-пуш дуннелы трогес саклык висъяны тыршисько. Котькинлы яртонэ мед тырмоз. Туж яратӥсько будосъёсты, вож садъёсты. Укно дурам соослы инты но уг тырмы. Сад-бакчамы но вань бере, перец узьымъёсы будо ни тани укно дурам. Мон соосын вераськисько. Вань улэп макеос сюлэм шунытэз шӧдо ук. Дунне вылын ваньмыз яратонэн герӟамын. Мӧйымыса мон сое эшшо но юнгес шӧдӥсько. - Тӥляд кылбуръёстыя трос кырӟанъёс кылдытъямын. Кызьы крезьгурчиосын кусып тупатӥськоды? - Бен, кылбуръёсыя трос кырӟанъёс кылдытъямын ни. "Тон понна" кылбурелэн тани ньыль пумо крезьгурез. Геннадий Ганьков, Пантелей Кузнецов, Мефодий Караваев, Николай Трубачев, Надежда Уткина, Валентина Широбокова, Анатолий Венчиков кылбуръёсылы крезьгур гожтӥзы. Мынам аслам нокинлы но крезьгур малпаны косыса вазиськылэме ӧвӧл. Крезьгурчиос асьсэос кылбуръёсме шедьто, мылкыдзыя кельшыто, лэся. - Нош асьтэос кырӟаськоды-а? Кудӥз кырӟанды тужгес но сюлэмдыя кельше? Ваньмыз- а крезьгурчиос кылбурчилэсь аслэсьтыз мылкыдзэ шӧдыны, валаны быгато? - Мон ачим кырӟась ӧвӧл ке но, крезьгурез яратӥсько. Кылбуракум но кырӟаса утчасько. Ритмика бордын озьы ужасько. Крезьгурчиос мылкыдме валало, кылбурелэсь пуштроссэ эшшо но мургес усьтыны быгато. (Людмила Яковлевна кырӟаны уг быгатӥськы шуэ ке но, со озьы ассэ яке асьмеды пӧяны выре. Туспуктэмъёсты учкылонъямы, шӧдтэк шорысь грамота но шедиз. Художественной самодеятельностез азинтонын мылысь-кыдысь тыршемез но бадӟымесь азинсконъёс басьтэмез понна ӟечкылало Быги школаысь дышетӥсез - Л. Я. Хрулёваез.) - Таизэ нош кызьы валэктоды? - юасько грамотаез лыдӟеме бере. - Ма, егит дыръя ветлылӥськомы вал концертъёсын. Кузпалы мынам спектакльёсын шудылӥз, ачим кылбуръёсме лыдӟылӥсько вал. Кин ке сьӧры кырӟаллясько, ачим солистка ӧй валы. Кык пичи нылъёсмес но сьӧрамы нуллылӥмы. - Мыным тужгес но кельше "Вождэ эн вай" кырӟанды. Вождэ эн вай тӥ шуиськоды гурттылы, юрттылы, анайдылы... Улэм-вылэм аръёстэс малпаса, эшшо кинлы ке "вождэ эн вай" шуыса вазиськемды потэ-а кадь? - Та кырӟанэз кылыкум аслам но сюлэмы ик вырӟиз. Николай Трубачев туж умой гур малпам. Шарканъёс сое сюанъёсазы бӧрдыса кырӟало. Вождэ эн вай шуэме нокинлы но уг поты. Мон котьку ӟеч малпанъёсын улыны тырши, нокинэ урод кылын ӧй сӧсыртылы. - Тӥ асьтэос но Шаркан ёросын будэмын бере, шарканъёс тӥледыз асьсэлэн карыса гажало, данъясько, дыр. Аспал муртты, Валентина Пудова, но кырӟанъёстэс быдэстылэ кадь. - Бен, Валентина Пудова "Ой, марлы?" кырӟанэз кырӟа. - Тӥляд кылбуръёсты печатласькемын "Егит сюлэм кырӟа", "Чагыр инбам", "Ныл сюлэм", "Йыр вадьсын инбам" бичетъёсын. "Погыли" нимо нылпиослы кылбур сборнике ог куамын пала кылбуръёсты пыртэмын. Нимаз книгаен но сое поттыны луысалыз. Куке-соку адӟомы-а нимаз книгадэс? - Та юбилееным валче туэ поттыны чакламын но. Ӧйтӧд кызьы луоз ини. - Тӥ покчи нылпиослы но, арлыдоослы но кылбур гожъяськоды. Кызьы но ку соос пӧрмо? Кин тӥледыз кылбуратэ? - Кыӵе ке малпан лыктэ ке, гожтытэк уг чидаськы. Уг ке гожтӥськы, сюлмысьтым маиз ке но ыше кадь. Нош покчиослы гожтон понна, пичи муртлы пӧрмытскыны кулэ. Мон пичи дырам берытскисько. Котьку шунытэн тодам ваисько со вакытъёсме. Мынам пичи дыры - со Кардон гурезь. Одӥг но ӝыны иськем со кыстӥське, меӵ ӧвӧл, нялмыт гинэ. Гуртэ пырыку, нырысь ик Кардон гурезь сюре. Отчы вуисько ке, сюлмы икак луэ. Сузэр-вынъёсме тодам ваисько. Анай-атайлэн ми тямыс кузя нылпиос вал, ог-огмес утьыса будӥм. Ачим но кык нылъёс будэтӥ, внукъёсы вить кузя ни. Бадӟымезлэн нылылэн, Ириналэн, кыкто нылъёсыз вордскизы. Кык арес но ӧвӧл на ай соослы. Анита но Аина туж шаплыесь, ерпечкаос кадесь будо, ваньзэ кутыло, ымазы тыро, дуннеез валаны дышетско. - Нош нылъёсты кыӵе удыс бырйизы? - Цоос кыксы ик суредасьёс. Эмеспие но художник - Николай Быков. Со городмылэсь гербзэ кылдытӥз. - Нылпиостылы юрттӥськоды, дыр. - Юртӥсько шуыны луоз меда. Визь-кенешен ке шат. Соос асьсэос милемлы юрттогес ини. Йыгмыт вамышъяло улонэтӥ. - Нош кузпалэныды тӥ кызьы ог-огдэс шедьтӥды? - Воткинск ёросысь Черновской школаын ужаськомы вал кыкнамы ик. Со физикаен но математикаен дышетӥз. Тодматским, ог-огмес яратӥм, комсомольской сюан шудӥм. Мон соку, чик юытэк но, шудэным кудӟемын вал. - Нош али тӥ асьтэдыз сыӵе ик шудоен шӧдӥськоды-а? - Мон туж шудо. Улонам, конешно, котькыӵе дыръёсыз вал. Сьӧд но тӧдьы гожъёс котькинлэн улоназ пумиськыло. Мон шудо нылпиосылэн шудэнызы. Егитъёс улыны быгато. Ваньзэ уродэн учконо ӧвӧл, выль сямен улыны дышетсконо. Выль даур, выль вакыт вуиз. Али егитъёслы ас кужымзэс эскерыны луонлык сётэмын. Огинтыяд пуконо ӧвӧл. Пукись ву зынме. - Тунаськемды куке вань-а? Кызьы тӥ малпаськоды, адями улонзэ ачиз лэсьтэ-а, яке со ваньмыз азьло ик "гожтэмын" ни-а? Удмуртъёс шуо ук: "Адӟонлэсь уд пегӟы". Улон сюрестэс выльысен радъяны косысалзы ке, марзэ ке воштысалды на-а? - Адями улонзэ ачиз лэсьтэ. Тунаськылэме ӧвӧл. Пересьмытозям Инмарлы но ӧй оскылы. Тятямы дышетӥсь вал бере, ми но атеистъёс кадь будӥмы. Али оскисько ни, шӧдӥсько Инмар вань шуыса. Инмар адямиез ачиз кадь лэсьтэм. Озьы бере, адямилэн но кужымез бадӟым. Асьмеос ӟигармес быдтӥськомы кулэтэм, уродэсь малпанъёсын. Адӟон вань ик, дыр. Но уродзэ ӟеч ужъёсын, малпанъёсын вормыны луэ. Соин ик чебересь малпанъёсын улӥсь муртлэн улонэз но чебергес, яркытгес пӧрме. Буёлъёсты асьмеос ик бырйиськом. Мыным тани кельшо вожмыт, лызмыт, бусӥр буёлъёс. Та улонын ваньмыз яратон бордысь кылдэмын. Яратон герд юн луыны кулэ. Яратоно матысь адямиостэ, музъемез, инкуазез, пудо-животэз, тылобурдоосты... ваньзэ, ваньзэ, мае Инмар кылдытэм. - Таӵе индылонъёстэс тӥ лыдӟисьёсмылы но вераськоды, дыр? - Бен. Нылпиос анай-атайёссэс мед яратозы, котьку мед кылзӥськозы соослэсь. Ӟеч дышетскыны, тодон-валан люканы мед тыршозы. Улонын со ваньмыз кулэ луоз. Нылашъёсты, сузэр-апайёсты, вань анайёсты 8-тӥ Мартэн ӟечкыласько. - Тӥледыз но, Людмила Яковлевна, вань сюлмысьтымы ӟечкыласькомы та сӥё-дано юбилееныды но нылкышноослэн праздникенызы. Котьку тазьы ик ӟечезлы оскыса улэ. - Люкиськон азямы, оло, вералоды на мар тӥ пӧраськоды та нуналэ? - Мон туж яратӥсько пӧраськыны. Та нуналэ асьме удмурт сиёнъёсты пыжисько: Фаршен мильым Пызез суралтӥсько йӧлын, ӝыны стакан кӧс вӧен, 2-3 курег пуз чигисько, шӧмызъя сылал понӥсько. Ыльняне кизер йӧлвыл кадьгес луэ. Фаршезлы парсь яке скал сӥлез мясорубка пыр поттӥсько, сугонэз векчи юдӥсько, сылалтӥсько но пурсатӥсько. Нырысь ик мильымез ӟырдатэм таба вылын пыжоно, собере пушказ фарш поныса бинялтоно. Перепеч Перепечлы ыльняньзэ вуэн гинэ лаисько, шӧмызъя сылал ватсасько. Нош фаршезлы картошка пӧзьтӥсько, нелькисько, курег пуз, губи, вӧй, шӧмызъя сылал понӥсько. Ыльняньлэсь пичиесь котыретъёс лэсьтылӥсько, дуръёссэ пеперъясько, вылаз фарш тырисько но духовкаын пыжисько. Ческыт медло! А. ПЛОТНИКОВА. 2-28-5 Гожтэт куды Тунсыко потоз-а? Редакцие вуэм гожтэтъёс пӧлысь дугдо инкуазьлы, вордскем шаерлы, вашкалаезлы но спортлы сӥземъёсыз вылэ дугдо. Та темаосъя трос гожтэтъёс вуо. Жаляса верано, уноез кӧсыт, огвыллемгес гожтэмын луо. Соин ик сыӵеоссэ ми кытӥ печатлатэк кельтӥськом. Тани коӵышъёс, пуныос сярысь 4-5 чурен гожтэмъёс вылысьтыз-вылаз вуо. Оскиськом: соосты тӥ юн яратӥськоды. Но малы ке сыӵе-таӵе гоно, ӝуждалаё шуыса гинэ возьматӥськоды. Соиз понна гинэ-а ньыль пыдо эшъёстэс гажаськоды? Нош эскерыса учке ай, ма но соос уг даурто, кыӵе но сямъёссы уг шараясько. Амало луэменызы пӧртэм учыръёсы шедьыло на. Ваньзэ сое возьматысалды ке, яратоно Мурзиктэс яке Шариктэс тазьы ик син азязы пуктысалзы лыдӟисьёс. Собере, Барсикъёс но Матильдаос сяна, мукет пӧйшуръёс, пудоос ӧвӧл, ни, лэся. Валъёс ик, кылсярысь, кыӵе визьмоесь, тунсыкоесь. Та ласянь эскерем-чаклам ужъёсынызы висъясько Ува ёросысь Булай школаысь пиналъёс. Пӧлады чорыганы яратӥсьёс вань гинэ. Татын но ужъёсты бордын чырмыт тыршемды сокем уг шӧдӥськы. Дэмен люкаськиськоды, ярдурын пукыны 2-3 чукырна кутӥськоды но гуртады бертӥськоды. Тунсыко-а потоз со сярысь лыдӟыны? Уз. Кудӥз нош ошмес быдӟа шурысь олома быдӟа чипейёсты кутылэ! Соиз ини воксё осконтэм. Чорыган амалъёсты, тӥ палан улӥсь чорыгъёсты, тумошо учыръёсты сярысь гожтысалды, дэмланъёстэс сётысалды ке, туж умой луысал. Вордӥькем шаерез, гуртэз котькинлы мусо, чебер потэ. Котькуд гурт, улос мукетъёсызлэсь висъяське инкуазеныз, кылдэменыз, нош отын улӥсь калык улэм- вылэменыз, сямъёсыныз но йылолъёсыныз. Со сярысь ӧжытгес гожто. Клубзы, школазы, мукет пуктӥськемъёссы вань шуыса гинэ иворто. Нош возьматысалды ке сиё-дано гуртоостылэсь улон сюрессэс, гурттылэсь кызьы кылдэмзэ но азинскемзэ, вашкала выжыостылэсь улэм-вылэмзэс, соку ужъёсты лыдӟымонэсь пӧрмысалзы. Со понна эскерон-чаклан уж нуоно, арлыдоослэсь юалляськоно. Топонимъёс (инты нимъёс) бордын но ужано, историен тунсыкъяськоно. Тани Алнаш ёросысь Денис Королёв Блатгуртэз сярысь умой гожтэм. Нош одӥг интыын янгышам: гуртсы вӧзтӥ Сибирь тракт, пе, ортче. Татарстанэ нуисеныз сураз, луоз. Соин ик ваньзэ пыр-поч эскероно, тодоно. Спортлы саклык ӧжыт висъяськоды. Нош физкультура урокъёсты яратӥсьтэмъёсты пӧлысьтыды шер пумиталод. Ӵошатсконъёсын ик кыӵе ӟырдыт нюръяськон пуроме ук! Со сярысь куинь чурен гинэ гожтӥськоды: шудон сыӵе лыдын йылпумъяськиз, Коля Мишаез азьпалтӥз. Нош кызьы? Коля, оло, уен-нуналэн спортэн эшъяське, секциосын сӥль- вирзэ кыдатэ. Удмуртия кужмо спортсменъёсыныз котьку данъяськылӥз. Гуртъёсын но шӧртчиос ӧжыт ӧвӧл. Соосын лыдӟисьёсты тодматыны быгатоды. Сое ваньзэ санэ мед басьтоды вылэм. Со сяна, куд-ог пиналъёс эшъёссылэсь вожъяськыса яке газет бамъёсысь нимтулзэс адӟон понна гинэ гожъясько кадь. Ма сярысь вераны тыршемзэс кытӥяз уд но вала. Соин ик нырысь пыр-поч малпаськоно, собере гинэ кие ручка кутоно. Озьы ик тэтэ карись юнкоръёс ужъёссэс вольыт гожъяськыны быгатӥсь эшъёссылы, дышетӥсьёссылы нырысь мед возьматозы вылэм. Янгышъёстэс тупатъяны но соку бер уз луы. А. СЕРГЕЕВ. 2-28-6 Кытысь пото кылбур чуръёс Школаямы ортчиз нылпи кылбурчиослы сӥзем ужрад. Пиналъёс нырысь-валысь тодматскизы Аркадий Клабуковлэн, Герман Ходыревлэн но Михаил Ильинлэн улон но гожъяськон сюресэнызы. Адӟытонын вал соослэн книгаоссы, тусбуйёссы, кылбуръёссыя дасям суредъёс. Дышетскисьёс шумпотыса кылзӥзы нылпи поэтъёслэсь жингрес чуръёссэс. Нош кылбуръёсты тужгес но чебер лыдӟизы Марина Иконникова, Игорь Калабин, Лёня Башкиров. Лилия Васильева мадиськонъёсын тодматӥз. Со нуналэ, эсьмаса, кылбур гожъяны ик мылкыд ӝутӥськиз. Кытысь пото кылбур чуръёс? Котькуд авторлэн аслаз гожъяськон манерез, кылбуръёслэн пуштроссы но ог- огзылы уг кельшо. Нош чуръёс вордӥсько сюлэмын, вань улэпсэ, чеберзэ яратон бордысен. Туж бадӟым тау карем потэ кылбур лыдӟисьёслы но, поэтъёслэн творчествоенызы тодматӥсьёслы но. Оло, милям но куке кылдозы кылбур чуръёсмы. Ирина ТУГАШОВА, 6-тӥ класс. Кармыж школа. Кизнер ёрос. 2-29-4 Верос гожтӥськом асьмеос "Кык" Каллен гиэ лымы усе. Кыӵе чебересь лымы пужыос! Куазь но шулдыр. Пиналъёс гурезь йылын нискылало, шумпото. Нош Колялэн чик мылкыдыз ӧвӧл, сумкаез но туж секыт потэ. Классазы со самой умой дышетскись. Дорысь ужъёссэ котьку дырз быдэсъя. Толон но быдэс ӝыт сочинение гожъяз, жадиз. Шутэтскыны выдэмез бере соку ик уме усиз. Ӵукна султыса гинэ тодаз лыктӥз: атематикаен дорысь ужзэ ӧз быдэсты. Соин ик туннэ со "кык" басьтӥз. Ох, кыӵе секыт солэн сюлмаз. Тани синкылиез каллен гинэ, ӵыжыт бам вылтӥз гылӟыса, лымы вылэ усиз. Коля пальто саесэныз синвузэ ӵушалтӥз но мылыз потытэк дор палаз вамыштӥз. Сюлмаз лемтэй куртчиськем кожалод. Сое сюпсьыса быдтыны турттэ кадь. Тани пияш ӧс кутон борды кутӥськиз но лулӟыса корка пыриз. Кылиськиз, аслаз комнатаяз мынӥз. Собере валесаз выдӥз. Тодаз лыктӥз математикаен дышетӥсез. Нылкышно, вожез потыса, пурысь синъёсыныз Коля шоры учкиз но шуиз: "Туннэ "кык" пуктӥсько. Валад-а?" Солэн синъёсыз тыл кадь ӝуало вал. "Малы-о со мыным одӥг пол но "вить" ӧз на пукты?" - малпаське Коля. Шӧдтэк шорысь комнатаяз анаез пыриз: "Пие, мар луиз? Школаысь бертэмед бере ӧд но сиськы ай" "Номыр но ӧз, бертыса жади". - "Жадид ке, шутэтскы, иське". Колялэн пушкыз тыриз, синзэ ворсаз, синлысъёсыз котмизы, ог-огзы борды лякиськизы. "Кык" пуктӥзы", - виышъяса вазиз пияш. - "Маин?" "Математикаен. Толон быдэс ӝыт сочинение гожъяй но "вить" басьтӥ, нош математикаен дасяськыны вунэтӥ, - шуиз Коля. - Мария Петровна монэ уг яраты, одӥг пол но "вить" ӧз на пукты". "Умойгес дышетӥд ке, "витьёс" но пуктылоз. Ӵуказе одно ик "кыктэ" тупаты". "Я, тупато. Одно ик тупато. Ӵуказе "вить" басьто. Мария Петровна мыным ноку но "кык" уз ни пукты". Собере, ӝотрак султыса, анаезлы шуиз: "Ойдо, анай, сиськом. Мынам кӧты сюмаз ни..." "Ойдо, пие, ойдо", - лушкемак пальпотыса, пумитаз анаез ваизиз. Лена ЗАМЯТИНА. Азамат гурт. Алнаш ёрос. 2-5-1 Нылпи - со Инмар Секыт ик Инмар сярысь вераськонэз кутскыны. Тӥ адӟылӥды-а ни Инмарез? Ӧд? Нош нылпи садын ужасьёслы осконо ке, соос котькуд нунал Инмаръёсын верасько. Инмар угось соос понна - нылпи. "Со котьма быгатэ, со сыӵе чылкыт, со сыӵе чебер..." - таӵе малпанэн герӟаськемын вал котькудӥзлэн ик нылпи садысь воспитательлэн ужез, адӟытонэз. Уг тодӥськы, кызьы мукетъёссэ, но монэ оскытыны быгатӥзы. Нылпи - со зэмзэ но Инмар. Пиналъёсын ке ӧй ужасалзы, соосты ке ӧй яратысалзы, та адямиос сыӵе шудо ымныроесь ӧй луысалзы, дыр, - малпай мон. Учке ай, кыӵе соослэн синъёссы чиляло, кыӵе задор мылкыдоесь! Вӧзысьтыз бадӟым эшъёссэ, апайёсты, дядяйёсты нылпи чылкытгес, чебергес, мусогес карыны быгатэ. "Кытысь тон дядяйёсты адӟид? Нылпи садын нылкышноос гинэ ужало ук", - уретоз, дыр, монэ куд-огез. Зэмзэ но, талы шуг оскыны. "Усатый нянь" киноын гинэ вань кадь потэ. Нош соос, шер ке но, улонын но пумиськыло вылэм. Эшшо ке ӵошатсконъёсы но пыриськыло. Кыӵе-мар ӵошатскон шуиськоды-а? Ойдолэ бен, ваньзэ радызъя. Ӝужыт, жужыт гурезь йылэ... "Нылпиос доры васьконо ӧвӧл, соос дорозь тубыны быгатоно", - шуо философъёс. Ӝужыт-а со пагӟа? Кӧняетӥ тубатын сылэмзэс тодон-эскерон понна ик, дыр, "Устоез нылпи садын ужась - 2002" ӵошатсконэ пыриськыны мылкыд каризы шаерысьтымы 32 воспитательёс. Соос ваньзы ик асьсэлэн ужан амалъёссы сярысь рефератъёс гожъязы, видеоматериалъёс дасязы, шудон пыр ужамзэс возьматӥзы. "Арлэн устоез дышетӥсез" нимо ӵошатсконъёс шаерамы арлы быдэ ортчытъясько. Со аспӧртэм йылоллы пӧрмиз ини. Нош нылпи садын ужасьёс понна таӵе ӵошатскон нырысьсэ радъямын вал. Нырысез табань соку ик ӟеч уг ке но пыжы, шуо. Таиз ужрад сярысь озьы вераны уг луы. Ӵошатсконэ пыриськисьёслэн тыро-пыдо дасяськемзы, радъясьёслэн пыр-поч тыршемзы шӧдӥськытэк ӧз кыльы. Котькудӥз ик та ужрадэ пыриськись мурт сярысь нимысьтыз вераны луысал, дыр. Воргорон сярысь кылпум поттылӥ бере, нырысь ик соин тодматом. Со - Суднищиков Андрей Эсенович, Ижкарысь 33 номеро нылпи садын ужась. "Поэзилэн пичиослэсь вераськонзэс волятыны юрттэмез", - таӵе темаез со сэрттэ-пертче аслаз рефератаз. Андрей Эсенович авторской кырӟанъёсъя нырысетӥ Калык куспо фестивальлэн дипломантэз, искусствоя но калык творчествоя фестивальлэн кык пол лауреатэз но "Вераськон жанр" нимо нырысетӥ Элькун фестивальлэн лауреатэз. Тодмо но дано адями. Усто пужыятске, пулэз чеберъяса вандылыны, пӧртэм арбериос лэсьтыны быгатэ, Вылӥ дышетсконниез йылпумъямын. Котькыӵе удысын со ассэ возьматыны быгатысалыз, дыр. Но Андрей - поэт. Солэн аслаз дунне валанэз. Нылпи садэ лыктыса со, кызьы ачиз вера, валаз тани мае: "Дунне вылын самой Быдӟым, самой визьмо адямиос - со нылпиос". Пиналъёсын со ортчытъя пӧртэм балъёс, поэзиен тодматскон урокъёс. Куинь ар ӵоже (тамында гинэ ужа ай со нылпи садын) нылпиосыз ваньзы сямен кылбураны дышизы ни. Со шумпотэ, куке пиналъёс тол бусыез кымалскем инбамен ӵошато, куке соослэн асьсэлэн, кылбуръёссэс лыдӟыкузы, синъёсазы кизилиос ворекъяло. Котыр дуннеысь чеберез адӟыны, валаны, дунъяны дышетэ пиналъёсты "Усатый нянь". Ачиз но соос пыр чеберез валаны дышетске, сюлэмаз кельтыны тырше. Андрей Эсенович, нырысетӥ турын вормыса, кыкетӥяз потӥз. Нош финалэ... Татчы тубыны укыр секыт вал угось. Ӵошатсконэ пыриськемъёс ваньзы кужмоесь, котыр ласянь возьматымонэсь ке но вал, финалэ вить муртэ гинэ кельтоно. Кема малпаськемез, йырзэ тӥямез бере, жюри ялӥз вормисьёслэсь нимъёссэс. Тани соос: Сарапулысь 4-тӥ нылпи садын ужась Катерина Витальевна Малкова, Ижысь 207-тӥ нылпи садысь воспитатель Татьяна Александровна Маркова, Воткинск ёросысь, Июльское черкогуртысь Любовь Викторовна Вершинина, Воткинскысь Наталья Николаевна Татаринова но Можгалась Светлана Евгеньевна Мыльникова. Та ӵошатсконлы йылпумъянъёс лэсьтон ортчиз операя но балетъя театрын. Нылпи садын, асьсэ удыссылэсь дунзэ но данзэ татысен тужгес но юн шӧдӥзы, луоз. Со сярысь веразы кужмоесь кичабонъёс, ӟырдытэсь ӟечкыланъёс но бадӟымесь кузьымъёс. "Нылпи - со буш лянэс ӧвӧл" К. В. Малкова та нуналэ вормись сяна, УдГУ-ысь психологя но педагогика факультетлэн студенткаез но луиз. Университетлэн ректоратэз сое экзаменъёстэк гинэ дышетскыны кутӥз. Сарапулысь кивалтӥсьёс асмуртсылы выль квартиралэсь усьтонъёссэ кузьмазы. Выль улон интыяз Катерина Витальевна пыртоз на компьютер но магнитофон. Табере егит специалист эшшо но ӝутскем мылкыдын азинтоз, дыр, кутскем ужзэ. Катерина Малкова оригамиен но аюрведаен тунсыкъяське. Татын со возьматӥз нылпиосын ӵош оригами бордын ужамзэ. Соос лэсьтӥзы Дунне кылдон вакытэз. Пиналъёс ас киосынызы йӧндыризы музъемез, инбамез, писпуосты но адямиез. Мар сярысь малпаськиз меда Инмар Дуннеез кылдытыкуз. Та сярысь вераны быгатозы, дыр, пичи кылдытӥсьёс гинэ. "Нылпи - со буш лянэс ӧвӧл. Сое кенжытыны гинэ быгатыны кулэ" - шуо шунды ӝужан палась визьмочиос. Соослэн малпанэнызы быдэсак соглаш луэ Катерина Витальевна но. Со котькуд пиналлэсь сюлэмзэ ӟеч ужъёсы валтӥсь, дуннеысь выльзэ утчан, кылдытон мылкыдэн кенжытыны быгатэ. "Удмурт калыклэн зэмос нылыз" Озьы шуизы Татьяна Александровна Маркова сярысь. Татьяна Александровна та ӵошатсконэ витьымтэ шорысь ӧз вуы. Кылем арын Ижкарысь нылпи садысь ужасьёс куспын ӵошатсконын со нырысетӥ интые потӥз. Учкисьёсты со паймытъяз аслаз кырӟаны-вераны быгатэменыз. - Кемалась-а тӥ кылбураськоды? - юасько Татьяна Александровналэсь. - Уг. Мон кылбуръёсын туж ик уг выриськы. Уж ласянь кулэ луэ ке, косо ке, соку сайка, лэся, пыдло ватэм быгатонлыке. - Тӥляд атайды тодмо удмурт кылбурчи Александр Белоногов. Кылбуран мылкыдды атайдылэсь пыӵам, шӧдске. Удмурт кылэз гажан но семьяды бордысен ик кутскиз, дыр. - Бен. Мынам анай-атайёсы мон вордскыку кыкназы ик медучилищеысь студентъёс вал. Мон ӵемгес улӥ анаелэн вордскем палъёсаз - Алнаш ёросысь Сырьез гуртын. Удмурт кылэз гажан песянае пыӵатӥз, луоз. Онься песянае калык йылолъёсты, сямъёсты чаклась-валась кышномурт вал. - Нош ку кылдӥз нылпиосын ужан мылкыдды? - Мон туж яратӥсько нылпиосты. Пичиысен ик тодӥсько ни вал кадь улонме соосын герӟало шуыса. Можга педучилищеез йылпумъяме бере, мон нырысь Вылӥ Кватчи школаын ужай, дышетсконме азинтӥ Глазовысь пединститутын. Ижкаре улыны интыяськи но нылпи садэ ужаны кариськи. - Тӥляд асьтэлэн нылпиосты вань-а, верасько-а соос удмурт сямен? - Мынам нылпиосы бадӟымесь ини. Нылылы 20 арес, пиелы - 19. Удмурт сямен соос уг верасько. Азьвыл удмурт кыл шоры мукет синмын учко вал ук, городын сое уг но дышето вал. - Нош али удмурт кыл шоры учкон воштӥськиз ни-а кадь. Кыӵе шуг-секытъёсын пумиськылӥськоды? Анай-атайёслэн пӧртэмесь, дыр, мылкыдъёссы. - Удмурт кыл шоры учкон воштӥськиз. Анай-атайёсын вераськыны, огъя кыл шедьтыны луэ. Нош асьсэос пиналъёс туж ярато удмурт выжыкылъёсты, легендаосты, кырӟанъёсты, шудонъёсты. Мон озьы ик удмурт кыллы дышетӥсько ӟучъёслэсь но бигеръёслэсь нылпиоссэс. Мед соос гажаны но валаны дышетскозы удмурт кыллэсь пуштроссэ, чеберлыксэ. Ваньмы Удмуртиын улӥськомы ук. - Тӥ тани ӵошатсконын финалэ потӥды. Кызьы учкиськоды вормонды шоры? - Туж бадӟым ныпъетэз оскизы мыным. 207-тӥ нылпи садлэсь, Октябрь ёрослэсь гинэ данзэ уг утиськы. Мон киын туннэ вань удмурт кылэз дышетӥсьёслэн данзы. Сое саптаны уг яра. Эшъёсы мон понна "висё", сюлмасько. Тау соослы юрттэмзы понна. Татьяна Александровна удмурт кыллэсь данзэ ӧз уськыты, сое со эшшо но вылӥе ӝутӥз. Тыршемез понна солы сётӥзы чибориё телевизор. "Удмурт кылы - со мынам нырысетӥ кузьыме но нырысетӥ вамыше. Со анай кадь нуэ монэ улонэтӥ", - шуэ ачиз Татьяна Александровна. Ма бен, анай кылмы солы эшшо но бадӟымесь вамышъёс лэсьтыны мед юрттоз. Туж зӧк медаз лу вылэм кӧм Куинетӥ вормись Л. В. Вершинина аслаз ужез шоры философ синмын учкыны быгатэменыз паймытӥз. Аслэсьтыз возьматон уроксэ со таӵе выжыкылэн йылпумъяз: "Вашкала дауръёсы динозавръёс асьсэлэсь пузъёссэс ӝужыт гурезь йылэ тырыса кельто вылэм. Тӧл, пе, золгес пельтэ ке, пузлэн кӧмыз зӧкгес луэ. Пичи динозавр кема йыгаськем, потэме потэ ни шуыса. Нош кӧм юнгес но юнгес кариське, пе. "Вазь на тыныд потыны, татын тӧлъёс поръяло", - шуэм со. Динозавр ӝокам, лултэм вордӥськем. Нылпиосты но ялан утьыса, шунытын гинэ возьыны кулэ ӧвӧл, дыр. "Кӧмез" ӧжытак векчиятоно, улонэ ачиз сюрес "ӵогыны" мед быгатоз. Нылпи садын ужасьёслы зэмзэ но бадӟым оскон сётэмын. Пиналъёслэн нырысетӥ сюрессы кутске нылпи садысен. Кызьы шуо удмуртъёс: "Шундылэсь азьло султы но, шунды тынэсьтыд ужамдэ адӟыса мед шумпотоз". Таӵе кылъёсын аслэсьтыз ужзэ йылпумъя Т. А. Маркова но. Мон малпасько, шунды но шумпотӥз соослэсь ужзэс адӟыса. А. ЕРМОЛИНА. . Туспуктэм вылын Т. А. Маркова. Туспуктэмез Ю. Ивановлэн. 2-5-2 Владислав КИРИЛЛОВ. Нош ӧвӧл одӥгез Яратэ Генямы Пичигес кисыяз Арбери люканы: Вуж болтъёс, усьтонъёс, Сӧриськем ручкаос, Векчи ез бинетъёс... Мар уд шедьты шкафысь, Со сюроз ӟепысьтыз. Нош ӧвӧл одӥгез, Ӧвӧл ныр кышетэз. 2-6-1 Ӵыжы-выжы кусыпъёсты эскере Кемалась ик ӧвӧл, тодматскыны кылдӥз венгер тодосчилэн Энико Сийлэн "Термины родства и свойства в удмуртском языке" нимо выль книгаеныз. Поттэмын со Будапештын. Ачиз но Э. Сий ужа отысь университетын. Трос ужъёс гожтэм ни финн- угор калыкъёслэн кылъёссыя. Таизлэн книга вылтусыз но чебер. Отын ньыльдон пала удмуртъёсын туспуктэм шуккемын: нылкышноос но пиналъёс удмурт дэремъёсын, нош воргоронъёс - шляпаосын но дукесъёсын. Энико Сий та фотоез Финляндиысь куке но адӟылэм. Собере сое курем. Та монографияз венгер тодосчи сэрттэ-пертче удмурт гуртысь удмурт выжыослэсь юн герӟаськемзэс. Соос огазеясько ужъя но шутэтсконъя, пинал-нуны вордонъя, кышнояськемъя-быземъя... Тани валчеяськемез возьматӥсь куд-ог кылъёс: эмеспи, нылпи, пиосмурт, пинал, вынмурт, иськавын, кышномурт, вылькен. Книгазэ гожтыкуз Э. Сий шаерысьтымы но, Россиысь но, кунсьӧрысь но тодосчиослэсь ужзэс кутэм. Та исследование чакламын тодосчиослы, дышетӥсьёслы, студентъёслы но удмурт кылын тунсыкъяськисьёслы. М. МИХАЙЛОВА. Ижкар. 2-9-7 Тол уй Усе лымы, Куанэ сюлмы. Кезьыт уммен Кызьпу кӧлэ, Юг азвесен Пужмертскылэ. Лыкты дорам Дуно эше! Учкы шорам Пуком ӵошен! Маша ИВАНОВА. Солвьёвка гурт. Грах ёрос. 3-11-1 Лулчеберет шаерын Балалайка Дунне вылын вань сыӵе крезьгуро инструментъёс, кудъёссэ куд-ог калыкъёс вашкала дырысен асьсэ музъем вылысь потэмын шуо. Кылсярысь, удмуртъёс асьсэлэнэн лыдъяло крезез, испанецъёс - гитараез, украинецъёс - бандураез, итальянецъёс - мандолинаез, нош балалайкаез шуо ӟуч калыклэн. Нырысьсэ балалайка сярысь калык тодӥз 1714-тӥ арын. Балалайкаез ӵемысь адӟыны луэ вал беризь пул вылысь суредъёсысь, кылыны луэ вал мадёсъёсысь, выжыкылъёсысь, калык кырӟанъёсысь: Коркам пыро, Ӟус вылам пуксё, Балалайкаме басьто, Кутско шудыны, Кырӟанъёс кырӟаны. Вашкала дыръя балалайкаос котыресэсь вылӥлям, кык сиен, корпуссэ (мугорзэ) лэсьтылӥллям бушатэм каунэз куэн кыскыса. Кин тодэ, кыӵе меда адӟонэз луысал балалайкалэн азьпалан, солэн жингрес куараезлы ӧй ке синмаськысал быдӟым ӟуч крезьгурячи В. В. Андреев (1861-1918). Тани со кызьы тодаз вае одӥг учырез, кудӥз воштыны юрттӥз балалайкалэсь "улон сюрессэ". "Одӥг пол шуныт, шулдыр гужем ӝытэ кылӥсько та дырозь ноку но кылылымтэ6 тодмотэм, сюлме пырись крезьгурез, уг валаськы, маин шудо? Кыре потӥ. Синъёсылы уг оскиськы. Тубат вылын пуке Антип нимо ужасе, задор шудэ кыӵе ке но пичи гинэ, туж куанер тӥрлыкен. Пайми. Антипез кури монэ соин шудыны дышетыны, со луиз мынам дышетӥсе". В. В. Андреевлы сыӵе кельшиз балалайкалэн куараез, соку ик басьтӥськиз сое умоятон, выльдон борды ачиз ик чертёжъёс но лэсьтылӥз. Кема утчано луиз кибашлыосты, малы ке шуоно, нокинлэн но та уж борды басьтӥськемез ӧз поты, воргорон тӥрлыкен ӧз лыдъялэ. Озьы ке но, ачиз В. В. Андреев но туж тодмо кибашлыос В. Иванова, Ф. С. Пасербский, С. И. Налимов басьтӥськизы та ӟеч уж борды. Соослэн визьмо йырзы, усто киоссы быдэсак воштӥзы балалайкалэсь вылтуссэ но, гурланзэ но. Туннэ со мугорыныз кельше треугольниклы: куинь сиосыз, кузь грифез, вакчи чыртыез, пичияк мыкыртӥськем йырыз. Лэсьто сое бадярлэсь, кунгож сьӧрысь сьӧд дуно писпулэсь. Балалайкаос вань олокыӵеез но: балалайка-прима, балалайка- секунда, балалайка-альт, балалайка-бас но мукет. Гурыз-куараез эшшо но чебергес луиз. Солэн азвесь, жингрес куараез, сиосыз чиньылэсь шунытсэ шӧдо но, соку балалайка ачиз жингыртэ. Калыклэн со одӥгез туж яратоно инструментэз. Балалайка шудэмъя кырӟало калык кырӟанъёсты, экто чупрес эктонъёсты, шудо пьесаосты. Куинь сиен шудыны луэ клссикаез но, джазэз но. Туж синмаськемын вал балалайкалы П. И. Чайковский. "Кыӵе синмаськымон чебер та балалайкаос! Кыӵе паймымон кужым сётыны быгато соос оркестрын, куараезлэн туж ӟеч тембрез, нокыӵе но инструментъёсын воштыны луонтэм. Кыӵе солэн чильпырась дун, чылкыт куараез". * * * Балалайкаен шудыны мылкыд карисьёс трос милям усточиосмы пӧлын но, дас кык пиналъёс балалайкаен шудыны дышетско. Туж гажало нылпиос дышетӥсьсэс - Владимир Серафимович Гулинэз. Со егит, мусо, визьмо дышетӥсь. Крезьгуръя училищеын но дышетэ на, "Балалайка" нимо алигес кылдытэм ансамбльын но шудэ, егит воргорон котькытчы вуэ. Владимир Серафимович дышетскиз Ижкарысь крезьгуръя училищеын, йылпумъяз Казаньысь консерваториез. Отын со балалайкаезщ пыр-поч дышетӥз. Усточиосмы пыриськыло пӧртэм ӵошатсконъёсы. Кылем арын тулыс Ижкарын ортчиз нырысетӥез калык инструментъёсъя ӵошатскон, кытын Мария Зямбахтина но Артём Кириллов басьтӥзы кыкетӥ инты. Туж бадӟым шумпотон ваиз пиналъёслы, тужгес но балалайкаен шудӥсьёслы, Екатеринбургысь Россилэн сӥё-дано артистэзлэн, профессорлэн Шаукат Сабирович Амировлэн концертэз, кудӥз сӥземын вал туж гажано, тодмо балалайкаен шудӥсьлы, профессор А. Б. Шаловлы. Балалайкаен шудӥсьёс пӧлын куинь китъёс: А. Б. Шалов, Е. Г. Блинов, П. И. Нечепаренко (А. Б. Шалов кылем арын улонысь кошкиз). Концерт ортчиз культура училищелэн юртаз 20-тӥ тулыспалэ. Ш. С. Амиров -нылпиосмылэн яратоно дышетӥсьсылэн В. С. Гулинлэн дышетӥсез. Сокем зол, чебер, чупрес шудӥз балалайкаен Шаукат Сабирович ӟуч, бигер калык кырӟанъёсты, нокинлэн но сое сцена вылысь лэземез ӧз поты. Профессорлы возьматӥмы одӥгзэ усточимес - Паша Васильевез. Со вордскемын Балезино ёросысь, Шолоково гуртын, ньыль ар дышетске ни балалайкаен шудыны. Павликмы 7-тӥ инмын лоба, кызьы сотэк, ачиз профессор солы балалайкаен урок сётӥз, ушъяз, янгышъёссэ но эскериз. Кыӵе усто, балалайка шедьтӥз шунды улын ас интызэ, со скрипка кадь ик тыршись, ӟуч калыклэн кадь кырӟась, шулдыр, паськыт сюлмыз. . В. С. Гулин, Паша Васильев, Саша Тронин. Туспуктэмез Ю. Ивановлэн. 3-11-2 Библиен тодматскон Дуннеез кылдытон - Ну, кутскомы-а Библиен тодматскыны? - юаз Лиза песянай Анялэсь. - Одно ик! Одно ик! - шумпотӥз нылаш. - Но нырысь ик мон тыныд улонысь учыр сярысь верало ай. Одӥг учёной асьме Шунды системамылы укшась пичи модель лэсьтэм. Туж ӟеч пӧрмем со ужез: пичи гинэ толэзь Музъем котыртӥ берга. Нош Музъем но мукет планетаос - Шунды котыртӥ. Одӥг пол со учёной доры Инмарлы оскисьтэм эшез лыктэм. "Усто-о! - пичи, чебер моделез адӟыса, соку ик вазем со. - Кыӵе быгатыса лэсьтэмын. Кинлэн бен та ужез, кин сое лэсьтӥз?" "Нокин но ӧз лэсьты сое, ачиз пӧрмиз",- серемпыр вазем учёной. "Бен мон номыре валасьтэм пичи пинал-а мар-а? Малы монэ исаськоды? - йырыз кур луэм кунолэн. Номыр но ачиз, ас понназ уг пӧрмы". "Шунды системалы укшась та пичи модель ачиз пӧрмиз шуыса тӥ уд оскиське, нош зэмос Музъем но мукет планетаос асьсэос, нокин лэсьтытэк пӧрмемын шуиськоды. Кызьы бен валано сое?" - лякытак юам учёной. - Зэм но, песянай, номыр но ачиз уг пӧрмы. Азьвыл мон со сярысь ӧй но малпаськылы вал. - Бен, тросэз уго со сярысь чик но уг малпасько. Кемалась, кемалась, туж кемалась, Аня, номыр но вылымтэ. Синъёстэ кынь али кӧня ке дырлы. - Ой, тём-тём пеймыт. - Тӥни озьы ик номыр вылымтэ, Инмар сяна. Бен, сое асьмелы али туж шуг валаны. Библиын гожтэмын: "Нырысь ик Инмар кылдытэм инбамез но музъемез". Кызьы верамы ни вал, соку котькытын тём-тём пеймыт вылэм. Ма кароно? Инмар югыт тыл кылдытэм. Югыт дырез Со "нунал" шуыса нимам, нош пеймыт дырез "уй" шуэм. Музъемез Инмар адями понна лэсьтӥз. Со туж сюлмаськиз, Музъем вылын шулдыр мед луоз шуыса. Со понна Инмар кылдытӥз сяськаосты, тылобурдоосты но трос мукетъёссэ. Со вакытэ музъем вылын зэмзэ но туж-туж чебер вылэм. Берло гинэ ини, адямилэн сьӧлыкамез бере, котырысь инкуазьлэн чеберез шӧдскымон кӧсэктӥз, куд-ог интыосын тодманы луонтэм шимес луиз. - Нош толэзез, шундыез, мукет планетаосты но Инмар адями понна ик лэсьтӥз-а? - Бен, ваньмыз со адями понна кылдытэмын. Малпаськы али: сомында кизилиос, галактикаос - ваньмыз соос бергало но ог-огенызы уг шуккиськыло. Соин ӵош ик огаз но со кизилиын, планетаын адями улыны уз быгаты. - Соку валантэм, малы, бен, ваньзэ сое лэсьтонэз вал? - Ваньзэ сое адӟыса, адями Инмар сярысь мед тодоз шуыса. - ?! - Бен, бен, сое туж секыт валаны. Но мургес малпаськимы ке, зэмзэ но валаломы, кыӵе асьмелэн Инмармы визьмо. Кыӵе тыршыса, сюлмаськыса кылдытэмын вань улос. Тани, кылсярысь, та пичи нымы-кибыосты ик басьтомы. Кыдёке ум ветлэ, вӧлдэтэ учкы али. - Кут сяна, отын нокин но ӧвӧл, песянай. - Нош кызьы со вӧлдэтысь уг усьы, тон ноку но со сярысь ӧд малпаськылы-а? - Зэм но, песянай, кызьы со уг усьы? - Кутлэн котькуд пыдаз 150 пасез, отысь лякиськись вещество потэ. Соин ик, кытчы кут пуксе - отчы тып-тып лякиське. Со лякиськись веществоез солэн ноку но уг быры. - Соин ик кутъёс укно пияла вылтӥ но ветло, уг но гылӟо, озьы-а, песянай? - Озьы, нылы, озьы. - Нош адями? Адямиез но Инмар лэсьтӥз ук. - Со сярысь васьмеос ӵуказе вераськомы. Ольга МОСКВИНА. Ижкар. 3-11-7 Шуд понна нюръяськиз Мон ноку но уг вунэты 1965-тӥ арын 27-тӥ гудырикошконэ удмурт калык писателен Михаил Андреевич Ляминлэн Игра посёлокын лыдӟисьёсын пумиськонзэ. Туж трос калык люкаськиз яратоно мадёсчиен вераськыны. Отын М. А. Лямин мадиз солэсь умой книгаос гожъямзэ но пӧртэм ӵектонъёс сётӥзы. Мукет лыдӟисьёс сямен ик мон шумпотыса басьтӥ солэн чебер кибервылыныз гажаса гожтэм "Четыре года в шинелях" выль книгазэ. Михаил Лямин вордскиз 1906-тӥ арын 26-тӥ толсуре Ува ёросысь Хомяково гуртын. Ньыль аресысен ик атайтэк кылеменыз, солэн улонэз капчиен ӧз ортчы. 13 аресысен граждан оже пыриськеменыз, писатель ас синмыныз адӟемзэ "Шудбур понна" книгаяз сэрттӥз-пертчиз. 1921-тӥ арын Выль Мултанысь педагогикая техникуме дышетскыны пыриз. Егит Миша газетъёсы статьяос соку ыстылӥз. Педтехникумез быдтэмез бере дышетскиз Ленинградысь А. И. Герцен нимо педагогикая институтын. Сое йылпумъяса, Михаил Андреевич Ижкарысь совпартшколаын удмурт кыллы но литературалы кык ар дышетӥз. Солэн кивалтэмез улсын татын ужаз литературая кружок. Дышетскисьёс сяна, отчы ветлӥзы писательёс но. Кружокын эскерылӥзы удмурт мадёсчиослэсь выль произведениоссэс. 1941-тӥ арын гудырикошкон толэзе Удмуртиын кылдыто стрелковой дивизия. Асьм е дорын вордӥськемъёсын та дивизиен ӵош кузь ож сюресэз ортчиз штабысь офицер Михаил Лямин но. Тыл пыртӥ потэмзэ писатель берло возьматӥз "Ож сюрес" книгаяз. Сое ӟуч кылэ берыктӥз дивизиен ӵош кузь сюресэз ортчем ӟуч писатель Алексей Никитин. Ӵапак улонэз пырак возьматӥсь та "Четыре года в шинелях" книга синпель кадь мыным весяклы кылиз. Война йылпумъяськем бере Михаил Лямин Ижевске берытскиз но выльысь ужаны кутскиз книга поттонын. Собере пӧртэм интыосын ужаменыз ӵош тыршиз выль произведениос кылдытон удысын. В. ЧЕРНОВ. 3-11-9 Э, Ондӥ, Ондӥ... Валэктымтэ Ондӥ, нырысьсэ школае мынэм бераз, отысь ӟыз-з! бӧрдыса бертӥз. - Ма луиз, пие? - пумитаз Ондӥез бубиз. - М-монэ ке ш-школае к-келяськод, - викышъямысь уг дугды Ондӥ, - нош ачид уд вераськы, школае портфелен мыноно шуыса... Школае - Ондӥ, султы ни, - ӵуказеяз ӵукна сайкатэ мумиз пизэ. - Школае бере кылёд. - Нуналлы быдэ школае мон-а ветло?.. Туннэ выны мед мыноз ни, - шобрет улэ пыдло ватӥськиз со. Капчи юан Выль темаез ортчемзы бере, дышетӥсь Ондӥлы вазиськиз: - Вера ай, Ондӥ, мае существительной шуо? Ондӥ ӟудыса ӧз улы: - Анвасильевна, юанды туж капчи но валэктыны туж секыт... Тупатысал, пе Укыр шаян ик та Ондӥ. Оло, соин но, дневниказ бӧрсьысь бӧрсе "кыкъёс" пуксьыллям. - Ку "кыкъёстэ" тупатод ни? - атаез пизэ визьма. - Мон кемалась тупатысал но, - нырзэ кыска пиез. - Марым... дышетӥсьмы огпол но журналзэ ӝӧк вылэ ӧз кельты на. Котьку сьӧраз нуллэ. Кошкем Таиз учыр Ондӥлы ог-витё арес дыръя вылэм ай. Соос доры чарка бичась бускельзы кожем. Микворлэсь пыремзэ адӟыса, кышномурт чабкиськем: - Нош ик тае шайтанэз нуллэ, дыр... Собере вить аресъем пиезлы вазиськем: - Семи, Миквор бускельмы пыриз ке, анай татын ӧвӧл шу, кошкиз шу. - Яйам, - вазем пиез. Анаез ӝӧк улэ пырыса вуттэм гинэ, соку ик ӧс усьтӥськем. Семи ӧс доры вуиэмни: - Аньай, дойын ӧвӧль, коськиз... - Кытчы меда?- юам Миквор. - Ӝӧк ульэ... Шонертӥз Дышетӥсь "Букварьысь" суредъёсты возьматъя но валэктэ: - Таиз атас, ӟуч сямен - петух, пуны - собака... - Со бака ӧвӧл, пуны ук! - берпуметӥ парта сьӧрын пукись Ондӥлэн куараез быдэс класс тыр чангетӥз. Паймиз Ондӥ быдэс урок ӵоже ни парта сьӧраз шымырскыса пуке. - Ондӥ, малы мурт тыбыр сьӧры ватӥськиськод? - дышетӥсь юатэк ӧз чида. - Ма... кызьы аслам тыбыры сьӧры ватӥськом?! - паймиз пияш. Туплы укша Дышетӥсь глобус шоры возьматыса юа: - Малы укша Музъеммы? - Туплы! - чот-чот вазиз берпум парта сьӧрын пукись Ондӥ. Дышетӥсь султытӥз вӧзаз пукись Онтонэз: - Кин нырысь ик озьы шуиз? - Ма, - ӟудӥз Онтон, - Ондӥ, дыр... Миськоно, пе Ондӥлэсь мисьтаськон машина пушкы лушкемак бинет понэмзэ бубиз синйылтӥз но юатэк ӧз чида: - Мар донгид? - Дневникме, - нокыӵе ӧз кариськы Ондӥ. - Нэнэ, дӥськут миськыкуз, сое но мед гылтоз... Уг быгато Внеклассной лыдӟонъёсын тодматскизы пудо-животъёс, пӧйшуръёс сярысь гожъясь писательлэн творчествоеныз. Урокез йылпумъяса, дышетӥсь класслы юанэн вазиськиз: - Малы та писатель пудо-животъёс сярысь трос гожъя? - Соос сёровно лыдӟыны уз быгатэ, пе, - Ондӥлэн ымыз усьтӥськиз. Пӧяськем - Нэнэ, бускель Шакыр песятай укыр пӧяськись вылэм, - ульчаысь пырем бераз, мумизлы вазиськиз Ондӥ. - Малы озьы мапаськод, пие? - Мынам укноосы сӧриськисьтэм пиялалэсь, шуэ вал. Кӧльыен лэзи но... пырдӥзы. Нодъяз Ондӥлэн бубиз пӧйшурамысь бертӥз. Солы нош ик ӧз удалты. - Макем усто, асьмеос туж вашкала дыре ум улӥське, - пумитаз сое Ондӥ. - Озьы ведь, атай, - Малы озьы? - Мон лыдӟи вал, вашкала дыре адямиос пӧйшураса гинэ улӥллям шуыса. Нош тон кадь пӧйшурасен асьмеос сютэм кулысалмы ни... Кышкась - Буба, уин возьмаськыкуд уд кышкаськы-а? - песятаезлэсь юа Ондӥ. - Кызьы уд кышка, пие... туала вакытэ кӧня йыр вандйсьёс, лушкаськисьёс. Туж кышкасько, тужгес но умме усьытозь кышкасько. Ушъяз - Тятя, туннэ ми кӧльы лэзьяса ӵошатским, - Ондӥ бубизлы ушъяське. - Нош кин вормиз? - Мон котькинлэсь кыдёке лэзи. - Умой, пие, умой. - Озьыен Анна кенаклы выль укно пуктод, иське... Тазьы но яра - Ондӥ, малы-о тон тур-пар йырсиен ветлӥськод? - Расчёскаме ыштӥськем, Анвасильевна. - Нэнэед мукетсэ мед басьтоз. - Э-э, бен соку сынаськыса ветлоно луоз ук... Ӵошатӥз Бубиз пизэ индылэ: - Э-э, Ондӥ, Ондӥ, чик возьдаськонэз уд валаськы ук тон. Кызьы-озьы кыкетӥ арзэ одӥг классын дышетскод? - Мар солы паймонэз?! Анвасильевна ялан одӥг классаз пуке ук. Ондӥ котыртӥ бергаз Рашит ХАЙДАР. 3-12-1 Пумиськон - Ӟечбур! Учкы ай, кӧня дыр ортчыса пумиським. - Музъем котырес. - Кыӵе-мар ужъёсыд мыно? - Парсь но гыре. - Тон, пе, выль книга поттыны дасяськиськод. - Тыршид ке, ыль пу но кенжоз. - Кузпалыд егит дыръяд кадь ик сэзь-а? - Кык син куспысь нырдэ ишкалтоз. - Туж усто кырӟа вал кадь. - Куака но кырӟасько кожа. - Нылыдлы дышетсконэз капчиен сётӥське-а? - Ӟозлэн кукыз кузь ке но, визьмыз вакчи. - Я, пиед ӝоген юрттӥськыны вуоз ни. - Кылыз лэчыт, киыз мырк. - Нош аслад тазалыкед кыӵе-мар? - Кырыж будэм писпуэз уд ни шонерты. - Бен, мӧйымиськом... Эх, берыкты на вал егит дырез! - Кошкись вуэ кык пол уд пыры. - Озьы, зарни дыр чаляк ортче. Улон-колёса: азьлань питыра. Ӟеч лу! Бертоно сюресэд Кам шур пасьта мед луоз. И. АЛЕКСЕЕВА. 3-12-7 Малы Куӵо коӵо выжыкыл Кемалась вылэм ни со. Туж кемалась. Дунне вылын улэм-вылэм тӧдьы тылобурдо - Коӵо. Одӥг пол Коӵо возь вылэ васькем. Вуэм но воксё абдрам: тылобурдоос, пе, ваньзы сьӧдэсь. Аслыз ачиз Коӵо йӧно но чебер потэм, ушъяськыны кутскем. - Эй, тылобурдоос, малы тӥ сыӵе сьӧд-сьӧдэсь? Учке ай, мон лымы кадь тӧдьы. - Исаськисьёсын ум вераськиське! - палэнскиллям бурдоос. Тылобурдоос возь вылэ пуксиллям но туж чебер, жингрес кырӟан мытӥллям. Коӵолы туж кельшем кырӟамзы, аслаз но кырӟамез потыны кутскем. Тылобурдоос доры матэктэм но шуэм: - Перыштаос! Монэ но дышетэ ай кырӟаны. - Э-э, та кырӟанэз дышетон понна, нырысь ик муръё пыр потыны кулэ. - Кыӵе-сыӵе муръё пыр? - Тӥни, адӟиськод-а, гурезь йылын корка сылэ. Со коркалэн липет йылаз туб но ӵын потон пасетӥз васькы. Коӵо дыртыса лобӟем гурезь йылэ. Ӝегатскытэк корка йылэ тубем но муръё пушкы тэтчем. Муръёысь гуре сюрем, мырдэм потэм отысь. Собере нош ик возь вылэ мынэм. Нош тылобурдоос, пе, кырӟаса зангари сяськалэсь тугоко кертто. - Эй тӥ перыштаос, ӧй дышы мон нокыӵе но кырӟанлы. Ӝоггес дышетэ. Коӵо шоры учкыса, тылобурдоос, пе, мырдэм серемзэс кутыса возё, угось Коӵо куӵо луэм: тӧдьыен сьӧдо. Со сярысь Куӵолы аслыз но вераллям. Коӵо оскымтэ. - Серекъялэ ойдо, серекъялэ, - йырзэ котькулэсь но вылӥе ӝутыса, Коӵо шур дуре васькем. Ассэ вуысь адӟыса гинэ оскем тылобурдоослэн верамзылы. Соку шурлы вазиськем: - Кожой кук, кызьы берен тӧдьы луоно? - Мынам вуам пыласькид ке, тӧдьы луод, - вазем шур. - Ачид пыласькы со кезьыт но пож вуад! - озьы шуэм но йырзэ урдыса кошкем Коӵо. Озьы тӥни, одӥг Коӵолэн ваменэс сямызлы луыса, вань коӵоос куӵо луиллям. А. БАДРЕТДИНОВА. 3-2-4 Кизнер ёросмылы - 63 Толшоре ёросмылы 63 ар тырмиз. Соин валче 5-7-тӥ классъёсын ортчиз ёросмылы сӥзем ужрад. Пумиськонэ ӧтчамы гуртысь библиотекарьмес Л. Н. Осиповаез но директормес С. П. Петроваез. Уго кыксы ик та адямиос асьсэлэсь егит дырзэс но трос кужымзэс сётӥзы ёросмылэн азинсконэзлы. Нырысь вераськиз А. Н. Осипова. Со милемды тодматӥз ёросмылэн азинскеменыз: нырысетӥ кивалтӥсьёсын, та ёрослы трос кужымзэс но быгатонлыксэс сётэм адямиосын, туала улонэныз. Людмила Николаевна ачиз но 2001-тӥ ар понна пуктэмын Кизнерысь данъян пул вылэ. С. П. Петрова - ёросысьтымы дано дышетӥсь, со пусъемын "Дышетон удысысь отличник", "Сӥё-дано дышетӥсь" нимо медальёсын но трос грамотаосын. С. П. Петрова мадиз аслаз улон сюресэз, улоназ пумиськылэм шуг-секытъёс сярысь. Со пӧртэм ужъёсыз быдэсъяз: вал огшоры дышетӥсь но завуч, директор но колхозлэн тӧроез, ёрос администрацилэн тӧроезлэн воштӥсез, но берен бертӥз аслаз школаяз, кивалтӥсь луиз. "Котькытын ужаны луоно. Вань сюлэмдэ, быгатэмдэ сётыса тыршид ке, ваньмыз ик тонэ гажалозы", - шуиз Серафима Петровна. Ми но тыршом та нылкышноос кадь ужась, лякыт сюлэмо но чебер луыны. Шуд сӥзём соослы азьланяз но таӵе ик муспотон но сэзь мылкыд. Таня МЕЛЬНИКОВА. Кармыж школа. Кизнер ёрос. 3-20-1 Отын-татын Ижкарысь 32 номеро школаын "Атлантида" нимо паймымон нылпи ансамбльзы вань. Отчы ветло 4 - 5 аресысен 16 - 17 аресозь нылъёс но пиос. Асьсэлэсь учкисьёссэс ансамбльысь эктӥсьёс паймытъяло капчи, етӥз выременызы, чильк-вальк кисьтаськись, быръем эктонзылы тупась костюмъёсынызы. Соос экто пӧртэм калыкъёслэсь эктонъёссэс, крезьгурез ӟеч валаса. Алигес "Металлург" санаториын шутэтскисьёс синмаськизы покчи нылпиослы (4-5 аресъемъёслы): отын соос возьматӥзы асьсэлэсь быгатэмзэс. Вань учкисьёслэн мылкыдзы ӝутскемын вал. А. ПОРШЕВА. 3-20-2 Классмы туж умой Мон дышетскисько 6-тӥ "дӥ фольклорной кружоке. Отын кырӟаськом, ӝог веранъёсты дышетӥськом. Классэнымы переплётной кружоке но ветлськом. Отын ми книгаосыз "эмъяськом". Мукет школаосы но таӵе ужен ветлӥськом. Алигес Олисов Денисмы школаямы ортчем конкурсэ пыриськиз, кылбур лыдӟиз. Нош Катя Баранова но Аня Перминова "Шулдыр семья" сценка возьматӥзы. Ми яратӥськом "Ӟечбур!" газетэз лыдӟыны. Та газетын пиналъёс сярысь, соослэн улэмзы, дышетскемзы сярысь гожъямын луэ. Милям классмы туж умой. Вань ужъёсты ӵош лэсьтӥськом. Пиналъёс умой дышетско. Классэнымы кивалтэ Т. А. Иванова. Тамара Александровна туж ӟеч, умой дышетӥсь. Урокъёсыз туж тунсыко ортчо, ваньзэ милемлы рос-прос валэктэ, тодон-валан сётэ. Ми яратӥськом асьмелэсь дышетӥсьмес. Лена НИКИТИНА. (Суредэзно сорлэн ик.) 60-тӥ школа. Ижкар. 3-20-3 Чеберъяськись комак выжыкыл Комак одӥг пол коӵыш киулэ сюрем но чеберъяськыны кутскем: - Лэзь монэ, гажано эше, пызьдэ уг ни сиы. Табере ачим ужаса сиён потто. - Я, комак, пегӟы. Татысь тустэ-буйдэ медам адӟелэ ни. Нунал-а, кык-а ортчем, сётэм кылзэ комак вунэтэм, нош ик ларь пушкы пырем. Коӵыш комакез жалямтэ, кутэм но сием. Саша ПОПОВ. Зямбай школа. Вавож ёрос. 3-20-4 Тюльпи выжыкыл Одӥг арамаын будӥз пичи гинэ чебер йыро сяська. Сое нокин ӧз адӟылы, ӧз чаклалля, соин солы туж мӧзмыт вал. Одӥг пол отчы вуыны кемдэм Оля нимо нылаш. Со туж паймем мусо, ненег сяськалы. Жаль потэм огназэ арамае кельтыны. Сяськаез выжыеныз ик каллен гинэ ишкалтэм но аслаз садаз мерттэм. Оля сое Тюльпи нимам. Сяськаос-эшъёсыз шумпотӥллям выль пичи эшсылы. Шудӥллям, вераськиллям соин. Озьы со юнмам, шаплы луэм. Ас чебереныз быдэс улосэз шулдыртэм. Нош Оля пичи вормонэныз данэ потэм. Кыӵе умой вылэм музъем вылын улыны, уката ик сюлэмыдлэсь шуныт пырызэ кузьмаськод ке. Катя ЧЕРНЫШЕВА. 5-тӥ класс. Зямбай школа. Вавож ёрос. 3-20-5 Дышетӥзы выжыкыл Улӥзы-вылӥлӥзы Курег но Атас. Тулыс вуыса, соос чипы поттыны вераськизы. Курег гидысь небыт кудые пузаз. Куазь пеймыт луыны кутскыса, Атасэн Курег сюрые интыяськизы, умме усизы. Кӧня ке улыса, гидэ лушкем гинэ Коӵыш пыриз. Кудыысь курег пузэз адӟыса сииз. Вазь ӵукна Куреген Атас султӥзы, буш кудыез синйылтӥзы. "Эк-эк-эк!" шуыса куректӥзы ик но, ма карод, ӧвӧлэз вань уз луы ни. Курег выльысь пузаз. Но ӵуказеяз ванбурзы нош ышиз. Атаслэн вожез потӥз. - Ойдо возьмаськом, оло, йыртэмасез кырмом, - шуэ. Тани пеймыт луэм бере, гидын кык ӝуась "тылъёс" адӟиськизы, куды доры матэктӥзы. Атасэн Курег тур-р-р! гинэ кудые лобӟизы. "Ко-ко-ри-ко! Сюрид ведь! - Коӵышез быжтӥз сэзя Атас. Курег кӧтурдэссэ ӵабъя. - Ой! Ой-ой! Вӧсь эн каре монэ! Уг ни пыра кудыяды! Уг ни сиы курег пуздэс! Бурдоос Коӵышез лэзизы. Со дырысен со куды котыре матэ но уг кариськы ни, шыръёсын кӧтсэ тыре. Катя НАГОВИЦЫНА. Люк черкогурт. Балезино ёрос. Малы ӧз тупаллэ ни? Одӥг нюлэскын улӥлӥзы-вылӥлзы Луд кеч но Гондыр, куспазы туж эшъяськизы. Огпол арня нуналэ Гондыр Луд кечез куное ӧтиз, кунозэ утялтыны шуыса, ӝӧк вылаз эмезь но чечы пуктӥз. Луд кеч но сьӧраз саламъёс кутэм, эшсэ кубистаен, кешырен утялтыны малпам. Кузь пель нырысь эмезез веръяз, ну ческыт потӥз. Чечы но солы кельшиз. Эшшо огпол утчаз на, пиняз йӧтӥз. Кытчы пырон инты ик ӧз шедьты ни мискинь. Визьтэммыса дораз бызиз. Нош Гондыр, кубисталы паймыса, нырысь сое сииз, кельшиз. Кешырез куртчиз но, кык азь пиньёсыз чигизы. Туж вӧсь луиз. Ӝуштэ, черекъя. Та учыр бере ог-огзы доры ветлэмысь дугдӥзы. Ирина ОСИПОВА. Кватчи школа. Можга ёрос. 3-20-6 Арня нуналэ Арня нуналэ ми ваньмы гуртамы луиськом. Кин маин выре: атае пу пильылэ, Сергеен Петя солы юрттӥсько, пу пыртыло. Анае пудоосты сюдэм бераз пӧраськыны кутске. Мон выж ӵужисько, пичи сузэреным утиськисько. Сузэръёсы Рита но Кристина мыным юрттэм каро, анай котырын бергало. Вань уж бырем бере, ваньмы: Катя, Рита, Кристина, Сергей, Петя, анаен атае но мон телевизор учкиськом. Лена АНИСИМОВА. Булай школа. Ува ёрос. 3-25-7 Сильвирмес кыдатӥськом Школаямы ӵем дыръя куасэн ӵошатсконъёс ортчыло. Тани алигес но ӵошатским, куинь иськемез нюлэскытӥ куасэн бызимы. Ортчытӥз сое физкультураен дышетӥсьмы Фридрих Михайлович Васильев. Котькудӥз пинал зол бызьыны тырше, финише нырысетӥ вуэмез потэ. Куасъёсмы ширто. Нош тӧл очукарем кадь шимес кариськиз, сюресмес согыны турттэ, но уг быгаты. Ми огмы бӧрсьы огмы бызиськом. Нырысетӥ бызе Сергей Никифоров, со бӧрсьы ик Андрей Орлов, куинетӥ - Андрей Королёв. Куазь шимес ке но кариськиз, мылкыдмы бурдъяськиз, ог-огмылжсь кылеммы ӧз поты. Спорт - со тазалык но. Озьы ми физкультура урокъёсын сӥльвирмес кыдатӥськом, ог-огмылэсь адӟем кариськом. Ваня МАЙКОВ. Кучыран школа. Алнаш ёрос. 3-27-8 "Пионерилы - 80" конкурсэ Ваньмыз асьме киын Кемалась-кемалась туж чебер интые лыктэм егит пи Асан. Утча вылэм со аслаз семьяезлы улон инты. Кельшиллям Асанлы татысь ӝужытэсь веськрес писпуос, синмаськем со вож буртчин кадь чилясь, небыт куаро возьёслы, шулдыр гурен жильыртӥсь шуръёслы, кельшем солы тылобурдоослэн сюлме пырись кырӟанзы. Та кеольшем интыяз ик Асан ваем семьязэ. Отчы ик улыны лыктӥллям ӵыжы-выжыосыз но. Пумен тросгес но тросгес коркаос пуксиллям. Озьы, шуо, кылдэм Туймы шур доры интыяськем Асан нимо гурт. Самой та гуртын ик вань Асан шор ёзо школа но. Школамы бадӟым - куинь этажо. Нырысетӥ дышетскисьёссэ аслаз бадӟымесь классъёсаз школамы пыртӥз 1994 арын. Спортзал, столовой, актовой зал, библиотека - ваньмыз вань солэн пушказ. Ми яратӥськом асьмелэсь школамес, тыршиськом солэсь улонзэ чебергес но шулдыргес карыны. Соин ик 2001-тӥ арын кылдытӥм Школа кенешмес, кивалтӥсе бырйизы монэ. Али отчы пыро 5-9-тӥ классъёсысь пӧртэм ужрадъёсы пыриськись но соосты ортчытъяны юрттӥсь тужгес но чырткем дышетскисьёс. Котькуд класслэн вань аслаз вожатоез, классысь будосъёсты утисез-чакласез, шутэтскон ужрадъёсты ортчытъясез, редколлегиез, старостаез, физоргез, трудовикез но корреспондентэз. Ваньзы соос эшъясько мукет классъёсысь сыӵе ик ужрад нуись дышетскисьёсын. Школа кенешлэн вань аслаз клубъёсыз. Егит суредасьёслэн клубзы ас котыраз люказ котькуд класслэсь редколлегиязэ. Та клублэн кивалтӥсез - Лена Филиппова. Егит суредасьёс учко классъёслэсь бордгазетсэс, асьсэос но пӧртэм ужрадъёслы, праздникъёслы сӥзем бордгазетъёс поттыло. "Лэсьты ачид" клубмылэн кивалтӥсез - Витя Никитин, "Фантазёръёслэн" - Оксана Маштакова, "Юрттӥськисьёслэн" - Надя Васильева, "Ромашкалэн" - Люба Алексеева. Кенешамы люкаськылӥськомы толэзяз одӥг яке кык пол. Эскериськом клубъёсмылэсь ужамзэс, ужрадъёсмылы дунъет сётӥськом, лэсьтоно ужъёсты пусйиськом. Кенешмы школа улонамы бадӟым инты басьтэ, милемыз, пиналъёсты, ваньмес огазея. Милемлы юртто библиотекарь Татьяна Евгеньевна Лермонтова но вуриськыны дышетӥсьмы Анна Павловна Гришина. Соос ик школаямы вожатойёс. Школамылэн улонэз асьме киын, дышетскисьёс! Луоз-а школамы чебер но шудбуро, пӧртэм ужрадъёсы пыриськись но вормисьёслэн радазы ветлӥсь - ваньмыз потэ асьме бордысь. Малпасько, милям школаямы гинэ ӧвӧл, трос школаосын вань дышетскисьёслэн огазеяськонъёссы. Сӥземе потэ вал, мед азьланяз но луозы школаосамы капчи мылкыдо, чырткем дышетскисьёс! Лариса МАРДАНОВА. Асан шор ёзо школа. Алнаш ёрос. 3-28-2 Тыло тылъёс Машинае пуксиськод ке, нуэ но нуэ вылэм. Сюрес милемыз та нуналэ Алнаш ёросысь Чем.-Куюк (Тыло) школае но вуттӥз. "Ӟечбур!"-ын ужасьёс татчы пыдзэс ик лёгылӥллямтэ на. "Зэм-а, даур-а, сизьымдон ар ӵоже-а?" - паймоды, оло, тӥ. "Дась лу!" угось 1992-тӥ арын гинэ "Ӟечбур!" луиз ай. Озьыен, дас ар куспатыса, шуом ини. Нош "Дась лу!"-ос татчы ӵем гинэ вуыло, пе, вал. Удмурт кылъя но литературая дышетӥсенызы, литературно-творческой кружокен кивалтӥсенызы Е. Г. Смирноваен ӟеч кусып возьылӥллям. Мылкыдзэс бурдъяны тужгес быгатылэм со вакытэ "Дась лу!"- ын ужам нылпи кылбурчи Герман Ходырев. Газетэн кусыпъёсты выльысь выльдон но юнматон вылысь, Елена Герасимовна школаязы редакциын ужасьёсынымы пумиськон радъяно кариськиз. Мылкыдзэ со милемлы но ивортӥз. Ӧтёнзылы ми туж шумпотӥмы но соку ик сюрес вылэ дасяським. Чем.-Куюке ум ке но вуылӥське вал, татысь пиналъёсын кусыпмы чылкак ыштэмын шуыны уг луы. Арысь аре выль но выль нимъёс кылдо, юнкоръёсмы будо, гожъясько. Газетмес но туж яратыса лыдӟо вылэм. Со сярысь ми тодӥмы школаязы вуылыса. "Кыдёкын улыса, синмыныды адӟытэк, Уд валалэ милесьтым яратэммес", - шуыса кырӟало алнашъёс. Зэмзэ но, таӵе шуныт пумиськонъёсысен эшшо но юн шӧдӥськод яратон мылкыдэз. Газетмылы гожтӥськемъёсты кизэс ӝутыны куримы но, ваньмыз сямен ик люкаськемъёс кизэс ӝутӥзы. Нош мылкыд карисьёс та нуналэ но быгатӥзы на газетмылы гожтӥськыны. Со понна пичияк кузьым басьтылӥзы. Елена Герасимовна 70-тӥ аръёсы ачиз но газетмылэн устоез юнкорез вал. Лыдӟисьёс сое Лена Берёзкинаен тодо на, дыр. Газетэз яратон мылкыдзэ со шуныт тылсиез кадь утьыны, нылпиосызлы кузьманы быгатэ. Ӟеч ужамзы но гожъяськон удысын шӧдскымонэсь азинсконъёс басьтэмзы понна, кружоксы Данъян грамотаосын но пусйылэмын. Берло аръёсы нимысьтыз кружок уг ке но нуо, котькуд юнкор сярысь лыдӟемды, соослэн ужъёсынызы тодматскемды луоз Елена Герасимовналэн лэсьтэм альбомъёсысьтыз. Ирина Махнёва, Коля Рябинин, Лена Лаврова, Надя Арбаева... Кӧня татын тодмо нимъёс. Пумиськон нуналлы пиналъёс кылбуръёс но кырӟанъёс дышетӥллям. Чидасьтэмъёсыз кыре потыса ик возьмало ни вал лыктэммес. Тулыс шунды нылпиосты кыре ӧте ини. Школа азбаразы ик волейболэн шудон сетка ошиллям. Пиос но, нылъёс но татысь пырыны уг ӵыдо. Листоклэн сэрегаз кыӵе ымныр тус суредасалзы меда та нуналэ пиналъёс? Уг тодӥськы. Соослэн туннэ француз амалъя радъям уроксы ӧй вал уго. Ма, сое тодон понна нокыӵе амалъёс но кулэ ӧвӧл. Пиналъёслэн ымныръёсазы пальпотон суредамын вал. Нокыӵе туно-пеллё кариськытэк но соослэсь уртчем мылкыдзэс шӧдытэк ӧй кыльысалыд. Нош француз амалэз соос удмурт кылъя урокъёсазы кутыло. Нырысь ик листоклэн сэрегаз пиналъёс ас мылкыдзэс возьматӥсь ымныр тус суредало. Кудӥзлэн со пальыша, кудӥзлэн - кунэрес. Та урокын пӧяськытэк ас мылкыддэ усьтыны луэ. Со понна нокыӵе дунъет, оценка уг пукто. Дышетӥсь валаны тырше пиналлэсь пуш дуннезэ. Нош пуш дуннезы пиналъёслэн зэмзэ но туж узыр. Соосты усьтӥськытыны гинэ быгатыны кулэ. Соку улӟо зэмос талантъёс. Чем.-Куюкысь дышетӥсьёс урокъёс гинэ ортчытъяса уг буйгатско, пӧртэм ужрадъёс, кружокъёс ортчытъяло. Пиналъёс шумпотыса ветло бисерен пунонъя но оригамия кружоке. Сое нуэ Л. В. Гаранькина. Лариса Владимировна Дэбесысь педучилищеез йылпумъямын. Солэн киыз котьмалы мынэ, туж чебер суредаське. Нылъёсыз Ирина но Лена анайзылэсь адӟем каро. Лена нырысетӥ классын гинэ дышетске ай, солы но кельше пӧртэм киужъёсын вырыны, туж вожъяськыса учке Ириналэн ужъёсыз шоры. Нош Наталья Демьяновна Бигбашева "Изонить" кружок усьтӥз. Та ужлы со ачиз книгаосъя гинэ дышетскиз. Быгатэмзэ пиналъёсызлы но возьматэмез, валэктэмез потӥз. Пиналъёс мылысь-кыдысь ветло та кружоке. Котькуд занятиосазы выль пужы малпало. Милемлы но кузьмазы картон бумага вылэ пӧртэм яркыт буёло сӥньысъёсын кыскаса лэсьтэм ужъёссэс. Пусйытэк кельтыны уг луы татысь музейзэс но. Пиналъёс ас выжыоссэс ӟеч утьыса возё, гуртсы сярысь узыр материал люкаллям, пӧртэм вашкала тӥрлыкъёсты шедьтӥллям. Тӥни сыӵеесь соос - тылоос. Соослэн котькуд лэсьтэм ужзы, сяськазы тылын пиштэ, югдэ, сюлэмез шунтэ. Ми сьӧрамы нуимы со тылзэс. А. ЕРМОЛИНА. Туспуктэмъёсыз А. Сергеевлэн. . Катя Антонова но Оля Соколова "Ӟечбур!"-лы сӥзем кырӟанзэс быдэсто. "Изонить" кружоке ветлӥсьёс кузьымъёс дасяллям. . Корреспондентмы А. М. Лаптев, удмурт кылъя дышетӥсь Е. Г. Смирнова но та нуналэ газетлы гожтӥськись Алёша Оськин. . Никонов но Бигбашев Коляос музейын. 3-30-2 Мар со заметка? Заметка - со улонысьтыды учыръёстэс, адӟемъёстэс, чакламъёстэс кызьы ке дунъяса (куддыръя сотэк но), малпанъёстэс-мылкыдъёстэс меӵак ивортон. Мар со зарисовка? Зарисовкаын вераськон мынэ кыӵе ке предприятие, гурт возёс, тодонъюрт сярысь. Журналист яркыт но чеберлыко кылын маде адӟемъёссэ, чакламъёссэ, мылкыдъёссэ. Мар со репортаж? Репортаж - ивор удысысь валтӥсь жанр. Журналист учыра, яке пырак пыриське кыӵе ке ужрадэ но лыдӟисьлы ӝогак, тунсыко, тупен-тупен маде ас синмыныз адӟемъёссэ. Мар со корреспонденция? Корреспонденция пыре тужгес ӝегатскытэк сётоно газет жанръёс пӧлы. Улонлэсь кыӵе ке люкетсэ возьматыса, корреспонденциын фактэз яке фактъёсты сэртто-пертчо но йылпумъян лэсьто. Мар со статья? Статья тужгес паськыт вӧлмем но секыт жанръёс пӧлы пыре. Мукет материалъёсын ӵошатыса, статьяын валтӥсь инты басьто теория но практика ужпумъёс, улонэз мур бугыртӥсь фактъёс но явлениос. Статьяын котыр ласянь сэртто-пертчо туж кулэ ужпумъёсты, темаосты, йылпумъянэз лэсьтон ӟеч герӟаське литературной кылын гожъяськон устолыкен. Мар со рецензия? Рецензия - со газетын но журналын печатласькись материалъёс пӧлысь одӥгез жанр. Отын сэртто-пертчо ӟеч палъёссэ но тырмымтэоссэ пусъё - литература, искусство удысысь произведениосты. Мар со очерк? Аспӧртэмлыкезъя очерк (зэмверос) матын чеберлыко литератураысь пичи формаен жанръёслы - верослы, вакчи повестьлы, но сое зэмос фактъёс вылын гожто. Отысь геройёсыз - улэп адямиос, суредъёс пырак улонысь басьтэмын. Чеберлыко произведениын сямен номыре аслэсьтыд малпаны уг яра. Мар со интервью? Интервью (юан-валэктон) - со вазиськоно муртэдлы кыӵе ке ужпумъя юанъёс сётъян но вазиськоно адямиедлэсь валэктон басьян. Мар со юмореска? Юмореска - со чеберлыко литератураысь одӥгез пичи формаен жанр. Юмореска висъяське серемес верослэсь. Серемес веросэ автор аслэсьтыз малпам суредъёс пыртыны ке быгатэ, юморескаез гожто зэмос фактъёс вылын, кыӵе ке югдурез, адямиез небыт серекъяса. Мар со верос? Верос - проза удысысь пичи формаен жанр. Отын автор суреда героезлэн улонысьтыз пичильтык люкетсэ. Действие кема уг кыстӥськы, геройёс кӧня ке гинэ. Мар со кылбур? Кылбур - со кылбуретысь размеръёсты чакласа (куддыръя чаклатэк но) гожтэм вакчи произведение. Кӧня ке чурен автор шараяны тырше мылкыдзэ но малпанъёссэ. Мар со выжыкыл? Выжыкыл - со калык творчествоысь вуэм жанр. Азьвыл сое калык малпа но маде ке вал, берло дыре выжыкылэз нимысьтыз авторъёс ӵемысь гожъяло. Выжыкыллэн пуштросэз осконтэм ке но, сое кылдыто зэмос улонлэсь радзэ чакласа. 3-30-3 Эскере литературно-творческой кружокады (Сэрттӥськом-пертчиськом выжыкылъёстэс но веросъёстэс) Нырысь ик, мар со сыӵе выжыкыл? Солэсь пуштроссэ эскерон борды котькинлэсь азьло басьтӥськиз этнограф, удмурт фольклорез бичась Н. Г. Первухин. Этнографлэн малпамезъя, выжыкыл пӧрмемын вожо кыллэсь. Вожо - удмуртъёслэн одӥгез вашкала инмарзы, пе, вал. Вожо нуналъёсы серемес веросъёсты кылзо, мадиськонъёсты верало, серемес учыръёсты тодэ ваё вылэм. Устной произведениосты калык вожо-маде шуыса нимам, куд-ог интыосын - вожо-кыл. Выжыкыл - со полэсо (сложной) кыл. Выжы возьматэ пиосмуртъёслэсь выжызэс, нош ӵыжы (ӵуж) - кышномуртъёслэсь. Ӵӵыжы-выжы кыл родня шуэмез возьматэ. В. И. Лыткин профессорлэн но мукет тодосчиослэн лыдъямзыя, выжы (вуж) вашкала огъя перм (удмурт, коми-зырян, коми-пермяк) кыл луэ, со возьматэ род, родство, основание шуэмез. Выжы ним бордысь пӧрмо действиез возьматӥсь кылъёс но: выжыяны, выжыятыса вераны яке ваньзэ радызъя, рос-прос эскерыны. Выжыкыллэн кыкетӥ люкетэз - кыл - кутӥське веран, мадён пуштросэн. Озьыен, та кылэз тазьы валэктыны луысал: выжыкыл - со кыӵе ке выжылэн кылдэмез но улэмез сярысь выжыятыса верам устной произведение. Выжыкылын маке шедем, сое малпаны уг луы. Отын пӧртэм осконтэм ужъёсты быдэсъяло, пӧйшуръёс адями кылын верасько ке но, персонажъёслэн выросъёссы, дауртосъёссы оскымонэсь мед пӧрмозы. Басьтомы Шаркан ёросысь Петуньки школаысь Роман Евсеевлэсь "Картаос но изьы" выжыкылзэ. Вакчияк пуштросэз солэн таӵе. Одӥг начар крестьянин шудон картаоссэ губиякуз ыштэм. Утчаськон сяменыз кызьпу йылысь адскисьтэм карись изьыез синйылтэм но сьӧраз кутэм. Пумен картаосыз но сюриллям. Собере дораз бертэм. Нош отын, пе, эксэй пуке, крестьянинлэсь тунаськемзэ вите, "ма луоз ӵуказе дворецам?" шуыса юа. "Тӥляд дворецты огпалтӥз куашкалоз", - вера соиз. Озьы верамез понна крестьянинэз эксэй ошыны турттэ. "Тунаськись", адскисьтэм карись изьызэ йыраз поныса, чиптэм-чаптэм ыше. Выжыкыл тазьы йылпумъяське. Роман Евсеевлэн та ыстэм ужаз туж трос осконтэм, ог-огенызы герӟаны луонтэм суредъёсыз. Нырысь ик, кыӵе ке начар крестьянин картаосын тунаськыса улоз меда? Вылаз ик, олокытысь-марысь эксэй кылдэ но дворецаз улон-вылонэзлэсь азьпалзэ тодыны турттэ. Собере адскисьтэм карись изьы но выжыкылэ витьымтэ шорысь вуэмын. Та выллем тодметъёс выжыкыллэн пуштросэзлы чик уг но тупало, юнме шорысь малпамын кадь йӧто. "Пичи адями" нимам выжыкылэзлэн пуштросэз бордын ужаноез вылэм на Алнаш ёросысь Чем.-Куюк школаысь Алёша Лебедевлы. Калык выжыкылъёслэсь адӟем карыса, Алёша но геройзэ куинь пӧртэм ужъёсты быдэстытэ, эксэйлэн куинь могӟетъёсыз пыр поттэ. Татын номыр но сыӵе-таӵе умойтэмез ӧвӧл. Ужпум тани ма бордын. Пичи адямилэн эксэйлэсь косэмъёссэ быдэсъямез дыртӥт-вуттӥдгес возьматэмын. Соин сэрен выжыкыллэн пуштросэз сюлэм котыре уг ни бинялскы. Та пумысен ик йӧн-йӧн малпаськыны кулэ на та ёросысь но школаысь ик Конькиналы (нимзэ гожтымтэ). Удмурт кылрадъянысь (грамматикаысь) пусъёсты шонер пуктылонлы сӥзем выжыкылзэ эксэйлыкен, вань улэпсэ сиыны ожалскем драколэн, солы пумит султэм батыръёсын, виркисьтонэн герӟам но, пуштросэз суро-пожо, валантэм пӧрмем. (Татын ик пусйыны кулэ: Чем.-Куюк школаысь Света Степановалэн удмурт кылрадъян сярысь выжыкылэз тунсыко луэм. Сое таяз номерамы ик печатласьком.) Нош Ижевскысь 73 номеро школаысь Настя Мерзлякова улонамы мур пыӵам "тон - мыным, мон - тыныд" шуонэз ужаз кутэм. Выжыкылысьтыз песянаез нюлэскы йыроме но, олокытысь марысь отчы Шиш вуэ ини. Мыным юрттӥд ке, нюлэскысь потто, шуэ со. Чурыткуртчем узыръёслы, пе, визь тыроно вал. Чупырес, амаллы Шиш ас кожаз номыр карыны уг быгаты, лэся. Озьы узыр семья пушкын жугиськон пуроме. Ваче гадь вуыны муг кылдытэм интые, кескич амалэн дышетоно вылымтэ меда кӧйзы голяса улӥсьёсты? Выжыкылзылэсь пуштроссэ умой-умой ӧръян сярысь малпаськыны кулэ на Алнаш ёросысь Варзи-Ятчи черкогуртысь Дениса Абрамовалы, Пичи Пурга ёросысь Гожня школаысь Ирина Серебряковалы, Вавож ёросысь Зямбай школаысь Люда Штыковалы. Нош Пичи Пурга ёросысь Бобья-Уча школаысь Надя Даниловалэн но Ува ёросысь Булай школаысь Люда Токаревалэн ужъёссылэн пуштроссы выль ӧвӧл ни, адӟем карыса гинэ гожтэмын. Татарстанысь одӥг нылаш "Ӟечбур!"-е печатласькем выжыкылэз аслыз карем но редакциямы ыстэм. Ми доры, шӧдскымон ӧжыт ке но, веросъёсты но вуо. Веросъёс гожъян - пыд йылазы юн сылӥсь авторъёс понна но капчи удыс ӧвӧл. Отын пуштроссэ но радъяны, сӧзнэтсэ (композицизэ) но чакланы быгатэм кулэ, геройёс но син азе яркыт мед пуксёзы, действиез но огсыр мед азинскоз, оглом вераса, чиньыен лыдъямон бам вылын пезьгыт вожминскон (конфликт) пыр возьматыны пӧрмытоно валтсӥь персонажлэн улонысьтыз кыӵе ке суредзэ (яке суредъёсты). Нош таӵе чурыт куронъёсты быдэстон вылысь, авторлэн луыны кулэ гожъяськон устолыкез но узыр улон сюресэз. Валамон ини, тӥляд ваньмыз азьпалан на. Соин ик ыстэм ужъёсты печатланы тросэз уг ярало, газетэ поттэмъёсыз но зэмос учырлы гинэ ӵемысь укшало. Тани мон киын Игра ёросысь Сеп гуртысь Ирина Трониналэн "Берпуметӥез тулыс" шуыса нимам веросэз. Сӥземын со егитъёслэн ӟырдыт яратонзылы, Афган музъем вылын душманъёсын ожмаськонлы, пинал пиослэн отын быремзылы. Бен, автор туж бадӟым ужпум борды дӥсьтыса басьтӥськем. Нош секыт тема борды басьтӥськон уг на возьматы нокыӵе быгатонлыкез. Пырак вераса, верос гожтэмын Афганистанын ожмаськон сярысь лыдӟемъёсъя, телевизор пыр адӟемъёсъя, кылэмъёсъя, мадемъёсъя. Соин но отысь суредъёс но вужер пыр гинэ адско кадь. Син азе уг пуксьы пияшлэн быдэ вуон сюресэз но, гажанзэ шедьтыса кузпалъяськемез но, Афганистанын ожмаськемез но. Шунды ӝужан палась тылошмес (вулкан) выллем "пӧзись" кунэз возьматон понна, аслыд отчы вуылыны кулэ вал, вылды. Сотэк гожъямед осконтэм пӧрмоз ук. Нош Пичи Пурга черкогуртысь Анна Ильина "Анай сюлэм" чеберлыко ужаз сэрттыны- пертчыны тырше секытэсь семья кусыпъёсты. Валтӥсь героез егит кышномурт шуге- леке сюремын: нылыз кынмыса туж зол висьыны усе, ӟырда, вылаз ик, та вадес картэз юыса улэ. Нош куинь нунал ӵоже доразы сулеп кадь кыллись нылаш сярысь сокем уг но сюлмасько кадь. Анаез уж дораз гань-гань ветлэ, берпум коньдонзэ быдтыса, нылызлы токма шорысь мунё басьтэ. Собере, пӧсе вуыса ини, лэся, ӝог эмъюрттэтэз ӧтён вылысь, жингыртыны турттэ но, телефонзэс уг сёто, отӥяз нылзэ бускель гуртысь доктор доры ки вылаз нуэ. Татын, ява, амалтэк юан кылдэ: нош малы кышномурт, калык амалъёсын ке но коть, нылзэ эмъяны уг туртты? Нырысетӥ нуналъёсаз со понна чиньызэ но уг выреты ук! "Инмаре, тон ке но жаля монэ, эн кушты" шуыса улэ. Озьы-а мар-а нылыд йӧналоз? Инмар тӧдьы боды ӧвӧл. Ачид кео ӧд бызьылы, ачид ке ӧд сюлмаськы, югдур ноку уз воштӥськы. Одӥг кылын пусйыса, веросын конфликтэз юри кылдытэмын кадь йӧтэ, соин сэрен кынманэн герӟаськем ужпум но мылкыдэз уг вырӟыты. Редакцие серемес веросъёссэс ыстӥллям Алнаш ёросысь Вуж Шудья школаысь Алёна Николаева но Яр ёросысь Ворца школаысь Катя Болтачева. Та нылъёслэн ужъёссы, шӧдӥське, адӟем карыса гинэ гожтэмын, собере кылзы бордын но ӝотыр-ӝотыр пуконо вылэм на. Ужъёсысьтызы тырмымтэоссэс, янгышъёссэс шараям понна иворчиосмылэн, озьы ик проза удысэ сюлэмзы кыскись мукет гожъясьёсмылэн но, малпасько, мылкыдзы уз усьы, азьланяз но милемын юн кусып возёзы. Тэк улӥсь мурт гинэ уго, шуо калыкын, уг янгыша. А. ЛАПТЕВ. 4-2-5 Горд паста Дышетӥсьёслэсь куддыръя уродъяськемзэс, шугесь урокъёсты, алама оценкаосты гужем ӵоже воксё вунэтӥ ни вал. Мон зыми кадь кузь но шулдыр шутэтскон нуналъёсы. Кӧттырымонам кӧлай, кӧня мылы потэ, сомында шудӥ, серекъяй. Мон укыр палэнски ни вал урокъёслэсь, правилоослэсь, книгаослэсь... Озьы ик, инмын лобаса выллем, улысал ини, дыр, нырысетӥ коньывуонозь, ӧз луысал ке таӵе учыр. Мынӥсько сюрес кузя но, син азям горд паста йӧтӥз. Мон шуак луи: оло иземысь сайкай, оло кулэмысь улӟи - номырзэ но уг валаськы ни. Йырам лыктӥзы дышетӥсьёс, алама оценкаос, шугесь контрольной ужъёс. Та горд паста синъёсме чарак усьтӥз. Доре ӝогак бертыса книгаме кутӥ но абдрай: уноянъя таблицаез уг тодӥськы ни, правилоосты вунэтӥськем, нош гожъяськеме-лыдӟиськеме мырдэм луэ на. Озьы ваньзэ дышетыса, тодам вайыса, школае ӝутскем мылкыдын мынӥ. Туж сюлмысь дышетскыны кутски. Куддыръя монэ азьтэмъяськон вормылэ ик, нош горд пастаен ручкае шоры учкисько но сэзяк луисько. Ушъяськемез кышъяськыны но ӧз яра Лымы пужнэ пурысь пилем, Вале небыт мамык, мамык. Гурезь баме салазкиен Мынэ нылпи калык. Гӧртэмын писпу вайёс, Кынмемын укно синъёс, Пиналъёс шудо кырын Тол шорын. Тани тазьы гожтэм кылбурчи Т. Шмаков. Зэм но, пиналъёсты кутыса возьыны уд быгаты, соос куасэн, салазкиен дырто гурезь баме. Юр-яр! карыса шудо, серекъяло. Тани туннэ но Нинаен Иви гурезе мынон сярысь кенешизы. Мар-о коркан юнме пукод? Салазкиоссэс басьтӥзы но ураме потӥзы. Кырын шулдыр. Каллен гинэ капчи тӧл веттаське, ненег лымы зыл-зыл усе. Нош омыр кыӵе! Шокаса кӧтыд но уз тыры кадь потэ. Усто ик таӵе куазен нискыланы салазкиен. Гурезьын шудыкузы, домбылё Павлик вуиз. Пиналъёс сое Паллёк гинэ шуо. Ма, кызьы уд шуы! Кӧй, шузи-мази, алдаськись. Тани со, йӧн-йӧн лёгаськыса, йырзэ выллань урдыса, выль куасъёсыныз гурезь баме тубиз. Собере боз-боз куараеныз кеськиз ук: "Эй, шекеляос, бушатэ гурезез, агайды ваське!" Эх, ширтыны кутскиз! Нош мар-о таӵе луиз ай? Куасъёсыз кечат-вамат кариськизы но, Паллёк лымые пужак месӥськиз. Эх, ӝуштэ ук, бозгетэ, гондыр сямен бурсэ. Нош куасъёсыз тӥяськыса пезьдылӥллям. "Кукы бералтӥськиз, нуэ монэ", - викышъяса шуэ ослоп. Салазкие пуктыса, пичиос сое мырдэм дораз вуттӥзы. Э-э, Пави, Пави, ушъяськемед кышъяськыны но ӧз яра ук. Собере гинэ валай Мон ӵукна ик ни гидысь Кылылӥ маке куара. Со курег мылысь-кыдысь Куроын сюлмысь кутка. Мон кема пайми солы: "Шат али курег пуза?" Собере гинэ валай - Со шуныт сярысь вера. Лилия ТАРАСОВА, 5-тӥ класс.