А-19-2 Вашкалаысен туннэ нуналозь Россия понна 352 ар - бадӟым лыдпус. Быдӟым Прометей тыл кузьмам бере, адями соин ноку ӧз люкиськылы ни. Тыл зэмос эш луиз, али но шунтэ, югдытэ, сюдэ. Нош отын ик тушмон но луыны быгатэ. Куронъёсты чакламтэен, тыл эрказъяськыны ӧдъя. Озьы адямиос уно ыштонъёс, куректон-кайгу адӟо. Вашкала дырысен тылпуэн нюръяськонлы бадӟым саклык висъяллязы. Иван ИИИ кивалтон вакытэ ик летописьёсын тылпулэсь утиськонъя куронъёс сярысь кылпум поттылэмын. Соку юромо тыл понэм адямиез ассэ тылпуэ донгылӥзы. 1504-тӥ арын Москваын пожарно-сторожевой охрана кылдыто. Иван Грозныйлэн указаз верамын: "Котькуд коркан тылпу кысон тӥрлык возёно". 1624-тӥ арын эксэй Михаил Фёдорович Романов нимысьтыз тылпу кысон команда кылдытэ. Каръёсын, гуртъёсын, нюлэсъёсын но мукет интыосын туж чакласькыса улыны, нош янгышам муртъёслэсь кылзэс юаны косэмын. Тӧдьы градэз тылпулэсь но лушкаськонлэсь утён вылысь, кыл кутӥзы боярин Иван Новиков но подъясь Викула Панов. Тӥрлыкъёссэс, валъёссэс, обозъёссэс нимаз гидазбарын возизы. "Иванлы но Викулалы,- вкерамын наказын, - юрттӥсьёсынызы тылпу потэм интые ӝог вуоно но вакчи дыр куспын сое кысоно. Нош Москваетӥ номыр карытэк ворттылӥзы ке, эксэй соосты туж зол йӧттоз". Соку калыклы тылпу потэм сярысь гырлы жугыса ивортылӥзы. 1654-тӥ арын эксэй"Лушкаськисьёсты но тыл понӥсьёсты ошылон сярысь" указ поттӥз. Отын верамын: "Лушкаськись но тыл понылӥсь адямиосты, кунсьӧр муртъёсты чик жалятэк ошылоно". 1675-тӥ арын эксэй Алексей Михайлович, бадӟым тылпу бере, Кремлез тылпулэсь утён вылысь "О наказе объезжим в Кремле" нимо указ поттэ. Санкт-Петербургез пуктэмзы бере ик (1703-тӥ ар) Пётр 1-лэн но "О построении домов в Санкт-Петербурге с соблюдением всевозможных предосторожностей от огня" нимо указэз потэ. Генерал Девнер караулъёс пуктылӥз. Карын улӥсьёс, барабан куараез кылыса, курикъёсын, багоръёсын, тӥръёсын но ведраосын тылпуэз кысыны дыртылӥзы. Адмиралтействоын нимысьтыз команда дасязы но нырысетӥ депо кылдытӥзы. Нош 1718-тӥ арысен ву вылын нюръяськыны брондспойтъёсын судноос лэсьтыны кутскизы. Тылпу кысӥсьёсын кивалтӥз генерал-полицмейстер. 1721-тӥ арысен ужаны кутско муръё сузясьёс но. 1739-тӥ арын А. Нартов вуэз выллань ӝутӥсь механизмен насос лэсьтӥз. Императрица Екатерина кивалтыку, командае пыро вал брондмайор, брондмейстер, гумыосы ву сётӥсь мастеръёс, фурманщикъёс (ваньмыз 120 адями). 1803-тӥ арын казна тылпу кысӥсьёслы 129 сюрс 239 манет коньдон висъяз. Николай И кивалтыку, нимысьтыз устав потэ. Нош Александр ИИ кивалтыку, мылкыд каремзыя оружиос но огазеяськонъёс кылдо. 1863-тӥ арын Москваын тылпулэсь утиськон тӥрлык лэсьтонъя завод усьтӥське. 1873-тӥ арысен дружинаос профессиональной луо. 1892- тӥ арын 14-21 инвожое тылпу кысӥсьёслэн нырысетӥ съездзы ортчиз. - Ижевскын нырысетӥ дружина кыллӥз 1810 арын. 1810, 1816-тӥ. 1834-тӥ аръёсы бадӟым тылпуос уно изъян ваизы, - маде пожарно-технической адӟытонысь методист И. Ю. Шмакова. Уно коркаосты, пуктӥськемъёсты тылпу нюлыштылӥз, адямиос но бырыны шедьылӥзы. Озьы карысь кивалтӥсьёс тылпулэсь утиськонъя нимысьтыз служба кылдытӥзы. Со туж кулэ вал. Нырысетӥ служба кылдӥз 182-тӥ арын Вотка карын, Ижевскын - 1834-тӥ арын, нош Сарапулын - 1865. Ижевскысь дружина кемалась кылдэмын вал ини. Кивалтӥз соин генерал-майор П. М. Севастьянов. Соку соос коммунальной хозяйствое пыртэмын вал. Тылпулэсь утиськем сяна, урамъёсты но сузяса, чылкытатыса возизы, котьку син азьын улӥзы. Калык соосты юн гажаз. 1810-тӥ арын тылпу кысӥсьёс понна нимысьтыз вӧсяськон ортчиз. Со дыре Ижевскын каланчазы ӧй вал на. 1815-тӥ арын заводлэн башняяз гырлы ошизы. Со ик ивортылӥз тылпу потэм яке тудву кылдэм сярысь. Александр Невскийлэсь соборзэ пуктэмзы бере, тылпу кысӥсьёс понна со каланча интые луиз. Гырлы жугем сяна, башняе флагъёс ошылӥзы. Соос возьматъяллязы кытысь тӧл пельтэмез яке кудпалан тылпу потэмез. 1929-тӥ арын башнязэ сэрпалтӥзы, нош гырлыоссэ тылпу кысӥсьёслы сётӥзы. Тылпу кысӥсьёс нимысьтыз пурысь дӥсь нуллӥзы, соин соосты, "пурысь геройёс" шуыса нималлязы. Брондмейстеръёс (офицеръёс) ыргон бирдыосын сьӧд кительёс, ыргон каскаос нуллӥзы. Тужгес йӧноез, данъяськымонэз вал мыйыкъёссы но тушъёссы. Чеберлы сяна, тушъёссы но мыйыкъёссы тылпу кысыкузы ӵынлэсь, тыллэсь утиськыны юрттылӥзы. Тылпу кысыны обозъёсын потазы. Обозэ пыризы: бадӟым, 50-70 ведра ву тэрымон бекче, карауллы пуксён линейка. Линейкаын котькудӥзлэн ас интыез вал. Линейка бере насос юнматъязы. Нош дышетэм валъёссэс туж эскерыса, утялтыса возизы. Нимысьтыз иполог возизы (ипология - валъёс сярысь наука). Бырйылӥзы лачмыт, кужмо валъёсты гинэ. Дышетэм валъёс, гырлы куараез кылыса но йырынызы шонтыса, асьсэос сӥесэ пырылӥзы. Кузёоссылы кӧтул, мылазь кыскетъёсты, биньгозы гинэ керттылыны кыльылӥз на. Одӥгез кысӥсь обозъёслэн азязы, вал вылын, мынӥз. Горнэзлэн куараеныз сюрес сётыны, ымзэс усьтыса сылӥсьёсты палэнскыны косылӥз. Вань калык тылпуэ дыртылӥз. Узыр адямиос, отчы шедён вылысь, нимысьтыз тарантасъёс но дӧдьыос медъяллязы. Комакъёсты кышкатыны, депоын кечтака возьылӥзы. Комакъёс угось зол люкетылӥзы, валъёс соослэсь кышкаменызы, кыстаськись луылӥзы. Тылпуысь берытскемзы бере, валъёссэс миськылӥзы, пыд гижыоссэс эскерылӥзы. Нырысетӥез тылпу кысон машина Ижевске вуиз 1928-тӥ арын. Дыр ортчемъя, обозъёслэсь куштӥськизы. Та дыре но тылпу кысӥсьёслы уж шеде. Но али туала тӥрлыкъёсынызы, машинаосынызы тылпуэ ӝог вуо, вакчи дыр куспын сое кортнало. Со сяна, бадӟым валэктон-алон уж нуо, тылпулэсь утиськонъя куронъёсты котькуд адямилы вуттыны тыршо. К-6-4 Пушнераны мынӥмы, Сое трос ми октӥмы. Нош малы кулэ пушнер? Шат шуо сое чебер? Пушнерлэсь уг лу букет, Пайдаез солэн мукет. Парсьпиослы - кисален, Курегъёслы - кеньырен. Яратском сое ми но: Со укыр витамино. Маша ВОТИНА. Петуньки школа. Шаркан ёрос. К-6-5 Возьёс вылын Пиштэ италмасэд, Сюлэм буйга Зарни возьёс вылын. Татын уг пишты Машина Тылобурдо гинэ кырӟа. З. ТРУХИНА. К-6-6 Зоя Трухина Куашказ... Йыг но дым... Вазе коркан, Колимы - Лэсьтэ питран! Котырес питран усе - Дыдыос сямен тэтэ Карыны, оло, турттэ. Я кызьы-озьы Шуккиз - Бызьыса кыре потӥз. Питранзэ лэзиз - Азьлань, Но быри - питран Куашказ... Бӧрдыса пуке Коли, Ӧй вуы питыръяны... Атаез нош буйгатэ: Лэсьтомы ӵошен, Коли! Шулдырты на улонме... Кырӟа-кырӟа, уӵые! Шулдырты на улонме... Лобыса вуо куше - Пуксьыса кылзо тонэ. Тон эн кышка - Кырӟа, кырӟа, Мон понна гинэ. Яггуби* но лызгуби*, Ӟечъясько ини монэн. Уг, уг бича соосыз - Мед чебертозы сикез. Лызпыӵы*, - Зынмата... "Кудӟыто" ини монэ. Ягмульы-нюрмульы* Удалтэм ук, ягамы! Горд инвис кадь - пазьгемын, Ворекъяло куакъёс пӧлын. Мыкырскод Октыны... Ватскозы - Ватскозы куакъёс пӧлы _____ Яггуби - боровик; Лызгуби - сыроежка; Лызпыӵы - душица, Ягмульы - брусника. К-6-7 Эшъёс Мынам эше Лена, Надя но Алёна. Соос монэн шудо, Мон соосын - шудо. Сяська но пасека Луд вылын будэ сяська, Буёлэз солэн туж трос. Со бордын нош пасека, Мушъёс ужало рос-прос. Эшъясько вылэм ук туж Льӧль сяська но ужась муш. Ксюша ПЕРЕВОЗЧИКОВА. Пашур-Вишур гурт. Шаркан ёрос. К-6-8 Йырсиям - шунды Ӝӧк вылын лента кылле, Ӵыж-ӵыж горд шунды выллем. Мон киям сое куто, Йырсиосам дэмӟыто. Эшъёсы ке адӟизы, Ваньзы-ваньзы паймозы. Малызэ валаськоды: Йырсиям пиштэ шунды. Марина ПУДОВА. Петуньки школа. Шаркан ёрос. 2-26-7 Тодматэ Юскиысь иворъёсын Кез ёросысь Юски школаысь Люба Главатскихлэн ужъёсыз газетамы ӵем гинэ потало. Со туэ 11-тӥ классэ йылпумъяз ини. Табере Люба сьӧры кыстӥське та школаысь ик Марина Каракулова. Иворчиенымы тодматскыны ми вуылӥмы школаязы. Марина Каракулова вормисе потӥз "ХХИ дауре - дэмен" конкурсамы, газетмылы гожтӥськон дыръя Шаркан трикотаж фабрикалэсь кофтазэ утӥз вал. Мариналэн кузьымезлы лӧптӥз 3-тӥ классын дышетскись выныз (Игорь ачиз но Выль арлы сӥзем конкурсамы пыриськылӥз). Нылызлэн вормисе потэмезлы шумпотӥз анаез но. Тамара Борисовна школаязы удмурт кылъя но литературая дышетэ. Школаысь пиналъёсты сямен ик, аслэсьтыз но нылпиоссэ удмурт газет-журналъёсын тодматылэ, "Ӟечбур!" газетэн но эшъяськытыны быгатӥз. Кельшиз мыным Мариналэн котьмае тодыны тыршемез, пӧртэм удысъёсын тунсыкъяськемез. Тани одӥгзэ заметказэ со писпулы сӥзем. Нылаш малпаське, кыӵе пайда вае нюлэс асьмелэн улонамы. Заметкалэн пумаз со писпуосты утялтыса возёно шуса вазиське. Тужгес но кельшытӥ мон Мариналэсь эшез сярысь верамзэ. "Ми Маринаен",- верамезлы быдэ эшезлэсь нимзэ поттылӥз нылаш. Та люконтэм эшъёс туэ 7-тӥ классэз йылпумъязы ини. Кык нылъёс одӥг ульчаын уло. Ваньмон дыръязы бисерлэсь пӧртэм пужыос бичало, шулдыр гужем нуналъёсы вань пиналъёсын ӵош футбол шудыны потало. Дышетскон ар мыныку, соос кыкназы ик волейбол, баскетбол секциосы ветло. Нош эктонъя кружокенызы ветлыса, соос ёросазы ортчылӥсь "Утренняя звезда" конкурсэ но пыриськыло. Газетэнымы эшъяськыны кутскемзэ Марина тазьы тодаз вае: "Нырысетӥ ужме гожтӥ - ӧз поттэ, кыкетӥзэ гожтӥ - нош ик газетысь ӧй адӟы. Собере Выль арлы сӥзем конкурсэ пыриськи, мон сьӧры - Игорь выны но. Потымтэ ужъёсы понна мылкыдме ӧй куашкаты. Малпасько, юн сямо луыны кулэ шуыса". Тыршись луэмез ик юрттэ Мариналы "витьёслы" дышетскыны. Физкультураен гинэ куд- ог дыръя "ньыльёсыз" потыло. Азьпал улонзэ но Марина син азяз яркыт пуктэ ини. Журналистэ дышетскыса, кыӵе ке но газетэн кивалтэмез, тунсыко адямиос сярысь гожъямез потэ. Нош кыӵе шумпотыса Марина тодаз вае кыдёкысь сюресъёс вылэ потамъёссэ. Пичиысен ик со дышиз ини пӧртэм интыосы вуылыны, трос адямиосын пумиськылыны. Анаезлэн, Тамара Борисовналэн, верамезъя нылпиосызлы сыӵе луонлык сётэ атайзы. Сюрес лэсьтон бордын ужа бере, араз одӥг пол со аслэсьтыз семьязэ дунтэм дунын поездэн кытчы ке нуллыны быгатэ. Озьы соос Перме, Москвае вуылӥзы ини. Мукет интыосты адӟылэмзы Игорен Мариналы ноку вунонтэм суредъёс выллем кылё. "Юн яратӥськом ми Марина Николаевалэн семьяеныз машинае пуксьыса, Ижкаре яке мукет интыосы вуылыны", - шуэ Марина. Азьпалан шундыё, шуныт куинь гужем толэзьёс. Лыктӥсь гужем Марина Каракуловалы шумпотонэн, жингрес серектонэн, ӟеч ужъёсын мед зороз. А. АЙМАНОВА. . Марина КАРАКУЛОВА. 2-27-8 Шонер сиськиськод-а, эше? "Ӟечбур!"-ез школаын, библиотекаямы но куд-ог егит семьяос басьто. Нылпиос сяна, мумы-бубыос но сое лыдӟо. Отын уго олокыӵе но дэмланъёс вань. Мон газетэз уг басьтӥськы, нош котькуд номерзэ школае вуылыкум лыдӟисько. Кемалась ик ӧвӧл, тазалыкез утён сярысь выль сэрег усьтӥды. Туж шумпотӥ: йырады нош ик выль малпан лыктэм. Ма сое покчиос но, бадӟымъёс но лыдӟозы. Мон но пыриськисько таяз сэрегады. Ужме, ярамон кадь ке, поттоды. Сиськонниын нырысетӥез янгыш Улонэз тэргаськом ке но, сютэм улон ӧвӧл ай. Радъямтэ, вистэм-вожтэм сиськон сям туж ӵем пумиськылэ пиналъёс пӧлын но, бадӟымъёс пӧлын но. Ойдолэ та ужпумез сэрттом-пертчом. Ӵукна, шуом, анай сиён пӧзьтэ. Сиськиды. Школаын нош ик тӥледыз сиён возьма. Сиськиды. Дорады ческыт пыжиськемен пумитало. Малы сыӵе нуш-нуш сиёнэз кельтод? Телевизор пыр усто передача мынэ. Буш киын пуксёд шат? Преник, печення кутӥды, сиемды уг пот ке но. Синды учке - ымды выре. Куд-огез урок дасян дыръязы но азьпалазы мар ке пукто. Ураме но буш уг вырӟо: крендель, нянь, сема кадьёсты сьӧразы басьто. Нош магазинысь кынтэмтэк (мороженойтэк) шер потӥськоды шуи ке, уг янгыша. Я, ӝыт вуиз, соин ӵош сиськон но. Ма кызьы уд веръя анайлэсь пӧсь шыдзэ, йӧлын, вӧйын ӝукез? Ма луиз табере кӧтады? Тӥ, пинал эшъёсы, уйзэ шутэтскиськом кожаськоды. Озьы ӧвӧл со. Ӝушты уйбыт но ужаса уз быдты сётэм уждэс! Марлы озьы луэ? Эсэпсэ чаклано ке, нуналаз ньыль пол сиськоно. Ми будон, дышетскон вакытэ тазалыкез утён но кыдатон сярысь валэктӥсь ӧй вал: газетын но, урокын но. Тӥ пичиысен тазалыкез утён сярысь тодон-валан басьтыны тырше. Тазалык - со шуд. Вистэм-вожтэм сиськон кӧтпуш висёнъёсы туж ӝог вуттоз. Соку троссэ сиемды но уз лу ни. Инкуазен сётэм шумпотон вӧзтӥды ортчоз. Улонды пиртэш кылёз. Кыкетӥез янгыш Радъямтэ сиськон урод сямлы пӧрмоз: ялан сиемды потоз, кӧтты маке но возьма кадь. Пӧзьтэм сиён ялан уз луы. Соин ик кӧс нянь амалтэк кутоды. "Ма отын уродэз?" - куд-огезлэн, оло, юанэз но кылдоз. Кӧс нянь нокыӵе гылтонтэк ӝуше тулляське, собере солы укмыс метръем сюл пыртӥ потоно ук ай. Сюл быгытъёс понна со туж секыт уж. Нош сиёнды дыртыса, ӟеч сыскытэк ньылэмын ке?.. Ӵапак отысь ик ӝуш висён но, сюл висён но пото. Самой егит, зол ужан вакытады висьыны медаз кылды. Со понна нянез чаен, шыдэн но мукет лымо сиёнэн кушано. Кӧтпушлы туж пайдаё луо сюкасен сиёнъёс. Куинетӥез янгыш Тӥ ӝоместонэз (жвачкаез) яратӥськоды. Нош мон со понна тышкаськисько. Малызэ но верало: дугдылытэк кема сыскиськиськоды. Дыльды потон без (железа) жаде. Дыльды кулэсме, сиськон вакытлы уг пот ни. Нош сиёнды дыльдытэк ньылӥськиз ке, кӧтлы нош ик курадӟон. Дыльды - кӧтлэн эшез. жоместонэз кӧня ке гинэ сысконо, 4-5 минут тырмоз. Соку тазалыклы нокыӵе изъян уз луы. Ньылетӥез янгыш Шуом, тӥ туж пӧсьын сиыны яратӥськоды шыдэз, юыны - чаез. Ым ӵуштаськымон пӧсь сиён ӟече уз вутты. Пиньды сузмоз. Ньылонады, ӵуштаськыса, лек пыктос кылдыны быгатоз. Ӝушлы но сыӵе сиськон бадӟым шуккет луоз. Озьыен, кезьытсэ сиёно? Туала пиналъёс зэмзэ ик йӧканаысь (холодильникысь) поттэмзэ соку ик сиё. Ярам, шунтыны ке выриськоды. Нош уд ке? Пичи дыръя но дыртон трос ук: я ураме шудыны потоно, я телевизор тонэ возьма. Ма ичи-а дыртон мугъёс? Кезьыт сиён ньылондэс кынтоз, пиньдэс но. Кынмады ке, эмчи доры ветлоно луоз. Соин ик сиськем берады ымпуштэс шуныт вуэн ӟеч-ӟеч гылтэ. Витетӥез янгыш Вистэм-вожтэм сиськон сям ялан сьӧрады ветлоз. Шуом, бакчае потӥды. Убоысь узыос шорады мыняло. Ма, кызьы-о чидалод веръятэк? Цутэрпуын - сутэр, пыдлогес мынӥды ке - огреч, ӵуж кушман. Ма ваньзэ вераса быдтод шат? Уть ай кыӵе суред кылдэ: анайды, емышъёс мед удалтозы шуыса, кыед ву кисьта. Бакчае гидысь кыед поттӥськоды. Кӧня отын висён алятӥсь микробъёс! Ай киды но миськымтэ. Дышем сямдыя емышез ялан озьы сиылӥды ке, кӧткыль висён (дизентерия) шедьтоды. Со кышкыт маке ини. Тӥни озьы чебер мульыос но бакча сиёнъёс курадӟон сётозы. Соин ик нырысь-валысь бичам-октэм мае ке чылкыт вуын миськоно, озьы ик кидэс но. Пуныен, коӵышен шудэм бере но кидэс одно ик майталэн миськоно. Тодады возе Сиськон дыръя ӝӧк сьӧрын кыл-куара уг поттыло. Уж, кылэм-адӟем учыръёс, дышетскон сярысь мукет дыръя вераськоно. Сиськыкуд ериськоно ӧвӧл. Индылон, пыкылон, визьман - ӝӧк сьӧрын мултэс. Йырады нокыӵе но малпанъёс но медаз бергалэ. Нош йыркуръяськон сиёндылэсь пайдазэ быдтоз. Ӝӧк сьӧрысь потыкуды сиён дасям муртлы тау карыны эн вунэтэ. Умой луоз, ӟеч кылъёс верады на ке. Озьы тӥ Инмарез гажамдэс но возьматооды. В. И. КОЛЕСНИКОВА. А-23-3 Калык понна тыршиськом - Михаил Григорьевич, нылпиослэн йыртэмаменызы сэрен потэм тылпуослэн лыдзы сюлмаськытэ. Эшшо но кышкытэз - туэ 8 нылпи бырыны шедиз ини. Кыӵе мугез, малы озьы луэ? Элькунмы азьланяз быгатоз-а пиналъёсты со кышкыт учыръёслэсь утьыны? - Со милемыз гинэ ӧвӧл, администрациосты, Кивалтэтын ужасьёсты, вань адямиосты сюлэмшугъяськытыны кулэ. Но нырысь ик, мед малпаськозы анай-атайёс. Жаляса верано, берло дыре нылпиослы саклык ӧжыт висъяло. Пиналъёссэс шугадӟонъёслэсь утён сярысь трос уг сюлмасько. Соосты пичиысен улонлы дышетоно. Мон педагог ӧвӧл, но тодӥсько: покчиос котьмаин тунсыкъясько, ваньзэ тодэмзы, эскеремзы, киязы воземзы потэ. Кызьы меда гур ӝуаку, газ но электроприборъёс ужаку нылпиосты огназэс кельтыны дӥсьтод? Со - йыруж. Покчиос со, покчиос ини. Соин ик кышкыт учыръёс кылдо. Пичи пинал ваньзэ бадӟымъёслэсь адӟем каре. Кытӥ малпан кылдэ: мумы-бубыосты асьсэды куронъёсты быдэсъяны дышетоно. Асьсэлэн соослэн трос ай алама сямъёссы. Тылын тужгес йыртэмало 2-7 аресъем покчиос. Соос номыре уг валало ай. Ачим но 6 арескысен сутскыны шеди. Со вал 1943-тӥ арын. Анае бускельёсмы доры потӥз, нош мон, ӝуась гурлэсь ӧссэ усьтыса, пальтоме шунтыны кутски. Тылгизьы тэтчыса, пальтоысь ватаез кенжиз. Киыным кӧня ке кокай, кысӥз кадь потӥз. Анае вуиз но юа: "Маке ӝуа кадь?" "Мон кысӥ ини", - шуи но, конькиосме кутыса, кыре потӥ. Урамысен пальтое гомӟиз. Ульчаетӥ ортчисьёс кысӥзы ини сое. Со бере тыллэсь туж кышкай. Озьы асме ачим дышетӥ. Но сыӵе астэ дышетон учыръёс медам луэ вал. Ӝуам, улонысь кошкем ненег мугоръёс шоры учкыны секыт. Ачим со пыр ортчи, сутскем вылтырысь лякиськем бинтэз октыкузы, шулдыр ик ӧвӧл. Тыллэн кулэлыкез сярысь веранэз ӧвӧл. Со йӧнатэ, синеръёсты но буйгатэ. Тани тылскем ик кӧня калыкез котыраз люка. Но эсэпсэ чаклано ик. Пӧлысьтымы ваньмы ас дыраз физикаез, химиез дышетӥськом, нош тодон-валанмес улонамы ум кутӥське. Тылпу кысӥсьёс быгатэмзыя ваньзэ лэсьтыны тыршо, но огнамы ми кыдёке ум мынэ, юрттыны кулэ. - Улонмы секытэн, анай-атайёслэн али трос мукет сюлэмаськонъёссы. Со но одӥгез мугез луэ, дыр? - Соиз но вань. Но кошкон азязы секыт-а, мар-а ваньзэ утялтыны, кысыны, ватыны? Нылпиослэсь дуноез улонамы номыр ӧвӧл ук. Вылаз ик туала нылпиос, ерпечкаос, котькытчы вутско. - Асьсэос пиналъёс быгато-а секыт югдурысь потыны? - Пиналъёсты али солы дышето. Но мумы-бубыослы та ужлэсь палэнсконо ӧвӧл. Валэктоно тылпулэсь кышкытлыксэ, кызьы кышкыт учырысь потыны индылоно. Нылпиослэн сыӵе психологизы: тылпу дыръя сэрегъёсы, валес улэ, шифоньере, пеймыт комнатаосы ватӥсько. Ӝожомоно Россия понна. Кунгож сьӧрын со валэктон уж туж ӟеч радъямын. Нош асьме дорын сое тросэз уг валало. - Тылпуос уно ваньбурез изъянто, кытӥ пеньлы пӧрмыто. Кин со понна кыл кутэ? - Сутскемъёс Госстрахысь коньдон басьто, нош предприятиос туж бадӟым ыштонъёс адӟо. - Анай-атайёс нош палэнэ кылё-а? - Соос асьсэос, уноез улон интытэк кыльыса, кайгуэ выемын ини, оло нош нылпиоссэс, ӵыжы-выжыоссэс но ыштӥзы. Озьы ке но, кыл кутонлэсь ӧй палэнтысал, ваньмыз шоры чиньы пыртӥзы учкисьёсын йырин мукетъёсыз медаз курадӟе. - Алиосыз тылпуос азьло аръёсы потамъёсызлэсь маин ке висъясько-а? - Висъясько изъян ваеменызы. Улон азьлань мынэ, адямиос улон интызэс выльдо, маке выльзэ басьто. Улон коркаосын трос тылпуос пото, угось юртъеръёссэс ваньзэ одӥг липет улэ пукто, коркаос ог-огзылы матын сыло. Со сяна, гаражъёсазы, кеносъёсазы ӝог гомӟись суретъёс, бензин возё. Тылпу кысӥсьёслэн кужымзы трос ӧвӧл, Ижевскын ик куддыр огдыре 5 тылпуос пото. Котькудзэ туж секыт кысыны. - Берытском пиналъёс доры. Азьло трос пӧртэм клубъёс, дружинаос ужазы. Нош али со ласянь югдур алама кадь? - Озьы. Азьло Удмуртия та ласянь быдэс Россиын азы кыско, спонсоръёс шедьтыса, кузьымъёс дасяло. Али, нылпиосты пожарно-прикладной спортэ кыскон вылысь, липето манеж пуктӥськом. Ваньзэ пумозяз вуттӥм ке, малпасько, ураметӥ ужтэк калгись пиналъёс уноез дорамы кыстӥськозы. Татысен ик пиналъёслэн быгатонлыкъёссы шараяськозы. Удмуртия спортсменъёсыныз котьку данъяськиз. - Уноез пиналъёс тылпу кысӥсь луыны малпало, дыр. Кытын дышетскыны луоз? - Асьме регион Екатеринбургысь училище борды юнматэмын. Мон но сое пырпотӥ. Кылем арысен Ивановоысь филиалэ но интыос сёто ини. Вылӥ образованиен удысчиос али отысь пото. Вань на Москваын но Санкт-Петербургын академиос. Ӝоген Екатеринбургын но вылӥ образованиен диплом сётъялозы ни. - Вералэ вал ас синмыныды адӟем тужгес кышкыт учыръёсты. - Ялан тодам ваисько 1980-тӥ арын Играысь леспромхозлэсь ӝуамзэ. Тылпу кызь гектар вылэ вӧлмиз. Штабельёсы 36 сюрс кубометр тэль, 10 сюрс пиломатериал, 5 сюрс щепа люкамын вылэм. Электропилаен пу дасякузы потэм тылпу. Туж трос техника ваим, угось быдэс Игра посёлоклы кышкытлык кылдӥз. Тылпу кысӥсьёслы отын туж трос пӧсяно луиз. Со ёросын ик, Малягуртын, 30 корка сутскиз. Одӥг пересь коркаезлы матын жуг-жаг сутыны кутскем. Сое алӥллям, но кылзӥськымтэ. Озьы тылгизьы тӧлъя юртъераз вуэм, тылпу бӧрысь бускель юртъёсы тэтчем. Тодэ лыкто на Пичи Пурга ёросысь Яганын луэм кышкыт учыръёс. Ижевскысь Нефтебаза но уно пол кенжылӥз. Но тужгес кышкытэз вал Ельниковской месторождениын. Ӝуазы 5 сюрс тонна му вӧй тэрись резервуаръёс. Ӝуждалазы ик соослэн 5 вылынъем корка ӝужда. Пыдэсазы ву пуке. Нош му вӧй ӟырдамъя, ву пӧзьыны кутске. Ярам ай, югдур отчыозь ӧз вуы. Пӧзьыны кутскысалыз ке, ӝуась му вӧй котырак 200 метр кеме пазьгиськысалыз. Кема нюръяськеммы бере, ас кожамы кызьы но озьы тылпуэз кортнам. Секыт вераны миым тылпуын бырем нылпиос сярысь. Кылем арын Пичи Пурга ёросысь Гожняын 3 пичи нылпиос быризы. Егит кузпалъёслэсь сюлэмзэс вӧсь карем уг поты ни вал, но со сярысь верано ик, дыр. Нылпиоссылэсь тылын йыртэман сямзэс кузпалъёс тодо вылэм. Озьы но анайзы гурзэ эстыса, бускелез доры потэм. Бызьыса вуэм на, но корка пушсы тылын, ӵынэн басьтэмын вылэм ини. Укмыс толэзьем нылзэ поттэм, нош бадӟымъёсыз койка улэ пегӟиллям. Пичи нылзэ но утьыны ӧз быгатэ ни. Жаляса верано, сыӵе учыръёс ӧжыт ӧвӧл. - Туэ тылпу кысӥсьёс 352 ар тырмонзэс пусйизы. Кыӵен мылкыдын сое пумитады? - Мылкыд номыр ӧй вал. Бадӟым тау шаерамы улӥсьёслы милемлы юрттэмзы, милемыз валамзы понна. Рейтингъя Россиысь тылпу кысӥсьёс пӧлын камчаткаос бере кыкетӥ мынӥськом. Озьы ик 2-тӥ интыын городъёсысь тылпуэз кысон ӝоглыкъя но. Калык юрттытэк, сыӵе азинсконъёсмы ӧй луысалзы. Шаерамы улӥсьёс тылпу потэм сярысь ӝог гинэ милемлы иворто, нош вуытозямы ас кужыменызы тылын нюръясько. Тылпу кысӥсьёс сярысь ке верано, соос кышкасьтэмесь, кужмоесь, ас удыссэс ӟеч тодо. Ужзы капчи ӧвӧл. Тани кунгож сьӧрын тылпуэз урамысен кысо, нош асьмелэнъёс тыл адэ пыроно луо. Кемалась ӧвӧл Воткае Америкаысь делегация вуылӥз, пӧлазы тылпу кысӥсьёс но вал. Сарапулысь ӟоскыт гараже мырдэм пырись тылпу кысон машина шоры чабкиськыса учко. Асьмелэнэн ӵошатыса, соослэн техниказы ик шудон машинаослы укша угось. Кужмоесь, оскымонэсь, котьмаиз вань отын. Но асьме тылпу кысӥсьёсты геройёсын ӵошатысал. Оскымонэсь воргоронъёс. Удмуртиысь пиос Чернобыле но ветлӥзы, 1979-тӥ арын Белоярской АЭС-эз бадӟым тылпулэсь утизы. Со понна Горбачёвез гажасько: тылпу кысӥсьёслэсь Чернобыльын быдэстэм ужзэс вылӥ дунъяз. Ми калык понна тыршиськом, кулэ ке, котьку юрттом. - Мар сӥзьысалды нылпиослы, анай-атайёслы? - Нырысь ик, огшоры адями, атай но песятай луыса, нылпиослы сӥзьысал шуд, тазалык, визьмо луон. Россилэн азьланез соос киын. Асьсэды котьку мед утёзы. Нош анай-атайёслы ваньзылы йыбырттӥсько. Туж гажасько трос нылпиё семьяосты. Бадӟым семьяосын нылпиоссэс яратыса будэто. Россия трос нылпиё семьяосын котьку кужмо вал. Быдӟым Отечественной войнаын кадь, али но соослэн нылпиоссы пӧсь интыосын Россилэсь данзэ утё. Ваньзылы сӥзьысал чакласькыса-эскериськыса, ог-огедлы юрттыса улон. А-23-7 Атайёссылэсь данзэс ӧз уськытэ Кыӵе шумпотэмын вал пиналъёс та нуналэ, эсьмаса, ымнырысьтызы пальшамзы ик ӧз бырылы. Туж пичиесь ай соос, пӧлазы 6-7 аресъемъёс но вань. Нош кужмо нюръяськыны, ӵошатскыны быгатэменызы зэмос спортсменъёслэсь но бере уз кыле. Ог нуналэ тылпу кысӥсьёслэн управлениязы уно калык люкаськиз. Туэ тылпу кысӥсьёс 352 ар тырмонзэс пусйизы. Солы сӥзьыса, пожарно-технической выставкаын ужасьёс О. П. Кондратьева, Н. Ю. Шмакова но Г. Ю. Швецова Ижкар гарнизонысь тылпу кысӥсьёслэн нылпиоссылы тунсыко "Я б в пожарные пошёл" нимо ужрад дасяллям. Татын пиналъёс ӵошатскизы, тылпулэсь утиськонъя тодон-валанзэс возьматӥзы. Нош нылпиоссы понна "висись" анай-атайёс, ӧтем куноос кичабонъёссэс ӧз жалялэ. Нырысетӥ эстафета бере ик азьпала потӥз "Искра" команда. Берпуметӥ ӵошатсконозь отысь пиналъёс асьсэды азьпалтыны ӧз сётэ ни. Нош конкурсъёс но эстафетаос вискын усто, шулдыр кырӟаменызы паймытӥзы Настя Постникова но Таня Халтурина. Ужрадэз радъясьёс кылбуръёсын, пиналъёслэн суредъёсынызы шулдыртӥллям спортзалэз. - Ӵошатсконъёсты ортчытыны вылысь, туж кема дасяськоно луимы, - маде пожарно- технической выставкаен кивалтӥсь О. П. Кондратьева. Пиналъёслэн шудо ымныръёссы возьмато: ужрад пӧрмиз, удалтӥз. Татчы ми котькуд частьысь 36 нылпиосты люкам. Азьло соос ог-огзэс уг но тодо вал, нош татын ӝог гинэ эшъяськизы, кужмо командаос кылдытӥзы. Пиналъёслэн кужмо нюръяськыны быгатэмзылы, быгатонлыкъёссылы шумпотӥськом. Ваньзы сямен спортивной секциосы ветло. Тодӥсько: пӧлазы вань футболистъёс, волейболистъёс, хоккеистъёс. Ми ваньзэ лэсьтыны тыршим, та ужрад нылпиослы вунонтэм мед кылёз шуыса". Ужрад кема кыстӥськиз, но котькуд ӵошатсконъёсын одно шараясько вормисьёс. Нырысетӥ интые потӥз "Искра" команда, кыкетӥ луизы "Пламя"-ысь шӧртчиос, куинетӥ - "Факел" команда. Спонсоръёс ӵошатскисьёслы туж ӟеч кузьымъёс дасяллям. Ваньмыз туж тунсыко, пайдаё орт ӟеч кылъёссэ вераз Элькунысьтымы МВД-лэн тылпулэсь утиськонъя кун управлениен кивалтӥсь М. Г. Камалетдинов но. - Бадӟым тау пожарно-технической выставкаын ужасьёслы, - шуэ Михаил Григорьевич. - Ужрад пиналъёс, анай-атайёс понна зэмос праздниклы пӧрмиз. Учке ай, спортзал кыӵе чеберъямын, кыӵе чебересь суредъёс, кылбуръёс. Кыӵе ӝутскем мылкыдын ӵошатскизы нылпиос. Соослэсь быгатонлыкъёссэс туж вылӥ дунъясько. Атайёссы сямен, будыса, соос Россилэсь данзэ утисьёс луозы. Покчиос анай-атайёссылэсь но данзэс ӧз уськытэ. . Кырӟа Таня Халтурина. . Кужмо нюръяськон вакытъёс. М. Г. Камалетдитнов но ужрадэз нуисьёс капитанъёсты ӟечкылало. Туспуктэмъёсыз Ю. ИВАНОВЛЭН. А-23 Покчиосты чакласа возёно Кин меда уг яраты тылскем дурын пукыны, вордскем нуналаз сюсьтылъёс ӝуатыны. Тыл угось буйгатыны быгатэ. Бадӟымъёс солэсь кулэлыксэ но, кышкытлыксэ но валало, нош покчи пиналъёс малы меда тыл доры кыстӥсько. Тани шаерамы 4 нылпиос шырпуэн йыртэмаменызы сэрен улонысь кошкизы ини. Солы валэктон сётыны курыса, вазиськи УГПС-ысь госпожнадзоръя валтӥсь инженерлы Ю. Р. Чирковлы. - Огкадь валэктон солы сётыны секыт. 2-6 аресъем нылпилэн ваньзэ ас синмыныз адӟемез, ас киыныз кутылэмез потэ. Нылпи садэ ветлӥсь экеос но дыдыос асэнызы валтыны уг быгато на. Мунёез, яркыт кагазо конфетэз, пӧсь утюгез, тылпоттонэз, венез, бирдыез, эмъюмез - ваньзэ пичи нылпи ас кияз возьыны яке ымаз поныны тырше. Умой пукыны косӥд ке, со лачмыт пукоз. Нош маке тунсыкозэ синйылтӥз ке, соку ик со арбери доры кыстӥськоз. Котькуд пинал озьы лэсьтэ. Алама учыръёслэсь утён понна, покчиосты чакласа возёно, ноку огназэс кельтоно ӧвӧл. - Созэ эн иса, тазэ эн лэсьты шуыса ялан улӥд ке, нылпи понна алама уз луы-а? - Таиз зэм. Озьы возид ке, нылпи секыт югдуръёсысь потыны уз дышы. Соосты тросгес индылоно. Пичиен-пичиен эрик сётоно, но одно чаклано, маке мултэссэ медаз лэсьты. Мумы-бубыослы нялтас кӧня ке дэмланъёс сёто. . Покчиос котьмае синйылто. Кытӥ кышкытлык ваись арбериосты но шедьто но со сярысь мӧйыослы иворто. Таӵе дыръя соосты одно ушъяно. . Куд-ог педагогъёс, психологъёс юромо алама учыръёс кылдытъяны косо. Но со изъян медаз вайы тазалыксылы. . Нылпиос пӧлын валэктон уж нуэ. Уже кутыны луоз мультфильмъёсты, рекламаосты, пиналъёсын выжыкылъёс, лкышноос нуналлы быдэ дышетскыны но ужаны Аксакшуре ветло, нош воргоронъёс пӧлысь одӥгез йӧллэсь сиён-юонъёс лэсьтон цехын ужа, мукетыз - аслаз музъем вылаз (фермер). Кызьы меда соос уло? Бакчазы, пудозы вань бере, со чотын. Толалтэ секытгес йӧтэ. Дышетскыкузы нылпиос быдэс арня ӵыжы-выжыоссы дорын уло, нош кӧснуналъёсы Вавил агай соосты гуртазы валэн вае. Но огъя вераса, улыны луоно, ву сярысь гинэ сюлмаськонъёс вань. Татын вань малы паймыны. Котькыӵе калык кемалась дырысен улон сётӥсь шуръёс, жильыртӥсь ошмесъёс доры интыяськылӥз, отысь нуналлы быдэ гучыкен-гучыкен тазалык басьтылӥз. Куюкиын соос ӧжыт ӧй вал. 70-тӥ аръёсы татын 80-лэсь ятыр семьяос улӥллям, котькудӥзлэн аслаз ошмесэз вылэм. Нош гуртлэн вырйыло интыяз муресь гудӟемъёс гудылӥллям но нылпиоссэс кадь ик утялтыса возиллям. Пиналъёс огкылысь уж борды басьтӥськизы: одӥгъёсыз куакъёсты корало но палэнэ нулло, мукетъёсыз лопатаосын но ведраосын дэриез поттыло, ву бызён ӧр гудо, куинетӥосыз пичи шур вамен погыртэм писпуослэсь выж лэсьто. Гуртын улӥсьёс но палэнэ уг кылё: пулъёс, кортӵогъёс, кулэ тӥрлык сёто. Пияла банкаослэсь, кирпич юдэсъёслэсь, езъёслэсь, мукет жуг-жаглэсь сузям ӧрлэсь вуэн тырмемзэ адӟыса, пиналъёс шумпотэмзэс ватытэк ӵашетыны ӧдъязы. Бӧрысь кык час пала кулэ луиз на Е. Е. Спиридоновалэн бакча берысьтыз колодчаез сузяны-тупатъяны. Азьло вуэз жеребеен ӝутъяллязы. Но кузёез кошкем бере, юбоез сисьмем но куашкам, бугролэн вылӥ коръёсыз сузмиллям. Перелӟем пеймыт вулэн пыдэсозяз кузь бодыен сузьыны вырим, но туж мур вылэм. Озьыен, вузэ чылкытатыса, бугролэсь вылӥ коръёссэ воштыса но жуг-жаг сюремлэсь пулъёсын ӵоксаса, сое улӟытыны луоз. Ужъёсмес йылпумъяммы бере, юбоос пуктылыса, пуӵъёсын котыртӥм. Сотэк уг луы: татӥ пудо ветлэ. Куюкие кыкетӥзэ мыныкумы, куазь пилемо тупаз. Но куюкиослэн ужзэс азинтэмзы туж потӥз. Таяз мыныкумы, ми вӧзы ватсаськизы на 5-тӥ классын дышетскисьёс Алёша Поклонов, Альберт Сачков но Даша Ушакова. Соос таӵе походын нырысьсэ, но мылкыдзы ӝутскемын. Пельпумаз лопатаен мынӥсь Дима лэсьтоно ужмы сярысь юалляське, берегес кылисьёсты дыртыны косэ, серекъя. Сыӵеосын походын мӧзмыт уг луы. Нюро возь вылысь Мирон ошмес но лёгамын вылэм. Сое но сузяны трос дыр кулэ луиз. Ужаса пӧсям пиналъёслэн умоезлы осконзы чик ӧй вал ни. Но шӧдтэк шорысь метр мында мурдалась ву потыны ӧдъяз. Шумпотэменызы тэтчаны ик кутскизы пиналъёс. Но жадеменызы но кыдырась зор улын котмеменымы, ужмы куспетӥ луиз. Туннэлы тырмоз, кылемзэ вуоно походын лэсьтом. Нош куюкиос милемыз чидатэк витё ни вылэм. Кызьы уд куноя таӵе пиналъёсты! Татын улӥсьёс понна тыршо ук соос! Пиналъёслы шуыса ӝӧк вылазы кыӵе но сиён-юонъёс пуктӥллямтэ: шыд, салатъёс, пыжиськемъёс, компот... Кузё кышноос, Татьяна Ермакова но Ольга Спиридонова, асьсэлэсь нылпиоссэс сямен утялтӥзы. Пиналъёслэн чырмыт ужамзы Екатерина Егоровалы но кельшиз. Сюлмысь тау каремзы пиналъёслэсь мылкыдзэс эшшо но бурдъяз на. В. БАЙМУРЗИН. 1 5-14-3 Тулыс, гужем вуыса, адямиос пӧртэм эмъюм турын-куаръёс дасяны кутско. Мае бичаны луоно куартолэзе но инвожое? Кызьпу Али кызьпу куаръёсты дасяны дыр вуэмын. Соос пекляосынызы курадӟись муртъёслы туж тупало, юртто нефрозъёс но нефритъёс дыръя. Атеросклерозэн висисьёслы юрттоз куаръёсын сылэтэм настойка. Болгариын улӥсьёс, кылсярысь, юо сое лулсэрзы сӧриськыку, пекляоссы висьыку, ӵужектонэн курадӟыкузы, кызон пӧсьтыку, мугоразы витаминъёссы тырмымтэ дыръя. Векчи вандылэм куаръёслэсь компрессъёс радикулит но ревматизм дыръя юртто. Кызьпулэсь поттэм тэкит Вишневскийлэсь, Винкинсонлэсь мазьёссэс лэсьтонэ кутӥське. Пужым Вашкала дырысен адямиос пужым нюлэскы тыоссэс чылкытатыны ветлылӥзы. Фитонцидъёсын тырмем омырез шокчыса, трос микробъёс но бактериос быро, пе. Пужымлэсь бычыоссэ я выль потӥсь лысъёссэ векчи юдыса, быректэм вуэ пононо (1:10). 30 минут мында сылэтоно. Та сурет юрттоз ньылон, тыос висьыку, подагра, ревматизм дыръя. Спиртэн сылэтэм настойкаез пичиен-пичиен юыны дэмлало ӝушенызы курадӟись муртъёслы. Пужымлэсь поттэм скипидар но канифоль пӧртэм мазьёс, бальзамъёс лэсьтонэ кутӥське. 5-15-5 Пумиськонъёс мылкыдэз бурдъяло Алнашын, егитъёсын ужанъя комитетлэн кивалтӥсезлэн В. М. Соловьёвлэн ӵектэмезъя, пиналъёс пӧлын удмурт культурамес, творчествомес ӝутонъя валэктон уж нуиське. Татын соос шаерысьтымы тодмо адямиосын пумиськыло, группаослы люкиськыса ужало. Мон но одӥгаз сыӵе занятиязы-пумиськоназы вуылоно кариськи. Ваньмы люкаськыса, художественно-прикладной искусствоосъя музхее мынӥм. Татын ӵапак усьтӥськемын вал егит суредасьлэн В. Бакаевлэн адӟытонэз. Вячеслав Бакаев паймытӥз котырысьтыз инкуазез валаменыз. Ужез огшоры гинэ быдэстэмын кадь, нош сокем со сюлэмез бугыртэ, котыраз шуныт пазьге. "Мон понна инкуазь улэп суред гинэ ӧвӧл, со улонэ но шокан омыр, - шуэ суредась. - Мон адӟисько пыд улысьтым лымылэсь шуназэ, валасько бурдо эшъёсылэсь куспазы кенешемзэс, малы кырӟамзэс". Суредасьлэсь мадемзэ пичи эшъёсы ымъёссэс ик усьтыса кылзӥськизы, ява. Адӟытон бере пиналъёс ас кружокъёсазы мынӥзы: кин театръя, кин эктонъя-кырӟанъя, кин гур сётӥсь тӥрлыкъёсын шудонъя... Мон но кыштыр гинэ вамыштӥ сюлэмылы матын луисяз литературное. Со интыяськемын ёросамы потӥсь "Алнаш колхозник" газетлэн редакцияз. Пиналъёсын татын ужа газетлэн редакторез И. З. Иванов. Котырес ӝӧк сьӧры интыяськыса, пиналъёс "пӧрамъёссэс" лыдӟо но ог-огзылэсь янгышъёссэс, тырмымтэоссэс, азинсконъёссэс пусъё. Мон но редакторлы юан сётытэк секытэк ӧй чида: - Иосиф Зотович, учконо ке, занятиосты туж тунсыко ортчо, но котькыӵе ужлэн аслаз секытъёсыз вань. Мар тӥледыз сюлэмшугъяськытэ? - Пиналъёсын пумиськонъёс мынэсьтым мылкыдме бурдъяло. Соиз гинэ урод - дыры ӧжыт. Ваньмаз вутскыны секытгес йӧтэ. Нош мукет муртлы кружокез оскыны адями ӧвӧл шуо. Кема аръёс ӵоже "Ошмес син" литературно-творческой кружокен кивалтӥсько ни уго. Нош тужгес бадӟым сюлэм висёнэ - пиналъёслэсь "шаблонной" малпанъёссэс воштон бордын ужан. Кылсярысь, сочинениын луыны кулэ кутсконэз, валтӥсь ужпумез но пумыз. Нош мар бордысен кутске со ужпум, кызьы сое сэрттоно - талы тросэз уг валэкто, анализъёс уг лэсьто. Света НИКИТИНА, УдГУ-ысь студентка. 5-15-7 Интыысь репортаж Шур-р-р! гинэ азьтӥм чильк-вальк "Джип" ортчиз. Эх, малпасько, милям гуртысьтымы культура юртмылэн сыӵе машинаез луысал ке! Соку быдэс элькунмес концертъёсынымы, адӟытонъёсынымы ортчылысалмы - котыръясалмы, дыр. Нош туннэ, ми - егитъёс но культура юртын ужасьёс, валэн уробоен мынӥськомы матысь гуртэ спектакль пуктыны. Вань декорациосмес, дӥсьёсмес, тӥрлыкъёсмес интыямы, ширтӥмы. Уробоен мотик но ярасал - таизлы гинэ но коньдон уг тырмы. Ма, вал куремлы гинэ но копейкаостэ жильдоно. Валэн ворттылон, машинаен ӵошатыса, трослы тунсыкогес ке но, котыр гурт калыклэсь возьыт. 21-тӥ дауре, куке котырак компьютеръёс, пӧртэм пумо "Джипъёс", "Фольксвагенъёс" вортто, нош ми концертъёс пуктыса валэн ветлӥськомы. Ярам ай, куазед шулдыр ке! Куддыр воксё сучыр-сучыр котмыса, кынмыса доре вуиськод. Малпасько, милям культура юртмы гинэ тазьы уг курадӟы шуыса. Уноезлэн клубъёслэн машина утчакузы шуг-секытъёссы кылдо. Вуж Монья культура юртмылы калык ним сётон пумысен вераськизы бере, спектакль пуктӥсьёслы пӧсятозязы ужано луиз. Шумпотымон, нырысетӥ учкисьёсмылы - Починка гуртысь калыклы - кельшиз. Ми возьматӥм Николай Никифоровлэсь "Йырберыктон ватос" пьесазэ. Кужмо кичабонъёс котькудмылэсь мылкыдмес лӧпкытӥзы. Собере спектакльмес Вуж Моньяямы пуктӥмы ини. Таиз самой "пӧсез" вал, шуыны луоз. Вуизы, угось, Ижкарысь, Пичи Пургаысь дунъясьёс. Озьы ке но, ваньмыз ӟеч ортчиз. Табере бадӟым малпанмы вань спектакленымы Бобья-Учала вуылыны. Но йырез нош ик поромытэ одӥг юан: кытысь коньдон, машина? Яке шудӥсьёс нош ик вал уробо тыр пуксьыса, вӧзазы декорациоссэс тырыса, бадӟым тракт кузя ширтозы-а? Оля НИКИТИНА. УдГУ-ысь студентка. 5-16-1 Книга бам Мон - улон книгалэн бамез, Тон сое лыдӟид. Тодӥд быдэс улонэз, Шуддэ отысь шедьтӥд. Зэмос яратон сярысь Вера тыныд книга бам. Соин улон книгаысь Со бамез шуид: "Мынам". Нош тыр толэзь пиштыку Малпанме, оло, валад, Ишкалтӥд тон со бамез, Ватӥд зарни шыкысад. Малпанъёс Уй пеймытысь югыт тылэз - Тонэ али мон малпасько. Кылӥ умой мон иворез, Соин юнгес ни мӧзмисько. Чагыр, лемлет, ӵуж сяськаос, Мон малпанам суредасько, Нош котькудӥз сяська пушкысь Тонэ гинэ мон адӟисько. Берпуметӥ тылгизьы Тылгизьы берпуметӥез Пеймытын кысӥз. Яратон тылскемез Котькин вунэтӥз. Ӧз араты тӧл, Ӧз сюры кӧс вай, Мӧзмонэд чик ӧвӧл, Ноку но ӧй вал. Сьӧд эгыр котькулы Кылиз сюлэмам Пенез тылскемысь Пазьгиз синъёсам. Мон тонтэк Калленэн, калленэн вамышто, Мусое, улонын мон тонтэк. Котькулы мон тонэ, дыр, ышто, Мон шудо луо шудэтэк. Мон кема малпало синъёстэ Малпанъёс сузёзы инбамозь. Мон тонтэк чик ӧй кыль сюлэмтэк, Уйвӧтам но ӧй вал чагыр возь. Лысвуэн котмизы бамъёсы, Лысву кадь чиляло синъёсы. Кинэн бен яратон кылъёсы Сюлэмаз пыраклы кылёзы? Люда ЧЕРНОВА. * * * Вераськод ке - вера Кошкиськод ке - кошкы Дорысьтым туннэ. Яратскод ке - вера, Буйгат сюлэмме. Сюлэмы мынам но Чурыт из ӧвӧл. Секыт малпанъёс но Йырам чик ӧвӧл. Вераськод ке - вера, Кинэ яратскод. Верамтэеныд тон Лулме быдтӥськод. Таня ВАСИЛЬЕВА, Глаз пединститутын дышетскись. * * * "Дунне котырес", - шуо калыкъёс, Куке ог-огмес шедьтомы асьмеос. Шедьто мон тонэ Та бадӟым дуннеысь Висъяло мон тонэ Сюосыз пӧлысь. Тодмало куарадэ, Чебересь синъёстэ... Уг тодӥськы мон, Тодмалод-а монэ. Катя ДИАНОВА. Быги гурт. Шаркан ёрос. Кин кинэ? Капказе гинэ потӥ - Шырчикез мон синйылтӥ. Со шула ук, чиргетэ Вань улосэз шулдыртэ. Мон пыри корка берен, Шуланме поттӥ кыре. Ну-ко, шырчик, кин кинэ Шуласа вормоз туннэ? Кема озьы выримы, Нош кудмы-о вормимы? Акыльтӥ мон шуланлэсь Нош шырчик шула на весь. Питран Петырлы басьтӥ питран- Тау но ӧз шу, чатран! Ураме потӥз - ширтӥз, Бӧрсяз тузон пурӟытӥз. Пумитаз Петыр эшсэ Куриз соиз питранзэ. "Ӧй на жадь, - шуиз Петыр, - Шудыса на кӧт ӧз тыр, Акыльтӥ ке шудыса, Соку утча курыса". Майя МИТРОФАНОВА. Алнаш черкогурт. 5-16-3 Кивоштӥсьёс будо Серпуховын Россиысь школаын дышетскисьёс куспын "Белая ладья" нимо шахматэн шудонъя ӵошатсконъёслэн финалэз ортчиз. Отчы Москваысь, Санкт-Петербургысь но мукет городъёсысь 31 командаос пыриськизы. Ижевсклэсь данзэ утиз Удмуртилэн кык пол чемпионэз 31-тӥ лицейысь команда. Асьме пиналъёс кужмо нюръяськизы. Укмыс пумиськонъёсын витьсэ вормизы но 45 луоноысь 25,5 очко люказы. Озьы егит шахматистъёсмы ньылетӥ луизы. Нош кылем арын та ӵошатсконъёсын ик кыкетӥ инты басьтӥзы вал. Туэ ӧз удалты соин: арессы воштӥськемен но пиос тырмымтэен, кык нылъёсты командае пыртоно луиз.Нылъёс но берпуметӥ турозь кужмо нюръяськизы. Тани кӧня очкоос люказы асьме шудӥсьёс:Настя Банникова 9 луноысь 4,5 очко, Алёша Смолин - 5,0, Паша Карнаухов - 6,5, Зоя Северюхина - 4,5, Женя Булдакова - 5. Та лицейысь пиналъёс ваньзы 6-тӥ ДЮСШ-е ветло, пӧртэм ӵошатсконъёсы ӵемысь пыриськыло. Витьназы ик нырысетӥ разрядъем спортсменъёс. * * * Ижкарын но тунсыко ӵошатсконъёс йылпумъяськизы. Алигес отын 12-80 аесъем 100- лэсь ятыр шахматистъёс кужымзэс мертазы. Котькуд команда понна 10 воргоронъёс но 2 нылкышноос шудӥзы. Вормизы 20-25 аресъем "Молодость" командалэсь данзэ утисьёс. Пӧлысьтызы уноез спортъя мастере кандидатъёс вал. Соос, вить пумиськонъёсын вормыса, 44 очко люказы. Нош командаысь тужгес устоез шудӥсь электромеханической заводысь инженер Максим Озолин, 6 луоноысь 4 очко люкаса, нимаз шудӥсьёс пӧлын нырсетӥ инты басьтӥз. "Юность" команда 1,5 очколы бере кылиз. "Юность" понна усто шудэменызы висъяськизы 6-тӥ ДЮСШ-е ветлӥсь спортъя мастере кандидатъёс Аня Доржеева (6 очко) но Лиза Бронникова (5,5 очко). Озьы ик командазылы трос очко ваизы УдГУ-ысь студентъёс, спортъя мастере кандидатъёс Илья Моисеев но Андрей Витвинов. Пумиськонъёсын соос быдэн 4,5 очко люказы. "Надежда" команда 33,5 очко люказ но куатетӥ интые потӥз. Та команда понна 6-тӥ ДЮСШ-ысь нырысетӥ разрядъем егит шахматистъёс шудӥзы. Пиналъёс 9,5 : 2,5 лыдын "Зрелость" командаез вормизы но туж кужмо "Ветеран" командаез азьпалтӥзы. И. ВЕЛЬТМАНДЕР. 5-17-1 Вунонтэм пумиськонъёс Мыным, школаын дышетскыкум ик, шуд усиз тодмо, визьмо, аспӧртэмлыко адямиосын, артистъёсын, писательёсын пумиськылыны. Ваньзы соос али ке но син азям шуныт, пальпотӥсь ымныръёсын пуксё. Нош соос пӧлысь одӥгез тужгес но сюлмам пыӵаз но весяклы вунонтэм кылиз. Со - удмурт литературалэн песятаезлэн внучкаеныз, Вера Николаевнаен, пумиськылонъёсы. Вера Николаевна писатель но, поэт ӧвӧл, со вань улонзэ калыкез эмъянлы сӥзем адями, со Григорий Егорович Верещагинлэн выжыысьтыз одӥгез пушъетэз. Таза мугоро, ассэ йӧно возись кышномурт борды синъёс асьсэос кыстӥсько. Йӧн-йӧн удмурт нылкышно, шуысал мон, удмурт кылэз уг ке но тоды. Выросъёсыз туж синмаськымонэсь, чырткемесь. Сабырлы выросъёсызъя ик малпанэ кылдэ, та кышномурт туж сюлмо, мыло-кыдо но йыгмыт шуыса. Сэзь чагыр синъёсыз небытак гинэучко шорад, доразы кыско. ... 1997-тӥ арын Верещагин 145 ар пусъем бере одӥг ар ортчыса, нош ик мыным шуд усиз паймымон адямиен пумиськыны. Таяз учыре удмурт литератураен дышетӥсьмы, Нина Фоминична Михайлова, гурт калыкез но пиналъёсты удмурт литератураенымы мургес тодматон вылысь, культура юртамы куное ӧтиз Верещагинлэсь внучказэ, В. М. Ванюшевез но Удмурт Национальной библиотекаын тыршись Н. Н. Бочкарёваез. Куноос лыктэмъёслы мадизы удмурт чеберлыко литературамес кылдытӥсь сярысь. Та ӝытэ гурт калыке трос выльзэ но тунсыкозэ тодӥз. Шӧдтэк шорысь вуиз ХХИ даур. 2001-тӥ ар, тулыс. Вера Николаевна Верещагинаен нырысьсэ тодматскеме дырысен ортчиз ини вить ар. Нош ик соин пумиськыны мылкыдме ӝутӥз Нина Фоминична. Мукет нуналаз ик автобусэ но пуксим городэ ширтӥм. Кыӵе шудо мон ! Вӧзам пукыса, монэн вераськись, пурысьтам йырсиё песянай кыӵе ке тодосчи, бадӟым адями кадь потӥз. Соку сюлэмы шӧдӥз, лэся, со зэмзэ но мынам матысь ӵыжы-выжые луэ шуыса. Ӧвӧл, анай-атай пыр ӧвӧл, мукет герӟетъёс милемыз матысь эшъёс каризы. Нырысь ик, яратоно мемие сямен, юалляськиз дыетсконэ, анай- атае, сузэр-вынъёсы сярысь, нош собере вольыт, шаплы, визьмо кылыныз Вера Николаевна монэ но, дышетӥсьме но тодматӥз песятаеныз, со бордысь потэм выль пушъетъёсынызы.. В. Н. Верещагиналэсь вераськемзэ кылзыку шӧдӥське куараезлэн дырекъямез. Я, кинлэн меда уз дырекъя, куке ас выжыдэ сыӵе-сыӵе сантэмазы ке. Нырысь ассэ Григорий Егоровичез черкысь кошкем бераз кельто пенситэк, куамынэтӥ аръёсы, кулэм бераз ини, семьяяз гинэ но нимтулзэ поттаны ӧз лэзьылэ, берлогес ини, поплэн выжыез шуыса сантэмамзылы чидатэк, ассэ ачиз быдтэ солэн Миша нимо внукез. "Выжыысь выжые сыӵе сям тупатэмын-а мар-а, та Россиын: асьсэлэсь дуно но дано адямиоссэс кулэмзы бере гинэ ӟечен тодазы ваё", - веранзэ азьланьтэ песянай. Григорий Егорович кадь визьмо, синмаськымон но нылпиосты яратӥсь адямиез ки йылын гинэ нуллыны кулэ вал. Лякыт сямо песятаез нылпиос яратӥзы, ачиз но соослэсь ӧз палэнскылы. Нылпи шудонъёслы бадӟым саклык ӧз юнме висъялля, луоз. Соосты Верещагин люкылӥз тазалыкез юнматӥсьёсызлы, "визез сынасьёсызлы", ужаны дышетӥсьёсызлы. Аслаз очеркъёсаз со пыр-поч маде вашкала дыръя паськыт вӧлмем куд-ог шудонъёс сярысь, шуом, "Куа котыртӥен", "Альча-дульча", "Курикетӥ поттэмен". Вазь ӵукна ик куз, сьӧд тушо пиосмурт кияз корзина кутыса кошке вал ини нюлэскы. Нунал ӵоже быръе-бича, куасьтэ, нош собере ини эмъя, уго вить чиньызэ кадь тодэ вал кудӥзлэн кыӵе тодметэз, аспӧртэмлыкез. Таӵе быгатонлыкъёс солы сётӥзы- кельтӥзы выжыосыз, нош Верещагин эшшо но муромытӥз, паськытатӥз. Туж матын вал инкуазьлы, соин матысь эшеныз сямен вераськылӥз, юрттылӥз но тау карылӥз. Адями - инкуазьлэн пичильтык гинэ люкетэз, но со шудо, малы ке шуоно, солы визь кузьмамын, шӧдӥсь но валась сюлэм сётэмын. Та ужын но инкуазез тодэмез ик солы юрттӥз. Солэсь мытэм ужзэ азьланьтӥзы выжыезлэн выль пушъетъёсыз. "Мон ачим но врач, - шуэ Григорий Егоровичлэн внучкаез. - Ветлӥ фронтэ, нош ож бырем бере ужай "Металлург", "Варзи-Ятчи" санаторийёсын. Та удысын озьы ик тыршиз Ольга сузэре но, кудӥзлы "РСФСР-ысь заслуженной врач" дано ним сётэмын". Паймымон ик адями та Верещагин, паймымон солэн выжыез но! Котькуд нылпи дышетэмын, вылӥ образование басьтэмын. Мон малпасько, кин умой тодэ ас выжызэ, яратэ сое, со ноку но уз ултӥя, зӥбыны но уз туртты мукетъёссэ. Аслаз бубаеныз данъяськон интые мае гинэ чидано ӧз луы Вера Николаевна! Война кутскем бере, фронтэ мед басьтозы шуыса, олокӧня куриськонъёс гожъяз. Но, поплэн выжыез карыса, палэнтылӥзы. Дыр ортчыса гинэ, ож лудын врачъёс тырмымэен, кема возьмам повестка вуэ Григорий Егоровичлэн внучкаез доры. Макем ӝож луэ, берло улэм аръёсаз Верещагинэз пыд ул лёгет, собере калык тушмон каризы. В. Н. Верещагина, курадӟыса улэмзэс тодаз вайыса шуэ: "Бубамы но, солэн пиосыз но, пиосыз бордысь ӝужам выжыосыз-пушъетъёсыз но - "калык тушмонъёс ӧй вал"... Верещагинлэн вордскемез дырысен туэ тырме 150 ар. Удмурт литературалэн песятаезлэн выжыез азьланьтӥське кызь одӥгетӥ даурын но. Тодмо литературоведъёс А. К. Поздеев, В. Г. Гусев, А. Н. Уваров но В. М. Ванюшев утчаськыса, писательлэсь улэм-вылэмзэ эскерыса шедьто удмурт чеберлыко литератураез кылдытӥсьлэсь ӵыжы-выжыоссэ но ужъёссэ калыке вуттон сярысь малпасько. Г. Е. Верещагинлэн пиосызлэн вордӥськизы нылъёс гинэ. "Ӧз вордскы бере "ас пиед, Озьыен, пе, быроз выжыед", - шуэ Андрей Самсонов одӥгаз кылбураз. ...Но медаз кышкаты верам кыл - Выжылэсь юн кылёз ки бервыл. Верещагинлэн выжыез уз быры, уз кулы, уз куасьмы огшоры тӧл шорын веттаськись писпу сямен. Кырӟанъёссэ кырӟалозы, кылбуръёссэ вералозы, улэмзэ тодазы ваёзы. Солэн выжыез биниськоз калык сюлэме дауръёслы.. Григорий Егоровичлэн гожъям ужъёсызъя дышетскомы но дышетскозы улонэз, ог-огмес валаны, дунъяны, калыкмылэсь визь шыкыссэ утьыны, ортчем сюрессэ тодыны, малы ке шуоно, толлоезтэк туннэез ӧвӧл, нош туннэезтэк ӵуказеез но уз луы. Надя ЯКОВЛЕВА, 10-тӥ класс. Вуж Монья школа. Пичи Пурга ёрос. 5-22-2 Лыдӟись вера малпанзэ Гуртэ понна ӝож Паськыт сюрес вуттэ Балезино ёросысь Вӧёгуртэ. Котыр садъёс, кыдёкын ик ӧвӧл нюлэс, гуртлэн шортӥз жильыртӥсь шур бызе. Быгато ик вылэм вашкалаос улон инты бырйыны. Малы меда гуртэз Вӧёгурт нималлям? Азьло солы шурлэсь нимзэ сётӥллям вылэм, Ӵужекшур шуиллям. Аръёс ортчыса, гуртлэн нимыз воштӥськиз. Одӥг воргоронлэн вӧй поттон машинаез вылэм, со доры матысь гуртъёсын улӥсьёс но вӧй поттыны лыктылӥллям. Со дырысен гуртмы Вӧёгурт нимын улэ. Нош вӧй вылтӥ кадь-а ортче гуртоослэн улонзы? Пиналъёс школае ветло, кышномуртъёс но воргоронъёс ужало. Уноез соос пӧлысь колхозэ интыяськемын. Колхозын машина-тракторъёс вужмемын, ялан тӥясько, нош выльзэ басьтыны луонлык ӧвӧл. Тупатъяны кема выремен, бусы ужъёс ӝегало, соин ик сӥзьыл ю-нянен но данъяськыны уг луы. Ужасьёс туж ӧжыт уждун басьто, созэ но дырыз дыръя уг сёто. Озьыен, колхоз куашкан калэ вуэмын. Оло, соин но эштосын ужан нуналлэн нокыӵе радыз ӧвӧл. Ӵукна ик юыса ужаны потӥд ке но, нокин номыр уз шуы, озьы ик ужан нунал но мыноз. Удысчиос пумит вазьыны уг дӥсьто. Нош куарето ке, ӵем дыръя керетон потэ, пумит ваземзы понна корказы но пырыса керето. Нош кӧня адямиос шудтэм учыре шедё юэм йырынызы? Кӧня воргоронъёс улонысь кошкизы ини. Яке малпаськытэк йырзэс быдто, яке лымы вылын изьыса куло - ваньмыз со аракы бордысь потэ. Воргоронъёс куректэмзэс шара уг верало. Усыкмем йырынызы кыӵесэ пыро ке, озьы шуг-секытъёсысь пото кадь малпало-а мар-а. Воргоронъёс гинэ уг, кышномуртъёс но аракы борды кыстӥсько ини. Сазь дыръязы юэмзылэсь мугзэ соос тазьы валэкто: "Одӥг-кык нуналлы ке но вунэтӥськом, нылпиосты сюдоно, дӥсяно шуыса". Статистикалэн верамезъя, гуртысь куать кышномуртлы одӥг воргорон кылемын. Анай-атайёссы юэмен, нылпиоссы но пинал дырысен ик аракы борды кыстӥсько. Вераме потэ на: гуртамы уно кышнояськымтэ пиос. Малы уг кышноясько? Валало угось: асьсэды но дӥсяны уксёзы уг тырмы, нош кышнояськизы ке, нылпиоссы вордскозы, , быдэс семьязэс вордоно луоз. Вератэк кельтэме уг луы дышетскон сярысь но. Куке гуртамы бадӟым, югыт школа вал, али солэн бервылыз но ӧвӧл ни. Вуж школамес кесям дырысен дас ар ортчиз ини. Выль школа пуктыны уг но малпало кадь. Пиналъёс дышетско колхоз контораын. Отын ик АТС, кивалтӥсьёслэн пукон интыоссы, отын ик пичиесь, пеймытэсь классъёсын пиналъёс дышетско. Ӧвӧл пиналъёслэн паськыт коридорзы но, спортзалзы но, актовой залын ортчись ужрадъёс сярысь малпанзы но. Нош кыӵе люкыт дышетӥсьёслэн интызы. Ваньзы одӥг ӝӧк сьӧрын, директорен завучен гинэ мукет ӝӧк сьӧрын пуко. Учительскойын ик книгаосын ӝажыос - пичи гинэ библиотека. Кинлэн ке мылысь-кыдысь ужамез, дышетскемез луоз-а меда таӵе школаын? Нош мар луэ колхозэ уждун яке почтае пенсия ваё ке?! Калык пыре-потэ, черодын сылыкузы ӵаш каро, юэмъёс куспазы керето, урод кылъёсын кесясько, нош пиналъёслэн со дыре уроксы мынэ. Соку пиналъёс дышетӥсьлэсь мадемзэ кылзо на-а меда? Покчи классъёс дышетско вуж садикын кык сменаен. Колхоз куашка, школа ӧвӧл, культура юртмы но ёросамы самой уродэз луэ. Кытысь али адӟод на пулэсь лэсьтэм культура юртэз? Соиз но сисьмыса музъеме пыре ини. Аппаратура вужмемын, крезьгур инструментъёсты но адӟыны уг луы. Озьы ке но, калык мылысь-кыдысь пыриське концертъёс пуктылонэ. Пиналъёс эктонъя кружоке ветло, праздникъёс дыръя гурт калыкез дасям концертэнызы шумпотто. Сыӵе алама клубын ужаса но, ёрос смотръёсын нырысетӥ интыос басьяло, ӧжыт ӧвӧл ни грамотаоссы но дипломъёссы. Тулыс, сӥзьыл вуэмен, гуртоослэн эшшо одӥг шуг-секытсы кылдэ на. Урамъёсысь машинаосын потыны уг луы, сыӵе нӧд. Кин ке висьыны мар кутске ке, машинаед вань вылысь но больницае шедьыны уд быгаты. Кылем гужем гуртмы дорозь асфальт лэсьтӥзы, нош урамъёсы - ӧз. Ӵошатсконъёсы ветлыкум вуылӥсько мукет школаосы, туж вожъяськыса бертӥсько вӧл- вӧлэсь классъёсын, туала куронъёсъя пуктэм школаосын дышетскись ёзъёсылы. Концертэн ветлӥськом пӧртэм гуртъёсы, адӟиськом синмаськоно кадь пуктэм туала культура юртъёсты. Нош милям гуртамы куке озьы луоз меда? Вордскем гурттэ, вордэм нэнэдэ кадь яратоно шуо. Нош мон ачим сярысь озьы вераны уг быгатӥськы, аслым со понна возьыт, гуртэ понна ӝож ке но потэ. Кин отын янгыш? Оло, пичи дыръям-а ӧз пыӵатэ меда вордӥськем гуртме яратон мылкыд? Ичигес ветлысал ке мукет школаосы, ӧжытгес адӟысал ке адямиослэсь кызьы улэмзэс, соку, оло, яратысал вордскем гуртме? Уно аръёс ортчыса, гольык пыд ветлэм интыосме гажаны но дунъяны ӧдъяло ке шат. Оля КОРЕПАНОВА, 1 номеро школа. Балезино посёлок. 5-27-2 Адями но коньдон Мар карод уксёке? Та юан огшоры гинэ кадь. Нош мургес учкид ке, асьмелэн улон-вылонмы быдэсак соин герӟаськемын. Куамын ар талэсь азьвыл шуылӥзы, коммунизмын, пе, ваньмыз дунтэк луоз, уксёлэн кулэлыкез быроз. Но дыр ортчемъя, кунмы социализм сюрес вылысь капитализме кожиз, потӥм рынокен экономика шуонэ. Таӵе югдур кылдыса, адямилэн уксё шоры учконэз зол-а воштӥськиз меда? "Мар карысалды, сюрес вылысь коньдон пуйы шедьтыса?" Таӵе юан сётӥ мон Завьялово ёросысь Якшур шор ёзо школаысь покчи классъёсын дышетскись пиналъёслы. Люда СИЛИНА, Оля НАГОВИЦЫНА, Юля БАЙКОВА: - Ми со уксё пуйыез ӝутыса юасалмы, кин ыштӥз шуыса. Собере кузёезлы берыктысалмы. Андрей ВОРОНОЦОВ: - Мон муртлэсь коньдонзэ аслым уг кары. Оло, со адямилэн берпуметӥ уксёез, нош дораз вите семьяез. ЖЕНЯ: - Мон ӧй берыктысал. Аслым ческыт сиён, сыскон, шудон басьтысал. Али покчиос ас малпанъёссэс ватытэк, шара верало. Соос чылкыт сюлэмоесь на, но пӧлазы пумиськыло ни коньдон понна вузаськисьёсыз. Оло, татысь ик пото ни пӧламы коньдон понна калыкез, куд-ог дыръя матысь адямиосиы вузан сямъёс? Анюта ПЕРЕВОЗЧИКОВА, УдГУ-ысь студентка. 5-28-1 Секыт зор Со вал кылем даурлэн шор вадьсаз, витьтонэтӥ аръёсы. Кизён, мерттӥськон йылпумъяськемын. Узьым вож-вож ӝужа, вож турын буртчин кадь ӝутӥське, нош турнан дыр вуэмын ӧвӧл на. Та нуналэ но, котьку сямен ик, пужымо яг сьӧрысь шунды чильпыраса ӝутӥськиз, калык уж борды басьтӥськиз. Арлыдоос гинэ гурт котырын бергало: ӵӧжпиоссэс, ӟазегпиоссэс шур дуре улляло, кудӥз но огез кунянзэс но шур дурысь ӝужась гуждор вылэ думо. Нуназе вуон вакытэ лымшор палась ыркыт тӧл пельтыны кутскиз, омыр мускытгес луиз, ӝоген зор вуоз кадь ини, нош пилем уг адӟиськы на. Но кема возьмано ӧз луы - Чурайгурт нюлэс сьӧрысь сьӧд пилем ӝутскиз, яркыт шундыез ӵоктаз, гуртэз пеймыт шобретэн шобыртӥз. Нырысь бадӟымесь но секытэсь шапыкъёс усизы, нош собере ведра дурын сямен кисьтыны ӧдъяз. Урам кузя, шукыяськыса, тузонэз но жуг-жагез нуыса, ву бызе. Котыр улосын туж зол шаугетыны кутскиз. Нырысь-валысь валаны но шуг вал, угось тӧл, гудыри, чилекъям ӧй вал, зорлэн кутскемез дырысен кык-куинь минут гинэ ортчиз ай. Липетъёс вылэ усись зор шатыр вазе. Азьло зор ву дырдыетӥ вышкые вияз, нош али со отчы уг тэры ни, кенос азе ваське. Гидкуазе, азбаре но шукыяськем ву тырмемын ини. Шаугетэм куара нош кужмоя но кужмоя. Кызьы шӧдтэк шорысь кутскиз, озьы ик шуак дугдӥз зоремысь. Но шаугетэм куара ялан кылӥське на. Зор кутскем бере ми эшеным кенос липет улэ ӝиптӥським вал. Нош зор дугдэм бере, ышыг интыысьтымы потыса, Онтон гурезь йылэ дыртӥмы. Паймымон суред адӟимы гурезь улысь. Пичи гинэ Сибы шурмы быдэс зарезьлы пӧрмем. Кышкыт шаугетыса, дыртыса но погылляськыса пож ву шуретӥ но нюкъёстӥ ваське. Милям соос трос гинэ, нимтэмъёсыз но, нимоосыз но вань. Ву коръёсты, писъёсты, пулъёсты сьӧраз васькытэ. Тӥни Быдӟым нюкысь быдэс кыз но ваське. Ваньмыз со Сибы шурамы вуэ. Сюбег гинэ шурмы табере 100 метр пала луэм, кебит дорысен Онтон гурезь дорозь паськытам. Тулыс тудву дыръя но, куке вырӟем йӧ огез бӧрсьы мукетыз шуккиськылэ, пилиськылэ, сыӵе куара уг кылӥськы. Туннэ со пур келян интылы укша. Коръёс, пулъёс бӧрсьысь бӧрсе уллань васько. Коръёсын ӵош ӟазегпиос но. Куанеръёс, огзы но улэп ӧз кыле ни, дыр, угось коръёс соосты я вуэ зымыто, я вылӥе сэрпалто. Коръёс вискы кунян но шедем. Ми эшеным бӧрдӥськом, кесяскиськом, ву тани, тани быдэс гурезез но кыскоз, ньылоз кадь аслаз ӧраз. Куанер кунян йырзэ вылӥегес ӝутыны тырше, нош ву тулкымъёс но коръёс сое зымыто, весь азьлань но азьлань нуо. Син азьысьтымы ышизы мискинь кунян но, ӟазегпиос но. Азьло, кык-куинь коркаос огазеяськыса, шур дуре мунчо пукто вал. Одӥг нялмыт интыын сылӥзы куинь мунчоос: Кондӥослэн, Батыръёслэн но Оньсим кенакъёслэн. Шурлы тужгес матын сылӥз Оньсим кенакъёслэнэз. Ву милям син азямы ик минут куспын со мунчоез но ньылӥз кадь. Нырысь мунчо кырыжтӥськиз, собере пичи но пичи кыльыны ӧдъяз. Ву ӝыны час мында кузёяськиз, тулкымъяськиз, шукыяськиз, шаугетӥз, собере зӥбломиз, выльысь ас ӧраз пыриз. Гопъёсын но нёжало интыосын кема пукиз на. Эрказъяськись вулэн бервылъёсыз бӧрысь тодмо луизы: вань тыметъёсты кырем, выжъёсты нуэм, Оньсин кенакъёслэсь мунчозэс сяна, Лёгор агайлэсь выль мунчолы ӵупем коръёссэ быдэсак нуэм на. Шур дурысь бакчаосын мерттӥськем убоослэн одӥг тодметсы но ӧй вал ни. Отысь улослэн тусыз чылкак воштӥськем. Тулкымъяськись шур кузя кошкись кунян ӵужкенакъёсылэн вылэм. Сое кема утчаса ветлӥзы на. Шӧйзэ но ӧз шедьтэ ни. Оло, ву Валое вуттӥз. Нош Сибы шур дурысь возьёсты кема дыр ӵоже бригадаосын сайкизы, сумедысь поттэм шальыосты, коръёсты люказы, валъёсын гуртэ нуллӥзы. Инкуазьлэн кужымез бадӟым ик: я со гужем куазен иудвуэн музъемез гылтэ, я гурт вылэ лэзе сӥльтӧл, коркаосты таркаса куштэ, нюлэскысь писпуосты погыръя.... Вашкала дыръя но инкуазь возьматъялляз луоз аслэсьтыз кужымзэ. Жаляса верано луэ, гожъяськисьёс вашкала дыре ӧй вал. Веранъёссы но асьме вакытозь ӧз вуэ. Азьланяз Дунне кузё кыӵе меда кужымзэ возьматоз на? Цозэ будӥсь пиналъёсмы адӟозы но гожтозы, дыр, ини. Е. ПАВЛОВА. Бадӟым Сибы гурт. Можга ёрос. 5-28-3 Герӟет Та туспуктэмъёсты ма герӟа? Туспуктӥсез одӥг, шуоды тӥ. Бен, соосты мон лэсьтӥ. Ваньмыз ик - инкуазь суредъёс. Озьы ке но, мынам мукет герӟетсэ пусъеме потэ. Ойдолэ туспуктэмъёс шоры дыр пыр учкоме. Ортчем, али, вуоно дыр. Таос пӧлысь одӥгез фотоснимокъёсы весяклы кыле? Кудӥз? Ортчем дыр. Малы со, юалоды. Мынам малпамея, али дырез фотое пуктыса кельтыны ик уг луы. Фотоаппаратлэсь кнопказэ зӥбытозь, али дыр воштӥське, ортчемезлы берыктӥське. Ӵошатэ: одӥг секундскын Шундылэн тылсиез 300000 иськемез ортче, Музъеммы ас сюрестӥз - 30 иськемез... Номыр но ас интыяз уг сылы. Дыръёсты шурен ӵошатэме потэ. Шуом, шурез ӵыпиллям. Ӵыпетэ люкаськем ву - со вуоно дыр. Дырды кузя васькись ву - али дыр. Дырдылэсь уллане кошкемез - ортчем дыр. Туспуктӥсь фотоаппаратэныз дырды вадьсын сылэ но адӟемзэ плёнка вылэ пуктылэ, нош снимокъёссэ ӵыпетлэн улланьысьтыз "бича". Тӥни озьы, вуоно дыр, алиез пыр потыса, ортчемезлы пӧрме. Туспуктэмъёс ортчем дырез гинэ возьматыны быгато. Нош соосъя али но вуоно дыръёслэсь герӟетсэс тодыны тыршиськом. Ульфат БАДРЕТДИНОВ. Туспуктэмъёсыз авторлэн. 5-28-6 Кузь саесо яке вакчи саесо?.. Дунне вылын пичи Толи кадь азьтэм адями ик ӧвӧл, дыр. Анаез сое ӵукна сайкатэ но, пиёкед ӝыны час выре султыны. Мумиз нош ик кровать доры вуэ ке, Толи шуэ: "Меми, синмы уг усьтӥськы на, кӧня ке возьма..." Анаезлэн йырыз кур луыны кутске: "Али ке ӧд султы, кампеттэ коӵышпиосыдлы сёто". Нош Толи, тазьы верамез кылыса, ӵашетыны кутске: "Анай, анай, мон султӥсько ни, эн сёт кампетме маниосылы". Тани али но Толи шобрет улысьтыз гондырпи сямен потӥз, собере штанизэ басьтӥз, гур вылысь шуныт носкиоссэ кияз кутӥз. Вӧзаз ваньзэ тыриз но вушйылыса пукыны ӧдъяз, дӥсяськоно шуыса вунэтӥз. Анайзэ синйылтэм бераз гинэ дӥсяськонэз тодаз усиз. - "Меми, тон кыӵе дэрем сётод мыным, кузь саесозэ яке вакчизэ? - юаз пияш. Анаез воксё паймиз. Ымнырыз ик воштӥськиз. - Ма... Котькыӵеез уз-а яра?.. - Кытчыозь киосме миськыны кулэ луоз шуыса тодэме потэ. Кузь саесозэ сётӥд ке, ӧжытгес кылёз миськонэз. Нылпи садэ ветлӥсь пиезлэсь тазьы верамзэ кылыса, анаез мар шуыны ик паймиз. Азьтэм адями кызьы но малпаськыны уг быгаты вылэм, ява! Света ФИРСТОВА. Булай школа. Ува ёрос. 5-29-4 Кыйбоды Оскоды ке оске, уд ке - эн. Я, соку кылзэ мадемме. Одӥг такыр (пустыня) интыын дуэ (верблюд) улэм. Со куинь толэзь ветлэм ву утчаса. Собере жуммыса пограм. Кӧня ке улыса синзэ усьтэм но, синпӧет (мираж) адӟиськем. Нырысь-валысь синмызлы оскымтэ. Кӧня ке минут ортчыса, ас понназ шуэм: - Мар луоз, лу. Собере синпӧет пала нюж! кыстӥськем. Кызьы но озьы чаклам интыяз вуэм, отын венё будос сылэ вылэм. Ӵап со улысь ик ошмес, пе, жильыртэ. Ву юэмез бере, дуэлэн кужымез кӧня ке потэм, нош кӧтыз тырымтэ на. Соку со венё будосэз сиыны кутскем. Ньылэ вылэм ни но, будослэн венез бышкалскем. Та буос лек вылэм, кый кадь лексись. Соин ик дуэ сое кыйбоды шуэм. Озьы кылдэм будос ним. Алёша ГРИГОРЬЕВ. Дыдксин Вашкала дыръёсы возь вылъёсын, нюлэсъёсын будо вылэм пӧртэм сяськаос. Тросэзлэн нимъёссы вылэм ини. Кыӵеез но вылымтэ пӧлазы! Паймод! Нош ошмес дуръёсын но сыръясь интыосын бӧрдыса сылэм пичигес чагыр сяська. Солэн нимыз вылымтэ. Кин бен синйылтоз сыӵе кылдэм макеез? Озьы ик та сяська огназ мӧзмыса будэм. Нош одӥг шулдыр нуналэ, шунды тылсиос писпуос пыртӥ ошмес вуэз шунтыку, сяська доры Койык нимо пинал пи васькем. Койык мыкырскем со вадьсы но ас понназ малпам: "Кыӵе паймымон сяська, чагыр-чагыр, мынам яратоно Дыдыкелэн синъёсыз кадь ик. Мон сое, яратонэлы сӥзьыса, дыдыксин шуо". Гуртаз бертыса, Койык ваньмызлы верам дыдыксин сяська сярысь. Со дырысен трос аръёс ортчиллям, озьы ке но со сяськаез калык туннэ нуналозь дыдыксин шуэ. Табере дыдыксин - яратӥсь муртъёслэн сяськазы. Лена АНТОНОВА. Бобья-Уча школа. Пичи Пурга ёрос. 5-29-5 Ӵош ужаса аломы Та секыт улонамы пиналъёсмес пичиысен аскожазы улыны дышетӥськом. Тани пу коркаосын улӥсьёс нылпиоссэс гур эстыны, ӝуась гуре пу тырыны косо. Огназ кылем пичи кузё ваньзэ пыр-поч лэсьтыны тырше. Но асьмеос, со пичи ай шуыса, ӵемысь вунэтӥськом. Пичи пиналлы та дуннеын ваньмыз тунсыко потэ, ваньзэ солы тодоно. Гур ӝуаку ик дыдыос но экеос мультфильм учкыны пуксё яке кыӵе ке шудон шедьто. Гур сярысь вунэто, кытӥ дыртонъязы ӧссэ но умой уг ворсало. Нош тыл сое гинэ возьма кадь. Кенӝем выж пулэз адӟыса ик нылпи кышкатске, диван улэ, шкаф пушкы яке пеймыт сэреге ватске. Пиналъёс татын янгыш ӧвӧл. Шуныт гужем нуналъёс вуизы ни. Шунды сиос азбаре, ульчае ӧтё. Олокызьы но шудэм потэ. Но уноез шудонъёслэн аламае вуттыны быгато. Кышкытэсь луо тылпоттонэн герӟаськемъёсыз. Сутскем гидъёс, коркаос, турын но куро зуродъёс, пудоос, тылобурдоос... Ма быдӟа изъян со. Городъёсын нюлэсъёс, бусыос, пу коркаос ӧжыт. Но вань мурӝолъёс, корка сигъёс, лифтъёс, балконъёс. Куд-огез тани шудон самолётсэс кенӝыто но омыре лэзё. Укмысэтӥ этажысен учкыса, туж чебер адӟиське. Шуак самолёт улӥ этаже мырӟиське, нош отын миськем дӥськут ошылэмын. Ваньмыз гомӟе, тыл укно, ӧс янакъёсы но выже. Бадӟым тылпу потэ. Уноез пиналъёс лифтъёсын тылын йыртэмало. Отын но тылпу потылэ, куд-огез сутскыны шедё яке ӵын пӧлы ӝокало. Сыӵе учыръёс ӧжыт ӧвӧл. Шырпуэн шудон уно изъян, куректон вае. Тылпу бадӟым кышкытлык кылдытэ. Уноез пенсионеръёс, пиналъёс ӝуась, ӵынэн тырмем коркаосысь ӝог потыны уг быгато. Школаосын, нылпи садъёсын, лагерьёсын алон-валэктон уж нуэм бере гинэ пиналъёс тылпулэсь кышкытлыксэ валаны быгатозы. Но та уж тросаз школаосын аналтэмын, шуыны луоз. Соин ОБЖ урокъёсын толэзяз одӥг час ке но тылпуослы саклык висъяно. Утиськыны, кылдэм югдурысь капчиен потыны но дышетсконо. Котькуд аре Ижкарын Городлэн нуналаз тылпу кысӥсьёс пиналъёслы бадӟым ужрад дасяло. Карлудын пӧртэм конкурсъёс ортчыло, тылпу кысон тӥрлыкъёсынызы тодмато, огнетушительёслэсь кызьы ужамзэс возьмато. Озьы, анай-атайёсын, дышетӥсьёсын валэктон уж ӵош нуыса гинэ, нылпиослэн йыртэмаменызы сэрен потӥсь тылпуослэсь утиськыны быгатом. Пиналъёсмес но утём. Тани 2001-тӥ арын 60 пол тылпу потылӥз ини, тямысэз нылпиос бырыны шедизы. Е. Ю. ХОТЕЕВА. 24-тӥ ПЧ-ысь инспектор. 5-29-6 Выжыкылъёс гожтӥськом асьмеос Кукейсяська Вашкала дыръёсы улэм-вылэм курег. Со туж яратэм сиськыны, пузаны, возь вылтӥ калгыны. Одӥг пол, туж чебер нуналэ, возьзэ эскероно кариськем. Ветлонъяз горд юлтошсэ адӟем. Курег паймем: - Мон гинэ та возь вылын улӥсько ук. Кытысь тон потӥд? - Ма, монэ кузёе татчы ваиз, - шуэм горд курег. - Марлы?- мукетыз юам. - Пузам кукейёсты кокчасько вал, соин ик монэ татчы кельтӥз. Табере ӧйтӧд кытчы кариськоно. - Эн куректы, мон вӧзын буш корка вань, отчы интыяськод. - Яралоз-а, мар-а. Ӵуказеяз курег горд эшсэ сайкатэ ини, пе: - Кызьы кӧлӥд, умой-а? - Умой, - шуэм соиз. - Умой кӧлӥд ке, ойдо мон сьӧры, сиемед потэ , дыр, ини. Озьы мынонъязы сиськиллям, вераськиллям. Пумен возь вылэ пузаллям. Озьы - нуналлы быдэ. Гордэз пуззэ сиемысь дугдэм. Кык курегъёс пузаса ветлэмысь ик, луоз, кукейсяськаос кылдӥллям. Туссы но кукейлэн кадь: пушкыз ӵуж, котырыз тӧдьы. Таня НИКОНОВА. Куакагырлы Вашкала дыръёсы улэм Куака нимо кужмо чебер пинал пи. Ачиз тылобурдо кадь чырткем, нош куараез куакалэн кадь боз-боз вылэм. Гуртын солэсь кужмо батырез нокин но тодымтэ. Куака шаплы, кельыт вал возем, солэсь дуно эшез батырлэн вылымтэ. Яратэм пияш веськрес мугоро чебер Гырлы нимо нылэз. Гырлылэсь чебер кырӟась нокытын но вылымтэ. Одӥг пол Куака пересьёслэсь вераськемзэс кылэм. Зарезьёс, сьӧд нюлэсъёс сьӧрын, ӝужыт гурезь йылын будэ, пе, тужгес но чеберез сяська. Солэсь чеберезгес,пе, нокытын но вылымтэ. Нокин но сое адӟылымтэ на, нокин но отчы вуылымтэ. Нош Куака со сяськаез Гырлылы вайыны малпам. Валзэ кыткем, йылсо пукыӵ ньӧлъёс басьтэм но сюрес вылэ дасяськем. Вал вылаз пуксем но шуэм: "Гурт калыке, мон кошкисько, котьмар мед луоз, нош сяськаез одно ик шедьто!" Собере нюлэс пала ворттэм. Трос дыр ортчем, куинь ар, нош Куака, пе, ялан ӧвӧл. Одӥг пол гурт тыр гырдалтэм куара кылӥськем. Вань калык тодмам Куакалэсь валзэ. Куакаез адӟыны калык люкаськем, нош ачиз, пе, ӧвӧл, валэз гинэ сылэ. Ачиз ӧвӧл ке но, сяськаез ньыль пыдо эшезлэн изнэсаз керттыса лэзем. Гырлылэн Куакатэк улэмез луымтэ ни, озьы ик куасьмем. Сяськаез нош Куакагырлы нималлям, Куакалэн Гырлыез кадь кылӥське. Табере солэн кидысысьтыз арлы быдэ чебер сяська потэ, яратӥсь муртъёсты тодэ вайытэ. Слава НИКОЛАЕВ. 5-30-11 Шундыберган Куартолэзьлэн пумаз "Удмурт дунне" газетлэн редакцияз США-лэн Екатеринбургысь культурая консулэныз Кимберли Харганэн пумиськон ортчмз. Удмурт газетэ вуылытозяз, консул тодматскиз ни "АиФ в Удмуртии", "Ижевск-Экспресс", "Карьера", "Новый Регион", "ТВС", "Арсенал" организациослэн уженызы. Газетлэн азинскон сюресэныз, туннэ нуналэныз тодматӥз валтӥсь редакторлэн воштӥсез И. И. Лебедев. Собере консул журналистъёслэн юанъёссылы вакчияк валэктонъёс сётъяз. - Россиын пресса сярысь огъя валатон сётыны шуг, котькуд регионэз нимысьтыз чакланы кулэ. Мон Удмуртиысен Омскозь газетъёслэсь, теле-радиокомпаниослэсь ужзэс эскерисько бере, со мынам син азям тазьы пуксе: одӥг кун пушкын трос мукет аспӧртэм кунъёс. - Пресссаез "ньылетӥ власть" нимало. Россиын та веран шонер-а тӥ сямен? - Ӧвӧлгес, дыр. Америкаын журналист мае ке бугыртэ, шарая, калыке поттэ ке, чиновникъёслы тэк пукыны маза уг луы ни. Нош татын ӝутэм ужпумъёсъя нокыӵе уж уг нуиськы, кивалтӥсьёс югдурез тупатон вылысь уг ик вырӟо. - Тӥ дорын кыӵе ке национальной изданиос пото-а? - Уг. Ас мылкыд каремзыя, Чикагоын полякъёс анай кылынызы газет потто, ӟучъёслэн но газетсы печатлаське. - Удмуртиын, мукет регионъёсын ӵошатыса, прессалы эрик сётэмын-а кадь? - Журналистъёслы татын ужаны луонлыкъёс кылдытэмын, вань туж ӟеч тыршись организациос но. Казахстанын, кылсярысь, та ласянь югдур секытгес, отын СМИ-осты зӥбемзы юн шӧдӥське. - Асьтэлэн яратоно изданиды? - Нимысьтыз нокудзэ но ӧй висъясал. Дипломатлэн ужаз кулэ луисьсэ гинэ лыдӟисько - "Вашингтон-постэз". И. ЛУКИНА. 5-30-8 Ас синмыным адӟи Тросэз уг тодо Марий Эл кунлэн туала улэм-вылэмез сярысь. Газет-журналъёсты лыдӟыса, энциклопедиосын бугыръяськыса пичильтык тодматскыны луэ, но умойгес вылэм аслыд пор музъем вылэ вуылыны, ваньзэ ас синмыныд адӟыны. Кемалась ӧвӧл, мынам эше, УдГУ-ысь журналистика факультетысь студент Павел Баженов Марий Элэ ветлӥз. Отысь бертэмез бере, Пашалы кӧня ке юанъёсын вазиськи. - Паша, - кыӵе муген Марий Элэ вуылӥд? - Ижкарысь Егитъёслэн центразы удмурт пиналъёслэн "Шундыкар" лагерязы вожатойёсты быръён мын из. Нылпиослэн Финно-угор парламентэнызы кивалтӥсь Света Едыгарова пор калыклэн нацинальной героезлэсь нуналзэ пусъён празднике ветлыны ӵектӥз. Мон пумит ӧй луы. - Отчы вуыса, ма нырысь ик син шорад йӧтӥз, паймытӥз? - Удмуртиысь ми вить кузя мынӥм. Сюрес вылын жадим ке но, пор музъем вылэ вуыса, нырысь ик инкуазьзы паймытӥз. Нылъёслы соку ик бадӟымесь, чебересь лымыгырлыос син шоразы йӧтӥзы. Нош мон, горордын улэме бере, чебер инкуазез адӟыса, гань-гань кариськи. - Кызьы делегацидэс пумитазы? - Вокзалысен "Марий Ушем" огазеяськонысь пор эшъёсмы туж шуныт пумитазы. Соос ик кураторъёсмы бӧрысь луизы. Общежитие интыямзы бере, со ӝытэ ик "Кудо+Коду" газетлэн валтӥсь редактореныз В. Н. Козловен пумиськон ортчиз. Соин ӵош калык куспо финно-угор газетъя лэчыт ужпумъёсты эскерим. - Ма бордын ужады на Йошкар-Олаын. - Шокчон дыр ик ӧй вал. Пумиськонъёс, пӧртэм ужрадъёс. Вуылӥм нылпи творчествоя "Радуга" центре, кытын пор калыклэн культураез, киужъёсыз сярысь трос выльзэ тодӥм-адӟим. Соослэн но костюмъёсазы, кышетъёсазы нимысьтыз пужыоссы вань. Кыл уд шедьты ваньзэ вераны. Сое нылпи киос лэсьтӥзы шуыса уд ик оскы. Со сяна, ветлӥм Мари парке, кытын национальной геройзылы сӥзем ужрад усьтӥськиз но быдэс куартолэзь кыстӥськиз. Отын ми поръёс сямен эктыны дышетским. Туж кельшизы Йошкар-Олаетӥ экскурсиос, синпелетъёссы, тунсыко адямиосын пумиськонъёс. - Нош кудӥз ужрад тужгес тунсыко потӥз? - Зэмзэ вераса, - ваньмыз. Но тужгес кельшиз одӥгаз гимназиын пӧртэм дышетсконниосысь студентъёсын пумиськон. Соос милемлы пор калыклэн вашкала улонэныз, легендаосыныз тодматӥзы. Егит артистъёслэн усто шудэмзы, эктэмзы, чебер костюмъёссы кемалы вунонтэм кылёзы. Жаляса верано, пор кылэз тодымтэенымы, троссэ валатэк кылим. Но кураторъёсмы юрттӥзы, верамзылэсь пуштроссэ валэктылӥзы. - Йошкар-Олае ветлэмед аслыд маке сётӥз-а? - Татын трос выль эшъёс шедьтӥм: поръёс, комиос, эстонецъёс, финнъёс... Бадӟым тау шуиськом ужрадэз радъясьёслы. Соослэн тыршеменызы ми пор калыклэн вашкала историеныз, сямъёсыныз, туала улэм-вылэменыз тодматским. Ваньмыз туж усто радъяын вал. Эдуард АНДРЕЕВ, УдГУ-ысь студент. 5-31-1 Воштылыса огзэс огзы... Куартолэзе школаосын жингырто берпуметӥ чингыли куараос. Гырлы куара котькуд школаын одӥг кадь чузъяське. Одӥг выллем ӟечкылан кылъёс, сяськаос, кузьымъёс... Озьы ке но, котькуд школаын та нуналэз асьсэ сяменгес пусйыны тыршо. Ижысь 67-тӥ школаысь дышетӥсьёс ортчем нуналъёсты киноез выллем тодазы ваизы. Дас одӥг ар ӵоже кыстӥськем "кинофестивальлы" йылпумъянъёс лэсьтӥзы соос. Тямыстон тямыс выпускникъёслы ваньзылы ик роль шедем татын. Одӥгъёсыз валтӥсь рольёсты шудыны басьтӥськиллям. Мукетъёсызлы огшорыезгес но ярам, шӧдске, огез- кыкез, ас мылкыд каремезъя, урод ролез быръем. Сыӵеос быгатыса шудӥллям "Миссия не выполнима" киноын. Дышетӥсьёс та нуналэ таӵеоссэ но сӥлы каризы, тӥ кадьёстэк, пе, улонмы шӧггес луысал. Озьы ке но, пу пуньы кузьмакуз, одӥгезлэн кымесаз шуккытэк ӧз чида дышетӥсь. Кин тодэ, оло, татысен та берпуметӥ гырлы чузъяськон нуналэ таӵеос но валалозы асьсэлэсь быдэ вуэмзэс. Табере соос асьсэос асьсэлы кыл кутӥсьёс. Улон нимо дышетӥсьлэн урокысьтыз пеганы но уг луы, лэсьтымтэ урок понна но солэн аслаз дунъетъёсыз. Нош али дунъяло дышетӥсьёс. Дас одӥг ар ӵоже дышетскемлы йылпумъянъёс лэсьто соос. "Девчата" киноын усто рольёсты шудэмзы понна тросэзлы нылъёслы вылӥ дунъет сётэмын вал. Пусйизы "Герой нашего времени", "Вратарь" но мукет киноосын шудэм актёръёсты. Ваньмыз ӧвӧлэз та кинофестивальын дас кык кинофильмъёс бергатэмын вал. Тӥни сыӵе аспӧртэм амалэн дышетӥсьёс пиналъёслы тодазы вайытӥзы дас одӥг ар ӵоже дышетсконзэс. Дышетӥсьёс асьсэос но зэмос артистъёс, актёръёс, режиссёръёс ӧфлм вылӥллям. Чебер кырӟаны быгатэменызы паймытӥзы соос залэ люкаськемъёсты. Бере ӧз кыле пиналъёс но. Котькуд класс концерт возьматӥз, дышетӥсьёслы, анай- атайёслы тау кариз. Озьы ик ӟеч кылъёссэс веразы анай-атайёс но. Быдэ вуон сюрес вылэ келяны лыктӥллям покчи эшъёссы но - нырысетӥ классын дышетскисьёс. Соос, бадӟым эшъёссылы сӥзьыса, кылбуръёс лыдӟизы. Тӥни озьы, воштылыса огзэс огзы ортчо аръёс но нуналъёс. Нылъёс но пиос будо но кошко, соос интые лыкто выльёсыз... Нош школалэн директорез В. В. Злобин таӵе пуштросо приказэн тодматӥз: "Котькуд дышетскисез лэзиськом экзамен сётыны". Та вырйылэз капчиен вормыны сӥзёмы 67 номеро школаысь пиналъёслы, озьы ик ваньмызлы, кин туэ йылпумъя школазэ. Паськыт сюрес тӥледлы, егитъёс! А. ЕРМОЛИНА. . Берпумзэ... Туспуктэмез Ю. Ивановлэн. Ельцов Алексей ЕЛЬЦОВ Мадиськон Дугдэ, нош ик азьлань ширтэ, Быдэс гуртэз дораз пыртэ. Небыт питран вылын сылэ - Чугун сюрес ӧвӧл кулэ. Возиськыса езтыл борды, Ворттылытэ ни милемды. Поромыса нунал ӵоже, Уйпал гинэ дораз коже. Мар йыртӥян со - ребус, Я, кин тодӥз?.. (Троллейбус). * * * Сюръёсыз солэн - Вӧл-вӧл, Но чырткем пужей Ӧвӧл. Корт сапег Ӝог пыдъёсаз, Тыл пиштэ Юн кымесаз. Ветлэ - Андан сюрестӥ, Ортчылэ Корка вӧзтӥм. Я, пичие, Тодад вай. Нимало сое... (Трамвай). "Быжтэм" луд кеч Коть тон куареты монэ: Ӝук уг сиы ни туннэ. Акыльтӥз нылпи садын, Гуньдӥсько, пушке уг мын. Сиысал мон чорывг лым, Яке сӥлен перепеч. Капчи вераны кылын - Кут вылэм, быжтэм луд кеч. Бече Ӝожаса бӧрдэ Серга: Ӟеч эшез ышиз уга. Гур вылын изе кожаз: Гын сапег кылле кожаз. Усиз малпаз гулбече - Отын ӧвӧл бече. Мурӝолын но вылымтэ, Корка сиге тубымтэ... Зар-зар ни бӧрдэ Серга, Юлтоштэк мӧзмыт уга. "Бускель пуны нуиз, дыр, Узатъяй сое куддыр. Корка кузё лушказ оло - Кылыктэм выри толон. Оло нош ӝутӥз пери, Оло со пегӟиз юри?.." Шумпотэ, тэтча Серга, Бечеез сюриз уга. Коӵышпи ини лумбыт Портфеляз пукем шыпыт. 6-13-7 Ма карыны вордске адями? Дыр ортчемъя улон азинске, адямиос воштсько, мукет сямен учкыны кутско уж, улон но мукет арбериос шоры. Али улонэз шуг шуиськом, малы ке шуоно, адямилы ужан инты но уг тырмы, соослэн со но та но басьтыны коньдонзы ӧвӧл.^Соин ик кызьы ке но улон понна, сыӵеос лушкаськыны кутско, куд-ог дыръя адямиез виыса но кельто. Озьы адями гылыт сюрес вылэ султэ. Мон сямен, таӵе муртъёс одӥг пол йыруж лэсьтӥзы ке, уз ни дугдэ, соос шоры мукетъёс но, юрттэм интые, кырыж учкыны кутско. Туала улонын трос бӧрдон, куректон, сюлмаськон. Тросэзлы люкетэ вина юон, наркотикъёс. Адями юэмын ке, ассэ ачиз уг вормы, малпаськытэк котькыӵе йыруж лэсьтыны быгатэ. Ку гинэ адӟисько пичи Денислэсь атайзэ, весяк кудӟемын луэ, нош солэсь адӟем кароз пиез но, озьы ик "вож кыен" эшъяськоз. Собере туала улонысь уд шедьты тамак кыскисьтэм егитъёсты. Уг тодӥськы, оло пиос но нылъёс озьы асьсэды вылэ ӝуто, оло мукетъёс сьӧрысь бере кылемзы уг поты. Асьсэлэсь тазалыксэс быдто шуыса валало меда? Нош мар кароно, куке вӧзысь эшед йыруж лэсьтэ ке? Юрттоно? Нош валалозы меда тонэ, урод сямъёс мур пыӵамын ни ке? Кемалась ик ӧвӧл, ёросамы армиысь бертэм пияшез виизы. Кин та йыружез лэсьтэмзэ тодӥ но пайми. Нырысь ӧй но оскы, огшоры вераськонъёс, дыр, шуыса малпай. Адямиос тодыса верасько вылэм. Та учырлэсь азьло пияшез лякыт сямо, визьмо малпасько вал. Ма муген, кин сэрен егит пи (солы мыным кадь ик 17 арес гинэ ай) та сюресэ вуиз? Мон али но уг оскиськы та йыружлы, эшъёсыз пияшез янгыше уськыто кадь потэ. Со огназ вылымтэ, тюрьмаысь бертэм бускельёсыныз ӵош. Асьсэ эшсы вылэ ик кизэс ӝутӥллям. Абдрамон. Кинэ табере улонамы эшен лыдъяно ни, кинлы осконо аслэсьтыд малпанъёстэ, ужъёстэ, улондэ? Шуиськом, адями улыны, ужаны вордске. Туала улонлы уг кельшы кадь та веран. Озьы бере, кылдэ юан: ма карыны вордске адями? Кин меда шонер валэктон сётоз? Елена ФРОЛОВА. Шор Кумор школа. Татарстан. 6-15-7 Мар луэм? Мар сыӵе луэм? Толалтэ бырем! Лымыед улысь Сяська мычиськем. Ураме потӥ, Котырак учки. Лыз чебер инлы Ой кыӵе пайми! Бусыын вӧл-вӧл Тюрагай чирдэ. Жингырес гурзэ Шаере кисьтэ. Мар сыӵ пыласькыны. Алёша ШИШОВ. Саркуз школа. Кизнер ёрос. 6-20-5 Римма ИГНАТЬЕВА Вуриськисьёс ВЕРОС Арня нуналэ Окси берозь изиз. Школае мыноно ӧвӧл ук - нокытчы дыртыны. Лелина песянаез сьӧрлось гуртысь ӵыжы-выжыоссы дӥне куное кошкемын. Бубиз гаражын, нош ик машиназэ тупатъя, дыр. Нош Оля акаез Ижын дышетске. Доразы нэнэез, Окси ачиз но пичи выныз гинэ кылемын. - Нэнэ, мынам сиеме потэ. Вуриськыса пукись нэнэзэ адӟыса, нылаш лӧптӥз: - Тон мынам мунёелы дэрем вуриськод-а? Зина апай вуриськонзэ палэнтӥз: - Сиемед потӥз-а, гыдышкое? Ойдо гур азь пала, перепеч пыжи вал. Собере выныд изьыку кыкмы но вуриськом. Тон - мунёедлы, мон - пичи Очилы дэрем. Оксилэн ымнырыз кунэртӥськиз: берло дыре ялан озьы - Окси ас понназ, нош ваньзы бадӟымъёс Очизы сярысь сюлмасько. Мылкыдыз уродмемен, нылашлэн сием потонэз ик быриз, лэся. - Маке урод сиськиськод, нылы. Ярам бен, ужад ке, кӧтыд золгес сюмалоз ай. Ойдо, иське, выныд доры. Мон Катя мунёедлы дэрем вандо, собере сое ачид вурод. Нэнэеныз бубизлэн, иабере Очи вынызлэн но, висъетазы нылаш мылпотытэк вамыштӥз. Та корка Очи вуэм бере вань дунне со ӧвӧлтэм эке котыртӥ гинэ берга на кожалод. Тӥни ук нэнэез Оксилэн мунёезлы дэремъёс вурыны но уг ваньмы ни: "ачид вурод", пе. "Со шушмалаксэс больницаысь медаз ик вайылэ вал", - ас понназ ӵемысь малпалля пичи ныл. - Нылы, вожд эн потты, тыныд юрттӥськымтэелы. Тон табере бадӟым ни ук - котьмар карыны аслыд дышетсконо. Школаын венен выроно луиз ке, сое кутыны ик уд вала, - нылызлэсь малпанъёссэ шӧдыса кадь валэктыны кутскиз кышномурт. Нэнэезлэн куараяз пыриськон шӧмыз вань кадь йӧтӥз Оксилы. Со ас понназ лушкемен мыньпотӥз: "А-а, иське ачид но валаськод монэ аналтэмдэ?" Нэнэез пичи вынызлы , зэмзэ ик, уката трос дырзэ висъя. Ма, трос гинэ ке луысал - уен-нуналэн со котырын гинэ берга ук! Оксилэсь дорын лэсьтэм ужъёссэ но я бубиз, я нэнэезлэн Оля сузэрез, я ӵужанаез эскерыло. Нылызлэн нырысетӥ классын дышетскемез сярысь ик нэнэез вунэтэм ни кожа вал Окси. - Фи, шедьтэм ук маин кышкатыны - вуриськонэн! Мар отын шугез? Кияд вень кутӥськод но вуриськод, - паймиз Окси. - Э-э, озьы ӧвӧл ай со, нылы. Вурысъёс уго пӧртэм луо, - пальпотӥз кышномурт. - Тыныд туннэ, кылсярысь, чурен вольыт вуриськоно луоз. Машинаен вурем кадь ик мед адӟиськоз. Оксилэн нэнэез тумба выллем ӝӧклэн бур палысьтыз ӧссэ усьтӥз но вылӥ кысканзэ вырӟытӥз. Отысь со турлы пумо сӥньысэн тырмытэм но вень возёнэн пичигес шыкысэз поттӥз. - У-у, мар мында веньёс! Малы со мында кулэ? - абдраз нылаш. - Векчи басмалы вень но пичигес, сӥньыс но тупасез кулэ. Тани мон али выныдлы етӥн сӥньыслэсь куэм басмалэсь дэремъёс вурисько. Малы одно ик етӥнлэсь шуиськод-а? Етӥнлэсь дӥськут уго небыт, мугор но уг пӧся. Миськыны но капчи. Зэм, етӥн басма миськыку пуксе. Соин ик вуриськыны-дӥськут вандыны пуксемлэсь азьло басмаез миськыса куасьтоно, собере утюгано. Нош берло, тупасьсэ вень но сӥньыс бырйыса, уж борды басьтӥськемед луоз ни, - нод-нод валэктӥз нэнэез. Соос ӵошенназы бырйизы Оксилэн мунёезлы дэрем вурыны горд вылын пичиесь тӧдьы сяськаосын басмаез. Бадӟым качы кутыса, нэнэез дэремлэсь тыбырзэ, азьзэ, собере кык огкадь саес вандӥз. - Нош малы тыныд мел но эгыр кулэ? - таиз ини нылоклэн йырвизьмаз нокызьы но уг тэры. - Мелэн мон пеймыт басмалэн мыддоринтӥз выкройкая суредасько, нош югыт буёлозэ - сьӧд эгырен. - Вандыса дасям басмаез кышномурт нылыз азе понӥз. Собере кытысь ке сэрегысь куболы укшась, вылӥяз курико мае ке поттӥз: - Ӵужаедлы та вуриськон кубо нэнэезлэсь кылем, нош соизлы - аслаз анаезлэсь. - Та вуриськон кубо-а? - чылкак паймиз нылок. Со угось кубо черсыны гинэ яра кожа вал. Лелина песянаезлэсь ыж гон черсэмзэ трос пол адӟылӥз, нош кубоен вуриськемзэ - ӧз. - Ма, кызьы соин вуриськод? Со вуриськон машина ӧвӧл ук, - Окси выныз шоры оскытэкгес учкиз. Тае кылыса Зина кенак мыньпотӥз: - Тани тазьы пукон вылэ кубоез пуктомы но тон солэн выжыяз пуксёд. Собере басма юдэсъёсты ваче карыса, пумаз венен кыӵес лэсьтомы. Та кыӵесэз кубо йырысь курике дэмӟытом но тыныд вуриськыны туж каньыл луоз. Луоен тырмытэм пуйыед но кулэ ӧвӧл. Вашкалаосмы ужан радзэс умоятон сярысь рос-прос сюлмаськиллям уго. Нэнэезлэн мадемез Оксилы туж тунсыко, со вакытэ ик абдрамон йӧтэ. Ма, кызьы та кубо ужан радэз азинтоз? Нэнэез дэмламъя кубо вылэ нылаш пуксиз но веньзэ кияз кутӥз. Пичиез но бадӟымез - котькудӥз ас ужзэс лэсьто. Зэм, Оксилэн вурысэз вольыт но шонер уг пӧрмы ай. Сӥньыссэ золгес ке кыске, басма шымыртӥське, лябгес каре ке, юдэсъёс ваче уг вуо. "Мунёлы яралоз", - лушкем малпаса вуттӥз гинэ, азьчиньыез вӧсь луэмлы чидатэк, нылаш чир! кеськиз. - Ма луиз? - нэнэез соку ик нылыз доры вуиз. - Мынам чиньыосы пӧрмостэме-есь, - ӧло вӧсь луэмен, оло ӝожомыса бӧрдыны ылаз нылаш. - Я-я, дугды бызгетэмысьт, эшшо вындэ сайкатод, - нылаш киысь веньзэ басьтыса, Оксилэсь пичи кикызэ кышномурт пелляны шӧтаз. Выныз сярысь тодаз уськытэмысь, нылашлэн сюлэмаз нош ик вожан мылкыд пуромем ни вал но, нэнэез кизэ йӧнатэмен, лэся, кулэтэм малпанъёс йырысьтыз ӝог тӧлӟизы. - Малы бен тон бур киысьтыд шорчиньыяд корт чиндэсэз (напёрстокез) ӧд быртты? Венез пӧлыӵы азьчиньыӵ куто, нош шорчиньыен сое басмае донго. Сӥньыс возиське нимтэмчиньы но чӧльы вискын. Басма пумдэ паллян киыныд возь. - Нэнэез, Оксилы тыбырзэ шонер возьыны косыса, вуриськон машинаез сьӧры выльысь пуксиз. Нылаш но ужзэ азинтӥз. Гумен-пумен вурысэз вольытгес луэ, басма но сокем уг шымыртӥськы ни. Нылаш сокем тырше, эсьма, нюлам ву кымесаз ик быльырам ни. Вень сьӧры горд сӥньыс вылӥысен улӥе кыстӥське. Вурысъёслэсь кузьдалазэс Окси огкадьгес карыны выре - машинаен вурем кадь ик мед адӟиськоз. Али солы нэнэез вуриськон машинаез уг оскы ай, нош быгатэмзэ синйылтӥз ке, мунёезлы дӥськут киын вурыны нылаш уз курадӟы. Тӥни ук нэнэез одӥг дэремзэ вурыса быдтӥз но бирды тырыны медэ ини. - Окси, оло нош, тон мыным бирды вурыны юрттод? - нылыз пала шуак берыктӥськиз нэнэез. - Ма, м-мон вуриськонме ӧй быдты на ук, - могӟиз Окси. - Шонер, нылы, нырысь огзэ ужез йылаз-пумаз вуттоно, собере ини мукетыз борды но басьтӥськыны яра, - изись нуныез чакламез бере нылыз доры кышномурт лыктӥз но пичи юрттӥсьсэ тыбыраз вешаз. - Усто пишме ини. Табере сӧзызэ быгыртоно на. Нош чырты котыртӥз курико венен ачим чильпало. Нэнэез ушъямысь Оксилэн сюлэмыз ик юнгес жугиськыны ӧдъяз кадь. - Нош кызьы сӧзыез быгырто? - вурыссэ гередаса юаз нылаш. - Асьмеос огшорызэ но капчизэ амалэз быръём. - Нэнэез басмаез сюбеггес гинэ куасалтӥз, чиндысэн сое ӝӧк борды зӥбыса волятӥз но эшшо огпол куасалтӥз. Собере мыддорин палласянь вурыны кутскиз: - Тани тазьы: вурысэд мыддорин палаз мед кылёз шуыса азьдоринтӥз адсконтэм дэмӟытӥськом но нырысетӥ куасалтэме вурӟиськомы, - кӧня ке вурыс лэсьтыса, киужзэ кышномурт берен сётӥз нылызлы. Таиз вурыс уката шуггем йӧтӥз Оксилы. Нэнэезлэсь адӟем карыса, басмаез паллян киызлэн пӧлыез но азьчиньыез вискы со пачкатӥз. - Молодец, визьлюке. Нош чӧльыеныд басмаез кутӥд ке, вурысэд уката умой пӧрмоз, - ушъяз нэнэез. Зэмзэ но, чӧльызэ но ужатыны кутскемез бере, басма ӧз шымыртӥськы, вурысъёс но юнгес луизы. Мае но тодоно вылымтэ вуриськыны быгатон понна. Нош Окси кожа вал, вуриськон - капчи уж. Чик но капчи ӧвӧл вылэм. Эшшо ке котькуд пумоез вурыс пӧртэм сямен лэсьтӥське. Вераса гинэ Окси троссэ уг вала, соин ик нэнэезлы уж вылын возьматоно луэ/ Адӟемзэ нылаш тыршыса быдэстэ. - Ой, табере паллян киям вень бышкалтӥськиз!- нош ик кеськемзэ ӧз шӧды, лэся, Окси. Вуриськонзэ сй выж вылэ уськытӥз но кизэ сэзъяны кутскиз. - Ужаку эскериськыны кулэ, нылы, - Окси вадьсы мыкыртӥськиз нэнэез. - Туж вӧсь луиз-а? - кышномурт нош ик дыдылэсь кизэ ым дораз вуттӥз. - Фу-фу, эмез-юмез та мед луоз, Оксимылэн чиньыез медаз висмы - борддорысь уллы мед луоз. Нэнэез шыпыртыса пелляськемысь, Оксилэн серемез ик потӥз: - Нэнэ, кытысь-о тон туно-пеллё сямен йӧнатскыны дышид? - Ма, пересьёслэсь, - нэнэез но пальпотӥз. Собере шуак юаз: - Бурыз яке палляныз киыд золгес вӧсь луиз? Окси малпаськонэ усиз: зэм ик, кудӥз меда? Ма, кыкез ик огкадь вӧсь луизы кадь. - Ӧй-тӧ-ӧд, - нёртӥз Окси. - Таиз но юн вӧсь луиз, соиз но... Нош малы тон юад? - Тон, нылы, выныд вордскем бере ӝоже усиськод, Очилы тросгес саклык висъясько шуыса. Нош мыным тӥ кыкнады ик огкадь дуно ук. Тон ке вогъяськыны ӧдъяськод, мынам сюлэмы вӧсь луэ. Очи ке бӧрдэ, нош ик мыным вӧсь. Паллян но бур киос сямен ик, тӥ выныныд одӥг мугорлэн люкетъёсыз. Тӥляд мугоретӥды мынам но бубыдылэн вирмы бызе... - нэнэез малы ке мӧзмыт тусо кариськиз. Борддор вӧзысь котыртэмын изись нуны вадьсы со мыкыртӥськиз. - Уммед тырмиз-а, пичие? Нэнэ пиёксэ кияз ӝутӥз. Маскара кадь йӧтэ Оксилы выныз. Мыжыксэ кырмем но ымдураз вуттыны йӧндыре. Ымдуръёсыныз чоп-чоп каре. - Сиемез потэ ни, вылды, - оло нылызлы, оло аслыз шуиз кышномурт. Мусторзэ пертчылыса, пичильтыкез со сюдыны ӧдъяз. Окси чылкак абдрамын: одӥг мугорысь чиньыос выллем, пе, та экеен ачиз нылаш. Кызьы озьы? Оло, шуэмез потэ нэнэезлэн, Окси но сыӵе ик пипчи вал? - Мон но тынэсьтыд гадьдэ нонӥ-а? - юаз чылкак абдрам Окси. - Бен, тон мынам нылы ук, - серектӥз нэнэез. - Табере тон бадӟым будӥд ни, школаын дышетскиськод. Тани мыным юрттыны но быгатӥськод ни. Вындэ гинэ малы ке уд яратӥськы. Соин ик мынам сюлэмы вӧсь луэ. Интыяз кынмем сямен огшап сылэмез бере, Окси дӥсьтытэкгес матэктӥз нэнэеныз выныз дӥне. Нылашлы пичи нуны али али сокем шуш уг поты ини. Нош киосыз солэн макем пичиесь! Бадӟым мунёезлэн быдӟаесь гинэ. Зэм, нунылэн киосыз шунытэсь. Тӥни ук, нононзэ куспетӥ карыса, Окси шоры пичильтык пальпотӥз но пичи киосыныз шонаськыны ылаз. - Кыӵе со... пичи на, - мукет номыре вераны ӧз тоды ни Окси. Нош ас понназ малпаз: "Вынылэн дэремаз бирды вурыны мон зэмзэ ик быгато..." 6-28-1 Шведкаосын пумиськон Ми кема гинэ дасяськимы Швециысь куноосты пумитаны. Тани вуиз со кема возьмам нунал. Шуныт перепечен пумитамы Швециысь нылъёсты. Туж паймыса, тунсыкъяськыса учко пиналъёс соос шоры. Сандра Старк но Кристи Хёмин дышетско Швециысь Йончопинг карысь университетын. Ми доры соос "Диалоги об образовании - российско-шведский опыт" проектэн лыктӥллям. Шонерзэ вераса, нылъёс Глаз каре дугдӥзы, нош Россиысь гурт школаез адӟемзы потэмен, вуизы милямаз. Нырысь ик, пусъеме потэ, Сандра но Кристи туж капчи мылкыдын вылтӥяськытэк гинэ вераськизы дышетӥсьёсын но пиналъёсын (переводчик пыр). Милесьтым туж ик уг висъясько дӥськут ласянь но: вылазы джинсы но свитер. Сандраез но Кристиез тодматӥмы ёрос музеенымы, нош собере школаямы "котырес ӝӧк" сьӧрын вераськон ортчиз. Туж тунсыко юанъёс сётъямы нылъёслы. - Кельшиз-а тӥледлы Россия? - Кельшиз. "Иворъёсын" милемлы телевизор пыр Чечняез но ыбылонъёсты гинэ возьмато. Нош татын милемды туж шуныт пумитазы. Умой утялто вылэм татын куноосты. - Кызьы тӥ ортчытӥськоды ваньмон дырдэс? - Ветлӥськомы кафее, спортзалъёсы, музыка кылзӥськом. - Нош мар сярысь мадёды эшъёстылы, дорады бертыса? - Паймимы дышетсконлы. Туж пӧртэмесь милям дышетскон системаосмы. Швециын воксё Россиын кадь ӧвӧл. Милям школаосын туж уно гуртэ ужъёс сётяло. Дышетӥсьёс пиналъёсты интернет но книгаос вылэ пыкиськыса ужаны косо. - Кыӵе шуг-секытъёссы Швециысь егитъёслэн? - Сыӵеесь ик - наркомания, аракы. - Мар понна тӥ яратӥськоды вордӥськем шаердэс? - Со милям туж умой. Швециын чебер инкуазь, туж чылкыт омыр. - Нош секыт-а Швециын студент луыны? - Ӧвӧл. Гимназиез умой йылпумъям дышетскись, нокыӵе шуг-секытъёстэк, студент луыны быгатэ. Дышетскон но эмъяськон дунтэк. Студентлэн улон инты ласянь шуг- секытъёсыз кылдо ке, со быгатэ государстволэсь ссуда басьтыны. Пунэмзэ берыктэ университетсэ йылпумъяса ужаны кутскем бераз гинэ. - Тодӥськоды-а тӥ ӟуч артистъёсты, писательёсты? - Жаляса верано, ум. - Кыӵе праздникъёсты пусъё Швециын? - Пусйиськомы гужем шорез. Соку чеберъяло ӝӧкъёсты, шведской блюдоос пӧрало. "Котырес ӝӧк" дыръя пиналъёс тунсыкъяськизы Швециын улон сярысь, англи кылын но юалляськизы. Вераме потэ на, Швециын улон ӟечлыкезъя вылӥын. Соин ик Кристилы но Сандралы валантэм потӥзы асьмелэн экономика ласянь кылдэм шуг-секытъёсмы. Кылсярысь, Швециысь дышетӥсь толэзьлы быдэ 1500 доллар басьтэ. Нош милям... Пумиськон туж шуныт ортчиз. Малпасько со вунонтэм кылёз милемлы но, Швециысь нылъёслы но. Ольга КОРЕПАНОВА, 1 номеро школа. Балезино посёлок. 6-28-2 "Мӧзмыса, тэк пукыны дыры ӧвӧл" Гуртаз но ёросазы гинэ ӧвӧл, шаерамы но нимтулыз тодмо та нылкышнолэн. Сабырлы, ужась, котькытчы вутскемез, капчи мылкыдо луэмез понна гажало сое гуртоосыз, ӵош ужась эшъёсыз. Али Г. С. Любимова крестьян хозяйствоен кивалтэ, кивалтэм сяна, ачиз котькыӵе уже вутске. Тунсыко солэн улон сюресэз. Городын вордскем нылаш вить арескысен анай-атаеныз Сюмси ёросысь Орловское посёлоке вуэ. Пичи дырысеныз анай-атаез нылашлы ужез гажан мылкыд пыӵатӥзы. Соин ик пичи Гали школаысен ик котьма борды чырмыт басьтӥськеменыз, ӟеч дышетскеменыз эшъёсызлэсь висъяськылӥз, котьмаин тунсыкъяськиз, котькытын ассэ эскерыны тыршиз. Школазэ йылпумъяса, УдГУ-э пыриз, бӧрысь, журналист луыса, ёрос газетын ужаз. Сизьымдонэтӥ аръёсы ёросын солэсь кужмо юнкор ӧй вал, дыр. Ӟеч кусып возиз "Дась лу!" газетэн но. Но, журналист луыса, ёрос газетын кема ӝегатскымтэ. Али Галина Сергеевна пинал дырзэ, юнкоръёслэн слётъёсазы, пӧртэм пумиськонъёсы ветлэмзэ шуныт мылкыдын тодаз вае. Тупен-тупен мадиз со пӧртэм удысъёсын тыршемез сярысь но. - Орловское берысткеммы бере, мон нырысетӥ классэ мынӥ. Школаын удмурт кылэз ӧз ик поттылэ, гурт калык но ӟуч сямен вераськиз. Гужем ке вуэ, соку ик Ува ёросысь Диньтэм гуртын улӥсь песяйёсы доры дыртӥсько, соослы юрттӥсько вал. Юрт котырын ноку ужзы ӧз бырылы, мушъёс но вордӥзы. Городын улыкум, нылпи садэ ӧй ветлы, бабае утиз. Озьы мон удмурт луыса будӥ, удмурт сямен малпаськи но. Ма, аслым но удмурт кыл туж кельше вал. Песяйёсы дорысь удмурт книгаосты шедьтыса, ас поннам лыдӟиськыны дышетски, грамматиказэ но дышетӥ. Нош 6-тӥ классын дышетскыкум, нырысьсэ ёрос газетэ заметкаме лэзи. Туж яратӥ литературая урокъёсты, уно книгаос лыдӟылӥ, сочинениосы но усто пӧрмылӥзы. Озьы-а, мар-а гожъяськон мылкыды ӝутскиз. "Пионерской правда" но "Дась лу" газетъёсты киям кутыса учкисько - кыказ ик пиналъёс гожъясько. "Мон но озьы быгато", - малпай ас поннам. Каллен гожъяськыны ӧдъяй. Книгаосты лыдӟыса, удмурт сямен но пӧрмыны кутскиз кадь. "Дась лу!"-эн юн кусып тупатӥ. Одӥг пол Аркадий Клабуковлы гожтэт ыстӥ. Со но мыным гожтӥз. Озьы кема дыр ӵоже куспамы гожъяським. Нош одӥг нуналэ пырак школаямы ачиз вуиз, ми азьын вераськиз. Мылкыды эшшо бурдъяськиз. Гожъясько вал школа улонмы сярысь, но тужгес кельшылӥз пӧртэм конкурсъёсы пыриськылыны. "Гужем нуналъёс" нимаське вал одӥгез. Соку мон Кильмезьын чорыгаммы, чебер инкуазьмы сярысь верос гожтӥ. Нырысетӥ инты басьтӥ. Вань школаез линейкае люказы но "Смена" фотоаппарат кузьмазы. Туж шумпотӥ. Эшъёсы вожъяськыса но учкизы кадь. Юнкор луэмме ваньзы тодо вал ини, эшъёсылы сочинениос но гожъяны юрттылӥ. Бӧрысь трос конкурсъёсы пыриськылӥ но вормисе потылӥ. Юнкоръёслэн слётъёсазы ветлылӥ, отын тодматскем эшъёсыным гожтэт пыр кусып возьылӥ. Туж тунсыко улӥмы, мӧзмыса пукыны дыр ик ӧй вал. Школаме Сюмсиын йылпумъяй ини, ялан журналистэ дышетскон малпанэн улӥ. 1972-тӥ арын пединститут университет луиз. Веразы: филологияя факультетын журналистикая специализация, пе, усьтозы. Мыным со ик кулэ. Конкурс бадӟым ик вал, выль эшъёсыным уен-нуналэн дасяським. Отчы пырыны "Дась лу!"-ысь рекомендацизы туж юрттӥз. Вить ар ӵоже дышетскыкум, мукет газетъёсы но гожъяны кутски. Публицистика сюлэмылы матынгес вал. - Нош журналист луыса, та удысын кема ӝегатскиллямтэды кадь. - Диплом басьтыса, ёрос газетын, сельхозотделын, ужаны кутски, колхозъёстӥ материал бичаса ветлӥ. Туж уг кельшы вал гурт калыклэн начар улэмез, ваньмыз шоры чиньы пыр учкемез, суп-сап ужамез. "Уг луы-а, мар-а умойгес, чырмытгес ужаны" - ялан ас поннам малпалляй. Озьы гожъяськон гинэ улонам ӧжыт потыны кутскиз, маке уг тырмы. Одӥг пол "Правда" колхозэ вуи. Комсомоллэн райкомаз ужам тӧрозы монэ ӟеч тодэ вал. Дораз ужаны ӧтиз. Сюмсиын патере но начар. Малпаськонэ уси, отын ик редактормы но пумитъяськоз шуыса малпай. Редактормылы жингыртӥллям ни, огкыл шедьтӥллям. Озьы колхоз профкомен кивалтыны кутски, бӧрысь бригадирын ужай. Машина сётӥзы, нунал ӵоже 11 гуртэз котыръяй. Но уже кельшиз. Ньыль ар парторгын но ужай. Соку мон гурт калыклэн улэм-вылэмезлы бадӟымгес саклык висъяй. Туж трос пуктӥським. Крезьгуро школа, музей, вуриськон цех усьтӥм, ӟеч кусып вози Сюмсиысь СПТУ-эн. Огдыре сое йылпумъям 12 нылъёсты дорамы ужаны ӧтӥм, нимысьтыз скал вордон звено кылдытӥм. Уноез бӧрысь со гуртэ ик бызизы. Ёрос кивалтӥсьёс, ужамме дунъяса, пӧртэм ужрадъёсы ӧтьылӥзы. - Соин ик Зонысь колхозэн кивалтыны ӵектӥзы, дыр. - "Звезда" колхозын туж начар улӥзы, музъемазы ю тысь ӧз удалты, вакчи дыр куспын куинь кивалтӥсьсы воштӥськиз. Со колхозэ тӧрое пуксьыны ӵектӥзы. Со дыре аслам ужан амалъёсы вал ини, кышкатэк выль уж борды басьтӥськи. Лыктэм берам номыр сыӵе-таӵе пуктӥськемъёс ӧй вал. Отчы-татчы бызьылонъям, семьяме но ӧй адӟылы. Коньдон утчаса, кивалтӥсьёс дортӥ кытӥ кураськыса сямен ветлэме вань. Но ӝоген гуртамы пилорама, ыжгон тугон ужаны кутскизы, пулэсь лэсьтӥськон цех, улон коркаос, столовой, школа борды спортзал, скал гид, нылпи сад пуктӥм, ю-няньмы, йӧлмы будӥз. Ужа но ужа вал, но выльдӥськон вань тыршеммес куашкатӥз, шуыны луоз. Калык мыным юрттӥз, умой пумитаз, ӟеч ужъёсыныз, кылыныз мылкыдме ӝутӥз, но берло аръёсы лек луиз. Улон чутрак воштӥськиз, дунъёс, тыриськонъёс будӥзы. Налоговой служба техникамес таланы кутскемен, собраниысен гурт калыклы люкыны кенешим. Но сётӥм ужась муртъёслы гинэ. Ваньзэ законъя лэсьтӥм. Аракы юисьёс, азьтэмъёс чагиськонъёс гожъяны кутскиллям. Али ӝыны гурт ужтэк пуке, бусыос но кизьытэк кылё. Ачим музъем басьтӥ, пӧртэм сортъем картошка мерттӥ, но трактормы ӧвӧлэн, туж секыт йӧтэ. Дыр воксё уг тырмы. - Гожъяськондэс вунэтӥды ни, дыр? - Зэм. Азьло югдур алама луэ, маке уг кельшы ке, соку ик киям ручка кутылӥ. Эшъёсы гожъяськыны косо ик, но мон серекъяса шуисько: пенсие потӥ ке, ваньзэ гожто ай. Тӥни сыӵе со улонэз адӟем, улонлэсь ческытсэ но, курытсэ веръям адями. Журналистлэн дипломез вӧзы мон ватсасал на трос мукетъёссэ но. Кулэ ке, Галина Сергеевна висись пудозэ эмъялоз, агрономез, бухгалтерез но воштыны быгатоз. Ӧжыт шаерамы сыӵе нылкышноос. Бакчаяз ик кыӵе но кылымтэ-адӟымтэ будосъёс, сяськаос уг будо, ваньмыз чылкыт уремын. Со секыт ужаз юртто на кузпалыз, песяйзы (чипы- курег утялтон, сюдон со вылын), городысь нылпиосыз но берто ке, соку ик уж борды басьтӥсько. Али Галина Сергеевналэн одӥг йыр висёнэз: трактор басьтыны кредит кызьы ке басьтоно. Котькуд нунал сямен Сюмсие ветлэ. Одно ик трактор басьтозы, малпасько, угось Галина Сергеевна маке борды басьтӥське, маке малпа ке, ваньзэ пумозяз лэсьтэ. Сыӵе со адями, сыӵе солэн сямыз. А. СЕРГЕЕВ. . Г. С. Любимова студент дыръяз "Дась лу"-э люкаськем юнкоръёсын кенеше. . 1970-тӥ арын слётэ люкаськем юнкоръёс но редакциын ужасьёс. . 8-тӥ классын дышетскыкуз Галяез редакциын туспуктӥллям. . 1998-тӥ арын Галина Сергеевна конкурсэ пыриськылэм. . Галина Сергеевна ёрос "Кенешын" ужамын, но финно-угор калыкъёслэн Сыктывкарын ортчем 1-тӥ конгрессазы ветлэмын. . Яратоно будосъёсыз пӧлын. Туспуктэмъёсыз Галина Сергеевналэн архивысьтыз кутэмын. 1 6-4-5 Бадяр куар Одӥг шулдыр нуналэ вордӥськиз пичи Бадяр куар.Ӵукнаосы пыласькылӥз азвесь кадь дун лысвуэн, шоказ чылкыт омырен, вольыт тыбырзэ шунтылӥз пӧсь шунды шорын. Шулдыр ке но вал куарлэн улонэз, акыльтӥз, вань дуннеез адӟемез потӥз. Тӧллы вазиськиз: "Тон котькытӥ ветлӥськод, котьмае адӟиськод, ну монэ но сьӧрад". Тӧл куронзэ быдэстӥз, Бадяр куараез ишкалтӥз но сьӧраз нуиз. Бадяр куар пеймыт сикъёс, ӝужыт гурезьёс вылтӥ лобе-лобе но пичи гинэ Сеп гуртэ дугдоно кариське. Та гуртлы со синмаськиз, тужгес но выль школалы. Соин ик школа азбаре пуксиз. Солэн чеберезлы синмаськыса, пиналъёс сое басьто но борддоре сяськаосын ӵош ляко. Али но отын. Адӟемды потэ ке, лыктэлэ но учке. Карина УСКОВА. Сеп школа. Игра ёрос. 6-4-6 Кык коӵышъёс Улӥзы-вылӥзы песянай но песятай. Соослэн Вася но Кузя коӵышъёссы вал. Песянаен песятай коӵышъёссэс яратӥзы. Вася трос шыр кутылӥз, нош Кузя ӧжытгес. Озьы но Кузялы тросгес саклык висъяллязы. Нош одӥг пол коӵышъёс жугиськизы. Кузя пыдзэ сӧсыртӥз. Нош Васялы номыр ӧз луы. Песятай Кузялы шуиз: "Тон умойгес Васялэсь". Йырыз курен, Вася дорысьтызы кошкыны малпаз. Ӵуказеяз ик улон инты утчаны кошкиз. Песянай султӥз но коӵышъёссэ сюдыны малпаз. Кузяез шедьтӥз, нош мукетыз ӧвӧл. Вася кошкем бере, юртазы трос шыръёс алязы. Пересьёс коӵышсэс утчаны кариськизы. Ӝоген соос коӵышез шедьтӥзы. Со дырысен песянай но песятай кыксэс ик коӵышъёссэс яратыны кутскизы. Лена ЛОПАТИНА. Пороз гурт. Шаркан ёрос. 6-9-5 Удмурт кылэз дышетон пумысен малпанъёссэс верало асьсэос пиналъёс: "Удмурт кылэз дышетӥмы шуыса ноку но ум жалялэ. Юнме дыр быдтон шуыны сое уг луы. Ас калыкмы сярысь трос выльзэ тодӥмы та урокъёсын". 11-тӥ класс, 67-тӥ школа. ВОЛОДЯ ВОЛКОВ: Удмурт кылэз дышетыны кулэ. Удмурт кыл туж тунсыко. Серемес кылъёсыз трос, нош ӟуч кылын соос ӵем уг пумиськыло. Дышетыны уг ке но яратӥськы, удмурт кылэз тодэме потэ. Газетысь статьяосты, анекдотъёсты лыдӟыны яратӥсько. ДИАНА САВЕЛЬЕВА: Та кылын ачиз Кузебай Герд вераськиз ук! ЛЕНА ПОЗДЕЕВА. Трос кылъёсты тодӥд ке, эшъёсыд но гажалозы. ЛЕНА БАБИНЦЕВА. Ми дышетӥмы ке, нылпиосмы дышетӥзы ке, удмурт кылмы ноку уз быры. МАКСИМ БЕГИШЕВ. Удмурт сямен уд ке вераськиськы, кыӵе тон удмурт? НАТАША ТУКТАШЕВА. Удмурт кыл азинскыны кулэ. КОСТЯ ФЕФИЛОВ: Котькуд школаын удмурт кылэз мед дышетозы. КОСТЯ ШИРОБОКОВ: Вашкалаослэсь кылзэс вунэтыны уг яра. Кинлэн мылкыдыз ӧвӧл, соос медам дышетэ. 31-ТӤ ШКОЛАЫСЬ ПИНАЛЪЁС. Ельцов 1 Алексей ЕЛЬЦОВ Инкуазь суредъёс Кызьпуос Сюреслэн мыд-мыд палаз шаугетыса сыло веськрес тӧдьы кызьпуос. Оло, одӥг минутлы но уг чалмыло ӟабыльтэмысь, нылпиос кадь, весь асьсэ понна шыпырто, серекъяло, ог-огзылэсь бабылес йырсизэс ненег вайёсынызы маялтыны шӧтало... Та егитъёс пӧлын кемалась ик ӧвӧл шадра бамо пересь кызьпу сылэ вал. Вакытэн губыртэм мугорыныз музъемлы йыбыртъя кожасалыд... Пинал эшъёсызлэсь шулдыръяськемзэс адӟыса-кылзыса, тужгес но шуныт тулыс нуналъёсы, курыт синвуосыз нырысь шапыкен, берло жальыр! гинэ вияллязы. Ӧвӧл, куректон синвуос ӧй вал со - шумпотон синвуос... ... Аслаз кузь улоназ кызьпу трос пӧсьсэ но, курытсэ но адӟиз. Куке но пинал эшъёсыз кадь ик веськрес, чебер бабля йырсиё вал. Тросэз вӧзаз сылӥсь эшъёсыз со шоры вожъяськыса синпумтӥзы уӵертылӥзы... Нош табере... губырес, шакырес... Зэм но, котьмае адӟиз солэн шакырес мугорыз. Пинал дыръяз, ачиз кадь ик эшъёсыныз ӵош, кыдёкысь Сибирь музъемъёсы секыт жильыосын жильыртыса кошкисьёслэсь ӝожмыт гуръёссэс кылзылӥз но вож кышетэныз шонаса кыльылӥз. Сыӵе секытэз адӟыса ик, оло, тросэз дырызлэсь вазь пересьмизы но погразы... Граждан ож вакытэ но соослы курытсэ-секытсэ чидано луиз. Кӧня муртэ вайёсазы ошылӥзы, тӧдьы ненег мугоръёссы борды султытъяса, вирен-азвесен "пылатъязы". Ӵушкась пуляос куд-огезлэн сюлэмъёсазы но мертчылӥзы... тазэ но секыт вакытэз тросэз ӧз чидалэ - сюрес дурысь кызьпуос уката шеромизы. Немец фашистъёс кунмы вылэ шӧдтэк шорысь омырскем бере, вож арамае ӵемгес вуылыны кутскизы казак нылъёс, пал кышноос, анайёс. Асьсэ кӧтӝожъёссэс, кайгу- куректонъёссэс соос вераллязы кызьпуослы. Кӧня меда курыт но кузьыт синву кисьтӥзы соос кызьпу выжыосы. Оло, соин ик писпуослэн мугоръёссы но тӧдьы луизы. Нош ожын бырем батыръёсты, валамон ини, синву но, кайгырон но ӧз ӝуты ни. Секыт ожмаськон аръёс пыд йылысьтызы эшшо погыртӥзы на кызьпуосты. Нош огназ кылемез кызьпу уката губырскиз, пересьмиз. Бырем ожгарчиослы йыбырттэм сямен, музъем дорозь ик вайёссэ-киоссэ лэзьяз. Вань эшъёсыз, апай-сузэръёсыз пӧлысь чылкак огназ кылиз. Нош одӥг пол со доры тӥрен мурт вуиз. Баблес кызьпу арамаын та пересь,пе, сюресэз шуш карыса сылэ. Кораз, кораз - тӥрез ӧз вормы пуляосын, курыт синвуэн кыдатэм мугорез. Пересь кызьпу ӧз чида адямилэсь ултӥямзэ, йырзэ сэзъялтыса ик выллань ӝутӥз, пинал эшъёсызлэсь баблес йырсизэс маялтӥз но... ух! шокчыса, пыраклы пограз. Койыкпи Со тулысэ шуръёс вазь усьтӥськизы. Оштолэзь пумын ик пиналъёс визнанъёсын ярдуртӥ бергазы ни. Чорыг, мызьзэ лэзем бере, котькыӵе пӧет борды кырмиське вал. Бакчаысь векчи нумыръёсты бичай но Тумен Юськи шуръёслэн усённиязы, бадӟым тымет кадь кылдэм коже, пешкаръёсты кутылыны васькисько. Пыдын сюресэ нюлэс пыр ортче. Ог куинь иськемез мынытозь куароосыз но, лысоосыз но писпуос шедьыло, кылем гужем ӵоже будэм пешкелез* но тырмыт. Корам бервылъёсын, нюлэс кушъёсын вазь будӥсь сяськаос- кечсинъёс йыръёссэс мычиллям ни. Интыен-интыен кучкыла** вись кузьда ӝужамын. Котькуд писпу но, куак вылын сямен тылобурдоос дугдылытэк кадь шулало, чипсо, чирдо. Йыр ик пороме. Тазьы кылзӥськыса, эскериськыса мыныкум, векчи кызъёсын котыртэм нюлэс кушысь койыкпиез синйылтӥ. Улытозям мон соосты трос гинэ адӟылӥ ни. Огпол кыкто кунянэн койыкез но ог дасо метрысен пумитай. Таиз но койыкпи анаеныз шуыса малпай вал. Матазгес кариськыны ӧй дӥсьты. Кышкатод но пинал пӧйшурез учкись-нонтӥсь уз луы ни, малпасько. Кыллись койыкпиез кӧня ке чакласа сылӥ но шур пала дыртӥ. Чорыг зэм но туж зол кысказ. Вись кузя пешкаръёсын но тилиосын пичи ведрае ӝог гинэ тырмиз. Полиэтилен пуйые но тыри на. Ог куинь-ньыль час визнаме бере, бертыны потӥ. Тулыс куазь кема югыт улэ. Ӝыт дасэ мыныку но нюлэс йылын шунды ошиськемын вал на. Мон, инкуазез яратӥсь мурт, таяз учыре но турын-куарлэсь ӝужамзэ чакласько, я тылобурдоослэсь куараоссэс тодманы тыршисько... Озьы койыкпи доры вуэмме но ӧй шӧдылы. Визнаны мыныкум койыкпи кылле вал, нош бертыкум векчи пыдъёсыз вылэ пыкъяськыны выре вал ни. Ӝутӥське, мыдлань-азьлань кӧня ке вамыш лэсьтэ но вожектыны ӧдъям ненег турын вылэ выльысь лэзиське. Скаллэн кунянэз выллем ик, векчи гинэ куараен бӧксыны выре. Кема гинэ возьмай кунянэз доры койыклэсь берытскемзэ. Ӝомал но кариськиз ни. Койыкпиез эскерись-чаклась ӧвӧл но ӧвӧл. Мон солэн матазгес кариськи. Уг кышка. Небыт гонзэ маялтӥ, озьы но ӧз кышка. "Я, мон доре берто ни, куазь пумен пеймыт луоз. Нош тонэ анаед ӝоген нонтоз", - тазьы шуэме бере эшшо огпол небыт гоно тыбырзэ маялтӥ но, кузь-кузь вамышъяса, дор пала дыртӥ. Ньыльдон-а, витьтон-а вамыш лэсьтыны вуттӥ-а, ӧй-а, мышме учкисько но, сьӧрам мискинь койыкпи вамышъя. Мон сое азьло интыяз ик нуи. Кылиз кадь. Кӧня ке вамыш лэсьтыса гинэ вуи, кунян монэ сутыны турттэ ни. Ог дасо пол озьы, дыр, мыдлань-азьлань ветлӥм. Воксё пеймыт кариськиз ни. Сикын шыпыт луиз. Пелё кучыранлэн "ху-хууу! ху-хууу!" кеськемъёсыз нюлэскын улӥсьёсты нош ик сайкатӥзы. Пелёлы вазиськыса кадь, нюк паласен пурысь ӵана*** нырысь-валысь "кувык" кариз, собере мотоен ортчем выллем "тррррры-тррр..." таргетыны кутскиз. Сыӵе куараосты кылыса мугор ик юзыр-кезьыр луыса кошкиз, вамышъёсме эшшо но кузьгес кари. Озьы но кунян сьӧрысьтым уг кыльы. Пӧйшурасьёслэн корказы дорозь сьӧрам мынӥз. Отчы пыри но соку ик нюлэсчилы жингыртӥ. Озьы но озьы шуисько, мон сьӧры койыкпи калъяськиз, мар карыны ёрмеменым, пӧйшураасьёслэн корказы тани пыроно луи. Нокытчы эн кошкы, али ик лыкто но шуиз со. Ӝоген мотоеныз вуиз. Кык кузя тодмо пӧйшурасьёсты сьӧраз ваем на. - Кытысен куняндэ нырысьсэ адӟид? - луло шедьтосме интыяз ик нуон вылысь юалляськыны ӧдъяз нюлэсчи. - Ойдолэ пыдын вамыштӥм. Койыкпи мотолэсь кышка. Я, азьло интыямы ик вуим кадь. Котырак пеймыт ни. - Койык куштыны кулэ ӧвӧл пизэ. Анайзэ возьмалом ни, - ӵогем кадь шуиз нюлэсчи. - Нош анайзэ вӧсь ке кариллям, йыртэмасьёс ичи-а, мар-а? - дӥсьтытэкгес пумитъяськоно кариськи. - Кизён вакытэ кин нюлэскы пыра. Городъёс ке ӧз вуылэ, нокинлы кадь йыртэманы, - вазизы пумитам. - Мон ӵукнаозь тӥледын улӥ ке, асме утчаны потозы, - нош ик кошкон мылкыдме муромытыны вырисько.- Тани тынад юрттӥсьёсыд вань ук, - воргоронъёс шоры возьматӥсько. - Я, я, дорад вуод ай, койыкпи шедьтэм котырез чакласа ортчом на, - вазиз пумитам нюлэсчи. Ньыль кузя оло, котькуд куакез фонарикъёсын югдытыса ортчим - койык нокытын ӧвӧл. Вошъяськыса, чакласькыса быдэс уез потӥм. Ӧз вуы кыр скалмы. Ӵукна пал койыкпилы векчи пуӵъёслэсь но бодыослэсь кенер лэсьтӥм. Нюлэсчиен пӧйшурасьёс кошкизы. Мон но ӝамдэлы доре бертылӥ. Зэм но, дорын ыштӥллям ни вылэм. Сьӧрам сиён кутыса, нош ик койыкпи доры дыртӥ. Кошкымтэ. Озьы ик кенер пушказ кылле. Котыртӥз нокин ветлӥсь ӧвӧл. Нунал но, кык но ортче - кунянмес нонтӥсь ӧз луы. Нош ик пӧйшурасьёслы но нюлэсэз чакласьёслы жингыртӥсько. Озьы, озьы, шуисько, койыкпиез ӧм ке сюдэ, со кема уз чида ни. Возьма, вуом, пе. Ӝоген ёросысь пӧйшурасьёслэн йырзы вуиз. Сьӧразы кунянъёсты нонтон ваиллям. Койыкпи, пичи пинал кадь ик, ӵоксузьылыса, бадӟымесь гучыкъёсын пичи флягаез бушатӥз. Собере сое машина уробое понӥзы но нуизы. Отӥяз койыкпие кытчы луиз, али но уг тодӥськы. Мукет пӧйшурпиосты сямен ик, нюлэскы лэзизы, луоз, оло, койык вордон фермае сюриз-а - со сярысь ӧй ни юалляськы. Нош кыр кунянэз утеме понна тау карыны ӧз вунэтэ. Пӧйшураны ветлон куасъёс но кучапи кузьмазы. ______ * пешкель - подлесок ** кучкыла - щавель *** пурысь ӵана - козодой 7-11-3 Горн, барабан но флажок "Мынам оскымон эшъёсы", - озьы шуэ та туспуктэм вылысь пиналъё сярысь Аксакшур школаысь вожатой Л. Е. Ажимова. Соос уго Любовь Евгеньевналы пӧртэм ужрадъёс ортчытъяны юртто. Косэмез возьмаса уг уло. Переменае яке урокъёс бере дораз лыкто но юало: "Ма туннэ каромы?" Нош педагог-организаторлы ӵапак сыӵе ик пиналъёс кулэ. Соин ик школаязы ортчылӥсь ужрадъёссы пайдаё но умой ортчыло, пӧртэм конкурсъёсы пыриськыло. Тани Ксюша Тихонова но Денис Кулышев (туспуктэм вылын паллян палаз сыло) тулыс "Пою моё Отечество" ёрос конкурсэ пыриськылӥзы. Отысь соос вормисьёс луыса бертӥзы. Ксюша "Пӧяз, пӧяз" кырӟанэз быдэстӥз. Котькуд ар кырӟанъя конкурсъёсы пыриськылэ Юра Михайлов но (бурысез). Учкисьёслы солэн но кырӟамъёсыз кельшо. Кырӟасьёслы баянэн шудэ гуртысьтызы ик клубын ужасьсы В.Н.Арекеев. Нош 9-тӥ классэз йылпумъям Лиля Поклоновалы (шорысез) баянист но кулэ уг луы. Лиля ачиз ик гармошкаен шудэ, ачиз ик кырӟа но. Нош ваньмон дыръёсаз Любовь Евгеньевнаен ӵош школа ужрадъёслы дасяське. Усто пиналъёсты школаязы котьку но пусйылыны тыршо. Дружиназылэн командирез Марина Почегова (та нылашлэсь туспуктэмзэ газетмылэн 5-тӥ номераз сётъямы) куартолэзе "Орлёнок" лагерьын шутэтскиз. Любовь Евгеньевна школае ужаны лыктэм дырысеныз вожатойлэсь ужзэ быдэсъя ини. Соин ӵош ик ӟуч кылъя но литературая дышетэ, школа сад-бакчаен кивалтэ. Вожатой луыса ужан мылкыдыз солэн одӥг пол пуксьылӥз ик. Со вал пионер но комсомол огазеяськонъёсты быдтон вакытазы. Озьы ке но, школаязы ужзэс ӧз аналтэ. Арысь аре пиналъёс пионере пыро, сборъёс ортчытъяло, горнзы, барабанзы но асьсэлэсь ужзэс быдэсъяло. "Родники" огазеяськон кылдэм бере, соос но отчы пыризы, "Зелёный мир" программая ужаны кутскизы. Ӵыж-ӵыж горд галстуксы интые керттӥзы гордо-лызо буёлозэ. Нош октябрёнокъёссылы "Шаерчи" значокъёс сётъяло. Котькуд куартолэзе Столярово гурт дорысь ёрос слётэ Аксакшур школаысь сизьыметӥ классын дышетскисьёс ветло. Отын соос Пионерилэсь нуналзэ пусъё. Сьӧразы огазеяськонзылэн ужамез сярысь альбом лэсьтыса нуо, кырӟан-эктон дасяло. Горн, барабан но флажок. Соос котьку аксакшур пиналъёсты сборъёсазы ӧтё, ужаны но дышетскыны капчи мылкыд сёто. А. АЙМАНОВА. Пичи Пурга ёрос. Туспуктэмез Ю. Ивановлэн. 7-11-5 . Конкурс . Конкурс . Конкурс Куиньзэ самой устооссэ кылзэмды луоз шаерамы чузъяськись радио пыр Али гужем шор. Тӥ, пиналъёс, ваньды ик ялкариськоды. Дышетсконлэсь, конешно. Гуртын улӥсьлы ужатэк но уг луы угось. Тани тӥ но гурт котырады яке колхоз лудын, школа бакчаын яке фермаын тыршиськоды, луоз. Куд-огезлы нош, оло, удалтӥз: зэмзэ но ялкаре - лагерьын. Озьы-а, тазьы-а но, ужасез но, шутэтскисез но шӧдыса уз вутты, кызьы куаръёс ӵужектыны ӧдъялозы, матэктоз сӥзьыл. Котькинлы сямен ик, со тӥледлы но, милемлы но сюлмаськонъёс ваёз. Тӥ, пиналъёс, школае мыныны дасяськоды, нош ми, газет-журналъёсын ужасьёс, асьмелы выль лыдӟисьёс шедьтон пумысен сюлмаськыны ӧдъялом. Али ик со сярысь малпаськиськомы ини. Соин ик юрттэт курыса вазиськиськом тӥледлы: малпалэ вал "Ӟечбур!" газетлы сӥзем реклама. Мед луоз со верамын ВАКЧИЯК, ЧЕБЕР но МУР пуштресо. Гожтӥськыны ӧтен выллемгес мед луоз. Пӧрмоз-а со кылбур, серемес учыр,выжыкыл яке эшшо маке мукет - мед. Быгатоды дэмен кариськыса малпаны. Шутэтскон лагерьын, нылпи площадкаын, колхоз ужын, школаын яке кытын ке шур дурын, возь вылын огазе пуксе но, шутэтскон сямен гожтэ. Собере, куспады эскерыса, туж-туж умойзэ (куронмес лыдэ басьтыса) редакциямы ыстэ. Куиньзэ самой устооссэ бӧрысь кылзэмды луоз шаерамы чузъяськись радио пыр. Озьыен, ялӥськом рекламалы сӥзем конкурс. Кин нырысь? 7-11-6 Анай кылзэс уз вунэтэ ни Таӵе чебер удмурт сэрегзы вань Сарсак-Омгалась нылпи садын. Воспитательёс но кивалтӥсьсы Н. В. Байкова анай-атайёслэн юрттэмзы улсын кылдытӥзы сое. Жаляса верано луэ, туспуктэм вылын пичи люкетэз гинэ адӟиське, нош соослэн вань на мукет тунсыко арбериоссы. Борддоре ошем коверез бышкыса пужыятэм воспитательлэн юрттӥсез луыса ужась А. А. Байкова. Со туж чебер, яркыт пӧрмем. Койка вылысь шобрет но асьсэ киын чильпамын. Пиналъёс ярато нылпи садзэс. Соосты отын туж ческыт сюдэ Рая апайзы - Раиса Семёновна Тараканова, нош воспитательёссы Татьяна Всеволодовна Байкова но Нина Фёдоровна Байматова дышето-визьмало, пӧртэм ӵукшудонъёс ортчытъяло. - Удмурт сямен-а, ӟуч сямен-а вераськиськоды пиналъёсын? - юасько. - Покчиосын удмурт сямен, бадӟымъёсынызгес ӟуч кылын, - шуэ Нина Фёдоровна. - Соослы угось ӟуч кыллы дышыны кулэ, дышетсконазы шуг-секытъёс медаз кылдэ. Анай кылзэс нош соос озьы но уз вунэтэ ни. 7-17-2 Серафима ПУШИНА-БЛАГИНИНА Дыдыко ВЕРОС Улосэ акшан лэзиське. Пудо уллёез но нуыны дыр ӝоген вуоз ни. Гуртын нимысьтыз пастух ӧвӧл. Тӥни соин колхозникъёслэсь скалъёссэс, ыжъёссэс гуртын улӥсьёс асьсэос ик черодэн возьмало. Туннэ тани со ужез Гелялэн Нина апаезлы быдэстоно вал. Нош со Ижевске кошкиз, профтехучилищее пырыны мылкыд кариз. Гелялэн песянаез конюхын ужа. Ӵапак соин пудо возьманы Гелялы оскизы. Бускель коркан улӥсь кышномуртэн Сима апаен ӵош пудоез возьмазы. Ӝыт матэктон азьын скалъёс но ыжъёс нюк пыдсысь нёжалэ шутэтскыны интыяськизы. Нош кык пастухъёс, дырзэс юнме быдтонтэм вылысь, губи бичаны малпазы. Ярбамысь нюлэс куше тубизы но утчаськыны шӧтазы. Геля вордскем дырысеныз улэ Вуж Кеныын песянаеныз но Нина апаеныз ӵош. Нош май толэзе солы сизьым арес тырмиз ни. Мумиз нылыз вордскем берегес ик кузпалэныз люкиськиз но городэ улыны кошкиз, механической заводын ужа табере. Гелялы ньыль арес тырмем бере, со суд йырсиё милиционерлы бызиз. Нылаш сое атай шуыса нима. Геля ӟеч тодаз возе на соослэсь доразы ӵошен бертылэмзэс. Вазь ӵукна ик песянаез но Нина апаез выж миськизы, корка пушез быдэсак сузязы-чылкыттӥзы, пӧраськизы. Виртырем но перепеч вуэм бере, Геляез выль дэрем дӥсятӥзы. Нылаш кыштырак гинэ сэндрае тубиз, дышем сямызъя отысен чаклалля куноосты. Выль атаез туж усто, лякыт сямо вылэм: пыремез бере ик Геляез сэндраысь басьтӥз. Нылаш кужмо воргоронлэн киысьтыз мӧзмытӥськиз но песянаез доры бызиз. Нош бератаз кепыранэз кытчы ке тӧлӟиз. Сое пуктӥзы ӝӧк сьӧры. Сиськемез бере со вань тодэм кырӟанъёссэ кырӟаз, кылбуръёс мадиз. Вася атаез сое ал вылаз пуктӥз, вешаз но шуиз: "Гелечкаез мон обидьыны уг сёт. Мон ачим анай-атайтэк будэмын..." ...Геля губиосты тыро-пыдо ӧз шедьтылы. Сима апайлэн сиён ваем мешокез тырме ни, нош Гелялэн сумкаяз дасо пала сяна губиос ӧз вуэ на. Тодмо ӧвӧл, соос пӧлысь кӧняез сиыны мынозы. Ныллэн мылкыдыз куашкамын. Губиос, оло, юри со азьысь ватско но Сима апайлы возьматско, со доры пегӟо. Ӵапак со вие дораз бызьыса вуиз Гелялэн эшез. "Мемеед но атаед бертӥзы. Ӧтё. Городэ нуыны туртто", - шок- пуль шоканъяз, мырдэм но кызьы вераны йӧндыриз Зоя. Сима апай пинал пастухез дораз кошкыны лэзиз. Гелялэн городэ мынэмез чылкак уг поты. Сое нырысетӥ классэ гожтӥзы ни татын, Вуж Кеныын. Нош городэн герӟаськемын быдэс мугорез юзыр-кезьыр карись малпанъёс гинэ. Отын ведь Петя атаез но улэ на. Солэн кык пиосыз вань - Игорь но Олег. Геля соосты огпол адӟылӥз ни. Кылем арын вал со. Петя атаез Кеныын улӥсь агаез доры бертӥз но пиосыныз ӵош магазинэ мынӥз. Геляос доры пыраз. Нылызлы шудон но конфет сётӥз. Бератаз Игорь, Олег, Геля но солэн эшез Римма чималиен шудӥзы. Кык нылъёс артана писъёс сьӧры ватскизы. Тӥни соку Геля эшезлы сипыртӥз: "Тынад одӥг но атаед ӧвӧл, нош мынам соос кык кузя..." Номыр ӧз вазь Римма. Кӧня ке дыр ортчыса, пиос керетон ӝутӥзы. Олег вожез потыса шуиз: "Со милям папамы, тынад ӧвӧл. Милямез ӝоген прокурор луоз, нош тынадэз милиционер гинэ". Геля азяз сылӥсь пиез артана писъёс вылэ донгиз, соиз бӧрдыны кутскиз.Соку ик Петя атаез бызьыса потӥз. Нылаш выль шудонзэ солы зӥртӥз. Мукетыз но сюлэмшугъяськытэ Геляез. Со - сюрес. Геля кык пол ни пыдын мынылӥз отчы, анай-атаез доры куное. Али ни со Южной автостанциысен Кены нюлэскозь автобусъёс ветло. Нош соку озьы ӧй вал. Вылаз ик, машинаос отын кудмында! Муминыз городэтӥ ветлыкуз но нылаш уно пол черектылӥз: "Машина лёгалоз!" Гуртын уд йыромы, одно дордэ шедьтод. Нош городын? Кык ар талэсь азьло Выль ар азьын ёлка чеберманы шудонъёс басьтыны ветлӥзы. Геля магазинэ ӧз пыр. Кыре ик кылиз но укно вылысь суредъёсты учкыны ӧдъяз. Дыр ортче, нош мемеез уг ву. Нылаш бызьыса пыриз магазинэ. Ӧз шедьты. Зар-зар бӧрдыны кутскиз. Котыраз агайёс, апайёс люкаськизы, милиционер но вуиз. Адрес юало. Мар вераны ик паймиз нылаш. Тӥни соку мумиз вуиз. Ваньмыз умой йылпумъяськиз. Нош та учырез Геля ноку уз вунэты. Таосыз мугъёс сокем ик уг сюлэмшугъяськыто. Вань на мукетыз. Самой бадӟымез. Гелялы песянаеныз люкиськоно луоз ук. Со туж яратэ нуноксэ, эркиягес но кадь. Шумпотэ пичи нылашлэн шораз Дыдыко шуыса вазиськемезлы. Дыдыко... Та кыллэсь пуштроссэ Геля рос-прос уг тод. Вераськыны кутскыкуз, доразы Завьяловоын улӥсь Аня апаез ветлӥз. Тӥни со, Гелялы вазиськыкуз, одно шуылӥз: "Гыдыке тон мынам". Нылаш та кылэз ӧз вунэты. Песянайзэ дыдыко шуыса ниманы кутскиз. Дыдыкоез ик сое ветлыны но дышетӥз. Мумиз Гелялы нырысьсэ сандали ваиз вал соку. Песянаез пыдкутчанъёсты кияз кутӥз но нылокез дораз ӧтиз: - Чаль, нылы, чаль! Вамышты мон доры. Пыддэ кутчалом, ветлыны дышетском. Геля кӧня ке вамыш лэсьтӥз но канжаськиз, выж вылэ сапкиськиз, бӧрдыны кутскиз... Нош табере тани дыдыко дорысь кошконо. Люкиськоно Нина апаен но, эшъёсыныз но. Вуж Кеныысь кошкытэк ӧйлась. Анай-атайёсыдлэсь кызьы люкиськод? Геля дышетскиз городысь школаын. Ӟеч дышетскиз. Нырысетӥ классэ йылпумъян азяз висиз, больницаын быдэс толэзь ӵоже кыллиз. Нош эшъёссэ сутыны но азьланьтыны быгатӥз. Дышетӥсез но ӟеч дышетскемез понна солы книга сётӥз. Дыдыкоеныз Геля ӵем пумиськылӥз. Каникулъёсыз дыръя одно гуртэ вуылӥз. Одӥг пол гинэ пионерлагере ветлӥз. Нош мукетсэ ваньмон дырзэ гуртын ортчытылӥз. Куатетӥ классэ ветлыкуз ни вал та учыр. Школаысь бертэмез бере, Геля паймиз анай-атаезлэн чал-чал улэмзылы. Соос возьмазы нылзылэсь сиськемзэ, дӥсь воштэмзэ. Собере гинэ мумиз шуиз: - Гелечка, дыдыко кулӥз. Ныл ӧз вала арлыдоослэсь ма сярысь верамзэс. Паймыса учкиз анаез шоры, бератаз атаез шоры. Кӧня ке дыр ортчыса, Геля но, мумиз но зар-зар бӧрдыны кутскизы. Сюрес вылэ дасяськыны ӧдъязы. Венок но басьтэмын вылэм ни. - Сыӵе шуг-секытъёсты чидаз ведь... Ӧз сётскы, ӧз куасалскы. Война вылтӥ гуртамы нокинлэн скалэз ӧз кыль ни. Нош со возиз. Нылпиосыз укмыс кузя ведь вал. Сюдӥз- вордӥз, нош табере тани... - корка люкаськем пересь кышномуртъёслэсь куспазы вераськемзэс кылӥз Геля. Со тодэ: песянаезлэн укмыс нылпиосыз вал. Кык нылъёсыз гинэ улэп кылизы. Ньылез пиосыз ож лудысь ӧз берытскелэ. 1941-тӥ арлэн пумаз кузпалызлэсь "ивортэк ышемез" сярысь иворез басьтэм. Паймод ведь, кызьы меда быдэс адями чиптэм- чаптэм ышыны быгатоз, малпалляз пичи Геля. Мукетъёссэ нылпиоссэ секыт улон быдтэм. Война йылпумъяськем бере, куамын куатяз мынӥсь пал кышно доры вуылэм гуртысь бригадир Иван Игнатьевич Новокрещенов. Семья кылдытон сярысь вераськон ӝутэмез бере ик, Гелялэн песянаез уретэм: "Нош нылпиосылы мон кин луо? Соосты ведь пыд вылазы вуттоно. Ӧвӧл, эн ветлы ни ай, Иван, сюлэмме вӧсь эн кар. Нылъёсылэсь мон кытчы кариськом?" Ӧз чида Геля. Бам вылаз быльырак потэм синкыли шапыкъёссэ ӵушылонъяз дыртыса потӥз коркась. Дыдыкоез ватэм бере, анай-атаез но, ӵыжы-выжыосыз но кема утчазы Геляез. Бакчаысь льӧмпу саюлын кӧлэ вылэм нылаш. Бадӟым куректон синкылиос солэсь кужымзэ быдтӥллям, шӧдске. Ӵапак та льӧмпу улысь пичияк ӟус вылын Геля уно пол пукылӥз аслаз яратоно песянаеныз. 7-18-2 "Мон малпасько" "Мар луиз тонэн, режиссёр?" Пыкылыса пайда уд потты 13-15 арес - со адямилэн улоназ тужгес но шугез вакыт, егит дыре выжон, улон шоры мукет синмын учкон, синмысь "льӧль очкиосты" сэрпалтон. Валамтэос кылдо анай-атайёс, дышетӥсьёс куспын. Нош кызьы сыӵе учырысь потоно, кызьы огкыл шедьтоно, ваче кусып тупатоно - егитъёс уг тодо. Та арлыдазы соослэн асьсэды бадӟымъёсын артэ пуктэмзы потэ, соос кадь малпаськыны туртто. Эмчиос верамъя, будыку йырвизь мугорлэсь бере кыле. Озьы егитъёс, мугорзы бадӟым муртъёслэн кадь ини шуыса, визьмын но асьсэды ортчемын ни кожало, соин сэрен ик шугъяськонъёс кылдо. Вань адямиос ортчо та сюресэз. Но асьсэос анай-атай луо ке, вунэто, лэся, асьсэлэсь янгышъёссэс, валамысь дугдо нылпиоссэс. Нош егитъёслы туж секыт, соослы эш кулэ. Анай-атайёссы та вакытазы тужгес оскымон адямиоссы мед луозы вал. Пыкылыса, керетыса пайда уд потты. Умойгес луысал, анай-атайёс нылпизылэсь куректон-сюлмаськонъёссэ валаны турттысалзы ке. Пинал муртлэн сюлэм пушказ пырон - со туж секыт уж. Пырыны ке быгатӥд, сое вӧсь кароно ӧвӧл. Гуртэ уж Мон нюръяськысал... Нош али мон ӵектысал выль гуртэ уж. Дыр интыяз уг сылы, со ялан азьлань мынэ, улон но воштӥське. Воштӥсько туала егитъёс. Пӧртэмгес ни соослэн малпанъёссы, тунсыкъяськонъёссы но улон шоры учкемзы. Соин валче мынам тодэме потэ вал егитъёслэсь туала улонлы куронъёссэс. Мае соос возьмало, мар понна нюръяськысалзы? Озьы ик нималом со ужпумез: "Мон нюръяськысал..." Азьланьтэ та малпанэз. Одно ик гожтэ, ма понна нюръяськысалды. Александр КУТАСОВ, УдГУ-ын дышетскись. "Юсьпи йыроме ке" "Мар луиз тонэн режиссёр?" гожтэмез лыдӟыса, мур малпаськонэ выйи. Егит эшъёсылэн сюлэм висёнъёссы, Соослы кулэ юн пыкъет, яратэм но сюлмаськем. Нош тӥ? Мар тӥ кариськоды? Куке малпаськылӥды-а, кузпалэн люкиськон учыр но нылпилэн сюлэмаз, дэриесь пыдкукен лёгиськем кадь, наштаськем пытьы кельтэ шуыса. Куашка семья, анай- атайёс ог-огзылы тыбырынызы берытско. Солэсь верамъёссэ санэ уг басьто бере, номыр но лэсьтыны уг быгаты шуыса, нылпилы чидантэм вӧсь луэ. Куке семья курадӟе, шуом, уксё ласянь (атай ужтэк кылемын, нош анай дасо пала уже вуттӥськыны тырше, кызьы ке но калык радъя улон вылысь), соку нылпиосын анай-атайёс вискын паськыт но мур гу кылдэ. Уженызы сэрен анай-атайёс уг шӧдо ни нылпизылэсь быдэ вуэмзэ. Дас одӥг аресъем нылпизылы "шаплыгес изьыны выд ни ай!" шуыны луэ ке вал, вуэ сыӵе дыр, куке озьы вераны уг яра ни, соку соин бадӟым муртэн кадь кенешоно. Нош анай-атайёс азьло музэн ик чакласа-индылыса возёно кожало. Висъясь гу эшшо но паськыта на. Пинал шӧдэ вордӥсьёсызлэсь быдэ вуэмзэ валамтэзэс, сое чик но синйылтыны тыршымтэзэс. Соин ик ассэ йыромем юсьпиен адӟыны кутске. Будэмъяз егит мурт, аслыз маке но выльзэ усьтыны но ассэ дунъяны турттэменыз ӵош, котырысьтыз улосэз, вӧзысьтыз адямиосты чакла-адӟе, анай-атайёсызлы но, улэм-вылэмзы шоры учкыса, дунъет сётоно кожа. Чиданлыкез, визьмыз, ужрадлыкез валамез солэн ӧжыт на, соин ик вордӥсьёсызлы укыр чурытэсь куронъёс пуктылэ. Шуом, эшезлэн, тодмоосызлэн анай-атайёсынызы ӵошатыса, мумы-бубыосыз начаргес уло ке аслазъёсыз пишмымтэ адямиос кадь пото. Соин, лэся, солэн но улоназ номыр уз пӧрмы шуыса, осконэз быре, анай-атайзэ дунъямысь дугдэ. Нош гу мургес луэ. Юрттэт сётӥсь ӧвӧл. Егит муртлы кырыж-мерыж сюрес сяна кыльымтэ ни шуыса-а мар- а, отчы ик кожоно кариське. Кудӥз ассэ быдтон калэ но вуэ, нош кудӥз аракыен, шузимытӥсь наркотикъёсын эшъяське. Озьы капчигес йӧтэ, вылды. Но со шулдыръяськон кема кыстӥськыны уг быгаты. Котьмалэн но пумыз вуэ. Сыӵе улон но ӝоген акылес, адӟемпотостэм потыны кутскоз. Малпасько, татын астэ туж лякыт, сабыр возёно. Эшшо огпол вераськоно на пиналэн, тодоно, зэм ик-а номыр но лэсьтыны уг луы ни. Кӧня ке юанъёс но сётыны ярасал: ку со сыӵе сюрес вылэ шедиз? Кин дэмлаз? Мар карыны турттэ азьланяз? Меӵак сётэм юанъёс, оло нош сое мур малпаськытозы. Тунсыкъяськыны кулэ, дыр, гажано муртэз сярысь но. Оло, синъёсыз шуак чилектозы, со адями сярысь умойзэ тодаз вайыкуз. Асьтэлэсь но ӟеч сямо, ужез гажась луэмдэс возьматоно, солы но уж сётоно. Дыр ортчемъя, оло, егит эшты бордады но биниськоз. Соку тӥ ик юрттоды солы выль эшъёс шедьтыны, улон шоры сайкытгес, сазь синъёсын учкыны. Асьтэлэсь эшъяськондэс ас понназ улыны дышытозяз, шонер малпаськонъёсы вуыны кутскытозяз юнматоно. Анай-атайёслы вунэтыны уг яра егит мурт понна кыл кутэмзы сярысь. Света НИКИТИНА, УдГУ-ын дышетскись. 7-19-2 Городысь пинал удмурт усточиос Пирданэз луоз дась Та нылашез тӥ, лыдӟисьёсмы, нырысьсэ уд адӟиське. М. Менладшинэн лэсьтэм туспуктэмъёссэ угось газетамы сётъяллямы вал ини. Нош кытысь, кин со - таиз сярысь огпол но ӧм гожъялэ на. Дыр вуиз тодматскыны. Таня со, тодмо фотокорреспондентлэн Мударис Мензарапович Менладшинлэн нылыз. Дышетске Ижысь 100-тӥ школаын, йылпумъяз 6-тӥ классэз. "4"-ёсын но "5"-ёсын гинэ эшъяське нылаш, школаязы но классазы ортчылӥсь ужрадъёсы мылысь-кыдысь пыриське. Со сяна, Таня туж яратэ пужыятскыны. Та ужлы сое дышетӥз анаез Нина Васильевна. Оштолэзе Киясаын ортчиз Менладшинъёслэн семьязылэн адӟытонэз. Отын вал Танялэн но киужъёсыз. Синмаськымон чебересь пӧрмиллям соос (учке туспуктэмъёсты). Мӧйыос но , оло, ваньмыз ик тазьы уз быгатэ, нош Танялы дас кык арес гинэ ай. Азьланяз, оло, мумиз сямен ик, борддоре ошон ковёр но, валес шобрет но пужыятоз ай. Мылкыдыз гинэ медаз сӥя. Таня котькытчы вуттӥське. Солэн вань черепашкаез но Линда пуныез. Соосты сюдэ, утялтэ. Яратоно пунызэ кыраны но дышетӥз ини. Городын ке но вордӥськемын, нылаш ӟеч вераське анай кылыныз, гажа сое. Анай- атаеныз, агаеныз ӵош шутэтскон нуналъёсы но гужем каникулъёсаз ӵем бертылэ песянайёсыз доры. Соос но ас калыксэ, вордӥськем шаерзэ яратон мылкыд пыӵаито Танялы, умой сямъёслы дышето. Тодмо ӧвӧл ай, кызьы лёгиськоз нылашлэн улон сюресэз, но удмурт сямъя бызиз ке, пирданэз дась луоз. (Танялэн кадь ик салфеткаос пужыятэмды потэ ке, схемаосты учке 14-тӥ бамысь.) 7-24-7 Ӵыжы-выжыосмы дорын Дебрецен шобырске сяськаен Котькуд гужем, 20-тӥ гудырикошконэ, Венгриез кылдытӥсь Святой Иштван эксэйлэн нуналаз, Дебрецен карын сяська карнавал ортче. Та нуналэ Дебреценысь 200 сюрс улӥсьёслэн лыдзы кык поллы уноя. Мадьяръёслэн та сямзы куамын арлэсь кема возиське ини. Та выллемгес ик ужрадъёс ХХ даурлэн кутсконаз но ортчыло вылэм. Соку шор урамъёстӥзы сяськаен чеберъям адямиос ортчылӥллям. Табере кемалы вунэтэм ужрад выльысен улӟытэмын. Карнавалэ пыриськисьёслэн ужъёссы пӧлын вылӥ дунъет басьто ас киосынызы лэсьтэм ужъёс. Композициос тодэ вайыто выжыкылъёсысь, легендаосысь геройёсты, азьло юртъёсты. Учкыны ваемын фирмаослэн эмблемаоссы, вузъёссы. Сяськаослэсь кылдытэм ужъёсты машинае интыяло но урам кузя нуо. Валамон, инкуазьысь пӧртэм буёло сяськаез шедьтыны шуг. Соку ини композицизэ кылдытӥсь куд-ог люкетъёссэ куасьмем сяськаосын тырмытэ, куддыръя соосты ас чакламзыя буяло. Ужъёссэс чибориё, чебер карон понна, суредасьёс карнавал азьын уйбыт суредасько. Огдышем сямъя карнавал кутске кар лудын. "Сяська-поездэз" келяло духовой оркестръёс но эктон коллективъёс. Соос пӧлын ик трос луо кунгож сьӧрысь лыктэмъёс, ӟучъёс, полякъёс, бельгиецъёс, немецъёс, израильтянинъёс, японецъёс. Котьку сямен ик куноосты туж шуныт пумитало. Лэсьтэм киужъёсты одно ик дунъяло, сюреслэн мыд-мыд палаз сылӥсь учкисьёс но кельшымон уж понна куаразэс сётыны быгато. Усто ужъёсты кузьымъёсын пусъё. Карнавалэ пыриськись коллективъёс концертъёсын потало Дебреценэ но со котырысь ёросъёсы. Со сяна, та бадӟым ужрадлэсь программазэ узырмыто спортивной ӵошатсконъёс, пӧртэм шутэтскон амалъёс, арня пала кыстӥське сурлы сӥзем шулдыръяськон. 20-тӥ гудырикошконлы азьло ик дасясдь но. Ваньмызлы тодмо укмыс пасё выж доразы ярмарка ортче. Венгер кылысь берыктӥз А. ЕГОРОВ, УдГУ-ын дышетскись.р 7-25-1 Кӧня вожез! Кӧня вожез гужемлэн! Синъёсы ик вожекто. Садын вож писпу сылэ, Куаръёс каллен ӵаштырто. Вож музъем луиз гуртын, Пиналъёс но вожекто, Вож-вож - вож турын сямен Будыны соос дырто. Льӧмпу но сутэрпу Бакчаям будэ льӧмпу, Паллян палаз - сутэрпу. Соос ӵошен ӟабыльто, Емышъёссэс утялто. Шунды шорын буясько, Шуныт зорен мисьтӥсько. Тани пото бакчаям, Сётозы мыным салам. Оля БЕСПАЛОВА. Селянур гурт. Грах ёрос. 7-27-3 "Анай" ум алӥське озьы ваземзылэсь Тӥ ноку но эн юалэ, Кытын анай-атайёссы. Татын ӟечгес тӥ луэлэ, Сотэк Сӧсыр - сюлэмъёссы. В. РОМАНОВ. Трос пол кылылӥ вал ини Сарапулысь анай-атайтэк кылем нылпиослэн юртсы сярысь. Кема утчано ӧз луы, ӝужыт кенерен котыртэм юрт карлэн шораз ик интыяськемын. Соку ик син шорамы йӧтӥзы сюрес кузя будӥсь чебересь сяськаос. Чылкыт миськыса ошылэмын коверъёс. Юртэ пырыку ик огшоры улон коркалы тупась шӧмыз шӧдӥськиз. Выж вылэ паласъёс валемын. Борддоръёс бордысь шуныт лыктэ но анай-атайтэк кылем пичи пиналъёсты жалян мылкыдэз эшшо но муромытэ. Милемыз шуныт пальпотыса пумитаз детдомлэн кивалтӥсез В. Ф.Хлопушина. Василина Фёдоровна та нылпи юртын 1987-тӥ арысен ужа ини. Пичи дырысеныз ик дышетӥсь луыны малпа вылэм. Педучилищеез йылпумъяса ужам нылпи садын, собере начальной школаын дышетэм. Национальностезъя со болгарка, Сибирьын вордӥськыса, Крымын улэмын. Кузпалыз Сарапулысь бере, татын ик улоно кариськиллям. Пиналъёслэн та юртын улонэнызы умойгес тодматскон понна ми кивалтӥсьсылы юанъёсын вазиськимы. - Дышетӥсь туж визьмо, валась но лякыт луыны кулэ. Нылпи юртын тужгес но, дыр? - Милям юртамы куатьтон пала адями ужа: ньыль пӧртэм категориосын кызь дышетӥсьёс, дас ньыль воспитательёс, сиён пӧрасьёс но выж миськисьёс. Ужасьёсмы ваньзы ик туж визьмоесь, умоесь, лякытэсь но тунсыкоесь. Котькудӥзлэн вань аслыз гинэ тупась ужан амалыз. И. Р. Зотина, И. В. Ларина, И. А. Русинова но мукетъёсыз ужазы мар ке но выльзэ пыртыны тыршо, пиналъёсты чеберез адӟыны дышето. Визьзыя бере кыльыса будӥсь нылпиосын ужаны капчи ӧвӧл. Котькуд пиналлы нимысьтыз "усьтон", лякытэсь кылъёс утчано. Пиналъёс пӧртэмесь, вань сыӵеосыз но, кудъёсыныз туж секыт ужаны. комокъёслы яратон, нуныян-вешан уг тырмы шуыса. Сузэр-вынъёс татын ӵош, ог-огзылы юрттыса уло. Пичиослы но бадӟымъёслы люкылэмын ӧвӧл. Сисько но, шудо но ӵош. Пиналъёсмы шаплыесь ке но, туж кылзӥськисесь, лякытэсь, куараез соос шоры будэтъяно уг луы. - Пиналъёсын кусыпъёстэс азьланяз но уд ыштӥське бере, тодӥськоды,луоз, школазэс йылпумъяса, кыӵе сюрес лёго соос? - Тросэз дышетсконзэс азинто. Одӥгез пияшмы - Суворовской училищеын, медколледжын но дышетскисез вань. Тросэз Сарапулысь колледжез йылпумъяло, радио- телемастер луо, нош нылъёс - вуриськыны-пӧраськыны дышетско. Дышетскыны мылкыд карисьёссэ асьмеос ик интыяны тыршиськом. - Кыӵе ужпумъёс тӥледыз тужгес но сюлэмшугъяськыто? - Милям валтӥсь ужпуммы - нылпиез семьяе интыян. Оскымон, умой анай-атай вӧзын со мед будоз. Нылпиослэн висёнъёссы пӧртэмесь бере, котькудӥныз нимаз ужано луэ. Соин ик дышетӥсь но, воспитатель но туж чидась но мурт нылпиез аслэсьтыз кадь ик яратӥсь луыны кулэ. Кыӵе мусояськемзы потэ пичиослэн, кыӵе возьмало соос мӧйыослэсь яратэмзэс! Ми одӥгзэ но пиналэз ум висъяське, котькудӥз зарни комок дуно. Гуртын сямен ик, ми пудо-живот вордӥськомы, вань кроликъёсмы, кечмы, городмылэн нуналаз пони кузьмазы, вал но вордӥмы. Пудоосты пичиос туж ярато, асьсэос ик утялтыны дышетско. * * * Ми ветлыкумы, нылпи юртэз выль дышетскон арлы дасяло вал, нош нылпиос пӧртэм лагерьёсы но санаторийёсы шутэтскыны келямын. Пичиосын ужало нимысьтыз быръем воспитательёс, эмъясьёс, кудъёсыз йӧнато, массаж лэсьто но куаръёслэсь ваннаосын пукето. Василина Фёдоровна вераз, тужгес но покчиосыз Сарапулысь ик санаторийёсын шутэтско шуыса. Соосын кенешыны-вераськыны дыртӥмы. Санаторийын ужасьёс Т. А. Вологдина, В. А. Тумачева но мукетъёсыз милемыз шуныт пумитазы. Котькуд комнатаосы пыртаса, шутэтскон юртэнызы тодматӥзы. Куноосты адӟыса, пичи пиналъёслэн синъёссы шумпотонэн пачылазы. Матысь тодмооссылы кадь, ог-огзэс куспетӥ карыса веразы умоесь но лякытэсь воспитательёссы сярысь. Астэ умой возиськод ке, ческытэсь кузьымъёс, пе, сётъяло. Ӵем гинэ шулдыръяськонъёс, ӵошатсконъёс ортчыло, пыласькыны нулло. "Ми тужгес но яратӥськомы анай кариськыса шудыны" - огкылысь веразы нылъёс. Сюдо туж ческыт, котькуд нунал пӧртэм пыжиськемъёс, тазалыксэс юнматон понна кислородной коктейль но турын-куаръёсын напитокъёс сектало. Пиналъёс мылысь-кыдысь возьматӥзы кырӟаны но эктыны быгатэмзэс. Вылтуссыя нылпиос одӥг но уг висъясько кадь семьяын, анай-атаен будӥсь пиналъёслэсь: мунё кадь чебер дӥсямын-кутчамын, чылкыт утялтэмын, эктыны но кырӟаны быгато, серекъяло но шумпото. Анай-атаен будӥсь пиналъёс сямен ик, соос но санаторийын куд-ог дыръя "дорам бертэме потэ", шуо. Озьы соос нылпи юртсэс "дор" шуо. Соос туж пичиесь на. Валало-а меда ма муген но малы та юртэ сюремзэс? Оло, асьсэды нылпи садын кожало-а? Нылпиослэн синъёсазы адӟиське шумпотон но ӟечезлы оскон. Угось соос аналтэмын ӧвӧл, ульчаостӥ уг калтырто. Интыямын шуныт, шулдыр юртэ. Вӧзазы лякыт сямо, котьку юрттыны дась луись но улонысь чеберзэ адӟыны дышетӥсь воспитательёссы. Пичи дырысен ик улонлэн палэназ кылем нылпиос, азьланяз шонер сюрес бырйыса, бадӟым шудзэс мед шедьтозы но, асьсэды ултӥятэк, сэзь мед вамышъялозы. Лена ВАСИЛЬЕВА, УдГУ-ын дышетскись. . Нылпи юртлэн кивалтӥсез В. Ф. Хлопушина. Котьку задор мылкыдо, сэзь. . Санаторий мугорез кыдатэ, книгаосын эшъяськытэ. . Та муспотон шудонъёсты нылпиослы кузьмазы воспитательёссы. 7-30-1 Ялон Кутскиз газетъёслы но журналъёслы 2002-тӥ ар понна гожтӥськон Гажано лыдӟисьёсмы! Газетмылэн талэсь азьло потэм номераз гинэ ивортӥмы вал, "Ӟечбур!"-лэн вуоно арлы гожтӥськон дуныз 64 манет 77 коньы луоз шуыса. Нош али дыртӥськом кӧня ке шумпоттыны. Удмурт Элькунысь Печатья но иворъёсты вӧлмытонъя министерстволэн но УФПС-лэн лыдӟисьёс сярысь сюлмаськеменызы, республикаямы потӥсь газетъёслы но журналъёслы вуоно ар понна дунъёс 1-тӥ куарусёнозь (сентябрёзь) кылем арын кадь ик луозы. Тодады вайытӥськом: "Ӟечбур!" газетлы 37 манет 75 коньыен гожтӥськыны быгатоды, нош "Кизилилы" - 45 манетэн. Собере дунъёс будозы. Озьыен, кинлэн коньдонзэ шыръямез потэ, гожтӥськыны тырше август толэзе ик. Газетмылы 37 манет 75 коньы тырыса, тӥ басьтоды бадӟымзэ но, пичизэ но газетэз (пичизэ гинэ басьтыны малпаськоды ке, гожтӥськемды луоз 1-тӥ сентябрьысен гитнэ, малы ке шуоно, индексэз тодмо ӧвӧл на). Кыӵе ке валамтэосты кылдӥзы ке, вазиське почтальонъёслы яке редакцие. . Ӟечбур!" - усто газет! Суредаз Диана НАУМОВА. Шор Постол школа. Завьял ёрос. 7-30-3 Инсьӧрысь куноос ВЕРОС Гужем. Вазь ӵукна. Марина но Оля губияны мынон сярысь вераськизы вал толон. Тани Оля, дорысьтыз потыса, Мариналэн коркаез пала вамыштӥз. Марина сюрес вылэ ӵапак дасяськем ни вылэм. Нылашъёс соку ик нюлэс пала шонтӥзы. Гуртсылэсь со кыдёкынгес, соин ик кык эшъёслы кемагес мыноно луиз. Пыдзы но жадиз, нырысь-валысь кӧня ке шутэтскизы, нюлэс куше пыризы. Отын шулдыр: тюрагай кырӟам, сизь кокаськем, кикы силем куараос кылӥсько. Нош котырдэ сак учкид ке, чебересь сяськаос, ӝужытэсь писпуос син шоры йӧтозы. Шулдыр, макем шулдыр нюлэскын! Мариналэн но Олялэн мылкыдзы эшшо но бурдъяськиз. Тани Оля вӧёгуби шедьтӥз, собере нош ик, шумпотыса эшезлы шуэ: - Марина, мон вить губи шедьтӥ ини, нош тон? - Мыным уг удалты, - ӝожмыт куараен вазиз Марина. - Чаль, иське, дорам, татын трос ай! - кеськиз Оля. - Бен вань ик-а мар-а губиез? - О-о, Маринӥ, чаль-чаль, мон ведь быдто ваньзэ. Озьы гинэ шуыса Оля вуттӥз но, матазы вераськем куара кылӥськыны кутскиз. Марина соку ик кинзэ тодмаз: - Оля, ма со Витя агай ук. - О-о, Таня апайлэн но куараез кылӥське. Ойдо соос пала мыном, оло, отын губиез тросгес. - Ойдо, - шумпотыса вазиз Марина. Тани нылашъёс тодмооссы пала вамыштӥзы. Оля шаплыгес нылаш бере, Мариналэн азяз кариськиз. Кӧня ке мынэмзы бере, Оля шуак дугдӥз. Марина кышкаса кадь юаз: - Оля, мар луиз? - Учкы ай отчы, мар ке горд тыл пиштэ. - Адӟи, Оля, ойдо кошком татысь, мон кышкасько. - Эн кышка, огнад ӧвӧл, асьмеос кыкнамы. Ойдо ай матэгес мыныса учком. Марина кышкасагес ик Оля бӧрсьы вамышъяз ини. Соос писпуос сьӧры ватскыса учко горд тыл пала. Марина паймыса Олялы шыпыртӥз: - Оля, адӟиськод-а, лобась тэркылы уг-а укша со? - Зэм но. Нош учкы ай, Витя агай но Таня апай мар-о отын сыӵе каро меда? Йыразы езъёс тыремын, пельёсазы розеткаос, асьсэос лапегесь... Марина, Марина, учкы ай, атаед тэркыысь потӥз! Тынэсьтыд но лапег ук. Кыӵе ке мукет кылын вераське Витя агаен, куараез но укыр зӧк. - Со мынам атае ӧвӧл, Оля. Атае лапег шат, нош тусыз зэм но сыӵе ик. - Марина, кинъёс бен соку соос? - Уг тодӥськы. - А-а! Мон тодӥ кадь, соос инсьӧрысь вуэмын. - Зэм но, соос лапегесь луо, йырсизы интые - езъёс, пельёссы интые - розеткаос. Соос, пе, адямиосты адӟо ке, куто но сьӧразы нуо. - Марина, ойдо, иське, чалягес татысь кошком, асьмемыз но сьӧразы нуозы, - Оля куалекъяны кутскиз. Нылъёс пегӟыны ӧдъязы вал но, вайёс борды канжаськыса усизы. Инсьӧрысь вуэмъёс соку ик сак кариськизы, нылашъёс пала вамыштӥзы. Нош Маринаез но Оляез адӟыса, дыртыны кутскизы. Со куспын губиясьёс, кызьы султэмзэс но валатэк, эх бызё ук! Марина жадиз, век-век шока... Со куспын Маринаез кырмизы, нылаш шуш куараен кесяське: - Лэзе монэ, лэзе, шузиос!.. - Марина, султы! Мар-о озьы корка тыр черекъяськод? - вожез потыса вазиз нылашлэн бадӟым выныз, Миша. Нылаш нырысь ик мазэ-созэ ӧз вала но, нош ик кеськиз: - Оля, кытын тон?! - Кыӵе тыныд Оля, мон со - Миша. Султы, школае мыноно, анаен атай ужаны мынӥзы ини. Марина валес вылысьтыз тэтчиз но юаз: - Миша, тонэ но кутӥзы-а мар-а? - Кинъёс? - Инсьӧрысь вуэмъёс... - Тон изиськод на-а мар-а? Сайкиськы ни, школае бере кылёд. Сочиненидэ но гожъямтэед... Марина сэзяк кариськиз. Собере чаляк дӥсяськыса, мисьтӥськыса но сиськыса, сочинениез борды пуксиз. Кыӵе ке но фантастика верос гожтыны косӥллям. Нылашлэн соку ик уйвӧтэз тодаз лыктӥз. Оля эшезлы но вераз юмоке сюрылэмзэс. Света СТЕПАНОВА. Улын Юри гурт. Пичи Пурга ёрос. 7-4-4 Тазалыксэс юнматӥзы Инвожо толэзе Вараксино шор ёзо школаын ужаз тазалыкез утёнъя лагерь. Отын шутэтскизы 1-4-тӥ классъёсысь витьтон кык пиналъёс. Котькуд ӵукна нылпиос зарядка лэсьтылӥзы. Соосты туж ӟеч сюдӥзы. Смена йылпумъяськон азьын шутэтскисьёс чеберскизы, тазалыксы юнмаз. Котькуд нунал пӧртэм ужрадъёс ортчытъязы. Пиналъёс шумпотыса тодазы ваё драмая кун театре ветлэмзэс. Татын соос учкизы "О серебряном блюдечке и наливном яблочке" ӟуч кылын пуктэм спектаклез. Ижкарлэн 80 ар тырмонэзлы сӥземын вал "Лӧпшо Педунь дорын куноын" нимаськись ужрад. Пиналъёс ветлӥзы Ф. Кедров нимо библиотекае, "Поле чудес" шудон ортчытӥзы. Удмуртилэн кылдэмез сярысь трос выльзэ соос тодӥзы. "Нюлэс сюресъёстӥ мынон-ветлон" ужрадын экологияя тодон-валанъёс басьтӥзы. Тунсыко но пайдаё ортчиз ГИБДД-лэн инспектореныз пумиськон. Со пиналъёслы тодазы вайытӥз сюресъёсты выжон правилоосты. Трос ортчылӥзы спортъя ӵошатсконъёс, шашкиен но шахматэн шудонъёс. Вормисе потӥзы 5-тӥ классысь Илья Хасаншин но 3-тӥ классысь Анжела Сапожникова. Соос пусъемын Данъян грамотаен но кузьымъёсын. Со сяна, лагерьын ужазы эктонъя, кырӟанъя кружокъёс, спортъя секциос. Спортивной отрядысь пиналъёс ыбылӥськонъя но велосипедэн ворттылонъя ӵошатсконъёсы пыриськизы. Котькуд нунал пумын пиналъёс нимысьтыз лэсьтэм туп вылэ пусйылӥзы асьсэлэсьт мылкыдъёссэс: горд буёл туж ӟеч мылкыдзэс вера; ӵуж - ӟечгес мед луысал но вожен - умой шуыса. Тросгес соосты буёл люкаськиз. Озьыен, пиналъёслэн шутэтскон дырзы удалтӥз. Соосын ужазы Е. С. Лобанова, В. Г. Шутова но лагерьлэн кивалтӥсез Н. Г. Коробейникова. В. М. ЛАГУНОВ. К-6-1 Мынам шаере Кызьпуос лэйкало- Со мынам шаере. Куддыр чус, я тӧло- Со мынам шаере. Идӟи шур быльыра - Со мынам шаере. Шунды гур пызьыра - Со мынам шаере. Куддыръя гудыръя - Со мынам шаере. Сӥзьыл зор кыдыра - Со мынам шаере. Кин уз кушты монэ - Со мынам шаере! Кин мынэ азьлане - Со мынам шаере! Горд узы пальыша- Со мынам шаере. Мон - Котков Алёша, Нош таиз кылбуре. Алёша КОТКОВ. Петуньки школа. Шаркан ёрос. 8-2-3 Кемыз тыныд, кион! ВЫЖЫКЫЛ Вуиз тол. Музъемез лымы шобыртӥз. Писпу дортӥ куасэн кион нискылтэ. Кияз - пурт, синмаз - очки. Кылыз муз вылэ ик йӧтэ. Дыльдыез вия. Штанэз пась, чыртыяз - шарфик. Со луд кечез адӟиз но визьтэммиз. Писпу мышкы луд кеч кариськиз но куалекъя. Гырк пушкысен коньы ваньзэ адӟиз. Собере луд кеч но коньыез синйылтӥз: - Коньы, мыным юртты. - Ярам, - шуиз коньы. Со луд кечлы гозылэсь лэсьтэм тубатсэ сётӥз. Собере кыкназы писпу гырке интыяськизы. Отчы кион пумен вуиз: - Луд кеч, чалякгес васькы коньы дорысь. - Бе-бе, - вазиз луд кеч. Нош коньы бадӟым кускылизэ поттыса, кионлэн кымыс шораз ик сализ. Соизлэн очкиез тарс! пилиськиз. Ым пушкысьтыз одӥг пиньыз но усиз. Кион зар! гинэ бӧрдыса лашкинтӥз. Куассэ но сэрпалтӥз, ява. - Кемыз тыныд, кион! - шуизы коньыен луд кеч. Света ЧУРАШОВА. Итэш гурт. Пичи Пурга ёрос. "Вунонтэм гужем" конкурсэ Вылтӥяськись тыпы ВЫЖЫКЫЛ Нюлэс кушын улӥз-вылӥз батыр писпу. Ог ӵукна со доры Сизь лыктэм: - Тыпы, тынад сул улад - нумыръёс, нош куаръёс вылад - буртчин бубылиослэн пузъёссы. Тон туж курадӟод. Оло, юрттоно? - Эн вераськы оломар но. Эн кышкаты, мон номырлэсь уг курдаськы, мон - Тыпы, - йырзэ урдыса вазем со... Ортчем толэзь. Сизь нош ик вуэм Тыпы доры. Шораз учкем но паймеменыз ымыз ик усьтӥськем. Нюлэс батыр копак воштӥськем. - Ма, Тыпы, кытчы пыризы куаръёсыд? - юам Сизь. - Э, Сизь, Сизь... Куаръёсме нумыръёс сиизы, али но вылтыртӥм ветло на кадь. Оло, юрттод? - ӝожтӥськыны ӧдъям Тыпы. - Бен ойдо утчалом, - вазем Сизь. - Но мон огнам гинэ соосты быдтыны уг быгаты, эшъёсме ӧтё. Верамын - лэсьтэмын. Бурдоос чаляк люкаськиллям. Пислэгъёс бубылиоссэ октӥллям, шырчикъёс сул улысьтыз нумыръёсты куяллям, нош кикыос гоно нумыръёсты потталлям. Ӝытлы соос ужзэс быдтӥллям. Тыпы туж шумпотэм, бурдоослы бадӟым тау карем, озьы ик вылтӥяськылэмез понна возьдаськем но. Аля ИЛЬИНА. Улын Юри школа. Пичи Пурга ёрос. Зор юрттӥз (Клава Журавлёвалэн 25-тӥ номерын печатлам суредэзъя выжыкыл) Улӥллям-вылӥллям кык эшъёс, Таня но Катя. Огпол соос тэтчаса шудыны малпаллям: кин вылэгес? Таня туж вылӥе - инбаме - тэтчем. Кельшем солы инбамын, отчы ик улыны но кылем. Солэн Катя эшез пичи мугоро вылэм, соин ик туж куректылэм. Таня малпам солы юрттыны. Огпол Катя ураме шудыны потэм, нош инбамысь эшез пилемъёсты зорзэс уськытыны косэм. Зор улын кема шудэмез бере, Катя бадӟым будэм. Со дырысен адямиос шуо: "Будэмед потэ ке, зор улын бызьылоно". Наташа ЛЮБИМОВА. 8-3-1 Герӟа лыдӟисьёсын кусыёсмес Кытчы гинэ уг вутты улон питран адямиез: нюко-гопо сюресъёстӥ нуллэ, пӧртэм интыосын, быдэсъямтэ ужъёсын тодматылэ. Озьы ке но, кулэ интые ик вае. Н. Н. Мухачёвалэн но тани улон питранэз ас интызэ шедьтӥз. Куке но малпалляз-а вал меда Надежда Николаевна ужан удысэз почта ужен герӟаськемын луоз шуыса? Егит нылаш, школазэ йылпумъяса, Ижын вузкарисе дышетскиз. Собере ужаны ӧтизы механической заводэ. Татын уго улон инты сётом шуыса оскытӥзы. Нош та юан егитъёсты котьку ик сюлэмшугъяськытэ. Зэм но, Надялы улон инты висъязы. Нош 1993-тӥ арын Надежда Николаевна выльысен Сюмси ёросысь Зон черкогуртаз берытскиз. Нылыз вордскиз но татчы ик улыны кылиз. Ижкарысь улон интыез буш ке но вал, вордскем палъёсызлэсь люкиськыны ӧз ӵыды ни. Собере почтае уж но дэмлазы. Ӝыны ар ортчыса, нылкышнолы почтаен кивалтыны, аслыз ик газет- журналъёсты лыдӟись кие вуттыны оскизы на. Надежда Николаевна ужзэ ӟеч быдэсъя. Юанъёсын вазиськисьёслы котьку пальышаса, лад-лад валэктэ. Ужан интыез но та чырмыт кивалтӥсьлэн ялан чылкыт, югыт. Борддор кузя читыр- чутыр будӥсь гульёсыз, укно дурысь усьтӥськем сяськаосыз эшшо но котырзэ шулдырто на. Со доры пиналъёс но, мӧйыос но пырало, улэм-вылэмзы сярысь вераськыны яратӥсьёс но уно гинэ сюро. Соин ик, лэся, гурт калыкеныз со ялан огинын, ужез но синмаськымон ӧръяське. . Н. Н. Мухачёва. Туспуктэмез Ю. Ивановлэн. 8-3-2 Анае - дышетӥсь Зоя Бетӥсь али но соос шоры пичи муртъёс шоры кадь учке, ненег будосъёсын ӵошатэ но соослы али но яркыт шунды кадь пальпотэм, небыт зор кадь шуныт кылъёс кулэ на шуыса малпа. Кема син азяз возёз туэ келям дышетскисьёссэ но. Витетӥ классэ потэм дас вить кузя пиналъёс Зоя Борисовналы ваньзы ик дуноесь. Кудӥзлы дышетскон шугенгес сётскиз, кудӥзлы капчиен. Но соос ваньзы тыршизы дышетскыны. Тужгес но умой пишме вал Абрамова Катялэн, Девятова Алёналэн, Титова Надялэн. Надя Титовалэн журналист луыны мылкыдыз вань. Соин ик со творчествоя кружоке ветлӥз, кудзэ нуиз кылбурчи А. Перевозчиков. Со сьӧры кыстӥськизы мукетъёсыз но. Оскисько, азьланяз но мынам анаелэн дышетскисьёсыз тыршисесь луозы, пӧртэм ужрадъёсы пыриськылозы но ӟеч сямо будозы шуыса. Сергей АГИЧЕВ, УдГУ-ын дышетскись. Туспуктэм вылын З. Б. Агичева урок нуэ. К-6-2 "Тютю Макси" Шур дурын пичи Вити Тютюос возьма, Утчаське отӥ-татӥ: Ышозы я ма. Пылаське ини Вити, Ӵӧжпиос вуно. Бызьылэ ичи вутӥ - Туж шуныт ву но... Ӵожпиосыз пегӟизы - Вот "Тютю Макси"! Шат озьы возьмалозы Ӵуж пипиосты? Тышкаськиз ук анаез: "Кытын ӵӧжпиос?" Ярам, Куинез сянаез, Вуизы соос... Алёша КОТКОВ. Петуньки школа. Шаркан ёрос. К-6-3 Ӵӧжпиос Нина потэ азбаре, Ӵӧжпиосты утялтэ. Чуки-беки вамышто, Нылашлэсь сиён куро. Син шорын тыро таба Ӝог гинэ тӥни буша. Чаляк соос будӥзы, Пукыль-пукыль луизы. Надя СПИРИДОНОВА, Вуж Монья школа. Пичи Пурга ёрос.