Армия Ӵышкемын йырыд туннэ понна пилеш, Автомат Калашников луиз ук эш. Берпалад сержант сапегеныз ӵыжаз, Тырмемын пӧсям вуэн противогаз. Сурон сапегъёс пыд куостэ ниё, Бызиськод коть нюр, коть гужтылӥсь луо. Бырйымтэ сюрес капчи уг сётӥськы, "Осто, Инмаре", - шуны уд дӥсьтӥвськы. Тон али тодӥд кыӵе со Армия, Пӧсям ву тыбыр кузяд шурен вия. Сиёнлэсь ческыт-кӧшсэ уд валаськы, Кӧлыса ческыт уммед уг сайкиськы. Шунды ӝужамлэсь азьло кесько: "Подъём!" Ньыльдон вить секунд куспын дӥсяськиськом. Нош но, нош но, нош нунал пӧрат Тыл но ӵын, противогаз но автомат. Нощ малпанъёсад чебер нылъёс гинэ, Кытын ке но, дыр, али витё тонэ. Азьлолэсь быдэс йырлы ӝужыт будӥд, Мугорыд таза, силё-виро луид. Нокинлэсь но табере уд кышкаськы, Тушмонэн но ваче син уд куалекты. Табере тонэ мырдэм тодмалозы, Ваньзы чебересь нылъёс синмаськозы. Ныр улад вуиз ини доре бертон, Вал, пияш, нош табере зэм воргорон. Уно Хольмберг Перма калыкъёслэн осконъёссы Азькыл Удмуртъёслэн асьсэ инмарзылы осконзы котыр ласянь но мур-мур эскеремын. Та удысын тужгес но трос лэсьтӥзы ЪИЪ даурлэн кыкетӥ ӝыныяз ужам тодосчиос: Б. Гаврилов, Г. Е. Верещагин, Н. Г. Первухин, И. Н. Смирнов, И. Васильев но мукетъёсыз. Удмуртъёс доры вуылыкузы трос вӧськылъёс гожтыса кельтӥллям немец М. Бух, мадьяр Б. Мункачи, финн Ю. Вихманн. Тросэз удмурт лыдӟисьёс татчыозь уг тодо на Уно Хольмберг финн учёнойлэсь удмуртъёслэн асьсэ инмарзылы осконзы сярысь гожъямъёссэ. Уно Хольмберг (Харва) финн-угор калыкъёслэн религизы сярысь кӧня ке книгаос гожтэм. 1911 арын со удмуртъёс доры но вуылэм. Узыр материалъёс вылэ пыкъяськыса, со 1914 арын "Удмуртъёслэн осконзы" книгазэ финн кылын печатласа потттэ. У. Хольмберглэн ужез дуннеысь калыкъёслы тодмо луиз книгазэ 1927 арын англи кылын печатласа поттэмзы бере. Со США-ын потӥз "Дуннеысь вань расаослэн мифологизы" сериын. Санкт-Петербургысь тодмо тодосчи А. И. Емельянов 1921 арын поттӥз "Курс по этнографии вотяков" книгазэ. Та книгаяз со уже кутӥз У. Хольмберглэсь материалъёссэ. Та кык авторъёслэсь одӥгзылэсь но книгаоссэс шедьтыны уг ни луы. Кылем арын милям куреммыя Швециысь Упсала университетысь тодмоос огдырлы Хольмберглэсь финн кылын поттэм та книгазэ келязы. Удмурт кылэ берыктон ужез ас вылаз басьтӥз УдГУ-ысь Кылтодонъя мынам кивалтоно лабораториям ужась егит тодосчи Сергей Максимов. Фотооссэ сканировать карыса кельтӥз лабораториям ужась Ян Насибуллин. Риф Насибуллин, филологи наукаосъя доктор. Уйпал Россиын улӥсь ӵыжы-выжыосмы сярысь тодонъёс нырысьсэ вӧлмизы норвежецъёслэн экспедициоссы пыр. Соос йӧ зарезьтӥ уяса ветлӥзы но Тӧдьы (Белое) зарезьлэн пыдлось ярдуръёсыз дорозь вуылӥзы. Отын интыяськемын вал выжыкылъёсын чебермаса суредам Кун-биярмъёслэн шаерзы. Со ванё-буро улӥсь калыкен викингъёс вузкаро вылэм. Но соку, ожгаро вакытъёсы, вузкарыны мынон ӵемысь пӧрмылэм таласа ветлонлы. Экспедициоссы дыръя биярмъёслэн Шунды пуксён палась бускельёссы валаны тыршылӥзы соослэсь улон сямъёссэс, трос инмарлы осконъёссэс. Со вакытъёсты тужгес ӟеч возьматэмын Святой Олавилэн улэмез сярысь веранын. Отын мадиське норвежецъёслэн 1026-тӥ аре биярмъёслэсь куалаоссэс, вӧсяськон интыоссэс таласа-куашкатыса ветлэмзы сярысь. Кинъёс бен вал со биярмъёс? Уйпал Россиын улӥсь Перма калык сярысь со вакытэ потӥсь ӟуч журналъёс верало, соослэн, пе, улоссы вӧлмемын вылэм Тӧдьы (Белая) зарезь дорысен Печораозь но Юграозь. Туала кылын вераса, Перма калык - со коми калык. Соос вазен ик вузкарыса кусып возё вылэм ни Новгородэн. Нош берло новгородъёс Перма шаерлэн пыдлось музъемъёсаз походэн ветлыны кутско но отысь асьсэлы музъем басьяло. Собере пермаосты пумен выт тырись ляльчилы пӧрмыто. Новгородъёслэн тыршеменызы ик комиос финн калыкъёс пӧлысь самой азьло христиан черк улэ сюро. Ӟуч журналъёс верамъя, одӥг Киев монастырьысь святой Герасим монах 1147 аре ик ини туала Вологда улосын христиан оскон сярысь ивор вӧлмытэ вылэм ни. Нош 1193 аре потэм журнал ивортэ, новгородъёс кыдёке уй пала мыныкузы, сьӧразы, пе, попъёсты но басьтыны ӧз вунэтылэ. Новгородъёслэн перма калыклэн осконъёсынызы но вӧсяськонъёсынызы тодматскыны умой луонлыкъёссы вал, но жаляса верано, адӟемъёссэс но кылэмъёссэс соос гожъяса кельтӥллямтэ. Берлгогес ини, дас куинетӥ дауре, святой Стефанлэн улэмез сярысь гожъямын кӧня ке кӧня ке поттылэмын, вашкала перма калыклэн вӧсяськон сямъёссы сярысь. Сос номырин воштонтэм дуноесь луо, малы ке шуоно, со бере нокытысь но уд шедьты ни сыӵе материал.Кужмо ӟуч черк комиосты угось чылкак котыраз бинялтэ, пересьёссылэсь вашкала осконъёссы йырысьтызы ыше. Комиосын ӵошатыса, удмуртъёс асьме нуналозь утьыны быгатӥллям вашкала вӧсяськон сямъёссэс. Соос тужгес но возисько ӵук пал но лымшор пал удмуртъёс пӧлын. Малы ке шуоно, уй пал удмуртъёсты, Слободской но Глазов ёросъёсын улӥсьёсты, Иван Грозный вакытэ ик кужмысь черке пыртылыны кутскизы, нош Кузон, Оса, Бирск, Бугульма ёросъёсы христиан осконлэсь пегӟыса вуэм удмуртъёс быдэсак утыны быгатӥзы асьсэ осконъёссэс. Христианстволэн вӧлмемез шоры учкытэк, ӟуч черк улэ вазь сюрем удмуртъёс пӧлын но возисько на вашкалаоссылэн куд-ог оскон сямъёссы. СУРЕД Бусы вӧсь. Кузон губерниысь Мамадыш ёросысь Вуж Юмья гурт. Калыклэн сюлмысьтыз угось дауръёсын возиськем йылолъёссэ быдтыны капчи ӧвӧл. Уй палась но адӟылыны луэ на шукырес чебер вӧсяськон арамаосты, кытын гурт калык куд-ог дыръя виро сётэ, тужгес но кыӵе ке шуг-секытъёсын, куректонэн пумиськыкуз. Удмуртъёслэсь инмаръёссылы осконзэс возьматӥсь ужам мон кутӥ аслэсьтым 1911 аре экспедициос дыръя бичам материалъёсме. Соку мон ветлӥ Пермь, Уфа но Кузон губерниосын улӥсь удмуртъёс доры. Материалме сэрттыны-пертчыны, калык син азе яркытгес, валамонгес но пыр-почгес поттыны-возьматыны юрттӥзы тодосчиослэн калык осконъёс сярысь пӧртэм вакытэ пӧртэм сямен гожъямъёссы. Соослэсь нимтулъёссэс мон азьланяз пусъё. Тужгес но бадӟым тау кареме потэ Юрьё Вихманн профессорлы. Со эш мылкыдын мыным юрттӥз, туж кулэ ӵектонъёс но дэмланъёс сётӥз. Кулэмъёсты сӥлы карон Удмуртъёслэн валамзыя, адямилэн, мугорыз сяна, вань на адӟиськисьтэм люкетэз - лул яке урт. Берло вакытэ нырысетӥез валан мурт культуралэн пыӵамез улсын азьпал радэ потӥз, нош урт кыллэн валатонэз трос интыосын ышемын ни, ачиз кыл но туж шер кутӥськылэ, вашкала веранъёсын гинэ возиськемын на. Пермь но Уфа губерниосын улӥсь удмуртъёс гинэ урт кылэз утьыны быгатӥллям, малы ке шуоно, соос асьсэ вашкала оскон йылолъёссэс возё на. Татысь удмуртъёс, адямилэн лулпуш дуннеез сярысь вераськыкузы, берло кылдэм лул кылын артэ азьло сямен ик урт кылэз но куто. Кылсярысь, соос шуо: пырс уртэз кошкем (лулыз кошкем). Тазьы соос верало кинлэсь ке но кыӵе ке муген туж кужмо кышкамзэ. Угось инкуазен герӟаськем трос мукет калыкъёс сямен ик, соос оско, кышкатскыкуз адямилэн лулыз ас улоннизэ кельтэ шуыса. Удмуртъёслэн валамзыя, лул кошке секыт висьыку но. Сое утчаны туно-пеллёез ӧтё, адями, пе, берен йырсазьзэ мед шедьтоз, мед йӧналоз. Таӵе йылолэз соос урт кутон (лулэз утчан) шуыса нимало. Уфа губерниын урт кутон кылын озьы ик нимало ним выльдон йылолэз. Сое ортчыто пинал висьыны усён дыръя. Нылпилы вордӥськыкуз ним мыдлань сётэмен, пе, со висён кылдэмын. Таӵе югдур вылысь адӟиськом, макем зол ог-огенызы герӟаськемын адямилэн нимыз но урт. И. Васильев тодосчи Вятка но Кузон губерниосысь удмуртъёс сярысь ужаз пусъе, Сарапул уездысь удмуртъёс вылӥын верам йылолэз озьы ик шуо: лул утчан. Но та веран берлогес кылдэмын ни, дыр. Кышкатскыку но висьыку сяна, изьыкуз но адямилэн уртэз мугорызлэсь люкиськылэ, пе. Соку со адӟиськись луыса но потыны быгатэ, ӵемгес урткыӵ (лобась шыр) тусын. Уфа губерниысь одӥг пересь удмурт валэктӥз, урткыӵъёсты, пе, нуназе ноку но адӟыны уг луы, соку адямиос уг изё угось. Изись адямилэн уртэз потыку гинэ, пе, урткыӵъёсты адӟыны луэ. Адӟиськись урткыӵ адями доры матэктэ ке, со возьматэ, кыӵе ке ӵыжы-выжыезлэн яке тодмоезлэн лулыз луэ шуыса. Урткыӵ зэмзэ но лул тылобурдо луэ шуыса, пересь таӵе веранэныз но возьматӥз: "Одӥг пиосмурт изьыны выдэм, нош юлтошъёсыз азбаре пукыса кылиллям. Соос адӟиллям, кызьы урткыӵ лобаса ветлэм. Сайкамез бере, пиосмуртлэсь уйвӧтаз мар адӟемзэ юало. Соиз шуэм, отӥ но татӥ ветлӥ, пе. Ӵапак урткыӵ ветлэм интыосты верам. Соку воргоронъёс таӵе малпанэ вуиллям: адӟем урткыӵ - со кӧлӥсь пиосмуртлэн лулыз вал, пе. Адямилэн уртэз сайкамезлэсь азьло ас улоннияз бертыны уг вуы ке, пе, соиз висьыны усе, кӧдэктэ но ӵакме. Соин ик кӧлӥсь муртэ шӧдтэк шорысь, шуак, кужмысь сайкатыны уг яра, пе. Урткыӵ тусын сяна, лул озьы ик пичи тӧдьы бубылиен адскыны быгатэ. Со гужем ӝытъёсы югыт укно доры лыктэ. Тужгес но тазьы ӵыжы-выжыоссы доры вуо кулэм муртъёслэн лулъёссы. Кузон губерниысь одӥг удмурт кышномурт, кулэм атайзэ буре ваён ӝыт ортчытыкуз, бубыли укно сьӧрын лобаны ӧдъям но шуэм: "Тани атайлэн тусыз бубылилы пӧрмыса вуиз". Куд-ог дыръя улэп адямилэн но лулыз тазьы адскыны быгатэ, пе, Бирск губерниысь Можга нимо гуртын трос пол кылӥ: адями туж зол кышкаку, урт мугор бордысь ишкалске, пе. Соку соос туно-пеллёлы вазисько. Соиз, тӧдьы ӵушкон кутыса, уртэз утчаны кошке. Котькытӥ утчамез бере, бератаз со пичи тӧдьы бубылиез адӟе, сое кутэ но ӵушконэныз корка пыртэ. Собере ӵушконзэ бубылиен валче быдэс уйлы висись муртлэн чыртыяз бине. Ӵуказеяз ӵукна ӵыжатэм тӧдьы узвесез кисьтыса эскеро, зэм ик-а кутэм лул бубылизы висись муртлэн уртэз луэ шуыса. Уртсэ кисьталом шуиськись йылолэз тазьы ортчыто. Ӵыжатэм тӧдьы узвесез туно-пеллё кыл вераса вуэн тазэ кисьтэ но висисьлэн йыр выллапалаз возе. Узвесь вуын уг пазьгиськы, быдэсак чебер суред кылдэ ке, висисьлэн уртэзлэн шедемез сярысь тодмо луэ.Урт кутон узвесь суредэз ибырвесь (омулет) чотын кышкам муртлэн чыртыяз ошо. Кӧлӥсь муртлэн лулыз мугорысьтыз бубыли луыса потэмез сярысь выжыкыллы укшась верамез озьы ик мон гожтӥ Кузон губерниысь Мамадыш уездын: "Кык воргоронъёс нюлэскы пу кораны мынӥллям. Лымшор вакытэ шутэтскыны пуксиллям. Огез умме усем. Юлтошез адӟем, кызьы солэн лулыз бубыли тусын ымысьтыз лобӟем но сьӧразы нюлэскы ваем вуэн ведрае пырем. Вуысь беризь гырке лобӟем, собере выльысь ву ведрае вуэм но отысь берен кӧлӥсь муртлэн ымаз пырем. Соку изись мурт сайкам. Сайкамез бере юлтошезлы шуэм: "Уйвӧтам адӟи, шур вамен уяса выжи шуыса. Сопал ярдурын гырко писпу сылэ вал, нош отын тросаз зарни коньдон". Ужзэс быдэстыса, воргоронъёс гуртазы бертӥллям. Нош кӧлӥсь муртлэн юлтошез, кӧня ке улыса выльысь нюлэскы мынэм но эшезлэн уйвӧтаз адӟем гырко писпуэз утчаны кутскем. Шедьтэм со писпуэз, нош гырказ, пе, тросаз зарни коньдон". Выжыкыл мадись воргорон лулэз та кылын ик нимаз ке но, лул бубылиез со урт бубыли шуыса вераз. Та бубылиез йӧтылон яке виён удмуртъёслэн бадӟым сьӧлыкен лыдъяське. Лул бубыли осконэз но соин герӟаськем тӧдьы узвесен тунан йылол финн выжыослэн гинэ осконэнызы лыдъяны уг луы, дыр. Малы ке шуоно, та выллем сямъёс мукет палъёсын но пумиськыло. Кыслярысь, славянъёслэн но вылэм лулэз кутон сямзы. Нош лул бубылилы оскон индогерманъёслэн вашкала дыръя котькытын вӧлмемын вылэм. Озьы ик мукет выжы калыклэсь асэстэмын, луоз, адями изьыку, луллэн урткыӵ тусын лобамез но. Та оскон угось ӵук пал Европаысь куд-ог мукет калыкъёс пӧлын но вӧлмемын. Кылсярысь, бигеръёс но башкиръёс пӧлын. Удмуртъёслэн лулэз ниман кылъёссы но соосын герӟаськем валанъёссы озьы ик тупало комиослэн лол (яке лов) но орт кылъёссылы. Соослэн но лолзы туала вакытэ азьпал радэ поттэмын. Орлов уездысь пермаос сярысь Добротводский маде, соос кулэм муртсылы кисьтон ортчытыкузы ӧсэз усьто, ӝӧк сьӧры пуксё но кулэм муртлэсь лулзэ ӵош сиыны-юыны ӧте шуыса. Лол кыл вашкала пуштроссэ ик кельтэм шуыса тодыны луэ Налимов тодосчилэн пусъем осконъёсысьтыз: комиослэн валамзыя, лов, йыркобы пушкын улэ, пе, нош адями кулэ ке, буслы пӧрмыса, омыре пегӟе. Та тодосчи ик гожтэ таӵе веранэз: лол одӥг кышномурт дорысь изьыкуз кошке но пичи шыр тусын кӧлӥсьлэн гадь вылтӥз солань-талань бызьылэ. Со вакытэ нылкышнолэн ымыз шобрет улэ шеде, нош лул буслы пӧрме но мугор пушкы бертэ. Луллэн шырлы пӧрмемез сярысь оскон комиос доры ӟучъёс пыр вуэмын, луоз, малы ке шуоно со пумиськылэ герман выжы калыкъёс пӧлын но. Комиослэн лул сярысь осконъёсазы лол валатонэн артэ трос интыосын пумиськылэ вашкалаезгес но - орт. Но солэн пуштросэз кӧня ке воштӥськемын ни. Орт - со трос адямиослэн утись-кузёзылы кельше. Налимов маде, котькуд адямилэн ортэз вань шуыса. Со, пе, адями вӧзын, котыраз улэ, ужаз пыриське, нош уйвӧтаз утёно муртэзлэн тусыныз адӟиське. Мукетыз Попов тодосчи пусъе, нылпилэн ортэз вордӥськыкуз кылдэ но, котьку сьӧраз ветлэ шуыса. Со сяна, тросэз гожъясьёс пусъё, орт нырысь ик кулонэз ивортӥсь шуыса. Адями кулыку, со чагыр тыл яке адямилэн тусыз кадь луыса мугорысь потэ. Куддыръя, пе, орт улэп адямилэсь кузэ лыз вишты пуксьымон чепыльытлэ. Мугоре лыз виштыос пуксён сярысь сыӵе ик осконэз пумитаны луэ Сарапул уездысь удмуртъёслэсь но. Куд-ог интыосын вӧлмемын ортлэн адями мугорлэсь быдэсак висъяськемез сярысь валан. Кылсярысь, Видеманн тодосчи коми кыл сузьетаз (словаряз) пусъе, орт, пе, со кулэм муртлэн вужерыз, кузёез, син азьын адсконэз, ишанэз. Озьы ик ватса на, комиос ортлэн омырын улэмезлы оско шуыса. Нош Налимов вера, адямилэн ортэз тылобурдоос пушкы улыны интыяське шуыса. Таяз учыре кулонлэн тодметэз тазьы ялӥське: тылобурдо лобӟыса корка пыре но йырыныз маке борды лулыз потытозь йыга. Утись кузёез бӧрсьы ик ӝоген ачиз но адями кулэ. Озьыен, комиослэн ортсылэн лул тылобурдолы пӧрмем осконзы удмуртъёслэнлэсь висъяське. Озьы ке но, комиослэн орт но удмуртъёслэн урт кылъёссылэн пуштросазы кылемын на туж вашкала одӥг валанзы: ишан-лул. Нырысь ик тае юнматэ Налимовлэн ивортонэз, кудӥзъя адямилэн лулыз (лов) кулэм бераз орт пушкы выже но кулэм муртэн орт одӥг макелы пӧрмо. Тае ик возьматэ Кандицский тодосчи но: кулэм муртлэн тусыныз орт эшшо ньыльдон нунал адскылэ на, пе. Та дыр ортчем бере со ыше. Озьыен, Видеманн орт кыллэсь вашкала пуштроссэ "кулэм муртлэн ишанэз" шуыса юнме уг пусйы. Нош ик берытскомы комиослы ӵыжы-выжы луись удмуртъёс доры. Урт но лул ог- огзылэсь нырысь ик висъясько тани маин: адями изьыку яке висьыку уртлэн дырын- дырын улоннизэ кельтэмез луэ, нош лул весяк, адями кулытозь, мугор пушкын улэ. Нырысь-валысь лулэз нимаз лул чотын ӧз лыдъяллялэ, дыр, сое адямилэн улонэзлэн тодметэз луэ шуыса гинэ валаллязы, кудӥз шокан дыръяз бус луыса потэ. Мар со сыӵе лул но кытчы со кошке, удмуртъёс сое валэктыны уг быгато. Михаил Елабужский куд-ог пересь удмурт воргоронъёслэн мадемзы сярысь вера: адями кулэ ке, пе, солэн лулыз бус музэн омыре тӧлӟе. Кузон губерниысь удмуртъёс пӧлын таӵе малпан вань: бадӟым ведӥн кулыку, тӧлпери яке сильтӧл вордӥське. "Лул потыку" тӧллэн кылдэмез сярысь валан выль ӧвӧл ни. Адями кулыку, урт лул сямен ик, бервылтэм уг тӧлӟы. Со адями кулэм бере но, солэн мугорызлэн оглюкетэз, тодметэз луэ на. Тае валаны луоз, тодамы ваимы ке, урт кулэм муртлэн ишан яке вужер-лулыз шуыса верамез. Кулэм мугор кур вылын кылльыку, урт солэн котыртӥз ветлэ. Мугорез ватэм бере, со кулэм муртлэн дораз ӧжытак улэ на, собере шайвылэ выже. Нош отысь дырын-дырын адӟиськыны берталля. Уртэз, нимысьтыз сэбед ортчытыса, кытчы ке нимаз интые но улыны пыртыны луэ. Удмуртъёслэн уртсы кадь ик комиослэн ортэнызы герӟаськем югдур но. Попов тодосчи шуэ, комиос орт нимъем вашкала песяй-песятайёссылэн лулъёссылы йыбыртъяло, пе. Со лулъёс, пе, адями кулэм бере сыӵе интыостӥ ветло, кытчы кулэм мурт улэп дыръяз вуылӥз. Шайсьӧр улонэз удмуртъёс со дунне яке сопал дунне шуыса нимало. Соослэн валамзыя, дунне куинь люкето: ин, кудаз Инмар, инбамлэн инмарез улэ; музъем, кудаз адямиос уло; пыд улысьтымы музъем ул люкет, кудаз кулэм муртъёс уло. Георги тодосчи пусъе, удмуртъёс сопал дуннеез улон луонлыкъёсъя висъяло на, пе: вӧсяськыса улӥсь муртъёслы вань югыт улон, кудаз шеьтыны луэ шудбур но куаныса, ӟеч улон; сьӧлыкоос понна вань курадӟон инты. Отын тэкитэн пуртыосын, адямиосты пӧзьто. Но та валан удмуртъёслэн асьсэлэн уг луы. Верещагин тодосчи пусъе, Сарапул уездысь тросэзлэн сопал дунне сярысь валанзы таӵе, пе: отын одӥг выжыысь кулэм муртъёс ӵош уло, одӥг семья выллем. Семьялэн йырыз луэ выжыез кылдытӥсь- мытӥсь.Верещагинлэн гожтэмезъя, пусйыны кулэ созэ: отын, сопал дуннеын, ӵыжы- выжыоссы пӧлы уг басьто ассэ ӵашетыса, жугиськыса возись муртэ. Таӵе валан умой возьматэ, ӵыжы-выжыослэн шайзы кулэмъёслэн огъя улон интызы луэ шуыса, кытын котькудӥзлэн улонэз нимаз. Адями кулэм бере сое отчы нуыны азьло кулэм ӵыжы- выжыосыз лыкто. Отын улон быдэсак музъем вылын кадь: пинал будыны быгатэ, кузпалъяськытэк кулэмез - кузпалъяськыны. Музъем вылын улыкуз сямен ик ужа, кӧтыз сюма, ёрмыса улонэз но адӟе, кынме но мукет. Комиослэн но куке но таӵе ик осконзы вал шуыса, умой адӟиське куд-ог интыосын али но возиськем валанъёссы. Кылсярысь, адями кулэмез бере азьло ӧнерзэ (профессизэ) азьланьтэ: пӧйшурась пӧйшура, чорыгась чорыга. Со сяна, Налимов пусъе, соос коркаез но коросэз одӥг горт (корка) нимын нимало шуыса. Комиослэн малпамзыя, кулэм муртлы шайгу зэмос дорез луэ. Таӵе оскон тани кытысь но умой шӧдӥське: соос кышкало мурт музъем вылын кулыны, малы ке шуоно, отысь асьсэ палась кулэм ӵыжы-выжыоссы доры сюрозы шуыса уг оско. Лулзы, пе, ялан мӧзмыса улоз. Угось кулэм бере луллы одно ик ватэм мугор дорын улоно. Таӵе оскон вань комиос пӧлын ӧвӧл вӧлмемын. Христиан оскон вуэм бере, дунне шоры учконзы но, кулэм бере улон сярысь валанзы но воштӥськиз. Соин ӵош ик комиос пӧлын возиське на вашкала выжыоссылэн малпаськон амалзылэсь трослы вылӥын осконзы. Кылсярысь, куд-огез оско, адями кулэмез бере лулыз улыны мукет кизилиосы кошке шуыса. Отын улон, пе, музъем вылын кадьгес ик, но трослы чебергес но шудогес. Куд-ог интыосын озьы ик 1 Арысь аре 4,5-5 сюрс пала быдэ вуэм пиоссэ Удмуртия армие келя.17 аресысен пиосты военной комиссариатын ужасьёс син азязы возьыны кутско. Эскеро соослэсь тазалыксэс, шараяло висёнъёссэс , ыстыло эмъяськыны. Тодӥськом , ляб тазалыкенызы сэрен тросэз призывникъёс армие уг шедё. Но та лыдпус кышкамон бадӟым луэмын ини. 2000-тӥ арлы,кылсярысь, вань призывникъёс пӧлысь 56 процентэз гинэ тазалыксыя армиын службалы ярамон луиллям. Таӵе югдур берло 5 ар ӵоже одӥг кадь возиське ини. Приволжской военной округысь 13 улосвылосъёс пӧлысь Удмуртилэн та лыдпусэз тужгес но уродэз. Татарстанысь, Башкортостанысь бускельёсмы вӧзын артэ ик сылыны возьыт, соослэн югдурзы данаклы ӟечгес. Со возьматэ макем ляб асьмелэн пиосмылэсь тазалыксэс утён удыс. Ма сое гинэ шат? Асьтэос тодӥськоды кӧня коньдон басьто Удмуртиын ужаса улӥсьёс, сюрыло-а соослы мерлыко юрттэтъёс, дырыз дыръя-а басьто нылпи пособиосты. Отысь ик потэ кӧня но мар асьмеос сииськомы. Нош пинал мугорлы тазалыко будон понна кӧря ӟечлыко витамино сиён-юон кулэ - веранэз ик ӧвӧл. Кылем арын тулыс призыв дыръя 900 пиос сютэм улыса, шуыны луоз, армие мынытэк кылизы. Огъя тазалыксыя учконо ке, соос огшоры будэмын кадь. Ӝуждалазы но тырмыт, нош секталазы нормалэсь ӧжыт. Вуж сямен вераса, гипертрофия висён со, пиналъёс туж чиедэсь будо. Сыӵе пиос секыт ужез быдэсъяны уг чидало, армие басьтонзэс соослэсь 6 толэзьлы бере кельто. Сӥзьыл призыв бере но 200-ез соос пӧлысь мугорзылэсь секталазэс будэтыны, тырмыт но ӟеч сиськыны луонлыксы ӧвӧлэн , быгатӥллямтэ. Табере соос 3 арлы армилэсь мозмытэмын. Удмурт Элькун Кивалтэтын кык-куинь ар кылле ини военкомлэн ӵектон -куронэз, ляб тазалыко будэм пиосты армие мынон азязы быдэс толэзь дунтэк санаторийёсын эмъяно сюдоно шуыса. Коньдон шедьтымтэен та курон куронэн ик кылле. Пӧртэм висёнъёс пӧлысь тужгес но зол алямын психикаен герӟаськемъёсыз. 20-25 процентэз призывникъёс йырсазьзэс курадӟыто аракыен но наркотикъёсын шузимытыса. Сыӵеослы пыӵал-тӥрлык киязы сётыны нокызьы но уг яра. Ог ёзъёссэс юнме шорысь вӧсь карыны, виыны быгатӥсьёс казармае шедьыны кулэ ӧвӧл. Та ласянь военкоматъёс азе чурытэсь куронъёс пуктэмын. Куддыръя наркотикен эшъяськемзэс армие шедёно пиос ватыса но возё, сое шараян понна ВВК-лэн (военно-врачебной комиссилэн) али выль тест-амалъёсыз вань. Котькудӥз сыӵе тест 6 доллар сылэ ке но, военкомат со ыштонъёсты ас вылаз басьтэ. Угось адямилэн улонэз нокыӵе коньдонэн уг мертаськы. Озьыен, тест адямилэн вирысьтыз бышкалтӥськемез бӧрсьы 14 нунал ортчыса но наркотиклэсь бервылзэ шедьтэ на ке, со призывникез психиатри больницае тазалыксэ эскерыны ысто. Отысь эмчиослэн кагаззыя гинэ ВВК решение кутыны быгатэ: басьтоно яке ӧвӧл та пияшез армие. Призывникъёс пӧлын озьы ик туж зол вӧлмемын лы но быгыт (костно-мышечной) висёнъёс.Пиослэн ӵемысь кырыжскемын луэ позвоночниксы. Витетӥ классысен дас одӥгозь вошъятэк одӥг парта сьӧрын пук-ай но. ВВК-лэн дэмезъя пиналъёслэн мугоръёссы будэмъя партаос но быдӟалазыя вошъяськыны кулэ. Татын ми пиос понна гинэ дур ум басьтвське, нылъёс понна но, - шуэ Удмуртиысь ВВК-лэн тӧроез В.П. Ярыш. Нылъёслэн тазалыксы сярысь но государство сюлмаськыны кулэ. Угось соос вуоно анайёс, асьмелы ик вуоно солдатъёсты вордӥсь-будэтӥсьёс. Пичиысен ик сколиозэн висись нылашлы бӧрысь анай луыса силё-виро пи вайыны шуггес ик луоз, дыр. Тросэз пиос курадӟо плоскостопиен.Терапевтъёслэн удысысьтыызы висёнъёс пӧлысь нырысетӥ интые пото вир но сюлэм висёнъёс, кыкетӥ - желудок висёнъёс. Кылем арын йылӥзы В но С гепатитэн висисьёс. Армие шедёно пиослэсь таазалыксэс юнматон удысын государствоен ма но со лэсьтӥське ик, но коньдон тырмымтэен со туж ӧжыт. Басьтомы школаосын арлы одӥг пол ортчылӥсь военно-спортивной сборъёсты. Арня ӵожелы гинэ радъям лагеръёсын трослы шат кыдатод тазалыктэ? Вылаз ик 1993 арын школаосын НВП(начальной военной подготовка) предмет интые табере ОБЖ-ез дышето. Пиосты армилы дасянъя пайдаеныз ОБЖ-ез нокызьы уг луы НВП-ен ӵошатыны. Бен секытсэ но со понна пайдаёзэгес сюресэз капчиеныз воштыны Калыкез дышетонъя министерство каньылак пӧрмытӥз. Табере янгышсэ валаса военкоматэн огкыл шедьтэмез уг ни поты. Кӧня ке ӟеч кыл вераны луоно призывъя медкомиссилэн ужамез сярысь. Асьмелэнъёс мукет республикаосын ӵошатыса умойгес ужало, шӧдске. Призывъя сётэм нарядэз быдэстон вылысь, куд-ог интыосын ваньзэ армие келяны дась, видно: висисьсэ но, ляб визьемъёссэ но, пытсэс сьӧры шедьылэмъёссэ но. Обороная министерство сыӵе солдатъёсты интыысь интые вошъя, эмъяны келя яке воксё службазэ азьланьтонлэсь мозмытэ. Огез но со коньдон быдтытэк уг ортчы. Медкомиссилэн урод ужаменыз сэрен, я отын, я татын шуге-леке вуон учыръёс кылдыло. Удмурт ВВК-лэн ужамезъя, висисьёсты суӥсъяса, таза призывникъёсты гинэ армие келямзы бере, отысь комисовать карыса берытскисез уг ни луы, яке, луэ ке но, мукет улосвылъёсын ӵошатыса, туж ӧжыт. Кыӵе мылкыдын армие кошко пиос? Военкоматын ужасьёслэн чакламзыя гуртын будэм пиос пӧлысь 65 процентэз армие шумпотыса мыныны дасясько. 7 процентэз нокыӵе уг карисько, косо бере - мыно шуо. 28 процентэз армие мыныны чутрак пумит. Городын будэм призывникъёс пӧлысь 50 процентэз армие шумпотыса мыныны дасясько. 20 процентэз нокыӵе уг карисько, косо бере - мыно шуо. 30 процентэз армие мыныны чутрак пумит. Ёросъёсъя ке верано, югдур умойгес Селты, Балезино, Красногорск, Грахово, Завьялово но Можга ёросъёсын. Армия шоры мылкыдтэк городъёсын улӥсьёс учко, тужгес но Ижевскын. Татысь призывникъёсты милициен но утчаса сборной пунктъёсы ваёно луэ. Сыӵеосын выре прокуратура. Котьма мед шуозы, Удмуртиысь пиостылэн тазалыксы ляб, соос армие уг сюро, отчы вуо силё-вироосыз, медкомиссиен эскеремъёсыз, тросэзлэн пиостылэн армия шоры учконзы но шоро-куспо, мылкыдтэм, озьы ке но, Удмуртиысь пиосын котьку но данъяськыны луоно. Зэмзэ но асьме пиос котькуд командир понна зэмос шедьтос луылӥзы но али но мед луозы. Соос котькуд подразделениын вакчи дыр куспын ас интызэс шедьто, ӟеч специалистъёс, умой спортсменъёс, зэмос эшъёс луо, службазылы нырысь-валысь урод мылкыдзы но, армие вуыса, пумен ӟечлы воштӥське. Та кылъёсты юнме ушъяса уг вераськы - трос военнойёслэсь, палэнысь улосъёсын служить карем офицеръёслэсь кылэме вань, военкоматъёсын ужасьёс но сое ик одӥг ымысь кадь верало. Приволжье военной округлэн штабысьтыз асьме доры тужгес но ӧжыт куаретонъёс вуо. Ма сюлмаськытэ пиосты армилы дасян удысын? Жаляса верано, будӥсь пиналъёсты али шергес пумитано луэ спортъя секциосысь но пӧртэм кружокъёсысь. Школаосын аналтэмын военно-патриотической уж. Быремын НВП предмет, туж ӧжыт ортчытъясько военно-спортивной лагерьёс, будӥсь пиос кыстӥськыны кутско вина юонлы, наркотик веръянлы. Таӵе алама югдурез уг тодо кожаськоды-а президент, Удмурт Правительство, интыосысь администрациос, калыкез дышетонъя министерство, тазалыкез утёнъя министертство, Обороная министерство, военкомат? Ваньзы тодо, нош учкисез учке, ужасез ужа. Жаль, ужасьёсыз одӥг-кык гинэ, кинлы со аслыз кулэ: асьсэос пиналъёс, соослэн анай-атайёссы, школа но военкомат. Тани шуом Ижысь 60-тӥ школа. Кутскизы но кылдытӥзы асьсэлы кадет класс. Кылем арын нырысетӥосыз дасэз пиос та классэз йылпумъязы, тямысэз соос пӧлысь пырӥзы федеральной пограничной службалэн Голицыноысь военной институтаз. Соосын школа ӵош ужан сярысь огкыл юнматӥз. Кадет классын дышетскыны мылкыд карисьёс туж трос. Ваньзэс уг но басьто. Одно ик 4 но5-лы гинэ дышетскисьёссэ, тазалыксыя тупасьёссэ, конкурсэз ортчисьёс пӧлысь тужгес но устооссэ пырто. Таяз арын кадет классын дышетско ини 30 пиос. Соос пӧлын гурт ёросъёсысь но лыктэмъёс вань. Ижысь 97 но огкыл гожтӥллям Гагарин но Жуков нимо академиен. Воткинскысь 7 школалы туэ тырмиз ини 10 ар, кудаз дасяло Пермь ракетной войскоослы институтэ курсантъёсыз. 30 пиос кадетъёс пӧлысь 22-24-ез котькуд ар та училищелэн курсантэз луэ. Удмуртиын ог 15 кадет классъёс али одно ик кыӵе ке военной училищеен огкыл кутыса ужало. Сомында ик тупанкыл гожтытэк асьсэ школаосын гинэ усьтылэмын кадет классъёс. Таоссэ быдтэмъёс соку ик военной училищеосы уг кутӥсько ке но, офицер луон мылкыдзы соослэн уг кысы. Эскеро асьсэлэсь тодон-валанзэс, тазалыксэс училищеосы экзаменъёс сётыса. Кудӥз-огезлы удалтэ но. Кылем сӥзьыл гинэ Удмуртиысь 31-эз кадет классъёсын дышетскем пиос курсантъёс луизы. Военкоматын ужасьёс азе али таӵе ужпум пуктэмын: котькудаз ёросын одӥг ке но кадет класс мед луоз. Со понна пиналъёсын, соослэн анай-атайёсынызы но дышетӥсьёсын нырысь ик бадӟым валэктон уж нуоно луоз. Сыӵе ужпум пуктэмын бере, медаз со луы косъськыса кылдытэм кадет класс. Со борды мылысь-кыдысь мед басьтӥськысалзы асьсэос пиналъёс но дышетӥсьёс. Соку гинэ пайдаез луоз, а то ке пӧрмоз, Ижысь 4-тӥ номеро ПТУ-ысь "Ожгарчи" клубын кадь. Отысь дышетӥсьёс дышетскыны пырем пиосты кужмысь "Ожгарчи" клубазы пырыны косо. Дас кык классы сыӵе кадет классъёс. Нош кужмысь каремлэн пайдаез куке луэ шат? Одӥг но шуымтэысь, огез-кыкез соос пӧлысь дышетсконзэс военной училищеын азьланьтыны мылкыд карылӥзы ик, но пырыны ӧз быгатэ. Демократи тӧлъя-буръя солань-талань шонаськонъёсын сэрен, асьме обществоын ыштэмын ни вал солдатлэн, офицерлэн данэз. Оло, матысь дыре со выльысь улӟоз, валам ини ук кадь, музъем утисьёсмес гажатэк, армиез сюдытэк-вордытэк, асьмелэн азьвыл эшъёсмы но, тушмонъёслы пӧрмыса, вань кунмес пыд улазы лёганы дасесь шуыса. Кыдёкысь шаеръёсын Палестинаысь пиналъёслэн киосазы - изъёс Тель-Авивысь аэропортысен палестинецъёс пала таксиен гинэ вуыны быгатод. Но тросэз израиль таксистъёс отчы мыныны соглаш уз луэ. "Мар тӥ?! - чабкиськозы соос. - Ӵужесь израиль номеръёсын машинаос шоры отын изъёсын лэзьяло ук!" Араб водителез шедьтыны дэмлазы милемлы. Нош та уж капчи вылымтэ, лэся. Араб таксистэз ӧм адӟе. Шудмы вылэм на, шӧдске, одӥгез израильтянин соглаш луиз милемды, Россиысь вуэм куинь журналистъёсты, блокпостозь нуыны. Отысен, пе, кӧня ке пыдын вамышъялоды но пуксёды вожесь палестинской номеръёсын таксие. Тель-Авивысен Рамаллах дорозь мынонэз ог 30 минут ӵоже гинэ, нош ми отчыозь вуттӥськыны часэн-ӝыныен дырмес быдтӥмы. Сюресэз отӥ но татӥ израильской военнойёслэн постъёссы эскеро. Руль сьӧрын израильтянин ке но пуке, милемды косылӥзы машинамес берыктыны но кытӥ ке котыр сюрестӥ ортчыны. Ваньмыз валэктӥське одӥг араб кылын - интифада. Озьы шуо палестинецъёслэсь восстанизэс. Куинь толэзь куспын соин валче ог 300 мурт бырыны шедем ини. Данакез быремъёс, ваньмыз сямен ик шуыны яралоз, палестинецъёс луо. Озьы ке но, вожесь номеръёсын машинае пуксеммы бере но, израиль солдатъёс милемды Рамаллахозь шонер сюрестӥ мыныны ӧз лэзе, гурезьёстӥ котырскыса кошкыны дэмлазы. Гурезьёсын сюресъёс сюбегесь но тузонэн шобырскемын, машина амалтэк "висьыны", дырекъяны кутскылэ, ми но пӧсекъяны ӧдъяськом. Отӥяз кызьы но озьы буйгатскиськом кадь, шуак кылдэм йыркурмы но ортче. Нош куддыр шумпотон мылкыдмы но адӟиськылӥз, шуом, пассажиръёслэсь паспортъёссэс эскерись кудӥз ке военной витьымтэ шорысь ӟуч кылын юалоз: "Кыӵе улон-вылонды?" Со - израиль солдатъёс-репатриантъёс. Тросэз соос пӧлысь тапалъёсы вуизы Россиысь но азьвыл Советской Союзэ пырись республикаосысь. Табере тани амалтэк пыриськоно луо арабо-израильской конфликтэ. Отысь но татысь вуэм еврейёслы улон инты сётон сярысь сюлмаськон ньӧм улсын Израильлэн армиез куд-ог палестинской музъемъёсы чуртнаськиз, оккупировать кариз. Ӵапак сыӵе интыосты табере возьмано луо вооружить карем рекрутъёс. Палестинаысь ваньмаз сямен городъёсын, нош озьы ик Иерусалимлэн шунды ӝужан палаз адӟыны луэ таӵе плакатъёсты-фотографиосты: 14 аресъем палестинец кияз кутэм изэн мынэ израильской танк шоры. Нош та плакатэн артэ - бырем пиналъёслэн тусбуйёссы. Палэнысь вуэм мурт татысь соку ик адӟоз аспӧртэмлыко пропагандаез но солэсь бервылъёссэ. Нош палестинецъёс понна таӵе "наглядной агитация" луэ патриотизмез ӝутон но израильской военнойёсты синазькыль карон. - Туж умойтэм со, куке пинал пиос киосазы изъёсын мыно израильской танкъёс пумитэ, - шуиз милемлы кызь куать аресъем палестинец Ахмед. - Соос кулыны дасясько. Одӥгъёсыз - валаса, мукетъёсыз - огшоры гинэ, капчи пинал мылкыдын. Нош та дыре ик изъёс луизы милям нюръяськеммылэн тодмо пусъёсыз. Изъёс возьмато милесьтым мылкыдмес, соос верало бадӟым сюлмаськонмы, куректонмы сярысь. Мылкыдмес ӧм ке возьматэ, асьмеос сярысь ӧм ке вералэ, шуом, изъёсын но, соку асьмелэсь государствомес но ноку ум кылдытэ. Ахмед эшшо маке вераны турттӥз на вал, нош мон сое ӧй кылзы. Тодам лыктӥзы Израильысь СМИ-ын олокыӵе но валантэм иворъёс. Арафатлы, шуо соос, ӟеч гинэ потэ, пе, палестина нылпиослэн бырыны шедемзы: "Арафат озьы басьтэ Израиль вылэ зӥбыны амалъёс". Собере шуак малпай на израиль армиысь одӥг снайперлэн валэктэмъёсыз сярысь, кудъёссэ печатлаз Израильын потӥсь "Гаарец" газет. Мылкыды ик куашказ, ява. Со снайперлэсь юало: шуг-а, пе, адямилэн йыраз йӧттыны. Валэктонэз вакчи вылэм: "Капчи". Пумитъяськыны вырись палестинецъёс будо ке, соос асьсэос пуля улэ пыро. Но дас кык ареслэсь пичиесь пиналъёс шоры ыбылыны лэзьымтэ. Озьы валэктӥз снайпер. Нош куке изъёсын лэзьясько бадӟымъёсызгес, соос пиналъёс ӧвӧл ни, соку курок вылэ зӥбыны луэ. Тодэ лыктӥзы Рамаллахысь дас кык-дас ньыль аресъем пиосъёс. "Войналы пумит" одӥгез митинг бере, со ортчиз Израильлэн военнойёсыныз утёно еврейёслэн интызы дорын, пиналъёс сэрпалляны ӧдъязы изъёсын но сутӥсь-ӵушкась макеосын тырмытэм ӟенеликъёсын. Рогаткаосысь гинэ но ыбылӥзы. Военнойёс дорозь изъёс ӧз но вуылэ, дыр. Кусыпсы угось укыр бадӟым вал, висказы кечато-кечато кенер но вал на. Озьы ке но, израильтянинъёс паласен талы пумит ужрадъёс кутӥзы. Броняен шобыртэм израиль автомобильёс зӥрак берытскизы но, "бунтарьёслы" матэ кариськизы, соосты улляны кутскизы синву поттӥсь газъёсын. Нош бӧрысьгес пиналъёс шоры ыбылыны шӧтазы пластиклэсь но резиналэсь дасям но кортэн тырмытэм пуляосын. Палестиналэн "ӝог юрттэт" сётӥсь машинаосыз, визьтэммем анайёс сямен, пуляос улэ пырылӥзы но "ожмаськон лудысь" сӧсырмыны шедемъёсты нуылӥзы. Ог-огзылы пумит час ёрос нюръяськыса ик ньыльдон пала палестинецъёс сӧсырмизы, тросэз соос пӧлын быдэ вуымтэ нылпиос. Одӥгез нош бырыны шедиз. Ӝытазе ини, ваче пумит вуылэм интыысь ми кошкем бере, омырез дырекъятӥзы гранатомётъёс но танкъёсысь орудиос. Зэмзэ верано ке, Ясир Арафат дас куать ареслэсь пинал адямиосты митингъёсы ветлыны уг лэзьы, но солэсь та приказзэ уг быдэсъяло. - Пиналъёсты кутыса возьыны уд быгаты. Соос капчи визьемесь на. Школаын эшъёссы, ас ёзъёссы азьын ушъяськемзы, асьсэлэсь кышкасьтэм луэмзэс возьматэмзы потэ; берлогес валэктӥз Рамаллахысь палестинецлэн ӟуч кышноез но пиез понна сюлэмшугъяськемез сярысь вераз. - Митинге медаз пегӟы шуыса, сое мон школаысь ачим басьтӥсько. Озьы но курдасько. Амал шедьтоз но пегӟоз: эшъёсыз азьын возьыт, вылды, кышкась но медаз шуэ. Мозмытскыны луонтэм югдур кылдэ. Площадьёсын бергам но вирез адӟыса будэмъёслы одно ик висён паласькоз, соос киязы пыӵал-тӥрлык кутозы. Быдэ вуэм "из зӥръясьёсын" ми пумиськимы Вифлеемысь одӥгаз ёросын - Байтсахурын. Пинал дыръязы соос но "оккупантъёс" шоры изъёс лэзьяллям, нош али киязы возё ӟуч Калашников автоматъёсты но американской М-16 винтовкаосты. Та егитъёс пыро "Танзим" милицие. Со луэ Палестинаысь национально-освободительной движенилэн военизированной организациез (ФАТХ). Палестинаез мозмытонъя со луэ бадӟымез "фракция". ФАТХ-ез кылдытӥз но соин кивалтэ Ясир Арафат. "Танзим" кылдэмын 1965 арын, нырысь-валысь со но пыриськылэм палестинской интифада шуонэ. Озьы вылэм 1993 арозь, норвежской соглашениосты гожтытозь. - Та сизьым аръёс ӵоже, - маде одӥгез пияш, - палестинецъёс но израильтянъёс куспазы тупаса улыку ми ужамы пӧртэм фирмаосын, лэсьтӥськонын. Нош Кэмп-Дэвидын саммит куашкам бере, израиль полицейскойёс милесьтым эшъёсмес шуак кырмылыны кутскизы. Тӥни соку ми валатскимы югдурлэсь ӟырданы кутскемзэ но ожмаськонлы дасяськыны ӧдъямы. Отӥяз милям тодэммы потӥз на, кинэ "Танзиме" куто но кытын соосты ожмаськон ужлы дышето. Веразы, валэктӥзы. Кызь арес тырмемын ке, Палестина государствоез кылдытонлы дурбасьтӥськод ке, "Танзиме" кутозы. Ожмаськыны дышетозы татын ик, аслад музъем вылад. Кӧня ке нылкышноос но вань, пе. Соос луо яке поваръёс, яке разведчицаос. Одӥгез учыр паймытӥз милемды. "Танзимын" трос луо палестинецъёс-христианъёс. "Уд оскиське-а" - юаз одӥгез, юн таза мугороез. Ачиз соку ик камуфляжезлэсь бирдыоссэ пертчылӥз но чыртыяз ошиськем пичи кироссэ адӟытӥз. Мон сэрытак фотоаппаратме кутӥ но. . . Пиосъёс киосынызы шонаны кутскизы, уг яра, пе. Маскаоссэс но пумен поттыло. Кулэ ӧвӧл озьыен туспуктэмъёссэс возьматыны. Израильлэн спецслужбаосыз, шуо, милемды утчало, кутыны выро. Пӧйшуръёсты кадь. Рамаллахысь палестинецъёслэн ӟуч кышноссы кӧснуналлы быдэ чай юон сямен огазе люкаськыло - палестино-российской эшъяськонлэн юртаз. Лыктыло картъёсынызы, нылпиосынызы дэмен. Тодматскемын но бен Советской Союзысь высшой учебной заведениосын вуоно кузпалъёссы дышетскыку.Йыръёссэс шобыртытэк, джинсъёсын но ветло. Нош ми та палъёсы вуылыку, мусульманъёслэн ӵапак Рамадан праздниксы вал ук. - Малы ке но ваньмыз малпало, ми татын паранджаен ветлӥськом шуыса, - серекъяло ӟуч кышноос. - Та сярысь милесьтым юалляло Израильысь ӟуч кышноос но. Дӥсяськиськом Россиын музэн ик. Рамаданэз пусйисьтэмез но вань татын. Рамаллахын, пе, та дыре уло куатьтон ёрос ӟуч кышноос, азьвыл Советской Союзын улэмъёс. Ваньзы ужало, "шунды ӝужан палась" ӧвӧл угось. Картъёсынызы уртче чидано луо ожмаськон вакытлэсь шуг-секытъёссэ. Нош бадӟымез сюлмаськонзы - нылпиос. - Ми пумит луиськом пиналъёсты быдтэмзылы. Соин ик демонстрациосы но потаськом, - шуо соос. - Вазен израиль снайперъёс пыдъёсы ыбылӥзы, нош табере йыре мертасько. Снайперъёс малпало, шӧдске, пиналъёс быремен валче митингъёсы потамысь дугдозы шуыса. Но соос янгышало. Югдур уката но ӟырда. Валерий Батуев, Рамаллах-Газа-Тель-Авив-Москва 1 Сергей Соснов "Яратон ошмесмы ӧръяськоз Кам шурлы. . ." Пичи пи мон ӧвӧл тон азьын, Эн сына мынэсьтым йырвизьме. Тулкымо яратон зарезьын Ай ӧй вал на мынам уяме. . . Кыӵе ке но ӧре коласьки Я пукись вож вуэ усьылӥ. Ӵемысьгес тылвуэн эшъяськи, Уйвӧтам нош тонэ адӟылӥ. Тод, уг витьы ноку но дасьсэ - Утчало но шедьто зарезьме: Яратон тулкымен веттасьсэ - Мед ыштом коть отын йырвизьме! * * * Усё куаръёс, усё, Уг тодо мылкыдме. Кыӵе секыт висён Аляз егит сюлме! Гордэсь, ӵужесь куаръёс Ваньзы огкадь туннэ. Пельто кезьыт тӧлъёс, Пурысь луиз дунне. Бен ку тонэ адӟо Вӧзам выль кен дӥсен? Ваньмыз оскон тӧлӟе. . . Усё куаръёс, усё. . . * * * Тон сярысь ӧвӧл та кылбуре, Эн малпа тон, эн серекъя монэ. Уг валаськы, мае сюлэм ктя, но солэн пумитаз вазись ӧз луы. Касим уггес вала на, вылды, Апкадировлэсь сямзэ. Туннэ ми ваньмы ик куасэн. Уин лымы усем. Сергеен ӵош ветлыку кельтэм сюресмы уг адӟиськы ни. Выльзэ дэмен лёгиськом. Тани корам лулпуослэн лӥялъёссы. Соослэн табере небыт шобретсы вань. Кызьы мугорысь яра быре, озьы ик шелепъёс но ышиллям. Тудву соосты кыдёке нуыса кошкоз, дыр. Лӥялъёс асьсэ мугоръёссэс, оло, тодазы но уз вае ни - сыӵе кылемзылы буйгатскозы. - Татчы малы лыктэммес тодӥськоды. Ошмесдурез утён, чакласа возён понна, асьмелы отряд кылдытоно, - вераськыны кутскиз Сергей. - Лулпуосты кораны лэзёно ӧвӧл. Ошмесэз кызьы ке но утёно. - Ма карод бадӟымъёсыз? - пайме Митя. - Соос корало ук лулпуосыз. Пумит кыл верад ке, соос асьмемыз берпаламы ӵыжыса лэзёзы. Визьтэмезгес тӥрен но шорамы шоналскоз. - Кышкась луд кеч кышка пыдул куараезлэсь но, - меӵкытвз Сергей. - Тон, Митя, соку ик луд кеч кариськид. - О-о, визьмо тон вераськиськод! - Апкадиров шып сылыны дышемын ӧвӧл. - Калыклэн кылъёсыз со. Пословица. Валад-а? - Асьмеос тэргашыса* ум улэ, - Сергеен Митялэсь аспӧртэм вераськонзэс мон куспетӥ кари. - Ойдолэ нырысь ик отряд кылдытоме, солы ним сёётоме, командир быръёме. Виталий, эке, Сагит но Касим вераськонэ чик ӧз пыриське, шуыны луэ. Чалмыт улӥзы. Кулэ дыръяз киоссэс гинэ ёӥтылӥзы. Ма, соос пичиесьгес на - витетӥ классэ сяна уг ветло. Сергей, Митя но Виктор куатетӥын дышетско. Мон ваньзылэсь бадӟым, сизьыметӥ классэз быдтӥсько. Отрядмылы командире огкылысь бырйим Сергеез. Нош отрядлэн штабезлы начальнике монэ каризы. Кин вылӥынгес - командир-а яке штаблэн начальникез-а, соиз сярысь чик ӧм малпаське. Зэмзэ ке верано, ум но тодӥське вал. - "Особый патруль" ним тӥледлы кельше-а? - юасько пиослэсь. - Кельше, - вазизы Викторен Сагит. Мукетъёсыз шып сыло. Митя малы ке пальпотӥз, соебре юаз: - Удморт сяин кызьы луоз? "Особой патруль"? Мон мар шуны пайми. Сергей но дась ӧвӧл кадь таӵе юанлы валэктон сётыны. Митя валатскиз юмоке вуэммес, ачиз ик вераськыны кутскиз: - "Особый патруль" - чебер ним. Вакчиятыса "ОП" шуыны луэ. Удмуортс яин мон тазьы шуысал: "Ошмесдур патрульёс". - Молодец, Митя! - Сергей шумпотэменыз кизэ ик мычиз Апкадировлы. - Ӟырыд ужа вылэм. Удморт сяин но чебер кылӥське. - "Ошмесдур пиос" но шуыны луоз, - ватсаз на Митя. - Туннэ, дасэтӥ феврале 1971-тӥ аре, асьме гуртын вордӥськиз "Особый патруль" отряд. Та сярысь нокин тодыны кулэ ӧвӧл, - командирмылэн куараез ик юнгес луиз кадь. Солэн кыкетӥ предложениез приказ выллем кылӥськиз. - Отрядмылэн нырысетӥ ужез - Ошмесдурысь лулпу корасьёсты тодон но шедьтон. 8 Кӧрыш Анна апайлэн юртэз сьӧрын сылэ пичигес гинэ корка. Вылтусыз чебер луысал ке, со шудон коркалы кельшысал. Али нокин озьы уз шуы. Липет йыылз гужемлы быдэ вожектэ, отчы будос ӝужа, укно янакез кырыжамын. Пичиесь укноосыз мӧзмыт учко кадь урамтӥ ортчись адямиос шоры. Та коркан улэ пересь кышномурт - Бибисара апай. Юртсэ чебер возьыны солэн кужмыз уг тырмы. Нош юрттӥсьёс уг сюро, лэся. Оло, ачиз уг сюлмаськы корказэ выльдыны? Туганъёсыз* Бибисара апайлэсь палэнскыса выллем уло. Кышномурт кӧня ке ыж, чипы-курег вордэ. Соосын, адямиосын сямен, шара вераське. Корка котыраз лумбыт выре. Маке но пӧрамъяське. Азбарез шулдыр. Отысь одӥг жагзэ но уд шедьты. Быртыкен-быртыкен бичаса ветлэ. Азбарысьтыз вож-вож ожо, садысьтыз льӧмпуос та пичи коркалэсь мӧзмыт туссэ вато кадь. Озьы ке но, Бибисара апай шоры учкыса, вань мылкыд куашка. Кесяськем, уно пол кышъям вуж дӥськутэз сое вашкала даурысь адямилы кельшымтэ. Выль дэремен, айшетэн ветлэмзэ мынам адӟеме ик ӧвӧл. Бибисара апаез Плюшкин шуисьёс но вань. Пунэмен одӥг коньызэ но уз сёты, пе, ачиз но номыр уз басьяськы. Картофка октыны, пузэ пильыны юрттӥсьёссэ но умой-умой куноямез ӧвӧл, быгай. Соин ик дораз ветлӥсьёс ӧжыт. Та коркалэн укноосыз уйбыт пишто - тылзэ уг кысы кузёез, кӧшкема-а мар-а... "Ведон ӧвӧл меда со? Изёнэз но, оло, уг вала?" - юаз одӥг пол Митя, клубысь кино учкыса ӵошен бертыкумы. Дыр уйшоре вуиське ни, адямиос кӧло, пиштӥсь укноос чик уг адӟисько. Бибисара апайлэн гинэ тылыз кысымтэ. "Ойдо учком, мар со каре", - ӵектӥз кӧрыше. Кыдёкысь шаеръёсын Палестинаысь пиналъёслэн киосазы - изъёс Тель-Авивысь аэропортысен палестинецъёс пала таксиен гинэ вуыны быгатод. Но тросэз израиль таксистъёс отчы мыныны соглаш уз луэ. "Мар тӥ?! - чабкиськозы соос. - Ӵужесь израиль номеръёсын машинаос шоры отын изъёсын лэзьяло ук!" Араб водителез шедьтыны дэмлазы милемлы. Нош та уж капчи вылымтэ, лэся. Араб таксистэз ӧм адӟе. Шудмы вылэм на, шӧдске, одӥгез израильтянин соглаш луиз милемды, Россиысь вуэм куинь журналистъёсты, блокпостозь нуыны. Отысен, пе, кӧня ке пыдын вамышъялоды но пуксёды вожесь палестинской номеръёсын таксие. Тель-Авивысен Рамаллах дорозь мынонэз ог 30 минут ӵоже гинэ, нош ми отчыозь вуттӥськыны часэн-ӝыныен дырмес быдтӥмы. Сюресэз отӥ но татӥ израильской военнойёслэн постъёссы эскеро. Руль сьӧрын израильтянин ке но пуке, милемды косылӥзы машинамес берыктыны но кытӥ ке котыр сюрестӥ ортчыны. Ваньмыз валэктӥське одӥг араб кылын - интифада. Озьы шуо палестинецъёслэсь восстанизэс. Куинь толэзь куспын соин валче ог 300 мурт бырыны шедем ини. Данакез быремъёс, ваньмыз сямен ик шуыны яралоз, палестинецъёс луо. Озьы ке но, вожесь номеръёсын машинае пуксеммы бере но, израиль солдатъёс милемды Рамаллахозь шонер сюрестӥ мыныны ӧз лэзе, гурезьёстӥ котырскыса кошкыны дэмлазы. Гурезьёсын сюресъёс сюбегесь но тузонэн шобырскемын, машина амалтэк "висьыны", дырекъяны кутскылэ, ми но пӧсекъяны ӧдъяськом. Отӥяз кызьы но озьы буйгатскиськом кадь, шуак кылдэм йыркурмы но ортче. Нош куддыр шумпотон мылкыдмы но адӟиськылӥз, шуом, пассажиръёслэсь паспортъёссэс эскерись кудӥз ке военной витьымтэ шорысь ӟуч кылын юалоз: "Кыӵе улон-вылонды?" Со - израиль солдатъёс-репатриантъёс. Тросэз соос пӧлысь тапалъёсы вуизы Россиысь но азьвыл Советской Союзэ пырись республикаосысь. Табере тани амалтэк пыриськоно луо арабо-израильской конфликтэ. Отысь но татысь вуэм еврейёслы улон инты сётон сярысь сюлмаськон ньӧм улсын Израильлэн армиез куд-ог палестинской музъемъёсы чуртнаськиз, оккупировать кариз. Ӵапак сыӵе интыосты табере возьмано луо вооружить карем рекрутъёс. Палестинаысь ваньмаз сямен городъёсын, нош озьы ик Иерусалимлэн шунды ӝужан палаз адӟыны луэ таӵе плакатъёсты-фотографиосты: 14 аресъем палестинец кияз кутэм изэн мынэ израильской танк шоры. Нош та плакатэн артэ - бырем пиналъёслэн тусбуйёссы. Палэнысь вуэм мурт татысь соку ик адӟоз аспӧртэмлыко пропагандаез но солэсь бервылъёссэ. Нош палестинецъёс понна таӵе "наглядной агитация" луэ патриотизмез ӝутон но израильской военнойёсты синазькыль карон. - Туж умойтэм со, куке пинал пиос киосазы изъёсын мыно израильской танкъёс пумитэ, - шуиз милемлы кызь куать аресъем палестинец Ахмед. - Соос кулыны дасясько. Одӥгъёсыз - валаса, мукетъёсыз - огшоры гинэ, капчи пинал мылкыдын. Нош та дыре ик изъёс луизы милям нюръяськеммылэн тодмо пусъёсыз. Изъёс возьмато милесьтым мылкыдмес, соос верало бадӟым сюлмаськонмы, куректонмы сярысь. Мылкыдмес ӧм ке возьматэ, асьмеос сярысь ӧм ке вералэ, шуом, изъёсын но, соку асьмелэсь государствомес но ноку ум кылдытэ. Ахмед эшшо маке вераны турттӥз на вал, нош мон сое ӧй кылзы. Тодам лыктӥзы Израильысь СМИ-ын олокыӵе но валантэм иворъёс. Арафатлы, шуо соос, ӟеч гинэ потэ, пе, палестина нылпиослэн бырыны шедемзы: "Арафат озьы басьтэ Израиль вылэ зӥбыны амалъёс". Собере шуак малпай на израиль армиысь одӥг снайперлэн валэктэмъёсыз сярысь, кудъёссэ печатлаз Израильын потӥсь "Гаарец" газет. Мылкыды ик куашказ, ява. Со снайперлэсь юало: шуг-а, пе, адямилэн йыраз йӧттыны. Валэктонэз вакчи вылэм: "Капчи". Пумитъяськыны вырись палестинецъёс будо ке, соос асьсэос пуля улэ пыро. Но дас кык ареслэсь пичиесь пиналъёс шоры ыбылыны лэзьымтэ. Озьы валэктӥз снайпер. Нош куке изъёсын лэзьясько бадӟымъёсызгес, соос пиналъёс ӧвӧл ни, соку курок вылэ зӥбыны луэ. Тодэ лыктӥзы Рамаллахысь дас кык-дас ньыль аресъем пиосъёс. "Войналы пумит" одӥгез митинг бере, со ортчиз Израильлэн военнойёсыныз утёно еврейёслэн интызы дорын, пиналъёс сэрпалляны ӧдъязы изъёсын но сутӥсь-ӵушкась макеосын тырмытэм ӟенеликъёсын. Рогаткаосысь гинэ но ыбылӥзы. Военнойёс дорозь изъёс ӧз но вуылэ, дыр. Кусыпсы угось укыр бадӟым вал, висказы кечато-кечато кенер но вал на. Озьы ке но, израильтянинъёс паласен талы пумит ужрадъёс кутвзы. Броняен шобыртэм израиль автомобильёс зӥрак берытскизы но, "бунтарьёслы" матэ кариськизы, соосты улляны кутскизы синву поттӥсь газъёсын. Нош бӧрысьгес пиналъёс шоры ыбылыны шӧтазы пластиклэсь но резиналэсь дасям но кортэн тырмытэм пуляосын. Палестиналэн "ӝог юрттэт" сётӥсь машинаосыз, визьтэммем анайёс сямен, пуляос улэ пырылӥзы но "ожмаськон лудысь" сӧсырмыны шедемъёсты нуылӥзы. Ог-огзылы пумит час ёрос нюръяськыса ик ньыльдон пала палестинецъёс сӧсырмизы, тросэз соос пӧлын быдэ вуымтэ нылпиос. Одӥгез нош бырыны шедиз. Ӝытазе ини, ваче пумит вуылэм интыысь ми кошкем бере, омырез дырекъятӥзы гранатомётъёс но танкъёсысь орудиос. Зэмзэ верано ке, Ясир Арафат дас куать ареслэсь пинал адямиосты митингъёсы ветлыны уг лэзьы, но солэсь та приказзэ уг быдэсъяло. - Пиналъёсты кутыса возьыны уд быгаты. Соос капчи визьемесь на. Школаын эшъёссы, ас ёзъёссы азьын ушъяськемзы, асьсэлэсь кышкасьтэм луэмзэс возьматэмзы потэ; берлогес валэктӥз Рамаллахысь палестинецлэн ӟуч кышноез но пиез понна сюлэмшугъяськемез сярысь вераз. - Митинге медаз пегӟы шуыса, сое мон школаысь ачим басьтӥсько. Озьы но курдасько. Амал шедьтоз но пегӟоз: эшъёсыз азьын возьыт, вылды, кышкась но медаз шуэ. Мозмытскыны луонтэм югдур кылдэ. Площадьёсын бергам но вирез адӟыса будэмъёслы одно ик висён паласькоз, соос киязы пыӵал-тӥрлык кутозы. Быдэ вуэм "из зӥръясьёсын" ми пумиськимы Вифлеемысь одӥгаз ёросын - Байтсахурын. Пинал дыръязы соос но "оккупантъёс" шоры изъёс лэзьяллям, нош али киязы возё ӟуч Калашников автоматъёсты но американской М-16 винтовкаосты. Та егитъёс пыро "Танзим" милицие. Со луэ Палестинаысь национально-освободительной движенилэн военизированной организациез (ФАТХ). Палестинаез мозмытонъя со луэ бадӟымез "фракция". ФАТХ-ез кылдытӥз но соин кивалтэ Ясир Арафат. "Танзим" кылдэмын 1965 арын, нырысь-валысь со но пыриськылэм палестинской интифада шуонэ. Озьы вылэм 1993 арозь, норвежской соглашениосты гожтытозь. - Та сизьым аръёс ӵоже, - маде одӥгез пияш, - палестинецъёс но израильтянъёс куспазы тупаса улыку ми ужамы пӧртэм фирмаосын, лэсьтӥськонын. Нош Кэмп-Дэвидын саммит куашкам бере, израиль полицейскойёс милесьтым эшъёсмес шуак кырмылыны кутскизы. Тӥни соку ми валатскимы югдурлэсь ӟырданы кутскемзэ но ожмаськонлы дасяськыны ӧдъямы. Отӥяз милям тодэммы потӥз на, кинэ "Танзиме" куто но кытын соосты ожмаськон ужлы дышето. Веразы, валэктӥзы. Кызь арес тырмемын ке, Палестина государствоез кылдытонлы дурбасьтӥськод ке, "Танзиме" кутозы. Ожмаськыны дышетозы татын ик, аслад музъем вылад. Кӧня ке нылкышноос но вань, пе. Соос луо яке поваръёс, яке разведчицаос. Одӥгез учыр паймытӥз милемды. "Танзимын" трос луо палестинецъёс-христианъёс. "Уд оскиське-а" - юаз одӥгез, юн таза мугороез. Ачиз соку ик камуфляжезлэсь бирдыоссэ пертчылӥз но чыртыяз ошиськем пичи кироссэ адӟытӥз. Мон сэрытак фотоаппаратме кутӥ но... Пиосъёс киосынызы шонаны кутскизы, уг яра, пе. Маскаоссэс но пумен поттыло. Кулэ ӧвӧл озьыен туспуктэмъёссэс возьматыны. Израильлэн спецслужбаосыз, шуо, милемды утчало, кутыны выро. Пӧйшуръёсты кадь. Рамаллахысь палестинецъёслэн ӟуч кышноссы кӧснуналлы быдэ чай юон сямен огазе люкаськыло - палестино-российской эшъяськонлэн юртаз. Лыктыло картъёсынызы, нылпиосынызы дэмен. Тодматскемын но бен Советской Союзысь высшой учебной заведениосын вуоно кузпалъёссы дышетскыку.Йыръёссэс шобыртытэк, джинсъёсын но ветло. Нош ми та палъёсы вуылыку, мусульманъёслэн ӵапак Рамадан праздниксы вал ук. - Малы ке но ваньмыз малпало, ми татын паранджаен ветлӥськом шуыса, - серекъяло ӟуч кышноос. - Та сярысь милесьтым юалляло Израильысь ӟуч кышноос но. Дӥсяськиськом Россиын музэн ик. Рамаданэз пусйисьтэмез но вань татын. Рамаллахын, пе, та дыре уло куатьтон ёрос ӟуч кышноос, азьвыл Советской Союзын улэмъёс. Ваньзы ужало, "шунды ӝужан палась" ӧвӧл угось. Картъёсынызы уртче чидано луо ожмаськон вакытлэсь шуг-секытъёссэ. Нош бадӟымез сюлмаськонзы - нылпиос. - Ми пумит луиськом пиналъёсты быдтэмзылы. Соин ик демонстрациосы но потаськом, - шуо соос. - Вазен израиль снайперъёс пыдъёсы ыбылӥзы, нош табере йыре мертасько. Снайперъёс малпало, шӧдске, пиналъёс быремен валче митингъёсы потамысь дугдозы шуыса. Но соос янгышало. Югдур уката но ӟырда. Валерий Батуев, Рамаллах-Газа-Тель-Авив-Москва 1 Возь вылысь бабылес кызьпуэз Сурсвузэ юыны ӵогиллям. Толон ӝыт арганчи Василэсь Нылмуртъёс сюлэмзэ чигиллям. Шуиллям: "Тон усто арганчи, Шулдыресь шудоно гуръёсыд. Нош ӧвӧл на, Вася, тынад чик Нылъёслы ярамон сюлэмыд". Ну, кутскиз ук, кутскиз шудыны: Возьмато, пе, али соослы, Васялэсь сюлэмзэ тодыны Кылдымтэ на тӥлед, нылъёслы. Нош кылӥз-а Вася кырӟамзэс? Кылысал ке, зэмзэ тодысал - Эктон гур шудысал арганэз, Нылъёсты огинэ люкаса. Исало ке соос, гажало, Сюлэмдэ чигемысь дугды тон. Кылӥськод-а, тыныд кырӟало: Ми озьы но тонэ яратом. Уно Хольмберг Перма калыкъёслэн осконъёссы Азькыл Удмуртъёслэн асьсэ инмарзылы осконзы котыр ласянь но мур-мур эскеремын. Та удысын тужгес но трос лэсьтӥзы ЪИЪ даурлэн кыкетӥ ӝыныяз ужам тодосчиос: Б. Гаврилов, Г. Е. Верещагин, Н. Г. Первухин, И. Н. Смирнов, И. Васильев но мукетъёсыз. Удмуртъёс доры вуылыкузы трос вӧськылъёс гожтыса кельтӥллям немец М. Бух, мадьяр Б. Мункачи, финн Ю. Вихманн. Тросэз удмурт лыдӟисьёс татчыозь уг тодо на Уно Хольмберг финн учёнойлэсь удмуртъёслэн асьсэ инмарзылы осконзы сярысь гожъямъёссэ. Уно Хольмберг (Харва) финн-угор калыкъёслэн религизы сярысь кӧня ке книгаос гожтэм. 1911 арын со удмуртъёс доры но вуылэм. Узыр материалъёс вылэ пыкъяськыса, со 1914 арын "Удмуртъёслэн осконзы" книгазэ финн кылын печатласа потттэ. У. Хольмберглэн ужез дуннеысь калыкъёслы тодмо луиз книгазэ 1927 арын англи кылын печатласа поттэмзы бере. Со США-ын потӥз "Дуннеысь вань расаослэн мифологизы" сериын. Санкт-Петербургысь тодмо тодосчи А. И. Емельянов 1921 арын поттӥз "Курс по этнографии вотяков" книгазэ. Та книгаяз со уже кутӥз У. Хольмберглэсь материалъёссэ. Та кык авторъёслэсь одӥгзылэсь но книгаоссэс шедьтыны уг ни луы. Кылем арын милям куреммыя Швециысь Упсала университетысь тодмоос огдырлы Хольмберглэсь финн кылын поттэм та книгазэ келязы. Удмурт кылэ берыктон ужез ас вылаз басьтӥз УдГУ-ысь Кылтодонъя мынам кивалтоно лабораториям ужась егит тодосчи Сергей Максимов. Фотооссэ сканировать карыса кельтӥз лабораториям ужась Ян Насибуллин. Риф Насибуллин, филологи наукаосъя доктор. Уйпал Россиын улӥсь ӵыжы-выжыосмы сярысь тодонъёс нырысьсэ вӧлмизы норвежецъёслэн экспедициоссы пыр. Соос йӧ зарезьтӥ уяса ветлӥзы но Тӧдьы (Белое) зарезьлэн пыдлось ярдуръёсыз дорозь вуылӥзы. Отын интыяськемын вал выжыкылъёсын чебермаса суредам Кун-биярмъёслэн шаерзы. Со ванё-буро улӥсь калыкен викингъёс вузкаро вылэм. Но соку, ожгаро вакытъёсы, вузкарыны мынон ӵемысь пӧрмылэм таласа ветлонлы. Экспедициоссы дыръя биярмъёслэн Шунды пуксён палась бускельёссы валаны тыршылӥзы соослэсь улон сямъёссэс, трос инмарлы осконъёссэс. Со вакытъёсты тужгес ӟеч возьматэмын Святой Олавилэн улэмез сярысь веранын. Отын мадиське норвежецъёслэн 1026-тӥ аре биярмъёслэсь куалаоссэс, вӧсяськон интыоссэс таласа-куашкатыса ветлэмзы сярысь. Кинъёс бен вал со биярмъёс? Уйпал Россиын улӥсь Перма калык сярысь со вакытэ потӥсь ӟуч журналъёс верало, соослэн, пе, улоссы вӧлмемын вылэм Тӧдьы (Белая) зарезь дорысен Печораозь но Юграозь. Туала кылын вераса, Перма калык - со коми калык. Соос вазен ик вузкарыса кусып возё вылэм ни Новгородэн. Нош берло новгородъёс Перма шаерлэн пыдлось музъемъёсаз походэн ветлыны кутско но отысь асьсэлы музъем басьяло. Собере пермаосты пумен выт тырись ляльчилы пӧрмыто. Новгородъёслэн тыршеменызы ик комиос финн калыкъёс пӧлысь самой азьло христиан черк улэ сюро. Ӟуч журналъёс верамъя, одӥг Киев монастырьысь святой Герасим монах 1147 аре ик ини туала Вологда улосын христиан оскон сярысь ивор вӧлмытэ вылэм ни. Нош 1193 аре потэм журнал ивортэ, новгородъёс кыдёке уй пала мыныкузы, сьӧразы, пе, попъёсты но басьтыны ӧз вунэтылэ. Новгородъёслэн перма калыклэн осконъёсынызы но вӧсяськонъёсынызы тодматскыны умой луонлыкъёссы вал, но жаляса верано, адӟемъёссэс но кылэмъёссэс соос гожъяса кельтӥллямтэ. Берлгогес ини, дас куинетӥв дауре, святой Стефанлэн улэмез сярысь гожъямын кӧня ке кӧня ке поттылэмын, вашкала перма калыклэн вӧсяськон сямъёссы сярысь. Сос номырин воштонтэм дуноесь луо, малы ке шуоно, со бере нокытысь но уд шедьты ни сыӵе материал.Кужмо ӟуч черк комиосты угось чылкак котыраз бинялтэ, пересьёссылэсь вашкала осконъёссы йырысьтызы ыше. Комиосын ӵошатыса, удмуртъёс асьме нуналозь утьыны быгатӥллям вашкала вӧсяськон сямъёссэс. Соос тужгес но возисько ӵук пал но лымшор пал удмуртъёс пӧлын. Малы ке шуоно, уй пал удмуртъёсты, Слободской но Глазов ёросъёсын улӥсьёсты, Иван Грозный вакытэ ик кужмысь черке пыртылыны кутскизы, нош Кузон, Оса, Бирск, Бугульма ёросъёсы христиан осконлэсь пегӟыса вуэм удмуртъёс быдэсак утыны быгатӥзы асьсэ осконъёссэс. Христианстволэн вӧлмемез шоры учкытэк, ӟуч черк улэ вазь сюрем удмуртъёс пӧлын но возисько на вашкалаоссылэн куд-ог оскон сямъёссы. СУРЕД Бусы вӧсь. Кузон губерниысь Мамадыш ёросысь Вуж Юмья гурт. Калыклэн сюлмысьтыз угось дауръёсын возиськем йылолъёссэ быдтыны капчи ӧвӧл. Уй палась но адӟылыны луэ на шукырес чебер вӧсяськон арамаосты, кытын гурт калык куд-ог дыръя виро сётэ, тужгес но кыӵе ке шуг-секытъёсын, куректонэн пумиськыкуз. Удмуртъёслэсь инмаръёссылы осконзэс возьматӥсь ужам мон кутӥ аслэсьтым 1911 аре экспедициос дыръя бичам материалъёсме. Соку мон ветлӥ Пермь, Уфа но Кузон губерниосын улӥсь удмуртъёс доры. Материалме сэрттыны-пертчыны, калык син азе яркытгес, валамонгес но пыр-почгес поттыны-возьматыны юрттӥзы тодосчиослэн калык осконъёс сярысь пӧртэм вакытэ пӧртэм сямен гожъямъёссы. Соослэсь нимтулъёссэс мон азьланяз пусъё. Тужгес но бадӟым тау кареме потэ Юрьё Вихманн профессорлы. Со эш мылкыдын мыным юрттӥз, туж кулэ ӵектонъёс но дэмланъёс сётӥз. Кулэмъёсты сӥлы карон Удмуртъёслэн валамзыя, адямилэн, мугорыз сяна, вань на адӟиськисьтэм люкетэз - лул яке урт. Берло вакытэ нырысетӥез валан мурт культуралэн пыӵамез улсын азьпал радэ потӥз, нош урт кыллэн валатонэз трос интыосын ышемын ни, ачиз кыл но туж шер кутӥськылэ, вашкала веранъёсын гинэ возиськемын на. Пермь но Уфа губерниосын улӥсь удмуртъёс гинэ урт кылэз утьыны быгатӥллям, малы ке шуоно, соос асьсэ вашкала оскон йылолъёссэс возё на. Татысь удмуртъёс, адямилэн лулпуш дуннеез сярысь вераськыкузы, берло кылдэм лул кылын артэ азьло сямен ик урт кылэз но куто. Кылсярысь, соос шуо: пырс уртэз кошкем (лулыз кошкем). Тазьы соос верало кинлэсь ке но кыӵе ке муген туж кужмо кышкамзэ. Угось инкуазен герӟаськем трос мукет калыкъёс сямен ик, соос оско, кышкатскыкуз адямилэн лулыз ас улоннизэ кельтэ шуыса. Удмуртъёслэн валамзыя, лул кошке секыт висьыку но. Сое утчаны туно-пеллёез ӧтё, адями, пе, берен йырсазьзэ мед шедьтоз, мед йӧналоз. Таӵе йылолэз соос урт кутон (лулэз утчан) шуыса нимало. Уфа губерниын урт кутон кылын озьы ик нимало ним выльдон йылолэз. Сое ортчыто пинал висьыны усён дыръя. Нылпилы вордӥськыкуз ним мыдлань сётэмен, пе, со висён кылдэмын. Таӵе югдур вылысь адӟиськом, макем зол ог-огенызы герӟаськемын адямилэн нимыз но урт. И. Васильев тодосчи Вятка но Кузон губерниосысь удмуртъёс сярысь ужаз пусъе, Сарапул уездысь удмуртъёс вылӥын верам йылолэз озьы ик шуо: лул утчан. Но та веран берлогес кылдэмын ни, дыр. Кышкатскыку но висьыку сяна, изьыкуз но адямилэн уртэз мугорызлэсь люкиськылэ, пе. Соку со адӟиськись луыса но потыны быгатэ, ӵемгес урткыӵ (лобась шыр) тусын. Уфа губерниысь одӥг пересь удмурт валэктӥз, урткыӵъёсты, пе, нуназе ноку но адӟыны уг луы, соку адямиос уг изё угось. Изись адямилэн уртэз потыку гинэ, пе, урткыӵъёсты адӟыны луэ. Адӟиськись урткыӵ адями доры матэктэ ке, со возьматэ, кыӵе ке ӵыжы-выжыезлэн яке тодмоезлэн лулыз луэ шуыса. Урткыӵ зэмзэ но лул тылобурдо луэ шуыса, пересь таӵе веранэныз но возьматӥз: "Одӥг пиосмурт изьыны выдэм, нош юлтошъёсыз азбаре пукыса кылиллям. Соос адӟиллям, кызьы урткыӵ лобаса ветлэм. Сайкамез бере, пиосмуртлэсь уйвӧтаз мар адӟемзэ юало. Соиз шуэм, отӥ но татӥ ветлӥ, пе. ӵапак урткыӵ ветлэм интыосты верам. Соку воргоронъёс таӵе малпанэ вуиллям: адӟем урткыӵ - со кӧлӥсь пиосмуртлэн лулыз вал, пе. Адямилэн уртэз сайкамезлэсь азьло ас улоннияз бертыны уг вуы ке, пе, соиз висьыны усе, кӧдэктэ но ӵакме. Соин ик кӧлӥсь муртэ шӧдтэк шорысь, шуак, кужмысь сайкатыны уг яра, пе. Урткыӵ тусын сяна, лул озьы ик пичи тӧдьы бубылиен адскыны быгатэ. Со гужем ӝытъёсы югыт укно доры лыктэ. Тужгес но тазьы ӵыжы-выжыоссы доры вуо кулэм муртъёслэн лулъёссы. Кузон губерниысь одӥг удмурт кышномурт, кулэм атайзэ буре ваён ӝыт ортчытыкуз, бубыли укно сьӧрын лобаны ӧдъям но шуэм: "Тани атайлэн тусыз бубылилы пӧрмыса вуиз". Куд-ог дыръя улэп адямилэн но лулыз тазьы адскыны быгатэ, пе, Бирск губерниысь Можга нимо гуртын трос пол кылӥ: адями туж зол кышкаку, урт мугор бордысь ишкалске, пе. Соку соос туно-пеллёлы вазисько. Соиз, тӧдьы ӵушкон кутыса, уртэз утчаны кошке. Котькытӥ утчамез бере, бератаз со пичи тӧдьы бубылиез адӟе, сое кутэ но ӵушконэныз корка пыртэ. Собере ӵушконзэ бубылиен валче быдэс уйлы висись муртлэн чыртыяз бине. Ӵуказеяз ӵукна ӵыжатэм тӧдьы узвесез кисьтыса эскеро, зэм ик-а кутэм лул бубылизы висись муртлэн уртэз луэ шуыса. Уртсэ кисьталом шуиськись йылолэз тазьы ортчыто. Ӵыжатэм тӧдьы узвесез туно-пеллё кыл вераса вуэн тазэ кисьтэ но висисьлэн йыр выллапалаз возе. Узвесь вуын уг пазьгиськы, быдэсак чебер суред кылдэ ке, висисьлэн уртэзлэн шедемез сярысь тодмо луэ.Урт кутон узвесь суредэз ибырвесь (омулет) чотын кышкам муртлэн чыртыяз ошо. Кӧлӥсь муртлэн лулыз мугорысьтыз бубыли луыса потэмез сярысь выжыкыллы укшась верамез озьы ик мон гожтӥ Кузон губерниысь Мамадыш уездын: "Кык воргоронъёс нюлэскы пу кораны мынӥллям. Лымшор вакытэ шутэтскыны пуксиллям. Огез умме усем. Юлтошез адӟем, кызьы солэн лулыз бубыли тусын ымысьтыз лобӟем но сьӧразы нюлэскы ваем вуэн ведрае пырем. Вуысь беризь гырке лобӟем, собере выльысь ву ведрае вуэм но отысь берен кӧлӥсь муртлэн ымаз пырем. Соку изись мурт сайкам. Сайкамез бере юлтошезлы шуэм: "Уйвӧтам адӟи, шур вамен уяса выжи шуыса. Сопал ярдурын гырко писпу сылэ вал, нош отын тросаз зарни коньдон". Ужзэс быдэстыса, воргоронъёс гуртазы бертӥллям. Нош кӧлӥсь муртлэн юлтошез, кӧня ке улыса выльысь нюлэскы мынэм но эшезлэн уйвӧтаз адӟем гырко писпуэз утчаны кутскем. Шедьтэм со писпуэз, нош гырказ, пе, тросаз зарни коньдон". Выжыкыл мадись воргорон лулэз та кылын ик нимаз ке но, лул бубылиез со урт бубыли шуыса вераз. Та бубылиез йӧтылон яке виён удмуртъёслэн бадӟым сьӧлыкен лыдъяське. Лул бубыли осконэз но соин герӟаськем тӧдьы узвесен тунан йылол финн выжыослэн гинэ осконэнызы лыдъяны уг луы, дыр. Малы ке шуоно, та выллем сямъёс мукет палъёсын но пумиськыло. Кыслярысь, славянъёслэн но вылэм лулэз кутон сямзы. Нош лул бубылилы оскон индогерманъёслэн вашкала дыръя котькытын вӧлмемын вылэм. Озьы ик мукет выжы калыклэсь асэстэмын, луоз, адями изьыку, луллэн урткыӵ тусын лобамез но. Та оскон угось ӵук пал Европаысь куд-ог мукет калыкъёс пӧлын но вӧлмемын. Кылсярысь, бигеръёс но башкиръёс пӧлын. Удмуртъёслэн лулэз ниман кылъёссы но соосын герӟаськем валанъёссы озьы ик тупало комиослэн лол (яке лов) но орт кылъёссылы. Соослэн но лолзы туала вакытэ азьпал радэ поттэмын. Орлов уездысь пермаос сярысь Добротводский маде, соос кулэм муртсылы кисьтон ортчытыкузы ӧсэз усьто, ӝӧк сьӧры пуксё но кулэм муртлэсь лулзэ ӵош сиыны-юыны ӧте шуыса. Лол кыл вашкала пуштроссэ ик кельтэм шуыса тодыны луэ Налимов тодосчилэн пусъем осконъёсысьтыз: комиослэн валамзыя, лов, йыркобы пушкын улэ, пе, нош адями кулэ ке, буслы пӧрмыса, омыре пегӟе. Та тодосчи ик гожтэ таӵе веранэз: лол одӥг кышномурт дорысь изьыкуз кошке но пичи шыр тусын кӧлӥсьлэн гадь вылтӥз солань-талань бызьылэ. Со вакытэ нылкышнолэн ымыз шобрет улэ шеде, нош лул буслы пӧрме но мугор пушкы бертэ. Луллэн шырлы пӧрмемез сярысь оскон комиос доры ӟучъёс пыр вуэмын, луоз, малы ке шуоно со пумиськылэ герман выжы калыкъёс пӧлын но. Комиослэн лул сярысь осконъёсазы лол валатонэн артэ трос интыосын пумиськылэ вашкалаезгес но - орт. Но солэн пуштросэз кӧня ке воштӥськемын ни. Орт - со трос адямиослэн утись-кузёзылы кельше. Налимов маде, котькуд адямилэн ортэз вань шуыса. Со, пе, адями вӧзын, котыраз улэ, ужаз пыриське, нош уйвӧтаз утёно муртэзлэн тусыныз адӟиське. Мукетыз Попов тодосчи пусъе, нылпилэн ортэз вордӥськыкуз кылдэ но, котьку сьӧраз ветлэ шуыса. Со сяна, тросэз гожъясьёс пусъё, орт нырысь ик кулонэз ивортӥсь шуыса. Адями кулыку, со чагыр тыл яке адямилэн тусыз кадь луыса мугорысь потэ. Куддыръя, пе, орт улэп адямилэсь кузэ лыз вишты пуксьымон чепыльытлэ. Мугоре лыз виштыос пуксён сярысь сыӵе ик осконэз пумитаны луэ Сарапул уездысь удмуртъёслэсь но. Куд-ог интыосын вӧлмемын ортлэн адями мугорлэсь быдэсак висъяськемез сярысь валан. Кылсярысь, Видеманн тодосчи коми кыл сузьетаз (словаряз) пусъе, орт, пе, со кулэм муртлэн вужерыз, кузёез, син азьын адсконэз, ишанэз. Озьы ик ватса на, комиос ортлэн омырын улэмезлы оско шуыса. Нош Налимов вера, адямилэн ортэз тылобурдоос пушкы улыны интыяське шуыса. Таяз учыре кулонлэн тодметэз тазьы ялӥське: тылобурдо лобӟыса корка пыре но йырыныз маке борды лулыз потытозь йыга. Утись кузёез бӧрсьы ик ӝоген ачиз но адями кулэ. Озьыен, комиослэн ортсылэн лул тылобурдолы пӧрмем осконзы удмуртъёслэнлэсь висъяське. Озьы ке но, комиослэн орт но удмуртъёслэн урт кылъёссылэн пуштросазы кылемын на туж вашкала одӥг валанзы: ишан-лул. Нырысь ик тае юнматэ Налимовлэн ивортонэз, кудӥзъя адямилэн лулыз (лов) кулэм бераз орт пушкы выже но кулэм муртэн орт одӥг макелы пӧрмо. Тае ик возьматэ Кандицский тодосчи но: кулэм муртлэн тусыныз орт эшшо ньыльдон нунал адскылэ на, пе. Та дыр ортчем бере со ыше. Озьыен, Видеманн орт кыллэсь вашкала пуштроссэ "кулэм муртлэн ишанэз" шуыса юнме уг пусйы. Нош ик берытскомы комиослы ӵыжы-выжы луись удмуртъёс доры. Урт но лул ог- огзылэсь нырысь ик висъясько тани маин: адями изьыку яке висьыку уртлэн дырын- дырын улоннизэ кельтэмез луэ, нош лул весяк, адями кулытозь, мугор пушкын улэ. Нырысь-валысь лулэз нимаз лул чотын ӧз лыдъяллялэ, дыр, сое адямилэн улонэзлэн тодметэз луэ шуыса гинэ валаллязы, кудӥз шокан дыръяз бус луыса потэ. Мар со сыӵе лул но кытчы со кошке, удмуртъёс сое валэктыны уг быгато. Михаил Елабужский куд-ог пересь удмурт воргоронъёслэн мадемзы сярысь вера: адями кулэ ке, пе, солэн лулыз бус музэн омыре тӧлӟе. Кузон губерниысь удмуртъёс пӧлын таӵе малпан вань: бадӟым ведӥн кулыку, тӧлпери яке сильтӧл вордӥське. "Лул потыку" тӧллэн кылдэмез сярысь валан выль ӧвӧл ни. Адями кулыку, урт лул сямен ик, бервылтэм уг тӧлӟы. Со адями кулэм бере но, солэн мугорызлэн оглюкетэз, тодметэз луэ на. Тае валаны луоз, тодамы ваимы ке, урт кулэм муртлэн ишан яке вужер-лулыз шуыса верамез. Кулэм мугор кур вылын кылльыку, урт солэн котыртӥз ветлэ. Мугорез ватэм бере, со кулэм муртлэн дораз ӧжытак улэ на, собере шайвылэ выже. Нош отысь дырын-дырын адӟиськыны берталля. Уртэз, нимысьтыз сэбед ортчытыса, кытчы ке нимаз интые но улыны пыртыны луэ. Удмуртъёслэн уртсы кадь ик комиослэн ортэнызы герӟаськем югдур но. Попов тодосчи шуэ, комиос орт нимъем вашкала песяй-песятайёссылэн лулъёссылы йыбыртъяло, пе. Со лулъёс, пе, адями кулэм бере сыӵе интыостӥ ветло, кытчы кулэм мурт улэп дыръяз вуылӥз. Шайсьӧр улонэз удмуртъёс со дунне яке сопал дунне шуыса нимало. Соослэн валамзыя, дунне куинь люкето: ин, кудаз Инмар, инбамлэн инмарез улэ; музъем, кудаз адямиос уло; пыд улысьтымы музъем ул люкет, кудаз кулэм муртъёс уло. Георги тодосчи пусъе, удмуртъёс сопал дуннеез улон луонлыкъёсъя висъяло на, пе: вӧсяськыса улӥсь муртъёслы вань югыт улон, кудаз шеьтыны луэ шудбур но куаныса, ӟеч улон; сьӧлыкоос понна вань курадӟон инты. Отын тэкитэн пуртыосын, адямиосты пӧзьто. Но та валан удмуртъёслэн асьсэлэн уг луы. Верещагин тодосчи пусъе, Сарапул уездысь тросэзлэн сопал дунне сярысь валанзы таӵе, пе: отын одӥг выжыысь кулэм муртъёс ӵош уло, одӥг семья выллем. Семьялэн йырыз луэ выжыез кылдытӥсь- мытӥсь.Верещагинлэн гожтэмезъя, пусйыны кулэ созэ: отын, сопал дуннеын, ӵыжы- выжыоссы пӧлы уг басьто ассэ ӵашетыса, жугиськыса возись муртэ. Таӵе валан умой возьматэ, ӵыжы-выжыослэн шайзы кулэмъёслэн огъя улон интызы луэ шуыса, кытын котькудӥзлэн улонэз нимаз. Адями кулэм бере сое отчы нуыны азьло кулэм ӵыжы- выжыосыз лыкто. Отын улон быдэсак музъем вылын кадь: пинал будыны быгатэ, кузпалъяськытэк кулэмез - кузпалъяськыны. Музъем вылын улыкуз сямен ик ужа, кӧтыз сюма, ёрмыса улонэз но адӟе, кынме но мукет. Комиослэн но куке но таӵе ик осконзы вал шуыса, умой адӟиське куд-ог интыосын али но возиськем валанъёссы. Кылсярысь, адями кулэмез бере азьло ӧнерзэ (профессизэ) азьланьтэ: пӧйшурась пӧйшура, чорыгась чорыга. Со сяна, Налимов пусъе, соос коркаез но коросэз одӥг горт (корка) нимын нимало шуыса. Комиослэн малпамзыя, кулэм муртлы шайгу зэмос дорез луэ. Таӵе оскон тани кытысь но умой шӧдӥське: соос кышкало мурт музъем вылын кулыны, малы ке шуоно, отысь асьсэ палась кулэм ӵыжы-выжыоссы доры сюрозы шуыса уг оско. Лулзы, пе, ялан мӧзмыса улоз. Угось кулэм бере луллы одно ик ватэм мугор дорын улоно. Таӵе оскон вань комиос пӧлын ӧвӧл вӧлмемын. Христиан оскон вуэм бере, дунне шоры учконзы но, кулэм бере улон сярысь валанзы но воштӥськиз. Соин ӵош ик комиос пӧлын возиське на вашкала выжыоссылэн малпаськон амалзылэсь трослы вылӥын осконзы. Кылсярысь, куд-огез оско, адями кулэмез бере лулыз улыны мукет кизилиосы кошке шуыса. Отын улон, пе, музъем вылын кадьгес ик, но трослы чебергес но шудогес. Куд-ог интыосын озьы ик 5 ШУРАЛИ поэма Шудӥсь муртъёс: Ядыгар - эль йыр, тӥро; Тутыгыш - солэн кыкетӥ кышноез Узы - Ядыгарлэн нырысетӥ кышноезлэсь кылем нылыз; Маймыл - Ядыгарлэн кивоштӥсез, ожгарчиез; Туно - ог витьтон аресъем воргорон, сьӥд туно-пеллё; Шурали - Узыен одӥг аресъем егит пияш, Шурали выжыысь берпуметӥез тӥдьы туно- пеллё; Действие мынэ туннэ ини мифологие выжем вакытъёсы одӥгаз вашкала удмурт эльын. Нырысетӥ действие Ядыгарлэн гужем шутэтскон интыез. Бадӟымесь писпуос, сӥныръёсты кынтӥсь улвайёс. Гужем мурьё, татын ик ошмес, зорлэсь ватӥськон липет, ӝӧкъёс, пуконъёс но мукет юрт арбериос. Нырысетӥ явление. Туно Ядыгарлэсь гадьзэ кылзӥське, пельёсаз, синъёсаз, нырпелесаз учке. Штанизэ но солэсь аслыз гинэ адӟымон усьтыса марзэ ке но солэсь котырласянь эскере. ТУНО. Хм-м. . . ЯДЫГАР. Мар?.. Мар сыӵе?.. ТУНО. Кӧшкемыт. ЯДЫГАР. Мар кӧшкемыт? Маиз кӧшкемыт? ТУНО. Зэмыт кӧшкемыт. Шӧдске тон пересьмыны кутскиськод ни. Ӟольгыриед ужа на ай? ЯДЫГАР. Мар? ТУНО. Ӟольгыриез шуисько. ЯДЫГАР. Мар, кыӵе ӟольгыри? А-а-а! Ма, ужатӥд ке ужа, дыр. . . ТУНО. Дыр-а ӧвӧл-а? ЯДЫГАР. Кылзы ай, тон монэ эмъяны лыктӥд-а?! ТУНО. Бен. ЯДЫГАР. Бен эмъя ук! Верай мон тыныд, мынам кӧт висе, пинь висе, пель висе, ныр висе, вань пасьёсы мынам висё, валаськод-а?! ТУНО. Мон бен мар карисько? Тӥни мон тыныд кӧня турын-вуос ваи ни. ЯДЫГАР. Нош толыкез кытын? Мынам со вуосыдлэсь ӧскеме потэ. Кӧты мынам со вуослэсь вия. ТУНО. Мон ваньзэ тодӥсько. ЯДЫГАР. Тодӥськод. . . Нош Шурали тани тодэ вал. Со чиньыосыныз гинэ бичатэ вал, котьмаин тон мед висёд, коть пыд косканэн, коть син тӧрнанэн - со чиньыеныз гинэ висёнэз быдтэ вал. Кылыныз но со мылкыдэз бурдъяны быгатэ вал. . .Остэ, Инмаре! Малы тон сое сӧрыса куштӥд? ТУНО. Бен, Шурали быгатэ вал. . . Со дас кык егит вӧсясьёсмы пӧлысь вал ук, дас кык кылэз со тодэ вал. . . Нош тон сое вашкалаос доры. . . шурлэн бугрес тулкымъёсаз. . . вылаз ик улошо карыса. . . ЯДЫГАР. Мон уг ӧбкелиськы! ТУНО. Эн чоръя ни. Куинетӥ явление. Потэ Узы. УЗЫ (ненег гинэ куараен). Атай, тани мон тыныд чечы сяськаосты шедьтӥ.Табере тон одно бурмод! Мон соосты быдэс арня утчай, нокытын но та палан соос уг будо вылэм, нош Вӧйвылбам сьӧрын соос быдэс бусы кадь! ТУНО. Остэ! Тон гыдыке отчы вуытозь ветлӥд?! УЗЫ(ушъяськыса). Ветлӥ-ӥ! ТУНО. Пӧртмаськись нюклэсь но ӧд кӧшкема? УЗЫ. Кӧшкемай, вамышелы быдэ со нюкез вӧсяськыса потӥ. . . Но со понна тани быдэс куды чечы сяськаос 1 Сергей Соснов "Яратон ошмесмы ӧръяськоз Кам шурлы. . ." Пичи пи мон ӧвӧл тон азьын, Эн сына мынэсьтым йырвизьме. Тулкымо яратон зарезьын Ай ӧй вал на мынам уяме. . . Кыӵе ке но ӧре коласьки Я пукись вож вуэ усьылӥ. Ӵемысьгес тылвуэн эшъяськи, Уйвӧтам нош тонэ адӟылӥ. Тод, уг витьы ноку но дасьсэ - Утчало но шедьто зарезьме: Яратон тулкымен веттасьсэ - Мед ыштом коть отын йырвизьме! * * * Усё куаръёс, усё, Уг тодо мылкыдме. Кыӵе секыт висён Аляз егит сюлме! Гордэсь, ӵужесь куаръёс Ваньзы огкадь туннэ. Пельто кезьыт тӧлъёс, Пурысь луиз дунне. Бен ку тонэ адӟо Вӧзам выль кен дӥсен? Ваньмыз оскон тӧлӟе. . . Усё куаръёс, усё. . . * * * Тон сярысь ӧвӧл та кылбуре, Эн малпа тон, эн серекъя монэ. Уг валаськы, мае сюлэм куре, Мае меда возьма на улонэ. Тон сярысь ӧвӧл та кылбуре, Мадемын тон сярысез туж кемалась. Берытсконтэм сюлэм висён быриз, Нош мукетсэ ни шедьтыны ӧйлась. * * * Макем оски тыныд, оски пумтэм, Нош со оскон кариз монэ шудтэм. Куке лыктӥ одӥг ӝытэ дорад, Макем секыт кылъёс мыным верад. Сӥзьыл садын пӧртэм турлы куаръёс Пӧрмылӥзы соку бездэм жаглы. Лыз инбамын пиштӥсь кизилиос Соку ик кынмизы, пӧрмыса йӧпырылы. Гольык улвай пӧлын вузӥз-а тӧл, Я чидатэк куректонлы ачим бӧрдӥ. Валай ини, шудэ мынам ӧвӧл. Тонтэк мон тод, - бурдтэм ӧрӟи. * * * Шаер сайка тӧдьы умлэсь, Назьылляське, усьтэ синзэ. Чагыр инмын азвесь толэзь Уй крезьгурез шыпыт кылзэ. Жильыр потто бызись вуос, Чик вис картэк кисьто крезьгур. Ӝоген котыр улос улӟоз Азьланьтӥськоз шудо даур. Пазьгоз шунды зарни сиос, Лудъёс буртчин дӥсялозы. Шулдыр гурен тюрагайёс Шаер вадьсын кырӟалозы. * * * В. Шибановъя Возь вылын турлы ковёр - Со тыныд гинэ. . . Жильырто ошмес вуос - Со тыныд гинэ. . . Омырын шудо тӧлъёс - Со но тон понна - Кытын ке нош вань, дыр, тон - Тон шат мон понна?.. * * * Уйвӧт, шуо, куд-огез быдэсме, Кылемез нош кыле уйвӧтэн. . . Малпан но, шуо, куд-огез быдэсме, Уноез нош кыле малпанэн. Каргаськем, шуо, куд-огез, пе, усе, Кылемез нош кыле кылъёсын. . . Пелляськем, шуо, куд-огез зэм луэ, Кылемез нош кылле пеллямен. Куд-огез данъямон адями но луэ, Куд-огез нош кыле ас понназ. Ӝыныен-пырыен бен котьма но луэ, Котькинлэн улонэз ведь аслаз. Куд-огез адями но шудо вордскемын, Мон шудлэсь малы ке висъямын. Уйвӧтэ - уйвӧтын, малпанэ - малпанын, Нош шудэ, оскисько, - азьланьын. * * * Вуэ ни уй, усьтэ чагыр синзэ. Дасез вылэ пазя зарниоссэ. Юзмыт ошмес вуын пыласькыса - Со ӵушиське куарен пальпотыса. Ыркыт тӧлэн шудэ, нуныяське, Лудъёс, возьёс вылтӥ котыръяське. Жалем турын зынэн пумен шока, Ӟеч ужъёслы бадӟым кужым люка. * * * Вормонтэм секыт из возисько сюлэмам. Тӧлӟонтэм пурысь бус пурӟемын синъёсам. Йыркурен кайгырись мылкыды тымемын, Нош улон ӵашае синвуэн тырмемын. Дыр вуоз, сюлэмме со излэсь мозмыто. Нап буслэсь сайкаса синъёсме но усьто. Нош тымем мылкыдме кырӟанэн ӧръяло, Жильырась ошмесысь мон вузэ веръяло. Со ваньмыз ик пӧрмоз, пот гинэ пумитам. Осконэ тылӝуэн ӝужалоз сюлэмам. Курисько, мусо ныл, лык дорам огдырлы, Яратон ошмесмы ӧръяськоз Кам шурлы.