Римма Игнатьева Бубыли Повесть Выжыкыл яке синпӧртман дунне-а та? Ог пала учкиськод - кужмо батыръёс выллем сыло пужымъёс. Мукет палан ас понназы маке шыпырто кызьпуос. Пӧлазы йыромиллям, лэся, кӧня ке быртык лысо писпуос. Радэн сылӥсь пужымъёслэсь борддор - со адямилэн ки бервылыз. Кызь, оло нош кызь вить ар талэсь азьло мерттӥзы вал, дыр, соосты. Тӥни табере зэмос нюлэс кылдэм куке но буш интые. Кызьпуос пужымъёсын артэ - егит пиос азьын лушкем кильтыръяськись, кемалась быдэ вуэм нылмуртъёс кадь адско. Шуныт мылкыдзэс возьматыны турттыса сямен чеберайёс дырын-дырын вайёсынызы шонтыло но выльысь куспазы сипыртыны ылало. Синмаськоно муртсы сярысь, вылды, ог-огзылы ивортытэк уг чидало. Сыӵе ини нылъёслэн сямзы. . . Пужымъёс но кызьпуос вискын - нюк. Мур ӧвӧл со. Бамалъёсыз но нялмытэсь. Нюклэн шораз, ӝужыт вож турын пӧлын, купанча, лызгырлы, тӧдьысяська пазьгиськемын. Со сяськаос вадьсытӥ, кудӥз вылэ пуксьыны валатэк, лэся, ненег бурдъёсыныз лопыръя ӵуж бубыли. Яке пӧсь шундыё, чагыр инбамо, ческыт емыш зынъёсын пачылась гужем нуналлы шумпотэмзэ-а озьы возьматэ. Тани со буртчин бурдъёсыныз капчияк йӧтскиз тӧдьысяська борды, собере ӝогак лобиз мукетыз сяська вылэ, огшап ортчыса куинетӥез вылэ пуксиз. "Майбыр ик та бубылиослэн улэмзы" - ас понназ вожъяськиз Костя. Солдатлэн нымы- кибылы вожъяськемезлы асьмеос, лыдӟись эше, йырмес кур ум каре. Егит на со. Вылаз ик, бадӟым карын будэм пияш уг тоды ук, бубылилэн улонэз туж вакчи шуыса. Ма собере вожъяськонэзлэн мукет мугез но вань ук: бубыли - эрико, нош Костя командиръёсызлэсь косонъёссэс быдэсъяно луэ. Мылкыдыныз пияш отын, ӝужыт гумыё заводъёслэн ӵынынызы но пумтэм-йылтэм машинаослэн ӵашетэменызы тырмем Оӵ караз. Отын угось со гольык пыдын бызьылӥз, озьы шуыны яралоз ке. Отын ик со нырысьсэ чупаз ненег нылмуртэз, солы аслаз яратэмез сярысь вераз. Нош берло. . . Ой, ма вал берло. . . Али малпаса гинэ но пилэн йырыз пороме, сюлэмыз икак луэ, быдэс мугорыз ӟырда. . . Нокыӵе кылъёсын со мылкыдэз уд вера. Одӥг гинэ валэктон вань талы- - ЯРАТОН. Бен, бен, яратон. Ваньзэ сутӥсь-ӵушкась, йырин-чукин карись, йырсазез ыштытӥсь яратон. Макем зол яратӥз Костя векчи куско, кузь куко, бадӟым сьӧд синмо Лиляез! Ӝужыт, веськрес мугоро, вакчи ӵышкем суд йырсиё нылмурт чик кошкылонтэм-вунэтонтэм пыриз пияшлэн малпанъёсаз, вӧтъёсаз, быдэс улоназ. Институтэз но кулэ ӧз луы ни. Кияз учебник кутэ, нош син азяз мусо Лиля. Пиез гочатыса музэн пальпотэ, дораз ӧте. Сое чупаны шуыса, Костя нылмуртэ ӟыгыртыны ӧдъя, нош уйвӧтэз бус сямен тӧлӟе. . . Нырысетӥ сессизэ ик "кыкъёслы" но "куиньёслы" гинэ йылпумъямез бере, Николай Петрович пиезлы чурыт кылзэ вераз: - Тырмоз! Дышетскиськод ке, дышетскы, кышнояськиськод ке - кышнояськы! Со ӝытэ ик нэнэеныз бубиз артысь подъездын улӥсь Лилялэн анай-атаеныз кенешыны мынӥзы. Азьвыл соос ваньзы одӥг заводын ужазы вал бере, ог-огзэс ӟеч тодо. Собере нылпиоссы но пичиысен эшъясько. Лиляен Костя одӥг садике ветлӥзы, одӥг классын дышетскизы. Пиналъёссылэн лушкем кусыпъёссы сярысь но шӧдскытэк ӧз улэ мӧйыос. Соин ик огъя кыл ӝог шедьтӥзы. Лилялэн анаез, Лидия Григорьевна, нырысь- валысь кушетскиз ик: - Лилечкае секытэн ӧвӧл-тэ?! Мыным уго со берло дыре номырзэ уг вера. . . Будэтӥськод, будэтӥськод соосты. . . Сокемзэ соосыз но, таосыз но уг тодо вал бере, кузпалызлэсь кылам-бурамзэ куспетӥ карыса, Иван Иванович нылзэ куно пумитан висъетэ чортӥз. Куноослы нылмурт ӧз паймы. Нош лыктэм мугзэс тодэмез бере ӧз ни сеськы: - Бен, ми Костяен кемалась ог-огмес яратӥськом. Тон, анай, эн абдра: ми зэмзэ ик валесын но трос пол ӵош кӧламы ни. Нош нылпи ваён сярысь ке. Мон шузи ӧвӧл ук. Али ваньмыз сямен ик пиос но нылъёс школаысен ик тодо ни секс но контрацептивъёс сярысь. Так что, мамочка, эн волновачкы, мынам ваньмыз окей! - пиосмуртъёс шоры малы ке но ӵыжектыса учкиз нылмурт. Удмурт сямен Лиля, городын будэм уноез нылпиос музэн ик, суро-пожо вераське. Ма, вордскем кылыз дораз сяна солы кулэ уг но луылы. Костяен но соос ӟуч сямен лабырто. Мӧйыос куспазы вераськонзэс азьланьтӥзы. Нош Лиля шӧдонтэм улсын ӧс пала вамыштӥз, собере шыпытак дӥсяськиз но квартираысь лобатӥз. Кызьы сюан ортчытоно, егитъёс кузпалъяськемзы бере, кытын но кызьы улозы - таиз Лилялэн ужез ӧвӧл. Одӥг гинэ нылзэс муминыз бубиз уз обиде, вылды. Нош али Костяез шумпотон иворен пыд йылысьтыз погыртоно. Собере, Костялэн Лариса сузэрез доразы ӧвӧл ке, оло, аслэсьтыз гочатӥсь мылкыдзэ но лычсузьымон буйгатоз. . . Тодэ ваёнъёсыз ожгарчилэсь сюлэмзэ лӥято но, со вакытэ ик бугырто но. Эх, чупа вал али Лилялэсь небыт ымдуръёссэ, сю куасьмемез юзматэм сямен, сюпсьы вал нылмуртлэсь ческыт мӧльзэ. Нош кышноез кыдёкын, Костя татын, пичигес гурт вӧзы интыяськем воинской частьын. Эсьма, увольнительное потыса но нокытчы мыныны. Котырын - нюлэс, нюлэс, нюлэс. . . Калыкен тырмем город бере татын егит пилы туж мӧзмыт но шимес йӧтэ. Тани туннэ но со гуртэ почтае ветлӥз. Яратоно Лилечкаезлы огкутскемен куинь гожтэт лэзиз. Костя мусо кышноезлы нуналлы быдэ сямен гожъя. Нош гожтэтъёссэ келяны нокинлы уг оскы ни. Воинской частьысьтызы почта туж урод ужа кадь йӧтэ солы. Ма, озьы ке ӧй луысал, Костя яратоно нылмуртэзлэсь толэзьлы огпол яке солэсь но ӧжытгес ивор басьясал шат? Ачиз Лиля котькуд гожтэтаз Костяез оскытэ, арнялы быдэ гожтэт гожъясько шуыса. Озьы бере, яратоно адямиедлы оскытэк, мурт зэм вера кожалод-а? Соин ик тӥни таяз увольнительнояз но Выльгурт почта пыр лэзиз пияш гажанэзы сӥзем выль кылбуръёссэ. Зэм, нэнэезлэсь ожгарчи ӝыны ар куспын ог витьтон гожтэтсэ басьтӥз ни. Нош кышноезлэсь укмыс гожтэт гинэ вуиз. Соосты Костя ӝытлы быдэ сямен лыдӟылэ. Нош огаз конвертэ Лиля аслэсьтыз туспуктэмзэ но понэм. Эшъёсыз адӟымтэ дыръя Костя та фотокарточкаез улэп нылмуртэ сямен чупалля но. Ма, Лиляез вӧзаз луысал ке, чупасал гинэ-а муспотонзэ Костя?.. Эх-х! - А вот тани мон тонэ куто! - пияшез исаса сямен лобась бубыли сьӧры уиськоно кожаз Костя. Нош чибори нымы пичи ке но, сэзь ожгарчилэсь шаплыгес вылэм. Тани- тани кутоз ни кадь бубылиез пияш, нош чеберай утыр музон сяська вылын кильтыръяське ни. Вожомем Костя нымыез пӧяно кариськиз. Кӧт вылаз кариськыса, турын пӧлы выдӥз но матысь тӧдьысяська вылэ бубылилэсь пуксемзэ возьма. Кема ик витёно ӧз луы - ӵуж бурдъёсыныз лопыръяса, пичи нымы ожгарчи вадьсы вуиз. Собере туж ӝог сяська вылэ пуксиз. - Верай ук: мон тонэ одно куто! - шумпотӥз Костя. Нош лӧпшамез юнме вылэм. Егит пилэн кияз кучасяська гинэ кылиз, нош бубыли, сое серем карыса музэн, мукетыз сяська вылэ пуксиз. - Я, иське, лоба, кытӥ мылыд потэ. Нош мон - тунало, - китыр-китыр серектӥз пияш. Кыллем интыяз пуксьыса, со сяська бурдъёсты оген-оген ишканы ӧдъяз: "Яратэ - уг яраты, сялӟоз - чупалоз, сюлэмыз борды ӝиптоз - шайтан доры ыстоз?.." - Малы шайтан доры ыстоз? Уз, Лиля монэ яратэ. . . - Кӧтыз ӝож луыса пияш гольык кылем сяська модосэз сачак музъем вылэ сэрпалтӥз но турын вылысь султӥз. Вальк-вальк выдэм турын кӧня ке шонерскиз ке но, пумозяз ӧз ӝутӥськы. "Мар кароно ай табере? - суйпосысьтыз часэз шоры учкиз Костя. Нуназе вакыт вуэм ни ке но, ожгарчи кӧт сюмамзэ уг шӧды. Сюэз гинэ чидантэм куасьме. Шунды угось укыр зол пыже. - Татын кытыназ ке ик ошмесэз вань, дыр! - Школаын дышетскыкуз Костя экологияя кружоке но ветлӥз вал. Соин ик солэн тодаз лыктӥз дышетӥсьсылэн тазьы верамез: "Нюк ошместэм уг луы". Табере со юзматӥсь вуо ошмесэз утчано кариськиз. Кускын дорозь будэм турынэз киыныз палэнъяса, пияш нюк кузя каллен вамыштӥз. Нюклэн шораз вуыса, со синйылтӥз: татын шашы уката нап-вож адӟиське. Лызгырлы, тӧдьысяська, купанча но кытчы ке ышиллям, лэся. Со понна татын будэ йырез поромытӥсь зыно тузь. "Озьыен, мон ӧй янгыша - ошмес матын ни", - шумпотӥз егит пи. Нюр интые лёгиськемзэ шӧдыса, солэн уката но золгес юэмез потыны кутскиз. Ӝоген со бадӟым из борды мырӟиськиз. "Кин тае татчы ваем?" - паймиз вал Костя. Изэз ӝутыны шуыса мыкырскиз но чылк-чылк вуо ошмес син шоры ӝимиз. Кезьыт ошмес вуэз сузеныз омыртыса гуч-гуч юэмез бере, Костялэн мылкыдыз буйгаз. Гадь тыраз шокчиз со кудӟытӥсь омырен. - Кыӵе умой! - шара ваземзэ ӧз ик шӧды со. Ошмес дорысь кӧня ке вамыш чигнаса, ожгарчи тузь модосэз ишкалтӥз. Солэн тодаз лыктӥз дасэтӥ классэз йылпумъямзы бере экологъёслэн лагерязы шутэтскемзы. Таӵе ик шулдыр нуналэ соос Лиляен ваче ки кутскыса лумбыт поръязы возьёс но нюкъёс кузя. Тазьы ик шӧдтэк шорысь вуизы ошмес дуре. Котырысьтыз улвайёсты, корт банкаосты утялтӥзы. Собере ог-огзэс юзмыт вуэн пылатӥзы. Соку Лиля тузь модосэз куаръёсызлэсь но сяськаезлэсь сузяса, ӵаж-ӵаж вуэз, коктейлез гумы пыр сюпсем музэн, гуч-гуч юиз но Костялы дэмлаз: - Ме, тон но тазьы юыса утча-ко. Вулэн шӧмыз ик воксё мукет луэ. - Ошмес дурын тонэ чупаны но ческытгес, - музьыезлэсь тузь шӧмо ымдуръёссэ чупаны ылаз Костя. Лиля соку ачиз нырысьсэ кизэ пилэн е улаз вуттӥз. Тузь омырен шокаса кудӟем егитъёс ог-огзылэсь гольык мугоръёссэс мусояса кема погылляськизы зӧк модосо кызлэн сай улаз. - Тон мынам, мынам, мынам гинэ! Валаськод-а сое, Лиля?! - быдэс дунне кылымон кесяськыны дась вал соку Костя. - Фи, шедьтэм ук малы шумпотыны! - вылаз сарафанзэ дӥсянъяз серектӥз Лиля. - Кин но кинэн уг кӧла, номыр отын сыӵе-таӵеез ӧвӧл. Адями кыӵе ке арбери ӧвӧл ук. . . - Ӝогак султыса, Лиля соку ури-бери лобатӥз лагерьзы пала. Нош ӝыт дискотекаысен куспазы номыре луымтэ кадь, Костяез адӟем но ӧз кары - ялан эктӥз мукет отрядысь Андреен. Со ӝытэ вожаменыз Костялэн сэпез ик пӧсьтыны турттэ вал кадь. Нош кӧня ке нунал ортчыса нылмурт выльысь пичи дырысеныз эшъяськем пияшез доры лыктӥз: - Костя, ойдо туннэ ӝыт асьмелэн ошмесмы дӥне ветломы. Мыным соку тонэныд туж умой вал. Та кылъёсты кылыса пияшлэн бурдъёсыз ик кылдӥзы, лэся. Ӝужыт но чиед мугоро Костя музьызэ лӧбак ки вылаз ӝутӥз но пир-р! гинэ берганы кутскиз. - Дугды, дугды, огпалмем! Адямиос адӟо ук! Воспиткамы нош ик визьноданы ӧдъялоз - кылэм уг пот ӟургетэмзэ! - пилэсь мозмытскиз нылаш. Нош ачиз мукетъёслы шӧдонтэм улсын гинэ пилэн бамаз ненег ымдуръёсыныз вуттӥськиз. Ӝыт соос берозь юмшазы. Мар юмшазы - шутэтскыса-шутэтскыса ог-огзэс мусоязы. Номыре валасьтэм дусымзэ соку Лиля индылӥз: - Ассэ но нылмуртэ гажась зэмос пиосмурт бордаз котьку нуллэ презерватив. Валад- а? Пияшлэн бамъёсыз ӝуаны кутскизы кадь: ма, зэмзэ ик, малы со та дырозь тае но ӧз вала на? Нош Лиляез нуны ваёно ке луиз? Вот нодтэм! Ярам ай, Инмар утиз, лэся, - Лилялы нылпи ӧз сюры. Берло Костя кисыяз котьку СПИД-лэсь но музон со выллем урод висёнъёслэсь утись арбери дасяса нуллӥз ни. ЗАГС-ын гожтӥськемзы, шулдыр сюан ортчытэмзы бере но кышноез нуны вордэмлэсь утиськоно кожаз. Ма, ачиз Костя но та ужпумен ӧз дырты: соос егитэсь на ук, ог- огзэс яратыса кӧтсы ӧз тыры ай. . . Ожгарчи нош ик ошмес вадьсы мыкыртӥськиз. Ву вылысь аслэсьтыз тусбуйзэ адӟоз кожаз со, нош ымнырыз ӧз возьматӥськы - ошмесэз сайясь бадӟым кызъёс сое мурт синъёслэсь ватӥллям, вылды. Костялэн серемез потӥз. Пияшлэн тодаз лыктӥз, кызьы соос Лиляен синучконэн котыртэм валес вылын ог-огзэс мусояллязы. Кӧлан висъетазы синучконъёс ошылыны Лиля дэмлаз. Аслэсьтыз веськрес мугорзэ валесысен но яратонэзлы адӟытэмез потӥз, дыр. "Эх, Лиля, кыӵе тон чебер!" - шара ваземзэ ӧз ик шӧды пияш. Собере эшшо огпол ошмес вуэз сузеныз омыртӥз но мӧзмонэн гыбдась сюлэмзэ басылскытон вылысь, лэся, кезьыт вуэз пушказ кисьтӥз. Собере каллен гинэ гурезь бамалысь кызъёс пала вамыштӥз. Пӧсь шундылэсь писпу саюлэ ватскыса, кысконзэ поттӥз. Оло, пе, котыраз бызгетӥсь чибиньёс ӵынлэсь кышкалозы. Синмаз, ныраз, ымаз нориськись чибиньёс выллем ик пилэн мӧзмонэн но яратонэн пачылам малпанъёсыз. . . . Лилялэн атаез, заводысь кошкыса, ужбергатӥсь кариськиз. Одӥг гинэ нылзылы дуно дӥськут, азвесь, зарни зундэсъёс, пельугыос, чыртыгышъёс басьтылӥз. Соин, лэся, эшъёсыз Лилялы вожъяськылӥзы. Вылаз ик, пиос со котыре та акылес чибиньёс музэн тэбинизы. Ма, Костя ачиз но таин валче уно уйёссэ изьытэк ортчытъялляз. Сюанзы бере гинэ капчияк шокчиз: табере яратоно Лилечказэ нокин таланы уз быгаты ни. Иван Иванович нылыныз эмеспиезлы кык висъетэн улонни басьтыса кузьмаз. Нош Костялэн нэнэеныз бубиз, туклячиен-кудозы но нылпиоссы азьын пунэме кылёнтэм вылысь, дыр, куинь висъетэн улоннизэс кык висъетэнэзлы воштӥзы но тазьы поттэм коньдонэнызы егитъёслы корка пуш тӥрлык чередӥзы. Ул но ул вал ини, шудэныд пыласькыса. Нош озьы вылымтэ. Гужем сессизэ но "кыкъёсын" йылпумъямез понна, Костяез институтысь чальтчытӥзы, собере сӥзьылаз ик армие басьтӥзы. Тани табере ӝыны ар мындазэ ини со - ожгарчи, дорезлэсь но мусо Лиляезлэсь палэнын. . . Аслаз малпанъёсаз выем пи дырлэсь лобемзэ но ӧз шӧды. Суйпосысьтыз часэз шоры учкалтӥз но абдраз: ӝоген ӝыт эскерон, собере отбой луоз ни. Интыысьтыз лӧбак ӝутскыса, Костя частез пала вамыштӥз. * * * Костя армие кошкем бере, Лиля чылкак огназ кылиз. Лидия Григорьевна но Иван Иванович, озьы ик картэзлэн нэнэеныз атаез Оӵкарлэн одӥг пумаз - заводзылы матынгес улыны кылизы, нош егитъёс выль микрорайонэ выжизы. Анаез ма ӵем чаклалляз нылзэ: огназ, пе, оло, сиськытэк но улэ. Сиён-юон сяна, коньдон вайылӥз. Лилялэн уго школа бере дышетскемез ӧз поты ни, нош уж шедьтыны туала вакытэ шуглэсь но шуг. - Тон, нылы, со служба занятиостӥ шуоназы коть ветлы вал - оло, маке ик ӵектысалзы, - дэмлаз Лидия Григорьевна огпол. Нош Лиляез диван вылын кыллёнъяз назьыльскиз но мылпотытэк кадь шуиз: - Фи, мамочка, кыӵе тон нодтэм! Ма, со службаязы дворнике сяна ыстыны уг тодо. Нош тон син азяд пуктыны быгатӥськод-а мынам кадь вылтусэн дворникез? То-то, уд! Яке папалэн-а монэ сюдэмез уг поты ни? - Мар тон, мар тон, нылы! Бубид тонэ туж яратэ - нокинлы обидьыны уз сёты. Тау Инмарлы, уксё но та нуналлы тырмымон поттэ. Только ачид огнад мӧзмиськод шуыса, оло, пӧй, уж дурын, калык пӧлын шулдыргес луысал. Тани монэ бубид ужаны уг лэзьы ни, нош монэ весяк со заводам. Аслам отделысьтым нылкышноос пӧлы сюлэм кыске. Эшъёсы пӧлын куректонэ но, вань висёнъёсы но вуно, - кизэ азькышетаз ӵушылыса, кышномурт нылызлэн пыд палаз диван вылэ пуксиз. - Тон, мама, нош ик вуж кырӟандэ кырӟаськод! Эшшо шу на: строе султыса, ваньмы дэмен демонстрацие потом но дуно партимес данъялом! - Лиля пуксиз. Киысьтыз книгазэ ворсатэк ик вӧзаз понӥз. Синъёсыныз лек чилекъяса, нылыз анайзэ пыӵкылӥз: - "Дэмен уж буй-га-тэ!" Да со парадокс! Коммунистической бзик! Папа коть сое кемалась валаз ини, нош тон ялан вуж сямен малпаськиськод! Вала ук тон: котькуд адями - со личность. Нош личность эрико луыны кулэ, соку гинэ со ассэ но гажалоз, пайда вайыны но быгатоз. Лидия Григорьевналэн синвуосыз быльыразы. Тае адӟыса, нылызлэн сюлэмыз небӟиз, лэся. Оло нош янгыш луэмзэ-а валаз - анайзэ пельпумтӥз ӟыгыртӥз: - Я-я, мамочка, вождэ эн вай. Только. . . давай уж сярысь ум вераське ни. Какие мои годы, шедёз ай маке-со. - Собере шонере потыны турттыса музэн, ӝӧк вылын кыллись газетъёс шоры возьматӥз: - Тӥни, ялонъёсты весь чакласько. - Ма бен мынам но выль газетэ вань ук, - берлань кутсэ кутчаны шӧтам Лидия Григорьевна пукон интыысьтыз сэзь султӥз но пырон ӧс дорысь стенкалэн ӝажыяз понэм сумкаяз утчаськыны кутскиз. - Тани, "Из рук в руки", олокыӵе но ялонъёсыз вань. Трамвайын лыктыкум газет вузась пичи пи пырак вадьсам пуксиз но тэльмырись куараен куриз: "Кенак, басьты вал огзэ газетме, а то мон планме уг тырмытӥськы". Ачиз тэшкыли быдӟа гинэ, нош аслыз нянь юдэслы коньдон поттыны амал шедьтэм ук. Жаль потӥз со пияш, соин ик газетсэ басьтӥ. Татын шурум-бурум арбериосты вузан-басьтонысен кутскыса квартира воштон, кинэн ке тодматскон сярысь ялонъёсты лыдӟод вылэм ява. Лидия Григорьевна газетсэ нылызлэн кияз сётэ вал но, Лиля кулэ ӧз кары: ӝӧк вылэ пон, пе, берло лисъяло ай. Кышномурт ӧз мерскы ни нылыз котыре - ваменэс, вог сямзэ тодэ угось. Буйгаз ке, ваньзэ ачиз ик тодоз, шедьтоз-валалоз. Лидия Григорьевна ӧс пала кыштырак гылӟиз но дӥсяськыны, кутчаськыны ӧдъяз. - Тон, оло, кошкиськод ни? - диван вылысь султыса, Лиля но пыронние потоно кожаз. - Бен, нылы, куазь югыт на ке но, бер ни ук - бубид ыштоз, - янгышам тусын кышномурт учкиз нылыз шоры. Со вакытэ ик лушкемен данъяськиз: удалтэмын ке удалтэмын ик Лилечкаез - мугорын но веськрес, тусбуйын но синмаськымон. "Ваньмыз умой луоз ай", - ассэ ачиз гинэ буйгатӥз анай. . . Нэнэез сьӧры ӧс ворсаськем бере, Лиля телевизорезлэсь пультсэ кырмиз. Та вакытэ эшшо огез сериал мынэ. Сериалъёсты нылмурт укыр яратэ. Отын сыӵе чебер яратонэз возьматыло. Эсьма сюлэм ик лычсузе. Мылкыдэз вырӟытӥсез но, бичатӥсез но тырмыт. Нош кыӵе майбыр уло отысь геройёс! Нуназеосы нылкышноос я йырсиӵышконние мыно, я мугорзэс кыдатонъя тренажёръёсын выро, нош ӝыт ке вуэ, ресторанэ я кафее кӧчо. Асьмелэн кышномуртъёсмы музэн семьязэс сюдон-дӥсян но со выллем укыр мӧзмыт ужпумъёсын асьсэды уг ранӟыто*. Уз, Лиля нэнэез сямен кухня - завод сярысь гинэ малпанъёсын уз улы. Со чебер, шулдыр улыны вордскемын. Костя но сое валалоз: армиысь бертӥз ке, кыӵе ке фирмае охраннике я телохранителе интыяськоз. . . Ӵапак та вие Лилялэн син шораз йӧтӥз "бегущая строка" шуонысь тунсыко ялон: массаж лэсьтонъя кабинетэ, пе, дас тямысысен кызь куинь аресозь веськрес мугоро нылмуртъёсты ужаны чорто. Лиля диван вылысьтыз ӝогак тэтчиз но ӝӧк доры мыныса татын кыллись огезлэн газетлэн сэрегаз али гинэ адӟем телефон номерез гожтӥз. Ӵуказе ӵукна ик со отчы жингыртоз. Оло, ӵапак со кабинетысен ик кутскоз Лилялэн майбыр, номырлы ёрмытэк улонэз? Массаж лэсьтыны уг быгаты ке, ӵок - дышетозы. Со понна Лиля егит - кызь арес но ӧз тырмы ай, мугорын но ялонын куремъя кадь веськрес, кузь куко. Отӥзэ ини улон ачиз возьматоз. . . . - Тӥляд мылкыдды, чеберай, милемлы валамон. Тӥ но милемды валаны тырше. Милям кабинетамы ветло "выль ӟучъёс" гинэ. Секыт ужъёсты быдэсъямзы бере, соослэн соответственно ӟеч шутэтскемзы потэ. Валаськоды-а тӥ монэ? - Костялэсь но, оло, ӝужытгес мугоро, паськыт пельпумо шоро-куспо арлыдо воргорон Лиляез йырысеныз пыдозяз, собере пыдысеныз йырозяз мертаса выллем учкиз, синъёсыныз ныллэсь саурзэ чаклаз но витьымтэ шорысь юаз: - Бюстгальтердылэн быдӟалаез куинетӥ номер, нош ӟыгыртыса - 68 сантиметр, озьы-а? - О-о. Нош кызьы тӥ тодӥды? - ӧжытак ӵыжектӥз Лиля. - Умой, умой, сокем зол ӧд керпоты - таиз милем ярамон. И вот мар, давай "тӥ" шуыса ум вераське ни, та минутысен - "тонэ" выжиськом, - воргорон Лиляез пыртӥз сӥсъяса кадь учке. Лилялэн мугорыз солэн учкемысьтыз юзыр-кезьыр луэ ке но, нылмурт но пиосмуртлэн синъёсаз меӵак мертчиськиз: кыӵе ке шунянь медаз кожа, пе. Уже кутӥсь мыньпотӥз: - Одним словом, гыдыке, тыныд али гинекологлэсь справка ваёно, собере - уж борды. Эшшо дорысьтыд телефондэ милемлы иворты. Куддыръя клиентъёсмы уин но вуо. В общем, ненормированный рабочий день. Со понна уждун баксъёсын басьтод. Кӧня-а? А кызьы ужалод. Ӟеч ужад, клиентъёсмылы кельшид ке, соответственно уждунэд но бадӟым луоз. Ну давай, табере дуй больницае, собере - пырак татчы. Окей? Лиля нодтэм ӧвӧл. Та кабинет шуоназы нырысьсэ пыремез бере ик валаз, кыӵе ужез быдэсъяны кулэ луоз солы. Валамон ини, анаезлы таӵе уж ӧй кельшысал. Нылзэ но соин дауртэмлэсь алысал. Атаез - ӧйтӧд. Туж ик уз яра, дыр. Ма, со ачиз но та выллем юртъёсы кожалля кадь йӧтэ Лилялы. Уйшор бере вуэ но, кышноезлы "ужын ӝегай" шуэ. Лидия Григорьевна оло зэмен оске, оло оскемъяське. "Ойдо ӵок, соослэн улонзы, мынам - аслам. А мар татын уродэз? Котькудӥз улэ озьы, кызьы быгатэ. Пиосмуртъёсты валесын буйгатыны, мусояны но котькудӥз кышномурт уз быгаты, нош мынам пӧрмоз. Костялэсь азьло но пиосмы вал ук - ваньзылэн мылкыдазы номыр аламаез ӧз шӧдӥськылы. И вообще, дунне кылдэм дырысен кышномуртъёс асьсэды но сюдо-дӥсяло, огъя улонэз но радъяло, пиосмуртъёсын валесын кусыпъёссы пыр. Костялы гинэ нокин номыр медаз шока. . . Ма, нокин уз но тоды ук мынэсьтым ма ужамме", - эмъяськонниысь "уж дураз" мыныкуз вожвылъяськись малпанъёс кӧня ке сюлэмшугъяськытӥзы ик нылмуртэ. Нош троллейбусысь васькемез бере ассэ чылкак буйгатӥз: Костя кӧня ке толэзьтэк кык ар уз луы, нош со дыр куспын Лиля тырмыт уксё поттоз, собере та ужезлэсь куштӥськоз. Котьмар ке но, Лиля картсэ яратэ. Яратэ озьы, кызьы быгатэ. . . Лилялэн нырысетӥ клиентэз луиз зӧк кӧто "кӧй паляка" (озьы та пиосмуртэ ас понназ нимаз нылкышно). Кӧтыз зӧкен сэрен пиосмурт нылмуртэ ачиз мусояны но уг быгаты вылэм. Соин ик со Лиляез ас вылаз пуксьыны куриз. Ог кык час валесын погылляськемзы бере, "кӧй паляка" ымдуръёссэ нюлыса дӥсяськыны ӧдъяз. Шобрет улэ ватскем нылмурт доры лыктыса, сое ӟырдыт чупаз но кисыысьтыз суменак коньдон поттӥз: - Таин туннэ понна тырмоз, дыр, о-о-а, гыдыке? Кузёосыдлы мон нимысьтыз тыро, нош тазэ пыдлогес ват. - Собере ӧсэтӥ потыкуз ватсаз на: - Тон мыным туж-туж кельшид. Азьланяз но пумиськылом на ай. . .Ӧз, Лилялы та "кӧй палякаез" мусояны юрӟым ӧз поты. "Нош мон ке кышкасько вал. Учкод ке, ваньмыз туж огшоры вылэм. Вылаз ик вирез шудытон-выльдон аслым но пайдаё луоз, вылды. Озьы гожъямын вал огаз журналын", - вож кагазъёсты брюкиезлэн ӟепаз пононъяз ас понназ пальпотӥз со. Толэзь ёрос ортчыса, Лиля ас удысэзлэн ӧраз пыриз. Ужез сокем ик секыт ӧвӧл. Куд-ог нуналъёсы бен куинь-ньыль пиосмуртъёсын но кӧлано луылэ ик. Сыӵе дыръя нылкышно аслыз ачиз шуэ: "Специфика работы такова". Нош ӵемгес сое зӧк кисыё клиентъёсыз узыр ресторанъёсын кулэ адямиосын пумиськонъёсы нулло. Огез арлыдо пиосмурт меӵак вераз: - Тон, муспотонэ, мынам - выже. Бен, бен, эн паймы. Выж - со огпал ярдурысен мукетаз потыны луонлык сётӥсь арбери. Тон - шоро-куспо улонысь узыр улонэ выжыны юрттӥсь. Та ужез ӟечкын лэсьтыны пишмытӥд ке. Мон тонэ зарниен дӥсяло. Лиля визьтэм ӧвӧл - со мылысь-кыдысь тыршиз, кулэ интыяз визьмо кыл вералляз, нош ӵемгес - синмальдымон чебереныз паймытъяз, вылаз ик мусо пальпотыны тыршылӥз. Зэм, куддыръя клиентэзлэн "кулэ адямиеныз" кӧлоно но луылӥз. Бен мар ке шат, шалтыртӥсьсэ гинэ данакгес мед сётозы, нош пиосмурт мугор - ваньмызлэн огкадь. Озьы кожа вал Лиля, таиныз "кулэ адямиен" ваче кыльытозяз. Куатьтонлэсь ортчем воргорон, кыксы но гольык кариськем бере, ӧжытак могаса вазиз: - Вот мар, голубушка, мынам тонэ мусояме уз пӧрмы, дыр. Простатит - номыр уд кары. Тон вӧзам гинэ кылльы, уд ке юрды, пичи вынме маялля - оло, ӝутскоз. - Со возьдаськыса музэн шобрет улэ пыриз но дӥсьтытэкгес ныллэсь мусторъёссэ, кӧтсэ, макесъёссэ маялляны шӧтаз. Абдраменыз Лиля ма карыны валатэк кылле. Нош песятай куре: - Мусоя пичи вынме, туж курисько, аслэсьтым пиосмурт кужымме шӧдэме потэ. Быгатӥд ке улӟытыны, коть огполлы ке но, мон тынад зарни чорыгед карисько: мае курид, сое ик быдэсто. - Мыным номыр кулэ ӧвӧл, - песятай Лилялы юрӟым потыны ӧдъяз. - Э-э, озьы уг луылы. Адями улэп дыръя солы ялан маке но уг тырмы. Тани тынад, шуом, вылӥ дышетскемед внаь-а? - ёртэ воргорон нерге. - Нош малы со мыным? - абдраз нылмурт. - Озьы эн шуы, голубушка. Мон ведь валасько: та удысад тон кема уд чида, егит дыр - со туж вакчи маке, лысву сямен ӝог тӧлӟе. Кожаськод, мон котьку таӵе вышкы выллем вал-а? Ӧй, голубушка. Уно кышномуртъёсты лычсузьымоназы мусоялляй. Студенткаосы но дорам ӵем кожаллязы. Нош табере - тани. . . - пиосмурт чалмиз. Лиля паймыса учкиз та пурысьтам йырсиё зӧк воргорон шоры. Табере солы та пересь сокем ик юрӟым ӧз поты ни. Озьы ке но, солэсь куронзэ быдэстыны ӧз дырты. - Нош тон тодӥськод-а, голубушка, мон ведь тыныд диплом лэсьтыны быгато! - нылмуртэ маяллямысь дугдыса, песятай миндэр вылэ гырпумъяськиз. - Да-да, диплом! Мон ведь али коммерческой университетлэн ректорез луисько. Нош таӵе чебер но егит нылмуртлы диплом азьланьын уз люкеты. Тон соглаш-а, голубушка? Лиля огшап малпаськиз: диплом? Чик дышетскытэк-а? Ма бен, яралоз. Вылаз ик: со понна сокем трос ик тыроно ӧвӧл - песятайлэсь марымзэ гинэ посоно. Нош ӵыжы- выжыосызлы, тодмоосызлы валэктоз, ӝытъёсы дораз ӧз кемдылы, ӝыт ужась университетын дышетскеменыз шуыса. Ваньмыз та туж умой радъяське ай. Зэмзэ ик, Костя армиысь бертӥз ке, дипломеныз Лиля ужтэк уз кыльы. Тазьы малпаса, песятай пала нылмурт берыктӥськиз. . . * * * Нуназе бере Лариса Лиля кензы доры мыныны дасяськыку, "чип-чип-чип" чипкетӥз ӧс вадьсысь гырлы. "Кин меда ни отын?" - вожез потӥз нылашлэн. Угось котьку озьы луэ: кытчы ке дыртыкуд, одно ик тонэ ӝегатӥсь сюре. Таяз учыре Маша эшез вуэм. Улоннизэс пичиятэмзы бере, Ивановъёс нылзэс матысяз школае выжтӥзы. Собере таяз дышетсконниын бадӟымгес саклык висъяло математикалы, нош Лариса со лыдпусъёсысь оломарзэс адӟе. - Кык арзэ ке но эшъёсыдтэк чидалод ини. Со понна азьланяз аслыд ик институтэ я университетэ пырыны йӧн луоз, - буйгатӥз нылзэ Николай Петрович. Картэныз соглаш кариськиз Нина Андреевна но: - Ма, сокем-сокем мӧзмид ке, кыдёкын ӧвӧл ук - эшъёсыныд адӟиськыны ветлод. Нош Маша дорамы но вуылоз, вылды. Зэмзэ ик, Лара но Маша нырысетӥ классысен укмысэтӥозяз ик одӥг парта сьӧрын пукизы. "Кыктоос" шуыло вал соос сярысь тодмооссы, ог-огзылэсь люкиськыны ӵыдымтэысьтызы. Табере тани нылашъёс ӝыны арлэсь кемагес пӧртэм школаосы ветло. - Маши, ой, мон туж юн дыртӥсько. Ойдо монэн ӵош, - эшез ӧс кусып вамен выжем бере ик ӟабыльтыны ылаз Лариса. - Тон бен кытчы? - Ай-й, Лиля доры ветлыны косӥз нэнэе. Костя курем: тодэ, пе, малы сокема Лилялэсь гожтэт ӧвӧл. Телефонэн гинэ жингыртыса утчаз нэнэе но трубкаез басьтӥсь ӧвӧл - олокытӥ калтыртэ, вылды, ни со кукла, - вожез потысагес валэктӥз Лариса эшезлы. - Уг, Лиля доры мон нокызьы но уг мыны, - чурт-чурт вераз Маша. Бен, Лариса тодэ, макем зол эшез яратэ вал Костяез. Нош Костя сузэрезлэсь эшсэ кылэм-адӟем но ӧз карылы. Табере тӥни Маша Лиляез адӟонтэм каре, яратонзэ таламез понна. - Тон бен огшоры гинэ лыктӥд вал-а? - янгышам тусо луиз Лариса. - Да-а, оло, пӧй, туннэ ӝыт "Инвожолэн" прзздниказ уд-а мыны шуисько вал но, - Машалэн мылкыдыз чылкак пильмаськиз. Лиля доры мынэ бере, озьыен эшезлэн сюресэз мынтӥт луоз. Нош Машалэн сокем ветлэмез потэ вал та ӝытэ. Алигес соослэн школаязы вуылӥзы та журналлэн редакцияз ужасьёс. Соос соку асьсэлэсь гожтэм чуръёссэс но лыдӟизы. Машалы туж кельшизы Захаровлэн но Нянькиналэн кылбуръёссы. Нырысетӥез улонысь туж сюлэмшугъяськытӥсь ужпумъёс сярысь серем пыр выллем вера. Нош нылмуртэзлэн чуръёсыз ненегесь но со вакытэ ик макем ӟеч возьмато туала ныллэсь лул пуш дуннезэ. Машалэн али но пель сьӧраз чузъясько на: ". . . Мусо лорд! Тӥ сыӵе веськрес. . . Тӥ - чебер. . . Тӥ сыӵе бабылес! Тӥ сыӵе. . . Тӥ сыӵе паймымон! Тӥ сыӵе. . . Тӥ сыӵе муспотон!.." Ачиз Маша кылбур гожъяны уг пӧрмы, нош та чуръёсты нылаш аслаз карыса Костялы лыдӟысал. . . Радио пыр ялонэз кылыса, нылаш лӧптӥз: со одно выльысь пумиськоз яратоно гожъяськисьёсыныз. Нош анаез нылызлы шуиз: "Огнадэ уг лэзьы! Ларисаен ӵош ке - соку мынэ". . . Тӥни табере Машалэн вань чебер малпанъёсыз кир-пазь пазьгиськизы. - "Инвожо" ансамбльлэн концертаз-а мар-а? Мыным соос чик уг ярало! - зӥрак берытскиз Лариса. - Ӧвӧл, тон ӧд вала. "Инвожо" - со егитъёслы журнал, удмурт кылын потэ. Мон ноку но ӧй малпалля удмурт сямен но сокем жингрес, паймымон кылбуръёс гожъяны луэ шуыса. Тани кылзы ай, кызьы адӟе улонэз отысь огез ужасьсы - Пётр Захаров: "Мунчоям кортӵог шукки но Мучоло отчы оши. Собере эшшо шукки но Кобыме оши. Собере эшшо шукки на - Нош ик мучоло оши. Собере эшшо шукки на - Нош ик кобыме оши. Собере эшшо шукки на. . . Ӧй ни шедьты ошыны. . . - Эй, - кеськи бускелелы мон, - Вай мардэ ке ошыны. . ." Зол ведь? Удмурт кылъя дышетӥсьмы шуэ: улон шоры философ синмын учкись мурт гинэ, пе, озьы гожтыны быгатоз, - Машалэн кылыз пертчиськиз. Ма, солы сиён но, юон но эн сёты - лыдӟиськон, кылбуръёс гинэ мед луозы. Сояз школаязы удмурт кылэз но дышето, нош Ларисалэныз - уг. Бен укмысэтӥ классозь со но вордскем кылзэ дышетэмъяськиз ик. Дышетэмъяськиз шуыны гинэ кыле на, угось бадӟым карын будэм ваньмыз сямен нылпиос ӟучомылэмын. Нош соосты выльысь удмурт карыны туртто на. Ӧйтӧд, маке пӧрмоз ик меда? Маша выллем фанатикъёсызлэсь ке шат, нош Ларисалы анай кылыз нокыӵе ик уг поты. Дыг-мог ӟабыльтыны йӧндыре - таиныз но окмоз. - Мынам пичи но сыӵе ужрадъёсы пыриськеме уг поты, - эшсэ обидемлэсь кышкасагес ик вераз Лариса. - Нош кӧняын со луэ? Машалэн сюлэмаз пичияк оскон тылгизьы чилектӥз: - Туннэ ӝыт куать часын кутске. Нош ужрад бере, пе, дискотека луоз. Монэ мемие огнаме, тонтэк уг лэзьы. - Нылашлэн куараяз тэльмыремез шӧдӥськиз. Нош Лариса, "дискотека" кылэз кылыса, пельёссэ чорк кариз. Тае валаса, Маша уката лӧптӥз: - Нош та журналын огез ужасьсылэн кылъёсызъя кырӟанъёс но кылдытэмын ни. Тон ведь кырӟанъёсты яратӥськод? Мукетыз ужасьсы ачиз ик аслэсьтыз кырӟанъёссэ сцена вылын возьматэ, лэся. Мынод-а? Таӵе-таӵе тэльмыремез кылыса, Ларисалэн сётскытэк амалыз ӧз луы ни. Эшшо ке Маша куатаськоз, солэн сыӵе сямыз поталля. Нош эшезтэк Ларисалы мӧзмыт луоз. - Ярам, Лиля доры мон ӝогак ветло но вуо. Мон доры тон вить часлы лыкты, ява, - нылашъёс юнме ӧз ӝегалэ ни: огез ог пала, мукетыз мукет пала кошкизы. Ӝоген выльысь пумиськон вылысь люкиськизы. . . 1 Виктор Шибанов Этнофутурист но, поэт но, тодосчи но, казак пи но. . . Со - доцент Дас ар ужа ини Удмурт кун университетын. Студентъёслы лыдӟе ӟуч но удмурт литератураез. Со ик луэ наука ласянь деканлэн юрттӥсез. Писатель, критик, кылбурчи. Куатетӥ но укмысэтӥ классъёслы удмурт кылын учебникъёс дасясь. Ньыль ар ӵоже Удмурт радиоын "Дунне кизилиос" радиоверанэз нуись. Студентъёслэн диплом уженызы кивалтӥсь. Финляндиын удмурт литературая антологиез дасясь, пӧртэм финн- угор конгрессъёсы пыриськылӥсь. Глаз ёросысь Котныр гуртын вордӥськем но Чорыглэн знакез улсын дунне вылэ вуэм Виктор Леонидович Шибанов. Л. Т. Виктор Леонидович, кызьы кутскиз литературае вамыштон сюресты но кызьы бадӟым литература улонэ вуиды? В. Ш. Секыт но умой юан. Литературае вамыштон но вуон - со кузь тубат, кытын трос лёгетъёсыз. Нырысь ик верало литературае вамыштон сюресэ сярысь. Кутсконэз паймымон гинэ. Дас одӥг арес дыръям, великысь усьыса, мон пыдме чигтӥ. Толэзь ӵоже дорам укное учкыса улӥ. Ӵапак тулыс кутскиз, лымы шуна, пучыос пото; мон пушкын но со дыре кыӵе ке выль адями вордӥськиз кадь. Нырысь суреданы кутски, собере кылбуръёс ӧръяськизы. Мон сярысь "Дась лу!" - э Владимир Романов гожъяз, огзэ суредме поттӥз (соку со кылбуръёсын выремме ӧз тоды на). Кылбураме шараяськиз берло, Глазове юнкоръёслэн слётазы ветлыкум. Романов кичӧлтэмен ик "Молот" журналэ куиньзэ кылбурме печатлазы. Ачиз Флор Васильев ("Молот"-лэн редакторез) ӟечкылаз монэ сыӵе вормонэным. Мон шузимымон шумпотэмын вал. Собере ини вераны луоз, кызьы дас тямыс арес дыръям Ижкарын бадӟым семинарын кылбур книгаме эскерыны но печатланы дэмлазы. Тӥни сыӵе, дыр, мынам литературае вамыштон сюресэ. Л.Т. Нош табере - бадӟым литературае пыремды сярысь. гожъяны. Сизьыметӥ- В.Л.1982-тӥ арын "Выль ужъёсы ӧтё" нимо кылбур книгае печатласькиз. Со нырысетӥ "лёгетэз". Кыкетӥяз мыным ӧз удалты: Д.Яшин юрттэмен тыршисько вал Венгрие ( Петер Домокош доры) аспирантурае мыныны - тоталитаризм мыным зол пыкет пуктӥз. Но 1985-тӥ арын Ленинград университетысь аспирантурае пыри. 1986-тӥ арын татысь литобъединениын кылбуръёсме возьматыны дӥсьтӥ но 1988-тӥ арын оштолэзе Москваысь дано кылбурчи Владимир Соколов доры ветлӥ (диссертациелэн темаез солэн кылбуретэныз герӟаськемын вал уго), лумбыт вераськыса пуким но валай, малпаськон но кылбуран манерея ӟучъёслэсь улӥын мон туж ик ӧвӧл шуыса. Собере ини 1993-тӥ арын мон Россиысь писательёслэн огазеяськонзылэн ёзчиез луи. Кызьы адӟиськоды, бадӟым литературае пыронэ огдыре кык пытьы кузя радъяськиз (куасэн мыныку сямен): огласянь наука, мукет ласянь, поэзия. Со дыре ик вал на стройбат (рядовой луыса), но соку ини мукет ужпум. Л. Т. Наука но литература вискын нокызьы но пичи дырез вератэк кельтыны уз луы, дыр. В. Ш. Пичи дыръям туж кӧшкемасько вал. Семьяын ми вить нылпи: кык агае, апае но выны. Озьыен, мон куинетӥ пи луисько. Мон вордскыку, атаелы куамын вить арес вылэм. Социологъёслэн эскеремзыя но калык визь чакламъя, та лыдпусъёс сьӧрын трос гинэ тунсыкоез усьтӥське. . . Мар вал пинал дыръям? Уриськон, веник дасян, турнан, картофка мерттон-копан, нюлэскын пу дасян. Гуртысь ваньмыз пиналъёслэн сямен. Гонораръёс вуыны кутскем бере, аслым выль велосипед басьтӥ (сояз, кудаз пыдме чигтӥ, мон пуксьыны ӧй дӥсьтылы ни). Л. Т. Тӥ тодосчи, кылбурчи, критик луиськоды. Секыт ӧвӧл меда сомында удысэз огдыре нуыны? В. Ш. Мон юромо тыршисько огдыре кӧня ке ужен вырыны (сыӵе амалэз "теория осьминога" шуисьёс но вань). Алигес гинэ мон та сярысь З.Рябининалы "Удмурт дунне" газетэ вераса пуки, но "Инвожолы" но вератэк уг чидаськы. Шуом, туннэ маке уг пӧрмы ке, нош кыкетӥез ласянь вожъяськисьёсыд люкетыны кутско ке, соку тон шыпытак гинэ куинетӥез удыс борды выжиськод, мултэс кужымдэ быдтытэк. Нуналаз трос ик уд лэсьтӥськы кадь, но толэзь ӵоже лэсьтэмед трос гинэ люкаське вылэм. Л. Т. Поэзия но кылбур дунне - мар со тӥ понна? В. Ш. Со - маке но валантэм сыӵе, кудзэ валаны тыршон понна, мон улонме но сётыны жаль ӧвӧл. Удмурт лулчеберетын поэзия - со валтӥсь удыс, кытын тужгес но мур ватскемын удмуртлык, удмурт философия, озьы шуыны луоно ке. Кылсярысь, кунгож сьӧрын мон возьматыны тыршисько ке, асьме лулчеберетмы дунне калыкъёслэсь бере уг кыльы шуыса, одно ик тросгес ӵошатонъёс поэзиысь верано луэ. Л. Т. Али дыре трос гинэ верасько этнофутуризм сярысь, тӥляд но со сярысь статьяосты я Ижкарын, я Саранскын, я Сыктывкарын, я Эстониын печатласько. Но ведь этнофутуризм чылкак выль ӧр уг луы ни? В. Ш. Зэм но, 2000 арын гужем Тартуын та сярысь вераськыкум, Андрес Хейнапуу пусйиз, мынам докладэя этнофутуризм 1990 аръёсы гинэ кылдӥз кадь шуыса. Солэн шӧдэмезъя, асьме выль ӧр Кузебай Гердысен ик кутскыны кулэ ни (мон тупатысал: Григорий Верещагинысен). Угось ма сярысь со этнофутуризм? - Туала (модерн) вакытлэсь ужпумъёссэ валан понна, усточи этнослэсь аспӧртэм мифъёссэ уже кутэ: озьы миф но туалалык сыӵе пӧлэстӥсько - пӧрме чеберлыко текст. Зэм, этнофутуризмын азьпал радэ потэ на одӥг тодмет - туала дуннеысь постмодернизмен герӟаськон,соин ик "этнофутуризм" нимкыллэсь паськыт но сюбег пуштроссэ висъяны кутсконо ни, шӧдске. Паськыт пуштросэн ке, отчы Гердлэн но, М.Петровлэн но куд- ог ужъёссы пырозы. Сюбег пуштросэн ке, со -С.Матвеев но Л.Нянькиналэн выллем выль утчанъёс. Л. Т. Кызыь учкиськоды туала удмурт литература шоры? В. Ш. Мон сое гажасько, соин - ӧжыт ке но - данъяськисько. Но капчи вераны: "милям литературамы узыр". Тӥ кутэ но кунгож сьӧрысь тодосчиос азьын сое валэктыны тырше ай (соосыз ӵемысь ӟуч сямен уг валало)! Туж секыт уж вылэм со. Берло дыре, кылсярысь, мон сыӵе "валэктон" ужез немец но финн кылын нуыны курадӟи. Озьы кӧня ке матысь эшъёс но шедьтӥ, со - финнъёс Кари Салламаа но Ээро Тарасти, француз Эва Тулуз, мадьяръёс Петер Домокош ноКаталин Надь .. Л. Т. Тунсыко но паймоно кадь, Виктор Леонидович, кин тӥледлы Америкаын печатласькыны сюрес усьтӥз? В. Ш. Зэмзэ но, тросэз дано профессоръёс но ас ужъёссэс Америкаын печатланы уг быгато. Мыным татыназ удалтӥз. 1998-тӥ арын пыриськи семиотикъёслэн конгрессазы, кытын ӟуч кылын докладъёс лэсьтыны уг луы вал. Мон докладме финн кылын гожтыса азьпалаз Финляндие лэзи, собере - монэ конгрессэ ӧтемзы бере - сое немец кылэ берыктоно луи. Ӟуч кыл ӧй вал бере, мон татын но пеймыт гуын кадь улӥ. Берло ини тодӥ, вераськеме тодмо семиотикъёслэн син шоразы йӧтэм но сое США-ын печатлано "Сноӟ, Фоӧӥсӵ, Силӥнцӥ" антологие пыртыны вераськиллям. Таиз ласянь тау финнъёслы, соос ик текстме англи кылэ но берыктӥзы. Потэм книгаез мыным почта пыр ыстӥзы. Л. Т. Тӥледын артэ котьку егитъёс, студентъёс. Дорады но соос, университетын но. Уд жадиське-а? В. Ш. Котьку ик ӧй шуысал. Но диплом ужъёсты вуттон дыръя (мынам арлы быдэ 8-10 кузя диплом гожъясьёсы), мон соосын котьку но ӵош луыны тыршисько. Собере, наукаосъя кандидатэз, монэ дас ар пала общежитиын возизы (азьвыл 17 арескысен ик отын улэмме уг вераськы ни). Общагалы йыркурме "шунтон" понна, мон ялан котырам студентъёсты возисько вал, кудъёсызлэн мыным соин яке таин юрттылэмзы потылӥз ке. Иське, мае мон вуи лэсьтыса со дас ар ӵоже общежитиын улыкум, отысь ӝыныез - со студентъёслэн мыным юрттэмзы. Л. Т. Ньыль ар ӵоже ни мировой классикаез "Дунне кизилиос" нимо радиожурналын лыдӟиськоды. Азьланяз та пумысен малпанды? В. Ш. Мон толэзьлы быдэ лэсьтӥсько ӝыны часъемесь кык радиоверанъёсты. (туэ - толэзяз быдэн одӥг).Озьы бере, ньыль ар куспын укмыстон куатёзь луыны кулэ ни. Зэм но, ужаны капчи ик ӧвӧл. Куд передачалы быдэс арня пуконо луэ (валамон ни, ӝытъёсы). Тани ХХ даурысь гинэ авторъёс (тодэ ваемея): Л.Т.Кылбурчи кылбура калыкез понна. Солэн одӥг кырӟанэз ке но калыке вӧлме ке, со ини туж умой. Мар со сярысь верасалды? В.Ш. Мон юамдэ тазьы валай: малы уд гожъяськы кылбуръёс композиторъёслы? Яке со туж секыт-а? Мон понна, зэмос кырӟан но зэмос кылбур - со пӧртэм жанръёс. Шонерзэ вераса, мон юромо сыӵеесь кылбуръёс гожъясько, кудъёсызъя кырӟан лэсьтыны шуглэсь но шуг (метрикаез тӥяме ласянь, "уйбыртон" манерез но постмодернизм амалъёсты кутэме ласянь ). Зэм, Надежда Уткина ог куиньзэ, ньыльзэ кызьы ке но быгатӥз ик крезьгурен "дӥсяны"! Паймисько. Л. Т. Нош мар улонады эшшо но паймытэ на? В. Ш. Николай Рубцов 36 аресаз кулӥз. Со сярысь диссертациме гожтэме потэ вал. Таӵе арлыдын ик сузэре улонысь кошкиз. Куинь нылъёсыз кылизы. Эшелэн но , Михаил Федотовлэн, 36 арескын сюлэмыз ужамысь дугдӥз. Туж но туж паймытэ та монэ. Л. Т. Лыдӟисьёсмы тодо, дыр, Тӥ С. Ф. Васильевен ӵош "Под тенью зэрпала" книга поттӥды. Эстоние, Венгрие, Финляндие вуылыса, оло, таӵе бадӟым уж борды басьтӥськиды. В. Ш. Л. Т. Кыӵе малпанъёсын но ужъёсын выль дауре выжиськоды? В. Ш. Берло кык ар мон понна туж секыт ортчиз. Ужме аналтыса кошкылӥ ни вал университетысь. . . Ыштӥ анайме, кудӥныз артэ кык ар ӵоже операциысь операцие ветлоно луылӥз. . . Гужем ӵоже арня но ӧй шутэтскы, нуналлы быдэ шӧдӥсько: тани- тани чигисько яке ваньмыз азьын пушто кадь. . . Соин ик шуысал: даур "воштӥськон" вакыт - зэмзэ но секыт маке. Мед инмар тросгес чидан но тросгес тазалык кузьмасал! Л. Т. Туж бадӟым тау. Малпам ужъёсты котьку мед быдэсмозы. 1 Гильман Касимов Чупчи шур кузя Удмурт музъемлэн уйпалаз бызе Чупчи шур. Чупчи - аспӧртэм шур. Котькуд шуръёс уйпалысь лымшор пала яке лымшор палась уйшор пала бызё, нош таиз - вамен. Куд-ог интыосын шур гурезь выллань тубе кадь, кытӥ-отӥ вуосыз дугдо, люкасько но нош азьлань бызё. Тодосчиос верамъя, та шурлы бадӟым йӧ (ледник) ӧр кырем дас сюрс ар талэсь азьвыл. Арысь аре сантиметрен сантиметрен со йӧ бульдозер выллем сюез туж зӧк кырыж пуртэн кадь донгыса лыктэм. Со люкам гурезь чуръёс вылэ дауръёс ортчыса сьӧд нюлэс будэм. Йӧлэсь ужам бервылзэ али но адӟиськомы Дэбес ёросын (Байгурезь), Балезино но Глазкар палан. Шурлэн ӧрез куинь иськемлэсь ятыр вылэм, нош мурдалазэ нокин но мертамтэ. Созэ гинэ тодӥськомы: пересьёс верамъя, Волгаысь туж бадӟым белуга чорыгъёс Балезино ёросозь тубиллям. Соос шудыку, ву кӧшкемыт пӧзе, пе, вал. Гурезь вылысь коръёсты куяло, кожалод, пе, вал. Хлыновысь* Дэбесозь бадӟымесь вузкарон пыжъёс ветлӥллям. Нош малы та шурлы Чупчи ним понӥллям? Та вашкала шур дурын Чудь выжыос улӥллям. Собере соос семьяен-семьяен кошкиллям но шунды пуксён пала Карелие интыяськиллям. Отын таослы выль ним сётӥллям - вепсъёс. Удмуртъёс шур дуре интыяськыкузы тодо вылэм, татын чудь калык улэ шуыса. Соин сое Чудьчи - Чупчи - нималлям (ӵошатэ: арганчи, туклячи но мукет). Удмурт калык шурлэн бур палаз, гурезё интые пуксем. Шурлэн паллян палыз ӵошкыт, тулыс ӧрысьтыз потэм ву ярдуръёсты трос иськем басьтылэм. Чупчи шур дуре интыяськем гуртъёсты син азе ӟечгес пуктон понна, Дэбес пала выллане асьмеос вашкала вузчилэн дас кык полысо бадӟым пыжаз пуксьыса мыномы. Горд Слудкаез ортчем бере, асьмеос шурлэн ӵошкыт палысьтыз ньыль коркаё гуртэз адӟомы. Нимыз солэн Будкаево. Горд Слудкаысь Будка Терехов Чупчи тупалась шырыт турынэз турнаса пыжъёсын гуртаз вайылэм. Толалтэ угось мур лымыетӥ зуродъёсысь турынэз ворттыны секыт но кыдёкын. Собере тулыс сопал ярдурез тудву шобыртылэ. Будка Тереховлэн пиосыз трос вылэм. 1646 арын Будка Чупчилэн паллян палаз улыны выжем. Татын ӝутскиллям ньыль коркаос. Гуртсэс пересь Будкалэн нимыныз Будкаево шуиллям. Со дырысен ортчиз куамын кык ар. Гурт дас кык коркаё луиз. Пересь Будка кемалась ӧвӧл ни, нош калыклы туж ярам шырыт турыно возь вылъёс но чебер чылкыт ошмесъёс. Огез ошмес адями синлы укша: котыраз синлыс кадь вож шашы будэ, шунды шоры лыз синмын учкыса, бугыръяськыса потэ ошмес ву. 1678 арын Хлынов карысь гуртъёсты но адями лыдъёсты гожъясьёс- целовальникъёс вуиллям. Гурт калык гуртсылэсь нимзэ воштоно кариськем: Сингурт. Вятичъёс юаллям: "Мар со Сингурт?" Удмуртъёс синзэс возьматӥллям но шуиллям: "Син со, син- глаз". Вятичъёс сое ас манеренызы гожтӥллям: "Деревня Глазово". Чупчи кузя выллань Сепыч (та кыллэн пуштросэз - мешок - чутыръяськыса кошкись шур) шур дурын сылэ куинь коркаё Качкашур гурт. Кыказ уло Елхузинъёс, куинетӥез буш: Уран Кунянов кулэм, нош кышноез Карино гуртэ бызем. Пиез солэн кышно басьтэм Сундыр нимо нылэз но сое дораз улэ шуыса гожтӥллям. Вылланьынгес нош Маметхул Касимовлэн кык коркаё Кестым починокез сылэ. Та гуртэз Иван Грозныйлэн атаез Василий ИИИ турокъёслы пумит усто тыршемез понна Вятской воеводствоын аслаз грамотаеныз ар князьлы Касим Газиевичлы (та нимысь Касимов фамилия кылдэм) кузьмам. ПетрИ кивалтон дыръя тросэз Касимовъёс Кариноысь Кестыме выжиллям. Таослэсь адӟем карыса, мукет бигеръёс но - Араслановъёс, Девятьяровъёс, Долгоаршиннойёс - Гыя, Медьма, Пажман но мукет ёросъёсы музъемзэс киултыны лыктӥллям. Грамотаез валась удмурт Нурыз Асанов, удмуртъёслэсь ӝожтӥськонъёссэс люкаса, Петр И доры Воронеже мынэм. Отын эксэй ожмаськон пыжъёс лэсьтэ вылэм. Асанов бумагаоссэ Петр И-лы сётэм, нош соиз таӵе указ гожтэм: "Музъемез законтэк басьтэмъёсты ваньзэс азьвыл улэм интыязы ик улляно". Бигеръёсты улляны Вятской воеводствоысь отряд ысто. Сое кылыса, бигеръёс юртъеръёссэс, пудозэс, арбериоссэс дунтэм дунын вузаллям но берен Кариное кошкиллям. Отряд кестым бигеръёсты жугыны медэ вылэм но, муллазы Василий ИИИ- лэсь грамотазэ возьматэм. Отын гожтэмын вылэм, кестым музъем бигеръёслы сётэмын шуыса. Озьы Кестымысь Касимовъёс али но отын уло. Кестым вадесын, Чупчи дурысь ӝужыт гурезь вылын, Гуръякар гурт интыяськемын. Сое Хан-Батый улысь пегӟем булгаръёс но бесермянъёс кылдытӥллям. Булгар бигеръёс татын кык сю ар улэмзы бере, Кариное - бигер выжыоссы доры кошкиллям. Бесермянъёс бигермиллям, мусульман осконэ выжыса, татчы ик кылиллям. Али но отын уло, нош бесермян нимзэс зол возё. Вятской археологъёс но та гуртэн тунсыкъяськиллям. Трос утчаськиллям, гудӥськиллям. Одӥг бесермян соослы верам, гырыкуз сюй улысь тунсыко из шедьтӥз шуыса. Сое, пе, со мунчо гур вылэ понӥз но париськон кариз. Соин сэрен из куиньлы пилиськем. Археологъёс со изэз ожо вылэ поттӥллям но радэн тыриллям. Из булгар кылын таӵе ивор верам: "Та из улын 1301 арын ватэмын Булгари Галей". Али со из Казаньысь исторической музейын. Чупчи шур вылланьынгес, нош ик гурезё ярдурын интыяськемын Балязин погост. Та гуртын ньыль корка. Ваньзы - Вася, Иван, Тренька но Замайко Елинъёс - ас семьяенызы уло. Азьвыл Балязин гурт Ватка шур дурын сылэм, отын али Кирово- Чепецк. Со гуртэз кылдытыку, бугроос ӵыпыку, Хлыновысь пимурт калыкез но гуртъёсты гожъясьёс вуиллям. Гурттылэн нимыз кыӵе луоз шуыса юаллям. Удмуртъёс вераллям: "Нимыз ӧвӧл на, нош тӧл кытысь ке балян зынэз вуттэ, кытын ке матын балян гу вань, вылды". Вятичъёс та верамъя ик гожтӥллям - Балянзин. Бератаз ини картаос вылэ трос гуртъёслэн нимъёссы вятичъёслэн вераськем манеренызы пыриллям: Дизьмино, Дзякино, Балезино, Бурино но мукет. Балезино станция 1897 арын кылдӥз, нош татын улӥсь удмуртъёс но бигеръёс али но сое Балязин шуо. Вузчилэн пыжез шур выллане уяса тубе но кӧлыны Озон гурт доры дугдо. Озон кыл - со паромен выжон инты, бадӟым пыжъёс дугдылон инты. Вазь ӵукна югам бере пыж нош ик Полӧм гурт вӧзтӥ азьлань мынэ. Полӧм кылэн вашкала удмуртъёс но туала комиос кӧс гужем дыръя воксё куасьмем пичи шурез нимало. Соин ик Чупчи дурын али бырем куинь Полӧм нимо гуртъёс вылӥллям. Таиз - ньылетӥез. Вятичъёслэн "ӧ" буквазы ӧвӧл бере, соос сое Полом гинэ гожтӥллям. Полом выллань Чупчи шуре усе Лоза шур. Азьвыл та шурын туж трос вучайыос (бобёр) вылӥллям. Удмурт пӧйшурасьёс соосты кутыны амал шедьтӥллям: кык кызэз вуэ погырто но йылзэс ваче кертто, нош выжыоссэ огезлэсь огпал ярдуре золто, мукетсэ - мукет пала. Керттэм йылъёсаз вуэ лӧзас* лэзё. Лӧзасо шурез вятичъёс вакчияк гожтӥллям - Лоза. Вылланьынгес Чупчи шуре усе лымшор пала бызись Кез шур. Али сое Лӧп (Лып) нимало. Ачиз Лӧп шур вакчи. Нош Юсь шурен огазеяськемзы бере, бадьёсын шобырскем выль шурез вашкала удмуртъёс но комиос Кез нималлям. Али но со дурын туж нап бадьёс будо. Нош Лӧп нимен нималлям пересьмыса вуэ пограм писпуосын жагомем шурез. Али но отын адӟиськыло измем коръёс но кыпыос. Малы ке шуоно, та шур сьӧд нюлэс пыр бызе. Кез шур дурын вашкала дырысен сылӥзы но сыло Кезэн герӟаськем гуртъёс: Кездур, Кезтупал, Кезвыр, Зӧк Кез. . . Нош Кез станция кылдӥз 1899 арын 24 шуркынмонэ. Чупчи выллань ик, бур палан, ӝужыт гурезь улын сылэ Тольён гурт. Верхочепецкой волостьлэн шоркараз, Зӧк Поргаын, толалтэ пӧйшурасьёс кыдёке ветлӥллям. Чалмыт нюлэскын соос туйлэсь тоъён коркаос лэсьтылӥллям. Сыӵе тольон интыос Лӧп, Юсь, Кузьминка шуръёс дурын трос вылэм. Кузьминка шур дурын али Кузьма станция сылэ. Туала вакытэ кылемын на Юсь-Тольон но Тольон гинэ. Тольонысь кыдёкын ик ӧвӧл, Чупчи выллань Варни гурт сылэ. Вашкала удмуртъёс но комиос бамалъёс вискытӥ кырыж-мерыж, читыр-чутыр бызись шурез Варни нималлям. Куке но мон юри Варни шур выллань тубай но пайми: кыӵе шонер ним сётӥллям! Соин ӵош ик кӧты ӝож луиз: кыӵе чебер кылэз асьмеос ыштӥськеммы! 1646 арын Варни починокын кык корка вылэм. Огаз Тутай Кельшин кышноеныз улэм. Соослэн вылэм кык пизы: Байбахтыр но Бахтым. Кыкетӥ корказэ Тутай пуктэм Зӧк Поргаысь Купташ вынызлы. Соос артэ улыны вераськиллям. Тани вузчилэн пыженыз асьмеос вуиськомы ни Дэбес гуртэ. Куке но трос калыкъем Зӧк Поргаысь Митяй но Вышка Степановъёс улыны каньыл, чус но шуныт инты утчаны потӥллям. Чупчи сопала выжыса, пичи шур кузя мынӥллям. Та шур куддыръя турын куаръёс улэ зыме но син азьысь ыше, собере каньыл бызись вуэз нош син азе потэ. Сыӵе сямо шурез вашкала удмуртъёс но комиос Ӟебес нималлям. Степановъёс гурезь улысь бадӟым пужымо инты шедьтӥллям. Уй палась татчы тӧл уг пельты, Чупчи но артэ гинэ. Таос сьӧры итӥськем Поломысь Сергунька Газегов но. Улон коркаос ӝутӥллям, шурез ӵыпыса вуко пуктӥллям. Зӧк Поргаын кадь ик пудо вузан-басьтон ярмарка усьтыны малпаллям. Вуоно ярмаркае лыктӥсьёслы кык юрт пуктӥллям - пудолы но калыклы изённи. 1646 арын Ӟебесын (Дэбесын) луэм ни сизьым улон корка. Трос гуртъёслы, погостъёслы, починокъёслы но займищаослы ивортӥлям: "Покров нуналэ Ӟебесын бадӟым ярмарка ортчоз". Тӥни кытчы дырто Хлынов городысь вузчиослэн пыжъёссы. Ярмаркае соос амезь но сюрло, кусо но тӥръёс, пуртъёс но чебер басмаос ваё, нош берлань чечы, сюсь, пӧйшур куос, ю-тысь нуозы. Бертыкузы пыжъёс Чупчи шурлэн тыбыр вылаз уллань полысъёстэк васькозы. Меӵ берытскон интыостӥ рульдэ гинэ бергатыны вутты. 1 Лушкем яратон Кылъёсыз но крезьгурез Ада Диевалэн Кытчы меда ватом лушкем яратонме, Кытчы меда каром сюлэм малпанъёсме? Оло, гурезь улын пӧзись ошмес синлы, Каллен мон шыпырто нимдэ азвесь вулы. Уин гинэ вӧтам вуылӥськод вӧзам, Улӟе-а пушъетэд, али озьы мынам. Шат небыт тӧл юрттоз, пельтоз но вешалоз, Оло, выль пушъетмес юри серем кароз? Куке шараямы асьме сюлэмъёсмес, Соку жильыртыса бызёз, вылды, ошмес. Соку, дыр, небыт тӧл уз ӧпкельы, нуоз, Улонмылэн пӧзись ӧраз пыласькытоз. Наталья Матвеевалэн лемлет малпанэз Одӥг сӥзьылэ "Шулдыр ӝыт" ансамбле тодмотэм егит кырӟась - Наталья Матвеева лыктӥз. Татын солэн луэ удмурт эстрадае сюрессэ мытэмез. Кык ар но ӧз ортчы, калыклы со нырысетӥ емышсэ - "Мон уӵы ик кылё" нимо крезьгуро альбомзэ кузьмаз. Кылзӥсьёс ушъяло ужзэ, угось Наталья Матвеева сыӵе оскымон но сюлме пырымон туала нылмуртлэсь мылкыдъёссэ но сюлэмшугъёссэ, шуд сярысь малпанзэ усьтэ. Озьыен, Наталья аслэсьтыз кылзӥсьёссэ но шедьтӥз, шуыны луоз. Оло, лулӟылӥсьёссэ но. Та ини туннэ. Нош кызьы ваньмыз кутскиз. . . "Мон училищеын самой лябез кырӟась вал, дыр" Наталья Матвеева Дэри (Завьял) ёросысь Бабино черкогуртын вордскиз. 8 классэз йылпумъяса, палэнысь улонэз адӟымтэ нылаш Вотка каре вуэ. Кызьы ачиз Наталья шуэ, анаез сое дораз, пе, кияз кырмыса возиз, нош берло кутӥз но чик тодмотэм дуннее келяз. Вотка карысь музыкально-педагогической училищее пырон азяз кылбур- кырӟанэн выремез ик ӧй вал. "Ма мар веранэз, нотаосты уг валаськы вал,- тодаз вае Наталья,- училищее пыри, кылбур но кырӟан но шуак олокытысь лыктӥзы". 16 арескысен ӟуч кылын нырысетӥ чуръёсыз кылдӥзы, собере соослы гуръёсыз. Нош бӧрысь удмуртъёсыз но вордскизы. Но малы ке но асьмелэн ӵемысь озьы луэ, азьвыл лэсьтэм ужъёсмес лябен, пӧрмымтэен лыдъяськом. Озьы ик Натальялэн но. Соосты со лазег мылкыдоен лыдъя. Табере Наташалэн ваньмыз ӧвӧлэз 90 котыр гожтэм ужъёсыз ини. "19 арескысен ик "Шулдыр ӝытын" кырӟан сярысь малпаськылӥ" Училищеез йылпумъяса, Наталья пӧртэм нылпи садъёсын крезьгуръя дышетӥсь луыса тыршиз. Ӝыны арзэ школаын но ужаз. Ӵемысь ужан интызэ вошъям мугзэ со тазьы валэктэ: "Ваньзэ выльзэ яратӥсько, выль адямиосын тодматскыны тунсыко потэ". Ӝоген ас сюлэм шоризэ шедьтӥз, улон сюресэз сое Вавоже вуттӥз, егит нылаш мурт дуннее выжызэ лэзиз. Вавожын пӧртэм смотръёсы пыриськылӥз. Татысен улонысьтыз, оло, самой бадӟым малпанэзз быдэсмиз. Культура юртын ужасьсы Владимир Конюхов эстрадаын кырӟан мылкыдыз сярысь юаз. Соку Наталья сизьым ар ӵоже ватыса возем малпанзэ - быдэс удмурт шаерлы тодмо "Шулдыр ӝыт" ансамбльын кырӟаны мылкыд каремзэ - шара вераз, ӧръяз. Но осконэз бадӟым ӧй вал: кутозы, оло, уз. Конюхов Анатолий Ушаковен кенешиз, ӝоген прослушивание ортчытӥзы. Анатолий Алексеевич нылашлэсь номыре но ӧз ваты, туала артистлэсь секыт улонзэ но. Вуиз сыӵе дыр, соку Наталья, оло, самой шудоез адями вал. Бадӟым малпанэз, нунал пӧрат малпанэз быдэсмиз уга соку. Озьы со 1998-тӥ арын сӥзьылпал "Шулдыр ӝыт" ансамбльын" ужаны кутскиз. Репетициос, концертъёс, гастрольёс. . . Нырысетӥ гужемзэ ансамблен ӵош Наташа шаермылэн лымшор палъёстӥз ортчиз, учкисьлы выль кырӟанъёссэ кузьмаз. Нош кылем гужем уйпал ёроъёсы вуылӥз. Татын со 1-тӥ крезьгуро альбомзэ вӧлмытӥз ини. Нош сузьетсэ кинлы сӥземзэ кырӟась ватэ, пушкам мед кылёз шуэ. Мар бен, нокин но пумит ӧвӧл, дыр, адямилэн лул ватосъёсызлы. "Вань малпанъёсы семьяе сярысь" Озьы луиз, Наталья ужа Ижкарын, нош семьяез Вавоже кылиз. Ярам, картэз вала кузпалызлэсь ужзэ. Пиезлы 6 арес ини, Наталья оске, пиез но кырӟалоз шуыса. "Мынам пытьыстӥм мед кошкысал, ӵок, шуом, артист ӧз ке нолуы, эшъёсыз пӧлын, кыӵе ке но пукон ӝытъёсын мед кырӟаллялоз. Крезьгурез со умой шӧдэ. Али туж ик кырӟаллямзэ кылыны уг ке но луы, куараез шӧдӥське ини. Солы туж кельше ансамбльмылэн концертъёсыз. Кулиса сьӧрын милемды ымзэ ик усьтыса учке. Туж яратэ А.Ложкинлэсь кырӟамзэ. Удмурт кылэз пие уг тоды, со кылзэ кырӟасез куараезъя но учкисьлы кырӟанзэ кузьманы быгатэмезъя. Со мынам критике. "Кырӟанэ кельше ке солы, со ас понназ гурзэ нёжъяса ветлэ,- шуэ артистка Берло ожъёсын Удмуртиысь быремъёсты буре вайыса Шаер Сонетъёслэсь тугоко Ӟеч-а, бур-а, Вордскем шаер, Тонэн потӥз лабыртэме. Сыӵе ик-а сямыд сабыр, Далай ини кенешеме. Сыӵе ик-а тӧдьы Кам шур, Кинъёс отын туннэ уло? Лазег кыле, лэся, Вадур, Шимес ик-а поръя Вало? Вордскем шаер, шудо улос, Висе сюлэм весь тон понна, Сое тон шӧдӥськод меда? Оло монэ кин ке кылоз, Кӧня ке но оскон вань на, Нош малы ке сюлэм курда. * * * Шаер сярысь малпаськыса, Сюлэм мӧзме ялан огназ. Нунал пӧрат куректыса, Чидан вуэ ини пумаз. Кытчы монэ тон нуиськод, Кыӵе дасяд на сьӧлтэтъёс? Малы выльысь юриськиськод, Ӧвӧл ни шат мудрон кылъёс? Мон сётӥсько, я ме пиме, Яратоно Вордскем шаер. Эн кушты, жаля тон монэ. Мон курисько, я вай кидэ, Ӧвӧл ук тон мыным бултыр, Уд кылӥськы шат тон монэ? * * * Батыр ке мон туннэ лусал, Кенерасал тонэ котыр. Дуртӥз пашпу трос мерттысал, Улон, шол, мед луоз шулдыр. Судья ке мон туннэ лусал, Пери ӧй адӟысал эрик. Соку эркын тон шокчысал, Вӧтад ӧй адӟысал курик. Кинэн сэрен секыт адӟон Усиз мусо шаер вылам, Кин валэктоз сое утыр? Бен мон ачим но эгесын, Секыт песьтэр пельпумъёсам, Зӥбе, кыске уллань казыр. * * * Нош шаерам улон пӧзе, Кин ке гыре, кин ке тыке, Кин ке чипсэ, кин ке вузэ, Кин ке зарни вылын пуке. Шугектыны ӧвӧл мугез, Кулэ ке басьты нылкышно. Шула ке кинлэн ке ӟепез, Узырмыны вань казино. Адӟон, адӟон бен кин монэ Вуттӥз таӵе нош улонэ. Нокин уг кылы куараме. Мон ӵабъясал солэсь синзэ, Мон юасал солэсь кылзэ, Нош кин монэ али кылзэ? * * * Куке сяськаяськись улос, Малы кысэ турлы данэд? Уг югдо шат шунды сиос, Малы бездэ синчеберед? Малы шуо тонэ ворпо, Кинлы сокем люкетӥськод? Сие на-а тонэ урбо, Малы солы но сётскиськод? Йырдэ уг лу шат ӝутэмед, Малы мугзэ тон учкиськод, Мае отысь тон утчаськод? Шорад ни жаль ук учкыны, Я ку кутскод шонерскыны, Калык марда коть улыны? * * * Озьы ке но, яратӥсько Тонэ, мусо Вордскем шаер! Тонэн уртче курадӟисько, Висён дыръя но тон чебер! Вождэ эн вай леке понна, Озьы асме пыкылӥсько. Бен кин понна сюлмаськом на, Мон саюлад тыр шокасько. Кӧты ӝожен, лэся, куддыр Мылкыд ортчыт сураськылэ, Мукет сямен улэм потэ. Уло кытын ке но бусьтыр, Соин йыркур пуромылэ, Шат асьмеос удалтымтэ? * * * Шол, музъеммы юриськемын, Малы шер-тур потэ будос? Шол, калыкмы но вӧсямын, Уг ул выжы лэзьытозяз? Уг адӟы шат Шунды-атай, Мар даурто югыт улсын? Уг вала шат Музъем-анай, Кӧня сьӧлык дунне вылын? Юан сьӧры юан кылдэ, Уд вуы, дыр, талэн пумаз, Нош юатэк уг лу буйган. Кудӥз-огез бен валэктэ, Дыльдыосыз пазяськытозь, Уг лу гинэ номыр валан. * * * Аръёс ортчо вӧтъёс музэн, Троссэ йырвизь но вунэтэ. Валлян мон вераськи тонэн, Туннэ нуо ни коркадэ. Шаер, шаер, кытчы кылё Пиосыдлэн ӟеч нимъёссы? Отын-татын соос кыллё, Ӵошкытамын бервылъёсын. Уксё люкан сямен нялтас Вунэтӥськом туж кулэзэ, Ӵуказелы оскиськыса. Ӵукна нош ӵап чортэ атас, Кин ке куртче на гырпумзэ, Синвуоссэ ӵушылыса. * * * Оскон, оскон, кытын-о со, Туэ кинлы-о осконо? Нош ялан оскыны косо. Паймод, кинлы йыбырттоно? Бен, оскытэк умой уд кӧл, Адямилы озьы кылдэм. Нош пӧяськон но шат ӧвӧл, Ӧвӧл ке, мед луо кылтэм. Мон оскисько Шундыелы, Туж оскисько Шаерелы, Юн оскисько калыкелы. Ӧм оске ке ог-огмылы, Я мар кылёз на асьмелы, Пӧрмом соку сись писпулы. * * * Я ӟеч ул тон, Вордскем шаер, Тонэн потӥз кенешеме. Мон гажасько тонэ укыр, Верам потӥз яратэмме. Вордскем шаер, Вордскем калык, Дано лу тон уно аръёс! Ноку медад адӟы сьӧлык, Мед утёзы шудо тӧлъёс! Быдтӥд ке тон яратонэз, Ӧд гажа ке ас калыктэ, Соку сюлмыд тынад тырттэм. Визьмад пон та индылэмез, Эн карга тон анай кылдэ, Соку уд луы тон шудтэм. Фёдор Суворов. 1 Уно Хольмберг Перма калыкъёслэн осконъёссы (азьланьтӥськемез) Сопал дунне сярысь валанзы комиослэн но, удмуртъёслэн но тужгес вашкалаез луэ. Со умой адӟиське адямиез ватон йылолъёсысьтызы. Пӧртэм интыосын улӥсь удмуртъёслэн ватон сямъёссы кӧня ке висъясько ке но, валтӥсь сэбедъёссы котькытын одӥг кадьгес. Лул адями пушкысь потэ ке, кулэм муртлэсь синъёссэ ворсало но ымзэ пыдсало, нош ымаз вӧй кисьто, куд-ог дыръя соин быдэс шӧйзэ но зырало. Собере кулэм муртэз шобретэн шобырто но соку ик ватон ужрадъёс борды кутско. Кулэм муртэз угось удмуртъёс улонниязы кема уг возё. Кыӵе муген сое кулэм нуналаз ик ватыны уг вуо ке, уйлы корка кельто. Но со уе изьыны нокин но уг выды. Кулэм мурт коркан луыку, озьы ик нокинлы но уг яра ужаны. Куд-ог интыосын, кылсярысь, Кузон губерниысь Мамадыш уездын, таӵе сям вань: кулэм муртлэн лулыз потэм бере ик, солэн ӵыжы-выжыосыз куреглэсь йырзэ ишкалто. Пумыны вуэмезлэсь азьло, кулэм муртлэсь киоссэ но пыдъёссэ веськыт тыро но кур вылэ поно, майталам веникен небыт шуныт вуэн мисько. Кинлы та ужез быдэстоно, кулэм мурт ӵем дыръя улонысь кошкемезлэсь азьло вераса кельтэ. Пиосмуртлэсь шӧйзэ пиос мисько, нош кышномуртлэсь - кышноос. Миськемлэсь азьло кулэм мурт вераськемез кылэ шуыса оско. Озьы ик оско, шӧй миськисьёслы ас мылкыдзэ но возьматыны быгатэ шуыса. Кылсярысь, миськисьёс пӧлысь шӧйлы кин ке синазькыль ке, со суй-пыдъёссэ сонь-чонь возе, мыжыкъёссэ кырме, нош мылкыдызъя ке - небыт, куасалляськись луэ. Шӧй миськем бере, кулэм мурт вылэ тӧдьы воштӥськон дӥсь дӥсяло, пыдаз выль бинялтон бинё но кут кутчало. Пиосмуртъёслы йыразы дорын лэсьтэм гинэ шляпа изьыяло, ӵемысь киязы пӧзь поно, нош пересьёслы боды но сёто. Нылкышно вылэ арлыдэзлы тупась выль дӥськут дӥсяло. Тазьы дӥсяса-кутчаса кулэм муртэз коросэ интыяло. Сое азьвыл лэсьто вал писпуэз гыркыса. Кулэм муртлэн йыр улаз веник валё но со вылэ миндэр поно. Коросэ кулэм муртэ тыбыр вылаз выдто, йырзэ ӧс пала карыса, сьӧраз трос пӧртэм арбериосты сёто: пурты, кружка, тӥр, пурт, лопата, пуньы, мунчо пырон веник, сын, коньдон пуйы, тамак калта, чакма (тыл поттон) пуйы (кулэм мурт тамак кыске ке вал), сиктан, нин шелеп, куткаб но мукет. Кышномуртъёслы сьӧразы сёто веньёс но сӥньыс. Со сяна, кулэм муртлэн кияз коньдон поно на. Тае куд-огез музъем дун (музъем кертым) шуыса валэкто. Сое кулэм мурт музъемлы кузё луон понна тыре, пе. Мукетъёсызлэн малпамзыя, кулэм муртлэн уксёез луыны кулэ шайтан киулысь мозмытскыны быгатон понна. Музъем вылын кема улэмзы понна, шайтан, пе, кулэм муртъёслы маза уг сёты, курадӟытэ. Арбериос сяна, кулэм муртлы дӥськут но сёто на. Кышномурт картэзлэн коросаз воштон ул дӥсь понэ, кулэезъя дӥсьсэ, пе, мед воштоз. Пиосмурт кышноезлэн коросаз ӵушконъёс но чеберманъёс тыре. Нылъёслы трос пӧртэм пумо дӥськут поно, сопал дуннеын кышнояськыны вуытэк кулэм пиос нырысь ик, пе, курало узыр пирдано нылъёсты. Сюанэзлэсь азьвыл кулэм, выль кен луоно ныллы сьӧраз вуриськон арбериоссэ келяло но выль улоназ бызьыны ӵекто. Пинал муртлэн сьӧраз сюмык (пичи кружка), пуньы но яратоно шудонзэ сёто, мумизлэсь, пе, медаз мӧзмы. Кулэм муртэн люкиськыны лыктэм ӵыжы-выжыосыз сьӧразы кузьымъёс ваё. Пӧлазы одно ик дэра луэ. Соин кулэм муртэз шобырто. Та ужез лэсьто кулэм муртэн тушмонъяськысагес улӥсьёс. Кулэм муртлы кузьым сётыкузы верало: "Тани тыныд, кулэ луиз ке, басьты". Кулэм муртлы музъем улысь улоннияз лэзё на сиён-юон: нянь но сылал, сӥль но табань, пӧзьтэм вина но мукет. Кӧтыз сюмаса медаз, пе, берта, семьяосызлы медаз люкеты. Пиналъёслы курег пуз яке йӧлын ӟенелик келяло, соослэсь ымзэс ӵемысь чечыен но вӧйын зырало на. Гаврилов тодосчилэн ивортэмезъя, куд-ог анайёс, вож нуныенызы люкиськыкузы, солэн ымаз гадьысьтызы йӧлзэс кыско. Коросэз азбаре поттэмлэсь азьло кулэм муртлэн ӵыжы-выжыосыз со вамен тэтчало, кулэмлэсь кышкаса медаз, пе, улэ. Кулэм муртэ шайвылэ дӧдьыен яке уробоен нуо - арлэн кыӵе дырыз тупалоз. Шай гуртлэсь матэ ке интыяськемын, кулэм муртэ берпум шутэтскон интыяз нин гозыос вылын нуо. Коросэз дӧдьые понэм бере, эшшо одӥг туж кулэ йылол, "кышканэз небӟытон" шуиськись сэбед ортчыто на. Кулэм мурт, пе, сопал дуннеысь пумитаны лыктэм муртъёслэсь медаз кышка. Пичиос вӧйын нянь вылэ, кулэм муртлэн ымныр вадьсаз возьыса, кирос суредало. Тае быдэстыкузы, "кышкандэ небӟытӥськом" шуо. Со сяна, семьяосыз но ӵыжы-выжыосыз "сопал дуннеын коньдоно, ёрмытэк ул" шуо но шай вылаз уксё зӥръяло. Улэп дыръяз кузпалъяськымтэ на ке вал, кулэм муртлы сопал дуннеын кузпал шедьтыны косо, огнад, пе, медад улы. Нош кулэм пинал мурт сярысь кулэм ӵыжы- выжыоссэс сюлмаськыны, сое утялтыны косо. Елабуга утемысь удмуртъёс, корос вылэ сюй куякузы, тазьы верало: "Ымыд-нырыд вылэ усись музъем тыныд зарни но азвесь мед луоз. Югыт дуннее кылись семьядэ умой утьы, солэсь улонзэ секыт эн кары. Аслыд кумышкалы но сурлы трос ю-нянь сёт". Гуэз согем бере кулэм муртлэн ӵыжы- выжыосыз кӧня ке сюсьтыл ӝуато но шай вырйылэ нянь пыргыто. Озьы ик кулэм муртлы пу кружка но пу пуньы сёто. Соосты тӥяса кельто - мурт адями басьтыны медаз быгаты. Егит ныллэсь шайвылаз басма юдэсъёс керттыса кельто на. Керттыкузы тазьы верало: "Тани тыныд дэрем, тани юбка, тани кышет". Язычникъёслэн шайёссы уй паласен лымшор пала кыстӥське, нош ымныръёссы лымшор пала берыктэмын луо. Удмуртъёс вазен корос ӧз лэсьтылэ, кулэм муртлэсь шӧйзэ туен биньылӥзы но шайгуэ лэзьылӥзы, нош куддыръя ыж куэн шобыртылӥзы. Ӵук пал удмуртъёслэн ватон сямъёссы вылӥын верамъёсызлэсь кӧня ке висъясько. Кылсярысь, соос коросэз шайвылэ бушен ваё, нош кулэм муртэз отчы берлогес ӵыжы- выжыосыз вутто. Нылкышноос бӧрдыса капка дорозь гинэ яке гурт ӟезьыозь мыно. Шӧез воргоронъёс коросэ шай дорысен гинэ поно. Корос - со вӧлэм зӧк пулъёслэсь лэсьтэм ньыль сэрего, меӵак урдэсо ящик. Солэн пыдэсаз кур, ыж гон, нош йыр дораз пичи миндэр поно. Корос пыдсэтэз корос борды пу ӵогъёсын шукко, йыр вадьсаз ньыль сэрго пичигес пась лэсьто - кулэмлэн уртэз кулэ дыръя отӥ эркын потаны мед быгатоз, пе. Соин ик со пасез урт ветлон пась шуо. Коросэз ворсамлэсь азьло кулэм муртлэн кудӥз ке ӵыжы-выжыез сьӧраз ваем тӧдьы басма кесэгез шай дорысен шори кесе. Паллян кияз кылем люкетсэ со кулэм муртлэн гадь вылаз поныса кельтэ, нош бур кияз кылемзэ доразы нуо но ар ӵоже корказы сюры яке борддор бордазы керттыса возё. Басма юдэсэз кесьыкузы шуо: "Кызьы ке та дэралэн оглюкетэз татчы кылёз, нош мукетсэ доре нуомы, озьы ик эн люкиськы милемын быдсак". Яке вакчияк: "Урттэ татчы басьтомы, нош шуддэ татчы басьтӥськом". Со сяна, куд-ог интыосын шайгу вадьсы ньыль юбо вылэ нин курлэсь липет лэсьтылӥзы. Удмуртъёслэн кулэм муртэ сюлмаськыса ватон сямысьтызы адӟиське соослэн дунне шоры аспӧртэмлыко учконзы. Комиослэн но адями ватон йылолъёссы сокем ик уг висъясько, тужгес но вашкалаосыз. Азьвыл гожъямъёс вылэ пыкиськыса, Будрин тодосчи маде, комиос, пе, кулэм муртэ ватыкузы, сьӧраз трос кулэ арбериос тырылӥзы: пукыӵ, пукыӵ ньӧл, пурты, кружка, пуньы, таган, озьы ик огзэ тужгес но умойзэ дӥсьсэ. Со арбериосты гуртлы кыдёкысь нюлэскы гудэм шайгуэ, пе, согылӥзы. Озьы ик вашкала шайгу шедьтосъёс но возьмато, вазен кулэм мурт сьӧры трос ваньбур келяло вал шуыса. Туала вакытэ комиослэн виро сётон йылолзы туж ӧжыт кылемын ни. Хлопин тодосчи соослэсь кисьтон йылолзэс таӵе кылъёсын возьматэ: "Кулэм муртэ ӝӧк вылэ интыянэз соос сьӧлыкен лыдъяло, сое соос ӟус яке выж вылэ поно. Ватон нуналэ коросэ горд кускерттонъёс, небӟытэм кур но пичияк нянь поно, кияз - ӧжытак коньдон. Кулэм муртэ коркась поттон азязы соос корос котырын пуко но псалом (ӟуч сямен гимн) кырӟало. Со сяна, соос кулэм муртэ сыӵе ушъян кылъёсын данъяло, кудъёссэ со улэп дыръяз ноку но ӧй кылысал. Коросысь горд кускерттонъёсты соос шай вылэ мыныкузы пумитазы шедем котькуд адямилы сётъяло". Пермь епархилэн газетаз (1889) кыӵе ке С. М. А. валэктэ, уксёез, пе, кулэм муртлэн кияз поно, солы сопал дуннеын инты басьтон понна. Со гожъясь ик пусъе на, кулэм муртлэн сьӧраз, пе, куддыръя дэра дӥськут но поныло на, кулэ дыръяз дӥсьсэ вошъяны мед быгатоз шуыса. Смирнов тодосчи ивортэ, кулэм муртлы коросаз озьы ик сиён но юон тырылӥзы шуыса. Берлогес, ӟуч сямъёслэн пыӵаменызы, луоз, кулэм муртлы сӥзем курбонэз кураськисьёслы сётъяны, люкылыны кутскизы. Кылсярысь, Попов тодосчи маде, куд- огез, пе, кураськисьёслы корос вамен кузьымъёсты сётъя. Та йӧспӧртэм йылолэз Налимов тазьы валэктэ: кулэм муртлэн киысьтыз кураськисьёслы мар сюре, со кулэм муртлэн сопал дуннеын паез луэ. Кулэм муртлы сётэм курбонлэсь оглюкетсэ шайкорос лэсьтӥсьёслы корос вамен кузьман йылол Смирнов тодосчилэн ужаз но пусъемын. Шӧй миськыку кутэм арбериосты - майтал, сын, ӵушкон - шӧй миськись муртъёслы ужамез понна дун чотын сёто. Комиос кемалась ини черке пыртэмын, соин ик адями ватон йылолъёссэс но черк йылолъёсыз утьыны тыршыса ортчыто. Вашкала шайёсты черке пыртымтэ удмуртъёслэсь гинэ пумитаны луэ на. Котьку сямен соос нюлэскы интыяськемын, нош куддыръя гуртлы матын но луо. Котькуд удмурт гуртлэн огъя кенерам шаез луэ, отчы гуртысь вань улӥсьёс ас выжы-кумыоссэс вато. Нош гуртъёс ог-огзылы матын сыло ке, соослэн огъя шайзы но луыны быгатэ. Малы ке шуоно, тросэз со гуртъёс кылдэмын луо одӥг вуж, вашкала гуртысь. Куд-ог интыосын гурт шай вӧзын адӟиськылэ на нимысьтыз шай. Со ӵемысь интыяськемын луэ бадӟым сюрес дуре. Отчы ватылӥзы гуртэ кулэм палэнысь муртъёсты. СУРЕД Уфа губерниысь Бирск утем. Можгалась языческой шай. Удмуртъёслэн языческой шайёссы кыр интыын пичи тэльёс кадь сыло. Малы ке шуоно, котырысьтызы нюлэс корамын ни. Со шай вылысь матысь нюлэсъёсын будӥсьтэм писпуосты но пумитаны луэ. Тросэз соос пересьмыса сисьмылэмын, шай вылэ ик пырамын. Шай вылын буре ваён тодметъёс, памятникъёс уг адӟисько. Куд-ог узыргес удмуртъёс гинэ бигеръёс сямен шай вылэ корлэсь яке пулъёслэсь шай кенер лэсьто. Музъем вылын я отын, я татын адӟиськыло виро сётэм бервылъёс, тӥям пу кружкаос но пуньыос, ӟустыриос. Шайвылэ кышномуртъёс но, пиосмуртъёс но мугтэк уг ветло. Удмуртъёс та интыез кӧшкемыт но йӧтылонтэм интыен лыдъяло.Кулэм муртъёслэн вожзы медаз поты шуыса, шай дортӥ ортчыкузы отчы одно ик маке но кушто: векчи ыргон коньдон, нянь шорем, номыр мукетыз ӧвӧл ке - сӥньыс нюжа. Инкуазьлэн пиналъёсызлэн кулэм муртлэсь кышкамзы тужгес но яркыт адӟиське ватэм бере чылкытатӥськон сямысь. Озьы улэпъёс мозмытскыны тыршо курадӟон но бырон вайыны быгатӥсь кулэм муртлэсь. Кулэм муртэн йӧттӥськыса улэм вань арбериосты кырсен лыдъяло. Ӵыжы-выжыосыз соосты кулэ уг каро ни - суто яке бусые куяло. Кылсярысь, Шестаков тодосчи Глазов утемысь удмуртъёс сярысь тазьы вера: кулэм мурт кыллем валесэз но, дӥськутсэ но, пе, суто, нош кулэм муртэ шай вылэ нуэм дӧдьыез сисьмыны аналто. Талэсь но вашкала дыръя вылӥ верам арбериосты бусые нимысьтыз висъям интые куяло вылэм. Та сярысь верало тросэз тодосчиос. Кылсярысь, Кошурников Сарапул утемысь удмуртъёс сярысь мадьыкуз вера, кулэм муртлэсь кыллем валессэ бусые нуо шуыса, озьы ик солэсь дӥськутсэ, кутсэ но мукет арбериоссэ куяло. Гаврилов тодосчи но шуэ, мар кулэм мурт борды йӧтӥськылэмын, ваньзэ нин кудые тыро но кулэм муртэ шайвылэ нуыкузы, кыӵе ке нюке яке сюрес дурын сылӥсь нырысь шедем кыз выжые куяло. Азьло со понна котькуд гуртлэн нимысьтыз висъям интыез вал шуыса возьматэ вань удмурт улосъёсын тодмо луись кыр куян кыл. Со нимамын кулэм муртэз кур вылын миськонлэн нимыныз. Куд-ог улосъёсын, кылсярысь, Кузон губерниын, али ке но сыӵе интыосын пӧртэм жуг-жагъёс, шелепъёс, веникъёс, дӥськут но мукет арбериос адӟисько. Таӵе интыосын удмуртъёс пӧртэм лулъёслэсь кышкаменызы матаз юнме шорысь уг ветло. Эрдмани тодосчи кур куян инты сярысь тазьы вера: "Кулэм муртлэсь корос пушкы понытэк тазьы вера: "Кулэм муртлэсь корос пушкы понытэк кылем арбериоссэ, корказэ но пудо-животсэ вератэк, ӵемысь палэнэ, нюлэскы нуо". Али но куд-ог кур куян интыосын виро сётэм бервыло писпуос адӟисько. Брызгалов тодосчи кылпум поттылэ Малмыж утемысь одӥг гуртлэн кур куян интыяз сылӥсь кыз сярысь. Со вылэ, пе, ошылэмын сарбаос, кудыос, пӧртэм ӟустыриос, куос, изьыос но мукет арбериос, кудъёссэ отчы кулэмъёс сьӧры ваемын, сопал дуннеын соос номырлы но ёрмыса медаз улэ шуыса. Комиос сярысь поттылӥмы ни вал, кулэм муртлэн семьяосыз шӧй чылкытатыку кутэм арбериос пӧлысь номыре но уг басьто шуыса. Коросэз одно ик урамын лэсьто, нош шелепъёссэ суто. Кулэм муртэ шай вылэ нуэм. Дӧдьыез яке уробоез шайвылэ ик кельто яке ӝыныозяз гуэ сого. Соосты доре нуоно ке, пе, кулэм мурт сьӧры кин ке ӵыжы-выжыед кошкоз. Смирнов тодосчи вера, куд-ог вуж шайвылъёсын, кылсярысь, Соликамск утемын, пӧртэм сямен кыллись трос дӧдьыосты адӟыны луэ шуыса. Ӵемысь соос тӥяса, сӧрыса кельтылэмын. Куддыръя шайгу вылэ кирос интые тӥям дӧдьылэн вайыжез яке сюлэз бышкыса кельтэмын луэ, пе. Со сяна, шайвылэ ик кельто гу копан тӥрлыкъёсты но. Кулэм мурт ӧтьытэк дораз медаз берта шуыса, удмуртъёс пӧртэм пумо сямъёсты утё. Кылсярысь, Елабуга утемын улэм муртэ коркась поттыкузы, ӧс куспын тӥр бышкалто. Со корка кулон медаз но вуы, пе. Трос интыосын, шӧез поттыку, ӧсэз ӟирыысьтыз басьто но мыдлань берыктыса поно. Шестаков тодосчи Глазов палась удмуртъёс сярысь мадьыкуз вера, соос, пе, кулэм муртэз ӧсэтӥ уг, укноетӥ потто. Нош отӥ поттыны корос уг тэры ке, липетсэс кесяса потто. Гаврилов тодосчи пусъе удмуртъёслэн кулэм муртэ пӧямзы сярысь. Со улэм юртаз сюрес медаз шедьты шуыса, коросэз азбарысен пуклёк вылэ поно но шундылы пумит куинь пол берыкто. Богаевский тодосчилэн ивортэмезъя, Сарапул удмуртъёс, келясь воргоронъёс кошкем бере, пытьызэс ӵужонэн ӵужо на. Котьмар ке но, зэмос чылкытаськон йылол шайвылысь бертэм бере гинэ кутске. Ӵук пал удмуртъёс шай ӟезьы дорысен ик кулэм муртлэн бордазы тэбинемлэсь мозмытскыны ӧдъяло. Та йылолэз тазьы ортчыто: кулэм муртэ келясьёс пӧлысь одӥгез шайвылэ ньылпу вайёс нуэ но юлтошъёссэ соин тыбыразы шачыръяса вера: "Берты дорад, эн кыль татчы". Куд-ог интыосын шайвылысь бертыкузы сусыпу вайёсын шонасько но, эн лыктэ сьӧрамы, мынэ бертэ дорады, шуыса кесясько. Уржум утемын, лулъёс сьӧразы медаз лыктэ шуыса, сюреслы вамен тӥрен шайтанэз суредало. Доразы бертыса, ватӥсьёс асьсэды ӵынатыса, тыл вамен тэтчаса яке кирс пенен зыраса чылкытатӥсько на. Мюллер тодосчи вера, Казань губерниысь удмуртъёслэн таӵе сямзы вань шуыса: шайвылысь бертыкузы ватӥсьёс пӧлысь семья кузё яке кин ке одӥгез соос вылэ пень пазя, мукет кулэм муртъёсты нуллоно медаз ни луэ шуыса. Котьмар ке но, тужгес но паськыт вӧлем чылкытатскон амал - со мунчое пырон. Ватонэ пыриськемъёс ваньзы бератаз кулэм муртлэн юртъераз эстэм мунчое пыро. Васильев тодосчи пусъе, мунчое пырыку пар кисьтаны уг яра шуыса, а то кулэм мурт, пе, соос понна лекен берытскыны быгатэ но пар ымнырзэс бышкалоз. Мисьтаськем беразы ваньзы чылкыт дӥськут дӥсяло. Кулэм мурт бере коркаез но чылкытато. Шӧез келям бере ик корка пушез окто: выжез но, борддоръёсты но, вӧлдэтэз но мисько. Куд-ог интыосын корка пушез ӵынато но, нош сэрегъёсы, ӧс но укно янак вылъёсы сусыпу вайёс тыро. Удмуртъёслэн валамзыя, кулэм мурт сӥлы карыса ватэмын ке но, со понна сюлмаськонзы уг быры на, кулэм мурт угось соослэсь ялан юрттэмзэс но утялтэмзэс возьма на. Нош солэн куронъёсыз уг быдэсъясько ке, кулэм мурт дорысьёсызлы люкетыны быгатэ, куд-ог дыръя нош курадӟытыны но. Кулэм муртъёс понна сюлмаськон - нырысь ик ӵыжы-выжыослэн ужзы. Нылпиослэн одно ик быдэстоно ужзы - песятай- песянайёсты тодазы возён. Удмуртъёслэн таӵе валанзы тужгес но яркыт адӟиське кулэм муртлы сӥзьыса кисьтон ортчытоназы. Кисьтонэз ортчыто вань кулэм ӵыжы-выжыосты буре вайыса яке кудзэ ке одӥгзэ гинэ. Котькуд кисьтонын одно ик сиён-юон пыжо-пӧрало но кулэм муртэ сюдо-сектало. Нимаз адямилы сӥзем кисьтон нырысетӥзэ ортчыто кулон нуналаз яке ватон нуналаз. Буре ваён сиён-юонэз ӵемысь дасяны кутско кулэм муртэ шайвылэ нуэмлэсь азьло ик. Кызьы вера Смирнов тодосчи, шӧез миськем но дӥсям бере ӟус вылэ выдто, нош коркась самой пересез кышномурт вӧзаз сюмыкъёс, пичи ӵашаос пуктэ но сӥльын нянь, тукмачи пӧра. Собере семьяысь тужгес но пересь пиосмурт сӥльын нянь кутэ, со бордысь куинь юдэссэ тӥялтэ но ӵашае понэ. Сюмыке тазьы вераса кумышка лэзе: "Таяз улонын ӟеч улӥд, сояз но умой ул. Эн курадӟыт милемыз, эн ветлы сьӧрамы. Милесьтым пудомес умой утьы. Нылпиосмес умой возьма. Кулэмъёсты ас бордад люка. Шур дуръёсын но нюлэсъёсын милесьтым пудомес умой возьма. Та сяна, тыныд вераны уг валаськы, йырдэ кур эн кар. Сояз улонад умой ул, эн куты милемыз берласянь но, азьласянь но, эн ветлы сьӧрамы". Пересь бӧрсьы семьяысь мукетъёсыз но со сямен ик карыны но вераны ӧдъяло.Та йылол дун тырон шуыса нимаське. Гаврилов тодосчи озьыгес ик маде Кузон губерниысь удмуртъёс сярысь. Кулэм муртлэн коросэз доры пичи тусь, пе, пукто. Нылкышноос шыд пӧзьто но со сяна куинь пичи юмал но шӧг табань пыжо на. Пӧрам сиёнэз ӝӧк вылэ пукто но, табанез котькудӥз черодэн пичиен-пичиен тӥяло, пуньыен лым омыртыса, корос вӧзысь тусе кушто-кисьто но шуо: "Пересьёс, эн йӧтылэ милемыз" Берло тусез азбар сэргы нуо но отысен сое пуныослы сёто. Озьыен, кыкез ик гожъясьёс верало, кулэм муртлы пуктэм посуда шӧйлэн вӧзаз ик луэ шуыса. Смирновлэн пусъемезъя, вӧсяськыкузы чылкак одӥг кулэм муртлы гинэ вазисько. Нош Гавриловлэн гожъямезъя, со дыре ик мукетъёссэ но кулэм муртъёсты буре ваё на. Васильевлэн Сарапул утем сярысь гожтэмысьтыз тодыны быгатӥськом, кулэм муртлэн азьло кулэм ӵыжы-выжыосыз сое сьӧразы нуыны лыкто но соин ӵош ик сиё-юо шуыса. Вылӥын пусъем тодосчи ик вера на, воргоронъёс дорын лэсьтэм сюсьтылъёс пукто шуыса, нош кышноос сиён лэсьто соку гинэ ӵогем куреглэсь - кулэм мурт нылкышно ке, яке атаслэсь - пиосмурт ке. Сӥльзэ яке нимаз пӧзьто, яке сезьы кеньырен. Лым пӧлы соос кыӵе ке но курег пуз пуштэм лэсьтыса тыро на. Гур вӧзы ӧс дорыгес тусь поно, кулэм муртлэн йыр вадесаз сямен ик, пичи сюсьтылъёс пуктыло. Со тусе сӥль юдэсъёс яке вӧйын сурам ӝук тыро, со сяна, пуньыен кӧня ке лым кисьто, кулэмъёслэсь нимъёссэс вераса но соосты курыса: "Курбондэс кабыл басьтыны, ӵошен сиыны-юыны, сиён-юонлы шумпотыны но каньыл мылкыдын али гинэ кулэм муртэ ас бордады басьтыны". Кышнояськымтэ егит пи кулон дыръя кулэм муртъёслы сое кышнояны ӵекто но вераны косо, отын медаз мӧзмы шуыса. Отын солэн матысь ӵыжы-выжыосыз вань шуыса лӥято, сое яратозы, шуо, озьы ик кышнояськемез но луоз. Егит ныл кулон дыръя солы бызьыны но ӵыжы-выжыосыныз улыны кенеш сёто. Вихманн тодосчи ватон сярысь тазьы маде:"Ватыны нокинэ но нимыьстыз уг ӧтё, но кулэм мурт сярысь тодэм муртлы одно ик лыктыны кулэ. Маылы ке шуоно, кулэм муртлэн гажамтэез понна кӧтыз ӝож луоз но улоназ шуг-секытъёс кылдытыны быгатоз. Куноослы пӧртэм пумо сиён-юон дасяны луэ: ӝук, сӥль, вӧй, табань, сур, нырысь ик - кумышка. Таин музъем вылысь куноосты гинэ уг утялто, озьы ик - музъем улысь ӵыжы-выжыоссэс, кудъёсыз кулэм муртэ ас дуннеязы басьтыны лыктэмын. Соос понна гур борды ӧс пала нимысьтыз тусьты пукто но котькуд сиён-юонэз пичиен-пичиен тыро. Тусьты борды выжыысьтызы кулэмъёслэн лыдзы мында асьсэ лэсьтэм сюсьтыл пукто на. Коркась самой пересез куяськыкуз тазьы вера: "Мелэ тани. Азяды мед усёз, песянай, песятай (но мукет кулэм ӵыжы-выжыосызлэсь нимъёссэс вера). Тӥ понна пӧзьтӥмы-пыжимы. Ӟеч улэ ни, йырдэс кур эн ни каре! Шыдмес-няньмес котьку удалтытэ, соосты утялтэ! Кизем ю-няньмес удалтытэ, сое уте. Ю-няньмес шыръёслэсь но возьмалэ! Нылпиосмылы шудбур сётэ. Уте соосты". Гур вӧзы ӧс доры кулэм ӵыжы-выжыослы сиськон посуда пуктон сям удмуртъёс пӧлын паськыт вӧлмемын. Соослэн малпамзыя, ӧс кусып кисьтонэ вуэм кулэм муртъёслэн зэмос дугдон интызы луэ. Багаевский ивортэ, Сарапул утемын сиёнэз ӧс кусып вылэ ик куямзы сярысь. Дорын кисьтон каронэн огмындагес ик паськыт вӧлмемын буре вайыса сиён-юон. Сое ортчыто ватон дыръя, кулэм муртлэн шай вылаз. Елабужский тодосчи таӵе нимо утемысь ик удмуртъёслэсь кулэмъёсты утялтэмзы сярысь веракуз тани мар маде: "Кулэм муртэ берпум шутэтскон интыяз келяку, сьӧразы шайвылэ нянь но кумышка ваё. Асьсэос сиё но юо, нош кулэм муртлэсь пайзэ шай вылаз кисьтыса но пыргытыса верало: "Ми кумышка юиськом но тыныд но лэзиськом, мед со азяд усёз. Ю сое сопал дуннеяд. Нянен тонэ буре ваиськом, си сое отын. Си но ю трос эшъёсыд пӧлын, соосын валче тупаса ул". Нош Островский тодосчи поттылэ, кулэм муртлэсь пайзэ шай вылаз лэсьтэм пичи гопе кисьто-поно шуыса. Шайвылын буре вайыса сиён-юон сярысь котыр ласянь гожтэмын Смирнов тодосчилэн ужаз Ватӥсьёс, пе, сьӧразы пӧртэм пумо трос сиён-юон нуо: табань, курег пуз пуштэм, курег пуз, кутэмняньёс, кумышка, сур но вина. Кулэм муртэз келяны калык куд-ог мукет коркаосысь но люкаське. Ваньзы сьӧразы кӧттыр басьто. Кулэм муртлэн шай вылаз буре вайыса сиё-юо. Али гинэ кулэмез сопал дуннее азьлогес кошкем муртъёсын ӵош улэп ӵыжы-выжыосынызы сиыны-юыны ӧтё. Сиёнлэсь оглюкетсэ шай вылэ кельто, оглюкетсэ сюе сого. Куддыръя кисьтон ортчыто кулэм муртлэн короказ, шайвылысь вуыса мунчое пырем беразы. Та пумысен Миропольский но пусъе, удмуртъёс шайвылысь бертэмзы бере гинэ кулэм муртлэн корказ кисьтон ортчыто шуыса. Котькудӥз татчы лыктэм мурт табань но курег веръя, озьы ик гур вӧзы пуктэм ӝуатэм сюсьтыло посуда нергее тазьы вераса сиён понэ: "Нырысь сиськы, собере кошкы. Но кыдёке эн кошкы. Милесьтым коркамес возьма, пудомес уть, медаз со йыромыса ышы". Собере ваньзы сиськыны пуксё, нош сиськемзы бере кулэм мурт понна пуктэм посудаысь сиён-юонэз пуныослы сёто. Куд-ог интыосын, кылсярысь, Мамадыш утемын, кулэм муртлы нимысьтыз тусьты пукто - со эшъёсыз но ӵыжы-выжыосыз пӧлын сиське шуыса оско. Татын ик гур вӧзын сылӥсь тусь но луэ, отчы азьло кулэмъёсты тодазы вайыса куясько. Соосты ваньзэсты буре вайыса сюсьтыл ӝуато но нимзэс верало. Со сяна, Глазов утемысь тани мар тодмо луиз на: удмуртъёс кисьтон бере мукет уяз но корказьысенызы сиён куяло на, кулэм муртлы коросаз сиён лекос ичи понӥзы шуыса малпало. Соос оско, кулэм мурт уин сиськыны лыктэ шуыса. Кылемез вань на. 7