Анатолий Назаров
Кузьма агай, базар но Буян
Улонысь учыр
Та учыр вал ог ньыльдон ар талэсь азьвыл. Булай починкаын улӥз-вылӥз Кузьма 
агай. Пӧртэм юмшанъёсты, юондыръёсты арганзэ кыскаса шулдыртыны яратэ вал со. 
Озьы ке но, бордаз Арганчи кушем ним ӧз лякиськы, нош Кавалерист шуыса 
вазиськемлы вожез ӧз потылы. Война аръёсы уго со кавалеристъёслэн дивизиязы 
сюрем но туж яратэ вал пиналъёслы вал вылын оже ветлэмъёссэ вераны. Войнаысь 
бертэм бераз колхозын пӧртэм удысъёсын ужаз, но тужгес трос гурт калыклэсь но 
колхозлэсь пудо-животсэс возьмаз.
Одӥг нуналэ бер сӥзьыл, дӧдьыен ветлымон лымы люкаськем бере, Кузьма агай базаре 
ӟазегъёссэ вузаны мыныны малпаз. Вазь ӵукна ик, бригадирлэсь юаса, Буян нимо 
пурысь улошоез кыткиз, дӧдьыяз четлык пушкы куать ӟазегъёссэ, арганзэ понӥз но 
Ӝикъя базаре ширтӥз. Кошкон азяз кышнозэ оскытӥз, ӝытазе, пе, коньдонэн вуо.
Ӝикъя базарын нуназеозь кык ӟазегъёссэ вузаз, нош нуназе бере бурдоосыз шоры 
учкись ӧз луы ни. Мӧзмыт луиз Кузьма агайлы, нош гуртэ бертыны вазьнагес ай. 
Арганэн шуд вал но, курытсэ пичи но ӟузььытэк, бордаз ки уг ӝутӥськы. Нош кисыын 
коньдон кӧня ке куаштыртэ ини.
Базарез котырак уӵертӥз но ачиз кадь ик мӧзмыса сылӥсь тӥрныдэн но салазкиен 
вузкарись воргоронэз адӟиз. Кочырысь вылэм со. Дораз лыктӥз но юон-куртчон лавка 
пала возьматыса юаз:
- Базар быре кадь ини, оло, пырыса шунтӥськом?
Воргорон эш сюремлы шумпотыса шуиз:
- Ойдо пыралом, базар нуналэз миськом.
Ӵошенназы одӥг курытсэ басьтӥзы, куртчыны - чорыген нянь. Валэн дӧдьыез но 
салазкиез син азязы возён понна, сэреге укно доры интыяськизы. Стаканъёссэс ваче 
шуккыса шунтӥськонъязы тодазы ваизы Кочырысь, Булай починкаысь но мукет 
гуртъёсысь ӵош тодмооссэс, иськавынъёссэс. Ӝужгес гуртэз веракузы, Кузьма 
агайлэн йыраз чилектэм кадь таӵе малпан кылдӥз: "Кожаса бертоно!" Ӟуземзы бере 
сюлэмзы небӟиз, мылкыдзы каньыломиз. Ог-огзылы умой сюрес сӥзьыса, воргоронъёс 
люкиськизы.
"Сюрес ог кык иськемлы гинэ кузь луоз, вал уз жадьы", - малпаз Кузьма агай но 
Ӝужгес гуртэ кожиз. Лавкаысь саламлы шуыса эшшо одӥг курытсэ басьтӥз на. Каньыл 
сюлэмын куаж! гинэ арганзэ шудыса, дӧдьые кыткем пурысь валэн но четлыке пытсам 
ӟазегъёсын ӝытпал Ӝужгес ураме пырись луиз. Арган куараез кылыса, калык кудӥз 
ураме потыса ик, кудӥз укно бордаз ик лякиськыса лыктэм куноез учкиз.
Иськавынъёсызлэсь азбар капкаоссэ усьтыкуз ик Кузьма агай кисьтӥз:
- Валля арын милемлы ыжйыр сётӥды вал но тани ӟазег кузьымен дорады вуи.
Кык ӟазегзэ сётыса, корка пыризы. Ӝамдэ улыса, бӧлякъёссы но бускельёссы вуизы. 
Сиизы-юизы, Кузьма агай арганэныз шулдыр гуръёс шудӥз, кырӟась-эктӥсь но вал. 
Озьы уйшор вуэмез но ӧз шӧдэ. Иськавынъёсыз воргоронэз кӧлыны косо вал но, 
Кузьма агай мыр-мыр пыкиськиз:
- Гуртам берто, гуртам. Кышно ыштоз. Ма, сизьым иськемез ми та улошоеным час 
куспын ширак гинэ ортчом. Валэ визьмо, сюресэз ачиз но шедьтоз.
Дӧдьыяз лач-лач интыяськыса, тулупеныз шобырскиз но сюрес вылэ потӥзы. Кӧня ке 
лашкинтэмзы бере, Кузьма нырулыны кутскиз но чыс-чыс умме усиз.
Кема-а, ӧжыт-а кӧлӥз - тодӥсь ӧвӧл. Сайказ со куалекъямон кынмыны кутскем бераз. 
Дырекъяса султӥз но котырак учкиз. Тём-тём пеймыт. Валэн дӧдьыез но, ӟазегъёсыз 
но ӧвӧл, нюлэскысь писпуос гинэ уй пеймытын шимес шаугето. "Иське, мон Павоской 
тэле усьыса кылиськем, - асэныз ачиз кенеше Кузьма агай. - Иське, гуртозь куинь 
иськем сяна уз луы ни".
Воргорон Булай починкае ӵукна пал гинэ вуиз. Паймем кышноезлы номыр но вератэк, 
вал гидэ васькиз. Буян улошоез отын ӧвӧл. Сюлмыз шуг луыса, конторае бригадир 
доры мынӥз. Кузьма агайлэсь базаре мыныса юмшамзэ кылзэмез бере йырыныз сэзъяз 
но шуиз:
- Улошоез ӧд шедьты ке, ваньмыз понна тыроно луод: вал понна но, дӧдьы понна но, 
сӥес-тӥрлык понна но.
Буянэз кык арня ӵоже утчаз Кузьма агай. Кытчы но ӧз вуылы со. Гуртсы котырысь ог 
дасо иськемысь вань выръёсты, гопъёсты, тэльёсты ортчиз, калыклэсь юалляськиз. 
Ӧвӧл, нокытын ӧвӧл улошоез. Му пыртӥ виям сямен, чиптэм-чаптэм ышиз-быриз.
Воргоронлы нунал но нунал ӧвӧл ни, уй но уй ӧвӧл. Лы но ку кылиз, ымнырыз 
сьӧдэктӥз.
Кыкетӥ арнялэн пумаз Павоской гуртысь пияш вал вылын вуиз но ивортӥз: ӟазегъёсын 
Буянэз, пе, нюлэскысьтызы пулы мынэмъёс шедьтӥзы. Вал, пе, лы но ку гинэ кылемын 
на, пыд вылаз мырдэм сылэ.
Кузьма агай Буянлы но ӟазегъёслы шуыса пыжем нянь, сезьы, ведра басьтӥз но 
лыктэм пияш сьӧры вал вылын ури-бери лашкинтӥз.
Нюлэскы вуэм беразы воргорон ваньзэ валаз, кызьы но мар луиз. Ширтон интыысен 
воргорон дӧдьыысьтыз усьыса кылем бере, биньгозы дӧдьы улэ сюрем но вал йырез 
бур пала кыскем. Сюрес вылысь ог сю витьтон метре кожыса, вал ӵем будӥсь векчи 
писпу пӧлы сюрем, сисьмыны кутскем лӥял вӧзы дугдоно луэм. Сиемез потэмен, со 
котырысьтыз йырыз сузьымон вань кыз вайёсты, сисьмем лӥялэз сием, дӧдьы 
вайыжезлэсь йылзэ но йыръем. Мозмытскыны турттыса, солань но, талань но 
лёгаськем-кыстаськем, но золтӥськем биньгозы сое юн возем.
Кузьма агай Буянэз юскиз, вылысьтыз южмем лымыез но йӧ ӟузыриосты сузяз, 
тыбырзэ тулупеныз шобыртӥз но нянь сукыриеныз утялтӥз. Ӟазегъёсызлы сезьы сётӥз. 
Собере тылскиз, ведраен ву шунтӥз но валэз, ӟазегъёсты сектаз.
Котыраз люкаськем пу дасясьёс серемзы потыса учко Кузьма агайлэн дауртэмез 
шоры, кин но со кылзэ шере, маке-со меӵкытъя. Но воргоронлы серемен йырин ӧй 
вал, тодэ угось: кык арня ӵоже сиськытэк нюлэскын улыса, Буян висьыны усёз, али 
сое ӝегатскытэк йӧнатыны кутсконо. 
Нюлэскы лыктэм буш валзэ Кузьма агай дӧдьые кыткиз, нош Буянэз дӧдьы борды 
думиз. Валлэн мыныны ӟигарыз ӧвӧл, дугдылыса-дугдылыса мырдэм но кызьы гуртэ 
вуизы.
Кузьма агай Буянэз вал гидэ интыяз пыртӥз но котыртӥз узыри сямен берганы 
кутскиз. Тусяз быдэс ӟыгыртэт турын, ведра сезьы понӥз, шунтыса ву пуктӥз, куинь 
ӟыгыртэт куро пыртыса, валлэн пыд улаз вализ. Собере гуртаз бертӥз но ӟазег 
вузамезлэсь кылем коньдонзэ но сукыри нянь кутыса магазинэ бызиз.
Буян доры вал гидэ воргорон кык бутылка водкаен вуиз, эшшо ӟыгыртэт куро пыртӥз 
на. Собере улошолэсь йырзэ кутӥз, ымзэ усьтӥз но быдэс бутылка водкаез чыртыяз 
кисьтӥз, куртчыны сукыри няньзэ сётӥз. Кӧня ке улыса, кыкетӥ бутылказэ усьтӥз. 
Табере ини валэныз ӵош дыртытэк ачиз но юиз.
Кудӟем вал куро вылэ ланьырскиз но синзэ кыниз - умме усиз. Кузьма агай сое 
куроен шобыртӥз, собере дӧдьыы сьтыз арганзэ пыртӥз, валэз вӧзы куро вылэ пуксиз 
но, эх, шудыны кутскиз ук! Кык арня ӵоже куректонэныз уй-нуналэз адӟымтэ-шӧдымтэ 
воргорон вань мылкыдзэ кисьтӥз. Арган куара я бӧрдэ, я серектэ, вӧлмыт жингыраса 
кошкись гурез шуак ыше, гуньдэ но, кема возем пытсэтысь мозмытскем сямен, 
выльысь эшшо но чебергес жингыртэ.Собере ӝамдэлы дугдэ, синмысьтыз васькись 
синкылиоссэ ӵушылытэк, вӧзаз кыллись валлэсь йырзэ кутэ но ымдураз ик чупа.
Гуртоос таӵе концертэз учко-кылзо но йырынызы гинэ шонало. Соослы угось Кузьма 
агай жаль но потэ, амалтэк серемзы но потэ.
Ӟеч утялтэмлэсь, шулдыр арган гурлэсь Буян пыд йылаз чаляк султӥз. Номыр 
луылымтэ сямен гонэз нош ик чильк-вальк кисьтаське, нош йырзэ эшшо но моторгес 
урдыса ворттылыны кутскиз.
3

 . . . Ӝытбыт нокинэн вераськытэк, лушкем синвуоссэ ӵушылыса аслаз висъетаз 
пукиз Маша: "Пӧяз, нодтэм муртэ музэн пӧяз! Эшшо ке эш нимаське! Всё, табере 
дораз пыдме но уг лёга. Витьымтэ шорысь пумиськеммы дыръя шораз но уг вазьылы. . 
. Лиляез солы мынэсьтымлэсь дуногес. . ." Дас куинетӥ баме усьтэм книгаез шоры 
учке нылаш, нош бусаськем синъёсыз номыре уг адӟо, сюлэмаз ВОЖАН гома. . .

4
* * *
Лиляез дорысьтыз шедьтымтэеныз, юнме сомында дырзэ быдтэмлы ассэ тышкаськыса, 
Лариса автобус дугдылонни пала кожиз. Ульчалэн сэрегысьтыз ширтӥсь машинаез 
нылаш ӧз синйылты. Аслаз малпанъёсызлэсь со сазьтӥськиз, кӧтурдэсаз туж юн 
мырӟемез шӧдыса гинэ. Нылмурт интыяз ик кисмыляк усиз но йырсазьзэ ыштӥз. . .
- Дугды! Дугды, шуисько! - паськыт пельпумо, ӵышкем йырсиё пиосмурт вӧзын пукись 
Лиля вожомиз - руль сьӧрысь муртлэн суй бордаз кырмиське, утыр сое мыжга: - 
Дугды! Тон адямиез лёгад ук! 
- Эн люкеты, шлюха! - ыргетӥз воргорон но педальзэ золгес зӥбиз - та интылэсь 
макем кыдёкегес пегӟод, сокем ӟечгес кӧлалод. Ӟучъёс шуэмъя, мын но утча бусыысь 
тӧлэз. Сьӧдмыт-вож "тойотаез" нокин ик синйылтыса ӧз вутты кадь. Со ульчаетӥ 
угось пыдын ветлӥсез трос ӧвӧл. Тӥни со визьтэм нылаш выллемъёс гинэ олокытӥ но 
калтырто. Сыӵеослы луыса Вадим пытсэт сьӧры пуксьыны уг малпа. Солэн ваньмыз 
азьпалан. Кемалась-а усьтӥз "психологической разгрузкая кабинетсэ", нош пайдаез 
шӧдскымон ини.
Ӵош дышетскем нылмуртэ кужмысь эриктэмамез понна пукыса потэмез бере, егит 
пиосмурт кема гинэ кудпала шонскыны валатэк улӥз. Собере огпол саунае ветлэмез 
бере кымесаз чапкиз: бордель усьтоно! Секс ласянь катэм кион выллем улӥсь 
пиосмуртлы ӵапак таӵе удыс тупамон! Зэм, бордель возем понна выльысь зонае 
сюрыны кема ӧвӧл, нош "психологической разгрузкая кабинетъёс" азьло дырысен 
модае пыӵамын. Озьы ик нималоз со аслэсьтыз удыссэ. Отчы чебересь нылъёсты 
шедьтыны шуг уз луы - кӧт сюман котькинэ кылзӥськись но лачмыт каре. Уката ик 
нодтэмъёссэ но кызьы коньдон поттыны ёрмемъёссэ. Мед тырмашозы сыӵеос Вадим 
вылэ: асьсэос но обиде уз кыле, Бойцов но узырмоз. Нош коньдон люказ ке, соку 
ини аслэсьтыз зэмос удыссэ радъялоз. Технической университетлэсь куинь курссэ 
йылпумъяны сяна ӧз кылды ке но, Вадим ӟеч вала туала улонлэсь кудпала бергамзэ. 
. .
- Шып кариськы шуи! Яке зонае сюремед потэ-а? А ведь уз учке, тон вӧзам гинэ 
пукиськод вал шуыса. Ментъёслы мон верало: тонэныд чупаськыса мынэменым сюрес 
вамен выжись нылмуртэ ӧй адӟы. Соку ини тон - соучастница преступления луиськод, 
валад-а?! - Вадим нылмуртэ ӧжытак кышкатоно кожаз: - Вылаз ик шараяськоз, кытын 
но ма ужамед. Мыным зона сокем ик кышкыт ӧвӧл - пукемын, тодӥсько. Нош тыныд?!
Лиля бӧрдэмысь дугдӥз - малпаськонэ усиз. Вадим зэм вера: марысь мар ке, ваньмыз 
шараяськоз. Уката ик пытсэт сьӧры ке пуктӥзы. . . Собере, оло, со нылаш чик но 
ӧз кулы. Кышкаменыз гинэ усиз. . . Бен шуккиськиз ке но, бурмоз ук. Ӧжытэз-а 
адямиос шудтэм учыре шедьыса сӧсырмыло но йӧнало?
Город сьӧрысен Вадим машиназэ дугдытӥз но кабинаысь потыса "корт валзэ" котырак 
чаклаз.
- Всё в порядке! Ни царапин, ни крови нет на машине, - шумпотыса ивортӥз со 
пукон борды шымыртӥськем Лилялы.
- Озьыен, со нылаш - улэп? - нылмуртлэн синъёсаз оскон тылгизьыос чилектӥзы но 
со сэрытак шонертӥськиз.
- Конечно улэп. Дышемын тӥ, мямляос, из мухи делать слона. . . И тем не менее. 
Автосервисэ пыратэк уз ортчы - "береженного бог бережёт" шуо, лэся. Озьы-а? - 
Вадим нош ик рульзэ Вотка кар пала берыктӥз. Час но ортчиз-а, ӧз-а - соос берен 
Оӵкар пала ширто ни вал. Ӵыж горд "тойотаын". . .
Дораз Лиляез нэнэез возьма вылэм. Нылзэ чаклалляны Лидия Григорьевна уг 
вунэтылы. Тани туннэ но олома мында сиён ваем. Нылзэ но пӧсь сиёнэн пумитаз:
- Со университетад дышетскыса, воксё ӟызомид ни. Бубид но сюлмаське - 
дышетскемед понна, пе, дун тыроно луиз ке, вера - коньдон сётоз.
Пыдкутчанзэ кыльыса, Лиля ванное пыриз. Отысь со пырак кухняе вамыштӥз - Вадимен 
ворттылонъяз сием потэмзэ но ӧз шӧдылы. Нош табере тани пыжем курегез сютэм ӟичы 
музэн кесяны шӧтаз. Нэнэезлэсь ачиз сиськиз-а ни шуыса юаны ик вунэтӥз.
- Нина Андреевна жингыртӥз. Костялэн гожтэтэз, пе, вань. Тон шер гожъяськод 
шуыса ӝожтӥське, лэся, - ӝӧклэн мукет пумаз пуксьыса, Лидия Григорьевна нылызлы 
выль иворъёсты ӝоктыны ылаз. - Тон, нылы, оло, карттэ уд яратӥськы ни? - Сюлмыз 
шуген юаз анай мурт. Лиля шуак луиз, эсьма киысьтыз вилказэ ик палэнтӥз.
- Тон мар озьы супыльтӥськод?!
- Ма, гожтэт гожъямтэысьтыд абдрасько. Нина Андреевна но пайме ни. Мон солы шуи: 
тон, пӧй, дышетскыны пырид но секыт йӧтэ - дырыд нокытчы уг тырмы, - пыриськись 
куараен лабыртӥз кышномурт.
- Шонер, мама, мон туж юн жадисько. Нош Костяез мон азьло сямен ик яратӥсько. 
Дыр шедиз ке, одно гожто солы, - Лиля выльысь вилказэ кырмиз. Берло дыре 
нэнэезлэн синъёсаз меӵак учкыны со уг дӥсьты. Уката ик туннэ номыр сыӵе-таӵезэ 
медаз вала вал.
- Я-я, мон так гинэ. Нош тон тодӥськод-а, Костялэн сузэрез, Лариса, реанимациын 
кылле, лэся. Машинаен лёгам ведь кыӵе ке ӧвӧлтэм, ачиз ке дугдымтэ но, - ӝӧк 
сьӧрысь султыса, Лидия Григорьевна тусьты-пуньы миськыны ӧдъяз. Нош Лилялэн 
киысьтыз вилкаез жингырак выж вылэ усиз.
- Мар тонэныд, нылы? - куалектыса берытскиз кышномурт. Нош борддоре долкаса 
учкись ӟаректэм ымныро нылзэ адӟыса, уката кышкатскиз: - Висьыны усид, оло? То-
то ӧсэтӥ пырыкуд ик ватлайтӥ, тусбуед аслыд уг укша шуыса, - киоссэ азькышетаз 
ӵушыса, Лидия Григорьевна нылыз доры лыктӥз но солэн кымесаз йӧтскиз. Ӟырдамын 
ӧвӧл шуыса валамез бере гинэ капчияк шокчиз.
- Мама, кытысен лёгаллям Ларисаез? - няркомем куараен юаз Лиля.
- Ма, тон доры со лыктэ вылэм, лэся. Озьы шуиз Нина Андреевна.Умой-умой уг но 
тодӥськы - телефон пыр гинэ трос-а вераськод. - Нылызлэн шуак воштӥськемезлы 
Лидия Григорьевна абдраз ке но, тае со ас понназ тазьы валэктӥз: Лиляен Лариса 
ваче вуо ке, ог-огзэс азьпалтыны турттыса музэн ӟабыльто, нокинэ уг адӟо ни. Ог-
огзэсты ярато, озьыен. Талы Лидия Григорьевна шум гинэ потэ. Нош кинлэн сюлмыз 
вӧсь уз луы, гажано адямиез шудтэм учыре сюремдэ тодыса?
- Я, нылы, сокем эн кушектӥськы, со пинал на - бурмоз. Йырсазяз пырем ни, шуиз 
анаез, - нылзэ буйгатыны дыртӥз нэнэез. Нош Лиля, йырыз висем вылэ чӧлтӥськыса, 
валесаз дыртӥз. Лидия Григорьевна нылызлы ӧз люкеты ни - "ӝыт жингырто" шуыса 
дораз дасяськыны кутскиз.

* * * 5

Дыр туж каллен ортче ке но, сое дугдытыны уг луы вылэм. Али гинэ кадь вуиз вал 
яркыт шундыё гужем. Таяз аре со туж пӧсь вал. Пӧсьтолэзе шунды шорын ньыльдон 
градус котырын возиськиз. Ява! Нош котьмалэн пумыз вуэ вылэм. Тани табере 
караулын сылӥсь ожгарчи вылэ каллен гинэ усьыло ини тӧдьы бубылиос. Ӝоген 
службаезлы ар тырмоз ини. Толон со нэнэелэсь гожтэтсэ басьтӥз. Нина Андреевна, 
пизэ сюлэмшугъяськытонтэм вылысь, дыр, Ларисалэн шудтэм учыре шедемез сярысь 
соку ик ӧз иворты вал. Тани табере нэнэез шумпотэ нылызлэн бурмыны кутскемезлы. 
Сузэрез чигем пыд вылаз но каньылля лёгиське ни, лэся. Зэм, гипссэ эмчиос 
куштӥллямтэ ай, нош висисез дораз бертыны лэзиллям ини. Нылзэ утялтон понна, 
Нина Андреевна огдырлы уж дурысьтыз ик куриськем.
Лиля сярысь но нэнэез гожтэм. Костялэн кышноез дышетскыны пырем. Кык ар куспын, 
пе, вылӥ дышетскемез сярысь кагаз басьтоз. Бен дышетскемез понна коньдон тыроно 
луэ, лэся. "Мар карод, улон таӵе радъяськиз бере", - гожтэм нэнэез. Собере 
ватсам: "Армиысьтыд бертӥд ке, оло, тон но, пие, визьмаськод - дышетскондэ 
азьланьтод". Тае тодаз вайыса, Костя мыньпотӥз: нэнэез котьку ӧпкельылӥз аслаз 
ӧжыт дышетскемез вылэ, соин ик пизэ но нылзэ ялан индылӥз, ӟеч мед дышетскозы 
шуыса.
"Улон возьматоз, мар луоз азьланяз. Дембелёзь ай быдэс ар но дас сизьым нунал", 
- ас понназ мур лулӟиз Костя. Пыдъёсыз но киосыз юз вайыны ӧдъямен, егит пи 
огинтыяз тэтчаны но киоссэ ваче йыганы шӧтаз. Солэн пель сьӧраз чузъяськизы 
командирезлэн алигес верам кылъёсыз: тазьы ик умой служить карид ке, пе, Выль ар 
котырын, оло, дорад бертылыны лэзёмы. "Та иворлы Лилечка укыр шумпотоз", - 
ваньмон дыръяз гажанэзлы гожтэт пӧран сярысь малпанэз ожгарчиез шунтӥз, лэся - 
со нош ик инмысь васькись бубылиосты чакланы ӧдъяз. . .

* * * 6

Эшезлэн больницаын кыллемез сярысь тодэмез бере, Маша Лиляез уката адӟонтэм 
карыны ӧдъяз. Лиля сяна кин-о бен янгыш на? Лариса соку Лиля доры мынӥз ук! Нош 
соиз тӥни лобась папа* музэн олокытӥ ялан калтыртэ: ӝытазе но, нуназе но сое уг 
шедьто. "Фифа! - ас понназ гинэ тышкаськиз нылаш. - Мон тыныд возьмато ай 
калтыртон! Ваньмыз уродэз - Лиля бордысь. . . Тодо, одно чаклало, кытӥ со 
пивылэс юмша!"
Ларисаез больницаысь дораз лэземзы бере, Маша аслэсьтыз малпанзэ эшез азьын 
шараяны медэ вал:
- Тодӥськода-а, Лара, со кен луонды мыным чик уг кельшы! Тӥни тон но соин сэрен 
сӧсырмыны шедид. . .
Нош Лариса, гипсэн бинем пыдзэ умойгес интыяса, эшезлы мытылӥз гинэ:
- Ӧвӧл, Машенька, Лиля татын пичи но янгыш ӧвӧл. Дыртэменым ачим азьме-берме ӧй 
чакла. . . И вот мар, дугды ини тон Лилялы йыркуръяськемысь, ведь Костя сое 
яратэ.
Машалэн уката золгес йырыз кур луиз. Эшшо ке эшез солы ик дурбасьтэ ук! Ӵок, 
лушкем малпанзэ Ларисалы со али уз вера, нош мар вань сюлэмаз - кисьтытэк уз 
чида:
- Да, яратэ, пе, ини! Со пивылэсэд агайдэ валес пыр аслыз кариз! Тон ке уд 
тодӥськы, мыным верасьёс луизы, кызьы со уй бубыли пиосын мынчыръяськылӥз 
школаын дышетскыкуз ик!
Лариса пальпотӥз:
- Э-э, Машие, Машие, тынад сюлэмыд али ке но агае бордын на, лэся, ук! Вунэты ни 
тон сое, Костялэн табере кышноез вань. Нош тон пинал на - аслэсьтыд пардэ 
пумиталод ай. - Огшап малпаськемез бере, нылаш мӧйы мурт сямен ватсаз: - Книгаос 
но компьютер сьӧрын пуконнад пиосты ас бордысьтыд ӧд донгыты ке конечно.
- Кулэзы вань мыным со пиосыдлэн! Мыным соостэк но умой! - вожез потӥз Машалэн. 
Эшеныз вожвылъяськонэ вуэмзылэсь азьло нылаш кошкыны дыртӥз. Нош сюлэмаз пыдло 
пырем малпанэз дыр ортчемъя уката юнмаз гинэ. . .

* * * 7

Картэзлэсь гожтэтсэ басьтыса, Лиля сюлэмшугъяськыны кутскиз: нош кык арня 
отпускын улытозяз Костя шӧдӥз ке кышноезлэсь маин выремзэ? Вылаз ик Вадим но 
Лиля бордысь озьы гинэ уз палэнскы ни. Берло дыре Бойцов Лиляез ӵемгес аслаз 
вӧзаз возьыны тырше: клиентъёслэсь мылкыдъёссэс мукетъёсыз нылъёс, пе, мед 
буйгатозы. Зэм, тужгес кулэ адямиос доры Лиляез ик ыстэ. Уката ик кунгож сьӧрысь 
вуэм зӧк кисыё дядяйёсын ӟеч кусып тупатэмез потэ ке. Алигес тани одӥг турок 
татын шутэтскиз, лулсэрзэ буйгатӥз. Ой бен акыльтӥз ук нылмуртлы со сьӧд моко: 
ӝыны час ортче-а уг-а, мусульманин ёртэ ини - мукет амалэн, пе, яраты монэ. . . 
Эшшо ке ай контрацептивъёслы-презервативъёслы йырыз кур луэ: мынам осконэя, пе, 
со шакшыосты кутыны уг яра. Нош ачиз, пырултэм, кылыныз но эсьма нылкышнолэн 
пушказ пыра. . .
- Жади ини мон со сьӧд мокоедлэсь! - пумитъяське вал Лиля. Нош Вадим сое 
ӟыгыртӥз но небыт азьзэ маялляса шуиз:
- Озьы кулэ, мусое, валаськод-а? Та турок монэ но, тонэ но узырмытоз. Ма, собере 
со асьме шаере ог кык арнялы гинэ лыктэмын ук - созэ гинэ чидалод. Куд-ог 
кышномуртъёс вань даурзэс одӥг акылес пиосмурт вӧзын, мукетъёссэ шӧмъятэк чидало 
ук.
Лиля Бойцовлэн пӧсям киосыз улысь мозмытскиз но мур лулӟиз:
- Нош мынам картэ со вискын отпуске бертӥз ке?
Бойцов нылмурт вылэ сёр сямен тэтчиськыны дасяськиз кадь:
- Эн лэзьы бертыны! Гожтэт лэзь. . . Ӧвӧл, ӧвӧл, телеграмма. . . Эшшо но 
умойгес, тон соиныд телефонэн вераськид ке. Шу: отпуске бертатэк службаед ӝоггес 
йылпумъяськоз, отпуск бере уката зол мӧзмод. . .. Э-э, да ма мон тонэ, кескич но 
визьмо ӟичыез дышетӥсько?
Машинаяз пуктыса, Бойцов ачиз ик Лиляез телеграфозь нуиз. Эсьма, кабинкае но 
нылмуртэн ӵош пыриз. Мултэссэ супыльтыны медаз шедьты, пе. Нылкышноослэн кыл 
гозызы уго ӵем дыръя туж кузь нуйтӥське. . .

* * * 8

Вылтусын гинэ бырем атаезлы уг кельшы Маша, сямын но ваменэс, малпам ужзэ котьку 
пумозяз быдэстыны тырше. Милициысь старшой лейтенант Иван Петрович Матвеев уго 
нылзэ ялан дышетылӥз: "Сётэм кылыдлы кузё лу". Ачиз Иван Петрович, оло, ӵапак 
таӵе сямызлы луыса ик сокем вазь бырыны сюриз. Виисьсэ но ӧз шедьтэ. Калыкын 
лушкемен вераськизы: оперативник, пе, тӧрлыкен герӟаськем мафиозилэн "быж вылаз 
лёгиськем" вылэм. Валамон ини, вылӥын пукись дядяйёслы таӵе чупырес милиционер 
укшамтэ - сюрес вылысьтызы утялтыны юрттӥллям, лэся. Тӥни озьы Маша бубизтэк, 
Зинаида Яковлевна картэзтэк кылизы. Соин ик Маша Мускоысь университетэ пырон 
сярысь уг малпаськы ни - медсестра луыса ужась нэнэезлэн уждунэз малы гинэ 
тырмоз.
- Укмысэтӥ классме йылпумъяса, культурая училищее пыро, библиотекаре дышетско, - 
нод-нод вераз нылаш анаезлы. Соиз пумитъяськыны выриз ке но, юн сямо нылыз сое 
ӧз ик кылзӥськы.
Культурая училищее пырон сярысь юалляськыны шуыса нылаш азьло ик ветлоно 
кариськиз. Дышетсконнилэн юртысьтыз потыса ог сю-кык сю вамыш мыныса вуттӥз-а, 
ӧз-а, Маша Лиляез адӟиз. Лапег мугоро Маша сэрег сьӧры ватскиз. Ассэ медаз 
синйылтэ шуыса, эсьма, чиганлэн выллем сьӧд но кузь йырси пунэтсэ гадь бордаз 
ӝиптӥз. "Удмурт Телекомлэн" филиалысьтыз Лиля шырмачлы укшась пиосмуртэн 
кунултӥськыса потӥз но, кыксы ик ӵыж-горд "иномаркае" пуксьыса, кытчы ке синтэм-
пельтэм лобатӥзы.
- А эшшо ке Лариса уг оскы Лилялэн юмшамезлы! - оло шумпотыса, оло 
йыркуръяськыса малпамзэ шара вераз нылаш. Со али ик эшез доры мыныны ӧдъя вал но 
аналскиз: Лариса нош ик уз оскы. Нош Маша одно шедьтоз ай эшсэ оскытыны амал!
Арня нуналэ Маша ӵукнаысен ик Лилялэн азбараз ни вал. Нылаш туж зол кынмиз ни ке 
но, саклан интыысьтыз - нылпиослы гужем шудыны чаклам пичи коркась вырӟыны ӧз ик 
малпа.
Нуназе котырын Лиля подъездысьтыз потӥз но автобус дугдылонни пала вамыштӥз. 
Маша но сьӧраз калъяськиз.
Автобусын адямиез котьку сямен тулляськемын вал бере, Лиля нылашез ӧз синйылты. 
Со понна Маша ӝужыт мугоро, кильтрес дӥсяськем нылмуртлэсь котькуд выроссэ 
сакла. Калык пӧлын ӝыны час ёрос донгаськыса мынэмзы бере, Лиля ӧс пала 
чуртнаськиз. Маша но кыкетӥ ӧслы матэгес кариськиз. Автобус дугдэм бере, кӧня ке 
адямиосын ӵош Лиля но ураме гылӟиз. Азьпалаз сылӥсь шоро-куспо арлыдо нылкышноез 
пыд йылысьтыз погыртымон донгыса, Маша но автобус пушкысь лобатӥз.
Ог дас минут пыдын мынэмзы бере, Лиля укмыс этажъем тӧдьы юрт пала кожиз. Юртлэн 
урдэсысьтыз сюбег ӧс Лиля бӧрсьы ворсаськем бере, Маша но со доры матэктӥз.
- "Кабинет психологической разгрузки", - шара лыдӟиз нылаш. Чылкак абдрам нылаш 
огшап ас понназ малпаськыса сылӥз но ӧслэн кутоназ кырмиськиз. "Дугды ай! - ассэ 
ачиз алӥз со: - Мыным татчы пырыны уг яра, эшшо ке Лиляен ваче ымныр луом". 
Бадӟым коркалэн ульча палась борддораз гожтэмез но вань вал кадь, адресэз, дыр. 
Соя тунсыко кабинетлэсь телефонзэ но тодыны шуг уз луы. Асьсэлэн Матвеевъёслэн 
доразы телефонзы ӧвӧл. Бен ӵок. Со ик умой: Маша али пырак Лариса доры пыроз. . 
.
"09" номерез бичаса, Маша со юртлэсь кыӵе ульчаын сылэмзэ валэктӥз - кема ик дыр 
ӧз ортчы, паймымон кабинетлэсь телефонзэ солы веразы. Маша выльысь телефон борды 
кырмиськиз. 
- Я валэкты ини, кытчы озьы тон жингыръяськод? - бордаз тэбиниз чылкак абдрам 
Лариса, валес вылын пуконъяз.
- Эн люкеты. Ӝоген ваньзэ тодом, - нод-нод вазиз Маша но трубкае шуиз: "Мынам 
тодэме потэ вал, тӥлед ужасьёс кулэ-а?.. Бен, дас тямыс арес. Массажисткае? 
Ярам. Мон малпасько на. Эшшо одӥг юан сётыны яралоз-а? Тӥ дорын-а ужа мынам 
тодмое Лиля Тарасова? Ой, вождэс эн вае, али солэн фамилиез Иванова луэмын шуыса 
вунэтӥ. . . Ужа, иське. Туж умой, со монэ кемалась та уже кутскыны чортэ ни вал, 
но. . . А-а, валай, озьыен, тӥ егитъёссэ но чеберъёссэ гинэ кутӥськоды? Валай, 
пиосмуртъёс шорам учкыло, о-о. . . Я, иське, ӵуказе мон тӥ доры лыкто. Ӟеч луэ".
Маша трубкаез понӥз но пинь пыртӥз гизьыртӥз:
- Шлюха! Эшшо ке сое ик жаляло: дышетске, кык арскын вылӥ образование басьтоз! 
Тьфу! Ме, жингырты та телефонъя! - лек зӥртӥз со кагаз юдэсэз Лариса азе. - 
Девушка по вызову, вот кин со тынад Лиляед! Мон туннэ ӵукнаысен сое саклай ини. 
Кызьы тодӥ-а? Ма, мыным нэнэе мадьылӥз, кызьы соослэн эмъяськонниязы вуттылӥзы 
сыӵе нылъёсты.
Эшез ваньзэ радызъя мадемез бере гинэ Лариса мае но сое валаз ик, лэся. Огшап 
мар вазьыны тодытэк пукемез бере агайзэ жаляны ӧдъяз:
- Нош кышноезлэсь солы но паласькиз ке, а, Маши? СПИД туж кышкыт маке шуо ук, 
кулӥз ке?
Нылъёс малпаськонэ усизы. Кӧня ке минут ӵоже ваче пумит чал-чал пукемзы бере, 
Маша дӥсьтытэкгес вазиз:
- Костялы шонерзэ гожтоно. Ар ортчыса армиысь бертӥз ке, Лиляез борды медаз ик 
йӧтылы.
- Ӧйтӧд, - могӟиз Лариса. Нош котьмар ке но, агаез солы туж жаль потэ: сое ик 
пӧяло, вылаз ик кышкыт чер но кузьманы быгатозы. Нылашъёс котькудӥз ас понназ 
малпаськыса пукизы. Ларисалэн сюлэмаз ӝожомон но кышкан каръяськизы. Нош 
Машалэн син азяз пуксиз Костялэн но Лилялэн сюанзы. Ресторанысь бертэмзы бере, 
шулдыръяськон выжиз Ивановъёслэн, Тарасовъёслэн но Матвеевъёслэн азбаразы. Июне 
уго уйёсы нуназе кадь ик югыт. Компьютер азьын пукись Маша но Ларисаен ӵош калык 
пӧлы потоно кариськиз. Ӝужыт мугоро, сьӧд костюмен, тӧдьы дэремезлэсь юг-юг 
луэмзэ уката юнгес пусйись "бубылиен" Костяез со нырысь ик синйылтӥз. Эмеспи 
эшъёсыныз тамак кыскыса сылэ вал. Нош выль кен нокыӵе кариськытэк атаезлэн 
огеныз утисеныз-телохранителеныз эктӥз. Макем ӧз кельшы Машалы Лилялэн тодмотэм 
пиосмурт борды лемиськыса выллем кильтыръяськемез. Нош эктӥсьёс нылаш доры 
матэктэм бере, Маша кылӥз Лилялэсь гольтрес серекъямзэ: "Ой, мар тӥ? Мон 
аслэсьтым эрикме яратонэн уг вошты. . ." Машалэн сюлэмаз ныж пуртэн бышкалтӥзы 
кадь: иське, Лиля Костяез зэм-зэм уг яраты? Ачиз Маша Костяен ӵош луон понна 
эриксэ гинэ ӧвӧл, лулзэ сётыны дась. . .
Машалэсь тодэ ваёнъёссэ эшез куспетӥ кариз:
- Мон Костялы гожтыны уг дӥсьтӥськы. Оло, Маши, тон ачид ик агаелы ваньзэ 
радызъя ивортод?
- Костя мыным уз оскы, дыр, - йырыныз сэзъяз Маша. - Соку, оло, ӵош гожтомы?
- Ярам, иське, - ал вылаз бадӟым книгаез интыяса, Лариса тӧдьы кагаз вӧлдӥз но 
гожъяны кутскиз.

* * * 9

Лиляен вераськемез бере, Костялэн мылкыдыз сӥялскиз. Ожгарчи сокем шумпотӥз вал 
дораз бертылонлы. Бен, одӥг ласянь Лиля шонер вера: отпуске бертылэмез бере со 
уката золгес мӧзмыны кутскоз. Огдышемен дыр ортчоз, собере дембелез но зэмзэ ик 
ӝоггес вуоз, оло. Вуоно сӥзьылозь туж кема ӧвӧл ни: кык толэзь но дас кык нунал 
- тол, собере куинь толэзь тулыс, эшшо куинь толэзь гужем, отӥяз шуркынмонлэсь 
вуэмзэ кема ик витёно уз ни луы. . .
- Эй, рядовой Иванов, экты, сотэк уг сёт, - кыӵе ке кагазэн шонаса пумитаз 
лыктӥсь юлтошез ожгарчиез сюлэмшугъяськытӥсь малпанъёсызлэсь сайкатӥз.
- Кинлэсь? - паймиз Костя. Лилялэсь уз луы - кышноеныз куинь нунал талэсь азьло 
гинэ телефон пыр вераськиз. Нэнэезлэсь ивор толон вуиз. Соос сяна Ивановлы нокин 
ик уг гожъя. Ма, Костя уг но возьма гожъямзэс - солы Лиля сяна нокин кулэ ик 
ӧвӧл. Тае шӧдэ нэнэез но, нош анай сюлэм - со анай сюлэм ини, кӧтсэ ӝож уг кары. 
Нылпиез гинэ шудо мед луоз. Нылыз-пиез шумпото ке, анай сюлэм но шудбурен 
пылаське.
- Эшшо ке со ик юа на. Дусымедлэсь, дыр, кинлэсь-о луоз, - мынектӥз частьысьтызы 
почтальон. - Тани ук нылмуртлэн кибервылыз адӟиське.
Сузэрезлэсь кинюртэмзэ синйылтыса, Костя уката абдраз, озьы ке но, конвертэз 
усьтыны ӧз дырты - лапег мугоро маскара ожгарчилы пумитаз номыр вератэк, 
гожтэтсэ пуш кисыяз донгиз но казарма пала вамыштӥз. 
Сузэрезлэн но солэн эшезлэн сое вунэтымтэзылы Костя шумпотӥз вал. Нош гожтэтсэс 
лыдӟемезъя ымнырыз кунэресгес но кунэресгес луиз. Пумозяз лыдӟытэк ик кагазэз 
люкмаз но корт койка улэ сэрпалтӥз.
- Сучка! - пинь пыртӥз тышкаськиз пияш. Мар карыны валатэк ожгарчи койкаос 
вискытӥ огпаласен мукет пала ветлэ. Таӵезэ со кышноезлы тодаз вайытоз! Уг ке 
яраты, иське, малы бызиз? Яке ожгарчиез возьманы моӵез уг сузьы-а? Ӧвӧл, Костя 
отпуск сётэмзэс витьыса уз улы - со туннэ ик Оӵкараз бертоз, ваньзэ ас синмыныз 
адӟоз, ас пельёсыныз кылоз.
Нокин адӟымтэ дыръя, Костя пыӵалзэ пельпум ваментӥз ошиз но ӝужыт кенер кузя 
ӝабырскиз. Ӝытозь солэсь пегӟемзэ нокин уз шӧды, нош тямыс час мында дыр куспын, 
удалтӥз ке, рядовой Иванов вордӥськем палъёсаз матэктоз. Бадӟым сюрес кузя 
Оӵкаре нуналлы быдэ дасо машинаос ширто.
Дас вить-кызь минут куспын вуиз ожгарчи бадӟым сюрес дурозь. Огназ сылӥсь 
Костяез кыдёкысен ик синйылтӥз лымшор палась вузъёсын Оӵкаре лыктӥсь турок. 
Вӧзаз изись юлтошезлэсь юатэк-вератэк со машиназэ ожгарчи вадьсы дугдытӥз. Таӵе-
таӵе удалтэмлы куаныса, Костя бадӟым машиналэсь ӧссэ юн ворсаз.
- Пайдом Оӵыкары? - юаз мычиськымтэ ымныро воргорон. Костя вылдӥсез улэ пыӵалзэ 
адӟиськонтэм интыяса, йырыныз гинэ шоназ на. Ӝоггес, ӝоггес доре вуттӥськоно. . 
. Ярам ай, та моджахед номырез уг вала - сюресчизэ юанъёсын уг ёрты. Яке асьме 
кылэз тодэмез сомындаенгес-а Костялы тодмотэм гуръёсты ас понназ гинэ нургетэ. . 
.

* * * 10

Нэнэез ужысьтыз бертэм бере Лариса эшеныз агаезлы гожтэт лэземзы сярысь мадьытэк 
ӧз чида. Нина Андреевна чылкак кӧдэктӥз. Нырысь-валысь кыл вераны ик ӧз шедьты. 
Лулзэ воштэмез бере нылкышно валаз, лэся, со вылымтэ дыръя та висъетын, оло нош 
кытын ке музон интыын, яке ик туж кышкытэз луэм шуыса. Та дырозь нылпиосыз шоры 
огпол но лек кылын вазьылымтэ мурт, со нылыз вылэ урмыса омыртӥськиз - кызьы 
гинэ мыжыксэ уг вутты:
- Мар тӥ дауртӥды! Кин озьы армиын служить карись пилы сыӵе ивор ыстоз! 
Лэсянтэмъёс! Агайдэ виемед потӥз, иське?! Собере кызьы озьы олокинлы оскод, Лиля 
мурт пиосмуртъёсын кӧласа ветлэ шуыса?! Ой, кӧты-сюлмы, ой, ӟаные*, вандӥзы, 
улэпкын коросэ донгизы ук та ӧвӧлтэмъёс!
Синкылиоссэ китышкыныз ӵушылыса, Нина Андреевна нылызлэн висъетысьтыз потӥз. 
Чидатэк возьманы ӧдъяз со картэзлэсь вуэмзэ - минут но, оло, уг ортчы, кышномурт 
борддорысь час шоры учке. Ӧс усьтӥськемез шӧдыса, нылкышно соку ик пыронние 
дыртӥз.
- Мар ке луиз, оло? - кузпалызлэсь ӟаректэм тусбуйзэ адӟыса, Николай Петрович 
дӥськутсэ кыльыны ик вунэтӥз кадь.
- Ой, Коли, тонэ возьмаса сюлэмы ик путоз ини кожасько вал. Я, нырысь пальтодэ 
кушты, собере сиськыкуд ваньзэ радызъя иворто. Сиемед потэ ни, дыр, ук? - картсэ 
витьымтэ шорысь иворен погыртонтэм вылысь Нина Андреевна сиськонни пала чигназ. 
Картэз киоссэ гылтытозь, кышномурт тусьтые шыд ӝутӥз ни. Нош пиосмурт нырысь ик 
нылызлэн висъетаз кожиз - оло, пе, висись муртлы урод луэм-а? Валес вылаз мӧзмыт 
тусын кыллись нылзэ пельпумаз вешаз:
- Ӝоген-а эктыны кутском?
Бубизлэн юанэз пумитэ Лариса нырзэ гинэ кыскиз.
- Я-я, табере ваньмыз умой луоз, йырдэ эн ошы. - Буйгатӥз нылзэ Николай 
Петрович, собере ӧс пала чигназ: - Отын нэнэед пӧсь сиёнэн вите, аслам но сиеме 
потэмен кӧты тыбырам вуиз ни, лэся.
Лариса куалекъясь пельпумъёсыз вылэ шобретсэ кыскиз. . .
- Сиськыкум мадё шуид вал, мар пумысен сокем-сокем чигиськиськод, - кияз пуньы 
но нянь кутыса, курег лымын шыдэз ӟузьылыны ылаз воргорон.
- Ой, Коли, тонэныд кенешытэк мар карыны ик уг валаськы, - ӝӧклэн мукет пумаз 
пуксиз кышномурт. - Лариса Маша эшеныз ӵошен Костялы гожтэт лэзиллям.
- Лэзиллям ке, умой, малы со понна куректонэз? - кышноезлэн сюлэмшугъяськонэз 
ворргоронлы тумошо кадь йӧтӥз. - Табере ог-огедлы гожтэт ысъяны но уг яра ни-а 
мар-а, пе?
- Серемен йырин ӧвӧл ай, Коли. Маша маке умойтэмзэ тодэм кенмы сярысь, - 
азькышетэзлэсь дурзэ погманы шӧтаз кышномурт.
- Кулэтэмзэ эн зульы, кышно. Луӵшо монэн ӵош шыд си ай - туннэ сиёнэд туж ческыт 
пӧрмем, - кышномурт аслэсьтыз трослы ик вазь ӧз берты шуыса тодэ воргорон. Соос 
уго одӥг заводын - огез цехын, мукетыз отделын - ужало.
- Сием потонэ но, сю куасьмонэ но копак быриз, - син пумзэ азькышет пумыныз 
кӧсатӥз кышномурт.
- Я, тырмоз гозыез нуйтыны, вера ини, ма луиз? - буш тэркызэ палэнтыса, кышноез 
шорыс сак учкиз пиосмурт.
- Лиля кенмы кыӵе ке фирмаын "девочка по вызову" порма ужа, лэся, ук, Коли, - 
кышномуртлэн нош ик бӧрдонэз пӧсьтӥз.
- Адямиослэсь сыӵе фирмаос сярысь супыльтэмзэс кылылэме вань. Нош кытысь тон 
тодӥськод, кенмы со шырмачъёсын герӟаськемын шуыса? - сак кариськиз пиосмурт.
- Бен шуисько ук, нылмылэн Маша эшез кенмес следитьтыса возем, - чигтӥськемысь 
уг дугды кышномурт. - Мар дауртэмзэ ачиз тодсал ни, вылды, но туала арын кышкыт 
чер ветлэ шуо ук. Эшшо ке со кен шуонмы пимес но черлатоз ай. Талэсь курдаса ик, 
Лара но гожтэт пӧраны согласичкем. . .
- Ну та кышноосын! Инбамын одӥг-ог пилемъёс гинэ адӟиськиллям но соос 
гудыръямлэсь кышкаса вӧсясько ини! - аслыз чай лэзьыны ӝутӥськиз пиосмурт. - Ай 
Костямылэн армиысь бертонэз кыдёкын на.
- Э, озьы эн шуы, - картсэ сюдон сярысь но вунэтӥз ни кышномурт. - Костямы туж 
импульсивной шуыса тодӥськод ук - службазэ аналтыса пегӟиз ке? - анай сюлэм мае 
ке шӧдэ ни, лэся.
- Оломар тодмотэм кылъёсын эн вераськы татын! Импульсивной, пе. . . Бен, 
тодӥсько, пимы ачим выллем ик ӟырдыт адями. Нош со нырысь ик пиосмурт ук! - пӧсь 
чаен ӵуштаськемзэ ӧз ик вала пиосмурт. - Тьфу, лешак.
Кышноез но картэзлэсь юмоке шедемзэ ӧз ватлайты - ялан ас гозызэ пунэ:
- Мон тазьы но малпай ини: Костямы оломар кулэтэмзэ дауртэмлэсь азьло, оло, 
асьмелы со доры мыныса буйгатоно? Одӥг арнялы отпуск тыныд но, мыным но сётозы, 
вылды. . .
- Ма, тон азьло ик шонерзэ вера вал ук, - серектӥз пиосмурт: - Пимылэсь мӧзми, 
пӧй - эскертыны ветлэме потэ. Таизлы мон чик пумит ӧвӧл.
. . . Бускель Парма улосвылын службазэ нуись пизы доры потэмзылэсь азьло, Нина 
Андреевна кенешоно кариськиз туклячиеныз. Оло, нылзэ но индылоз-визьмалоз: 
кузпаллы бызем нылмуртлы мурт пиосъёсын кӧланы чебер ӧвӧл. Тае Лидия 
Григорьевна, туклячиез тодаз уськытытэк но, туж умой вала, дыр, но. . . Оло нош 
ачиз но та дырозь номыре тодытэк-валатэк улэ?
- Бен, Лилялэсь дӥськутсэ миськыкум, кагаз юдэс шедьтӥ. Отын кыӵе ке телефон 
номер пусъемын вал. Аслэсьтыз юай но киысьтым со бумагаез ишкалтыса, нылы шорам 
шӧтэм куараен черектӥз: "Мар тон мынам ӟепъёстӥм утчаськиськод?! Что за привычка 
- шпионить!" Соку мон валатӥськи, нылы мае ке мынэсьтым ватэ шуыса, - ӧз 
танӥськы Лидия Григорьевна туклячиез азьын. - Нош муромытыны ӧй дӥсьты - Лиля 
атаез кадь ик, мултэс гажа эрикез. Визьноданы-индылыны, эриксэ кортнаны дӥсьтӥд 
ке, аслыд ик йыр висён шедьтод. . . Куддыръя ас поннам эмеспиме но жалясько: 
аслым сямен ик, котьмае чиданы кылдоз, вылды, - аслаз матысь адямиосыз вылэ 
ӝожамзэ кинлы кисьтыны шедьтэмезлы шумпотӥз, лэся, Лидия Григорьевна.
Котьмар ке но, туклячиезлэн но кудоезлэн пизы доры мынэмзы сярысь Лидия 
Григорьевна Лиляезлы ивортоно кариськиз. Нырысь-валысь Лиля лӧптӥз:
- Вот и хорошо! А то со дундук надумал отпуске бертыны. Служить карон дырзэ гинэ 
юнме кузёмытоз. Вылаз ик мынам та вакытэ уж дурам маке мында сюлмаськонъёсы.
- Нош кытын ужаськод тон, нылы? - дӥсьтытэкгес, пыриськись куараен юаз анай. Со 
пумитэ нылыз керӟег вазиз:
- Сколько раз говорить? Массажисткой работая зарабатываю я себе хлеб и молоко!
- Я-я, буйгатскы, нылы. Мон тонэ обидён вылысь ӧй юа ук. Туклячи йырме сураз-
пожаз, - мар верамзэ ачиз но ӧз шӧды кышномурт.
- Мар, мар сказала твоя туклячи?! - анаез вылэ омыртӥськиз Лиля. Кышномурт 
интыяз ик пумиз, эсьма миськоно тэркыез ик киысьтыз жингыр-куангыр карыса усиз. 
Со али "а" но б" но шуыны уг тоды ни. Нош нылыз сьӧськаб сямен дораз матэктэ. . 
.
Кышкаменыз Лидия Григорьевна пырак выж вылэ пуксемзэ ик ӧз вала. Синкылиосыз бам 
кузяз чурен вияны ылазы:
- Тон но, нылы, бубид кадь ик - ваньмыз тӥя, ваньмыз тӥ понна гинэ мед луоз. 
Вань даурме чидаса ортчытӥсько ини. Али мон тынэсьтыд кылдэ юаны кулэ вал, дыр, 
нош мон сое но уг быгатӥськы. . . Бен, туклячи шуиз, тон, пе, юмшась, калгись 
пуны. Э-э, нылы, нылы, монэ ке уд жаляськы, карттэ коть сӥлы кар вал ук. . . - 
ымнырзэ азькышетэныз ӵоктаса, кышномурт улытозяз нырысьсэ, вылды, сюлэм пӧськызэ 
тазьы шара мурт азьын усьтыны дӥсьтӥз.
Нош нылыз анаезлэсь ӝожамзэ кылэм-адӟем но уг кары:
- Ну и что! Каждый зарабатывает так, как может! Мар мон сокем уродзэ лэсьтӥ? Ну 
и что, если иногда мурт пиосъёсын кӧласько ке? Зато соос хорошо платят! А нош 
тӥляд сётэм коньдонэныды йӧл но нянь сяна уд басьты ук! Так что, заткнись! И 
своей туклячи рот закрой! И ездить к Косте не надо, он сам скоро отпуске бертоз! 
Так и скажи своей туклячи. Мын, али ик султы но доразы мын!
Кышномурт викышъямысь дугдӥз, каллен гинэ ӝутӥськиз выж вылысь:
- Бен кудоен туклячи уг тодо шат, пизы отпуске бертэ шуыса?
- Костя соослы сюрприз хотел сделать! - йыркуро вераз Лиля но мукет висъетэ 
кошкиз. Лидия Григорьевна но гур азь палан ӧз ӝегатскы ни - туклячиосыз доры 
дасяськыны кутскиз.
Нэнэез бӧрсьы ӧс ворсаськем бере Лиля малпаськонэ усиз. Я, али со Костялэсь 
анай-атайзэ буйгатскыны амал шедьтоз. Нош Ларисаен Машалэсь ымзэс кызьы 
пытсалод? Костялы но ивортӥллям ни ке? Таиз сярысь уго со нэнэезлэсь рос-прос 
юалляськыса ик ӧз вутты - сокем вожез потӥз. Малы соос муртлэн улоназ пырисько? 
Соос асьсэос урод улӥзы ке, таиз понна Лиля янгыш ӧвӧл ук - вакыт сыӵе вылэм. 
Инмарлы тау, али адямилы эрико шокчыны луонлыкъёс уногес ини. Тани Лиляез но 
тӧрлык ласянь нокин уг ёрты, ужатэк улэ шуыса.
Нош Костяен кусыпъёсыз сярысь ке шуоно, Лиля отысь номыр уродзэ уг адӟы. Дыр 
вуиз но бызиз. Нош Костялы ке ӧй, кинлы бен со бызьысал - уго Костяен соос пичи 
дырысенызы ӵош, ог-огзылы кемалась дышемын. Ӝог пурӟытскылэ ке но, Костя озьы ик 
шаплы басылске, вожпотонзэ сюлэмаз кема уг нуллы. Сузэрез эшеныз маке ивортӥллям 
ке но, огшап пӧсекъямез бере картэз буйгатскоз. Лиля пиосмуртэ оскытыны но, 
буйгатыны но амал шедьтоз. Картэзлэн анай-атаез гинэ номыр уродзэ медаз дауртэ, 
пизэс Лиля пумитэ медаз узатэ вал. . .

* * * 11

Котыр улосэз пеймыт пурты шобыртӥз. Оло машинаын ӝокыт луэмен, оло куазь ӝыт пал 
уродмемен, Костялэн сюлэмыз ик путыны медэ. Машина кузёлэн та дырозь номыре 
шӧдылытэк изем эшез ӝуштыса пуксиз. Ожгарчиез синйылтыса со юлтошез шоры Костялы 
валантэм кылын черекъяны ӧдъяз. Руль сьӧрын пукисез пыриськись писэйлы укшаны 
кутскиз. "Ӧжытак янгышаськем, лэся, - ас понназ мыньпотӥз Костя, - руль сьӧрысез 
та зӧкметлэн ляльчиез, дыр. Кузёез шоры пуны гинэ но утыны уг дӥсьты".
Пушкысьтыз жобзэ поттыса зӧкметлэн мылкыдыз буйгаз, лэся - азяз термосъёссэ но 
пыжем сӥльзэ интыяса тоӵ-тоӵ сиськыны басьтӥськиз. "Сока ойдо, сока", - 
синучконэ учконъяз лек малпаз Костя. Пияш вылдӥсезлэсь бирдыоссэ пертчылыны медэ 
ни вал но пыӵалэз сярысь тодаз вайыса укно пыр азьпал сюресэз чакланы ӧдъяз. 
Педлон лымы усе. Векчи лымы пырыос ӧвӧл, мыжык быдӟаесь токмошъёс. Ӧвӧл, 
токмошъёс со ӧвӧл - уй бубылиос лобало. Пумитазы шерос лыктӥсь машина фараослэн 
югытсыя Костя адӟе: та чебер бубылиос музъем вылэ усё но питранъёс улын 
лёгасько, туссэс ышто. Нош машина капот вылысьёсыз ӝоген вулы пӧрмо. "Та югыт но 
чылкыт лымы выллем ик ӧй вал-а мынам яратонэ? Но. . . сое лёгазы, виизы. Мон 
тодо, одно тодо, кин отын янгыш!" - ас понназ малпаське пияш.
Оӵкарозь ог кызь иськем кылем бере, машина тыпак дугдӥз.
- Иди, дальше нэлӟа, - янгышам тусын вазиськиз пияш шоры водитель.
- Малы? - паймиз Костя. 
- Нэлӟа, - йырыныз шона сьӧд моко. - Далшэ - патрул. 
Костя эчешыса дырзэ юнме ӧз быдты ини. "Ӵок, - малпаз со ас понназ, - нялтас 
мынӥсь машина ӧз сюры ке но, татысен кыдёкын ӧвӧл ни - ӵукнаозь пыдын но вуо 
ни". Со понна кырын пияшлы капчигес луиз - сюлэмыз сокем уг кужекъя ни. "Ӝоген 
ӝыт эскерон, собере отбой. Частьын ӧвӧлме шӧдӥзы ни-а меда? Ӧз, дыр. . . Нош 
Лиля али ма каре меда? Со уг но малпа, дыр, мон туж матын ни шуыса. Оло, выль 
дусыменыз мынам валесам погылляське?" - егит пилэн сюлэмаз ныж пуртэн донгизы 
кадь. Со пиньёсыныз гинэ гизьыртӥз на.
- Тон мар сыӵе беромид, солдат? Выль арлы отпуске бертӥськод, оло? - 
"Москвичысьтыз" йырзэ мычиз шоро-куспо арлыдо удмурт воргорон. Солэсь удмурт 
луэмзэ Костя валаз аспӧртэм вераськон манерезъя.
- Отпуске? А-а, бен, - шуак луиз ожгарчи. - Бероми тани. . .
- Я, пуксьы, иське, чем пешком - ӵош кошком, - шулдыр серектӥз пиосмурт. - Мон 
но тани уйлы пумит деревняысьтым потоно луи. Эмеспие телефон пыр ивортӥз, 
нылылэн пиез вордскиз шуыса. Кышное ӧз чида ини: мын туннэ ик, пудоез ачим 
утялто. Та уго милям нырысетӥез нунокмы, кызьы уд шумпоты, - гуртысь пиосмуртлэн 
ымыз пытсаськыны уг вала ни.
Воргоронлэн нылыныз эмеспиез ӵапак Костяен Лилялэн ульчаязы уло вылэм. Номыр 
уродзэ малпасьтэм лякыт сямо воргоронэн люкиськыса, ожгарчи тодмо корка пала 
вамыштӥз. Подъездысь корт ӧс ворсамын вылэм. Оло, кин ке потӥсь луоз-а шуыса 
Костя огшап возьмаз, собере суйпосысьтыз чассэ учкиз: дас кыке мынэ ини. Йырзэ 
вылӥе чатыртӥз - тросэз укноос пеймытэ выемын. Лиляезлэн но тылыз уг ӝуа ни. 
"Озьыен, яратонэн выремдэс синучкон пыр чакламед уг поты?" - лек малпаз Костя но 
шуныт дӥськутэз улысь пыӵалзэ поттыса, ӝегатскытэк ӧс пала матэктӥз. "Бах-ба-
бах!" - чалмытэз сӧриз ыбем куара. Таин валче пытсам ӧс ваяк усьтӥськиз. Кытын 
ке урмыса ик утыны кутскиз пуны. Озьы ке но, огаз но укноын тыл ӧз ӝуатскы.
Лифтлэсь вуэмзэ возьмаса мар Костя ӧз улы ни - тубатъёс вамен тэтчаса тубиз со 
тямысэтӥ этажозь. Ӧс бордысь кнопкаез зӥбиз - нокыӵе куара уг кылӥськы. "Уд 
возьмаськы, иське, мусое?" - лек пальпотӥз егит пи. Кӧня ке минут талэсь азьло 
уже кутэм амалэн ӧсэз усьтыны медэ ни вал но, тыпак дугдӥз: соку матын адямиос 
ӧй вал, нош татын котькуд ӧс сьӧрын бускельёссы. Пыӵалзэ берен пельпумаз ошыса, 
Костя штан кисыяз утчаськыны кутскиз. "А-а, тани со!" - шумпотӥз со, паки 
пуртсэ шедьтыса. Костя кошкем бере Лиля тунгонзэ воштымтэ. Нош армилэсь азьло 
пияш огпол тазьы ик пуртэн ӧссэ усьялляз ни вал. "Жильыен гинэ медаз ворсаськы 
вылэм", - сюлэмшугъяське Костя. Керӟегъяськеменыз сэрен, вылды, нырысь-валысь 
номыр ӧз пӧрмы. "Эн пӧсекъя!- косӥз со аслыз ачиз. - Номыр уродэз ӧз луы. Лара 
эшеныз янгышазы, Лиля монэ вите". Ассэ тазьы буйгатыса, ожгарчи выльысь пичи 
пуртсэ ӧсэн но янакен вискы чуртназ. Таяз учыре киосыз сокем юн ӧз куалекъялэ 
ни. Английской шуыса нимаськись тунгонлэн кылыз капчиен сётӥськиз. "Уф, 
жильыямтэ!" - кымесысьтыз пӧсям вузэ саесэныз ӵушалтӥз егит пи. 
Пыронниысь тылэз ӝуатэмез бере но пумитаз нокин ӧз поты. "Кытӥ бен со та кема 
ветлэ?" - дӥськутсэ ӵоге ошонъяз но пыӵалзэ со улэ ватонъяз пӧсекъя Костя. 
Озьыен, сузэрез агайзэ алдамтэ, Лиля зэмзэ ик мурт воргоронъёсын костаське?
Лумбыт сюрес вылын сиськытэк но юытэк улэмез али туж ӟеч шӧдӥськиз. Пӧранние 
мыныса, пиосмурт чайнике ву лэзиз но сое быректыны пуктӥз. Холодильникысь сыр, 
ӵынатэм сӥль шедьтӥз. Мискаын шыд нерге вань шуыса адӟиз ке но, пӧсятэмез ӧз 
поты ни - ки улаз сюременыз гинэ "кӧтсэ кышъяз". Чай но ӝог пӧзиз.
Кӧтыз тырем бере гинэ Костя кӧланние вамыштӥз. Лиля татын ӧвӧл шуыса со 
кемаласьгес валаз ни ке но, вольыт валем валесэз синйылтыса, уката золгес 
ӝожомиз: "Уг, со монэ пичи но уг яраты. . . Нош малы иське мон сое сокем 
яратӥсько?" - валес вылэ дӥськутэныз ик пуксьыса, егит пиосмурт небыт шобретэз 
мыжганы ылаз. Жальыр васькись синвуоссэ со уг но шӧдылы, лэся. Чугдымон бӧрдэмез 
бере, ожгарчи выльысь сиён-юон висъетэ вамыштӥз. Вылӥ ӝажыысь "Белый аист" 
коньяк ӟенеликез басьтыса, чай юон ӵашалэн ӝыныяз лэзиз но огшокчемен пушказ 
кисьтӥз. Копак буш али пилэн сюлэмаз. Курыт юон ньылонзэ ӵушкаса гадьзэ уката 
юнгес кужекъятыны кутскиз. Костя эшшо одӥгзэ ӵашазэ тырмытӥз на. . . Ӟенеликез 
чылкак бушам бере со йырзэ ӝӧк вылэ поныса, толэзь шоры вузӥсь сютэм кион сямен 
бӧрдыны кутскиз. . .
Куазь юганы ӧдъям бере гинэ Костя сазьтӥськиз. Вань висъетъёсысь тылэз ӝуатӥз - 
Лиля кызьы ӧй вал, озьы ик али но ӧвӧл.
- Вот б. . .! - тышкаськиз пиосмурт. Ой, макем вӧсь солы али! Нош йырыз 
пилиськыны турттэ кадь. Ожгар дӥськутсэ кӧлан висъетазы куштыса, Костя 
пыласьконние пыриз. Пӧсьсэ кезьытэныз вошъяса гылтӥськемез бере солы ӧжытак 
каньылгес луиз. Вылтыраз няняськем быдэс пуд кырсез вуэн ӵош гылтӥськыса усиз, 
лэся - мугорыз небӟиз, капчияз. Спортэн вырон дӥськутсэ шифоньерысь шедьтыса, 
пиосмурт сое вылаз дӥсяз.
- Нэнэлэсь куаразэ коть кылоно, - шара вераськыны кутскемзэ со ӧз ик шӧды, лэся.
Телефон трубкаез кематэк ӧз ӝутэ.
- Лара, тон-а со? - тодмо куаралы шумпотӥз Костя. - Нош нэнэ кытын? Сузэрез 
"соос уж дуразы кошкемын ни" шуоз кожа вал пиосмурт, нош Ларисалэсь верамзэ 
кылзыса, мылкыдыз чылкак усиз. Нэнэез но бубиз толон нуназе автобусэн Костялэн 
служить карон интыяз мынӥллям.
- Малы? - визьтэм мурт сямен юаз Костя.
- Костя, нош тон отпуске бертӥд шат? Лидия Григорьевна толон ӝыт гинэ вераз, 
тонэ отпуске лэзё шуыса. Нош нэнэен буби ӧз тодэ. Ачид милем номыр та сярысь ӧд 
гожъя ук. . . Лиля но ӧз вера вал, - кыдёкысен уката мусо кылӥське сузэрезлэн 
куараез. Нош Костялэн соин ӟабыльтыны дырыз ӧвӧл.
- Лара, кылзы ай, тон уд тодӥськы-а, кытын меда Лиля? - номыр мукетсэ али солэн 
тодэмез ик уг поты ни кадь. - Тон, сестрёнка, давай не придуривай. Асьтэос 
эшеныд гожтӥллямды ук, кышное кыӵе ке кабинетын узыр воргоронъёслэсь кӧтулъёссэс 
маялля шуыса. . .
Кулэ адресэз тодыса, Костя ошем дӥськут пӧлысь аслэсьтыз пуховиксэ шедьтӥз но 
ожгар кутчанзэ пыдаз бырттӥз. Шуныт изьызэ утчаса мар ӧз улы ни - пыӵалзэ куртка 
улаз ватӥз но улонниысь потӥз.
Вазь ӵукна ке но ай, автобусъёс ветло ини. Костялы тупасез ӝог вуиз. Машина ӵуж, 
вож, горд тылъёсын ӝуась юболы йыбырттыса дугдэ ке, пиосмурт чиданзэ ыштэ. Азьло 
со ноку ӧз чаклалля, карын сомында сюрес вожъёс вань шуыса. Нош туннэ тани 
автобус азьланьскыны ик уг вуы - светофор. . .

* * * 12
 
Вадим косэмъя Лиля таяз уе но Турциысь лыктэм бизнесменэз "лӥятоно" луиз. 
Уйбыт изёнэз ӧз тоды акылес пиосмурт. Татын ужаны кутскемез дырысен Лилялы 
нырысьсэ пиосмуртэз яратон юрӟым потӥз. Ӵошен кылемзы бере ик мусульманин 
нылкышноез ӝӧк вылэ султыса эктыны куриз. Пыртӥз адӟиськись бубыли бурд выллем 
дӥсеныз шонаськыса, Лиля пир! бергам бере, сьӧд гонэн шобырскем мугоро ӟырдыт 
воргорон сое ал вылаз пуктӥз но веськрес нылмурт мугорез маялляны ылаз. Со 
куспын нылкышно шӧдӥз, кызьы пиосмуртлэн кӧтулысьтыз чурытомем нёредэз со пушкы 
пыдлогес но пыдлогес мертчиське. "Ой!" - вӧсь луэмлы чидатэк, Лиля пиосмуртлэн 
ал вылысьтыз тэтчиськиз. Соку ик сьӧд гоно киос сое кырмизы но валес вылэ 
сэрпалтыса, огез бӧрсьы мукетсэ дӥськутсэ ишканы ӧдъязы. Собере тыбыр вылаз пуд 
секта секыт ныпъет усиз. . .
Ӵукна пал гинэ кӧлэм потон вормиз ӟырдыт воргоронэз. Лиля султыны вырӟем вал но, 
гоно киос сое нош ик валес вылэ ӝиптӥзы. . .
Ыбылэм куараосты кылыса, Лиля кужмысь мозмытскиз адӟемпотостэм пиосмуртлэн 
суйыз улысь. Дӥськут нергезэ вылаз лазъяса, со ӧс пала вамыштӥз. Ӧс кутон борды 
кутӥськыса ӧз вутты, соиз усьтӥськиз но картэз адӟиськиз.
- Костя! - чир кеськиз Лиля но шораз урдэм пыӵалэз палэнтыны турттыса суй бордаз 
ошиськиз.
- Бен, мон! Нош тон мар кариськод татын, калгись мумы пуны! - лек юаз пиосмурт. 
Со куспын нылкышно шӧдӥз: картэзлэн суйыз лябӟиз - пыӵал гумы Лиля шоры уг, выж 
вылэ учке ни.
- Костя, мар тон дауртӥд?! Кытын Вадим?! - картэзлэсь юанъёссэ кышномурт уг ик 
кылы, кожалод. Нош урмем пиосмурт сое бордысьтыз палэнтӥз но ӧс кусып вамен 
выжиз. Ӵашетэмез кылыса сайкам но кускыныз дорозь шобретэн ӵоксаськем пиосмурт 
мар карыны валатэк я Лиля, я Костя шоры кышкаса учкылэ. Пыӵалэн шораз 
урдӥськемзэс синйылтыса, со йыр вылаз ик шобретсэ кыскиз - озьы аслэсьтыз улонзэ 
утёз кожаз, вылды. Нош визьтэм пуля сое ненегъяськон интыяз ик ваньмытӥз. . .
- Всё, дӥсяськы ӝоггес! - командиръёсызлэсь адӟем карыса музэн чурыт косъяськиз 
Костя. Лиля картсэ та дырозь таӵе лекъяськись тусоен ӧз адӟылы на вал. Ма, 
лекъяське гинэ ке луысал, со али урмемын, оло нош визьзэ ик ыштэм. Иське, кызьы 
мукет сямен валэктод улэп адями шоры пыӵалэн урдӥськемзэ. Костя - адями виись. 
Таӵеез кышномуртлэн йырвизьмаз нокызьы уг тэры.
- Тон соосты ваньзэс виылӥд-а? - кузёез азьын нискетӥсь пуны музэн учке Лиля 
картэз шоры, выж вылысь султыны дӥсьтытэк.
- Султы шуи! - нылкышнолэсь тэльмыремзэ Костя али уг кылы. - Дӥсяськы но дорамы 
бертомы!
Туж юн вӧсь луэм мурт выллем ӝуштыса Лиля пукон интыысьтыз ӝутскиз. Валес вӧзысь 
пукон вылын кыллись дӥськутсэ басьтыны дӥсьтытэк сылэ со. Кышноезлэсь кышкамзэ 
Костя валаз, лэся - горд луэм тӧдьы шобрет вылэ мукетыз пукон вылын кыллись кыӵе 
ке ӟустариосты сэрпалтӥз, собере кышноезлы брюкизэ но водолазказэ мычиз.
- Тон монэ но виёд-а? - жальмыт учке нылкышно картэз шоры. Уг, со али уг бӧрды, 
уг но кесяськы. Вань ӟигарыз быремын - чиньыеныз но ӧй выретысал, дыр, кышкан ке 
ӧй луысал. Бен, та вие нылкышно туж юн кышка, картэз сое но ыбыса куштоз шуыса, 
тӥни ук кыӵе кӧшкемыт учке со Лиля шоры.
- Кӧня пол тыныд верано, дӥсяськы! - ым тыросаз кеськиз Костя. Пумит вазьылыны 
дӥсьтытэк Лиля чалмытак но сэрытак дӥсяськыны шӧтаз. . .
Вир пӧлын пыласькись шӧйёс вамен выжыкуз, нылкышнолэн йырыз берганы ӧдъяз, тани-
тани ӧскыны кутскоз. Ачиз но валатэк, со пиосмуртлэн суй бордаз кырмиськиз. 
Костя ӧз палэнскы, кышнозэ но ӧз донгы.
Пал кыл но вераны дӥсьтытэк вамышъязы соос дор палазы. Оло нош со кышкан ӧй вал? 
Угось ог-огзэс чик тодӥсьтэм адямиос но кызьы вераськонэз мытыны уг валало. Бен, 
бен, соос табере ог-огзы понна чылкак мурт адямиос: огез - лул вузась, мукетыз - 
йыр быдтӥсь. Нош Костя ялан оскылӥз: Лиля солэн самой оскымон эшез. Лиля но 
малпалляз, солэн картэз чибинез гинэ но вӧсь уз кары шуыса. Табере тӥни артэ 
вамышъяло чылкак тодмотэм адямиос музэн - чалмыт. . .
Аслаз подъездэз азьын Лиля тыпак дугдӥз.
- Тон мар?! - паймиз картэз.
- Курдасько. Тон монэ виёд, - пуэктэм ымдуръёсыныз мырдэм выретыса вазиз Лиля.
- Азьло курдано вал, табере бер ни! - пинь пыртӥз гизьыртӥз пиосмурт но кышнозэ 
тыбыраз донгиз. Лиля амалтэк азьланьсконо луиз. Нош киосыз, чиньыосыз 
кылзӥськымтэен, усьтонъёссэ Костялы сётӥз.
- Татын усьтон кулэ ӧвӧл ни, мон сое толон уин пазьги! - кышнозэ азьлань 
вамышъяны косыса, пиосмурт корт ӧсэз пыдыныз донгиз.
Асьсэлэн улонниязы пырыса но Лиля оскытэк учкиз картэз шоры.
- Кылиськы, эн кышка. Мынам киы тон шоры уг ӝутӥськы, - синъёссэ палэнтӥз Костя. 
Мамык дӥськутсэ кыльыса, киысьтыз пыӵалзэ куштытэк со пыласькон висъетэ кожиз. 
Нош чылкак катьтэммем Лиля пыронниысь пичи пукон вылэ ланьырскиз. Огшап улыса со 
вулэсь жильыртэмзэ кылӥз но кӧня ке буйгаз - иське, картэз сое зэмзэ ик уз виы. 
Шонерзэ верано ке, та мылкыдэз буйганэн ӵошатыны ик уг луы. Золтэм сӥ выллем 
луэм лулсэръёсыз ӧжытак небӟытскизы но Лиля нош ик викышъяны кутскиз. Куараен 
ӧвӧл, каллен гинэ. Зэмзэ верано ке, нылкышнолэн бӧрдэмез пуны нискетэмлы укша. 
Маза уг сёты одӥг юан: мар луоз та бере? Мар луоз?
Со куспын борддоръёс зуркамон йыггетэм кылӥськиз. Зуркак луыса Лиля интыысьтыз 
тэтчиськиз. Мар со вал? Кытын ке но туж матын йыггетӥз, лэся ук?
- Костя-а-а! - шӧтэм куараен кесяськыны, пыласьконнилэсь ӧссэ кысканы ылаз 
нылкышно. Пумитаз ву жильыртэм гинэ вазиське.
Мар карыны валатэк, Лиля аслаз улонниысьтыз бызьыса потӥз но ваньмаз ӧсъёсы 
йыгаськыны кутскиз. . .
Вирен сураськем вуысь куинь пиосмуртъёс Костяез мырдэм поттӥзы.
- Вождэс эн вае - асме виыны гинэ но уг быгатӥськы. . . Пӧрмостэм. . . - 
няркомем куараен шуиз со чылкак шулӟектэм бускельёссылы. Ӝог юрттэт сётӥсь 
машиналэсь вуэмзэ но ӧз шӧды ни, йырсазьзэ ыштӥз. . .
Куинетӥ уйзэ Лиля кӧлэ эмъяськоннилэн коридорысьтыз чурыт диван вылын. Кӧлэ 
шуыны луэ ке быдэс уй ӵоже кӧтурдэс вылысь мукет пала берыкъяськыса кыллемез. 
Кӧт пушкысьтыз пуляез эмчиос поттӥзы ке но, Костя йырсазяз уг пыры. Таяз уе 
ӵукна пал Лиляез изем потон вормиз, лэся. Эсьма уй дежурствозэ йылпумъяса, 
эшезлы котькуд висись сярысь малпанъёссэ вераса, мусо Олечкалэсь кошкемзэ но 
шӧдымтэ. Сайказ со зӧк мугоро Женялэн борддоре ошем радиоприемникез улӟытыкуз 
мае ке жингырак уськытэмысьтыз. "Дас витетӥ толсуре Устинов ёросысь огаз юртэ 
интыяськем офисысь шедьтэмын ньыль воргоронъёслэн шӧйёссы. Кин ке маке тодэ ке 
та учыр сярысь, куриськом жингыртыны 02 номеро телефонъя. . . Мукетыз ивормы: 
Парма улосвылын службазэ ортчытӥсь ожгарчи Иванов Константин валантэм мугъёсъя 
частьысьтыз пегӟем но аслаз улоннияз ассэ ачиз ыбем. Солэсь улонзэ утён понна 
кулэ вир. Мылкыд карисьёсты туж куриськомы вазиськыны элькунысьтымы нырысетӥ 
номеро эмъяськонние", - дикторлэсь куаразэ кылыса Лилялэн уммез соку ик тӧлӟиз. 
Со изён интыысьтыз ӝогак султӥз но сумбрес медсестра доры вамыштӥз:
- Ӝоген-а сазьтӥськоз мынам картэ? Малы со ялан синъёссэ уг усьты?
Ӝӧк сьӧрын пукыса пичи мензуркаосы эмъюм тырись медсестра тетрадяз учкыса 
мылпотытэк кадь вазиз:
- Со мында вирдэ ыштӥд ке, ӝог гинэ уд бурмы. . . Но мон уг тодӥськы, тӥ эмъясь 
врачлэсь юалэ. Туннэ Валерий Александрович дежурить каре. Со ординаторскойын ни.
Лиля ӧз ӝега ни, усьтэм ӧсэтӥ ымаз, ныраз, гадяз думылэм езъёсты, сюлэм 
жугиськемез возьматӥсь приборез синйылтӥз но ординаторское дыртӥз.
Нош мар бен Костя? Со ялан ас дуннеяз. Мугорыз валес вылын вырӟылытэк кылле, нош 
лулыз вадьсаз лоба - ваньзэ синйылтэ. Дырын-дырын со эмъяськоннилэн палэназ но 
кошкылэ. Куддыръя ортчемзэ тодаз вайылэ. Тани со, ньылетӥ классэ йылпумъям пияш, 
гужем каникулъёсыз дыръя песянаез дорын гуртын шутэтске. Кӧтыз тырымон узы-боры, 
эмезь сиемез, пичигес Юс шурын пыласькылэмез бере, огпол песянаез сое кызьпу 
веник тӥяны чортӥз.
- Кызьы бен таин мунчое пырод? - паймиз пияш небыт куаро векчи вайёсты песянаез 
азе куштыса. Ачиз Костя уго карын но, гуртысь мунчоын но вехоткаен гинэ 
зыраськылэ.
- Тани мон та вайёсты лач тырыса кертто но толлы веникмы дась луоз. Ма, эн ай, 
туннэ ӝыт ик мон тонэ ачим выль веникен паро. Мунчое пыремед потэ-а? - нунокез 
шоры мусоясь синъёсын учкиз песянай.
- Ӧйтӧд, - нырзэ кыскиз пияш.
- Пыром, пыром. Ялан со ӟазегъёслэн но ӵӧжъёслэн жомбылляськонниязы гинэ уд 
кылльы. Кызьпу веник быдэс мугордэ выльдоз, тазатоз, - вайёсты ог-огзы борды 
интыянъяз лабыртэ песянай. . .
Тэльысь бертэмзы бере песянай нунокезлы веникъёсты вылӥ кеносысь сюрые ошылыны 
косӥз:
- Отын саюл, со вакытэ ик тӧл но сюре. Коръёс вискы уго ӝуйы тырымтэ - юромо 
тӧл мед шедёз шуыса озьы лэсьто кеносэз - валэктӥз песянай.
Песянаезлэн кеносэз улыно-вылыно. Улӥяз Костя огпол чипыослы тысь утчаса пыраз 
ни вал. Татын бадӟымесь ӵанъёсын пызь, ю тысь, сылал, сакыр песок, кеньыръёс 
возисько, курлойын куасьтэм сӥль ошемын. Пичигес сюкась возённи но татын ик. 
Пӧсь куазен песянай отысь ӵаж-ӵаж юонэз кувшинэ лӧдыса поттылэ. Юзмыт сюкась 
ньылонэз ик вандэ кадь. Нырысь-валысь Костя кожаз вал, таӵе кезьыт мае ке юыса 
со ӵуказеяз ик черлалоз. Нош песянай серектӥз гинэ:
- Уд, нуноке, уд черла. Мон та юонэ пӧртэм турынъёс тырисько - озьы со тазалыклы 
пайда гинэ вае.
Берло пияш кышкатэк юылӥз ни ӵаж-ӵаж сюкасез. . .
Кенослэн вылӥяз солэн та дырозь пырамез ӧй вал на. Тани табере со абдраса 
синйылтэ кенос пушез. Кенослэн паллян палаз борддорысен мукет борддорозь кузь но 
ыльыс шача понэмын.
- Сюры со, пие, - валэктӥз песяез. - Дӥсь ошылон сюры.
Пеймыт юртъерлэн (татын уго укноосыз вылымтэ) бур пал борддор кузяназ паськыт 
ӟус. Отчы йыло-дӥнё валиськемын, нош валес тӧдьы ынэн возъямын.
- Инвожо толэзе Ванчо ӵужмуртэд кышноеныз но нылпиосыныз куноязы. Гужем ӵоже, 
оло, пӧй, кудзы ке но берталозы на ай шуыса возьмасько. Соос вуыкулы валес ӵапак 
дась луоз, - куноезлэсь абдрамзэ валаса огшоры шуиз песянай. Собере Костялы 
возьматӥз дӥсь ошылон дорысен кӧланниозь ваменак понэм сюры шоры: - Веникъёсмес 
тани татчы ошылом, пие. Соос куасьмемъя кеносын омыр уката ческыт зыно луоз.
Нош Костя со виын синйылтӥз вӧлдэтэ но борддоре пуксем ӵужмыт-горд бурдо 
бубылиосты. Нымыослэн бурдъёссы лач каремын - соос татчы шутэтскыны пыриллям, 
лэся.
- Бубылиос? Малы соос татын? - шӧртчи пияш огзэ бурдоез кутыны шуыса сузьтӥськем 
вал но, песянаез чурт-чурт шуиз:
- Вӧсь эн кары соосты! Бубылиос - со кулэм ӵыжы-выжыосмылэн лулзы. Шӧйзы 
музъемын, нош лулзы бубылилы пӧрмыса азьвыл улэм интыосаз берен берытске.
Кулэм ӵыжы-выжыоссылэн лулзы сярысь кылыса, пияшлэн тыбыр кузяз кезьыт ву 
пальккизы кадь. Пеймыт но салкым кеносэ со огпол но огназ ӧз пыралля ни. Уката 
ик песяез но ӝоген бубылилы пӧрмытскиз уго. . .
Лиля палатае пырыку, Костя азьвыл сямен ик номыр шӧдылытэк кылле вал. Соин но, 
лэся, тодмо куараез кылыса нылкышно шуак луиз.
- Бу-бы-ли, - висисьлэн ымдуръёсыз ик ваче бурмиллям кадь - мырдэм усьтӥськизы.
- Мон татын, Костя, тон вӧзын! - картэз сое ӧте кожаса, Лиля висись вадьсы 
мыкыртӥськиз. Со вакытэ нылкышнолэн бамаз кин ке небытак йӧтскиз. "Ма, кин со? 
Костя валес вылын вырӟылытэк кылле ук", - сокем тодмо йӧтскемез тодаз вайыса, 
Лиля шуак луиз. Со ӧз адӟы, кызьы синмын адӟонтэм бубыли Костялэн мӧля вылаз 
пуксиз но огшап ортчыса пиосмуртлэн мугораз выльысь каръяськиз. . .
Костя синъёссэ усьтӥз но кышноез шоры тодматэк учкиз.
- Женя! Женя! Со синъёссэ усьтӥз! - шумпотэм Лиля усьтэм ӧсэтӥ кызьы лобемзэ 
шӧдытэк зӧк медсестралэн чыртыяз ӟыгырскиз. . .

1

Галина Романова
Со уретэм кырӟан гуръёс. . .

Вылэм, шуо, вылэм
Сыӵе калык дунне вылын. . .
Тыр шепъёсын ю-нянь будэтӥллям
Гранит излэсь юнгес андан ӵыжатӥллям,
Бадӟым дун шуръёсты ӵыпылӥллям,
Ӧрӟи кадь нылпиос но вордӥллям.
Огзэ гинэ соос аналтӥллям:
Вордэм нылъёссылы-пиоссылы
Асьсэ кырӟанъёссэс дышетыны
Ӧвӧл сюлмаськиллям.
Со уретэм кырӟан гуръёс
Али дырозь шуккиськыло
Пӧртэм шаеръёсын.
Куддыр сое кылӥськомы
Пересь писпу ӟукыртэмысь,
Чылкыт ошмес жильыртэмысь.
Куддыр солэн шулдыр но ӝожалэс гурез
Чузъяськылэ садын, чагыр инмын,
Уӵы но тюрагай кырӟанъёсын.
Уд шедьты ни, уд ни
Пумзэс но кутсконзэс
Вунэм кырӟанъёслэсь.
Дуно марӟанъёсын питыраса,
Дунне сэрегъёсы ышылэмын. . .

Вал меда, ӧй вал меда
Сыӵе калык дунне вылын?
Кин валэктоз на.
Кин табере тодоз на?..
Та кылбуре гожтэмын вал 1980-тӥ аръёсы. Со вакытэ школаосын пумен ӧжытгес но 
ӧжытгес саклык висъяны кутскизы удмурт кылэз дышетонлы. Нылпиос ӟучомылӥзы, 
удмурт классъёс пытсаськылӥзы. Нылпи садъёсын но школаосын дышетон программаос 
лэсьтэмын вал пиналъёс ӟуч кылэз ӟеч мед тодозы шуыса. Нош анай кылзэ, шуылӥзы, 
пинал, пе, озьы но уз вунэты. Школаосын "ӟуч" но "удмурт" классъёс усьтылӥзы. 
"Ӟучъёсаз" люканы тыршылӥзы ӟечгес дышетскисьёсты, расписаниын удмурт кылъя но 
литературая урокъёсты берло пуктылӥзы. Пинал амалтэк вожъяськыса учкылӥз "ӟуч" 
классъёс шоры, ассэ ултӥгес каремзэс шӧдылӥз.
Анай кыллы дышетонэз таӵе югдуре вуттэмзы монэ туж сюлэмшугъяськытӥз. 80-тӥ 
аръёслэн шоразыгес Ува ёросысь трос удмурт гуртъёстӥ ветлӥ, удмуртлыкмес утён 
сярысь юанъёсын анкета ортчытӥ. Мар бен соку шараяськиз? Анай-атайёсты, пе, 
ӵемысь кужмысь сямен нылпиоссэс ӟуч кыллы дышетыны косо. Школаосын асьсэос 
дышетӥсьёс нылпиоссэс удмурт классэ уг сёто, удмурт кыл азбарысь потэм бере кулэ 
уг лу ни, шуо. Со вакытэ гуртын дышетӥсьлэн данэз вылӥын вал, огшоры калык 
солэсь адӟем карылӥз. Тӥни озьы аслэсьтыд анай кылдэ сантэман, улӥе карон калык 
пӧлы пумен пыӵаз. Со али но шӧдӥське на уйпал но шунды пуксён пал ёросъёсын.
Мыным трос ветлоно луэ палэнын улӥсь удмуртъёс доры. Паймыса но синмаськыса 
учкисько бигер но башкир удмуртъёс шоры. Отын школаосын анай кылзэс дышетэмысь 
ноку но ӧз куштӥськылэ. Отын кивалтӥсьёс но, мӧйыос но, пиналъёс но - ваньзы 
огкыл шедьто, йыразы ноку ӧз лыктылы таӵе юан: "Малы кулэ удмурт кыл?" Тюрк выжы 
калык вӧзын улыса, вылды, татысь удмуртъёслы но астэ ачид гажан мылкыд пыӵаз. 
Ваньмызлы тодмо ук: бигеръёс но башкиръёс мукет калык пӧлы сураськонлэсь 
возисько, кылзэс но культуразэс юн утё.
Пермь областьысь но Мари Элысь удмуртъёс доры мон, оло нош. куинь пол но, ньыль 
пол но ветлӥ ини. Туж умой пумитало, асьмелэсь мӧзмемзы туж шӧдӥське. Нош удмурт 
кыллы дышетон аналтэмын, шуысал мон. Тужгес но урод югдур Пермь областьысь Куеда 
ёросын. Маиз паймымон: отысь удмуртъёс Башкириысь Татышлы ёросысь удмуртъёслэн 
бӧлякъёссы луо.
Куеда ёросысь Удмурт Гондыр гуртын пичиысен бадӟымозь удмурт сямен верасько, нош 
школаязы трос аръёс ӵоже ини вордскем кылзылы уг дышето.
Та пумысен ӟеч-ӟеч вераськи школалэн директореныз Зинаида Ивановна Останинаен. 
Со шуэмъя, анай-атайёс, пе, пумит луо. 1994 арын та ужпумъя гурт калык пӧлын 
юалляськон ортчытэм Пермьысь социолог Анатолий Баландин. Тросэз улӥсьёс соку 
куриллям доразы удмурт кылъя дышетӥсьёсты лэзьыны. Но со курон али ке но 
быдэстымтэ. Та пумысен мон эшшо юалляськи на Удмурт Гондырын улӥсьёслэсь. 
Ваньмыз пыкиське, пе, школалэн директорез вылэ.
Куеда палан укмыс удмурт гурт, кыказ гинэ умой-умой дышето анай кылзэс: Киргаын 
но Союзын. Нош Кипчак школалэн директорез, удмурт адями, шуэ: ми, пе, удмурт 
кылэз факультатив амалэн гинэ дышетыны кельтӥм.
- Малы со кулэ на? Капка сьӧры потӥськод но, ӟуч сямен вераськоно луэ. Собере 
удмурт учебникъёсын но шуг. Нимысьтыз вазиськоно луэ Пермьысь управление, нош 
соос куронмес ӵемысь кылэм-адӟем уг каро. Тросэз анай-атайёс но асьме кылмес 
дышетыны пумит луо, - чик кепыратэк вера со.
- Нош иностранной кылын кыдёке-а мыныны луэ? - юасько.
- Конечно, табере мае гинэ басьтӥськод этикеткаын англи яке мукет кылын гожтэмын 
луэ.
Удмурт Гондыр но Кипчак школаосысь удмурт директоръёсты ӧм быгатэ ас паламы 
берыктыны. Со понна Кирга школалэн бигер директорез Лидия Михайловна Султанова 
сюлэмме небӟытӥз.
- Кызьы озьы мултэс луоз меда ас кылыд! - шуиз со. - Жаляса верано луэ, та 
палась куд-ог удмуртт интеллигенцилэн асваланэз улӥын на. Нош куд-ог директоръёс 
мултэс бызьылонлэсь но кышкало. Ми татын ноку но ум палэнскиське удмурт кыллэсь. 
Нылпиос но, анай-атайёс но сое дышетыны пумит ӧвӧл. Ма, пӧлазы котьку сюрозы 
мыдлань малпасьёсыз но соослэсь кылзӥськыны кулэ меда?
Вераме потэ на Мари Элысь Карлыган палъёс сярысь. Та музъемлы асьмеос тау 
кариськом, йыбырттӥськом трос азьмынӥсь удмурт интеллигенциез будэтэмез понна. 
Сӥлы карыса, данъяса вераськом татысь Кузьма Андреевич Андреев дышетӥсьлэсь 
нимзэ.
Карлыган палан но али укмыс удмурт гурт лыдъяське. Выжыоссы - Татариысь Вуж 
Кушкет палась. Озьы ке но, Пермь областьын сямен ик, татын но нылпиослы анай 
кылзылы дышетонлэсь кулэзэ сокем ик уг шӧдо-валало.
Сизьымдонэтӥ арозь Карлыган чылкак удмурт гурт вылэм, мукет кылын вераськисьёсты 
ӧжыт кылоно, пе, вал. Али татын кылемын на 976 гинэ удмуртъёс, кылемъёсыз - 1107 
поръёс, 247-ез бигеръёс, 149-эз ӟучъёс. Удмурт кыл пумен мылес луиз, азьпал радэ 
потӥз ӟучез.
Калык татын ог-огеныз тупаса улэ. "Тон пор, тон удмурт, тон бигер" шуонъёсты уд 
кылы. Егитъёс сурасько, нылпиоссы ӟуч луыса будо ини.
Карлыганын улыны али-а, азьвыл-а умойгес вал шуыса юамелы пересь дышетӥсь Семён 
Гаврилович Скородумов чигиськыса ик шуэ:
- Ма веранэз ини, азьвыл, конечно. Ми татын кузё вал. Мон школаын куамын сизьым 
ар нылпиосыз удмурт кыллы дышетӥ. Собере 1974 арын удмурт классъёсыз быдтӥзы. 
Карлыганэ пӧртэм калык вуыны кутскем бере, классъёс но пӧртэмесь луизы: отын ик 
удмурт, пор, бигер, ӟуч. Амалтэк ӟучез вормиз, соос гуртамы самой ӧжытэз ке но. 
Нош 1980 арын школаын удмурт урокъёс чик ӧй вал ни. Сое 1990 арын выльысь 
кылдытӥз школалэн азьвыл директорез Фёдор Кузьмич Кузнецов. Но нылпиосты удмурт 
кылын вераськытыны туж секыт ни.
Али школаын ньыль кылын ик кӧня ке урокъёс нуо. Но нылпиос отын шенгыль но 
пенгыль гинэ верасько на асьсэ кылъёсынызы. Тросаз семьяосын асьсэ кылъёсынызы 
верасько ик ай, нылпиос но пичи дыръязы солы дышо. Но нылпи садэ вуыса, ваньзы 
ӟучомо. Куспазы вераськыны уго ӟуч кыл кулэ луэ. Озьы асьсэ кылзылы дышетон 
кыкетӥ интые кыле, солы арняяз кӧня ке гинэ час дыр висъяло на.
Кузебай Гердлы сӥзем праздник Карлыган палъёсын ӟеч ортчиз. Лыктэм куноосты 
пумитаны школа коридоре дасяськиллям татысь "Радуга" ансамбльзы но. Дэремъёссы 
песянай-песятайёссылэн кадь, кырӟало-верало но удмурт сямен, нош ансамбльзылэн 
нимыз малы ке ӟуч.
Мон нылпиослы матэ кариськи, малпасько вал соосын лач-лач удмурт сямен 
вераськыны. Огезлы вазиськи, мукетызлы. Уг валало. Пӧлазы вылэм Кузьма 
Андреевичлэн но выжыез - Вова Андреев, тямысэтӥ классын дышетскись.
- Мыным Кузьма Андреевич бабаелэн бабаез луэ, (татын песятаез озьы шуо), - шуэ 
Вова. - Удмурт сямен ваньзэ ик валасько, но вераськыны ӟеч уг быгатӥськы. 
Яратӥсько асьме сямен кырӟаны-эктыны. "Ӟардон" ансамблямы но ветлӥсько, 
барабанэн шудӥсько.
- Дышетскон школаед песятаедлэн песятаезлэсь нимзэ нуллэ. Тодӥськод, дыр, ук, со 
трос кужымзэ сётӥз асьме калыкмы вылӥ культураё, ӟеч дышетскем, ассэ но калыксэ 
гажась мед луоз шуыса? Нош тон тани асьме удмурт кылмес но вунэтӥськод ни.
Вова пельпумзэ гинэ ӝутъя, мар вераны ёрме.
1989 арын ортчем переписья Киров областьын ог 23 сюрс пала, пе, удмуртъёс уло. 
Но малы ке соос доры туж шер ветлӥськомы. Висмы кыдёкынэн, дыр, шуиськом. Но 
ведь асьмеды озьы ик трос иськемъёс висъяло Башкортостанысь но Татарстанысь 
удмуртъёсын но. Но малы ке соос доры пыдъёс кыскогес, ма, отысь удмуртъёс но, 
кивалтӥсьёссы но асьме доры ӵемысь вуыло, гань-гань улыны маза уг сёто: я соослы 
нылъёссэс-пиоссэс УдГУ-э пыртоно, я школаосазы книгаос, учебникъёс кулэ, я 
доразы писательёсты, артистъёсты ӧтё. . . Соин ик паймонэз ӧвӧл, дыр, та палась 
удмуртъёс пӧлысь ӟеч, синмаськымон журналистъёс артистъёс, тодосчиос, 
писательёс пото шуыса.
Тодам лыктэ 1993 арын Киров областьысь Уни палась удмуртъёсын пумиськылэме. Соку 
отысь удмуртъёс мыным таӵе ӝожтӥськонэн вазиськизы: нылпиосмес, пе, анай кылмылы 
дышетэммы потэ но, интыысь кивалтӥсьёс пумит луо. Соку ми кивалтӥсьёсын ӝот-ӝот 
вераським, соос соглаш кариськизы. Ижкаре вуыса, мон Калыкез дышетонъя 
министерствое вазиськи: озьы но озьы шуисько, Уни палъёслы нылпиосты дышетыны 
удмурт учебникъёс ыстоно вал. Соку министерствоысь валтӥсь специалист Антонида 
Спиридоновна Березина мыным трос учебникъёс сётӥз. Соосты вить-куать посылкаен 
Уние ыстӥ. Берлогес Униысь тодмое Удмурт съездэ ветлыкуз мыным нош ӝожтӥськиз: 
озьы ик кыллё, пе, со учебникъёс, нылпиосты удмурт кылын дышетыны нокин ӧз 
басьтӥськы. Тани татчы, удмуртъёслэн съездазы но, пе, мон вӧзы кык ӟуч 
кивалтӥсьёсты лэзизы.
Туэ мыным нош кылдӥз Пермь областьысь удмуртъёс доры вуылыны. Табере ини куинь 
бадӟым гуртъёсын улӥсьёсын тодматски: Гырдор (Светозарево), Асьтаркан 
(Астрахань), Печкес (Сибирь). Та палась удмуртъёслэсь малпанъёссэс ӟечгес тодон 
понна, таӵе юанъёсын анкетаос дасяй:
1. Тодӥськоды-а удмуртъёслэсь вашкала дырысен ортчем сюрессэс, Киров городлэсь 
историзэ?
2. Ог-огеныды удмурт кылын вераськиськоды-а?
3. Школаяды нылпиостэс удмурт кыллы дышетысалды-а?
4. Яратӥськоды-а удмурт кырӟанъёсты, писательёслэсь гожъямъёссэс, спектакльёсты?
Котькуд гуртын ог 20 мында анкетая юанъёс ортчытӥ. Монэ тужгес но шумпоттӥзы 
гырдоръёс. Татын нылпиоссы удмурт кылын гожъяськыны, лыдӟиськыны уг ке но быгато 
ни, анай кылынызы ӟеч верасько на ай.
Тани мар гожто татысь 8-тӥ но 10-тӥ классын дышетскисьёс Марина Люкина но 
Вероника Кудяшева: "Ми куспамы весяк удмурт кылын вераськиськом, пӧламы мукет 
нациысь пиналъёс но кылмес тодо, валало. Соин ик школаын туэ потэ вылэм удмурт 
кылмес дышетэммы, асьме калыкмылэсь историзэ тодэммы. Озьы ик милям туж потэ 
вылэм Удмуртиысь пиналъёсын тодматскеммы, гожтэт пыр соосын кусып тупатэмын. Туж 
яратӥськомы анай-атайёсмылэсь, пересь мемейёсмылэсь кырӟанъёссэс. Одӥг праздник 
но уг ортчы удмурт кырӟанъёстэк. Нош школаямы ми удмурт писательёслэн 
произведениоссыя спектакльёс но пуктылӥськом".
Соин ӵош ик ӟуч кылъя но литературая дышетӥсь Геннадий Аркадьевич Зянкин шуэ: 
удмурт кылэз, пе, дышетоно на тодматскон понна гинэ. Мон ӧй вала, кыӵе со сыӵе - 
тодматскон. Факультатив амалэн дышетоно шуыны турттэ-о мар-о вал.
Гырдорысь ик одӥг воргорон сюлмыз вӧсь луыса мыным шуиз: "Эх, азьло татын кыӵе 
чебер удмурт гуртъёс вал! Ӟама, Тойдой, Самсон, Мамур, Уши, Бадьпи, Кузиль, 
Кибиёк, Обран, Панё. . . Быризы. Улӥсьёсыз кин Каре (Слободской), кин Кылное 
(Киров), кин тани татчы, Гырдоре, лыктӥзы. Ваньмыз кир-пазь луиз. . . Улон но 
сӧриськиз. . . Эх, ма веранэз!" Нош тодӥськоды-а тӥ, шуисько, Кылно (Киров) 
карды интыын асьме выжыос улӥллям шуыса. Уг, шуэ, милемлы со сярысь нокин верась 
ӧвӧл, уг но гожъяло, пе. Анкетаысьтым нырысетӥ юанлы валэктон сётыны озьы ик 
нокин ӧз быгаты. Нош ньылетӥ юанэлы ӵош вераськем сямен гожтӥзы: "Туж 
яратӥськом!"
Удмуртлыксэс вунэтыны кутско ини Уни палась гуртъёсын - Асьтарканын но Печкесын. 
Татын нылпиос куспазы ӟуч кылын гинэ верасько на, уг тодо ни удмурт кырӟанъёсыз, 
эктонъёсыз. Соиз шумпотымон: нылпиослэн анай кылзэс дышетэмзы потэ. Анай-атайёс 
но пумит ӧвӧл. Печкесысь нылпи садын ужась гожтэ: "Оло, удмурт кылэз дышетонэз 
радъяса, калыкмы уз быр ни. А то татын кивалтӥсьёслы нокинлы удмурт кыл кулэ 
ӧвӧл ни, дышетӥсьёс но ваньмыз ӟучъёс гинэ". Озьы ваньмыз пыкиське кивалтӥсьёс 
но кадръёс борды. Кировысь но Ижкарысь Калыкез дышетонъя министерствоос алигес 
огкыл шедьтӥзы кадь: удмурт нылпиосты анай кылзылы дышетон пумысь вераськон 
мынэ, бумагаос но гожтэмын. Озьы ке но, кӧня аръёс кыстӥськозы ай, та чидантэм 
югдур воштӥськытозь!
Удмурт элькунамы али школаосын кылмылы, историмылы бадӟымгес саклык висъяны 
кутскизы ини. Со понна лэсьтэмын нимысьтыз программаос но. Но соосты улонэ ӟеч-
ӟеч пыӵатон понна, одно кутэмын луыны кулэ кылъёс сярысь закон. Солэсь 
кулэлыксэ тужгес но ӟеч шӧдо удмурт кылъя дышетӥсьёс. А то ортчозы кӧня ке дасо 
аръёс но, кулэ уз луэ ни удмурт газет-журналъёс но, книгаос но, театр но. . .
Вунэм кырӟанъёсмы,
Дуно марӟанъёсын питыраса,
Дунне сэрегъёсы ышылозы. 
1

Елена Павлова
"Анае шуылоз вал. . ."

Ужась калыклэн улонэз ноку но капчи ӧй вал. Сизьым полэс нюласа-пӧсяса гинэ со 
быгатылӥз аслыз дӥсь, сиён-юон шедьтыны-дасяны. Туж ӟеч тодӥсько на анаелэсь 
аслыз воштӥськон дӥськут, праздникъёсы дӥсян дэремъёс басьтылэмез сярысь 
верамзэ. Тани со возьматэ мыным лемлет кашамер дэремзэ но шуэ:
- Та дэремме мон басьтӥ вал дас ньыль арес дыръям Можга черкогуртысь, Юска купец 
дорын араны ветлыса. 
Пур-пур, туж кельышлы вуремын анаелэн та дэремез, сӧзы ултӥз сьӧд чильтэр 
лэземын. Сьӧд чильтэр пыртӥ лемлет буёлэз туж чебер чильпыра. Чильтэрзэ но анае 
ачиз ик чильпам, дэремзэ но ачиз ик вурем. Мукет дэремзэ но возьматэ: лушкем 
пужыё ӟарыт-лыз. Тазэ но, пе, муртлы араса басьтӥ.
Тани укоен чеберъям шымыриё пильыс дӥсь. Та дӥсьлы пильыс басьтон понна, атае 
эшъёсыныз завод кузёлы ужаллям, нюлэс кораса, Вало кузя пур келяллям. Нош 
вуронзэ Гальымбит нимо бигер вурем. Мон тодӥсько на сое. Таӵе ик син азям пуксе 
ӝӧк сьӧрын вуриськыса пукемез. Вуриськон куспаз ик нэнэеным удмурт сямен 
шенгыль-пенгыль вераське. Пурысьтаны кутскем сьӧд йырсиез вакчи ӵышкемын, сьӧд 
синкашъёсыз улысь сьӧд синъёсыз пальпотыса учко, пичи сьӧд тушез вакчи ӵышкемын. 
Тыбырыз ӧжыт губырскемын ке но, ӝӧк сьӧрысь султыкуз, йырыз вӧлдэтэ ик йӧтоз 
кадь потэ вал мыным. Гуртамы со коркась корка ветлылӥз, шымыриё шуба, дӥсь, 
дукес вурылӥз. Одӥг кутскемен котькуд семьяын арня яке кык ужа вал. Мыным со 
асьме семьяысь адями кадь ик потэ вал ини. Ваньмы ӵош сиськыны пуксиськом, 
изьыны выдӥськом, ӵукна нош ик котькудӥз ас ужез борды кутске. Куддыръя 
Гальымбит ужан сяменыз ик каньылля бигер гурез нукыртэ. Ужзэ быдтыса, машиназэ 
салазкие понэ но мукет бускельёс доры кошке. Со кошкем бере, дорын шыпытгес но 
мӧзмытгес луэ вал кадь. 
Гуртысь нылкышноос нош пыш, етӥн будэтылӥзы, тыатӥзы, сэстӥзы, кужен мертчанзэ 
висъяллязы, черсӥзы. Мертчанлэсь ӵушконлы векчи дэра, дэрем алача куылӥзы, нош 
кушлэсь - ынлы, мешоклы дэра. Шортсэс пӧртэм чибор буёлъёсын буяса, чебер 
дэремъёс вурылӥзы. Кӧня ужез лэсьтыны кулэ луылӥз, кӧня дыр бырылӥз. Гуртэ 
буёлъёс вуттылӥзы бигер уромъёсмы ик. Тӥни озьы котькуд арберилэн, дӥськутлэн 
аслаз историез.
Тани вашкала буртчин кунгожсьӧр кышет. Яркыт зангари лыз вылын ӵужен зарниям 
кадь сӥньысъёсын чебересь пужыос пуктылэмын. Черкын чирдӥсь батюшкалэн зарниям 
вӧсяськон дӥсезлы укша со. Со выллем кышет сярысь верамын вал, дыр, калык 
кырӟанын: "Мынам кышетэ заграничной кышет вал. . ." Анаелы таӵе кышет атаез 
Алабгоысь ваем.
Вал на анаелэн мукет чебересь кашамер кышетъёсыз, но кунгожсьӧр кышет самой 
дуноен лыдъяське вылэм. Со кышетъёсысь сяськаосты учкыса, мынам ноку но кӧты ӧз 
тырылы. Котькуд сяська борды мон чиньыеным йӧтӥськисько, ныр дорам ик вайыса 
соосты зынъясько но нюлэс зынэз шӧдӥсько кадь. Соосты весь син азям воземе потэ 
вал, анаелэсь йырам керттыны курисько.
Тужгес но чебер адӟисько вал соос шур дурын. Кукей ӵуж вуын миськыса, кышетъёсты 
куасьтыны кӧня ке дырлы шур дурысь бакча кенер вылэ ошылӥзы. Быдэс дунне соку 
сяськаё возь выл луылӥз кадь. Мон небыт вож турын вылтӥ одӥг кышет дорысь 
мукетыз доры гольык пыд ветлӥсько, соослэсь куасьмемзэс чакласько, небыт 
вешаськись шуныт гужем тӧл медаз тӧлӟыты соосты кенер вылысь. Кышетъёсты шунды 
шорын кема возьыны уг яра - гужалозы. Шунды чебер буёлъёссэс басьтоз. Ветлон 
сяменым ӵуж сяська вылэ лёгиськыны шедьтӥсько. Отчы ческыт чечы бичаны муш 
пуксемын. Эх, соку тэтчаськод ини пал пыд вылад! Муш лексем пыдэз ӝутӥськод но 
отысь шизэ синкыли пыр кыскиськод. 
Тани кышетъёс куасьмизы. Соосты туж лачмыт гинэ куасалтылыса вылысьтыз вылаз 
тыриськод, нош анай соосты, кык паськыт куръёс вискы поныса ваче думылэ но 
сандыке понэ. Озьы кышетъёс лач-лач гинэ уло. Нош сандыкын дӥськут пӧлын котьку 
но луоз вал юр шелеп. Тӥни солэсь кышетысь сяськаосты зынъякум мон шӧдылӥ пужымо 
нюлэслэсь зынзэ. Со пужым шелепъёсты сандыке кашамер дӥськутэз кейлэсь утён 
понна понылӥзы. Котькуд арберизэ анае туж ӝикыт возьыны тыршылӥз, котькудӥз 
угось соос туж секыт ужез быдэстыса басьтэмын.
Бызись ныллэн одно ик мед луоз кашамер дэремез, кунгожсьӧр кашамер кышетъёсыз, 
воштӥськон шымыриё пильыс яке дуно пустол дӥсез, ӝужыт катьырмаё (каблуко) 
катаез, пужыятэм ӵушконъёсыз, чалмаосыз, оброс тӥрлыкез, ӝуткам ӝӧккышетэз, 
валес тӥрлыкез одно ик ӝуткам шобретэн. Нош ужан дӥськут кӧня луыны кулэ вылэм: 
куэм ыжгоно дэра дэремъёс, айшетъёс, шуба, дукес - ваньзэ вераса но уд быдты. 
Ваньмыз соос лэсьтэмын ас киыныд. Ку меда дыр шедьто вал со дӥськутэз куыны, 
вурыны, дасяны?! Маид ке ӧз ке луы, одно вералозы: "Осто, солэн бызьыкуз дукесэз 
гинэ но ӧй вал ук!" Тӥни озьы веран карозы, азьтэме кылёд. Ныл бызьыку, вань со 
дӥськутэз пилэн коркаяз, кузь кыскем гозы вылэ ошылэмын луоз вылэм - вань калык 
мед адӟоз. 
Дуно воштӥськон дӥськутсэс дӥсялозы вылэм куное мыныкузы, сюан-бӧрысь дыръя. 
Анае чебер дӥськутсэ дӥсялляз ӧтем куно сектакуз но. Куно сектаку угось кузё 
кышно ачиз но учкымон мед луоз, ӝӧк вылыз но чебер мед луоз. 
- Одоття туж кельышлы дӥсяськыны быгатэ, - шуылозы вал анае сярысь.
Одӥг куэм дэремаз сӧзы борды вить чук бырттэмын вал. Мон паймыса учкылӥ чукъёс 
шоры. Сыӵе ик чукъёс вурылэмын вал пужыятэм ӵушконъёс но чалмаос борды, ӝуткам 
шобрет бордын гинэ но чукъёсыз вал. Анаелэсь малы озьы чукъёс вурылэмын шуыса 
юай но, со валэктӥз: кӧня чук ошемын, соослэсь пужызэ пуктыны сомында ик адями 
басьтылэм. Пужы учкыны анае но кинлэсь ке киужъёссэ вайылэ вал. Но со котькуд 
пужы борды аслэсьтыззэ но будэтылӥз, чебересь шортъёссэ но ачиз сяменгес 
тупатылӥз. Соку пужы выльысь усьтӥськылӥз, чебергес луылӥз. Шортъёссэ артэ 
пуктыса учкылоз вал, кудӥз кытчы кельшоз шуыса. Ужан дыръя нуллон куэм 
дӥськутсэс но чебер карылыны тыршылӥзы. 
Анае али кадь ик син азям пуксе ӧтем куно сектаны дӥсяськем дыръяз: вылаз лемлет 
кашамер дэремез, со вылын азяз лыз буртчин пужыятэм айшетэз, гадь вылаз 
калтыриосын бадӟым уксё тӥрлык. Вылаз нош укоен чеберъям пильыс шымыриё дӥсез, 
со вылтӥ лэземын бутьмарез. Йыраз керттэмын "заграничной" буртчин кышетэз. 
Кышетэз ӧжытак берлань кошкем, чалма кыскыса, луоз, сьӧд бабля йырсиез пичияк 
кыре кылем. Пыдаз кутчамын катьырмаё сьӧд катаез, паллян киулаз кунултэмын куско 
черыкез, нош бур кияз - чебер вашкала рюмка. Кырӟан мытэ анае: 
Ачим гинэ кашамер но,
Винаосы калямпер.
Ой, мынэсьтым уд юы ук,
Кинлэсь-о но юылод.
Бур киыныз рюмказэ ӧжытак сэзъялтэ, катьырмаё катаеныз кутчам пыдзэ каньылля 
лёге, мугорыз ӧжытак лабыртӥське. Ӝӧк сьӧрын пукись куноосыз шоры пальпотыса 
учке. Вань ӝутскем ӟеч мылкыдзэ яратоно адямиосызлы сётыны дась со.
Ӝӧк сьӧрын пукись кышноос кузё кышномуртлы кырӟанэн вазисько:
Ой, мар мылкыд сётылод ук
Тон милемлы, эшъёсы.
Ачид ке но кызьы-о бон,
Али ке но ми озьы. 
 
Ой, вань, лэся, вань, лэся, ук
Сектаны но эсэпез,
Сётылэм но сюмыкъёссэ
Быдтыса но со юиз.
Огзылы огзы озьы вазиськыса, ӟеч кылъёс вераса, люкаськем куноос шулдыр кырӟало. 
Та гурен кӧня ке кырӟамзы бере, анае кырӟан гурез шуак воштэ. Таиз но кырӟан гур 
соиз кадь ик чебер чузъяське:
Вай кырӟалом, эшъёсы но,
Вай вералом, эшъёсы.
Вай лэзёме та тырмылэм,
Ой, мылкыдмес.
Сюлмысьтыз ик кырӟа анае. Кужмо но чебер куараез я вылӥе ӝутӥське, я лобӟыса 
кадь кошке, я улӥе лэзиське но калыклэн сюлэмаз ик пыре, мылкыдзэ бугыртэ. Али 
дырын тодӥсь муртъёс шуысалзы, дыр, та кышномуртлэн куараез бадӟым но чебер 
драматической меццо сопрано. Инкуазь сётэм солы сыӵе байлык, чебер куара. Гурт 
калык верамъя, мынам анае шуылоз вылэм:
- Кулӥ ке, монэ гробе понӥды ке, мон гробысь султо но тӥледлы одӥг чебер кырӟан 
кырӟало на.
Ӧз, ӧз султы ни анае гробысь, ӧз кырӟа ни шулдыр гурзэ. Вазь кошкиз со улонысь - 
ньыльдон арес гинэ вал али.
Нош маин куно карылӥзы со аръёсы дуно кунооссэс, ма пуктэмын вал ӝӧк вылазы? 
Самой дуноез сиён - пыжем ӟазег. Со быдэскын пуктэмын, нош вылаз, куноослы 
басьтыны мед луоз шуыса, кӧня ке юдэс ӟазег сӥль ик юдыса понэмын. Быдэс ӟазегез 
нокин уг йӧтылы, уг кеся, озьы ик быдэскын кыле со. Мукет тэркыын питранэн-
питранэн вылысьтыз вылаз ӵуж ӵыжтэм вӧй пуктэмын. Со вылын - вандылэм нӧкы вӧй, 
куноос басьтыны, сиыны мед быгатозы. Нош ӵыжатэм вӧез йӧтылӥсь ӧвӧл, а то 
сьӧськаб, вирсэртэм шуыны шедьтозы. Ма, собере одӥг нунал куспын ик кык-куинь 
уллё куно пыртылоно луо вал ук. Кузё кышно выльысь ӟазег пыжыса уз вутты ни. 
Одно ик бадӟымгес тусьтыен пуктэмын кӧйӵыжы, тусьты пушкы чечыпуньы понэмын. 
Тазэ вина сектам беразы одно ик кунолэн ымаз поныны тыршо. Ӝӧклэн пумазгес 
тэркыосын пуктылэмын пыжиськемъёс: перепечъёс, быскылиос, шекераос, пӧзьтыса 
пыжем сушкаос. Сушкаез пӧзьтыса пыжиськод ке, со базар сушка порма луэ. Таоссэ 
но сиёнэз исась уг луы. Та пыжиськемъёсты сандыкын ворсаса возё но ӝӧк вылэ трос 
пол пуктыло. Кыӵе гочаса улоно вал, со сиёнъёсты малпаса, вис шедем дыръя одӥг-
ог шекераез я сушкаез лушкаса сиён дыръёс но луылӥзы. Секыт война аръёсы мукет 
ческыт сиёнъёсты пичи дыръямы вӧтаса но ӧм адӟе угось.
Ӝӧк вылын сиыны вылысь пуктэм сиёнъёс трос луо вал: кӧжы кисаль (етӥн вӧйын туж 
ческыт луэ вал со), шу кисаль, шарк-шарк сылалтэм кубиста, чырсатыса дасям но 
лымыныз ик юдыса пуктэм горд кушман, одно ик кык-куинь тусьтыен пуктэмын луоз 
вал сӥльын пӧзьтэм пӧсь шыд, кыӵе ке ӝук (ӵемгес чабей ӝук, шораз бадӟым гопын 
шунам вӧй уя), кукей пилем. Таоссэ сиёнъёсты котькӧня си, чаклась ӧвӧл. Тусьты 
бушаз ке, нош понозы. Тэркыысь юдэм сӥлез но кӧттырымон сиыны луэ. Бератаз, 60-
тӥ аръёсы, ӝӧк вылэ пукто ни вал ӵынатэм чорыг, колбаса, йӧлпыд, собере кузятэм 
йӧл лэсьтыны дышизы. 
Коркан тросаз юмшасьёс, куноос. Кузё кышно чакланы тыршылӥз, дораз пырем адями 
одӥгез но ӝӧк сьӧры пуксьылытэк медаз кошкы шуыса. Ӝӧк сьӧры сиськон понна ӧз 
пуксьылэ, ӝутскем мылкыдзэс кузёлы возьматон понна. Сабырлы гинэ кырӟаса, 
вераськыса пукылӥзы ӝӧк сьӧрын. Сиён шоры ӧжыт учкылӥзы. Юмшан дорысь доразы 
ужан дорысь кадь жадьыса но сиемзы потыса бертылӥзы. 
Сиён-юон дыръя одно ик арганчи луоз вал. Мылкыдэз ӝутӥсь капчи эктонэз со 
пыдъёссэ лёгаса, йырзэ арган вылаз ик лэзьыса, сюлмысь шудылӥз. Пинал нылъёс, 
пинал кышноос но егит пиос эктыны кутско. Эктыкуд киостэ пӧртэм сямен вошъяса 
мед эктод, эшеныд но одӥг кадь кариськыса, пыдъёстэ выртыны мед быгатод. Котькуд 
эктон одӥг тупатэм интыын ортче вал. Мынам но анае эктыны туж яратылӥз, пӧлазы 
сабырлы гинэ потылӥз. Черыкез но сектаськон рюмкаез кияз ик. Нош ӝутскем мылкыд 
азьлань но азьлань ӧте, черыксэ но рюмказэ ӝӧк вылэ пуктэ но киоссэ азьланегес 
лэзьяса ширъя. Паськыт удмурт дэрем сӧзыос вӧлъясько, дэрем сӧзы улэ кельышлы 
вурем чилясь лентаос чебер адӟисько. Капчи арган куара эктӥсьёсты бурдъя. Арлыдо 
адямиос эктӥсьёслы мылкыд карыса, пыдесъяськыса кизэс чабо. Соос озьы чабылӥзы 
асьсэлэсь ӝутскем мылкыдзэс, эктӥсьёсты гажамзэс возьматыса. Пинал дыръязы соос 
но озьы ик ширъялозы вал уго. Эктӥсь муртъёс дугдыкузы одно ик пыдесъяськем 
муртъёсты ӝутыны кулэ. Сыӵе ини сям со удмуртлэн. 
Таӵе шулдыръяськон дыръя калык пичи дырлы ке но куректонзэ вунэтылӥз, паськытгес 
вӧлъялляз ужен жадем пельпумъёссэ. Азьланезлы оскон мылкыдыз но кужмоялляз, шуг-
секытъёсты вормыны юрттылӥз.

1

Вера Кузнецова
Йыр-пыд сётон
Мынам вордӥськем гуртэлэн нимыз Синяр-Бодья. Со интыяськемын Кизнер ёросысь 
одӥгаз туж чебересь возьёс, бусыос, куашетӥсь тэльёс вискын. Пересьёс верамъя, 
гуртмылэн нимыз ноку но вошъяськылымтэ. Гуртамы улӥсьёс потэмын бускель Вуж-
Бодьялась. Вуж-Бодья гуртысь ик потӥллям Гучин-Бодьяос но Вишур-Бодьяос.
Синяр-Бодья калык Вуж-Бодья гуртысь потэмын бере, вашкалаос луд-куалае 
вӧсяськыны отчы ветло вылэм. Озьы ик отчы люкасько вылэм Вуж-Бодьяысь потэм 
вань калык. Берлогес со луд-куалаез дэмен вӧсь кариллям, нош Инмарлы тау 
каремзэс, курон-веранъёссэс ортчытъяны кутскиллям гурт сьӧрын, кык бадӟымесь 
пужымъёс улын. Вашкалаос малпало вылэм, писпу макем ӝужыт, сокем со матын 
вылӥысь Инмар кылчинлы. Пужымъёс борды мудор понэмын вылэм. Со вӧсь пужымъёс туж 
ӝужытэсь, пе, вал, азьвыл татчы аэродроме лобась самолётъёс пуксён интызэс 
соосъя чаклало вылэм. Но, тӧдьыен гордъёс ожмаськон дыръя со пужымъёс улэ куинь 
солдатъёсыз ватӥллям. Солы луыса, гуртын улӥсьёс вӧсяськон интызэс воштоно 
луиллям огназ сылӥсь бадӟым беризь улэ.
Туж жаляса верано луэ, пудо возьмась шунтӥськыны шуыса писпуос улэ тыл понэм. 
Озьы вӧсь пужымъёс но, беризь но сутскыса быризы. Кема ӧз улы ни, сьӧразы кошкиз 
пудо возьмась но. Пересьёс верамъя, вӧсь интыез жуг-жаг куян интылы пӧрмытыны 
уг яра, озьы ик отысь номыре тӥяны, сутыны уг яра.
Котькуд тулыс музъем ужъёс йылпумъяськем бере, гурт калыкмы люкаське вылэм 
беризь улэ. Тол пыр поттэм кунянэз яке ошпиез вандо, вӧсяло но сиемзы-юэмзы бере 
Инмарлы вазисько, сётэм-будэтэм сиён-юонэныд кӧтмес тыримы шуыса солы тау каро, 
азьпалан но озьы ик мед луоз шуыса Инмарлэсь курисько. Нош сӥзьыл ужъёс бырем 
бере дэмен вӧсь луд-куалаын вӧсясько вылэм. Котькуд гуртлэн аслаз пуртыез, пе, 
вал. Отын шыд яке ӝук пӧзьтылӥллям.
Мон малпамъя, удмурт калык одӥг ужзэ но вӧсяськытэк, Инмарлэсь юрттэт курытэк ӧз 
кутскылы. Табере тросэз соос вунэмын ини. Но гуртамы азьло сямен ик Быдӟым 
нуналэз, Ымусьтонэз, Йӧ вылэ султонэз пусъё на. Али мынам нимысьтыз вераме потэ 
йыр-пыд сётон йылолмы сярысь. Та йылол асьме дорозь вуэмын туж кемалась-кемалась 
вакытысь, вашкала язычествоысь.
Кулэм ӵыжы-выжыослы йыр-пыд сётон куинь ар ортчыса лэсьто. Йыр-пыд сётыны 
малпась мурт будэтыны кулэ скал яке ош. Пиосмуртъёслы ош сёто, нош 
кышномуртъёслы - скал. Йыр-пыд сётон кышномуртлы ке сӥземын, йыр-пыд пӧзьтыны 
матысь ӵыжы-выжы кышномуртэз ӧтё, нош пиосмуртлы ке - пиосмуртэз. Йыр-пыдэз 
мунчоын, бадӟым пуртыын пӧзьто. Собере, кузё кышно бӧлякъёссэ, бускельёссэ, 
пересьёсыз ӧтча. Ӧтемъёс одӥгез но буш киын уг лыкто, пичи ке но сиён ваё: нянь, 
пызь, курег пуз но мукет. Со сяна, сьӧразы ваё на пичи гинэ басма юдэсъёс. Кулэм 
мурт сопал дуннеын но ёрмыса медаз ул, пе, аслыз юбкаос, дэремъёс мед вуроз. 
Озьы ик куто на векчи корт коньдон. Кулэм муртлэн музъем понна тыремез мед луоз, 
басьтэм потоно арбериосты басьтэмез мед луоз, пе.
Лыктэм муртъёс нырысь ик ӝӧк сьӧрын вӧсясько, кулэмъёсты буре ваё. Собере кузё 
лыктэмъёс пӧлысь аслыз эш быръе. Соос ӵошен яке куинь кузя пӧзем йыр-пыдэз 
пыртыны мунчое пото. Мунчоын соос кулэм муртэ буре ваё сьӧразы поттэм аракыен. 
Йыр-пыдэз корка бадӟым тусьтыен пырто, сӥльзэ сиё но лыоссэ корка шоры пуктэм 
коропе тыро. Отчы ик куяло сьӧразы ваем басма юдэсъёсты, векчи коньдонэз. Тани 
тыныд дэрем ваимы, нуллы (кулэм муртлэсь нимзэ верало) кенаке, анае, бускеле. . 
. Собере со короп котыртӥ эктыса ветло, пудо-живот ӵыжиз шуыса ӵыжасько. Скал 
йыр-пыд ке пӧзьтэмын, скал кыскиськом шуыса ветло. Таӵе кылъёс вераса кырӟало:
Куать ноныё скал сётӥськомы
Яратоно кенаке (анае, апае. . .),
Скалэн йӧло-вӧё мед улод.
Собере кужмогес муртэ быръё но сое вал каро. Чыртыяз гырлы ошо. Коропез пу дӧдьы 
вылэ поныса, шур сьӧры, бадӟым кыз улэ нуо. Дӧдьые куро поно но отчы вань мылкыд 
карисьёс пуксё. Собере со куроез бадӟым тылскемын суто. Со тылскем котырын озьы 
ик кырӟало, "лекасько" но ӵыжасько. Шур дурысь бертэмзы бере корка туж зол дыбыр 
поттыса пыро, кулэм муртлэсь нимзэ вераса, аракызэ пӧсятыса возьмад, дыр, шуо.
Ӵуказеяз яке йыр-пыд сётэм бере ик пиналъёс куяськем пӧлысь векчи копейкаосыз но 
басма юдэсъёсыз бичало.
Йыр-пыд йылол ортчытыку, кузё муртлы аслыз йыр-пыдэз пӧзьтыны но, лы бордысь 
сӥльзэ висъяны но уг яра, пе. Нош пӧзьтӥсьлы кузё мурт пиосмуртлы ӵушкон сётэ, 
кышномуртлы - кышет.
Йыр-пыд сётон вашкала йылолэз гуртамы туннэ но ортчытъяло на, нош 87 аресъем 
Марья апайлэсь верамзэ гуртоосмы уг тодо ни. Тани мар вераз со.
Троица нуналэ туж чылкыт сузям-бичам куалаын котькин ас семьяеныз вӧсяське, пе, 
вал. Собере кизён кудые сиён-юон тырыса, семьяенызы ик аназы вылэ мыно вылэм. 
Ворргоронъёс та нуналлы юри пичи гинэ пу лопата лэсьто вылэм. Ана вылазы 
вӧсяськемзы бере, со лопатаен пичи гинэ гу гудо но отчы ваем сиёнъёссэс тӥяса 
куяло: милемын ӵош пересьёс но, пе, мед сиёзы. Собере со куям сиёнэз сюен 
ӵоксало но котькудӥз аслаз ана вылысьтыз беризь улэ дэмен вӧсь ортчытонэ мынэ. 
Вӧсь беризь будӥсь интыез Шор бусы шуо вылэм. Со Шор бусыын музъем вылэ тӧдьы 
ӝӧккышет вӧлдо, пе, вал но сиён-юон пуктыло, дэмен вӧсясько. Доразы вӧсяськыкузы 
мудор азе кызьпу вайёсты поно вылэм. Ӵуказеяз вӧсяськонзы Шор бусыын ик будӥсь 
сирпу улын ортче вылэм. Тӧръёсты быръё, пе, вал, соос пудо-живот вандо но сӥль 
пӧзьто, собеер шуо: ""Музъемозь йыбырттэ". Ваньмыз йыбыртто но сиськыны кутско. 
Сиськемзы бере туж шулдыр юондыр луэ, пе, вал, арганэн шудыса, кырӟаса-вераса.
Тӥни озьы выжыысь выжые пересьёс ортчытъяло вылэм пӧртэм йылолъёс. Куд-огез соос 
туннэ но кылемын на. Состы туннэ вунэтоно ӧй вал, егитъёслы пыӵатоно. Инмарен 
герӟаськем сям-йылолъёс адямиез урод лэсьтонлэсь, урод малпанлэсь утё.
Мыным та ужме быдэстыны юрттэмзы понна бадӟым тау карисько гуртысьтымы Мария 
Лаврентьевна Чернышева но Мария Павловна Чарнышева пересьёслы. Соос 1931 но 1913 
арын вордӥськемын, вашкала удмурт йылолъёсты троссэ тодо на, сюлмазы возё.
1

Кылзы арган
Крезьгурез Виталий Самигуловлэн
Кылъёсыз Ирина Самигуловалэн
Ой, арганэ, ой, арганэ,
Вераметыныд потэ:
Танып* дурысь, пичи гуртысь.
Пумитай яратонме.

Припев: Кылзы арган, кырӟа арган.
 Мед кылоз быдэс дунне!
 Тон нош, эше, ой, арганэ,
 Вала, буйгат сюлэмме.

Ой, синъёсыз, ой синъёсыз,
Шорам мусо учкизы.
Танып котыр, вань дуннемы,
Йырин-чукин луизы.

Припев.

Ой, италмас, ой, сяськаос,
Тӧл ке потӥз - тӧлӟозы.
Танып дурын пумиськонъёс,
Уйшорозь кыстӥськозы.

Нимасько тонэ. . .
Крезьгурез Виталий Самигуловлэн
Кылъёсыз Ирина Самигуловалэн

1. Нимасько тонэ "шунды",
 Нош мыным уд пиштӥськы.
 Нимасько тонэ "толэзь",
 Уйёсы уд ӝужаськы.

Припев: Нимасько мон, нимасько,
 Ӵошатско, синмаськисько,
 Нош уг луы валамед,
 Кезьыт тол кадь кынмемед.

2. Нимасько "ӵуж италмас",
 Адӟеме выльысь ӧйлась.
 Нимасько "ӵук тюрагай",
 Ӧд кырӟа - юнме нимай.

Припев.

3. Кызьы гинэ ӧй нима,
 Маин но ӧй ӵошатъя,
 Тон ачид астэ нимад - 
 "Бус" шуид, - ышид пырак. . .

 Милям но вӧсяськиллям
Гуртэлэн нимыз М.-Ошворцы, яке Ванькагурт. Пуксемын со ӵапак Оӵ (Иж) шурлэн 
кутсконаз. Нош 1646 арын ортчем переписья нимаське вылэм Малая Ворчка. Берло Оӵ 
но Ворчка нимъёсты огазеяллям но Ошворцы кылдэм. 1646 арын лэсьтэм лыдпусъёсъя 
тодмо, гуртамы дас вить мурт улэ вылэм шуыса. (Нылкышноос переписе пыртэмын 
ӧвӧл). Соос пӧлысь тросэз Иван нимо атай нимын. Озьыен гуртамы нырысь ик 
Иванъёс пуксиллям. Отысь ик кылдэм солэн Ванькагурт нимыз но.
Вашкала дыръя кытын ортчылӥзы вӧсьёс, вераны шугъяськисько, гуртоос но уг тодо 
ни. Но вӧсь пӧртэм пумо вылэм. Кылсярысь, Бусы вӧсь ортчытӥське бусы ужъёсты 
кутскемлэсь азьвыл. Бусы ужъёс каньыл мед ортчозы шуыса, Кылчинлэсь, Инмарлэсь, 
Утисьлэсь куриськиллям. Нош куарсур нуналэ вӧсяськиллям кизем ю-няньзы мед 
удалтоз, солы будыны куазь мед тупалоз шуыса. Бусы вӧсе мыно вылэм быдэс гуртэн, 
чылкыт, сайкыт дӥсь дӥсяса. Вӧсьлы быдэс ужпиез вандозы вылэм.
Со сяна, вӧсьёс ортчытъясько вылэм иськавынъёсын гинэ но. Тани, шуом, 
гуртысьтымы Дурга выжы семья. Соос азбаразы пуктэм куалаязы пото но Инмарлы 
вазисько, семья куспазы тупаса мед улозы, котькудӥзлы шуд-пай, дэлето улон мед 
сётоз шуыса.
Мукетыз вӧсь тэльын ортче вылэм. Отчы воргоронъёс гинэ ветлылӥллям.Та вӧсьын 
ӵӧжез яке ӟазегез вӧсяло но Утисьлэсь пудо-животсэс, нылпиоссэс тылпулэсь, 
висёнъёслэсь, вӧсь луэмлэсь утьыны куро. Тэле мынозы вылэм чылкыт дӥсяськыса, 
сьӧразы курег пуз коже пыжем мильым, бискыли куто. Озьы ик куро на вӧй, чечы - 
улонзы кӧё-вӧё, чечыё мед луоз.
Туннэ милям гуртысь воргоронъёс вашкала вӧсьёсты, сямъёсты вунэтӥллям ини. Нош 
куд-ог песянайёс ветло на. Со понна котькудӥз ас понназ кыз возе. Со кыз бадӟым 
мед луоз, улысь вайёсаз тӧдьы ӵушкон вӧлдыны но отчы сиён-юондэ пуктыны мед 
быгатод. Пересьёс вӧсясько, сиён-юонъёссэс асэнызы ӵош Утисьлы оскалтыны куро, 
нош кылемзэ гуртазы ваё. Тэльысь салам шуыса, соосты пичи нылпиослы сётъяло.

Надежда Козырева,
Як-Бодья ёрос. 
"Самой умой урод кылбур"
(Е. Евтушенко)
Укмыстонэтӥ аръёсы туж трос гожъязы НЛО сярысь. Тодмо артист но крезьгурчи 
Геннадий Бекманов мыным вазиськиз НЛО сярысь кырӟанлы кылбур гожтыны. Мон озьы 
но, тазьы но выри, трос пӧсяй, но кырӟанлы кылъёс гожтыны ӧй быгаты. 1992 арлэн 
кутсконаз мыным "Инвожо" журналлы бумагалы Калининград пала Неман городэ лобано 
луиз. Отын туж чылкыт, шыпыт, чебер инты, калык но лякыт, йӧно. Кыӵе ке мукет 
дуннее вуи кадь потӥз. Неман гостиницаын соку тани таӵе чуръёс кылдӥзы. Вуэм 
берам кылбурме шумпотыса Г. Бекмановлы сётӥ. Но кырӟан ӧз кылды. Ачиз мыным 
номыр ӧз вера ке но, кылбуре сюлмаз ӧз лякиськы, вылды. "Удмурт дуннеысь" 
"Шӧкыч" баме со поттыны ӧз яра.

Галина Романова

НЛО ваиз шудбур
НЛО, НЛО, НЛО васьказ, луоз,
Музъеме инсьӧр дунне палъёсысь,
НЛО, НЛО, НЛО кельтӥз, луоз,
Та гуртэ монэ, нош ачиз лобӟиз.
Соин, дыр, нылъёс монэ
Серемес гинэ каро,
Ӝытазе шудон пӧлын
Исаса шорам учко.
Йырсие, пе, ӵогырес,
Паськыт ныры чатырес,
Горд ымныры питырес,
Мугоры нош кысмылес.

НЛО, НЛО, НЛО васьказ, луоз,
Музъеме инсьӧр палъёсысь,
НЛО, НЛО, НЛО кельтӥз, луоз,
Та гуртэ монэ, нош ачиз лобӟиз.
Гурт калык но паймемын - 
Кытысь мон таӵе вордски?
Мемей-дядяй ӟудэмын - 
Кин выжые, пе, мынӥ.
Вераськем, шуо, шенглес,
Ветлэме но сумбырес.
Мырк киын, пе, вӧлэмын,
Нош визьмын удалтэмын.

НЛО, НЛО, НЛО, кытын-о тон?
Басьтыны монэ лыкты вал ӝоггес!
НЛО, НЛО, НЛО, кытын-о тон?
Кар вал монэ адями тусогес.
НЛО кылӥз монэ, 
Пырак гуртамы васькиз.
Шорам мусо учкыса,
Инсьӧр ныл отысь потӥз.
Куараез - бызись ошмес,
Йырсиез - ӵуж бабылес.
Бамъёсыз - кисьмам эмезь,
Синъёсыз - сайкыт толэзь.

НЛО, НЛО, НЛО берен лобӟиз,
Нош нылаш татчы гуртамы кылиз.
НЛО, НЛО, НЛО тӧлӟиз-быриз.
Инсьӧр ныл дорам лыктыса шуиз:
Тон мынам яратонэ,
Чебере но визьмое.
Мусо зарни бугоре,
Гажаса чуп каронэ.
Быдэс инсьӧр дуннеысь 
Тон кадьзэ ӧй шедьты мон.
Вай кидэ, лык, возь вылысь
Саюлэ лэсьтом тылыс.

НЛО, НЛО, НЛО ваиз шудбур,
Тылысын ум улӥське ми - юртын.
НЛО, НЛО, НЛО вуттӥз шудбур,
Кышноен картъёс луимы гуртын.

Людмила Кутянова
Ӵок
Тон монэ уд яратӥськы. Ӵок.
Кожаськод, дыр, мӧзмыса ветло,
Кожаськод - вамышедлы быдэ
Синъёсад пуны кадь учкыло.

Эн малпа, йыбыртъяны ӧй меды,
Кайгуме мон туж пыдло ватӥ.
Кӧтӝожме но мӧзмемме уд тоды - 
Куареттэк ортчо тынад вӧзтӥд.

Нош секыт луиз ке, мар бен?
Миндэрез юнме шат эш шуо?
Синвуме кисьтӥ ке но, уд адӟы.
Тон уд адӟы. Ваньмыз буйгалоз.
75 ар.

Татьяна Чернова
Мукет синмын учкысал

Кызь кык аресысьтым,
Эх, кушты вал дассэ!
Соку мон ветлысал
Витетӥяз классэ.
Соку котькуд нунал
Мон азьлане вамышъясал,
Троссэ вамышъёсме
Мукет сямен лэсьтылысал.
Бусы дурысь сяськаосыз
Чагыр синъёс ӧй кожасал,
Вож возь вылысь италмасэз
Кырымъёсын ӧй ишкасал.
Дунне вылысь тросэз шоры
Мукет синмын, дыр, учкысал,
Улонысьтым могӟетъёсты
Жагез сямен порылысал.
Лушкем куртчись лек сямъёслы
Мукет дунъет мон сётысал.
Соку али та улонам
Тросэз мукет, дыр, луысал.
Декабрь, 1975 ар.

Егит пилы
Синмаськи тыныд, егит пи,
Мон ӧвӧл учкыны тузӥ.
Возиськод астэ туж лачмыт,
Сюресэз лёгаськод йыгмыт.

Тон туэ быдтӥд школаез.
Мон ветло на ай ог арез.
Тон кошкод меда кыдёке,
Сюлэмыд кытчы куриське?

Тон кошкид ке но палэнэ,
Мон сьӧрад дась дунне пуме.
Нош кылид ке тон колхозэ,
Луомы одно огазе.
Март, 1972.

Бадӟым уже потоно вал,
Бадӟым уже!
Ас киыныд кутылоно вал
Анданэз.
Ас синмыныд адӟылоно
Лэсьтӥськонэз.
Ас уженыд юнматоно
Огъя ужез.
Декабрь, 1975.

Та мынам самой нырысетӥ кылбуре. Валасько, со, поэзиен тунсыкъяськыны кутскем 
берам, кинлэсь ке адӟем карыса гожтэмын. Огшоры - кызьы шуо, плакатно - 
пӧрмемын. Но - нырысетӥез. Соин ик дуно. 
СергейМатвеев
Вордӥськем шаере
Тыр тысё шепъёсты адӟыса,
Сюлэмам йыгаське шумпотон.
Вордӥськем гурт шорам учкыса,
Ымнырам шӧдӥське пальпотон.

Луд вылын сяськаос адӟисько,
Кудъёсыз шаермес данъяло.
Нюлэскын писпуос куашето,
Кудъёсыз шаермес ушъяло.

Инметӥ тюрагай лобӟыса,
Туж шулдыр гуръёссэ кисьтылэ.
Тюрагай гуръёсты кылзыса,
Со сьӧры лобӟеме потылэ.

Ӵук шунды, нуналэз вайыса,
Пеймытэз кыдёке сэрпалтэ.
Небытэсь сиоссэ кисьтыса,
Асьмемыз выль шудэн пылатэ.

Ваньмыз со - вордӥськем шаере!
Ялан со азьлане вамыштэ.
Нош мусо, яратон калыке
Уженыз шаерме шумпоттэ.
1980.

Лидия Нянькина
Писпуос мӧзмылэс сылыло,
Бергаса куаръёссы усьыло.
Пӧртэмесь малпанъёс поръяло,
Ӵуж куаръёс музъемез ӵоксало.
Писпуос мӧзмылэс сылыло.
Куаръёсты нош сӥзьыл ӵужыло ,
Огинэ люкаса, сутыло.
Ӝуазы сьӧд ӵынэн ӵуж куаръёс,
Уз ни кылске ӵаштыр! куараос. . .

Писпуос мӧзмылэс сылыло.
Куаръёссы но уг ни усьыло.
Куакаос вайёсаз пуксьыло.
Шоразы калыкъёс учкыло.
Писпуос мӧзмылэс сылыло.

04. 10.86.
Таӵе "ӟеч" чуръёс гожтэм бере, кылбур гожтон удысын мон 5 ар вис кари.

Семён Перевощиков
Арганчилэн кырӟанэз

Шур сьӧрысь колхоз гурт
Чалмытскем: шутэтске. . .
Тыр толэзь югдытэ возь вылэз.
Монэн ӵош меӵ ярдур
Ву вылэ кадь учке,
Пальпотэ толэзьлы сак нюлэс.

Изнэсо тулкымъёс
Кылзозы куараме,
Возь кузя вӧлдӥськоз кырӟан гур.
Арганэ вералоз
Мынэстым малпанме,
Тон сярысь кырӟалоз мыным шур.

Нош адӟи ке тонэ,
Уг, уг вазьы шорад,
Тон вӧзтӥ ик ортчо, кырӟаса.
Куректоз арганэ
Монэн ӵош уйшоре,
Вазёзы басъёсыз, лулӟыса.
Салкымен вешалоз
Капчи тӧл ымнырме. . .
Мон шоры вазиське кадь нюлэс:
"Мар озьы уй ӵоже
Калгиськод тон юнме,
Нылъёслэсь ӝегатскод изёнзэс?"

Арганэ вералоз
Мынэсьтым малпанме,
Тон сярысь кырӟалоз мыным шур.
Гуртысьтыд сэзь тылъёс
Небӟыто сюлэмме.
Яратско мон тонэ, мусо гурт!

26. 09. 50.
Та кылбурме нокытчы печатланы ӧй сёты, лыдӟисьёслы номыр выльзэ вераны ӧй быгаты 
шуыса. Ачим но валай мукет авторъёслэн лёгем сюрестӥзы мынэмме.

1