НЮЛЭСКЫН

Ӧз мозмы Шуваллэсь улос - 
Удмурт нош ик зӥбемын.
Пумтэм-йылтэм сьӧд нюлэс
Камитлы юртъер кылемын.
Гужем. Сӥзьыл куазен
Писпу йылын тӧл нёръя.
Нюлэс шорысь котрес возьын
Турынэз пужмер-кын нюръя.
Возьлэн шораз лабрес сирпу.
Камитэз табере уг ваты.
Ӟырдыт ӝуась гурлы кӧс пу
Кынмем сюлэмез уг шунты.
Мар малпаса улэ Камит,
Маин нуналзэ ортчытэ?
Мар уж бордын выре лумбыт 
Маин даурзэ вакчиятэ?
Пӧйшуран- солэн вань ужез.
Пӧйшуран бордын кӧттырез.
Пӧйшур ку - улаз валесэз,
Пӧйшур ку - вылаз шобырез.
Бутьмар* жильыртэм куараен
Кӧльы пӧлысь ошмес пӧзе.
Солэсь пӧрмем шур азвесен
Ныл гадь выллем чиля, бызе.
Сьӧд сюй вылысь кый сямен
Вож турын пӧлы ыштӥське.
Син адӟымтэ кужымен
Кытчы ке азьлань кыстӥське.
Азьлань. Весь азьлань со мынэ,
Паськыт бадӟым шурлы пӧрме.
Шурлэн азьлань мынэмез - 
Камитлэн азьланьлы осконэз.
- Кин вань отын, пот азям,
Ваньдэ-бурдэ вай, потты.
Ӵогъяса виён дырозям
Киндэ вера, эн ваты.
- Мон - Быдыш, юрттэм пыдйылчи.
Бродяга, пегась, кызулчи.
Та нюлэслэн кузёез,
Вань пӧйшурлэн эксэез.
Султӥз Камит. Учкиз кырыж
Та кылъёсыз верась пала.
- Быдыш. . . Эксэй. . . шалмем кырныж.
Мынам эзеле тон вал-а?!
Кылыд тынад чурыт-зуркыт,
Синъёсыд - йылсо пежъян. . .
Азяд сылэ Камит - быркыт.
Быгатод-а вормын кужмын?!
Камитэз адӟыса Быдыш
Берлань чигназ ог вамыш
- Камит, тон - батыр. Мон янгыш.
Ваче улыны асьмеос тӥыш*.
- Тонэн кушласькон понна
Мон ӧй лыкты нюлэскы.
Эксэез вормытэк туннэ
Кулэ луиз палэнскын.
Тон вир юон инты утчась,
Калыклэсь ваньбурзэ талась.
Калык понна сьӧрам ке мынод,
Соку мыным эш луод.

* * *

- Окрестности села Юськи
Охвачены восстанием.
Камит, смутьян Ижевска,
Командует движением.
- Зачинщиков стрелять и бить. . .
Камита в цепи заковать!
Чтоб легче было изловить,
Цену его всем объявить. . .

* * *

Уй. Юртъер вистӥ тӧл шула,
Писпу куаръёс ӵаштырто - ӵаш-ш. . .
Ӝакы секыт уммен кӧлэ.
Укно пуаз куара - тыш-таш. . .
Ӝакы изе. Ортчем дырзэ
Ческыт ум вамен адӟе.
Камитлэн ки вылаз йырзэ
Понэм кадь, соин со кудӟе.
Йӧэн суро зор усе - шар-р. . .
Укно пиялаез миське.
Укно пу нош ик зурка - зур-р. . .
Ӝакы уг кыл, шобыртӥське.
Кезьыт тӧлъя липет пулъёс
Огзэс-огзы жуго - шырк-шарк. . .
Ӝакы вадьсын пыд куараос
Выж лэйкамъя вазё ӟырк-ӟарк. . .
- Кин со татын? Тон-а, Камит?
Мар сямен, кытысь. . . ку вуид?!
Зор улын-а таӵе кынмид,
Сӥзьыл кынэз сьӧрад ваид?
- Сӥзьыл кынэз сьӧрам ӧй вай,
Калыклэн кынэз мон бордын.
Калыкез шунтыны сюрес утчай,
Ӧйлась кезьытэз вормын.
Куазь сӥзьыл. Кынтэ асьмемыз.
Шымыртэ нёред модосэз.
Куазь сӥзьыл. Шувал жильыеныз
Ӝикатэ кияз улосэз.
Ализэ ӧм вормелэ.
Вуоно гужем возьматоз.
Монэ ке ӧз кырмелэ,
Калык сьӧрам нош мыноз.

* * *

- Кинлы кулэ буртчин кышет,
Кинлы кулэ йырси пунэт?
Бутьмар дурады пилинӟы*,
Бызёно ныллы дӥсь бирӟы. . .
Ваньмыз мынам тырмымон,
Дунтэм дунын вузамон.
Анай, кенак! Чаль, лыкты:
Кулэ вузъёс вань - басьты!
Бадӟым тушо векчи вузчи
Укно улъёсын черектэ.
- Дугды, вузчи, лыкты татчы! - 
Ог пересь мурт черектэ. - 
Аслым кулэ одӥг вуз:
Дӥсь каптырна кык-куинь куз.
Пыр аль дорам, возьмат вуздэ.
Вера мыным выль уждэ.
Вузчи пыре. Отын калык,
Гуртлэн лушкем кенешез:
"Мед гинэ луоз тазалык,
Тазьы ум кельтэ та ужез".
Вузчи басьтӥз лякем тушсэ - 
Пинал кариз пересь туссэ.
Калык луиз чалмыт-шыпыт
Веран кутскиз кылзэ Камит:
- Вузкарон амал котыртӥ
Ёросысь вань гуртъёсы.
Ӝутскон нуналэз ивортӥ.
Дасяй азьветлӥсьёсыз.
Удмур пӧлын уно мылкыд
Зӥбыны дышмон кужымез.
Соос кылем арын кадь ик
Возьмало ваньмыз гужемез.

* * *

Гужем. Камит нош нюлэскын,
Возьлэн шораз сирпу улын.
Ӝакы но татчы лыктэмын
Камитэн валче улыны.
Пичи Сизя шур бордысен
Оӵ шурозь ветлон интызы.
Быдышен пӧйшуръёс сяна,
Уно ветлӥсь доразы.
- Зӥбетэз куштыны выль кужым
Вордӥськоз, - шуиз чорыгась.
Луоз меда со та гужем?
Ку лыктоз со, кудпалась?
- Шып улыны сӧзылэсь курдад.
Ӧй вормы тонэ кутыны.
Уг султы сюрес ваменад
Кутскем уждэ пумаз вуттыны.
Азьланьлы оскондэ эн быдты.
Мылдэ-кыддэ юнматы.
Выль кужым уз васькы инмысь.
Утча сое тон калыкысь.

* * *

- Я с давних лет бездельник.
Быдыш - как вы разбойник.
Пришел с одним вопросом
И с важным к вам доносом.
- Поставленных царем и богом
Людей изволил ты чернить.
За то тебя, бродяга,
Должны немедленно казнить.
- Мне женщина одна нужна,
Право на разбой монеты.
Лишь то - во что объявлена
Цена вождя Камита.
- Представь ты к нам Камита,
Не жаль монет и триста.
Получишь право на разбой,
В придачу женщину с собой.
 * * *

- Кытын Камит? - Быдыш юа
Сиён пӧзьтӥсь Ӝакылэсь. - 
Шедьтӥ мон арак, уз ю-а,
Уй-нунал мӧзмыт ортчемлэсь?
- Со туннэ ветлӥз гуртъёсы.
Жадемын, изе, уз султы.
Ӵуказе уно ужъёсыз,
Аракен дырзэ уз быдты. 
Син пумысьтыз учкиз Быдыш
Вӧзаз сылӥсь Ӝакыез.
Кекатӥз сое кыз борды,
Ымысьтыз потэ шукыез.
Ымзэ туйылӥз кышетэн,
Ныпъяз. . . ышиз тэль ӝокытэ,
Бераз вуизы солдатъёс,
Зӥбизы корен Камитэз.
Батыр Камит иземысь вырӟиз,
Зӥбет корез куасалтӥз.
Куасалтӥз но ӧз тӥялты,
Жильы сое бинялтӥз.
Ӟигаро ке но вал Камит,
Андан бугоуэз ӧз вормы.
Удмуртлэн эксэйлы пумит
Дасям ӝутсконэз ӧз пӧрмы.

* * *

Мускоысен Сибирозь
Иськем юбоё кузь сюрес;
Ог гуртысен мукет гуртозь
Уг урылы сьӧд нюлэс.
Со вылтӥ ортче пыдйылчи,
Отӥ келяло рестанэз,
Отӥ ветлэ турлы вузчи,
Сотский лыктэ вытаны.

Гуртлэн пумаз бадӟым корка - 
Ортчисьёслы со кунокуа.
Кузёез узырме пумен,
Коньдонзэ лыдӟе сюрсэн.
Ёрос калык талы пайме:
"Кызьы, - шуэ, - та байке?"
Кудӥз шуэ: "Вузчи пыре,
Потонзэ уг пот ни берен".
Бадӟым корка одӥг пол
Вуиз карысь исправник.
Кузё пегӟем, дораз ӧвӧл.
Со дырысь со - разбойник.
Тӥни со кузё вал Быдыш - 
Эксэйлыклэн пал улваез.
Со дырысь бырйиз кабаш*
Сюрес вылын талан баез.
Мед талалоз вал баез.
Нош марлы талаз Ӝакыез?
Марлы вузаз Камитэз,
Вузаз удмурт калыкез?
Соин уго со Быдыш
Гурезь улысь ӧлексыез,
Востэм тылобурдоез
Бырйытэк сиись сьӧсь кырныж.
Кунэз гижы улаз возись
Ваё чырты орёлэн
Соос луо ог выжыысь.
Дышмон вань сьӧсьтэм лулолы.
Быдыш кудӟон сьӧркытӥ
Ӝакы потӥз калыке.
- Дышмондэс, - шуэ со, - кутыны
Чаляк ваньды люкаське.
Люкаськизы гурт калыкъёс.
Пото тыгылэм* куараос:
"Куштоно сое тылэ
Пеньзэ лэзёно тӧлъя. . ."
Нюлэскын сылэ сиресь кыз,
Кузили муӵ - выжыяз.
Отчы Быдыш разбойникез
Гольык мугорын гозъязы.
Виытэк сое удмуртъёс
Думылыса кельтӥзы.
Сьӧд Быдышез кузилиос
Улэпкын сиыса быдтӥзы.
Быдышлэн бӧрдэм куараез
Кема нюкъёстӥ вӧлдӥськиз.
Сьӧсь пӧйшур шат ас караз
Жаляса сое кылзӥськиз?
Эксэй писпулэсь улзэ
Вожомем удъёс чигизы. 
Вир юса юнмам выжызэ
Ӧз тырмы порыны ӟигарзы.

* * *

ТУННЭ НУНАЛ

Чорыгась пересь тодӥз
Верам кужымез вордӥськиз.
Заводъёсын быдэсмыса,
Азьланяз выль вож со ӵогиз. . .
Сьӧд сюен согиськем
Камитъёслэн мугорзы.
Горд вирен пыласькем
Нелькылэм музъемзы.
Выль пушйись писпулы
Мускытлык сётӥзы.
Та ӝужась улонлы
Выжылык дасязы. . .
Удмурт, пор ӟучен. . . ог кенешен
Камитлэн ужам заводаз
Тырше валче бригадаен
Вить арлы пусъем план бордаз. 
- Вуж улонмес ас улаз
Соге сюен коммун-юрт,
Кин уногес быгатоз
Солы сётыны андан, корт?!
Та кылъёсъя ужасьлэн
Ӝоггес берга вир сюлмаз.
Со ӝоглыкъя цехъёсын
Золгес кырӟа шкив-сюмыс. . .
Мартен-вулкан вӧлдэ андан
Удмурт бусылэн вылъёсаз.
Ужась вырӟе. . . вуж гурт гылӟе
Андан лавалэн улъёсаз.
Эксэй пуктэм десятникъёс
Выжы лэзёнтэм поремын.
Нокин уг шу: "Эй тӥ, шыръёс!.."
Ударной ужан удысын. . .
Эксэйлык кузьмаз крестьянлы
Куанерлык, сабан, пу усы.
Революци сётӥз тыршисьлы
Тодонлык, комбайн, Мы-ты-сы*. . .
Колхозын омыр дырекъя,
Трактор дыбыртэ, берга.
Моторез бусы тыр черекъя. . .
- Вае музъемдэс сюрс га!*
Кыре потӥз удмурт кыл,
Будэ удмурт кылбурет;
Школае сюриз удмурт ныл,
Быре пеймыт керемет.

Ваньмыз со уж тыршись пӧлы
Нюръяськытэк уг кылды.
Туктар. . . Быдыш. . . сьӧськаб класслы
Гу гудытэк уг буды.
Таӵе Иж котырын туннэ нунал - 
Кызь вить октябрьын вордскем пинал.
Озьы ке но Камит сярысь
Уз вун кырӟан калык сюлмысь:
"Чиль но чиль чилялоз
Сьӧд нюлэс вылъёсыд.
Со сьӧд нюлэс шоръёсад
Котырес возьёсыд.
Со возь шоръёсад
Лабырес сирпуэд.
Со сирпу улъёсад
Улылэм Камитэд. . ."
Кематэк уз вун вашкала зӥбет,
Удмурт лысьӧмен ӵыпем Оӵ ӵыпет. . .
Ижкар шорын гурезь йылын,
Вашкала куала бервылын,
Эксэй тусэз тодэ вайыса
Черк собор сылэ та виын.
Солэн вӧзаз, завод палаз,
Удмурт вир кисьтэм интыын,
Вить сэрегъем Горд кизили
Ворекъя, чиля Горд шайын.
Уд областьлы дас ар тырмиз.
Кызез, куамынэз тырмылоз.
Со шай вылын калык пӧлын
Музыка шудоз, поръялоз:
"Тӥ курбон луиды жугиськон понна,
Вунонтэм яратон калыклы
Тӥ сётӥды солы вань луэмзэ,
Солэн улэмезлы но эрикезлы.
Куддыр курадӟиды пеймыт пытсэтын,.
Тӥ вылэ жалятэк суд поныса
Куддыр коразы тӥлесьтыд йыръёстэс.
Куддыр Сибыре лэзьязы керттылыса. . ."
Музыка шудоз, сюлэмез позыртоз,
Нош уз поты синкыли.
Музыка шудоз, калык кырӟалоз
Мылкыд ӝутӥсь сэзь кылын:
"Кулонлэсь кышкатэк люкаськылэ,
Ситэк-ютэк улӥсь муртъёс.
Люкаськиды ке, озьы тӥни
Кур карисез вормын луоз. . ."

Печатламын М. Н. Тимашевлэн 1931 арын Ижкарын Удкнигаын потэм "Камит" книгаезъя. 
Поэмалэн кылыз туалаезлы матэ каремын.

1

Гажано редакция!
Ӟечбуресь "Инвожо" редакциын ужасьёс. Журналды удмурт егитъёслы потэ бере, 
аслэсьтым сюлэм висёнъёсме тӥледлы кисьтоно кариськи. Ньыль ар талэсь азьвыл 
кышнояськи. Туж уг поты вал ӟуч нылэз басьтэме. Но, кызьы шуо удмуртъёс, ачиз 
бордам тэбиниз, нокызьы но со бордысь мозмытскеме ӧз луы ни. Анай-атае кемалась 
пенсиын ни. Соослы секыт йӧтоз шуыса, сюан но лэсьтэме уг поты вал, кузпалы монэ 
ачиз ёртӥз. Кӧня отчы уксё кисьтӥськиз! Собере городысь нылэз гуртэ нуоно луиз. 
Солы отын туж уг кельшы вал дэри дыръя сапеген ветлыны, удмуртъёсты аслэсьтыз 
улӥе карылӥз. Нош куке вордӥськиз Оксанамы, олокыӵе но суредъёсын пумиськоно 
луиськиз. Анай-атайме со пиналзэ кияз но кутылыны ӧз лэзьылы. Юрдӥсько, пе, 
тӥлесьтыд. Мон весь чидай. Угось кык тылъёс вискын сопала но, тапала но тэтчыны 
кышкыт, кенжод, ӝуалод но пеньӟод. Куке Оксаналы куинь арес тырмиз, мумы-бубыосы 
вӧзын улэмен, шенгыль гинэ мусояк удмурт кылын вераськыны шӧтаз. Ваньмы, кышное 
сяна, шумпотӥмы. Эх, берло анаез милемды паймытъяз. Со вотской кылын, пе, эн 
вераськы, вотяк нылпиосын эн шуды, песяед кие эн мыны, атаед котыртӥ гинэ эн 
берга. Озьы йыры кыӵесэ шедиз. 
Нош гырпумез бер луэ вылэм куртчыны. Чырты берам пуксиз кузпалы. Нуналлы быдэ 
монэ удмурт луэменым пыкылыны кутскиз. Малы мон асме мыскыл карыны кулэ, чиданэ 
быриз, ачим кузпалме анаез доры городэ нуыса кельтӥ. Малпасько, визьмаськоз ке, 
буйгатскоз но берытскоз, уз ке - ачиз тодоз. Туж мӧмисько нылылэсь. Солы гожтэт 
уг гожъяськы, анаез уг лэзьы, адӟиськылыны но пыраме уг луы - вотской шӧмдэ ик, 
пе, адӟеме уг поты. Бӧрысь ини тодӥ, кузпалылэн анай-атаез чылкак гуртысь потэм 
удмуртъёс вылӥллям. Нош нылзэс сыӵе "ӟуч" кариллям, паспортаз но удмурт луэмзэ 
гожтӥллямтэ. Ноку но соос ми азьын анай кылынызы ӧз вераськылэ. Озьыен, быдэсак 
янгыш татын соос луо. Нош кин луоз мынам нылы, чылк-чылк удмурт адямилэн нылыз-
пиез.
Эшшо одӥгзэ сюлэм висёнме вераме потэ на. Куке-соку городын ужай, анай-атае 
лябен, берен гуртэ бертоно кариськи, соку ик тӥни кузпалъяськи но. Уже мылы-
кыдыя но дышетскемея вал, трамвайно-троллейбусной управлениын инженер луыса 
ужай. Табере колхозэ потасько. Уждунмес аръёсын ум адӟылӥське. Лушкаськыны 
быгатӥд ке - улод, ӧд ке - куанермод. Туала арын асьмеды нокин жалясь ӧвӧл. Ас 
кужыменыд поттэм ваньбурдэ вузаны ке шат быгатӥд на. Вӧзамы ӵош будэм эшелэн 
чильк-вальк кисьтаськись дачаез сылэ. Кин тодэ, мар солэн пушказ, нош кырласянь, 
оло, быдэсак зарни вуэн кисьтамын. Аслаз ужаса поттэм коньдонэныз ке со 
лэсьтэмын луысал, гурт калык солы ӧй йыркуръяськысал, дыр. Эше мон мында ӧз но 
дышетскы, ӧз но курадӟы. Му вӧй поттонын огшоры шофёр луыса ужа. Нош кыӵе со 
улэ, ушъяськемысьтыз ӧскем потыны кутске, ым пумтӥз вӧй вия, пыдъёсыз музъемез 
шӧдытэк небыт ковёр вылтӥ кадь лёгасько. Сыӵе дыръя адями ассэ шӧдэмысь дугдэ 
вылэм: вылысьтыз вылаз машина басьтэ, выльысь выле квартиразэ воштэ, семьяезлэсь 
но аслэсьтыз арлы быдэ дуно пӧйшуръёслэсь дӥськутъёссэс вошъя. Малы одӥг кадь 
ӧвӧл та улон? Удмурт музъем улысь поттэм вӧймы, со ведь ваньмылэн асьмелэн 
ваньбурмы луэ. Малы одӥгез со дивидентэн валлин уксё пӧлын пылаське, мукетызлы 
адӟыны но со ӧвӧл. Толэзь уждунэз, эшелэн верамезъя, сюрсъёсын, миллионъёсын, 
мон сомында коньдонэз улытозям киям кутылэмын ӧвӧл. Сыӵе дыръя ньылонэ кыӵе ке 
бадӟым комок кугӟа, куанер но узыр - кызьы милемды та музъем чида?! Ми кадь 
начаръёслы кызьы улоно? Мар кароно?
Ураме потыса кесяськыса-а, кураськыса-а ветлоно? Котьмар кар, тонэ жалясь но, 
адӟем карись но уз луы. Нош кинлы кызьы улоно, кескич-а, шонер-а, улон ачиз, 
лэся, сое быръе.
В. Машкин,
Пичи Пурга ёрос.
Сергей Максимов
Нюлэслэн удмурт нимъёсыз*
Удмурт вераськетъёсын (диалектъёсын) нюлэсэз ниман понна пӧртэм пумо кылъёс 
кутӥсько. Со кылъёс возьматыны быгато нюлэслэсь быдӟалазэ, отын будӥсь 
писпуослэсь ӝуждалазэс, бадӟым яке пичи луэмзэс,кыӵе будос-писпуослэсь отын 
будэмзэс. Тани яг кылын нимало пужымо нюлэсэз, нош арама кылэз куто куаро 
писпуосын, куакъёсын басьтэм интыез. Векчи писпуо нюлэсэз уй пал удмуртъёс куд-
ог интыосын пеӵкезь шуо. 
Удмурт кун университетысь кылтодонъя лабораториын али дасяське удмурт 
диалектологи атлас, кудаз картаос вылын суредамын луоз нимаз кылъёслэн удмурт 
диалектъёсын вӧлмемзы. Котькуд карта чакламын одӥг кыӵе ке но валанлы 
(понятилы), нош со бордын гожтэмын луоз на валэктон кыл (комментарий). Та 
статьямы но огез сыӵе валэктон кыл вылэ пыкъяськыса гожтэмын. Со нюлэслэн огъя 
нимъёсызлы, мукет сямен вераса, бадӟым нюлэсэз ниман понна кутӥськись кылъёслы 
сӥземын.
1. Писпуо, куако интылэн огез тужгес но ӵем кутӥськись нимыз нюлэс кыл луэ. 
Со паськыт вӧлмемын элькунмылэн лымшор палаз - Грах, Алнаш, Кияса, Кизнер (уй 
палзэ лыдэ басьтытэк), Можга, Пичи Пурга (куд-ог гуртъёсты лыдэ басьтытэк), 
Завьял ёросъёсын, Воткинск ёросысь Мунчогурт ( Банное) но Кукуи гуртъёсын. Вавож 
но Можга ёросысь интыен-интыен одӥг гуртын ик кызьы ке нюлэс, озьы ик тэль кыл 
кутӥське. Нюлэс кыл ваньмаз сямен тупал вераськетъёсын (Башкир но Бигер 
элькунъёсын) тодмо луэ. Со сяна, та кыл шаермылэн уй палаз но пумиськылэ на - 
Балезино но Кез ёросъёсын, озьы ик Глаз ёросысь Куреггурт котырын.
Нюлэс кыл кемалась вӧлмемын ӧвӧл на. Та сярысь тодыны луэ ЪИЪ даурлэн пумаз 
глазов диалектъя Ю. Вихманнлэн гожтэм текстъёсысьтыз, кудъёсаз ӵаӵа-ен артэ 
нюлэс но пумиськылэ. Отысь ик нюлэс-эн герӟаськем таӵе кылъёсты но шедьтылоно: 
нюлэсмурт, нюлэснюня (ӵаӵамурт кылын артэ) [Ӟицхманн 1: 119, 130]. Али дыре 
Котгуртын, кытысь тодосчи троссэ глазов диалектъя материалъёссэ бичаз, нюлэсэз 
ӵаӵӵа (шаӵӵа) шуыса верало.
Берло дыръёсы поттэм диалект текстъёсын Эгра палась удмуртъёслэн но нюлэс, нюня, 
нюлэс утись, нюлэс буба кылъёссы пумиськыло [Кельмаков 1981:97, 118]. Та 
кылтэчетъёс (словосочетаниос) возьмато, эгра удмуртъёс но бадӟым нюлэсэз нюлэс 
кылын ик нимало вал шуыса, нош табере со интые вылӥын верам ёросын сик но тэль 
кылъёсты куто.
Пӧртэм интыосысь удмуртъёс нюлэс кылэз куараез ласянь мукет сяменгес верало. 
Вань куараосыз шонер возьматон понна соосты нимысьтыз транскрипциен гожтыны 
кулэ: н`улэс, н`у лэс, н`у лэш, н`ууэс ~ н`уэс, н`ууос~ н`уос, н`улэс, 
н`ылос, н`ълэс, н`ъуэс. 
Тросэз пусъем вариантъёс кылдэмын вераськетъёсын л куаралэн кыл шорын (мукет 
согласной азьын яке гласнойёс вискын) но кыл пумын слог кылыдтӥсьтэм у куарае 
выжеменыз яке быдэсак усеменыз ( л ~ у~ О). Соин ик н`ууэс (н`уэс), н`ууос 
(н`уос) кыл формаос ( л интые у (О) куараен) пумисько сыӵе диалектъёсын, 
кудъёсаз л согласной мукет кылъёсын но у (О) куарае потэ, кылсярысь: вау, 
скау, кыуыны - вал, скал, кылыны интые. Озьыен, вылӥ пусъем формаос кутӥсько 
Вавож но Кизнер палъёсын, интыен-интыен Можга но Грах ёросъёсын, со сяна, шошма 
вераськетын (Татарстан, Марий Эл, Киров обл. но кукмор вераськетэ пырись куд-ог 
гуртъёсын (Татарстан).
Мукет вариантъёс пӧлысь нырысь ик вераломы -ос-пумъемъёссэ: нууос (нуос) - 
пусъемын Порез гуртын (Киров обл., Малмыж р-н), Карлыган (Марий Эл), Бадӟым Сибы 
(Можга р-н); н`ылос - Канлы (Башкортостанысь Кушнаренко р-н). Малпаськомы, 
пусъем формаосын-ос нимаз суффикс луэ шуыса. Кылсярысь, -эс но -ос 
суффиксъёсын огдыре ик таӵе огкадь пуштросъем кылъёс пӧрмемын: (чонари) вотэс - 
вотос, валтос - валтэс. 
Ӝыныё небыт л куараен, яке Л-эн формаос, кутӥсько таӵе гуртъёсын: н`улэс - 
Ташкичи (Башкортостанысь Илиш р-н), н`улэш - Свердловск обл., Красноуфимск р-
н). л куараез таӵе аспӧртэмлыко веран нырысетӥяз гуртын бигер, нош берлояз пор 
кылъёслэн пыӵамзы (влиянизы) улсын кылдэмын. Юваослэн н`улэш кылазы кыл пуысь 
с-лэн ш-е выжемез но поръёсын кусып воземенызы валэктыны луэ. Та вераськетын 
чурыт с но з куараос ваньмаз вашкала кылъёсын ш но ж куарае потэмын 
[Насибуллин 1: 94-95]. Соин сэрен красноуфимск удмуртъёс, шуом, со нюлэскы 
мынӥз интые шо н`улэшкъ мъниж (шо нюлешкы мынӥж) вералозы. 
Нырысетӥ кылъёсысь (слогысь) у интые ы (ъ) куара пусъемын Башкортостанысь 
Канлыын (н`ылос), Балезино ёросысь Гуръякарын (н`ълэс) но Татарстанысь Лельвиж 
гуртын (н`ъуэс). Озьы ик куд-ог гуртъёсысь (Филипповка, Кукмор р-н; Вылысь 
Балтач, Башкортостанысь Татышлы р-н) н`улэс форма шедьтэмын, кудаз у интые 
у (ымдуръям ы) кутӥське.
Эскероно кылмы туж вазь шеде тодосчиослэн син шоразы, нырысьсэ 1733-тӥ аре сое 
пусъе Петербург Наукаосъя Академилэн членэз Г. Ф. Миллер Нулӥсс 
вариантэн[Тепляшина 1966:39]. Берлогес со сюре удмурт кыллэн нырысетӥ 
грамматикаяз (1775) но Захарий Кротовлэн кылсузьетаз (словаряз) (1785) 
[Грамматика 25; Кротов 150]. 
Финн кылчилэн Ю. Вихманнлэн малпамезъя, нюлэс кыллэн кылдэмез ньылпу писпулэн 
нимыныз герӟаськемын. Озьы ик тодосчи пусъе, та кылэз куке но вань удмуртъёс 
нюлэсэз ниман понна куто вал, дыр, шуыса [Ӟицхманн 1923-1: 
201-202]. Академик Б. А. Серебренниковлэн эскеремезъя, кыллэн пумысьтыз -эс (-
ес) суффикс вашкала урал вакытэ кылдэм *-кс(-ск) кылӥтэтысь 
азинскемын, кылсярысь, со соӧмус (соӧмуксӥ- ) `зундэс` финн кылын кутӥське, 
ӵошатэ: соӧми `чиньы` [Серебренников 1: 145-146]. Та суффикслэн к куараез 
нюлэс кылын тросаз интыез возьматӥсь падежъёсын выльысь потэ: нюлэс-к-ы, нюлэс-
к-ын, нюлэс-к-ысь но мукет.
2. Тэль. Бадӟым нюлэслэсь нимзэ возьматон понна та кыл Калмез но Вало шуръёс 
котырын вӧлмемын: Якшур-Бодья, Сьӧлта, Смси, Вавож, Ува ёросъёсын, Эгра ёрослэн 
лымшор но шунды пуксён палаз, Завьял ёросысь куд-ог гуртъёсын, Можга но Кизнер 
ёросъёслэн уй палаз. Озьы ик со Киров улосысь Вятской Поляна, Малмыж, Кильмезь, 
Уни (татысь калмез удмуртъёс пӧлын гинэ) ёросъёсын. Красногорск ёросысь Малягурт 
котыръёсын та кыл ӵаӵӵа кылын артэ кутӥське.
Вераны кулэ, тэль но мукет интыосын но паськыт вӧлмемын, но пуштросэз солэн 
кӧня ке муетгес луэ. Та пумысен М. Г. Атаманов 1987:69 гожтэ, тэль кыл 
лымшор но уйпал удмуртъёс дорын мелкий лес, густой подлесок, чащоба; заросли 
молодого хвойного леса пуштросэн кутӥське шуыса. Нош финн тодосчи , Вихманн ог 
сю ар талэсь азьло сое таӵе валатонъёсын пусъем: `лес (небольшой)` (елабуга 
диалект), `роща, лесок, лесной массив` (глазов, елабуга, малмыж-уржум, уфа 
диалектъёс), `лес вообще` (малмыж диалект), `заросли, кустарник` (малмыж-
уржум диалект) [ӞӞ 258] .
Нырысетӥ источникъёс, кудаз сюремын тэль, - со удмурт кыллэн нырысетӥ 
грамматикаез (1775) но Захарий Кротовлэн кылсузьетэз (1785) [Грамматика 25; 
Кротов 216] .
Эскероно кылмылэн кылдэмез сярысь ас малпанзэ нырысь ик Ф. Видеманн вераз, луоз. 
1880 аре потэм коми-немец словараз со пусъе, та кыл коми-пермяк ӵӥл` `пичигес 
ӵем пинал нюлэс` кылын герӟаськемын шуыса [Ӟиӥд. 535]. Венгер тодосчи Ирен 
Шебештьен удмурт но коми кылысь тэль (ӵӥл`) кылэз ӵошатэ венгер ӵӧлды 
`тыпы` но ханты ӵаи, ӵайӥ `нюлэс, сьӧд нюлэс` кылъёсын [НыК : 4-
14]. Коми этимологи словарьын удмурт но коми-пермяк тэль кылэз коми-зырян 
миль, мильцӧд `густые заросли сосняка; густой молодой хвойный лес` кылъёсын 
герӟало но, вашкала пуштросэз `густой подлесок, заросли леса` вылэм шуыса 
лыдъяло. Отын ик вылӥ верам перм кылъёсты венгер ӵӧлды `куак(ъёс)` кылын 
ӵошато [КЭСК 279]. Нош венгер этимологи словарез лэсьтӥсьёс таин соглаш уг луо - 
ӵӧл но ӵӧлды тыпыез нимась венгер кылъёс, соослэн малпамзыя, алан (вашкала 
осетин) кылысь асэстэмын [ӤӞУ 1539-1540].
3. Ӵаӵӵа кыл вӧлмемын Чупчи шорысь но улланьысь удмуртъёслэн: Киров улосысь 
Слободской, Зуевка, Фалёнка, Богородск, Уни (ватка удмуртъёслэн гинэ), Омутнинск 
ёросъёсын, шаерысьтымы Яр, Глазов, Юкаменск, Красногорск ёросъёсын, озьы ик 
Балезино ёросысь куд-ог гуртъёсын.
Ӵаӵӵа кыллэн но трос гинэ куараезъя пӧртэмлыкъёсыз: ӵашша, шаӵӵа, чашша, ташша, 
ташйа. Ӵашша но шаӵӵа вариантъёс со гуртъёсысь ик пусъемын, кытын ӵаӵӵа шуыса 
верасько. Кылсярысь, шаӵӵа форма Глаз ёросысь Турбашур но Котгуртын кутӥське.
Чашша, ташша, ташйа, чашйа вариантъёс бесерман гуртъёсын вӧлмемын. Та формаос 
кылдэмын бесерман диалектлэн аспӧртэмлыкысьтыз, кудаз ӵ (но ӝ) куара уг 
кутӥськы, нош гласной но ш яке ж куараос азьын ч куара ӵемысь т` куарае 
выже (ч+Гш/Гж=т +Гш/Гж), ӵошатэ: бӥс. чэж, т`эж удм.лит. ӵӧж, бес. чуж, т`уж 
удм. лит. ӵуж.
Уйпал удмуртъёслэн (но бесерманъёслэн) сяна, М. Г. Атамановлэн [1: 71] 
гожтэмезъя, ӵашка, ӵашша выллем кылъёс шор но куд-ог лымшор районъёсын но 
пумиськыло. Но отын та кылъёс мукетгес пуштросэн кутӥсько: 1) `густо разросшееся 
мелколесье` 2) `островок леса посреди поля` 3) `роща`.
Гожтэм удмурт источникъёс пӧлысь нырысь ик эскероно кылмы чатча `лес` формаен 
Захарий Кротовлэн кылсузьетаз (1785) сюре [Кротов 254]. Ог сю ар берлогес 
(1880) озьы ик сое Ф. Видеманн коми-немец словарезлэн удмурт-немец приложенияз 
пыртэ [Ӟиӥд. 540].
Тросэз лыдӟисьёс понна вератэк но валамон, дыр, ӵаӵӵа кыл ӟуч кылысь асэстэмын 
шуыса, ӵошатэ: чаща `густой частый лес; заросль`. Ӟуч кылэз эскерись немец 
тодосчилэн Макс Фасмерлэн малпамезъя, чаща кыл частый тодметнимлэсь пӧрмемын. 
Берлоез кыллы тупась формаос, тросаз славян кылъёсын сяна, литва кылын но вань 
[Васмӥӧ 1: 305-306]. Шор но лымшор ёросъёсын пумиськись ӵашка форма ӟуч 
чащка кыллэсь потэмын, луоз.
4. Сик. Таиз нюлэс ним вӧлмемын Дэбес но Шаркан палъёсын, Кез ёрослэн лымшор 
люкетаз, Эгра ёрослэн ӵук пал люкетаз, озьы ик Балезино ёросысь Андрейшур 
котырын но Воткинск ёросысь Сьӧдӟи (Чёрный ключ) гуртын. Со сяна, нюлэслэн огъя 
нимыз чотын сик кыл Пичи Пурга ёросысь Бӧдья-Пуро (Сундуково), Бурангурт 
(нюлэс но яг кылъёсын артэ) но Абдэс-Урдэс (нюлэс но ляг кылъёсын артэ) 
гуртъёсын пумиське.
Та кыллэн куарая пӧртэмлыкъёсыз трос ӧвӧл. ЪИЪ даурлэн пумаз финн тодосчи Ю. 
Вихманн та кылэз Башкортостанысь Качак гуртысь чик вылтусын `роща, лесок, 
глухой лес` пуштросэн пусъем [ӞӞ 234]. Кукмор удмуртъёслэн инты нимъёсазы 
чик формалэн пумиськемез сярысь озьы ик В. К. Кельмаков [1: 93] ивортэ. Нош 
М. Г. Атаманов [1: 70] та кылэз ик лымшор Удмуртиысь с`иг тусын пусъем. 
Вылӥын гожтӥмы вал, кытын сик кыл бадӟым нюлэсэз возьматон понна кутӥське. 
Табере вераломы, кыӵе пуштросэн сое пӧртэм тодосчиос пусйиллям. Захарий 
Кротовлэн кылсузьетаз (1785) со `лес` шуыса сётэмын, Ф. Видеманнлэн (1880) - 
`лес, кустарник`; Ю. Вихманн ЪИЪ даурлэн пумаз таӵе валатонъёссэ пусъем: `лес` 
(глазов диалект), `перелесок, лесок` (малмыж но елабуга диалект), `роща, лесок, 
глухой (тёмный) лес` (уфа диалект), нош Б. Мункачи (1896) - `глухой лес, роща; 
густой лес, чащоба` (сарапул диалект) [Кротов 198; Ӟиӥд. 525; ӞӞ 234; Мунк. 
454]. Атаманов М. Г. [1: 70] сик кыллэн валтӥсь валатонэз `смешанный лес 
небольших размеров` луэ шуыса лыдъя. Нош Якшур-Бодья ёросысь Ванькагуртысь 
(мал. Ошворцы) та кылэз `бусы шорысь пичигес нюлэс` пуштросэн гожтэмын.
Коми тодосчи Е. С. Гуляев сик удмурт кылэз пӧрмемезъя сикт `деревня, 
селение, село`, сик `островок в лесу, выделяющийся обилием каких-л. ягод; 
ягодный куст`, `группа, коллектив родственников` коми кылъёсын оградэ пуктэ. 
Огъя перм вакытэ солэн пуштросэз `совокупность, множество, группа однородных 
предметов` вылэм шуыса лыдъя [КЭСК 255].
5. Сурд. Нюлэслэн огъя нимыз чотын таиз кыл сурд тусын тодмо бавлы удмуртъёслы 
- Татарстанлэн лымшораз интыяськем Бавлы ёросын но Башкортостанысь Ермекей 
ёросысь Купчанай гуртын. Удмуртиысь куд-ог лымшор но шор ёросъёсын сурд кыл 
куаро нюлэсэз возьматон понна кутӥське, кылсярысь, кызьпу цурд, пипу сурд 
кылтэчетъёсын. Тросаз словарьёсын со `роща (лиственная)` валатонэн сётэмын. Нош 
Видеманнлэн кылсузьетаз (1880), кудӥз гожтэм источникъёс пӧлысь нырысетӥез сик 
кылэз пусъе, цолэн пуштросэз `кызьпу арама (нюлэс)` шуыса тодмостэмын [Ӟиӥд. 
528].
Тодосчиос, сурд кыллэсь пӧрмемзэ эскерыкузы, сое сорд `местность позади поля; 
небольшой лес; луг с ручьем` коми кылын ӵошато. Озьы ик та перм кылъёсты ӥӧдӧ 
`лес, роща` венгер кылын герӟало [КЭСК 261]. Но венгер кыллэсь этимологи 
кылсузьетсэ лэсьтӥсьёс пусъем кылэз перм кылъёсын ӵошатонлы пумит луо [ӤӞУ 328-
329].
Вераны кулэ, эскероно кылмы вашкала перм кылэ булгар (вашкала чуваш) кылысь 
сюрыны быгатэ вал шуыса. Тани чуваш кылын солы тупась сарт кыл `холм, 
возвышенность; невыоская гора` пуштросэн кутӥське [ЧРС 321]. Та выллем кыл 
тросаз мукет тюрк кылъёсын но вань [Ӧасанӥн 1: 419]. Пуштросэзлэсь удмурт 
кыллы тупамтэзэ тани кызьы валэктыны луэ: гурезез ниман кыллэн `нюлэс` валатонэ 
выжемез дуннеысь кылъёсын ӵем гинэ пумиськылэ; кылсярысь, комиос нюлэсэз вӧр 
шуо, нош кылдэмез ласянь со удмурт выр кыллы тупа.
Сурд кыллэн огъя удмурт валатонэз `арама, куаро нюлэс` вал, дыр. Бавлы 
вераськетын та кыллэн пуштросэзлэсь воштӥськемзэ (паськытамзэ) М. Г. Атаманов 
[1: 70] тани маин валэктэ: бавлы удмуртъёс нюлэсо степьёсын уло, кытын ӵем 
дыръя куаро писпуос гинэ будо, соин ик `кызьпу арама` пуштросэн кутӥськись кылын 
соос, пе, котькыӵе нюлэсэз ниманы кутскиллям.
6. Яг. Та кыл пӧртэм интыосысь удмуртъёслы тодмо, но нюлэсэз огъя ниман кыл 
чотын Пичи Пурга палан гинэ пумиське. Яган-Докъяын но Шор Кечолын со сяна 
нюлэсэз ниманы мукет кылзы но ӧвӧл ни кадь, кылсярысь, Яган-Докъяын кызьпу 
арамаез но кызьпу яг шуо. Куд-ог музон гуртъёсын та кыл кутӥське нюлэслэн 
мукет нимъёсыныз артэ: Улын Юри (нюлэс), Абдэс-Урдэс но Буран (нюлэс, сик) но 
Завьял ёросысь Ожмос-Пурга (нюлэс).
Эскероно кыллэсь л`аг вариантсэ Абдэс-Урдэс но Улын Юри гуртъёсын пусъемын. 
Озьы ик таӵе тусын сое верало ваньмаз сямен лымшор наречиын, кытын та кыл 
кутӥське. Со сяна, Башкир Элькунын инты нимъёсын со ик ӟаг вылтусын 
пумиськылэ.
Гожтэм источникъёсы нырысьсэ та кыл удмурт кыллэн нырысетӥ грамматикаяз (1775) 
сюре [Грамматика 23]. Ачиз нюлэс нимыз ӧвӧл ке но отын, со Ягъ мули `брусника` 
кылын валче пусъемын. Нош Захарий Кротовлэн кылсузьетаз (1785) со таӵе тусын 
сётэмын - ягь `сосняк, бор` [Кротов 283].
Кылдэмез ласянь удмурт яг кыл коми яг кылын герӟаськемын шуыса, нырысьсэ ас 
кылсузьетаз Ф. Видеманн пусъе [Ӟиӥд. 478]. Тодосчиос вылӥын верам перм кылъёсты 
йа эм, лаъэм `песчаная пустошь, заросшая сосновым лесом` ханты кылъёсын ӵошато 
но финн-угор формаез *лаккЗ `соцновый (еловый) лес` вал шуыса малпало [УӤӞ 88]. 
Пор кылын но вань та выллемесь ик кылъёс: йакӵӥ, д`акӵӥ, йакӵ ?, д`акӵ?, й?кӵ? 
`очень высокое, стройное, без сучьев (дерево); сосна; сосновый лес`, - но соос, 
венгер тодоцчилэн Габор Берецкилэн малпамезъя, огъя перм кылысь (яке вашкала 
удмурт кылысь) асэстэмын [Бӥӧӥцзки 1: 97-98].
Кызьы верамы вал ини, вылӥын сэрттӥмы-пертчимы нюлэслэсь огъя нимъёссэ. Кӧня ке 
гожтомы на нюлэслэн куд-ог аспӧртэмлыко нимъёсыз сярысь но.
Бӧлек. Та кыл пусъемын Башкортостанысь Бурай ёросысь Кӧйгуртын (Кизганбашын). 
Нюлэс кылын артэ сое интыысь нюлэсъёссэс ниман понна куто. Со бигер (яке 
башкир) кылысь асэстэмын: урал бигеръёслэн вераськетазы булэк кыл `мелкий 
лес, полесье` шуэмез возьматэ [Тат. Диал. 110]. Таиз кыл огъя тюрк *бэ:л- 
`люкыны` глагол выжыысь пӧрмемын. Пӧртэм тюрк кылъёсын солэн таӵе валатонъёсыз: 
`часть`, `перегородка`, `группа`, чув. пулек ёроща, лесокё [ ЭСТЯ 214-217].
Кызьы адӟиськомы, чувашъёс но та кылын (пичи) нюлэсэз ниманы быгато. Солэн сыӵе 
пуштросэз `висъет (перегородка)` валатонысь пӧрмемын. Угось нюлэсо степьёсын 
ӵемысь нюлэсъёс нюк кузя гинэ будо, яке соос юри мерттылэмын сюбег чурен гинэ 
бусыос вискы. Озьыен, бӧлек (< булэк) умойгес тупа со палась нюлэсъёсты ниман 
понна. Озьы бере, кӧня ке дасо аръёс ортчыса, кӧйгуртъёс нюлэс кылзэс, оло, 
чылкак вунэтозы.
Арка. Та кылэз Р. Ш. Насибуллин [1: 109] пусъе камсьӧр удмуртъёслэсь таӵе 
кылтэчетъёсын: пашпу (пашпу) арка `орешник, ореховая роща`, кызо арка (Качкын-
Турай) `еловый лес`. Тодосчилэн малпамезъя, та кыл потэмын бигер яке башкир 
арка хребет (горы) кыллэсь. Сурд кылэз эскерыку, верамы ни вал, дуннеысь 
кылъёсын ӵемысь "нюлэс" валан "гурезь" валанысь кылдыны быгатэ шуыса. Озьыен, 
таӵе воштӥськонэз адӟыны луэ та кыл вылтӥ но. Ватсаса вераны кулэ на, арка 
кыллэн шонергес валатонэз камсьӧр удмуртъёслэн `писпуэн (нюлэсэн) басьтэм гурезь 
(выр)` луэ шуыса.
Нюк. Таиз кыл нюлэсэз ниман кыл чотын пусъемын Вавож ёросысь Куашур гуртын. 
Шонергес валатонэз солэн `нюкысь нюлэс` луыны кулэ. Нош нюлэслэсн огъя нимъёсыз 
чотын со гуртын нюлэс но тэль кылъёс кутӥсько. Нюк кыллэн `нюлэс` валатонэн 
кутӥськемезлы туж ик паймыны кулэ ӧвӧл, дыр, угось тросаз ёросъёсын асьмелэн 
ӵошкыт интыос гырылэмын, нош нюлэсъёс нёжалъёсын, нюкъёсын гинэ кылемын на. Тани 
со выллем кылын ик нюлэсъёссы нимамын Глаз ёросысь Котгурт но Турбашур 
котыръёсын: донды-гоп, мӧля-гоп, родя-гоп, кырок-гоп. Вераны кулэ, гоп кыл 
кызьы ке вылӥ верам гуртъёсын, озьы ик трос мукет интыосын `нёжал, нюк` 
пуштросэн кутӥське шуыса.
Куаро нюлэсэз возьматон понна, кылсярысь, кызьпу нюлэсэз, пӧртэм интыосысь 
удмуртъёс турлы амалъёс куто. Тани лымшор но куд-ог шор ёросъёсын паськыт 
вӧлмемын бигер кылысь басьтэм арама (кызьпу арама) кыл. Та кылын ӵемысь нимало 
озьы ик шур кузя будӥсь векчи писпуосты, куакъёсты. Нылга но Кизнер котырын 
кызьпу нюлэсэз возь яке вӧзь (кызьпу возь/вӧзь) шуо. Герӟаськемын-а со возь 
(выл) кылын, со сярысь али шуг вераны. Трос интыосын кызьпу нюлэсэз кызьпуо пӧл 
шуо. Валамон ини, пӧл кыл та кылтэчетын кылберлэн (послелоглэн) дӥньыз луэ 
шуыса, ӵошатэ: пӧлын, пӧлы, калык пӧлын, кызьпу пӧлын но мукет.
Глаз котырысь пересьёслэн вераськоназы возиськемын на тыло (кызьпу тыло) кыл 
но. Лыткин В. И. но Тепляшина Т. И. [1: 225] глаз палъёсысь ик сое кызьпупӧл 
тыло кылтэчетын пусйиллям. Мукет палан со инты нимъёсын гинэ кылемын на, лэся, 
кылсярысь, таӵе гурт нимъёсын: Тыло, Тыловай, Тыловыл, Тылойыл, Тылошур. Коми 
кылын талы тупась тыла кыл `подсека` валатонэн кутӥське; огъя перм кылын 
солэн пуштросэз `подлесок`, `молодой лес, удобный для расчистки под пашню` вылэм 
шуыса лыдъяло [КЭСК 292-293]. Озьы ик куд-ог интыосын пичигес кызьпу нюлэсэз 
огшоры гинэ кызьпуо инты шуо (сурд но яг кылъёс сярысь вылӥын верамы ни).
Бавлы (Татарстан) удмуртъёс пичигес нюлэсэз ниман понна писпулэн нимыз борды 
бигерысь асэстэм -лык суффиксэз ито, кылсярысь, кызьпулык, пипулык. Нош 
Башкортостанысь удмуртъёс та суффикс азе -о- кылӥтэтэз ватсало на: кызьпуолык, 
пипуолык.
Озьыен, удмурт диалектъёсын нюлэслэн огъя нимыз чотын (бадӟым нюлэсэз ниман 
понна) таӵе кылъёс кутӥсько: нюлэс, тэль, сик, ӵаӵӵа, сурд но яг. Пӧртэм пумо 
пичигес нюлэсъёсты ниманы удмуртъёслэн озьы ик трос нимысьтыз кылъёссы вань. Но 
вераны кулэ, туала дыръя трос интыосын соосыз пересь калык гинэ тодэ на.
5

 Ӟечбуресь, "инвожоос"!
Мон улӥсько Башкириысь пичи гинэ Юда гуртын. Мыным 14 арес ини. Мон туж 
яратӥсько тӥлесьтыд журналдэс лыдӟыны. Отысь вӧсьлы сӥзем ялондэс адӟи но 
вӧсяськон кылъёсты гожтэме потӥз.
Остэ, Инмаре, Кылчинэ!
Буре вайыса, шыдэн, нянен потӥськом.
Остэ, бадӟым Инмаре!
Кизем, пазьгем юосмы удалтысалзы ке,
Шуныт, небыт зоръёстэ сётысалыд ке. . .
Дунне айбат мед кылёз,
Жугиськон медаз пот, Инмаре, Кылчинэ,
Пудоос таза мед луозы.
Дунне вылэ шудо, таза нылпиос мед вордӥськозы,
Анай-атайзылы но, калыклы но ярась нылпиос мед луозы.
Тыллэсь, тӧллэсь сакласа улысалыд ке, Инмаре, Кылчинэ.

Таиз ведӥнъёслэн каргашон* кылъёссы:
Инмаре, канае,
Шудды медаз луы.
Вордӥськем интыосты мед кулылозы.
Дунне вылын огез но медаз улы.
Ачид но кема медад улы.
Мон тонэ аслам кылъёсыным виё.
Гуртамы нылпи вордӥське ке, анаез но, атаез но туж шумпото. Калыкъёс но гумырез 
кузь мед луоз шуо. Нош кин ке кулэ ке, вань туганъёсыз бӧрдо. Соослэн серекъямзы 
но уг поты ни. Кин ке кышнояське ке, вань туганъёсты*, куное ӧтьыса, винаен 
сектало. Выль кенакез удмурт сямен дӥсяло. Сое ошмесысь ву вайыто но со вузэс 
уксёен вузало.
Елена Шайдуллина.

*каргашон - каргаськон
*туган - бӧляк, ӵыжы-выжы
Уно Хольмберг
Перма калыкъёслэн осконъёссы
(Азьланьтӥськемез. Кутсконэз 1-3, 5-6 номеръёсын)
Гавриловлэн гожъямъёсысьтыз валано, кызьы ке мукет нимаз кисьтонъёсын, озьы ик 
таяз но азьлогес кулэм ӵыжы-выжыос буре ваёно кулэм муртэн ӵош ик сиыны-юыны 
лыкто. Лы нуллон интылэсь нимзэ тодосчи уг поттылы ке но, со кыр куян инты шуыса 
валано. Куд-ог палъёсын вал сюанысь лыосты шай вылэ ик нуо.
Кулэм муртэз шумпоттытон сярысь Вихманн тазьы маде. Сиськем бере корка корзина 
пырто. Солэн пыдсаз куро тыремын луэ. Отчы валлэсь вань лыоссэ люкало, йыркобызэ 
вылӥяз поно. Йыркобыяз улэп валлы сямен сермет поно. Кинлэн мылыз потэ, лыос 
вылэ эшшо дэра вандэтъёс но одӥг коньы коньдон тыро на. Собере кутске шулдыр 
йыр-пыд сётон эктон. Пересь удмурт воргоронъёс но кышноос, ог-огзы сьӧры пото 
но, корзинаез бергатыса, вашкала гуръя удмурт эктонэз экто. Эктыку ӵемысь 
черектэм куараос но кылӥсько. Эктӥсь муртлэсь котыраз сылӥсь калык юа: "Кинлы 
понна эктӥськод?" Соиз кулэм муртлэсь нимзэ вера. Пересь калык эктыны быгатэмзэс 
возьматэмзы бере, ваньзы, егитэз но, пересез но, корзина котыре сюан гуръёсты 
кырӟаны султо. Шулдыр кырӟанэз кубыз (скрипка) шудэм но пыдын тыпыртэм улсын 
кырӟало. Куд-ог кырӟанъёсты нимысьтыз та сэбед дыръя гинэ быдэсто, кылсярысь, 
таӵезэ: 
"Вал гидэд, кузё валъёсын тырмемын,
Огзэ валдэ нуимы ке но,
Кылемез валъёсыд мед удалтозы!"

Кырӟан йылпумъяськем бере, корзинаез азбаре потто. Отын лыосты но куноосты 
шайвылэ нуыны кыткем валъёс возьмаса сыло ини. Корзинаез нырысетӥ дӧдьые поно. 
Вандэм валлэсь кузэ музэ вӧлдыса, со вылын экто, котыраз сюан гуръёсты кырӟало. 
Собере вань калык гырлы жингыртэм улсын но сюан кырӟанъёслэн чузъяськемзы улсын 
вашкала языческой шайвылэ ворттылыны мынэ.
Со сяна, Верещагин тани ма сярысь маде на: курбон (виро) сётоно пудолэн, пе, 
нокыӵе вордӥськем шекъёсыз медаз луэ. Кылсярысь, скал ке со, сюръёсыз быдэсэсь 
луыны кулэ но мукет. Озьы ик та тодосчи вера ӵыжы-выжыос кисьтонэ лыктыкузы маке 
но сьӧразы ваё шуыса, кумышка яке кыӵе ке но пӧрам сиёнъёс, сур но куддыр ваё. 
Со сяна, котькуд пиосмурт сюсьтыл вае на. Пиосмуртэз ке буре ваё, пиосмуртъёсгес 
ваньзэ радъяны туртто, кышномуртэз ке - нылкышноос.
Начар муртъёслэн виро сётыны пудозы уг тырмы ке, курбонлы одно ик кулэ луись йыр 
но пыд лыосты базарысь басьто. Соосты собере шайвылэ нуо.
Берло пусъем йылолэз Осокин тодосчи Малмыж утемысь удмуртъёслэсь тодэм.
Коркалэн кузёез туж урод, номырлы ярантэм нин куды шедьтэ. Отчы адямиосын но 
пуныосын волятэм-сыскем пӧртэм лыосты, куасьмем нянь кӧмъёсты но одӥг культо 
куро понэ. Со кудызэ собере ӝӧк вылэ пуктэ, кык сюсьтыл ӝуатэ. Огзэ куды дуре 
юнматэ, мукетсэ ӧс янак вылэ пуктэ. Собере кияз куды кутыса, йыраз изьыен 
коркалэн тӧр сэрегез пала йыбырттылэ. Соин ӵош вань семьяез вӧсяськыса йыбырттэ, 
Инмар кулэм муртэз, сютэм но кезьытын возьыса медаз курадӟыты.
Вӧсяськон бырем бере, коралэн кузёез лыосын но нянь кӧмен тырмытэм кудыез ӧс 
янак вылэ пуктэм сюсьтыл вадьсытӥ поттэ но кудыысь куроез кенжытэ. Собере вань 
семья кудыын ӝуась тыллэн югытэныз нюлэскы мынэ но, кудыез курбон кузьым чотын 
писпуэ ошо, кулэм муртлы кӧттыр, шуныт мед ваёз шуыса. Озьы ик соос оско, кулэм 
мурт азьын быдэстоно ужзэс сюлмысь лэсьтӥзы шуыса.
Нимаз адямилы сӥзьыса кисьтон карем сяна, удмуртъёс озьы ик кыӵе ке но асьсэлы 
гинэ нуналъёсы огъя кисьтон ортчыто. Бускель культураослэн йылолъёссы 
пыӵаменызы, пӧртэм интыосын кисьтон ортчытон дырзы висъяськыло. Христиан оскон 
юнмам улосъёсын удмуртъёс кисьтонзэс каро ӟуч черкъя - пукро нуналэ (вуж стилья 
- коньывуонлэн 1-тӥ нуналаз), Дмитрийлэн нуналаз (коньывуонлэн 15-тӥ нуналаз), 
тройчае но радоницае, великтэм (быдӟым нунал) бере 10-тӥ нуналаз. Нош кытын 
язычество золгес утиськемын на, шуом, Кузон губерниын, кисьтон ортчыто тулыс 
великочетверик нуналэ (кулэм потон уй, ӵук мунчо уй) но тройча азьын покчиарняе, 
нош сӥзьыл - Казань Инмар-анайлэн (казанская богородица) нунал (вуж стилья 22-тӥ 
коньывуонэ) азьын покчиарняе. Со нуналъёсы ик ӵук пал удмуртъёс но огъя 
кисьтонъёссэс ортчытъяло. Котьмар ке но, кисьтон нуналъёс мурт культурая 
тупатскемын ини, угось вашкала йылолъя араз удмуртъёслэн кык гинэ бадӟым 
кисьтонзы луылэ вал, дыр, - тулыс но сӥзьыл. Та сярысь верало таӵе нимъёс: тулыс 
кисьтон но сӥзьыл кисьтон. Соос, Аминофф тодосчилэн пусъемезъя, арлэн тужгес но 
бадӟым кисьтонъёсыныз лыдъяло.
Огъя кисьтонъёсты удмуртъёс тазьы ортчыто: яке котькуд семья нимаз аслэсьтыз 
кулэм ӵыжы-выжыоссэ буре вае, яке иськавын-бӧлякъёс ӵош люкасько огъя 
пересьёссэс буре вайыны. Куддыр быдэс гурт но дэмен кисьтон ортчытэ. Сыӵе гуртын 
котьку сямен ваньзы ӵыжы-выжыос луо. Туала дыръя нырысетӥез кисьтон ортчытон сям 
ӵемгес пумиськылэ, луоз. Котьмар ке но, трос интыосын иськавын-бӧлякъёсын дэмен 
кисьтон каронлэн пытьыосыз асьме дырозь кылемын на.
Котькуд семья нимаз кисьтон карон учыръёсы но, берло ӵем дыръя ӵыжы-выжыоссы 
дортӥ ветло, таосызлэсь матысь адямиоссэс буре вайыса. Кылсярысь, Елабуга утемын 
нырысь кисьтонэз доразы каро, пересьёссэс, нимзэс вераса, сиыны-юыны ӧтё. Собере 
бускельёссы доры ветло на, кудъёсыныз ӵош пересьёссы улэп дыръязы тупаса улӥзы. 
Туж паськыт вӧлмемын сыӵе сям: ӵыжы-выжыос люкасько выжызылэн самой вуж корказ, 
дэмен пересьёссэс буре ваён понна. Та пумысен Кувшинский тодосчи вера, одӥг 
выжыысь калык, пе, бӧлякен-бӧлякен коркаосы люкаське.
Дэмен кисьтонъёс сярысь Богаевский тодосчи но маде. Но со шуэ, огазьын, пе, 
котьку ик ӵыжы-выжыос гинэ уг луо, умой бускельёс но, пе, огъя кисьтонэ 
пыриськыны быгато. Шугъяськытэк вераны луэ, бускельёсын ӵош кисьтон ортчытон сям 
берлогес ини кылдэмын шуыса. Вашкала йылолъя, кисьтонэ котьку ӵыжы-выжыос гинэ 
люкаськылӥзы, угось ӵыжы-выжыослэн огазеяськемзы ик тупа ини кулэмъёсты сӥлы 
каронлы. Со сяна, кулэм муртлы дасям курбон сиёнэз вашкала валанлыкъя муртъёслы 
сиыны уг яра вылэм.
Буре вайыны огазе люкаськем ӵыжы-выжыосты Васильев тодосчилэн верамезъя, 
удмуртъёс бӧляк шуыса нимало. Со маде, кыӵе ке но пусъем нуналэ вань ӵыжы-выжыос 
тужгес но кыдёкын улӥсь бӧляксылэн корказ люкасько шуыса. Выжыысьтызы самой 
пересез воргорон соку вуж сукман дӥся но сюсьтыл дасяны кутске. Сюсьтылъёсты 
тырмымон дасямез бере, соосты гур борды юнматъя но выжыысьтызы кулэм адямиоссэс 
буре вайыны ӧдъя. 
Котькудӥзлы со нянь пыры пыргытэ, пичигес табаньлэсь палэссэ тӥялтэ, озьы ик 
ӧжытак кумышка, сур но шыд лым адскисьтэм лулъёс понна пуктэм тусе кисьтэ. Со 
бӧрсьы со сямен ик каро вань куноос, кудъёссылэн пересьёссы сопал дуннее 
кошкемын. Тусьлэсь пуштроссэ, кызьы ӵемысь кисьтон дыръя каро, берло пуныослы 
сёто.
Миропольский тодосчи пусъе, вань ӵыжы-выжыослэн кисьтон ортчытыны люкаськоно, 
корказы выжыысьтызы тужгес но вужез корка луэ. Со сяна, со вера на, ӵош 
люкаськылэмзы бере, ӵыжы-выжыос коркась корка сиыса-юыса ветло на шуыса.
Вылӥын верам кисьтонъёс сяна, быдэс гуртэн ортчытоно бадӟым кисьтонъёс но луыло 
на. Бух тодосчи ивортэ, соосты гурто калыкен кисьтон нимало шуыса. Со нуналэ 
котькуд коркан ӝӧк выл тыр сиён луэ. Ӝыт пал гуртысь вань улӥсьёс, али гинэ 
бызем выль кенъёсты вератэк, люкаськыса коркась корка ветло, одӥгзэ но 
кельтытэк. Котькуд коркан пырем мурт, кулэм мурт понна пуктэм тусе сиён 
пырыосты куяса, таӵе кылъёсты вера: "Тӥ, сопал дуннее кемалась кошкемъёс, 
тӥледлы та сӥзем сиён азяды мед усёз!"
Вылӥын верам бадӟым кисьтонъёс кылдэмын луозы гуртъёсын вань ӵыжы-выжыослэн 
одӥг гуртын ӵош улон вакытъёсы Гавриловлэн тодэмезъя но, угось кисьтонэ со 
гуртын улӥсьёс гинэ пырисько, нош мурт гуртъёсысь нокинэ но уг ӧтё. Богаевский 
тодосчи Бух сямен ик пусъе, корка палэнысь вуэм кышноос кисьтонэ уг пырисько 
шуыса.
Быдэс бӧляк яке гурт дэмен кисьтон карыны ӧдъя ке, ӵемысь со кӧня ке нунал ӵоже 
кыстӥське. Миропольский тодосчи шуэ, сое куддыръя куинь но, ньыль но нунал каро, 
пе. Котьмар ке но, кисьтон ӵемгес ӵуказе ӵукнаяз ик йылпумъяське ни. Гаврилов 
маде, Кузон губерниысь удмуртъёс кисьтон нунал бере ӵукнаяз кык курег ӵого. Сиён 
пӧзьыку, вить яке тросгес коркась ӵыжы-выжыоссэс ӧтё. Соос лыктэмзы бере ик ӝӧк 
сьӧры уг пуксё. Кисьтонлы юри дасям сиёнэз ӝӧк вылэ пуктэмзэс витё, выж вылын 
сылыса уло. Пересь пиосмуртъёс но пересь кышномуртъёс, киязы пуньы басьтыса, 
котькудӥз черодэн тусе лым кисьтэ. Со сяна, отчы одӥг-ог шапык сур но кумышка 
кисьтыса, кулэмъёсты буре ваё. Тодосчилэн верамезъя кыкетӥ нуналэз кулэм 
муртъёслэсь макмырзэс веськатон понна гинэ ортчытӥське.
Васильев тодосчи вера, кисьтонлэн кыкетӥ нуналэз озьы ик кулэмъёсын люкиськон 
нунал луэ. Ӵукна атасэз ӵогем бере, кулэм муртъёсты азьло нуналаз сямен ик 
сӥльын но юонэн утялто, семьяоссы соослы тазьы вазисько: "Сие, юэ но бертэ 
дорады - эшъёсты доры, тупаса улэ, милемды жалялэ, милесьтым нылпиосмес утелэ, 
ю-няньмес, пудомес но тылобурдомес возьмалэ".
Нимысьтыз нуналъёсы ортчись кисьтонъёсты удмуртъёс, доразы сяна, шайвылын но 
каро. Шестаков тодосчи пусъе, Глазов утемысь удмуртъёс, пе, вань огъя кисьтонъёс 
дыръя шайвылэ ветло. Отчы пиосмуртъёс но нылкышноос, сьӧразы сиён басьтыса, вал 
вылын мыно. Отын соос куараен бӧрдо, сисько но юо, кылемзэ кулэмъёслы кельто. 
Первухин тодосчи вера, соос шайвылэ радница но пукро нуналъёсы ветло шуыса. 
Берлозэ нуналэз "пичи кисьтон" шуыса нимало, пе. Со нуналъёсы нимаз интыын, шур 
дурын, ӵӧж вандо но, тылобурдолэсь вирзэ бызись вуэ виятыса, тазьы верало: "Тани 
тӥледлы вирзэ сётӥськом, вождэс эн поттэ, пересьёс". Сӥльзэ соос доразы пӧзьто, 
нош кулэмъёслэсь пайзэс ӝӧк улысь ведра нергее куяло. Ӵуказеяз шайвылэ мыно, 
сьӧразы курег пуз, мильым, сур, сылал, нянь но кумышка басьто. Отын соос сюсьтыл 
ӝуато, шай вылэ ӝӧккышет валё, со вылэ сиён-юон тыро но кирос карыса вӧсясько: 
"Югытэтӥ ветлэ, пересьёс! Мурт музъеме кошкиды. Мед луоз тӥляд отын тыраз няньды 
но, сылалды но. Эшъёсыныды тупаса улэ. Тӥтэк мумытэм-айытэм но ӧжыт калыко 
кылимы. Киосмес ужмы бордысь эн ишкалтэ, семьямес эн куашкатэ-пазялэ, пудомес 
зӥбыса эн возе. Тани тӥледлы сюсьтылъёс ваиськом. Котьку югытын ветлэ! Тӥ понна 
тани курег пуз пуштэм но мильым, вождэс вайытэк саламмес басьтэ, сие, юэ но 
кырӟалэ". Сиськемзы бере, кылем сиёнзэс шай вылэ кельто, одӥг-ог быдэс курег пуз 
но паньгатыса кельто. Озьы ик сур но кумышка киськало, сиён-юон кулэм муртъёслы 
иназ мыноз шуыса оскыса.
Котьмар ке но, вань улосъёсы удмуртъёс огъя кисьтон нуналэ шайвылэ уг ветло. Ӵем 
дыръя отын тулыс кисьтонэз гинэ ортчыто. Георги тодосчи, кылсярысь, вера, 
удмуртъёс, пе, шайвылэ сӥль но мильым великочетверике (кулэм потон уй нуналэ) 
нуо. Александр Фукс тодосчи поттылэ, Кузон губерниын чылкак тулыс тройча дыръя 
гинэ шайвылэ ветло шуыса. Али ке но тросэзлэн черке пырымтэ удмуртъёслэн таӵе 
йылолзы возиське. Шайвылэ мыныкузы, сиён но юон сяна, озьы ик куаро писпулэсь 
лэсьтэм куды нуо. Сое берло кулэмезлэн шаез вылэ пукто. Али но интыен-интыен, 
кылсярысь, Кузон губерниысь Мамадыш утемын, кыр куян интые гырпум ӝужда буре 
ваён юбо (дьыбо) яке пус (билги) пукто сыӵе адямиослы, кудъёсыз сюрес вылысен 
яке войнаын бырыса, мурт музъеме ватэмын. Юбо вӧзы куддыр одӥг куко пичи ӝӧк 
лэсьто на. Кисьтон дыръя семьяосыз со вылэ сюсьтыл ӝуатыса пукто, кулэм муртлы 
курег сӥль, мильым но мукет сиён-юон тыро. Юбоез пукто, кулэм муртлэн лулыз 
вордскем гуртаз мед вуоз шуыса". Таӵе учыръёсы виро одӥг пол гинэ сёто, котькуд 
адямилэн бырем бераз.

Палэнын бырыны шедем муртъёслы пуктэм юбоос но ӝӧкъёс. Кузон губерниысь Мамадыш 
утем.

Комиослэн огъя кисьтонъёссы ӟуч черкен одӥг дыре ортчо но соин огвыллемесь луо. 
Тройча кисьтонэз (семик) шайвылын ортчыто, отчы пӧртэм пумо сиён но юон нуыса. 
Хлопин тодосчи ивортэ, сиёнэз интыяз луэмезъя пӧсен вуттыны туртто шуыса. Угось 
калык оске, кулэмъёс сиёнысь потӥсь парез ярато шуыса. 
Празднике лыктэмъёс ас пайзэс сиемзы бере, кылемзэ кураськисьёслы сёто. Куд-огез 
сиёнэз шайгуос вадьсы но пыргытыса кельто. Азьло дыръёсы кулэм муртлэн ым 
вадьсаз гон карыса, отчы юон киськало вылэм. Та пумысен Попов тазьы маде: 
Чердынск утемын, пе, нылкышноос семик дыръя кулэм ӵыжы-выжыоссылэн шайёссы вылэ 
лыктӥзы, сьӧразы но шаньги вайыса. Шаньгиез соос тӥяса шай вылэ тыризы, нош 
мусурез гопе кисьтӥзы. Сое кулэм муртлэн йыр вадьсаз гудӥзы. Кисьтыкузы бӧрдэм 
пыр веразы: "Ю, ю!" Глазов утемысь комиос сиёнэз, сарбаосты тырыса, кулэмъёс 
понна шайвылысь писпуос вылэ ошыло.
Кулэм ӵыжы-выжыоссэс сюдыкузы-сектакузы но буре вайыкузы, комиослэн кисьтонъёс 
дыръя кулэмъёс понна кыласа-бураса бӧрдон йылолзы вань. Кыласа-бураса бӧрдонэз 
озьы ик пумитаны луэ уй пал удмуртъёслэсь но, кылсярысь, Глазов утемын. Лымшор 
палангес улӥсь удмуртъёслэн сыӵе сямзы ӧвӧл бере, солэсь кылдэмзэ ӟучъёс пӧлысь 
утчаны кулэ, дыр.
Кылемез вань на.
3

Тимашев
ВАЁ МЫЛКЫД
Арня ӵоже
Калык ожын.
Уг изь уйзэ,
Куштэ карзэ.
Уг сётӥськы
Эксэй арми - 
Выль калыкен
Нюлэс тырме.
Кисьто вирзэс,
Уг чигнало.
Ӝуась йырзэс
Ӝуто вылэ:
- Дышмонмылэн
Пыд бервылыз
Та юр тылэн
Мед ӝуалоз;
Мед сутӥськоз
Улон юртэз;
Мед кыриськоз
Ӵыпем вуэз!
- Эн сутэлэ,
Ӟеч калыкъёс,
Тӥ жалялэ
Асьме юртмес, - 
Со пӧлысь ик
Мукет куара
Вӧлме сино
Кар котыре.
Туктар лыктӥз
Камит доры.
Веран кутскиз
Калык шоры:
-Асьмеос, эшъёс,
Ум вормелэ.
Эксэй мрутъёс
Уз сётскелэ.
Ог эсэпен
Улысалмы,
Каллен юртмес
Утьысалмы.
Марлы вырӟим,
Кышкам ужлэсь?
Мар ӟеч адӟим
Ӝутскон бордысь?
Бер ӧвӧл на,
Вай бертоме,
Шувалолы
Йыбырттоме. . .
Камит учкиз,
Куртчиз пиньзэ,
Тодаз ваиз 
Ужам ужзэ:
Кылем арын
Туктарлы со
Карлэн лудаз
Нюлэс сайкиз.
Жалямтэ вал
Ас мугорзэ.
Оскиське вал
Басьтын дунзэ.
- Вунэтӥд-а? - 
Туктар шуиз, - 
Сютэм арын
Кин-о сюдӥз?
Туктар бере
Камит вера:
- Дышмон - карамы,
Дышмон пӧламы.
Кутскем ужлэсь
Ум дугдэлэ,
Йыр вузасьлэсь
Ум кылзэлэ. . .
Камит палан
Ляба пыкет:
Чорыгасьлэн
Верам кылыз
Али солэн
Тодаз лыктӥз:
"Юртлы быдэ
Нимаз визь;
Муртлы
Гу (гудӥз) кудӥз - 
Отын тӥни
Асьмелэн
Ляб интымы
Крестьянлэн. . ."

ОЖ БЕРВЫЛЫН
Ӝуам тэль бервылъёс
Ӵын шобрет улын на.
Ыбылэм мугоръёс
Сӥямын ӧвӧл на.
Соослэн вылтӥзы
Жильтыро солдатъёс.
Сӧсырто удмуртэз
Секытэсь прикладъёс.
- Скажи, где зачинщик,
По чьей вине смута?..
Тот царю изменщик,
Кто скроет Камита. . .
Пётр Кубашев
Кызьы монэ Ципья черко гуртэ ужаны келязы

Институтэз йылпумъяны секыт вылымтэ, секыт вылэм, выль интые ужаны мыныку, анай-
атай юртэн, эшъёсын, гурт калыкен люкиськон. Дышетӥсь луэмме возьматӥсь дипломен 
бертэм берам, ми доры витьымтэ шорысь таляк калык люкаськиз. Анае ку сыӵе-сыӵе 
ӧтчаськем - марзэ-созэ валаса ик ӧй вуы. Сюанэ кадь лыкто, ява! Куд-огез мӧйы 
кышноос, айшет улазы ватэм нерге карыса, векчи виямзэ ваё, куд-огез - 
пыжиськемъёс. Кӧня ке улыса, эшъёсы но лыктӥзы - арганэн, кырӟанъёсын. Соос 
пӧлысь самой мотор кырӟасез - Гриша Лёнька, ӵыж-горд баблес йырсиё но туж чебер 
тенор куараен кырӟась пияш. Мукетъёслэсь ушъямзэс витьыса улӥсь ӧвӧл со, Тарас 
Геналэн поръятӥсь арганэз сьӧры ассэ ачиз вераса, кисьматэ ке кисьматэ ни шол: 
"Улмо садысь уӵыпи кадь, уӵыпи кадь, милям но Гриша но Лёнькамы!"..
Мынам бертэме кытысь-марысь бадӟым юмшанлы пӧрмиз: кепыр но ваисько кадь укыр 
дано луэмысьтым, шумпотон мылкыды но сюлэмме бичатэ - дышетӥсь луи ук, сётаки!
Шулдыръяськон ӝытмы ортчем бере, быдэс толэзь, ой, ӧвӧл, ӧвӧл - толэзь но ӝыны 
шутэтски. Со шудо нуналъёсам мар гинэ лэсьтыса ӧй вуы - юрт куспамы но 
юрттӥськи, бакчамес но ури-бери тазатӥ, нюлэскын пу но дасямы. Нош огпол 
клубысьтымы агитбригадаысь эшъёсы мукет гуртэ концертэн мыныны ӧтизы. Лӧбык 
сямыным мыноно кариськи, али ке но, малпасько ке, пельёсы ӵыжекто. Азамат гуртэ 
мыныкумы, агитбригадаен кивалтӥсь мӧйы кышномурт шуэ: "Мон тыныд но роль малпай. 
Я, я, эн паймы, ролед шуг ӧвӧл, одӥг кыл но верано уд луы". "Бон кыӵе роль со, 
кылъёстэк?" - пайми. "Милям, - шуэ агитбригадаен кивалтӥсь, - куинь кузя шудыны 
сценкамы вань. Пуштросэз огшоры гинэ: кузпалъёслэн кусыпсы кыӵе ке муген тэшкам, 
соин ик семьяязы уно керетонъёс кылдӥллям. Со сӧриськем кусыпсэс радъяны быгатэ 
пизы гинэ. Тӥни сыӵе вакчияк пуштросэз. - Собере мӧйы кышномурт тэльбуго кутыса 
мынӥсь пияш шоры возьматӥз. - Со Володяен ми кыкнамы кузпалъёсыз шудӥськом, нош 
пи луонмы лыктыны ӧз быгаты. Самой сое тон гинэ воштыны быгатод". "Так, так, - 
шуисько, - вера, иське, мар мыным кароно, кызьы шудоно кылтэм-ымтэм ролез?" Мӧйы 
эше шуэ: "Катанчи усьтӥськем бере, картэным ми ӝӧк сьӧрын пукиськомы но пимес 
пӧртэм сюресэ, мыд-мыд пала кыскаськомы шуыса даллашиськомы. Пиелы мон "А" 
шуисько ке, картэ, будто ке, "Б" шуэ. Озьы мыдлань-азьлань дышетонъямы, пимы, 
будто ке, "А" но, "Б" но шуэмысь дугдӥз, шорамы "Бе-е-е" шуыса кесяськись луиз. 
Тӥни самой со луэ керетонмылэн шормуӵез. Нош тон, милям пимы, ченгешыса 
вераськеммес "корказьын" кылзэмед, сцена сьӧрын, иське. Туж кужмо кесяськыны 
кутскем берамы, карт луонэ ӝӧк вылэ мыжге но коркась потыса кошке. Мон, "ах!" 
шуыса, киосме лэзьясько но пукон вылам ик, будто ке, кулыса усисько. Вот самой 
соку тон сцена вылэ потӥськод но адӟиськод: анаед йырсазьзэ ыштэм! Тынад улонад 
но озьы ик луысал ке, кызьы возьысалыд астэ, а?" "Палэнтӥ мед ветлоз сыӵе 
возьытэ вуон!" - шуисько. "Возьытэ вуон ӧвӧл со, со - куректон! - шуэ 
гуртысьтымы нимо-дано артисткамы. - Вот со куректонэз, анайдэ жалян мылкыдэз 
возьматоно". Нош кызьы йырсазё каром мон анайме, номыр но вератэк?" - юасько. 
"Тон монэ, будто ке, вуэн пазьгиськод. Пазьгиськод но - мон сайкиськемын! Ха-
ха!.. Валад-а? Шуг ӧвӧл ведь ролед?" "Валай, валай, - шуисько. - Только мон 
понна со ролед чик но капчи ӧвӧл: пушкад лопыръяськись куректондэ, одӥг кыл но 
вератэк, возьматыны быгатэм кулэ ӧвӧл, кожад-а?.."
Вуимы Азамат гуртэ. Клубын тачак калык вылэм ини. Лыктэм артистъёс туж ӝог 
дӥсяськизы, буяськизы но. . . кутскиз концерт. Котькуд кырӟасез, эктӥсез кык пол 
потыны куро, "бис!" шуыса кесясько ява! "Анайме" ву пазьгыса сазьтӥськытоно 
бере, - малпасько ас поннам, - стаканэн ву дасяно ук мыным. Артистъёслэн 
дӥсяськон комнатаязы ӝӧк вылын - графинэн ву но вӧзаз стакан. Со стаканэ ву понӥ 
но сценалы матысь укно дуре пуктӥ, собере концертлэсь мынэмзэ учкыны ӧдъяй. Кӧня 
ке дыр ортчыса, анай луонэ дорам лыктыса сипыртӥз: "Али асьмелэн номермы 
кутскоз, дась лу. Киосме лэзьяса, йырме оши ке, - тынад потонэд. Валад-а? - 
"Валай, - шуисько, - валай!"Кутскиз номермы. Анаен атай шуонъёсы эк пурисько 
ук, эк пурисько куспазы! Мон "пизы" луисько бере, туж сак кылзӥсько куспазы 
кесяськемзэс. Кылзонъям вунэтӥськем аслэсьтым артист луэмме. Атай шуонэ ӝӧк вылэ 
йыг! мыжгиз но сцена сьӧры бызьыса кошкиз. Анае киоссэ лэзьяз, йырзэ ошиз, 
синъёссэ кыниз. . . Мон катанчи сьӧрын учкыса сылӥсько, мар азьланяз луоз. Со 
куспын анай шуонэ пал синзэ ӧжытак усьтӥз но вожпотэм тылгизьыоссэ шорам 
пазьгиз, лушкемак мыжыксэ но возьматӥз. Соку гинэ тодам лыктӥз, мыным сцена вылэ 
потоно шуыса. Укно доры бызьыса мынӥ, вуэн стаканме басьтыны. Но. . . мар та?.. 
Кытын стаканэ?!.. Мукет артистъёс басьтӥллям, шӧдске. Юалляськыса-утчаса ветлыны 
дыр ӧвӧл, - клублэн коридораз потӥ, кыӵе ке посуда шедьто, оло, малпаса. 
Учкисько: кузь коридорлэн мукет пал сэрегаз вуэн бак сылэ. Бызьыса мынӥ но 
вӧзысьтыз кобы шедьтӥ. Но. . . со жильыямын вылэм, борддоре юнматэмын. Борддор 
борды пыдыным пыкъяськыса, кобыез жильыеныз валче кортӵогысь ишкалтӥ но, 
бекчеысь ву омыртыса, сцена вылэ дыртӥ. Анай шуонэ "ах!" шуыса ӝуштэ, ӟубис 
усьтэм пал синмыныз монэ утча. Адӟиз монэ но нош ик "ах!" кеськиз. Та радаз 
шумпотон шӧмыз но вал кадь ини куараяз. Монэ витьыса жадем, шӧдске, со кема 
йырвизьдэ ыштыса сцена вылын пукыны умой шат. . .
Вуэн кобыме киям кутыса, сцена вылэ потӥ. Ымнырме туж куректӥсь тус кари: "Э-э, 
мусо анае, - верасько ас поннам, - мыным луыса таӵе секыт улонэ вуид ук ини тон, 
мискине. . . Я, эн ни куректы, та нуналысен мон визьмасько. . ." Та кылъёсме ас 
пушкам верам берам, быдэс кобы вуме анай шуонэлэн ымныраз палькки. Йырсазьзэ 
ыштэм кариськыса пукись муртэ чирак кеськиз но, шузимем синъёсыныз шорам учкыса, 
интыысьтыз тэтчиз. Кышкаменым, кобыелэн жильыез борды пыдыным дэмӟи, ӧжыт гинэ 
ӧй усьы. Нош анай шуонэ. . . пограз. Пограз но йырсазьзэ ыштӥз, таяз радэ чик 
шудытэк. Быдэс зал кушетскиз. Сцена сьӧрын сылӥсь эшъёсы катанчиез туж ӝог 
кыскизы. Мӧйы артисткамес ки йылазы нуизы, нош монэ сильсьӧрам донгаса сцена 
вылысь уллязы. Со дырысь нокыӵе ролез шудыны ӧтьылӥсь ӧйлась ни монэ. Ӧз ке ӧз, 
мар карод на. . . Пычкиськыса артист уд луы, со понна талант кулэ вылэм, сое мон 
Азамат клубын туж умой валай.
Я, шутэтскон дыры ортчиз, ужаны мынон дыры вуиз. Таиз келяськон пумиськыку кадь 
шулдыр ӧй вал. Анае нош ик ӧтчаськем, нош ик мон марзэ-созэ валатэк кыли. Сьӧр 
гуртъёсы но ведь ивор вуттэм, паймод но бырод. Абышгуртысь апаймы, мынам 
песятаелэн сузэрез, туж ческыт юача пыжыса ваем. "Мурт дуннее вуыса, сюдӥсь-
марась но, оло, уз луы", - шуыса, юачазэ ас киыныз чемоданам понӥз. Саламезлэсь 
дурзэ чигыса веръяй: ой-ой ческыт, ымын сылме!
Нош ик Тарас Гена арганэныз вуиз, Гриша Лёнька, тенормы, таяз рад мӧзмытсэгес, 
"Ӟеч лу! шуид но тон кошкид" кырӟанэз мытӥз.
Гурт калыкеным, эшъёсыным люкиськон азям ӝож мылкыдме эшшо но муромытӥз 
вӧзысьтымы Васьлей агай. Аресын со али туж мӧйы ини, конечно, но пичи дырысеным 
со монэн ассэ эш кадь возиз, колхозмылэн нылпи садаз ветлыкум ик ини "Николаич" 
шуыса кизэ сётылэ вал, азьвыл ик тодэ вылэм, шӧдске, дышетӥсь луэмме. Озьы тӥни. 
Лыктӥз со ми доры но вӧзам пуксиз. Мукетъёслы кырӟаны но куспазы вераськыны 
люкетонтэм вылысь, пелям каллен гинэ сипыртэ: "Граждан ож дыръя мыным Ростов 
карозь вуылоно луиз. Туж шулдыр интыос отын, но. . . - кылыныз клёц! карыса, 
йырзэ сэзъялтӥз, - асьме шаерлэсь туж палэнын, дунне пыдэсын шуид ке, чик уд 
янгыша. Тынад но та ужан интыед со палан ке, мӧзмод, ой мӧзмод, Николаич. . ." - 
"Мынамез ужан интые сыӵе кыдёкын ӧвӧл, Васьлей агай, Татариын со. Мыным кызьы 
мыныны но валэктӥзы ини: Арск станциын поездысь потӥськод но, Балтаси пыр 
мыныса, Ципья черко гуртэ вуиськод, шуизы".
Васьлей агаен вераськонмес но, кырӟан-буранмес но йылаз-пумаз ӧй вутты, капка 
азям дугдыса, куаразэ сётӥз Можга станцие мынӥсь колхоз машина. Анае, правление 
ветлыса ведь, монэ келян сярысь азьвыл ик вераськем вылэм ини.
Машина куараез кылыса, корка тыр люкаськем калык бугырак луиз. Нырысь ик мон 
борды ӟыгырскиз Нюрка нимо нылашмы. Егитгес дыръям гужем шудонъёс пӧлысь дорозяз 
кык пол келяса ветлӥ вал. Сое со вунэтымтэ. "Ме, тани, юри тыныд дасяй, - шуиз 
но киям гордэн, вожен, лызэн буям сӥньысъёсын пужыятэм ныркышет сётӥз. - Со 
Ципья шуон палысьтыд нылъёсын тодматскод-а ни табере?" - оло пыкылыса, оло 
ӝожомыса, мыным гинэ кылымон юаз но кык пал бамам ик чуп-чуп кариз. Сое 
палэнтыса, бордам ӟыгырскиз Абышгуртысь апаймы. "Э, пие, пие, - кузь нёжъяны 
ӧдъяз со, коркасьтымы огыр-бугыр куараез согыса. - Та аресад ик атай юртэдлэсь 
люкиськыса, пыд йылад ветлӥсе уд кыльы меда ни тон?.. Осто-о-о, мар дунне меда 
ни со Пичия шуон гуртэд?"" Туймы пасьта ке но, шурзы вань-а меда, Сизьгурт 
бамалын быдӟа ке но нюлэссы но вань-а меда, ыж-скалъёс но вордо меда?.. Курег 
пуз но ваи вал, оло, сьӧрад басьтод-а шуыса?.. "Мон понӥ ни, понӥ чемоданаз", - 
шуиз анае.
Капка азямы дугдэм машина нош ик куаразэ сётӥз. "Я, дыртоно", - вази мон но, ӧс 
пала вырӟи.
Ӟеч лу, шуид но тон кошкид,
Машинае пуксьыса. . . - 
чебер куараеныз нёжтӥз Гриша Лёнька Тарас Геналэн арганэз сьӧры но, ваньмыз 
люкаськемъёс, кырӟаса, ӧс сьӧры гылӟизы.
Кырӟанэз азбарамы йылаз-пумаз вуттэм берамы, ураме машина доры потон азям, 
верано кылъёсы но кырӟано гуре ачиз кисьтӥськиз кадь сюлмысьтым:
Капкаетӥ потыкум,
Семьяеным люкиськыкум,
Лемта но медло вал
Шедьыса кыльыны. . . - 
туж ӝожоми но, берпум кылме мырдэм гинэ вераны быгатӥ на. Синмам тэрымтэ 
синкылиме Нюркалэн кузьмам ныркышетэныз ӵушылӥ. Машинае пуксён азям, анае 
ӟыгырскиз бордам: "Мукет дуннеын но ас юртэдлы кадь мед дышод, нуные. . . Астэ 
умой возид ке, нокин но со-та уз кары. . . Я, ӟеч ужа, выль тодмоосыд-эшъёсыд 
милям но эшъёсмы мед луозы. . ."
Машина вырӟиз. Капка азямы келяськыны люкаськем калыклы Нюркалэн ныркышетэныз 
киме сэзъяй но, ӝоген гурт сьӧрысьтымы тракт вылэ потӥмы. Азьпал улонам - 
тодмотэм дунне, тодмотэм Ципья калык. . .

Кылемез вань на
1

Николай Никифоров
Ефимов эшезлэсь кузьмам обросъёссэ гуртаз вузано ӧз кариськы. Малпаз: "Кулэ 
карисез Саидлэсь басьтыны вутскиз ни, дыр". Толон Анют ивортӥз вал пересьёслы 
пенсия сётъямзы сярысь. Тае лыдэ басьтыса ик егит пи бускель Такашур гуртэ 
ветлоно кариськиз. Кыдёкын ӧвӧл - куинь иськем гинэ. Кионэз пыдъёсыз сюдо. 
Ветлытэк, тыршытэк адями но бур уг адӟы.
Сюрелась ӟег пӧлтӥ кыстӥськись сюресэтӥ вамышъяны ик ӝокыт. Шунды тылсиос но 
тулкымась ӟег мӧль огазе сураськыса омырез напчыто. Сюлэмез пачылмытӥсь 
крезьгуръёссэ быдэс ёросэ пазя тюрагай. Аслэсьтыз шумпотонзэ, шукыяськись 
мылкыдзэ шарая, вылды.
Ӝыны сюрессэ ортчыса, Геня арлыдо кызьпулэн саюлаз шутэтсконо кариз. Сумказэ пыд 
вӧзаз понӥз но сигарет аратыса, нап, небыт турын пушкы ланьыраз.
Чагыралэс инбамысь кесэген-кесэген кошкись тӧдьы пилемъёс шоры учкыса кылле со. 
Улӥын тӧл уг ке но шӧдӥськы, пилемъёс бугыръясько, ог-огзэсуйыло, аспӧртэмлыко 
суредъёс кылдытыса воринъясько.
Пилемъёс музэн тӧдьы-чылкытэсь ӧвӧл ке но, соос кадь ик бугыръясько егит пилэн 
малпанъёсыз. Малы-о анаез но, Савар Петя но уг валало сое? Ӧвӧлтэм, сюлэмезлы-
мылкыдызлы укшамтэ ужъёс ӵекто. Сютэм пунылы сямен, лы но кӧттыр малпало, лэся. 
Уг, уг, соосъя уг кариськы, - ас малпанзэ пунэ Геня. - Нырысь ик шофёръёсты 
дасянъя курсъёсты йылпумъяны кулэ. Эсьмаса, аслам машинае луоз. Пуксьы но ширты! 
Шофёръёс коньдон дурыны но быгато кадь. Дышетскон дыръям коньдонэн Анют но 
юрттоз, анае но уз кушты ай. Нош Пётр мон азьын пунэмо ӧвӧл шат? Милям юртамы 
улэ ук. Нош мон отысь ас люкетэтэк кошком иське? Э-э, шумпотыса гаӵолӥн усёз. 
Куро мон ас люкетме, пыртослы кузьмаса уг кельты. Сотэк но анайме талаз ни. Э-э, 
таиз олокыӵе дуно вуз ӧвӧл, - ас малпанэзлы ик мыньпотэ Кулуш Геня. - Таӵеез 
ваньбур вамышлы быдэ лошъяське. Дугды ай, дугды, озьы вераса умойтэм кадь. Сыӵе 
ваньбур понна ик дас ар нюлэс корай ук. Эх, пумитано вылэм, Фёдороваез. Ноны 
йылъёссэ куртчылыса, чир-р кесяськытыса эриктэмасал мон сое. Шузи ик вань, лэся, 
мон. Нош ик аслым ачим капкан утчаны тыршисько. Сюресэз палэнын, Инмар ваче син 
медаз пумиськыты соин. Олома даурто ведь. От шакшы лул! Аслэсьтыз арлыдо пиосын 
мынчыръяськиз-гольтыръяськиз но, монэ кыӵесэ чуртназ. Как будьто мон солэсь 
гольык мугорзэ мусояны уг йӧндыры кожаз, лэся. Сучка! Малпаськонэлэн рад-черодэз 
ик ӧвӧл. Я, вамыштыны кулэ", - интыысьтыз турак тэтчиз со.
Ефимовлы удалтӥз. Нырысь ураме пырыса ик колонка дорын сылӥсь кышноосын огъя кыл 
шедьтӥз. Дуныз понна ӧз кыстаське, Инмарлэсь суредзэ шат ултӥен вузалозы?
Берен сюрессэ ас понназ кырӟан нёжъяса ик вамышъяз ни со. Кисыяд шалтыртӥсь 
кагазъёс пыро ке, мылкыд ик инсьӧры ӝутске уго.
Ципьяе вуытозь иськем ёрос гинэ кылем бере, мышкысеныз лыктыса вӧзаз "Иж" 
мотоцикл дугдӥз.
- Пуксьы, кореш*, - вазиз руль сьӧрын пукись егит пи. - Кемалась ни-а бертӥд?
Йыраз каскаен луэмысь-а, мар-а, Геня нырысь ик ӧз тодма сое. Шораз пыр-поч 
учконъяз юаз:
- Кин бен луиськод ай тон? Тусыд, куараед но тодмоесь кадь, нош нимдэ вунэтӥ, - 
мотоциклэ пуксёнъяз тунсыкъяськиз со.
- Лёня Абрамов мон, кык класслы бӧрысьгес дышетски.
- А-а, тодӥ, тодӥ. Галя апаед но вал-а?
- Шонер. Кузпаллы быземын ни со.
Мотоцикл бӧрсяз тузон катанчи ӝутыса ширтэ. Син азьын эли-кеби ворекъяло тузонэн 
шобырскыны вутскем сяська йыръёс, будосъёс.
- Ципьяын ужаськод шат, Лёня?
- Ӧвӧл. Уже интыяськыны уг быгатӥськы ай. Тынад улэм интыосад "кунояса" бертӥ 
ук мон но.
- Кӧня ар "гырид?"
- Куинь.
- Кыӵе статьяя?
- Лушкаськон. Сабантуйысь кудӟыса вуи но, уин магазинэ пыраськем. Мурьёзэ 
сэрттыса. Тумошо но, ӝож но. Куинь ӟенелик понна куинь арлы пуктӥзы. Берен 
нуналаз ик мельтонъёс капыртӥзы.
Мотоцикл гурт ураме пырыса ӧжытак ӝоглыксэ кулэстӥз но, сурен вузкарон ларёк 
пала кожыса дугдӥз.
- Радиаторе ӟырдаз, - гадьзэ маялтӥз Абрамов, йырысьтыз шлемзэ руль борды 
ошонъяз. - Сур юом ай.
- Ачим утялто, Лёня, - черодэ султӥз Ефимов. - "Реактивной самолётэн" ваемед 
понна кызьы-о дун тырытэк?
Писпу саюлэ интыяськыса, сурен, аракыен кема кунояськыса, вераськыса пукизы 
соос. Ог-огзылы юрттыса улыны кыл сётыса люкиськизы. Озьы уго: чорыгась 
чорыгасез кыдёкысен тодма шуэм сямен ик, пытсэт сьӧрын пукылэмъёс но ӝог 
тодматско, огъя кыл шедьто.

* * *

Датай Анют кема малпаськыса ветлӥз: "Верано-а, ӧвӧл-а Генялы секытэн луэме 
сярысь? Оло, ӧжытак сабыр кароно на? Уже мед интыяськоз, ӵошен улон-вылон сярысь 
кылпум мед ӝутоз".
Нош таӵе вераськон-кенешон ӝутон сярысь Ефимов ӧз ик малпаськылы кадь. Кӧттыр 
но, валес вылын мусояськон ке луиз, коть туннэ ик акырӟаман* мед ортчоз. Сыӵе 
мылкыдзэ шӧдыса-валаса, Анют ӝегатсконо ӧз кары ни.
- Ӝоген атай кариськод тон, Геня, - валес вылысен ивортӥз со. - Пи вордскоз 
меда, ныл-а?
- Малы-о асьмелы нылпи кулэ на, Анют? - нылкышнолэсь чыртыяз кый сямен биниськем 
киоссэ палэнтыса лулскиз Геня. - Ачим уже интыяськыны уг быгатӥськы. Туала арын 
нылпи вордон но туж дуно усе, шуо.
- Курдаськод, иське? Инмар тазалыксэ ке сётӥз, кыкнамы вордыны шат ум быгатэ? - 
бордаз ик няняськиз Анют. - Мон Валерикме огнам но будэтӥсько ай. Нош вуоно 
нуныелэсь люкиськон сярысь кылпум ик эн ӝутылы. Уг ветлы больницае. Асьмелэн 
вирмы ук со, ог-огмес яратыса кылдэм лул.
- Вазьгес на шуэме потэ, - чутрак пумит кариськыны ӧз дӥсьты ни Геня.
- Дасяськы, Гени. Сизьым толэзь ортчыса семьямы йылоз. Со дырозь уже но 
интыяськод ай. Азьпалась ӟечезлы оскондэ гинэ эн ышты. Сыӵе дыръя адями кык 
полэс кужмо кариське.
Анютэн Валерикъёс дорысьтызы кошкем бере, Геня валес вылысьтыз султӥз но 
синучкон азе матэктӥз. Аслэсьтыз тыр мугорзэ синйылтыса, мыньпотытэк ӧз чида: 
"Ужатэк, ческыт сиыса-юыса кӧты ик азьлань сётскиз ни. Ну и шузиесь та 
кышномуртъёс. Племенной ужпи интыын возе кадь монэ. Да-а, нылпизэ вордытэк ӵошен 
улонмылы уг оскы, луоз, Анют. Малы сокем дыртонэз вал? Котьма шуид ке но, 
сяськалэн емышез быгыльскыны кулэ. Яратон сяська но сыӵе ик, вылды. Малы-о 
тӧлсяськаен пуконэз? Кышкыт ик та атай кариськон. Вормо меда мон та ныпъетэз? 
Огпаласен ке учконо, шудо луыны кулэ ук! Монэ но кин ке "атай" шуоз, мынэсьтым 
адӟем карыны тыршоз. . . Ой, йыр ик пороме".
Дыртытэк сиськемез бере, чылкыт дӥськутъёссэ дӥсяз но туннэлы ужъёс пусйыса 
ульчае потӥз. Пыдъёсыз огдышемен нош ик Гафуровлэн капка выжыяз кожизы. 
Жингыртонзылэн кнопкаяз огшап нюръяса сылӥз ке но, потӥсь ӧз луы. Сэм пунызы 
гинэ, быдэс ёросэз зуркатыса музэн, жильыеныз шальтыртыса утэ.
"Уже кошкем, дыр, - малпаз со ураме потонъяз. - Вузаны обросъёссэ куро шуисько 
вал, албасты люкет. Ӧз пӧрмы. Э-э, - пирсэктэ мылкыдыз, - сётоз на меда? Ай 
пунэмам коньдонэ но берыктымтэ".
Сур вузан ларёк пала матэктыкуз тодмо мотоциклэз синйылтӥз со. Озьы ик вань: 
Абрамов.
- О-о, ӟечом-буром, кореш! - сурен кружказэ эшезлы сётыса пальпотӥз Леонид. - 
Юыса ул ай, мон аслым басьто, - вузкарись пала дыртӥз.
Абрамов шоро-куспо мугоро егит пи. Выросъёсыз кенӟалилэн кадь чырткемесь. Малы 
ке синъёсаз котьку сьӧд очки бырттэмын. Йырсиез мертчан выллем ӵуж ке но, алигес 
лэзем мыйыкез сьӧд буёлэн наштамын, шӧдске. Леонидлэн ымдураз пичияк вурысэз 
вань. Кыӵе ке жугиськонын басьтэм пус-тодметэз, луоз. Со вурысэныз сэрен, егит 
пи котьку пальышаса учке, кожалод.
- Кытчы ветлӥд? - нош ик сурен берытскиз Абрамов. - Анютэныд яратон кусыпты 
кыӵе? Сутскыны ӧд-а шедьы на?
- Асьме сямен вераса: ништяк! - пумитаз пальпотыса вазиз Геня. - Ачид тодӥськод: 
кисыын ке тӧл шула, пиосмурт ассэ ачиз маялляны кутске. Мон но сыӵе югдурын. 
Нунал пӧрат кисыосме маяллясько, шалтыртӥсь шелеп утчаса.
- Да-а, секыт асьме улон-вылонмы, кореш. Ачим но век-век гинэ шокасько. Ярам ай, 
пересьёсы та нуналэ пенсизэс басьтӥзы. Соослэсь ик ӧжытак шупчытӥ, - кунэрес 
мыньпотӥз егит пи.
- Трос-а капыртӥд?
- Ӧвӧл. Сур юымон гинэ. Коньдонзэс курыны ке кутскисько, соку ик мельтонъёсын 
курдатыны кутско. Киосад, пе, выльысь "браслетъёс" бырттозы. Вот шакшыос. Ас 
нылпизэс капканэ донгыны выро.
- Мынамез но анае куаретэ: ужаса сиыны, пе, дышетскы. Нош асьмелэсь дунне пыдсын 
ужам аръёсмес воксё лыдэ басьтыны уг малпало. Йыркуро мон, Лёня, быдэс дуннелы: 
анаелы но, чиновникъёслы но, Инмарлы но. Одӥгез но юрттыны уг малпа.
- Озьы ке но, черке ветлӥськод, лэся, ук, Геня. Гуртоос озьы бӧтьырто. Адӟем, 
пе, кар Кулуш Геня эшедлэсь.
- Черк сярысь поттылыса, тодам уськытӥд. Мынам тонэн базар кутонэ вань ай. 
Бадӟымос базар луыны кулэ.
Геня сурзэ юыса кружказэ ӝӧк вылэ пуктӥз но, ымдуръёссэ саесэныз гинэ ӵушалтыса, 
синзэ кырмыштӥз.
- Ветлом ай ышыггем интые. Наполеонлэн выллем планме, оло, ӵошен быдэстыса умой 
луысал.
- Коӵо выллем кытысь ке, оло, чилясь-пиштӥсь арбериосты синйылтӥд? - сьӧраз 
вамыштыса, лушкемен юаз Абрамов.
- Ойдо, вамышъя, - сигарет пачказэ поттӥз Ефимов. - Кион, пе, быдэс гумырзэ азяз 
пуктэм капканзэ утчаса бызьылэ. Ачимес маин кулэс?

* * *

Берло дыре Кулуш Геня думет йылысь мозмытскем пунылы укшаны кутскиз. Ӵукна Анют 
дорын кӧтсэ тырыса потэ, черке кожа но, нунал лумбыт урам кузя калтыртэ. 
Юасьёслы вераны дасям кылъёсыз дышетэмын ни: "Уж утчасько, уже интыяськыны уг 
быгатӥськы".
Сурен вузкарон лавка вӧзын но ӵемысь дунтэк куноясьёс шедьыло гинэ. Ӝыт пал Анют 
доры шӧмаськыса, кудӟылыса вуылыны кутскиз со. Пирсэктӥз кышномурт сюлэм. 
Ваньмыз сярысь ватытэк, ваче син учкыса, Кулуш Тамараен вераськыны-кенешыны 
малпаз.
Кышноос столовой азбарысь пуксёнэ интыяськизы но, Анют соку ик сюлэмшугзэ 
шараяно кариськиз.
- Геня понна пирсэкъяны кутски ай, Тамара, - секытак лулскиз со. - Выльысь янгыш 
сюресэ медаз кожы вылэм.
- Малы-о озьы шуиськод, Анют? - кышкатскыса выллем азьлань сётскиз Кулуш Тамара. 
- Оло маке-маке йыруж лэсьтон сярысь поттылӥз?
- Аслэсьтыз лушкемен малпанзэ мыным шат шараялоз?
- Уд тоды.
- Ужпум воксё мукет. Ӝытъёсы кудӟылыса вуылыны кутскиз. Паймытэ: кытысь-о 
коньдон шедьтэ меда?
- Ма вераны но абдрасько, Анют, - тӧлъя лопырскем йырсизэ тупатыса лулскиз 
Тамара. - Уж сярысь вераськон ӝутыны но паймисько. Тани столовоямы парсь сюдӥсь 
кулэ вал, ӵектыны ик ымы уг усьтӥськы. Огпол уж сярысь вераськон ӝутӥ но, со 
дырысен дорамы уг кожа ни.
- Ужлэсь курданэз ӧвӧл. Ачим но вераськыса утчало ай. Только кылзоз меда со 
монэ? Мон ведь со понна мусояськон мунё выллем гинэ. Ни кышноез ӧвӧл, ни оскымон 
эшен уг лыдъя на, дыр.
- Эсьмаса кинъёсын юэ, эшъяське - тод вал, Анют.
- Толон пересьёс мадизы. Такашуре, пе, обросъёс вузаны ветлэм. Гафуров Саидлэсь 
курем, шуо.
- Осто, козма! Вот пӧрмостэм адями. Ачиз, инмарлы оскисько шуыса, черке 
ветлэмъяське. Отын ик соослэн тусбуенызы вузкаре вылэм. Нош мон инмарлы оске 
шуыса шумпотӥ вал. Пересьёс верало ук: "Инмарлы оскись адями, пе, шонер, ӟеч 
ужъёс лэсьтыса, оскыса, яратыса, котьма секытлы чидаса, зӥбыт-востэм улыны 
тырше".
- Тон солэн анаез ук, Тамара. Лад-лад вераськоно вылэм Геняен. Ас пиед сярысь 
сюлмаськондэ инмар вылэ погыльтыса умой ӧвӧл кадь. Солэн азьпал улонэз сярысь 
нырысь ик тон сюлмаськыны-шугъяськыны кулэ.
- Ачиз но кӧкыысь нуны ӧвӧл ни. Ымдуръёсыз анай йӧллэсь кӧсамын. Нош Анют, ма 
муген кылчин кадь кариськид? - ӝотак берытскиз Тамара. - Геня сярысь укыр 
сюлмаськиськод кадь.
- Яратӥсько мон сое, Тамара. Собере мукетсэ но тыныд шараятэк амалы ӧвӧл. 
Секытэн мон. Сюлэм улам выль лул кылдэмын.
- Нош Генялы ивортӥд-а ни?
- Верай но, воксё ӧз шумпоты кадь.
- Оло атай кариськонзэ малпаса, ӧжытак йырвизьзэ бергатоз, азьпалэз сярысь 
малпаськыны кутскоз.
- Озьы медло вылэм, Тамара. Нош Геняен ваче син учкыса вераськоно на вылэм тыныд 
но.
- Верай ук: милям соин ӝукмы уг пӧзьы, кенешмы уг тупа. Ярам, Пётрлы валэкто ай, 
мед вераськоз. Воргорон воргоронэн огъя кыл шедьтозы, кожасько.
- Паймисько мон тыныд, Тамара, - интыысьтыз султӥз Датай Анют. - Аслэсьтыд 
ӝутоно ныпъеттэ ялан мурт пельпуме куштыны турттӥськод.
- Сокем эн шугъяськы, Анют. Пие воксё ыштэм мурт ӧвӧл на ук. Ӵош юрттом.
- Медам бероме вылэм. Тани малэсь кышкыт.

* * *

Ӝытлань уж дурысь бертӥсьёсын сэрен ульча ик сюбега кадь. Ваньмыз дырто: кудӥз 
магазинэ коже, кудӥз сад-бакчаысь нылпиез доры вамыштэ.
Аракыен вузкарон лавка вӧзын но тросаз калык; соку ик шӧдӥське - кытын ке уждун 
сётъязы. Воргоронъёс вераськисесь, ог-огзылы пельпумазы чапкыло, маке вераса 
пальпотыны дырто.
Син азьтӥ солань-талань тулкымъяськисьёс шоры учкыса сылонъяз, Геня ӵапак ваче 
син луиз Савар Петяен. Ваче ки сётыса ӟечбуръяськемзы бере, воргорон аслэсьтыз 
татчы ма муген кожемзэ валэктоно кариз, лэся.
- Кема витем-возьмам уждунмес сётъязы ай. Соин ик кык ӟенелик басьтӥ.
- Озьыен узырмид?
- Музъем бордын ужасьлэсь узырмемзэ эн юа тон, Геня. Туннэ нуналлы дӥсяны но 
кӧттыр ке шедьтӥд - ярам ни, - сигарет поттыса аратӥз Пётр. - Тон кинэ ке 
витиськод-возьмаськод шат?
- Калтыртӥсько ай. Нуналэз кызьы ке но ортчытоно ук.
- Ойдо ай сьӧрам. Вераськом-кенешом. Мынам тыныд шумпотымон ивор вуттэме потэ. 
Анют доры ветло кожасько ни вал.
Пётрлэн кисыысьтыз кык ӟенелик йыръёсты адӟыса, Геня выжыятыса, юалляськыса ӧз 
сылы ни. Соку ик сьӧраз вамышъяны соглаш кариськиз. Суй посысьтыз чассэ лушкемак 
синйылтыса, ас понназ пусйыны но ӧз вунэты: "Анай уж дураз луыны кулэ на".
Кык кузёоссэ огӵош адӟыса, Балян шумпотэмзэ шараятэк ӧз чида ни. Сьӧр пыдъёсыз 
вылэ султыса, циркын номер возьматӥсь пуны музэн, мусояськись-жальмыт куараен 
нискетыны кутскиз.
Геня ньыль пыдо эшезлэн дораз вамыштыса, йырзэ маялтӥз, вешаз но пыриськись 
куараен вазиз:
- Номаин тонэ кунояны, балян. Кисыям тӧл шула. Вуонояз узырмыса лыктыны ке 
тупаз, одно ик ческыт саламен кунояло. Тодад на, дыр: пытсэт сьӧрысь но саламъёс 
вуттӥ мон тыныд, Балян.
Пуны кузёезлэсь ма сярысь поттылэмзэ валаз, кожалод - ымдуръёссэ ик нюлыштыса 
лэзиз.
- Геня, корка пыромы-а, яке бакчаысь ӝӧк вылэ сиён дасялом? - тунгонэз 
басьтонъяз юаз Пётр.
- Писпуос пӧлын каньылгес луоз, Петро. Нош сиён сярысь мар-о сюлмаськиськод? 
Убоысь кияръёс басьтом, улмоос но куртчымонэсь ни.
Савар Петя куноеныз соглаш ӧз кариськы. Коркасьтыз сӥль, чорыг, нянь поттӥз. 
Убоысь кияръёс октыса, вышкыысь вуын чылк-чылк миськылӥз но вӧзазы ошиськем 
улвайысь кӧня ке улмоос ишкалтӥз на. Чаркаосы аракы лэзьылонъяз ӵектӥз:
- Интыяськы ӝӧк сьӧры, Геня.
- Ярам, - котыр утчалляськиз егит пи. Шунды ӝужан пала учкыса шара куриськиз: - 
Сиёно няньмы кӧттыро медло, Инмаре. Ваньмылы шуд, тазалыктэ сёт, - гадьзэ 
киросаз но ӟус вылэ лэзькиз.
- Кемалась ӧй юы ни вал, - чарказэ кияз басьтӥз Пётр. - Уждунысен уждун 
басьтытозь - кӧс закон.
- Та палтӥ астэ серметаны быгатӥськод вылэм. Молодец!
- Оло юысал но, Геня. Коньдонлы ёрмысагем улӥськомы ук. Ачид тодӥськод: ас 
нылпиосылы но юрттӥсько, Ольгалы но келяй. Студентъёслэн стипендиенызы курег но 
кӧтсэ тырыны уз быгаты ук.
- Маке ӝожмыт кутске асьме вераськонмы, Петро.
- Сыӵе пӧрмостэм адями ук мон, Геня. Ачим куное ӧтисько, ачим ас улон-вылонэлы 
ӝожаны кутскисько. Ойдо ай, юом. Оло кылъёсмы но небӟыса кошкозы.
Геня та кылъёсты гинэ витем-возьмам, шӧдске. Соку ик чарказэ кымалтӥз но вандэм 
киярез басьтыса, куажырак куртчиз.
- Геннадий, - сигаретсэ аратӥз Пётр, - тон мыным шараяд вал: куке но мон шоры 
учкыса вожъяськылӥд, мон кадь луэмед потыны кутскиз шуыса.
- Шонер, Петро. То толэзё уе мынам син азям синмаськымон геройлы пӧрмытскид вал 
тон. Уго котьку сюлмаськись, малпаськись тусбуё анайме кыӵе шумпотон тулкымен 
пальккыны-пылатыны йӧндырид соку. Сыӵезэ лэсьтыны кужмо, зэмос воргорон гинэ 
быгатэ кожай.
- Мон нокыӵе герой ӧвӧл, Геня. Улон сюрес вылам лэсьтэм янгышъёсы тырмыт гинэ. 
Выльысь мытоно ке луысал, со кырыж-мерыж сюресъёсы чик ӧй кожылысал, дыр. Зэмос 
яратонме но анаед вӧзын гинэ шедьтӥ. Малпаськы тон но та сярысь. Сюлмысен 
яратонэз ке пумитаськод, адями кык полэс кужмогес кариське, чылкыт мылкыдо, 
котькинлы ӟеч лэсьтэм потэ. Кыӵе ни Анютэн кусыпъёсты?
- Мусояськиськом.
- Атай кариськыны мылкыдыд ӧвӧл-а?
- Ӧй-тӧд. Али но уже интыяськыны уг быгатӥськы но. . .
- Вот, вот, со сярысь ик шумпоттыны малпаса ӧти вал мон тонэ, - азьчиньызэ вылӥе 
ӝутӥз Пётр. - Толон главной инженерен вераськи. Мастерское уйлы возьмаськись 
кулэ. Ужез но секыт ӧвӧл.
- Возь-мась-кись?! - кылзэ чигтылыса вазиз но горыны кутскиз егит пи. - Мон 
сизьымдон аресъем пенсионер кожаськод, оло?
- Малы озьы шуиськод? Отын егитъёс но ужало.
- Уг, уг. Сыӵе ужлэсь Инмар мед утёз. Мар пайда басьтом мон отысь? Шедьто ай ас 
мылкыдъям уж, уж кион ӧвӧл шуо кадь.
- Соиз, конечно, озьы. Мон тыныд юрттыны малпаса гинэ ӵектон сётӥ вал. Тонэ 
кужмысь уг кариськы.
- Пальккы ай аракыдэ, Петро.
Воргорон чаркаосты тырмытъяз но секытак лулскиз:
- Тыныд юртто кожай вал.
- Мон сярысь эн сюлмаськы, Петро, - чарказэ кымалтӥз Геня. - Маке тӥ анаен укыр 
сюлмаськисесь кариськиды кадь. Олокыӵе адӟемпотостэм ужъёс ӵектӥськоды.
- Туала дыре адями котькуд ужлы шумпотэ, Геня. Умой шат ужтэк пукыны? Уж ке 
ӧвӧл, мыным нунал ик ар кадь потыны кутске.
- Кин кызьы дышемын, Петро. Нош шонерзэ ке верано, мон дас ар ӵоже кызь ар 
азьпаллы бушын "гыри" ни. Соин ик ӧжытак ке но ужатэк улэме, шутэтскеме потэ.
- Валасько мылкыддэ, Геня. Вождэ эн вай, нош индылытэк уг чидаськы. Малы-о 
кылыдлы быдэ пытсэт сьӧрын пукемед сярысь поттылӥськод? Сое, козырной картаез 
музэн, ӝӧк вылэ шарт! карыса куянэз ӧвӧл.

- Нош тон малы монэ визьманы басьтӥськид? Астэ сюратаен лыдъяськод-а мар-а? 
Пошёл, ты. . . Тодӥськод-а кытчы?
- Э-э, пияш, ма верамдэ валаса вераськы. А то мон шорад учкыса уг улы, ява. 
Пиньёстэ жильдыса, ас кияд сёто.
- Мар-р? - интыысьтыз турак тэтчиз Геня. - Оло урдлыосыд лыдыны кутскизы? 
- Пуксьы интыяд. Эн атасъяськы. Мон тыныд ӟечлы верасько. Интыяськы уже, ас 
семьядэ кылдыты.
- Ачим тодо.
- Куатаськид, оло? Зэмлыкез синме ик верам нокинлы уг яра.
- Тау куноямедлы, Петро, - интыысьтыз султыса, бакча ӧс пала вамыштӥз Геня.
- Уд юиськы ни шат?
- Тырмоз. Укыр курыт но кузьыт тынад аракыед. Чырты выжыез гинэ ӧвӧл, сюлэмез 
сутэ.
- Луылэ озьы но.
Егит пи та кылъёсызлэсь могӟиз кадь. Капка ӧс борды кырмиськыса, огшап маке 
малпаськыса сылӥз но, Пётрлэн синмаз учкыны дӥсьтытэк музэн нёжтӥз:
- Петро, уксёед ке вань, кӧня ке палгыты ай. Школалы пу дасяны вераськи вал - 
берыкто.
- Трос-а кулэ?
- Вылкуме-дӥськутме толлы дасяно вал. Быгатӥськод ке, сёт ог вит сю манет.
- О-о, сокем узыр ӧвӧл мон, - пальпотӥз воргорон. Гадь кисыысьтыз коньдонзэ 
поттыса кык пол лыдъяз но ог люкетсэ Генялэн кияз сётӥз.
- Лыдъя. Кык сю манет. Та нуналъёсы премия сётъяны верасько кадь, быгатӥ ке, 
юртто. Нош та сётэмме анаедлы эн поттылы. Куаретоз.
- Курдаськод, оло?
- Куддыръя аслэсьтыд ляб муртлы но сётскытэк амал ӧвӧл, Геня. 
Кулуш Геня тау карытэк, коньдонзэ кисыяз ватӥз но дыртыса капка пала вамыштӥз. 
Солы кулэ ӧй вал ни визь-кенеш но, мусояськыны турттыса тэтчась Балян пуныез но. 
Туннэ понна узыр адями со - кисыяз кык сю манет шалтыртэ, киоссэ бичатэ.

Кылемез вань на.
1

Милитина Гаврилова-Решитько
Царица Тамара, Матрон, Медея но мукетъёсыз. . .
Со сяна, эшшо трос на шудэм но шудоно рольёс. Соосъя угось учкисьёс тодо но 
дунъяло артистъёсыз. Нош кыӵеесь соос улонынӥ Одӥг ласянь, чебересь, 
синмаськымонэсь, кырӟаны-вераны быгатӥсесь. . . Мукет ласянь, соосты тодымтэос 
малы меда олокыӵе но вераськон поттыло. . . Ма, со артистлэн ужез, уж-а ма? - 
шуисьёсыз но шедьыло.
 Уж со, уж. Огшоры гинэ ӧвӧл. Йӧспӧртэм но секыт уж. Лопаткаен муэз копан, юэз 
сюрлоен аран секыт ке но, ужамъя дышиськод, нош оскымон рольдэ возьматыны 
быгатон, - со котькудӥзлы уг сётскы. Тани элькунысьтымы калык артисткалы Фаина 
Ивановна Будиналы со сётскиз. Туэ Фаина Ивановна зарни юбилейзэ пумита! Егитъёс 
чакламъя , ой, макем со трос кадь ! Ӧв-ӧ-ӧл! Оскелэ, ӧвӧл. Мылкыд но егит, сюлэм 
но ӟырдыт, мугор но ай сокем воштӥськымтэ. Нош кӧня тодон, улонэз мур шӧдон, ас 
уждэ эшшо но валаса быдэстон.
Витьтон. Ма кызьы уд паймы та лыдпуслы. Мынам сыӵе ик син азям ай Будинаез 
нырысьсэ сцена вылысь адӟеме. Егит артистъёслэсь дышетскемзэс йылпумъяса 
вуэмзэс чидатэк возьмаськод. Озьы ик чидатэк витиськод соосын нырысетӥ 
пумиськонэз.
 Спектаклен сцена вылэ потэмзылэсь азьлогес ик егит артистъёслэсь репетицизэс 
учкыны мынӥ. Катанчи ворсамын вал. Кӧня ке улыса, со каллен гинэ усьтӥськыны 
кутскиз но, кык кесэгъёс вискытӥ егитъёслэн оглань-талань бызьылэмзы адӟиськиз, 
одӥгез ӝужыт но веськрес мугоро, тӧдьы кысъем артистка вӧлдэт пала йырзэ ӝутыса, 
малэсь ке кышкаса выллем, пыдъёссэ купыртӥз: "Ой, мама миа!" - шуыса черетскиз 
но сцена вылысь пегӟиз. Со вал, бӧрысьгес тодӥ ни, Фаина Будина.
Ой, кыӵе чебересь, егитэсь, ӟырдытэсь потӥзы соос мыным! Ӧжыт оло вожъяськи но: 
мон ноку уг ни лу таӵе егит, мон ноку уг ни лу артистка. Котькуд артистлэн 
сцена вылэ вуон сюресэз котькудӥзлэн аслаз. Огкадез со гинэ, ваньзы соос вуэмын 
гуртысь.
Дэбес ёросысь центрлэсь кыдёке нюлэсъёс пушкы интыяськем Урдумошур гуртын будӥсь 
Фаялэн олокыӵе но малпанъёсыз вал. Мумиз но бубиз колхозын ӧз ужалэ, нылзэс но 
отчы ӧз лэзьялэ , соин ик солэн лыдӟиськыны дырыз трос гинэ шедьылӥз. Туж 
яралляз нюлэс кушын сяськаос пӧлын лыдӟиськыса пукыны. Кыӵе гинэ книга лыдӟе, 
отысь кельшымон героиня кадь луэмез потэ.Кык сузэръёс но ньыль вынъёс ваньзы ик 
лыдӟиськыны яратылӥзы. Сиськыны но книгатэк ӧз пуксьылэ, нош уин тыл ӝуатэмысь 
анайзы алэмен, шобрет улын пичи фонарикен лыдӟиськылӥзы. Фаина но ӟеч дышетскиз: 
литератураен сочинениос умой гожъяз, немец кылэз ӟеч тодӥз, нош Тыловай школа 
сое химиен олимпиадае но лэзьялляз.
Книга лыдӟыса йыраз олокыӵе но суредъёс кылдылӥзы. Котырак вож нюлэс! Чагыр 
инметӥ азвесь самолёт лобӟе. Кыӵе со чебер. Пушказ, книгаын гожтэм кадь, дыр, 
пассажиръёс вӧзтӥ стюардесса ортче но соосты вуэн секта. Со ӝужыт, веськрес, 
ӵуж йырсиё, чагыр синмо, пальпотӥсь. Киоссэ укноетӥ поттэ но пилемъёсты кутылэ, 
кожалод. Со инбам паськыт, син сузёнтэм. Учкы ай, со мон ук. Ассэ син азяз 
пуктэ Фаина. Луо - стюардесса! 
Мукет дыръя журналист сярысь книга лыдӟе. Стюардесса умой, нош журналист эшшо 
ӟечгес. Пӧртэм городъёсты адӟод, гуртъёсы поталод, калыкен пумиськод, адӟемъёстэ 
журнал-газетэ гожтод. Со сочинение выллем ук. Усто. Журналист луо!
Стюардесса но, журналист но со ӧз луы. Дас класс бере пединститутэ литфаке 
дышетскыны пыриз. Котьку сямен со аръёсы нырысетӥ толэзьзэ студентъёсты колхозэ 
ужаны ысъязы. Ас понназгес улыны дышем Фаиналы эшъёсыз йӧспӧртэм потӥзы. Ма, 
осто, тамакало, пиосын чупасько. Фу! Кутӥз но гуртаз бертӥз.
Мумиз азбарзэ ӵуже. Паймыса учкиз нылыз шоры.
- Тон малы гуртын?
- Куштӥ мон дышетсконме.
- А-а, куштӥд. . . - кенер вылэ куасьтыны кымалтэм куинь литръем банкаез кутӥз 
но нылызлэн йыраз крок! гинэ шуккиз. Кызьы со ӧз сӧриськыӥ - Чемодандэ кут но 
берлань кошкы!
Бабуэз гинэ жаляз нылоксэ. Ӟыгыртӥз, вешаз но эн бӧрд, ӵуказе кошкод, шуиз.
Нылаш ӵуказеяз ӵуказеяз ик городэ шонтӥз. Ӧз яра бере, дышетсконнияз выльысь 
ӧз ни мыны. "Ижмаше" контролёре пыриз. Оло ӵуказеяз, оло нош куинетӥ нуналаз ик 
"Ижмаш" культура юртэ вуиз. Соку отын туж трос кружокъёс ужазы. Нош Фаина чебер 
лыдӟиськыны дышетскон кружокез бырйиз. Соин кивалтӥз ас вакытаз Щукин нимо 
училищеез заочно йылпумъям З. Я. Кириллова. Фаялы отчы сокем уно ветлыны ӧз 
ке но кылды, трос кылбуръёсты дышетыны но соосты вольыт лыдӟыны дышиз. Татысен 
ик концертъёсы пыриськылӥз.
"Ижмаш" культура юрт но Удмурт драмтеатр ог-огзылэсь кыдёкын ӧвӧл. Кириллова 
тодэм, Москваысь Щукин нимо театральной училищее дышетскыны егитъёсты, пе, куто. 
Нылашлы со отчы мыныны дэмлаз. Эскеры, пе, кужымдэ. Кӧня ке этюдъёс дасяны 
юрттӥз. Со дырозь Фая ӧз тоды на вал, ма со этюд?
Азьвыл ыстэм студентъёс одӥг ар дышетскыса вуттӥллям ни вылэм. Соос борды 
йылтыны шуыса, кыкетӥ курсэ, комиссия лыктэмъёс пӧлысь туж золъёссэ быръёно 
луиз. Эскерисьёслы Фая яраз кылбуръёсты юн валаса, куараеныз шудыса лыдӟеменыз. 
Экзаменъёс со понна секыт ӧз потэ. Нылаш соку ик валаз на: артист мед луоз 
шуыса, инмар сое та дырозь синйылтыса возиз, дыр. Дышетсконнияз вуыса эшшо 
шӧдӥз: сюлмыз котьку но сцена вылэ кыске вылэм.
Тӥни со дырысен Будиналэн улоназ вань шудо но шудтэм дыръёсыз герӟаськемын 
Удмурт калык театрен.

* * *

Кӧня ке дыр ортчыса, Фаина Ивановналэн театрын ужамезлы куамын ар тырмоз. Нош 
ужан пыр дугдылытэк тодэ лыкто дышетскон аръёс, малы ке шуоно, театръя училище, 
дышетӥсьёс но дышетскисьёс сяна, Москва город но дышетӥсь вал. Солэн чеберез, 
соборъёс, театръёс, музейёс, Мавзолей, со дорысь тодмо площадь, отын ик "Москва" 
нимо уян бассейн, кудаз со туж яратыса ветлылӥз. Урамын 30 градус кезьыт, нош 
бассейнын ву шуныт, нылаш отын синъёсыз гордэктытозь уялляз. Вуж Арбат ульча, 
отысь калык. . . Татысь адӟемез вань улытозязлы мед тырмоз шуыса, Фаина 
котькытчы ё вуыны тыршиз. Кызьы кельтод Бадӟым театре ветлытэк! Отын нырысьсэ 
адӟиз "Каменный цветок" но "Лебединое озеро" балетъёсты, дуннелы тодмо 
Плисецкаяез. Сатирая театре учкыны ветлӥз яратоно артистъёссэ: А. Ширвиндтэз но 
А. Папановез, туж яратылӥз А. Мироновлэсь шуныт юморзэ. Чайковскийлэн залаз 
кылзӥз Магомаевез. Коньдонлы туж ёрмыса ӧз улы, мумиз толэзьлы быдэ 70-90 манет 
ысъяз, О .Чужановаен кык ар ӵоже центральной банкын ужазы, ӝытъёсы яке ӵукнаосы 
отын утялскылӥзы. Чеберез адӟон понна, дырзэ но кужымзэ трос гинэ быдтоно 
луылӥз. Куддыръя соосты Вахтангов нимо театре шудыны ӧтьылӥзы. Студентъёс, 
удмурт нылъёс но пиос, куноос азьын нырысьсэ "Золушкаын" шудӥзы, куноос азьын. 
Костюм дӥсязы - кринолин, парик. Астэ ачид уд тодма, нош вӧзын кыӵе шудӥсьёс! 
Эксэез шудэ Волынский, нылзэ - Райкина, Ю. Яковлев но татын. Шуд - инмозь!
Интситутын дышетӥсьёс, соос пӧлын художественной кивалтӥсьсы М. Тер-Захарова 
шӧдӥзы Ф.Будиналэсь драматической рольёсты шудыны быгатонлыксэ, соин ик солы 
оскылӥзы мур но пӧсь сямо адямиослэсь рольёссэс, кылсярысь, М. Горькийлэн "Фома 
Гордеев", Ч. Айтматовлэн "Материнское поле" произведениосысьтызы нылкышноосты. 
Со сяна Фаина кылбуръёс лыдӟонзэ ӧз кушты. Та удысъя конкурсазы училищеын кыкетӥ 
инты басьтӥз. Аслаз эшъёсыныз дасязы удмурт шаерлы сӥзем сузьет, отын быръемын 
вал Удмуртиысь кылбурчиослэн кылбуръёссы. Озьыен, училищеын но ваньмон дырзэ 
токма ӧз ортчытъя. Диплом ужзэс "Машенькаез", "Бедность не порок", "Дуэнья" 
спектакльёссэс Удмуртие ваизы. Фаина пӧртэм сямо нылкышноосты шудылӥз, соос ог-
огзылы чик но ӧз тупаллялэ: лякыт сямо интеллигент, кырӟаны дышетӥсь Нина 
Александровна, лякыттэм, шузияськыны быгатӥсь, огназ кылем купец кышно Анна 
Ивановна, ас данзэ вылӥын возьыны быгатӥсь чебер донья Клара. Та куинь пӧртэм 
жанръя спектакльёсын егит артистка аслэсьтыз быгатонлыкъёссэ возьматӥз ни.
Дышетсконзэс йылпумъясь артистъёслэн туж бадӟымесь, ӟечесь малпанъёссы вал. 
Бертӥзы ке, соос театрез воштозы, отын музон улон но выль сямен ужан ӧр кутскоз. 
Малпамзыя ваньмыз ӧз луы.
Ижкаре вуизы соос 1973-тӥ арын пӧсьтолэзьлэн пумаз.
Кызьы бен пумитазы егитъёсты? Вить ар дышетскытозязы мар дасязы соослы 
Культурая министерство но театрлэн кивалтӥсьёсыз? Тани со сярысь ма гожтэ Б. 
Саушкин "Удмурт театр" книгаяз:
". . . Номыр но ӧз. Ужан интызы музыкальной труппаен валче одӥг юртын ик. Сотэк 
но люкыт театре 15 мурт ватсаськиз на. Тужгес но юн шугъяськизы егит аартистъёс 
патеръёс дасямтэенызы. Нош ик общежитие выллем номеръёсын-гостиницаын 
костаськыны ӵекто. "Вить ар ӵоже чельыеныды но выриллямтэды!" - йыркурзэс 
кивалтӥсьёслэн синмазы ик верало егит специалистъёс. Ужпум тазьы ик ӧй вал, 
конечно, патеръёс курыса, министерство но, театр но трос пол вазиськылӥзы: 
горисполкоме, Министръёслэн Советазы. Нош отын валась ӧз луы тэльмыремзэс".
Ф. И. Будиналэн верамезъя, театрын соосты нокин но ӧз пумита, кӧлоно луиз 
театрлэн фойеаз ик. Ӵуказеяз - гостиница. Собере келязы гастроле. 18 кузя 
артситъёс но одӥг П. Мурашов режиссёр. Со аре куазь зоро вал, сюресъёс кузя 
туж трос пол автобусэз донгано луылӥз. Я, озьы быдэс толэзь ортчиз. Вуизы 
театре, отын нош нокин но ӧвӧл. Егитъёслэн мылкыдзы сӧриськиз, ку вылазы кадь 
шӧдӥзы: соос татын кулэ ӧвӧл. Ар ужамзы бере, писоты армие келязы, нылъёс бызизы 
но нылпи ваизы, труппа пазьгиськиз. Ӧз луы ни соос пӧлын В. Кожевников, С. 
Шиляева, Р. Ильина. . .
Фаина мукет эшъёсыныз ӵош кылиз театре. Ӟеч рольёсын мылкыдзэ буйгатъяз. Одӥг 
пол сыӵе малпан кылдӥз: тынад мылкыдыд урод ке, озьыен, учкисьлэн но тонэн йырин 
алама луоз. Ӧвӧл, зӥбись мылкыдлы сётсконо ӧвӧл. Аслыд ачид зол кужым но умой 
мылкыд шедьтоно. Пуш кужымез кужмоятоно. Сое быдэстыны юрттоз театр! Фаина ӧз 
пӧяськы. Урод шат со: туннэ одӥг мылкыд, ӵуказе нош мукетсэ шудоно. Озьы мылкыд 
борды мылкыд итӥське . Артитстлы трос улонэн улоно луэ. Нуналлы быдэ адямиос 
шоры учкиськод. Кызьы соиз яке таиз ветлэ, сиське, пуныен калге, кизэ шона. 
Интситутын наблюдение шуыса нимаськись предмет вал. Со дырысен та сям пыӵаса 
кылиз. Табере туж юрттэ мылкыддэ но кутыны, соин ик, дыр, Фаина ноку но 
калыкез уг лекаты. Эскероно ай шуэ, оло со чик но озьы ӧвӧл, кызьы нырысь 
адӟиське. 
Артистлы умой роль шеде ке, солы оско ке, уж пӧрме ке, талэсь бадӟым шумпотон 
вань на меда? Нош ӝытъёсы ужаменыд сэрен семьяед сӧриськыны шеде ке, пичи 
нылыныд люкиськыса, гужем гастрольёсы кошконо луэ ке, мар малпалод быръем ужед 
сярысь. Та пумысен кыӵе ке сыӵе малпанъёс вуыло ке но, быръем сюрессэ Фаина ноку 
но ӧз карга, яратоно профессиез понна али ке но аслыз но, инарлы но тау каре. 
Улоназ кӧня ӟеч адямиос пумиськизы. Дано артисткаен В. Садаеваен трос 
рольёсты огвакытэ ӵош шудоно луылӥз. Кӧня сюлмаськонъёс вал. Со кадь но медам 
луы, солэсь урод но медам адӟиськы. Фаина котькудаз ик аслэсьтыз адӟонзэ роляз 
пыртылӥз. Бӧрысь Вероника Алексеевнаен эшъяськизы. Эшъяськиз мукетъёсыныз но, 
сотэк уг луы театрын, одӥг сцена вылэ потӥськод ук, одӥг спектакльын шудӥськод. 
Котькудӥзлэн аслаз героез, но соос люконтэм герӟаськемын. Фаиналэн героиняосыз 
аспӧртэм сямоесь, ас малпанъёссэс валасесь но соосты быдэстыны тыршисесь, соин 
ик учкисьёс соосты валало но ярато. Синмаськыса учкизы "Уйпал кизилиысь" егит 
яратӥсь нылашез Катяез, "Кылем гужем Чулимскын" спектакльысь суро-пожо мылкыдо 
Зинаидаез. Фаиналэн героиняез адӟе яратоно адямиезлэсь кыдёке но кыдёке 
палэнскемзэ, солы туж вӧсь, но со дыре ик вала - сое нокызьы но вӧзад берыктыны 
уд ни быгаты. 
Зол, ваменэс но ас палаз кыскыны быгатӥсь сямо нылкышноез Трубачёваез артистка 
"Паймымон эмъюм" комедиын возьматӥз. Татын со яратон сярысь вераз ни серем пыр, 
кызьы пуктэмын вал быдэс спектакль но. Сюлмаз туж зол пырем "Трибуналысь" кужмо 
кышномурт Полина. Нырысьсэ шудӥз аслэсьтыз арлыдын бадӟым кышномуртэ. Будина 
кӧберасагес басьтӥськиз та борды, но режиссёр В. Перевощиков буйгатӥз мылкыдзэ. 
Зэм но, со вал В. Садаевалэн, Г. Владыкиналэн, В. Байковлэн шудоно геройёссылэн 
анайзы, нош картъёссэ шудӥзы В. Перевощиков но С. Марков. Полиналэн ролез, 
актрисалэн верамезъя, туннэ но сюлмаз. Та уженыз театр Можгаысь нылпи колоние 
ветлӥз. Спектакль бере учкисьёс пӧлысь одӥгез егит адями Фаиналы сяська керттэт 
кузьмаз. Тау каремзэ вераз. Тӥ, пе, мынам анае кадь потӥды. Шонерзэ верано ке, 
Фаина Ивановна та спектаклен ӧз люкиськы на, шуыны луоз.
 Со трос аръёс ӵоже ужа ни синтэмъёслэн клубазы, драмкружокен кивалтэ. Соослэн 
куинетӥез спектакльзы Макаеноклэн "Трибунал" пьесаезъя дасяськиз вал. Отчы 
ужаны ӧтьыкузы Ф. Будина юн куалектӥз: быгатоз-а отысь калыкен одӥг кыл 
шедьтыны, синтэмъёслэн шоразы учкыса жаль но пото. Дӥсьтонэз тырмиз, ужаны 
кутскиз. Арлы быдэ, ой, жади ни, тырмоз, шуэ аслыз ачиз, нош соосыз дорысьтызы 
уг лэзё. Сыӵе дыръя Будиналы юртто , дыр, та веран кылъёс: мон ке ӧй, соку 
кин? 
Актриса Фаина Будина котькуд шудоно персонажезлэсь возьматыны тырше сямзэ но пуш 
мылкыдзэ. Авторлэн героиняезлы сётэм сям борды со одно ик йылтоз аслэсьтыз 
малпанзэ но улонэз тодэмзэ, лулсюлэмзэ. Фаина Ивановналэн "Аугырес тулыс" 
спектакльын шудэмез сярысь Б. Саушкин книгаяз тазьы гожтэ: "Оа сьӧд уже кыскыны 
медэ Бутаровлы синмаськись Маланья нылзэ. Соиз нырысь соглаш луэ ке но, бӧрысь 
атаезлы люкетыны тырше. Егит актриса Ф. Будина туж оскымон быгатэ возьматыны 
героиняезлэсь сюлэмшугъяськонъёссэ, мылкыдызлэсь воштӥськемзэ".
Сюлмаз озьы ик зол кельшыса шудӥз "Яратон но вожан" спектакльын Медеялэсь 
рользэ. Аслаз верамезъя, котькуд актрисалы, пе, мед кылдоз аслэсьтыз Медеязэ 
шудыны. Сое пыр потыса нокыӵе роль кышкыт ӧвӧл ни. Отчы вань кужымдэ но 
быгатонлыктэ огазеяно. Сотэк номыр уз пӧрмы. Вылӥ трагедия. Сое шудыку арня 
спектакльлэсь азьло, арня спектакль бере умме усьыны со ӧз быгатъя ни. Иош шудэм 
бераз быдэс мугорыз-ёзвиосыз висизы. Иедея - юн сямо кышномурт,- вера Фаина 
Ивановна. - Сыӵе ӥышномуртэз возьматон понна аслыд но зол кариськоно. 
Кышномуртэ воргорон куштэ ке, мар кароно мискиньлы? Кин ке катез бырытозь бӧрдэ, 
кин ке быгатэмезъя шудэз понна нюръяське. Ма каре Медея? Со Илонын ассэ зол 
возе. Мукет кунэ кык нылпиосын кылиз, солы нокин но юрттыны уг быгаты. Ас дораз 
бертыны уксёез но, кораблез но ӧвӧл. Мар кароно? Кызьы картэзлы сыӵе ик вӧсь 
лэсьтоно? Со шедьтэ амал но весяклы историе кыле.
Та спектаклез дасяку, пӧртэм вераськонъёс вал: татчы ветлӥсь уз луы, удмурт 
учкисьлы со уз яра. Яраз. Учкисьёс витизы. Гажаса но малпаськыса учкизы, малы 
ке шуоно, татын но удмурт спектакльёсын сямен ик возьматэмын улонысь тодмо юдэс. 
Сыӵе учыр луыны быгатэ кыдёкысь дауръёсы но, мукет кунын но, асьме дорын но.
Медеяез шудон вакытэ ымнырыз ик солэн воштӥськиз, оло егитомиз но. Таӵе учыр 
тодэ лыктэ. Капюшонэн, тӧдьы вакчи шубаен, пыдаз тӧдьы сапегъёсын, иельпум 
сьӧраз тӧдьы сумка. Пуш малпанъёсызлы шумпотыса но пальпотыса потӥз со 
театрысь. Жальпотонэз дораз вуытозь ӧз ышы. Нокыӵе транспортэ но ӧз пуксьы. 
чебер, капчи мылкыдзэ иылкыдъёссэ калык пӧлын сурамез ӧз поты. Бертытозяз 
сьӧраз егит пияш вамышъяз, со валаз, лэся, актрисалэсь мылкыдзэ мултэс 
вераськонэн ӧз акыльты. Актриса дораз пырыкуз келясезлы "ӟеч лу!" гинэ шуиз. 
Медеяез шудон солэн ужаз тужгес шудо вакытэз вал, дыр. Кыӵе жаль: Удмурт 
театрлэн трагедилы мылкыдыз ӧвӧл, нош гурт темаен герӟаськем спектакльёсын гинэ 
шудыса сюбег но сюбег кыле быгатонлыкед. Шонер вераз вал тодосчи В. Е. Владыкин: 
вокруг одной зеленой березы играем любовь. Соиз но вань: та учыре артистъёс 
янгышесь ӧвӧл. Сёто роль - шуд. Котьма ке но, театр калыклэн ымнырыз луэ.
Мон гурт темаез урод карыны уг турттӥськы. Вань отын ӟечез. Ф. Будиналы но 
кылдӥз со умоез шудыны, шуом, "Гуртысь маскарчиос" спектакльын. Актриса Жанна 
вордӥськем гуртэзлэсь люкиськыса городэ кошкиз но ас интызэ шедьтыны ӧз быгаты. 
Дунне вылтӥ калгыса вуиз дораз. Будиналэн Жаннаез вылласянь чебер, калык азьын 
ассэ зол возьыны выре, нош огназ дыръя чигиськемез шӧдӥське, со жадемын, тырттэм 
мылкыдо. Номыр но сое уз ни улӟыты кадь. Нош артистка тодэ, озьы луыны уг 
быгаты. Гуртысь пересьёсыныз пумиськыку со героинязэ улӟытэ, солэн кужымез тырме 
на пӧяськисез но шараяны. Лек кылъёс туж вӧсь ке но каро, дорысьтыз кужым 
басьтыны быгатэ но выльысь кошконо луэ пизэ будэтыны. Вылласянь учкыса та роль 
капчи гинэ кадь. Артистка артисткаез шудэ, но чигиськем мылкыдо адямилэсь улэмзэ 
возьматыны каньыл ик вылымтэ.
Чылкак мукет роль Быдӟым вормонлы сӥзьыса пуктэм -"Чебер апайёс" спектакльын. 
Ожмаськон кемалась ке но ортчемын, солэн узвесь пырыосыз ож бере 
вордӥськемъёслэн мугоразы но пыризы , сое шӧдӥз на ачиз Фаина но. Умой-а, ляб-а 
вал пьеса, но артистъёс вань мылкыдзэс поныса шудӥзы. Будиналы Полина 
Сергеевналэн ролез сюриз. Солэн героиняез улонэз, шуг-секытъёсты валаны тыршись 
кышномурт. Сюлмыз висемен курадӟись мурт нылзэ будэтон сярысь сюлмаськоно луэ. 
Иылызлэн кӧт сюмамез шоры учкыны чидатэк, мукетъёсызлэсь, сыӵе ик куанеръёслэсь 
сиён куроно луэ. Ма бугырске сыӵе дыръя адямилэн сюлэмаз? Кыӵе луэ мылкыдыз? 
Керпотон но, йӧн сямез утён но, кураськытэк нылпидэ сюдыны быгатымтэлы вожпотон 
но. Та ролез шудыкуз артисткалэн мугорыз ик пичиомиз кадь. Спектакль бере 
пумиськыкузы, Фаина Ивановна оло пальпотыса, оло ассэ жаляса серемпыргес шуиз:
- О-о-оё, мон улонме ӧй на шӧды кадь, асме весь пиналэн лыдъясько, нош 
режиссёръёс егитъёслэсь рольёссэс уг ни сётъяло.
Зэм но, артисткамылы Инмар адскымон мугор, чебер тус сётэм. Со шудыны быгатысал 
К. Лучко выллем пӧртэм рольёсты шудыны, ӥылсярысь, шпагаен ассэ утьыны, нош со 
шудэ пересьёсты. Соос пӧлын вань бен туж золъёсыз но, "Эштэрекын" - Юмья, 
"Марым, лэся, яратӥ" - Малафеева, одӥгез трагической, мукетыз комедийной, 
лякыттэмъяськись сямо. Мыным со рольёс пӧлысь тужгес кельше Матрон, "Атас Гири" 
спектакльысь гуртын улӥсь кескич кышномурт.
Егит кышномуртлы капчи ӧвӧл, дыр, пересь иуртэ сцена вылын суреданы.
Нырысь-валысь Фаина ӧгзэ шедьтыны шугъяськиз. Озьы но каре, тазьы но турттэ, 
нош шудэмаз зэмлыкез ичи. Тодаз ваиз Урдумошурзэ, Ита возь вылтӥ бызьылэмзэ, 
корказэ, буямтэ выж вылтӥ тёп-тёп гольык пыдын ветлэмзэ, тол вылтӥ ӝӧк вылысь 
самовар котырын пукись анайзэ, бабузэ. . . сыл ай, сыл. . . Шудоно бабу-узэ! 
Кыӵе со шулдыр мылкыдо адями вал, исаськыны яратӥсь. Уг, уг, лекъяськыса уг, 
шулдыръяськыса исаськись, маскаръяськись. Ачим кадь ик ӝужыт. Нош малы меда 
кышет улысьтыз пельзэ поттыса ветлэ вал? Ляб кылэмысьтыз-а, трос тодыны 
турттэмысьтыз-а. Оскалтоно!
Вуоно репетициын Фаина одӥгзэ пельзэ кышет улысьтыз поттӥз, бабуэз выллем 
лапышак-лапышак вамышъяз, кӧня ке губырскиз но шӧдӥз - аспӧртэмлыко образ 
пӧрмиз.
Мон малпасько, та спектаклез учкемъёс нин азязы пуктӥзы йӧспӧртэм пересь 
Матронэз. Ӵапак сыӵе со вал. Кулэтэм дыръя кылымтэ улэ но аналске, мылкыдыз ке 
вань - кырӟаны но дась. . .
Артистка возьматӥз ас выжыезлэсь но быдэс удмурт нылкышноослэсь туж зол 
стерженьзэс, кудъёсыз бусыын но ужаны вуо, бакчаязы но бергало, куисько но, 
керттӥсько но, пужыятско но.
Ачиз но Фаина Ивановна - сыӵеос пӧлы пыре. Огназ нылзэ будэтӥз, дышетӥз, ас 
дораз бубызэ сизьым ар вордӥз, бабузэ - 13 , сузэрез вить ар дышетскытозяз улӥз, 
трос тодмо нылъёс со дорын инты шедьтылӥзы. Бабуэз куддыръя Фаиналэсь юа вал: ку 
бен куинь кузя сиськыны пуксём ни? Сыӵе дыръёс туж ичи луылӥзы. Будиналэн 
ааньмызлы юрттэмез потылӥз, котькинлэсь улонзэ капчиятон мылкыдын улылӥз. Та 
сям солы пичи дырысеныз пыӵамын. Мукет эшъёсыныз ӵошатыса, соослэн семьязы 
ванёгес улӥз, бубиз тросгес сакыр басьтыны быгатылӥз, Фаина котьку ик сакырзэ 
эшъёсызлы сётъяз, адӟе вал, соослэн ӧвӧл. Мумиз-бубиз та суредэз синйылтытэк ӧз 
улэ, но нылзэс ноку ӧз алылэ. 
19-тӥ школаын солэн вань "Ӥылбуретъя театрез", отчы кыкетӥ классысен дасэтӥ 
классозь дышетскисьёс ветло. Тунсыко нылпиос, дышетӥсьсылэсь илома но 
юаллясько, йырсизэ кутыло, кизэ маялляло. Универстиетысь дышетскисьёсты чебер 
вераськыны дышетэ. Соосыныз но, таосыныз но литературая композициос дасяло. Кӧня 
правительственной концертъёс нуэмын, кӧня радиоспектакльёс шудэмын. Одӥгез 
сярысь вераме потэ ик. Г. Перевощиковлэн "Йӧвалег" радиоспектакляз Ф. Будина 
егит кышномуртлэсь Риналэсь рользэ шудӥз. Та роль туж тунсыко луэ. Куддыръя 
героинялэсь лэсьтэм ужъёссэ валаны шугъяськоно. Тросэз лыдӟисьёс но солы 
пумитъясько. Артистка но нырысь-валысь героинязэ ӧц вала, сое шудэмез но ӧз 
поты. Автореныз кенешытэк уж борды ӧз басьтӥськы. Ачиз тупен-тупен валаны 
тыршиз: малы Рина улоназ сомында янгышъёс лэсьтэ, малы огпалась мукет пала 
оонаське, кожа, мае утча? Рос-прос ӧраз пырыса ини актриса оа бордын мылысь-
кыдысь ужаз. Мынам валамея ,Ф. Будиналы таӵе мылкыдо кышномуртэ сцена вылын но 
трос шудыны ӧз кылды. Со туж ӟеч возьматыны быгатӥз яратонлэсь мӧзмись 
нылкышноез. Та романъя театрын спектакль пуктыны малпасалзы ке, (сое адӟем потэ 
вылэм), татын но Фаина зол шудысал. Радиоын солэн одӥгез та бадӟым ужез луэ. Ии 
дорын Ф. Будина яратэ кылбурен композициос-бичетъёс лыдӟыны. Яратоно 
кылбурчиослэсь чуръёссэс калык пӧлы вуттыны быгатоно луэ. Но ӵемысь ачиз ик 
дасям бичетъёссэ гожтыны но дэмла. Кылсярысь, туж умой пӧрмытӥз Флор 
Васильевлэн кылбуръёсызъя "Улытозям мон улонэз кырӟай" бичетсэ. Сое лыдӟизы 
Сергей Марковен ӵош. Озьы ик удмурт нылкышно кылбурчиослэн кылбуръёссыя но 
бичет дасяз. Ноосты со пӧртэм адямиос азьын лыдӟе удмурт но ӟуч кылъёсын. Удмурт 
калык, пе, соосты лыдӟыны быгатэ ачиз но. Асьме поэзиез мед тодозы мукет выжы 
калыкъёс. Милям но вань туж чебер кылбур гожъясьёсмы. Соосты калыке поттытэк туж 
возьыт, солэсь но ортчыт - сьӧлык. 
Ф. Будина котьку пыриське театрын ужась союзэнызы радъям "Чебер лыдӟись" нимо 
конкурсэ. Ӵемысь аасьялля нырысетӥ интыосты. Али но син азям Ч. Айтматовлэн 
"Материнское поле" книгаысьтыз анайлэсь монологзэ лыдӟемез. Сцена вылэ потыкуз 
ик валамон луиз: со басьтоз нырысетӥ инты. Пельпумаз сяськаё кышет, зыл-зыл 
вамыштӥ сценалэн шор вадесаз, син азяз кылзӥсьёс но, жюри но ӧвӧл ии кадь. 
Солэн азьпалаз паськыт ӵошалъёс, кыдёке пукись оунды но куректон. Сое 
кылзӥсьлы вуттон, собере озьы ик сцена вылысь кошкон. 
Ваче кошко кык сюресъёс. Одӥгез - улон, семья, эшъёс, шумпотонъёс но 
сюлэмшугъёс. Мукетыз - рольёс, рольёс, улонэз шудыса возьматонъёс. Та улон 
сюресъёс трос векчи синьысъёсын герӟасько но огзэс огзы узырмыто. 
Шудо-а со? Ӧйтӧд. Одӥг ласянь туж шудо кадь. Кӧня рольёс, мылкыдъёс, ӟеч 
кылъёс, кичабонъёс. 
Шудо соин но, солэн шумпотонэз виучкаез будэ, бакчаез пайда вае, машинаез ветлэ, 
трос эшъёсыныз иумиськылэ. . . Мукет ласянь, гуртысь кышноосты гинэ шудыса ог 
ортчы-а улонэз, малпаназ вал ук Жак Коктовэн яке Лев Толстойлэн романъёсазы 
выллем уно узыр костюмъёсын дӥсяськем спектакльёсын шудылыны. Нюлэмшугъяськытэ 
соиз: быгатэ-а Фаина Ивановна тырмыт юрттэт сётыны театрезлы но удмурт 
калыкезлы? Удмуртлык сярысь уродэн верало ке, солэн Котьку нюлэмыз вӧсь луэ. 
"Мон валтӥсь ӧвӧл, сьӧрам калыкез нуэме уг луы, - шуэ но. - Мон - огшоры 
артистка. Асме шудо ке но шуисько, тодам лыкто трос ыштонъёс. Ватӥ ни мамаме, 
папаме, бабуме. Ваньмыз вӧсь. Мон соосты тодам вайыса улӥ ке, соослы сояз 
дуннеязы улыны умойгес луоз. Котьма ке но. . . мон шудо ик, дыр. Дунне вылэ 
вордӥськеменым, мон ӧй ке луысал, ӧй адӟысал кызьы шунды монтэк сужасал, 
писпуос куаръяськысалзы, сяськаос усьтӥськысалзы, тылобурдоос чебер гурзэс 
кисьтысалзы...
Кылзӥсько мон Фаина Будинаез но малпасько: шудо тон, шудо. Тынэсьтыд ӟеч 
артистка пӧрмиз. Кылбуранзэ, гожъяськонзэ азьланьтысал ке, мон одно ик 
кылбурчи но луысал. Улонэз адӟонэ туж узыр. Калыклы юрттонниын ужасал ке, отын 
со одно ик адскымон луысал.
 Верамъёссыя, тросэз артистъёс кема кӧлыны ярато. Нош Будиналэсь ӵемысь кылоно 
: мыным ӵуказе вазь султоно . . . ваньмаз вуоно. Аслаз бакчаяз вутсконо, нылызлы 
но юрттоно, тодмо кышномуртсэ эскерыны ветлоно, солэсь но ужъёссэ быдэстыны 
тыршоно.
Котьма ке но, Инмар солы артисткалэсь улонзэ сӥзем. Соин со шудо ачиз но, 
учисьёс но. Туннэ ми сое адӟомы выжыкылысь эксэй кышноен, ӵуказе со возьматоз 
Матронлэсь улонзэ, мукет дыръя луоз Медея. . .
1

Калыклэн сюлэм вӧсез
Мон котькуд гужем песянае но песятае дорын шутэтскисько. Пичи гинэ гуртсы ми 
дорысен куать иськемын интыяськемын. Кобиньпи - бырем гурт, али отын вить юртын 
гинэ уло на. Нош ас вакытаз мар гинэ татын ӧй вал: клуб, магазин, совхоз гидъёс. 
Берло тросэз улӥсьёс бускель гуртэ кӧчизы - "центральной усадьбае". Кин бен отын 
янгыш, "неперспективной" шуэм гуртъёсты быдтыны кутскизы шуыса?
Толалтэ Кобиньпи гуртэ, татын улӥсьёслэсь ӵыжы-выжыоссэс лыдъятэк, нокин уг 
вуылы. Ма, бырем гуртысь тол кезьытэ мар шедьтод? Куноос озьы ик мур лымыез 
гушъяса ветлоно луо. Машинаен татчы лыктӥд ке, оло сюрес дурын сое возьмаса 
пукод, оло песянаед дорын пӧсь чай юод. Гуртоос ӟар кезьытэн лымы бусыостӥ нянь 
но мукет сиён-юон, пенсия понна сьӧрлось гуртэ ветлоно луо. Озьы ик больницае 
потатэк но улыны уг луы. Уката ик пересьёслы. Нош сюресэз уг сузяло. Одӥг пол 
гинэ ӧз вазиськылэ ни гуртоос совхозлэн кивалтӥсезлы, гурт администрацилэн 
тӧроезлы, нош сюрес озьы ик ӧвӧл. Вал сыӵе учыр, куке ёрослэн администрациезлэн 
йырызлы гожтэт лэзизы, лымы сузямын вал: начальникъёс азьын возьыт потӥз, вылды.
Одӥг пол песянае туж зол висьыны усиз. Бускелез доры мыныса, матысь гуртэ 
больницае чортӥз. Мынӥз адями, малы-о бен курись муртлы уд юртты? Собере 
песянайлы со укол но пуктылоно луиз. "Скорый" машина одӥг пол лыктӥз ик, 
эмъясез ваиз, нош мукет дыръя бензинэ, пе, ӧвӧл шуыса, уг ни лыкты шуиз. Кызьы 
сыӵе адямиослы вождэ уд потты? Асьсэлы кулэ луысал ке, бензин но, мукетсэ но 
шедьтысалзы ук!
Гужем вуэ ке, бускель гуртысь калык татысь уг ик кошкылы. Кин мар каре: одӥгез 
турын турна, мукетыз эмезь, узы-боры, сутэр бича, куинетӥез чорыга. Гужем 
сюресъёс усьтэмын угось. . . Мар мылыд потэ, сое ик кар: кӧня мылыд потэ бакча 
возь, турын турна - ваньмыз тынад.
Кален-каллен кылёз ни гуртэ. Ма, кызьы-о чидалоз калык кезьыт толэз потыны? Тӥни 
озьы ик пумен быроз таиз но гурт. Туннэ одӥгъёсыз кошкозы, ӵуказе - мукетъёсыз. 
Быроз гурт, но уз быры милям со сярысь тодэ ваёнъёсмы но малпанъёсмы.
Бен, кылёзы, дыр, гуртэ, кинлэн вань бадӟым чебер коркаез, дуно юрт котырез, 
машинаез яке тракторез. Соос татын улыны быгатозы, малы ке шуоно луонлык вань ук 
пудо-живот утялтыны, узыр бакча возьыны. Малпасько, али но вань ини сыӵе "выль 
удмуртъёсмы". Кобиньпи гурт сярысь соос мар ке но тодазы возёзы шат? Лыктозы 
выльёсыз "дачникъёс", со гурт кылёз, нош солэн историез, азьвыл культураез 
быроз.
Гурт калык палэнэ кошкон сярысь малпаку сюлэм шымырске. Уно аръёс ортчыса но со 
сюлэм висён уз бурмы ни. Нокызьы но гуртэ медаз быры вал.
Шыпыт Кобиньпи урамын. Дауръем топольёс гинэ весь вайёссэс вырето, куаръёсынызы 
шыпырто. "Калыкъёс, уте вордӥськем гуртэз", - верало кадь соос.

Мар вал - берлань уд берыкты ни
Вить ар ортчиз ини со дырысен, куке улонзэ чутрак воштӥз одӥг нунал. 
Кышномуртлэн весь син азяз на со гудырикошкон ӝыт. Бен, та улонысь азьлозэ 
ӵушыса быдтод шат? Со мур яра кельтэ адямилэн сюлэмаз, воштыны сое номырин. Но 
уг луы ни. Со нуналэз но берлань уд берыкты ни. . .
Гудырикошкон. Ӵапак та пӧсь гужемен люкиськон вакыт, куд-огез бакчаязы картофка 
окто ни, луд вылын ю-нянь калто. Колхозын ужасьёслы доразы, ас бакчаязы 
вутскыны ик уг луы: лудын кысык вакыт. Анна Ивановналэн картэз машинаен ю-нянь 
ворттэ. Тодмо ини, механизаторъёс юытэк уг уло, тужгес но колхозлэсь ваньбурзэ 
басьтыны ёртӥсьёс вань ке. Вань сыӵе адямиос но, кудъёсыз курыт юон понна ваньзэ 
вузаны дась. Анна Ивановналэн картэз уж дураз пичияк юэмын вылэм, машина дораз 
шутэтскыны выдэм но, бускель гуртысь механизатор сое лёгам. Югыт дуннеез ӧз ни 
адӟы воргорон. Ӧй, кышномуртлэн картэз гинэ ӧй вал янгыш. Воргорон уйбыт ужам, 
изьыны но ӧжытлы гинэ выдылэм, ӵукна нош - выльысь уж дуре. Адями корт ӧвӧл ук 
ваньзэ чиданы:
Янгыш кузёос но: кысык вакытэ озьы шат возёд колхозысь дисциплинаез?! Ӵемысь луо 
сыӵе дыръёс но, куке кузёос мукетъёссэ колхозын ужасьёсын ӵош юо, лушкасько яке 
ог-огзы вылэ узато. Кинлэсь ке коньдон басьтонзэ кулэсто, кинлы ке премия уг 
сёто. Валамон ини, колхозниклы.
Трос пол Анна Ивановна судэтӥ ветлӥз со ужез медаз аналтэ шуыса. Йыружез понна 
воргорон кыл мед кутоз. Уг тодӥськы кызьы, но воргорон судэз пырпотӥз. Татын но 
уж коньдонтэк ӧз, дыр, ортчы. Тросэз озьы ик калык понна тодмотэм но валантэм 
кылиз. Нош йыруж лэсьтэм воргорон со семьяеныз ӵош улэ. Узыр со: муш вордо, сад-
бакча возё, пинал будэто. Малпан кылдэ: азьлоез сярысь куке жалялоз меда 
воргорон?
Макем ӝож вал милемлы нырысетӥ сентябре яратоно дышетӥсьёсмы шоры учкыны. Солэн 
йыраз сьӧд кышет керттэмын, нош пыдаз тӧдьы туфли кутчамын вал. Бызён туфлиез, 
дыр, ми малпамы. Классын мар ке но вераськиськомы вал, собере Анна Ивановна 
милемды синкыли пыр выль дышетскон арен ӟечкылаз но пушкыз тыремен, бызьыса 
классысь потӥз.
Анна Ивановна кык пиоссэ будэтэ. Чылкак атайзы тусъем будо пиос, тужгес но 
покчиез. Шӧдо: огназ соослэн табере анайзы, сое пиос ноку но огназэ уз кельтэ.
Та учыр но гуртысьтымы юись воргоронъёсты ӧз дышеты. Али но калык весь юэ, 
собере семья куспын керетон, жугиськон потэ. Озьы пиосъёс тросэз юыса куло-быро. 
Собере кытысь ке янгышъёссэ утчаськомы, шедьтыны сое шуг луэ ни.
Бен, таӵе улонэн-а уд юы? Секыт учырын гинэ угось улонмы сярысь малпаськыны 
кутскиськомы. Нош шонер-а мон лэсьтӥ? Янгыш ӧвӧл-а мон мукетъёсыз азьын? Кызьы 
шуо калыкын - гырпумдэ куртчы вылэм но, уг ни сузиськы. Быдэс улонмы озьы медаз 
ортчы вылэм. Нош мар вал та улонын - уд берыкты берлань.

Марина Биянова,
Ушур гурт,
Балезино ёрос