Ӟечбуресь "Инвожо" журналын ужасьёс! Гожтэ тӥледлы одӥг пичи гуртысь одӥг пичи нылаш. Мыным журналды туж кельше. Соин но, оло, тӥлед гожтоно кариськи. Алигес усьтэм "Сюлмысь вераськон" выль рубрикады но туж сюлэмылы тупаз, лэся. Ачим сярысь ке, вакчияк верало, дышетскисько Удмурт кун университетын. Нимме, кытын улэмме вераме уг поты - кулэтэм со. Туж яратӥсько бадӟым толэзё уйёсы суредаськыны, крезьгур кылзыны. Пӧртэм пумо буёлъёс, гуръёс юртто мыным шуг- секытъёсы сярысь вунэтыны, малпанъёсам ке но гажано адямиеным пумиськыны, вераськыны, мусояськыны. . . Яраз Александр Шкляевлэн "бичетэз". Зэм, паймымон со - яратон дунне. Отысь героиня сямен, мон но нуисьо аслэсьтым дневникме, принцелы гожъясько гожтэт. Озьы каньылгес луэ. Бен, бумага ваньзэ чида. Ма, юнме шорысь Запад психологъёс но уз дэмлалэ, дыр, "ӵемгес тӥледлы урод луыку, ваньзэ аламазэ бумага вылэ гожъяно" шуыса. Тужгес но асьмелы: гуртын психологъёсмы туж ичи, вань ке но, котькудзы доры сэзь уд вамышты. Кин тодэ, оло, ӵуказеяз "сюлэм усьтонэд" быдэс гуртлы вӧлмоз?! Мхм. . . шумпотымон, "Инвожо" та пумысен бере кыльымтэ. . . .Мон кемалась суредасько ини. УдГУ-ысь худграфе пыро шуыса малпалляй. Но аслам кужымелы ӧй оскы, басьтӥськи мукет удыс борды. Котькуд суредэ - яратонме малпаса пӧрмытэмын. Курень, сьӧд суредъёсты мон чик уг гажаськы. Огвакытэ дышетсконэ урод мынэ вал, яратоно адямие сярысь нокыӵе ивор ӧвӧл; малы улӥсько та дунне вылын, кинлы мон кулэ, ма понна суредаськисько - дыр быдтон уж со. . . но мукет та выллем юанъёс йырме поромытӥзы, лэся. Сыӵе ини мон. Ноку малы ке аслым ӧй кельшылы. Асме кӧй шуэмысьтым, сиськылытэк уйжоммытозям бызьылӥсько, пресс качатьтӥсько; асме визьтэмгес малпамысьтым, кулэзэ но кулэтэмзэ лыдӟисько; асме яратымтэысьтым гажанэ азьын "ляб лул" кадь потӥсько. . . Огласянь, валасько, умой со - азинскиськод, шуод-а, мар-а? Нош мукет ласянь. . . Яратонын но азё-беро уробо выллем, ява. Кельшоноосыныз керетӥсько, адӟемпотостэмъёсыныз вераськисько, нош одӥгзэ гинэ витисько. . . Ой, тӥни, сюлэмме тӥледлы усьтыса, капчигес но луиз кадь. Озьыен, вуоно суредам но ичигес луозы сьӧдэз, куренез. . . Алигес кельшоно пияше кузпал луыны ӵектӥз. Нош мон кемалась ини аслым ачим кыл сётӥ: яратоно адямие мукетсэ кышно ваиз ке, соку гинэ мон но бызё. Ма, семья сярысь малпаськыны но вазьгес ай. Тӥни озьы, весь витисько, витисько. . . Кин тодэ, оло, со мынам Инмарен гожтэм кузпалы?! . . .Зэм, зэм, нош ик лемлет малпанам вуи. . . Таин гожтэтме йылпумъясько. Суредъёсме, гожтэтме печатлалоды-а, уд-а - тӥляд ужды. Но мынам журнал бамысьтыды туж лыдӟеме потэ вал суредасьтылэсь - Юрий Лобановлэсь суредъёсы пумысен малпанъёссэ. Оло, кыӵе ке визь-кенеш сётоз. Ӧй люкетысал, дыр, психологъёслэн но куд-ог дэмланъёссы. Ӟеч луэ. Гажаса одӥг пичи нылаш. Огъя Удмуртиысь устолыко суредась егитъёс сярысь малпаськыса, малпан кылдэ, нылъёс пӧлынгес вӧлмемын, лэся, чеберлык шоры мур пуштросо амалэн учкон. Пиос но вань, нош малы ке но соос ӧжытгес. Таяз учыре но асьме азьын нылаш кемдӥз. Шудо улон сярысь, яратон сярысь ӟеч мылкыдын малпаськись - суредъёсыз вылын со озьы адӟиське. Нош маиз уг тырмы - суредъёсын уг адӟиськы суреданъя кутӥськись амал (техникаез). Озьы ке но, со амалъёс лыктозы адями доры, нылашмы сюлмысьтыз тыршиз ке, одно ик лыктозы. Чуръёсам чик но вӧсь кареме уг поты та егит сюлэмез. Ӧтисько сое "Инвожо" журналлэн редакцияз - пыр-поч кенешомы. Нош одӥг суредэз (витез пӧлысь) журналэ поттымон - туж ӟеч со пӧрмем. Сое тӥ ас синмыныды адӟиськоды. Гажаса Юрий Лобанов. Улонысь учыр Лабрес льӧмпу ваньзэ тодэ Сюрес дурысь бусы шорын сылӥсь льӧмпу мае гинэ адӟемын, кылэмын ӧвӧл меда. Котыр гуртъёсын улӥсьёслэн тросэзлэн соин улонзы герӟаськемын. Татын пумиськылӥзы яратӥсь сюлэмъёс, татысен ӟар потыку люкиськылӥзы пӧртэм гуртъёсысь люкаськем егитъёс. Соин ик сое погыртыны, гырыку-кизьыку люкетэ шуыса, выжыеныз порыны нокинлэн киыз уг ӝутскы. Мукет бусыосысь ведь трос писпуосты погртылӥзы ни. Ма веранэз ни одӥг писпу сярысь, куке быдэс гуртъёс ӵлшкыт бусылы пӧрмытэмын. Нош та лабрес льӧмпу улэ но улэ, сюэн-сюрсэн адямиослэсь малпанъёссэс, верам кылъёссэс тодаз возьыса. Гужем пыдын ветлӥсь калык али но солэн саюлаз пуксьыса жадемзэ веськатэ. Кизьыку но ю-нянез октыку-калтыку механизаторъёслы пӧсь сиён бусые вортто.Соос но нуназеяны татчы люкаськыло. Оскисько: мӧйы льӧмпу кык яратӥсь сюлэмъёсты но тодаз возе, луоз. Ӟырдыт вал яратонзы Онтонлэн но Любалэн. Та льӧмпу улын пукылӥзы соос нуналлы быдэ шкоалысь бертыкузы, ог-огзэс синъёсынызы вешаса но мусо кылъёс вераса. Дыр ортчиз. Егитъёс школаын дышетсконзэс йылпумъязы. Табере шер пумиськылоно луылӥз. Люба Ижкаре мединститутэ дышетскыны пыриз. Нош Онтон нокытчы но пырыса ӧз вуы. Сӥзьыл солы армие мыноно вал. Онтон городэ кошкем Любаезлэсь бертэмзэ чидатэк витьылӥз. Яратон нылашсэ шутэтскон нуналъёсы пумиталляны вокзалэ ветлылӥз, кытӥяз пырак Ижевскозь но вуылӥз. Онтонлэн анаез тодӥз, кытчы пиез ветлэ, кинэ яратэ.Кытысь ке но со кылэм , Люба висе шуыса. Нош Онтон кылэм ӧз кары анайзэ. Гомась тылын ӝуась яратонэз кысыны уг луы ни вал.Нош анаез ялан одӥг малпанэн улӥз: кызьы ке но люконо таосты. Со вие муг но шедиз кусыпсэс кыдёке карыны. Пияшлэн анаезлэн Алтай крайын улӥсь выныз гожтэт келям: татын, пе, улон инты но, уж но шедьтыны быгатоды. Озьы соос выжыенызы ик кыдёкысь шарае улыны интыяськизы. Онтон вис карытэк Любаезлы гожтэт ысъяз, мӧзмыса, пе, улон инты уг шедьтӥськы.Армие кошкон азяз бертылӥз Любаез доры. Кыл сётӥз, бертыкуз нырысь ик со доры пыроз шуыса. Соку, пе, нокин асьмеды люкыны уз быгаты ни. Люба туж капчи мылкыдо вал, шудны-серектыны быгатылӥз, маке но выльзэ малпалляз. Шудон пӧлын сое гинэ витьылӥзы эшъёсыз. Висемзэ чик ӧз шӧдылэ. Собере. . . Онтонэз армие кошкем бере куректыса но мӧзмыса лябомыны кутскиз. Котькыӵе висён куректыку шарае потэ шуо ук. Синъёсыз солэн пумен муре усизы. Ижевскысь бертылыкуз тужгес но сюлэмыз жугиськылӥз. Нокин но сое вокзалын сяськаосын ӧз пумиталля. Гуртаз огназ бертылӥз. Сюлэмзэ льӧмпу улын буйгатылӥз, эшез доры кожыса ( со гинэ нылшез валалляз), маке но понназы лушкем гинэ сипыртылӥзы. Любалэн тазалыкез пумен лябомиз но лябомиз. Вуоно араз ик дышетскыны мыныны ӧз быгаты ни. Толалтэ Мултанын больницаын кыллиз. Шуныт тулыс вуэм бере, кӧня ке гуртаз улӥз. Солэн катез ӧй вал ни ке но, нуналлы быдэ льӧмпуэз доры васькалляз, шулдыресь, шудо нуналъёссэ тодаз вайылӥз. Берпуметӥзэ ветлыкуз льӧмпулэн одӥгаз ваяз лента керттыса кельтӥз, мед, пе, каллен тӧласа улоз, егитъёслэсь яратэмзэс тодэ вайытоз. Бӧрысь висеменыз сэрен Любалы отчы ветлыны ӧз кылды ни. Нош мыноно луиз больницае. Отын нуналлы быдэ гажанэзлы гожтэт гожъялляз. Катез ӧй вал ни ке но, егит муртлэн сюлэмыз кыре-буре куриськылӥз. Нуналлы быдэ огназ вамышъялляз пичигес тэльлэн сюрес дуртӥз. Писпуос улэ пуксьыса, мынӥсь-ветлӥсь машинаос шоры учкыса пукылӥз. Тодмо шофёръёс машинаысьтызы йырзэс мычыса ик нылаш шоры пальпотылӥзы, ойдо, пе, ворттылом шуыса йырзэс сюрес шоры шонтылӥзы. Катьтэм Люба киыныз гинэ шонтылӥз. . . Нылашез йӧнатыны ӧз быгатэ ни. Одӥгаз шулдыр нуналэ со улонэн люкиськоно луиз. Кисыяз нош гажан муртэзлы гожтэтэз кылем. Онтон шуак Любаезлэсь гожтэтъёссэ басьямысь дугдӥз ке но, солэн кулэмез пумысен ӧз валатскы. Толэзь ортчыса, бертӥз отпуске. Кызьы вераз, озьы ик лэсьтӥз: нырысь ик пыриз Люба доры. Шимес иворез кылыса, сюлмыз чигиськиз егит воргоронлэн. Льӧмпу улэ мыныса, кема Онтон пукиз куректыса но кайгырыса. Йырзэ ӝутӥз но, пырак вадесаз ик горд лента тӧлаське. Со соку ик тодмаз Любаезлэсь лентазэ. Вай бордысь сое пертчыса, чупаз, маялляз, улэп адямиен сямен вераськиз. Яратонэзлэн шайгу вылаз ветлыса, Онтон туж урод мылкыдын кыдёкысь шаере кошкиз . Кык яратӥсь сюлэмъёслы ӧз кылды ӵош улыны. Онтонлэн сюлэмаз али ке но кылемын Любаезлэн тусыз, сямыз, быдэс мугорыз. Кышнояськылӥз вал, ӧз быгаты со улыны мукет кышномуртэн - люкиськиз. Озьы со али но, ӵыжы-выжыосызлэн верамзыя, одӥгназ улэ. Наталья Тратканова. Расил Сабиров Иванлэн дартъёсыз Верос Зэм ик, евангелиысь басьтэмын та нодкыл: Христос вордскыку, вӧсясьёс солы кузьымъёс ваё. Чилясь суред вылын - лякыт тусбуё, кузь тушо пересьёс. Соослэн пельпумъёсазы ныпъетъёс, отын зарни, ладан, мирро, оло нош смирна? Мон созэ ӟеч уг валаськы. Та пересьёс возьмазы, ку ӝуатскоз Вифлеем кизили, но кузьым кутыса сюрес вылэ потӥзы. Со доры, Кинлы кузьым чик кулэ ӧй вал. Чаклалэ ай: али гинэ вордскем вож нунылы, тэбетъёс-кутэтъёс интые, зарни яке смирна чуртнало. Шуныт анай киос интые, нуныез куто, лякыт ке но, мурт агайёс, ужаса сюрмем кикуръёсазы. Нунылы йӧл кулэ, нош солэн ныр улаз донго ладан. Оло, соин Коля Митюковлэн, вӧйын зырам синмо баӵко солэсь мемизэ черкысен вӧсян дыръя, паникадилое кизямез потыны кутскиз. Колялэн куректонэз сотэк но сокем бадӟым вал, эшшо ке вылаз ик солэн синъёсаз но пеляз курыт ӵын пазьгизы. Таин валче быдэс историез чутрак выльдыны мылкыдыз ӝутӥськиз Ванялэн. Ӵок, отын маке вужез кылиз ик ке. . . Таӵе малпанъёсын ми - христианин но мусульманин - огаз толсур ӝытэ огъяулонниын ӟерас (курадӟись) эшмы доры вамыштӥм. Валамон ини, инбамын кизилиос ӧз ӝуалэ, ма, соосты кырымамы октыны мылкыдмы но ӧй вал; йӧзор усиз; нош мынӥсь-ветлӥсьёс кытчы ке дыртӥзы. Выль лымы вылтӥ ми пыдъёсынымы сыӵе "крендельёс гожмамы" - выль книгаысь иероглифъёс но тӥни, нош куараосмы кезьыт омырын соосты ваньмызлы кылымон шараязы. Вераны луысал: милям евангелимы вань калык азьын гожтӥськиз, но солэн тужгес пусйымонэз - шораз лызэктӥз сюлмаськись киосын понэм небыт пластинка, кытын гожтэмын вал милям улэп куараосмы. Сизьымдонэтӥ аръёсысь кыӵе ке "Кругозор" выллем. Уката лякыт сямоез ужась но мадёсчи - Иван Прорехин. Со мынэсьтым но чебересьгес "крендельёс" суредаз; пельпумаз гитараен, быдэсак азвесьвуамын, уродос изьыен - Образцовлэн театрысьтыз актёръёс сыӵегес туссэс каро, нырысетӥ адямиосты шудыкузы. Солэн пальто кисыысьтыз ӟенеликын маке-со пальккаськиз но милемды студентъёслэн огъяулонниязы дыртытӥз. Отын угось егит доцент Серёга Васильев пукиз но возьмаз - яке кузь лекциоссэ гожтыны дартсэ, яке витьымтэ куноослэсь лыктэмзэс. Маке но чеберлыкозэ кылдытон дарт Серёгалэн улонниез пала каллен гинэ вуытозь но кык ӧтьымтэ куноос выль коркаос, оло нош чебер коркаос вискытӥ йыромыса ветлытозь, асьмелэн дырмы вань ай туж тодмо адямиен - Иван Прорехинэн тодматскыны. Туж тунсыко адями шуимы ке, со номыр верамтэ кадь луоз. Тазьы шуомы: со - ивангели (Иван нимлэсь кылдытэмын. - ред.) адями, чик ӧвӧлтэмысь выжыкылъёс, кузьмадёсъёс кылдытъясь, огшоры жуг-жагысь но синпӧртмасьсэ адӟись мурт. Философи изэз шедьтэм алхимик музэн, со котькыӵе арбери борды йӧтскыса но сое аслаз йырвизьмаз бергатыса, малпанъёсаз зарнилы укшатыса, син азямы ик выжыкылэз зэмлыко ужлы, учырлы пӧрмытъялляз. Таизлы ми, материалистъёс но атеистъёс , пумтэм абдраллямы. Огъяулонниысь удмурт пиос солэсь лыктэмзэ чидатэк возьмаллязы. Кылбуръёсты адӟонтэм карись, озьы ке но, вань эшъёсмы пӧлысь нырысен ас чуръёссэ печатлам Ившин Сашка соку ик аракыен вузкаронние лобатъялляз; Федоров Володя, кроватез улысь ӟазег сӥль поттыса, шыд пӧзьтыны кутскылӥз; нылмурт выллем возьдаськись Морозов Витя уката зол шумпотылӥз, угось со античкаен экзаменлы дасяськыны быгатылӥз Ванялэн зулемез улсын гинэ, вылаз ик кӧт тырымон сиськыны; озьы ик шумпотылӥз Дембель но, малы ке шуоно, юэм йырын гинэ со дусыменыз пумиськыны ветлылӥз; вашкала реализмъя экзаменлы дасяськон вылысь, кӧня ке грампластинкаосы гожтэм "Война и мир" басьтэм Никитин Федя пыдысьтыз куасъёссэ куштэ но горд мыйыксэ мычыны ӧдъя, Хайдаров Рашид кыӵе ке удмурт кылбурез ӟуч кылысь бигер кылэ берыктэ - огкылын вераса, ваньмыз возьмазы кыӵе ке праздникез. Нош огъяулонние кызьы ке ик сюрыны кулэ на ук ай. Марья Семёновна, шӧдэм кадь, вань "беллёез" бичаны косыса, ачиз вахтёр интые пуксемын. Кут гинэ но пырон амал уз шедьты. Ваня сянаез. Керетыса-даллашыса пырыны турттонэз ик ӧвӧл - милициез ӧтёзы но вань калык азьын, Шушковез сямен, судъялозы я мар. Визьпог Ванямылэн йыраз кескич малпан чилектӥз. Ужлы ӟудэм студентъёс волейболэн шудыны но, американецъёслэсь адӟем карыса, нуналлы быдэ иськем мында урамъёстӥ бызьылыны ылазы вал. Соос чот кариськыса, Ванялэн банкаосыз куакъёс улэ каръяськизы, вылысьтымы штанъёсмы но дэремъёсмы лач бинялтэмын - асьмеос тӧдьы гожмоё эрезьёсын (трусъёсын) но пыдъёсамы кроссовкиосын дӥсяськемын-кутчаськемын табере. Тазьы асьмеос тазалыксы сярысь сюлмаськись студентъёслы укшаськомы. Нюламмы-пӧсяммы мед адӟиськоз шуыса, ми туж ӝог бызьыса котыртӥмы огъяулонниез. Собере возьмамы на трос кузя лыктӥсь студентъёсты. Соос сьӧры ми но калъяськимы. Марья Семёновна, ӝӧк сьӧры султыса, котькудзэ йырысеныз пыдозяз чаклаз - ваньмыз татын улӥсьёс кадь. Нош таосыз кинъёс ай таӵе? Кык спортсменъёс сьӧд но лыз эрезьёсын (трусъёсын), нюлам вузы кымесъёсазы, мугоръёсазы быльырамын, тэтчаса вахта вӧзтӥ бызизы. Кыӵе этажын улӥсьёс вал ай та? Ул дӥськутэн соос, миндэръёс выллем, ваньмыз огкадесь. Тани таиз, тӧдьы йырсиёез, зэмен ик спортфакысь кадь. Нош соиз, сьӧдэз, кытысь? Палэнысь ӧвӧл-тэ? А, мар юнме йырез тӥялод - сьӧд спортсменлэн берыз но ӧз адӟиськы ни. Вакчи эрезьёсын (трусъёсын) соос ваньзы огкадесь. Соос сьӧры бызьылытозь, эсьма "беллёез" воштэмзэс чаклано. Ул дӥськутъёсын пыреммес синйылтыса вылысь, удмурт пиос ӧз абдралэ - соин йырин ӧз луы ни. Улонниын огыр-бугыр кариськиз: Ваня самой чалмытъёссэ, вераськисьтэмъёссэ но зулисьлы пӧрмытылӥз. Нош ачиз Ваня со куспын селёдкаез портвейнэн гылтылӥз, Сафоез Софоклэн сураменыз Витяез абдратъяз, гитараен шудэмъяськылӥз но Шибановен шахматэн шудыны вутскылӥз. О, шахматэз Ваня уката зол яратӥз, Ильф но Петровлэсь книгаоссэс лыдӟемез бере. Та акылес шудонын но вань вылэм паймымонэз. Ас понназ маке но супыльтӥсь Шибанов факультетлэн сборнояз куинетӥ доска вылын шудӥз, - Ваня - мастере кандидат сямен, нырысетӥяз. Зэм, кандидат со луиз берлогес, кудӟем йырын. Таиз ортчем учыр сярысь но нимысьтыз вератэк ӧвӧл. Вузын дышетскисьёс пӧлын "Тужгес устоез шудӥсь" ӵошатсконэ Ваня беромыса лыктӥз. Вылаз ик туж зол юэмын вал. Паймоно кадь, кызьы со усыкмем йырыныз аудиторие шонер сюрес шедьтэм. Судья сое лэзьыны уг туртты ик вал ке но, факультетлэн данэз сярысь сюлмаськыса, Ваняез пырыны лэзиз. Уката ик филфак ӵошатскиз ЭПФ-ысь студентъёсын. ЭПФ-ъёс одӥг арня талэсь азьло та преподавательлэн занятиез дыръя баскетболэн шудыкузы куспазы жугиськиллям, соин ик дышетӥсьлэн милям "тушмонъёсмылы" йыркурез ортчымтэ на вал. Ӵыж-горд йырсиё "тушмон" шумпотыса мукет эшъёсызлы юрттыны дыртэ ни вал, но Ваня сое ӝегатӥз. Шудыны кутскем бере ик Ваня нырыныз ӝӧкез "кокчаны" ӧдъяз. Шахмат пул вылысь фигураос таин валче интыоссэс вошъязы. "Король" интызэ воштэм бере шудон нош ик азьланьскиз. Шонергес вераса, шудон йылпумъяськон калэ вуиз. Соку Ваня, буёлъёсты сураменыз, пумит шудӥсен эчешыны кутскиз. Куд йырыныз со валаз, огшоры гинэ шудыса, керетытэк солы вормыны уз кылды. Пумит шудӥсьсэ со я тамаканы чортылӥз но шудонэз нокин вормытэк йылпумъяны дэмлалляз, я пуконъёсты вошъялляз, я анекдотъёс мадьылӥз, я Ильфен Петровез тодаз вайылӥз. . . Огкылын вераса, Ваня сокем зол ӵашетӥз, асьсэос шахматистъёс, судьяос, учкисьёс сяна, ураметӥ ортчисьёс но ми пала кырыжак учкылыны шӧтазы. Горд йырсиё пияшлэн мылкыдыз лапказ, со пала-та пала учкылыны кутскиз. Таин валче Ванялы келямзэ ӧз ик шӧды. Нош Иван пумит шудӥсьсэ чупаз, анекдот мадиз но сое магазинэ чортӥз. . . Та учырез али но тодамы вайытэк ӧм келтьтэ. Но Витя Шибанов нокыӵе ик ӧз кариськы, угось со валаз: Ваня со ӵошатскон дыръя кадь сьӧраз ортчымтэ на. - Озьыен, шудон радызъя мыноз. Уката ик Ваня таяз учыре тросгес саклык висъяз вашкала грек драмалы, висказ серемес чуръёс, анекдотъёс мадиз. Морозов ваньзэ соосты туж мыло-кыдо гожъяз. Витялэсь гожъямзэ шӧдыса, Ваня визьноданы кутскиз: тазэ гожты, тазэ - эн. Бендерлэн но Швейклэн шайвылъёстӥ кыӵе ке Орестэн ӟыгыръяськыса ветлэмзы, Мойшалэн кышноезлэсь дусымзэ трамвайысен тодэмез сярысь учыръёсты гожъянъяз, Витя пинал ныл сямен ӵыжектылӥз. Со куспын Дембель пӧсятӥсьсэ гульымаз лэзьылӥз но Витя шоры кырыжак учкылӥз. Дембель ас понназ тау карылӥз Ванялы. Угось Ваня ке ӧй луысал, туннэ "бусёнъёс" куспын жугиськон одно пуромысал. Шудо Прорехинэн арганэз ӟератӥсь (курадӟытӥсь) Федотов Мишаен ог- огзылы шоры пальпотыса учкылӥзы. Мае меда та вие тодаз ваиз Миша? Оло, ар талэсь азьло стройотрядын - Сингапурын - луэм учырез? Валамон ини: Дембель-стройбат стройотрядэ ӧз мыны - бетон ныркыны солэн мылкыдызъя ӧвӧл. Нош Витька Морозов трос коньдон "дурыны" мылысь-кыдысь кошкиз. Одӥг нылэз яратэменызы сэрен Дембелен Витька общежитиын огпол гинэ ӧз жугиськылэ ни. Нош тани Сингапурысен, стройотрядысь эшъёсызлэсь гожтэтъёс басьямзэс синйылтыса, Витя, я ӵыжектыса, я ӟаректыса ыргетӥз: - Мынамез ке одӥг чур но ведь уг гожъя. Со. . . варгас ӟазегеныз, дыр. . . выльысь кушласькиз. Ваняен Миша "варгас ӟазеген кушласькон" пумысен эшенызы соглаш ке но вал, мылкыдъёссэс ӧз шараялэ. Табере соос дорысьтызы гожтэтъёслы сокем ик ӧз шумпотэ ни. Со интые кыксылэн ик йыръёсазы выль малпан чилектӥз. Шыпытак султыса, пиос горд сэреге мынӥзы но Мишалэн, ныллэн кадь чебер кинюртэменыз, киыныз гожтэт пӧраны ӧдъязы: "Ӟечбур, мынам дуно адямие, Витя Морозов! Ӟечбур, мынам гырисе, уен-нуналэн ужасе но мынам матысь эше! Тон сыӵе шуак кошкид, монэным рос-прос ӧд но ӟечъяськы - нош мон быдэс уйме бӧрдыса потӥ, миндэре али ке но кот на. Ма, мон али но бӧрдэмысь уг дугдылӥськы - миндэр пуйые уз кӧсалля тон бертытозь, монэ батырлэн выллем кужмо киосыныд ӟыгыртытозь. "Гаян" романысь батырез тодӥськод на-а? Со батыр - тон. Мон та романэз лисъясько но син азям тон гинэ, мынам мусо Витечкае! Гаянлэн яратоно нылыз вал ук, со понна ик со кулӥз. Мон асме со ныл кожасько. Нош тонэ - Гаян. Тодӥськод на-а, кызьы соос шыр гольык пыласько оло Камын, оло Лудзинкаын. Мынам но тонэныд ӵошен гинэ пыласькеме потэ. Витя, Витенька. Мынам тыныд одӥг лушкем мае ке шараяме потэ. Зэм ик, тон нокинлы но номыр уд вера? Уката ик Дембельлы. Ваньмыз малпало но зулё, милям соин кусыпъёсмы матынэсь шуыса. Но тон, мынам гажанэ, со супыльтонъёслы эн оскы. Инмар азьын верасько: милям соин номыр ӧй вал. Нош тонэныд - вал, соиз зэм. Тодӥськод на-а, античкая экзамен бере, тон куректэм вылад юэм но (тон соку мадид, макем зол серекъязы ке но, дышетӥсьёс тыныд "кык" пуктӥзы шуыса) мон доры лыктӥд. Асьмеос соку гуртын пӧзьтэмзэ юимы, нош ваньмыз кошкем бере, комнатаын ваче гинэ кылимы но асьмелэн ваньмыз туж умой пӧрмиз. Вылӥысен котьмае синйылтӥсь Нюлэснюня алданы уз сёт. Оло, тон со шудо ӝытэз но вунэтӥд ни? Возьыттэм иське тон! Мон тани ялан бӧрдӥсько - уг тодӥськы, оло шумпотэменым, оло куректэменым. Витя, асьмелэн ведь ваньмыз туж трос умой пӧрмиз. Зэм, тон номыр уд тодӥськы ни, нош соку верад вал, мон вань нылъёс пӧлысь самой умоез шуыса. Тон соку мыным аслэсьтыд паспорттэ но кельтыны ӧдъяськод вал. Тодӥськод на-а? Нош мон тыныд соку верай куалаын вӧсяськон сярысь. Тае кылыса тон паспорттэ шуак басьтӥд. Я бен ӵок, таиз пумысен берло вераськом. Тодӥськод-а, Витенька. . . Дугды ай, Стерхова дышетэмъя, выль чурысен кутско. Витя, мон тыныд меӵак верало, ватыса уг улы - мон тынэсьтыд нуны возьмасько но соин ик тонэ туж юн яратӥсько. Тон али номыр сярысь эн сюлмаськы, ужа отрядад пумозяз, тросгес коньдон потты, нош собере соку ик мон доры лыкты. Нэнэе доры мыныса, благословить карыны куром но куалаын вӧсяськом. Асьмелы туала сямъёсъя нокызьы уг яра. Нэнэелы мон телеграмма лэзи ни. Собере тынад нэнэед доры мыном. Угось сюан, собере нуны сюан сярысь малпаськыны дыр вуэмын. Витенька, гырисе мынам, мынам кужмо Гаянэ! Мон котьку тодам ваисько тынэсьтыд ужаса сюрмем киостэ - соос монэ йырысеным пыдозям маяллязы. Ах со киос! Мынам сюлмо тыршисе, тон вань тодмо пиосы пӧлысь тужгес ик умоез! Нош Дембель вылэ ойдо ӵошен сялалом. Татысен мон сое пумитай ке, озьы ик каро. Нылпиед тынад ук, Витя! Копак тон тус! Гожты ӝегатскытэк. Конвертэд ке ӧвӧл, Мишкалэсь кур, солы Ванька нуналлы быдэ гожъя. Ну, таин тырмоз. Ужа лулысь-сюлмысь тыршыса. Олокыӵе но "шпаклёвкаос" шоры эн учкылы, Инмар ваньзэ адӟе. Аслэсьтыд ужаса сюрмем киостэ жаля мон но вуоно нылпимы понна. Ӝоген уго нунымес роддомысь ас кияд кутыса поттоно луод ни. Туж зол чупасько. Тынад кышноед Люда. Р.С. Ӧжыт гинэ ӧй вунэты. Мон "Детский мир" магазинэ пырай ни - адӟи вож тэбетъёс но лыз дэремъёс, вуоно нунымылы туж кельшымонэсь. Этажысьтымы нылъёс асьсэлэсь ӵекто, но мон малпасько, выльёссэ басьтыса умойгес луоз, озьы-а? Малы асьмелы вужез, тон коньдон поттод ук? Я, дугдыны уг валаськы ни, лэся. Ӟеч лу, мусое. . ." Ваня ялан вералляз, Мишка медаз дырты но нылъёс выллем чебер мед гожъялоз шуыса. Пумаз соос суредазы сюлэм, пукыӵ ыбылӥськись пичи но кӧй амурчикъёсты. Кӧня ке малпаськыса, соос суредазы на зарни зундэсъёс но кык лента - лыз но горд. Гожтэтсэс соос чик ӝегатскытэк почтае нуизы но бадӟым синмо пужыесь ымныро нылашъёсын ӵош конверт вылэ кулэ штемпельёс но мар пусйизы. Ӵуказеяз соос, почтальонлэсь лыктэмзэ адӟыса, валесъёссы вылэ ланьырскизы но огез гожтэт лыдӟем, мукетыз арганэн шудэм мактал кариськизы. Шумпотэм Витя но выдӥз, борддор пала берытскыса, лушкемен гожтэт лыдӟыны кутскиз. Огшап ортчыса солэн кроватез ӟукыртӥз но Витя ымнырын ми пала берытскиз. Солэн бамыз я ӵыж-ӵыж луылӥз, я тӧдь-тӧдь ӟаректылӥз. Пальпотӥсь тусыз вожпотонэн воштӥськылӥз. Со али нокинэ уг адӟы кадь - яратонэныз ваче гинэ кылем кожалод. - Вот ведь сука мар гожтэм! Дембель вылэ, пе, ӵошен сялалом. Мон нырысь ик ас вылад сялало, курва! Ну ай озьы мон тонэн ваче гинэ кыли но асьмелэн ваньмыз пӧрмиз? Дембелен тӥ ӵошеннады нылпи лэсьтыса кыллиськоды отын но табере мынам коньдонэным шоголляськыны ӧдъяськод иське?! Ас понназ гинэ даллашыны акыльтыса, лэся, Витя вазиськиз Мишаен Ванялы: - Кылзэ ай, мар гожтэ со стерва! "Нылпиед копак тон тус, пе. Кытысь со тодэм ини, вордӥськымтэ нуныез мыным укша шуыса?! Курег визь! Мишаен Ваня, азьло сямен ик кыллёнъязы, номыр луымтэ кадь пумитаз шуылӥзы: - Тынад, Витя, тынад! - Соин ӵош улӥсь нылъёс но милем веразы, нуныез ӵапак тон тус шуыса. - Номыр уд кары, кышнояськоно луод! Витя тӧдьы синкашъёсыныз выретыны шӧтаз. Инбам выллем синъёсысьтыз тани-тани синкылиосыз кисьтӥськозы. - Нош малы мон кышнояськыны кулэ? Дембельлэн ук со пиналыз, со ик мед кузпалъяськоз! - керӟегъяське Витя. Мишаен Ваня сое "буйгатъямъясько": - Эн сюлмаськы дырызлэсь вазь. Тани ужанмес йылпумъямы ке, коньдон басьтыса Людаедлэн нэнэез доры мыноды. Тазьы шуыса Миша арганзэ кыскиз но Витялы чылкыт бумага мычиз: - Ме, гожтэт ысты. Нош Ваня ватсаз: - Только небыт, лӥятӥсь кылъёсын гожты, нылмурт медаз сюлмаськы, а то эшшо нуныез куспетӥ усёз. Чылкак абдрам Витя кагаз борды кырмиськиз но туж тыршыса гожтэт гожъяны кутскиз: "Котьмар ке но, калгись пуны ик вань тон. . ." Та гожтэт бере Витя азьло сярысь трослы умойгес, тыршысагес ужаны кутскиз. Почтальонэз синйылтыса, со ялан возьмалляз: тани-тани кин ке ик ивортоз, солы гожтэт вань шуыса. Гожтэт ӧз вуы ке но, со понна эшмы усто тыршемез понна премия но грамота басьтӥз. Витялэн Людаен кусыпъёсыз пӧсь гужем бере юзмыт куарусён толэзе Лудӟи шурысь ву салкымам выллем луизы. Витя малпаз: со - Людалы стройотрядысен лек гожтэменыз, нылмуртлэн нуныез куспетӥ усемен кезьытомизы соослэн кусыпъёссы. Табере соос ӧз пумиськылэ ни. Нош Дембель йырзэ урдӥз. . . * * * 1 Кышноен Ванялы удалтӥз, шуыны луоз. Зэм, Аля карт луонзэ студент дырысеныз ик кияз кырмиз, нош отӥяз чылкак Кабаниха кадь луиз. Ваня талы чутрак пумит кариськиз, солэн Тихон кадь пӧрмостэм луэмез ӧз поты. Тужгес но умой пӧрмылӥз солэн дорысьтыз капчиен кошкыны. Кабанихаезлэн син азяз ик, нокыӵе керетонъёстэк мар, шыпак гинэ гылӟе но тӥни. Тани Ваня балконын куинетӥ ӟенеликсэ "Мерлоез" бушатэ, эшшо куинез ватэмын на сяська горшокъёсын. Аля котькытысь утчалоз, нош татысь утчаськыны тодаз но уз лыктылы. Со понна кышноезлэсь ватоссэ - холодильник улысь коньдонэз - Ваня кемалась шедьтӥз ни. Ӵапак соин ик басьтэмын Ванялэн юонэз но. Со ини толло ӝытысен "ӟистэ". Дораз бертӥсь кузпалзэ адӟыса, Ваня солы гоно мугорзэ возьматэ но шумпотыса киыныз шона. Картэзлэсь кудӟем тусбуйзэ синйылтыса, Аля пыд улзэ шӧдылытэк тубат кузя лобатэ но, Ксантипа музэн пӧрмостэм философез нодъяны - лек кылъёсын тышкаськыны дасяське. "Возьыттэм", сурон бам! Кылемаз но мумид дорысь пень кадь кудӟыса бертӥд, собере выль штандэ дӥсяд но сэрег сьӧрын возьмась дусымед доры кошкид! Бодыен кокан люкет! Ярам ай соку ки улам бритва сюриз! Сурон бам! Ваньзэ, ваньзэ мумилы урттылӥсько но нокыӵе киное соин уг мыны. Бубиз нош, бубиз, пизэ визьнодам интые, ядан суреда но созэ киное ыстэ. Художник! Пикассо! Кыӵе пи пи будэтэм - возьыттэм. . ." Йыркурен пачылмем кышноезлэсь ӧсэз йыг! Подэмзэ шӧдыса, Ваня чоз-чоз кариськиз. Кытӥ-мартӥ пыдзэ кутчаз, "Мерлазэ" усьтыр-табыр сумкаяз чуртназ но ӝогак подъездэ дыртӥз. Аля йылсо катаосыныз тубат кузя шоккетон но ым пушказ тэронтэм кылъёсын далашон вакытэ, Ваня корт пагӟаетӥ корка сиге ӝутскиз но писэйёты кышкатыса, ас понназ "На пыльных дорожках далёких планет останутся наши следы" кырӟанэз нукыртыса, берпуметӥ подъездээ ваське. Со куспын Аля ас улоннияз пыре. Кияз ыльнянь погыльтонэз кутыса балконэ потэ но. . . отын буш. Кытчы пыриз со шайтан воштэм?! Ньылетӥ этажысь васькемез ӧй пишмысал ук. Паймоно кадь. Со коньдон ватоссэ чакланы дыртэ - интыяз. Нош пыдкутчанэз - ӧвӧл. Озьыен, выльысь дусымез доры шупчиз! Возьыттэм! Та вие телефон ӟазыртӥз: - Аллё, мон со. - Кытын тон? - Мон татын. - Сурон бам ик тон. Ваньзэ, ваньзэ мумидлы чагисько! - Урттылӥськы. - Кытын тон? Ал гинэ балконын вал ук! - Алечка, пичие мынам, философиен лекциосты тодӥськод на-а? - Адӟем уг пот со лекциостэ. Ойдо доре берт. - Тон тодӥськод на-а, Ситников мар вералляз? - сёто мон тыныд Ситниковез! Нош ик юид? Кӧня тазьы кыстӥськоз на? - Алечка, мон тыныд тодад уськыто Гегельлэсь одӥг малпанзэ: огвакытэ ик мон татын но ӧвӧл но. . . - Мар тон супыльтӥськод! Нош ик парсь кадь кудӟем ни. . . - Озьы шуэмын "Феноменология духа" книгалэн томаз. . . - Иське тон - парсь. - Шонер. Нош тон - Кабаниха. - Ма-ар?! Кызьы тон пегӟид? - Алечка, мусое, ручка басьты но гожты: огвакытэ ик мон мынӥсько но уг, озьы ик мон татын но, ӧвӧл но. та нунал понна мынам валэктонэ таӵе. Нош табере мон кошки отчы, кытчы нуо пыдъёсы. Адью, Алечка. Салам вера мемиедлы, - та кылъёсыз бере Ваня, "Мерлаеныз" жингыртыса, вамыштӥз отчы, кытчы пыдъёсыз нуо. Нош куд пыдъёсыз сое котьку сямен ик нуизы анаеныз Юра выныз доры. Зэм, юэм йырын ульчаетӥ мыныкузы Швейк сярысь туж бадӟым куараен эчешемзы понна (Юра шуэм, отын, пе, "гомосексуалист" гожтэмын, нош Ваня - "педераст") соосты кыксэс ик милицие вуттылэмзы бере, Иван кыл сётӥз, выныныз ваче ноку уз юылы ни шуыса. Угось юэмез бере Юралэн мылкыдыз шукыръяськыны ӧдъялляз но со одно ик ураме чортӥськылӥз но отысен кыӵе ке паймымон учыре шедьылӥз. Валамон ини, выныныз ӵош Ваня но юмоке сюрылӥз. Огпол соосты, кудӟем муртъёсты, милиционеръёс кырмиллям. Коридорын кема возьмаллям протокол гожтыны ӧтемзэс. Соку Ваня буш кабинетысь ӝӧк вылысь милиционер картузэз синйылтэм. Кема малпаськытэк, картузэз йыраз изьыям но дежурной вӧзтӥ потон ӧс пала лашкинтэм. Зэм, катэз чакласьёсын ваче ымныр пумиськылытэк Ваня ӧз ортчы. Шахматэн шудыны яратэменыз сэрен со огпол Твере мыноно луиз. Кунокуа юртэ (гостиницае) интыяськемез бере, сиськонние вамыштӥз. Солэсь азьло одӥг тодмоеныз "Ркацители" ӟизтӥзы. Синнннъёсыз ляб адӟемен, иван ӝӧк вылэ пуктэм "Спецобслуживание" гожтосэз ӧз ӧз но синйылты. Со куспын Ваня пумитэ номыр куаретытэк пуксиз чылкыт дӥсяськем воргорон, вылтусын кунгож сьӧрысь лыктэм муртлы укша. Шӧмаськем Иван вазьылытэк ӧз чида: - Хоӟ до ыоу до? - Вӥӧы ӟӥлл? Хоӟ аӧӥ ыоу? - Чё? А, марым, о кӥы. Сенька, бери мяч. - Ӟхаӵ? - паймиз куно. - Ӵханк ыоу ӟӥӧы муцх, пӧй. . . Кыл бӧрсьы кыл. Кунгож сьӧрысь куно Швейцариысь дипломат вылэм. Ог-огенызы тодматскем бере, дипломат кыксылэн чаркаосазы курыт юон лэзиз. Таос ваче шуккиськыса юиллям но улон-вылон сярысь вераськыны шӧталлям Валамон ини: тросгес супыльтэм Ивна. Пальпотӥсь официант ӝӧк вылазы сиён-юон пуктылыкуз, сак кылзэм кудӟем иванлэсь вордскем Ижкарез, отысь промышленность, улӥсьёсыз сярысь зулемзэ. Дипломат уката абдрам, Ижын пыӧал-тӥрлык поттэм сярысь иворез кылыса. Нош Иванлэн кыл гозыез кузьгес но кузьгес луэ: - Нош тон, зема, тодӥськод-а милесьтым тужгес бадӟым узырлыкмес? - иван нош ик аслаз яратоно Алькаез сярысь тодаз ваиз. Нош дипломатлэн йыраз, кышномуртъёс ӧвӧл, Удмуртиын поттӥськись пыӵал-тӥрлык. Солэн тодэмез потэ ини самой кужмоез сярысь. Аслаз сюмыказ гинэ аракы лэзьыса, Ваня юиз, ымнырзэ кисыртӥз но шуиз. - Скалка. - Ӟхаӵ? - ӧз вала дипломат. Нош Иван, Алязэ син азяз пуктыса, мур лулӟиз: - Скалка. Ыльнянь погыльтон, иське. Тае кылыса, швейцарец уката золгес паймиз, нош официант кышкаса синъёсыныз со пала, та пала кырмышъяны шӧтаз. . . Вордскем Ижаз бертэмез бере, Ваняез телефон пыр Пушкинской урамысь туж тодмо ужъюртэ ӧтизы. Ӧз, огпол гинэ ӧз ӧтчалэ Иван Германович Прорехинэз та юн борддоро, тём пеймыт укноё юртэ. Бадӟым тыпылэсь лэсьтэм но ай Сталин вакытэ татчы пуктэм ӝӧк сьӧрын героймы сизьым пол пыр-поч гожъяно луиз со дипломатэн пумиськонэз сярысь. Котькудаз со кагазъёсын маке мында юнме супыльтонэз вал. Огез гинэ сизьым полаз ик шонер пусъемын вылэм: асьмелэн (мерламы" трослы кужмогес соослэн (бургундскойзы) сярысь. Зэм, кэгэбэшникъёс солы ӧз оске но выльысь юалляськыны кутскизы, кыӵе лушкем иворез Иван шунды пуксён палась спецслужбаослы "вузаз". - Ма, тӥ озьы ик вералэ вал: озьы но озьы, гожты, пӧй, Ирод эксэй но вож нунлыослэн вордскемзы сярысь евангелиысь притчаез. Бен, соиз зэм, Лозаннаысь воргоронэн мон Вифлеем кизили сярысь легендаез Матфей но Иоанн пӧртэм сямен валэкто шуыса эчеши. . . - кияз корт ручка кутыса, Иван тямысэтӥ ползэ выжыкыл гожтыны дасяськиз. Соку кэгэбэшникъёслэн бадӟымзы мазэ-созэ валаса, вылды, номыр вазьытэк, киыныз гинэ ӧс шоры возьматӥз. . . * * * . . . Нош визьлюкъёсмы та вие лымы улэ согиськем юртъёс вискытӥ читыр-чутыр ветлыса, Серёга Васильевлэн улонниез доры матэктӥзы. Соослы кулэ вал, дыр, вахта вӧзтӥ шыпытак гинэ ортчыны Сергейлэн висъетаз. Нош Ваня огшоры адями сямен ветлыны дышемын ӧвӧл. Таяз учыре но со, нылпи куараосты кылыса, паллянэ кожоно кариськиз. Одӥг висъетлэн ӧсэз бордын "сушилка" гожтэмын. Татын кузь ӝӧк сьӧрын пуко университетын ужасьёслэн нылпиоссы но маке ик паймымонзэ витё. Бен, покчиос пуньыосынызы но чупырес ужало, пумен синъёсынызы Лымы ныллэсь но тол бабайлэсь одӥг ӧс дорысь мукетаз тыр тэркыосын бызьылэмзэс чаклало. Пичиос кемалась тодмазыф ини, Лымы нылэн Тол Бабай - эшъёссы пӧлысь кудзылэн ке нэнэзы но бубызы шуыса. "Пӧртмаськисьёс" мукетаз висъетэ ышылон дыръя нылашъёс но пияшъёс выльысь пыдъёсынызы ӵыжаны, пуньыосынызы буш тэркыосы йыганы кутскылӥзы. Со вискын Лымы нылэн Тол Бабай ӟудэм тусын ог-огзылэсь юаллязы: - Табере кызьы шулдыртом на покчиосмес? Со куспын пиналъёслэн йыръёссы ӧс пала берытскизы. Угось отын азвесь дӥськутъёсын кык тодмотэмъёс адӟиськизы. Соку ик пыдъёсынызы шонамысь, пуньыосынызы йыгамысь дугдӥзы. Покчи сюлэмъёсынызы шӧдӥзы угось: таосыз маке но паймымонзэ ваизы. Зэмзэ ик, Ваня гитаралэсь сизэ золтӥз но кырӟан мытӥз: Тэльын вордскиз пичи вож кыз, Тэльын ик со будӥз. . . Пиналъёс со борды итӥськизы. Табере нылашъёслэн но пияшъёслэн синъёсазы шудо тылсиос ӝуатскизы. Нош мукетыз ӧс азьын ымзэс усьтыса сылӥзы чылкак абдрам тусо Лымы нылэ Тол Бабай. Соослэн пыд азязы костаськизы верано кылъёсын гожтосъёс. Кырӟан йылпумъяськыса, ми шудо пальпотӥсь пичиослы киосынымы шонтыса ӧс пала чигнамы. . . Серёга доры вуыса гинэ мон тодӥ, маин ог-огзылэсь пӧртэм луо мирро но смирна. Брокгаузэз но Эфронэз тодаз вайыса, милесьтым юаз: нылпиос азьын визьтэм кылъёсын ӧм-а, пе, вераське. Собере Сергей ӝыныё ӟенеликъёссэ поттӥз. Ми тодамы ваим ортчем студент аръёсмес но барангыез. Колхозын бичаммес ӧвӧл, табаын пыжемзэ. Таиз пумысен милям Сергеен малпанъёсмы кемаласен уг тупало. Кудмы шонер - ачиз Сковорода но уз вала. Иван гинэ ке шат. Огкылын вераса, ми куараосмы чугдытозь кырӟамы. Собере Сергей милемды келяны потӥз. Автобусэ пуксеммылэсь азьдо ми выл лымы вылэ "гожъям" пытьыосмес чакламы. Эй, вылӥын! Та бервылмес адӟись вань-а? Озьы тӥни, бадӟым небегъёс. (книгаос) музъем влын но гожъясько. Нош тужгес кудӟем но паськыт бервылъёс кельтылӥз нырысетӥез ивангелист - Ваня Прорехин, Образцовлэн малпамезъя, дунне вылысь нырысетӥез адямилы. Бен, евангелистлы ӧвӧл, ивангелистлы. Озьы шонергес луоз. . . Берыктӥз Римма Лаптева. Николай Никифоров Ӝыт вӧсь бер йылпумъяськиз. Вӧсяськыны лыктэм арлыдоосты келяса, Сабер Зина алтаре кожаз на, мукет висъетъёсты синйылтыса ортчиз. Ас понназ вӧсь шыпыртыса ӧс кальчетэз* пушласянь пунняз. Куатьтон вить аресъем кышномурт черкын возьмаськись, утялскись интыын. Бусы шорысь писпу музэн огназ кылиз со: ӵыжы-выжыез но ӧвӧл, нылпиосыз но. Улоно коркаезлэн липетэз пуж кадь дуэм бере, баӵколэсь черке куриськиз вал. Пумит ӧз кариськы Серафим поп. Арлыдо кышномуртлы пичигес висъет сётӥз, валес котыръёсын юрттӥз. Ӝыт сиськемез бере, оброс азе султыса Зинаида кема вӧсяськиз, собере шутэтскыны выдӥз. Арлыдыз вань бере, нунал куспын зол жаде, лэся - ӝог умме усиз. Кышкыт уйвӧт адӟыку сямен, шарак усьтӥз со синъёссэ. Шырась ӟичы музэн золтӥз лябӟыны кутскем пельёссэ. Валатскиз: черк пушкын кин ке ветлэ. Кылӥсько каллен лёгаськем, шыпыртэм куараос. Пӧртмаськонъёсты тодаз вайыса, кышномурт ӝогак гинэ керосин лампазэ ӝуатӥз но вӧсь шыпыртыса, гадьзэ киросаны ӧдъяз. Нош пыд куараос ӧз чалмытске. Соос эшшо но матынгес, шаракгес кылӥсько ини. Ӧс сьӧрысь пиосмурт куара кылӥськиз: - Уть ай, тыл пиштэ. Оло, татын кин ке вань? - Со гинэ уг тырмы на асьмелы, - бозгес вазиз мукетыз. - Эскеры ай. Сабер Зина валес вылаз уськытскиз но шобырсконзэ вылаз кыскиз. Угось ӧсэтӥ сьӧд ымныро адями пыриз. Синъёсыз гинэ чилекъяло. Ымныраз чулки золтэмын. - Уйшоре мар-ось кариськод татын, пересь? - Чер-кез возь-мась-ко-о. . . - мырдэм потӥз куараез. - Возьма, возьма. Интыысьтыд гинэ эн вырӟылы. Ог вамыш азьлань ке сётскид, та вӧсь юртын ик ас кулон эзельдэ шедьтод. Валад-а? - Кызьы валатэк?! Уг пота мон татысь. Нырысетӥез сьӧры ӧсэтӥ чуртнаськиз кыкетӥез "сьӧд ымныр". Таиз мугорын ӝужытгес. Кышномуртлэсь улон сэрегзэ кузё синмын эскериз но борддоре юнматэм обросъёсты сумкаяз тырыны кутскиз. Сабер Зина черке кинъёслэсь пыремзэс вала кадь. Сюлворись куараен куриськиз: - Инмарлэсь, сьӧлыклэсь курдалэ вал, нуныкаосы. - Кылыд кузь шат? - кӧсыт ӟазыртӥз шоро-куспо мугороез. - Али ик вакчиято, - пуртсэ поттыса курдатыны ӧз вунэты со. - Осто, Инмаре! - лулскиз кышнмоурт. Кыксы ик берен черке потӥзы. Маке ӵаштыртӥзы, котыръяськизы на соос. Бератаз кышномуртлэн пель сьӧраз кылӥськиз: - Кореш, дыраз шупчыны кулэ. Узырлыкмы тырмыт ни. - Нош пересен ма каромы? Батюшка доры бызёз ук, яке милицие жингыртыны йӧн шедьтоз. - Думылом, керттылом койка бордаз. Сабер Зина ӝогак койка вылаз уськытскиз но шобретсэ лачак вылаз кыскиз. Лулзэ ыштэм мурт сямен кылле со. Валес шобретсэ кесяса, пересь кышномуртэ койка борды юн-юн керттылэмзы бере, ӝужытэз буйгатӥз на: - Сокем эн куректы, песянай. Ӵукна баӵко лыктоз но мозмытоз. Кышкатскем пересез огназэ кельтыса, ӝогак ӧс сьӧры ышизы уй "куноос". Кылӥськиз на жингырак! карыса пилиськем пияла куара, бӧрысь - мотоцикллэн выжгетэмез. Пыдъёссэ-киоссэ выретыны, кужмо думылэм гердъёс борды йӧтскыны курдаса сылэ Сабер Зина. Дугдытэк вӧсьёс шыпыртэ. Ас понназ валатскиз со лушкаськисьёслэсь пырамзэс. Уго солэн сэрегысьтыз но кык мудоръёссэ, вӧсь книгаоссэ нуыса кошкизы лэсянтэмъёс. Анют сайкаса-шӧдылыса кӧлӥз та уй. Синъёссэ усьтэмезлы быдэ вӧзысьтыз валессэ маялляса эскере со. "Кытын-о калге меда Геня? Кудӟыса кытчы ке пограз шат? Ой, озьы луыны кулэ ӧвӧл, - ас малпанэзлы пумит кариське егит кышномуртлэн мылкыдыз. - Одно ик доре вутскыны тыршылӥз ук. Яке асьсэ юртазы-а кӧлыны кылиз меда?" Пӧртэм паласен, пӧртэм тодметъёсын мытыса утча ас малпанъёссэ Датай Анют. Анаезлэн верамез но тодаз усиз: "Кӧлыны быгатытэк, олома сярысь малпаськыса, быдэс дуннеез олокӧня пол котыртӥ та уе", - ӵукъёсы ивортылоз вал арлыдо кышномурт. Соку Анют валаны но ӧз быгатылы кадь. Ма кызьы-о, пе, небыт валес вылэ выдыса, шутэтскыны, умме усьыны уд быгаты? Нош табере улэм-вылэмъяз Анют но валатскиз кадь. Утёд ке, небыт валес но чурытоме вылэм, жадем синъёслэн но кыниськемзы уг поты, малпан бугор но пумтэм-йылтэм сэра, сэра, сэра. . . Тодаз усиз Малмыж карын сиён пӧрасьлэн ӧнерезлы дышетскон аръёсыз. Отысен уго со ыштӥз, шуыны луоз, ас егит дырзэ, азьпалан ӟечезлы осконзэ, выжыкылын сямен лопырскем яратон мылкыдзэ. Улыны интыяськиз вал анаезлэн тодмоосыз доры - бигер кузпалъёслэн юртазы. Мархаба нимо кышномурт ӟеч, сабырлы мылкыдо вал. Нылпизы ӧвӧлысь-а, мар-а, Анютэз ас нылыз интыын адӟылӥз. Шуныт кылзэ но вераны уз вунэты, ческыт пыжем- пӧраменыз но куноялоз. Ма, Анют но гуртын будэм бере, ужлэсь курдаса быдэ ӧз вуы. Ву нуллон, выж миськон-утялтон - со понна шудон выллем адскылӥз. Таӵе юрттӥсезлы шумпотылӥз гинэ Мархаба. Угось ачиз нылпи ваён юртын санитарка луыса тырше бере, нунал куспатыса, уй-нуналэн уж дураз луыны тупалляз. Анай мылкыдын шумпотылоз вал: ужысь бертыкуз коркаез но шуныт, чылкыт, сиён но дасямын. Аспӧртэмлыко шуныт мылкыдын вераськылӥз Рафис кузпалэз но. Ньыльдон вить аресъем воргорон егит адске. Тусбуен но чебер, муспотымон. Талы муг луэм, дыр, Рафислэн бухгалтерын ужамез но. Воргорон кужымез кулэ карисьтэм уж ӧз дырты солэсь ымнырзэ кисыриен шорманы, тазалыксэ лябӟытыны. Котьку пальпотыса вераськылӥз со Анютэн, ӵемысь ӟичылэн кадесь кескич синъёсыныз сӥсъяса ик эскероз вал нылмуртлэсь веськрес мугорзэ. Мархаба ужын дыръя, шудэм- серекъям улсын ӟыгыртыны, йырсизэ маялтыны но кер ӧз потылы. Сыӵе учыре Анютлэн ымнырыз ӵыж-горд намераськылоз вал, вӧзысьтыз палэнскыны дыртылӥз. Огаз уе Анют мугорзэ маяллясь, мусоясь киосты шӧдыса сайказ. Коркан шыпыт, борддорысь часлэн огсыр тиккетэмез гинэ кылӥське. Укноетӥ пырись толэзь югыт корка пушез ӵынкыт тусъем карыса возьматэ. Анют валатскиз: солэн вылаз пуш дэремез гинэ кылемын на, трусикез ӧвӧллы потэм. - Ма мар дауртӥськод, Рафис агай? - интыысьтыз султыны тыршонъяз лекак юаз со. - Черекъяло ведь. Кош вӧзысьтым. - Кин-о кылоз тынэсьтыд куарадэ, Анют? - олокыӵе гольтрес куараен гырдалтӥз воргорон. - Бускельёсмы кӧло, Мархаба апаед - уж дурын. - Кош вӧзысьтым, - мозмытскыны курадӟе на нылмурт. - Эн шузияськы, мусое, - киосыныз мугорзэ маяллямысь уг дугды на воргорон. - Коньдонэн юртто, ма курид, ваньзэ басьтыса кузьмало. Кыл-куара гинэ эн поттылы. - Рафис агай. . . - могӟиз Анют. - Шып, мусое. Котькуд нылмурт но та уж пыр ортчыны тупатэмын. Аллалэн* гожтэмез озьы, дыр. Эн курда, вӧсь уг кары. Бератаз аслыд но кельшоз. - Секыто ке луи. . . - Уд, Анют, уд, мусое. Со палтӥ утё, возьмало мон тонэ. Оло воргорон киослэн маялляменызы шуназ нылмурт, оло узырлык сярысь поттылэм кылъёс йырвизьзэ суразы - шуг вераны. Олома ӧз пумитъяськы ни. Кожаз: та уен ваньмыз ортчоз, вуноз. Олокыӵе валантэм, кышкыт но мылкыдэз бичатӥсь уй вал со. Егит ныл ма дауртэмзэ ачиз но вераны, дунъет сётыны ӧй быгатысал, дыр. Ӵукнаяз ӵошен валес вылын сайкаса, кема чус кыллизы на соос. Рафис но сокем мӧйы уг адскы, тусбуен чебер воргорон. Егит дыраз берытскыса, Анютлы ваче семья кылдытыны ӵектон ке сётысал, нылмурт кыл вератэк соглаш кариськысал та вакытэ. Ӧз, таӵе кильтыръяськон-мусояськонзы ог уен ӧз вуны, ӧз тӧлӟы. Нылмуртлэсь таӵе вамышсэ Рафис ас сяменыз валаз, лэся. Табере соос нунал куспатыса Мархаба дежурствое кошкылыку, ӵошен кӧлазы ни. Толэзь ортчыса но секыто кариськымтэзэ валатскемез бере, вераны луонтэм шумпотӥз Анют. Табере со чидатэк возьмалляз ӝыт вуэмез, Рафисэн ваче син кылёнзэс. Зэм, Мархабалэн синъёсаз меӵак учкыса вераськыны курдалляз ик. Кожаз: шӧдоз-валатскоз кышномурт. Ӵош дышетскись эшъёсыз пӧлын возьытэ вуттоз, анаезлы ивортоз. Нош соизлы ас улон-вылонэз чебер уйвӧт кадь потылӥз, лэся. Номыр сярысь кыл-куара ӧз поттылы. Со понна нуналысь нуналэ Рафис шумпоттылыны ӧз жадьылы. Зарни пельугыос, чыртыяз жильы, зундэсъёс кузьманы вутскиз ни. Уждун басьтон нуналаз, Анютэн ваче син кыльыку, шыпытак гинэ дэремзэ ӝутоз но нылмуртлэн трусик пушказ суменак уксё поноз вал. Ваче учкыса кильтыро пальпотылӥзы соос сыӵе дыръя. Дышетсконзэ йылпумъяса, Анют со аре ик бускель гуртысьтыз пилы бызиз. Воргоронтэк мӧзмыт кариськылӥз солы. Нош сюан, выль семья кылдытон шумпотон ӧз кузьма Датай Анютлы. Пи нуны вордэмезы но сокем ик ӧз шумпоты кадь. Воргоронъёс пӧлысь со котьку утчалляз Рафисэз: сыӵе ик ӟырдыт яратӥсьсэ, мусо кылъёс шыпыртӥсьсэ, кузьымъёс, коньдон сётъясьсэ. Эсьмаса, кузпалэныз валесын мусояськылыкуз но Рафисэз тодаз вайылӥз, ӵошатонъёс утчалляз. Тае шӧдытэк-валатскытэк ӧз улы картэз но. Тэшказ ӟечлыко кусыпсы - люкиськизы. Тани аръёс ортчыса ни, Рафисэз тодаз ваиз, маин ке солы укшаз вал Кулуш Геня. Кышномуртлэн ог вакыт лопырскыса, куспетӥ луэм яратон мылкыдыз выльысь алетскиз кадь. Таӵе малпаськонъёс кышномурт мугорез пӧсятыса-ӟырдатыса лэзё. Сяртчы кадь тыр мугорыз ик кужекъяны кутске. Геняен ӵошен мунчое ветлэмзэс малпаса, пальпотонзэ кутыны уг вормы ни. Уй пеймытын ымдуръёсыз асьсэ коже пуньырӟо, вӧлско. "Уть ай, секыто кариськеме сярысь ивортонэ воксё ӧз шумпотты Геняез, - дыректэ кышномурт сюлэм. - Нош мон кожай вал, яратонлэсь мӧзмыса улэм егит пилэсь йырзэ ӝогак ас палам берыкто. Неужель уз пӧрмы? - мукет пала берытскыса выдэ со. - Бен, Генялы но мултэс ныпъет ӝутыны секыт луоз. Ватсаса Валерик пие вань на уго. Ачиз но уже интыяськыны уг дырты. Ужамез уг поты, луоз, алангасарлэн. Гогыез улэ ошиськоз-а, мар-а, уже ке интыяськиз? Оло, кыӵе ке министерской портфель вите- возьма? Вот тыныд а, тюрьмаын, пе, ужай. Ужатэк, курортын сямен, уло кожам, лэся. Э-э, уд ӧрекча монэ, Гени. Ӝог визьмало мон тонэ. Шӧдытэк-валатэк ик кылёд "от ворот - поворот" каремме. Гольтырес синъёсыныд кырмышъямед но ноны йылъёсме сюпсьыса ик гольык мугорме яратэмед понна гинэ шат сюдом-вордом? Сыӵелы гинэ котькудӥз воргорон быгатоз. Инмарен висъям тӥрлыкез гинэ медло. Эсьмаса пыӵ- тэйёс гинэ но ӧрсё, нылпи вордо. Э-э, котьма шуид ке но, мугорез но пӧртэм сямен мусояло, - отын ик ас малпанэзлы пумит кариське Датай Анют. - Геня та палтӥ аспӧртэмлыко тырше, Рафис выллем. Соин мусояськыку вирсэръёс ик пыкто кадь. Тани-тани лычсузьыса пилиськозы. . ." Кышномуртлэсь малпаськон ӧрзэ тугаса укное йыгаськись луиз. Дыртытэк, чакласькыса кока со укно пияла борды. Анют шырась ӟичы музэн золтӥз пельёссэ. Валес вылысьтыз шыпытак султӥз но, пыд чиньыосаз вылэ лёгаськыса гинэ укно вӧзы матэктӥз. - Кин отын? Ма кулэ? - палэнтӥз со чильтэр возъетэз. - Анют, усьты ай ӝогак. Малы капкадэ ӵогад? - Геня, тон шат? - Ӝоггес пот. Мар-ось укно сьӧрысен сьӧлыкъёсме юалляськиськод? Датай Анют тыл ӝуатӥз но, борддорысь часэз уӵерак синйылтыса, пуш дэрем коже гинэ азбаре дыртӥз. Кышномурт капкалэсь вамен пуннетсэ палэнтэм бере ик туйнаськыса музэн пыриз Геня. Киысьтыз бадӟым, тыро сумказэ синйылтыса Анют юанэн ӧз ӝега. - Ма кытчы-о ветлӥд? - Кытын вал, отын ӧвӧл ни, - ӝотак капка ӧсэз ворсаз Геня. Ныпъетсэ киысеныз кияз воштонъяз вазиз: - Та узырлыкез огдырлы кытчы ке ватоно вал. Ӵукнаозь. Та кылъёслэсь зуркак луиз кышномурт. Мугор кузяз сюрсэн-сюэн кузьылиос куртчылыса ортчизы кадь. Ӝогак тӧлӟиз уммез, эсьмаса синъёсыз ик питырскизы. - Остэ-э, - мукет кыл вазьыны ӧз шедьты ни Анют. - Оло, кырыж сюрес вылэ вамыштӥд? - Сявка сямен котырам эн берга, ява! - ӝотак вазиз Геня. - Синердэ зол кут! Бӧтьыртыса ке ветлод, ӵуказе ик мельтонъёс дорад шмон* ортчытыны вуозы. - Ой, эн курдаты, Геня. Сотэк но лулы пыдтышкам лэзькиз кадь. Шонерзэ вера: кытчы ветлӥд, кинэн? - Инмарлэн кашка такаеныз ӵошен сизьымдон но сизьым шур сьӧры ветлӥм, - меӵкытӥз егит пи. - Валад-а, гыдыкае? Кулуш Геня котыр утчалляськыса, маке малпаськыса сылӥз но, тыро сумказэ ӝутыса, мунчо пала вамыштӥз. Анютэз та кылъёс лек тылэн сямен ӵушказы. Сюлэмыз луп-луп! Йыгаськыны кутскиз. Огшап Генялэн бӧрсяз учкыса сылӥз но корказ пыриз. "Ма кароно? Оло, анаез доры ветлыса ивортоно? Яке милицие? Монэ но янгыш уз каре меда? Ой, Инмаре-Куазе! Ма малы бордам кыски мон сое? Мар адӟонъёсы вань на меда?" Корказьысь пыд куараосты кылыса, Анют ӝогак тылзэ кысӥз но валес вылаз уськытскиз. Чус кылле со. Ӟукырак, мылпотытэк куара сётӥзы ӧс ӟирыос. Геня зажигалкаеныз югдытыса оброс азе матэктӥз но сюсьтыл ӝуатыса пыдес вылаз уськытскиз. Маке вӧсь шыпыртыса, вылысьтыз вылаз гадьзэ кироса со. Вӧсьсэ йылпумъяса оброс пала куинь пол йыбырттӥз но пыд йылаз ӝутскиз. Чиньы йылыныз чепыльтыса гинэ кысӥз сюсьтылэз. Вылдӥсьёссэ ӟус вылэ куяса, шыпыт лёгаськыса валес вӧзы лыктӥз но Анютлэн урдсаз выдӥз. - Витид-возьмад-а, гыдыкае? - йырсияз йӧтскизы дырекъясь киос. Анют пумитаз ӧз вазьы, ӧз палэнты егит пилэсь мусоясь киоссэ но. * * * Уйшоре черке лушкаськыны пырасьёс, Соослэн Сабер Зинаез думылыса кельтэмзы сярысь ивор Ципья гуртын туж ӝог вӧлскиз. Озьы уго: кыл вӧлдон - со кӧс турынэ шырпу куштэм кадь ик. Соку ик гомӟе, алетскыса бадӟымос лопырскыны дыртэ. Тросгес тодон, ас синъёсынызы адӟон мылкыд вӧсь возисьёссэ но, чылкак Инмарлы оскымтэоссэ но черк вӧзы люказы. Ваньзы лушкемен шыпырто, ог-огзылэсь кылэм- адӟемъёссэ мултэстыса пӧлэстыны вутско. Ӝогак лыктыса вуиз райцентрысь оперативно-следственной группа но. Милициысь вуэмъёс соку ик черк ӧс-укноосты, котырысь ёросэз чакланы-эскерыны басьтӥськизы. Писпуос пӧлтӥ ветлонъязы лёгаськем, лошъяськем турын-куаръёсты синйылтӥзы. Со сюрес ӵапак укно вӧзы вуттэ. Укно пиялаос жиль-куаль пырдытэмын, укноысь ез кенертэтъёс корт вандон бычкыен вандылэмын. Эксперт-криминалист кортэз вандыку виям пырыосты, уйшоре шупчем мудоръёсысь пырдылэм буёлъёсты нимаз-нимаз люкаса басьтӥз. Та "лултэм адӟисьёс" ӝегатскытэк келямын вал криминалистикая лабораторие. Эскерисьёс мукетсэ но синйылтӥзы: черк выж вылын лошъяськись вуж календарь вылэ шарак кылемын кроссовки пыдберъёс. Черклы матын улӥсьёслэсь юалляськон номыр выльзэ ӧз ватса. Огкылысь верало: "Ӟеч кӧлӥм, лэся. Нокыӵе куараосты ӧм кылэ". Уголовной розыскысь капитан Шмыков нош ик черк утялтӥсен вераськоно кариз. Угось со гинэ лушкаськисьёслэсь мугорзэс матысен адӟиз, куаразэс кылыны быгатӥз. Серафим баӵкоен вераськыса, чай юыса пукемзы бере, Сабер Зина но ас лулзэ шедьтӥз ни кадь. Мыло-кыдо вераське, котьма адӟем-синйылтэмзэ шараяны тырше. Вӧсь юртэз сантэмасьёсты одно ик мед кырмозы, кылзэс мед юалозы кадь потэ солы. Зэм, лушкем осконэз но вань на: милиция йыртэмасьёсты ӧз ке но шарая, инсьӧр кузё одно ик пунэмзэ берыктоз. Со угось вылӥысен ӟечсэ но, уродзэ но дыраз синйылтэ. Одно ик аслэсьтыз судзэ ортчытоз, ашкынэмъёслэсь* кылзэ юалоз. - Озьыен, соос кык кузя вал. Шонер-а? - бумагае дыртыса гожъянъяз юалляське Шмыков. - Ас лулам сьӧлык ватсаме уг поты, - кышет улысьтыз потэм йырсизэ тупатъянъяз вазе Сабер Зина, - синъёсыным адӟемме гинэ верало. Мынам улон-вылон висъетам кык кузя пыразы. Кыксылэн ик ымныразы чулкаос золтэмын вал. Син шоразы гинэ пась лэсьтӥллям. - Мугоорзы кыӵеесь вал? Дӥськутсы? - Атаманэз - косъськисез шуисько - таза мугоро, пельпумъёсыз паськытэсь. Со ик эшезлы валэктылӥз, кыӵе мудоръёсты, вӧсь книгаосты басьтыны. Шакмат дэремен, пыдъёсаз небытэсь, вож тапочкиос вал кадь. - Нош кыкетӥез? - О-о, чырткем, шаплы пияш, шӧдске. Пуны кадь отчы-татчы бызьылыны гинэ дась улэ. Мугорыз шоро-куспо. Лыз тусъем трикоен вал, пыдъёсаз тӧдьы, капчи пыдкутчанъёс. - Кроссовкиос? - Озьы ниало кадь. - Куаоазыя тодманы ӧд быгатэ-а? Асчьме гуртоос ӧвӧл меда шуисько. - Ӧй, ӧй. Кытысь-о вань калыклэсь куаразэ висъяны, тодманы йӧндыром? Ма, вераськыны но тросгес со атаманэз вераськиз-лабыртӥз. Шмыков арлыдо кышномуртэ сак луэмез понна ушъяз но, гожъям протоколаз кинюртытыса кошкыны дыртӥз. * * * Анют пизэ сад-бакчае нуыку гинэ валес вылысьтыз тэтчиз Кулуш Геня. Мунчо сарачае огдырлы ватэм сумказэ басьтӥз но, котыр утчалляськыса-чакласькыса, бакчаын буш сылӥсь муш умортое ватӥз. "Ӝытазе Лёняен нюлэскы кӧчыром. Отын оскымонгес утиськоз", - ас понназ пусйиз со. Ульчае потыса калык синме возьматӥськыны малпаз Геня. Кышкаса-курдаса ватскем медаз кожалэ, малпаз, вылды. Ма, собере калыклэсь ма сярысь лабыртэмзэ кылзон но мултэс уз луы. Ог ӝыны час ёрос котыръяськкемез бере, магазинэ пырыса ӟенелик аракы басьтӥз но ас вордскем юртэз пала вамыштӥз. Отын уго люкетыны нокинлы вал - Петро но анаез уж дуразы. Ю, пук, мапаськы. Ог чарка кымалтэмез бере, нокыӵе сиён куртчытэк ик сигаретсэ аратӥз. Выж вылтӥ солань-талань лёгаськыса ветлэ. Синъёсыз амалтэк учко сэреге интыям оброс пала. Ачиз ма дауртэмзэ шӧдытэк-валатэк кадь, гадяз кирос тырыны кутскиз егит воргорон. Ӟуч кылын шара куриськиз на: "Прости, господи!" Пытсэт сьӧрын пукыкуз, огшоры дырзэ ортчытон понна гинэ вӧсь книгаез нырысььсэ кияз басьтӥз вал Ефимов. Нош лыдӟемъяз тунсыко потыны ӧдъяз. Пӧртэм малпанъёс ваче кариськыса, йырвизьмаз тыл кенжытымон шуккиськизы, оло. Куд-ог гожтэмез сюлэмез ик бугыртэ ук, амалтэк ас сьӧлыкъёсыд сярысь малпаськыны кутскиськод. Соин валче ик трос вал отын осконтэмез но. Озьы ке но, ӵемгес кутылыны, лыдӟылыны кутскиз со Евангелиез. Бӧрысь лыдӟиз на выль но вуж Сӥзёнъёсты. Та вӧсь книгаосты лыдӟон нуйтӥськись дырез "виён" гинэ ке но вал, Геняен витьымтэ- возьмамтэ адӟон луиз. Ог нуналэ камераязы выль муртэ пыртӥзы. Азьвыл пукисьёс маке кунэрес мыньпотыса пумитазы вал сое. Кин, кыӵе адями луэмзэ тодо ни вылэм, лэся. Нош Ефимов, кыкетӥ толэзьзэ гинэ пытсэт сьӧры шедем мурт, кытысен-о ваньзэ тодыны вутскоз? Зэкъёс выльп ырем мур борды тэбиньыны, йыркуро кылъёс вераны ӧдъязы. Ӧз чида ни Геня, ас кужымезлы оскыса, дурбасьытса вазиз вал. Пуромиз ваче керетон, эсьмаса, ваче гадьяськыса, кӧня ке пол мыжгаськыны но вутскизы. Возьмасьёс но сак вылӥллям, соку ик камера ӧсэз усьтӥзы. Киязы резина бодыосын, наручникъёсын. - Ма луиз?! Ма йыртэмаськоды?! - Тӥни, кужымез мултэсмем, лэся, - Геня шоры синмыныз возьматӥз арлыдо зэк. - Ми доры "петушокез" пыртӥзы вал, солы дурбасьтыны ӧдъяз. Яяратэмез потэ, вылды, - веранзэ йылпумъяса, гольтырес серектӥз воргорон. Шонерзэ вераса, камераязы выль пырем муртлэсь "петушок-атас" луэмзэ ӧз ик тоды вал Ефимов. Нош кылэмез вань: ас гольык мугорзэ кышноос сямен яратыны-мусояны сётӥсь муртэ "атасэн" нимало. Уг гажало сыӵеосты, адямиен ик уг лыдъяло кадь зэкъёс. Угось тросэз "атасъёс" - нылъясты эриктэмаса шедемъёс. Кыӵе статьяя шедемзэс валатскемзы бере, сыӵеосты аьссэды эриктэмало ни. Уг жаляло сыӵеосты, егит воргоронлэсь озьы быдэс гумырлы пиосмурт мылкыдзэ-данзэ бордысьтыз ишкалтыса басьто кадь. Сыӵеосын сиськонниын ог ӝӧк сьӧры пуксён но зэкъёс пӧлын бадӟым сьӧлыкен лыдъяськылэ. Нош соку, Кулуш Геня номыр со-та тодытэк, дурбасьтыны кутскиз вал. Малпаз шат ужпумлэсь мыдланес берытсконзэ? Ӵош пукись эшъёсыз Ефимовез янгыш карыса возьматэмзы бере, солы вить уй-нунал ӵоже карцерын* пукытэк ӧй вал ни Йӧгуын кадь кезьыт карцерын. Излэсь сюрем борддоръёс вӧзы пыкъяськыса пуконъяз трос малпаськылӥз со вӧсь книгаысь лыдӟемъёсыз сярысь. Ас понназ малпаз-пусйиз на: "Йыртэмаме понна пукон дырме ке ӧз кузёмытэ, аръёс ке ӧз ватсалэ, гумырам Инмарлы оскыны, вӧсь кыл возьыны кылме сётӥсько". Ӧз, таяз учыре ваньмыз ӟечен ортчиз, мукет статья ӧз ватсалэ Ефимовлы. Озьы Инмар азьын сётэм кылзэ быдэстытэк амалыз ӧз луы ни. Лул-сюлмысь басьтӥськиз егит пи вӧсь книгаосты лыдӟыны, инсьӧр кузёлы йыбыртъяны. Ӧз вунэтылы со ӵукна- ӝыт вӧсьёсты. Ярам вӧсь книгаос палтӥ шугъяськонэз ӧй вал: артэ черкысь баӵко ӵемысь вуылӥз. Пытсэт сьӧрын олокыӵе кибашлыос-усточиос но вань. Вордскем нуналаз Генялы одӥг эшез пул вылэ кортӵогам Иисус Христосэз лэсьтыса сётӥз вал. Ас койкаез вӧзы юнматӥз сое Геня. Осконлы сётскыса егит пи ӧжытак сабырскиз кадь: укылтэмъяськон сямызлэсь, урод кылъёслэсь куштӥськыны тыршиз. . . Геня поштопысьтыз аракызэ лэзьыса юиз но, висъет сьӧры вамыштыса, борддорысь пичи мудор шоры синъёссэ кугӟаз. Пумтэм жадем адями музэн секытак лулскиз со. Катьтэммыса пукон вылэ лэзькиз но кыланы-бураны ӧдъяз: "Кыӵе мон сьӧлыко но возьыттэм тон азьын, Инмаре?! Сокем мыным ӟеч лэсьтӥд, бышкись езъёсын котыръям сыръясь нюкысь поттӥд. Выльысь эрик кузьмаса, оскон кузьмад вал югыт дунне шоры шумпотон синъёсын учкыны, калык радъя улыны, яратыны. . . Нош мон? Тыныд вазиськоно юртэ лушкемен пыраса йыртэмай. Тыныд оскисьёслэн чылкыт лулазы сялам мактал луэ ук та! Кыӵе изьвер мон, кыӵе пӧйшур? Э-э, пӧйшуръёс но мон кадесь ӧвӧл, дыр. Соос но ӟеч лэсьтэмез валало. Юнме шорысь шат быдэс дуннеез ву нюртыку, тынад юрттӥсед - Ной - соосты утиз-кельтӥз. Уг быгатӥськы ни мон оброс шоры пырак учкыны, уг но быгаты, дыр. Эриклэсь шат такем кудӟи? Кудӟытозям кунояз ни акылес, эзэр-безэр улон. Вуберганэ шедем шелепез музэн бергатӥз- лэйкатӥз но, сьӧсь гульымаз ньылыны шӧтаз. Э, Инмаре! Оло берпуметӥзэ юрттод на мыным? Выль кужым сётод улонысь ас интыме шедьтыны? Та куриськонъёсме но ке быдэстысалыд, черкысь лушкам ваньбурме одӥгтэм берыктысал. Эн люкы на берпум осконэлэсь, эн чигты векчи нюжаез. Ӝыны ар ӵоже уго уже интыяськыны уг быгатӥськы. Куке но "зэк" нимын ветлэм адями, калык пӧлы берытскыса кышкыт- кӧшкемыт вужерлы пӧрмытске. Ваеь но кадь тон, ӧвӧл но. Тонэн нокин адями сямен уг вераськы. Синпӧет мон, бакча сульдэр интыын. Пытсэт сьӧрын луымтэослы но, пе, уж уг окмы. Ма кытчы кариськизы ужан интыос? Малы ужась калык ттолэзен, арен уждунзэ уг басьты? Кызьы улыны кулэс о?! Газетъёс гожъяло: "Маял вылын кадь, пе, ӝутске йыртэмасьёслэн, йыруж лэсьтӥсьёслэн, лушкаськисьёслэн лыдзы". Нош ма кароз ёрмем адями? Сютэм куреглэн малпанэз ю тысь сярысь гинэ уго. Лул вань бере, сием-юэм потэ ук. Кытчы шеди мон, кыӵе дуннее? Оло зарезь шорысь пичияк шормуӵе ргнаме куштӥзы? Ау-у, адямиос! Юрт-тэ-э!" Берло кылъёссэ шара ваземысьтыз, асс куараезлэсь ачиз куалектӥз Ефимов. Дыртыса отчы-татчы утчалляськиз - нокин ӧвӧл, чус. Кылем аракыен ӟенеликсэ дыртыса диванн сьӧры пуктӥз но бакча беръёстӥ гинэ Датай Анютлэн юртэз пала вамыштӥз. "Ӟечлы осконзэ ыштэм адями - адями ӧвӧл ни, - тодаз ваиз со кытысь ке лыдӟемзэ. - Анютэн сюлмысь вераськыса утчало ай. Оло маке-маке визькенеш сётоз". * * * Следовательлэн кабинетаз участковой инспектор ьлейтенант Селезнёв йыгаськытэк- маратэк гинэ пыриз. Сьӧраз ӧсэз ворсаз но ӝогак пукон вылэ лэзькиз но йырысьтыз картуззэ ӵоге ошыса вазиз: - Черке палэнысь "гастролёръёс" ӧз вуылэ кожасько мон, Валерий Александрович. ГАИ постысь патрульёс но палэнысь вуылэм машинаосты ӧм синйылтэ шуо, - пежырскем йырсизэ маялтӥз участковой. - Нош ачид кинлы сьӧлыкаськод, Виктор Ефремыч? Оло, кудӥз ке сӧсырмем ӧрӟиед лопырскыны шедьтӥз меда? А-а? - Арлыдоос ивортӥзы: ог-кык толэзь азьло, Ефимов Геннадий, пе, обросъёс ӵектыса ветлӥз. Оло солэн кибервылыз?ъ- Со алигес зонаысь берытскем мурт сярысь-а тон, Виктор Ефремыч? - Бен, со. Али но уже ӧз интыяськы на. Веранэз одӥг: уже уг куто. Толон юри колхозэн кивалтӥсьмы доры кожай вал. Оскытӥз. Пилорамаын ужасьёс, пе, уг окмо. Куто шуиз. - Нош со кыӵе мудоръёсты вузаз меда? Дорысьтыз яке сьӧраз вуттэм? Тлаэсь азьвыл черкын ӧз ышылы кадь. Номыр сярысь ӧз поттылы отец Серафим. - Мон вуззэ басьтэм арлыдо кенак доры кожай вал. Оброссэ учки. Саид Гафуровлэн кибервылыз кадь потӥз. Ср сыӵеен паньсаське. Эрико нянь, пе, озьы шедьтӥсько. - Гафуровлэсь лушкам кожаськод-а? - Шуг вераны. Пумиськыса вераськыны ӧй быгаты Гафуровен. Казане вузъёслы кошкем. - Нырысь-валысь та "сюресэтӥ" вамышъяны кулэ. Собере туннэ лабораториысь анализъёс но вуозы ни. Картотекаын Ефимовлэн чиньы бервылъёсыз вань. Ӵошатом, эскером. Чакласагес улыны кулэ со Ефимовдэ, Виктор Ефремыч. Олокытчы медаз шупчы вылэм. - Гуртын со. Туннэ магазинысь потыкуз ваче син луим ай. - Нош солэн мотоциклэз вань-а? Адӟисьёс ивортӥзы вал ук: уйшор вакытэ, пе, черк вӧзтӥ мотоцикл ортчиз. - Пырак вераны уг тодӥськы. Ма, сое тодыны шуг ӧвӧл уго. - Ярам, мон ГАИ-е жингыртыса тодо. Так-так, - ӝӧк вылэ чиньыеныз кока Шмыков. - Кытын улэ со али дыре? Анаез дорын-а, яке. . . - Уд вала, Валерий Александрович. Почтаын ужась Возисова Аня котырын гожеръя кадь. Ӵемысь соосты ӵошен пумитасько. - Кышномуртлэсь лушкемен юалляськыны кулэ луоз, дыр. Со дорын кӧлэм меда лушкаськисьёс черке пыран уе? Чакласькыса дауртыны кулэ та ужен. Дусымезлы лушкемен маке-маке шыпыртыны медаз вутскы. - Ярам, пумиськыса вераськыны тыршо мон. Анаез доры но кожаны малпасько ай. - Усто. Юртты мыным, Ефремыч. Нокытчы уг вутскиськы. Малы ньыль киё но ньыль пыдо ӧвӧл меда? - Э-хе-ей, - пальпотӥз Слезнёв. - Соку эшшо но тросгес ужасалды, Валерий Александрович. Кыскись валлы воз ныпъетсэ ватсало шуо кадь. - Озьы, шонер вераськод. Вераськонзэс йылпумъямен лыдъяса, Шмыков ӝӧк вылысь телефон трубказэ кияз басьтӥз, нош участковой ӧсэтӥ потыны дыртӥз. * * * Туэез сӥзьыл аспӧртэмлыко чебер адскиз Кулуш Генялы. Азьвыл, пытсэт сьӧрысь мозмытозяз, инкуазь шоры таӵе тунсыкъяськыса ӧз ик учкылы кадь. Ворпояськыса пиштӥсь-ворекъясь писпу куаръёс огдыре сяськаосын лопырскемын кожалод. Шунды тылсия синмез ик мальдыто, вуюисен воринъясько. Губиен тыро корзиназэ ӝутыса гурт ураметӥ вамышъянъяз, сад-бакча азбарысь нылпи куараосты кылыса тыпак дугдӥз. Оло, аслэсьтыз пичи дырзэ тодаз ваиз со, оло, мукет. Синъёссэ вошъятэк музэн учке шулдыръяськись нылпиос шоры. Соку ик синйылтӥз туп сьӧрын шумприч бызьылӥсь Валерикез но. Кенертэт вӧзын сылӥсь воспитателен вераськыса, пияшез сьӧраз басьтоно кариськиз. Сотэк Анютлы одно ик татчы вуылыны кулэ луоз на ук. - Валерик! Ойдо бертом, - пальпотыны тыршыса вазиз егит воргорон. - Мама уз лыкты шат? - вӧзаз шаплы бызьыса вуиз пияш. - Тонэ-а лыктыны косӥз? - Бен. Нюлэскысь бертыкум сьӧрам басьтоно кариськи. Анаед уж дораз ӝега на, дыр. Ачим пушмульы но бичай тыныд, - ог кырым пушмульы сётӥз со пияшлы. Коньы музэн пушмульы йыръёнъяз, ӟиллё музэн ӟабыльтэ Валерик. Дырын-дырын берытскыса эшъёсыз пала учкылэ: "Адӟо-а эшъёсыз атаен вамышъямзэ? Мед могӟозы, атайтэм шуыса мукетъят медаз куаретэ ни". - Мама тон шоры "атай" шуыса вазиськыны косэ. Нош тон вождэ уд-а вай? - Шум гинэ пото, Валерик. Монэ озьы нокин ӧз нималля на. - Озьыен мон нырысетӥез луо? - Шонер. - Мама мыным лушкемен эшшо маке но ивортӥз на. Тодэмед потэ-а? - Туж тунсыко? Ма сярысь-о вераз? - Мамалы эн поттылы, ява. Куаретоз. - Уг, уг, Валера. Асьмеос, кык воргоронъёс гинэ, мед тодомы. - Ӝоген, пе, тӥ мыным я сузэр, я вын кузьманы дасяськиськоды. Тон, пе, коньдонэн юрттӥд. Та дырозь мама ужаса-ужаса нылпи басьтымон коньдон ӧз шедьты вал. - Ох-хо-хо, - оло серектӥз, оло гырдалтӥз Геня. - Сыӵе малпанмес но шараяз шат? - Мама мыным котьма сярысь маде. Усто ик луысал вын ке басьтысалды. Нош тон, атай, маин-о ужалод? Машинаен яке тракторен? - Пумозяз ӧй малпа на, пие, - мусояса вазиськемзэ ӧз ик шӧды кадь Ефимов. - Нош тыныд кыӵе ӧнер кельше? - Мон будӥ ке, врач луо. Ӵужанае ӵемысь висьыса улэ. Нош тон, атай, машинае пуксьы. Монэ но ворттылытод. Эх, вожъяськыса учкысалзы эшъёсы. - Одно ик мылкыд карондэ быдэстыны тыршо, Валерик. Шофёрлэсь ӧнерзэ басьто. - Воспитательмы куаретӥз ай. Йырсиед, пе, кузь. Атаедлы, пе, вера. - Э-э, та ласянь эн куректы, пие. Ай момент ӵышком. Эсьмаса скаллэн кылыныз нюлыштэм кадь луоз йырыд. - Нош ма шуэм со "ай момент"? - Ӝог, иське. - О-о. Асьмеос но дорамы ай момент вуим. Капка дорозязы ваче лабыртыса вамышъянъяз Генялэн сюлэмыз небӟиз, мылкыдыз бурдъяськиз кадь. Ас понназ капчияк лулскиз: "Кыӵе дуно та эрик! Мон но ӝоген кык нылпиослэн атайзы карисько ук. Юртты, Инма. . ." - куаӵак луиз со. Гадьзэ лекак ӵушкаса ортчтиз. * * * Датай Анют, йыр висемезлы ӝожтӥськыса, уж дурысьтыз вазь ик куриськиз но ӝогак дораз бертӥз. Ма йырыз зэмзэ но черк гырлы сямен жон! Вазе. Кыӵе гинэ малпанъёс уг вуӵырто, куашето отын?! Тани-тани йыркобызэ пасялозы но жилькак кыре пазьгиськозы. Кулуш тамараен но участковой милиционерен пумиськон сярысь малпанзэ огдырлы палэнтӥз егит кышномурт. Огзэ ӟеч валаз: одно ик Геняен ваче син учкыса вераськоно. Сотэк кыксылы но умойтэм луоз, беромозы. "Ӟеч визьдэ сёт, Инмаре! Пӧрмостэм вамыш лэсьтыны эн сёт кыкпмылы но", - черк йылысь кирос пала учкыса шыпыртӥз Анют. Геня корказь тубат вылэ интыяськем но кыдёке учкыса, сигарет ӵындыса пуке. Малы ке кышкатскем ужпилэн кадь солэн синъёсыз, капка куаралэсь ик зурак кариськиз быдэс мугорыз. Нылкышно синъёс ваньзэ синйылтыны вутскизы. - Мар-ось берытскид? Маид ке вуныса кылиз, оло? - мылпотытэк гинэ тунсыкъяськиз Геня. - Ойдо ай корка пыром, Геня. Тонэн ваче син учкыса вераськон-кенешонэ вань. - Ма сярысь, Анют? - Ойдо, ваньзэ шараяло. Егит воргорон мылпотытэк султӥз, сигарет пумзэ музэ куштыса, кроссовки тышкыныз лёгыса кысӥз. - Кытын калгид кылем уе? - корка ӧсэз подыкуз ик юаз Анют. - Ку д ке лавкаез сузяд, оло? Тонэ жалясько мон, тон понна курдасько, - пукон вылэ лэзькыса викыштӥз Анют. - Малы-о соку ик синвуаськонэз? Ой, та кышноосын. Синвузэс ӵук лысву кожало, лэся. - Шонерзэ мадь, Геня. Оло, ачим но маин ке юрттыны быгато. Сюлэменым юн шӧдӥсько-валасько - кырыж сюресэ вамыштӥд. Ефимов солань-талань лёгаськыса ветлӥз но кышномуртлэн пельпумаз кизэ поныса куриськиз: - Вань ке, ӧжытак аракы пальккы ай, Анют. Быдэс гадь ӵуштаське. Эн курда, ваньзэ ватытэк мадё. Кышномурт синдуръёссэ кышет пумыныз кӧсатӥз но, гур сьӧры ветлыса, быдэс поштоп кабак аракы вайыса ӝӧк вылэ пуктӥз. - Сиён дасялом-а? - Кулэ ӧвӧл. Сотэк но кӧттыро. Сюлмаськонэн но кайгуэн. Егит воргорон чаркае аракы лэзьыса юиз но сигарет кенжытыса Анют вӧзы пуксиз. - Сьӧлыко мон, Анют. Черке пырыса обросъёс, вӧсь книгаос лушкаса поттӥ. - Малы? - Ох, ну и юан но сётӥськод тон! Тодмо ни мугез - вузан вылысь. - Инмаре, ӟеч кар! Ма мар дауртӥд тон? Ачид Инмарлы оскиськод, вӧсь возиськод ук. - Эриклэсь кудӟи, лэся, мон, Анют. Эриклэсь но тынад яратонэдлэсь. - Озьыен, нош ик пытсэт сьӧры кошкыны муг утчаськод? - Нош монэ малы жалянэз? Сиёно няне но юоно вуэ отын, дыр. - Ас вордсконо нылпиед сярысь но уд малпаськы шат, Геня? - нош ик викыштӥз кышномурт. - Монэ ке уд жаляськы, коть сое жаля вал. Югыт дунне вылэ вордӥськыса, вераськыны кутскем бераз ик юалоз ук: "Кытын мынам атае? Кин со?" Ма шуом мон солы, кызьы валэктом? - Шонерзэ вреалод. - Ӧвӧл, Геня. Тыныд вераны капчи. Нош берло малпалод ук ай валче ортчытэм нуналъёсмес, уйёсмес. Гырпумдэ куртчыны тыршод но уд пӧрмыты ни. - Ачим но ӧпкелисько, Анют. Шайтан ныртӥм кыскиз, лэся. Нош берлань чигнаны уг луы ни. Кырсь уж лэсьтэмын, со понна закон азьын кыл кутыны кулэ, - интыысьтыз султӥз Геня но кемалась кысэм кысконзэ учог азе сэрпалтӥз. - Нош тон кыӵе ӵектон сётысалыд, кыӵе кенеш? - Ойдо ӵошен Серафим поп доры ветлом. Ваньзэ лушкемен мадём. Лушкам арбериостэ но берыктод. - Валалоз кожаськод, оло? Серафим Баӵко юрттӥз ке но, милиция йылыз-пумаз потоз. Шараялозы. - Куд-ог йыружъёсты, йыртэманъёсты соос но шараяны уг быгато. Уката ик туала дыре. Мудоръёстэ, вӧсь книгаостэ ке берыктӥд, оло, соос но уз утчаське ни. - Э-э, тыныд вераны капчи, Анют. - Капчи ке луысал, мон синвуаськыса ӧй пукысал, дыр, Геня. Ойдо ӵошен ветлом. - Огнам лушкай, огнам ик верасько. - Ку? - Туннэ ӝыт вӧсе ветло но баӵколы ваньзэ шараяло. Оскы. Анют, - вӧзаз лыктыса ӟыгыртӥз Геня. - Мӧзмо мон тонтэк. Уката ик атай кариськон дыр но матэктэ. Анют интыысьтыз султӥз но шумпотон творен чилектэм синвуоссэ кимышкыныз ӵушылыса кужмысь пальпотӥз. - Оскисько мон тыныд, Геннадий, - малы ке нимзэ ик быдэсэн вераз кышномурт. - Оскисько. Сюлэмы лушкем ӵектэмъя уго бертон ӝытад ик чыртыяд ошиськи вал. * * * Куазь кыдыраса зоре. Тӧл юри турка кадь кезьыт шапыкъёсты. Ымнырез вӧсь карыса кокчало соос. Писпуосысь ӵужектэм куаръёс адскисьтэм киыныз ишкалтэ но кезьыт шапыкъёсын коттыса, музъем борды лякылэ. Пыраклы, сисьмыса кыед луон вылысь. Акылес но мӧзмылэс та сӥзьыл куазь. Со дыре ик паймымон чебер вакыт. Шундыё, чебер нуналэ быдэс ёрос ворпояськыса воринъяське уго. Ӵыж-горд пишто садысь улмоос, каньылак шокче арам-кутсам бусы, бриллиант пырыос музэн ворекъяло чырс вуэн пачылам шу каросъёс". . . Тани-тани пельтозы кезьыт тӧлъёс, валиськоз небыт мамык лымы. Котыр чус кариськоз, музъем вылысь вань сьӧдэз, кырсез тӧдьы шобрет улэ ватэмын луоз. Нош кызьы ватод сюлэм кырсез, люкам сьӧлыкъёсты,к ырсь ужъёсты. Йӧ зор пырыен кокчаса уз улэ шат соос лул-мылкыдэз, уз кынтэ-а сюлэмез? Бамзэ бышкись йӧ зор пырыослэсь киыныз возъяса вамышъясь Кулуш Геня вӧзы мотоцикл дугдӥз. - Кытчы-о потӥд таӵе куазен, кореш? - йырысьтыз шлёмзэ тупатъянъяз тунсыкъськиз Лёня Абрамов. - Ӝыт вӧсе вамышъясько. - Ну и интересной адями тон, кореш, - лычсузем ужпи музэн гырдалтыса серектӥз Абрамов. Куаразэ шыпытгес карыса ватсаз на: - То вӧсь юртэз сантэмаськод, то инсьӧр кузёлы йыбыртъяны ветлӥськод. Таӵе сантэмам серектэм кура Ефимовлэсь гадьзэ ик ӵушказ кадь. Эшезлэн синъёсаз пырак учкыса сялӟиз. - Кылдэ вес вылын мертатэк тӧлъя-буръя эн пазя, ява, кучапи! - куараез ик дыректӥз кадь солэн. - Монэ улыны эн дышеты. Маке-маке пумит вераны ке дӥсьтӥд, урдлыостэ лыдъяло. Ойдо ай писпуос улэ ватском. Тонэн базар лэсьтытэк амалы ӧвӧл. Абрамов мотоциклзэ сюрес вӧзы кельтыса, ӝот=ӝот вамышъясь эшез сьӧры дыртӥз. Арлыдо топольёс улэ султыса чус сылӥзы соос. Кыксы ик дыртытэк сигарет аратӥзы. Котыр эскериськыса учкемез бере Геня лулскиз: - Эрикез номаин уг вошты мон, Лёня. Со ӝытэ асьмеос кудӟемен сыӵе мыдланес дауртӥмы. Мон вань лушкам арбериосты берен черке нуыны малпасько. - Иське, капканлэсь мозмид? Со понна шат тырши мон? - Тон огнад ӧй вал со уе. Ӵошен йыртэмамы. - Озьыен, мынэсьтым люкетме эн иса, киям сёт. - Тани талэсь секталазэ веръямед уг-а поты? - мыжыксэ урдӥз Ефимов. - Одӥг кыл- куара ке поттӥд, лулдэ гульымтӥд кыскыса басьто. Басьто но. . . сьӧд музъеме вато. - Тон, тон. . . - Тырмоз. Сявка музэн эн куаньгеты. Мон тынэсьтыд арлыдогем, пытсэт сьӧрын но тросгес пукемын. Нош та ини бадӟым козырь. Сыӵеосты гажаны кулэ, кылзӥськыны. Тюремной закон. - Кышкась луд кеч! Кубиста куарез ньылыса ӧд вутты на, нош берпалтӥд сьӧд мульыосыд питырскизы ни. Исьнердэ зол кут, шестёрка! Ма верай, озьы ик лэсьто. Мукетъят монэн пумиськыны муг эн утча ни. Нош кудӟеменыд маке-маке вераны ке шедьтӥд, быдэс пинь кенердэ пазяло. Одӥг лепило* но радъяны, выльдыны уз йӧндыры. Ма вазьыны ёрмем Абрамовез тополь улэ огназэ кельтыса, Кулуш Геня черк пала дыртӥз. Кузь-кузь вамышъяны тырше со. Мышсэ но уг учкылы. Туннэ нуналозь эш карем адямизэ сьӧд вужерен лыдъя, оло. * * * Ӝыт вӧсь мыныку, Геня сюлмыз вӧсь луыса учкылӥз черк пушкысь буш кылем интыосты. Угось аслаз сьӧлыко кибервылъёсыз, ачиз лушказ отысь мудоръёсты. Калыкен ӵош кошкыны ӧз дырты со. Вӧсь йылпумъяськем бере Серафим поп вӧзы матэктӥз. - Ӟечбуресь, отец Серафим! - Ӟеч, ӟеч, нункае, - шуныт мылкыдын вазиз баӵко. - Маке шергес вуылыны кутскид кадь берло дыре. - Ӧжытак виси. Ма собере ас сьӧлыкъёсы но лулме ӝокато ни кадь. - Асьмеос ваньмы Инмар нылпи луиськомы. Нош Святой причастие басьтытэк, сьӧлыкъёсмылэсь мозмытскыны ум быгатӥське. Соин ик черк ваньзэ огкадь вите- возьма - сьӧлыкозэ но, сьӧлыктэмзэ но, егитсэ но, пересьсэ но. . . - Ачим но со сярысь малпасько, отец Серафим. Лулпушме ӧжытак капчиятоно вал. - Ойдо сьӧрам, - висъет сьӧры вамыштӥз Серафим поп. - Оген кайгуэз вормыны туж секыт, егит эше. Интыяськы, - пукон шоры возьматыса ӵектӥз со. Геня пӧсяса ымныраз потэм шапыкъёссэ кимышкыныз ӵушалтӥз но синъёссэ улэ ошыса лулскиз. - Яратонын но сьӧлыканы вутски ни мон, отец Серафим. Кузпалъяськытэк, венчаться кариськытэк ик выль вордсконо луллы улон кузьманы вутски. Сьӧлыко уж ук. - Ог-огдэс яратӥськоды ке, со туж ик бадӟым сьӧлык уз луы, кожасько. Апостол Пётр верам: "Нош котьмалэсь но ортчыт ог-огдэс сюлмысь яратэ. Малы ке шуоды, яратон троссэ сьӧлыкъёсты зӥбе". - Вождэс эн вае юанэлы. Нош тӥ асьтэос кузпалъяськемын-а, отец Серафим? - Уг, уг, пие. Мон огнам улӥсько. Тӥлесьтыд шуддэс шӧмъяны-веръяны ӧз кылды. Со понна бадӟым муг шедиз. Священной сан басьтытозь, адями кышнояськымтэ на ке вал, солы кузъяськыны уг ни яра. Со луэ целибат. - Озьыен, яратыны сьӧлык ӧвӧл? - Кин ӧз яраты, озьыен со ӧз тоды-вала Инмарез но. Малы ке шуоно, Инмар ик вань асьме лул-гажанмы, яратонмы. Инмар кинлы кыӵе сюрес возьматэ, ваньмыз понна оскись мурт инсьӧр кузёмылы тау каре. - Нош со сюрес мыдлане ке кожиз? - О-о, сыӵе дыръя визь-кенеш куроно, пие. Вылӥысь васькись визь, нырысь ик, чылкыт, озьы ик сабырес, зӥбыт, кылзӥськись, зэмлыкез яратӥсь но жалянлэн ӟеч емышъёсыныз тырмемын луэ. - Нош инсьӧр кузёмы сьӧлыко ужез синйылтытэк кельтыны быгатэ-а? Инмар синъёс котьмае дыраз синйылто. Ӟечсэ но, уродзэ но ужъёсты. - Тӥледлы ваньзэ шараяны ик курдасько, отец Серафим. Ымы усьтӥське ке но, куарае уг пот. - Сьӧлыксэ вераны пырем адями сюлэм ӧссэ вӧлак усьтыны кулэ, пие. Ӧд ке но шарая, тодмо луоз. Вӧсь книгаын гожтэмын уго: "Улонлэн книгаяз гожтымтэ адямиос куштэмын луозы тыл зарезе". Мукетыз но пусъемын: "Йыбыртъялэ, сьӧлыкъстэс вералэ, соку сьӧлыкты ӧжытак кулэсмоз". Кулуш Генялы шоканы ик секыт кариськиз. Дэремезлэсь вылӥ бирдызэ кыӵесысьтыз мозмытӥз со. Султыса кошкы вылэм - баӵкоез обидёз кадь потэ. Ма собере сое татчы нокин но кужмысь ӧз пырты ук. Оло, бадӟым сьӧлыксэ шараяса трослы капчигес луоз улыны, адямиослэн синъёсазы меӵак учкыны. Егит пи, дӥсьтонлык шедьтыса, пуконзэ азьпала интыяз но меӵак учкыса вазиз: - Отец Серафим. . . Черкысь мудоръёсты-обросъёсты, вӧсь книгаосты мон лушкай. - Мар-р? Свят, свят! - Кулуш Геня шоры учкыса гадьзэ киросаз но пуксем интыысьтыз лӧбак тэтчиз баӵко. - Визьдэ шайтан сураз, оло? Мар бӧтьыртӥськод тон, Геня? - Кылзы, отец Серафим. Ваньзэ ватытэк мадё. * * * Сабер Зина ӵукна черк пушез утялтыса, колонка доры вулы потыкуз ӧс выжыысь тыро пуйыез синйылтӥз. Котыр утчалляськиз. Нокин уг адскы черк ёросын. Дӥсьтыса- дӥсьтытэк пертчиз со пуйез. Уйшоре ышем обросъёсты, вӧсь книгаосты синйылтыса, дыртыса гадяз кирос тырыны кутскиз. Чагыралэс иньаме учкыса юаз на: "Милемлы юрттыны малпад, иське, Быдӟым Инмармы?" Ципья черкогуртэ вӧлмем выль иворлы ӧз паймытске Кулуш Геня, Датай Анют но Серафим баӵко гинэ. 1 Мон вуылӥ выжыкыл дуннее Сюрес. . . Сюрес. . . Пумыд но, йылыд но ӧвӧл ук тынад. Кытчы но уд вуттӥськы тон! "Сюрес шулдыръяське но соин ӵош ик трос ужа. Ӧйтӧд, дунне вылын со мында ужась вань меда? Уй но нунал, тол но гужем - со ялан гуретэ, шыпыртэ, ӟукыртэ, кырӟа но маде".(В. Широбоков). Одӥгъёссэ тон улонлэсь пыраклы люкиськод, мукетъёсызлы пумиськыны юрттӥськод. Нош кӧня адямилэн вирыныз пылатэмын тон, сюресэ? Кыӵе шаере, кыӵе музъеме ваёд? Поездын лэйкаса мынонъям таӵе малпанъёс йырам бергало. Мынам азьпалам туж кузь сюрес. Кыдёке-кыдёке, Венгрие, асьме ӵыжы-выжыосмы доры со вуттоз. Та паймымон шаере вуылыны луонлык клдӥз милемлы группаысьтымы эшеным ӵош кылем гужем, гудырикошкон толэзе. Удмурт униврситетэ Венгриысь ӧтён вуыса, дышетӥсьёс милемыз отчы ӧтьыны малпазы. Туэ нырысьсэ ми, удмурт филологи факультетысь удмурт-венгер отдлениысь нырысетӥ курсысь быдтэм студентъёс, сыӵе кузь сюрес вылэ потӥмы. Выжыкыл дуннеын кадь ортчытэм нуналъёс табере кыдёке но кыдёке кошко. Тодэ ваёнъёс гинэ сюлэмез бугырто на. Но ваньзэ вераме потэ радызъя. Кузь сюресмы милемыз нырысь ик Москвае вуттӥз. Укно сьӧрысь векчи кдырась зорез адӟыса, мылкыды куашказ. Но, юромо милемыз пумитаса, лэся, пурысь пилемъёс сьӧрысь пальышаса ӵук шунды потӥз. Вокзалын нокытчы интыяськыны - со мында калыкез. Нимаз дунне кадь та вокзал, ваньзы кытчы ке дырто, ваньзы ог-огзэс сутыны тыршыса бзьыло. Сумкаосмес камераосы ӵогаса, поръяны мынӥськом Красной площаде. Ӵапак вылӥын часъёслэн жонгетэмзы кылӥськиз. Зэм но, дас кык час тырмем ни вылэм. Кӧня татын кунгож сьӧрысь адямиос! Оло, пӧлазы венгеръёс но ваь. . . Котырак синпельлы туспуктэмъёс лэсьто. Тани мавзолей. Азьло аръёсы кадь кузь черод ӧвӧл ни отын (1990 арын мон вуылӥ ни вал татчы). Озьы ик йӧн-йӧн сыло солдатъёс. Кожалод, излэсь лэсьтэмын соос. Синъёссэс но уг кыньыло. Кремлетӥ сяна, Москва шур кузя но эшеным поръямы. Котькытын чылкыт, чебер. Урамъёсын пишто ӵуж, горд, лыз, льӧль сяськаос. Кошкем ик уг пот ни, ява, татысь. Но ӝыт милемыз нош ик возьма ни вал чугун сюрес. Мылыз потытэк, каллен гинэ вырӟиз Будапештэ - Венгрилэн шоркараз нуись поездмы. Уй. . . Укно сьӧрын, коть синме донгы, номыр уг адскы. Шат сопал дуннее нуо монэ? Вазь ӵукна, кукурузаен бусыосты адӟыса, шӧдӥсько, Украина пыр ортчиськом шуыса. Асме буйгатӥсько: иське, шонер мынӥськом. Поездын но тросэз украин кылын вераськыны кутскизы. Маскара ик соосты кылзыны. Украинаын ик ортчимы таможня пыр. Котькуд иськемен Венгрилы матэ но матэ вуиськомы кадь. Сюлэм золгес но золгес жугиськыны кутске. Чидан но пумен быре ни. Ӝоггес адӟем потэ вань сюлэмшугъяськонмылэсь ямышсэ. Тани граница дуре но вуим - Захане. Татын выльысь эскеро милемыз. Кӧня ке сылэммы бере, нош ик мынӥськом азьлань. Пумтэм сюреслэсь жадьыса, номыр но монэ уг паймыты ни кадь. Йырам одӥг малпан - мисьтӥськыны но, небыт валес вылэ выдыса, гань-гань изьыны. Поездын венгер кылын вераськисьёс но тросгес луизы. Егит анай, пичизэ бӧрдэмлэсь буйгатыса, серемес кылбур маде. Вераськемысьтызы одӥг кылзэ валасько ке, со мыным бадӟым шумпотон. Тани со - Венгрия. . . Мон мынӥсько венгер музъем вылтӥ, шокасько венгер омырен, кылӥсько венгер пиналлэсь бӧрдэмзэ. . . Инмозь ик кыстӥсько кукурузаен, шундыберганэн удалтэм бусыос. Радэн-радэн будо яблокпуос, персикъёс, виноградъёс. Кырымпыдэс быдӟа музъем но татын утялтытэк кельтэмын ӧвӧл. Улон коркаос пыласько турлы сяськаос пӧлын. Поездлэн мур ӝуштэмез кылӥськиз - вуиськом Будапештэ. Татын милемыз возьмало ни вылэм. Кӧня ке ортчыса, ми "интерсити" электричкаын пукиськом ни вал. Кык но ӝыны час мынэммы бере, азьпаламы Самбатхей город адӟиськиз. Вуим ик, лэся! Ньыль нунал татчы лыктыса, оскон ик быриз ни вал, куке но татчы вуом на шуыса. Нырысь-валысь интыязы чылкт, чебер, вӧлмыт огъяулонние.Ижкарысь аслэсьтым комнатаме тодам ваисько но, зэмзэ но выжыкыл дуннее вуи кадь потӥсько. Таӵе чебер огъяулонние сюрон понна гинэ но татын дышетскемед потоз ук! Ӝыт, ваньмы люкаськыса, дышетӥсьёсынымы ӵош ресторанэ мынӥмы. Ми сяна, татчы Мордовиысь, Комиысь, Карелиысь, Санкт-Петербургысь студентъёс , дышетӥсьёс но финн-угор культураен тунсыкъяськисьёс вуиллям. Ресторанын туж шуныт пумитазы, ческыт сюдӥзы, венгер винаосты веръятӥзы. Вераны кулэ, венгеръёс доразы сиськыны уг ярато, ӵемысь быдэс семьяен ресторанъёсы ветло. Котькуд нуналмы венгер кылэз дышетонъя урокен кутскылӥз. Озьы ик кылзӥм пӧртэм тодосчиослэсь лекциоссэс. Тунсыко потӥз мыным пыр-поч тодматскыны венгер калыклэн историеныз, культураеныз, солэн улонэныз но сюлэмшугъяськонъёсыныз. Ӵемысь ми ваньмы ӵош кенешлӥмы , котькудӥз аслаз элькунысьтыз улон-вылонэныз тодматылӥз, улонмес ваче ӵошатылӥмы. Со сяна, дышетӥм венгер калык кырӟанъёсты но эктонъёсты. Шутэтскон дырмес но пайдаё ортчытылӥм: поръямы городысь урамъёстӥ но площадьёстӥ , шайвылэ но, пляже но вуылӥмы. Туж паймим городлэн чылкытлыкезлы. Нош мар меда малпало та ласянь венгеръёс, асьме доры вуыса кырсь улонмес адӟо ке.Соослэн вамышлы быдэ сяськаос, сяськаос. . . Кожалод, зэмзэ но городэтӥ сяська зор ортчем. Паймим городысь библиотекалы но. Отын вашкала книгаос люкамын. Кыӵе соос бадӟымесь но секытэсь! Ӵужектэм кагаззэс кутылыса, киос ик куалекъяло - таӵе арбериослэсь но мар вань меда дуноез? . . .Черкъёсын радэн-радэн сыло пуконъёс, театръёсын кадь. Котькудаз пичи гуртын одно ик черксы вань. Угось венгеръёс Инмарлы оско, соос тросэз католикъёс луо. Ваньмызлы паймыса катьмы ик быриз, лэся. Паймим венгеръёслэн капчт мылкыдо, котьку юрттыны дась луэмзылы. Магазинэ гинэ но пыриськод ке, тонэн одно ик ӟечъяськозы, басьяськыны юрттозы, шуныт клъёсын келяны уз вунэтэ. Али но син азям базар нунал. Ма но ӧй вал соку шор площадьын: пулэсь, туйлэсь, кулэсь лэсьтэм арбериос, пӧртэм синпель кузьымъёс. Ческыт пӧраськем кыдёкысен ик нырез бичатэ. Паймоно усточиослэн быгатонлыкъёссылы. Городысь утчамед потыса но уд шедьты ӟуч букваосын гожтэм кылъёсты - турист агентствоысь гинэ ке шат? Удмуртсэ уг но вераськы. Нокытын воштыны уд быгаты асьме манетэз но. Магазинъёсын ӧвӧл ӟеч-венгер яке венгер-ӟуч словарьёс. Мырдэм но кызьы ми соосты шедьтӥм ик. . . антикварной магазинысь. Кӧс но арня нуналэ нокин номыр уг ужа - нянь басьтэмед но уз лу. Светофоръёс гинэ но "щутэтско". Шутэтскон сярысь ке верано, Сомбатхейлэн котькуд сэрегез, кожалод, шутэтскон понна кылдытэмын. Романтической мылкыдо адямиос ваньмон дырзэс ты дурын ортчыто. Татын нокин но тыныд уз люкеты. Дырын-дырын ӵожъёс но юсьёс гинэ тодэ вайыто, тон музъем вылын ик на шуыса. Егитъёс, асьмелэн кадь ик, ӝытъёсы дискотекаосы ветло. Пӧсь нуналъёсы пичиез но бадӟымез - ваньзы мыно пляже. Татын нокин уз учкы, кызьы тон дӥсяськемын. Нырысь интыын венгеръёслы, американецъёслы сямен ик, дӥсед мугорыдъя каньыл мед луоз. Ми но одӥгаз нуналэ шутэтскыны-поръяны Сомбатхейлэн котыръёсаз ветлӥмы. Тубимы гурезьёсы. Отысен, вылӥысен, городэз туспуктэме уськытылӥм. Вуылӥм пичи гуртъёсы. Огполаз венгеръёслэсь калач пыжемзэс адӟимы. Асьмеос но сое тылскем вылын пыжыны оскалтӥм. Кыӵе ческыт со! Кылдэ ньылод. Австрилэсь кык-куинь вамыш кемын вал ми - Сомбатхей та кунлы матын сылэ. Одӥгаз пичи городын, Кёсегын , нош ик татчы мед берытском шуыса, вашкала колодчае уксё куштӥм. Нош выльысь вуылэме зэмзэ но потэ. Шонерзэ ке верано, бертон сярысь ӧм но малпаськылэ. Мынам потэ вал киме вылӥе, инбам вадьсы ӝутыса, быдэс дунне тыр зол-зол кеськеме:"Дыр, берытскы, эн кошкы сыӵе ӝог!" Но озьы кылдэмын ини: куке но котьмалэн пумыз вуэ. Кык арнялэсь ортчемзэ шӧдыса ик ӧм вуэ. Одӥг шокчемен кадь кытчы ке дыртыса, бызьыса кошкизы нуналъёс. Венгриен люкиськон нуналэ но милемыз псь шунды сайкатӥз. Пӧсьсэ со зэмзэ ӧз жаля - котькуд нунал куамын градус вылын возиськиз. Берпуметӥзэ ми мынӥськом Сомбатхейлэн урамъёстз. Берпуметӥзэ адӟиськом писпуосты, сяськаосты, улон коркаосты, венгеръёслэсь котьку пальпотӥсь ымныръёссэс. Ӟеч лу, Сомбатхей! Ӟеч лу, Венгрия! Мон оскисько, асьмеос куке но адӟиськом на шуыса.Вуоно пумиськытозямы! Алёна Родионова. Мария Никитина Дунолэсь но дуно Мынняпал дуннее. . . Вуж Монья котырысь гуртъёслэн кылдэмзы, азинскемзы Шулдыресь возь выло, Вордӥськем музъеме. Тон сярысь туж уно Вераме ни потэ. Я бен усьты ӧстэ, Вашкала шыкыстэ. Нюлэсъёс но возьёс, Сюресъёс, ошмесъёс. . . Та сярысь мадисько, Калыкме данъясько. Кыл - со калыклэн культураез. Адями макем ӟеч тодэ ас вордӥськем шаерзэ, сокем юн сое яратэ, соин тунсыкъяське. Кыл вылын адӟиське солэн вашкала улонэз но. Мынам малпамея, вашкалаез туалаен трос полэс биниськемын. Вашкалазэ, ортчемзэ санэ басьтымтэенымы такем секыт югдуре вуимы. Чечняын, шуом, оло, сомында вир кисьтон ӧй луысал, кивалтӥсьёс умойгес тодысалзы ке та калыклэсь йылолъёссэ, сямъёсэ. Котькуд калыклэн уго аслыз гинэ тупась сямыз. Пӧлазы "зарни пырыосыз" но вань, кудъёссэ выльысь улӟытоно вылэм. Кылсярысь, удмуртъёслэн инкуазен кусыпъёссы, ог-огедлы юрттон сямыз, калык педагогика. Макем паймымон со - калык педагогика. Лякытэн гинэ, амалак урод сямлэсь куштӥськыны юрттон. Тани милям гуртамы азбар ӵужись бӧрсяз жагзэ кельтӥз ке, мӧйыос шуозы: "Э-э, нылы, картэд шадра луоз ук!" Шадра кыл ми палан калык понна йӧнтэм луэмез возьматэ. Тӥни озьы, амалак, возьытэ уськытыса дышетӥзы. Туж паймымон но тунсыко ми палась гуртъёслэн кылдэм, азинскем сюрессы. Тани соос: Вуж Монья, Сьӧдочмес Пельга, Ӝыкъя. Мувожо Пельга, Поргурт. Таос сяна, войналэсь азьло таӵе гуртъёс вылӥллям на: Покровской, Огородниково, Рябовский хутор, Ӝикъя Починка. Та бырем гуртъёс сярысь я бусы, я возь нимъёс гинэ верало на. Мыным туж тунсыко потэ вордӥськем палъёсылэсь вашкала дырзэ но али азинскемзэ тодыны. Сьӧдочмес Пельга (Итешево) Та гурт райцентрысен 37 иськем, Ижкарысен - 52, Агрыз станциысен - 15, Ижкар- Можга асфальт сюресысен - 9. ЪВИИИ даурлэн пумаз татчы вуиллям Пельга выжыысь удмуртъёс. Интыяськиллям ошмес дуре, Оӵ шурлэн вылӥязгес (Оӵ шур кузя бигеръёс интыяськемын вылӥллям ини). Ошмессы бугыр-бугыр сьӧд музъемез портыса ик потэ вылэм. Оло, соин но Сьӧдочмес Пельга шуиллям. (Пельга воршуд сярысь вера М. Атаманов). Учёной но исследователь Миллер пусйиз: "Пильга входит в название многих вотяцких деревень, но сами вотяки не знают, что они значат". Н. Ф. Катаев шуэ: "Пильга кыл - "бильга" - памятник. Пельга, мон малпамъя, со воршуд ним, выжы. Гурт нимлэн оглюкетэз луыса со пумиське Грахово, Кизнер, Можга, Вавож ёросъёсысь гуртъёсын но (ог 70 пала). Сьӧдочмес Пельга гуртысь удмуртъёс куспазы туж тупаса улӥллям. Но бӧрысь гуртлэн нимыз воштӥськем, Итэш шуиллям. Та нимыз пумысен кык пумо валэктон сётыны луоз. Куке но соку, пе, та калыклэн паймымон пиез вылэм. Кужмо, чебер, йӧно, Итэш нимо. Выжыкылысь батыр выллем вылэм со, но пересьмыса кулэм. Нимыз медаз быры шуыса, калык сюлмаськем - гуртсэс Итэш шуиллям. Нош мукетъёсыз валэкто, со, пе, "иптэш" бигер кыл бордысь потэмын, "эш" шуэмез вера. Вазен Итэш вӧзтӥ кошке вылэм Екатеринбург-Елабуга тракт. Со кузя жильыосын дурылыса нуллылӥллям политической заключённойёсты, егит пиос но эксэй армие татӥ ик кошкылӥзы но бертылӥзы. Та сюрес узыр купецъёсты я Сарапулэ, я Елабугае вузкарыны вуттылӥз. Озьы ик татӥ ортчылӥллям гырлыосын каретаос, тарантасъёс. Татысь калык музъем ужен вырем, муш вордэм, чорыгам, пӧйшурам. Туж умоесь кусыпъёссы вылэм артысь гуртысь бигеръёсын. Ог-огзы доры кунояськыны, керттӥськыны но ветлозы вылэм. Лымшор палась удмуртъёслэн музъем вылазы бигеръёс улыны вуиллям Казань ханстволэн куашкамез бере (1552 ар). Озьы Оӵ шур кузя кылдӥзы Байки, Биктово, Кыдаш, Кызылляр бигер гуртъёс. Соослэсь адӟем каремзы та гуртъёсын улӥсь удмуртъёслэн вераськон кылазы но шӧдӥське. Тӥни озьы, ог-огенызы кенешыса, тупаса улӥллям та гуртъёсысь удмуртъёс но бигеръёс. Асьмелы соослэсь адӟем кароно вылэм. Мувожо-Пельга (Быстрово) Быстрово гурт азьвыл Мувожо Пельга, Итэш Починка шуыса нимаськиз. Со ЪИЪ даурлэн пумаз кылдэм, Россиысь крепостной правоез воштэм бере, Ӟуч государствоын капитализм азинскон вакытэ. Пересьёс верамъя, вашкала дыръя гурт бадӟымгес луэ ке, пинал семьяос мукет азе улыны кошко вылэм. Тӥни озьы, Сьӧдочмес Пельга гуртысь пинал семьяос Мувожо-Пельгае вуиллям. Туж кельшем быръем интызы: чорыго шур дурын, шулдыресь возьёс, узыр сик. Ӵыжы-выжыосынызы виссы но куинь иськем гинэ. Дуннеез котыръяса, татчы выжы лэзиллям Вятка, Сарапл палась, Киров но Пермь областьёсысь ӟучъёс. Гуртэз Скалшур висъя. Огпалаз радэн пуктэм коркаос - ӟучъёслэн, мукет палаз - удмуртъёслэн. Куинь урамъёс кылдӥллям: Ӟуч урам, Бадӟым урам, Атнакул. Войналэсь азьвыл гуртын 70 пала коркаос но куинь бӧлякъёс вылӥллям: Чумар бӧляк (14 корка), Нялмыт бӧляк (10 корка), Айбат бӧляк (15 корка). Выжыос таӵе вылӥллям: Балян выжы, Пукро выжы, Чумар выжы, Карпа выжы. Ӟучъёс нокыӵе бӧляке пыриллямтэ, соосты фамилиен гинэ верало вылэм: Дресвянниковъёс, Огородниковъёс, Тепляковъёс, Звергуковъёс, Ермолинъёс, Мымринъёс но мукет. 1877 арын, калык бусыын ужаку, шӧдтэк шорысь тылпу потэм но быдэс гуртэз пеньлы пӧрмытэм. Пӧсь куазен коркаос, шашыен липем гидъёс синкуспын быриллям. Одӥг пол гинэ ӧвӧл, кык пол, пе, гурт ӝуалляз. Тылпу бере гурт интызэ ӧжытак воштэм, шур выллане тубиллям. Соин валче вуко но ӵыпет палэнэгем кылиллям. Калык тупаса улэм, музъем ужен вырем, муш утялтэм-вордэм, пичиысен ӟуч но удмурт кыллы дышыса будӥллям. Тылпу бере Итэш починка котыре кылдӥллям кык пичиесь гуртъёс (5-6 коркалэсь). Но соос кема улӥллямтэ, быриллям. Кылем даурлэн 30-тӥ аръёсызлэн умой но урод палъёсыз удмурт улосамы но пытьы кельтӥз. Колхоз кылдон вакытэ кулак карыса куинь семьялэсь ваньбурзэс талаллям но тус-тас кариллям. Колхоз борды нырысь ик ӟуч семьяос дэмен басьтӥськиллям. Сюлмо тыршыса но ӝог ужамзэс чакласа, колхозлы "Быстрово" ним сётӥллям. Мувожо Пельга, Итэш Починка гуртэз Быстрово шуыны кутскиллям. Котыр бигер гуртъёсын кусыпъёс но юнмаллям. Огзэс огзы уром шуиллям, куное ветлозы вылэм. Озьы гуртын ӟуч, бигер, удмурт кылъёсты тодылӥллям. Гуртын уго дышетскем калык но вал ини. Пересьёс верамъя, гуртэ, пе, тодмотэм, визьмо адями вуылэм, грамоталы дышетэм, азьлань улон сярысь мадьылэм (мон малпасько, со Верещагин вал шуыса, малы ке шуоно, со вакыт со ужаз Бурановоын, ми пала но вуылӥз, дыр). Колхозын пуромиз огъя ужан, будэтӥзы удалтэм ю-нянь, йылӥз пудо-живот. 1934-1938 аръёсы "Быстрово" колхоз туж бадӟымесь азинсконъёс басьтӥз. Тодматэме потэ тани таӵе лыдпусъёсын - кӧня нянь октэмын вал гектар музъемысь: 1931 ар 1938 ар - ӟег - 8,5 ц - 15 ц - чабей - 8,5 ц - 12,3 ц - сезьы - 4.4 ц - 15 ц Уксёзы но пумен йылыны кутскем. Колхоз данъяськылӥз аслаз кужмо валъёсыныз. Колхоз кылдыку гинэ 8 валзы вылэм, нош 1931 арын - 52, 1937 арын - 100 валзы, пе, вал ни. Гырон быдтон дыръя но мукет ӵошатсконъёсын котьку вормисе потылӥллям. Ӝог мынэм лэсьтӥськон но. Вал гид, школа, сиськонни войналэсь азьвыл татын ужасьёссэс уксётэк сюдылӥллям, ясли, лавка, бадӟым ӵыпет, вуко пуктӥллям. Озьы гурт нуналысь нуналэ юнмаз. Ул но ул гинэ вал кадь шумпотыса, ог-огдэ гажаса. Нош озьы гинэ вылымтэ. Витьымтэ шорысь ожтыллэн шимес вужерез 22-тӥ инвожое татчы но вуиз. Нырысь нуналъёсаз ик пиосмуртъёсты, соосын ӵош валъёсты но нуизы. Котькуд воргоронлэн ож пыр ортчем сюресэз - туннэ нуналозь лыдӟымтэ зӧк книга. Я похоронка, я "без вести пропал" шуыса иворъёс йыгаськылӥзы котькуд корка. 28 муртъёс пӧлысь одӥгез, кин ас улонзэ сётӥз шудбурмы понна - гвардиысь майор А. Г. Тепляков. Чехословакиысь Братислава город дорысь гурезь йылын сылэ ожчиослы монумент. Отын гранит вылэ гожтэмын: "1945 ар, гвардиысь майор А. Г. Тепляков". Вуж Монья школа солэсь нимзэ нуллэ. Ож аръёс бере гурт калыклы туж секыт йӧтӥз: уноез городэ кошкылӥзы (ӟуч семьяосгес), ужась ки уг тырмы. Кӧня тыршоно луылӥз! 60-тӥ арозь гуртын радио но, электротыл но ӧй вал. Эшшо гуртэз (неперспективной шуизы- огвакыт бырон калэ вуылӥз. Но выжыез юн вылэм, лек сильтӧллы ӧз сётскы. Быстрово гуртэ туннэ йы-йыг коркаос пуксё, егит семьяос кылдо, лавказы вань, ӝоген школа юртэз усьтозы. Одӥгез урод - вазенгес ик лэсьтыны малпам асфальт сюрес туннэ но ӧвӧл на. Тӥни сыӵе тунсыко та пичи гинэ гуртлэн ортчем сюресэз, шулдыр инкуазез но паймымон калыкез. Бен, кызьы уд паймы. Татысь одӥгез кышномурт З. Р. Дресвянникова 102 аресозь улэмын. Нош М. Г. Мымрин ожлэсь азьвыл ик образование басьтэм но ПВО-ысь генерал-лейтенант луэм. Дас одӥг медальёсын но орденъёсын со пусъемын, Государственной премилэн лауреатэз луэ. И. А. Дресвянников нош - математика наукаосъя кандидат, Ивановоысь технической институтын математикая дышетэм. Верхняя Иж-Бодья (пор гурт) Та гурт туж умой интые пуксемын. Кыдёкын ик ӧвӧл, Бубби шур, кудӥз Оӵ (Иж) шуре усе. Агрыз карозь сизьым иськем. Сылэ ӵошкыт но ӵыдонтэм интыын. Гурт дортӥ ик ортче Агрыз - Набережные Челны чугун сюрес. Ог 30 процентэз гурт калык чугун сюрес вылын ужа. Поръёс татчы Йошкар-Ола палась, асьсэлы умой инты утчаса вуилям. Нырысь шурлэн вылӥязгес улӥллям. Иван Грозный эксэй кивалтон вакытэ удмуртъёс поръёсты улляны кутскиллям. Тапал музъемлэсь соос люкиськиллямтэ ни, шур кузя улӥегес кошконо луиллям. Али но уло со быръем интыязы, удмуртъёсын огкылысь, тупаса. Асьсэ культуразэс утьыса возё, удмурт кылэз но ӟеч тодо. Ог 200-250 ар талэсь азьло та гуртысь поръёслэн выжыоссы кошкиллям Грах ёросэ. ЪИЪ даурысь тодосчиос гожъямъёсазы верало, поръёс Выль Монья, Ӝикъя, Чокал, Мувожо-Пельга гуртъёсын уло вылэм. Нош ЪИЪ даурлэн кутсконаз лымшор пала, Кам сьӧры кошкылӥзы. Куд- огезлы нош улэм интыез жаль потэм, лэся, ӧз кошке. Бодьялан кылемын быдэс (порпи бӧляк). 1978-1980 аръёсы ортчем переписья, пор гуртын 44 корка вылэм, улӥсез - 230 (соос пӧлын - кык ӟуч семья). Вуж Монья (Старая Монья) Пересьёс верамъя, та гурт интыын сикъёс вылӥллям. Тӥни со сикъёсты сайкыса, асьсэлы корка пуктылӥллям. Корка вӧзы корка, нош - мукетыз корка. Вуж Моньяез кылдытӥллям шуо кык вынъёс. Соос корка пуктӥллям, улыны кутскиллям. Малпасько ни, пе, кызьы меда интызылы ним сётоно. Одӥгез шуэ, монъя луоз, мынэсьтым малпам нимме сётом, нош мукетыз, пе - монъя луоз. Тӥни сыӵе "монъя" кыл бордысь Монья ним потэм. Оло, та ченгешон бордысен ик кутскыса, та вынъёс люкиськиллям. Одӥгез соос пӧлысь кошкем но быръем Выль Монья интыез, солы малпам нимзэ сётэм. Нош вынызлэсь, нырысьсэ кылдэм Моньяез, Вуж Монья шуиллям. Тӥни со нырысетӥ коркаез Азькей корка, пе, шуо вылэм. Со шурлы матын, кызьпу улланьын сылэм, вӧзаз вӧсяськон инты вылэм. Та корка бордысен пуксьыны кутскем пичи гинэ урам. Нош 1930 арын кылдэм ини колхоз. 1933-34 аръёсы - ваньзы колхозэ пыриллям. Пырыкузы кинлэн маиз вань сётӥллям: валзэс, ыжзэс, кечъёссэс, дӧдьыоссэс, уробооссэс но мукет. Берло ни пуктӥллям гидъёс, нырысь ик - скал гид. Скалзэс гинэ ӧвӧл, ыжзэс но кыскыны косо вылэм. Олокызьы но курадӟиллям, ужаллям. Уждун интые сютэм кулэмлэсь кӧня ке пызь, нянь сёто вылэм. Кин ке тыриськонзэ уг тыры, коркась корка пыраса, ваньбурзэс таласа ветло вылэм. Кинлэсь ыжзэ, пе, потто, кинлэсь скалзэ, куддыр умой дӥсьсэс но нуо, пе, вылэм. Собере соосты ваньзэ базаре нуыса вузаллям. Колхозэ пырыкузы пичи магазинзы но, клубзы но, кебитсы но вылэм ни. Кебитсы шур дурын сылэм, соин ик шурез Кебитшур шуиллям. Вуэн но парен ужась вукооссы но вылӥллям. Собере школа пуктӥллям. Но ужась калык тырмымтэен дышетскыны трос кылдымтэ. Электростанцизы дизельной двигателен ужам. Вӧсяськон интыоссы трос вылэм. Кышноосты отчы пыраны лэзиллямтэ. Быдэс лудзы кенерен котыртэмын вылэм. Жаляса верано луэ, со лудъёс али быремын ини. Вуж Монья гуртын али 1794 адями улэ. Соос пӧлысь удмуртъёс - 1701, ӟучъёс - 15, поръёс - 77, бигер - 1. Ӝикъя (Буро-Ӝикъя) Та гуртлэн кылдэмез рос-прос тодмо ӧвӧл. Пересьёс шуо, татчы, пе, Карашурысь но Аксакысь адямиос яна потыса вуиллям. Интызы кельшем, соин татчы интыяськиллям. Та гурт вӧзын ик вылэм Покровской гурт. Со али быремын ни. Отчы адямиос нырысь Арланысь вуиллям. Соин сое нырысь Арлан кутор шуо вылэм. Мукет ёросъёсысь гуртъёс сямен ик, та гуртъёс шуг-секытъёсты вормыса, ӟеч ужъёсын пачылмыса будӥзы. Соос вакытысь вакытэ, нуналысь нуналэ утьыны тыршо удмурт культурамес, сям-йылолъёсмес. Паймымон милям кибашлыосмы. Соослэсь ужъёссэс кунгож сьӧрын но тодо, дунъяло. Моньялан вань парсь вордон комплекс, колбаса, йӧл-вӧй поттон цехъёс. Данъяськисько но музъемозь ик йыбырттӥсько мон мынняпал калыкелы. Леонид Кузелин СПИД вуиз ини пичи гуртъёсы но Вераны кулэ, СПИД-эн висисьёслэн лыдзы син шорын йылэ. Али котькуд минутлы быдэ дуннеын дас одӥг муртлы СПИД-лэн вирусэз палаське. Кышкыт эпидемия 18,8 миллион адямилэсь улонзэ талаз ини, нош 34,3 миллионэз та черен курадӟе. Россия Федерациын СПИД-лэсь вируссэ нуллӥсьёс 140 сюрс пала лыдъясько, со пӧлысь 552 СПИД-эн висе.849 пинал ворсдкемын ВИЧ - инфекциез нуллӥсь анайёслэсь. Тпросэз егит анайёс наркотикъёсын кушласько, нылпиоссэс быдтонлэсь палэнско. Асьме элькунмы алигес пыртэмын Приволжской Федеральной округе. Отчы пырись бускельёсмы пӧлын СПИД-лэсь вируссэ нуллӥсьёслэсь шараям лыдпусъёс тодыны но мултэс ӧй луысал. Башкортостанын 1286 висисьёс, Татарстанын 2143, Кировын - 57, Пермь областьын 2304. Асьме элькунамы туннэ нуналлы СПИД-лэсь вируссэ нуллӥсьёс 830 адями шараямын ини, соос пӧлысь 16 СПИД-лэсь кулӥзы ни. 6 нылпиос ВИЧ-ен черлам анайёлэсь вордскемын. Висисьёс шараямын ни элькунысьтымы 4 каръёсын но 12 ёросъёсын. Пӧлазы 664 пиосмуртъёс, 166 нылкышноос, соос пӧлысь 580 пӧлысь 13-25 аресъемъёс. 614 нокытын уг ужало, 55 школаосын но училищеосын дышетскисьёс, 13 студентъёс, 208 ВИЧ-ен черламъёс пуко пытсэт сьӧрын. Озьы ик СПИД-лэсь вируссэ нуллӥсьёс шараямын ини 170 семьяын, 41 ВИЧ-инфекциен черламын кыкназы ик кузпалъёс, 112 - пиосмуртъёс, 17 - нылкышноос. ВИЧ-эн черлам секытэн луэм кышномуртъслэн но лыдзы будэ, соос пӧлысь 6-эз пичи пинал ваизы ини, 25 - пиналъёссэс куштӥллям, 7 - нылпизылэсь ворсдкемзэ возьмало Тужгес но кышкыт югдур кылдэмын Глаз , Иж, Вотка но Сарапул каръёсын, Балезино но Яр ёросъёсын. ВИЧ-инфекциез нуллӥсьёс пӧлысь 91,5 процентэз ( яке 759 адями) та через наркотикъёс пыр шедьтӥллям. Малы ке шуоно, ВИЧ-инфекцилы паськыт сюрес усьтэ наркомания. Угось та вируслэсь кышкытлыксэ тодыса вылысь но асьсэлы кулэ доза утчасьёс со сярысь уг малпасько ни. Йырез усыкмытӥсь суретъёс пӧлысь шаерамы тужгес паськыт вӧлмемын героин. Та шузимытӥсь наркотик адямиез ас ӧраз туж ӝог кыскыны быгатэ. Кизер героин вуэ Глаз каре, отысен Балезиное, Кезэ, Яре, Юкаменске, собере артысь музон ёросъёсы. Нош шаермылэн шор но лымшор палъёсаз со ӵемгес порошокен шеде. Наркотикъёсты вӧлмыто базаръёсын, школаосын, мукет дышетскон интыосын, баръёсын но дискотекаосын. Туэ ӝыны ар куспын гинэ элькунамы 390 муртлы ВИЧ-инфекция паласькиз. Ар куспын таослэн лыдзы 1000-лэсь ятыр луоз. Россия Федерациысь СПИД-эн нюръяськонъя центрысь специалистъёслэн но тодосчиослэн чакламзыя, 2001-тӥ ар пумын Россиын ВИЧ-инфекциез нуллӥсьёслэн лыдзы 300-400 сюрсозь вуыны быгатоз, нош кык ортчыса, т лыдпус миллионлэсь ортчоз. Матысь дыре, кык-куинь ар куспын, ВИЧ-инфекцилэн нырысетӥ тулкымез ортчоз, отчы тросгес шедёзы наркоманъёс. Нош ньыль-вить ар ортчыса, та инфекция паськыт вӧлмоз пиосмуртъёслэн но нылкышноослэн матысь кусыпъёссы пыр. Соин ик туннэ асьмелы тужгес но сак кариськоно - та черлэн вотсэтаз медам шеде шуыса. Вераны кулэ, ХХ-тӥ даурысь (али шуом ини ХҺ даурысь) та кӧшкемыт висёнлэсь вируссэ нуллӥсьёс шараямын ини пичи гуртъёсын но. Соос пӧлын Балезино ёросын Кожило, Пыбья, Быдыпи: Ярын - Бачумово, Бармашур; Кезын - Кузьма; Шарканын - Н.Тыловай; Камбаркаын - Балаки; Завьяловоын - Якшур но Хохряки, Уваын - Поршур- Тукля гуртъёс. Иж, Глаз, Сарапул каръёсын но Балезино, Шаркан, Яр ёросъёсын 27 кузя быдэ вуымтэос шараямын. Соос пӧлысь 16 школаосын дышетскисьёс, 11-эз нокытын уг дышетско, уг но ужало. Глаз карын шедьтэмын ВИЧ-инфекциен черлам дас куинь аресъем наркоман. Ми доры ӵем гинэ жингырто но юало: кин-о, пе, ноку но уз черла СПИД-эн? Тодады вайытӥськом СПИД-лэсь вӧлмем сюресъёссэ: - калгон ( кушласькон) пыр; - вир пыр; - вордӥськись нылпилы секытэн кышномурт пыр. Доноръёслэсь вирзэс али сак чаклано. Туж шер дыръя гинэ янгыш луыны быгатоз вир сётӥсез эскеронын анализ умойтэм лэсьтэмен яке висисьлы дыртыса чакламтэ вир лэземен. Озьы ик эмъяськонниын сак чакласа но эскерыса возё пинал ваись нылкышноосты. Тодосчиослэн но эмъясьёслэн чакламзыя, секытэн кышномурт дырызлэсь вазь ке шараямын (14 арняозь секытэн луэм бераз) но эмъямын 98-99 процентозь пиналъёсты черламлэсь утьыны быгато, пичи нуны тазалыко ворсдке. Соин ик секытэн луэм кышномуртъёсты умой эскерыса но чакласа возёно, соос пӧлын со сярысь эмъясьёслы - акушер-гинекологъёслы туж умой радъяны кулэ валэктон ужез. Озьыен, кылиз одӥг гинэ сюрес - калгон-костаськонэн вырон. Сю процентлы сямен утемын котькудӥз сыӵе улонэ пыриськисьтэм адями. Озьы ик нокыӵе кышкытлык ӧвӧл одӥг муртэз гинэ яратӥсь адямилы. Кызьы верамы ини, туннэ шуге-леке шедемъёс пӧлысь 91,5 процентэз наркотикен вырисьёс. Пусйыны кулэ, туннэ нуналлы Россиын кутӥське нимысьтыз эмъямькон амал (азидотимидин, ламивудин, фосфазид, тимозид), кудӥз ВИЧ-лэсь СПИД-э выжонзэ ӝегатыны быгатэ. Соку вирусэн азэм адями дасо аръёс ӵоже улыны быгатоз на, но эшшо огпол вераськом - ВИЧ-инфекция (СПИД) туннэ эмъяны луонтэм висён. Соин ик асьмелы СПИД-эн герӟаськем ужпум шоры учконмес быдэсак воштоно. Али элькунамы котькуд учыр рос-прос эскеремын, висисьёслэн кусыпъёссы чакламын. Эмъясьёс матысь адямиоссэс синйылтыса-эскерыса возё. Эпидемиез кортнан амал одӥг - профилактикая ужез кужмоятон но паськытатон. Вераны кулэ, таӵе уж умой радъямын Балезино ёросын. Та ёросын 2000-тӥ арын туж секыт югдур кылдэмын вал, СПИД-лэсь вируссэ нуллӥсьёс 85 адями шараямын . Ёрос кивалтӥсьёс пыр-поч но ас вакытаз кышкыт черлэсь утиськон борды басьтӥськизы. 2001-тӥ арын тулыс пал кышкыт черен паласьисьёслэн лыдзы кулэсмыны ӧдъяз, нош май-июнь толэзьёсы ВИЧ-инфекциен одӥг висись но шараямтэ ни. Малпасько, таӵе ӟеч ужамз адӟем карымон луыны кулэ мукет ёросъёсысь но город администрациосысь кивалтӥсьёс понна но. Азьланяз СПИД медаз вӧлмы шуыса, сак эскероно доноръёслэсь вирзэс, шедьтыны тыршоно висисьёсты но СПИД-лэсь вируссэ нуллӥсьёсты. Тужгес но умой радъяно наркотикен вырисьёс пӧлын ужез, сое вузасьёсты шараяно но шедьтоно. СПИД-эн висён но солэн вӧлмемез сярысь калыклы валэктон ужез умоятоно. Ватоно ӧвӧл мукетсэ но. ВИЧ-инфекция бордад лякиськоз яке уз, соиз ин ачид бордысь потоз шуыса. Котькудӥзлэн улонэз аслаз кияз. Осконо аслад йыг-йыг сямыдлы, кышкыт адӟонлэсь аслыд ачид утиськоно. Кин асьмелы "Шулдыр ӵукна!" кузьма Ку-ка-ре-ку! Ку-ка-ре-ку! Кенер вылын вазь ӵукна ик атас чоръяны ӧдъяз. Озьыен, вордӥське выль нунал. Султоно, дыртоно дышетскыны, ужаны, улон ӧрлэсь тунсыкозэ адӟыны. Но (ӵемысь озьы луэ) чик но шуныт валесысь султэм уг пот. Соку мынам сайкатӥсе ужзэ мытэ - со ГТРК "Удмуртилэн" 10-тӥ каналысьтыз телепередача "Шулдыр ӵукнаен!" Куаразэ корка трос лэзисько: выльысь умме усеме медаз луы. Кызьы шуо калыкын, кин вазь султэ, солы Инмар но сётэ. Зэм ик вылэм. Татысь ужасьёссы нунал куспын ма гинэ но карыса уг вутто, ява: чебересь но тунсыкоесь сюжетъёс дасяло, олокыӵе но локытысь иворъёс вутто, визьмо но адӟем карымон куноосынызы тодматыло. Нош кыӵе чебересь но мусоесь нуисьёсыз - Фёдор Миннигараев но Светлана Кибардина. Учкисьсэс котьку пальпотонэн пумитало. . . .Миннигараевен интервьюэ 8 часын ӵукна! Вуи телевидение. Возьмасько. 5-10 минут, 20 минут ортче, нош со ӧвӧл но ӧвӧл. Час ортчыса, тодмо луиз: витьымтэ шорысь солы съёмкаосы потоно луэм. Кыкетӥзэ вуыкум но нош возьмано луиз: я съёмкаос, я монтаж, я запись. . . Такем огыр-бугыр ужзы! Озьы ке но, мон сое "кырми" ик! -Ку малпады журналист луоды шуыса? -Шонерзэ вераса, журналист луо шуыса, пичи дыръям ноку ӧй малпалля. Школаын дышетскыкум, удмурт кылъя но литературая дышетӥсе Нина Валентиновна Фаршатова котьку урокъёссэ "Ӟечбур!" (азьло "Дась лу!") газетэн герӟа вал. Сказуемоез-а, подлежащеез-а. . . ортчиськом, ӵемысь примеръёс газетысь утчаны косылӥз. Та дышетӥсе ик пыӵатӥз удмурт кылэз но литератураез гажан но яратон мылкыд. Ма, мыным гинэ ӧвӧл, тросэзлы Нина Валентиновна юрттӥсь луиз. Солэн дышетэм улсаз ик кылдӥзы нырысетӥ кылбур чуръёсы, веросъёсы, серемес учыръёсы. Бӧрысь ини 6-7 классын дышетскыкум, ветлӥмы "Ӟечбур!" ("Дась лу!") газетлэн 70 ар тырмонэзлы сӥзем шулдыръяськонэ. Малы ке соку ик Ижкаре лыктыны мылкыды пуромиз. Но рос- прос кытчы дышетскынып ырон сярысь ӧй малпаськы вал ай. Угось математика но капчиен сётӥськылӥз, физикаен но информатикаен ӵемысь олимпиадаосы пыриськылӥ, ӟеч интыос басьялляй. Собере кутӥ но Удмурт Кун унивеститетысь филолгия факультетэ пыри. Но луысал ке отын журналистика удыс, одно ик отын визьме будэтысал. Дышетскыкум тэк ӧй пукы. Ваньмон дыръёсам гожъяськылӥ, нош 3-тӥ курсын "Удмурт дунне" газетынужаны кутски. Журналистика удысам нырысь вамышъёсме лэсьтэм сяна, та газет мыным бадӟым школа но луиз, трос тунсыкозэ, кулэ луисьсэ сётӥз. Со понна бадӟым тау кароно "Удмурт дуннеын" ужасьёслы, солэн тӧроезлы А. Шкляевлы. Отын ужаса, мон йыг-йыг султӥ журналистика удысэ. - Нош малы-о телевидение кошкиды? - Газетысь чик но кошкеме уг поты вал, телевидение монэ ӧтиз соку иворъёсъя ёзэтэн кивалтӥсь - Светлана Денисовна Семёркина. Соослы со дыре туж кулэ вылэм журналист. Соин, кема малпаськыса, соглаш луи ик. Кошкеме пумысен, тау Инмарлы, ӧй жалялля на. - Татын весь пыд йылын ужано. Ӧд малпаллялэ-а гань-ганьгес уже выжон сярысь? - Самой таиз ик - весь пыд вылын ужан - мыным тунсыко потэ, соин монэ бордаз кыске. Татын часлы быдэ ваньмыз вошъяське: шуом, али тынад съёмкаосыд луоно, нош куддыръя кыӵе ке югдурен йырин, сое 2 часлы бергес пукто. Монтаж, командировкаос, запись пумысен но тазьыгес ик. Ваньмыз суро-пожо. Мыным потэ, ужелэн тани та ик гочатӥсь чечыез но луэ. - Ужады кинлэсь адӟем кариськоды? - Зэм но, Москваысь но, элькунысьтымы но тележурналистъёслэсь ужамзэс чаклатэк уг луы, малы ке шуоно, "Шулдыр ӵукнаез!" дасям сяна, мон ужасько иворъёсъя ёзэтын но. Соин, эскерськод ини, кызьыгес журналсит иворез дася, сётэ, вера. Кылсярысь, кельше РТР каналысь "Вестиез" нуись Евгений Ревенко. Учкисеныз рос- прос кусып тупатыны быгатэ. Пумиськылэме бере, чакласа возисько та каналысь ик Игорь Кожевинлэсь ужамзэ. Со Е. Ревенкоен ӵош иворъёс бича. Игорь вуылӥз асьме доры но. Мон шаерысьтымы тунсыкоесь адямиосты ӵектыса, со ӟеч сюжетъёс дасяз. Бӧрысь ини тау карыса гожтэт но ыстӥз. - Яратӥськоды-а командировкаосы потаны? - Уг яратӥськы. - ?! - Оломаиз-олома, но уг яратӥськы. Кельше Москва палъёсы вуылыны. Алигес нош ик отчы, Саратове потыны кулэ луиз, но луонлыкъёсмы ӧвӧлэн, ӧм быгатэ. Берпуметӥзэ Москвае вуылыкум, пумиськылӥ Эрик Батуевен (командировкаослэсь мазэ тужгес но яратӥсько - выль адямиосын одматскылыны). Со ӵапак дунтэм билетъёс шедьтыса, монэ кафее нуллӥз. Улэпкын адӟи Дакоез (бӧрысь автографсэ но кури), "Жуки" группаез. Озьы ик радъямын вал лотереяен шудон. Мон но отчы пыриськи ке но, машина но видеомагнитофон ныр ултӥм кошкизы. - Тӥледлы кудӥз тужгес но сюлэмдылы матынгес: * тема быръён, сое гожтон * съёмкаос * запись * монтаж * дасьсэ (телевизорысь) чагыр экранысь адӟон - Кельше со дыр, куке мынэ "Шулдыр ӵукна!"-лэн записез (передачаез плёнка вылэ гожтон). Соку ик сюлэмы буйга, шутэтске. Та передачалы луыса, мон усьтӥськисько кадь. Улонмы огыр-бугыр бере, сокем иворъёс пӧлы выиськод, йырыд ик эсьмаса, "пӧзьыны" кутске. Нош "Шулдыр ӵукна!" бордын ужаса, мыным потэ, ваньмыз уродэз, жадьытӥсез пушкысьтым тӧлӟе, азьланезлы выль кужым сётэ. Асме телевизор пыр учкыны уг яратӥськы ке но, амалтэк эскероно луэ ини. Угось ачид шоры палэнысен учкыса гинэ, тырмымтэостэ шедьтыны быгатод. Нош журналистлы со, тужгес но передача нуисьлы, кулэ маке: ужам ужедлы дунъет сётыны луоно. - Сюжетъёслы тунсыкоесь темаос, адямиос кытсь шедьтӥськоды? - "Шулдыр ӵукна"-ез ачим нуисько бере, сюжетъёсы отын туж шер потало, ӵемгес "Шаерын". Нош тунсыкоесь видео суредъёссэс передачаям вутто "шаерчиос". Юалляськыса утчало, шедьто калыкмылэсь марӟанъёссэ. - Кызьы кылдӥз ӵукна передачады? - Кивалтӥсьёсмы кемалась туртто вал ини ӵукна эфир кылдытыны. Бӧрыьс та малпанэз А. А. Ушаков, ВГТРК-ен кенешыса, улонэ пыӵатӥз. Москва милемлы вивсъяз нимыьстыз дыр. Но соку ик шуизы: коньдонэн ум юрттэ. Озьы ке но, пичияк сётӥзы ик 2000-тӥ арын мартэ (южтолэзе) "Шулдыр ӵукнаен!" нырысьсэ чагыр экранъёсамы потӥз. Азьло тани Москва юрттэт ысъя ик ке вал, али уг ни. Соин передачамес, луоз шуыны, возиськом рекламалы луысагес. - Нош малы-о сокем вазь кутске - ӝыны сизьымен! - Та пумысен ми номыр карыны ум быгатӥське. Угось, кызьы шуи ини, милемлы Москва эфире потыны дыр сётэ. Но, кызьы ивортӥзы, азьланяз воштӥськонъёс луозы ай. - Ӵукна учкисьёстылэсь мылкыдзэс кызьы ӝутӥськоды? - Нырысь ик, передачаямы ноку но ӝожмытэсь видеосуредъёс ум сётӥське. Пӧртэм пумо керетонъёс, шуг-секытъёслэсь ми палэнскыныгес тыршиськом. Угось ӵукна ик адямилы уродэз сярысь возьматыса, солэн быдэс нуналлы мылкыдыз но лапкалоз. Эшшо "Шулдыр ӵукнаен!"-амы ми сётъяськом шулдыресь крезьгуръёс. Учкисьёсмылэн ӵукна ик тапыр-тапыр эктэмзы мед потоз. Котькуд чагыр экран азе пуксем адямиез ми сайкатыны, шулдыртыны кулэ. Соин ӵемысь, передачамы тунсыкогес мед пӧрмоз шуыса, Интернетысь иворъёс бичаськом, газет-журналъёсты учкылӥськом. - Нош кызьы меда асьтэос ӵукнадэс пумитаськоды? - Мон котьку туж вазь султӥсько. Самой берез - сизьым час. Яратӥсько сайкам берам чай яке кефир юыны. Нош тужгес но кельше персиклэсь дасям сокъёс. Сое гинэ юыса улысал, дыр. - Тӥледыз калык ӵукна учке, нош асьтэос кыӵе каналэз бырйиськоды? - Телевизор туж шер учкисько. Но пуксисько ке ини, ГТРК-езгес учкисько: "Мылысь- кыдысь", "Вамыш", "Марӟан" но мукет. Вазь ӵукна уже мыныса, бер гинэ дорам вуисько. Соин дыры луэ на ке, телевизоре кыӵе каналэз адӟытэ, отысь ик иворъёсты чакласько. - Ӵукна ик тӥ мусо пальпотӥськоды. Тӥледыз косо-а яке асьтэос выль нуналдэс сыӵе капчи мылкыдын пумитаськоды? - Косыса пальпотыны нокызьы но уз луы кадь потэ. Ма, пӧрмиз ке но, со сюлэм пушкысь ӧвӧл, огшоры кезьыт пальпотон гнэ. Учкись сое одно ик шӧдоз, угось синъёссы соослэн ӵемысь мӧзмыталэс луо. Чагыр экранын пальпотыса вераськон - сом ынам уже. Гурт калыклы ӵукназэ пудо утялтоно-сюдоно ке но, соос паймыса но шумпотыса мед учкозы милемыз, сьӧрамы мед пальпотозы. Но серекъяно валаса, передачалэн, видеосуредлэн пуштросэзлы со мед тупалоз. - ОРТ но мукет каналысь ӵукна потӥсь передачаослэсь адӟем кариськоды-а? - Ӵошатыны тыршисько ик. Син шорам соку ик Москваысь журналистъёслэн кезьытлыксы йӧтэ. Тросэз отын камера азьын верано кылъёссэс "зубритьто", собере пуля выллем верало. Соин куд-ог дыръя иворъёс учкисьлэн пельсьӧртӥз гинэ ортчо. Но уродзэ гинэ верам уг мот. Трос отын милемлы адӟем карымонэз но: кызьыгес, кылсярысь, дӥсясько, асьсэды возё, причёсказэс но мукет. - Та удысэ али кутскись журналистъёс шоры кызьы учкиськоды? - Маиз тужгес но умой, али соослы сётэмын вӧл-вӧл бусы - кытчы мылыд потэ, ма гожтэмед потэ - гожъя, вера. Сомында туннэ газет-журналъёсмы, вань удмурт телевиденимы, радиомы. Мылыд потытэк но гожъялод, ява. Шумпотӥсько, каллен- каллен егит журналистъёсмы пыд вылазы султыны тыршо ини. Тнани "Шулдыр ӵукнаын" но ӵемысь егитъёслэн видеосуредъёссы потало. - Кузпалэныды тӥ кыкнады ик журанлистъёс. Дорады ужды сярысь вераськылӥськоды-а? - Вераськиськом. Но куддыр нунал куспын уж дорын жадиськом ке, та темалэсь палэнскыны тыршиськом. - Выль малпан йырады лыктэ ке, кинэн нырысь кенешиськоды? - "Шаерчиосын". Шумпотӥсько, милям туж умой коллективмы шуыса. Выль идеяосме соослы усьтэме бере, эшъёсы соку ик малпанъёссэс. Дэмланъёссэс верало. Тани Т. Денисова мыным туж ӟеч ӵектонъёссэ, тодон валанзэ сётэ. Со уг вера огшоры гинэ, котьку пыр-поч, дыртытэк ваньзэ валэктэ. - Нош пиды журналист луон мылкыдзэ ӧз возьматы на-а? - Кин луод шуыса Вовамылэсь юаськом но, пичигес ай бере - 2 арес сяна ӧвӧл ай, ма вераны уггес вала. Ми сое удмурт но ӟуч кыллы дышетӥськом, сётӥмы сыӵе яслие яслие, кудаз англи кылэз пичиысен дышетыны кутско. Кыӵе удыс быръёз - улыса- вылыса учком ини. Али шуг вераны. - Яратоно арлэн вакытыз: - Яратӥсько гужемез, малы ке шуоно, соку шуныт; яратӥсько тулысэз - угось ваньмыз улӟе, сяськая. Зарни буёлъёсын тырмем арлэсь вакытсэ но гажасько. Ма, тол но туж сюлэмыя, соку резь! гинэ ворттылыны луэ. Азьло, школаын дышетскыкум ай, котьку ӵошатсконъёсы пыриськылӥсько вал. Маиз-мар, весь 2-тӥ инты басьялляй. Таки И-тӥ инты мон дорысь "пегаз". - Историысьтымы тодмо адями, кудӥныз тӥ тунсыкъяськиськоды? - Одӥг адямиез гинэ пусйыны уг быгаты. Мон ваньзы сярысь пичиен-пичиен тодыны тыршисько. Нокинлэн но фанатэз уг луиськы. Таизлэн - таиз яра, соизлэн - соиз. . . - Яратоно шулдыръяськонды-праздникты: - Выль ар!!! - Яратоно кырӟанды: - Мхм. . . Ма вераны ик уг тодӥськы. Тросэз ярало. Мон ачим но ведь 7-тӥ классозь кырӟалляй. Дышетӥселэн верамезъя, куарае жингрес вылэм. Бадӟымгес будӥ но та быгатонлыкме ыштӥ. Ма, выльысь улӟытыны но ӧй тыршы ини. Али чик уг кырӟаськы - бӧксэм кадь кылӥське потэ. - Тӥляд улон девизды: - Мон тазьы шуысал. Ачим гороскопъя чорыг. Кызьы тодмо, соос 2-лы люкисько - тулкымъя уясь но тулкымлы пумит мынӥсь. Мон пушкын берпуметӥ вераме тросгес ке но, луо куддыр пӧртэм учыръёс. Соин, мон тулкымъя но уясь, кулэ дыръя тулкымлы пумит мынӥсь но. - Яратоно шутэтскон интыды? - Ой, шутэтскыны чик дыры уг тырмы. Студиямы та пумысен ми серем пыр гинэ вераськиськом: - кытчы шутэтскыны ветлӥд? - Венгрие, Италие, Францие. - А мон Кение вуылӥ. - Кӧня доллардэ бен кисьтӥд? - А-а, ма, огородозям 15 манет гинэ усе. . . Сосновка гуртын. Но со туж шер луылэ. Луылэ ке но, гуртын уж трос бере, созэ-тазэ ужано: картош октоно, емыш бичано. . . Но со мыным туж кельше. - Тляд хоббиды: - Ӧвӧл кадь. Мон ведь "Удмурт дуннеын" "Шӧкыч" бамез дасялляй, соин юморескаос, серемес учыръёс гожъясько. Ольга Никитина УдГУ-ысь студентка, журналистикая факультет, ИИИ курс П. С. Вераськонмы йылпумъяськем бере, Фёдор будэтӥз на: "Ыстӥсько бадӟым-бадӟым салам Ленӥелы но пиелы. Мон тӥледыз яратӥсько!" Елена Овсянникова Кузёбай вӧсьёс Вордӥськем Кузёбай гуртэ элькунмылэн лымшор палаз интыяськемын. Гуртме котырто, кезьыт тӧлъёслэсь, зоръёслэсь утё Парсы, Ӟатча, Муштор, Луд гурезьёс. Та гурезьёс йылэ тубиськод ке, вордӥськем гуртэ кырымпыдэсын кадь адӟиське. Тӥни ферма, гужемзэ скал возён инты, Бадӟым урам, клуб, контора, кирпичлэсь, пулэсь ӝутэм-ӵупем чебересь, йӧно коркаос. . . Гуртмес кыклы люкыса, Кузёбай шур бызе. Шур дурын Туйка, Опой, Пома ошмесъёс жильыртыса бызё. Оло нош та ошмесъёслы синмаськыса, гуртоосмы Варӟи шур дурысь улыны татчы кариськиллям. Пересьёслэсь кылэме вань, та интые калык Омгалась лыктэмын шуыса. Варӟи шур дуре интыяськиллям но гуртмес но Варӟи Омга шуиллям. Тулыс лымы шунаку, сӥзьыл зорыку, шур, ӧрысьтыз потыса, паськыт вӧлскылэм, трос изъян ваем. Соин гуртоос шурлэсь палэнэгес кариськоно луиллям. Азьвыл кык гурт вылэм - Варӟи Омга но Кузёбай. Али гуртам кык сюлэсь трос корка лыдъяське. Малы меда Кузёбай нималлям гуртмес? Пересьёс со сярысь тазьы верало: "Кык ляльчиос куспазы ченгешиллям: кудзылэн, пе, кузёзы байгес. Собере шуиллям: Опой нюкысь бызьыса кудзы ке нырысь тубизы, солэн ик кузёез байгес. Одӥгез ляльчи тубем но кеськем: "Мынам кузёе бай! Кузёе бай!" Со дырысен гуртме Кузёбай шуиллям. Кузёбай гуртын улӥсьёс люкисько куинь выжылы: Будӟым куало выжы, Луд выжы но Булда выжы. Котькуд выжылэн вань аслаз вӧсяськон интыез: Будӟым куала, Луд но Булда. Та куинь вӧсяськонъёс сяна, вань на Ю вӧсь но Акташ вӧсь, кудъёсаз люкаське быдэс гурт. Тазьы выжыослы люкиськон кыстӥське ини вашкала дырысен. Выжы мынэ пиосмурт бордысен. Сьӧр гуртысь кышно ваё ке, со картэзлэн выжыяз пыре. Шудо мед улозы шуыса азьло одӥг выжыысь кен вайыны туртто вылэм. Али сое чаклась ӧвӧл ни. Будӟын куала Азьло котькудӥз аслаз куалаяз арлы вить пол вӧсяське вылэм: Будӟын нуналэ, Петро нуналэ, Пукро нуналэ, Микола нуналэ но Вӧй нуналэ. Будӟын Куалае вӧсь кутӥсьёс гинэ ветло вал. Вӧсяськыны лэзьымтэысьтызы, юртысьтызы куалаоссэс ворсазы. Куалаез ворсаку, вӧсьсэ одно ик куштоно. Куала пушкысьтызы вань тӥрлыкъёссэс Будӟын куалае "сяська вылэ лэзиськом вӧсьсэ" шуыса, тылын суто. Быдӟым куала выжыысь кышномурт Дернова Елена вераз: "Ми вӧсясьын дыръя, туж тросэз куала вӧсьсэс куязы. Тӥрлыкъёссэс ваньмыз одӥг тылскемын ик сутылӥзы. Одӥгезлэн туж чаляк ӝуаса быре, отын ик мукетызлэн каллен гинэ гыбдаса улэ. Со озьы вӧсьсылэн кошкемез уг поты". Та вӧсез дорад выльысь но басьтыны луэ. Со понна, Будӟын Куала доры мыныса, тӧдьы ӝӧккышет вӧлдоно, нянь, аракы поныса, сяська вылысь вӧсь басьтӥськом шуыса йыбырттоно. Собере Куала пушкысь кӧня ке пеньзэ басьтоно но дорысь куалае ваёно. Соку куалае вӧсь ачиз бертэ. Удмурт Тоймобашысь вӧсь курыса ветлӥзы вал но, ӧз сётэ. Мукет гуртэ вӧсез сётканы уг яра. Али Будӟын Куалае вӧсяськыны арлы куинь пол гинэ на ветло: Будӟын нуналэ, гужем Петро нуналэ но сӥзьыл Пукро нуналэ. Пучы арняе, пус чӧлтыса, одӥг арлы вӧсясь, тӧр, ӵужиськись но мисьтаськись быръё. Куала нюлэскын туж шулдыр интые пуктэмын, кенерен котыртэмын. Со дорын ик ошмес бызе. Куала пушкын борддор кузя кык ӟус пуктэмын. Вӧсясьлэн пуконэз нимаз. Бур пал сэрегаз ӝӧк сылэ, со вадьсын - ӝажы. Отын посуда-тӥрлык кылле. Выжез куалаын ӧвӧл, шораз ик - тылскон инты, вӧлдэтэ жильыен пурты ошемын. Котыртэм пушкы пырон азязы пыдесъяськыса йыбыртто, собере озьы ик йыбыртто на куала ӧс азьын. Куала пушкы пиосъёслы но, кышноослы но пыраны уг яра: пиосъёс интыясько паллян палаз, нылкышноос- бур палаз. Нырысь ик утялто куалаез: ӵужиськись выжзэ ӵуже, мисьтаськись тусьты-пуньыосты дася. Ӟус вылэ ӵушконъёс вӧлдо, миндэр тыро, со вылэ ваем няньзэс поно. Гурт понна вӧсяны кык нянь ваё, куинетӥез кылемын вӧсясь доры. Со нянез вӧсясьлэн дораз гурт калыклэн ваем пызеныз пыжыса дасяло. Будӟын куалае вӧсяны ӵӧж ваё. Сое гурт понна люгезен* басьто, гурт калык ачиз но трос ӵӧж нуэ. Гурт понна басьтэм ӵӧжез куала пушкын пӧзьто, нош кылемъёссэ - кырын. Тылыоссэ но пуштӥрлыксэ суто. Сӥль но ӝук пӧзем бере, сое ваньзэ вӧсяло. Вӧсясь ю-нянь мед удалтоз, тылпу медаз луы, пудо-животлэн, гурт калыклэн тазалыкез мед луоз шуыса Воршудлы вазиське но йыбырттэ солы. Йыбырттэм бераз кӧня ке аракыез но нянез тылэ кушто. Та вӧсям ӝукез ваньмызлы веръято. Нимаз ӵӧж нуисьёс, мар понна сӥзиськизы вал, со понна вӧсято. Кылсярысь, одӥгез Будӟын Куала выжыысь нылкышно Будрина Азина тазьы вераз: "Пересьёслэсь кельтэм кылзэс мон быдэстӥ. Песяе анаелы верам вылэм, вӧсез куштэм берам вӧсяны одно ӵӧж нуоно шуыса. Сое песяй вӧсяны ачиз быгатымтэ. Анай но ӧз быгаты, весь вераз, песяедлэсь верам кылзэ ӧй быдэсты шуыса. Мон сое 1987 арын гинэ быдэстыны быгатӥ. Будӟын Куалаын соку вӧсясь, Трокай мынэсьтым юаз: "Мар понна тон ӵӧждэ ваид, Азина?" - "Песяелэсь но анаелэсь верам кылзэс быдэстӥсько", - шуи мон солы. Со озьы вераса ик ӵӧжме вандӥз но вӧсяз. Туж шулдыр вал со аре Будӟын Куалан. Гурт калык трос пӧртэм мугъёсын вӧсяны ӵӧж нуэ, кин выль корка пуктэ (отын умой улыны мед кылдоз, пе), кин нылпиосызлы тазалык куре. Кинлэн ке кыӵе ке сюлэмшугез вань ке, со ваньмыз умой луиз ке, вӧсяны ӵӧж нуо шуыса сӥзиське. Со сӥзиськемез одно ик быдэстоно, вӧсь сое возьма. Будӟын Куалаын ӵукнаысен ӝытозь уло. Сием-юэмзы бере, ваньзэ утялто, мисько, люгезь бичало, пу дасяса кельто. Кошкыкузы куинь пол йыбырттыса кошко. Гуртысен вӧсясь дорын нош ик йыбыртто, собере тӧр доры мыно, ӵужиськись, мисьтаськись доры но ветло. Озьы вӧсь нерге ортчыто. Вӧсь нерге гур Парсы* но гыркъёсын Пукылӥсь Воршудмы Ӟеч ужалэ шуылыса Со лэзьылӥз. Асьмелэн но та валче Ой, но улэммы Адямилэн ӧвӧл ук но, Ой, Иньмарлэн. Ву вылын бубыли, Лыз инмын кизили. Эн люк, Иньмаре, Та яратон туганъёслэсь. Асьмелэн кадь но шулдыр Вӧсь нерге бӧлякъёсмы. Шер анайлэн, шер атайлэн Ой, луозы. Пужым но выжыын Вӧсям но вӧсьёсмы Кабыл ке луысал. Уз лу меда весь валче но, Ой, улэммы. Вылӥынгес верамын вал, вӧсез сяська вылэ лэзё но отысь ик басьто шуыса. Озьыен, Будӟын Куала вӧсь сяська вылын улэ. Будрина Азина тазьы вера: "Милям мерттӥськон бакчамы пичи вал но милемлы барангы мерттыны бакча сётӥзы. Одӥг нуналэ кенэным со барангыез ӝутканы мынӥм. Бакча дурысь ик туж веськрес беризь будэ. Дыр ӵапак беризь сяськаян вадес вал. Со беризьлэн сяськаез бичано кадь улӥе ошылӥськемын, весь сюлэм ик оломар луэ учкыса. Ужакум малпасько, мон тае одно ик бичало шуыса. Беризь сяська кынмамлэсь эмъюм, соин мон сое котькытысь бичасько вал. Мынӥ беризь доры. Дораз вуи но, нокызьы ӧй быгаты сяськазэ ишканы. "Эн чигы монэ" - шуэ кадь. Малпаськи-малпаськи но берен кен доры кошки. Куинь пол ветлӥ мон со беризь доры, сяськазэ бичало шуыса. Сое ишкыны нокызьы киы ӧз пыры, киме кин ке но кутэ кадь. Сыӵе жаль потӥз со беризь, сяськаез комокен-комокен ошылӥськемын, басьтӥськод ке, палэс кыле кадь. Со юртысь кузёез Кузёбайын улэ вал, Ӝакапае. (Намер гуртын улӥсез ӧвӧл ни). Кыктой-а, куиньмой-а улэм берам дораз мыныса юасько: "Ӝакапай, тӥляд юртты дорын беризь будэ. Солэсь сяськазэ тӥяло шуыса мынӥ вал, малы меда ӧй быгаты?" "Со беризь - вӧсь пуксьылон инты, соин ик ӧд быгаты, дыр. Пересьёс озьы вераса кельтӥзы, анаен атай но сое ноку тӥяны уг лэзё вал", - шуиз со. Будӟын Куалалэсь вӧсьсэ - Воршудэз - урод уг шуо. Озьы ке но, сое гажаны, малпаны кулэ. Вӧсен шудыны уг яра. Тани кыӵе учыр вераз Азинапай: "Гужем Петро нуналэ вӧсяськыны мыноно вылэм. Со кӧснуналэ тупам. Со аре вӧсясез Михайлов Николай вылэм. Вӧсьсэс со арня нуналлы кельтэм, 12 интые 13 июльлы. Вӧсь сяська вылын улэ бере, куалае со нуналаз ик, 12 июле пырыны кулэ. Со Миклайёслы йӧтӥз ведь. Со но, солэн кышноез но паралич шуккыса кулӥзы. Соослы кӧс нуналэ ик мыноно вал, арня нуналэ бер ни. Адямиос но озьы шуизы: "Вӧсь соосыз шымыртӥз пересьёсмылэсь сямъёссэс чаклано, тодэмъя вошъяны уг яра". Гуртысьтымы куд-ог семьяос куалаоссэс кесяллям, вӧсьсэс куштытэк. Соос пӧртэм мугъёсын гуртысь кошконо луиллям: я колхозысь потто, я мар. Будӟын Куалаез но вылысь кивалтӥсьёс олокӧня пол кесяны косылӥллям, но сыӵе уже нокинлэн но киыз ӧз ӝутӥськы. Али вашкала куала интые выльзэ ӝутӥзы. Пересьёс но, пиналъёс но отчы котькуд ар сӥзиськыны, вӧсяськыны тубало, вылысь Инмарлэсь ӟеч, тыр шудо- буро улон куро. Луд Луд вӧсь интыяськемын ӝужыт гурезь йылын. Гурезез но Луд гурезь нимаське. Пересьёслэн верамзыя ЪВИИИ даурын отын кыӵе ке но кар вылэм, туж трос писпуос будо вылэм. Али писпуэз отын кӧня ке гинэ на, котыраз бусы. Нош вӧсяськон инты кенерен котыртэмын. Луд вӧсь басьтэмын бигеръёслэсь, уразаен воштыса. Бигеръёслэн вӧсяськыны ветлэмзы потымтэ, соин ик воштӥллям. Али соос ураза куто. Лудэ вӧсяськыны тубо Петро нуналэ ӝытаз. Отын быдэс уйзэс вӧсяськыны пото: бигер вӧсь со, соин ик уин вӧсясько. Вӧсяськыкузы Кереметлы вазисько, шуныт зордэ, ӟеч нуналъёстэ, аръёстэ сёт шуыса курисько, ӟеч татулыкен мед уломы, гурт калыклы номыр изъян медаз луы, шуо. Сӥзиськыса нуэм пудоосыз, Будӟын Куалаын сяин ик, мар понна сӥзиськемзэс вераса вӧсяло. Ӵемгес сӥзисько семьяысьтызы кин ке висьыку, яке кыӵе ке шудтэм учыр луэм бере. Лудэ быръё ньыль вӧсясь: бадӟым вӧсясь, тӧр но кык юрттӥсьёсыз. Песятайёсмы вордӥськон аръёсы пус чӧлтон вылымтэ, вӧсясез туно быръё вылэм. Песятаймы тазьы вера вал: "Мон кӧкыын вылӥськем ай соку. Кытчы ке но Будӟын Куала пала мыныса туж бадӟым эстӥськиллям но туноез ваиллям. Туно, пе, со тылскеме тэтче но кинлэсь ке нимзэ черектыса вера. Кинлэсь нимзэ вераз, со ик вӧсясь луэ. Озьы кӧкыысен ик вӧсясе пыриськем, нош будытозям атае ветлэм". Вӧсясез пус чӧлтыса бырйыны кутскизы, вӧсьёсыз быдтыны турттыкузы, отчы лушкем ветлыкузы. Вӧсясе быръем адямиосты куинь ар возё, собере нош пус чӧлто. Дас одӥгетӥ июне люгезь но кеньыр бичало. Со люгезен тӧдьы така басьтыса дасяло. Дас кыкетӥ июле сӥзиськем семьяос Лудэ тубыны дасясько, нянь но сизьым куарнянь пыжо. Ӝыт ньыль вӧсясьёс бадӟымез доры люкасько, кусказы путозэс* керттыса гидкуазе пото. Огзы вӧзы огзы султо но шунды ӝужан пала куинь пол йыбыртто. Собере вань посуда-тӥрлыксэс вал уробоосы тыро, такаез но отчы ик интыяло. Котькудӥз аслаз валэныз тубе. Лудэ пиосмуртъёс но, кышномуртъёс но, пиналъёс но тубо. Котыртэм доры вуыса, вӧсясьёс Луд вӧсез усьтӥськом шуыса, пыдес вылазы султыса йыбыртто. Собере бадӟым вӧсясь ошмесысь дун ву басьтэ. Со вуэз пуртые ӝук пӧзьтыны поно. Пуртыосы ву тырыса, котыртэм пушкы тылско. Ваньмыз дась луэм бере, бадӟым вӧсясь така чылкыт мед луоз шуыса, куинь беризь куарез тыр вуэ веттылэ но куинь пол маялтэ, собере сое беризь улын котыртэм сьӧрын вандо. Вирзэ музъеме уг лэзё, тусьтые куто. Такалэсь сӥльзэ кык пуртые поныса пӧзьто. Вань ужзэ вӧсясьёс быдэсъяло. Кышномуртъёслы котыртэм пушкы пыраны уг яра. Ӵукна куинь часэ нырысетӥ пуртыысь сӥльзэ но ӝуксэ кӧня ке басьто но, вылэ мичеме шуыса, тусьтыен мырк вылэ поно. Сое вӧсьысь гуртэ бертыкузы, сьӧразы басьто, вӧсяло но, калыклы люкыло. Таиз луэ вазь пурты. Кыкетӥ пуртыысь ӝуксэ вӧсяло шунды ӝужамлэсь азьлогес. Тазэ но гурт калыклы сюдо. Кылемзэ вань ӝукез сиыса уг быдто, доразы нуо. Дорысенызы бӧлякъёссылы, ёросъёссылы сюдо. Ваем сиёнэз, пунылы сяна, мукет пудо-животлы сюдыны уг яра. Такалэсь лыоссэ, йырзэ Лудысен ик суто, соос доре медаз бертэ. Ӵукна кошкон азязы, Лудэз ворсаськом шуыса, нош ик пыдесъяськыса йыбыртто. Одӥг вӧсез но ӝоже уськытыны уг яра. Луд вӧсез уката ик. Сое угось урод вӧсь шуо. Тани кыӵе учырез тодаз ваиз гуртысьтымы Михайлова Анна: "Одӥг ар Лудэз куштэм каризы вал. Николаев Максимен Фадеев Матвей вань тӥрлыкъёссэ сутыса кельтӥллям. Со аре ик Прокопьев Николайлы пус усемез вал вӧсясь луыны. Солэн кышноез дышетӥсь шуыса ӧз мыны-о мар-о со. Ма, ӵапак вӧсяськыны лэзёнтэм аръёсы вал уга. Кыӵе пӧсе вуиз со. Уин чик иземе уг луы шуэ вал. Лыктыса басьто но нуо, пе. Кытын гинэ куштӥськем юрт вань, отӥ нуллӥллям. Больницае но вуылӥз. Отысен, пе, уг ёрто, бертэ но - ваньмыз выльысь кутске. Вӧсез выльысь кутэмзы бере гинэ дугдӥллям. Но Колялэн тазалыкез ӧвӧл ни. Юбоысь усьыса, пыдыз ӧлексы кылиз, вань гумырезлы калека луиз". Тазэ учырез Иванов Майор вераз: "Мон соку школаын дышетскисько вал ини, Дмитриев Федотэз ватыны ветлӥм. Луд ошмеслэн йыр азяз туж зӧк, вольыт кыз будэ вал. Со кызэз Педот корка пуктыны дораз ваем. Соку со фермаын ужа вал. Сиён пӧзьтыны паровой котёл лэсьтӥллям. Парсь сюдӥсьёс сиён котьку ик асьсэос пӧзьто вылэм, но со нуналэ Педот малы ке ачиз кутскем. Чалякгес мед пӧзёз шуыса, котёллэсь аварийной клапанзэ ворсам. Котёл пуштӥз, Педот интыяз ик кулӥз. Ньыль парсь сюдӥсьёс но сӧсырмыны шедизы". Вӧсьлэсь улон интызэ сантэман нылпиос вылэ но усьыны быгатэ. Корка пуктыкузы гуртысьтымы Михайлова Катерина Лудысь кызэз погыртэм. Солэн пиналыз сукыр вордӥськиз. Али со Ижын улэ, синмыз ӧз ни тупа. Булда Кузёбайын асьсэлэн Булдазы вылымтэ. Сое туж шулдыр кырӟаса-вераса Бодья гуртысь ваиллям. Азьло Булда вӧсьсы вылэм Усоын но, Чумойын но, Сьӧд Ошмесын но. Нырысь Сьӧд Ошмесын вӧсясько вылэм, собере - Усоын, Чумолёын, ньылетӥ араз - Кузёбайын. Отчы Ӟатчалась, Бодьялась но вӧсяськыны вуо вылэм. Мукет гуртъёсын вӧсяськонзы быриз, Кузёбайын гинэ кылиз на. Чумолёысь, Усоысь Булда выжыос али но вӧсяськыны ветло на. Вӧсяськон радзы но озьы ик кылиз - куинь армысь огпол. Булда интыяськемын Ӟатча гурезь бамалын, котырак писпуос будо. Вӧсяськон интызы кенерен котыртэмын. Котыртэм пушкын ӝӧк ӟусъёс сыло. Булдае вӧсяськыны ветло Трочинь нуналэ. Будӟын нуналэ пус чӧлто, вӧсясь, тӧр, юрттӥськись, ӵужиськись, тусьты-пуньы миськись но нянь шормась быръё. Вӧсясь вӧсез дас кык ар возьын кулэ. Али вӧсез возе Евдокимов Василий. Солы нырысьсэ вӧсясь луыны пус усиз. Самой кема вӧсез возиз Иванов Майор Ианович "Монэ пиналысен быйизы, - шуэ со.- Пус чӧлтон дыр, пе, вуиз. Мон отын ачим ӧй вал, мыным пус усем. Туж возьдаськи, мыным, пинал муртлы вӧсясь луоно шуыса. Пересьёс котьку ветло вал ук. Коммунистъёслэсь пегӟыса, азьло вӧсяськыны, сабантуе мынӥськом шуыса мыно вал. Пус чӧлтыкузы уг учко, комсомолец-а тон, партиец-а. Тыныд пус усиз ке, котьма кар. Отказать карыны ӧй дӥсьты. Вӧсен шудыны уг яра. Кинъёс вӧсьёсыз валатэк, малпаськытэк кесязы, дунне вылын кема ӧз улэ ни. Вӧсе нырысь асме ачим юнматыса мынӥ, номырзэ тодытэк, валатэк. Котыртэм капка доры вуытозямы куинь пол йыбырттӥм, вӧсьлэсь пырыны мед лэзёз шуыса курим. Бадӟымъёс мар каро, мон но сое карисько. Капка азяз йыбырттэммы бере гинэ монэ капказэ усьтыны косӥзы. Мынам песятае сьӧры вӧсяськыны бадӟым нылыз ветлэ вылэм. Огпол со юам: "Кулӥд ке, тон интые кин вӧсяськыны ветлоз?" Мынам атае кӧкыын кылле вылэм ай, песятае со шоры возьматэм. Война дыръя вӧсяськыны ветлӥллямтэ, атае ожысь бертыса, выльысь вӧсяськыны кутскиллям. Мынэсьтым тани юаллясько, атаед ваньзэ вераса кельтӥз, дыр, шуо. Но милемыз ведь Инмар ӧвӧл шуыса дышетӥзы. Сюлмад лушкем оскиськод вал, шара вераны ӧз дӥсьтэ. Со лушкем вӧсяськеммы вӧсьлы кельше вал меда, уг-а, но, кылдэм ке, вӧсьмес татчыозь возьыны быгатӥм ни ай. Мыным пус усем бере, пересьёс озьы ик шуизы: "Чакласькысагес, олокытчы ӝимоно медаз лу. Вӧсь доры кыскаса, кужмысь нуллоно медаз луэ". Пинал муртъёс, кин Инмар ӧвӧл шуыса дышетэмын, соос отчы уг мыно вал. А пус соос вылэ усе, озьы вӧсь куре. Тӥни Прокопьев ӧз мыны но, мар луиз. Мон но ӧй оскысал, пус усьыса вӧсяськыны мыноно шуыса. Булдалэн нюкез кыскиз монэ. Мотикен валче нюказ кошки. Ладно парашютист вал, мотикысь тэтчыса вуи но из вылэ уси. Вӧсь луэмелы чидатэк, отын мыным кулэм кадь луоно вал кадь, нош мынам йырам соку ик чилектӥз: "Мон вылэ ведь мотик питра". Палэнтӥськыса гинэ вуи, мотик мынам кыллем интыям усиз. Собере ини мон вань сюлэмме сётыса вӧсяськыны кутски. Котьма мед шуозы но, вӧсь вань. Вӧсь ведь кинэ яратэ, кин солы кельше, солы ик пус но усе. Пус чӧлтыкузы, мон весь шуисько: "Пинал дыръям йыртэмъяськи но, дыр, вӧсьлы кельши ке, нош мыным мед усёз". Дас кык ар вӧсез вози но табере я тӧр, я юрттӥсез луисько. Булдалэн книгаез вылэм, вӧсяськонъёсыз но отын вал, дыр. Нош али ми асьме тодэмъя гинэ вӧсяськиськом. Булда вӧсен ӵош Инмарлэсь куриськом тазалык, ванбур, татулык. Ю-нянь мед удалтоз, пудо-живот арам медаз луы шуыса вӧсяськиськом. Со книгаын ваньмыз гожъямын вылэм, кыӵе аре но ку вӧсез ортчытоно, ку пус чӧлтоно. Но Матвеевъёс дорын ӝуаны ӝымиз со. Мон кие ӧз вуы ни. Матвеевъёс, коммунистъёслэсь курдаса, вӧсяськонзэс тэтчытыса кельтӥзы. Соин но, оло, сыӵе тылпу адӟоно луизы. Кузьмин Пислег но дырыз вуытозь ӧз чида. Одӥг ар вӧсяз но пус тэтчытӥз. Нош кулэ вал куинь пол вӧсясь луыны. Али ке но, оло, улысал на". Булда вӧсяськон туж шулдыр ортче. Тӧдьы така, ӟазег, кеньыр, нянь, сандык но пурты курыса, ӵукна ик мыно. Азьло чуньы вӧсяло вылэм, нош али со дуно усе шуо. Чуньылэн мугорыз интые - така, ӟазег - серметэз луэ. Булдае кузьмаськемъёссэс сандыкын возё. Кин та вӧсез яратыса ӵушкон ӝӧккышет кузьма, кин сӥзиськемзэ быдэстэ. Со кузьымъёсыз, сюан дыръя ныллэсь пирдан дӥсьсэ котыр ошылэм сямен, писпуосы но, кенер вылэ но ошыло. Котыртэм пушкы нылкышноосыз пыраны уг лэзё. Вӧсясь така вандэм бере, нылкышноос утялто, мисько. Такалэсь вирзэ уг куто, музъеме лэзё. Такаен ӝукез котыртэм пушкын пӧзьтыса вӧсям беразы, нырысь ик вылэ мычеме поно. Писпу борды пичи ӝажы шуккемын - отчы поно. Собере, котыртэм сьӧры поттыса, гурт калыклы сюдо. Кин муш вордэ, муше мед удалтоз шуыса, Булдае вӧсяны чечы вае. Кинлэн скал выжыез уг удалты, со вӧй вае но мукет. Ваньзэ ваемъёсты вӧсям беразы, гурт калыклы веръято. Булдаын ӝытозь сиё-юо, шулдыръясько. Бертон азязы вань посуда-тӥрлыксэс мисько, утялто, кузьымъёссэс выльысь сандыке тыро. Сандыкез, вӧсяськон дыр вуытэк, усьясь уз луы ни. Кошкыкузы, ыбессэ ворсам беразы, кенер котыртӥ тӥрен гож лэзё, "кортнало". Будӟын Куалаын сямен ик, йыбырттыны нырысь вӧсясь доры тубо. Азьло урам кузя крезен шудыса тубо вылэм. Ю вӧсь Булдаез сямен ик, ю вӧсез ортчыто Трочинь нуналэ. Та вӧсьлэн азьло аслаз интыез вылэм. Отысь писпуэз сисьмыса пограз но отын уг вӧсясько ни. Табере вӧсез ортчыто ю бусы дорын. Быдэс гурт калык отын люкаське. Вӧсясь бырйыку уг чаклало кыӵе выжыысь со: Луд-а, Булда-а, Будӟын Куала-а. Вӧсяны нуо тӧдьы така. Бусы дурын ик пӧзьто сое. Трос нянь люкаське татчы Котькуд нянез шорыса басьто но вӧсяло. Ӝук пӧзем бере, сое вӧсяса инмарлы йыбыртто: Осто Инмаре! Бадӟым Инмаре! Ю вӧсь понна вӧсяськиськом. Пазьгем юэ уката но пушъетэн мед пущъёз, Камыш кадь юн куроё, Азвесь шепен, зарни тысен кисьматы Ю-няньмес. Осто Инмаре! Шуныт, небыт зоръёстэ сёт. Сильлэсь-тӧллэсь, Тыллэсь-пулэсь, Висёнъёслэсь, черъёслэсь Уть вал, Инмаре! Пудоен-животэн, кыткон валэн, Кыскон скалэн улыны тазалык сёт, Инмаре! Осто! Ваньзэ вераны ӧй шедьты, дыр, Уть, Инмаре! Вӧсяськемме кабыл басьты, Осто, Инмаре! Ю вӧсез котькуд ар вӧсяло. Верай вал ини, азьло кузёбай кык гуртлы люкиське вылэм шуыса: Кузёбай но Варзи- Омга. Кыксылэн ноо гуртъёслэн асьсэ Акташ вӧсьёссы вылэм. Акташ вӧсь Акташ вӧсьёс кема вуныса улӥзы, отчы вӧсяськыны ветлӥсь ӧй вал. Лушкемен ветлыны отчы ӧз луы угось - гурт вӧзын ик соос. Но отысь одӥгысьтыз но вӧсез куштэмын ӧвӧл. Акташын чуньы яке кык ӟазег вӧсяло - пыдыз ньыль мед луоз. Вӧсясь луыны быгатэ котькуд выжыысь пиосмурт. Акташ вӧсь номырин котыртэмын ӧвӧл. Отын куинь ӝужытэсь кызъёс будо, со выжыын ик вӧсясько. Вань та вӧсьёс ог-огзылы матын луо: котькуд вӧсьлы пудо-живот яке тылобурдо вандо, вӧсяськон радзы но огсяменгес ортче: нырысь быдэс гурт понна басьтэм пудоез вандыса вӧсяло, собере сӥзиськемъёссэ. Нимысьтыз дугдэм потэ вӧсьёслы вазиськонъёс вылэ. 1921 арын П. Н. Луппов Алнаш ёросысь Ляли гуртысь вӧсяськемзэс тазьы гожтӥз: "Остэ, вылӥсь Инмаре, Бадӟым Инмаре. Мон соин понна шыдэн, нянен вӧсяськисько ныллэн-пилэн шудэз-бурез понна тон ке сётысалыд кизем юэз-нянез. Выжызэ ке юн карысалыд, Инмаре. Зарни куроен, азвесь кидысэн мар ке малпамме тон ке вуттысалыд, вылӥсь Инмаре. Ми соин понна гурто калыкен вӧсяськиськом, ог кылын кадь карысалыд. Та люгыт дунне вылын шудыса, серектыса улыны шуддэ ке сётысалыд, вылӥсь Инмаре. Улон азьмес люгыт сайкыт карыса возьысалыд ке, вылысь Инмаре. Лысо пуэн, куаро пуэн вӧсяськом, вылысь Инмаре. Лысо пулэн лыс ултӥз, куаро пулэн куар ултӥз шудбур вайыса сётысалыд ке, вылӥсь Инмаре. Вордэм нылэз-пиез юрто-еро, пудоё- живото тон ке карысалыд, кыткем вало, кысконо скало, ӵ ышконо ыжо тон ке карысалыд. Будӟын эксэйлы сётын пи ке сётысалыд. Будӟын эксэез ванё-буро карысалыд ке, вылӥсь Инмаре.. Нюклэсь-гоплэсь, ки ортчемлэсь кунулад, бурд улад утьыса тон ке возьысалыд, вылӥсь Инмаре. Кизем-пальккем юэз-нянез ӵыжыт вуэм табань кадь тон ке сётысалыд. Пыжем, пӧзьтэм шыдлэсь-няньлэсь берекетсэ ке тон сётысалыд, бадӟым Инмаре. 7 сётоно ныл, 9 басьтоно пи тон ке сётысалыд, вылӥсь Инмаре. Юэз-нянез культо вӧзы культо ке сётысалыд, чумолё вӧзы чумолё, кабан вӧзы кабан ке сётысалыд, вылӥсь Инмаре. Итыме пыртэм юлэсь-няньлэсь берекетсэ юн ке сётысалыд, вылӥсь Инмаре. Мон та сяна вераны уг тодӥськы, вылӥсь Инмаре. Вождэ эн вай, соин понна курисько-вӧсяськисько, вылӥсь Инмаре". Та куриськонэз Кузёбай гуртын гожтэм куриськонэн ӵошатоно ке, соослэн быдӟалазы туж пӧртэмесь. Гуртысь вӧсясьёслэсь Инмарлэсь мар вераса куриськиськоды шуыса юаськод ке, вань выжыысь вӧсясьёс кӧня ке кылын гинэ верало: "Куриськом гурт калыклы тазалык, ваньбур, шуныт зор, ю-нянь мед удалтоз, пудо-животлы изъян медаз лу. Кин кызьы быгатэ, озьы вазиськиськом". Вӧсь ужын номыр тодымтэ- валамтэ пинал пилы вӧсясь луыны пус усе ке, солы пересьёс ваньзы ик валэкто, кызьы-мар кароно, мар бордысен кутсконо. Озьы ик пересьёсын валэктыса кельтэмын, кызьы инмарлы вазиськоно, мар куроно, кызьы тау кароно. Но арез ар, вакытэз вакыт вошъямъя, азьло шедьтэм чеберлыко амалъёс но кылъёс, бумага вылэ гожъямтэен, воштӥсько, маиз но соиз ыше. Озьы ке но, огъя пуштроссы уг ышы. Удмурт калык куриськонъёс возьмато: адями понна дунне ӟеч луэ соку гинэ, куке отын со шоры нуназе югыт шунды пиштэ, куж уйёс мускыт-шунытэсь, куке зоръёс дыраз но шуныт зоро, куке тӧл вешаськыса выллем пельтэ, куке адямилэсь улон дуннезэ куректон но, кайгу но уг йӧтыло. Соку солэн кизем юэз удалтэ, нянез кие ӟечкын сюре, пудоез йылэ. Озьы бере, ӵыжы-выжыеныд, аслад тодэм ӟеч калыкеныд ӵош мыныса, ӵош сиыса-юыса, чебер но шулдыр улэмед луоз. Ужад, тыршид, сюлмаськид ке, улон-вылон кусыпъёсыд чебересь, ӟечесь луозы, ог- огдэ яратод, ачид но инмаръёс понна яратоно адями луод. Кузёбайысь Луд гурезь - палэнысен но матысен. Татын гужем Петро нуналэ Луд выжыысь воргоронъёс улошоятымтэ тӧдьы така вандо но уйбыт вӧсяськыса пото. Кылем гужем Будӟын Куала вӧсе пус чӧлтыса быръем воргоронъёс. Бадӟым вӧсясьсы вал Михаил Николаевич Кондратьев. Люгезен басьтэм ӵӧжен ӝук. Сое вӧсе лыктэмъёслы ваньмызлы веръяны сётъяло. Люгезь (коньдон) бичало. Вуоно вӧсе соин ӵӧж яке така басьтозы, гурт калыклэн азьпалан ӟеч улонэз понна, сое курбон сётозы но ваньзы ӵош вӧсяськыса сиёзы. Будӟын Куала вӧсь йылпумъяське сьӧр тылыс вӧсянэн - со гуртлэн палэназ быремъёсты, кыре кулэмъёсты буре ваён. Та Кузёбай нылкышноос пӧртэм выжыысь луо, пичи дырысенызы вӧсе ветло. Зяо апай (Дмитриева Зоя Шариповна) - Луд выжыысь, Огаш апай (Курбатова Агафья Ивановна) - Будӟын Куала, Насьта апай (Евдокимова Анастасия Карповна) - Булда выжыысь. Туспуктэмъёсыз Михаил Егоровлэн 1 Вордскем кыл - калыклэн лулчеберетэз "Язык народа - лучший, никогда не увядающий и вечно вновь распускающийся цвет всей его духовной жизни, начинающейся далеко за границами истории. В языке одухотворяется весь народ и вся его родина. . ." К.Д.Ушинский. "Удмурт пушкын ужан дыръя, Вуж улонэн пуриськыку, Выль улон сям кылдытыку, Ӟеч кивалтос - та удмурт кыл!" Куӟебай Герд. Котькуд адямилэн вань правоез аслаз кылызлы но аслаз культураезлы. Та одӥгез валтӥсь право международной конвенциосын юнматэмын. Сое гажан но улонэ пыӵатон уката ик тунсыко луэ ӧжыт лыдъем калыкъёслы. Вордскем кылзэс утён но гажан юрттэ соослы улыны но ас дунзэс валаны. Анай кылэз утён но сое дышетон огкадь луэ коренной калыкъёслы но, эмигрантъёслы но. Вордскем кыл - со калыклэн лулчеберетэз, вераськон амалэз, дауръёсын утем синпелетэз. Калык улэ, куке солэн ас кылыз вань. Кыл быре - калык но быре. Дунне вылын быризы ни меря но мурома калыкъёс. Зэмзэ вераса, соослэн ӵыжы-выжыоссы улэпесь на. Нош асьсэ кылынызы уг но верасько. Соос вӧзазы улӥсь калыкъёсын сураськизы. Генъёссы кылизы, нош калык быриз, малы ке шуоно, кылзы ӧвӧл ни. Мон вордӥськи Ижевскын. Дышетски 14-тӥ номеро лицейын. Али тодон-валанме будэтӥсько Удмурт кун университетын. Пичи дырысен ик яратӥсько удмурт кылэз но литератураез. Со мынам вордскем кылы луэ. Анай кыл тодонэз мыным "кузьмаз" аксянае. "Кыл тодэм котомка уг куры",- шуэ со мыным. Песянаймы милемын вераське котьку удмурт кылын гинэ. Ачиз со вордӥськемын но улэмын Алнаш районысь Карйыл гуртын. Городын улыса но ас клзэ со уг ваты. Куд-огез, уката ик егитъёс, керпото удмурт луэмзэс возьматыны, ӟуч кылын гинэ вераськыны туртто. Нош мон вордски но будӥ удмурт кыллэн крезь бурдаз.Пичи дырысеным ик кылӥ солэсь калык кырӟанъёсты. Мыным тужгес но яра "Чагыр, чагыр дыдыке" кырӟан: "Чагыр, чагыр дыдыке, Малы пыддэ жобаськод? Пичи чебер дыдыке, Малы ялан бӧрдӥськод?" Берлогес тодӥ, та кылбурлэн авторез Григорий Егорович Верещагин шуыса. Верещагин - нырысетӥ удмурт учёной, писатель, этнограф. Аслаз научной ужъёсаз ("Вотяки Сарапульского уезда Вятской губернии", "Вотяки Сосновского края") со быдэс Россилы но Европалы возьматӥз удмурт этнослэсь пӧртэмлыко луэмзэ. Волга шур но Урал гурезьёс вискын улэ туж вашкала калык. Соослэн вань асьсэ кылзы, историзы, культуразы. Та калыкез мукетъёсыныз ( ӟучъёсын, бигеръёсын) нокызьы но сураны уг луы. Удмуртъёслэн матысь ӵыжы-выжыоссы - комиос, поръёс, мордваос. Ваньмыз соос финн-угор выжые пыро. Та калыкъёс дунне вылын ог 25 миллион луо. Уло соос Россиын, Финляндиын, Венгриын, Эстониын. Вашкала вакытэ та выжыос туж кужмоесь вал, бадӟым куронъёсын улӥзы. Н.М.Карамзин историклэн чакламезъя, финн-угоръёс ӟуч калыклэн вашкала историяз туж бадӟым инты басьто ("История государства Российского"). Туала финнъёс, венгеръёс, эстонъёс юртто асдунмес валаны, кылмес, культурамес ӝутыны. Мон яратӥсько удмурт кылын потэм Евангелиосты лыдӟыны. Со бордын мылысь-кыдысь ужало дьякон Михаил (М.Г.Атаманов) но Марья Картано. Марья туж умой тодэ удмурт кылэз, ӵем вуылэ асьме шаере. Нош алигес мон тодматски мукетыныз финн учёноен - Пиркко Суихконенэн. Со улэ Хельсинки городын, пӧртэм кылъёсты тодэ. Монэн со удмурт кылын вераськиз.Ушъяз, вордскем кылме уг вунэтӥськы шуыса. Пиркко Суихконен мыным кузьмаз "Терра" журналын потэм "Урал калыкъёс статистикалэн синучконаз" шуыса нимаськись статьязэ. 1838-тӥ арысен кутскыса туала вакытозь, татын эскеремын финн-угор калыкъёслэн лыдзы. Тани отысь кӧня ке лыдпусъёс: Аръёс Удмуртъёслэн лыдзы Удмурт кылэз Процентэн анай кылын лыдъяло 1838 205115 205115 100 1897 420970 420970 100 1926 514220 508762 98,8 1939 605673 590528 97,5 1959 624794 556741 89,1 1970 704328 581877 82,6 1970 713969 545603 76,5 Та лыдпусъёс верало, арысь аре удмурт кылэз тодӥсьёслэн лыдзы кулэсме. Сюлмаськыто 1989-тӥ арын ортчем Всесоюзной переписьлэн лыдпусъёсыз но. Удмуртъёслэн огъя лыдзы 746562 адями, нош удмурт кылэз асьсэлэн лыдъясьёс 515128 адями гинэ. Со луэ 69,6 процент. Нош 1838 но 1897-тӥ аръёсы югдур воксё мукет вылэм. Соку вань удмуртъёс асьсэды шуылӥллям, ӟучомыны уг тыршо вылэм. Малы со озьы луэ? Таин валче психологъёс, политологъёс, этнологъёс, оло нош, огшоры адямиос азе пӧртэм юанъёс пуксё. Асьме калыклэн туж секыт но тунсыко улон сюресэз. Удмуртъёс нюлэс калык вал, усто пӧйшуръёс но чорыгасьёс, музъем бордын ужасьёс. Нош соос ноку но нимаз ӧз улэ. Вань калыкъёслэн улон сюрессы но историзы ог-огенызы туж юн герӟаськемын. Удмурт калыклэн историяз АНАНЬИНО вакыт бадӟым инты басьтэ. 2800-2300 аръёс талэсь азьло улэм ӵыжы-выжыосмы туж вылӥ азинскем культура кылдытыны быгатӥзы. Соослэн вылэм азинскем техниказы, кортлэсь, ыргонлэсь, излэсь лэсьтэмын ожмаськон тӥрлыкъёссы, арбериоссы. АНАНЬИНО вакытысь удмуртъёс кусып возиллям пӧртэм кунъёсын: Скандинавиен но Сибирен, Кавказэн но Крымен, Средней Азиен но Ближний Востокен, Египетэн но Индиен. Та вакытэ удмурт калык уката но кусыпъёс возиз иран калыкъёсын (скифъёсын, сараматъёсын, аналъёсын). Асьме выжыос соослэсь сюлэсь трос кылъёссэс асэстӥзы: корт, пурт, гурт, нянь, узыр, медо, пудо, курег, вуз, турын но мукет. Асьме эралэсь 300 ар талэсь азьло АНАНЬИНСКОЙ культура люкиське кык люкетлы. Кам, Тӧдьы Кам, Ватка Кам шуръёс кузя улӥсь выжыосмы кылдыто ПЬЯНОБОРСКОЙ. Нош Печора , Вычегда, Сысора но Камлэн кутсконаз улӥсьёс - ГЛЯДЕНЕВСКОЙ шуыса нимасьись культура. Нырысетӥосыз бордысь потӥз удмурт калык, нош гляденевецъёслэсь кутске коми калыклэн историез. Калыкъёслэн интыысь интые кӧчыса ветлонэз ( великое переселение народов) туж кужмо шуккет сётӥз удмурт выжылы но. Со ваче вуылыса, ожмаськыса улон аръёсын кыстӥськиз. Кочевникъёс лыдынызы вормизы: удмурт выжыос Ватка улосэ кошконо луизы. Камлэн Волгае усён дораз Ю11-1Х дауръёсы булгар выжыос вуо но кужмо кун кылдыто. Удмуртъёс, соос киулэ сюрыса, выт тырись калык луо. Ю11 даурын кылдӥз Зарни Урдо ( Золотая Орда) шуон Кун, бӧрысь Кузон Кунлык ( Казанское Ханство). Удмурт калык Арск котыре Удмурт Эль (Арское Княжество) кылдытӥз. Нош ХЮ даурлэн шораз Кузон Кунлыкез, соин валче Удмурт Элез но, Иван Грозныйлэн ожгарчиосыз пазьгизы. 1552 арын Казань но Арск вискын бадӟым ожмаськон вал. Ӟучъёс пленэ басьтӥзы 5 сюрс адямиез, соос пӧлын 12 князез, 7 военной вождез, 300 визьмо но азьмынӥсьь удмуртъёсты. Та дырысен быдэс удмурт музъем сюриз ӟуч эксэйлэн киулаз. Озьыен, удмурт калык ноку но ачиз ожмаськон ӧз кенжытылы. Бадӟым но кужмо калыкъёсын пумиськыса, со ӵем дыръя чигналляз, пеймыт нюлэсъёсы пегӟылӥз. Озьы солэн вираз пыӵаз кышкан сям. Тае пусъё ҺХ даурысь ӟуч писательёс, кудъёсыз Вятской губерниын ссылкаын вал: А.Радищев, А.Герцен, В.Короленко, М.Салтыков-Щедрин. Соос дурбасьтӥзы удмуртъёс понна, уката ик В.Короленко тодмо "Мултан ужын". Нош куд-огез ӟучъёс "мышь саврасая" шуизы удмуртъёсты. Калыклэн историяз кылиз таӵе но веран: " Бигер - гондыр, ӟуч - кион, удмурт - сяла". Озьы удмурт калыклэн менталитетаз пыӵазы чидан сям но куректон мылкыд. Со сярысь верало таӵе калык кырӟанъёс: "Поръялоз, поръялоз", "Сьӧд дэреме", "Марлы бичай?". Ваньмыз сямен кырӟанъёс чиданы дышето: "Из но, му но пилиське но, адямилы чидано. . .". Озьы ке но, удмурт калык ӧз вунэты ас кылзэ. Ӧз куштӥськы ас лулчебретэзлэсь. Быгатэмезъя сое утиз но азьланьтӥз. Сыӵе калык ассэ гажаны мылкыд кылдытэ. Удмурт калыклэн ӟеч сямыз - ужез яратон. Ужась муртлы котьктын дан. Со сярысь умой тодыны луэ таӵе пословицаысь но поговоркаосысь: "Ужатэк улны уг луы", "Ужаку шунды шоры уг учко", "Уж адямиез чебер каре". Ужась но лачмыт калыкез котькин но гажа. Вашкала дырысен удмуртъёс тупаса уло вӧзысьтыз калыкеныз: поръёсын, бигеръёсын, ӟучъёсын. Ӵош ужало но, шулдыръясько но, кулэ дыръя куректонзэс но шори люко. Историлэн пӧртэм вакытаз удмурт кылэ пыӵазы таӵе ӟуч кылъёс: укно, кусо, книга, поп, суд, урядник, закон но мукет. Бигер кылысь - туган, урам, яратон, уром. Берло дыре асьме кылмылэн лексикаез узырме выль кылъёсын: кат, элькун, ӧри, энерчи. Со бордын ужа Кун Кенешысь нимысьтыз термино-орфографической комиссия. Асьмелэн туала улонмы пумен радъяське кадь. Ужаны кутско заводъёс но фабрикаос, ӝутске экономика. Соин валче ужтэк кылемъёслэн лыдзы быре, нош дышетскыны мылкыд карисьёслэн - будэ. Экономика ӝутскиз ке, уноез национальной но культурной ужпумъёс радъяськозы. Ижкарын али куамын одӥг школаосын удмурт кылэз дышето. Удмурт кыллэн данэз ӝутске. Анай кылын передачаос радио но телевизор пыр тросгес кылӥсько. Мон тужгес но яратӥсько "Мылысь-кыдысь" передачаез. Отын мынам анае Измайлова Анна Сергеевна сярысь но вераськон мынӥз. Со УдГУ-ысь профессор. Удмурт журналъёслэн, газетъёслэн но лыдзы будэ. "Кенеш" вӧзы ватсаськизы на "Инвожо", "Вордскем кыл" но "Кизили" журналъёс. Кылдӥзы выль общественной организациос:"Удмурт Кенеш", "Дэмен", "Шунды". Удмуртлыкез ӝутон ужрадлы бадӟым саклык висъя Удмурт Республикаысь Нациосын ужанъя Министерство . Финляндиын ужа Кастрен нимо, Венгриын - Регули нимо обществоос. Удмурт калык асдунзэ, кулэлыксэ валаны турттэ. Общественной авторитетэз будэ. Нош школаосын но, институтъёсын сое дышетыны кутско мукет кылъёсын оградын. Озьыен, удмурт кыллэн социальной функциосыз паськытало, авторитетэз будэ. Мон оскисько, вуоз сыӵе дыр, куке удмурт кылын вераськозы политикъёс но ужбергатӥсьёс, вань удмуртъёс асьсэ кылзэс дышетозы но тодозы. Соин но, оло, асьмеос чидатэк витиськом депутатъёслэсь "Закон о языках Удмуртской Республики" катэз улонэ кутэмзэс. Анай кылэз одно ик утьыны тыршоно. Со - Инмарен сётэм кыл. "Вначале было Слово" - гожтэмын Священной Писаниын. Анай кыл - калыклэн лулчеберез, кырӟанъёсын, легендаосын, преданиосын, пословицаосын, поговоркаосын зарни шыкысэз. Кылтэк калык ӧвӧл. Кылтэк литература, культура ыше. Ышо-быро калык сямъёс, кырӟанъёс, выжыкылъёс, мадёнъёс, шудонъёс, обрядъёс, - оглом вераса, тунсыко материальной но духовной культура. Асьмеос жаляськом, куке инкуазьысь ыше-быре, яке тылобурдо, яке пӧйшур. Нош мар луоз, дуннеысь быдэс калык ке быриз? Тодмо ӟуч педагог К.Ушинский шуэ вал: " Кыл - со самой улэп, самой узыр но оскымон кусып, со герӟа вашкала, туала но вуоно улэмез одӥг быдӟым, исторически луло сузьетэ". Мае гинэ ӧз адӟе, мае гинэ ӧз тодэ, ӧз малпаллялэ вашкала ӵыжы- выжыосмы, ваньмыз со калыклы сётӥське анай кыл пыр. Мон данъяськисьо удмурт калыклэн нылыз луэменым. Удмурт кылын вераськизы но гожъяськизы Г.Верещагин, Кузёбай Герд, А.Оки, Ф.Васильев, Г.Красильников. 1 Анатолий Перевозчиков Сазьтӥськон Тулыс урамын. Куар потон толэзь. Музъемысь бус парла. Нюлэскын но мур нюкъёсын лымы адӟиське на. Отын но татын - тудву кошкем бервыл. Сумед вуж ожоез но турынэз согем. Син шоры йӧто шыръёслэн му вылэ гудӟыса ветлэм сюресъёссы. Бусыысь узьым пурысь мамык дыжен шобырскемын. Шунды бус пыр тӧдьы шар кадь гинэ пиштэ. Али нунал шуыса ӧд ке тодысалыд, сое толэзен но сураны быгатысалыд. Шуныт вуэмлы шумпотыса сямен тиньгетэ пислэг. Сое валаны луэ: со лек толэз пыр потӥз. Ӟырт кезьытэз ворми, шуыны луоз, мон но Мынам но лулы тулыс вуэмез шӧдэ. Шӧдэ куар потон толэзез, нош куарен быгыльскыны уг вормы. Малы? Оло, соин но: будослы, писпуослы сямен солы но зор кулэ. Кыж-мыжез миськись тулыс зор, сюлэмез чылкытатӥсь, улӟытӥсь Инву. Бен, тани вуиз, вуиз со - кема возьмам зор: жаль! гинэ кисьтэ, вань кырсезлэсь кадь Инкуазез миське. Ӝоген со, иське, душ улын мисьтӥськем егит нылмурт кадь адӟиськоз: - сяськаяськоз, отӥяз емышен быгыльскоз. . . Тани таӵегес мылкыдын пумитай вал выльдӥськонэз. Вити сое. Вити нырысетӥ яратонэз сямен. Уго тодӥсько ни вал: маке но та улонын уг тырмы, ӝокатэ. Кулэ гудыриё-чилекъяно зор. Сыӵе зор бере ук омыр чылкыта, юзмыта, ошмес ву кадь ческыт луэ. Со омырен шокаса, шокаса кӧт уг тыры. Выльдӥськонэз герӟаськомы Михаил Горбачёвен. Шуг улонмы пересь кивалтӥсьёсын сэрен малпан вал. Со вакытэ калык юнме шорысь ЦК-ез "дом престарелых" ӧз шуы ук. Озьы ик вал уго: одӥг вылӥ кивалтӥсь но (Брежнев-а со вал, Черненко-а) тӧро пукон вылысьтыз ӟечен ӧз кошкылы. Быгатэ на-а, уг-а, кынарыз вань-а, ӧвӧл-а, кулытозяз пукылӥз. Но соку но котькудӥз "калык сярысь сюлмаськисько" шуылӥз. Нош калыклэн улонэз секыт но секыт луыны кутскиз. Магазинысь ӟеч вуз но ческыт сиён ышиз. Талон но "блат" кузёяськыны ӧдъяз. Блатэд вань - тон Адями. Ӧвӧл - пыдулчи. Талонэд вань - кызьы ке озьы векалод ай. Ыштӥд - "ӵыжиськыны" быгатод. . . Нош "блатэн" кузёяськизы чиновникъёс но вузкарисьёс. Тӥни соосын кин кусып тупатыны быгатӥз, со улонлэсь нӧкызэ омыръяз. Кин ӧз быгаты, яке ӧз "тыршы" (ӧз "тыршы" малы? Угось совето (кенешо) власть адямиез Ассэ вунэтыны косылӥз, шуылӥз: "Сначала думай о Родине, а потом о себе". Яке ужатылӥз "за того парня". . . Шуг-секыт, кайгу зол куасаз асьме ужась калыкез. Басьтом Кенешо власть вакытэз. Революция. Граждан ож. Коллективизация. Репрессия. Немецен ожмаськон. . . Войнаен сэрен куашкатэм хозяйствоез ӝутон. . . Ма, ваньзэ вералод шат, мае чидаз, адӟиз калык! Котьма ке но, берло дыре улон умойске ни вал кадь. "Коммунизме мынӥськомы", - шуим. Ма Хрущёв кивалтон вакытэ сэреглы быдэ сямен горд басма вылэ бадӟымесь букваосын гожтэм плакатъёслы паймисез ӧй вал ни кадь. Нош ялэмын вал отын: "Нынешнее поколение будет жить при коммунизме!" Кин со "нынешнее поколение"? "Мон - со мон! - шумпотыса вералляй. - Вот ведь кыӵе шудо вордӥськиськем: коммунизмын уло!" Но коммунизмлэн ческытэз кемалы ик ӧй вал. Столовойысь ӝӧк вылэ дунтэк нянь ӝамдэлы поталляз но ышиз. . . Со ик вылэм коммунизмлэн ишанэз-ышонэз. Нош тани егит Горбачёв руль сьӧры вуиз. Шумпотӥм: таиз кун машинамес нюк улэ уз нуы, шонер сюрес вылэ - ӟеч улонэ вуттоз. Зэм но, выль "ӵужон" выль сямен ӵужыны кутскиз. Ӧдъяз юонэн нюръяськон бордысен. Шонер кадь. Та висён улонэз чутытэ, нюк пыдсы погыльтэ, азьлань мыныны люкетэ. . . Та вакытэ мыным но "Зангари" ансамблен ӵош Сибирьысь шахтёръёс доры вуылыны шуд усиз. Соку ик учырам комсомол сюанэ. Егитъёслэн тӧрозы, пе, кышнояське. Сьӧд костюмен, тӧдьы дэремен выль кузпалъёс, ой, чебер, туж йӧно адӟисько. Куазь гужем вал бере, шундыё, шуныт. Ӝӧк сьӧр пуконзэс кырын ортчыто. Монэ соку тани мар паймытӥз. Ӝӧквыл тыр сиён-юон, нош водка ӟенеликъёс ӧвӧл. Вина интые, чаен тырмытэм стаканэн шуккисько. "Йӧспӧртэм ке йӧспӧртэм, - малпай мон. - Ма, сюан шампан юонтэк луэ шат? Луэ вылэм. Тани ук, син азям со", - шуи аслым ачим. Со вие ик кытын ке но йырвизь пыдэсын малпан югектылӥз ке но, "та бодыез мултэс куасалтон ӧвӧл-а" шуыса. Берло таӵе сюанъёс трос интыосын ортчылӥзы. Журналистъёс сыӵе кичӧлтонэз вань кужмысь данъяны но улонэ пыӵатыны выризы. Одӥгезлы "ӟенелик" кушем ним но сётӥзы. Но. . . кызьы берлогес вераз ни Черномырдин: "Хотели как лучше, получилось как всегда". Озьы ик луиз уго. Горбачёвлэн та кичӧлтонэз государстволы (мукетъёсыз сямен ик) пайда ваемезлэсь уногес изъянэн берытскиз. Малы? Малпамын умой кадь вал ук: юонэз улонысь выжытӥз ик пороно! Нош юон интые виноградэз коразы но порылӥзы. Кун казнае лыктӥсь коньдон шурез "куасьтӥзы". Собере пыӵал тӥрлыкез быдтон вылэ выжимы. "СССР выемын ни соос пӧлы, - шуизы. - Тырмоз выль оружие лэсьтыны!" Америкаен огкылэ вуимы. Договор гожтӥмы. Эскерисьёсын воштӥськимы. Оружиез быдтонын кичӧлтӥсь луимы. Танкъёс, ракетаос, войнаын кутӥськись машинаос куштӥськем кортлы пӧрмизы. Америка асьмелэсь адӟем кароз, малпамы. Милям нокыӵе секретмы ӧвӧл тӥлесьтыд шуыса, азьвыл ватыса воземзэ кыре поттылӥмы. Ож техника лэстиӥсь завдъёс тусьты-пуньы, пылесос, газ плитаос, лопатаос но трос мукет чыры-пыры ужъёсын вырыны кутскизы. Дышетскем, вылӥ ӧнеро адямилэн кулэлыкез быриз. Солы амалтэк базаре потоно луиз. Вузкарыны. Дунтэм дунын басьтэ, дуно дунын вуза. Тӥни сыӵе рынок сяськаяз вамышлы быдэ. Куддыръя чакласькод но паймиськод: вузкарисез басьяськисезлэсь но трос. Мар карод, кытчы пырод, кызьы ке но улоно ук. Кин азьвыл капчигес, калык шӧлкын улыны тыршиз, лушкаськиз, солы эрик луиз. Азьвыл киез думись закон жильы чигтэмын: лушкаське! Адямиос ог-огенызы ӵошатскыса выллем кутскизы лушкаськыны. Кмн кинэ ортчоз! Макем бадӟым начальник, солы сокем бадӟымгес "перепеч" шедьылӥз. . . Ношм ыным кытчы пыроно та огъя вакханалилэсь? Мыным но мукетъёслэсь адӟем кароно-а? А то ведь, перепечтэк кылемдэ ик уд шӧды. Табере адямиез данъян флюгер воштӥськиз. Азьвыл со (шузиос, пе, коммунизмлы оскыса, мурт сярысь сюлмаськыса улӥзы) астэ ачид яратон урод сям вал. Табере шуо: "Астэ ачид ке ӧд яраты, мукетыз но тонэ уз яраты". Ленин "Самый человечный человек" ке вал, табере - изверг, изгой. Мавзолейысь, пе, сое поттоно. Маяковский - "жертва революции" луиз. Быгатонлыксэ, пе, коӵыш быж улэ куштӥз, кужымзэ утопиез данъяны быдтӥз. Кылзӥсько, кылзӥсько телевидение, радио пыр бӧтьыртӥсьёсты но - син азям бус кадь ӝутске, азьвыл адӟеме, тодэме йырчукин берытске. Мар вал азьвыл чебер, табере шӧтэм. Марлы оским, кинэ инмарам, луиз шайтан. . . Амалтэк кытын ке йыр сэрегын шугъяськытӥсь малпан чилектӥз: "Ма неужто мон но асьме калык сыӵе шузиесь вылӥськеммы, ӧвӧлтэм макелы оскыса улӥськеммы? Яке кызьы шуо "летаргической" вӧтын-а вылӥськеммы? Маяковскийлэсь вань гожъям книгаоссэ люканы турттыса, малы соку бызьылӥ? Малы соку школаын солэсь Ленинлы, революцилы, партилы сӥзем чуръёссэ наизусть дышетылӥ, малы Маяковскийлэн гожъяськемезлы синмаськыса, ачим но со сямен тубатэн кылбурме радъялляй? Малы та поэтэз гажан мылкыд сюлэмам литератураен дышетӥсь пыӵатӥз? Малы, малы, малы?.. Та юан пӧлы йыроми. Йыроми, пеймыт тэле сямен. Сопала мынӥсько, тапала - уг адӟиськы югытэз. Писпуос-юанъёс гинэ котыр. . . Мар ке вал азьвыл валамон, табере - валантэм, йыртӥян. Оло, зэм но Югытлы оскон - со урод. Коммунизм - утопия? Капитализм - со умой? "Кытын капитализм, отын ужась калык но туж умоу, бай улэ", - шуо кунгож сьӧры ветлэмъёс, вожъяськыса выллем. Но кызьы тодмо: котькуд выжыкылын сямен, татын но Зэм тысез вань. Сок кылле, кылле но, куке но уда. Шат озьы ӧвӧл? Тодам ваисько: ачиз ветлӥсь кут, ковёр-самолёт, яке лобась вал - сивка-бурка сярысь выжыкылэз. Калыклэн вашкала малпанэз быдэсмиз ук! Кылдытэмын машина но, самолёт но. . . Иське, коммунизм но со утопия, быдэстонтэм малпан ӧвӧл, кызьы вераны туртто (пӧяны-а шуод) туала дерьмократъёс, яке соослы "ужась" тодосчиос. Нош соку, Горбачёв кивалтыку, собере Ельцин тӧро пуксён вылэ пуксьыку, кытын, кытын вал сазь йыр? Оло зэм но, кудӟемын, уйжомемын вал? Маин? "Демократия", "Эрик" нимаськись кудӟытӥсь вуэн. Ма озьытэк, кызыь оскысал кадь Ельцинлэн верамезлы: едэс, пе, ӧжыт золтытэк уд луэ, ӝыны арзэ чидалэ, собере улон тупатскоз. Та верам кылы ке, пе, ӧз зэма, мон йырме рельса вылэ поно! Ельцин оло пырак тазьы ик ӧз шуы но - верамезлэн пуштросэз-сылалэз таӵеен кылиз йырам. Соку малпай вал, асме ачим буйгатыса но азьлань улонлэн умойскемезлы оскыса: "Мар бен, ӝыны арзэ кызьы ке но чиданы луоз, дыр. Отчыозь вуж басьям дӥськут, пыдкук но пӧсьтыса уз вутты". . . Нош тодысал ке азьланьзэ, со ӝыны ар дасо арлэсь но кема кыстӥськоз шуыса, нёшто Ельцинэз президентэ быръён понна, куараме сётысал. ӧй, конечно. Но тӥни, кызьы ӵемысь луэ, оскись луэме юмоке вуттӥз. Монэ гинэ ке луысал, вань ужась калыкез! Тани табере вукак потӥм ни со "выльдӥськон" шуонэн. Дасо аръёсын "выльдӥськиськон", кавычкен вераса. Кык срок, кӧтурдэстӥз пыкъяса кивалтытӥзы Ельцинэз. Бератаз олигархъёс валазы, шӧдӥзы-а шуод, калыклэк чиданэз чиге ини шуыса. Шӧдтӥзы воштӥсь. Кунгож сьӧры пегӟем мае ке. Нош кызьы калыклы возьматод, кызьы батыр карод? Соку ик инмысь усем кадь террористъёс вуизы. Соос конечно кытысь? чечняысь! Озьы тӥни ож ялӥське. Террористъёсты с. . . дыръязы жалятэк ыбылыны. . . Озьы калык син азе султӥз телевидение, радио но печать юрттэмен, сэзь, кышкасьтэм, веськрес батыр. Кызьы уд синмаськы? Азьло висись президентэн уд ӵошаты. Егит, шаплы, эшшо ке дзюдоист. Иське киыз но пыдыз солы президентын ветлыны. Нош азьвыл президентэз но солэсь семьязэ утён но привилегиос сётэм Указзэ адӟытэк но кельтыны луоз. Кылымтэ улсы ик кельтоно, дыр, "передела собственности не будет" шуэмзэ но. НАТО бурд улэ пырыны турттэмзэ но. Будьто ке Югославиысь югдур ӧз возьматы та альянслэсь сьӧсь ымнырзэ. . . Мар но уд лэсьты, коммунистъёс медаз берытске, медаз ворме шуыса. Луэ соослэсь лозунгзэс но кутыны. Ӵок, вера ке но куд-огез, Путинлэн программаез ӧвӧл. Марлы нош со кулэ? Астэ ачид шараян понна-а? Путин отчозь ӧз ву на ай. Со ас сюлэмзэ сьӧд ящикын возе. Дырызлэсь вазь сое уз потты, уз возьматы. Иське, вить, вить, калык, чидандэ иты. . . Оскиськод, егит, шаплы, батырлы. Егит, веськрес, шаплы батырлы. Со понна куарамес сётӥм. Ма кызьы -о сотэк? "Уждунмес будэто", - шуиз ук. Ма собере ужысьтымы кивалтӥсьёс но чуртыт веразы: "Путинлы куарадэ ӧд ке сёты, тод: тон ужысьтыд мозмытэмын!" Мон та верамлэсь ӧй ке но кышка, малпаськоно луиз: чырты сьӧрам ньыль нылпиосы. Ужтэк кылид-марад ке, кызьы соосыз сюдод? Уж шедьтыны та вакытэ туж секыт. Ӵок ини, коньдон ӧжыт ке но сёто, кулэмлэсь сютэм улнлэсь кызыь ке но утиськыны луэ ик ай. Ма собере бакча юрттэ на. Отӥяз но инмар ӧз кушты ке, кызыь ке но вылом ай. Озьы тӥни, мылкыды туж-туж луытэк но осконме уг чигиськы. Табере чидатэк возмасько ини, ку уждунме будэтозы но, азьвыл сямен ик дыраз но бусьтыр коньдон тырыны кутскозы. А то ведь кызьы луэ? Куке соку уждун сёто но, со магазинэ одӥг пол пырыса ик быре. Нош прожиточной минимум 1000 манет ини. 500 манет мар со? Шапык! Дунъёс тани уждун будэмез мар юаса уг уло - ракета выллем инме ӝутско. . . - Эк-эк-эк! - шуод ини. Выльысь тани тулыс вуиз. Но малы ке но со шоре кезьы ыртэ. Уг дырты шундыяськыны. Нош выльдӥськон кутскыку, макем ӝог куазь шунытаз вал. Сюлэм ик сое шӧдыса кудӟиз. Табере, шымырскыса, кынмем кадь улэ. Вирез, йӧлысь сямен дуремын, тудвуэн ӧръяськыны уг дырты. А ведь тулыс толэзь. . . 1 Тодэ ваёнъёс Пётр Кубашев Кызьы монэ Ципьялан пумитазы (Азьланьтӥськемез) Алнашысен Ципья гуртозь сюрес кузь, мон сое география картая туж умой эскери но лыдъяй ини. Нюркаелэн кузьмам ныркышетэныз киме сэзъяса гурт калыкеным люкиськем берам, колхоз машина монэ Можгалась Сюгинск станцие вуттӥз. Калыкез нош отын - ой-ой-ой!.. Ма, ваньмыз Ципьяла мыныны мылкыд кариллям-а, мар-а?! Мырдэм но кызьы билет басьтэм берам, пӧсяса вуӟем мугорме тӧлатыны кыре поттӥ но лабырес кызьпу улысь скамья вылэ пукси. Вӧзысьтым воргорон, вераськыны кылпум поттон вылысь, шӧдске, "тамакед ӧвӧл-а, пацан?" шуиз. Йыры кур луиз: кыӵе мон "пацан", мон - дышетӥсь! Но мар карод, ымаз уд чабкы ук адямилэн. Кисыысьтым "Беломорме" поттӥ но, мелэ, шуисько, кыскелэ, пожалуйста, мынам "Беломор" сяна тамаке ӧвӧл. "О-о, - шуэ воргорон, - тон дуно тамак кыскиськод, мыным махорка но ярасал. Атаед бадӟым ужын ужа, шӧдске". "Малы атае, - шуисько, - мон ачим - дышетӥсь!" Вӧзам пукисе шорам учкиз. "Можгалась педучилищеез йылпумъяд-а?" - юа. "Институтэз!" - тӧдьы кагаз вылэ печать пуктэм кадь ӝот-ӝот вераса ляки но тамаксэ аратыны тыл ӝуатӥ. "Егит адскиськод, туж егит", - тамак ӵынзэ мон шоры пельтӥз воргорон. Ӵокак луыса, туж юн кызыны ӧдъяй. "Ачид уд кыскиськы бере, малы кисыяд "Беломорен" ветлӥськод?" - тыбырам мыжгаса серектӥз артэ пукисе. "Арня талэсь азьло гинэ кыскыны кутски", - мырдэм лулме шедьтыса верай. "Кулэ, кулэ, - нош ик серектӥз воргорон. - Тамак ке ӧд кыскы, дышетӥсь луэмдэ уз тодмалэ. Я, ойдо, поездмы вуэ ни кадь. . ." Секыт шокаса но сьӧд ӵыныныз вокзал котырысь юртъёсты согыса, ми вадестӥ ортчиз паровоз. Люкаськем калык бугыртэм кузьыли карлы пӧрмиз кожалод: котькудӥз аслаз вагонэз пала дыртэ: котомкаосын, сумкаосын, чемоданъёсын мыд-мыл пала бызисьёс ог-огзы борды мырӟиськыло, жоб кылъёсын кесяськисьёс но вань. Чемоданэ мынам капчи, вагонэ тубыны туж ик ӧй курадӟы. Ас интыме шедьтыса пукси гинэ но, поезд вырӟиз. "Я, ӟеч лу, удмурт музъеме, ӟеч лу, Алнаше но Нюркае, кӧня ке час ортчыса, монэ пумиталоз выль улон. . ." - ас поннам вераськыса учкисько вагон укно сьӧры кылись Можга шоры. * * * Казаньлы матысь Шемордан чугун сюрес станция котыр ласянь нюлэсэн ӝокатэмын кадь потӥз мыным. Юалляськыса но мар, Ципьяла нуись сюрес вылэ потӥ. Вокзал котырын но, сюрес вылын но - котькытын бигер сямен верасько. Нырысь-валысь мукет дуннее вуи кадь потӥ. Ципьяе нуись сюрес дурын - зор-котлэсь утиськон инты, пу скамьяез но вань. Пукси, "Беломорме" кенжытӥ. Куазь туж пӧсь - аран вакыт. Кема ик ӧй пукы, дорам лыктӥз кыӵе ке пияш. Бигер кылын вазиськиз мыным. Шораз долкаса учкемме валаз, лэся, ӟуч кылэ выжиз: тон но-а, пе, Ципьяла мынӥськод, иптэш? Ӝоген, пе, татысь элеваторе нуллӥсь машина вуоз но асьмеос ать! шуытозь Ципьяла вуомы. Выль эше туж вераськись но капчи мылкыдо, шӧдске. Тусын чебер, мугорын веськрес. Нимзэ но, кин луэмзэ но вераса вуттӥз ини: клубын баянист луыса, пе, ужасько, нимыз - Габдульбар. Мынэсьтым дышетӥсь луэмме тодӥз но интыяз тэтчаны ӧдъяз: "Э, малай, малай, мӧйы кышноос нош ик куспазы вожъяськыса-керетыса улозы ук ини!.." Ма сярысь вераськемзэ валамтэеным, шораз мыняса учкисько. "Эн паймы, иптэш, эн паймы, - бӧтьыртэ Габдульбар. - Таӵе эмеспиос Ципьялан уг костасько. Адӟод но улод, кӧня ке нунал ортчыса, коркалы быдэ куноостӥ ветлод, котькудаз со коркан бызьыны вуэм кисьмам улмо кадь чебер нылын тодматозы. Ай, алла, алла, йырыд поромоз, малай! Монэ но сьӧрад ке ӧтьылӥд, юмшанмы асьмелэн шулдырлэсь но шулдыр луоз, баянэн мон охо-хо, кыӵе кисьматӥсько! Удмурт "Чаботаез" шудыны кутскисько ке, арлыдзы улэ губырмем бабайёс но тэтчаса эктӥсь луо. Ай, алла, алла, уломы ке уломы, шол!". . . Выль эше вань малпанъёссэ вераса ӧз вутты, вадесамы машина дугдӥз. "Эй, Габдульбар, киль. . ." - кузовын пукисьёс эшшо маке веразы на бигер сямен. Только мон кытысь тодом со кылъёсыз, кытысь валалом, мар соос верало. "Давай чемодандэ, иптэш!" - шуиз Габдульбар но, синмез кырмыштымон дыр куспын ми машинаын вал ини. Ынъёс вылэ небытак интыяськем берамы, машина вырӟиз. Ӝоген нюлэс сьӧры ышиз Шемордан. Габдульбар тодмоосызлы вераз, та выль эшмы, пе, дышетӥсь - Ципья школаын ужалоз. Кышноез ӧвӧл на, - шуиз но кылыныз клёц! кариз. "Берпумез иворед - самой кулэез!" - серектӥз огез кышномурт. "Кудаз школаын бен ужалоз - ӟучо бигераз-а, удмуртаз-а?" - юаз мукетыз кышномурт. "Удмуртаз", - шуиз Габдульбар мон интые. "Аслаз кылыз-ымыз ӧвӧл, шӧдске, выль тодмоелэн, мыным сыӵе эмеспи кулэ ӧвӧл", - нош ик серектӥз нырысетӥез кышномурт. "Нош ми тонэ витиськомы ини. Улон инты но шедьтӥмы - Демеевъёс доры, - шуиз мукетыз кышномурт но мыным матэгес кариськиз. - Вай бен тодматском: мон - Мария Петровна, удмурт кылъя дышетӥсь. Казане ветлыса бертӥсько ай. Шофёрмы усто адями - Ципья калыкез няраксэ сюрес вылысь бичаса вае. Нимыд Пётр шуыса тодӥсько ни. Атай нимыд кызьы вал ай?" "Николаич". Вераськонамы нош ик удмурт кылын вераськись пыриськиз, таяз радэ воргорон: "Кемалы ӝеганы малпа меда та дышетӥсьты Ципьялан?" "Адӟом ини, кызьы пумиталоды" шуыса, "беломорме" кенжытыны кутски вал но, машиналэн кузовез туж вылӥе тэтчытэмен, "беломор пачкае сюрес урдсы киргаз. Гурак серектӥзы. Зӥбломем беразы, Габдульбар юаз: "Бигер кылэз уд тодӥськы, дыр?" "Ӧжытак тодӥсько, - шуи. - Милям Алнаш базарамы ваньмыз сямен вузкарисьёс - бигеръёс". "Я бен, мар тодӥськод, кӧня ке кылдэ вера ай", - лӧпшаны ӧдъяз Габдульбар. Мынам но мылкыды бурдъяськиз, кӧня кыл тодӥсько, ваньзэ верай: "Быр, икы, ись, дурт, биш тэнке. . ." Витетӥ чиньыме куасалтыса, берпум кылме верай гинэ но, машинаын мынӥсьёс гудыртэм кадь ӵош серектӥзы. "Ай алла, алла, давай эшшо огпол лыдъя на, малай!" - серекъя Габдульбар. "Быр, икы. . ." - моганы ӧдъяй. "Давай, давай, быр, ике. . . ись. . ." - лӧпкытэ Габдульбар. "Быр, икы, ись, дурт, биш тэнке", - шуи но нош ик гурак серектӥзы. Габдульбар кӧтсэ посэ: "Тон дышетӥсь ӧвӧл, тон - артист! Кин дышетӥз тазьы лыдъяськыны, малай, охо-хо-о?!" "Ма, Алнаш базарамы бигер вузчиос озьы лыдъясько ук. - шуисько. - Мар ке умойтэмзэ верай ке шат?" - юасько Мария Петровналэсь. "Удмурт кылэ берыкттыса, верамед тазьы луэ: "Одӥг, кык, куинь, ньыль, вить манет", - шуиз со. Тае кылыса, мынам но серекъянэ пӧсьтӥз. Э, гориськом ук, гориськом! Озьы лӧпшаса-серекъяса мынонъямы, кузь сюрес но вакчи потӥз. Огаз вырйылэ вуимы но, ми азе яплак вӧлдӥськизы Ципья черко гуртлэн юрт липетъёсыз. Чебер интыын сылэ мыным тодмотэм Ципья. Уй пал кезьыт тӧлъёслэсь сое утё нюлэсо гурезьёс, нош соос выжыетӥ читыр-чутыр бызе Ушмо шур. "Тани та асьмелэн школамы, - шуиз Мария Петровна, машинамы бадӟымесь коркаос вадьсы дугдэм бере. - Ойдо пыром но, мон тонэ тодмато завучен но директорен. . ." * * * Школалэн директореныз, Леонид Васльевичен, вамышъяськомы улоно патерам - Демеевъёс доры. Куинь кузя уло соос - кык мӧйы кузпалъёс но егитгес кышномурт. Директор кема ӧз улы, тодматӥз монэ но кошкиз. Кузёосылэсь нимтулзэс но тодытэк кыли. "Диван, - вазиз кузё кышное картэз шоры, - пырты кроватез кеносысь но интыя бӧлет вӧзы егит пилы. Нимыд кызьы ай, Петыр шуиз кадь директорды, - мон пала берытскиз но пальпотӥз. - Вождэ эн вай кесяськыса кадь вераськеммылы. Картэлэн сузэрыз - Марья, туж ляб кылэ но соин, лэся, кесяськыса вераськыны дышимы". "Петыр нимы, Петыр, - шуи но ачим мур малпаськонэ уси: малы меда со пересь муртлэн нимыз сыӵе шуш? Диван. . ." - абдраса учкисько кузёе шоры. Паймемелэн пумаз-йылаз ӧй вуы, кузё кышное нош ик кузпалэзлы вазиз: "Диван, дёгуысь дёэз дюод-а, али гинэ пыртӥ". Тае кылыса, корказьысьтызы гужем кӧлан интыязы пукси но кык киыным йыр бордам кырмиськи: "Батюшки, мар дуннее сюри мон, удмуртъёс-а та яке мукет выжы калык-а?! Вераськемзэс чик уг валаськы ук!" Озьы пуконъям, нырулыны кутскиськем. "Марья, валиськы корказе, Петырлэн иземез потэ, сюрес вылын жадем", - нош ик кужмо кеськыса вераз кузё кышно Марьязылы. Соиз эшшо но кужмо кеськиз: "Яралоз!.." Валиськем бераз, ӧс куспысен кышно палазы вазиз: "Кенак, шобрет мае бен сётом?" "Борддорын пась вань, соин мед шобырскоз", - кузё кышнолэн йыгмыт куараез кылӥськиз. "Ярам!" - нош ик пелез кесьымон куараен вазиз Марья шуонзы. Сыӵе кужмо вераськемысь умме соку ик тӧлӟиз. Мукет малпаськонэ уси ни табере: кызьы меда "борддорысь пасен" шобырсконо. . . Марья апае сыӵе ик кужмо куараен но таяз радэ каньылак шуиз мыным: "Я, Петыр, выд но шутэтскы, ачим тани пӧсь сиён дасюо тыныд. Кынмоно кадь люид ке, тани та пасен шобырты мугордэ, дёо-о",- борддоре ошем шуба шоры возьматӥз со. "Татын сямен вераськыны дышон понна, та кылъёсты нимысьтыз тетраде гожъятэк уз луы, дыр", - малпаса выдӥ но супрак умме усиськем. Уйвӧт адӟи: Нюркае кышет пумыныз синъёссэ ӵушылэ, мӧзмисько, пе. . . * * * Кызьы ужаны кутски но кызьы пумитазы монэ дышетскисьёс - ваньзэ радызъя мадьыны кулэ-а меда? Ӧвӧл, дыр. Ваньмызлэн дышетӥсьёслэн улон сюрессы огвыллемгес луыны кулэ кадь. Но вераме потэ нырысь уждун басьтэме сярысь. О-о, со вунонтэм, со - праздник: кисыям со мында коньдонлэн пырамез ӧй вал на бере, бызьыса сямен почтае мынӥ, анаен атаелы ыстыны. Ваньзэ кагазъёсты кызьы кулэ гожъяса, коньдонме тыри но, почтаын огез ужась юа: "Тон учитель П. Н. К. уд-а луиськы? Арнялэсь кема ни сыӵе адресэн гожтэт кылле ми дорын, кинлэсь юаны, кинлы сётыны чылкак ӟудӥмы". Мае ке шӧдыса, лэся, сюлмы икак луиз: ваелэ, шуисько, гожтэттэс учко, оло, зэмзэ но со мыным. Букваосыз но тупало кадь, "учитель" кылыз но. . . Дырекъяса кутӥ конвертэз но соку ик тодмай Нюркалэсь чуръёссэ: "Татария, Пичия, учителю П. Н. К". Ураме потыса, конвертэз усьтӥ. Бадӟым тӧдьы кагаз вылын одӥг гинэ чур, со но синкылиен наштаськемын. Мырдэм но кызьы лыдӟи: "Мукет Нюркадэ шедьтӥд-а ни со Пичия шуонад?!" Эк шу, ужелэн огыр-бугыр нырысь нуналъёсыз Нюркае сярысь малпанъёсме палэнтӥллям, шӧдске, ачим но сое шӧдытэк кыли. Мар возьыт та, мар юмок?!. Я, туннэ ӝыт ик гожтэт гожто но ваньзэ-ваньзэ верало, кызьы татысь удмуртъёс Иванэз "Диван" шуо, йырез- "дьыр", йӧлэз - "дьеу". Огкутскемен, туж усто визьнод но сёто миськем сяртчы кадь чебер Нюркаелы: кынмид ке, шуо, борддорысьтыды пасен шобырскы но соку ик шуналод. Патерам бертӥ но гожтэт гожтыны пукси. Ваньзэ-ваньзэ верай, часэн-минутэн лыдъяса мади толэзь ӵоже Ципьялан улэме сярысь. Малпасько, Нюркаелы тужгес но кельшоз Габдульбарен нимо-дано активисткаез данъяны ветлэммы сярысь ивор. Со кышнмоуртлы али сизьымдон вить арес ке но ини, йырвизьмыз - ой-ой-ой! - тулыс шур ву кадь: ортчемзэ но, ализэ но улонэз туж ӟеч тодэ, веран кылыз ачиз ӧръяське. Монэ тужгес но паймытӥз романсъёсыз тодэмез. Корка тыраз люкаськем мӧйыос но, егитъёс но вырӟылыны дӥсьтытэк кылзо кырӟамзэ. Шӧдӥське, Габдульбар кемалась дышем ини та пересь кышномуртлэн кырӟамез сьӧры баянзэ кысканы: я дырекъяса бӧрдэ кадь арган куара, я витьымтэ шорысь, тюрагайлы пӧрмытӥськыса, сайкыт инбаметӥ поръяны ӧдъя. . . Пересь кышномуртлэн куараез ӧжытак ӟукыртӥсь луэмын ке но ини, кузь нёжтыкуз кечлэн бӧксэмезлы кельше ке но ини, сое кылзӥсьёс котмем синъёссэс ӵушыло, кияз сяськаос сётыло. Кыӵе гинэ чебер кылъёс ӧз вералэ со ӝытэ, кыӵе гинэ кырӟанъёс ӧй кылы мон со ӝытэ!.. Но тани мон вылэ но вуизы. Егит дышетӥсез, пе, кылзомы. Вань калык мон пала берытскиз. Йырам чилектэм кадь малпан лыктӥз: али асме возьматыны ӧй ке быгаты, мон сярысь умойтэм малпанзы бордам лякиськоз но солэсь мозмыны уд ни быгаты. Но мае бен кырӟано?! Романсъёсты уг тодӥськы ук!.. А-а, вот, вот. . . Сусанинлэсь ариязэ яратӥсько но тодӥсько, мон сое дыши дышетскись студентмылэсь. Солэн куараез гудыръя вал - бас, сцена вылэ потэ ке, огпол кырӟаса гинэ ноку но кошкыны ӧз лэзьылэ. Мон, конечно, векчи куараеным та ариез калык азьын ноку но ӧз кырӟалля, нош али, амалтэк султоно луи бере, мар карод на. . . Куноослы таӵе кылъёсын вазиськи: "Мон, жаляса верасько, романсъёсты уггес тодӥськы. Пумит ӧд ке луэ, кырӟало Михаил Иванович Глинкалэсь 1836 арын гожтэм операысьтыз Сусанинлэсь ариязэ". Люкаськемъёс огшокчем кадь "о-о-о" шуизы но кизэс чабыны ӧдъязы. Асме туж-туж юн кырмыны выри ке но, векчи куарае эшшо но векчи луиз кадь. Но тани лулме шедьтӥ но ӧръяськиз, ӧръяськиз арие. . . Эх, сётӥсько ук, эх, жингыртэ ук куарае!.. Пумаз вуэм берам, ошап нокин но ӧз чабы, собере гинэ сайкам кадь луиз калыкен тырмем корка: укно пиялаос жон! вазё кичабонъёслэсь. Мон кырӟам бере, Габдульбар "Чабата" шуон гурез мытӥз. Шонерзэ верано ке, Ципья пала вуылымтэ мурт таӵе эктонэз но, таӵе кылъёсыз но улытозяз уз кылылы, дыр. Котырак султэм пияшъёс но воргоронъёс нырысь ик эктыто нылъёсты, собере аьссэос кутско ук лӧпшаса эктыны! Нырысь-валысь валаны луэ кадь мар верамзэс, нош отӥяз. . . Тани, кылзэ ай, валалоды-а та кылъёсты: Ай-бий, Насьта, Искабына-бырала, Живо драва, Анасына-бырала. . . Кылдэм ке, кылдэм ке, Каза быжзэ урдэм ке. Кышно басьтны кылдэм ке!.. Ваньзэ тае, али мар верай, тӧдьы кагаз вылэ гожъяй но, конвертэ поныса, Нюркаелы ыстӥ. Арня ёрос ортчиз-а, ӧз-а, почтаын ужась пумитаз монэ урамысен но шуэ: "Учитель П. Н. К.! Тыныд нош ик гожтэт вань". Нош ик Нюркае ыстэм. Таяз радэ бугыръяськись мылкыдзэ вить чуре тэрытэм: "Пасеныд ачид ик шобыръяськы ини, гыдыке!.. Нош оломар кылын вераськись Ай-бий Насьтаедлы бадӟым салам вера. Ойдо ӵок, ачид тодод, кулэед ӧвӧл. . . Анаен атаедлы лыдӟи гожтэттэ но, соосыд шулӟектӥзы, мар дуннее, пе, сюрем бен та пияшмы?!" Чурыт пуссэ пуктыкуз, ручказэ туж юн зӥбем, шӧдске, Нюркае, кагаззэ ик кесем. Эк шу, котькинлэн ик та выллем луэ меда яратонэз, яке мынам гинэ-а таӵе секыт куректон сюрес вылтӥ гылӟе?.. * * * "Ӟеч но бур, Нюрие, чебер шушые! Гожтэттэ ке басьтӥсько, мылкыды бугыртӥське, синъёсы чилясесь луо, пельёсы ӵыжекто. Ваньмыз со - шуныт но сюлмысьтыд потӥсь кылъёсыдлэсь. Ципьялан улон-вылон огсямен питыртӥське, котькуд ортчем нунал - одӥг вамышлы пересьмон. Ӵем дыръя малпасько: мар меда со пересьмон? Кие но уд куты сое, уд но сиы сое, уд но адӟы сое. Нош ачиз таӵе ик вӧзад кадь, ас мугорыныд шӧдӥськод кадь сое. Тон кызьы учкиськод та малпанъёсы шоры? Вуоно гожтэтад вераса лэзь, ява. Тыныд сӥзьыса кылбур гожтӥ. Тупатъянэз вань на ай - кузьгес кадь потэ аслым. Пумаз-йылаз вуттӥ ке, гожтыса ысто. Ципья калык тодэ но со кылбурме. Нырысь ик лыдӟи Демьян Ивановичлы, суреданъя дышетӥсьмылы. Мӧйы ке но ини со, мылкыдыныз мынэсьтым но егит. Туж каньыл адями, паймод но бырод. Лыдӟи мон солы кылбурме но чабкиськиз: та чуръёс, пе, сцена вылэ курисько! Алигес культура юртамы концерт возьматӥзы. Тӥни отын лыдӟи со кылбурме. Быдэсак концертмы туж умой ортчиз шуи ке, асме ачим ушъям кадь луо, дыр: мон мында эктӥсез но, кырӟасез но ӧй вал уго отын. Ой, Нюрие, тазьы ик уло, дыр, артистъёс но! Сцена вылын - ымныре пиштӥсь тылъёс, огшокчем мылкыдын бугыръяськись зал. . . Только вот кылбурелэсь пуштроссэ ӧз валалэ, синкылизэс ӵушылэм интые, туж кужмо серекъяны но чабыны ӧдъязы. Уть, тани, кыӵе бен серемес интыез вань та чуръёсын, татын мӧзмонэз возьматӥсь кылъёс ук: Макем ческыт луэ тыкмачен шыдэд. . . Нош кызьы вератэк кельтом, Кыӵе луэ нызьылиен шыдэд! Валалод сое веръяса гинэ, Дунъялод шӧмзэ ӟузьыса гинэ. . . Нызьылидэ пӧзьтӥськод кӧжы лымын, Сураськод сое тон йӧлвылын. . . Нызьылиен шыддэ тодам ке ваисько, Алнашам вуэм кадь потӥсько. Нызьылиен шыд, нызьылиен шыд. . . Берпум кылъёсме верай гинэ но, кык кышномуртъёс залысь бызьыса потӥзы, азьпал радын пукись воргорон вукекъяськыны ӧдъяз. Мукетъёс гур! серекъяло: "Браво!" шуыса кесясько. Мар луиз? Бен али синкыли потыны кулэ кадь ук, нош соос горо. Маке умойтэмзэ верай шат?.. Сцена вылысь кошким гинэ но, залын "бис!" шуо, нош ик потыны куро. Потӥ. Залысь куара кылӥськиз: "Алнашын сием шыддэ нош ик тодад вай али, туж шап маке ук со!" Кыкетӥ радаз лыдӟыкум, кылбурелэсь пумзэ вакчиятӥ, акылес медам луы шуыса: Нызьылиен шыдэз яратӥсько, Тон, Нюркае, сое ке пӧзьтӥськод. Шыдэлэн шӧмыз эшшо но воштӥське, Пуньылэсь уно йӧлвыл ке понӥськод. Нызьылиен шыддэ тодам ке ваисько, Алнаше вуэм кадь потӥсько. Эх, Нюрка, Нюрка, со нызьылиен шыдэныд кыӵе юмоке сюри мон!.. Демьян Иванович тодӥськод-а мар шуиз, сцена вылысь кошкем берам? Ципьялан, пе, "нызьыли" - со горд нумыр! Ма, тӥни. . . шуныт зор бере музъем вылтӥ гызмыльтӥсь макеос, валад- а?.. Вот самой со нумырен шыд сиыны дэмласькем ципьяосыз, йӧлвыл поныса, эшшо ке. . . Амалтэк вукекъяськод! Ма, асьмелэн Алнашамы ныгылиез "нызьыли" шуо бере, тон но, мон но янгыш меда, мусое?.. Я, ӟеч лу, чидатэк ивордэ витё". * * * Туннэ арня нунал. Кровать вылам погылляськисько, султэме уг поты на. Туж чебер уйвӧт адӟисько на вал, Марья апае кесяськемен, куаляк луыса сайкай. "Кенак! - шуэ, азбарысь кышно пала пырыса, - больницаысь Семёноваед, ява, пи шедьтэм!" "Кыӵе Семёнов, кин со?" "Ма, главврач". "Осто, та Марьяен, ма. . . тыныд ивортӥз-а, мар-а?! "Ма, ӧз но. . . ма. . . кылӥ. . ." "Кытын мар вань, пельтэм мурт нырысь ик кылэ уго", - ас понназ вераське кузё кышное. Главврачез мон тодӥсько ини, алигес тодматскимы: тып-тып таза, ӝужыт мугоро, сямызъя пезьдыт, быдэс ёроссэ кияз кырмыса возьыны быгатоз. Марья апаелэсь иворзэ кылыса, куаляк луи, бызьыса кышно пала мынӥ, пеляз кариськыса, кужмо кеськи: "Пи шедьтэм, шуиськод-а, Семёнов?!" "А?! - ӧз вала Марья апае. - Сиемед потэ-а?!" "Кытысь пи шедьтэм главврач, шуисько? Кин ке больницае куштыса кельтэм-а, мар-а, со нылпиез?" "Ма. . . ма. Кышноез пиям!" Тае кылыса, кроватям бызи но йырме шобрет улэ ватӥ. "Шузи, - тышкаськисько асме. - Алнашам но, нылпизы ке вордске, "нылпи шедьтӥм" шуо ук! Мар таӵе мыдланес адями мон! Мар малпало меда кузёосы мон сярысь, тьфу!".. Ӧсэтӥ пырись луиз. Шобрет улысь йырме ӧжытак поттыса, пал синмыным учки но адӟисько: Габдульбар! Мар, пе, та кема погылляськиськод, айда, малай, султы, юмшаны кошком! Матам лыктӥз. "Привет!" - шуэ. "От кого?" - юасько. "Ӟечбур, иське!" - кизэ сётӥз. Куазь туж шулдыр, тулыс шунды Ципья котырысь лымыез нюлэ но вулы пӧрмытэ. "Ойдо базар пала, - шуэ Габдульбар. - Арборка шурлэсь лӧпшамзэ учком". Арборка шурез татысь удмуртъёс Убор ву шуо. "Сыӵе пичи шур но сямзэ возьматэм каре, оло?" - юасько. "О-о, адӟид ке, паймод! - данъяськон шӧмыз кыре потӥз бигер эшелэн. - Арлы быдэ Кургеме, Сырьяе нуись выжез тӥя". Шур дурын - таляк калык. Кӧня ке воргоронъёс багоръёсын выж вылын сыло но тыгиськылэм йӧосты палэнтыло. Убор вуэд, ява, зэмзэ но урмем пуны кадь: ыргетыса-шаугетыса выж улэ поръяське. Уллапаласьгес улыг инты - яплак вуэн согемын, паськыт зарезь выллем. Капчи омырен шокаса, котыр утчаськисько: чебер тулыс, чебер дунне! Люкаськем калык пӧлысь унозэ уг ке но тодмаськы на, соос но таӵе шулдыр куазен мусоесь пото. Убор вулэн ӝужытгес ярдураз - базар. Отын но таляк калык. Мынам ӵошатэме потӥз Алнаш базарез Ципья базарен. "Ойдо, - шуисько Габдульбарлы, - базардэс учком". Ветлӥськомы вузкарисьёс вискытӥ. Котьмар вань - коньдонэд медло. Мӧйы бигер кышномуртлэсь юасько: "Кукеедлы кӧня куриськод?" Соиз шорам учкиз но, синъёсаз пумен вожомем тылгизьыос ӝуатскизы, "Кит, малой, кит!.." - кесяськыса, туж уно мыным тодмотэм бигер кылъёс вераз на. Кыӵе ке тодмоеныз вераськыса сылӥсь Габдульбар куашетскиз, палэнэ кыскиз монэ: "Мар дауртӥд?" Милям Алнаш базармы басьяськисьёс шоры тазьы уг кесясько! - воже потӥз. - Уть, олокин кожаськоды асьтэдыз! "Сыл ай, сыл, иптэш, - буйгатэ Габдульбар. - Маке умойтэмзэ вераны шедьтӥд, дыр?" "Ӧй, - шуисько, - мон кукеезлэсь дунзэ гинэ юай". "Алла, алла, - чабкиськиз Габдульбар. - Кин бен кышномуртлы сыӵе юан сётоз! Ай, алла, алла!.. Туж тодэмед ке потэ, тӥни со воргоронлэсь юа. Нимыз Сайфи". Сайфи сӥльын вузкаре. Така сӥльыз но вань, ӟазегез но, курегез но. Дасолэсь уногес кукеез но вань. Габдульбар, кукейёс шоры возьматыса, каллен гинэ кӧтурдсам йӧтскиз: юа, пе, дунзэ. "Якшымы, иптэш?" - вазисько, бигер сямен тодэмме возьматыны тыршыса. "Бик якшы, бик якшы, малай!" - лӧптӥз Сайфи. "Кукей бармы?" "Бар, бар!" - мынясь луиз вузчи. Отӥяз бигер кылы ӧз ни тырмы но ӟуч кылэ выжытэк ӧйлась. "Кӧняен вузаськод кукейдэ?" - юанэлы Сайфи туж дыртыса шуиз: "Не продаём бит, малай, самим надо будет". "Малы, иське, кыре поттӥд, возьматон понна-а, мар-а?" - тэбини бордаз. Учкисько: Габдульбаре куасалляськыса серекъя. "Кукей не дам, йомырка - пожалуйста!" - шуиз Сайфи. Соку гинэ йырам шуккем кадь луиз: нош ик юмоке шедиськем ук! "Кукей" но "курег пуз" одӥг радын уг ветло вылэм, фу, лешой!.. * * * Базар капка сьӧры потӥмы гинэ но, пумитамы кемдӥз партилэн райкомезлэн секретарез. Учкисько: ваньмыз соин ӟечбуръясько, йыбыртъяло, нош со адӟем но уг кары, вань малпанэз - Убор ву вылысь выжез утён сярысь, дыр. . . Шукыръяськись шур дуре дыртэ. Витьымтэ шорысь мон пала кожиз но, кизэ азьлане мычыса но пальпотыса, матам лыктэ. Пыдъёсы кисальӟизы, синмы лыз-вож адӟыны ӧдъяз: мынам уго татчыозь таӵе бадӟым кивалтӥсен артэ пукеме но ӧвӧл на. Бур киме юн-юн кырмиз но шуэ: "Улонмылэн ӧраз пыриськиськод ни, шуо, умой дышетӥсь, пе, пӧрмоз тӥлесьтыд. Шумпотӥсько, туж шумпотӥсько. Ӵуказе лык ай дорам, вераськон вань", - шуиз но шур пала дыртӥз. Габдульбарен милемыз соку ик котыртӥзы. "О, Ачиз ӟечъяськиз тонэн!" - азьчиньызэ ӝутӥз Демьян Иванович. - Дасяськы эмеспи луыны, солэн нылыз Казаньын дышетске!" Со ӟечъяськон бере улонэ унолы воштӥськиз. - монэ синйылтӥзы. Ципья ёросысь "Азьлань" газет, монэ ушъяса, бӧрсьысь-бӧрсьысь кык материалъёс печатлаз, собере классам урок нуэмме но возьматӥзы со газет вылын ик. Конечно, ваньзэ сое мон Нюркаелы ыстылӥ. Малпай, шумпотз, нош со гожтэм: "Тон котыре люкаськем эшъёсыдлэсь тактиказэс валай. Соос тонэ асьсэлы капыртыны выро! Вот!" "Тактика" шуэм. . . Уд оскиське-а? Лыктэлэ бен дорам, возьмато, гожтэтэз али ке но ӝӧкам. Шонерзэ ке верано, со кылэз ку но мар ласянь вераны ик ӧй тодылы на вал татчыозь. . . Вот ведь та Нюркаен!.. Ужлэн ӧраз умой-умой пыриськод ке, дырлэсь ортчемзэ шӧдыны уг луы вылэм. Дышетскисьёсы умой-тодӥсь-валась мед луозы шуыса тыршеменым, Нюркае палэнэ но кыдёке гылӟыны ӧдъяз, гожтэтъёссэ но шергес басьяны кутски. Огаз гожтэтын уго туж юн пыкылӥ: малы конверт вылад "Пичия" гожъяськод, шуи, мон Ципья черкогуртын ужасько ук. Уг ваты ни мылкыдме, пырак верало: татысь калык мыным кельшыны ӧдъяз ни, пумен соос сямен вераськись но луи ни, дышетскисьёсыным но одӥг кыл шедьтӥсько кадь: урокъёсамы кырӟаськомы но, пичиесь сценкаос но пуктылӥськомы. Ма, ваньзэ вераса пумаз вуод шат, ужез умой карон понна, кыӵе гинэ амалъёс уд утчаськы ук. . . Дышетскон ар бырон азьын нылпиосылэсь тодон-валанзэс но, аслэсьтым быгатонлыкме но мургес тодоно кариськи. Доска доры ӧтьылыса, кыӵе ке предложениез котыр ласянь эскерон - самой умой амал, дыр, малпаса, тямысэтӥ классам пыри. Доска доры нырысь ик ӧти Граня нимо нылашез. Мугорын со таза, ӝужыт, куараез боз-боз, огъя вераса, быдэ вуэм ныл. Со вӧзын мон - тэшкыли. Сизьым кыллэсь огшоры предложение гожтытӥ но юасько ини: "Шедьтыны быгатод-а, Граня, та предложениысь подлежащойзэ?".. Граня утчаз-утчаз но шедьтӥз, со кылэз одӥг гожен пусйиз. Ушъяй мон сое. "Молодец, - шуисько, - ойдо табере сказуемойзэ утчалом". Таяз радэ кемалыгес могаз, но шедьтӥз. Нош ик ушъяй, нош ик "молодец" шуи. Самой со вакытэ, йырам шайтан пырыса-а, мар-а, мыдлань сюресэ кожи, чик чакламтэ юан сётоно кариськи: "Граня, - шуисько, - оло, асьмеос эшшо одӥг сказуемойзэ шедьтомы на татысь? А?.." Граняе туж сюлмаськись тусын доска вылысь предложениез лыдӟе но лыдӟе, собере эшшо одӥг кылэз кык чурен пусйиз. Класс ӵашетыны ӧдъяз. "Эн люкетэ, пиналъёс, - шуисько, - Граняен ми татысь куиньметӥзэ сказуемоез шедьтомы на ай! Уд оскиське-а?.. Давай, Граня, сэзьгес кариськы!" Шӧдӥсько, Граняе бурдъяськиз но ньылетӥзэ кылэз кык гожен пусйиз. Витетӥзэ сказуемоез шедьтыкуз, воже потыны ӧдъяз. "Тон, - шуисько, - Граня, толбыт мар малпаса пукид ай парта сьӧрад?! Кин дышетӥз тонэ одӥг предложениысь со мында сказуемой бичаны, узы-боры кожад-а, мар-а, тон сое?!" - матаз ик кариськыса, йырме чатыртӥ но шораз учкисько. Гор-гор серекъясь класслы-а меда солэн вожез потӥз, мыным-а, ӧйтӧд, гудыртэм кадь "Ачиз утчаны косэ но, эшшо ке!" шуыса вань кужмысьтыз суралскиз но монэ вӧзысьтыз сэрпалтыса лэзиз. Янак борды ӧй ке кырмиськысал, укноетӥ азбаре лобысал, чик ватытэк верасько. Урокмылэн радэз куашказ. Возьыт ке но вал, классэным ӵош черекъям нерге кари, но сюлэмы пӧсьвуам кадь луиз: тол ӵоже огшоры предложениысь вить сказуемой шедьтыны дышетӥськем ук нылпиосме. Секыт мылкыдын кошки со нуналэ школаысь. Почта вадестӥ вамышъякум, отын ужась укное йыгаськиз но пырыны ӧтиз. "Тани, нош ик тыныд гожтэт. "Учителю П. Н. К." шуэмын. Таяз радэ Нюркае бадӟымгес гожтэт ыстэм. Нош пуштросэз туж вакчи, кӧня ке кылын гинэ вераны луоно: тыныд осконэ, пе, быриз, монэ Сизьгуртысь сюсьтыл кадь пияш кура. Тусын но, визьмын но тынэсьтыд нырулдэ ӵушоз. Ӟеч лу!.. Нырысь шуак пӧсектӥ, собере валатски: та ведь монэ кышкатон понна гинэ кескич вамыш лэсьтэм, албасты!.. Уть, люкод сое мон бордысь. . . Ишь тон, Нюрка!.. Ух, кескич нылаш!.. Визьмо ик та Нюркае мынам, визь люке, зарни комоке. . . 1 Чебер пияше Кылъёсыз но крезьгурез Ада Диевалэн Кытысь вуыса Син азям шедид? Вӧзам пуксьыса Мусо вераськид. Припев: Чебер пияше, Мусо пияше, Шулдыртэ, кырӟа Синмаськемме бен, Вала-а меда, Шӧдэ-а меда, Вала ик меда? Шорам учкиз но Дунне ик улӟиз. Возь выл сяська но Котыр усьтӥськиз. Припев: Чебер пияше Кырӟа мылкыды. Луоз-а куке Ӝыт пумиськонмы? Припев: Тон мынам шумпотонэ Кылъёсыз Галина Романовалэн Крезьгурез Ада Диевалэн Тон сётӥд мыным выль кужым, Ӧрӟилэн кадесь юн бурдъёс. Пунэмзэ басьтӥд сюлэмме, Эрикме, шулдыр крезьгурме. Припев: Тон мынам шумпотонэ, Тон мынам куректонэ, Тон мынам шулдыр гуре, Тон ик мынам бӧрдонэ. Дӥсяло ӵыж выль дэремме, Йырсиме пуштрес сынало. Кутчало ялтрась катаме, Кӧтӝожме вато туж пыдло. Припев: Чиган ныл сямен, туж етӥз, Олокинэн но верасько. Тон дортӥ гинэ ортчыку, Адӟымтэ улэ карисько. Припев: Юрий Коротков Лек синмо утись (Азьланьтӥськемез. ) Ӝоген Беглой ужаны дышиз, уйёсы мугорыз ӧз висьы ни. Чассэ ӧз нуллы ни, кулэтэмзэ валаз, татын дыр минутъёсъя уг лыдъяськы, ӟардонысен шунды пуксьытозь мынэ, - тысьысь модосэ, тулысысь гужеме. Праздникъёс яке мукет кыӵе ке югдуръёс уг дугдыто, бызись вулэн кожылэмез кадь гинэ ортче со. Беглой нырысьсэ ассэ тазалыкоен шӧдӥз. Пиез сярысь малпан ӧй ке курадӟытысал, ассэ со шудоен лыдъясал. Кузь туш ке но лэзиз, Беглой егитомиз кадь. Тӧдьышурлэн улонэз азьланьске нуналлы быдэ секыт ужаса - узырмонлы ӧвӧл со, дунне вылын улон понна - капчи но шулдыр, ваньмыз калык азьын, Инмарлы осконзы но пичи муртлэн атаезлы оскон кадь. Беглой эшшо огпол Нежданаен ваче син пумиськыны быгатӥз на. Нылаш ачиз нюлэскы мынӥз, сьӧраз одно ик Беглой но мыноз шуыса валатскиз. Вераськыны но номыр сярысь кадь. Ачиз сярысь Беглой вераны уг быгаты - кутске гинэ мукет дунне сярысь мадьыны, Неждана пельёссэ пытса. Нош ныллэсь улэмзэ юатэк но тодмо - вань дас куать аресъемъёс ог-огзылы укшало. Беглой гуртоос, турынъёс сярысь юалляське, собере озьы гинэ артэ поръяло, дырын- дырын огзы шоры огзы учкылыса. Беглой малпаз соос али гинэ Инмарен лэсьтэм Адам но Ева кадесь шуыса. Но Ева мукетызлы курамын ӧй вал. . . Гуртоос дышизы ни Беглойлы, сое асьсэ адямиен лыдъяло. Пётр гинэ шораз лек учкылэ, уг ӟечъяськы. Манетлэсь палэнскыло. Со лумбытэн шунды шорын приёмникеныз кылле. Огпол Беглой солэсь урод мылкыдзэ валаз. - Мар чырсад? - Батарейкаос пуксизы, мылкыдтэк чалмем приёмникез пала шонтӥз Манет. - Трагедия. . . - серектыса вазиз Беглой. - Гур вылын возь - кӧня ке ужалозы на. - Вози ни. . . Толэзь улыса дуннелэн чемпионатэз - малпасько, ӧй адӟы ке, кылзо коть. . . - батарейкаосыныз ӵош Лёва ачиз но пуксем, шӧдске - бадӟым дуннеен возись берпум нюжаез чигиз угось. - Ужаны пот, - дэмлаз Беглой. - Куасьмод ук мӧзмыса. - Медаз но вите! - йырзэ урдӥз Манет. - Монэ военнопленноен мед лыдъялозы. Женеваын кутэм конвенцияя мед сюдозы. - Мон тонэ сюдӥсько ай, - Беглой кышноосын сётэм картошка, сылалтэм чорыг но губи поттӥз. - Тыныд тунсыко ӧвӧл-а, мар-а? Асьмеос нокыӵе дыр машинатэк мукет дауре вуим! Та ваньмыз зэм ук! Туннэ Купала праздник луоз. Дунтэм шудон Маскарад ӧвӧл - зэмос Купала! - Муское лобем потэ. Тамара нылаш доры. - Тьфу, муньылон!.. Ну, потод татысь - таӵезэ ноку но уд адӟы ни! - Мед, - мылкыдтэк вазиз Манет. - Каллен. . . - Беглой сак кариськиз. - Кутскиз! Гурт кузя кырӟан чузъяськиз - пиос но воргоронъёс коркась корка ӧтьылыса ветло: Олле, нылъёс, песянайёс, Пыласькыны! Мусоосмы-гажанъёсмы, Пыласькыны! Ой, кин ке ӧз поты Пыласькыны, Мусоосмы-гажанъёсмы, Пыласькыны! Ой, со луоз Буш тусь кадь! Мусоосмы-гажанъёсмы, Буш тусь кадь! Нош кин мыноз Пыласькыны, Мусоосмы-гажанъёсмы, Пыласькыны! Со мед луоз Тӧдьы кызьпу! Мусоосмы-гажанъёсмы, Тӧдьы кызьпу! - Ойдо! - Беглой Манетэз ӟус вылысь ӝутӥз но коркась сьӧраз кыскиз. - А то зэмзэ тусь кадь буш куасьмод! Педлон пеймыт ни. Чебер дӥсяськем нылъёс, кышноос но пичиос тылскем пала бызё. Гурезь йылэ туж бадӟым тылскиллям: шораз ваё кот боды донгемын, со вылын ачиз Купальница пуке - силёлэсь лэсьтэм мунё, боды котыртӥ тыл эктэ. Беглой Манетэн палэнэгес султӥзы. Тылскем доры быдэс гурт люкаськиз, нонӥсь нылпиос но туж пересьёс гинэ ӧвӧл. Нылъёс йыр вылазы сяськалэсь пунэм тугокоосын, котькудӥзлэн кияз турынлэсь пунэм гозы. Ваньзы тыл котыртӥ эктыса ветлыны кутскизы: Ой, гурезь ӝужыт но меӵ ук, Ой, солэн йылаз, вылӥяз, Паськыт, ӵошкыт интыяз ук Бадӟым тыл ӝуа. Куинь кыйёсты, ой, суто ук: Одӥгез ук пӧяса ӧтись-чортӥсь, Кыкетӥез ук нюж кыстӥськись, Куинетӥез ук позыръяськись. Ыжпиосты пӧяса ӧтись кыез, Вае тылэ! Нылъёс но кышноос, тыл доры лыктӥзы но отчы кӧс куро куштӥзы. Соиз дары кадь кенжиз. Нюж кыстӥськись кый котырез тӥя, Сое - тылэ! Позыръяськись кый ваньбурез пазя, Сое - тылэ!.. Куинь кыйёсыз быдтэмзы бере, калык пазьгиськиз, кн ке зол шултӥз - Еремей но Пётр котькинлэсь азьло тыл вамен тэтчизы. Бӧрсязы ик ваньзы тэтчаны ӧдъязы, пиос - шортӥз ик, Купальница борды йӧтскыны турттыса, нылъёс, дэремзэс кутыса - дуртӥзгес. Кинэн ке Неждана но тэтчиз - горд лэзьям кузь йырсиез тыллэсь тулкымен сьӧраз лобиз. Мӧйыос но тэтчало. Пичиос но. Кин уггес вуы, тыл вылэ лёгиське - калык серекъя, нош соиз, лябыт тэтчась, эгырзэ кут бордысьтыз куя. Ой, кин уг тэтчы Та тыл вамен, Мусоосмы-гажанъёсмы, Та тыл вамен, - ымныраз горд пужыё Лука Беглой азе султӥз но тыл доры ӧте: Ой, со луоз Буш тусь кадь! - - ваньзы кырӟаны кутскизы. - Сьӧд кужым тыллэсь кышка, - серектӥз Пётр. - Мынӥм! - Беглой Лёваез кыске. - Со сярысь гинэ малпаса улӥ. Мын, мын, шулдырты папуасъёсты! - шонтӥз соиз. Муртъёслэн шулдыръяськемзы пиняз йӧтэ. - Чёрт тонэн! - Беглой киоссэ посыса мертаське. Тылскемлэн мукет палыз уг адӟиськы. Бызьыса вань кужмысьтыз донгиськиз - ымныраз пӧсь омыр шокчиз. Ушъям куараос улсын со кыдёке тылскем сьӧры тэтчиз но султӥз, пичи пи кадь ачиз аслыз шумпотыса. Выль кырӟан кутскиз, калык тыл котыртӥ ветлэ: Ой, лудын ук, Ой, лудын ук беризед. Беризь улын, Беризь улын лапасэд. Лапасын нош, Лапасын нош ӝӧк сылэ. Ӝӧк сьӧрын нош, Ӝӧк сьӧрын нош ныл пуке. Тыл доры чиед Грушаез донгизы. Сяська бичаз, Сяська бичаз турын пӧлысь. Тугоко ук, Тугоко ук керттӥз сяськалэсь. Груша тугокозэ кияз кутӥз но калыклы возьматэ, кызьы со сяська ишказ но тугоко керттӥз. Кин тугокоез, Кин тугокоез нуллоз, куасьмытоз. Тугокоез нуллоз, Тугокоез нуллоз пересь мурт. . . Калык дугдӥз, пересьёс но кышнояськем пиос Грушалэсь тугокозэ сётыны куро. Нылаш мышказ ватӥз. Тугокоез пересь мурт, Пересь мурт уз куасьмыты. Мынэсьтым егит дырме, Егит дырме уз лӥяты! Пересьёс интыязы султӥзы, нош ик лудысь беризь сярысь но лапасысь ныл сярысь кырӟан мытӥзы. Тугокоез нуллоз, Тугокоез нуллоз гажанэ. Гажанэ тугокоез, Гажанэ тугокоез куасьмытоз. Табере егитъёс потӥзы. Таосыз тугокоез уг куро, сое таланы туртто. Груша чир! кесяськыса, тыл котыртӥ бызьылэ. Кышноослэн тыбыр сьӧразы ватскылэ, кылзэ мычылэ, исаське. Лука татчыозь азьпала ӧз пота. Гажанэ тугокоез куасьмытоз, Мынэсьтым егит дырме, Егит дырме дунъялоз! Тугокозэ Груша Лукалы лэзиз, соиз йыраз понӥз, мыкырскиз - Груша солэсь кык йырлы пичи вал - но чупаськизы. Артэ султӥзы, кырӟан выльысь мытӥськиз. Круге Неждана потӥз. Со Груша сямен кеч кадь уг тэтча, пальпотыса, капчи вамышъя, кинлы тугокозэ сётыны утча ик, кожалод. Пересьёслы сётытэк, ӝоггес кошкиз. Пиос потэм бере тугокозэ ватыны турттыса пеганы кутскиз. Лука сямен ик, Еремей но шудон азьпала уг поты, Неждана шоры учке но пальпотэ. Гажанэ тугокоез куасьмытоз, Мынэсьтым егит дырме, Егит дырме дунъялоз! Неждана тугокозэ ӧз лэзьы, ӧз но дугды, ӝоггес бызьылыны кутскиз. Кузь йырсиез но сьӧраз ик лобе. Шудон азинтӥськиз, калык выльысь берпум кырӟан кылъёсты кырӟа, ӝоггес но ӝоггес. . . Пиос асьсэос палэнскизы ни, Еремеез азьпала лэзё. Соиз матэгес кариськиз, нош Неждана серекъяса вӧзтӥз ортчиз, тугокозэ тыбыр сьӧраз ватӥз. Гажанэ тугокоме куасьмытоз, Мынэсьтым егит дырме, Егит дырме дунъялоз!.. Малпамтэ шорысь Неждана султӥз Беглой азе но тугокозэ кияз лэзиз. Малпамтэ шорысь вуэм тугокоез Беглой мырдэм кутыны быгатӥз. Кырӟан чутрак дугдӥз, калык кынмиз кадь. Неждана кӧсэктӥз, киосыныз ымнырзэ ватӥз, ма лэсьтэмезлэсь ачиз кышказ. Беглой паймыса тугоко шоры учкиз - сяськаос пӧлы йырберыктон турын пунэмын. Нырысь Пётр сазьтӥськиз, Беглой киысь тугокоез ишкалтӥз но тылэ куштӥз, Нежданаез йырситӥз кутыса, гурт пала кыскиз. - Ӟечкыласько! - серектӥз Манет. - Тон юнме дырдэ уд быдтӥськы вылэм. Калык сураськиз, кышноос асьсэ понна супыльто, воргоронъёс но кырыж учкыло. Еремей мыкыртӥськыса огназ сылэ. Пересьёс та учырез умойтэмен лыдъяло, йырзэс шонаса, пичиосты гуртэ улляло. Беглой, боды ньылэм мурт сямен, ма карыны валатэк сылэ. Нежданалы но юрттыны уг быгаты, уг но кошкы. Пётр берытскиз, тылскем вӧзтӥ сопала-тапала ветлэ, шок-пуль шока, вожпотэменыз калык шоры учкылэ. - Мар-о, пиос? - кеськиз со. - Тырмоз кышноосын шудыны! А, пиос? Табере мыжыкъёсын шонаськом кӧня ке! - лекез озьы ик пальккаське. - Кин мон вылэ? Вань- а татын дӥсьтӥсез? Нокин но уг вырӟы, ваньзы валало, кинлы верамын со кылъёс. - Я, кин со сыӵе, мурт тугокоосты лушкась, мурт кенъёс шоры учкись? Беглой азе дугдӥз. - Нырдӥне вуиз ни та сьӧсь. . . - пинь пыртӥз сипыртӥз Манет но куртказэ кыльыны кутскиз. - Мон пото! Беглой сое дугдытыны малпа вал, нош соиз шоналскиз гинэ. - Сялӟы, мынам шато-каноен горд поясэ. Мон сое кисло-куслоез кадь куасалто. Адӟем уг пот со парсь ӝушез! Манет тылскем азьпала потӥз, куртказэ мышказ куштӥз, футболкаезлэн азяз - гольык Мадонна. Пётр дэремзэ ик куштӥз. Огезлэн лекез, мукетызлэн керӟегез потон сюрес шедьтӥзы. Гуртоос, инты сётыса, котырак султӥзы. Пётр кирос понӥз но жугиськон кутскиз. Лёва алдамтэ, куке но каратэен вырем ик: одӥг мултэс выростэк, туж ӝог ужа, мыжгамез но, мыжыклэсь палэнскылэмез но киноын кадь. Нош Пётр кудӟем мурт сямен киосыныз шонаське, тазьы учкыса туж капчи кадь сое вормыны. Озьы ке но, Манетлэн мыжыкез мугораз гинэ сюре. Кужымзы огкадь вылэм. Лёва усто палэнскылэ, но ачиз но бергась ки вукоез пасяны уг быгаты. Гуртоос асьсэ адямизы понна висё но мылкыдзэс кесяськыса но дэмланъёсын ӝуто. Нош Пётр со куспын сомында уг жугиськы, кӧня чаклаське. Тани со юри усьтӥськиз но Лёвалы мыжгыны сётӥз. Соиз эшшшо шумпотӥз, вылаз омырскиз - шӧдтэк шорысь аслыз пель дораз вуиз. Собере - татчыозь возем бадӟым кужымен - бамаз. Нырысьтыз вир пазьгиськиз. Манет гаӵоло усиз. Гуртоослэн шумпотыса кесяськон куспазы Пётр берытскиз, киысьтыз вирзэ штани бордаз ӵушылӥз но кошкыны дасяськиз. - Пётр! - алӥсь куараен пересьёс пӧлысь кин ке кеськиз. - Пётр, кидэ сёт! - пиос но кеськизы. Соиз мылпоттэк берытскиз, кыллись Манет доры лыктыса, кизэ мычиз. Манет, кӧтурдэсаз кариськыса, кисыысьтыз утчаське. Собере ик ачиз султӥз, Пётр шоры сьӧсь кадь учкиз но, Беглой мазэ-созэ валатозь, кизэ ӝутыса, баллонысь тушмонэзлэн ымныраз пазьгиз. Пётр уйжомыса палэнскиз, вӧсь луэмезлы чидатэк, лаптӥськиз. Собере пыдессинмыз быриз, киоссэ шеръяса, йырсазьтэк турын пӧлы усиз. Кышноос черекъяны ӧдъязы, воргоронъёс усем Пётр доры бызьыса лыктӥзы. - Вииз! Вииз, убир! Орина кенакез ӧте! Беглой Лёва киысь баллонзэ ишкалтӥз. - Нокин но кулэ ӧвӧл! - кеськиз со. - Ымнырзэ пылатэ но тӧл шоры выдтэ - час улыса ортчоз! - Манетэз китӥз кутыса, гурт пала кыскиз. - Мар-о, вормид-а, парсь? Кытчы гинэ уд чуртнаськиськы - ваньзэ паньсаськод. Со кизэ тыныд сётэ вал ук. . . Соиз, выжыос борды канжаськылыса, пыдъёссэ мырдэм выретыса мынэ. - Папуасъёс. . . - ӟукыртэ со. - Дышето мон цивилизациез яратыны. Еремей вазь ӵукна ик пӧйшураны дасяське вал, дораз Беглой лыктӥз. - Еремей, монэ но сьӧрад басьты. Пӧйшураны дышеты. Ыбылӥськыны уг быгатӥськы - армиын, кызь ар талэсь азьло, ыбылӥськи вал. Капкан коть пуктылыны, бурдоосты кутылыны ярало. Еремей койык кулэсь вурем сапегъёссэ кутча. Пальпотыса шораз учке. - Тырмоз ни мыным кышномурт ужез ужаны, - куре Беглой. - Ӝоген тани тол вуоз - соку ма каром, дась сиськись луэм уг пот. Пиосмурт уж кулэ. . . Еремей лулӟиз - жаль ышем нунал, таӵе юрттӥсен угось нюлэскын ачид но какалмод. Озьы ке но, мылпоттэк киыныз шонтӥз. Беглойлы бадӟым буш песьтэр сётӥз, ачиз мукетсэ, пичизэгес, сиён-юонэн пельпумаз ошиз, винтовказэ кутӥз. Черк шоры кирос кариз но нюлэс пала вамыштӥз. Мышсэ учкылытэк мынэ Еремей, Беглой сьӧраз бызьыса сямен дыртэ. Сьӧразы ик басьтӥзы гуртысь самой бадӟым Суслон нимо пуныез. Солэн сюрло сямен кокырскем быжыз кытӥ ке азьпалан адскылэ. Ӝуен шобыртэм музъем шуныт на, нош омыр уйёсы юзмыт луэ ни. Сӥзьыл уг шӧдӥськы на, кытӥ-отӥ гинэ ӵуж куаръёс адӟисько. Шӧдтэк шорысь пуны дугдӥз. Еремей, эскериськыны косыса, кизэ ӝутӥз но винтовказэ кутӥз. Беглой сак кариськыса учкиз ке но, номыре но ӧз адӟы. Каллен гинэ со Еремей пала вамыштӥз, винтовкаезъя солэсь кудпала мерттаськемзэ учке. Пыд улаз вай чигиз - соку Беглойлэн бадӟым курка быдӟа дукъя вайёс борды бурдъёсыныз кокаса лобиз. Еремей сялӟиськиз. Беглой янгыше усеменыз киоссэ гинэ шеръяз. Азьлань вырӟизы. Кӧня ке улыса, Еремей ӝуйы вылысь пытьыосты возьматӥз. - Луд кеч? Еремей чиньызэ ымдураз понӥз, берлань учкиз. - Нимызъя уг яра? - валаз Беглой. Тодаз ваиз, кызьы Тӧдьышуръёс пӧйшуръёсты ноку но нимзыя ӧз вераллялэ. - Кузь пель? Еремей йырыныз шонтӥз. Кӧня ке мыныса, со векчи писпуос вӧзы нальык пуктӥз, пушказ вандылэм сяртчы понӥз. Ӝыны час ортчыса, Еремей сялаез ыбиз. Таяз учыре Беглой шокатэк кадь сылӥз ни. Собере Еремей азьло пуктэм нальык дораз потӥз. Таяз луд кеч пуке, тэтчаса жадем ини, уг но вырӟылы. Еремей кизэ нальык пушкы лэзиз но сое пельтӥз поттӥз, пуртсэ кутыса, чыртызэ вандӥз, вирзэ лэзиз. Беглой синзэ воштыны быгатытэк, виясь вир шоры учке, ньылоныз кӧсаз. Со тодэ, татын луд кеч кырсь пӧйшур лыдъяське, соин ик вань вирыз мед кошкоз, пе. Еремей Беглой шоры учкиз но серектӥз. Секыт луд кечез ӝутӥз но чыртытӥз кусказ керттылӥз. Собере кирос понӥз, Беглойлы нальыкез басьтыны косӥз но азьлань вамыштӥзы. Нуназе пал гинэ нырысьсэ шутэтскыны пуксизы. Еремей сяртчы, сугон, ӵынатэм сӥль поттӥз, луд кечез вандэм пуртэн ик ваньзэ юдӥз но сиськыны кутскизы. - Кылзы ай, Еремей, - кутскиз Беглой. _ Мон юнме тонэн ӧй мыны ук. Лукаен но, Флегонтэн но ӧй мыны. Еремей ӧз но кылы кадь, сӥльзэ йыръе. - Быдэс гужем тонэн пиосмурт пиосмуртэн кадь вераськыны малпаса улӥ, нош кудпалласянь кутскыны ӧй тоды. . . - киыныз шонтӥз Беглой. - Тӥни ведь Инмар кызьы тупатӥз: Балянсинэ мон вуи тон отын дыръя, тон сьӧры мед мыном но тон монэ кулонлэсь мед утёд. . . Нежданаез мед пумиталом. . . Нюлэскын пуны лангетэ - сёрез яке коньыез уйылэ, дыр. Соослэн кузы вуымтэ на, соин ик Еремей пуныез котьку берен ӧтьылэ. - Зэмзэ верало, уг тодӥськы, ма марым. . . Тон сое яратӥськод, нош мыным - оло, берпуметӥ шумпотон. Мон со сярысь малпатэк но турттӥ ни - уг луы. Еремей кынмем кадь ымнырзэ Беглой пала берыктӥз - шораз ик учке кадь но - уг адӟы. Султыны кутскиз, Беглой но азяз султӥз. - Ойдо кенешом, мар карыны. Весь тазьы уз луы ук. Еремей шораз учкытэк музысь кык сюро саниксэ ӝутӥз. - Тон мар?! - Беглой берлань чигназ. - Ӧй возьма вал тынэсьтыд!.. Еремей сое пельпумтӥз юн-юн кутӥз но мышказ сэрпалтӥз. Соку ик ыргетэм кылӥськиз но вайёс вискытӥ гондыр потӥз. Суслон пунызы вылаз ик ошиськем, берлань кыске. Гондыр пуныез сэрпалтыны турттыса, сопала-тапала выре. Адямиосты адӟыса пештырскиз, куинь пиньёссэ возьматӥз. Бер пыд вылаз султӥз но тэтчиз. Еремей чигнакуз гылӟыса усиз, гондыр вылаз омырскиз пачкатӥз, собере сое тӥяны, кесяны кутскиз. Пуны висказы пырыны турттэ, гондырез куртчылэ. Ваньмыз - юнме. Беглой интыяз ик кынмиз кадь.Пегӟоно-а, кинэ ке ӧтёно-а шуыса - пыдыз палдэм винтовкаез ӵыжыны шедьтӥз. Куалекъясь киыныз сое кутӥз но, вань кужмысьтыз кеськиз: - Берла-а-ань!!! - гондырлэн ымныраз ыбиз. Соиз кӧшкемыт кеськыса султӥз, йырыныз шона. Со куспын Еремей улысьтыз потӥз но мышласянь чырты выжыяз саниксэ донгиз. Гондыр усиз, султыны выре на вал, ӧз быгаты ни - чалмиз. . . Беглой гондырез чакласа кема сылӥз. Собере капчияк мур шокчиз, шонерскиз но ӟигартэм луиз. Кышкаса сыӵе жадем, пӧсямзэ ӵушыны но кизэ ӝутэмез уг луы ни. Еремей султыны выре. Кузё солэсь тыбырзэ зол гинэ кесям. Отын сӥлез дӥсеныз ӵош юдэсэн-юдэсэн ошкемын. Беглой Еремейлэсь суйзэ пельпумаз поныса ӝутӥз, гурт пала вамыштӥз. Еремей золгес ӝуштыны ӧдъяз, соку Беглой сое тыбыр вылаз ныпъяз. - От даур. . . - секыт шокаса вераз. - Тазьы ик нуллом огмес огмы - я тон монэ, я мон тонэ. . . Беглой гуртэ вуэ куштэм кадь пӧсяса вуиз. Вань коркаосысь кышноос но нылъёс потӥзы, собере воргоронъёс Беглой вылысь Еремеез басьтӥзы но, корка пыртыса, скамья вылэ понӥзы. Быдэс корка тыр калык люкаськиз, вӧсь луэмез миськыны чылкыт ву ваизы. Неждана кагаз кадь ӟаректыса, Еремей вӧзы пыдес вылаз султӥз, солэсь кизэ аслаз кияз кутӥз. Кунултыса кӧшкемыт, пелляськись Оринаез ваизы. Тулыс Беглоез но Манетэз со пыд вылазы султытӥз. Орина сюсьтылъёс ӝуатыны, ваем турынъёссэ парыны косӥз но ваньзэ улляз. - Кыдёкысь зарезьын, Буян шормуӵын, пӧсь тӧдьы Алатырь из кылле, - нукыртӥз пересь, - со Алатырь из вылын чебер ныл сылэ, вуриськись, усточи, андан вень возе, буртчин сӥньыс писъя, виресь сӧсырмем интыосты вуре.. Андан кошкы, нош тон вир эн вия. . . Калык корказе люкаськиз. Беглойлэсь нокин номыр уг юа: гондыр сӧсыртэмъёсты угось ваньзылэн адӟылэмзы вань. Кышноос Беглойлы но мурт вирез миськыны ву ваизы. Беглой синмыныз Нежданаез шедьтӥз. Со ваньмызлэсь палэнынгес сылэ, синву пыр шораз учкиз но йырзэ ошиз. Беглой но Лёва Еремейлэн мунчояз пыро. Пӧртэм-пӧртэм турын паремен пӧсь сётъяло, шокчыны ик секыт. - А-а-а! - кеське Лёва, ассэ кызьпу веникен шачкетыса. - - Ага-га-га-га!!! Тани мае мон татын яратӥсько - со мунчо! Валало та ужез сволочьёс! Беглой лапча вылын турынэн зыраське. - Сӥзьы-ы-ыл! Зарни сӥ-изьыл!.. - кырӟа шумпотыса Манет. - Ӝоген нюр кынмоз!.. Басьтом асьмеос лэчыт Синмо Утисез но кошком та пеймыт шаерысь. - Ӧвӧл, Лёва, - шуиз Беглой. - Кошким ке но, номыр но ум басьтэ. Умоен кошком. Манет нап бус пыр паймем ымнырзэ возьматӥз. Оскытэк учке: уг шоккеты-а, пе. - Тон мар, Беглой?.. Урмид-а?.. Малы-о асьмеос татчы чуртнаським? Экскурсие-а? Тон ачид ук монэ татчы валтӥд! Ӧжыт гинэ ӧм чоньдэ! Мар понна?.. Мынам тыронэ ӧвӧл ук Мускоын - тынад! Со оброс пул быдэс лимон сылэ! - Татын солэн дуныз мукет, Лёва, - йырыныз шоназ Беглой. - Со коньдонэн уг лыдъяськы. - Со поплэн нылыз тынэсьтыд йырдэ берыктӥз-а? - Мон азьло но оскисько вал. . . - Кулэ ӧвӧл! - кеськиз Манет. - Кылэм уг пот! Адӟем уг пот, куке дусымъёстэс азьвыл валютаен сётъясь "мерседесъёсын" черке пыртыны нулло! Куке президент ас уллёеныз черкын сылэ, патриархлэсь кизэ чупа - ӧскеме потэ! Куке оскон сярысь алдасько - ӧскеме потэ! Э-э, - Манет кык чиньызэ ымаз донгиз. - Мон но пылатэмын! Мон но оскисько! Оскисько, Инмаре! - кирос понӥз. - Но пилем вылысь пересьлы ӧвӧл! Оскисько вылӥ кужымлы, дунне визьлы, кудӥз радиацилэсь, СПИД-лэсь но визьтэм политикъёслэсь утёз! Оскисько! Только Инмармы асьмелэн пӧртэм! Мон шонерак оскисько - отчы! - вӧлдэт шоры возьматӥз. - Мудоръёстэк но юись попъёстэк! Мон оброс пулъёс сьӧры бызьылэмлэсь азьвыл МИФИ-ысь куинь курссэ быдтӥ, ӧд тоды-а? Малпаськод, Лёва Манетэн вордӥськиз? "Теория расщепляющихся материалов!" Мон тодӥсько, малэсь дунне лэсьтэмын, котькуд куар, модос. Озьы ик тодӥсько, ваньмыз тузон гинэ пурӟыса кылёз! Ма соку, шат та папуасъёсын мынам одӥг Инмаре? Беглой изъёс вылэ ву кисьтӥз. Пӧсь тӧдьы бус тачыртыса ӝутскиз но вань мунчое вӧлскиз. - Пыжод! - Манет выж вылэ усиз. - Инмар ваньмызлэн одӥг! - шуиз Беглой. - Бен. "Озьы уз луы, малы ке шуоно, луыны уз быгаты". Мукет номыр вераны. . . Тыныд валэктонэз ӧвӧл ук. . . Асьмеос пулъёсты ӧм лушкалэ, утим соосты! - мукет пал ласянь кутскиз Манет. - Сисьмысалзы ваньзы юнме. Нош али калык адӟе. Татын ӧвӧл ке но, мед, Америкаын яке Занзибарын соос ӧз быре, соос вань! Тон художник ук, ё-моё, мынэсьтым тросгес валаськод. Сыӵе чебересь макеос нюр интыосын быро! Калыклы возьматэмед уг пот шат? - Пул бордын чеберлык ӧвӧл - шуиз Беглой. - Тон вӧсяськыкузы синъёсазы учкы. Тӥни кытын чеберлык. - Утись мынам! - ма вераны шедьтытэк, кеськиз Манет. - Уг сёт! Мон со понна курадӟон пыр потӥ! - Эшшо кулэ на, - Беглой горыса пӧсь изъёс вылэ нош ву палькке. Манет черекъяса, кымесыныз ӧсэз донгыса, мунчоысь лобӟыса потӥз но пужмертэм турын вылтӥ эктыны кутскиз. Коньывуон толэзе музъем кынмиз, нюръёс но шуръёс йӧэн кортнаськизы, нош шуркынмонэ ваньмыз лымыен шобырскиз. Омыр кезьытэныз уг суты на, но ымысь бус потэ, ваньмыз толлэсь вуэмзэ возьма. Пеймыт луэм бере, Беглой дӥсяськыса педло потӥз. Азьло сямен дась лёгем сюрес вылтӥ ӧз мыны, лымые выйылыса нюлэсэтӥ вамыштӥз. Пуныос татын адями шоры утыны дышемын ӧвӧл - пумитало но келяло чал-чал. Баӵколэн корка укноосаз чагтыл дырекъя. Беглой гид сьӧры султӥз но лушкемак укноос шоры учкылэ. Ачиз шумпотыса пайме - кызь ар улыса, солы нош кылдӥз укно улын сылыны но минутъёсты лыдъяса шугъяськыса возьмаськыны: потоз-а, уз-а, яке укноос кысозы но солы, кор берыкъям бере кадь жадем макелы, берен дораз бертоно. Ӧс усьтӥськиз, корказе Еремей потӥз но гурт шортӥ дор палаз кошкиз. Кӧня ке улыса, нош ик лымылэн ӟукыртэмез кылӥськиз - Неждана луд кеч шубаен, йыр вылаз гинэ понэм кышетэн гид пала бызе. Сэрегез сьӧры кожиз но Беглой шоры мырӟиськиз, кышкаменыз каллен гинэ кеськиз. Соиз нылэз кутӥз, ӟыгыртӥз но дыртыса кезьыт бамъёссэ, пельпум вылаз лэзиськем кышет улысьтыз йырсизэ чупаны кутскиз. Неждана сое донгиз но вамышлы чигназ, котырес синъёсыныз кышкаса учке. - Мар тон?.. Сьӧлык ук со!.. Ноку но озьы эн лэсьты ни, а то уг пота ни дорад! - Уг ни, уг ни. . . - Осто. . . - нылаш киоссэ ӝуась бамъёсаз понӥз. - Баӵко шӧдоз, юалоз, нош мон алданы но уг быгаты! - Еремей ветлӥз-а? - Бен. . . Жаль со. Возьыт но. . . Пуке, уг куареты, синъёссэ ватэ. Мон но учкыны уг дӥсьтӥськы. Озьы ик пуким. . . Валатскиз, дыр, - пытьыостэ адӟиз, - Беглойлэсь мур пытьыоссэ возьматӥз. - Нош Пётр тодӥз ке - осто Инмаре, кудмес ке виёз ведь. - Нежданае мынам. . . - каллен гинэ, кышкатонтэм понна, Беглой йырсиоссэ маялляз. - Мон малпасько вал, улон ортчиз шуыса, мар вал - со вал, возьманэз номыр. Нош Инмар мыным та быдӟа шуд сётӥз. . . - Шудо ум луэ асьмеос, - Нежданалэн мылкыдыз ӧвӧл, куараез нёрмыт, тани-тани синкылиосыз потозы. - Мон синучконэн тунай. Кык синучконъёсты ваче пуктылӥ, кык сюсьтыл ӝуатъяй. . . Нокинэ ӧй адӟы - тонэ но, Еремеез но. Монашка кариськоно луоз, дыр. . . - Ма, тӥляд со синучконъёсысьтыды астэ но уд адӟы, - серектӥз Беглой. - Нош атай туннэ Еремейлы нош сюан сярысь поттылӥз, - Беглоез кылзытэк вераз нылаш. Вуоно арняе кураны косӥз. . . Мар каром, уг тодӥськы. . . - викыштӥз со. - Эн лыкты вал тон татчы, медам пумиське вал. . . - Неждана, кылзы ай, - шуиз Беглой. - Тодӥськод на-а, верад вал, кызьы кык яратӥсьёс черк азьын, вань калык азьын, ваче ки кутскыса, баӵко азе пыдесъяськизы? Ӵуказе Пятница*, ойдо асьмеос но, калык люкаськем бере. . . - Ум!.. Ум, мар тон! - кышкатскиз нылаш. - Малы юнме курадӟонэз! Ваньзэ оглом лэсьтом. - Уг! Уг! Уг! Уз лэзе асьмелы! - Неждана корка пала чигназ. - Озьы умойгес луоз - калык азьын но, Инмар азьын но. Лушкаськисьёс сямен, тазьы ватскыса уломы-а, мар-а? Ачид шуид ук - Еремей валатскиз, ӝоген ваньзылы тодмо луоз. . . Ӧз лэзьы ке - Еремейлы бызёд, нош мон син азяд уг пота ни. . . - Уг дӥсьты мон. . . - Мон ӵуказе ачим дорад лыкто, - шуиз Беглой. - Кин ке потӥз, - Неждана корка пала берытскиз. - Пыроно ни мыным. . . Беглой китӥз кутӥз. - Вераським-а? Ӵуказе уд кышка-а? - Пётр! - туж зол кышказ нылаш. - Лэзь, адӟоз! - Беглой киысь ишкалскиз. - Вераським-а? Ӵуказе уд кышка-а? - Я, мар луоз, луоз. . . - каллен вераз Неждана. Беглой киысьтыз лэзиз но нылаш корка пала пегӟиз. - Кытӥ ветлӥськод?! - лек юаз Пётр. - Гидэ ветлӥ, ыжпиослы турын сётӥ. . . Пётр азьлань вамыштӥз, сэрег сьӧры ватскем Беглой вӧзы ик султӥз, котырак учкиз но берлань берытскиз. Дораз бертыса, Беглой чагтыл ӝуатӥз но тыл тэтчась шоры пальпотыса учке. Шӧдтэк шорысь киосыз Неждана зын шуыса шӧдӥз - кызьпу пучылэсь пукетэм вуэн со йырсизэ миське, угось. Беглой киоссэ ымныр бордаз лякиз, собере чагтылзэ мудор пала нуиз но пыдесъяськиз. - Инмаре, - шуиз со. - Тани со мон, сьӧлыко адями. Тон тодӥськод, кызьы мон улӥ: весь пегай кинлэсь ке, мар ке но утчай. Тонэ утчасько шуыса ӧй тодылы, Инмаре! Тани мон нош сыӵе луи, кыӵеен дунне вылэ вордӥд: чылкыт лул-сюлэмын мискинь но быдэсак тон киын. Инмаре, мон ноку но, номыр но тынэсьтыд ӧй курылы, али нырысьсэ курисько: юртты, Инмаре, юртты милемлы!.. Ӧс усьтӥськиз, кезьыт тӧл чаг тылэз кысӥз. Чуме Манет пыриз, тушсэ пужмер басьтэм. - Тырмоз чаг сутыны - кызетӥ даур азбарын! - кеськиз со. - Лёва вераз, мед луоз югыт! Югыт луиз! - бадӟым фонарик ӝуатӥз. Электротыл пеймытэз вандӥз, кор висъёсысь ӝуйыез оброслэсь пильылӥськем буёлъёссэ югдытӥз. Беглой султӥз но, озьы ик пальпотыса ӝӧк сьӧры пуксиз. Манет шораз паймыса учкиз но, тамаксэ кенжытыса, шораз ӵын кульчо лэзиз. Беглой номыре валасьтэм мурт сямен сылэ. Лёва солы быдэс пачказэ мычиз. Соиз басьтӥз но кенжытӥз, собере ымысьтыз тамаксэ ӝогак басьтӥз но паймыса шораз учкиз, собере - Лёва шоры. - Кытысь? - Сайкад, иське! - йыбырттӥз Манет. Инмарлы тау! Ӟеч ӵукен тонэ! - "Буранэз" шедьтӥд-а? Кызьы-о? Кытысь-о? - Кызьы?.. - серектӥз Лёва. - Мон быдэс арня нюлэскытӥ бызьылӥсько ни, тон гинэ кытӥ ке лобаськод!.. Мон соку ик тулыс ик малпай: кыдёкын луыны кулэ ӧвӧл, - валэктыны кутскиз со. - Еремей кужмо ке но, малпасько, кӧня-о со кыкнамес вылаз нуыны быгатысал? Ну, мон пересьёслэсь юаськи: инкуазь та палан шукыръяське-а? Соос веразы, дас ар талэсь азьло, пе, тӧлпери вал, дуннелэн пумыз вуиз шуыса малпамы ни, пе, вал. Палэнтӥ кошкиз, трос писпуосты погыръяз. Кудпаланзэ возьматӥзы. Кынтэм бӧрсьы мон со пала мынӥ - вить час гинэ мынонэз. Уд йыромы - тӥяськем писпуос кыдёке кыстӥсько, котькызьы ветлы, шораз ик мырӟиськод. Мон кузяз мынӥ но учкисько: сылэ! Сылэ, мусое! - шумпотыса серектӥз Лёва. - Сыномем гинэ кӧня ке. Нош Потехинлэн тӥрлыкез но, вӧез но вань. Ӝыны час вӧсяськи - усьтонзэ берыктыны кышкаса. Улытозям нырысьсэ вӧсяськи, мед ужалоз шуыса! Свечаоссэ тылын вози, пӧсен тыри - улӟиз! Улӟиз! Пусъёсыд но интыяз! - мыжыкеныз вань кужмысьтыз Беглойлэн пельпумаз кока. - Всё! Пумыз вуиз! Тырмоз, курадӟим! - со тэтчиз, пуконэз ӵыжиз, чагтылъёсыз сэргы сэрпалтӥз но, пыд улысьтыз ваньзэ тӥяса, корка пумтӥ бызьылыны кутскиз. - Тау та коркалы! Тырмоз, Беглой, эрик!! Султы! куас пытьыея со интые уй куспын вуом! Соос ӵукна гинэ шӧдозы - нош асьмеос кыдёкын ини! - Мон уг мыны, - шуиз Беглой. Лёва лёгиськыны шонтэм пыдыныз интыяз ик кынмиз. - Тон мар. . . шузимид-а ни?! Мон тон понна берытски ук! Мон соку ик кошкыны быгатысал, ӝыны сюресэз ортчысал ни, нош мон вить час берлань лыктӥ!.. Тон самолётысен ик тае ваньзэ кӧшкемыт уйвӧтэз сямен вунэтод. Уйвӧт та! - киоссэ паськыт шонтӥз. - Одӥг карта вылын но нокыӵе Тӧдьышур ӧвӧл. - Вань, - йырзэ шоназ Беглой. - Уйвӧт ке но - сайкаме уг пот. - Со нылаш понна-а?.. - паймиз Манет. - Басьты сьӧрад! Ӧз мыны ке - керттылом, нуом. Лэсьты соин Мускоын ма мылыд потэ. Отын со тыныд куинь нунал куспын акыльтоз, татын тынад чылкыт омырлэсь йырыд берга! Эн алда астэ! Тон цивилизованной адями, валаськод, вазь-а, бер-а но, шедьтозы таосты. Геологъёслэн яке пожарникъёслэн самолётсы лобоз - и всё! Журналистъёс, тодосчиос вуозы - ӧвӧл ни тынад Тӧдьышуред. . . Ваньзэ тае Беглой вала, но та сярысь малпаськытэк тырше. Бадӟым дунне дырын- дырын ачиз сярысь тодаз вайытэ ик. Сайкыт куазь дыръя уй пала Транссибирской коридоретӥ туж вылӥетӥ лобись бадӟым самолётъёс адско. Нош огпол, нюрмульы бичакуз, Беглой истребителен куштэм ошон бак шедьтӥз. - Ӧвӧл, мон тонэ татчы уг кельты! - ӝутыны турттыса Лёва сое ӟыгыртӥз. - Султы, шуисько. Беглой серектӥз, Лёваез ӟыгыртӥз но тыбырзэ вешаз. - Тау, Лёва. . . Номыр но эн вера ни, ява. Тон уд вала. Мыным умой татын. Павел пие гинэ уг тырмы. Быгатӥ ке, мон сое татчы ваё. . . Нош тон мын. Эн дырты гинэ - йыромод. Сьӧрад нокин но уз уиськы. . . Одӥг гинэ куронэ вань - кылдэ сёт, та интыез нокинлы но эн вера. Вунэты. Уйвӧтэз сямен. . . Я, ӟеч лу!.. Беглой Лёваез ӧс дорозь келяз. Лёва ӧс кусып сьӧры вамыштӥз, берпуметӥзэ мышказ учкиз но - гуэ усем сямен пеймытэ ышиз. Вазь ӵукна ик, шунды ӝужамлэсь азьло, гуртоос черк азе люкаськизы - кышноос но нылъёс тӧдьы кышетъёсын но зыбынъёсын, воргоронъёс чылкыт дэремъёссы вылтӥ воштӥськон шубазэс дӥсяллям. Коркаосысьтызы семьяосынызы йӧно пото но бускельёсынызы ӟечъясько. Неждана ӵыжы-выжыосызлэсь палэнынгес сылэ. Беглоез адӟыса, ӵыж-ӵыж луиз. Дораз мыныны малпа вал но, интыысьтыз вырӟыны ӧз быгаты, синъёсыз гинэ шораз кышкаса учко. Беглой дыртытэк калык пӧлтӥ ортчиз, Нежданаез китӥз кутӥз но черк пала вамыштӥз. Калык чалмиз но сюрес сётыса чигназ, паймыса Пётр но нырзэ ошем Еремей шоры учкыло. Беглой шӧдэ, кызьы Нежданалэн киыз куалекъя. Черк вӧзы вуизы но ӧс усьтӥськиз, азязы Никодим баӵко потӥз - ымнырыз кӧсэктэмын, пурысьтам йырсиез пештырскемын. Неждана куалектӥз но берлань чигназ. Никодим баӵко шоразы шузимем, адӟисьтэм синъёсыныз учкиз, одӥг вамыш вамыштӥз но гаӵоло усиз. Гуртоос ваньзы ӵош сазёмизы но баӵкоез лымыысь ӝутыны бызизы. Беглой Нежданалэсь кизэ лэзиз, бызьыса черке пыриз. Ӧс куспы дугдэм Беглой шоры обросъёс мӧзмыт учкизы. Иконостас шорын, кытын вал лэчыт синмо Утись, кӧшкемыт сьӧд пась. Нокин но Беглоез янгыш ӧз кары, нокин но номыр солы ӧз вазьы. Шораз но ӧз учке - ваньзы кайгуэ усемын. Анайёссылэн ки вылазы нонӥсь нуныос но чалмизы. Собере воргоронъёс кенеше люкаськизы но Еремей, Пётр но Лука, куас вылэ султыса, выль пытьы кузя кошкизы. Беглой но сазёмиз. Корка бызьыса пыриз но куасъёссэ басьтӥз. Кайгырись гуртоос но кагаз кадь ӟаректэм Неждана шоры берпуметӥзэ учкиз но пӧйшурасьёс сьӧры мынӥз. Соос ог-огзы сьӧры дыртыса бызё. Беглой пӧйшурасьёсты сутӥз, шоразы вазиз, огзы но ӧз берытске. Мырдэм сьӧразы мынэ, кӧня ке улыса, кыльыны кутскиз но собере пӧйшурасьёс син азьысьтыз ышизы. Дыртоно ӧвӧл, Балянсинозь кужым кулэ луоз. Пӧйшурасьёс нош лушкаськисез шунды пуксьытозь сутыны малпало вал, ӧз тодэ угось, Лёва "Буранэз" шедьтӥз но вань кужмысьтыз газовать карыса кошке ни шуыса. Беглой куиньназэс ик пӧйшурасьёсты куас пытьы бырем интыысь шедьтӥз - татысен паськыт гусеница пытьы кутске. Матазы вуыку, Еремей Балянсин гурт пала юаса кадь возьматӥз. - Ӵуказе ӝытозь вуоз, - вераз Беглой. Уз йыромы. Мон сюресэз пусйи,- ӵабыштэм пужым шоры возьматӥз. - Балянсинысь самолётэн гинэ потыны луэ. Самолёт арняяз кык пол лоба. Удалтӥз ке, отысь шедьтом сое. Ӧм ке - мон со сьӧры лобо. Тодӥсько, кытысь сое утчаны.Утисез одно берен ваё, Балянсинозь гинэ монэ вутты! Пӧйшурасьёс, ваче султыса, кӧня ке кенешизы, Беглой палэнын сылӥз. Тани со пала берытскизы. - Тон соин мынод, - шуиз Пётр. - Тӥ ӵош луоды, ог-огдылэсь вамышлы но уд кыле. . . Сюрес азязы вӧсяськыса, Еремеен Беглой пытьы кузя кошкизы. Пётр но Лука бӧрсязы кема учкыса сылӥзы, сьӧразы кирос тырыса, берен Тӧдьышуре берытскизы. . . Еремей вань кужмысьтыз мынэ. Беглой кыдёкегес кыле ке, калленгес вамышъя, чидатэк мышказ учкылэ. Пунызы нош кыдёкын азьпалан бызе. Дырын-дырын луд кечез яке коньыез шӧдыса утэ но пайме, малы кузёез сое адӟем уг кары. Пеймыт луэм бере гинэ Еремей бадӟым пужым доры кожиз, мур гыркысьтыз чугунэн пытсаса кельтэм куасьтэм нянь, сылалтэм сӥль но гондыр ку, тылскыны кызьпу туй поттӥз. Куасэн лымы гу гудӥзы но отчы выдӥзы, вылазы лымы куашкатыса, гондыр куэн шобырскизы, пунызы вӧзазы ик выдӥз. Ӵукна пеймытэн ик султӥзы но азьлань вырӟизы. Беглой дырлэсь ортчемзэ ӧз вала ни, пумем пыдъёссэ мырдэм выретэ, куддыр гуэ кадь куашкалля - пыд йылаз умме усьылэ. Собере сайкиське, тол нюлэсэз но Еремейлэсь винтовкаен тыбырзэ адӟе. Соин ик уг вала - час-а, кык-а яке быдэс уй кӧлӥз, оло, огдырлы гинэ синзэ кыньылӥз. Нош ик синзэ кыньылэм бераз Еремей шоры мырӟиськиз. Гусеница пытьы вамен "Буранлэн" дӧдьыез сылэ, котыраз буш канистраос кыллё. Берпуметӥ бензинзэ поныса, Манет "Буран" бордысь секыт дӧдьыез куштыса кельтэм. Жадеменыз Беглойлы омыр уг тырмы, вуысь поттэм чорыг кадь шока, соин ик тыоссэ кынтӥз. Куинетӥ нуналаз кызыны кутскиз, кер-кор шоканы ӧдъяз, вуэ куштэм кадь пӧсяз. Озьы ке но, номыр куаретытэк, робот сямен Еремей сьӧры мынэ. Кӧлыны дугдэм беразы, Еремей сое кыӵе ке турынъёс парыса сектаз но, кыӵе ке сутӥсь мазен мугорзэ зыраз. Ӵукна Беглой, катьтэм ке но, тазалыко султӥз. Балянсинэ акшан вакыт вуизы. Гостиницалэн укноосыз улын куинь "Буран" сылэ, соос пӧлысь огзэ Беглой тодмаз. Водкаен тырмытэм ӝӧк сьӧрын Лизавета кузё, кыӵе ке кудӟем пӧйшурась но Потехин пуко. - А, со но тани! - Беглоез адӟыса, шумпотӥз Потехин. - Нош монэ нюлэскысь ӧтизы, "Буранэд", пе, вуиз! Мон мукетсэ басьтӥ вал ни! Малы мыным кык! Берпалы бадӟым ке но, одӥг ук! Ну, ӟечом-буром! - ӟыгырскиз но тыбыраз вешаз. - Нош ми тӥледыз ватӥм ни вал. Быдэс арня утчам. Петрович котькытӥ лобаз, собере лымы усиз, тӥледыз согиз шуыса малпам. Пуксьы, улӟемдэ миськом! Со понна куасьмылытэк юоно - выльысь вордӥськид ук. . . Беглой шоры мукет дуннеысь вуэм мурт шоры кадь котырес синъёсыныз учкыса, Лизавета выль чаркаос ваиз. - Шедьтӥд, иське, Тӧдьышурез? Лёва татын куинь нунал юиз, ваньзэ вераз. . . А, Еремей! - киыныз шонтӥз пӧйшурасьлы. - Тон, иське, Тӧдьышурын улӥськод? Тылскем котыртӥ бызьылӥськод? Дас ар тодмоесь - куное коть ӧть вал, нылъёстэс кырманы. . . Беглой кунэрскыса сылӥсь Еремей шоры учкиз. - Кыӵе Тӧдьышур? - паймиз со. - Кызьы? - шуак луиз Потехин. - Быдэс гурт, кызьы тон соку верад вал. - Лёва супыльтӥз-а, мар-а? - серектӥз Беглой. - Со институтын докладлы дасяське. Казённой уксёез таркам, отчёт кулэ. Умой малпам!.. - ӝӧк ултӥ Еремеез донгиз, соиз серектэм кариськыса, пиньёссэ возьматӥз. - Нюръёс шуназы, соин ик гужемзэ Еремей дорын пуконо луиз, выльысь кынтытозь. . . Ну, Лёва! - йырыныз шоназ. - Нош ачиз со кытын? - Ӵукна "Скорая помощь" вуылӥз. Одӥг пияшез балян кесям. Тӥни со ваиз. - Потехин кудӟем пӧйшурась шоры возьматӥз. - Быдэс интыез ик ӧвӧл. . . Соосын Букачачае лобиз. - Уд тодӥськы-а, отысь Муское рейсъёс вань-а? - Покчи арняе Хабаровскысь пуксьылэ кадь. . . Мар нунал асьмелэн туннэ? - Потехин борддор вылэ ошем календаре учкиз. - Тӥни, ӵуказе луоз. - Нош Петрович ку луоз? - Ӵуказе ик, шуиз. Ачим но возьмасько, патрон ваёз. . . Ох, шумпотӥсько тон понна! - нош ӟыгыртӥз Беглоез. Потехинлэн соргетэмез улсын кӧлыны выдыкузы, Беглой сюлэмшугъяськыса Еремей шоры учкиз. - Дугды ай. . . Нош уксё? Уксёмы асьмелэн ӧвӧл ук, со зынмем Букачачаозь но. Нош Муское ке лобӟоно? Еремей йырыныз шонтӥз но потӥз. Час пала улыса, кынмем мешокен вуиз, кытын ке матын писпу гырке ватэмын вал, луоз. Валес вылэ гурезь мында уксё кисьтӥз: банкысь пачкаос но озьы гинэ резинкаен керттэм коньдон. - Кытысь? - шултӥз Беглой. - Та мар, кылемез люкаськиз-а? Асьмеос узыр вылӥськеммы!.. Нош эксэйлэнъёсыз ӧвӧл-а? - серектӥз со реформалэсь азьло уксёосты адӟыса. - Таоссэ сэрпалты, куамын ар уг ни ветло таос. . . Табере со валаз, малы Еремей пальпотыса учкылӥз лушкаськись приемщик шоры: куосыз понна солэн сётэм пичи уксё но солы чыртыозяз тырме, юнме нуллонтэм понна, кылэмзэ ватоно луэ. "Кукурузник", нырзэ урдыса, куас вылаз шур дуре дугдӥз. Тӧллэсь ватскыны турттыса, Беглой Еремейлы валэктэ: - Малы тыныд лобӟыны кулэ? Татын монэ возьма! Тон отын номыре но уд тодӥськы ук! Еремей со шоры возьматӥз, собере ачиз шоры, кык чиньызэ ӝутӥз но кырыме кырмиз: "Ӵош луом, вамышлы но ум люкиське". Вератэк но валамон вал, адэ ке но васьконо луиз, со сьӧраз мыноз. - Я, соку мынӥм! - шонтӥз Беглой. Петрович ӧссэ усьтӥз но Потехинлы патронъёсын ящик сётӥз. - Улӟид? - кеськиз со Беглойлы. - Соку али инме тубод!.. Самолёт музъем бордысь ишкалскем бере, Еремей скамья борды вань кужмысьтыз кырмиськиз но, пичи мурт кадь паймыса, писпу йылъёс, кибы быдӟа гинэ кылись коркаос, киыныз шонась адями шоры учке. . . Городэ вуон азязы Петрович аэропортэн герӟаськиз но Беглойлы бадӟым чиньызэ возьматӥз. - Вуиськом! - кеськиз со. - Мон кури, ӝутсконэз кӧня ке мед ӝегатозы шуыса. Тӥни Москваысез сылэ,- улӥын сылӥсь лайнер шоры возьматӥз. - Тынэсьтыд, марым. . . - Луоз, луоз! - Беглой пельпумаз чапкиз. - Тау, Петрович! Выльысь лобӟыкуд, милемыз эн вунэты, кузьымен вуом. "Кукурузник" аэропорт вӧзы ик султӥз. Бадӟым самолёт шуласа двигательёссэ шунтэ. Еремей кӧшкемыт корт тылобурдо шоры учкиз но кирос кариз. - Тӥни со! - кеськиз Беглой. Манет берпуметӥ пассажиръёсын трап кузя тубиз но пушказ ышиз. - Бызим! Со лыдӟытэк гинэ уксёзэ касса укное донгиз: - Кык - Мускоозь! - Паспорттэс вае, - кассир кизэ мычиз. Беглойлэн ньылоныз ик кӧсаз. Ӝыны ар куспын со вунэтыны вуиз вал ини, дунне вылын паспорт вань шуыса. - Тодӥськод-а, апай, - укное мычиськиз со. - Милям паспортмы ӧвӧл. Но милемлы туж та рейсэн кошкыны кулэ. . . -Ыштӥды-а, мар-а? - Ӧй. Мон соин тылскем аратӥ, - зэмзэ вераз Беглой. - Нош солэн, - Еремей шоры возьматӥз, - ноку но ӧй вал. - Тӥ татын эн котыръялэ! - кассир берен уксёзэ берыктӥз. Инмар вылэм на - кыкетӥ пилотэн ӵош аэропортэ Петрович пыриз. - Юртты, Петрович! - омырскиз Беглой. - Паспортъёс ӧвӧл. . . - Лэсьты, Люда, - вераз соиз кассирлы. - Адями али гинэ улӟиз, паспорт ӧз вуы на лэсьтыса. - Ох, Петрович, пытсэт улэ вуттод монэ. . . - йырыныз шоназ но билетъёс сётӥз. Стюардесса возьма ни соосыз. - Тӥ Балянсинысь-а? Вуиды, иське! Ойдолэ, - потон пала нырысь ачиз вамыштӥз. Еремей корт утчась арка улэ пыриз гинэ - соиз жингыр! вазиз. Со кышказ, шымырскиз. - Кисыосады мар-о? - юаз милиционер. - Кортты вань-а? Уксё? Пурт? Час? Еремей буш кисыостӥз утчаськиз. - Кирос со! - валатскиз Беглой. - Солэн мӧляяз - кирос. - Кыле киростэс но выльысь ортче, - косӥз милиционер. Нош Еремей кык киыныз ик дэрем улысьтыз киросэз борды ӝабырскиз. - Кушты! - косӥз Беглой. - Кык вамыш гинэ ортчод но тани татчы - берен басьтод!.. Инмарлы оскись со, валаськоды-а, - милиционерлы вераз. - Кироссэ кылемез уг луы! Милиционер йырыныз шоназ: - Паспорттэк, эшшо жингыртэ на! Оло, со гранатаосын ветлэ! - Ну, тӥледды! - стюардессалэн чиданэз быриз. - Тӥ татын котьма каре, ми лобим. Озьы но кызь минутлы ӝегам ни! Кӧтыз уродэн учке Беглой инбаме ӝутскись самолётлэн пытьыез шоры. - Вить час улыса, Утись мускоын луоз, - Еремейлы вераз со. - Нош асьмеос тонэн йырин быдэс арня ӵоже поездэн зуркаса мыном. Беглой кӧлон вагонэ кык билет басьтӥз. Вокзалысь ик аслыз но Еремейлы городын нуллон дӥсь но сиён-юон басьтӥз. Купеын ик дӥсьсэ воштӥз но пӧйшурась азе джинсы, свитер, куртка понӥз. - Дӥся. Еремей яркыт дӥсь шоры юрдыса кадь учкиз но йырыныз шоназ. - Тон мар, Мускоетӥ ку дӥсен калгыны малпаськод-а? Сьӧрад калык уллёен ветлоз но чиньыеныз донгалоз! Тонэ нырысетӥез ик милиционер кырмоз но толэзь мында кылдэ юаса возёз - кытысь, кин, малы паспортэд ӧвӧл. Уд адӟы ни Утисьтэ! Калыклэн син шораз йӧтыны кулэ ӧвӧл, валад-а? Шорамы ӧжытгес учкылӥзы ке, умойгес луоз. Еремей, мылпоттэк ке но, дӥсьсэ воштӥз. Ул дэрем улысьтыз Беглой кулэсь вурем пуйызэ адӟиз. - Таиз мар? Еремей пуйызэ басьтӥз но Беглойлэн кияз патронъёс кисьтӥз. - Да-а. . . - шултӥз Беглой. - Умой коть, аэропортын ӧз утчаське. . . Котьма шу - чебер! - дунъяз со, джинсыен Еремеез синучкон азе донгыса. - Йырсиед но модной - ӟуч стиль! Поезд вырӟиз. - Табере кылзы. . . - Беглой пуксиз Еремей азе. - Мон гажасько тынэсьтыд оскондэ, но асьмеос шуге-леке сюрим. Мыным тон вераськисен кулэ. Куддыръя ке но. . . Тӧдьышуре вуим ке, нош чалмод, нош али мыным куарадэ кылоно. Мон тонэн юнме супыльтыны уг малпаськы, тон маке юаны яке вераны мед быгатод, валаськод-а? Еремей куаретытэк шораз учке. - Асьмеос Муское мынӥськом, тон уд тодӥськы, ма со Муско! - куаразэ будэтыса вераз Беглой. - Тон троссэ уд валаськы, нош мон уг тодӥськы, мае тон уд валаськы! Утисез шедьтэмед потэ ке, вераськы!.. Никодим баӵколэсь юасалыд ке, со но озьы ик шуысал!.. Я, вера, монэ валад шуыса? Я! Юа мар ке!! - Тон табере весь-а озьы кесяськод? - гань-гань юаз Еремей. Вить нунал ӵоже мынытозязы, Еремей ӵукнаысен ӝытозь укно дурын, тодмотэм дунне шоры учкыса пукиз. Со Балянсинын адӟылӥз ни самолёт но снегоход, электротыл, радио но трос мукет мае ке. Нош Лука яке Пётр луысалзы ке, секытгес, дыр, луысал. Беглой но укно сьӧрысь дунне шоры, ачиз валатэк, Еремейлэн синъёсыныз учке. Красноярскез адӟыса, Еремей сямен ик, сюлэмшугъяськыны кутскиз. Город ӵынлэсь изьы дӥсям, кожалод. Обь дурын пароходъёслэн шайвылзы, Волга дурысь нефть кыскись машинаосты но инвисозь кыстӥськись лултэм кырвылэз адӟыса, сюлэмаз кышкан пыӵаз. Сызрань дорын вагонэ сисьмем курег пуз зын пырем бере, дасо пол, оло, кирос понӥз. Еремеен ӵошатыса, Беглой вала, самой кышкытэз азьпалан на - Мускоын. Поезд вазь ӵукна Казанской вокзалэ вуиз. Беглой но Еремей сьӧд пальтоен проводница сьӧрын тамбурын сыло. Беглой пӧйшурась шоры жалясь синъёсын учкиз - соиз синъёссэ кыньыса вӧсяське, Инмарлэсь кужым, выль адӟонэз чиданы куре. Зуркась, зын вагон кызьы ке но герӟа на вал угось Тӧдьышурен, нош али пырак Антихристлэн улосаз пыре. Адӟонэз нырысь вамышысен ик кутскиз. Час пик шуон дыр вал. Кӧлымтэ лек калык кузьыли мында, дыртыса мынэ, пумитазы мать карыса тележкаосын нуллӥсьёс чуртнасько. Кин ке чемоданзэ нюж кыске, сюрслэсь трос пыдъёс асфальт борды шарккето, динамикъёс кесясько, машинаос куара сёто. - Зол возиськы! - кеськиз Беглой. Площадь вылэ потӥзы. Татын поездлэсь кылись пиосмурт висказы чуртнаськиз но киоссы лэзиськизы. Еремеез вуберганын кадь бергатӥзы но сюрес вылэ потӥзы. Интыысьтыз вырӟись такси шораз ик шултӥз. Берен тротуаре берытскем интые, Еремей азьлань бызиз, ӧжыт гинэ машина питыран улэ ӧз сюры. Соку ик пробка кылдӥз, Еремей машинаос вискытӥ визьтэммыса солань-талань берга, собере киоссэ инме ӝутӥз но тормозъёс ӟукыртэмен нокинлы кылӥськонтэм куриськон кесяськыса, асфальт вылэ куалекъяса пыдесъяськиз. Светофор дорысь постовой дораз лыктыны кутскиз. Беглой адямиосты донгаз но Еремей доры солэсь азьло бызьыса вуиз, китӥз кутӥз но метрое кыскиз. Ӵынэн тырмем омыр Еремейлэсь шоканзэ пытса. Соос музъем улэ васькизы. Эскалатор азьын, улӥе васькись тубат шоры учкыса, кышкаса юаз: - Мон отчы пырыны кулэ-а? - Эн сылы гинэ - лёгалозы! - Беглой сое пыд улысь кошкись тубат вылэ кыскиз. Сьӧд пасьысь дыбыртыса поезд потӥз. Беглой Еремеез калыкен тырмем вагонэ туйназ, ачиз мырдэм гинэ тэриз на. Тём-тём пеймытын тылъёс бызьыло. Еремей котыр эскериське. Котыраз - кулэм муртъёс, лултэмъёс сямен вагон выремъя шонасько. Пи но ныл ӟыгырскыса кынмем сямен сыло, огзы шоры огзы учко ке но, уг адӟо. Анай кӧлӥсь чорыг кадь, ымзэ усьтыса пуке, пыдес вылысьтыз вож нуныез котырак кыньылӥськисьтэм синъёсын учке, пустышказэ ымысьтыз куштэм. . . Азбарын со воргоронъёс ик азьвыл сямен домино жуго. Машина но озьы ик подъезд азьын сылэ, гужем куспын вылаз тузон пуксем но иворъёс лякылыны пул луэм: "Лялька! Ми киное кошким!", "Матюха - козёл!", "Ельцину - нет!", "Цой - жив!" Машиналэн питранъёсыз лэзькемын, асфальтэ выем кадь адӟиське. Беглойлэн комнатаез печатен пытсамын. - Ӝог асьмелэн улонысь ӵушо! - Беглой печатен кагаззэ кесиз, ӧс вылысь усьтонзэ шедьтӥз но усьтыса пыриз. Выж вылын пичи пиен гожъям кык тетрадь лист кылле. "Атай! Анай шуэ, тон, пе, кулӥд, нош мон тодӥсько, берытскод шуыса. Берт ӝоггес но басьты монэ соослэсь! Павел!" Адрес. Телефон. "Мон возьмасько тонэ. Телефонэз котьку азьло ӝутӥсько". "Атай! Кытын тон? Соос монэ 20-тӥ шуркынмонэ нуо! Ӧд вуы ке, лыкты Америкае". Англи кылын адрес: Лос-Анджелес, штат Калифорния. . . Беглой учкиз электро час календарь шоры: 19.11.9ч.30м. Ӝӧкысьтыз машиналэсь усьтонзэ но документсэ поттӥз. - Монэ татын возьма, - косӥз Еремеез. - Нокытчы но эн пота, ноикнлы но эн усья. . . - Мон тонэн мыно, - шуиз Еремей. - Тон гинэ отын уд тырмиськы! - лулӟиз Беглой. Со нош дышиз ни ӝог мынӥсь Муско улонлы но сюлэм вылаз усе Еремейлэн гань-ганез. - Тонэ юнме медаз адӟылэ, валаськод-а? Кык час улыса вуо! Еремей йырыныз шоназ. Валаз ке но, Беглоез дорысьтыз вамышлы но уз лэзьы. - Чёрт тонэн!, - сётскиз Беглой. - Огзэ тод: мон вератэк, эн но вырӟылы. Мар гинэ уг лэсьты, мар гинэ уг вера, кызьы гинэ уг алда - эн куареты! Татын мон пӧйшурась. . . Лёва дорын юондыр, кудӟемъёс куашето, нылъёс чиректыло. Беглой ог вить минут пала жингыртӥз, мырдэм кылӥзы. Чылкыт мычиськем Лёва ӧсэз усьтӥз но, Беглой мазэ-созэ валатозь, бордаз ӟыгыръяськыны омырскиз: - Беглой!! Пегӟиз! Нош мон малпасько ни вал, уйжомиз но отчы кылиз шуыса. Тонэ мозмытыны экспедиция бичаны малпасько вал. Нош мон арня юисько ини, уг оскиськы, бертӥ шуыса. Унитаз вылэ пуксисько но шумпотыса бӧрдӥсько - Манет синвузэ ӵушиз. - Еремей! - горектӥз со, пӧйшурасез адӟыса. - Тон но пегӟид-а? Усто! Адями кадь улод коть! - Еремеез ӟыгыръяз, нош соиз уг но вырӟылы, синъёсаз гинэ лек тылгизьыос тэтчало, Лёваез интыяз ик кекатысал. Лёва кудӟеменыз номыре но ӧз шӧды. - Нош мон верасько - уг оско! Одӥг парсь ӝуш но уг оскы! Серекъяло! Ойдо, - комнатае кыкназэс ик ӧтиз, - вералэ, Манет уг алдаськы шуыса! - Дугды, - вераз Беглой. - Кытын Утись? - Таиз шонер, - чиньызэ ӝутӥз Лёва. - Табере мон тодмасько тонэ! Нырысь ик - уж. . . - Шонаськыса соосыз кухняе нуиз, холодильникысь курег поттӥз, солэн пушкысьтыз - коньдон. - Тон Царевичез тодӥськод ук. Пулэз адӟиз но - усиське вал. Нош уж коньдон дорозь вуиз но, кутскиз ук карусель. Ӝыны нунал керетӥм. Пул миллион грин сылэ, нош со мырдэм ӝынызэ сётӥз. Но сомындазэ но али нокытысь уд шедьты. Тон умойгес донгысал, дыр, но, кин тодӥз, сыӵе ӝог вуод шуыса. Таиз тынад люкетэд. Пунэм тырондэ Царевич куштӥз но тани дас сюрс кылиз на. Лыдъя- огзэ но ӧй быдты, тонэ возьмай. . . Беглой пачка долларъёс поттӥз. Еремей шоры учкиз. - Дунтэм-а? - юаз Лёва. - Умой, умой, - шонтӥз Беглой. Кӧня ке малпаськыса сылӥз. Ма уродэз луыны быгатэ вал - луиз. Со уг тоды, кызьы табере Царевич киысь обросэз ишкалтоз - тӧдьы узвесь солдатикъёсын сейфлы укшась квартираысь - Кылзы, Манет, тынад пыӵал- тӥрлыкен вырисьёсыд вань-а? Пушка шедьтод-а? Глушителен. - Малы тыныд? - Кулэ. Только ӝоггес. Вужез кулэ ӧвӧл, валад-а? Ог кызё патрон. - Тодӥськод-а кӧня сылоз? - шултӥз Манет но чиньыеныз омырын кӧня ке нольёс гожтӥз. Беглой пачкаысьтыз ӝыныезлэсь ӝынызэ ӝӧк вылэ куштӥз. - Тырмоз-а? Маиз кылёз - тынад, комиссионной. Ӝыт вуо, басьто. . . - ӧс пала кошке ни вал но дугдӥз, Манетэз пельпумтӥз кутӥз. - Тани мар на, Лёва. . . Тон милемыз ӧд адӟылы, вераським? Ачид но шып пук. - Мар сыӵе? - шуэрскиз Манет. - Тӧдьышуръёс адямиоссэс лэзиллям. Тонэ утчало, Лёва, - жаляса кадь вераз Беглой. - Со, Лёва, ментъёс но чекистъёс но ӧвӧл, кема уз вераське. Тодӥськод на-а, кызьы сёрлэн синмаз йӧттӥзы. Озьы ик тонэ но някыртозы. Пукиськод, водка юиськод - дзинь! Укноын пась, пуляед - йыр кобыад, - Манетлэн кымсаз чиньыеныз коказ. - Ӵуказе, оло нош, ар улыса. Возьма. . . Мон верай вал, лушкаськыны уг яра шуыса, нош черкысь - туж бадӟым сьӧлык. Лэчыт Син - со ваньзэ адӟе. Соин ик дугды шулдыръяськемысь, астэ ачид буре ваёно ни. . . Манетлэн мылкыдыз куашказ. Кышкаса лапырскиз но укно штораоссэ ворсалляны кутскиз. . . Кылемез вань на. 1