Верещагин Брангуртын. Григорий Егорович Верещагин - удмурт калыклэн дано пиез - 1891-тӥ арын 11-тӥ коньывуонэ туала Кез ёросысь Ойыл (Полом) удмурто -ӟучо гуртын огшоры музъем ужен герӟаськем семьяын вордӥськиз. Сарапулысь реальной училищеез йылпумъяса, солы дышетӥсь луыса ужаны оскизы. Ог кызё ар пала со туала Шаркан ёросысь Сосновка, Шаркан но Ляльшур школаосын ужаз. Аслаз верамезъя, улон-вылон ласянь шуг-секытъёс кылдэмен сэрен, мыноно луи,пе, черке ужаны. 1895-тӥ арысен 1900-тӥ арозь Алабга (Елабуга) черкын диакон луыса ужа . Г. Верещагинлэсь вылӥ верам улон виссэ "зарни" вакыт шуыны луоз, малы ке шуоно, та дыр куспын туж трос удмурт калыклэн улэмез сярысь научной гожъямъёсыз потӥзы. Нош "Вотяки Сосновского уезда" но "Вотяки Сарапульского уезда Вятской губернии" ужъёсыз императорской ӟуч географической обществоен азвесь медальёсын пусъемын вал. 1889-тӥ арын Г. Верещагинлэн нырысетӥез удмурт кылын "Чагыр,чагыр дыдыке. . ." кылбурез нуны веттан калык гур нимын потэ. Литература удысын ужасьёслэн чакламзыя, та кылбур печатласа поттэм нырысетӥез рос-прос чеберлыко произведение луэ. Г.Верещагинлэн 1900-тӥ арозь улэм но творчество удысын сюресэз трос ке но, тырмыт эскеремын ӧвӧл на. Шӧдӥське, Брангуртын улэмез сярысь гинэ но ваньзэ ум тодӥське на. Та ӵектэм ужам мон удмурт калыклэн дунне адямиезлэсь Брангуртын улэм но ужам вакытсэ возьматыны тырши. Данакез со гурт калыклэн тодэ ваёнъёсызъя гожтэмын, кудъёссэ тодосчиос наукалэн куронъёсыз вылэ пыкъяськыса мед эскерозы на вылэм. Г.Е.Верещагин туала Пичи Пурга ёросысь Брангуртэ (Бураново) 1900-тӥ арын кузпалэныз Василиса Ивановнаен но Николай пиосыныз вуо. Черкын со Иван Васильевичез, тодмо удмурт этнографез, фольклористэз, миссионерез воштэ, кудӥз ужамын школаын но. Гуртэ вуэм выль мурт азьвыл священниклэн юртаз улыны интыяське. Со черк корка та дыре но сылэ на. Григорий Егоровичлэн Брангуртын улэмез сярысь мадемъёссы бускель Чутожмон гуртысь пересь кышномуртъёслэн но кылемын. Дарья Михайловна Кузнецова (1910 - 1994) но Евдокия Никитична Мерзляковаослэн верамзыя (1910 -1998) , отец Григориез, пе, туж яратӥськомы вал. Школаын со пиналъёсыз лыдӟиськыны, лыдъяськыны, озьы ик закон божийлы дышетэм. Мылысь-кыдысь эмъюм турынъёслэн кулэлыксы сярысь , кытысь но ку бичаны шуыса валэктылэм. Гурт калык люкам эмъюм турын-куаръёссэс Верещагинъёс доры ваё вылэм. Нош матушка Василиса Ивановна сюлмысьтыз ик тау карыса соосыз пыжиськемъёсын утялтылэм, мунё дӥсьёс лэсьтыны но шудыны базар басма чукъёс сётъя, пе , вал. Малпан кылдэ, Г.Верещагинлэн кузпалыз кибашлы, котьма лэсьтыны быгатӥсь кышномурт вылэм шуыса. Будзынналэ Чутожмонэ лыктэ, пе, вал но пиналъёсын ӵош гурт кузя мудорен ветло вылэм. Матысь Ильинск ӟуч гуртэ но вуыло вылэм. Кузнецова Д.М. но Мерзлякова Е.Н., Григорий Егоровичлэн Верещагинлэн дышетэм нылъёсыз, вань улонзэс сӥзиллям гурт ужлы. Дарья Михайловна ужамын колхозын кладовщик луыса, нош Евдокия Нпикитична - фермаын бригадирын, бырйылэмын УАССР- ысь Верховной Советэ депутатэ. Чутожмон гуртысь одӥгезлы умой дышетскись нылашлы Бегишева Клавдия Андрияновналы (улонысь кошкемын ини) Г. Верещагин гожтыса книга кузьмаз. Та синмпель кузьым книгаез туж лякыт утьыса возе Клавдия Андрияновналэн нылыз Бегишева Мария Николаевна. Одӥгез удмурт тодосчимы - Брангурт пи Константин Михайлович Баушев - потэмын Верещагинлэн ки пыртӥз. Солэн визьнодамезъя тодмо лингвист луэ. Ужа Ленинградысь Герцен нимо пединститутын. Баушевлэн дышетэм студентъёсыз А. Поздеева, В. Алатырев озьы ик тодосчиос луизы. Солэн ик ки пыртӥз потӥзы тодмо артистъёс: Б. Безумов, Г. Соловьёв, Н. Бакишева, В. Загуляева но мукетъёсыз. Отец Григорийлэсь улонзэ 1917 арын ортчем революция тарказ. Сое черкысь улляло, озьы ке но Брангурт калык сое уг кушты. Ас дораз улыны Титов Кирьян Антонович (Баӟа Кирья) пыртэ. Ужа черкын, нош школаын дышетыны Григорий Егоровичез уг ни лэзё. Солэсь колаын дышетон ужзэ Иван пиез азьланьтэ, нош со бӧрсьы- Евгения Васильевна Ливанова ("Удмуртия" телерадиокомпаниысь С. Верещагин операторлэн анаез ). Граждан ож - Григорий Верещагинлэн улоаназ - шимес вакыт. "Гордъёс" вуо ке, черкын ужаськод шуыса, сое ултӥяло. Калык верамъя, ыбыны но пуктӥллям вылэм, но кин ке но дурбаьстэм, озьы гинэ батюшко улэп кылем, нош диаконзэ тӧл вуко пала, бусые нуыса, шашкиен кораллям. Нош "тӧдьыос" ке вуо, гурт калыкез "югдытӥсь" шуыса, нош ик сантмало. Таӵе ултӥямъёслы чидатэк, батюшко Коньгашур нимо нюкын ватскыса улэм. Вераськон мынэ Изӝутон нюкын но шуыса. Ксения Григорьевна Тунцаревалэн (1911-1998) но Иван Андреевич Баушевлэн (1923) верамзыя (улонысь кошкемын ини). Г. Верещагинлэн семьяез туж ик ванё-буро, тырмыт ӧз улы, но тау калыклы, маин быгатӥзы юрттӥзы батюшколы. Эшшо но секыт улон-вылонэз отец Григорийлэн 1925-1927 аръёсы. И. Баушевлэн верамезъя, та аръёсы, вуэ, пе, татчы кыӵе ке но егит Мамаев поп. Солэн зӥбемезлы но ултӥямезлы чидатэк пересь удмурт батюшко черкысь кошконо луэ. Г. Верещагинлэн черкысь кошкемез, Брангурт улосэн люкиськонэз но луиз. И. Баушевлэн тодэ ваёнъёсызъя, со, пе, Брагуртысь 1927 арын кошкиз. Сое Максим Митрей (Петров Дмитрий Максимович) келям. Книгаоссэ но печатлам бумагаоссэ кык туж бадӟым коробъёсы лач-лач тырыса келяллям. Озыьен, Брангуртын гожъямъёсыз солэн ӧжыт ӧй вал, дыр. 1917 ар бере, Г. Верещагин вань сюлэмзэ сётыса аслаз калыкезлы югыт сюрес усьтонэ пыриське. 1918 арын аслаз дышетэм пиеныз К. Баушевен удмуртъёслэн И съездазы пыриськиз. Г. Е. Верещагинэз удмурт писательёслэн "песятайзы" шуиськом ке, мон малпамея, сое Кедра Митрейлы но Кузебай Гердлы литературной кирос атайзы шуыны луоз. 1911 арын Брангуртэ вуылэ Кедра Митрей, пумиськылэ Григорий Верещагинэн. Мар сярысь соос вераськизы, асьмелы тодмо ӧвӧл, но вал, дыр куспазы бадӟым вераськон, визьнодаз, дыр вуоно писателез, бакель кариз но кулэ ӧре валтӥз. 1919 арын Кузебай Герд Брангуртэн артысь Яган-Докъя гуртэ вуылэ. Со вакытэ отын дышетӥсь луыса К. Баушев ужа. Григорий Верещагинэн Кузебай Герд но К. Баушев одно ик пумиськылӥзы, дыр, малы ке шуоно, соос удмуртъёслэн И съездазы но огазьын вал. Вераськон мынэ 20-30-тӥ аръёсы Кузебай Герд Брагнуртысь ШРМ-е но вуылэ шуыса. Улонэз котькыӵе секыт мед луоз но, Г. Верещагин творческой но научной ужъёслэсь уг палэнскы. Брангуртын улон вакытаз, удмурт калыкез югдытон удысын тыршемез вераны луонтэм бадӟым. Пӧртэм изданиосын потэм ужъёсыз гинэ дасолэсь уно. Нош кӧня меда кылё на соос пӧртэм архивъёсын, библиотекаосын, кунгож сьӧрын. Поттэм ужъёслэн аръёссы тодмо, озьы ке но ми ум пусйиське соосты Брангурт ын улон вакытаз гожтэмын шуыса, ваньзэ 1900-1927 аръёсы печатламъёссэ но рос-прос эскерыны кулэ на. Брангурт калыклы дуно "Деревня Бурангурт" очеркез, кытын автор тупен-тупен, котыр ласянь гуртмылэсь кылдэмзэ, улэм-вылэмзэ, музъем узырлыксэ, пӧртэм инмаръёслы оскемзэ эскере, фольклорной материал вылын калыклэсь лулчеберетсэ возьматэ. Брангуртъёс данъясько удмурт калыклэн дунне адямиеныз, Григорой Егорович Верещагинэн. Сюлмысьтызы ик гажаса пусйизы соос вордӥськем дырысеныз 140 но 150 ар тырмонзэ. Та ужрадъёсы ветлӥзы ӵыжы-выжыосыз, тодосчиос, писательёс, дышетэм пиналъёсыз. Туэ одӥгез выль урамлы Григорий Верещагинлэн нимыз сётэмын. Г. Е. Верещагинлэн улон но творческой сюресэз палдуресгес эскеремын нашуим ке, ум янгышалэ, дыр, тужгес ик Брангуртын улон вакытэз. Ми малпамъя, со вакыт бадӟым "тӧдьы вишты" луэ. Соин ик тодосчиослы, писательёслы солэн улэм но ужам интыосаз туж кулэ вылэм кылдытъяны ӧриос, кудъёссэ бурд улазы мед басьтысалзы учёнойёс, мед юрттысалзы материал люкан ласянь ужзэс радъяны. Нырысетӥ удмурт кылбурчилэн, тодосчилэн, калыкез югдытӥсьлэн Григорий Егорович Верещагинлэн вордӥськемез дырысен сю витьтон ар тырмемезлы сӥзем ужрад Пичи Пурга ёросысь Брангуртын но ортчиз.Та дано адями сярысь таяз учыре пинаоъёс мадизы. История наукаосъя кандидат Л.С. Христолюбова пиналъёслэн ужъёссылы туж вылӥ дунъет сётӥз. Одӥгеныз, Ольга Конюховалэн уженыз, тодматскыны дэмласьком тӥледлы но. 1 Галина Романова "Вӧсям но вӧсьёсмы кабыл мед луоз. . ." Кылем арын гужем, христиан оскисьёслэн Петров день шуон нуналазы, мон ветлӥ Алнаш ёросысь Кузёбае, отысь калыклэн Куала но Луд вӧсьёсаз. Удмурт вӧсьёсын азьвыл мон тодматски вал пӧртэм книгаосысь лыдӟыса гинэ. Соин туж адӟеме потӥз вашкала дырысен кыстӥськись зэмос удмурт вӧсез. Отысь адӟеме потӥз асьме калыклэсь дунне шоры учконзэ, лулпуш дуннезэ. Вӧсьёс ортчизы лачмытак гинэ, нокыӵе мултэс вераськонъёстэк, индылонъёстэк. Кузёбайёс отын ӵӧж но така вандыса, ӝук пӧзьтыса, ӵош сӥзиськизы асьсэлы, семьязылы, нылпиоссылы, гурт калыксылы тыр, шудо-буро, ог-огеныд тупаса, ӟеч улон курыса. Угось дунне вылын солэсь но бадӟымез мар вань на. Вӧсьсылэн пумаз, ваньзы ӵош пыдесъяськыса, кыре кулэмъёслы сьӧр тылыс вӧсям каризы. Озьы буре ваизы ожмаськонъёсын быремъёсты, гуртсылэн палэназ кулэмъёсты. Вӧсьёссэс ортчытон нуналзы тупаз гужем туж кысык дыре - турын дасян вакытэ. Озьы ке но, гуртысь кык сю пала семья пӧлысь ог дас куатез тубизы Куала вӧсязы. Соос кысык вакытэ лыктыны быгатымтэос понна но сӥзиськизы. Угось удмурт калык ужез ноку но сьӧлыкен ӧз лыдъялля, Инмарен кӧтыд уз тыр, Инмарлы оскы но, ачид но эн нырулы шуылӥз. Нош кузёбайёс ватсало на: ужан - со алама ӧвӧл, адями веран - сьӧлык. Кузёбайёс араз ньыль пол вӧсясько. Нош куинь арлы огпол луэ на Булда вӧсьсы. Монэ паймытӥз соиз: вань вӧсьёссы ортчыло христиан праздникъёс вакытэ. Куала вӧсь - Паскае, Петров но Покров нуналъёсы. Булда вӧсь но Луд вӧсь - Петрове. Сюлам ӝож мылкыд но каръяськиз вал ини - иське, удмуртъёс уг тодо ни кыӵе вакытъёсы ортчытъяло вылэм вашкалаос вӧсьёссэс, соин ик соосты христиан праздникъёсын тупатӥзы. Собере умой-умой малпаськыны кутски. Христиан оскон ведь вашкала язычкство шуон оскон бере кылдэмын. Оло, христиан праздникъёс тупатэмын язычество осконэн? Бугыръяськонъям, ки улам сюриз Анатолий Васильев тодосчилэн "В поисках "второго мира" книгаез. Отын вашкала дырысен пӧртэм гожъямъёс вылэ пыкиськыса, дунне вылысь вань осконъёс сярысь пыр-поч мадемын. Тужгес но бадӟым саклык висъямын христиан осконлы. Зэмзэ но, христианъёлсэн кироссы но (вашкалаос кӧс писпу ваез ваче кирос кадь карыса зыраллязы но тыл поттылӥзы), сюсьтылзы но (вашкалаос тыллэн кужымезлы оскизы, лек периосты, висёнъёсты уллян понна, инмаръёссы азьын сюсьтыл ӝуатъяллязы), молитваоссы но (вашкалаос кыллэн кужымезлы оскизы), обросъёссы но (вашкалаос пӧртэм арбериослэн кужымзылы оскизы), гырлы жугонзы но (Ассириысь куинь сюрс ар талэсь азьло кисьтэм гырлы шедьтэмын. Вашкалаос оско вылэм, сьӧд кужымъёс гырлы куаралэсь кышкало шуыса) - ваньмыз басьтэмын язычникъёслэсь. Сыӵе лек кылын табере вера соосты христиан духовенство, вашкала осконъёсты мыскыл карыса. Христиан праздник нуналъёс но тупатэмын вылэм вашкала язычникъёслэнэн. Кылсярысь, туала Паска нуналэ, тулыс вашкала славянъёслэн вылэм ӟеч ю-нянь, таза пудо-живот куриськон вӧсьёссы. Со нуналэ соос курег пуз буяло вылэм но инмаръёссылы кузьмало. Нош эшшо но азьлогес Египетын кулыса улӟем Осирис нимо инмарзэс тулыс праздниказы данъяса, ог-огзылы тазьы вазисько вылэм: "Осирис воскрес!" Срезиземной зарезьлэн шунды ӝужан палаз пӧртэм выжы калыкъёс уло вылэм, инмаръёссы но туж трос вылэм. Одӥгзэ Адонис шуиллям - музъем вылын вань будосъёслэн удалтонзылэн инмарзы вылэм со. Со, пе, кулэм но выльысь улӟем. Сое данъяса, адямиос ог-гогзылы тазьы вазиськылӥллям: "Адонис воскрес!" Сыӵе ик инмаръёссы вылэм ассириянъёслэн но, вавиланъёслэн но, персианъёслэн но. Нош асьмелэн, удмуртъёслэн, христиан Паска нуналэ Быдӟым нуналмы, тулысэз данъян вӧсьмы вань. Христиан праздникъёсты, йылолъёсты тазьы ваньзэ пыр-поч эскрыса потоно ке, ваньмыз пыкиське язычество вылэ, ваньмыз отысь асэстэмын. Соку малы кулэ вал вашкала осконъёсты, инмаръёсты мыскылляны, быдтыны? Малы ке шуоно, калыклэн осконэз бордын возиське кужымез, чеберлыез, дданэз. Трос калыкен кузёяськон, соосты ляльчи интыын возён, кылзӥськись карон понна, кулэ вал кыӵе ке одӥг гинэ кузёослы тупась осокн. Озьы малпаса кылдытэм осконъёс - христианство, буддизм, ислам, иудаизм - валтӥсь инты басьтыны кутскизы. Малы ке шуоно, соос ваньзы ӧтизы секыт улонэз чиданы, кылзӥськыны. Нош кӧня йыружъёс лэсьтэмын вал, кӧня калык быдтэмын вал Иисус Христослэн, Буддалэн, Мухаммедлэн нимынызы! Христиан черклэн одӥгез тужгес йыружез луэ Крестовой походъёсыз. Рыцарьлэсь дӥсьсэ дӥсяса, бадӟым киросъёс улын соос кык сю ар пала ожмаськизы. Быдтэмын, саптамын, мыскыллямын, таркамын вал туж трос калыклэн имнаръёсыз, осконъёсыз. Дунне вылэ "шонер инмарен ӟеч улон ваись " рыцарьёс ӧз жалялэ пиналъёсыз но, пересьёсыз но, нылкышноосыз но - ваньзэс олокызьы но вӧсь карылӥзы, коразы, нош добразэс, музъемзэс асьсэлы басьтылӥзы. Шунды пуксён палась рыцарьёслэн виресь киоссы сузьтӥськыны кутскизы славян музъем вылэ но. Но 1242 арын Чуд тылэн йӧэз вылын соосты дугдытӥз, пазьгиз Александр Невский князьлэн дружинаез. Собере Александр Невский луиз христиан оскисьёслэн святойзы. Солы тау карыса, черкъёс пуктылӥзы. Со, пе, православъёслэсь тушмонъёссэс пазьгиз. Но ведь рыцарьёс христиан осконысь ик кылдэм одӥг ваез вал - католикъёс. Иське, христианъёс ожмаськизы христианъёсын. Иисус Христослэн нимыныз, еретикъёс, ведӥнёс шуыса, туж трос визьмо адямиос тыл вылын сутэмын вал. Кылсярысь, асьмелы ӟеч тодмо таӵе нимъёс: Галилео Галилей, Николай Коперник, Джордано Бруно, Жанна д Арк но трос мукет. Испаниын гинэ тыл вылын сутэмын, быдтэмын вал 34382 адямиос, нош быдэс Европаын - 5 миллион пала. Ма, кылем даурлэн кутсконаз гинэ али черкын ужасьёс И.Сеченов, И.Мечников, Д.Менделеев бадӟым ӟуч тодосчиосты еретикъёс шуыса мыскыллязы, эскерыса-чакласа возизы. Ог-огедлэсь Инмарзэ, осконзэ адӟонтэм карон тужгес но зол ӝутскиз музъем вылэ одӥг инмаръёслы гинэ восяськон вӧлмем бере. Соос пӧлысь тужгес но бадӟымъёсыз - Иисус Христос, Будда, Мухаммед. Отчыозь котькудӥз калык чидаз мукетсэ, осконъёслы луыса бадӟымесь ожмаськонъёс ӧз ӝутӥськылэ. Дунне кылдэм дырысен адмиос вӧсяськылӥзы пӧртэм пумо трос инмаръёссылы. Котькудӥз тыршиз аслэсьтыз инмаръёссэ сӥлы карыны, соослы курбон сётылӥз. Оско вал уго, ӟеч инмаръёс адямиез жалялозы, солы улыны кужым сётозы. Малы ке шуоно, адямилы музъем вылын улыны котьку секыт вал. Со трос курадӟиз висёнъёслэсь, тушмонъёслэсь, сӧсь пӧйшуръёслэсь. Сиён-юон, дӥсь понна уен-нуналэн тыршоно луылӥз. Дауръёсын-дауръёсын кыстӥськыса, котькуд выжы калыклэн кылдӥз аспӧртэмлыко, аслыз гинэ тупась осконэз, дунне шоры учконэз. Со осконэз бордысь ик кылдӥзы аслыз гинэ тупась сямъёсыз, йылолъёсыз, кырӟанъёсыз, эктонъёсыз. Мон туж бер вордӥськи, кылем даурлэн витьтонэтӥ араз гинэ. Соин ик мыным адӟыны ӧз кылды ни Булай дорамы ортчылӥсь бадӟым Булда вӧсьмес но, гуртэн-гуртэн люкаськыса, Куала вӧсь ортчытонмес но, семья воршудмес но. . . Ваньмыз со мон вордӥськытозь кемалась, азьло ик ини христиан оскон ваисьёсын но Совето властен мыскылляса таркамын, быдтэмын, пазямын вал. Гуртысьтымы туала пересьёс песятай- песянайёссылэсь кылэмзэс тазьы верало: Булда вӧсе, пе, люкаськыло вылэм трос гуртъёсысь калык. Отчы сомында валъёсын вуылӥллям, соослэн сылэм бервылазы турын-куар но, пе, уг ӝутскы ни вал, вал думылон векчи писпуос но куасьмылӥллям. Малы ке шуоно, бадӟым вӧсьсы одӥг нунал гинэ кыстӥськылымтэ. Мыным адӟыны кылдӥз на Булда вӧсь арамаысь кылем бадӟым кызэз гинэ. Сое но гуртысьтымы пудо возьмась тыл тылскыса сутӥз. Собере ачиз но вӧсь карем, быдтэм кызэз сьӧры кошкиз - малпамтэ шорысь висьыса кулӥз. Озьы ик мыным адӟыны кылдӥз на бадӟым кыз вайёсысь пудо-живот йыркобыосты, басма юдэсъёсты. Тодӥсько на, кызьы мон, пичи маке, со кызъёс дорысь кӧшкемаса пегӟылӥ. "Пӧртмаськись" кыз уйвӧтам но пырылӥз. Со вакытэ кин ке лушкемен возе на вал, дыр, вашкала осконъёсмес, ассэ, семьязэ, оло нош быдэс гуртэз но утьыны тыршыса, инмаръёсмылы лушкем вӧсяськылӥз, луоз. Ми будӥмы синтэм коӵышпиос сямен, номыре адӟытэк, номыре тодытэк. Вашкалаосынымы герӟась герд чигиз. Пересь мемее но угось уг тоды ни вал, яке тодэ но, уг вера вал милемлы удмурт инмаръёс сярысь. Ачиз но со черке вал ини, гудыръян-чилекъян дыръя, инбамын озьы Илля Пророк сюлоеныз жуге шуыса вералляз. Нош ишанъёслы, пӧртмаськонъёслы, туно-пеллёослы туж оскылӥз. Библия - христианъёслэн но иудейёслэн сӥлы карон, священной книгазы. Зэмзэ но со адямилэн дунне вылын улэмез сярысь туж малпаськытӥсь, мур книга. Отысь котькудӥз аслыз маке но кулэзэ, сюлэмызлы матысьсэ шедьтыны быгатоз. Но соин ӵош ик мыным Библия люкетысь "Выль сӥзёнэз" лыдӟыкум трос юанъёс кылдо. Мынам куд-ог юанъёсылы отец Михаил тупен-тупен валэктӥз ке но, мон понна озьы ик валантэм, малы Иисус адямилы кулэм атайзэ ватыны лэзьымтэ, тазьы шуэм: "Асьсэлэсь кулэмъёссэс кулэмъёс мед ватозы, нош тон мын но Инмар эксэйлык сярысь Ӟеч Иворез тодытыса ветлы". Озьы ик валантэм Иисуслэн тазьы шуэмез но: "Эн сюлмаське лулды понна - мар сиём, мар юом, мугорды понна - мар дӥсялом шуыса. Лулды бадӟымгес ӧвӧл-а сиёнлэсь, мугорды - дӥськутлэсь? Учкелэ инмысь тылобурдоос шоры: соос уг кизё, уг арало, кеносазы но уг люкало, но Инмысь Атайзы сюдэ соосты. Тӥ соослэсь трослы умойгес ӧвӧл-а?.. Дӥськут сярысь но малы сюлмаськиськоды? Учкелэ бусы сяськаос шоры. Кызьы соос будо, уг ужало, уг черсо. . . Озьыен, эн сюлмаське, эн но шуэлэ: "Мар милемлы сиёно?", яке "Мар юоно?", яке "Мар дӥсяно?" Малы ке шуоно, ваньзэ тае язычникъёс утчало. Тӥляд Инмысь Атайды тодэ уго, ваньмыз таос тӥледлы кулэ шуыса. Нырысь ик Инмарлэсь Эксэйлыксэ но Солэсь шонерлыксэ утчалэ, нош ваньмыз мукетыз тӥледлы сётэмын луоз. Озьыен, эн сюлмаське ӵуказе нунал сярысь. . ." "Выль сӥзёнын" одӥг интыяз шуэмын: "Бамез чабкись муртлы мукет палзэ но пукты. Выл дӥсьтэ талась муртлы эн люкеты дэремдэ но басьтыны". Нош мукет интыяз аслыз ачиз ик пумит кариське, лекъяське: "Мынэсьтым тушмонъёсме, кудъёсыз мынам эксэйлыкелы пумит карисько, татчы Мон доры вае но Мон азьын жуге". Таӵе юанъёс трос гинэ люкасько. Мон чик пумит ӧвӧл черкъёслы, мечетьёслы. Дунне вылысь одӥг гинэ Инмар доры сюрес лёгыны, соин огкыл шедьтыны кулэ, дыр, пӧртэм осконъёс пыр. Но сюлэмме шугомытэ осконъёслэн ог-огзэс чидамтэзы, мукет осконъёсты ултӥ каремзы, мыскыллямзы. Соин ик мынам христиан оскон пыртӥ Инмар доры сюрес лёгеме уг поты. Нош кӧня удмурт калык черк пыртӥ кужмысь ӟучомытэмын вал! Солэн бервылыз ик ӧвӧл-а асьме калыкмылэн пумен ӧжытгес но ӧжытгес кылемез? Кин ке,оло, шуоз, бадӟым заводъёс пуктэмын вал, соин ик удмурт калык ӟучомыны кутскиз. Но ведь заводъёсты шор но лымшор удмуртъёс доры пуктылӥзы. Нош удмуртлык туннэ ке но соос пӧлын возиське на. Уйпал удмуртъёс черклэн гижыосыз улэ туж вазь сюризы. Табере тросэзлы соослы дунне: удмурт кылзэс, сямъёссэс, йылолъёссэс ултӥ каро, ӟучозь но вуэмын ӧввӧл на. Ма, тос дауръёсын вире пыӵам удмурт сямез озьы гинэ куштыны, палэнтыны уг луы уго. Кузёбайын Бадӟым Куала вӧсьын мон тодматски Огаш апаен (Курбатова Агафья Ивановна) - Бадӟым куа выжыысь мӧйы кышномуртэн, Зоя апаен (Дмитриева Зоя Шариповна) - Луд выжыысь кышномуртэн но Насьта апаен (Евдокимова Анастасия Карповна) - Булда выжыысь мӧйы кышномуртэн. Соос шуо, Совето власть вакытэ но, война вакытэ но, пе, Бадӟым Куалаын вӧсяськонмылэсь ӧм куштӥське, лушкемен ветлӥськом, пе, вал. Луд вӧсьёссылы гинэ кӧнялы ке вис луэм. Озьы ик кышномуртъёс черкез но мурт уг каро. Отын вӧсяськыны нокин но, пе, пумит ӧвӧл. Но черке, шуо соос, олокинэз но ветлэ, олокыӵе но малпасьёсыз но вань, дыр. Соин куддыръя отын пепыраногес, пе. Нош гуртэн ӵош, огкылысь кариськыса вӧсяськон сюлэмез небӟытэгес, мылкыдэз буйгатэгес, пе. Бадӟым Куала вӧсе Кузёбайысь удмурт кузпалъёсынызы ӵош лыктэмын вал ӟучъёс но: Борис Семёнович Сурин но Анатолий Моисеевич Семакин. Соос городын ке но уло, котькуд ар, пе, огаз ке но вӧсе вуыны тыршиськом. - Милям ӟучъёслэн но азьвыл таӵегес ик вӧсьёсмы валл, - жаляса шуо соос, - кытысь ке палэнысь ваем христиан оскон турказ-быдтӥз сыӵе ӟеч сямъёсмес. Милемлы кузёбайёслэн вӧсьёссы туж ярало, матын пото. Озьы веразы ке но, Бадӟым Куала вӧсяськон арамаысь потыкузы, соос кирос тыризы. Воргоронъёсты со понна нокин номыр ӧз шуы - озьы ик кулэк адь. Кузёбай вӧсь дыръя мон син азям пуктӥ асьмелэсь вашкала-вашкала улон дуннемес. Али сямен ик, котьмаиз вал, дыр отын: курадӟон но, шумпотон но, бӧрдон-ӧбкелён но. Одӥгез гнэ ӧй вал, дыр: куректон адзьын пыдесъяськон, куректонлэсь йырвизьдэ ыштон. Соку угось адямилэ азьланезлы осконэз бадӟым вал: одно ик юрттоз солы Инмарез, Воршудэз, Кылчинэз, Коркакузёез. . . мурт дуннеысь ваем оскон удмуртлэсь вӧсь куалаосссэ гинэ ӧз тарка-быдты, солэсь со лулсюлэмзэ, улон сюрлы ёззэ чигтӥз. Ма, удмуртъёслэсь гинэ шат? Ӟучъёс но, трос мукет калыкъёс но асьсэ чеберлыксэс, йӧнлыксэс ыштӥзы. Куасалскем муртэ угось котькызьы куасаны луэ ини. Малы ке шуоно, адями йыроме, выжызэ ыштэ. Та пумысен йырам мертчыса сямен кылиз Башкириысь Удмурт Татышлы школалэн директорезлэн тазьы верамез: - Милям ноку но ӧз дугдылэ удмурт вӧсьёсы ветлэмысь. Совето влвасть но, война но, сютэм аръёс но ӧз люкетэ, ӧз кышкатэ. Нош алигес ӵыжак выль вӧсь куала но мечеть пуктӥмы. Гуртамы уго кызь корка бигер семья но улэ. Нылпиос мӧйыосын ӵош удмуртъёсыз куалае ветло, бигеръёсыз - мечете. Оскоды оло уд, ява, нылпиос кыӵе ке зӥбытэсьгес, малпаськисесьгес луизы. Дышетскыны но ӟечгес кутскизы. Мон сямен, адямилы осокн туж бадӟым кужым сётэ. Но со кышкатыса, кужмысь карыса медаз оскы, аслаз мылкыдызъя, аслаз сюлэм куремезъя. Инмар одӥг. Со доры мынӥсь-нуись сюресъёс пӧртэмесь. Али музъем вылын тросэз Инмар доры сюрес шедьто ислам, иудаизм, буддизм, христиан осокнъёс, сектаос пыр. Котькудзылэн соослэн Инмар доры вуттӥсь сюрес вылазы юрттӥсьёс сыло: черкъёсын, мечетьёсын, храмъёсын, сектаосын ужасьёс. Соос котькудӥз асьсэ инмарзэс ушъяло, вылӥе пукто, нош мукетъёссэ ултӥяло. Но уг луы шат Инарез яратыны черкъёсын, мечетьёсын, храмъёсын ужасьёстэк? Мон сямен, Инмар сюлмад мед луоз. Христиан оскон вылэ пыкиськыса, олокыӵе но сектаос кылдылэмын. Соос адямиез эшшо но йыромыто, быронэ но вутто. Соин ик Инмар доры, оло, мукетгес сюрестӥ но мыноно ини. Тодмо философъёслэн верамзыя, дунне вылын улон, пе, спиралья берга - ваньмыз азьвыл интыяз ик берытске. Нош Лев Мельников академик-тодосчи "Оракул" газетын потэм "Я вам откорою будущее" статьяяз пырак тазьы шуэ: "2003 арын язычество оскон выльысь выль сямен улӟыны кутскоз". Асьмелы но дыр вуиз ни, дыр, нош ик вашкалаосмы сямен инкуазь доры берытскыны, инкуазь дунне пыр вӧсяськыны, инкуазь дунне пыр Инмарез сӥлы карыны. Мыным матын асьме вашкала вӧсьёсмы. Отысь мон кылӥсько, адӟисько чылкыт ошмеслэсь жильыртыса быземзэ, выль кен кадь дӥсяськем кызьпуослэсь эктэмзэс, ӝужыт кызъёслэсь батыр пельпумъёсынызы выретэмзэс, гурт калыклэсь, ӵош одӥг бугоре бинялскыса, дунне сюрес вылын сылӥсь нюк-гопъёс вамен капчиен питырскыса мынэмзэ. Кузёбай калыклэн йӧнлыкезлы, сабырлыкезлы синмаськыса кыли мон. Нош пель сьӧрам весь кылӥське нёжмыт, чебер вӧсь гурзы: Асьмелэн та валче, ой, но улэммы Адямилэсь ӧвӧл, ой, но Инмарлэсь. Инмын но кизили, ву вылын бубыли, Эн люк, Инмаре, та яратон бӧлякъёслэсь. Вӧсям но вӧсьёсмы кабыл ке луысал, Уз лу меда весь валче но, ой, улэммы. Галина Тихонова Ышем но выльысь улӟем вӧсьёс Итэш но Монья гуртъёс вискын котырак круген кызъёс но ньылпуос будо, шоразы турын ӝужа. Та шулдыр интыын сизьым гуртлэн вӧсяськонэз вылэм. Татчы соос гырлыен, чалмаен, ӝуткаса куэм шобретэн чебермам валъёсын лыкто вылэм. Котькуд гурт нимаз пуртыен шыд, ӝук пӧзьтылэм. Сое пӧзьто вылэм ыж, така, ветыл, кунян сӥльёсын. Нош парсен но чорыген уг яра вылэм. Вӧсяськылӥзы Инмар ӟеч улонзэ, ӟеч аръёссэ мед сётоз шуыса. Инмарлы тазьы вазиськыса кырӟало вылэм: Армиысь огпол лыктылэм Гершыд юонэд. Туннэ гинэ, ой, нуналэн Изэмаз, лэся. Вить чиньыен кырмыса Пазьгылэм юосмы Азвесь шепен мед шепаськоз, Зарни тысен мед тысяськоз. Итэш вӧсь Та вӧсе гурт калык аслыз умой улон курыны ветлэ вылэм. Инмарзылы йыбыртто вылэм ӟеч аръёссэ, ӟеч тазалыксэ мед сётоз шуыса. Кӧс яке мултэс зоро аръёс тупало ке, пудо-животсы тросэн бырыны шедё ке, гурт кузя ог-огзы доры кеньыр, вӧй бичаса ветло вылэм, собере ваньзы ӵош люкаськыса ӝук пӧзьто. Сое воргоронъёс кусказы тӧдьы чылкыт ӵушкон керттыса, йыразы картуз (тэбетэй) поныса вӧсяло вылэм. Собере ӝуклэсь тырвылзэ (вылзэ) ӝутыса, вань калыкен ӵош пыдесъяськыса Инмарлы йыбыртто. Итэш вӧсь ворсаськиз ни вал. Но 1994 аръёсы Маланья Павол агай, Лякон Сеня агай, Чураш Гондыр агай, Куарӟи апай но Ӝакы апай калыкез ӝуткаса ветлӥзы, вӧсез выльысь усьтӥзы. Вӧсяськонысь васькыкузы, ӟеч адямиос доры ӟеч мылкыд карыса, коркась корка пыраса кошко. Табере та вӧсь арлы быдэ гужем инвожо толэзе ортчылэ. Луд бакча но Быдӟым Куа вӧсьёс Азьвыл ми палъёс кык выжы вылӥллям: Итэш но Монья. Итэшъёс - Луд выжы, Моньяос - Быдӟым Куа выжы. Итэшъёслэн Луд бакчазы Итэш но Монья вискын бусы шорын, нош моньяослэн - гурт пумазы. Лудэ воргоронъёс гинэ ветло вылэм. Нырысь лымыез кырымен бичаса (вуэн уг яра, пе, вал) пӧсято но ӝук пӧзьто, вӧсяло. Собере пичи посудаен вайыса вӧсям виназэс но ӝуксэс тыл вылэ куясько вылэм. Сиськон посудазы ваньмыз пулэсь, пе, вал. Быдӟым Куала вӧсе мӧйыос гинэ пырало вылэм. Соос вылазы тӧдьы дэра дэремен , пыдазы керттэм дэра чулкаен, йыразы пельшетэн (кускозь кыстӥськись йыре понон), пельшет вылазы кышет керттыса вӧсясько вылэм. Луд бакча но Быдӟым Куа вӧсь интыос али но вань на, но вӧсяськисез ӧвӧл ни. Елена Коткова Актэмыр калыклэн вашкала сямъёсыз но йылолъёсыз Актэмыръёслэн ар ӵоже ортчись музъем ужен но семья улонэн герӟаськем юондыръёссы но сямъёссы сярысь удмурт тодосчиосын эскеремын ӧвӧл на. Огъя лымшор удмуртъёслэсь сямъёссэс но соослэсь пӧртэм дыре ортчись праздникъёссэс гожтӥз Б. Гаврилов (1891). Та удмрутъёслэн ик вӧсяськонъёссы сярысь гожтэмын М. Елабужскийлэн, Г. Потанинлэн но П. Лупповлэн статьяосазы. Нимам авторъёслэсь ужъёссэс Актэмыр калыклэн йылолъёсыныз ӵошатӥськод ке, соос данакез тупало. Кылсярысь, Ымусьтон, Йӧ вылэ султон, Вӧй, Пучы арня, Кулэм потон уй, Ӟуч кисьтон, Трочинь но Гырон быдтон. Куд-ог аспӧртэмлыкъёссы вань ке но, огломак ми палъёсын сямен ик ортчо вылэм. Но актэмыръёслэн Сурем шуккон, Кукей куштон, Пинал куно, Курак базар но Таган гурезьын шудон кадь сямъёсты-йылолъёсты мон одӥг книгаысь но ӧй шедьты. Сурем шукконэн огвыллем йылол Башкириысь удмуртъёс пӧлын пумиське. Сое А. Тимерханов дипломной ужаз "Эру" нимын кутэ. Сурем шукконлэн но Эрулэн дыръёссы гинэ пӧртэмесь: Эру - вӧй юон дыръя, пучы ньӧръёсын, нош актэмыръёс та йылолэз ортчытылӥллям Акашка дыръя. Валэктонэз одӥг - шайтан уллян. Озьы ик Сурем шуккон йылол сярысь гожъямын на Б. Гавриловлэн ужаз. Но со сое Сӧрем шуккон шуыса гожтэм. Озьы ик Бернат Мункачилэн 1887 арын потэм книгаяз Мамадыш уездысь Улынгуртъёслэн та выллем йылолзы сярысь гожъямын на. Улынгуртъёс сое Погой шуккон шуыса нимало вылэм. Соос озьы шайтанэз, пе, улляськом. АКАШКА Кулэм уй потон бере, куинь нунал ортчыса, актэмыръёслэн куинетӥез бадӟым тулысэз пумитан праздниксы - Акашка. Та праздник куинь нунал ӵоже кыстӥське вылэм. Солы дасяськиллям одӥг-кык арня ӵоже. Коркаысьтызы вань кырсь дӥськутсэс мисько. Сое ке ӧд быдэсты, быдэс ар арсыз, кырсь, пе, улод. Акашкалэн азьвыл ӝытаз ӝӧк пуме нянь сукыри но сылал пукто вылэм, семья быдэс ар нянё мед луоз шуыса. Ӝӧк пумысь нянез ӵукнаозь уг исало. (Та сям али ке но возиське на). Акашка уез нылкышноос уйбыт уг изё вылэм: кудӥз, черке мыныса, ӵукнаозь вӧсяське, кудӥз уйбыт киужен выре. Акашкалы дӥсяны одно ик выль дэрем вурылӥзы. Та вакытэ пиналъёс но туж лякыт, нокинэн керетытэк улыны тыршылӥзы. Малы ке шуоно, Акашка нуналэ, пе, Инмар, инмысь васькыса, ньыльдон нунал укно улъёстӥ кылзӥськыса ветлэ. Коркась керетэмез, лякыттэмъяськемез кылӥз ке, соослы весяклы сыӵе улон, пе, сӥзёз. Соин ик пересьёс али но пиналъёсты укноетӥ сяланы но, жуг- жаг куямлэсь но ало. Инмар вылэ, пе, куштыны яке сялӟыны шедьтоды. Актэмыръёслэн та сямзы гожтэмын Л. Христолюбовалэн "Калык сямъёсты чакласа" книгаяз но. Акашка ӵукна вазь ик султыса нылкышноос пыжиськизы-пӧраськизы. Курег пуз ӝыт ик буяса дасяло вылэм. Кӧс куазен нуназе бере, пыжиськемзэс но ӝыны литр аракы басьтыса, кулэмъёсты буре вайыны шай вылэ ветлылӥзы. Котькудӥз аслаз ӵыжы-выжыезлэн гу вылаз пуксьыса куяське. Ваем аракызэ лыктэм адямиослы веръятэ. Гу вылэ таӵе кылъёсын куяське: "Сие-юэ, пересьёс, милемлы вождэс эн поттэ, адямилы, пудолы урод эн каре, улонмы азин медло". Шай вылысь бертыса, вӧсь нерге ортчытлӥзы. Вӧсь нергеын сиё-юо асьсэ бӧлякъёсынызы гинэ, ог-огзы доры ваче ветлыса. Котькуд коркан, ю-нянь мед удалтоз шуыса, вӧсь гурез кырӟало вал. Табере со гурез гуртын тодӥсь ӧвӧл ни. Акашка нуналэ гуждор ӝук пӧзьтыса сиё на вылэм. Гуждор ӟазег пи ышкымон ке но мед потоз шуыса. Пӧзьтэм кеньырез векчи юдэм курег пузэн сураса лэсьтэм сиёнэз "гуждор ӝук" шуо. Со гуждор ӝукез семьяысь воргорон гид бере потыса вӧся вылэм. Со сяна, Акашка нуналэ кӧня ке пиосъёс огпал урамысен кутскыса мукет пал урамозь "Сурем шуккыса" ветло вылэм. Зӧкесь тыпы яке бадяр бодыосты котькуд корка сэрег борды вань кужмысьтызы йыг! гинэ, пе, шукко вал, коркась шайтанъёсты но вегинъёты улляськом шуыса. Гурт пуме вуыса, бодыоссэс огинэ, пе, куяло но асьсэос нош ик гуртлэн огпал пумысеныз кутскыса, мукет пал пумозяз коркась корка ветло, пумен тазьы кырӟало: Пар кукейдэс ӧд ке сётэ, пар кукейдэс лушкалом. Пар кукейдэс ӧд ке сётэ, бызёно нылды сектэм медло. Акашка праздниклы мӧйыослэсь но зол шумпотылӥзы пиналъёс но пичиос. Та нуналэ соос, ньыль-вить кузя люкаськыса, гуртэтӥ курег пуз бичаса ветло вылэм. Акашкае актэмыръёс шыкысысьтызы выль дӥсьсэс дӥсяса, пиналэн пересен ваньзы Таган гурезь йылэ шудыны поталлязы. Та ӝужыт котырес таган выллем гурезь вашкала дырысен бордаз люка кык урамъёсысь калыкез. Малы ке шуоно, со кык урамъёслэн висказы сылэ. Гурезь йылын уйшорозь кырӟанъёс, пӧртэм шудонъёс но эктонъёс чузъяськылӥзы. Тужгес но ярато вал круген шудонэз. Шудыкузы Тазьы кырӟаллязы: Гуждор вакчи, гуждор вакчи, Гуждорез турнан уг лу. Йыры пинал, йыры пинал, Нокытчы мынын уг лу. Тополь садэз мон уг мертты, Солы сяська уг поты. Солы сяська уг поты но, Отын уӵы уг чирды. Мыло-кыдо, мыло-кыдо Та пинал но мылкыды. Уг лу сое пыд улам Али ке но воземе. Озьы ик шудо вылэм "Адями октыса" (та шудонэн али ке но гуртын шудо на), "Сукыр табаен" но мукет шудонъёсын. Шулдыр куазен Таган гурезе быдэс гуртысь калык люкаське вылэм. Огез егитъёслэсь шулдыръяськемзэс адӟыны лыктэ, мукетъёсыз асьсэос но пумит ӧвӧл шудон пӧлы пыриськыны. Пичи пиналъёс асьсэ понна юр-яр каро. Ог-огэс кутылыса гурезьтӥ курег пузэз питыръяса шудо вылэм. Акашкалэн кыкетӥ нуналаз тари ӝук пӧзьто вылэм. Собере юрт кузё азбаре 7 яке 9 табань (одно ик кузтэм, пе, мед луоз), нянь, сӥль, тусьтыен ӝук поттылӥз. Шунды ӝужан пала йыбыртъяса, ӝуксэ, табаньзэ но няньзэ вылэ ӝутка вылэм. Собере вӧсям сиёнзэ, корка пыртыса, семьяезлы сюдылӥз. Узьым ӝужам бере, вал кыткыса но пичи муртэ, аслэсьтыз пиналзэ яке нылпиезлэсь нылпизэ кизем ана вылэ кукей питыръяны нуо вылэм. "Кукей куштон" шуыса нимаське со. Нянь умой мед удалтоз шуыса, пичи муртлы кияз буям курег пуз сёто но сое узьым пушкытӥ питыръято вылэм. Акашкалэн берпуметӥ нуналаз гуртысь пересьёс но пиналъёс но Кайначигык Бадӟым Куалае вӧсяськыны мыно вылэм. Сьӧразы ӝук пӧзьтыны нянь, вӧй, кеньыр нуо. Кенерен котыртэм Бадӟым куалаын ӵушконъёс, ӝӧккышетъёс озьы ик быдэс кылизы. Соосты исась ӧй вал. Азьвыл нуналаз, уксё бичаса, кинлэсь ке валзэ яке ветылзэ басьто. Пудоез кузёзэ ик вандыто, собере сое сад улын бадӟым пуртыын сӥлен ӝук пӧзьто вылэм. Вӧсяськон дуре кышноосыз ӧз лэзьылэ, соос кенер сьӧрын пукылӥзы. Бадӟым ӝӧк вылэ сиёнэн артэ бутылкаосын аракы пуктылӥзы. Ӝӧк пуме пияла банкае яке чашкае ваньзы пичиен-пичиен асьсэлэсь аракызэс лэзьяло вылэм. Вӧсясь но солэн кык юрттӥсьёсыз тӧдьы дӥськутэн дӥсяськемын, пельпумазы ӵушконъёс ошылэмын. Вӧсясь, кияз тусьтыен ӝук кутыса, шунды пуксён пала йыбыртъя вал. Собере тусьтыен ӝуксэ огезлы юрттӥсезлы сётыса, мукетыз киысь чашкаен аракыез басьтэ. Аракыен но озьы ик вӧсяське. Куриськонзэ быдтэм бераз, чашказэ вылэ ӝутэ но "аминь" шуэ. Вӧсяськон бырем быре, ваньзы семьяенызы огинэ пуксьыса сиё-юо, вӧсясез но уг вунэто - куно каро. Пудолэсь лыоссэ огинэ люкаса кельто вылэм. Та вӧсяськон тулысэз пумитан но гырыны потон понна ортчытӥське вылэм. Колхоз кылдэм бере Бадӟым Куалаын вӧсяськон бырем. СПАС Черке пыремзы бере, актэмыръёс ӟучъёслэсь адӟем карыса, Спас праздникез но пусйылыны кутскиллям. Со август толэзе луэ, араз куинь пол ортчытӥське: 19, 28 числоосы. Актэмыръёс Спасэз ортчытылӥзы 19 августэ. Та нуналэ Асангурт черкысь батюшкаез ӧтьыса ваё вылэм. Азбарысь азбаре пыраса со быдэс гуртэтӥ ветлэ, сьӧраз 5-6 кузя пиосмуртъёс туж бадӟым обросэз ӝутъяса нулло. Азбар шоры ик кузь ӝӧк пукто, со вылэ ӝӧккышет валё. Ӝӧк вылэ кызьпу ваез тӥяса пукто. Юртлэн кузёез азьло ик дасям сиён-юонзэ (курег пуз, табань, мушник, пирог но одӥг полштоп аракы) азбарысь ӝӧк вылэ тыре. Батюшка, пыжиськемен тусьтыез кияз кутыса, оброс азьын куриськон лыдӟе. Тусьтызэ пумен я выллань ӝутэ, я уллань лэзе, со бӧрсьы ваньзы оброс пала йыбыртъяло. Куриськемзы бере, вӧсям сиён-юонэз быдэс семьяен сиё-юо. Озьы вӧсясько котькуд азбарын. Актэмыр гурт бадӟым, соин ик быдэс гуртэз ортчыса, одӥг нуналскын уг вуо вылэм. Кыктой-куиньмой вӧсяськыса, батюшка Асангуртаз бертэ. ПЕТРОЛ Та бадӟым юонэз актэмыръёс турнаны потон азьын 12 июле ортчыто вылэм. Нош Петроллэн ӵуказеяз ог дасо гуртысь калык Ушкоп нюлэскы Булда вӧсе мынэ вылэм. Сое куинь арлы одӥг пол лэсьтылӥллям. Та вӧсяськонын удмуртъёс нырысь ик курбон сёто вылэм Инмарлы, собере Му кылчинлы. Ӝытазе гурт пумысь луд вылын ыж вандыса, сое пӧзьто вылэм. Озьы пересьёсты буре вайылӥзы. Отын ик кызьпу туйлэсь лэсьтэм тусь. Отчы пудолэсь вирзэ кисьто, собере котькудӥз вӧсяськись отчы сьӧраз ваем аракызэ палькке, табаньзэ но луд вылын пӧзьтэм одӥг пуньы ыж сӥлез куштэ. Кошкыкузы со тусез луд вылэ ик кельто вылэм, куяськемез пуныос мед сиёзы шуыса. Кыкетӥ нуналаз ӵукна ваньзы мунчоын мисьтасько но нуназе бере Булда вӧсе люкасько. Тылскем вылэ пурты ошо. Тылскем дорысен ог 50 вамыш кемын лымшор палаз куинь кызьпу вайёс бышкемын вылэм, соос азьын ӝӧк сылэм. Кызьпуос борды юнматъям гозыос вылын чалмаос ошылэмын, пе, вал. Одӥгаз кызьпу гыркын ӵушконэн шобыртэм тусьты. Отчы вӧсясь бичам уксёзэ тыре. Вӧсясь нырысь куриськон лыдӟе аракылы, собере - няньлы. Нырысетӥ нуналаз вал вандылӥзы, кыкетӥ нуналаз- - ветыл. Куинетӥ нуналаз Му кылчинлы вӧсяськиллям, кизем ю-нянь умой мед удалтоз шуыса, Булда вӧсяськонэ пыриськылӥзы нылкышноос но. 2 Инмарен сётэм удыс 1999 ар. . . Малы ке тол туж кезьыт потӥз мыным соку. Оло ачим капчигес дӥсяськемын вал, угось туж акыльтӥсько секыт дӥсьлэсь, оло толэз зэмзэ но шуныт ӧй вал. Самой соку нырысьсэ мон тодматски Валя Михайловаен. Ижевскысь автобус одӥгаз кӧс ннуалэ нош ик мынӥсь-ветлӥсьёсты Алнаш музъем вылэ вуттӥз. Автобусысь потыса, котыр утчаськи. Куазь беромемын ни, Алнашысь егитъёс доразы дырто, нош сьӧрлосьёслы. . . Мынэсьтым палэнынгес бадӟым буш сумкаен егит нылаш. - Тыныд кытчы мыноно, - юай мон солэсь. - Кузёбае, - вазиз со. - Бон куазь бер ни, мыным но сопала кулэ вал, Алнашысь ӵыжы-выжыосы дорын кӧлыса, ӵуказе ӵукна гинэ бертом, ойдо монэн ӵош. - Уг, дыр. Монэ пумитаны дядяе вуыны кулэ, возьмало ик, дыр, сое, тон сьӧры мыныны кепырасько. - Иське, ӵош возьмалом, огнад уд сылы ук татын. Нылашлэн дядяез ӝыны час улыса гинэ вуиз. Со куспын ми Валяен ӟечгес тодматским, угось сылонъямы трос вераськыса но, зол гинэ кынмыса но вуттӥм. Валя дышетске вылэм УдГУ-ысь хужожемственно-графической факультетлэн ньылетӥ курсаз. Специализациез - батик. Аслаз дӥсяськон манерезъя но мылкыдызъя туж тунсыко но аспӧртэмлыко нылаш со. Котьку капчи мылкыдыз паймоно кадь бордаз кыске. - Валя, малы астэ чеберлык удысэн герӟад? Та тынад пичи дыр малпанэд, яке кин кедэмлаз-а? -Пичи дыръям ик чеберез шӧдонэ, инкуазьлэсь чеберлыксэ адӟонэ вал ини. Школаын дышетскыкум бусые етӥн утялтыны ветлылӥм. Эшъёсыным ми етӥн куролэсь пӧртэм мунёос лэсьтыса шудылӥм. Мон синмаськисько та будослы. Малызэ ачим но уг валаськы. Школаын математикаен герӟаськем предметъёсты яратылӥ. Соин но, дыр, школаме быдтэме бере физико-математической факультетэ пырыны ӧдъяй. Табере жаляса-а яке шумпотыса-а верано, конкурс пыр соку ӧй поты. Документъёсме басьтыса, ӵужмуртэ доры вуи. Аслэсьтым кӧт ӝожме, урод мылкыдме огшоры ки улам шедем карандашен бумага вылэ кисьтӥ. Суредме ӵужмуртэ адӟиз но шуэ: "Ма тынад суредаськыны быгатонлыкед вань ук. Чик кайгырыса но йырдэ ошыса эн ул. Утча астэ мукет удысын. Оло Инмаред тныд книгаяз чеберлык удысэ сюрес гожтэм али". Озьы одӥг арзэ дасян курсъёсы ветлыса, вуоно араз дыштскыны пыри УдГУ-ысь худграфе. -Нош специализацидэ малы одно ик таизэ бырйид? Мар со батик? Кызьы сое валано? -Факультетамы пӧртэм отделениос но специальностьёс вань: вылӥ педагогической колледж, дизайн, чеберлыко но культурая отделениос. Специальность бырйыны косэм беразы, мон нырысь шугъяськи. Ваньмыз тунсыкоесь, улонын кулэ луись ужъёс - пужъятскон, куиськон, ювелирной ужъя мастер но мукет. Тросэз пичи дырысен ик тодмо ни, нош батик сярысь кылэме ӧй вал, соин но, дыр, мон аслмы тодмотэм уже кыстӥськи. Дышетскыны пыри бере, одно ик тодымтэзэ но тодэме потэ вал. Батик - француз кылын вераса, баӵигуӥ - набивной, яке англи сямен - басма вылын суредаськон. Нырысьсэ батик кылдӥз Индонезиын. Кыӵе ке суред вылэ сюсь зырало но, собере со басмаез буёло вуэ донго. Нырысь сюсен зырамтэ интыосыз буясько вал. Азьланяз батик асьме пала но вуиз. Али дыре батикез кык пӧртэм макелы люко: пӧсь но кезьыт. Озьы ик кык пумо амал суредаськонъя но кисточкаен ужан, яке нимысьтыз арбериосын. Ми соосты "резерв" шуиськом. Валамон ни, котькуд ужын бадӟым фантазиед мед луоз. Соку суред тужгес но тунсыко но аспӧртэмкыло пӧрме. Батик - дуно арбери со. Сое быдэстон понна трос коньдон но чидан кулэ. Нош ас киосыныд быдэстэм уждэ адӟиськод ке, сюлэм пушкы макет бадӟым шумпотон но аслыд оскон каръяське. Батик чеберлык удысын гинэ уг кутӥськы, сое адӟыны луэ огшоры бытовой улонын. Кылсярысь, дӥськут буянын, кышет, занавес, панно но мукет. -Валя, батик удысэз туж яратӥськод, нош уг люкеты-а со тыныд мукет, выль но тунсыко ужъёсын вырыны? -Одӥг но уг. Со сяна мон трос суредасько, "гобелен" ужен вырисько - куисько пӧртэм ӵушконъёс, кврикъёс, покрывалоос. Туж тунсыко потэ кызьы вашкала удмуртъёс сэбед яке нерге ортчытонъёссэс, улонлы но Инмарелы осконзэс, куиськон ужазы пӧртэм символ пусъёсын возьмато вылэм кизили, ромб, квадрат, треугольник пусъёс сяна, куиськонын инкуазь суредъёсты о чакланы луэ. Кылсярысь, "душес пужы", "калмз пужы" но мукет. Со сяна яратӥсько на лозоплетениен вырыны.Дорысь Ижкаре тачак векчи ньӧр вайыкум, поездын но автобусын калык шорам паймыса но учке кадь. Бон котьмар мед малпалозы ни, милемыз, худграфын дыштскисьёсты, студентъёс куспын "улетевшие", шуо. -Кӧтты ӝож уг луы-а,- юатэк ӧй чида. -Уг, малы ке шуоно, асьмеос но валаськом, мукет факультетсь студентъёслэсь ми улон шоры копак мукет сямен учкиськомы. Улонын уксё но карьера бадӟым инты басьтэ ке но, чеберлыктэк улыны туж секыт но мозмыт. Милемыз дышето улонэз котыр ласянь улонысьтымы чеберез адӟыны, шӧдыны но калыклы возьматыны. Кылсярысь, сӥзьыл инкуазь пӧртэм яркыт буёлъёсын кисьтӥське, нош мон эшшо но яркыт дӥсь дӥсясько. Горд палэзь сямен горд брюки бырйисько, яркыт ӵуж бадяр куар выллем пиштӥсь кофта, яке мар йыра млыктэ. Валасьтэм мурт малпалоз, мар шуккытэм адями со. Нош валасез, адӟоз таӵе вылтусэн мон сӥзьыл инкуазьлэн люкетэз луисьо шуыса. - Суредаськыны но пӧртэм киужъёсынв ырыны ку вдохновениед лыктэ? - Нуналлэн котькуд вакытаз. Тужгес но кытчы ке крыре-буре потаськод ке, кылсярысь, возь вылэ, нюлэскы, музейёсы, кыӵе ке тунсыко городъёсы, гуртъёсы. Туэ гужем тани ми группаенымы ӵош. Санкт-Петербурге вуылӥм. Трос пӧртэм музейёстӥ, вытавкаостӥ ветлӥм. Сое адӟыса, малпанам трос ччебер суредъёс кылдӥзы, пуш дуннее узырмиз. Суредаськыным ылкыд ачиз лыктэ,. Мон кемагес уг суредаськиськы ни ке, мылкыды ик урод луэ, улонын аслым инты уг шедьтӥськы ни. - Уждэс лэсьтон понна одно ик трос коньдон кошке, луоз. Нош коньдондэ берыктон опонна лэсьтэм ужъёстэ уд вузаськы-а? - Крнешно, милям факультетамы дышетскон дуно усе, оломаиз но отын кулэ. Кылсярысь, одӥг тюбик масляной краска 70 манет сылэ. Нош тюбикъёс милемлы ужаны ог дасо пала кулэ. Студентлы со туж шӧдскымон секыт йӧтэ. Мыным дышетскыны анай- атае юртто, стипендие номырлы ик уг иырмы, шуыны луоз. Лэсьтэм ужъёсме вузаны кепырасько али. Мыным соос ежесьгес пото. Огшоры кузьмасько эшъёсылы, ӵыжы- выжыосылы. Соослы туж кельшо корзинаосы, соосты мон ньӧрлэсь керттӥсько. Куддыръя киужъёсме асьсэос куро, сюлэмзыя кельшись формаен корзина керттыны косо. - Дырыд жаль уг поты-а? - Уг. Аслым кельшымон уже бордын мон мылысь-кыдысь тыршисько. Нош ас киыным лэсьтэм арбериосы эшъёсылы туж ярало ке, эшшо но мылкыды ӝутӥське. Ужамъя ужам потыны кутске. Пӧртэм ужъёс бордын ужамея киос но воляло. Собере ужедлэсь кулэлыксэ ӟечгес но валаны кутскиськод. Азьланяз быгатонлыкме узырмытыса, кин тодэ, ужам ужъёсме, оло, вузаны но быгато. "Чеберен кӧт уг тыры" шуо ке но, мон тазьы верасал: "Чеберлык утёз дуннеез". Мон аслым туж шудо потӥсько. Улонамы чеберлыкез пыӵатыны луонлыке вань шуыса. Ольга Семёнова. 1 Кулонэн герӟаськем чакланъёс но осконъёс Кулонэз калык шыпытак пумита: со тодэ угось, дыр вуиз ке, нокин но кулытэк уз кыльы. Кызьы ке улон Инмарлы сётӥське, озьы ик соин басьтӥське но. Та сярысь пословицаос но верало: ваньмы Инмар азьын ветлӥськомы: кык пол уд кулы; кулонлэсь уд пегӟы. Адямиез кулон сокем уг кышкаты, со кышка солэсь шӧдтэк шорысь вуэмезлэсь, солы дась луымтэезлэсь. Ӵапак татысь ик пото пӧртэм вераськонъёс. Кылсярысь, кулэм муртъёслэн лулъёссы сярысь сюлмаськоно шуыса, собере сопал дуннее кошкем лулъёс, пе, улэп адямиослэсь улон-вылон сюрессэс чакласа возё. Котькуд адямилэн тодэмез потэ, дыр, ку, кыӵе дыре солэн кулонэз вуоз. Таин валче но трос чакланъёс кылдэмын. Талы чик но паймонэз ӧвӧл, малы ке шуоно, удмуртъёс, мукет калыкъёс сямен ик, адями та дунне вылын огшап улӥз но кулэменыз валче даурлы мукет дуннее улыны кошкиз, шуо. Сое соос адӟыны тыршо котыр улонысь. Зэм но, куд-ог веранъёс юнме шорысь кылдэмын ӧвӧл, нош куд-огъёсыз воксё мистикалы матын луо; куд-ог веранъёс потэмын кемалась вунэтэм йылолъёсысь. Озьы ке но, ваньмыз соос потэмын удмуртъёслэн котыр улосэз адӟемзы, шӧдэмзы-чакламзы бордысь. Удмуртъёслэн таӵе веранзы вань: пиньыд усиз шуыса уйвӧт адӟид ке, иське, матысь адямиед кулоз, нош пиньыд вир вияса усиз ке - ӵыжы-выжыед. Таӵе веран кылдэмын, дыр, тани ма бордысь: калыклэн малпамезъя, адямилэн мугорыз люкиськиз кулэм (мугор) люкетэзлы но котьку улэп луись люкетэзлы (йырси, пинь, гижы). Соин но, лэся, уйвӧтын усем пиньёсты адӟид ке, семьяяд кин ке кулӥсь луоз, шуылӥзы, нош вирез ӵыжы-выжыосын герӟаллязы. Пусйыны кулэ, ӵапак пинь, йырси но гижы пыр адямиез капчиен сӧрыны, вегнаны луэ, соин ик соосты кытчы сюрем сэрпалляны уг яра, пе. Кылсярысь, вандылэм гижыостэ кытчы сюрем куяд ке, пе, сопал дуннеын соосты лыдъяны косозы, нош йырсидэ куяд ке, тылобурдоос соослэсь асьсэлы кар лэсьтозы но йырыд висись луоз. Со сяна, вал на сыӵе вераськон: пиньёс но гижыос сопал дуннеын урод кужымъёслэсь утиськыны юрттоз. Соин ик кулэм муртлэн коросаз куддыръя гижыен пуйы тырылӥзы: солы, пе, сопал дуннеын соос ӝужыт гурезь йылэ тубыны юрттозы. Борддорысь поттэм корез уйвӧтад ке адӟид, со, пе, кулэм муртлы. Та веран тани ма бордысь потэмын: азьло дыре кулэмъёсты коркась ӧсэтӥ уг потто вылэм, укноетӥ яке борддорез юри со учыр понна пасьям вистӥ. Бӧрысь со пасез выльысь тупатъязы, кулэм муртлэн лулыз берен медаз ни берты, сопал дуннее каньылак мед кошкоз шуыса. Соин ик кулэм муртъёсты коркась али ке но пыдыныз азьлань потто - со, пе, мед тодоз, кытчы сое нуо, нош кытысь потто - медаз тоды. Вуэ усьыса уйвӧт секыт висён яке кулон сярысь вера. Удмуртъёслэн малпамзыя, ву - со адямилы но вань улэп макеослы улон сётӥсь, но кулонэз ке вуэ, со нош ик отчы берытске. Вашкала дыръя адямиос лыдъяллязы, кулэмъёс сопал дуннее вуэтӥ мыно шуыса. Соос кожазы, сопал дунне ӵапак шур дорын шуыса, соин ик шайгуосты но шурлэн ярдуръёсаз гудылӥзы, кулэм муртъёслэсь пыдъёссэс шур пала карыса ватылӥзы. Кулэм муртэз миськыны кутӥськись арбериосты но шур кузя лэзьяллязы. Удмуртъёс лыдъяллязы, шур, вань уродзэ - куректонэз, висёнъёсты - сьӧраз нуэ шуыса. Вань на пудо-животъёсын, тылобурдоосын герӟаськем чакланъёс. Пуны корка шоры учкыса вузэ ке, курег атас сямен чоръя ке, азбарын кучыран, уйсы черекъя ке, ӟольгыри яке ваёбыж корка пушкы пыро ке, сьӧд душес корка липет йылэ пуксе ке, - ваньмыз со коркась кин ке кулон сярысь ивортэ, пе. Пуныез сопал дуннеен герӟаллязы. Вегин, пе, аслаз вегнаськон ужъёсыныз вырыкуз, пунылы берытскыны быгатылӥз. Нылпи ваёно кышномурт пуны котырын туж сак луыны кулэ вал, малы ке шуоно, пуны кышномуртлы но, вордсконо пиналлы но пӧртэм кайгу вайыны быгатоз. Язычникъёслэн чакламзыя, пуны кусып возьыны быгатылӥз кулэм муртъёсын но, улэпъёсыныз но. Соин ик, кулэм муртъёслы курбон сётыку, кӧня ке дыр ортчыса, со сиёнэз пунылы сётъязы. А то курбон кулэм муртъёс доры уз вуы, пе. Нош асьсэос чакласа улӥзы: пуныос сиськыкузы куспазы ыргето, жугисько ке, кулэмъёслы, пе, та ужрад кельшиз. Поръёслэн малпамзыя, шайвылэ пырон капкаосты, пе, пуныос чакласа возё, соин ик кулэм муртэз отчы ватон понна, солэн лулызлы курбон сётылӥзы, нош кулэм муртлэн коросаз, пунылэсь утиськон понна, боды понылӥзы. Кызьы пусйимы вал ини, пуны сопал но, тапал но дуннеен кусып возьыны быгатэ, озьыен, со таяз дуннеын мар ортчемез сопал дуннее но вуттыны быгатэ. Соин валче кылдӥз мукетыз веран но: пуны сопал дуннеысь тапалаз висёнъёсты вайыны быгатэ. Удмуртъёс висёнэз адӟылӥзы пуны вылысь. Висись адями бурмоз-а, уз-а шуыса тодэмез потэ ке, пе, висись адямилэн бервылаз кылем нянь пырыосты пунылы, пе, сётоно. Пуны соосты сииз ке - висись йӧналоз, ӧз ке - кулоз. Кӧез висись адямилэн мугораз зырано но пунылы сётоно. Пуны сое сииз ке, адями улоз. Озьы пуны висёнэз аслыз, пе, басьтэ. Тылобурдоос сярысь ке верано, соос кулэм муртъёслэсь лулзэс, пе, нулло. Соин ик шайгу вылэ нянь пырыосты пазьго, бурдоос соосты мед сиёзы шуыса. Таин валче ик кылдэмын мукетыз чаклан но: тылобурдо корка пушкы пыре ке, со вера, матысь дыре татын кин ке кулоз шуыса. Тросэз калыкъёс лыдъяллязы, куакаос кин ке кулон азьын каргето шуыса. Соос шӧйёсты сиё угось. Таиз чаклан вӧлмемын луоз на куакалэн шимес куараезлы но сьӧд тылыосызлы луыса. Асьмелэн вашкалаосмы пӧртэм шуг- адӟонъёсты сьӧд буёлэн герӟаллязы угось: пеймыт уй, пеймыт пещера, сьӧд нюлэс... Усись кизилиез адӟид ке, иське, кин ке кулӥз. Дунне вылысь трос калыкъёс пӧлын вӧлмемын вал котькуд адямилэн аслаз кизилиез вань шуыса малпан. Кизили югыт пиштэ ке, озьыен, адямилэн улонэз но, пе, югыт, нош адями ке, пе, кулэ, солэн кизилиез кысэ яке усе. Соин ик югыт уе пеймыт инбамысь яркыт кизили усе ке, кин ке кулэ, шуо. Татысь ик оскон но кылдэмын: "Инбамын кӧня кизилиос, сомында ик дунне вылын адямиос". Синучкон пилиськиз ке, сое одно ик куштоно. Пилиськем синучкон - корка пушкысь тужгес но кышкыт арбери: со улэп адямиослэн но кулэм муртъёслэн лулъёссы куспын герӟетэз возьматэ. Со сяна, пилиськем синучкон "кыкто" лулэз возьматэ пилиськемен, тӥяськемен, со шудэ-буре уз ни вутты. Калыкъёс кыктоосын яке асьсэлэн лулъёсынызы лыдъяны кутскизы синучконысь но ву вылысь вужеръёссэс. Синучконэз пилиськод ке, иське, пилиськод аслэсьтыд лулдэ но, нош кин пилиз со синучконэз, сое возьма бадӟым кайгу: висён, шудтэм учыр яке кулон. Семьяысь кин ке кулэ ке, синучконэз маин ке ворсало, отчы учкыны уг яра. Синучконэз уд ӵоктаськы ке, кулэм муртлэн лулыз отчы йыромоз, собере ялан улэп адямиос доры ветлоз. Тазьы но шуылӥзы: сыӵе синучконэ учкид ке, отысь кулонэз адӟод, со тонэ сьӧраз басьтоз. Вуриськыку венез ачид пала карыса вуроно ӧвӧл - кин ке кулоз. Кулэм муртэз дӥсяны аслаз куронъёсыз вань. Отысь ик сыӵе веран но потӥз, луоз. Удмуртъёс кулэм муртлы дӥськут дэралэсь вуро вал. Шортдэрем шуыса нимаськиз со. Сое одно ик киын вурылӥзы. Сояз дуннеын солы нокыӵе но черъёс медаз люкетэ шуыса, сӥньысэз ӧз герӟалляллэ. Ӧс куспы пуксьыны уг яра - анай-атаед кулоз. Ӧс кусып, пе, коркаез урод дуннелэсь уте. Соин валче кылдэмын трос чаклан- веранъёс. Кылсярысь, сюан дыръя выль кенлы но эмеспилы ӧс куспы лёгиськыны уг яра, соослы син, пе, усёз. Озьы ик ӧс кусып - со, пе, вашкалаослэн, утисьёслэн интызы. Нош вашкала славянъёс лыдъязы, ӧс куспын корка кузёос уло шуыса, соин ик ӧс кусып вамен ӧз ӟечбуръяськылэ, а то керетон, пе, луоз. Ӝӧк пумын кыллись сиён-юонэз, тусьты-пуньыез йӧтылыны уг яра. Сое тазьы валэктыны луэ: ӝӧк пум кулэм муртлэн интыеныз лыдъяськылӥз. Кулэм муртэ буре вайыку, сое вожзэ поттонтэм вылысь, ӝӧк пуме пуньы но стакан пукто вал, озьы ик кӧня ке сиён. Кулэм муртэ ватыку куазь шулдыр ке, кулэм адями, пе, ӟеч адями вылэм, нош урод сямо адями кулэ ке, куазь но, пе, жобаське. Таиз чакласькон потэмын христианстволэсь азьвыл. Со герӟаськемын Шундыез данъянэн, сое Инмар интыын адӟем бордысь. Удмурт религиозной мифологиын Шунды мукет образъёс пушкын нырысетӥ инты басьтэ. Шунды сётэ улон, солы йыбыртъязы, сое данъязы, сое "котьмае адӟись синъёсын" ӵошатъяллязы. Кулэм муртлэн коросэз бадӟым но паськыт ке пӧрме, озьыен, семьяысь нош ик кин ке кулоз. Корос, вашкалаослэн малпамзыя, со - кулэм муртлэн улон интыез. Удмуртъёс коросэз азьвыл "корка" шуыса нималлязы. Корослэн ворсэтаз яке урдэсъёсаз пичи укно лэсьто вал, кулэ дыръяз, пе, солэн лулыз потаны мед быгатоз. Со "урт ветлон пась" шуыса нимаськем. Тӥни озьы, корос кулэм муртлэн коркаеныз лыдъяськиз бере, корос бадӟым пӧрме ке, кулэм муртлэн "коркаяз" ӝоген мукетыз вуоз шуыса малпан татысь потэ. Кулэм муртлэн синъёсыз усьтэмын ке, иське, та коркась нош ик кин ке кулоз. Кулэм муртлэсь синъёссэ ыргон коньыен ворсало, со синъёс улэпъёслы маке кышкытсэ, уродзэ медаз вайы шуыса. Кулэмъёс - сукыресь, сопал дунне - пеймыт дунне. Со кулэм муртлэн тодметэз. Кулэм муртлэн ворсам синъёсыз верало на, улэпъёсыныз со кусып возьыны уг ни быгаты шуыса. Оло нош кулэм муртлэсь синъёссэ ыргон коньыен соин но ворсало, улэпъёсыз кожало вал, дыр, сопал дуннеын уксёлэн кулэлыкез вал шуыса. Яке солэсь синъёссэ ворсало, кулэмъёслы сопал дуннее оломае но адӟемзэ медаз вутты шуыса. Озьы адямиос кулэм муртлэсь кызьы ке но чакласькыны выризы. Кулэм муртэ коркан возьыку, укно дуре чашкаен ву пуктоно луоз. Удмуртъёс укно дуре ву пукто но ӵушкон ошо вал, сопал дуннее кошкемезлэсь азьвыл кулэм муртлэн лулыз мисьтӥськыны но ӵушиськыны мед вуттоз шуыса. Нош солэн лулыз кошкыку, чашкаысь ву пальккаськоз, пе. Кулэм муртлэн коросаз сюмык нӧкы вӧй поныны кулэ яке солэсь ымдурзэ нӧкы вӧен зырано. Удмуртъёс понна вӧй - со узырлыклэн тодметэз. Озьы лэсьто вал тани малы: таяз дуннеын, пе, со куанер ӧз улы, сояз дуннеын но начар медаз улы, со сяна, сопал дуннее сюресэз вӧй кадь небыт но вольыт медло.Кулэм муртлэн коросаз сӥньыс пононо. Удмуртъёс сюресэз сӥньысэн ӵошато. Со сюрестӥ ик кулэм муртлы сопал дуннее но кошконо луоз. Кулэм муртлы шуозы вал: "Сюресэд сӥньыс кадь вольыт медло". Кулэм мурт дораз бертаны медаз ни быгаты шуыса, куддыръя герӟам сӥньысъёсты коросэ тырылӥзы. Сӥньысэз сётъяллязы кулэм муртэз ватыны лыктэм ӵыжы-выжыосызлы, соосын кусып возьыны мед быгатоз шуыса. Бызьымтэ ныл кулэ ке, сое ватыку, кузьымъёс сётъяны кулэ. Трос калыкъёс сямен ик, удмуртъёс малпазы, сопал дуннеын улон азьланьске шуыса. Со тапал дуннелэсь номырин но уг висъяськы, отын но сыӵе ик ужано, сиёно-юоно, яратоно... Кин пичиысен кулэ, сопал дуннеын будэ, собере семья кылдытэ. Татысь асьмеос христианстволэсь азьвыл кылем йылолъёссэ адӟиськом: кулэм муртлэн коросаз дӥсьёс тыро, со дӥсьёс, пе, отын солы кулэ луозы. Таяз учыре адӟиськомы сюан-йылолэз, кузьмаськонэз. Бызьыны вуэм яке бызьыса вуттымтэ нылэз ӵемысь отчы сюан дӥсен келяло. Коросэз гуэ лэземлэсь азьвыл, отчы кӧня ке векчи коньыос куяно. Удмуртъёс ты йылолэз "музъем дун" шуо. Кулэм муртлы, пе, сояз дуннеын аслыз инты басьтоно луоз, а то лулыз лобаса ветлоз. Куддыръя, "музъем дунэз" тодазы возьыса, коньдонэз коросэ но тырыса лэзё. Коросэз ки йылазы нуись адямиослэсь сюрессэс басьтыса кошконо ӧвӧл. Коросэз гурт пумозь ӵемысь ки йылазы нуо, нош коросэз нуисьёс азьын мынӥсьёс пумитазы шедемъёслы пуйыысьтызы кулэм муртлэсь "саламзэ" сётъяло. Озьы, пе, кулэм муртлэн сюресэз чылкыта. Кулэм муртлэн сюрес вылаз нокыӵе но шуг-секытъёс, пе, медаз пумиське, а то солэн вожез потоз. Нош кин кулэм муртлэсь сюрессэ басьтыса кошкоз, со, пе, со висёнэн ик висёз, кыӵе висёнлэсь кулӥз коросысь адями. Шайвылысь кошкыку, пуртэн яке тӥрен гож лэзьыса кельтоно. Озьы возьматӥське улэп адямиослэн кулэмъёслэсь люкиськемзы. Корт арбери уте урод кужымъёслэсь. Тае лыдэ басьтыса ик, коросэз кыре поттэм бере, корка азе тӥр кельтылӥзы, нош кӧкые, пиналэз "шайтан медаз басьты" шуыса, пурт понылӥзы яке нунылэсь кыллем интызэ пуртэн круг лэсьтылӥзы. Шайвылысь бертыса, муръё борды йӧтсконо. Таиз веран котькытын вӧлмемын. Озьы лэсьто кулэм муртлэсь медаз кӧшкемалэ, медаз мӧзме шуыса. Муръё - со кык дуннеослэн валче луэмзы. Муръё, гур, пень - ваньмыз со сьӧд кужымъёслэсь утись макеос. Соин ик, шайвылысь бертыса, кулонлэсь утиськон вылысь, адямиос муръё борды йӧтскылӥзы яке кизэс пенен зыраллязы. Нош кулон та корка медаз ни лыкты шуыса, корослэн кыллем интыяз муръёысь кирпичъёсты тырылӥзы. Вож нуныез, сьӧд кужымъёслэсь утён вылысь, озьы ик пенен зыраллязы. Кулэм муртъёслэн лулъёссы муръёетӥ кошко шуыса лыдъяллязы. Адями кулыны курадӟе ке, луллы юрттыны тыршыса, муръёез усьтылӥзы. Со сяна, выль лул но, пе, муръёетӥ лыктэ, соин ик, кышномурт нылпи вайыны кутске ке, муръёез усьто вал, нош нылпи кулыса вордске ке, лулэз берыктӥськыны курыса трубаез усьтылӥзы но гур ворсэтэ пуктылӥзы. Вашкала-вашкала куд-ог адямиос инкуазьын ортчись куд-ог учыръёсты валэктыны ӧз быгатылэ, соос кулонлэсь мугзэ ӧз тодылэ но солэсь кышкаллязы. Соин валче соос кыӵе ке но паймымон кужым вань шуыса оскылӥзы. Котькудӥз шудтэм учыр, соослэн малпамзыя, со кыӵе ке но адскисьтэм кужымъёслэн ужзы. Вордскем бераз ик валантэм кужымъёс адямилэсь эзельзэ тодо но дасяса возё ни. Соин ик кылдылӥзы пӧртэм чакласьконъёс. Татьяна Шулятьева, УдГУ-ысь аспирант. 3 Любовь Ганькова Ӟуння вӧсьёс Вуж сибирь сюрес вылын дас витетӥ даурысен сылэ ини Вуж Ӟуннягурт. Сое бигеръёслэсь Туймы шур но со валлин кыстӥськись арама люке. Вашкала вакытэ Бизяки бигеръёс удмурт уромъёссы доры тыллы ветлозы вылэм. Таослэн котыразы нокыӵе гуртъёс но вылымтэ на. Ӵыдыны луонтэм италмас возьёс, сутэрен, льӧмен, туген узыр арама, коркаса быдтонтэм сьӧд нюлэс сюдӥзы, дӥсязы, шунтӥзы удмурт, бигер, пор но ӟуч калыкъёсты. Пересь выжыосмы ымысь ыме, пельысь пеле вераса кельтӥзы гуртмылэсь Ӟуння нимо кышномуртлэсь кылдэмын шуыса. Гурт вӧзысь арама Зарча ныллэн нимыныз нимаське вал. Трос сыӵе интыос.Котькудӥз татын улӥсь мар ке но ӟечсэ кельтэм, ужаса поттэм, кудӥз ке умой нылпи будэтэменыз, кудӥз ке ӟеч ваньбуреныз, кудӥз ке йӧно но визьмо луэменыз висъяське. Пересьёс кошко, соос интые егитъёс будо. Быремын ни вашкала инкуазьлэн чеберез. Озьы ке но гурт калык возиз, ӧз ышты аслэсьтыз вашкала удмурт йылолъёссэ. Россей калыкез кужмысь Христослы оскыны косэмзы бере, солэн тулкымез Ӟуння гуртэ но вуиз. Быризы, ӵакмизы вӧсяськон интыосмы, арамаосмы. Булда вӧсь Ӟунняос вашкала дырысен вить вӧсь возё вал. Та вӧсь сярысь ке верано, син азям пуксё ӝужытэсь топольёс, льӧмпу сад, кӧня ке кызъёс но Палды шур. Со писпуос борды ошылэмын луоз вал пужъятэм ӵушкон, кышет, чалма яке дэрем.Озьы гуртоосмы но кыдёкысь лыктэм куноос Булда вӧсе лыктыса сӥзисько вал. Сӥзем чалмазэ, ӵушконзэ егит ныл ке татчы писпу борды оше, одно ик аслыз кельшымон кузпал куре вал, дыр, висись адями - тазалык, пияны быгатӥсьтэм кышномурт - нылпи. Ваньмызлэн вал аслаз малпанэз. Котькудӥз оскылӥз азьпалан ӟеч улонлы. Нош сӥзиськем адями, кылзэ ке уг быдэсты, секыт кайгуэз адӟе яке висьыны усе вылэм. Гуртамы али ке но верало одӥг выжы сярысь. Чуньы, пе, вандыны сӥзиллям вылэм, нош ужзэс быдэстӥллямтэ. Пересьёссы кулӥллям, нылпиоссы анай-атайзылэсь сӥзиськемзэс санэ басьтӥллямтэ. Со дырысен, пе, выжыязы кин ке но ляб синмо вордӥське. Булда вӧсь куинь армись одӥг пол луоз вылэм. Ю-нянь кизем бере, Ушков нюлэскысь зӧк сирпу дорын ортчылэм. Та интые Ӟуння, Вандэмо, Кечгурт, Ахтачик, Ятцаз, Котныр но мукет трос гуртъёс люкаськылӥллям. Вӧсяськыны тыл поттылӥллям сирпу борды пыш гозыез зыраса. Вӧсяськонэ воргоронъёс гинэ пыриськиллям. Та нюлэскысь сирпу дорын вӧсясько вылэм быдэс арня ӵоже, собере отысь тылэн ас гуртазы бертылӥзы. Ӟуння гуртын Булда вӧсь Тупал урамын Иван но Мерон песятайёслэн висказы вылэм. Татчы ик пуктэмын вылэм вӧсяськон корка. Со вӧсяськон коркан вылэм кӧня ке обросъёс, тусьты-пуньы, сӥзьыса кельтэм ӵушконъёс, ӝӧккышетъёс но мукет аребриос. Гурт калык нюлэскысь вӧсяськисьёсты возьмало но, кеносысь мыддоръёсты кыре поттыса, нош ик вӧсяськыны кутско вылэм. Бадӟым тылскем вылын вандос-шыд пӧзьто. Одно ик Булдалы вир сётозы вылэм. Вӧсяськись удмуртъёс куро вылэм: тани тыныд вир сётӥськом, эн кисьты милесьтым вирмес, вордӥськем нылмы-пимы таза, чебер но визьмо мед будоз, милемыз сюдӥсь-утялтӥсь мед луоз, коргидамы пудомы йылонлы мед луоз, ӟечкын сиыса-юыса, калыкен валче, шудбурен-тазалыкен вань карыса мед уломы. Вӧсез кыланы-бураны, кырӟаса вераны кутске вылэм Есна песятай. Солэн кужмо, чылкыт, чебер вӧсь гур кырӟам куараез Палды шур кузя уллапал ураме шуккиське вылэм. Со кулэм бере вӧсь гурез тодӥсьёс вылӥллямтэ ни. Ас сьӧраз нуиз, луоз, Булда вӧсьлэсь вӧсяськон амалъёссэ но, вӧсь гурзэ но. Туала дыре Булда вӧсез тодӥсьёс ӧжыт ни, колхоз кылдон вакыт вӧсяськон коркаез ю возён кенос каризы. Озьы быриз гуртысьтымы Булда вӧсь. Ӝужытэсь топольёс, пужым но кыз гинэ кылемын на Булда вӧсез адӟисьёс. Быдӟым Куала вӧсь Та вӧсь Булда вӧсь бере кыкетӥ интыын сылэ. Пыдйылазы йы-йыг сылӥсь семьяослэн вал асьсэлэн куалаоссы. Котькудӥз семья куалаяз ас сяменыз ку мылыз потэ вӧсяськылӥз. Нош Быдӟым Куалае вӧсяськыны люкасько вылэм. Со Куалае быдэс гурт Тупал урамын Кузьма Микалялэн бакчаяз сылэм. Куалалэн укноосыз вылымтэ. Отчы пичиосты пыраны лэзьылӥллямтэ. Священной инты вылэм со. Татын вӧсяськылӥллям ю- нянь вуэм бере. Ю-шепъёсты, бакча сиёнъёсты, вандос-шыдэз, винаез, чечыез вӧсялов ылэм. Та вӧсьын инмарлэсь курылӥзы: вуэм нянен, ӟеч калыкен, нылын пиен улыны мед кылдоз, выжы-кумыен сиыны-юыны мед кылдоз, кельтэм кидысссэс шыр медаз кора шуыса. Кышноос та вӧсяськонэ одно ик пыжо вылэм куарнянь. Вӧсямтэ куарнянез но вандос сиёнэз нокин сиыны ӧз кутскылы. Ваньзэ сиён-юонъёсты воргоронъёс вӧсяло вылэм. Быдӟым Куалаын сием-юэм беразы вӧсям сиёнлэсь пичи ке но оглюкетсэ доразы нуозы вылэм. Та сиёнэз сиыса адями быдэс ар уз висьы, шуге- леке вуэмлэсь но утиське шуыса оскылӥзы угось. Нош сое пудолы ке сёто, пудо йылэ, пе. Жаляса верано луэ, Микаля песятайлэн юртэз быремын ни, Куала кесямын, таркамын. Ми но янгыш, дыр. Дауръёсын возем йылолъёсты, вӧсьёсты, куалаосты утьыны ӧм быгатэ. Табере сое ваньзэ берыкты вылэм но - бер ни! Бысысьӧр вӧсь Та вӧсьлэн интыез гуртлэн шунды ӝужан палаз, ву вуколэн улланяз, Иван Росканович Киршинлэн усадьбаез сьӧрын, бадӟым лабрес кызьпу улын вылэм. Усадьба но, пересь кызьпу но, Бусысьӧр вӧсез возись пурысьтам Мачык Педор но ӧвӧл ни. Та вӧсьын потэм узьымез вӧсяло вылэм. Озьыен, та вӧсь май толэзьёсы ортчылӥз. Отын нырысь ик кыл сётылӥзы воргоронъёслы. Собере гинэ шыдэн, ӝукен кунояськылӥзы. Кызьпу вае ваем кузьымъёссэс ошылӥзы: пужъятэм кышетъёссэс, ӵушконъёссэс, чалмаоссэс, кутъёссэс, пужыоссэс - кин мар быгатэ. Озьы кузьым кельтылӥзы бусы вӧсясьлы но бусы кузёлы. Винаен но пыжиськемен огзэс огзы куно карылӥзы. Кема шулдыръяськемзы бере, вандосъёслэсь йыркобыоссэ но кызьпу вае ошылыса кельтылӥзы. Бусы кузё кузьыммес, кызьы сое яратэммес мед, пе, адӟоз. Озьы ик со гурт калыкез медаз кушты. Ӝужан узьымзы зӧк куроё, таза тысё мед луоз, шепаськем юосты шунды медаз сут, инкуазь ӟеч зорзэ, гудыризэ мед сётоз, бусыязы чумолё вӧзы чумолё, кабан вӧзы кабан мед пуксёз. Шулдыръяськон бырем бере доразы бертыкузы одно ик бусы кузёлы сюан гурен тазьы кырӟало вылэм: Тонэ гинэ малпаса, Ми вӧсяським, Тонэ гинэ данъяса, Сиимы но юимы. Ӝужам гинэ узьыммы, Зарни куроё медло. Пазьгем гинэ кидысмы, Азвесь тысё медло. Тыныд гинэ оскыса, Узьыммес ми кельтӥськом. Тонэ гинэ данъяса, Дорамы ми бертӥськом. Керемет вӧсь Керемет вӧсь самой ӝужыт вырйылын Валлапал урамын интыяськемын вылэм. Та интыын кӧня ке кызъёс но пужымъёс будӥллям. Вӧсяськон инты кенерен котыртэмын вылэм. Керемет вӧсен воргоронъёс гинэ кивалтӥзы. Вӧсясьёс вылазы одно ик тӧдьы дӥсь дӥсяллязы, кусказы керттылӥзы путо, йыразы гын шляпа понылӥзы. Татын нокыӵе обросъёс вылымтэ. Шунды ӝужан пала пыдесъяськыса, кизэс выллане ӝутыса, Шундылы вӧсясько вылэм. Вӧсяськон кенер пушкын одно ик вӧйын нянь, сюмыкен вина луэ вылэм. Вӧсяськон ортчылэм лымы бырем бере, кизён кутскемлэсь азьло. Инкуазьлы вӧсяськисьёс шуныт зор, небыт тӧл курылӥллям. Вӧсь гур кылъёс ваньмыз инкуазьлы гинэ сӥземын вал. Вӧсяськонзы бырем бере, адӟыны лыктэм пичиосын вӧйын няньзэс люкылӥзы. Адӟыны кышноос но лыктылӥллям. Гуртысь та вӧсяьсконлэн гурезь бамалэз гинэ кылемын на. Оло тодыса, оло тодытэк, писпуоссэ но кин ке корам. Нош Керемет вырйыл возьма, дыр, выль вӧсяськисьёсты?! Анна вӧсь Таиз вӧсь мукетъёсыз сярысь трослы ӧз висъяськылы. Анна вӧсь инты али но быдэс на. Со Палды шур дурысь куинь кызъёс дорын. Али но отын, таба кадь ӵошкыт вӧсяськон интыын, эмезьпу, легезьпу будэ, туж уно боры луэ. Оло, со борылы луыса, пичиос но та вӧсяськонэз тодо. Татын вӧсяськон мукетъёсыз сярысь самой шулдырез вылэм, малы ке шуоно, сяська вакыт, турнаны потэмлэсь азьло ортчылэм. Анна вӧсе быдэс гурт, пичиез но, пересез но лыктылэм. Ваньзы ӵош инкуазьлы вӧсяськылӥллям, нокыӵе мудоръёстэк. Тужгес но сюлэмзэс сётъяса вӧсяськылӥллям кышноос. Анна вӧсь кышномуртлэн нимыныз нимамын но соин луоз. Вакытэз но сыӵе вал уго: удмурт нылкышно туж секытэн улӥз. Кинлы вералоз со кӧтӝожзэ, кытчы мыноз, кин валалоз? Инкуазьлэн чебер вакытаз нылкышнолэн сюлмыз тулысэн ӵош усьтӥське вал, дыр, мылкыдыз бурдъяське, ыркыт тӧл шорын шокчыны кыре куриське. Ассэ инкуазен герӟаса, солэсь шудбур тэльмыриз но огдырлы, огшаплы ке но буйгалляз. Та вӧсь кельше вылэм туала гырон-быдтон праздниклы. Тӥни озьы улӥллям-вылӥллям гуртоосы. Пересь выжыосмылы ваньмыз понна йыбырттӥсько. Та секыт улонэз пырпотыны, чиданы соос мед юрттозы. Ваньзэ азьвылзэ малпаса, сюлмы шуген таӵе кылбур чуръёс лыктӥзы: Ар выжыысь лыктэм Ӟуння Бадӟым сюрес вылын сылэ. Тырше, ужа, нылпи вордэ, Сьӧд йырсиез ни пужмертэ. Шыпыртыса пересь бадьёс Лушкем мадё ортчем дырзэс. Синкылизэс кисьто музэ, Соин, вылды, Палды куасьме. Аналтэмын Ыргон ошмес, Ӧвӧл чаклась Булда вӧсез. Анна вӧсьмы куашка яре, Кыйпот аляз Захар возе. Тон малпаськы, Ӟуння вылэ, Эн ышты вал выжыостэ! Ӟуння капка сьӧры потса Возьма вордэм нылпиостэ. 1 Ньыльдон ар - сцена вылын 1961 арын Удмурт йӧскалык театр Ленинградысь театральной институтэз йылпумъям артистъёслэсь кыкетӥ группазэс кутӥз. Егитъёс сьӧразы куинь дипломной спектакльёссэс ваизы: "Стряпуха", "Проводы белых ночей", "Гроза". Егит актёръёс нырысь нуналысен ик Удмурт йӧскалык театрлэн труппаяз ас интызэс шедьтӥзы, театральной институтэз быдтэм нырысетӥ группаен эшъяськизы но мылысь- кыдысь ӵош ужаны кутскизы. Туннэ Ленинградысь театральной студиез йылпумъям кыкетӥ группа пӧлысь йӧскалык театрын ньыль мурт гинэ кылизы на: РФ-ысь но УР-ысь калык артистка В. А. Садаева, РФ-ысь но УР-ысь сӥё-дано артистъёс В. А. Загуляева но Г. К. Соловьёв, РФ-ысь искусствоосъя сӥё-дано ужась но УР-ысь калык артист Л. Г. Романов. Соос табере мӧйыен лыдъясько ини но учкисьёслэн яратоно артистъёссы луизы. Котькудзы соос 40 ар ӵоже 100 мында рольёс шудӥзы ини. Учкисьёслэн сюлмазы но визьмазы соос кылё туж быгатыса, аспӧртэмлыко шудэменызы. Малы ке шуоно, та ньыль актёръёс чылкак пӧртэмесь, ог-огенызы соосты нокызьы но уд сура. Валентина Загуляева - лэчыт сямъёсты шудӥсь актриса. Со пӧртэм мылкыдэз возьматыны быгатэ, но тужгес но ӟеч пӧрмо серемес сямо, кырӟась геройёслэн рольёссы. Сыӵеесь луо "Жингрес сӥзьылысь" Тимофеевна песянай, "Кезьыт ошмесысь" Сьӧд Сандӥ, "Лысву сямен уг тӧлӟы синкылиысь" Педора песянай, "Анайёсысь" Онись апай. Нош ужаны кутскыкуз В. Загуляева туж быгатыса шудӥз "Ой, чебер нылъёс!" пьесаысь ерпечка Сонялэсь рользэ. Вероника Садаева "Гроза" нимо дипломной спектаклязы ик, Катериналэсь рользэ шудыса, ассэ туж быгатӥсен возьматӥз. Нош "Мынам яратонэ татын" спектаклез Мариналэсь рользэ шудыса, быдэсаксэ чебергес, узыргес кариз. В. Садаева учкисьёсты бордаз кыскиз аслаз мур, синмаськымон пуш лулэныз. Насьток но Исьток" комедиысь ужез яратӥсь, "Милям со одӥг" но "Кык тол но куинь гужем" драмаосысь йӧно, визьмо, сабырлы кышномурт образъёсты со туж быгатыса усьтӥз. Удмурт йӧскалык театрлэсь данзэ Вероника Садаева быдэс лёгетлы вылӥе ӝутӥз, классикъёслэн пьесаосысьтызы Медеялэсь, Грушнеькалэсь, Катерина Измайловалэсь, Фемицаталэсь рольёссэс шудыса. В. Садаева кужымзэ эскере режиссёрлэн ужаз но. Со трос быгатонзэ сётӥз "Тӧдьыльӧмпу улын", "Дано артистлэн нылыз" спеектакльёсты пуктонын. В. Садаева егит актёръёслы возьматӥз, кызьы ужаны кулэ, геройёслэсь образъёссэс мургес усьтон понна. Генннадий Соловьёв учкисьёсты бордаз кыске аспӧртэмлыко капчи куараеныз, геройёслэсь пуш дуннезэс усьтыны быгатэменыз. Берло аръёсы солэн быгатонлыкез тужгес но адӟиськиз "Сирпу улын яратон", "Бызьыны вуэм песяйёс", "Яратэ - уг яраты" спектакльёсын. Нош -Эш-Тэрек" трагедиын Салиханлэсь образзэ туж мур возьматӥз - со ик батыр но, чебер но, кескич но, лек но. Финн-угор дуннеысь театръёслэн фестивалязы Геннадий Соловьёв умой шудэмез понна премиен пусъемын. Леонид Романов - пӧртэм жанръёсын ужаны быгатӥсь актёр: лирической но, драматической но, комедийной но, поэтической но, выжыкылын но... Трос шудэм рольёсыз пӧлысь уд шедьты одӥгзэ но огкадьзэ. Кылсярысь, "Стряпуха" спектакльысь - Трофим Соломка, "Коварство и любовь" спектакльысь - Миллер, "Эбга" трагедиысь - Вӧсясь, "Яратэ - уг яраты" комедиысь Матай, "Яратон уг пересьмы" комедиысь Леким но трос мукет. Леонид Романов 70-тӥ аръёслэн пумазы но 80-тӥ аръёслэн кутсконазы УАССР-ысь культурая министерствоын министрлэн воштӥсез луыса ужаз. Собере Москваысь В. Маяковский нимо Академической театрын СССР-лэн калык артистэз А. Гончаров дорын режиссёрлы дышетскиз. Удмурт театрын али со пуктӥз ини кызь спектакльлэсь трос ужъёссэ. Син шоры тужгес но йӧто таӵеосыз: "Леди Макбет Мщенского уезда", "Чебер апайёс", "Йыромем тури", "Жингрес сӥзьыл", "Уте милемыз, инмаръёс" но мукет. Театрын одӥг сезон но уг ортчы Л. Романовлэн пуктэм спектакльёсызтэк. Туннэ но Ленинградысь театральной институтлэсь кыкетӥ группазэс йылпумъям та ньыль артистъёс егитъёслы адӟем карымон ужало, Удмурт йӧскалык театрлэсь данзэ вылӥын возё. Анна Евсеева, Удмурт Элькунлэн культура удысысьтыз сӥё-дано ужась Серафима Пушина-Благинина Анае но монэ яратэ, Но лек кылъёссэ поттылэ. Атае но монэ яратэ, Но куд-ог дыръя пыкылэ. Пие но монэ яратэ, Но куддыръя ӧчкарылэ. Картэ но монэ яратэ, Но шек сямъёссэ поттылэ. Эшъёсы но монэ ярато, Но ӵем дыръя вӧсь карыло. Припев: Инмаре нош монэ яратэ, Инмаре мыным ваньзэ сётэ! Номыре пунэмзэ курытэк, Сьӧлыкъёсме лыдэ басьтытэк. Инмаре! Жаля монэ тон! Инмаре! Сёт сыӵе адӟон, Кудӥныз шудо луо мон, Кудӥныз курадӟо но мон. Инмаре! Мон тонэ утчасько, Гажаса тонэ улӥсько, Пыдесъяськыса курисько, Инмаре, котькулы данъясько! Тӥ ваньды, эшъёсы мынэсьтым Мае ке но куриськоды. Одӥгез куре йырвизьме, Мукетыз адӟе вылтырме, Одӥгез возьма чеберме, Мукетыз пинал даурме. Одӥгез куре сюлэмме, Мукетыз ӧте валесэ, Одӥгез юэ вирсэрме, Ваньдылы кулэ улонэ. * * * Пинал дыръям мон вал чебер, Али луи ни кадь визьмо. Со аръёсы мон вал кизер, Али луи батыр, кужмо. Али уг кыскиськы тамак, Ведь кыскылӥ, визьтэм нылаш. . . Уг лу святой луэм копак, Мон таӵеен ини соглаш. Вина потэ на юэме, Пиос шоры но учкеме. Нош тазалык но та визьмы Уг сёто ни визьтэммыны. Азьвыл лябгес, дыр, гожъяськи, Али луи батыр кадь, зол. Куд-ог дыръя мон ушъяськи - Асме но пыкыло огпол. Янгышъёсын, вормонъёсын Вуи дорад мон, Инмаре. Ӟеч ужъёсын но эшъёсын Сёт улыны ни табере. * * * Котькуд адями - Инмар но шайтан. Озьы кылдэмын, Коть тан, коть эн тан. * * * Одӥг улон мыным уз тырмы, Кӧня кылёз лэсьтымтэез: Яратымтэ туганъёсы но Книгаосы гожтымтэез. Ишкылымтэ сяськаосы но Вуылымтэ шаеръёсы, Лэсьтылымтэ янгышъёсы но, Вордскылымтэ нылпиосы. Эшшо одӥг улон лусал ке, Мон улысал сое озьы: Вань эшъёсме яратысал, дыр, Али уг быгаткы кызьы. Тросгес нылпи но вордысал мон, Инмар ке сётысал сое. Вань эшъёсы доры вусал мон, Кытчы ӧй пыра куное. * * * Кык пол улэме уг поты, Кемагес улэм потэ. Пересьмеме но уг поты, Пинал кылеме потэ. * * * * Удмуртъёслы кулэ курбон - Соку луом, дыр, ми шудо. Кулэ бере - мед луо мон, Яке кулэ меда пудо? Кызьы воштод та улонмес - Уг вала сое йырвизьмы. Я, ӝуатэ ни тылскемдэс, Мед ӝуалоз йыры, сюлмы. Я, юэлэ ни вань вирме, Но сюпселэ лы-сьӧмъёсме. Соку, оло, Инмар юрттоз: Оло, удмурт шудо луоз, Оло, шайтан сое быдтоз. . . * * * Пиостэк улыны быгато, Пиетэк быгато-а? Эшъёстэк улыны быгато, Калыктэк быгато-а? Сюлэмтэк улыны быгато - Зэмлыктэк быгато-а? Анайтэк улыны быгато - Инмартэк быгато-а? * * * Ой, кинлы сюлэмме усьтоно, Ой, кинлы кӧтӝожме верано? Ӧжытэз ук монэ валало, Лек кылын куддыръя вазьыло. Пиелы кӧтӝожме усьтысал, Но укыр со пичи на ук ай. Картэлы кайгуме верасал, Картме но улляй. Анайлы, оло, усьтысал. . . Но со мынэсьтым кыдёкын. Ой, лулы но каръян сюлэмы. . . Атае но сопал дуннеын. * * * Мон луо туж шудо мукетаз улонын, Со понна мон али чидало. Туж чебер, туж умой но югыт, дыр, отын, Сьӧлыктэм кылчинъёс лобало. . . Песятай пумиське атаен котькулы, Тушмонъёс но уз луэ отын. Нош али уг ни чида сюлмы но лулы - Туж секыт улыны дуннеын. Инмаре! Тон сётӥд пиедлэсь улонзэ Милемлы капчигес лэсьтыны. Мар кулэ милемлы - сётӥськод тон ваньзэ, Инмаре, тау Тыныд. . . * * * КИНЛЫ КУЛЭ. . . Кинлы кулэ мынам улэме? Пиелы? Со но кошкоз. Кинлы кулэ мынам улэме? Картэлы? Но со мукетыныз монэ воштоз. Кинлы кулэ мынам улэме? Мамаелы? Но со мукет ныл вордоз. Кинлы кулэ мынам улэме? Папаелы? Но со пизэ золгес яратоз. * * * МОН - ШУДО! Туж узыр ке луысал, Инмар ӧй яратысал. Туж шудо ке луысал, Сюлэмы пилиськысал. Трос нылпи ке вайысал, Сэрытгес пересьмысал. Туж чебер ке луысал, Вань калык вожъяськысал. Туж визьмо ке луысал, Оло нош, визьтэммысал. Нош визьтэм ке луысал, Трос калык шумпотысал. * * * ГОЖТЭ ТРАГЕДИЯ Куке мон уг луы дуннеын Гожтэ мон сярысь трагедия. Вал, пе, сыӵе кышномурт Удмурт. Калыксэ, пе, со туж яратӥз, Трос синвузэ со понна кисьтӥз, Макем зол сюлэмзэ чигтӥз, Ӟеч ужъёс но уно лэсьтӥз. Инмар, пе, солы кузьмам Визьзэ, чеберзэ пумтэм. Шайтан нош сое веднам: Карем сое эриктэм. Уно Хольмберг Перма калыкъёслэн осконъёссы Удмуртъёслэн кисьтон дыръёссы пӧлысь тужгес но бадӟымез луэ великтэм (быдӟым нунал) котырын. Соку вань кулэмъёс ветлыны кутско шуыса малпало. Тужгес но великочетверик уе, сое тросаз улосъёсын кулэм-потон-уй шуыса нимало, кулэмъёс, пе, улэп адямиос азе пото. Та дыре пӧртэм пумо сэбедъёс ортчыто, кудъёсыз улэп адямиосты кулэм муртъёслэсь утьыны кулэ. Та нуналлэн азьло ӝытаз тросаз улосъёсын пуртэн, тӥрен яке гур ӵужонэн корка котыртӥзы гож гожтыса ортчо. Укноосты, муръёез но коркась мукет пасьёсты лач-лач ворсало. Укноосы андан арбериосты тыро, ӧс но укно янак йылъёсыз сусыпу яке палэзь вайёсты юнмато. Черке пыртэмъёс, со сяна, ӧсэ но борддоръёсы кирос суредало на. Изьыны выдэмлэсь азьло корка пушез сусыпу улвайёсын ӵынато на. Ӵуказеяз ӵукна азбаре куроез сутыса тылскем лэсьто но, семьяысь вань калык бӧрсьысь бӧрсе со вамен "инмар тазалык мед сётоз" шуыса тэтча. Со сяна, мунчое пыро но собере кисьтон ортчытыны кутско. Чылкытатскон но утиськон сэбедъёс сяна, ӵем дыръя жобъёсты-ишанъёсты, лек лулъёсты уллян сэбед ортчыто на. Глазов утемысь удмуртъёс сярысь Первухин тодосчи гожтэ, соос, пе, вуж чугунъёсты, бодыосты, пыӵалъёсты но мукет со выллем арбериосты куто но матысь нюлэскы, ӵуш-паш карыса, ыбылыса но кесяськыса, ар ӵожын кионъёсты но мукет сьӧсьёсты улляны мыно. Отысь бертэмзы бере, кусо, гур ӵужон, лопата но учогысь пень басьтыса, ас корказэс ведӥнъёслэн кырсь ужъёссылэсь утён понна гож лэсьтыса котырто. Соослэн малпамзыя, угось та дыре лек лулъёс котькытӥ урод ужъёс лэсьтыса ветло. Озьы ик соос вӧсясько но, "осто Инмаре" шуыса пудозэс вӧсяло, изьыны выдыкузы ведӥнъёс медаз пырыны быгатэ шуыса кошкон полэз но гулбеч укноосты ворсало. Коркалэн тӧр шораз сылӥсь тӧдьы ӝӧккышетэн ӝӧк вылэ ӟеч лулъёсты либатон понна чабей нянь колды но сылал поно. Со лулъёс, пе, изись муртъёсты уин возьмало, утё. Куд-ог палъёсын пинал пиос быдэс уй корка яке кенос йылын ведӥнъёсты возьмаса пуко. Ведӥнъёс ӵемысь писэй, пуны, куддыр кион кариськыса пото. Кулэм потон уе кулэмъёсты куноятон сямлэн пытьыосыз адӟисько на, христиан осконэ берыктӥськыса, ӟуч черклэн йылолъёсызъя улыны кутскемъёслэн но. Котьмар ке но, шайтанъёсты, лул-ишанъёсты уллян сэбедэз тросэтӥ пучы арнялэсь азьло нуналэ ортчыто. Первухин тодосчилэн ивортэмезъя, Глазов утемын, нош Кошурниковъя но Верещагинъя, Сарапул утемын та сэбед кулэм потон уез ортчытонэн герӟаськемын. Бирск утемысь та пумысен таӵе мадемзэс кылӥ: пиос но нылъёс, пе, гурт кузя ветло но капкаосы но коркаос борды бадь ньӧрын жуго, озьы ик куддыр коркась валесазы кыллись адямиосты шачыръяса кесясько: "вервагисьтыр". Тазьы атас чоръяны кутскытозь ветло, ӵукна пал ньӧръёссэс гурт сьӧрысь возь вылэ куяло яке тылын суто. Гуртэ бертыкузы, котькудзы ик ӝоггес лыктыны тыршо, угось берлоез вуись мурт, пе, кинлэн ке курадӟонэныз, шудтэм учыреныз пумиське. Ӵукна куазь югдыку, куд-огез гид азбаразы потало на, пудо-животъёссэс тыбыртӥзы бадь ньӧрын шачыръяло. Васильев тодосчи Сарапул палась удмуртъёс сярысь гожъякуз поттылэ, соос, пе, ньӧрын шачыръякузы тазьы кеськыло: "Ми кылез-дэез но висёнэз улляськом!" Ватсаса со маде на, ишанъёсты уллясьлэн гурт пумысен гурт пумозь ветлыкуз ӵем дыръя кияз ӝуатэм сиресь бодыез луэ на шуыса. Гаврилов тодосчи ивортэ, та сэбедэз удмуртъёс пучы шуккон нимало шуыса. Кузон губерниын пучы арняез пусъён сямъёс пӧлы кыӵе ке но сценкаосты пуктон но пыре. Соосты котьку сямен шайтанъёсты уллян сэбедлэсь азьло возьмато. Валлян ӝытаз егит пиос гуртысь самой палэнэ интыяськем мунчое люкасько. Отын соос, гурзэ эстыса, пӧртэм шудонъёсын шудыны кутско, кылсярысь, выт бичанэн но солдатэ басьтонэн. Выт бичан понна, пӧртэм пумо чиновникъёсты быръё: выт бичасьёсты, выт эскерисьёсты, судьяосты, выт бичан радэз чаклась полициез но быръё. Выт уксё интые, сьӧд бобы кӧжыен шудо. Сое котькудӥз лыктыкуз сьӧраз вае. Куд-огез выт тыронлы пумитъясько. Соосты кужмысь тырыто. Куд-огзэ наказать но каро. Собере солдатэ басьтон кутске. Егит пиос пӧлысьтызы быръем муртъёслы генерал, капитан яке мукет вылӥ офицер сан сёто. Та адямиосты, кун службаез нуон понна, лекрутэ люканы кутско. Тае быдэстэм бере, дышетсконъёс ӧдъяло. Ожгарчиос винтовка интые бодыосын зарядка лэсьто. Бератаз уйшоре генерал воргоронъёслы команда сётэ: гуртэ бызьыса, шайтанъёсты улляно, пе. Кулэм потон уе но пучы арня уе сяна, куд-ог инытосын, ӵемысь уй пал ёросъёсын лул-ишанъёсты уллян мукет дыръя но луылэ. Васильев пусъе, со пучы арня бере вордӥськонэ луэ шуыса. Бух вера, шайтанэз уллян ымусьтон (рошво) бере сизьыметӥ нуналаз ортчытӥське шуыса. Ымусьтон вылтӥ шайтанъёсты уллян сярысь озьы ик Верещагин но маде: Сарапул утемысь удмуртъёс, пе, ымусьтонлэн куинетӥ нуналаз асьсэлы пичигес пу молот лэсьто, но соин жобъёсты-ишанъёсты улляло. Кивалтослэн нимыз бордысь ик та сэбедлэн чокмор нимыз кылдэмын. Одӥг газетысь (1851) тодмо луэ, лек лулъёсты уллян Малмыж утемын выль ар азьын ортче шуыса. Глазов удмуртъёслэн та сэбедзы пӧртэм христиан праздникъёсын ӵош лэсьтӥське. Жобъёсты- ишанъёсты уллянлэн вашкала дырыз, котьмар ке но, быдӟым нунал котырын луэ - покчиарня уй. Ӟучъёслэн пучы арня нуналэ кутӥськись бадь ньӧръёслэн вылӥ кужымзылы оскеменызы, дыр, со сэбед берло верам нуналэ ортчыны кутскиз. Тае возьматэ удмуртъёслэн вервагисьтыр шуыса кесяськонзы но, кудӥзлэсь пуштроссэ соос валэктыны уг быгато. Нош тазьы кесяськон умой тодмо кызьы ке Кузон, озьы ик Уфа губерниосын. Со кыллэн нырысетӥ люкетэз верба (бадь ньӧр) ӟуч кыл луыны кулэ. Котьмар ке но, пусйыны кулэ: лулъёсты сюдо-сектало вылӥын верам нуналъёс пӧлысь кулэм потон уе гинэ. Удмуртъёс сямен ик котыразы улӥсь калыкъёс но - крашинъёс (черке пыртэм бигеръёс), чувашъёс но поръёс - кулэмъёслэн лулъёссы со нуналъёсы потыса ветлэмзылы оско. Оглом вераса, Ӵук пал Европаысь вань калыкъёслэн, ӟучъёсты но лыдэ басьтыса, тулыс - яке быдӟым нунал, яке тройча котыр - кулэмъёслэн ветлон вакытсы луэ. Комиослэн туала валанлыксыя, кулэмъёслэн калгон вакытсы семик праздник дыръя луэ. Соку, пе, Янович тодосчилэн верамезъя, соос оско, Инмар кулэмъёслы музъем вылтӥ ветлыны лэзе шуыса. Котьмар ке но, соослэн но кылемын на быдӟым нунал вылтӥ лулъёсты уллян сэбедлэн пытьыосыз. Угось та сярысь Хлопин тодосчи тазьы ивортэ: соос, пе, кулэм потон уй азьын ӵукна куазь югдэмлэсь азьло доразы сусыпу но ньылпу вайёс ваё. Оглюкетсэ быдэс ар ӵожелы мумыкор вискы яке гур вылэ тыро, кылемзэ суто, тылыз вылтӥ тэтчаса. Вераны кулэ, та сэбед, кыӵе ке но христиан праздник борды итӥськыса, берлогес ини кылдэмын шуыса лыдъяно. Лулъёсты уллян йылоллэн вашкалаезгес луэ, кызьы пусъе Нурминский тодосчи, куд-ог поръёслэн шайтанэз уллямзы. Та сэбедэз соос ортчыто южтолэзе выль толэзь ӝужан азьын огаз уе. Вылӥын верам осконлэн перма калыкъёслэн лымшор бускельёссы пӧлын вӧлмемез возьматэ кудпалась солэсь вуэмзэ утчаны кулэзэ. Сыӵе валан ӵук пал финн-угор калыкъёс пӧлы булгаръёс пыр вӧлмиз, дыр. Со палась ик соос доры вуэмын трос мукет осконъёс но сямъёс, кудъёсызлэсь пытьыоссэс вылӥ азинскем вӧсяськон радысь сяна, озьы ик кулэмъёсты сӥлы каронысь но адӟыны луэ. Сыӵе тодметъёс пӧлысь, кудъёсыз удмуртъёслы булгаръёслэсь вуэмын но кудъёсыз соослы но булгаръёслэн пушъетъёссылы, чувашъёслы огъя луо, нырысь ик пусъёно нимаз но ар ӵоже ортчись кисьтонъёслэсь огдыре ортчемзэс. Со сяна, вань на трос чыры-пыры югдуръёс, кылсярысь: кулэм муртэз зыран, шӧез кур вылэ понон, семьяосызлэсь корос вамен тэтчамзы, инты басьтыны сьӧраз уксё понон, курегез виро сётон, сюсьтылъёс, озьы ик кулэм муртлы ӧс доры тусь пуктон, отчы кулэм муртлэсь нимзэ вераса пичиен сиён куяно, собере пуныослы сётон но, соослэн сиськемзыя кулэм муртлэсь мылкыдзэ эскерон. Берлоез сям комиослы но тодмо луэ. Озьы ик удмуртъёслэн но чувашъёслэн огъя йылолъёссы пӧлы пыро кулэмъёслы нимысьтыз кылдытэм кур куян интыез сӥлы карон. Озьы ик кулэмъёсты буре ваён понна юбо пуктон, со азе курбон тырон понна пичигес ӝӧк но пукон лэсьтон. Со сяна, кулэмъёслы йыр-пыд сётон но вал кузьманэз сюан сямен ортчытон - ваньмыз со сямъёс нырысь-валысь удмуртъёслэн асьсэлэн ӧй вал, дыр. Мусульман осконлэсь пыӵамзэ возьматэ удмуртъёслэн шайгузэс уй паласен лымшоре радъямзы. Таӵе ватон сямез куд-ог интыосын комиос но азьвыл утиллям, шӧдске. Озьы ик покчиарняе кулэмъёсты сӥлы карон ужрад ортчытон но мусульман дуннеысь вуэмын. Бигеръёс сямен ик Бирск утемысь удмуртъёс но котькуд покчиарня ӝыт, чай юыкузы, кулэмъёсты буре ваё. Ватсаса пусйыны кулэ, бигеръёслэн валанлыксыя кулэм мурт ар ортчыса гинэ адямиослэн азьысьтызы кошке но Инмарлэн судэз улэ шеде. Озьыен, кулэм муртлэн ар ӵоже дораз улэмез сярысь валан но муртъёслэсь асэстэмын, лэся. Озьы ке но, удмуртъёслэсь вылӥын пусъем осконзэс ӵошатыны кулэ хантыослэн кулэм муртэз тодын возён понна лэсьтэм мунёез ар ортчем бере ватон йылолэнызы. Удмуртъёслэн но азьвыл сыӵе ик сямзы вал шуыса, таӵе югдур возьматэ, дыр: Бирск утемын улӥсьёс кулэм муртлэн ар тырмон нуналаз шай вылаз ӵушкон сого. Ватон нуналэ соин шайвылысь уртэз доразы нуизы вал, собере со ар ӵоже коркан ошкыса улӥз, кулэм муртэз тодын возён понна. Кулэм муртэз буре ваён ӵушкон славян калыкъёслы но тодмо, комиослы но. Со перма калыкъёс доры азьло кулэм муртлэн буре ваён тусыз интые вуиз, луоз. Инкуазен огинтыын улӥсь тросэз калыкъёс сямен ик, удмуртъёс оско, улэп адямиослэн улонзы но шудзы-бурзы кулэмъёсын герӟаськемын шуыса. Татысь ик потэ кулэмъёсты, тужгес но нылпиослэн анай-атайёссэс сӥлы карон. Семьяос пересьёсты жугыса, тышкаськыса возё ке, таосыз эзельзы вуон азьын пиналъёссылы урод лэсьтыны, пунэмзэ берыктыны кыл сёто. Кылсярысь, Верещагин та пумысен тазьы вера: семьяосыз пересь муртэ урод карыса возё ке, пе, таиз соосты кулон валесаз таӵе кылъёсын кышкатэ: "Тӥ монэ пуныез кадь возиды, адӟонтэм карыса улӥды, кулэмме гинэ мынэсьтым возьмады. Я, бен, со пумен матэктэ ни. Улытозям уг ни тӥледлы люкеты. Но только возьмаса улэ, кошкеме бере, тӥледлы адӟон бӧрсьы адӟон вуоз, шудтэм учыр бӧрсьы шудтэм учыр луоз". Адямиос малпало, кулэм муртъёс висён лэзё шуыса - кулэм мурт мыж. Со кыӵе ке но одно ик лэсьтоно ужез быдэстымтэ понна курадӟон луэ. Сое эмъяны чылкак одӥг гинэ амал вань - курбон сётон. Висён сюрыку, удмуртъёс яке доразы курбон сёто: азбар пумысь нимысьтыз интыын пудоез вандыса, сӥльзэ коркан пӧзьто но лыоссэ кыр куян (кур куян) яке лы куян интые нуо: яке вань та сэбедэз берло пусъем интыын ортчыто. Кыр куянын ортчись курбон сётон вӧсьёс пӧлысь тужгес но шӧдскымонэз бер вӧсь ("берлоез вӧсь") луэ. Сое одно ик уин быдэстоно, сьӧд курбон пудоез лушкаса. Виро сётыку, вӧсясь кулэм муртъёслы вазиськыса вӧсяське, та курбон берлоез ини шуыса. Озьы ик куре, сиён-юонэз лулъёс кабыл мед басьтозы адямиослы медаз ни люкетэ шуыса. Висёнъёс сяна, кулэмъёс трос мукет курадӟонъёсты но лэзьыны быгато. Кылсярысь, соос семьяоссылэсь пудо-животсэс вато. Елабужский тодосчи вера, кыӵе ке пудо уллёысь ыше ке, пе, удмуртъёс шуо: "Пересьёс сое ватӥллям". Мурт адямиослы ышем пудоез шедьтыны кемдэ ке, кулэмъёслэн вожпотэмзылэсь кышкаменызы, соос со сярысь пудолэн кузёезлы вераны уг дӥсьто. Боагевский тодосчилэн верамезъя, вал ышыку, со кулэм пиосмуртлэн ужез шуыса лыдъяло, нош скал ышыку - кулэм кышномуртлэн. Кыказ ик учыре со пудоез кулэм муртлы сӥзёно, угось солэн ышемез возьматэ, кулэм мурт гурт пудолы кулэяське шуыса. Со сяна, кулэмъёс улэп адямиослэн возёссылы (хозяйствозылы) пӧртэм амалэн изъян карыны быгато. Соос кизем юосты быдто, изъян карись нымы-кибыосты, шыръёсты келяло но мукет. Оглом вераса, ивортэ Елабужский, удмуртъёс пересьёссылэсь тросгес уродзэ адӟо. Озьы ке но, мылкыдзы ӟеч луыку, кулэмъёс улэпъёслы озьы ик пӧртэм амалэн шуд но азинскон вайыны быгато. Удмуртъёслэн кисьтонъёс дыръя чирдоно куриськонъёсысьтызы валаны луэ, кулэмъёс сое ик карыны быгато, мае инмаръёс но ужало. Соос быгато семьяез но пудоез йылэтыны, соосты тушмонъёслэсь но сьӧсьёслэсь утьыны, ю-нянь будон понна сюлмаськыны, озьы ик быгато зорез вайыны но шундыез пиштытыны. Соин ик удмуртъёс, виро сётыса но вӧсяськыса, пересьёссылы матэ кариськыны тыршо. Нырысь ик кулэмъёс улэп ӵыжы-выжыоссылэсь кӧттыр сётӥсь ӧнеръёссэс утисьёс луо. Та пумысен Аминофф тодосчи шуэ, Ватка губерниысь удмуртъёс, пе, кудъёсызлэн пӧйшуран огез валтӥсь ӧнерзы луэ на, пӧйшуран вакыт кутскыку, кулэмъёслы но, нюлэс кузёослы виро сёто. Васильев тодосчи поттылэ, тулыс пудоез нырысьсэ возь вылэ лэзьыку, кулэмъёслы курбон сӥзён каро, пе. Соку семьялэн йырыз азбарын курегез вандыса шуэ: "Мон куреглэсь вирзэ кисьтыса виро карисько но кыл сётӥсько сӥзьыл, тӥледыз сӥлы карыса, возь вылэ лэзем пудоосы пӧлысь огзэ вандыны мед гинэ соос доре вуысалзы изъянмыны шедьытэк". Тодосчилэн гожъямезъя, соос озьы лэсьто кыре лэзем пудозэс кулэмъёс пӧртэм пумо быронлэсь мед утёзы шуыса. Пудоос шуре яке нюре медаз вые, сьӧсьёс улэ медаз сюре. Сӥзьыл соос, сётэм кылзэс быдэстыса, азбарын такаез виро сёто. Пудозы понна удмуртъёс озьы ик выль пуктэм гидын но кулэмъёслы вӧсясько. Верещагин тодосчи поттылэ, соку, пе, корка кузё ыж вандэ, сое гид азбарын пӧзьтэ но, кияз писпу вай кутыса, йыраз изьыен вӧсяське. Вӧсяськыкуз со тазьы вера: "Пересьёс, виро сётэм ыжмес кияды-пыдады басьтэ, валъёсмес зӥбыса эн возе, скалъёсмес эн курадӟытэ!" Вӧсяськем бере, вӧсям сиёнэз семьязы куспын люко, сӥльзэ сиё, нош лыоссэ гид сэреге сого. Берлогес кылдэм ӧнерен - ю-нянь будэтон удысэн - вырыкузы но удмуртъёс кулэмъёслэсь юрттэт курон понна вазисько. Аминофф тодосчи вера, соослэн малпамзыя, кулэмъёс, пе, инмаръёс сямен ик ю-нянез удалтытыны яке кулэстыны быгато. Соин ик бусы ужъёсын герӟаськем праздникъёс дыръя курбон сётыку, сопал дуннее кошкем муртъёсты но буре ваё. Верещагин маде, Сарапул утемын кулэмъёсты тулыс кизем бере ортчись тулыс сур нимъем праздник дыръя буре ваё шуыса. Соку, пе, пересьёслы ӵӧжез но вандо. Со тодосчи ик гожтэ, турнаны яке араны потыкузы, удмуртъёс, пе, пересьёссэс нянен буре вайыса, тазьы вазисько: "Пересьёс, бубыос, вын-нюняос, эн куштэ милемды, сётэ милемлы тыраз ю-нянь, та тыр нянь колды кадь ик!" Шестаков тодосчилэн верамезъя, Глазов утемысь куд-ог интыосын, ю-нянез октэм-калтэм бере, кисьтон ортчыто огдышем сямъя. Богаевский Сарапул утемысь таӵе сямез возьматэ. Котькуд семьялэн кузёез сӥзьыл кизён азьын бусы кэсэг вылаз мынэ но, кунулаз атас яке курег вайыса, отын сое вандэ но вирзэ бусые лэзе. Сӥльзэ доразы пӧзьто, нош лыоссэ но тылызэ бусые тылобурдо вандэм интые нуо. Таӵегес ик сям сярысь Васильев тодосчи но маде. Со кыӵе ке но эшшо одӥг кисьтон сярысь поттылэ на, кудзэ сӥзьыл узьым бусыын ортчыто. Соку виро сёто скалэз яке валэз. Отчы пырисько пиосъёс, кышноос но нылпиос. Та праздникез ортчытон амалъёс - сюсьтылъёсын но кулэмъёслы пуктэм тусьёсын - быдэсак огъя кисьтонлы кельшо. Озьы ик комиослэн валамзыя но кулэмъёс улэп кылемъёслэн улоназы пӧртэм амалэн пырисько. Вожзы потон дыръя соос быгато пӧртэм пумо изъян вайыны, висёнъёс келяны, пудоез нюлэскы ватыны но мукет. Нош мылкыдзы лякыт дыръя, соос улэп адямиослы котыр ласянь утись луо. Нюлэскын ӵыжы-выжыоссылы пӧйшуракузы сюрес возьмато, луд пӧйшурез-тылобурдоез нальыке-сикыӵе улляло, нош чорыгез - мурдо пушкы. Лудын соос пудоез возьмаса уло, сьӧсьёслэсь утё, бусыосын юлэсь вуэмзэ эскеро, нош сюрес вылын сюресчиез урод адямиослэсь возьмало. Соин ик комиос, кызьы пусъе Налимов тодосчи, пӧртэм учыръёсы кулэмъёслы вазисько. Нюлэскы мыныкузы, соослэсь пӧйшур-тылобурдо куро, пудозэс лудэ поттыкузы утьыны-возьманы косо, ю бусызэс аракузы, пересьёссылы вӧсясько, мед тросгес ю-нянь сётозы шуыса. Озьы ик бусы ужъёсын герӟаськем праздникъёс дыръя, кылсярысь, Ильиндене, комиос, инмаръёслы сяна, кулэмъёслы но вӧсясько. Арам бере соос кисьтон каро, нимысьтыз пӧрам чомор нимо сиёнзэс сиыса. Со сиёнэз вӧйлэсь но йыды кеньырлэсь дасяло. Азьвыл сое кулэмъёслы анаос вискы межае пуктылӥзы. Комиос зэмзэ ик кулэмъёссэс утись-вордӥсь лулъёсын лыдъяллязы но ялан лыдъяло на шуыса, таӵе югдур но возьматэ. Выль корказэс соос луэмезъя котьку но пуктыны тыршо вуж интыяз, кытын ас вакытаз пересьёссы улӥзы. Отын, пе, соослэн лулъёссы ялан уло на. Кӧттыр понна сяна, удмуртъёс пересьёссэс вань ужъёссылы кабыл сётыны куро. Кылсярысь, кышнояськон дыръя кулэмъёслы виро сётыса вазиськон оглом вӧлмем йылол луэ. Котьку сямен виро сёто сюан нуналэ. Соку вӧсяло бадӟым пудоез - валъёсты яке скалъёсты. Та ужрад вал сюан сэбедлы кельше вандэм пудолэсь лыоссэ бератаз шулдыръяськыса лы куян интые нуэменызы. Куд-огез малпало, сюан нуналэ курбон сётэм бере пиналъёс уг ни вордӥсько шуыса. Сыӵеос виро сётонзэс луэмезъя бӧрысьгес дырлы выжытыны туртто. Удмуртъёслэн малпамзыя, адямилэн улонэз но кулэмъёслэн кузьымзы луэ. Богаевский тодосчи пусъе, удмуртъёслэн осконысьтызы валаны луэ, пе, макем матын луо пересьёс но нылпиос вискын кусыпъёс, кулэмъёс, пе, вордскисьлы лул сёто. Таӵе малпан тани кытысь адӟиське: нылпи секытэн вордскон дыръя, соос нош ик пересьёслы куриськыса вазисько. Верещагин таӵе учыр сярысь поттылэ: одӥг кышномурт, пе, лултэм вордӥськем пиналзэ кияз кутыса, куриське: "Кулэмъёс, агай- вынъёс, сётэ нылпиелы лул!" Первухин тодосчи вера, пинал ваён секытэн ортчыку, гогыясьлэн инмаръёслы вазиськемез пайда уг сёты ке, бератаз, пе, со нылкышнолэн но картэзлэн тужгес но гажано кулэм ӵыжы-выжыоссылы вӧсяськыны кутске, соослэсь нимъёссэс вера но соослы виро сётыны кыл сётэ. Та гожъясь ватсаса вера на, али гинэ пинал ваем анайлэн анай-атаййёсыз кулэмын ни ке, пе, пиналлэн нырысетӥ улон арняяз, соосты сӥлы карыса, анай-атай одно ик кисьтон ортчытэ. Сое озьы ик нылпи висьыны усьыку но ортчыто, куке туно-пеллё ивортэ, висёнлэн мугез песятаезлэн яке песянаезлэн нылпиез доразы ӧтемысьтыз кылдэмын шуыса. Озьы ик сюрес вылэ потыкузы но удмуртъёс кулэмъёсты кабыл сётыны куро. Васильев вера, удмуртъёс, пе, куное мыныкузы, асьсэ кулэм ӵыжы-выжыоссылы вӧсясько, нош бертыкузы буре ваё кунояны ветлэмъёслэсь ӵыжы-выжыоссэс. Верещагин вера, Сарапул утемысь улӥсьёс, пе, сюанэ мыныкузы, кулэмъёс сюрес вылысен висён медаз лэзе шуыса, сьӧразы нянь шоремъёс басьто но сое бусы ӟезьы, кенер борды куриськыса куяло. Сюрес вылысен кыӵе ке шудтэм учыр луэ ке, сюресчие яке солэн валэз висьыны усе, яке уробо колёса тӥяське но мукет со выллем - со кулэмъёслэн ужзы шуыса малпало но интыяз сьӧразы кутэм сиёнэн куяськыны кутско. Ӵук пал удмуртъёслэн сямазы мур пыӵам урам вӧсьсы вань. Сое бер сӥзьыл, дӧдьы сюрес пуксем бере гинэ, ортчытъяло. Гурт урам шоры бадӟым тылскем лэсьто но вӧзаз чуньы вандыса сиё. Лыоссэ лы куян интые нуо. Яковлев тодосчи вера, муртъёсты та виро каронэ уг ӧтё шуыса, нош чуньы понна дунзэ быдэс гуртэн тыро. Аптиев тодосчи та выллем ик сьӧр сюрес нимъем вӧсь сярысь поттылэ, со, пе, кулэм муртлэн котькуд куатетӥ араз ортчытӥське. Соку сьӧд ошез виро сёто. Сое урамын но, сюрес вылын но уг ортчыто - кытын ке мукет интыын. Вӧсяськыкузы удмуртъёс вазисько пересь анай-атайёссылэн лыктэм интыысьтызы черъёслы. Туала улон интыязы курадӟонъёс медаз вае шуыса курисько. Шугъяськытэк вераны луэ, та йылолъёс мукет калыклэсь асэстэмын шуыса. Чувашъёс но, выль улон интыосазы пуксемзы бере, азьло улэм интыысьтызы лулъёсты-кузёосты буре ваё. Пусйыны кулэ на эшшо одӥг вӧсез. Со возьматэ, удмуртъёслэн малпамзыя, макем пӧртэм чыры-пыры ужъёсын но кулэмъёс, улэп адямиослэн улоназы пыриськыны быгато шуыса. Вӧсез ортчыто кумышка пӧзьтонзы удалтымтэ дыръя. Васильев вера, удмурт нылкышноослэн вина пӧзьтонзы уг удалты ке, пе, кулэмъёсты буйгатыны шуыса, сьӧд курегез вӧсяло. Богаевский тодосчи пусъе на: куд-огез, пе, вӧсь нергеез вань ӵыжы-выжыосын ӵош ортчытоно шуыса лыдъя. Соку, пе, котькудӥзлы аслаз пересез понна сюлмаськыны кулэ, малы ке шуоно, котьку ик уг луы тодыны, кудзы соос пӧлысь винаез пӧзьтыны люкето. Вылӥын верамъёс яркыт возьмато, макем шӧдскымон инты басьто вал пересьёс комиослэн дунне шоры учконазы, нош черке пыртымтэ удмуртъёс пӧлын со кытын но отын али ке но кылемын на. Асьме вакытэ кулэмъёслэн азьвыл утем удысъёсазы нимысьтыз утись-возьмась кузёзы кылдӥз. Дыр ортчыса, удмуртъёслэн тросаз вӧсяськонъёсазы кулэм анай-атайёслэсь нимъёссы интые Инмар пуксиз. Елабужский тодосчи пусъе, али, пе, удмуртъёс кулэмъёслы вазиськоназы вӧсяськыны кылэз но уг ни верало, со интые соос йыбырттыны шуо. Озьы ке но, таӵе югдур вань удмуртъёс пӧлын ӧвӧл. Вашкала йылолъёсты сӥлы карыса, куд-ог интыосын али но инмаръёсын но пӧртэм утись-возьмась кузёосын артэ кулэмъёс шӧдскымон инты басьто на. Озьыен, кулэмъёслы вӧсяськемез Елабужский юнме уг нима, дыр, удмуртъёслэн "язычествозылэн юнматэм карез (крепостез)" шуыса. Кулэмъёслы вӧсяськонлэн бадӟым инты басьтэмез тани кытысь но адӟиське: удмуртъёс пересьёслэсь сямъёссэс но вӧсяськон сэбедъёссэс чакласа возисьёсын гинэ уг лыдъяло, соос пересьёссэс утись-возьмасьёсын но лыдъяло. Удмуртъёслэн малпамзыя, кулэмъёс вашкала сямъёсты возьмасьёс луо. Гаврилов тодосчи губерниысь тазьы верамзы сярысь поттылэ: калык анай-атайёссылэсь кылем йылолъёссэс ӧз ни ке чакла, кулэмъёс соосты ю-нянь удалтымтэен курадӟытозы. Таӵе валан пӧртэм палан улӥсь удмуртъёс пӧлын вӧлмемын. Та ласянь инкуазьлэн инмаръёсыз кулэмъёсын ӵошатскыны уг быгато. Берло гинэ ини, удмуртъёс пӧлы мукет калыкъёслэн йылолъёссы пыӵамен, инмысь инмар кулэмъёсын оградэ султэ. Кулэмъёслы вӧсяськон озьы ик шӧдскымон инты басьтэ удмуртъёслэн огазьын, ӵош улоназы. Тае умой возьматэ соослэн куалаын тунсыко вӧсяськонзы. Сергей Максимов. 1 Утёно-а инкуазьмес?! Шур дурын вож садъёс шыпырто, Ву дуртӥ туливить бызьылэ. Учкисько мон, кыӵе со шудо - Шат юнме дуннеын со улэ! С. Широбоков. Юнме ӧвӧл, дыр, инкуазь пӧртэмлыко. Котькыӵе будослэн, пӧйшурлэн, нымы-кибылэн та дуннеын аслаз интыез вань. Котькудӥз но ас сяменыз дуно, нош со дыре ик соос ог-огенызы юн герӟаськемын. Пӧйшур-а, будос-а бырыны шеде ке - вӧзысьтыз мукетыз но лябӟыса пашмыны быгатэ. Кылсярысь, сьӧсьёс ӧз луэ ни ке, йылозы йырйиськисьёслэн выжызы. Таосыз ас сяменызы быдтозы будосъёсты, пумен со инты буш кылёз. Сыӵе югдуръёсты трос вераны луоз. Тодмо биолог Джеральд Даррелл вераз вал: ". . .инкуазез утён - со асьмемыз утён. Сое ӧм ке уте, со быроз, собере быромы асьмеос но". Арысь аре инкуазьлэн узырлыкез ичиоме. Инкуазь ноку но быронтэм шуыса малпазы калыкъёс. Адями улэп макеосты быдтэ оло малпаськытэк, оло юромо, оло тодон тырмымтэеныз. Берло ньыль дауръёсы гинэ музъем вылысь адямиен сэрен ышизы-быризы 63 пумо пӧйшуръёс, 94 турлы тылобурдоос. Дронт, бескрылой гагарка, странствующий голубь но туж трос мукет пӧйшур-будосъёс.Нош азьпалан асьмемын сэрен кӧняез бырозы на. Берло аръёссэ нуналлы быдэ музъем вылысь быре 1-10 котыр пӧйшур но одӥг (оло тросгес) будос. Нош таӵе ыштонэз берыктыны луонлык ӧвӧл ни. Маиз вань на та инкуазьын, сое утьыны кулэ асьмелы. Тани кыӵе муген быро пӧйшур-будосъёс: - улон интызэс куашкатон; - пӧйшуран; - пӧйшуръёсты мукет интыысь вайыса, соослы тупасьтэм будосъёсты быдто, яке ог- огзылы люкетыса бырыны-куасьмыны шедё; - сиён тырмымтэен; - гурт ужъёсын сэрен; - шӧдтэк шорысь быдтонэн. Та мугъёс ваньмыз тодмо ке, капчигес луэ сое сэрттыны-пертчыны. Туннэ нуналын калыклы валамон луиз: инкуазьлэн узырлыкез укыр ӝог куанерме шуыса. Соин ик 1948 арын кылдытэмын вал Инкуазез утёнъя калыккуспо огазеяськон (НУКО - Международный союз охраны природы - МСОП). 1949 арын огазеяськон борды кылдӥз шер но бырыны кутскем пӧйшур-будосъёсты эскерись комиссия. Та комиссия ик тодмо тодосчилэн Питер Скоттлэн ӵектэмезъя Горд книга поттыны чаклаз. Пӧйшуръёсты но будосъёсты Горд книгае шедемзы возьматэ соос улонамы шер пумиськыло но соосты утьыны кулэ шуыса. Котькуд кунын, Горд книгае пырем пӧйшур яке будос, вань калык азьын инкуазь узырлыкез утён понна кыл кутэ. МСОП-лэн Горд книгалэн нырысетӥ томез 1963 арын поттэмын вал. 9 ар ортчыса потӥзы мукет вить томъёсыз, кытчы пыризы 236 турлы нонӥсь пӧйшуръёс, 287 пумо тылобурдоос, 36 пӧртэм музъем вылын но вуын улӥсь пӧйшуръёс (эбекъёс но бакаос выллем), 119 пумо нюжтӥськыса ветлӥсьёс (кыйёс, кенӟалиос), чорыгъёс но будосъёс. Книгаын вань листъёсыз пӧртэм буёлэн буямын. Горд страницаос вылын возьматэмын пӧйшуръёс но будосъёс, дунне вылысь кудъёсыз бырон калэ вуэмын ини, ӵуж буёлэназ - быронлэсь кыдёкын ӧвӧл ни шуыса пусъемын. Тӧдьы страницаосы пыртэмын ӧжыт лыдъем но шер пумиськылӥсь макеос. Пурысяз пӧйшуръёс но будосъёс, кудъёсыз умой- умой тодэмын-валамын ӧвӧл на. Нош 1972 арын та книгаын кылдӥзы на вож буёло листъёс но. Соос сӥземын сыӵе пӧйшур-будосъёслы, кудъёсызлэн лыдзы адямилэн утеменыз сэрен будэмын. Азьланяз соослэн быронзылы кышкытлык ӧвӧл ни. Кылсярысь, утьыны луиз зубръёсты. Асьме шаерын кынылэсь лыдзэ будэтыны луиз. Нош кыӵе ке пӧйшуръёсты яке будосъёсты эскерыса (утялтыса) возьыны луоно дыръя, со страницаез, кытын со сярысь гожъямын, Горд книгаысь басьто. Быдэс дунне вылын котькуд кун Горд книгаысь пӧйшуръёс но будосъёс мед улозы шуыса, ваньзэ мар быгатэ, лэсьтыны тырше. Озьы ке но, сыӵе улэп макеослэн лыдзы арысь аре будэ. Быдэс дунне вылысь номыр но огвакытэ уг быры. Нырысь со ыше одӥг интыысь, собере мукетысьтыз. Соин ик котькуд кунлы кулэ луиз кылдытыны аслэсьтыз книгазэ. Нырысетӥез таӵе книга поттэмын вал 1974-78 аръёсы. Отчы пыртэмын 62 пумо нонтӥськись пӧйшуръёс, 63 тылобурдоос, 8 вуын но музъем вылын улӥсьёс, 444 пӧртэм будосъёс. 1984 арын поттэмын Горд книгалэн кыкетӥ изданиез. Со потӥз кык томен. Ар ортчыса, потӥз на Росси Федерацилэн но Горд книгаез. Куд-ог обласьёс но кунъёс, кудъёсыз пыро Россия пушкы, асьсэлэсь Горд книгазэс потто ини. Соос вань Татарстанын, Башкортостанын но мукет шаеръёсын. Али дыре печате поттыны дасяло Пермь областьлэсь Горд книгазэ. Асьме шаерамы но уно тодосчиос инкуазез утён удысын ужало. Со ласянь кыӵе ужъёс мыно шуыса тодамы вайыто. Озьы 1988 арын поттэмын вал "Редкие и исчезающие растения и животные Удмуртии" нимо книга. Со инъет сётӥз Удмуртиысь Горд книгалы. (2001 ар. "Удмуртия" книга поттони). Нырысетӥ томез сӥземын пӧйшуръёслы, кыкетӥез - будосъёслы но губиослы. Ваньмыз ӧвӧлэз книгае пыремын 112 пумо пӧйшуръёс, 212 пала будосъёс, быдэн 18 ӝуйёс но губиос. Котькуд томын лэсьтэмын чебересь суредъёс но фотографиос. Пӧйшурлэн но будослэн нимыз латин но ӟуч кылын гожтэмын, нош куд-огез удмурт кылын но вань. Озьы "русский осетр" - со "эксэй чорыг" вылэм, "росомаха" - "лакша". Сыӵе берыктонъёс лэсьтӥз Н. Г. Ильминских. Ватсалом на, лакша асьме элькунамы ӧжыт гинэ бырымтэ. Та понна "тау кароно" браконьеръёслы. Нош быдэсак 2 томъем Горд книга потӥз кылем арын гинэ. Соин тодматскон презентация Элькун библиотекаын шуркынмон толэзе ортчиз. Нош пыриськизы отчы пӧйшурасьёс, студентъёс, пӧртэм удысысь специалистъёс, художникъёс, тодосчиос. Книга сярысь пыр-поч веразы лыктэм куноос. Редакционной коллегие пырем муртъёсты но верам потэ, соос: профессор, биологи наукаосъя доктор, Горд книгалэн ответственной редакторез В. В. Туганаев; инкуазез утёнъя министр, редакционной коллегилэн председателез А. В. Кулагин; профессор, биологи наукаосъя доктор Н. Г. Ильминских; доцент, биологи наукаосъя доктор О. Г. Баранова; биологи наукаосъя кандидат, валтӥсь редактор Н. Е. Зубцовский но мукетъёсыз. Горд книгаез поттыны дасяз инкуазез утёнъя но инкуазь байлыкъя министерство. Авторъёс оско, соослэн ужзы шаерамы инкуазез утёнлы юрттоз шуыса. Нош ми вералом на, шаермылэн азьланез сыӵе луоз, кызьы асьмеос сое утьыны быгатомы. Надежда Ежова, Кун библиотекаын ужась. Та темая но озьы ик экономикая, правоя, пӧртэм практической пособиос, справочной литература, энциклопедиос, психологияя, философияя книгаосты, кызьы ке лыдӟыны, озьы ик дунэн басьтыны быгатоды Кун библиотекаысь. Ми ужаськомы котькуд нунал 10 часысен 20 часозь. Кӧснуналэ - 10-ысен 18-озь. Арняе но вордӥськонэ шутэтскиськом. Милям адресмы: Советской ульча, 11-тӥ юрт. Телефонмы: 78-07-34, краведческой отдел. Фатых Пукроков Кӧня Инмаръёссы удмуртъёслэн? Христианъёс туж адӟонтэм каро язычникъёсыз. Западын язычникъёсыз радап (паган) шуыса нимало, ӟучъёс соосты поганые, погань шуо. Малы? Ӟуч тодосчиос шуо, удмуртъёслэн, пе, ньыльдонлэсь трос Инмаръёссы вал. Соослэсь гожъямъёссэс диссертациосазы удмурт тодосчиос но пырто. Кыӵе со Инмаръёс (божествоос) - коркакузё, вукузё, нюлэскузё, гидкузё, мунчокузё но сыӵе ик пумтэм-йылтэм кузёос. Но бен кыӵе калыклэн соос ӧй вал? Малы одно ик со кузёосты божествоос шуыса удмуртъёслы лякизы? Ужпум тани мар бордын. Удмуртъёс сяна, ваньмыз мукет калыкъёс со кузёосты тушмонъёс шуо, олокызьы но соосын нюръясько, соос сярысь олокыӵе но умойтэм выжыкылъёс мадё. Нош удмуртъёс нокинэн но ченгешыса уг уло. Соос бускель калыкъёсын но, инкуазьысь пӧртэм кужымъёсын но уг ченгешо. Ми пал удмуртъёс (Башкир музъем вылысь) горд вылын сьӧд виштыё чебер бубылиез Коркакузё шуо, соосты ноку но виыны, вӧсь карыны уг яра. Пересьёс милемыз, пичиосыз, коркан, мунчоын, гидын, кеносын, азбарын шуланы уг лэзё вал, малы ке шуоно, Коркакузё, Мунчокузё, Гидкузё, Кеноскузё уг ярато шуламез. Шуланы уг яра бусыын но (Бусыкузёлэн вожез потоз), нюлэскын но (Нюлэскузёлэн вожез потоз), ноку но, нокытын но юнме шорысь ӵашетыны, шимес чирекъяны, уг яра, малы ке шуоно, озьы асьмеос иземысь сайкатӥськом Тӧлпериез (таиз тани зэм но тушмон!). Мон школаын физикаез дышетӥсь вал. Физикаез тодӥсько бере, вераме луэ тани мае: асьмеос шуласьком яке ӵашетӥськом ке, омырысь молекулаосты ваче шуккытӥськом но турбулентной тулкымъёс кылдытӥськом. Валамонгес кылын вераса, сильтӧллы кутскон сётӥськом. Асьме дорысь кошкыса, со тулкымъёс кужмояло но зэмзэ ик куддыръя тӧлперилы пӧрмо. Соин ик удмуртъёс кулэен гинэ шулало, ӵашето вылэм. Йӧ зорыны кутске ке, мынам анае нянь октон куй вылэ вӧй поныса, зор улэ поттоз вал, Инкуазь вожзэ медаз потты, гурысь басьтэм нянь кадь шуныт но вӧй кадь небыт зорзэ мед сётоз. Мукет нокыӵе калыклэсь лек зор улэ вӧйын нянькуй поттылэмзэ мон уг тодӥськы. Татысь асьмеос адӟиськом: ваньмыз удмуртъёс поэтъёс вылӥллям. Туж зол кесяськыны (акырыны) яра (ярам гинэ ӧвӧл, кулэ но вылэм) араз одӥг нуналэ гинэ. Мар нунал со вылэм, мон уг тодӥськы ни, сое тодэ вал мынам песянае. Со тулыс, лымы бырем бере луэ вылэм. Песяй косэмъя, ми эшъёсынымы Изпоттон яке Кезьыт, яке Карин гурезь йылэ мыныса кесяськиськом вал, вань ньылонмес кесяса акыриськом, ява - Инбаме учкыса: милям пумитамы Инкузё мед гудыртоз. Малы со кулэ? Нырысетӥ гудыри бере, вань турын-куаръёс син азьын Инме кыстӥсько, но туж паймымонэз тани мар: нырысетӥ гудыри бере, Инмысь ваёбыжъёс васько. Вань мукет гужем тылобурдоос лымшор палась лобӟыса вуо, нош ваёбыжъёс Инмысь васько. Озьы шуэ вал мынам песянае. Нырысьсэ гудыртэ, ке, ми шумпотыса "И-го-го!" шуыса гырдалляськом, валъёс сямен музъем вылтӥ погылляськиськом вал. Азьло ведь ваньмыз сямен калыкъёс Валлы вӧсясько вылэм. Библиын но гожтэмын - Ваал. Ваал Инмарлэн пиез Даган. Дальлэн кыллюкамысьтыз мон шедьтӥ: "Даган - это жеребец по второму году". Зэм но, Даган Валлэн пиез вылэм! Но Даган со вакчиятэм дагаан (дагаян) кыл луэ, мукет сямен вераса, дагаяно вал со (дагаяно ужпи)! Тӥни малы сюрес вылысь (музъем вылысь) дага шедьтӥськод ке, со тыныд шуд вае: со дага Вааллэн яке Даганлэн пыдысьтыз усемын. Ми пичи дыръямы, вал уллё тыпыр-тапыр ворттыса ортчем бере, ураме бызьыса потӥськом вал валпыд бичаны (ми озьы шуиськом вал валъёслэн пыд пыдэсысьтызы киргаса кылем сюез). Пересьёс шуо вал, кияр выжые валпыд понӥз ке, со шумпотыса, удалтыса будэ. Мукет сямен вераса, вашкалаослэн вань улонзы поэзиен, выжыкылъёсын, легендаосын, мифъёсын тырмемын вылэм! Берытском на Библие. А ведь удмуртъёслэн таган но ӟучъёслэн таганка кылзы со Даган кылысь потэмын (отын соос вӧсям валзэс пыжо вылэм). Валзэс соос зӧк пуӵ борды думо но тыл вылын бергато вылэм. Отысь ик тӥни потэм вал кыл (коленвал но мукет). Библиын шуэмын, Вааллэн пиез мукет сямен нимаське вылэм Явь. Славянъёслэн таӵе куиньметсы (троицазы) вылэм: Инмын кивалтэ Правь, Музъем вылын - Явь, Музъем улын - Навь. Явь кылысь потэмын явление, явиться но мукет ӟуч кылъёс. Славянъёс Явь Инмарзылы тазьы вазисько вылэм: Яаве! Яке Яве, нош удмуртъёс шуо вылэм "Ява!" Славянъёслэсь Яаве кылзэс Библиез гожъясьёс Яхве гожтӥллям. Озьы тӥни Яаве славян кыл еврей Инмарлы пӧрмем. Богословъёс тае валамзы бере, йырсизэс кысканы кутско: "Яхве со чик но Инмарлэн нимыз ӧвӧл, со Явь Инмарлы вазиськон вылэм. Еврейёс куто но Библиысь Яхве Инмарзылэсь нимзэ Иегова шуыса гожъяны кутско ("сущий"). Табере туала Библиосысь тӥ Яхве кылэз уд ни шедьтэ, котькытын табере Иегова гожъямын! А ведь богословъёс шуо, Библия, пе, Святой Дух верамъя гожтэмын. Со гожтытэм Яхве, нош туала богословъёс шуиллям: "Святой Дух, тон шузи, Яхве ӧвӧл тынад нимыд, Иегова!" Табере валамон луиз кадь ини, малы христианъёс язычникъёсты адӟонтэм каро: соос Библиязы ваньзэ язычникъёслэсь пыртӥллям. Но соослэн ваньзэ йырин-чукин берыктыса верамзы потэ, язычникъёс, пе, трос вӧсяськон сямъёссэс христианъёслэсь басьтӥллям. Но ведь Музъем вылын Инмарлы оскон язычество бордысен кутскиз. Мишель Нострадамус шуэ: "Кинэ сокем возьмазы, со ноку но уз ни лыкты, лыктоз мукетыз Утись. Со быдэсак выльдоз христианствоез, нош мусульманство пыдес вылаз лэзькоз". Собере та пророк шуэ на: "Асьсэос ик, христианъёс Ветхий но Новый Заветсэс тылэ сэрпалтозы". Таиз но валамон, малы ке шуоно, берло дыре потэм Библиосын Яхве (Явь) Инкузёлэн нимыз саптамын. Вашкалаос Инмарзэс Ваал, Даган, Явь шуэм сяна, Эль но шуыса нимало вылэм. Табере та кыл "вордӥськем пал", "зор пал", "шаер" кыллы тупа. Малыӥ Азьло дыръя котькуд калыклэн аслаз элез вылэм. Вордӥськем палаз бертыса, мӧзмем адями нырысь ик аслаз Инмарез, аслаз Элез доры бертэ, солы йыбырттыны. Озьы тӥни шаер но Эль кылъёс сураськизы. Еврейёс Эль шуэмзэс Эл шуо вылэм, нош трос лыдын та кыл Элохим луэ. Мынам апайёсы, марзы ке уг ке пӧрмы, шуо вал: "Эллакым" (Элхоким шуэм ук со!). Еврейёс ушъясько ке но, соослэн котьку но Инмарзы одӥг вал шуыса, ушъяськемзы кышъяськыны но уг яра: соослэн но божествооссы трос вылэм, сое возьматэ Элохим кылзы! Вавилонъёс но ассириос Инмарзэс Элу шуо вылэм. Вашкалаос Инмарзэс, вылӥ верамъёсыз сяна, нимало вылэм на Раав. Ваньмыз со гожъямын Библиын. Но Раав Инмарлэн нимыз отын уродэн лыдъяське. Удмуртъёс инкуазьысь пӧртэм кужымъёсты тушмонэн ӧз лыдъялэ, соосын тупаса улӥзы. Тушмонъяськем гинэ ӧвӧл, удмуртъёс соосын эшъяськылӥзы но. Сиськыны пуксьыкузы, ӝӧк вылэ одӥг мултэс пуньы поно вал - коркакузё но ӵош мед сиськоз. Гидэ, мунчое яке кенсы пыремзылэсь азьло пересьёс кыӵе ке но куара сёто вал, яке кызо, яке кырӟало: кузё изе ке вал, шуак сайкаса, медаз кышка. Гидкуаын, коркан ноку но зол керетыны уг лэзё вал, малы ке шуоно, юртысь кузёез кошкоз. Нош кузётэк кылем юрт мӧзмыт кыле, семья но пумен быре, шуоз вал мыным анай. Мунчое пырыкузы, сурымзэ улляса, из вылэ ву кисьто но ӧсэз усьто. Али асьмеос сое физикалэн законъёсызъя гинэ валаськом. Нош мынам атае шуэ вал, озьы, пе, асьмеос Мунчокузёлы потыны ӧс усьтӥськом, пӧсьмылэсь медаз ӝока. Удмуртъёс гудӟемзэс котьку но ворсаса возё вал: отчы сьӧд кужымъёс медаз пыре. Гудӟем шобретсэ усьтэмлэсь азьло, мынам анае жильыен яке ведраен каньылак жингыртэ вал, гудӟем кузё изе ке, кышкатэк мед сайкалоз. Пыртэм вуэз анай ноку но соку ик юыны уг лэзьы вал: вулэн тулкымъяськемез мед чалмоз, кылясь вуэз юид ке, лулыд но кылялоз. Собере вуэз ноку но, кымаськыса юыны уг косы вал анай: ведраысь но, ошмесысь но - сыӵе адями сьӧсь кадь луэ. Адями маин пӧртэм пудоослэсь? Солэн возетэз вань, со ассэ кутыны быгатэ. Нош ассэ возьыны, кутыны ке уг быгаты, со адями ӧвӧл ни, кык пыдо пудо. Озьы шуоз вал мыным анай. Мукет сямен вераса, ноку, номыр ласянь астэ сьӧсь кадь эн возьы, адями кадь возь, тыршы Дунне Адями луыны. Тӥни кытын удмурт калык педагогикалэн шорсюлэмыз, квинтэссенциез! "Нянь нырдэ (нырысетӥ юдэстэ) бадӟым эн шоры, вордӥськоно нылпиосыдлэн нырзы бадӟым луоз". "Нянь туриждэ (сукырилэн пыдэсыз) ноку но огнад эн сиы, улонын йыромод", "Сӥлё лыдэ ноку но вить чиньыеныд эн куты, берен обезьянлы пӧрмод", "Ӝыт ӵоже одӥг сюмык сяна пӧсятэм эн юы, визьдэ ыштод", "Куинь пол ӧтьытэк, мурт ӝӧк сьӧры эн пуксьы"; "Сётэм виназэс куинь пол ӵектытэк ымад эн поны, ведналозы"; "Ноку но сюмыкедлэсь пыдэссэ эн учкы, солэн пыдсаз вож кый пуке, сое ньылӥд ке, винатэк улэмед уз лу ни, вожектод"; "Сиськыкуд эн чапкеты, парсьлы пӧрмод", "Шыд сиыкуд пуньы куараед ӧс доры медаз вуы, сиёнэдлэн берекетэз дораз бертоз"; "Нокинэн но эн уродъяськы, улытозяд одӥг тушмонэд но медаз луы" (Нош Иисус шуэ, ас тушмондэ яраты. Малы кинэн ке тушмонъяськонэ вуоно но со тушмонэз яратоно? Удмуртъёс шонергес вераллям: "Нокинэн эн уродъяськы, улытозяд одӥг тушмонэд но медаз луы, соку тон котькинэ но яратыны быгатод!) "Котькуд адями, котькуд пудо, котькуд будос - Инкузёлэн нылпиосыз, одӥгзэ ке но вӧсь карид, Инкузёлы вӧсь луоз - коть пӧлыдэ бышкалты, коть чӧльыдэ, одӥг кадь вӧсь луэ, одӥг кадь вир потэ: "Изэн лэзиськод ке, ки ишкалскем кадь луэ, пыӵалэн ыбиськод ке, пельпуме шукке, лек кыл вераськод ке, сюлэме шукке, лек малпан шедьтӥськод ке, йырвизь сураське"; "Кин ултӥя, со ачиз ултӥямын луоз, кин ӝутэ - со ачиз ӝутэмын луоз"; "Ӝожпотэмдэ сюлмад эн нуллы, муртъёслы но эшъёсыд вылэ но эн кисьты, шур кузя лэзь", "Лек кылын шорад вазизы ке, пальпоты, жаля та пурӟем адямиез"; "Яратоно адямиедлы ноку но лек кылдэ эн вера, яратыны луэ сыӵе муртэ гинэ, кинлы тон ӟеч лэсьтӥд"; "Уксёез сандыкен токаны луэ, нош сюлэм шунытэз гаде токаны уг луы, токаны луэ сое мурт сюлэмъёсты шунтыса гинэ"; "Узыр соиз ӧвӧл, кудӥз ваньмызлэсь трос капыръяз, узыр соиз гинэ, кин ваньмызлэсь трос сётӥз - коньдонэн ӧвӧл, арбериен ӧвӧл - сюлэм шунытэн. Тынад шунтэм сюлэмыд мукетъёссэ шунтэ, соосыз нош - мукетъёссэ. Аслыд одӥг нунал секыт луиз ке, кин ке но сюлэм шунытсэ сётоз: котыръяськыса, котыръяськыса, аслад шунытэд ик озьы кулэ дыръяз ас дорад берытскиз". Но ас шунытэд гинэ ӧвӧл, со сю пол, сюрс пол выльдэмын, узырмытэмын, чебермытэмын Удмуртъёс дунне вылысь вань луло арбериосын тупаса, тэрыса, эшласькыса уло, соос пӧртэм кузёослы йыбыртъяло. Но вӧсясько вал соос одӥг Инмарлы гинэ (нош Кылчин со - Инмарлэн музъем вылэ ыстэм юрттӥсез!) Еврейёслэн али но Инмарзы кык: Яхве (Иегова) - таиз ӟечез, нош Азазел - таиз урод Инмарзы, со пустыняын улэ. Солы но, Яхвелы сямен ик, кечтака сёто. Яхвелэсьсэ вандыса сиё ке, Азазеллы улэп кечтаказэс пустыняе нуыса кельто. Христианъёслэн куинь полэс Инмарзы: Дуннеез кылдытӥсь, Солэн пиез но Святой Дух. Удмуртъёсты, одӥг Инмарлы вӧсяськись муртъёсты, куинь полэс Инмарлы вӧсяськонэ поттӥзы но табере шуо, соосты, пе, вылэ ӝутӥм. Нош тодыны уг луы-а меда, кӧня дыр ӵоже ини удмуртъёс одӥг Инмарен уло? Мон дунне вылысь витьтонлэсь ятыр калыкъёслэсь кыллюкамъёссэс эскери. Финнъёслэн туж зӧк словарьысьтызы мон удмурт кылын тупась 40 кылзэс гинэ шедьтӥ (тодосчиос, пӧртэм амалъёсын эскерыса, 200-300 кылзэс шедьто). Аккад кылын (пичи гинэ кыллюкамазы) 190 кылзы удмурт кылъёсын тупало. Аккад кыл со - вавилон-иссири кыл, еврейёслэн кылзы сямен ик, семит кыл семьяе пыре. Озьыен, куке но асьме вашкала выжымы семитъёс но вылӥллям (еврейёслэсь но азьло!) Озьы но шуыны луоз: удмуртъёс еврейёслэсь но еврейгес вылӥллям, иське.Ньыль сюрс арлэсь кема ини, удмуртъёслэн Инмарзы одӥг вылэм. Но солы пумит тазьы верало на; "Удмуртъёслэн вылэм лек Инмарзы но, нимыз солэн Керемет яке Луд".Мынам вань трос гуртэн люкаськем вӧсе, куинь гуртэн вӧсе, Мӧр вӧсе, Луд (Керемет) вӧсе но ветлэме. Ваньмаз ик вӧсьёсын, Лудын (Кереметын) но, удмуртъёс вӧсясько одӥг Инмарлы. Керемед (Луд) со Инмар ӧвӧл, со - вӧсьлэн нимыз. Удмуртъёс ноку но трос Инмарлы вӧсяськись "поганьёс" ӧй вал. Чирков Сергей (Сава Сергей) Вордӥськемын Балезино ёросысь Быдыпи гуртын. Песятаезлэн атаез Савелий вылэм. Отысь ик потэм Сава выжы, соин ик Сергейлэн кушем нимыз Сава луэ. Со ачиз кырӟанъёс гожъя, ачиз ик быдэсъя но. Али ужа Удмурт Йӧскалык театрын валтӥсь администратор луыса. Вылӥ тодонлыксэ Удмурт Кун университетын азинтэ. Ма бен, ойдолэ, матэгес кариське, туннэ тӧр шорамы удмурт эстрадаысь одӥгез кырӟась Сава Сергей. Тодматсконмес азьланьтыса, мон, Ада Диева, Сергейлы юанъёсын вазиськи: Ада: Сергей, ку кутскиз тынад кырӟан удысэд но кызьы со азьланьтӥськиз? Сергей: Кырӟан удысэ кутскиз 1989 арын: культпросветучилищелэн хорово- дирижерской люкетаз дышетскыны пыри. Сое йылпумъяса, кырӟанъя "Айкай" театрын артист луыса ужай. 6-7-тӥ классын дышетскыкум ай, Быдыпи клубе "Шулдыр ӝыт" ансамбль вуылӥз. Соослэн концертсы мыным туж кельшиз. Кельшиз кырӟамзы, сцена вылын кызьы асьсэды воземзы. Йырам малпан кылдӥз: мыным но одно ик та удысын кужымме эскероно. Ада: Нош кин луэмед потэ вал? Сергей: Анае ветеринар вал бере, туж кельше вал солэсь ужамзэ учкыны: кызьы шприцъёсын, скальпельёсын, пинцетъёсын выре. Но мынам потэ вал хирург луэме. Али но та мылкыды уг сӥялскы. Улонме выльысь кутсконо луысал ке, мон одно ик сюрес медицинае, дыр, бырйысал. Ада: Амалыд ке луысал, улондэ кызьы радъясалыд? Сергей: Мон культура удысэз бырйи бере, мынам мед луысал аслам бадӟым удмурт эстрадая студие. Отчы вань удмурт эстрадаысь ужасьёс пыриськыны мед быгатысалзы. Шуом, кыӵе вань эстрадая театрез Алла Пугачёвалэн. Бадӟым здание, бадӟым зал, аппаратура, светомузыка, пиротехника, в общем, ваньмыз "супер" вылиын мед луоз. Продюсер, балетмейстер, хормейстер, аранжировщик - вань специалистъёс мед луысалзы. Ада: Тон сямен, улонлэн кыӵе тырмымтэосыз? Сергей: Таиз, вылды: али вань узыръёс но начаръёс. Нош власть - лушкаськисьёс киын. Мон улонлэсь ӧжытак бероми, шуод-а, мар-а. Школаын дышетскыкум воспитание, улон шоры учкон мукетгес на вал. Но шуак, шӧдтэк шорысь, улон чутрак воштӥськиз, шӧдыны ик ӧйлась сое. Адями ассэ гинэ тодэ, ачиз понна тырше улыны. Нош мынам патриотической мылкыды озьы ик кылиз. Ада: Мар тыныд кельше (улонын), нош мар - уг? Сергей: Мыным кельше, али сётэмын эрик. Котькуд адями, мылкыдыз вань ке, быгатэ аслэсьтыз луонлыкъёссэ усьтыны, азинтыны. Уг кельшы - куке туртто тонэ лёгыны, саптаны, ултӥяны. Адямилэсь кыӵе ке но шексэ, аламазэ азьлогес адӟыны туртто. Нош умойзэ палэнто, адӟыны уг быгато, синзэс пытсало. Ада: Сергей, мар со тон понна сцена? Сергей: Сцена - со улон, калыклы умой энергия сётон но калыклэсь энергизэ аслыд баьстон. Оглом вераса - ог-огдэ валан, ог-огедлы умой мылкыд пыӵатон. Ада: Ку кылдӥз нырысетӥ кырӟанэд? Сергей: Мон 9-тӥ классын дышетскисько вал. Школаямы комсомоллэн вордӥськем нуналэзлы сӥзем смотр ортчиз. Мыным косӥзы кыӵе ке но кырӟан быдэстыны. Мон кутӥ но ачим ӟуч кылын кырӟан гожтӥ. Нимаськиз со "Когда вступал ты в комсомол". Быдэстӥ сое гитараен. Калыклы та кырӟанэ кельшиз, бадӟым дунъет сётӥзы, мылкыды бурдъяськиз. Пумен мукет кырӟанъёс но гожъяны кутски. Малы? Малы ке шуоно, милям гурт вӧзамы вань бигер гурт Падера. Отчы куддыр дискотекае ветлӥськомы вал. Мон паймылӥ, малы соос асьсэ бигер эстрадазыя экто шуыса, нош милям гуртамы сыӵеез ӧвӧл. Мон малпай, кызьы кароно озьы, милям но егитъёс удмурт эстрада кырӟанъёсъя эктыны мед быгатозы. Кылдӥз малпан, нырысь 2-3 ке но удмурт кырӟанъёс гожтыса оскалтыны. Нырысетӥез "Эн иса тон монэ" шуыса нимаськиз. Та вал школаын дышетскон аръёсам. Ношк алыке поттыны луонлык кылдӥз 1997 арын, кырӟанъя "Айкай" театрын ужакум гинэ. Тау кареме потэ Сергей Распоповлы (азяз мед усёз, али со улонысь кошкиз ини), со вал нырысетӥез аранжировщике. Нош кин усьтӥз сюрес та мылкыдме поттыны, со "Айкайысь" азьвыл директорез Геннадий Семёнович Корепанов. Со мон понна туж бадӟым Дышетӥсь, юрттӥвсь но монэ валась адями. Ада: Кызьы тынад кырӟанъёсыд пӧрмо? Сергей: Со понна мон уин курадӟисько, гурез кылдэ уин. Ада: Нырысь гурез-а кылдэ? Сергей: Бен, гурез борды соку ик кылдэ кырӟанлэн пуштросэз. Собере ини гурезлы тупась кылъёс утчасько. Ада: Али кӧня кырӟанъёсыд люкаськизы ини? Сергей: Кырӟанъёс вань гинэ, нош луонлык ӧвӧл - ваньмыз коньдон вылэ пыкиське. Ада: Кылъёссэ но, крезьгурзэ но ачид-а пӧрмытъяськод? Сергей: Кырӟанъёсы профессиональноесь мед луозы шуыса, берло дыре удмурт поэтъёслэсь кылбуръёссэс учкылыны тыршисько. Ада: Кырӟанъёсыд ма сярысьгес, марлы сӥземын тынад? Сергей: Соос ваньмыз сӥземын егитъёслы, дискотекаосын эктон понна. Ада: Сергей, кыӵе кырӟасьёс тыныд кельшо? Сергей: Сцена вылын ужамез, ассэ воземез Валерий Леонтьевлэн кельше. Ада: Мар со тон понна яратон? Сергей: Яратон - со ог-огдэ валан, одӥг малпанэн улон, шумпотонэз но куректонэз ӵош люкон. Ада: Нош кыӵе нылъёс тыныд кельшо? Сергей: Шаплыесь, сэзесь, капчи мылкыдоесь. Ада: Арлэн кыӵе вакытэз тужгес но кельше? Малы? Сергей: Мыным кельше тулыс, куке ваньмыз улӟе, куаръёс вожекто, мылкыд бурдъяське. Улонын эшшо но тросгес ӟечсэ лэсьтэм потыны кутске. Ада: А мар тон ӟечсэ лэсьтысалыд? Мар куремед потэ (мечта) Сергей: Ада: Кыӵе яратоно сиёнэд? Сергей: Сиисько ваньзэ, чырсамын гинэ медам луы. Ада: Яратӥськод-а ачид маке пӧраны? Сергей: Яратӥсько. Шыд: кеньырен, кӧжыен, вермишелен, консерваен... Ада: Кызьы учкиськод юон но кыскон шоры? Сергей: Туж урод. Кызьы ке но аслым но та сямъёслэсь куштӥськоно вал. Ада: Кыӵеесь азьланяз малпанъёсыд? Сергей: Ада: "Инвожо" журналэз лыдӟиськод-а? Сергей: Котькуд номерзэ лыдӟисько. Туж кельше, шумпотӥсько асьмелэн таӵе чебер журналмы вань шуыса. Ада: Мар сӥземед потэ журналэз лыдӟисьёслы но отын ужасьёслы? Сергей: Одно ик котьку мед гожтӥськозы та тунсыко журналлы. Сӥзисько шуд, тазалык. Кызьы шуо, тазалыкед ке луиз - ваньмыз луоз. Р. С. Вераськонмы йылпумъяськем бере, Сергей капчияк шокчиз: "Экзамен сётӥ кадь. Нош кыӵе пӧрмиз - дунъет сётозы лыдӟисьёс". Кылъёсыз но крезьгурез Сава Сергейлэн Эн иса тон монэ Улӥ, улӥ, ӧз вала на нокин, Мае шедьтӥ, мае лэсьтӥ - ачим. Нош тон монэ ялан пыкылӥськод, Улонэз, пе, юнме тон саптаськод. Припев: Эн, эн иса тон монэ, Эн, эн пыры сюлэме. Мон ачим шедьто сюрес, Мон ачим шедьто шудме. Куке но тон монэ яратылӥд, Будэм интыостӥд монэ нуллӥд. Шумпотӥськом соку вал котьмалы, Калыкъёслы, чебер яратонлы. Припев: Юрий Коротков Лек синмо утись (Азьланьтӥськемез) - Кытын Утись? - машинае пуксем беразы ик юаз Еремей. - Мукет адями киын, - Беглой моторзэ лэзиз. - Ӝегам, табере секытгес луоз. - Тон куамын сребреник басьтӥд-а? - Еремей коньдонэн сумка шоры кырыж учкиз. - Тросгес, - серектӥз Беглой. - Соин ӝыны иудей царствоез басьтыны луоз. . . Яралозы ай, - ӝот-ӝот кариськыса вераз со. Вуж Арбат пала кожиз но телефон вӧзы дугдӥз. Дималэсь номерзэ бичаз - отын автоответчик ужаны кутскиз. Солэсь гольтрес верамзэ пумозяз кылзытэк, офисэ жингыртӥз: - Та "Антиквар" фирма-а? Дмитрий Алексеевич кулэ вал. . . Нош ку вуоз? Еремей вӧзаз сылэ. Палэнэ учкиз но йӧӟектӥз: пичи ӝажыосын, борддор вӧзын, асфальт вылын - котькытын пӧртэм-пӧртэм обросъёс сыло-кыллё. Антикварной пӧлысь лавкалэн витринаысьтыз святойёс адямиос шоры мӧзмыт учко. Кин ке соос шоры огшоры учкыса сылэ, кин ке басьтыны коньдонзэ лыдъя. Еремей матэгес кариськиз, Лэчыт Синэз утча. Шӧдтэк шорысь пельпум вылтӥз бадӟым сьӧд ки мычиськиз но Богоматерез кырмиз. Еремей синъёссэ каллен гинэ суам кадь негр шоры ӝутӥз но кеськыса, кирос тырыса берлань чигназ, ульчаысь художниклэсь мольбертсэ погыртӥз. - Эй, агай, кысконэд вань-а? Еремей берытскиз - шораз учко кык пилеш ӵышкем нылъёс, ку куртка вылтӥзы кульчоосын йыркобыос ошылэмын. - Эй, агай. . . Гуньдӥд-а, мар-а? - огез син азьтӥз киыныз нуллӥз. - Сайка! Еремей син азьыысьтыз ик кузесь горд гижыосты адӟиз но курадӟыса кулыны дасяськиз. - Мар учкиськодӥ Кельшиз-а? - мукетыз нылаш эшезлэн берпалаз чапкиз. - Басьты, вузаське! - Осто, Инмаре! Кошке син азьысьтым! - Еремей синъёссэ кыниз. - Осто, Инмаре- Кылчинэ, эн кушты монэ. Беглой будкаысь потӥз, нылъёсыз пельпумтӥзы берыктӥз но берпалазы ӵыжыса келяз. - Уёзь уз луы, - вераз со. - Кошким, мынам аслам уже вань на. . . Школа капка азьын пумитазы бадӟым охранник потӥз: - Пропуск? - Мыным пиме адӟоно вал. - Начальникен герӟаське, - рацизэ мычиз. Беглой палэнскиз но бускель азбаре пыриз. Котырак чакласькыса, борддор вамен потӥз. Еремей - сьӧраз. Бадӟым спортзалын бадӟым классысь нылъёс теннисэн шудо. Коридоръёсын нокин но ӧвӧл. Беглой одӥг ӧсэз усьтӥз - отын англи кылын верасько, мукетаз - колбаосын мар ке пӧзе, куинетӥяз - Еремей Беглойлэн пельпум вылтӥз учкиз - скелетлэн буш ымнырыныз ваче лкиз но паллян пельпум вылтӥз сяласькыса кошкиз. - Каллен, - сипыртӥз Беглой. Мукетаз классын пичиос компьютеръёс шоры учкыса пуко, Павел дураз ик. Беглой, дышетӥць медаз шӧды шуыса, кагазэз погмаз но пиез шоры лэзиз. Соиз вожез потыса берытскиз, шумпотэменыз синъёсыз ик ӝуатскизы. Беглой чиньызэ ымдураз понӥз. Павел дышетӥсь шоры учкиз но, мониторзэ берыктыса, бадӟым букваосын гожтӥз: "Мон тодӥ, лыктод шуыса!!!" Беглой дораз ӧтиз. - Виктор Николаевич, туалетэ потаны луоз-а? - юаз Павлик. - Урок бырытозь вить минут, Дэвидсон, - вазиз дышетӥсь. "Возьма монэ корказьын", - гожтӥз Павлик. Звонок бере со лобӟыса потӥз но Беглойлэн чыртыяз ӟыгырскиз. - Мон тонэ туж возьмай, сыӵе возьмай. Тушед нош кыӵе серем! Кытын сыӵе кема вал? - Тон Дэвидсон-а ни? - серектӥз Беглой. - Тон кошкем бере ик соос монэ басьтӥзы. Собере анай шуиз: тон кулӥд, пе, озьы луыны кулэ, пе, вал, фамилиме воштӥзы. Ӵуказе ми лобӟиськом. Тон монэ уд сёты ук соослы? Табере мон Беглов луо? - Кылзы, Павел, - кӧня ке палэнтыса вераз Беглой. Вӧзтӥзы сопала-тапала дышетскисьёс бызьыло. - Мон но ӵуказе кошкисько, туж кыдёке. Весяклы. Тон бадӟым ни, ачид бырйы. . . - Мон тонэн! - шуиз Павел. - Мынам мынон интые Америкаын кадь тунсыко ӧвӧл. - Мон тонэн! - Дугды ай. Мон пичи гинэ гуртэ мынӥсько, асьмеос ноку но Муское ум берытске ни. - Котькытчы ке но - тонэн! Беглой нош ӟыгыртӥз пизэ. - Тӥни анай, - вераз Павлик, пельпум вылтӥз учкыса. - Ойдо вералом солы. Капка азьын лемлет "Мерседес" сылэ вал, соосты адӟытэк, Лариса тротуар вылтӥ мынэ. Беглой, Павликез китӥз кутыса, берен школае пыриз но коридоръёс кузя мукет ӧс пала бызиз. Еремей - сьӧразы ик. - Малы борддор вамен? - паймиз Павлик. - Тазьы матынгес, - Беглой сое ӝутӥз но ачиз тубиз. Музъем вылэ гинэ тэтчиз, вылаз охранник омырскиз, кизэ бералтыса, пыд вылысьтыз погыртӥз. - Кошкы, гад! Атае со мынам! - Павел пичи мыжыкъёсыныз тыбыраз йыга. Охранник одӥг киыныз Беглоез возьыса, мукетыныз рацизэ кутӥз. - - Юртты! - кеськиз Беглой уйжомем Еремейлы. Соиз котыр учкиз - кузь ныдэн ваё машесэз адӟиз. Еремей солэсь мажессэ пыдыныз ишкалтӥз но ваеныз охранникез гондырез сямен чыртытӥз гаӵоло погыртӥз, мажесэз музъеме мур пыртӥз. Соиз синъёссэ кесьыса, ымзэ усьтыса мозмытскыны тырше. - Зо-о-ол! - кеськиз Павел. - Со, гад, ваньмызлы пальпотэ, нош нылъёсты кытӥ кулэ ӧвӧл - отӥ кырма! Беглой машинаяз тэтчиз. - Тодматскы, Павел! - вазиз со, моторзэ ужатыса. - Со Еремей. Нырысь со тыныд шузигес потоз, но со усто пияш!.. - Асьмеос доре ум бертӥське шат? - паймыса юаз Павлик. - Доре уг яра. Мон малпасько, анаед вань милициез ӝутӥз ни, - вераз со. - Сиеме потэ, - шуиз Павлик. - Юэме но. . . Беглой чебер супермаркет вӧзы дугдӥз. - Эх, йыр ке йыр, пыд ке пыд! - шонтӥз со. - Басьты, ма мылыд потэ! Павликен ӵош басьяськыкузы, Еремей яркыт этикеткаосты учкылыса ветлэ. Шӧдтэк шорысь тэтчыны дасяськыса кадь дугдӥз. Бадӟым шудон гондырен ваче син вуиз, тани-тани султоз но ыргетыса вылаз омырскоз кадь потӥз. - Улэп кадь, озьы ведь? - шуиз Павел. - Мыным но таӵе кулэ вал.Жаль, дуно. . . - со гондырлэн ныраз шуккиз, соиз ымзэ усьтӥз но лек куаразэ сётӥз. Беглой долларъёсын тыриз, берыкьэмез манетъёсын басьтӥз. Машинаязы пуксьыса, пакетъёсты усьяны кутскизы. Еремейлэн дыльдыез вия, нош сиён борды уг йӧтылы. - Усто! Нош Джеймс узыр ке но, котькуд котьткуд долларез понна куалекъя, - ым тыраз сиёнэн вераз Павлик. - Кин кӧня сииз лыдъя. Ме, - "кока кагазэ" - Еремейлы мычиз. - Мыным так-то "севен ап" ярагес "кока" но номыр ӧвӧл. Еремей банказэ кияз бергатэ. - Тани тазьы, - Павлик кульчозэ уськытӥз. - Мар та? - Вием нуныослэн вирзы, - аслэсьтыззэ юыкуз вераз Беглой. - Тодысал ке, пӧзьтэм картошка тыныд басьтысал. . . Вазь пеймыт луиз, город пӧртэм рекламаосын, яркыт витринаосын ӝуатскиз. Вӧзтӥзы мигалкаеныз шудыса милицейской машина кошкиз. Еремей кизилитэм инмысь сюрс укноос, синмез кыскись фараос шоры учке. Моторъёслэн куаразылэсь, ӵынлэсь, ымныръёслэсь - ваньмызлэсь со жадиз ини. Одӥг нунал Мускоын улэмлэсь солы капчигес вить нунал ӵоже нюлэсэтӥ ветлыны. Вокзалысен Беглой Переславле Гришалы жингыртӥз но билетъёссэ Павликлы сётӥз. - Павел, тон йыр интые кылиськод, - вераз со. - Еремей троссэ уг тоды. Тӥ Переславль-Залеские вуоды, отын мынам эше пумиталоз. Солэн Гриша нимыз, лапег гинэ, тушо, гном кадь. Ӧд пумиське-маралэ ке, музеез шедьты. Тани коньдон - такси кутод. Ваньмыныз тон вераськы, Еремей бак луоз. Шудонын кадь, валаськод-а? Мон ӵуказе вуо. - Еремей, - пӧйшурасьлы вазиз со. - Мон малпасько, Мускоен кӧтыд тыриз! Та мынам городэ, тон татын мыным кулэ ӧвӧл. Тон ведь монэ гондыр вылэ пӧйшураны ӧд басьтысалыд? Татын нош кышкытгес, татын урмем кионъёс. Мыным юрттыны уд быгаты, люкетод гинэ. Тонэн ӵош мынам пие. Мон Утись понна, нош тон пие понна кылмес кутом. Еремей сётскиз. . . Беглой соосты поездэ пуктӥз. Павлик туж шумпотыса возьма поезд вырӟемез, выль шаерез адӟонэз. Еремей берпуметӥзэ курмем укно пыртӥ учкиз бадӟым город шоры. - Мон Шайтанлэсь улоссэ адӟи, - шуиз со. Манет дорын туж шыпыт вал. Лёва пыдчиньы вылаз ӧс доры лыктӥз но кема кылзӥськыса сылӥз. - Адӟылӥд-а? - усьтыкуз ик юаз. - Кинэ? - Тӧдьышуръёсты. . . - А-а. . . - мырдэм валаз Беглой. - Ӧй. Ӧз вуэ на, дыр. - Мон возьмаса уг ул, - шуиз Манет. - Мон чальтчисько. . . Тани ме, ма курид, - секыт бинет сётӥз. - Выль ик ӧвӧл, но умой на. Патронъёс вылесь. . . - азьло ик дасям сумказэ пельпумаз ошиз. - Мон дачае, Тамара нылаш доры. . . Мын но утча на монэ, уз шедьтэ! - Э, дугды ай. . . Мон тон дорын уёзь пукыны малпасько вал! - Кулытозяд. . . коть пук. Ӧс ачиз пытсаське, - Манет ышиз, собере нош йырзэ мычиз: - Тылэз кысыны эн вунэты! Счётчик медаз берга!.. Огназ кыльыса, Беглой штораосты усьтӥз но вылӥысен уй Муско шоры, кизем кадь тылъёс шоры учкиз. Кыдёкын улӥын кӧлыны валасьтэм проспект куашетэ. Комнатаын гидын кадь: буш ӟенеликъёс, выж вылын пень но тамак пумъёс. Кресло вылэ пуксьыса, Беглой бинетсэ пертчиз но кузь гумыё парабеллум поттӥз. Отын ик глушитель но патронъёсын коробка. Ваньзэ учкиз, кызьы кулэ бичаз, телевизор лэзьыса, гань-гань кариськиз. . . Кӧня ке улыса, нош укное учкиз. Уйшор вуэм ни. Телефонэз ас палаз кыскиз но номер бичаз. Автоответчик куриз нимзэ вераны но эшшо мар ке. Ваньмыз бырем бере, Беглой вазиз: - Дима, Беголв та. Кут трубкадэ. - Беглой! Кыӵе тӧлын? - соку ик Царевичлэн кудӟем куараез кылӥськиз. - Нош Манет вераз, тон монах луид, пе, - сьӧлыктэ быдтӥськод! - гор-гор серекъя. - Ну, сьӧсьёс, кыӵе пул ишкалтӥллям! Синъёсылы ӧй оскы - уйвӧт адӟисько кожай! Верало вал - куанермиз Россия! Асьмелы табере ог-огмылы пунэмъёстэк. . . Шумпотӥсько тыныд. . . - Тон со Утись сярысь-а, мар-а? - юри гань-ганьгес вазиз Беглой. - Тон Манетэз уд тод1иськы-а? Мар ки улаз шедиз, кутӥз но гылӟиз. Нош ма мон ваи!.. Сюлэмыд кыӵе? Кытӥ ке ӧвӧл кулод, адӟид ке. . . - Кӧня сылэ? - Дималэн куараез куалекъясь луиз. - Нырысь адӟы, - серектӥз Беглой. - Таӵезэ тон ӧд адӟылы на. - Али вуэмед луоз-а? Машина лэзём-а? - Ачим быгато. Муртъёс гинэ медаз луэ, валад? - Беглой дыртытэк обоймае патронъёс тыре. - Валай. Возьмасько. - Валидол дася, - Беглой трубказэ куштӥз но обоймазэ пистолет кутонэ донгиз. Дима сейф кадь ӧссэ усьтӥз. Беглой солэсь мычем кизэ адӟытэк пыриз но гостиноез, кухняез эскериз. - Огнад? - юаз со. - Тон мар! Нылэз валесысь сэрпалтӥ, - серектӥз Дима. - Я, возьматы! - Эн дырты. Адӟод ай. . . - Беглой штораосты ворсаз но телефон езэз розеткаысь кыскиз. - Тыромз дан поттыны, екуня-ваня! - ӧз чида ни Царевич. - Озьы но оскисько. Потты! Только пичиен гинэ - нырысь дурзэ гинэ но каллен потты. . . - нош сумка шоры мертчиськиз. Беглой отысь коньдон поттӥз но ӝӧк вылэ тыриз. - Та мынам пае, - валэктӥз со. - Кылемзэ Манетлэсь басьтод. Нош Утисез тон али мыным берыктод. Дима паймыса долларъёс шоры, буш сумка шоры учкиз, собере лек синъёссэ Беглой шоры ӝутӥз. - Тон Сибирьын-а озьы шоккетыны дышид? - юаз со. - Со понна тодӥськод-а, Беглой, ма луэ?! - телефон пала вамыштӥз. Беглой пистолетсэ поттӥз. Ывбем куара вазиз, телефон Дималэн ки улысьтыз лобӟиз но борддор борды шуккиськыса пилиськиз. Дима мырдэм марзэ-созэ валаз. Веднам мурт кадь пистолет гумы шоры учке. - Э-э-э. . .-эй, Беглой. . . калленгес. . . гижыдэ утялты. . . пистолетлэсь палэнскыса, урдэслань кошке. Беглой пистолетэн сьӧраз нуэ. - Ӧд ке сёты, мон ачим шедьто, - шуиз со. - Нош тон татын замокъёс сьӧрад зынмыса кыллёд! Ну? - Дугды. . . Мон киын ӧвӧл со. Уд ке оскиськы - утча. . . - Кытын со? - Одӥг адями дорыню - О кей, - шонтӥз Беглой. - Мынӥськом одӥг адями доры. - Ум. . . Ум, тон мар! - Дима йырыныз но, киыныз но шонаны кутскиз. - Ум! Тон уд тодӥськы, тон уд валаськы, кин со адями. . . Котьма кар монэ, нош со доры уг мыны! Беглой валаз, Дима зэмзэ но визьзэ ыштытозь кышка шуыса - пистолетлэсь ӧвӧл, со тодмотэм адямилэсь. Кулӥз ке но, со доры мыныны интыысьтыз но уз вырӟылы. Беглой бергась кресло вылэ пуксиз но Дималэсь узыр коллекцизэ учкылыны кутскиз. Ӝажы вылысь шкатулка шоры мертчиськиз. - Татын сизьым патрон вал, - пистолетсэ шонаса вераз Беглой. - Вить кылиз на. Берпуметӥез - тынад, - со зарни шкатулка шоры мертаськиз. - Фаберже?.. Я, мынӥськом-а, ум-а со адямиед доры?.. - Тон уд валаськы! Утисез басьтӥд ке солэсь - тон шӧй! Мон но. . . Солэсь уд пегӟы! Музъем улысь шедьтоз! Сибирьысь, Америкаысь - котькытысь! Куинь нунал но уд улы. Астэ ке уд жаляськы - пидэ жаля!.. - Юнме эн кышкаты, Дима! - вазиз Беглой. - Ӧд вала ке но, мон валэктыны тыршо. Мон отысь сыӵезэ шедьтӥ, маи мынам ноку но ӧй вал, нош тынад эшшо ик. . . Эрик. Паймымон со, Дима, - Эрик! - киоссэ шеръяз. - Тон мыным кулэ ӧвӧл, мон тынэсьтыд уг но кышкаськы, - кресло вылын берытскиз, узыргес мишень утчаса, - тынэсьтыд но, нокинлэсь но. Эрик! - пияла пыр зарниям сервиз шоры ыбиз. Сервант усьтӥськиз но вань фарфор выж вылэ жингыраса усьылӥз. - Асьмеос мынӥськом ни-а, ум на-а? - Ум. Дима чырсаз, ыбем куараез но уг кылы ни кадь, тыбырыныз ӝужыт ӝӧкез ворсаса сылэ. - Палэнскы! - косӥз Беглой. - Тае гинэ эн иса. . . - бӧрдыса кадь куриз Дима. Беглой пистолетсэ ӝутӥз. Дима палэнскиз но Беглой вашкала китай вазае ыбиз. - Берпуметӥез, - шуиз со, Дима шоры каллен гинэ гумызэ ӝутыса. Дималэн маке вераны кужымез ӧй вала ни, пӧртэм буёло фарфор чалепъёс вылтӥ ӧс пала вамыштӥз. Сталин вакытэ пуктэм туж ӝужыт юртлэн коридораз Дима домофон кнопкаез зӥбиз. Беглой пистолетсэ йырбераз возе. - Кин со? - кӧня ке улыса, кӧлэмысь султэм керӟег куара вазиз. - Мон со, Дима. Вождэс эн вае. Вераськон вань. . . - Ӵуказе ӵукна лыкты. - Туннэ вераськыны кулэ, - бӧтьыртӥз Дима. - Тон огнад-а? Беглой пистолетэныз йырбераз донгиз. - Огнам.. Замок ӟукыртӥз но ӧс усьтӥськиз. - Мон тыныд верай, Беглой, - лифт дугдэм бере шуиз Дима. Ачиз кулэм мурт кадь кӧсэктэмын. - Тон улӥсь ӧвӧл. - Али тон кулон калын, - Беглой сое берыктӥз но, тыбыр сьӧраз ватскыса, ӧс пала мынӥз. Дима боды ньылэм кадь вамышъя. Сое ӧс синметӥ чаклаллям, лэся, кизэ жингыртыны ӝутыса ӧз вутты - ӧс усьтӥськиз. Беглой Димаез вань кужмысьтыз кузё вылэ донгиз, ӝогак пыриз но ӧсэз ворсаз. - Ӟечбуресь, Иван Афанасьевич, - вазиз со. - Умой, умой, Беглов, умой ке, - шуккиськем кизэ посыса ӟукыртӥз Пинчер. Со пыдесозяз гинэ пижамаен, гольык пыдъёсаз - шлепанцы шуон, пурысьтам йырсиез тугаськеммын. - Та понна кыл кутоно луод, Дима, - кӧсэктэм Царевич шоры учкиз. - Нош мар мон каром. . . - Беглой киысь пистолет шоры возьматӥз Дима. - Кулыны кулэ вал, - вераз Пинчер. - Берло вераськоды, - уретӥз Беглой. - Кытын Утись? - Кин со, Ваня? - комнатаысь кышномурт куара кылӥськиз. - Мон доры куноос. Кӧл! - вазиз Пинчер. - Эн кушетэ, - сипыртӥз на. - Кышное инфаркт бере. . . - Ойдо, - берытскиз но, шлепанцыеныз шлачкетыса, коридор кузя кошкиз. Ваньмыз гань-гань ортче, Пинчер уг но адӟы кадь шораз урдэм пистолетэз, куноосты ик пумита, кожалод. - Паймисько тыныд, Бегов, - лулӟиськиз со. - Ньыльдон аресозь адями кадь вал, нош али: я котрабанда, табере - йыруж. . . С. ньыльдон куатетӥ статья, дас вить арозь, конфискациен. . . - Мын-мын! - Тӥни мӧйыосты но уд гажаськы ни, - йырыныз шоназ Пинчер. Беглой паймиз, Дималэнэн ӵошатыса, квартира сокем узыр ӧвӧл: тыпы мебель трос улэмын ини, кемалась тупатъямез возьма, вуж телевизор, нокыӵе антиквариат ӧвӧл. Борддор вылын гинэ, Пинчерлэн ӵыжы-выжыосызлэн фотографиоссы улын, кузьым шашкаос,м аузер, орденъёс но будёновка ошылэмын. Пинчер кабинетаз тыл ӝуатӥз но секретер шоры возьматӥз: - Татын Утись. . . Отын мынам пистолетэ кылле, соин ик ачид басьты. А то пушкаез адӟод но керӟегъяськынык утскод, кытӥ ке ӧвӧл, пересез виёд, нош со - сю кыкетӥ, высшой мера. . . Пинчер но Дима шоры учкыса, Беглой секретерез уьстӥз, отын кабураен "Макаров" но наручникъёс кыллё. Со пистолетэз кисыяз донгиз, наручникъёсты сумкаяз куштӥз. Обросэз поттӥз, телевизор вылысь салфеткаен бинялтӥз. Беглой ӧз малпа вал,в анмьыз таӵе капчи но ӝог ортчоз шуыса. Пинчер но Дима калыкез ӝутытозь, Москваысь гинэ пегӟонэз кылиз на. - Дӥсяськы, - Пинчерлы шонтӥз. Кышноезлэн комнатаез вӧзтӥ ортчыку, Пинчер чиньызэ ымдураз кариз: "тс-с". Чыртызэ шарфен биниз, куртка дӥсяз но каллен гинэ ӧссэ пытсаз. Городэтӥ соос вераськытэк мыно - Дима руль сьӧрын, Пинчер вӧзаз, Бегой бӧрсязы кияз пистолетэн. Пеймытысь азяз гаишник потӥз, пиштӥсь бодыен но автоматэн. Дима керӟегъяськыны ӧдъяз но синучконэтӥ Беглой шоры учкиз. - Дугды, - косӥз Пинчер. Бронежилетэн мугоръёс машинаез котыртӥзы. - Одӥг кыл - тон шӧй, - вераз Беглой. - Эн тулкымъяськы, - берытскытэк вазиз Пинчер. - Нош киостэ кисыысьтыд потты. . . Укноетӥ удостоверенизэ мычиз. Гаишник горд книжкаез фонарикен югдытвз, собере ымнырзэ, ваньзы вылтӥ тыл югытсэ нуиз, номыр вератэк, честь сётӥз но, машинна пеймытэ ышизы. Городысь потэм беразы, Белой косӥз: - Дугды. . . Кыкнады потэ. Умойгес писпу утчаса, нюлэскы пыриз. Кикур пасьта пипу шедьтӥз но наручникъёсты Пинчерлы лэзиз. - О, тазэ шумпотыса, - пальпотӥз со. Дшыем сямыныз Дималэсь кизэ бералтӥз но писпу борды кортназ. - Мар-о, мон татын кулом-а? - бӧрдыса кеськиз Дима. - Ме, - Беглой пыд улаз пичи пурт куштӥз. - лытозяд огпол коть ужа. . . Мотор куара кылӥськемысь дугдэм бере, Дима кӧня ке кесяськиз, оло, кин ке вазёз. Куараез гинэ шуккиське. Пыдыныз пуртэз ас палаз кариз, писпу вӧзы пуксиз но ыль, кот писпуэз вандыны кутскиз. . . - Яра-а? - Пинчер Беглойлэн пачка сигаретэз шоры возьматӥз. Ваземзэ возьматэк басьтӥз но кенжытӥз. - Кышно уг лэзьы, соин сьӧрам уг нуллӥськы. . . Беглйо куаретытэк машиназэ нуэ, пистолетэз паллян ки улаз. - Нош табере, - азинтэ Пинчер, - мон тыныд валэкто, пияш, кытчы чуртнаськод. . . Ужед урод, Беглов. Тон малпаськод: чурыт Димаез куртчид, урод Пинчерез кышкатӥд - Утись тынад? Уж мон бордын ӧвӧл. Мон мар - винтик. Тон уд тодвськы, кыӵе машина улэ выдӥд. Паровоз улэ. . . кудӥзлэн коммунаын дугдонэз. . . Мон юай вал, тодӥськод-а тон 1918 арысь Указэз - черк узырлыкез конфисковать карон сярысь? Тон малпаськод, со окньдонэн Поволжьелы нянь басьязы? - серектӥз Пинчер. - Ӧвӧл. со миллионъёс отчы мынӥзы, - вылӥе возьматӥз. - Тямыстон ар ӵоже асьме историен вузкаризы. Котькин Кремльын мед пукоз - вузкарозы. . . Мон тонэ сю пол пуктыны быгатысал. Но ваньдэс пуктылысалмы ке, кин гуртъёстӥ ветлысал? Нош мае тӥлесьтыд таласьком, мае - таможня - отчы ик мынэ, кунггож сьӧры. Мукет сямен гинэ. Монополия со, Беглов. Тодӥськод-а, ма луэ, кин монополия вылэ омырске? Кылылӥд, дыр: пияш-следователь война бере Германиысь поттэм уж ӝутӥз - узырлык сярысь. Кык миллиард долларозь. . . Калугаын поезд улэ сюриз. Нош мон верай вал: эн пыры паровоз улэ. Ӧз кылзы, куинь нылпиез кылиз. . . Мон тыныд пулэз сётӥ ке но, кык- куинь нунал ортчыса, нош мон доры вуоз. Нош тон та дырысен зэм но - беглой. Сьӧрад - сю пӧйшурасьёс. . . - Тон нош а басьтӥд ужамед понна? - серекъяса юаз Беглой. - Мон художник. Тон кадь ик, - серектӥз Пинчер. - Котькуд ужын вань аслаз художникъёсыз. . . Кылзы, Беглов. Ӵукнаозь берен вуим ке, кылме сётӥсько, улэп кылёд. - Уг, Пинчер, - йырзэ шоназ беглой. - Татын паровозды аварие сюриз. Та Утись мынам! - Тон художник вылымтэед, - вераз Пинчер. - Тон шузи!.. Мар соин тон карод? - Мон ачим сое кунгож сьӧры потто. Весь тӥледыз уз сюды ук! - Иське тон озьы шунды пуксён пала лобиськод, Ярославскоетӥ! Бадӟым курик. . . Переславль пыр, дыр? Беглой шӧдтэк шорысь машиназэ дугдытӥз но пальпотӥсь Пинчер шоры учкиз. - Пот, - машина сьӧры кариськыса багажниксэ усьтӥз. - Пыр. Купе люкс - гажано адямиослы. - Кыӵе секыт шузиосын вырыны, - кӧтӝожен вераз Пинчер. Ӝутыса багажнике пыриз. Беглой сое кужмысь пытсаз. Переславль сюреслэн ӝыныяз трасса вылысь пичи нюлэс сюрес ылэ кожиз. Писпу выжыос вылтӥ юри тэтчатыса машиназэ нуиз. Кӧня ке иськем ортчыса дугдӥз но багажникысь посӥськем Пинчерез поттӥз. - Мын! Пинчер нюлэскы вамыштӥз. Беглой кӧня ке ӝегаса, сьӧраз мынӥз. Ӵукна сайкась нюлэсэз пыдесозь бус басьтэм - писпуос омырын уяло, кожалод. - Кылзы ай, - кеськиз Беглой. - Мон тодӥ тынад песятаед сярысь. Чоньдэм со, пуны кадь, нюре выем. Кирос но шай но ӧвӧл! - Жаль. . . - шуиз Ринчер. Со пыд улаз учке, выжы борды медаз канжаськы шуыса. - Адӟонэз сыӵе, иське. - Тӥляд, пинчеръёслэн, ваньдылэн сыӵе адӟонды, - шуиз Беглой. Пинчер берытскиз. Беглой, кык киыныз пистолетсэ возьыса, шораз мертаське: - Мын, шуисько! Пинчер пальпотыса йырыныз шона. - Милемыз кулонэз ваче син пумитаны дышетӥзы, йырез вылӥын возьыса, - серектӥз со. Мертаськем планка вылысен Беглой Пинчерлэсь гань-гань уй куспын жадем ымнырзэ адӟе. Интыысьтыз вырӟысал ке, яке вераськысал гинэ ке - Беглой ыбысал. Нош со пурысь бус пӧлын статуя кадь сылэ. Беглой пистолетсэ лэзиз, берытскиз но машинаез пала вамыштӥз. - Янгышаськод, Беглов, - жаляса кадь вера Пинчер. - ЧК-ын служить ӧд кары. Закон одӥг: кулэм шӧй гинэ мышке уг ыбылы. Мон тонэ куто - уг янгыша. Вождэ эн вай. . . Беглой, куакез тӥяса, машиназэ котыртӥз но трасса пала кошкиз. Переславль шыпыт но йӧно пумитаз. Нокин но нокытчы но уг дырты, машинаос сюбег ульчаостӥ каллен мыно, кытӥ-отӥ валэн уробоос адӟисько. Музей городской усадьбаын интыямын - провинциальной классицизм. Гриша татын ик улэ, оло азьло гидын, оло пуны карын. Беглой калыктэм азбаре машиназэ пыртӥз но моторзэ кысытэк дугдӥз. Потыса ӧз вутты, мышказ икк еськизы: - Дугды! Киостэ капот вылэ! Беглой ӟаректӥз но киоссэ пӧсь капот вылэ лэзиз. Собере вожез потыса берысткиз но кеськиз: - Мон тыныд сю пол вералляй: адями шоры ноку но эн мертаськылы! - Ага! Кышкад! - шумпотӥз Павлик, - пукыӵсэ ӝутӥз но ньӧлзэ вылӥе лэзиз. - Еремей лэсьтӥз. Соин туж тунсыко! Кӧня со тодэ - котькинлэсь трос: кызьы бурдоос кырӟало, кызьы турын-куарлэн нимыз. . . - Кытын со? - дугдытӥз Беглой. - музейын. Гришалы со юрттэ. - Дасяськы. Кошкиськом, - Беглой усьтэм ӧсэ пыриз. Музейын шутэтскон нунал вал, лыз халатэн пересь кышно тевтон рыцарьлэсь йырзэ ӵушылэ. Экспонатъёс вылысь тылъёс кысылэмын, вуж крестьян окрка интерьерын гинэ ӝуа: мумыкор борды ошем зыбкаез ӟустарилэсь лэсьтэм кышномурт ветта, кузёез куэм дэремен, пыдаз кутэн чилеп керттэ, нош висказы Еремей пуке но кызьпу туй лянэсэз тупатъя. Беглоез адӟыса, ужзэ палэнтӥз но гозы вамен вашкалаысь туалае вамыштӥз. Валаны турттыса кыдёкысен синмаз учке - вань-а, ӧвӧл-а? Беглой пулзэ пертчылӥз. Еремейлэсь ымнырзэ оброслэн пиштэмез югдытӥз кадь. Со кирос понӥз но, Утисез лачмытак кутыса, тау карон куриськон чирдӥз. - Вазь шумпотӥськод, - шуиз Беглой. - Азьло вӧсяськы, улэп мед кылёмы шуыса. - Со обросэз нош ик сумкаяз ватӥз но Еремейлы "макаров" мычиз. - Кудпалыз ыбылэ, валалод-а? Еремей пистолетэз юрдыса сямен кияз бергатӥз но берен сётӥз. - Мар тыныд кулэ? - юаз Беглой. - Та Та бронебойноез-а мар-а? - кык метръем ыбылӥськон арбери шоры шонтӥз. Еремей нош йырыныз шоназ но мукет диорама пала возьматӥз. Отын пӧйшурась берданкаеныз юрмег шоры мертаське. - Тае, - шуиз со. Со тае кемалась чакласа улэм вылэм ни. - Вождэ эн вай, - киоссэ вӧлъяз Беглой. - Музейысь экспонат. Кошким, дыр ӧвӧл ни. . . Доразы Павликен Переславский дырто вал ни. - Уг лэзьы! - кыдёкысен ик кеськиз со. - Мон таӵе юрттӥсь сярысь вань улытозям малпай. Ми соин кык арня куспын вань вуж Россиез тупатъялом! - Кылзы. . . - кутскиз вал Беглой. - Кылэм но уг пот! - тушсэ сэзъя Гриша. - Тямыс ар ӧй вал но - ме тыныд! Кык нунал коть. Пиед мед чылкыт омырен шокалоз. - Дугды али тон. . . - Час коть! Час азьлань, час берлань. Музеез учкы, чай юом, адямиос кадь. . . куриз Гриша. - Кылзы! - Беглой сое пельпумтӥз зол-зол сэзъяз но палэнэ нуиз. - Контораыьс адямиос вуизы ке - ӝог-а, бер-а, соос одно вуозы - вералод: вал но кошкиз, Прибалтикае малпа вал - Литвае-а, Латвие-а. Валад-а? - Нош ик? - юаз Переславский. - Вождэ эн вай, ужам тонэ кыски шуыса. Эшшо вералод. . . Номыр но эн вера ни, - шуиз Беглой, ӧс азе сьӧд "Волга" дугдэмез адӟыса. - Ӝог ужало, сьӧсьёс! - мукет ӧс доры бызиз, сьӧраз - Павлик но Еремей. Куинь чекистъёс, пересь кышноез донгыса, музее пыризы. Вӧл-вӧл усьтэм ӧс коридор пумын пиштэ ай, пегӟисьёслэн мугоръёссы ки вылын кадь адӟисько. - Берлань! - кеськиз огез но вӧлдэтэ ыбиз. Беглой Павликез корт арбериос пӧлы донгиз, мертаськытэк ӝыны обоймазэ чекистъёс шоры ыбылӥз. Соосыз таӵезэ ӧз возьмалэ вал, пӧртэм диорамаосы ватскыса, ыбылӥськыын кутскизы. Пулярс шулало, огез корт тефтонецлэн пыдаз йӧтӥз но сое погыртӥз. Рыцарь коридор вамен усиз, люкетэн-люкетэн куашказ. Пиялаос пильылӥсько, пӧртэм мунёос но суредъёс усьыло. - Дугдэ! Дугдэ! - Гриша дэймыса чекистъёс азетӥ бызьылэ. Ыбылӥськон дугдӥз. Огез чекист коридор вамен бызьыса потӥз но, Переславскиез ӟыгыртыса, ӵош экспонатъёс сьӧры усизы. - Тае басьтом-а? - юаз Еремей. Со пӧйшурась вӧзын сылэ но чаклам берданка шоры возьматэ. - Басьты! Басьты! - кеськиз Беглой. - Лэсьты мар ке! - Солэн обоймаез быриз, нош Пинчерлэн "макаровез" ӧчкарыса кадь нырысь патронзэ ик куртчиз. Еремей берданкаез басьтӥз но дыртытэк ваньзэ эскериз. Чекистъёс каллен матэ но матэ вуо. - Ыб ни! - Беглой куалекъясь луиз. Павлик сэрегын пельёссэ ӵоктаса пуке. Еремей патронэн пуйызэ поттӥз, огзэ донгиз, мукетъёссэ паллян ки чиньыосыз вискы тыриз. - Ыб ни! - бӧрдон калэ вуиз Беглой. Еремей мертаськиз но шӧдтэк шорысь кридор шоры потӥз. Азьпалась чекист ӝутӥз вал пистолетсэ но, Еремей азьпалтӥз сое, пуля корт борды жин! Вазиз но пистолет выж вылэ бергаса лобиз. Чекист ки бордаз кутскыса вузыны кутскиз. Син куспын Ереей мукет патрон донгыса вуттӥз но мукетыз пистолет выж вылэ палдӥз. Беглой Павликез кутӥз но ӧс пала бызиз. Еремей каллен бӧрсязы чигна, пистолетэн кылем чекист пала пыӵалзэ возьыса. Мышлань ик Еремей ӧс кусып вамен потӥз, ворсаз но палэнэ тэтчиз - соку ик куинь пуляос ӧсэ куинь пась лэсьтӥзы. Еремей Беглойлэн мынӥсь машинаяз тэтчиз. Чекистъёс, пистолетъёссэс бичаса, машинаязы пуксизы. "Жигули" но сьӧӧраз уиськись "Волга" кӧлӥсь городэтӥ ортчизы, шып улонэз куспетӥ карыса. - Адямиос шоры мертаськыны уг яра шуид вал ук, - машиналэн мышказ пукись Павлик вазиз. - Кыӵе адямиез, - пинь вискытӥз сипыртӥз Беглой, сиучконэтӥ уиськись "Волга" шоры учкыса. "Волгалэн" укноысьтыз пистолетэн суй мычиськиз. - Йырдэ утялты! - Беглой машиназэ сюрес кузя сопала-тапалануллэ, мертаськыны люкетыса. Куинетӥез пуля машина пыр потӥз, мыш пиялаез пильыса, азьпаласьсэ езатъяз. - Питыранъёсаз ыбылы! - Еремейлы кеськиз Беглой. - Ум пегӟе! Еремей пыӵалзэ пилиськем пияла пыр донгиз, мертаськиз - пасяськем питранэн "Волга" пичигес выж вылысен шуре усиз. Пӧсь моторысь буй-буй бус потӥз. - Ишкалскимы. . . - шуиз Беглой. Каньылак кариськыны ӧз вутты, урдэсазы нош ик сьӧд "Волга" кылдӥз. Со шуккон вылысь омырскиз, Беглой ныр ултӥз потыны мырдэм вутскиз. "Волга" котырскиз но нош сьӧразы уиське. Таяз учыре чекистъёс ӧз дыртэ ни, пуля улэ ӧз пыре - кӧня ке кыльыса сьӧразы мыно. Азьпалан сюрес вольыт, шонер - уд пегӟы. Беглой туж зол мынон сяменыз нюлэсэ кожиз. Рульзэ сопала-тапала бергатыса, номыре чаклатэк котыръя. Азьпалазы нокин но медам сюры шуыса вӧсяське. Собере "Жигули" нош трасса вылэ потӥз но шунды пуксён пала кожиз. Горд сюен наштаськем "Волга" сюрес вамен берытскыса ширтӥз, ящикъёсын тырмытэм "Камаз" улэ пыриз. "Камаз" дугдӥз. Нош прицепез сюрес урдэсэ кырыжаз, "портвейнэн" ящикъёс асфальт вылэ усьылвзы, борт улысьтыз шур кадь дунтэм вина вия. Сюрес вылын кыкналласянь ик "пробка" кылдвз. Огез водитель возьдаськыса кадь сӧриськымтэ ӟенеликез ӝутӥз, со сьӧры ик мукетъёсыз дырто - кин кык-куинь гинэ басьтэ, кин сумкаосазы туйна. "Камазысь" шофёр кияз монтировкаен бызьылэ, кӧнязэ ке коть ящиксэ утьыны тыршыса. Вӧзысь гуртысь но калык бызьыса лыктэ ини. Огез воргорон ведраен йӧл нуэ вал, йӧлзэ кисьтыса ведразэ ошмес сямн бызись портвейн улэ донгиз. Чкистъёс калыкез юнме донгазы, жугизы, одӥгез вылӥе но ыбиз. Нокин но ӧз кылзӥськы, ӧз кышка: калыкез дунтэм сюрем макелэсь ишкалтыны кужым ӧвӧл на. Беглой машиналэсь вань кужымзэ поттэ. Азьпалазы сюрись машинаос асьсэос сюрес ёто - пуля пасьёсын, пильылӥськем пиялаё машиналэсь кышкало. Картаез пыдес вылаз вӧлдыса, Беглой кытынзэс валаны турттэ. Синъёссэ ӝутӥз но мырдэм котыртыса вуттӥз - дугдэм машинаос шоры мырӟиськиське вал. ГАИ-лэн будка вӧзаз бадӟым самосвал сюресэз пытсаса котырске, пумит мынӥсь машинаослы потыны пичи гинэ пась кылемын. Военоой автобусысь автоматъёсын но каскаосын солдатъёс потыло. Беглой сюрес урдэсэстӥ тузон поттыса кошкиз. Омоновецъёс шораз автоматъёссэс урдылӥзы вал но "Жигули" машина вискытӥ кошкиз. Ыбем пуляос шуласа вылтӥзы кошкизы. Беглой нрысь сюрем пичи сюресэ кожиз гнэ, йыр йылазы куашетэм но винтъёс шулам кылӥськиз. Нырысетӥ ыбем капот вылтӥ ортчиз. Еремей, ымзэ усьтыса, корт тылобурдо шоры учке. - Ыб! - кеськиз Беглой. Еремей огпол, кык пол ыбиз. Вертолёт, номыр луымтэ сямен, вертолёт вылазы лобе. - Питраназ эн ыбылы! - кеськиз Беглой. - Кытчыяз нош? - Адӟиськод-а винтэз? Солэн шораз, выжыяз ик. . . Еремей нош мертаськиз но ыбиз. Вертолоётлэн моторез кизьнылыны кутскиз, омырын шонаськыса,в ылазы ик лыктэ. Беглой, пегӟыны турттыса, вань кужмысьтыз газзэ зӥбе вал но, шӧдтэк шорысь тормозаз сюриз. Вертолёт ӧжыт гинэ липетсэс ӧз нуы, винтэныз кызьпуосты тӥяса, гаӵолин усиз. Пилот кабинаысьтыз потӥз но шуккиськем автоматчикез кыска. "Жигули" сӧриськем мотореныз ӵын поттыса сюрес кожонэ ышем бере, пуштэм куара кылӥськиз. Нюлэс вылэ тыл ӝутӥськиз но вертолёт чалепъёс палдытылӥзы. Беглой машиназэ ярдуре дугдытӥз. Шур сопал дурын пичи гинэ черк сылэ. Еремей Павликен потӥзы но машиназэс шуре донгизы. Соиз мырдэм вырӟиз, шуре питыраз но лэйкаса котырскиз, выиз. - Нош маин ветлом табере? - паймыса юаз Павлик. - Куасэн, - шуиз Беглой. - Отын машина кулэ ӧвӧл. - Кытын отын? Беглой ӧз вазьы. Кирос понӥз но дэймем Еремей шоры учкиз: - Тон уд вала. . . Тон понна со корт гинэ, нош мыным - матысь эшме ватон кадь. . . Машинаезлэсь мозмытскыса, Беглой ассэ гань-ганьгес шӧдӥз. ЧК-ос шунды пуксён пал кугожез мед пытсалозы, соос со куспын ветлӥсь калык пӧлы сураськизы. Станциысь диспетчерлэн вераськемез, питран кокаськем но тепловоз шуламъёс кылӥсько. Вокзал адӟиськем бере, Беглой дугдӥз. - Кылзы, Еремей. . . Соос монэ утчало. Тонэ нокин но уг тоды. Монэн мар ке луиз ке - тӥледлы Сретенскозь вуоно. Тодад возь, Павел, Сретенск-Байкал сьӧрын. Географиез ортчиды-а? - Ӧм. - Малы мон со школаязы сомында коньдон тыри?.. Еремей, Сретенск, Сретенье Господне. . . - Валай. . . - вераз Еремей. - Отысен Балянсинозь самолёт возьмалоды. Соос шунды пуксёнэ вань сюресъёсты пытсазы, йыразы но уз лыкты мукет палась утчаны. . . Тон бак луод, Еремей, тон, Павел, билетъёс басьты. Мар на?.. А, коньдон. . . - Беглой кисыостӥз утчаськиз но быдэс пачка долларъёс поттӥз. - Шайтан. Вож уксё гинэ. . . Я, воштом. . . Нош пыӵалдэ куштоно луод. Тонэ соин соку ик кырмозы. Кушты, кушты, кулэ уз луы ни. . . Беглойлэн машинаеныз люкиськемез сямен ик, Еремей берданказэ усем куар пӧлы туж жаляса куштӥз. . . Беглой вокзал пала мынӥз. Котырак учкылӥз но киоск укное вож кирпич мычиз: - Вошто-а? - Тон мар? - шултӥз кузёез. - Мынам толэзь куспын сомында уг луы! - Вай, кӧня вань. Водка но - кызь ӟенелик. - Беглой витрина шоры учкиз. - "Абсолют", "Смирновской". . . Ваньзэ пичиен. . . Сумказэ пӧртэм ӟенеликъёсын тырмытӥз. Долларъёсты лыдъякуз, кин ке китӥз кутӥз. Мыйыко, таза старшина пальпотыса шуиз: - Берыктоно луод ваньзэ. Протоколлы кулэ луоз. Кыкетӥез мент Беглой мышкын резина бодыен шудыса сылэ. Киоссэ бордысьтыз лэзьытэк, старшина Беглоез вокзалысь милица комнатае нуиз. Азьпалаз пуктӥз, протокол бланк поттӥз. - Да-а. . . Зол няняськид, пияш, - лулӟиськиз со но ручка кутӥз. - Фамилия? - Сидоров, - малпатэк вазиз Беглой. Та чекистъёс ӧвӧл - ментъёс, соосын со кызьы ке огкыл шедьтоз. Гуртъёстӥ ветлыкуз кӧня адӟылӥз ни со соосты. Огез умой: Еремей Павликен но Утисен палэнын. Ачизтэк но вуозы. - Си-до-ров. . . - гожъя старшина. Резина бодыен умойгес солы, гожъяськон уж секытгес йӧтэ. - Понятойёс кулэ, - вераз кыкетӥез. - Соосты но шедьтом - законъя. Нимтулыд? - Николай Петрович, - вераз беглой. - Ни. . . ко. . . лай. . . Пет. . . ро. . . вич. . . Ваньзэ кызьы кулэ лэсьтом. . . Ку вордӥськид? - Оло, вераськом, пиос? - юаз Беглой. - Одно ик вераськом! - старшина шумпотыса ручказэ куштӥз. - Мар адямиосты ӝегатод? Сидоров? Астэ Иванов гинэ шу и вал, Иван Иваныч. Беглой ӝӧк вылэ вож пачка понӥз. - Тырмоз? - Уз, озьы уз пӧрмы, - шуиз старшина. - Нош тазьы? - Беглой нош пачка понӥз. - Дугды ай, учком, маид вань на, - старшина сумказэк утӥз. - О-о!.. - парабеллум поттӥз. - Таиз дуно сылэ! Пушкаед биографиен, дыр? - синмыныз кыньыртӥз со. - Али гинэ шедьтӥ вал. - Ага, нюлэскысь. . . - валаса шонтӥз страшина. Беглой кык пачка поттӥз на: - Таид пушка понна, - эшшо огзэ поттӥз: - Таиз кышнолы, колготкилы. . . - Нош таиз пиналъёслы, "Сникерслы!" - Беглой коньдон пачкаен доминоен кадь ӝӧк вылэ шуккиз. - Визьмо адямиен умой вераськыны, - мыньпотӥз старшина. - Табере гылӟы татысь, муньылон, вить секунд улыса, станциысь медам адӟы! - Ӟеч луэ, воргоронъёс! - Беглой ӝӧк вылысь секыт сумказэ басьтз но ӧс пала вамыштӥз. Сумка улысь фотография потӥз, улаз "Розыск" гожтэмын. Старшина учкиз отчы но ымзэ усьтӥз. - Э-э. . . э-э. . . - бӧксӥз со. Киысьтыз коньдонзэ уськытӥз но кеськиз:- Берлань! Кыкетӥез ӧс куспысен Беглоез кутӥз но интыяз пуктӥз. Соос Беглоез фотографиен ӵошатӥзы. - Со? - Со. - Майорлы жингыртоно. . . - шуиз старшина. - Мар майорлы - Муское жингыртоно! - Оло нош вераськом, пиос? - юаз Беглой. - татын сомында ик вань на, - сумказэ возьматӥз. - Ум, - кырыжак серектӥз старшина. - Соосын вераськыны уг луы. . . Номер бичаз но пель дораз трубкаен чонь-чонь султӥз. Станция вӧзтӥ дыбыртыса товарняк кошке, укно жингыртэ, ӝӧк вылын графин тэтча. Со вакытэ укноын пась кылдӥз, телефон шнур чигиз но старшиналэн ымныраз шуккиз: соиз, мазэ-созэ валаэк, бодызэ кутэ вал но, боды лулъяськем маке сямен, палэнэ тэтчиз. Мукетыз пуля йыр вылысьтыз штукатуркаез пыргытӥз. Кыкетӥез мент, кизэ ӝутыса, укное кышкаса учке. Поезд дыбыртэм улсын ыбем куараос ӧз но кылӥське угось. - Я мар, пиос, кошки мон? - шулдырскиз Беглой. - Жаль, вераськыны ӧм быгатэ. . . Пистолетсэ но коньдонзэ берен сумкаяз тыриз но комнатаысь потӥз. Состав бичасьёс ӵуж жилетъёсын вагонъёс вискытӥ поръяло. Ваньзы ужало, Беглой шоры нокин но учкись ӧвӧл. Со мырдэм почтовикез шедьтӥз но мыжыкеныз йыгаськиз. Укноысь поӥськем, шӧмаськем ымынр посуда мычиськиз. - Шунды ӝужан пала? - улласянь кеськиз Беглой. - Озьы ке мар? - мыпоттэк вазиз посуда. Беглой кык ӟенелик "смирновской" возьматӥз. - Байкалозь вуом-а? - Уралозь но уз тырмы, - вазиз посуда. - Нош тазьы? - беглой сумказэ усьтӥз. - пуксьы, мусое. Находкаозь вутто! - сяськаяськиз посуда. Питран ёс шулдыр кокасько, укно сьӧрын ӵуж-горд сӥзьыл нюлэсъёс ортчыло. Беглой, Еремей но Павлик, ымнырзэс юзматӥсь тӧллы пуктыса, тамбурын сыло. Волга вамен выж вылтӥ потыкузы, Беглой пистолетсэ поттӥз, пурысь инбаме салют кариз но шуре куштӥз. "Кукурузник" вуж мотореныз тачыртэ, бурд езъёсыныз шула. Улӥын сьӧд нюлэс уя. Самолётлэн вужерез писпу йылъёстӥ кошке. Пассажиръёс ваче пельпум пуко но, бортъёс вӧзын ныруло. Рюкзакъёс, сумкаос самолётлэн быжаз куямын, Еремей гинэ дуно арберизэ гадь бордаз возе но пальпотыса тодмо интыосты учкылэ. Павлик кӧлэ, Беглой кыниськись синъёссэ усьтыны турттэ. Кабина е ӧс усьтэмын. Лётчикъёс тамак кыско, огез киыныз шонаса мар ке но вера, Петрович наушникъёссэ куштыса серекъя. Шӧдтэк шорысь Пеирович сак кариськиз, наушникъёссэ дӥсяз. Салон пала берытскиз, Беглой шоры но Еремеен Павлик шоры учкиз. Рация мар ке вераз, мотор тачыртэмъя номыр но ӧз кылӥськы. Кӧня ке улыса, одӥгез лётчик самолётлэн быж палаз мынӥз, мар ке бугыръяз, куиньназэс ик синмыныз эскериз. Беглой Синъёссэ кыньыса пуке но синлысъёсыз вискытӥз чаклаське. Кӧлонэз тӧлӟиз, ма кароно шуыса малпа. Пегӟемъёс сярысь ивор Балянсинэ но вуэм ини. ЧК отын ӧвӧл, но участковой но солэн дасо юрттӥсьёсыз вань. Петрович син пумтӥз Беглойлэсь выросъёссэ чакла. Беглой нырулэ кадь. Улӥын гурт адӟиське ини, лымылэсь сузям пуксён инты, вездеход но ог дасо "Буранъёс". Самолёт котырскыса пуксьыны кутскиз. Петрович штурвалзэ кутӥз, кыкетӥез лыдъя: - Ньыльдон метр. . . куамын. . . дас вить. . . Соку Беглой азьпала тэтчиз, кабинае пыриз, Петровичез чыртытӥз кутӥз, кисыысьтыз пистолетсэ поттыны турттэ. Соиз, самолёт музъем вылэ йырыныз медаз усьы шуыса, штурвалзэ ас палаз кыскиз. Самолёт бурд вылаз усьыны ӧдъяз. Паллян палан пукись пассажиръёс озьы ик нырулыса бур палъёсыз вылэ усьылӥзы. Беглой кыкетӥез вылэ усиз. Соиз солэсь киоссэ бералъяны кутскиз. Беглой солэн ымныраз сётӥз но мозмиз. Музъем вылын адямиос дэймыса учко, "шузимем" "кукурузник" шоры. Салонысь пассажиръёс огзы вылэ огзы рюкзакъёсын ӵош усьыло. Кыкетӥез пилот кышкаменыз креслояз ӟигартэм пуке, нош Петрович пистолетсэ аоттыса вуттӥз. Беглой сое китӥз кутӥз но пистолетэз таланы турттыса бералъя. Петрович пистолетсэ лэзиз но малпамтэ шорысь штурвалзэ кыскиз. Самолёт меӵак валлань кошкиз, Беглой выж палаз усьысал, дыр, но, гырпумъёсыныз кутскыса вуттӥз."Кукурузник" меӵак выллань тубе. Тани кужымез быриз но быдэсакыз омырын зурканы кутскиз, Пеирович штурвалзэ донгиз, шонертӥз. Беглой пистолетсэ Петровичлэн йырбераз донгиз. - Всё, Петрович!.. - мырдэм шокаса вераз со. - Азьлань!.. Вылӥ пилотажтэк. . . - гуртлэсь палэнэ возьматӥз. - Кытчы? - серектӥз соиз. - Америкае? Полюсэтӥ матынгес луоз. . . Беглой салонэ учкиз. Пассажиръёс шуккиське интыоссэс маялляса, ӝуштыса султыло. Кин ке йыр бордаз кутскыса кылле. Беглой Еремеез ӧтиз. - Кытчы пуксём? Соиз уллань учкиз. - Шур кузя кызь иськем. Тӥни со гурезь сьӧрын. Гурезь сьӧрысен Петрович лэзькиз но шурлэн лымытэмгес интыяз пуксиз. Самолёт йӧ вылтӥ нискылскыса кыдёке гылӟиз но ярдуре лымые мырӟиськиз. Петрович моторзэ кысӥз. - Лобӟод-а? - юаз беглой. - Мон лобӟо. Нош тон пуксёд, - гань-гань вераз соиз. - Та-а рация? - Беглой корт ящик борды йыгаз. - Та. Беглой панеляз ыбиз. Стрелкаосыз вырӟизы но ноле усизы. - Куасъёстэ вай, - косӥз Беглой. Куиньназы мур лымые тэтчизы. Петрович кык куз куас куштӥз. Беглой Павликез ныпъяз. - Вождэ эн вай, Петович, - шуиз со. - Ӟеч лу! Ваньмыз понна тау, урожэн эн малпа. - Малпало, кызьы малпатэк. Шур вамен кошкизы - Еремей азьпалан, бӧрсяз Беглой пиеныз. Гурезь йылэ тубемзы бере, Беглой мышказ учкиз: пассажиръёс потӥллям но кин маин лымы сузя - сюрес лэсьтэ. Уёзь вуттозы. Ӧз ке, самолётын кӧлозы, уз кулэ. . . Нюлэскы пырем бере, моторлэсь жадем пельёс мукет куараосты кылыны кутскизы. Дыр калленгес мыныны кутскиз кадь. Еремей - азьпалан. Павлик паймыса котыр учкылэ. Солы атаез вылын ворттылыны кельше, пужым вайёс вылысь лымыез куашкатъя. - Ӝог-а вуом но? - чидатэк юаз со. - Ӝог, - шуиз Беглой. - Вить нунал гинэ. Еремей котыръяса мынэ, кыр интыосы уг пота, пытьызэс писпуос улэ ватыны тырше. Паймымон - нокыӵе куараос уг кылӥсько. Уиськись ӧвӧл. Тӧдьышуре мукет паласен вуизы. Павлик кемалась Еремей вылын пуке ини. Беглой рюкзаказ оброс гинэ нуэ на ке но, туж жадиз ини, кыдёке кылиз. Иськемысен ик тодмо интыосты адӟиз но, Еремеез кельтыса, пичи пи кадь азьпала бызтз. Бызьыкуз Утисез поттӥз но, йыр йылаз ӝутыса, гурезь уллань нискылтӥз. - Эге-гей, калыкъёс! - шумпотыса кеськиз со. - Пумиталэ! Ого-го-го! Куараез нюлэс борды шуккиськиз. Калык ӧвӧл. Беглой, лёгамтэ лымы шоры учкыса, интыяз ик пуксиз. Котыраз - пӧйшур пытьыос гинэ. Вӧзтӥз дыртытэк Еремей ортчиз. - Эй. . . - вазиз Беглой. - Кытын калык? Еремей номыр куаретытэк, корка вӧзаз лыктӥз, рюкзаксэ ылмы вылэ понӥз. Беглой сое сутӥз но саестӥз кутӥз: - Калык кытын? - Кошкизы, - вераз Еремей. - Асьмеос кошкем бере, ӵуказеяз ик. - Малы? - Кин тодэ, куноос эшшо уз лыктэ-а шуыса, вылды. Шонер, ваньмыз туж визьмо лэсьтэмын. Беглой ачиз но вала вал, Лёва та грут сярысь кинлы ке верам бере, Тӧдьышурлэн улонэз быриз шуыса. Но ӧз малпа вал, калык соостэк кошкоз шуыса. Ӧс вӧзысь лымыез куяку но, гур эстыку но Беглой номыр ӧз куареты. Еремей ачиз вералоз ма кулэ. Коркан ваньмыз чылкыт утялтэмын. Кыдёке кошкиллям, лэся, мае вормиллям, сое гинэ басьтӥллям. Тӧр шор сэрег синтэм кадь - обросъёсты но нуиллям. Еремей дӥськутсэ воштӥз, шыкысысь поттыса, аслэсьтыззэ дӥсяз. Джинсызэ, свитерзэ но сапегъёсэ гуре куштӥз. Гулбечысь сылалтэм сӥль поттӥз но чугунэ пӧзьытыны пуктӥз. Коркан шуныт луиз. Павлик гур вылэ тубиз но, гондыр куэ бинялскыса, умме усиз. Еремей Беглой азе пуксиз. Висказы ӝӧк вылын, куинетӥез вераськись мурт сямен, Утись сылэ. - Кытчы кошкизы? - юаз Беглой. - Кыдёкегес. . . Инмар сётӥз ке, отын толъём. Гужем коркаос пуктылом. . . - Еремей кӧтӝожен котыр учкиз. - Музъем улэп ыром. Черк но музъем улын луоз. . . Пыдло пыром, музъем вылын милемлы инты ке ӧвӧл. - Кыдёкын-а со? - Куинь нунал луоз. - Ку потӥськом? Еремей соку ик ӧз вазьы. - Тон вуид ини, - вераз со, синъёссэ ӝутыса. - Отӥяз мон огнам мыно. Беглойлэн гадяз мар ке ишкалскиз кадь. Еремей шоры учкиз но синъёсызъя валаз Утисез утчаны мыно азязы ик ваньмыз кенешемын ни, мар ке курыны, керетыны юнме гинэ луоз. - Мар-о мыным - берлань? - йырзэ шонтӥз со. - Кызьы малпаськод, кӧня вамыш ортчыны вутто мон? - Кӧня Инмар сётоз. . . - шуиз Еремей. - Тон милям ӧвӧл. Пӧламы луэмед потэ, нош ачид шайтан дуннеен наштамын. Лулэд тынад шорамы. . . Нокин но тонэ уг улля. Ул татын. Вӧсяськы. Коркаосын сиён трос кельтэмын. Пыӵалме кельто. . . Вуоно толалтэ лыкто. Огнад улод, сьӧлыктэ быдтод но дорамы лыктод. Ӵд ке - берен берытскы. Шорамы тон - отчы но татчы но огкадь. . . - Пиме коть басьты, - кема малпаськемез бере шуиз Беглой. - Нежданаез кышно ваид ке, со тӥляд пиды мед луоз. - Сое басьто, - шонтӥз Еремей. - Нош сюанэн вуоно толозь овозмьалом. Собере малпалом. . . Со берпуметӥ вераськонзы вал. Ӵукна Беглой соосты келяны потӥз. - Нош тон? - атаезлэн сьӧразы ыныны дасяськымтэезлы паймиз Павлик. - Мон тӥледыз суто, - Беглой пиезлэсь йырзэ вешаз но Еремей пала донгиз. Люкиськонзы кема уз кыстӥськы шуыса валэктӥз. Пияш пальпотыны турттӥз ке но, ӧз пӧрмы. Со сюлэмшугъяськыны ӧдъяз. - Мон тонэн! - Тонэн мыным секыт луоз. Уг вуы. Еремей Павликез ныпъяз но выль лымы вылтӥ кошкиз. - Кылзы ай, Еремей. . . - кеськиз Беглой. Соиз берытскиз. - Нежданалы вера, мон. . . Еремей йырзэ шоназ но чиньызэ тып-тып ваче карем ымдураз кариз. Собере учкылытэк, азьлань вамыштӥз. . . Буш ӝӧк шоры учкыса Беглой кема пукиз. Гур кемалась кысӥз ни, корка ӝог сӥя. Коркась потӥз но, лымыетӥ выйылыса, баӵко корка доры вуиз, ӵогетсэ ишкалтӥз. Татын но озьы ик буш но чылкыт. Ӝӧк вылын Нежданалэн кыштеэз вӧлдэмын, вылаз - йырберыктон турынлэсь куасьмем тугоко. Беглой сайкиськиз кадь. Ар - сокем трос ӧвӧл, нуналлы быдэ сюлмаськон уж вань ке. Черк ӧс азез сузяз, буш сэреге, мудор интые, сюсьтыл ӝуатӥз, Еремей но Павлик понна вӧсяськиз. Собере вань коркаостӥ ортчиз. Кытысь но отысь лэсьтӥськон тӥрлык, посуда, дӥськут бичаз но Еремейлэн коркаяз ваиз. Сиён-юон ӧз нуллы, чаклаз гинэ, кӧнялы ваньмыз тырмоз - ваньзэ пичи кагаз вылэ гожъяз. Ужзэ быдтыкуз, пеймыт уй вал ини. Котыр шыпыт, лымылэн усемез ик кылӥське. Беглой чог ӝуатӥз, сиськиз, гожъямзэ выльысь эскериз. Улыны луоз! Ӝоже усьыны сьӧлык, Тӧдьышуръёслы нюлэскын сю пол секытгес! Еремеен кельтэм патронъёсты лыдъяз, тямыссэ лётчиклэн пистолетысьтыз ватсаз. Чагтылзэ кысон азяз мае ке шӧдӥз, сак кариськиз. Мурт куара кылӥськиз, собере "Буран" моторлэн тачыртэмез шуккиськиз. Беглой серектӥз: кызьы со, визьмо адями, малпаз, ЧК сое уз иса ни шуыса! Обоймазэ выльысь пистолетэ донгиз но, Еремейлэсь винтовказэ басьтыса, кыре потӥз. Пужымъёс вискытӥ фараос чиляло. )буран ёс" паськыт чурен лыкто. Еремеен Павлик сярысь сюлмаськон ӧвӧл: кыдёке вузы ни, луоз. Нош Беглой ӵукнаозь возиськоз. Виемзы бере коркаосысь утчаськозы. Отчыозь Еремейлэсь кошкем куас пытьызэс согоз. Яркыт тылъёс матэкто. Беглой умой-умой дасяське. Корка сэрегысь но кенос палась лымыез лёгаз - кин тодэ, ма луоз. Отчы выдӥз но вӧзаз винтовказэ понӥз. Пистолетсэ кутӥз, синъёссэ кыниз. Фараос мукет палагес пиштӥзы ке, мертаськыны умойгес луоз. Берыктӥз Илья Пельтемов. 1 Юкаменск пала артистъёс, художникъёс, писательёс туж шер ветло. Ма, асьсэос но отын улӥсьёс сокем ик уг кыстӥсько удмурт пала. Удмурт газет-журналъёсты туж ӧжыт басьто, кырӟась-верась коллективъёссэс шер адӟоно, нылпиоссы но тросэз анай кылзэс вунэтыса будо. Кылем арын тулыс мон Юкаменск пала юромо потано кариськи. Отысь улӥсьёсын, пиналъёсын ваче син вераськи. Шумпотӥ, та пала но каллен-каллен ӟеч тӧлъёс вуо ини. Школаосын но нылпи садъёсын удмурт кыллы бадӟымгес саклык висъяны кутскиллям, анай-атайёс сокем уг пумитъясько ни, пе, пиналъёссэс асьсэ кылзылы дышетыны. Нылпиослэн удмурт писательёс, художникъёс, артистъёс сярысь тросгес тодэмзы потэ, калыкмылэн ортчем сюресэныз тунсыкъясько. Нош Вылӥ Униын вань асьсэлэн драмкружоксы но. Отысь 9-тӥ классын дышетскись Юлия Даниловалэн шудэмез сюлэмме вырӟытӥз. Мылкыдыз ӧз сӥя ке, нылашлэсь зэмос артист пӧрмоз. Юкаменскысь но Палагей школаысь дышетскисьёс Анна Дёмина, Марина Иванова кужымзэс эскеро гожъяськон удысын. Та кибашлы нылашъёслы кутскем ужазы ӟеч сюрес сӥзем потэ Галина Романова. * * * Анна Дёмина Висись сюлэм Эссе "Гажанэ мынам! Мон тодӥсько, яратонэ, та гожтэтме тон ноку но уд адӟы, ноку но уд лыдӟы шуыса, нош сюлмы мынам одно ик гожтыны косэ, ваньзэ-ваньзэ тыныд вераме потэ, мусое. . ." Сюрс пол но ини гожъяз та чуръёсты Маша. Тани нош, ассэ мырдэм бӧрдэмлэсь возьыса, бумага вылын мае ке пӧрмытыны тырше. Оло нош солы гожтэ? Кинлы бен, солы? Адямилы, кудӥз сярысь-а нылаш уй-нунал малпаське, муспотон кылъёсты верамез потыса, солы чебер гожтэтъёсты гожъя. Пичи дырысен тодӥсько мон та нылашез: чебер ымныро, зарни йырсиё. Нимзэ но та нылашлы анаен атаен туж чеберзэ бырйизы:Машенька. "Мотор, ерпечка, шаян", - шуылӥзы со сярысь. Бускельёс доры потӥсько ке вал, Машенькалэн жингрес серекъямез, чебер кырӟамез улыны выль кужым сётылӥз. Сокем муспотон вал та нылаш, сокем лякыт но шудо! Улон одӥг интыяз уг сылы - азьланьске, ваньмыз воштӥське. Адями но будэ, воштӥське, азьланьске. Тани Машенька шуак воштӥськиз: синъёсыз мӧзмыталэс луизы. Уг кылӥськы ни солэн жингрес куараез но. - Мар луиз тонэныд, Машенька? Кытӥыд ке висе шат? Оло нош яратон тонэ сокем воштӥз? Яратон адямилы шуд вае, нош тонэ со малы сокем вӧсь каре? - Одӥго яратон, Егор дядяй, одӥго яратон, - лулскиз Машенька. Ноку но ӧз малпалля, Маша сыӵе синмаськыны быгатоз шуыса. Со пияшен нырысетӥ классысен одӥг школаын дышетско ке но, ноку но ӧз малпалля, сое сокем яратоз шуыса. Яратон, яратон висён пыриз Машалэн сюлэмаз! Но со яратон солы выжыкыл дунне ӧз вайы. Уг тоды угось Машалэн гажанэз яратэмзэ, уг учкы шораз лякыт, мусо синъёсын. Вӧзаз сыӵе муспотон нылаш вань шуыса уг но вала, оло, ноку но уз тоды. Мукетсэ яратэ угось Машалэн мусоез, мукетызлы шуныт кылъёссэ вера, мукетыз сярысь малпаське, уйвӧтъёсаз мукетсэ адӟе. - Ой, Егор дядяй, кыӵе сюлмы висе! - лулске нылаш. - Бурмоз, мусое, бурмоз. Адӟод али, лыктоз мукетыз яратон, вунэтод сое. . . Вунэтоз-а меда? Ачим угось сыӵе шудэным улӥсько. * * * Кылбуръёс Дышетӥселы Вазь ӵукна мынӥськод школае, Секытэсь сумкаос киосад. Вай юртто нуыны, мусое, Вай учко одӥг пол на шорад. Мон кошко. Сюресъёс люкозы. Нош тынад улонэд - школаын. Вань ӟечез гинэ мед вуозы Тон доры та чебер дуннеын. * * * Флор Васильевлы Война. . . Война. Мар бен со кыл? Война - со секыт ож, со - тыл, Со - сьӧд пилем, секыт зӥбет. Война - со уй, шимес пеймыт. . . Пинал дырдэс война лушказ, Ӟеч улондэс секыт кариз. Вань шудбурдэс валлё* кысказ, Соку гинэ война быриз. * * * Кызьпу Луло-а, лултэм-а Сылэ та писпу. Монэ вунэтэм шат? - Ӟечбур-а, кызьпу! Монэ тодмаськод-а? Я вазь, мусое. Малы изиськод тон, Ваед лэзькемын?.. Бадӟым пурты донгиллям Веськрес тыбыраз. Лек висён пыртӥллям Тӧдьы мугораз. Мон басьто висёндэ Баблес кызьпуэ. Я, шонты вайдэ, Я, лэзь эктыса, Мусо писпуэ. * * * Уйвӧтам тонэ малпай мон, Асказе* тонэ адӟи. Сюлэмам - шырчик куара но Зарни крезь кадь арганчи. Тон пумит номыр эн вера, Сюлэмме вӧсь эн кары. Юасько шыпыт: "Шат бер-а Вордӥськиз та яратон?" Ул гинэ пинал сюлмын тон, Пӧсь гадям тонэ шунто. Инмарлы мон тау шуо но Вань дуннеез ярато. * * * Марина Иванова Час нош ядан тиккетэ Верос Борддорын час тиккетэ. Пеймыт коркан викышъям куара кылӥське. Лена огназ пуке, атайзэ вите. Туннэ но атаез кытын ке юыса калге, дыр. Ӝытъёсы тазьы огназ нылаш куиньметӥ толэзьзэ ортчытэ ини. Куиньметӥ толэзьзэ Лена копак огназ - анайтэк но, атайтэк но. Анаез бырыны шедиз, куректон нылашлэсь вань улонзэ пичи пырыослы сӧриз. Атаез, курадӟонзэ вормытэк, бутылка пыдсы учкылыны кутскиз. Анаезлэсь быронзэ чиданы Леналэн кужымез окмиз, нош атаезлэн юэмез солы тужгес но секыт усе. Азьло атаез сое туж яратылӥз, нылыз понна ваньзэ лэсьтыны дась вал. Лена но тодылӥз: марысь мар ке, атаез солы котьку ик юрттоз, валалоз. Нош табере атаез ӵемысь шораз черекъя, куддыръя кизэ но урдыны дась. Леналэн атаез мурт луиз, со сьӧры шуг-секытлэсь ватскыны быгатоз шуыса уг ни оскы. Туннэ но нылаш ас висъетаз пытсаськиз. Валесэ куштӥськыса, миндэрзэ ӟыгыртӥз. Леналэн йыраз али пӧртэм малпанъёс бугыръясько: мар сыӵе атаеныз луиз, малы соос ог-огзэс уг ни валало? Нылаш та юанъёсызлы валэктон уг шедьты. Вырӟылытэк кылле, бам кузяз синкылиосыз васько. Шуак вуэм малпанэз Ленаез мукет дуннеысь поттӥз: "Сое кемалась Сергей вите ни ук!" Сергеен соос арня талэсь азьло гинэ эшъяськизы. Шонерзэ вераса, Леналы та пияш кемалась яра ни вал, нош нылъёс сое ялан алӥзы: "Малы со тыныд кулэ? Со сярысь нылъёс пӧлысь нокин умойзэ ӧз на вера. Оксаналэн пиналыз но, пе, вань солэсь". Лена нош пумитазы шуылӥз: "Яратско мон сое. Номыр но асэным карыны уг быгатӥськы. Сое адӟисько ке, шоканэ ик пытсаське, му пыр вияны дась. . ." Леналэн син азяз пуксиз, кызьы соос Сергеен ульчаетӥ, киысь кие ваче кутскыса калгизы. Леналэн корка дораз вуыса, Сергей нылэз каллен ӟыгыртӥз но чупаз. Нылашлэн пыд улысьтыз музъем кошкиз кадь. Со вакытэ Леналы ваньмыз кытын ке туж кыдёкын вал, со понна быдэс дуннеын али соос кык кузя, ог-огзэ яратӥсь егитъёс гинэ. Лена султӥз но дыртыса Сергей доры потыны дасяськиз. Со вие атаез вуиз но шораз черекъяны кутскиз: - Кытчы мынӥськод?! Тон мынэсьтым юаськод-а? Мон тонэ кытчы ке лэзи-а? Нош ик калгыны мынӥськод! Леналэн чиданэз быриз, атаез шоры черектӥз: - Тынад нош мар ужед! Монэн эн кузёяськы! Ас улондэ тод, астэ чакла! Нылашлэн ньылоназ бӧрдон дугдӥз, ӝогак коркась потыса, клубе мынӥз. Отысен Сергеез адӟиз но ваньмыз вунӥз. Быдэс дуннее соос кык кузя гинэ кылизы кадь. - Туннэ Витя эшелэн вордӥськем нуналыз, - шуиз Сергей. - Ойдо ӵош мыном. Со мынам эше ук, ӟечкылатэк умойтэм луоз. Эн возьдаськы - Витялэн анай-атаез уз луы, пе, кытчы ке кошкиллям. Витя доры пыризы но, Леналэн йырыз ик берганы кутскиз: быдэс коркан тамак ӵын лӧсъяськемын, вина зын паке. Лена соку ик берытскыса кошкыны медэ вал но, Витя, выль кунооссэ адӟыса, доразы мынӥз но соосты ӝӧк сьӧры пуктӥз. Кыкназылы ик вина лэзиз. Сергей хоп! карыса юиз. Лена атаезлэсь кылъёссэ тодаз ваиз но, солы ӧчкарыса, рюмказэ кымаз. Собере эшшо одӥгзэ, куиньметӥзэ. . . Нылашлэн йырыз берганы кутскиз. Султыны медэ вал но, пыдъёсыз уг кылзӥсько, кысмыляк луо. Лена Сергеез ӧтиз, кыкназы педло потӥзы. Кӧня ке сылэмзы бере, Леналы йӧнгес луиз кадь. Табере нылашлэн оломалы серемез потыны кутскиз. Капчи мылкыдын Сергеез чупа ини. Соиз нош нылашез олокытчы валтэ ни. Кыӵе ке висъетэ пыризы но, валес вылэ уськытскизы. . . Лена синзэ усьтӥз - шунды вылӥын ини. Вӧзаз нокин но ӧвӧл. Котырак утчаське, кытынзэ валаны уг быгаты. Султыны медэ вал но, йырзэ выртэмез уг луы, ӝыныё пилиськыса кошке кадь. Тодаз лыктӥз толло ӝыт, пияшен нырысетӥ уез. Каллен султыса, ӝӧк доры вуиз. Отын пичигес гожтэт: "Лена, тон со мында эн ни юы, нош уез мон вунэтонтэм ортчытӥ. Ӟеч лу! Сергей". Леналэн син азяз нош ик ортчытэм уез ортчиз. "Малы нош Сергей сыӵе вылтӥяськыса гожтэ?" - номырзэ уг вала нылаш. Ӝогак дӥсяськиз но дораз бертӥз. Гуртаз атаез юэмын ни. Нылзэ адӟыса, йыг-йыг вамышъяны медэ вал но, усиз, мае ке ныр улаз сипыртыса, умме усиз. Леналэн йырысьтыз Сергейлэн гожтэмез нокызьы уг поты. Чидатэк ӝытэз вите со. "Ӧвӧл, номырзэ но умойтэмзэ Сергей вераны уг меды вал. Со дыртӥз, луоз, соин ик ӝогак гинэ маке со гожтӥз. Клубын сое одно ик пумитало ай. Со дорам лыктоз но нош ик ӝик-ӝик бордаз ӟыгыртоз", - ассэ буйгатэ Лена. Ӝытазе нылаш дыртыса клубе потӥз. Сергеез нокытысь но ӧз шедьты, эшъёсыз но кытчы кариськемзэ уг тодо. Лена яратоно пияшсэ быдэс ӝыт витиз, нош сое пумитаз гуртаз бертыкуз гинэ. Сергей ульчаетӥ Оксанаез ӟыгыртыса мынэ. Соос мае ке но туж серекъяло. Ленаез адӟыса, пияш чусомиз, мар вераны уг тоды ни. Оксана нош, Сергейлэсь могӟемзэ шӧдыса, Лена шоры серекъяса учкиз но Сергеез ымдураз ик чупаз. Лена ма карыны тодытэк сылӥз но, собере солы кин ке шуак бамаз чабкиз кадь, бызьыса кошкиз. Гуртаз пырыса, нылаш атаез шоры ӧз но учкы, кӧлон висъетаз пытсаськыса, миндэрзэ ӟыгыртӥз. "Малы со озьы кариз? Малы ныл яратонэз серекъяса куштӥз? Анай, анай, кытын тон?! Нокин но мыным юрттӥсь но, верась но ӧвӧл. Та дуннеын мон копак огнам кыли. Копак огнам!, - бӧрдэ ныл сюлэм. - Кин понна мон улом на та дунне вылын? Кинлы мон кулэ? Мар пайдаез улэмелэн?" Таӵе сьӧд малпанъёс каръясько ныл йыре. Лена быдэс улон сюрессэ малпаса, бӧрдӥз-бӧрдӥз но умме усиз. Ӵуказеяз вань ӵукна ик Лена бакчае потӥз. Уриськыны медэ вал но, ужамез уг луы - нош ик йыраз сьӧд малпанъёс лыкто: "Сергей, иське, монэ со уе эриктэмаз но куштӥз. Кинлы мон табере сыӵеен кулэ на? Уг, уг ни ул та дунне вылын!.." Озьы Лена арня-а, кык-а улӥз. Ачиз но со уг ни вала, мар каре, мар вера, йыраз одӥг гинэ малпан берга, гадьзэ пачкатэ: "Малы мыным улыны кулэ?" Аптечкаысь кырымаз пӧртэм таблеткаосты люказ, ву ваиз. Сое ваньзэ ньылыны медэ вал ини но, ӧскемез потыны кутскиз. Ленаез со куиньметӥ нуналзэ ранӟытэ ини. "Мынам номыри но уг висьы ук, ма бордысь та?" - аслэсьтыз ачиз юаз но собере ныл сюлэм ваньзэ валатскиз. Лена уг тоды, мар табере солы кароно: кырымысьтыз таблеткаоссэ сиёно-а, куштоно-а? "Ӧй ке сиы, быдэс гурт серем кароз, нош сиёно ке?.. - шара вераське Лена. - Уг, уг си. Табере мон тодӥсько, кин понна мыным улоно. Огнам ке но, ваньзэ чидало, вормо!" Малпанъёссэ часлэн жингыртэмез куспетӥ кариз. Сизьым пол шуккиз но, чусомиз. Педлон вамышъёс кылӥськизы. "Атай! Кызьы нош мон солы ваньзэ вералом? Мар со шуоз? Ойдо, котьма мед шуоз, пиналме мон уг кушты, со мынам нуные. Нош вератэк кызьы? Али со юэмын, мар пайдаез соин вераськыса. Собере вераськом" - малпаське нылаш. Таӵе дыръя кинэн ке вераськем потэ. Лена бускелез Катя апай доры мынӥз. Соиз но, ваньзэ тодыса, мар вераны ик могӟиз. Собере ас понназ кӧня ке малпаськыса пукемез бере шуиз: - Лена, атаедлы али номыр но эн вера. Нош ваемед ке потэ, эн кышка, мон тыныд юртто. Мынам пиналъёсы ваньзы кошкизы ини, огнам кыли. Тон коть пересь улонме югдытод. Бускелез дорысь Лена капчи мылкыдын потӥз. Табере со огназ ӧвӧл ни - сюлэм улаз выль улон ӝужа. Нош берло, оло, вӧсь карем ныл сюлэмыз бурмыны ӧдъялоз. Нуналъёс, арняос, толэзьёс ортчо. Лена атаезлэсь синзэ ватэ. Солы потэ, атаез шораз кырыж учкылэ кадь. Нош кызьы эшшо учкод на, ваньмыз адске ини ук. Тани туннэ но со нылыз шоры учкиз но нёжтӥз: - Я, мар шорам учкискод? Улыны-а дышетод? Атаез пумозяз вераса ӧз вутты, Лена мытыса шуиз: - Бен, мон пинал витисько. . . Атаез нылыз доры мынӥз но бамаз шлач! чабкиз. Эшшо чабкыны кизэ ӝутӥз на вал но, Лена бызьыса ураме потӥз, Катя апай доры пегӟиз. Отчы вуыса ини, йырсазьзэ ыштӥз. Бускельзы ваньзэ валаз, больницае жингыртӥз, нош ачиз Ленаос доры мынӥз. Отысь Леналэсь кудӟем атайзэ адӟыса, вань лексэ лэзиз: - Кызьы тынад киыд ӝутскиз? Кызьы нылкышно луоно муртэз жугод?! Нимдэ-а саптаз шуиськод?! Тон кемалась ини ачид нимдэ саптад! Возьыттэ чарка пыдсы выйытӥд! Нылыдлэн улонысьтыз одӥг гинэ пиштӥсь кизилизэ инмысь уськытӥськод ук тон! Леналэсь атайзэ тазьы тышкаськиз но, Катя апай дыртыса дораз кошкиз. Леналэн атаез ас понназ ныр улаз маке нукыртыса, малпаськыса кылиз. Ленаез больницае нуизы. Аскыяз Катя апаез телефон жингыртэм сайкатӥз. Лена вылэм со. Ваньмыз умой, пе, пиналыз ӟеч вордӥськем. Умой иворлы шумпотыса, Катя апай Леналэн атаез доры мынӥз. Ӧссэ усьтӥз но - мар та?! Корка пушкын лыз ӵын лӧсъяськемын, шоканы но уг луы. Катя апай укноез усьтыны мынэ вал но, маке борды канжаськиз. Мар тамаша та? Вася, лэся, ук?! - Вася, нош ик ӟузид-а? Мар пыд улын кыллиськод?! - вожез потэ Катя апайлэн. Шораз вазьылӥсь ӧвӧл . . . Леналэсь атайзэ ватыны быдэс гурт люкаськиз. Кудӥз воргоронэз жаля, кудӥз тышкаське. Юыса гурзэ вазьгес пытсаз но, соин тазьы луиз, дыр, шуо. Нош куд-огез шуэ, нылызлэн синмаз учкыны возьыт луиз, дыр, пе. Лена номыре уг кылы, пумем кадь сылэ. Малы солы сомында курадӟон?! Быгатоз-а со ваньзэ тае чиданы? Малы атаезлы юэмысь дугдыны ӧз юртты? "Атай, тыныд капчи, анае доры кошкид. Нош мон кытчы пыром? Монэ ведь чылкак огнаме кельтӥды! Дас куать арескын - чылкак огнам!" - аизлэн гу дораз Лена викышъяса бӧрдэ. Катя апай нылашез китӥз кутӥз но дораз нуиз. Со ӝытэ ик Ленаез нош ик больницае, пиналыз доры нуизы. . . . . . Лена час шоры учке, нош учке. . . "Ма бен кытын соос? Малы уг на лыкто? Туннэ ик вуыны кулэ ук! Мынам гуртам бертэме потэ ини. Тӥни пие но алекъяськыны кутскиз ни", - шара малпаське Лена. - Лена, дорад лыктӥзы, - медсестра ӧте. Нылаш ӝогак дӥсяськиз, пиналзэ басьтӥз но ӧсэз усьтӥз. Азяз Сергей сылэ. Лена мар вераны уг тоды. Синмысь синме учкыса, озьы кема гинэ сылӥзы. Куддыръя угось синъёс кылъёслэсь умойгес верасько. Озьы выль улонэ нуныез атаез ачиз поттӥз. * * * Уг валаськы Педлон - тулыс, Сюлмам - сӥзьыл. Малы мӧзмыт потэ тулыс нунал? Уг шумпотты монэ уӵы чирдон, Мӧзмыт потэ шурлэн жильыртэмез. Уг валаськы, малы та куректон? Малы висьытӥськод тон сюлэмез? Писпуослэн пучыоссы тордо, Лымы улысь музъем адске ини, Нош сюлэмам мынам тӧлъёс вузо. Егит сюлэм, троссэ чидад ни тон, Я чида на вал кӧня ке эшшо. Мон вунэто сое, яратонме, Мон быгато, сюлмы чидаз на ке. * * * Курадӟон Тулыс. Ваньмыз али сайка, Али котыр улон вордске. Нош урамын сылэ корка, Капка бордаз сьӧд пус адске. Ортче калык капка дортӥ, Синъёсазы нош синкыли. Бӧрдэ куанер пияш понна, Кудзэ чигтӥз убир война. Бӧрдэ чигтэм анай сюлэм, Атай нош гуньдыса сылэ. Одӥг пизы гинэ вылэм, Со но шедем война улэ. Чечня. Кыӵе со кыдёкын. Уг кылӥськы ыбем куара. Нош куректон котьку матын - Пыроз каллен, уз сёт куара. * * * Витисько тонэ Нош ик зор кыдыра бездылэм инбамысь, Урмем тӧл ишкылэ куаръёсты писпуысь. Тём пеймыт коркаын мон огнам пукисько, Витисько мон тонэ, малпасько. Ӵуж куаръёс бергаса шобырто музъемез, Малпанъёс лыктыса тырмыто йырвизез. Син азям нош - тынад серекъясь вылтусыд, Сюлэмам нош - тынад либатӥсь кылъёсыд. . . Мон пото та коркась, чагисько лек тӧллы. Мед нуоз малпанме тон доры, Мед тынад сюлэмыд золгес жугиськоз, Мед мынам висёнэ дорад но вуоз.