Анай-атайёс но нылпиос. . . Соос куспын валантэмъёс, лекъяськонъёс но керетонъёс котьку вал, уз но быре. (кулэстыны ке шат луоз улӥ ӵектонъёсты быдэсъяса) Малы ке шуоно, анай-атайёстылэн (татысен А-а.) пинал но егит дырзы воксё мукет вакытэ ортчиз, соослэн улоназы мукет сямъёс но дунъетъёс кузёяськизы. Мӧйыослы секыт ини улонлэсь туала куронъёссэ быдэсъян вылысь асьсэдыз воштыны. Соослы ас вакытаз шуэмын ке вал 10 часын ӝыт изьыны выдыны, школаысь бертэм берад нырысь ик чипы-курегез, пудо-животэз сюдыны, озьы ик медло лэсьтэмын. Даллашыны, споръяськыны эн ик малпа. Огъя вераса, кызьы шуизы, озьы ик медло. Али семья кусыпъёсын эркын тӧлъёс шулало. Со валантэмъёсты но кулэстыны луонлыкъёс кылдэмын. Али уго А-а-сын споръяськыны, аслэсьтыд шонер луэмдэ валэктыса соосын огкыл шедьтыны луоно. Та вие А-а. гинэ нылпиоссэс уг ни дышето, пиналъёс но А-а-эс визьноданы, ас палазы берыктыны быгато. Ыль нянез ныркыса сямен аслыд кулэезъя А-а. "пӧраны" луоно. Кызьы шуиськоды-а? Ойдолэ бен чаклалом , эскером, малпаськом. Нырысь ик котьку но тодад возь - А-а. -со ненег, ӝог тулкымъяськись, ӝог керӟег луыны быгатӥсь маке. Соин ик соосты гажамдэ, яратэмдэ возьматыны эн возьдаськы. Сюлмысь вераськонъёслы дырдэ тросгес но ӵемгес висъялля. Пӧртэм шугъяськонъёсыд сярысь кенешон ӝутыку А-а-лы либыт, небыт но одно ик пыриськисьтэм куараен вазиськоно. Озьы вераськемысь котькуд А-а-лэн сюлмыз небӟе. Огдыре ик созэ но вунэтоно ӧвӧл: кыӵе гинэ албасты, (тынад малпамедъя) А-а. мед луозы, мар гинэ тумошозэ, кулэтэмзэ, тынэсьтыд мед курозы - кыӵе луыны, мар карыны, кыӵе гинэ улон шоры паймымон учконзы соослэн мед луозы - соос тонэ ярато, тыныд ӟечсэ гинэ лэсьтыны тыршо. Нокудӥз но А-а. нылпиезлы уродзэ уз дэмла, уз ӵекты, уз лэсьты. Соос котьку но сюлмасько, мед тон пӧртэм кышкытлыкъёслэсь утемын луод, мед шудо-буро будод, мед тынэсьтыд гажано адями пӧрмоз. Нош мар тон ачид улонысь возьмаськод, кыӵе тыныд луыны кулэ - ваньзэ аслыд малпано-лэсьтоно луоз. Тыныд, А-а-лэсь улон шоры учконзэ воштыны турттӥсь муртлы, тужгес но кулэзэ вунэтоно ӧвӧл, сое тӥ 1-тӥ кат интыын лыдъяны быгатоды: котькуд сюлэмшугъяськытӥсь ужпумез сэрттон-пертчон азьын А-а-лэсь шугъяськон мугзэс валаны тыршы. Ма соосты кышкатэ, мае соос тынэсьтыд возьмало. Асьсэос мугзэ пыр- поч валэктыны ке но уг быгато, валад ке марлэсь кышкамзэс, тодод кызьы но малэсь соосты буйгатыны. Озьы ик вералод: "Та ужпумын нокыӵе кышкытлыкез ӧвӧл, нош вань курон-косонъёстэс мон быдэсъяло". Нылпи но А-а. кусыпъёсыз радъян удысын 2-тӥ кат: ЭН ПУМИТЪЯСЬКЫ! А-а-ыд котьку но котьмаин нырысь ик соглаш кариськоно. Нош бӧрысь каллен-каллен, пумен-пумен аслэсьтыд малпандэ ик шонере поттыны тыршоно. Та выллемгес оло кутскод: "Мусо анае (атае), мон тодӥсько, тон мыным ӟечсэ гинэ лэсьтыны тыршиськод, соин ик тынад сыӵе но сыӵе куронэд-косонэд (тодӥськод на, дыр, куараед со вакыт небыт, лякыт, сюлмысь потӥсь но пыриськисьтэм луыны кулэ шуыса), но вай учком та югдур шоры мукет синмын, оло, асьмеос кыкнамы ик соглаш луомы, огкыл шедьтомы. Огкылэ вуыса А-а-ты буйгатскозы: кыӵе ӟеч сямо асьмелэн пиналмы, кылзӥськись будэ. Нош кызьы уж вылын сётэм кылдэ быдэсъялод, соослы туж ик кулэ но ӧвӧл ини. А-а- ты сое вунэтозы, соос огкылэ вуэмды понна но куано ини. Нош табере ӧжытак радызъягес. Кыӵе ужпумъёсъя ӵемгес валантэм учыръёс А-а. но нылпи кусыпъёсын кылдыло, но кызьы соосыз палэнтыны луоно? 1. А-а-сыд одно ик тонэ шудонысь кема ӝегатскытэк, дырыз дыръя бертыны косо. Валамон, соос кышкало тӥ уин жугиськисьёслэн, пӧртэм маньякъёслэн ки улазы шедёды шуыса. Озьыен, мар кароно? Нылашъёслы шуыны луоз мынам яратоно но кужмо келясе, туганэ вань шуыса (ӧвӧл ке но, малпанады гинэ со ванвь ке но). Пияш А-а- ез азьын газовой баллончикеныз мед шоналоз, таин мон нокинлэсь уг кышкаськы шуыса. Со сяна, А-а-эс оскытэ, одно ик гуртады жингыртоды шуыса, шутэтскон интыяды вуэмды но отысь кошкон дырды сярысь. 2. Уг лэзё тонэ отчы яке татчы ветлыны, кытын соослэн малпамзыя урод ужъёс лэсьтӥсько: вина юон, тамак кыскон но мукет. Зэм но, соглаш кариськы, сыӵе учыръёс дискотекаосын, баръёсын но клубъёсын луыло. Но нялтас нош ик аслэсьтыд вера: сыӵе интыосын али порядокез чаклась дружинникъёс вань шуыса, соос эрказмемъёсты дугдытозы, интыязы пуктозы шуыса. А- а-ыд дружинник сярысь верамдэ лыдэ уз басьтэ, керӟег куарадэ поттыса со сярысь верад ке. Эшшо одӥг пол индылӥсько на - возь астэ кылзӥськись нылпи сямен, А-а- лэсь кышкамзэс валась, соосты гажась пинал сямен. Кылсярысь. А-а-ыд: тыныд уг яра ветлыны со клубе, малы ке шуоно, отын: а) ваньзы наркоманъёс б) уродэзлы гинэ дышетозы в) шуш музыка г) бер гуртэ бертод Тон: зэм но, анай (атай), сыӵе учыръёс отын пумиськыло. Но тон ведь монэ со наркотикъёс пумысен умой визьмад ини. Сое веръяны табере монэ нокин косыны уз быгаты (тау тыныд со понна). Оскы мыным, мон номыр уродзэ отын уг лэсьты, тонэ но ӝоже уг уськыты. Нош ӝог музыкая эктон пумысен ке, со мугорез туж капчиятэ, урод мылкыдъёсме палэнтэ. Умой шат луоз урод мылкыдъёсы дискотекае ветлымтэысь тон вылэ ке усизы? (Татын пальпотӥды ке, эшшо умойгес луоз). Эн сюлмаськы, анай (атай), мон ӝоггес бертыны тыршо. Чакла, тазьы верамдэ ӧжытак воштыса но выльдыса мукет шуг-секыт учыре но вераны луоз. 3. А-а-лы уг кельшы тынад яратоно эшед. Юано, маин бен уг кельшы шуыса. Собере валэктоно, тынад со нылашен (пияшен) эшъяськемед, сое яратэмед тыныд номыр уродзэ уг сёты шуыса. Умой дышетскыны но уг люкеты, асьмелэсь семья кусыпъёсмес но уг сӧры, мынэсьтым сямъёсме но уг уродмыты. Кин тодэ, дыр ортчиз ке, мон, оло, эшшо но ӟечсэгес эш шедьто. 4. А-а-ыд тонэ гуртад ужаны косо. Валамон ини, ваньмон дырыд быдэсак юртъер котырез чылкытатонлы, пудо-животэз утялтонлы, лавкае ветлонлы ке кошке, татын А-а-ыд тынэсьтыд мултэссэ куро. Но воксё ужатэк тоже уг луы. Улӥськод бере А-а-ныд одӥг коркан, ваньдылэн тӥляд одӥг кадь правоосты но котькуддылэн аслаз ужан удысъёсыз мед луозы. Валэкты соослы, тазэ ужез мон умой быдэсъясько, нош тазэ мынэсьтым вазьгес на курыны, собере мултэсгес но пӧй луоз ни. 5. Весь косо кытчы мынэмед сярысь вераны но отысен одно ик жингыртыны. Кытчы мынӥськод шуыса ивортонэз секыт ӧвӧл ук, вера. Медад гинэ вунэты кытчы мыно шуэмдэ. Бӧрысь уго алдаськемед шараяськоз. Ачид но ке уд на тодӥськы кытчы вамыштод, яке А-а-едлы кельшымтэ интые ке шонтӥськод, малпа сыӵе интые мынэмдэ, кудъёсыз тонэ соослэн син азязы вылӥе ӝутозы: музее, выставкае, библиотекае, городысь чебер интыостӥ поръяны. Но соку тыныд зэмзэ но куд-ог музейёсын но выставкаосын тодматсконо луоз. Тодоно мар отын али возьамтӥське, мар вылез кылдэмын. Жингыртыны тоже секыт ик ӧвӧл, нош уг ке поты, отын, кытчы мынӥсько - телефонзф ӧвӧл шуоно. 6. Ӵем юаллясько тынад улонэд сярысь. Асладэз - со асладэз ини. Отчы нокинлы но нырзэ чуртнаны лэземын ӧвӧл. Но А-а-ыд мерскыло ик. Соослэн тонэ алама ужъёслэсь утемзы потэ ук. Озьы бере, вера ваньзэ, мар сярысь А-а-лэн кылэмзы потэ, аламазэгес ӧжытак ватыса. Куддыръя А-а- лы улон-вылондэ мадемедлэн умоез но вань. Шуг-секытъёсы йыромид ке, соос юрттыны быгатозы. А-а-лэн улонэз ӟечгес валамзы + тынад визьмыд, шонер ӧре пырыны юрттозы. Сыӵе юанъёсын укыр ӵемгес ке тыныд вазиськылӥзы, А-а-ныд валэктон уж ортчыты: мынам улонэ - со мынам улонэ, нокин отчы медам мерскылы. Но со дыре ик кыл сётоно луод - кулэ дыръяз ваньзэ ватыттэк мадьылод шуыса. Сётэм кылдэ одно ик быдэсъя, котькуд дыръя ушъяськыса выллем вера: тани ук, анай-атай, кыл сётӥ вал но озьы ик лэсьтӥсько, вань лулпуш дуннеме тӥледлы усьтӥсько. А-а-ты шӧдӥзы ке, тон "шонер нылпи" шуыса, ӧжытак эрекчаськыны но кутскыны луоно. 7. Тышкасько тон аляк, чурыт, азьтэм, ляб визьмо, астэ ачид гинэ яратӥсь шуыса но мукет. Чакла ачид, вань-а тонэ озьы нимамзылэн зэмлыкез. Ӧвӧл ке, верамзэс пеляд ик эн поны. Нош вань ке, малпаськы, малы тонэ озьы нимало, мар косэ тонэ озьы лэсьтыны? Оло, зэмзэ но кӧня ке воштӥськыны кулэ? 8. Весь косо дышетскыны. Тодон-валанъёсыд зэмзэ но лябытэсьгес ке, умойгес ик луысал соосты будэтыны. Нош А-а-сыдлэсь акылляськемзс чидамед ке уг ни луы, юромо возьматоно соослы, кыӵе трос гуртэ уж тыныд берло дыре сётъяны кутскизы шуыса. Кык-куинь арнязэ ӝӧк сьӧрысьтыд бер ӝытозь эн поталля, весь лыдӟемъяськы, дышетскемъяськы, яке кельшиз ке, зэмзэ но тодон-валанъёстэ будэты. Тодӥськод-а, мар соку луоз? А-а-ыд жадем синъёстэ адӟыса, тонэ жаляны кутскозы: ӵок ини, со книгаосыныд, тазалыклэсь дуноез номыр ӧвӧл, шутэтскы, нылы, (пие), шуозы. Нош умой дышетскыса но весь книгаос сьӧрын пукыны косо ке, валэкты А-а-едлы, тынад йырвизьмыд огвакытэ гинэ ӟеч ужа шуыса, кылемаз, тӥ косэм дыре, йыры пӧртэм лыдпусъёслэсь пилиськыны турттэ шуыса. Шонерзэ вераса, гуртэ сётэм ужез лэсьтон понна, мыным кык час но тырме. 9. Коньдон уг стёто. Мугъёсыз кык пӧртэм луыны быгатозы: соослэн ӧвӧл коньдонзы, яке уг сёто юромо, чурытаськыса. Коньдон ӧвӧлтэм дыръя А-а-тэс валаны кулэ, жаляны. Уксёзы луыса но уг сёто ке, тодоно мугзэ. Собере юано, ичизэ кӧня соос висъяны быгатысалзы. Валэкты А-а-едлы, малы тыныд коньдон кулэ, нырысь-валысь умой ужъёслы шуыса верано, шуом, эшъёсын театре ветлыны. Астэ жаляса кӧня ке викышъямъяськид ке но, мултэс уз луы - мон быдэ вуись маке ини, нош кисыям буш, улонэ но озьы ик буш ортче ини. Ужаны мыноно луоз ини-а, мар-а?. Кышкаты А-а-тэ, уж но шедьтӥд ини шуыса, сыӵезэ, кудӥзлэсь соос чик но шум уз потэ, шуом, уин ужась барын официант, яке бармен. 10. Уг лэзё гуртад эшъёсыныд люкаськыса шулдыръяськыны. Чылкыт квартирадэс сапталозы, ваньзэ кир-пазь карозы, вина юозы, тамак кыскозы, кесяськись крезьгуръёс кылзоды, эктоды, нош мар бускельёс малпалозы?! Котькуд кышкамзылэн мугзыя радэн-радэн оскыты, сокем урод уз луы шуыса. Тамак кыскисез ульчае потоз (подъездэ, балконэ), курытэз пӧлысь пичияк шампанской гинэ юом. Нош музыка золгес луиз ке, мар бен, арня, шутэтскон нунал ук. Эктэм-кырӟам, музыка кылзэм сяна, ми ведь визьмо вераськонъёс но мытӥськом. Асьтэос тодӥськоды ук, кыӵе тунсыкоесь мынам эшъёсы. Эн кышкалэ, каллен-каллен сётскозы, пумен огкылэ вуыны татын но луоно. Йылпумъян. А-а-ын кусыпъёстэ умоятон удысын, тонэ сюдӥсь-вордӥсьёсыд ӵемгес тонъя мед кариськозхы шуыса, тодад возь, тужгес но кулэез - со КУРОН. Курыны быгатыны кулэ, чутрак пумитъяськытэк, вай но вай, сёт али ик но одно ик шуытэк. Куронэн ку вазиськонзэ но тодоно. А-а-лэн мылкыдзы урод ке, доразы эн ик матэкты . Нош капчи мылкыдзы дыръя, уката ик тон соосты маин ке шумпоттӥд ке - сюрес усьтэмын. Ноку но эн куареты А-а-тэ калык азьын, соос сыӵе но сыӵе лекесь, акылляськисесь, мынам улонам юатэк мерскылӥсесь шуыса. Умойгес луоз, шуиды ке: каньыл сюлэмо, акылляськисьтэм, ӟеч сямо адями ассэ озьы но озьы возе. Та дэмланъёсты уже кутыса, ваньмыз соку ик пӧрмоз, умой луоз шуыса эн малпа. Улонын ноку но огдыре ик ӝогак гинэ "чаляк, трос но ӟеч" уг луы. Куинез пӧлысь огез ке нр соку ик уг пӧрмы. Но солэсь кышканэз ӧвӧл. Улон тубатэтӥ кыксэ пагӟаез кельтыса, куинетӥяз тэтчано ӧвӧл, огез бӧрсьы мукетаз вамыштоно. Дыртыса пыддэ но чигтыны шедьтод. Ваньмыз дэмланъёсмы тыныд, оло, уз тупалэ. Утча аслэсьтыдзэ. Семья кусыпъёсыз радъян, А-а-тэс ас палад карон - секыт но кык пумо уж. Тон дышетскод А-а-тэ, соос - тонэ. Соос малпало тонэ визьнодаськом шуыса, тон - соосыз. Нош пайдаез ваньдылы берытскоз. Шудо-буро, мусо, чебер, каньыл но тӥледыз яратӥсь А-а-ёс тӥледлы. Ваньзэ умойзэ, эшъёс-экспериментаторъёс! "Ровесник" но нылпиослы потӥсь мукет журналъёсысь статьяосъя, озьы ик Ижысь 73 номеро школаысь психологен О.Глуховаен кенешыса материалэз дасяз В.Занчаров. 1 Ӧй бурмы кадь мурт дуннелы Ижкаре кыӵе ке ужен вуылыкуз, Лидия Фёдоровна одно ик Шабердые вутскыны тырше. Отын солэн пичи дырысеныз лёгам интыосыз. Анайзэ эскерем сяна, пумиськылэ эшъёсыныз, ӵыжы-выжыосыныз, мӧзмыса пумем сюлэмзэ буйгатэ гурт котырысь возьёсын но нюлэсъёсын. Татын со понна ваньмыз мусо но дуно, матын но чебер. Татын со котькинлэсь шудо! Ма бен Балезиноын но вордскем гурт котыраз кадь ик инкуазь. Но ӧвӧл. . . Лидия Фёдоровна понна со озьы ӧвӧл. Вордӥськем сэрег угось адямиез пересьмытозяз дораз адскисьтэм сиосыныз кыске но кыске. Удмурт кун университетэз йылпумъяса, англи кыллы дышетӥсьлэсь дипломзэ басьтыса, Лидаез келяло Балезино ёросысь бигер Кестым гуртэ. Егит дышетӥсьсэс пиналъёс соку ик яратӥзы, уроказ мылысь-кыдысь ветлӥзы. Лидалэн бен уггес ик пот вал Балезино палан ужамез: дорызлэсь кыдёкын, мӧзмон егит сюлэмез куасалтыса ик куаштэ. Нош ай вераськон кыл пумысен но кӧня пол со серемес учыре вуылӥз. Ачиз сямен умой кадь вера, нош соослы серем. Уйпал удмурт калыклэн ӟучгес выремзылы воксё абдралляз. Сач-сач удмурт адями вӧзысьтыз удмурт адямиен шенгыль ӟуч сямен вераське! Лидалэн ноку сыӵеез кылэм-адӟемез ӧй вал. Гуртазы чылк-чылк, быдэс гуртэн, удмурт сямен вераськизы. Соин ик со татын кема аръёс ӵоже улыса но балезино вераськетэз аслаз ӧз кары. Лидалэн ноку но малпанэз ӧй вал, куке- соку со уйпал ёросын улоз, отысь яратонзэ шедьтоз шуыса. Семья кылдэм бере, ныл йырлэн сыӵе адӟонэз - гурт сярысь трос уд малпа ни. Кылдо сюлмаськонъёс, вордӥсько нылпиос. Кузпалъёс улыны Балезино посёлоке выжизы. Кытын на, пе, отын вордскем палъёс! Со дырысен Лидия Фёдоровна быдэсак уйпал шаере выиз. Табере солэн муспотон Андрей но Сергей пиосыз быдэ вуо ини. Бадӟымез пиез Балезино ёрос милициын следователь луыса ужа, заочно туэ юиридической институтэз йылпумъялоз. Кыкетӥез Глазовысь пединститутын социальной но информационной технология факультетын кыкетӥ курсын дышетске. Али ке но Лидия Фёдоровна вордскем пал интыосызлэсь мӧзмон висёнзэ семьяезлы шара вералля. Кузпалыз но пиосыз анайзылы соку ик пужит карисько, нокытчы ум мынэ, татын ик улом, шуо. Соосты но валаны луэ: пиосыз понна дуно сэрег - Балезино. Нош веньтэк сӥньыс огназ уг вуры, лэзем выжыдэ но выльысь уд ни бугыръя. Пиналъёссэ ваем бере, посёлокысь гуртэ дышетыны ветлыны секытгес йӧтӥз. Пионеръёслэн юртазы интыяськиз, "Клуб интернациоальной дружбы" кружокен кивалтӥз. Вылӥ кивалтӥсьёс ӝог синйылтӥзы чупырес нылашез. Киыз но пыдыз, пе, калыкен ужаны - роное инспекторе бастӥзы. Котькыӵе удысын Лидия Фёдоровна ассэ умоен возьматъяз, котькуд ужзэ рос-прос быдэсъяны тыршылӥз. Татысен солэн кутскиз тубат кузя ӝутсконэз. Районэ бырйизы депутатэ, поссоветэ ужаны ыстӥзы. Нырысетӥ сентябре школае мынӥсь нылпиос шоры учкыса сюлэмыз пирсэкъя ик . Ма озьы ини со - зэмос дышетӥсь улытозяз кыле дышетӥсь луыса. Берло аръёссэ Лидия Фёдоровна депутатъёсын кивалтэ. Валамон ини, нылкышнолы кивалтон удыс капчиен уг сётӥськы - юртъер, пудо-живот, бакча котыр, гуртысь музон ужъёс. Но Лидия Фёдоровна та ласянь чик уг кайгыры, сое валало пиосыз но, кузпалыз но. Ӧй ке валасалзы, таӵе ужрадъёс борды со ӧй басьтӥськысал, дыр. Укмыстонэтӥ аръёслэн кутсконазы, Балезиное Карл Александрович Пономарёв вуылӥз. Та учыр Лидия Фёдоровна понна вунонтэм кылиз. Вот, пе, удмуртъёсты огазеяно вал, котькуд кык ёросъёсын кыӵе ке но кенеш кылдытъяно. Кема малпаськыса ӧз улэ, исполкоме бырйизы Нырысь-валысь со номырзэ ӧз валалля, ялан йырзэ висетылӥз: малы кулэ сыӵе огазеяськон, кинлы? Но солэн югыт вужерез 1993-тӥ арын рос-прос адӟиське ни вал. Лидия Фёдоровналы ёросысь "Удмурт кенешен" кивалтыны оскизы.Пыкъяськыса кинлы ӟеч карод. Тон удмурт ке, удмуртъёс понна сюлмаськы, ас калыкед понна кужымдэ жалятэк ужа. Одӥг ласянь Лидия Фёдоровналы капчиен сётскиз та общественной ужез, малы ке шуоно, со гурт администрациысь кивалтӥсьёсын тодмо, озьы ик роно пыр удмурт кылъя но литературая дышетӥсьёсын кусыпъёсыз ӟечесь кылемын. Соку саесъёстэ пужалля но - азьлань. Дӥсьтӥсь, шаплы кышномурт мукет ёросъёсысь кивалтӥсьёсын пумиськылоно кариськиз. Тужгес но ӵем - Глаз ёросысь Золотарёва Надежда Константиновнаен. Таӵе удысын ини пӧртэм ужрадъёсы пыриськылоно луэ, ачид ке палэнскид, юрттӥсьёсыд но уз луэ. Соос ведь кивалтӥсь шоры учко. Тон калыклэн азьпал радаз мынӥсь адями луиськод ке, котьма ласянь тынэсьтыд адӟем мед карозы. Аръёс ортчемъя, Лидия Фёдоровна юнгес но юнгес кыске серметсэ. Трос но пайдаё ужам ужезлэн емышез табере сюлэмзэ буйгатэ. Но со огдырлы гинэ озьы кадь потэ. Лидия Фёдоровналэн сюлмыз ноку уз буйга, тэк пукыны чидасьтэм адями со. Туннэ - татын, ӵуказе -мукет ёросын, усьсэ - Ижкарын. Уж тырмыт, дырыз дыръя вутсыкыны гинэ кулэ. Удмурт центрзы Балезинолэсь палэнынгес - Дядьпи гуртын. Кызьы чидалод отчы вутскытэк. Эскероно, мар ужа калык , та секыт улонамы кызьы ке но солы юрттоно, кужым сётоно.Гуртоос ӵемысь пӧртэм конкурсъёс ортчытъяло. Отын но тынад визьнодамед кулэ. Калык Лидия Фёдоровнаез вите, озьыен, сое ярато, гажало, асьсэлэн каро. Куддыръя малпамъя ваньмыз уг пӧрмы, алама луэ. Сыӵе дыръя янгышез ас вылад басьтоно луылэ. Тон кивалтӥсь - тыныд чидано. Лымшор ёросъёсысь удмуртъёсын ӵошатыса, секытгес ик сётӥське татын ужаны. Но Иванова уг чигтӥськы, ужам ужмы юнме уз быры, шуэ. Солэн вань туж бадӟым малпанэз: удмурт калыкысь потэм нылъёс-пиос кивалтэт удысын тросгес мед луозы. Нош со понна асьме калыкмылэсь политической сознанизэ ӝутыны тыршоно. Кенешын ужаса, Лидия Фёдоровна туж трос тодонлык люкамезлы шумпотэ, валаны кутски, шуэ, та улонын одно ик политикае пыриськыны кулэ шуыса. Со уже удмурт калыкез ӝутыны быгатоно. Татын но Ивановалэсь калыкен ӟеч ужамзэ тодосчиос но кивалтӥсьёс синйылтӥзы, Людмила Степановна Христолюбовалэн ӵектэмезъя ( со сярысь бертэм бераз гинэ тодӥз), Лидия Фёдоровналы Америкае вуылыны кылдӥз. Озьы ик шуд усиз Финляндиын финн-угор калыклэн конгрессаз пыриськыны. Ивановъёслэн юртъер котырзы бадӟым гинэ. Отын котьмаиз вань: пудо возён гидъёсыз но, мунчоез но, бакчаез но, садэз но. Талэсь азьвыл куинь комнатаё квартираын улӥллям, кельшымтэ, музъемлы матэ кариськиллям. Лидия Фёдоровна туж яратэ куноосты. Дораз пырисьёсты, шуныт кылынз сяна, ческыт сиён-юонэн утялтэ. Одно ик пӧсь чай пӧсятэ. Зэмзэ но котьку татын калык, куноос, дыр, малпай мон ас поннам, висъет сьӧрысь паськыт чебер кухняысь бразильской киноосын кадь бадӟым но кузь ӝӧкез адӟеме бере. Кошкон азям Лидия Фёдоровна синкылиоссэ мырдэм но кызьы кутыса шуиз: " Яратӥсько куноосты, уката ик лымшор палъёсты, малы ке шуоно, соосын кенешем - вераськем берам дорам бертылэм кадь потӥсько. Нош кошкон дырзы вуэ ке, синкылиос асьсэос быльырало. Ӧй дышы, ӧй бурмы кадь мурт дуннелы. . ." Екатерина Феофанова (Новелла) - Кыӵе умой! Кыӵе умой улыны! Таӵе мылкыдэз ӝутӥсь кылъёс быдэс нюлэстӥ, уӵылэн шулдыр кырӟамез кадь, чагыр инбаме лобӟизы. ". . . Ой-ой, ыны-ыны! - чузъяське нюлэс тыр. Тужгес но кылъёсын шудэ вазь ӵукна, куке тылобурдоос но вань нюлэс пушкын улӥсьёс али гинэ ческыт умлэсь сайказы ай. Ойдолэ табере берытскоме улыны шумпотӥсь адями доры. Кин меда со? Оло пичи нылаш, кудӥз инвожо сяськаез шедьтӥз, оло нылмурт, кудӥзлы яратон вань ӧсъёссэ усьтӥз ини но соин лыктэм вож нюлэскы чебер, шулдыр улонлы оскись мылкыдзэ вераны? Ма кин но уз быгаты кырӟаны-вераны вить кылэз! Тани пӧйшуръёс но асьсэлэсь яратэмзэс кызьы ке но возьмато ук. Чу! Тани пыд куараос но кылӥськыны кутскизы. ӧвӧл, со пыд куараос гинэ ӧвӧл, со сюлэмлэн йыг-йыг йыгаськемез но кылӥське, ява. Нылашлэн чагыр-лыз сяськаосын дэремез но, ӵуж мертчан йырсиез но, ымнырыз но адӟиськиз ини. Оло, тодматском соин? Ӧйтӧд, тодматскод меда со бубылиен? Али гинэ беризь сьӧрын вал, нош вакчи дыр куспын кызьпу доры лобӟем ини. Учком, ветлом со сьӧры, соку тодмо луоз асьме героймы сярысь. Тазьы лобаса, Танюш гуртаз но вуиз. Быдэс нунал аслэсьтыз пуш мылкыдзэ валатэк ветлӥз. Али солэсь, мар тонэн, Танюш, шуыса юасалзы ке, ачиз но нокызьы валэктыны ӧз быгатысал. Та нуналэ солэн вань адямиослы умойзэ гинэ лэсьтэмез потылӥз, быдэс ымнырыныз пальпотыса учкылӥз дунне шоры. Кыӵе уж борды ӧз кутскылы - ваньмыз туж капчиен, туж чаляк пӧрмылӥз. Ӧз, со ноку ӧз малпалля, со доры но яратон мылкыд вакчи вамышен вуоз шуыса. Со сярысь малпаськыса, сюлэмыз, эсьма, гадь пушкысь потымон тэтчаны кутске. Соку паллян пал гадьзэ кутытэк уг луы: сюлэмтэк кылид ке, кин тонэ яратоз на, кин таӵе йырез поромытымон шумпотон ваёз на? Али та нлыашлэн синмаз учкид ке, мар меда отысь лыдӟод? Калыкын шуо ук, адямилэн кыӵе сюлмыз-лулыз, синмысьтыз, пе, адӟиське. Уд, ваньзэ уд лыдӟы чылкыт синъёсысь. Син но сюлэм адӟиськисьтэм гердэн керттылэмын ке но, книгаез усьтыса кадь уд учкы, кытын яратонлэн кутсконэз, кыӵеен Танюш адӟе аслэсьтыз азьпала улонзэ, кыӵе дӥсьтӥсьтэм малпанъёс поръяло солэн йыраз. Нош асьмеос, лыдӟисе, ойдо пыром солэн малпаськон дуннеяз. "Мар кароно, кытчы пононо ӝуась сюлэмез но уйжомем кадь йырез? Курадӟыса, шузимон калэ вуыса улоно- а яке сутэр кадь сьӧд синъёсыз ас пушкам возёно-а? Яке. . ." Мукет малпанъёссэ Танюш ас понназ бергатъякуз, сюлмыз дурк-дурк тэтчаны кутскылӥз но быдэс мугорыз шумпотонэн пӧсьвуаськылӥз кадь. . . Тани вуиз кема возьмам ӝыт но. Нош ӝыт вуэ ке, мар каро егит нылъёс но пиос? Бен, ваньзы пото урамъёсы тыр толэзь улын поръяны, шулдыр возь вылъёстӥ бызьылыны: эктыны, шудыны. . . Таня но коркасьтыз потӥз. Мар бен кароз пинал нылаш кузь ӝытъёсы, вылаз ик яратон муртэз но возьма ке урамын? Озьы ик вань: Владикез соослэн корка дортӥзы ветлэ ини. Нош кулэ-а вераны, кинъёс та мадёсысьтым Таня но Владик шуонъёсмы? Ӧвӧл, дыр. Кулэ ӧвӧл вераны соослэсь кытын ужамзэс, дышетскемзэс но. Соос - кыкназы та ширтӥсь улонысьтымы ог-огзэс утчасьёс. Кытысен соос нырысьсэ адӟизы ог-огзэс - ульчаысен-а, концертысен-а, библиотекаысен-а, уж дурысен-а - соиз но асьмелы номыр ик уз вера. Котькытысен мед пумиськозы, ог-огзылы кулэ гинэ мед луозы. Дӥськут, вылтус ним - ваньмыз со чыры-пыры гинэ. Сюлэм висён, пӧртэм малпанъёс, яратон, мӧзмон мылкыд - соос курадӟыто егитъёсты. Владиклэн синъёсыз Таняез кемалась синйылтӥзы вал ни. Толэзь ӵоже лулӟылыса, туж мур малпаськись тусын, шудтэм адями кадь учкылӥз егит пи нылаш шоры. Пияш нылашен умойгес тодматсконо кариськиз. Со тодэ: тодматсконэз быдэстоно ас катъёсызъя. Медам шӧдылы со бубылиед, тон сое утчаськод шуыса. Учкид ке но шораз, мед со луоз малпамтэ шорысь выллем. Нырысь вамышед пӧрмиз ке, дася ни мукетсэ. Пумиськыкуд туж гажаса ӟечбуръяськоно, синъёсын гинэ, кылъёстэк. Куддыр ас дораз ӧтись тусъем луоно, куддыр пальышано. Пичияк гинэ янгышад ке, вань дасям ужед тэшкаса быроз. Тӥни та нылаш сьӧры Владик лобаса ветлӥз. Вань тодон-валанзэ уже кутыны тыршиз. Озьы со быгатӥз ас палаз берыктыны мусо нылашсэ. Лыдӟисе, тон эн малпа, Владик вань малпанъёссэ мыным вераса пукиз шуыса. Ӧвӧл, мон, улон дуннеяз пыраса, пичи интызэ гинэ лыдӟыны быгатӥ. Нош Танюш ӧз но вала, кызьы со тэтчиз яратон шурлэн ӧраз. Табере Владик Танялэн рыцарез. Соослэн сюлэмъёссы ог-огзэс гинэ витьыса улӥллям, кожалод. Владик. Кин со? Кытын ужа? Дышетске? Мар сярысь малпанъёсыз? Яратон пумысен нокинлы но сюлэмзэ ӧз усьты на вал Таня. Кышкалляз, уз валалэ сое, валамтэенызы вӧсь карозы шуыса, дас куать аресозяз вань малпанъёссэ вералляз кагазлы гинэ. Егит дыръя сюлэм сыӵе валантэм: туннэ мӧзмиськод, нош ӵуказе капчи луэ - ваньмыз умой, улон но шудо. Нош ӵуказе улыса - одно ик бӧрдод. Туж ӵем вошъясько тӧлъёс. Соин ик кинлы бен кисьтод ас мылкыддэ? Озьы ик яратонэн но. Эшъёсыз кемалась туганъёсын ушъяськыса ортчыло ни вал Таня дортӥ. Нош нылашлы нокин ӧз яралля. Зэм, огпол пумитаз кожаз вал яратонэз, нош ӵуказезяз ик сое мукетыныз адӟиз. Таня номырзэ ӧз вала таӵе "яратонлэсь". Тӥни озьы куректонъяз со ӧз шӧдылы, кызьы вуизы солэн улоназ сьӧд сутэр кадь синъёс. Ку нырысьсэ пумиськизы - соиз вунӥз ини, со понна ноку уз вунэ со синъёслэн Таня шоры учкемзы: малы ке но соос туж мӧмытэсь вал. Нош куддыръя, пилемъёс сьӧрысь шунды сиос потэм сямен, Таняез адӟыса, сьӧд синъёс пумтэм шумпотӥзы. . . Таня синмаськиз. Со яратӥз. Меӵ ярдурысь ву берганэ тэтчиз. Уйшор берозь поръяса ветлӥзы бадӟым дуннеысь ог-огзэс шедьтэм сюлэмъёс. Ойдо, лыдӟисе, ум люкетэ та кык дыдыкъёслы. Мед вераськозы, мед яратозы. Сӥзёме соослы шуд но бур! Лайд Шемйэр, пор (мари) писатель Корказьысь тубатын - корка Верос Асьмеос кыкмы ик туж умой валаськом: татын али - тон но мон - ӵошеннамы гинэ. Кызьы но малы бен асьмеос пумиськимы? Мон уг оскиськы, инмарлэн гожтэмез озьы вал шуыса. Угось тон мынам улон сюрес вылам кылдыны кулэ ӧй вал. Мон тодӥсько: мыным сӥземез монэ мукет интыын вите. Нош тон куриськод монэ тыныд корка пуктыны. Туж пичи, сюбег но лапег корка. Бен, тыныд юрттыны мон пумит ӧвӧл. Курондэ быдэстыны мынам кужыме но тырмоз. Огзэ гинэ мон уг валаськы: малы тон та ужпумез быдэстон понна одно ик монэ бырйид. Тынад огъёзъёсыд пӧлысь кин ке сое, оло, мынэсьтым устогес быдэстыны пишмытысал. Соос, ӝужытэсь но чебересь, туала егитъёс, нокытын но нокинлэсь уг возьдасько, номырлэсь уг кышкало. Малпасько, тӥ ог-огдэс ӟечгес валасалды но тон аслэсьтыд улондэ туж умой радъясал. Уд валаськы? Оскы мыным: огкадь арлыдоос улон шоры огвыллемгес учко, куронъёссы- сюлмаськонъёссы но тупало бере, куспазы вожвылъяськонъёссы уг луыло. Эсьма ымныръёсысьтыды куосты ик туж юн укшасал. Нош мынэсьтым ымнырме кемалась гожмало ни кисыриос, учкеме но азьвыл кадь задор ӧвӧл. Ма, огъёзэныд тӥ серекъясалды но огвыллем. Нош ымдуръёсыныды ог-огды борды йӧтскыкуды, кыктылэн но дартъёсты огкадь ӝуалскысалзы. . . Нош малы бен али асьмеос пагӟалэн берпуметӥ тубатаз сылӥськомы но тыныд татчы корка пуктон сярысь кенешиськомы? Тон тэльмырыса, ӵектӥськиськод, нош мон ялан уг дӥсьтӥськы соглаш кариськыны. Ӵапак татчы, одно татчы юрт пуктон - со тынад малпанэд. Мон ке та вакытэ малпаськисько (уг, тыныд корка лэсьтон сярысь уг). . . тон сярысь. Тон но мон сярысь малпакум, мынам быдэс мугоры кыӵе ке паймымон тылын гоманы ӧдъя но мылкыды валантэм дартэн пачыла. Мон туж ӟеч шӧдӥсько, али асьмеос татын кыкнамы гинэ шуыса. Таин валче, вылды, сокем ӝуалске мылкыды- дартэ, сокем тон мыным кельшыны кутскиськод. Мон тынэсьтыд кык поллы бадӟым валасько ке но, тынад синмальдымон чеберед уката ӟырдатэ мынэсьтым валантэм тылын улӟытскем мылкыдме. Зэм, мынам мугоры куке но кемалась таӵе ик валантэм тылын гомалляз ни, но со туж кемалась-кемалась вакытэ вал но вунӥз. Тынад кынтӥсь, со дыре ик вӧез кадь шунтӥсь учкемысьтыд мон шӧдӥсько шыпыт тыметлэсь чеберзэ но гужем зарезь дурысь юр-яр ӵашетэмез. Тани кытысь ке ӧвӧл кужмо тулкымъёс туж ӝог вуизы но ӝужыт ярдуре шуккиськыса, кезьытэн сутӥсь ву пырыос гольык мугорме йырысеным пыдозям гылто но дыгыр куалекъятыто. Та кынтӥсь ву тулкымъёс часталы гинэ палэнскыку, мынэсьтым мугорме шуныт шунды сиос шобырто. Ваньзэ тае мон шӧдӥ, али тынад ӧтись синъёсад учкыса. Озьы ке но, ӵапак та паймымон мылкыд ик монэ тыныд корка лэсьтонлэсь кышкатэ, дорад матэктыны уг лэзьы. Со вакытэ ик мон, далайгес кышнояськем, семьяё мурт, ноку тазьы мурт нылкышноосын ӧй пумиськылы на: тынад пӧсь шокчемед мынаменыз сураське, ӝуась бамъёсмы огкадь гомӟытско, чилясь синъёсы выё тынад сыӵе ик шудӥсь синъёсад, ӟырдам мугоры тынад мылпотонэн пачылась мугорыд борды биниськыны ыла. Тон егит но чебер, тон бордысь ӟырдыт мылкыд пачыла, тон кельшиськод али гинэ усьтӥськись сяськалы. Туннэ мон кудӟемын, та сяськалэн зыныныз-шӧмыныз шокаса гинэ. Номыр мукетсэ-мултэссэ карыны мынам дӥсьтонэ уг тырмы. Нош тон кужмысь куриськод корказьысь пагӟалэн берпуметӥ тубатаз пичигес гинэ корка лэсьтыны. Та - тынад тужгес бадӟым малпанэд-куронэд. Тон оскытӥськод, соку асьмеос пыраклы ӵош луомы шуыса. Бен, со сярысь тон кылын гинэ уд вераськы. Мылкыддэ возьмато тынад пурысялэс синъёсыд шокамедъя но, я ӝутъяськись, я улӥе лэзьяськись гадьёсыд но. . . Тынад выросъёсыд монэ выжыкыл дуннее вутто, сюлэмме золгес жугиськыны косо. Тӥни малы мон дась ини тынэсьтыд курондэ быдэстыны. Зэм, кытын ке но пыдлон йырсазям улэ алӥсь малпан: дугды, тон кышнояськемын, тынад нылпиосыд будо, тон соос понна кыл кутӥськод, мукетызлы синмаськыса, тон соосты "вузаськод". Со вакытэ ик шӧдӥсько, кызьы, сюлэмме ас палад берыктыса, тон монэ быдэсак биниськод-керттылӥськод чебередлэн вотэсэныз. Ма, тон сое ачид но уд ватӥськы. Тон лыдӟиськод мынэсьтым малпанъёсме, кивалтӥськод мынам мылкыдыным. Тае валаса, мон кышкаса куалекъяны ӧдъясько. Шӧдӥсько: тынад учкемед но воштӥське. Озьы ке но, тынад куронэд уг воштӥськы: тон куриськод корказьысь пагӟалэн берпуметӥ тубатаз лэсьтыны корка - туж пичи, лапег, сюбег гинэ корка. Пуктыны ӵапак со интые, кытысь асьмеос, берпуметӥ вамыш лэсьтыса, музъем вылэ васькомы. Тынад тодад но уг лыктылы, дыр, та тубатэ трослэсь но трос адямиос пыдкутчанъёсысьтызы дэризэ куръяллязы-куяллязы шуыса. Нош тон ке ӵапак отчы корка лэсьтыны куриськод. Бен, мон лэсьто тыныд корка, одно лэсьто. Но. . . тон косӥськод лымылэсь но йӧлэсь корка пуктыны. Мон озьы но лэсьтысал, дыр. . . Бен, бен, одно ик, но вӧлдэт лэсьтыны мыным пулъёс кулэ луозы. Нош мон тодӥсько: татын - лапасын но, коргидын но - нокытын одӥг пул уд шедьты. Ваньзэ кытчы ке тус-тас каризы - лушказы, тарказы, отчы-татчы пазязы. Яке бускельёс озьы "тыршизы-а", яке. . . Тӥни соин, та бадӟым но юн юртлэсь липетсэ сэрттыса, пичигес выль коркамес липыны пул ладьяно луоз ук. Тазьы мыдланес дарманьтонтэм понна мон али мыныны кулэ тымет дуре - отысь корано луоз егит лулпуэз яке палэзьпуэз. Тодам лыктэ, кызьы аслам атае, мон соку туж пичи на вал ай, нюлэскысь пипу майыгъёсты нуллыса, лапасмес липиз. Берло со вайёс вылтӥ я куро, я турын вӧлдо. Валамон ини, пудолы кезьыт тол куазен но шуныт вал. . . Зэм, пипу дуре нюлэскы мыныны - кыдёкын, нош лулпу но палэзьпу матын, юртмы вадьсын. Нош майыг соос луозы, мон соосты кораса татчы ке ваи. Али соос ай улэп писпуос, йылъёсынызы лыз инбамозь сузьтӥськыны ылам писпуос. Мон али йырме тӥясько, кызьы ӝоггес но умойгес лэсьтоно асьмелы ӵошен улымон корка. Бен, сокем секыт ӧвӧл со: пагӟалэн берпуметӥ, яке музъем вылысен тубыку, нырысетӥ тубатэз вылэ майыгъёс юнматыны но отчы лымы пазяны. Нош солэсь азьло майыгъёс кораны кулэ ук. Шайтан басьтон! Малы тыныд (мыным но!) кулэ луиз со каргам корка? Сылӥськом асьмеос бадӟым-бадӟым коркалэн корказьысьтыз пагӟалэн берпуметӥ тубатаз но татчы ик эшшо пичи корка лэсьтыны на. Кин бен асьмелы люкетэ та бадӟымаз коркан улыны? Со, али ай чылкак тырттэм ке но, мынам вордскем юртэ ук. Кемалась ӧвӧл ай, татын милям семьямы улӥз. Валамон ини, тон мынам сюрес вылам пумиськемлэсь трослы азьло. . . Марлы бен мон со йӧ коркан улыны кулэ, аслам вордскем юртэ туж умой на дыръя? Паймисько, кызьы мон улом сыӵе ӟоскыт карын, со тӧдь-тӧдь луиз ке но? Бен, тынад мылкыдыд сыӵе. Оскытӥськод: яратоно муртэн тылысын но эксэйлык выллем улон. . . Кема-а бен асьмеос тазьы сыломы: тыныд кулэ сыӵе адями, кудӥз тыныд лымы корка пуктоз, нош мыным сыӵе корка кулэ ӧвӧл. Кемалась ини асьмеос пуштрес,мамык кадь небыт, юг-тӧдьы лымы улын сылӥськомы. Мынам чиль-сьӧд гоно изьые но вылдӥсе быдэсак тӧдьы луэмын. Паймоно кадь: инмысь каллен гинэ усись лымы пырыос огез но тон вылэ уг пуксё. Тынад мугорыд пияла шобретэн ватэмын кожалод, яке котырад кыӵе ке аспӧртэм вӧльы (поле) кылдэмын. Нош мон тынад кылъёсыдлы оски, быдэсак тонъя кариськи, тынэсьтыд куронъёстэ но кыл сётэмдэ зэм кожай. Ваньмыз со вал кутскыкуз. Ма, шонерзэ вераса, мынам мылкыды али но олокыӵе ӧз воштӥськы. Шӧдтэк шорысь корка сигын коӵышлэн, бен, сиам коӵышлэн шимес кесяськемез кылӥськиз. Со вие тынад учкемед чылкак музон луиз - тынад синъёсыд, коӵышлэн пеймытын учкемез кадь, вож-вож ӝуаны ӧдъязы. Зэм, тон соку ик астэ ачид кияд кутӥд, гань-гань кариськид. Нош мыным тон малы ке но мурт кадь потыны ӧдъяд, мылкыдме но азьло кадь ӧд бичаты ни. Табере гинэ мон шӧдӥ, тон огшоры адямилы уд укшаськы, выросъёсад маке ик мултэсэз, гольтресэз вань шуыса. Со - зӧк кускерттон, сыӵезэ нуллӥзы асьмелэн вашкалаосмы. Кызьы мон та дырозь сое ӧй адӟы? Тон со кускерттонэз тодмотэм пӧйшурлэн куэзлэсь вурем шубаед вылэ туж йӧспӧртэм керттэмед. Кускерттонэдлэн огез пумыз урдэс луэмын - со мыным тодам уськытэ кыӵе ке пӧйшурлэсь быжзэ. Паймоно кадь: кытын бен кускерттонэдлэн мукет пумыз?.. Малы со кытчы ке вылдӥсед улэ ватскемын? Бен, мусое, мон соглаш та коркалэн корказяз, берпуметӥ тубатэ тыныд пичи улонни лэсьтыны. Нош мон инкуазьлэн нылпиез луисько бере, оскисько солэн юрттэмезлы. Соин ик лэсьтӥськыны кутскемелэсь азьло мон вазиськыны кулэ Югыт Юмо- Кылдытӥсьлы. Шунды ӝужан пала йыбырттыса, мон солэсь шуд но тазалык, кутскем ужез ӟечен быдэстыны кужым, выль коркаын тыр улон, улонам азинсконъёс курыны кулэ. Нош али быдэс дунне юг-тӧдьы шобретэн шобыртэмын - мон уг валаськы кудпалась ӝужа шунды. Со вакытэ ик шӧдӥсько: Шунды мон шоры учке, нош тон солы мышкын сылӥськод. Тон учкиськод мон шоры. Кыӵе кылъёсын Юмолы вазиськыны кутсконо, мон уг тодӥськы. Угось мон туж кемалась ӧй вал ни вордскем палъёсам - мурт шаеръёстӥ ветлыса, калыкелэсь вань сямъёссэ, йылолъёссэ вунэтӥськем ни, лэся. Озьы ке но, пинал вакытысьтым маке ик кылемын на ук, со бордысен ик кутско иське: "Вылӥысен усьтӥськизы Быдӟым Кылдытӥсьлэн- Юмалэн синмальдымон бадӟымесь юртъеръёсыз, улӥысен усьтӥськизы Музъем-Анаймылэн юртэзлэн ӧсъёсыз. Юмоысь бус васькыса, Музъемысь бус ӝутскыса, сёт милемлы улыны ӵук ӟардон кадь капчи, сяськаяськись будосъёс выллем чеберскыны, та кык бусъёс вискын югыт Шунды кадь улыны дэлеттэ сёт. . ." Дугды ай, малы мон семьяен шудо но тыр улон сярысь тэльмырисько? Мынам туж кемалась кылдытэм семьяе вань ни ук, соос мыным туж дуноесь. Ма бен мыным эшшо кулэ на? Нош кутски бере, азьланьтыны кулэ ини: "Милям нылпиосмылы но, соослы визь сётыса, турын люк быдӟа мугор кузьмаса, тыр шепез музэн кужмоятыса- юнматыса, бакель кар! Мынэсьтым куронме бакель каремед бере, аслэсьтым улонме но, ваньбурме-узырлыкме но бакель кар! Уть милемды лек кужымъёслэсь но ваньмызлэсь уродэзлэсь!.." Тон малы ке но мынам син азьысьтым ышыны ӧдъяськод, озьы ке но сюлмыным шӧдӥсько, тон вӧзам ай шуыса. Мынам син азям табере тӧдьы чильтэрен ватӥськем музъем но инбам: "Улыса-вылыса тулыс вуэ, тулыс нуналэ сильтӧл пуроме. Уть, Инмаре, милемыз со сильтӧллэсь. Улыса-вылыса гужем вуэ, гужем нуналэ гудыри ӵашйылэ. Гудырилэсь-ӵашъемлэсь уть милесьтым коркаосмес, пудомес-тылобурдоосмес, нылпиосмес, ӵыжы-выжыосмес, ваньбурмес, мушъёсмес! Ми ай пиналэсь, ежесь - инбам улын ветлӥськом. Оло, тыныд милям кыӵе ке ужъёсмы ӧз кельше, оло, курбон сётыкумы пудоез курадӟытӥм, оло, янгыш кыльыса пыд уламы лёгамы вӧсям сиёнмес, оло, мултэс трос тынэсьтыд куримы-возьмамы, яке милям сямъёсмы-выросъёсмы кельшонтэмесь вал. Вылӥ Кылдытӥсь-Юмо, Вылӥ но Быдӟым Вордӥсьмы, Вылӥ но Быдӟым Утисьмы, милесьтым вань янгышъёсмес шонертэ асьтэос. . ." Мынам тодам лыктӥз: отӥяз татын чирдыны куриськонлэн кылъёсыз уг тупало - со кылъёсты вӧсяськон нюлэсъёсын гинэ шара вераны луэ. Озьы ке но, али мынам малпанъёсы ӝыныё медаз уре вылэм. Котьмар ке но, мон малпанъёсме йылпумъяны кулэ ук: "Бакель кар милемды, уть сьӧд кужымъёслэсь но ваньмызлэсь уродэзлэсь!.." Ад! Мур но пеймыт гу! Ад! Тылын сутӥсь, пумтэм-йылтэм гу! Ад! Пыдэстэм, мур гу! - Та кылъёс мынам пель сьӧрам чузъяськизы гинэ, дыр. Оло нош пыдлось йырвизьмам бугырскизы - ачим но ӧй вала. Нош монэ ас палаз берыктыны турттӥсь, мылкыдме сокем-сокем бичатыса вырӟытӥсь чебер нылмурт витьымтэ шорысь тӧдьы лымылы, тӧдьы буслы пӧрмиз. Собере чылкак адсконтэм кылиз. Корка сигын нош ик кылӥськиз сиам коӵышлэн сюлэмез вӧсь карись куараез. Со куара огшоры вӧсь уг кары - сюлэме мур яраос кылдытэ. Мар бен, номыр шоры учкытэк, мыным та бадӟым коркае пырыны кулэ - уго со мынам вордскем юртэ. Кинлэн йыраз лыктоз сыӵе шузи малпан: корказьлэн тубатаз пичи улонни лэсьтыны. . . Со вакытэ ульчае потӥсь капка туж зол куара сётыса усьтӥськиз но озьы ик ворсаськиз. Нош мон малы ке нокинэ ӧй синйылты. . . Людмила Хрулёва "Кутоно вал инмысь туриез". . . Туэ 8-тӥ мартэ мыным 60 арес тырме. Бен, 60 арес ӧжыт ӧвӧл ни, но мон ас вылам аръёсме уг шӧдӥськы. Ялан мар ке но ужаны тыршисько, тэк уг пукиськы. Мон вордски Шаркан ёросысь Вортча Починка гуртын. Семьяямы 8 кузя нылпиос вал. Ижевскысь пединститутэз йылпумъяй. Дышетскыкум асме ачим сюдӥ но, дӥсяй но. Радиоын внештатной корреспондент луыса тырши, почтальонкаын но ужай. Нош гужем каникулъёс вискын скал кыскисьёсты вошъялляй. 17 ар журналист луыса ужай. Мылкыды бурдъяськыку, кылбур чуръёс асьсэос бумага вылэ курисько. Нимысьтыз кылбуръёсын бичетэ ӧвӧл ке но, весь гожъяськисько. Тросэз кылбуръёсы кырӟанлы пӧрмемын. Асме мон яркыт пиштӥсь кизилиосын артэ уг пуктӥськы. Шундыберган вӧзын лымыгырлы но луыны кулэ. Ваньзы ик соос артэ одӥг бадӟым поэзия кылдыто. Л. Я. Хрулёва, Россиысь журналистъёслэн члензы, Удмуртиысь культура удысысь сӥё-дано ужась. Ми но, редакциын ужасьёс, вань сюлмысьтымы ӟечкыласькомы Тӥледыз, Людмила Яковлевна, дано юбилееныды. Сӥзиськом тазалык, "инмысь турилэсь одӥг тылызэ ке но кутоно вылэм" малпанды мед быдэсмоз. Синмыным сӥсъясько инбамез, Йырвизям малпанэ чилектэ. Кутоно вал инмысь туриез. "Нош кызьы?" - юасько амалтэк. Ай юрттоз, дыр, мыным уйвӧтэ, Бурдъёстэк но соку лобисько. Адӟеме куддыръя зэм йӧтэ, Ӵап соин ик, вылды, оскисько. Ай куто мон, куто туриез, Ишкалто одӥгзэ тылызэ. Нош ассэ мон лэзё бурдоез - Мед лобоз, мед шедьтоз ас парзэ. Тылыез йыр улам мон возё, Синпелет кадь луоз со, иське. Инмарлы кадь солы мон вазё: "Уть монэ, вай на выль чуръёстэ". * * * Эн учкы оскись синъёсын - Уг адӟы. Эн вазьы чебер кылъёсын - Уг кылы. Эн бӧрды шушы синвуэн - Уг ӵушы. Эн чирды уӵы куараен - Уг вала. Эн кушты кияд киосме - Уг шунты. Эн утча сюлэм ватосме - Уд шедьты. Сюлэм ватослы дыраз шедьтоно Усьтон но. * * * Пилем но мон Пыдэстэм чагыр инме Одӥгназ кылем пилем. Эшъёссэ, лэся, ыштэм, Дыртытэк мӧзмыт калге. Ай юртто мон пилемлы Эшъёссэ чаль шедьтыны. Ӝужыт каз йылэ тубо Инбам тыр солы кесько: - Эге-гей!!! Тон лоб, пилем, Меӵак Из гурезь йылэ: Эшъёсыд отын витё, Мон но ай ӝоген вуо. * * * Лу гинэ мон вӧзын Коть дунне пыдэсы, Коть адэ, коть рае Нуозы пыдъёсы Тонэн ӵош, мусое. Мон, кулэ ке, луо Вож садысь ӵуж уӵы. Мон, кулэ ке, ваё Муш кадь трос-трос чечы. Мон, кулэ ке, шунто Тонэ льӧль шобырен. Кулэ ке, бинялто Мугордэ, туг сямен. Коть дунне пыдэсын, Коть адын, коть райын - Лу гинэ мон вӧзын Выжыкыл шаерын. * * * Тугало ай Мон куто но, тугало ай Бабылес ӵуж йырсидэ. Вож туген мон тугало ай Веськырес еж мугордэ. Тугало ӵуж йырсидэ, Тугало еж мугордэ. Тон луод мынам гинэ - Вунэтод туганъёстэ. Кый выллем ик бинялско мон Вырӟемед но луонтэм. Туг зынэн юн кудӟыто мон Султыны быгатонтэм. Бинялско мон кый выллем, Кудӟыто вырӟылонтэм. Тон луод мынам гинэ, Туганэ, яратонэ. Нокинлы но мон уг сёты Аслэсьтым муспотонме. Туганы но мон уг сёты. Шудбуро ӵош улонмес. Гажанэ, муспотонэ, Тон луид мынам гинэ: Будо кык нылпиосмы - Яратон емышъёсмы. * * * Адями ик мед кылё Улонэ монэн кузёяське, Со озьы, иське, инмаръяське. Мар но со уг лэсьты монэным (Ваньмыз, пе, азьло ик гожтэмын): Шелепез музэн шуак сапке, Жалятэк куддыр бамам чабке. Мукетъят жаля но мусоя, Нуныез сямен ик эркия. Я кутске но нош мыддоринске, Лушкемак куртче, ӟичыяське, Кӧосыз сямен но бергатэ, Сюреслэн урдсаз но сэрпалтэ. Котьмар кар монэн тон, улонэ, Ӟечезлы уг быры осконэ. Адями тусын ке тон вӧсяд, - Адями ик мед кылё весяк. * * * Тулыслэн мон нылпиез Тулыслэн мон нылпиез. Тулыслэн вазь сяськаез. Оло нош соин, ӵапак Тулысме мылкыд копак. Ӧвӧл кадь нырко сюрес, Ӧвӧл кадь ӝужыт гурезь. Ӧвӧл кадь секыт ныпъет, Ӧвӧл кадь улон пӧет. Адями ке вордӥське, Дуннемы выльме, иське. Нунылэн вань ке шудэз. Вань аслаз кизилиез. Ас шудме-кизилиме, Вазь тулыс шедьтэм чурме. Кырӟало мон дугдытэк, Ошмес кадь ик жадьытэк. Мынам эш-юлтошъёсы Удмурт калык вера: адями улытозяз корка мед пуктоз, писпу мед мерттоз, пинал мед вордоз. Та веран визьмо луэ но котькуд вакытлы, пӧртэм нацио калыкъёслы тупа. Туала вакыт туж аспӧртэмлыко. Демократической обществое мынон сюрсын пумисько умоез но, уродэз но. Социализм куашказ, соин ӵош ик трос умоез но быриз. Ышизы- быризы дунтэк дышетскон, эмъяськон, пӧртэм социальной луонлыкъёс. Улонамы пыӵало наркомания, СПИД но мукет со выллем кышкыт но юрӟым кылъёс. Туала улон кулэ каре ужбергатӥсь адямиосты. Социализм вакытэ вань адямиослы квартира но уж сёто вал. Нош али вылӥ обращзованиен адямиос но ужтэк ёрмо. Нош дунтэм улонни сярысь веранэз но ӧвӧл ни. Соин ик ваньмызлы ачид сярысь ик малпаськоно луэ. Мынам одӥг тодмоосы вить кузя нылпи вордо. Али ке но Ижкарын общежитиын уло. Туала улон мерттэтъя соос куанер адямиос луо, озьы ке но, вить пиналзэс вордыны тыршо. Семьялэн узырлыкез пинал бордын. Та семьялы президент А.А.Волков нимысьтыз юрттэт сётӥз. Таӵе эшъёсы-юлтошъёсы понна мон туж шумпотӥсько. Нош мукетыз тодмоосы - Куликовъёс - та улонын асьсэды шедьтӥзы. Соос дырыз дыръя рыноклэн улоназ пырыны быгатӥзы. Соослэн вань кык квартиразы но кык машиназы. Соос узыр адямиос лыдъясько туэ. Озьы ке но, та эшъёсы-юлтошъёсы ӧз ыштэ ӟеч сямо луэмзэс, сюлэм чылкытлыксэс, котьку но юрттыны дась шуге-леке шедемъёслы. Уксё нокинлы но капчиен уг сётӥськы, озьы ик Куликовъёслы но. Соос нылпиоссэс дышето, умой шутэтскыны быгато. Тазьы удмуртъёс пӧлын но узыръёс будо. Тросгес мед луысалзы таӵе ужбергатӥсьёс - усточиос. Нош али учком гуртын улӥсь егитъёсты. Соос но уло, кызьы быгато, улонзэс ас киынызы лэсьто. Одӥгез со - Зуев Денис - мынам двоюродной агае. Уваын со аслыз корка пуктӥз. Ӟеч быгатыса ужа татысь санаториын. Озьы ик Андрей Измайлов атаея двоюродной агае луэ. Со улэ Алнаш ёросысь Карйыл гуртын. Отын солы вань бӧлякъёсыз корка пуктыны быгатӥзы. Мон но Ваня выныным кык гужем улӥ но ужай Карйылын. Туж чебер но умой корка пӧрмиз. Андрейлэн кык пиосыз будо. Нырысетӥ пиезлэн нимыз Евгений. Солы вить арес тырмиз ини. Нош кылем арын май толэзе вордӥськиз Максим пизы. Андрейлэн но Денислэн вань ваньмыз, ма кулэ адямилы та улонын, но соослэн ӧвӧл дыштскемзы, та улонэн сэрен вылӥ образование басьтыны ӧз быгатэ. Нош городын улӥсьёс туннэ тросэз кык вылӥ образование басьтыны тыршо. Туала улон кулэ каре трос тодэм-валамез, пӧртэм удысын быгатэмлыкез. Мынам эшшо вань тодмое. Солэн нимыз Гагарина Екатерина Сергеевна. Со дышетскиз УдГУ-ын, йылпумъяз филфакез. Али ужа Дебес исполкомын юрист луыса. Со вакытэ ик юридической факультетын дышетске, ӝоген кыкетӥ диплом басьтоз. Куд-огез адямиос малпало, тодон-валан вордскем шаераз басьтыса, кунгож сьӧры улыны мыныны. Тросэзлэн потэ татысь кошкемзы, малы ке шуоно, улон татын туж секыт. Асьме дорын умой, тазалыко вордӥськем адями но ассэ сӧсыр мурт, кожалоз. Тросэз малпало: кунгож сьӧрын улон умойгес. Но ваньмыз уг быгато отчы кошкыны, калыклэн уг тырмы коньдонэз, ӧвӧл тодмоосыз но быгатонлыкъёсыз. Мон малпасько, кунгож сьӧрын улон но ужан туж ик капчи ӧвӧл. Тыж быгатӥсьёсыз гинэ отчы мыныны дӥсьто. Нош ик тодмое сярысь вераме потэ - Ганеев Валерий Ахметович. Со Вавож школаын директор луыса ужаю Шаплы, визьмо адями. Солэн Игорь пиещз Болгариын улэ, пӧртэм кунгож кылъёсты тодэ. Удмурт университетэз пырпотыса, историклэсь дипломзэ басьтыса, со выльысь дышетскыны пыриз. Таяз учыре - Софийской университетэ. Мон улӥсько ХҺ-тӥ даурын. Котькуд вакытлэн вань ӟечез но, уродэз но. Соик ик адямилы быгатыса улоно ас вакытаз, ас даураз. Улонын олокыӵе но шуг-секытъёс пумисько, соин ик пӧртэм учыръёсы тон вӧзын мед луоз оскымон эшед, ӟеч юлтошед. Соку шунды но яркытгес пиштоз,тылобурдоос но сэзьгес чирдозы, сильзоръёс но ӧжытгес усёзы. ҺХ-тӥ даурез тодэ ке ваёно, мон туж синмаськисько та вакытысь быдӟым ӟуч писательёслы, соослэн ужаны но улыны быгатэмзылы. Со Герцен но Огарев, Тургенев но Виардо, Некрасов но Панаев. Нош нылкышноосты вераны уг быгатӥськы. Мон малпамъя, воргоронъёс быгато вожъяськытэк ог-огзылы зэмос эш луыны. Кышномуртъёсын котьку секытгес. Соос керӟегесь, вожъяськисесь, мылкыдъя улыны тыршо. Соин но, дыр, мынам эшъёсы но тодмоосы пӧлын тросгес воргоронъёс (агайёсы, вынъёсы, атае). Нош самой яратоно эшъёсы пӧлысь одӥгез - пересь анае. Солэн нимыз - Мария Ивановна. Мыным 17 арес, нош солы - 77. Кема аръёс ӵоже со улэмын но ужамын Карйылын, скал кыскись но пудо утись луыса. Умой ужамез понна трос медальёсыз но грамотаосыз вань. Гуртын улэм адями, Ижкарын но ассэ мултэс уг кары, вордскем кылзэ уг вунэты, удмуртлыксэ утьыны тырше. Мыным но со пыӵатӥз вордскем гуртме, анай-атайме гажан но утён мылкыд. Аслэсьтым сюлмысь малпанъёсме, секыт учыръёсме солы гинэ верасько. Мон тодӥсько: со монэ котьку, котькыӵе дыръя вала но яратэ, кулэ ке юрттэ. Сыӵе адямиос дунне вылын туж шер пумиськыло. Мон но со кадь ик ужась, чрмыт, йыг-йыг, рос-прос луынеы малпасько. Юнме ведь уг шуо: "Вера мыным, кин тынад эшед, нош мон верало, кин тон ачид". Екатерина Измайлова, УдГУ-ысь журналистикая факульттысь студентка. Та нылашез Дэбес палъёсын тодӥсьтэмез ӧвӧл, дыр. Кыӵе гинэ ужрадъёс уг ортчо районын - Наташа Образцова котьку но отчы мылысь-кыдысь пыриське, вань мылкыдзэ, тодэм-валамзэ сётыса ик мыноз олокыӵе но олимпиадаосы, ӵошатсконъёсы. Ёросысь "Галанча" литературая Центрлэн но улон-вылоназ со куинетӥ арзэ ни мыло-кыдо ветлэ, авторъёслэсь татчы вуттэм чуръёссэс сэрттон-пертчонэ ӟеч-ӟеч пыриське. Аслаз творчествоеныз шаерысьтымы лыдӟисьёс ӟеч тодмо ни. "Инвожоез" лыдӟисьёс но Н. Образцовалэсь гожъямъёссэ шуныт пумитазы. Солэн произведениосызлы вылӥ дунъет сётэмын вал шаерысьтымы егит гожъясьёслэн миым ортчем кенешоназы но: туэ апрель толэзе ортчоно таӵе ӧтчаме нылаш ӟеч-ӟеч пыриськыны малпа. Наташалэсь сюжетъёссэ лыдӟыса, мынам осконэ номыртэм йыг-йыг луэ: та адями одно ик удмурт литературае вамыштыны кулэ, солэн интыез отын, тани таӵе егит гожъяськисьёс сярысь сюлмаськыса гинэ удмурт литературалэн ӵуказе нуналыз сайкыт луоз. . . Озьы мон шуысал. Сыӵе мылкыд кылдэ авторлэсь кылем арын "Кенеш" журналлэн 12-тӥ номераз потэм "Анай сюлэм" вероссэ лыдӟыса, мукет чуръёсыныз тодматскыса. Монэн соглаш кариськозы, дыр, "Инвожоез" лыдӟисьёс но Н. Образцовалэсь туннэ ӵектоно вероссэ лыдӟемзы бере. Никвлад Самсонов, писатель. Ӟинь-ӟинь-ӟинь. . . Верос Аназ атай, яке, ӟуч сямен вераса, "отец-одиночка" шуэм котьку но туж тунсыко но паймымон потэ. Кызьы-озьы? Ярам, огназ анай ке луысал Таӵеосыз трос гинэ. Нош атай? Котьмар ке но, татын номыр паймымонэз ӧвӧл вылэм. Тани мынам бускеле - Петыр сыӵе. Кышноез мукет пиосмуртэн кошкиз, нылзэ кулэ ӧз кары. Табере Петыр вить аресъем Лизаезлы анай но, атай но. Нырысь секыт вал солы кышномуртлэсь вань ужзэ быдэсъяны, но табере ньыль ар ӵоже дышиз ни.Мисьтаське но, выж но миське, сиён но трос кышномуртъёслэсь ческыт пӧра. Одӥг ужез гинэ нокызьы но уг пишмы - йырси пуныны. Нош Лизаветаез аслэсьтыз кудьырскемъёссэ вандыны нокызьы но соглаш уг кариськы. Со гинэ ма на - одно бантик нуллэмез потэ. Соин ик Петыр нылзэ ӵукна вазьгес сайкатэ (пунӥськонлы часлэсь трос дырзы быре уга), Лизазэ синучкон азе пуктэ но йырсиез вылын тунаны кутске. Котькуд ӵукна, Лизазэ детсадэ кельтыкуз, Петыр нылзэ ассэ умой возьыны косэ, но озьы верамез туж ик уг юртты, лэся. Ӝыт Лизалэн воспитателез Петырлы нылыз вылэ урттылӥське. Я со уг сиськы, я шыдзэ кинлэн ке тусьтыяз кисьтэ, я, ватсконэн шудыкузы, самой умой эшсэ - Сашикез шкафе пытса. Нош кӧня дӥсь быдтэ Лиза! Паймод но бырод. Котькуд нунал Петыр нылзэ детсадысь я пась колготкиен, я кесям дэремен, я пал носкиен вае. "Ма сокем карид, выль колготкиедлэсь пыдэссэ пась поттымон?" - пайме со дӥськут кышъянъяз. "Пиосын машинаен шудӥ" - валэктэ нылыз. "Тани тазьы ӟинь-ӟинь-ӟинь! Кылӥськод-а, кыӵе буксовать каре?" - ӝог пыдесъяське со. . . "Кулэ, кулэ Лизалы анай - малпаське ас понназ Петыр. - Пиос пинал кадь будэ нылы. Нош кытысь мон сыӵе кышномурт шедьтом, кудӥз нылме яратоз?" Аслыз Петырлы нокин но кулэ ӧвӧл - со татчыозь кышнозэ яратэ на. Озьы ке но, Лизалы анай кулэ. Тазьы малпаськыса, Петыр ужысьтыз одӥг кышномуртэз нылыныз тодматыны дораз вайылӥз. Ачиз ӝӧк вылэ сиён бичанназ Анжелаен Лиза шоры учкылэ. Номыр ӧвӧл, верасько кадь. Но сак кариськыса мадиськемзэс кылзыны кутскиз. - Тӥ канфет яратӥськоды-а? - юа Лиза. - Яратӥсько, - ныллы пыриськыса кадь вера Анжела. - Мынам канфетэ вань. Мелэ, сие. Яраз-а? - Бадӟым тау, канфетэд туж ческыт. - . . ., нош мынам Тузике сое малы ке но сялӟиз. . . Лизалэн со кылъёсыз бере Анжелалэсь кызьы кошкемзэ ӧз но валалля. . . Кулэ. . . кулэ Лизалы анай. . . Нош огпол садикысь ӵош бертыкузы корка доразы вуыса кыкназы но воксё паймизы. Вань укноосазы тыл ӝуа. Корказьын ик ческыт пыжиськем зын шӧдӥське. Ӧс кусыптӥ выжыса вуизы гинэ но, пумитазы бызьыса пальышась кышномурт потӥз. Шораз учкыса Петыр интыяз ик пумиз. Кышноез. Света. Кузпалызлэсь дорысьтыз малы кошкемзэ Петыр али но уг вала. Гожтӥськемзы бере соос 2 арзэ улӥзы. Нош бӧрысь. . . Бӧрысь Света йыркуръяськыны кутскиз. Уга Петыр больницаысь главной хирург. Секыт висись адямиез ваё ке, уин валес вылысьтыз но султыса кошконо луэ. Светалы со ӧз яралля. Мукет кышномуртэд вань, операцие уд - со доры ветлӥськод. Ӧйтӧд, мукетъёсызлэн картъёссы пиосмуртъёс кадесь, гурт котыразы тыршо, нош тон мурт висисьёс понна выриськод шуыса куаретъялляз, нош собере, тӥни, воксё мукетыныз кошкиз. Ма понна кышнозэ яратӥз Петыр, ноку но ӧз тодылы. Тусын, бен, муспотон гинэ но, Петырен соос воксё пӧртэмесь. Таиз чагыр синмо, тӧдьы йырсиё (Лиза но быдэс со тус), небыт сямо, каллен. Нош Света сьӧд кысъем: вакчи пеймыт йырсиё, сьӧд синмо, чупырес. Но сямыз! Лекыз потэ ке, кытчы пырыны но уд вала. Кышноезлэн сыӵе пурӟылон вакытъёсаз Петыр котьку но гуртысьтыз кошкыны тыршылӥз. Но котькыӵе медло, яратон синтэм, шуо. Тани али но Светазэ адӟыса Петырлэн сюлэмыз ик жугиськемысь дугдӥз кадь. - Мын, нылы, милемлы вераськоно. - Лизаез гур азь пала берыктӥз со. - Мон тыныд отын туж ческыт пирожки пыжи, - итӥськиз Света. Лиза кышномурт шоры син ултӥз учкиз но, кухня пала вамыштӥз. Нылашлэн тыбырыз ышем бере, Света ӝогак картэз борды ӟыгыртӥськиз. - Кыӵе мӧзми мон! - Кинлэсь? - Кызьы кинлэсь? Тынэсьтыд. - Нош нылыд? Света могак луиз: - Петя, Петенька, тон эн йыркуръяськы. Шузи вал мон дорысьтыд кошкыкум. Ӧй тоды тон солэсь сю поллы умойгес шуыса. - Нош али? - Али. . . Ой, Петенька, вождэ эн вайы тон. Со. . . со. . . солы вина сяна номыр но кулэ ӧвӧл. - Кошкыкуд озьы ӧд малпа. - Петя, Петя, эн вера озьы. Учкы, кыӵе со монэ кариз - Света ӝогак саесъёссэ пужалляса суйёсысьтыз лыз-вож луэмъёссэ возьматӥз но выльысь Петыр борды ӟыгыртӥськиз. -"Ма кароно? Ма кароно?" - йыгасько Петырлэн йыраз малпанъёсыз. Ӟыгыртэмез но потэ, нош киосыз асьсэос лэзисько. Кӧня куректон ваиз солы кышноез. Озьы ке но, яратон ваньзэ ворме. Тани али но Светалэсь дуногес но мусогес кышномурт ӧвӧл со понна. Ма кароно. Ма кароно? Кызьы, ма, Лиза шуоз, озьы ик луоз", - малпаз со. Шӧдтэк шорысь Петыр пыд бордаз йӧтскемез шӧдӥз: - Папа.. - Ма, нылы? - Кин со? - кышномурт шоры возьматӥз Лиза. - Нылы, нылы! Мон тынад анаед! Лизонька, мон бертӥ, табере ми ваньмы ӵош улом, ӟыгыртӥз сое Света. Лиза со шоры паймыса учкиз но, пичи чиньыосыныз мугорзэ ӟыгыртӥсь киосты палэнъяз. Бызьыса мынӥз но папаезлэн пыдесаз ӟыгырскыса, сое ас комнатаяз кыскыны ӧдъяз: - Папа, мыным огнам мӧзмыт. Айда машинаен шудом. Ӟинь-ӟинь-ӟинь!" Образцова Наталь, Дэбес средней школа, 11 класс. Лаванда пушкын пыласькысал, нош мон. . . Оля но Лена Никитинаос - сузэръёс. Кыкназы но дышетско УдГУ-ын. Одӥг сюресэз лёго - журфакез. Ӵемысь журнал-газетъёсысь пумитано луэ ни соослэсь нимъёссэс. Никитинаосты нырысьсэ адӟись адями уз но малпа соос сузэръёс луо шуыса. Чылкак пӧртэмесь. Лена, бадӟымез, чиедгес но ӝужытгес, сьӧдалэс йырсиё, лызалэс-вож синмо. Нош Оля лапег, пичи мугоро, ӵуж йырсиё, чагыр синмо. Яратэ кезьыт вуэн пыласькыны. Сямъёссы пӧртэмесь: Оля яртэ лыз буёлэз, Лена - одӥгзэ но нимысьтыз уг висъя. Лена 5-тӥ, нош Оля 3-тӥ курсысь студенткаос. Кыӵеесь нылъёс улонын, али тододы - соку пыриське кенешонамы. Л.Т. Нылъёс, паймытэ одӥгез, анайды тӥляд дышетӥсь. Ӧз поты шат солэн огдэс но ас интыяз адӟемез? ЛЕНА. Туж потэ вал. Но мон пичи дырысеным малпалляй артист луон сярысь. "Пурга гуръёсы" В.Ушаковлэн кружоказ но ветлылӥ. Кельшо мыным киноын шудӥсь артистъёс. ОЛЯ. Нош кӧня тусбуйёссэс люкалляд вал! ЛЕНА. Озьы. Котьку со чебер малпанъёс пушкы выйыса улӥ. Ӵапак со вакыт гуртысьтымы пиосмы Москваын театральной училищеын дышетско вал. Вот, Лена, шуо, тон школаез йылпумъян вакытэ училищее, пе, удмуртъёслы набор луоз. Но малы ке калыкез ӧз люкалэ. Собере мон бырйи журналистика удысэз. Та профессия но монэ пичи дырысеным гочатыса возиз. Дышетӥсь сярысь ке, монэ анае куд-ог дыръя интыяз кельтылэ вал, соин ик мон малпай, со мыным тодмо уж ини, собере журналист чик но дышетӥсьлэсь кыдёкын ӧвӧл ук. ОЛЯ. Мыным дышетӥсьлэн но, бибиотекарьлэн но ужзы кельшо вал. Нош куке сцена вылэ Надежда Уткина потӥз, сыӵе мон солы синмаськи. Со дырысен артист луо шуыса малпалляй. Али но малпанэ йырысыьтым куштэмын ӧвӧл на. Надежда Эдурадовнаен пумиськи, валай, мынам солэн кадь куарае но, быгатонлыке но ӧвӧл. Бырйи журналистлэсь ужзэ. Пичи дыръям гожъяськисьёслы вожъяськисько вал. Кинлэн ке газетэ заметкаез потэ ке , малпасько , нош мон малы сое быгатонтэм. Озьы кужымме та удысын эскероно кариськи. Кылбур но гожъялляй, крезьгур но пӧрмытъялляй. Табере хуграфе пырысал кадь, туж яратӥсько суреданы, но улонын ваньзэ ӵош уд куты. Л.Т.Лена, кылэме вань, школа бере Москваысь РУДЭН-э журналистэ дышетскыны пырыны малпаськод вылэм шуыса. ЛЕНА. О-о.Кык пол мон отчы огнам ветлӥ.Анай-атае но, дышетӥсьёсы но уг лэзё вал. Кызьы, пе, сокеме мыныны дӥсьтӥськод. Нош мынам сыӵе потэ вал отын дышетскеме. Кылдымтэ, лэся, нокыӵе мугтэк мон отысь бертоно луи. Ӝыны сюлэмы али отчы ик кылиз. Л.Т. Кыкнадэс но городэ келяно. Секыт вакыт. Нош со коньдон нокинлы уг тырмы. Стипендилэн лыдыз ӧжыт. Кызьы та югдурысь потӥськоды? ОЛЯ. Милям ноку но анай-атаймылы со но та кулэ шуыса ӝожтӥськеммы ӧвӧл. Кызьы ке асьмеос уксё поттыны турттӥськом. Кытӥ-отӥ анаймылэн выныз юрттэ, со фермер бере, 50-эн, 100 манетэн сётылэ милемлы. ЛЕНА. Оля туж умой керттӥське, нош мон вуриськисько. Аслам вуременымгес ветлӥсько. Л.Т. Тон, Оля, Леналэсь троссэ адӟем кариськод, луоз. Со сьӧры ик городэ но дышетскыны кыстӥськид-а? ОЛЯ. Мон котьку вожъяськыса но данъяськыса Лена шоры учкылӥ. Пичи дырысеным солэсь адӟем карыса будӥ. Туж трос со лыдӟиське, оломаин но тунсыкъяське. Школаын кӧня кружокъёсы ветлылӥз. Нош мон сыӵе ӧвӧл. Пичи дыръям аслым ачим Лена сярысь капчи визьем потылӥ. Лыдӟиськыны сокем ик ӧй вырылы, книгаез лыдӟыса быдтӥсько но - сэрпалтӥсько. Со мынам йырам ӧвӧл ни. Нош Лена ваньзэ рос-прос валэктэ, отысь геройёсын ӵош улыны быгатэ. Али но со сыӵе. Л.Т. Ма, тон пичигес кариськод, дыр, астэ. ЛЕНА. Озьы, озьы. Али но со мон вылэгес чӧлске. Но луэ сыӵе вакыт, мон но юанъёсын солы ӵемысь вазиськылӥсько. Л.Т. Эшъёсыд шуэмъя, лыдӟиськыса, пе, тон, Ленӥ, кӧттэ тыриськод. ЛЕНА. Лыдӟиськытэк мон куло. Литература мон понна зэмзэ но сиён кадь потэ. Тани басьтом Набоковъя кыӵе ке кинофильмез, экранысь сое воксё мукет сямен учконо. А лыдӟыса чылкак музон произведение. Омыр уг тырмы - сокем мыным со лыӟиськон кельше. Уй но нунал книгаен пукысал. Нош литератураез яратонэ И.Бунин бордысен кутскиз. ОЛЯ. Мон но сое адӟыса амалтэк лыдӟиськыны кутскылӥ. ЛЕНА. Лыдӟиськон пумысен учыр вераме потэ. Школаын дышетскыкум ай, суббота ӝытэ, эшъёсы клубе потӥзы, нош мон ӧй. Уйшор бере куинь часозь лыдӟиськыса пуки. Вот пукисько залын, пичи лампочкаен тыл ӝуа. Ваньзы изё, шӧдтэк шорысь кин ке таӵ! гинэ капкаез ворсась луиз. Мон шуак луи, ӵогаськыны вунэтӥськем. Табере со адями азбарын черекъя ни. Кышкаса но мар дораз потӥ - адӟисько , пеймытын пияш сылэ. Кин-о тон шуыса юамысьтым, уд тодма, шуэ. Ма мыным ӵогаськоно ук, кызьы татчы вуид, юасько. Собере вераз ини, однокурсницае доры, пе, куное лыктӥ. Нош соиз клубысь эшъёсыныз кошкем, йыроми, пе, уг шедьтӥськы ни корказэс. Гуртын милям гинэ тыл ӝуа вылэм, вот и пырем со ми доры. Пияшез кунокаозяз келяй. Одӥг пол "Инвожоын" литкружокын веросэ сярысь кенешон ӝутӥзы. Вӧзам пукись Андрей чабкиськыса ик шуэ, кин меда тае гожтӥз (мынэсьтым тусме уг тодма со), сыӵе, пе, со мыным тодмо потэ. Ма ,Вуж Моньяысь шуисько. Адямие бакомиз. Л.Т. Котькытын тӥ ӵошен: эшъёс-а, сузэръёс-а меда шуо тӥледды. ЛЕНА. Кин кызьы шуэ. Кудӥз одӥг кадьзэ но шедьтыны быгатӥськом, шуо. А.П.Шкляев вераз вал, туж быдӟым суредась , пе, одно ик тӥледыз сузэръёс шуысал. ОЛЯ. Сямъёсмы но озьы ик висъясько. Лена тросгес вераськыны яратэ. Нош мон сыӵе ӧвӧл. ЛЕНА. Оля, ма мыным кулыны выдэм пересьёсын но кенешыны тунсыко потэ. Нош тон кыскаса сямен монэ гуртэ нуиськод. ОЛЯ. Мыным но тунсыко но, мон ведь сокем уг супыльтӥськы. Пӧртэмесь соин но, мон общежитиын улӥсько, Лена квартираын, ӵыжы-выжыосмы дорын. Солы озьы кельше. Озьы ке но, ми соин котьку ӵошен. Л.Т. Тӥледлы бен озьы шуг ӧвӧл-а эш шедьтыны? ЛЕНА. Яратон ласянь ке, ми сыӵе учырен ӧм на пумиськылэ. Нылъёс сярысь но шуг- секытъёс уг кылдыло кадь. ОЛЯ.Шуг уз луы яратон сярысь но. Леналэн куронъёсыз мукетэсьгес, угось солы кельшо вить-куать ареслы бадӟымесь пиос. Интеллигентноесь, ӝужытэсь , визьмоесь мед луозы. Нош мыным пӧртэм-пӧртэмъёсыз. Л.Т. Кызьы сое валано!? ОЛЯ. Кин мынм кельшоз, солы ик синмасько: пичиез но, бадӟымез но, кышнояськемез но, олокыӵеосыз но луо ук соос. Монэ гинэ мед валалозы кадь. Мон Лена сямен ӵем уг синмаськылӥськы, но луылэ. Л. Т. Лена, тынад куронъёсыд туж вылӥ. Нош вань-а асьмелэн сыӵе удмурт пиосмы? ЛНА. Ва-ань. Мон улонам адӟи ини кык сыӵе пиосты. Но малы ке но. . . ОЛЯ. Сюлэмад уг лякисько, о-о. ЛЕНА. Ӧвӧл, ӧвӧл, Оля. Тон Монья писоты малпаськод. Зэмзэ но, 11 классын дышетскыкум, дышетӥсьелэн пиезлы синмаськылӥ. Но со мукет нылын эшъяськем. Палэнын улэ вал угось. Л. Т. Оло, соин со озьы луэ, вань кужым-мылкыддэс дышетскыны сётӥськоды. ЛЕНА. Мон озьы ӧй шуысал. Яратон понна номыр жаль ӧвӧл. ОЛЯ. Мыным но озьы потэ. ЛЕНА. Дышетӥсьмы Нина Фоминична Михайлова ялан шуэ вал, котькыӵе картты мед луоз, но улонын огнады эн кыле. Солэн нылыз городэ дышетскыны кошкиз, нош ачиз чап-чара огназ кылиз. Мӧзмыт но секыт ук оген, уката ик арлыд будэмъя кинэн ке вераськем потэ, дыр. Со понна ик вӧзын эшед мед луоз. Вот самой солэсь мон кышкасько. Л. Т. Ма, вазь ук ай тӥледлы со сярысь малпаськыны. Нырысь ик бызёно, пинал ваёно, сюлэмдыя уж шедьтоно. Соин ик улонады умойзэ гинэ сӥзем потэ. НЫЛЪЁС. Озьы мед луоз. Л. Т. Кыкнады но пӧртэм изданиосын печатласькиськоды. Ужам ужды син азьын. Нош тон, Ленӥ, шара ӧд вера на мукетыз сярысь, яке тынад со ватостэ кыре поттэмед уг поты-а? ЛЕНА. Малы-о уз поты - верало. "Учительская газета"-ен эшяськемме юаськоды, дыр. Зэмзэ но, кызьлэсь уно статьяосы отын печатласькизы ини. Мон отчы ас мылкыд каремея гожъясько. Оля 11 классын дышетскыкуз, школаямы "Имею право" шуыса нимаськись конкурсэ пыриськыны анкета вуэм. Быдэс школа отчы пыриськиз. Гожтэмед вӧзын, пе, суредэд мед луоз на. УдГУ-ын ке но дышетскисько ни вал, мон но гожтӥ, уже кельшем, лэся, гожтэт басьтӥ "Клуб юного бизнесмена" рубрикае ужъёсме куриллям, кызьыгес гожтоно шуыса статья келяллям. Со дырысен соосын эшъяськисько. Л. Т. Тӥни котькытын печатласькиськоды. Нош мар люкетэ, мар уг тырмы "Инвожое" ужъёстэс сётъяны? Журналмылэн бамъёсысьтыз тӥледды уггес луы адӟылыны. ОЛЯ. Журнал мыным кельше. Но алама соиз, газетэ гожтэмдэ сётӥськод но, соку ик уждэ адӟиськод. Л. Т. Нош тӥляд возьмаса катьты быре, чиданды чиге, озьы-? ОЛЯ. Лэсьтэм ужлэсь ӝоггес емышсэ адӟем потэ ук. ЛЕНА.Нош мыным потэ, мон ӧй буды на журналозь. Газетын конвейер ке, журналын ведь чылкак мукет ужпум. Л.Т. О, тӥ сыӵе мылкыдын, малпанэн улӥськоды-а ма? Вот тӥни малы ӧжыт вылэм гожъясьёсмы, нош ми шуиськомы : кытын студентъёс. ЛЕНА. Уг, уг, мон уг шӧдӥськы на асме журналозь будэмме. Газет сярысь ведь со трослы мур пуштросъем луэ. Дӥсьтонэ но уггес тырмы на. Л.Т. Туала студентъёсты шер адӟылоно театръёсысь, выставкаосысь. Ваньмон дырды кызьы ортче. ОЛЯ. Ми Ленаен тыршиськом котькуд спектакле ветлыны, яратӥськом "Эктон коркае" вуылыны. Мыным кельше тужгес но журналистикаен вырыны, гожъяськыса акыльтӥсько ке - суреданы кутскисько, солэсь но акыляк потӥсько ке - горд сюй (глина) борды кутскисько. Мар ке со лэсьтӥсько но - утыр Ленамы тӥя ини. ЛЕНА. Ма, со пияла кадь, йӧтылыны ик уг луы. Выж миськыкум но уг иса ай таосты шуисько, олокытӥ-мар чиго, пилисько. Суредъёс сярысь ке, Олялэн соос абстрактноесь пӧрмо, нош мынам реальноесь шуод-а, мар-а. Милям соос дорын куд- огез рамка пушкы но тыремын. Ваньмон дыръямы яратӥськомы кырӟаса пукыны. Бертылыкумы мамамылы юрттӥськомы. Уж трос ук гуртын. ОЛЯ. Улонамы куинь пумо шоканмы: кырӟан, гожъяськон, суредан. Комнатаямы быдэсак оранжерея кылдытэмын. Туж яратӥськом улэп сяськаосты. Соосты монгес утялтӥсько. Мамамы шуэ, тӥ бертӥськоды ке, сяськаосты ик улӟо, мукет сямен шоканы кутско. Яратӥськом бакча котырын вырыны, праздникъёсы куноосты шумпоттытыны, пичиослы синпӧртмамон кузьымъёс дасяны. Л.Т. Тӥлесьтыд зэмос дышетӥсь пӧрмысал. ЛЕНА. Мон малпасько, мынам со пушкам вань бере, озьыен, мон дышетӥсь. ОЛЯ. Гуртын журналист луыса уд ужа ук. Озьы ке, дышетӥсь луысал,дыр. Л.Т. Но тӥляд ведь табере сыӵе луонлыкты ӧвӧл. ЛЕНА. Пичи дырысеным туж яратӥсько немец кылэз. Соин ик дун тырыса дышетскисько на романо-германской факультетын. Азьланяз школаын дышетыны правое луоз. Л.Т. Тӥ вуоно журналистъёс, мылкыдды ӧвӧл-а палэнын асьтэды эскерыны, шуом, Эстониын, Венгриын, музон кунъёсын? ЛЕНА. Сыӵе мылкыдмы ӧвӧл. Кузпал ласянь ке, мода луиз-а, мар-а, тросэз нылъёсмы отчы учко, соосты татысь но шедьтыны быгатом, адямилэн сямыз гинэ умой мед луоз. Л.Т. Тросэз гуртысь егитъёс, дорзылэсь палэнэ кошкыса, мӧзмо. Нош тыныд, Оля, городын улон капчиен сётскиз, дыр? ОЛЯ. Туж капчи, Леналэн сьӧраз быж кадь ветлӥсько вал. Общежитие интыяськыны но ӧй шуга. ЛЕНА. Табере мон со сьӧры. ОЛЯ. Соин общежитие интыяськыны но капчи вал. ЛЕНА. А ведь мыным нокин но ӧз юртты. Мон котьку ачим тыршылӥ. Пичи дръям туж дӥсьтӥсь вылӥськем, будэмъям, шӧдӥсько, сямы воштӥське. Тани Москвае ӧй ке но кыльы дышетскыны, кык арняез кык арен ӵошатӥсько. Сыӵе со мыным трос сётӥз. Улон шоры мукет синмын учкыны кутски. Мон удмурт шуыса ӧй ни возьдаськы. Ӟучъёс одӥг кыл тодо, нош мон кыкеныз-куиненыз вераськисько. Таӵе суредэз вераме потэ. Санкт-Петербургетӥ эшеным удмурт кылын чар! гинэ вераськыса поръяськом. Ми доры кунулскыса мӧйыгес парочка лыктӥз. Адӟиське - кунгож сьӧръёс. Француз кылын-а, пе, вераськиськоды, туж чебер кылӥське, шуо. Ми Удмуртиысь, Чайковскийлэн вордскем интыысьтыз шуэмысьтымы паймо. Милям йырмы ик вылӥе ӝутӥськиз. Москваын негръёсын одӥг блокын улӥмы. Вахтаысен эшелы жингыртӥсько, удмурт кылын вераськисько. Монэ индусъёс, негръёс котыртӥзы но, мон шоры учкыса, со итальянка, дыр, шуо. Йырсиез, пе, сьӧд, синъёсыз - вожалэс. Мукетыз шуэ, испанка, куинетӥез - индейка. Трубкаме понӥ но, мон удмурт, удмурт нылаш шуисько. Ваньзы паймизы, юаллясько, кытын со, кыӵе азьын. . . Собере одӥгез пияш сьӧрам ветлыны кутскиз. Бӧрысь ог-огмылы гожтэт гожъямы. Отчы дышетскыны кыльысал ке , со монэ одно ик кышно басьтысал, дыр, малы ке шуоно, со дырысен быдэс общежитиетӥ утчаса ветлэм. Одӥг пол ӧсэ йыгаськись луиз. Усьтӥ но :"Наконец-то я тебя нашел",- со пияш шумпотэменыз киоссэ вӧлъяса сылэ азям. Собере котькуд ӝыт городэтӥ поръяллямы. Л.Т. Пыриськылӥськоды-а, шуом, "Шундые", "Удмурт кенеше", студентъёслэн огазеяськонъёсазы. . . ОЛЯ. Гуртамы одӥг пол сӥзьыллы сӥзем ӝытэз ортчытыны малпамы. Асьме кужымен. "Удмурт кенешлэсь" коньдон курылӥ. Сётӥзы, асьмеос ик паймимы. ЛЕНА. Бадӟым классъёсын дышетскыкум "Шундыкар" лагерьын шутэтскылӥ. Отын ик кылэз шӧдыны юрттӥз Пётр Захаров. Сыӵе со милемлы заданиос сётъя вал. Газетэ монэ редакторе бырйылӥз. Нош студентъёс куспын нокыӵе огазеяськонъёс ӧвӧл. Москваын алигес егит журналистъёслэн конференцизы ортчиз, малы ке милямъёс нокин отчы ӧз шедьы. Л.Т. Озьыен, тӥляд политикае пыриськемды ик уг поты. НЫЛЪЁС. Уг шуимы ке, шонергес луоз. ЛЕНА. Но со сярысь потэ мынам гожъяме. Асьме доры Починок вуылӥз, сое туж мыло- кыдо гожъяй вал. Л.Т. Журналист - со ньылетӥ власть, шуо. Та пумысен кыӵе малпанды. НЫЛЪЁС. Ми сое ас выламы ӧм шӧдэ на, улонлэн паськытгес ӧраз пырим ке, соку ини валалом, дыр. Л.Т. Тодэм потэ вылэм, тӥ асьтэды кытын но кыӵеен адӟиськоды? ОЛЯ. Мон ужасал телевидениын. Внештатной корреспондент луыса тыршисько ини, но мынам потэ, аслам авторской передачае мед луысал. Иворъёсын уг поты ужаме. Кӧсыт со. Фермерлэн но ужез кельше, улысал ке гуртын, мед луысал шур дурын чебер-чебер коркае. Ужысь бертӥськод - лулысь-сюлмысь отын шутэтскиськод. Нош газетэ гожъян ас сяменыз секыт уж луэ. ЛЕНА. Гожъяськон , радио но чагыр экран - соос чылкак пӧртэмесь ук. Котькудӥзлэн аслаз сюресэз. ОЛЯ. Мон сое туж умой шӧдӥ ни. ЛЕНА. Яратӥсько компьютере выйылыны. Соку мон асме ик уг шӧдӥськы ни. Кытӥ но уг ветлӥськы. Сыӵе со тунсыко.Но арняяз кык но ӝыны висъям дыр мон понна туж ӧжыт луэ. Потэ эркын журналист луэме, кунгож сьӧрын кадь мед луоз вылэм, дорын гожъяськиськод, собере уждэ компьютер пыр пӧртэм изданиосын печатлало. Ялан выль адямиосын пумиськылысал. Визьмо, котьмае тодыны тыршись луэме потэ. Пичи пуртыын пӧзьыса улэм уг поты. Ужасал Москваын, асьме калык сярысь тросгес гожъясал, ӟечгес мед тодозы вылэм удмуртъёсты. Бӧрысь берытскысал татчы, нюлэскын улысал, мемуаръёс гожъясал. Т.Л. Сюрестэ наукае выжтэмед ӧй луысал-а?? ЛЕНА. Мынм со кулэ ӧвӧл, уг поты отчы выеме. Л.Т. Соку, басьтом тани азьвыл вузъёсын дышетскись егитъёслы потӥсь "Студенческой меридиан" журналэз. Оло, ӟырдыт кужыменыд сое выльдон борды басьтӥськысалыд? ЛЕНА. МГУ-ысь нылаш "Работницаын" быдэс рубрикаез огназ нуэ. Нош милям сыӵе луонлыкмы ӧвӧл. Уггес оско егитъёслы. Со нылашен пумиськылэме потэ. Умой луысал студентъёслы сыӵе журнал, но, кӧня отын "но"-ез ай. Л.Т. Лена, ӝоген университетэн люкиськон дыръёсыд вуо. Кыӵе мылкыдыд? ЛЕНА. Ой, туж жаль. Университет котырысь студентъёсты адӟыса, одӥг нунал шуак йырам малпан лыктӥз, мыным сыӵе ӧжыт кылиз дышетскыны. Туж вакчи дыр сётэмын вылэм. Мылкыл урод луыны кутскиз. Сыӵе яратӥсько группаме. Уката ик ӟучъёсты. Мон соос вӧзын дӥсьтӥсьгес луи. Вань удмурт эше - Наташа Сергеева. Со буш адями ӧвӧл. Вань солэсь мар басьтыны. Малы ке тросэз удмуртъёс менталитетной уровеньзэс будэтыны уг тыршо, университетэ пырыкузы кыӵеесь вал, сыӵеесь ик кылё. ОЛЯ. Зэмзэ но, Лена вӧзын мон но трослы воштӥськисько. Ӟучъёслэсь бере кылеме уг поты. Гужем каникулъёс бере городэ вуисько ке, эшъёсы паймо, трослы воштӥськемед, шуо.Куд-ог тодмоосы кызьы вуизы городэ, озьы ик интыязы пуко. Туж ӧжытэз умой пала воштӥсько. Л.Т. Ӵемысь студентъёслэсь кылоно, экзаменъёс азьын дырлы ке но кулоно вал шуэмзэс.. ЛЕНА. Мон понна со трагедия ӧвӧл. Мыным со праздник. Школаез медален йылпумъям адями сыӵе кылъёсын медам но вераське. Ноку ӧй курадӟылы дышетсконын. Оля тани коркан тыл ке кысэмын, со нырысетӥ этаже но васькыны кышка ни. Пичи дырысеныз ик пӧськы потаса курадӟемын. Школаын дышетскыкуз эшшо одӥг висён ватсаськиз на. Ӧсэтӥ пырись мае ке, пиос шудон сяменызы, лымы комокен лэзиллям, ӵапак ӧс йылысь пияла Олялэн сюрлыаз мертчиськем. Озьы со урок бырытозь тыбыраз вир вияса пукем. Шимес суредэз адӟем беразы, ваньзы огыр-бугыр луиллям. Мур гинэ пырем пияла юдэс. Мыным та улонын секыт луэ ке, соку ик Оляен луэм учыр сярысь малпасько. Солы ведь эшшо но секыт вал. ОЛЯ. Экзаменъёс дыръя Лена монэ димедрол юыны косэ. Зэмзэ но, мон кышкась, но экзамен азьын мыным эмъюмъёс кулэ ӧвӧл. Дӥсьтыса но дасяськыса мынӥсько. Вал сыӵе учыр. Университетэ пырон аре одӥг предметэн куинь басьтӥ. Кыӵе куректӥ, стипендия уг сёто. Дышетӥсь сьӧры сюлворыса ветлӥ, со нокыӵе ик уг кариськы. Табере сыӵе дышетӥ со предметэз, сайкатыса юазы ке - соку ик валэктон сётыны быгато. Л.Т. Тӥ, нылъёс, туж яратӥськоды нылпиосты. Валаськоды ни соослэсь психологизэс. Дорады кылемын пичи вынды. Ӵем-а сое тодады вайылӥськоды? ЛЕНА. Нылпитэм адями - со туж куанер адями. Мынам аслам куинь пиналы мед луоз кадь, нош Оля витьсэ но будэтысал, шуэ. Ми ум кышкаське шуг-секытъёслэсь. Инмар тазалык мед сётоз. ОЛЯ. Женя вынмы куинетӥ классын дышетске. Туж мӧзме милесьтым. Бертыкумы азьпаламы бызьыса ӟыгырске, ку кошкоды шуыса юа. Солы мӧзмыт. Пожалуйста, эн кошке, шуэ, со уггес вала на мар со сыӵе университет, будӥз ке, озьы сюлворемезлы серемез гинэ потоз на, дыр. Милесьтым мотик кузьыммес возьма. Ум тодӥське, быгатом-а куке быдэстыны малпанзэ. Л.Т. Ужаськоды, пе, палэнын, кинэ гожтыны дор палады вуысалды? ОЛЯ. Ӟеч-ӟеч усьтыны тыршысал Эркишевез, Уткинаез, Ермаковаез . Туж гажасько университетысь физкультураен дышетӥсьме Т.Г.Дубовицкаез. ЛЕНА. Нырысь ик гожтэм ужме А.Г.Шкляевлы возьматӥсько, ужме дунъясе доры ик вамыштысал. Тодмо адямиослэсь интервью басьясал. Но со мыным али туж секытэн сётӥське. Отын ведь адямиез усьтыны быгатоно. ОЛЯ. Али пукеммес эскери-чаклай но, валай, мон адямиен тазьы вольыт, азьло дасям тетрадьёстэк, вераськыны уг быгатӥськы на. Л.Т. Асьмелы сыӵе вакыт кылдӥз: даурысь дауре выжимы. Мар шуысалды та пумысен? ЛЕНА. Зэмзэ но, улонлэсь воштӥськемзэ ас синмынымы адӟиськомы. Даурысь мукетаз дауре выжем адямиос визьмоесь, пе, луо, талантливоесь. Малпасько, туж трос выльдиськонъёс луозы на. ОЛЯ. Шуд усиз асьмелы та вакытэз адӟыны. Удмурт ёзъёсылы вераме потэ, утчалэ асьтэды котькытысь, талантэ ӧвӧл шуыса ӝоже эн усе.. Ас вылысьтым ик вераме потэ. "Ӝужась кизилиос" конкурсэ пыриськылӥ, кылбур но, крезьгур но гожъяй, конкурс бере куарае ляб шуыса мылкыды куашказ. Уг яра вылэм сокем улӥе астэ лэзьыны. Асьмелы сомында луонлыкъёс сётэмын, пӧртэм калыклэсь кылъёссэ дышетӥськомы, компьютер пыр быдэс дуннеен герӟаськыны луонлыкмы вань. Асьмеос , егитъёс, шудоесь! Л.Т. Котьма шуэ но, вераськеммыя тӥ мыным макем пӧртэмесь но матынэсь потӥськоды. Тодэм потэ вылэм, улонлэсь кыӵегес паймымон сэрегзэ адӟысалды? ЛЕНА. О-о, мынам соку гинэ вань малпанэ быдэсмысал, Франциысь лаванда бусыын пыласькысал. Потэ на Ален Долонэн пумиськеме. Со мынам идеалэ. Рос-прос учкисько но - чиптэм-чаптэм атаелы кельше. Юнме библиотекаосысь тусбуйзэ доре "лушкаса" уг нуллӥськы вылэм (серекъя). ОЛЯ. Нош мон ке - тӧдьы лилия пӧлын. Италие вуылыны мылкыды вань. Бони Биянкиен ("Золушка-80") пумиськысал. Мон ведь соослэсь кылзэс но дышетӥ ни. Пичи дыръям ик почта пыр итали кылъя книгаос октылӥ. Воксё анае абдраса быре вал. Сомында со книга люкаськиз! Л.Т. Ма бен, нылъёс, тӥляд ваньмыз азьпала на, малпанды мед быдэсмоз. Журналистлэн уго сыӵе ужез, туннэ со татын, ӵуказе , оло, Францие но, Италие но вуттоз. Кенешиз Любовь Тихонова. Редакциын гажано ужасьёс! Тӥледлы но Тӥляд лыдӟисьёстылы но ӟеч тодмо луэ Пичи Пурга райцентрын ужась "Пурга кизилиос" огазеяськон. 12 арзэ ни мон отын ужамъям паймемысь уг дугдӥськы аслам вордскем палъёсысьтым кибашлыё но визьнодлыко адямиослы: арысь аре уг кулэсмо литератураез, чеберез гажась егитъёслэн лыдзы. Туннэ мон ӵектӥсько занятиосам 5 ар ӵоже ветлэм нылъёсмуртлэсь, Удмурт кун университетлэн юридистика факультетысьтыз дышетскисьлэсь Жанна Рыбаковалэсь "Террорист" вероссэ. Вордскемын та автор Пичи Пурга ёросысь Курегын. Эн пайме, отын улӥсь адямиос асьсэос ӧжытак данъяськыса верало: "Курегын улӥськом ми". Уз, Куреггуртын уз шуэ, одно ик - "Курегын!" Мынам чакламея, таӵе аспӧртэмлыко ваменмонзы "курегъёслэн" (ачим но соосъя кариськисько) асьсэ гуртэнызы данъяськонлы тупа. Ӧжытак, кыньырскем синъёс пыр ӟизась юмор пыр. Ярато та гуртын кырӟаны-вераны. Татысь фольклор ансамбльзы котыр гуртъёсын гинэ ӧвӧл, палэнын но ӟеч тодмо. Котьмар шуэ но, чырткем, ас родной нылызлэсь, культураезлэсь возьдаськисьтэм калык улэ Курегын! Жанналэн творчествояз кельшо мыным юмор амалэн, ӧжытак кыньыртэм синъёс пыртӥ чакласа гожтэмъёсыз. Сое тӥ шӧдоды авторлэн узыр, йыг-йыг кылтӥрлыкез бордысь но, улон-вылон шоры задор синъёсын учкемезъя но. Малпасько, та произведение тодматскемды бере ымнырады одно сайкытак мылкыд кылдоз, ӵуказе нунал одно ик шундыё луоз шуыса оскон отысь уз ышы, уз быры. Нош авторлы? Авторлы литературае паськыт сюрес сӥзем потэ, солы инмар сётэм быгатонлык, сое азинтыны гинэ кулэ. . . Никвлад Самсонов, писатель. "Террорист" Верос Тр-р-р! Телефон жингыртэ. Токен шуккем кадь тэтчыса султӥ. Остэ, Инмаре-кылчинэ, кыӵе убирлэн шуккиз на йыраз таӵе бер жингыртыны? Куалектэменым, тылэз но ӝуатыны уг шедьтӥськы ни. 3 час ӵукна. - Алло! - Алло! Ӟечбуресь, Ленаез ӧте вал, пожалуйста, - трубкаысь кылӥськиз пиосмурт куара. - Кыӵе Лена? Ӧвӧл татын нокыӵе Лена но. Янгышады луоз, - трубкаез понӥ. Макем ческыт уйвӧтме куспетӥ каризы, шуккыса куштон люкетъёс! Шуныт валес вылам нош ик выжыкыл дуннеям вуи. Котырак зарезь, вуэз сокем чылкыт, пыдсыз адӟиське, пӧртэм буёло чорыгъёс уяло. Кӧня мылыд потэ зумылы! Дельфинъёсын ӵошатскыса уясько. . . Шуак трактор куара кылӥськиз. Ма, кытысь трактор? А-а, телефон со. Монэ визьтэммытыны малпало-а, шай-а? 5 час. - Алло! - Ленаез ӧте вал, пожалуйста, - нош ик кылӥськиз трубкаысь. Нош ик Лена?! - Кыӵе Лена?! - воже потэмен, кеськемме но ӧй вала, бускельёсы валес вылысьтызы ӧз усьылэ-а, мар-а - Со Ленадэс коть чёртъёс мед нуозы, уг улы со татын шуисько! - трубкаме зӥртӥ. Шӧдӥсько: нырпелесъёсы тӧдьыектӥзы, йыры курен, ымнырысьтым вире ӧжыт уг пазьгиськы. Умме усем уз луы ни, эх шу, быдэс нунал табере йырчукин луыса кошкоз ини. Кызьы ӵукнаез пумитало, озьы ик нунал но ортче шуо. Туннэ берпуметӥез зачётэ, собере гуртэ шонтыны луысалыз. Нош табере педло ик потыны кышкыт. Гуртын пуконо ке шат? Справка басьто но тӥни. Кин ай бен та сокем утча Ленаез? Малы мынэсьтым номерме бичало? Татын ноку Лена ӧз улы кадь. Квартирае ӵужапаелэн, солэн Таня нимыз, ма, собере со но гуртэ бертӥз, ми доры, мон али шол-шол огнам. Кыӵе Лена? Тупаны но кулэ ук туннэ ик озьы луыны. Профессоръёслэсь мон озьы но сютэм кионъёслэсь кадь кышкасько. Со куспын нош ик телефон жингыртыны ӧдъяз. Синмы пож адӟе ни. Кутом-а, ум-а? Нош ик Ленаез ке юало? Нош Вера ке жингыртэ? Ми соин вераським вал туннэ ӵош университетэ мыныны. Яке нош ик. . . - Кылзӥсько, - куарае мырдэм потӥз, сюлмы гадьысьтым тэтчыны ӧдъя. - Ӟечбуресь! Вождэс эн вае, пожалуйста, нош тӥляд кызьы нимды? Пуштэменым, телефонме борддор шоры ӧжыт гинэ ӧй сэрпалты. - Ох тон, адӟемпотостэм, шайтан, виён люкет! Аслам йырам 100 пӧртэм малпанъёс бергало. Каръян лулы, мар солы мынэсьтым кулэ? Нош кыӵе ке террорист яке адями виись ке? Оло, квартираме "сузяны" малпа? Тодӥз, дыр, мон огнам улӥсько шуыса. Караул! Верай вал ведь апайлы, корт ӧс пуктоно шуыса. Телефонэ эшшо 2 пол жингыртӥз на. 100 манет ке но сётысалзы, ӧй кутысал ни. 100 манет, учконо ке, трос, басьтысал ик, дыр, ӵок, ӧз сётэ бере, ӧй куты. Нош куараез со пилэн чебер вал. Оло, со огшоры гинэ йӧнтэмъяське, огшоры шудэ гинэ. Озьы но, тазьы но малпаны уг валаськы ни. Кыӵе меда ачиз? Чебер, дыр. Сьӧд синмо, ӝужыт. . . Малы меда телефонме куштӥ? Вераськоно вылэм, тодматсконо. Визьмо, дыр, со. Нылъёсыз котыраз трос, дыр. Нош мон? Кин мон сыӵе? Эх шу, немарлы мыным чебер принцъёс сярысь малпаськыны. Ма, тазьы учконо ке, тусын-буйын мон но кӧшкемыт ӧвӧл, кадь. Синъёсы чагыресь, бадӟымесь, ныры но адямилэн кадь, киы-пыды интыяз, йырсие вакчи, кузь, зэм, фотомодель ӧвӧл, со понна нокинлэн но мынам кадь бордаз кыскись пальпотонэз ӧвӧл, кеньыре но йырам тырмыт, кадь. Озьы ке но, яратонэ ӧвӧл. Вань кыӵе ке но пияшъёс, но мыным сыӵеосыз чик но кулэ ӧвӧл. Мыным кулэ зэмос пияш, кудзэ мон яратыны быгатысал. . . Ас дуннеям озьы малпаськыса пуконъям, университетэ ӧжыт ӧй йыромы.Йыр ке йыр, пыд ке пыд, пыри. Профессор шорам ӧз но учкы, "зачёт" пуктӥз но лэзиз. Маиз мар луэм та? Шунды интые толэзь пиштыны уз кутскы-а? Шумпотэменым, быдэс дунне тыр кесяськем потэ. Ымдуры пель дорозям: табере гуртэ гань-гань бертэме луоз. Шуак, тубатэтӥ васьконъям, кин ке бордам мырӟиськиз. Мазэ-созэ валаса ӧй вутты - сумкае тубат кузя питыраса васькиз, ачим но бӧрсяз лёгетъёсты лыдъяса ӧжыт ӧй пезьды. Кыӵе псих со танк кадь ваньзэс лёгаса ветлэ, у, скал! Кытчы вуэмме валаны турттыса кыллёнъям, дорам пияш мыкырскиз. - Вождэс эн вае, пожалуйста, вӧсь-а луиды? - соин "лекаськиськем", вылды. - Киы-пыды выре кадь, уло ай, - шуи но, сумкаме киысьтыз ишкалтыса берытски. Вань мылкыды мучолоен ӵушалтыса куштэм кадь луиз. - Мар мон карыны быгатом, кӧтты ӝож медаз луы ни шуыса? - мерске на пияш. - Син азьысьтым ыш! - кеськемме ӧй шӧды. Усьыкум, йырме но шуккиськем, лэся: озьы-а, пе, адями шоры черекъялод? - Вождэс эн вае, - шуисько, - ваньмыз умой. - Мынам нимы Сергей, - шуэ. - Нош тӥляд? - Катя. - Тӥ нырысетӥ курсысь, дыр, озьы-а, нырысьсэ татысь тӥ кадь чебер нылашез адӟисько. - Нылъёс шоры дэймон интые, пыд азьдэс умой чакласа ветлоно - шуи ук - быдэс нуналы йырчукинскыса кошкиз. Ачим шораз учкисько. Чебер, ӝужыт, бадӟым курсысь, дыр. Дугды ай, кытысь ке но мон адӟылӥ ни та пияшез. Кытысь бен? Ымныртусыз туж тодмо. . . Кытысь? Ойдо, ӵок, университетысь ик, дыр. - Ойдолэ, мон тӥледыз келяло. - Эшшо мар шуоды на? - Тӥ автобусэ-а? - Троллейбусэ. - Мон но. Монэн ӵош ик пуксиз. Уг васькы одӥг дугдонние но, ялан шорам учке. Васьки, со но васькиз. Ӧй чида ни: - Сергей, мар тӥледлы мынэсьтым кулэ? Лушкаськыны малпаськоды ке, мынам оценкаосын зачёткае сяна, номыри ӧвӧл. - Катя, тӥ мар? Мар тӥ малпаськоды мон сярысь? Солэн синъёсыз пазьылэс ӵаша быдӟа ик луизы. Умойгес шораз учки. Зэм но, шузи ук мон, тырмымтэ, малпаса уг вуттӥськы на, кылы сачак ляке ини. Синмаськоно кадь, йӧно, зэмос пияш. Кытысь бен мон сое адӟылӥ? Пӧрмостэм, асме возьыны но уг быгатӥськы. - Вождэс эн вае, пожалуйста, - шуи но, подъездам вамыштӥ. Пырыса вуттӥ-а, ӧй-а, жингыртӥсь луиз. - Катя! Сергей та. Ӵукнаозь гань-гань изи. Нуназе вакыт жингыртӥсь луиз: - Ӟечбур, Катя! Сергей та. - Умой, шуисько. Ачим умой-умой ӧй вала на, кин, кызьы, ку. - Мар кариськод? Ойдо пумиськом, мон мӧзми ини. Паймеменым, кылме ньылӥсько вал. - Тон. . . кытысь. . . мынэсьтым номерме тодӥськод? Дугды ай, куараез тодмо, кин ке но мыным жингыртылӥз ини таӵе куараен. Кин? Сергей нырысьсэ. . . Эн ай, сыл ай, толон уин, зэм-зэм, толон Ленаез юаса, сопал дуннее кошкытон калэ вуттӥз. - Нош Лена тыныд кулэ ӧвӧл-а, - ӧжыт ӧй усьы. - Катя, Катя, мон тонэ Лена кожасько вал. Катя, кылзы, пожалуйста, монэ. Ойдо пумиськом, мон тыныд ваньзэ валэкто. Мон кыкетӥ подъездын улӥсько, 5 минут ортчыса, тон доры вуо, ява, - трубказэ понӥз. Кин?.. Мар?!.. Кыкетӥ подъезд? Тодӥ! Тодӥ мон со пияшез! Тӥни кытысь адӟылэме вань, вӧзам улэ, физикая факультетын дышетске. Апае вералляз вал со сярысь, пель сьӧртӥм лэзьылӥ. Йыгасько. Сергей. Тапочкиосын, курткатэк, бызьыса лыктэм, шӧдске. Сяська керттэтэн. - Мон тонэ яратӥсько, - шуэ. Уг оскиськы. Нош тӥ оскысалды-а, нырысь тӥледлы быдэс уй изьыны ӧз сётысалзы ке, собере, пыд йылысьтыды погыртыса, ӧжыт ӧз онгромытысалзы ке? Жанна Рыбакова. Сергей Антонов Кык тетрадь Повесть КУТСКОН ИНТЫЕ Лултэм арбериос но адямиос сямен вераськыны быгатысалзы ке, ма меда ивортысалзы асьмелы? Шуом, Галялэн но Мишалэн тетрадьёссы. Зэм, бумага вылэ гожтэмез лыдӟыны луэ. Нош Галялэен Миша сое асьсэ понна гожъязы ук. . . Эх, шу!.. Эн юалэ, кызьы та гожъямъёс мон кие вуизы но малы нылашен пияш сое трос калык азьын шараяны соглаш луизы.Оло, соослэн тодытэмзы потӥз, маин шокало но кызьы уло огъёзъёссы - 15-16 аресъем нылашъёс но пияшъёс? Собере тӥледлы но тунсыко, дыр, ук. Муртлэн улонэз малы ке но адямиослы котьку тунсыко потэ уго. Нош икн ке, оло, та дневникъёсы гожтэм учыръёсысь ассэ тодмалоз. . . Умоен-а, аламаен-а пуксё геройёсмы лыдӟись азе - созэ асьтэос дунъялэ ини. Мынам одӥгзэ вераме потэ: улон - со улон. Нош татын возьматэмын егитъёслэн улонысьтызы пичи гинэ люкетэз. Ойдолэ, иське, ӵош тодматскомы медучилищеын дышетскись нылашез но дышетӥсь луыны дасяськись пияшез сюлэмшугъяськытӥсь ужпумъёсын. * * * ГАЛЯЛЭН ТЕТРАДЕЗ: "Куд-ог дыръя мон юасько аслэсьтым, малы дневник нуисько. Собере аслым ачим верасько: одӥг адямилэсь мӧзмеменым сэрен, дыр. Со пиез мон туж яратӥсько. Со али кыдёкын: Чита палан служить каре. Малы пиосты сокем кыдёке лэзьяло? Удмуртиын ик мед служить карысал, соку пумиськылэммы но луысал. Нош тазьы солы отпуск но уг сёто, мон но со доры мыныны уг быгатӥськы. Кыкетӥ арзэ яратоно мурттэк улӥсько ни. Ужас! Со монэ яратэмысь уг дугды. Котькуд гожтэтаз Андрей гожъя, кызьы со монэ ӟыгыръялоз но чупалоз армиысь бертэмез бере. . . Йырам куддыръя лыктыло улон-вылон сярысь малпанъёс. Кызьы меда радъяськоз улонэ училищеме йылпумъяме бере? Ужаны кутско. Уж, уж, уж - озьы быдэс улон кыстӥськоз, пенсие потытозь ик. Нош кыӵе улон на пенсие потэм бере? Уката ик кышномуртъёс куамын арессы тырмытозь пересьмо ни. Нош мыным ӝоген дас куать тырмоз. Озьыен, ӝыны улонэ ортчемын. Нош кыӵе луэ кышномуртлэн улонэз быземез бере? Картэз юртъер котырын номыр уг лэсьты, нош нылкышно быдэс нунал уж дураз тырше, собере сомында ик дыр ӵоже дорысь уж-пӧрез быдэсъяно луэ на. Магазинэ ветлоно, сиён дасяно, ӝӧк вылэ пуктоно, тусьты-пуньы миськоно, дӥськут котоно, нылпи вордоно, сюдоно, дышетоно, пудо утялтоно. . . Визьтэммод ук! Тод но вылэм, Андрей мыным юрттӥськоз-а? Конечно, мынам туж ик учкеме уз поты, кызьы яратоно адямие тусьты-пуньы миське яке носкиоссэ гылля. Луысал, дыр, ужъёсмес люкыны. Кытын кужым кулэ, шуом, выж ӵужыны - пиосмурт, нош тузон ӵушылыны - кышномурт. 3 апрель". МИШАЛЭН ТЕТРАДЕЗ: " Туннэ йырме быдтон сярысь малпаськи. Угось трос шуг-секытъёсты чидай ни. Только кызьы мыным кулоно? Пистолет басьтоно ке - туж дуно. Оло, милиционерлэсь талано? Яке пӧйшурась кариськоно-а? Капчигес луоз газэз усьтыса кельтыны, но бускельёс шӧдӥзы ке, "скороез" ӧтёзы. . . Оло, изьытӥсь эмъюм шедьтоно? Только уг тодӥськы, кӧня но кыӵезэ кулэ. Трамвай улэ тэтчыны кышкасько. Ма тэтчи ке но, соку ик уг кулы, вылды, нош врачъёс бурмытозы. Собере быдэс улонме инвалид луыса ветло. Уг ни ай! Оло, ток шуккемлэсь кулоно? Ӧвӧл, рос-прос ӧвӧл со. Мыным ведь рос-прос кулэ. Вӧсь гинэ медаз луы. Уг тодӥськы, малы ваньзэ тае дневникам гожтӥсько. Аслым? Мукетъёсызлы? Ну, мед лыдӟозы. Только мон со сярысь мед тодом, нош лыдӟисьёс мед малпалозы, мон уг тодӥськы шуыса. Ма мон дневникме тӥледлы но сӥзьыны быгато. Лыдӟелэ! Мон малпасько: котькуд адямилэн та улонын аслаз кыӵе ке быдэстоно ужпумъёсыз, ужъёсыз сое улэпеныз герӟало. Мон аслэсьтымзэ улонэн герӟась нюжаме ыштӥ яке ӧй шедьтылы ноку. Монэ трос пӧртэм ужпумъёс зӥбо. Адями вордӥське, будэ, дышетске, ужа, семья кылдытэ, нош собере - кулэ. Котькудӥзлэн пумыз одӥг - кулон. Макем ваньмыз та огпӧртэм но мӧзмыт. Нош малы кужмо но кышкасьтэм адямиез пересьмем бераз котькудӥз сволочь ултӥяны быгатэ? Малы адямиос сокем вазь пересьмо но тазалыксы лябӟе? Бӧрдэме ик потэ. . . Оло, кытчы ке кошконо? Нош кытчы пегӟод аслэсьтыд? 3 апрель". ГАЛЯЛЭН ТЕТРАДЕЗ: Туннэ училище бере ми Маринаен мон доры мынӥмы. Со мадиз, кызьы пияшен чупаськиз. Эсьма, Мариналэн ымдуръёсыз ик тӧрналлям, табере эше секытэнгес вераське. Марина ачиз туж шаплы нылаш. "Союз Аполлон" нимо сигарет кыске, водка юэ. Пивылэс* нылмуртлы укша ке но, уг тодӥськы, кызьы Марина быгатэ ныл данзэ утьыны, уката ик трос пиосын ӵош аракы юыса улэмез вылысь. Нош кызьы вераське со! Котькуд кылыз бере - мать-перемать. Но Марина шоры учкыса нокызьы уд малпа, со сыӵе блатной шуыса. Солэн синъёсыз туж чебересь, чагыресь. Мон котьку малпалляй, Мальвиналэн гинэ сыӵе синъёсыз луыны быгато шуыса.Марина шоро-куспо мугоро ке но, мукет нылъёслэсь лапег уг адӟиськы. Адямиос азьын со ассэ ашкынэм мурт кадь возе, нош ачиз туж возьдаськись. Анае сое уг яраты, соин ик мон Маринаез лыктэмезлэсь азьло котьку жингыртыны курисько. Мед лыктоз анай дорын луымтэ дыръя. 16 май". МИШАЛЭН ТЕТРАДЕЗ: "Училищеын урокъёс бырем бере мон ноку бертыны уг дыртӥськы. Туннэ одӥг гинэ "кык" пуктӥзы - со туж умой ни. Группаямы куамын адями дышетске, но урокъёсын ог кызез гинэ пуке. Кин висе, кинлэн мылкыдыз ӧвӧл. Вылаз ик дышетӥсьмы нокинлы уг кельшы, сволочь первосортной со. Ассэ самой визьмо адямиен лыдъя. Котькин но ачиз сярысь озьы малпа, дыр. Тани троллейбусын мынӥсько, нош котырам пӧртэм адямиос сыло. Котькудӥзлэсь юалэ ай, шузи-а, визьмо-а астэ кожаськод шуыса, огез но ассэ визьтэм уз кары. . . Эстетикая урокъёс со, огкылын вераса, дурдом. . . Нырысетӥ часаз дышетӥсь маде мар ке но сярысь, пӧртэм ӵошатонъёс лыдӟе, нош кыкетӥ часаз ми солэсь вань верамзэ тетрадьёсамы гожтӥськомы. Урокысь уроке озьы. Мон тазьы малпасько, искусство, яратон, чеберлык шоры котькудӥз ас сяменыз учкыны, ас валамезъя дунъяны кулэ. Нош быгатозы-а дышетскисьёс ас кожазы малпаськыны, дышетӥсь урокъёссэ огпӧртэм, дышем кабъя гинэ ортчытъя ке? Дышетскон ар йылпумъяське ни, нош ми одӥг пол гинэ ай музее ветлӥмы. Туннэ урокъёс бере вань студентъёсты лекция кылзыны люказы. Мӧйы воргорон мадиз, кызьы ми, быдэ вуымтэос, йыружъёс лэсьтылӥськомы, нош со ужъёсмы сярысь малпаськомы, лӧптылӥськом гинэ шуыса. Одӥг дундук кинлэн ке машинаеныз ворттылэм, та понна сое колоние келяллям. Мукетыз, училищеысьтымы ик дышетскись, шудон пистолет шедьтэм но пеймыт ульчаысен куамын сизьым аресъем кышномуртэз кышкатыны ӧдъям, арам карыны турттэ вылэм. Кышномурт туж куалектэм, пе, пистолетэз адӟыса. Пияш нокинэ арам карыны вуттымтэ, озьы ке но, таиз но колоние сюрем. Та пиос кыксы ик, конечно, шузиос. Мынам аслам но кудӟеме вань дыръя мурт машинаен ворттылэме потыны кутске. Ма, сыӵе вакытам пистолет но сюрысал ке, мон мар гинэ ӧй дауртысал!.. Туннэ ӝыт нокыӵе ужъёсы ӧвӧл, соин ик книга лыдӟо, дыр. Та арын со борды кык пол кутскылӥ ни - нокызьы лыдӟыса быдтыны уг быгатӥськы. Шапык но дыры ӧвӧл. Училищеысь куинь часын бертӥсько но номыр карыны уг ни быгатӥськы - диван вылэ усисько но изисько. Нош книга бамез берыктыны кате ӧвӧл ни. Библиотекаын ужась шуиз, Шерлок Холмс сярысь тросэзлэн лыдӟемзы потэ, пе. Сое ведь Конан Дойль гожтӥз. 16 май". ГАЛЯЛЭН ТЕТРАДЕЗ: "Толон Марина училищее бер лыктӥз но быдэс нунал висись мурт кадь ветлӥз. Урокъёс бере юаз, луоза-а, пе, ӝыт мон доры пырыны. Анай туннэ уин ужа, соин ик мон соглаш кариськи. Марина лыктӥз но ивортӥз, кышномурт луиз шуыса. Пияш, кудӥз солы засосъёс пуктылӥз, верам: Марина, яратэ ке, мед сётӥськоз. Соос эшъёсынызы кыӵе ке шулдыръяськонын вылӥллям. Ваньмыз кудӟемын ни, пе, вал. Марина но Сашка куштӥськем коркае мынӥллям, отын эше пияшлы сётӥськем. Соку ик соослэн ваньмыз пӧрмымтэ но мукет нуналэ соос нош ик куштӥськем корка кошкиллям. Табере Марина уг тоды, мар карыны: нылпи ваёно кылем ке? Солы ведь дас куать арес но ӧвӧл ай, нош пияшлы сӥзьыл армие мыноно. Марина мыным жаль потэ. Анай котьку монэ кышкатъяз, кышномурт луыны туж вӧсь шуыса. Мон Мариналэсь юай та сярысь, нош со вераз, туж юн вӧсь вал, пе. Котькудӥзлэн ас сяменыз, дыр. 20 май". МИШАЛЭН ТЕТРАДЕЗ: "Туннэ анаеным ӵош гуртэ ветлӥмы. Со гужем отпусксэ татын ортчытыны турттэ. Гуртын мон Пашаен пумиськи. Со зэмос воргорон кадь луэм ини. Озьы ке но, мон солэсь ӝужытгес. Паша УдГУ-ын дышетске. Ми шумпотӥмы пумиськеммылы. Вераськимы, городын но адӟиськомы ай шуыса. Пичи дырмес тодамы ваим. Ведь милям семьямы тямыс ар гуртэ ӧз ветлы ни. Куке анай но атай ӵош улӥзы, ми котькуд гужем татчы вуылӥмы. Нырысетӥ араз ик мон Пашаен эшъяськи. Со мынэсьтым кык ареслы бадӟымгес ке но вал, монэ ноку ӧз ултӥялля. Ӵукна ми тыметэ пыласькыны бызьылӥм, нуназе бере пу сабляосын ог-огмес "кораллямы", нош ӝыт милемыз кужмысь доръёсамы пырыны косо вал. Но одӥг вакытэ милям эшъяськонмылэн пумыз вуиз. Пашалы соку дас арес вал. Со аре анае но атае берпум толэзьёссэс ӵош улӥзы. Пашалэн анаез доры пичи сузэрез кунояны лыктӥз. Солы дас укмыс арес вал. Милемлы Пашаен со быдэ вуэм кышномурт кадь потӥз. Малызэ уг тодӥськы, но Наталья Петровна сузэрзэ пиеныз одӥг висъетэ интыяз. Котькуд нуналэ Людаез ӧтчаны пӧртэм пиос вуылӥзы ке но со берозь олокытын калтыртылӥз. Паша вералляз, изьыны выдыкуз Люда бертэмын уг на луылы вал шуыса. Огпол нуназе бере мон пашаез ӧтьыны лыктӥ. Эшелэн висъетаз пырыкум, Люда валес вылын пуке вал. Со чулкаоссэ дӥся вылэм. Вӧзаз Паша пукиз. Мон Людаез котьку дэремен яке вакчи юбкаен адӟылӥ, нош татын, нырысьсэ соое улдэрем коже синйылтӥ. Таӵе суред мыным туж кельшиз. Нылмуртлэн гадь бордаз йӧтскеме потэ вал. Та сярысь малпай гинэ, Люда кесяськыны кутскиз, малы мон ӧсэ йыгаськытэк пыри шуыса. Мон юай, малы Пашалы яра вӧзаз пукыны, нош мыным - уг? Люда валэктӥз, Паша солы выжы-кумы луэ шуыса. Тодӥсько на: Людаен вожаменым мынам Пашалы туж йыры кур луиз но гужем пумозь мон соин ӧй шудылы ни. Нош али мон валай, малы Паша Люда вӧзын пукиз: со кышномуртлы дӥсяськыны юрттэ вал. . . 20 май". ГАЛЯЛЭН ТЕТРАДЕЗ: "Туж кышкыт учыр. Кулӥз адями - пияш. Уг тодӥськы, кызьы гожтыны ик ваньмыз сярысь. Бускель урамысь коркаын, одӥгаз квартираын, эшъёс люкаськиллям. Наркоманъёс. Нылмурт, кудзэ та пияш яратэ вылэм, малы ке но куатаськем. Пияш олокӧня пол ассэ простить карыны курем. Нылмурт верам: пияш укноетӥ тэтчиз ке, соку гинэ простить сое кароз. Пияш, трос малпаськытэк, укно дуре султэм но тэтчем. Укмысэтӥ этажысь. Пазьгиськем. Шораз учкыны ик кышкыт вал, шуо. Милициез ӧтиллям. Шулдыръяськыны люкаськем эшъёс, асфальт вылысь "кисалез" адӟыса, кин кытчы пегӟиллям. Нылмурт но. Собере пиос нош ик люкаськиллям, возьмаллям, ку нылаш дораз огназ кылёз. Ӧссэ тӥяса квартираяз пыриллям. Соос нылмуртлэсь йырзэ борддор борды йыгаллям, пыдынызы лёгаллям. Кошкон азязы трос зарни арбериоссэ киултӥллям на. Нылмурт узыр семьяысь вылэм. Пиосты берло кутӥзы, суд вал. Ваньзэс пуктӥзы. Нылмуртлэн нокыӵе судэз ӧй вал, угось али со больницаын кылле. Быдэс улытозязлы инвалид кылемын. Пиос одӥг висисьтэм инты но мугораз кельтӥллямтэ. Али ми дорын ваньмыз та учыр сярысь супыльто. Кин мар вера. Куд-огез шуэ: наркотикъёс, пе, ӧй юысалзы ке, номыр ӧй луысал. Пияш - шузи. Но ведь со возьматыны турттӥз, нылашез яратэ шуыса. Оскытон понна дась вал кулыны но. Нылмурт - сволочь. Жаль, конечно, сое сокем зол жугизы шуыса. Мон туж кышкасько тышкам нылъёс шоры учкыны. Дискотекаосы ветлыкум адӟылӥ, кызьы нылъёс пиос понна жугиськылӥзы. Нош соос, пиос сярысь, кышкытгес жугисько. Киосазы мар сюрем кутыса, ог-огзылэсь йыръёссэс пильылыны дась. Мон но, Марина но адӟылӥмы ни сыӵе жугиськонъёсты. Ярам, дискотекаосы пиосын ветлылӥм. Соин ик умойтэм учыръёсы ӧм шедьылэ. 27 май". МИШАЛЭН ТЕТРАДЕЗ: "Толон училищеын урокъёс йылпумъяськем бере Лёшаен шур дуре мынӥмы. Пыласькыны кезьытгес вал, соин ик огшоры гинэ пукимы. Лёша вераз, училищеез куштыны малпа шуыса. Со воксё кыӵе ке мукет пияш, йӧспӧртэмгес. Атаез солэн - дышетӥсь, анаез - кырӟась. Лёша - визьмо пияш, трос тодэ но тунсыко маде. Только туж шыпыт со кыӵе ке, но пиос сое уг йӧтыло. Монэн эшъяськеменыз сэрен, дыр. Лёша ӟызы ке но, маиныз ке нылмуртлы укша. Киосыз лябесь, берпалыз бадӟым, гадьыз но пичияк мычиськемын. Синъёссэ со возьдаськыса кадь ӵемысь уллань лэзья. Туж куатаськись мар ке. Ымныр тусыз мудор азьын али гинэ вӧсяськем муртлэн кадь, синъёсыз чагыресь. Соос пушкын котьку марлэсь ке тодмотэмезлэсь кышкан каръяськемын. Лёшалэн номыре ватыса улэмез уг луы. Куке Потапов юаз, изиз ни-а Лёша кыӵе ке нылмуртэн, соиз шуиз: "Зэмзэ верасько - ӧй вал на". Мон Лёша азьын ноку жоб кылъёсын уг тышкаськиськы. Но малпасько, адямиос асьсэ понна трос арбериосты нималляло сыӵе кылъёсын, кудъёссэ книгаосын ноку уз печатлалэ. Мон, кылсярысь, куд-ог дыръя жоб кылъёсын гинэ малпаськисько. Соос котьку мынам йырам бергало, нош дневникам малы ке соосты уг гожтӥськы. Ми Лёшаен шур дурысь кошким. Кӧня ке калтыртӥмы на но, Лёша, трамвае пуксьыса, дор палаз ширтӥз. Мон урамын тыпак огнам кыли. Мар кароно? 27 май". ГАЛЯЛЭН ТЕТРАДЕЗ: "Туннэ валай, мон синмаськемын шуыса. Яратонэ артэ сылӥсь коркан улэ. Мон ӵемысь сое укно пыр яке балконысен адӟылӥсько. Со мынэсьтым ӝыны ареслы бадӟымгес, нимыз - Толя. Монэ соин Марина туннэ тодматӥз. Сашка, Марина но мон та пияш доры куное пырамы. Ми куинь ӟенелик портвейн басьтӥмы. Пичияк юэммы бере магнитофон кылзӥмы, собере калтыртыны кошким. Сашка урамын кык эшъёссэ туганъёсынызы пумитаз на, ваньмы ӵош куштӥськем юртъёс пала вамыштӥмы. . . . Куке но ми Маринаен татӥ ветлӥмы но куашкан калэ вуэм корка пырим. Со одӥг этажъем, пичи, нош мар вал пушказ азьвыл, нокин уг тоды ни. Выж вылын тамак пумъёс но бушатэм ӟенеликъёс костасько. Вуж но кырсьмем диван сылэ. (Ӵапак со вылын Марина кышномурт луэм). Нырысьсэ та коркае пырыкум, мыным туж кышкыт, соин ӵош ик тунсыко но вал. Собере котьку, та пала вуылыкумы, ми корка шоры учкылӥмы. Огпол адӟимы, кызьы солдат отчы кудӟем нылмуртэз пыртӥз. Соос час ортчыса гинэ потӥзы. Нылмурт викышъяз, кырсь синкылиосыз бам кузяз питыразы. . . Куштӥськем юртъёс вӧзтӥ ми шунды пуксьытозь калтыртӥмы. Собере доръёсмы пала кожимы. Экзаменъёс матэкто - дасяськыны кулэ. Мон дорам бертӥ, нош аслам номыр кареме уг луы. Пукисько, укное учкисько, Толяез адӟыны турттӥсько. Мынам ялан соин ӵош луэме потэ. Толон Андрейлэсь гожтэтсэ басьтӥ. Туннэ ик ответ гожтыны малпай вал, нош мар гожтоно? Мон ведь уг ни яратӥськы сое. Анаен вераськыны кулэ. Оло, кыӵе ке визь- кенеш сётоз? 28 май". МИШАЛЭН ТЕТРАДЕЗ: "Урокъёс бере мон Кулышев доры ветлӥ. Со милям "Негатив" группамылэн кивалтӥсез луэ. Туэ училищеез йылпумъя. Дышетскиз ньыль ар, нош табере валаз, солы крезьгурчилэн ужез юнгес кельше шуыса. Дышетӥсьлэн ужез сярысь кылэмез ик уг поты ни. Вадим гитараен туж усто шудэ, только вот кырӟа лябгес. Со туж умой пияш. Ачиз кынартэм но ассэ йӧно возьыны тырше. Туж яратэ кинэ ке сереме уськытыны, нош ачиз серекъяку, синъёсыз малы ке мӧзмытэсь луо. Мон Вадимлы "Плейбой" журнал ваи. Со отысь кыӵе ке фотозэ аслыз кельтыны турттэ. Журнал чибориё, Швециысь. Мон кык ар талэсь азьвыл сое одӥг пияшлэсь талай вал. Кулышев дорын мыным кельшиз. Солэн комнатаяз шкаф но валес гинэ сыло, нош укно дурын - магнитофон. Шкаф пӧртэм кассетаосын тырмытэмын. Вадимлы бускельёсын туж удалтэм. Магнитофон лэзьяменыз сэрен уг, пе, куарето. Куд-ог дыръя куаразэ будэтыны курыло, пе, нош гужем - укноосыз улын экто. Вадим мыным наушник пыр крезьгур кылзыны сётӥз. Крезьгурен кассетаез кылзыкум, мон азьын кыӵе ке воксё мукет дунне усьтӥське. Куд-ог дыръя со туж ик чебер уг луылы, озьы ке но, чылкыт. Со - мурт дунне, озьы ке но, асьмелы туж матын. Со пушкын ми кинлэсь ке улонъёссэс улӥськомы. Мурт улонъёс крезьгурын милемлы матын луо. Крезьгур быдэс сюлмам пыӵа, вань сэрегъёсаз солэн тулкымъёсыз вуо. Сыӵе сэрегъёсы но, кудъёсыз сярысь нокин уг тоды, кудъёсыз сярысь нокин уг малпа. Мон трос кырӟанъёслэсь кылъёссэс уг валаськы, но соос ноку монэ уг пӧяло. Мон шӧдӥсько соосты, оскисько соослы, мынӥсько крезьгуре сьӧры отчы, кытчы со нуэ монэ. Со гинэ тодэ, улэп кылё-а мон яке куло-а. Крезьгур весяк улоз! Мон - ӝыны даур пала гинэ. Но гурлэн тулкымъёсаз пыласькыкум мон кулонлэсь уг кышкаськы. Кулэм берам мон та крезьгур зарезьлэн пыдэсаз лэзисько но соку гинэ адӟыны быгато солэсь вань чеберзэ но кужымзэ. Мон яратӥсько крезьгурез. 28 май". ГАЛЯЛЭН ТЕТРАДЕЗ: "Туннэ Андрейлэсь гожтэт вуиз. Юа, малы мон уг гожъяськы? Туж мӧзмем ни мынэсьтым, лэся. Чидатэк витисько, пе, гуртысен пумиськон нуналмес. Жаля, мынам аресы ӧжытгес шуыса, а то кузпалъяськысалмы ни, пе. Ми Андреен гуртын тодматскимы. Мон отчы песянае доры ветлылӥ. Андрей со гуртын вордскиз, будӥз; со гуртаз ик армиысь но алигес берытскиз. Мон сое уг яратӥськы ни ке но, адӟоно вылэм, кыӵе со луэм. Солы кызь арес ни. Мон Андрей сярысь анаеным вераськи. Со ӧз лэзьы гожтыны, мон яратэмысь дугдӥ шуыса. Андрей, пе, йырзэ быдтоз, сыӵе гожтэтэз лыдӟиз ке. Соин сэрен мон одӥг гожтэт борды ньыль пол кутскылӥ. Гожтӥ. Туннэ ик ыстӥ. Только табере Чита пала ӧвӧл ни, Андрейлэн вордскем гуртаз. . . Толон уин мон Толя дорын вал. Мон со доры кошки, куке анай рос-прос умме усиз. Толя анай-атаеныз милям кадь квартираын улэ. Атаезлэн юылон сямыз вань. Анаез кыӵе ке заводын штукатур-маляр луыса ужа. Толя монэ комнатаяз пыртӥз. Ми вить час ӵукнаозь отын пуким. Со йырзэ пыдес вылам тырылӥз, нош чупамез одӥг пол но ӧз поты. Паймымон! Мынам син шорам йӧтӥз, со кыӵе ке но огшорыгес адями шуыса. Укмыс классэз гинэ йылпумъямын, рынокын грузчик луыса ужа, ӵем юылэ. Толяен рос-прос вераськыны но номыр сярысь. Пумиськылыкумы ми шыпыт пукиськом, ум вераськиське. 29 май". МИШАЛЭН ТЕТРАДЕЗ: "Мон валай, Толяез уг яратӥськы шуыса. Со чебер тусо, нош мыным уг кельшы. Солэн синъёсыз, кудъёсыз сомында нылъёсты шузимыто, мыным чилясь пияла кадь гинэ пото. Толялы вань нылъёс синмаськемын, нош со монэ гинэ яратэ. (Туннэ гинэ вераз ай). Чупаны медэ вал - мон палэнски. Уг быгатӥськы чупаськыны яратымтэ муртэн. Мон доры Марина пыраз - со пияно. Мар карыны уг тоды. Аборт лэсьтыны уг яра, шуэ. Со ваньмыз сярысь Сашкалы ивортэм. Соиз, пе, соглаш Маринаез кышно басьтыны. Табере эшелэн вань улонэз нылпи борды кугӟалоз. Дышетскон сярысь малпаськонэз ик ӧвӧл. Сыӵе ужъёс. 30 май". МИШАЛЭН ТЕТРАДЕЗ: "Туннэ урокъёс бере монэ но Вовчикез актовой залын выж миськытӥзы. Ми кык уроке ӧм ветлэ, нош со понна училищеямы одно кыӵе ке уж сёто. Выжез ӝогак миськимы но бертыны потӥм. Вовчиклэн дас манетэз вал. Эшшо дас манет школаын дышетскисьёслэсь шедьтӥм. Пиво басьтӥмы но парке кожимы. Кенер вамен потыса ватскимы сьӧрос сьӧры. Та интыез быдэс училище тодэ. Сьӧрослэн борддоръёсаз пӧртэм пиослэн но нылъёслэн нимъёссы, яратон сярысь, озьы ик кылъёс гожъямын. Суредъёс но вань. Мон уг валаськы, малы пиос таӵе умойтэм ужен выро. Соин ик, куке Вовчик пуртсэ поттӥз, мон солы номыр гожтыны ӧй лэзьы. Туж паймымон. Тани - Вовчик. Солэн чылкыт, чебер синъёсыз, бамъёсыз тыкыль- тыкыль, котьку ӵыжектэмын. Малпаны луоз, котьку ӝутӥськем температураен ветлэ шуыса. Сое курсамы но Маша шуыса нимало. Нош со али борддор вылэ кыӵе ке жоб кыл гожтыны ӧдъя вал. Умойтэм ук со. Вовчиклэн чебер синъёсаз учкиз ке, нокин но уз оскы, со ӵемысь лушкаське, пистолетысьтыз дыдыкъёсты ыбылэ но визьзэ ыштэм кудӟем мурт кадь жоб кылъёсын тышкаське шуыса. Нош курсамы со - староста. 30 май". ГАЛЯЛЭН ТЕТРАДЕЗ: " Али гинэ мон доры Марина но Саша пыразы. Мылкыды ик ӧвӧл ни соосын вераськыны. Ку гинэ эн лыкты, соос котьку али гинэ валесысь султэм муртъёс кадь луо. Сашка дыртыса дӥсяськемын, дэремез лэзиськемын, штанэз бирдыямтэ, ачиз пӧсямын, синъёсыз солань-талань бызьыло. Солэн учкемез туж кышкыт луылэ вал куд-ог дыръя. Тонэ синъёсыныз кыле кадь. Мыным возьыт ик луылӥз. Нош малы мон ветлылӥ соос доры, ачим уг тодӥськы. Марина но котьку одӥг халат коже, ымнырыз урод. Нош диван вылэ пуксиськод но, адӟиськод - шобрет погмамын, со вылын яке Сашкалэн плавкиосыз, яке Мариналэн маиз ке костаське. Кызьы меда соослы анай-атайёссылэсь уг йӧты? Сюан шудо! Нош Марина пияно ке ӧй луысал, мар соку? Озьы ик улысалзы ватскыса? Табере ӝоген нылпи коляскаен ветлозы ни. Кышкыт уйвӧт кадь та. 17 июнь". МИШАЛЭН ТЕТРАДЕЗ: "Понедельнике - нырысетӥ экзамен. Толон ӝыт мон доры Гена пыриз. Кияз тыро ӟенелик. Юаз, потэ-а мынам юэме? Конечно, потэ! Мынӥмы солэн ӵужкенакез доры. Гена мыным со сярысь вералляз ни. Вераз вал, ӵужкенакез туж усто кышномурт шуыса. Зина апай милесьтым кыдёкын уг улы, бускель урамын, коммунальной квартираын. Одӥг бускелез ӝыны арзэ ни Сарданысь эмъюртын ортчытэ, нош мукетыз, пинал воргорон, кунгож сьӧрын. Солэсь комнатазэ кышноез чакла. Квартира туж алама. Нырысетӥ этаж, выж сисьмемын, трубаос сурыкмемын, вияло. Душ ӧвӧл. Кырсь. Геналэн ӵужкенакез туж зол юэ. Азьвыл солэн туж умой квартираез вылэм городмылэн мукет районаз но воргорон, кудӥныз Зина апай улӥз, воштӥськыны косэм. Татчы лыктэмзы бере, воргорон шуак кытчы ке ышем. Табере Зина апай татын ик улэ. Анай- атаез сое мурт каро. Выжы-кумыосыз пӧлысь Гена гинэ ветлэ со доры. Но мон малпасько, со так уг ветлы шуыса. Куке ми лыктӥм, ӧсэз кематэк ӧз усьтэ. Собере кышномуртлэн кадь куара юаз: "Кин отын?" Гена нимзэ вераз. Ӧс усьтӥськиз. Ми азе потӥз тугаськем йырсиё кышномурт. Пересь но, мӧйы но шуыны ӧй луысал со сярысь. Ӵыжектэм ымнырыз шоры учкыса мон валай, Зина апайлэн аракытэк улэмез уг ни луы шуыса. Синъёсыз куке чагыресь вылӥллям, нош табере бездӥллям. Йырсиосыз миськымтэ, кыӵе ке курень буёлэн буямын. Одӥг азь пиньыз усемын. Зина апайлэн ымнырыз кисьмамтэ но сисьмыны кутскем помидорлы укшаз. Вот так ӵужкенак! Зина апай милемыз мылпоттэк пумитаз. Монэн сэрен, дыр. "Ваид. . . Малы сьӧрад ваид?.. Ветло олокинъёс но. . ." - нукыртӥз ас понназ. Со вылын вужмыны вуэм вож дэрем дӥсямын вал. Гена вералляз, со ӵужкенакезлэн яратоно дэремез шуыса. Зина апайлэн пыдаз уродос тӧдьы катаос кутчамын. Гена ӟенеликсэ возьматыса шуиз: "Зина апай, ми тонэ вордскем нуналэныд ӟечкыласьком, тани кузьым ваимы". Зина апай туж шумпотӥз но соку ик небӟиз. Ми комнатаяз пыримы. Отын воргорон но кышномурт пуко ни вал. Соос но алкашъёс, шӧдске. Воргорон мӧйы мар ке но, тушез мычымтэ, нырыз сьӧдэктэмын, ымнырыз кынмем картофка кадь ик. Киосыз улвайёс выллем мычиськемын. Со вылын вужмем милицейской штан но дэрем дӥсямын, шнурокъёстэк ботинка кутчамын. Кышномуртлэн йырсиосыз вакчи ӵышкемын, сьӧд буёлэн буямын. Тросэз пиньёсыз усьылэмын, нош ымнырыз вуюись кадь "пужыятэмын". Азьвыл со туж чебер вылэм шуыса адӟиське. Али шуак пересьмем нылашлы кельше. Бездэм вакчи дэремез пыдесъёссэ но уг ваты. Гена вераз, кышномуртлэн нимыз Валентина Степановна шуыса. Со кыӵе ке общежитиын сторож луыса ужа, лэся. Нош воргорон - Саша агай - грузчик. Гена монэ ваньмыныз тодматэм бере, ӝӧк сьӧры пуксимы. Мон котырме учки. Комната мынам сэрегелэсь пичигес вал. Буш. . . Валес, шкаф, ӝӧк, ньыль пукон - номыр мукетыз ӧвӧл ни. Ӝӧк праздниклы дасямын вал.Кастрюльын - пӧзьтэм картошка, тэркыосын - сылалтэм кияр, губи, чорыг. Мискаын кыӵе ке сӥль вал на. Озьы ик ӝӧк вылэ куать ӟенелик интыяськем: кык - водка, ньыляз - горд вина. Зина апай вераз, милемыз гинэ возьмало на вал шуыса. Саша агай рюмкаосты водкаен тырмытӥз. Юимы Зина апайлэн тазалыкез понна. Саша агай рюмкаосмес нош тырмытӥз. Юимы умой улон понна. Водка быриз. Мон ӵектӥ горд вина борды кутскыны. (Пичияк юисько ке, мон возьытме воксё ыштӥсько). Водка бере Саша агайлы горд вина ӧз мыны ни. Со ӝӧк вылэ ик ӧскиз. Зина апай сое "паразит" шуыса тышкаськиз. Нош мон малы ке но ангесаз мыжги. Кудӟеменым сэрен, дыр. Валентина Степановна ялӥз: вань воргоронъёс сволочьёс но кобельёс, пе. Саша агай, выж вылысь ӝутскыса, сое китӥз кырмиз ни вал, но мынам мыжгеме воргоронэз валес вылэ вуттӥз. Валя апай чагиськиз, туэ шулдыръяськыны но юыны уг ни быгато шуыса. Соку ми та кышномуртлэн пинал дырыз понна юимы на. Со куспын Саша агай пичияк сайкиськиз но ӝӧк сьӧры пуксиз. Мае ке валэктыны тыршиз, но сое нокин ӧз кылзы. Зина апай воргоронэз дораз келяны куриз. Солэн кышноез зэмос кион, пе. 1 Тамара Пантелеева Ма со сыӵе верос? Удмурт литературоведениын кема дыр ӵоже мынӥз эчешон: кызьы нимано проза амалэн гожтэм пичи произведениосты - очерк, верос, новелла? Удмурт литературовед Ф. К Ермаков шуэ: "Октябрь революция бере нырысетӥ аръёсаз удмурт проза кӧнялы ке бере кыле вал поэзилэсь но драматургилэсь". Прозаен гожтэ нырысетӥ веросъёс но зарисовкаос вал туж лябесь, примитивноесь, ӧй на вал нимысьтыз жанр вылтуссы. "Верос" термин удмурт литературае соку ик ӧз пыӵа. Тросэз гожъяськисьёс тыршизы лыдӟисез оскытыны, гожъямзы зэм шуыса, соин ик прозаен гожтэмзэс пусйылӥзы: "зэм учыр", "мадь", "мадён", "веран". Туала удмурт литератураын вормиз "верос" термин. Ма со сыӵе верос? Нырысь ик, туала ӟуч литературоведъёс пукто та жанр азе таӵе куронъёс: верос луыны кулэ быдӟалаезъя пичи, машинкаен печатласа 7-8 бам; со веросэз лыдӟисьлэн лыдӟемез мед потоз одӥг кутскемен; туж вакчи дыр куспын ортичьс учыръёсты возьматыса, писатель веросын ӝутэ троссэ лыдӟисьёсты сюлэмшугъяськытӥсь ужпумъёсты но соосты быдэстыны, улонэ пыӵатыын валэктэ. Соин ик веросэз шуо "мобильной", "боевой" жанр. Со сяна, пусйыны кулэ: веросын геройёсыз укыр лачак луыны уг быгато. Верос луэ сюжетэн яке сюжеттэм, философской мылкыдо яке малы ке но дышетӥсь "назидательной", яке огшоры ылкыдэз ӝутон понна гожтэм. Озьы ик пумисько ӟеч пумо но урод пумо, яке чик но йылпумъямтэ веросъёс. Озьы ӵемгес гожъяз ӟуч веросчи А. П. Чехов. Ӟуч писатель шуылоз, пе, вал: "верос гожтӥды ке, куштэ кутсконзэ но пумзэ, малы ке шуоно, веросчиос тросгес пӧясько кутсконаз но пумааз". Нош Юрий Нагибин веросъёссэ гожъяны кутске вылэм пумысеныз. Лыдӟись ачиз малпаськыны кулэ: кызьы меда та веросын гожъям учырез азьланьтыны, йылпумъяны луоз шуыса? Куддыръя кык-куинь бамо веросын гожтэмын адямилэн быдэс улонэз, нош куддыръя 20-30 бам вылын возьмато кыӵе ке но вакчи дыр куспын ортчем учырез. Одӥгъёссэ веросъёсыз лыдӟыса, асьмеос адӟиськомы тодмо учыръёсты (фактъёсты), нош мукетъёссэ лыдӟыса вуиськомы писательлэн паймымон, малпам дуннеяз. Озьы висъяло реалистической но фантастической веросъёсты, яке отын улыны быгато фантастической элементъёсыз: вӧт, пӧртмаськон, синпӧет, ишан но мукет. Веросын вераськон мыныны быгатоз адями яке кыӵе ке будос, писпу сярысь, яке пудо-животъёс, оло нош, висёнъёс сярысь. (Сыӵе луэ Кедра Митрейлэн "Сурсву" веросэз, кытын аслаз секыт, курадӟыса улонэз вылэ ӝожтӥське, бӧрдэ пересь кызьпу. Сыӵеесь луо Ашальчи Окилэн куд-ог веросъёсыз: кылсярысь, "Культпоход", кытын асьсэ сярысь кайгырыса верало паласькись (инфекционной) висёнъёс). Ӵем дыръя веросын луыны быгатэ одӥг яке кӧня ке геройёс, озьы ик одӥг герой быгатэ герӟаны трос пӧртэм веросъёсты. Кылсярысь, удмурт калыкын паськыт вӧлмемын вал Алдар сярысь ымысь ыме, пельысь пеле ветлӥсь (устной) веросъёс. Та веросъёсын валтӥсь героез одӥг - Алдар. Котькудаз нимаз веросын герой пӧртэм учыръёсы шедьылэ но аслаз быгатонлыкеныз, визьмыныз огшоры адямилэсь данзэ узыръёс азьын ӝутыны пӧрмытэ. Сов еросъёсын мукет, ӟуч сямен вераса, второстепенной героййёс валтӥсь геройлэсь амало, шаплы, визьнодо луэмзэ яркытгес усьтыны яке действиез азинтыны гинэ юртто. Веросын темаез но пӧртэм луыны быгатэ: Ӟеч ужась адямиос сярысь, висён сярысь, чылкытлык улон сярысь, ишанъёс но периос сярысь. Гожъясьёс верало котьма сярысь: бадӟым но пичи ужъёс сярысь, со тунсыко но визьмо, быгатыса гинэ гожтэмын мед луоз. Огаз веросын вань мадисез, нош мукетаз со ӧвӧл. Таин валче ик веросъёсыз люко на: верос, кытын вань нимысьтыз мадисез (рассказчик). Сыӵе луэ Г. Красильниковлэн "Оксана" веросэз. Татын кык мадиськисьёсыз: егит но пересь пиосмуртъёс. Пересез егитэзлы маде, кыӵе учыр вал солэн вордскем гуртаз но ма луиз отӥяз. Егит мадись лыдӟись доры вуттэ пересьлэсь верамзэ. Та выллем произведениосты шуо "верос пушшкын верос" (рассказ в рассказе". Мадисьлэн (нырысетӥ лицолэн) нимыныз гожтэм веросъёс, луэм учыр сярысь верам сяна, со югдурлы дунъемт сётыны юртто: мадись вера соиз яке таиз ужпум шоры аслэсьтыз кызьы учкемзэ. Озьы ик пумисько Г. К. Красильноиковлэн веросъёсыз, кудъёсаз ӧвӧл нимыьстыз мадисез: верос азинтӥське куинетӥ лицолэн нимыныз яке нырысетӥ лицолэн нимыныз. Котькуд мед "нуоз" веросэз, но со луыны кулэ туэ тунсыко лыдӟись понна. Озьы ке ӧз луы одӥш мурт но произведениез пумозяз уз лыдӟы, солы со мӧзмыт, кулэтэм потоз. Писатель мед тыршоз возьматыны маке но выльзэ, мед оскытоз лыдӟисез, солэсь сюлэмзэ мед вырӟытоз. Верос - быдӟалаезъя пичи, вакчи бере, писатель малпаннзэ лыдӟись доры ӟечгес вуттон понна, тыршыны кулэ туж но туж быгатыса уже кутыны пӧртэм детальёсты. М. Зощенко шуылоз вылэм: "Деталь бордысь потэ тросэз, ваньмыз ке ӧвӧл". Деталь котьку но кутэмын луыны кулэ ас интыяз но валаса, со котьку но шонер мед возьматоз улонэз. Писатель утча, быръе, интыя сыӵе детальёсты, кудъёсыз юртто лыдӟисьлэн син азяз яркытгес пуктыны геройлэсь (персонажлэсь) образзэ (вылтуссэ, сямзэ). Произведенилэн авторез лыдӟисен кусып возе хужожественной кыл пыр. Кылтӥрлыкез ӟеч, лыдӟисьлы матын, валамон ке, сыӵе произведение лыдӟись доры сюрес чаляк шедьтэ. Веросын, деталь-а (адями котырысь арбериос) со, портретной характеристика-а (адямилэн вылтусыз но сямыз) со яке пейзаж (инкуазез суредан) - ваньмыз пырыны кулэ одӥг ӧре - мургес, ӟечгес усьтыны авторлэсь малпанзэ. Ӟуч прозаиклэн Юрий Нагибинлэн малпамезъя, "пейзаж - со котьку ик трос кылын инкуазь сярысь гожъям ӧвӧл, со быгатэ луыны одӥг но туж яркыт, ваньзэ воштӥсь деталь". Солэн ик верамезъя, тросэз литературоведъёс веросэз лдыъяло "ожмаськонысь разведкалэн туж ӝог шедьтэм но юн кулэ луись ивореныз". Кызьы адӟиськомы, версоэз ӵошато разведкаысь ваем иворен. Произведение аслаз "бамъёсаз" ӝутыны кулэ ожлудын кадь туж ӝог но сэрыт ортчись ужпумъёсты. Юрий Нагибин лыдъя: "Зэмос верос - со разведка но, ож тылӝу но огвакытэ ик, мукет сямен вераса, со темаез эскерон, утчаськон гинэ ӧвӧл, со кылтӥрлыклэсь вань чеберлыксэ уже кутыса быдэсак темаез усьтон". Озьыен, веросчи быгатыны кулэ пичи произведениын вань люкам, мур малпам ужпумез оскымон возьматыны. 1987-тӥ арын потэм литературно-энциклопедической словарьын верослы таӵе валатон сётэмын: "Рассказ, малая эпическая жанровая форма художественой литературы - небольшое по объёму изображенных явлений жизни, а отсюда и по объёме текста прозаическое произведение. В 1840-х гг., когда безусловное преобладание в русской литературе прозы над стихами вполне обозначилось, В. Г. Белинский уже отличал рассказ и очерк как малые жанры прозы - от романа и повести как более крупных. Во ИИ-ой половине ЪИЪ в., когда очерковые произведения получили в русской демократической литературе широчайшее развитие, сложилось мнение, что этот жанр всегда документален. Рассказы же создаются на основе творческого воображения. По другому мнению, рассказ отличается от очерка конфликтностью сюжета, очерк же - произведение в основном описательное. Существует еще одна разновидность прозаического жанра - новелла. Видимо, правильнее было бы понимать рассказ как малую прозаическую форму вообщее и различить среди рассказов произведения очеркового (описательно- повествовательного) типа и новеллистического (конфликтно-повествовательного) типа. Очеркового типа рассказы обычно включают "нравоописательное" содержание, раскрывают нравственно-бытовое и нравственно-гражданское состояние какой-то социальной среды, иногда всего общества. . . В основе новеллистического типа обычно - случай, раскрывающий становление характера главного героя. . . Именно "романического" типа содержание и порождает в рассказе новеллистического типа их острую конфликтность и быстрые развязки. Иногда новеллистическую форму строения сюжета писатель применяет и для выражения "нравоописательного" содержания". Верос но новелла огкадьгес, соосты ӵем дыръя ог-огзылэсь висъяны ик уг луы шуиськомы ке но, учёнойёс та жанръёслэсь пӧртэмлыксэс шӧдо. Литературалэн жанрез луыса новелла кылдӥз Возрождение вакытэ. ЪИЪ-ЪЪ дауръёсы та жанр паськыт вӧлмиз Европаысь литератураосы но. Уката ик новелла жанрез ӵем куто США-ысь писательёс (Эдгар По, Брет Гарт, О. Генри, Э. Хемингуэй но мукетъёсыз). Зэм, туала ӟуч, озьы ик удмурт, литератураын куд-огпписательёс новелла шуыса нимало повестез но. Малы? Угось быдӟалаезъя пичи, повествование амалэз уже кутыса гожтэм произведениын сюжетэз туж лэчыт, лыдӟисьлэсь мылкыдзэ бугыртӥсь луэ. Со сяна, новелла ӵемгес лыдӟись понна витьымтэ йылпумъянэн дугдэ. Юнме шат Гёте шуылозв ылэм: "новелла. . . выль, ноку адӟылымтэ югдур". Новелла быдӟалаезъя пичи но пуштросэзъя мур жанр шуиськомы, нош чылкак "выль, ноку адӟылымтэ" учыръёс туала гожъясьлэн, укта ие егитэзлэн, улоназ ӵем уг пумиськыло бере, номыр уродэз уз луы, дыр, одӥг адямилэн улонысьтыз одӥг-кык учыр сярысь кылтӥрлыклэсь вань чеберлыко амалъёссэ уже кутыса возьматэмез огшоры верос шуимы ке но. Удмурт литературоведениын верослы саклык висъяллязы тодмо учёнойёс но критикъёс: М. П. Петров, В. М. Ванюшев, А. А. Ермолаев, Ф. К. Ермаков, А. С. Зуеыва-Измайлова, Т. И. Зайцева но мукетъёсыз. Соослэн ужъёсыныщзы тодматыны быгатоды удмурт журнал но газет бамъёс пыр, озьы ик "Малые жанры прозы в литературах народов Поволжья и Приуралья" сборникысь научной статьяосты лыдӟыса. Ӟуч учёнойёслэсь лыдӟемды лоуз таӵе ужъёссэс: Эсалнек А. Я. Внутрижанровая типология и пути ее изучения, - ., 1985. - 282с. Шубин Э. А. Современный русский рассказ: Вопросы поэтики жанра, - Л., 1974. - 181 с. Чернец Л. В. Литературные жанры. Проблемы типологии и поэтики. М., 1982. - 192 с. Лейдерман Н. Л. Движение времени и законы жанра. Свердловск, 1982. - 254 с. Захаров В. Н. Поэтика рассказа // Захаров В. Н. Система жанров Достоевского. - Л. Изд-во Ленинградского ун-та, 1985. Добин Е. Сюжет и действительность. Искусство детали. М., 1981. Антонов С. П. Я читаю рассказ. М., "Молодая гвардия". 1973. - 256 с. Татьяна Пчеловодова "Тон эн кельты монэ огнаме. . ." Липетысь шапыкен лымыед шунаку, Нюкъёстӥ тудӟыса тулыс ву кошкыку, Ӝытъёсы уӵыед гуръёссэ кисьтыку, Тон эн кельты монэ огнаме. Та нялмыт бамалын ӵыж узы кисьмаку, Возь вылын жин! кусо куараос вазьыку, Бусыын сюрелась ю-шепъёс кырӟаку, Тон эн кельты монэ огнаме. Омырын ӵуж куаръёс бергаса усьыку, Луд ӟазег уллёед ӝож гурен лобыку, Палэзьпу горд весен кильтырес сылыку, Тон эн кельты монэ огнаме. Юг лымы луд вылэ поръяса пуксьыку, Ӟырт кезьыт жалятэк киосме кынтыку, Уйёсы муръёын тӧл шимес вузыку, Тон эн кельты монэ огнаме. * * * Ыштӥсько тонэ Ыштӥсько туннэ тонэ мон - Шӧдӥсько. Ыштӥсько туннэ тонэ мон - Валасько. Ыштӥсько туннэ тонэ мон - Тодӥсько. Ыштӥсько туннэ тонэ мон - Но уг бӧрды ни сюлэм. Ыштӥсько туннэ тонэ мон - Уг, уг пот ни синкыли. Ыштӥсько туннэ тонэ мон - Ӵок, огнам ке но кыли. Уг, уг утча мон тонэ - Сюркесэд аслад. Уг, уг ветлы мон сьӧрад, Учкыса уг кыль бӧрсяд. . . Ыштӥсько туннэ тонэ, Муспотон яратонэ. Ыштӥсько тунэ тонэ мон - Шӧдӥсько. Ыштӥсько туннэ тонэ мон - Валасько. Ыштӥсько туннэ тонэ мон - Ыштӥсько. * * * Уй куспын садамы льӧль макъёс Чебересь синъёссэс усьтӥллям. Яркытэсь, льӧль ӝуась бурдъёссэс Пӧсь шунды, дыр, ӵукна кенӝытъям. Пиштыло, ӝуало льӧль макъёс, Гомало ӝог кысӥсь пӧсь тылын. Тӥ понна яратӥсь сюлэмъёс, Огнунал гомало та чебер сяськаос. Тӧлӟыло ни туннэ льӧль макъёс, Ыр тӧлъя лэйкаса лобӟыло. Синъёсыз мальдытӥсь льӧль атлас кесэгъёс Котырысь музъемез шобырто. Тӧлӟыло, усьыло чебересь сяськаос. Ой, вакчи ук, вакчи даурзы. . . Ог-огзэс яратӥсь сюлэмъёс Весь но весь ас эшсэс утчало. * * * Дыртӥськомы уже Кӧня арзэ ни ӵук но ӝыт Та сюресэз мон лёгасько. Кӧня арзэ котькуд нунал Тонэ, тонэ пумитасько. Мон дыртӥсько уже, уже, Тон дыртӥськод уже, уже. Туж дыртыса ӟечъяськиськом, Мыд-мыд пала вамышъяськом. Кызьы ӧй адӟы та дырозь, Кыӵе чылкыт, кыӵе чагыр Тынад вылэм ук синъёсыд, Кыӵе мусо учко соос! Мон дыртӥсько туннэ уже. Тон дыртӥськод туннэ уже. Синмысь синме мур учкыса, Ай нырысьсэ ӟечъяськиськом. Кызьы ӧй адӟы та дырозь, Кызьы ӧй шӧд та нуналозь? Кызьы ӧй вала гажамдэ, Кызьы ӧй тод яратэмдэ? Мон дыртӥсько туннэ уже, Бурдъёс вылын кадь лобисько. Мон тодӥсько, мон тодӥсько. Туннэ тонэн нош пумисько. * * * Сюлмы туннэ но ӧпкеле, Сюлмы туннэ но кужекъя, Сюлмы туннэ но весь бӧрдэ Чик куаратэк, чик куаратэк. Будо, будо ук пиосыд, Ужан вуо ни пиосыд, Быдэ вуо ни пиосыд, Атайзытэк, атайзытэк. Вуттӥм, лэсьтӥм ни коркамес Ӟеч калыкен, ӟеч калыкен. Кӧня толзэ ни потӥськом Тонтэк, тонтэк, тонтэк. Лобо, кошко ук аръёсы Котькуд нунал, котькуд нунал. Тӧдьы нюжа ни йырсиям. . . Нош тон пинал, сыӵе пинал. * * * Изелэ, мусоосы. Изь ни, изь, мусо нылы, Кынь чимыостэ. Мунёед ини жадем Шып гинэ умме усем. Изь ни, изь, шаян пие, Шобырты кикыостэ. Гондырпиед кемалась Адӟе ни уйвӧтъёстэ. Изь ни, изь, чебер нылы, Пон йырдэ миндэр вылад. Мунёед ини бордад Ӟыгыртӥськем шыпытак. Изь ни, изь, етӥз пие, Шутэтскы ни ӧжытак. Луд кечпи но жадьыса Ланьырскем тӥни вӧзад. Изе ни, нылпиосы, Изе ни, мусоосы. Будылэ тӥ сюлмоесь, Луэлэ тӥ визьмоесь. Яратон, яратон, мар меда сыӵе тон. . . Туннэ вераськонмы луоз яратон сярысь. Нош мар со яратон? Кин солы валэктон сётоз. . . Со адӟыны луонтэм маке бере, озьыен, со шӧдон пыр гинэ адями доры вуэ. Яратон кылэз пӧртэм сямен валаськомы. Тросэз кырӟанъёс но та кылэн герӟаськемын. Тэтэ карыкумы анай-атаез но шудонъёсты яратоно, бӧрысь, улонэз паськытгес адӟемъя, та верам кылъёс бере мукетъёсыз ватсасько на. Нош быдэ вуэмъя яратон сюлэмез гомӟытэ. Та сярысь ик милемлы гожтэ Можга ёросысь Карашур гуртысь Ольга Михайлова но. Олялэсь гожтэм ужзэ шумпотыса сётӥськомы. Нылашлэн журнал бамъёсамы печатласькон сярысь осконэз пичигес ке но вылэм, дӥсьтонлыкез солэн тырмем: пӧрам ужзэ ми доры келям. Егит гожъяськисьёсмылэсь ужъёссэс ми гажаса но туж шумпотыса печатланы тыршиськомы, уката ик публицистикаез, туала улон шоры лэчыт синмын учконэз. Олялэн сямен тросэзлэн мед луоз вылэм таӵе дӥсьтонлыкез, соку асьмеос, лыдӟись эшъёсмы, журналмес эшшо узырмытомы (со тӥ понна потэ), ог- огмылэсь синъёсмес усьтомы, ӝоже усем мылкыдмес буйгатомы, озьы ик визь-кенеш сётыны тыршоме. Ойдолэ журнал пыр эшъяськонмес юнгес кароме. Яратон. Со мон сямен сюлмаськон, малпаськон луэ. Шонер валэктон сётыны солы туж шуг. Но яратонтэк адями улыны уг быгаты. Улонын со пӧртэм луэ. Яратыны луэ дуннеез, вордӥськем интыез, дуно муртэз, анай-атаез. Мон понна самой чылкыт но чебер яратон егит ныл но пи куспын. Сыӵе шӧдонэн пумиськизы Натӥен Саша но. Та учыр сярысь ачиз Натӥ вераз мыным. "Со вал август толэзь. Ӝыт салкымгес лэмын вал ини. Тӧл но пуксемын. Инбамын одӥг пилем но ӧвӧл. Куаръёс уг выро. Котыр шыпыт. Ваньмыз кӧлэ кадь. Милям гинэ Сашаен кылӥське сипыртэммы. Тӥни соку ик мон доры вуиз нырысетӥ яратон. Шӧдтэк шорысь лыктэ вылэм со. Кема сылӥм ми ог-огмы шоры учкыса. Сашалэн соку синъёсыз чиль-чиль чилязы, соос быдэсак яратонэн пачылмемын вал. Трос шунытэсь кылъёс верамез бере со шуиз на: "Мон кемалась турттӥсько ини вал. . . Натӥ, мон тонэ. . . яратӥсько". Сашалэн чебер ымдуръёсыз йӧтскизы мынамез борды. Со монэ ӟыгыртыса ӧй ке возьысал, соку ик лопыръяськыса инбаме лобӟысал, дыр. Соин ӵош мыным котыр дунне но кулэ ӧвӧл ни. Котырысьтым дунне кытчы ке вые но ыше кадь. Йыр вадьсын кизилиё инбам. Сюлмын сыӵе капчи, умой. Ӧй вал, уз но луэ ни кадь нокыӵе сюлэмшугъяськонъёс, ӝожомонъёс. Нырысетӥ яратон, нырысетӥ чупаськон. . . Котькуд нунал ми соин адӟиськылӥм. Шур дурын пукылӥм, кырӟаллям, ог-огмылы муспотон кылъёс вералляй, инбамысь кизилиосты лыдъяллям. Ортчылӥзы нуналъёс, арняос. Та толэзь куспын кӧня шумпотонэз, умоез вал. Одӥг пол ми Сашаен туспуктэм вылэ пуксим. Мон Саша азьын сылӥсько, солэн киосыз монэ ӟыгырто. Кыкнамылэн ик синъёсмы тырмемын шудо яратонэн, шумпотонэн. Куке но мынам песянаелэсь кылэме вал, туспуктэм вылэ яратоно пиеныд пуксьыны уг яра шуыса. Вожъяськись адямиос син уськытозы, пе. Соку мон та калык веранъёсты чик пелям ӧй поны, малы ке шуоно, сокем зол выемын вал яратон дуннее. Тӥни со туспуктэм вылэ пуксем бере, шулдыресь нуналъёс зэмзэ но кема ӧз кыстӥське ни. Кызьы лымы пырыос шуныт киын шунало, сылмо, озььы ик со нуналъёс но ӝог гинэ быризы. Школаысь тросэз нылъёс Сашалы синмаськемын вал. Мугорын но, тусын но угось учкымон пияш со. Шорамы вожъяськыса учкылӥзы. Собере шуак кусыпмы сӧриськиз, ӝытъёсы но Саша мон доры ӧз ни ветлылы. Чилясь синъёсыз бездӥзы, яратонэз но уг ни шӧдӥськы. Адями син азьын воштӥськиз. Озьы ке но, котькуд нунал мон яратонме возьмай. Нош со ӧз вуы ни. Песянаелэн туспуктэм сярысь верамез зэмаз. Яратонмы шуак сӥялскиз, шорияк пилиськиз. Нош одӥг пол дискотекаын ачим адӟи, кызьы Саша ӟыгырскыса но кильтръяськыса Дина нимо нылын ветлэ вал. Тае адӟыса, мынам интыям ик пыдъёсы шальтразы. Соку син азям бус вӧлскиз, номыре но уг валаськы ни. Ваньзэ тодэ вайыса, кема сылӥ на мон одӥг интыям. Йырам бӧрсьысь бӧрсе юанъёс лыкто но лыкто, сюлэмез бугырто: "Малы Сашалэн сыӵе ӟырдыт яратонэз туж ӝог кысӥз?" Берло гинэ мон тодӥ, Дина Сашалэсь йырзэ шузимытэм шуыса. Со мон сярысь оломар но уродзэ верам. Саша, пе, монэ дорозям келя, нош мон гуртэ пырытэк мукет пиен калгисько на. Кызьы Саша оскиз та супыльтонъёслы? Сыӵе уродэсь кылъёсын кысыны быгатӥз пӧсь яратӥсь сюлэмзэ. Паймисько! Собере мон валай ини Сашалэсь кыӵе вылэмзэ. Со ваньмызлы но котьмалы оскись, визьнодтэм, мукетъёссэ мыскылляны яратӥсь адями. Та учыр бере, пӧсьвуаськыса но куректыса, мынам синъёсы усьтӥськизы. Яратон пыр мон адямилэсь сямзэ тодыны быгатӥ, со пыр трос визь люкай. Тау Сашалы визь-нод сётэмез понна ке но". Виталий Самигулов Удмурт фольклорын ведӥнъёс сярысь сюжетъёс . . . Пичи дырысенымы ик асьмеос ваньмы яратыса кылзӥськомы выжыкылъёсты, мадиськонъёсты, малпаськиськом пословицаослэн дышетонзы вылын, паймиськом удмурт калык кырӟанъёслэн сюлэмез шунтӥсь крезьгуръёсызлы. Вашкала дырысен даурысен дауре, одӥг поколениысен мукетаз выжыса, асьме доры вуэмын калыкмылэн поэтической искусствоез. Со - калыклэн устной художественной творчествоез - фольклор. Фольклор олокӧня дауръёс ӵоже адямиез улонлы дышетӥсь вал, даурысен дауре выжылӥзы солэн визьбурез, философиез, этикаез; со дышетӥз калыкез кужмо, сэзь, юн но ог-огедлы лякыт, юрттӥсь луыны. . . ЪИЪ-тӥ - ЪЪ-тӥ дауръёсын удмурт фольклорез эскерон но люкан удысын ужазы кунгож сьӧрысь ӟуч но удмурт тодосчиос. Печатламын вал трос научной ужъёс но книгаос, кудъёсыз сӥземын кырӟанъёслы, выжыкылъёслы, пословицаослы, поговоркаослы, легендаослы, преданиослы. . . Соос пыр-поч эскеремын ни, сётэмын научной дунъет. . . Но вань на удмурт фольклорын жанр, кудӥз туж ӧжыт эскеремын но люкамын. Со - ведӥнъёс сярысь сюжетъёс. Соос но ымысь ыме, одӥг поколениысен мукетаз выжо. Озьыен, со мадёсъёс фольклорлэн одӥгез жанрез луо. Ведӥн шоры но кык синмын учкыны луэ: фольклористлэн но аномальной явлениосты эскерись тодосчилэн синъёсынызы. Нырысетӥез эскере веросъёсты, мадёсъёсты, соослэсь поэтиказэс, кылзэс, зэмослыкез вылэ пыкиськытэк; нош кыкетӥез ужаз кутэ пӧртэм приборъёсты, датчикъёсты но тырше пӧртэм тодмотэм но кышкыт явлениосты наука ласянь валэктыны. Пусъем потэ сое но - туж секыт но пумозяз эскерымтэ тема, малы ке шуоно, калык ведӥнъёслэсь кышкалляса улӥз, соос сярысь трос вераськыны ӧз дӥсьты. Революцилэсь азьло ведӥнъёсты черк зӥбыса возиз, нош собере, атеизмен сэрен, со сярысь вераськыны-гожъяськыны ӧзгес лэзьылэ. Собере, ӧвӧл теоретической база - ӧз печатлаське нимаз монографиос, та - пумозяз вуттымтэ уж но троссэ выводъёсты лэсьтоно луэ асьме малпаммыя гинэ. Фольклорысь эпосэз эскерим ке, та темаез пыртыны луэ выжыкылтэм прозае (несказочной) но солы матысь луо преданиос, легендаос, тужгес но быличкаос. Та проза выжыкыллэсь кӧня ке тодметъёсын висъяське, валтӥсез - зэмос вылэ пыкиськон. Мадись мурт тырше кылзӥсьёссэ мадёсэзлы оскытыны. Адямилэсь пӧртэм "сьӧд кужымъёсын" (Нюлэсмуртэн, Вумуртэн, Палэсмуртэн. . .) пумиськемез сярысь веросъёсты быличка шуо. Быличка возьматэ адямилэсь валэктыны луонтэм инкуазь явлениослэсь кышкамзэ. Легендалэсь со висъяське али вакытэз (азьлозэ ӧвӧл) суредаменыз, отын трос дыръя вераське сыӵе учыр сярысь, кудӥз луиз асэныз верасен яке солы туж матысь но тодмо адямиосын. Быличкаослэн вань асьсэлэн нимысьтыз поэтичностьсы но аспӧртэмлысы. Туж быгатыса кутӥзы соосты аслаз "Бежин луг" веросаз И. С. Тургенев но пӧртэм повестьёсаз Н. В. Гоголь. Ведӥн сярысь сюжетъёс выжыкылэн ӵошатыку, фольклорын кема уг "уло". Революцилэсь азьло мадёсъёс ӧвӧл ни. Та югдурез валэктыны луэ тазьы. Выжыкылъёслы асьмеос ум ке но оскиське, шумпотыса кылзӥськом. Нош ведӥнъёс сярысь мадёслы одно ик осконо, ӧд ке оскы, со выжыкыллы пӧрме. Мадись со сюжетэз яке адӟем, яке солы анай-атаез, я песятаез вераллям. Соин но ведӥн сярысь веросъёс кык-куинь поколение ортчыса зэмослыксэс ышто, малы ке шуоно, быро адӟисьёс (очевидецъёс, свидетельёс) но соос фольклорысь ышо. Соиз но вань, сое гожъяса кельтӥсьёс но ӧвӧл. Ведӥнъёс сярысь сюжет мадьыку, валтӥсь куронлык луэ зэмос вылэ пыкиськон но кылзӥсьёсты оскытыны тыршон. Соин но, фольклорной яке диалектологической материал люкаку, умойгес луэ шедьтыны сыӵе учыръёсын мадёсъёсты, кудаз луо трос участникъёс, адӟисьёс но соос мадем учырзэс юнматыса вераны быгато. Нош одӥг кузя гинэ адямиен луэм учыръёсты люканы тыршоно ӧвӧл, дыр, - сюжетъёссэ со ошоры но малпаса вераны быгатэ. Табере выжом ведӥнъёс вылэ. (Камсьӧр удмуртъёс "ведон" шуо). Кин бен со сыӵе? Пӧртэм тодосчиос сое ас сяменызы валэкто. Тодмо ӟуч фольклорист Т. В. Цивьян гожтэ: "Ведӥн - со сыӵе адями, кудӥзлэн вань вылӥ, мукет адямилы сётымтэ быгатонлыкез но, тодон-валанэз но, со сяна, со туж матын луэ адями статуслы". Удмурт тодосчилэн но фольклористлэн Г. Н. Шушаковалэн валэктэмезъя, ведӥн - со лулзэ быдэсак шайтанлы, пеймыт кужымъёслы сётӥсь адями; со туж кышкыт кужым, олома но уродзэ лэсьтыны быгатэ. Озьыен, ведӥн со адями, кудӥз быгатэ инкуазьлэсь аслэсьтыз законъёссэ сӧрыны яке воштыны, кудӥзлэн луо юрттӥсьёсыз - шайтанлэн сьӧд кужымъёсыз. Ведӥнъёслы сётэмын вылӥ, валэктыны луонтэм визьлык, азьпалзэ адӟон, поэтической творчество, веднаськон кылъёсты тодон, тунатскон, эмъяськон. . . Ведӥнлэсь сьӧд ужъёссэ, урод лэсьтэмзэ наукаын малефиций шуо. Малефицицй - со сьӧд магия яке веднаськон но шайтанлэн кужымез пыр адямилэн тазалыкезлы, улосэзлы яке ваньбурезлы изъян лэсьтон. Ведӥн - со сыӵе ик адями, со улэ асьме пӧлын ик, асьмелэсь со номырин но уг висъяськы кадь: озьы ик дӥсяське, ужа, сие-юэ, дырыз ке вуэ - кулэ. Но адямиослы урод лэсьтон - соослэн улосазы валтӥсь куронзы. Умойтэм уж ӧз ке лэсьтэ, ведӥнъёслы улыны секыт, ӝокыт но чидантэм луэ. Ведӥнъёс асьсэлэсь магической быгатонлыксэс, профессиональной устолыксэс огшоры шӧдтэк шорысь яке генетически уг басьто, соос сыӵе сюрес малпаськыса быръё, дышетско, лыдӟо тупась литература (ӵемгес "сьӧд книга"). Озьыен, вераськон мынэ ведӥнлэн "профессиез" сярысь. Котькуд профессия сямен ик, солэн аслаз удысаз тодон-валанлыклы нимысьтыз куронэз вань, соос "тодӥсьёс", соин ик висъясько калык пӧлысь. Пиосмурт но, нылкышно но ведӥн луыны быгатэ; нылпи но, мӧйы но калык; котькыӵе социальной удысысь адями. Нош кыӵе ужась адямиос ведӥн луо? Ӟуч фольклорын ӵемгес пумиськыло пастух, вукочи, мушкась, гур поттӥсь, плотник, дуриськись, першал. . . Финн-угор калыкъёслэн но ӟуч калыклэн ноку ведӥн уг луы музъем ужась адями (земледелец). Ведӥнъёсты сьӧд ужъёссыя таӵе группаослы люкылыны луэ: 1)Бертылӥсьёс (шайгуысь), 2)Берытскисьёс(пудо-животлы яке лултэм арберилы пӧрмисьёс), 3)Чер, висён сётӥсьёс но адями кусыпъёсты сӧрисьёс. Ведӥн син уськытэ ке, адями черла, висьыны усе. Со понна ведӥн сӧроно муртсэ ушъяса но лэсьтыны быгатэ. Куд-ог дыръя огшоры шораз учкем но тырме. Туж ӧжыт эскеремын на мукет адямилы, тылобурдо-пӧйшурлы яке лултэм арберилы берытскись ведӥнъёс (оборотни). Калыкын та оскон туж юн но кема кыстӥськись вал. Али но шедьыло на сыӵе адямиос, кудъёсыз юн оско берытсконлы. Верамзэс юнматон понна соос гурт нимез, интыез, адӟись-кылӥсьёсты нимало. Трос дыръя мадись вероссэ тазьы йылпумъя: ". . . Со али но улэ на, со асьме пӧлын, но кинзэ мон уг вера". Ведӥнлэсь адями вылтуссэ воштэмзэ наукаын реинкарнация шуо. Реинкарнациен герӟаськем мифъёс вашкала дырысен ик вань ини. Со сярысь гожъямзэс асьмеос лыдӟыны быгатӥськом Геродотлэсь, Платонлэсь, Гомерлэсь, Вергилийлэсь, Овидийлэсь. . . Ведӥнъёс вылтуссэс вошто асьсэ мылкыдзыя, озьы ик соос быгато огшоры адямиез кужмысь пӧйшурлы яке арберилы пӧрмытыны. Куд-ог дыръя ведӥн одӥг пол гинэ ӧвӧл, трос пол но берытскылыны быгатэ. Тодамы ваём, кылсярысь, вашкала "Слово о полку Игорове"-ысь князь Игорез. Нырысь ик со ӵӧжмерен (горностаен) шашы пушкы тэтче, тӧдьы ӵӧжен пуксе ву вылэ, вал вылысь кионэн тэтчыса ваське но собере ӧрӟиен ӝутске лыз инме. Ӟуч фольклорын ведӥн ӵемгес кионлы, гондырлы но коӵышлы берытске. Удмурт фольклорын пумиськыло коӵыш, пуны, парсь, кеч, ош, ӟазег, ӵӧж пӧйшур-тылобурдоен герӟаськем сюжетъёс. Удмурт фольклорын но, ӟучаз но реинкар - нация дыдыкен уг пумиськы. Дыдык сярысь малпан ӵемгес герӟаське лул, улон но Святой Дух валатонъёсын. Ведӥнлэсь пӧйшурлы берытскемзэ (реинкарнацизэ) зооморфной шуо. Трос пумиськыло мадёсъёс, кудаз ведӥн коӵышлэсь вылтуссэ басьтэ, сыӵе берытсконэз элюрантопия шуыса нимало. . . . Кык егит пиос тракторен кыскыса куро скирда нуо вал. Шӧдтэк шорысь азязы бызьыса коӵыш потэ. Гуртын ке луысал, номыр но ӧвӧл кадь, нош татын - бусы шорын, толалтэ*.. Пиос сое улляса но, кышкатыса но утчаллям, коӵыш бызьыса берен, пе, трактор азе потэ. Соку тракторист сое кӧня ке пол вакчи ломен шуккем, собере гинэ кесяськыса пегӟем. Нош ӵуказеяз одӥг песянай (сое ведӥн шуо вал) юн висьыны усем, киосыз но, пыдъёсыз но, пе, сӧсыртэмын. Ачиз ик верам, трактористъёс жугизы шуыса. Ведӥн тылобурдолы но берытскыны быгатэ, сыӵе луонлыкез орнитоморфной реинкарнация шуо. . . . Егитъёс сьӧр гуртысь шудонысь берто. Нуналлы быдэ азязы тӧдьы ӟазег, пе, потэ. Улляло, нош со уг но кышка. Ӵуказеяз одӥгез пияшлэн атаез со тылобурдоез кутыса дораз вайыны косэм. Озьы ик кариллям. Уйшоре бертыкузы со ӟазег нош ик азязы потэм. Егитъёс тылобурдоез кутӥллям но со егит пилэн атаез доры нуиллям. Корказ пыртӥллям. Атаез изе ни вылэм, султэм но со ӟазег азьын пурт шерыны кутскем. Ӟазег мае ке шӧдыса сямен мозмытскыны, пе, выре, нош пияшъёс сое эшшо но золгес кырмиллям. Соку тылобурдо шӧдтэк шорысь адямилы берытскем но шуэм: "Ну, кутӥд тон монэ, Сандыр". (Нимыз воштэмын). Собере дыртытэк гинэ потыса кошкем. Егитъёс ваньзы но сое тодмаллям, со вылэм асьсэ гуртысьтызы ик огез воргорон. Та учыр бере уйшоре урамын тӧдьы ӟазег адскылымтэ ни. Удмурт фольклорын ведӥнъёс ӵемгес дор пудо-животлы берытско, нюлэс пӧйшуръёслы туж шер. К. Гердлэн удмурт калык мадёсъя гожтэм "Кык гондыръёс" выжыкылаз, кылсярысь, кызьпу кӧттырмостэм пересьёсты гондыръёслы берыктэ. Куд-огез ведӥнъёс тылобурдо-пӧйшурлы гинэ ӧвӧл, будослы (фитоморфной реинкарнация) яке лултэм арберилы но берытскыны быгато, но со арбери луло выллем луэ. Таӵе пӧртмаськонэз фольклористикаын эманация шуо. Ведӥнъёс ярато бугорлы, веньлы, питранлы, зундэслы, ӵужонлы берытскыны. . . . Егитъёс ӝытазе клубысь шулдыръяськыса берто вылэм. Шӧдтэк шорысь азязы омыретӥ лобыса ӵужон потэ но поръяны ӧдъя, тэтча, шудэ. Егитъёс сое кутыны курадӟо, нош ӵужон эшшо но золгес тэтча, пегӟе. Мырдэм сое кутӥллям но номрылы ярантэм тӥяллям. Нош ӵуказеяз одӥг ведӥн кышно кулон калэ вуэм, губырскем, пересьмем, ӟустари выллем кылем. Куд-ог дыръя ведӥнлэн кыӵе ке арбериез пыр огшоры адямиен но реинкарнация ортчыны быгатэ. . . . Кык агай-вынъёслэн пинал кышнооссы ошмес дуре вулы мыно вал. Соос адӟизы бусыысьтызы ю-нянь пушказы ыжъёс пыризы шуыса. Соку огез нылкышно (со ведӥн вал) ву карнанзэ куштӥз, со вамен вамыштӥз но, кионлы пӧрмыса, ыжъёс пала бызиз. Кыкетӥез но кышномурт озьы ик кариз - кионлы берытскиз. Ведӥн нош ик адями луиз, нош эшез ӧз ни быгаты. Удмурт фольклорын озьы ик трос инты басьто сюжетъёс, кудъёсаз сопал дуннеысь тапал дуннее ведӥнъёс бертыло. Со адӟисьёс вералляло, кызьы соослы пумиськылӥллям улэп кадь ик адямиос, кудъёсыз азьло кулэмын ни вылэм. . . . Одӥг воргоронлэн кышноез висьыса кулӥз. Атаез вӧзы пичи нылыз гинэ кылиз на. Кӧня ке толэзь ортчыса соос уйшоръёсы изьыны ӧз быгатылэ ни - корка сигын кӧшкемыт вузэм, бӧрдэм куараос кылӥськылыны кутскизы. Воргорон ӧз чида ни, одӥг нунал эшъёссэ уйшоре дораз ӧтиз. Корка сигын кӧшкемыт куара кылӥськем бере ик, тӥръёс кутыса, ӝогак отчы тубизы но нылкышноез кырмизы. Со вал корка кузёлэн кузпалыз. Киосыз йӧ кадь кезьыт, синъёсыз пеймытын чиляло, дӥсез сыӵе ик, кудӥныз сое ватӥзы. Нылкышно бӧрдыса сюлворыны кутскем, мозмытыны курыса, азьпалан бертылонтэм кылзэ сётэм. Воргоронъёс асьсэос но кышкаллям, ведӥнэз мозмытӥллям. Азьпалан со дораз бертылымтэ ни. Тросэз тодосчиос пусъё ӟуч калыклэн но финн-угор калыкъёслэн фольклоразы бертон мотивлэсь ог-огзылы быдэсак тупамзэс. Тодмо финн тодосчи - фольклорист Л. Симонсуури кулэм муртъёслэсь бертылэмзэс тазьы валэктэ: соос бертыло улэп дыръязы урод утялтӥзы шуыса; берто кинлы ке пунэмзэ берыктыны; ӵыжы-выжыосыз обидеть каремзы понна; берпум куронзэс кылзымтэзы понна; аслэсьтыз дӥсьсэ яке арберизэ басьтон понна; семьяез сярысь сюлмаськыса, нылпиосызлэсь мӧзмыса; йылпумъямтэ ужъёссэ быдэстыны. Калыклэн верамезъя, "бертылӥсь" категориез кылдыто: 1) кин аслаз кулонэныз ӧз кулы. 2) кинлэн юн на гердэз улэпъёсын. Кин ас "пайзэ" ӧз басьты - кылсярысь, кузпал - карт, нимтул, крещение, сопал дуннее сӥлы-дано келян. 3) кин улэп дыръяз сьӧд кужымъёсын кусып возьылӥз. Та персонажъёслэн группазылэн аспӧртэмлыксы вань: соос урод ужъёссэс асьсэлэн семьязылы, ӵыжы-выжыоссылы, тодмооссылы пумит лэзьыло. Сое шуо "асладъёсыд доры ветлон мотив". Берытскись но бертылӥсь ведӥнъёс финн-угор фольклорын но, удмурт фольклорын но азьмынӥсь жанръёс луо. Кызьы адӟиськом, ведӥнъёс калык понна кышкыт кужым луо. Адями вашкала дырысен ик сьӧд кужымен нюръяськыны, солэсь утиськыны тыршиз. Кыӵе бен со амалъёс? Малефиций лэсьтӥсь адямиез калык пӧлысь вылтусызъя нимаз висъяны туж шуг. Калыкын верало, соосты, пе, чилясь синъёссыя тодманы луэ. Ведӥн ноку но вераськисезлэн синмаз шонерак уг учкы. Куддыръя солы пумит дасям арбериез ке шӧдэ, сюлэмшугъяськыны кутске но адямиослэсь со ведӥн луэмзэ тодмало. Кылсярысь, корка пушкы пырем адямиез ведӥн-а, ӧвӧл-а шуыса эскерон понна, ӧс йылэ палэзьпу вай поно. Со ванен ведӥн ноку но уз поты ни, нош огшоры адями - потоз. Б. Мункачи удмуртъёс пӧлын ужакуз гожтӥз: "Ведӥнлы ӝӧк сьӧрысен палэзьпулэсь лэсьтэм пуньы сёто, соин со сиыны уг быгаты, пуньызэ юри выж вылэ уськытэ но мукет пуньы куре. Озьы со ассэ шарая. . ." Ведӥнэз кышкатон понна, корка пушкын, кытын со луоз, пурт поттоно но сое бышкалтоно укно рамае, ӧс янаке яке ӝӧклэн улӥяз. Ведӥнъёс туж кышкало бышкись но вандӥсь тӥрлыклэсь. Ӝӧк сьӧрысен солы тыр нянь сётӥд ке, уз сиы, мукет шоремзэ куроз. Тросэз кышкыт учыре шедем адямиос верало, ведӥн, пе, кышка Инмарлы шара вазиськемлэсь, (кылсярысь, "Осто, Инмаре, юртты мыным. . ."). Тыл - одӥгез ведӥнъёсты кышкатӥсь бадӟым кужым. Со ваньзэ но сутэ - ассэ ведӥнэз, (вашкала дыръя соосты бадӟым тылпу вылын ӝуато вал) солэсь книгаоссэ, арбериоссэ но ваньбурзэ. Доразы бертылӥсь ведӥнъёслэсь утисько шайгу пасяз яке пыд палаз пипу, палэзьпу боды бышкалтыса. Ӧс йылэ чигем вень ке понӥд, ведӥн пырыны но, потыны но уз быгаты ни. Пельтэм вень, ӟуч вень (булавка), нунылэн кияз керттэм азвесь коньдон но ведӥнъёсты кышкатэ. Малы ведӥнъёслы пумит нюръяськонын быдӟым инты басьтэ палэзьпу? Финн-угор калыкъёслэн та писпуэз сӥлы каремзы сярысь трос мадёсъёс люкамын. Кылсярысь, "Калевала" эпосын ик, пожар бере "ваньмыз но ӝуаса быре, кылё на изъёс но палэзьпу гинэ". Сариола дэмла аслаз нылызлы: "Кушты тылэ палэзьпулэсь улвайзэ, ӝуаты сое. Улвай пумтӥ вир ке вияз - асьме вылэ ожен лыкто, нош ву ке вияз - тупаса улон но эрик возьмало". Финн-угор калыкъёслэн палэзьпу луэ туж бадӟым магической атрибутсы. Волга котырын улӥсь калыкъёс лыдъяло вал палэзьпу улын ноку но уз ӵашйы шуыса; палэзьпулэсь кирос нуллӥзы, нош кулэм муртъёс бертылон уй дыръя юртъер борды палэзьпу улвай бышказы. Ведӥнъёсты уг яра сураны пелляськисьёсын но туночиосын, удмурт пелляськисез азьло ведӥн радэ ик ке но пырто вал. Ведӥн котьку но адямилы урод уж лэсьтэ (сьӧд магия), нош пелляськись но туночи трос дыръя адямилы юрттыны тыршо (тӧдьы магия), урод уж ке но лэсьтыны быгато. Туннэ огез ассэ шуэ "экстрасенс", музонэз - меӵак ведӥн, куд-огез - туно-пеллё. . . Адямиос но пӧртэм синмын учко соос шоры: огез соослы уг оскы, кыкетӥез карга, куинетӥез кышка. . . Нокызьы но уг луы соосты одӥг аршинэн мертаны. Нимаз вераны кулэ сое но: удмуртъёслэн веднаськон-пелляськон амалъёссы, вань финн-угор выжыысь калыкъёслэн сямен ик, славянъёслэн сярысь вазьгес кылдӥллям, соин соос туж кужмоесь. Малы ке шуоно, финн-угор калыкъёс, славянъёс сярысь, вашкалаесьгес. Озьы ик та калыкъёс матын луо Инкуазьлы, нош тунатскон- пелляськон - со Инкуазь кужымъёсты валаса кутон но соосты ас вылад ужатон луэ. Адямилэн верам кылыз мукетызлэсь улоссэ ке воштэ, ведӥнлэн кылыз кужмо, шуо. Кулэм адямилэн лулызлы оскыса вашкала адями малпаз, лул пӧйшурлы берытске шуыса. Олокӧня дауръёс ӵоже адями солы оскыса но солэсь кышкаса улӥз. Ведӥнъёс, кызьы тодмо, эмъяны но, урод лэсьтыны но быгато. Ведӥн котьку но аслэсьтыз паймытӥсь кужымзэ возьматыны кулэ. Со мед быгатоз адямилэсь психологизэ, малпанзэ воштыны. Соин но калык ведӥнлэсь котьку но кышкасагес улӥз. Фольклористикаын 200 арлэсь кема ӵоже ни пӧртэм сямен учкылӥзы ведӥнъёсты, туночиосты но пелляськисьёсты ог-огзылэсь висъян яке ӵошатон шоры. Юнматскиз куинь пӧртэм учкон. Нырысетӥез - ведӥнъёсты, туночиосты но пелляськисьёсты ог-огзылэсь уг висъяло но одӥг группае пырто. Кыкетӥез - висъясько нимаз ведӥнъёс но туночиос гинэ, нош пелляськисьёс уг. Куинетӥез - нимаз висъясько ведӥн, туночи но пелляськись - соос ваньзы пӧртэм персонажъёс. Туала традициын юнматскиз кыкетӥез тенденция, со удмурт фольклористикалы матынгес луэ. Ведӥнъёс пӧлы уг яра пыртыны озьы ик сыӵе адямиосты, кудъёссэ калык "ведӥн" шуэ, номыр вылэ но пыкиськытэк. Ӵем дыръя со ужаны яратӥсь, узыргес улӥсь адями, яке кудӥзлы ӵем гинэ мар ке но удалтэ, кин эмъяськыны йӧндыре (кӧт пуктӥсь, лы интыясь, синмысь жаг поттӥсь но мукет). Кылсярысь, одӥг гуртын улэ вылэм мушкась. Мукет мушкасьёс сярысь со тросгес чечы басьтоз вылэм, соин ик сое ведӥн, "мушен вераськись" шуиллям, инкуазез яратэмзэ но валамзэ чик лыдэ басьтытэк. Нош туала адями оске меда ведӥнлы? Тросэз мӧйыос та юанлы оскиськом шуыса веразы, нош егитъёс пӧртэм сямен малпало. Олег Б., 33 арес, механизатор: "Мон Инмарлы уг оскиськы, нош вкедӥнлы оскисько - адӟеме но, кылэме но вань, кышкасько мон соослэсь - олома но карозы". Анатолий Ш., 36 арес, шофёр. "Уг оскиськы ведӥнлы но, Инмарлы но, но уин шай вӧзтӥ ортчыны кышкасько. Нош туночиос но пелляськисьёс вань, дыр, экстрасенсъёс гуртамы но вуыло ук". Татьяна А., 19 арес, студентка.: " Инмар - со мон понна Инкуазь. Ведӥнъёс вань, дыр, но мон уг оскиськы, соос пӧйшурлы пӧрмыны быгато шуыса". Марс С., 35 арес, дышетӥсь: "Пелляськисьёс но мукет эмъясьёс вань, нош Инмар но, ведӥн но - ӧвӧл. Шайгуысь пась - со шырлэн ужез, куд-ог дыръя шай вылысь тыл адӟо - озьы сисьмем шӧйлэн фосфорез ӝуа". Владислав С., 37 арес, инженер: "Мон - атеист, озьы ик ведӥнлы но уг оскиськы. Ведӥнлэсь пӧйшурлы берытскемзэ но наука туж капчи валэктэ: адӟисьёс трос кузя ке но луизы, гипнозлэн кужмыз улсын сое адӟо. Нош со ведӥн шуонзылэн гипнозэн вырыны бадӟым быгатонлыкъёсыз вань". Катя Ш., школаын дышетскись: "Мон Инмарлы но, ведӥнлы но оскисько. Пересьёс огшоры кыллы уг быро, (уг супыльто) дыр". Кызьы адӟиськом, егитъёс пӧлын но ведӥнлы оскисез но, оскисьтэмез но вань. Тӥни со - огласянь ведӥнэз палэнтон, нош мукет ласянь - солэсь кышкан - тросэзлы тупа, дыр. Оскисьтэмъёсыз нош, озьы ке но, туж ярато ведӥн сярысь мадёсъёсты кылзыны, малы ке шуоно, та выжыкылтэм прозалэн аслаз нимаз чеберлыкез, поэтикаез, темаез но идеяез вань. Куд-ог тодосчиос та веросъёслэсь педагогической рользэ но пусъё: со, пе, асьмелэн улонмылэн синхрониысь но диахрониысь одӥгез куронэз луэ. Адями вашкалаысен ик малпаськылӥз: осконо-а, ӧвӧл-а ведӥн сярысь веросъёслы? Пересьёсмы оскиллям бере, озьыен асьмелы но осконо. Вань вакытъёсы но вань дауръёсы адямилэн йырвизьмыз кыстӥськиз паймоноезлы но тодмотэмезлы. Со тыршиз валэктыны луонтэмзэ, сое эскерыны но усьтыны. Нош аслэсьтыз кужымзэ лябен адӟыса но тодон-валанзэ ичиен лыдъяса, адями кышка вал Инкуазьлэн бадӟым но валантэм кужымезлэсь. Ваньзэ мукетсэ, кудзэ адями ӧз валалля, сое лыдъяз лушкем, тодмотэм, вылӥысь кужымен. Калык со кужым шоры кышкаса но гажаса учкылӥз. История возьматэ, тушмонъёсын, сьӧд кужымъёсын, пӧртэм инкуазь явлениосын калык огазеяськыса ожмаськылӥз, соин но со котьку но вормисе потылӥз. Удмурт фольклорын но озьы ик - ведӥнъёс калыкез кышкатыса ке но возё, вормыны уг быгато, малы ке шуоно, ведӥн со огназ, нош адямиос огазеяськыса нюръясько. Калык ог-огзэ гажаса, ог-огезлы юрттыса, азьпал югыт улосэзлы оскыса ке улэ, сое нокыӵе но кужымъёс уз ворме. П. С. Виталий Самигуловлэн материалэныз ми усьтӥськом пӧртэм сьӧд кужымъёс, ишанъёс сярысь вераськонмес. Милям тодэммы потэ, вань-а кылэмды яке адӟемды Нюлэсмуртэз, Коркакузёез, Гидутисез, Мунчокузёез, ведӥнэз но мукет со выллем паймымон кужымъёсты? Гожтэ вал милемлы пӧртэм ишанъёс сярысь, вералэ соосын тодмоостылэн яке асьтэлэн пумиськылэмдэс. Витиськом гожтэттэс. 1 Озьы улӟе выжыкыл Элькунысьтымы чебер киуж арбериосты утённилы (изобразительной искусствоосъя музейлы) кылдэмез дырысен туэ кызь ар тырме. Со ӵоже ик татын ужа ини Т. Н. Москвина но. Татьяна Никитична - небыт дӥсья реставратор. - Пичи дыръям малпам-тодэме ик ӧй вал, музейын ужаны кылдоз шуыса, - маде со. - Суредаськыны туж яратылӥ бере, та удысъя дышетӥсь луыны малпалляй. Университетлэсь художественно-графической факультетсэ йылпумъяме бере, школае мыныны ӧдъясько вал. Но шоркарамы со аре ӵапак выль музей усьтӥзы, отчы удмурт кылэз тодӥсь ӧнерчи кулэ вылэм. Монэ ӵектӥзы. Тӥни озьы татчы вуи. Музейысь ӧнерчиослы ужзэс шол-шол буш интыысен кутсконо луиз, шуыны луоз. Нырысь-валысь 150 пала киуж арбериоссы бен вал ик - шаертодэт юртысь (краеведческой музейысь) эшъёссы улосысьтымы кибашлы суредасьёслэсь ужъёссэс но кӧня ке мукет синпелетъёссэс мылетӥзы. Кылемзэ асьсэлы люкано-бичано луиз. Таня нырысь аръёссэ киуж удыс тодосъя ужась (научный сотрудник декоративно- прикладного искусства) луыса тыршиз. - 10 ар ӵоже ветлӥмы ми экспедициосы, - азинтэ Татьяна Никитична. - Вуылӥмы элькунмылэн сьӧраз улӥсь удмуртъёсмы доры но: Башкортостанэ, Татарстанэ, Киров палъёсы но мукет интыосы. Тыршеммы юнме ӧз луы, шумпотыса вераме потэ, коллекциямы туж тунсыко экспонатъёс шедьтыны быгатӥмы: пӧлаз киров палъёсмылэн но, палэнысь лымшор удмуртъёслэн но, бесермянъёслэн но киужъёссы вань. Озьы ик бичамы бускель бигеръёслэсь, ӟучъёслэсь чеберъян дӥсьёссэс но мукет киуж арбериоссэс. Бичан-люкан ужмес шаерамы кемалась ӧм кутскелэ бере, вашкала чеберез пӧлысь ужез пытьытэм ышемын-быремын, тус-тас луэмын. Эстониын но Финляндиын, тани, вань выжы-кумы луись калыкъёсмылэн, озьы ик асьмелэн но вашкала дӥсьёссы-маоссы люкамын. Пӧлазы ик удмурт сюлык кышетъёс, шаерамы соос ичи ни. Шумпотоно, отын коть утиськиллям шуыса. Озьы ке но, ӟеч-ӟеч утчаськод-тыршиськод ке, тунсыкоез шеде ик на. - Тани асьмелэн удмуртъёслэн йыразь пуосмы луо вылэм, йыруктэт шуод-а, - азинтэ веранзэ тодосчи. - Паськыт ӟус вылын кӧлась вашкалаосмы сое миндэрез выллем йыр улазы поно вылэм, нош ӵукна султэмзы бере валессэс бинялто но йыразь пуэнызы вылтӥз кымалто. Со йыразь пуос туж чебер чильпаса-пужыятыса лэсьтэмын, синмаськымон адско. Берло вакытэ соосты шедьтыны туж шуг ини. Коркаосамы корт койкаос сыло. Но Ува палъёсысь йыразь пуосты пумитаны милемлы кылдӥз ик на. Туж чебер коллекция пӧрмиз. Кызь ар ӵоже музейын ужатозяз, вашкала удмурт киужъёс, дӥськут, пужыос сярысь тодосчи ма гинэ но тунсыкозэ, паймымонзэ ӧз тоды ни: - Мынам дипломе но куиськон ужен герӵаськемын вал. Соин ик туж ӟеч тодӥсько та удысэз, озьы ик пужыятсконэз, но мон ноку ӧй тодылы, удмуртъёслэн нимаз асьсэлэн пужызы но вылэм шуыса. "Кирос пужы" шуо тани, со болгар пужы (пересьёсмы вашкала болгаръёсын бускельяськон вакытазы сое уже кутыны ӧдъяллям, вылды). Жильы пужы - бигер вакытысь вуэм маке, соослэсь адӟем каремын. Гладь амал - украинъёслы матынгес. Но таосыз сяна, вылэм на чын удмуртэз но, пужы пуктон амал, туж аспӧртэмлыко: песянайёсмы пужыятско вылэм канватэк, пырак дэра вылэ, таизлэсь шортсэ гинэ лыдъяса. Та сямез татчыозь утьыса возиллям на киров пал удмуртъёсмы. Тунсыко маде музейчи вашкала дэремъёс сярысь но. Туннэ асьмеос ӟеч тодӥськомы уйпал удмуртъёсмылэн соос тӧдьыесь луо вал, юг-юг дэралэсь. Нош лымшор палъёсмылэн - чибориё: лыз, горд я сьӧд буямын. - Мон но озьы малпалляй, но со туж ик ..? вылымтэ, - нош ик валэктэ тодмое. - Уго нырысь-валысь ваньмыз удмуртъёсмы, лымшор палъёс но, юг тӧдьы дэра дӥсен ветлылӥллям. Сое вашкалаосмы чебертылӥллям "ворттӥсь низь (соболь)" шуиськись пужыен, буртчин ӵуж сӥньысэн пӧръяса. Ӵапак тае тодосчиос "зарни пужы" шуо. Бӧрысьгес ини, дорамы бигеръёс вуыса, чибор дэрем нуллон сям пыӵам. Удыссэ тазьы пыр-поч тодэм-валамез Татьяна Никитичналы али ужаз но трос юрттэ. Реставратор луэмез пумысь со тазьы вера: - Экспедициосысь ваёно котыръёс, дӥсьёс пӧлын ӵемысь кырсьёсыз но, вӧё-виштыосыз но пумиськыло. Соосты ӝогак утялты вылэм, но уг лу. Та ужез быдэсъяны яра гинэ, мукетъёслы музей экспонатъёс борды йӧтскылыны уг оско. (Быдэс дуннеын сыӵе сям кутэмын). Музеямы реставратормы ӧй вал, кӧня ке аръёс ӵоже шугъяськыса, ёрмыса улӥмы. Бӧрысь мыным ӵектӥзы: дӥсен-кутэн, пе, тыныдгес выроно луылэ, экспедициосысь но вайылӥськод - оло, дышетскод ачид ик? Мон шумпотӥ. Кузпалы но пумит ӧз лу: нылпиосмы пичиесь вал ай но, соос сярысь сюлмаськонэз но соосты утёнэз ас вылаз басьтӥз. Озьы Москваысь реставрационной центрын дышетскыса, та ӧнеръя диплом басьтӥ. Отысь бертыса, музей дӥсьёсмес утялтон борды ӝегатскытэк кутскимы ини. Реставраторъёс пӧлын, Татьяна Никитична мадемъя, пӧртэм удысчиосыз вань. Огъёсыз корт киуж арбериосты выльдыны выро, мукетъёсыз горд я тӧдьы сюй, пияла, я эшшо музон макелэсь быдэстэмъёссэ утьыны тыршо. Татьяна Никитичналэн сюлэм висёнэз - басмаослэн вужмемзы. Соос кема дыр ӵоже улыса, асьсэзыз сиыны, пӧсьтылыны, куашканы ӧдъяло, кудзэ кей сиыны шедьтэ. Соосты калыклы адӟытыны поттэмлэсь азьло выльдоно луэ. Ас мылпотэмъя та ужез быдэсъяны лэземын ӧвӧл. Экспонатъёсты выльдон сярысь ӵектон кутыны быгатэ та ужпумъёсты эскерись нимысьтыз кенеш гинэ - реставрационной Совет. Солэн ужаз пырисько элькунысьтымы тодосчиос, ог 18 мурт. Соос дэмламъя уж борды басьтӥське ини реставратор. - Ужаку пӧртэм учыръёс кылдыло. Одӥг полаз тани даурлэн кутсконаз вурем "сюан дэрем" выльдыны ваизы. Туж чебер маке, но пал саесо. Уллапал люкетыз но изъянтэмын. Сое быдэстыны турттыса, кӧня утчаськоно-ветлоно луиз! Басмаез - "маркизет", туж векчи маке. Асьме палъёсысьтымы шедьтыны ӧм быгатэлэ, Москвае мыныса, отысь пересьёслэсь юалляськоно луиз, та басмалэсь вурем арбериоссы ӧвӧл-а шуыса. Сюриз ведь. Сюан дэреммес пӧрмытӥм. Пал саесъя мукетсэ кесэгпай вури, сӧзулзэ тупатӥ-выльдӥ - выль кадь луиз. Табере сое адӟытонъёсамы возьматылӥськомы ини. Озьы тӥни улӟе но улэ вашкала выжыкыл. Чеберлыкез утён - капчи уж ӧвӧл. Со ужпумез, выжыкылын выллем, быдэстыны быгато, пе, чылкыт сюлэмо адямиос гинэ. Нош музейын тыршисьёс - сыӵе муртъёс ик вань, дыр. Соос радын нырысь интыын Татьяна Никитична Москвина, киужъёсъя реставратор, тодосчи. Владимир Возняков.