Семён Виноградов
Будӟым куалан вӧсяськон
Удмурт йылолъёсысь туж бадӟымъёсыз пӧлы пыро вӧсяськонъёс. Со вӧсяськонъёс пӧлын 
но тужгес бадӟымъёсыз вань. Чын бадӟымен лыдъяло луд вӧсяськонэз. Собере Будӟым 
куа, Гершыд, Куарсур (сое Гербер но, Петров но шуо).
Удмурт вӧсяськон сярысь вераны курыса, мон кызьы ке вазиськи Гычань нимо 
песянайлы. Со ӧжытак мынякгес потӥз но юаз: ваньзэ-а верано? Ваньзэ тодэме потэ 
вал, шуисько. Асьмелы, пе, уске, султылытэк кык арня пуконо луоз, оло, соку 
вераса быдто. Табере мон ачим но валасько ни, со дыр но ӧжытак вылэм на шуыса. 
Вӧсяськонъёс осконъёс бордысь пото, нош оскон но вӧсяськон бордысь пото ни 
ваньмыз сямен мукетъёсыз йылолъёс, сэбетъёс, сямъёс.
Кӧня ке верасал, мар со Будӟым куалан вӧсяськон. Мукет вӧсяськонъёслы сямен ик, 
та нуналлы мунчое пырыса но пыжиськыса дасясько. Вӧсясьёс - быдӟым вӧсясь, тӧр, 
сюмык кутӥсь, тылаась-пӧрась но соослэн кышнооссы гурт калыклэсь вазь лыкто. Ӵем 
дыръя вашкалаос сямен эстӥськыны тыл потто. Куала шорын пинё-пинё сюры ошиськыса 
улэ. Со сюрые пурты ошемын, отын ӝук пӧзьто. Куалалэн укноосыз ӧвӧл. Туала 
куалаосыз укноен но лэсьто ни. Пушказ кортӵогтэк лэсьтэм ӝӧкъёс. Паллян палаз - 
пиосъёслы, бур палаз - нылкышноослы. Крезьчилы но тӧролы - паллян палась урдэс 
ӟус. Со йылтӥ ӝажы ортче. Отчы котькуд коркась вӧсяны пичигес нянь колды ваё. Со 
ӝажы йылтӥ кузь сюры кыстӥське. Со борддор кузьда. Та сюры вылэ кузьмам чебересь 
ӝуткам пужыё ӵушконъёс ошылэмын. Пырон ӧсэн ваче борддорын кызьпу куаръёс 
ошылэмын. Кыдёкысь сэрегын, паллян палан, вылӥынгес пичи гинэ шыкыс пуктэмын - 
со воршуд короб. Пушказ мар тыремын, нокинлы уг возьмато. Со сэрег палан ик сылэ 
бадӟым кор пукон, нимыз - мудор пукон. Со быдӟым вӧсясьлы вӧсям сиёнзэ вылӥ 
ӝажые "вылэ мычем" пуктыны (инмаръёслы сиыны пуктыны). Ӝукез веръятэк пӧзьто. 
Ӝук пӧзем бере гурт калык люкаське. Вӧсясьёс ӝӧк вӧзы султыса вӧсяло но вылэ 
мичем поно, собере, вӧсям вӧсьмы кабыл медло шуыса, быдӟым вӧсясь, тӧро но мукет 
юрттӥсьёс ӝукез веръяло. Соос бере гинэ гурт калыклы веръяны яра ни.
Будӟым куалалэн кыдёкысь бур пал сэрегаз бадӟым шыкыс (сандык) вань на. Отын 
вӧсяськон тусьты-пуньыез утё: сюмыкъёс кык пӧртэмесь (чебергес но пичиесьгес - 
нылкышноослы чакламъёсыз, сумбресгес но бадӟымесьгес - пиосмуртъёслы), дуры но 
бадӟым пу тусьтыос, пу пуньыос. Бур палан, борддор вӧзысь лапег урдэс ӟус вылын 
югыт, чебер дӥсен дӥсяськем ньыль-вить кышномуртъёс пуко. Соос уксётӥрлыкъёсын, 
тӧдьы кышетъёсын. Вӧсясьёслэн кышнооссы со. Тӧро но та кышномуртъёс сямез-
йылолэз, вӧсяськон радэз сӧрись ӧвӧл-а шуыса чаклало. Ӝӧкез, эстӥськем интыез 
котыртыса кошкись медам луы. Кин ке юри яке янгышен котыртӥз ке, гуртоослэн солы 
туж вожзы потэ: гуртлэсь азинлыксэ басьтэ, гуртлы я котыртӥсь муртлы секыт луоз, 
пе. Азьвыл вӧсяськонзылэн веранэз кызь куать ёзо вылэм, быдӟым вӧсясь сое 
кырӟаса, быдӟым крезь шудэм улсын вералоз вылэм. Сое табере котькуд гуртын уг 
тодо ни. Куд-ог интыосын со веранъёс но, гурез но пӧртэмесь, котькытын ик чын 
одӥг кадь ӧвӧл. Нуназе бере, шонергес вераса, ӝыт палгес ини, вылэ мичемез 
васькытэм бере, Будӟым куалась бертыкузы, вӧсям няньзэс доразы нуо. Вылэ мичемез 
быдӟым вӧсясь сие.
Будӟым куалан вӧсяськон нуналэ ӵукна асьсэ куалаязы вӧсясько. Будӟым куаысь 
бертыса, бӧлякен-бӧлякен вӧсь нерге ветло. Коркась корка ветлыкузы, шур выллань 
тубо. Кисьтонын сямен шур уллань уг васько. Котькуд корка люкаськыса, бӧлякъёс 
вӧсям вӧсь кабыл медло шуыса сисько. Кузё-а, гуръёсыз умой тодӥсь мурт-а вӧсь 
гур сётэм бере со сьӧры вӧсь гурен кырӟало-верало но куно луыса мукет мурт доры 
асьсэ бӧляке ик вӧсьнерге ортчытыны пото. Озьы вань бӧлякез ортчо. Корка пуш 
шулдыртэмын, ӝӧк вылэ пыжиськемъёс, пӧраськемъёс пуктылэмын. Та нуналэ калыклэн 
мылкыдыз ӝутӥськемын луэ. Адямиос ог-огенызы адӟисько, кенешо, шутэтско, 
инмаръёсынызы кенешо-верасько, ӟечез понна тау каро, азьланезлы но ӟечлык куро, 
кудӥз улон сюресэз каньыл медло, котьмар ласянь мед удалтоз шуыса сӥзиське.
Одӥг кылын вераса, вӧсяськонъёс калыклэсь мылкыдзэ каньыл каро но кужымзэ, 
осконзэ трослы будэто.

Кедра Митрейлэн люкамъёсысьтыз
1929 арын Ленинградысь Д. В. Бубрих профессорлэн кивалтэм улсаз удмурт кылэз 
эскеронъя экспедиция ортчиз. Отчы соку пыриськиз Эгралан вордскем тодосчи-
писатель Кедра Митрей но.
Экспедициен ӵош ветлыкуз Кедра Митрей Зури черкогуртысен 75 аресъем Будянь Сидор 
Миша нимо пересен пумиськем но солэсь туж тунсыко верам-мадемъёссэ гожъям. Соос 
пӧлысь одӥгез сӥземын Зуриен Эгра вискысь но соослы матысь гуртъёслы:
Тури-пари Герейгурт,
Сюлоен шуккем Чумошур.
Мунчо ӵоксэт Шербет,
Тӧл йӧтонтэм Шадбеггурт,
Кичи-вачи Кабачи,
Эгра выжы - пушнер выжы,
Чай юон Лозодур,
Ӵуж пуньы Извыл,
Вал кышкатскем Бачкейгурт.
Паймоно кадь: котькуд гуртлэн аспӧртэмез та чуръёсын лачак лякыса выллем син азе 
пуктэмын - одӥг-кык кылын гинэ вераса, шулдыр пальпотыса но китырак серектыса-
исаса.
Та кылбур али зэмос документлы но кельше ини. Малы ке шуоно, отын верам 
гуртъёсты табере тыпак таӵеен уд ни адӟы. Шуом, кичи-вачи Кабачи али посёлок 
быдӟаозь будэмын. Герейгурт но тури-пари - отчы но татчы, куӵо-муӵо - пуксемын 
ӧвӧл, кык ульчаё йӧно гурт луэмын. Шербет, Шадбеггурт (вужез) быремын. Извыл 
пыремын Эгра посёлоклэн территорияз. Бачкейгурт но "вал кышкатсконо" кадь шуш 
ӧвӧл ни.
Кин кылдытэм меда та кылбурез? Зуриос, дыр. Зури черкогурт угось та даурлэн шор 
вадесозяз синмаськымон йӧно, чебер вал. Та кылбурын серекъям гуртъёсы зуриос 
нылъёссэс но кенлы уг сёто, пе, вал...
П. ПОЗДЕЕВ.
Ливий Ураков
Котьма ке но...
повестьысь люкетъёс
"Кыктоос"
Онисим агаеныз одӥг аре вордскиз. Кыкназы но ӟырт кезьыт нуналъёсы югыт дуннеын 
нырысетӥ куаразэс поттӥзы: огез - толшорлэн сизьыметӥ нуналаз, Инмарлы 
оскисьёслэн быдӟым Рошво праздниказы, мукетыз - кызь одӥгетӥ толсуре, Сталинлэн 
вордскем нуналаз. Юри турттыса нокызьы но озьы тупатыны уд быгаты. Атайзы, Павел 
Тимофеевич, араз кык пи лэсьтэмез, сокем чупрес ужамез пумысен йырберзэ 
кормалляз на но, ма карод на, озьы луиз бере. Нырысетӥ пиезлы, Сталинэз бур 
карыса, Иовисар ним поныны вуттӥз. Тодысал ке, ӵапак кызь одӥгетӥ толсуре кыкетӥ 
пиез вордскоз шуыса, та нимез соизлы кельтысал вылэм. Кыӵе умой тупасал. 
Сталинэз Павел Тимофеевич гажа вал, ма, кызьы, пе, сотэк, дуннеысь вань 
куанеръёслэн выль инмарзы ук со. Иосиф Виссарионович сярысь Павел Тимофеевич 
нырысьсэ граждан ожын Царицын дорысен кылӥз вал. Ассэ адӟыны ӧз кылды, сӧсырмыны 
сюриз. Эмъяськонниын кылльыкуз со сярысь мадемъёссы тодаз кылизы. Сталинэз юн 
мылкыдо кивалтӥсь луэмез пумысен ушъяллязы, нош ачиз лапег гинэ, шадра, пе, 
парсь зу кадь йырсиез гордалэс-сьӧд, огъя вераса, тусыз учкымон ӧвӧл. Ӟуч сямен 
шӧнгыльгес вераське. Секыт сямзэ одно пусйылӥзы на.
Кыкетӥ пизылы кышноез, Опрось, Иисус ним поныны турттэ вал. Павел Тимофеевич 
чутрак пумит кариськиз, Владлен, пе, шуом. Огкылэ вуэмзы ӧйлась, озьы покчизы 
огшоры Онисим луиз.
Кык пиос эгызоос сямен будӥзы, тусын уго кисьтэм-басьтэм огкадь луизы. Уката ик 
Онисим агайзэ мугорын сутэмез бере. Куддыръя атайзы но соосыз сура вал. Опрось 
гинэ вордэм пиоссэ нырысь учкемаз ик висъяны быгатылӥз.
Эксэй понна ожмаськыса но, граждан ожын но окопъёсын эбылям, сутскем Павел 
Тимофеевич улонысь вазь кошкиз. Опрось суй-пыдызлы юскиськыны ӧз сёты. Пиоссэ 
будэтӥз, дышетскыны луонлык кузьмаз. Соосыз, сизьым классъем ШКМ-ез йылпумъяса, 
колхозазы ик кариськизы, тракторе пуксизы. Та ужын уго тысен но, мукетыныз но 
уждун бусьтырес усьылӥз.
Ньыльдонэтӥ арын тулыс, Горд Армие кошкон азяз, Иовисар кышнояськиз. Артэ будэм 
Лизаен огазе кариськизы. Ар ортчыса, нырысетӥ май праздник азьын, соослэн нылзы 
вордскиз. Иовисарлэсь куремзэ лыдэ басьтыса, нунылы Сталина ним понӥзы. Будӥз 
ке, пе, чебер кылӥськоз: Сталина Иовисаровна. Таӵе нимо адями огпӧртэм Окыльна, 
Марья кадьёс пӧлы уз сураськы.
Иовисар армиын Волга дурын, Саратовен артэ вал. Татын но сое тракторе ик 
пуктӥзы. Гаубицаез кыскыса нуллӥз. Та пушкалэн гумыез кузь ик ӧвӧл, нош снарядэз 
парсьпи зӧкта, из коркае йӧтӥз ке, пыры кароз. Тушмон солэсь окопын но, дзотын 
но ватскыны уз быгаты, собыдӟа снаряд лысьӧмзэ пазялоз.
Колхозын валэс юосты кизьыса быдтэмзы бере Иовисарлэн гожтэтэз уйламтэ шорысь 
Белорус музъем вылысь вуиз. Ож перилэсь матэктэмзэ шӧдыса, Горд Армилэсь лыдзэ 
та дырлы вить миллионозь вуттӥзы. Куартолэзь шорын выль но выль ожгарчиосты 
шунды пуксён палась кунгож доры келязы. Соос пӧлы Иовисар но сюриз.
Кыдёкысь гожтэт Опросьлэсь но Лизалэсь мылкыдзэс сӧриз.
- Толон гинэ кырныж коргид йылысен ӧрыд( вераз, нош туннэ пиелэн гожтэтэз 
кунгож дорысь вуиз. Э, сюлмы! Отын ож тыл пуромоз шуыса верасько ук. - Опрось 
нюромем синъёссэ ӵушконэн ӵушылэ. - Онисим, ма уд луласькы,
- Уз, уз, война уз луы, - Лизалэн оскемез уг поты, нош синъёсыз аслаз но 
котмизы. Пичи нылыз жир! бӧрдыны ӧдъяз. Онисим номыр ӧз вазьылы, корка шортӥ 
олань-талань поръя. Собере сельсоветэ кошкиз. Отын секретарьын Лизалэн апаез 
ужа. Колхозъёсын ужасьёслы паспорт уг сётъяло вал бере, сое воштӥсь справка 
курыны малпаз. Сыӵе кагазэн, пе, Лизаен ӵош Белоруссие Иовисар доры ветлом. Нош 
сельсоветысь секретарь сузэрзэ Онисимен ӵош мыныны ӧз лэзьы:
- Сонякеме вож нуныен потод-а?
Справка но сётыны ӧз дырты. Печатен кагазэз возьматӥз. Отын гожтэмын вал, Ижкаре 
сиён-юон басьяны ветлӥсьёслэсь лыдзэс кулэстон вылысь, пе, сельсоветъёс 
колхозникъёслы справка медаз сётъялэ.
- Ма, татын Иж сярысь верамын, нош мон Белоруссие мынӥсько ук, - тэльмыриз 
Онисим.
- Нокытчы потаны лэземын ӧвӧл.
- Сютэмъёслы сюрес пытсаськоды, иське... А милям няньмы вузаны но тырмоз, 
тодӥськод ук.
- Соиз озьы. Тани мар, тырылляськисьёс(( луизы ке, тон нянь утчась ӧвӧл, валад-
а?
Секретарь справка гожтытозь, Онисим ӝӧк вылысь мукет кагазъёсты лыдӟыса пукиз. 
Огаз Понино райсоветлэн тӧроез Фоминых сярысь гожтӥллям. Райпоазы вуэм басмаез 
со кивалтӥсьёслы лушкемен вузатэм. Соослы кышъям штанэн ветлыны возьыт, пе. Нош 
аслыз тӧро костюм но час черодтэк басьтэм. Та понна Фоминыхлы зол гинэ 
йӧттӥллям.
Кошкон азяз Онисим чабей пызен костюм воштӥз. Выль ӧй вал ни со. Казакпилы бен 
йӧнгес кулэ вылэм но, таиз но яралоз ини, сюрес вылын ӟеч калыклэсь сокем уз 
висъяськы.
Онисимез ӝоген армие басьтоно вал бере, сюрес вылэ потытозяз военкоматэ ветлытэк 
ӧйлась. Толэзь пумозь ветлыны лэзизы. Нялтас йырзэ ӵышкытӥз. Тодысал ке, кӧня 
дырлы бабляосыныз люкиськемзэ. Нош йырсиез вожъяськымон вал.
- Марлы тыныд пыгылиё изьы утчанэз, тынад со йылад будэ, - шуылӥзы куд-огез.
Йырси ӵышконниысен синучконысь ассэ адӟиз но, сюлмыз нёрк луиз: чылкак музон 
мурт - нырыз кузь шуыса, со азьвыл но тодэ вал, нош табере со уката нуям, лэся. 
Онисим лулӟиз: ма карод на, Инмар сыӵе ныр сётэм бере, йылзэ вандыса уд кушты 
ук, быдэс даурад нуллод ини. Оломалы тодаз лыктӥзы школаын дышетэм кылбуръёс: 
На севере диком стоит одиноко
На голой вершине сосна...
Нырыз валлин таӵе чуръёсты тодэ ваемез туж тумошо йӧтӥз, ӵышкись муртэз 
паймытыса, горак серектӥз.
Котырзэ тырыны анаез Онисимлы песьтэр ӵектэм вал но, со атаезлэсь шук-шак 
чемоданзэ поттӥз. Лиза солэн дасяськемез шоры мӧзмыт учке.
- Эн ӝожа, ӝоген картэныд адӟиськоды, - буйгатӥз Онисим. - Воштыло мон сое 
кӧнялы ке. Бертылоз.
- Осто-о, верам кылыд зэмасал ке...
- Пӧрмоз. Малы ке-а йырме ӵышкытӥ, кожаськод? Иовисарен огкадь мед луомы шуыса. 
Мон кылё, со кошкоз, нокин номыре валаса уз вутты.
Лизалэн мылкыд каньылаз, пальпотыса шыднарзэ( ӟыгыртӥз. Собере палэнтӥськиз но 
серемпыр юаз:
- Нош алдад ке? Бертыса астэ Иовисар шуод эшшо. Кин тодмалоз тӥледды?
- Озьы эн вераськы. Картсэ мукетыныз сурась кышноез исьникут шуо, - чурыт 
меӵкытӥз Онисим.
Мултэс лек ваземзэ валаса, либытэн ватсаз:
- Тон уд алдаськы, Иовисарлэн синмыз лызмыт-чагыр, нош мынам чагыр шуыса 
тодӥськод.
Лиза серемпыръяськемысь уг дугды:
- Нош бер ӝыт яке уин вуиз ке?
- Анай вань на ук, сое уд ӧрекча.
- Нош огнам ке дорам тупай? - мерске Лиза.
- Э-э, оломар эн вераськы, - Онисим киыныз шонтӥз но коркась потӥз.
Нуналъёс ог-огзэс уйыса кадь питырало. Онисимлы дыртоно. Можгаын поездэ 
пуксьыкуз, келясез ӧй вал. Гуртын та вие ужъёс уго лыдтэм.
Кыл - юаз-вераз, сюрес - Белоруссие вуттӥз. Кызь одӥгетӥ инвожое вазь ӵукна 
Дзержинск сьӧрысь кыӵе ке разъездын вагонэ лапеггес гинэ пимурт пыриз. 
Сьӧдкысъем, сюбег ымныро, синъёсыз быльккес. Выросъёсызъя но мар Онисим валаз, 
таидлы воргорон шӧм пырымтэ на, дас ньыль аресъёс сяна уз луы. Пукыны ваче 
тупазы. Тодматскизы.
- Арон, - кизэ мычиз пияш.
Лида каре, пе, мынӥсько. Онисимлэн но отчы мынэмезлы паймиз, туннэ-ӵуказе война 
пуромоз ук! Поездын калык со сярысь гинэ вераське. Минск сьӧры потыны кӧбераса, 
ваньмыз сямен васькыса кылизы ни.
- Зэм но, быдэс вагонын ӵошен мынӥськом, - пияшъя кариськиз Онисим, - нокыӵе 
куара-ланга уг кылӥськы.
- Калык котырзэ ворттэ, кунгожлэсь пыдлогес, - валэктэ Арон. - Мон но тани 
куинетӥзэ берыктӥськисько ни.
- Зэм ик война, иське? - Онисим малпаськонэ усиз. - Газетъёсын война уз луы 
шуыса гожъяло ук, юнме супыльтон, пе, со.
- Газетын - одӥг, путэтысь - мукет.
- Кызьы озьы?
- Уд тодӥськы шат? Калыкын шуо: урод ивор путэтэтӥ но пызьыра.
Поезд дымбыр-йыг карыса дугдӥз. Чик юнме интые. Бӧрысь тодӥзы, Чеховлэн 
веросысьтыз йыртэмась музэн, кин ке рельса бордысь гайкаосты октэм. Тау чугун 
сюрес вылын ужасьёслы, адӟыса вуттӥллям, поездын мынӥсьёслэн йыръёссы сотэк 
быгылес ӧй кыльысал.
- Сьӧськабъёс! - Арон мыжыксэ сэзъя. - Фашист курокъёс!
- Огшоры калыкез быдтыны малпаллям. Ма, калыкез но - тон но мон, ымдурамы самой 
йӧлмы куасьмымтэ на.
- Ӧвӧл, эке, соос мукетъёслы кайгу дасяллям вылэм, ожчиосын зэмос эшелон 
азьпаламы мыныны кулэ, пе, вал. Кытын ке ӝегатскем. 
- Иське, соослы?..
- Озьы угось.
Поезд вырӟиз, сюресэз эскерыса выллем, каллен гинэ мынэ. Арлыдоос, быронлэсь 
утемез понна, Инмарлы тау карыса вӧсяськысалзы ни, нош пияшъёслэн тодазы ӧз 
лыкты. Мылкыдзы ӟеч ик ӧй вал. Шып пуко. Онисим синъёссэ укное чӧлтӥз. Отын 
белорус музъем. Граждан ож дыръя Польша киулэ кылемез. 1939 арын, Гитлер 
полякъёсты ожманы кутскем бере, татысь калык Совето Союзэ пырыны кариськиз. 
Война ке кутсконо, кемалась-а ож тыллэсь ватскылӥзы? Но татӥын вир уз 
кисьтӥськы, дыр. Сталин шуиз ук: "Мурт музъем милемлы кулэ ӧвӧл, нош асьмелэсь 
одӥг висьсэ но ум сётэ. Тушмонэз ас пузкараз пазьгом".
Аронлэн но йыраз ож пуромон сярысь малпанъёс бергало вылэм. Со Горд Армилэн 
вормонэзлы уг оскы, угось гитлер ожгарчиосты ас синмыныз адӟиз ни. Чидаз но. 
Арон - еврей. Фашистъёс Польшаын солэсь анай-атайзэ виизы. Аслаз но йырыз мырдэм 
быгылес кылиз. Лидаысь улонниязы али нокин ӧвӧл ни. Юрт бервылысьтыз кылем 
котырзэ кырсиез доры нуллэ. Апаезлэн картэз - эмчи, хирург. Куартолэзе со 
кышноеныз ӵош Волга дурысь вуэм но, медсанбатэ ужаны пуктӥллям. Онисимлы 
удалтӥз, Аронлэн кырсиез Иовисарен одӥг дивизиын служить каре вылэм. Лидаысен 
солы медсанбатэ жингыртӥзы но тодӥзы, кытын али Онисимлэн агаез.
- Мынонэз куамын иськем ёрос луоз, - валэктӥз Арон. - Пыдын со сюресэз ӝытозь 
мертаса уд вутты, велосипед утчало ай.
Аронлэн патерез Онисимлы ӧз кельшы. Выж вылын олома но лошъяське, пуконъёс кытчы 
ке шедем пуктылэмын, пианиноен ӝӧк ваче дыгемын, вӧзтӥзы ортчыку одно ик бордазы 
шуккиськоно.
- Шудӥськод-а? - пианино вылэ чабкыса патер кузёлэсь юаз Онисим.
Арон кыл вератэк пуконэз дораз кыскиз, сӥё-дано артист музэн ялӥз:
- Людвиг ван Бетховен. "Лунная соната".
Еврей пилэн чиньыосыз улысь сюлэмез бугыртӥсь крезьгур чузъяськиз. Онисимлы со 
туж тодмо потӥз. Кытысь но ку меда кылэмез вань? "Праздник святого Йоргена" 
нырысетӥ ӟуч куараё фильмысь ке шат? МТС-ын дышетскыкуз сое быдэс группаенызы 
учкыны ветлӥзы вал. Отысь крезьгур туж кельшиз, но Аронлэн шудэмезлы уг укша. 
Оло "Мы из Кронштадта" фильмысь? Ӧвӧл. "Чапаевысь" - тӥни кытысь!
- "Чапаев"! - кеськиз Онисим.
- Ма - Чапаев? - шудэмысь дугдӥз Арон.
- Кино сыӵе вань. Тушо денщик тӧдьы офицер доры пырем дыръя та крезьгур 
чузъяське.
- Чапаев, шуиськод? Граждан ожысь дано командир. Со сярысь фильмдэс учкеме ӧвӧл. 
Бетховенлэсь крезьгурзэ отчы пыртӥллям ке, умой мар ке, дыр.
- Зо-ол. Пичиос вить-куать пол учкыны ветлылӥзы. Оло, пе, Чапаев уз быры, вуысь 
потоз ик, - серектӥз Онисим.
- Бен, Чапаевез тӧдьыос быдтӥзы, - султыса вазиз Арон. - Нош тодӥськод-а, 
Октябрь революцилэсь тужгес дано муртсэ кин-о отӥ кариз?
- Ленинэз шуиськод ке, сое Каплан виыны турттэ вал.
- Мар Ленин... Ленинэд косъяськись гинэ вал, нош калыкез кин-о бергатӥз?
- Сталин! - тодэмезлы шумпотыса кеськиз Онисим.
- Сталин - со тон кадьёс понна. Джон Ридлэсь "Десять дней, которые потрясли мир" 
книгазэ лыдӟемед ӧвӧл уга. Америкаысь писатель со, Москваысь Кремль борддор вӧзы 
ватэмын.
Онисимлэн зэмен но Джон Рид сярысь кылылэмез ӧй вал. Сталин генсек луэм бере, 
солэсь книгаоссэ Совето Союзын огпол но ӧз поттылэ, малы ке шуоно, Октябрь 
революцилэсь кызьы ортчемзэ возьматыса, Джон Рид "вань калыкъёслэсь инмарзэс" 
чик адӟымтэ кадь, нырысь интые Троцкиез пуктэм.
Арон - еврей, Троцкий но со выжыысь ик, нош еврейёс ас калыксэс котьку ушъяло. 
Ог-огзэс кыдёкысен адӟон, кунултон, вылӥе ӝутон сямзы соослэн лулазы-виразы мур 
пыӵамын.
- Ме, кузьмасько, - Джон Ридлэсь книгазэ Онисимлы сётӥз. - Дорад бертыкуд мӧзмыт 
уз луы, лыдӟыны кутскид ке, дугдыны уд быгаты ни. Нош таиз агаедлы, - пичи гинэ 
ӟенелик спирт кузьмаз на.
Велосипед вылэ пуксьыса урамъёстӥ ворттыкузы Онисим синйылтӥз: мынӥсь-ветлӥсьёс 
уйшор уин мында но ӧвӧл, тэк сылӥсь-пукисез огзэ но уд адӟы, ваньмыз кытчы ке 
дырто. Ульча пумынгес сылӥсь пу коркаос пала вуизы но, котькудӥзлэн муръёысьтыз 
бугыр ӵын потэ, котырак дыльды шыр васькымон ческыт зын вӧлскемын. Паймод, мар-о 
та калык гужем шорын нуназе куазен одӥгтэмак сиён пӧра меда?
- Арня ӵоже пудозэс вандыло ни, сӥль ӵынато, - валэктӥз Арон. - Ӵынатэм мар ке - 
со кемагес уг сӧриськы.
- Гурын ӵынато шат? - паймиз Онисим.
- Соослэн муръёоссы сӥль но чорыг ӵынатыны юри тупатэмын.
Та югыт дуннеысь мае но уд адӟы вылэм: муръёын сӥль ӵынато, удмурт шаерын таӵеез 
нокинлэн йыраз лыктымтэ, лэся.
- Выльнуналэ така вандӥськомы ке, ми сӥлез йӧгуэ тыриськом, ӵынатыса ум 
курадӟиське, - Онисим малпанзэ шара вераз.
- Йӧгуэз сьӧрад уд басьты...
- Сьӧрад? Малы?
- Ма, ӧд вала шат? Войналэсь кышкаса, соос пегӟыны дасясько.
Полигонэ Иовисар доры кожизы гинэ, шугадӟонэн пумиськизы: вӧзтӥзы пуля кадь 
ортчем капчи машиналэсь палэнскеменызы сэрен, сюрес урдсысь кызьпу шоры 
дыгиськизы но музэ сапкиськизы. Ойгетыса султӥзы, учко но - Онисимлэн дэрем 
саесэз копак виресь, ньылӟиськем пельпумыз чидантэм кужекъя. Ӝоггес мар ке но 
кароно, сотэк яраез азоз. Велосипедэ усьтыр-табыр пуксизы но азьлань ширтӥзы.
Вуизы. Постовой Иовисарез мырдэм-мырдэм ӧтиз. Агай-вынъёслэн пумиськонзы кӧсыт 
вал. Шумпотыса ӟыгырскемзы но ӧз луы, Онисим сӧсырмыны сюриз уга. Шуак Аронлэн 
йыраз лыктӥз: яраез спиртэн зырано ук! Пияшез эмъямзы бере ӟенелик солдат кие 
вуиз. Соиз паль паляз, ӵапак кызь одӥгетӥ инвожое командирезлэн вордскем 
нуналыз, пе.
- Сержантмы йырвыл трос шумпотоз талы, - Иовисар спиртэн ӟенеликез мур ӟепаз 
ватӥз. - Тон, Онисим, али ик хуторе мын, отын милям эмъяськонни нергемы вань. Ай 
командирлэсь юаськыса, ачим но тӥледын ветло.
Ӝоген соос куиньназы хутор пала вырӟизы. Арон велосипедэ пуксиз, нош "кыктоос" 
артэ вамышъяло. Онисим ас малпанзэ вераз: со агаез интые татчы кылёз, Иовисар 
Пычасэ кошкоз. Нокин номыре уз вала. Батареялэн командирезлы гинэ ке шат верано?
- Сюресэд кузь, тыныд туннэ ик Лидаысь поездэн кошконо, - Онисим агаезлы индылэ. 
- Уть ай, котыр ваньмыз война сярысь верасько. Аронлэн но кыл йылаз со гинэ.
- Война ке кутскиз, татчы кылисезлы бырыны кема ик ӧвӧл, - Иовисар шара 
малпаське. - Но кин-о вералоз, кутскоз-а со, уз-а?
- Соиз-таиз сярысь тунаса эн улы, тынад сюресэд одӥг - Пычасэ, - мӧйы мурт 
музэн, лад-лад нодъя Онисим. - Ож ке пуромиз, мынам йыры быгылес кылёз, Инмар 
утёз, со ик, тонэ утён вылысь, монэ татчы вуттӥз.
Эмъяськонниын фельдшер Онисимлэсь шуккиськем пельпумзэ миськиз, маин ке зыраса, 
ӝик-ӝик биниз. Сӧсырмем муртэ со кӧлыны кельтӥз. Иовисарлэн гордармеец 
книжкаезъя. Та ик луиз "кыктоослэн" ог-огзэс воштэмзы.
- Ӟеч лу, выны! Марысь-мар ке - чеброс, ява. Инмаред мед утёз. Тау лыктэмедлы, 
таӵе-таӵе ӟечтэ улытозям уг вунэты.
Та вал Иовисарлэн берло кылъёсыз. Со Аронэн ӵош Лидае кошкиз.

Курег ӵӧн( 
Эмъяськонни нюлэсчилэн улыно-вылыно юртаз интыяськемын. Коркалэсь кузёзэ кӧня ке 
нунал талэсь азьло гинэ кыӵе ке курок пуртэн бышкалтэм. Берласянь. Кышноез 
кулэмын ни вылэм. Корказ анай-атаез но бызьыны вуэм Улияна нылыз улыны кылиллям. 
Пересьёслэн кӧлантӥзы вылӥяз, нылзылэн - улӥяз. Соин ӵош Паша санитаркаез 
интыяллям. Пересьёсын артэ нимаз висъетын фельдшер интыяськемын. Нош висись 
ожчиослы кылльыны улӥысь кунопал висъетэз тупатӥллям. Отын койкаез кык гинэ. 
Огаз пушка лафет улэ пачканы шедем Митыр Митан кылле, мукетыз - буш. Митан - со 
Онисимлэн гуртысьтыз ик пи. Иовисарен одӥг пушка борды юнматэмын, снаряд 
нуллӥсе. Онисим агаез интые кылем сярысь Митан тодӥз но чик ӧз паймы, эшез понна 
шумпотӥз гинэ. Адями быгатӥз бере, малы солы тушмоналод.
Онисим висисен артэ пуксиз. Митан юалляськем вылысь юалляське, гуртысь ваньмыз 
сярысь тодэмез потэ. Мӧзмем ик, шӧдске. Зэмос нимыз солэн - Митрофан, но гуртын 
сое Митан гинэ шуо. Нош Митыр? Валлё(( удмуртъёслэн нимтулзы вӧзы выжы нимзэс 
будэтылӥзы на. Митрофанъёслэн юрт муртъёссы Митыр нимын ветлӥзы. Тӥни озьы 
Митрофан Митыр Митан луиз. Воргорон шӧмаз пыремез бере солы Нюжтэм кушем ним 
лякизы на. Нылъёсты посыны укыр яратылӥз уга. Со понна кӧня тыш но сиылӥз, ӧз 
визьмаськы. Кыӵе ке нылмурт вылэ синмыз усе ке, олокытӥ-мартӥ котыраз биниське 
но куак улэ кыске ини. Соин ик зэмос яратонлэсь шӧмзэ ик веръямез ӧй вал на.
Волга дурын частьсы сылыку на ай, пушказэс Иовисарлэн тракторез борды 
дэмӟытыкузы, Митанлэн макесэз вылэ лафет усиз. Солдатэз эмъяськонние выдтӥзы. 
Мугорзэ бур пыдес улысеныз мӧля дорозяз гипсэн коросазы. Калык сямен педло но 
потаны, пукыны но уг быгаты. Сӧсырмем муртлы юрттӥсь, утялтӥсь санитарка Паша 
луиз. Та трос нылпиё, куанер семьяын будэм нылмурт, ас мылкыдызъя армие 
кошкытозяз, ӟеч улонэз адӟылымтэ. Мӧзмыт уй-нуналъёссэ егит шудонъёс гинэ ӧжытак 
шулдыртылӥзы. Пӧлат-вият дорысьтыз ӧжытаклы ышытскоз но пукон коркан сое 
ӟыгыртӥсь ӧз ке луы, берен дораз дыбыр кошкоз вал. Нош ӟыгыртэмлы ноку ӧз 
пумитъяськылы. Мукет нылъёсты мусояло ук, маин Паша соослэсь пӧртэм? Быдэ 
вуэмъяз мугорыз чеберскиз. Кузялэс ымнырызлы, бадӟым ымызлы луыса, пиос понна 
кутъёслы чечы кадь ӧз потылы, дыр, но пимуртлы тынад тусбуед котьмалэсь мусо уг 
поты ук. Уката ик пеймыт уйёсы, ӟыгырскеме тугъяськем егит мугоръёс гомӟыку.
Арлыдызъя санитарка Митанлэсь куинь аресъёслы бадӟымгес. Сӧсырмем пияшез со 
нырысь-валысь вынзэ кадь адӟиз. Вӧзаз пуксиз но, чик кепыратэк, возьдаськытэк, 
солэсь дӥсьсэ кылиз, вылтырзэ, кунулъёссэ, кук виссэ спиртэн коттэм бинтэн 
ӵушылӥз. Тодматскыкузы ассэ вылтӥяськемъяськыса Паша Ангелина шуиз.
- Озьы-а, ма! - серектӥз Митан. - Иське, мон - Водопьянов.
Паша Ангелина - Совето Союзын тракторен ужась нылкышноослэсь нырысетӥ бригадазэс 
кылдытӥз, Вылӥ Кенешлэн тодмо депутатэз луиз, нош Водопьянов - лётчик, Совето 
Союзлэн Героез.
Санитаркаен ӟечгес тодматскемез бере Митан тодӥз, Пашалэн песятаез бигер вылэм. 
Фамилизэ солэсь нуллэ.
- Тон но ӟуч ӧвӧл ук? - нылмурт валатскиз.
- Удмурт мон. Сыӵеос сярысь кылэмед вань-а?
Паша удмуртъёсты тодэ вылэм, соосын пумиськылэмез ке но ӧвӧл.
Медпунктысь пӧрась ӝытлы курег сӥлен макарон дасям. Пашалы чурыт юдэс сюрем.
- Мар та таӵе?
- Курег ӵӧн, - удмурт сямен вераз Митан.
Ӟуч кылэз гинэ тодӥсь муртлы "ӵӧн" кыл, валантэм сяна, вераны быгатонтэм но 
вылэм. Митан бӧрсьы нёжтыны выре:
- Тшэ-эн.
Нуналмысь ас понназ со кылэз нукыртыса ветлӥз, нош чылкыт вераны ӧз пишмыты. Ӧз 
но шӧдылэ, кызьы Пашалэн нимыз ик Ӵӧн луиз.
- Мар ни, Курег Ӵӧнэ? - Паша палатае пырыку ик вазе Митан.
- Каллен поръяськом, Курег пузэ, - серектэ соиз.
- Маин сюдоды туннэ?
- Курег ӵӧн, пе, луоз.
Кыкназы ик горо. Озьы серекъяса-мараса, нылын пиен пумен матэкто. Паша шӧдӥз, та 
висисезлэн мугорыз - луло азвесь. Бордаз йӧтскыны уг луы, соку ик ӟырда. Уката 
ик кук висказ кидэ вуттӥськод ке, быдэсак гомӟе. Санитарка одӥг пол, кык пол 
шӧдымтэ улсы кариськиз, но ялан озьы уд выры ук, аслад но вирыд шудэ бере.
- Мар-ось тон сыӵе, Митрофан Евсеевич? - дырекъясь куараен юа.
- Кыӵе мон тыныд Митрофан Евсеевич! - вожпотэмъяське висисез. - Митыр Митан мон, 
Курег ӵӧнэ, - нылмуртэз бордаз кыскиз, кытӥ-мартӥ гадьзэ но кырмалтыны вуттӥз 
ни. - Ох, ческыт, дыр, тон, уть, ой, кыӵе пӧсь котырыд.
- Ачид но... - Паша каньсыраз.
- Ку? - сыр куалекъя Митан.
- Гипстэ куштэм бере...
Ойы! Кызьы чидалод на, ческыт-пӧсь тулкымъёс быдэсак пылато ук! Паша зурк! 
султӥз, ӵем шока, ымнырыз ӵыж ӵыжектэм, синъёсыз чиляло, пертчиськем дэрем 
улысьтыз гадьёсыз тани-тани погыльскозы. Эх, султыса ӟыгырты вылэм - уг луы, 
Митанлэн мугор гипсэн эгесамын. Ныллэсь берзэ нюлам киыныз вешаз но, дэрем 
сӧзулзэ ӝутыса, гольык макессэ маялляз. Кисьмамын, дартэн чарс-чарс жалемын ук 
та! Э-э, сюлмы!
Митанлэсь гипссэ Белоруссие вуэмзы бере гинэ куштӥзы. Курег ӵӧн ик вандылӥз сое 
но, нылын пиен уйлэсь вуэмзэ мырдэм витьыны чидазы. Ческыт сьӧлыкен пачылам 
дырзы Онисим ялӥськытозь кыстӥськиз. Улияна умме усе гинэ, Паша кыштырак гинэ 
Митан вӧзы вуэ. Ули бен ӝоген шӧдӥськиз, кытчы эшез уйлы быдэ ышылэ, нош со 
сярысь огзы но вераськон ӧз поттылэ.
Онисимлэн вуэмез Пашалы силё-сюрно пӧлы кугӟам кадьлась. Митанэз ӵуказе ӵукна 
кошкоз ни, соин ик берпуметӥ уйзэ мусояськысалзы на, нош кытчы Онисимез карод? 
Буш койка туганэныз артэ сяна ӧвӧл. Улиянаен артэ шат интыяно? Нош тодмотэм 
пимуртэ бызьыны вуэм ныл вӧзы кызьы-о выдтод? Улияна кызь аресказ мынэ ке но 
ини, пиос сярысь кыл ик уг поттылы на. Онисимлэн нылъёс котыртӥ зынъяськемез 
вань ни, дыр, иське, чебер Улияна борды лякиськоз. Соосты ваче син вуттоно, нош 
кызьы но кытын меда? Гужем нуналэд кузь ке но, пумыз вуэ ини. Ӟудэм ныл 
Митанэныз кенешоно кариськиз. Соиз эшеныз кенешыны вуэм ни вылэм но, Онисим 
кылымтэ улсы кылем. Дусымъёс азбаре потӥзы. Онисим гичулысь( лэзькем пулэз 
чекычен кортӵоганы выре. Со тэк пуконэз уг тодылы, лэся. Бакчаын но гудӥськыны 
вуиз ни, кыед но поттӥз, жадёнэз валасьтэм кузьыли но тӥни. Нош Митан - 
тяпайтӥсь майсы. Но тани Онисим доры Улияна вуиз, пияшлы кизэ миськыны ву ваем, 
пельпум вылаз тӧдьы ӵушкон ошемын. Куспазы маке лабыртӥзы но бакча капка пала 
вамыштӥзы. Шайвылэ, пе, ветлом. Отын корка кузё, Улияналэн бубиз, Хаим Рудь, 
ватэмын. Кема ик ӧз ветлэ, берытскизы. Митан Онисимез ӝогак палатае валтӥз.
- Уин мон доры Паша лыктоз, - шыпыртӥз со, - нош тон солэн интыяз кӧл.
- Улияна тодэ-а?
- Нылъёс куспазы кенешиллям ини.
- Зэм шу?!
- Улияна вӧзаз шальыез выдтэм ини. Мерскид ке, йырдэ мертаны.
- Озьы-а, ма...
Доразы чульк гинэ Паша пыриз. Чик кепыратэк-маратэк Онисимлэн валес вылаз 
пуксиз.
- Соид ныс-ныс изе ини, - Улияналэн висъетэз пала йырыныз шонтӥз. - Мын ини, 
ойдо, ваньмыз кӧло, нокин уз люкеты.
Онисим уг лула. Паша котыраз кариське:
- Ма, тон, Оня, пиосмурт-а, ӧвӧл-а? Вай-ко, мон тынэсьтыд мылкыддэ узато.
- Ойы, возьыттэм ик тон, - Онисим палэнскиз. - Тӥни Митанэд, нугылля, кӧня мылыд 
потэ, - султӥз но ӧс пала керӟег вамыштӥз. - Шайтан кышно, - нукыртӥз ас понназ, 
- нимме кызьы пӧръяз, ява. Оня, пе. Укылтэм. 
Нош санитарка солэн бӧрсяз кылъёссэ келяз на:
- Ӟырдыт пияш, дыр, тон. Митанэ ке ӧй луысал, мон тонэ одно вылам вуттысал. 
Мотри, нылашед борды зӥбытгес кутскы, эн дырты, ежгес на со. Ма, мусояд ке, 
небӟоз, со но кышномурт выжы ук...
Улияна тылзэ кысэм ни вылэм. Изе-а, иземъяське гинэ-а, уд вала. Онисим кыштыр 
гинэ кылиськиз но буш валесэ выдӥз.
Нош Паша со вакытэ Митанэз котыре биниськиз ини, пиез ӟыгыртыса валесэ уськытӥз 
но вылаз кыскиз.
Егитъёслэн дырез чаклан сярысь йыразы но ӧз лыкты. Нош инвожо толэзь 22-тӥ 
нуналаз выжытозь одӥг час гинэ кылемын на вал.

Улияна
Ули тэтэ дырысеныз пичиослэсь мӧзмыса будӥз. Мумиз сое сяна пинал ӧз вайы но, 
хуторын огназы гинэ улӥзы бере, Улияналы ас ёзъёсыныз шудыны туж шер учыралляз.
- Меми, кытын мынам сузэре, кытын выны? - анайзэ ёртылӥз со. Нош ма вералоз 
кышномурт, туж но туж витёно нуны гердэз пушказ ӧз быгыльскы ни бере. Куамын 
ареслэсь егит кышно, пинал ваён быгатонзэ утчаса, кытӥ но ӧз ветлы, эмчиослы но, 
абызъёслы( но, туноослы но, оло, аслыз сюсеткалы но вазиськылӥз, пайдаез ӧйлась. 
Олокыӵе но эмъюмъёс пумтэм юылэмысьтыз-а, мар-а, тупатскем интые, бордаз 
вормонтэм висён лякиськиз. Валесын кык ар ёрос костаськемез бере лы но ку луыса 
кулӥз. Ули дас куать аресказ мумытэк кылиз.
1939 арын куарусён толэзе шунды пуксён пал белорус музъем Совето Союзэ пыриз. 
Таин валче хуторлэн улоназ воштӥськонъёс туж ик ӧз шӧдӥське. Хаим Рудь азьвыл 
сямен ик нюлэсчи луыса ужаз, нош Улияна мединститутын дышетсконзэ азьланьтӥз. 
1941 арын гужем пал хуторазы медпункт интыяськиз. Хаим талы пумит ӧз кариськы, 
угось коркаез бадӟым, инты ваньмызлы тырмоз. 
Вылаз ик, нылызлы уж шедиз - сое медсестра каризы. Ожгарчиос пӧлын висисьёс, 
сӧсырмемъёс шерос гинэ луылӥзы, Улилы номыр карытэк, пичи ке но, уждун басьяны 
умой ӧз поты, сиён пӧрасе куриськиз. Ма бен сиськисьёсыз но чиньыен лыдъямон 
вал: бубиз, песянаеныз песятаез, фельдшер, Паша, Митыр Митан но ачиз.
Нюлэсчилэн семьяяз вуоно войналэн матэктэмез сярысь оломар трос ӧз вераськылэ, 
угось оскыса улӥзы, Хаим - коммунист, лесничестволэн парткомаз пыртэмын бере, ку 
но кызьы кариськыны тодоз, дыр, шуизы, лэся. Тани туш но лэзиз, туж тумошо 
адӟиське, Гитлер, пе, выламы урдскиз ке, эшъёсыным пеймыт нюлэскы кошком, 
партизан луом. Райкомлэн косэмезъя со мукет коммунистъёсын ӵош сьӧд тэльёсын му 
коркаос, пыӵал тӥрлык, сиён-юон тырыны ватэгъёс гудӥзы. Хутор котыре ожгарчиос 
вуэмен, татын улӥсьёслэн мылкыд куашказ. Хаимлэн бубиз пиезлэсь кушетскыса юаз:
- Асьмелы татысь кошкыса умойгес ӧй луысал-а?
- Кытчы?
- Ож сузёнтэме.
- Келяло тӥледыз. Вераськи ни, - буйгатӥз Хаим.
Нош нылзэ мукет юан сюлмаськытэ вылэм:
- Тятя, нош малы-о Гитлер еврейёсты выжытэм быдтыны турттэ?
Бубиз секыт лулӟыса валэктӥз, Германиын еврейёсты Гитлер сяна но адӟонтэм 
карисьёс пумтэм луизы. Сыӵе фюрерзэ уга немец калык ачиз бырйиз. Ма, евреез 
яратӥсьтэмъёс мукет кунъёсын но вань гинэ. Солэн, визьмо но быгатӥсь луэменыз, 
асьсэды азьпалтэмезлы вожъясько, дыр.
- Мон тонэ шонер ке валай, - Ули атайзэ куспетӥ кариз, - еврей калык визьмыз 
понна Инмарлы тау карыны кулэ.
- Э-э, озьы гинэ ке луысал, - Хаим йырзэ бергатӥз. - Дарвинлэсь валэктэмзэ но 
лыдэ басьтоно, угось быгатӥсез еврей ӝутӥське, нош лябез ӟызыме, начарме. Улон 
ачиз дауръёсын озьы калыкез пужнэ.
Улилэн мукетъят ма но со юалляськемез потэ на вал но, ӧз вуы, бубизлэсь сюлэмзэ 
шуак кысӥзы. Партизанъёслы ватскыса улон инты лэсьтонысь бертыкуз немец шпионъёс 
шоры ӝимем. Телефон ез кузя партизан каре лушкем мыно вылэм.
- Кинъёс тӥ? - лэчыт синъёсыныз портыса юам Хаим. Пумитаз шедемъёс пӧлысь огез 
ӟепысьтыз кыӵе ке кагаз поттыса мычем, нош мукетыз вал вылысь мыкырскем 
нюлэсчилэн тыбыраз кинжал донгем.
Атайзэ жаляса но солэсь мӧзмыса, Ули уен-нуналэн синвузэ кисьтылӥз, кыласа-
бураса бӧрдылӥз, выль шайвылэ ялан ветлылӥз. Онисим вуэм бере ӧжытак буйгатскиз 
кадь. Нырысь адӟемаз ик та пияш солы кельшиз. Паймоно кадь, Митанэн ӵош будэмын, 
нош чылкак мукет адями: лякыт, востэм, куаразэ мултэс ноку уз потты. Инмарлы но 
оскисько, пе. Корка нырысьсэ пырыкуз ик вӧсяськиз. Тусын туж ик чебер уд шуы, 
нырыз кузьгес но, ӵок. Со понна чагыр синъёсыз визь-визь учко, ныллэн мугортӥз 
возьдаськытыса уг бызьыло. Иське, ужпи сямо ӧвӧл. Сиськыкуз ассэ туж ӝикыт возе, 
ӝӧк сьӧры пуксьыкуз но, потыкуз но киоссэ, ымнырзэ гылтоз. Кӧтсэ тырыса, 
шутэтскыны ӧз выды, уж юаса, азбаре потӥз. Митанэз ке верано, соиз сиськыса, 
часэн-часэн валесэз мерта.
Шайвылэ ветлыкузы но Онисим мултэс ӧз лула. Сомында чебер сяськаос пумитазы 
сюрылӥзы, ӧз мыкырскы, ныллы кузьманы шуыса ӧз ишкалты. Ялан ас понназ 
малпаськыса чус вамышъяз. Сыӵе ческыт возь выл зынъёслэсь альтэмзэс ӧз ик шӧдылы 
кадь. Нылмурт шоры огпол но учкылытэк мынӥз. Эсьма, вукырем вамен потыкузы солы 
кизэ но ӧз сёты. Ӧйтӧд, ма солэн йыраз сокем кугӟам. Ули пияш шоры лушкемен 
учыръяз, соизлэн тусыз кунэрес ке но вал, ныллэн секыт мылкыдыз малы ке 
каньылаз.
Шайвылысь но озьы ик пал кыл вазьытэк бертӥзы. Пашалэн вуоно уй сярысь 
шыпыртэмез Улиез чылкак паймытӥз. Курдатӥз но. Ма, кызьы сыӵе зӥбыт, востэм 
пимурт тодмотэм нылэн ваче кӧлыны лыктоз? Со возьыттэм Митанэн Курег ӵӧн, соослы 
дартъяськыны медам люкеты шуыса, юн сюлворизы, луоз.
Пумит кариськыны ӧз дӥсьты бере, Ули ма карыны, та уйзэ ассэ кызьы возьыны 
ӟудыса, кӧлыны пырыкуз сьӧраз секыт шальы кутӥз но валес улаз понӥз. Онисим 
кыштырак вуыку нылмурт изем улэ аналскиз, нош аслаз быдэс мугор золскемын, 
пельёсыз котькуд ӵаштыртэмез саклало. Тани пияш кылиськиз, выдыкуз валесэз 
ӟукыртӥз. Вырӟылытэк кылле, олома лулӟылэ, ачиз уг лула. Озьы кыксы но, кыл-
куара сётытэк, далай улӥзы. Улилэн уммез, валамон ини, матаз но уг лыкты. Йыраз 
олома но малпанъёс бергало, малы ке ваньмыз матаз кыллись пи вылэ вуо. Мумизлэсь 
берло кылъёссэ тодаз ваиз. Поляк семьяын вордскем но еврей кузпал луэм кышномурт 
шуиз вал:
- Тон, нылы, быдэ вуэмын ни, соин ик та кылъёсме пеляд пон: еврейлы эн бызьы. 
Сотэк но ӝыныез вирыд еврейлэсь ини. Нылыд-пиедлы визьмо, чырмыт луон понна таиз 
но тырмоз. Еврей выжы калыкез адӟемпотостэм карисьёс та дуннеын пумтэм. Тон сое 
уд шӧдӥськы, уго тусыдъя кисьтэм-басьтэм ачим кадь, бубидлэн одӥг виштыез но 
лякиськымтэ. Тынад но пиналыд ачид кадь медло. Соку сое но инмар выжы луэмысьтыз 
нокин уз бышкы. Соин ик ӟучлы бызь. Яке чувашлы, вотяклы.
Чуваш сярысь Улилэн кылылэмез вань, нош кин со вотяк? Бӧрысь тодӥз, вотяк - со 
удмуртэз ултӥям кыл вылэм. Митан вераз. Евреез укылтэмъёс Иуда, жид шуо, ӟучез - 
кацап, нош удмуртэз, пе, - вотяк. Мар верам меда со? Митанъя ке чаклано, иське, 
- покач, азё-беро, акылес мурт. Нош Онисим? Таиз тӥни - кыӵе сабырлы но 
кельышлы. Кудзы вотякесьгес? Онисим медло вылэм. Со кадь вотякен... э-э, 
удмуртэн уртче улыны туж каньыл луысал вылэм. Малы нош "кадь"? Онисим артэ ик 
кылле ук, султы, дораз мын но шобыр улаз чульк гинэ пыр. Ӧвӧл, ӧвӧл, озьы уг 
яра, нырысь вамыш пиосмурт лэсьтыны кулэ. Улилы песянаез озьы индылоз вал. Ма, 
Польшаын, оло, сыӵе сям возизы, дыр, но, СССР-ын озьы уг выро, луоз, угось татын 
пиослы но, нылъёслы но огкадь эрик сётэмын шуо ук. Осто-о, ныллэн йыраз олома но 
лыктэ, ява. Курданэз дӥсьтонлы уг сётскы. Ӵок, Ули уз султы, Онисим вӧзы выдӥз 
ке, соиз, кин тодэм, пешкытыса лэзёз, вылаз ик, серем кароз. Кин ке Улиез али 
кышкатысал ке, соку...
Онисим вуыку хуторын огезлэн но мылкыдыз ӟеч ӧй вал. Пияш сое шӧдытэк ӧз кыльы. 
Соинтэк-а ассэ сокем востэм возиз, куаразэ будэтэмлэсь кӧбераса вераськиз. 
Гольтырес вырись Митан шоры но ӝотырес учкылӥз. Иське, пересьёсты, Улиез жаля, 
висись яразэс шӧдтэк кыльыса ӵабтэмезлэсь кышка. Соин ик мултэс уг зульы, соин 
ик али но валесэ шыпак выдӥз но умме усиз. Усиз ке...
Онисим... Ма, со вуиз но Улилэн сюлэм вылаз зӥбись куректонэз капчиязгес. Кыӵе 
со оскымон, йӧн-йӧн пиосмурт. Таӵе муртлы бызем нылъёс шудо луо, дыр. Ӧйтӧд, 
ӧйтӧд. Улондэ пиосмуртэн чебер мытон сярысь Ули нокинэн ӧз вераськылы на. Кузпал 
шедиз ке, песянаез визьмалоз-валэктоз кожаз, лэся. Эк, малы азьвыл ик ӧз 
юалляськы меда? Сюанзэ витьыса улӥз уга. Нош малы одно ик сюан уйдэ витёно? 
Витьыса, витьыса вить ик кылёд. Аслыд ик нырысь вамыш лэсьтоно, но кызьы 
дӥсьтод? Ма, та Онисим ачиз ик султы вал но вӧзаз выд вал. Тодаз лыктӥз валес 
улысьтыз бодыез. Э, шузи ик тон, Ули, пимуртэз вӧзад витиськод, нош ачид сое 
тышканы шальы дасяд. Дыр уйшор ни, луоз, быдэс уй но тазьы ик ортчоз-а, мар-а 
ини. Нылмурт пумен-пумен изён бус пӧлы выйыны ӧдъяз...
Онисим Улилэсь витемзэ шӧдэм, лэся. Тани со валес вылаз пуксиз, собере ул 
эрезьзэ, ул дэремзэ кылиз но домбыль гольык лась. Остэ быри! Ули пала пыдчиньы 
вылаз кыстӥське. Вӧзаз выдӥз, шобрет улэ нюжак пыриз. Улилэн мугор сыр 
куалекъяны ӧдъяз, пиосмуртлэн киосыз кӧлан дэремзэ выллань кыскизы, шуныт 
чиньыос пельпумъёссэ, ноныоссэ, макесъёссэ йыгыръяло. Инмаре! Кыӵе умой, кыӵе 
ческыт вылэм пимуртлэн мусоямез. Номыр кышкытэз вылымтэ, куалекъятэк сётскиськод 
ке. Небыт ымдуръёс бамъёссэ бичатӥзы, Улилэсь ымдуръёссэ лякыт пачкатӥзы... Кыӵе 
со валантэм шока... Номыр уг вазьылы... Бен, озьы ик мукетъёслэн но ужзы луэ, 
дыр: лушкемен, пеймытын, кыл поттылытэк... Ой, мыйыкез бичатэ, ӝыны уй куспын 
будыны вуттэм шат? Мыйыкез ӧй вал кадь ук? Пилэн пӧсь пыдесыз Улилэн золскем 
макесъёсыз вискы донгиськиз, тани-тани вылаз выдоз, пачкатоз. Ма, одӥг кыл ке но 
вазь вал, Ули кышка ук. Зугырак луыса киоссэ ӝутӥз но вылаз лэзькись 
пельпумъёсты пыкъяз. Соку ик тодаз лыктӥз: сӧсырмемез вӧсь луоз ук! Но кытын 
яраез, ӧвӧл ук? Кин та?! Митан, албасты! Чатран! Онисим кариськыса монэ алданы 
малпад!
Шуш черекъямысьтыз Улияна шарак потӥз, валесысьтыз тэтчиз но бызьыса педло 
потыны медэ вал, ӧсэтӥ пырись Онисим шоры донгиськиз но солэн чыртыяз ӟыгырскиз, 
викышъяса куалекъя.
- Кин?! - лек юаз соиз.
- Мита-ан, - бӧрдэ Ули.
- Митан?! Кытын?! - отчы-татчы учкылэ Онисим.
- Вӧта-ам...
- А-а, озьы-а, ма? Я, я, буйгатскы. Чыртыме лэзь, кекатод. - Онисим нылмуртэ ки 
вылаз лӧбак ӝутӥз но валесаз нуиз. Пичи муртэ музэн веша, шобретэн шобыртэ.
- Эн кошкы, - викышъя Ули, - кышкыт мыным.
- Мыным но маке секыт. Гудыръям, чилекъям азьын кадь. Куазез юри чакланы потай 
вал. Ин сайкыт. Тӧл ӧвӧл. Нокыӵе куара уг кылӥськы - ваньмыз ныс-ныс кӧлэ, одӥг 
вай но уг вырӟылы. Я, я, буйгатскы ни, мон татын, - Онисим ныл вӧзы пуксиз. 
Котыр шыпыт, нош сюлэм малы ке но сызла.
Ули огзэ кизэ пилэн кырымпыдсаз понӥз, мукетыныз чиньыоссэ куасалтытӥз - 
ӟыгыртэм кадь луиз.
- Выд, - шыпыртэ со. Онисим ӧз вала, малпаз, сое ас валесаз ысто.
- Изён уз пегӟы. Буйгатскы, ойдо. Мон вӧзад пуко, эн кышка ни.
Та Онисим пичи пинал кадь валасьтэм. Яке юри озьы турттэ-а? Шузи... Кылатэк 
куалекъяса, дартэн жӧломем Ули борддор пала берытскиз. Кема ӧз вырӟылы. 
Куатаськиз. Нош Онисим номыре ӧз вала, лэся, ныллэсь йырсизэ но ӧз маялты, шыпак 
султӥз но выльысь педло потӥз. Мур лулӟыса. Ӧйтӧд, ма солы сыӵе маза уг сёты? 
Ули пилэн бӧрсяз ымдуръёссэ куртчылыса учкиз: "Э-э, шузи ук, шузи!" Ӧз тоды уго 
со, кӧшкемыт ож пуромонлэн матэктэмез Онисимлэн шӧтаз усе вылэм шуыса.
Нош шимес вир кисьтон кутскытозь кык час гинэ кылемын на вал.

Ож пери ӝутскиз
Кунгож сьӧрын лыдтэм фашистъёс шунды ӝужатозь ик пыд йылазы вал ни. Тросэз 
кӧлыны но ӧз выдылэ. Гитлерлэн но Геббельслэн узатэм-урмытэм уно миллион 
ожгарчиоссы дышем сямзыя мисьтӥськизы, мычиськизы, ческыт сиизы-юизы но Тӧдьы 
зарезьысен Сьӧд зарезёзь кыстӥськись кунгож сьӧрысь быдӟым кун вылэ омырскыны 
косэмез витизы. Нош диверсантъёссы, сьӧд ужзэс лэсьтыса, шумпотымон иворъёс 
ыстылӥзы ни: Горд Армилэсь штабъёссэ герӟась телефон езъёс, пе, вандылэмын. 
Соосты выльысь итыны ыстэм связистъёсты ваньзэ виыло. Визьмын ужазы фашистъёс, 
угось тодо вал, ӟучъёслэн рациоссы туж ӧжыт, соин ик дивизиос, полкъёс куспазы 
радио пыр вераськыны уг быгато ни. Диверсантъёссылэн иворъёссы немец 
ожгарчиослэсь мылкыдзэс уката лӧпкыто, вакчи дыр куспын вормонлы осконзэс 
юнмато. Со сяна, ожъёс кутскон азьын ваньмызлы немец ожчиослы Гитлерлэсь 
приказзэ лыдӟизы. Мурт музъем вылэ ожалскытозязы, фашистъёс доразы ивор ыстыны 
дырто. Гожтэтсы вуытозь, соос уго большевикъёсты, жидъёсты быдтӥсь дано немец 
пиос луозы ни. Куд-огез кунгож сьӧры шымырасагес ик учкылэ но, кышканзэ пачкатэ, 
бырон я сӧсырмон сярысь малпанзэ улля, ассэ ачиз буйгатэ: Иван кышкаса пегӟыкуз 
улаз мед лэзьылоз. Ганс яке Фриц сое одно сутозы, визьтэммонлэсь мозмытыса 
лулзэ ишкалтозы.
Дыр туж вазь ке но вал, Онисим, азбаре потыса, валъёсты люктаз, толло турнам 
сизьйырез сётӥз. Собере гидысь кыедэз куштӥз, мунчое ву нуллӥз. Ужзэ быдэстыса, 
бакча берысь шур дуре уӵыосын пумиськыны васькем вал но, одӥг тылобурдо куараез 
но ӧз кылы. Котырак шим-шим, ӟепысьтыз паки пуртсэ поттыса, бадьпу йылэз вандӥз. 
Сулзэ кыскыса, чипсон лэсьтыны малпаз. Дор палъёсыз тодаз лыктӥзы. Одӥг пол, 
Можга педучилищеын дышетскисьёс гуртазы концерт возьматэмзы бере, Онисим 
эшъёсыныз гурт калыксэс паймытыны малпазы. Кузьдалазыя но зӧкталазыя пӧртэм 
чипсонъёс лэсьтыны быдэс тулыс выризы. Собере шуланы дышетскизы. Лушкемен 
пырскемзы юнме ӧз лу. Возь вылэ турнаны васькем анай-атайёссэс эктон гурен 
шулдыртӥзы. Кыӵе-кыӵе соосты вешазы, ӟыгыръязы соку. Онисим соку, оло, нырысьсэ 
валаз, калыклы ӟеч уж лэсьтӥськод ке, со тыныд уката бадӟым ӟечен берытске.
Бадьлэсь чипсонэз тулыс гинэ лэсьто, гужем соин уг выро ни, угось сулэз соку 
пуэз борды тач-тач бурмемын луэ. Сое тодыса вылысь, Онисим шуланзэ пӧрмытыны 
турттӥз ик но, пайдаез ӧйлась, сул гумыез, пушкысьтыз пузэ донгыны выронъяз, 
пилиськыса кошкиз. Бакча бере потэмез Онисимлэн кисьӧр луиз. Оло ке пыласько шуэ 
вал, шурлэн нимыз гинэ шур вылэм, вуэз пыдесозь но ӧвӧл, кучапилы ке шат уямон. 
Лысвуын котмем пыдкутчанзэ куасьто шуыса, вайёс вылэ ошылэм вал - ӝужась шундыез 
пилемъёс ватӥзы. Иське, кытын ке тӧл поръя. Пилемъёс - соос тӧлтэк уг калтырто. 
Нош хуторын ялан одӥг куар но уг выры.
Азбаре берытскыса, Онисим вием нюлэсчилэн ветлоно валэз доры выльысь кожытэк ӧз 
чида. Сыӵе чебер со - синъёстэ воштэмед уз луы: тӧри гонэз майталэн миськем 
кадь, вальк-вальк кисьтаське, быжыз, изнэсэз, пельёсыз сьӧдэсь, нош пыдъёсыз - 
выль тӥр ныдэз пияла чалепен вуштыса но сыӵе вольыттыны уд быгаты. Онисим тӧри 
Красавчикез топ-топ вешаз, солы эшшо сиён сётӥз на.
Со куспын ингож палась пилемъёс ог-огзэс уйылыса шудэмысь дугдӥллям, шундыез 
огназэ кельтӥллям. Нош Онисимлэн пыдкуксэ куасьтон сярысь тодаз ӧз лыкты ни. 
Липет улысь велосипедэз адӟиз. Кутыса эскериз - ваньмыз интыяз, али ик 
ворттылыны луоно. Нуназезэ губияны яке узы-боры эскерыны потано ке шат? Нош али 
Улияналы сиён дасяны юрттысал ке, мултэс ӧй луысал. Шуак инмысь мар ке жуэтэмез 
кылӥз. Йырзэ ӝутӥз но - палэнэтӥгес лузь быдӟа гинэ адскись самолёт лобе. Ай 
огназ ӧвӧл, бӧрсяз мукетъёсыз но вань. Хутор доры вуытэк, соос лэзькыны шӧтазы. 
Полигонэ пуксьыны медо ке шат? Нош отын аэродромзы ӧй вал кадь, агаеныз 
пумиськыкуз Онисим синйылтытэк ӧй кельтысал. Нырысетӥ самолёт мае ке куштӥз. 
Полигон вырйыл сьӧрын, хуторысен уг адӟиськы, мар отчы усиз, уд тод. Музъем 
вылысен ыбем кылӥськиз. Мукет самолётъёс вуизы, таосыз но мар ке куяло. 
Полигонын дыбыр! ыбыло. Уть ай, изён но соослы изён ӧвӧл, учениоссэс сокем вазь 
ортчыто, ява. Нош омырын ог дасо самолётъёс бергало, чипы вылэ душесъёс музэн 
уськытскыло но, кутыны быгатытэк выллем, берен ӝутскыло. Нап ӵынлэсь бугырскемзэ 
адӟыса, Онисимлэн сюлэм шымырскиз: музъем вылын уг ыбыло, музъем бомбаослэсь 
зурка. Тушмон бомбаослэсь!
Война! Тодӥзы ке но со кутскоз шуыса, ӧз оске. Оскизы ке но - сокем ӝог ӧз вите.
Война... Оло нош, ӧвӧл? Оло, маке мукет? Но малы собыдӟа сьӧд ӵын бугыръяськыса 
ӝутске? Адӟоно, тодоно, ӝоггес!
Хутор сьӧры потэмез бере гинэ Онисим велосипедэн ури-бери ворттэмзэ валаз. 
Сюлмыз гадьысьтыз потымон жугиське, йырыз пилиськыны дась. Азьтӥз ик, сюез 
пазяса, тушмон самолётысь ыстэм пуляос сюрессэ вандӥзы. У-у, сьӧсьёс! Ма, кытын 
асьме самолётъёс, малы душесъёсты музэ уг сапкыло? Кытын зениткаосмы, малы уг 
ыбыло? Юанъёс, юанъёс. Кин валэктоз? Ма луоз ни табере?..
Полигонысь ожмаськон ужлы дышетскыны пуктылэм гаубицаос но пушкаос тушмон 
самолётъёс шоры ыбылыны уг быгато вал. Зениткаос матын ӧвӧл. Нош асьме лётчикъёс 
артиллеристъёсты утьыны ӧз вуэ. Война кутскон азьын кунгож дорысь аэродромъёсын 
сюрс вить сюлэсь уно выльёсыз но кӧня ке сюрс вужмемъёсыз самолётъёсмы сылӥзы. 
Выль самолётъёсын лобаны кык сю пала гинэ экипажъёс дасямын вал. Соингес ик 
тушмон сюрс кык сю пала выль самолётъёсмес война кутскон нуналэ ик музъем вылын 
быдтӥз. Озьы немецъёс омырын кузё луизы но кызьы мылзэ потэ озьы эрказъяськизы.
Хутор дорысь полигонын одӥг пушка но, одӥг тягач но быдэс ӧз кыле, ваньзэ 
бомбаос сузмытӥзы, снарядъёсты пуштытӥзы. Тушмон самолётъёслэн лыктэмзы сярысь 
артиллеристъёс тодысалзы ке, ватскыны, кир-пазь кариськыны быгатысалзы, озьы 
асьсэды ке но утьысалзы, нош полигонэ кыскем телефон езъёс вандылэмын вал бере, 
кышкытлык сярысь иворез татчы ыстыны ӧз луы.
Сутскем, пазям, бугыръям полигонэ вуэм бераз Онисим дэймиз: ожгарчиосмылэн 
шӧйёссы пасьтана костасько. Кудӥз-огез сайкаса но вуттымтэ, лэся, ул дӥсь коже 
кыллё. Данаксэ шӧй-ӧлексы но шуыны кылыд уз берытскы, сокем соос сузмытэмын: 
огезлэн суйыз, мукетызлэн пыдъёсыз ӧвӧл, котырак сюен сураськем адями люкетъёс, 
вир, шимес трос вир... Онисим велосипедзэ музэ сэрпалтӥз но пумыса сылэ. Курыт 
ӵын шоканзэ пытса, шимес суред онгратэ, зӥбе, синвузэ пызьыртэ. "Тани кыӵе тынад 
эзелед луысал, агае, - шыпырто ымдуръёсыз. - Мон ке тон интые ӧй кыльысал, тонэ 
но сюен сурасалзы". Пыдесъяськем ожгарчиез адӟыса, со доры вамыштӥз. Соиз 
мыкырскем но, музъем вылэ пыкъяськыса, мукет ымысь кыл потэмез вите, вирен 
орсмем шӧйлэн ымысьтыз. Соизлэн йырыз но гадьыз гинэ вань на, мугорызлэн улӥыз 
быдэсак ишкалтэмын. Дораз лыктэм муртэ шӧдыса, мыкырскем ожгарчи Онисим шоры 
шузимем синъёсын учкиз, шӧйлэсь йырзэ маялтӥз:
- Тон, Митюке, вить ӧжытак, мон али ик... шедьто пыдъёстэ, - султӥз но 
шонаськыса палэнскиз. Онисим, ма карыны, кытчы вамыштыны тодытэк, измем кадь 
сылэ. Бен, со но та шӧйёс пӧлын луысал ук, кызьпуэн ке ӧй тыгиськысал. Агайзэ 
Онисим утиз, нош аслыз кин-о бырыны ӧз сёты. Велосипед? Кызьпу? Арон - тӥни кин 
солэн утисез. Велосипедэз солэн вал ук. Иське - Арон. Витёнтэм шорысь пумитаз 
сюрем адями. Оло, витёнтэм шорысь но ӧвӧл, оло, сое ачиз Инмар ыстӥз. Котькин 
мед луоз но, Онисим выльысь валаз: адямиослы ӟеч лэсьтэмед аслыд ик ӟечен 
берытске. Уть ай, Лиза нылзэ ке ӧй вордысал, Онисим Белоруссие но ӧй потысал. 
Лиза картэзлэсь мӧзмиз, Иовисарлэн нылзэ адӟемез потэ вал. Онисим валаз но жаляз 
соосыз, ваче вуттыны кариськиз. Табере тани кызьы ваньмыз берытскиз.
Малпанъёсызлэсь мозмытскыса, Онисим полигон бервылэз эскериз. Ветлӥсьёс уг 
адӟисько. Кытын но отын ӝуштэм, шуш черекъям кылӥськылэ. Сьӧд ӵын сьӧрын, вӧсь 
луэмезлы чидатэк, сӧсырмем мурт, юрттэт курыса, ыме тэронтэм кылъёсын кесяське. 
Котырак - шурдыт, шимес. Сюлмыд ляб ке, путоз.
Шузимем ожгарчи берытскиз. Кык суй но пыд ваем. Митюк шуонлэн шӧйыз вӧзы понӥз. 
Онисимлы телефон трубка донгиз:
- Жингырты, вера, огзэ пыдзэ ӧй шедьты, озьы гинэ мед нуозы ни.
Онисим али гинэ валаз: таидлэн визьмыз сураськем.
- Киосыз кыкез но паллян ук, - юзыраса вазиз.
- Дак, Митюк паллянэс ук, уд тодӥськы шат? - шузимем мурт пожаськем синъёссэ 
Онисимлэн ымныраз мертчытӥз. Тодма но, уг но кадь. - Товарищ Лаптев? Иосиф 
Виссарионович? Огнад-а музъемысь потӥд? Я, ӵок, кылемъёсыз эшъёсыд уз мӧзме. 
Ваньмыз артысь артэ кыллё. Чикын( огазе кыскай но, ӧз сайкалэ...
Машина гуретэм кылӥськиз. Райкомысь полуторка вуэм вылэм. Соин лыктэм муртъёсын 
кенешизы но, Онисим хуторе кошкиз, машина - матысь гуртэ. Адямиосты люкаса, 
быремъёсты калык радъя ватыны вераськизы. Нош сӧсырмемъёсты, биньылыса-мараса, 
медсанбатэ нуозы.
Хуторын ваньмыз пыд вылазы ни вылэм. Фельдшер, Митан но Паша валэн уробоен 
полигонэ мыныкузы Онисимез пумитазы. Фельдшер солы пересь еврейёсын кенешыны 
косӥз, соосты, пе, гуртэ нуыса умойгес луысал, хуторе огназы кыльыны уз дӥсьтэ.
Пересьёс виыны судам муртъёс тусын азбарысь ӟус вылын пуко вал. Шӧдӥське, суй-
пыдзы чылкак юскиськемын. Онисимлэсь вуэмзэ но шӧдытэк кылизы. Улияна коркан, 
кышнопалан, пӧра вылэм. Шуэрскем синъёсын пумитаз:
- Война ук?
- Бен, война...
Нылмурт Онисимлэн чыртыяз ӟыгырскиз:
- Эн кушты монэ.
- Эн вал но, солдат ук мон.
- Мон но... медсестра.
- Нош пересьёстэ кытчы?
Пересьёслы инты, пе, дась. Одӥг тодмо еврей нюлэс пыдсын ик улэ, отысь нокыӵе 
Гитлер уз шедьты. Полигонысь фельдшер бертӥз ке, уробоез басьтыса, соку ик сюрес 
вылэ потозы.
Онисим кӧтсэ тырытозь, Улияна солы бубизлэсь дӥсьсэ дасяз. Сӧсырмемъёсты 
нуллыны, пе, яралоз. Сӧсырмемъёсты гинэ ке луысал... Пияш велосипедэ пуксиз но 
выльысь полигонэ ширтӥз. Мынонъяз ас понназ малпаське: кин ай со табере? Вылаз 
нюлэсчилэн дӥсез, кисыяз сельсоветысьтызы кагаз (Лаптев Онисимлы, трактористлы 
сётэмын) но гордармеецлэн Иовисарлэн книжкаез. Кин бен табере луоно?
Йыртӥянзэ самолётъёс висатӥзы. Вылӥетӥ лобо, Лида кар пала. Лачак. Онисим 
соослэсь кыз улэ ватскыса кылиз.
Полигонысь луло кылем муртъёсты полуторкае пуктылӥзы. Куать кузя соос, пӧлазы 
шузимем ожгарчи но. Фельдшер шофёрен артэ пуксиз, медсанбатэ сюрес возьматыны 
шуыса. Нош быремъёс дасоосын вылэм. Ватон ужзы далай гинэ кыстӥськиз. Нырысь ик 
бомба пуштэм бервылэз огъя шайгулы тупамон каризы, собере шӧйёсты ки вылазы но, 
валэн но отчы нуллыса тыризы. Гуртысь лыктэмъёс пӧлысь кин кыла-бура, кин 
Гитлерез карга, мукетыз кӧшкемыт сузмытэм шӧйёсты адӟыса вукекъяське, ӧске, зар-
зар бӧрдӥсез но вань. Кык пол кир-пазь пазьгиськылоно луылӥзы, фашист самолётъёс 
узвесь зорен пылатъязы угось. Ярам, нокин ӧз быры. Нош медпунктэ кошкись 
машиназы вылэ бомба усем. Ваньзы, кин вал отын, быриллям. Сьӧсь тушмонъёс! 
Адӟизы ук, машинаын сӧсырмемъёс гинэ вал шуыса.
Полигонэ вуизы тэле пегӟыны вуттэм кӧня ке ожгарчиос. Соос но эшъёссэс ватон уж 
борды басьтӥськизы. Шуак кин ке но "ӝуа!" кеськиз. Хутор пала учкизы но, отын 
тылпу шукыръяське, поръяса ӵын ӝутске, тылгизьыос тэляло. Онисим усьтыр-табыр 
хуторе кошкиз. Митанэз валэн уробоеныз ӝегатӥзы на. Со понна Митыр Митан лушкем 
малпанзэ быдэстыны вуттӥз. Полигонын быремъёсты ватыку кин ке но косэм: шӧйёс 
бордысь шедьтэм одӥг кагаз но сюе согиськыны медаз шедьы, ваньзэ одӥг азе 
тыроно. Митан люкам кагазъёс пӧлы аслэсьтыз но гордармеец книжказэ донгиз. Оже 
ке нуизы, ӧйтӧд ай, мар луоз. Тӥни ук, райкомысь адями ма шуиз: Молотов, пе, 
бадӟым война кутскем сярысь ивортэм, кунгож дорын вир пумтэм кисьтӥське ни, 
фашист самолётъёс трос асьме каръёс вылэ бомбаос куяло. Матысь нуналъёсы 
немецъёс Лида пала но вуыны быгатозы.
Ярам ай, Митанэз али Инмар быронлэсь утиз, нош кемалы-а? Соин ик ӝоггес 
палэнсконо та палась, ышытсконо, ватсконо. Митан тодӥз, солэн эшъёсыз но, 
командирез но полигонын одӥгтэмак быриллям. Солэсь гордармеец книжказэ шедьтыса, 
табере дораз, военкоматэ ивортозы: быриз, ватӥм. Нош Митан шузи ӧвӧл, со луло 
кылён сюрес шедьтоз.
Хуторе уробоын мыныкузы Митан Курег ӵӧнэн вераськон поттӥз:

- Кылзы ай, мусокае, асьмедыз татын нокин уг тоды, дӥсьмы огшоры адямиослэн 
кадь, соин ик кытчы мылмы потэ, отчы ик мынэммы луоз.
- Ма, кытчы-о мыном на, медсанбатэ сяна.
- Иське, ӵош мыном, ява.
- Кызьы озьы? Тонэ кытчы ке келяло шуид ук?
- А, кин сое тодэ на...
- Нош мон, Онисим, Улияна?..
Вераськонзы таин кысӥз. Нош Митан, Пашаез ас палаз берыктыны, сьӧраз валтыны 
быгатоз шуыса, осконзэ ӧз ышты. Бен, Курег ӵӧнэз соин ӵош луоз.

Убиръёс
Улияналэн нуназеяны дасям сиёнэз дуре полигонэ кошкемъёс дыраз ӧз вутске. 
Пересьёсын ӵош ӝӧк сьӧры Лидаысь кушетскыса соку гинэ вуэм Арон пуксиз. Кылем 
уйзэ, пе, чырым но карытэк потӥ. Уйшор котырын телефонэз жингыртэм:
- Жиды есть? - юало, пе. Арон телефонзэ куштэм, нош соиз выльысь но выльысь 
жингыртэ. Еврей пи вожпотыса кеськем:
- Дугдэлэ! Ма тӥледлы кулэ?!
- Дорамы пот! Ми тонэ ошом. Ӧд ке поты, улонниеныд ӵош сутом.
Мадьыкуз Арон шыдзэ но йӧскадь ӟузьылыны уг быгаты, киосыз куалекъяло, 
синкылиосыз тусьтыяз усьыло. Со ӝыт поездэн кошконо вылэм, но поездэ пуксьыны 
быгатымтэ. Соин ик уйлы Лидае кылем. Нош вазь ӵукна станция вылэ бомбаос куязы 
ни. Тодмоосыз кемалась кин кытчы пегӟемын ни бере, Арон, кин доры пырыны 
тодытэк, велосипедаз пуксе но хуторе шок-пуль вуэ. Еврей пилы сиён ӧз мыны. Тау 
карыса, азбаре потӥз. Улияна - со бӧрсьы. Вераськыса сылыкузы адӟо: кинъёс ке 
бакча пала лыкто. Шуэрскем Арон тӧллэсь мамык кадь ишкалскиз но синуӵер - гид 
сиге, турын пӧлы ватскиз. Витьымтэ куноосты Улияна огназ пумитаз. Тодысал ке, 
кинъёс со...
Куинь кузя воргоронъёс азбаре пыризы. Кыкез фашистъёслэн телефон езъёсты 
вандылыны ыстэм диверсантъёссы вал, куинетӥез - поляк Болеслав, кылысь кылэ 
берыктӥсьсы. Аслазэныз сяна, туж ӟеч вераське немец, белорус но ӟуч сямен. Ӵапак 
таос шоры ӝимыса, Улияналэн атаез быриз. Диверсантъёслэн пичи гинэ быдэстоно 
ужзы кылем на. Хуторын жид-большевик улэ, кудзэ Минскын но ӟеч тодо. Рациез 
вань. Тӥни сое фронтлэн штабаз ивор сётытоно (пумитъяськиз ке - кужмысь): 
"Лидаысь партизанъёслэн лушкем штабзы. Горд Армия пазьгемын. Улэп кылемъёс 
командиръёсынызы ӵош пленэ сётско. Юрттӥсьёсы пегӟизы. Котырак ваньмыз ӝуа, 
куашка, калык быре. Мон огнам кыли. Пумитъяськыны кужмы уг тырмы ни, монэ 
котырто. Юрттэ!" Соос но ӧз тодэ уга, утчано большевиксэс асьсэос ик виизы ни 
шуыса.
Улиянаез адӟыса, Болиславлэн пыдъёс либыразы.
- Анна?! Тынад мумид Анна ук?
- Ӧвӧл ни со. Ватӥм.
- Ку?
- Польшаысен ик.
- Нош аид - Хаим Рудь?
- Со но вал но ӧвӧл ни.
- Ку? - Болислав шулӟектӥз. - Кылем арня вискын-а?
Улияна йырыныз шонтӥз но синвуаськиз. Немецъёс куспазы маке лабыртӥзы но корка 
пыризы. Нош Болислав юбо музэн сылэ. Вот таиз пумиськон...
Куке но кин ке но шуэм: дунне вылысь тужгес чебер нылъёс - Польшаын. Ӧйтӧд ини, 
зэм-а, ӧвӧл-а со. Кинлы кызьы, вылды. Нош поляк нылъёс пӧлысь чеберезлэсь чебер 
вал, дыр, Анна - Улияналэн анаез. Озьы потылӥз поляк пилы - Болиславлы. 
Институтэз йылпумъяса, сое кышно басьтыны медэ вал. Нош Анна чутрак пумит 
кариськиз. Туслы поляк пиез кые ке евреен воштӥз. Юри ӧчкарыса кадь солы бызиз. 
Йӧно поляк нимзэ но саптаса. Пӧрмостэм евреен огазеяськизы но чиптэм-чаптэм 
ышизы. Кызь арлэсь кема Болиславлэн Анна сярысь кылэмез ӧй вал. Табере тани 
шуак-дуак пумиськизы. Улияна зэмен но кисьтэм-басьтэм Анна кадь. Сыӵе ик ненег-
ӵыжыт бамо, синъёсыз пыдэстэм, чиль сьӧд йырсиез кускозяз кисьтӥське. Бен, 
Улилэн синъёсыз мумизлэн кадь ик учко. Болислав ноку ӧз валалля, ма соос верало, 
ма куро, гочато-а, серекъяло-а яке ултӥяло-а. Пумитазы ноку учкыны ӧз чидалля, 
йырзэ мыкыртылӥз. Эксэй ныл азьын музэн. Тани али но со синъёссэ музэ чӧлтӥз, 
шоканзэ ворсась курыт тодэ ваёнзэ улляса, дыльдызэ ньылӥз, интыяз лёгаськиз. Эх 
шу, тазьы-а луоно вал. Улияналэсь бубызэ, иське, та диверсантъёс виизы ук. 
Болислав Хаимез тодмасал ке, ӧйтӧд, дыр, ма карысал. Ӧз тодма уга, еврей 
Хаимлэсь туссэ тушез чылкак воштэм. Бен, Болислав поляк кизэ адями вирен, 
Анналэн картэзлэн виреныз, ӧз сапта. Озьы ке но, озьы ке но...
Поляклэн нылмурт шоры учкемез ӧйлась ни, Анна азьын сямен ик йырзэ мыкыртӥз. 
Ноку пумиталлямтэ ныл азьын сылыны солы туж секыт йӧтӥз. Пыдесъяськы вал азяз, 
йырдэ пуклёк вылэ пон но, мед ӵогысал, пунэмзэ мед берыктысал...
Ассэ ачиз вормыны Болислав быгатӥз ик. Дыректэм сюлэмзэ буйгатыса, мур шокчиз но 
либыт юаз:
- Огнад-а дорад?
- Пересьёсын. Соос нуназеяло али.
Корка пыризы. Кыл поттылытэк. Фашистъёс киосазы пистолетъёсын вань висэтъёстӥ 
ортчиллям ини, корка шорын сыло. Пересьёс сэргы шымырскиллям. Поляк Улияналэсь 
пӧсь чай куриз, ачиз котомкаысьтыз ӵынатэм сӥль, консерва поттылӥз. Витьымтэ 
куноос ӝӧк сьӧры интыяськизы, нянь шормазы. Улияна парланӥсь чай лэзьяны ӧдъяз. 
Со вискын огез немец ныллэсь макессэ кырмалтӥз, вандоно пудолэсь музэн, жалятэк. 
Улияна солэн бамаз сачак сализ, вань кужмысьтыз. Немец тэтчиз ук, ӝӧкез ик 
вырӟытӥз, укно вылысь керосин лампаез уськытыса сӧриз. Улияна пересьёс пала 
сётскиз, немец - со сьӧры. Берласянь кырмиськиз, ас палаз берыктыны турттэ, 
Улияна пумитъяське. Кыкназы выж вылэ погразы. Улияна фашист улэ пачказ. Штани 
пушказ сьӧсьлэн киыз пыремысь, жир! черекъя, ӵыжаське, нош сютэм кион солэсь ул 
штанизэ ӟузыр-ӟазыр кесяз но палэнэ сэрпалтӥз. Пересь еврей, тае адӟыса, ӝӧк 
вылысь секыт ыргон дурыез кыскиз но вожомем сьӧсьлэн йыраз вань ӧдыеныз( коканы 
ӧдъяз. Фашист погыльскыса пыдесъяськиз, пересь шоры дыльдызэ пазяса "Иуден!" 
кеськиз но ыбиз. Пересь муртлэн пыдъёсыз либыразы, выйизы кадь, со зуняк пограз. 
Фашист шоры шимес вузыса кизэ урдэм пересь кышномуртлэсь йырзэ кыкетӥ пуля 
пасяз. Улияна, йырсазьзэ ыштыса, песянаез борды ӟыгырскиз. Диверсантъёс полякез 
педло потыса эскериськыны косо, ыбылэммес кылыса нокин, пе, уг лыкты-а. Нош 
Болислав уг дырты, наганзэ эскерем каре, ӟустариен ӵушылэ. Пересьёсты виись 
немец Улиянаез вирен наштаськем интыысь кышнопала нюж кыскыса нуиз. Соиз 
сазьтӥськыса вылаз лэзькись немецлэн ымныраз ӵыжиз. Урмем ужпи нырысьтыз вир 
пазьгиськемез ӧз ик шӧды кадь, ныллэсь макесъёссэ вань кужмысьтыз вайяны турттэ. 
Эшез ныллэсь суйёссэ йыр сьӧраз золтэ. Поляк та суредэз адӟыса юзыр-кезьыр луиз. 
Ас азяз нылзэ сантэмало кадь потӥз. Бен, Улияна солэн нылыз луыны быгатысал ук. 
Анна мумиз еврейлы ке ӧй сётӥськысал. "Анна! Нылы!" - йыраз чилектӥз.
- Дугдэ! - кеськиз Болислав. - Дугдэ, шуисько!
Немецъёс шонерскизы, султыны уг дырто.
- Эн люкеты! - огез черектӥз.
- Тыныд но кылёз, - серектӥз мукетыз.
Улияна сикыӵе сюрем тылобурдо сямен выре. Ашкынэм фашист сое чеплет музэн 
пачкатэ.
- Дугдэ, дугдэ! - Болислав ӟырдаса интыысьтыз тэтчиз но, ачиз но ма каремзэ 
валатэк, йыг! зӥбиз, огезлэсь фашистлэсь йырзэ сузмытӥз, мукетсэ, сильсьӧртӥз 
ӝутыса, узвесь пуляен сюлэмзэ пасяз. Кыллись бандитъёсты вожомыса ӵыжаз на, 
собере кудӟем мурт сямен, жӧл-пал вамыштӥз кунопала. Выж вылын пилиськем 
лампаысь керосин кисьтӥськемын, отчы ӝуась шырпу куштӥз. Ӝогак берытскиз но, 
кышнопалан везэкъяса сылӥсь Улиянаез китӥз кутыса, азбаре валтӥз. Малы Болислав 
Улияналэн улоннияз тыл лэзиз, со валэктыны ӧй быгатысал: визьмызлэсь азьло киыз 
ужаз шуысал но тӥни. Но визьмызтэк озьы ӧз ужа, угось диверсантъёссэс вием 
понна, немецъёс пуляен утялто. Тае валаса яке шӧдыса ик, Болислав виро пытьызэ 
тылпуэ ватыны анлаз, дыр. Шӧйёс сутскизы, пень кылиз, утча на, мар татын вал. 
Нош бертыса вералоз, возьмаськисьёс шоры ӝимизы шуыса. Немецъёс оскизы ке, лулыз 
бордаз кылёз.
Поляклы ӝоггес дор палаз вырӟоно, нош нылэз огназэ кельтыны жаль потэ. Ӧжыт ке 
но сое буйгатоно, йырсазяз пыртоно. Уть ай, соид, азбарысь ӟус вылэ кыминскыса, 
зар бӧрдэ. Утисез шоры уг но учкылы, коркаез ӝуа шуыса уг вала. Болиславлэсь 
ныркышетсэ кырмиз ке но, йырзэ ӧз ӝуты, синвузэ ӧз ӵушылы. Болислав нылашез 
суйтӥз кыскыса пуктӥз. Улияна уг дырты, нош корка пушкын шуэръяськись тыл тани-
тани кыре донгиськоз, пӧсь шокчеменыз адямиосты сутоз.
- Сантэманлы ӧм сётске, - ныллэсь пельпумзэ маялляз поляк. - Буйгатскы, яраосыд 
ӟуз вир виямонэсь ӧвӧл кадь. Ойдо, палэнском татысь. - Улияналэсь синвуоссэ 
кимышкыныз ӵушалтыса, сое бакча пала валтӥз. Кӧня ке вамыш лэсьтӥзы но дугдӥзы.
- Пинал дырмы аиныд ӵош ортчиз. Эшъяськиськом вал, - пӧяз поляк. - Учкы ай, - 
корка шоры возьматӥз. Липет пыртӥ, укно висъёстӥ ӵын пызьыра. - Мед сутскозы 
сьӧсьёс. Улэпкын отчы кельтоно вал соосыз, керттылыса.
- Нош песянае, песятае?! - тылпу пала кыстӥськиз нылмурт. Поляк сое ӧз лэзьы.
- Поттыны уд быгаты ни, - шуиз. - Ма карод на табере. Ӵок ини, куд-куд интыосын 
шӧйёсты суто ук. Нош кагазъёсыд жаль ке, соосыд таки-так пеньӟысалзы. Война, 
гыдыке, война кутскиз.
Нылын люкиськыкуз Болиславлэн синвуосыз быльырскизы. Улиянаез ас нылзэ музэн 
ӟыгыртӥз но индылӥз:
- Тон, гыдыке, пыдлось гуртэ ватскы. Отын тонэ убиръёс уз шедьтэ. Эк-эк-эк, 
кышкыт вакыт асьмеды вите. - Кошкыкуз ини берытскиз но оскытӥз: - Война бере мон 
тонэ одно шедьто, юртто.
Ӝуась хутор дорысь поляк синтэм-пельтэм кошкиз, пегӟыса сямен. Война бере 
шедьто, юртто шуиз, но ку со быроз ай, кин вормоз? Созэ та вие нокин уг тод на. 
Болиславлэн бызьыса кошкемез но быронэз пумитэ дыртэм кадь луиз. Ачиз кадь ик 
телефон ез вандылӥсь фашистъёс шоры ӝимиз. Соосыз поляклэн одӥг кылызлы но ӧз 
оске, угось кисыяз немецъёсын ик пӧрам кагазъёсын Болислав ӟуч связист шуыса 
гожтэмын вал. Соин ик диверсантъёс поляк воргоронлэн сюлмаз пурт бышкалтӥзы, 
шӧйзэ коӵо-куакаослы кокчаны кельтӥзы.
Хуторын тылпу сюанлэн тужгес шукырес дырыз вуиз. Коркан ӝокаса алектэм тыл 
кылъёс, тыметэз тудву кырыку музэн, ӧдыенызы укноосты донгизы но кыре 
лопырскизы, корка борды педласянь ӝабырскизы. Юнме уг шуо: лушкаськись, пе, 
ваньбурдэ нуыса кошкоз, нош юртъердэ кельтоз, тылпу ке - ваньзэ нюлыштыса 
басьтоз. Тани татын но со корка бордысь кенеръёс кузя гид пала кыстӥське ини. 
Тае адӟыса, Улияна сазьтӥськиз, Аронэз кесяське. Соиз азбарын жӧлмаса сылэ ни 
вылэм. Нылмурт еврей пиез, дыраз юрттыны ӧд лыкты шуыса, куаретыны но быгатысал, 
дыр, но куанер егитъёслы та вие ырлэштонэн( йырин ӧй вал. Улияна тӧлатыны ошылэм 
дӥсьёсты бакчае поттылыны ӧдъяз, Арон чуланэ пырыны быгатӥз. Отысь ки улаз сюрем 
чемоданэз, мукет ваньбурез азбаре куяз. Собере ваньзэ бакчае нуллӥзы.
Поляклэсь Улиянаен вераськемзэ Арон кылэм. Велосипедзэ азбарысь бакчае поттыса, 
ныллы шуиз:
- Асьмелы татысь палэнскыны дыртоно луоз. Нош кытчы?
- Поттылэм ваньбурмес куштыса кошком-а?
- Тон ке уд, мон огнам шупчо. Лидае берытско. Отысен - медсанбатэ. Сюресэз 
тодӥсько, уин мыно, убиръёс кӧлыку.
Пумтэм курдам еврей пи зэмзэ но Улиянаез огназэ кельтыса кошкысал, дыр. Угось 
фашистъёс пересь еврейёсты, шуыны луоз, син азяз виизы. Нош немецъёс Лидае 
пыризы ке, ма луоз еврейёсын? Коть шай пыдсы ватсконо, фашист синме ӧвӧл шедёно. 
Тазьы малпаськыса, Арон пегӟыны дасяськиз... Со куспын хуторе велосипедэн Онисим 
вуиз. Ули со борды зар бӧрдыса ӟыгырскиз. Удмурт пи юалляськыны ӧз дырты, 
нылмуртэ буйгатыны выриз. Тылпуэз кысон сярысь малпанзы ик ӧй вал ни.
Ӝуась хуторе Митанэн Паша но берытскизы. Дэмен йырзэс тӥяло: кытчы табере соослы 
кариськоно? Пеймыт нюлэскысь партизанъёслэн лушкем улонтӥязы вырӟоно ке шат? 
Улилэн мадемезъя, отын кӧлантӥез но, сиён-юон но, дӥськут но дасямын. Валъёслы 
но мешокъёсын сезьы лачамын. Эсьма, фашистъёслэсь кышканэз ӵокак уз лу. 
Кенешыса-кенешыса Пашаен Ули медсанбатэ мыноно кариськизы. Арон но соос сьӧры ик 
калъясько, пе. Онисим но таӵе малпанлы пумит ӧз вазьы. Митан гинэ мукет пала 
турна вылэм.
- Орудимылэн расчётэз быдэсак быремын. Кагазъёсъя ваньмыныз ӵош - ми но 
Иовисарен, - йӧн-йӧн вера Митан. - Озьыен, бырим - согизы. Война пумозь ми эрико 
муртъёс. Мылыд потӥз ке, пыртосэ куриськы, кулэ ке - медъяськы. Уробомы, кык 
валмы вань, уз шат кутэ? Быгатэммыя бергалом, поляклы я белоруслы узырлык 
люкалом, асьмедыз но сюдом, улэп но кылём. Нош война бере дор палъёсы шонтом...
Таӵе верамлы пумит Онисим шеперскиз:
- Нош калык синме кызьы учкод? - лек юаз. - Мукетъёс ож бусыосын улонзэс уз 
жалялэ, тон ке куайыса улод, нош бӧрысь ушъяськод: ми но, пе, ожмаським.
Одӥг кылэ ӧз вуэ. Соин ик нырысь-валысь кӧтсэс тырыны малпазы. Со понна шур 
сьӧры выжизы, тэлясь тылпулэсь палэнэгес. Ымтыраськонзы йӧскадь ӧй вал. Мылкыдзы 
но. Чус сиськизы. Ма но со кушазы. Тылпу но кӧтсэ тыриз, лапказ.
Улос вылэ ӝомал лэзькем бере егитъёс хуторез пыраклы кельтӥзы. Хуторез гинэ ке 
луысал - бӧрсязы сабырлы, вуоноезлы оскон сётӥсь улонзы кылиз. Азьпалазы война 
вал. Огзы но ӧз тодэ, ма вите соосты ӵуказе, арня, толэзь ортчыса. Нош шимес вир 
кисьтон 1418 нунал кыстӥськоз.

( Ӧрыд (диал.) - ишан, кайгу.
(( Тырыллясьёс (диал.) - выжыятӥсьёс.

( Шыднар (диал.) - картлэн выныз.
( Ӵӧн (диал.) - ӵемон.
(( Валлё (диал.) - азьвыл.
( Гичул (диал.) - липето гид азбар. 
( Абыз (диал.) - пелляськись.
( Чикын (диал.) - азьвылгес.
( Ӧдыеныз (диал.) - кынарыныз, кужмыныз.
( Ырлэштонэн (диал.) - керетонэн, ченгешонэн.
Римма Игнатьева
Возьыт
новелла
Туэ южтолэзь чик уг укша ас вакытэзлы. Куазь паймоно кадь салкым улэ. Инбамез 
пурысь пилемъёс сайяло. Куке но шунды пальпотоз на шуыса оскыны ик шуг. Витьымтэ 
шорысь синтэм-пельтэм жобаськыны, лымы букосъёс пуктылыны ӧдъя. Чагыр инбамо, 
яркыт шундыё, котыр улосвылэз шунтӥсь-сайкатӥсь тулыс кытчы ке йыромем, оло.
Нина Петровналэн мылкыдыз ӵапак та куазь кадь пильмаськемын. Толон сое 
школазылэн директорез юнме шорысь лушкаськись шуыса янгыш кариз. Ӵош ужась 
эшъёсыз пӧлысь кин ке ик со пала дурбасьтоз кожа вал егит дышетӥсь. Нош 
учительское люкаськемъёс ваньзы йыръёссэс ошизы но пал кыл вазьылытэк пукизы.
- Мон нокинлэсь номырзэ ӧй вора, - директорлэн синмаз Нина меӵак учкиз.
- Коллективе тӥ вуытозь, Нина Петровна, номыр ӧз ышылы! - лек вераз Татьяна 
Ивановна. Вожез потэмен, лэся, солэн ымнырыз но йырсиез кадь ӵыжектӥз.
Нырысь-валысь Нина Петровна малпаз вал, директор, пе, ачиз но марзэ-созэ валатэк 
вераське, дыр. Угось дунне вылын улытозяз солэн нокинлэсь номырзэ юатэк 
басьтылэмез ӧвӧл. Татьяна Ивановна тае тодэ-вала, луоз, нош зэмос лушкаськисез 
шараян вылысь юри ваньзэс эскере-чакла, дыр. Ас понназ тазьы малпаса, Нина 
Петровна ӧжытак буйгатскыса шуиз:
- Мон лушкаськись ӧвӧл, Татьяна Ивановна.
- Озьы шуиськод, иське?! - лекъяськеменыз, лэся, кивалтӥсь Нина Петровна шоры 
"тон" шуыса вазиськиз. - Бен ӧд лушкаськы ке, малы уд юаськы, кытысь, кинлэн, 
кӧня но ку ышиз?! А-а?! Тон ӟеч тодӥськод, мынэсьтым тани та сумкаысьтым ньыль 
сю манетме ку поттэмдэ! Соин номыре уд юаськы ни!
Нина мар шуыны ик паймиз. Ма, со ӧз лушка бере, тодэмез но уг поты. Вылаз ик, 
Татьяна Ивановна сое, урокысь лыктӥсь муртэ, йыраз тӥр обыкен шуккем музэн, ӧс 
кусыпын ик онгромытӥз. Нош дурбасьтӥсьёс луымтэен егит дышетӥсь уката абдраз. 
Ма, паймиз гинэ шат? Шонергес луоз, вуэ куштэм мурт кадь луиз шуид ке. Шундыё 
нуналэ гудыртэмлы укша та. Нош кытысь вуиз, малы та гудыри Нинаез ӵашйиз? Тазэ 
егит нылкышно уг вала.
- Тон ке ӧд лушка, соку кин бен?! - кузяна сылӥсь ӝӧкъёслы ваменак пуктэм ӝӧк 
сьӧрысьтыз султӥз кузё.
- Мон уг тодӥськы, - янгышам дышетскисьлы тупа али Нина.
- Тон ке уд тодӥськы, мон тодӥсько! - кеськиз кивалтӥсь. - Кыӵе коньдонэн арня 
талэсь азьло городэ ветлыкуд костюм басьтӥд?! Оло, уждунэныд? Ха-ха, кутскись 
дышетӥсьлэн уждунэзлы сюрс ньыль сю витьтон манетэн дӥськут уд басьты! Со понна 
ӝыны арзэ сиськытэк улоно луод. Мон тани тынэсьтыд кык вылтӥ уждун басьтӥсько ке 
но, сыӵе костюмез уйвӧтам но адӟеме ӧвӧл! Елизавета Петровна куамын арзэ та 
школаын математикалы дышетэ, нош сыӵе дуно дӥськутсэ ӧй синйылтылы! Елизавета 
Петровна, вералэ, малы тӥ сыӵе костюм уд басьтӥське?
Чурен сылӥсь ӝӧкъёс пӧлысь одӥгез сьӧрын пукись мӧйы дышетӥсь куаляк луыса 
интыысьтыз ӝутскиз:
- М-ма, м-мыным, пересь муртлы, вужез но яралоз. Нош егитъёс, быгато ке, мед 
чеберъяськозы... - Веранзэ йылпумъяса, Елизавета Петровна ас интыяз пуксиз но 
котыр чал-чал пукись эшъёсыз шоры учкиз. Ваньзы азьло сямен ик йыръёссэс ошыса, 
шыпыт пуко. Директор гинэ ӵош ужась эшъёсыз шоры вылласянь уллань учкыса сылэ.
- Вот, вот! Быгато ке! Нош быгатоз-а толэзяз куинь сю манет уждун басьтӥсь мурт 
одӥг но ӝыны сюрс манетэн дӥськут октыны? То-то вот! Уз! Нош милям Нина 
Петровнамы быгатэ! Кызьы?! - вожомем кивалтӥсьлэн йырбераз кульчояса бинем горд 
йырсиез таркаськем. Кесяськыса сямен вераськыкуз ымпумъёстӥз дыльдыез ик 
пазяське.
Ӵашъем гуртысь шор ёзо школаен Татьяна Ивановна витетӥ арзэ кивалтэ ни. Татчыозь 
ужам директоръёс та пичи но сюреслэсь палэнысь гуртын одӥг арлэсь кема ӧз 
чидаллялэ. Торккес сямо, маиныз ке воргоронлы кельшись Татьяна Ивановна куашкан 
калэ вуэм школаез тупатъяны коньдон но, ужась но шедьтӥз. Со понна ик Ӵашъем 
школалэсь директорзэ ёрос кивалтӥсьёс сӥлы каро. Нош ӵош ужась эшъёсыз 
кивалтӥсьсылэсь кышкало: марысь-мар ке, улляны муг котьку шедьтоз, нош берло 
кытысь уж шедьтод? Уката ик та гуртэн вань улонэд герӟаськемын ке.
"Мар бен, котькудӥз ас понназ ачиз кыл кутыны кулэ", - шоканы дӥсьтытэк кадь 
пукись эшъёссэ сӥсъяса сямен учкиз егит дышетӥсь.
- Тӥ, Татьяна Ивановна, янгышаськоды. Мон тӥлесьтыд но, мукетызлэсь но чик 
номырзэ ӧй вора. Нош маин мон аслым дӥськут басьтӥ, соиз ини мынам уже, - тӧдьы 
бӧз выллем кӧдэктэм Нина аслаз ӝӧкез пала вамыштӥз. Кунулысьтыз книгаоссэ но 
тетрадъёссэ портфеляз лачмытак интыяз. Туннэ понна урокъёсыз быремын. Зэм, дораз 
бертыса, ӵуказе урокъёслы дасяськыса но тетрадьёсты эскерыса, уйшор бероз пуконо 
луоз на...
Татьяна Ивановналэн бамъёсыз пилиськоно кадь гордэктӥзы. Эшшо ке сыӵе 
пӧрмостэмъёс солы, школалэн директорезлы, мытылыны дӥсьто!
- Ах, вот кызьы?! - лек кеськиз кивалтӥсь. - Тон кожаськод, коллектив номыре уг 
адӟы, номыре уг вала?! Ӵуказе ӵукна мынам ӝӧк вылам ньыль сю манет ӧд поны ке, 
мон участковойлы заявление гожто! Тон кадьёслы воля сёт ай, йыр вылэ тубыса, пыд 
азям сялалоды! Таин туннэ всё! - Ниналэсь пумитъяськыны выремзэ пеляз ик ӧз поны 
кузё. Директорлэсь кбераса, дышетсьёс, ӝогак дӥсяськыса, учительскойысь тӧлӟизы. 
Нина пала учкыны ик ӧз дӥсьтэ ни, лэся.
Быдэс уйзэ егит дышетӥсь чырым но ӧз изьы. Кияз книга-а кутэ, дышетскисьёсызлэсь 
тетрадьёссэс-а эскерыны ӧдъя - пель сьӧраз чузъяське директорзылэн куараез, 
"Лушкаськись!"
"малы со монэ озьы ултӥя? Мар мон солы уродзэ лэсьтӥ?" - синкыли пыр малпа Нина.
Ӵукна со котьку сямен синучкон доры ӧз лыкты, синдуръёссэ но ымдуръёссэ ӧз буя. 
Ӝыны ар куспын нырысьсэ мылпотытэк вамыштӥз гурт пумысь школа пала. Солы озьы 
йӧтэ: котькуд укноетӥ шораз учко но чиньыенызы возьмато: "Егит дышетӥсьсы 
лушкаськись вылэм".
Школае пырыкуз пумитаз шедем дас одӥгетӥ классын дышетскись пиос - Кузьмин 
Володя но Музыкантов Саша - удмурт кылъя но литературая дышетӥсьсы шоры жаляса 
сямен учкизы. Эсьма, ӟечбуръяськемзы бере ӧсэз вӧлак каризы но Нина Петровнаез 
азязы лэзизы. "Таосыз но кылӥллям ни, лэся", - ас понназ секыт лулӟиз дышетӥсь.
- Цербер мылкыдзэ уськытӥз, вылды, - кылӥз со Сашалэсь верамзэ.
- О-о, со изьвер нокинлы шокчыны маза уг сёт, лэся. Алигес сизьыметӥысь Корнилов 
Петязэс линейкаен тышкам, - эшезъя кариськиз Володя.
- Жуге-ем? - нёжтӥз Саша.
- Бен, жугем. Корнилов историен уроксэ дышетымтэ, лэся. Нош Татьяна сое парта 
сьӧрысьтыз кыскаса поттэм, собере быдэс класс азьын тышкам: учке, пе, ма каро 
мон тӥ пӧлысь котькудӥныды, мынэсьтым ӧд ке кылзӥське. - Володялэн мадемезъя 
Нина Петровна валаз, кинэ пиналъёс куспазы Цербер нимало.
"Зэмзэ но, директорлы та ним тупа", - мӧзмыт пальпотӥз со.
- Ну, ваид-а ньыль сю манет? - пумитаз сое кивалтӥсь.
- Мон ӧй вора бере, малы вайыны кулэ? - юанлы юанэн ик вазиськиз Нина Петровна 
пальтозэ ӵоге ошон куспетӥз.
- Озьы, иське? - куаразэ будэтытэк вераське туннэ директор. Озьы ке но, та 
минутэ учительское учырам кык дышетӥсьёс, кыӵе ке муг шедьтыса, Нина Петровнаез 
Татьяна Ивановнаен ваче син кельтӥзы.
- Мар бен, туннэ ик участковой доры ветло, - кышкатыса шуиз на кузё. Со пумитэ 
Нина Петровна номыр з вазьылы ни - журналэз кутыса, аслаз кабинетаз кошкиз. 
Аслаз йыраз малпан берга: "Нёшто Андрей солы оскоз? Уз, со ваньзэ эскероз, тодоз 
но монэ шонере поттоз..."
Егит милиционерлэсь синмаськемзэ Нина клубысен нырысьсэ пумиськыкузы ик шӧдӥз. 
Армиысь бертыса, алигес милициын ужаны кутскем пиез Ӵашъем гуртэ Ниналэсь кык-
куинь толэзьлы азьлогес ыстӥллям. Мумы-бубытэк будэм Андрейлы ог кызь ар талэсь 
азьло специалистъёслы шуыса пуктэм кирпич коркае одӥг висъетэн улонни но 
висъяллям. Ниналы но отчы иа патер сётӥзы, подъездъёссы гинэ пӧртэм.
Соку, клубысен, Андреез адӟыса, егит нылмурт шуак луиз: уйвӧтъёсаз лыктылэм 
чебер принц! Со минутэ котырысьтыз адямиос бус пӧлы сылмизы кадь. Ачиз но 
валатэк, Нина милиционер пумитэ вамыштӥз. Со али пилэсь чагыр синъёссэ гинэ 
адӟе. Соос нылмурт шоры сокем шуныт учко, эсьма, Ниналэн мурт гуртлы дышытэк 
кезьытомем сюлэмыз ӵыжтэм вӧй выллем небӟиз.
- Тӥ дышетӥсь-а? - юаз Андрей. Гуртын ваньмыз ог-огзэс тодо, выль лыктэмзэ ӝог 
синйылто. Участковой но егит дышетӥсьлэн вуэмез сярысь азьлогес ке но кылӥз вал 
ни, кылъёс шедьтымтэеныз та веськрес мугоро, векчи куско, пельпумаз лэзькем ӵуж 
мертчан йырсиё муспотон нылмуртлы озьы вазиськиз.
- Бен, мон дышетӥсь. Нош тӥ милициын ужаськоды-а? - Нина но озьы ик шузи-мазигес 
юаз. Егитъёс, ваче син учкыса, капчияк серектӥзы. Ӧйтӧд, ӧжыт-а, кема-а соос 
озьы клуб шорын сылӥзы - эктӥсьёс мыд-мыд ласянь донгамысь гинэ егитъёс 
сазьтӥськизы.
- Ойдо асьмеос но эктомы, - ӵектӥз егит пи. Нылмурт соку ик киоссэ солэн 
пельпумъёсыз вылэ понӥз но выльысь пальпотӥз. Пилы сое амалтэк кускытӥз кутоно 
луиз.
- Инмаре! Кыӵе векчи тӥляд кусты! Чигемезлэсь кышкано, - гордэктыса шуиз егит 
пи. Нина пумитаз номыр ӧз вазьы, со борды матэгес гинэ кариськиз.
Эктон гур чалмемез но соос ӧз кылэ - ваче син учкыса, зал шортӥ бергазы но 
бергазы. Ог-огзылы синмаськем ныллэсь но пилэсь мылкыдъёссэс валаса, лэся, 
клубын ужась магнитофонэз выльысь улӟытӥз. Нош мукет егитъёс борддоръёс кузя 
сылӥсь ӟусъёс вылысь султыны ӧз дӥсьтэ. Егит дышетӥсь но милиционер гинэ каллен 
лэйкаса, вальсэз эктӥзы...
Нина, коридоретӥ вамышъянъяз, тодэ ваёнъёсызлы мӧзмыт пальпотӥз. Кыӵе шудо вал 
нылмурт со ӝытэ! Андрей сое ӧс дорозяз ик келяз. Нош люкиськыкузы шуиз:
- Ӵуказе ӝыт мон тӥледды клубын возьмало...
Нош Нина клубе уг поты ке, участковой солэн ӧсаз йыгаське ини:
- Номыр ӧз лу-а мынам принцессаеным? Ярам, ярам, тон со тетрадьёсысь янгышъёссэ 
утча, нош мон сэрегын шыпытак пуко - палэнысен тон шоры учко...
Котькуд ӝыт сямен, толон но Нина яратоно эшсэ возьмаз. Нош Андрей ӧх лыкты. Оло, 
солы куректонзэ кисьтысал ке, сюлэмыз буйгатскысал. Солэн кӧтыз уката ӝож луиз.
Ӵукна ӧсэтӥ потыкуз гинэ Нина выж вылысь Андрейлэсь пичи гожтэтсэ ӝутӥз. Толон 
пырыкуз ӝоже усеменыз, лэся, сое адӟымтэ. "Вождэ эн вай туннэ лыктымтэелы - 
ӝегатскытэк райцентре ӧтизы", - шуэм гажанэз. "Фу, кыӵе мон шузи! 
Милиционеръёслэн ужзы огшоры дышетӥсьлэн кадь ӧвӧл ук", - сюрес вылысен ини ассэ 
ачиз тышкаськиз Нина. Со вакытэ ик жаляз, соин луэм аспӧртэм учыр сярысь туганэз 
Нина ымысь уз, адӟемпотостэм Татьяна Ивановналэсь кылоз шуыса. Угось нылмурт ӝыт 
гинэ яратонэныз пумиськоз, нош директор, Андрей райцентрысь берытскем ни ке, 
туннэ нуназе вискын ик чагиськыны дыртоз...
Нунал маке кадь кузь кыстӥське ини. Озьы потэ Ниналы. Со туннэ лумбыт аслаз 
кабинетаз пукиз. Зэм, котькуд класслэн журналэз учительскойын возиське бере, 
кӧня ке пол отчы пырано луылӥз ик. Котькуд полаз ӧсэз усьтыкуз шӧдылӥз: сое 
адӟыса, ӵош ужась эшъёсыз чалмытско. Нош Татьяна Ивановнаен егит дышетӥсь 
урокъёс бырем бере гинэ пумиськиз на. Кивалтӥсьлэн синъёсыз шумпотон тылгизьыен 
чиляло. Нина шоры со пыдул лёгет шоры сямен учкыса ивортӥз:
- Тӥляд лушкаськемды сярысь, Нина Петровна, участковоймы тодэ ни.
Директорлэн кезьыт мынектэмезлэсь нылмуртлэн мугорыз юзыр-кезьыр луыса кошкиз. 
"Иське, Андрей ваньзэ тодэ ини. Мар бен, со ик умой. Ӝоггес кырмоз лушкаськисез, 
мед мозмытоз монэ таӵе секыт курадӟонлэсь", - Нина вань сюлмыныз оскиз, Андрей 
солы одно ик юрттоз шуыса.
Дораз бертыны дасяськыкуз учительскойын пелез урмытымон телефон жингыртӥз. 
Школае туж шер жингыръяло. Со уго Татьяна Ивановналы ёрос кивалтӥсьёсын кусып 
возьыны гинэ кулэ луылэ. Таяз учыре но телефон трубкаез директор кутӥз.
- Нина Петровна, тӥледды гурт администрацилэн юртаз, участковойлэн кабинетаз 
ӧтё, - вормонэныз данъяськыса музэн, кивалтӥсь йӧно учкиз егит дышетӥсь шоры, 
собере, мумы ӟазеглэн пиоссэ сакламез выллем, ӵош ужась эшъёсыз пӧлысь котькудзэ 
пыртӥз сӥсъяса кадь синйылтӥз...
...Андрей Нинаез туж кезьыт пумитаз.
- Пуксе, Нина Петровна, - ӝӧкезлэн мукет палаз сылӥсь пукон шоры возьматӥз 
Андрей. Нина, мар шуыны валатэк, кисмыляк отчы пуксиз. "Малы монэным озьы выре? 
- нылмуртлэн йыраз кӧшкемыт малпан чилектӥз: - Оло, со зэмзэ директорлы оскиз? 
Малы бен?.."
- Нина Петровна, малы тӥ Татьяна Ивановналэн ӵектонэныз соглаш уд луиське? - 
мурт адямиен музэн вераське Андрей. - Ньыль сю манетсэ берыктэ но ужез быроз. А 
то следователез ӧтёно, дело усьтоно... Тӥлед но, милицилы но, директордылы но 
озьы умой ӧвӧл. Асьтэос валськоды, дыр?
- Тон мар, Андрей? - Ниналэн синкашъёсыз лобыны турттыса сямен урдӥськизы. - 
Оло, тон монэ лушкаськись кожаськод?
Старшой лейтенант ӵыжектӥз, синъёсыз сапег ныраз мертчизы. Огшап чал-чал пукемзы 
бере Андрей могӟылыса вазиз:
- Вождэ... эн потты, Нина... Уж нимаз, улон ас ӧртӥз мынэ. Мон тыныд юрттыны 
турттӥсько, соин...
Нылмурт милиционер шоры валаны тыршыса, мыр-мыр учкиз. Собере чурт-чурт шуиз:
- Мыным юрттэт кулэ ӧвӧл. Мон нокинлэсь, номырзэ ӧй вора!
Андрей, сое буйгатыса выллем, пыриськись куараен юаз:
- Нош костюм маин басьтӥд?
- Бен, басьтӥ со дуно костюмез! Ну и мар?! Уг яра вал-а?! - пуштӥз нылмурт. 
Андрей нош ик сое басылскыны куриз:
- Яра, конечно. Только...
- Мар "только"? Ворам коньдонэн басьтӥ, кожаськод-а?! Ӧй! Нош тынэсьтыд таӵезэ 
ноку ӧй возьмалля. "Моя милиция меня бережёт!, пе. Да тӥ ваньды капчиезъя улыны 
дышемын! Кивалтӥсь киын власть. Шат солы пумит мынод? - Нина чылкак вожомыса 
черекъяны ӧдъяз. Быдэс мугорыз куалекъя.
Андрейлэн нылмуртэз лекъяськисен адӟылэмез ӧй вал на. Нош туннэ Нина огшоры гинэ 
уг лекъяськы, со вожомыса пурӟемын. Оло, зэмзэ Нина янгыш ӧвӧл? Нош кин, иське, 
лушкаськись? Татьяна Ивановна но юнме уз вераськы ук. Со - педагог, дышетӥсь, 
озьыен, психолог но. Мае ке шӧдыса-валаса ик егит дышетӥсез лушкаськись шуэ? 
Дуно костюм басбтэмез но абдратэ. Угось таӵе дуно ввузэ Андрейлы но ӧз возьматы. 
Кышказ, дыр, милиционер соку ик юалляськыны кутскоз шуыса... Котьмар ке но, Нина 
жаль. Андрей сое яратэ ук, та сярысь ныллы огпол но ӧз вера на ке но. Мурт адями 
луысал ке, оло, капчигес быдэстысал та ужез. Кӧня ассэ пыкылӥз Андрей, кӧня 
дасяськиз Нинаен чылкак тодмотэм адямиен сямен вераськыны - ӧз пишмыты. Табере 
тӥни, вылаз ик, Ниналэн истерика порма луиз. Лушкаськем сяна, лулсэръёсыз но туж 
лябесь вылӥллям. Кызьы потоно ай таӵе учырысь?
Участковой ӝӧк сьӧрысьтыз султӥз. Кисыысьтыз сигаретсэ утчаз, нош кенжытыны ӧз 
дӥсьты - пӧлыеныз азьчиньыез вискын бергатыса, кысконзэ берен ватӥз. "М-да, 
начар улон, начар улон, кытчыозь вуттӥськод тон адямиез", - мур лулскиз Андрей. 
Собере шуак берытскиз но викышъяны дъям Ниналы дэмлаз:
- Вот мар, Нина, али мын, дорад берты. Эн куректы, ваньмыз радъяськоз.
Нина милиционер шоры паймысагес учкиз. Оло, со ваньзэ валаз? Ма, кызьы нош 
сотэк: яратӥсь мурт гажанэзлы быдэсак оскыны, сое валаны кулэ. "Ог-огдэ 
валатэк, сюлэмад бадӟым мылкыд уз улӟы", - индылоз вал нылзэ мемиез. Зэмзэ ик, 
Ниналэн мумиз но бубиз ог-огзэс валаса, мур гажаса улӥзы. Пётр Ивановичез пыктос 
эзель вазь куасалтӥз. Нош толэзь талэсь азьло картэз доры Ниналэн мемиез но 
пыраклы кошкиз. Нэнэзэс ватэмзы бере Ниналэн Микта агаез кыӵе ке бинет мычиз:
- Тазэ мемимы тыныд шуыса кельтӥз.
Нина бинетэз пертчиз но - отын сю, витьтон манетлыкъёс адӟиськизы. 
- Кытысь, малы та? - паймем нылмурт синкыли пыр учкиз агаез шоры. Нош агаез 
сузэрезлы валэктӥз:
- Мемимылэн черламез дырысен куинь ар мында тырмиз. Солэсь азьло быдэсак пенсизэ 
милем сётъяз. Колхозын уждунэз ӝегато бере, ми солэн коньдонэныз улӥм. Нош берло 
куинь ар ӵоже пенсизэ со кык люкетлы висъялляз: тани та бинетаз понэ но кылемзэ 
нош ик милем мылетэ. Одӥг коркан улӥськомы бере, мыным нимаз коньдон кулэ ӧвӧл, 
пе. Ӵем шуылоз вал: "Нина нылы кыдёкын, огназ улэ. Оло, коньдонлы но ёрме. 
Быгатэмея солы но юрттэме потэ..." Та коньдонэн, сузэре, мемимес тодэ вайылон 
вылысь аслыд маке басьты.
Ӵапак со уксёен ик тямысэтӥ март азьын Нина аслыз костюм басьтӥз вал. Нош 
Татьяна Ивановна солы вожъяськоно кожам, лэся...
- Дугды бӧрдэмысь, Нина. Синкылиостэ адӟыса, мынам сюлэмы вӧсь луэ. Буйгатскы но 
дорад берт. Номыр сярысь эн сюлмаськы, - нылмурт доры лыктыса, Андрей кизэ солэн 
пельпум вылаз понӥз.
- Иське, тон мыным оскид? - Нина шумпотыса синкылиоссэ ныркышетэныз ӵушылӥз. 
Андрей солэн синъёсаз янгышам тусын учкиз но... ӧз вазьы. Ныллы пуконысь султыны 
юрттӥз но сое ӧс дорозь келяз.
Нина бӧрсьы ӧс ворсаськем бере Андрей дӥськутэзлэн пуш кисыяз утчаськыны шӧтаз. 
Толон басьтэм уждунысьтыз ньыльзэ сю манетлыкъёсты нимаз карыса, брюкиезлэн 
ӟепаз донгиз. Собере ӝӧк вылысьтыз бумагаоссэ ӝогак утялтӥз но, кабинетсэ 
пытсаса, школа пала дыртӥз...
"Оскиз, Ондӥ мыным оскиз! Озьыен, зэмзэ яратэ", - вазь укна ик школае дыртон 
сяменыз малпа нылмурт. Та малпанэз солэсь сюлэмзэ шунтэ, Татьяна Ивановналэн 
кезьыт синъёсыныз пумиськыны кужым сётэ.
Нина Петровна учительское пырыку Татьяна Ивановна котьку сямен ӝӧк сьӧраз пуке 
ни вал.
- Умой, умой, мусокае. Музьыед азьын сётаки возьыт потӥз, иське? Ярам, ярам, мон 
та учыр сярысь вунэтыны тыршо, - кескич пальпотӥз директор. - Нош тӥ, Нина 
Петровна, намотайте на ус: мукет дыръя лушкаськиды ке, уг жаля - ужысь мозмыто, 
- та кылъёслэсь нылмурт пӧсь вуэн пылатэм кадь луиз. Со али номырзэ уг вла: ма 
вераны турттэ кивалтӥсь?
- Мукет дыръя но, али но мон ӧй вораськы, уг но вораськы, - йырзэ ошыса шуиз 
егит нылмурт но журналъёсты возён ӝажые сузьтӥськиз. Уг поты солэн та лек 
кышномуртэн эчешемез но, вераськемез но.
- Ӧй вораськы, шуиськод, нош Андрей Сергеевичлы коньдонме берыктэмед, - лек 
мыньпотӥз Татьяна Ивановна.
Тае кылыса, Нина отчыяз ик погра вал. Усемезлэсь кышкаса, матысь пукон вылэ 
лэзиськиз.
- Кыӵе коньдон? Мар коньдон? - мырдэм кылымон юаз со . Йырыз жон вазьыны 
кутскиз. Киоссэ, пыдъёссэ вырӟытэмез но уг пишмы ни.
- Кызьы кыӵе коньдон? - Татьяна Ивановна но абдраз. - Ньыль сю манет. Кык нунал 
талэсь азьло мынам сумкаысьтым ӵапак сомында ышиз. Так вот, толон, ӝыт пал, 
участковой мыным ньыль сю манет ваиз. Тӥ, Нина Петровна, со коньдонэз, 
следствилэсь курдаса, милиционер дусымды пыр берыктоно кожаллям. Мар бен, ӟучъёс 
шуэмъя, повинную голову меч не сечёт. Валлэн ньыль ке но пыдыз, ито ӵемтылэ. Нош 
егит адями сьӧлыкатэк уг быгаты. Соин ик мон тӥледды простить кари.
Ниналэн директорлы пал кыл но вераны кужымез ӧз кыльы ни. Со вакыт уроке ӧтись 
гырлы жингыртӥз. Нош нылмуртлэн интыысьтыз вырӟемез уг луы. Учительское чылкак 
огназ кылемзэ ик ӧз шӧды. Ӝыны час мында онгромыса пукемез бере Нина Петровна 
каллен султӥз но сэрегысь шифоньер пала вамыштӥз. Туж юн висись мурт музэн 
дыртытэк дӥсяськиз но учительскойысь кошкиз.
Кема юмшаз со Ӵашъем гуртлэн ульчаостӥз. Бадӟым сюрес вылэ вуэмзэ ачиз но ӧз 
вала. Райцентре мынӥсь автобус нылмуртэ ӝыны час куспын ёрос каре вуттӥз.
Аракыен вузкарись магазинэ пырыса, со тӧдьы йыро ӟенелик куриз, собере гуртын 
кулэ луись арбериосын вузкарисяз кожиз.
Автостанцие Нина Петровна бер ӝыт гинэ вуиз. Суйпосысьтыз чассэ учкиз - Ӵашъем 
вӧзтӥ ортчись берпуметӥз автобус ог час ортчыса гинэ вырӟоз. Огшап малпаськемез 
бере нылмурт аптека пала вамыштӥз...
Патераз со пеймытэн берытскиз. Тыл ӝуатытэк кылиськиз но ӝӧк дорысь пукон вылэ 
лэзиськиз. Ульчаысь юбое ошем лампочка солэн улонниезлэсь пушсэ но югдытэ. Ӝомо-
югдо азьын Нина лушкем бӧрдыса, часлэсь кема пукиз. Собере шуак султӥз но ӧс 
дорысь пичи ӟус вылэ кельтэм сумкаяз бугыръяськыны шӧтаз. Аракыен ӟенелик сяна, 
дӥськут ошылон гозы, майтал, маке мында эмъюм поттӥз. Аракызэ но эмъюмъёссэ 
кыкна кияз кырмыса, со выльысь ӝӧк сьӧры бер ытскиз. Ӟенеликсэ усьтыса, курыт 
вуэз пушказ огкутскемен кисьтӥз. Кӧня ке минут ортчыса, нылкышно буйгаз. Ваньмыз 
бус пыр кадь адӟиськыны кутскиз. Шонаськысаӧс пала мынӥз, пичи ӟус вылэ 
ланьырскиз. Выж вылэ усем гозы бинетэз кияз кема бергатӥз, собере йыркурен 
кровать улэ зӥртӥз. 
Шонаськыса, канжаськылыса со выльысь ӝӧк доры вуттӥськиз. Борддорысь 
выключателез кийыгыиеныз шедьтӥз но патераз югыт луиз. Ӝӧк вылын люкен-люкен 
кыллись книгаосты, тетрадьёсты палэнтӥз но чылкыт кагаз баме ӝог гожъяны 
кутскиз: "Ӟеч лу, югыт дунне! Ӟеч кыль, яратоно Андрее! Мон тӥ азьын, гуртоос, 
ӵош ужась эшъёсы, чылкыт. Янгыш кариськоды ке но, мон вораськись ӧвӧл. Та быдӟа 
возьытэз чиданы мынам кужыме уг тырмы. Татьяна Ивановналэсь ултӥямзэ чидасал, 
дыр. Нош тон, Ондӥе, монэ быдэс лулыныд-сюлмыныд уд яратӥськы вылэм... Ӵок, 
аслам янгыше понна вылӥ Инмар азьын ачим кыл куто. Вождэс эн вае мыным, адямиос. 
Кызьы быгатӥ, озьы улӥ. Ас тодэмея-валамея кошкисько тӥ дорысь. Вылам мемиелэсь 
берпуметӥ кузьымзэ дӥсялэ - куреньпыр-сьӧд костюмме. Кулэме сярысь агаелы ивортэ 
таӵе адресъя..."
Гожъянзэ йылпумъяса Нина котыр учкиз - улоннияз ӝикытак интыяськем арбериослы, 
тау карыса сямен, берпуметӥзэ йыбырттӥз. Собере, сиськонни пала мыныса, вуэн 
стакан ваиз но ӝӧк вылын кыллись эмъюмез отчы одӥген-одӥген куяз. Аракыез музэн 
ик, быдэс стакан суретэз Нина гулькак ньылӥз. Собере, дӥськутсэ кыльытэк, 
пыдкутчанзэ гинэ куштыса, валесаз выдӥз. Султылонтэм вылысь...
* * *
Нина Петровнаез ватэмзы бере ӵуказеяз участковой школалэн директорез доры 
лыктӥз:
- Татьяна Ивановна, котьмар ке но, лушкаськисез утчаны кулэ. Арня талэсь азьло 
гожтэм заявленидэс ӧд куштэ на-а?
Татьяна Ивановна янгышам мурт сямен сопала-тапала утчаськыны, моганы кутскиз. 
Милиционер со шоры мыр-мыр учемысь, дарали кадь ӵыжектӥз. Киоссэ кытчы карыны 
тодытэк, я ӝӧк вылаз кыллись ручказэ кутэ, я сумказэ усьтэ-пытса.
- Вождэс эн поттэ, Татьяна Ивановна, но мынам уже сыӵе, - анайлы укшась 
кышномурт азьын Андрейлы возьытгес йӧтӥз.
Нош директор посӥськемысь уг дугды. Ӝӧк улысьтыз мае ке туж тунсыкозэ адӟыны 
тыршыса кадь пыд азьзэ учке.
- М-м-мон тӥледды, Андрей Сергеевич, валасько. Но... Курисько, тӥ но валалэ 
монэ, - пыриськись куараен кыдёкысен кутскиз Татьяна Ивановна. - Валаськоды-а, 
коньдон сюриз... Толон...
- Иське, дышетӥсьёс йыртэмасьёсты ас кожазы утчазы? - участковой школалэн 
кивалтӥсез шоры.
- Н-ну, м-марым... Чылкак озьы шуыны уг луы. Н-но... Со адӟемпотостэм ньыль сю 
манетме... м-мон... сумкаысьтым тани та адсконтэм висъетаз понӥськем. Толон ӝыт 
сумкаям пыри но... пичи молнизэ усьтӥсько, нош отын - коньдон. Вот, озьы но 
луылэ вылэм, Андрей Сергеевич, - шонере потыны турттӥсь муртлы кельше али 
директор.
Солэсь пыриськись куараен мадемзэ кылыса, Андрей интыяз ик кынмиз. Кӧня ке минут 
ӵоже ма вераны валатэк пукемез бере со интыысьтыз урмыса султӥз:
- Нош Нина кызьы?!
Та пумитэ Татьяна Ивановна юн куараен валэктӥз:
- Солэсь гожтэтсэ тӥ лыдӟиды ук. Нина Петровна монэн йырин ӧз, тӥледын сэрен 
кулӥз.
Номыр вераны быгатытэк, жӧломем Андрей, пыдъёссэ мырдэм кыскаса, дор палаз 
вамыштӥз...

Гербер - калык праздник
Туж кемала дыр ӵоже асьмеос ас калыкмылэн историезлэсь но вашкалаысь лыктӥсь 
олокӧня сюрс аръёс ӵоже азинскем искусствомылэсь, фольклорлэсь висъямын-люкемын 
вал. Тани юа али, удмурт калыклэсь йылолъёссэ, нергеоссэ, сямъёссэ тодӥськод-а 
шуыса. Туж ӧжыт мурт тодэ на соосыз. Тазьы, вань историмес но йылолъёсмес 
тодытэк, асьмеос шузи выллем муртъёслы пӧрмом.
Вань удмуртъёсыз ас калыкмылэсь бездытэммы ке уг поты, али асьмеос вань дунне 
калыкъёс сямен ик йылолъёсмес, историмес эскерыны, тодыны кулэ, дыр. Удмурт 
калык - музъем ужась, пӧйшурась калык. Музъем ужен герӟаськем трос но туж 
чебересь йылолъёс, нергеос малпам со. Отын адӟиське удмуртлэн музъем ужез 
яратэмез но инкуазез гажамез, соин тупаса, кенешыса улэмез.
Тулыс ужъёсыз быдтэмзылы шумпотыса, гуртоос люкаськозы вылэм гербер (геры бер) 
нерге ортчытыны. Лымшор удмуртъёс та йылолзэс гершыд (геры шыд) шуыса нимало. 
Чаклалэ али: макем чебересь кылъёс та. Тулыс гырем-киземлы сӥземын со. Тулыс 
ужъёссэс быдтэмлы шумпотыса, турнаны потон азьын адямиос ог-огенызы адӟисько, 
пӧртэм ужъёс, улон-вылон сярысь куспазы кенешо. Гужем пӧсь ужъёс ке вуо, гурт 
калыклы тазьы огазе люкаськыны вис уг шедьы ни.
Гершыд кутскон нуналэ бӧлякен вӧсьнергее ветло. Собере юондыр кутске. Кык-куинь 
нунал ортчыса, вӧсяськон кутске. Юэм муртэ отчы пырыны уг лэзё. Вераны 
вунэтӥськем: вӧсьнерге, шур кошкемъя ке чаклано, выллань вулы пумит мынэ. 
Уллапал урамъёсысь бӧлякъёс доры пыраса, ваннапал (выллапал) бӧлякъёс доры тубо. 
Ӵошатоно ке, кисьтон дыръя, коркась корка пыраса, уллань мыно. Вӧсьнергее 
ветлыны потэмлэсь азьло (нуназе) котькуд кузё куалаяз инмарлы, куазьлы, 
мукылчинлы йыбырттэ, тулыс ужъёс ӟеч ортчем понна тау каре.
Гуртэн гершыд вӧсяськонэ вить нунал ветло. Котькуд нуналаз музон интые ньылетӥ 
эстӥсько. Пудо вандо, гурт калыклы шыд пӧзьто. Котькуд нунал нимаз вӧсь: 
Шундылы, Куазьлы. Куинетӥ нуналаз Мукылчинлы, мукет сямен вераса, сюдӥсь-вордӥсь 
аныкай музъеммылы. Ньылетӥ нуналаз - быдӟым йыбырттон. Кинлэн семьяяз кулэм мурт 
вал, ар ортчемын ке ӧвӧл - соослы йыбырттонэ пыриськыны уг яра. Витетӥ нуналаз 
Акташлы вӧсясько. Та мифологической героймы сярысь мон номыр уг тодӥськы на. 
Оло, удмурт калыклэн вашкала историяз та адями тодмо кивалтӥсь, эксэй, оло, йӧно 
тӧро вылэм - кин тодэ, ма понна та ним вӧсяськонэ пыремын. Ас тусызъя со инмар 
нимлы уггес кельшы, адями нимлы тупа кадь потэ мыным.
Куатетӥ нуналаз уллань сиён. Гуртлэн шур кошкемъя уллань палаз та нергеез 
ортчытыны писпу вань. Со дорын сиён пӧзьто (ӵем дыръя ӝук), одӥг пересь мурт 
вӧсяське, собере кулэмъёслы куясько, вераськыса пуко, сисько. Тӥни озьы тулыс 
ужъёсыз йылпумъянлы сӥзем праздник йылсаське.
Берло дыре та йылол интые ортчытъясько гырон быдтон шуыса нимаськись 
праздникъёс.
Гырон быдтон арысь аре бездытгес ортчылыны кутскиз ини. Азьлогес та праздникез 
Алнашын ортчытъямзэс адӟылэме вал. Куд-ог ар сое "Гырон быдтон", куд-ог ар 
"Кырӟан праздник" шуылӥзы. Отын туж шулдыр вал. Базар, ӵошатсконъёс, пӧртэм 
серемес шудонъёс, валъёсын ворттылон, парашютистъёс но тэтчало вал та праздник 
вадьсы. Пиналэз но, мӧйыез но аслыз ярамон, шумпотымон вадессэ шедьтылӥз 
праздникын.
С. Виноградов,
Удмуртиысь калык художник.

Вениамин Ившин
Куинь кырӟан
Казакпилэн кырӟанэз
Тынад - мугорыд.
Мынам - синъёсы.

Тынад - куараед.
Мынам - пельёсы.

Тыныд - серекъян.
Мыным - яратон.

Тыныд - сяськае...
Уд учкиськы тон.
* * *
Льӧль-улмо бамъёсыд,
Льӧль-улмо ангесыд,
Горд-эмезь ымдурыд,
Сьӧд-сутэр синъёсыд.
Ой, та ӟеч емышъёс -
Укыр йӧн кузьымъёс:
Уксёен басьтонтэм,
Киыным сузёнтэм,
Жалемзэс,
Ческытсэс
Неноку веръянтэм!..
* *** 
Лыз ягын ческыт мульы -
Ягмульы со,
Горд мульы.
Нош малы со милемлы?
Милем вае пушмульы -
Шар выллем питырасьсэ,
Пинь улын тыкыртӥсьсэ,
Ческыт вӧй кадь шунасьсэ,
Мылкыдэз лӧпкытӥсьсэ
Нылъёслэсь-нылмуртъёслэсь -
Ягмульы кадь бамъёслэсь -
Йыръёссэс
Берыктӥсьсэ!
* * *
Астэ эмезь-а кожаськод?
Весь мыняськод пиос азьын.
Укыр ческыт ке потӥськод,
Ой, веръяса ик быдтозы.

Шуак луид, оло, сугон?
Вань пиосты ни улляськод.
Укыр ик бен курыт ке тон,
Ой, куштозы ук, торк! кылёд.
* * *
Дыдык бурд кадь чидасьтэм но
Пӧськы бурд кадь буйгасьтэм,
Синкашсэ ни шудытэ со,
Мылкыдме, дыр, гочатэ.

Ойдо, гочаты... Киыд но
Медло юсь
Шудон пӧлын.
Пужыё кышет пумыд нош
Чечег быж ук -
Мурт ӟепын(.

Ныл дыр кырӟан
* * *
Кыльымтэ ни, мыльымтэ ни
Ми бордысь адӟымтэез,
Ваньзэ ик лӧдэм-сэрттэм ни
Калыклэн кылыз-бурез.
Нош огзы но, мукетсы но
Чик ӧз адӟе, гажанэ,
Кызьы тон ульча урдсын ик
Бамам чуп карид монэ.
* * *
Адӟыса но мон ӧй адӟы
Татынзэ солэсь.
Ӧй но шуна, ӧй но раньӟы
Пальпотэмезлэсь.

Нош малы ай шӧдӥсько мон
Ӧвӧлзэ сюлмын?
"Кулэез вал!" - шуисько но,
Ачим - укноын...
* * *
Вандӥ-вури, выльзэ вуттӥ
Чебер-чагыр дэремме.
Куно пӧлын матад лыктӥ,
Тыныд ваи сюлэмме.

Шудо ӝӧксьӧр эшъёс пӧлын
Кытчы урдсы учкиськод?
Ӧвӧл ай мон сиресьтурын,
Юнме урод малпаськод.

Индылэмъя ӧй лыкты мон,
Ӧй пыры мон косыса.
Мылкыдъёсты бурдъятымон
Лэзё али кырӟаса.
Пыдме лёго, такыр экто,
Мед зуркалоз выж пулэд,
Оло вазёд, оло шултод,
Оло потоз учкемед.

Вань сюлэмме тыныд верай,
Уг малпаськы лӧпшаны.
Мон лыктыны ке ӟеч валай,
Ӟеч валало кошкыны...
* * *
Тэль йылэ кубиста йыр кадь
Погыля толэзь.
Учкемед выллем, шулдыр со
Пазьгытэ азвесь.

Пужнонзэ пужнэ толэзь но
Югдытэ садме,
Вужерлэсь-вужеръёслэсь со
Мозмытэ лулме.

Уӵерак лоба уйсы но,
Берга бубыли.
Юг лысву пушкын майсы кадь
Ужа кизили.

Турын-куар но, лулосъёс но
Юо толэзь ву,
Сюлмысьтым мӧзмон сиос но
Шып куро сурсву...

Но тон кадь ик, вазьытэк но,.
Чаль кошке толэзь,
Уйвӧтме но алытэк кадь
Кулэсме азвесь...
* * *
Гурезь йылтӥ-а кильтыр,
Вож куар пӧлтӥ-а чильтыр
Ӝужа-пуксе шундые?
Уг мын укно улэтӥ -
Бакча бертӥ сюрестӥ
Пото ӝыт шудонние.

Гажанэлэн бамъёсаз,
Пеймыт сутэр синъёсаз
Шудэ капчи мылкыдыз...
Ырак пото мон азяз,
Пырак шуо пумитаз,
Мед дыректоз сюлэмыз:

- Кыӵе тынад малпанэд,
Кыӵе тынад веранэд,
Малы тон чик вазисьтэм?
Тон котьма шу, дуное,
Тон котьма шу, мусое,
Мон -
Тон понна вордскиськем...

Кузэн кырӟан
* * *
Часэн-часэн шальтраз дыртӥсь нунал,
Куара сылмиз мукет куара пушкын.
Ю шепъёсты зӥбиз лушкем ӝомал,
Юзырало мылкыд тысьёс сюлмын.

Та нуналлэсь огзэ шудо чассэ
Мыным кузьмаз вал пальыштӥсь синмыд,
Адӟылымтэ шуныт визылъёссэ
Усьтӥз мыным шӧдӥсь-валась лулыд.

Шальтрам дырез уд сазна выль дырен,
Но кисьманы вуэм тысьёс сюлмын
Вазиськыло пыдлось крезен-гурен
Пельпумъёсме зӥбем ӝомал пушкын...
* * *
Мон синмыдлэн синлыс пыртӥз
Учки толло дырез.
Выль эшъёсме но синйылтӥ,
Чаклай ӵуказеез.

Синкылидэ эсэпласа,
Тэль ошмесозь лыктӥ.
Адӟонэдлэн гажан пулсаз
Выль улонме шедьтӥ.
* * *
Пӧськы бурд кадь чебер ӝутъяське синкашед,
Нош мынам - куакалэн кадь, дыр, жум, лусьтырес.
Пӧртэмесь асьмеос.
Ӵуж бабля йырсиед,
Нош мынам - пурысен но сьӧдэн сурогес.

Пӧртэмесь асьмеос.
Но гажан юртамы
Тулыс тӧл кадь ырак шумпотон ке лыктэ,
Ог тылэн ӝуатско, серекто синъёсмы,
Эшъёслы но та тыл югытсэ, дыр, сётэ.

Кайгумы но одӥг: тынэсьтыд но бамдэ,
Мынэсьтым но сайя тём-пеймыт бурдъёсын.
Кынтылэ-а, шунтэ-а малпан мылкыддэ -
Сюлэмам вуттӥське со сыӵе ик кужмын.

Пӧртэмесь асьмеос.
Но уно огкадьмы.
Тусамы-буямы, вылды, со ик пырем.
Бен соин-а куддыр вазьыло шорамы:
"Вын-сузэр, оло, тӥ? Патретты - огтусъем".
* * *
Одӥг чур гинэ,
Одӥг кыл чур.

Камкоӵо кеськем кадь,
Вӧсь но мур.

Яр пумысь выжы кадь,
Сюл но кал.

Ӧпкелись тулкым кадь,
Гыл но гал.

Одӥг чур гинэ,
Одӥг кыл чур.

Витьымтэ шорысь
Ыртэм кылбур.

( Ӟеп - кисы.
* * *
Карйыл гурезь доры чигнам	 гордъёс палась нош ик пушка куараос кылӥськизы. 
У-ух!.. У-ух!.. зурканы кутскиз музъем. 
- Асьмелэнъёс! - лӧптӥз Иван. - 
Тӧдьыослэн но пушкаоссы улӟизы. Ваче ыбылӥськемзэс кылзыса, пиналъёс огшап 
чал-чал сылӥзы. Собере Иван шуиз:
- Мон гордъёс доры мыно.
- Малы? - паймиз Максим. - Аресмы вуиз ке, улон ачиз кинъёс пала 
кариськыны валэктоз.
- Малы ке сюлмы шӧдэ: мон соосын луыны кулэ кадь.
- Ойдо Евгений Васильевичен кенешом, - тэтчиз Максим.
- Ма, тӧдьы офицерен со сярысь кенешод-а, вот сюсьыгей! - серектӥз Мани.
- Уг валаськы, уг валаськы... - йыр бордаз кырмиськиз Максим. - Евгений 
Васильевичен али гинэ эшъёс вал, нош табере со шоры ыбыломы-а?
- Басьты монэ сьӧрад! - Иванькалэн саес бордаз кырмиськиз Мани. - 
Санька, Пилька, ойдолэ милемын ӵош! Максим ӧжытак мед малпаськоз на.
- Мон уг... уг мын. Мынам, асьтэос тодӥськоды, лулы шуг, - палэнэ 
кариськиз Самар Пилька. 
Санька Маниез ӝип- ӝип ӟыгыртӥз:
- Тон, дыдые, дорад берт но шобрет улад купырскы ай, ява. 
- Тон но уд мынӥськы-а, Санька? Тынад но лулыд шуг?
- Ма... ӧтид ке, мыно. Дорад уд бертӥськы шат, анаед ыштоз ук.
- Уз ышты. Пилькаен Максим кытынме вералозы. Ойдо ми сьӧры! Иванька, кылӥд-а, 
Санька но мынэ! 
Со куспын пушкаослэн гудыръямзы кужмояны ӧдъяз.
- Ой! - лулӟиз Мани. - Кышкаса анаелэн сюлмыз путэ, дыр, ини.
- Визьлюк! - Манилэсь нёред мугорзэ Максим ӟыгыртӥз но бамаз чупаз. - 
Мын берт. Ми тон понна но ожмаськомы, ява!
- Тон соглаш-а? Соглаш-а мыныны? - интыяз тэтча Мани. - Уг, табере мон 
уг берт! Тӥ кытчы, мон но отчы! 
Пиналъёс Чебер нюк пала вамыштӥзы, Самар Пилька - дор палаз.
Чебер нюкез котыртыса, Бадӟым арама сьӧры вуоно, отысен Кузь шашы 
возь сюре. Со возез ортчыса, Карйыл бусы яплак усьтӥське. Тани та 
сюресэз бырйизы егит эшъёс.

* * *

Гордъёс доры вуэмзы бере Маниез соку ик лазаретэ интыязы: виресь 
бинтъёсты, нюлам дэремъёсты, гимнастёркаосты, бинялтонъёсты, пе, миськод. 
Ожъёс вискын со доры Иван но, Санькаен Максим ветлытэк ӧз чидалэ.
Карйыл бусыысен Кайсы черкогурт кикур вылын кадь адӟиське. Со лымшор 
пала васькись нялмыт вырйылэ интыяськемын. Отчы нуись Грах сюресэз 
тӧдьыос вистэм-вожтэм ыбыло. Кайсыез мозмытыны та сюрес уз ни юртты - 
гордъёс сое туж умой валазы. Соин ик, та бусые синпӧетлы кык пушказэс 
кельтыса но ньӧмыз понна гинэ ыбылэм карыса, гуртэз кык ласянь котыртоно 
кариськизы - Усмангурт ласянь но Блатгурт ласянь. Манилэн лазаретэз Карйыл 
бусые ик кылиз. Иванэн Санька Блатгурт пыр, нош Максим Усмангурт пыр 
мынӥсьёс пӧлы шедизы. Ӝоманы кутскон азьын ваче ыбылӥськон чалмыны ӧдъяз. 
Миськем дӥськутъёсты лазаретын ужасьёсын ӵош ошылыкуз Марья Кайсы гуртэз 
шоры учкиз но абдраз: гурт уг ни адӟиськы, ӵын пӧлы ышемын.
Горд солдатъёс подводъёсты туж ӝог Грах сюрес вылэ поттӥзы но пушкаоыз 
кыскись валъёсты Кайсы пала уллязы. Лазарет но интыысьтыз вырӟиз.
- Чигнало, учкы, чигнало! - шулдыр вазиз тэльбугоез возись солдат, 
Варӟылэ нуись сюресэтӥ дыртӥсь тӧдьыос шоры возьматыса. - Котыртэмысь 
лэзьыны уг яра вал соосыз, эк-ма! Блатгурт пыр мынэмъёс берегес кылизы 
шат?
Ӝоген Кайсы черкогуртлэн Бадӟым урамаз вуизы. Кӧня ке коркаос ӝуало, 
соосты умой-умой кысӥсь но ӧвӧл.
- Ӟеч лу, мон ас гуртам вуи, - шуыса Мани уробоысь тэтчиз.
- Сыл ай, сыл! - вазиз солдат, валэз дугдытӥз. - Эн кошкы, нылы, тон 
али милемлы туж кулэ. Ужаны быгатӥськод, киыд зарни. Тӧдьыосыз кыдёкегес 
уллямы ке, бертод...
Мани огшап ма карыны паймыса сылӥз, собере уробое пуксиз:
- Улля валдэ! Но-о-о!
Ӟуч ураме потэм беразы валзэс ӝоггес уллязы. Школа но совдеп мышказы 
кылизы. Ӝоген соос нюлэс пала тубись подводъёсты сутӥзы. Тани Елабуга-Сарапул 
тракт. 
- Асьмелы та сюрестӥ мыныны косэмын, - шуиз солдат но паллянэ 
кожиз.
- Тӧдьыос Агрызэ чигнало-а, мар-а? - юаз Мани.
- Ӧйтӧд, нылы. Та сюрестӥ косӥзы но мынӥсько тани.
- Та сюресэз мон ӟеч тодӥсько, - шуиз Мани. - Татӥ Абышгуртэ, бадӟым 
апаймы доры, пукись ныл чотын ветлӥсько вал. Туж кельышлы гурт, егитъёссы 
уно.
- Шаян пиос кугӟатыса ӧз кельтэ-а? - мыняк потӥз солдат.
- Тӥляд но сыӵе йылолды вань шат? - паймиз Мани.
- Мон кыдёкысь ӧвӧл. Асьмелэн вань йылолъёсмы огкадесь.
- Озьы, иське?..
- Ы-ы-ы...
Абышгуртэз потэмзы бере вань солдатъёс сик дуре интыяськизы. Ӝоген 
куазь тём-тём пеймыт луиз. Кытысь ке ӧвӧл Мани доры Максим вуиз.
- Ваньдэс ыштӥ, кожасько ни вал, - шумпотӥз со. - Тузӥм ке тузӥм 
шол тӧдьыосты!
Вераськоназ ӧжытак ушъяськон сям пыӵам, Мани соку ик тае шӧдӥз.
- У-у, тон, пе, уд тузы!
- "Мон" ӧй шу, "ми", - вазиз Максим.
- Валай, валай... Кытын нош Иванькаен Санька?
- Соос Варӟыл сюрестӥ пегӟисьёсыз уйыса мыно. Кайсыын ваче ӧм вуэ. 
Тӧдьыос котыртэммес шӧдӥллям но кызьы пегӟемзэс ӧз валалэ.
Умой-умой вераськыса ӧз вуэ - соосты тылскем дуре ӧтизы.
- Ыбылӥськыны пӧрмостэмъёсыз но вань на, - шуиз Максим. - Соосты дышетыны 
люкало, дыр.
- Тонэ но-а?
- Мон дыши ни. Мукетъёссэ дышетыны мынӥсько. Дыртоно - дисциплина!
													
	* * *	

Максим, Иванька, Санька но Мани гордъёс сьӧры кошкем бере Самар 
Пилька гуртаз бертӥз но ньылёй кыре ӧз пота. Огнуналэ соос доры 
тӧдьы солдатъёс пыризы. Шуизы, кудаз ке юртын, пе, сӧсырмем горд 
солдатъёсты ватыса возё, шедьтӥмы ке, солдатъёсты но, кузёоссэс но 
ыбыломы. Пилькалы ӧз оске, корка сиге но тубазы, кеносэ но пыразы. 
Адӟо: отын но, татын но шал-шал буш. Мукет юртъёсын штыкен бышкаса 
утчаны ӟег курозы коть вал. 
"Малы соос мыным ӧз оске? Малы? - кайгырыса пукиз Пилька, солдатъёс отӥ-
татӥ утчаськыку. Солэн туж тодытэмез потэ вал, кызьы таослы алигес гинэ 
пушкаен ыбылыны юрттӥз, солдатъёссылы снарядъёс сётъяз. - Малы вераськемзы 
ик ӧз пот? Номыре уг тодӥськы, кожазы-а, мар-а? Оло, верано вылэм, 
кытын сӧсырмемъёсты ватыса возё? Быдэс гурт тодэ ук кин дорынзэс".
Солдатъёс капкаетӥ пото ни вал. Пилька ӧз чида, азбаре дыртӥз.
- Сылэ ай! - кеськиз.
Солдатъёс шуак берытскизы, йырзэ ошыса сылӥсь пияш шоры учкизы.
- Ну! - ӧз чида огез солдат. - Мар веранэд вань?
- Мон... мон... со солдатъёсты ӧй адӟы... Малпасько... м-м... - Пилька 
али гинэ валаз, кыӵе умойтэме ассэ ачиз вуттӥз. Берен чигнаны муг 
утчанэз кема кыстӥськиз. - Мон...
- Арестовать! - кеськиз огез солдат.
Пилька шоры винтовкаос урдскизы.
- Эн поттэ монэ ураме! Гуртоосы медам адӟелэ. Верало, кытын соос... 
верало... - солэн кылыз быгыльмыны ӧдъяз. - Ур-раме по-потӥды ке, б-бур 
пала коже... Ми д-дорысен куинетӥ корка...
													
	* * *

Сӧсырмем куинь горд солдатъёсты но соосты утьыса-йӧнатыса возись 
пересь Азамат Лёгорез гурезь ултӥ бызись нимтэм шурлэн ярдураз, 
лабырес бадьпу улын, ыбылӥзы.
													
	* * *
Нош ик Карйыл бусые чигнам гордъёслэсь Кайсы черкогуртэз кык ласянь 
котыртэмзэс шӧдыса, тӧдьыос кыклы люкиськоно луизы: огез Сюгинске, 
мукетыз Сарапулэ нуись трактъёс вылэ дыртӥзы. 
Кайсы черкогуртэ выльысь гордъёс пыризы. 	Таяз радэ соос киязы пыӵал 
возьыны быгатӥсь егит пиосты но воргоронъёсты утчаны кутскизы.
Самар Пилька, ураме потаны дӥсьтытэк, дораз пуке. Умойтэм лэсьтэмзэ 
ваньмыз тодо ни кадь потэ. "Янгышай, янгышай... Сьӧразы азбаре потыны 
кулэ ӧй вал. Ма, шорам пыӵал урдозы кожай шат? Мон интыын котькин 
эбылясал... Гурт калык зэмзэ тодэ меда мар лэсьтэмме? Оло, уг тоды? 
Ма, кытысь тодоз, ураме ӧй пота ук! Эх-ма, кызьы та гыбдась сюлэмез 
небӟытоно? Нош гордъёслы ке юрттӥ? Соослы кин дорын тӧдьы офицерлэсь 
кытынзэ ке верай? "Эксэй армилэн сӧсырмем полковникез Зименков Евгений 
Васильевич Митрошинъёс дорын куноя" шуи ке? О-о, сое туж оскыса йыг-йыг 
кышномурт доры кельтӥзы. Калык пӧлы офицерез сӧсырмем бераз кытчы ке 
келязы шуыса кылпум вӧлдӥзы ке но, мон тодӥсько: ваньмыз со пӧяськон! 
Иванька гордъёс сьӧры кошкем бере анаезлы ивортыны пыри но соку ик 
валай: офицер соос дорын! 
Тӧдьы офицерез гордъёс кие сётон сярысь малпан Пилькалэн йыраз 
мургес но мургес пыӵаны ӧдъяз. Огез гинэ люкетэ: Иванькалэн анаез. 
Офицерез кырмизы ке, сое но кыскалозы ук. Нош ыбизы ке? Гурт калык 
соку кыӵе синмын учкоз Пилька шоры? Ӧвӧл, ӧвӧл, та ужез солы кызьы ке 
мукет сямен лэсьтоно - нокин тодонтэм вылысь. 
Витьымтэ шорысь Пилька сайкам кадь луиз: дасолэсь уно кайсы воргоронъёс 
Чебер нюке пегӟемын ук! 
Та малпанэзлы со шумпотӥз. Пегасьёс сярысь гордъёслы вераз ке, 
законэз уте шуыса уз ушъялэ шат сое? Вот уго! Укноетӥ ураме учкиз. 
Кык солдатъёс вамышъяло. Корка пырыны ӧтьыса, киыныз шонтӥз. Соосыз тае 
гинэ возьмало вылэм, кожалод, - кытӥ-мартӥ пыризы. 
- Асьтэос тодӥськоды, милям гуртмы Горд Армиез туж яратэ но солы 
котькуд ласянь юрттыны тырше. 
- Бен, бен, тодӥськом, тодӥськом! - вазизы солдатъёс. - Мар веранэд 
вань, ӝоггес вера, ми туж дыртӥськом.
- Тӧдьыосыз улляды шуыса, милям куд-огез уг тод на. Ивор ке сётӥмы, 
туж шумпотозы. Кыдёкын ӧвӧл соос. Тӧдьыослэсь пегӟизы вал.
Солдатъёс Пилькаез валтыса сямен сьӧразы поттӥзы. Урамын котыразы 
мукетъёсыз люкаськизы. 
- Вал вылын ворттылыны быгатӥськод-а? - юазы.
...Чебер нюке пырем беразы меӵ яро интые вал вылын мыныны ӧйлась ни. 
Пилька огназ вамыштӥз. Гордъёс сое син улысьтызы уг лэзё.
- Иськавынъёс! - кеськиз Пилька. - Мон та - Филипп Самаров, Самар 
Пилька! Эн кышкалэ, потэ дорам! 
- Голодный, поди? Чаль, накормим! - кылӥськиз Коко Васьлейлэн куараез.
- Сами лыктэ мон доры! - нош ик вазиз Пилька, Коко Васьлеез исам 
карыса. 
- Мар ваид? - гуысь кадь кылӥськиз мукетыз куара. 
- Асме ваи.
- Тон милемлы кулэ ӧвӧл!
- Потӥды ке, куаноды.
- Нырйылзэ ваид-а, мар-а? Чаль татчы!
- Уг! Тӥледыз витисько!
- Тыныд оскыны луэ-а?
- Луэ.
Кӧня ке улыса, Коко Васьлей адӟиськиз. Со бӧрсьы мукетъёс кыре 
потӥзы. Соосты соку ик горд солдатъёс котыртӥзы. 
- Ляб ужаськоды, ляб, - лыктэмъёс воргоронъёсты серем каризы. - 
Разведкады ӧвӧл-а, мар-а? 
- Мы этому шалопай поверили! - Коко Васьлей Самар Пилька шоры туж лек 
учкиз. 				 
	* * *

Кайсыысь пегасьёсты доброволецъёс чотэ карыса, доразы но пыраны лэзьытэк, 
Сюгинске нуись тракт вылтӥ вамышъясь горд солдатъёс радэ султытӥзы. 
Соос пӧлын Иван Митрошинлэн атаеныз агаез но вал.
Гордъёслы юрттӥськемезлы шумпотыса, Самар Пилька капчи мылкыдын дораз 
бертӥз. 
													* 
* *
Максимез но Марьяез ож сюрес Екатеринбург пала вуттӥз. Кыӵе ке пичигес 
гурт понна ыбылӥськон дыръя снаряд Максимлэсь .бур пыдъюмылзэ 
сузмытӥз. Кӧня кыллиз со йырсазьзэ ыштыса - тодӥсь ӧвӧл. Ож чалмем 
бере сӧсырмем солдатъёсты утчась санитаръёс сьӧры Мани но куриськиз: 
маке умойтэмзэ сюлмыз шӧдӥз кадь. 
Максимез со нюлэс дуртӥ бызись пичигес шур вӧзысь шедьтӥз. Ачиз 
нюжтӥськыса татчы лыктэм, шӧдске: погмаськем турын-куар вылын вирен 
саптаськем пытьыез адске. Шур дорозь ог кык вамыш гинэ вуымтэ, гаӵоло 
усем.
Тодмам бераз Мани кынмем кадь луиз. Интыысьтыз вырӟыны но, вазьыны но 
уг быгаты. Кулэм кожаз. Ымнырыз уго кӧсэктэмын, ымдуръёсыз куртчылэмын, 
йырсиез тугаськемын. Собере Максим вӧзы лэзиськиз но бӧрдонэз пӧсьтӥз.
Со виын Максим синъёссэ усьтӥз. Бӧрдӥсь Маниез адӟыса, каллен гинэ юаз:
- Мар луиз Мани, малы бӧрдӥськод?
Соиз шуэрак луиз, эшшо юнгес бӧрдыны ӧдъяз но Максим борды ӟыгырскиз:
- Мон... мон тонэ кулэмын кожай...
- Адӟиськод ук, улэп.
- Улэп, Максим, улэп! Инмарлы тау!
Кӧня ке улыса, шур дуре ньыль кузя тӧдьыос вуизы... Огез - офицер. Мани 
Максимлэсь сӧсырмем пыдзэ миськиз вал ини. Миськиз но санитаръёсты витёно 
кариськиз. Нош утёд ке тӥни... "Кытысь-марысь вуизы таос? Милямъёсыз кытын?" 
- Мани долкаса кадь тӧдьыос шоры учке. Со куспын огез солдат Максим доры 
мыкырскиз, пыдзэ умой-умой учкиз но офицерлы шуиз: 	
- Та пияшлы али ик операция ӧд ке лэсьты, пыдзэ гинэ ӧвӧл, ассэ но 
утьыны уд быгатэ.
- Лазаретэ! - вазиз офицер но огеныз солдатэн нюлэскы вамыштӥз. - Татын 
ик вите, мон санитаръёсты ысто.
Трос ик дыр ӧз ортчы - дыбыртыса подвод вуиз. Санитаръёс Маниез Максим 
бордысь палэнтыны ӧдъязы. 
- Уг сёт! Милям асьмелэн лазаретмы вань! Гордъёс палась ми, эн 
йӧтылэ! - кесяськиз Мани, Максим борды ӟыгырскыса. 
- Тӥлядъёс чигназы, соос гуртлэн сопалаз ини. Ӧд кыл шат, кыӵе лек 
ожмаськон вал?
- Мани, эн керӟегъяськы, - вазиз Максим удмурт сямен. - Асьмеос 
котыртэме сюриськеммы, тӧдьыос кие. Астэ уть, мон понна эн сюлмаськы.
- Уг сёт! - эшшо юнгес ӟыгырскиз со Максим борды. Собере солдатъёслы 
вазиськиз: - Тӥ гордъёсыз ыбылӥськоды! Тае но ыбоды-а?
- Табере таид горд но, тӧдьы но, вож но ӧвӧл ни, со - висись. Нош 
висись муртэ бурмытоно. Валад-а, нылаш?
- Мон ке вӧзаз ӧй лу, со кулоз... - нош ик викышъяны ӧдъяз Мани. - 
Мар косӥды, ваньзэ быдэсъяло, мон котьма карыны быгатӥсько, эн гинэ люке 
монэ солэсь!
- Милям лазаретамы ӵапак таӵе адями кулэ. Шумпотыса сьӧрамы басьтом.
Максимен Мани, тӧдьыослэн лазаретазы сюрыса, толэзь ёрос лек тылӝу 
пушкын костаськизы. Нош	кунул боды вылэ султэм бераз Максим Семёнов 
тӧдьыос дорысь пегӟон сярысь кылпум поттылыны ӧдъяз...
* * *
Кайсы черкогуртэ Митрошинъёс доры ватыса кельтэм тӧдьы офицер кема но секыт 
висиз. Йырсазьзэ ыштылыкуз, оломар но вераське, кинэ ке индылэ, косъяське, 
тышкаське... Сазьдӥськыкуз кема вазьылытэк кылле, собере дӥсьтытэкгес Лукерлэсь 
мар вераськемез сярысь юа.
- Ма, мон тодӥсько шат кинэн кенешемдэ? - буйгатэ соиз.
Огаз нуналэ, мылкыдыз тужгес капчи дыръя, полковник кеносысь корка пыроно 
кариськиз. Учкемез потӥз, кызьы удмуртъёс табань пыжо. Зыретэз веръяз - кельшиз.
- Тазьы пегаса кемагес улӥд ке, - шуиз со Лукерлы, ӝуась гур шоры учкыса, - 
кыромемдэ ик уд шӧдылы. Нош мон паймымон калык пӧлын будэмын, бадӟым каръёсын 
дышетскемын.
Али солэн лулысь-сюлмысь вераськыны мылкыдыз ӝутскиз, удмуртъёс сярысь, соослэн 
улэм-вылэмзы, йылолъёссы сярысь умойгес тодэмез потӥз. Солэн сюлмаз кемалась 
паӵаз ни та огшоры удмурт кышномуртэз гажан мылкыд.
- Тау тыныд, Лукерья, пыд йылам султытэмед понна. Та ӟечтэ мон ноку уг вунэты, - 
шуиз со. - Марысь-мар ке, улонэд секыт луиз ке, тод: быгатэмея юрттыны тыршо. 
Мон - Евгений Васильевич Зименков, Саратовын генераллэн семьяяз будэм адями. 
Уно гинэ пумиськылӥ бигер, мари семьяосын, нош удмуртъёсты нырысьсэ адӟисько. 
Азьвыл малпанъёсы эшшо муромизы: та калыкъёсын туж капчи, огкылысь улыны луоно. 
Уг яра вал Россиез пӧзись пуртылы пӧрмытыны. Маин янгыш калык, ӟуч-а со, удмурт-
а, бигер-а?
- Сыӵе кылъёсыз мон уггес валаськы, - эшеныз кадь вераськыса пукись 
полковниклэсь кепыр ваиз Лукер.
Ӧс куараез кылыса, кыксы ик куалектӥзы. Самар Пилька пыриз. "Ма, капкаез пытсай 
кадь но..." - суй-пыдыз юскиськымон абдраз Лукер.
- Мон бакча ыбестӥды пыри, эн пайме, - шуиз Пилька. - Воргоронъёстылэн иворзы 
ӧвӧл-а шуыса тодэме потӥз.
- Кытысь ке мар ке кылӥськиз, оло? - шуак луиз Лукер.
- Кыӵе ивор вуоз асьме доры, почтамы но радызъя уг ужа бере? Зэм, мар но со 
кылӥське ик. Колчак армиез Урал гурезьёс сьӧры поттӥллям ни, пе. Соин валче 
уездамы но, Кайсыын но выльысь совдепъёс, коммунистъёслэн укомзы но татысь 
ячейка улӟизы. Тӥни со гинэ. Совдепамы ужаны кужмысь ӧтё но, ӧйтӧд, мыноно-а, 
ӧвӧл-а... Тынад нош, Евгений Васильевич, кыӵе-мар улэм-вылэм, тазалыкед юнма ни-
а?
- Кытысь тон монэ тодӥськод? - паймиз Зименков.
- Ма, сӧсырмем берад татчы ачим ӝутыса ӧй пырты шат?
- Озьы, иське?
- Вот уго!.. Ярам, уг ни люкеты, вамышто. Иванькалэн иворез луиз ке, гожтэтад 
мынэсьтым салам вера, ява, Лукер апай, эшед мӧзме шу. Ӟеч луэ.
- Кин со? - ӧс ворсаськем бере ик юаз куалектэм Евгений Васильевич. - Быдэс 
коркаез кезьыт карыса кельтӥз.
- Нылпиосмы но, гурт калык но сое уггес ярато, - шуиз Лукер. - Малы ке сюлэме уг 
лякиськы.
- Умоен ӧз ветлы со! - пӧсекъяны ӧдъяз Зименков. - Пожалуй, кошкыны дасяськоно. 
А то астэ но, семьядэ но умойтэме вутто.
- Кытчы кошкод огнад, висись мурт? - вазиз Лукер. - Кисыяд нокыӵе кагазэд но, 
коньдонэд но ӧвӧл ук.
- Тон киын-а соос?
- Ӧвӧл.
- Озьы ке, югдур ямсыз. Но... тазьы пукыны уг лу ни. Пырась адями ӧз вера шат, 
коммунистъёс властьсэс юнмато шуыса? Татысь гылӟыны пумен шуггес но шуггес луоз. 
Кин тодэ, со пияш, оло, али ик чагиськыны мынӥз, тани-тани монэ кырмыны лыктозы. 
Соку кызьы? Дыртоно!
- Тонэ утьыны кельтэм муртэд сярысь тодӥськод-а?
- Кин со?
- Туж чакласькыса тонэ эскерыны пыралля. Зэмзэ кошкыны малпаськод ке, мон со 
доры ветло но ивор сёто. Кыдёкын ӧвӧл, Усмангуртын гинэ.
Тае кылыса, Евгений Васильевич вераны луонтэм шумпотӥз но бурдъяськиз. Со ӝытэ 
ик Усмангуртысь адями солы огшоры дӥсь ваиз, со ӝытэ ик соос, гурт сьӧры потыса, 
Кайсыез возъям ӝомалэ сылмизы.
Нош Лукер, тӧдьы офицерлэн кузь но кышкыт сюресэз мед удалтоз шуыса, Инмарлы 
вӧсяськиз...
													 
* * *
Максимен Маниез ас сьӧразы нуись тӧдьыос вылэ витьымтэ шорысь гордъёс 
тӧлпери кадь вуизы. Ыбылӥськон, юр-яр кесяськон, валъёслэн гырдаллямзы 
- ваньмыз огинэ сураськыса, нокыӵе кылын верантэм суред кылдӥз. Солэсь 
азьло гинэ Максимен Мани лабырес кыз вӧзы интыяськизы вал. Ыбылӥськон 
кутскыса, Мани Максимез усьтыр-табыр кыз улэ кыскиз но аслаз мугорыныз 
сайяз. 
Ярам ини, ыбылӥськон, юр-яр карон кема ӧз кыстӥськы. Омыр нош ик 
жингыртымон чус луиз. Мани, дӥсьтыса но дӥсьтытэк, кыз улысь йырзэ 
мычиз. Собере шуиз:
- Кыӵе четлыке сюримы, Максим? Быдэскын потыны быгатомы на-а?
Манилэн кышканэз Максимлы но палаз, со секытгес шоканы ӧдъяз. Тазалыкез 
ляб на уго.
- Мар отын? - юаз. - Малы нокыӵе кыл-куара ӧвӧл? Тӧдьыос чигналлям-а, 
мар-а? Гордъёс соосты уйыса мынӥзы, дыр, оведь? Ойдо татысь потом, кытын 
ке лазаретсы вань, оло. Соос пӧлы сураськысалмы ке...
- Тон эн сюлмаськы. Мон... мар кулэ, ваньзэ лэсьто, кинэ кулэ, шедьто. 
Тон кылльы, ява, эн вырӟылы... - ма карыны ӟудэменыз, кыл йылаз мар 
лыктэ, сое ик бӧтьыртэ Мани.
Максим шуак вырӟиз но, Маниез бордысьтыз палэнтыса, кыре мычиськиз. 
Кӧня ке учкыса улэм бераз шимес куараен кесяськыны ӧдъяз. Собере, кыз 
улвайёс улысь потыса, кунул бодыосыз вылын лазарет котыртӥ, полевой 
кухня дортӥ чутышак-чутышак тэтчаны ӧдъяз. Соос азьын - кышкыт суред: туж 
уно тӧдьы солдатъёс, лазаретысь сӧсырмемъёс, уробое кыткем я буш 
валъёс - ваньмыз-ваньмыз ыбылэмын, бышкемын, корамын. 
- А-а-а! - кесяське Максим. - Кинлы осконо?! Тазьы шат выль улонэз 
лэсьто?! А-а-а!..
Кужмыз лябӟыса, турын вылэ лэзиськиз. Долкам синъёсыныз котыр утчаське.
- Максим, асьмелы татын кема улыны уг яра. Кин тодэ, оло, нош ик 
кудзы ке берытскозы.
- Ӝоггес, ӝоггес татысь! - Максимлэн куараез ӟазырес кылӥськыны ӧдъяз. 
Собере, тэтчаса, усьылыса, шуккиськылыса, ньыль пыд йылаз кыстӥськыса, 
шунды пуксён пала нуись сюрес доры сётскиз. Кытысь кужмыз потӥз на - 
паймод но бырод. Сюрес вылтӥ но иськем ёрос озьы ик мынӥз на, собере 
ожо вылэ пограз но йырсазьзэ ыштӥз. Ай умме-а усем?..
Мани со шоры шугъяськыса учке. Пияш син азяз начармиз кадь потэ, мугорыз 
эшшо ӟызыгес кылиз. Кызьы юрттыны валамтэеныз, азьланяз мар луонзэ 
тодымтэеныз, туж шер бӧрдылӥсь нылаш, Максимлэсь йырзэ маялляса но 
ымнырзэ синвуэныз коттыса, куараен викышъяны ӧдъяз. 
Максим ӝыт пал гинэ сайказ. Шуэрес юаз:
- Кӧня мон изи, малы вазьгес ӧд сайкаты?.. 
Кытын соос али, кыӵе шаерын, кыӵе калыклэн музъем вылаз - кин ке 
верась луысал ке! Кык нунал но кык уй, узы-боры сиыса, писпуос улын 
кӧласа, кытчы мынэмзэс валатэк, олокытчы вамышъязы. Максимлэн пыдыз нош 
ик кужмо висьыны ӧдъяз. Ошмес шедьто ке, сӧсырмем интызэ миськыса, Мани 
сое сюрес дурысь бичам шырбыж куарен биньылӥз. Ассэ но, Максимез но 
буйгатон вылысь шуылӥз:
- Нюлэскын уробо сюрес вань бере, асьмемыз со одно кыӵе ке гуртэ 
вуттоз.
Озьы ик луиз. Одӥг ӵукна, кыз улын кӧлыса сайкамзы бере, туж матын 
уробо поглянъёслэн ӟукыртэмзы но валлэн соргетэмез кылӥськиз. Кыз улын 
кыллисьёс асьсэды утьыны дасяськем пӧйшуръёс кадь золскизы. Но тани уробоын 
пукись кык воргоронъёс матазы вуизы. Тӥрзы но бычкызы вань. Пу кораны 
мынӥсьёс, шӧдске. Максим ӧз чида, куаразэ сётӥз. Паймем воргоронъёс кыз 
улысь потӥсь адямиос шоры огшап учкыса улӥзы, собере, юалляськон-
вераськон сямен, мылкыдзы лапкиз. Валзэс берыктӥзы но кыӵе ке ӟуч 
гуртысь мӧйы кышномурт доры кельтӥзы. Берло тодӥзы: со кышномурт 
огезлэн воргоронлэн апаез вылэм. Бен кытынзэс но: Екатеринбург доры вуиллям.
Максимен Марья ӝыны арлэсь кема Урал гурезьёс сьӧрысь Власьевна дорын 
улӥзы. Кунокуа кузёзы нокызьы кошкыны ӧз лэзьы.
- Висись пияш кулыны шат кузь сюрес вылэ потоз? - пыкылӥз со Маниез. 
Ма, ачиз но со бадӟым куректонэ усемын вылэм: пиезлэсь тӧдьыос сьӧры 
кошкемзэ тодыса, горд комиссар картсэ син азяз ыбем. Тае кылыса, 
Маниен Максимлэн гордъёслы но, тӧдьыослы но синазькыль мылкыдзы бугырскиз: 
вуж улонэз утисьёс но выль улонэз лэсьтӥсьёс ог-огзэс озьы виыло бере, 
кызьы соосын одӥг радэ султыса вамышъялод?! "Сыӵе лек сюлэмо 
революционеръёс-а Россиен кивалтыны малпало? Сыӵеесь-а Ленинлэн со 
коммунистъёсыз?! Сыӵеесь ке тӥ, -малпа Максим, - асьмелэн сюресмы 
пӧртэм..."
Максим умой-умой катьяськыса, соос дор палазы потӥзы. Тыбыразы пичи котомкаен 
гуртысь гуртэ костаськисьёс соку туж уно вал, соин, лэся, Максимен 
Маниез кураськисьёс радэ каризы: куд-огез кӧлыны но лэзьылӥз, куд-
огез пӧсь чай но удылӥз...
													
	* * *
Кайсы черкогурт граждан ожысь бертӥсь воргоронъёссэ шулдыр мылкыдын ӧз 
пумита: котькуд семьялэн аслаз ыштонъёсыз, аслаз куректонэз вал. Чебер 
нюке пегӟем дас одӥг мурт пӧлысь Коко Васьлей но Левоньлэн Олексей 
пиез гинэ бертӥзы. 
Максимен Мани Выль аре ни гуртазы вуизы. Нырысь соосты ӧз но тодмалэ, ӧз 
но оске - быремын кожало вылэм ини.
Кӧня ке улыса, Санька Копаров но Иван Митрошин вуизы. Маниен Максим 
кадь ик начармемын, соослэн кадь ик сурыкмем дӥсен.

													
	* * *

Пумиськем беразы Иванька Мани борды эшшо но юнгес кыстӥськыны ӧдъяз. 
Азьвыллэсь но лачмытгес возиз ассэ, азьвыллэсь но уногес мусо кылъёс 
вералляз. Нош чутӥсь Максим, огинэ ке вуо, котькыӵе муг шедьтыса, 
Манилэсь палэнэ кариське. Эшъёсыныз ӵошатоно ке, со шӧдскымон керӟег, 
лэчыт кыло луэмын. Мани мугзэ вала: эшъёсыз вӧзын чутӥсь, ӧлексы мурт 
сӥлы-данлы ӧвӧлгес уго.	
													
	* * *

Кыдёкын гомам герман ож Кайсы черкогуртлы бадӟым куректон ваиз вал: 
уноез егит воргоронъёс бырыны шедизы, котькуд семьяез вытъёсын кекатыса 
возизы. Озьы ке но, Кайсы черкогурт соку няньтэк ӧз улы.
Нош граждан ож, Россиын улӥсь калыкез ог-огез вылэ узатон ож, котькуд 
семьяез сураз-пожаз, сютэм кельтӥз, гомась тылӝуэ сэрпалтӥз.
Кайсы черкысь баӵколэн улонамы антихрист пыриз шуыса верамез зэм, оло?
Кизьыны потон азьын Максим Семёнов, Санька Копаров, Иван Митрошин но 
Самар Пилька тулыс бусы ужъёсты ог-огзылы юрттыса ортчытыны кенешизы.
	Семьяоссылэн огазеям кужыменызы котькудзылэсь анаоссэс гырыны-кизьыны 
капчигес луоз, малпазы соос. 
Зэм, семьяос ке шуоно, кыӵе семьяос на бен? Иван Митрошинлэн атаеныз 
агаез чиптэм-чаптэм ышемын-быремын, нокыӵе иворзы ӧвӧл. Лек тылӝуэз 
шӧмъям Иванька умой вала: ожмаськонын ӵем дыръя солдатъёслэсь лыдзэс 
чотась ӧй вал, Митрошинъёс но со чотамтэ лыдпусъёс пӧлы сюризы, луоз. 
Иванька табере анаеныз гинэ кылиз.
Самар Пилькалэн песянаез кемалась уг ни султылы, соин ик сое гырись-
кизисьёс радэ уд пырты ини.
Копаров Санька чылкак огназ кылиз: ожын дыръяз висьысагес улӥсь анаез 
кулэм.
Максим Семёновлэн атаез ожысь, Инмарлы тау, таза сӥлё-виро бертӥз, 
анаез но чырткем на, песянаез гинэ яратоно внукезлэсь бертэмзэ 
возьманы чидамтэ. Нош ачиз Максим, сӧсырмем пыдо егит пи, кыӵе гырись-
кизись на?
Тӥни ваньзэ сое лыдэ басьтыса, та эшъёс тулыс бусы ужъёсты кужымзэс огазеяса 
ортчытыны кенешизы. Нош кидыссы огзылэн но ӧвӧл. Соку соос, юрттэт 
курыса, совдепе вазиськизы. Выль тӧро егитъёсты кылзӥз, кылзӥз но шуиз:
- Мы такой ерундой не занимаемся.
- Чем же вы занимаетесь? - юаз Максим.
- Укреплением Советской власти!
Та кылъёс Максимлэн пельдӥняз салем кадь луизы.
Веранэз ӧвӧл, Кайсыысь совдеплэн ёросын кылдэм югдурез нокудласянь но 
радъяны кужмыз ӧй вал на: коньдонэз-маиз но ӧвӧл, тодӥсь-валась ужасез но. 
Озьы ке но, ваньзэ тае адями сямен валэктыны луэ вал, дыр, ук.
Егит эшъёс ӧз чигналэ, гурт кенешазы вазиськизы. Ӧтчамын соослэн 
куронэнызы ваньмыз ик соглаш ӧз ке но луэ, таӵе решение кутӥзы: 1) 
Кенешлэн магазеяз кидыс ӧвӧл. Соин ик ёросысь мукет кенешъёсы вазиськоно 
но Иван Митрошинлэсь, Максим Семёновлэсь, Александр Копаровлэсь, Филипп 
Самаровлэсь куронзэс быдэстоно. 2) Аран бырем бере соос пунэмзэс Кайсыысь 
кенешлэн магазеяз кык полэс берыктыны кулэ.

* * *
Та егит эшъёс секыт ожез ортчыса бертӥзы ке но, мылкыдзы пуксемын ӧвӧл 
на - мукет егитъёсын ӵош шудонпӧлы потало.
Огаз ӝытэ Мани палэнысен уӵерак-уӵерак шораз учкыса сылӥсь Максим доры 
лыктӥз. Мыньпотыса пияшлэсь кизэ кутӥз:
- Ыштод ведь, Максим, ыштод...
- К... кинэ? - могак луиз соиз. Сӧсырмем пыд вылаз лёгиськыны 
шедьтыса, ӧжыт гинэ ӧз усьы.
- Монэ, - жинграк серектӥз нылаш. - Мар-о кылыд быгыльмиз кадь?
- М... ма, ӧйтӧд... - абдраса сылэ Максим.
- Келялод-а туннэ?
Максим, тае кылыса, мар вазьыны паймиз. Собере шуиз:
- Ойдо келяло.
Арамаетӥ соос гуртсы пала вамыштӥзы. Шудонпӧлы кылемъёс ӝоген чалмизы. 
Арган шулдыр куаразэ ӧз поттылы ни. Соку уӵыослы куанон дыр вуиз. Нылаш 
вӧзын мыныны дӥсьтытэк, Максим берегес кыльыса вамышъя.
- Сыл ай, ум дыртэ, уӵыосты кылзом, - Мани эшез пала берытскиз но - 
ваче син луизы. Огшап номыр вератэк сылӥзы. Собере Максим сайкиськем 
кадь луиз:
- Уть ай, асладэз "уӵыед" малы ке гуньдӥз... - шудонпӧлы кылем 
Иван Митрошин сярысь малпаса шуиз Максим. - Сьӧрамы лыктыса, мукет гурен 
уз кырӟа-а?
- Мынам тынэсьтыд кырӟамдэ кылэме потэ, - нош ик жингрес серектӥз 
Мани. - Соизлэсь акыльтӥ ни.

1

Семён Виноградов
Кулэм мурт ватон
Вордӥськем мурт кулытэк уг кыльы. Та сям-йылолъёс шулдыресь ӧвӧл ке но, соосыз 
котькин тодыны кулэ. Мон верасько ватон, куинь, сизьым, ньыльдон уй, ар 
кисьтонъёс но йыр-пыд сётон сярысь.
Адями кулэ ке, сое огназэ уг кӧлыто. Бӧлякъёссы, выжы-кумыоссы яке бускельёссы 
лыктыса пуко. Со пукисьёсыз уй пукет шуыса нимало. Бӧлякъёссы но мылкыд карись 
гуртооссы корос (гроб) лэсьтыны ӵуказеяз ньыль-вить кузя лыкто. Куать-сизьым 
муртэ гу гудыны утчало. Кулэм муртэ гылтыны но ньыль адями пала кулэ. Гылтӥсьёс 
ик сое дӥсяло но. Пересь мурт азьло ик аслыз кулон дӥсь дасяса возе, гу 
гудӥсьёслы, корос лэсьтӥсьёслы но гылтӥсьёслы кузьым (ӵушконъёс, басма кесэг) но 
азьло ик люка. Пересь мурт яратоно, гажано адямиоссэ кулэм бераз ассэ гылтыны 
куре. Корос лэсьтыны матысьёсыз ӵыжы-выжыосыз лыкто, нош гу гудытыны пыдлосьгес 
ӵыжы-выжыосыз ӧтё. Корос пыдсаз веник куарез суыса поно, со вылэ тӧдьы тулыс ыж 
гонэз миськыса вӧлдо, со вылэ ни азьвыл тӧдьы дэра валё, берло аръёсы - тӧдьы 
бӧз. Йыр улаз пичи миндэр пуйы вуро, сое турынэн тырмыто. Азьло аръёсы воштос 
дэрем, штан поно вал, нош али тросаз гуртъёсын озьы уг каро ни. Толалтэ йыраз 
изьы, кияз пӧзьы поно, гужем - картуз. Миськем майталзэ сьӧраз лэзё. Коросэ ик 
одӥг ӵашка но пуньы донго. Пуньыяз чечы но вӧй зырӟо. Кӧня ке коньы уксё поно 
на. Ымныр котыраз нырулкышет валё. Котьмарзэ но тросэн уг тыро, солы секыт, пе, 
луоз.
Удмуртъёс кулэм муртсэс уг чупало. Чупан - ӟуч йылол. Возьмано муртсы ӧвӧл ке, 
кема уг ӝегатско, ӵуказеяз ик ватыны туртто. Шунды пуксем бере ӝыт ватыны уг 
косо, кулэм муртсы, пе, шайтан кие сюроз. Гуэз но азьло ик гудыса уез буш огназ 
кӧлтыны уг яра, шуо. Кулэм мурт гылэм вуэз адями пыд улэ медаз сюры шуыса, кытчы 
ке палэнэгес, лёгаськонтэм интые, кисьтыны тыршо.
Адями кулыку дӥсям дӥськутэз но, корос лэсьтэм шелепез но, гылтон дыръя уже 
кутэм веникез но куркуянэ (шайпала) нуыса суто.
Кулэм муртсэс удмуртъёс пыдыныз азьлань уг потто, йырыныз азьлань потто. Жаляса 
верано луэ: тросэз удмуртъёс та йылолэз уг быдэсъяло ни. Одӥг пол таӵе суредэз 
адӟыны кылдӥз: кулэм мурт ватӥсьёс жугиськон калэ вуизы. Ӝыныез шуо: кулэм муртэ 
йырыныз азьлань поттоно, муктъёсыз - пыдыныз азьлань, пе. Ӟучомем мурт котькытын 
но ӟучомем ини. Ассэ но кулэм ӵыжы-выжыоссэ гажатэк, ӟуч сямен карыны турттэ. 
Ярам коть, одӥгез чырткем удмурт кеськиз: "Ма, со удмурт ӧй вал-а, мар-а?!" Соку 
гинэ йылолзэс удмурт сямен ортчытӥзы. Йылолъёсмес дунъятэк, гажатэк ялан вошъямы 
ке, асьмеос, бигер выжы калыкъёс сямен, удмуртъёсмес коростэк гинэ мешоке поныса 
ватканы кутскомы, дыр, ини азьланяз.
Малы удмуртъёс кулэм муртэ йырыныз азьлань потто шуыса юаськод ке, ньыльдон-
витьтон ар талэсь азьло пересьёс валэктыны пӧрмыто на вал. Кулэм мурт, пе, 
корказэ берпумзэ адӟе на, соин, пе, солэн берзэ учкыса потэмез потэ, бӧрысь но 
азбарзэ, юртъерзэ, ульчазэ (урамзэ) адӟыса, пе, кошкемез потэ. Пырак шайвылэ 
вуытозь, йырыныз азьлань нуо. Пинал мурт, егит мурт, улэп мурт со дуннеез адӟыны 
дуннеысь чылкаклы кошке, со берлань кошке, ваньмыныз люкиське, берпумзэ 
адӟиське.
Кулэм мурт дунне югыт дуннелы котьмар ласянь мыддорин луэ. Соин ик солы кут ке 
кутчало, бинялтонзэ мыдлань бинё, кутгозызэ но мыдлань бинё, кускерттонзэ паллян 
кертто. Шундылы пумит берыктӥськыло (коросэн но озьы ик), коркась поттыкузы ӧсэз 
ӟырыысьтыз басьто, кулэм муртэ ӧс бертӥ потто но короссэс корказе пукто. Асьсэос 
поттӥсьёс ӧсэз интыяз пукто но, корка пырыса, вань калыкен ӵош ӧсэтӥ пото.
Шайвылын но гуэз шундыез чакласа гудо. Кулэм муртсы, пе, шунды шоры учкыса мед 
улоз. Йырыз уй палан луэ, пыдыз лымшор палан. Грутэн-гуртэн пичияк пӧртэмлыкез 
вань: куд-куд гуртын шунды ӝужамез учкыса, пе, мед улоз, мукетъёсаз - лымшор 
шундыез адӟыса.
Гуаз нырысь люкъёссэ сюез ас семьяез пичи шелеп вылэ поныса куя. Куд-огез соку 
шуэ на: ымныр вылад усем сюед зарниен-азвесь медло, чебер сяська луыса мед 
потоз. Уксёлы ӟудыса эн улы шуыса, одӥг-ог азвесь уксё кушто (али кӧня ке огшоры 
векчи уксё). Ватэм беразы гу вылаз куясько. Соку шуо: "Огазьын сие-юэ, ваньдылэн 
азяды мед усёз, вождэс эн вае, эн кыжтэлэ, эн мыжтэлэ, милемыз сьӧрады эн 
нуэлэ".
Шайвылысь бертыкузы, ӟезьы юбо вӧзы пенен ведра пуктыса дасяло, кизэс пенен 
зыраса, азбаре пыро. Мунчо эстыса дасямын луэ ни. Соку ик мунчое вырӟо: кин 
кылиськыса веникен ик пыре, мукетъёсыз, кизэс-бамзэс пуж-пуж миськыса, корка 
вамышто. Пыремзы бере ик кимыш вылынызы муръё борды йӧттӥсько. Выжъёс, корказьёс 
ваньмыз миськемын (мукетъёс шайвылэ ветлон вискын). Чабей ӝук пӧзьтыса дасямын. 
Кулэм муртлэн пиез со ӝукез гидкуазяз поттыса вӧся, шуэ: "Инмаре, кулэм нэнэелы 
сопал дуннеын ӟеч инты сёт, солэсь сьӧлыкъёссэ быдты, ӟеч кар, каньыл кар!"
Собере сиё, юо, ужасьёслы пӧртэм кузьым сётъяло. Табере куинь уй шуон кисьтонэз 
берло аръёсы ватон нуналазы ик ортчыто.
Геннадий Мадьяров
Эшъёсын пумиськон 
верос
Шуныт тӧл, алигес гинэ ӝужам турынэз выретыса, шунды сиос улын улӟем музъем 
вылтӥ шыпыт гылӟе. Котыр ваньмыз сайкамын. Бурдоос пӧртэм-пӧртэм куараосын 
чипсо-шулало-чирдо. Вылӥе ӝутскем тюрагай, "бӧлякъёссэ" согыны тыршыса кадь, ас 
гурзэ, оло, ваньмызлэсь шулдыр кисьтэ. Нюк валлин будӥсь пинал кызьпуослэн, 
топольёслэн, сирпуослэн вожектыны ӧдъям вайёссы тӧл ыртэмъя каньылля выро.
Нюлэс пала кыстӥськись пыдын ветлон сюрестӥ губырскыны ӧдъям мӧйы воргорон 
вамышъя. Со ӝикыт дӥсяськемын: тӧдьы дэремен, сьӧд костюмен, пыдъёсаз чильк-сьӧд 
сурон сапегъёс, гадь вылаз орденъёс, медальёс ворекъяло. Сюресэз - тӧллы нялтас, 
соингес но со капчи, йыгмыт вамышъя. Тӧдьмаськем йырсиез тӧлъя шудэ, паськыт 
кымес вылаз лэзькыса, кытӥяз бездэм синъёссэ ик сайя. Соку воргорон йырсизэ 
киыныз берланьтэ. Ортчем аръёс ымныраз пурысь буёлэн вутскиллям, мур кисыриос 
сое жалятэк гожмаллям.
Тани воргорон трос пумо писпуосын, куакъёсын, турын-куарен узыр нюлэс дуре вуиз. 
Дугдыса со батыръёс кадь сылӥсь писпуос шоры учкиз но мур лулскиз. Собере, 
солань-талань берыкъяськыса, мыд-мыд пала йыбырттэм кариз. Чылкыт омырез гадь 
тыраз шокчыса, со азьлань вамыштӥз. Вӧл-вӧл куше вуэмез бере воргорон нош ик 
дугдӥз но паськыт кизэ гадь вылаз карыса, азьысьтыз писпуослы йыбырттӥз:
- Ӟечбуресь, мусоосы. Тани нош ик Кирлоды Вормон нуналэ тӥледын ӵош пукыны, 
вераськыны вуиз. 
Озьы шуыса, солэн синъёсыз нюромизы, мугорыз шымырскиз но, пушкыз тырыса, мукет 
номыр верамез ӧз ни лу. 
Писпуослэсь палэнэгес лэсьтэм ӝӧк доры мыныса, Кирло сумкаяз бугыръяськыны 
ӧдъяз. Отысь юри та нуналлы суралтэм-пӧзьтэм аракызэ поттӥз, вӧзаз нянь сукыри, 
вӧй но табань понӥз:
- Тани, мусоосы, мар быгатӥ - ваи, - писпуос шоры учкылыса шуиз со.
Пумитаз вазись ӧз луы. Шуак кужмоям тӧл гинэ писпу вайёсты выретыса ортчиз. Ӝӧк 
вӧзы лэсьтэм скамья вылэ пуксьыса, воргорон аракызэ чаркае лэзиз, шорем нянь 
вылэ вӧй вӧлдӥз. Собере сиён-юон борды йӧтскылытэк чалмыт пукемез бере матысь 
кыз доры вамыштӥз. Писпулэсь шакырес мугорзэ маялтыса, бордаз ӟыгырскиз:
- Ӟечбур, Ваня, - ӵакмем куараен вазиз. - Витьтон арлэсь кема ини музъеме выдӥд. 
Кышноед но, ӵыжы-выжыосыд но уг возьмало ни, дыр, нош тон тани... улэп. Ма, тон 
кадь батыръёс бырозы шат? Уз. Бен, мон понна тон - улэп. Со секыт ожмаськонмы 
бере шутэтскыны гинэ выдӥд. Пӧсь вал со нуналэ, ой, пӧсь! Патронъёсмы быремен, 
винтовкаосынымы, собере мыжыкъёсын шонаськоно луим. Эшшо дасо фашистъёсты сопал 
дуннее келям на... Ӧвӧл, Ваня, тон быремын ӧвӧл. Тани ук, азям сылӥськод. 
Мугорыд сыӵе ик таза, йырсиед но азьло кадь ик нап, суй-пыдъёсыд зӧкесь, 
кужмоесь. Нечё-о-о, Ваня, нечё-о-о, улом ай. Ма, озьытэк-а! Уен-нуналэн дуннеез 
чакласа, улонэз азьланьтыса сылӥськод ук...
Кирло, ымдуръёссэ ӵушалтыса, мур лулӟиз. Огшап выллань учкыса сылэмез бере со 
дырекъясь ымдуръёсыныз кыз борды йӧтскиз но куинь вамыш кемын сылӥсь пужым доры 
вамыштӥз.
- Ну, вот, Петро, выльысь пумиським. Вай-ко та чебер, веськрес мугордэ ӟыгырто. 
Уть, кыӵе тон! Ой, етӥз! Синъёсад но ымнырад аръёс ик йӧтскиллямтэ кадь. 
Пальпотӥсь тусыд измем сюлэмме шунтэ, мылкыдме каньылатэ. Асьмеос Москва дорысен 
Будапештозь артэ вамышъям. Мар веранэз, со сюрес вылын котьмаиз вал. Но улонлы 
оскон ӧз кошкылы сюлмысьтыд. Кезьыт окопын но, зынмем нюрын кылльыкумы но. 
Кырӟаны-эктыны нош кыӵе шаплы вал! Чебер нылашлэсь тусбуйзэ милемлы огпол гинэ 
ӧд возьматъя. Веранэд ик одӥг вал: кышнояськыса нылпи но ю-нянь будэтон. Тон уго 
гуртын будэмед. Берпум курондэ, Петро, мон быдэстӥ. Зэм, капчи ӧй вал. Атай-
анаед шоры синъёсме ӝутыны ӧй дӥсьтылы. Но мар карод?.. Кышкасьтэм луэмед понна 
комдивлэсь кузьым чассэ атаедлы сётӥ... Туннэ но син азям таӵе суред: али гинэ 
бызьылыны кутскем нылокез тон пуляос улысь поттӥськод. Кызьы со отчы вуэм - 
валаны ӧм быгатэ. Ма, со бордын шат ужпум? Нылоклэн анаез, мар карыны валатэк, 
йырысьтыз кышетсэ басьтыса, тыныд сётӥз. Мар вераз со шумпотыса пачылмем 
синвуосыз пыр - созэ но йӧнала ӧм валалэ... Со кышетэз ымныр бордаз карыса, 
анаед сюлмыз чигымон бӧрдӥз. Эх, шу-у... Секыт, Петро, секыт. Не Вормон нунал, 
не куазьлэн шулдырез уг буйгато сюлэмез... А ведь мон тонэ кышнояй, Петро. Инмар 
понна, кышнояй! Уть, вӧзад макем чебер кызьпу сылэ. Юри бордад мерттӥ. Малпанэд 
мед быдэсмоз шуыса. Мон понна тӥ кыкты но улэпесь. Нылпиосты но тани - пинал 
куакъёс - вӧзады. Чебересь будо. Асьтэлэн но егит, кужмо дырды сяськая на...
Воргорон пужымез вешаз, собере кызьпуэз маялтӥз. Огвакыт чалмыт сылыса, со бадяр 
доры вамыштӥз. Бордаз ӟыгырскыса, кема гинэ номыр куаретытэк сылӥз. Писпу 
йылъёстӥ, турын-куар вылтӥ нош ик шуныт тӧл ортчиз. Соку ини воргоронлэн но 
куараез выльысь ӝужаз:
- Эх, Микола, Микола - украин калыклэн кышкасьтэм пиез!.. Тон азьын нокыӵе 
янгыше ӧвӧл кадь, нош дорад вуыкум сюлмы выльысь но выльысь шымырске. Котыртэме 
шедьыса, асьмеос юн шуге-леке вуим. Госпитальын тон бурмысалыд, но кульчоысь 
мозмытскытозь ӧд чида ни. Курадӟемдэ малпаса, шоканэ ик пытсаське. Монэ бордад 
лякыт сямыд, батыр кужмыд кыскизы. Берпум шокчытозяд вӧзысьтыд ӧй палэнскылы. 
Вань верамъёстэ, куронъёстэ сюлмам возисько. Вордскем хуторад мон вуылӥ. Чугун 
сюреслэсь кыдёкын вылымтэ со. Ма, хутор но уд шу ни - юртъёс сутэмын, ваньбур 
тус-тас луэмын. Кызьы ке улэп кылем пересез пумитаса, мае но сое тодӥ. Собере 
семьядэ вить ар утчай, Микола. Трос адямиос юрттэмен кышноеныд но пиеныд 
пумиськи. Война соосты мынам шаерам вуттэм. Атай-анайдэ улэпен адӟыны ӧз кылды 
ни. Кышноед шорам нырысь-валысь оскытэкгес учкиз. Пужыятэм ныркышеттэ возьматэме 
бере ини куараен бӧрдыны кутскиз. Бен озьы но ай быремедлы ӧз оскы. Улэп со, 
шуэ... Туж жаль, Микола: тыныд пидэ адӟыны кылдымтэ. Со ачид кадь ик чебер, таза 
мугоро. Кышноеныд вераськеммес кылыса, бордам ӟыгырскиз но ӧз лэзькы ни. "Тон 
мынам атае" шуэ. Кошкыны ик уг лэзь ни - бӧрдэ, чыртыям тач-тач ӟыгырскыса улэ. 
Эн куректы, Микола, кузпаллы шудэд бадӟым вылэм. Ӟеч тодӥсько: тонэ яратонэз али 
но кысэмын ӧвӧл. Тонэ яратыса ик пидэс но будэтэм-дышетэм. Соиз но ӟеч: 
семьяеныд юн кусып возиськом. Ма, сое тон ачид но тодӥськод, адӟиськод, Микола. 
Угось тон но, мукет эшъёсмы но улэпесь. Мон огдэс но уг вунэтӥськы, озьы бере, 
тӥ ваньды ми пӧлын улӥськоды.
Кирло чалмиз. Кӧня ке лулӟылыса, синдуръёссэ ӵушылыса сылэмез бере мукет 
писпуос доры мынӥз. Огез дӥньын но сылытэк, вераськытэк ӧз кыль. Шунды 
улланьскыны шӧтам бере гинэ ӝӧк палаз вамыштӥз...
Куартолэзьлэн укмысэтӥ нуналаз Кирло арлы быдэ татчы ветлэ. 
Война бырыса но со дораз ӧз берытскы ай. Офицеръёсты кык ар возизы на. Собере, 
гуртаз вуыса ини, лесничествое ужаны интыяськиз. Мугез сыӵе: писпуосты со 
пичиысен ик улэп адямиосты кадь яратӥз. Выльёссэ мерттон, будӥсьёссэ утялтон, 
ӧлексыоссэ бурмытон - ваньмыз со вордскыкуз ик вираз вылэм, лэся. 
Кышнояськыса, уж борды кутскыса но Кирло бырем эшъёссэ нуналлы быдэ сямен тодаз 
возьылӥз. Выльысь но выльысь сюлмыз чепылляськиз. Улонлэн выльдӥськемезлы 
шумпотон но кытчы ке тӧлӟе, мӧзмон, улэп кылемлы лушкем возьдаськон сюпсьыны 
кутске. Сыӵе секыт луыку, со тӥр кутэ но нюлэскы кошке вал. Одӥгаз нуналэ 
турынэн шобырскем сайкыт кушын кема малпаськыса сылӥз. Берытскымтэ эшъёсызлы 
сӥзьыса писпу мерттон сярысь малпанэзлы Кирло шумпотӥз. Со аре ик, сӥзьыл, дас 
писпу мерттӥз. Ог-огзылэсь кык-куинь вамыше. Пӧйшуръёс я адямиос изъянтэмлэсь 
кенерен котыртӥз. Тӥни со дырысен Кирло та эшъёсыныз люкиськытэк кадь улэ. 
Чаклан интыостӥз котыръяськемез бере доразы кожатэк ноку уг кошкы. Улэп 
муртъёсын сямен вераське, мугорзэс маялля-веша, нош куддыр номыр вератэк азязы 
йырзэ ошыса сылэ... 
Вормон нуналэз пумитаны Кирло быдэс толэзь азьлогес дасяськыны кутске. Нырысь ик 
аракы сюкась суралтэ. Собере ачиз ик виятэ но. Мукет дыръя воргоронлэн со шоры 
учкемез но уг поты (пӧзьтон сярысь веранэз но ӧвӧл, косӥд я курид ке, вожез 
потоз). Но Вормон нунал - со Вормон нунал! Кирлолэн улоназ талэсь бадӟым 
праздник ӧвӧл. Та нуналозь арня кыльыса, со сулеп ву но, дэриӟем сюрес шоры но 
учкытэк, нюлэскы кошке. Писпуос вискысь куасьмыса тӥялскем-усем вайёсты, палэнэ 
нуыса, огазе тыре, татчы ветлыны дышем койыкъёслэсь кыедзэс октэ, юри татын 
пукыны, буре вайыса сиыны-юыны лэсьтэм ӝӧк-скамья котыраз берга. Воргоронлэсь 
мылкыдзэ шӧдыса оло дуннелэн улӟемезлы шумпотыса, нюлэскысь писпуос улэп 
адямиослы укшаны кутско кадь. Котьма ке но, Кирлолы озьы потэ. Со нуналэ 
воргорон дораз жадьыса бертэ, но лэсьтэм ужезлы шумпотонэз пумтэм луэ. Нош 
Вормон нуналэ ини...
Тани туэ арлыдо солдат нош ик эшъёсыз доры вуиз. Тазьы учкыса, ваньмыз азьло 
аръёсы кадь вал. Но пӧртэмез вань ик. Мерттэм писпуосыз уката юнмаллям, 
чеберско, нош аслаз мугорыз пумен пичиёмыса губырскем. Нош аслаз ымнырыз... 
куасьмемынгес. Ӝожомонэз но азьло музэн чаль уг тӧлӟы ни, ӟигарзэ быдтыса, 
кузьыт синкылиосыз небыт турын вылэ кема усьыло.
- Я, дуно эшъёсы, - вазиз со, чарказэ ӝутыса. - Та нунал дуннеез дауръёс пыр 
югдытоз. Музъем арлы быдэ тазьы ик вож турын-куарен, сяськаен чеберскоз, сайкыт 
инмын тюрагай чирдоз, шулдыр садъёсын уӵыос кырӟалозы. Мар карод, та чеберез-
шулдырез тӥ уд адӟе ни, лэсьтэм ужъёстылэсь данлыксэс уд шӧдэ, адӟыны кылдымтэ 
нылпиостэс уд ӟыгыртэ, пал кылем кышнодэс уд чупалэ. Озьы ке но, тӥ котьку монэн 
артэ. Ма, кышноосыныды, нылпиосыныды но, дыр. Анай-атайёсыныды, мукет ӵыжы-
выжыосыныды, эшъёсыныды но. Весяк озьы медло. Та музъем тӥледлы весяк небыт 
валес мед луоз, инмысь шунды весяк мед шунтоз улоннидэс, вакчи тылсиямдылэн 
югытэз ноку медаз кыс. 
Чарказэ бушатыса, воргорон вӧйын няньзэ сииз, собере - табаньзэ. Кыкетӥ чарказэ 
юыны ӧз быгаты ни: кӧтӝожез гульымаз ньылыны луонтэм дугдӥз. Ӝӧк вылэ 
гырпумъяськыса, со йыр бордаз кутскиз. Кемалась ортчем нуналъёс выльысь син азяз 
пуксизы. Воргорон синкыли секыт шапыкъёсын ӝӧк вылэ усьылӥз. Котькуд шапыкез - 
ожысь бертымтэ воргорон, улонлэн ог люкетэз буш кылён...
Курыт малпанъёсызлэсь мозмыны быгатытэк, Кирло отын шунды писпу йылъёсы 
пыкъяськытозь пукиз. Собере интыысьтыз султӥз но, писпуос-эшъёсыз шоры эшшо 
огпол учкыса, секыт вамышъёсын дор палаз вырӟиз.

Семён Виноградов
Мумыкор
Дуннеын тужгес но паймымон потэ мыным адями. Котькудӥз ас калык выжыысьтыз 
потэмын, соин ик сое валан понна та калыклэсь улон сямъёссэ тодыны кулэ. Тани 
басьтом удмуртэз. Кин со, маин висъяське мукет калыкъёслэсь? Шораз учкиськом ке, 
валаськомы кадь кыӵезэ. Нош мугорез гинэ адӟыса пуктэм тус палдурес луэ. 
Удмуртлэн вань на лулыз, лул улонэз. Адямилэн синмаз учкыса, дуннеез адӟем мурт 
солэсь лул улонзэ пичияк ке но шӧдыны быгатэ. Нош муресьгес тодон-валанъёс 
люкасько, ужъёсты рос-прос чакласькод ке. Лэсьтэм ужаз адями кужымзэ но, 
лулызлэсь чеберзэ но уг жаля.
Удмурт адямиез валан понна мынам чакламе потэ удмурт коркаез но солэсь куд-ог 
люкетъёссэ. Корка - мугорез утён но шунтон инты гинэ ӧвӧл, со мылкыдэз, лулэз 
утён, юнматон инты но. Быдэсаксэ коркаез учконо ке, со огшоры маке гинэ ӧвӧл. 
Отысь котькуд интыез, люкетэз калыкмылэсь быгатонзэ но малпанъёссэ-осконъёссэ 
усьтэ. Та туж бадӟым ужпум. Коркалэсь оглюкетсэ гинэ эскером. Азьло 
вераськонъёсам-гожъямъёсам мон валэктылӥ ни, мар со сыӵе ӝӧк но кыӵе солэн 
интыез семьялэн улоназ но малпанъёсаз. Озьы ик вераським удмурт муръё сярысь, 
пуконъёсыз но ӧсъёсыз эскеримы. Туннэ вераськом коркалэн огез шорсюлмыз сярысь. 
Мумыкор шуиськом асьмеос сое. Вордӥськоно нылпилэн анаез борды гогыеныз бурмемез 
выллем, удмурт адями ас коркаезлэн мумыкореныз лул гердъёсыныз герӟаськемын. 
Тросэзлы та валантэм кадь потоз. Веранме валэктыны тыршо.
Коркаез ӝутыку, мумыкор тубытон нимаз йылоллы берытске. Мумыкор ӝутон дыр вуэ 
ке, солы инты дасяло: зӥбиськон вадесаз - пумъёсыз улэ ыж гон поно. Солы секыт 
ужзэ ужаны капчи мед луоз, вӧлдэтэз но корка сиге тырем сюез ас тыбыр вылаз 
возьыны каньыл мед луоз шуыса ӟеч кыл верам выллем со. Куд-ог кузёос мумыкор 
улазы азвесь уксё но поно. Секыт ужез мумыкор ас вылаз басьтэ бере, солы тау 
карем, уждунзэ тырем выллемгес луэ, дыр, та. Ужасьёс-вемечиос кузё кышнолы вазё: 
"Мумыкор ӝутӥськомы, аракыдэ эн вунэты!" Я ӝыны черык, я быдэс черык аракы но 
гурысь соку гинэ пыжиськемъёс вуттэ ужасьёслы. Пичияк сиыса-юыса, ужзэс нош 
азьланьто: пелькор тыро, ачамаос пуктыло, липисько.
Корка вуэм бере корка пырон каро. Бигеръёсын артэ улӥсь удмуртъёс сое коркатуй 
карон шуо. Та сямез-йылолэз ортчытыны бӧлякъёссэс ӧтчало. Нош куд-ог гуртъёсын 
быдэс гурт люкаське выль корка пырись доры. Пӧртэм кузьымъёс ваё кузёослы. Ӟеч 
кыл вераса пыро: "Выль корка шудо-буро мед луоз!", "Таза улыны мед кылдоз" но 
мукет. Кузьымъёссэс ӝӧк вылэ тыро, мумыкоре но ошыло. Кузьымтэк лыктэм 
пиосмуртъёс, ӟеч кылъёс вераса, азьло аръёсы мумыкоре азвесь уксё шукко вал. 
Табере кагаз коньдон дэмӟыто. Ваньмыз со возьматэ: мумыкор коркалэн туж сӥлы 
каронэз выллем луэ. Таӵе малпанэ вуттэ лыктэм муртъёслэн, коркалы (медаз 
лекъяськы шуыса) вазиськем интые, мумыкорез кузьымъёс ошылыса шумпоттэмзы. Оло, 
коркалэн ӧвӧл, коркамуртлэн (коркаез утисьлэн), коркакузёлэн символзы луэ 
мумыкор. Кузёлы сямен солы кузьымъёс, коньдон ваё ук.
Мумыкорен герӟаськем йылолъёс-сямъёс ортчытъясько на пиосыз армие келян дыръя. 
Кошкись лекрут пи бӧлякысьтыз гажано муртъёсызлэн мумыкоразы чук оше - азвесь 
уксёен шукке буртчин лента. Со чукез армиысь бертэм бераз йылол ортчытыса 
васькытэ. Семьяысьтыз кинэн ке я эшъёсыныз саламен, аракыен мыно ошыса кельтэм 
чуксэ басьтыны. Со бертытозь чукез нокин уг йӧтылы. Таиз сям возьматэ 
удмуртъёслэсь мумыкорлэн утись кужымезлы оскемзэс. Ас мумыкорзылы гинэ уг 
вазисько, асьсэ бӧляк-выжы мумыкоръёслэн но кужымзы мед юрттозы шуыса кузьым 
кельто. Асьсэлэн шудзы ӧжытгес ке, выжы-кумыоссылэн шудазы ке но, пизы армиысь - 
войнаысь бертонэз мед адӟоз, пе.
Кузь сюрес вылэ потыкуз но лекрут пи асьсэ коркась мумыкор борды йӧтӥськыса потэ 
но шуэ: "Бертонэз мед адӟом, ӟеч сюрес сёт, уть монэ". Удмуртъёс оско: 
мумыкорлэн аслаз утись кужымез, инмарез, инмарлыкез вань. Вӧсяськыкузы удмуртъёс 
тужгес кужмо инмаръёссы пӧлы котьку пырто Шунды-мумыез, мукылчинэз. Асьме калык 
малпамъя, мумимы но, Шунды-мумы но удмуртэз утё бере, асьме коркась коръёсмылэн 
мумызы - мумыкор но шуг-секытъёслэсь палэнтыны быгатэ. Мумыкорлы ӟеч кылын 
вазиськиськод, вӧсяськиськод ке, кузьым сётъяськод, со сярысь уд вунэтӥськы ке, 
тыныд со юрттоз шуыса малпало, лэся, удмуртъёс. Мумызылэсь сюлмаськемзэ, 
юрттэмзэ выллем син азязы пукто, вылды, соос та учырез. Мон малпасько, югыт 
дуннеен сопал дуннеез висъясь гож кадь луэ мумыкор. Куд-ог сямъёс но тае валаны 
юртто. Тросэз уг тоды, луоз: корка пушкын вӧсяськыкуз, асьме адями выжлэн 
(поллэн) котькуд интыяз уг султы. Коркан вӧсяськонлэн аслаз вадесыз вань. 
Мумыкор улын но, солэн ӧс пал дураз (люкетаз) вӧсяськыны уг яра. Кыӵе ке бадӟым 
уж борды кутскыку яке сюан-бӧрысь ортчытыку, нылпи вордӥськыку, Быдӟым нунал 
выллем сиён-юон, вӧсяськон дыръёс луыку, кытӥяз корка пушкын но вӧсясько. Шыдэн-
ӝукен-а, быдэс нянен-а, табанен-куарнянен-а вӧсяське кузё - со мумыкорлэн тӧршор 
палаз сылыны кулэ. Мумыкор вадьсысен ӧс дорозь инты луэ куяськон пал. Татын 
вӧсяськыны уг яра. Удмурт сямъя вӧсяськонэз нокыӵе кулэм муртэн но кулэм мурт 
дуннеен (сопал дуннеен) сураны, саптаны уг яра. Со туж бадӟым сьӧлык - 
инмаръёсмес паньсам, сантэмам, кыжмытэм луэ. Ассэ гажась удмурт та вашкала сямез 
одно ӟеч быдэстыны тырше. Сямъёс, йылолъёс улонмес тунсыко, чебер каро, асьме 
калыклэсь историзэ тодыны но валаны дышето.
Мумыкорлэн удмурт этикетэн (астэ кызьы возёнэн) но, социальной положениен но 
герӟаськем вадесъёсыз вань. Шуом, пырид мурт доры - пырак тӧршоразы мыныны, соку 
ик пуксьыны уг яра. Кыӵе ке но ӟеч кыл верано, косӥзы ке, ӧс дорысь ӟус вылэ 
пуксёно. Тонэ гажало ке, "вылэ туб, мар сокем ӧс доры гинэ пуксиськод", шуозы 
кузёос. Соку урдэс ӟус вылэ пуксёд ини. Туж юн гажамон яке узыр мурт луиськоды 
ке, тӥледды одно ик тӧршоры пуктыны тыршозы. Тӥни озьы мумыкор узырен куанерез, 
гажамез но гажамтэез возьматӥсь-висъясь вадес луэ на.
Удмуртъёслэн малпамзыя, сопал дуннеын улон но югыт дуннеын выллемгес ортче. Соин 
ик куд-ог йылолъёсыз кулэмъёс понна но ортчытъяло. Сӥзьыл-тулыс юондыръёс 
кулэмъёслы сӥземын, соосыз сӥзьыл кисьтон, тулыс кисьтон шуиськомы. Сопал дуннее 
сюан-пирдан сётонъёс ортчытъясько. Соосыз йыр-пыд сётон, вал сюан, кулэм мурт 
сюан, мыдлань сюан, мыддорин сюан шуо. Нош куд-ог та выллем йылолъёсы-сямъёсы 
мумыкор но пыре. Туала аръёсы но Куеда палась удмуртъёс дорын адӟыны луэ на 
шайвылъёсысьтызы кулэм муртлы ортчытэм выль корка пырон сямлэсь бервылъёссэ. Та 
ёросысь шайёсын син шоры йӧто шайгуос выллем ӵупем бугроос. Соос котькуд палтӥз 
кык корез ӵупыса лэсьтэмын. Нош кор бугро вылэ пуктэмын чебер решётка - йылсам 
сюбег пулъёслэсь ньыль борддор. Кузьласяньтӥз "борддоръёс" вамен понэмын чебер 
боды, сюры. Со вылэ ошылэмын ӵушконъёс, кышетъёс, ныркышетъёс, буртчин лентаос. 
Паймыса юасько Гондыр гуртын улӥсьёслэсь: со выль шайгу малы сыӵе чебермамын? 
Адями, пе, сопал дуннее улыны интыяськиз, солы выль корка пырон ортчытӥмы. Нош 
юасько: марлы басмаос ошылэмын? Ми, пе, со дуннее кошкем муртлэн выль корка 
пыроназ, гуртамы корка пыронэ ветлыкумы сямен ик, кузьым вайса лыктӥськомы но 
мумыкораз ошылӥськомы. Шайгу решётка йылысь вамен понэм боды - со кулэм муртлэн 
коркаезлэн мумыкорез луэ вылэм. Тӥни озьы мыным адӟыны кылдӥз сопал дуннеысь 
коркалэсь но мумыкорзэ. Югыт дуннеын но, сопал дуннеын но улонъёс ог-огенызы 
герӟаськемын уго. Соос, калык малпамъя, огвыллемгес ортчо.Соин ик мумыкорен 
герӟаськем куд-ог сямъёсыз удмуртъёс ортчытъяло улэпъёслы но, кулэмъёслы но.
Трос мукет йылолъёсаз но удмурт калык мумыкорез уг вунэты. Тани чаклаломы 
пӧртмаськон вакытэз. Сюрес воже кылзӥськыны-тунаськыны мыныкузы, жоб зӥбонлэсь 
утиськон вылысь, мумыкор шоры учкыса но гур борды йӧтӥськыса кыре пото. 
Чакласькиды, юалляськиды ке, мумыкорен герӟаськем мукет сямъёс сярысь но тодыны 
быгатоды на.
Вань та эскерем учыръёс возьмато мумыкорлэсь удмурт калыклэн чебересь лул 
малпанъёсаз бадӟым инты басьтэмзэ.

1

Семён Виноградов
Оуэр!
Асьме ӵыжы-выжыосмылэн олокыӵе но сюлмаськонъёссы вылэм. Пӧртэм калыкъёсын 
ожмаськоно луылэм. Нош кыӵе вылэм соослэн кивалтӥсьёссы? Кӧня аресъемъёсты оже 
кыско вал меда? Уно со выллем юанъёс йыре лыкто, азьвыл улонэз син азе пуктыны 
ке турттӥськод. Кызьы тодод на соосыз?
Котькуд ласянь ке малпаськиськод, асьме дыре но мае но сое тодыны луоно вылэм. 
Тани басьтом оуэр карон (эру карон, эро карон) нергеез. Та йылолэз Будӟыннал 
азьысь покчиарняе ортчыто. Дас сизьым аресъем пиос, тӧдьы дэра айшетъёс 
(азькышетъёс) керттыса, чылкыт дӥсяськыса, ӵукна кураськыны пото. Та нергеез 
кудӥз-огез кураськон но шуэ.
Ветло коркась корка. Куалы быдэ соослы кеньыр, вӧй, кык курег пуз, сӥль сёто. 
Шур сьӧрын нимысьтыз интыын ӝук пӧзьто, пересь муртэ вӧсято, шулдырак сисько. 
Курег пуззэс берло шулдыръяськыны кельто, уг пӧзьто ни. Быдэ вуэмъёсын ӵош ӝук 
сиыны быдэс гурт люкаське. Тазьы пусъё пиослэсь калык радэ пыремзэс, крестьян 
ужлы дась луэмзэс. Азькышет татын ужась муртлэн символэз выллем луэ кадь.
Эро карон таин уг йылпумъяськы али. Та люкетсэ мон гожъяй Татариысь Агрыз 
районысь Варклет-Бӧдья гуртын Гаврилова Евдокия Гавриловналэсь, Виноградова 
Антонида Гавриловналэсь но Гаврилов Герасим Гавриловичлэсь. Варклет-Бӧдьялэсь 
кызь иськемын Удмуртиын вань Шайтангурт. Татын юалляськи на Михайлова Париза 
Михайловналэсь но атаелэсь Виноградов Николай Петровичлэсь. Атай кепыр ваиз ке 
но, туж кемалась вашкалаысь вадессэ вераны шедьтӥз кадь потӥз мыным. Покчиарня 
уе ("кулэм потон уй" шуо сое шайтангуртъёс) люкасько, пе, вал быдэ вуись пиос 
огаз мунчое. Отчы куинь-ньыль пересьёс лыктозы вылэм. Дас сизьым арес тырмемъёс 
куинь толэзь талэсь азьло дасям кивалтосъёсынызы вуо (тачырнаосын, пукыӵъёсын, 
шибодыосын, кестэнъёсын, чоклоръёсын). Пияшъёс огез бере мукетыз, штанизэс 
куашкатыса, "оуэр" черектыны кулэ. Вылтырзэс но куаразэс чакламзы бере пересьёс 
котькудӥзлы нимаз пумо чекыля сёто. Со дыре ик пияш дасям кивалтоссэ возьматыны 
кулэ. Арбериез быгатыса лэсьтэмын ӧвӧл ке, пересьёс тӥяса кушто, лэсьтӥсьсэ 
сапырес ужамез понна возьытэ вутто.
Тӥни озьы быдэ вуон нуналазы пиослэсь ужаны быгатэмзэс, куаразэс, мугорзылэсь 
юнмамзэс, кышнояськыны вуэмзэс чаклало. Мунчоын та нергеез ортчытэм бере пиос 
гуртлэн пумаз люкасько: кин буш вал вылын, кин пыдын. Ваньзылэн сямен киосазы - 
кивалтос. Уйшор вакытэ люкаськем пиос - быдэ вуэмъёс (покчи вынъёссы но кудӥзлэн 
сьӧраз), кӧня ке пол "оуэр" шуыса кесяськем беразы, корка йыгаськыны кутско. 
Кузёос сайкаса сиён-юон уг ке потто, эшшо золгес дыбырто, зыръёсын яке векчигес 
корез трос кузя ӝутыса. Озьы гурт кузя куашетыса-йыггетыса васько. Аракы ке 
потто, пуссэс учкыса сёто, кинлэн пус-чекляез ӧвӧл, солы юон уг донгиськы.
Куд-ог гуртъёсын улӥсьёс, коркасьтызы шайтан-периоссэс улляськом шуыса, ӵужонэн 
ӟус улъёстӥзы шоналлясько, собере гинэ укнозэс усьто но егитъёслы вазисько, 
аракы сёто. Та уе пӧртэм палась пыӵалэн ыбем куараос но одӥг-ог кылӥсько. Озьы 
ведӥнъёсыз, шайтанъёсыз курдатӥськом, шуо. Быдэ вуэмъёс куашетыса гурт пуме вуо. 
Отын кивалтосъёссэс тӥяло но шур дуре эстӥськыса суто. Озьы шайтан-периосыз, пе, 
улляськом. Та йылол пыр, мон сямен, вашкалаосмы егит ожгарчиосты ожмаськон 
искусстволы дышетылӥзы. Оуэр! шуон ("ура!" выллем) ожмаськон дыръя удмуртъёслэн 
вазиськонзы, луоз (боевой клич).