Татьяна Владыкина Арнунал гуръёс Арнуналъёсы (арнунал - арлэн пӧртэм вакытъёсыныз герӟаськем юондыр) сӥзем вӧсь нергеослэн одӥгез аспӧртэмлыко тодметсы вань - та нуналъёслы гинэ тупатэм кырӟан гуръёс. Соослэсь пуштроссэс валан понна лыдэ басьтыны кулэ йылолъёслэсь ортчон радзэс. Вань арнуналъёсысь висъяны быгатӥськом кык люкетсэ: огъя гуртэн яке семья пушкын гинэ ортчытоно вӧсез но вӧсь нергеез (коркась корка ветлон сямез). Вӧсяськыку курисько вылэм, вань инмаръёслы сюлворыса вазисько. Куриськись адямиос нимысьтыз луо вал, куд-ог дыръя, верамзыя, куриськон быдтыса, соос вӧсь гурен кырӟаны ӧдъяллязы. Но куриськыку ӵемгес уг кырӟало, пе, вал, бадӟым крезен гинэ шудо. Вӧсьысь бертыса, лымшор бере вӧсь нерге ортчыто вылэм. Коркась корка нимаз-нимаз ветло мӧйыос но егитъёс (пиос - акашка яке гершыд дыръя вал вылын ворттылэм бере; нылъёс - бусы сюан бере; нылъёс но пиос - сӥзьыл пӧртмаськыкузы). Кунояса ветлоно кырӟанъёссэс люканы луэ куриськон кырӟанъёслы но куноян кырӟанъёслы. Куриськон кырӟанъёслэн пуштроссы - быдэсак вылӥ сьӧрпал кужымъёслы вазиськон выллем: Гершыд сюан гуръёс Осто гынэ Иньмаре, ӟеч шуныт зор сётса зор вал, Иньмаре, Ӟеч кизьылэм ю-няньёсмы ӟеч мед кисьмалоз. Вай, осто гынэ, ваньмы йыбырттом, Ӟеч кизьылэм ю-няньмы ӟеч мед кисьмалоз. Борд но ӝужда луо шувиз ӟегкаймы, ай-яй. Борд но ӝужда луо шувиз ӟегкаймы, ай-яй. Лыз но кай но пильдылэ, вож но кай но пильдылэ. Борд но ӝужда но кылё шувиз ӟегкаймы, ай-яй. Някыръяськыса ик кылиз гурт пала ӟегкаймы, Зарни тӥсен тӥсяса, аз(ы)весь шепъёсын, Ой, возьма, дыр, возьма, дыр, Митрей агаймы, Бадӟын гынэ капказэ, ой, но усьтыса(. Акашка гур Акашка ваиськом, ой, миос ук, Куло гинэ кашка валъёсын. Атасэд чортылоз, курегед пузалоз, Ми куроно дыръя дась медло(й). Акашка ваиськом, ой, но миос ук, Ой, усьтэлэ, усьтэлэ ӵогаллям капкадэс, Ми пыроно дыръя дась медло(й). Куноян кырӟанъёс сузьемын пӧртэм кырӟан-веран сямъёслэсь (кырӟан-веран сям ӵем пумиськылӥсь образэз радъясь каб; сям "йылол", "обряд" шуэмез возьматэ на). Соос мылкыдэз верась кабъёс выллем луэмын, огзы борды огзы итӥськыса, кузь яке вакчи кырӟан кылдыто. И. Арнуналлэсь вуэмзэ возьматыса кырӟан сям: а) арнуналлы нимызъя вазиськон: Остэ, Гершыд но юонъёс... Ар ӵоже возьмам акашкамы, Акашка понна осто кариськом... Армись гинэ лыктылэм вӧй юонмес Вае шулдыртом, быратъёсы, йыбырттом... Армись лыктылэм Будӟин нуналъёс... б) арнуналлэсь юондыр луэмзэ кырӟаса веран: Остэ гинэ, Инмаре но, бадӟым Инмаре, Ми, тонэ сӥлы карыса, сииськом-юиськом-вӧсяськиськом... Инмарлэсь но сётылэм шыдзэ но няньзэ Валче карыса сиёме-юоме... Милемлы винадэс но сётыса улэлэ, Милям гинэ сюлмамы мед шудоз. Коркадэс вольыт, ой, миськелэ, Мед шудоз сурен, ой, араклы... в) вӧсь нергелэсь кырӟанэн люкиськонтэм луэмзэ возьматон: Арскын но лыктэм акашкаед Тӧр шоры но пуксьыса гурлалоз... "Вӧсь нерге, вӧсь нерге, вӧсь нерге" шуиськом, Чик кырӟамтэ вӧсь нерге луоз шат... Муш мумы кадь кырӟалом, Жингыртом муш мумы кадь. Армись огпол лыктылэм Петыровмы, Петыров но юонмес шулдыртом... Котырак султыса кырӟаломы, Кизем юмы ву тулкым кадь мед удалтоз. Кизем юмы ву тулкым кадь мед удалтоз, Асьмелы октыны-бичаны, ой, мед кылдоз... г) вӧсь нерге гурез бӧрдонэн ӵошатыса веран сям: Арлы гинэ одӥг пол акашка лыктылэ, Вань калыкез кырӟатэ, ой, бӧрӟытэ... д) куноослэсь мылкыдзэс шараян сям: Вай кырӟалом, вай вералом, эшъёсы... ...кырӟаса-вераса йывоме... Ӝӧк сьӧры пуксьылэм но бере Уг лу меда ог ӟеч кылмес, ой, вераммы... ИИ. Арнуналлэсь вуэмзэ возьматэм сяна, паськыт вӧлмемын куриськыса кырӟан сям. Курон-сюлворонъёслэн кабзы пӧртэм: а) азинлык сӥзён: Остэ, Гершыд но юонъёс Азьлапал ӟеч аръёссэ мед сётоз. Кизем но пазьгем юосмес ачид ӟечкын кие-пыдэ сёт. Ӟеч зордэ, ӟеч гудыридэ, ӟеч гужемдэ, ӟеч тылобурдодэ сиёнлы-юонлы сёт! Остэ гинэ, Инмаре, Бадӟым Инмаре, Кабыл гинэ мед басьтоз вӧсям вӧсьмы. Ой, однако, ой, асьмелэн но валче улэммы Кема гинэ аръёслы дан медло... Осто но, Инмаре, шуддэ-бурдэ сёт, Нылын но пиен, шыдэн но нянен. Азьлань сётэм юдэ-няньдэ зарни тысен, азвесь куроен сёт. Ар ӵоже тазьы ик мед уломы. Остэ, Инмаре, Бадӟым Инмаре, Куинь бусые пазьгем няньмы ньыль бусые мед пушъёз... Осто но, Иньмаре, Бадӟым Иньмаре, Вӧсям но вӧсьёсмы кабыл медло(й). Вӧсям но вӧсьёсмы кабыл ке луиз, Гурт калыклы(й) улыны капчи луоз... Остэ но, Иньмаре, козма, Иньмаре, Эн сёт вал, Иньмаре, ой, дышмонлы... б) уродзэ каргаса кырӟан сям: Осто но, Инмаре, козма, Инмаре, Эн сёты дышмон кайгырлы. Дышмон калыклэсь корт тунгон дуремын. Корт тунгон сьӧрысь, ой, потыса, Ой, мед усёз чан вылэ. Отысь но, ой, потыса, ой, мед усёз Тӧдьы Кам кожъёсы. Тӧдьы Кам кожъёсты но, ой, потыса, Ой, мед усёз сьӧд моря шоръёсы... в) луоно ужъёсты суредан, вань шуыса возьматон: Воргоронэд потоз, ой, бусые, Валъёссэ кыткылоз, ой, герые. Гырылоз но аназэ, ой, сезьызэ кизёз. Кизем гинэ анаез вож вожектоз. Котыр дунне-бусыез, ой, шулдыртоз. Вож-вож вожектоз возь вылын но турынэд, Ӵуж-ӵуж усьтӥськоз италмас но сяськаед. Котыр-котыр возь вылэз, ой, шулдыртоз. Вань калыкъёс, ой, учкыны мынозы... Нюпыр-нюпыр шуналоз тулыс лымыед, шу, Жаль-жаль ик кошкозы тулыс вуосыд, шу, Со ву кошкемъя ӝутскоз ю-нянед, шу, Бакча сиёнэд но, юэд-нянед но мед ӝужалоз паска дырысен сӥзьылозь, шу... ИИИ. Адӟонэз улонлэсь вылэгес пуктон, вылӥ сьӧрпал кужымъёсты сӥлы карыса кырӟан сям: Та люгыт дуннеос, ческыт музъемъёс Асьмелэсь но ӧвӧл ук, ой, Иньмарлэсь... Ой, тӥледын милемыз, милемын тӥледыз Яратыса сётылэм вылысь Иньмар... Сю ар, сюрс ар ум улэлэ, валче уломе, Та валче но, ой, улэммы адямилэсь ӧвӧл - Инмарлэсь... Улэммылэсь уногес улон азьёсмы, Мар бон гожтэм Инмармы азьланьзэ... Улом али, туганъёсы, вылом али, Ум улэ, музъемъёс сисьмытозь. Музъемъёс но уз сисьме, асьмеос сисьмомы, Вылъёсамы бадьёс но будылоз. Бадьпу гинэ сяськаос мамык гинэ, Та дуннеын асьмеос куно гинэ... ИВ. Вордскем юртэз, анай-атаез сӥлы карыса кырӟан сям: Сиём али, юом али, мусо туганъёсы, Вань ведь али анай-атай, ой, кужыммы. Анаен но атайлэсь кужымзэ весь уд возь, Вань ведь асьмелэн али ужан кужыммы... Тӥ но эрки, эшъёсы, ми но эрки, Вордӥсь анай-атайёс вань ӵоже... Анаен но атайёс ӧй ке луысалзы, Кытын бон асьмелы таӵе шулдыр улон. Анаен-атай ӧз ке луы, Асьмелы визьёс кин сётоз... Пӧртэм вӧсь нерге кырӟанъёслэсь пуштроссэс чакласа, соослэсь одӥг кужмо мылкыдзэс валаны луэ: вӧсь нергеез ортчытон сям - со вылӥ сьӧрпал кужымъёсын гожтэм маке. Адӟон(Инмар(Пересьёс(Анай(Атай - та валатонъёс адямилэн йырсазяз ог-огенызы артэ сыло но ог-огзэс палдуртытэк но саюлтытэк воштыны быгато: Остэ, остэ, Иньмаре, милям сямъёс та ӧвӧл. Милям сямъёс та ӧвӧл - пересьёслэн сямъёссы... Ой, асьмеос ке ӧм шулдыртэ, кин-о шулдыртоз, Асьмемыз косо анаен, ой, атайёс.... Анайлэсь-атайлэсь вӧсяллям вӧсьёссэс Эн люкиське, нуныёсы, даурады(й)... В. Ӵыжы-выжы кусыпъёсты данъян сям, валче улонэз сӥлы карон: Куазьшур гынэ вӧсьёсмы мар но вералляз, "Валче улэ гумырады", - ой, со шуиз... Тӥ туганэн ми туган огинэ ке луиськом, Зарниен азвесьёс жингыртыса, ой, уло, Одӥгмес одӥгмы кур ке, ӝож ке ӧм каре, Уг лу меда весь валче, ой, улэммы. Тӥледын милемыз, милемын тӥледыз Яратыса сётылэм но вылысь Иньмар... Иньмарлэсь но сётылэм шыдзэ но няньзэ Валче карыса сиёме но юоме... Совето власть аръёсы троссэ вӧсьёсты быдтӥзы, пушйытыны тыршизы огъя советской йылолъёсты. Вӧсь нергеосты лушкемак но ӧжыт калыкен ортчытон аслэсьтыз "емышсэ" сётӥз: вӧсь нерге гуръёсты туж мӧйыосыз гинэ тодо на. Со гуръёсты вераса кырӟан сямъёс но тросэз ышемын-быремын. Но ӵыжы-выжы кусыпъёсты сӥлы карисьёсыз та дырозь кылемын огшоры куноян кырӟанъёсын. Озьыен, ваньзэ вӧсь нерге кырӟанъёсты ёзнаны луэ нимаз-нимаз кырӟан-веран сямъёслы. Соослэн огзы борды огзы итӥськемзы ӝот-ӝот, бӧрсьысь бӧрсе воштонтэм радъямын ӧвӧл. Котькуд кырӟась вакытэзлы тупась кырӟанэз ас тодэмезъя но ас валамезъя сазна, та вылӥ верам кырӟан-веран сямъёсты лыдэ басьтыса. Озьы котькудаз кунокуаын чузъясько вал одӥг гурен но пӧртэм кырӟан-веран сямъёсын кылдытэм кырӟанъёс. Али но котькудӥз ассэ гажась кузё кышно ӧтчам кунооссэ "утялтыны" тырше аслаз яратоно куно гуреныз. Вӧсь нерге гуръёс вуныны кутскем бере улосамы вӧлскизы ӟуч, украин, грузин но мукет калыкъёслэсь асэстэмъёс. ( Кырӟанъёслэсь кылъёссэ сётӥськом озьы ик, кызьы кырӟало калыкын, тупатъятэк. Вожодыр Кутске 7 толшоре но йылпумъяське 19 толшоре. Вожо вылтӥ шудыса но кырӟаса ӝыт пуконъёс ортчытъязы, вожояськылӥзы, тунатскылӥзы. Егитъёс ӝыт пуконъёсы мунчое яке корка люкаськылӥзы. Нылъёс киужен ветлӥзы, нош пиос эшлы луыса. Кӧня ке ужаса пукемзы бере соос шудылӥзы, эктылӥзы, асьсэлэсь маскаръяськыны но мадьыны быгатэмзэс возьматылӥзы. Пӧртэм пумо шудонъёсын шудылӥзы. Кылсярысь, Н. Первухин ватскемен, лодӥгаен шудэмзы сярысь гожтэ, "Ӵӧжмер", "Сяла ыбон", "Юр" но мукет шудонъёслэсь пуштроссэс возьматэ. "Сяла ыбон" - вакчи скамьялэн пумъёсаз ваче ымныр, киязы пӧзь поныса, кык пиос, пиен ныл яке нылэн ныл пуксьылӥзы. Шудӥсьёс ог-огзэс урдэслань туж зол мыжганы, скамья вылысь уськытыны кулэ. Интыяз пукыса кылисез вормисе потэ. "Юр" - кузь ӵушконэз юн позыртыса, пумаз герд керттыло. Шудӥсьёс котырак выж вылэ пуксё. Пыдъёссэс гож сьӧры лэзьяло но бадӟым ковырен, выж лёгетэн яке ынэн шобырто. Валтӥсь быръё. Гожын пукисьёс ковыр ултӥ киысь кие со ӵушконэз сётъяло. Нош шудонэз валтӥсь гож котыртӥ ветлэ, одӥгезлэн яке мукетызлэн шудӥсьлэн пельпумаз йӧтскылыса. Со туж сак луыны кулэ, малы ке шуоно, кияз позыртэм ӵушконэн шудӥсь борды йӧтскыны шедьтэ ке, соиз султэ но, шудӥсьёс котыртӥ куинь котыр котырскытозяз, позырскем ӵушконэн жуге. Собере соос интыенызы воштӥсько. Кин жугиз, со валтӥсь луэ. "Тодысь" - шудыны мылкыд карись пилэсь синзэ кышетэн пытсало но выж шоры пукто. Котькуд ныл сое дораз мыныса чепыльтэ. Кин ке но юа: "Кин тонэ чепыльтӥз?" Пияш ныллэсь нимзэ шонер вера ке, сое чупа, уг ке - вань нылъёс тыбыраз чиньыенызы мырӟыло. Куатетӥ толшоре уин егитъёс люкаськыса сюрес воже "вожо кылскыны" мыно вылэм. Сюрес вожын укватэн яке табапудэн котырес гож лэсьто: оско вылэм, огшоры бодыен котыртыса, "вожоез уд кылы", "простой бодыен неномыр но уг кылӥськы", пе. "Вожо кылзыны" шур дуре но ветлӥллям. Кез ёросысь Квасер гуртын таӵе учыр сярысь верало: "6-тӥ толшоре уин егит пиос но нылъёс, тулуп но табапуд басьтыса, прудэ "вожо кылскыны" кариськиллям. Шӧдтэк шорысь йӧ пилиськем но, со улысь маке быдӟа пуны потэм. Нырысь-валысь ваньзы кышкаллям, собере молитва лыдӟиллям но - пуны ышем" (Подседерцева Ф. П., 62 арес). Рошво (ымусьтон, рождество) уйысен егитъёс тунатскыны кутскылӥзы. Тунатсконъёслэн зэмамзылы оскылӥзы. Тужгес но тунсыко вылӥллям 13 толшор уе тунатсконъёс, малы ке шуоно, та дырез "вожолэн самой лек дырыз" шуылӥзы. Тунатскылӥзы но уйшоре, "кышкыт" интыосын: сюрес вожын, мунчоын, гулбечын, куштӥськем коркан. Уйшор уин люкаськыса, кӧня ке нылъёс но пиос сюрес воже мыно. Отын кыӵе ке но корт арбериен (литовка, пурт, табапуд, тӥр) гож котыртылӥзы. Лымы вылэ выдыса кылзылӥзы: гырлы куара ке кылӥське, сюан луоз; пул шуккем - матысь муртэд яке ӵыжы-выжыосыд пӧлысь кин ке кулоз; кутсаськем - ю удалтонлы. Гож пушкысь молитва лыдӟыса гинэ потыны луэ яке уйшор бере атасъёслэсь чоръямзэс возьмано, сотэк "вожо кутоз" шуыса кышкало вал. Верало на мукет тунатсконъёсыз но: - кӧлыны выдон азязы колодчаез тунгонэн пытсаллязы, нош усьтонзэ йыр улазы миндэр улэ понылӥзы. Кыӵе йырсиё егит пи усьтон курыны лыктоз, солы ик бызёд; - синзэс пытсаса, киоссэс вӧлъяса, ымнырынызы тым (бадь вайёслэсь пуныса кутэм кенер) азе султылӥзы, собере тымез оген-оген лыдӟылӥзы: "амбар - мешок - пуд". Тым "амбар" кылын ке бырылӥз, оскылӥзы, туж узырезлы бызёд шуыса, нош "мешок" ке - шоро-куспо улӥсезлы, "пуд" - начар азе; - уйлы косяк азе вуэн стакан пуктылӥзы, нош стакан вылэ аспӧртэмлыко "выж" чаг понылӥзы. Кыӵе пиен вӧталод, солы ик бызёд; - бадӟым пуньыен ву кынтоно: ӵошкыт ке - уд кулы, кулонлы гоп кынме; - ӝӧк улын кӧлоно. Узыр азе бызёно ке, султэм берад ю пырыез я нянь пырыез шедьтод. Ӧз ке лу, начарлы бызёд. Акшан вакытэ но уйшор уин ульчаетӥ ветлыны ӧз тыршылэ, тужгес но кышкато вал нылпиосыз. Уг яра вылэм ветлыны выж дортӥ, куштӥськем коркаос вӧзтӥ, мунчо котыртӥ - отын, пе, "вожоос уло". Нош ортчытэк уг лу ке, адямилы одно ик Инмарез тодаз вайыны кулэ. Вожо вылтӥ киуж ужаны косылӥллям: черсыны, вуриськыны, керттӥськыны; но - нуназе но акшан бере гинэ. Пож вузэс лушкем кисьтало вылэм - "вожо медаз адӟы". Уг яра та вакыт гурысь пенез поттыны, етӥн сэстыны, ӵужъем лэсьтыны, мунчое уйлы сьӧд дӥсез кельтыны. Миськем дӥсез но педло ошылоно ӧвӧл: "вожо пурултэмтыса (йӧнтэмъяськыса) кельтоз". Шудонние лыктэм егитъёс тыршылӥзы уйшорозь мунчоысь кошкыны. Тани кызьы тодаз вае Кез ёросысь Квасер гуртысь Подседерцева Ф. П.: "Мумаосы егит дыръязы вожо вылтӥ мунчоын пукылӥллям: нылъёс черсса, пиос соослы эшлы мыно вылэм. Одӥг ӝыт мунчоысь вань егитъёс кошкиллям гуртазы, нош егит пи но ныл кылиллям. Соос доры вожо потэм. Кышкаменызы пияш шубазэ ик мунчое кельтэм. Ӵуказеяз ӵукна мыно но, шуба, пе, номырлы уг яра ни, чисто корамын". Пересьёс оскылӥзы: тужгес но сак луыны кулэ вожолэн берпуметӥ нуналаз. Кылсярысь, колодчае яке ошмесэ вазь ӵукна вулы уг яра потыны: вожоосын "коламын" луоз. Оскылӥзы, вожоос ву улэ кошко шуыса. Уйпал удмуртъёслэн вожо дыр йылолазы бадӟым инты басьтэ вожояськон сям. Вожояськылӥзы пичиез но, бадӟымез но. Люкаськылӥзы гурт пумысь корка, отын дӥсяськылӥзы. Вожояськисьёс котьку но кузтэм мед луозы шуыса тыршылӥзы. Дӥсяськылӥзы пӧртэм сямен. Ӵемгес кышномуртъёс пиосмурт кариськыса, нош пиосмуртъёс кышномурт луыса пӧртмасько вылэм. Пиосмурт вылаз дӥся, пе, вал шортдэрем яке дэра юбка, йыраз ӝӧккышет керттэ, тыбыраз мушко яке ныпъет оше, ымнырзэ маин ке тӧдьыен ӵокса. Кышномурт нош дӥся пиджак, изьы, шаровар, кусказ керттэ тӧдьы пужыятэм ӵушкон. Пиосмурт но, кышномурт но быгато вылэм солдат кариськыса вожояськыны: шинель, е, изьы, сурон сапег дӥсялозы-кутчалозы вылэм; туш интые - куж, киязы боды интые укват яке табапуд, вылазы маке со лукыр-лакыр дӥсяло, кусказы е кертто, е улазы тӥр поно. Кураськись кариськыса дӥсяськем адями сумкаяз нянь понылэм. Чиганъёсты но пумитаны луоно вылэм - "улыно-вылыно дӥсяськылӥм, чиганъёс кадь, вылӥяз тӧдьы понылӥм". Куддыръя йыразы пуж поно вылэм, бадӟым кӧто карисько, тыбыр лёг лэсьто. Одӥг пиосмурт вылэ кык берыктэм шуба дӥсяло-кутчало вылэм: одӥгзэ - пыдъёсаз, мукетсэ - киосаз. Куссэ жильыен керттыло. Йыраз изьы поно, бамзэ сьӧдмало. Озьы "гондыр" кариськыса вожоясько. Со "гондырез" коркась корка пиосмурт нуллылэм. Корка пырем бере "гондыр" кузёоссэ кышкатыны тыршылӥз, нош пиосмурт чалмыт кариськыны косылӥз: "Мишка, нельзя! Мишка, нельзя!" шуылӥз. "Вал" но, пе, кариськылӥзы. Куролэсь вал йыр лэсьтылӥзы. Со йырез ын улэ пырем пиосмурт возе. Валэз "серметаса", сое коркась корка мукет пиосмурт нуллэ вылэм. Глаз ёросысь Золотари гуртын вожояськисьёсты люкась адями быръё вылэм. Со ӵемысь мӧйы пиосмурт луэ вылэм, коркась корка ӧтчаськыса бодыен ветлэ, пе, вал. Котькуд коркан солэн бодыяз дэрем сеп, тамак пуйы яке маке мукет керттылӥзы. Куд-ог дыръя, кузьым трос люкаськемен, пересь пиосмурт со бодызэ мырдэм вормылэм. Берло со вань вожояськисьёсын ӵош юмшаса ветлылэм. Бодыысьтыз вань кузьымез аслыз кыле вылэм. Та гуртын ик пӧртмаськисьёс сьӧразы кирень нуллӥллям. Егит пиез я нылэз кутыса, со киренез куртчыто вылэм. Калыкын али но оско на, вожояськисьёс котькыӵе ужез азинто, пышлэсь, етӥнлэсь, кубисталэсь удалтонлыксэс ӝуто шуыса. Соин ик котькуд коркан соосты туж шумпотыса пумиталлязы. Семьяын вож нуны вань ке, соку гинэ туж мылзы потытэк корказы пырыны лэзьылӥзы, нош пиналзэс гур азь пала ватылӥзы. Кезысь вожояськисьёс, ураметӥ медам тодмалэ шуыса, лушкем ветлӥллям, нош Глаз палъёс - пӧртэм кырӟан кырӟаса. Котькытын но сюрес вылын пумитам адямиосты лымые месыло вылэм. Корка пырем беразы выж вылэ бодыен йыгало, пе, вал. Круген тэтчаллям, гур пытсэт борды корт арбериен, дэра катокен яке дӥсь миськон пулэн тышкаса. Корка кузёос вожояськисьёсты одно ик тодманы тыршылӥллям, ымныр ӵоксэтсэс кыскаса, кырмалляса. Озьы шулдыръяськем беразы бадӟымъёссэ юри та праздниклы дасям сурен секталлязы, пиналъёслы сакыр яке пыжиськем сётылӥзы. Вожояськон йылпумъяськылӥз 19 толшоре (йӧ вылэ сылонэн). Галина Глухова 6772 Римма Игнатьева Возьыт новелла Туэ южтолэзь чик уг укша ас вакытэзлы. Куазь паймоно кадь салкым улэ. Инбамез пурысь пилемъёс сайяло. Куке но шунды пальпотоз на шуыса оскыны ик шуг. Витьымтэ шорысь синтэм-пельтэм жобаськыны, лымы букосъёс пуктылыны ӧдъя. Чагыр инбамо, яркыт шундыё, котыр улосвылэз шунтӥсь-сайкатӥсь тулыс кытчы ке йыромем, оло. Нина Петровналэн мылкыдыз ӵапак та куазь кадь пильмаськемын. Толон сое школазылэн директорез юнме шорысь лушкаськись шуыса янгыш кариз. Ӵош ужась эшъёсыз пӧлысь кин ке ик со пала дурбасьтоз кожа вал егит дышетӥсь. Нош учительское люкаськемъёс ваньзы йыръёссэс ошизы но пал кыл вазьылытэк пукизы. - Мон нокинлэсь номырзэ ӧй вора, - директорлэн синмаз Нина меӵак учкиз. - Коллективе тӥ вуытозь, Нина Петровна, номыр ӧз ышылы! - лек вераз Татьяна Ивановна. Вожез потэмен, лэся, солэн ымнырыз но йырсиез кадь ӵыжектӥз. Нырысь-валысь Нина Петровна малпаз вал, директор, пе, ачиз но марзэ-созэ валатэк вераське, дыр. Угось дунне вылын улытозяз солэн нокинлэсь номырзэ юатэк басьтылэмез ӧвӧл. Татьяна Ивановна тае тодэ-вала, луоз, нош зэмос лушкаськисез шараян вылысь юри ваньзэс эскере-чакла, дыр. Ас понназ тазьы малпаса, Нина Петровна ӧжытак буйгатскыса шуиз: - Мон лушкаськись ӧвӧл, Татьяна Ивановна. - Озьы шуиськод, иське?! - лекъяськеменыз, лэся, кивалтӥсь Нина Петровна шоры "тон" шуыса вазиськиз. - Бен ӧд лушкаськы ке, малы уд юаськы, кытысь, кинлэн, кӧня но ку ышиз?! А-а?! Тон ӟеч тодӥськод, мынэсьтым тани та сумкаысьтым ньыль сю манетме ку поттэмдэ! Соин номыре уд юаськы ни! Нина мар шуыны ик паймиз. Ма, со ӧз лушка бере, тодэмез но уг поты. Вылаз ик, Татьяна Ивановна сое, урокысь лыктӥсь муртэ, йыраз тӥр обыкен шуккем музэн, ӧс кусыпын ик онгромытӥз. Нош дурбасьтӥсьёс луымтэен егит дышетӥсь уката абдраз. Ма, паймиз гинэ шат? Шонергес луоз, вуэ куштэм мурт кадь луиз шуид ке. Шундыё нуналэ гудыртэмлы укша та. Нош кытысь вуиз, малы та гудыри Нинаез ӵашйиз? Тазэ егит нылкышно уг вала. - Тон ке ӧд лушка, соку кин бен?! - кузяна сылӥсь ӝӧкъёслы ваменак пуктэм ӝӧк сьӧрысьтыз султӥз кузё. - Мон уг тодӥськы, - янгышам дышетскисьлы тупа али Нина. - Тон ке уд тодӥськы, мон тодӥсько! - кеськиз кивалтӥсь. - Кыӵе коньдонэн арня талэсь азьло городэ ветлыкуд костюм басьтӥд?! Оло, уждунэныд? Ха-ха, кутскись дышетӥсьлэн уждунэзлы сюрс ньыль сю витьтон манетэн дӥськут уд басьты! Со понна ӝыны арзэ сиськытэк улоно луод. Мон тани тынэсьтыд кык вылтӥ уждун басьтӥсько ке но, сыӵе костюмез уйвӧтам но адӟеме ӧвӧл! Елизавета Петровна куамын арзэ та школаын математикалы дышетэ, нош сыӵе дуно дӥськутсэ ӧй синйылтылы! Елизавета Петровна, вералэ, малы тӥ сыӵе костюм уд басьтӥське? Чурен сылӥсь ӝӧкъёс пӧлысь одӥгез сьӧрын пукись мӧйы дышетӥсь куаляк луыса интыысьтыз ӝутскиз: - М-ма, м-мыным, пересь муртлы, вужез но яралоз. Нош егитъёс, быгато ке, мед чеберъяськозы... - Веранзэ йылпумъяса, Елизавета Петровна ас интыяз пуксиз но котыр чал-чал пукись эшъёсыз шоры учкиз. Ваньзы азьло сямен ик йыръёссэс ошыса, шыпыт пуко. Директор гинэ ӵош ужась эшъёсыз шоры вылласянь уллань учкыса сылэ. - Вот, вот! Быгато ке! Нош быгатоз-а толэзяз куинь сю манет уждун басьтӥсь мурт одӥг но ӝыны сюрс манетэн дӥськут октыны? То-то вот! Уз! Нош милям Нина Петровнамы быгатэ! Кызьы?! - вожомем кивалтӥсьлэн йырбераз кульчояса бинем горд йырсиез таркаськем. Кесяськыса сямен вераськыкуз ымпумъёстӥз дыльдыез ик пазяське. Ӵашъем гуртысь шор ёзо школаен Татьяна Ивановна витетӥ арзэ кивалтэ ни. Татчыозь ужам директоръёс та пичи но сюреслэсь палэнысь гуртын одӥг арлэсь кема ӧз чидаллялэ. Торккес сямо, маиныз ке воргоронлы кельшись Татьяна Ивановна куашкан калэ вуэм школаез тупатъяны коньдон но, ужась но шедьтӥз. Со понна ик Ӵашъем школалэсь директорзэ ёрос кивалтӥсьёс сӥлы каро. Нош ӵош ужась эшъёсыз кивалтӥсьсылэсь кышкало: марысь-мар ке, улляны муг котьку шедьтоз, нош берло кытысь уж шедьтод? Уката ик та гуртэн вань улонэд герӟаськемын ке. "Мар бен, котькудӥз ас понназ ачиз кыл кутыны кулэ", - шоканы дӥсьтытэк кадь пукись эшъёссэ сӥсъяса сямен учкиз егит дышетӥсь. - Тӥ, Татьяна Ивановна, янгышаськоды. Мон тӥлесьтыд но, мукетызлэсь но чик номырзэ ӧй вора. Нош маин мон аслым дӥськут басьтӥ, соиз ини мынам уже, - тӧдьы бӧз выллем кӧдэктэм Нина аслаз ӝӧкез пала вамыштӥз. Кунулысьтыз книгаоссэ но тетрадъёссэ портфеляз лачмытак интыяз. Туннэ понна урокъёсыз быремын. Зэм, дораз бертыса, ӵуказе урокъёслы дасяськыса но тетрадьёсты эскерыса, уйшор бероз пуконо луоз на... Татьяна Ивановналэн бамъёсыз пилиськоно кадь гордэктӥзы. Эшшо ке сыӵе пӧрмостэмъёс солы, школалэн директорезлы, мытылыны дӥсьто! - Ах, вот кызьы?! - лек кеськиз кивалтӥсь. - Тон кожаськод, коллектив номыре уг адӟы, номыре уг вала?! Ӵуказе ӵукна мынам ӝӧк вылам ньыль сю манет ӧд поны ке, мон участковойлы заявление гожто! Тон кадьёслы воля сёт ай, йыр вылэ тубыса, пыд азям сялалоды! Таин туннэ всё! - Ниналэсь пумитъяськыны выремзэ пеляз ик ӧз поны кузё. Директорлэсь кбераса, дышетсьёс, ӝогак дӥсяськыса, учительскойысь тӧлӟизы. Нина пала учкыны ик ӧз дӥсьтэ ни, лэся. Быдэс уйзэ егит дышетӥсь чырым но ӧз изьы. Кияз книга-а кутэ, дышетскисьёсызлэсь тетрадьёссэс-а эскерыны ӧдъя - пель сьӧраз чузъяське директорзылэн куараез, "Лушкаськись!" "малы со монэ озьы ултӥя? Мар мон солы уродзэ лэсьтӥ?" - синкыли пыр малпа Нина. Ӵукна со котьку сямен синучкон доры ӧз лыкты, синдуръёссэ но ымдуръёссэ ӧз буя. Ӝыны ар куспын нырысьсэ мылпотытэк вамыштӥз гурт пумысь школа пала. Солы озьы йӧтэ: котькуд укноетӥ шораз учко но чиньыенызы возьмато: "Егит дышетӥсьсы лушкаськись вылэм". Школае пырыкуз пумитаз шедем дас одӥгетӥ классын дышетскись пиос - Кузьмин Володя но Музыкантов Саша - удмурт кылъя но литературая дышетӥсьсы шоры жаляса сямен учкизы. Эсьма, ӟечбуръяськемзы бере ӧсэз вӧлак каризы но Нина Петровнаез азязы лэзизы. "Таосыз но кылӥллям ни, лэся", - ас понназ секыт лулӟиз дышетӥсь. - Цербер мылкыдзэ уськытӥз, вылды, - кылӥз со Сашалэсь верамзэ. - О-о, со изьвер нокинлы шокчыны маза уг сёт, лэся. Алигес сизьыметӥысь Корнилов Петязэс линейкаен тышкам, - эшезъя кариськиз Володя. - Жуге-ем? - нёжтӥз Саша. - Бен, жугем. Корнилов историен уроксэ дышетымтэ, лэся. Нош Татьяна сое парта сьӧрысьтыз кыскаса поттэм, собере быдэс класс азьын тышкам: учке, пе, ма каро мон тӥ пӧлысь котькудӥныды, мынэсьтым ӧд ке кылзӥське. - Володялэн мадемезъя Нина Петровна валаз, кинэ пиналъёс куспазы Цербер нимало. "Зэмзэ но, директорлы та ним тупа", - мӧзмыт пальпотӥз со. - Ну, ваид-а ньыль сю манет? - пумитаз сое кивалтӥсь. - Мон ӧй вора бере, малы вайыны кулэ? - юанлы юанэн ик вазиськиз Нина Петровна пальтозэ ӵоге ошон куспетӥз. - Озьы, иське? - куаразэ будэтытэк вераське туннэ директор. Озьы ке но, та минутэ учительское учырам кык дышетӥсьёс, кыӵе ке муг шедьтыса, Нина Петровнаез Татьяна Ивановнаен ваче син кельтӥзы. - Мар бен, туннэ ик участковой доры ветло, - кышкатыса шуиз на кузё. Со пумитэ Нина Петровна номыр з вазьылы ни - журналэз кутыса, аслаз кабинетаз кошкиз. Аслаз йыраз малпан берга: "Нёшто Андрей солы оскоз? Уз, со ваньзэ эскероз, тодоз но монэ шонере поттоз..." Егит милиционерлэсь синмаськемзэ Нина клубысен нырысьсэ пумиськыкузы ик шӧдӥз. Армиысь бертыса, алигес милициын ужаны кутскем пиез Ӵашъем гуртэ Ниналэсь кык- куинь толэзьлы азьлогес ыстӥллям. Мумы-бубытэк будэм Андрейлы ог кызь ар талэсь азьло специалистъёслы шуыса пуктэм кирпич коркае одӥг висъетэн улонни но висъяллям. Ниналы но отчы иа патер сётӥзы, подъездъёссы гинэ пӧртэм. Соку, клубысен, Андреез адӟыса, егит нылмурт шуак луиз: уйвӧтъёсаз лыктылэм чебер принц! Со минутэ котырысьтыз адямиос бус пӧлы сылмизы кадь. Ачиз но валатэк, Нина милиционер пумитэ вамыштӥз. Со али пилэсь чагыр синъёссэ гинэ адӟе. Соос нылмурт шоры сокем шуныт учко, эсьма, Ниналэн мурт гуртлы дышытэк кезьытомем сюлэмыз ӵыжтэм вӧй выллем небӟиз. - Тӥ дышетӥсь-а? - юаз Андрей. Гуртын ваньмыз ог-огзэс тодо, выль лыктэмзэ ӝог синйылто. Участковой но егит дышетӥсьлэн вуэмез сярысь азьлогес ке но кылӥз вал ни, кылъёс шедьтымтэеныз та веськрес мугоро, векчи куско, пельпумаз лэзькем ӵуж мертчан йырсиё муспотон нылмуртлы озьы вазиськиз. - Бен, мон дышетӥсь. Нош тӥ милициын ужаськоды-а? - Нина но озьы ик шузи-мазигес юаз. Егитъёс, ваче син учкыса, капчияк серектӥзы. Ӧйтӧд, ӧжыт-а, кема-а соос озьы клуб шорын сылӥзы - эктӥсьёс мыд-мыд ласянь донгамысь гинэ егитъёс сазьтӥськизы. - Ойдо асьмеос но эктомы, - ӵектӥз егит пи. Нылмурт соку ик киоссэ солэн пельпумъёсыз вылэ понӥз но выльысь пальпотӥз. Пилы сое амалтэк кускытӥз кутоно луиз. - Инмаре! Кыӵе векчи тӥляд кусты! Чигемезлэсь кышкано, - гордэктыса шуиз егит пи. Нина пумитаз номыр ӧз вазьы, со борды матэгес гинэ кариськиз. Эктон гур чалмемез но соос ӧз кылэ - ваче син учкыса, зал шортӥ бергазы но бергазы. Ог-огзылы синмаськем ныллэсь но пилэсь мылкыдъёссэс валаса, лэся, клубын ужась магнитофонэз выльысь улӟытӥз. Нош мукет егитъёс борддоръёс кузя сылӥсь ӟусъёс вылысь султыны ӧз дӥсьтэ. Егит дышетӥсь но милиционер гинэ каллен лэйкаса, вальсэз эктӥзы... Нина, коридоретӥ вамышъянъяз, тодэ ваёнъёсызлы мӧзмыт пальпотӥз. Кыӵе шудо вал нылмурт со ӝытэ! Андрей сое ӧс дорозяз ик келяз. Нош люкиськыкузы шуиз: - Ӵуказе ӝыт мон тӥледды клубын возьмало... Нош Нина клубе уг поты ке, участковой солэн ӧсаз йыгаське ини: - Номыр ӧз лу-а мынам принцессаеным? Ярам, ярам, тон со тетрадьёсысь янгышъёссэ утча, нош мон сэрегын шыпытак пуко - палэнысен тон шоры учко... Котькуд ӝыт сямен, толон но Нина яратоно эшсэ возьмаз. Нош Андрей ӧх лыкты. Оло, солы куректонзэ кисьтысал ке, сюлэмыз буйгатскысал. Солэн кӧтыз уката ӝож луиз. Ӵукна ӧсэтӥ потыкуз гинэ Нина выж вылысь Андрейлэсь пичи гожтэтсэ ӝутӥз. Толон пырыкуз ӝоже усеменыз, лэся, сое адӟымтэ. "Вождэ эн вай туннэ лыктымтэелы - ӝегатскытэк райцентре ӧтизы", - шуэм гажанэз. "Фу, кыӵе мон шузи! Милиционеръёслэн ужзы огшоры дышетӥсьлэн кадь ӧвӧл ук", - сюрес вылысен ини ассэ ачиз тышкаськиз Нина. Со вакытэ ик жаляз, соин луэм аспӧртэм учыр сярысь туганэз Нина ымысь уз, адӟемпотостэм Татьяна Ивановналэсь кылоз шуыса. Угось нылмурт ӝыт гинэ яратонэныз пумиськоз, нош директор, Андрей райцентрысь берытскем ни ке, туннэ нуназе вискын ик чагиськыны дыртоз... Нунал маке кадь кузь кыстӥське ини. Озьы потэ Ниналы. Со туннэ лумбыт аслаз кабинетаз пукиз. Зэм, котькуд класслэн журналэз учительскойын возиське бере, кӧня ке пол отчы пырано луылӥз ик. Котькуд полаз ӧсэз усьтыкуз шӧдылӥз: сое адӟыса, ӵош ужась эшъёсыз чалмытско. Нош Татьяна Ивановнаен егит дышетӥсь урокъёс бырем бере гинэ пумиськиз на. Кивалтӥсьлэн синъёсыз шумпотон тылгизьыен чиляло. Нина шоры со пыдул лёгет шоры сямен учкыса ивортӥз: - Тӥляд лушкаськемды сярысь, Нина Петровна, участковоймы тодэ ни. Директорлэн кезьыт мынектэмезлэсь нылмуртлэн мугорыз юзыр-кезьыр луыса кошкиз. "Иське, Андрей ваньзэ тодэ ини. Мар бен, со ик умой. Ӝоггес кырмоз лушкаськисез, мед мозмытоз монэ таӵе секыт курадӟонлэсь", - Нина вань сюлмыныз оскиз, Андрей солы одно ик юрттоз шуыса. Дораз бертыны дасяськыкуз учительскойын пелез урмытымон телефон жингыртӥз. Школае туж шер жингыръяло. Со уго Татьяна Ивановналы ёрос кивалтӥсьёсын кусып возьыны гинэ кулэ луылэ. Таяз учыре но телефон трубкаез директор кутӥз. - Нина Петровна, тӥледды гурт администрацилэн юртаз, участковойлэн кабинетаз ӧтё, - вормонэныз данъяськыса музэн, кивалтӥсь йӧно учкиз егит дышетӥсь шоры, собере, мумы ӟазеглэн пиоссэ сакламез выллем, ӵош ужась эшъёсыз пӧлысь котькудзэ пыртӥз сӥсъяса кадь синйылтӥз... ...Андрей Нинаез туж кезьыт пумитаз. - Пуксе, Нина Петровна, - ӝӧкезлэн мукет палаз сылӥсь пукон шоры возьматӥз Андрей. Нина, мар шуыны валатэк, кисмыляк отчы пуксиз. "Малы монэным озьы выре? - нылмуртлэн йыраз кӧшкемыт малпан чилектӥз: - Оло, со зэмзэ директорлы оскиз? Малы бен?.." - Нина Петровна, малы тӥ Татьяна Ивановналэн ӵектонэныз соглаш уд луиське? - мурт адямиен музэн вераське Андрей. - Ньыль сю манетсэ берыктэ но ужез быроз. А то следователез ӧтёно, дело усьтоно... Тӥлед но, милицилы но, директордылы но озьы умой ӧвӧл. Асьтэос валськоды, дыр? - Тон мар, Андрей? - Ниналэн синкашъёсыз лобыны турттыса сямен урдӥськизы. - Оло, тон монэ лушкаськись кожаськод? Старшой лейтенант ӵыжектӥз, синъёсыз сапег ныраз мертчизы. Огшап чал-чал пукемзы бере Андрей могӟылыса вазиз: - Вождэ... эн потты, Нина... Уж нимаз, улон ас ӧртӥз мынэ. Мон тыныд юрттыны турттӥсько, соин... Нылмурт милиционер шоры валаны тыршыса, мыр-мыр учкиз. Собере чурт-чурт шуиз: - Мыным юрттэт кулэ ӧвӧл. Мон нокинлэсь, номырзэ ӧй вора! Андрей, сое буйгатыса выллем, пыриськись куараен юаз: - Нош костюм маин басьтӥд? - Бен, басьтӥ со дуно костюмез! Ну и мар?! Уг яра вал-а?! - пуштӥз нылмурт. Андрей нош ик сое басылскыны куриз: - Яра, конечно. Только... - Мар "только"? Ворам коньдонэн басьтӥ, кожаськод-а?! Ӧй! Нош тынэсьтыд таӵезэ ноку ӧй возьмалля. "Моя милиция меня бережёт!, пе. Да тӥ ваньды капчиезъя улыны дышемын! Кивалтӥсь киын власть. Шат солы пумит мынод? - Нина чылкак вожомыса черекъяны ӧдъяз. Быдэс мугорыз куалекъя. Андрейлэн нылмуртэз лекъяськисен адӟылэмез ӧй вал на. Нош туннэ Нина огшоры гинэ уг лекъяськы, со вожомыса пурӟемын. Оло, зэмзэ Нина янгыш ӧвӧл? Нош кин, иське, лушкаськись? Татьяна Ивановна но юнме уз вераськы ук. Со - педагог, дышетӥсь, озьыен, психолог но. Мае ке шӧдыса-валаса ик егит дышетӥсез лушкаськись шуэ? Дуно костюм басбтэмез но абдратэ. Угось таӵе дуно ввузэ Андрейлы но ӧз возьматы. Кышказ, дыр, милиционер соку ик юалляськыны кутскоз шуыса... Котьмар ке но, Нина жаль. Андрей сое яратэ ук, та сярысь ныллы огпол но ӧз вера на ке но. Мурт адями луысал ке, оло, капчигес быдэстысал та ужез. Кӧня ассэ пыкылӥз Андрей, кӧня дасяськиз Нинаен чылкак тодмотэм адямиен сямен вераськыны - ӧз пишмыты. Табере тӥни, вылаз ик, Ниналэн истерика порма луиз. Лушкаськем сяна, лулсэръёсыз но туж лябесь вылӥллям. Кызьы потоно ай таӵе учырысь? Участковой ӝӧк сьӧрысьтыз султӥз. Кисыысьтыз сигаретсэ утчаз, нош кенжытыны ӧз дӥсьты - пӧлыеныз азьчиньыез вискын бергатыса, кысконзэ берен ватӥз. "М-да, начар улон, начар улон, кытчыозь вуттӥськод тон адямиез", - мур лулскиз Андрей. Собере шуак берытскиз но викышъяны дъям Ниналы дэмлаз: - Вот мар, Нина, али мын, дорад берты. Эн куректы, ваньмыз радъяськоз. Нина милиционер шоры паймысагес учкиз. Оло, со ваньзэ валаз? Ма, кызьы нош сотэк: яратӥсь мурт гажанэзлы быдэсак оскыны, сое валаны кулэ. "Ог-огдэ валатэк, сюлэмад бадӟым мылкыд уз улӟы", - индылоз вал нылзэ мемиез. Зэмзэ ик, Ниналэн мумиз но бубиз ог-огзэс валаса, мур гажаса улӥзы. Пётр Ивановичез пыктос эзель вазь куасалтӥз. Нош толэзь талэсь азьло картэз доры Ниналэн мемиез но пыраклы кошкиз. Нэнэзэс ватэмзы бере Ниналэн Микта агаез кыӵе ке бинет мычиз: - Тазэ мемимы тыныд шуыса кельтӥз. Нина бинетэз пертчиз но - отын сю, витьтон манетлыкъёс адӟиськизы. - Кытысь, малы та? - паймем нылмурт синкыли пыр учкиз агаез шоры. Нош агаез сузэрезлы валэктӥз: - Мемимылэн черламез дырысен куинь ар мында тырмиз. Солэсь азьло быдэсак пенсизэ милем сётъяз. Колхозын уждунэз ӝегато бере, ми солэн коньдонэныз улӥм. Нош берло куинь ар ӵоже пенсизэ со кык люкетлы висъялляз: тани та бинетаз понэ но кылемзэ нош ик милем мылетэ. Одӥг коркан улӥськомы бере, мыным нимаз коньдон кулэ ӧвӧл, пе. Ӵем шуылоз вал: "Нина нылы кыдёкын, огназ улэ. Оло, коньдонлы но ёрме. Быгатэмея солы но юрттэме потэ..." Та коньдонэн, сузэре, мемимес тодэ вайылон вылысь аслыд маке басьты. Ӵапак со уксёен ик тямысэтӥ март азьын Нина аслыз костюм басьтӥз вал. Нош Татьяна Ивановна солы вожъяськоно кожам, лэся... - Дугды бӧрдэмысь, Нина. Синкылиостэ адӟыса, мынам сюлэмы вӧсь луэ. Буйгатскы но дорад берт. Номыр сярысь эн сюлмаськы, - нылмурт доры лыктыса, Андрей кизэ солэн пельпум вылаз понӥз. - Иське, тон мыным оскид? - Нина шумпотыса синкылиоссэ ныркышетэныз ӵушылӥз. Андрей солэн синъёсаз янгышам тусын учкиз но... ӧз вазьы. Ныллы пуконысь султыны юрттӥз но сое ӧс дорозь келяз. Нина бӧрсьы ӧс ворсаськем бере Андрей дӥськутэзлэн пуш кисыяз утчаськыны шӧтаз. Толон басьтэм уждунысьтыз ньыльзэ сю манетлыкъёсты нимаз карыса, брюкиезлэн ӟепаз донгиз. Собере ӝӧк вылысьтыз бумагаоссэ ӝогак утялтӥз но, кабинетсэ пытсаса, школа пала дыртӥз... "Оскиз, Ондӥ мыным оскиз! Озьыен, зэмзэ яратэ", - вазь укна ик школае дыртон сяменыз малпа нылмурт. Та малпанэз солэсь сюлэмзэ шунтэ, Татьяна Ивановналэн кезьыт синъёсыныз пумиськыны кужым сётэ. Нина Петровна учительское пырыку Татьяна Ивановна котьку сямен ӝӧк сьӧраз пуке ни вал. - Умой, умой, мусокае. Музьыед азьын сётаки возьыт потӥз, иське? Ярам, ярам, мон та учыр сярысь вунэтыны тыршо, - кескич пальпотӥз директор. - Нош тӥ, Нина Петровна, намотайте на ус: мукет дыръя лушкаськиды ке, уг жаля - ужысь мозмыто, - та кылъёслэсь нылмурт пӧсь вуэн пылатэм кадь луиз. Со али номырзэ уг вла: ма вераны турттэ кивалтӥсь? - Мукет дыръя но, али но мон ӧй вораськы, уг но вораськы, - йырзэ ошыса шуиз егит нылмурт но журналъёсты возён ӝажые сузьтӥськиз. Уг поты солэн та лек кышномуртэн эчешемез но, вераськемез но. - Ӧй вораськы, шуиськод, нош Андрей Сергеевичлы коньдонме берыктэмед, - лек мыньпотӥз Татьяна Ивановна. Тае кылыса, Нина отчыяз ик погра вал. Усемезлэсь кышкаса, матысь пукон вылэ лэзиськиз. - Кыӵе коньдон? Мар коньдон? - мырдэм кылымон юаз со . Йырыз жон вазьыны кутскиз. Киоссэ, пыдъёссэ вырӟытэмез но уг пишмы ни. - Кызьы кыӵе коньдон? - Татьяна Ивановна но абдраз. - Ньыль сю манет. Кык нунал талэсь азьло мынам сумкаысьтым ӵапак сомында ышиз. Так вот, толон, ӝыт пал, участковой мыным ньыль сю манет ваиз. Тӥ, Нина Петровна, со коньдонэз, следствилэсь курдаса, милиционер дусымды пыр берыктоно кожаллям. Мар бен, ӟучъёс шуэмъя, повинную голову меч не сечёт. Валлэн ньыль ке но пыдыз, ито ӵемтылэ. Нош егит адями сьӧлыкатэк уг быгаты. Соин ик мон тӥледды простить кари. Ниналэн директорлы пал кыл но вераны кужымез ӧз кыльы ни. Со вакыт уроке ӧтись гырлы жингыртӥз. Нош нылмуртлэн интыысьтыз вырӟемез уг луы. Учительское чылкак огназ кылемзэ ик ӧз шӧды. Ӝыны час мында онгромыса пукемез бере Нина Петровна каллен султӥз но сэрегысь шифоньер пала вамыштӥз. Туж юн висись мурт музэн дыртытэк дӥсяськиз но учительскойысь кошкиз. Кема юмшаз со Ӵашъем гуртлэн ульчаостӥз. Бадӟым сюрес вылэ вуэмзэ ачиз но ӧз вала. Райцентре мынӥсь автобус нылмуртэ ӝыны час куспын ёрос каре вуттӥз. Аракыен вузкарись магазинэ пырыса, со тӧдьы йыро ӟенелик куриз, собере гуртын кулэ луись арбериосын вузкарисяз кожиз. Автостанцие Нина Петровна бер ӝыт гинэ вуиз. Суйпосысьтыз чассэ учкиз - Ӵашъем вӧзтӥ ортчись берпуметӥз автобус ог час ортчыса гинэ вырӟоз. Огшап малпаськемез бере нылмурт аптека пала вамыштӥз... Патераз со пеймытэн берытскиз. Тыл ӝуатытэк кылиськиз но ӝӧк дорысь пукон вылэ лэзиськиз. Ульчаысь юбое ошем лампочка солэн улонниезлэсь пушсэ но югдытэ. Ӝомо- югдо азьын Нина лушкем бӧрдыса, часлэсь кема пукиз. Собере шуак султӥз но ӧс дорысь пичи ӟус вылэ кельтэм сумкаяз бугыръяськыны шӧтаз. Аракыен ӟенелик сяна, дӥськут ошылон гозы, майтал, маке мында эмъюм поттӥз. Аракызэ но эмъюмъёссэ кыкна кияз кырмыса, со выльысь ӝӧк сьӧры бер ытскиз. Ӟенеликсэ усьтыса, курыт вуэз пушказ огкутскемен кисьтӥз. Кӧня ке минут ортчыса, нылкышно буйгаз. Ваньмыз бус пыр кадь адӟиськыны кутскиз. Шонаськысаӧс пала мынӥз, пичи ӟус вылэ ланьырскиз. Выж вылэ усем гозы бинетэз кияз кема бергатӥз, собере йыркурен кровать улэ зӥртӥз. Шонаськыса, канжаськылыса со выльысь ӝӧк доры вуттӥськиз. Борддорысь выключателез кийыгыиеныз шедьтӥз но патераз югыт луиз. Ӝӧк вылын люкен-люкен кыллись книгаосты, тетрадьёсты палэнтӥз но чылкыт кагаз баме ӝог гожъяны кутскиз: "Ӟеч лу, югыт дунне! Ӟеч кыль, яратоно Андрее! Мон тӥ азьын, гуртоос, ӵош ужась эшъёсы, чылкыт. Янгыш кариськоды ке но, мон вораськись ӧвӧл. Та быдӟа возьытэз чиданы мынам кужыме уг тырмы. Татьяна Ивановналэсь ултӥямзэ чидасал, дыр. Нош тон, Ондӥе, монэ быдэс лулыныд-сюлмыныд уд яратӥськы вылэм... Ӵок, аслам янгыше понна вылӥ Инмар азьын ачим кыл куто. Вождэс эн вае мыным, адямиос. Кызьы быгатӥ, озьы улӥ. Ас тодэмея-валамея кошкисько тӥ дорысь. Вылам мемиелэсь берпуметӥ кузьымзэ дӥсялэ - куреньпыр-сьӧд костюмме. Кулэме сярысь агаелы ивортэ таӵе адресъя..." Гожъянзэ йылпумъяса Нина котыр учкиз - улоннияз ӝикытак интыяськем арбериослы, тау карыса сямен, берпуметӥзэ йыбырттӥз. Собере, сиськонни пала мыныса, вуэн стакан ваиз но ӝӧк вылын кыллись эмъюмез отчы одӥген-одӥген куяз. Аракыез музэн ик, быдэс стакан суретэз Нина гулькак ньылӥз. Собере, дӥськутсэ кыльытэк, пыдкутчанзэ гинэ куштыса, валесаз выдӥз. Султылонтэм вылысь... * * * Нина Петровнаез ватэмзы бере ӵуказеяз участковой школалэн директорез доры лыктӥз: - Татьяна Ивановна, котьмар ке но, лушкаськисез утчаны кулэ. Арня талэсь азьло гожтэм заявленидэс ӧд куштэ на-а? Татьяна Ивановна янгышам мурт сямен сопала-тапала утчаськыны, моганы кутскиз. Милиционер со шоры мыр-мыр учемысь, дарали кадь ӵыжектӥз. Киоссэ кытчы карыны тодытэк, я ӝӧк вылаз кыллись ручказэ кутэ, я сумказэ усьтэ-пытса. - Вождэс эн поттэ, Татьяна Ивановна, но мынам уже сыӵе, - анайлы укшась кышномурт азьын Андрейлы возьытгес йӧтӥз. Нош директор посӥськемысь уг дугды. Ӝӧк улысьтыз мае ке туж тунсыкозэ адӟыны тыршыса кадь пыд азьзэ учке. - М-м-мон тӥледды, Андрей Сергеевич, валасько. Но... Курисько, тӥ но валалэ монэ, - пыриськись куараен кыдёкысен кутскиз Татьяна Ивановна. - Валаськоды-а, коньдон сюриз... Толон... - Иське, дышетӥсьёс йыртэмасьёсты ас кожазы утчазы? - участковой школалэн кивалтӥсез шоры. - Н-ну, м-марым... Чылкак озьы шуыны уг луы. Н-но... Со адӟемпотостэм ньыль сю манетме... м-мон... сумкаысьтым тани та адсконтэм висъетаз понӥськем. Толон ӝыт сумкаям пыри но... пичи молнизэ усьтӥсько, нош отын - коньдон. Вот, озьы но луылэ вылэм, Андрей Сергеевич, - шонере потыны турттӥсь муртлы кельше али директор. Солэсь пыриськись куараен мадемзэ кылыса, Андрей интыяз ик кынмиз. Кӧня ке минут ӵоже ма вераны валатэк пукемез бере со интыысьтыз урмыса султӥз: - Нош Нина кызьы?! Та пумитэ Татьяна Ивановна юн куараен валэктӥз: - Солэсь гожтэтсэ тӥ лыдӟиды ук. Нина Петровна монэн йырин ӧз, тӥледын сэрен кулӥз. Номыр вераны быгатытэк, жӧломем Андрей, пыдъёссэ мырдэм кыскаса, дор палаз вамыштӥз... Александр Черных Вӧсяськон Пермь областьысь Куеда ёросысь Бадӟым Гондыр гуртын улӥсь удмуртъёс вашкала сямъёсты но йылолъёсты тодазы возё на, куд-огез пӧлысьтызы али но возисько. Арлэн вакытъёсыныз герӟаськем вашкала сямъёс но йылолъёс музъем ужъёсъя тупатэмын вал. Арлэн кутсконэз тулысысен лыдъяськиз. Та вакытэ бусы ужъёс кутскылӥзы - гырон-кизён, соин валче "геры поттонэз" пусйылӥзы. Бусые потон азьын котькуд семья гуртаз вӧсяськылӥз, Инмарлэсь ӟеч ю-нянь курылӥз. Нуназе ини, чебер дӥськутъёсын пӧръяськыса, быдэс гуртэн бусые потылӥзы. Котькуд семья кӧня ке сажень музъемзэ гырылӥз но со вылэ тӧдьы ӝӧккышет вӧлдылӥз. Отчы нянь но курег пузъёс тырылӥзы. Собере семьялэн кузёез соосты кияз кутэ но, шунды ӝужан пала берытскыса, Инмарлы вазиське: "Котькуд тысьлэсь куамын модос мед ӝужалоз, тысьёсыз курег пуз быдӟаесь мед луозы, нош туссыя азвесь кадесь". Та вӧсяськем бере нырысетӥ кизён кутске. Тысен ӵош музъем вылэ курег пузъёсты но куязы. Одӥгзэ одно ик сюй улэ согоно, нош мукетъёссэ сиылӥзы. Ю-няньёсты кизьыса быдтэм бере бадӟым шулдыръяськонъёс, вӧсяськонъёс кутскылӥзы. Вӧсяськон дырез чаклаллязы сялакучкылак (кислица) турынлэн вуэмезъя (куартолэзьлэн пумыз). Кӧня ке гуртъёсысь улӥсьёс вӧсь сётыны Барабан шурлэн Буй шуре усён вожаз люкаськылӥзы. Татын чуньыез вӧсязы, кузэ но лысьӧмзэ шуре куштылӥзы. Инмарлэсь куризы кезьытъёслэсь палэнтыны, бус медаз вӧлскы, шуръёс, ӧрысьтызы потыса, пудоосты медаз выйытэ, чорыг мед шедёз. Веник тӥян азьын озьы ик вӧсяськылӥзы но пудо-живот вӧсяллязы. Сӥзьыл бусы ужъёс бырем бере "курыськон" кутскылӥз. Тупатэм нуналэ быдэс семьяен вӧсяськылӥзы. Корка кузё Инмарлы вазиське. Ӝытлы куноос люкасько. Ӝӧк выл тыр сиён-юонъёс дасямын. Шулдыръяськон куинь нунал ӵоже мынэ. Одӥгаз коркан пукыны акыльтэ ке, мукетаз мыно. Пуко, верасько, кырӟало, шулдыръясько. Егитъёс ӵош люкаськыса экто-кырӟало. Праздник нуналъёсы удмуртъёс котькуд нунал мунчоын пыласькизы. Ӝытъёсы одӥгаз шуныт мунчое пукыны егитъёс люкаськылӥзы. Озьы ортчылӥз куинь нунал. Куноос кошкем бере тодазы вайылӥзы кулэм муртъёсты. Табань пыжылӥзы, сур пӧзьтылӥзы. Сиськыны кутскемлэсь азьло табаньлэсь люкетсэ но сурез пу ӵашае тырылӥзы. Сое, кулэмъёсты но сиыны, юыны ӧтьыса, пельпум вылэ пуктоно вал. Мукет ӵукнаяз кузё кышно сӥльын шыд пӧзьтэ, ӝӧк вылэ потон азязы вань "лыктэмъёсты" куноя, мукет куриськонозь кӧттыро, пе, мед улозы. Собере коркась жуг-жагез ӧс пала ӵуже но куриськонэ "лыктэм" вань ӵыжы-выжыосызлэсь лулзэс потыны куре. Жуг-жагзэ гидкуа сьӧры куштэ, озьы со "кунооссэ" келя. "Куриськон" берегес ик ортчыто вал одӥг нуналъем вӧсяськон. Таяз ини гуртоос гинэ люкаськылӥзы, палэнысьёссэ ӧз ӧтьылэ. Вӧсяськон дыръязы уртче кариськыса басьтэм чуньыез вӧсяллязы. Вӧсяськон нуналлэсь азьло вӧсясьёс но соослэн юрттӥсьёссы быдэс уй ӵоже урам шоры тылскем ӝуатылӥзы. Ӵукна калык люкаськыса ини татчы чуньыез ваё, бышкалто. Ӝытозь вӧсясьёс сое пӧзьто. Нош ик калык люкаське. Чуньы сӥлез ваньмызлэн тэркыосазы люко. Вӧсясь аслаз тэркыеныз азьпалаз потэ но Инмарлы вазиське, нош люкаськемъёс музъемозь йыбыртъяло. Вӧсяськем бере ваньзы чуньы сӥлез оскалто. Вӧсясь аслаз тэркыяз люкаськемъёслэсь коньдон бича. Со пудо-животэз вӧсяны но куанер улӥсьёслы мынэ вал, соин ик Бадӟым Гондыр котырын кураськисьёс ӧй вал. Вӧсям чуньылэсь кылем-мылемъёссэ егитъёс одӥг азе биняллязы но огназ сылӥсь кыз вае ошылӥзы. Нош асьсэос кырӟанъёсын гуртазы бертылӥзы, урам шорысь тылскемез но кысо вал. Дӧдьы сюрес кылдэм бере Бадӟым Гондыр котырысь гуртъёсын улӥсьёс нош ик огъя вӧсяськонэ люкаськылӥзы. Вӧсяськон интызы Барабан но Сухая Кырга вискысь арамаын вал. Отын удмуртъёс вашкала дырысен ХХ даурозь вӧсяськылӥзы, сое исаны, сантэманы уг яра вал. Вӧсясьёс но соослэн юрттӥсьёссы азьло ик вӧсяно пудо- животъёсты дасяллязы: тӧдьы кунянэз, тӧдьы чуньыез но тӧдьы ӟазегез. Куинь-ньыль тылскем ӝуатылӥзы. Котькуд пудо-животлы - нимаз тылскем. Йыраз изьы дӥсяса, вӧсясь кияз чабей пызьлэсь табань кутэ, шунды ӝужан пала берытске но Инмарлы вазиське. Куаразэ зол поттыса, кырӟаса сямен, со вера аслэсьтыз куронъёссэ. Нош куре со Инмарлэсь ю-нянё улон, тазалык. Тылскем доры люкаськем калык изьыостэк, пыдесъяськыса сылэ. Берпуметӥ кылзэ ваньзы ӵош верало: "Аминь". Со куспын вӧсясьлэн юрттӥсез пудо-животэз миське но керттылэ. Нош вӧсясь киысьтыз няньзэ писпу улэ понэ, сое ӟустариен шобыртэ, кияз ньӧр кутэ, нош со вылэ тӥрез интыя, собере выльысь вӧсяськыны кутске. Вӧсям пудо ӟеч, пе, мед луоз. Ньӧрлэсь пичи люкетъёссэ вандыса, тылскеме но палэнэ куштэ. Собере со ньӧрез, музъем вылэ поныса, тӥрен ӵогоно, тӥр музъеме ик мед кылёз. Та сям вӧсь сётонын нимысьтыз инты басьтэ. Озьы шайтанэз кышкатыны турттылӥзы, дыр, вӧсяно пудолэсь палэнтыны тыршылӥзы. Собере вӧсясьлэн юрттӥсез пуртэн вандэ вал пудо-животэз, вирзэ тусе виятэ. Нырысетӥ шапыкъёссэ вӧсясь пуньыен кисьтэ тылскеме, собере матысь писпуосы кисьта на. Нош ик ваньзы вӧсясько. Мукет тылскем дорын тазьы ик вӧсяло мукет пудо-животэз. Ваньмыз пудоос кыӵе ке но инмарлы сӥземын вал: чуньы - Инмарлы, кунян - шундыын улӥсь Инмарлы, ӟазег - Бадӟым Ангеллы. Пуртыосын сӥль пӧзён сямен, адямиос пумен трос но трос люкаськылӥзы, ваньзы кыӵе ке но сиён-юонэн. Вӧсян тылскем дорын киоссэс лымыен ӵушыло, кисыысьтызы уксё поттыса, зипун сӧзулзы пыр вӧсясьлы сёто, собере пыдесъясько. Сӥль пӧзем бере вӧсясьёс йырзэ но пыдъёссэ потто, нош ик вӧсяськыны кутско. Ваньмыз пыдес вылазы сыло. Вӧсяськем бере ӝук пӧзьтыны кутско. Люкаськем калык нырысь йыр-пыдысь сӥльзэ сие, собере - сӥлез но ӝукез. Озьы кыстӥськиз ӵукнаозь. Лыоссэ бунэн керттылӥзы но писпуос борды думылӥзы. Бун сисьмыса усем бере лыосты тылскемын сутылӥзы. Гуртазы кошкон азьын эшшо одӥг пол вӧсяськылӥзы на. Вань вӧсяськонъёсы удмуртъёс тӧдьы дӥськутъёсын ветлӥзы, кутъёс кутчаллязы. Гербер Тулыс ужъёсты быдтэмзылы шумпотыса, гуртоос люкаськозы вылэм гербер (геры бер) нерге ортчытыны. Лымшор удмуртъёс та йылолзэс гершыд (геры шыд) шуыса нимало. Чаклалэ али: макем чебересь кылъёс та. Тулыс гырем-киземлы сӥземын со. Тулыс ужъёссэс быдтэмлы шумпотыса, турнаны потон азьын адямиос ог-огенызы адӟисько, пӧртэм ужъёс, улон-вылон сярысь куспазы кенешо. Гужем пӧсь ужъёс ке вуо, гурт калыклы тазьы огазе люкаськыны вис уг шедьы ни. Гершыд кутскон нуналэ бӧлякен вӧсьнергее ветло. Собере юондыр кутске. Кык-куинь нунал ортчыса, вӧсяськон кутске. Юэм муртэ отчы пырыны уг лэзё. Вераны вунэтӥськем: вӧсьнерге, шур кошкемъя ке чаклано, вулы пумит выллань мынэ. Уллапал урамъёсысь бӧлякъёс доры пыраса, ваннапал (выллапал) бӧлякъёс доры тубо. Ӵошатоно ке, кисьтон дыръя, уллань мыно коркась корка пыраса. Вӧсьнергее ветлыны потэмлэсь азьло (нуназе) котькуд кузё куалаяз инмарлы, куазьлы, мукылчинлы йыбырттэ, тулыс ужъёс ӟеч ортчем понна тау каре. Гуртэн гершыд вӧсяськонэ вить нунал ветло. Котькуд нуналаз музон интые ньылетӥ эстӥсько. Пудо вандо, гурт калыклы шыд пӧзьто. Котькуд нунал нимаз вӧсь: Шундылы, Куазьлы. Куинетӥ нуналаз - Мукылчинлы, мукет сямен вераса, сюдӥсь- вордӥсь аныкай музъеммылы. Ньылетӥ нуналаз - быдӟым йыбырттон. Кинлэн семьяяз кулэм мурт вал, ар ортчемын ке ӧвӧл - соослы йыбырттонэ пыриськыны уг яра. Витетӥ нуналаз Акташлы вӧсясько. Та мифологической героймы сярысь мон номыр уг тодӥськы на. Оло, удмурт калыклэн вашкала историяз та адями тодмо кивалтӥсь, эксэй, оло, йӧно тӧро вылэм - кин тодэ, ма понна та ним вӧсяськонэ пыремын. Ас тусызъя со инмар нимлы уггес кельшы, адями нимлы тупа кадь потэ мыным. Куатетӥ нуналаз - уллань сиён. Гуртлэн шур кошкемъя уллань палаз та нергеез ортчытыны писпу вань. Со дорын сиён пӧзьто (ӵем дыръя ӝук), одӥг пересь мурт вӧсяське, собере кулэмъёслы куясько, вераськыса пуко, сисько. Тӥни озьы тулыс ужъёсыз йылпумъянлы сӥзем праздник йылсаське. Берло дыре та йылол интые ортчытъясько гырон быдтон шуыса нимаськись праздникъёс. Гырон быдтон арысь аре бездытгес ортчылыны кутскиз ини. Азьлогес та праздникез Алнашын ортчытъямзэс адӟылэме вал. Куд-ог ар сое "Гырон быдтон", куд-ог ар "Кырӟан праздник" шуылӥзы. Отын туж шулдыр вал. Базар, ӵошатсконъёс, пӧртэм серемес шудонъёс, валъёсын ворттылон, парашютистъёс но тэтчало вал та праздник вадьсы. Пиналэз но, мӧйыез но аслыз ярамон, шумпотымон вадессэ шедьтылӥз праздникын. С. Виноградов, Удмуртиысь калык художник. Гуждор Котькуд аре удмурт калык лудэ потонэз бадӟым мылкыдын, чидатэк возьма вал. Оске вал: Инмар туэ юрттоз трос ю-нянь басьтыны, дырыз дыръя зор усёз, шунды но кулэ дыръя инмын пиштоз, уз погырты кизем юэз сильтӧл. Соин ик котькуд аре, нырысь гуждор потыку, калык люкаськылӥз гурт дорысь бадӟым писпуос улэ Инмарлэсь куриськыны-вӧсяськыны. Кудӥз удмуртъёс та юмшанэз ортчытылӥзы йӧ келянэн ӵош, кудӥз геры поттонэн ӵош, кудӥз пырак нимаз. Та праздникез калык туж яратылӥз. Сайканы кутскись инкуазь гинэ но мылкыдэз туж вылэ ӝутылӥз. Тани вордскем Сюмси ёросысь Вылынгуртам сое ортчытылӥзы бадӟымесь кык кызьпуос но кыз дорын Ягонюр тыэн артэ. Вӧсяськем сяна, паймымон шулдыръяськылӥзы, ӵошатскылӥзы. Кылем даурысь этнографъёс та праздникез эскерылӥзы пӧртэм интыосысь. Б. Гаврилов сое гожъяз лымшор пал удмуртъёслэсь, соин ик сое нимаз акашка, отын угось озьы нимало вылэм. Шор но уйпал удмуртъёслэсь та юмшанзэс гожъязы Н. Первухин но Г. Верещагин. Н. Первухинлэн гожъямезъя, котькуд праздник азьын удмуртъёс мунчое пырылӥзы, тӧдьы дӥськут дӥсяллязы. Вандылӥзы тӧдьы ошпи яке тӧдьы тылобурдо. Со пудоез басьто вал, котькудӥзлэсь уксё люкаса. Гуждор нуналэз ортчытыны бырйылӥзы гурт кенешын, куазез чакласа. Пересьёс угось валало вал, ку луоз шуныт, шундыё нунал. Праздник нуналэ ӵукна ик пыжылӥзы табань, шекера, кутэм няньёс. Нуназелэсь азьлогес мыно вал лудэ. Нош сӥлен ӝук пӧзьтӥсьёс ӵукна ик кутскылӥзы ужзы борды. Нуназе ёросын вӧсясь шунды пала учкыса кутскылӥз Инмарлы вӧсяськыны. Куд-ог интыосын вандылӥллям така но. Н. Возисов. * * * "Гуждор" праздник ортчытэмын вал 1994 арын куар потон толэзьлэн сизьыметӥ нуналаз Завьялово ёросысь Ильинск селоын. Сётӥськом солэсь ортчон радзэ. Праздникез нуись: - Ӟечбуресь, гажано эшъёс, вӧсясьёсмы, ӧтем куноос! - Ӟечбуресь, иськавынъёс но бускельёс, покчи эшъёс но песянайёс! - Ми тӥледыз ӟечкыласьком асьме музъемлы, инкуазьлы сӥзем праздникенымы - "Гуждоренымы". - Та праздникмы мед юрттоз удмурт калыкмес герӟаны, огазеяны. - Инмарлы, инкуазьлы вӧсяськом, йыбырттом, умой, азинлыко улонмы понна, ӟеч музъем ужъёсмы понна, тазалыко но ог-огмес гажаса, яратыса улон понна, котьку но валче улонмы понна. Каллен чузъяське удмурт крезьгур, собере ик кылбур: Учке али, кыӵе шулдыр Кам дор! Озьы югдэ буртчин улэп гуждор. Со шундылэн ненег вож нылпиез, Улонмылэн бадӟым шумпотонэз. Гуждорен ӵош лыктэ улэп югыт, Кышкатскыса кошке ӟырдыт кезьыт. Улӟе улос, улӟе мӧзмем сюлэм, Гадь тыр ни шокчиськод дун омырен. (Г. Романова) Верасько учёнойёс, этнографъёс, удмурт культура дэменлыкын ужасьёс но мукетъёсыз. Лыктэм калыкез ӟечкылало "Гуждор" праздникен, удмурт калыклэн вашкала сямъёсыз сярысь верало. Тулыс но Шунды (ныл но пи, праздникез нуисьёс) ӧтё калыкез вӧсяськон интые, кытын пӧзе инмарлы сӥзьыса вандэм пудо сӥлен ӝук. Пиос но нылъёс, пичи пиналъёс кырӟало вӧсяськон азьын инкуазез данъян кырӟан. Кутске пи: Гурт сьӧрысь лудъёсын Лымыос шуназы. Луд вадьсын Тюрагай тюргетэ. Припев: Тыро улон, шудо улон, Ой, вай, шунды, Ой, вай, Инмаре! Нюк дурысь писпуос Сайказы кӧлэмысь. Кыр мушъёс Бадь вадьсын бызгето Припев. Шундылэн тылсиез Улӟытэм ни тэлез. Бурдоос Дугдытэк ӟильырто. Припев. Шуныт зор усиз ке, Пӧсь шунды потаз ке, Осконо: Ю-няньмы удалтоз. Припев. Лобало ке мушъёс, Азбар тыр пудоос, Чечы-сӥль Ӝӧк выл тыр ик луоз. Припев. Кырӟан бырем бере, ас интыязы султо вӧсясьёс. Соос нырысь ик шунды пала яке шунды ӝужан пала учкыса вӧсяло лыктэм калыклэсь сиён-юонзэ, кудъёсыз тыремын радэн-радэн ӵушкон яке ӝӧккышет вылэ. Выль лыктэм калык султэ вӧсясьёс бере: нырысь радъёсаз - пиос, беразы - нылкышноос. Нырысь вӧсяло няньлэсь пӧрамъёсты, пыжиськемъёсты, собере - сӥлез- вӧез, бӧрысь - юонъёсты. Вӧсям бере котькуд сиён-юонлэсь пичи люкетсэ тыро пу тусьтые. Вӧсясьёс, веръямзы бере, сиён-юонлэсь оглюкетсэ поно тылэ, мукетсэ, бодыен гоп лэсьтыса - музъеме, Му-Кылчинлы но кулэм пересьёсты буре вайыса. Вӧсясьёс Инмарлы вазисько таӵе кылъёсын: "Остэ, Инмаре, Бадӟым Инмаре, Инмар-Кылчинэ (йыбыртто). Ю-няньмы туэ мед удалтоз. Одӥг тысьысь куамын куро, одӥг куроысь куинь сю кидыс. Культо культо вӧзы, кабан вӧзы кабан, остэ, Инмаре. Ю-няньмы ваньмыз кеносэ мед вуоз. Пудоосмы трос мед пиялозы, одӥгез но медаз быр, гидэ пыртыкумы мумыоссы быдӟа мед лоузы. Остэ, Инмаре, Бадӟым Инмаре, Инмаре-Кылчинэ (йыбыртто). Тэльёсын пӧйшуръёс, шуръёсын чорыгъёс, ягъёсын тылобурдоос котьку трос мед луозы. Остэ, Инмаре, Бадӟым Инмаре, Инмаре-Кылчинэ (йыбыртто). Уть гидкуазьмес ьылпулэсь, сильтӧллэсь, асьмеды но пудоосты - висёнъёслэсь". Озьы ик вӧсяло пудолэсь вирзэ, гонзэ, вандэм азьысь лызэ-сӥльзэ, пӧзьтэм сӥльын ӝукез. Вирез вӧсяку но шуо: пудомы сӥлё-виро мед луоз. Гонэз вӧсяку: гуртамы та гон мында пудо мед луоз. Сӥлез вӧсяку: лы борды тросгес сӥль мед быгыльскоз. Отӥяз сётӥськом куриськонъёсты, кудъёсыз басьтэмын "Специфика жанров удмуртского фольклора" сборникысь (Ижевск, Удмуртский институт истории, языка и литературы УР ОАН СССР, 1990. - 152б). * * * Остэ, Инмаре-Кылдысинэ, кизем-пакмем юэз ожо сяен ожматсалыд ке, бадьпу сяен пушмытсал ке, кызьпу сяен тэлеӟытсал ке, коньы бызьымон, сёр бызьымон нюрпычкыса сётсал ке, октон-калтон дыръя культо вӧзы культо ке пуктысал, чумолё вӧзы чумолё ке пуктысал, пыртэме ваён дыръя дас кык йыло кабан ке люкаськысал, обиньысь ваён дыръя коскиен вайса быронтэм тыр дэлеттэ-берекеттэ Тон ке сётсал; сусекъёс улласянь пуньырӟымон, вылласянь тудӟымон, будӟын эксейлы выт-корс тырымон ваньбурдэ Тон сётсал ке, сюмысо урысэзлэсь утьса вордысал ке, жильыё кортэзлэсь утьсал ке; бызён-потон дыръя бӧрысь уиськисьлэсь, пумиь пыкиськисьлэсь утьсал ке; пыдын ӵемтэмлэсь, кылын янгышамлэсь утьсал ке. Тулыс вапумен пудодэ-животтэ бусые поттон дыръя выжылэсь, нюк-гоп дэрилэсь, сьӧсьлэсь-каблэсь, лул ке - пӧськылэсь, черлэсь-чурлэсь, лыктэм кыльлэсь-дэйлэсь утьсал ке; гид тыр, луд тыр карысал ке. Гужем нуналэн шуныт-лэськыт нуналъёстэ ке сётсал, небыт зоръёстэ сётсал ке, сильтӧл, лек зоръёсыдлэсь утьсал ке. Оло азьло вераноез сюриз, оло берло вераноез сюриз, милесьтым мулят тэмес ачид ӵошкаты. (Остэ, Инмар-Кылдысин, если бы брошенному-засеянному нами зерну ты дал зазеленеть, словно сходам травы весной, если бы взошло-разрослось (оно), словно поросль ивы, если бы пошло в рост (оно), словно молодые берёзы, если бы соломины наклонились так, что по ним могла пробежать белка, могла пробежать куница; когда мы выйдем убирать его, пусть встанет сноп к снопу, суслон к суслону; когда станем их складывать, пусть сложится кабан о двенадцати верхушках; если бы ты сделал так, чтобы хлеба наши из овина на волокушках нам возить-не перевозить; если бы сусеки наши с верхом наполнились; если бы ты ниспослал нам достаток, чтобы выплатить все долги, если бы ты уберег нас от дурного-черного взгляда, вослед смотрящего, уберег бы, если бы ты от дурных-черных помыслов, встающих у нас на пути, уберег бы. Как бы не споткнуться нам, как бы лишнего не сболтнуть. В весеннюю пору, когда скот на луга выводим, от кореньев, трясины-оврагов, хищников-зверей, душу если - от нарывов-болячек, болезней-напастей, сохранил бы если; полон хлев, полные луга если бы сделал. В летнюю пору теплые, мягкие дни если бы ты ниспослал;мягкие дожди если бы ты ниспослал, от бурь-гроз если бы уберег. Т, что раньше сказать надо было, произнеслось ли то, что позже надо было сказать, произнеслось ли, наше новедение сам выпрями-упорядочь). * * * Рстэ, Инмаре, Воршудэ, будӟым мудоре, Кылчсин-Инмаре, выль шыдэныд-няненыд тонэ буре ваисько! Тырез-бусэз аслыд мед луоз, сыркез-югез будӟым эксэйлы вытсэ сётны мед кылзё! Будӟым эксэй ӟеч мед улоз, вузме вузаса сётэм вытме чаль мед берыктоз! Кизем юме-няньме узыдэ-борыдэ сеэн кисьматы-муляты! Куамын ке, выжыё кар, сюрас ке, тысё кар, азвесь ке, шепо кар, зарни ке, тысё кар! Шуныт зордэ ачид сёт, лымы толдэ ачид сёт, ӟеч ардэ ачид сёт! Уй ке, дауэдлэсь ачид уть, сӥль ке - дауэдлэсь ачид уть, намер ке, пильмыдлэсь ачид уть! Итыме пыртон дыръя, дас кык ар вылэ кабан сюрмон кар; вылласянь понсэ, улласянь пуньыр потмон кар, вылласянь пачыл потмон кар; кутэсэн шуккон даръяз, тысен-муэн мытмон кар; кенос кож пушказ сюлыс басьтыса, сюлыс выжтымтэ вылэ кар, пуж басьтыса, пуж выжтымтэ вылэ кар! Пӧйшур доры мыныкы, пуныме узатон дыръяз, пыдын ӵабтон, нырыз сузен вылэ вутты! Тэле мыныкы, узыр ямъё силёе мыныкы, чаркме-налькме туго быжо вылэ вутты! Ныро пыженыд гылтыса ваем сеэн сёт, Инмаре! Ӟечтэ сёт! шунды ӝужантӥысь нимаса-донаса шунды пуксёнтӥозь кылӥсьлы кылымон, адӟисьлы адӟымон кар! Вылӥзэ лобыса лыктэм кыльлэсь, улӥзэ бусые пырем кыльлэсь, муръё тушмонлэсь ачид уть: янгыш пыдлэсь, гижыё гижъяськемлэсь, вайыжо вайыжаськемлэсь ачид уть, Инмаре! Куамын ке пасьта, азбар кутмон кар, сипуж ӝужда кыедо улмон кар! Азбарад сётэм нылыдлы-пиедлы, зоро пӧськыед сэен, ӟибыль-ӟабыль карыса улны-вылны еч шуддэ- бурдэ сёт! тупала сизьым сётэм ныло-пиё кар, тапала укмыс басьтэм кено-менё кар! Вазь адкем кузэн-палэн ачид уть, вазь вордкем нылын-пиен ачид уть! Остэ, Инмаре, валдэ, урдэс ке, чуньыен сёт, пыдыз юрго вылэ вутты, нырыз сюмъё вылэ вутты! Искалдэ, урдэс ке, куняно вылэ вутты, ӵышкыны гоно-туро вылэ вутты! Жагдорме чипыен-куреген сёт! вувылме ӵӧжен-ӟазеген сёт! Талэсь бадӟым уг тодкы вӧсяны, ачид кельы-вайы, Инмаре! (Остэ, Инмар. Воршуд, великий Мудор, Кылчин-Инмар, новыми яствами (букв. Супом- хлебом) тебя добрым вспоминаем, лучшаЯ часть (букв. Зрелое-полное) для тебя пусть будет, худшая часть (букв. Слабое-недозрелое) для великого царя подать платить пусть останется; великий царь пусть добром будет; (за счет) проданных мною товаров выплаченную подать быстрее пусть возвернет. Посеянный мною хлебом словно землянике-клубнике дай дозреть; да будут (они) о тридцати корнях, о двенадцати коленах, о тысяче зерен, с серебряными колосьями, с золотыми зернами! Теплых дождей сам нисмпошли, южных ветров сам ниспошли, хороший год сам ниспошли; от северных вихрей чсам ниспошли, от бурь-ураганов сам сохрани, от грозовых-зловещих облаков сам сохрани! Когда заполняются овины сделай так, чтобы поставить клади на двенадцати стойках, чтоб (овины) снизу сплющивались, а сверху переполнялись; когда молотить начнем (цепами ударим), чтобы зерно-медом зачиналось; когда в закрома пойдем, чтобы лотком не переносить, ситом не пересеять! Когда на охоту пойду, собака моя, зверя гонящая, пусть носом почует, пусть лапой дотянется, когда в леса пойду, пусть в силках-капканах моих будут те, у кого хвосты пушисты! Словно на лодке, пусть приплывут ко мне, Инмар! Добро ниспошли! От восхода до заката солнца слышащий да обо мне услышит, видящий да меня заметит! От недобрых слов, от проклятий-напастей, от нечисти-скверны, от неверного слова, от неверного шага, от острых когтей, от поперечных оглоблей сам сохрани, Инмар! Да будет мой двор о тридцати саженях, да будет навоза толщиной с сито! Ниспосланным мне дочерям-сыновьям, словно птенцам ласточки, шебеча, жить-пожить да удастся! Выданным в чужие края семерым дочерям детей ниспошли, девятерых снох в мой дом нимпошли! Впервые увиденную жену-женщину сохрани, детей-первенцев сохрани! Остэ, Инмар, жеребая кобыла жеребенка да принесет, пусть иноходцем будет, пусть со звездочной во лбу будет! Стельная корова теленочка принесет, пусть масляною будет, пусть молочною будет! Суягняя овца ягненка принесет да принесет, пусть шерстью стрижется, пусть руном стирежется! Двор мой цыплятами-курицами заполни, реку (букв. Воду) мою гусями-утками заполни! Больше этого и испросить не знаю! Сам реши-рассуди, Инмар! * * * Сиён-юонэз вӧсям бере, ваньмыз мыно лудэ, кытын дасямын межа (гыре гуртысь самой мӧйы, гажано адями). Бадӟым вӧсясь, буям курег пузъёсын сураса, со музъеме кизи йыды, чабай яке сезьы. ("Ю-тысь курег пуз быда ик бадӟым, тыро, ӵуж мед луоз" шуыса кизе). Пиналъёс соку ик со курег пузъёсты бичало. Кизьыку егитъёс кырӟало: Чаляк буды, сезьые, Таза луы, сезьые. Куаръёсыд потэм бере-е-е, Шуныт зоред мед усёз. Ӝужыт буды, етӥнэ, Тысё луы, етӥнэ. Сяськаед ӝужам бере-е-е, Шунды ӵемгес мед пиштоз. Ваё буды, кӧжые, Весь кадь луы, кӧжые, Куаръёсыд потэм бере-е-е, Шуныт зоред мед усёз. Мульый буд, кияре, Бадӟым луы, кияре. Сяськаед ӝужам бере-е-е, Шунды ӵемнес мед пиштоз. Чаляк буды, дыдыке, Чебер луы, дыдыке. Йырсидэ пунон вуоз, Тонэ бускель куралоз. Кизем бере ортче вылэм берпуметӥез обряд - серемес религиозной шудон - "тау карон". "Тау карон" Тужгес кужмо, бадӟым мугоро пиосмуртлы сёто ошлэсь быжзэ. Та пиосмуртэз "ошпи" нимало. Со быжез кутэ но бераз сэзъяса возе, йырзэ мыкыртыса, ош сямен бурсэ. Ӝӧксьӧрлэн тӧр солы сюмыке кумышка поныса ӧте: "Тпрукань-тпрукань, ошпи, ме ю-ю- ю". "Ошпи" бӧксыса лфыктыны кулэ ӝӧк доры, быжзэ кык киыныз ик бераз возьыса, сюмыкысь кумышкаез ымыныз юыны турттэ. Нош солы озьы гинэ юыны уг сёто: донгало но, серекъяса быжтӥз но кыскало. "Ошпи" йыркуреныз соосты быжыныз жуге. Кызьы но озьы юыны быгатэм бераз, ваньмыз пуксё утялтӥськыны. Таин быре юмшанлэн курон-вӧсяськон люкетэз. Вань мылкыд карисьёс няньзэс вӧсятэм бере интыязы берытско. Сӥлен ӝукез вӧсям бере, вань калыкез ӧтё ӝук сиыны. Со вакытэ нош ик чузъясько удмурт крезьгуръёс. "Гуждорлэн" кыкетӥ люкетаз орчт шулдыръяськонъёс: пиос нюръясько, нылъёс круген шудо, кырӟало. Чузъясько удмурт калык кырӟанъёс, арганчиос шудо, калык эктэ, шулдыръяське. Праздникез нуись: Кизили усиза-, Арган гур улӟиза-, Яратон лыктӥз-а куное? Небыт уй тӧлэн-а, Югыт оолэзен-а Ӵошатом тонэ мон, дуно? Кытӥ меда, кытӥ, Кыӵе сюресъёстӥ, Ваиды дорам та гажанэз? Уӵыё садын-а, Шулдыр возь вылын-а Нырысьсэ валай уй гужемез? (В. Возняков) Тросэз адями яоатонэз нырысьсэ вала, тулыс инкуазь улӟыку, гуждор потыку. Кырӟанмы но со сярысь. Гуждор потыку Шур дуре но васькыса но, Ӵуж пучыослы пайми. Ӵуж пучыослы пайми но. Йырсидэ тодам ваи. Припев: Гуждор потыку, сурсву вияку, Тонэ пумитай возь вылын. Возь вылтӥ но ветлыкум но, Италмаслы синмаськи. Италмаслы синмаськи но, Айшеттэ тодам ваи. Припев. Нюлэс дуре мыныса но, Инвожолы синмаськи. Инвожолы синмаськи но, Льӧль бамдэ тадам ваи. Припев. Бакча бере мыныса но, Вож кызьпулы пайми. Вож кызьпулы пайми но, Дэремдэ тадам ваи. Припев: Узы вуыку, веник тӥяку, Тонэ чупалляй со улын. Праздникез нуись: - Гажано эшъёс! Тырмоз пукыны. Учке ай, бубылиос-майсыос кыӵе шумпотыса бергало сяськаос вадьсын! Асмеос но бергалом. Ваньмыз шудӥсьёс султо круге но мыто "Серга-берга" кырӟанэз. Припевзэ кырӟаку, кыкен-кыкен кунулскыса, интыязы бернало. Серга-берга Сиын-юны тырмоз ини, Шаермес шулдыртоно. Возь вылэтӥ бубыли кадь Асьмелы но бергано. Припев: Серга-берга, Кузьма-возьма, Илля-улля ми пала. Тюрагае, чингылие, дугдылытэк кырӟа вал. Пинал мылкыд - юмал йӧлпыд - Весь кырӟаса эктысал. Припев. Ой, чуньые, чупрес куке, Берло-азьло ворттылы, Туган-эше, сьӧрам бызьы - Быгатод-а кутыны. Припев. Праздникез нуись: - Тани шунды-мумы но пилем сьӧрысь потэ ини, праздникмылы шумпотыса. Куром солэсь кизён дыръя ӵемнес потаны, лудамы дыраз шуныт вайыны. Эктом-кырӟалом со понна. Шунды-мумы Шунды-мумы, вай шуныт, Милемды эн вунэты. Лымы шуназ, зор ортчиз, Дыр вуиз ни кизьыны. Сяртчы-сугон мерттомы, Ӟазег пуз быдӟа будоз. Кенакмы ву киськалоз, Чылкыт-чебер со луоз. Шунды-мумы, вай шуныт, Милемды эн вунэты. Буртчин турын нап будоз, Искалмы трос йӧл сётоз. Чипыос шумпотозы, Тросгес нымы шедьтозы. Ӟазегмы соку эктоз, Пиоссэ шуре нуоз. Кутске макаръяськыса шудон. Воргорон: Эк, кыӵе мынам Оринае мусо, чебер! Кытчы пырид, нуныкае? Мар гинэ мон тыныд ӧй вайы, ойдо, шудом-эктом, собере котьмазэ сёто, мусое. Ӟечыран дорын кырало: Оринае, лык дорам Пиос: Оринае, лык дорам, Сутэр-эмезь кудыям. Сутэр-эмезь кудыям но, Пушмульые кисыям. Припев (кырӟало нылъёс): Пӧяськод ке, Педоре, Мышме адӟод табере. Мышме адӟод табере но, Котьма кар ни собере. Ӧд ке пӧя, Педоре, Ӟыгырском ни табере. Ӟыгырском ни табере но, Котьма кар ни собере. Оринае, лык дорам, Сяла-дукъя песьтэрам. Сяла-дукъя песьтэрам но, Нош коньые кисыям. Припев. Оринае, лык дорам, Выль катае пуйыям. Выль кате пуйыям но, Чыртывесе кисыям. Припев. Оринае, лык дорам, Шудо луод мон вӧзын. Шудо луод мон вӧзын но, Шунды луод коркаям. Огез бӧрсьы мукетыз фольклор коллективъёс возьмато удмурт кырӟанъёсты, эктонъёсты, хороводъёсты, ваньмыз ӵош шудо, кырӟало. Кутско спортъя ӵошатсконъёс но. Пото нюръяськисьёс, мешокен бызьылӥсьёс, кор вылтӥ ветлӥсьёс, писпуэ тубасьёс, маскара эстафетаосын бызьылӥсьёс. Ваньмызлы соослы дасямын кузьымъёс, ӵошатсконъёсты ортчыто котькуд удысэз тодӥсь-валась судьяос. Таин праздник йылпумъяське. Лыктэм куноос тау каро праздникез ортчытӥсьёслы. Ёросысь коллективъёс кунооссэс кырӟаса келяло, ӟеч сюрес но умой ужъёс сӥзё. Дасяз З. Никитина, Республикаысь калык творчествоя но культпросвет ужъя научно-методической центрын ужась. Гур шуккон веме Гурт калык вемеос малы ке куартолэзегес ортчытъя вал. Соку ю-нянь кизьыса быдтэмын луэ ини, турын турнаны но вазьгес на. Басьтом тани гур шуккон вемеез ик. Тодмо уго, али гур уг шукко, кирпичлэсь тыро. Нош вашкала дыръя мукет сяменгес лэсьтылӥзы. Гур шуккон вемее кузё ог дасо кужмо воргоронъёсты люка вал. Лябез адями отын кема ӧй чидасал. Уж секыт, кужымез кулэ каре. Огез-а, кыкез-а ас валэнызы юрттыны лыкто. Угось гур лэсьтыны трос горд сюй ворттоно луэ. Со сюез кыдёкысь ваёно - огшоры горд сюен ӟеч гур уз пӧрмы. Умой лякиськисьсэ шедьтыны тыршо вал. Со пӧлын одно ик нӧкы кадь тӧдьы сюй мед луоз. Гур но пичи уг лэсьто вал. Корка пушкын со бадӟым гинэ инты басьтылӥз. Гур шуккыны коркалэн кузёез азьвыл ик инты дася. Зӧк пулъёслэсь ящик кадь каб лэсьтэ. Отчы сюй тыро но собере пу молотэн зол тышкало. Со вылэ кыкетӥ формат понӥське - гурлэн пушкыз кадь. Висказы пичи горд сюй тырыса, нош ик молотэн тышкало. "Тук-так, тук-так", - шуккиське котырак гурт кузя. Куинь адямилы гинэ ӵош тышканы инты тырме. Жадемзы бере соосты мукетъёсыз вошто. Нокинлы но тэк улыны дыр ӧвӧл. Азбарын но уж мынэ. Кирпич но горд сюйлэсь ик лэсьто угось. Сое котырак кисьтало, пӧлаз скал кыед поно, вылтӥз гольык пыдын лёгаса ветло. Нянез сямен нырко, погылляло, собере пичи пу ящике формаосы тыро но пу молотэн тышкало кабъёсына. Тани ыль кырпич дась. Сое, тыл вылын возьытэк, шунды шоры тырыса кельто. Шунды куасьтэ но, кирпич гур азе плита выллем но ӵын потон труба лэсьтыны ярамон луэ. Со ужез коркалэн кузёез огназ лэсьтыны быгатэ ни. Плитаез ӧз эстылэ - солэн пушказ пу тырыны интыез уг луы вал. Андан плитаосты лавкаосын со дыре уг вузало на вылэм. Плита вылэ таганка пуктыса, сиён дасяло, нош бадӟым гурын нянь пыжо, мукет сиён-юонъёс пӧзьто. Тани гур шуккон веме пумаз вуиз. Кузё шумпотэ. Кузпалыз выль гур вылэ черык аракы пуктэ. Вемее лыктэмъёс котырак пуксё. Гур лэсьтонын тужгес кибашлы ужам мурт пу молотсэ чупа, маке сипыртэ но сябась каре. Собере корка кузёен чупаське но вемее лыктэм мукет ужасьёслы чарка курытсэ дэмла. Соос но озьы ик пу молотэз чупало, сюмыксэс бушато. Собере, выж вылэ васькыса, мудор шоры вӧсясько, выль гур вылэ сюсьтыл ӝуатыса пукто. Инмарлэсь куро: гур кема мед чидалоз, трос шуныт мед сётоз, берекетлы медло. Ӝӧк вылын куртчон тырмыт дасямын, сиё-юо. Али сямен йырзэс ыштытозь ӧз юылэ. Веме быдэс урамлы юмшан луоз вылэм. Нокинэ но утялтытэк ӧз лэзьылэ, кырӟаса, эктыса вемелэн пумыз вуэ. Гуртазы кошкыкузы, одно ик вӧсяськозы, пе, вал сэргысь мудоръёс шоры. Табере гурез куасьтоно, эсэпсэ валаса, ӧжыт пуэн эстылоно. Тол вуэм бере гур вылэ тылобурдоослэсь вирзэс кисьталлязы. Пӧсь вир шуккем сюе пыӵа, куасьме но вольыт луэ. Тузон уг пот ни. Бадӟым гурез толбыт эсто-ужато. Гур вылын ю-тысь, етӥн культо куасьто. Отын миськем-котмем дӥськутэз кӧсато. Гужем гурез ӧжытгес эстылӥзы. Шуккем гур корка сисьмытозь чида вал. Корка одно ик пичи корт гур но пукто. Соин корка пуш ӝог шуныт луылӥз. Вылаз сиён пӧзьтылӥзы. Е. Первушин. "Удмурт дунне", 15.01.94. 2836 Гырлыё валъёсын лыктӥзы но... Сюан - адямилэн улоназ кыкетӥ вордӥськон. Удмуртъёслэн улоназы но со бадӟым инты басьтэ. Сюан ӝӧк сьӧры пуксьытозь, трос гинэ дасяськонъёс-вераськонъёс луо на. Отын ваньмыз чакламын. Шуом, кызьы возьыны кулэ ассэ эмеспи, выль кен. Сюан - со аспӧртэмлыко пичи драма, кудаз котькудӥзлэн вань аслаз ролез. Берло дыре та туж чебер вашкала сямъёс вуныны кутскизы, куд-ог интыосын кӧня ке тодметъёссэ гинэ чаклало на. Юан, куран. Нылэз юаны, кураны лыкто эмеспилэн бубиз, куд-ог ӵыжы-выжыосыз но дэмчи. Дэмчи вераськыны кутске. Со меӵак нылдэс кураны лыктӥмы уг шуы, ӵем дыръя вазиське: "Тӥляд вузано ветылды вань шуо, уд вузалэ-а милем?" Ныллэн мумы-бубыосыз ӝӧк вылэ тӧдьы ӝӧккышет валё. Озьы соос соглаш луэмзэс возьмато. Нош ӝӧк вылэ валем ӝӧккышетэз ныл палэнтэ ке, пумит луэмзэ возьматэ. Мумы-бубылэн нылзэс сётэмзы уг поты ке, милям ветылмы быдэ ӧз вуы на шуо, вазь на, пе, сое вузаны, ӧжытак берлогес лыктэлэ. Удмуртъёс ноку пырак уз шуэ: "Нылмес сётыны пумит луиськом". Нош вералозы кызьы ке котыръяса. Ныл тупан - мукетыз бадӟым ужрад. Татчы ачиз эмеспи луон но лыктэ ини. Со сяна, ныллэн но пилэн матысь ӵыжы-выжыосыз пумисько. Умой-умой тупамзы бере ныллэн мумиз ӝӧк вылэ нянь колды но вӧй пуктэ. Эмеспилэн бубиз со нянь колды пушкы ӧжытак азвесь коньдон тыре. Озьыен, ныл курамын лыдъяське. Тупам беразы черык юо. Пилэн но ныллэн мумы-бубыоссы ог-огзылы кыӵе ке кузьым сёто. Ныл тупанын ик йырдун, пирдан сярысь, вада пуктон сярысь (тупан, ярашон) верасько. Вада пуктыку, ныллэсь валес котырзэ эскеро, сое дунъяло. Собере ини сюан ортчытон дыр но инты сярысь верасько. Инты учкон. Кыл тупам бере ныллэн мумы-бубыосыз эмеспизылэн корказ мыно, нылзэс сётон интыен тодматско. Сюанлы дасяськон. Ныллэн но пилэн мумы-бубыоссы котькудӥз асьсэлэсь ӵыжы- выжыоссэс сюанэ ӧтьыса ветло. Кинэ сюанэ ӧтё - солы бадӟым дан луэ вал. Уката но егитъёс чидатэк витьылӥзы, ку соосты нырысьсэ сюанэ ӧтёзы. Ныл ласянь но, пи ласянь но ӧтемъёс сьӧразы мар ке но сиён-юон нуыны кулэ. Куд-ог дыръя сюанэ ӧтёнзэс но меӵак уг верало, шуо: "Букодэс вӧялэ, кузь сюрес вылэ ӟеч товарлы потано". Сюан. Сюан нуналэ эмеспи ласянь вань ӵыжы-выжыос пи доры люкасько. Сюанэ мынымтэосыз соосты келяло. Пересьёс индылыса кельто: "Аляк эн каре, ӟеч ветлэ. Сюресты мед удалтоз". Син усемлэсь, коркась потыкузы, ваньзы гур борды йӧтӥсько. Со сяна, кисыязы сугонлэсь яке чесноклэсь пилетсэ поно. Пилэн ӵыжы-выжыосыз ныл доры гырлыё валъёсын мыно. Азьпалазы ик киросанай, киросатай. Нош ныл дорын куноосты витё ни. Ваньмыз кемалась дасямын. Укно вылын, синучкон йыразьын, мукет интыосын ошылэмын чебер пужыятэм ӵушконъёс, валес коверен валемын, нош ӝӧк вылын пӧртэм сиён-юонъёс. Нырысь ик пуктыло кезьыт сиён-юонъёсты, нош сюанчиос пырем бере пӧсьсэ но интыяло ини. Одно ик отын луоз чорыген нянь, пӧртэм пӧрамъёс. Ӝӧк шоры ик пукто пыжем ӟазегез. Сиён понна гинэ уг, та гурт тылобурдо умой улон-вылон сӥземез возьматэ. Гырлы куараосты кылыса, ныллэн бубиз кык-куинь ӵыжы-выжыосыныз пумитаны потэ. Куноосты сылалэн нянен, вӧйын пумитало. Сюанчиосты йырдунтэк пырыны уг лэзё. Пырем беразы соос корка котыртӥ кырӟаса куинь пол котырско. Собере ныллэн тужгес но матысь ӵыжы-выжыосызлэсь кизэс кутыло, тодматско, малы лыктэмзэс верало. Сюанчиосты ӝӧк сьӧры пукто. Киросбубиз тӧро шоры (мудор сэргы) пуксе. Ӧжыт куртчем каро, кызьы вуэмзы-лыктэмзы сярысь кырӟало. Собере дан поттон кутске. Сюанчиос кен луоно нылзэс учкыны куро. Нош сое шуак уг потто. Кин ке, серемес дӥсяськыса, кен кариське но вина юыны ӵектэ. - Милям нылмы таӵе ӧй вал, - пумитъясько сюанчиос. - Пересь ни со, вина но юэ. Нош милям нылмы ымаз но уг тыры... Эмеспи но чарказэ уг куты. - Бен толон ӝытазе гинэ асьмеос ӵош вал ук, мусое. Толон гинэ шунытэсь кылъёс верад вал ук мыным, пумен уд ни шат тодмаськы... - олокызьы но выре "нылмурт" сюанчиос азьын, ассэ кен луоно ныл шуыса. Озьы ке но, сюанчиос "нылэз" кулэ уг каро, соизлы кошконо луэ. Кен луоно нылзы потэ. - Вот таиз милям нылмы, таиз милемлы кельше, - шуо ини сюанчиос. Нылэз пи борды пукто. Кутске шулдыръяськон. Сюанчиос ныллэн но пилэн тупамзы, выль семья понна чаркаоссэс ӝуто. Сюан гуръёс кырӟало: "Тӧдьы кызьпу вож куаро но...", "Уйвае но мон бызи"... Собере ваньзы ик гуртаны пото, коркась корка ветло. Котькуд коркан ӝӧк сьӧры нырысь пуксё сюанчиос, соос бере ини келисьёс. Келисьёс ныл дорын асьсэ сярысь шуо: "Ми али куро вылын сиськиськом, нош сюанчиос - турын вылын". Нош пи доры вуэм бере сюанчиос куро вылэ выжо, келисьёс - турын вылэ. Гуртамысь пырыса, ваньмыз котырско, гуртамы умой шуыса, кыл верало. Шулдыръяськон, дан поттон азьланьске. Собере ныл вордэм анай-атаезлы берпуметӥзэ ву вае. Сюан гур кырӟаса, ваньзы васько ошмесэ, кырӟаса ик тубо. Ведраосы азвесь коньдон куяло. Сюанчиос ныллы вузэ тубытыны люкето, пазясько. Собере ӝӧк вылэ берпуметӥзэ сиён-юон пукто, ныл берпуметӥзэ мумы-бубыосыныз ӝӧк сьӧры пуксе. Кошкон азязы сюанчиос пирдан курыса кырӟало: Поттэ, поттэ винаостэс, Ньыльдон эгесо бекчедэс. Выллань тэтчом, выждэс чигтом. Ми ум кошке, ми ум кошке, Выль кышнотэк ум кошке. Ми ум кошке, ми ум кошке, Дурем сандыктэк ми ум кошке. Ми ум кошке, ми ум кошке, Мамык валестэк ми ум кошке. Ми ум кошке, ми ум кошке, Дуриськон кебиттэк ум кошке... Валес котырез потто, сюанчиос солы дун сёто. Ваньмыз дась ни кадь кошкыны. Нош потон азязы кен луоно нылзэс лушкаса вато. Йырдун сётытэк уг потто. Сием-юэмзылы, шулдыръяськемзылы тау карыса, сюанчиос кошкыны вырӟо. Ныллэн мумиз-бубиз бӧрдыса люкисько. Выль кен но бӧрдэ. Гур котыртӥ котыръяськыса, ваньзы пото. Азбаре потыса, нылэз гид дортӥ, пинал дырзэ, егит дырзэ ортчытэм вань интыостӥз нулло. Собере ныл ваньмыныз люкиське. Келисьёс сюанчиослы кузьым сётыса келяло. Валъёсы пуксьыса, келисьёс но пи доры мыно. Эмеспи дорын. Сюан калыкез пилэн мумиз-бубиз, ӵыжы-выжыосыз пумитало. Сюанчиос ветлэмзы сярысь кырӟаса верало. Ныллэсь мамык валессэ выж вылэ кушто но, ваньзы ик отын погыллясько. Небыт-а, ӧвӧл-а, пе. Собере валесэз валисько, котырзэ учко. Учкыкузы ик валес вылэ кузьым тыро. Ваньмыз ӧжытак кӧлыны выдыло, нош со валес вылэ киросанайёссэс интыяло. Шулдыръяськыны вазь ӵукна ик, 7 час котырын, кутско ни. Пельнянь яке табань сиыны ӝӧк сьӧры пуксё, пенӟаськыны кутско. Мурьёез пытсало, табанен зырасько. Со сяна, корка липет йылысь атасэз яке курегез лэзьяло, кытчы лобемзэ учко. Валес вылын мунёез кӧлто, собере верало ини, уй ӵоже, пе, пинал вордскем. Кутске эмеспи учкон. Вӧлдэтэ йӧтымон коньдон куяло. Кенэн эмеспиен октыны кулэ. Нош егитъёслы люкето, выж вылэ жуг-жаг куяло. Нылэн пиен коньдонэз вожмаськыса бичало: кинлэн тросгес луоз. Келисьёс ныллы юртто, нош сюанчиос - пилы. Выж вылэ шобрет яке выж лёгет кушто на, кин ӝоггес басьтоз. Коньдон бичамзы бере ныл выжез ӵуже ни. Кутске ӝӧккышет учкон, кудзэ выль кен вале. Тусьты-пуньы пукто. Келисьёс отчы асьсэлэсь кузьымъёссэс тыро. Нош сюан гур уг чалмылы, валес учкыку но, выж ӵужыку но, ӝӧккышет вальыку но. Кӧня ке корка гуртаны потало на. Кошкыкузы келисьёс нылэз асьсэ борды керттыло, сьӧразы "нуыны" туртто, нош азьветлӥсьёс сое мозмыто. Нылэз бӧрӟытыса, вань ӵыжы-выжыосыз дортӥ нулло. Али ке, пе, трос бӧрдӥз, азьпал улоназ уз бӧрды ни. Ӟазег вӧсян Та вӧсез сӥзьыл Покро азьын ортчыто. Песьтэре яке сумкае нянь сукыри, вӧй, ӵуж мильым, тусьты-пуньы, аракы, тӧдьы ӝӧккышет тыро. Гуртын ик ӝӧк вылэ нянь, сылал, вӧй пуктыса йыбыртто: "Нюлэс мума-бубамы, тыныд пирдан сётӥськом. Ӟеч ворды пудо-животэз, возьма сьӧсь изьверъёслэсь. Кылемез пудо-животмы мед удалтоз". Собере, луло ӟазегез кутыса, тэле мыно. Картэн улӥсь кышномуртъёсты та вӧсе сике уг басьто вылэм. Ветло пиосмуртъёс, пиналъёс, пересьёс. Интыязы вуыса, нош ик йыбыртто, собере ӟазегез вандо, тылско. Ву быректытозь, ӟазегез ишко, сузяло, пӧзьтыны пуртые интыяло. Быректэмез бере ик куинь пуньы сӥльын лымез тыл вылэ кисьто, иназ мед мыноз шуыса. Лымаз йыды кеньырлэсь сылалтэк шӧг ӝук пӧзьто. Пӧземез бере йыбыртто, сьӧразы ваем котырзэс ӝӧккышет вылэ пуктыло. Ӵуж мильымзэс тӧдьы басма вылын бадӟым кыз вай вылэ поно. Собере ини сиськыны пуксё. Ӟазег лыосты ваньзэ туйлэсь лэсьтэм чумонэ (коробка выллем) люкало, отчы пуштроссэ, гонзэ, йырзэ тыро. Куд-огез гонзэ, йырзэ ӟазег тус лэсьто но кыз вае поно. Чумонэз сюе сого, нош йыбыртто. Бервылзэс утялто но гуртэ берто. Гуртын соосты кышноос витё ини: тодо ук, кыӵе ческыт ӟазег сӥльын ӝук. Вылаз ик, сылал ватсаны яра ни. Но солэсь азьло нюлэскысь берытскемъёсын ӵош йыбырттоно на. Вера Чиркова, Игра ёросысь Кабачигуртысь библиотекарь. Флор Васильев Х Х Х Песяйлы песяез вераллям: Вашкала дыръёсы, пе, вал сям - Кулэм мурт ватыку кырӟаллям, Крезьгурзэ валтӥллям нош паллян. Бускельзэс пыраклы келяку Кутчаллям кутъёссэс но паллян. Шай дорысь тылскемез пелляку Кылӥськоз вал кема ӝож кырӟан. Мугорыз ке кошкиз - мар карод?! Нош лулыз, пе, татчы мед кылёз. Паллян гур кылӥськиз ке пеляз, Со кузя вамышсэ мед лёгоз. Со кожоз шайгуэ сюресысь, Ас гуртаз пыраклы, дыр, кылёз. Калыкъя огъя гур кырӟамысь Аслэсьтыз куаразэ но кылоз. Со лулзэ, ик, вылды, возьыса, Тылскем тыл шай дорын пуроме. Осконтэм малпанлы оскыса, Калыкъёс кырӟало на дэмен. "Со озьы вал, - шуэ песяе, - Люкиськон котькинлы но секыт. Малы ке малпанам та вие Весь ӵемгес лыктылэ вуж вакыт". Анатолий Волков АЗВЕСЬ СЮАН Куаръёс поръяло ни, усё шыпырак, Асьме арлыдмес вераса. Пильмо луэ куазь, векчи зор кыдыра, Мӧзмыт ни луэ улон сад. Туннэ пусйиськом ни Азвесь сюанмес, Кема асьмеос ни ӵошен. Ӝоген пужмерен ни басьтоз йырсиме, Мылкыд мед кылёз егитэн. Югыт мылкыдмес асьмелэсь кылдытӥз Тулыс усьтӥськем льӧль ӟардон. Соку лыктыса ворекъясь сюрестӥз Улӟиз ас дыраз яратон. Бадӟым сюресэз ортчимы ни тонэн Будэ, шулдырме семьямы. Шудмес ми ӧм воштэ коньдон-ваньбурен, Уз вормы шудмес тӧдь лымӹ Даниил Яшин Со вакытэ Горд Армие келян Таӵе ик син азям суредаське. Ладимылэн кырӟан гурез пелям Дырын-дырын али но чузъяське. Тани со, кутыса кияз молот, Чукен коньдон шуккиз мумыкоре. Шӧдӥськытэк, шӧдӥськыса, оло, Лул-сюлэмзэ ӧръяз кырӟан гуре: Ӧсэтӥ но потыкум, Анаелэсь люкиськыкум, Горд чук но мед луо вал Мумыкоре кыльыны. Бӧрдэ анай, бӧрдо нылкышноос, Пересь муртъёс кыл вератэк уло. Корка тыр люкаськем келяськисьёс Пумен агай сьӧры ни кырӟало. Горд чук но мед луо вал Мумыкоре кыльыны. Та вакытэ ӧй вал ни атаймы - Вазьгес уго со улонысь кошкиз. Лади нош, ортчыкуз гидкуазьтӥмы, Сое но кырӟаназ тодаз ваиз. Капкаетӥ потыкум, Атаелэсь люкиськыкум, Азвесь но мед луо вал, Питыраса кыльыны. Нош урамын мукет пиосъёсыз Та агайме сямен ик келяло. Ваньзы - келясьёсыз, кошкисьёсыз - Ӝожмыт гурез дэмен ни кырӟало: Ураметӥ кошкыкум, Калыкелэсь люкиськыкум, Сяська но мед луо вал, Чигыса кыльыны. Сяська ӧз луэ, ӧз, воргоронъёс, Сюрес урдсы ӧз кыле чигыса... Урам пумын сыло келяськисьёс, мышсэс весь учкыса но бӧрдыса. Ӧй вал бӧрдӥсьёсыз алӥсь муртъёс, Ӧй вал, дыр, алыныны но кулэез: Секыт ожмаськонэ кошкылэмъёс, Тодмо ини, уз берытске тросэз... ...Мултэс дуно, укыр мултэс дуно Странамылы Быдӟым война йӧтӥз. Асьме калык кызь миллионлэсь уно Нылзэ-пизэ лек тылӝуын ыштӥз. Шат соинтэк бӧрысь но кылдыло Секыт аръёс сярысь кылбуранъёс, Али но сюлэмез чепылляло Ортчем вакыт сярысь ӝож кырӟанъёс. Яков Майков КЕЛЯСЬКОН Куӵо музъем вылэ усе ӵыжыт палэзь, Сӥзьыл тӧлъёс пельто, пельто... Кошкись пиос туннэ чебер нылъёсмылэсь Мылкыдъёссэс ӝоже кельто. Яратэмзэс нылъёс вато калык азьын, Ку верало - тодӥсь ӧвӧл... Кырӟан гинэ уя кӧлӥсь урамъёсын, Арган гурез ветта ыр тӧл. Егит пилэн кияз пужыятэм кышет - Тодэ ваён понна кузьым. Мусо ныл, эн мӧзмы - бертоз гажан эшед, Эшшо ӝужаз ке вож узьым. Ӟеч ужъёсмес солдат быгатыса утёз, Басьтоз уно тодон-валан. Бертӥз ке, нош ик со зарни ю-нянь кизёз, Гуртын луоз шулдыр сюан. Куӵо музъем вылэ усе ӵыжыт палэзь, Шулдыр гурзэ шудэ арган. Урамъёсын туннэ юзмыт ӵукна палозь Мылкыдъёсыз ӧръя кырӟан. Алексей Ельцов ИЗЬ, НУНЫЕ Нуны веттан Ӵуж кӧжы кадь гинэ Пичиесь чиньыос, Лыз мульы кадь гинэ Чебересь чимыос. Чип-тӧдьы йырсиед Мертчан кадь ик небыт, Котырес бамъёсыд Узы кадь ик ӵыжыт. Туж пичи на ай тон, Алигес вордскемын. Лыз мульы чимыос Изьыны кынемын. Изь ай, изь, нуные, Тон вордскид будыны. Анаед-атаед Шуд сӥзё ук тыныд. Михаил Федотов ШИРЪЯН Ойдо, ойдо, эше возь вылэ, Валляла удмуртъёс кадь эктом. Та турнан - куар басьтон - нуналэз Я бен вай асьмеос шулдыртом. Нылъёсмы но тӥни чуренак Ворекъясь сяськаос кадь сыло. Кесэгзэс но ӧз мытылэ на, Эктыны ӧтеммес возьмало. Кутскизы ук нылъёс но пиос, Крезьгурась арганэд но укыл. Тыпырто, тапырто эктӥсьёс, Пыд улысь чилектоз ини тыл. Мылкыдо эктэммес адӟыса, Шундыед но ӧз чида, лэся, Чырткем пи кадь капчи тэтчаса, Возь вылэ ик васькиз со весяк. Ой, эктӥ мон туннэ, ой, эктӥ. Ужаны мылкыдме бен ӧръяй. Пыдъёсме, киосме кадь воштӥ. Эмъяськись вылэмед тон, ширъян. Удысэз мытыны курыса, Кусоед но шулдыр жонгетӥз. Удмуртлэн валляла дыръёсаз Та вие ик вуи кадь етӥз. Анатолий Комаров ГЫРОН БЫДТОН ГУР Вало дурын вазе крезь - Гуреныз вырӟоз гурезь... Тыпыр-тып, Тыпыр-тып - Гадь пушкын шулдыр мылкыд, Эктыны куриське пыд. Ӵужкенакед - горд намер, Кышетэз - ӵыж кашимер. Тыкыр-тык, Тыкыр-тык - Пыдзэ лёгыса кырӟа, Такмакъёс йыраз лачак. Бӧрсяз потӥз казакныл, Гордань Мани - ӝуась тыл. Зӥр берга, Зӥр берга, Туп кадь тэтча горданед, Пыдъёсыз музэ уг йӧт. Пересьёс но, пе, эктом, Вай кругмес бадӟыматом! Оп, каро, Оп, каро, - Ӧрӟилэн кадь мылкыдзы, Ӵыштыр-ӵаштыр эктэмзы. Чик эктӥсьтэм бускеле Мыняк-мыняк потылэ, Эх, шуэ Эк, шуэ, Пыдзэ лёгаса чабе, Эктӥсько, пе, со кабен. Куаразэ сётӥз арган. Итӥськиз бӧрсяз баян, Вики-вак, Вики-вак, Эктэмъя потэ эктэм, Ёзвиысь кошке жадем. Туннэ бадӟым шумпотон - Гуртамы гырон быдтон. Тыпыр-тып, Тыпыр-тып, Кизёнмес быдтӥм дыраз, Шулдыръяськом тареяз! Сог-сог мед будоз няньмы, Бусьтыр медло кеносмы. Тыпыр-тып, Тыпыр-тып, Бусьтыр медло кеносмы, Шулдыр луоз улонмы. Анатолий Комаров СЮАН, СЮАН Шунды яркыт, сюрес вольыт, Лымы пиштэ чильыр-вольыр! Дӧдьы бурдъёс - дыдык бурдъёс, Валъёс бӧрсьы лобӟо соос! Буко жуге азвесь гырлы, Шулдыр гурез, чебер жингрес. Данъя, ушъя гырлы кылын, Дугдылытэк со выль кенмес. Пиос арган шудо вожмин Нылъёс гурзэ нёжто дэмен... Сюан калык шумпотэмын, Выль кен зориз, пе, тол куазен. Тол шокамысь сюрес южма, Изьы, кышет - ваньмыз гӧртэм, Нош кенмылэн бамыз гома, Шудэз пиштэ сутэр синмаз! Пумитамы корказь азе Пазял кенак васькоз штопен, Ӝиптоз пизэ, ӝиптоз кензэ, Юалляськоз тупен-тупен. Корка бадӟым, пушкыз югыт, Шуоз кенак выль кенезлы: "Дорам тыныд уз лу мӧзмыт, Пие вӧзын луод нылы..." Ӝуто валъёс тӧдьы тузон, Дӧдьы берын ковёр тӧла!.. Сюан, сюан... Мар шумпотон! Бен мед гинэ сюрод пӧлаз!.. Анатолий Комаров ВЫЛЬ КЕН ПЫЛАТОН - Гуртамы Одоть - выль кен, Ойдо сое пылатом, Ярдуре султом дэмен, Яратэмзэ юалом. - Тэтчысал - визыл кыскоз, Сумед сюен шобыртоз, Кайгу - иськавынъёслы, Уката но картэлы. - Кайгыроз ик, дыр, Одоть, Жалялом асьме пимес. Кускозяд пыртом ик коть - Веръялод Вало вумес. - Пырысал но - выль дӥсен, Вошки вал юмшан муген. Эн сӧре ни мылкыдме, Эн уретэ кырӟанме. - Кырӟамед, Одоть, пӧрме, Шып кылзэ гурдэ Вало. Васькы гинэ ву дуре - Йырсиостэ веттылом. - Васькысал - йырси котмоз, Йырси пунэт сэрттӥськоз, Кырын выльысь пуныны - Тӧлэд дасяк туганы. - Йырсиед кузен туж кузь, Нодтэм но уг лу шуны. Гажанэд ачиз вуиз - Шуре сое пыртомы. Выль кенлэн гомӟиз тусыз, Ву дуре бызьса васькиз. - Эн, эн исалэ картме. Пыртэ со понна асме! Даниил Яшин Со вакытэ Горд Армие келян Таӵе ик син азям суредаське. Ладимылэн кырӟан гурез пелям Дырын-дырын али но чузъяське. Тани со, кутыса кияз молот, Чукен коньдон шуккиз мумыкоре. Шӧдӥськытэк, шӧдӥськыса, оло, Лул-сюлэмзэ ӧръяз кырӟан гуре: Ӧсэтӥ но потыкум, Анаелэсь люкиськыкум, Горд чук но мед луо вал Мумыкоре кыльыны. Бӧрдэ анай, бӧрдо нылкышноос, Пересь муртъёс кыл вератэк уло. Корка тыр люкаськем келяськисьёс Пумен агай сьӧры ни кырӟало. Горд чук но мед луо вал Мумыкоре кыльыны. Та вакытэ ӧй вал ни атаймы - Вазьгес уго со улонысь кошкиз. Лади нош, ортчыкуз гидкуазьтӥмы, Сое но кырӟаназ тодаз ваиз. Капкаетӥ потыкум, Атаелэсь люкиськыкум, Азвесь но мед луо вал, Питыраса кыльыны. Нош урамын мукет пиосъёсыз Та агайме сямен ик келяло. Ваньзы - келясьёсыз, кошкисьёсыз - Ӝожмыт гурез дэмен ни кырӟало: Ураметӥ кошкыкум, Калыкелэсь люкиськыкум, Сяська но мед луо вал, Чигыса кыльыны. Сяська ӧз луэ, ӧз, воргоронъёс, Сюрес урдсы ӧз кыле чигыса... Урам пумын сыло келяськисьёс, мышсэс весь учкыса но бӧрдыса. Ӧй вал бӧрдӥсьёсыз алӥсь муртъёс, Ӧй вал, дыр, алыныны но кулэез: Секыт ожмаськонэ кошкылэмъёс, Тодмо ини, уз берытске тросэз... ...Мултэс дуно, укыр мултэс дуно Странамылы Быдӟым война йӧтӥз. Асьме калык кызь миллионлэсь уно Нылзэ-пизэ лек тылӝуын ыштӥз. Шат соинтэк бӧрысь но кылдыло Секыт аръёс сярысь кылбуранъёс, Али но сюлэмез чепылляло Ортчем вакыт сярысь ӝож кырӟанъёс. Яков Майков КЕЛЯСЬКОН Куӵо музъем вылэ усе ӵыжыт палэзь, Сӥзьыл тӧлъёс пельто, пельто... Кошкись пиос туннэ чебер нылъёсмылэсь Мылкыдъёссэс ӝоже кельто. Яратэмзэс нылъёс вато калык азьын, Ку верало - тодӥсь ӧвӧл... Кырӟан гинэ уя кӧлӥсь урамъёсын, Арган гурез ветта ыр тӧл. Егит пилэн кияз пужыятэм кышет - Тодэ ваён понна кузьым. Мусо ныл, эн мӧзмы - бертоз гажан эшед, Эшшо ӝужаз ке вож узьым. Ӟеч ужъёсмес солдат быгатыса утёз, Басьтоз уно тодон-валан. Бертӥз ке, нош ик со зарни ю-нянь кизёз, Гуртын луоз шулдыр сюан. Куӵо музъем вылэ усе ӵыжыт палэзь, Шулдыр гурзэ шудэ арган. Урамъёсын туннэ юзмыт ӵукна палозь Мылкыдъёсыз ӧръя кырӟан. Алексей Ельцов ИЗЬ, НУНЫЕ Нуны веттан Ӵуж кӧжы кадь гинэ Пичиесь чиньыос, Лыз мульы кадь гинэ Чебересь чимыос. Чип-тӧдьы йырсиед Мертчан кадь ик небыт, Котырес бамъёсыд Узы кадь ик ӵыжыт. Туж пичи на ай тон, Алигес вордскемын. Лыз мульы чимыос Изьыны кынемын. Изь ай. Изь, нуные, Тон вордскид будыны. Анаед-атаед Шуд сӥзё ук тыныд. Михаил Федотов ШИРЪЯН Ойдо, ойдо, эше возь вылэ, Валляла удмуртъёс кадь эктом. Та турнан - куар басьтон - нуналэз Я бен вай асьмеос шулдыртом. Нылъёсмы но тӥни чуренак Ворекъясь сяськаос кадь сыло. Кесэгзэс но ӧз мытылэ на, Эктыны ӧтеммес возьмало. Кутскизы ук нылъёс но пиос, Крезьгурась арганэд но укыл. Тыпырто, тапырто эктӥсьёс, Пыд улысь чилектоз ини тыл. Мылкыдо эктэммес адӟыса, Шундыед но ӧз чида, лэся, Чырткем пи кадь капчи тэтчаса, Возь вылэ ик васькиз со весяк. Ой, эктӥ мон туннэ, ой, эктӥ. Ужаны мылкыдме бен ӧръяй. Пыдъёсме, киосме кадь воштӥ. Эмъяськись вылэмед тон, ширъян. Удысэз мытыны курыса, Кусоед но шулдыр жонгетӥз. Удмуртлэн валляла дыръёсаз Та вие ик вуи кадь етӥз. Анатолий Комаров ГЫРОН БЫДТОН ГУР Вало дурын вазе крезь - Гуреныз вырӟоз гурезь... Тыпыр-тып, Тыпыр-тып - Гадь пушкын шулдыр мылкыд, Эктыны куриське пыд. Ӵужкенакед - горд намер, Кышетэз - ӵыж кашимер. Тыкыр-тык, Тыкыр-тык - Пыдзэ лёгыса кырӟа, Такмакъёс йыраз лачак. Бӧрсяз потӥз казакныл, Гордань Мани - ӝуась тыл. Зӥр берга, Зӥр берга, Туп кадь тэтча горданед, Пыдъёсыз музэ уг йӧт. Пересьёс но, пе, эктом, Вай кругмес бадӟыматом! Оп, каро, Оп, каро, - Ӧрӟилэн кадь мылкыдзы, Ӵыштыр-ӵаштыр эктэмзы. Чик эктӥсьтэм бускеле Мыняк-мыняк потылэ, Эх, шуэ Эк, шуэ, Пыдзэ лёгаса чабе, Эктӥсько, пе, со кабен. Куаразэ сётӥз арган. Итӥськиз бӧрсяз баян, Вики-вак, Вики-вак, Эктэмъя потэ эктэм, Ёзвиысь кошке жадем. Туннэ бадӟым шумпотон - Гуртамы гырон быдтон. Тыпыр-тып, Тыпыр-тып, Кизёнмес быдтӥм дыраз, Шулдыръяськом тареяз! Сог-сог мед будоз няньмы, Бусьтыр медло кеносмы. Тыпыр-тып, Тыпыр-тып, Бусьтыр медло кеносмы, Шулдыр луоз улонмы. Анатолий Комаров СЮАН, СЮАН Шунды яркыт, сюрес вольыт, Лымы пиштэ чильыр-вольыр! Дӧдьы бурдъёс - дыдык бурдъёс, Валъёс бӧрсьы лобӟо соос! Буко жуге азвесь гырлы, Шулдыр гурез, чебер жингрес. Данъя, ушъя гырлы кылын, Дугдылытэк со выль кенмес. Пиос арган шудо вожмин Нылъёс гурзэ нёжто дэмен... Сюан калык шумпотэмын, Выль кен зориз, пе, тол куазен. Тол шокамысь сюрес южма, Изьы, кышет - ваньмыз гӧртэм, Нош кенмылэн бамыз гома, Шудэз пиштэ сутэр синмаз! Пумитамы корказь азе Пазял кенак васькоз штопен, Ӝиптоз пизэ, ӝиптоз кензэ, Юалляськоз тупен-тупен. Корка бадӟым, пушкыз югыт, Шуоз кенак выль кенезлы: "Дорам тыныд уз лу мӧзмыт, Пие вӧзын луод нылы..." Ӝуто валъёс тӧдьы тузон, Дӧдьы берын ковёр тӧла!.. Сюан, сюан... Мар шумпотон! Бен мед гинэ сюрод пӧлаз!.. Анатолий Комаров ВЫЛЬ КЕН ПЫЛАТОН - Гуртамы Одоть - выль кен, Ойдо сое пылатом, Ярдуре султом дэмен, Яратэмзэ юалом. - Тэтчысал - визыл кыскоз, Сумед сюен шобыртоз, Кайгу - иськавынъёслы, Уката но картэлы. - Кайгыроз ик, дыр, Одоть, Жалялом асьме пимес. Кускозяд пыртом ик коть - Веръялод Вало вумес. - Пырысал но - выль дӥсен, Вошки вал юмшан муген. Эн сӧре ни мылкыдме, Эн уретэ кырӟанме. - Кырӟамед, Одоть, пӧрме, Шып кылзэ гурдэ Вало. Васькы гинэ ву дуре - Йырсиостэ веттылом. - Васькысал - йырси котмоз, Йырси пунэт сэрттӥськоз, Кырын выльысь пуныны - Тӧлэд дасяк туганы. - Йырсиед кузен туж кузь, Нодтэм но уг лу шуны. Гажанэд ачиз вуиз - Шуре сое пыртомы. Выль кенлэн гомӟиз тусыз, Ву дуре бызьса васькиз. - Эн, эн исалэ картме. Пыртэ со понна асме! Флор Васильев Х Х Х Песяйлы песяез вераллям: Вашкала дыръёсы, пе, вал сям - Кулэм мурт ватыку кырӟаллям, Крезьгурзэ валтӥллям нош паллян. Бускельзэс пыраклы келяку Кутчаллям кутъёссэс но паллян. Шай дорысь тылскемез пелляку Кылӥськоз вал кема ӝож кырӟан. Мугорыз ке кошкиз - мар карод?! Нош лулыз, пе, татчы мед кылёз. Паллян гур кылӥськиз ке пеляз, Со кузя вамышсэ мед лёгоз. Со кожоз шайгуэ сюресысь, Ас гуртаз пыраклы, дыр, кылёз. Калыкъя огъя гур кырӟамысь Аслэсьтыз куаразэ но кылоз. Со лулзэ, ик, вылды, возьыса, Тылскем тыл шай дорын пуроме. Осконтэм малпанлы оскыса, Калыкъёс кырӟало на дэмен. "Со озьы вал, - шуэ песяе, - Люкиськон котькинлы но секыт. Малы ке малпанам та вие Весь ӵемгес лыктылэ вуж вакыт". Анатолий Волков АЗВЕСЬ СЮАН Куаръёс поръяло ни, усё шыпырак, Асьме арлыдмес вераса. Пильмо луэ куазь, векчи зор кыдыра, Мӧзмыт ни луэ улон сад. Туннэ пусйиськом ни Азвесь сюанмес, Кема асьмеос ни ӵошен. Ӝоген пужмерен ни басьтоз йырсиме, Мылкыд мед кылёз егитэн. Югыт мылкыдмес асьмелэсь кылдытӥз Тулыс усьтӥськем льӧль ӟардон. Соку лыктыса ворекъясь сюрестӥз Улӟиз ас дыраз яратон. Бадӟым сюресэз ортчимы ни тонэн Будэ, шулдырме семьямы. Шудмес ми ӧм воштэ коньдон-ваньбурен, Уз вормы шудмес тӧдь лымӹ Даниил Яшин Со вакытэ Горд Армие келян Таӵе ик син азям суредаське. Ладимылэн кырӟан гурез пелям Дырын-дырын али но чузъяське. Тани со, кутыса кияз молот, Чукен коньдон шуккиз мумыкоре. Шӧдӥськытэк, шӧдӥськыса, оло, Лул-сюлэмзэ ӧръяз кырӟан гуре: Ӧсэтӥ но потыкум, Анаелэсь люкиськыкум, Горд чук но мед луо вал Мумыкоре кыльыны. Бӧрдэ анай, бӧрдо нылкышноос, Пересь муртъёс кыл вератэк уло. Корка тыр люкаськем келяськисьёс Пумен агай сьӧры ни кырӟало. Горд чук но мед луо вал Мумыкоре кыльыны. Та вакытэ ӧй вал ни атаймы - Вазьгес уго со улонысь кошкиз. Лади нош, ортчыкуз гидкуазьтӥмы, Сое но кырӟаназ тодаз ваиз. Капкаетӥ потыкум, Атаелэсь люкиськыкум, Азвесь но мед луо вал, Питыраса кыльыны. Нош урамын мукет пиосъёсыз Та агайме сямен ик келяло. Ваньзы - келясьёсыз, кошкисьёсыз - Ӝожмыт гурез дэмен ни кырӟало: Ураметӥ кошкыкум, Калыкелэсь люкиськыкум, Сяська но мед луо вал, Чигыса кыльыны. Сяська ӧз луэ, ӧз, воргоронъёс, Сюрес урдсы ӧз кыле чигыса... Урам пумын сыло келяськисьёс, мышсэс весь учкыса но бӧрдыса. Ӧй вал бӧрдӥсьёсыз алӥсь муртъёс, Ӧй вал, дыр, алыныны но кулэез: Секыт ожмаськонэ кошкылэмъёс, Тодмо ини, уз берытске тросэз... ...Мултэс дуно, укыр мултэс дуно Странамылы Быдӟым война йӧтӥз. Асьме калык кызь миллионлэсь уно Нылзэ-пизэ лек тылӝуын ыштӥз. Шат соинтэк бӧрысь но кылдыло Секыт аръёс сярысь кылбуранъёс, Али но сюлэмез чепылляло Ортчем вакыт сярысь ӝож кырӟанъёс. Яков Майков КЕЛЯСЬКОН Куӵо музъем вылэ усе ӵыжыт палэзь, Сӥзьыл тӧлъёс пельто, пельто... Кошкись пиос туннэ чебер нылъёсмылэсь Мылкыдъёссэс ӝоже кельто. Яратэмзэс нылъёс вато калык азьын, Ку верало - тодӥсь ӧвӧл... Кырӟан гинэ уя кӧлӥсь урамъёсын, Арган гурез ветта ыр тӧл. Егит пилэн кияз пужыятэм кышет - Тодэ ваён понна кузьым. Мусо ныл, эн мӧзмы - бертоз гажан эшед, Эшшо ӝужаз ке вож узьым. Ӟеч ужъёсмес солдат быгатыса утёз, Басьтоз уно тодон-валан. Бертӥз ке, нош ик со зарни ю-нянь кизёз, Гуртын луоз шулдыр сюан. Куӵо музъем вылэ усе ӵыжыт палэзь, Шулдыр гурзэ шудэ арган. Урамъёсын туннэ юзмыт ӵукна палозь Мылкыдъёсыз ӧръя кырӟан. Михаил Федотов ШИРЪЯН Ойдо, ойдо, эше возь вылэ, Валляла удмуртъёс кадь эктом. Та турнан - куар басьтон - нуналэз Я бен вай асьмеос шулдыртом. Нылъёсмы но тӥни чуренак Ворекъясь сяськаос кадь сыло. Кесэгзэс но ӧз мытылэ на, Эктыны ӧтеммес возьмало. Кутскизы ук нылъёс но пиос, Крезьгурась арганэд но укыл. Тыпырто, тапырто эктӥсьёс, Пыд улысь чилектоз ини тыл. Мылкыдо эктэммес адӟыса, Шундыед но ӧз чида, лэся, Чырткем пи кадь капчи тэтчаса, Возь вылэ ик васькиз со весяк. Ой, эктӥ мон туннэ, ой, эктӥ. Ужаны мылкыдме бен ӧръяй. Пыдъёсме, киосме кадь воштӥ. Эмъяськись вылэмед тон, ширъян. Удысэз мытыны курыса, Кусоед но шулдыр жонгетӥз. Удмуртлэн валляла дыръёсаз Та вие ик вуи кадь етӥз. Анатолий Комаров ГЫРОН БЫДТОН ГУР Вало дурын вазе крезь - Гуреныз вырӟоз гурезь... Тыпыр-тып, Тыпыр-тып - Гадь пушкын шулдыр мылкыд, Эктыны куриське пыд. Ӵужкенакед - горд намер, Кышетэз - ӵыж кашимер. Тыкыр-тык, Тыкыр-тык - Пыдзэ лёгыса кырӟа, Такмакъёс йыраз лачак. Бӧрсяз потӥз казакныл, Гордань Мани - ӝуась тыл. Зӥр берга, Зӥр берга, Туп кадь тэтча горданед, Пыдъёсыз музэ уг йӧт. Пересьёс но, пе, эктом, Вай кругмес бадӟыматом! Оп, каро, Оп, каро, - Ӧрӟилэн кадь мылкыдзы, Ӵыштыр-ӵаштыр эктэмзы. Чик эктӥсьтэм бускеле Мыняк-мыняк потылэ, Эх, шуэ Эк, шуэ, Пыдзэ лёгаса чабе, Эктӥсько, пе, со кабен. Куаразэ сётӥз арган. Итӥськиз бӧрсяз баян, Вики-вак, Вики-вак, Эктэмъя потэ эктэм, Ёзвиысь кошке жадем. Туннэ бадӟым шумпотон - Гуртамы гырон быдтон. Тыпыр-тып, Тыпыр-тып, Кизёнмес быдтӥм дыраз, Шулдыръяськом тареяз! Сог-сог мед будоз няньмы, Бусьтыр медло кеносмы. Тыпыр-тып, Тыпыр-тып, Бусьтыр медло кеносмы, Шулдыр луоз улонмы. Анатолий Комаров СЮАН, СЮАН Шунды яркыт, сюрес вольыт, Лымы пиштэ чильыр-вольыр! Дӧдьы бурдъёс - дыдык бурдъёс, Валъёс бӧрсьы лобӟо соос! Буко жуге азвесь гырлы, Шулдыр гурез, чебер жингрес. Данъя, ушъя гырлы кылын, Дугдылытэк со выль кенмес. Пиос арган шудо вожмин Нылъёс гурзэ нёжто дэмен... Сюан калык шумпотэмын, Выль кен зориз, пе, тол куазен. Тол шокамысь сюрес южма, Изьы, кышет - ваньмыз гӧртэм, Нош кенмылэн бамыз гома, Шудэз пиштэ сутэр синмаз! Пумитамы корказь азе Пазял кенак васькоз штопен, Ӝиптоз пизэ, ӝиптоз кензэ, Юалляськоз тупен-тупен. Корка бадӟым, пушкыз югыт, Шуоз кенак выль кенезлы: "Дорам тыныд уз лу мӧзмыт, Пие вӧзын луод нылы..." Ӝуто валъёс тӧдьы тузон, Дӧдьы берын ковёр тӧла!.. Сюан, сюан... Мар шумпотон! Бен мед гинэ сюрод пӧлаз!.. Анатолий Комаров ВЫЛЬ КЕН ПЫЛАТОН - Гуртамы Одоть - выль кен, Ойдо сое пылатом, Ярдуре султом дэмен, Яратэмзэ юалом. - Тэтчысал - визыл кыскоз, Сумед сюен шобыртоз, Кайгу - иськавынъёслы, Уката но картэлы. - Кайгыроз ик, дыр, Одоть, Жалялом асьме пимес. Кускозяд пыртом ик коть - Веръялод Вало вумес. - Пырысал но - выль дӥсен, Вошки вал юмшан муген. Эн сӧре ни мылкыдме, Эн уретэ кырӟанме. - Кырӟамед, Одоть, пӧрме, Шып кылзэ гурдэ Вало. Васькы гинэ ву дуре - Йырсиостэ веттылом. - Васькысал - йырси котмоз, Йырси пунэт сэрттӥськоз, Кырын выльысь пуныны - Тӧлэд дасяк туганы. - Йырсиед кузен туж кузь, Нодтэм но уг лу шуны. Гажанэд ачиз вуиз - Шуре сое пыртомы. Выль кенлэн гомӟиз тусыз, Ву дуре бызьса васькиз. - Эн, эн исалэ картме. Пыртэ со понна асме! Даниил Яшин Со вакытэ Горд Армие келян Таӵе ик син азям суредаське. Ладимылэн кырӟан гурез пелям Дырын-дырын али но чузъяське. Тани со, кутыса кияз молот, Чукен коньдон шуккиз мумыкоре. Шӧдӥськытэк, шӧдӥськыса, оло, Лул-сюлэмзэ ӧръяз кырӟан гуре: Ӧсэтӥ но потыкум, Анаелэсь люкиськыкум, Горд чук но мед луо вал Мумыкоре кыльыны. Бӧрдэ анай, бӧрдо нылкышноос, Пересь муртъёс кыл вератэк уло. Корка тыр люкаськем келяськисьёс Пумен агай сьӧры ни кырӟало. Горд чук но мед луо вал Мумыкоре кыльыны. Та вакытэ ӧй вал ни атаймы - Вазьгес уго со улонысь кошкиз. Лади нош, ортчыкуз гидкуазьтӥмы, Сое но кырӟаназ тодаз ваиз. Капкаетӥ потыкум, Атаелэсь люкиськыкум, Азвесь но мед луо вал, Питыраса кыльыны. Нош урамын мукет пиосъёсыз Та агайме сямен ик келяло. Ваньзы - келясьёсыз, кошкисьёсыз - Ӝожмыт гурез дэмен ни кырӟало: Ураметӥ кошкыкум, Калыкелэсь люкиськыкум, Сяська но мед луо вал, Чигыса кыльыны. Сяська ӧз луэ, ӧз, воргоронъёс, Сюрес урдсы ӧз кыле чигыса... Урам пумын сыло келяськисьёс, мышсэс весь учкыса но бӧрдыса. Ӧй вал бӧрдӥсьёсыз алӥсь муртъёс, Ӧй вал, дыр, алыныны но кулэез: Секыт ожмаськонэ кошкылэмъёс, Тодмо ини, уз берытске тросэз... ...Мултэс дуно, укыр мултэс дуно Странамылы Быдӟым война йӧтӥз. Асьме калык кызь миллионлэсь уно Нылзэ-пизэ лек тылӝуын ыштӥз. Шат соинтэк бӧрысь но кылдыло Секыт аръёс сярысь кылбуранъёс, Али но сюлэмез чепылляло Ортчем вакыт сярысь ӝож кырӟанъёс. Яков Майков КЕЛЯСЬКОН Куӵо музъем вылэ усе ӵыжыт палэзь, Сӥзьыл тӧлъёс пельто, пельто... Кошкись пиос туннэ чебер нылъёсмылэсь Мылкыдъёссэс ӝоже кельто. Яратэмзэс нылъёс вато калык азьын, Ку верало - тодӥсь ӧвӧл... Кырӟан гинэ уя кӧлӥсь урамъёсын, Арган гурез ветта ыр тӧл. Егит пилэн кияз пужыятэм кышет - Тодэ ваён понна кузьым. Мусо ныл, эн мӧзмы - бертоз гажан эшед, Эшшо ӝужаз ке вож узьым. Ӟеч ужъёсмес солдат быгатыса утёз, Басьтоз уно тодон-валан. Бертӥз ке, нош ик со зарни ю-нянь кизёз, Гуртын луоз шулдыр сюан. Куӵо музъем вылэ усе ӵыжыт палэзь, Шулдыр гурзэ шудэ арган. Урамъёсын туннэ юзмыт ӵукна палозь Мылкыдъёсыз ӧръя кырӟан. Алексей Ельцов ИЗЬ, НУНЫЕ Нуны веттан Ӵуж кӧжы кадь гинэ Пичиесь чиньыос, Лыз мульы кадь гинэ Чебересь чимыос. Чип-тӧдьы йырсиед Мертчан кадь ик небыт, Котырес бамъёсыд Узы кадь ик ӵыжыт. Туж пичи на ай тон, Алигес вордскемын. Лыз мульы чимыос Изьыны кынемын. Изь ай. Изь, нуные, Тон вордскид будыны. Анаед-атаед Шуд сӥзё ук тыныд. Михаил Федотов ШИРЪЯН Ойдо, ойдо, эше возь вылэ, Валляла удмуртъёс кадь эктом. Та турнан - куар басьтон - нуналэз Я бен вай асьмеос шулдыртом. Нылъёсмы но тӥни чуренак Ворекъясь сяськаос кадь сыло. Кесэгзэс но ӧз мытылэ на, Эктыны ӧтеммес возьмало. Кутскизы ук нылъёс но пиос, Крезьгурась арганэд но укыл. Тыпырто, тапырто эктӥсьёс, Пыд улысь чилектоз ини тыл. Мылкыдо эктэммес адӟыса, Шундыед но ӧз чида, лэся, Чырткем пи кадь капчи тэтчаса, Возь вылэ ик васькиз со весяк. Ой, эктӥ мон туннэ, ой, эктӥ. Ужаны мылкыдме бен ӧръяй. Пыдъёсме, киосме кадь воштӥ. Эмъяськись вылэмед тон, ширъян. Удысэз мытыны курыса, Кусоед но шулдыр жонгетӥз. Удмуртлэн валляла дыръёсаз Та вие ик вуи кадь етӥз. Анатолий Комаров ГЫРОН БЫДТОН ГУР Вало дурын вазе крезь - Гуреныз вырӟоз гурезь... Тыпыр-тып, Тыпыр-тып - Гадь пушкын шулдыр мылкыд, Эктыны куриське пыд. Ӵужкенакед - горд намер, Кышетэз - ӵыж кашимер. Тыкыр-тык, Тыкыр-тык - Пыдзэ лёгыса кырӟа, Такмакъёс йыраз лачак. Бӧрсяз потӥз казакныл, Гордань Мани - ӝуась тыл. Зӥр берга, Зӥр берга, Туп кадь тэтча горданед, Пыдъёсыз музэ уг йӧт. Пересьёс но, пе, эктом, Вай кругмес бадӟыматом! Оп, каро, Оп, каро, - Ӧрӟилэн кадь мылкыдзы, Ӵыштыр-ӵаштыр эктэмзы. Чик эктӥсьтэм бускеле Мыняк-мыняк потылэ, Эх, шуэ Эк, шуэ, Пыдзэ лёгаса чабе, Эктӥсько, пе, со кабен. Куаразэ сётӥз арган. Итӥськиз бӧрсяз баян, Вики-вак, Вики-вак, Эктэмъя потэ эктэм, Ёзвиысь кошке жадем. Туннэ бадӟым шумпотон - Гуртамы гырон быдтон. Тыпыр-тып, Тыпыр-тып, Кизёнмес быдтӥм дыраз, Шулдыръяськом тареяз! Сог-сог мед будоз няньмы, Бусьтыр медло кеносмы. Тыпыр-тып, Тыпыр-тып, Бусьтыр медло кеносмы, Шулдыр луоз улонмы. Анатолий Комаров СЮАН, СЮАН Шунды яркыт, сюрес вольыт, Лымы пиштэ чильыр-вольыр! Дӧдьы бурдъёс - дыдык бурдъёс, Валъёс бӧрсьы лобӟо соос! Буко жуге азвесь гырлы, Шулдыр гурез, чебер жингрес. Данъя, ушъя гырлы кылын, Дугдылытэк со выль кенмес. Пиос арган шудо вожмин Нылъёс гурзэ нёжто дэмен... Сюан калык шумпотэмын, Выль кен зориз, пе, тол куазен. Тол шокамысь сюрес южма, Изьы, кышет - ваньмыз гӧртэм, Нош кенмылэн бамыз гома, Шудэз пиштэ сутэр синмаз! Пумитамы корказь азе Пазял кенак васькоз штопен, Ӝиптоз пизэ, ӝиптоз кензэ, Юалляськоз тупен-тупен. Корка бадӟым, пушкыз югыт, Шуоз кенак выль кенезлы: "Дорам тыныд уз лу мӧзмыт, Пие вӧзын луод нылы..." Ӝуто валъёс тӧдьы тузон, Дӧдьы берын ковёр тӧла!.. Сюан, сюан... Мар шумпотон! Бен мед гинэ сюрод пӧлаз!.. Анатолий Комаров ВЫЛЬ КЕН ПЫЛАТОН - Гуртамы Одоть - выль кен, Ойдо сое пылатом, Ярдуре султом дэмен, Яратэмзэ юалом. - Тэтчысал - визыл кыскоз, Сумед сюен шобыртоз, Кайгу - иськавынъёслы, Уката но картэлы. - Кайгыроз ик, дыр, Одоть, Жалялом асьме пимес. Кускозяд пыртом ик коть - Веръялод Вало вумес. - Пырысал но - выль дӥсен, Вошки вал юмшан муген. Эн сӧре ни мылкыдме, Эн уретэ кырӟанме. - Кырӟамед, Одоть, пӧрме, Шып кылзэ гурдэ Вало. Васькы гинэ ву дуре - Йырсиостэ веттылом. - Васькысал - йырси котмоз, Йырси пунэт сэрттӥськоз, Кырын выльысь пуныны - Тӧлэд дасяк туганы. - Йырсиед кузен туж кузь, Нодтэм но уг лу шуны. Гажанэд ачиз вуиз - Шуре сое пыртомы. Выль кенлэн гомӟиз тусыз, Ву дуре бызьса васькиз. - Эн, эн исалэ картме. Пыртэ со понна асме! Флор Васильев Х Х Х Песяйлы песяез вераллям: Вашкала дыръёсы, пе, вал сям - Кулэм мурт ватыку кырӟаллям, Крезьгурзэ валтӥллям нош паллян. Бускельзэс пыраклы келяку Кутчаллям кутъёссэс но паллян. Шай дорысь тылскемез пелляку Кылӥськоз вал кема ӝож кырӟан. Мугорыз ке кошкиз - мар карод?! Нош лулыз, пе, татчы мед кылёз. Паллян гур кылӥськиз ке пеляз, Со кузя вамышсэ мед лёгоз. Со кожоз шайгуэ сюресысь, Ас гуртаз пыраклы, дыр, кылёз. Калыкъя огъя гур кырӟамысь Аслэсьтыз куаразэ но кылоз. Со лулзэ, ик, вылды, возьыса, Тылскем тыл шай дорын пуроме. Осконтэм малпанлы оскыса, Калыкъёс кырӟало на дэмен. "Со озьы вал, - шуэ песяе, - Люкиськон котькинлы но секыт. Малы ке малпанам та вие Весь ӵемгес лыктылэ вуж вакыт". Анатолий Волков АЗВЕСЬ СЮАН Куаръёс поръяло ни, усё шыпырак, Асьме арлыдмес вераса. Пильмо луэ куазь, векчи зор кыдыра, Мӧзмыт ни луэ улон сад. Туннэ пусйиськом ни Азвесь сюанмес, Кема асьмеос ни ӵошен. Ӝоген пужмерен ни басьтоз йырсиме, Мылкыд мед кылёз егитэн. Югыт мылкыдмес асьмелэсь кылдытӥз Тулыс усьтӥськем льӧль ӟардон. Соку лыктыса ворекъясь сюрестӥз Улӟиз ас дыраз яратон. Бадӟым сюресэз ортчимы ни тонэн Будэ, шулдырме семьямы. Шудмес ми ӧм воштэ коньдон-ваньбурен, Уз вормы шудмес тӧдь лымӹ Даниил Яшин Со вакытэ Горд Армие келян Таӵе ик син азям суредаське. Ладимылэн кырӟан гурез пелям Дырын-дырын али но чузъяське. Тани со, кутыса кияз молот, Чукен коньдон шуккиз мумыкоре. Шӧдӥськытэк, шӧдӥськыса, оло, Лул-сюлэмзэ ӧръяз кырӟан гуре: Ӧсэтӥ но потыкум, Анаелэсь люкиськыкум, Горд чук но мед луо вал Мумыкоре кыльыны. Бӧрдэ анай, бӧрдо нылкышноос, Пересь муртъёс кыл вератэк уло. Корка тыр люкаськем келяськисьёс Пумен агай сьӧры ни кырӟало. Горд чук но мед луо вал Мумыкоре кыльыны. Та вакытэ ӧй вал ни атаймы - Вазьгес уго со улонысь кошкиз. Лади нош, ортчыкуз гидкуазьтӥмы, Сое но кырӟаназ тодаз ваиз. Капкаетӥ потыкум, Атаелэсь люкиськыкум, Азвесь но мед луо вал, Питыраса кыльыны. Нош урамын мукет пиосъёсыз Та агайме сямен ик келяло. Ваньзы - келясьёсыз, кошкисьёсыз - Ӝожмыт гурез дэмен ни кырӟало: Ураметӥ кошкыкум, Калыкелэсь люкиськыкум, Сяська но мед луо вал, Чигыса кыльыны. Сяська ӧз луэ, ӧз, воргоронъёс, Сюрес урдсы ӧз кыле чигыса... Урам пумын сыло келяськисьёс, мышсэс весь учкыса но бӧрдыса. Ӧй вал бӧрдӥсьёсыз алӥсь муртъёс, Ӧй вал, дыр, алыныны но кулэез: Секыт ожмаськонэ кошкылэмъёс, Тодмо ини, уз берытске тросэз... ...Мултэс дуно, укыр мултэс дуно Странамылы Быдӟым война йӧтӥз. Асьме калык кызь миллионлэсь уно Нылзэ-пизэ лек тылӝуын ыштӥз. Шат соинтэк бӧрысь но кылдыло Секыт аръёс сярысь кылбуранъёс, Али но сюлэмез чепылляло Ортчем вакыт сярысь ӝож кырӟанъёс. Яков Майков КЕЛЯСЬКОН Куӵо музъем вылэ усе ӵыжыт палэзь, Сӥзьыл тӧлъёс пельто, пельто... Кошкись пиос туннэ чебер нылъёсмылэсь Мылкыдъёссэс ӝоже кельто. Яратэмзэс нылъёс вато калык азьын, Ку верало - тодӥсь ӧвӧл... Кырӟан гинэ уя кӧлӥсь урамъёсын, Арган гурез ветта ыр тӧл. Егит пилэн кияз пужыятэм кышет - Тодэ ваён понна кузьым. Мусо ныл, эн мӧзмы - бертоз гажан эшед, Эшшо ӝужаз ке вож узьым. Ӟеч ужъёсмес солдат быгатыса утёз, Басьтоз уно тодон-валан. Бертӥз ке, нош ик со зарни ю-нянь кизёз, Гуртын луоз шулдыр сюан. Куӵо музъем вылэ усе ӵыжыт палэзь, Шулдыр гурзэ шудэ арган. Урамъёсын туннэ юзмыт ӵукна палозь Мылкыдъёсыз ӧръя кырӟан. Алексей Ельцов ИЗЬ, НУНЫЕ Нуны веттан Ӵуж кӧжы кадь гинэ Пичиесь чиньыос, Лыз мульы кадь гинэ Чебересь чимыос. Чип-тӧдьы йырсиед Мертчан кадь ик небыт, Котырес бамъёсыд Узы кадь ик ӵыжыт. Туж пичи на ай тон, Алигес вордскемын. Лыз мульы чимыос Изьыны кынемын. Изь ай, изь, нуные, Тон вордскид будыны. Анаед-атаед Шуд сӥзё ук тыныд. Михаил Федотов ШИРЪЯН Ойдо, ойдо, эше возь вылэ, Валляла удмуртъёс кадь эктом. Та турнан - куар басьтон - нуналэз Я бен вай асьмеос шулдыртом. Нылъёсмы но тӥни чуренак Ворекъясь сяськаос кадь сыло. Кесэгзэс но ӧз мытылэ на, Эктыны ӧтеммес возьмало. Кутскизы ук нылъёс но пиос, Крезьгурась арганэд но укыл. Тыпырто, тапырто эктӥсьёс, Пыд улысь чилектоз ини тыл. Мылкыдо эктэммес адӟыса, Шундыед но ӧз чида, лэся, Чырткем пи кадь капчи тэтчаса, Возь вылэ ик васькиз со весяк. Ой, эктӥ мон туннэ, ой, эктӥ. Ужаны мылкыдме бен ӧръяй. Пыдъёсме, киосме кадь воштӥ. Эмъяськись вылэмед тон, ширъян. Удысэз мытыны курыса, Кусоед но шулдыр жонгетӥз. Удмуртлэн валляла дыръёсаз Та вие ик вуи кадь етӥз. Анатолий Комаров ГЫРОН БЫДТОН ГУР Вало дурын вазе крезь - Гуреныз вырӟоз гурезь... Тыпыр-тып, Тыпыр-тып - Гадь пушкын шулдыр мылкыд, Эктыны куриське пыд. Ӵужкенакед - горд намер, Кышетэз - ӵыж кашимер. Тыкыр-тык, Тыкыр-тык - Пыдзэ лёгыса кырӟа, Такмакъёс йыраз лачак. Бӧрсяз потӥз казакныл, Гордань Мани - ӝуась тыл. Зӥр берга, Зӥр берга, Туп кадь тэтча горданед, Пыдъёсыз музэ уг йӧт. Пересьёс но, пе, эктом, Вай кругмес бадӟыматом! Оп, каро, Оп, каро, - Ӧрӟилэн кадь мылкыдзы, Ӵыштыр-ӵаштыр эктэмзы. Чик эктӥсьтэм бускеле Мыняк-мыняк потылэ, Эх, шуэ Эк, шуэ, Пыдзэ лёгаса чабе, Эктӥсько, пе, со кабен. Куаразэ сётӥз арган. Итӥськиз бӧрсяз баян, Вики-вак, Вики-вак, Эктэмъя потэ эктэм, Ёзвиысь кошке жадем. Туннэ бадӟым шумпотон - Гуртамы гырон быдтон. Тыпыр-тып, Тыпыр-тып, Кизёнмес быдтӥм дыраз, Шулдыръяськом тареяз! Сог-сог мед будоз няньмы, Бусьтыр медло кеносмы. Тыпыр-тып, Тыпыр-тып, Бусьтыр медло кеносмы, Шулдыр луоз улонмы. Анатолий Комаров СЮАН, СЮАН Шунды яркыт, сюрес вольыт, Лымы пиштэ чильыр-вольыр! Дӧдьы бурдъёс - дыдык бурдъёс, Валъёс бӧрсьы лобӟо соос! Буко жуге азвесь гырлы, Шулдыр гурез, чебер жингрес. Данъя, ушъя гырлы кылын, Дугдылытэк со выль кенмес. Пиос арган шудо вожмин Нылъёс гурзэ нёжто дэмен... Сюан калык шумпотэмын, Выль кен зориз, пе, тол куазен. Тол шокамысь сюрес южма, Изьы, кышет - ваньмыз гӧртэм, Нош кенмылэн бамыз гома, Шудэз пиштэ сутэр синмаз! Пумитамы корказь азе Пазял кенак васькоз штопен, Ӝиптоз пизэ, ӝиптоз кензэ, Юалляськоз тупен-тупен. Корка бадӟым, пушкыз югыт, Шуоз кенак выль кенезлы: "Дорам тыныд уз лу мӧзмыт, Пие вӧзын луод нылы..." Ӝуто валъёс тӧдьы тузон, Дӧдьы берын ковёр тӧла!.. Сюан, сюан... Мар шумпотон! Бен мед гинэ сюрод пӧлаз!.. Анатолий Комаров ВЫЛЬ КЕН ПЫЛАТОН - Гуртамы Одоть - выль кен, Ойдо сое пылатом, Ярдуре султом дэмен, Яратэмзэ юалом. - Тэтчысал - визыл кыскоз, Сумед сюен шобыртоз, Кайгу - иськавынъёслы, Уката но картэлы. - Кайгыроз ик, дыр, Одоть, Жалялом асьме пимес. Кускозяд пыртом ик коть - Веръялод Вало вумес. - Пырысал но - выль дӥсен, Вошки вал юмшан муген. Эн сӧре ни мылкыдме, Эн уретэ кырӟанме. - Кырӟамед, Одоть, пӧрме, Шып кылзэ гурдэ Вало. Васькы гинэ ву дуре - Йырсиостэ веттылом. - Васькысал - йырси котмоз, Йырси пунэт сэрттӥськоз, Кырын выльысь пуныны - Тӧлэд дасяк туганы. - Йырсиед кузен туж кузь, Нодтэм но уг лу шуны. Гажанэд ачиз вуиз - Шуре сое пыртомы. Выль кенлэн гомӟиз тусыз, Ву дуре бызьса васькиз. - Эн, эн исалэ картме. Пыртэ со понна асме! Даниил Яшин Со вакытэ Горд Армие келян Таӵе ик син азям суредаське. Ладимылэн кырӟан гурез пелям Дырын-дырын али но чузъяське. Тани со, кутыса кияз молот, Чукен коньдон шуккиз мумыкоре. Шӧдӥськытэк, шӧдӥськыса, оло, Лул-сюлэмзэ ӧръяз кырӟан гуре: Ӧсэтӥ но потыкум, Анаелэсь люкиськыкум, Горд чук но мед луо вал Мумыкоре кыльыны. Бӧрдэ анай, бӧрдо нылкышноос, Пересь муртъёс кыл вератэк уло. Корка тыр люкаськем келяськисьёс Пумен агай сьӧры ни кырӟало. Горд чук но мед луо вал Мумыкоре кыльыны. Та вакытэ ӧй вал ни атаймы - Вазьгес уго со улонысь кошкиз. Лади нош, ортчыкуз гидкуазьтӥмы, Сое но кырӟаназ тодаз ваиз. Капкаетӥ потыкум, Атаелэсь люкиськыкум, Азвесь но мед луо вал, Питыраса кыльыны. Нош урамын мукет пиосъёсыз Та агайме сямен ик келяло. Ваньзы - келясьёсыз, кошкисьёсыз - Ӝожмыт гурез дэмен ни кырӟало: Ураметӥ кошкыкум, Калыкелэсь люкиськыкум, Сяська но мед луо вал, Чигыса кыльыны. Сяська ӧз луэ, ӧз, воргоронъёс, Сюрес урдсы ӧз кыле чигыса... Урам пумын сыло келяськисьёс, мышсэс весь учкыса но бӧрдыса. Ӧй вал бӧрдӥсьёсыз алӥсь муртъёс, Ӧй вал, дыр, алыныны но кулэез: Секыт ожмаськонэ кошкылэмъёс, Тодмо ини, уз берытске тросэз... ...Мултэс дуно, укыр мултэс дуно Странамылы Быдӟым война йӧтӥз. Асьме калык кызь миллионлэсь уно Нылзэ-пизэ лек тылӝуын ыштӥз. Шат соинтэк бӧрысь но кылдыло Секыт аръёс сярысь кылбуранъёс, Али но сюлэмез чепылляло Ортчем вакыт сярысь ӝож кырӟанъёс. Яков Майков КЕЛЯСЬКОН Куӵо музъем вылэ усе ӵыжыт палэзь, Сӥзьыл тӧлъёс пельто, пельто... Кошкись пиос туннэ чебер нылъёсмылэсь Мылкыдъёссэс ӝоже кельто. Яратэмзэс нылъёс вато калык азьын, Ку верало - тодӥсь ӧвӧл... Кырӟан гинэ уя кӧлӥсь урамъёсын, Арган гурез ветта ыр тӧл. Егит пилэн кияз пужыятэм кышет - Тодэ ваён понна кузьым. Мусо ныл, эн мӧзмы - бертоз гажан эшед, Эшшо ӝужаз ке вож узьым. Ӟеч ужъёсмес солдат быгатыса утёз, Басьтоз уно тодон-валан. Бертӥз ке, нош ик со зарни ю-нянь кизёз, Гуртын луоз шулдыр сюан. Куӵо музъем вылэ усе ӵыжыт палэзь, Шулдыр гурзэ шудэ арган. Урамъёсын туннэ юзмыт ӵукна палозь Мылкыдъёсыз ӧръя кырӟан. Алексей Ельцов ИЗЬ, НУНЫЕ Нуны веттан Ӵуж кӧжы кадь гинэ Пичиесь чиньыос, Лыз мульы кадь гинэ Чебересь чимыос. Чип-тӧдьы йырсиед Мертчан кадь ик небыт, Котырес бамъёсыд Узы кадь ик ӵыжыт. Туж пичи на ай тон, Алигес вордскемын. Лыз мульы чимыос Изьыны кынемын. Изь ай. Изь, нуные, Тон вордскид будыны. Анаед-атаед Шуд сӥзё ук тыныд. Михаил Федотов ШИРЪЯН Ойдо, ойдо, эше возь вылэ, Валляла удмуртъёс кадь эктом. Та турнан - куар басьтон - нуналэз Я бен вай асьмеос шулдыртом. Нылъёсмы но тӥни чуренак Ворекъясь сяськаос кадь сыло. Кесэгзэс но ӧз мытылэ на, Эктыны ӧтеммес возьмало. Кутскизы ук нылъёс но пиос, Крезьгурась арганэд но укыл. Тыпырто, тапырто эктӥсьёс, Пыд улысь чилектоз ини тыл. Мылкыдо эктэммес адӟыса, Шундыед но ӧз чида, лэся, Чырткем пи кадь капчи тэтчаса, Возь вылэ ик васькиз со весяк. Ой, эктӥ мон туннэ, ой, эктӥ. Ужаны мылкыдме бен ӧръяй. Пыдъёсме, киосме кадь воштӥ. Эмъяськись вылэмед тон, ширъян. Удысэз мытыны курыса, Кусоед но шулдыр жонгетӥз. Удмуртлэн валляла дыръёсаз Та вие ик вуи кадь етӥз. Анатолий Комаров ГЫРОН БЫДТОН ГУР Вало дурын вазе крезь - Гуреныз вырӟоз гурезь... Тыпыр-тып, Тыпыр-тып - Гадь пушкын шулдыр мылкыд, Эктыны куриське пыд. Ӵужкенакед - горд намер, Кышетэз - ӵыж кашимер. Тыкыр-тык, Тыкыр-тык - Пыдзэ лёгыса кырӟа, Такмакъёс йыраз лачак. Бӧрсяз потӥз казакныл, Гордань Мани - ӝуась тыл. Зӥр берга, Зӥр берга, Туп кадь тэтча горданед, Пыдъёсыз музэ уг йӧт. Пересьёс но, пе, эктом, Вай кругмес бадӟыматом! Оп, каро, Оп, каро, - Ӧрӟилэн кадь мылкыдзы, Ӵыштыр-ӵаштыр эктэмзы. Чик эктӥсьтэм бускеле Мыняк-мыняк потылэ, Эх, шуэ Эк, шуэ, Пыдзэ лёгаса чабе, Эктӥсько, пе, со кабен. Куаразэ сётӥз арган. Итӥськиз бӧрсяз баян, Вики-вак, Вики-вак, Эктэмъя потэ эктэм, Ёзвиысь кошке жадем. Туннэ бадӟым шумпотон - Гуртамы гырон быдтон. Тыпыр-тып, Тыпыр-тып, Кизёнмес быдтӥм дыраз, Шулдыръяськом тареяз! Сог-сог мед будоз няньмы, Бусьтыр медло кеносмы. Тыпыр-тып, Тыпыр-тып, Бусьтыр медло кеносмы, Шулдыр луоз улонмы. Анатолий Комаров СЮАН, СЮАН Шунды яркыт, сюрес вольыт, Лымы пиштэ чильыр-вольыр! Дӧдьы бурдъёс - дыдык бурдъёс, Валъёс бӧрсьы лобӟо соос! Буко жуге азвесь гырлы, Шулдыр гурез, чебер жингрес. Данъя, ушъя гырлы кылын, Дугдылытэк со выль кенмес. Пиос арган шудо вожмин Нылъёс гурзэ нёжто дэмен... Сюан калык шумпотэмын, Выль кен зориз, пе, тол куазен. Тол шокамысь сюрес южма, Изьы, кышет - ваньмыз гӧртэм, Нош кенмылэн бамыз гома, Шудэз пиштэ сутэр синмаз! Пумитамы корказь азе Пазял кенак васькоз штопен, Ӝиптоз пизэ, ӝиптоз кензэ, Юалляськоз тупен-тупен. Корка бадӟым, пушкыз югыт, Шуоз кенак выль кенезлы: "Дорам тыныд уз лу мӧзмыт, Пие вӧзын луод нылы..." Ӝуто валъёс тӧдьы тузон, Дӧдьы берын ковёр тӧла!.. Сюан, сюан... Мар шумпотон! Бен мед гинэ сюрод пӧлаз!.. Анатолий Комаров ВЫЛЬ КЕН ПЫЛАТОН - Гуртамы Одоть - выль кен, Ойдо сое пылатом, Ярдуре султом дэмен, Яратэмзэ юалом. - Тэтчысал - визыл кыскоз, Сумед сюен шобыртоз, Кайгу - иськавынъёслы, Уката но картэлы. - Кайгыроз ик, дыр, Одоть, Жалялом асьме пимес. Кускозяд пыртом ик коть - Веръялод Вало вумес. - Пырысал но - выль дӥсен, Вошки вал юмшан муген. Эн сӧре ни мылкыдме, Эн уретэ кырӟанме. - Кырӟамед, Одоть, пӧрме, Шып кылзэ гурдэ Вало. Васькы гинэ ву дуре - Йырсиостэ веттылом. - Васькысал - йырси котмоз, Йырси пунэт сэрттӥськоз, Кырын выльысь пуныны - Тӧлэд дасяк туганы. - Йырсиед кузен туж кузь, Нодтэм но уг лу шуны. Гажанэд ачиз вуиз - Шуре сое пыртомы. Выль кенлэн гомӟиз тусыз, Ву дуре бызьса васькиз. - Эн, эн исалэ картме. Пыртэ со понна асме! Эрик Батуев Лейла верос Кузь йырсиоссэ Лейла кышет улаз ватӥз: мурт синъёсты бордазы кыско угось. "Ӵыжы- выжыосме гинэ медам пумита вал. А то быро!" - Лейла, палэнэ учкылытэк, азьлань дыртэ. Векчи, йылсо каблукъёсыз аэропорт выж вылтӥ ӧчкарыса кадь зол йыггето. Дэрем но туж чебер дӥсям, сьӧдо-тӧдьыё воротникен но манжетэн. Воргоронъёс Лейлаез кыдёкысен ик адӟо, шораз пыр-пыр учко, синъёссэс воштыны уг ӵыдо. Кудӥз дораз вамыштыны но дась. Собере монэ адӟо но, мылкыдзы шуя. Но мынам соослы йыры кур ӧвӧл, Лейлаез нош поннам тышкаськисько: "Мунё! Шедьтэм ук маин Чечняе мыныны. Война - со дискотека-а, мар-а?!" Лейла монэ уг ик адӟы кадь. Ас понназ вераськыса мынэ: - Марлы со монэ Чечняе ӧтиз? Мар вераны турттэ вал?.. Солэн йыраз али Руслан гинэ... Руслан... Руслан... Ар талэсь азьло мон Лейлалэн комнатаяз пукисько вал (одӥг университетын дышетским, общежитимы но одӥг вал, комнатаосмы - артэ), чай юисько. Шуак ӧс усьтӥськиз. Кыӵе ке пияш пыриз. Йыгаськытэк, юаськытэк, чырткемъяськытэк. Ӝужыт, сьӧдалэс. Пырем бераз ик мон шоры умойтэм синмын учкиз - "кин та таӵе, ма татын каре?" юаса кадь. Собере ини Лейла шоры но мыр-мыр учкиз. Лейла сое соку ик ӝӧк сьӧры ӧтиз. Валэктыны дыртӥз: - Та мынам бускеле. Сергей. Журналист. Трос пол ми пала вуылӥз. - Чечняын вал, иське? - тодмотэм муртлэн ымнырыз син куспын воштӥськиз, мон шоры ӟеч мылкыдын учкыны кутскиз. - Мынам нимы - Руслан. - Кизэ мычиз. Киыз бадӟым, чурыт но секыт. Артэ пуксиз. Кӧня ке улыса юаз: - Кельшиз-а ми палан? Мар шуыны ик пайми. Отын война мынэ, нош та... - кельшиз-а, пе, Чечня? Валэктэмме со возьмаса ӧз ул. - Так! - пыдесаз чабкиз но дуак! султӥз. - Пӧрмытске ӝоггес: ресторанэ мынӥськом. Эшелэн вордскем нуналэз. Мон "уг мын" шуи. Мар тодмотэм муртлэн аресаз ветлод? Ӧтемын но, мар но ӧвӧл. - Мынам куное - тынад куноед! Дӥськуттэс воштэ но... - Руслан мон пала берытскиз. - Тон тазьы но мыныны быгатод. Кызьы мылыд потэ... Тӥни озьы шӧдтэк шорысь мон ресторанэ сюри. Тулыспал толэзе вал со. Кезьыт. Пинь вылэ пинь уг йӧтылы - сыӵе кезьыт! Нош ресторанын - шуныт. Отын чечен пиос гинэ пуко. Кудӟемын ини. Куашето, кесясько. Ас сяменызы экто. Ымныръёссэс адӟи но, мылкыды куашказ. Нош ик Чечняез тодам ваи. Отын куинь толэзь война мынэ ини, нош таос Москваын пуко, ресторанын юмшало. Я, юондыр мырдэм-мырдэм быриз. Часэн ӝыныен уин, тём-тём пеймытэн, ми шулдыръяськонысь потӥм. Шунытысь - кезьытэ. Метро пытсамын ини, машинаос уг ик дугдыло. Фук! гинэ карыса вӧзтӥмы ортчо. Киосмес ӝутъяса, ӝыны час пала сылӥм. Такси интые ми доры мукет машина дугдӥз. Милицилэн "Уазикез". Отысь тэтчыса ик сержант потӥз. - Возьматэ документтэс! - ӝотак вазиз Русланлы. Солэн паспортаз учкиз но лӧптыса ик кеськиз: - Эй, эшъёс, чечен! Кудӟемын! Машинаысь эшшо кык милиционеръёс потӥзы на. Автоматэн-маин. - "Гумыяд" наркотикъёсыд вань-а? - Ӧвӧл, - вазиз Руслан. - Нош тӥляд паспортты? - табере монэ ёртыны кутскизы. - Так, ваньды машинае! Нош тон, нылаш, - сержант Лейлалы вазиськиз, - гуртад берт. Лейла ми сьӧры куриськиз. Руслан ӧз лэзьы: - Тани тыныд уксё - таксиен берты. Ми ӝоген вуом. Милемыз одӥг камерае пуктӥзы. Ӟусмы но борддоръёс тышкаськон кылъёсын гожмамын. Котыр шыпыт. Соин ик умой кылӥське, кызьы милиционеръёс начальникенызы верасько. Ми, пе, чеченэз но одӥг валантэм гражданинэз кутӥм. Мар вераз соослы начальниксы телефон пыр - кин тодэ. Вераськонзэс быдтыса, милиционеръёс картаен шудыны кутскизы. Часлэсь ятыр ини камераын пуким, нош соос шудо но шудо. Ми сярысь чылкак вунэтӥзы кадь. Изем потэ ини. Чурыт ӟус вылын пукыса, умме озьы гинэ уд усьы. - Сергей! - шыпытак вазиз Руслан. Собере киям пичи пакет донгиз. - Ват. - Мар та? - Кокаин. - ?! - ӟус вылысь ӧжыт гинэ ӧй усьы. Изён мылкыды кышкатэм куака уллё кадь отчы- татчы пазьгиськиз. Чиньыосы пичи пакетэз кырым пушкам ватӥзы. Вылтыры дыр-р! куалекъя. Вот кыӵе вылэм со - кышкан! Ведь кокаинэз кисыысьтым шедьтӥзы ке, отделениысьтызы ик пырак тюрьмае келялозы! Тае тодыса, анаелэн сюлмыз уз чида. Руслан шорам учке вылэм. - Ват! Кисыысьтыд уз утчалэ. Тон чечен ӧвӧл ук. - Уг, Руслан! Вай пакеттэ кытчы ке татчы ватом. Мон котырак учки но синйылтӥ: борддорын пичи пась вань. Та бинет отчы тэроз. Кышкан синъёсты но сакгес каре вылэм. Руслан гор-гор серекъяны кутскиз. Бинетсэ берен басьтӥз, кисыяз донгиз. Нош мыным серемен йырин ӧй вал: умойтэм учыре сюри. Табере со монэ кышкась шуоз. - Серекъя, серекъя. Тон но олокыӵе герой ӧвӧл. Чечняын война мынэ, нош тон Москваын юмшаса ветлӥськод. Мон чечен луысал ке, татын ӧй пукысал. Русланлэн киосыз бадӟым мыжыкъёслы пӧрмизы. Мыжгоз-а, уз-а - мыным нокыӵе ӧз йӧт. Ӧз мыжгы. Секыт лулӟиз, мыжыкъёсыз пасям туп сямен лябомизы, шуязы. - Мон туннэ ик бертыны дась, - вазиз со. - Только агае уг лэзьы. Агайлэн кылыз, милям законъёсмыя, - закон. Табере ачиз но Руслан пасяськем туплы кельшыны кутскиз. - Но тӥ палъёсын ведь война мынэ! Вань мӧйыосты озьы кылзӥськизы ке, кин ожмаськоз? Руслан гадь тыраз ик омырез кыскиз, собере выльысь секытэн шокчиз: - Мон тыныд али ваньзэ вераны уг быгатскы. Москваысь кошкеме пока уг луы... Шуак-дуак кошки ке, трос муртъёс умойтэм югдуре шедёзы. Вань ужъёсме пумозяз быдтӥ ке, соку рос-прос вераськыны быгато ини. Ӧз ке но лэзь, одно берто. - Ма, умме-а, мар-а усиды?! - корт ӧсэ ӵыжись луиз. - Потэ давай! Ӧс усьтӥськиз. Милиционеръёс протокол пӧраны кутскизы. Лыдӟи но пайми: милемыз, пе, куашетэммы, милиционерлы мытылэммы понна ӝегатӥзы. Чутрак шуи: - Мон та чуръёс улэ уг гожтӥськы! Руслан пыдме лёгиз: шып ул, пе. - Ярам, вае бумагадэс, - мылпоттэк киме нюртӥ. Быдэн дас манет тырим но эрико луим. Та дыр куспын куазь эшшо кезьытомем. Урамын одӥг машина но ӧвӧл, Садовой кольцо пала, центрлань, пыдын кошким. Сэрыт мынӥськом - куазь ачиз дыртытэ. Выж доры вуэм берамы Руслан тыпак дугдӥз. Кисыяз пыриз но пичи бинетсэ поттӥз. - Кулэ-а? Мон бинетсэ йыркурен палэнтӥ но азьлань вамыштӥ. Со дугдытӥз. - Та кокаин ӧвӧл, - серектӥз Руслан. - Ӧвӧл?! - Ӧвӧл. Мон тонэ эскерыны малпай. Вузалод-а монэ ментъёслы, уд-а? Та - насвай, та понна номыр ӧй карысалзы. Руслан бинетсэ усьтӥз: - Адӟиськод-а, тӧдьы ӧвӧл та - вож. Табере тодӥсько: тонэн эшъяськыны луоно, - чик серекъятэк ини вераз со. Озьы мыскыллямез понна ӧжыт гинэ ӧй мыжгы сое. - Вождэ эн вай, - Руслан кизэ мычиз. Ойдо, пе, ваньзэ вунэтом. Мон мылы потытэк кизэ кырми... * * * Самолёт Ингушетие вуэ ини, отысен Грозные таксиен кык час мыноно на. Лейла нош ик шугъяськыны кутскиз. - Ӵыжы-выжыосме гинэ медам пумита вал. А то соос берен Москвае келялозы. Самолётысь потэм берамы сэрытгес такси утча. Озьы ик лэсьтӥ. Ог витьтон аресъем таксист трос ке но куриз, кытчы пырод, война вакытэ такси куинь пол будэ. Таксист чечен ке но, Лейла соин ӟуч сямен вераськиз. Ас нимзэ но воштыса вераз. Бигер ныл кариськиз. Нокин, пе, медаз тод кин луэмме. Солэн атаез угось оппозиционер вылэм, Дудаевлы пумит нюръяськись мурт, тодӥзы ке, Грозныёзь но, пе, уг ву - заложник карозы. "Москвичлэн" укноетӥз гурезьёс адскизы. Ӵукна зорем, соин ик али вылӥе бус ӝутӥське - ӵындэ кадь. Кытын Чечня кутске, сюресъя но валано. Отын но татын "Сак луэ: минаос!" гожтэмъёс адскыло. Пумитамы грузовой машинаос сюрыло. Пӧртэм арбериосын но адямиосын тырмемын.Грозныйысь калык пегӟе. Кудӥз пыдын но мынэ. Пуликовский генерал ультиматум ялэм: кык нунал куспын Грозныйысь вань чечен боевикъёс кошкыны кулэ. Ӧз ке кошке, городэз, пе, музъемен ӵошкатом. Авиация но, артиллерия но ыбылоз. Ӵапак та ультиматумез гожтон вакытэ ми сюрес вылэ потыны кемдӥськимы. Милемлы одӥг нунал но дас час дыр кылемын. - Тон журналист, удостоверенидэ возьматод но, чеченъёс но "федералъёс" но уз дугдытэ, - шуиз Лейла. Собере Руслан доры ветлыны дэмлаз. Пумит ӧй кариськы. Лейла мугзэ но вераз: - Руслан анаеныз сюанмы сярысь вераськыны бертӥз вал... Солэн кошкемез дырысен куинь толэзь ортчиз ини. Чечен гурезьёс доры матэктэммыя сюрес уродгес но уродгес луэ. Асфальт интыен- интыен копак пырдэмын, гопъяськемын. "Москвичмы" танк кадь зуркаса ворттэ. Русланлэн гуртаз ӝыт пал вуим ини. Кытысь ке артысь гинэ автоматъёсын ыбылӥськем кылӥське. Нош гурт сьӧрын, чу! чу! карыса, "градлэн" снарядъёсыз пуштыло. Русланлэн коркаез дорозь сю вамыш пала кылем бере Лейла машинаез дугдытыны косӥз. Собере таксистэз Руслан доры ыстӥз: - Вералэ: Москваысь Сергей вуиз. Кышноеныз. Татчы мед лыктоз. Пересь таксист кошкиз гинэ - Лейла синучконзэ поттӥз. Бератаз шуак берыктӥськиз но мынэсьтым юаз: - Ну, мар шуод? Чебер кен луо-а? - Тьфу! - шуи но мышкин кариськи. Лейла... жин-жин серектӥз: - Мон так гинэ юай. Тодскод ведь сямме... Чечен сюанэ мыным ноку вуылыны ӧз кылды. Соин ик ветлэм, адӟем потэ. Соослэн сюанзы, пе, куинь нунал кыстӥське. Шулдыр, шуо... Юаме потэ вал: чеченъёс сюан дыръя мар кузьмало? Но юаса ӧй вутты - ӧс усьтӥськем куара кылӥськиз: таксист потӥз. Солэн мышкысьтыз кышномурт ымныр мычиськиз. Русланлы кельше - анаез, дыр. Мон машинаысь потӥ. Пумитазы вамыштӥ. Чечен сямен чырткемъяськи. Тазалыкез сярысь юай. - Тау. Асьтэос кызьы вуиды? Сюресты кыӵе-мар вал? - Умой, тауэлэ. - Руслан Мурат дорын, дыр. Ойдолэ возьмато, - машинамы пала вамыштонъяз шуиз кышномурт. - Тӥ Русланлэн анаез-а? - юай солэсь. - Ӧвӧл, сузэрез. - Ог-огдылы туж кельшиськоды. - Ваньмыз озьы шуо. "Москвич" вӧзтӥ ортчыкумы, кышномурт машина пушкы учкиз: Лейла ӝыны ымнырзэ азьпал пуконлэн тыбыр сьӧраз ватэм. - Руслан кыӵе улэ ини? - юасько, Лейла шоры гинэ медаз учкы шуыса. - Огсен улэ. - Ӧз кышнояськы на-а? - кылтэмлэсь кыл гинэ юай. - Кышнояськиз. Ог арня талэсь азьло. Сюанэз шулдыр ортчиз. Калыкез трос вал. Мон ас пельёсылы ӧй оскы. - Нош машинаын кыӵе ныл пуке? - юаз со. - Кышное, - ӧрекчано луиськиз. Валамон, Лейла куремъя. - Чебер. Чечен ныллы укша. - Бигер со, - нош ик алдаськытэк ӧйлась... Руслан Мурат дорын но ӧй вал. Нош кулэ на-а сое утчаны? Лейлалы табере татын номыр карыны. Озьы ке но, шуак-дуак уд кошкы. Русланлэн сузэрез маке умойтэмзэ шӧдоз. Мурат валэктӥз, кытысь Русланэз шедьтыны луоз. Солы но Русланлэн сузэрезлы тау кари но машинамы доры дыртӥ. - Кошким! - шуи таксистлы. - Кытчы?! - таксистэн Лейла мон шоры паймыса учкизы. - Грозные. - Марлы? Со отын шат? - Лейлалэн бадӟым синъёсыз эшшо бадӟымесьгес луизы. - Ӧвӧл... - зэмзэ вераны ымы ик мырдэм усьтӥськиз. - Со... Со кышнояськем ини. Лейла кузь гижыосыныз чыртыям кырмиськыны дась луиз. "Алдай" шуэмме вите. Но мон эшшо огпол верай: - Со кышнояськем. Лейла валаз кадь: мон сое уг пӧяськы. - Кин озьы шуиз? - Сузэрез. Таксист машиназэ улӟытӥз. Лейлалэн бамъёсыз вылтӥ синкыли шапыкъёс погыльскизы. - Шузи мон! Шузи! Кызьы соку ик ӧй вала? Сое кужмысь кышноязы! Ӵапак соин сэрен монэ ӧтиз вал. Нош мон тани ӝегай. Ваньмыз та войнаен йырин озьы луиз. Мон сое кызьы буйгатыны ик ӧй вала. - Ойдо вырӟим, - шуиз со таксистлы, синвуоссэ ӵушылонъяз. - Кытчы?.. - паймиз соиз. - Со доры. Солэн возьыттэм синъёсаз учкеме потэ. * * * Инмын нырысетӥ кизилиос адскизы. Капкае йыгаськи. Тушо чечен потӥз. Пельпумаз автомат ошемын, бур пыдыз чутэ. - Ассаламу аллейкум! - вази мон солы. - Во аллейкум ассалам! - Руслан тӥ дорын-а? Мон солэн эшез, журналист. Москваысь лыктӥ. - Пыр! Руслан гужем кухняын пуке вал. Карасин лампалэн тылыз ымнырме югдытӥз но, со ӝӧк сьӧрысь тэтчыса ик потӥз: - Сергей?! Тон?! Ӟыгырским. Зэмзэ но, пумиськеммылы со туж шумпотӥз. Мон но пӧртэм ӧй вал. Но огшап ортчыса, йырам таӵе малпан лыктӥз: эш на-а со мыным, ӧвӧл-а? Лейлаез алдаз ук... - Руслан, мон огнам ӧй лыкты, - дырез юнме быдтонтэм вылысь шуи солы. Кинэн - ӧй вера. Со ведь кыкнамес улляны быгатоз. Табере ми солы кулэ ӧвӧл ни. - Кытын со? - валатскиз Руслан. - Таксиын пуке. Русланлэн шумпотонэз ымнырысьтыз тыпак кысӥз. - Кышнояськемед сярысь со тодэ ини. Руслан ульчае потӥз. Чутӥсь воргорон монэ но таксистэз чай юыны ӧтиз. Ог кызь минут ортчыса, Руслан берытскиз. Пыремез бере ик милемлы киыныз шонтӥз, кошким! Чутӥсь воргорон милемыз капка дорозь келяз. - Кытчы мынком? - юай мон. - Дорам, конешно, - шуиз Руслан. - Тӥ мон доры лыктӥды ук. Лейла номыр пумит ӧз вазьы. Пересь таксист пал кыл но уг поттылы, но шӧдӥсько: милемын ворттылыны солы акыльтӥз ини. Руслан пинал кышноеныз ӵош уг - нимаз патерын улэ вылэм. Милемыз отчы пыртӥз. Кӧлытэк, пе, уд кошке. Таксистэз лэзимы. Ӵукна дас часэ лыктыны курим. Руслан карасин лампа ӝуатӥз. - Татын Москва ӧвӧл, электротылэз уд адӟы. Война. Пумитаз вазись ӧз луы. - Сяс, кышномуртъёс сиён-юон дасялозы, возьмалэ. - Озьы шуыса, Руслан азбаре потӥз. - Ну, возьмато мон солы, ну, возьмато! - Лейла йырысьтыз кышетсэ кыскиз но комокаса чемодан вылаз сэрпалтӥз. - Эк, возьмато! Вань улонме сураз-пожаз! - Буйгатскы. Кышнояськиз бере, мед улоз ини. Нош тыныд мукет карт шедьтом, - шуисько. Лейла эшшо юнгес пурӟиз: - Кыӵе карт?! Нокинэ адӟеме уг поты ни! Куараез дыректӥз. Со укно пала берытскиз. Комнатае лемлет дэремен но сыӵе ик лемлет кышетэн пинал ныл пыриз. Зӥб-зӥб. Гурт ныл но тӥни. Возьдаськись сямо. Ӧс доры дугдӥз но вырӟылыны ик уг дӥсьты ни. Пырыны лэземмес, ӧтеммес, лэся, возьма. Мон султӥ, чырткемъяськи. Со эшшо золгес возьдаськыны кутскиз. - Вождэс эн вае, мон чай ваи, - нылаш мырдэм-мырдэм куаразэ поттӥз. - Чай юэ, собере ӝыт сиён но дась луоз. Азбарын вамышъёс кылӥськизы. Руслан пыриз. Нылаш потӥз. - Тон монэ соин-а воштӥд? - Лейлалэн синъёсыз лек синкылиен тырмизы. - Тӥ чайдэс лэзе, лэзе, - Руслан палэнэ чальтчыны тыршиз кадь. - Маин со мынэсьтым умойгес? Пиналгес ке шат. Озьы-а? Комнатаын чал-чал луиз. Соослы нимазы вераськыны кулэ. - Руслан, тамакедь вань-а? - юай мон. Со кисыяз пыриз. Сигаретсэ поттӥз но мыным мычиз. Ачиз шорам ик ӧз учкы. Мон потӥ, сигаретме кенжытӥ. Лейла но, Руслан но жаль йӧто. Куке-соку малпай вал: таос ог-огзылы туж тупало... Сигаретэ туж ӝог быриз. Но пырыны ӧй дырты. Форточкаетӥ Лейлалэн куараез педло кылӥське, собере нылмурт шара бӧрдыны кутскиз. Руслан шып улэ, куддыр гинэ "Эх, Лейла-а!" шуыса лулӟылэ. Гид палан кин ке ветлӥсь вань. Ӝоген сайкам куреглэн шимес куараез кылӥськиз. Матэгес вамыштӥ. Толэзь дас кык-дас ньыль аресъем пияшлэсь мугорзэ но пуртсэ югдытӥз. Курег нош ик кеськиз. Табере берпуметӥзэ ини. Куреглэн йырыз ӧй ке но вал ини, со ялан лобӟыны турттӥз. Пересьёс верамъя, озьы куреглэн лулыз, пе, мугорысьтыз потэ. - Тон милемын йырин-а курегез вандӥд? Кулэ ӧй вал. - Кызьы "кулэ ӧй вал"? Собере куатаськод но шуод: кунояны но ӧз быгатэ. Мукетъят куное лыктэмед уз поты ни. Жаль, такамы ӧвӧл ни. Атайме но дядяйме вием беразы вандӥм. - Тон Русланлэн выныз-а? - Ӧвӧл. Со - мынам агае. Нош мон солы - вынмурт. Вандэм курегзэ пияш кышномуртъёслы гужем кухняе пыртыса кельтӥз. Русланлэн кышноез но сузэрез курегез пӧсьвуазы, гонзэ ишкыны кутскизы. - Мӧзмыт-а ми дорын? - юаз Русланлэн сузэрез. - Егитъёс гуртысь кошкизы. Кин ожмаськыны вырӟиз, кин Казахстанэ пегӟиз... Куазь шулдыр. Соин ик ураме потӥ. Инмын кӧня кизилиос!.. Пырыкум Руслан султӥз - пырисез татын султыса пумитало. - Ну мар, эше? - вазиз со мыным. - Жадид, дыр? Сюресэд кузь вал. Я, кӧня ке чида на. Ӝоген сиськом, собере изьыны выдод, шутэтскод. - Да-а... Паймытӥд тон монэ. Поннам озьы ик малпай: милемыз, пӧй, берен Грозные келялод, дыр, - шуи мон Русланлы вӧзаз пуксёнъям. - Тон мынам эше ук. Лейла но. - Иське, мон тыныд эш гинэ?! - Лейла нош ик пӧсектӥз. - Тӥ - мынам куноосы. Мон гажасько тӥледыз. Ӧй ке гажасал, дорам но ӧй ӧтьысал. - Гажасал ке, озьы ӧй лэсьтысал, - вазиз Лейла. Руслан солы чечен сямен маке вераз. Лейла но чечен кылэ выжиз. Куддыръя гинэ ӟуч кылъёсты вералля: "сволочь", "подонок". Руслан ваньзэ чида. Со интыын мукет чечен пукысал ке, Лейлаез кемалась чабкысал ини. Кавказын кышномуртлэсь воргоронэз мыскыллямзэ уг чидало. Нош Руслан "Эх, Лейла!" гинэ карылэ. - Ну, мар йӧнозэ вералод ини? Оло, тыро-пыдо валэктод ик? - мон но мед валало шуыса, лэся, Лейла ӟуч сямен юаз. Руслан султӥз: - Вождэс эн вае, кӧня ке минутлы тӥледыз кельтыло. - Кышноедлэсь-а, мар-а та куспын мӧзмид? - Лейла со шоры адӟемпотостэм карись синъёсын учкиз. - Мыным намаз лэсьтоно, - капчияк валэктӥз Руслан, йырзэ уллань лэзьыса. - Тон мыным рос-прос номыр ӧд вера ук, - вазиз Лейла. - Аллах ваньзэ тодэ. Солы, дыр, ваньмыз тазьы мед луоз кадь потӥз. Тӥ татын кӧня ке пуке, вераське, чай юэ. Мон ӝоген вуо. Руслан педло потӥз. Соку ик корка солэн кышноез пыриз. Лемлет дэремен нылаш ӝӧк вылэ сиён пуктылыны кутскиз. Лейла шоры учкыны но уг дӥсьты. Шӧдӥз, дыр, кыӵе куно соос доры вуиз. - Кыӵе-мар улкоды? - шӧдтэк шорысь юаз Лейла. Куараез чылкак тодмотэм муртлэн кадь. - Адямиос кызьы уло, ми но озьы ик... - нылашлэн киосыз куалектӥзы. Лейла со шоры микроскоп пыр сямен учкыны кутскиз. - Ачид татысь-а? Та гуртысь-а? - Ы-ы. Сояз урамын улӥсько... Улӥ... - нылаш сураськыны кутскиз, кытчы пырыны ёрмиз ини. Нелькем картошкаез но пӧзьтэм курегез тэркыосы тыремез бере кошкыны дыртӥз: - Ческыт мед кошкоз! Озьы шуыса, со кыре потӥз. - Ӵукна ик татысь кошком! Шоразы учкеме уг луы ни, - Лейла вилказэ сэрпалтӥз. - Инмаре-кылчинэ! Кыӵе мон шузи! Ачим со доры лыктӥ. Атаен агайёсы тодысалзы ке! Виыса куштысалзы. Сое но виысалзы. Мар со дауртӥз?! Мон шып пукисько. Таӵе дыръя мар вералод? Со вакыт кин ке укное йыггетӥз. Лейла куалектӥз. - Руслан! - педлон кесяськись луиз. Кыӵе ке пиос сыло. Ымнырзы пеймытын уг но адскы. Кӧня ке улыса, ӧс усьтӥськиз но, кесяськись-шулась пиос пыризы. - Соослэсь интервью басьтод-а? - ӧс дорысен ик Руслан мынэсьтым юаз. - Басаев дорын служить каро. - Соос ведь мыным йӧнала номыр уз вералэ, - серем пыр вази мон. Куноос пальышазы. Пумен ӝӧк сьӧры интыяськыны кутскизы. - Ми котьма сярысь вераны быгатом. Возьматыны но. Только собере одӥг свидетель но улэп уз кыль. Ваньзы серекъяны кутскизы. Мон но ӧй чида. Лейла гинэ шып, мӧзмыт пукиз. - Мар тон сьӧд пилем кадь пукиськод? - одӥгез егит воргорон Лейлалэсь ӝож мылкыдзэ синйылтэм ини. - Руслан, тон кунодэ, чебер нылэз, обидид шат? - Ӝӧк сьӧрын пиос гинэ. Мыным ведь тӥледын ӵош пукыны уг яра. Соин ик мар карыны паймисько, - Руслан интые вазиз Лейла. - Тон ведь татын куно! Ми вӧзамы пукыны лэзиськом. - Тауэлэ. Лейлалэн соосын вераськыны чик мылкыдыз ӧвӧл. Но ӝӧк сьӧрысь кошкемез но уг луы. Куатаськозы. Нош соос юаллясько но юаллясько: кытысь тон, кин луиськод? Бератаз Лейла серем пыр шуиз: - Нырысь кӧня ке сиськыны сётэ вал. А то воксё сютэм. Москваысь лыктӥ. - Москваысь, иське?! Куазь отын кыӵе? Паймымон: Москва война тылпу поттӥз, нош соос - "кыӵе куазь"? Со дыре корка нош ик лемлет дэремен ныл пыриз. Каллен гинэ, вужер сямен, куноослы сиён ваиз. Уйшор куноос бер кошкизы. Акыльтӥськиз соосын. Куиньнамы кылем бере Лейла Русланлэсь юаз: - Тон кышноедлы кинме верад-а, мар-а? - Ы-ы. Солэсь мон номыре уг ватӥськы, - шуиз Руслан пальышаса. Шӧдӥськиз: со юри ӧчкаре. Адӟиське: Лейлаез со яратэ, но та сярысь вераны уг дӥсьты: данзэ саптэмамезлэсь кышка, луоз. - Тӥни кызьы! Со кышноезлэсь номыре уг ваты! Мыным гинэ номыр но уг вера! Яратыса-а коть кышнояськид? - Яратыса, - шуиз Руслан, нош куараез дыректӥз. - Яке тонэ кужмысь-а кышноязы? Гурезьёсын ведь ӵемысь анай-атай косэмъя кышноясько. - Тӥляд но, городскойёслэн - нёжалъёслэн - озьы. Вераны кулэ, вашкала дырысен гурезьёсын но нёжалын улӥсь чеченъёс ӵем дыръя керетылӥзы. Нёжалъёс, пе, зэмос горецъёс ӧвӧл. Совето власть вакытэ отын - улӥын - школаос, институтъёс усьтӥськизы. Та интыосысь чеченъёс урод дышетскись я чик дышетскымтэ муртъёслы шуылӥзы, тӥ, пе, гурезьёсысь васькемын-а, мар-а? Нош гурезьёсын улӥсьёс соосты пыкылыны ӧдъязы: тӥ, пе, вань сямъёсмес вунэтӥды ини, ӟуч луиды. - Мынам анаен атае монэ яратымтэ муртлы ноку уз сётэ, - вазиз Лейла. - Главноез - картэ чечен мед луоз, мусульманин. Соослы, оло, тынад семьяед но ӧй кельшысал, ӵыжы-выжыосыд Дудаевлы дурбасьто. - Аллахлы кызьы кулэ вал, со озьы ик лэсьтӥз, - вазиз Руслан. - Мар тон весяк Аллах сьӧры ватскиськод? - Уг ватскиськы. Кызьы пӧрмиз, озьы ик луыны кулэ вал, дыр. Лейла мон шоры учкиз, собере - Руслан шоры: - Ярам, мыным изьыны выдоно ини, ӵуказе вазь султоно. - Лейла, тон татчы выдод, - Руслан диван шоры возьматӥз. - А тон, Сергей, - сояз комнатае. Ойдо сьӧрам. Ӧс куспысен Руслан берытскиз на: - Лейла, тыныд Фатима простыньёс ваёз. Ӟеч изь. - Собере кышноезлы кеськиз: - Фатима! Валиськы куноослы. Ми мукет комнатае потӥм. Руслан карасин лампазэ ӝуатӥз. Лампалэн ляб тылыз пичияк югыт кариз. Ӧс янак азьысь коранэз но мукет мусульман книгаосты адӟи. - Татчы выдод, - Руслан шифоньерысь тӧдь-тӧдь простынь поттӥз но матрац вылэ вӧлдӥз. - Мон вӧсяськыны потало. - Тон ведь Москваын ӧд вӧсяськы кадь? - Шузи вал. Озьы шуыса, Руслан педло потӥз. Ог кызь минут ортчыса, со берен пыриз. - Ми тонэн умой-умой вераськыса но ӧм вуттэ, - вазиз мыным. - Ай иземед-а потэ ни? - Уй кузь - вуо. Мон кузь но секыт вераськонлы дасяськи. - Ӧд кышнояськы на-а? - юаз Руслан. - Дасяськисько ини. Руслан, тон быгатод-а мыным ке но ваньзэ чик ватытэк вераны? Тон ведь Лейлаез яратскод? Руслан шып кариськиз. Мон сое ӧй дыртыты. Со кадь ик чал-чал пуки. Та чалмытын йырам одӥг малпан чилектӥз. Соку мон... ваньзэ валай. - Кылзы ай, Руслан, Чечняе кошкыкуд тон верад вал: отын арня пала гинэ уло. Нош тон тани куинь толэзь ортчыса но ӧд ву. Агайдэ виеменызы-а татчы кылид? - Солэн кык нылпиез кылиз. Сузэрелэсь но картсэ виизы. Солэн но куинь нылпиез. Семьяямы мон одӥг воргорон кыли. Атаймы война азьын кулӥз вал. Нош анае - койкаын. Астраханьын. Агае бырем бере висьыны усиз. Соос мыным шуизы: берт Москваяд, а то тонэ но виёзы. Но соосты татчы огназэс уд кушты ук! Бен сяммыя но озьы луэ. Юртъер самой покчиезлы кыле - мыным. Соосты мыным сюдоно-утялтоно. Соин ик мон сёровно татчы - доре - бертыны кулэ вал. Нош собере... Собере соос мыным кышно шедьтӥзы - Фатимаез. Мон пумит вал. Верай: Москваын Лейлае вань. Но анае больницаысен шуиз: "Пие, войнаын котьмар луыны быгатоз. Аллах тонэ ас дораз но басьтыны быгатоз. Анай сюлмылы капчигес луысал, та музъем вылэ тынад пиед ке кыльысал. Нош со москвичкаед тон доры уз лыкты. Тон солы Москваын гинэ кулэ". Мон Лейлалы жингыртӥ. Куатетӥ августэ. Но выльысь ожъёс кутскемен, связь кысӥз. Номыр тыро-пыдо вераса ӧй вутты. Собере мон анаелы верай, таяз аре, пӧй, сюан ортчытыны уг яра. Агайме виизы ук. Сузэрелэсь картсэ но. Нош со пересьёсын вераськем. Пересьёс шуиллям: "Бен, али сюан карыны уг яра, но, мар карод, война ук!" - Куать числое ик ми сюрес вылэ потысалмы ке, сюанэд ӧй луысал-а? - Ӧй. - Соку мон отпускын вал на. Соин соку ӧм лыктэ. - Только Лейлалы номыр эн потт ылы. Я, ӟеч изь! - Руслан султӥз но кошкиз. * * * Лейла вазь султӥз. Чемоданысьтыз мукет дэремзэ поттыса дӥсям ини. Ӝӧк вылэ Москваысь ваем кампетъёссэ поттэм. - Таиз тыныд, - Русланлы одеколон но тӧдьы дэрем мычиз. - Тынад ведь туннэ вордскем нуналэд. - Ой, мон воксё вунэтскем, - аслыз ачиз паймиз Руслан. - Та кышетъёсты анаедлы, сузэредлы, кышноедлы сёт. Кампетъёсты - племянникъёсыдлы. - Марлы оломар но поттылӥськод? - Руслан кизэ кытчы карыны ёрмиз. - Монэ тодазы мед вайылозы. Собере мон та секытэз берен Москвае нуом-а? - Оло, уд кошке туннэ? - Руслан нырысь мон шоры учкиз, собере - Лейла шоры. - Мар-о, Сергей, кылёмы-а? - Лейла туж кескич юаз. Синзэ ик кыньыртыса. - Кыле. Интымы вань, - вазиз Руслан. - Табере монэн люкиськемед но уг пот ни-а, мар-а? - Лейла йырсиоссэ кияз люказ. - Кышноедлэн йырсиез вакчи. Тыныд ведь кузь йырсиосы туж кельшо вал... Руслан укное учкиз. - Мон та уй кышноеныд вераськи. Уйбыт сямен... - Лейлалэн куараез воштӥськиз. - Мыным маке шат... - Мон троссэ тодӥ. - Ну и ма? - Тон ведь ӵем дыръя солы Лейла шуыса вазьылӥськод, - со нош ик чечен кылэ выжиз. Со куспын комнатае Фатима пыриз: - Чай али-а лэзьялом, бергес-а? - Али, - шуи мон кузё кариськыса. - Ой, воксё вунэтӥ! - Лейла чемоданзэ усьтыны дыртӥз. Отысь кыӵе ке конверт поттӥз. - Мон тыныд, Руслан, гожтэт ваи. Колялэсь. Москвае ӧте. Со али туж секыт югдуре шедемын. Мон Коляез тодӥсько. Со Русланэз кулонлэсь утиз. Огпол Москваын "ожмаськон" вал: чеченъёс но Москваысь бандитъёс ваче вуизы. Чечняын война кутскемлэсь азьло ай. Ваче жугиськыкузы Русланлэсь кӧтсэ пуртэн пасязы... Сюлъёсыз ик кыре потӥзы. Та суредэз адӟыса, Коля-бандит интыяз кынмиз кадь. Тушмонзэ нюж кыскыса сюрес доры поттӥз. Собере, пистолетэныз кышкатыса, ортчись машинаез дугдытӥз. Русланэз больницае нуиз - аслаз кышноез доры. Куинь толэзь ортчыса, Руслан пыд йылаз султӥз. Со вакытэ та больницае ик Лейла шедиз - аппендицитэн. Ӵапак отысен тодматскизы соос. Колялэн пичи нылыз вань. Москваын улӥсь чеченъёс алигес Коля борды лякиськиллям: сомында уксё ӧд сёт ке, нылдэ уд адӟы ни. Русланлы со сярысь гожтӥз, дыр. Руслан конвертэз усьтӥз но лыдӟыны кутскиз. Собере шырпузэ кежтытӥз но соку ик сутӥз. - Мон мыно, - шуиз Лейлалы. - Вера солы. - Нош таиз - сюрес вылэ. - Лейла мукет конверт мычиз. - Татын - уксё. Фатималэн ымнырыз ӵыжектӥз. Коля сярысь со уг тоды угось. Картсэ таланы ӧдъяло шуыса малпаз, дыр. Фатима педло потӥз. Со виын капка дорысь машина куара кылӥськиз. Толло таксистмы вуэм. - Ӟеч кыле! - чемоданзэ кутыса, Лейла кыре дыртӥз. - Коля зэмзэ туж секыт югдуре шедемын. Москвае вуид ке, мыным эн жингырты... Русланэн люкиськыса, мон но вырӟи. * * * Грозныйозь Лейла чик вераськытэк мынӥз. Часме учки. Ультиматумен тупатэм дыр дас часлэсь ятыр кылиз на. Озьыен, мон Лейлаез Ингушетие, аэропортозь, келяны но выльысь Грозные берытскыны вуо. Городэ пырон азямы машинамес боевикъёс дугдытӥзы. Одӥгзэ тодмай. Со но монэ тодмаз. - Мага кытын-о? - юай мон. - Штабын. - Салам вера. - Ойдо отчы. - Уг. Милемлы али аэропортэ дыртоно. - Пыратэк эн кошке. Уг лэзьы. Грозные вуид бере, адскытэк-а, мар-а кошкод? Война кутскемлэсь азьло Мага чечен ОМОН-ын взводлэн командирез вал. Лапег гинэ. Каратист. Солы сьӧд кускерттон сётэмын. Пуртъёсты но зол зӥръя. Огпол тае Дудаев адӟем (Мага дас вамыш кемысен лэзьыса, соку пуртсэ швабра борды бышкалтэм) но соку ик ОМОН-эн кивалтӥсе пуктэм. Война кутскыса, Мага "полевой командир" луиз. Афганистанын но ожмаськемын. Отын сое сӧсыртылӥзы. Пуля тызэ пасяз. Вирен сяласькыса, Мага зуп! музъем вылэ лэзькиз. Эшез ӧз юртты - матэктӥсь душманъёсты адӟыса пегӟиз. Мага озьы но ассэ ыбыны ӧз быгаты - йырсазьзэ ыштӥз. Душманъёс но сое ӧз вие: чыртыысьтыз мусульман толэзен векчи жильыез адӟизы. Душманъёс сое эмъязы, собере асьсэ палан ожмаськыны косӥзы. Берлогес ини ожмаськон секретъёсты солы мадизы. Та тодон-валанъёсыз Магалы Чечняын но яразы. Огпол со, Афганын сямен ик, скалъёсты ожмаськонэ поттӥз. Уин сюръёссы борды фонарикъёс керттылӥз но скал возьмасез соосты уллань васькытыны косӥз. Матэктӥсь фонарик тылсиосты адӟыса, "федералъёс" скалъёсты ыбылыны кутскизы, угось чечен боевикъёс нёжалэ васько кожазы. "Федералъёс" скалъёсын ожмаськон куспын Магалэн эшъёсыз соосты котыртӥзы... ...Магалы мынам вуэме сярысь ивортӥллям ни. Капка дорысен ик со пальышаны кутскиз. - Чаль пыре! - Лейлаен монэ со штабе ӧтиз. Но отчы пырыса ӧм вуттэ - снаряд шултэм кылӥськиз. - Выдэ! - кеськиз Мага. Выдӥм гинэ - снаряд гудырак пуштӥз. Артэ сылӥсь лапаслэн номыриз ӧз кыль ни - котырак ӵын но тузон гинэ вӧлскиз. - Окопъёсы! - нош ик кеськиз Мага. Окопъёссы сюбегесь, пичиесь. Мырдэм лаптӥським. Кӧня ке секунд ортчыса, кыкетӥез снаряд пуштӥз. Мага тамаксэ огпол сюпыштӥз на но сэрпалтӥз: - "Град" ыбылэ. Прямой наводкаен. "Федералъёслы" кин ке милесьтым координатъёсмес ивортэм, шӧдске. Куинетӥез снаряд воксё милемын артэ усиз. Шоссе вылысь палдэм асфальт юдэсъёс дасо метр кеме выллань ӝутскизы, собере ӝутскем луоен ӵош окопъёсы гуп! гуп! усьылыны кутскизы. Ыме но, синъёсы но луо тулляськиз. Асфальт юдэс тыбырам гуп! усиз. Пельёсам жон! вазе. Шонерскеме но уг лу - тыбыры юн вӧсь луэ. Нош ик снаряд вуиз. Солэн пуштон тулкымез монэ окопысьтым ӧжыт гинэ ӧз палгыты. Йыры зол шуккиськиз. Ымдурысьтым но йырысьтым вир вияны ӧдъяз. Лейла пала учки. Улэп! Чеченъёс вискын кылле. - Танкъёс ыбыло ини, - уйвӧт пыр кадь Магалэсь куаразэ кылӥ. Омыре нош ик луо но асфальт юдэсъёс ӝутскизы. Озьы котырамы ог куамын минут пала пуштылӥз. Собере чал-чал луиз. - Дасо минут ялкарозы, - вазиз Мага. - Со дыр куспын блиндаже бызьыса вуттомы. Куноос, мон сьӧры! Война шуыса уд но оскы, ява. Тӥни ук, азьпаламы, скалъёс вож турынэз бичаса ветло. Оло, соос дышемын ни снаряд пуштылэмъёслы? Яке контузить каремын но соин номыре уг кыло-а? Нош куазь кыӵе шундыё! Нокыӵе война тодын ӧвӧл ни. Со вакыт азьтӥмы пуляос чиугетыса лобизы. - Снайперъёс ыбыло, - вазиз Мага. - Ӝоггес, ӝоггес! Кинлэн ке сад-бакчаяз вуим. - Отчы пыре! -Мага гу шоры возьматӥз. Та гу ӵапак со блиндаж шуонзы вылэм. Липеттэм. Отысен шунды шоры учки. - Уть ай, кыӵе пиштэ! - вази вылӥе кылем Магалы. - Чик война ӧвӧл кадь. - Ӝоген куазь воштӥськоз. Зол кутсакузы, шунды воксё ышылэ. Ми вадьсытӥ вертолётъёс лобаны кутскизы. Мага кошкиз. Ӝоген, пе, вуо. Со кошкем бере вертолётъёс ыбылыны ӧдъязы. Собере нош ик чал-чал луиз. Дорамы ог дас ньыль аресъем пияш вуиз. Автоматэн. - Потэ отысь, Магаез виизы, - шуиз со. Мага гаӵолӥн кылле вал. Ымнырыз виресь. Нош ымдуръёсыз пальышало кадь. Синъёсыз ворсаськемын ини. Магаез, тӧдьы простыняен бинялтыса, штабе пыртӥзы. - Куноос! Ӝогак машинае пуксе! - кеськиз Магалэн воштӥсез. - Кошке татысь! Отӥяз бер луоз. Ӝоген выльысь гудыръяны ӧдъяз. Шунды зэмзэ ик пилемъёс сьӧры ватскиз кадь. Лейла витёнтэм шорысь шуиз: - Лучше монэ мед виысалзы. Чеченъёс, тае кылыса, воксё паймизы, ог-огзы шоры учкизы, но шара ӧз вазьылэ. Лейла со куспын туж каллен, снаряд усемез юри витьыса музэн, машина доры вамыштӥз. Пельпумъёсыз дыр-р куалекъяло - бӧрдэ: - Кызьы табере улом?! Машина доры вуытэкгес, со турын вылэ лэзькиз. Мон сое ӝутӥ, лӥятыны кутски: - Буйгатскы, буйгатскы... Таксистмы дыртытэ, весь газзэ зӥбылэ. Огшап улыса, Магалэн эшъёсыз "федералъёсты" ыбылыны кутскизы. Нош соос - таосты. Инме выльысь вертолётъёс ӝутскизы... Ми машинаямы пуксим. Таксистмы, гопъёс но лёгъёс шоры учкылытэк, шузимем кадь ворттэ, городысь потыны дыртэ. Кин ке сьӧрамы уиське, кожалод. Город пуме вуыкумы, йыры поромыны кутскиз. Шоканы омыр ик ӧз тырмы ни... Сазьми но - госпитальын, пе. Вӧзам сӧсырмем солдатъёс кыллё. Сайкамме адӟыса, вылды, дорам врач-лейтенант лыктӥз. - Всё, война быриз! - шуиз со. Мон киосме выретӥ. Интыязы кадь. Пыдъёсы но. Иське, мар мон татын кыллисько? - Вирсэрад эшшо одӥг укол пуктом на, собере гуртад бертыны быгатод. Отӥзэ дорад эмъяськод ини. - Мар монэн? - Контузия. Мон йырме ӝутоно кариськи. Нош со вормонтэм секыт, пушказ, оло, кирпичъёс туллямын. Пельёсам жон-н! вазе. Медсестраос котыртӥмы лобаса кадь ветло, пальпото. Сӧсырмем солдатъёс но пальышало. - Мар луиз? - юасько. - Верасько ук: война быриз! - Кызьы быриз? - Уд ке оскиськы, куать часэ иворъёсты кылзы! Кӧня ке улыса, радио пыр зэмзэ ик веразы: - Туннэ Россиысь Безопасностья Советлэн секретарез Александр Лебедь но чечен армилэн Генштабезлэн кивалтӥсез Аслан Масхадов ожмаськемысь дугдон сярысь документ гожтӥзы... Мар ке осконтэм потӥз. - Ме, улмоостэ си, - йӧскадь витамин. Пӧлазы гожтэтэз но вань. Нылаш кельтӥз. Лейлалэн вылэм. Со гожтэм: "Ваньмыз понна тау. Вождэ эн вай, татын, госпитальын, тонэ возьмаса улэме уг лу ни. Малызэ тодӥськод. Москваын пумиськом. "Кышноед". Укол пуктэм бераз лейтенант пӧртэм эмъюмъёс сётӥз на. - Ваньзэ ю. Дорад вуид ке, одно койкае выд, ӟеч-ӟеч эмъяськыны. Ярам коть, барабанной перепонкаосыд пилиськиллямтэ. А то пельтэм кыльысал. Госпитальысь потэме бере бадӟым из вылэ пукси. Йыры кыска на. Пельы но ӧжытак жонгетэ. "Кытчы табере? Война быриз, пе. Берен Чечняе я Москвае?" Туж кема озьы малпаськыса пуки. Оломар сярысь но. Одӥгез гинэ йырам ӟеч-ӟеч гердъяськиз: Лейла ассэ ачиз уз быдты. Чеченъёс понна со туж бадӟым сьӧлык. Корка пырон сямлэн радлыкез 1. Киросанаен киросатайёс выль коркан кӧлэмын ини, соос куно возьмаса пуко. Ӝӧк выл тыр сиён-юон пуктылэмын. Корка пуш чеберъямын: штораосыз но вань, укноосы чебересь ӵушконъёс ошылэмын. Выль коркан ческыт (нюлэс) зын. Ваньмыз ик корка пыронэз (туез) ортчытыны дась. 2. Мурӝолын ыж вандэмын ини. 3. Нырысь ик корка пыро киязы коӵышен пичи ныл но пичи пи. Коӵышез выж вылэ лэзё. Киросанай вера: "Э-э, нылы-пие, та коркан туж ӟеч улоды, коӵышты соку ик тӧр шоры мынӥз. Я, умой улоно мед луоды!" 4. Кияз мудорен егитэз корка кузё пыре, киросанаеныз но киросатаеныз чырткемъяське, мудорзэ корка сэреге яке оше, яке пуктэ. Соин ӵош ик кузё кышно пыре, со яке пукон яке ӟус пыртэ. Киросанаен но киросатаен ӟечбуръясько. - Ӟеч кӧлӥды-а? Кыӵе уйвӧт адӟиды? - соослэн тодэмзы потэ. - Ӟеч уйвӧт адӟим: та выль коркады, нуныкайёсы, умой улоды! 5. Собере кияз нянь шумесэн атайзы пыре, со но ӟечбуръяське, нянь шумессэ гур доры нуыса пуктэ,[ЕАВ1] ачиз киросатай вӧзы ӝӧк пуме пуксе. 6. Анайзы вуж коркасьтызы коркакузёез выляз чортыса поттэ (кут пушкын "пуке" песятай - козма). Козмазэ, кутгозыен гыж кыскыса, котькуд сэреге вуттылэ но шуэ: "Ӟеч возьма нылпиосме, утялты, вождэ эн потты. Ныло-пиё мед улозы, зарниен- азвесен пыласькыса, трос пудо вордыса". 7. Куноос но пыро ини, котькудӥз кузьымен. Кин карнан, кин ведра, кин гӧршок, кин тусьты, кин пельнянь погыльтон, кин самовар, кин дуры, кин арган вае. Пырыкузы векчи коньдонзэс выж вылэ пазьго. Котькудӥз лыктэм мурт кузьымзэ кузё кышнолэн кияз сётэ но кылбураса кадь вера: "нянё мед улоды", "вуды котьку ведра тыр мед луоз" но мукет. Кузё кышно соосты ӝӧк вылэ тыре. Арган кузьмало но шуо: "Коркады крезьгуро мед луоз". 8. Куноос коркаез котыр учко, ог-огзылы верало: "Осто, та Митрей корказэ умой ке умой лэсьтэм, киыз котьмалы но туж мынэ ук. Сандык кадь пӧрмем. Одӥг шыр но пырыны уз дӥсьты..." 9. Куноосыз ӝӧк сьӧры пуктыло: "Я, пуксе ини, дуно куноос, та ваньмыз тӥ понна пыжемын-пӧзьтэмын". 10. Кузё мурӝолысь быдэс бекче (я черык) аракы поттэ. "Береке-ет!" черекъяса пумитало сое куноос. Бекчеез ӝӧк вылэ пуктэ но, уксёен мед улоды шуыса, куноос со вылэ векчи коньдон тыро. Кузёлы кияз нянь сёто но шуо: "Шыд медло, нянь медло!" Соиз чепыльтыса гинэ ымаз понэ но аслаз интыяз (ӝӧк вӧзын солы нимысьтыз пукон дасямын) пуксе. 11. Кузё ас кышноезлы, анай-атаезлы, киросанаезлы, киросатаезлы но аслыз сюмыкъёсы аракы понэ. Куноос ваньзы султо но кырӟало: Ой, мар мылкыд сётоды, Ой, тӥ милемлы? Асьтэос ке кызьы ук, Ой, ми озьы. 12. Ачиз кузё но кузё кышно юо но чарказэс йыр вылазы кымало. "Ваньды тани тазьы юэ, ява!" шуыса вазисько. 13. Куноос нош ик кырӟало: Ой, вань вылэм, вань вылэм Сектаны но эсэпты. Сётылэм но сюмыксэс Быдтыса но юизы. 14. Сектаськон кутске, куно карон. Одӥгез куно шуэ: "Ой, табань но сием потэ вылэм ини та выль коркан, выль гурады табаньды пыже-а, уг-а?" 15. Кузё кышно табань пыжыны кутске. "Тани, туж ӟеч пыже табаньмы - сие, сие, дуно куноос", - сётэ лыктэм муртъёслы. 16. Ваньмыз табань сиё, ческыт шуо, ушъяло. Кузё кышно вазе: "Анай, тон пыж ни ай табанез, мынам кырӟаме потэ ини". Кузё кышно кырӟаны кутске: Корка но ӝутӥ, ой, камышен, Липетсэ липи, ой, но шашыен... Ваньмыз кырӟало. 17. Табань пыжись анайзы кияз таба пудэн куноос доры потыса юа: "Ческыт-а бен табаньды?" "Ческыт, туж ческыт!" - вазё пумитаз. "Ойдо, анайзы, экты ай та выль выж вылын", - ӵектэ кузё кышно. "Арганчи, шуд, экто ай, экто!" Анайзы атаенызы ӵош экто. 18. "Табере тӥ, пиналъёс, эктэ!" - шуо но сектаськонзэс азинто. Ваньмыз ӝӧк сьӧрысь пото ини. Егитъёс куать яке тямыс кузя экто. Мукетъёс такмакъёс кырӟало, кизэс чабо. 19. Кузё кышноен картэз кыкназы эктыны пото: "Выль коркамы капчи мылкыдын мед уломы, ойдо ай, кышно, эктыса лэзём!" Анай-атайзы, киросанайзы, киросатайзы пыдесъяськыса кизэс чабо. Пизы, кензы эктыса быдтэм беразы соосты пыд йылазы султыто. 20. Одӥгез куно шуэ: "Ойдолэ ини табань шумесэз эгесалом, ӧм ке эгесалэ, со пилиськоз! Туж ческыт табанен сюдӥды, котьку но сыӵе ик мед удалтоз". 21. Табань шумесэз выж шоры пукон вылэ пукто. Ваньмыз круге султо но табань шумес котыртӥ кырӟаса, ваче ки кутскыса ветло. Бумага коньдон сярысь кырӟакузы, табань шумес пушкы бумага коньдон тыро, азвесь коньдон сярысь ке - тӧдьы копейкаос, зарни сярысь ке - ӵуж коньдон; льӧмпу, бадьпу ньӧръёс. 22. Эгесам бере атайзы табань шумесэз кышнопала нуыса кошке: "Ой, туж секыт луэм та, воксё уг вормиськы, кускы ик чигиське вал, дуно кортъёсын - зарни-азвесен эгесаллям, лэся"". 23. Кузё кышно кырӟаны кутске, вань куноос итӥсько. Кузё кышно пизэ китӥз кутэ но "Пиё, пиё коркае но..." кырӟанэз кырӟа. Собере нылзэ кутэ, куноослы возьматэ кадь: "Ныло, ныло коркае но..." 24. Куноос кошкон азьын кузё кышно вань лыктэмъёсты нош ик ӝӧк сьӧры пуктылэ. Нош ик сиё, юо, верасько. Кырӟало "Кенос учкиз, сезьы киськиз..." кырӟанэз. 25. Одӥгез мӧйы куно: Ма, куазь бер ини, ойдолэ кошком. Мукетыз:Бертоно ни, пудоез но утялтоно. Куинетӥез: Ой, шудо но шудо мед луоз та коркады. Ваньмыз ӧс доры султо но кырӟаны кутско: Ой, тау ини, тау ини Сюдэмдылы но вордэмдылы. Талэсь гинэ бадӟымзэ Шедьтыса тӥ улэлэ. Милям пукем интыямы Уӵы пукыса мед чирдоз, Сием-юэм бервыламы Иньмар кыктэн мед сётоз. КОРКА ТУЙ ДЫРЪЯ ЧУЗЪЯСЬКОНО КЫРӞАНЪЁС * * * Осто шуыса ӵогем укноетӥ Пӧсь шундыед мед пыроз. Осто шуыса ӵогем ӧстӥ Ӟеч туганэд мед пыроз. Та коркалэн, ой, шулдырез Кузёосыз вань ӵоже. Эшшо шулдыр, эшшо шулдыр Куноосыз вань ӵоже. Ой, шулдыр ук, шулдыр ук Пуктылэм та коркады. Васькылымтэ пар уӵыед Васькылыса мед чирдоз. Нянь шумесэз эгесан кырӟан Ойдолэ но мыноме Дэри, пе, но шур кузя. Бадьпуэз-а шедьтомы но Льӧмпуэз-а шедьтомы. Льӧмпуэз ке ӧм шедьтэ, Сирпуэз-а шедьтомы. Сирпуэз ке ӧм шедьтэ, Ыргонэн но эгесалом. Ыргонэз ке ӧм шедьтэ, Бумагаен эгесалом. Бумага ке ӧм шедьтэ, Азвесен но эгесалом. Азвесь ке но ӧм шедьтэ, Зарниен но эгесалом. Азвесь ке но ӧм шедьтэ, Зарниен но эгесалом. * * * Корка но ӝутӥ, ой, камышен, Липетсэ липи, ой но, шашыен. Куно но ӧти, сектало шуыса, Кылыным алдаса, ой но, мон лэзи. Тӧдьы но тэркы, ой, сьӧд дуро, Кельше со сутэр, ой но, бичаны. Тӧдьы но тэркы лемлет дуро, Кельше но эмезь, ой но, бичаны. Тӧдьы но кышет лемлет дуро, Кельше со егит, ой но, нылъёслы. Тӧдьы но картуз, ой, сьӧд дуро, Кельше со пинал, ой но, пиослы. Корка но ӝутӥ, ой, кирпичен, Липетсэ липи, ой но, шиферен. * * * Пиё, пиё коркае но, Соин шулдыр коркае. Ныло, ныло коркае но, Соин шулдыр коркае. Садо, садо азбаре но, Соин шулдыр азбаре. Мако, мако бакчае но, Соин шулдыр бакчае. * * * Укно улын лемлет сяська, Укно дурам пыртысал. Та яратон куноосме Весь син азям возьысал. Укно уллэн, ой, шулдырез Лемлет сяська вань ӵоже. Та коркалэн, ой, шулдырез Куноосы вань ӵоже. Укно улысь лемлет сяська Тӧлӟе-быре сӥзьыл пал. Куноосы кошкем бере Кӧты ӝож луса кыле. Кошкон азьын кырӟан Кенос учкиз, сезьы киськиз Галановской ӟезеглы. Лавка учкиз, преник басьтӥ Таӵе чебер нылъёслы. Вина пӧзьтӥ, нырйыл басьтӥ Таӵе чебер пиослы. Дукес уд нуллы, мае нуллод, Вань дӥсянэд со бере. Калыке уд поты, мар карод, Арлыдъёсыд вуэм бере. Дасяз Мария ИШМАТОВА. [ЕАВ1]из Крень юон (крень нунал, тусьты-пуньы миськон толэзь, ым пытсан) Луэ масленча бере вордӥськонэ. Та нуналэ ӵукна выльысь мунчое пыро, собере кышномуртъёс сиён пӧзьто: картошка, чорыг, губиен нянь пыжо. Масленчалы пӧрамзэс уг сиё ни: шаньгиоссэс сукари куасьто. Егитъёс нош, вал кыткыса, урам кузя ворттыло: вал бордазы ошыло вылэм мунчое пырем веникъёсты, "кушман гырлы" яке "конгра гырлы" (шуш куара сётӥсь гырлы). Ворттылӥзы лушкем - кырӟанъёстэк, гармошкатэк, серекъятэк. Н. Первухинлэн гожъямъёсызъя, кӧня ке ворттылэм беразы, веникъёссэс гурт пуме куяса, доразы бертылӥллям. Кышномуртъёс, нуназе бере люкаськыса, шулдыръяськон сярысь вераськылӥзы. Глаз ёросысь Золотари гуртын пиосмуртэз быръё вылэм коркась корка ӧтчаськыса ветлыны. Ветлэ со кияз бодыен, со борды котькуд коркан (вожояськон дыръя сямен ик) дэрем сеп, тамак пуйы но мукет ма но со кертто. Н. Первухин гожтэ, кышноос сьӧры йыраз йылсо туй колпакен мӧйы пиосмурт ветлэ вылэм шуыса. Со колпакез борды пӧртэм дэрем сеп вурылӥллям. Куд-ог интыосын кышноос, асьсэды возьман понна, пе, кык егит пиосмуртъёсты бырйылӥллям на. Соос кышномуртъёс сьӧры векчи ньӧръёсын ветлылӥллям. Юондыр кутске акшан вакыт бере. Люкаськем коркан кырӟамзы но эктэмзы бере, сьӧразы юон но кӧня ке кирень басьтыса, коркась корка ветлылӥзы. Юмшакузы "пурултэм мадён" яке "юон голосэн" кырӟаллязы. Коркан улӥсьёс кышноосты пумиталлязы: выж шоры брагаен яке сурен кӧртчага (сюй гӧршок) пуктылӥзы, нош кӧртчага вылэ - егит нылэз. Со кӧртчага котыртӥ "тыкыр-тыкыр эктыса" котырскылӥзы. Собере пиосмуртъёсты сурен но брагаен секталлязы, кирень куртчытъяллязы: та, пе, "ваньмыз, мар кылиз масленчалэсь". Озьы соос ортчылӥзы быдэс гуртэз. Галина Глухова 1457 КУЗПАЛЪЯСЬКОН Выль кузпалъёсты пусъён инты (ЗАГС-ын, культура юртын яке клубын) со учырлы котыр ласянь дасямын. Борддоръёсысь адӟыны луэ удмурт кылын лэчыт веранъёсты, сӥзёнъёсты, кылбур чуръёсты. Шуом, таӵеоссэ: "Умой кышно - ӝыны юрт"; "Кышно басьтон - кур кесян ӧвӧл"; "Кышнотэк пиосмурт но йыроме"; "Нылпитэм кузпалъёс - шудтэм мискиньёс"; "Выль семьялы - шудбур но тазалык!"; "Котьма кар, тон мынам, дуное. Тон понна вордӥськи дуннее" но мукет. Кыӵе ке вакчи кылбур но мултэс уз луы, дыр. Котырак пужыё ӵушконъёс ошылэмын. Выж вылэ кузпалъёслы султыны чебер выж лёгет-ковер валемын. Магнитофонысь шулдыр удмурт гур чузъяське (крезьгур гинэ яке кырӟан). Тани гожтӥськон комнатае ӧс усьтӥське но, лыктэмъёсты отчы пырыны ӧтё. Удмурт сюан гур чузъяськемъя (магнитофон яке вить-куать муртлэсь фольклор ансамбль) ваньзы залэ пыро. Эмеспиен выль кен азьло ик дасям выж лёгет вылэ султо, кунооссы - соос бӧрсьы, матысь эшъёссы-адӟисьёссы (свидетельёссы) - вӧзазы: эмеспилэнэз - выль кен пала, выль кенлэнэз - эмеспи вӧзы. Гожтӥськонэз ортчытӥсьлэн юрттӥсез одӥг-кык кылбур лыдӟе. Собере люкаськемъёслы вазиське: - Туннэ кузпалъясько Россилэн но Удмурт Элькунлэн гражданъёссы (кылсярысь, Петрова Любовь Ивановна но Карпов Виктор Алексеевич). Кузпалъяськемды сярысь книгае гожтыса кельтоз ЗАГС-ын ужась... ЗАГС-ын ужась пыре. Со удмурт дӥсен, чыртывесен но та учырлы тупась нимысьтыз гадьпусэн (нагрудной знак) мед луысал. - Ӟечбуресь, гажано эшъёс, ӟеч адямиос! Ӟечбуресь, Люба но Виктор! Мон оскисько: тӥляд улонады та нунал одӥгез тужгес но шудоез луоз. Сыӵеен со тӥляд сюлмады весяклы мед кылёз. Солэн шунытэз ноку но медаз кысы. Улонын пӧртэм вакытъёс луо: ӟечез но секытэз. Котькыӵе вакытъёсы адямиос семья кылдытэк ӧз улэ. Тупаса улӥсь семья адямилы котькыӵе шуг-секытэз вормыны юрттэ, нылпи вордыса, улонэз азьланьтэ. Даурысь дауре озьы: нылпиос будо, мумы-бубыос (анай-атайёс) пересьмо, кошко, улонын соосты нылпиос вошто. Люба но Виктор! Тӥ семья кылдытыны малпады бере, иське, улондылэн емыш будэтон вакытэз вуиз. Чебер, усто емыш будэтон понна нуналысь нуналэ ялан сюлмаськоно луэ. Тӥледлы котьку ваче ки, огкылысь луыса, ог-огды шоры шуныт, сюлмаськись синъёсын учкыса, ог-огдылэсь мылкыддэс ӝуткаса улыны тыршоно. Улон сюрес вылын сяськаос гинэ уз луэ, легезьпулэн кадь бышкись венез но шедёз. Сое но чидано луоз. Соин ик туннэ, кузь сюрестылэн кутскон нуналаз, мон юасько на: Люба, дась-а тон улондэ весяклы Викторен герӟаны? - Дась! - Виктор, тон дась-а улондэ весяклы Любаен герӟаны? - Дась! ЗАГС-ын ужась, зундэсъёсын тэркыез кутыса, кузпалъяськисьёс доры лыктэ. Крезьгур чузъяське. - Озьы ке, тани та дасям зундэсъёстэс ог-огдылэн бур киысьтыды нимтэм чиньыяды бырттэлэ. (Егитъёс зундэсъёссэс быртто). - Табере, Виктор, Любалэсь кизэ кут но мон сьӧры вера: - Россилэн катъёсыз азьын, мумы-бубыосмы азьын, татын люкаськем матысь но яратоно эшъёсмы азьын ми ӵош улыны кылмес сётӥськом. Выль семья кылдытыса, ог- огмес гажась кузпалъёс луыны, нылпи будэтыса, вашкала выжымес азьланьтыны, улонмес шудо-буро но чебер карон понна сюлмаськыны кыл сётӥськом. - Лыктэ татчы но семья кылдытэмды сярысь книгае гожтӥськелэ. (Крезьгур яке кырӟан чузъяське). Егитъёс гожтӥськон ӝӧк доры мыно. Адӟисьёссы но соос бӧрсьы ик вамышто. Бӧрсьысь бӧрсьы гожтӥсько: выль кен, эмеспи, выль кенлэн эшез, эмеспилэн эшез. Крезьгур чалме. Гожтӥсь мурт лыктэмъёслы вазиське: - Петрова Любовь Ивановна но Карпов Виктор Алексеевич Россилэн законэзъя семья кылдытэмзы сярысь гожтӥськизы. Кузпалъёслы вазе: - Табере тӥ кузпалъёс (кышноен картъёс) луиды. Ас мылкыд каремдыя одӥг фамилие выжемдэс Закон юнматӥз - табере тӥ кыкнады но Карповъёс, Карповъёслэсь выжызэс йылэтыса азьланьтӥсьёс. Фамилидэс уродэ эн уськытэ. Сюлмаське, эшъёсты но, (гурт) калык но Карповъёсты шумпотыса, гажаса верано мед луозы. Кузпалъяськем сярысь свидетельствозэс кузпалъёслы сётэ: - Тани басьтэ туннэ нуналэз юнматӥсь, тодэ вайытӥсь документтэс. Та - кунэнымы сётэм кагаз. Тодады возе: та кагазэн гинэ семья уг возиськы. Куспады тупаса, ог- огдэс гажаса улэ. Кусыптэс сураны турттӥсьёслэсь эн кылзӥське, сюлэмъёстылы но ог-огдылы оске. Созэ но эн вунэтэ: семья нылпиосын юнма. Дасяське нэнэй-дядяй (анай-атай) луыны, пиналъёстэс ӟеч адями будэтыны. Виктор, учкы Любаед шоры: со тынад яратоно кузпалыд гинэ уз лу, со пиналъёстылэн яратоно нэнэзы луоз. Нош тон, Люба, Викторед шоры, мусо картэд шуыса сяна, нылпиосыдлэн тятязы шуыса учкы. "Корка нылпиен шулдыр", - шуэм асьме калык. Иське, шулдыртэ коркадэс но шудо луэ! Гажано куноос! Ӟечкылалэ выль кендэс но эмеспидэс! Крезьгур чузъяське. Лыктэм куноос егитъёсты ӟечкылало. Крезьгур чалмем бере, ваньзы нош ас интыосазы мыно но, гожтӥсь мурт веранзэ азьланьтэ: - Гажано, анай-атайёс! Тӥляд нылпиосты будӥзы, тани соос кузпалъясько ни. Туннэ тӥляд тодады лыкто, дыр, соосын луэм пӧртэм учыръёс: шуг-секытъёс но, шумпотон- серекъянъёс но - котькыӵе дыръёс вал. Нылпи будэтон сюлмаськонъёстэк уг луы. Тау тӥледлы, тӥ ваньзэ вормиды. Азьланяз соос тӥледды ӵемгес мед шумпоттылозы. Оскисько, соослы пыд йылазы йыг-йыг султыны, отӥяз нылпиоссэс будэтыны быгатэмдыя тӥ юрттоды на. Тӥледлы яратоно песянай-песятай, ӵужанай-ӵужатай луыны шуд мед усёз. (Та интыын мумы-бубыослы ӵектыны луоз нылпиоссылы ӟечкылан кылъёс вераны. Кыӵе ке синпель кузьым сётэмзы ке потӥз, мед сётозы. Та сярысь соосын азьло ик вераськоно, та ӵектон соослы возьмамтэ шорысь медаз луы. Кузпалъяськисьёслэн огзылэн мумиз, мукетызлэн бубиз вераськыса умойгес адскоз, дыр). Собере гожтӥсь мурт кузпалъёслы вазиське: - Гажано Люба но Виктор! Ноку но мумы-бубыостэс эн куштэ. Соослы ӟеч кыл вераны, юрттӥськыны эн вунэтэ. Ялан тодады возе, кӧня сюлмаськизы соос тӥледыз будэтыны. Та шудо нуналады тау карыса соослы йыбырттэ. (Выль кузпалъёс анай-атайёссылы йыбыртто). Гожтӥсь муртлэн юрттӥсез одӥг-кык кылбур лыдӟе. Собере гожтӥсь мурт берпум кылзэ вера на: - Я, улон сюресты вольыт, чебер медло! Крезьгур чузъяськемъя яке ансамбль кырӟам улсын ваньзы залысь пото. Азязы - егит кузпалъёс. Кузпалъяськонэз гожтон йылолын уже кутыны луоз таӵе кылбуръёсты: 2. Нылкышно ке тон азьын, Чебергес адскем потэ. Нылкышно кен тон урдсын, Ӝужытгес будэм потэ. Нылкышно ке тон сьӧрын, Кужмогес луэм потэ, Нылкышно ке тон вӧзын, Визьмогес луэм потэ. (Ф. Васильев) 3. Яратон кулонлэсь но кужмо, Уд, уд кортна, уд возь серметэн. Сюлэмдэ вазь тулыс ик кырмоз, Бурдъялоз тодмотэм кужымен. Выжыкыл сюрестӥ со валтоз, Усьтӥськоз улонлэн чеберез. Улэмед тулыс сад кадь луоз, Нош адӟод ни вуэм емышез. (Ф. Васильев) 4. Кык тӧлъёс сюрес вылын. Со - тон но мон. Нош могӟетъёс пыдъёс улын Пӧртэм пумо. Ньыль киос юн кырмисько - Тынад, мынам . Кык сюлэмъёс йыг йыгасько Асьме понна. Ортчо, кошко пеймыт уйёс, Вордске нунал. Сяськаясько ни писпуос Асьме понна. Асьме понна ӝужа улон Котькуд нунал. Ноку но мон таӵе, оло, Шудо ӧй вал. Крезьёс шаер вадьсам туннэ Шудо жон-жон. Кык юсьёсыд ӝутско инэ - Со - тон но мон. (М. Федотов) 5. Яратӥськод ке, Шу астэ шудо: Яратыку Улон кырӟа шулдыр. Мусо синъёс Югдо соку, Шунто. Соку уин но кадь Югдэ шунды. Яратӥськод ке, Ӝог лобе вакыт, Соку ачид но Луиськод бурдо. Соку уг пересьмы Егит мылкыд... Яратӥськод ке, Шу астэ шудо. (А. Белоногов) 6. Тонтэк Ӝынызэ ыштӥсько кадь шудме, Мынон сюресэ но Ыше кадь тонтэк. Огнам Куспетӥ карисько ужанме, Сиён ымтырме Кельтӥсько быдтытэк. Тонтэк Изён ум но сӥньыс кадь чиге, Кынэн ӵуштаське Сяськаясь малпанэ, Тонтэк Сюлэмы но кыклы люкиське, Угось ӝыныез Тон киын улонэ. (А. Белоногов) Дасяз Галина Никитина Масленча Та йылолэз пусйылӥзы выль ар бере сизьым-тямыс арня ортчыса, тулыспаллэн пумаз - южтолэзьлэн кутсконаз. Шулдыръяськыны-кунояськыны кутско покчиарняе но йылпумъяло арняе. Юмшан кутске покчиарняе. Ӵукна ик нянь, табань, мильым пыжылӥзы. Нуназе егитъёс шудылӥзы, кырӟаса ульча кузя валэн ворттылӥзы. Валъёссэс чебермаллязы: букое пужыятэм ӵушкон, гырлы ошылӥзы, валзэс шобретэн шобыртылӥзы. Ӝытазе пересьёс юмшаллязы, "юон голосэн" кырӟаллязы, нош егит муртъёс, соослэсь эктэмзэс- кырӟамзэс учкыса, сьӧразы ветлӥзы. Егитъёс куасэн нискылазы, пичи дӧдьыосын, вал дӧдьыосын, юри тупатэм скамьяосын, черсон кубо вылын. Егит пиос, гурт пумысь нялмыт, ӝужыт гурезь бырйыса, лымызэ лёгало вал, собере гурезь кузяна вольыт пуӵ тырылӥзы, нош куд-ог дыръя ӵошкыт интызэ но йӧвалег карылӥзы. Сое "масленча пуӵ" шуылӥзы, чебермам валэн, гырлыен юри нюлэскысь вайылӥзы. Со пу вылтӥ егит пиен но нылэн яке ныл нылэн, ваче ки кутскыса, кырӟаса нискылаллязы. Юмшанлэн самой шулдыр дырыз луэ вал арнянуналэ. Та нуналлы мӧйыос нимысьтыз дасяськылӥзы: брага но сур пуктылӥзы, картошка, мильым вӧяллязы, кык-куинь пӧртэм шыд пӧзьтылӥзы. Масленча келянэ мӧйы кышноос люкаськылӥзы но уйбыт коркась корка ветлӥзы. Кышноос вылазы куать но солэсь трос кильымо шортдэремзэс дӥсяллязы - "пыдбам вылынызы ӵож". "Зӧкомем" кышномуртъёслэн сыӵе йӧспӧртэм горд дэремъёссы вуоно тулыс-гужемлэсь дэлето но ваньбуро луэмзэ, адямилэсь вордон- пиян быгатонлыксэ возьматэм выллем луэ. Шундылэсь буёлзэ, кужымзэ сӥлы каремзы но адӟиське та йылолын. Масленча, вожо дырен ӵошатыса, тулыс лыктонэн герӟаськемын. Пыдазы кут кутчаллязы. Кут кутчамзэс сапегъёссэс жалямен валэкто ке но, солэн мугез, ми валамъя, сокем огшоры вылымтэ. Кут вашкала пыдкутчан бере, сое пыдэ понэм вашкала йылолэз утем выллем луэ. Егитъёс ӝытазе ӧз шулдыръяськылэ ни, пересьёс гинэ эктылӥзы но кырӟаллязы, нош егитъёс учкыса ветлӥзы. Озьы масленча келянзы кыстӥськылӥз югыт луытозь. Галина Глухова 1651 Семён Виноградов Мумыкор Дуннеын тужгес но паймымон потэ мыным адями. Котькудӥз ас калык выжыысьтыз потэмын, соин ик сое валан понна та калыклэсь улон сямъёссэ тодыны кулэ. Удмурт адямиез валан понна мынам чакламе потэ удмурт коркаез но солэсь куд-ог люкетъёссэ. Корка - мугорез утён но шунтон инты гинэ ӧвӧл, со мылкыдэз, лулэз утён, юнматон инты но. Быдэсаксэ коркаез учконо ке, со со огшоры маке гинэ ӧвӧл. Отысь котькуд интыез, люкетэз калыкмылэсь быгатонзэ но малпанъёссэ-осконъёссэ усьтэ. Та туж бадӟым ужпум. Коркалэсь оглюкетсэ гинэ эскером. Туннэ вераськом коркалэн огез шорсюлмыз сярысь. Мумыкор шуиськом асьмеос сое. Вордӥськоно нылпилэн анаез борды гогыеныз бурмемез выллем, удмурт адями ас коркаезлэн мумыкореныз лул гердъёсыныз герӟаськемын. Тросэзлы та валантэм кадь потоз. Веранме валэктыны тыршо. Коркаез ӝутыку, мумыкор тубытон нимаз йылоллы берытске. Мумыкор ӝутон дыр вуэ ке, солы инты дасяло: зӥбиськон вадесаз - пумъёсыз улэ ыж гон поно. Солы секыт ужзэ ужаны капчи мед луоз, вӧлдэтэз но корка сиге тырем сюез ас тыбыр вылаз возьыны каньыл мед луоз шуыса ӟеч кыл верам выллем со. Куд-ог кузёос мумыкор улазы азвесь уксё но поно. Секыт ужез мумыкор ас вылаз басьтэ бере, солы тау карем, уждунзэ тырем выллемгес луэ, дыр, та. Ужасьёс-вемечиос кузё кышнолы вазё: "Мумыкор ӝутӥськомы, аракыдэ эн вунэты!" Я ӝыны черык, я быдэс черык аракы но гурысь соку гинэ пыжиськемъёс вуттэ ужасьёслы. Пичияк сиыса-юыса, ужзэс нош азьланьто: пелькор тыро, ачамаос пуктыло, липисько. Корка вуэм бере корка пырон каро. Бигеръёсын артэ улӥсь удмуртъёс сое коркатуй карон шуо. Та сямез-йылолэз ортчытыны бӧлякъёссэс ӧтчало. Нош куд-ог гуртъёсын быдэс гурт люкаське выль корка пырись доры. Пӧртэм кузьымъёс ваё кузёослы. Ӟеч кыл вераса пыро: "Выль корка шудо-буро мед луоз!", "Таза улыны мед кылдоз" но мукет. Кузьымъёссэс ӝӧк вылэ тыро, мумыкоре но ошыло. Азьло аръёсы кузьымтэк лыктэм пиосмуртъёс, ӟеч кылъёс вераса, мумыкоре азвесь уксё шукко вал. Табере кагаз коньдон дэмӟыто. Ваньмыз со возьматэ: мумыкор коркалэн туж сӥлы каронэз выллем луэ. Таӵе малпанэ вуттэ лыктэм муртъёслэн, коркалы (медаз лекъяськы шуыса) вазиськем интые, мумыкорез кузьымъёс ошылыса шумпоттэмзы. Оло, коркалэн ӧвӧл, коркамуртлэн (коркаез утисьлэн), коркакузёлэн символзы луэ мумыкор. Кузёлы сямен солы кузьымъёс, коньдон ваё ук. Мумыкорен герӟаськем йылолъёс-сямъёс ортчытъясько на пиосыз армие келян дыръя. Кошкись лекрут пи бӧлякысьтыз гажано муртъёсызлэн мумыкоразы чук оше - азвесь уксёен буртчин лента шукке. Со чукез армиысь бертэм бераз йылол ортчытыса васькытэ. Семьяысьтыз кинэн ке я эшъёсыныз саламен, аракыен мыно ошыса кельтэм чуксэ басьтыны. Со бертытозь чукез нокин уг йӧтылы. Таиз сям возьматэ удмуртъёслэсь мумыкорлэн утись кужымезлы оскемзэс. Ас мумыкорзылы гинэ уг вазисько, асьсэ бӧляк-выжы мумыкоръёслэн но кужымзы мед юрттозы шуыса кузьым кельто. Асьсэлэн шудзы ӧжытгес ке, выжы-кумыоссылэн шудазы ке но, пизы армиысь - войнаысь бертонэз мед адӟоз, пе. Кузь сюрес вылэ потыкуз но лекрут пи асьсэ коркась мумыкор борды йӧтӥськыса потэ но шуэ: "Бертонэз мед адӟом, ӟеч сюрес сёт, уть монэ". Удмуртъёс оско: мумыкорлэн аслаз утись кужымез, инмарез, инмарлыкез вань. Вӧсяськыкузы удмуртъёс тужгес кужмо инмаръёссы пӧлы котьку пырто Шунды-мумыез, мукылчинэз. Асьме калык малпамъя, мумимы но, Шунды-мумы но удмуртэз утё бере, асьме коркась коръёсмылэн мумызы - мумыкор но шуг-секытъёслэсь палэнтыны быгатэ. Мумыкорлы ӟеч кылын вазиськиськод, вӧсяськиськод ке, кузьым сётъяськод, со сярысь уд вунэтӥськы ке, тыныд со юрттоз шуыса малпало, лэся, удмуртъёс. Мумызылэсь сюлмаськемзэ, юрттэмзэ выллем син азязы пукто, вылды, соос та учырез. Мон малпасько, югыт дуннеен сопал дуннеез висъясь гож кадь луэ мумыкор. Куд-ог сямъёс но тае валаны юртто. Тросэз уг тоды, луоз: корка пушкын вӧсяськыкуз, асьме адями выжлэн (поллэн) котькуд интыяз уг султы. Коркан вӧсяськонлэн аслаз вадесыз вань. Мумыкор улын но, солэн ӧс пал дураз (люкетаз) вӧсяськыны уг яра. Кыӵе ке бадӟым уж борды кутскыку яке сюан-бӧрысь ортчытыку, нылпи вордӥськыку, Быдӟым нунал выллем сиён-юон, вӧсяськон дыръёс луыку, кытӥяз корка пушкын но вӧсясько. Шыдэн- ӝукен-а, быдэс нянен-а, табанен-куарнянен-а вӧсяське кузё - со мумыкорлэн тӧршор палаз сылыны кулэ. Мумыкор вадьсысен ӧс дорозь инты луэ куяськон пал. Татын вӧсяськыны уг яра. Удмурт сямъя, вӧсяськонэз нокыӵе кулэм муртэн но кулэм мурт дуннеен (сопал дуннеен) сураны, саптаны уг яра. Со туж бадӟым сьӧлык - инмаръёсмес паньсам, сантэмам, кыжмытэм луэ. Ассэ гажась удмурт та вашкала сямез одно ӟеч быдэстыны тырше. Сямъёс, йылолъёс улонмес тунсыко, чебер каро, асьме калыклэсь историзэ тодыны но валаны дышето. Мумыкорлэн удмурт этикетэн (астэ кызьы возёнэн) но, социальной положениен но герӟаськем вадесъёсыз вань. Шуом, пырид мурт доры - пырак тӧршоразы мыныны, соку ик пуксьыны уг яра. Кыӵе ке но ӟеч кыл верано, косӥзы ке, ӧс дорысь ӟус вылэ пуксёно. Тонэ гажало ке, "вылэ туб, мар сокем ӧс доры гинэ пуксиськод", шуозы кузёос. Соку урдэс ӟус вылэ пуксёд ини. Туж юн гажамон яке узыр мурт луиськоды ке, тӥледды одно ик тӧршоры пуктыны тыршозы. Тӥни озьы мумыкор узырен куанерез, гажамез но гажамтэез возьматӥсь-висъясь вадес луэ на. Удмуртъёслэн малпамзыя, сопал дуннеын улон но югыт дуннеын выллемгес ортче. Соин ик куд-ог йылолъёсыз кулэмъёс понна но ортчытъяло. Сӥзьыл-тулыс юондыръёс кулэмъёслы сӥземын, соосыз сӥзьыл кисьтон, тулыс кисьтон шуиськомы. Сопал дуннее сюан-пирдан сётонъёс ортчытъясько. Соосыз йыр-пыд сётон, вал сюан, кулэм мурт сюан, мыдлань сюан, мыддорин сюан шуо. Нош куд-ог та выллем йылолъёсы-сямъёсы мумыкор но пыре. Туала аръёсы но Куеда палась удмуртъёс дорын адӟыны луэ на шайвылъёсысьтызы кулэм муртлы ортчытэм выль корка пырон сямлэсь бервылъёссэ. Та ёросысь шайёсын син шоры йӧто шайгуос выллем ӵупем бугроос. Соос котькуд палтӥз кык корез ӵупыса лэсьтэмын. Нош кор бугро вылэ пуктэмын чебер решётка - йылсам сюбег пулъёслэсь ньыль борддор. Кузьласяньтӥз "борддоръёс" вамен понэмын чебер боды, сюры. Со вылэ ошылэмын ӵушконъёс, кышетъёс, ныркышетъёс, буртчин лентаос. Паймыса юасько Гондыр гуртын улӥсьёслэсь: со выль шайгу малы сыӵе чебермамын? Адями, пе, сопал дуннее улыны интыяськиз, солы выль корка пырон ортчытӥмы. Нош юасько: марлы басмаос ошылэмын? Ми, пе, со дуннее кошкем муртлэн выль корка пыроназ, гуртамы корка пыронэ ветлыкумы сямен ик, кузьым вайса лыктӥськомы но мумыкораз ошылӥськомы. Шайгу решётка йылысь вамен понэм боды - со кулэм муртлэн коркаезлэн мумыкорез луэ вылэм. Тӥни озьы мыным адӟыны кылдӥз сопал дуннеысь коркалэсь но мумыкорзэ. Югыт дуннеын но, сопал дуннеын но улонъёс ог-огенызы герӟаськемын уго. Соос, калык малпамъя, огвыллемгес ортчо.Соин ик мумыкорен герӟаськем куд-ог сямъёсыз удмуртъёс ортчытъяло улэпъёслы но, кулэмъёслы но. Трос мукет йылолъёсаз но удмурт калык мумыкорез уг вунэты. Тани чаклаломы пӧртмаськон вакытэз. Сюрес воже кылзӥськыны-тунаськыны мыныкузы, жоб зӥбонлэсь утиськон вылысь, мумыкор шоры учкыса но гур борды йӧтӥськыса кыре пото. Чакласькиды, юалляськиды ке, мумыкорен герӟаськем мукет сямъёс сярысь но тодыны быгатоды на. Вань та эскерем учыръёс возьмато мумыкорлэсь удмурт калыклэн чебересь лул малпанъёсаз бадӟым инты басьтэмзэ. 1 Нылъёслэсь быдэ вуэмзэс пусъён сямъёс Галина Глухова Пересьёс туж шумпотыса верало асьсэлэн егит дырзы, тужгес но пукон коркаосын шулдыръяськемзы сярысь. Со пукон коркаосы ветлыны быгато вылэм быдэ вуэм егитъёс гинэ. Кылсярысь, нылъёслэсь быдэ вуонзэс пусъёнлы нимысьтыз сям-йылолъёс тупатэмын вылэм. Пӧртэм интыын улӥсь удмуртъёс соосты пӧртэм сямен нимало: "Ныл брага" - уйпал; "Пинал куно" - лымшор; "Пукон табань" ("Табань сиён", "Кушман сюан", "Пичи сюан") - шорпал; "Ныл сюан" Киров улосысь удмуртъёс шуо. Пусйыны кулэ: ваньмыз та сям-йылолъёс ортчытъясько вылэм сӥзьыл, бусы ужъёс бырем бере. Пукон табань. Та сям ортчытъяське вылэм Шаркан палан улӥсь егитъёс пӧлын. Нылъёс, табань пыжыны шуыса, бичало вылэм пызь, курег пуз, вӧй но мукет мар но со. Люкаськыны азьло ик корка утчало вылэм. Корка шедьтэмзы бере егитъёс куспазы ортчытоно дыр сярысь кенешо вылэм. Дырзэ пуктэм бере кинэ ке но мукет гуртэ ысто, "пукон табане" ӧтьыны. Юондыр кутскон нуналэ гуртысь вань егит нылъёс но пиос сьӧр гуртысь ӧтем кунооссэс пумитаны вераськем корка люкасько вылэм. Собере нылъёс ӝӧк вылэ ас пӧрам сиён-юонзэс (та шулдыръяськонын куноосты одно ик табанен сюдыны кулэ вылэм) пуктыло но кунооссэс ӝӧк сьӧры ӧтё. Сиськемзы бере шудо, экто, кырӟало, ог-огенызы матысьгес тодматско вылэм. Озьы егитъёс шулдыръясько вылэм ӵукнаозь. Пересьёслэн тодэмзыя, та йылол нылъёслы но пиослы ог-огенызы умой-умой тодматскыны, яратэмзэс кыре поттыны луонлык сётэ вылэм. Кушман сюан. Таиз йылол пусйиське вылэм Завьял котырысь удмуртъёс пӧлын. Пукролы нылъёс юри дасяло вылэм аспӧртэмлыко чеберъям "шляпа". Сое лэсьто вылэм чурыт езлэсь, йылаз вандэм каляга интыяло но отчы лентаос бышкало. "Шляпалэсь" дурзэ но лентаосын чеберъяло вылэм. Пукро нуналэ нылъёс вылазы шортдэрем дӥсяло, чыртывесь тыро, йыразы кышет кертто, нош кышет вылазы одно ик лэсьтэм "шляпазэс" поно. Сыӵе "йӧно" дӥсяськыса, соос коркась корка ветло вылэм. Котькуд коркан соосты мыло-кыдо возьмало, пе, вал. Корка пыремзы бере кузё кышно, куноосты эктыны косыса, гур пулэн шудэ. Эктэмзы бере нылъёсты ӝӧк сьӧры пуксьыны косо. Мукет сиёнэн ӵош ик ӝӧк вылын одно ик луэ вылэм чырсатэм горд кушман. Озьы егит нылъёс ортчо, пе, вал быдэс гуртэз. Ныл сюан ортчытъяло вылэм Киров палан улӥсь удмуртъёс (Унинск ёрос). Нырысетӥ нуналаз вузкаронние (базаре) ветло, нош кыкетӥ нуналаз та йылолэз (ныл шудон сюан) ортчыто вылэм. Люкасько егит нылъёс гинэ. Вылазы удмурт дэремъёссэс дӥсяло, йыразы кур кышет (буртчин бадӟым кышет) кертто. Пӧлысьтызы кык нылъёсты пиосмурт дӥсяло: йыразы изьы поно, вылазы - азям ( ), кусказы ӵушкон кертто вылэм. Озьы соос, нимысьтыз крезьгур кырӟаса, коркась корка ветло, пе, вал. Жаляса верано, пересьёс крезьгурзэ уг тодо ни. Ураметӥ ортчыкузы, пумитазы сюрисьёс соослэсь кинъёс но кытысь тӥ шуыса юало вылэм. Ваньзэ верамзы бере нылъёслы етӥн, куж яке уксё сёто вылэм. Нош корка пыро ке, кузёос соосты ӝӧк сьӧры пуксьыны косо. Нылъёс пӧртэм кырӟанъёс кырӟало, пе, вал: кинъёс соос, кытысь вуизы, кыӵе тылобурдо (папа) соосты дӥсяса лэзиз. Вань люкамзэс нылъёс вузало вылэм но уксёзылы дэрем вурыны одӥг кадь басма яке дась вуремзэ басьто вылэм. Озьы "ныл сюанзы" ӵукнаысен лумбыт кыстӥське вылэм. Та шулдыръяськонъёсы пересьёс, бызем нылкышноос уг пырисько ке но вал, соос палэнысен учкыса сыло вылэм. Ваньмыз та вылӥ висъям сямъёс егит нылъёслэсь быдэ вуэмзэс возьматон луэ. Юондыре ветлэмзы бере соосты выль кенъёсын одӥг радэ пырто ини вал. Пересьёслэн тодэ ваёнъёссыя, та праздник бере зэмзэ но туж трос сюанъёс ортчытъясько вылэм. Вашкала сямъёсъя, таӵе йылолэз ортчемзы бере гинэ нылъёслы шудонние потаны яра вал. 3462 Ныл брага Та йылол сӥзьыл бусы ужъёс бырем бере ортчытӥське. Шулдыръяськон ӝытазе кутске но ӵуказеяз нуназе йылпумъяське. Солы пыр-поч дасясько, кык арня пала яке солэсь но кемагес. Пересьёслэн верамзыя, егит нылъёс коркась корка ветло, брага пуктыны ӵужъем, пызь, туг люкаса; пыжиськыны шуыса нимысьтыз люкало на вылэм пызь. Собере одӥгзэ эшсэс мукет гуртэ келяло, отысь егитъёсты та празднике ӧтьыны яке ортчытоно дыр сярысь тодытыса гожтэт гинэ ысто. Лыктыны мылкыд карисьёс ивор лэзё. Егитъёс та шулдыръяськонын одно ик кузэн луыны кулэ вал. Соин ик, лыктӥсьёсты лыдъяло но, нылъёс, пиос кузэн-кузэн уг ке тупало, мукет гуртъёсы ӧтён келяло на вылэм. Гожтэтазы озьы ик верасько дӥськут сярысь но: ваньмызлэн со одӥг кадь мед луоз. Тодэ ваёнъёссыя, ӝӧк сьӧры нылъёс ӵемысь тӧдьы кофтаен но сьӧд юбкаен пуксьылӥзы, егит пиос - тӧдьы дэремен но сьӧд шароварен. Праздник кутскон нуналэ вань егит нылъёс мукет гуртысь лыктэм кунооссэс пумитаны люкасько вылэм азьло ик вераськем корка. Пумитамзы бере соосты ӝӧк сьӧры пуктылӥзы, чаен секталлязы. Со куспын юри быръем егит "кузпалъёс" - ныл но пи - коркась корка кошко та гуртын улӥсь пиосты ӧтчаны. Сьӧразы одно ик басьто вылэм кыӵе ке но крезьгуро инструмент, кылсярысь, Балезино ёросысь Карсовай гуртын мандолинаен шудо вылэм. Котькуд коркан соос мандолинаен шудыса кырӟало, пе, вал. Озьы, ӧтем пиосты чортыса, люкаськем куноос доры берен мыно. Егит "кузпалъёсты" но пиосты корказьысен таӵе кылъёсын пумитало: "Ваньды-а люкаськиды? Нокинэ но ӧд ыштэ-а?" Собере ваньзы корка пыро, ӝӧк сьӧры пуксё. Сиськемзы бере, ӧтчаськыса ветлэм нылын-пиен сяна, ваньзы ӝӧк сьӧрысь султо. Нылъёс ӝӧк вылысь сиён-юонэз утялто но, ӝӧккышетэ бинялтыса, сое "кузпалъёслэн" йыр йылтӥзы басьто. Собере гинэ таос ӝӧк сьӧрысь пото. Собере шулдыръяськон, ог-огенызы матысьгес тодматскон кутске. Уйшорозь экто, шудо, кырӟало. Уйшоре нылъёс сьӧразы ваем воштон дӥсьсэс дӥсяло. Таосыз дэремъёссы одно ик пужыё луо. Шулдыръяськон ӵукнаозь азьланьтӥське. Верамзыя, Карсовай гуртысь нылъёс ӵукна пал нош ик воштӥсько вылэм. Ог-огзылэсь дӥсьсэс но дӥсяло. Егит пиос быръем нылзэс медам тодмалэ шуыса, бамзэс маин ке но шобырто вылэм. Пиос асьсэлэсь нылзэс тодманы тыршо: "Кудӥз мынам нылы? Мынам сыӵе ӧй вал. Ма, али гинэ татын вал ук!" Куд-ог нылъёс, кӧлыны шуыса, мукет корка лушкемак пегӟыны тыршылӥзы. Та гуртысь пиос но нылъёс, сьӧразы мыныса, берен шулдыръяськонние ваён понна, соосты суэн, эгырен нашталлязы яке вуэн пазяллязы. Куноос гуртазы бертыны дасясько нуназе котырын яке нуназе бере. Соосты нош ик чаен сектало. Та шулдыръяськонын висъясько ныл но пи - егит "кузпалъёс". Соос кивалто, йылоллэсь пуштроссэ чаклало, ваньмыз радызъя мед мыноз шуыса эскеро. Люкаськем куноос егит "кузпалъёсты" сӥлы каро, соослэсь кылзӥсько. Тужгес тунсыко луэ нылъёслэн дӥсь воштэмзы. Верамын вал ини, уйшоре егит нылъёс вылазы пӧртэм пужыё дэрем дӥсяллязы шуыса, озьы ик пӧртмаськыса но дӥсясько вылэм. Удмурт сюанын али но выль кен интые пи доры юромо сюан дӥсен пересь кышномуртэ яке ныллэсь эшсэ потто. Вераны кулэ, ныл брага праздник уйпал егитъёслэн одӥгез яратоноез луэ. Галина Глухова 2655 Альбина Вахрушева Варсь но сур Варсь пӧзьтон понна одно ик ӟегез удато, собере сое куасьто но изо. Озьы ӵужъем пӧрме. Ӵукна ик гур эсто. Со куспын ӵужъемлэсь юмал суралто, пӧлаз ӟег пызь но ватсало на. Гур ӝуатозь, сурет юмалӟе. Соку ик корчага (горд сюйлэсь бадӟым гӧршок) дасяло. Солэн пыдэсызлэсь кык-куинь чиньы вылӥынгес пичияк портэм пасез вань. Со юн пулэсь лэсьтэм пытсэтэн (ӵоген) пытсаське. Ӟег куроез пӧсьвуано, озьы со небӟе но, чылкыт но луэ. Пась вадьсы пушласянь кечат-вамат куинь-ньыль чаг пононо, чагъёс вылэ небӟытэм куроез позыртыса, лач- лач керттыса юнматоно: суралтэм юмал пыртӥз тюак медаз вия. Куро пуж интые но луэ - со пыр варсь сӥсъяське. Корчага пыдэсы, варсь медаз ӵуштаськы шуыса, тюрышак (ӧжытак гинэ) ву кисьтоно, собере тыраз ик - дасям юмалэз. Напезъя суралтэт йӧлвыл кадь нап мед луоз, суралтон боды медам усьы, мед сылоз. Табере посудаез вуттэм гуре пуктоно. Пӧземезъя ялан ву йылэтоно: медаз ичиёмы, пӧзьыса медаз быры, озьы ик тыраз мед луоз. Ӵуказеяз вазь ӵукна пасьсэ усьтыса эскероно. Дась ке, нимысьтыз лэсьтэм дырды кузя виятоно. Куд-ог дыръя, бадӟым куно каронлы яке сюанлы ке дасясько, вашкалаосмы одӥг гуре кык но корчага пукто вылэм. Варсь ӟеч удалтэ ке, вияса бырем бераз вылаз быректэм ву ватсало на. Кӧня ке пытсаса возё но нош виято. Берлозэ кык пол озьы быректэм ву ватсаса виятэменызы сур пукто вылэм. Угось варсь бервылын сур туж удалтэ. Сур лэсьтон понна выльысь юмал суралтыса дасяно. Кудӥз отчы туг ватса. Со сурлэсь кужымзэ зол каре. Озьы чырсато, собере, быдэсме-вуэ ке, гуӵӵа (нап) вылысьтыз сӥсъяло: чырс медаз ванды, мултэс медаз чырса. Вашкалаосмылэн та юонъёссы туж пайдаё но ческыт луо. Варсен пӧсятэм, пӧртэм сиёнъёс дасяны луэ. 1429 "Удм.дунне", 11.10.97. З. Токарева Табань Та сиёнэз удмуртъёс пӧртэм сямен дасяло. Ӵемгес зыретэн яке йӧлвылэ веттылыса сиё. Милям анаймы сое котькугес ик арня ӵукна дася вал. Няньзэ ӝыт ик котыса кельтэ ини. Маин но уг пыжы: сӥлен, чорыген, курег пузэн, губиен... Анаелэсь адӟем карыса, мон но та сиёнэз пӧртэм сямен пыжисько. Та сиёнэз лэсьтыны дэмланъёс сётӥсько озьы, кызьы сое ачим дасясько. Быдэн стакан йӧл но ву, кызь грамм маял (дрожжи), одӥг но ӝыны стакан пужнэм тӧдьы пызь, кык сиськон пуньы сакыр песок, одӥг чечы пуньы сылал басьтоно. Соосты ваньзэ сурано но уйлы чырсатыны кельтоно. Ӵукна ыльнянез учконо. Напгес ке пӧрмем, кӧня ке йӧл ватсаса кизертоно на. Пыжоно ӝуась гур шорын. Ыльнянез кӧня ке люкетсэ таба вылэ кисьтоно. Со вылэ корам сӥлез ньылетӥ пононо, кыӵеез вань : кунян, парсь, ыж, ӵӧж, ӟазег, курег. Со таба вылын пырсатэм сугонэн, сылалэн, изэм сьӧд пӧсьтурынэн,йӧлын сурамын луэ. Табань пыжем бере вылтӥз нӧкы вӧен зырӟано. Ньыль бадӟымесь люкетъёслы вандоно. Сӥль интые пӧртэм чорыгез но басьтыны яралоз. Векчиезлэсь пушсэ сузяськом, йырзэ куштӥськом, тазазэ лыэзлэсь но сузяськом. Сое, ӧжытак сылалэн пызьнаса,уйлы кельтоно. Пӧлаз таба вылын кӧй-вӧен пырсатэм сугон, изэм пӧсьтурын ватсано на. Оскалтэ ыль курег пузэз сугонэн сураса но, губиез но кубистаез векчиятыса но. Таосаз сугон, ыль курег пуз, изэм пӧсьтурын ватсало на. Одӥг кылын вераса, кинлэн маиз вань, соин ик пӧралэ. 1165 "Удм. дунне", 27.09.97. Виртырем Та сиёнэз пудо вандон вакытэ дасяло. Сузям сюлэз сылал вуын миськоно, собере кӧнялы ке сылал вуэ ик кельтоно. Пушкес дасяны кык люкет пӧсь лымлы (сӥль пӧзьтэм бервылэ) одӥг люкет вир, чабей кеньыр, чеснок, пуш кӧй мынэ, сылалзэ шӧмызъя ватсано. Ваньзэ сое ӟеч-ӟеч сурано. Суретты туж нап но, туж кизер но медаз луы. Вандылыса дасям сюлъёслэсь огпал пумзэс керттылоно. Котькудаз ик пушкессэ ӝыныезлэсь ятыргес пононо - кык куиньмос люкетаз. Тросгес понӥды ке, кеньырез будэмен, виртыремды пилиськоз. Собере сюлдэс вылӥтӥз но керттоно. Пушкесты огкадь мед луоз шуыса, кӧня ке пол огпалысьтыз огпала карыса сурано, быректэм вуэ пононо. Кеньырез небӟытозь пӧзьтоно. Лымысь поттэм бере шобыртыса кельтоно. Виртыремез холодильникын яке мукет салкым интыын возёно. Ӝӧк вылэ пуктэмлэсь азьло, векчи вандылыса, табаын пӧсятоно. 708 Выль кен ваён нерге Вашкала дыръя выль кен ваем беразы выль кенэз нырысь ик куала пыртыса, из котыртӥ котыртыса, корка пыртозы вылэм. Вазен куалан тыл тылскон инты изэн котыртэмын луоз вылэм. Кыктой, куиньмой ужатэмзы бере со выль кен ваисьёс, огаӟе люкаськыса, выль кензэс изьялозы вылэм, йыраз йыркерттон керттыса но чалма ошса. Удмурт кышноос чалмаен пинал дыръязы ветло; ог дасо ар чалмаен ветлэм беразы, чуӟсаськыся пелькышетэн ветло ини. Озьы изьям беразы со выль кышноез, педло поттыса, сьӧр гуртысь ке луоз - бусы капка сьӧры поттыса, бызьтозы вылэм. Озьы бызьтыса кудӥз чырткемез выль кен, гуртозяз пегӟоз вылэм, начар ке казакпиосыз, озьы ик, кутны шедьтытэк, выль кенэз лэзёзы вылэм. Кутны ке шедьто, озьы бызьтэм беразы гуртаз бертса, казак пиос выль кенэз нырысь ик куала пу кислэс пыртыто вылэм, "кужым утчаськом" шуса. Пу пыртэм беразы нош ик ошмес дуре ву доры ведра-карнан кутса нуозы вылэм, кужымзэ утчаны шуыса. Ошмес дуре вуэм беразы выль кенэз ву омыртытозы вылэм но, со вуэн ведразэ кутса, казак пиос выль кенлэн йыр вылтӥз кисьто, выль кышеоез пылато вылэм. Озьы пылатэм беразы ог-огзэс куткозы вылэм пылатыны но собере выль кенэз карнанэн вузэс гуртэ нутозы вылэм, нош но "кужым утчаськом" шуса. Гуртэ вуэм бераз выль кенэз картэныз чуме пытсало вылэм... Одӥг час мында соосыз пытсаса возёзы вылэм, собере ачсӥос чум берын кылзӥськыса, чумын мар каро шуыса улозы вылэм. Ог час ортчыса, соосыз пытсэтысь лэзё вылэм. Тани кызьы вылэм удмуртлэн нергеез. Гожтэмын Сарапул уездын. Печатламын 1952 арын Б. Мункачилэн ужаз. Дасяз Т. Владыкина. 1249 Выль кен ваён нерге Удмурт выль кен басьтэ ке, со выль кензы аслаз картэзлэсь бадӟым арлыдо муртъёсыз нимыныз уг вера. Картэзлэсь айзэ со выль кышно "айзы" шуэ, картэзлэсь мумизэ "мумизы" шуэ, картэзлэсь нюнязэ "нюнязы" шуэ, апайзэ "апайзы" шуэ... Со выль кышно нылпи шедьтэ ке, сокы нылызлы-пиезлы семья пӧлысьтыз ни ке сюре, со выль кышно пиналэзлы мызон ним поно, сое "кушем ним" шуо. Со пиналзэ ог нимо мӧйы мурт азьын нимыныз верамез уг луы, ёрмыса кушем ним понэ. Удмурт кышноос выль кышно тырысьтызы пересьмытоӟазы ачсэлэсь гольык йырзэс бадӟым арлыдо пиосмуртлы уг возьмато. Выль кышно гольык пыдзэ но ватэ картэзлэсь, бадӟым муртъёслэсь. Гольык пыдзэ выль кышно возьматӥз ке, со шудтэм луоз, шуо. Пиосмурт кышно басьтэм бераз нырысь вармаяз ке мынэ, вармайёсыз пуктытэк, ачиз уг пуксьы. Озьы сылӥсь выль эмеспиез вармумиз нырысь пуктэ, ыштан алача-а, бинялтон дэра-а ӟус вылэ поныса. Озьы пуктэм бераз вармумиз, выль эмеспилэсь изьызэ куштыса, йырзэ вӧйын зыра. Гожтэмын Сарапул уездын. Печатламын 1952 арын Б. Мункачилэн ужаз. Дасяз Т. Владыкина. 823 Нуны вордонэз пусъён Пинал вордскем бере, ӝӧк вылэ ӝӧккышет вӧлдыса, тыр нянь понса но черыкен вина (пуктыса), Инмарлы вӧссяько. Пи ке: "Кунлы кенер медло!" шуса, ныл ке: "Калык вылэ потмон мед луоз, кузь арлыдо, паськыт шудо медло!" шуса вӧсясько. Собере кин ке нырысь мурт ке (корказ) вуэ, со адямиез коньдонэн югӟато. Коньдонэз ке ӧвӧл со адямилэн, мазэ ке но созэ - тыл чакмазэ но - кельто со коньдон интые; берло ачиз коньдонэн воштэ (кельтэм арберизэ). Вӧсяськем беразы со ӝӧк вылэ пуктэм виназэс котыр сектало вань муртлы но собере ӝук пӧзьтыны кутко но, со вордскем нылпилэн мумиз-аиз, ӟуч мумы-ӟуч айы кутса, пиналзэ пылатыны черке мынэ. Пылатэмысь вуса, иськавынъёссэ ӧтчаса, юондыр каре, нылпи вордскем понназ шумпотса. Нырысь ик, оброс азяз сюсьтыл ӝуатыса, со пӧзьтэм ӝукеныз кутке куриськыны выль нылпи шедьтэм понназ. Со ӝуксэ, тӧдьы ӝӧккышетэн вӧлдэм ӝӧк вылэ пуктыса но вина пуктыса, тазьы вӧсясько: "Остэ, ӟеч Бадӟым Инмаре! Та ӝӧк вылэ пуктэм тыр ӝукеныд, тыр винаеныд тыныд остэ карко, Инмаре, аслад сётэм выль муртэд понна. Тыныд буре вайытэк ум сииське-юиське, Инмаре, Остэ! Та выль нылдэ-пидэ ӟеч шудбуро, улоно-вылоно, паськыт шудо, кузь арлыдо, гырпумам куткысь, киме воштысь карсалыд ке, Инмаре, Остэ! Зарни визьем, азвесь кикыем карсалыд ке, Инмаре, Остэ! Дунне кутмон, дунне утьмон кужымо карысалыд ке, Инмаре! Кузо-пало улмон-вылмон, ӟеч адӟоно карса- улса пересьмымон карсалыд ке, Инмаре, Остэ! Урод синлэсь, тушмон муртлэсь ачид ик уть, Инмаре! Та пиналэ вордкем понна куриськемме-вӧсяськемме ачид ик тустыты-пӧртыты, Инмаре, Остэ! Мон талэсь уно вераны уг тодкы, Остэ!" Озьы вӧсяськем бераз со люкаськем калыксэ сиськыны ӝӧк сьӧраз пуктытэ. Пиосмуртъёс, нылпи шедтон юон дыръя лыкто ке, коньдон кутса мыно со вордскем пиналэз югӟаны. Отчы вуэм беразы, корка пырем беразы, "Чурткемесь на-а, иськавынъёс, - шуо, - ӟеч ивордэ кылса лыктӥм; - тынысьтыд но мултэс ми шумпотӥм; - та вордкем пиналэд сӥлы-данлы медло! - ӟеч адямиослэн син шоразы адкымон медло! - ушъямон-верамон, астэ сюдысь медло! - кузь арлыдо, паськыт шудо мед луоз", - шуо. Собере, коньдон киазы кутса, бур сээс йылазы сёто, гольык киынызы уг сёто. "Тани югӟасько" шуса, "та коньдонэ кадь югыт-сайкыт мед луоз та пиналэд", - шуо. Люкаськем иськавынъёс юо-сиё; киязы бекче сёткаса, ӝӧк вылэ пукто, "учке, мар ми лушкаським, иськавынъёс!" шуса. Со ӝӧк сьӧрын пукись адямиос "берекет медло!" шуса, "тани эгсаськом ини!" шуса, коньдон поно бекче вылазы. Гожтӥз Бернат Мункачи Дасяз Т. Владыкина 2078 Бусы сюан Удмуртъёс шулдыръяськонлы бадӟым саклык висъяллязы. Котькуд вакытлэн аслаз дырыз. Бадӟымесь шулдыръяськонъёс гырон-кизён уж бырем бере кутскылӥзы. Кияса ёросысь Вуж Салья гуртын вашкала дырысен тодмо бусы сюан - бусы праздник. Со тужгес вашкалаосыз пӧлы пыре. Та нергелэсь пуштроссэ юаса-вераса ветлыкумы, ми туж трос пӧртэм веранэз кылӥмы. Кылсярысь, одӥгъёсыз шуо, бусы сюан, пе, анайтэк кылемъёс понна ортчытӥське вал. Мукетъёсыз та праздникез егит дыръязы кулэм муртъёсын герӟало. Соосты данъяса, буре вайыса ортчытӥське вал, пе, со. Угось удмуртъёс вашкала дырысен синйылтӥллям дуннелэсь кудпала бергамзэ, инкуазен юнэсь кусыпъёс возиллям, музъем ужез быдэсъяллям. Соос валаллям: нянь котьмалэсь но бадӟым. Со ке вань, улон но, оскон но вань. Соинтэк-а вашкалаосмы бусы сюан но ортчытъяллям. Ваньмыз со кизён бырем бере, ю-няньлы тау карыса ортчытӥськем. Праздниклэн кутсконэз но быронэз - ваньмыз бусыен герӟаськемын, со бусыын ик кутске но отын ик йылпумъяське. Мынам малпамея, бусы сюан вашкала дыръя туж бадӟым праздник вал, дыр. Солэсь асьмеос кӧня ке вайзэ-пушъетсэ гинэ адӟиськомы на. Со егитъёслэн юмшанзы бере, отчы нырысь ик бызьымтэ нылмурт потыны кулэ. Вашкалаос одно ик бурлат шортдэрем, туго кышет, уксё тӥрлык, пыдазы укмысо кут, йыразы уко туг дӥсяло вылэм. Котькин чебер пӧрмытскыны тыршем. Салья гуртмес Байвади шур кыклы люке бере, соин ик юмшан но кык нунал кыстӥськылэм. Нырысь ик ортчыто вылэм отын, кытчы киземын ӟег. Кылсярысь, ӟегзы Пор пала киземын ке, бусы сюан нырысь шур сопалан ортчоз, нош Ваннапалан ке, шур тапалан. Бусы сюан ортчон нуналэ вань егитъёс Крыкмас шур дуре мыно вылэм. Шулдыръяськонзы отын кутске. Крыкмас дуре Починкаысь, Вужгуртысь, Куӵосысь, Тигерменысь, Уддядиысь, Кибьялась, Лялиысь, Аксакшурысь но мукет гуртъёсысь люкаськылӥллям. Шур дурысь Суллё возь вылын чузъяськиллям шулдыр кырӟанъёс, эктонъёс, шудонъёс. Нуназе котырын вань егитъёс юа бичаллям, отын ик сиён пӧзьтӥллям. Нош ӝыт пал вань гуртъёсысь егитъёс бусы сюан адӟыны лыкто вылэм ини. Бусы сюан кутске шунды пуксем бере гуртлэн уллапалаз, бусы дорын. Сюанчиос нырысь шудыса эшъёссэс возьмало. Ваньзы вуэм бере, ӝыны круг кылдытыса, ымнырынызы лымшор пала берытско но кунулскыса кырӟаны кутско: Осто гинэ, Инмаре, Быдӟым Инмаре. Сизьымдон но дышмонэз Пыд уламы лёгалом, Вылӥсь гинэ Инмармес Йыр йыламы ӝутомы. Таӵе кылъёс сюан но вӧсь нерге кырӟанъёсын но пумиськыло. Та кылъёс, рефрен луыса, вань праздниклы кутскон сёто. Озьы вашкалаос Быдӟым Инмарез, со ю-нянь будэтыны, утялтыны мед юрттоз шуыса, сӥлы кариллям. Кырӟаны кутскыку, кытысь ке чокморъёс вуо. Соослэн ымныръёссы ватэмын, берыктэм шубаосын, бадӟым шароваръёсын дӥсяськемын. Киязы бодызы вань. Соос сюанчиос азьтӥ олокызьы но маскаръяськыса тэтчало, учкись калыкез серекъято. Учкисьёс ӵем дыръя чокморъёсты исаса ветло, пушнерен но йӧттыло. Сюанчиос куинь корка воштыны кулэ. Одӥг вамыш лэсьто но выль корка пырем кадь шулдыръяськыны кутско. Котькуд коркась эктыса но тау карыса кошко. Куинь пол интызэс воштэмзы бере сюанчиос шурлы пумит урам кузя выллань кырӟаса тубо. Урам кузя тубыкузы, сюанчиосты куно карисьёс но луо. Вашкалаос шуозы вылэм: бусы сюанчиосты куно карид ке, коркад шудбур но тазалык каръяськоз. Соин ик кинлэн маиз вань: вӧен нянен, чечыен нянен, пӧраськемен, мусурен, ческыт аракыен одно ик куно карылыса лэзьяллязы. Сюанчиос куно карыны потӥсь адямиез адӟо ке, дугдо но солы ӟеч кылъёс вераса кельто вал. Сюанэз учкисьёс сюанчиос бӧрсьы тубо ини. Егит пиос чебер нылъёсты синйылтылӥзы. Озьы урам кузя тубо но бусы доры дугдо. Татын нош ик гурт калыклы Инмарлэсь азинлык куро, кизем ю-няньлэн шепъёсыз курег пуз быдӟаесь, пе, мед луозы. Кутсконаз сямен ик, куинь корка вошто, корка кузёлы бадӟым тау каро. Собере исаськонъёс кутско. Кылсярысь: Ой, йӧно ик, йӧно ик ук Милям Патан Нинамы, Татчы лыктыны со возьдаське, Кырӟась Сеняен ветлыны уг возьдаськы. Исаськемзы-марамзы бере эшъёссылы вазисько на, соос вожзэс медаз вае шуыса. Озьы йылпумъяське бусы сюан. Чокморъёс, берпуметӥ такмак кырӟакузы, ымнырысьтызы кышетъёссэс кушто но вань калыкен ӵош шулдыръяськыны кутско. Егитъёслэн шулдыръяськонзы бусы дурын кема чузъяське на. Мон малпасько, та праздникын чик ӧвӧл кулэтэм интыосыз. Вашкалаосмы асьсэ шулдыръяськоназы туж быгатыса пыртӥллям кизем ю-нянез дунъян мылкыдзэс. Одӥг ласянь, со - шулдыръяськон, нош мукет ласянь - няньлэсь данзэ ӝутон. Мон данъяськисько, асьме удмурт калыкмы няньлы сыӵе бадӟым саклык висъя. Бусы сюан йылпумъяськем бере пересь анайёс но атайёс ӝук пӧзьтыса вӧсясько. Быдӟым Инмарлы вазисько. Будӥсь егитъёс анай-атайёссэс воштӥсьёс мед луозы шуыса, гурт калыклы тазалык куро. Тани учке ай, кыӵе кылъёс пыртӥллям соос куриськоназы: "Осто, Инмаре! Осто, вылӥсь мусо Бадӟым Инмаре, Инэ-вуэ! Юмес удалтыны курыса, нянен йыбырттӥсько! Ваньмыз кизем ю-няньмы юн выжыё мед луоз, бадьпу кадь мед пушъёз, сёр но потонтэм тыгыз, дас кык езо, камыш куроё, борддор кадь мед будоз, курег пуз быдӟа зарни тысё мед шепаськоз, узы сяин мед кисьмалоз, боры сяин мед ӝомӟоз. Удалтэм няньмы кеносэ тэрымтэен, выль кеносъёс мед пуктоно луоз. Со сиыны но, вузаны но мед тырмоз. Бусыосмы куро кабанъёсын тулляськемын мед луозы. Ӵыжтэм вӧй кадь шуныт зоръёстэ, лумыт тӧлъёстэ сёт, Бадӟым Инмаре. Сильтӧллэсь, тылпулэсь, секыт аръёслэсь уть, Инмаре! Дэлеттэ, берекеттэ сёт, Инмаре! Пудо- животмы тыр мед йылоз, ыжъёсмы куинен пи мед ваёзы, скалъёсмы кошкись шур мында йӧл мед сётозы. Вань удмурт калыкелы ӟечлыктэ, ваньбурдэ сёт, ӟудытэк улондэ вай, Инмаре! Эль вылэ удмуртъёслэн ӟеч данзы мед вӧлмоз! Шаермес тӥрен-пуртэн, пыӵал тӥрлыкен ожмаськонлэсь уть. Гуртэ пырись через-чурез, тузонэз сяин, лысвуэз сяин, кыдёке, нюлэс сьӧры, пазьгыса лэзь. "Сиё-юо!" шуисьёслэсь азвесь кенерен котырты милемыз. Удмурт калыке инмысь кизили мында мед луоз. Нылпиосмы коркаосамы тэронтэм мед вордскозы. Шуддэ-бурдэ, азинлыктэ, тазалыктэ, йӧнолыктэ, сабырлыктэ сёт будӥсь нылпиослы. Соос мед кылзӥськозы анай-атайёссылэсь, сӥлы мед карозы пересьёсыз, мед утёзы удмуртлыкмес! Мусо ӟабыльтӥсь нылпиос удмурт кылынызы, кырӟанъёсынызы мед шулдыртозы коркамес, азбаръёсмес, урамъёсмес, гуртъёсмес, каръёсменс! Тушмонлэсь-ишанлэсь уть-ворды соосыз! Ноку медаз адӟе соос ултӥямез! Бадӟым Инмаре! Удмурт калыке медаз ышты шырыт но лякыт сямзэ! Медаз чигы солэн чиданэз! Жадёнэз тодытэк, шумпотыса мед ужалоз, куськем (кутскем) удыссэ пумозяз мед вуттоз. Бадӟым Инмаре, Салья калыклы эрик но тазалык сёт! Татысь адямиос куспазы тупаса, ог-огзылы юрттыса, кырӟаса-вераса мед улозы! Эн вунэты монэ но, Бадӟым Инмаре! Инэ-вуэ, Воршудэ, югыт тӧдьы Кылчинэ, лёгиськоно пыд улме ӵошкыт кар, уть ӵендэмелэсь (ӵемтэмелэсь), тазалыкен амало ужаны, каньылэн улыны юртты. Адямиосын ӟеч кылын вераськыны визьдэ сёт. Родняе но семьяе, огкылысь кариськыса, ванё-буро мед улозы. Осто, вылысь мусо Бадӟым Инмаре, Инэ-вуэ! Вӧсяськемме кабыл басьты, мае кури, ваньзэ сёт. Осто, Инмаре!" Бусы сюан дыръя кырӟано такмакъёс Осто гинэ, Инмаре но, Быдӟым Инмаре. Куинь бусые пазьгем няньмы Ньыль бусые мед пушъёз. Ой, возьма, дыр, возьма, дыр, ук Ваннапал ю-нянь бусымы. Капкаоссэ усьтыса, Ю-нянь, ю-тысь будыку. Ойдолэ но мыныломе Талэсь гинэ бай азе. Ум быдтэлэ, ум быдтэлэ Одӥг байлэсь данъёссэ. Учкиськоды ке, учкелэ Ӟеч гинэ синмыныды. Кин ке урод малпаса учке, Синмаз кыйсинь мед потоз. Ой, возьма, дыр, возьма, дыр, ук Первой гинэ коркамы. Отчы гинэ воштӥськытэк Амалъёсмы, ой, ӧвӧл. (Арганчиос шудо "Поръяса-поръяса" эктонэз) Ой, таулэ, таулэ, Та куанылэм интыосмы. Ойдолэ но мыныломе Талэсь шулдыр интые. Ой, возьма, дыр, возьма, дыр, Кыкетӥ корка интымы. Отчы гинэ мынылытэк Милям амалмы ӧвӧл. (Арганчиос шудо "Пурга гурез") Ой, возьма, дыр, возьма, дыр, Милям Саня апаймы. Азьвыламы вӧен-нянен, Подвал гинэ винаен. Ой, возьма, дыр, возьма, дыр, Милям Маня апаймы. Азьвыламы пӧраськемен, Кабак гинэ винаен. Ой, возьма, дыр, возьма, дыр, Милям Еня апаймы. Подвор гинэ капкаоссэ Али гинэ усьтыса. Ой, возьма, дыр, возьма, дыр, Милям ӟег но бусымы. Тулкымъяськыса, веттаськыса, Сяськаоссэ сюреласа. Вай кырӟалом, ой, эшъёсы, Вай вералом, эшъёсы, Кема ум улэ - люкиськом Турлы-турлы интые. Салья дано, Салья дано, Салья маин но дано? Италмас кадь пиосын но, Мак ссяька кадь нылъёсын. Тӥлесьтыд но та ӟечъёстэс Тодылыса, туганэ, Кемалась но кемалась ук Возьмалляса ми улӥм. Шиш тӥледлы кедра мульы, Кӧмзэ музысь бичалэ. Шиш тӥледлы Салья нылъёс, Асьтэ гуртысь утчалэ. Отӥ но ӟичы пытьы но, Татӥ но ӟичы пытьы. Та Салья но, ой, пиосмы Ваньзы пу пилён нушы. Отӥ лыкто машинаос, Фараоссы чиляса. Татӥ лыкто Салья пиос, Нырулъёссы чиляса. Сьӧд кышетэ бер пужыё, Бер пужыез - мак сяська. Та Салья но, ой, пиослэн Кисыосазы буктылка. Али гинэ вал ук, али Бусы дурын лыз сяська. Али гинэ вал ук, али Дас кык арес дыръёсы. Тӧлӟысал ке льӧмпу сяська, Тӧлӟемъёсыз потыса, Ӧй усьысал, ӧй усьысал Бергаса но бергаса. Даур меда та дауре, Сяська меда дауре? Даур ке но ортче, дыр, но, Сяська ке но, тӧлӟе, дыр. Яратӥсько канаваысь Лыз сяськаез бичаны. Яратӥсько лыз синмозэ, Уг лу ни вунэтэме. Та Салья но, ой, пиосыз Эгыр мешок карысал. Эгыр мешок карысал но Куатыр-куатыр лёгасал. Та Салья но, ой, нылъёсыз Зарни зундэс карысал. Зарни зундэс карысал но Шор чиньыям нуллысал. Чечыез ми ум сииське, Чечытэк ум улӥське. Пиосын ми ум улӥське, Тугантэк ум улӥське. Улмо садэ пырем бере, Чидалод-а сиытэк? Яратонлэсь люкиськыку Чидалод-а бӧрдытэк? Пужым ачиз чебер ӧвӧл, Пужымлэн пиез чебер. Мон ачим чебер ӧвӧл но, Мынам эшъёсы чебер. Шунды ӝужа шунытлы но, Толэзь ӝужа югытлы. Ми вордӥським дунне вылэ Ӵошен валче улыны. Шорады ке учкылӥсько, Чебердылы паймисько. Люкиськонме малпасько ке, Чиге пинал сюлэмы. Возь вылэ ке тӥ потӥды, Сяськатэк эн бертэлэ. Ми пала ке тӥ вуиды, Пыратэк эн кошкелэ. (Арганчиос шудо "Алнаш гурез") Ой, возьма, дыр, возьма, дыр, Кыкетӥ корка интымы. Отчы гинэ воштӥськытэк Амалъёсмы, ой, ӧвӧл. (Арганчиос шудо "Переходной" эктонэз) Ой, таулэ, таулэ, Та куанылэм интыосмы. Ойдолэ но мыныломе Талэсь шулдыр интые. Ой, возьма, дыр, возьма, дыр, Куиньметӥ корка интымы. Отчы гинэ воштӥськытэк Амалъёсмы, ой, ӧвӧл. (Арганчиос шудо "Аксакшур гурез") Ой, йӧно ик, йӧно ик ук Милям Идок Галямы. Татчы лыктыны со возьдаське, Ерок Гиршаен ветлыны уг возьдаськы. Ой, йӧно ик, йӧно ик ук Милям Патан Нинамы. Татчы лыктыны со возьдаське, Кырӟась Сеняен ветлыны уг возьдаськы. Ой, йӧно ик, йӧно ик ук Милям Богдан Валямы. Татчы лыктыны со возьдаське, Юрмалай пиосын ветлыны уг возьдаськы. Ой, эшъёсы, эшъёсы но, Вожъёстэс эн ваелэ. Тӥ ке татчы потысалды, Ми тӥледыз ӧм исасалмы. Осто гинэ, Инмаре но, Быдӟым гинэ Инмаре. Музъеме пазьгем ю тысед Ӟечкын гинэ мед кисьмалоз. Осто гинэ, Инмаре но, Вылӥсь гинэ Инмаре. Пазьгылэм ю тысьмы вылэ Шуныт зоръёстэ но сёт. Осто гинэ, Инмаре но, Вылӥсь гинэ Инмаре. Удалтэм ю тысьёсмы но Ву тулкым кадь мед тулкымъяськоз. Осто гинэ, Инмаре но, Быдӟым гинэ Инмаре. Кизем ю-нянь бусыосмы Азвесь шапыкен мед шобырскозы. Куанон быриз, куанон быриз, Куанон ваньмыз ик быриз. Шудон быриз, шудон быриз, Шудон ваньмыз ик быриз. Дасяз Семён Вахитов, Вуж Салья гурт Кияса ёрос. 9519 Вашкала удмурт куриськон Удмуртъёсты черкын пылатӥзы, чукынытӥзы ке но, соос асьсэлэсь вашкала осконзэс, ымысь ыме, пельысь пеле вераса вӧсяськон, куриськон кылъёссэс палэнэ ӧз каре, кулэтэм шуыса ӧз куштэ. Асьме вӧсяськон, куриськон кылъёсты - языческой чирдон макеосты - кылемаз дауре мыло-кыдо люказы но соосъя бусьтыр-бусьтыр ужъёс кылдытӥзы Б. Мункачи (1887), Ю. Вихманн (1893), Г. Верещагин (1886, 1889), Н. Первухин (1888-1889), И. Васильев (1906) но мукетъёсыз. Отчы пыртэм текстъёс соку "улэпесь" вал на, верась муртъёс соослэн кужымзылы зэмзэ ик оскизы на. Такем улэпъёссэ, чарс-чарс, вож-вож модосо-куарооссэ куриськонъёсты али сокем трос уд шедьты ни. Соин ик соос пӧлысь одӥгзэ, Б. Мункачилэсь 1887 арын Будапештын печатламзэ, тодэ вайытэме потэ. Таӵе вылэм со вашкала удмурт куриськон кыл: "Остэ, Инмаре, Воршудэ, быдӟым мудоре, Кылчин-Инмаре, виль шыдэныд-няненыд тонэ буре ваисько! Тырез-бусэз аслыд мед луоз, сыркез-югез будӟым эксэйлы вытсэ сётыны мед кылёз! Будӟым эксэй ӟеч мед улоз, вузме вузаса сётэм вытме чаль мед берыктоз! Кизем юме-няньме, узыдэ-борыдэ сеэн, кисьматы-муляты! Куамын ке выжыё кар, сюрс ке тысё кар, азвесь ке шепо кар, зарни ке тысё кар! Шуныт зордэ ачид сёт, лумыт тӧлдэ ачид сёт, ӟеч ардэ ачид сёт! Уй ке дауэдлэсь ачид уть, сӥль ке дауэдлэсь ачид уть, намер ке пильмыдлэсь ачид уть! Итыме пыртон дыръя, дас кык эр вылэ кабан сюрмон кар; валласянь понса, улласянь пуньыр потмон кар, вылласянь пачыл потмон кар! Кутэсэн шуккон дыръяз, тысен-муэн мытмон кар! Кенос кож пушказ сюлыс басьтыса, сюлыс выжтымтэ вылэ кар, пуж басьтыса, пуж выжтымтэ вылэ кар! Пӧйшур доры мыныкы, пуныме узатон дыръяз, пыдын ӵабтон, нырзэ сузён вылэ вутты! Тэлэ мыныкы, узыр ямъё силёе мыныкы, чаркме-налькме туг быжо вылэ вутты! Ныро пыженыд ваем сеэн сёт, Инмаре! Ӟечтэ сёт, шунды ӝужантӥозь нимаса-данаса, шунды пуксёнтӥозь кылӥсьлы кылымон, адӟисьлы адӟымон кар! Вылӥзэ лобыса лыктэм кыльлэсь улӥзэ бусые пырем кыльлэсь, муръё тушмонлэсь ачид уть; янгыш пыдлэсь, гижыё гижъяськемлэсь, вайыжо вайыжаськемлэсь ачид уть, Инмаре! Куамын ке пасьта азбар кутымон кар, сипуж ӝужда кыедо улмон кар! Азбарад сётэм нылыдлы-пиедлы, зоро пӧськыед сеэн, ӟибыль-ӟабыль карыса улны- вылны ӟеч шуддэ-бурдэ сёт! Тупала сизьым ныло-пиё кар, тапала укмыс басьтэм кено-менё кар! Вазь адкем кузэн-палэн ачид уть, вазь вордкем нылын-пиен ачид уть. Остэ, Инмаре, валдэ урдэс ке чуньыен сёт, пыдыз юрго вылэ вутты, нырыз сюмьё вылэ вутты! Искалдэ урдэс ке куняно вылэ вутты, кыскыны йӧло-вӧё вылэ вутты, ӵышкыкы гоно-туро вылэ вутты! Жагдорме чипыен-куреген сёт! Ву вылме ӵӧжен-ӟазеген сёт! Талэсь бадӟым уг тодкы вӧсяны, ачид кельывайы, Инмаре!" 2260 Дасяз В. Владыкин КИН КИЫН Вань шудӥсьёс круге султо. Арганчи эктон гур шудэ. Одӥг муртлы кыӵе ке пичигес арбери сёто. Шунды бергамъя, со арбери киысь кие кругетӥ азьлань мынэ. Араганчи шудэмысь шуак дугдэм бере, кин кие арбери кыле, со маке но карыны кулэ: эктыны, кырӟаны, кылбур-верос мадьыны но мукет. КРЕНДЕЛЬ СИЁН Та шудонээз шудыны котькуд командаысь быдэн одӥг мурт потэ. Соослы кузь боды сёто. Со боды борды сӥньыс керттылэмын, нош пумаз крендель думемын. Сигнал сётэмъя, командаысь адямиос, киоссэс берлань карыса, со кренделез сиыны кулэ. Кин котькинлэсь азьло кренделез сие, со ик ворме. ПУМИСЬКОН Командаысь быдэн одӥг адями потэ. Соос ваче лыкто. Ӟечбуръясько. Ог-огзылэсь кизэс кырмо, нимзэс верало. Собере ваче тыбыр султо. Нырысь огезлэсь, собере мукетызлэсь юало: "Кыӵе вал солэн дэремез, синъёсыз, туфлиез, галстукез?" Но трос мукет юанъёс. Кин ваньзэ тодэ, со ик вормисе потэ. КРУГЫСЬ ДОНГЫСА ПОТТОН Нырысь круг лэсьтоно. Со круг пушкы кык кузя шудӥсьёс пото. Пал пыд йылазы кариськыса, соос ог-огзэс донганы кулэ. Кин эшсэ, гож сьӧры донгыса, азьвылгес поттоз, со ик вормись луоз. ЛЕНТА ТЫРЫСА Шудӥсьёс лыдъяськыса лента тырись но горд ош быръё. Лента тырись вань шудӥсьёслы лента тыре (горд, вож, лыз, ӵуж, сьӧд, курень...). Лента тырем бере горд ош пыре но йыгаське: "Тук-тук-тук!" Ваньзы юало: "Кин тон?" Горд ош: "Мон - горд ош". Ваньзы: "Мар кулэ?" Горд ош: "Лента". Ваньзы: "Кыӵеез?" Горд ош (ленталэсь кыӵезэ выера): "Лыз. Кӧняен?" Лента тырись: "Сизьым манетэн". Горд ош сизьым пол чабе. Со вакытэ "лыз лента" бызьыса кошке. Горд ош сое кутыны кулэ. Вань "лентаосты" кутылэм бере шудон йылпумъяське. Семён Вахитов. Кияса ёрос, Вуж Салья гурт 1408 БЫЗЁН-БАСЬТОН Бызён-кышнояськон туж юн чакласькемез но кема дасяськемез кулэ каре вал азьло. Выль кен-а со, эмеспи-а - выжыоссэ тодыны тыршо вал: кыӵе муртлэн пиез-нылыз, кыӵе семьяысь, ужамзэ но чаклало вал. Нылын-пиен ог-огзылы туж синмасько, кельшо ке но, лушкем ветло вал. Кен ваем беразы солэсь нырысь ик выж ӵужемзэ учко вал. Корказь ӵужемзэ но чаклало вал: кызьы со ӵужоз корказь котырзэ гужем яке толалтэ. Кензы, ӵукна потыса, азбарез, корказь котырез чылкытатыса пырыны кулэ. Кытчы кензы пож вузэ кисьтоз, кытчы жагзэ куштоз - ваньзэ чаклало вал. Кенлэн нимыз Анна ке, Анна нимо муртэ бабушед азьын вераны уг яра. Нош атайзы Иван ке, Иван нимо муртэ семья пушкын озьы ик вераны уг яра вал. Семьяын атайзы вань ке, кенлы гольык йыр но, гольык пыд но ветлыны уг яра - медаз адӟы атайзы. Тае чакламтэ муртэ самой возьыттэм, возьытэз бырем адями шуозы вал. Куатаськыны уг яра: "ваче кобы жин! шуиз ке, со кышнопалан ик мед быроз" шуо вал. Кен муртэ визьмалозы вал: семья кусып аляк медаз луы, керетӥд ке но, капка, забор сьӧры даллашемед медаз поты. Ӝӧк сьӧрын ваньмыз ӵош сиськоно. Озьы ик учко вал кензылэсь черсыны, куиськыны, кутэсэн кутсаськыны, араны, дэрем вурыны, етӥн сэстыны быгатэмзэ. Араны но кутсаськын ӧд ке быгаты, соку тон сиытэк но кулод; нош черсэмед-куиськемед, вуриськемед, керттӥськемед ӧз ке луы - гольык ветлод. Улон сыӵе вал. Елена Камашева. Завьялово черкогурт. 1174 НУНЫ СЮАН Выль кен пинал вае ке, туж шумпотозы вал. Та нуналлы сӥзьыса, туж ческыт бискыли пыжо вал, сое одно ик вӧйын но курег пузэн лайыса. Кашае ӵыжы-выжыос, бӧлякъёс ветло. Сьӧразы, выль кенэз утялтыны шуыса, асьсэ пӧзьтэм виназэс, пыжиськем- пӧраськемзэс ваё. Удмурт-а, ӟуч-а, бигер-а калык, котькудӥзлэн пӧлаз вань, дыр, адямиез сӧрон, висись карыса кельтон яке воксё виён-быдтон амалъёсты тодӥсьёс. Тӥни сыӵе адямиос одно лыктыны тыршо вал нуны ваем нылкышно доры. Таослэсь кызьы ке но утиськыны тыршо вал, нунызэс но веднамлэсь чаклало вал. Нош нуны сюан туж шулдыр. Кырӟаса, такмакъёс вераса, гур ворсанэн шуккыса эктозы. Алякъясько но вал. Туж сак улоно вал штаниез куашкатэмзылэсь. Гур ворсанэн крезь шудӥсез сиктанэн гинэ конгыртозы вал. Е. Камашева. Завьялово черкогурт. 658 КОРКА ТУЙ Вашкала сямъёсъя корка туйлы (пыронлы) монэ картэлэн мумиз дышетӥз. Со йылолэз чакласа ик, пиме но выль юртэ поттӥ. Выль коркалэн муръёез лэсьтэмын ни ке, сое няньтэк возьыны уг яра. Выль корка нырысь ик коӵышез пыртоно. Со умоен пыре ке, семья та коркан шудо луоз, нош ӟеч улыны кылдэмын ӧл ке, потыса кошке. Собере выль коркае ӝӧк потто. Анай мурт тӧдьы ӝӧккышет вӧлдэ, ӝӧк вылэ вӧй но нянь сукыри понэ, собере семьяоссэ таӵе кылъёсын благословить каре: "Ноку но сием потонэз медад адӟе, нянё, ныло-пиё мед луоз коркады". Семьяослэсь лыктэмзэс возьмаса, та коркан кирос анаен кирос атай кӧло. Анай мурт коркакузёлы (домовойлы) сӥзьыса, выль юртлэн корказь ӧс вылаз шорем вӧйын нянь понэ. Уйшор бере (ӵукна калык султэмлэсь азьло), урод синъёс медам адӟе шуыса, анай вань семьязэ кияз обросэн вуж коркась выляз поттэ. Котькудӥзлэн кияз мар ке но тӥрлык луыны кулэ, буш потыны уг яра: кин пукон, кин тусьты-пуньы, кин книга кутэ. Анай бӧрсязы потэ. Ӧсэз пась кельтэ но коркакузёзэс сьӧразы ӧте: "Ойдо, табере выль коркад потӥськод, семьядэ ӟеч ворды, таза но шудо кар, пудолэн азинэз мед луоз". Атай мурт котэм табанен нянь шумес поттэ. Озьы пыро ини выль корка. Кирос анаен- атай пырисьёсыз вӧйын нянен пумитало, шуд, кузь арлыд, ӟеч тазалык сӥзьыса, ваньзэс вӧйын няньзэс сюдо. Анай мурт, йыр котыртӥзы обросэн шундылы нялтас котыръяса, котькудзэс благословить каре. Кенэзлы но пиезлы "ас нылпидэс асьтэос мед будэтоды, ӟечсэс мед адӟоды" шуэ. Нылпиоссылы та выль коркан шудбур, тазалык, шудо улон но ӟеч дышетскон сӥзе. Вӧйын нянь сиемзы бере ваньзы изьыны выдо. Анай чакланы косэ: кин мар вӧталоз. Со уйвӧт, пе, ваньзэ азьланьзэ валэктоз. Ӵукна султыса юа ини. Вӧтъёссэс ас сяменыз валэктэ. Собере иськавын-бӧлякъёссэс, матысь тодмооссэс зыретэн табань сиыны ӧтё. Выль гурын табань анайзы пыже. Нырысетӥ пыжем табаеньзэ ӝӧк пуме пуктэ, кулэмъёсыз буре вайыса но азинлык курыса. 1599 Е. Камашева 1 Чуӟсаськыса - чузырет лэсьтыса; чузырет - йырси пунэт интые пель доры быгыльтыса тупатэм йырси, нуллӥзы пересь кышноос гинэ. 1 Нунылы ним сётон йылоллэн радлыкез Нунылы ним сётонэз пусъён яке вордскем сярысь свидетельство гожтон нуналэ та йылолэз ортчытонэ анай-атаен ӵош лыкто песянаен песятай, ӵужанаен ӵужатай, ӧтем куноос но матысь эшъёссы. Соосты йылолэз ортчытӥсь мурт пумита. Каллен гинэ чузъяське лэймыт гур. Йылолэз ортчытӥсь мурт анайлэсь-атайлэсь дасям кагазъёссэс эскере: шонер-а гожъямын. Собере ваньзэс залэ пырыны ӧте. Залэз та учырлы тупамон суредъёсын, гожтэмъёсын, индылонъёсын чебермано. Борддоръёсы пужыятэм ӵушконъёс ошылоно. Кылсярысь, таӵе визькылъёс гожтыны луоз: 1. Нылпитэк кышно-картъёс - сиротаос. 2. Корка нылпиен шулдыр. 3. Азбар пудоен чебер, корка - нылпиен. 4. Ӟеч адямиослэн син шоразы адскымон мед будоз нуныды! 5. Анай-атайлэн ӟеч кылыз вуын но уг выйы, тылын но уг ӝуа... Йылолэз ортчытӥсь. Гажано эшъёс, куноос, ваньдэс ӧтисько залэ. Кырӟан гур чузъяськемъя ваньзы выж лёгет-ковер вылтӥ залэ пыро. Азьпалазы - анаен атай, пичи нуны атайлэн ки вылаз. Соос бӧрсьы киросанай но киросатай, ӵыжы-выжыос, куноос но эшъёссы вамышто. Анаен атай но киросанаен киросатай свидетельство гожтон ӝӧклы матэ карисько но кыкнапалаз султо. Кырӟан гур чалме. Йылолэз ортчытӥсьлэн юрттӥсез кутскон кылъёс вера. Юрттӥсь. Гажано эшъёс! Туннэ (анай-атайлэсь нимзэс вера: кылсярысь, Елена Геннадьевна но Александр Алексеевич Корепановъёслэн) семьяязы бадӟым шумпотон: дунне вылэ выль адями вордӥськиз! Асьмеос люкаським пичи пилы (ныллы) ним сётыны, улонэ вамыштон сюресаз шуныт кылъёс вераны, мумы-бубыоссэ ӟечкыланы, соосын ӵош шумпотыны. 1-ез лыдӟись. Батыр адӟиське кышномурт Эркын шонскыса ке турна. Бадяр кадь веськрес кышномурт, Куке пельпумаз ву карнан. Шудо со - уно пол адӟим - Гажась мурт сяська кузьмаку. Ӝужась горд шунды кадь бадӟым, Нуны мусторзэ ноныку. (В. Ванюшев) 2-ез лыдӟись. Вордске ке адями дунне вылэ, Шуныт кылъёс солы одно кулэ, Сотэк уз вазьы со: "Мусо нэнэ!" Сотэк уз шедьты сюрессэ но улонэ. Шуныт кылъёс - со зарнилэсь дуно, Яркыт тылын уг мальдыто ке но. (Т. Чернова) Юрттӥсьмурт йылол ортчытӥсьлы аслыз кыл сётэ. Юрттӥсь. Туннэ ним сётон йылолэз ортчытоз (йылолэз ортчытӥсьлэсь нимзэ, кин луыса но кытын ужамзэ вера). Пыре йылолэз ортчытӥсь мурт. Йылолэз ортчытӥсь. Шумпотӥськом тӥляд татчы лыктэмдылы. Гажано (Елена Геннадьевна но Александр Алексеевич), гажано куноос, эшъёс! Вашкалаос шуиллям: "Зарниен но азвесен мар-о бен карод? Со интые вордэм нылпиед мед луоз". Даур бере даур воштӥське, нылпиос ванен улон но азьланьтӥське. Яратыса, визьмо но небыт кылын, ӟеч уж бордын будэтэм пиналъёс улонамы шумпотон но шудбур ваё, ужамы кивоштӥсьёс луо, вань улон-вылонэз умоято. Будэтэ пичи пидэс! Со бадӟым улонэ шонер вамышъёс мед лэсьтоз, калыклэсь улонзэ умоятонэ кужымзэ мед сётоз, пичизэ но, бадӟымзэ но ужзэ сюлэмзэ сётыса мед лэсьтоз. Пыӵатэ солы ас шаерзэ, ас калыксэ яратон мылкыд, мукет калыкъёсын тупаса, ог-огдэ гажаса улыны быгатонлык. Юрттэ пидылы удмурт калыклэсь ӟеч сямъёссэ, ужъёссэ, визьнодзэ тодыны-валаны, дышетэ сое анай-атай кылзэ гажаны. Будэм бераз удмурт калыкысь потэмын шуыса данъяськыны мед быгатоз. Пидылэн вордӥськемез но солы ним сётон сярысь кагаз (акт) вылэ кинюртэмдэс (подписьтэс) пуктэлэ. Атай нунызэ киросанайлы сётэ. Собере соос кыксы но - анаен атай - кагаз вылэ гожтӥсько. Актэ гожӥськыкузы, "Пиё, пиё коркае" кырӟан чузъяське (яке магнитофон пыр, яке фольклор ансамбле ветлӥсьёс кырӟало). Йылолэз ортчытӥсь. Гажано (Елена Геннадьевна но Александр Алексеевич), тӥледын ӵош туннэ шумпото матысь эшъёсты - пидылы киросанай но киросатай луыны мылкыд каремъёс. Вералэ соослэсь нимъёссэс. (Анай нимтулзэс вера). Йылолэз ортчытӥсь. Гажано (Ирина Николаевна но Владимир Петрович), та дырысен тӥ (Корепановъёслэн) пизылы киросанай но киросатай луиськоды. Эн жалялэ солы сюлэм шуныттэс, юрттэ анай-атайлы пичи нунызэс пыд йылаз султытыны, чебер сямъёс пыӵатыны, улонын шонер сюресъёс шедьтыны. Секыт югдуръёсы юрттэ кутэм (возем) пидылы визьмо кылын-кенешен, ӟеч ужен. Гожтӥське кутэм (возем) пидылэн вордскемез сярысь бумага (акт) вылэ. Киросанай нунызэс бубизлы сётэ, собере киросанай но киросатай акт улэ гожтӥсько. Чузъяське кырӟан ("Пиё, пиё коркае" ик). Йылолэз ортчытӥсь. Удмурт Элькунлэн актэзъя (Елена Геннадьевна но Александр Алексеевич Корепановъёслэн пизы, кудӥз вордӥськиз 14 инвожое (июне) 2000 аре Дэбес черкогуртын), та дырысен (Женя, Корепанов Евгений Александрович) ним нуллоз но Удмурт Элькунлэн но Россилэн гражданинзы луоз. Чузъяське Россилэн кункрезез (гимнэз). Ваньзы султыса кылзо. Залын анай-атайлэн ужан интыысьтыз ӧтем эшъёссы вань ке, пӧлысьтызы одӥгез, мумы-бубы доры лыктыса, нунылэн шобрет вылаз синпель кизили понэ (памятной знак), собере интыяз мынэ. Мукетыз ӧтем эшсы, мумы-бубыос вӧзы султыса, синпель гожтэт (памятной адрес) лыдӟе но, сое киязы сётыса, интыяз мынэ. Синпель гожтэтэ таӵе визьмо кылъёсты пыртыны луоз: 1. Вордскем пиналды сӥлы-данлы медло! 2. Ӟеч адямиослэн син шоразы адскымон медло! 3. Кема улоно, пачыл шудбуро но лэчыт визьмо мед луоз! 4. Чакламтэ нылпиос, кортнамтэ вал кадь ик, эрказ луо. 5. Кузяз ветлыса будэтэм пиналлэн сямыз ваменэс луэ. 6. Ческытлы дышем пинал пиньтэм кыле. 7. Утялтымтэ нылпи ӟызы будэ. 8. Музъем яратэ кыедэз, пинал нуны - вешамез. 9. Мултэс ушъян - сӧрон гинэ. Йылолэз ортчытӥсь (нуныез кияз кутыса). Буд, пичи пияш, калыклы ӟеч ужъёс лэсьтыны, мумы-бубыосыдлы шумпотон вайыны мед быгатод! Юрттӥсь йылолэз ортчытӥсьлы нунылэн вордскемез сярысь свидетельствоез сётэ, соиз та документэз анайлы сётэ. Йылолэз ортчытӥсь. Гажано (Елена Геннадьевна но Александр Алексеевич), ӟечкыласько тӥледыз пиеныды. Ассэ сюдӥсь-вордӥсь, тӥледлы юрттӥсь мед луоз, ушъямон-верамон адями мед пӧрмоз. Кызьы калыкын шуо: кыдёкысен верамон, матысен вожъяськымон! Яратэ ог-огдэс, пиналды тӥлесьтыд мед дышетскоз яратыны но, ужаны но, улыны но. Чузъяське "Та коркалэн шулдырез" кырӟан. Йылолэз ортчытӥсь. Та шумпотон нуналэ шуныт кылъёсмес вераськом тӥляд анай- атайёстылы но, табере песянай-песятайдылы но ӵужанай-ӵужатайлы, тау кариськом анай-атай сюлэмзылы. Мумы-бубыос анай-атайёссылы йыбыртто, нунызэс кудзылэн ке кияз сёто. Йылолэз ортчытӥсь. Гажано песянай-песятай но ӵужанай-ӵужатай! Калык шуэм: адями, пе, улытозяз корка пуктыны но писпу мерттыны кулэ. Но адямилэн улонэз эшшо но тырмытгес луэ, куке со дунне вылэ выль улон кузьма но сое зэмос кивоштӥсь будэтэ. Иське, таиз но нуны будоз, корка пуктоз, писпу мерттоз, нылпи вордоз. Озьы улон азьланьтӥськоз. Бадӟым тау тӥледлы, тазалыко луэ, кема улэ. Визьмо верамъёсыныды, небыт кылыныды, шуныт киосыныды юрттэ нылпиостылы зарни бугорзэс будэтыны. Юрттӥсь. Вашкалаос пи нуныез бубизлэн дэремез вылэ куто вылэм, бубизлэсь ӟеч сямъёссэ мед басьтоз шуыса. Йылолэз ортчытӥсь анайлы бубы дэрем сётэ (ныллы анаезлэсь кофтазэ, азькышетсэ яке дэремзэ сёто). Анай со вылэ нунызэ кутэ. 1-ез лыдӟись (пилы сӥзён лыдӟе). Бубиз выллем визьмо медло, Бубиз кадь ик сюлмо медло, Бубиз кадь ик армиысь Ӧрӟи кадь мед бертоз берло! (Ныллы сизён): Ачид кадь ик чебер медло, Ачид кадь ик сюлмо медло, Ачид выллем ик, ӟеч картэн Нылпи со мед вордоз берло! Чузъяське "Та коркалэн шулдырез" кырӟан. Йылолэз ортчытӥсь. Шудбур но тазалык кема аръёслы! Гажано эшъёс, ӟечкылалэ анай- атаез! Куноос но эшъёс анай-атаез, ним басьтэм нуныез ӟечкылало, собере залысь пото (озьы ик: азьпалазы - нуныен анай-атай, бӧрсязы - куноос но эшъёс). Чузъяське кырӟан. Та выллем кылбуръёсты уже кутыны луоно. 1. Нылы, муспотонэ будэ, Будэ, юнма часлы быдэ. Сое таӵе ик шӧдӥсько, Воштӥськемзэ синйылтӥсько. Ӵыжыт бамы пумен бездоз, Шӧртчи сямы но зӥбломоз, Но чебере юнме уз ыш: Будӥсь нылы басьтоз аслыз. Со люкалоз бадӟым кужым Сое возьмась ӟырдыт ужын. Ваньзэ ӟечсэ та улонысь Тыршоз аслыз пыӵатыны. Али нош изь тон, дыдые, Ческыт уммен котькуд уе. Вӧтад медаз пыры пилем, Кышкыт ож аръёсы выллем. Шунды выллань, нунал азьлань... Тон буд, пичи нылы мынам. Вистэм-вожтэм нуналъёсысь Тон люка шуд пырыосыз. (Т. Чернова) 2. Макем шудо дунне вылын улон, Тонэ ке ярато! Тонэ ке ярато Мумы-бубыосыд, Юлтошъёсыд, Дышетӥсед, Гажано эшед... Но номырин но воштонтэм Соку луэ ни шудбуред, Куке тонэ бамад чупа Аслад мусо нуныкаед. (А. Кузнецова) Дасяз Галина НИКИТИНА. Нумыр сюан Вылен (Выль базарен, Ильин ннуалэн) туж юн герӟаськемын Брангуртлы матысь гуртыгн, Чутожмонын, ортчись Нумыр сюан. Выль базар ортчем бере, Чутожмон гурытсь воргоронъёс, кышномуртъёс, егитъёс но пиналъёс, озьы ик лыктэм куноос пото "Нумыр сюанэ". Воргоронъёс выль гын шляпаосын но кутъёсын, кышномуртъёс выль кышетъёсын, кутъёсын, егитъёс но пиналъёс выль дэремъёсын. Бакчаосазы ӝӧкъёс поттыса, пыжиськемъёс пуктыло, выль вуэм бакча сиёнъёс, асьсэ пӧзьтэм виназэс, сурзэс потто но ӧтчам калыкез утялто. Ӝӧк котыр султыса, киязы мак сяська но кубиста куар кутыса, сюан гурен кырӟало. Кӧняез ке ветло убоос вискытӥ, кубиста куар вылысь нумыръёсты кышкатыса. Та вакытэ кубиста куаръёс вылэ нумыръёс пото, кубистаез быдто. Соин ик чутожмонъёс та сюанэз кубиста нумырез быдтонлы, келянлы сӥзиллям. Озьы бакчаысь бакчае сюан гурен кырӟаса, нумыръёсты келяськом шуыса юмшало. Кырӟан гурез одно ик мыто воргоронъёс: Коркалэн, пе, шулдырез, Нэнэй-дядяй вань ӵоже. Азбарлэн, пе, шулдырез, Пиосъёс но вань дыръя. Кенослэн, пе, шулдырез, Нылъёс вань дыръя. Возь выллэн но шулдырез, Выль кенак но вань ӵоже, Ульчалэн но шулдырез, Гырлыё вал вань дыръя. Бакчалэн но шулдырез, Мак сяська дыръя. Мусо, мусо кудое, Кочон кудое. Эшшо но мусо Кубиста туклячие. Кибыдэ но нумырдэ Ми сьӧрамы нуомы. Ӟечсэ ми бакчае кельтӥськом, Уродзэ сьӧрамы басьтӥськомы. Пичи но ывань, бадӟым но вань. Ваньды улляське ми сьӧры. Юонзэс быдтыку, кӧня ке нумыръёсты куар вылэ поныса, сюан гурен шур дуре мыно но шуре куштыса келяло. В. Байсаров, Бураново шор ёзо школаысь удмурт кылъя но литературая дышетӥсь. Гожтэмын Чутожмон гуртысь Кузнецова Мария Михайловналэн верамезъя. Вордӥськемын 1910 арын. Григорий Верещагин Пукон табань Пукон табань котькытын ӧвӧл; вань со кытын-кытын гинэ. Кинлэн со сярысь кылылэмез-адӟылэмез ӧвӧл - верало со сярысь. Пукон табань - нылъёслэн-пиослэн праздниксы. Сое лэсьто сӥзьыл бусы уж быдтэм бере; лэсьто кытын (ке) лымы усем бере но. Ма нунал луоз со пукон табань, кытысь люкаськозы нылъёс-пиос, со сярысь ивор сёто азьло: мед, пе, дасяськозы. Собере нош ик ӧтё. Ӧтё матысь гуртъёсысь, кытцы ачизэс но ветло. Азьло нуналаз дасяло табань пызь, вӧй, курез пуз, сӥль... Ма кулэ - котьма, ӝытазе табань кото; сур но пӧзьто. Ӵукна султыса, пӧраны кутско; пӧрало лумбыт - пыжо, пӧзьто; быдто ке пӧранзэс, кинэ ке тодӥсь кышномуртэз учкыны ӧтё: умой-а, пе, пӧрамы, возьытэ ум вуэ-а? Кышномурт дышетэ кызьы пӧраны, ма пӧраны. Вочак ке, ма кулэ, пӧрамын, ӝытазе куноосты ӧтьыны ысто, мед, пе, лыктозы пиос, нылъёс, нокин но, пе, медаз кыль. Пиос мед, пе, басьтозы сьӧразы шудон но, кинлэн ма шудонэз вань. Куноос люкасько мукет гуртъёсысь (куинь-а, ньыль-а гуртысь) ӝытазе, тыл ӝуатскыкы. Куноос ке вуо, сектало соосты азьло сурен. Ачизэс нылъёс дӥсясько чебер, мед, пе, пиослы синмаськомы. Пиос но лыкто чебер дӥсяськыса, мед, пе, нылъёслы синмаськомы. Сурен сектамзы бере нылъёс пукто ӝӧк вылэ котьма пӧртэм пӧрамзэс: перепеч, шаньги - котьма; татын вочаксэ ум вералэ: пыжем-пӧзьтэмзы, пӧрамзы луэ ӝӧк тыр, ӝӧк вылэ но уг тэр. Нылъёс ялан, ӝӧк дорын сылыса, кунооссэс сиыны косо, сие, сие, шуо. Кунооссы трос уг сиё. Соос шудыны лыктэмын но, шудон сярысь ик малпало но; кудӥз сиён борды йӧтскылэ гинэ. Азьло пыжо табань, сюдо табанен; табань но трос уг сиё, тросэз веръя гинэ. Пуко ӝӧк сьӧрын куноос чарак; собере ӝӧк сьӧрысь пото но, нылъёслы тау каро; нылъёс шуо: эн, пе, ӵушкалэ, пӧраны, пе, ум быгатске, ӧм дыше на. Куноос ӝӧк сьӧрысь потэм бере пуксё ӟус вылэ. Нылъёс ӝӧк вылысь пӧрам сиёнзэс окто. Кин ке ӧтем куно усто шудыны кутске; ӧтись нылъёс эктыны кутско. Экто удморт сямен усто, быгатыса; эктыны быгатӥсьтэмез отцы уг но лыкты, лыктэ ке быгатӥсьтэмез, уг экты. Эктэм бере ӧжытак шутэтскыса шудо бускелен. Кыкен-кыкен нылын-пиен пуксё артэ. Кудӥз ӧтись нылъёс пӧлын чырткемгес, чебергес, косэ пуксьыны артэ ӟус вылэ; вочаксы пуксем бере, пуксьыны косӥсь пумысен кутскыса, котькудзэ юа: тупаськод-а, пе, бускеленыд? Тупасько ке шуэ, юа мукетсэ. Кудӥз ныл-а, пи-а уг тупаськы ке шуиз, со нош ик юа, кинэн, пе, тупалод. - Кинэ кулэ? - Мыным кулэ Иван-а, Марья-а (нимзэ вера). Тупаса улӥськомы ке шуизы, мынэ азьпала; отын озьы ик юа. Созь юаса пумаз вуэ. Пи-а, ныл-а - ассэ ке юасез куре, со пуксе но, юась луэ соиз, кудзэ воштэ, кудӥз шуоз, мон, пе, нокинэн но уг тупаськы. Соку вочаке пукисьёс интызэс вошто но мукетъёсыныз кыкен-кыкен (нылын-пиен) карисько. Созь шудо бускелен кема. Пиос бускель куро яратоно нылъёсты, нылъёс - яратоно пиосты. Собере шудо зындэс ватэмен. Азьло нош ик ӧжытак экто. Табере шудонэн шудэ мукетыз быгатӥсь. Кудӥз пи быгатэ эктыны, со эктэ. Кин жаде эктыны, со пуксе шутэтскыны. Шудо зындэс ватэмен, синтэм бубылиен (кудӥз шуэ чималиен). Мадьскон-а, маке кылбур-а пукон табаньын ӧвӧл. Отын шудон да эктон гинэ. Ватсаса веран Мадьсконэз пукон табаньын трос уг ярато. Ярато эктыны, шудыны. Кырӟаны но татын сямзы ӧвӧл; ӧжытак гинэ маке выль кылэмзэс кырӟало. Яратоно шудонзы отын: эктон, бускель, синтэм бубыли, зындэс ватон. Та кык пӧртэм шудон сярысь гожтомы собере (кайта). Али вералом на маке кылбур сярысь. Кудӥз ке кылбур шедьтэ, кылзӥськыны косэ - пуке, пе, мон юало: ма луоз вераме? Одӥгез шуэ вераськом, кыкез шуэ учком, куинетӥез шуэ лыдӟиськом. Уг уты, уг куртчы - пырыны уг лэзь. Музъем вылтӥ уг ветлы, вылэ уг учкы, пузкар уг лэсьты - пиналъёсыз вань. Чипей быжыныз шоналтӥз но, писпу усиз, гурезьёс султӥзы. Мынӥсько, мынӥсько но, пытьые ӧвӧл, вандӥсько, вандӥсько но, вирыз уг пот. Кузь кук мынӥз, мынӥз но - музъеме выиз. Выль шортдэремлэн сӧзулыз пась. Ма тулыс чебер каре, гужем салкым каре, толалтэ шунтэ? Ма адске уин гинэ? Ветлӥсько музъем вылтӥ, инэз уг адӟиськы. Чӧж тыын, быжыз гурезь вылын. Кык быжо коӵыш. Секыт-а, ӧвӧл-а - корка вамен уд кушты. Куамын кыкез кутсаське, одӥгез культо берыктэ. Губырес-купырес бусыэз котыртӥз - гуртаз берытскиз. Кур куарняньын выль сӥль. Кин тушен вордске? Жугиськизы, жугиськизы но кенсы пырыса ошкизы. Бурдтэк лобе, пыдтэк бызе. Кырӟан - Уроме! уроме! Кыдёке-а ветлӥд? - Кыдёке ик, лэся... Жадисько ин мынса. - Уроме! уроме! Ку потӥд коркасьтыд? - Та вакыт потэм вал Коркасьтым-гуртысьтым. Потыкым куазе Чилектӥз-гудыртӥз; Потэмме шӧдыса, Лыз валэ гырдалтӥз. - Уроме! уроме! Бусыын-а кӧлӥд? - Нюк дурын, кыз улын Валиськи но кӧлӥ. - Уроме! уроме! Йырулад ма понӥд? - Йыролтэс интые Пельы гинэ вал. - Уроме! уроме! Ас улад ма валид? - Урдлые вал валес, Шобырски кыз лысэн. - Уроме! уроме! Пыласькид-а бен тон? - Пыласьки ӧжытак Куар вылысь лысвуэн. - Уроме! уроме! Ӵушконэд но-а вал? - Вал небыт ӵушконэ - Люгылэн вож куарез. - Уроме! уроме! Со даред бен кытын? - Со дарме-ӵушконме Кыз улэ ик кельтӥ. *Уйпал диплект формаосты сётӥськом, авторлэн кадь ик кельтыса. Салдат пи келян йылоллэн радлыкез 1. Капка азе калык люкаське. Ваньзы ӵош корка пыро салдат пиез келяны. Кузё кышно ӝӧк сьӧры пуксьыны ӧте. Куд-огез сьӧраз аракы, ӵушкон, коньдон, ныркышет, тамак пуйы ваем. Кузё кышно лыктэм калыкез ӝӧк сьӧры пуктылэ, салдат пи но эшъёсыныз ӝӧк сьӧрын ни. Анаез сектаське. 2. "Шур дурын вож сад улын" кырӟанэз кырӟаны кутско. Салдат пи кырӟа но кытӥяз синкылизэ ӵушылэ, мылкыдыз капчи ӧвӧл. 3. Кырӟан бырем бере арганчи шудэм улсын ньыль кузя нылъёс "Ньылен эктонэз" экто. 4. Эктон йылпумъяськем бере куноос "Мемиеным, дядиеным" кырӟанэз кырӟало. 5. Салдат пи ӝӧк сьӧрысь потэ но шуэ: "Анай, атай, эшъёсы, иськавынъёсы, мон но армие кошкон азям атаелэн корказ ас яратоно нылыным берпумзэ экто ай. Шуд, арганчи!" Салдат пи ас нылыныз эктэ. 6. Ӝыныез куноос ӝӧк сьӧрысь султо, куд-огез сектаське. Кырӟаны кутско "Нэнӥелэн ӝӧк вылаз" кырӟанэз. Салдат пи нэнӥез шоры учкыса но, киоссэ пельпум вылаз поныса но, сэзъяса но кырӟа. Ваньмыз со шоры учко, кудӥзлэн синкылиез но вия. 7. Кырӟан бырем бере анаез вера: "Я, пие, туж ик эн чигиськы, шудтэм уд луы ай. Пи вордске ке, соку ик шуо вал: государьлы майыг луоз. Атаед но вань, анаед но вань, шудо луод ай, одно ик бертод, гырод но, кизёд но. Я, пие, часъёсыд- минутъёсыд вуо ини, кошкон дырыд но матэктэ, ойдолэ чук шукком". 8.. Пиос (эшъёсыз) лента сёто, азвесь манет, пурт, молот, пукон. Салдат пиез эшъёсыз пукон вылэ кунултӥз кутыса султыто, со мумыкор борды лента - чук шукке. Кырӟало. Кырӟамъя солдат пи сильсьӧртӥз пуртэз куштэ, собере эшъёсыз, кунултӥз ик кутыса, пукон вылысь васькыто. 9. Ӝӧк дорын пуко киросмумиз, анаез, атаез. Отчы салдат пи лыктэ но пыдесъяське. Киросмумиз пияш котыртӥ нянь колдыез йыр вадьсаз возьыса котырске. Анаезлы черод вуэ, со - благословить каре. Собере анаез мудорез йыр йылтӥз озьы ик куинь пол котыртэ но чупатытэ. Атаез пиезлы пу пуньы сётэ, шуэ: "Тани, пие, мон но салдат дыръям та пуньыен сиськи, служить кари но бертӥ. Тон но бертоно мед луод, та пуньыен сиськыса котьку кӧтыд тыр мед луоз". 10. Салдат пи нош ик кырӟаны кутске, ваньмыз итӥсько. "Ой, ӟеч луэ" кырӟанэз кырӟало. Эшъёсыз салдат пиез, ки йылазы ӝутыса, коркась потто. Ваньмыз соос сьӧры вырӟо. Ӧсэтӥ потыкузы, салдат пи янак борды кутскылэ. 11. Гидкуазьысен анаез пиезлэсь картуззэ йырысьтыз басьтэ но бызьыса корка пыре, пиез но со сьӧры. Анаез пизэ чупа, ӟыгыртэ но бӧрдыса кыле. Картуззэ басьтыса, пиез капка сьӧры потэ. 12. Капка дорын кыткем валъёс возьмало ни. Уробое нылъёс, пиос, арганчи пуксё. Салдат пи гурт пумозь арганэн, гырлыен, кырӟаса кошке ини. 13. Ваньмыз кылё, кизэс шонало но черекъяло: "Ӟеч лу! Ӟеч ветлы! Ӟеч берт!" Салдат пи келян кырӟанъёс Шур дурысь вож сад улын Шур дурысь вож сад улын Ӵуж уӵы чирдоз вал. Та садын ӝытлы быдэ Ми соин пукком вал. Огпол ӝытазе лыктӥз Со сад улэ пукыны. Паллянзэ кизэ сётӥз, Люкиськиськом шуыса. Мынам сюлмы чигиськиз - Мар понна улом на? Мыно бадӟым ву дуре, Со мур вуэ тэтчо. Ӵукна вазь ик султыса, Со ву дуре мон васьки. Нош отын яратонэ Монэ возьмаса пуке. Со дорам матэ лыктӥз - Мынам сюлмы чигиськиз. Со бурзэ кизэ сётӥз, Та кылзэ вераса: "Мон кошкисько табере Солдатэ служитьтыны. Нош тонэ, яратонэ, Косӥсько возьманы!" Мемиеным дядиеным Мемиеным дядиеным Улон дыры медло вал. Нюлэс дуртӥ просекетӥ Ветлон дыры медло вал. Нюлэс дуре мар-о потэ? Потэ шудтэм легезьпу. Арамае мар-о потэ? Потэ шудтэм эмезьпу. Бусы шоры мар-о потэ? Потэ шудтэм палэзьпу. Калык вылэ кин-о потэ? Потэ шудтэм нылъёсмурт. Кузь сюресэз кин-о лёга? Лёга шудтэм пиосмурт. Нэнӥелэн ӝӧк вылаз Нэнӥелэн ӝӧк вылаз Сиёно шыд тусьтые кыле ук. Шоремен-ӝыныен, шоремен-ӝыныен Нянь кусоке сиытэк кыле ук. Урумкаен ӝыныен, урумкаен ӝыныен Юоно винае кыле ук. Просекен ӝыныен, просекен ӝыныен Турнано просеке кыле ук. Удысэн ӝыныен, удысэн ӝыныен Арано удысэ кыле ук. Анаен ӝыныен, анаен ӝыныен Гыроно анае кыле ук. Лэзёз меда, уз меда Лэзёз меда, уз меда но Нэнӥе чук шуккыны? Сётоз меда, уз меда Ӵуж но, вож но лентазэ? Сётоз меда,уз меда Азвесь, пе, но манетсэ? Сётоз меда, уз меда Чаг кесён но пуртъёссэ? Сётоз меда, уз меда Кортӵог шуккон молотсэ? Сётоз меда, уз меда Тыпылэсь лэсьтэм пуконзэ? Тапала ке берытски, Преник басьтыса сиёмы. Сопала ке бырылӥ, Сюсьтыл ӝуатса вӧсяське. Сопала ке быроно, Пурт гаӵоло мед усёз. Тапала ке берытски, Пурт ныр йылаз мед бышкалскоз. Адӟемды ке потылӥз, Та чук шоры учкылэ. Адӟемды ке ӧз поты, Ишкалтыса куштэлэ. Ӟеч луэ но ӟеч луэ Ӟеч луэ но ӟеч луэ, Мусо, чебер нылъёсы. Ӟеч луэ но ӟеч луэ, Эшласькем но эшъёсы. Эшшо ик но ӟеч луэ, Мемие но дядие. Ой, ӟеч луэ, ӟеч луэ, Дэри, пе, но калыке! Дасяз М. Д. Ишматова. Сценарийлы кырӟанъёсты вераз Завьял черкогуртын улӥсь Раиса Прокопьевна Орехова. Солдатэ келян Милям Арка гуртамы, Башкортостанысь Янаул ёросысь салдатэ келян туж шулдыр ортче. Но озьы гинэ шуыса, шонер уз луы, дыр. Салдат келян ӝытын вань куректон, кайгырон но. Повестка басьтэмез сярысь егит пияш нырысь ик анай-атаезлы ивортэ, собере со ивор вань гуртоослы вӧлме ни. Егит пияш гурт эшъёсыныз, нылъёсын но пиосын коркась корка пыраса ветло. Нырысь ик доразы нуо матысь туганъёссы (ӵыжы- выжыоссы). Отын сиыса-юыса, ас ёрос эшъёссы доры пырало. Егит пиез шоразы куто, нош азьпалазгес, чебер но шулдыр крезьгуръёссэс кисьтыса, арганчи мынэ. Пель сьӧрын кема шуккисько на егит нылъёслэн уӵылэн кадь куараоссы. Гуртэтӥ юмшаса ветлэмзы бере салдат пилэн дораз люкасько. Корка тыр ӵыжы-выжыоссы, егит пилэн эшъёсыз. Салдат пиез но солэсь гажано нылзэ тӧр шоры пукто. Анаез-атаез, собере матысь эшез кыл верало. Егитъёс шулдыртыны кутско, нош пересьёс бӧрдо, асьсэ понна инмарлы курисько. Ӝӧк сьӧрын пукыкузы ик пияш кырӟа, сюлмысьтыз куректонзэ ӧръя. х х х Салдат, салдат шуизы но Кускам пояс керттӥзы, Дас тямыс арес тырмиз но Сюлмам тылпу понӥзы. х х х Бусы капкалэсь потӥ но Бинялтӥськи кызьпуэ. Ӧй бинялтӥськы кызьпуэ, Бинялтӥськи кайгуэ. х х х Бусы капкалэсь потӥ но Погырай но кыли ук. Уг бӧлиськӹ, дыр, шуэм вал, Бӧлиськи но кыли ук. Озьы кырӟамез бере егит пияш эшъёсызлы кыл сётэ. Ӝӧк сьӧрын пукись нылъёс но пиос ӵош кырӟаны кутско: х х х Дыдык пизэ марлы вордэ? Лыз инметӥ лобаны. Анай пизэ марлы вордэ? Армиын служить карыны. х х х Тӧл ке потӥз, тӧлатэлэ Салдатлэсь дэремъёссэ. Эн бӧрдытэ, буйгатэлэ Салдатлэсь аныкайзэ. х х х Ой, эшъёсы, эшъёсы, Эшъёсылэсь эшъёсы, Эшъёсылэсь но бӧлиськи. Огнам йырам мар каром? х х х Кызьпу будэ, кызьпу будэ, Кызьпу будэ кайгутэк. Эх, мон но ке кызьпу луысал, Будысал, дыр, кайгтэк. х х х Ой, уг поты сьӧд льӧмпуэз Тӥр кутыса ӵогеме. Ой, уг поты эшъёсылэсь Бӧлиськыса улэме. х х х Ӝужыт, ӝужыт гурезь йылын Сьӧдчабей таратӥсько2. Таня мында калык пӧлысь Ог-тонэ яратӥсько. х х х Озьы ӧвӧл али со, Тазьы ӧвӧл али со, Лобӟем ӟазег берен бертэ, Салдат но бертоз али. х х х Укно улын сутэр будэ, Солэн ваез куинь гинэ. Солэн ваез ньыль ке лыусал, Мон но тазьы ӧй луысал. х х х Ӝужыт, ӝужыт гурезь йылэ Кыкнамы тубом али, Огмес огмы яратыса, Огазьын улом али. х х х Ой, ву вия, ву вия, Ву кузя ӟазег уя, Ву кузя ӟазег уя но, Кык синмысьтым ву вия. х х х Нюлэс сьӧртӥ пилем лыктэ, Зороз но зороз ини, Мон ке кошки, аныкае Бӧрдоз но бӧрдоз ини. х х х Буэ3 кузя ветлӥ, ветлӥ, Гырлы сяська бичаса. Аныкае бӧрдод али, Тырлы дырме малпаса. Та такмакъёсты кырӟам бере салдат пилэн нылызлы юаса кырӟало: Эмезь садэ пырид ке, Чидалод-а сиытэк? Гажанэдлэсь бӧлиськид ке, Чидалод-а бӧрдытэк? Егит нылаш пумитазы вазе: Эмезь садэ пыри но Ӧй чида мон сиытэк. Гажанэлэсь бӧлиськи но, Ӧй чида мон бӧрдытэк. Кырӟам бере ӝӧк вылэ ӝук пукто. Нырысь ик сое пересьёс куриськыса сиё. Ӝукез куинь пол омыртоно, куинь полаз но умой сюрес сӥзьыса. Пересьёс бере егит нылъёс но пиос озьы ик ӝукез бӧрсьысь бӧрсе куинь пол омырто но вӧе веттыса, куриськыса сиё. Бигеръёсын артэ уло бере, бигер такмакъёсты кырӟало на, собере ӟуч кырӟанъёс вылэ выжо. Егитъёс клубе пото, отын кырӟаса-бергаса экто. Ӵуказеяз ӵукна нош ик салдат пилэн дораз люкасько. Быдэс гурт калык, пичиез но, бадӟымез но, келяны лыктэ. Вордскем коркасьтыз потыкуз, егит пи гурез пиньыныз куртчыса кельтэ. Со куртчем бервылзэ бертытозяз исатэк возё. Бусы капка доры вуытозь, ваньмыз ӵош кутӥсько но гуртлэн шортӥз кырӟаса пото. Бусы капка доры вуыса ини егит пи трос азвесь коньдон пазьге. Пичи пиналъёс сое соку ик октыса быдто. Салдат пи ваньмыныз люкиське, мышкыз ышытозь ик кышетэныз сэзъяса мынэ. Тӥни озьы ортче гуртамы салдат пиез келян. Вашкала дыръя сярысь, отын трос воштӥськонъёсыз вань ни. 3907 Л. Ушиярова, Удмурт университетысь студентка. Салдат (лекрут) юмшатон Бер сӥзьыл. Бусы ужъёс йылпумъямын. Та вакытэ, туала аръёсы сямен ик, салдат пиосты - лекрутъёсты вазен но басьто вылэм. Лекрутэз басьтон куд-ог семьяосын секыт кӧтӝожен берытске, тужгес но крестьян хозяйствоез нуыны воргорон киос уг тырмо ке. Соин но гуртъёсын бер ӝытъёсы но мӧзмыт кырӟан гуръёс чузъяськылӥзы. Ёросэн-ёросэн, куддыръя нош гуртэн-гуртэн салдатэ келян сямъёс-йылолъёс пӧртэмесь луозы вылэм. Завьял ёросысь куд-ог гуртъёсын тазьыгес ортчылӥзы. Ужан нунал ортчем бере салдатэ басьтоно егит воргоронлэн эшъёсыз люкасько но гурт кузя ортчо, коркась корка пыраса (со куинь-ньыль ӝыт, тросгес но кыстӥське). Юмшась пиос но нылъёс пӧлын тужгес висъяське салдатэ келяно мурт. Солэн картузаз но, мылазяз но пӧртэм буёло чукъёс бырттэмын, уго котькуд коркан солы чукъёс тэчо. Озьы возьмато салдат пиез гажамзэс. Нош чыртыяз пужыятэм кузь ӵушкон ошемын. Тазэ киросмумиз, бубыез сётӥзы. Егитъёс, люкаськем калык, юмшаны потэмъёс одӥг капка азе дугдо но кырӟанэн "йыгасько": Желатьтӥз ке, усьтылоз, Ӧз ке желатьты, уз усьты... Корка кузё, салдат лекрут келян гурез кылыса, тылэз ӝуатэ но капказэ усьтыны потэ (со ӵогамын ӧвӧл ке но). Пырисьёс азбарысен нош ик кырӟанзэс мыто но корка пырон сямен кылало-бурало. Желатьтӥз ук, желатьтӥз, Тылъёссэ но ӝуатӥз. Тылъёссэ но ӝуатӥз, Ӧсъёссэ но усьтылӥз. Нош корка пырем беразы, кузё кышно медаз йыркуръяськы шуыса, лекрутлэн матысь эшез - юмшасьёслэн тӧрозы (азьветлӥсьсы, тодӥсьяськисьсы) кырӟанзэс азьланьтэ: Вина юны ум ик пырке, Ми адскыны пыриськом. Ми адскыны пыриськом, Верано кылъёсмес вераны... Отӥяз ини кусып тупа, кузё кышно пыремъёсты мусурен яке ӵужъемлэсь пӧзьтэм сурен утялтэ. Салдат пиез гажамзэ возьматыса, солэн пичи дырысьтыз пӧртэм учыръёсты тодаз вайыса вера, кыла-бура. Собере ини чукъёс пӧлысь кельшымонзэ быръе но мумыкоре шуккыны куре. Со интые сандыкысьтыз-шыкысысьтыз чук поттэ но озьы ик кыласа-бураса бырттэ. Салдат пилы пурт сёто. Пукон вылэ султыса, быръем чукез со азвесь коньдонэн шукке, эшъёсыз кырӟало: Адӟемды ке потылӥз, Та чук шоры учкелэ. Адӟемды ӧз ке поты, Ишкалтыса куштэлэ... Чукез шуккем бераз салдат пи пуртсэ пельпум сьӧртӥз, пукон вылын сылыкуз ик, музэ уськытыны кулэ, эшъёсыз кырӟан-веран дыръя. Куштоно озьы, йылыныз со выж борды мед бышкалскоз. Тапала ке берытсконо, Пурт ныр йылаз мед усёз... Капчиен шокчыса: Берытскоз ук, берытскоз!!! Пурт ныр йылаз бышкалскиз. (Пурт ӧз ке бышкалскы, салдат пи уз берты, шуо, вань сыӵе калык веран). Салдат, капчиен шокчыса, пукон вылысь ваське. Кык эшъёсыз, яратоно нылыз но матысь эшез, кунултӥз куто но корка котыр котырско, "Люкиськон" кырӟанэз кырӟало: Кылёз ук, кылёз ук Та Якшур но дуннеед. Якшур дунне мар гинэ, Лёгоно пыд ул кылёз ук... Отӥяз ини кыласа-бураса кырӟало меми-дяди, эшед-ёзэд, яратон туган сярысь. Асьсэос пумен коркась пото, корказетӥ васько. Тӥни озьы ортчиз одӥг корка пыран. Мукетъёсаз но пырыса-потыса вуоно, тужгес ик салдат пилэн ӵыжы-выжыосыз доры. Г. К. Перевозчиков, дышетӥсь. "Удмурт дунне", 2.11.90 Салдат келян гур Калык пӧлын салдат келян гур вашкала дырысен ик вӧлмемын вылэм ини. Эксэй вакытысен солэн пуштросэз воштӥськымтэ. Тужгес но войнае келякузы, сюлмысьтызы куректон-кайгузэс кырӟан кылын вералозы вылэм. Салдатэ мыныны повестка вуэ ке, соку ик дрожкаен (тарантасэн) вал кыткыса, быдэс гуртлэсь урамъёссэ котыръялозы вал. Уробое тыраз пуксьылӥзы лекрутлэн эшъёсыз: нылъёс но пиос. Лекрут вӧзы мизганчи (арганчи) пуксёз вал вятской мизганэн. Салдатэ шедем пимы нылъёслэсь пӧртэм чебересь сырлам (пужыятэм) ныркышетъёссэс, огез борды мукетсэ керттыса, чыртыяз оше вылэм. Тау карыса кырӟакузы, со, кышетъёсыныз шонаса, мизган шудэм улсын урам кузя ортчылӥз. Салдат пи, вордӥськем дорысьтыз берпумзэ тау карыса потыкуз, пересь муртэ куриськыны курозы вылэм. Бадӟым тусьтые пӧсь ӝук поныса, бамкышетэн кутылӥзы. Солэн шораз пу пуньыен шунтэм вӧй поныса, инмар кылчинлы куриськылӥзы. Лымшор пала йыбырттыса, куриськем ӝукез вань люкаськем калыклы веръятылӥзы. Лекрут пиос мумыкоре азвесь коньы шуккыса кельтозы вал. Салдат бертытозь, сое ӧз басьтылэ. Кудӥзлы ӧз ке но кылды бертыны, со коньыоссэс коркаоссэс выльдыны сэрттытозь возиллям. Кылем векчи уксёзэ салдатэ кошкись азбаре потэм бераз вылэ пазьгоз вал но - пиналъёс шумпотыса бичаллязы. Ожмаськон дыръя кызьы келямзэс но куд-ог кырӟан гуръёссэс мӧйыос али но тодазы возё на. Мынам но пель сьӧрам пыдлось жингрес куараен кылӥсько кадь соос. Озьы тӥни быдэс гуртэн туала вакытэ но азьло сямъёслэсь ум куштӥськиське. Та дыре бусы капкаос ӧвӧл ни ке но, гурт сьӧры потытозь но автобуслэн берыз ышытозь, келян гуръёсыз кырӟаса кылиськом. Та кырӟанэн келязы Быдӟым Отечественной войнае гуртысь вань воргоронъёсыз. Озьы ик милесьтым атаймес но. Али ке но тодам ваисько: гужем уин вал со, 1941 арын. Анаен но атаен ӵош вань люкаськем иськавынъёс, бускельёс кырӟазы но бӧрдӥзы. Озьы сюлэм путэмзэс небӟытъязы. Машинае ке пуксиськод, Нуэ но нуэ вылэм. Пинал сюлме тыл ке пыре, Ӝуа но ӝуа вылэм. Та урамтӥ кык пол ортчи, Кык полэз но ӝыт ортчи. Кӧт куректэмысь кырӟай-лэзи, Изись муртэ сайкатӥ. Тазалыкме адӟизы но Чылкак батыр шуизы. Вож бадяр кадь мугорме но Яратыса басьтӥзы. Нимтэм, пустэм гурезь йылэ Тубонъёсмы вань али. Зор кадь усись пуля улэ Пыронъёсмы вань али. Ӝужыт пашпу гурезь йылэ Тубытэк ум кылелэ. Сьӧсь тушмонэз ми вормомы, Нош ик шулдыр уломы. Выль Кырги шур вия, дыр, Камышъёсыз кылё, дыр. Камыш ӧвӧл - возьёс кылё, Лёгем музъемъёс кылё. Келяды ке, тӥ келялэ - Бусы капкаез потытӵож. Учиськоды ке, учиське - Милям бермы ышытӵож. Бусы капкалэн юбоез Погыраз но кылиз ук! Ум люкиське, дыр, шуэм вал, Люкиським но кылим ук! 2206 Ш. Меншарапов. Пермт областьысь Куеда ёросысь Покчи Гондыр гурт. "Удм. Дунне", 18.05.90. Салдатэз пумитан Историысь но, мӧйыослэн верамысьтызы но тодмо, азьло вакытэ салдатъёс кызь вить ар ӵоже служить каро вылэм шуыса. Кызь аресъем мурт дор палъёсаз ньыльдон вить арес тырмыса гинэ вуэ ини. Али сямен соку почта пыр кусыпъёс но возьыны ӧз луылы, соин ик анай-атайлы пизы сярысь иворез но тодыны ӧз кылдылы. Транспорт но ӧй вал бере, салдатлы дораз пыдын но мар бертоно луылӥз. Кинлы кызьы удалтэ, бертон дырзы толэзь но, кык но, ар но кыстӥськылӥз. Начаръёсызлы гуртъёстӥ кураськыса но ветлоно луэ вылэм, нош кудӥз узыръёс дорын медъяськыса ужаллям, куд-огъёсыз кышномурт доры пыртосэ но пырылӥллям. Гуртазы вуо ини, пе, чылкак пересьмыса. Вордскем инты дуно, кулыны ке но бертэмзы потэ. Тӥни сыӵе вылэм салдатлэн бертон сюресэз. Соин но, вылды, салдатлы сӥзем уно мадёсъёс, выжыкылъёс кылдытъямын, веросъёс гожъямын. Салдат сюрес вылын я нюлэскузёосын, я вумуртъёсын, я вегинъёсын, я шайтанъёсын пумиське. Салдатэз пумитан йылол сярысь пересь мемиелэн (анаелэн мемиез 95 арескын кулӥз) верамысьтыз тодам ваисько на. Бертӥсь мурт соку ик дораз уг пыры вылэм, со угось уг тоды, кин сое пумиталоз, улэпесь на-а анай-атаез. Соин ик со ӵыжы- выжыоссы я кирос анай-атаез доры пыре. Озьы, дораз вуытэк, сьӧрлось гуртын но изёно луэ на салдатлы. Отысь ини, бертэмез сярысь ивор сётэмзы бере гинэ, валэн келяса лыкто вылэм. Жадем муртэ кунокуаын ӟеч утялто, сюдо, мунчое пырто, дӥськутсэ вошто. Нош со куспын ивор басьтэм анай-атай муртъёс, сузэр-вынъёсыз салдатэз ӟеч-ӟеч пумитаны дасясько. Азбар котырез окто-калто, ӝикытато, выжез мисько, пӧрасько. Уж котькинлы тырме. Сюан-бӧрысьлы кадь пӧрмытско угось. Салдат корказ пыре, кирос тыре, вӧсяське, собере ини анай-атайзэ ӟыгыртэ-чупа. Со куспын корка тыр калык люкаське, чипыен-куреген шуэм сямен. Ӝӧк выл тыр сиён пуктылэмын. Салдатэз возьмам вина шуыса, отчы ик пичи бекчеен вина пукто. Ӝӧк сьӧрын ӟусъёс кузя ӵыжы-выжыосыз котырак пуксё. Салдатлы инты - пукон вылын. Анай-атаез сектасько, куно утялто, утыр пизэс но уг вунэто. Сием-юэмзы бере салдат султэ но корка пырем калыкен тодматскыны кутске. Дыр трос ортчемын бере, воштӥськонъёс но уно луо угось. Вань лыктэм калыкез ӝӧк сьӧры пуктыло. Отӥяз шулдыръясько, экто-кырӟало. Бӧрысь ини гуртэтӥ юмшаны пото. Кыктой но, куиньмой но кыстӥське шулдыръяськон. Ваньмызлэн ик бертэм муртэ ас дораз пыртылэмез, утялтэмез потэ. Чук (туг) шуккыса кельтэмез салдат ас киосыныз ишка. Отӥяз со эшъёсыныз ӵош сьӧр гуртъёстӥ но юмшаса ветлэ на. Мурт дортӥ ветлон сям мон тодыса но утиськиз на. Берло дыре со шергес но шергес пумиськылэ ни. Роман Яковлев "Удм.дунне", 9.12.95. 1 Бӧлиськыны - люкиськыны. 2 Таратыны - сузяны-чылкытатыны. 3 Буэ - шурлэн нимыз. Балтась удмуртъёс пӧлын семык но бельгы Алигес тани нош Балтась ёросысь вордскем Сырья гуртам вуылӥ. Мугез но вал угось. Ӵапак со нуналэ вал семык (троица). Мае отысь адӟи, маизлы синмаськи, пайми - со сярысь ик лыдӟисьёслы вераме потэ. Куке но семык удмуртъёслэн вашкала праздниксы вылэм. Табере со вунэтэмын. Нимыз гинэ кылемын. Балтась удмуртъёс троицаез семык шуо. Тросаз гуртъёсын сое кӧснуналэ пусъё. Нош Тагашур гуртын улӥсьёс шайвылэ ветло покчиарняе). Карык Сермаысь калык - арняе. Малы меда тагашуръёс та нуналэз покчиарняе пусъё? Удмуртъёслэн вашкала семык праздниксы та нуналэ ортчоз вылэм. Соин но, дыр, тагашуръёс та сямлэсь куштӥськиллямтэ. Нош Карыг Серма гуртлэн шаез мукет интыын - Ципья черкогурт дорын вылэм. Собере, татысь черкез ворсамзы бере, карык сермаос кулэмъёсты гурт доразы гинэ ватыны кутскизы. Выль шайвыл кылдӥз. Кӧснуналэ та гуртысь калык Ципья шае мынэ, нош арнянуналэ - выль шайвылазы. Табере эскером, кызьы та палъёсын семыклы дасясько. Та ужрад удмуртарняе ик кутске. Нырысь пыжисько. Собере пӧрамзэс, гурысь поттыса, ӝӧк вылэ пукто. Вань семьяен оброс азе султыса, инмарлы вӧсясько. Матысь кулэм ӵыжы-выжыоссэс буре ваё, соослы сопал дуннеын куректытэк но сьӧлыктэк улон сӥзё. Собере вӧсяськисьёс улэпъёсызлы шуд но тазалык куро. Та ужрад ортчем бере ӝӧк вылэ пуктэм пыжиськемъёсты веръяно. Озьы, пе, улэпъёсыныз ӵош кулэмъёсыз но сисько. Нуназе бере курег вандо. Собере одно ик мунчо эстыны кулэ. Таиз герӟаськемын ини адямилэн ар ӵоже люкаськем сьӧлыкъёсызлэсь но висёнъёсызлэсь гылтӥськонэн. Кин та нуналэ мунчоын ӧз мисьтӥськы, со борды эшшо но тросгес черъёс, пе, лякиськозы. Шайвылэ мынон нуналэ кузё кышно, вазь ик султыса, табань пыже. Собере куреген шыд пӧзьтыны пуктэ. Ваньмыз вуэм бере нош ик быдэс семья ӝӧк котыре султэ. Тужгес но мӧйыез адями инмарлы йыбыртъя, солэсь вань ӟечсэ куре. Озьы ик буре ваё кулэмъёсты но. Пӧсь табанез но шыдэз веръям бере шайвылэ мыныны дасясько. Сьӧразы сӥль, курег пуз, пыжиськем басьто, озьы ик аракы но. Балтась удмуртъёс шайвылэ быдэс гуртэн, семьяен мыно. Доразы тужгес но пересьёсыз гинэ кылё, кинлэн пыдъёсыз уг вамышъяло ни. Та нуналэ вордскем гуртсылэсь палэнын улӥсьёс но берто. Соин но семык нунал ас гуртоосыныд, эшъёсыныд, ӵыжы-выжыосыныд пумиськонлы пӧрме на. Ӧвӧл, дыр, сыӵе семья, кудӥз ӧз ваты матысь муртсэ. Соин но сьӧразы ваем сиён-юонзэс берлогес кулэмъёслэн гу вылазы тыро. Озьы кутске буре ваён. Та ужрад дыръя аракы поттыны уг яра. Кулэмъёсты вӧсяку, сое гу вылэ пуктӥд ке, кулэмъёсызлы но, улэпъёсызлы но быдэс ар ӵоже курыт синкылиен бӧрдоно луоз, пе. Вӧсь ортчем бере гинэ аракызэс сумкаысьтызы потто. Лыктэмъёс одно ик бускельёссылэн но шайгу доразы ветло. Шайвылысь потыку берез учкыны уг яра. Кулэм муртъёс, пе, сыӵе адямиез ас доразы кыско. Тазьы ортче семык. Вератэк кельтэме уг поты эшшо одӥгез праздник сярысь. Со бельгы нимаське. Ортче со семык бере, арняе. Сое пусъё Сырья, Вукогурт, Сизнер но Карык Серма гуртъёсын гинэ. Нырысь ик верало, кытысь потэмын бельгы ним. Пересьёслэн верамзыя, со герӟаськемын Бельгия кунэн. 1914 арын нырысетӥ мировой война кутскиз. Тросэз воргоронъёс фронтэ басьтэмын вал. Кайгу адӟонлэсь ӧз пегӟе та вылӥ верам гуртъёсысь пиос но. Войнае огдыре кошкизы. Ваньзы соос одӥг интые сюриллям. Частьсы котыртэме шедем. Сиён тырмыт луымтэен но висемен, тросэз быро. Кылемъёсыз пленэ шедё. Соосты Бельгие вутто. Война йылпумъяськем но пленысь мозмытскем бере тодмо луиз, туж ӧжытэз гинэ улэп кылиллям шуыса. Со дырысен та ньыль гуртъёсын улӥсьёс котькуд аре семыклэн берлось нуналаз нюлэскысь возь вылэ мыно. Шайвылэ сямен, арняе но курег вандо, шыд пӧзьто. Ӝыт ужъёс йылпумъяськем бере вань гуртэн нюлэс пала вырӟо. Лыктэмъёс ымнырынызы шунды ӝужан пала пуксё. Сьӧразы ваем сиён-юонъёссэс азязы тыро. Бӧрысь возь вылэ пуксьыса, сиёнзэс, аракызэс веръяло, ог-огзэс куноято. Пусйыны кулэ бельгылэсь эшшо одӥг тодметсэ. Мӧйыос но егитъёс сектаськон но куноятон дыръя пиналъёс кызьпу веник бичало, возь вылтӥ ог-огзэс шлачкетыса ветло. Пиналъёслэн выросъёссы, веникен уйылӥськемзы войнаез тодэ вайыто. Та ӝытлэн кыкетӥ люкетэз шудон-эктонъёсын герӟаськемын. Сиськон-сектаськон ортчем бере зэмос шулдыръяськон кутске. Эн малпалэ, та выллем ужрадын кырӟаны но эктыны уг яра шуыса. Весяк куректыса уд улы. Быдэс гуртэн тазьы арлы огпол сяна уг люкасько бере, шулдыръяськем но потэ ук. Бельгы сярысь веранме азьланьто. Мӧйыос татын нимазы, егитъёс нимазы круг кылдыто, асьсэлэн арганчизы. Ӧжытсэ вераса, куинь-ньыль арганлэсь ӧӝыт уг улы. Та пал удмуртъёслэн туж аспӧртэмесь эктон гуръёссы, кырӟанъёссы. Тани басьтом егит пиослэсь ӟыгыт сямен эктонзэс. Арганлэн кужмо шудэмез но пиослэн чот-чот такмак вераса лэземзы улсын пыдъёс асьсэос круге курисько. Тани куд-ог такмакъёс: Куро ке но кабанэ, Турын ке но кабанэ, Горд ке но гажанэ, Сьӧд ке но гажанэ. Со гинэ пыре кеносэ, Со гинэ юэ аракыез, Со гинэ кыске тамакез. Луэ, луэ, луэ со - Пинал дыръя луэ со. Маке луэ, луэ со - Пинал дыръя луэ со. Пиосты нылъёс вошто. Таиз ини апай сямен эктон нимаське. Круг шоры оген-оген потыса, кизэс кус бордазы карыса, арган шудэмъя котыр бергало. Припев дыръя эктӥсь мурт котыр тапыртыса ортче но ас интыяз мукетсэ ӧте. Такмакъёслэн кылъёссы таӵеесь: Пужым меда, ой, кыз меда, Кыскилиез, ой, вань меда? Апай меда, сузэр меда, Ӟеч улонэз (туганэз) вань меда? Пияла чарка - пыгылес чарка Питраз, кошкиз, ой, шӧдӥд-а? Пинал даур - сяська даур Ортчиз, кошкиз, ой, шӧдӥд-а? Шулдыръяськон пеймыт луытозь кыстӥське. Собере калык дор палаз вамыштэ. Мӧйыосыз - кӧлыны, егитъёсыз - шулдыръяськонзэс азьланьтыны. Тӥни озьы ортчо Балтась пал удмурт гуртъёсын семык (троица) нуналъёс. Оскисько, соос татын кема возиськозы на шуыса. 5866 А. Овчинников "Удмурт дунне", 15.07.93. Ныл лушкан Пинал дырысь эшеным пумиським. Андрейлы (нимъёс воштэмын) ньыльдон кык арес ни. Тыр ӝӧк сьӧрын кунояськыса, вераськыса пукыкумы, со ӝожтӥськытэк ӧз чида: - Эх, Никол! Соку малпанмес уж вылын быдэстыны ӧм йӧндыре. Иринаез ке лушкасалмы, мон но тон сямен ик кузпалэн улысал. Тынад нылпиосыд но быдэ вуэмын ни... - Кылдэмез озьы луэм, вылды. Инмарлэн кымсы гожтэмезлэсь уд ортчы, шуо, - мон пумитаз вазьыны мукет кылъёс ӧй шедьты ни. Со нуналъёс выльысь син азям пуксизы. Дыр ортчыса но вань вераськемъёсмы али но пель сьӧрам чузъясько кадь. Эше колхозамы шофёр луыса тыршиз. Мон парсь вордон фермаен кивалтӥсько вал. Одӥгаз нуналэ урамысен пумиськимы но, Андрей куриз: - Юртты ай кузпал лушканы. Одӥг тодмо нылмуртэ вань. Улонме соин герӟаса утчано вал. Та сямен калтыртыса улыны адямиослэсь возьыт. Арлыд йылэ но йылэ. Ныл лушканъёсы трос пол пыриськылэме вань. Аслэсьтым кузпалме но лушкаса ик пыртӥмы вал. Озьы ке но, соглаш кариськыны ӧй дырты. - Таӵе ужрадэ казакпиосты ӧтчало вал кадь ук, - калыкмылэсь вашкала сям-йылолзэ тодаз уськытыны тышисько на. - Кемалась-а пересьмыны вутскид? Асьмеос огъёзъёс ук! Ми палан - Бигер шаерысь Балтач ёросын - таӵе сям возиське. Нылэн пиос ог-огзэс ярато но семья кылдытыны соглаш ке но, ас мылкыдъёссэс шараяны уг дырто. Егит пи ныл лушкан нуналаз гинэ та сярысь ас анай-атаезлы ивортэ. Тодмо ини, кыӵе гуртысь, кин луэмзэ шарая. Корка пушсэс утялтыны, сиён-юон дасяны куре. Та нуналэ егит пилэн дораз зэмзэ но огыр-бугыр луэ. Озьы ке но, дасяськон ужрадъёс лушкеменгес лэсьтӥсько. Трос синъёс медаз адӟе, трос пельёс медаз кылэ. Дырыз вуыса, ваньмыз шараяськоз, выль кенэн эмеспиез ӟечкыланы лыктозы ай. Выль кенлэн дасям тыкмаченыз (лапшаеныз) шыд сиыны ӧтчалозы ук. Таӵе ужрадэ палтэм (нечётной) лыдын пиос пырисько, ӵемысь куинь яке вить мурт. Нылмуртэ лушкам бере пало лыдын берытскон вылысь озьы тупатэмын. Лушкаськисьёс, вал-машиназэс палэнэ кельтыса, котьку сямен ӝыт шудон пӧлы кожало. Выль кенэз лушкамзы бере ӝегатскытэк кошкыны дырто. Лыдӟисьёс соку ик син азязы пукто, луоз, Леонид Гайдай режиссёрлэсь "Кавказская пленница" кинокартиназэ. Ӧвӧл, ми палан озьы уг даурто, сюжет-сӧзнэт но отын кадь уг азинскы. Нылмуртэ кужмысь карыса ваид ке, судэ шедемдэ валатэк кылёд, ява! Шудон-серекъян уж ӧвӧл ук. Вылаз ик, асьсэ гуртысь нылэз ке лушкало, анай-атайёсыз, ӵыжы-выжыосыз со часэ ик кылозы, выль кудо-туклячиослэн доразы вуозы. Соос асьсэ нылзылэсь лушкемен юалозы: "Соглаш-а со та юртэ выль кен луыса пырыны? Яратэ-а аслэсьтыз карт луонзэ?" Нылмурт пумит луэмзэ яке кужмысь пыртэмзэс шараяз ке, анай-атайёсыз нылзэс соку ик сьӧразы нуыса кошкозы. Нош соглаш ке кариськиз, кудо-туклячиоссылэсь удэм аракы зэс юыны но уз пумитъяське ни. Ныл лушкан... Кызьы кылдэмын со, малы? Таӵе учырен асьмеос школаысен ик тодматскиськом, кылсярысь, Ф. Кедровлэсь "Катя" повестьсэ лыдӟыса. Бен, повестьын узыр пи Катяез кужмысь лушка. Нош мон таӵе лушкаськонлэсь мугзэ мукет адӟисько. Татын вань кадь удмурт адямилэн шара вераськыны, выль кен курасьёс ыстыны дӥсьтонлык шедьтымтэез. Оло, нылзэс уз сётэ - берыктыса лэзёзы. Возьыт ук! Ма, собере мукетыз но йылол вал на. Ведь егитъёсты анай-атайёссы ӵемысь кузпалъяськытылӥзы, егитъёслэсь мылкыдъёссэс чик но лыдэ басьтытэк. Оло, соин но казакпиос асьсэ яратонзэс лушкаса вайылыны кутскизы. Умой сям-а та? Умой но, ӧвӧл но. Егитъёс кузпалъясько, выль семья кылдыто. Нош мукет палыз? Шуак-дуак кузпалъяськыку, егитъёс, оло, ог-огзэсты но ӟеч-ӟеч тодыса ӧз вуттэ? Одӥг пол-куинь пол адӟиськыса гинэ но лушканьёс пумиськыло ук. Улыны-вылыны кутскемзы бере валатско: сямзыя соос пӧртэмесь, яратонзы уг ара. Кулэтэм керетонъёс, ог-огдэ ултӥянъёс кенжо. Нылмуртэ лушкаса пи доры ваемзы бере пилэн анаез соослы вӧен нянь сётэ. Куспазы тупаса, пе, мед улозы-вылозы. Нылмурт та нянез сие ке, озьыен, со семьяе выль кен луыса пырыны соглаш. Сием-юэм беразы лушкаськись казакпиос, эшсылы но выль кенлы ӟеч уй сӥзьыса, доразы кошко. Выль кенлы но эмеспилы одӥг валес вылэ интыяськытэк амалзы ӧвӧл ни. Лушкаса ваем нылмурт ӵукна султэм бере выжез миськыны кулэ. Ӧс дорысен кутскыса, мудор дорозь лыктоно. Озьы со аслэсьтыз пырем пыдбервылъёссэ ӵуше, та юртысь потонтэм, пыраклы кылён вылысь. Чай дасяса, пилэсь анай-атайзэ ӝӧк сьӧры ӧте. Бускельысьтыз пичи пиез яке нылэз ӧтьыса, ошмес вулы ветлэ ни. Пичи эке солы ву ваён сюрес возьматэ. Выль кен гуртысь ик нылмурт луэ ке но, та сямез быдэстэ. Ведраосаз ву омыртэмез бере выль кен сюрес возьматӥсезлы коньдон сётэ... Нош ӝытазе выль кенлэсь лэсьтэм тыкмачсэ сиён шулдыръяськонэ люкасько. Выль кен шербет вуэн, кыӵе ке емышо сокен сектаське. Пилэн анаез кенэзлы кышет кузьма... Котьма ке но, ныл лушкан сям пыдло пыӵамын на. Ёросысьтымы мӧйыос но, егитъёс но тросэз озьы ас семьязэс кылдытӥзы. Уло, ужало, нылпиоссэс вордо. Озьыен, яратӥсь сюлэмъёс ог-огзэс шедьтӥзы, гумырзэс ӵош ортчытыны соглаш кариськизы, сюанъёс шудӥзы. Ваньзылэн азьпалан шудзы гинэ мед луоз вылэм! Н. М. Никифоров 4190 Сибы сюан Нырысетӥ люкет Кылӥське нылъёслэн кырӟамзы: Сяськаосын сыръя тулыс возь выл. Нош со сяська пушъёз-а шундытэк? Та улонын чебер музъем вылын Кызьы меда улод яратонтэк? Сцена вылэ кияз сяськаосын пияш (вуоно эмеспи) потэ. Пумитаз ныл лыктэ. Пи солы сяськаоссэ кузьма. Собере мусояськыса кошко. Сцена мышкысь каллен гинэ чузъяське кырӟан: Та улонысь кема утчай тонэ, Кытысь эшшо кыкетӥзэ шедьтом? Сюлэмысьтым уг кушты, гажанэ, Лулме сямен тонэ мон утялто. Сцена вылэ ныл потэ. НЫЛ. Кожалод, зарни шур Пальккиськиз ярдураз. Со озьы чузъяськиз Сюан гур. Жин вазе быдэс гурт. Кин пукоз на дораз? Эх, лэйка, веттаське Сюан гур! Кырӟась сюанчиос пыро: Тылобурдо сямен лопыръяса Лобо, кошко уйёс но нуналъёс. Кырӟанъёсме вуо-а кырӟаса, Шедьто-а мон тыныд чебер кылъёс? Сцена вылын ӝӧк, со вылын сиён-юон тыремын. Борддоръёсы, укно йыразьёсы, оброс сэргы пужыятэм ӵушконъёс ошылэмын. Сюанчиосыз пумитало ныллэн анай-атайёсыз, выжы-кумыосыз. Ӝӧк сьӧразы ӧтё, отчы ик выль кенэн эмеспиез пукто. Шулдыръяськон кутске. Пинал пиосыз тӧроез вайыны лэзё. СЮАНЧИ. Тӧромы вуытозь, ойдолэ кыӵе ке кырӟанэз мытом. (Кырӟало.) Сяськаяськись возь вылын но Сяська эн кузьма мыным. Возь выл ачиз тугоко но, Италмаслэсь ӵуж уко. Учкы али тон котыр но, Тулыс куазь кыӵе шулдыр. Пур-пур сыло льӧмпуос но, Жингыр вазё уӵыос. Быдэс дунне воштӥське но, Шумпотэ, кырӟа сюлэм. Тӥляд кузьмам гурдыя но, Кырӟамъя потэ кырӟам. Сяськаяськись возь вылын но Сяська эн кузьма мыным. Вера сюлэм кылъёстэ но Вань ӟечсэ малпанъёстэ. Пар валъёс тӧроез вутто. ТӦРО. Ӟечесь но буресь, куноос! Кыӵе лыктӥды но маин вуиды? Э-э, кума, тон но татын-а? СЮАНЧИ. Ми гурмес ыштӥм ай, ум ни тодӥське. Сюан гур сётыса лэзь али. ТӦРО. Тани-тани сёто, шонерак кырӟаса лэзё. (Кырӟаны кутске.) Ӟечесь-а, буресь-а, Дуно куноос тӥ, Шонер-а, котыр-а, Кытӥ вуиды? Шунды ӝужаку-а Яке ӝытазе-а? Тулыс-а, сӥзьыл-а Яке пӧсь гужем? КУАРА. Ӧвӧл, ӧвӧл, таӵе ӧвӧл милям сюан гурмы. ТӦРО. Шонер ӧй сёты-а, ма? Тани утчало, шонер гурдэс шедьто. Валъёсмы но бон лыктӥзы, Юргаса, юргаса. Асьмеос но лыктӥмы, Весь тӥледыз малпаса. Коркады ми пыримы, Тӧр шорады учкимы. Отысен ми валамы Тӥлесьтыд байлыктэс. Милям гинэ анаймы Мар но вераса ӧз лэзь. Юонъёстэс юэлэ но Анай визьдэс эн ыштэ. Ой, мар мылкыд сётоды Тӥ милемлы, эшъёсы. Асьтэос ке кызьы-о, Ой но, ми озьы. Ой, вань, лэся, вань, лэся, Сектаны но эсэпсы. Сётылэм но сюмыкъёссэс Быдтыса юизы. Выль кенлэн анаеныз атаез, мылкыд сётыса, быдэн одӥг сюмык юо. ТӦРО. Эшъёс, ойдолэ ӧжыт эктом, весь кырӟалод-а? Ачим но эктыса лэзё али. Тӧро эктыны потэ. Сюанчиос кырӟало, кизэс чабо. Экто али, экто али, Эктэмъёсы туж потэ. Та люкаськем калыкъёсын Тодматскеме туж потэ. Эктэ, нылъёс, эктэ, нылъёс, Сапегдэс эн жалялэ. Сапегдэс ке, ой, жаляды, Эктытэк но кылёды. Тӧдьы носки, сьӧд галоши Кинлэн пыдаз уз кельшы. Милям капчи мылмы-кыдмы Кинлэн сюлмаз уз кельшы. Тыпыр-тыпыр, ой, карыны Тыпы выж пулъёс кулэ. Та даурме ортчытыны Ачим кадь туган кулэ. Тыпыр-тыпыр кариськод но, Катаед бон аслад-а? "Туган", "туган" шуиськод но, Туганэд бон аслад-а? Ой, кыдёке, туж кыдёке Пукон пуктыса кельтӥ. Ой, кыдёке, туж кыдёке Туган кутыса кельтӥ. Гурезь улын, гурезь йылын Сюэн, сюрсэн муш лоба. Сю ар, сюрс ар ум улэлэ, Вае валче уломе. Арган шудыны кутске. Нылъёс куинен-куинен потаса, вошъяськыса экто. Пиос пуньыосын шудо. ПИЛЭН АНАЕЗ. Я, эшъёсы, бекчезэс куроно вал ини, вань меда пурысьтам бекчезы? Сюанчиос бекче поттон гурез кырӟаны кутско. Дас кык эгесо бекчедэс но Поттӥды ке, Ми бертом. Ӧд ке поттэ, Ум бертэ. БӦРЫСЬЧИОС. Ӧвӧл милям бекчемы, Ойдо бертэ гуртады. СЮАНЧИОС. Тямыс сэрего пияла но Сётӥды ке, Ми бертом. Ӧд ке поттэ, Ум бертэ. БӦРЫСЬЧИОС. Ӧвӧл милям пияламы, Ойдо бертэ гуртады. СЮАНЧИОС. Сэрего но басмадэс Сётӥды ке, Ми бертом. Ӧд ке сётэ, Ум бертэ. БӦРЫСЬЧИОС. Ӧвӧл милям басмамы, Ойдо бертэ гуртады. СЮАНЧИОС. Пурысьтам но бекчедэс но Юимы ке, Ми бертом. Ӧм ке юэ, Ум бертэ. БӦРЫСЬЧИОС. Ойдо, мелэ юэлэ, Собере ни бертэлэ. Потто пурысьтам бекче, выж лёгет вӧлдо но сектаськыны кутско. Нылдылэсь но котырзэ но Поттӥды ке, Ми бертом. Ӧд ке поттэ, Ум бертэ. БӦРЫСЬЧИОС. Ойдо, мелэ басьтэлэ, Собере ни бертэлэ. Ныллэсь сандыксэ потто. Тӧро сандык вылэ пуксе но дун курыны кутске. Сюанчиос но бӧрысьчиос ваче кыскало. ТӦРО. Ой, эшъёсы, калленгес, сандыкез вӧсь карыны шедьтоды. Кумае та сандыкез кызь ар бичаз. Маиз но ӧвӧл отын, адӟиды ке, паймоды. СЮАНЧИОС. Вай али ӝутыса утчалом. Маке туж секыт, кирпич тыремын ӧвӧл-а татын? ТӦРО. Туэ арын кирпич но туж дуно. Ма, дӥськутэз укыр трос, соин сандыкез ӝутыса вормонтэм. Вӧзаз эшшо кык тушакез, сизьым миндэрез вань на. Пилэн атаез коньдон поттэ но сётэ. ТӦРО. Осто, ма, та ваньмыз-а? Кумае таӵе дунтэм сётыны ӧз лэзьы. Тушакезлы но вай. Одӥг гинэ ӧвӧл, кык ук тушакез, нош миндэрез кӧня! Атайзы нош ик коньдонзэ поттэ. ТӦРО. Я, сёто ини, тырмоз, дыр. Я, ӟеч улоно мед луозы. Корка тыр нылпизы мед луоз, гид тыр - пудозы. АТАЙЗЫ. Озьы мед луоз ини. 1-ТӤ СЮАНЧИ. Я, эшъёс, чортӥське ини, бертон дыр вуиз, лэся, ини. (Сюанчиос пӧлысь огез нылмурт кырӟаны кутске.) Бертоно ни вал, Бертоно ни вал, Милям таӵе вакыт Берто ини вал. Изёно ни вал, Изёно ни вал, Милям таӵе вакыт Изё ини вал. ВЫЛЬ КЕНЛЭН ЭШЕЗ (келясь ныл). Я, эше, сюанчиос чортӥсько.Ойдо, кошкон дыр вуиз. Выль кен кырӟаса-вераса, анай-атаеныз люкиське. Сьӧрлось гуртэ бызисько но, Монэ нуыны лыктӥзы. Монэ нуыны лыктӥзы но, Четверть вина ваизы, Дядие туж шумпотӥз. Сандык бордам кутскизы но, Мемие бӧрдын кутскиз. Венчать кароно шуизы но, Йырсиме кык пунӥзы. Йырсиме кык пунӥзы но, Ныл даурме басьтӥзы. Ӟеч луэ ни, семьяосы, Мон табере кошкисько. Мон табере кошкисько, Чаль уд адӟе ни монэ. Ныллэн анаез но тӧрозы сюанчиослы кузьымъёс сётъяло. СЮАНЧИОС (кырӟало). Гуре тырем картошкалэн Октон дырыз вуэмын. Татчы лыктэм сюанчилэн Кошкон дырыз вуэмын. Бӧрысьчиос киоссэс шонаса келясько. Кыкетӥ суред Бӧрысьчиос шулдыръясько. Пилэн корказ нылэз пыртӥзы. Сое ӵушконэн-нянен пумитазы. Ӝӧк вылэ тыраз сиён-юон пуктылэмын. Выль кенлэн сандыкысьтыз дӥськутсэ поттыса, корка пушкы адӟымон азе ошыло. дӥськутэзлэн ТРОСЭЗЛЫ НО ЧЕБЕРЕЗЛЫ ПАЙМО. Сцена вылэ кырӟаса бӧрысьчиос пото. Гырлы куара кылӥське. Кинъёс, кинъёс, кинъёс, кинъёс Лыктӥллям? Сибы нылъёс, Сибы пиос Лыктӥллям. Маин, маин, маин, маин Лыктӥллям? Пар валъёсын, пар валъёсын Лыктӥллям! Малы, малы, малы, малы Лыктӥллям? Кырӟан-веран, кырӟан-веран Лыктӥллям. Корка пыризы, ӟечъяськизы. Одӥг ӟенелике аракы поныса, тӧролы лэзизы. ТӦРО. Птр-р-р-р. Ой, сильтӧл кадь ик ваизы, курдаса кулӥсько вал. Йыгнай гурезьтӥ шонерак васькытӥзы, ӧжытак гинэ Кебит шуре ӧз пыртэ. Осто, татын кӧня куноос вылэм, нош кыӵе чебересь соос! 1-ТӤ БӦРЫСЬЧИ. Тон милемлы бӧрысь гур сётыса лэзь, ум тодӥське ни. ТӦРО. Я, тани сёто. (Учкисьёслы.) Мон соосыз алдало али... (Кырӟа.) Туганэ, туганэ, Пуксьы мон вӧзы. Буйгаты мынэсьтым Мӧзмем сюлэмме. Буйгаты мынэсьтым Мӧзмем сюлэмме. 2-ТӤ БӦРЫСЬЧИ. Ой, нылъёс, та асьмелэн гурмы ӧвӧл ук, алда, лэся, тӧромы. ТӦРО. Я, алдаськем-а, тӥляд гурды ӧвӧл шат та? Тани шедьто, гур пыдсы ик пырыса утчало. А-а, тани шедьтӥ. (Кырӟа.) Сэзь-сэзь гинэ кариське, Пезь-пезь кариське, Эн сётӥське та Сибы но, Ой, шыд-няньлы. Тэтчом гинэ но поттылом Пурысьтам бекчедэс. Пурысьтам но бон бекчеды Жаль ке но потэ, Малы-о бон ваиды Милесьтым сузэрмес? Милям гинэ но сузэрмы Сузэр-а, мар-а? Лавкае но бон пуктылэм Ӟуч мунё кадь. Милям гинэ но эмеспимы Эмеспи-а, мар-а? Гур урдсы но бон думылэм Мес кунян кадь. Эшъёс, ойдолэ али эктыса лэзём. Нырысь ачим экто. (Экто, кырӟало.) Укно улам уӵы чирдэ, Оло, потса кутом-а? Мылы-кыды весь тон вылын, Оло, туган кутом-а? Тӧро анай-атайёссэс ӧте. Соос экто. Собере мӧйыос выль кенэн эмеспиез эктыны чорто. Бӧрысьчиос ваньмыз экто, маскаръясько. 3-ТӤ БӦРЫСЬЧИ. Ой, воксё жадим ини. Ойдолэ выль кенэн эмеспилэсь мар ужаны быгатэмзэ эскером. Со вакыт анайзы пурысьтам бекче поттэ. Тӧро калык азе потыса кырӟа. Пурысьтам но бекчедэс Юо шуса лыктэм вал. Вай секталэ пыд выжыям, Ой, султыса. Соку выль кен табань пыже. Гурысь потто сутӥськем табань. Кыкетӥез табань чебер пыжемын. Эмеспиез пу пильылыто. Анайзы со вакытэ кузьмаське. Кинлэн ке чыртыяз картошка оше, мукетызлы - горд кушман, куинетӥезлы - кешыр но мукет. 4-ТӤ БӦРЫСЬЧИ. Я, чортӥське ини, бертон дыр вуэмын. (Кырӟало.) Тӧл тӥ палась тӧлан дыръя, Кылӟиськыса сылӥсько. Одӥг ке но куараостэс Уг кыл меда шуыса. Тӥ уд лыктэ ми доры но, Ми ум лыктэ тӥ доры. Ку адӟомы асьмеос ук Одӥгмес но одӥгмы. Ой, тау ини, тау ини но Сюдэмлы но сектамлы. Талэсь гинэ бадӟымъёссэ Шедьтыса но тӥ улэ. Сюанчиос бӧрысьчиосты келяло. Дасяз Л. Сергеева , "Удмурт дунне", 20.07.91. 7184 Завьял сюан Адямилэн улоназ семья кылдытон - со туж бадӟым уж. Удмурт сюан сцена вылын пуктэм пьесалы укша. Рольёсты шудӥсьёс но вань: тӧро, ныл келясь но мукет. Тӧро - со сюанэз нуись валтӥсь герой, гур сётэ, шулдыръяськытэ, ваньмыз солэсь кылзӥсько. Сюан дӥсь - самой чеберез, самой ӟечез. Сюанлы шуыса, юри дӥськут вурылӥзы. Коркаез но сценаез сямен чеберъяло. Укноосы пужыятэм ӵушконъёс, чалмаос ошыло, валесэз ӝуткам шобретэн шобырто. Лыктыкузы валъёссэс чебер изнэсэн, букозэ буртчин лентаосын, гырлыен чеберъяло. Сюанэ лыктэмъёс пӧлысь кин ке уг кырӟа, уг шулдыръяськы ке, сое ӵушконэн шукко. Ӧд ке кырӟа, чук уз сётэ. Нош чуктэк бертӥд ке, астэ умойтэм воземед шуыса малпалозы. Сур, аракы юылӥзы. Кудӟымоназ одӥгезлы но юыны уг яра - сереме уськытозы. "Йырдэс эн ыштэ, ӟольгыри мында гинэ юэлэ", - шуыса келялозы вал сюанэ мынӥсьёсыз. Жугиськонъёс, керетонъёс ноку но уг луо вылэм, одӥг семья кадь ог- огзэс гажаса, паймытыны турттыса, ӟечсэс возьматыса шулдыръяськиллям. Котькуд ёрослэн аслаз сюан но ярашон кырӟанъёссы вылӥллям. Соос пӧлысь куд- огъёссэ тодэ вайытэм потэ. 1. Ӟеч иворез кылӥм но Ми лыктӥсь но кариським. Ми лыктэм но поннамы, Вож ваись но эн луэ. Ми, пе, но лыктӥмы Дас кык но, пе, иськемысь. Бусыетӥ ми потӥм Тыр толэзь но югытъя, Возь вылтӥ но ми потӥм Италмас но югытъя. Нюлэстӥ ми потӥм Кызьпу туй но югытъя, Выж вылтӥ но ми потӥм Вал пыдъёс но куарая. Ульчаетӥ ми пырим Электротыл югытъя, Ульча кузя ми ваським, Кесэген но пилем кадь. Капка азяды ми вуим, Бугыръяськись пилем кадь. Азбарады ми пырим, Лек гудыриос но кадь. 2. Вася сватлэн тубатэз Позыриё-позыриё. Тӥяськымтэ кусъёсмес Тӥяса но тубимы. Корка полэз но солэн Ӵуж лакен но вӧямын. Ӵуж лаковой сапегтэк Пырыны но ӧм дӥсьтэ. Корка пушказ пуконъёсыз Лыз бархатэн шуккемын, Лыз буртчин но дэремъёстэк Пуксьыны но ӧм дӥсьтэ. Котырак со пуконъёсы Лыз дыдык кадь ми пуксим. 3. Шулдыртэ но шулдыртэ Вася сватлэсь четлыксэ. Пужым-а но кыз-а медам Солэн, пе, но четлыкез? Пужым ик но, видно, "Жон" шуыса шуккиське. Шулдыртэ но шулдыртэ Оля сватьялэсь ӝӧк вылзэ. Ӝӧк вылаз пуктэм Тыр шунтэм вӧйзэ, Сое со лэсьтэм Инмысь тыр толэзен. Ӝӧк пумаз пуктэм винаосыз Кабакысь винаос кадь. Милям, пе, но мусоез Коля, пе, но ысватмы. Солэсь но, пе, мусоез Маня, пе, но сватьямы. Эшшо но, пе, мусоез Лиза пичи сватьямы. Солэсь но, пе, мусоез Петя пичи ысватмы. 4. Тӧдьы льӧмпу сяськаез ми Тӧдьы катанчи кожам. Возь выл тӧдьы сяськаез ми Манет ӟузъет кожамы. Инвожолэсь сяськазэ ми Выль кенак кожамы. Легезьпулэсь сяськазэ ми Выль эмеспи кожамы. Италмаслэсь сяськазэ ми Пинал нылъёс кожамы. Купанчалэсь сяськазэ ми Пинал пиос кожамы. Бакчаысь мак сяськаез ми Пинал сватьяос кожамы, Сиреньпулэсь сяськазэ ми Пинал сватъёс кожамы. Вишняпулэсь сяськазэ ми Казмас калык кожамы, Яблокпулэсь сяськазэ ми Асьме эшъёс кожамы. 5. Милям но сватъёслэсь Подвалзэс учкем потэ: Вань-а меда, ӧвӧл-а Соослэн пурысьтамзы. Шедьтӥм ик но, шедьтӥм ук Сватъёслэсь но бекчезэс. Однако но вылэм ук Соослэн пурысьтамзы, Чакламлэсь но, малпамлэсь но Ортчытэсь но вылӥллям. Ойдолэ но мыноме Казмаска но шур кузя. Льӧмпу-а но шедьтомы, Сирпу-а но шедьтомы. Сирпуэз ке ӧм шедьтэ, Бадьпуэн но яралоз. Бадьпуэз ке ӧм шедьтэ, Ыргонэн но эгсалом. Ыргонэз ке ӧм шедьтэ, Зарни-азвесен эгсалом. Зарниез ке ӧм шедьтэ, Бумагаен яралоз. 6. Ӟечкын ик-а лыктэмын Милемыз кожаськоды? Вордылэм но нуныдэс Нуыны ми лыктӥмы. Куать сэрего кеностэс Куинь сэрего ми кельтом, Някырскем сюрыостэс Пезьгытыса ми кельтом. Нюртылэм сандыкъёстэс Урдсӥньтыса ми кельтом. Тӧлберъёссэ кельтыса, Тыр тысьёссэ ми нуом. Простойёссэ кельтыса, Буртчинъёссэ ми нуом. Трековойзэ кельтыса, Пустолъёссэ ми нуом. Ыргонъёссэ кельтыса, Зарни-азвесь ми нуом. 7. Ӵукна сиськыны пуксид ке, Одӥгез пуньыед кылёз. Соку тодад лыктылоз ук Вордылэм но нуныед. Турнаны но потӥд ке, Огез кусоед кылёз. Соку тодад лыктылоз Вордылэм но нуныед. Араны но потӥд ке, Одӥг сюрлоед кылёз. Соку тодад лыктылоз Вордылэм но нуныед. Ӵукна но султӥд ке, Корка сэргыд буш кылёз. Соку тодад лыктылоз Вордылэм но нуныед. 8. Казмаска но шур кузя Куать пар пыжен ми лыктӥм. Первояз ми нуом Пар ӝуась ӟичыосыз. Кыкетӥяз ми нуом Мамык валес миндэрез, Куинетӥяз ми нуом Варшавской но кроватез. Ньылетӥяз ми нуом Морозовской сандыкез. Витетӥяз ми нуом, Буртчинэз но пустолэз. Куатетӥяз ми бертом, Асьмеос но пуксьыса. 9. Тау улэ но тау улэ Сюдэмлы но сектамлы, Ваньлэсь ваньзэ быдтыны Шуыса ми ӧм лыктэ. Ми пинал но калыкъёс Ӟеч кыл веран ум тодске. Ӟеч кылмес ке кылӥды, Йыр йылады ӝутэлэ. Уродзэ ке кылӥды, Пыд улады лёгелэ, Милям пукем интыямы Уӵы пукса мед чирдоз. Сием-юэм поннамы Тӥлед ваньбур мед луоз, Ойдолэ но мыноме Бай дорысь но бай доры. Шуом, завьялъёс Казмас гуртысь нылэз кен каризы. Озьыен, казмасъёс ярашисьёс луо. Тани соослэн кырӟанъёссы. 1. Кызьпу пӧлтӥ ми потӥмы Кызьпу туй но югытъя. Нюр вылтӥ но ми потӥмы Тузь сяська но югытъя. Выж вылтӥ но ми потӥмы Выж кор но дыбыртэмъя. Ульча кузя ми тубимы Электротыл югытъя. Капказе но ми дугдӥмы, Бугыръяськись пилем кадь. Азбарады ми пыримы, Кесэген но пилем кадь. 2. Берекет но берекет, Ой, мусо но сватъёсы. Талэсь но, пӧй, бадӟымзэ Инмармы но мед сётоз. Кырӟалэ ай, эшъёсы, Мусо сватъёс юыку. Мусо гинэ ысватмы - Василей но ысватмы. Солэсь но, пӧй, мусоез Василиса сватьямы. Эшшо но, пӧй, мусоез Николай но ысватмы. Солэсь но ук мусоез Олёна ной сватьямы. 3. Ӝӧк вылаз вӧлдылэм Ньыльдон вожен ӝӧккышетэз. Ӝӧк вылаз пуктылэм Тыр шунтэм вӧй тэркыез. Со вӧй маин даллаше? Ӵук ӝуась ӵуж шундыен. Со вӧзы ик пуктылэм Сазанэн чорыго няньзэ. Со чорыг малы-о кельше? Лек кошкись но шуръёслы. Ӝӧк шораз ик пуктылэм Карасэн но чечызэ. Со чечы маин-о даллаше? Муш палэпен даллаше. 4. Ойдолэ ной мыноме Пурысьтамзэс утчаны. Вань-а меда дасямез Васьлей сватлэн пурысьтамез? Шедьтӥм ик но шедьтӥм ук Вася сватлэсь пурысьтамзэ. Ойдолэ но мыноме Та Дэри но шур кузя. Льӧмпу-а но шедьтомы, Сирпу-а но шедьтомы? Сирпуэз ке ӧм шедьтэ, Льӧмпуэн но эгесалом. Льӧмпуэз ке ӧм шедьтэ, Ыргонэн но эгесалом. Ыргонэз ке ӧм шедьтэ, Азвесен но эгесалом. Азвесез ке ӧм шедьтэ, Бумагаен эгесалом. 5. Ойдолэ но мыноме Бай дорысь но бай доры. Пичи вань но бадӟым вань, Ойдолэ ной ми доры. Ӟеч ивор ной кылӥськиз, Ми лыктӥсь но кариським. Тыпырак но лёгыса, Шатырак вералом. Шатырак ной вераса, Дыбырак лёгылом. 6. Ю али но ю али Милесьтым курадӟеммес. Гур выл сэргын пӧзьтӥмы, Коӵыш тусе виятӥм. Си али но си али Милесьтым табаньмес. Фарфоровой табаен Кудреватой пыжимы. Дас кык курег пуз чигимы, Йырвонка вӧйын вӧямы. Табанен ке гуньдӥды, Атас вирын гылатэ. 7. Марлы-о синмаськид? Лаковой но сапеглы. Марлы-о синмаськид? Та бабылес йырсилы. Макарьяк колпакен ветлон йырыд Туй чутыр вылэ усиз. Чоголёк ботӥен ветлон быбиед Нин кут вылэ усьылоз. Сафьян перчаткаен нуллон кикиед Нянь шумесэ нӧдылоз. Чильыр-мульыр учкон мимиед Гурт пыд шоры учкозы. Ливий Ураков Котьма ке но... повестьысь люкетъёс "Кыктоос" Онисим агаеныз одӥг аре вордскиз. Кыкназы но ӟырт кезьыт нуналъёсы югыт дуннеын нырысетӥ куаразэс поттӥзы: огез - толшорлэн сизьыметӥ нуналаз, Инмарлы оскисьёслэн быдӟым Рошво праздниказы, мукетыз - кызь одӥгетӥ толсуре, Сталинлэн вордскем нуналаз. Юри турттыса нокызьы но озьы тупатыны уд быгаты. Атайзы, Павел Тимофеевич, араз кык пи лэсьтэмез, сокем чупрес ужамез пумысен йырберзэ кормалляз на но, ма карод на, озьы луиз бере. Нырысетӥ пиезлы, Сталинэз бур карыса, Иовисар ним поныны вуттӥз. Тодысал ке, ӵапак кызь одӥгетӥ толсуре кыкетӥ пиез вордскоз шуыса, та нимез соизлы кельтысал вылэм. Кыӵе умой тупасал. Сталинэз Павел Тимофеевич гажа вал, ма, кызьы, пе, сотэк, дуннеысь вань куанеръёслэн выль инмарзы ук со. Иосиф Виссарионович сярысь Павел Тимофеевич нырысьсэ граждан ожын Царицын дорысен кылӥз вал. Ассэ адӟыны ӧз кылды, сӧсырмыны сюриз. Эмъяськонниын кылльыкуз со сярысь мадемъёссы тодаз кылизы. Сталинэз юн мылкыдо кивалтӥсь луэмез пумысен ушъяллязы, нош ачиз лапег гинэ, шадра, пе, парсь зу кадь йырсиез гордалэс-сьӧд, огъя вераса, тусыз учкымон ӧвӧл. Ӟуч сямен шӧнгыльгес вераське. Секыт сямзэ одно пусйылӥзы на. Кыкетӥ пизылы кышноез, Опрось, Иисус ним поныны турттэ вал. Павел Тимофеевич чутрак пумит кариськиз, Владлен, пе, шуом. Огкылэ вуэмзы ӧйлась, озьы покчизы огшоры Онисим луиз. Кык пиос эгызоос сямен будӥзы, тусын уго кисьтэм-басьтэм огкадь луизы. Уката ик Онисим агайзэ мугорын сутэмез бере. Куддыръя атайзы но соосыз сура вал. Опрось гинэ вордэм пиоссэ нырысь учкемаз ик висъяны быгатылӥз. Эксэй понна ожмаськыса но, граждан ожын но окопъёсын эбылям, сутскем Павел Тимофеевич улонысь вазь кошкиз. Опрось суй-пыдызлы юскиськыны ӧз сёты. Пиоссэ будэтӥз, дышетскыны луонлык кузьмаз. Соосыз, сизьым классъем ШКМ-ез йылпумъяса, колхозазы ик кариськизы, тракторе пуксизы. Та ужын уго тысен но, мукетыныз но уждун бусьтырес усьылӥз. Ньыльдонэтӥ арын тулыс, Горд Армие кошкон азяз, Иовисар кышнояськиз. Артэ будэм Лизаен огазе кариськизы. Ар ортчыса, нырысетӥ май праздник азьын, соослэн нылзы вордскиз. Иовисарлэсь куремзэ лыдэ басьтыса, нунылы Сталина ним понӥзы. Будӥз ке, пе, чебер кылӥськоз: Сталина Иовисаровна. Таӵе нимо адями огпӧртэм Окыльна, Марья кадьёс пӧлы уз сураськы. Иовисар армиын Волга дурын, Саратовен артэ вал. Татын но сое тракторе ик пуктӥзы. Гаубицаез кыскыса нуллӥз. Та пушкалэн гумыез кузь ик ӧвӧл, нош снарядэз парсьпи зӧкта, из коркае йӧтӥз ке, пыры кароз. Тушмон солэсь окопын но, дзотын но ватскыны уз быгаты, собыдӟа снаряд лысьӧмзэ пазялоз. Колхозын валэс юосты кизьыса быдтэмзы бере Иовисарлэн гожтэтэз уйламтэ шорысь Белорус музъем вылысь вуиз. Ож перилэсь матэктэмзэ шӧдыса, Горд Армилэсь лыдзэ та дырлы вить миллионозь вуттӥзы. Куартолэзь шорын выль но выль ожгарчиосты шунды пуксён палась кунгож доры келязы. Соос пӧлы Иовисар но сюриз. Кыдёкысь гожтэт Опросьлэсь но Лизалэсь мылкыдзэс сӧриз. - Толон гинэ кырныж коргид йылысен ӧрыд( вераз, нош туннэ пиелэн гожтэтэз кунгож дорысь вуиз. Э, сюлмы! Отын ож тыл пуромоз шуыса верасько ук. - Опрось нюромем синъёссэ ӵушконэн ӵушылэ. - Онисим, ма уд луласькы, - Уз, уз, война уз луы, - Лизалэн оскемез уг поты, нош синъёсыз аслаз но котмизы. Пичи нылыз жир! бӧрдыны ӧдъяз. Онисим номыр ӧз вазьылы, корка шортӥ олань-талань поръя. Собере сельсоветэ кошкиз. Отын секретарьын Лизалэн апаез ужа. Колхозъёсын ужасьёслы паспорт уг сётъяло вал бере, сое воштӥсь справка курыны малпаз. Сыӵе кагазэн, пе, Лизаен ӵош Белоруссие Иовисар доры ветлом. Нош сельсоветысь секретарь сузэрзэ Онисимен ӵош мыныны ӧз лэзьы: - Сонякеме вож нуныен потод-а? Справка но сётыны ӧз дырты. Печатен кагазэз возьматӥз. Отын гожтэмын вал, Ижкаре сиён-юон басьяны ветлӥсьёслэсь лыдзэс кулэстон вылысь, пе, сельсоветъёс колхозникъёслы справка медаз сётъялэ. - Ма, татын Иж сярысь верамын, нош мон Белоруссие мынӥсько ук, - тэльмыриз Онисим. - Нокытчы потаны лэземын ӧвӧл. - Сютэмъёслы сюрес пытсаськоды, иське... А милям няньмы вузаны но тырмоз, тодӥськод ук. - Соиз озьы. Тани мар, тырылляськисьёс(( луизы ке, тон нянь утчась ӧвӧл, валад- а? Секретарь справка гожтытозь, Онисим ӝӧк вылысь мукет кагазъёсты лыдӟыса пукиз. Огаз Понино райсоветлэн тӧроез Фоминых сярысь гожтӥллям. Райпоазы вуэм басмаез со кивалтӥсьёслы лушкемен вузатэм. Соослы кышъям штанэн ветлыны возьыт, пе. Нош аслыз тӧро костюм но час черодтэк басьтэм. Та понна Фоминыхлы зол гинэ йӧттӥллям. Кошкон азяз Онисим чабей пызен костюм воштӥз. Выль ӧй вал ни со. Казакпилы бен йӧнгес кулэ вылэм но, таиз но яралоз ини, сюрес вылын ӟеч калыклэсь сокем уз висъяськы. Онисимез ӝоген армие басьтоно вал бере, сюрес вылэ потытозяз военкоматэ ветлытэк ӧйлась. Толэзь пумозь ветлыны лэзизы. Нялтас йырзэ ӵышкытӥз. Тодысал ке, кӧня дырлы бабляосыныз люкиськемзэ. Нош йырсиез вожъяськымон вал. - Марлы тыныд пыгылиё изьы утчанэз, тынад со йылад будэ, - шуылӥзы куд-огез. Йырси ӵышконниысен синучконысь ассэ адӟиз но, сюлмыз нёрк луиз: чылкак музон мурт - нырыз кузь шуыса, со азьвыл но тодэ вал, нош табере со уката нуям, лэся. Онисим лулӟиз: ма карод на, Инмар сыӵе ныр сётэм бере, йылзэ вандыса уд кушты ук, быдэс даурад нуллод ини. Оломалы тодаз лыктӥзы школаын дышетэм кылбуръёс: На севере диком стоит одиноко На голой вершине сосна... Нырыз валлин таӵе чуръёсты тодэ ваемез туж тумошо йӧтӥз, ӵышкись муртэз паймытыса, горак серектӥз. Котырзэ тырыны анаез Онисимлы песьтэр ӵектэм вал но, со атаезлэсь шук-шак чемоданзэ поттӥз. Лиза солэн дасяськемез шоры мӧзмыт учке. - Эн ӝожа, ӝоген картэныд адӟиськоды, - буйгатӥз Онисим. - Воштыло мон сое кӧнялы ке. Бертылоз. - Осто-о, верам кылыд зэмасал ке... - Пӧрмоз. Малы ке-а йырме ӵышкытӥ, кожаськод? Иовисарен огкадь мед луомы шуыса. Мон кылё, со кошкоз, нокин номыре валаса уз вутты. Лизалэн мылкыд каньылаз, пальпотыса шыднарзэ( ӟыгыртӥз. Собере палэнтӥськиз но серемпыр юаз: - Нош алдад ке? Бертыса астэ Иовисар шуод эшшо. Кин тодмалоз тӥледды? - Озьы эн вераськы. Картсэ мукетыныз сурась кышноез исьникут шуо, - чурыт меӵкытӥз Онисим. Мултэс лек ваземзэ валаса, либытэн ватсаз: - Тон уд алдаськы, Иовисарлэн синмыз лызмыт-чагыр, нош мынам чагыр шуыса тодӥськод. Лиза серемпыръяськемысь уг дугды: - Нош бер ӝыт яке уин вуиз ке? - Анай вань на ук, сое уд ӧрекча. - Нош огнам ке дорам тупай? - мерске Лиза. - Э-э, оломар эн вераськы, - Онисим киыныз шонтӥз но коркась потӥз. Нуналъёс ог-огзэс уйыса кадь питырало. Онисимлы дыртоно. Можгаын поездэ пуксьыкуз, келясез ӧй вал. Гуртын та вие ужъёс уго лыдтэм. Кыл - юаз-вераз, сюрес - Белоруссие вуттӥз. Кызь одӥгетӥ инвожое вазь ӵукна Дзержинск сьӧрысь кыӵе ке разъездын вагонэ лапеггес гинэ пимурт пыриз. Сьӧдкысъем, сюбег ымныро, синъёсыз быльккес. Выросъёсызъя но мар Онисим валаз, таидлы воргорон шӧм пырымтэ на, дас ньыль аресъёс сяна уз луы. Пукыны ваче тупазы. Тодматскизы. - Арон, - кизэ мычиз пияш. Лида каре, пе, мынӥсько. Онисимлэн но отчы мынэмезлы паймиз, туннэ-ӵуказе война пуромоз ук! Поездын калык со сярысь гинэ вераське. Минск сьӧры потыны кӧбераса, ваньмыз сямен васькыса кылизы ни. - Зэм но, быдэс вагонын ӵошен мынӥськом, - пияшъя кариськиз Онисим, - нокыӵе куара-ланга уг кылӥськы. - Калык котырзэ ворттэ, кунгожлэсь пыдлогес, - валэктэ Арон. - Мон но тани куинетӥзэ берыктӥськисько ни. - Зэм ик война, иське? - Онисим малпаськонэ усиз. - Газетъёсын война уз луы шуыса гожъяло ук, юнме супыльтон, пе, со. - Газетын - одӥг, путэтысь - мукет. - Кызьы озьы? - Уд тодӥськы шат? Калыкын шуо: урод ивор путэтэтӥ но пызьыра. Поезд дымбыр-йыг карыса дугдӥз. Чик юнме интые. Бӧрысь тодӥзы, Чеховлэн веросысьтыз йыртэмась музэн, кин ке рельса бордысь гайкаосты октэм. Тау чугун сюрес вылын ужасьёслы, адӟыса вуттӥллям, поездын мынӥсьёслэн йыръёссы сотэк быгылес ӧй кыльысал. - Сьӧськабъёс! - Арон мыжыксэ сэзъя. - Фашист курокъёс! - Огшоры калыкез быдтыны малпаллям. Ма, калыкез но - тон но мон, ымдурамы самой йӧлмы куасьмымтэ на. - Ӧвӧл, эке, соос мукетъёслы кайгу дасяллям вылэм, ожчиосын зэмос эшелон азьпаламы мыныны кулэ, пе, вал. Кытын ке ӝегатскем. - Иське, соослы?.. - Озьы угось. Поезд вырӟиз, сюресэз эскерыса выллем, каллен гинэ мынэ. Арлыдоос, быронлэсь утемез понна, Инмарлы тау карыса вӧсяськысалзы ни, нош пияшъёслэн тодазы ӧз лыкты. Мылкыдзы ӟеч ик ӧй вал. Шып пуко. Онисим синъёссэ укное чӧлтӥз. Отын белорус музъем. Граждан ож дыръя Польша киулэ кылемез. 1939 арын, Гитлер полякъёсты ожманы кутскем бере, татысь калык Совето Союзэ пырыны кариськиз. Война ке кутсконо, кемалась-а ож тыллэсь ватскылӥзы? Но татӥын вир уз кисьтӥськы, дыр. Сталин шуиз ук: "Мурт музъем милемлы кулэ ӧвӧл, нош асьмелэсь одӥг висьсэ но ум сётэ. Тушмонэз ас пузкараз пазьгом". Аронлэн но йыраз ож пуромон сярысь малпанъёс бергало вылэм. Со Горд Армилэн вормонэзлы уг оскы, угось гитлер ожгарчиосты ас синмыныз адӟиз ни. Чидаз но. Арон - еврей. Фашистъёс Польшаын солэсь анай-атайзэ виизы. Аслаз но йырыз мырдэм быгылес кылиз. Лидаысь улонниязы али нокин ӧвӧл ни. Юрт бервылысьтыз кылем котырзэ кырсиез доры нуллэ. Апаезлэн картэз - эмчи, хирург. Куартолэзе со кышноеныз ӵош Волга дурысь вуэм но, медсанбатэ ужаны пуктӥллям. Онисимлы удалтӥз, Аронлэн кырсиез Иовисарен одӥг дивизиын служить каре вылэм. Лидаысен солы медсанбатэ жингыртӥзы но тодӥзы, кытын али Онисимлэн агаез. - Мынонэз куамын иськем ёрос луоз, - валэктӥз Арон. - Пыдын со сюресэз ӝытозь мертаса уд вутты, велосипед утчало ай. Аронлэн патерез Онисимлы ӧз кельшы. Выж вылын олома но лошъяське, пуконъёс кытчы ке шедем пуктылэмын, пианиноен ӝӧк ваче дыгемын, вӧзтӥзы ортчыку одно ик бордазы шуккиськоно. - Шудӥськод-а? - пианино вылэ чабкыса патер кузёлэсь юаз Онисим. Арон кыл вератэк пуконэз дораз кыскиз, сӥё-дано артист музэн ялӥз: - Людвиг ван Бетховен. "Лунная соната". Еврей пилэн чиньыосыз улысь сюлэмез бугыртӥсь крезьгур чузъяськиз. Онисимлы со туж тодмо потӥз. Кытысь но ку меда кылэмез вань? "Праздник святого Йоргена" нырысетӥ ӟуч куараё фильмысь ке шат? МТС-ын дышетскыкуз сое быдэс группаенызы учкыны ветлӥзы вал. Отысь крезьгур туж кельшиз, но Аронлэн шудэмезлы уг укша. Оло "Мы из Кронштадта" фильмысь? Ӧвӧл. "Чапаевысь" - тӥни кытысь! - "Чапаев"! - кеськиз Онисим. - Ма - Чапаев? - шудэмысь дугдӥз Арон. - Кино сыӵе вань. Тушо денщик тӧдьы офицер доры пырем дыръя та крезьгур чузъяське. - Чапаев, шуиськод? Граждан ожысь дано командир. Со сярысь фильмдэс учкеме ӧвӧл. Бетховенлэсь крезьгурзэ отчы пыртӥллям ке, умой мар ке, дыр. - Зо-ол. Пичиос вить-куать пол учкыны ветлылӥзы. Оло, пе, Чапаев уз быры, вуысь потоз ик, - серектӥз Онисим. - Бен, Чапаевез тӧдьыос быдтӥзы, - султыса вазиз Арон. - Нош тодӥськод-а, Октябрь революцилэсь тужгес дано муртсэ кин-о отӥ кариз? - Ленинэз шуиськод ке, сое Каплан виыны турттэ вал. - Мар Ленин... Ленинэд косъяськись гинэ вал, нош калыкез кин-о бергатӥз? - Сталин! - тодэмезлы шумпотыса кеськиз Онисим. - Сталин - со тон кадьёс понна. Джон Ридлэсь "Десять дней, которые потрясли мир" книгазэ лыдӟемед ӧвӧл уга. Америкаысь писатель со, Москваысь Кремль борддор вӧзы ватэмын. Онисимлэн зэмен но Джон Рид сярысь кылылэмез ӧй вал. Сталин генсек луэм бере, солэсь книгаоссэ Совето Союзын огпол но ӧз поттылэ, малы ке шуоно, Октябрь революцилэсь кызьы ортчемзэ возьматыса, Джон Рид "вань калыкъёслэсь инмарзэс" чик адӟымтэ кадь, нырысь интые Троцкиез пуктэм. Арон - еврей, Троцкий но со выжыысь ик, нош еврейёс ас калыксэс котьку ушъяло. Ог-огзэс кыдёкысен адӟон, кунултон, вылӥе ӝутон сямзы соослэн лулазы-виразы мур пыӵамын. - Ме, кузьмасько, - Джон Ридлэсь книгазэ Онисимлы сётӥз. - Дорад бертыкуд мӧзмыт уз луы, лыдӟыны кутскид ке, дугдыны уд быгаты ни. Нош таиз агаедлы, - пичи гинэ ӟенелик спирт кузьмаз на. Велосипед вылэ пуксьыса урамъёстӥ ворттыкузы Онисим синйылтӥз: мынӥсь-ветлӥсьёс уйшор уин мында но ӧвӧл, тэк сылӥсь-пукисез огзэ но уд адӟы, ваньмыз кытчы ке дырто. Ульча пумынгес сылӥсь пу коркаос пала вуизы но, котькудӥзлэн муръёысьтыз бугыр ӵын потэ, котырак дыльды шыр васькымон ческыт зын вӧлскемын. Паймод, мар-о та калык гужем шорын нуназе куазен одӥгтэмак сиён пӧра меда? - Арня ӵоже пудозэс вандыло ни, сӥль ӵынато, - валэктӥз Арон. - Ӵынатэм мар ке - со кемагес уг сӧриськы. - Гурын ӵынато шат? - паймиз Онисим. - Соослэн муръёоссы сӥль но чорыг ӵынатыны юри тупатэмын. Та югыт дуннеысь мае но уд адӟы вылэм: муръёын сӥль ӵынато, удмурт шаерын таӵеез нокинлэн йыраз лыктымтэ, лэся. - Выльнуналэ така вандӥськомы ке, ми сӥлез йӧгуэ тыриськом, ӵынатыса ум курадӟиське, - Онисим малпанзэ шара вераз. - Йӧгуэз сьӧрад уд басьты... - Сьӧрад? Малы? - Ма, ӧд вала шат? Войналэсь кышкаса, соос пегӟыны дасясько. Полигонэ Иовисар доры кожизы гинэ, шугадӟонэн пумиськизы: вӧзтӥзы пуля кадь ортчем капчи машиналэсь палэнскеменызы сэрен, сюрес урдсысь кызьпу шоры дыгиськизы но музэ сапкиськизы. Ойгетыса султӥзы, учко но - Онисимлэн дэрем саесэз копак виресь, ньылӟиськем пельпумыз чидантэм кужекъя. Ӝоггес мар ке но кароно, сотэк яраез азоз. Велосипедэ усьтыр-табыр пуксизы но азьлань ширтӥзы. Вуизы. Постовой Иовисарез мырдэм-мырдэм ӧтиз. Агай-вынъёслэн пумиськонзы кӧсыт вал. Шумпотыса ӟыгырскемзы но ӧз луы, Онисим сӧсырмыны сюриз уга. Шуак Аронлэн йыраз лыктӥз: яраез спиртэн зырано ук! Пияшез эмъямзы бере ӟенелик солдат кие вуиз. Соиз паль паляз, ӵапак кызь одӥгетӥ инвожое командирезлэн вордскем нуналыз, пе. - Сержантмы йырвыл трос шумпотоз талы, - Иовисар спиртэн ӟенеликез мур ӟепаз ватӥз. - Тон, Онисим, али ик хуторе мын, отын милям эмъяськонни нергемы вань. Ай командирлэсь юаськыса, ачим но тӥледын ветло. Ӝоген соос куиньназы хутор пала вырӟизы. Арон велосипедэ пуксиз, нош "кыктоос" артэ вамышъяло. Онисим ас малпанзэ вераз: со агаез интые татчы кылёз, Иовисар Пычасэ кошкоз. Нокин номыре уз вала. Батареялэн командирезлы гинэ ке шат верано? - Сюресэд кузь, тыныд туннэ ик Лидаысь поездэн кошконо, - Онисим агаезлы индылэ. - Уть ай, котыр ваньмыз война сярысь верасько. Аронлэн но кыл йылаз со гинэ. - Война ке кутскиз, татчы кылисезлы бырыны кема ик ӧвӧл, - Иовисар шара малпаське. - Но кин-о вералоз, кутскоз-а со, уз-а? - Соиз-таиз сярысь тунаса эн улы, тынад сюресэд одӥг - Пычасэ, - мӧйы мурт музэн, лад-лад нодъя Онисим. - Ож ке пуромиз, мынам йыры быгылес кылёз, Инмар утёз, со ик, тонэ утён вылысь, монэ татчы вуттӥз. Эмъяськонниын фельдшер Онисимлэсь шуккиськем пельпумзэ миськиз, маин ке зыраса, ӝик-ӝик биниз. Сӧсырмем муртэ со кӧлыны кельтӥз. Иовисарлэн гордармеец книжкаезъя. Та ик луиз "кыктоослэн" ог-огзэс воштэмзы. - Ӟеч лу, выны! Марысь-мар ке - чеброс, ява. Инмаред мед утёз. Тау лыктэмедлы, таӵе-таӵе ӟечтэ улытозям уг вунэты. Та вал Иовисарлэн берло кылъёсыз. Со Аронэн ӵош Лидае кошкиз. Курег ӵӧн( Эмъяськонни нюлэсчилэн улыно-вылыно юртаз интыяськемын. Коркалэсь кузёзэ кӧня ке нунал талэсь азьло гинэ кыӵе ке курок пуртэн бышкалтэм. Берласянь. Кышноез кулэмын ни вылэм. Корказ анай-атаез но бызьыны вуэм Улияна нылыз улыны кылиллям. Пересьёслэн кӧлантӥзы вылӥяз, нылзылэн - улӥяз. Соин ӵош Паша санитаркаез интыяллям. Пересьёсын артэ нимаз висъетын фельдшер интыяськемын. Нош висись ожчиослы кылльыны улӥысь кунопал висъетэз тупатӥллям. Отын койкаез кык гинэ. Огаз пушка лафет улэ пачканы шедем Митыр Митан кылле, мукетыз - буш. Митан - со Онисимлэн гуртысьтыз ик пи. Иовисарен одӥг пушка борды юнматэмын, снаряд нуллӥсе. Онисим агаез интые кылем сярысь Митан тодӥз но чик ӧз паймы, эшез понна шумпотӥз гинэ. Адями быгатӥз бере, малы солы тушмоналод. Онисим висисен артэ пуксиз. Митан юалляськем вылысь юалляське, гуртысь ваньмыз сярысь тодэмез потэ. Мӧзмем ик, шӧдске. Зэмос нимыз солэн - Митрофан, но гуртын сое Митан гинэ шуо. Нош Митыр? Валлё(( удмуртъёслэн нимтулзы вӧзы выжы нимзэс будэтылӥзы на. Митрофанъёслэн юрт муртъёссы Митыр нимын ветлӥзы. Тӥни озьы Митрофан Митыр Митан луиз. Воргорон шӧмаз пыремез бере солы Нюжтэм кушем ним лякизы на. Нылъёсты посыны укыр яратылӥз уга. Со понна кӧня тыш но сиылӥз, ӧз визьмаськы. Кыӵе ке нылмурт вылэ синмыз усе ке, олокытӥ-мартӥ котыраз биниське но куак улэ кыске ини. Соин ик зэмос яратонлэсь шӧмзэ ик веръямез ӧй вал на. Волга дурын частьсы сылыку на ай, пушказэс Иовисарлэн тракторез борды дэмӟытыкузы, Митанлэн макесэз вылэ лафет усиз. Солдатэз эмъяськонние выдтӥзы. Мугорзэ бур пыдес улысеныз мӧля дорозяз гипсэн коросазы. Калык сямен педло но потаны, пукыны но уг быгаты. Сӧсырмем муртлы юрттӥсь, утялтӥсь санитарка Паша луиз. Та трос нылпиё, куанер семьяын будэм нылмурт, ас мылкыдызъя армие кошкытозяз, ӟеч улонэз адӟылымтэ. Мӧзмыт уй-нуналъёссэ егит шудонъёс гинэ ӧжытак шулдыртылӥзы. Пӧлат-вият дорысьтыз ӧжытаклы ышытскоз но пукон коркан сое ӟыгыртӥсь ӧз ке луы, берен дораз дыбыр кошкоз вал. Нош ӟыгыртэмлы ноку ӧз пумитъяськылы. Мукет нылъёсты мусояло ук, маин Паша соослэсь пӧртэм? Быдэ вуэмъяз мугорыз чеберскиз. Кузялэс ымнырызлы, бадӟым ымызлы луыса, пиос понна кутъёслы чечы кадь ӧз потылы, дыр, но пимуртлы тынад тусбуед котьмалэсь мусо уг поты ук. Уката ик пеймыт уйёсы, ӟыгырскеме тугъяськем егит мугоръёс гомӟыку. Арлыдызъя санитарка Митанлэсь куинь аресъёслы бадӟымгес. Сӧсырмем пияшез со нырысь-валысь вынзэ кадь адӟиз. Вӧзаз пуксиз но, чик кепыратэк, возьдаськытэк, солэсь дӥсьсэ кылиз, вылтырзэ, кунулъёссэ, кук виссэ спиртэн коттэм бинтэн ӵушылӥз. Тодматскыкузы ассэ вылтӥяськемъяськыса Паша Ангелина шуиз. - Озьы-а, ма! - серектӥз Митан. - Иське, мон - Водопьянов. Паша Ангелина - Совето Союзын тракторен ужась нылкышноослэсь нырысетӥ бригадазэс кылдытӥз, Вылӥ Кенешлэн тодмо депутатэз луиз, нош Водопьянов - лётчик, Совето Союзлэн Героез. Санитаркаен ӟечгес тодматскемез бере Митан тодӥз, Пашалэн песятаез бигер вылэм. Фамилизэ солэсь нуллэ. - Тон но ӟуч ӧвӧл ук? - нылмурт валатскиз. - Удмурт мон. Сыӵеос сярысь кылэмед вань-а? Паша удмуртъёсты тодэ вылэм, соосын пумиськылэмез ке но ӧвӧл. Медпунктысь пӧрась ӝытлы курег сӥлен макарон дасям. Пашалы чурыт юдэс сюрем. - Мар та таӵе? - Курег ӵӧн, - удмурт сямен вераз Митан. Ӟуч кылэз гинэ тодӥсь муртлы "ӵӧн" кыл, валантэм сяна, вераны быгатонтэм но вылэм. Митан бӧрсьы нёжтыны выре: - Тшэ-эн. Нуналмысь ас понназ со кылэз нукыртыса ветлӥз, нош чылкыт вераны ӧз пишмыты. Ӧз но шӧдылэ, кызьы Пашалэн нимыз ик Ӵӧн луиз. - Мар ни, Курег Ӵӧнэ? - Паша палатае пырыку ик вазе Митан. - Каллен поръяськом, Курег пузэ, - серектэ соиз. - Маин сюдоды туннэ? - Курег ӵӧн, пе, луоз. Кыкназы ик горо. Озьы серекъяса-мараса, нылын пиен пумен матэкто. Паша шӧдӥз, та висисезлэн мугорыз - луло азвесь. Бордаз йӧтскыны уг луы, соку ик ӟырда. Уката ик кук висказ кидэ вуттӥськод ке, быдэсак гомӟе. Санитарка одӥг пол, кык пол шӧдымтэ улсы кариськиз, но ялан озьы уд выры ук, аслад но вирыд шудэ бере. - Мар-ось тон сыӵе, Митрофан Евсеевич? - дырекъясь куараен юа. - Кыӵе мон тыныд Митрофан Евсеевич! - вожпотэмъяське висисез. - Митыр Митан мон, Курег ӵӧнэ, - нылмуртэз бордаз кыскиз, кытӥ-мартӥ гадьзэ но кырмалтыны вуттӥз ни. - Ох, ческыт, дыр, тон, уть, ой, кыӵе пӧсь котырыд. - Ачид но... - Паша каньсыраз. - Ку? - сыр куалекъя Митан. - Гипстэ куштэм бере... Ойы! Кызьы чидалод на, ческыт-пӧсь тулкымъёс быдэсак пылато ук! Паша зурк! султӥз, ӵем шока, ымнырыз ӵыж ӵыжектэм, синъёсыз чиляло, пертчиськем дэрем улысьтыз гадьёсыз тани-тани погыльскозы. Эх, султыса ӟыгырты вылэм - уг луы, Митанлэн мугор гипсэн эгесамын. Ныллэсь берзэ нюлам киыныз вешаз но, дэрем сӧзулзэ ӝутыса, гольык макессэ маялляз. Кисьмамын, дартэн чарс-чарс жалемын ук та! Э-э, сюлмы! Митанлэсь гипссэ Белоруссие вуэмзы бере гинэ куштӥзы. Курег ӵӧн ик вандылӥз сое но, нылын пиен уйлэсь вуэмзэ мырдэм витьыны чидазы. Ческыт сьӧлыкен пачылам дырзы Онисим ялӥськытозь кыстӥськиз. Улияна умме усе гинэ, Паша кыштырак гинэ Митан вӧзы вуэ. Ули бен ӝоген шӧдӥськиз, кытчы эшез уйлы быдэ ышылэ, нош со сярысь огзы но вераськон ӧз поттылэ. Онисимлэн вуэмез Пашалы силё-сюрно пӧлы кугӟам кадьлась. Митанэз ӵуказе ӵукна кошкоз ни, соин ик берпуметӥ уйзэ мусояськысалзы на, нош кытчы Онисимез карод? Буш койка туганэныз артэ сяна ӧвӧл. Улиянаен артэ шат интыяно? Нош тодмотэм пимуртэ бызьыны вуэм ныл вӧзы кызьы-о выдтод? Улияна кызь аресказ мынэ ке но ини, пиос сярысь кыл ик уг поттылы на. Онисимлэн нылъёс котыртӥ зынъяськемез вань ни, дыр, иське, чебер Улияна борды лякиськоз. Соосты ваче син вуттоно, нош кызьы но кытын меда? Гужем нуналэд кузь ке но, пумыз вуэ ини. Ӟудэм ныл Митанэныз кенешоно кариськиз. Соиз эшеныз кенешыны вуэм ни вылэм но, Онисим кылымтэ улсы кылем. Дусымъёс азбаре потӥзы. Онисим гичулысь( лэзькем пулэз чекычен кортӵоганы выре. Со тэк пуконэз уг тодылы, лэся. Бакчаын но гудӥськыны вуиз ни, кыед но поттӥз, жадёнэз валасьтэм кузьыли но тӥни. Нош Митан - тяпайтӥсь майсы. Но тани Онисим доры Улияна вуиз, пияшлы кизэ миськыны ву ваем, пельпум вылаз тӧдьы ӵушкон ошемын. Куспазы маке лабыртӥзы но бакча капка пала вамыштӥзы. Шайвылэ, пе, ветлом. Отын корка кузё, Улияналэн бубиз, Хаим Рудь, ватэмын. Кема ик ӧз ветлэ, берытскизы. Митан Онисимез ӝогак палатае валтӥз. - Уин мон доры Паша лыктоз, - шыпыртӥз со, - нош тон солэн интыяз кӧл. - Улияна тодэ-а? - Нылъёс куспазы кенешиллям ини. - Зэм шу?! - Улияна вӧзаз шальыез выдтэм ини. Мерскид ке, йырдэ мертаны. - Озьы-а, ма... Доразы чульк гинэ Паша пыриз. Чик кепыратэк-маратэк Онисимлэн валес вылаз пуксиз. - Соид ныс-ныс изе ини, - Улияналэн висъетэз пала йырыныз шонтӥз. - Мын ини, ойдо, ваньмыз кӧло, нокин уз люкеты. Онисим уг лула. Паша котыраз кариське: - Ма, тон, Оня, пиосмурт-а, ӧвӧл-а? Вай-ко, мон тынэсьтыд мылкыддэ узато. - Ойы, возьыттэм ик тон, - Онисим палэнскиз. - Тӥни Митанэд, нугылля, кӧня мылыд потэ, - султӥз но ӧс пала керӟег вамыштӥз. - Шайтан кышно, - нукыртӥз ас понназ, - нимме кызьы пӧръяз, ява. Оня, пе. Укылтэм. Нош санитарка солэн бӧрсяз кылъёссэ келяз на: - Ӟырдыт пияш, дыр, тон. Митанэ ке ӧй луысал, мон тонэ одно вылам вуттысал. Мотри, нылашед борды зӥбытгес кутскы, эн дырты, ежгес на со. Ма, мусояд ке, небӟоз, со но кышномурт выжы ук... Улияна тылзэ кысэм ни вылэм. Изе-а, иземъяське гинэ-а, уд вала. Онисим кыштыр гинэ кылиськиз но буш валесэ выдӥз. Нош Паша со вакытэ Митанэз котыре биниськиз ини, пиез ӟыгыртыса валесэ уськытӥз но вылаз кыскиз. Егитъёслэн дырез чаклан сярысь йыразы но ӧз лыкты. Нош инвожо толэзь 22-тӥ нуналаз выжытозь одӥг час гинэ кылемын на вал. Улияна Ули тэтэ дырысеныз пичиослэсь мӧзмыса будӥз. Мумиз сое сяна пинал ӧз вайы но, хуторын огназы гинэ улӥзы бере, Улияналы ас ёзъёсыныз шудыны туж шер учыралляз. - Меми, кытын мынам сузэре, кытын выны? - анайзэ ёртылӥз со. Нош ма вералоз кышномурт, туж но туж витёно нуны гердэз пушказ ӧз быгыльскы ни бере. Куамын ареслэсь егит кышно, пинал ваён быгатонзэ утчаса, кытӥ но ӧз ветлы, эмчиослы но, абызъёслы( но, туноослы но, оло, аслыз сюсеткалы но вазиськылӥз, пайдаез ӧйлась. Олокыӵе но эмъюмъёс пумтэм юылэмысьтыз-а, мар-а, тупатскем интые, бордаз вормонтэм висён лякиськиз. Валесын кык ар ёрос костаськемез бере лы но ку луыса кулӥз. Ули дас куать аресказ мумытэк кылиз. 1939 арын куарусён толэзе шунды пуксён пал белорус музъем Совето Союзэ пыриз. Таин валче хуторлэн улоназ воштӥськонъёс туж ик ӧз шӧдӥське. Хаим Рудь азьвыл сямен ик нюлэсчи луыса ужаз, нош Улияна мединститутын дышетсконзэ азьланьтӥз. 1941 арын гужем пал хуторазы медпункт интыяськиз. Хаим талы пумит ӧз кариськы, угось коркаез бадӟым, инты ваньмызлы тырмоз. Вылаз ик, нылызлы уж шедиз - сое медсестра каризы. Ожгарчиос пӧлын висисьёс, сӧсырмемъёс шерос гинэ луылӥзы, Улилы номыр карытэк, пичи ке но, уждун басьяны умой ӧз поты, сиён пӧрасе куриськиз. Ма бен сиськисьёсыз но чиньыен лыдъямон вал: бубиз, песянаеныз песятаез, фельдшер, Паша, Митыр Митан но ачиз. Нюлэсчилэн семьяяз вуоно войналэн матэктэмез сярысь оломар трос ӧз вераськылэ, угось оскыса улӥзы, Хаим - коммунист, лесничестволэн парткомаз пыртэмын бере, ку но кызьы кариськыны тодоз, дыр, шуизы, лэся. Тани туш но лэзиз, туж тумошо адӟиське, Гитлер, пе, выламы урдскиз ке, эшъёсыным пеймыт нюлэскы кошком, партизан луом. Райкомлэн косэмезъя со мукет коммунистъёсын ӵош сьӧд тэльёсын му коркаос, пыӵал тӥрлык, сиён-юон тырыны ватэгъёс гудӥзы. Хутор котыре ожгарчиос вуэмен, татын улӥсьёслэн мылкыд куашказ. Хаимлэн бубиз пиезлэсь кушетскыса юаз: - Асьмелы татысь кошкыса умойгес ӧй луысал-а? - Кытчы? - Ож сузёнтэме. - Келяло тӥледыз. Вераськи ни, - буйгатӥз Хаим. Нош нылзэ мукет юан сюлмаськытэ вылэм: - Тятя, нош малы-о Гитлер еврейёсты выжытэм быдтыны турттэ? Бубиз секыт лулӟыса валэктӥз, Германиын еврейёсты Гитлер сяна но адӟонтэм карисьёс пумтэм луизы. Сыӵе фюрерзэ уга немец калык ачиз бырйиз. Ма, евреез яратӥсьтэмъёс мукет кунъёсын но вань гинэ. Солэн, визьмо но быгатӥсь луэменыз, асьсэды азьпалтэмезлы вожъясько, дыр. - Мон тонэ шонер ке валай, - Ули атайзэ куспетӥ кариз, - еврей калык визьмыз понна Инмарлы тау карыны кулэ. - Э-э, озьы гинэ ке луысал, - Хаим йырзэ бергатӥз. - Дарвинлэсь валэктэмзэ но лыдэ басьтоно, угось быгатӥсез еврей ӝутӥське, нош лябез ӟызыме, начарме. Улон ачиз дауръёсын озьы калыкез пужнэ. Улилэн мукетъят ма но со юалляськемез потэ на вал но, ӧз вуы, бубизлэсь сюлэмзэ шуак кысӥзы. Партизанъёслы ватскыса улон инты лэсьтонысь бертыкуз немец шпионъёс шоры ӝимем. Телефон ез кузя партизан каре лушкем мыно вылэм. - Кинъёс тӥ? - лэчыт синъёсыныз портыса юам Хаим. Пумитаз шедемъёс пӧлысь огез ӟепысьтыз кыӵе ке кагаз поттыса мычем, нош мукетыз вал вылысь мыкырскем нюлэсчилэн тыбыраз кинжал донгем. Атайзэ жаляса но солэсь мӧзмыса, Ули уен-нуналэн синвузэ кисьтылӥз, кыласа- бураса бӧрдылӥз, выль шайвылэ ялан ветлылӥз. Онисим вуэм бере ӧжытак буйгатскиз кадь. Нырысь адӟемаз ик та пияш солы кельшиз. Паймоно кадь, Митанэн ӵош будэмын, нош чылкак мукет адями: лякыт, востэм, куаразэ мултэс ноку уз потты. Инмарлы но оскисько, пе. Корка нырысьсэ пырыкуз ик вӧсяськиз. Тусын туж ик чебер уд шуы, нырыз кузьгес но, ӵок. Со понна чагыр синъёсыз визь-визь учко, ныллэн мугортӥз возьдаськытыса уг бызьыло. Иське, ужпи сямо ӧвӧл. Сиськыкуз ассэ туж ӝикыт возе, ӝӧк сьӧры пуксьыкуз но, потыкуз но киоссэ, ымнырзэ гылтоз. Кӧтсэ тырыса, шутэтскыны ӧз выды, уж юаса, азбаре потӥз. Митанэз ке верано, соиз сиськыса, часэн-часэн валесэз мерта. Шайвылэ ветлыкузы но Онисим мултэс ӧз лула. Сомында чебер сяськаос пумитазы сюрылӥзы, ӧз мыкырскы, ныллы кузьманы шуыса ӧз ишкалты. Ялан ас понназ малпаськыса чус вамышъяз. Сыӵе ческыт возь выл зынъёслэсь альтэмзэс ӧз ик шӧдылы кадь. Нылмурт шоры огпол но учкылытэк мынӥз. Эсьма, вукырем вамен потыкузы солы кизэ но ӧз сёты. Ӧйтӧд, ма солэн йыраз сокем кугӟам. Ули пияш шоры лушкемен учыръяз, соизлэн тусыз кунэрес ке но вал, ныллэн секыт мылкыдыз малы ке каньылаз. Шайвылысь но озьы ик пал кыл вазьытэк бертӥзы. Пашалэн вуоно уй сярысь шыпыртэмез Улиез чылкак паймытӥз. Курдатӥз но. Ма, кызьы сыӵе зӥбыт, востэм пимурт тодмотэм нылэн ваче кӧлыны лыктоз? Со возьыттэм Митанэн Курег ӵӧн, соослы дартъяськыны медам люкеты шуыса, юн сюлворизы, луоз. Пумит кариськыны ӧз дӥсьты бере, Ули ма карыны, та уйзэ ассэ кызьы возьыны ӟудыса, кӧлыны пырыкуз сьӧраз секыт шальы кутӥз но валес улаз понӥз. Онисим кыштырак вуыку нылмурт изем улэ аналскиз, нош аслаз быдэс мугор золскемын, пельёсыз котькуд ӵаштыртэмез саклало. Тани пияш кылиськиз, выдыкуз валесэз ӟукыртӥз. Вырӟылытэк кылле, олома лулӟылэ, ачиз уг лула. Озьы кыксы но, кыл- куара сётытэк, далай улӥзы. Улилэн уммез, валамон ини, матаз но уг лыкты. Йыраз олома но малпанъёс бергало, малы ке ваньмыз матаз кыллись пи вылэ вуо. Мумизлэсь берло кылъёссэ тодаз ваиз. Поляк семьяын вордскем но еврей кузпал луэм кышномурт шуиз вал: - Тон, нылы, быдэ вуэмын ни, соин ик та кылъёсме пеляд пон: еврейлы эн бызьы. Сотэк но ӝыныез вирыд еврейлэсь ини. Нылыд-пиедлы визьмо, чырмыт луон понна таиз но тырмоз. Еврей выжы калыкез адӟемпотостэм карисьёс та дуннеын пумтэм. Тон сое уд шӧдӥськы, уго тусыдъя кисьтэм-басьтэм ачим кадь, бубидлэн одӥг виштыез но лякиськымтэ. Тынад но пиналыд ачид кадь медло. Соку сое но инмар выжы луэмысьтыз нокин уз бышкы. Соин ик ӟучлы бызь. Яке чувашлы, вотяклы. Чуваш сярысь Улилэн кылылэмез вань, нош кин со вотяк? Бӧрысь тодӥз, вотяк - со удмуртэз ултӥям кыл вылэм. Митан вераз. Евреез укылтэмъёс Иуда, жид шуо, ӟучез - кацап, нош удмуртэз, пе, - вотяк. Мар верам меда со? Митанъя ке чаклано, иське, - покач, азё-беро, акылес мурт. Нош Онисим? Таиз тӥни - кыӵе сабырлы но кельышлы. Кудзы вотякесьгес? Онисим медло вылэм. Со кадь вотякен... э-э, удмуртэн уртче улыны туж каньыл луысал вылэм. Малы нош "кадь"? Онисим артэ ик кылле ук, султы, дораз мын но шобыр улаз чульк гинэ пыр. Ӧвӧл, ӧвӧл, озьы уг яра, нырысь вамыш пиосмурт лэсьтыны кулэ. Улилы песянаез озьы индылоз вал. Ма, Польшаын, оло, сыӵе сям возизы, дыр, но, СССР-ын озьы уг выро, луоз, угось татын пиослы но, нылъёслы но огкадь эрик сётэмын шуо ук. Осто-о, ныллэн йыраз олома но лыктэ, ява. Курданэз дӥсьтонлы уг сётскы. Ӵок, Ули уз султы, Онисим вӧзы выдӥз ке, соиз, кин тодэм, пешкытыса лэзёз, вылаз ик, серем кароз. Кин ке Улиез али кышкатысал ке, соку... Онисим вуыку хуторын огезлэн но мылкыдыз ӟеч ӧй вал. Пияш сое шӧдытэк ӧз кыльы. Соинтэк-а ассэ сокем востэм возиз, куаразэ будэтэмлэсь кӧбераса вераськиз. Гольтырес вырись Митан шоры но ӝотырес учкылӥз. Иське, пересьёсты, Улиез жаля, висись яразэс шӧдтэк кыльыса ӵабтэмезлэсь кышка. Соин ик мултэс уг зульы, соин ик али но валесэ шыпак выдӥз но умме усиз. Усиз ке... Онисим... Ма, со вуиз но Улилэн сюлэм вылаз зӥбись куректонэз капчиязгес. Кыӵе со оскымон, йӧн-йӧн пиосмурт. Таӵе муртлы бызем нылъёс шудо луо, дыр. Ӧйтӧд, ӧйтӧд. Улондэ пиосмуртэн чебер мытон сярысь Ули нокинэн ӧз вераськылы на. Кузпал шедиз ке, песянаез визьмалоз-валэктоз кожаз, лэся. Эк, малы азьвыл ик ӧз юалляськы меда? Сюанзэ витьыса улӥз уга. Нош малы одно ик сюан уйдэ витёно? Витьыса, витьыса вить ик кылёд. Аслыд ик нырысь вамыш лэсьтоно, но кызьы дӥсьтод? Ма, та Онисим ачиз ик султы вал но вӧзаз выд вал. Тодаз лыктӥз валес улысьтыз бодыез. Э, шузи ик тон, Ули, пимуртэз вӧзад витиськод, нош ачид сое тышканы шальы дасяд. Дыр уйшор ни, луоз, быдэс уй но тазьы ик ортчоз-а, мар-а ини. Нылмурт пумен-пумен изён бус пӧлы выйыны ӧдъяз... Онисим Улилэсь витемзэ шӧдэм, лэся. Тани со валес вылаз пуксиз, собере ул эрезьзэ, ул дэремзэ кылиз но домбыль гольык лась. Остэ быри! Ули пала пыдчиньы вылаз кыстӥське. Вӧзаз выдӥз, шобрет улэ нюжак пыриз. Улилэн мугор сыр куалекъяны ӧдъяз, пиосмуртлэн киосыз кӧлан дэремзэ выллань кыскизы, шуныт чиньыос пельпумъёссэ, ноныоссэ, макесъёссэ йыгыръяло. Инмаре! Кыӵе умой, кыӵе ческыт вылэм пимуртлэн мусоямез. Номыр кышкытэз вылымтэ, куалекъятэк сётскиськод ке. Небыт ымдуръёс бамъёссэ бичатӥзы, Улилэсь ымдуръёссэ лякыт пачкатӥзы... Кыӵе со валантэм шока... Номыр уг вазьылы... Бен, озьы ик мукетъёслэн но ужзы луэ, дыр: лушкемен, пеймытын, кыл поттылытэк... Ой, мыйыкез бичатэ, ӝыны уй куспын будыны вуттэм шат? Мыйыкез ӧй вал кадь ук? Пилэн пӧсь пыдесыз Улилэн золскем макесъёсыз вискы донгиськиз, тани-тани вылаз выдоз, пачкатоз. Ма, одӥг кыл ке но вазь вал, Ули кышка ук. Зугырак луыса киоссэ ӝутӥз но вылаз лэзькись пельпумъёсты пыкъяз. Соку ик тодаз лыктӥз: сӧсырмемез вӧсь луоз ук! Но кытын яраез, ӧвӧл ук? Кин та?! Митан, албасты! Чатран! Онисим кариськыса монэ алданы малпад! Шуш черекъямысьтыз Улияна шарак потӥз, валесысьтыз тэтчиз но бызьыса педло потыны медэ вал, ӧсэтӥ пырись Онисим шоры донгиськиз но солэн чыртыяз ӟыгырскиз, викышъяса куалекъя. - Кин?! - лек юаз соиз. - Мита-ан, - бӧрдэ Ули. - Митан?! Кытын?! - отчы-татчы учкылэ Онисим. - Вӧта-ам... - А-а, озьы-а, ма? Я, я, буйгатскы. Чыртыме лэзь, кекатод. - Онисим нылмуртэ ки вылаз лӧбак ӝутӥз но валесаз нуиз. Пичи муртэ музэн веша, шобретэн шобыртэ. - Эн кошкы, - викышъя Ули, - кышкыт мыным. - Мыным но маке секыт. Гудыръям, чилекъям азьын кадь. Куазез юри чакланы потай вал. Ин сайкыт. Тӧл ӧвӧл. Нокыӵе куара уг кылӥськы - ваньмыз ныс-ныс кӧлэ, одӥг вай но уг вырӟылы. Я, я, буйгатскы ни, мон татын, - Онисим ныл вӧзы пуксиз. Котыр шыпыт, нош сюлэм малы ке но сызла. Ули огзэ кизэ пилэн кырымпыдсаз понӥз, мукетыныз чиньыоссэ куасалтытӥз - ӟыгыртэм кадь луиз. - Выд, - шыпыртэ со. Онисим ӧз вала, малпаз, сое ас валесаз ысто. - Изён уз пегӟы. Буйгатскы, ойдо. Мон вӧзад пуко, эн кышка ни. Та Онисим пичи пинал кадь валасьтэм. Яке юри озьы турттэ-а? Шузи... Кылатэк куалекъяса, дартэн жӧломем Ули борддор пала берытскиз. Кема ӧз вырӟылы. Куатаськиз. Нош Онисим номыре ӧз вала, лэся, ныллэсь йырсизэ но ӧз маялты, шыпак султӥз но выльысь педло потӥз. Мур лулӟыса. Ӧйтӧд, ма солы сыӵе маза уг сёты? Ули пилэн бӧрсяз ымдуръёссэ куртчылыса учкиз: "Э-э, шузи ук, шузи!" Ӧз тоды уго со, кӧшкемыт ож пуромонлэн матэктэмез Онисимлэн шӧтаз усе вылэм шуыса. Нош шимес вир кисьтон кутскытозь кык час гинэ кылемын на вал. Ож пери ӝутскиз Кунгож сьӧрын лыдтэм фашистъёс шунды ӝужатозь ик пыд йылазы вал ни. Тросэз кӧлыны но ӧз выдылэ. Гитлерлэн но Геббельслэн узатэм-урмытэм уно миллион ожгарчиоссы дышем сямзыя мисьтӥськизы, мычиськизы, ческыт сиизы-юизы но Тӧдьы зарезьысен Сьӧд зарезёзь кыстӥськись кунгож сьӧрысь быдӟым кун вылэ омырскыны косэмез витизы. Нош диверсантъёссы, сьӧд ужзэс лэсьтыса, шумпотымон иворъёс ыстылӥзы ни: Горд Армилэсь штабъёссэ герӟась телефон езъёс, пе, вандылэмын. Соосты выльысь итыны ыстэм связистъёсты ваньзэ виыло. Визьмын ужазы фашистъёс, угось тодо вал, ӟучъёслэн рациоссы туж ӧжыт, соин ик дивизиос, полкъёс куспазы радио пыр вераськыны уг быгато ни. Диверсантъёссылэн иворъёссы немец ожгарчиослэсь мылкыдзэс уката лӧпкыто, вакчи дыр куспын вормонлы осконзэс юнмато. Со сяна, ожъёс кутскон азьын ваньмызлы немец ожчиослы Гитлерлэсь приказзэ лыдӟизы. Мурт музъем вылэ ожалскытозязы, фашистъёс доразы ивор ыстыны дырто. Гожтэтсы вуытозь, соос уго большевикъёсты, жидъёсты быдтӥсь дано немец пиос луозы ни. Куд-огез кунгож сьӧры шымырасагес ик учкылэ но, кышканзэ пачкатэ, бырон я сӧсырмон сярысь малпанзэ улля, ассэ ачиз буйгатэ: Иван кышкаса пегӟыкуз улаз мед лэзьылоз. Ганс яке Фриц сое одно сутозы, визьтэммонлэсь мозмытыса лулзэ ишкалтозы. Дыр туж вазь ке но вал, Онисим, азбаре потыса, валъёсты люктаз, толло турнам сизьйырез сётӥз. Собере гидысь кыедэз куштӥз, мунчое ву нуллӥз. Ужзэ быдэстыса, бакча берысь шур дуре уӵыосын пумиськыны васькем вал но, одӥг тылобурдо куараез но ӧз кылы. Котырак шим-шим, ӟепысьтыз паки пуртсэ поттыса, бадьпу йылэз вандӥз. Сулзэ кыскыса, чипсон лэсьтыны малпаз. Дор палъёсыз тодаз лыктӥзы. Одӥг пол, Можга педучилищеын дышетскисьёс гуртазы концерт возьматэмзы бере, Онисим эшъёсыныз гурт калыксэс паймытыны малпазы. Кузьдалазыя но зӧкталазыя пӧртэм чипсонъёс лэсьтыны быдэс тулыс выризы. Собере шуланы дышетскизы. Лушкемен пырскемзы юнме ӧз лу. Возь вылэ турнаны васькем анай-атайёссэс эктон гурен шулдыртӥзы. Кыӵе-кыӵе соосты вешазы, ӟыгыръязы соку. Онисим соку, оло, нырысьсэ валаз, калыклы ӟеч уж лэсьтӥськод ке, со тыныд уката бадӟым ӟечен берытске. Бадьлэсь чипсонэз тулыс гинэ лэсьто, гужем соин уг выро ни, угось сулэз соку пуэз борды тач-тач бурмемын луэ. Сое тодыса вылысь, Онисим шуланзэ пӧрмытыны турттӥз ик но, пайдаез ӧйлась, сул гумыез, пушкысьтыз пузэ донгыны выронъяз, пилиськыса кошкиз. Бакча бере потэмез Онисимлэн кисьӧр луиз. Оло ке пыласько шуэ вал, шурлэн нимыз гинэ шур вылэм, вуэз пыдесозь но ӧвӧл, кучапилы ке шат уямон. Лысвуын котмем пыдкутчанзэ куасьто шуыса, вайёс вылэ ошылэм вал - ӝужась шундыез пилемъёс ватӥзы. Иське, кытын ке тӧл поръя. Пилемъёс - соос тӧлтэк уг калтырто. Нош хуторын ялан одӥг куар но уг выры. Азбаре берытскыса, Онисим вием нюлэсчилэн ветлоно валэз доры выльысь кожытэк ӧз чида. Сыӵе чебер со - синъёстэ воштэмед уз луы: тӧри гонэз майталэн миськем кадь, вальк-вальк кисьтаське, быжыз, изнэсэз, пельёсыз сьӧдэсь, нош пыдъёсыз - выль тӥр ныдэз пияла чалепен вуштыса но сыӵе вольыттыны уд быгаты. Онисим тӧри Красавчикез топ-топ вешаз, солы эшшо сиён сётӥз на. Со куспын ингож палась пилемъёс ог-огзэс уйылыса шудэмысь дугдӥллям, шундыез огназэ кельтӥллям. Нош Онисимлэн пыдкуксэ куасьтон сярысь тодаз ӧз лыкты ни. Липет улысь велосипедэз адӟиз. Кутыса эскериз - ваньмыз интыяз, али ик ворттылыны луоно. Нуназезэ губияны яке узы-боры эскерыны потано ке шат? Нош али Улияналы сиён дасяны юрттысал ке, мултэс ӧй луысал. Шуак инмысь мар ке жуэтэмез кылӥз. Йырзэ ӝутӥз но - палэнэтӥгес лузь быдӟа гинэ адскись самолёт лобе. Ай огназ ӧвӧл, бӧрсяз мукетъёсыз но вань. Хутор доры вуытэк, соос лэзькыны шӧтазы. Полигонэ пуксьыны медо ке шат? Нош отын аэродромзы ӧй вал кадь, агаеныз пумиськыкуз Онисим синйылтытэк ӧй кельтысал. Нырысетӥ самолёт мае ке куштӥз. Полигон вырйыл сьӧрын, хуторысен уг адӟиськы, мар отчы усиз, уд тод. Музъем вылысен ыбем кылӥськиз. Мукет самолётъёс вуизы, таосыз но мар ке куяло. Полигонын дыбыр! ыбыло. Уть ай, изён но соослы изён ӧвӧл, учениоссэс сокем вазь ортчыто, ява. Нош омырын ог дасо самолётъёс бергало, чипы вылэ душесъёс музэн уськытскыло но, кутыны быгатытэк выллем, берен ӝутскыло. Нап ӵынлэсь бугырскемзэ адӟыса, Онисимлэн сюлэм шымырскиз: музъем вылын уг ыбыло, музъем бомбаослэсь зурка. Тушмон бомбаослэсь! Война! Тодӥзы ке но со кутскоз шуыса, ӧз оске. Оскизы ке но - сокем ӝог ӧз вите. Война... Оло нош, ӧвӧл? Оло, маке мукет? Но малы собыдӟа сьӧд ӵын бугыръяськыса ӝутске? Адӟоно, тодоно, ӝоггес! Хутор сьӧры потэмез бере гинэ Онисим велосипедэн ури-бери ворттэмзэ валаз. Сюлмыз гадьысьтыз потымон жугиське, йырыз пилиськыны дась. Азьтӥз ик, сюез пазяса, тушмон самолётысь ыстэм пуляос сюрессэ вандӥзы. У-у, сьӧсьёс! Ма, кытын асьме самолётъёс, малы душесъёсты музэ уг сапкыло? Кытын зениткаосмы, малы уг ыбыло? Юанъёс, юанъёс. Кин валэктоз? Ма луоз ни табере?.. Полигонысь ожмаськон ужлы дышетскыны пуктылэм гаубицаос но пушкаос тушмон самолётъёс шоры ыбылыны уг быгато вал. Зениткаос матын ӧвӧл. Нош асьме лётчикъёс артиллеристъёсты утьыны ӧз вуэ. Война кутскон азьын кунгож дорысь аэродромъёсын сюрс вить сюлэсь уно выльёсыз но кӧня ке сюрс вужмемъёсыз самолётъёсмы сылӥзы. Выль самолётъёсын лобаны кык сю пала гинэ экипажъёс дасямын вал. Соингес ик тушмон сюрс кык сю пала выль самолётъёсмес война кутскон нуналэ ик музъем вылын быдтӥз. Озьы немецъёс омырын кузё луизы но кызьы мылзэ потэ озьы эрказъяськизы. Хутор дорысь полигонын одӥг пушка но, одӥг тягач но быдэс ӧз кыле, ваньзэ бомбаос сузмытӥзы, снарядъёсты пуштытӥзы. Тушмон самолётъёслэн лыктэмзы сярысь артиллеристъёс тодысалзы ке, ватскыны, кир-пазь кариськыны быгатысалзы, озьы асьсэды ке но утьысалзы, нош полигонэ кыскем телефон езъёс вандылэмын вал бере, кышкытлык сярысь иворез татчы ыстыны ӧз луы. Сутскем, пазям, бугыръям полигонэ вуэм бераз Онисим дэймиз: ожгарчиосмылэн шӧйёссы пасьтана костасько. Кудӥз-огез сайкаса но вуттымтэ, лэся, ул дӥсь коже кыллё. Данаксэ шӧй-ӧлексы но шуыны кылыд уз берытскы, сокем соос сузмытэмын: огезлэн суйыз, мукетызлэн пыдъёсыз ӧвӧл, котырак сюен сураськем адями люкетъёс, вир, шимес трос вир... Онисим велосипедзэ музэ сэрпалтӥз но пумыса сылэ. Курыт ӵын шоканзэ пытса, шимес суред онгратэ, зӥбе, синвузэ пызьыртэ. "Тани кыӵе тынад эзелед луысал, агае, - шыпырто ымдуръёсыз. - Мон ке тон интые ӧй кыльысал, тонэ но сюен сурасалзы". Пыдесъяськем ожгарчиез адӟыса, со доры вамыштӥз. Соиз мыкырскем но, музъем вылэ пыкъяськыса, мукет ымысь кыл потэмез вите, вирен орсмем шӧйлэн ымысьтыз. Соизлэн йырыз но гадьыз гинэ вань на, мугорызлэн улӥыз быдэсак ишкалтэмын. Дораз лыктэм муртэ шӧдыса, мыкырскем ожгарчи Онисим шоры шузимем синъёсын учкиз, шӧйлэсь йырзэ маялтӥз: - Тон, Митюке, вить ӧжытак, мон али ик... шедьто пыдъёстэ, - султӥз но шонаськыса палэнскиз. Онисим, ма карыны, кытчы вамыштыны тодытэк, измем кадь сылэ. Бен, со но та шӧйёс пӧлын луысал ук, кызьпуэн ке ӧй тыгиськысал. Агайзэ Онисим утиз, нош аслыз кин-о бырыны ӧз сёты. Велосипед? Кызьпу? Арон - тӥни кин солэн утисез. Велосипедэз солэн вал ук. Иське - Арон. Витёнтэм шорысь пумитаз сюрем адями. Оло, витёнтэм шорысь но ӧвӧл, оло, сое ачиз Инмар ыстӥз. Котькин мед луоз но, Онисим выльысь валаз: адямиослы ӟеч лэсьтэмед аслыд ик ӟечен берытске. Уть ай, Лиза нылзэ ке ӧй вордысал, Онисим Белоруссие но ӧй потысал. Лиза картэзлэсь мӧзмиз, Иовисарлэн нылзэ адӟемез потэ вал. Онисим валаз но жаляз соосыз, ваче вуттыны кариськиз. Табере тани кызьы ваньмыз берытскиз. Малпанъёсызлэсь мозмытскыса, Онисим полигон бервылэз эскериз. Ветлӥсьёс уг адӟисько. Кытын но отын ӝуштэм, шуш черекъям кылӥськылэ. Сьӧд ӵын сьӧрын, вӧсь луэмезлы чидатэк, сӧсырмем мурт, юрттэт курыса, ыме тэронтэм кылъёсын кесяське. Котырак - шурдыт, шимес. Сюлмыд ляб ке, путоз. Шузимем ожгарчи берытскиз. Кык суй но пыд ваем. Митюк шуонлэн шӧйыз вӧзы понӥз. Онисимлы телефон трубка донгиз: - Жингырты, вера, огзэ пыдзэ ӧй шедьты, озьы гинэ мед нуозы ни. Онисим али гинэ валаз: таидлэн визьмыз сураськем. - Киосыз кыкез но паллян ук, - юзыраса вазиз. - Дак, Митюк паллянэс ук, уд тодӥськы шат? - шузимем мурт пожаськем синъёссэ Онисимлэн ымныраз мертчытӥз. Тодма но, уг но кадь. - Товарищ Лаптев? Иосиф Виссарионович? Огнад-а музъемысь потӥд? Я, ӵок, кылемъёсыз эшъёсыд уз мӧзме. Ваньмыз артысь артэ кыллё. Чикын( огазе кыскай но, ӧз сайкалэ... Машина гуретэм кылӥськиз. Райкомысь полуторка вуэм вылэм. Соин лыктэм муртъёсын кенешизы но, Онисим хуторе кошкиз, машина - матысь гуртэ. Адямиосты люкаса, быремъёсты калык радъя ватыны вераськизы. Нош сӧсырмемъёсты, биньылыса-мараса, медсанбатэ нуозы. Хуторын ваньмыз пыд вылазы ни вылэм. Фельдшер, Митан но Паша валэн уробоен полигонэ мыныкузы Онисимез пумитазы. Фельдшер солы пересь еврейёсын кенешыны косӥз, соосты, пе, гуртэ нуыса умойгес луысал, хуторе огназы кыльыны уз дӥсьтэ. Пересьёс виыны судам муртъёс тусын азбарысь ӟус вылын пуко вал. Шӧдӥське, суй- пыдзы чылкак юскиськемын. Онисимлэсь вуэмзэ но шӧдытэк кылизы. Улияна коркан, кышнопалан, пӧра вылэм. Шуэрскем синъёсын пумитаз: - Война ук? - Бен, война... Нылмурт Онисимлэн чыртыяз ӟыгырскиз: - Эн кушты монэ. - Эн вал но, солдат ук мон. - Мон но... медсестра. - Нош пересьёстэ кытчы? Пересьёслы инты, пе, дась. Одӥг тодмо еврей нюлэс пыдсын ик улэ, отысь нокыӵе Гитлер уз шедьты. Полигонысь фельдшер бертӥз ке, уробоез басьтыса, соку ик сюрес вылэ потозы. Онисим кӧтсэ тырытозь, Улияна солы бубизлэсь дӥсьсэ дасяз. Сӧсырмемъёсты нуллыны, пе, яралоз. Сӧсырмемъёсты гинэ ке луысал... Пияш велосипедэ пуксиз но выльысь полигонэ ширтӥз. Мынонъяз ас понназ малпаське: кин ай со табере? Вылаз нюлэсчилэн дӥсез, кисыяз сельсоветысьтызы кагаз (Лаптев Онисимлы, трактористлы сётэмын) но гордармеецлэн Иовисарлэн книжкаез. Кин бен табере луоно? Йыртӥянзэ самолётъёс висатӥзы. Вылӥетӥ лобо, Лида кар пала. Лачак. Онисим соослэсь кыз улэ ватскыса кылиз. Полигонысь луло кылем муртъёсты полуторкае пуктылӥзы. Куать кузя соос, пӧлазы шузимем ожгарчи но. Фельдшер шофёрен артэ пуксиз, медсанбатэ сюрес возьматыны шуыса. Нош быремъёс дасоосын вылэм. Ватон ужзы далай гинэ кыстӥськиз. Нырысь ик бомба пуштэм бервылэз огъя шайгулы тупамон каризы, собере шӧйёсты ки вылазы но, валэн но отчы нуллыса тыризы. Гуртысь лыктэмъёс пӧлысь кин кыла-бура, кин Гитлерез карга, мукетыз кӧшкемыт сузмытэм шӧйёсты адӟыса вукекъяське, ӧске, зар- зар бӧрдӥсез но вань. Кык пол кир-пазь пазьгиськылоно луылӥзы, фашист самолётъёс узвесь зорен пылатъязы угось. Ярам, нокин ӧз быры. Нош медпунктэ кошкись машиназы вылэ бомба усем. Ваньзы, кин вал отын, быриллям. Сьӧсь тушмонъёс! Адӟизы ук, машинаын сӧсырмемъёс гинэ вал шуыса. Полигонэ вуизы тэле пегӟыны вуттэм кӧня ке ожгарчиос. Соос но эшъёссэс ватон уж борды басьтӥськизы. Шуак кин ке но "ӝуа!" кеськиз. Хутор пала учкизы но, отын тылпу шукыръяське, поръяса ӵын ӝутске, тылгизьыос тэляло. Онисим усьтыр-табыр хуторе кошкиз. Митанэз валэн уробоеныз ӝегатӥзы на. Со понна Митыр Митан лушкем малпанзэ быдэстыны вуттӥз. Полигонын быремъёсты ватыку кин ке но косэм: шӧйёс бордысь шедьтэм одӥг кагаз но сюе согиськыны медаз шедьы, ваньзэ одӥг азе тыроно. Митан люкам кагазъёс пӧлы аслэсьтыз но гордармеец книжказэ донгиз. Оже ке нуизы, ӧйтӧд ай, мар луоз. Тӥни ук, райкомысь адями ма шуиз: Молотов, пе, бадӟым война кутскем сярысь ивортэм, кунгож дорын вир пумтэм кисьтӥське ни, фашист самолётъёс трос асьме каръёс вылэ бомбаос куяло. Матысь нуналъёсы немецъёс Лида пала но вуыны быгатозы. Ярам ай, Митанэз али Инмар быронлэсь утиз, нош кемалы-а? Соин ик ӝоггес палэнсконо та палась, ышытсконо, ватсконо. Митан тодӥз, солэн эшъёсыз но, командирез но полигонын одӥгтэмак быриллям. Солэсь гордармеец книжказэ шедьтыса, табере дораз, военкоматэ ивортозы: быриз, ватӥм. Нош Митан шузи ӧвӧл, со луло кылён сюрес шедьтоз. Хуторе уробоын мыныкузы Митан Курег ӵӧнэн вераськон поттӥз: - Кылзы ай, мусокае, асьмедыз татын нокин уг тоды, дӥсьмы огшоры адямиослэн кадь, соин ик кытчы мылмы потэ, отчы ик мынэммы луоз. - Ма, кытчы-о мыном на, медсанбатэ сяна. - Иське, ӵош мыном, ява. - Кызьы озьы? Тонэ кытчы ке келяло шуид ук? - А, кин сое тодэ на... - Нош мон, Онисим, Улияна?.. Вераськонзы таин кысӥз. Нош Митан, Пашаез ас палаз берыктыны, сьӧраз валтыны быгатоз шуыса, осконзэ ӧз ышты. Бен, Курег ӵӧнэз соин ӵош луоз. Убиръёс Улияналэн нуназеяны дасям сиёнэз дуре полигонэ кошкемъёс дыраз ӧз вутске. Пересьёсын ӵош ӝӧк сьӧры Лидаысь кушетскыса соку гинэ вуэм Арон пуксиз. Кылем уйзэ, пе, чырым но карытэк потӥ. Уйшор котырын телефонэз жингыртэм: - Жиды есть? - юало, пе. Арон телефонзэ куштэм, нош соиз выльысь но выльысь жингыртэ. Еврей пи вожпотыса кеськем: - Дугдэлэ! Ма тӥледлы кулэ?! - Дорамы пот! Ми тонэ ошом. Ӧд ке поты, улонниеныд ӵош сутом. Мадьыкуз Арон шыдзэ но йӧскадь ӟузьылыны уг быгаты, киосыз куалекъяло, синкылиосыз тусьтыяз усьыло. Со ӝыт поездэн кошконо вылэм, но поездэ пуксьыны быгатымтэ. Соин ик уйлы Лидае кылем. Нош вазь ӵукна станция вылэ бомбаос куязы ни. Тодмоосыз кемалась кин кытчы пегӟемын ни бере, Арон, кин доры пырыны тодытэк, велосипедаз пуксе но хуторе шок-пуль вуэ. Еврей пилы сиён ӧз мыны. Тау карыса, азбаре потӥз. Улияна - со бӧрсьы. Вераськыса сылыкузы адӟо: кинъёс ке бакча пала лыкто. Шуэрскем Арон тӧллэсь мамык кадь ишкалскиз но синуӵер - гид сиге, турын пӧлы ватскиз. Витьымтэ куноосты Улияна огназ пумитаз. Тодысал ке, кинъёс со... Куинь кузя воргоронъёс азбаре пыризы. Кыкез фашистъёслэн телефон езъёсты вандылыны ыстэм диверсантъёссы вал, куинетӥез - поляк Болеслав, кылысь кылэ берыктӥсьсы. Аслазэныз сяна, туж ӟеч вераське немец, белорус но ӟуч сямен. Ӵапак таос шоры ӝимыса, Улияналэн атаез быриз. Диверсантъёслэн пичи гинэ быдэстоно ужзы кылем на. Хуторын жид-большевик улэ, кудзэ Минскын но ӟеч тодо. Рациез вань. Тӥни сое фронтлэн штабаз ивор сётытоно (пумитъяськиз ке - кужмысь): "Лидаысь партизанъёслэн лушкем штабзы. Горд Армия пазьгемын. Улэп кылемъёс командиръёсынызы ӵош пленэ сётско. Юрттӥсьёсы пегӟизы. Котырак ваньмыз ӝуа, куашка, калык быре. Мон огнам кыли. Пумитъяськыны кужмы уг тырмы ни, монэ котырто. Юрттэ!" Соос но ӧз тодэ уга, утчано большевиксэс асьсэос ик виизы ни шуыса. Улиянаез адӟыса, Болиславлэн пыдъёс либыразы. - Анна?! Тынад мумид Анна ук? - Ӧвӧл ни со. Ватӥм. - Ку? - Польшаысен ик. - Нош аид - Хаим Рудь? - Со но вал но ӧвӧл ни. - Ку? - Болислав шулӟектӥз. - Кылем арня вискын-а? Улияна йырыныз шонтӥз но синвуаськиз. Немецъёс куспазы маке лабыртӥзы но корка пыризы. Нош Болислав юбо музэн сылэ. Вот таиз пумиськон... Куке но кин ке но шуэм: дунне вылысь тужгес чебер нылъёс - Польшаын. Ӧйтӧд ини, зэм-а, ӧвӧл-а со. Кинлы кызьы, вылды. Нош поляк нылъёс пӧлысь чеберезлэсь чебер вал, дыр, Анна - Улияналэн анаез. Озьы потылӥз поляк пилы - Болиславлы. Институтэз йылпумъяса, сое кышно басьтыны медэ вал. Нош Анна чутрак пумит кариськиз. Туслы поляк пиез кые ке евреен воштӥз. Юри ӧчкарыса кадь солы бызиз. Йӧно поляк нимзэ но саптаса. Пӧрмостэм евреен огазеяськизы но чиптэм-чаптэм ышизы. Кызь арлэсь кема Болиславлэн Анна сярысь кылэмез ӧй вал. Табере тани шуак-дуак пумиськизы. Улияна зэмен но кисьтэм-басьтэм Анна кадь. Сыӵе ик ненег- ӵыжыт бамо, синъёсыз пыдэстэм, чиль сьӧд йырсиез кускозяз кисьтӥське. Бен, Улилэн синъёсыз мумизлэн кадь ик учко. Болислав ноку ӧз валалля, ма соос верало, ма куро, гочато-а, серекъяло-а яке ултӥяло-а. Пумитазы ноку учкыны ӧз чидалля, йырзэ мыкыртылӥз. Эксэй ныл азьын музэн. Тани али но со синъёссэ музэ чӧлтӥз, шоканзэ ворсась курыт тодэ ваёнзэ улляса, дыльдызэ ньылӥз, интыяз лёгаськиз. Эх шу, тазьы-а луоно вал. Улияналэсь бубызэ, иське, та диверсантъёс виизы ук. Болислав Хаимез тодмасал ке, ӧйтӧд, дыр, ма карысал. Ӧз тодма уга, еврей Хаимлэсь туссэ тушез чылкак воштэм. Бен, Болислав поляк кизэ адями вирен, Анналэн картэзлэн виреныз, ӧз сапта. Озьы ке но, озьы ке но... Поляклэн нылмурт шоры учкемез ӧйлась ни, Анна азьын сямен ик йырзэ мыкыртӥз. Ноку пумиталлямтэ ныл азьын сылыны солы туж секыт йӧтӥз. Пыдесъяськы вал азяз, йырдэ пуклёк вылэ пон но, мед ӵогысал, пунэмзэ мед берыктысал... Ассэ ачиз вормыны Болислав быгатӥз ик. Дыректэм сюлэмзэ буйгатыса, мур шокчиз но либыт юаз: - Огнад-а дорад? - Пересьёсын. Соос нуназеяло али. Корка пыризы. Кыл поттылытэк. Фашистъёс киосазы пистолетъёсын вань висэтъёстӥ ортчиллям ини, корка шорын сыло. Пересьёс сэргы шымырскиллям. Поляк Улияналэсь пӧсь чай куриз, ачиз котомкаысьтыз ӵынатэм сӥль, консерва поттылӥз. Витьымтэ куноос ӝӧк сьӧры интыяськизы, нянь шормазы. Улияна парланӥсь чай лэзьяны ӧдъяз. Со вискын огез немец ныллэсь макессэ кырмалтӥз, вандоно пудолэсь музэн, жалятэк. Улияна солэн бамаз сачак сализ, вань кужмысьтыз. Немец тэтчиз ук, ӝӧкез ик вырӟытӥз, укно вылысь керосин лампаез уськытыса сӧриз. Улияна пересьёс пала сётскиз, немец - со сьӧры. Берласянь кырмиськиз, ас палаз берыктыны турттэ, Улияна пумитъяське. Кыкназы выж вылэ погразы. Улияна фашист улэ пачказ. Штани пушказ сьӧсьлэн киыз пыремысь, жир! черекъя, ӵыжаське, нош сютэм кион солэсь ул штанизэ ӟузыр-ӟазыр кесяз но палэнэ сэрпалтӥз. Пересь еврей, тае адӟыса, ӝӧк вылысь секыт ыргон дурыез кыскиз но вожомем сьӧсьлэн йыраз вань ӧдыеныз( коканы ӧдъяз. Фашист погыльскыса пыдесъяськиз, пересь шоры дыльдызэ пазяса "Иуден!" кеськиз но ыбиз. Пересь муртлэн пыдъёсыз либыразы, выйизы кадь, со зуняк пограз. Фашист шоры шимес вузыса кизэ урдэм пересь кышномуртлэсь йырзэ кыкетӥ пуля пасяз. Улияна, йырсазьзэ ыштыса, песянаез борды ӟыгырскиз. Диверсантъёс полякез педло потыса эскериськыны косо, ыбылэммес кылыса нокин, пе, уг лыкты-а. Нош Болислав уг дырты, наганзэ эскерем каре, ӟустариен ӵушылэ. Пересьёсты виись немец Улиянаез вирен наштаськем интыысь кышнопала нюж кыскыса нуиз. Соиз сазьтӥськыса вылаз лэзькись немецлэн ымныраз ӵыжиз. Урмем ужпи нырысьтыз вир пазьгиськемез ӧз ик шӧды кадь, ныллэсь макесъёссэ вань кужмысьтыз вайяны турттэ. Эшез ныллэсь суйёссэ йыр сьӧраз золтэ. Поляк та суредэз адӟыса юзыр-кезьыр луиз. Ас азяз нылзэ сантэмало кадь потӥз. Бен, Улияна солэн нылыз луыны быгатысал ук. Анна мумиз еврейлы ке ӧй сётӥськысал. "Анна! Нылы!" - йыраз чилектӥз. - Дугдэ! - кеськиз Болислав. - Дугдэ, шуисько! Немецъёс шонерскизы, султыны уг дырто. - Эн люкеты! - огез черектӥз. - Тыныд но кылёз, - серектӥз мукетыз. Улияна сикыӵе сюрем тылобурдо сямен выре. Ашкынэм фашист сое чеплет музэн пачкатэ. - Дугдэ, дугдэ! - Болислав ӟырдаса интыысьтыз тэтчиз но, ачиз но ма каремзэ валатэк, йыг! зӥбиз, огезлэсь фашистлэсь йырзэ сузмытӥз, мукетсэ, сильсьӧртӥз ӝутыса, узвесь пуляен сюлэмзэ пасяз. Кыллись бандитъёсты вожомыса ӵыжаз на, собере кудӟем мурт сямен, жӧл-пал вамыштӥз кунопала. Выж вылын пилиськем лампаысь керосин кисьтӥськемын, отчы ӝуась шырпу куштӥз. Ӝогак берытскиз но, кышнопалан везэкъяса сылӥсь Улиянаез китӥз кутыса, азбаре валтӥз. Малы Болислав Улияналэн улоннияз тыл лэзиз, со валэктыны ӧй быгатысал: визьмызлэсь азьло киыз ужаз шуысал но тӥни. Но визьмызтэк озьы ӧз ужа, угось диверсантъёссэс вием понна, немецъёс пуляен утялто. Тае валаса яке шӧдыса ик, Болислав виро пытьызэ тылпуэ ватыны анлаз, дыр. Шӧйёс сутскизы, пень кылиз, утча на, мар татын вал. Нош бертыса вералоз, возьмаськисьёс шоры ӝимизы шуыса. Немецъёс оскизы ке, лулыз бордаз кылёз. Поляклы ӝоггес дор палаз вырӟоно, нош нылэз огназэ кельтыны жаль потэ. Ӧжыт ке но сое буйгатоно, йырсазяз пыртоно. Уть ай, соид, азбарысь ӟус вылэ кыминскыса, зар бӧрдэ. Утисез шоры уг но учкылы, коркаез ӝуа шуыса уг вала. Болиславлэсь ныркышетсэ кырмиз ке но, йырзэ ӧз ӝуты, синвузэ ӧз ӵушылы. Болислав нылашез суйтӥз кыскыса пуктӥз. Улияна уг дырты, нош корка пушкын шуэръяськись тыл тани- тани кыре донгиськоз, пӧсь шокчеменыз адямиосты сутоз. - Сантэманлы ӧм сётске, - ныллэсь пельпумзэ маялляз поляк. - Буйгатскы, яраосыд ӟуз вир виямонэсь ӧвӧл кадь. Ойдо, палэнском татысь. - Улияналэсь синвуоссэ кимышкыныз ӵушалтыса, сое бакча пала валтӥз. Кӧня ке вамыш лэсьтӥзы но дугдӥзы. - Пинал дырмы аиныд ӵош ортчиз. Эшъяськиськом вал, - пӧяз поляк. - Учкы ай, - корка шоры возьматӥз. Липет пыртӥ, укно висъёстӥ ӵын пызьыра. - Мед сутскозы сьӧсьёс. Улэпкын отчы кельтоно вал соосыз, керттылыса. - Нош песянае, песятае?! - тылпу пала кыстӥськиз нылмурт. Поляк сое ӧз лэзьы. - Поттыны уд быгаты ни, - шуиз. - Ма карод на табере. Ӵок ини, куд-куд интыосын шӧйёсты суто ук. Нош кагазъёсыд жаль ке, соосыд таки-так пеньӟысалзы. Война, гыдыке, война кутскиз. Нылын люкиськыкуз Болиславлэн синвуосыз быльырскизы. Улиянаез ас нылзэ музэн ӟыгыртӥз но индылӥз: - Тон, гыдыке, пыдлось гуртэ ватскы. Отын тонэ убиръёс уз шедьтэ. Эк-эк-эк, кышкыт вакыт асьмеды вите. - Кошкыкуз ини берытскиз но оскытӥз: - Война бере мон тонэ одно шедьто, юртто. Ӝуась хутор дорысь поляк синтэм-пельтэм кошкиз, пегӟыса сямен. Война бере шедьто, юртто шуиз, но ку со быроз ай, кин вормоз? Созэ та вие нокин уг тод на. Болиславлэн бызьыса кошкемез но быронэз пумитэ дыртэм кадь луиз. Ачиз кадь ик телефон ез вандылӥсь фашистъёс шоры ӝимиз. Соосыз поляклэн одӥг кылызлы но ӧз оске, угось кисыяз немецъёсын ик пӧрам кагазъёсын Болислав ӟуч связист шуыса гожтэмын вал. Соин ик диверсантъёс поляк воргоронлэн сюлмаз пурт бышкалтӥзы, шӧйзэ коӵо-куакаослы кокчаны кельтӥзы. Хуторын тылпу сюанлэн тужгес шукырес дырыз вуиз. Коркан ӝокаса алектэм тыл кылъёс, тыметэз тудву кырыку музэн, ӧдыенызы укноосты донгизы но кыре лопырскизы, корка борды педласянь ӝабырскизы. Юнме уг шуо: лушкаськись, пе, ваньбурдэ нуыса кошкоз, нош юртъердэ кельтоз, тылпу ке - ваньзэ нюлыштыса басьтоз. Тани татын но со корка бордысь кенеръёс кузя гид пала кыстӥське ини. Тае адӟыса, Улияна сазьтӥськиз, Аронэз кесяське. Соиз азбарын жӧлмаса сылэ ни вылэм. Нылмурт еврей пиез, дыраз юрттыны ӧд лыкты шуыса, куаретыны но быгатысал, дыр, но куанер егитъёслы та вие ырлэштонэн( йырин ӧй вал. Улияна тӧлатыны ошылэм дӥсьёсты бакчае поттылыны ӧдъяз, Арон чуланэ пырыны быгатӥз. Отысь ки улаз сюрем чемоданэз, мукет ваньбурез азбаре куяз. Собере ваньзэ бакчае нуллӥзы. Поляклэсь Улиянаен вераськемзэ Арон кылэм. Велосипедзэ азбарысь бакчае поттыса, ныллы шуиз: - Асьмелы татысь палэнскыны дыртоно луоз. Нош кытчы? - Поттылэм ваньбурмес куштыса кошком-а? - Тон ке уд, мон огнам шупчо. Лидае берытско. Отысен - медсанбатэ. Сюресэз тодӥсько, уин мыно, убиръёс кӧлыку. Пумтэм курдам еврей пи зэмзэ но Улиянаез огназэ кельтыса кошкысал, дыр. Угось фашистъёс пересь еврейёсты, шуыны луоз, син азяз виизы. Нош немецъёс Лидае пыризы ке, ма луоз еврейёсын? Коть шай пыдсы ватсконо, фашист синме ӧвӧл шедёно. Тазьы малпаськыса, Арон пегӟыны дасяськиз... Со куспын хуторе велосипедэн Онисим вуиз. Ули со борды зар бӧрдыса ӟыгырскиз. Удмурт пи юалляськыны ӧз дырты, нылмуртэ буйгатыны выриз. Тылпуэз кысон сярысь малпанзы ик ӧй вал ни. Ӝуась хуторе Митанэн Паша но берытскизы. Дэмен йырзэс тӥяло: кытчы табере соослы кариськоно? Пеймыт нюлэскысь партизанъёслэн лушкем улонтӥязы вырӟоно ке шат? Улилэн мадемезъя, отын кӧлантӥез но, сиён-юон но, дӥськут но дасямын. Валъёслы но мешокъёсын сезьы лачамын. Эсьма, фашистъёслэсь кышканэз ӵокак уз лу. Кенешыса-кенешыса Пашаен Ули медсанбатэ мыноно кариськизы. Арон но соос сьӧры ик калъясько, пе. Онисим но таӵе малпанлы пумит ӧз вазьы. Митан гинэ мукет пала турна вылэм. - Орудимылэн расчётэз быдэсак быремын. Кагазъёсъя ваньмыныз ӵош - ми но Иовисарен, - йӧн-йӧн вера Митан. - Озьыен, бырим - согизы. Война пумозь ми эрико муртъёс. Мылыд потӥз ке, пыртосэ куриськы, кулэ ке - медъяськы. Уробомы, кык валмы вань, уз шат кутэ? Быгатэммыя бергалом, поляклы я белоруслы узырлык люкалом, асьмедыз но сюдом, улэп но кылём. Нош война бере дор палъёсы шонтом... Таӵе верамлы пумит Онисим шеперскиз: - Нош калык синме кызьы учкод? - лек юаз. - Мукетъёс ож бусыосын улонзэс уз жалялэ, тон ке куайыса улод, нош бӧрысь ушъяськод: ми но, пе, ожмаським. Одӥг кылэ ӧз вуэ. Соин ик нырысь-валысь кӧтсэс тырыны малпазы. Со понна шур сьӧры выжизы, тэлясь тылпулэсь палэнэгес. Ымтыраськонзы йӧскадь ӧй вал. Мылкыдзы но. Чус сиськизы. Ма но со кушазы. Тылпу но кӧтсэ тыриз, лапказ. Улос вылэ ӝомал лэзькем бере егитъёс хуторез пыраклы кельтӥзы. Хуторез гинэ ке луысал - бӧрсязы сабырлы, вуоноезлы оскон сётӥсь улонзы кылиз. Азьпалазы война вал. Огзы но ӧз тодэ, ма вите соосты ӵуказе, арня, толэзь ортчыса. Нош шимес вир кисьтон 1418 нунал кыстӥськоз. ( Ӧрыд (диал.) - ишан, кайгу. (( Тырыллясьёс (диал.) - выжыятӥсьёс. ( Шыднар (диал.) - картлэн выныз. ( Ӵӧн (диал.) - ӵемон. (( Валлё (диал.) - азьвыл. ( Гичул (диал.) - липето гид азбар. ( Абыз (диал.) - пелляськись. ( Чикын (диал.) - азьвылгес. ( Ӧдыеныз (диал.) - кынарыныз, кужмыныз. ( Ырлэштонэн (диал.) - керетонэн, ченгешонэн. Урвӧсь Удмуртъёслэн одӥг вашкала ӟеч сямзы - урвӧсь ортчытон - сярысь мадеме потэ. Мон сямен, со тросэзлы тунсыко потоз, малпаськытоз но. Кыллюкамын "урвӧсь" кыллы таӵе валатон сётэмын: "Урвӧсь - этнографиысь вужмем кыл, шайтанэз уллян сям. Сое удмуртъёс масленица праздниклэн бӧрысь нуналаз пусйиллям, сое ик шуиллям тулыс вӧсяськон". Котькыӵе праздник мед луоз, солы одно азьло ик дасяськоно луэ. Урвӧсез ортчытонэ но быдэс гуртэн пыриськылӥзы. Воргоронъёс коркась корка сиён-юон люкаса ветлозы вал. Начар улӥсез но маке но сётыны шедьтоз вылэм. Гажано мӧйы муртэ бускельёссы поп чотэ пырто. Одӥг нунал ортчыса, пиос Сипко нюке мынозы вал. Отын дась ини азьвыл лэсьтэм липет ул, бадӟым чугун пурты дась ини, тырмыт кӧс пу ваемын. Пуртые кеньыр но сӥль поныса, ӝук пӧзьтыны ӧдъяло. Кибашлыос соку ик кык мудор лэсьтыны кутско. Ӝуез, писпу ӵыжинъёсты но лысъёсты думылыса, одӥгаз мудорлэн шораз нянь, шаньги, сӥль юнмато. Сое, кузь майыге дэмӟытыса, писпу шоры ӝуто. Кыкетӥез мудорзы я кионлы, я гондырлы кельше. Тазэ но майыг йылэ юнмато, писпу борды интыяло. Нырысетӥ мудор шоры вӧсяськыны кутско. Поп маке молитва кадь кырӟа. Кылъёссэ тодам уг ни ваиськы. Инмарлэсь куро: пудоосты сьӧсьёс медаз быдтэ, висёнъёслэсь мед утёз. Вазисько, ю-нянь мед удалтоз, калык пӧлын висёнъёс медаз вӧлме, шудбур трос мед ваёз шуыса. Нош кыкетӥ мудор шоры бодыен, шальыен погыртытозязы ик лэзяло. Зол кесясько, кыдёке, пе, мед кошкозы уродзэ ваись шайтанъёс но периос, вир юись пӧйшуръёс. Корт пуньыен сиськыны уг лэзё вал. Ваньмыз пуртыысь сӥлё-вӧё ӝукез сиыны кутско. Кылемзэ пуртые ик кельто, инмарлы, пе, мед яралоз, со но кӧтсэ мед тыроз. Сиськемзы бере вӧсясько. Отӥяз вӧсь ортчытэм интыез чылкыт утялто: жуг-жаг ке, окто - инмарлэн вожез потоз. Егит воргоронъёс Богдан выре тубо. Йылаз ик вуыса, куинь пол кесько: "Урвӧсь! Урвӧсь! Урвӧсь!" Кытын куара чузъяське, сопала ик погыльскыса, гурезь баметӥ питыр васько. Озьы куинь пол кесясько но Тыловай шур дурозь ик погыльско. Егитъёслы со шудон-серектон. Арлыдоос дэменак гуртэ берто. Мылкыд карисьёсыз кин ке дӥне люкасько, отын сиё-юо, кырӟало-экто, шулдыръясько. Арган интые гур пытсэт (заслонка) но яра вылэм. Ӝомыт луыса, егитъёс коркась корка ветло. Отын азьло ик сусыпу вай дасямын луэ ини. Со ваез ӵындыто но гулбечетӥ, пуконъёс, ӟусъёс ултӥ ӵынэн бустурганэз (домовой), висёнъёсты, шуг-секыт улонэз улляло. Нош отӥяз пинал калык лотокен нискыланы гурезе кошке. Тӥни озьы удмуртъёс тулыс вӧсяськонэз ортчытъязы. Колхозъёс кылдэм бере та сямлэсь куштӥськизы. Табере со сярысь тодӥсь ик ӧвӧл ни. Сизьымдон вить арес но солэсь мӧйыгес муртъёс тодазы ваё на, луоз, урвӧсез. Но удмуртъёслэн та сямзы сярысь тодытэк-адӟытэк уг гожтӥськы. Мыным аслым но та тулыс вӧсяськонэ шуд усиз пыриськыны. Урод-а, ӟеч-а, но - со асьмелэн историмы. Уг дэмласькы со сямез выльысь берыктыны. Нош адӟем карымонэз, тунсыкоез отын вань. Ӵыжы-выжыосмылэн улон- вылонэнызы, сямъёсынызы тодматскыса, вашкалаосмылэсь кыӵе сюлмаськонъёсын улэмзэс умой валаськод. Ваньмыз со герӟаськемын азьпалан ӟеч, шудо-буро, таза но байлыко улон сярысь малпанэн. Е. Первушин. "Удм. Дунне" - 22.01.94. 2653 Михаил Иванов Эшмед но эшмедъёс Удмуртъёс эш кылэз ярато но, туж мур валало но. Милям гуртмылэн нимыз но солэсь кылдэмын - Эшмед. Селта черкогурт дорын со. Гуртмылэн матэтӥз вашкала Сибыр тракт ортче. Ми палась куд-ог фамилиос но та кыл бордысь ик потэмын: Эшмаков, Эшманов. Удмурт калык кылосысь одӥгез легенда но со вылысен кутске - "Эш-Тэрек". Пересьёс Эшмедмылэн ма муген тазьы нимаськемез сярысь тазьы лабыртыло вал. Выль гурт кылдоно интые, пе, азьло ик Моко нимо воргоронлэн пиез юртъяськем. Нырысетӥ аръёсаз солэн юртъяськем интыезлэн нокыӵе нимыз вылымтэ. Та адями, огназ улэменыз, сюлэмыз позыръяськымон мӧзмылэ вылэм. Юрт пушказ бергакуз но, азбараз со-та ужакуз но, Анлэт ӧр дуртӥ солань-талань ветлылыкуз но, шур валлинысь тэлетӥ поръяллякуз но аслыз ачиз уйбыртыса выллем со кылалоз-буралоз вылэм: - Эш мед... Эш мед... Эш мед луоз вылэм... Э-э-эк... Ок-ок-ок... Солэсь огназ дыръя та вераллямъёссэ кинъёс ке кылӥллям, шӧдске. Моколэн пиезлэсь пуксем интызэ Эшмед шуыны кутскиллям. Солэн коркаеныз артэ мукет юртъёс кылдэм бере ини та выль гуртэз ваньмыз Эшмед шуыны кутскиллям. Гурт кылдэмын бере, сое кызьы ке одно ик ниманы кулэ ук. Эшмед гуртэ мыным калыкезъя но, нимызъя но ӵыдонтэм чебер потэ. Сылэ со, уг быры. Нокыӵе сильтӧл сое отчы-татчы пазяны уг вормы. Ма, медаз но вормы. Мед, котьку мед улоз Эшмед. Быдэсакез та югыт дунне сямен ик. Тятие Тӥни самой со Моко выжыысь ми но - Ивановъёс - потӥськеммы. Моко пилэн пиез Миквор луэм, Микворлэн пиез Иван, Иванлэн пиез Микаль, Микальлэн - Матё но Ботё, Матёлэн берпуметӥ пиез - мон, мынам пие - Витя (Виктор гожтӥське). Выжымы, озьыен, паськыт-паськыт но юн луоно вылэм. Но Октябрь революция солэсь вань улон азьзэ сураз-пожаз... Тятиелэн Микаль тятиез кулон азяз кык пиоссэ дораз ӧтем но шуэм: "Я, мон та югыт дуннеысь кошкисько ини. Тӥледлы тани быдэн кырым зарни кельтӥсько. Азвесез асьтэос тодэмъя люке. Та зарни вӧзы эшшо кырым-а, тросгес-а люкалэ но асьтэ пиостылы тазьы ик кельтэ. Узырлык пичиен-пичиен гинэ люкаське. Тон, Матё, вузкаронэныд ик выр. Тон, Ботё, гурт котырез возь". Тазьы вераськемзы бере ӵуказеяз Микаль песятае кулэм. Сое Мултан черке пырталлям, вӧсяллям но ватӥллям. Та вакытэ мынам тятие но, Ботё но кышноёесь вылӥллям ини. Но тятиелэн со дырысь нырысетӥ кышноез кыӵе ке кыль висён сэрен кулэм. Тятие, туж ик трос дышетскымтэ ке но (церковно-приходской школаез быдтэм ик кадь), ваньмон дыръёсаз книга-газет но кияз кутылоз вылэм. Уксё лыдъян-чотанын со укыргес нодлыко вылэм. Отысь-татысь пӧйшур но пудо ку бичаса, Вавоже но, Сюмсие но вуылозы, пе, вал. Умошуд гуртысь Шапей Иван вузчиен ӵошенназы Тылошур доры етӥн завод пуктыны кенешо вылэм ини. Но малпанзы малы ке быдэсмымтэ. Отӥяз ини тятие Вятка губерниысь Слободской городэ кык бигеръёсын ӵош ку посон завод пуктэм. Тылошур кенакелэсь агайзэ отчы приказчике келяллям. Песятае но, тятие но туж ӝужыт мугороесь вылӥллям. Тятие чагыр синмо, веськрес, чебер вылэм. Маскаръяськыны, пе, ортчыт яратэ вал. Тамак ӧвӧл кыскем, вина ӧвӧл юэм. Куное дораз кинэ ке ӧте ке яке ачиз куное мынэ ке, одно ик дуно папирос пачка поттоз вылэм. Кыске, пе, дуно куноос, чик жаль ӧвӧл! Граждан ож вакытэ карательной отрядъёс (шонергес верано ке, бандитъёс, мародёръёс), пе, ветло вал. Эшмедэ соос кык пол вуылӥллям. Зарнизэ таланы турттыса, тятиме туж зол жугиллям. Тятие вӧсь луэменыз кровать улэ, пе, ватӥське, бандитъёс сое отысь куктӥз кыскыса потто но урысэн нош ик жуго. Ӵапак соку, со минутэ ик, тӧдьыос гуртэ вуиллям но бандитъёс соослэсь кышкаса пегӟиллям. Кин тодэ, учырез тазьы ӧй тупасал ке, тятиме соку ик виысалзы но, оло. Та дырысен солэн тыбырыз куазь воштӥськемлы быдэ чидантэм висьылэ вылэм. Тятиме мон ӟеч уг тодӥськы ни. Уйвӧтысь кадь гинэ син азям пуктӥсько: ссылкаысь висьыса, лы но ку гинэ кыльыса бертӥз но, со нуналэ ик нэнэеным ӵош Анлэд дуре васькизы. Шурмес, возьёсты-лудъёсты - оглом инкуазез, пе, туж яратэ вал со. Кулон азяз соосын люкиськыны шуыса ветлӥз, дыр, соку. Шур дурысь тубемзы бере койка вылысь ӧз султылы ни. Туж зол висиз ке но, ӧз ӝуштылы, ӧз керӟегъяськы. Ын улын шып кыллиз. Кулӥз но озьы ик: шып, нокыӵе куара поттылытэк. Кинлэн тятиез вал, мон, конешно, соослы туж вожъяськылӥ. Но нэнӥе укыр куректэмме, вожъяськемме эшъёслы возьматыны ӧз лэзьылы. Со шуоз вал: вожъяськон - самой урод сям, со ляльчиослэн улон радзы. Али дырозь мынам нокинлы но вожъяськеме но, йыбырттэме но ӧвӧл. Ӟеч мылкыдо, чылкыт малпано ке - тон мынам эше, юлтоше, кырсь малпано ке - кош дорысьтым, азьыдлэсь тыбырыд чебер. Озьы улӥллям мынам тятие но, нэнӥе но. Калыклэсь пӧртэменызы ик, оло, сокем трос курадӟонэз но адӟизы. Нэнӥе Костя - лапег мугоро, паськыт пельпумо, тыр сӥльвиро егит воргорон. Блинов дораз ӝомо-югдо вакытэ гинэ вуиз. Корка пыриз но, дӥськутсэ но кыльытэк, лыз дэра сумкаысьтыз ньыль полэс куасалтэм газетэз поттӥз. Бер вуэмысьтыз паймыса, пумитам Насьток кышноезлы газетлэн ӝыны бамез быдӟа патретэз возьматӥз но шуиз: - Тани та луоз табере Инмармы. Собере ӟус вылэ султӥз но мудор рамаысьтыз Христосэз басьтыны кутскиз. Насьток, тае адӟыса, кыӵак абдраз, бакомиз кадь, ма вераны кыл уг шедьты ни. Ӧжытак буйгамез бере алвылаз чабкыса шуиз: - Мар дауртӥськод тон, Костя! Эн иса! Мар озьы выриськод? Инмар борды эн йӧтскылы. Ой, быри, быри! Мар ишан та, мар ишан! Костя, конешно, кышноезлэсь вӧсяськемзэ, Мултан черке но ветлэмзэ ӟеч тодӥз. Но со ӧз малпалля, Насьтӥез туннэ таӵе пурӟоз шуыса. Костя азьвыл но вералляз: Инмарлы оскон - со синпӧет гинэ, дунне вылын нокыӵе Инмар но, мукетыз но ӧвӧл. Солы, куанер семьяысь егит воргоронлы, Селталась партийной ячейкаын ялан индылӥзы: "Вӧсяськон, Инмарлы оскон - со узыръёслэн калыкез пӧян понна верамъёссы гинэ". Костя талы пумен-пумен оскыны кутскиз. Собере огезлы но, кыкезлы но та малпанзэ пыӵатыны турттылӥз. Отӥяз, партячейкалэн дэмламезъя, аслаз Сурӟи гуртаз ачиз кадь ик дасо мында егит пиосын но нылъёсын ӵош комсомол ячейка кылдытӥз. Ӵош люкаськыса, та егитъёс выль улонэз данъясь кырӟанъёсты кырӟаллязы, комбед, ликбез шуонъёслэн ужъёсазы пыриськылӥзы. Но ӝоген граждан ож пуромиз. Сурӟи, Мугло, Гопгурт, Эшмед палъёстӥ со ож огпол гинэ ӧвӧл, куинь-ньыль пол гудыръяса но котыр дуннеез тылын ӵушкаса ортчиз. Та гуртъёс туннэяз гордъёс кие, ӵуказе тӧдьыос кие сюрылӥзы. Тӥни соку Костя Блиновез, партячейкалэн дэмламезъя, Горд Армие мынытӥзы но комиссаре пуктӥзы. Блинов ӵапак соку веськрес мугоро, курень синмо, мертчан йырсиё Насьтоксэ адӟыны Селталась бертӥз. Корка пыремез бере ик мудорысь Инмарез интые Ленинлэсь патретсэ интыяны кутскиз. Яратоно кышноез солэн мылкыдызлы меӵак пумит кариськиз: - Васькы отысь, Костя, эн иса Бадӟым Инмарез. Озьы вырид ке, мон тон дорысь кошко. Нош Костя Насьтаезлэсь уг кылзӥськы. Ас понназ малпа: "Валалод ай, валалод..." Кузпалыз Насьтӥлы азьвыл но вералляз: "Азьланьын асьмеос умой улом, али кадь ум курадӟе. Узыръёслэсь ваньбурзэс талалом но куанеръёслы люкылом". Сюлмызлэн куд ке пал сэргыныз, оло, Насьток вала но вал картэзлэсь малпанзэ. Ведь учконо ке, вань калык курадӟе. Сурӟиослэн няньзы, вылез вуытозь, арлы быдэ уг тырмы. Насьтӥ нэнэзэ ялан жаля вал. Огназ ужа, огназ сюдэ ук со. Тӥни куинь ар талэсь азьло гинэ дядяез кулӥз, вылаз ик, олокытысь-марысь тылпу потыса, корказы сутскиз. Гуртысьтызы узыр улӥсь Никодим агай ке ӧй юрттысал, оло, пыдйылскысалзы но соос. Со Никодим агай таослы куинь арлы, пунэмен шуыса, дас кык пуд нянь но ветыл сётӥз. Али капчигес ини: вынъёсыз будӥзы, мар но со ужаны быгато ини. Никодимлы пунэмен тыронзы но трос ӧз кыльы ни. Насьток малпа, тае Инмар радъяз шуыса. Соин ик арнялы быдэ нэнэеныз ӵош черке ветлэ, семьязылы юрттэмез понна Инмарлы тау каре. Нош табере таӵе югдур кылдӥз: аслаз картэз, яратоно картэз, Бадӟым Инмарез сантэма, солэн интыяз улэп муртлэсь - Ленинлэсь - тусбуйзэ пуктӥз. Озьы нырысьсэ та кузпалъёс туж лек керетӥзы но пӧртэм интыосы изьыны выдӥзы: Костя кровать вылэ, Насьтӥ - сэндрае. ...Туж вазь ӵукна, ӟардэм бере ик, урамысь вал пыд куараос кылӥськизы. Костя соосты ӝоггес кылӥз. Сюлмыз мае ке шӧдӥз, лэся: кышказ, либрак луиз. Пельпумъёсаз дукес возъяз но Насьтӥезлы сэндрае сузьтӥськыса шыпыртӥз: - Монэ утчало ке, мон татын ӧвӧл, Селталан. Валад-а? - собере гулбеч ӧсэз усьтӥз но отчы шыпак зымиз. Валъёс, зэмзэ ик, соослэн капка доразы дугдӥзы. Капкае урыс ныдынызы йыгало ини. Насьтӥ дэремзэ ӝогак дӥсяз но педло потӥз. Ӧтьымтэ куноос капкаез пыдынызы ӵыжало. Насьтӥ кутэтэз усьтӥз гинэ но, сое егит солдат, номыр вератэк, бур пала донгыса погыртӥз. Кык солдатъёс но офицерзы корка бызьыса пыризы. Солдатъёслэн киосазы винтовкаос, офицер пистолетэн. Сьӧразы Насьтӥ но кыстӥськиз. - Кытын картэд? Кытчы сое ватӥд? - пистолетсэ сэзъя офицер. - Уг тодкы, - шуэ Насьтӥ. - Ах, уг тодкы-а? Вера, кытчы ватӥд! - урыссэ урдӥз солдат. - Утчалэ, со татын кытын ке, - солдатъёсыз шоры лек учкыса шуиз офицер. - Тон коргидысь, чуланысь утча, нош тон - гулбечысь, - солдатъёсызлы косъяськиз белогвардеец. Ну, мар-о утчанэз? Гулбеч ӧсэз одӥгез солдат усьтӥз гинэ но, отысь Костяез соку ик адӟиз. Соиз косытэк но, маратэк но отысь потӥз. - Эй, эн утчаське ни. Тани со - горд комиссар, - педло потэм солдатъёслы кеськиз тӧдьы офицер. Собере Костялэсь киоссэ мышласянь урысэн керттылӥзы но ураме поттӥзы. Соос сьӧры канжаськылыса но шонаськыса мынэ Насьтӥ. Сынамтэ йырсиосыз сураськемын, синъёсыз шулӟектэмын. Мугорыз куалекъяса тэльмыре: - Эн ыбе картме. Со интые монэ вие... Тӧдьы офицер шуак дугдӥз но шуиз: - Сылэ! Тани мар, горд комиссар, мон тыныд улон кузьмало. Ойдо ми сьӧры, ойдо ми палан гордъёслы пумит ожмаськыны. Соглаш-а? - Ӧвӧл. Революция понна, Кенешо власть понна мон улонме но уг жаляськы, - офицер пала берытскиз но лек тусын вераз Костя. - Ачид тодӥськод! Азьлань! - команда сётӥз но гуртлэн пум палаз возьматӥз офицер. Ӧжыт улыса, офицер солдатъёсты нош ик дугдытӥз. - Дугдэ! Кылзӥськы ай, пась бер, бер ӧвӧл на, визьмаськы. Ойдо ми сьӧры. Мынам тонэ виеме чик уг поты. Астэ ке уд, чебер кышнодэ коть жаля, - мылкыдыз шунытасагес вера ни офицер. - Яке пегӟы-а, мар-а кытчы ке... Насьток, так кылыса, Костя доры лобӟыса кадь лыктӥз но солэн саес бордаз юн-юн кырмиськиз: - Кылзӥськы, кылзӥськы, мусое. Тӧдьыосын кошкемед ке уг поты, ойдо туннэ ик Вавоже пегӟом но, война бырытозь, отын Зина апаед дорын улом. Жаля астэ, жаля монэ. - Мон, комиссар маке, пегаса мед ветлом-а? Уг. Вормон понна мон вордскемын, улэпкын уг сётскы! - урам тыр кесяське Костя. Сое кылыса, отысь но татысь корка укноосы адямиос мычиськизы, но ураме потыны огзы но ӧз дӥсьтэ. - Азьлань! - нош ик косӥз офицер. Костя вамышъя но малпа: кӧня вамыш меда мынам улонэ кылиз на? Э-э, курадӟыса улонлы тани-тани пум вуэ вал кадь. Революция куанер калыклы ӟеч улон сётыны медэ вал ини... Вот табере мон одӥг-кык-куинь вамыш вамышто, усё но... уг шока ни. Оло нош, Инмар доры мон али мынӥсько. Но... большевикъёс верамъя, дуннеын нокыӵе Инмар ӧвӧл. Оло мон обросысь Инмарез басьтэме понна таӵе кыл кутӥсько-а? Оло берытсконо но таослэн пыд азязы выдыса тэльмыроно, медаз ыбе шуыса. Одӥг-кык вамыш... Нош Насьтӥ? Со дугдылытэк синву кисьтэ но тэльмыре: - Жалялэ сое. Монэ, монэ ыбе со интые... Вуизы урам пуме. Костялэн йырсазез тыкиськиз, сураськыны кутскиз. Вамышъямзэ ик уг шӧды ни. Со дась вал ини вераны, тӧдьыос сьӧры мыноз шуыса, но малпаз: "Мон соосъя кариськи ке, гордъёс татчы вуозы но кышноме сопал дуннее келялозы". Урам пуме дугдӥзы. Костя "мон соглаш" шуыны ымзэ усьтӥз вал ини, со вакытэ офицер йырзэ резяк шоналтӥз но, кык винтовкаосысь ыбем куараос быдэс гуртэз зуркатӥзы. Костя пограз. Насьтӥ солэн мӧля вылаз лэзиськиз, дэрем гадьыз пӧсь вирен пеймыт-горд луиз. Тӧдьыос сое жальмаса, жаляса сылыны ӧз ик малпалэ, валъёссы вылэ пуксизы но Мугло пала ӝог-ӝог лашкинтӥзы. Со дырысен Насьтӥлы быдэс дунне уй кадь пеймыт луиз. Картсэ ватэмез бере ик нэнэ юртаз берытскиз. Вынъёссэ утиз-вордӥз, ужаз но арня нуналъёсы Мултанысь черке ветлӥз. Конешно, картсэ виён нуналэ ик обросэ Христосэз лад-лад интыяз. Озьы сюлэмзэ ӧжытак буйгатӥз кадь. Насьтӥлэн валамезъя, картэз Инмар азьын сьӧлыкеныз йырин озьы быриз. Ма, Христосэз Ленинэн вошты ай... Со ведь адями виемезлэсь но бадӟымгес сьӧлык. Выль Мултан черкын та чебер но туж куректӥсь егит кышномуртэз Пётр отец, удмурт поп, синйылтӥз. Одӥг пол, вӧсяськон йылпумъяськем бере, со Насьтӥ доры лыктӥз но каллен гинэ юаз: - Мар сэрен сюлмыд сокем бӧрдэ, нылы? - Ой, святой отец, мынам чик-чик улэме но уг поты ни. Картме тӧдьыос виизы... - Э-э, тынэсьтыд-а карттэ ыбизы? Мон кылӥ вал, кылӥ. Буйгатскы, нылы. Кылдэмез сыӵе вылэм, дыр. Весь бӧрдӥсь, куректӥсь адямиез Инмар уггес яраты. Мар карод. Улон али сыӵе уга... Ӟечезлы оскондэ эн ышты. Уно пол озьы буйгатъяз сое удмурт баӵко. Одӥг пол дораз пыртылӥз, Елена матушкаеныз но тодматӥз. Паяен, пыжем нянен утялтӥзы. Мукет радаз, вӧсяськон бырем бере, Насьтӥ Сурӟияз бертыны потӥз вал. Тымет пала васькон дорысен сое сутӥз Эшмедысь узыр егит воргорон - Микаль Матё. Татчы со тӧдьы валэн, тарантасэн вӧсяськыны ветлылӥз. Егит кышномуртэн артэ валзэ дугдытӥз но вазиськиз: - Асьмелэн сюресмы одӥг, дыр. Пуксьы, дыдые. Пыдын кема вамышъяно луод. Жадёд но. Насьтӥ ӵыжак ӵыжектӥз. - Мон пыдын ветлыны дышемын, уг жадиськы, - шуиз. - Ойдо пуксьы ини, валлы секыт уз луы. Тон Сурӟиысь ведь? - тэльмырем кадь вазиз Матё. - Уг, у-уг. Нош кызьы монэ тодӥськод? - паймыса юаз Насьтӥ. - О-о, мон тонэ кемалась синйылтӥ ни. Зэмзэ верано ке, тонэ адӟыны шуыса татчы ветлӥсько. - Матё тарантасысьтыз шуак тэтчиз, егит кышномуртэз кускытӥз лӧбак ӝутӥз но тарантасаз пуктӥз. Соиз мар шуыны ик ӧз шедьты. Вал гонӟыртыса Умопуд пала ворттӥз. Собере сое Матё пырак Сурӟияз нуиз на. Гуртэ ӧз пыра. Гурт пумысен васькытӥз. Отӥяз соос нош но нош черкын пумиськылӥзы. Матёлэн нэнэез Муглоысь вал. Пизэ со ялан индылӥз, Насьтӥез кышно мед басьтоз шуыса. Ужась семьяысь, пе, востэм, чебер, кин-о, мар-о, пе, тыныд кулэ на. Нош Насьтӥлэн выльысь бызён сярысь йыраз малпан но ӧз лыктылы. Берло гинэ синмаськиз-а, мар-а, вылды, граждан ож бере кык ар ортчыса, со Матёлэн, чебер но узыр воргоронлэн, кышноез луиз. Нырысь-валысь Насьтӥ та юртъерын йыромем-усыкмем кадь но луылӥз. Пересьсы - ӝужыт Микаль - "Мын ай, кен, льӧмпу вадьсысь кеносысь тари кеньыр пырты" шуэ ке, уг тоды вал, кытын соиз - льӧмпу вӧзысез кенос. Таослэн уго куать кеноссы. Котькудӥз вӧзын - льӧмпу. Отӥяз дышиз. Вазь ӵукнаысен бер ӝытозь уж тырмылӥз. Пудолы сиён дасян понна колдэч вӧзын ик ту-у-ж бадӟым пурты сылэ. Доразгес эшшо кык пичиесь пуртыос. Кык корка. Одӥгез ньыль сэрего, улыно-вылыно, мукетыз - куать сэрего. Семьязы бадӟым. Песятайлэн куинь вынъёсыз. Куинез вӧзаз: Дмитрий, Николай но Сергей. Зэм, пичиез вынзы, Сергей, Селталан улӥз. Булычёв вузчиослэн приказчиксы вал. Эшмедаз арня вискын одӥг нуналлы гинэ бертылӥз. Семья бадӟым бере, сиён но трос пӧзьтоно, тусьты-пуньы но трос миськоно. Нош бусы ужъёс кӧня! Ньыльдон десятинлэсь уно бусы но Анлэд шур дуртӥ сомында ик возьёс. Насьтӥ жадёнэз ӧз шӧдылы. Вузкаремысь бертэ ке, картэз со доры лобӟыса кадь вуэ но чыртыяз ошиське. Матё картэз улосын туж тодмо ужбергатӥсь. Пӧйшур но пудо куос октыса, гуртысь гуртэ ветлылӥз. Люкамзэ коротникын сузя, куасьтэ но кык бигер вузчиосты возьма ини. Соос солы дун тыро, тау каро но кошко. Лыктыкузы, конешно, олокыӵе бискылиос, саламъёс ваё: куасьтэм но сылалтэм горд чорыг, мызь, кампетъёс - оломар но. Матёослэн горд чорыгзы ноку ӧз бырылы. Сӥльзы котьку асьсэлэн. Няньзэс ӝыныез гуртсы пунэмалляз. Огпол, изьыны выдэм беразы, Насьтӥ картсэ ӟыгыртӥз, чупаз но юаз: - Матё, мон весь юаме потыса улӥсько: кызьы тӥ тамында ваньбур люкады? Уть, зарнидэ но толон возьматӥд - лыдъянтэм трос ук! - Э-э, нуные, мусонькае, та ваньбур дауръёс ӵоже люкамын. Выжыямы тани кин но кин вылэм: Миквор, Иван, Вася, соос бӧрсьы ини мынам дядие. Али тодӥсь но ӧвӧл ни, оло Миквор, оло Иван доры йыромыса кык бигеръёс-вузчиос вуиллям. Соослэн валзы висьыны кутскем. Вот тӥни, Миквор ик, дыр, со бигеръёсты ас валэныз гуртысь гуртэ ку бичаса нуллэм. Собере ачиз но вузкарыны дышем. Тӥни отысен ни та уж мон кие вуиз. Но ведь ваньбур люканы уй но нунал ужам кулэ. Ачид адӟиськод: ми ноку но ужтэмаса ум пукиське. Зэмзэ ик, таос лумбыт ужало, ӝытазе гинэ котькудӥз ас интыяз пуксе но эшшо мар но со ужа на. Пересь Микаль шур сьӧры тэль мерттыны тысь дася, Ботё - Матёлэн выныз, кут кута, кышноос черсо, керттӥсько, дэра куо... Ӵукна ини пудо люктано. Таиз - Насьтӥлэн ужез. Одӥгъёсыз скалъёс, ыжъёс, ветылъёс, валъёс, парсьёс гидысь гинэ пото ай, мукетъёсыз ошмес дорысь ву юыса берто ини. Ӟазегъёсты, курегъёсты, ӵӧжъёсты, немычъёсты лыдъясь но ӧй вал. Дасо мында вал но чуньы возизы, кык ужпи - ворттылыны. Одӥгез лымы кадь тӧдьы, мукетыз - су кадь сьӧд. Вольытэсь соос, чебересь, сэзесь, проворесь. Соосты утялтыны, сюдыны, сузяны Матё мукетъёслы ӧз оскылы. Соослэн вамышен вамышъямзы ик уг луы кадь вал. Йырзэс вылӥе урдыса гонӟырто яке лашкинто. Валъёсты кыдёкысен адӟыса, урам дурын шудӥсь пиналъёс кир-пазь пегӟо. Ульча паськыт, нош сюрес урдэсъёсын вож-вож ожо. Ма, улон огсыр мынэ вал. Кинлэн ке коркаез сутскыны шеде яке пудоез - валэз, скалэз кулэ ке, соку ини адямиос курадӟылӥзы. А так огсыр улон вакытэ нокин ик сокем ӧз курадӟылы. Нош кураськыса эшмедъёс ӧз ветлэ. Та палан музъем туж удалтытӥсь. Вӧё музъем. Ну, юись, картаен шудӥсь, азьтэм семьяос вал ик. Но гуртоос соослы но юрттылӥзы. Тужгес ик тау каро вал Сатёослы. Курадӟись семьяослы соос дунтэк ӟегзэс изылӥзы (вукозы но Анлэд дурын вал уго), пунэмен кеньыр но, пызь но сётъяллязы, кунян но, чуньы но дунтэм дунын вузаллязы. Огъя вераса, гурт калык понна та семья матэ кариськыса улонтэм ӧй вал. * * * ...1919 арын Выль Мултанэ учительской семинария усьтыны малпазы. Со дышетскон юртлы аслэсьтыз бугрозэ сётӥз Умопудысь кыкетӥ гильдиё вузчи, Куӟебай Гердлэн кышноезлэн ӵыжы-выжыез Шапей Иван - Иван Антонович Ирисов. Семинария кылдытон сярысь укыр сюлмаськиз Насьтӥлэн тодмо удмурт попез Пётр Фёдорович Лекомцев. Нош Матё та вузчиен но, та попен но туж эшъяське вал. Нырысетӥ пиез вордскем бере киросатае Ирисовез басьтӥз. Лекомцев поп солы нимзэ но Пётр кариз, аслэсьтыз сётӥз. Огпол, вазь ӵукна ӟардон азьын ик, Ирисов вузчи но Лекомцев Матё доры вуизы. Насьтӥ пыд йылаз вал ини. Тодмо попез капка дорысен пумитаса, солы музъемозь йыбырттӥз но кизэ чупаны турттэ вал. Поп кизэ палэнтӥз. Мон, пе, черкын, службаын ӧвӧл. Мон, пе, дорады али огшоры адями музэн лыктӥ. Насьтӥ лыктэм куноосты корка пыртӥз, кыкетӥ этаже тубытӥз. Отысь бадӟым залэ Матё но со вакыт вуиз. Олокытысь-мар сурон сапег но кутчаны вуэм, выль лыз дэремзэ но дӥсям, пумен векчи мыйыксэ маялля. - Ой, кыӵе дуно куноос вуиллям, - киоссэ лопак карыса, доразы лыктӥз, я одӥгзэ, я кыкетӥзэ ӟыгыръяз но куинь пол чупаз. Ӝӧк сьӧры пуксизы. Насьтӥ олокытӥ-мартӥ сиён-юон пуктылӥз. Но сое нокин ик ӧз веръя. Та куинь воргоронъёс вина но уг юо, тамак но уг кыско. - Кыӵе сюрес вуттӥз меда тӥледды та пала? - юаз Матё. - Муген лыктӥм ай. Уд юртты-а тон, Матвей Михайлович, Мултанын семинария пуктыны? - юаз Пётр отец. - Ӧйтӧд, кыӵе юрттэт бон кулэ? - ӟудомиз Матё. - Борддоръёс вань, липет кулэ, - шуиз Шапей Иван. - Да-а, липет, иське, - малпанэ усиз Матё. Собере шуак луиз но вераз: - Ма, мынам пулъёсы вань. Вуко кеносэз пулэн шуккыло шуисько вал... - Ӵапак сое тодыса ик мон баӵкоез дорад ӧти. Вунэтӥд-а, кызьы ке верад вал, пулэд вань шуыса? - юаз Шапей Иван. Озьы ик кенешизы. Семинариез та куинь воргоронъёслэн сюлмаськеменызы но юрттэменызы пуктӥзы. ...Кӧня ке ар ортчыса, Шапей Иванэз Сибире келязы, нош удмурт баӵкоез, Пётр Фёдорович Лекомцевез, "калык тушмон" карыса ыбизы. Берлогес ини отын дышетскизы мынам нэнэелэн ӵыжы-выжыосыз - Пётр Блинов но Михаил Лямин. Пыдйылчи Та аре укыр трос лымы усиз. Азбарысь сое сузяськод гинэ но, ӵуказеяз сомында ик люкаське. Матёлэсь одӥг липет корзэ но зӧк лымы чигтэм. Гужемозьлы шуыса, отчы зӧк юбоослэсь кык пыкет пуктоно луиз. Одӥг пол вазь ӵукна ик Матёлэн капкаез вадьсы кошовкае кыткем пар валъёс дугдӥзы. Ӝоген капка ӧсэ туж зол йыгаськыны кутскизы. Ӵыжало-а, бодыен йыгало-а. Матёлэн кӧшкеман но кышкан сямыз вал. Соин ик кышноезлы - Насьтӥлы шуиз: - Мын ай, учкы, асьме доры кин таӵе вазь вуиз. Нош ӧтьымтэ куноос вистэс-вожтэм йыгасько, кык пуныос соос шоры урмыса уто. - Кин отын? - юаз Насьтӥ. - Усьты! Ӝоггес! - лек вазиз капка сьӧрысь воргорон. Насьтӥ усьтӥз. Син шораз соку ик куинь милиционеръёс адӟиськизы. Лекесь, кышкамонэсь. Огез милиционер Насьтӥез винтовка прикладэныз донгиз но лымы пуктосэ паллян пала уськытӥз. Насьтӥлэн сюлмыз пилиськиз кадь. Соку, чилектэм музэн, син азяз пуксиз нырысетӥ картэз Костя, горд комиссар, сое ыбыны лыктэм белогвардеецъёс. Насьтӥ огдырлы йырсазьзэ ыштӥз. Сазьтӥськемез бере корка пыриз но адӟе: та милиционеръёс корка шорын Матёлэсь кисыоссэ, дэремъёссэ эскеро. Пистолетэз-маиз ӧвӧл-а шуыса эскеро, луоз. Собере кровать котыръёсты бугыръязы. Полате-сэндрае тубазы. Насьтӥ мар карыны, мар вераны тодытэк, мурт адями кадь, ӧс дорын сылэ. Милиционеръёслэн кузёзы ӝӧк сьӧры пуксиз но юалляськыны кутскиз. Собере одӥгзэ милиционерез гуртысь адӟисьёсты-понятойёсты вайыны косӥз. Матёез ӝӧк сэргы пуксьытӥз. Юалляське: - Тон Матвей Михайлович Иванов, озьы-а? - Озьы, - вера Матё. Собере Матёлэн кышноез шоры учкиз: - Ма, куноос лыктӥллям ук, уродэн-а, умоен-а, утялтон пуктылы ай, Насьтӥ. Соиз соку гинэ уммысь сайказ кадь. Сылалтэм чорыг, сӥль, кубиста поттӥз, олокытысь бадӟым штопен горд вина но вуттӥз. - Сиелэ, юэлэ. Кыдёкысь вуиды, луоз. Кынмиды но, дыр, - шуиз. Кык милиционеръёс уралмем кадь сиськыны ӧдъязы. Горд вина но юо. Кузёзы дугдылытэк юалляське но гожъя. Мар-о юа? Кӧня ляльчи возид? Кызьы тамында ваньбур люкад? Оломар сярысь но. Собере, эшъёсызлэсь горд винаез ӵем бекыръямзэс адӟыса, шуак ӝӧк вылэ мыжгиз: - Тырмоз! Мар-о тӥ? Службаын-а яке куноын-а? Соосыз, вӧесь ымдуръёссэс саесъёсынызы ӵушылыса, ӝӧк сьӧрысь кыштырак потӥзы. Корка пушкы со вакыт трос калык люкаськиз. Кин лушкемак-лушкемак ӟеч дӥськутъёсты поттылэ, кин ӟенеликъёсты нуллэ. Насьтӥ но огыр-бугырен валче зарниен коробказэ лушкемак поттӥз, лобӟыса кадь артысь корка пыриз но со ящикез сьӧрос пыдэсазы выйытӥз. Собере нош ик улоно корказы вуиз. Со вакыт милиционеръёслэн йырзы приговор мактал лыдӟе вал ини Матёлы: - Волисполкомлэн пуктэмезъя, тон, Матвей Михайлович Иванов, кулаке поттэмын но тынад быръён правоосыд таламын, тонэ арест улэ басьтэмен лыдъяськомы. - Озьы ке озьы, мар карод, - номыр шугъяськытэк, огшоры вераз Матё. - Но мон ваньзэ ӧй лыдӟы на, - шуиз милица йыр, - ваньбуред таламын луоз. Озьы кутскиз та семьяын мур лымыё тол нунал. Пеймытозь татын кузёяськизы куинь милиционеръёс. Соослы юрттӥзы комбедчикъёс, адӟисьёс. Кулаке поттэмъёслэн валъёсынызы ик куать воз ваньбурез Селтала нуизы, кылемзэ, Мултанын но Выль Моньялан торг лэсьтыса, куанеръёслы дунтэм дунын вузамъяськизы. Бератаз та куанер семьяосысь кышноос Насьтӥлэн буртчин дэремъёсыныз кутсаськыны но, кыед ворттыны но ветлылӥзы. Озьы шузимиз И. В. Сталин. Озьы шузимиз калык но. Ай 1960-тӥ аръёсозь Эшмедгуртэ "Шудо шур" нимо (кылӥськоды-а: "Шудо шур" мурт чотын шудо улон, пе) колхозын одӥг пудо гид но, склад но, итым но, пудо гид но, вуко но ӧз лэсьтэ, валъёс-скалъёс но Матёлэсь быръем-утем выжыосысьтыз возиськизы. Гуртоос, таӵе дась "шуд" усемез адӟыса, воксё азьтэммизы, тросэз рай вуонэз возьманы кутскизы. Матёез но Насьтӥез, соослэсь пиналъёссэс кураськыса ветлон калэ вуттӥзы, пыдйылтӥзы. * * * 1931 арын, мон вордскем бере кык арня ортчыса, мынэсьтым нэнэ-дядиме но монэ ссылкае Архангельск областьысь Няндом посёлок доры келязы. Ачим мон, валамон, уг тодӥськы ни со дырез. Тятие-нэнӥе верамъя гинэ тодӥсько. Нэнӥе, Анастасия Фёдоровна Блинова (Иванова), со нуналысен та дуннеысь кошкытозяз, ас югдаз улӥсь но вераськисьтэм луиз. Инмарлы гинэ лулысь-сюлмысь вӧсяськоз вал - котькуд вазь ӵукна, бер ӝыт. Келяллям милемыз пудо нуллон вагонъёсын. Самой уродэз, пе, вал вагон пумысь ведраосы "педло потан". Пиосмуртъёс но, нылкышноос но отын огазьын ук. Нырысь, пе, кышноос одеялэн-маин шобырскыса ведралы шара верантэм интыоссэс возьмато, собере - пиосъёс. Берло, пе, ваньмызлэн возьдаськонзы быриз, тӧлъя кытчы ке кошкиз кадь. Ведра вылын пиосмурт пуке но, со бӧрсьы отчы ик нокыӵе кариськытэк лаптӥське кышномурт. Мар карод, адями котьмалы - уродэзлы но, ӟечезлы но - ӝог дыше. Нина апай Сыӵе бадӟым семьяысьтымы ми кык кузя гинэ: Нина апай но мон кылимы. Солы али тямыстон ньыль арес тырмиз ини, мон сизьымдонме выжисько. Ми выжыысь нылкышноос азьло кема уло вылэм. Мынамез песянае укмыстон тямысаз кулэм, солэнэз - даурзэ сю кык аресозяз кыстӥськытэм. Пиосмуртъёс малы ке вазь кулылӥллям. Асьсэды жалятэк уй но нунал ужано луэмысь, дыр. Собыдӟа юртъерез, сомында пудо-животэз возь ай. Верай ук ини: милям кык коркамы (одӥгез улыно-вылыно), мукетыз куать сэрего вылэм, куать кеносмы, быдэн дасо валъёсмы но скалъёсмы, уллёен-уллёен ыж, парсь вордӥллям на. Со сяна, кык кеносмы, кык мунчомы, итым, вуко, кизён, аран, тӧлӥськон машинаосмы, чипы- курегъёсмы, ӵӧжъёсмы, ӟазегъёсмы вылӥллям на. Таосызлэсь лыдзэс семьяямы тодыны ик турттӥллямтэ. Гырон-кизён музъеммы, возьёсмы но быдэн ньыльдон кык десятин вылэм. Нина апае ваньзэ тае тодаз возе. Сое сяна, мон уг тодӥськы сыӵе адямиез, кудӥз вань улытозяз нокинэ ӧз пӧя, нокинлы ӝоже уськытон кыл ӧз вера. Пичи дыръяз ӝоже кык пол усемез сярысь гинэ поттылӥз ик. Огполаз, пе, начальной школаын дышетскыкуз, пиналъёс солэн чыртыысьтыз кироссэ адӟиллям но со кирос сӥньыстӥз кыскаса но донгаса нуллӥллям. Серекъяло, пе, школа тыр ик горо но шуо: "Учке ай, учке, Нина Иванова Инмарлы оске. А Инмар ӧвӧл, а Инмар ӧвӧл. Сталин эш Инмар ӧвӧл шуиз ук. Со шуиз бере - Инмар ӧвӧл!" Кыкетӥез ӝож учырез таиныз ик герӟаськемын. Ваньзэ пиналъёсты пионере кутӥллям. Нина апайме кутӥллямтэ. Со, пе, кулак выжыысь. Со, пе, Инмарлы оске. Та дырысен Нина апае чыртыяз кирос ӧз нуллы (али нуллэ ини). Гурт калыклы тау карыса, со ялан тодаз вайылэ ссылкаысь пегӟемзэ. Сое отысь вайыны колхоз правление Трефин Иванэз ыстэм. Сое сокеме юри лэзиллям. Контролёръёс билет эскерыку, ява, та Трефин Иван Нина апайме сьӧросэ ватыны ятвылтэм. Таин валче тодам лыктӥз на таӵе учыр. Милемды ссылкаысь мед лэзёзы шуыса, сельсовет но, гурт калык но кык пол кенеш ортчытӥллям. Ваньзы-ваньзы эшмедъёс гожтӥськиллям. Кызьы со понна тау уд кары. Зэм, пайдаез солэсь ӧз луы. Кулэ вал, пе, Сталин кадьёслы Удмуртиысь кыӵе ке эшмедъёс... Нина апаелэн отӥяз но улонэз шулдыр ӧй вал. Ижкаре лыктыса, 74 номеро заводэ ужаны интыяськиз. Кин ке чагиськыны вуэм но, отысь уллязы. "Калык тушмонлэн" нылызлы ожгар тӥрлык лэсьтонын ужаны уг яра, пе. Война вакытэ со мукет заводлэн парсь вордон гидаз ужаз. "Пудоослэсь кылем-мылем картофказэс сиыса улэп кыли", - шуэ. Татын ужакуз со доры кыӵе ке сютэм пияш пырем. Чик тодмотэм маке. Нина апай сое картофкаен кӧня ке сюдэм. Кӧты ӧз тыры шуыса, картофка эшшо курем на. Нина апай картофка ваё на шуыса парсь гидаз мынэм. Соку та пияш апаелэсь быдэс толэзь ӵоже нянь басьтон карточкаоссэ но уксёзэ лушкаса кошкем. Али но ай солэсь марзэ ке-марзэ ке дырын-дырын лушкало. Ваучер нергеоссэ но, уксёзэ но ялан ыштылэ. Малыез тодмо. Вань адямиосты ачиз кадесь кожа, ваньмызлы оске. Куинь ар талэсь азьло чик ӵыжы-выжытэм висись кышномуртэз дораз утялтыса возиз. Ӝыны ар пала. Пуньыен сюдӥз, сьӧросэ нуллӥз. Сомында сюлмаськемез понна кулыны дасяськем кышномурт солы витьтон манет гинэ уксё сётэм. Нош со кышномуртлэн кенэз, ӵыжы-выжыосыз но вылӥллям. Одӥг пол но со доры ветлӥллямтэ. Кулэм бераз квартиразэ куспазы люкон понна керетыса жугиськиллям но, шуо. Сыӵе секыт улон сюресэз ортчыса но, Нина апае мылкыдзэ уг куашкаты. Нуналлы быдэ вазь ӵукна со зарядка лэсьтэ, одӥг комнатаен квартираетӥз бызьылэ. Ми доры но арнялы быдэ сямен ветлэ. Тазьы огшоры учкыса, та апае воксё валантэм кадь. Нош мур малпаськод ке, валаны луэ ик. Тӥни ук, Кенешо властьлэн унь-мань карем адямиосыз ноку но ӧз каргаськылэ, нокинлы урод ӧз сӥзьылэ. Эксэй Николай ИИ но калыкезлы ӟечсэ гинэ сӥзьыса улонысь кошкиз. Тае Инмарлы оскисьтэм, урод мылкыдо адямиос ноку уз валалэ, дыр. Анна апай Умопудысь семилеткаын дышетскыкум, пинал йырыным мон ялан малпасько вал: малы эшъёсылэн тятиоссы но бадӟым агайёссы фронтын ожмасько, нош милям семьяысь отын нокин ӧвӧл. Тятие мынам, кулаке поттэмзы бере, дорамы вуиз но ӝоген кулӥз, бадӟымез агае, самопал лэсьтыкуз, патрон пуштыса, чиньыостэм кылиз. Война кутскем бере кык-куинь толэзь ортчыса, Анна апайме коть фронтэ нуизы ик. Ну мон шумпотӥ ук. Анна апае связистка вылэм. Смоленскез мозмытон дыръя, 1942 арын толшор толэзе, со куинь нунал ӵоже кезьыт окопын улэм. Тыбырзэ кынтэм. Солэн тыбырыз Северысь бертыкуз но туж зол кынтэмын вал. Вирсэръёсыз кынмыса уродмиллям. Та апае вералоз вал: Смоленске, пе, пырим но, отын но татын юбоос борды асьме адямиос ошылэмын. Со ошем адямиослэн, пе, кылъёссы потылэмын... Война бырем бере Анна апае тэльын сир бичаса улӥз. Куать нылпи будэтӥз. Фронтын ожмаськиз шуыса, военкоматысь но, сельсоветысь но нокыӵе кузьымъёс-маръёс ӧз басьтылы. Ачиз но йыбыртъяса ӧз ветлы. Отын ужасьёслэн сое ӟечкын тодэ вайылыны тодазы ӧз лыктылы. Сыӵе милям сяммы: нокинлы, ноку эн йыбыртты. Нош кезьытэз солэн тыбырыз ялан шӧдэ вал - пӧсь гужемъёсы но тыбыры кынме шуыса вераллялоз вал. Кулон азяз пиналъёсызлы шуэм: "Монэ ватыны дасякуды, одно ик шуныт кофта дӥсялэ. Шайгуын ке но тыбыры медаз кынмы ни". Нош кулаке ӧй ке поттысалзы, тятиелэн пуктыны юрттэм педтехникумаз сое кутысалзы ке, кыӵе меда солэн улонэз луысал. Со туж ӟеч дышетӥсь луысал, дыр, "- сал" ке ӧй люкетысал. КРЕНЬ Юондырлэн радыз Сцена вылын корка пуш. Борддор кузя ӝӧк но ӟусъёс пуктылэмын. Бодыен пересь пиосмурт - Левонь -потэ. ЛЕВОНЬ. Тани вӧй дыр но быриз, посной вуиз. Кирень юон вуиз. Вашкала дыръя пересьёс юри боды ӵогыны нюлэскы ветлылӥллям. Тани мон но ветлӥ. (Кышноезлы вазиське.) Матрон, Матрон, мон бускельёсты ӧтчаны мынӥсько. Туннэ кирень юыны асьме дорысен, пе, кутско. МАТРОН. Мын, мын, Левоне. Гуртысьтымы ваньзэс ӧть. Лукерьяосне но пыра, Калистаосне но. Только трос ӟузьыны эн шедьты. ЛЕВОНЬ. Уг, уг. Нош тон татын ӟеч-ӟеч дасяськы. Ӝӧк вылдэ но эскеры. Левонь, бодызэ кутыса, коркась корка калыкез ӧтчаны кошке. Тани Митьконе пыре. ЛЕВОНЬ. Ӟеч-а, бур-а? МИТЬКОН. Умой, умой. Пыре. Мар ветлӥськод? ЛЕВОНЬ. Кирень юыны ӧтчасько. Туннэ кирень юыны ми дорысен кутско. Ӝытазе 5 часэ. МИТЬКОНЬ. Туж умой! Мыно, мыно. Тани бодыяд тодмос понӥсько - тамак пуйы. МАТРОН (ӝӧк вылзэ пӧръян висказ). Вӧй дыр быриз бере, посной сиськыны кутскон вуиз. Тани ӝӧк вылам посной ӝук поно, киренен сюкась, сюкасен ӝожон, кӧжыпог но лэсьтӥ, кӧжы кисаль но. ЛЕВОНЬ (пыре). Матрон, Матрон, ваньзэс ӧтчай. Тани вуозы ни. Нош кӧртчагаед кытын? Малы ӧд потты на? МАТРОН (кӧртчагазэ поттэ но корка шоры валем выжлёгет вылэ пуктэ. Кырӟа). "Оп" шу, "нап" шу, кизер ке но, "нап" шу. "Оп" шу, "нап" шу, кизер ке но, "нап" шу. Ну бен та кӧртчага котыртӥ шулдыръяськозы ук бускельёсы! Пыд куара кылӥське. Лиза пыре. ЛИЗА. Ӟечесь-буресь! Пырыны луоз-а? МАТРОН. Пыре, пыре. Малы бен огнад лыктӥськод? Кытын Педоред? ЛИЗА. Педоре мынам ӟенелик пыдсы выйиз ини. Соин ик огнам лыктыны кариськи. МАТРОН. Ойдо ӝӧк пала кариськы. Пуксьы. Тани мукетъёсыз но вуозы. Лена пыре. ЛЕНА. Ӟеч да, бур да, нянь да сылал, Киренен сюкась сиысал. Лена бӧрсьы кышноос пыро, кырӟало. "Оп" шу, шурина калина, "оп" шу, шурина калина, Ну кому какое дело малина. Ну кому какое дело малина. (Ваньзы кӧртчага котырын бергало, кырӟало, шулдыръясько.) Кирень мой, кирень мой, кирень мой за рекой. Кубиста но сиысал, кочонэз но ярасал. (Одӥг огзылэсь юбка пумъёссэс кутыса тэтчало). ОДӤГЕЗ КЫШНОМУРТ. Перепуз зым корказы, ӵуштаськем зым. ВАНЬЗЫ(сое кылыса). Перепуз зым корказы. Со вискын лушкаськись кӧртчагаез лушканы пыре. ЛУШКАСЬКИСЬ (лушкем). Перепуз но юысал. Лушкакуз сое куто но кирень куртчыто, юало. ВАНЬЗЫ. Кин шӧм? ЛУШКАСЬКИСЬ. Марина шӧм. (Собере со кошке). ЛЕВОНЬ. Та кӧртчагаез возьмано. (Кӧртчага вылэ пуксе. Сое кышноос куто но озьы ик кирень куртчыто). ВАНЬЗЫ. Кин шӧм? ЛЕВОНЬ. Матрон шӧм. Одӥгез кышномурт кӧртчагаез ӝутыны турттэ. КЫШНОМУРТ. Быдэс-а та, тырттэм-а та? Пыдэсо-а, пыдэстэм-а? Ваньзы кӧртчагаез ӝуто, ӝӧк вылэ пукто. "Ӟильыр-ӟильыр..." кырӟанэз кырӟаны кутско. Матрон ческыт сурзэ кобыен сектаса ветлэ. Кутско кырӟаны: Куинь куз кутэ вал. ОДӤГЕЗ КЫШНОМУРТ. Матрон апай, суред туж ческыт. МУКЕТЫЗ КЫШНОМУРТ. Тэтчано на вал. Такмакъёс кырӟаны кутско. Собере экто. ОДӤГЕЗ КЫШНОМУРТ. Кошконо ни вал. Кошконо ни вал. Милям таӵе дыръя Кошкыло ни вал. Ваньзы та кырӟанэз кырӟало. МУКЕТЫЗ КЫШНОМУРТ. Левонь, Левонь, куноосыд кошкыны дырто ук ини. ЛЕВОНЬ. Мед кошкозы ни. ОДӤГЕЗ КЫШНОМУРТ (Левоньлы). Тодӥськод-а, кытчы та бодыдэ пононо? Та бодыдэ куинь сюрес вӧзы куштоно, ю кизён пала, бусые. Ю-няньмы мед удалтоз, етӥнмы но. Нош тулыс учкыны мыном, кыӵе со потоз лымы улысь: пурысь ке - губи удалтоз, тӧдьы ке - нянь удалтоз. Нош та боды бордысь басмаостэ Марпаедлы сёт, пиналъёстылы чачаё шобыр мед вуроз. Ваньзы кырӟаса кошко. ГОЖТЭМЫН КУЛЬТУРА УДЫСЫН УЖАСЬЁСЫН ЗОЛОТАРИ ГУРТЫН. 2941 Будӟыннал Азьвыл дыръя Будӟынналлы котькудӥз туж дасяське вылэм. Юртъер котырзэс чылкыт каро, лымы улысь потэм жуг-жагез ӵужо-утялто, корка пушсэс быдэсак мисько: вӧлдэтсэ майталэн, лысо писпу вайёсын зыраса, борддоръёссэ луоен, гизен зыраса, нош выжез кӧснуналлы быдэ чылк-чылк мисько вал. Гурзэс но тӧдь-тӧдь каро. Пучы арняозь ик со луэ Будӟынналлэсь азьло арняе адямиос котырзэс чылкытато вал. Тазэ инмар праздникез пусъё, пучыё горд бадьпу вайёсты вакчиесь гинэ тӥяса но соосты бумага сяськаосын чеберъяса, собере та пучы керттэтэз азьвыл ик чылк-чылк миськем мудоръёс азе интыяло. Ӟучъёс та горд бадьпуэз верба шуо, нош вожзэ - ива, тазэ мудор азе интыяны тӥяло пучыё горд бадьпу сюрымтэ дыръя гинэ. Нош святить каро горд бадьпу пучыез. Асьме палъёсын таӵе бадьпу тросэтӥ будэ. Пучы арня но Будӟыннал вискын вань на Быдӟым четверг. Вирнунал ӝытазе укно янакъёсты, ӧсъёсты педпал ласянь мелэн гожъяса кирос тыро вал, кудӥз сусыпу вайёс но тыре, юртъер котыртӥзы, киязы тӥр кутыса, молитва вераса котырско вылэм, нош кинлэн пыӵалэз вань, куинь пол омыре ыбе, шайтанъёсты кышкатӥськом, вань уродзэ улляськом, пе. Азьло та Быдӟым четверг нуналэ оломар но туртто вылэм: умойзэ ӧтё, шуом, бакча сиён, емыш, гидын пудо-живот мед удалтоз, азбарын гурт тылобурдо трос мед луоз. Но уг вунэто вылэм уродзэ улляны: бакчаын жуг-жагез суто, урбо-тараканэз улляло но мукет. Пучы арняысен Будӟынналозь курегъёслэсь пузамзэс чакланы кутскылӥллям, семьяысь котькуд адямилы тырмымон мед люкаськоз. Шуом, бубызылы - 5, мумызылы - 8, кӧснуналэ - самой пичиезлы ини. Будӟынналэ курегъёс Иисус Христослы пузало. Будӟыннал азьын кӧснуналэ курег пуз буяло, куд-огез сое черке святить карыны нуллэ. Черкын вӧсяськон уйшоре 12 часэ кутске, ӵукна 6 часозь кыстӥське. Вӧсяськон куспын ик черк котыртӥ котырско. Матын черк ӧвӧл ке, гуртазы вӧсяськыса, мӧйыос но, пиналъёс но чылкыт дӥсен дӥсяськыса кӧлыны выдо вал. Куд- ог мӧйыос уг но изё вылэм. Арнянуналэ ини, вӧсяськемысь бертыса, нырысь курег пуз сиё, собере шаньги, сӥльын пирог пӧрало, курег пузэн сиыны колобок пыжо. Нуназеяз самой пичиосыз пиналъёс куро пӧлын шудо, гуждор, выж вылын курег пуззэс сӧриськытозяз ик питыръяло. Сӧриське ке - сиё. Бадӟымъёсызгес пиос пиосын, нылъёс нылъёсын курег пузэнызы вошъясько, огзэсты огзы нимынызы верантэм вылысь курисько, нылъёс "дева", "эшко", "гыда", "дусым" шуыса гинэ вазисько вылэм; пиос "уром", "годок" шуо, козлокен, шальыен шудо; нылъёс но, пиос но лаптаен, "битьбежатен" шудо, ӵош кутскыса, котыр ветло-кырӟало (хороводэн). Тазьы Трочинозь шудо вылэм. Бӧрысь уг ни. 2184 Р. Орехова "Ӟардон", 10.04.93. Нуны сюан Корка нылпиен шулдыр, шуиллям пересьёс. Нылпитэм семьяез шудтэмен лыдъязы. Пинал вайымтэ нылкышноез муры скалэн, варгаз азеген, емыштэм писпуэн ӵошатылӥзы. Пинал ваёно кышномуртэ нокинэ, нокыӵе нымы-кибыез но виыны, вӧсь карыны ӧз лэзьылэ. Кинэ ке вӧсь каремед пиналэдлы йӧтоз, шуылӥзы. Кулэм адямиез ватонэ ветлоно ӧвӧл. Лушкаськонлэсь алылӥзы - вордӥськоно нунылы кыӵе ке но шӧтэм тодмет, пус пуксёнэн кышкатылӥзы. Карнан вамен вамшытоно ӧвӧл, ӧлексыосыз учконо ӧвӧл. Нырысетӥез пиналзы ныл ке, мукетыз пи мед вордскоз шуыса, вож нуныез атаезлэн дэременыз бинялто. Нуны вордскем семьяын ӝӧк вылэ тӧдьы ӝӧккышет вӧлдо, сукыри нянь, вӧй, сылал пукто. Йӧлын ӝук пӧзьто, сур, вина пукто. Песянай нылпиез ӟазег гонлэсь лэсьтэм миндэр вылэ кутэ. Гур доры нуэ но, нимтэмчиньыеныз суэз басьтыса, пиналлэн кымесаз кирос каре, коркакузё висьыны медаз сёты шуыса. "Остэ, инмаре, кема мед улоз, таза мед луоз". Самой мӧйыез пиосмурт ӝӧк сьӧрын кузё луэ. Нырысь сюмыкез кулэмъёслы пуктэ, мудор сэреглы матэгес, ӝӧк сэргы, пуньы понэ. Мӧйыез кышномурт вина тыре, шунды ӝужан паласен кутскыса секта. Аракыез веръяса, пересьёсты буре ваё, ӟеч мед будэтозы-утялтозы шуо. Нылпи ваем кышномурт доры нырысь куинь нуналъёсаз асьсэ пӧрам сиёнэн нылкышноос гинэ ветло. Нуны ваем кышномурт ванрьмызлэсь веръяны турттэ, йӧлыд трос мед луоз шуо, муртлэсь няньзэ сиыса, куноос нылпиез уг учко, ӟечкылало, таза, бадӟым мед луоз, пе, анаей-атаезлы юрттӥсь мед луоз. Собере нылпи сярысь уг верасько ни. Толэзь ортчыса каша(зубок) каро. Пилы тросгес шумпото. "Пиме сюдӥсько - пунэме сётӥсько, ныл сюдӥсько - тӧлъя лэзисько, мумыме-айыме сюдӥсько - тыриськонме тырисько". Вордскем нунылы ним сётоно. Нимыз ӧз ке тупа, пинал начар, висись луоз, нош тупаз ке, сое шудтэм учырлэсь, черлэсь, ведӥнлэсь, урод синлэсь утёз, кожазы. Ним бырйыку, инкуазьлэсь кыӵезэ, быдэстоно ужъёсты чаклаллязы, кышномуртлэсь кӧняетӥ нылпи ваемзэ, ӵыжы-выжыысь нимъёсты. Семьяын одӥг нимо кык мурт луэмлэсь утиськизы. Ӵыжы-выжыос пӧлын огвакыт вордскем кык пиналъёслэн нимъёссы но огкадь луыны кулэ ӧвӧл, озьы огез кулоз, пе. Адями ним луылӥзы пӧйшур, тылобурдо, будос нимъёс (Пужей, Гондыр, Кион, Балян, Юрмег, Пислэг, Жакы, Кайсы, Дыдык, Сэдык, Италмас, Сяська, Сезяй, Чипчирган), инкуазьлэсь воштӥськонзэ возьматӥсь, ужан тӥрлыкъёсты нимась кылъёс (Зора, Лымаш, Герей, Усья, Кусо). Ним сётӥзы ке но, шораз дыды, эте, нылы, пие шуыса вазьылӥзы. Агай, апай, нюню, вылькенак, ӵужодӥг, ичимень, кырси, кудо, туклячи - озьы вазисько вал ӵыжы-выжыос. Семён Виноградов Будӟым куалан вӧсяськон Удмурт йылолъёсысь туж бадӟымъёсыз пӧлы пыро вӧсяськонъёс. Со вӧсяськонъёс пӧлын но тужгес бадӟымъёсыз вань. Чын бадӟымен лыдъяло луд вӧсяськонэз. Собере Будӟым куа, Гершыд, Куарсур (сое Гербер но, Петров но шуо). Удмурт вӧсяськон сярысь вераны курыса, мон кызьы ке вазиськи Гычань нимо песянайлы. Со ӧжытак мынякгес потӥз но юаз: ваньзэ-а верано? Ваньзэ тодэме потэ вал, шуисько. Асьмелы, пе, уске, султылытэк кык арня пуконо луоз, оло, соку вераса быдто. Табере мон ачим но валасько ни, со дыр но ӧжыт ай вылэм на шуыса. Вӧсяськонъёс осконъёс бордысь пото, нош оскон но вӧсяськон бордысь пото ни ваньмыз сямен мукетъёсыз йылолъёс, сэбетъёс, сямъёс. Кӧня ке верасал, мар со Будӟым куалан вӧсяськон. Мукет вӧсяськонъёслы сямен ик, та нуналлы мунчое пырыса но пыжиськыса дасясько. Вӧсясьёс - быдӟым вӧсясь, тӧр, сюмык кутӥсь, тылаась-пӧрась но соослэн кышнооссы гурт калыклэсь вазь лыкто. Ӵем дыръя вашкалаос сямен эстӥськыны тыл потто. Куала шорын пинё-пинё сюры ошиськыса улэ. Со сюрые пурты ошемын, отын ӝук пӧзьто. Куалалэн укноосыз ӧвӧл. Туала куалаосыз укноен но лэсьто ни. Пушказ кортӵогтэк лэсьтэм ӝӧкъёс. Паллян палаз - пиосъёслы, бур палаз - нылкышноослы. Крезьчилы но тӧролы - паллян палась урдэс ӟус. Со йылтӥ ӝажы ортче. Отчы котькуд коркась вӧсяны пичигес нянь колды ваё. Со ӝажы йылтӥ кузь сюры кыстӥське. Со борддор кузьда. Та сюры вылэ кузьмам чебересь ӝуткам пужыё ӵушконъёс ошылэмын. Пырон ӧсэн ваче борддорын кызьпу куаръёс ошылэмын. Кыдёкысь сэрегын, паллян палан, вылӥынгес пичи гинэ шыкыс пуктэмын - со воршуд короб. Пушказ мар тыремын, нокинлы уг возьмато. Со сэрег палан ик бадӟым кор пукон сылэ, нимыз - мудор пукон. Со быдӟым вӧсясьлы вӧсям сиёнзэ вылӥ ӝажые "вылэ мичем" пуктыны (инмаръёслы сиыны пуктыны). Ӝукез веръятэк пӧзьто. Ӝук пӧзем бере гурт калык люкаське. Вӧсясьёс ӝӧк вӧзы султыса вӧсяло но вылэ мичем поно, собере, вӧсям вӧсьмы кабыл медло шуыса, быдӟым вӧсясь, тӧро но мукет юрттӥсьёс ӝукез веръяло. Соос бере гинэ гурт калыклы веръяны яра ни. Будӟым куалалэн кыдёкысь бур пал сэрегаз бадӟым шыкыс (сандык) вань на. Отын вӧсяськон тусьты-пуньыез утё: сюмыкъёс кык пӧртэмесь (чебергес но пичиесьгес - нылкышноослы чакламъёсыз, сумбресгес но бадӟымесьгес - пиосмуртъёслы), дуры но бадӟым пу тусьтыос, пу пуньыос. Бур палан борддор вӧзысь лапег урдэс ӟус вылын югыт, чебер дӥсен дӥсяськем ньыль-вить кышномуртъёс пуко. Соос уксётӥрлыкъёсын, тӧдьы кышетъёсын. Вӧсясьёслэн кышнооссы со. Тӧро но та кышномуртъёс сямез- йылолэз, вӧсяськон радэз сӧрись ӧвӧл-а шуыса чаклало. Ӝӧкез, эстӥськем интыез котыртыса кошкись медам луы. Кин ке юри яке янгышен котыртӥз ке, гуртоослэн солы туж вожзы потэ: гуртлэсь азинлыксэ басьтэ, гуртлы я котыртӥсь муртлы секыт луоз, пе. Азьвыл вӧсяськонзылэн веранэз кызь куать ёзо вылэм, быдӟым вӧсясь сое кырӟаса, быдӟым крезь шудэм улсын вералоз вылэм. Сое табере котькуд гуртын уг тодо ни. Куд-ог интыосын со веранъёс но, гурез но пӧртэмесь, котькытын ик чын одӥг кадь ӧвӧл. Нуназе бере, шонергес вераса, ӝыт палгес ини, вылэ мичемез васькытэм бере, Будӟым куалась бертыкузы, вӧсям няньзэс доразы нуо. Вылэ мичемез быдӟым вӧсясь сие. Будӟым куалан вӧсяськон нуналэ ӵукна асьсэ куалаязы вӧсясько. Будӟым куаысь бертыса, бӧлякен-бӧлякен вӧсь нерге ветло. Коркась корка ветлыкузы, шур выллань тубо. Кисьтонын сямен шур уллань уг васько. Котькуд корка люкаськыса, бӧлякъёс вӧсям вӧсь кабыл медло шуыса сисько. Кузё-а, гуръёсыз умой тодӥсь мурт-а вӧсь гур сётэм бере со сьӧры вӧсь гурен кырӟало-верало но куно луыса мукет мурт доры асьсэ бӧляке ик вӧсьнерге ортчытыны пото. Озьы вань бӧлякез ортчо. Корка пуш шулдыртэмын, ӝӧк вылэ пыжиськемъёс, пӧраськемъёс пуктылэмын. Та нуналэ калыклэн мылкыдыз ӝутӥськемын луэ. Адямиос ог-огенызы адӟисько, верасько, шутэтско, инмаръёсынызы кенешо, ӟечез понна тау каро, азьланезлы но ӟечлык куро, кудӥз нош улон сюресэз каньыл медло, котьмар ласянь мед удалтоз шуыса сӥзиське. Одӥг кылын вераса, вӧсяськонъёс калыклэсь мылкыдзэ каньыл каро но кужымзэ, осконзэ трослы будэто. Бусы сюан нылпи сценарий Азькыл Гужемлэн шораз, 12-тӥ пӧсьтолэзе (июле), чебер дӥськутсэс дӥсяса, нылъёс но пиос ю бусые мыно. Пичи Пурга ёросысь Гожня гуртын та праздникез бусы сюан шуо, вӧзысь гуртын ик, Алганча-Игралан - шыр сюан. Ваньзы ик сьӧразы басьто узы-борылэсь лэсьтэм ческыт ву, пӧраськемъёс, пыжиськемъёс. Ю бусые вуэмзы бере выль кен быръё. Выль кензэс ӟег пӧлы вато но пиосыз сое утчаны косо. Кудӥз пи шедьтэ, со ик эмеспи луэ. Одӥгез пи куинь шепез кырымаз басьтэ но, кирос карыса, инмарлы йыбырттэ. Осто, вылысь бадӟым Инмаре Ӟеч аръёс мед сётоз. Сарана йыро кадесь ик Мед луоз ӟег няньмы. Собере сиён-юонзэс ӝӧ Галина Никитина Черодэн но кенешыса Туала гуртын улӥсьёс трос ӟеч сямъёсты вунэтӥзы, кулэтэм карыса, лэся, сюрес уртсы сэрпалтыса кадь кельтӥзы. Тани вералом веме сярысь. Туж вашкала но ӟеч сям. Нимаз крестьян хозяйстволы дырын-дырын адямиослэн юрттэмзы кулэ луылэ вал. Сотэк гуртын улонэз син азе но пуктыны шуг. Лингвистъёслэн верамзыя, веме кыл араб-перс "немат" (ӟеч уж, ӟеч карем, кузьым) кылысь потэмын. Веме ортчытъян сям бускелен улыны кутскем дырысен кылдэмын. Кылем даурлэн пумаз вемеос куинь пӧртэм пумоесь вал, шуыны луоз. Котькуд хозяйствоын веме черодэн-черодэн ортчыто. Гырыку, кизьыку, турнаку веме уггес лэсьтыло вал, малы ке шуоно, котькудаз кузё аслэсьтыз ужзэ ӝоггес быдтыны тыршылӥз. Нош ю-тысь вуэм бере, тямыс-дас адямиен огазеяськыса, ог-огзылэсь юзэс черодэн кутсало вал, нокинэ но нимысьтыз медъятэк. Кенешын вераськыса, бускельёсын веме ортчыто вал шуге-леке усемъёслы, - шуом, корказы сутске, корка кузё секыт висьыны кутске, пудо-животъёс бырыны шедё, пиналъёс сирота кылё яке мукет. Карттэк кылем солдат кышноослы но юртто вал. Бускелен гыро но кизё, ю-няньзэс арало, турынзэс утялто, кыед потто, озьы ик колодча гу копало, пу вортто. Нош кызьы та ужез радъяллязы? Со понна юрт кузё гурт калыкез ачиз вемее ӧтчалляз. Веме котьку но дунтэк орчылӥз. Юрттӥськыны лыктэмъёсты корка кузё сиён-юонэн утялтылӥз, нош туж шуг-секытэ усемъёслэсь бускель калык сюдэм-сектамзэ но куддыр уг витьы, уг но куры вал. Дэмен уж ортчытыны малпась кузё бӧлякъёссэ, гуртооссэ ӝыт пумысь ӧтьыны ветлӥз. Бадӟым но секыт уж ке лэсьтоно - вань гуртооссэ ӧте, матысь гуртъёсын улӥсь бӧлякъёслы но ивор ыстэ. Ӵуказеяз ӵукна вемечиос кузё доры лыкто, отын соосыз сюдо, собере ваньзы уж борды кутско. Бусыын, сикын ке ужало, вемечиос, кузё доры пыратэк, ужан интые люкасько. Отын ик нуназеяло но. Нуназе сиёнзы - киренен сюкась, вож сугон, курег пуз, чырс йӧл, шаньги, нянь. Ӝытазе, ужысь бертыса, вемечиос кӧня ке шутэтско, дӥсьсэс вошто но выльысь кузё доры лыкто, кунояськыны шуыса ини. Отын соосыз аракыен, сурен сектало, пӧртэм пумо шыдэн, ӝукъёсын, пыжиськемъёсын куноято. Огшоры веме одӥг нуналскын яке ӝыны нуналскын ортче вал. Ку ортчытонзэ корка кузё ачиз быръе. Г. Е. Верещагинлэн верамезъя, Ляльшур гуртысь (Шаркан ёрос) крестьянъёс вемеоссэс азьло арня но праздник нуналъёсы ортчытъяло, пе, вал. Собере кенешиллям: та нуналъёсыз сӥё-дано кароно, ужано ӧвӧл. Соин ик веме ортчытыны малпась мурт нырысь ик бускельёслэсь юаны-вераны кулэ. Куддыр арнянуналэ но веме люканы кенешо вал, но нуназе бере гинэ. Веме дыръя кузё ассэ туж лякыт, ӟеч мылкыдо возьыны кулэ. Кинлэн ке ужамез солы уг ке кельшы, со соку но ас мылкыдзэ шарае уг поттылы. Вемечиослэн ужазы мерскись, мултэс косъяськись, кинлы кытын но кӧня ужаны тодӥсьяськись кузё юрттӥськисьёсызлэсь ужзэс но, мылкыдзэс но сӧре угось. Мукет дыръя таӵе кузёлы юрттыны мылкыд карисьёс но уз шеде ни. Революцилэсь азьло гожъямъёсъя но гурт калыклэн верамезъя, веме дыръя туж трос кырӟало вал, серекъяны-маскаръяськыны, шудыны но дыр шедьтылӥзы. Шулдыръяськон но уж куспын умой-умой висыз уг луы. Кырӟало ужаку, шутэтскыку, ӝӧк сьӧрын кунояськыку. Корка лэсьтон вемее кык-куинь пол ӧтчало вал. Кузёлэн семьяез бадӟым ке, кор коранзэ но сое сикысь поттонзэ, бугро ӵупонзэ ас кужымен лэсьтылӥз, бугро ӝутыны гинэ веме люкалляз. Кор поттыны гуртоос ас валъёсынызы, тӥрлыкенызы лыкто. Кузё дорын ӵукназэ сиськыса, сике мыно, отын ик нуназеяло. Ӝытазе кӧня ке шутэтскыса, нош ик кузё доры люкасько: кунояськонзы куддыр уйшорозь но кыстӥське. Мукет дыръя гуртоос бугро кораны люкасько. Та ужез лэсьтонын ньыль-куать адямилэсь трос уг луылы, нош бугроез ӝутонэ ог куамын мурт но лыктэ. Кышноос пиосъёслы юртто, сиён-юон дасяло, вашкала сямъёсыз тодӥсь пересьёс кенеш сёто, кызьы но ма лэсьтоно, мар бордысен кутсконо. Татын ик пиналъёс но бергало. Мумыкорез ӝутыку, кудӥз но соиз кузё со улэ коньдон понэ, мукетыз, ӝӧккышетэн бинялтыса, бордаз нянь сукыри ӝутэ. Берло соин вемечиосты куноятэ. Мумыкор ӝутӥсьёслы одно ик чаркаен аракы сёто, мукет вемечиосты ужез быдтэмзы бере гинэ сектало. Корка ӝутон веме азьын одно ик кӧртчал дасяло вал. Пересьёслэн верамзыя, веме люкась кузё гуртооссэ таӵе кылъёсын ӧте: "Кӧртчал сиыны лыктэ, веме кариськом". Туж шулдыр, дэмен ужлы пӧрме вал гур шуккон веме но. Одӥг яке кык адями горд сюй дасяны мынэ, пиналъёс сое гуртэ вортто, нош мӧйыос укноетӥ луоен пызьнам выж вылэ куяло. Кышноос, нылъёс, котыртэме султыса, сюй вылэ веник пыр ву кисьтало но сое пу бодыосын ныркыны кутско. Кӧня ке нырко, собере сюез берыкто но нош ик нырко. Ужаны шулдыргес мед луоз шуыса, котыртэметӥ ветлыкузы, пумен кырӟало. Ог дас вить адями сюй шукконэ пыриське. Г. Е. Верещагин одӥгаз статьяяз гожтэм, гур шукконэ удмуртъёс егитъёссэгес ӧтьыло вылэм шуыса, соослы, пе, аракы но сиён ичи кулэ луоз. Вемечиосты, гур шуккыку, одӥг пол гинэ сюдо вал. Ӝыт сиськон котьку но шулдыр кырӟанъёсын, эктонъёсын кунояськонлы пӧрмылӥз. Вылӥын верам пӧртэм пумо вемеосты удмуртъёс пиосмурт ужъёс гинэ шуо вылэм. Нылкышноослэн ортчытъяно вемеоссы мукетэсьгес вылӥллям. 2. "Ми етӥнмес кизимы..." Пиосмурт - юрт кутӥсь, нош нылкышно - сое шунтӥсь но шулдыртӥсь, семьязэ утись, шуо вашкалаос. Та веранысь ик валаны луэ ни, кыӵеоссэ ужъёсты быдэсъязы пиосмуртъёс но ма карылӥзы нылкышноос. Нылкышноос туж пӧртэм вемеос ортчытъяло вылэм: сэстӥськон, черсон, шорт миськон, ын вурон, тулыс корка миськон но мукет. Ын вурон вемеез ныл сётыны дасяськисьёс гинэ ортчытъязы. Куд-огезлэн верамезъя, со вемее куинь-ньыль ӵыжы-выжы кышномуртъёсты гинэ ӧтё вал. Нош мукетъёсыз шуо: ын вурыны лыкто, пе, вал ныллэн вуоно выль семьяысьтыз кышноос гинэ. Кузё кышно но егит нылаш ын уг вуро вылэм, гур котырын бергаса, сиён-юон дасяса дырзы ортчылэм. Глазов ёросын улӥсь удмуртъёслэн ын вурон веме ортчытон сямъёссы сярысь ҺХ даурлэн пумаз пыр-поч гожтэм Н. Первухин. Солэн верамезъя, вемее ӧтчаса ветлэ вылэм ачиз бызёно ныл яке пичи сузэрез. Ӧтьыны тыршылӥзы вуриськыны быгатӥсь нылкышноосты, нылъёсты. Вемечиос кеносэ люкасько. Отын соосыз егит ныл аслаз пӧзьтэм кумышкаеныз куноятэ. Ӧжыт кунояськемзы бере одӥгез кышномурт пиосмурт дэрем (вуоно эмеспилы) вандыны кутске, мукетыз вуриськыны пуксе. Ын борды бызёно ныллэн эшъёсыз весь векчи коньдон, туг кышетъёс вурӟыло, ӟеч кылъёс верало, азьланяз умой улон сӥзё. Вурем ынэз азбар шоры майыг вылэ ошо но со улэ кӧня ке пичи пиосыз (куинь-вить адями) пырто. Егит ныл соослы ӝук сётэ, сиыса быдтэмзы бере котькудӥзлы вечи коньдон кузьма. Ӝытазе мӧйыос ӝук сиыны лыкто. Ӝӧк сьӧры пуксемзылэсь азьло котькудӥз ын вылэ коньдон понэ. Сэстӥськон веме ортчытъяло вал сӥзьыл, етӥн аньыосты куасьтэм бере. Кузё кышно азьло ик варсь, сур, кенэм пӧзьтэм дася, собере гинэ ӧтчаське ни. Веме ортчытон нунал пыжиське, сиён-юон октэ-калтэ. Сэстӥськыны ньыль-куать кузя люкасько вылэм. Южтолэзе, куать-сизьым кузя люкаськыса, нылкышноос черодэн-черодэн шорт миськон веме ортчытъяллязы. Миськемлэсь азьло, шортэз кык-куинь уй пӧсь гур вылын пенен паро вылэм. Собере шур яке ты дуре кошкылӥзы но, люкмесэ лэзьыса, шортэз вуэн коттылӥзы, собере валёкен тышкаллязы. Вемее нылъёс, кышноос гинэ ветлылӥзы, нош ӝытазе пиосъёс но кунояськыны вуылӥзы. Котькуд гуртын тулыс корка миськон веме ортчытъяло вал. Бускель кышномуртъёс черодэн ог-огзылы выж, вӧлдэт, борддоръёс миськыны юрттылӥзы. Кузё кышно соослы табань пыже, мунчо эстыса дася вал. Корка миськон веме кышноослы секыт йӧтылӥз: ӵуж-ӵуж мед луозы шуыса, вӧлдэтъёсыз, борддоръёсыз луоен зырало вал. Нуналскын одӥг корка сяна миськыса ӧз вуттылэ. Удмуртилэн шор но уй пал ёросаз улӥсь удмуртъёс кубиста сылалтон но ӟазег-ӵӧж вандон веме уг ортчытъяло вылэм. Та сям лымшор удмуртъёс пӧлын вӧлмемынгес вылэм. Удмурт пословицаос, поговоркаос но яркыт возьмато гурт калыклэсь ог-огедлы оскон, юрттон сямез вылӥ дунъямзэ: "Иськавынтэк улыны уг луы", "Иськавын-бӧляк доры котьку мыныны луэ", "Одӥг йырлэн - одӥг визьмыз, кык йырлэн - кык визьмыз, иськавын-бӧляклэн визьмыз - вань визьлы визь", "Бадӟым семьяен ужаны капчи", "Кенештэк ужез кутсконо ӧвӧл", "Кин соку ик юрттэ -со кык пол юрттэ", "Юрттӥськы - тыныд но юрттозы но мукет. Вемеен ужан котыр ласянь пайдаё вал. Будӥсь пиналъёс, мӧйыосын ӵош ужаса, соослы юрттыса, дэмен тыршыны дышетскылӥзы, калыклэсь ӟеч сямъёссэ улоназы пыӵатылӥзы. Туннэ нуналъёсы веме ортчытъян сям гуртын туж шер пумиськылэ ни. Одӥг-ог корка лэсьтыны, картошка мерттыны-копаны веме люкалляло, сутскем муртъёслы юрттыло, озьы ке но, ог-огедлы юрттон сям бырон калэ вуэмын, эшъяськон сям лябӟемын. Ӵемысь али озьы луэ: колхоз адямилы юртыны нарядэн ыстэ но юрттӥсь муртлы уждун тыре. Нош соиз юрттоно адямилэсь ватсаса сиён-юон, дун возьма на. Веранэз ӧвӧл, кыӵе секыт со усе пересьёс, пал кышноос понна. Соин ик вашкала ӟеч сямез вунэтоно вылымтэ. Со гурткалыклэсь улонзэ, ужзэ капчигес каре, адямиослэсь кусыпъёссэс юнматэ,будӥсь пиналдъёсты ужаны,юрттэт сётыны, жалясь сюломо луыны дышетэ. Собере дэмен уж адямилэсь сюлэмзэ но шунтэ, мукетызлы юрттэт сётон мылкыдэз юнматэ. Г. А. Никитина - этнограф, исторической наукаосъя доктор Корка миськон веме сярысь Та гожтэмам мынам корка пуш миськон веме сярысь мадеме потӥз. Кин ке но, оло, паймоз: кыӵе-мар со веме, малы со кулэ? Туала арын нуналмысь чылкыт улыны луонлыкъёс вань ини угось. Кытын но отын гинэ шат возиське на та сям. Та кузь улонам оломае но тодоно-адӟоно луиз. Нош гурт калыклэн ог-огедлы юрттыны дась луон сямыз котьку нырысь интыын вал. Озьы ӵыжы-выжыедлэн, бӧлякедлэн, бускеледлэн юрттэменыз секыт уж капчиен сётскылӥз. Корка миськон но огъя калыкен - вемеен юрт кузёлы чылкыт улонлы оскон вайылӥз. Нош ар ӵоже корка пушкы кырсьт трос гинэ люкське. Ӧжытлы ке но син азяды пуктэ ай вашкала ӵыжы-выжыосмылэсь улэм-вылэмзэс. Шуккем гур азьпалан таганка вылын пичи чугун пуртыын сиён пӧзьто. Отысь ӵем дыръя корка пушкы ӵын вӧлскылӥз. Пичи корт гурез но усьтыку-пытсаку одно ик ӵын потэ. Ваньмыз со борддоре, вӧлдэтэ пуксе, ар ӵоже корка пуш сьӧд-сьӧд луэ. Лавкаысь басма дӥськут басьтон сярысь малпан ик ӧй вал. Етӥнэз утялтон котькуд семьялэн сюлмаськонэз вал. Етӥн культоосты гур вылын но, сэндраын но куасьтылӥзы. Отысь уно гинэ тузон пурӟылӥз. Малы бен етӥн культоез корка пушкын куасьтоно луылӥз. Етӥнэз му вылысь окто, ю- тысез, ю-нянез октэм-калтэм бере. Сӥзьыл ӵем дыръя зоро улэ, луд вылын етӥн куасьмыны уг вуы. Нош ючисэ ошылыса кельтӥд ке, тылобурдоос етӥн кидысэз сиыса быдтозы. Азьло аръёсы соос пумтэм-йылтэм вал. Учке ай али котырысь: трос-а адӟоды на шушыосты, ӟиллёосты, пежаосты, мукет тылобурдоосты. Соослэсь утён вылысь, вашкалосмы етӥнзэс доразы куасьтоно луылӥзы. Собере культоосты, обине нуыса, пальчаен тышкало: одӥг кидысэз но куро борды уг кыльы ни. Калыклэн самой ӟеч пыдкутчанэз азьло дыре вал кут. Корка пырыку, кут бордысь дэриез вуэн уд миськы - бинялтонэд котмоз. Озьы кырсь пыдын корка пыроно луэ, выж вылэ дэри кыле, куасьме. Выжез ӵужыку, тузон выллане ӝутске. Тамак ӵындэмлэсь гинэ но кӧня кырсь люкаське. Малы ке азьло со пумысен чакласькон-эскерон ӧй вал, лэся. Нош тулыс пал корка пыртоно луо ини ыжпиосты, кунянэз, ӟазегъёсты. Кезьыт куазен кынмыны я мар шедёзы шуыса, озьы лэсьттоно луо вал. Вӧл-вӧл шуныт гидъёс пуктӥсь но ӧй вал кадь соку. Ёрмыса улон, секыт аръёс, кырсь корка - ваньзы соос калык пӧлы висён вӧлмытӥсьёс луо. Малы ке-а тросэн вӧлмемын вал трахома, лыдон висён, кӧткыль (тиф), ӵужектон, кезегъян (малярия), пужы (корь) но мукетыз. Висисьёслы юрттэт сётӥсьёс но ӧй вал ай. Тараканъёс, пыӵъёс, урбоос но мукет висён вӧлмытӥсьёс адямиосыз соку чылкак одольыса возизы. Корка миськон вемеез оштолэзьлэн пумаз ортчыто вал. Солэсь азьло тараканъёсты быдто. Одӥг-а, кык-а нуналлы бускельзы доры улыны мыно. Ӧсэз, укноосты усьтыса кельто. Со куспын тараканъёс кынмыса выж вылэ усё. Соосты октыны корка курегъёсты пырто. Нош урбоосты, пыӵъёсты кезьыт уг басьты, соосты пушнерен но керосинэн быдтылӥзы. Корка пушез миьскон вемее ог витё кышномуртъёсты ӧтё вал. Воргоронъёслы но уж тырме. Ву соку трос кулэ луэ. Сое азбарын шунтоно, вуэз пенен сурано, Вӧлдэтэз миськыны тубат дасяно, пож вуэз поттано, муръёосыз сузяно, вӧлдэтэз, борддорез пуртэн вуштоно. Нылкышноос корка пушез чылкыт миськон куспазы кыӵе ке ӝожмыт гур мыто, шудон- серектон, капчияськон та нунал уггес луы: ужаса жадем муртлы кытын на, пе, со. Кышномуртлы дыр но ӧвӧл юрттыны лыктэм калыкез сюдыны-утялтыны. Нош бускельъёссы одно ик сиён дасяса ваёзы ини, вамее лыктэмъёсты сюдозы. Корка миськон дыръя малы ке трос юонэн ӧз вырылэ, курытэзтэк но яра вылэм. Тани быдэс нунал ортчиз, секыт ужез быдэстӥзы. Жадем муртъёс ӝоггес кӧлыны выдо. Ӵуазеяз вазь султыса, пудоосты утялтоно, сиён-юон дасяно, пиналъёсты дӥсяо- кутчано, школае келяно. Собере нош ик кудӥз ке бускелез доры корка миськыны мыноно. Озьы арлы быдэ лэсьтылоно луылӥзы. Али сыӵе кырсез-секытэз корка утялтонын уг ни луылы. Азьло аръёсы сярысь калык трослы чылкыт, чебер, ӝикыт улыны дышиз. Туала вакытэ корка пушез буяны, шпалер лякыны улонамы луонлыкъёс кылдӥзы. Тузонэз-кырсез ӵушылыны олокыӵе но арбериос, вузъёс вань. Сыӵе кырсь улон пыртӥ но потоно луиз вашкалаосмылы. Вужзэ, азьлозэ тодытэк, туалазэ дунъяны ум быгатэ. Та выллем вемеос историе гинэ мед кылёзы на. Е.Первушин, Дэбес ёросысь Тыловай черкогурт. "Удмурт дунне". 12 март, 1994. Пыш чӧлтон но мукетыз сярысь Ас музъеменызы улӥсьёс вашкала дыръёсы бадӟым юртъер пуктылӥзы, трос пудо-живот вордылӥзы. Тужгес но данъяськылӥзы вал вордӥсь муртъёс. Валэд ке ӧвӧл, музъм но кулэ ӧвӧл ни. Музъемед ке ӧвӧл, тон пыдйылчи адями: кураськись яке медъяськыса ужась. Музъем но пыжем нянь одӥг кадь дунъясько вал. Нянь сиыкуд, нянь пырыдэ эн уськыты, кикур пасьта но музъемдэ гырытэк-кизьытэк эн кельты. Асьме удмурт калык туж ужась вал. Вузаськыны-басьяськын туж ик ӧз яратэ. Лушкаськыса, алдаськыса узырмыны ӧз тырше. Узыръёс вал ке но, ас кужыменызы но визьмынызы узырмизы. Тани вералом пыш сярысь. Пышез трос аръёс ӵоже кизизы. Улонэз сыӵе вал-а, мар-а, шуод ини. Пышез бусые туж шер кизё вал. Бакчае кизизы. Пышлы туж ӟеч музъем кулэ, котькуд ар со улэ кыед поттоно. Тужгес но солы кельше вал кыед. Сӥзьыл векчи лымыен кыед потто вал. Тулыс сое пазяло но гыро, кызё но усыяло. Сӥзьыл пышез ишко, культо кертто (пыш аньы шуо). Сое кенер вылэ куасьтыны ошыло. Куасьмемез бере кутсало. Кутсам бере ик пыш ты доры чӧлтыны валэн нуо. Пыш тыос улыг интые, кык метр мурда гудэмын вал. Оген муртлы пичигес, нош кудӥз кык-куинь муртлы - бадӟымгес ини. Со гуос корсэтэн лэсьтэмын, тыраз ик ву. Милям гуртмылэн пыш тыосыз дэмен вӧсяськон дорын интыяськемын вал, али но бервылъёсыз вань на. Пышез тыэ чӧлто но зыръёсын копаксэ вуэ зымыто. Нош шуре пышез уг чӧлто вал, малы ке шуоно, чорыг быре. Пышез татын кӧня возё вал, созэ уг тодӥськы ни. Отысь поттылэмзы бере, сюрыос вылэ ошылыса, вузэ ӟизато, тӧлато. Гуртэ ваё но эшшо тӧлато на. Собере ини мунчо эсто, отын пызыр-пызыр луытозяз куасьто. Куасьмемез бере сэстӥськон пуртэн сэсто. Пыш сэстыны веме каро вал. Вемеын кышноос гинэ ужало, малы ке пиосъёс ӧз пыриськылэ. Ужзы бырем бере ужасьёсыз ӝытазе ӟеч-ӟеч сюдӥзы. Вина уг юо вал. Пыш пыр йӧтӥз шуыса, сылалтэм кубиста ву юылӥзы. Пышез сэстэмзы бере шуныт мунчоын согъясько ини. Кузё кышно та бордын огназ ужа. Быдэ вуэм нылыз ке вань, со нэнэезлы юрттэ. Нырысь корт согыен согъяло. Солэн вылтусыз таӵе: пул борды 15 сантиметр кузьдалаесь кортӵогъёс кокамын: огпал пумыз пулэн, нош мукет пал пумыз пуклё, медаз выры шуыса. Собере ини зу согыен согъяло. Таиз парсь зулэсь лэсьтэмын вал. Согы лэсьтыны но ваньмыз уг быгато вал. Мынам анае тазьы каре вал. Пу кутон борды сирен но ӟустариен зуэз лякылэ, сӥньысэн керттылэ, собере вуэм гурын ӵыжатэ. Гурысь поттыса, ӧжыт сӥятэ. Сир кие медаз лякиськы шуыса, шуныт дыръяз ик вылтӥз мушлэн сюсеныз зыра вал. Кужзэ нимаз каро, мертчанзэ - нимаз. Кужез кыклы люко. Уродэзгес корка, мунчо пуктыны, пакля интые мынэ. Нош умоез - черсыны. Мертчанэз ини гозы пуныны мынэ. Валэн ужало бере, гозы трос кулэ вал. Мертчанлэсь ик вуриськон сӥньыс, сапег кышъяны дратва лэсьтон черсо вал. Пыш, етӥнэн ӵошатыса, котлэсь сокем уг кышка, нош етӥн ӧжытак котмыны сюре ке, сисьме ини. Соин ик азьло канатъёс, парус гозыос пышлэсь пуно вал. Пу корабльёслэсь пасьёссэс но пышен пытсало вылэм. Кужез огшоры черсэн яке пыдын лёган черсонэн черсо. Черсыны векчи но вольыт тыршизы. Собере сӥньысэз ӝоктӥськон пуэ ӝокто вал. Ӝоктэмзы тачак люкськем бере тулыс пал шорт мисько ини. Шортэз кыктой-куиньмой возё пӧсь пень вуын. Смобере ини шур дуре шорт миськыны мыно. Шорт миськон вемее пиосмуртъёс но пырисько. Шортэз бадӟым тусе тыро но нушыосын туё, собере шурын гылляло но нош ик туё. Ужзы бырем бере шулдыръясько. Табань пыжо, вина юо. Кузё кышноез ӟечкылало: сӥньысэд, пе, небыт мед луоз. Миськем ӝоктэмез берган пуэ тыро но бугоре бинё. Тазэ ужез пичи муртъёс но быдэстыны быгато. Собере ини пунӥськыны кутско. Кенос берын но, корка берын но борддор борды ӵог шуккылэмын. Со ӵог бордысен мукетозяз сӥньысэз кыскало. Чакланы кулэ, кӧня чур ини сӥньыс, кудпасьта луоз куоно дэра. Трос ке карид, пасьталаез кисе но, выртэ но уз тэры. Куэм дэраез лымы вылэ вӧлдыса гужато. Лымы ке ӧвӧл ни, гуждор вылын тӧдьы луытозяз гужато вал. Собере выльысь мисько но куаьто, пинё-пинё пу валёкен небыт луытозяз погылляло. Мон котьку данъяськисько удмурт калыкеным. Соос ужлэсь уг кышкало вылэм. Тужгес но нылкышноос трос ужез быдэсъяло вал. Мынам кылэме вань: векчи куско муртэ кышно эн басьты, со ужась уз луы, зӧк пыдкӧтоез кышномурт кыдёке уз мыны. Выль кен чеберзэ уг быръё, ужасьсэ утчало вал. Роман Яковлев. Ижевскын улӥсь. "Удмурт дунне", 6.03.93. 3543 Кубо, черсон веме... Думет йылын ош куае. Мар со? Тодӥды, со черс. Нош мар борды со думемын? Кубо борды. Кубо - со вашкала дырысен туж кулэ луись арбери, номырин воштонтэм ужан тӥрлык. Аслэсьтыз кузёзэ, солэсь семьязэ дӥся-кутча. Пичи нылаш сюмори дорозь сузе ни ке, пичи киыз черсэз бергатыны ворме ни ке, та дырысен улонэзлэн берпуметӥ нуналъёсыз дорозь кубо борды думемын луэ вал. Соин ик, дыр, кубоез туж сӥлы каро, утё вылэм, пӧртэм буёлъёсын чеберъяло; кузьмакузы бордаз азвесь но ыргон коньдон шукко. Кубо дуно синпель луэ. Со ик чеберлэн, ужлэн, сюлмо луонлэн тодметэз (символэз) кадь. Удмуртъёс кык пӧртэм кубоен черсо. Уй пал но шор ёросъёсын куболэн нокыӵе люкетэз уг сэрттӥськы, вылӥ люкетэз паськыт. Лымшор удмуртъёс сое ӟуч кубо шуо вылэм. Нош лымшор палъёслэн вылӥ люкетэз борды боды кадь, кубо бордысь висъяське, со люкетсэ сюмори шуо. Таиз удмурт кубо. 1896 арын вордӥськем ӵужмумаелэн кубояз азвесь но ыргон коньдонэн чукъёс шуккылэмын вылэм. Дыр ортчемъя, чукъёсыз пӧсьтӥллям. Кубо, синпель кадь, анайлэсь ныллы кыле. Али соин мынам мама черсэ. Сузэръёсы вань ке но, соос ӵужмумаме умой уг тодо ни, соин мон кубоез аслым басьтысал. Мон понна со туж дуно. Али, Пичи Пурга ёросын улыса но ужея тунсыкъяськыса, кубоен герӟаськем куд-ог йылолъёсты тодӥ. Соосын нылпиосты но арлыдо адямиосты тодматэме потэ. Нырысетӥез. Кык ваче тупаса улӥсь семьяосын нылпиоссы огдырегес вордӥсько ке, нылэз но пиез дусымъяло вылэм. Тазьы ик ӵош сиыса-юыса, пыраса-потаса, ог-огзылы юрттыса мед улозы. Быдэ вуыса, нылпиоссы, оло, кузпалъяськозы но. Егит пи дусымъям нылызлы кубо лэсьтыса кузьма, пе, вал, нош ныл - тамак пуйы, улонын соос ӵемысь уг ке но кузпалъясько. Тае вераз Тылойыл Починка гуртысь нылкышно, кубозэ но возьматӥз. Дусымъям муртэз али мукет гуртын улэ, нылкышно аслаз картэныз шудзэ шедьтӥз. Кыкетӥез. Черсон веме. Бызёно ныл доры ӵыжы-выжыысьтыз нылкышноос но эшъёсыз черсыны асьсэлэн кубоосынызы лыкто. Вуоно кен аслыз пирдан мед дасялоз, соин черсэм шортъёссэс солы кельто. Кызё кышно люкаськемъёсты табанен сюдэ-утялтэ, нылъёс но кышноос шулдыръяськыса шудо, кырӟало-верало, шуд сӥзё. Улын Юриос та сямез умой тодо на. Сюан ортчем бере выль кенлэн анай-атаез яке апйёсыз кубо нуо (кубо нуон йылол). Нылкышно луэм мурт ас кубоеныз мед черсоз, семьязэ мед дӥсялоз-кутчалоз. Кубоязы векчи уксёен чукъёс шуккыло вылэм, тыр улон, шуд но бур сӥзьыса кырӟало, сиё-юо. Та сярысь Кукмор ёросысь нылкышнолэсь кылӥ. Нош "Вӧй келян" шулдыръяськонъёс дыръя кубоен гурезьысь но нискылалозы вылэм. Озьы маскаръясько, мылкыдзэс усьто. Ваньмыз та сямъёс удмуртъёслэсь сабырлы луэмзэс, ог-огдэ гажась мылкыдзэс, огкылысь луэмзэс но ужез сӥлы каремзэс, шулдыръяськыны-шутэтскыны быгатэмзэс возьмато. Та сямъёсты-йылолъёсты егитъёс утьыны но азинтыны быгатысалзы ке, макем усто луысал. И. Фёдорова, Пичи Пурга ёросысь Эдэйгуртын улӥсь. 2381 Ӟазег веме Бер сӥзьыл, Четай бигер гуртлэн ураметӥз ширтыкумы, автобус укноысен синйылтӥ пинал дырысьтым вунонтэм суредэз. Чебер дӥсяськем нылъёс но кышноос шур дурысь кырӟаса берто. Ваньзылэн пельпумъёсазы пужыё карнанъёс. Нош ведраос интые... вандэм-чылкытатэм ӟзазегъёс ошылэмын. Озьыен, кудаз ке юртын туннэ ӟазегъёсты вандӥзы. Табере сӥльзэс люкмесын чылк-чылк миськыса ваё. Бигеръёс та ужпӧр вемезэс "Каз ӧмэсе" нимало. Асьме кылэ берыктыса, сое ӟазег вандон веме шуыны шонергес луысал, дыр. Ӟучъёс тае ӵемысь пусъё "Ӟазег тылы" нимын. Ӟазег сӥль котькуд выжыысь калыклэн узырлыкез возьматӥсь кӧттырен лыдъяське. Пырсатэм ӟазеген сюанъёс ортчыло, быдэскын пӧзьтэменыз - кисьтонъёс. Кулэм ӵыжы- выжыосмылы озьы асьмеос виро курбон сётӥськом. Татарстанысь удмуртъёс ӟазег сӥлез котькуд вӧсь ӝӧк вылэ пуктыны тыршо. Сое одно ик Семык дыръя (Трочин) шайвылэ мынонлы нимаз дасяса кельто на. "Ӟазег сӥльтэк ке мынӥд, азьланяз ӟазегпиосыд уз удалтэ", - верало арлыдоос. Ӟазег сӥлез нырысь веръяськод сӥзьыл кисьтон дыре, кулэм ӵыжы-выжыосты буре вайыку. Нош куазь йӧнгес кезьытскем бере гаггетӥсь бурдоослэн нуналъёссы лыдъямын ни. Анае вералоз вал: "Асьме егит дырмы кадь вакчи ӵӧж-ӟазеглэн улон гумырзы". Котькудаз сямен юртын, айызэ лыдъятэк, кык-куинь мумы ӟазегез вордыны кельто. Озьыен, уллё бадӟым гинэ луэ, сӥзьылаз ни уж трос люкаське. Ӟазег ишкон - туж ӝег уж. Кышномуртлы сое оген быдэстыны капчи ӧвӧл. Соин ик вашкала дырысен, кӧня ке мурт ӵошен кенешыса, та ужрадэз вемеен быдэсъяллязы. Ӵемысь асьсэ ӵыжы- выжыоссэс, бускельёссэс ӧтчало-люкало. Тодам на: мон ӟазегпиосты вандылӥсько. Кышноос, соосты лачмытак кутыса, дорам нулло. Кесясько, лопыръясько мискинь бурдоос. Котькудзэ вандэмлэсь азьло шыпыртыны косэ вал: "Кылемез мед удалтоз! Мыным сьӧлык медаз лу, анай-атайёслэн йылолзы". Вандэм ӟазеглэсь чылкыт вирзэ нимаз тэркые виято. Пожаськемзэ, сьӧдпыръемзэ ни, лымые ӟизато. Кузё кышно уго ас семьязэ но, вемее лыктэмъёсты но ческыт пӧзьтэм вир шыдэныз утялтоз. Отчы кеньыр, картошка, пӧртэм ватсэтъёс - ческыт шӧмо будос куаръёс ватсало. Виртырем но усто пӧрме. Ӟазег ишконэз али дыре ӵемысь мунчоосын радъяло. Отын шуныт, пӧсь ву но ки улазы. Милям гуртамы ӟазеглэсь тылыоссэ азьвыл кӧсын ишко вал. Со туж секыт но ӝег уж. Берло дыре тылобурдоез пӧсь вуэ кото ни. Озьы ишкыны трослы каньылгес. Тылызэ одно ик нимаз, мамыксэ нимаз карыса ишко. Туж небыт валес котыр пӧрмоз солэсь! Бызись нылмуртлэн одно ик ас тушак-миндэр котыръёсыз медло. Ӟазег вандон нуналэ семьяысь котькудӥзлы быгатэмезъя уж шеде. Воргоронъёслы но, покчиослы но. Пиналъёс тужгес шумпотыса чылкытато ӟазег пыдъёсты-тяпаосты, йыръёсты. Ваньзэ ишкыса, пушсэ поттыса-сузяса быдтэмзы бере шур дурысь люкмесэ миськыны васько. Котькуд кышномуртлэн пельпумаз карнан, отчы вить-куать ӵӧж-ӟазегъёс ошемын. Пиналъёс шырӟем тылыез кышноослэн азязы пазяса бызё. Эсэплано: трос но куяно ӧвӧл, ӧжыт но. Дорысен, капка выжыысен кутскыса, ӵапак шур дурозь мед окмоз. Озьы, пе, азьпалан ӟазег уллёед но сокем сузьйиськыса ветлоз. Ӟазег мугоръёсты кырӟаса ик гылъяло. Миськем-утялтэмзэ, вузэ ӟизатон вылысь, писпу вайёсы ошыло. Ужзэс йылпумъяса, капчи мылкыдын дор палазы вамышто. Нош кузё кышнолэн ӝӧк вылаз юондырлы кадь дасямын ни. Ӟазег сӥль но, шыд но, пӧзьтэм ческыт аракыез но... Ачиз пумен, выжыкылысь адӟем карыса, юрттӥськись пичиосты куноятынят сӥль люкылыны кутске. "Тани тыныд ӟазег пыд - анай-атай сюрестӥд ваышъя, нылъёслы - бурдъёс, ӝоген кузпаллы мед "лобӟозы"..." Кенерам сьӧрын яке гидын, ас нылпиоссэс утчаса, куаразэс сёто на кышкатскем айы но мумы ӟазегъёс. Соосты уз исалэ ни. Выжылы шуыса, ӟеъёссэ, тазаоссэ бырйыса кельтӥзы ук. Нош ӝӧк сьӧрысь кышноос, нылъёс ӵуказе кин дорын веме ортчытон сярысь кенешо ини. Озьыен, нош ик ортчоз ӟазег вандон веме. Шумпотонлэн но ужлэн юондырзы. Н. М.Никифоров 3260 Вашкала праздникъёс Южтолэзь пӧртэм праздникъёсын узыр. Соос инкуазьлэсь сайкамзэ, улӟемзэ пусъё кадь. Бусы ужъёслэн кутскемзылэсь азьло калык сюлмысьтыз шулдыръяське, шутэтске на. Та дыре дӧдьы куштонэз, пучы арняез, нош ӵуказе улыса вашкала сямъя быдӟым нуналэз пусъё. Соос вискын кулэм потон уй яке великий четверг, куд-ог интыосын ӵук мунчо уй, сенишной уй шуо. Сое пумитаса, котькуд семья корка пушсэ чылк-чылк утялтыны тыршылӥз: вӧлдэтсэс, борддоръёссэс, выжзэс сяна, миськылӥзы. Ӝытазеысен ӝӧк вылэ чылкыт тӧдьы ӝӧккышет вӧлдылӥзы, сылал но нянь сукыри пуктылӥзы: быдэс арзэ ёрмытэк, пе, мед уломы. Шуо вал, та уе кулэмъёс гуртазы адскыны бертыло, юртъер котыртӥ ишанъёс, ведӥнъёс, адямилэн пӧртэм тушмонъёсыз калтырто. Соослэсь утиськон понна укноосы, корка пырон ӧс вадьсы, гидкуа азе, капка борды сусыпу, палэзьпу, ньылпу вайёсты тырылӥзы, мелэн яке эгырен киросъёс пуктылӥзы, корка котыразы мак пазяллязы. Ведӥнъёсты, ишанъёсты кышкатон вылысь, егит пиос но воргоронъёс бер ыт гурт кузя ветло но корка сэрегъёсы зыръёсын шуккыло, пыӵалъёсысь ыбыло, вал вылын ворттыло но кесясько: "Кионэз-гондырез улляськом, кылез-дэез улляськом, шырез-комакез улляськом шур уллань!" Мунчое пыремзы бере ӝытазе вылазы чылкыт дӥсь дӥсяллязы. Вань уродзэ, кырсьсэ- пожзэ улляса, мунчо азьысен пырем вениксы вылэ пельпум ваментӥзы сяласькылӥзы. Бакчае потыса, улмопу но сутэрпу вайёсты сэзъяллязы: вань нымы-кибыез, пе, мед кошкоз, изъян медаз вайы. Жуг-жаг мултэс медаз поты шуыса, бакча капка сьӧры потылӥзы но кесяськылӥзы: "Ой, бакчаям одӥг жагез но ӧвӧл ук!" Скалзэс уин кыскозы вал, тросгес, пе, мед йӧл сётоз. Мудор азе пуктэм пучы ньӧрен пудоез шуккылӥзы, гуртэ, пе, мед бертылоз. Азьпал улонзэс тодон вылысь, та уе мунчое, сюрес воже, липет йылэ, укно улэ султыса тунаськылӥзы: мар кылод, сыӵе ик адӟонэд луоз. Покчи арня уе суйпосъёссэс горд, вож буртчин яке ыж гон шортэн керттылыса кӧлазы, турнан но аран вакытэ киоссы, пе, медаз тӧрналэ. Таӵе ик бадӟым дасяськон быдӟымнунал азьын мынэ вал. Ӝытазе выж вылэ куро пыртыса валё, ӵукна сое культоен ӵужо. Культо пушкын одно ик кӧня ке кутсамтэ шепез луыны кулэ. Тӧдьы ӝӧкккышет вылэ нимысьтыз пыжем нянь сукыри, сылал, буям курег пуз, табань, ас пӧзьтэм вина пукто. Быдӟымнуналэ ужаны сьӧлык, шуылӥзы. Соин ик вань ужзэс азьвылгес быдтыны тыршылзы: быдэс уй ӵоже вуриськылӥзы, кышъяськылзы. Шунды ӝужам бере ик кышномуртъёс табань но нянь пыжо ни. Нырысь табаньзэс но сукыризэс азбар шоразы яке куалаязы вӧсяло. Собере гинэ семьяенызы ӝӧк сьӧры пуксьылӥзы. Коркалэн кузёез буям курег пузэз кутыса чупа но нылпиосызлы сётэ, соосыз киысь кие келяло. Собере, курег пуз кутыса, ог-огенызы шуккисько: кинлэн быдэс кылёз, со ик таяз арын самой кужмоез луоз. Пиналъёс ӵукна коркась корка буям курег пуз октыса ветлӥзы: кин самой трос люка, со ик вормисе потэ. Собере, гурезь йылэ мыныса, гуждор вылтӥ гурезь уллане питыръяса шудылӥзы: кинлэн сӧриськоз, кинлэн уз. Шудонзэс быдтыса, вань курег пуззэс сиылӥзы. Мӧйыос коркась корка юмшало, кутэм пиналъёссылы кузьымъёс нулло. Быдӟымнунал бере ӵуказеяз, сое акашка шуо, пиос валъёс вылын ворттыло. Валъёсты вӧсям табанен сюдо, пу тусьтыысь винаен сектало: секыт уже кыткиськон азьын кужымзы, пе, мед люкаськоз. Озьы котькудӥз праздник одно ик азьланезлы осконэн герӟаськемын вал. Улонысь кырсьсэ-пожзэ, вань уродзэ, дэмен люкаськыса, быдэс гуртэнызы огкылысь кариськыса улляны тыршылӥзы. Та бордысь потэ вал куспазы тупаса улэмзы, ӟеч сямъёсты утьыны-вордыны тыршемзы. Калык вера: ӵук мунчо уй пильмо ке луэ, арез пильмо луоз, тӧло ке - тӧласькоз. Ӵук мунчо уй куазь кынтӥз ке, ньыльдон уй кынтоз на, шуо. Акашка нуналэ одно мед зороз. Т. ГРИГОРЬЕВА. Юрий Александров Кулэ на-а асьмелы веме? Нырысь ик - мар со "веме" кыл? Кыӵе солэн пуштросэз но кытысь со потэмын? Удмурт кылъя туала специалистъёслэн, кылсярысь, И. В. Таракановлэн чакламезъя, асьме доры со вуэмын артысь тюрк дуннеысь. Чуваш кылын со - "ниме" (диалектъёсын - виме), бигер но башкир кылын - "эме". Поръёс сое асьме выллемгес верало - "вима". Огкадьзыя шуыны луэ: "веме" кылэз удмуртъёс но поръёс булгаръёслэсь - вашкала чувашъёслэсь - огдырегес пунэмаллям. Ваньмаз та кылъёсын пуштросэз огкадьгес - "дэменак юрттон". Булгаръёс пӧлы та кыл вуэм араб яке иран (перс) кылъёсысь. Веме нергеен герӟаськем "кенеш", "бускель" кылъёс удмуртъёс доры выжемын артысь тюрк кылъёсысь. Ма, вашкала удмуртъёс но ог-огзылы дунтэк туж кемалась юрттылӥзы ик, дыр. Сыӵе малпанэ вутто таӵе кылъёсмы: "уртче", "валче", "огинын", "дэмен", "ӵош", "юрттэт"... "Веме" кыл ваньмызлэсь соослэсь валанъёссэс огазе бинялтыса кутэ кадь. Соин ик, дыр, та сьӧрлось кыл сокем пыдло пыриз удмурт улон-вылонэ но асьме калыклэн лулаз-сюлэмаз. Собере созэ но лыдэ басьтытэк уг луы: муртлэн киренез но чечы кадь ческыт, пе. Удмуртъёслэн вашкала булгаръёсын кусыпъёссы кызьы тодмо историын, матынэсьгес луизы но юнмазы ВИИИ-ЪИИИ дауръёсы. "Веме" кыл но удмурт кылэ сокугес ик выжыяськиз, луоз. Выль кыл пырем бере, солы нимысьтыз кулэлык но вылэм, дыр, ини. Адямилы ним вордскемез бере сёто. Та нерге но ӟеч-ӟеч юнмам но сыӵе ним кулэ карем. ВИИИ-ЪИИИ дауръёсы ик удмуртъёслэн ог-огедлы юрттон сямзы-нергезы ас котыраз трос пӧртэм юрттӥськонъёсты одӥг бугоре юн-юн биняськытэм. Веме нергелэсь- институтлэсь кылдэмзэ, комиосын ӵошатыса, умойгес валаны луэ. Соос но выжызыя, бӧлякъя тазьы ик ог-огзылы юртто. Ог-огзылы юрттон сямзэс соос "отсӧг" шуо. Та кылзэс-терминзэс соос "помочи, межсемейные трудовые артели" шуыса берыкто ӟуч кылэ. Асьмеос "веме" кылмес котькытын огкадь валаськомы. Пуштросэзъя, комиослэн сярысь, со паськытгес, эркынгес: "бускельёслэн яке ӵыжы-выжыослэн ог-огзылы дунтэк, ас мылкыд каремзыя дэмен юрттэмзы". Веме инъяськемын "сям" вылэ. Сям быдэсакеныз веме нергеен кивалтэ кадь. Арлыдызъя но со трослы мӧйыгес. Мае шуо сям? Со - вань удмурт калыклэн визь кужыменыз нокытчы гожъятэк кылдытэм законъёс, улондэ кызьы радъяны визь-кенешъёс но индылонъёс, умойтэмъёслэсь алонъёс. Со законъёс пушкын адями вордскемез дырысен улыны кулэ. Вемеез кылдытӥзы но утизы вашкалаослэн дауръёс ӵожелы тупатэм сям эгесъёссы. Вашкалаос тодо вал уго: сыӵе эгесъёстэк дунне питранэд кыдёке ик уз погыльскы. Азинскемзыя удмуртъёс вемеез ӟеч-ӟеч быдэ вуттэм этической комплекслы, системалы пӧрмытӥзы. Сое аспӧртэмлыко ужрадъян, ужан сям яке улонэз огъя визьмын, огъя мылкыдын радъям культура шуыны яра. Тазьы малпато калыклэн выжыысь выжые туж трос веранъёсыз. Кылсярысь, таӵеосыз: "Шуг-секытэ сюрем муртлы (семьялы) ӧд ке юртты - сьӧлык", "Юрттӥськид ке, тыныд но юрттозы", "Муртлы кӧня сётӥд, тыныд но сомында ик сётозы", "Сётэмед сётэмен ик берыктӥськоз". Юрттэмен ӵош ик вемеын, тодаз чик луытэк но, адями аслэсьтыз кыӵе вылэмзэ но возьматэ. Артысь адӟисьёс-чакласьёс усто ужасез соку ик синйылто. Сое "зарни ки", "туж кибашлы", "киыз мынэ", "киыз чырткем", "киыз капчи" шуо. Котьма ласянь синмаськымон ке, сыӵезэ "зарни адями", "дунне адями"нимъёсын данъяло. Ушъятэк. Адямилэн ас азяз шара вератэк. Вемее покчиос но шумпотыса мыно. Шелеп бичало, мукет чыры-пыры ужъёсты быдэсто. Та ужамзэ пинал даураз уз вунэты. Ураметӥ ортчылыкуз, дырын-дырын тодаз ваёз но аслыз ачиз пальпотоз: "Таослэн корка ӝутон вемеязы мон но вал!" Удмуртъёслэн улоназы, ӝужась калыклы чебер мылкыдъёс пыӵатоназы, юртъер утёназы, кысык ужъёссэс бергатоназы вемелэн ӟечез пумтэм-йылтэм. Соослэн огъязы вӧсь нерге ортчытъянъёсын но уно. Тани нимъёссыя ик сое валаны луоз: мер вӧсь, дэмен вӧсь, луд-куа вӧсь. Кытын но отын тодазы вайыло на губер вӧсь сярысь но ("губер" люкетэз "губерния" шуэмлэсь, шӧдске). Семьяос уго вӧсяськон дыръязы ог-огзылы юртто кеньырен, вӧйын, чечыен, вӧсяно тылобурдоен, пудо-животэн, кытӥяз нош аракыен но. Ог-огедлы юрттон сям шӧдӥськытэк уг кыльы егитъёсты кузпалъян дыръя но, нуны сюан ортчытыку но, солдат келяку но, кулэм муртэ берпум сюресаз келяку но. Валамон, веме сярысь вераськонъёс соку уг луо. Но вемелэн шорсюлмыз отын луэ - ог-огедлы сётон-басьтонтэк уг ортчо таосыз нергеос но. Вакчияк вераса, веме кулэ каре на нимысьтыз бадӟым уж гожтэмез. Туннала улонмес чакласькод ке, адӟиськод, кызьы веме син азьын куашка, тужгес ик солэн шорсюлмыз - ас мылкыдыдъя, быгатэмедъя, нокыӵе дун возьматэк (туала сямен - ӟенелик ёртытэк) ог-огедлы юрттон. Укыргем "туала" мылкыдоос, оло, шуозы: улон огинтыяз уг сылы, азинске, капитализме мынӥськомы... Отӥяз соос ик йырзэс чатыртозы шорад: "Кин визьмо, кин кужмо, кин амало но кескич, со ӟеч адямиос радэ потоз". Та верамын ваньмыз шонер кадь. Но тыпак озьы улыны кутскимы ке, тэльысь пӧйшуръёслы ум пӧрме-а асьмеос? Котькудӥз ас сярысьтыз гинэ сюлмаськыса улыны ӧдъяз ке, мукетъёсты нуназе куазен адӟемысь дугдӥз ке, азьланьын кин юрттоз на огназы кылем пересьёслы, пал кышноослы? Шуозы: "Кун вань. Со мед сюлмаськоз сыӵеос сярысь" Но кун - асьмеос ӧвӧл шат, калык ӧвӧл шат со? Ваньзэ куштыны уг яра, дыр, вылӥ кузёос вылэ гинэ. Котькудӥз кулэяськись вылӥослэн син шоразы уз но йӧты, ма, кулэяськисьёс но ваньзы юрттэт курыны соос доры уз мынэ (яке мынэмзы но уз луы). Сыӵе яке таӵе муген йӧнала луонлыкъёстэк кылем адямиосмес, асьме вӧзысь бускельёсмес озьы ас югдазы, шуг дуннеязы кельтон вылысен улонмес выльдыны кутскимы ке, асьмеос туж ик трос ӟечез адӟомы-а меда? Малы юан бӧрсьы юан кылдэ мынам сюлмам? Соин но, оло: улон юрт пуктэм понна тани гуртъёсын но коньдон тырытыны кутскемын ни. Ог-огедлы дунтэк ужан сям - веме, оло, историын гинэ-а луоз на? Чаклалэ ай: гуртын али тросэзлэн-а кужмыз сузе ас коньдонэныз яке медъяса ужасьёслэн тыршеменызы выль юртъер ӝутыны? Выль коркаос тросэз вуж дунъёсын бичам материалъёслэсь пуктэмын. Гуртын миллионеръёс ӧвӧл (соос вузкаронэн уг выро ук!). Кызьы азьланяз соос юртсэс-ерзэс выльдозы? Котькуд гурт синмаськымон улӥз отысь калыклэн кужыменыз: ог-огезлы юрттэменыз, тупаса улыны тыршеменыз, ог-огезлы сётыны, ог-огезлэсь басьтыны мыло-кыдо вылэменыз. Умой, туж умой луысал, асьмеос вемелэсь кулэзэ выльысь тодамы вайысалмы ке. Веме кулэ мед луоз вылэм, со медаз ик кулы вылэм. Вемелэн улонэз но, кулонэз но асьме бордысь - тон но мон бордысь потэ.