Людмила Айтуганова - Татьяна Зайцева Ас вакытэзлэн пиез Семён Самсоновлы - 70 Калык писатель, Удмурт Элькунлэн Кун премиезлэн лауреатэз, удмурт но ӟуч кылын потэм ньыльдон пала книгаослэн авторзы Семён Александрович Самсонов вань гожъяськытозяз сюлмаськыса улӥз произведениоссэ ас (туала) вакытэзлы тупамон карон, гожъямъёсыныз калыкезлы но литературалы пайда сётон сярысь. "... паймымон но, туж секыт но, сӥ-буро но кадь писательлэн ужез. Лыдӟись азьын вань гожтэмед понна кыл кутонэз но вань...", - ас быръем удысэз сярысь данъяськыса но шугъяськыса гожтӥз вал со. Туэ 1-тӥ куарусёнэ солы 70 арес тырмысал. Трос гожтыса вуттӥз ке но, эшшо но уно лэсьтысал на, дыр. Таиз понна но удмурт литература, удмурт лулчеберет бадӟым тау карыны кулэ дано писательмылы - ас вакытэзлэн пиезлы. - Удмурт литературалэсь азинскон сюрессэ эскерисьёс но Семён Самсоновлэсь творчествозэ дунъясьёс ваньзы сямен ик та писателез Геннадий Красильниковен артэ пукто. Тӥ сямен, шонер-а соос лэсьто? Кыӵе солэн удмурт литератураын зэмос интыез? - Мон Семён Самсоновез дунъясько ас вакытысьтыз удмурт литератураын тужгес кужмоез писатель шуыса. Со, мон малпасько, писатель сямен но, адями сямен но тыпак тупа ас вакытэзлы - 80-тӥ но 90-тӥ аръёслэн кутсконзылы. Соку нырысь интые потӥзы "деловой" адямиос, ас ужан удыссы понна сюлмынызы висись, ӟырдытэсь, одӥг интыязы сылыны быгатӥсьтэм, котькытчы вутскыны, выльзэ утчаны тыршись геройёс. Ӵапак сыӵе адямиос Самсоновлэн очеркъёсаз, повестьёсаз, романъёсаз возьматэмын. Кылсярысь, Василий Леонтьевич Леонтьев ("Милям гуртмы - Тыло" очерк), Василий Яковлевич Капралов ("Тӧллы пумит" очерк), Анастасия Ильинична Щербакова ("Азьлане сюрес" очерк), Тоня Платонова ("Дыдыкъёс бус пӧлы уг йыромо" роман) но мукетъёсыз. Та геройёс ваньбур поттонэз азинтыны сюлмасько, ас ужзылы вань кужымзэс сёто. "Дыдыкъёс бус пӧлы уг йыромо" (1979) романэз потэм бере Самсоновлэн нимыз удмурт литератураын дано инты басьтӥз. 1981 арын та ужез пусъемын вал УАССР-лэн Кун премиеныз, нош Йӧскалык библиотекалэн 1989 арын ортчытэм эскеронъёсызъя "Голуби с пути не сбиваются" удмурт литератураысь самой трос лыдӟиськись произведениен лыдъямын (авторезлы со пумысен нимысьтыз диплом сётэмын). Быдэсак та роман сӥземын ас вакытэзлы тужгес тупась ужпумлы: колхозъёсты юнматонлы, соосты кужмоятонлы, иське, тросгес йӧл-вӧй но сӥль поттон сярысь сюлмаськонлы - производственной темалы. Соин ик, мон шуысал, Семён Самсоновлэсь удмурт литератураын зэмос интызэ шараян понна, нырысь ик учконо солэсь производственной темалы сӥзем ужъёссэ, соослы дунъет сётыны тыршоно. Геннадий Красильниковен артэ пуктон сярысь ке, шуг вераны: соосыз артэ пуктыса учконо-а, ӧвӧл-а. Но самой паймымонэз тани мар. Г. Красильников 1928 арын вордӥськемын, С. Самсонов - 1931 арын. Кусыпсы - куинь ар гинэ. Кыкназы ик соос одӥг выллемгес улон сюресэз ортчемын: гуртысь потэмын, ёрос газетъёсын ужамын, собере - "Советской Удмуртиын", тодон-валанзэс Москваысь литературая институтын йылэто, удмурт писательёслэн огазеяськонэнызы кивалто. Та ласянь мон соосты артэ пуктыны соглаш. Но, учке ай, макем пӧртэмесь соослэн гожъяськон манерзы но возьматэм дуннезы. Геннадий Красильников аслаз творчествоеныз 60-тӥ аръёсы усьтӥськиз. Та аръёслэн тусбуйзы но та аръёсысь геройёс солэн произведениосаз суредамын. Семён Самсоновлэн пероеныз кылдытэм дунне - со 80-тӥ аръёс. Кусыпсы куинь арлы гинэ висъяське, но гожъямъёсазы соос чылкак пӧртэм вакытъёсты возьмато но усьто. - Малы нош озьы луиз меда? Маин со герӟаськемын? - Та сярысь малпаськоно на. Али вераны шугъяськисько. Война бере аръёсы Кенешо Союзысь калык улӥз на, фашистэз вормемезлы шумпотыса, соин ӵош ик котькуд бырем нылыз но пиез понна юн куректыса. Литератураын огшоры адмилэн улон-вылонэзлы бадӟым саклык висъяське, нуналысь нуналэ ортчись югдуръёс но ужпумъёс солэн мылкыдъёсыз но малпанъёсыз пыр возьматӥсько. Оглом вераса, нырысь интыын сылӥз войнатэм улонлэн чеберез, огшоры адямилэн сюлмаськонъёсыз, солэсь лулпуш дуннезэ ӟечгес тодыны тыршон. Геннадий Красильниковлэн азинлыко гожъяськон дырыз та аръёслы тупаз. Очеркъёсаз, веросъёсаз, повестьёсаз но романъёсаз та писатель нырысь ик тыршиз огшоры адямиослэсь (колхозниклэсь, механизаторлэсь, врачлэсь яке мукетъёсызлэсь сыӵе ик огшоры ужасьёслэсь) улон сюрессэс возьматыны, соослэсь мылкыдъёссэс, малпанъёссэс, вӧзысьтызы адямиосын кусыпъёссэс валаны но тодыны. Та вакытэ писатель азе улон мукетгес куронъёс пуктэ на вал. Наукалэсь но техникалэсь шедьтонъёссэ-вормонъёссэ лыдэ басьтыса ужазинлыкез умоятон нырысь интые потэмын ӧй вал на. Но Кенешо Союзысь адямилэн вормонэзлы шумпотыса, калыкеныз но кивалтӥсьёсыныз данъяськыса, шаерзэ ушъяса улон сьӧркытӥз шунды пуксён пал шаеръёсысь калыкъёс сиён-юон поттон, кунмуртъёссылэсь улон-вылонзэс умоятон ласянь кыдёке азьпала кошкиллям. Соин ик асьме адямиослы но ваньбур поттонэз выль сямен радъян борды ӝегатскытэк басьтӥськоно вал: наукалэсь но техниклэсь вормонъёссэ уже пыӵатоно, ӟечгес ю-нянь октоно, тросгес йӧл-вӧй но сӥль люкано, машина поттон, дӥськут но пыдкук вурон удысэз трослы пайдаё кароно. Улон куриз азьмынӥсь адямиослы котыр ласянь бадӟым саклык висъямез. Литературае эшезлэсь (Г. Красильниковлэсь) ӧжытак беромыса лыктэм писатель - Семён Самсонов ӵапак та куронлы аслаз творчествоеныз вазиськоно луиз. - Татьяна Ивановна, берло дыре малы ке но, мыным потэ, производственной темалы гожъяськисьёслэсь творчествозэс улӥегес пуктыны кутскизы кадь. Таин ӵош Семён Самсоновлэсь но гожъямъёссэ дано интыысьтыз куштыны вырисьёс ӧвӧл-а меда? - Та литература ӟеч литература луэ. Мукет ужпум, та темаез бугыртӥсь писательёс ас вакытсэс но со вакытысь адямиослэсь лул-сюлэм дуннезэс ваньзы-а вылӥ ӟечлыкен усьтыны быгатӥзы. Бадӟым таланто авторъёс производствоен герӟаськем ужпумъёсты сэрттон-пертчон сяменызы адямилэсь пуш улонзэ адӟытэк ӧз кельтылэ, произведениысьтызы котькуд югдурзэ но суредзэ адямилэн визьмыныз но дартъёсыныз мерталлязы. Пичиосызгес талантъёс асьсэос шӧдытэк но, дыр, колхоз ужез, заводысь воштӥськонъёсты, лэсьтӥськон удысэз мыло-кыдо возьматыны тыршон сяменызы геройёссылэн сюлэмзы сярысь вунэтылӥзы. Собере соослэн возьматоно геройзылэн пушказ мургес учкыны дырзы но ӧй вал угось, чалякгес кырмоно вал туннэ нуналлы адӟиськисьсэ, кулэзэ, яркытсэ. Мон юри С. Самсоновлэсь гожъямъёссэ радызъя, бӧрсьысь бӧрсе учкыса потӥ но таӵе чакланэ вуи: валтӥсь герой нылкышно ке, со котькугес ик ӝотрес сямо мурт луэ, катерьма вылаз торк-торк легаськемез ик та сярысь вера. Валессэс но сыӵе муртъёс сояз но, таяз но произведенияз чылкак одӥг кадь тупато. Буёлъёс сярысь ке вераськон мынэ, соос котьку яркытэсь, пырак пиштӥсесь: лыз ке - лыз, вож ке - вож яке горд ке - горд гинэ. Но солэн тазьы гожъяськемез нош ик потэ ас вакытэзлэсь туссэ дырыз дыръя возьматыса вуттыны тыршон, вакытэзлэн куронэзлы ӝоггес вазиськыны быгатон бордысь. Соин тӥни пичиесь тодметъёсты, суро яке шоро- куспо мылкыдъёсты но буёлъёсты матэ карыса возьматыны дыр уг кыльы ни. Та темалы гожъям произведениос, озьы ик Самсоновлэнэз но, берло дыре лыдӟисьсэ ыштыны кутскиз. Малыез валамон. Но озьы луыны кулэ ӧвӧл, дыр. Асьмеос куд-ог дыръя ум быгатӥське дунъяны созэ, мармы вань. Собере Самсоновлэсь зэмос интызэ шедьтон, возьматон понна быдэсак творчествозэ басьтоно, одӥг романзэ гинэ валтӥсь интые пуктоно ӧвӧл. Азьпалан Самсонов, оскисько, очеркъёсыз пыр но усьтӥськоз, дыр. Та жанр солы тужгес матын но кельышлы. - Мон вераськонмес ӵапак очеркъёсыз вылэ выжтыны медӥсько вал. Та ласянь малпандэс ӟечгес усьтыны ӧй быгатысалды меда? - Бадӟым литературае сюрессэ Семён Самсонов очеркъёс бордысен кутскиз. Нырысь книгаосыз гуртын улӥсьёслы, аспалъёсызлы (землякъёсызлы) сӥземын вал. Соослэн шугъяськонъёссы но шумпотонъёссы сярысь вераськон мынэ "Азьлане сюрес. Очерк" (1959) книгаяз, "Льӧмпу сяськая" (1961) веросъёсын но очеркъёсын бичетаз. Пичи колхозъёсты бадӟыме огазеян ужрад син азяз, сюлэм пыртӥз ортчиз. Гурт улонын выльдӥськон ӟечлы малпамын ке но вал, троссэ адямиосты куреконэ вуттӥз. Тужгес но "неперспективной" шуиськись гуртъёсты быдтыны кутскемен ӵош. Тани С. Самсоновлэсь но Тылозэ быдтыны чакламын вал. Вань сюлэм ӟырдытсэ но талантсэ поныса гожтэ со "Милям гуртмы - Тыло" очерксэ. Пырак вераны кулэ, та очерк писательлэсь гуртсэ быронлэсь утиз. Жаляно луэ, та мылкыдыз "Дыдыкъёс бус пӧлы уг йыромо" романаз чик но уг адӟиськы ни. Азьланяз но, повестьёс но романъёс кылдытъяменыз ӵош, писатель ялан очеркъёс бордын тыршиз. Вылӥ верам книгаосыз сяна, потӥзы на: "Тӧллы пумит": Завьялово районысь "Родина" колхозлэн председателез В. Я. Капралов сярысь очерк" - 1961; "Тау тыныд, адями! Очеркъёс" - 1963; "Музъем вера: Механизаторлэн улонысьтыз суредъёс" - 1976; "Ӵук ӟардон. Очеркъёс" - 1983; "Адямилы но бурдъёс кулэ: Очеркъёс" - 1961. Туннэ очерк удмурт литературысь кошкиз, шуыны луоз. Тани дырын-дырын Г. Грязев гожъя (умой гожъя), вӧзаз кинэ вераны ик тодоно ӧвӧл. Очеркъёсты ӵемгес телевидение но радио пыр сётъяло. Но таӵезэ лэсьтыны капчи. Угось отын аслыз адямилы микрофон, экран пыр кыл сётӥське. Учкись-кылзӥсь ассэ адямиез кылэ-адӟе. Нош Самсоновлы аслыз со адямиез адӟытыны но, кылзытыны но быгатоно вал. Учке ай, кӧня сюлэмзэ сётэ, висьыса со гожтэ очеркъёсаз огшоры калык пӧлысь героез сярысь. Авторлы оскиськод: со геройёссэ яратэ. Очеркъёсыз пумен ӟепчгес но ӟечгес пӧрмыны кутско. Нырысьёсыз описательной, познавательной шӧмъемесь ай ке, лирической мылкыдоесь, берлоосаз писатель бадӟымесь ужпумъёс пуктэ ини, ачиз но малпаське, лыдӟисьёсызлы но маза уг сёты. Собере ачиз вакыт кулэ каре вал, шуимы, чырмыт, шаплы, котькытчы вутскыны быгатӥсь адямиосты. Тани Самсонов ачиз ик кытчы гинэ вуэмын ӧвӧл: геройёссэ утчаса, быдэс Удмуртиез ортчиз, Кенешо Союзлэн пӧртэм сэрегъёсаз вуиз, Париже но сюрес лёгиз, Америкае но мыныны медэ вылэм. Вакытэзлэсь куронъёссэ быдэсъяны тыршеменыз ик, дыр, со мыло-кыдо ужаз очеркъёс бордын. Зэмзэ но, кыӵе жанр, очерк сяна, быгатоз на туала улонлэсь тусбуйзэ но пушказ бугыръяськись кужымъёссэ сокем ӝог, дырыз дыръя адӟыны-шӧдыны но лыдӟись доры вуттыны? - Но, мыным потэ, со укыргес "вольыт" гожъяз: писательлэн синмыныз сое гинэ адӟылӥз, мае адӟыны-кылыны лэземын вал. Талы мар верасалды? - Зэм, солэн Кенешо властьлы пумит луэмез уг шӧдӥськы. Ӝӧказ со номыре ӧз гожъя, дыр. Со гинэ мар - наоборот, Кенешо кунмес, улонмес, калыкез данъяса, ушъяса улӥз. Со дуннеез озьы адӟе вал, улонэз мукет сямен ӧз адӟы. Но та Самсоновлэн гинэ ӧвӧл, быдэс удмурт калыклэн адӟонэз ук. Гуртысь потэм мурт городэ вуэ, писатель луэ. Ас ужъёсызъя пӧртэм шукрес кунокуаосын (гостиницаосын) улэ, йӧно ӧтчамъёсы но кенешъёсы ветлэ, бадӟым адямиосын артэ пуке, сое нокин ултӥ уг кары. Озьы ке но, пушказ, выжыосыныз, вирыныз, сямъёсыныз со гуртысь удмурт пи ик кыле. Та ласянь учконо ке, со, гуртысь потэм мукет адямиос сямен ик, туж оскись. Партилэсь куронъёссэ пумитъяськытэк, мур-мур выжыяз учкытэк быдэсъяны дась вал. Социализмо улонлы юн оскиз, шумпотыса лэсьтӥз но. Мукет калыкъёслэн литератураязы диссидентъёссы но вал ке, асьмелэн соос ӧй вал. Мон ачим но ваньмызлы оскисько вал. Ай аспирантураын дыръям чылкак паймылӥ: кызьы озьы асьсэ кунзэс курлало, кызьы озьы таиз умойтэм, соиз умойтэм шуо. Соин ик мар лэсьтӥське вал партилэн куремезъя Кенешо Союзысь литератураын, кыӵе мылкыдын ужаны писательёсты ӝуткало вал съездъёсазы - со ваньмыз Самсоновлэн творчествояз пыӵалляз. Солженицын кадь гожъяськисьёсты Самсонов аслыз эш ӧз карылы. Но со калыкысь потэмын бере, калыкезлэн дунне шоры учконъёсыныз улэ бере, солэн пушказ туж юн возиськиз, дыр, таӵе валан: таиз - ӟеч, таиз - урод. Оло, пушказ со шугъяськылӥз ик, оло, сюлмыз но висе вал (марлы чик юнме гуртъёсты быдто?! кыӵе-сыӵе со чиновникъёс луозы - лушкаськыса уло?! мар даурто?! но мукет), но солэсь сыӵе дыръёссэ, матысь адямиосыз сяна (кышноез, нылпиосыз), нокин ӧз тодылы, дыр. Со пушказ нокинэ ӧз лэзьылы. Мон малпасько, котькуд адямилэн пушказ маиз ке но мукетъёслы тодмотэмез вань на. Пушкысь малпанъёсыдлы пумит вамыштыны кышкыт. Со ласянь учконо ке, Семён Самсонов ноку ӧз кожалля, ас малпанъёссэ ноку ӧз лёгалля, со котьку ас калыкеныз ӵош вал, калыкез понна тыршиз, ужзэ калыкезлы сӥзиз. Соин ик, мон шуисько, Самсонов ӟуго-ӟуго мылкыдо, трос полэсо шӧдонэн но быгатонэн, дырын-дырын аслыз ачиз пумит луылӥсь писатель вал, оглом вераса, - огшорытэм усточи, кызьы ке огшорытэм вал со вакытысь быдэсак улон. Но быдэс улонзэ, творчествозэ учконо ке, мыным потэ, со землякъёсыз азьын, калыкез азьын чылкыт. Ас калыксэ туж юн яратэмез, ас вакытэз понна ӟечсэ лэсьтыны тыршемез солы лул-мылкыдъёссэ саптаны- сьӧдманы ӧз сёты. - Домокош "Удмурт литература" нимо книгаяз Самсонов сярысь гожтэ: "...он несомненно талантлив и, если бы обладал большей требовательностью, мог бы обогатить удмуртскую литературу значительными произведениями". Тани тӥ но Самсоновлэн берло гожъямъёсыз сярысь статьяяды (потӥз "Вордскем кыл" журналын - 1999 ар, � 3-4) шедьтӥськоды солэсь пумозяз вуттымтэ малпанъёссэ, сценкаоссэ, эпизодъёссэ, образъёссэ. Собере та тырмымтэоссэ "азьвыл сямен ик, туннэлы кулэез сьӧры уйиськонэн" валэктӥськоды. Иське, тӥляд малпанды Домокошлэн малпанэзлы матын луэ. Нош мар бордысь меда потэ Самсоновлэн таӵе "сямыз", тырмымтэез? - Мон азьвыл, зэм но, Самсновлэсь ас азяз зол куронъёс пуктыны быгатымтэзэ туж бадӟым тырмымтэосыз пӧлы пыртӥсько вал. Малпасько вал: трос гожъяськемысьтыз, дыртыса ужамысьтыз куронъёс пуктыны ӧз быгатылы. Озьы шуыны али мынам ымы уг пыры ни. Угось валай: асьмеос ужаны быгатэменымы возиськиськомы. Самсоновлэн туж трос гожъЯськыны быгатэмез ик литературамылы кулыны, бырыны ӧз сёты. Туннэ асьме писательёсмы ӧжыт гожъясько. Шуэмзы потоз: лыдӟись доры вуыны секыт, уг печатало, книгамес уг потто но мукет. Туннэ кылбурчи-веросчилы ручка борды кутскемез понна гинэ ини тау кароно, гожъяськисьлэсь данзэ уте ук шуыса. Пырак вераны кулэ: Самсонов кадь мылысь-кыдысь ужасьёс берло дыре шер пумиськыло. Пусйыны кулэ тани мае но: С. Самсонов пӧртэм жанръёсты улӟытэ-вордэ: очерк, верос, повесть, роман. Учке ай: "Яратӥсько тонэ" - колхоз улонлы сӥзем лирической кузьмадёс, "Тугаськем бугор" - детектив, "Шунды выллань, нунал азьлань" - сюресвыл очеркъёслэсь сузьет, "Дыдыкъёс бус пӧлы уг йыромо" - производственной темалы сӥзем роман но мукет. Оглом вераса, со туала дырлы сӥзем удмурт литератураез жанръёс ласянь быгатэмъяз паськытатыны тырше. Та бордын со юромо, валаса ужа кадь, потэ мыным. - Тани тӥ вераськоды: С. Самсонов удмурт литератураын "веръямтэ" жанръёс борды басьтӥськылӥз, шуиськоды, озьы со аслэсьтыз быгатонзэ валаны-тодыны тыршиз, ассэ утчаз, дышетскиз. Оло нош, исамтэ интыосы Самсонов соин вутскылӥз, отчы пытьы кельтыны капчигес, угось азьдэ-бердэ чакланы кулэ ӧвӧл, нокинэн тонэ уз ӵошатэ? - Огласянь капчи. Мукет ласянь, мыным потэ: со чылкыт малпанъёсын ужаз, произведениоссэ ӟеч мылкыдъёсын гожъяз. Одӥгаз вераназ со шуиз вал: "Тужгес но сюлэм висе удмурт калык понна, солэсь кылзэ но культуразэ утён пумысен..." Ӵапак таӵе "висёнэз" ик: дыр, сое косылӥз удмурт литератураез выль но выль жанръёсын узырмытыны. Солэн пушказ бадӟым валанэз вал, дыр, - со удмурт литература понна ӟечсэ лэсьтэ, удмурт культура понна тырше-курадӟе. Нош, "аха, татын буш на, иське, аслыд ним лэсьтыны луоно" шуонъёс Самсоновлэн йыраз но вуылымтэлы юн оскисько. Собере учке ай, Самсонов макем бадӟым интыосы пуксьылӥз: "Молот" журналлэн валтӥсь редакторез вал (1963-1965, 1967-1971); писательёслэн огазеяськонэнызы кивалтӥз (1984-1993), сое бырйылӥзы РСФСР-ысь писательёслэн огазеяськонзылэн правленияз ёзчие но секретаре (1986), Быдэс дуннеысь финн-угор писательёслэн ассоциацизылы вице-президентэ (1992). Со ноку бадӟым креслоын пукеменызы данъяськыса, косъяськыса ӧз ул, котькуд интыяз быгатыса тыршиз, ужзэ ӟеч-ӟеч радъяны пӧрмытъяз. - С. Самсоновлэн очеркъёсыз пумысен туж туныско малпанъёстэс верады. Мынам та ужпум вылэ берытскеме потэ на вылэм. Кызьы тӥ малп аськоды, Татьяна Ивановна, оло, Самсоновлы очеркист луыны кылдэмын вал? Оло, со аслэсьтыз та кужымзэ валаса-тодыса ӧз вутты яке, тодыса вылысь, быгатонзэ мукет сюрес кузя валтӥз? - Зэмзэ но, мон ӵемысь аслэсьтым юасько: малы меда Семён Самсонов очерк бордын гинэ ӧз ужа? Малы со романэ кошкиз? Уг луы вал шат "Тугаськем бугорзэ" криминальной инъет вылын очерк карыны? "Кам вадьсын гудыръя" - сое но ӟеч-ӟеч очерк карыны луысал. Ма, "Дыдыкъёс бус пӧлын уг йыромо" романэз но очеркъёс вылын лэсьтэмын ук. Но, мукет произведениоссэ ӧй ке гожъясал, удмурт литература трослы начаргес кыльысал, Самсонов но Самсонов ӧй луысал. Солэн пушказ ялан пуке вал, дыр, мукет жанре потыны косӥсез. Мукет сямен но учкыны луоно. Оло, со Самсоновлэн но янгышез ӧвӧл, оло, со критикалэн янгышез. Солы дыраз верасез, дэмласез ӧй вал, дыр, пуксьы но йӧн-йӧн публицистической яке документальной литература лэсьты шуыса. Критика солэн повестьёсыз но романъёсыз понна кичабыса улӥз. Очеркъёссэ сомында ӧз ушъялэ, мамында ушъязы романзэ. Нош писатель, валамон ини, критикъёслэсь верамъёссэс адӟытэк-кыльытэк уг улы. Соин ик мон шуисько, Самсоновлэн творчествоезлэн ляб палъёсыз критикамылэн ляб луэмез бордысь но потэ. - Мукет гожъяськисьёслы Самсонов писательлэсь маизлы дышетскыны ӵектысалды, маиз солэн тужгес адӟем карымон луэ? - Асьмелэн писательёсмы туала ужпумъёсты уг шӧдо, уг адӟо. Улонлэн туннэ пуктэм куронъёсыз пумысь уг малпасько. С. Самсоновлэсь та ласянь адӟем карыны но дышетскыны кулэ. Дыр ортче, шуом, 15-20 аръёс, соку гинэ, беромыса, малпаськомы: озьы кулэ вылэм ук... Тани туннэ шумпотыса верало, нылъёсмы, пе, кунгож сьӧры бызё, иське, асьмелэн соос чебересь, визьмоесь. Но ведь талы чик но шумпотыны кулэ ӧвӧл, бӧрдыны кулэ. Собере асьмеос туж ӧжыт дышетскиськом, азьтэмесь, ӧжыт лыдӟиськиськом, выленыз ӧжыт тунсыкъяськиськом. Амал утчаськом, созэ яке тазэ лэсьтонтэм вылысь. Астэ ачид буйгатыны муг котьку сюре - угось озьы капчи. Самсоновлэн произведениез бордын ӟырдыт ужамез, мылысь-кыдысь тодон-валан бичамез но туж адӟем карымон. Оглом вераса, Самсонов кадь творчествоедлы вань лулдэ-вирдэ сётыса ужаны куд- огезлы писательёсмылы дышетсконо но дышетсконо ай. Нош сотэк литератураедлы, озьы ик ас калыкедлы мар ке но ӟечсэ сётыны-кельтыны вормод меда? 7 Людмила Айтуганова - Татьяна Зайцева Ас вакытэзлэн пиез Семён Самсоновлы - 70 Калык писатель, Удмурт Элькунлэн Кун премиезлэн лауреатэз, удмурт но ӟуч кылын потэм ньыльдон пала книгаослэн авторзы Семён Александрович Самсонов вань гожъяськытозяз сюлмаськыса улӥз произведениоссэ ас (туала) вакытэзлы тупамон карон, гожъямъёсыныз калыкезлы но литературалы пайда сётон сярысь. "... паймымон но, туж секыт но, сӥ-буро но кадь писательлэн ужез. Лыдӟись азьын вань гожтэмед понна кыл кутонэз но вань...", - ас быръем удысэз сярысь данъяськыса но шугъяськыса гожтӥз вал со. Туэ 1-тӥ куарусёнэ солы 70 арес тырмысал. Трос гожтыса вуттӥз ке но, эшшо но уно лэсьтысал на, дыр. Таиз понна но удмурт литература, удмурт лулчеберет бадӟым тау карыны кулэ дано писательмылы - ас вакытэзлэн пиезлы. - Удмурт литературалэсь азинскон сюрессэ эскерисьёс но Семён Самсоновлэсь творчествозэ дунъясьёс ваньзы сямен ик та писателез Геннадий Красильниковен артэ пукто. Тӥ сямен, шонер-а соос лэсьто? Кыӵе солэн удмурт литератураын зэмос интыез? - Мон Семён Самсоновез дунъясько ас вакытысьтыз удмурт литератураын тужгес кужмоез писатель шуыса. Со, мон малпасько, писатель сямен но, адями сямен но тыпак тупа ас вакытэзлы - 80-тӥ но 90-тӥ аръёслэн кутсконзылы. Соку нырысь интые потӥзы "деловой" адямиос, ас ужан удыссы понна сюлмынызы висись, ӟырдытэсь, одӥг интыязы сылыны быгатӥсьтэм, котькытчы вутскыны, выльзэ утчаны тыршись геройёс. Ӵапак сыӵе адямиос Самсоновлэн очеркъёсаз, повестьёсаз, романъёсаз возьматэмын. Кылсярысь, Василий Леонтьевич Леонтьев ("Милям гуртмы - Тыло" очерк), Василий Яковлевич Капралов ("Тӧллы пумит" очерк), Анастасия Ильинична Щербакова ("Азьлане сюрес" очерк), Тоня Платонова ("Дыдыкъёс бус пӧлы уг йыромо" роман) но мукетъёсыз. Та геройёс ваньбур поттонэз азинтыны сюлмасько, ас ужзылы вань кужымзэс сёто. "Дыдыкъёс бус пӧлы уг йыромо" (1979) романэз потэм бере Самсоновлэн нимыз удмурт литератураын дано инты басьтӥз. 1981 арын та ужез пусъемын вал УАССР-лэн Кун премиеныз, нош Йӧскалык библиотекалэн 1989 арын ортчытэм эскеронъёсызъя "Голуби с пути не сбиваются" удмурт литератураысь самой трос лыдӟиськись произведениен лыдъямын (авторезлы со пумысен нимысьтыз диплом сётэмын). Быдэсак та роман сӥземын ас вакытэзлы тужгес тупась ужпумлы: колхозъёсты юнматонлы, соосты кужмоятонлы, иське, тросгес йӧл-вӧй но сӥль поттон сярысь сюлмаськонлы - производственной темалы. Соин ик, мон шуысал, Семён Самсоновлэсь удмурт литератураын зэмос интызэ шараян понна, нырысь ик учконо солэсь производственной темалы сӥзем ужъёссэ, соослы дунъет сётыны тыршоно. Геннадий Красильниковен артэ пуктон сярысь ке, шуг вераны: соосыз артэ пуктыса учконо-а, ӧвӧл-а. Но самой паймымонэз тани мар. Г. Красильников 1928 арын вордӥськемын, С. Самсонов - 1931 арын. Кусыпсы - куинь ар гинэ. Кыкназы ик соос одӥг выллемгес улон сюресэз ортчемын: гуртысь потэмын, ёрос газетъёсын ужамын, собере - "Советской Удмуртиын", тодон-валанзэс Москваысь литературая институтын йылэто, удмурт писательёслэн огазеяськонэнызы кивалто. Та ласянь мон соосты артэ пуктыны соглаш. Но, учке ай, макем пӧртэмесь соослэн гожъяськон манерзы но возьматэм дуннезы. Геннадий Красильников аслаз творчествоеныз 60-тӥ аръёсы усьтӥськиз. Та аръёслэн тусбуйзы но та аръёсысь геройёс солэн произведениосаз суредамын. Семён Самсоновлэн пероеныз кылдытэм дунне - со 80-тӥ аръёс. Кусыпсы куинь арлы гинэ висъяське, но гожъямъёсазы соос чылкак пӧртэм вакытъёсты возьмато но усьто. - Малы нош озьы луиз меда? Маин со герӟаськемын? - Та сярысь малпаськоно на. Али вераны шугъяськисько. Война бере аръёсы Кенешо Союзысь калык улӥз на, фашистэз вормемезлы шумпотыса, соин ӵош ик котькуд бырем нылыз но пиез понна юн куректыса. Литератураын огшоры адмилэн улон-вылонэзлы бадӟым саклык висъяське, нуналысь нуналэ ортчись югдуръёс но ужпумъёс солэн мылкыдъёсыз но малпанъёсыз пыр возьматӥсько. Оглом вераса, нырысь интыын сылӥз войнатэм улонлэн чеберез, огшоры адямилэн сюлмаськонъёсыз, солэсь лулпуш дуннезэ ӟечгес тодыны тыршон. Геннадий Красильниковлэн азинлыко гожъяськон дырыз та аръёслы тупаз. Очеркъёсаз, веросъёсаз, повестьёсаз но романъёсаз та писатель нырысь ик тыршиз огшоры адямиослэсь (колхозниклэсь, механизаторлэсь, врачлэсь яке мукетъёсызлэсь сыӵе ик огшоры ужасьёслэсь) улон сюрессэс возьматыны, соослэсь мылкыдъёссэс, малпанъёссэс, вӧзысьтызы адямиосын кусыпъёссэс валаны но тодыны. Та вакытэ писатель азе улон мукетгес куронъёс пуктэ на вал. Наукалэсь но техникалэсь шедьтонъёссэ-вормонъёссэ лыдэ басьтыса ужазинлыкез умоятон нырысь интые потэмын ӧй вал на. Но Кенешо Союзысь адямилэн вормонэзлы шумпотыса, калыкеныз но кивалтӥсьёсыныз данъяськыса, шаерзэ ушъяса улон сьӧркытӥз шунды пуксён пал шаеръёсысь калыкъёс сиён-юон поттон, кунмуртъёссылэсь улон-вылонзэс умоятон ласянь кыдёке азьпала кошкиллям. Соин ик асьме адямиослы но ваньбур поттонэз выль сямен радъян борды ӝегатскытэк басьтӥськоно вал: наукалэсь но техниклэсь вормонъёссэ уже пыӵатоно, ӟечгес ю-нянь октоно, тросгес йӧл-вӧй но сӥль люкано, машина поттон, дӥськут но пыдкук вурон удысэз трослы пайдаё кароно. Улон куриз азьмынӥсь адямиослы котыр ласянь бадӟым саклык висъямез. Литературае эшезлэсь (Г. Красильниковлэсь) ӧжытак беромыса лыктэм писатель - Семён Самсонов ӵапак та куронлы аслаз творчествоеныз вазиськоно луиз. - Татьяна Ивановна, берло дыре малы ке но, мыным потэ, производственной темалы гожъяськисьёслэсь творчествозэс улӥегес пуктыны кутскизы кадь. Таин ӵош Семён Самсоновлэсь но гожъямъёссэ дано интыысьтыз куштыны вырисьёс ӧвӧл-а меда? - Та литература ӟеч литература луэ. Мукет ужпум, та темаез бугыртӥсь писательёс ас вакытсэс но со вакытысь адямиослэсь лул-сюлэм дуннезэс ваньзы-а вылӥ ӟечлыкен усьтыны быгатӥзы. Бадӟым таланто авторъёс производствоен герӟаськем ужпумъёсты сэрттон-пертчон сяменызы адямилэсь пуш улонзэ адӟытэк ӧз кельтылэ, произведениысьтызы котькуд югдурзэ но суредзэ адямилэн визьмыныз но дартъёсыныз мерталлязы. Пичиосызгес талантъёс асьсэос шӧдытэк но, дыр, колхоз ужез, заводысь воштӥськонъёсты, лэсьтӥськон удысэз мыло-кыдо возьматыны тыршон сяменызы геройёссылэн сюлэмзы сярысь вунэтылӥзы. Собере соослэн возьматоно геройзылэн пушказ мургес учкыны дырзы но ӧй вал угось, чалякгес кырмоно вал туннэ нуналлы адӟиськисьсэ, кулэзэ, яркытсэ. Мон юри С. Самсоновлэсь гожъямъёссэ радызъя, бӧрсьысь бӧрсе учкыса потӥ но таӵе чакланэ вуи: валтӥсь герой нылкышно ке, со котькугес ик ӝотрес сямо мурт луэ, катерьма вылаз торк-торк легаськемез ик та сярысь вера. Валессэс но сыӵе муртъёс сояз но, таяз но произведенияз чылкак одӥг кадь тупато. Буёлъёс сярысь ке вераськон мынэ, соос котьку яркытэсь, пырак пиштӥсесь: лыз ке - лыз, вож ке - вож яке горд ке - горд гинэ. Но солэн тазьы гожъяськемез нош ик потэ ас вакытэзлэсь туссэ дырыз дыръя возьматыса вуттыны тыршон, вакытэзлэн куронэзлы ӝоггес вазиськыны быгатон бордысь. Соин тӥни пичиесь тодметъёсты, суро яке шоро- куспо мылкыдъёсты но буёлъёсты матэ карыса возьматыны дыр уг кыльы ни. Та темалы гожъям произведениос, озьы ик Самсоновлэнэз но, берло дыре лыдӟисьсэ ыштыны кутскиз. Малыез валамон. Но озьы луыны кулэ ӧвӧл, дыр. Асьмеос куд-ог дыръя ум быгатӥське дунъяны созэ, мармы вань. Собере Самсоновлэсь зэмос интызэ шедьтон, возьматон понна быдэсак творчествозэ басьтоно, одӥг романзэ гинэ валтӥсь интые пуктоно ӧвӧл. Азьпалан Самсонов, оскисько, очеркъёсыз пыр но усьтӥськоз, дыр. Та жанр солы тужгес матын но кельышлы. - Мон вераськонмес ӵапак очеркъёсыз вылэ выжтыны медӥсько вал. Та ласянь малпандэс ӟечгес усьтыны ӧй быгатысалды меда? Семён Виноградов Оуэр! Оуэр карон (эру карон, эро карон) нергеез Будӟыннал азьысь покчиарняе ортчыто. Дас сизьым аресъем пиос, тӧдьы дэра айшетъёс (азькышетъёс) керттыса, чылкыт дӥсяськыса, ӵукна кураськыны пото. Та нергеез кудӥз-огез кураськон но шуэ. Ветло коркась корка. Куалы быдэ соослы кеньыр, вӧй, кык курег пуз, сӥль сёто. Шур сьӧрын нимысьтыз интыын ӝук пӧзьто, пересь муртэ вӧсято, шулдырак сисько. Курег пуззэс берло шулдыръяськыны кельто, уг пӧзьто ни. Быдэ вуэмъёсын ӵош ӝук сиыны быдэс гурт люкаське. Тазьы пусъё пиослэсь калык радэ пыремзэс, крестьян ужлы дась луэмзэс. Азькышет татын ужась муртлэн символэз выллем луэ кадь. Эро карон таин уг йылпумъяськы али. Та люкетсэ мон гожъяй Татариысь Агрыз ёросысь Варклет-Бӧдья гуртын Евдокия Гавриловна Гавриловалэсь, Антонида Гавриловна Виноградовалэсь но Герасим Гаврилович Гавриловлэсь. Варклет-Бӧдьялэсь кызь иськемын Удмуртиын вань Шайтангурт. Татын юалляськи на Париза Михайловна Михайловалэсь но атаелэсь Николай Петрович Виноградовлэсь. Атай кепыр ваиз ке но, туж кемалась вашкалаысь вадессэ вераны шедьтӥз кадь потӥз мыным. Покчиарня уе ("кулэм потон уй" шуо сое шайтангуртъёс) огаз мунчое люкасько, пе, вал быдэ вуись пиос. Отчы куинь-ньыль пересьёс лыктозы вылэм. Дас сизьым арес тырмемъёс куинь толэзь талэсь азьло дасям кивалтосъёсынызы вуо (тачырнаосын, пукыӵъёсын, шибодыосын, кестэнъёсын, чоклоръёсын). Пияшъёс огез бере мукетыз, штанизэс куашкатыса, "оуэр" черектыны кулэ. Вылтырзэс но куаразэс чакламзы бере пересьёс котькудӥзлы нимаз пумо чекыля сёто. Со дыре ик пияш дасям кивалтоссэ возьматыны кулэ. Арбериез быгатыса лэсьтэмын ӧвӧл ке, пересьёс тӥяса кушто, лэсьтӥсьсэ сапырес ужамез понна возьытэ вутто. Тӥни озьы быдэ вуон нуналазы пиослэсь ужаны быгатэмзэс, куаразэс, мугорзылэсь юнмамзэс, кышнояськыны вуэмзэс чаклало. Мунчоын та нергеез ортчытэм бере пиос гуртлэн пумаз люкасько: кин буш вал вылын, кин пыдын. Ваньзылэн сямен киосазы - кивалтос. Уйшор вакытэ люкаськем пиос - быдэ вуэмъёс (покчи вынъёссы но кудӥзлэн сьӧраз), кӧня ке пол "оуэр" шуыса кесяськем беразы, корка йыгаськыны кутско. Кузёос сайкаса сиён-юон уг ке потто, эшшо золгес дыбырто, зыръёсын яке векчигес корез трос кузя ӝутыса. Озьы гурт кузя куашетыса-йыггетыса васько. Аракы ке потто, пуссэс учкыса сёто, кинлэн пус-чекляез ӧвӧл, солы юон уг донгиськы. Куд-ог гуртъёсын улӥсьёс, коркасьтызы шайтан-периоссэс улляськом шуыса, ӵужонэн ӟус улъёстӥзы шоналлясько, собере гинэ укнозэс усьто но егитъёслы вазисько, аракы сёто. Та уе пӧртэм палась пыӵалэн ыбем куараос но одӥг-ог кылӥсько. Озьы ведӥнъёсыз, шайтанъёсыз курдатӥськом, шуо. Быдэ вуэмъёс куашетыса гурт пуме вуо. Отын кивалтосъёссэс тӥяло но шур дуре эстӥськыса суто. Озьы шайтан-периосыз, пе, улляськом. Та йылол пыр, мон сямен, вашкалаосмы егит ожгарчиосты ожмаськон искусстволы дышетылӥзы. Оуэр! шуон ("ура!" выллем) ожмаськон дыръя удмуртъёслэн вазиськонзы, луоз (боевой клич). Ӵыжы-выжыосмы дорын Пётр Сергеев Шуныт-а туннэ финн-угор "юртамы"? Финн-угор выжы калыкъёсты огазеясь дунне сярысь вераськонъёсты берло дыре ӵем гинэ кылӥськоды, луоз. Нош та бадӟым семьяез куке-соку син азяды пуктыны тыршиды-а ни: кинъёс отчы пыро, кытын соос уло, кыӵе дӥськут нулло, мар сиё- юо?.. Финн-угор шуыса нимам "юртлэн" липет улаз интыяськемын бере, та калыкъёс ог-огзылэсь шумпотонъёссэс но, сюлэмшугъяськонъёссэс но агай-вын, апай-сузэр кадь ӟеч шӧдыны-валаны кулэ кадь. Собере, оло, финн-угор дуннелэн шорсюлэмызлэсь кытчы интыяськемзэ но тодомы, вань ке со. Огкылысь вераса, 25 миллион адямиез огазеясь семьялэн кызьы но маин улэм-вылэменыз вакчияк тодматскоме. Комиос но удмуртъёс, поръёс но эстонъёс, финнъёс но мадьяръёс (венгръёс), вепсъёс но ижоръёс, карелъёс но ливъёс - тӥни кинъёс финн-угор шуыса нимам дуннеез кылдыто. 90-тӥ арозь палэнысь кунъёсын улӥсь выжы калыкъёсынымы нокыӵе кусыпъёсмы ӧй вал шуимы ке, ум янгышалэ, дыр. Берло дыре ини шуныт тӧлъёслэн пельтэмзы шӧдӥськиз. Ог-огмы доры вуылыны сюресъёс шедьтӥм. Мадьяръёс но финнъёс Россиын улӥсь финн-угор калыкъёслы матэгес кариськизы. Валче ужан, ог-огедлы юрттон ласянь со аръёсы ӧжыт лэсьтэмын ӧй вал. Асьме шаермы но ӵыжы-выжыосынымы кусыпъёсмес юнматон понна трос тыршиз. Тодады вае ай 1992 арез: Россиысь финн- угор калыкъёс асьсэлэсь оскымон пиоссэс но нылъёссэс Иже нырысетӥ ӧтчаме ыстылӥзы. Со дырысен куинь ар ортчыса, финн-угор егитъёс асьме доры конференциязы люкасько. Улонысь валтӥсь ужпумъёсъя кенешонъёсы кызьы ке кунгож сьӧры, озьы ик бускель шаеръёсы потазы. Газет-журнал поттон удысын тыршисьёс, радиоын но телевидениын ужасьёс матысь ӵыжы-выжыосынызы кусыпъёссэс юнматон сярысь сюлмаськизы. Чаклано ке, та калыкъёс ог-огзылэсь кызьы но маин улэм- вылэмзэс тодытэк ӧз кыльылэ. Табере амалтэк юан куриське: нош со пӧртэм ужрадъёс ог-огмылы эшшо но матэгес луыны юрттӥзы-а? Жаляса вераны кулэ: котьку сяменгес ик, ӧтчамъёсын, конференциосын, семинаръёсын пусъем-чаклам куд-ог ужрадъёс кагаз вылэ гожтэмен кыльылэмын. Бускель кунъёсын улӥсь удмуртъёс доры кызьы дас-кызь аръёс талэсь азьло асьсэ кылын гожтэм книгаос ӧз вуэ, али но озьы ик. Удмурт шаерамы весяклы выжы лэзем поръёслэн, комиослэн но югдурзы та ласянь пӧртэм ӧвӧл. Перьмын улӥсь Оньӧ Лав (сое ми журналмылэн та ар понна кыкетӥ номераз печатлам) одӥгаз гожтэтаз ӵапак сыӵе кулэяськон сярысь вераз. Выжыезъя со - коми-пермяк. Удмурт сямен чылкыт но чебер гожъяське. Асьме издательствоын потэм кызё пала авторъёслэсь книгаоссэс шедьтыны но келяны курыса вазиськем. Валамон ни, лыдӟисьёсмылэсь кулэяськонъёссэс быдэсъянлэсь палэнскыны ми ум быгатӥське. Мукет ласянь чаклано ке, бускель кунъёс куспын литератураен, культура программаен вошъяськон калыкез дышетонъя но культурая министерствоослэн сюлмаськонзы луыны кулэ ӧвӧл-а? Тросэз понна адӟем карымон луо комиослэн ужан амалъёссы. Бадӟымесь ужпумъёсты быдэсъян борды соос берло дыре рос-прос басьтӥськизы. "Финн-угор дуннеысь ивор вӧлмытӥсь ёзъёс ЪЪИ даурын" нимам семинар но, мынам малпамея, юнме шорысь Сыктывкарын ӧз ортчы. Ӵыжы-выжы луись калыкъёсмылэсь ыстэм куатьтонлэсь трос журналистъёс, калыкъёсын ужан политикая но культурая министерствоосын тыршисьёс солэн ужаз пыриськизы. Коми шаерлэн шоркараз, Сыктывкаре, талэсь азьвыл ӧй вуылы бере, тросэз мыным синмаськымон но вожъяськымон потӥз. Нырысь ик, отысь куд-ог кивалтӥсьёслэн кулэ ужпумъёсты быдэсъян борды саесъёссэс пужалляса выллем басьтӥськемзы. Соос пӧлысь одӥгез - Валерий Петрович Марков, Россиысь Кун Думалэн депутатэз, коми калыклэн ӧтчамезлэн исполкомезлэн тӧроез, быдэс дуннеысь финн-угор калыкъёслэн огкылэ вуонъя калыккуспо комитетсылэн кивалтӥсез. Солэн котькытчы вутскемез, котыр ласянь юрттэмез туж шӧдӥське. Басьтом тани со семинарез ик. Малы ке сое радъян борды удмуртъёс но, поръёс но, мукетъёс но ӧз кутске. Нош комиос пӧрмытӥзы. Солэн пайдаез отӥяз шӧдӥськыны кулэ. Валерий Петрович Финляндиын ортчем куинетӥ конгресслэсь ӝутэм ужпумъёссэ быдэсъян ласянь но мыло-кыдо тырше. Матысь вить аръёсы финн-угор дуннеысь газетъёсын, журналъёсын, радиоын но телевидениын ужасьёсты огазеян, куспазы иворъёсын вошъяськон но трос мукетыз сярысь кенешизы соку Хельсинкиын. Комиос, со борды басьтӥськыса, мукетъёссэ калыкъёсты азьпалтӥзы. Сыктывкарын табере ивор вӧлмытонъя центрзы вань - "Комиинформ" медиа-холдинг нимаське со. Кивалтыны оскемын туж йӧно но визьмо егит воргоронлы Павел Кочановлы. Семинаре люкаськемъёсты асьсэлэн ужан амалъёсынызы тодматыны нуллӥз. Туала техникаен узыр кабинетъёсын пукись егит пиослэн но нылъёслэн ужамзы шоры вожъяськыса учки. Ӵапак со юртэ ӵыжы-выжы калыкъёсмылэсь кызьы но маин улэм-вылэмзэс возьматӥсь иворъёс люкаськыны кулэ. Витьтонлэсь уно компьютеръёс уй но нунал финн-угор дунне пала мертамын. Отын ик асьсэ телевиденизы но вань. Соос ик газетъёс потто. Со липет улысь радиоверанъёс Сыктывкар, Воркута но Коми шаерысь мукет городъёсы вуо. Огкылын вераса, бускельёсмы та ласянь кыдёке азьпала вамыштӥллям. Валамон ни, асьсэ дорысь сяна, мукет улосвылысь но коньдонэн юрттэт басьто. Кызьы меда вератэк кельтод Финляндиысь Кастрен огазеяськон сярысь, кудӥз финн-угор выжы калыкъёс понна сокем трос но пайдаё ужъёс быдэстӥз ини. Комиос асьсэ кылзэс утён но азинтон, культуразэс ӝутон бордын чырмыт ужаменызы но паймытӥзы. Соос 1994 арын ини "Коми Элькунын кун кылъёс сярысь" Катэз (Законэз) кутӥллям. Солэсь улонын кызьы быдэсъяськемзэ сак эскерыса уло. Та шаерысь куд-ог администрациосын документъёссэс кык кылын дасялляло ини. "Центральная" шуыса нимам гостиницае вуылэмъёс сое ас синъёсынызы адӟо, луоз: ужанрадлыксы асьсэ кылын гожъямын. Семинарез люкасьёс но ортчытӥсьёс пӧлысь "Коми му" газетлэсь валтӥсь редакторзэ Надежда Быковскаяез нимысьтыз пусйыны кулэ, дыр. Нуналлы быдэ сямен пумиськылӥсь ужпумъёс сярысь кенешыкумы, огпол со мыным вераз: "Вылӥ кивалтӥсьёс доры ветлыны кепырано ӧвӧл. Кык пол но, дас пол но мыноно. Соос йыбыртъямез ярато. Ми озьы кураськиськом. Та кабинетын мултэс адями луиськод шуыса, одӥгез но улляса ӧз лэзьы на. Юрттыны юртто". Надежда Николаевналэн бызьылэмез, зэмзэ но, шӧдӥське. Огдыре вис шедьтыса, ми, Удмуртиысь куинь эшъёс, "Коми му" газетлэн редакцияз вуылӥмы. Отысь но адӟем карымонзэ трос синйылтӥм. Финн-угор выжы калыкъёс азьын сылӥсь быдэстоно ужпумъёс ӧжыт ӧвӧл. Семинаре люкаськылэмъёсты кылзыса но сое валаны луиз. Кытын ке ас кылынызы газет-журнал поттонлы пумит карисько, кытын ке ас кылзэс кун кыллы пӧрмытонэн нюръясько но мукет. Тани Карелиын но та ласянь югдурзы ушъяськымон вылымтэ. Отысь калыкъёсын ужан политикая кун комитетысьтызы Наталья Антонова сюлмыз вӧсь луыса мадиз со сярысь. Карелиын улӥсь ӟучъёс выжы калыклэсь кылзэ кун каронлы туж но туж пумитъясько, пе. Малпано ке, асьмеос но, удмуртъёс, та ласянь кыдёке ӧм кошке. Кун Кенешлэн сессиосаз кылмес кун каронъя вераськонъёс огпол гинэ ӧз потылэ ни. Нош Закон татчыозь кутэмын ӧвӧл. Сыктывкаре лыктэм эшъёс дырзэс юнме ӧз быдтэ. Пор шаерын потӥсь "Кудо+Коду" ("Дом+Очаг") газетэз тросэзлэн ик адӟылэмзы ӧвӧл, дыр. Со финн-угор дуннеын калыккуспо газет лыдъяське. Дасясьёсыз тиражзэс будэтон пумысен сюлмаськемзэс возьматӥзы. Зэм но, сомында шаеръёсын улӥсь 25 миллион калык понна ӟуч кылын 3100 тиражен потӥсь газет номыр уз сёты. Но редакторез Владимир Козлов верамъя, "Кудо+Коду" газетэз Финляндиын но, Швециын но, Венгриын но яратыса, пе, басьто. Бускель шаеръёсы вӧлмытон ласянь ми пӧлын но нимысьтыз ужазы. Сыктывкаре вуылэммы сярысь веранме йылпумъяса, тазьы шуысал: ивор вӧлмытонысь бадӟым инты басьтӥсь ужпумез комиос интыысьтыз вырӟытыны быгатӥллям, ӵуказе нуналлы осконэн уло, финн-угор дуннеысь калыкъёсынымы кусыпъёсты уката юнматон сярысь сюлмасько. Ӵапак со понна ик тӥни, кызьы валады ини, иворъёсты люканъя но кулэ дыръяз коть Америкае, коть Японие келянъя центр кылдытӥзы. Комиос азьланезлы эшшо но бадӟымесь малпанъёсын уло. Соослэн ӵыжы-выжы калыкъёсын вань шаеръёсты "телевыжъёсын" герӟамзы потэ. Оскон вань: та ныпъетэз но ӝутыны вормозы. Сокем узыр база кылдытыны быгатӥзы бере, мар шуод на, мед ужалозы ини. Нош асьмелы, удмуртъёслы, со центре шедёнлэсь бере кылёно ӧвӧл. Кызьы но маин улэм-вылэммес Камчаткаын но, Венгриын но, кыдёкысь мукет шаеръёсын но мед тодозы. Пӧртэм кылын вераськись ӵыжы-выжы калыкъёсмы куспын огдэ огед валан, ог- огедлы юрттон мед пушъёзы. Финн-угор нимаськись бадӟым юртамы соку гинэ тырмыт шуныт но югыт пыртомы. Римма Николаева "Корка пуктӥ, писпу мерттӥ..." В. С. Ушаковлы - 50 арес Глаз карын Чупчи шур вамен выж вылын пичигес мугоро баблес йырсиё пияш мороженой сиыса сылэ. Чебересь шудбуро чарланъёслэн лобамзы шоры учкыса, мур лулӟылэ. Котыраз калык люр-ляр поттэ, номыр сярысь сюлмаськонзы ик ӧвӧл, кожалод. - Тӥни, котькудӥз ас малпанъёсыныз ас быръем сюресэз вылтӥ лёгаське. Чупчи дурысь чорыгасьёслэн но вань улонзы зыгатӥсь пукызы вылын золтэмын кадь. Нош мыным визнан ньӧрме кыӵе ярдуре пуксьыса чӧлтоно? - йыртӥямон шуг юанэзлы пияшлэн нокыӵе валэктон шедьтэмез уг луы. - Быдэ вуэм адямилы шуг вылэм дунне вылын улыны. Анае тани монэ уйвӧтаз но инженерен адӟе, нош мынам ке чик инженер луэме уг пот. Васи гурт хозяйствоя техникум вӧзтӥ куинь нунал куспын вить пол ортчиз ини. Дышетсконнилэн ӧсэз доры вуэ но, ӧс кутонэз ас палаз кыскыны дӥсьтытэк, выльысь ульча кузя азьлань вамыштэ. Сюресэз нош ик Чупчи шур дуры вуттэ. - Ӵок, анае котьмар мед шуоз, кагазъёсме со техникуме уг сёты... Киоскысь мороженой басьтӥз. Кылдэм малпанэзлэсь капчияк луиз кадь. Ыркыт пельтӥсь тӧл пала ымнырзэ берыктыса, синъёссэ кыниз. Нап бабылес йырсияз тӧл веттаське. Шуак пельпумаз кин ке йӧтскись луиз. Та карын сое, агаез сяна, нокин уг тодма кадь... Люм шор ёзо школаысьтызы вожатойзы вылэм. - Мар куректӥськод? - вазе нылаш. - Мон уг куректӥськы, мороженой сиисько. - Тон, мороженой сиись, кытчы дышетскыны мынӥськод? - Ачим но уг тодӥськы. - Нош мон тодӥсько, кытчы тыныд дышетскыны пыроно. Тани, - "Советской Удмуртия" газетэз усьтыса, чиньыеныз пичи гинэ ялон шоры возьматӥз. - Быгатонлыкъёсыд вань - артистэ тыныд мыноно. Тымиськыса улэм ву, ӵыпетсэкырыса, азьлань омырскиз кадь. Со нуналэ ик Вася Ижкаре вырӟиз. Агаез солы аслэсьтыз костюмзэ дӥсяса лэзиз: кызьы, пе, сотэк, артистэ мынэ бере, вылтусыз но артистлэн кадь кельшымонм медло. Удмурт театре вуыса, Васи чылкак абдраз: кӧня егитъёслэн артист луэмзы потэ вылэм! Офицер дэремен туж йӧно, ӝужыт мугоро пияш син шораз йӧтӥз. "Вот таиз ваньзэ тодӥсь бадӟым адями луоз. Нош кыӵе кылын солы вазиськоно меда?.. Ма, удмуртъёс пӧлын бере, со но удмурт ик, луоз". Дӥсьтонзэ вормыса, Вася йӧно пи доры лыктӥз но кизэ мычиз: - Вася. - Аркаш... - Мар-о, Васи, возьматом-а, "где раки зимуют"? - синмыныз кырмыштӥз Аркаш. Черодэз вуыса, Васи но быгатонлыкъёссэ возьматыны пыриз. Шугъяське. Вылаз ик, учкись режиссёр Г. Веретенников мыдлань-азьлань лёгаське на. А. Пушкинлэсь кылбурзэ но И. Крыловлэсь баснязэ лыдӟем бераз куинетӥ туре гинэ лыктыны косӥз. Соку, пе, Москваысь комиссия луоз. Василэн Ижкарын нокин тодмоез ӧй вал. Аркаш сьӧраз мыныны ӵектӥз: - Атае мынам мукет семья кылдытӥз. Но эн кышка, сюранае мынам - мировой. Пияшъёслы улонни ласянь удалтӥз: со кышномурт бадӟым сюлэмо адями вылэм, аслэсьтыз пиоссэ кадь утялтыса возиз. Дас нунал куспын Аркашен Васи люкиськонтэм матысь эшъёс луизы. Горький нимо садэ потыса, пӧртэм выль "ужъёс" малпало, этюдъёс возьматъяны дышетско. Тыршемзы юнме ӧз луы - эшъёс, вань конкурсъёс пыр потыса, Москваысь Щукин нимо училищее пыро. -Сцена вылын шудон кемаласен кельше ни вал, - тодаз вае Василий Серафимович. - Покчи классъёсын дышетӥсьмы А. Г. Волкова самодеятельной кружок нуиз. Та дырысен ик ваньмыз со лулпушкам пырыса кылиз, вылды. Шумпотонзэ вераны Глаз ёросысь Н. Слудкае вордскем гуртаз бертэ. - Анае артистэ дышетскыны мынэмме тодыса, чутрак пумит луиз. Нош атае мынам - зэмос пиосмурт, коммунист, колхозлэн тӧроез - туж шумпотӥз, - тодаз вае Ушаков. Студентлэн дышетскон аръёсыз туж ӝог гинэ ортчо. Кыкетӥ курсаз выжемез бере ик дышетӥсьсы Б. Г. Кульнев Васялы режиссёре но нялтас дышетскыны дэмла. - Ежгес вал ай, режиссура удыслэсь кулэлыксэ соку ик ӧй но вала. Юнмам, кыдам бӧрам та малпанэ выльысь кылдӥз ини. Артистэ дышетскись пиналъёс асьсэос ик рольёс но шудо, режиссёр-постановщик интыын но кужымзэс эскеро. Вася соку мукетъёслэсь номырин ик ӧз висъяськылы. 1973 арын дас вить кузя егит нылъёс но пиос: Пётр Романов, Галина Владыкина, Фаина Будина, Ольга Чужанова, Василий Ушаков но мукетъёсыз, артистлэсь дипломзэ басьтыса, Удмурт театре вуо. Сьӧразы дась спектакльёс ваё: А. Островскийлэсь "Бедность не пороксэ", А. Афиногеновлэсь "Машеньказэ", Р. Шериданлэсь "Дуэньязэ". В. Ушаков артист луыса одӥг ар ужа но армие мынэ. Арми бере (мылкыдыз ялан режиссурае кыскиз угось) Удмурт телевидение рижиссёре интыяське. Нош 1977-78 аръёсы ГИТИС-ысь вылӥ театральной курсъёсын пуктӥсь режиссёре дышетске но выльысь театре берытске, табере ини - пуктӥсь режиссёр луыса. Нырысетӥ ужез - Р. Киплинглэн "Кошка, которая гуляла сама по себе" пьесаезъя нылпиослы выжыкыл-спектакль. Василий Серафимовичлы нырысь вамышъёссэ лэсьтыны юрттэ Александр Блинов. 1978 арлэн пумаз А. А. Блинов валтӥсь режиссёрлэсь ужзэ быдэсъяны ас интыяз В. С. Ушаковез кельтэ. Кошкон азяз Александр Андреевичтеатрын вань ужась калык азьын ас мылкыдзэ усьтыса шуиз: - Аслэсьтым удысме оскымон киосы кельтӥсько. Василий Серафимовичлы капчи ӧз йӧты. Егит специалист, дырзэ но быгатонзэ жалятэк, быдэсак ужаз выйиз - режиссёре дышетскон дыръяз ик сюлмаз кельшем Р. Валишинлэсь "Инвожо уйшоре но пиштэ" повестьсэ спектакль карон борды. 1979 арын 27 шуркынмонэ премьера ортчиз. Повестьлэн авторез Р. Валишин репетициосы туж шумпотыса ветлэ вал. Ӝож соиз - премьеразэ адӟытэк, улонысь кошкиз. - Драматургия удысын ужан ласянь трос тодон-валан басьтӥ, Ф. Пукроковлэсь "Корка пырон" пьесазэ лэсьтыку. Паймымон чебер, туж узыр потӥз удмурт кылмы. Литературной стилез валаны дыши. Пьесаез сцена вылын пуктымон карон понна, мон сое сюлэмы, визьмы, лул-пушкы пыртӥ поттӥ. Но ачим шал-шал буш корка кылем кадь луи. Бумага вылысь пьеса со спектакль ӧвӧл на. Сое учкисьёслы возьматымон пӧрмытыны трос кужым кулэ вылэм. Ужаны кужым Василий Серафимовичлы кузпалыз Алевтина Николаевна сётэ. Со котьку картэзлэн вӧзаз. Люкетытэк, ужъёсаз пыриськытэк, аслаз бадӟым яратонэныз кузпалзэ ӟеч вормонъёсы бурдъяны быгатэ... Москваын дышетскыкуз, Вася анаез-атаез доры адӟиськыны бертэ. Ӵапак сизьыметӥ коньывуонэ. Москва бере гуртын сокем чалмыт но мӧзмыт вылэм! Ӝытазе анаез Васялы егитъёс пӧлы клубе потыны ӵектэ. - Мар каром мон отын? - Нылъёс шоры коть учкод. - Мар соос шоры учконэз? - Ма, егит пи ӝытъёсы анаез шоры учкыса пукоз шат? Анаезлэн верамез борды школаын ӵош дышетскем эшез итӥськиз на. Васи ӧз пыкиськы ни. Ульчае потыса, соос артысь Выль Эбгае нуись сюрес кузя вырйылэ тубизы. Гуртэ пырем беразы ик кык нылъёсты-сузэръёсты пумитазы. Одӥгезлы Вася соку ик синмськиз. Чупчи шур вамен выж вылын сылыкуз сямен, нош ик инмысь шуд кизили васькиз кадь. Алевтина, Пермысь пединститутэз йылпумъяса, школаын дышетӥсь луыса ужа ни вылэм. Та ныл Москваез ик бездытӥз. Васялы гуртын мӧзмыт ӧз пот ни. Одӥг пол соос ӵошен Глазове вуылӥзы. Нылашлы аслаз вордскем гуртаз бертоно вал. Со карлэсь куинь иськемын гинэ. Ӝыны сюресэз вамышъяса ӧз ке но жаде, шутэтскыны кенешизы. Куспазы оломар сярысь но лабырто, нош ог-огзылы синмаськемзэс одӥг пол но шараяны ӧз дӥсьтэ на. Вася Алевтинаезлы сокем синмаськемын, пыд улысьтыз музъемез шӧдылытэк, яратонэз вӧзын бурд вылын кадь лоба. Сюреслэсь кӧня ке палэнскыса, усем кызьпу вылэ пуксизы. - Пуксим. Мон тамакме аратӥ. Мар лэсьтэмме валатэк, ӝуась тылпоттонме берен коробкаяз ик чуртнаськем. Соиз кенжиз ук! Коробкаысь тыл синкашъёсме кылыныз нюлыштӥз кожалод, ымнырысьтым вань гонэ ӵуштаськиз. Чилектэм кадь малпан кылдӥз: "Та инмысь Вылӥ Инмарлэн шӧдытӥсь пусэз, дыр. Алевтина мыным кузпаллы сӥземын"... Со дырысен уно аръёс ортчизы. Табере Антон пизы йыг-йыг пиосмурт ини. Театрын ик куарая режиссёр луыса ужа. Ас удысэзъя ужлы Петербургысь гуманитарной университетын заочно дышетске. Василий Серафимович тазьы вера: - Аслам корка но пуктэме уз луы, дыр, кожасько вал. Но, кызьы шуо калыкын, "син кышка, ки лэсьтэ". Пӧрмытӥ ук! Сад-бакчаям ас киосыным корка пуктӥ, мунчо ӝутӥ. Мар быдэстыны кулэ адями музъем вылын улытозяз, ваньзэ пишмытӥ кадь: корка пуктӥ, писпу мерттӥ, пи вордӥ. Туж яратэ пӧраськыны. Ачиз серекъя: "Театрын ӧй ке ужасал, пӧраськись луысал, дыр". Ушаковъёслэн семьязы асьсэ мылкыдзыя кутэм законъя уло: кин нырысь ужысь бертӥз, со ик сиён пӧра. Режиссёр, пе, рольёсты нырысь ик ачиз синмаськымон шудыны быгатыны кулэ. Кылсярысь, кудӥз ке артист витьымтэ шорысь висьыны я мар кутскиз ке, режиссёрлэсь но ӟечгес кин тодоз на солэсь рользэ? Ӵем пумиськыло учыръёс, куке режиссёр аслэсьтыз спектакльзэ "утёно" луэ. Василий Серафимовичлэн но шудылон дыръёсыз вал: "Гуртысь маскарчиос" спектакльын (М. Варфоломеев) Гурьянлэсь но Кудрявойлэсь рольёссэс, "Эриктэм эмъясь" спектакльын (Ж. Мольерлэн) - Жеронтлэсь, "Кык тол но куинь гужемын" (Ф. Абрамов) - Егоршалэсь, "Айнаын" (Т. Чернова, В. Ушаков) - Крезьчилэсь. Режиссёр ужъёсыз сямен ик, актёр ужъёсыз но арысь аре юнмало но кыдало. Ужатозяз данак выль нимъёслы усьтӥськыны юрттӥз: крезьгурчиослы, кылбурчиослы, драматургъёслы, художникъёслы. В. Ар-Сергилэн "Тонэ кожай вал юг дыдык" пьесаезъя спектакль дасян йӧэз сузмытыса тудву вырӟем кадь потӥз мыным. Егит артистъёс но рольёссэс сокем валаса шудӥзы, крезьгурез но (гожтӥз Н. Шабалин) сокем интыяз вал - спектакль огшокчемен вордӥськемын кожалод. М. Федотовлэн кылъёсызъя та спектакльлы гожтэм "Тыныд гинэ усьто мон сюлэмме" кырӟан али ке но радио пыр ӵем чузъяськылэ на. Ӟеч ужамзэ сӥлы карыса, 1991 арын Лулчеберетъя министерство В. С. Ушаковлы "Удмурт Элькунысь искусствоосъя дано ужась" ним сётэ. - Котырам люкасько асме валась, монэн огкадь мылкыдын улӥсь муртъёсты люкасько. Адямилэн бадӟым-а, пичи-а быгатонлыкез - со монэ чик но уг шугъяськыты. Ваче ужаку ог-огдэ валан вань ке, пушкысьтым шӧдонэ вера кадь: ваньмыз пӧрмоз, ваньмыз усто луоз, - шуэ Василий Серафимович, ужан амалъёссэ шараяса. Собере ватса. - Куддыр кыӵе ке малпан мыным улыны маза уг сёты. Со дыре киям выль пьеса вуэ. Соиз нош ӵапак мынам малпанэным огъя луэ, юн герӟаське. Соку уж борды мылысь-кыдысь кутскисько ини... Та ласянь учкыса, тросэз спектакльёсыз вунонтэм кылизы. Кылсярысь, Г. Красильниковлэн но С. Самсоновлэн произведениоссыя, Е. Загребинлэн пьесаосызъя пуктэмъёсыз. Тупаса ужало драматурген Анатолий Григорьевен. Ньыль удалтэм спектакльёс пӧрмытӥзы ини: "Лысву сямен уг тӧлӟы синкыли", "Атас Гири", "Эмезь кисьмаку" но "Парсьпи но эмеспи". Синмаськымон ӟеч ужало Пётр Захаровен. "Эбга" спектакльзэс Удмурт театр нуллӥз Финляндиысь Нурмес каре финн-угор театръёслэҥ994 арын ортчем фестивалязы. Ужзэс туж вылӥ дунъязы. Али соос П. Захаровлэн выль пьесаезъя спектакль дасян бордын ужало. Нимаське - "Выль кен". "Выль кен" пьесалы Василий Серафимович юн синмаськемын. Туж оскымон возьматэмын егитъёслэн ненег, номырин паньсамтэ чылкыт яратонзы. 1997 арын Йошкар-Ола карын финн-угор театръёслэн мукетыз фестивальзы ортчиз. Удмуртиысь артистъёс Е. Загребинлэн пьесаезъя В. Ушаковлэсь "Эш-Тэрек" спектакльзэ возьматӥзы. Василий Серафимовичлэн таиз но ужез умоен пусъемын вал. Удмурт авторъёслэсь сяна, ӟучъёслэсь но пьесаоссэс пуктылӥз: кылсярысь, учкись калыкез паймытӥз М. Варфоломеевлэн пьесаезъя дасям "Сюрес вожын" спектакленыз, "Гуртысь маскарчиос" но учкымон усто пӧрмиз. Мар шуод на: произведение ӟеч ке, спектакль но усто пӧрме. Нош кунгожсьӧр драматурглэн Ж. Мольерлэн пьесаезъя "Эриктэм эмъясь" спектаклез кисьтэм-басьтэм удмурт луиз. - Пьесалэн темаез, пуштросэз учкисьлэн мылкыдызъя ке, мар пӧртэмез: дуннелэн кыӵе сэрегаз, кыӵе кылын со гожтэмын. Вашкала бадӟым писательёслэсь пьесаоссэс валаны, соос дорозь ӝутскыны тыршон гинэ туж пайдаё луэ. Удмурт авторъёслэсь гожтэмзэс артистъёслы асьсэлы тупатъяно луэ. Нош витьтон адями - со витьтон малпан ук. Сыӵе пьеса сярысь мар веранэз на. Нылпиослы дасо пала выжыкылъёс-спектакльёс пуктӥз. В. Зиминлэн пьесаезъя "Жили- были две лисички" выжыкылэз туж удалтӥз, театрын уно аръёс мынэ ини. Василий Серафимович, мон сямен, - романтик, ас понназгес кариськыса улыны туж яратэ. Репетициос дыръя тылэз ӝуатыны уг лэзьы, пеймыт залын пуке. Сыӵе ини режиссёрлэн адӟонэз: огшоры учкисьёслы солэн ужез уг но адскы кадь. Нош спектаклез калык азе поттон понна, ой! кӧня пӧсям вудэ ӵушылоно луэ. -Ужаны кутскон аръёсам суткаяз кызь ньыль час ӵоже уженым гинэ улӥ. Берло валай ни: театр со улон вылымтэ, уж вылэм. Самой дуноез дунне вылын - со тынад улонэд. Театр сяна, вань на семьяед, матысь эшъёсыд, чебер инкуазь - ваньмыз, мар тыныд ужаны но улыны кужым сётэ. Ваньмон дыръяз туж яратэ Л. Толстоез но Ф. Достоевскиез лыдӟыны. - Мон олокӧня пол лыдӟисько ини книгаоссэс, озьы ке но, котькуд лыдӟыкум мар ке выльзэ, азьвыл адӟымтэзэ шедьтӥсько. Уно аръёс ӵоже пушказ лушкем малпанэз - экспериментальной студия кылдытон. - Е. Вахтанговлэн верам кылъёсыз зэм вылӥллям - театр "студийной" луыны кулэ. Артистъёс одӥг лул кадь, одӥг малпанэн, мылкыдъёсын уло но ужало ке, соку творчествозы адямиосты огазея, дисциплина но уг чуты ни. Шонерзэ вераса, али театрмылэн художественной идеяез но, худсоветэз огазеясь малпанэз но ӧвӧл. Дэмен кенешыса валче ужасалмы ке, оло, пьесаосты но курадӟыса ӧм утчасалмы. Вунэтоно ӧвӧл, театр - со калыкмылэн синучконэз. Солэсь данзэ удмурт характеръёс пыр, удмуртлыкмес мур но оскымон возьматэм пыр ӝутыны быгатом. Сцена одно ик чеберлык ласянь вылӥын луыны кулэ, калыкез со бордаз мед кыскоз. Ваньзэ тае лыдэ басьтыса азинскыны быгатысалмы ке, йӧскалык театрмы калыклэн шорсюлмыз луысал,- таӵе малпанъёсын улэ но ужа режиссёр В. С. Ушаков. Вераны кулэ на: Василий Серафимович 1995 арын М. Петровлэн "Италмас" поэмаезъя нырысьсэ удмурт чеберлыко телевизионной фильм кылдытӥз. Мон та гожтосэ бордын ужакум, вӧзысьтым ӵош дышетскем эшъёсыным кенешылӥ. Одӥгез мыным шуэ: - Ӵогиськымтэ курег пуз кадь со - Удалтымтэ чипы-а, мар-а? - ӧй вала мон. - Ӧвӧл. Ӵогиськем курег пуз пилиське но, тон тодӥськод ни: чипыез вань-а, ӧвӧл- а; сьӧд-а, тӧдьы-а, куӵо-а со. Нош таиз ас понназ, пушказ пырыны уг лэзьы. Нош пушказ пӧзись мылкыдыз чебер, йӧно ужъёсын учкись калыкез паймытъя, шумпоттэ, малпаськыны косэ, серекъятэ но бӧрӟытэ. Искусствоосъя дано ужасьлы Василий Серафимович Ушаковлы творчество удысын азьланяз но пумтэм-йылтэм азинсконъёс сӥзём, улоназ - шуд но бур, юн тазалык! Семён Самсонов Кисьпинь кылемын ӧвӧл-а? Пединститутэз быдтон арамы, тулыс, удмурт литературая дышетӥсьмы Ева Ивановна Никитина милемыз люказ но вера: - Программаын воштӥськонъёс луизы. Экзамен азьын мон тӥледлы кӧня ке лекциос лыдӟо на. Асьмелы тодматсконо Гердлэн, Ашальчи Окилэн, Кедра Митрейлэн, Коноваловлэн, Медведевлэн но мукетъёсызлэн творчествоенызы. Ыммес усьтыса кылзӥськиськом ми: кытысь сыӵе писательёс потӥзы на, татчыозь соос сярысь нокин номыре ӧз вералля ук? Ева Ивановна, лапеггес мугоро, чиед кышномурт, котьку сямен лачмытак валэктэ: соос, пе, 1930 аръёсы нокыӵе мугтэк янгыш каремын но пытсамын вал. Милям, егит муртъёслэн, дышетӥсьлэсь валэктэмзэ азьпалтыса кылдо выль но выль юанъёсмы: асьсэды арестовать каремын ке, книгаоссы сярысь вераны уг лу вал шат, малы Пётр Блиновлэн "Улэм потэ" романэз удмурт литератураын нырысетӥез луэ шуыса пӧялляськоно вал, Кедра Митрейлэн "Секыт зӥбетэз" "Улэм потэ" сярысь дас арлы вазьгес потэмын вылэм бере? Кызьы со озьы: удмурт гожъяськон кылмы но литературамы Октябрь революция бере гинэ кылдэмын шуизы, табере тани солэсь кемалы азьло гожъяськем кудмында адямиос, соослэн произведениоссы тодмо луо? Мар со сыӵе дунне - историез кесэген-кесэген ватыса возьыны турттон? Та юанъёс огшорыесь ӧй вал. Ярам, Ева Ивановна, со аръёсы улэм куд-ог писательёсты ачиз тодэм но произведениоссэс лыдӟылэм мурт, кызьы быгатӥз валэктыны тыршиз ни. Шуг вал милемлы ваньзэ сое сюлэм пиямы поныны. Оскыны. Талы мугез вал уго. Воксё серем учыр тани... Институтын огаз курсын ӵукна экзамен кутскем, кыл дуннея - языкознаниея. Огез шӧртчи студент билет басьтэм но, сое учкыса, дышетӥсезлы Иван Степанович Толстыхлы вазем: "Яралоз-а, мон дасяськытэк гинэ верало?" Соиз пельпумъёссэ гинэ ӝутъям: пожалуйста, пе... Кутскем ук студентэд самой бадӟым академикез Маррез шатыр лӧдыны, тышканы Толстых интыысьтыз чот! султэм, вӧлдэтэ быльк учкем, ымдуръёссэ выретэм но - куараез уг поты, пе. Куке но соку ини юам: "Шузимид-а, мар-а?" Студент шуэм: "Мон ӧй шузимы. Озьы вера Сталин". Дышетӥсь шыпак луэм, кӧдэктэм: "Кыӵе Сталин, ма тон уйбыртӥськод?" Студент валэктэм: "Иосиф Виссарионович Сталин. Туннэ ӵукна радио пыр "Правдаысь" солэсь статьязэ лыдӟизы". Мукет студентъёс но итӥськиллям: озьы, пе, озьы, шонер. Дышетӥсь выльысь кылтэм-ымтэм луыса сылэм но зуркак верам: "Вить минутлы вис!" Аудиторие пыремез бере ини со студентлы "вить" пуктэм но мукетъёсызлы экзаменъёс берлогес луозы шуыса ивортэм. Билетъёсаз вань юанъёсыз уго Марр дышетэмъя дасямын вал. Табере ваньзэ соосыз вошъяно. Сталинъя тупатъяно. Кылтодослэн историез берло выльысь воштӥськиз на. Со тулкымен ӵош удмурт литературалэн историез но выль сямен усьтӥськиз. Соку ай, пединститутын государственной экзамен сётыку, 30-тӥ аръёсы быдтэм писательёслэн книгаоссы но библиотекаосын ӧй вал на, соос сярысь гожъямъёс но ӧй вал. Бадӟым тау Ева Ивановна Никитиналы. Со милемлы ӝогак гинэ лыдӟиз устоесь лекциос. Тау карисько ӵужмуртэлы Семён Ясоновлы но. Война бере со Играын милицилэн начальникез вал, берло - Красногорскын. Экзаменлы дасяськыкумы ӵапак ми доры тупаз - Иже вуылӥз. - Кедра Митрей... Коновалов... - вань тодэм писательёсылэсь нимъёссэс верам берам понназ нёртӥз со. - Мынам соосын пумиськылэме но вань. Михаил Коновалов асьме Тыло гурт вӧзысь Акаршурысь, тынад дядяед соин одӥг классын дышетскемын. Юа - вералоз. Нош мон пумиськылӥ, Акаршураз бертакуз. Кедра Митреен - Играысен... Пытсэтысь лэземзы бере... Кыӵе писательёс вал, кыӵе писательёс!.. Семён Ясонович мадьыны кутскиз Михаил Коноваловлэн "Вурысо бам", "Гаян" но мукет произведениосыз сярысь. Трос гожъямъёсаз, пе, асьме палъёс - Акаршур котырысь югдуръёс но адямиос возьматэмын. Тылоос но, шуэ, куд-ог геройёссэ улонысь зэмос нимынызы вералозы - гуртысь юалляськы ай. - Нош Кедра Митреез мон дышетӥсьын ужакум ай туж яратӥ, - табере мукет писатель сярысь пыр-поч маде ни ӵужмуртэ. - "Вуж гуртсэ" дорын шара лыдӟимы, мемие чабкиське но шуэ: ма, асьме Тылотӥ тӧдьыослэсь но гордъёслэсь ветлэмзэс, ожмаськемзэс возьматэмын ук отын. Далко Семон но, пе, вал. Туннэ кадь тодӥсько на "Секыт зӥбет" романэзлэсь кутсконзэ, - веранзэ азьланьтэ Семён ӵужмуртэ. - Аран удыс, Дыдыклэн бурдъяськыса кырӟамез, Дангыреныз ана вылэ амалак ӵошен кылемзы... Соиз вашкала даур. Но милям егит дырмы сыӵе ик вал, сыӵеесь ик аран удысъёс, ныл кырӟанъёс... Пумаз нош озьы луэ: Дангырез каторгае Сибыре келяло. Соку малпаз шат Кедра Митрей, дасо ар ортчыса, ассэ но отчы вуттозы шуыса... 1947-1948 аръёсы вал со... Игра НКВД-ысь тодмо ужасе вераз, политикая пуктэм мурт - Корепанов писатель бертэмын, шуо. Соку ик йырам чилектӥз: Кедра Митрей ӧвӧл-тэ? Дырыз сыӵе: шара уд юалляськы, уд выжыяты. Всё-таки тодӥ - Кедра Митрей! Мынам соин пумиськем, вераськем потэ. Мукет начальство Иже совещание кошкон вискын, уй дежурствое дыръя, Корепановез милицие ӧти. Валамон ини, кышкам со, сьӧраз пичильтык котомкаен вуиз. Ӝужыт, чиед. Лы но ку гинэ - дотово ӟызы! Туж кема курадӟим вераськонмес мытыны. Огшоры пумиськыны ӧтемелы уг оскы но - тӥни. Нырысь мон школаын ужамме, вань книгаоссэ тодэмме мади. Отӥяз со но ӧръяськиз. Мон троссэ уг тодӥськы вылэм. Нош ӟуч кылын гожъяськемзэ кылэме ик ӧй вал. Первойзэ ай мазэ ке эксэй армиын дыръяз ӟуч кылын поттэм. Али пукыкуз но, мукет нимын гожъяса, рукописьсэ кӧттыр понна сётъям но поттылэм. Кинлы ке тодмо-а соос, асьме доры вуозы на-а - ӧйтӧд. Гожъямезлэсь нимъёссэ но вераз, псевдонимзэ но - ӧй гожты ук... Выльысь кытчы ке но келялозы на шуыса ӧй тоды... Одӥг-кык гинэ ӧй вал, дыр, удмурт литератураын сыӵе кисьпинь кылемъёс... Соосыз но утчано на. Одно ик... "Кисьпинь" шуэмез мон валасько вал, мемиелы шорт биньыны, ӟугырияськыны, куиськыны юрттылӥ бере. Чигем, усьыса кылем сӥньыс нюжа выллем гинэ ӧвӧл, дыр, сыӵе ыштонъёсмы асьме литератураын - созэ мон али гинэ малпасько, ӵужмуртэлэсь мадемъёссэ тодам вайыса. Кедра Митрей 1948 арын ик выльысь ссылкае Свердловск пала келямын вал. Табере ӵужмуртэ кулэмын ни. Кин ке утчалоз, шедьтоз на меда со "кисьпиньёсты"? Татьяна Зайцева Котькинлы валамон кадь: чеберлыко произведение лыдӟисьтэк ӧй вордӥськысал. Угось автор, мадёс-верос я кылбур гожтыкуз, лыдӟисьсэ ялан син азяз возе, солэн мылкыдъёсызлы но куронъёсызлы тупамон луыны тырше. Иське, произведение соку гинэ йылаз-пумаз вуэ, куке сое кин ке но лыдӟе. Соин ик литературалэсь азинскон сюрессэ эскерисьлы та югдурез одно ик лыдэ басьтоно луэ. Россиысь тодосчиос чеберлыко гожтослэн лыдӟись доры вуон сюресэныз кемаласенгес ини тунсыкъясько. Та утчанъёссылы соос уно гинэ ужъёссэс сӥзизы. Озьы ке но, берло дыре - тужгес но та 10-15 аръёсы - критикъёс но литературоведъёс шугъяськыны ӧдъязы: та ужпумез котыр ласянь чакланы-валаны тыршон мылкыдъёс, пе, сӥялэс луизы. "Лыдӟись" шуиськись удыскыл гинэ но, пе, наукаын ӟеч-ӟеч юнмаса вуымтэ на. Озьы бере, тодосчиос та югдурез тупатон борды ӝегатскытэк басьтӥськоно кариськизы. Произведениез дунъякузы, сое чеберлык ласянь эскерыкузы, лыдӟисьлэсь мылкыдъёссэ но табере ӵемысь чаклало ини. Литератураез дышетонын пушйыны кутскиз герменевтика удыс яке, мукет сямен вераса, историко-функциональной амал. 1998- 99-тӥ аръёсы "Вопросы литературы" журналын "Кыӵе луыны кулэ литературалэн историез?" нимын ӝутэм кылож (дискуссия) возьматӥз: литератураез эскеронын сюбеггес луись туала амалъёсын ӵош - "нарратология", "фемонология", "семиотика" но мукетъёсыз - азьпала потӥзы "герменевтика" но "экзегетика", "рецептивной эстетика" но "рецептивной поэтика". Дискуссия бере валамон луиз, та выль амалъёс наукае мур пыӵаса вуиллям ини но литератураез эскеронын соос али паськыт кутӥсько шуыса. Лыдӟись но чеберлыко гожтос вискын кусыпъёс ялан огтусъемесь уг уло. Пӧртэм аръёсы, улонлэн пӧртэм вакытаз произведение шоры учкон воштӥське, малы ке шуоно, улонэн ӵош лыдӟисьлэн лул-сюлэм куронъёсыз но воштӥсько. Литератураез эскерисьёс верало: мадёсчи (писатель), лыдӟись но критик вискын кусыпъёс лэчытомо, пе, даурлэн тужгес ӟуго но бугрес азинтӥськон вакытъёсаз. Литература улонлэн пезьгытлыкез, вачепуктонъёслэн (конфликтъёслэн) "гудыриё" луэмзы, журналъёслэн ӟырдытлыксы таӵе югдурен валэктӥське, пе: литератураез азинтӥсь кужымъёс пӧлысь (мадёсчи-веросчи-а, лыдӟись-а яке кылбур-верос дунъясь-а) кудӥз азьпала потоз, валтӥсь луоз. Озьыен, одӥг гожтос ик пӧртэм вакытъёсы пӧртэм сямен лыдӟемын- валамын луыны быгатэ. Литератураез историко-функциональной амалъя эскерон- дышетон, вылӥынгес верамы вал, наукае туала аръёсы юн пыӵаны кутскиз. Та амал лыдӟисьёслэсь но мылкыдъёссэс лыдэ басьтэ бере, чеберлыко гожтослэсь литература улонын интызэ, огъя дунлыксэ но пуштрос узырлыксэ валаны-шедьтыны со ӟеч юрттоз. Жаляса верано, удмурт литературалэн лыдӟисьёсыныз кусыпъёсыз татчыозь эскерымтэ на. Али ке но меӵак вераны ум быгатэ, кинъёс книгаосты лыдӟо, кыӵеоссэгес но кызьы лыдӟо. Мукет сямен вераса, лыдӟисьмылэн произведениез дунъяны быгатонлыкез сярысь тыро-пыдо ум тодӥське на. Нош учконо ке, вань азьмынӥсь кунъёсын наука, дышетон, лыдӟиськон но биобиблиография удысъёсын, ужзэс радъякузы, лыдӟиськонэн герӟаськем ужпумъёслы котьку бадӟым саклык висъяло, быдэ вуымтэослэсь но егитъёслэсь тунсыкъяськемъёссэс тужгес но юн эскерыса возё. Озьыен, удмурт литература азьын сылӥсь ужпумъёс пӧлысь туннэ тужгес но лэчытэз - пиналъёслэсь, быдэ вуымтэослэсь но егитъёслэсь кыӵе произведениосын тунсыкъяськемзэс тодон. Угось кыл устолыкмылэн, озьы ик быдэсак лулчеберетмылэн азьлапал улонэз та мылкыдъёсын туж юн герӟаськемын. Вань лыдӟисьёслы огкадь ярась кылбур-верос гожъясьёслэн дырзы кошкиз, шуыны луоз, нош ӟеч-ӟеч учконо ке, выль ӧръя азинскись литератураез туэ ӧжытэз удмуртъёс лыдӟо - егит муртъёсгес, тужгес но гуманитарной тодон-валан басьтэмъёсыз яке басьтӥсьёсыз. Тазэ но вераны кулэ, пиналъёслэн но егитъёслэн лул куронъёсазы лыдӟиськон уж али туж ик бадӟым инты уг басьты ни. Лыдӟисьёсыз но ай я буш дырзэс маин ке тырмытон понна, я тодон-валанзэс узырмытон понна, я кыӵе ке удысъя дышетсконзэс капчиятон понна киязы книга куто. Гожтослэсь чеберлыксэ, кыл узырлыксэ, геройёсызлэсь лул- дуннезэс дунъян понна, сюлэмзылы шумпотон басьтон понна кылбур-веросъёсты лыдӟемысь дугдӥзы ни кадь. Тодмо ук, удмурт кылын вераськисьёслэн лыдзы трос ӧвӧл, соин ик, аспӧртэмлыко куараё но тусбуё чеберлыко литературамы азьланяз но мед сяськаялоз шуыса, школаосын но вузъёсын удмурт литератураез дышетонлы бадӟымгес саклык висъяны кутсконо. Пинал калыклэсь лыдӟиськон ужлэсь куштӥськемзэ пӧртэм мугъёсын валэктыны луоно. Нырысь ик, удысчиос шуо, асьме улонамы пӧртэм аудио но видео арбериос тросэн пырыны кутскемен, пе, таӵе югдур кылдӥз. Адями, пе, шутэтскон дырзэ табере соосынгес ортчытэ. Оглом вераса, книгалэн азьвыл данэз пумен бырыны кутскиз. Кылемзэ но лыдӟисьмес медам ыштэ шуыса, али та ужпум борды рос-прос басьтӥськоно, лыдӟисьёслэсь куронъёссэс тодыны тыршоно но азьлапал воштӥськонъёслэсь вуэмзэс шӧдыны дышетсконо. Котьма ке но, ваньмыз валало ук: адямилэсь пуш дуннезэ зэмос усто книга узырмытыны юрттэ. Асьме нылпиосмес книга пала берыктон понна, нырысь ик, кылбур-веросъёслэсь ӟечлыксэс ӝутон борды басьтӥськоно. Озьы гожъяны тыршоно: пичи лыдӟись суредам дуннелы мед оскоз, сюлэмзэ отысь мылкыдъёслы мед усьтоз, лул-визьмаз зэмос адями луыны тыршонъёс мед вордӥськозы. Зэмзэ но усто кылбур-верос пыдэстэм ошмес кадь ук. Отысь мар гинэ басьтыны уг луы: тодон-валан но, чеберлыкез шӧдон но, нодлыко улыны визь-кенеш но, ӟеч сямъёслы-йылолъёслы дышетскыны кужым но. Валамон ини, лыдӟисьёсты будэтон уж школа вылэ усе, тужгес но - литератураез дышетӥсьёс вылэ, соослэн со одӥгез валтӥсь удыссы луыны кулэ. Берло аръёсы пыд йылаз йӧн-йӧн султэм гуманитарной дышетон ӧрлэн амалъёсыз та ласянь туж учкымон луо. Татын угось дышетӥсьлы но, дышетскисьлы но книгаез дунъяны одӥг кадь луонлык сётӥське. Дышетскись - косыса лыдӟиськись, нош дышетӥсь - книга сярысь тодон-валан сётӥсь гинэ уг луо ни, соос кыксы но лулчеберет узырлыкез пушказы пыртӥсьёс радэ пыро. Оглом вераса, дышетскись но дышетӥсь писательлэсь гожтэмзэ котькудзы ас сяменызы лыдӟыны-валаны быгато. Но таин валче "лыдӟиськись" дышетӥсьлэн дышетон удысын кулэлыкез трослы будэ. Солэн ма лыдӟемез но кызьы лыдӟемез ужан удысаз быгатонлыксэ возьматӥсь тодмет луыны кутске. Валамон ини, лыдӟиськыны дышетон бордын гинэ ужпум ӧвӧл, таӵе малпанэз но будӥсьёслэн улоназы пыӵатыны кулэ: котькуд адямилы, тодон-валанъёс люкам сяна, кылэм-адӟемъёссэ, асэныз луэм учыръёсты радъяны но дунъяны визьмаськоно. Улонын вордӥськемез но чеберлыко литератураысь басьтэм лул-мылкыдъёс адями пушкын ӵош, ӟугаськыса-сураськыса уло. Та ласянь учкыса, вашкалаосмы но тодон-валанъёс люканэз, соосты радъянэз но мукетъёсызлы сётыны быгатонэз нылпиоссэс дышетон- визьнодан ужазы вылӥе пуктылӥзы. Литератураез эскеронын одӥгез туж кулэ уж - кылбур-верослэсь кыӵе вакытын кылдэмзэ но адямиослэсь та произведениез кызьы валамзэс тодон. Тае Геннадий Красильниковлэн "Арлэн кутсконэз" романэз вылын учкыны туж тунсыко луэ. Мынам чакламея, котькудӥз ик адями, лыдӟем книгаоссэ тодаз вайыкуз, Г. Красильниковлэсь кудзэ ке но гожтоссэ одно вера. Но тужгес ӵем "Арлэн кутсконэз" роман сярысь поттыло, "кельшиз", "усто гожтэмын", "туж кулэ маке" но мукет сыӵе дунъет сётӥсь кылъёс ватсаса. Кемалась кулэ вал, дыр, ини Г. Красильниковлэн лыдӟисез шоры котыр ласянь учкыны: кызьы но малы, аръёс ортчемъя, одӥг книга пумысь ик лыдӟисьлэн мылкыдыз вошъяське но та вошъяськонын котырысь дунне, вакыт кыӵе инты басьто. Озьы писательлэн произведениосызлэсь мукет "дауре" вамыштон сюрессэс ӟечгес адӟыны луонлык кылдысал. "Арлэн кутсконэз" роман нимаз книгаен 1965 арын потӥз. Критикъёс но литературатодосчиос та чеберлыко гожтослы ӝогак гинэ дунъет сётыны вутскиллямтэ, вылды, мон сыӵе статьяоссэс но рецензиоссэс ӧй шедьты. "Удмурт литератураын" (1966) Г. Красильниковлэн творчествоезлы быдэс йырет (глава) висъямын ке но, та роман сярысь отын вераськон уг мыны. Газетъёсы шат мар но со гожъязы, но вурӟетъёс (подшивкаос) пушкын мон ӧй бугыръяськы. Малпан кылдэ: авторлэсь ас гожтэмезлы дунъетсэ адӟыны дышемъёс (лыдӟисьёс но критикъёс) таяз учыре чылкак ӟудӥллям но ыштӥськиллям. Угось "Арлэн кутсконэз" роман удмурт литературалэн со вакытысь кабъёсаз уг тэры вал. 1969 арын гинэ ай Ижевскысь пединститутлэн "Ученые записки" (вып. 20) бичетаз З. Богомоловалэн "Проблема гуманизма и ее идейно-художественное решение в романе Г. Красильникова "Начало года" нимо статьяез потэ. Татын гуманизм но чеберлык ласянь огдышемъя учкон пыр романын мадем ужрадъёс сярысь огшоры, дунъет сётытэк верамын. Трослы тодмогес луиз Г. Красильниковлэн "Начало года" романэзлэн 1974 арын Москваын потэм изданиезлы гожтэм Е. Усыкиналэн "Клятва Гиппократа" нимо азькылэз. Озьыен, литературатодон но литература дунъян удысын ужасьёс та роман борды 70-тӥ аръёсы гинэ ӟеч-ӟеч басьтӥськиллям ай. 70-тӥ но 80-тӥ аръёслэн (нырысетӥ ӝыныязы) тросэз критикъёс но литературоведъёс шуизы: "Арлэн кутсконэз" романын Красильниковлэн улон шоры аслаз учконъёсыз возьматэмын. Геройёссэ, мадем югдуръёсты "сьӧд" но "тӧдьы" карытэк, лыдӟисез ассэ малпаськыны косыса суредамзэ ӟечен ӧз пусъе. Романлэсь кулэлыксэ туж вылӥе пуктыса но геройзэ умоен дунъяса, критика Г. Красильниковез куаретылӥз, рос- прос, пе, валаны уг луы, возьматэм муртэз ӟечез яке уродэз пала кыстӥське, мар солэн пушказ. Тодамы ваём, адямилэсь пуш чеберлыксэ со вакытэ кыӵегес политической пуктонъёс но кужымъёс пала дурбасьтэмезъя дунъяло вал. Кылсярысь, З. Богомолова гожъяз: Красильников возьматэ, пе, кызьы коммунизм моралья улонлэсь палэнтӥськон адямиез одно ик обществолы пумит каре. Сосновлэн но Световидовлэн ваче вуонзы обществолэсь кыӵезэ яркыт адӟытэ. Яке: геройёслэн ваче кусыпъёссы возьмато, пе, социализмо обществоын адямилэн лул-сюлэмыз понна мынӥсь идеологической ожмаськонэз. Пусйыны кулэ, лыдӟемзы бере критикъёслэн мылкыдъёссы но малпанъёссы туж пӧртэмесь ке но вал, Соснов докторез, вераськыса сямен, ваньзы огкадь дунъязы. Соослы Сосновлэн улон шоры учконэз ӧз кельшы. Тае берло "абстрактной гуманизм" шуыса нимазы. Сосновлэн улон шоры тазьы учкемез сьӧраз ортчем карьеристъёслы дурбасьтэм луэ, пе, мукет сямен, пе, сое нокызьы но уд шуы. Сыӵе адямиосын ожмаськыны со мылкыдтэм но быгатӥсьтэм. Соин ик Соснов интые кивалтӥсе пуксьыны малпась егит врач, карьерист но демагог Световидов больницаын ассэ сокем эрказ возе. "Арлэн кутсконэз" романэз дунъясьёс котькудзы сямен ик 70-80-тӥ аръёсы геройёсыз шоры таиз - ӟеч, таиз нош - урод шуыса учкылӥзы. Кылсярысь, Ф. Ермаков гожтэ: Соснов но Световидов чылкак пӧртэмесь, соослэн пуш узырлыксы ог-огзылы уг тупало, ваче пумит луо. Озьы ик Сосновез но ваньмыз сямен критикъёс туж капчиен вӧсь карыны луоно муртэз сямен дунъязы. Трос авторъёслэн литературно- критической статьяосынызы 1977 арын "Счет предъявляет время" нимын потэм бичетсы романысь геройёс шоры тазьы учконэз быдэсак юнматӥз шуыны луоз. Кылсярысь, отын гожтэмын вал: Сосновлэн чалмыт улыны тыршемез, урод кужымъёслы пумит номыр карыны быгатымтэез кышкатэ, пе. Со аслаз ӟеч сюлэменыз, матвеевско- световидовской кырсьлыкен ӵошатыса, лябгес адӟиське. "Счет предъявляет время" книга удмурт критикалэн азинскон сюрес вылаз шӧдскымон вамыш луиз, угось татын ог-огзылы тупасьтэм дунъетъёс, ваче эчешись материалъёс но сётэмын вал. Пусйыны кулэ, ваньмыз авторъёс Сосновлэсь лякыт-зӥбыт улон философизэ аслаз писательлэн улон шоры учконэныз чылкак ӧз суралэ. 70-80-тӥ аръёсысь литература дунъясьёслэн "Арлэн кутсконэз" роман но отысь валтӥсь геройёс шоры учконзы, валамон ини, тросэзлэн лыдӟисьёслэн мылкыдъёсынызы огкадь вал. Мукет сямен луыны но кулэ ӧвӧл, дыр, угось критикъёс - со сыӵе ик лыдӟисьёс, литератураез ӟеч тодэменызы-валаменызы гинэ соос мукетъёсызлэсь кӧнялы ке висъясько. Собере тазэ но пусйыны кулэ: кылбур-верос дунъясь, произведение пумысь кылдэм малпанъёссэ верам сяна, ачиз ик та малпанъёслы ӝужаны, юнманы но юрттэ на. Озьы ик вунэтыны уг яра, совето кивалтэт дыръя литератураез критикагес лэсьтылӥз шуыса. Литературалы ӵапак со кытчы но кызьы мынон сюрес бырйылӥз, солэсь пуштроссэ но туссэ-буйзэ ас сяменызгес радъялляз. "Критика удыс ХХ дауре литератураез азинтӥсьёслы ваньмызлы чурыт куронъёс тупатъяз. Литературалэн котькул ёзэтэзлы - книга кылдытонысен кутскыса лыдӟисьлэн чеберлыко гожтос сярысь ӟечен яке уродэн верамез дорозь - критика сыӵе кужым-амал шедьтӥз, кудъёсыз та удысъёсты дугдылытэк, кызьы косэмын озьы ужатытӥзы. Оглом вераса, та вакытэ литератураын гожтӥсьлэн, лыдӟисьлэн но гожтосэз дунъясьлэн интызы огкадесь ӧй вал - берпуметӥезлы луонлыкъёс тросгес сётэмын вал". Выльёсыз удмурт критикъёс "Арлэн кутсконэз" романлэн кызьы ке валтӥсь геройёсыз шоры, озьы ик отын ӝутэм ваче вуись ужпумъёс шоры мургес но паськытгес учкыны ӧдъязы. Соос романлэсь пушгерӟетсэ сокем ик валтӥсь геройёс борды ӧз думе ни, тае соос шорсюлэм малпанъёслэн ваче вуонъёссы но пӧлэстӥськемзы бордысь утчаны кутскизы. Г. Красильниковлэн книгаысьтыз нырысь ик малпанъёссэ лыдӟыны тыршизы, таин ӵош романэзлэсь кык валтӥсь пӧртэмлыксэ адӟизы: философской палзэ но геройёсыз пыр ӟеч но урод шуиськись валатонъёсты бугыртыны быгатэмзэ. Соослэн эскеремъёссыя, Сосновлэн лул-пуш кужымез, пе, ӵапак ассэ жалятэк, ваньмызлы юрттыны дась луон сямыз бордысь потэ. Та ик, пе, сое Световидовлэсь вылӥе пуктэ. Но Световидов сярысь ке, пе, верано, со ас ужзэ оскымон быдэсъя, но одӥг гож дорозь гинэ. Со... югыт нуналэз адӟылытэк, ялан эмчи уже гинэ выйтӥськыса улыны пумит луэ. Герой ачиз но, пе, малпаське, асьмемыз но малпаськытэ: кулэ ик-а меда улондэ кин ке, мар ке понна сётыны, тужгес ик - кулэез но уг адӟиськы ке. Удмурт литератураын "производственной" тема азьпала потон вакытэ "Арлэн кутсконэз" роман адямилэсь сюлэмзэ но лул-пуш дуннезэ мур возьматэменыз литератураен тунсыкъяськисьёсты туж юн ас бордаз кыскиз. Романэз дунъякузы, эскеронзэс табере уг бугоръяло ни кыӵе социальной ужпумъёс ӝутэмын но мар вераны турттэм автор шуонъёс борды, чеберлыкезлы, аспӧртэмлыкезлы но кылтӥрлыкезлы бадӟымгес саклык висъяло. Озьыен, та произведенилэсь ӟечлыксэ лэчыт нравственной ужпумъёсты яркыт художественной амалъёс пыр сэрттэмез-пертчемез бордысь адӟо ини. ("Арлэн кутсконэз" романлэн "...сюлэмез ик бугыртӥсь кылын гожтэм берпум люкетэз лыдӟисез сазьтӥськытэ, солэсь визьзэ но возьытлыксэ сайкатэ, леклы пумит султыны косэ, ӟечлыкез утьыны ӧте", - гожтэ Л. Фёдорова одӥгаз ужаз). "Арлэн кутсконэз" роман шоры учконъёслэсь туннэ кыӵе луэмзэс огломак чакласькод ке, валаськод: берлоосыз дунъетъёс азьвылъёсызлы ваче пумит уг карисько, котькудӥз ик выль лыктӥсь критик азьвылгес шедьтэм ӧръёсты быгатэмъяз муромытэ но паськытатэ гинэ. Но эчешонъёс но тэкшеронъёс азьланяз кылдозы ик, оло. Кыложез улӟытыны быгатоз А. Зуевалэн но "Арлэн кутсконэз" книга пумысь "Удмуртская литература в контексте языческих и христианских традиций" гожтосысьтыз верамез. Угось татын роман "Библия" пыр учкыса валэктэмын. Кылсярысь, Зуева гожтэ: "Евангелиеын" сётэм визьбур но латин кылбурлэн пӧртэмлыкез романлэн вань сӥльвираз пыӵамын, пе, но валтӥсь геройёслэн лул- пушенызы, суредам сямъёсынызы но тусбуенызы, улон-вылонэнызы, котырысьтызы дуннеен, авторлэн но лыдӟисьлэн огъя дунъетэнызы герӟаськемын. Романысь валтӥсь конфликтэз но тазьыгес ик эскере: Сосновен Световидов вылысь Христосэн Антихристлэсь ваче пумит луэмзэс адӟыны, пе, луэ. Нош кызьыгес учко меда та роман шоры туала лыдӟисьёс? Тае тодон понна Удмурт университетысь филологи ёзэтаз пичи но бадӟым курсъёсын дышетскись студентъёслы, озьы ик романо-германской кылъёсъя ёзэтысь куд-ог дышетскисьёслы кӧня ке юанъёс сётъямын вал. Та егитъёс мыным тунсыко потӥзы, нырысь ик, со ласянь: таослэн лыдӟиськон сямзы Г. Красильниковлэн романэз шоры туала азьветлӥсь мукет нылъёслэсь но пиослэсь учконзэс шараяны юрттэ. Со сяна, та быръем муртъёс - вуоно дышетӥсьёс, иське, паськытгес учкыса, - вуоно национальной интеллигенцимы но. Пусйыны кулэ, анкетаысь юанъёслы валэктонъёссы рос-просэсь пӧрмиллям. Та юанъёслы валэктонъёс яркыт возьмато: кызьы берло дас ар ӵоже гинэ но (угось материалме мон люкай дышетонын но литературатодонын дас ар ужан куспам) Г. Красильниковлэн лыдӟисез воштӥське, кызьы улонамы ортчись выльдӥськонъёс "Арлэн кутсконэз" роман шоры учконъёсты аспӧртэмлыко карыса кошко. Вакчияк тодматском студентъёслэн куд-ог верамъёсынызы. "Кызьы тӥ учкиськоды Соснов... Световидов шоры?" юанъёслы 1991-92 аръёсы гожтэм валэктонъёсазы туж ӵем пумиськылӥзы тазьыгес верамъёссы: "Соснов ас дырызлы гажамон, ӟеч сюлэмо адями, туала вакытэ солы арлыдоосгес синмаськозы. Мон солы уг синмаськиськы ни. Солэн дырыз ортчиз, но ачиз со кошкыны уг дырты, егитъёслы будыны люкетыса улэ. ...Световидов урод адями ӧвӧл. Азьвылгес со мыным малы ке уг яра вал, табере со шоры мукетгес учкисько ини. Мынам ке солэн кадь улыны быгатонэ луысал!"; "Мыным уг кельшы Сосновлэн ляб сямо луэмез. Таӵе муртъёслы дунне вылын шуг йӧтэ. Световидов шоры туж синмаськыса учкисько!" Вань таӵеосыз но веранъёс: "Световидов - со туала адямилэн образэз. Кин туала арын уг утча престижной уж?! Дан?! Уг кышка вылаз мултэс ответственность басьтыны?! Соснов - со "зануда". Яке мукет веранъёс: "Туннэ нуналъёсы роман актуальностьсэ ыштӥз. Зэмзэ ке, ыштӥз озьы, кызьы сое школаын сёто. Серем гинэ потэ, кызьы милемыз дышето вал та романэз валаны"; "Световидов вормисе потӥз. Со егит, ачиз сярысь сюлмаське, адӟонэзлы уг оскы, ас улонзэ ачиз лэсьтэ, сое пыкылыны номыр понна"; "Мыным Сосновлэн укыр ӟеч луэмез акылес потэ. Световидов - асьмелэн азьлапалмы но, туннэез но"; "Сосновез гажасько оскымон, ужась луэмез понна, но асьме вакытлы, улон огинтыяз медаз сылы шуыса, тросгес Световидовъёс кулэ". Трос та выллем веранъёсты сётыны луысал на. Малпасько, таоссэ лыдӟыса но яркыт суред пуксе ини. Соя валаськом, 90-тӥ аръёслэн кутсконазы, калыклэн дунне шоры учконэз чутрак воштӥськыны ӧдъян вакытэ, кыӵе вылэм егитъёслэн лул-пуш куронъёссы. Верамъёссы шум уг поттыто, угось таӵе мылкыдъёсын улӥсь егитъёс ӵуказе кузё луозы. Но мар карод на: мар вань, со вань. 1996 арын верамъёсазы ӟудэм мылкыдзы шӧдӥське: шугъясько, пырак уг тодо вераны, кудӥз герой пала кариськыны. "Соснов мыным жаль потэ. Со мынам анай-атае ук. Но соос туннэ нуналэ бырозы, дыр. Соснов быдэсак ӟеч адями шуыны уг быгатӥськы. Световидов шоры мон ӧжытак умой но учкисько кадь. Кызьы вераны уг тодӥськы, но мон солэсь кышкасько"; "Школаын Световидовез уродэн возьматон понна катаосызлэсь ӟукыртэмзэс но тодамы уськытылӥзы. Нош мон уг тодӥськы, кызьы со шоры учконо. Сосновез мон жалясько гинэ. Тушмондэ простить карыны? Ӧйтӧд"; "Световидов мыным урод но, умой но уг поты"; "Шонерак верано ке, кызьы геройёсыз шоры учконо, мон уг валаськы. Школаын одӥгзэ верало, улонын нош чылкак мукет луыса кошке, тужгес но милям гуртамы". Табере 1999 арлэн кутсконаз сётъям куд-ог верамъёсынызы тодматском. Воштӥськонъёслэн огломак туссы пуксе кадь, мыным потэ. "... Туннэ туж но туж уг тырмо Сосновъёс. Вал ик-а меда сыӵе адямиос улонын шуыса малпасько. Туннэ калык милям гуртын лушкаськыса но огзэс огзы сиыны вырыса гинэ улэ. Нош мыным ваньмыз со адӟемпотостэм. Световидов кадь циникъёс пӧлын улоно луэ". "Мыным матын 50-60- тӥ аръёсы гожтэм литература. Яратоно писателе Р. Валишин. Соснов борды ӝиптӥськысал дедуше борды сямен. Кытын тӥ, Сосновъёс? Малы егитъёс Световидовъёс луыса кошко?" "Соснов шоры мон кык пӧртэм учкисько. Валтӥсь эмчи шоры сямен ке - туж умоен, огшоры мурт шоры сямен ке - туж ик умоен уг. Адями мыным урод кариз ке, малы мон солы юрттыны кулэ? Световидов?! Туала арын та выллем врачъёс туж трос, но коньдонэд ӧвӧл ке, со доры мынытозь, выд но кул. Ӵок ини, туно-пеллё доры мынод". "Мон шугъяськисько та геройёсты валаны: кудзы шонер, кудзы ӧвӧл. Но улысал мон Соснов вӧзын". "Соснов кадь пересь атае мед луысал..." Тӥни сыӵе - верамъёсазы ӟеч адямилэсь мӧзмон шӧдӥське. Кылем 2000-тӥ арын нырысетӥ курсэ пыремъёс пӧлысь 37-езлэсь юалляськыны быгатӥ. Таосыз но верамъёссы берло сётъям веранъёслы тупало. Но, вунэтоно ӧвӧл, нырысетӥ курсын дышетскисьёслэн малпанъёссы чылкак асьсэлэн ӧвӧл на, школаын дышетэмъёссы шӧдӥське. Озьы ке но, та выллем верамъёссы паймытӥзы: "Мыным Соснов, кызьы ке Световидов но, номыр кадь ик уг поты" яке "Сосновлэн шугъяськонъёсыз - со аслаз ужез", "Мон та геройёс шоры нокызьы но уг учкиськы, нош экзаменын критикъёслэн дунъетъёссыя вераны быгато". Серем пыр верамъёссы но пумиськыло: "Соснов - со зэмзэ но синмаськымон пересь". Вань та вылӥ верамъёсты огъяса, таӵе йылпумъян лэсьтыны луоз: удмурт литератураын туннэ туж шугъяськытӥсь югдур кылдэмын. Удмурт писательёслэн книгаоссы лыдӟисьёслэн улоназы азьвыл кадь ик дано инты уг басьто ни. Таӵе югдурез тупатон понна чик ӝегатскытэк произведениослэсь пуштроссэс но кылтӥрлыксэс выльдон борды басьтӥськоно. Адямилэсь лул-пуш дуннезэ усьтыны юрттӥсь выль амалъёсын, выль шедьтонъёсын литературамес узырмытыны тыршоно. 1 По данным переписи 1989 г. на территории Российской Федерации проживало 714 833 удмурта. Из них 69,9 процентов проживало в пределах Удмуртской Республики. Компактными группами удмурты проживают также в Татарстане, Республике Марий Эл, Кировской, Свердловской и Пермской областях, а также в Башкортостане. Удмурты на территории современного Башкортостана появились в конце ХВИ - начале ХВИИ веков. Юрий Шкляев УЛОН СУРЕДЪЁС 1 Кион Максим Милям гуртмы пичи гинэ, школамы ӧвӧл. Дышетскыны кыдёкысь бускель гуртэ, Тыловае, ветлоно луэ. Соин йырин эшелэн, кудӥныз ми тямыс классэз йылпумъятозь школае ӵош вамышъяллям, дышетсконзэ азьланьтыны мылкыдыз ӧз сузьы ни. Озьы табере кузь сюресэз огнам мертаны усе. Ярам ай, арняяз кык пол гинэ - вордӥськонэ но кӧснуналэ. Мукет дыре угось интернатын улӥсько. Дорлэсь мӧзмоно ик но, ма карод, нуналлы быдэ бертылыса вань пыдкуктэ пӧськытод. Туннэ кадь шулдыр толсур куазен сюрес капчиенгес сётӥське, угось куасэн нискылтыны каньыл. Озьы ке но, быдэс кык час пала бертыны выри. Ма, дорам ӝоггес вуысал, дыр, но, тэль дуртӥ шонерак мыныны кӧберай, кионъёс шоры ӝимод шуыса. Со муген, дас иськем интые, дас вить иськемез мертаськиз. Вылаз ик, куасъёсы - нерге гинэ, ас лэсьтэм маке, трактор дӧдьыосын волятэм сюрес вылын вайясько. Жади, пӧсяй. Корка пырисько но - шал-шал буш, кезьыт. Сюлэмы шымырскиз. Шӧдски, мемие, вынъёсме кутыса, бускель Легӟа гуртэ улыны выжем. Берло дыре отысь пӧйшурась Кион Максим дорамы ӵемысь кожалляз. Мемиме кураны. Кышноез висьыса кулэм но, пал кылем уга. Мон азьын меми пумит кариськиз вал, ньыль пиналын кытчы, пе, мон бызём на. Дорын ӧвӧл дыръям кылзы тупам, иське. Кӧты ӝож луиз, синвуосы быльыр васько. Викышъяса-викышъяса пичи гурез эстӥ. Гулбечысь картошка поттыса палай, питырес вандылӥ но ӟырдам корт вылэ лякылӥ; пыжиз ке, таӵе сиёнэн ке но кӧтэз алдало, пӧй. Со куспын корказьын кин ке шарккетӥз, учкисько - мемие пыре. Монэ ӟыгыртӥз но йырме маялля. - Э, пие, пие, вождэ эн вайы, тазьы лэсьтӥ шуыса. Пиосмурттэк тӥледды огнамлы будэтыны секыт, - зар-зар бӧрдыны кутскиз. - Эн бӧрды, меми. Валасько, мон пичи ӧвӧл ни. Нош таӵе вамыш лэсьтэмедлэсь азьло мынэсьтым юано ик вылэм. - Ӧй дӥсьты уга, кылы ӧз пыры. - Нош Легӟаын мар ужалод? - Ма, отчы мынӥ но, ӵуказеяз ик скал сюдӥсе интыязы. Ужез кельшымон кадь... Мемие, лулӟылыса но дырын-дырын викыштылыса, гурысь ӝуэз туӵкоен сураз. - Гуред быре ини, ӵуказе мон нош бертылыса эсто, сотэк гулбечысь картошкамы кынмоз. Я, дӥсяськы, вынъёсыд доры мыном. Каньсыратӥсь гур дорысь кошкем уг поты ни вал но, ма карод, мемие бӧрсьы лымыен куажыртыса вамышъясько. Нош со, Легӟаозь куинь иськемез ортчытозямы, ялан шудтэм гумырез вылэ ӝожкиз, викышъяз. Ми гурт пумысен куинетӥ корка доры кожим. Азбарысен пумитамы кык бадӟымесь пуныос потӥзы. Кышкаса чигнатски, но соос, мемиме тодмаса, утэмысь дугдӥзы, монэ зынъязы но берен каръёсазы пыризы. Коркалэн кузёез, ог куатьтон аресъем воргорон, ӝӧк сьӧрын пуке вал. Покчи вынъёсы гур вӧзын шудо, бадӟымез - Вова доре ужъёссэ лэсьтэ. Кион Максим пумитамы султӥз: - Вуиды-а? Ӧстэс юнгес подэ, шуныт медаз пегӟы. Я, пиёшкан, чырткем-а? Кызьы монэ табере шуод ини: сюрбубы яке Максим агай-а? Уг куаретӥськы, йырме ошыса сылӥсько, син ултӥм гинэ корка пушкез учкалтӥ. Укыр люкыт потӥз. Ӝынызэ пала шуккем гур басьтэ, солэн вылаз дасо тэшкылиослы кӧлыны инты тырмоз. Кышнопалан - пичи гинэ ӝӧк, паськыт ӟус, ӝажыын пӧраськон, сиськон арбериос. Кунопалан - паськыт но сюбег кӧлантӥос, ӝӧк, кык пуконъёс тэрытэмын, борддоръёс кузяна ӟусъёс, выж шорын ик пичи корт гур эстӥське, борддоръёс бездыт шпалерен лякылэмын, валес вадьсысь ӵогын пыӵал ошиськемын. Коркан пӧсь, окыт, пӧйшур ку, тамак, пуны зын. Сюрбубы шуонэ монэ кылиськытӥз но кышнопал ӝӧк вылэ тӧдьы нянь колды, пӧзьтэм сӥль, сылалтэм кубиста, чечы но чай пуктӥз. - Ойдо пуксьы, пиёшкан, кӧттэ кышъя, сюрес вылын уралтӥд, дыр. Ми пичиосын гусъяським ни вал. Ӝӧк вылэ учкыса, мынам дыльдые шыр васькыны ӧдъяз. Уката но чечыез синйылтыса. Угось сое араз одӥг пол-кык пол гинэ веръяллясько. Китӥм валтэмез витьыса ӧй улы - ӝӧк сьӧры усьтыр-табыр пукси. Вынъёсы но вӧзам интыяськизы, кӧтсы тыр ке но ини. Чечым чечы гочатэ ук. Тоӵ-тоӵ сиськи, чечыен чай юи но пӧсяй, синъёсы асьсэос кыниськыны ӧдъязы. Тае адӟыса, мемие сюбегысьтыз валесысь выл шобретсэ басьтӥз но косӥз: - Жадемед, лэся, пие, выд, шутэтскы. Йыры миндэр вылэ вуиз-а, ӧз-а - умме усиськем. Бер ӝыт сайкакум, вынъёсы гур вылын, мемие валесын кӧло ни вал. Максим агай ӝӧк сьӧрын пуке, пӧйшуран тӥрлыкъёсыныз шальтыртэ. - Сайкад-а? - йырзэ ӝутӥз со. - Мае вӧтад выль интыын? - Номыре но. Кулэм кадь изиськиз. - Кызэменым сайкатӥ, луоз. - Ӧд, умме быриз. - Иське, лык ай, мылыд ке потэ, юртты мыным. Ӵуказе ӵукна пӧйшураны кошко. - Ма кароно? - Ыбем капсулез та мырк пежъянэн пезьгытоно, интыяз выльзэ каллен тышкалтыса пыртоно. Собере патронэ куинь ньыльмосаз дары кисьтоно но кужен ворсано, дробь кисьтоно, вылаз куж туйылоно. Мон картечен, пуляен патронъёс дасяло. Тазэ ужез ачим гинэ лэсьтӥсько, нокинлы уг оскиськы. Кема пуким. Кызь пӧлысь кыксэ дасям патронме Максим агай ӧз кельшыты, капсульёссэ нэлькемед, пе. Озьы ке но, быдэстэм ужме ушъяз, воргорон шӧм пыӵам ни, пе. - Мон тонэ, пиёшка, пӧйшураны, чорыганы дышето. Вынъёстэ но. Аслам мынам кык нылъёсы гинэ вал, сьӧрло быземын, соин ик тодэм-валамме тӥледлы сёто. Кылзӥське, эн лякыттэмъяське но, ваньдэсты адями каро. Уть ай, мон колхозын уг ке но ужаськы, тӧдьы нянь ӝӧк вылысьтым уг бырылы. Дӥськутэ но нуллыса быдтонтэм. Тэль уго сюдэ но тазалык но сётэ. Муш вордӥсько на ай. Инмар ке юрттӥз, азьланяз эшшо ванё-буро улом. - Пӧйшураны, чорыганы мынам мылы-кыды вань. - Со ик умой. Сыӵе ужын мылкыдтэк номыр падиез уз лу. - Нош малы тонэ Кион Максим шуо? - Хе, хе! Мае тодэмед потэм. Кемалась ни со вал. Асьме палан кионъёс алязы. Уйёсы ураметӥ бызьыло, азбаръёсысь пуныосты нулло, гидъёсысь пудоосты вандыло. Ми соку Горд Олексеен тупаса улӥм, пӧйшураллям. Огнуналэ гуртлэсь ӝыны иськемысь нюке кулэм вож кунянэз нуыса кельтӥм, котыраз капканъёс пуктылӥм. Ӵуказеяз ӵукна соосты эскерыны мынӥм. Йыртэмъёс, огмы но пыӵал ӧм кутэ. Кыдёкысен ик адӟиськом - пурысь сьӧсь шедем. Матазгес вуим но, кион пумитамы лыктыны кутскиз. Капканэз гыж кыскыса. Пуклёке шуккем куриксэ мозмытэм, шӧдске. Гонэз пештырскемын, синъёсыз ӝуало, ыргетэ. Мон усьтыр-табыр кызэ туби. Нош Горд Олексей гурт пала лашкинтӥз ук! Бӧрсяз лымы тузон гинэ пурӟе на. Я, малпасько, эше ӝоген пыӵалэн берытскоз. Ачим писпуын ӟечгес интыяськыны турттӥсько. Нош кион кыз котыртӥ ветлэ, вылӥе учкылэ но я пыдысьтыз капканэз, я писпуысь сулзэ йыръе. Дыр ортче, Олексей уг вуы. Ӟонгыраны ӧдъяй. Син шорам зӧк кӧс улвай сюриз. Вай, пӧй, мон тае чигто но соин кионэз кышкато. Сузьтӥськи, кыски, кӧс пу тарс! чигиз но, мон улваен ӵош зуп! уси. Кион вылам урдскиз. Куртчыны медэ вал но, ымзэ киысьтым ваен ваментӥ, ачим вылаз пукси. Серметэн музэн кортнай, ява. Кион йырыныз шона, ыргетэ, нош мон юн возисько, ымзэ кесисько. Выриз, выриз но басылаз. Соку мон тае каллен-каллен гурт пала берыктӥ, пумен урдэсъёсаз пыдесъёсыным тышкасько. Кытчы пыроз на, мынӥз ведь. Капка азям вуим но, кион жадьыса супыляк усиз, синъёссэ кыниз, ымысьтыз шукы потэ. Донгасько, донгасько - уг султы. Ӝогак гозы поттӥ но сьӧсез думылӥ. Олокытӥ-мартӥ калык люкаськиз. Огез чабкиське, мукетыз горе: Максим, пе, кион вылын ворттылэ ни. Кин ке пыӵал но вуттӥз, сьӧсез ваньмытӥзы. Учкисько, Горд Олексей адямиос пӧлын уг адскы. Эк, пӧй, возьмато ай мон тыныд! Дораз мынӥ. Корказ пырисько но, таиз сульыр-р гинэ чай юыса пуке. Ах тон, покач! Ӝӧккышетсэ самовареныз но тусьты-пуньыеныз валче выж вылэ кыски. Олексеез, гадь бордаз кырмиськыса, культоез музэн сэзъясько. - Тон, албасты, быремме витиськод-а вал?! Пыддэ но дорам эн лёга ни! Инмар понна, тышкасал, дыр, ярам, пиез вискамы донгиськиз. Сялӟиськи но ӧсэз йыг! ворсаса кошки. Тӥни со дырысен мыным Кион Максим кушем ним лякизы. Ӵок ойдо, мон уг ӝожтӥськиськы, вожме уг поттӥськы, угось улытозям витьтон куать кионэз кутӥ, вии ни. Котькудӥз понна суменак коньдон сётъязы. Кузэс но ӟеч дунын вузалляй. Куатьтонэтӥзэ сьӧсез ыби ке, соос сьӧры уйылӥськемысь дугдо. Кынар уггес тырмы ни уга, кионъёс но та дыре асьме палан шерос гинэ пумиськыло на. Я, укыр трос супыльтӥ кадь, кӧлыны дыр вуэмын. Вордӥськонэ вазь ӵукна мон Тыловае нискылтӥ. Школаын пиналъёс котькулэсь но люр- ляр каро, ӝоген Выль ар, кыз котырын шулдыръяськозы, ческыт кузьымъёс веръялозы. Нош мон чидатэк вити кӧснуналэз. Бертӥ ке, Максим агай сьӧраз пӧйшураны басьто шуиз, оло, пыӵалэн но ыбыны сётоз. Ӧз пӧя. Куазь шулдыр тупаз. Яркыт шунды синъёсты мальдытэ. Писпуос гӧрен азвесямын. Ми куинь кузя куасъёсын выль лымы вылтӥ капчиен гылӟиськомы. Мынам тыбырам кион капкан ошемын, Максим агай пумъёссэ ваё вандэм пулэ бинем горд басма юдэсъёслэсь сузьет нуэ, нош бӧрсяз мынӥсь егит воргоронлэн - Венькалэн - пельпумаз кык кион капканъёс лачамын. Милемлы, Ита шур вамен выжыса, Сурд волоке вуоно. Отысен сьӧд нюлэс кутске - кионъёслэн каръяськон интызы. Мынам мылкыд лӧптэмын. Воргоронъёс укыр каллен вамышъяло кадь потэ. Соосты азьпалтыса, я нюк баметӥ, я вырйылысь уллань ширтӥсько, Максим агай алӥз: - Жадёд ук, пиёшкан, сюресмы кузь на. - У-уг. Лымы уг выйы, куасъёс усто гылӟо. - Хе, хе, адӟом али, шуиз синтэм Коли... Нуназе пал кионлэн алигес ортчем пытьыез вылэ учырам. Дугдӥмы. Воргоронъёс тамак кыскон сяменызы кенешизы, кинлы кытӥ мыноно, кионэз котыртон понна. Монэ пичи шур кузя ыстӥзы, Венька тэлетӥ котырскоз, отын-отын пумиськом, пе. Максим агай мыным пыӵалзэ сётӥз: кионлэсь медам кышка шуиз, дыр. Лӧптыса ик вамышъясько. Пумиським но, кион пытьы котыртэмысьтымы потэмын. Кыкетӥзэ но озьы ик луиз. Куиньметӥзэ котырскеммы бере гинэ кион пытьыез пытсам. Воргоронъёс горд басма юдэсъёсын векчи гозыез пытьы кузязы кыскыса кошкизы, монэ куинь зӧк зыръёс утчаны косӥзы. Мырдэм-мырдэм шедьтӥ. Ӝомытскыку ини котыртэтмы пӧрмиз. Отысь сюбег гинэ потон инты кельтӥм, со вадьсы капканъёс пуктылӥм но зӧк зыръёс борды езэн думылӥм, ваньзэ лымыен согим. Пытьыосмес лысо вайёсын ӵужыса ватӥм на. Собере ини дор пала вырӟим. Мон жадеменым мырдэм вамышъясько, нош воргоронъёс азьло сямен ик капчиен гылӟо. Гуртэ чылкак какалмыса вуи. Ӝыт шыд но ӧй сиы, чай юыса валесэ ланьырски. Ӵукна сайкасько но, шунды вылын ни. Пӧйшурасьёс вазь ик тэле кошкиллям. Бӧрдонэ ымдурам вуиз: малы ӧз сайкатэ, малы монэ кельтӥзы? Усьтыр-табыр дӥсяськыса, пытьызы кузя бызисько. Доразы вуисько но, Максим агаен Венька горд ӟустариосын гозыез биньыса сыло. Вӧзазы ыбем кион кылле. - О, бадӟымез пӧйшурасьмы вуэ. Ӵапак дыраз. - Нырысь пӧйшурен тонэ, пиёшкан. Айда, кузэ ниыны юртты. Уд быгатӥськы? Дышетом. Дорамы бертыку, мыным кион куэз нуыны сётӥзы. Мон сое пельпумам оши но урам кузя йырме чатыртыса мынӥсько. Капкаос сьӧрын пуныос нис-куань уто, пумитамы сюрисьёс паймо: учкы ай, ма быдӟа сьӧсез мекалтӥллям. Лавкае пыраса, воргоронъёс асьсэлы ӟенелик, нош мыным быдэс пуйы кампет басьтӥзы. Нырысь пӧйшуред понна, пе. Бӧрысьгес Максим агай монэ пуныен коньыяны, лудкечаны дышетӥз. Ваньмон дыръям быдэс толэз тэльёстӥ котыръяськи. Школаысь бертӥсько но, Найда пунымы капка азьын пумита ни, утэ, пӧйшураны чортэ вал. Ыбем коньыосылэсь, луд кечъёсылэсь пайдаез дуно сёрлэсь мында ӧз люкаськылы ини но, мыным сюрбубилэн ушъям кылыз дуногес потылӥз. Ай со монэ пӧйшураны, инкуазез валаны, кылыны-адӟыны трос гинэ дышетысал на но, жаль, улонысь вазь кошкиз. Мон соку Глазкарысь пединститутын дышетскисько ни вал. Сюрбубае выль лымы вылтӥ пӧйшураны мынэм. Быдэс нунал сёр сьӧры уйылӥськем но тылскем дорын кӧлоно луэм. Доре ӟырдаса бертэм. Гур вылэ выдыса, мемиме куре, пе: - Оксин, тулупен шобырты ай, укыр кынмисько, пӧсятэм но ӧз шунты. - Ма, висьыны усид, дыр. Оло, першалэз ӧтём? - Ӵок, ортчоз ай, та дырозь эмчиослы вазиськылэме ӧвӧл. Ӝытозь погылляськем но уйбыртыны, кер-кор шоканы ӧдъям. Меми бызьыса - першал доры. Нош соиз куинь иськемысь гуртын улэ. Лыктытозяз Максим агайлэн лулыз потэм. Озьы быдэс улослы тодмо пӧйшурась Кион Максим, куатьтонэтӥзэ кионзэ ыбыса вуттытэк ик, улонысь кошкиз. Солэн бурд улаз мыным но, вынъёсылы но макем шуныт, оскымон вал... 2 Печораен тодматскон Кызьы но луылэ, ява: пичи дырысеным уйпал шаеръёсты адӟеме потылӥз, нош улон сюресэ монэ ачиз отчы вуттӥз. Мединститутэз йылпумъям бераз кышноме Коми улосэ ужаны ыстӥзы. Улон инты, ӟеч уждун силизы но, ми тодмотэм интые мыныны пумит ӧм кариське. Сыктывкаре вуимы но, милемыз Ухтае ыстӥзы. Отысен Вуктыл посёлоке. Котырмес вертолётэн келям, асьмеос пичи пиенымы АН-2 самолётэн лобим. Вуимы - нокин пумитась ӧвӧл. Кышное эмъяськонние жингыртӥз. Ӝоген отысь машина (ӝог эмъюрттэт сётӥсьёслэн) вуиз. Мырко-гопо сюрестӥ зуркаса-зуркаса мынӥськом. Оштолэзьлэн кутсконэз ини, нош татын лымы ӧжытак гинэ лапкам ай, юг-юг кылле на. Сюрес вылын но пукись вуос одӥг-ог сяна ӧвӧл на. Вуктылысен кузь пу юрт вӧзы дугдӥм. Татын милемлы улыны пичигес висъет сётӥзы. Ӧсторе кык пукон, ньыль муртлы ӝӧк тэрытӥм, кунопала - мыным кышноеным но пиелы кӧлантӥос, выжвыл кана интыям. Сьӧрамы ваем котырмес - со трос ӧй вал - кызьы но озьы лачам. Кышноме татысь эмъяськонние ужаны ыстӥзы ке, ачим школае интыяськи. Адямиос Вуктылэ олокытысь но лыктэмын. Дышетӥсьёс - тямыс пӧртэм выжы калык муртъёс, дышетскисьёс - дас тямыс. Удмуртъёс пӧлазы - одӥг-кык гинэ, тросэз украинецъёс, бигеръёс, чувашъёс... Комиос ичи. Тросэз татчы "кузь" коньдон поттыны вуэмын. Соин, лэся, пиналъёссэс чик уг чаклало, котькызьы мед дышетскозы. Нырысь-валысь талы абдрано вал, бӧрысь дышиськиз. Вуктылэ вуэммы берегес кӧлыны курадӟиськиз на. Уйёсы уго татын югыт, ӵукна пал гинэ ӧжытак ӝомытскылэ. Ум лыктымтэысь книга лыдӟыса кылльылӥ. Но каллен-каллен югыт уйёсы кӧлыны быгатӥ. Шонерзэ вераса, Вуктылэ вуыса ми кышноеным ӝожомим, мылкыд куашказ, угось патер интые баракысь кыӵе ке сэрег сётӥзы, ужанниосмы но баракъёсын. Милемыз буйгатӥзы: ӝужытэсь туала улон юртъёс ӝоген липет улэ вуттэмын луозы но, отын корка туй кароды; дӥськут, сиён-юон утчаса уд ёрме - Вуктылын котьма вань, вылаз ик, дунтэм дунын. Зэмзэ но, вузъёс ласянь выль интыын югдур умой вал. Мыным кельшиз на, посёлок вӧзтӥ ик Печора шур бызе шуыса. Коми шаерын со тужгес бадӟымез. Интыяськеммы берегес ик мон йӧ вылын чорыгасьёс доры васькай. Пайми. Соос чабакез, ёршез силё шуыса куяло. Сигез, кыныез, юшез кутыло. Вормон нуналэ куазь туж шулдыр кемдӥз. Ӵапак соку Печора вылысь йӧ вырӟиз. Чебер но шурдыт суред. Юрт азбар быдӟаесь йӧ кесэгъёс, ваче шуккиськыса, ог-огзы вылэ тубо, урдӥськыло, йыг! мырӟиськыса пилиськыло - ӵаш! вазе. Куд-кудаз тылскем бервылъёс, адями но пӧйшур интыос адско, нош огез вылын луд кеч мыд-мыдлань тэтча. Мискинь, кызьы меда шуг учырысь потыны быгатоз на? Йӧ кесэг ярдурлы матэ вуиз ке, мувыре тэтчыны быгатод ке шат. Шур вылысь юзырес тӧл ке но пельтэ, ярдурын лачак калык люкаськемын. Лабырто, йӧос шоры чиньыосынызы возьматъяло. Вӧзам школа завхозмылэн картэз дугдӥз. Лёня чорыганы туж мыло-кыдо шуыса, мон тодӥ ни. Пӧйшураны но ӵем ветлэ. - Таӵе йӧ кошконэз нырысьсэ адӟиськод, луоз? - юаз со. - Бен. Ми палан шуръёс пичиесь, нош Кам доры ветлыны тулысъёсы ӧй учыралля. - Арня ортчыса, Печора быдэсак мозмытскоз, чорыганы пыжен мыныны луоз ни, - Лёня ас понназ малпаське. - Кылзы ай, нош монэ эшлы ке но сьӧрад уд басьты-а? Адӟем потэ вылэм, кызьы тӥ татын чорыгаськоды. - Мылкыдыд вань ке, ветлом, ӵошен каньылгес но, шулдыргес но. Вуоно кӧснуналэ ньыль часын ӵукна Лёня дорамы йыгаськиз ини. - Кема кӧлӥськод, чорыгась, - серекъяз со. - Ойдо, дӥсяськы но вамыштом. Ваньмыз, мар кулэ - мынам пыжам ини. Усьтыр-табыр вырисько, соиз, таиз уг сюры. Кин тодӥз вал, Лёня таӵе вазь вуоз шуыса. Нош со монэ чакла но индылэ: - Шунытсэгес дӥся, уин кынмод. Тани кеч кулэсь пыдвыл ваи, соосын пыдъёсыд резина сапегъёсад гурын кадь ветлозы. Лабыртыса шур дуре ваським. Пыже интыяським но, Лёня солэсь моторзэ лэзиз. Печораетӥ кема ик ӧм уялэ, отчы усись кыӵе ке шуре кожим. Лёня валэктӥз: Курья, пе, со нимаське, нюръёсысь бызе, гужем сюбег гинэ кыле, вуэз пыкмем шӧмо луэ, нош али, уть, кыӵе вӧлскемын. Печора кузя йӧос васькыло на, татын ке - ву чылкыт ни. Йыр вадьсытӥмы, бурдъёсынызы куашетыса, лымшорысь берытскем луд ӵӧжъёс ортчыло. Коми нюр вылъёсын, шуръёсын но тыосын гужем соослэн улэмзы майбыр луоз. Ми каллен гинэ выллань тубиськом. Шӧдтэк шорысь куакъёс пӧлысь ыбем куара чузъяськиз. Йыр вылтӥмы ик узвесь пырыос чиетӥзы. Кышкаменымы куаляк усим. Лёня ораськиз но пыжез ярдур пала валтӥз. Куакъёс сьӧрысь кык пӧйшурасьёс потӥзы. Эше музъем вылэ тэтчиз но соос доры даллашыса вамыштӥз, огезлэн гадяз кырмиськиз: - Тӥ мар-о, шузимиды шат, адямиос шоры ыбылӥськоды?! - Ӧм адӟе тӥледыз, бус пыртӥ шуак потӥды но... - Падиды ӧвӧл ке, гуртады пуке, йырбыдтӥсьёс! - Я, вождэс эн вае, ми юри ӧм ук... - Ага, йырмес пасясалды ке, вожмес поттысалмы на. Чакласьконо ук ӧжытак, - Лёня кӧня ке сӥялскиз. - Татӥ сеть пуктылэмын-а? - Ми ик пуктылӥм. Толон уж бере лыктӥм вал. - Лешак басьтон! Бере кылиськиз. Айда, Егорыч, улӥе ик васьком, Печорае. А тӥ, каналляос, шып улэ татын, вань чорыгез кышкатоды. Инты ми умой шедьтӥм. Тӧллэсь саюлэ. Котырмес пыжысь потттылӥм но сетьёс пуктылӥм. Огзэ - бадӟым чорыгъёслы, кыксэ - пичиосызлыгес. Собере нодъя - тылскем кенжытӥм но сиськыны пуксим. Лёня ӟенелик кабак вина поттӥз, корт кружкаосы лэзьяз но шуккиськыса шуиз: - Я, нырысь тулыс чорыганэн тонэ. - Тау. Астэ но. Киыд капчи медло. - Соиз озьы. Шудмы вань ке, чорыг сете пыроз, нош ӧвӧл ке, дорамы тырттэм ӟенелик гинэ ваём. - Ӵок, ӧз ке но удалты. Инкуазез но тазьы учкыса пукыны туж ӟеч ай. Тулыс ваньмыз улӟе, весь-весь шока, лымы улысь вож турын потэмын ни, писпуос бычырало. Усто! Улэмъя улэм потэ. - Ай кема тазьы шыпытын ум пуке. Чорыгасьёс, пӧйшурасьёс Печора кузя ворттылыны кутскозы. Сетьёсмес медам дэмӟытэ вал, чакласьконо луоз. Зэмзэ но, вӧзтӥмы ӝоген огез бӧрсьы мукетыз моторо пыжъёс ортчылыны ӧдъязы. Милемды адӟыса, киосынызы шонало, мар ке но кесясько. Лёняез тодмало, дыр. Нуназе котырын шур выльысь чусомиз. Одӥг-ог йӧослэн ярдуре шуккылӥськемзы но ӵӧжъёслэн омырез вандэмзы гинэ дырын-дырын кылӥськылэ. Эше шӧмаськиз, кыкетӥ ӟенеликсэ поттӥз на. Мон ӧй юы ни. Лёня кужмысь ӧз кары, бадӟым чорыгъёслы пуктэм сетез эскерыны ыстӥз: - Пыжъёслэсь кышкатскыса, оло, пыризы ни. Шедем ке, улысь гозызэ курико бодыен кыскыса, чорыгдэ пыже потты но сетьсэ берен вуэ лэзь. Я, мын, мон оген кымалто на. Каллен гинэ полысаса сеть доры уяй но, вылӥ гозы борды кутскыса, кузяз кыстӥськисько. Шуак шӧдӥ - сюрем! Зугыр каре, сетез нуллэ. Курико бодыез ӝогак кутӥ но ӝутӥ. Шопыль! выре, парсьпи быдӟа. Нырзэ гинэ дэмӟытыса вуттэм вылэм, ӧй ке ӝутысал, мозмытскысал. Шумпотэменым сеть кузя ӧй мыны ни, усьтыр-табыр Лёня доры берен полысасько. - Сюре-ем! Туж бадӟым сёмга! - Зэм-а? - Лёня жӧл-пал ярдуре лыктӥз, вуэ ик пыриз, пыжез му вылэ кыскыны юрттӥз, отысь чорыгез шакасъёстӥз кык киыныз ик ӝутыса учке. - Ма, та нельма ук! Дас кило пала луоз. Таин чорыг шыд ке чорыг шыд пӧзьтом. - Жаль ук. Доре нуоно вылэм. - Асьмеос йырзэ, бурдъёссэ гинэ лымлы каром. Нодъямес золгес аратӥм но, кӧня ке улыса, дыльдыез шыр виятӥсь чорыг лым зын котырак вӧлскиз. О, сыӵе шыдэз ӟузьылыны та улонын шер гинэ кылдылэ. Кӧт пыдсы ик вуэ, ява. Лёня нош ик ӟенеликысьтыз ӟизатӥз, ӟамыртӥм. Таӵе дыръя кыллэн серметэз ӧвӧл ни. Улонысь олокыӵе но паймымон учыръёс мадьыны куро. Мынам сыӵеосыз трос ик ӧй вал бере. Лёнялы сермет ӟезез кутоно луэ. - Зэм, чорыган, пӧйшуран сямен оломае но адӟиськиз, нош таӵезэ кулытозям уг вунэты. Кылзы. Бер сӥзьыл вал со. Куаръёс куашкамын ни. Потӥ пуныеным тэле, оло, пӧй, дукъяез яке турез сӥль каро. Пыд улын ӵаштыр вазе бере, тылобурдоос матазы уг лэзё. Мылкыд куашказ. Ӵап кылӥсько, пуные утэ. Эскериськыса кал-ле-ен гинэ куара шораз мынӥсько. Матаз ик вуи ни вал, шӧдтэк шорысь гондыр бурсӥз, собере мукетыз, куиньметӥез. Инмаре! Пуные шудон интыязы монэ ӧтем ук. Котыртӥзы бызьылэ, куаньгетэ. Огез гондыр мон пала учкиз но бурсӥз. Кызьы мон отысь пегӟи! - дуннелэн чемпионэз но озьы ӧз бызьылы, дыр. Шур дуре вуи но, пыже тэтчыса, эх, полысасько ук. Пуные тодам лыктыса гинэ полысъёсме вылэ ӝутӥ. Жаль ук, сыӵе визьмозэ пуныез шер шедьтод. Кышкаса берен ярдурлы матэтски. Вуиз ведь пуные. Зур куалекъя. Курдалод уго, сӥзьыл куазен гондыръёс шудо, укыр лекесь луо, кесялозы, нимдэ но уз юалэ. Тэле пырыны ӧй дӥсьты ни, пӧйшуртэк, гонтэк-туртэк шуод-а, доре бертӥ. Гуртысен но сюлэм куалекъяса улӥз ай. Кызьы коми пӧйшурасьёс уг кышкало меда, огназы гондырез гуысьтыз поттыны дӥсьто ук. Лёня чалмиз, куакъёс пала уӵертӥз. Мон сетьёсмы пала учки но адӟисько: вуысь кыӵе ке пӧйшур потӥз. Ог куамын вамыш кемын. - Лёня, учкы ай, кин-о со? - Шып кариськы. Ондатра. Ыб. Пуляен, - сипыртӥз эше. Мертаськисько, киос куалекъяло, шоканме дугдытыса ыби. Йӧтӥз! Бызьыса - пӧйшур доры. Тылскем доры ваи. - Кузэ ниылэмед вань-а? - Лёня юаз. - Милям таосты, вукомак шуыса, уг кутыло вал. - А кыӵе чебер изьы пӧрме солэн куэзлэсь. - Соиз озьы. Шузиесь вылӥськеммы уга. Луд кечлэсь, ӟичылэсь, сёрлэсь кузэс ниылэме вал бере, ондатралэсь но быгато, пӧй. Пурт кутыса, уж борды кутски. Эк бен, зын ик вылэм та пӧйшур, нырез ик чатыртэ. Кема гинэ ниыны выри. Лёня кӧс турын люк вылэ ланьырскыса соргетэ ни вал. Мон но вӧзаз интыяськи. Нокызьы умме усеме уг лу. Ярдуре йӧ шуккиське, тулкым золгес жальыртэ но, шарак потӥсько, куакъёсын тӧл вайёсты ваче шуккыку, йырме ик ӝутыса учкисько, Лёнялэн гондыръёслэсь пегӟемез сярысь мадемез йырысьтым уг кошкы угось. Ма, уез но уй кадь ӧвӧл, нуназе кадь югыт улэ. Кынмеменым туж вазь ӵукна сайкай. Тылскеммы кысэм. Кезьыт бус мугорез юзыр- кезьыр каре. Нодъямес выльысь кенжытӥ, чай быректӥ. Со вие Лёня но сайказ. Чаен шунским но, эше пыже пуксиз: сетьёсты огнам, пе, ӝутъяло, огдышем сямен, нош тон со вискын ӵӧжаны ветлы. Пыӵал кутыса, ярдуретӥ вылӥе туби. Бус вӧлскемен, шур вылысь номыре адӟыны уг лу. Эх? пӧй, кинэ таӵе куазен ыбыны быгатод. Шуак кылӥсько% азьпалам ӵӧж кесяське. Шоканме пытсаса, пыдчиньы йылам вамышъясько. Адӟисько, луо ныр вӧзын ньыль ӵӧжъёс уяло. Чебер куасӥ шоры мертаськыса ыби. Со интыяз ик бекмыльскиз. Мукетъёсыз бурдоос тур-р лобӟизы. Бызьыса ву дуре мынӥ но, шашы вӧзын ик мумы ӵӧж урдэс вылаз уя на. Таизлы адӟытэк но йӧттӥськем. Зо-ол, одӥг ыбемен кык ӵӧжез кутӥськиз. Шумпотыса тылскем доры берытски. Лёня сетьёсты октэм ни. Чорыг лачак шедем. Уката ик сигъёс. Укыр бадӟымъёсыз, куинь килогравмъем нельма сяна, сюриллямтэ ке но, мынам таоссэ адӟыса но эктэм потыны ӧдъяз. Огзэ, мукетсэ чорыгъёсты кутыса учкисько, ки вылам мертасько. Лёня сетьёссэ биня. - Ум ни чорыгалэ шат? Дыр вазь ӵукна ук ай. - Тырмоз, аксымъяськисьёсты шур уг яраты. Собере моторо пыжъёс ӝоген выльысь мыдлань-азьлань ветлыны кутскозы, чорыг шуре пегӟоз. Вуктылэ вуыса, мон доры пырим. Кышное кӧлэ на вылэм. Сыӵе вазь бертэммылы паймиз, нош мырдэм ӝутыса пыртэм чорыгмес адӟыса абдраз. Шумпотэменыз милемыз кытчы пуктыны, маин куноятыны уг тоды ни. Ӟенелик кабак вина но поттӥз. - Я, Инмар тазалык мед сётоз тӥледлы, карттылэн киыз капчи вылэм, удалтӥз милемлы, - Лёня чарказэ ӝутӥз. - Мукетъят но чорыганы уртче ветлыны мед кылдоз. Чорыгмес ми люким. Бадӟым нельмаез Лёня мыным сётӥз. Ну бен выль чорыг ческыт кошкиз, лымын но, пырсатыса но, пыжыса но. Нош ӵӧж сӥль кӧш вылэм, чорыг шӧм. Ярам, нырысь ик мумызэ пӧзьтӥм вал. Айызэ мон школае сульдэр лэсьтыны нуи. Усто пӧрмиз. Чебер куаси вал уго. 1 Куаси - айы ӵӧж. 1 Никвлад Самсонов Шуняньёс кык ёзэн комедия Шудӥсьёсыз: Сима, Серафима Николаевна Пельтэмова-Кечевская - Шуняньгуртысь вузкарись. Лилька-Килька Шеркушманова - Шуняньгуртысь медпунктын ужась. Фельдшер. Шальтрамов - Иван агай - арлыдо воргорон, бухгалтер. Шальтрамова - Катьырна апай - солэн кузпалыз Сатрапян (Алёха). Шайтан Труба (Лёха) - Шуняньгуртысь электрикъёс. ПРОЛОГ яке кутсконлэн кутсконэз. Потэ Катьырна апай. Авансценаын валантэм югдур: оло ӝытазе, оло ӵукна, оло уйшор, оло туннэ нунал, оло уйвӧт. Пеймыт но кадь, со дыре ик ваньмыз лызпыръем адӟиське. Котькытын выжыкыл, аспӧртэм мылкыд. Кышномурт пыдес вылаз лэзькыса кыла-бура, вӧсяське. ШАЛЬТРАМОВА. Остэ, Кылчинэ-Инмаре, вордэм анае-атае, соосыз будэтэм пересьёсы, та дуннеысь мукет дуннее кошкемъёс, монэ сӥлы карисьёс но карисьтэмъёс, монэ малпасьёс но малпасьтэмъёс, монэ ушъясьёс но курласьёс, мынам матысьёсыз но палэнысьёсыз, мыным кельшисьёсыз но кельшисьтэмъёсыз, мыным мусоосыз но синазькыльёсыз... (Вис каре, аслэсьтыз ачиз юа.) Эшшо кинэ на? Медам вунэты вал... Нокинэ но... (Нош ик вӧсяське.) Узыръёсыз но куанеръёсыз тодмоосы, ӵыжы- выжыосы, эшъёсы, йыртэмасьёсыз но йыртэмасьтэмъёсыз, шаплыосыз но ӟымыриосыз, дӥсьтӥсьёсыз но дӥсьтӥсьтэмъёсыз, возьдаськисьёсыз но зӥбытъёсыз, лушкаськисьёсыз но лушкаськисьтэмъёсыз... (Шуак луэ, вӧсяськонзэ куспетӥ каре.) Осто, Инмаре, вождэ эн потты та шузи кышномуртлы: оломар но шедьтӥсько вераны. Шузи бере шузи ик вань... (Эшшо вӧсяське.) Тыныд вазиськылэме ноку ӧй вал, Инмаре-Кылчинэ, юртты вал! Туж курисько: юртты! Чыртыёзям вуиз ни, нылпиосы азьын возьыт: Иванэ, кузпалы шуисько, пересьмон уй-нуналаз мурт кышноос понна быремын! Егит дыръям чидасько вал, тупатскоз ай шуыса оскылӥ - табере чиданэ чигиз! Кышкаты вал сое, ӧжыт ке но зуркаты, Инмаре, котырзэ! Ас картэд вылэ юриськыны сьӧлык ке но, Кылчинэ, уг быгатӥськы ни: нылпиосылэн нимынызы, соослэн нылпиоссылэн нимынызы курисько: дышетоно, одно дышетоно пересь албастыез! (Нош ик куспетӥ луэ.) Осто, вождэ эн вай, ӵукна ик таӵе кылын тышкаськеме понна: пумаз вуи ни! Юртты! Кошке, ыше. НЫРЫСЕТӤ ЁЗ Тыл ӝуатске. Капчи крезьгур чузъяськем улсын катанчи ӝутске. Шуняньгуртысь медпункт. Борддор кузя пуконъёс, фельдшерлэн гожъяськон ӝӧкез. Паллян палан ӧс, отын процедураос ортчытъян инты. Соин сцена кыклы пилемын кадь: приёмнойын югдур азинскемъя адӟиське процедурной кабинетын ортчисез но. Аспӧртэмлыкез: медпунктлэн ульчае потӥсь ӧсэз кык полэс - огез капчи, гужем кутъёс медаз пыре шуыса чакламын - ӝыныез пияла. Со пыртӥ урамысь оломае но адӟыны луоно. Бур палан буям гур. Со борды электроковрикъёс юнматэмын. Борддор кузя шкафъёс, канаос. Аптека нерге. Лилька-Килька огназ. Дыртыса Серафима пыре. СИМА (ӧс куспысен ик). Шоразы но ӧй учкысал - оломарлы адӟеме потэ... ЛИЛЬКА-КИЛЬКА. Вуозы... СИМА (корка шорын ик). Тодӥськод-а, соосыд толон мар дауртӥллям? Эк, мискинь Шайтан труба тон, Шайтан труба... Сатрапянэд но... Кыкназы ик паренэсь... (Секыт лулске.) Табере... ЛИЛЬКА-КИЛЬКА (гожъяськонзэ ик вунэтэ). Мар луиз? СИМА. Тон но янгыш: спирт зындэ шӧдо... Соосъя нялтас луиськод: золгес яратозы, кожаськод-а, мар-а... ЛИЛЬКА-КИЛЬКА. Созэ ачим тодӥсько... Сатрапянэд валлян пыриз но шуэ: мар карыны, пе, уг валаськы... СИМА (керӟегъяськыса отӥ-татӥ ветлонъяз). Мар луэм? ЛИЛЬКА-КИЛЬКА. Марлы, шуисько, токма юиськоды? А ма, пе, кароно? Юиськод, пе, дунне ӧжытак шулдыргес адӟиськыны кутске... СИМА. Мар-о сыӵе куректон шедем? ЛИЛЬКА-КИЛЬКА. Куректон ӧйтӧд, но... (Пукон интыысьтыз султэ, укноетӥ учке, возъетъёсты тупатъя.) Киоссэ тани тазьы вӧлъяз но возьматэ: мар, пе, карыны уг валаськы соосын - кужым но, пе, вань, визь но тырмыт - нош кытчы карыны уг валаськы... СИМА. Самой со киосын толон кыкназы но Гланя апайлэсь мимала ӟазегзэ кутӥллям но вузаллям... ЛИЛЬКА-КИЛЬКА. Шайтан труба но? СИМА. Кытчы венез, отчы ик сӥньысэз но... Магазинам ӵукна ик пӧллёнзы со сярысь гинэ... ЛИЛЬКА-КИЛЬКА (керӟегъяськыса). Табере мар? СИМА. Уг тодӥськы. Тани вуозы, асьсэлэсь юалод... От, шакшыос, шакшыос... ЛИЛЬКА-КИЛЬКА (эшез доры матэ кариськыса синмаз ик учке). Сим? Оло нош, соосын ӟеч-ӟеч вераськоно? СИМА (ымпумтӥз мыняк потэ). Кытчыязы ке йӧтоз-а тынад верамед? (Нош ик корка шортӥ котырске.) Мар кароно - ачим но уг валаськы... Мукет иворе но вань... Тон пумысь... Только вай тӥни созэ... (Ӝажы шоры возьматэ.) Апельсиновой шуисько... Чатран люкетъёсын йырин гурт пумысь гурт пуме: пуш ӝуаны кутскиз... (Лилька- Килька ӝажыысь пакет доры сузьтӥське, дэрем сӧзыез выллань кыстӥське, макесъёсыз кыре пото. Сималэн синъёсыз питырско.) Таӵеесь шат тынад! Осто быри - девяносто три! ЛИЛЬКА-КИЛЬКА. Маи? СИМА. Пыдъёсыд, пӧй. ЛИЛЬКА-КИЛЬКА (нокыӵе кариськытэк). Ме, куасьмод! СИМА (пакетысь сокез юэ, мылкыдыз лапка). Тӥни мар понна... ЛИЛЬКА-КИЛЬКА. Тон мар-о? (Пельдӥнь котыртӥз чиньыеныз бергатэ.) Шарикоподшипник? СИМА (шораз учкемысь дугдыны нокызьы уг вала). Да-а... Тӥни марлы! ЛИЛЬКА-КИЛЬКА (эшезлэн таӵе ылё-кырсё вераськемез сое пурӟытэ). Мар лемтэй куртчиз тонэ? Сима нош ик солэн пыдъёсыз шорысь синъёссэ уг вошъя. СИМА. Да-а... Мировоесь... Классноесь... Сексопильноесь! Тӥни мар понна Иван агай?! ЛИЛЬКА-КИЛЬКА (шуак луэ). Кыӵе Иван агай? Марлы Иван агай? СИМА (огысьтыз пукон вылысь мукетаз пуксе, малпаськись тусо луэ). Эк, мискинь Шайтан труба, мискинь Шайтан труба... Шузи ик вань... Таӵе ваньбурез аракыен вошты... Тьфу! ЛИЛЬКА-КИЛЬКА. Ой, Серафима! Воксё оломар кадь луэмед туннэ! СИМА (интыысьтыз туж шаплы султэ). Лилька! Валай! Тани тазьы бергатом! ЛИЛЬКА-КИЛЬКА (берен ӝӧк сьӧры интыяське, гожъяськонэз борды кутскыны шӧта). Кыӵе муртэн но эшъяськытэк уг луы: олокыӵе Иван агай, оломар но йыраз лыктэ... Кош, адӟеме уг пот... Уг вераськы ни! Куатаськыса зэмзэ но гожъяськон бордаз кутске. Сима тае вала, соин ик чырткемак эшезлэн мышказ вуэ, сое пельпумъёстӥз ӟыгыртэ. СИМА. Тыныд, Лильки, синмаськем мурт вань! ЛИЛЬКА-КИЛЬКА. Шедьтӥськод ук! Сыӵеос тракт вылысь из мында! СИМА. Ой-ёй-ёй! Нош таиз! (Чиньыосыныз шальк каре. Собере шуак кунэрес луэ: медик шоры сокем жалясь синъёсын учке. Жалезлы чидатэк, лэся, вадьсысьтыз пукон вылэ пуксе.) Ой, Лилькие, вераны киы-пыды уг ӝутскы... ЛИЛЬКА-КИЛЬКА (тунсыкъяськонэз нош ик ворме, гожъяськонзэ палэнтэ). Вера ни! Мискинь албастыосмы тани-тани пырозы... СИМА (интыысьтыз уг султы). Мед пырозы: сыӵе электрикъёсыз дышетоно! Одно ик! Нош татын мукет ужпум, Лилькие, ой-ёй-ёй! Семьяё мурт! ЛИЛЬКА-КИЛЬКА. Дугды ай, Серафима, кыӵе семьяё мурт? (Вожзэ поттыса, пыдыныз йыг! лёге.) Вера, шуисько! СИМА. Учкисько: магазинам Иван агай пыре. ЛИЛЬКА-КИЛЬКА. Кема котыръяськод... СИМА. Эн дырты, мон чаляк вордскиськымтэ... (Ӝӧк вылысь синучконэз шедьтыса, со чеберъяськыны шӧта.) Бухгалтерез верасько... Дыдые, шуэ, пайми ни, пе, мар карыны... Мар луиз, Иван агай, шуисько... Яратонэн гомасько, пе... (Вис каре.) Ой, интыям ик кулӥсько вал: оло серекъяно, оло... Мӧйы воргорон, умой ӧвӧл кадь... Бон, шуисько, Иван агай, кин понна озьы... ЛИЛЬКА-КИЛЬКА. Шаплы, пе, вылэм соид Шуняньгуртысь кышноос котыртӥ... Артэ гуртъёсысь но ӵошкатэ, пе, вал... Кинлы меда сокем синмаськем?.. СИМА. Тыныд. Озьы ик шуиз. Тон, пе, соин эшъяськиськод, эшеныд кызьы ке матэгес кар, пе, вал... Мон, пе, солэсь, тынэсьтыд, значит, пыдберзэ ик чупаны ик дась... (Вис.) Коть нош погра, коть нош... ЛИЛЬКА-КИЛЬКА (чылкак дэймемын). Серафима, мар каром? СИМА (гырпумъёссэ ӝӧк вылэ тыре). Тазьы малпасько: синмаське бере - нялтас кариськоно... Нокытӥыд уз пӧсьты... ЛИЛЬКА-КИЛЬКА. Но... Атайлы тупа ук со! Ветеран. СИМА. Пушкин кызьы шуиз? "Любви все возрасты покорны!" ЛИЛЬКА-КИЛЬКА (аслыз пукон инты уг шедьты). Тыныд-то мар... Тыныд капчи... Нош мыным калыкен ужано... СИМА. Мон но парсь возьмась ӧвӧл... ЛИЛЬКА-КИЛЬКА. Нош Шайтанчике? Нош Сатрапянэд? СИМА (малпаськись тусо луэ). Шайтан труба? Сатрапян? Вожалозы? Соос-а? Соос, ява, тордэменызы вожаны но уз быгатэ ни! Мед вожалозы вылэм! Вожан пиосмуртлэсь вирзэ шукыяськытэ, пе... Адреналин... Тон мынэсьтым тросгес тодыны кулэ. ЛИЛЬКА-КИЛЬКА. Озьы шат? (Медпунктысь пуконъёсыз интыысьтызы вошъяны ӧдъя). СИМА. Тон мар дауртӥськод? ЛИЛЬКА-КИЛЬКА (ачиз но пайме). Зэм но... Оломарлы... СИМА (медпункт шортӥ ик ортче, вань вылтусэныз возьматэ, номыртэм усто малпан шедьтӥз шуыса). Так вот... Асьмеос тазьы каром: та учыр шоры стратегической синъёсын учконо. Шудом! ЛИЛЬКА-КИЛЬКА (гырпумъяськыса ик учке эшез шоры). Маин? СИМА. Малы "маин"? "Кинэн" шу... ЛИЛЬКА-КИЛЬКА. Ой, Серафима, укыр мудрон. Йыр воксё квадратной ни. СИМА (нош ик медпункт шортӥ ортче, пияла ӧсэтӥ ураме учке). Та-ак... Та-ак... ЛИЛЬКА-КИЛЬКА (выжез ӵужыны ӧдъя). Олокытысь жаг люкаське... СИМА (табере сое уд тодма ни: шырез адӟем пинал коӵышлы укша). Дугды ни... Та- ак... Лилькие, табере кыл сёт, ваньзэ, мар мон косӥ, лэсьто шуыса. Сётӥськод? Ярам. Чупаськыны малпаз ке но. ЛИЛЬКА-КИЛЬКА (ӵужиськонзэ куспетӥ карыса). Ки-ин? Тон мар-о? СИМА (пышкылыса). "Мар-о", "мар-о"... Соглаш? Вот тӥни озьы... Учкы табере... Чаль... (Лилька-Килька Сима вӧзы номыртэм сэрыт вуэ, собере укное учке). ЛИЛЬКА-КИЛЬКА. Мар каром? (Суйпос часэз шоры учке.) Нош электрикъёсмы? СИМА (палэнысь пукон вылэ чырткемак пуксе). Интыяд пук! Смотри, ваньзэ монъя кар. Тон мар малпад, соид озьы ик кариськоз. Электрикъёс? А вот соосыз дышетом! (Киоссэ ик посэ, интыяз пукыны уг чида, нош ик корка шортӥ ортче.) Эк шу, ой, Лилькие, мар луоз али! Йыр ке йыр, пыд ке пыд! Шуоз вал песятае! ЛИЛЬКА-КИЛЬКА. Но... СИМА. Монъя кариськод - ваньмыз пӧрмоз! ЛИЛЬКА-КИЛЬКА. Ой, Серафима, умой-а луоз озьы? Ой, сюлмы... СИМА (эшшо огпол ураме учке на). Пыроз ни... Нялтас кариськы... Маке висён нергезэ шедьты... Собере? Электрикъёсмы ӵап вуозы! ЛИЛЬКА-КИЛЬКА. Но... Законъя... СИМА (вожзэ поттыса, пыдыныз йыг! лёге). Нош ик "но"! Кызьы вераським - озьы ик кар! ЛИЛЬКА-КИЛЬКА (ӟудэмын). Нош ӟыгыръяськыны малпаз ке? СИМА. Тон но ӟыгырскы! Уд пӧсьты! Пумозяз вераса уг вутты - Шальтрамов пыре. ШАЛЬТРАМОВ. Чырткемесь, Лилия Витальевна! СИМА. Нош марлы монэн уд чырткемъяськиськы, Иван агай? ШАЛЬТРАМОВ. Ма, ӧм-а адӟиське? СИМА. Кык пол чырткемъяськыса сьӧлык, пе, шат? ШАЛЬТРАМОВ. Я, иське... Марым... Сими, атай нимдэ... СИМА. Николаевна мон... (Котыртӥз зынъяськыса ортче). Кыӵе усто одеколонэн пазяськемед... Вералом-а нимзэ? ШАЛЬТРАМОВ (керпотыса кадь). Кыл бон тӥляд, Серафима Николаевна... Мычиськем бӧрсям ӧжытак пазьгем вал... (Фельдшер пала берытскыса.) Марлы ай, Лилия Витальевна, пырем вал? СИМА (эшезлэсь ваземзэ витьыса уг ул, соку ик ымзэ вуттэ). Бон, Иван агай, кышкыт висён бордад лякиськем ук... О-о, Лильки? ЛИЛЬКА-КИЛЬКА. Озьы, озьы... Склероз со, Иван агай... ШАЛЬТРАМОВ (шудонэ пыриськыса). Вань, вань кылэме. Сарыкмем пересьёслэн висёнзы... (Шуак луэ, ассэ гырпумтӥз кутэ, мултэс верамзэ валатске, соин ик шудонзэ азьланьтэ, ымныраз кышкан тус пуктэ). Туж-а кышкыт со, нылъёс? СИМА. Номыртэм! Вирсэръёс шальтрак пилиськыло, пе. Озьы-а, Лильки? ЛИЛЬКА-КИЛЬКА. Ойдо ай тазёлогес пуксьы, Иван агай. Мерталом... Лилька-Килька давление мертаны дасяське, солэн куремезъя Шальтрамов вадьсысьтыз пукон вылэ пуксе но саессэ пужалля. Сима со вискын нош ик ӧс укноетӥ ульчае учке, ури-бери луэ, Лилькаезлы киыныз шона, палэнэ ӧте но пеляз маке шыпыртэ. Соиз но чырткем кариське. СИМА. Туж зол кызъё ятэ. Тӥни соку ик... Кызьы вераським! ЛИЛЬКА-КИЛЬКА (соглаш луэмзэ йырыныз мыкыръяса гинэ возьматэ). Иван агай, ойдо ай таяз висъетэ пыром. Кускозяд кылиськы. Давленидэ быдтом... ШАЛЬТРАМОВ. Кыӵе давление, нылъёсы? Медкомиссиын ӧвӧл, шуизы... СИМА. Толон ӧй вал - туннэ вань... Сыӵе маке ук со. Фельдшер вань шуэ ке, озьыен, вань... Кылзӥськоно... Ойдо, ойдо... (Воргоронэз донгаса сямен висъет сьӧры поттэ.) Тыныд али банка пуктылозы. Шыпыт ул. Ятэ? Лилька-Килька пиосмуртэн ӵош кияз банка пуктылон котыръёсын висъет сьӧры ыше. Сима огназ кыле. Эшшо огпол укноетӥ учке, гань-гань кариськыса, пукон вылэ пуксе, гижыоссэ сузяны ӧдъя. Кыӵе ке но гурез нёръясько, пе: электрикъёслэн пыремзы будьто ке со понна витёнтэм шорысь луэ. Алёхаен Лёха кыкназы но ужан дӥськутэн, бордазы инструментъёсын сумкаоссы вань. Алёхалэн паськыт монтёрской еэз бордын юбо йылэ тубан "гондыр гижыосыз" ошылэмын на. САТРАПЯН. Ӟечом-буром, чарка муром! ШАЙТАН ТРУБА (ӝужыт со, Сатрапянлэн йырыз солэн пельпумыныз одӥг радын адӟиське). Чырткемесь! О-о, ӵукна ик кинэ адӟод вылэм! Тон, Серафима, татысь кошкылыны валаськод-а, уд-а? Ку гинэ пыр - тон весь татын. Висиськод шат? СИМА. Тынад мар ужед: оло, висисько но... Лялькиен эшъяськиськом, лэся... Асьтэос но лякиськем люгы кадесь... САТРАПЯН (ужан котырзэ ӧс доры куянъяз). Милям уж сыӵе: огмытэк уг пӧрмы. Со - нолёвка, мон - фаза. ШАЙТАН ТРУБА. Ӧвӧл, мон - фаза, тон - нолёвка... САТРАПЯН (пайме). Марлы? ШАЙТАН ТРУБА. Огшорылэсь но огшоры: тани та мар-о? (индикатор-отвёртка возьматэ). САТРАПЯН. Мар-о мынэсьтым, тани Сималэсь юа... Мон ликбез ӧвӧл... Индикатор со, токез возьматӥсь... (Сима пала берытскыса вера.) Ез борды йӧттӥськод - уг ӝуатскы. Озьыен, татын - ноль... СИМА. Табере валай: тон, Сатрапян, ӵукна бер вуиськод - Шайтан трубаед огназ... Тонтэк но быгатэ... Озьыен, тон - ноль! ШАЙТАН ТРУБА (посӥськыса, эшез азьын янгыше усем мурт выллем). Ма, чылкак озьы ӧй шуысал. САТРАПЯН. Я, ноль ке, ноль мед луоз... Кытын хозяйка? (Висъет сьӧрысь Лилька- килька потэ: татчыозь со Шальтрамовен выриз, банкаос пуктылӥз, ваньмыз со адӟиське.) Туннэ шумпоттод-а, Лилия Витальевна? (Чиньыеныз возьматэ.) Толон устолэсь но усто кошкиз... Киосыд капчиесь... СИМА. Возьыттэм тон, Сатрапян... ӵукна ик... САТРАПЯН. Мынам ним сыӵе... Я, давай ни? СИМА. Гони монету! САТРАПЯН. Нош тон... Магазинад кожад-а? ЛИЛЬКА-КИЛЬКА (отчы-татчы учкылэ: синъёсаз юан пусъёс пуктылэмын). Ӧйтӧд, пиос... Нош ревизиен вуизы ке? САТРАПЯН (шуям мылкыдын). Эк тӥ... Сима? Лильки? Мар луиз? Кыӵе утялтӥськоды вал? ЛИЛЬКА-КИЛЬКА (Сима пала учке). Азьлоез азьло турынэн шобырскем ни! Озьы-а, Сими? САТРАПЯН (Сималэсь ваземзэ возьмаса уг улы). Шайтанчик! Кинъёс асьмеос? ШАЙТАН ТРУБА (пырем дырысеныз ни туж мыло-кыдо тунсыкъяське ӝажыосы пуктылэм- тырем эмъюмъёсын. Адӟиськод: таӵе вераськонлэсь солэн палэнскемез потэ. Но... Сатрапянэн гогыос ваче думемын). Электрикъёс... САТРАПЯН. Тон, Шайтанчик, лыдпусъёсты яратӥськод: районысь больницаослэн асьмелы тыриськонзы кӧня сюрс? ШАЙТАН ТРУБА. Кызь тямыс... САТРАПЯН. Нош Шуняньгуртысь медпунктазы, Шайтанчик, быдэс толзэ гур эстыса уг даурто, электроковрикъёсын шунтӥсько! Летучкаын кызьы вераськизы? Езъёсыз вандылоно! И никаких! ШАЙТАН ТРУБА. Озьы... Только... Комиссиен.... САТРАПЯН. Комиссиен? Тон но мон комиссия ӧвӧл шат? Акт лэсьтӥськом... (Гур борды юнматъям электроковрикъёс борды чабке.) Таосыз арестовать кариськом! ЛИЛЬКА-КИЛЬКА. Ой, пиос! Нош толалтэ?! (Олокытӥ-мартӥ чаркаен-мензуркаен Сатрапян вӧзы вуэ.) Ме, ме, Алёха, эн гинэ иса! Ю! Спирт! Тӥни графин... (Палэнын сылӥсь Сималы.) Пал кыл но?.. Со вискын Сатрапян - сое кема куроно ӧвӧл - спиртсэ графинысь вуэн сура, ӝынызэ ачиз кымалтэ - адӟиське: спирт юыны дышетоно ӧвӧл. САТРАПЯН. Марым, Лёха, мотри, пушкад эн кыскы я мар... (Кылемзэ Шайтан трубалы мыче. Соиз дӥсьтӥсьтэм синъёсын огшап нылъёс шоры учке, соос палась берытске но бушатэ). СИМА (котырске). От, быгато ке быгато шуняньгурт пиосыд! Лилька! Тон понна Магадан бӧрдэ ни! ЛИЛЬКА-КИЛЬКА. Мар-мар? СИМА. Та алкахоноликъёсын сэрен кезьыт шаеръёсы тып-тап келялозы! ЛИЛЬКА-КИЛЬКА. Осто, Симуля, та понна гинэ-а? Кыл вылад пӧськы мед потоз... СИМА. Мынам-а? Мынамаз уз! Нош... (Кескич синъёсын портыса ик учке пиос шоры, вӧзтӥзы котырске.) Нош та шуняньгурт пиосыз куртко ке, куртко... А, Шайтанчик? (Шайтан труба вадьсысен пыдыныз йыг! каре, со пала быдэс мугорыныз сётске. Соизлэн соку ик ваньмыз шальтра, вузкарись шоры дась луэмзэ возьматӥсь синъёсын учке.) А? ШАЙТАН ТРУБА. Мон... мон... Мон нылъёсын котьку... Соглаш... СИМА (азьтӥзы ортче. Нош ик Шайтан труба вадьсы дугдэ). Шайтанчик, дармовой мар вань? ШАЙТАН ТРУБА. Задарма шуиськод-а? (Посӥське.) Ну, шыр кутылонын... Мае ӵекто... (Собере шумпотыса Сатрапян шоры учке.) Собере?.. Тани Алёха тазьы кырӟа: "Кезом- Яром - едем даром!.." СИМА (киыныз шонтыса, бордысьтыз палэнске). Кылыд ке ӧй луысал, куака нуысал... (Сатрапян вадьсы дугдэ.) Тон, гажано Сатрапян, али ик пистончикысьтыд вить манеттэ поттӥськод, Лилькалы сётӥськод! Спиртэз понна! САТРАПЯН. Нош ӧй ке? СИМА (азьло сямен ик котыртӥзы поръя, нош ик Сатрапян вадьсы дугдэ). Кытчы кариськод - поттод! Ӧд ке... Соку мар кариськом, Лильки? ЛИЛЬКА-КИЛЬКА. Соку... Соку бригадирлы, председательлы чагиськом... СИМА (чырс улмоез куртчем кадь). Ваньзы паренэсь! ЛИЛЬКА-КИЛЬКА. Соку... Соку... (Мукетызлы малпанлы медиклэн визьмыз уг тырмы ни. Соин ик юрттэт возьмаса Сима шоры долка). СИМА (эшезлэсь таӵе югдуре шедемзэ уг адӟы кадь). Тон, Лильки, мын ай процедурнояд, ас уждэ лэсьты. (Лилька-килькалэсь висъет сьӧры ышемзэ возьмаса сылэ. Собере нош ик Сатрапян пала берытске.) Соку, гажано Алёшае, соку, гажано Олёше, соку, гажано Сатрапянэ... (Тае веракуз нылмуртлэн куараез ӧжытак дырекъя. Вис карыса, мискинь электрикъёс шоры долка. Соос но ма вераны ӟудэмын.) Соку! Соку быдэс бакчаяды люгы кидыс пазялом, кирень алятом! Электрикъёс гурак серекто. САТРАПЯН. Айда, вырӟим, Шайтанчик, азьвыл сямен комсомольской бюрое ӧтёзы я мар... (Мылысь-кыдысь вушъе. "Гондыр гижыоссэ" паськыт еэз борды думылэ. Шайтан труба ӧс дорын ни. Сима тӧлпери кадь азьпалазы чот султэ). СИМА. Уд кошке! САТРАПЯН, ШАЙТАН ТРУБА (ӵош). Марлы? СИМА (чиньыосыныз возьматэ). Манӥ, манӥ, гыдыкъёсы. Гланя апайлэсь ӟазегзэ толон кытчы кариды? САТРАПЯН (та ивор пумысен шуак луэм вал, собере ассэ кияз кутэ, номыр луымтэ кадь, гадьзэ урдэ). Кыӵе ӟазег? Кыӵе Гланя апай? Шайтанчик? (Шайтан трубалы та номыртэм возьыт потыны кутске, соин ассэ кытчы донгыны уг вала.) Ах, Гланя апайлэсь? Так со толон вал ни, о-о, Шайтанчик, ми со кышномуртэн - полный расчёт! Прокурорен кышкатыны малпаз! Кыӵе ке ӟызы ӟазегез понна! Тау мед шуоз: тракт вылтӥ кошкисьёслы тулляны быгатӥм... (Мултэс вераны шедьтӥ шуыса, ассэ пельтӥз кырме, соин ик Шайтан труба пала берытске.) О-о, шу, Шайтанчик, мар-о номыр уд куаретӥськы? ШАЙТАН ТРУБА. Ӵукна ик коньдонзэ пыртыса кельтӥм... Шумпотоз кожаськом вал... Но... САТРАПЯН. Валамон ситуация, Серафима Николаевна? СИМА. Суам бамъёс! Шорады ӧй но учкысал! САТРАПЯН (нош ик кошкыны пӧрмытске). Ха, эн учкы. Косӥсь вань шат. О-о, Шайтанчик? Вырӟим... Ӧсэтӥ тани-тани потыны шӧтась электрикъёс азе Сима ваменак султэ. СИМА, Поттэ! Шайтанчик! ШАЙТАН ТРУБА (бызырам мылкыдын). Ӧвӧл, Серафима Николаевна... Милям гуртын ваньмыз нэнэ киын... Уждун апрель понна гинэ ай... СИМА. Сатрапян! Потты! САТРАПЯН (табере эшшо но гольтырес кариське). Ӧвӧл мынам но, Симуля. Нош небӟытӥсь валюта? (Гадь вадьсытӥз уллань возьматэ.) Буль, буль... Татын ни... СИМА. Соку... Соку... Ми но гожтэт гожтом! Тодӥськоды-а кытчы? Госдумае! Правительствое! Районэ! Электросетяды! Копиосын! Озьы но, пӧй, озьы, электроезъёсыз вандылом шуыса кышкатъяло! Асьсэос ужан нунал вискын... Потты вить манеттэ! САТРАПЯН. Хы... Гожтэлэ... Ӵын со милемлы. О-о, Шайтанчик? Ми понна уж бырымтэ на: чырты мед луоз - сиес сюроз... Нош пыдъёсмы татчы уз йӧтылэ ни! Амба! (Тае кылыса, висъет сьӧрысь Лилька-килька олокытӥ-мартӥ вуэ). ЛИЛЬКА-КИЛЬКА. Сими? Оло? СИМА. Шып! Мын, уждэ ужа! (Фельдшерлэсь висъет сьӧры ышемзэ вите, собере номыртэм кужмо кызыны кутске. Дугдэ. Висъет доры кариське. Эшшо огпол кызъе). Соку ми тазьы каром! Ме! Ми но ум ёрмиське! Учке! (Висъет катанчиез шарак кыске - отын Лилька-килька кушетка вылын пукись Шальтрамовез ӟыгыртэм, йырзэ ымныр котыраз карем. Палэнысен учкыса, амалтэк малпалод, таосыд чупасько шуыса. Электрикъёс воксё жӧломемын). САТРАПЯН (шуак луэмез котькинлэсь азьло быре, долкам эшез шоры омырске). Мар паймид, пытса ымдэ - куака пыроз! Татын асьметэк но... Альтернатива! ШАЙТАН ТРУБА (Лилька-Килька пала омырскем вал). Лиля! Толон ӝыт гинэ! Сатрапян кырме. САТРАПЯН. Стоп! Мелэ! (Кытысь ке кисы пыдэсысьтыз ватэм манетлыксэ поттэ, ӝӧк вылэ сэрпалтэ.) Эшшо ке медицина! СИМА (таӵе быгатэмезлы ачиз но пайме, со вакытэ ик курда но. Пумозяз ваньзэ валаса уг вутты на. Сатрапянлэсь манетлыксэ басьтэ.) Трос тодӥськод, Алёша, ӧжыт валаськод... САТРАПЯН (ӧс куспысен, быдӟияськыса). Кытын ини милемлы тон кадь луыны... Киысь чиньыос но огкадесь ӧвӧл, пе... Смотри, Симоня. Туннэ, дискотека бере, келяло шуыса эн но малпа! ШАЙТАН ТРУБА (пыдыныз йыг! лёгыса Лилька-килькалы). Мон но! (Пияш эшшо маке вераны висъет пала омырскем на вал, Сатрапян кунултыса, кыскаса сямен корказе поттэ. Озьы ке но, Шайтан труба мозмытске, ӟубис ӧсэтӥ мычиське на). Тани! (Кык чиньы вискысьтыз пӧлы пумзэ возьматэ. Серафима мар ке меӵкытыны дасяськем вал - ӧз. Олокызьы ӝӧк сьӧры вуэ, йырзэ ӝӧк вылэ кымин карыса, зар-зар бӧрдэ. Ури-бери Лилька-килька вуэ, эшсэ пельпумаз маялля. Буйгатӥсько, пе). ЛИЛЬКА-КИЛЬКА. Я-я... Валерьян сётом шат? (Соизлэсь йырыныз шонамзэ адӟыса, уг вырӟы.) Ачид ук... Оломар но шедьтӥськод... Мар луоз табере? Сима тыпыр-тапыр султэ, ныркышетэныз ымнырзэ ӵушалтэ, погмаськем котырзэ тупатъя. СИМА. Кышкатӥзы ук, воксё кизерми... Тӥ кадьёс тани тамында! (Ӧс пала мыжыксэ, кык чиньы вискысь пӧлы пумзэ возьматэ.) Мелэ! ЛИЛЬКА-КИЛЬКА. Ну, Симуля, даёшь... Кызьы дӥсьтӥськод?.. СИМА (табере интыысьтыз султэ, эшез пала омырске). Нош тон мар татын пукиськод? Процедурнояд висисед вань?! ЛИЛЬКА-КИЛЬКА. Ма, висись шат со? СИМА. Кин-о собере? Иван агай, айда, марш! Лык! Нечё кылзӥськыса пукыны! Шальтрамов потэ: ӵукна ӝужась шунды кадь - сокем небыт, сокем шудо ымныро. ШАЛЬТРАМОВ. Ма, уг кылзӥськиськы... Пельы ӵоктамын, Серафима Николаевна. Ӵоктамын... СИМА. Оскисько, туж зол оскисько... Чипылэн коӵышлы музэн... Тон али эн ӝега... Корказе пот но тамактэ кенжыты, милям кенешонмы вань. ШАЛЬТРАМОВ. Кысконэн уг выриськы мон, дыдыосы... Кулэ бере - пото... Ява, Лилия Витальевна... Корказе потэ. ЛИЛЬКА-КИЛЬКА (секыт лулскыса, эшез вӧзы пуксе). Котьмар шу но, Сими, сюлмы интыяз ӧвӧл: ваменскозы соосмы. Одно ваменскозы! Шайтанчике сӥзьыл сюан каром шуэ вал ни... Табере? (Викыштэ). СИМА. Милям бон сюанозь ик вуэмын ӧвӧл на ай... Но... (Нош ик корка шортӥ ортче, ӟырдыт мылкыдо, пыд улысьтыз из пырыос пезьдыло кадь.) Эк, мон соосыз, эк! А мар-о мон? (Аслыз ачиз оскытэк, шуак луэ, эшез шоры дол-дол учке.) Оло, юнме дауртӥськом, Лильки? Марымез сиыны дышем парсез, пе, уд ваменты... (Собере нош ик мукет мылкыдо кариське, горемзэ возьыны уг быгаты.) Кулӥсько вал таид пумысь... (Киыныз корказь пала возьматэ.) Оло, умой-умой чупаськиз-а? Пиосмы дэймизы ук! Учкы ай Шайтанчиктэ!? Востэм шу, ява! ЛИЛЬКА-КИЛЬКА. Осто, серем кариськод, Серафима... Огшоры гинэ ӟыгырски вал - кытысь-марысь лӧптӥз ук, ява: пачкатӥз ук киосыныз, тани-тани, малпасько, чупаськыны кутскоз... Ой, мар каром табере? Кыӵе ымнырын возьматском Шайтанчике азе? СИМА. Эн куректы... Самой главнойзэ лэсьтӥм. Ваньмыз малпамъямы луиз, вожаны кутскизы соосмы, Лильки! (Эшсэ кустӥз ӟыгыртэ, зӥр! бергатэ). ЛИЛЬКА-КИЛЬКА (котырзэ тупатъя). Пичи дыды ик вань тон, Сима. Нош таин мар каром? (Йырыныз нш ик ӧс пала возьматэ.) Шыпыртӥз ни: ӝытазе дас одӥг часын медпункт дорын возьмало, пе. СИМА (малпаськись тусо луэ). Озьы-а? От, пересь сарык! Лӧптӥз, кельшисько кожаз? Мед, Лильки, мынод сыӵе свиданкае! ЛИЛЬКА-КИЛЬКА. Нош Шайтанчик? Калык тодӥз ке? Ӧвӧл, дышето мон сое, тодоз нылъёс котыртӥ гожеръяны! СИМА (чырткемак ӝӧк вылэ пуксе, пыдыныз сэзъя, серектэ). Пӧрмоз, Лилькие! Асьмея луоз! Уз си! Оломар эн даурты Иван агаен. Мын, Лильки, ӝытазе. Адӟод. Ой, оломар понна но йырмес висьытӥськом - ойдо кырӟалом! Туж кырӟаме потэ! Кырӟамъям ваньмыз куректонэ шур ву кузя кадь кошке! Кырӟало. Кырӟанын егит сюлэмъёслэн ӵуказе нуналлы осконзы пачыла. Шуак дугдо, ӧс куспын - Шальтрамов. ШАЛЬТРАМОВ. Туж быгатӥськоды: филармоние келяно тӥледыз... СИМА. Артистэ-а? Манӥ-манӥ ӧжыт потто соос, Иван агай... Гуртысь огез кырӟаса ветлэ: городын улэ - татчыозь квартираез ӧвӧл, тани таиз но оло вань, оло ӧвӧл (Зундэсъёссэ чиньыосыныз шудыса возьматэ.) Уг мыны артистэ, Иван агай. Уг. (Мылкыдзэ мукет карыса, пукон интыысьтыз тэтчыса ик ваське.) Нош пырем мугдэ таки вераса ӧд вутты на. ШАЛЬТРАМОВ. Сигарет понна магазинэд пала потэм вал, Серафима Николаевна... СИМА (нош ик ӝӧк вылэ лӧбышак пуксе). Али гинэ уг кыскиськы шуид ук, Иван агай... (Чиньыеныз сэзъя.) Ой, Иван агай, смотри... Яке тынад зэмзэ но склероз, яке... (Лилька-килька шоры я воргорон шоры кескич учке. Лилька-килькалы та уг кельшы: зӥрак берытске но процедурнояз кошке.) Тамак но уд кыскиськы, вина но юэмдэ адӟеме-кылэме ӧвӧл, нош кышноосын? ШАЛЬТРАМОВ. Егит дыръя... Нылъёс синмасько вал... Висъет сьӧрысь Лилька-килька потэ. СИМА (медпункт шортӥ вормись мылкыдын ортче.) Валамон... Мынам но егит дыръям одӥг крутой туганэ вал... ЛИЛЬКА-КИЛЬКА. Сима! Адямилы маза уд сётӥськы... Эмъяськыны... СИМА. Солы? Эмъяськыны? Висиськод шат, Иван агай? Уд? Мон но озьы шуисько! Кор ӝутканы кулэ солы, а не бухгалтерия... (Ассэ куспетӥ каре: мултэс вераны шедьтэмзэ вала.) Вождэ эн вай, Иван агай. Вот со крутой туганэ шуоз вал: малы, пе, кыллись кышномурт вамен вамыштыса потод... ЛИЛЬКА-КИЛЬКА (та кылъёс пумысен возьдаськем манер чабкиське). Осто, Сима, воксё... СИМА (табере пичи ныл сямен тэтчаса поръяны дась). Пиосмурт азьын возьдаськонэз уг валаськы... Озьы-а? А мар-о верантэмез, о-о, Иван агай? Ваньмыз отысь усемын, пе... ЛИЛЬКА-КИЛЬКА (вожзэ поттыса, пыдыныз йыг! лёге). Сима! СИМА. Мар Сима, мар Сима!.. Вордскем дырысеным Сима... (Пиосмурт доры вамыштэ, солэн пилешаз чуп каре.) Ох, сюлмы дырекъяны кутске, таӵе пилешез адӟисько ке! Тон, Иван агай, милесьтым кылзӥськы, ява? Мия кариськы... Ми но тыныд пайдаё луом... Соку ваньмыз о(кэй! Луоз! Нош али? Али Сима тӧлӟиз! Кескич серектыса, олокызьы гинэ зэмзэ но "тӧлӟе". Лилька-килькаен Шальтрамов ӟудыса но паймыса ог-огзы шоры учко. ЛИЛЬКА-КИЛЬКА (малы ке но висъет сопала-тапала пота, мае ке но интыысьтыз вошъя, шприцъёсын банказэ кӧня пол меда отчы-татчы вуттӥз ни). Кӧня пол ни порядок лэсьтыны малпаськылӥ. ШАЛЬТРАМОВ (азьло интыяз ик пуке). Озьы, озьы... Вот ведь шакшыос... ЛИЛЬКА-КИЛЬКА. Ки-ин? ШАЛЬТРАМОВ. Ма, Индиен Пакистан... ЛИЛЬКА-КИЛЬКА. Мар-о луэм? ШАЛЬТРАМОВ. Сьӧраз ортчемын: ядерной испытаниос... ЛИЛЬКА-КИЛЬКА. Озьы-а, пе... Нош мон кожам вал... (Медпункт шортӥ ик ӵужыса ортче. Ӵужись мурт вадьсаз вуэм бере Шальтрамов пыдъёссэ ӝутыса возе. Медам, пе, люкеты.) Кыӵе ни дорад, Иван агай? Уг-а вись Катьырна апаед? ШАЛЬТРАМОВ. Дорын-а? Танкын кадь - порядок! Кышно - пенсионерка... ЛИЛЬКА-КИЛЬКА (нош ик Шальтрамов дортӥ ӵужыны кутске. Воргоронлы амалтэк пыдъёссэ выльысь ӝутытэк ӧйлась.) Нош яратонэн кызьы? ШАЛЬТРАМОВ (номыртэм курадӟись мылкыдо, ассэ ултӥ карем мылкыдын серектэмъяське). Кыӵе яратон... Нюк улэ питрам ни со милям... Тани тӥледын, Лилия Витальевна... ЛИЛЬКА-КИЛЬКА (ӵужиськонзэ ик куспетӥ каре). Артэ но уд кӧлаське? ШАЛЬТРАМОВ (возьдаськем кариськыса посӥське, кескич серектэ). Однако. Выжыятӥськоды... ЛИЛЬКА-КИЛЬКА (ымнырыз сайкытак луэ, шуныт пальпотонэн тырме). Нош милям! Пургалам бертӥсько - тятяен нэнэ дорын ке, асме мултэс кожаны кутскисько. Уй но нунал ӵошен. Огзытэк огзы вамыш но уз лэсьтэ. ШАЛЬТРАМОВ. Озьы, дыр: пурга калык - кочон калык... Синмаськымон! Тани тӥ но... Только вералэ ай: мар вал татын со электрикъёсын - оло керетӥды, оло?.. ЛИЛЬКА-КИЛЬКА (киыныз шонтыса). Пельдэ зӧк кар... Асьмелэн кусыпмы. Мар-о шуиз Сима? Кылзӥськы милесьтым... ШАЛЬТРАМОВ (лӧптыса). Мон дась, котьку дась! Мар ке косӥды, Лилия Витальевна, котьмае лэсьто! Чидало тӥ понна! ЛИЛЬКА-КИЛЬКА. Укол ке но пуктӥ-а? ШАЛЬТРАМОВ. Кытчы кариськод... Возьдаськисько ке но... Нош туннэ ӝыт? Дас одӥг часын шуисько? ЛИЛЬКА-КИЛЬКА. Айда процедурное. Брюкидэ... ШАЛЬТРАМОВ (ӝу вылэ пуксем мурт кадь). Али ик... Али ик... Кызьы-о? Выдоно-а? Я- я, выдӥсько... Процедурнойысен Шальтрамов штанизэ небыт интыосыз адӟиськымон уллань каре, выдэ, Лилька-килька палэнысь ӝӧк дорын шприцъёсын выре. Шальтрамова пыре. Процедурнойысь катанчи ворсамын ӧвӧл бере, кушетка вылын кыллись картсэ соку ик адӟе. ШАЛЬТРАМОВА. Иван? Мар дауртӥськод татын? ШАЛЬТРАМОВ. Уд адӟиськы шат - висисько. Магазинэ васькисько вал... Сигаретлы... Тани сюлэм кутӥз... ШАЛЬТРАМОВА. Ма-ар? Кыскыны шӧтад? Пересьмыса? Сюлмыд? (Картэз шоры мыр-мыр учке. Собере фельдшер шоры). ЛИЛЬКА-КИЛЬКА (кияз уколэн). Али гинэ пыриз со, Катьырна апай. Тыбырыз. Радикулит манер. Остеохондроз... ШАЛЬТРАМОВА. Остойӧналоз? Уз йӧна уг шуиськы... (Табере кузпалыз шоры жалясь синъёсын учке.) И-иван, каръянэ, марлы татчыозь ӧд поттылы висемдэ?.. Сопал урамтӥ, тапалтӥз но ветлӥсько: така утчаса... Нялтас пыронолась... ШАЛЬТРАМОВ (табере дӥсьтӥсь луиз, тӧлъёслэсь кудпала пеллямзэс пумозяз ӧз ке но вала ай. Со вакытэ ик Лилька-килькалэн киысьтыз шприц шоры учкылэмысь уг дугдылы: кыӵе йӧно воргорон яратоз, пе, уколэз). Кыӵе така? Ыж вордӥськом на шат? ШАЛЬТРАМОВА (синъёссэ щприц шорысь вошъятэк). Ма, ӧм вордэ шат? ЛИЛЬКА-КИЛЬКА. Я, витамин пуктом. Эн куалекъя. Туннэ больница чотын, ӵуказе ас уксёеныд басьтоно луод... Пиосмуртлы укол пуктэ, Шальтрамова чабкиське. ШАЛЬТРАМОВА. Эк, Иван, Иван... Мар пери шоры сюрем мурт тон... Мар пери! Егит дыръяд но... ЛИЛЬКА-КИЛЬКА. Егит дыръяз но курадӟе вал-а, Катьырна апай? ШАЛЬТРАМОВА. Ой, курадӟе вал, курадӟе! Ачим нерад луисько вал! Кӧня пелляськись доры нуллӥ - пайдатэк! ЛИЛЬКА-КИЛЬКА (кияз нош ик шприц возе). Нюлэскы ветлэ, дыр. Таиз лемтэй куртчемлэсь. (Шальтрамовлы нош ик чырткемак сале. Нош ик ӝӧк котыраз вуэ: озьыен, мукет укол пуктыны дасяське). ШАЛЬТРАМОВА. Кыӵе адӟон вуиз тазьы?.. Толон... Толон гинэ артана люкад ук. Висёно кадь интыед ӧй вал. Мар куректон, мар куректон... Вӧзазы нош ик Лилька-килька вуэ. Выльысь уколэн. Тае адӟыса, Шальтрамова амалтэк кирос пононо луэ. ШАЛЬТРАМОВА. Марым, мултэс уз луы-а? Егит дыръяз нокыӵе уколтэк... Со мынам сиськыны кык мурт понна... Йӧналоз... ЛИЛЬКА-КИЛЬКА (Шальтрамовлэсь чилясь берпалзэ ватаен зыра). Таиз мукет витамин, Катьырна апай... Сокем дуно ӧвӧл... Памперсъёс но сёто... Кулэ шуыса поттылӥз вал... О-о, Иван агай? Шальтрамов маке вераны ымзэ усьтэм вал - ӧс вӧлак усьтӥське, лобӟыса кадь Сима пыре. СИМА. Лилька! Срочно! Главврач! ЛИЛЬКА-КИЛЬКА. Мар-о луэм? Ужаны маза уг сёто. Сима, тон татӥ чакла, ява... Кошке. СИМА (халат дӥся, медицинской изьы изьыя, йӧно адӟиське). Улӥськом тӥни... Медпунктэ телефон пуктыны уг быгато! Табере бызьылы! Нош мон... Серафима - чидась адями! Кытын пась - отчы дась! (Вуӵыртонзэ куспетӥ карыса, кузпалъёс шоры учке.) Нош мон таӵе пациентъёсыз уг адӟиськы... Иван агай, кыӵе тазалык? (Ӝӧк вылысь шприцез басьтэ.) Пуконо шуиз, лэся... Быгатом: медкурсъёсын дышетски вал... Иван агай. Катьырна апай? Уг-а быгаты? Кыллись воргорон олокызьы, олокыӵе пружинкаё кариськыса, кыллён интыысьтыз чырткем султэ, дыртыса дӥсяськыны кутске. ШАЛЬТРАМОВА (номыр но куаретӥсьтэм картсэ донгаса ик корказе поттэ. Сима пала берытске на). Быгатод, ма, кызьы уд быгаты, Сими... Ӵуказе пуктоз ни... Эмъюмъёсызлы но коньдон тырымтэ на... Вунэтӥсько вал: кыӵе ке пампирсъёс кулэ на, пе... Уксё зӥргатъян... Маин-о сое сиёно, Сими? Кысконзэ гинэ медаз кыскы - сёт со пампирстэ ик, сыӵе кулэ бере... СИМА. Ма... Кытын ай меда... (Утчаськонъяз куспетӥ дугдэ.) Лык ай... Пеляз ивор вуэмъя Шальтрамовалэн синъёс питырско. ШАЛЬТРАМОВА (корказь ӧс пала эшшо огпол учке на). Уин? Улаз уг... Инмар мед утёз... Кӧлан котырзэ ачим утялтӥсько.... Артэ ум ке но... Туннэ уин? Кӧс вал... Ӵок, ӵок, кулэ ӧвӧл со пампирсъёсыд... Я, ӟеч... Кошке. Туж дыртыса Шальтрамов берен пыре. ШАЛЬТРАМОВ (корказьысь кышноезлы). Ма, дугды ай, сир кадь лякиськиз: часталы гинэ... Серафима Николаевналы веран кылы вань. (Сималы.) Котьмар кар, Серафима Николаевна, синмаськисько бере синмаськисько Лилия Витальевналы! Куспамы вераськыса но ӧм вуттэ. Озьы ик шу: туж пумиськемез потэ. Туннэ ӝыт дас одӥг часын татын, медпункт корказь дорын, возьмало! Вамышъямзэ адӟыса гинэ но сюлмы йӧлпыд кадь небыт луэ! (Корказьысь кышноезлы.) Я, потӥсько ни, потӥсько! (Сималы.) Серафима Николаевна! Туж курисько: сое адӟыса но мынам кӧты-сюлмы тыре. Вералэ! Ӟеч! Кошке. Вис. Собере Лилька-килька пыре. ЛИЛЬКА-КИЛЬКА. Мар ни? (Йырыныз Шальтрамовлэн бӧрсяз возьматэ.) Шораз ӧй но вазьылы, йыры кур!.. Пересь таракан, улошоямтэ така, сурон бам: пумиськисько - синъёсыныз пырак, ява, шыр гольык каре ук! СИМА (табере серекъян серметсэ кутыса возьыны уг быгаты, Лилька-килькалэн чыртыяз ӟыгырскыса горыны ӧдъя.) О-ой, кӧты-сюлмы! Пуштӥрлыке ик куашка! ЛИЛЬКА-КИЛЬКА. Медаз на, медаз, Серафима! (Малпаськись тусо луэ.) Табере вожаны кутскоз? СИМА. Ки-ин? ЛИЛЬКА-КИЛЬКА. Катьырна апай. Учкемезъя ик валатски... СИМА. Шедьтӥськод ук... Визьмо кышномурт со... Верамзыя, Шальтрамовезлэсь мазэ гинэ адӟемын-чидамын, пе, ӧвӧл... (Малпаськись тусо луэ.) Серем серемен, нош сюлмы... Шонер-а лэсьтӥськом? ЛИЛЬКА-КИЛЬКА. Эн но вера... Шайтанчиклэсь номыртэм кышкасько: востэм востэмен... Востэм мурт, пе... Оломар дауртоз... Сатрапянэз дышетэмъя... СИМА. Я, соку ик коросэ выдӥськод... Адӟод, асьмея луоз! Вай на одӥг пачказэ! (Лилька-килька пачкаен сок сётэ. Сима пукон вылэ гань-гань пуксьыса, пыдъёссэ ӝӧк вылэ тыре.) О( кэй луоз, Лильки! Тани тазьы кырмом асьмеос соосыз! Матриархат! (Буш пачказэ погмаса возьматэ.) Ойдо, кырӟалом! Чаль, пуксьы вӧзам! Кырӟало. Кырӟан ӧръяськемъя тыл каньылля кысэ. Нырысетӥ ёз йылпумъяське. КЫКЕТӤ ЁЗЭЗ Нырысетӥ суред Шальтрамовъёслэн капка азьзы. Азбаразы кык капкаос пыр пыроно: огез - вашкала ӟезьы, йыг-йыг, олокыӵе но пужыосын чеберъямын. Мукетыз - лапег кенерлэн капкаез. Урамысь пудоос медам пыре шуыса, ӟазег, мукет тылобурдо утялтыны чакламын со. Кенер пыр ваньмыз адӟиське. Шуняньгуртын сыӵе кенерез тэчет шуо. Паллян палан лабрес льӧмпу. Улвайёсыз сокем уллань лэзькемын - Шальтрамовъёс доры пырыку, йырдэ амалтэк уллань мыкыртӥськод. Йыбырттӥськод кадь. Соин ик пырись муртъёс амалтэк бур пала сётсконо луо. Ӝытъёсы пукыны шуыса, лэся, пукон инты лэсьтэмын, вӧл-вӧл паськыт пуллэсь. Отын ик ӝӧк нергеез но вань. Ӝӧк сьӧрысь пукон вылын Шальтрамова керттӥськыса пуке. Ас понназ кыӵе ке гур нёжъя. Азбарысь Шальтрамов потэ. ШАЛЬТРАМОВ. Мар-о мясокомбинатэ вуттэм скалъёс кадь... ШАЛЬТРАМОВА. Скалмес заготскотэ ум нуэ ай, Иван... Скал ке вань, юрт котыр ик шулдыр... Параскалэн гидкуа котыраз толон пырай, скалэз ӧвӧл - пырак кулэм мурт бервыл кадь... ШАЛЬТРАМОВ (мылкыдтэм со. Пуксиз). Шедьтӥськод ук. Татын... ШАЛЬТРАМОВА. Кытӥыд бон сыӵе висе, Иван? Толло нуналдэ утчаськод ук. ШАЛЬТРАМОВ (кенер борды гырпумъяськыса, урам кузя учке). Кытӥыд, кытӥыд... Сюлмы висе! Валад-а? ШАЛЬТРАМОВА. Коть нош ини тонэн - соку ик пурӟиськод, калык манер вераськемед но уг луы... (Вис карыса.) Кылзы ай, Иван, нош со першалзэс марлы сыӵе шӧтэм нималлям - Лилька-Килька. ШАЛЬТРАМОВ (акыльтэм мылкыдын). Пичи мугоро, чукырна выллем, значит... ШАЛЬТРАМОВА. Ма, ужаны чырткем кадь... Учкы ай, тон понна кӧня уколзэ ӧз жаля... Сокем эн куректы ай, Иви, ваньмыз ортчоз, ваньмыз бурмоз... Егит дыръяд, учкы ай, кыӵе сэрыт бурмиськод вал... Ури-бери Сима вуэ, пичи ӟезьыетӥ уг ӝега - кенер вамен гинэ. СИМА. Уть ай, пыр уӵыпиос кадесь... (Кизэ ымдураз вуттыса, чуп каремзэ возьматэ.) Ыль-ль-ыль-ы-осы! Укыр муспотонэсь адӟиськиськоды! (Соку ик Шальтрамов пала.) Иван агай, тани! Повестка! Адью! Ӟеч луэ! Кызьы вуиз - озьы ик кӧчиз. Пиосмурт соку ик чырткем мылкыдо луэ, сэрытак азбаре пыре, отысь нош ик дыртыса потэ. Кияз мычиськон приборен. ШАЛЬТРАМОВ. Давай, пӧсь ву кулэ! ШАЛЬТРАМОВА. Нош ик мычиськод шат? Туннэ понназэ... ШАЛЬТРАМОВ. Давай, давай... Правление ӧтиллям... Калык азе... Шальтрамова азбаре ыше, пиосмурт, капчи гур гурласа, ӝӧк сьӧры интыяське. Шальтрамова нош ик потэ. Табере кружка пӧсь вуэн, Шальтрамов мычиськон ужен вырыны кутске. ШАЛЬТРАМОВА. Висьыса вылысь но... Тау карозы кожаськод-а? (Картэзлэсь номыр но куаретэмзэ уг кылы бере, малпанзэ азинтэ.) Паймисько: монэн вераськыны кылыд бурмемын, нош ать! гинэ карозы - тон дась. Шальтрамов азьло сямен ик гурласа, мылысь-кыдысь мычиське. ШАЛЬТРАМОВА. Ву ӟузид-а? Кыӵе висён шедьтӥд? ШАЛЬТРАМОВ. Мон сое ӧй... Со монэ... Тон бордысь потэ... Тонэн йырин. Шальтрамовалы пумитаз вазьыны электрикъёс люкето: тэчет сьӧрын Сатрапянэн Шайтан труба. САТРАПЯН. О-о! Шальтрамовъёс пар дыдыкъёс кадь: шулдыр ӝытэн! Тон, Иван агай, контораысьтыд милесьтым но вазьгес бертыны быгатӥськод... Бен, бен, тӥ, Иван агай, колхозной интеллигенция... Нош интеллигенция, одӥг классиклэн верамезъя, визь, йырвиын, пе, луэ... Соин ик тӥледлы вазь бертаны сьӧлык ӧвӧл... Нош калыкын кызьы шуо тӥледыз, Иван агай, тодӥськод-а? (Соиз мычиськонъяз "уг тодӥськы" шуыса йырзэ сэзъя.) Конторской крысаос, пе, тӥ! Бухгалтер но, Шайтан труба но талы пумит вазьыны ӝутскемзы вал ни - электрик кык киоссэ ӝутыса ик ымзэс пытса. САТРАПЯН. Ша, пиос! Вождэс эн поттэ! Калыклэсь дунъет сётэмзэ чиданы кулэ! ШАЙТАН ТРУБА. Дугды ни... Электрикъёс табере тэчет борды гырпумъяськыса сыло. САТРАПЯН. Та дылдалы верасько - соглаш уг луы... Хотя мон но сю процентлы ик соглаш ӧвӧл Сатрапян шуэменызы... Туала арын ӵукназэ чибинь но сазь султэ шат? Ярам... Мукетыз сярысь... Нош тон, шуисько, Шайтанчик, марлы сыӵе ним нуллӥськод? Шайтан труба... Мон, пе, Афганын гранатомётчик вал... Станковой гранатомётчик... Нош гранатомётэз душманъёс "шайтан труба" шуо, пе... ШАЙТАН ТРУБА. Ваньмыз шонер... ШАЛЬТРАМОВА (куалектэм кадь луэ). Бон марлы уд пыриське? Пиосыз кема косонэз ӧвӧл. Шайтан труба калык манер пичи ӟезьыетӥ пыре, нош Сатрапян - кенер вамен лӧбышак тэтчыса. Шальтрамова куаляк луэ. ШАЛЬТРАМОВА. Осто, Сальтрапян, милям отын вуж кыйгумы вань... Вылаз огшоры пулъёс гинэ куямын. Кӧня верасько талы... (Кузпалыз шоры возьматэ.) Сатрапянлы номыр уг луы, эшшо огпол берытскыса учке на тэтчем бервылаз. Одӥгзэ пулэз ӝутэ, мыкырскыса ик отчы учке, оломарлы отчы шултэ. Собере Шальтрамовлы ӟечъяськыса Шайтан трубаен ӵош кизэс мычо. САТРАПРЯН. Мур вылымтэ кыйгуэд, Иван агай... Милям кык тэльбуго мурда.... ШАЛЬТРАМОВ. Ӧвӧл, ӧвӧл, пиос... Соин но, лэся, куасьмиз... (Пиосмурт, таӵе куноослы луыса, мычиськонзэ ик куспетӥ кариз ни. Кузпалыз пала берытскиз.) Тон, Катьырна, мын ай, ӝӧк вылэ мар ке но потты. Адямиос ужаса берто... (Пиос ӝӧк сьӧры интыясько. Шальтрамова, ас понназ нукыртыса, азбаре пырись капкаетӥ ыше.) Та колодчае доры председателез но вуттылӥ ни: тупатъяно вал, шуисько, Петрович, самообложение, налог тыриськом, тае тупатъяны ке но шедьтоно вылэм... Бергаз, тупатъялом, пе. Татчыозь тупатъяло. САТРАПЯН (киыныз шонтыса). Соос ваньзы огкадесь... Обещалкинъёс соос. Начальство шуисько... (Шальтрамов доры матэгес пуксе, Шайтан трубалэсь моклок быдӟа мыжыкъёссэ ӝӧк вылэ лачмытак интыя.) Усто мыжык, о-о-о, Иван агай... ШАЛЬТРАМОВ. Удалтэмын... Атаезъя... САТРАПЯН. Катьырна апай ӧвӧл дыръя вераськом: уг яра тыныд, Иван агай, та шудонэн шудыны! Лилька-килька - Шайтан трубалэн. А то! ШАЛЬТРАМОВ. Мон, марым, пиос... Кытчы на мыным... Арлыд... САТРАПЯН. Озьыен, вераським? Ми куспамы уд ӝегалля? Яралоз... Табере вера: марлы Серафима алигес тон доры пыраз? ШАЛЬТРАМОВ. Кыӵе Сима? Марлы Сима? САТРАПЯН (Шайтан трубалэсь мыжыкъёссэ нош ик ӝӧк вылэ тыре). Ватӥськод? Чимаса шудыны малпад? Смотри, Иван агай! Живо-два космосэ вуттом! ШАЛЬТРАМОВ (табере зэмзэ но курданэз потӥз). Марлы космосэ? Кыӵе космосэ? Верало, верало... Тани повестка вуттӥз... Кытчы ай мон сое сэрпалтӥ? (Кисыысьтыз утчаське. Уг шедьты.) Олокытчы кариськем: Катьырналы сёти вал, лэся, - конторае правление люкало. Симаез пыртыны косӥллям... САТРАПЯН (оскыса но оскытэк). Правление шуиськод-а? Шайтанчик, асьме гуртын колхоз вань на шат? ШАЙТАН ТРУБА. Правление вань бере - озьыен, колхоз но вань. А Лилька пумысь ке верано, ми соин, Иван агай, картошка октэм бере ЗАГС-э мыныны вераським вал ни... Табере уг валаськы... Пиосмуртъёслэн вераськонзы таин куспетӥ уриське, азбарысь кияз тэркыосын Шальтрамова потэ. ШАЛЬТРАМОВА (ӝӧк котырын берганъяз). Осто, Иван, мольк! пуке: боды ньылӥд-а? Мын ай, нянь ке но потты... Пуньыос... Шальтрамов кышноезлэсь косэмзэ быдэстыны номыртэм чырткем кошке: таӵе вераськонлэсь палэнскыны ӧжыт ке но муг луиз. САТРАПЯН. Нянь понна ум бӧрдӥське ай, Катьырна апай... ШАЛЬТРАМОВА. Ма понна-о бон? САТРАПЯН. Шайтанчике понна куректӥсько: синмаськоно адямиез... (Пумозяз вераса уг вутты, азязы пуктылэм куртчон борды кутске). ШАЛЬТРАМОВА. Кубистамы сылалтэмез вань на... Ӵынатэм парсь сӥльмес но веръялэ... Али ик нянь поттоз... САТРАПЯН. Нянь понна ум бӧрдӥське, Катьырна апай.... ШАЛЬТРАМОВА. Валасько, валасько, Сальтрапян... Уг пукетӥськы ни ук... Кабак винаез басьтыны - куртчылӥське... Ӧвӧл... САТРАПЯН. Мар тон, мар тон, Катьырна апай, со сярысь пичи но ӧм малпалэ... Юнме шорысь марлы ньылонэз коттод... Кыӵе усто ӵынатӥллямды - ачиз-а? ШАЛЬТРАМОВА (вӧзазы ик пуксе). Бон со синмаськоно нылмуртэд мотор адями-а? Нимдэ но вунэтӥсько... Олексей вал кадь... Олёш? ШАЙТАН ТРУБА (юрттэт курись синъёсын эшез пала берытске). Марым, Катьырна апай... САТРАПЯН (тэчыен-вилкаен ужаны уг вунэты). Соослэн сыӵе проблема, Катьырна апай: Шайтанчик кепыра, возьдаське солэсь.... ШАЛЬТРАМОВА. Озьы-а, мискине... Удмуртлэн возьдаськон вань уго... Возьдаськон... Анайдэ но сӥлы карисько... Озьыен, сыӵе шудтэме кылид... (Йыраз маке шукке, лэся, чиньызэ ымдураз ляке.) Тӥ куртче, куртче, пиосы, ужам бере кӧс нянь но ческыт.. Тазьы кар, ятэ... Шальтрамов потэ. Кияз нянь турижез вань, кунулаз - ӝыны черык пальккаськисез. ШАЛЬТРАМОВА. Осто, Иван, ӧвӧл ни кожасько вал... ШАЛЬТРАМОВ. Сӥлы адямиосыз кӧс пуньыен алдаса лэзёд шат?.. САТРАПЯН (соку ик мылкыдыз бурдъяське). Сабырлы картэд, Катьырна апай... Шайтанчиклы маке вераны ӧдъяськод вал. ШАЛЬТРАМОВА. Э-э, вунэтӥ... Огшорылэсь но огшоры: ӝытазе мумидлэсь атассэ ванды, кукъёссэ миндэр улад пон. Ӵуказеяз ик атас кадь чырткем луод! Чай пукто ай... Тӥ монтэк но... (Кошке). Шальтрамов черык борды кутске. САТРАПЯН. Тон, Иван агай, мыжыкъёс понна вождэ эн потты... ШАЛЬТРАМОВ. Кыӵе мыжыкъёс, кыӵе мыжыкъёс, пиос... Мон ваньзэ валасько... Кытысь тодӥды, Серафима вуылӥз шуыса? ШАЙТАН ТРУБА. Марым, ми Шерлок Холмс кадесь, Иван агай... Логика... Мар малпаськод - ваньзэ тодӥськом... САТРАПЯН. Я-я... Шедиз ук Шерлок Холмс. Табере ми, Иван агай, соос борды лякиськем веник куар кадесь... Укыр вожмы потӥз... Туннэ... О-о, Шайтанчик? Лыдпус одӥг-одӥг мед луоз шуыса, Иван агай, тани таиныд... Ӵошкатоно... (Йырыныз черык шоры возьматэ). Азбар капка усьтӥське, дыртыса берен Шальтрамова пыре. ШАЛЬТРАМОВА. Соосты лыкто... Симаен Лилька... Сопал урамтӥ, туж дыртыса. Иван, тыныд укол пуктозы, дыр... Уксёдэ тырыны эн вунэты... Пунэмен улыны умой ӧвӧл... (Пиослы.) Милям, гыдыкъёсы, куректон кабен быдӟа: Иванмылы чер йӧтэм, укол пуктыло... Пыд улысь потэ, пыд улысь потэ адӟонэд... Пиос соку ик ӝӧк сьӧрысь султӥзы. САТРАПЯН.Айда, Шайтанчик! Нош таин туйылозы! (Аракы шоры возьматэ). Тау, Катьырна апай! Ми шултӥм! Озьыен, атас кукъёсыз шуиськод? (Шайтан трубалы.) Пеляд пон, шунянь! ШАЛЬТРАМОВА (паймемъяське). Марлы сокем курдазы? Кышномурт ӝӧк вылысь сиён-юон котыръёсыз берен дораз пыртыны шуыса бичаны кутскиз. Воргорон табере номыртэм чырткем кариськиз: пыдысьтыз сапег кунчиоссэ пиджак саесэныз чилямоназ ӵушылыны ӧдъяз. ШАЛЬТРАМОВА. И-иван? Мар дауртӥськод? ШАЛЬТРАМОВ. Кызьы мар? Адямиос лыкто, лэся... Али верад ук... ШАЛЬТРАМОВА. Висись-а, ӧвӧл-а тон? Алдай мон... Нокыӵе Симаед но, Лилькаед но уз ву... ШАЛЬТРАМОВ (ӟудэ). Марлы? Мынам? ШАЛЬТРАМОВА. Ӧйтӧд... (Вис карыса.) Олокыӵе ик... (Тазэ пичи ӟезьыетӥ кошкись Сатрапянлы но Шайтан трубалы вера, лэся.) Нуназе люгытэн. Урамтӥ важной ортчисезлы... Соин ик амал шедьтӥ... ШАЛЬТРАМОВ (табере зэмзэ но шальтрам мылкыдын). Нош мон малпасько вал... (Пукон вылэ лэзьке). ШАЛЬТРАМОВА. Али гинэ ошаклы тупаськод вал. Укол пуктэмзэс возьмаськод шат? Айда юртты... Мар ке но верало... ШАЛЬТРАМОВА. Мар? ШАЛЬТРАМОВА. Туннэ уин вӧтасько: ӵапак бакча берысьтымы уйпу улын ӟыгыръяськиськом кадь... Тодӥськод на-а, егит дыръяд? Ма, одӥг пол ке но ӟыгырты на ук... ШАЛЬТРАМОВ. Котырысьтыд кезьыт колодчаысь кадь... (Кузпалыз шоры паймем синъёсын учке.) Тон мар-о ай сыӵе туннэ? ШАЛЬТРАМОВА. Кыӵе? ШАЛЬТРАМОВ. Ма, тани... Шаль кышет керттэмед? ШАЛЬТРАМОВА. Мед кельшо шуыса... ШАЛЬТРАМОВ (воксё дэймем синъёсын). Тон мар-о? Пинал визь? ШАЛЬТРАМОВА (Иванзэ пал суйыныз кунултэ, ӵошен скамья вылэ пуксё). Марлы пинал визь? Пересьмыны вазь на, Иви... Ой, кыӵе кырӟаме потэ! Ойдо! Шальтрамова кырӟан гур мытэ. Нырысь-валысь Шальтрамов эзэр-безэргес кариськиз вал. ШАЛЬТРАМОВ. Дугды ай, мар шуозы адямиос? Кыкнамы? (Кузпалыз шоры учке, собере итӥське. Усто пӧрмыто). ШАЛЬТРАМОВА. Иви, марлы пенжактэ но уд куштӥськы? (Вӧзаз эшшо но матэгес кариське.) Учкы ай, егит дыръяд мар дауртӥськод вал? Кыӵе сюлмаськыса пельпумам... (Вераса уг вутты, Шальтрамов шуак султэ). ШАЛЬТРАМОВ. Тон мар тазьы серем кариськод? Адямилы, значит, мыным больничной сёто вал... Сомында укол пуктӥзы... Чидасько... ШАЛЬТРАМОВА. Серем карыны уг малпаськы тонэ, Иван... Сюлмы оломар бугырскиз. (Черыксэ кунулаз кутэ.) Одӥгзэ юод шат? Оло, висемед но буйгалоз? ШАЛЬТРАМОВА. Уг. (Дыртыса ортче, колодча бервыл доры дугдэ.) Люкетэ... ШАЛЬТРАМОВА (соку ик пересь адӟиськыны кутске, ӧжытак губырске но кадь). Озьы... Озьы... Мон табере люкетӥсько... Вань ултозям чидай... (Викыштэ). ШАЛЬТРАМОВ. Бырод ук тонэн, колодча сярысь верасько, лэся... Эмеспи бертӥз ке, одно ик ӵокталом... ШАЛЬТРАМОВА (ӝужась толэзь кадь. Пальпотэ.) Нош мон... Нош мон кожам вал... Ме, Иви, одӥгзэ ке но... ШАЛЬТРАМОВ. Уг шуи! Туннэ правление, пе... Отын... ШАЛЬТРАМОВА. Эн ветлы со правленияд, Иви... Арлыд но вань... Эн ветлы. ШАЛЬТРАМОВ (хром сапегъёсыныз нош ик ӟукыртыса ортче, пыд улаз шедем изэз чырткемак ӵыжыны быгатэ). Мыноно! Шальтрамов вань ултозяз заседаниосын пукиз? Пукиз! Али но! Баланс! Соку - порядок! ШАЛЬТРАМОВА. Мынод, мынод... Кытчы кариськод... Марымзэ сиыны дышем... (Шуак луэ, валатске.) Ой, Иви, вождэ эн вай, оломар но... Тон сярысь ӧвӧл... Вуоно пенсиме басьтӥ ке, Ивие, со эмъюмъёссэс басьтом... Тазалыкед понна сюлмаськисько... Тазалык - байлык... Ой, байлыклэсь но байлык... Нош али... ШАЛЬТРАМОВ (долкам тусбуё сылэ). Мар? ШАЛЬТРАМОВА. Нош али... (Пиосмуртэз кунултэ.) Ма, ойдо пырим. Липеттэм ӟольгыриос-а асьмеос? Маке но верало... Шальтрамов уката абдрамын. Амалтэк кузпалыз сьӧры вамыштэ. Крезьгур кужмоя, тыл кысэ. КЫКЕТӤ СУРЕД яке ЭПИЛОГ Отын ик. Ӵукна. Сое атасъёслэн чоръямзыя валаськод. Урам кузя, авансценаетӥ, Серафимаен Лилька-килька дыртыса вамышъяло. СИМА. Собере? ЛИЛЬКА-КИЛЬКА. Вуи медпункт доры... Дас одӥг часын. Учкисько - сылэ. СИМА (чабкиське). Осто шу?! Пичи ӟезьы вадьсысен дугдо. ЛИЛЬКА-КИЛЬКА. Осто но, козма но шуод: корказь сьӧрысь кыкназы но пото... СИМА. Асьмелэнъёс? ЛИЛЬКА-КИЛЬКА. Бе-эн... (Котырак утчаське, ӵемысь Шальтрамовъёслэн корказы пала учкылэ.) Пыр вылэм... Тодоно вал... Таӵе вазь умой ӧвӧл... СИМА. Отӥяз мар? ЛИЛЬКА-КИЛЬКА. Ой, Сима, сюлмы шӧдэ, юнме тазьы дауртӥм... Кышкасько... СИМА. Мар юнме, мар юнме... Поездэд - тю-тю... ЛИЛЬКА-КИЛЬКА. Кыкназы но Иван агаез кунултӥзы, усьтыр-табыр валтыса кошкизы... СИМА (табере малпаськись тусо луэ). Да-а... Татын, Лильки, криминал медаз лу вал... ЛИЛЬКА-КИЛЬКА. Мон но шуисько... Быдэс уез изьытэк потӥ... Тон доры кенешыны пырай - бертэмын ӧй на вал... Олокытӥ ветлӥськод... СИМА. Райпоын... День кооператора... Шашлык сиыны нуллӥзы... ЛИЛЬКА-КИЛЬКА (йырыныз Шальтрамовлэн юртэз пала шонтэ). Оло, юалом, озьы но, пӧй, озьы... Кыӵе тазалыкез? СИМА. Ойдо ай вамышъялом... Соку ик коросэ уг яра... Кошко. Соос бӧрсьы Сатрапянэн Шайтан труба вуо. ШАЙТАН ТРУБА. Сюлэм шуг, соин сайкатӥ... Быдэс уй малпаськыса потӥ: мар луоз табере? САТРАПЯН. Номыр но... "Губа" солы... Гауптвахта, иське.... Шуняньгуртысь гауптвахта... ШАЙТАН ТРУБА. Котьмар ке но... Тазалыкез... САТРАПЯН. Бухгалтерлэн-а? Шуисько ук: бульдозер кароно сое... ШАЙТАН ТРУБА. Котьмар ке но... Жаль... Асьме гурт воргорон... САТРАПЯН. Нош со Лилькадэ ӟыгыръякуз тонэ жаляз-а? Вот угось... (Вис каре.) Маке ваньмыз та аслым но... Нёшто асьме нылъёс сыӵеозь вуиллям ни: пересь воргоронэн... А, Шайтанчик? ШАЙТАН ТРУБА. Дугды ни.. Вал ке, вал... Табере уд берыкты... Поттоно адямиез... (Нылъёслэн бӧрсязы йырыныз шонтэ.) Кошкизы - милицие жингыртозы. Ойдо, Лёха, ойдо... Мынам, тодӥськод-а, кудбыдӟа йыркуре со бухгалтерлы? САТРАПЯН. Мар пайдаез со йыркуредлэн? Тани-тани син куспысьтымы нырмес ишкалтозы... ШАЙТАН ТРУБА. Уз ишкалтэ ай... САТРАПЯН (эшез шоры паймыса учке). Нош тон кытысь тодӥськод? ШАЙТАН ТРУБА. Уг тодӥськы, Лёха, но шӧдӥсько... Ӧй ке но шӧдысал, со бухгалтерез толон тани таосын... (Мыжыкъёссэ возьматэ.) Ойдо, поттом? Вырӟыса уг вутто, азбарысь Шальтрамова потэ. Пиос номыртэм шаплы ватскон инты шедьто. ШАЛЬТРАМОВА. Эх, мискине, мискине... Правление, пе, кошкисько... Сыӵе-сыӵе чеберъяськыса... Одеколонэн пазяськиз на... Аслазэз уг яра - эмеспилэнэныз... Ой, мар даур та, мар даур... Кинэ но чидатэк ӧвӧл... (Котырске, тэчет вамен ураме но учке, ватскем электрикъёсыз олокызьы уг адӟы.) Быдэс уй кенэм быдӟа но ӧй изьы: весь вуоз, дыр, кожасько, капка усьтэм куараез возьмасько... Егит дыръяз озьы калы быре вал... Нош татын... Эк, мискинь, мискинь... Шудон каризы ук тонэ... Шудон... Соку ик валатски... Нош тон лӧптӥд: правление, пе, мынӥсько... (Вожзэ поттыса.) Албасты! Ожалтӥзы, дыр, ай со электрикъёсыд ик... Иван, шуисько! ШАЛЬТРАМОВЛЭН КУАРАЕЗ. О-о... Мон татын... Татын... ШАЛЬТРАМОВА. Осто, кытысь ке... Музъем пыдсысь кадь куараез... Ишанэз адӟод, ява... Пырало ай... Сюсьтыл пукто... Кошке. Пиос соку ик ватскем интыысьтызы пото. Пичи ӟезьыез усьто, колодча вадьсы мыкырско. ШАЙТАН ТРУБА. Я-я, Иван агай... Чида, чида... Поттом... Шальтрамовлэн тышкаськемез кылӥське. САТРАПЯН (гуэ, Шальтрамовлы). Ымдэ пытсамы вал ук, Иван агай... Шальтрамов нош ик жоб кылъёсын куашетэ. ШАЙТАН ТРУБА. Я-я... Поттом, поттом... Шок-пуль луытозязы ик выро. Воргоронлэн ӝуштэмез, тышкаськемез кылӥське. САТРАПЯН. Тон, Иван агай, дугды таргетэмысь... Кутом но кошком... Пук лумбыт ӵоже... Тазьы вераськом: ми сярысь нокинлы уд поттылӥськы, ми но егит ныл дортӥ гожеръямдэ - молчок! Контракт! Яралоз? Кызьы уз яра, одно яралоз! Смотри, Шуняньгуртын тазьы луэмдэ чипыен парсьпи горыны кутскозы... Айда, Шайтанчик, воргоронъёсыз люкалом! ШАЛЬТРАМОВЛЭН КУАРАЕЗ. Тазьы кароно... Али кык юбо лэсьтӥськоды... Колодчалы музэн... Пуктӥськоды, бакча колодча берганэз ваиськоды, соин монэ татысь ӝутӥськоды. Валамон? САТРАПЯН, ШАЙТАН ТРУБА (ӵош). Яралоз, яралоз, Иван агай! Али ик! Пиос чырткем карисько, азбаре пырись капка шоры ыбисько - пумитазы Шальтрамова потэ. САТРАПЯН. Чырткем, Катьырна апай, марым... Иван агай колодчаяды... Усем-а, мар- а... Поттоно... Жаль... ШАЛЬТРАМОВА (пиос шоры оскытэкгес учке, собере чылкак куалектэ). Осто шу, нош мон пӧртмаське кожасько... Озьыен, колодчае... (Колодча доры матэктэ.) Иван? Улэп на-а? Осто, мискине, кызьы таӵе мыскылэ сюрид? Э-э, шудтэме, шудтэме... Нош мон... Нош мон... (Пыдес вылысьтыз султыса чабкиське гинэ.) Я-я, чида, нуныкае, чида... Вань бускельёсыз, иськавынъёсыз люкало. Али ик... (Музъем улысь Шальтрамовлэн маке верамез кылӥське). САТРАПЯН. Марым, Катьырна апай, люкано ӧвӧл калыкез... Ачид тодӥськод, озьы- тазьы пӧллёзы... Ярато ук асьмелэн таӵеез... ШАЛЬТРАМОВА. Озьы, озьы, Сальтрапян... Нош мон тон сярысь воксё... Мар-о каром, пиосы? ШАЙТАН ТРУБА. Ойдолэ ни! Катьырна апай, возьматод мар кулэ! САТРАПЯН. Дышетэмед иназ, Катьырна апай: атас кукъёсын ӵош кӧлэм! Тӥни кыӵе чырткем! Куиньназы ик азбаре ышо. Нош авансценалэн мукет палысьтыз Симаен Лилька-килька пото. ЛИЛЬКА-КИЛЬКА. Тонэн йырин! Малпаськом вал ни загсэ... Табере... (Викыштэ). СИМА (пичи ӟезьы доры вуыса). Пыралом шат? Оло нош, соргетыса кӧлэ... ШАЛЬТРАМОВЛЭН КУАРАЕЗ. Татын мон, нылъёс, татын... Нылъёс куалекто. СИМА. Кылӥд-а? ЛИЛЬКА-КИЛЬКА. Нош... Ишан ке? СИМА. Ишан, ишан... Асьмелэсь вераськеммес кылыса вазиськиз... Эн куректы - улэп! (Сэрытак пичи ӟезьыез усьтэ, пыре.) Иван агай, кытын тон? (Котыр утчаське). ШАЛЬТРАМОВЛЭН КУАРАЕЗ. Татын мон, татын, Серафима Николаевна... Туж курисько: Катьырналы эн поттылэ вал... Кыкназы но нылъёс колодча вадьсы мыкырско. ЛИЛЬКА-КИЛЬКА (дэймем куараен). Иван агай, мар утчаськод отысь? Пиосмуртлэсь валэктэмзэ кылзыны уг кылды - капкатӥ Шальтрамова потэ. ШАЛЬТРАМОВА. Ой, нылъёсы, мар куректонэз адӟоно луэ! Мар куректонэз! Правление, пе, кошкисько... Толон ӝыт... Уг лэзиськы вал... Ваменскиз! Табере - отын... Юэмез но ӧвӧл кадь... Оло нош... (Котырак учке, чаклаське, нылъёс шоры юась синъёсын учке.) Оло нош, дыдыосы, мон тазьы малпасько, сектазы шат меда: юисьтэм муртлы трос-а кулэ? Висисько шуэ на? Озьы-а? ШАЛЬТРАМОВЛЭН КУАРАЕЗ. Самой озьы, Катьырна... Юбилей понна... ШАЛЬТРАМОВА. Мар, мар?.. (Нылъёслы.) Ярам ай, улэп... Поттоно вал... Сальтрапянлэн Шайтанэныз ӟигарзы уггес тырмы... Азбарын юбо дасяло... СИМАЕН ЛИЛЬКА-КИЛЬКА (ӵош). Татын шат соос? Азбарысь электрикъёс пото. Шайтан трубаез адӟыса, Лилька-килька со доры омырскем вал - Симаез ӝегатэ. СИМА. Дугды! (Электрикъёслы.) О-о, шуняньгурт пиос, ӵукназэ изьыны уг валало: бизнес лэсьто. САТРАПЯН. Дугды ай, Симуля... Нырысь адямиез поттом... Собере кенешом, ятэ... Иван агайлэн бертыны ӟигарыз тырмымтэ ни... Мын, Шайтанчик, юбо потты! Тон, Катьырна апай, возьматы! Лопатка кулэ на! Ачиз со дыре юбо пуктыны шуыса гу гудыны кутске, Шальтрамоваен Шайтан труба, Лилька-килька соку ик азбар капкаетӥ ышо. СИМА (Сатрапян доры матэктыса). Кышкаськод-а? САТРАПЯН (гудӥськонзэ ик куспетӥ карыса). Марлэсь? СИМА. Нош куашказ ке? САТРАПЯН (куаразэ кужмо карыса). Уз! О-о, Иван агай! (Отысь номыр но уг кылӥськы.) СИМА, Йырпыдэс ик вань тон. Ӧй малпа вал, вожанэд собыдӟа шуыса... САТРАПЯН. Ха, пиосмурт-а, ӧвӧл-а мон? Табере мон но валатски ни... Пумозяз вераса уг вутты - Шайтан труба, Шальтрамова, Лилька-килька пото. Юбоез кыско. ШАЙТАН ТРУБА. Пӧрмоз? САТРАПЯН. Конешно! Давай, Сим, тани татчы кутскы. Нош тон, Шайтанчик, таӵе ик юбо потты на. Тӥр но эн вунэтэ. Мынэ! Шальтрамоваен Шайтан труба ышо. Лилька-килька сьӧрысьтызы вамыш но уг кыльы. САТРАПЯН (Лилькалэн бӧрсяз серем пыр). Хы, таид Шайтанчикез борды ыжлюгы кадь... СИМА. Яратэ... Памперсъёс, улкутэтъёс но дасям ни... САТРАПЯН (нош ик гудӥськыны кутске). Шайтанчиклы-а? СИМА. Паймисько тыныд: яке шузияськиськод, яке... САТРАПЯН. Яке подшипникед шальтрамын... Озьы-а? (Сималэсь гудӥськемысь дугдэмзэ адӟыса.) Я-я, эн сылы! Давай! Так вот, подшипник сярысь... Та улонын, Симуля, шальтрам подшипникен улыны каньылгес... СИМА. Соин ик юиськод? САТРАПЯН. Собере мар каром на? Йыр вань, киос вань, кужым вань -кытчы каром соосыз? (Колодчае.) О-о, Иван агай?.. Я-я, тырмоз йыркуръяськыны. Ачид янгыш, Шайтанчиклэсь вожзэ поттӥд! Азбаре пыремъёс нош ик пото. Шайтан труба соку ик Сима киысь лопатаез басьтыса гудыны кутске. САТРАПЯН. Тон, Шайтанчик, мын ай Лилькаеныд ик колодча берганэз потты. Бакчаысьтыз Катьырна апай возьматоз... Катьырна апай! Берло! Шальтрамова колодча дурын Шальтрамовеныз вераське. ШАЛЬТРАМОВА. Эк, мискине тон, мискине... Кызьы тазьы кемдӥд, Иван... Трос-а, мар-а юид? Усьыкуд шуккиськид, дыр, ук... САТРАПЯН. Я,я... Берло юалляськод, Катьырна апай. Сэрыт! Куинь кузя нош ик кошко. Сатрапян Симаез ӟыгыртыны турттэ. СИМА. Дугды ай, Сатряпянчике... Нырысь вера... (Колодча пала возьматэ). САТРАПЯН (киыныз шонтыса). Уз адӟы... СИМА. Вуттод ай.. (Колодчаысь Иван агай медаз кылы шуыса, палэнэгес кариське.) Мар дауртӥды соин? САТРАПЯН (бордысьтыз палэнскыса). Марлы ми? СИМА. Кин-о собере? Тӥляд ужды... САТРАПЯН (киоссэ выллань ӝутыса, - сётскисько, пе). Милям, милям. Асьтэос янгыш. Тодӥськод-а, кыӵе жаль потыны кутскиз Шайтанчике? Медпунктын Лилька-кильказэ тани таин адӟемез бере? (Колодча пала йырыныз шонтэ.) Тодӥськод-а, Алёхае макем начармиз? Кыл но уг поттылы! (Туж зол куараен.) Виё, пе, мон со пересь тараканэз! Ачим ик курданы кутски: йыруж лэсьтӥз ке? Толон лумбыт сьӧрады эскериськыса ветлӥм... Медпункт дорысен тани тае пумитам. Шайтанчике ыльскын кесяны дась вал... СИМА (лулске). Тӥни кызьы... САТРАПЯН. Соку ик тодам лыктӥз тани та колодча... Гозы шедьтӥм, керттылӥм, ымзэ пытсам... Ӧз но куаньгеты - гауптвахта! Али тани моторъяське ни! СИМА (эшшо огпол лулске на). Озьы ик малпай... Шудо адями Лилька-килька... САТРАПЯН (нылмурт доры матэгес кариськыса). Мон но, Симуля, вожаны Шайтанчиклэсь пӧртэм ӧвӧл... СИМА (исам карыса). Зэм шу! САТРАПЯН. Зэм, зэм! СИМА. Зэм шу? Зэм шу? Исаськыса Сима юбо котыртӥ берга, Сатрапян - сьӧраз. Кутыны уг быгаты. СИМА. Кутӥд ке - мар ке но верало! Кутӥд ке - мар ке но верало! Сатрапян кутыны уг вуы - азбарысь нош пото Шальтрамова, Шайтан труба, Лилька- килька. ШАЙТАН ТРУБА. Тӥ мар? САТРАПЯН (тазьы адӟемысьтызы шуак луэ, киоссэ кытчы карыны уг вала). Номыр но... ШАЙТАН ТРУБА. Давай, давай! (Сималэсь гузэ муромытыны турттэ на.) Пуктӥм! Нокин номыр уг куареты, юбоез пукто. ШАЙТАН ТРУБА (Сатрапянлы). Мынэ бергатонэз поттэ! Катьырна апай! Возьматы! Сатрапян, Сима, Шальтрамова капкатӥ ышо. Мынон куспетӥзы Сима Сатрапян борды ачиз кунулске. ЛИЛЬКА-КИЛЬКА (колодча вадьсы мыкырске). Иван агай, чида ни ойдо, чида... Табере уколъёс уг ни пуктылы... (Мыжыкеныз Шайтан труба шоры возьматэ.) Тани таосын йырин со! ШАЙТАН ТРУБА. Тырмоз! Гауптвахтае пуктэм муртэн уг верасько! ЛИЛЬКА-КИЛЬКА. Нош тонэ отчы куштӥзы ке? ШАЙТАН ТРУБА. Мыным мукет нылъёс кулэ ӧвӧл! ЛИЛЬКА-КИЛЬКА (вӧзаз султэ но пельпум бордаз ӟыгырске). Нокин но! Нокин но-а? ШАЙТАН ТРУБА. Верай! Точка! ЛИЛЬКА-КИЛЬКА. Нош марлы уд чупаськы? ШАЙТАН ТРУБА. Ма... Тӥни... (Йырыныз колодча пала возьматэ.) Собере тӥни на... (Киыныз азбар пала шонтэ). ЛИЛЬКА-КИЛЬКА (азьвыл сямен ик ӟыгырскемын). Адӟемысьтызы кепыраськод? (Лулске, бордысьтыз лэзьке.) Шуняньёс ик вань... Шайтан труба пумитаз вазьыса уг вутты, азбарысь Сима, Сатрапян, Шальтрамова пото. Табере колодча бергатонэн. ШАЙТАН ТРУБА. Давай, Алёха, кырмиськы! Давай, нылъёс, сюй куялэ, лёгалэ! Эшшо юбо пукто. Отчы бергатонэз юнмато. ШАЛЬТРАМОВА. Чида ни, чида, нуные... Чидан чигымтэ... ШАЙТАН ТРУБА. Али, Иван агай, кускытӥд гозы пумын керттӥськы, кырмиськы! (Сатрапянлы.) Давай, Алёха, асьмеос пӧзьтӥм та ӝукез, асьмеос ик сиём... САТРАПЯН. Озьы, озьы, Шайтанчике... ШАЙТАН ТРУБА (ужамысь шуак дугдэ). Стоп! Кыӵе мон тыныд Шайтанчик? Нимы ӧвӧл шат? Тырмоз! Куспазы ури-бери Сима пыриське. СИМА. Я, я, берло! Адямиез поттоно! ЛИЛЬКА-КИЛЬКА (вӧзазы чырткемак вуэ). Лёшик, нуные, я-я, тырмоз... Монэ но "килька" каро... Ойдо! Ваньзы колодча бергатон борды кырмисько, сое бергато. Шальтрамова котыртӥзы бызьылэ, мар ке но вера, сое кылзӥсь ӧвӧл. Шальтрамовез потто: солэн кильтро дӥсез номыртэм йӧспӧртэм адӟиське, ачиз наштаськемын. СИМА. Ой, Иван агай, Иван агай... (Бордысьтыз сюен наштаськемзэ сузясько, пе). САТРАПЯН. Сима! Чаль! ШАЛЬТРАМОВА (Иванэз котыртӥ берга. Сима сямен ик маке но сюлмаськемзэ возьматэ). Осто, Сальтрапян, вожаськод-а, шай-а? САТРАПЯН. Кыӵе мон Сатрапян? Алёша мынам нимы, Катьырна апай... Эшшо верало на: тон тадэ олокыӵе но правлениосы эн лэзья ни... Талэсь но мултэссэ сектаны шедьтозы... Валад? Нош али Шайтан... фу, вождэ эн потты, Лёшик, кошким! ЛИЛЬКА-КИЛЬКА (паймем синъёсын). Кытчы? Нош милемыз кин келялоз? СИМА (эшсэ кунултэ, сьӧраз кыскыса сямен валтэ). Ойдо, Лиля, уд-а адӟиськы: шуняньгурт пиос ук соос, нылъёсыз но келяны ӟигартэмесь! Ойдо кырӟалом! Шудонысь бертӥськом мед кожалозы шуняньгуртъёс. Гур мыто. Кырӟамзылы синмаськыса, лэся, Шуняньгуртысь ӵукна чоръясь атасъёс но чус карисько. Электрикъёс, тае адӟыса, чырткемесь луо. ШАЙТАН ТРУБА (Сатрапян шоры учке, йырыныз кошкем нылъёслэн бӧрсязы шонтэ). Шуласьком? САТРАПЯН. Шуласьком! Шайтан труба пичи ӟезьыетӥ калык манер потэ. Сатрапян - тэчет вамен чырткемак тэтче. Нылъёс сьӧры дырто. Шальтрамовъёс кыкназы кылё. ШАЛЬТРАМОВА (лулске). Эк шу... Котькуд сяська ас вакытаз... ШАЛЬТРАМОВ (янгыше усем мурт музэн). Кыӵе сяська? ШАЛЬТРАМОВА. Егит дыр сяська, Иванэ... Егит дыр... Нош тон мынам... Соослэн сяська пӧлазы пырыны малпамед... (Картэз шоры мыр-мыр учке.) Вера: вань-а, ӧвӧл- а Инмар? ШАЛЬТРАМОВ. Мар-мар? ШАЛЬТРАМОВА. Вань бере вань, Иван Шальтрамов! Кылӥз со монэ! Дурбасьтӥз! (Палэнэгес кариське, картсэ таӵе бакча сульдэр каден адӟыса чабкиське.) И-иван! Осто, бырод тонэн! Кинлы кельшиськод? Ойдо! ШАЛЬТРАМОВ. Кытчы? ШАЛЬТРАМОВА. Ма, кытчы, пе... Дорамы... Мар ке но верало... Вай пенжактэ пельпум вылам... Крезьгур кужмоя. Шальтрамовъёс азбаразы ышо. Катанчи. 1 Андрей Вахрушев Кылльыны пилем вылын, эх, кыӵе усто Зор Мар юнме эчешод та дыре: Устогес меда зор яке пӧсь? Ӧтисько тӥледыз мон кыре, Вуостӥ калгыны котмытозь... Шыпытэсь - писпуос, урамъёс, Турын-куар гадь тыраз ик шока. Нош малы кунэрес - ымныръёс? Зор улын шат мылкыд но ӝока? Нош мыным туннэ кыӵе капчи Уяны малпанам - зорыку! Сюлэмын вордӥське кадь ачиз Кыӵе ке чеберлэсь чебер гур. Мон тыныд гинэ, юг мадёсэ, Сӥзисько та йӧнтэм кылбурме. Зорен ӵош сюлэмысь ватосэ Пертчиське но усьтэ лулгурме. Мар юнме эчешод та дыре: Устогес меда зор яке пӧсь? Ӧтисько тӥледыз мон кыре, Вуостӥ калгыны котмытозь... Ваёбыжъёс Шумпотон пиштэ синмад - со сярысь ай мадь! Ваизы ваёбыжъёс - уз но кошке кадь! Вуизы бурдъёсазы - Учкы! - гужемез. Вазь ӵукна полысазы Льӧль ӟардӥсь инмез. Чилектэм выллем лобо - жичак! - ортчизы... Я кынмо, я лопырско, асьсэос - ӟызы. Лобӟоно вал, эх, аслым, Кыньыса синме, - Егитэсь, шаплыосын, - Чагыр-лыз инме! Сяськаос - возь вылъёсын, вай бордын но вань! Вуизы ваёбыжъёс - уз но кошке кадь! Дорамы, иське, гужем Нош ик куноя. Бусыез шунды пыже, Тӧдь пилем - уя... Тюрагай Тулкымзэ шунды пельтӥз ук шульыкмем бусыосы - Топольёс бабыльскизы кадь юг-азвесь угыосын, Ярдуре, шунды шоры ик, ӵуж синзэ усьтӥз вукуар - Шат уг вала со: вуоз на - ӵушкаса - пужмер-акар... Тюрагай кырӟа, кисьтэ со пыд азяз инбам гурзэ, Сюлэмам шыпыт шедьтэ ни тулыс гур лякыт ӧрзэ. Та ӧре герӟаськемын кадь алиез но вань улон, Нош улон - сыӵе кузьыт но, туж чебер но, паймымон... Ин укно Вадьсамы пилемъёс весь гылӟо кытчы ке, Сюрессы мертантэм кыдёке кыстӥське. Секытэсь пилемъёс, инбамез ватыса, Уяса кадь кошко, сьӧразы валтыса. Но тани сьӧд инэз портонэн кадь пася Мальдытӥсь шунды си - юыгтсэ со пазя! Усьтӥське ин укно - тулкыме выйтылэ Возьёсты, лудъёсты, нюлэсо вырйылэз. Сюлэме но пыре со сайкыт омырен, Лул-сюлэм пачыла - вазиське: "Инмаре!.." Куакагырлы Чидатэк вите гужем. Пӧсь шунды. Лысву. Сяськаысь выляз выже Дуринчи-тӧлпу. Бусыын бубылиос Лыз-горд-ӵуж экто. Шур кожын шакаляос Уяло-чильдо. Нош таиз чагыр кесэг Шат инмысь усем? - Воректэ лушкем, кысэ - Турынэ ышем... Но шедьтом ай, шып кылын Жингыртӥз ке со, Вашкала выжыкылэн Вазиськоз мусо. Я, кинлы жингыраськод Чингыли гурдэ? - Милемлы, дыр, висъяськод Пичильтык дырдэ... Чидатэк вите гужем. Пӧсь шунды. Лысву. Эн турна инмысь усем Гырлыез, кусо! Унябейёс Возь вылын, мамык выллем, пилемъёс кыллё, Тӧл шорын вӧлдӥськыса, лушкемен пӧллё. Воринъясь шундыпиос - витьымтэ лымы, - Жаль, вакчи уй-даурзы - улыны-вылны. Капчиесь гинэ соос - лобӟозы инме, Шокыштӥд ке шоразы... Эн пелля юнме! Кылльыны пилем вылын, эх, кыӵе усто, - Ма, ачиз вазе кадь со: "Пуксьы - лобыштом!" Мед кема кыстӥськысал та майбыр вакыт - Лымыясь но пелляськись, шундыё, сайкыт! Ӟуч кылысь берыктӥз Сергей Матвеев Шаермылэн историысьтыз Владимир Чернов Тазьы кыда андан Уралысь одӥгез бадӟым предприятие - куинь ордено Ижсталь огазеяськон 240 ар сюресэз ортчиз ни. Заводэн ӵош Ижевск город но кылдӥз, будӥз, юнмаз. Та дыр ӵоже бадӟым сюрес ортчемын. Вольыт ӧй вал со. 1872 арын татчы тигель гуръёс пуктӥзы, Россиын нырысьсэ тигель андан тросэн поттыны кутскизы. Солэн ӟечлыкез мукет кунъёсынлэсь вылӥынгес вал. Та андан Россиысь ваньмаз пыӵал тӥрлык лэсьтон заводъёсы мынӥз. 1877 арын тулыспалтолэзе Ижын нырысетӥ мартен гур пуктӥзы. Солы заводлэн валтӥсь корпусэз вӧзысь мастерское инты сётӥзы. Мартэн гур пуктонэн кивалтӥз инженер Василий Яковлевич Вергер. Гур дорын ужаны устоосызлы рабочийёслы Ефим Королёвлы но Александр Потопеевлы оскемын вал. Ужамзэс ялан чакласа возиз бадӟым опытэн мастер Савелий Гордеевич Селюков. Та гурын огдыре 250-300 пуд андан ӵыжалляз. Эстӥськизы пуэн. Андан ӵыжатон татын мукет интыосынлэсь ӟечгес радъямын вал. Кортэз мартенэ кисьтэмзылэсь азьло ик нимысьтыз гурын ӟырдатъязы. Ӵыжатэм анданэз но али сямен бадӟым кобые ӧз кисьталэ. Со нимысьтыз интыосы васькылӥз. Озьы кылдылӥзы 17 пудъем слитокъёс. 1879 арын заводысь кивалтӥсьёс пусйизы: "Андан туж усто, со пыӵал тӥрлыклэсь вань ёзъёссэ дасяны мыноз. Мартенамы ӵыжатэм кортмы кунгож сьӧрысь ваемезлэсь умой". Россилы андан пумен трос но трос кулэ луиз. Соин ик 1893 арын кыкетӥзэ мартен гур пуктӥзы. Таяз 500 пуд андан ӵыжатӥзы ини. Собере, 1902 арын, заводын андан ӵыжатон цех ӝутскиз. Та удысын синмаськымон тыршизы кибашлыос И. Петров, П. Ульянов, Г. Лыков. Удмурт пи Максим Иванович Никифоров но соос вӧзын дышетскиз. Бератаз со тыло профессиен усто мастер луиз. Нырысетӥ мировой война дыръя Иж заводэ эшшо одӥг мартен гур пуктӥзы на. Но граждан ож дыръя тӧдьыос гуръёсты тӥяса-куашкатыса кельтӥзы. Ваньзэ выльысь лэсьтытэк ӧйлась. 1929 арын оштолэзе андан ӵыжатӥсьёс профсоюзлэн завкомезлэн паськытатэм пленумаз люкаськизы. Соос ВКП(б)-лэн ХВИ конференциезлэсь вань рабочийёслы но крестьянъёслы социализм мылкыдо ӵошатсконэ пыриськыны ӧтьыса вазиськонзэ сюлмысь ӟечкылазы но шуизы: ас удысъёсамы ужазинлыкез нуналысь нуналэ ӝутом, егит кунмылы эшшо но трос андан сётом. Тулаысь, Коломенскысь, Сормовоысь эшъёссэс ог-огенызы ӵошатскыса ужаны ӧтизы. Ӝоген ударной бригадаос кылдӥзы. Соос куспын ӵошатскон паськыт ӧръяськиз. Партилэн ӧтёнэзлы вазиськыса, дуриськон мастерскойысь кызез рабочийёс ас мылкыд каремзыя ужан нормазэс йылэтӥзы. Ш. Сайфуллинлэн бригадаез андан ӵыжатонзэ одӥг но ӝыны часлы вазьгес йылпумъяз. Прокат поттон мастерскойысь М. Емельяновлэн бригадаез ужазинлыксэ кык поллы ӝутӥз. Выль мартен цехез лэсьтӥсьёс но ӟырдыт ужазы.1929 арын куарусёнэ цех нырысетӥ плавка ортчытӥз. Вуж мартенын сярысь, татын ог куинь часлы ӝоггес андан ӵыжатыны кутскизы. Нырысетӥ пятилеткаос дыръя андан поттон чутрак будӥз. Со вакытэ "Ижсталь" заводэз выльдыны но паськытатыны кутскизы. 1931 арлэн пумаз выль мартен быдэсак ужаны ӧдъяз. Со вӧзы ик чугун ӵыжатон мастерской пуктӥзы. Наукалэсь но техникалэсь азинсконъёссэс уже пыӵатонын бадӟым юрттэт луиз 1930 арын кылдытэм научно-исследовательской лаборатория. Нырысетӥ пятилеткаын гинэ лабораториысь выльзэ уже пыӵатӥсьёсын (новаторъёсын) ӵош ог кызь пӧртэм выль маркаё андан но сплавъёс ӵыжатыны кутскизы. Андан ӵыжатӥсьёс Быдӟым Отечественной война аръёсы ноку адӟылымтэ подвиг лэсьтӥзы. Татысь ужасьёс, трос но ӟеч андан поттэм сяна, танкъёслэсь "Ижевский рабочий" колонна но "Комсомолец Удмуртии" эскадрилья кылдытыны коньдон люканэ но пыриськизы. 1944 арын коньывуонэ СССР-ысь Вылӥ Кенешлэн Президиумез заводлэсь бадӟым вормонъёссэ Ленин орденэн пусйиз. Правительство 362 рабочийёсты но инженерно-технической ужасьёсты орденъёсын но медальёсын данъяз. Заводэз куать пол пусйизы ВКП(б)-лэн киысь кие вошъяськись Горд знамяеныз. Война бере предприятие мылысь-кыдысь басьтӥськиз секыт ужъёсты капчиятон, выль техникаез но технологиез пыӵатон борды. Рыноке выжемен шуг-секытъёс кылдӥзы ке но, металлургъёс али но вань кужымзэс сёто ужазинлыкез ӝутонлы - трос но ӟеч андан поттонлы. Вячеслав Ар-Серги Сюрес вӧзысь чарпа Сюресэз та палъёсын но асфальтэн шобыртӥллям ни. Табере сое уд тодма. Тӥни со вырйылын, сюрес дурын ик, люкенак егит но етӥз кызьпуос будо вал. Табере соос ӧвӧл ни. Кинлы люкетӥллям? Нош нюкын, вукырем дурын, дауръёсын кыллись бадӟым чарпа из озьы ик кылле. Тӧлъёс но зоръёс сое волятыса бадӟым тылкӧльы из тусо кариллям. Изэз палэнтыны нокинлэн йыраз пырымтэ. Ортчемзэ тодэ ваёнъёслэн картазы вылын со координат нерге кылем. Кӧня пол та из доры шутэтскыны дугдылӥськиз. Со вие татӥ машинаос шер ветлӥзы ай, соин ик райцентрозь дас кык иськемез ӵемгес пыдын латькетоно луылӥз - кык-куинь эшъёсын, ӟабыльтыса, алякъяськыса. Та из доры котьку сямен пичияк куртчыны дугдылӥм, нош куддыр - одӥг портвейнэз но кӧсатыны. Кужмозэгес со вакыт милям тодэммы уг поты на вал, нош одӥг-кык чарка горд вина жадем студент мугорлы ӵапак иназ мынылӥз. Кытысь ке кужым но соку ик потылӥз, ымдуръёсы серекъян но лыктылӥз... Сыӵе малпаськонъёсын тымиськем горд "Жигуль" со чарпа вадьсы дугдӥз. Отысь шоро-куспо мугоро, сьӧд мыйыко, очкиен воргорон потӥз. Дӥсез сокем узыр ӧвӧл ке но, туж ӝикыт, мугоръя, чылкыт. Огшоры сюрес выл дӥсь. Воргорон тамаксэ аратӥз но, каллен вамышъяса, чарпа вӧзтӥ котырскиз, малы ке кык пол ката нырыныз ӵыжемъяськиз. Из но из. Огшоры из. Сыӵеос дунне вылын лыдъямтэ-чотамтэ. Но таиз та воргорон понна огшоры ӧй вал. Сотэк марлы татчы нимысьтыз дугдысал? Буш интые, уката ик нюке. Машинаос отӥ ӝоглыксэс юромо будэто ук - бамалэ капчиенгес тубыны медло шуыса... Зэмзэ ик, марлы меда пыдъёсы сцеплениез но тормозэз асьсэос шедьтӥзы, нош бур киы рычагез соку ик нейтральное пуктӥз? Азьпалангес, паллян киын, - туж тодмо гурт. Отысен мон асме та дуннеын шӧдӥ. Вордски-а, вакыт бусъёс пӧлысь нимаз мугоръяськи-а... Татын али но монэ тодӥсь адямиос уло на. Соосын ӵош будӥ, эшъяськылӥ, куддыр ӵашетылӥ но. Мар меда соос мон сярысь малпало вал? Кыӵе синмын шорам учкыло? Ӧйтӧд... Оло нош, соослэсь ортчемез сярысь юалляськид ке, азьпал сюресэ яркытгес адскоз? Мурт синмын, палэнысен учкыса. Нош кызьы соослэсь ас сярысьтым юалом? "Шузимем та" шуозы ук, номыр уз маде - серем гинэ карозы. Иське, тусбуйме воштоно, дыр. Медам тодмалэ. Зэм, одӥг шуре, пе, кык пол уг пырало, нош кин тодэ... Кытчы вуттод тон, сюресэ? Малы ӧтид?.. Воргорон малпаськись тусын огшап сылӥз на, собере зӥрак берытскыса, машинаез доры дыртӥз. Пушказ пуксьыса, со мел шедьтӥз но куака бурд кадь сьӧд йырсизэ соин наш-наш буяз. Бен, мыйыксэ но. Табере со воксё пурысьтам тусо адскиз. Синучконэз кутыса, ымнырзэ посӥз. Озьы кисыриос кылдӥзы. Табере куаразэ воштоно. Бозгетӥсьгес кароно. Я, кыӵе-мар пӧрмоз? - Вераське Ижевск. Интыысь дыр - чёрт тодэ кӧня... Гужемлэн югыт тусыз акшан пала кыстӥське ни... Ӟечесь-буресь, гажано эшъёс. Собере со ӝогак моторзэ улӟытӥз но азьлань ширтӥз. Гурт шӧдскымон паськытам. Выль урамъёс кылдӥллям на. Шор урам но вольыт луэм. Азьвыл татӥ сопалаз пыдын но потыны уг лу вал. Соин-а, мар-а гурт кыӵе ке мурт лул кадь йӧтэ. Тодмо ымныръёс уг адско. Кин-мар адямиос урам кузя дырто? Оло, бӧрысяз вордскемъёс? Яке палэнысь лыктэмъёс-а?.. Пуныос но тодмотэмесь - азьтэм тусын лань-лань ветло. А ведь азьвыл кыӵе шӧртчиесь, лекесь вал! Киязы боды кутытэк ураметӥ ветлыны ӧз быгатылэ... Капкаос дорын мырдэм будӥсь ожо но кырсь- бездэм тусо адске - мычымтэ бам кадь. Нош тани огез капка дорын, ӟус вылын, арлыдоос пуко. Кышномуртъёс но песятай. Машина ӵапак соос доры дугдӥз. Воргорон пушкысьтыз потыса но ӧз ву - огез кышномурт чангес юаз: - Тӥ парсьпи басьтыны-а? Толон ведь городъёс ветлӥзы, ваньзэ нуизы. - Тарлаослэн яке гурезьйылъёслэн вань на, дыр, - малпаськись тусын вазиз песятай. - Соослэн туэ парсьпиос удалтэмын... - Ӧвӧл, - шуиз воргорон, - мыным парсьпи кулэ ӧвӧл. - Хм... - Мон одӥг адямиез утчасько. Со татын вордскиз но куке-соку татын улӥз, школаын дышетскиз. Нимыз - Владислав. - Кин меда со? - Атаез электрик вал, нош анаез складын ужаз. Владислав семьяязы - "пурты пыдэс". Соослэн кык пунызы вал - Моряк но Полкан. Нош коӵышсылэн нимыз - паймод: Тимофей. - Валай, - уретӥз песятай, - тодӥськом. Но ведь со эшты кемалась татын уг ул ни. Уг но адскылы. - Татысь выжыятыса, оло, шедьто, пӧй. - Тон милицаысь-а? - Ӧвӧл, ачим но соослэсь курдасько. - Марлы? - Огшоры. Мугтэк. Соосын трос уд вераськы. Уката ик руль сьӧрын. - Хм... Соку тӥ газетысь, дыр. - Ӧвӧл. Газет берло дыре уг лыдӟиськы - шимес. - Мон но уг. Нош утчано муртты сярысь ке... Мар шуод? Ӧйтӧд... А-а, солэн вож мотоциклэз вал. Синтэм-пельтэм ворттылӥз. - Вож ӧй вал, - ваменэс вазиз кышномурт, - горд. - Нош мон шуисько: вож! - песятайлэн ангесыз ик куалекъяны кутскиз. - Горд. - Кыкты ик янгышаськоды, - шуиз воргорон. - Мотоез вож вал, нош питран вылысь бурдъёсыз - гордэсь. - Хм... Можот быть... Со ачиз но сыӵегес вал. Пӧртэм буёло. Атаезлэн но йырсиез - сьӧд , нош тушез - горд. Эх, арганэн кыӵе зол шудылӥз!. Нош кышноез шулдыр кырӟалляз... - Сэре соос люкиськизы ук. Атаез кытын ке Вавожын улӥз, отын ик толалтэ кынмыса кулэм. - Кынмыса ӧвӧл - сюлмыз путыса. Гужем куазен, - нош ик пулсаськиз песятай. - Да солэн сюлмыз ошлэн кадь вал. Юнме-а морякын служитьтӥз? Сякойзэ моряке уг басьто. Тани тонэ марлы ке ӧз басьтэ ук... - Сэре мар?... Зато мон - танкист! - Куашкам ыштань тон, а не танкист. - Ух, йырад та шальыен лэзи ке, пересь куака! - Эн тэтча, лутьмем атас, ми, кышноос, тонэ живо-два куасалом, - серектӥз огез кышномурт. - Нош Владислав? - выльысь юаз воргорон. - Владислав-а? Ӧйтӧд... Огшоры кадь вал. Номырин ӧз висъяськылы. - Ӧз, пе! Лапас липет йылазы тубыса, со кӧт вылаз выдэ но зӧк книгаосты лыдӟе вал. Анаез весь тышкаськылӥз - синдэ, пе, быдтӥськод! - Толалтэ со школае луд кеч изьыен но куфайкаен ветлылӥз, маке пасьта клёш штанэн. Урамысь адямиез уг адӟылы вал - мольк! гинэ шоразы донгиськылӥз. Весь мар ке сярысь малпаськылӥз, лэся. - Маке сярысь сюлмаськылӥз, дыр. - А ведь соку соос пегӟизы ик! - сялӟиськиз песятай. - Бакчаысь вань улмоез "сузяллям". Но Владиславез тодмай... Собере син азьысь ялан пегалляз. - Эн пӧяськы, ӧз пега. Тодӥськод на-а атаезлэн войнае ветлэмез сярысь юалляськыкуз кыӵе со азьын мынчыръяськид? - А-а, со ведь райгазетэ заметка поттӥз, - ымдурзэ пепертӥз песятай. - Ӟеч гожтӥз. Собере милем дунтэменгес пу вайылыны кутскизы. - Визьмо пияш вал со Владислав, - шуиз мукетыз кышномурт. - Школаын но ӟеч дышетскиз, шуо. - Визьмо! Школалэн директорез солэсь нимзэ арнялы быдэ колхоз радио пыр йыртэмасьёс пӧлын поттылӥз. Ишь! - А тынэсьтыд пидэ радио пыр ӧз поттылэ ке но, тӥни ук али ке но фермаын кыед поттэ. Нош Владислав институтэ пыриз. - Нош аслад пиед кыед ӧз ке потты, Оренбургын тюрьмаын пукиз! - Огпол мыжгем понна! Уксё луысал ке, ӧй пукысал. Соин ик пытса ымдэ! - Я, я, керо курегъёс! Кылдэс вакчи каре! - куаразэ будэтӥз песятай. - Нош Владислав сярысь ке... Умой пияш вал. - Пересьёсты пышкылӥз, серем карылӥз. - Ӧз. Со кылзскись вал. - О-о, пе! Анаез картошка гудыны косэ, нош со быдэс нуналлы нюлэскы шупче. Огназ. Вылаз ик лӥялгубитэк бертылӥз. Тожо мыным - кылзӥськись! - Нош кин сое ӟечгес тодэ меда? - юаз воргорон. - Татын будэмъёс - ваньзы. Зырымесьёсты вератэк, - шуиз огез кышномурт, пеймыт кышетсэ тупатъяса. - Со Владислав огпол автобус дорысен гуртозям котомкаме но нуиз. Быдэс кырым канфет сётӥ. - Канфетэд но вал-а? Аслад кибыосыд вить кузя вал ук. - Сётӥ шуисько бере, сётӥ! - ымдуръёссэ юн кариз соиз. - Тӥляд ук, галак выжылэн, сакырды но ӧй вал. - Остэ, калера! Сакырмы, пе, ӧй вал! - Мар шуод, улон азьвыл капчи ӧй вал. Но калык сюлмогес вал, - нод-нод вераз песятай. - Соиз зэм. - Шонер вераськод. - Сое бускель гуртысь нылаш яратэ вал. Только кусыпсы мар ке ӧз тупа. - Ай! Солэн нылъёсыз кут мында вал но! Ӝытлы быдэ музонзэ келялляз. - Ма, со клубе но ӧз ветлы ук. Весь гуртаз пукылӥз. Тон сое агаеныз сураськод, дыр. Вот соиз тулыс коӵыш вал. Ма, атайзы но! Вир! - Мон сое армиысь бертэм бераз адӟылӥ - эх, казакпи! - Казакпи! Соку со кышнояськемын ни вал. Адӟылӥ мон кышнозэ - востэм гинэ сыӵе. Институтысь ик шедьтэм, пе. - Погонъёсаз нош пичи кизилиосыз вал, мугор вылысьтыз еосыз ӟукырто. Туннэ кадь ик тодам на. Нош йыраз - кизилиен ик ышляпа. - Ачид тон - "ышляпа"! Солдатлэн йыр вылаз яке пилотка, яке картуз, яке изьы. Нош со - шляпа, пе! - Тӥ воксё шузиесь, кышноос, - нод-нод вераз песятай. - Шляпаосын лымшор палан ветло. Содатъёс но. Со шляпаез панама шуо. - О-о-а? - О-о, пе. - Кызьы ке мон сое сюрес вылын пумитай. Ӟечъяськиз но - марлы ке нимме сураз. - Шуисько ук, со котьку ас югдаз улӥз. Анаез но сокем кыло-буро ӧй вал. Куаӵак вандоз но тӥни. Сямыз - пиосызлэн кадь. - Небоч луод. Ньыль нылпиосты будэты ай. Нош картэз? Туннэ - татын, ӵуказе - ӧйтӧд. Сэре воксё кытчы ке шайяськиз. - Одӥг юондыр но сотэк уг ортчы вал - соиз зэм. Парсь вандон но. - Соин ик кышноез вожалляз. - Вожаз, пе! Ӧз. Ачим кылылӥ: ӧс пась, шуылӥз, мын, кытчы мылыд потэ. - Со Владислав ведь огпол корказы тылпу но тырылӥз. Мырдэм кысыса вуизы. Собере сое кема "пожарник" шуылӥзы на. - Со зол уя вал. Ог ярдурысь зуме но мукетаз потэ. Кызьы омыр тырмылӥз? - Зэмзэ ик. Озьы уяса ӵӧжпиоссэс но весь поттылӥз. Милесьтым но. - Ма, мурт мурдоосысь чорыгзэс но шупчытъяз. Соин ик усто уялляз. - Мон но мурт мурдоосы пыралляй, - шуиз песятай. - Тон мурдоосы гинэ ӧд пыра... - Кытчы эшшо? - Шудтэм муртлы - марымын но лы, шуо. Тӥни отчы. Сотэк-а кышноостэ вошъяса улӥд? - Пошёл-ко тон, пересь ӟиры! Весь ӟукыртӥськод. Вӧясед ӧвӧл ни но. - Кулэез вал! - Нош Владислав? - воргорон соослэсь вераськонзэс выльысь но выльысь кулэ ӧре пыртыны выриз. - Тусын со атаез тус вал, нош сямыз - анаезъя. - А мон сямен - наоборот. - Синдэ ӧд кесьылы но соин, дыр. - Мон али но венез ачим писъясько! - Писъясь!.. - Владислав маскаръяськыны яратылӥз. Эшъёссэ вӧзаз люка но мар ке маде. Соку кӧтсэс посыса горо. - Маскаръяськись?! Да солэсь кылзэ зырен но уд бералты вал. Огпол автобусэн ӵош бертӥм. Мон пукисько, со сылэ. Дак вань сюрессэ ас пушказ бӧтьыртӥз. Мар сярысь - шай тодэ. - Шӧмо, дыр, вал. - Тодэмед ке потэ, быдэ вуэм дыръяз мон сое огпол но шӧмын ӧй адӟылы. Юондыръёсын но кема ик ӧз пукылы. Ӝогак шыльтчылӥз. Оло дӥсезлэсь, оло калыклэсь возьдаськылӥз. - Возьдаськоз со!.. Ӵукна ньыль часэ ик укно улын мотоеныз таргетыса сылылӥз... - Нылдэ ӧтьылӥз, дыр. Астэ-а, мар-а кожалляд? - Кылыд бен! Пурт но вень! Соин ик тыныд йӧно карт но ӧз шедьылы. - Чем со Семон нергеосыныд, луӵӵе карттэк улод. - Ишь, пырак ведь - андел! А тон сяна, кин-о Семонлы йыр берыктон аракы секталляз? Уйвӧтаз но, лешой, нимме сураны кутскиз. Я, котьма ке но, ӟеч мед кӧлоз сопал дуннеяз... Со куспын гурт вылэ акшан вӧлскиз. Буёлъёс сураськизы. Пересьёслэн синъёссы бездӥзы. Ымдуръёссы вӧзын омыр гинэ лэйка... Воргорон эшшо огшап соос артэ пукиз на. - Озьы ини со... Трос аръёс ортчизы... - песятай лулскем кариз. - Тросэз вунэ. Тани Владислав но... Со татысь кемалась кошкиз ни. Али пумитад ке, уд но тодма, дыр. Нош куддыр синэз кыниськод но - выльысь сое адӟиськод: урамтӥ вож мотоеныз сильтӧл кадь ортче. Ма, со весь татын кадь... Анаеныз атаез но улэпесь кадь... Аръёс ортчо... Нош толлоез туннэ кадь ик син азьын. Номыре вунэтэм уг поты... Вунэтӥд ке, ачид ик бырод кадь... Шимес... Адями ведь котьку артын кадь. Тодэ ваёнъёсын улэ. Со сяна, сюлэмез шунтон ӧвӧл ни... - Шонер вераськод. Шонер... - Интересно, кытын меда али со Владислав? - Городын улэ шуизы ук. - Ма, дышетскемын бере - ясное дело. - Нош мар ужа? - Кивалтӥсьын, дыр. - Ӧйтӧд. Со ноку ӧз косъяськылы. Ӝоггес ачиз ик лэсьтоз. - Кин тодэ... Оло, воштӥськиз со. - Адями ултозяз сизьым пол воштӥське, пе. Лулыз но, мугорыз но. - Нош тон кыӵе вал, сыӵе ик кылид. Пуклёк. - Нош тон - шерымтэ тӥр. Весь йыре кокаськод - пилемед ноку уз лу! - Тырмоз ченгешыны! Адямилы акыльтӥз ни, дыр. Тодмозэ утча бере, юрттоно ук, - кушетскиз огез кышномурт. - А тӥ солэн вордскем юрт дораз ветлэ. Сопалъёс бускельёсыз ӟечгес тодо, дыр. Та сюрестӥ пырак столовой дорозь мынэ, собере бур кие коже. Куинетӥез корка. Лыз налишникен. Липетэз шиферен шобыртэмын. Урам палась кык листэз усемын... - Ярам. - Ассэ Владикез адӟиды ке, салам вералэ. Гуртоосыз уг вунэто, шуэ. Шудэз-бурез бордаз медло. - Ярам. Мон малпасько, со шудтэм ӧвӧл, дыр. Созэ ачиз вала ке. Я, мон вырӟо ни. Ӟеч луэ. - Ӟеч! - шунды кадь пальпотӥз пересь пиосмурт. - Улон капкаосаз Третьяк мед сылоз! Со ведь - милям гуртысь! - Кыӵе Третьяк? - Владислав, пӧй, хе-хе-хе. - Хм... Ярам. Воргорон кескич мынекъясь песятай шоры эшшо огшап учкиз но дыртытэк машинаез доры вамыштӥз. Пушказ пуксиз. Секытомем синлысъёсыз сандык пытсэтъёс кадь лаӵ! усизы. Тём пеймыт луиз. Ымдуръёсыз кӧсазы. Мӧйы муртъёсты со тодмаз, нош нимъёссэс тодаз ӧз вай. Али сямен ик, пичи дыръяз но та адямиос солы дурыстэм арлыдоесь но визьмоесь потылӥзы. Зэм, гуртооссэ со кытӥяз ӧз валалля. Оло нош, валаны ик ӧз тыршылы? Таиз шонергес луоз, дыр. Котьма ке но, соос кыӵе ке мӧзмылэс дуннеын улӥзы кадь, бурдтэмесьгес йӧтылӥзы. Соин но, вылды, сое ассэ, ву берган сямен, мукетыз дунне бордаз кыскылӥз - отын Бетховен чузъяськылӥз но улон сярысь кенешыны Маркес ӧтьылӥз... - Кенакъёс! - со укноетӥ йырзэ мычиз. - Татӥ, шуо, туж батыр Тӧдьы ошмес пӧзе вал. - Кыӵе Тӧдьы Ошмес? - паймиз огез кышномурт. - Мон сое тодско вал, - вазиз песятай. - Но со куасьмиз. Вылаз кызьпуос будо ини. Ческыт вал вуэз! Ньылонэз но ӧз кынтылы. Ву ке кулэ, отӥынгес, тракт дурын, колонка вань. - Тау, - воргорон машиназэ вырӟытӥз. "Иське, Тӧдьы Ошмес куасьмем. Жаль. Жальлэсь но жаль. Оло нош, кулэм скал йӧло вал шуэмзэ гинэ озьы йӧтэ? Ӧйтӧд... Бен даурез сыӵе вал, дыр. Котьмалэн уго аслаз йылол-даурез. Вань улэпезлэн но, лултэмезлэн но..." Воргорон вордскем юрт палаз ӧз мыны ни, бертон сюрес вылэ потӥз. Со угось ӟеч тодэ: отын сое возьмась ӧвӧл. Капка азьын анаез но нюромем синпумъёссэ айшет сэргыныз ӵушылыса уг сыл ни... "Ӟеч кӧл, мусо анае..." Тани со гурт пуме вуиз но колонка вӧзы дугдӥз. Потыса вузэ гуч-гуч юиз. Нош ымдуръёсыз сыӵе ик кӧсыт кылизы кадь. Сюэз но ошмес вуэн кадь ӧз буйга. - Табере тусэз берыктоно, - со шара ваземзэ ик ӧз шӧды. Киыныз йырысьтыз тӧдьызэ курткыны кутскиз. Нош мар та? Номыр уг курткиськы. Синучкон доры бызиз. Учке но - йырсиез сыӵе ик пурысьтамын. Мар кароно? Йырзэ колонка ву улэ донгиз. Кема шопыльтӥз. Собере синучконэ былькмиз. Ӧжыт гинэ воштӥськем ке шат - сыӵегес ик пурысьтамын. Нош ымнырысьтыз кисыриос? Соосты но воргорон кема волятыны выриз. Но кисыриос... Озьыгес ик кылизы. Лыктыкуз укыр таӵе ӧй вал ук. Оло, ас киыныз ассэ озьы кариз? Иське, мае утчаз, сое ик шедьтӥз? "Остэ, остэ, Инмаре-утисе!... Отче наш, иже еси на небеси..." Супыр-супыр жадем воргорон музэ пуксиз. Со валаз: гуртоос сое таӵеен но тодмазы. Пичи дыръяз со хоккеен шудыны яратылӥз - капкаын туж ӟеч сылӥз. Ӵапак соку "Третьяк" кушем ним лякиз. Нош пияш ӧз йыркуръяськы, ас понназ данъяськылӥз но - Владислав Третьяк! Ведь со дунне хоккейлэн кизилиез! Нош та нимез Владиславлы нырысь ик Петруч сётӥз - "Беларусь" тракторысьтыз сиськыны но изьыны гинэ потась адями. Зэм, куддыръя соослэсь хоккеен шудэмзэс учкыны но дыр шедьтылӥз. Ӵапак со али Владиславен вераськиз - песятай. Соин но, дыр, сыӵе кескич пальпотылӥз. Ӟечок! Выжыкылэз ӧз уреты... Оло нош, азьвыл тусбуе сюрес вылэ кылиз? Ортчем сюрес вылам? Ай чарпа из-а ас бамаз пыӵатӥз? Пурысьтам йырси но кисыриё ымныр. Маскара. Адӟемпотостэм маскарад!.. Со нош ик машинаяз пуксиз но тракт вылэ потӥз. Сюлмаз сӥзьыл нюлэскын кадь шал- шал буш луиз. Тӧл ӵужектэм куаръёсты бергатэ, ез юбоосын шула. Инвис такырӟем буш бусыосын вандылӥськемын. Одӥг сюрес гинэ кыле на - азьлань, пумозяз. Оло лулэз утись, оло сое быдтӥсь сюрес... Тани спидометрын тямыстон иськем ини, сю иськем, сю кызь. Ӝоглык ялан будэ. Воргорон, омырез вандыса, азьлань дыртэ. Азьпалаз - кыӵе ке тылъёс. Ӝуатско но, кысыло но... Гуртаз вуыса, нокинэ сайкатонтэм вылысь, кыштырак гинэ комнатаяз сётскиз но диван вылэ выдӥз. Тылзэ ӧз ӝуатъя. Угось отын синучконэз вань. Отчы учкыны со али курда. Но тани йыраз витьымтэ шорысь шияк кариз: "Бертыкум нош малы со бадӟым чарпа изэз ӧй адӟы ни? Оло... со воксё но отын ӧй вал?.." Дыртыку ӝоглык бадӟым, пе, сюрес урдсын кыллись изъёс уг адско ни. Соос тонэ келяло гинэ - одно берытскод на шуыса. Ӧд ке берытскы - малпалод. Азьвыл ортчем сюреслэн тодметэз... тодметъёсыз сярысь. Куке-соку дыртыса, ваньзэ ик тыро-пыдо адӟыса вуттытэк ортчем сюреслэн... Кудзэ ноку уд ортчы ни. Тылтэм комнатаын огназ пукись воргоронлэн кучапи сямен нискетыса бӧрдэмез потыны кутскиз. Оло, кинлэсь ке вешамзэ-а но витьыса?.. 1 Паньки - усто ки Ӵукна вазь Паньки султэ, Ӵукысен Шатыр поттэ. Пужым кор Кысык ворттэ, Бамалэ Выль юрт пуктэ. Паньки Гадь тыраз Шока. Йылсаське, Пуксе корка. Наличникез Пужыё, Турлы-турлы Буёло. Укноосыз Вӧлмытэсь, Маке быдӟа Синмоесь... Ужезлы Пайме Паньки: Мар быгатэ Вылэм Ки! Вӧл-вӧл шур, Возь выл, Нюлэс Эмъюм омыр Кузьмало. Бурдоос Тузӥ гурзэс Солы Шулдыр Ӧръяло! Шур кузя ӟазег ветлэм... Шур кузя Ӟазег ветлэм, Отчы-татчы Кожылэм. Кӧня ке, лэся, Сылэм, Сузяськыны Дугдылэм. Юри Оло янгышен Тылызэ со Палдытэм. Мыным Жаль потӥз тылы, Ӝог ӝутӥ Турын пӧлысь. Ӧй куасалты, Ӧй чигты. Ошмес дуре мон дыртӥ, Отын сое Пылатӥ. Доре вуи Кысыкгес. Пӧсь табанез, Шаньгиез Ӵыжтэм вӧен Мон вӧяй. Тылы Шедьтэме понна, Топ! Топ! Вешаз песянай! Тумошо Опо Кыл вылын Опо Толэзе тубоз. Кыл вылын Опо Шундыез сабоз. Кыл вылын Опо Кам вамен уя. Кыл вылын Опо Инсьӧрын поръя. Мон, шуэ, тулыс, Паймыто туэ. Мон куро вылын Уяло, шуэ. Со быдӟа муртэ Шат возёз куро? Со кузьда муртэ Шат утёз куро? Ушъяськиз Опо, Уямез ӧйлась. Тулкымен гуньдӥз, Ымыз вылэм - пась. Тып дугдӥз Валэн тыпыр-р! Ворттӥсь мурт кадь, Кӧжыез музэ Шорӟем кадь, Тяпкетэм кадь, Шыпыртэм кадь, Лабыртэм кадь, Вуӵыртэм кадь Куазь зоре. Кӧня меда Зорысал на, Кӧня меда Пазьгысал на, Ӵашетыса Бергасал на, Сачырмытозь Коттысал на Та зоред. - Зор, Я дугды Зоремысь но Монэ коркан Воземысь тон. Коркан сяна, Юрт котырын Ужмы Ноку но Уг быры! Зор кылӥз, Тып дугдӥз! Йыры кур. Исаськон Огыр шуэ: - Йыры кур! Солы вазё: - Шуба вур! Йырыд кур Уз лу соку. Огыр ялан: - Йыры кур! Солы шуо: - Мын соку Чӧлты Пыштые Бун кур! Возь сое Небӟытозяз, Ӟеч-ӟеч Бун луытозяз. Кесялод тон Бун курез, Тӧлӟоз тынад Йыркуред! Огыр пурӟиз: - Йыры кур! - Марлы тынад Йырыд кур! Йырыд Кур ке, Берт дорад, Мын Коскы вур Йыр берад! Учконо ке - Адями кадь, Кылзӥськись но, Туж зӥбыт кадь. Онтонлэн нош йылолыз: Тӧдьы шуо -сьӧд шуэ, Сьӧд шуо - тӧдьы шуэ, "Я" ке шуо, "уг" шуэ. "Уг" ке шуо, "я" шуэ. Мыто кырӟан, Нош со кырӟа, Кесяськыса, Урмытыса... Учконо ке - Адями кадь, Лӧпшасьтэм но, Туж зӥбыт кадь. Нош Онтон кадь Йӧназ мурт ик, Ой, ӧвӧл,дыр, Дуннеын... Таӵе чылкак Мыдланес пи Кытын вань меда? Кытын? Адями кадь Верамез но Пеляз уг поны Онтон... Ойдо сое Пуклёк боды Визьманы понна Керттом. (Мыдланес).1991, 5. - Кылтэчы, Кылтэчы, Кыӵе кыл Нош тэчид? - Вань, шуо, куинь Юри, Ку ветлом ай юри? Ветлысал Кватчие, Адӟысал куать сиез... Кожысал Туймыйылэ, Адӟысал Туймы йылэз. Кытын ке Сюровай, Будэтэ, пе, сюро вай! Васькысал Кузилие, Лыдъясал кузилиез. Пырасал Каксяла, Сиысал кык сяла... Кожысал Ӵӧжйылэ, Отын ӵӧж, пе, йылэ... Вамыштысал Уроме, Отын улэ уроме. Вуыло ай Асанэ - Кылемын ку посонэ. Отысен Пычасэ, Монэ вань утчасе... - Кылтэчы, Кылтэчы, Кыӵе кыл Нош тэчид? - Ветло ай Утчанэ, Шал-шал Буш Тэчонэ! (Кылтэчы: Кылын шудон), 1991, 5. Фермаысь Меми бертӥз, Ӧс куспысен Пальпотӥз. Со паймиз Корка пушлы, Чылкытэзлы, Шунытлы. Мон шуи: - Уже пӧзиз, Жадеме Ужын тӧлӟиз. Пудоосмес Утялтӥ: Люктай Но сиён сётӥ. Чик туннэ Маза ӧй вал, Тулкымаз Ужен нунал. Выль шыд Пӧзьтӥ Тыкмачен, Чай пари Турын-куарен! (Мемие ужан дыръя), 1991, 5-7. Выль Тӧдьы нингубиез, Чебер кызьпугубиез, Выжыеныз порыса, Вень йылаз Дэмӟытыса, Караз Шып нуэ ӵушъял. Пумитаз Ӝимиз лӥял. Нырзэ урдӥз но Адӟе: Мырк вылэ Луд кеч Тэтчем. - Мон, шузи, Кӧня тэтчай, Нюлэстӥ Сиён утчай! Тон нош тани Шедьтэмед. Мыным, дыр, Тон ваемед! Ӟугырак луиз ӵушъял: "Уть, кескич, Юри ушъя! Лӥял вылын Тэтча на, Шоккетондэ Кисьты на. Киндэ Мед тодоз лӥял..." Со куспын Кыштыр гинэ Ас караз Шыльтчиз ӵушъял! (Кескич ӵушъял), 1991, 7. Берга, берга тон, черсэ, Киы чырткем на черсэ. Тодӥськод, дыр: ож вылтӥ, Кӧня пыдвыл мон керттӥ. Ӝуась гур азьын черсӥ, Уйёсы ӧжыт изи. Картэлы но вынъёслы, Тодмотэм солдатъёслы Кӧня пыдвыл мон келяй, Келякум бӧрдӥ, верай: - Эн кынме, мусоосы , Чырткем жуге сьӧсьёсыз. Тазаесь мед бертоды, Пӧсь мед шунтоз пыдвылды. Шортэ сюлэм шунытме Черсыкум ӧй пон юнме. Ож лудысь гожтэт басьтӥ: -Меми, тау, Пыдмес шунтӥд! Кас тушмон пегӟе, Чигна, Матэктэ Вормон Нунал! Бертӥзы воргоронъёс... Уг быро черсон ужъёс. Мон али но черсӥсько, Мон али но керттӥсько Ыж гон пӧзь, Ыж гон пыдвыл - Ки-пыдысьтыд но уд кыль! Мынам уже кулэ на, Мынам уже уз быр на. Берга, берга тон, черсэ, Киы чырткем на черсэ! (Ӵужанайлэн кырӟанэз), 1991, 7. Шур дурын ми пукиськом, Микален чорыгаськом. Мон чӧлтӥсько визнанме, Синъёс ышто пукыме. Поттаса уг вуиськы, Вазьыны уг ваньмиськы. Ӧчкарем кадь, Микальлы Номыр но уг сюр. Малы? Чиданэз тани чигиз. Мон вӧзы ик кыстӥськиз: - Тыныт сюре, Мыным - уг. Вай, шуэ, интыям пук. Интыен воштӥськимы, Визнаса пукиськомы. Мон чӧлтӥсько визнанме, Синъёсы ышто пукыме. Поттаса уг вуиськы, Вазьыны уг ваньмиськы. Ӧчкарем кадь, Микальлы Номыр но уг сюр. Малы? Чиданэз выльысь чигиз, Мон вӧзы выльысь пуксиз: - Тыныд сюре, Мыным - уг. Вай, шуэ, интыям пук. Ас интыяз пуксьыкуз, Визнанзэ адӟи соку: - Чорыг тон уд кут туннэ: Кукчо быдӟа визнанэд. Ваземелы шумпотӥз, Гор-гор гинэ серектӥз: - Юри керттӥ бадӟымзэ, Кожай, куто кор кадьзэ. (Маскара чорыгась), 1991, 8. - Мынам вань ӵужатае! - Ушъяське Оги. - Нош мынам - ӵужапае! - Ӧз чида Лёги. - Нош мынам - ӵужодӥге! - Нош мынам вань ӵужмуртэ! - Кылӥсько жин куараос, Ӵаш потто нылъёс-пиос. Палэнын сылӥсь Мики Вераськонэ итӥськиз: - Огдылэн но ӧвӧл ӵуж. Мынам гинэ ӵуж но ӵуж! - Кызьы озьы? Кыӵегес? Маиныз-о мукетгес? - Одӥг пиньыз солэн - ӵуж, Зундэсэз но солэн - ӵуж. Сандыказ - ӵуж чалмаез, Ӵуж кисьтаськись дэремез, Ӵуж айшетэз, Кышетэз, Ӵуж-ӵуж чебер пыдвылэз. Вот ӵужанай ке, ӵужанай! (Маиныз-о мукетгес?), 1991, 9. Лумбыт сямен тӧл пелляз, Тузонэз но погылляз. Писпу вайёсты выртӥз, Шудыны, лэся, дыртӥз. Тӧллы шумпото скалъёс, Уг ни куртчисько лузьёс. Пастухась пичи Осьып Кыз выжыын пуке шып. Вӧзаз нош пуны, - Уг кӧл, Кӧлонэн йырин ӧвӧл. Кузёез ук шутэтске, Пуны котыр чаклаське. Скалъёсты туж сак чакла, Медам вырӟе гурт пала. Ай нёжалэ васькозы, Нап-нап турын ишкозы. Ӝыт, шунды пуксён дыре, Скал уллё бертэ доре. Осьып вӧзын пуныез, Оскымон, лякыт эшез. (Пичи Осьып), 1991, 10. Нюлэскы, Арамае, Меӵ но Нялмыт бамалэ, Ӝӧккышет кадь Нёжалэ Ӵашъем кадь Ивор вуэм. Кин сое Татчы вуттэм: Нимо-дано, пе, Коӵо, Луэм, пе, Куӵо-маӵо!.. Марым, Кылем, пе, Быжтэм. Сускич пасьта Кузь быжзэ Олокытчы, пе, Ыштэм. Жалясез но Сое вань, Шумпотӥсез Солы вань. Нокин но Уг тод мугзэ: Кытчы карем Со быжзэ? Оло кулэ Луымтэ-а, Оло ачиз Акыльтэм-а, Кинэн ке Вожвылъяськем-а, Соиз лекын Ишкалтэм-а? Акыльтӥз Юасьёслэсь - Потёрӧ Эшъёсызлэсь: Мырк борды, пе, Кормыштӥ, Нюлэскысь Нюке куштӥ! - Мар милемыз Пӧяськод? - Вазиз ӟольгыри уллё. - Кин тон Астэ кожаськод? Оло Кыӵе ке Шулё! Липет йылысен Тонэ Коӵыш Ӝабыртӥз... Токма Зулемед понна, Со кузь Быждэ Ыр- ге- тӥз! (Быжтэм коӵо), 1991,10. Сике узылы мынӥм, Васяез но ми басьтӥм. Ӵыжытлэсь ӵыжыт узы, Сомында узы музын! Янгышен вамыш лэсьтод, Узыез пуньырӟытод! Бичаськон дыръяз эшмы Кариськиз маке шыпыт. Ваньмы ӵош кесяськимы, Ышиз-быриз Васимы. Тыпы доры вуимы. Кин со вӧзын? - Васямы. Тыпыысь сизез адӟем, Узы пурызэ мычем. Ас понназ малпам, дыр: Сизь - Кисьмам узыез сиись! Сизез учкыса жальмам... Ми нош Йыромем кожам! (Жальмам), 1991, 10-12 Шунды ӝужамлэсь азьло Микаль пыд йылаз. Дун вуэн умпотонзэ Пазьгыса улляз. Азамат выр-бамалэз Котыртӥз Микаль. Гуретэм мотор куара Инбамын лэёказ. Нянь колдыез шорем кадь Бусыез гыриз, Пужен пызез пужнэм кадь Куазь шуныт зориз. Мускыт но небыт сюе Пазьгемын вал тысь. Арня, кык-а ортчыса, Вож-вож уд потӥз. Потӥз, ӝужаз, тэлеӟиз - Вож шобрет чиляз. Эсьма, тӧл но удъёсты Вешаса пелляз. Гудыри кошкон азьын Азамат бамал Уката луиз ӝужыт - Таӵеез ӧй вал. Ачиз Микаль ышымон Удалтӥз чабей. Кузь мыйыкез вешамон, Чабей шеп чабе. Тӧл лэйка тулкым вылын, Визь кузьда шепъёс. Йӧн-йӧн модосъёс пӧлын Нап зангариос. Микальлы тау карыса Крезьгура бусы. Крезь си выллем шепъёслэн Вазе мыйыксы. Нош со крезьгур сӥземын Тыныд, Азамат! Музъем ужасез сюлмо, Шуд солы кузьмад! Шудэз ӧвӧл пельпумаз, Ас кияз шудэз. Учкы котьку шеп бордын Шуд тылси шудэ... Шунды ӝужамлэсь азьло Микаль бусыын... Мар быдӟа та улон шуд Азамат бамын! (Шудо Микаль), 1991, 12. Гурт вадьсын Лэйкась бусэн кадь Лэйкаса куара вазе. Кин-о, Мар со, Чидатэк Куаш поттэ Ӵукна куазен? Тани Чангес Куараеныз Чангетӥз со Шур сьӧрын... Илья агай Питырам кадь Жин-жан Поттэ Кебитын. Тани солэн Куараез нош Шуккиськиз ни Гурт пумын. Кошкыны ик Ӵыдонтэм кадь Юртъёс ӝужъё. Бамалын. Лэсьтӥськисьёс Шунды кадь ик Пальпотыса Ужало. Юрт липетъёс, Укно синъёс Бамалын Крезьгурало. Юртъёс валлин Мерттэм садъёс Чебер нылъёс кадь Сыло. Нош тани со Чангес куара Чангетӥз Школа садысь. Мар куспын со Отчы кошкем? Адӟоно вылэм отысь! Школа садын Покчи эшъёс Ву кисьтало, Урисько, Кырӟало но, Вис каро но, Сюйын Кыштыр Копасько. Нокыӵе Чангес куара но Уг кылӥськы Пӧлазы. Чебер Чылкыт, Син мальдымон Садын Ужам бервылзы! Кытысь, Кин со, Ӵукна куазен Вуэ татчы но Отчы? Кызьы озьы, Кытчы вуэ - Уж пӧзе Бугыр, Пачыл! Оло, кин ке Выжыкылысь Ачиз ветлӥсь Кут шедьтэм? Аслыз сыӵе Кут шедьтэм но Ӟеч уж лэсьтэ, Кыштыртэ! Оло, чик но Озьы ӧвӧл? Оло нош, Озьы но, дыр... Малпаськыса Улыкумы Вуиз Нуназеян дыр. Возь вылысь но, Бамалысь но, Школа садысь, Фермаысь но Пиналэз но, Мӧйыез но, Пиосъёс но, Кышноос но Васькизы Арамае... Тани кытысь Ческыт шыд лым Тӧл вылын Зынэз вае. Тани кытын Чангес куара Шыд ӝутэ, Выль чай паре, Чылкыт ӝӧккышет Вылэ со Чебер шормам Нянь тыре. Чылк-чылк гинэ Мисьтаськыса, Ӝӧк сьӧры Калык пуксе: Пиналэз но, Мӧйыез но Дыртытэк, Сабыр сиське. Бус сямен ик Парланыса Буса шыд, Буса Пӧсь чай. Мон со Чангес Куараез нош Олокытысь но Утчай. Олокытчы Вуыса но, Ку со Сиён но Дасям? Ымныр вылтӥз Вуэз Ваське, Ужаса, луоз, Пӧсям. Бурлат шорт кадь Бам быгытэз, Зангари тус Айшетэз. Пиналэз но, Мӧйыез но Музъемозь Йыбырттӥзы! Ческыт сиён Пӧрма понна (Мар куспын нош?), Сяська керттэт Кузьманы но Вут-тӥ-зы! Арамае Возьёс кузя, Шундыё Выр-бамалэ Крезь сиослэн Шудэмзы кадь Жингыртӥз Кара-ланга: - Мон та - Шаплы, Котьку Чупрес, Етӥз, Визьмо Тыр-лы-га!2 (Тырлыга), 1991,12-16. Ӵукна вазь... (Паньки султэ) 1991, 1. Шур кузя... (Шу кузя ӟазег ветлэм...) 1991, 1. Кыл вылын... (Тумошо Опо) 1991, 1-3. Валэн тыпыр-р!.. (Тып дугдӥз) 1991, 3. Огыр шуэ... (Йыры кур. Исаськон) 1991, 3 Учконо ке -Адями кадь, - Кылтэчы, Кылтэчы, Кыӵе кыл Фермаысь Меми бертӥз, Выль Тӧдьы нингубиез Берга, берга тон, черсэ, Шур дурын ми пукиськом, Мынам вань ӵужатае Лумбыт сямен тӧл пелляз Нюлэскы, Арамае, Сике узылы мынӥм Шунды ӝужамлэсь азьло Гурт вадьсын эйкась бусэн кадь 1 Потёро - мултэс зулись мурт. 2 Тырлыга - пуксеттэм, котьмае лэсьтыны вуись пинал. Олег Четкарёв Генераллэн гурезез Ӝӧк вылысь телефон шуак туж зол куаразэ поттӥз, котьку сямен ӧз тюргеты - каргетӥз кадь. - Кылзӥсько. - !!! - Ма-ар?! - генерал золскиз, телефон трубказэ пель бордаз юнгес ӝиптӥз. Кушетскем муртлэн верамысьтыз куинь кыл гинэ йырвиымаз мертчиз: "Глазов", "ЧМЗ", "пуштӥз!" Пушкыз быдэсак йӧӟектӥз, оло. Кӧня ке минут ортчыса ини, мазэ-созэ ӟечгес валамез бере, ӧжытак басылаз но йыраз чот-чот радъяськиз: ма кароно, кинлы ивортоно, кинэ ӧтёно, кинэ ыстоно пуштэм интые. Ӧжытак улыса, Удмурт Элькунлэн граждан обороная но шукырес учыръёсъя кун комитетэзлэн тӧроез, генерал Тимази Георгиевич Габричидзе, сэректэм сюлэмын выльысь но выльысь жингыръяз, тодыны тыршиз, кыӵе ини отын - пуштэм интыын, маин йырин шудтэм учыр луиз? Эли- кеби ӧз выры, телефон пыр но, ужасьёсыныз но ӝот-ӝот вераськиз, нош югдур син азяз пумен-пумен суред вылын кадь кылдӥз. Соку ини золскем лулсэръёсыз ӧжытак лябӟизы: радиация ӧвӧл, цех куашкамтэ, тыл кысэмын. Но, но... адями быремын, кӧняез ке нош сутскыны сюремын, улэп кылёнзылы оскон ӧжыт. Таиз ини тужгес уродэз, угось адямилэн быремез - со номырин лыдъянтэм-дунъянтэм ыштон. Малы та сярысь тросэз чик уг малпасько, асьсэлэн но, тужгес ик мукетъёсызлэн но улонзылы кышкытлыкез палэнтон сярысь уг сюлмасько? Кытысь сыӵе чидантэм урод мылкыд адямиослэн виразы пыӵаз меда? Со Инмарлэн визьнодамезлы, быдэс инкуазьлэн улон радлыкезлы пумит луэ ук! Эх, адямиос, адямиос, асьмеды асьмеос быдтыны турттӥськом-а, мар-а ни, ог-огмес жалян, утён сярысь пумен ӧжытгес малпаськиськом бере. Тимази Георгиевичлэн кивалтоно Комитетаз, пӧртэм мер огазеяськонъёсысь ужасьёс калык понна сюлмаськон сярысь валэктон уж нуо, нош телевидение нуналлы, часлы быдэ пумтэм вир кисьтонэз, вӧсь каронэз, адямиослэсь ог-огзэс кутъёсты музэн виылэмзэс возьматэ, сюосын пӧртэм газет-журналъёс дышето: астэ гинэ тод, ачид понна гинэ ул, вӧзысьтыд ваньмыз тыныд тушмонало. Кинлэн меда калыкмылы тушмон мылкыд сокем-сокем пыӵатэмез потэ? Генераллы таӵе югдур туж но туж уг кельшы, угось ачиз быдэсак улонзэ адямиосты, соослэсь югыт но сайкыт дуннезэс, музъемзэс утёнлы сӥзиз. Со понна аслэсьтыз мылкыдзэ но, мугорзэ но ялан кыдатыны, юнматыны тыршылӥз, кытын гинэ ӧз ужа, кытын гинэ ӧз улы. Сыӵе сям пыӵаз ини пичи дырысеныз кыдёкысь Зестафони грузин карын. Тау атаезлы. Гиви Акакиевич андан ӵыжатон заводын дас куинь аресысен ужаз. Ма карод, война вал ук, ваньмыз фронтлы маин ке но юрттыны тыршизы, пичиез но, пересез но. Вылаз ик, маин ке но улоно вал, угось 1943 арын Гивилэн атаез кулӥз, собере анаез. Заводзы Уйпал Кавказ котырысь ожгарчиосмылы пыӵал тӥрлык поттэ вал бере, адямиос отын уен-нуналэн ужазы. Озьы Гиви кадь пиёкъёс анданэн артэ кыдаса будӥзы, быдэ вуизы, атыкай музъемзэс утён понна котькыӵе тушмонлы пумит султыны дась луись мылкыдо воргоронъёс луизы. Нылпиоссылы но сыӵе мылкыдзэс пыӵатӥзы. Трос аръёс ортчем бере ни Гиви Акакиевич, цехлэн тупатъян-выльдон ужъёсъя мастерез луыса но, куддыръя заводысь уен-нуналэн уг бертылы вал. Уката ик - цехысь мар ке тӥяськон, куашкан учыръёсы. Нош дораз вуэ но, уд вала, жадемын-а со, ӧвӧл-а, турнике тэтчыса кырмиське но ӝутъяське. Собере пизэ ачиз интые ӝабырскытэ яке аслаз киосыныз лэсьтэм гантельёсыныз Тамазиез пӧсятозяз вырытэ. Ялан индылӥз кадь: "Учкы, тӥни со гурезь кыӵе меӵ но ӝужыт, йылаз тубыны кужмо воргорон гинэ быгатоз, соин ик ёзвиостэ юнматы". Гиви Акакиевич сизьымдон арессэ пусйиз ини, нош арлыдлы уг сётӥськы, со али но веськыт, граб кадь юн воргорон. Пересь даураз вуыса, трос секытсэ чидано луиз ке но. Улон озьы берытскиз уга: Леселидзе каре кӧчизы вал, йыг-йыг чебер юртъер ӝутӥзы, нош Грузиен Абхазия куспын ожмаськон пуромиз но, Габричидзелэсь корказэ сутӥзы. Борддоръёсыз гинэ кылизы на. Табере Тамази Георгиевичлэн анай-атаез Москваын нылзы дорын уло но, шокар вӧзысь музъем басьтыса, выль корка ӝуто. Тӥни сыӵе юн мылкыдо адями - Гиви Акакиевич Габричидзе. Аслэсьтыз ӟеч сямъёссэ пиезлы но пыӵатыны быгатӥз. Тамази Георгичевич атаезлы пумтэм тау каре со понна. Тау каре вордскем Зестафониезлы но, отысь ӵош будэм эшъёсызлы, калыклы но. Угось соослы луыса, вуоно генерал бадӟым улонэ сюрессэ лёгиз. Татын солэн атыкай музъемдэ утён - со воргоронлэн вылӥ оскет ужез шуыса малпанэз кылдӥз но юнмаз. Анай-атаез Леселидзее улыны выжемен сэрен, Тамазилы школаез Адлерын йылпумъяно луиз. Татын ик со одӥг арзэ лэсьтӥськонын бетон ужъёсты быдэсъяз. Со дыре ни, армие дасяськыса, дизелистэ дышетскиз. Ӝоген солдат луыны кулэ ни вал, ӵап эшъёссэ пумитаз. Соос Саратовысь химиен герӟаськем ожгарчиосты дасясь вылӥ училищее дышетскыны пыриллям ни вылэм. Сьӧразы чортӥзы. Тамази мынӥз, учкиз. Кельшиз. Училищеын ваньмыз пыр-поч радъямын, уставтэк ӝыны вамыш но уд лэсьты, спортэн вырыны, мугордэ юнматыны туж ӟеч луонлыкъёс кылдытэмын. Трос малпаськыса ӧз улы, экзаменъёссэ сётӥз но, сое дышетскыны кутӥзы. Нырысь-валысь секыт йӧтӥз пияшлы. Бӧрысь дышиз, устоосыз курсантъёс пӧлын ветлӥз. Макем шумпотӥз та училищее сюремезлы - Саратов урамъёстӥ йырзэ чатыртыса ветлылӥз, угось со вакытэ ожгарчиослэн, уката ик офицеръёслэн данзы калык пӧлын туж вылӥын вал. Но со дыре ик Тамазилы татын валан сётӥзы, со атыкай музъеммес, калыкмес тушмонъёслэсь утись, озьыен, тыныд вань калык оскиське, марысь-мар ке, мурт ожгарчиослы пумит султыса, улондэ но эн жаля. Сыӵе тынад Инмар азьын но, калыкед азьын но кутэм кылыд. Та сярысь Тамази Георгиевич улытозяз ог минутлы но ӧз вунэтылы. Училищеез йылпумъям егит лейтенантэз Калининградэ ыстӥзы, 11-тӥ армилэн нырысетӥ Московско-Минской дивизияз. Танк полклэн радиаци-хими ож тӥрлык кутэмез саклась разведка взводэзлы командире пуктӥзы. Лейтенант ужез борды соку ик гижысь- пиньысь басьтӥськиз. Тае адӟыса, армилэн хими войскоосызлэн кивалтӥсезлэн воштӥсез Габричидзеез дораз ӧтиз но шуэ: "Ми тӥледлы секытгес удыс ӵектӥськом. Хими ож тӥрлыклэсь утиськонъя батальонысь взводлэн командирез луоды". Нош тямыс толэзь ортчыса, Тамази Георгиевичлы ротаен кивалтыны оскизы ни. Ӟеч ужамез понна дырызлэсь вазь старшой лейтенант каризы. Бен, егит офицер вань тодэм-валамзэ ужезлы сётылӥз ке но, кытӥ-кытӥ янгышалляз, ӵемтылӥз но. Синву потымон ӝожомылӥз соку, нош мылкыдзэ ӧз возьматылы, ужез борды уката рос-прос басьтӥськылӥз, чаклалляз, малы янгышаз, ма кароно, азьланяз шекъёсыз медаз луэ ни шуыса. 1977 ар Габричидзелэн улоназ туж пусйымон луиз. Соку со хими ож тӥрлыклэсь утиськонъя нимысьтыз ротаен кивалтэ вал. Дивизиязы бадӟым дышетскон ужрадъёс - учениос ортчытӥзы. Азьвыл ик веразы, радио пыр ог-огенызы кусып возён тулкымъёссэс "тушмон" зӥбоз, суралоз шуыса, озьы ке но, роталы чаклам интыосы вуоно но отын хими яке радиаци ож тӥрлыкез кутэм сярысь тодоно. Кутэмын ке, штабе ивортоно но кышкытлык ваись бервылъёсты палэнтон ужрадъёс ортчытоно. Роталэсь радио пыр кусып возёнзэ суран понна "тушмонлэн" нимысьтыз батальонэз вал. Одӥг минут ӵоже со локаторен шедьтылӥз, кытысен рота вераське, но соку ик кужмо сиосын кусып возён тулкымзэс пачкатыны быгатылӥз. Ма кароно, соин йырин радиокусыптэк медаз кыльы шуыса? Малпаськыса-малпаськыса амал шедьтӥзы. Нимысьтыз карта лэсьтӥзы но лыдпусъёсын лушкем вераськон кыл тупатӥзы. Шуом, рота подразделение отысь но отысь сюрес вылэ потэ. "Тушмон" локатор куаразэс пачкатыса уг вутты, ротаысь связистъёс мукет радиотулкыме потыса, иворзэс пумозяз сёто ни. Малпанзы дивизилэн хими удысъёсызъя кивалтӥсезлы кельшиз. Выль амал быдэс дивизие вӧлмытэмын вал. Кутскизы учениос. Ротаос куддыръя кык уй- нунал ӵоже дугдылытэк мынылӥзы чаклам интыосазы, вить сю иськемез огкутскемен ортчылӥзы. Соку солдатъёс сыӵе жадьылӥзы, пыд вылазы изьыны ӧдъяллязы. Офицеръёслы асьсэлы секыт ож машинаосты валтылоно луылӥз. Дивизиысь подразделениос сизьым сю пол радиоэфире потазы, "тушмон" соослы огпол но люкетыны ӧз быгаты. Азязы пуктэм вань ужпумъёс быдэстэмын вал. Учениослы йылпумъянъёсъя Габричидзелэн ротаез тужгес устоосыз пӧлы сюриз. Ӟеч кивалтыны но уката ик подразделениосын кусып возьыны выль амал малпамез понна, Тамази Георгиевич "За боевые заслуги" медален пусъемын вал. Быдэс дивизиысь кык сюлэсь уно офицеръёс пӧлысь соегинэ сыӵе вылӥ дунъязы. Валамон ини, азинсконъёс ас кожазы ӧз лыктэ. Егит офицер жадёнэз валатэк ужаз, тодон-валанзэ ялан будэтыны тыршылӥз. Ӧйтӧд ини, кӧня уйёссэ но кӧлытэк ортчытъяно луылӥз. Ай ӵапак Калининградысен кышнояськиз, нылыз вордскиз. Генерал али но пайме, кызьы меда вань секытъёсты чидаз, вормиз. Егит муртлэн задор мылкыдыз оло та вакытлы юри кыдатэм мугор кужмыз вормонтэмзэ но ӝутыны юрттӥзы, дыр. Уката ик танкъёсын ветлыны дышетон сюрес лэсьтӥсь подразделениен кивалтыкуз секыт йӧтӥз. Командиръёс татчы тужгес кылзӥськисьтэм, нодтэм солдатъёссэс ыстӥллям. Ма гинэ ӧз дауртылэ соос! Абдралод но, бӧрдод но, ява. Нош командирлы соосты ужатоно, ваньзэ рос-прос лэсьтытоно ук. Эк бен, курадӟоно луиз. Нунал ӵоже какалмыса, бер ӝыт ини вань солдатъёс интыязы-а, ӧвӧл-а шуыса эскерон ортчытэ но умме усемзэс вите на. Соку гинэ огъя улоннияз бертыны потэ. Дораз уйшор бере часын, кыкын вуэ. Пӧсь ву ӧвӧл. Сокугес пинал ваем кузпалэзлы секыт ӝутъяны, кезьыт вуэн вырыны уг яра, висьыны кутскоз, йӧлыз быроз. Иське, юрттоно солы. Жадем офицер ву пӧсятэ, дӥсь миське но, кӧлон дырыз час-кык сяна уг кыльы ни, угось куать часлы - солдатъёсты сайкатон вакытлы - полигонэ вутсконо ни. Кышноезлы но капчи ӧй вал. Но егит кузпалъёс чидазы соку но, бӧрысь пӧртэм полигонъёслэн улонниостӥзы костаськыкузы но, ма быгатӥзы, ваньзэ лэсьтӥзы, пиналзы чырткем но визьмо мед будоз шуыса. Сюлмаськемзы юнме ӧз лу, нылзы юристэ дышетскиз, Минюстлэн Удмурт Элькунъя Кивалтэтаз ужа. Кавказын шуо, котькуд адямилэн, пе, аслаз тубоно гурезез. Огез йылозяз ӝутӥське, мукетыз - шурдэменыз яке кужымезлы оскымтэеныз - ӝыныёзяз гинэ тубе. Тамази Габричидзелэн гурезез меӵ ке но вылэм, со ӧз шурды, пумен вылэ но вылэ ӝутскиз. Дыр вуыса, сое полклэн кивалтон ёзаз ужаны басьтӥзы. Оскем удысэз кельше вал, но огпол командирез сое ӧтиз но шуиз: "Гожты рапорт, академие дышетскыны куриськыса". Тамази Георгиевич: - Татын ик ужасал но. - Ӧвӧл, тон кадь офицеръёс академиын дышетскыны кулэ. Гожты рапорт. Габричидзелы кылзӥськоно луиз. Дышетскиз. Нош академия бере улон сюресэз вордӥськем грузин музъем вылаз вуттӥз. Татын ини со уката вылӥе ӝутскиз, Кутаисиын быдэс ньыль дивизиослэн, иське, корпуслэн хими удысэныз кивалтӥз. Москваысь лыктэм эскерисьёс ужзэ чаклазы но сокем вылӥ дунъязы - 1991 арын мӧля вылаз "За службу Родине в Вооруженных силах" орден тэчизы. Ӧйтӧд, кыӵе гурезе ӝутскыны вормысал на Тамази Габричидзе, но СССР куашказ. Грузиын асьсэлэн ожгарчи шуон огазеяськонъёссы кылдылӥзы. Ӵемысь валаны ӧз луылы, кинъёс со - зэмос ожгарчиос-а, курокъёс-а. Пыӵал тӥрлыкез, мукет ожмаськон котырез соос медаз киултэ шуыса, азьвыл СССР-лэн, табере Россилэн ожгарчиосызлы бышкись ез сьӧрын уен-нуналэн туж сак возьмаськоно, курокъёслы пезьдэт сётыны дась улоно луиз. Тамази Георгиевичлы ожгарчиосыныз ог-огзэс виылӥсь грузинъёс но абхазъёс вискы но султылыны кылдӥз. Сюлмыз ӵогъяса малпаськылӥз: малы, кинэн йырин дауръёсын артэ улэм кык калыкъёс пыӵал тӥрлыкен ваче пумит султӥзы? Куд-ог грузин кивалтӥсьёс Габричидзелы туж ӵекто вал армизылэсь присягазэ кутыны, но со чутрак вандӥз: "Зэмос офицер присяга одӥг пол кутэ". Нош кылдэм югдуре вордскем Грузияз азьланяз но ожгарчи ужзэ быдэсъяны секыт вал. Соин ик Россилэн граждан обороная удысаз выжыны ӵектӥзы но, соку ик соглаш кариськиз. Озьы полковник Габричидзе Удмурт Элькунэ вуиз. Татысь граждан обороная штаблэн ож югдурлы дасяськонъя ёзэныз кык ар кивалтӥз но, ӟеч но валаса ужамзэ синйылтыса, сое нырысь ик та штаблы, собере граждан обороная но шукырес учыръёсъя кун комитетлы кивалтӥсе юнматӥзы. Бен, нялмыт вырйыло удмурт шаер - со гурезё Грузия ӧвӧл, но Тамази Георгиевичлэн ужез татын но меӵ гурезе тубон кадь. Вылаз ик, Габричидзе капчи сюресъёсты уг утча, со быръе сыӵезэ, кытын калыклы тросгес пайда вайыны, солэсь улонзэ, музъемзэ ӟечгес утьыны быгатоз. Туж юртто армиын трос аръёс ӵоже люкам тодон-валанъёсыз, кыдам сямыз... ...Бугрыш станциын, вагон сӧриськемен, пропан газэн кӧня ке цистернаос пуштӥзы, мукетъёсыз урдэс вылазы кыллё. Котырак тыл гома. Сое кысыны лыктэм пожарникъёс ву пызйыны кутскизы но, кыллись цистернаосысь газ потыны ӧдъяз но гомӟиз. Тылэн ожмаськисьёс ури-бери палэнскизы, матэ лыктыны уг дӥсьто ни. Ӟырдам цистернаос тани-тани пуштозы но, соку тӧлпери Бугрыш пала шокчоз, юртъёсты пеньӟытоз. Ӵап соку татчы Тамази Габричидзе но элькунысь тылпу кысӥсьёслэн йырзы Михаил Камалетдинов вуизы. Югдурез чакласа гинэ вуттӥзы, шукырес учыръёсъя ӧрилэн кивалтӥсез Юрий Питкевич лыктӥз. Тамази Георгиевич солы шуиз: "Тылпуэз уг кысо, кышкало. Асьмеос адямиосты косыны ум быгатӥське, соин ик ойдолэ тазьы каром: куиньнамы ӝуась цистернаос вӧзы султом". Озьы ик каризы. Тылпу кысӥсьёс, тае адӟыса, нокин косытэк ас ужзэс быдэсъяны ӧдъязы. Газ пызйись цистернаос бордысь тыл кысэмын вал, но соосты, медаз пуштэ шуыса, ялан ву пызйыса сӥятоно, нош тылпуэн нюръяськисьёслэн машинаосысьтызы эстӥськон быре ни. Тамази Габричидзе Сарапулэ ширтӥз. Нефтебазае вуиз но, директорзы, пе, висе. Валтӥсь инженерзылы жингыртӥз, нош соиз эстӥськон ыстыны пумит кариське. Соку Тамази Георгиевич шуиз: "Озьы ке, мон али быдэс Сарапулын тревога яло, нош сыӵе учыре мыным лэземын ваньзэ, ма гинэ кулэ, кужмын но басьтыны". Таӵе кылъёсты кылыса, директор но висемысь дугдӥз, инженер но ӧз пумитъяськы ни, эстӥськон нокыӵе кагаз гожъятэк висъяз. Тылпуэз быдэсак кысэм бере газэн пызйись цистернаосты пуштытӥзы. Вераны кулэ, туж шонер лэсьтӥзы, малы ке шуоно, Нижний Новгород дорысь Арзамас станциын Бугрышын кадь ик луэм учыре пограм цистернаез ӝутыны кутскиллям но, соиз пуштэм - куать адямилэсь пеньзэс но шедьтӥллямтэ ни. Та шудтэм учыр бере Габричидзе валаз: мукет таӵе учыръёсты ӝог но янгышатэк палэнтон понна, интыысь интые ветлыны быгатӥсь кивалтон пункт кылдытоно. Отысен быдэс элькунэ косонъёс-приказъёс ыстыны мед луоз. Сотэк шудтэм учырез палэнтон дыръя янгышъёс кылдо но, бӧрысь копасько ини: кин умойтэм приказ сётӥз, нош кин ке озьы карыны косӥз-а вал? Утча на йылзэ-пумзэ. Озьы кӧня ке ар талэсь азьло, Габричидзелэн ӵектэмезъя, интыысь интые ветлыны быгатӥсь кивалтон пункт кылдытыны кутскизы. Коньдонэн ӝикыт ке но вал, отысь но татысь бичаса, одӥг сыӵе пункт лэсьтӥзы. Учениос дыръя сое Россиысь МЧС-лэн тӧроезлы возьматӥзы. Солы Удмуртиысь эшъёсызлэн ужзы кельшиз, но шуиз, таӵе пунктэз ожгарчиослэн эскеронзы пыр поттоно. Кивалтон пунктъёсты лэсьтон понна Россиысь МЧС тендер ортчытӥз. Удмуртиысь граждан обороная но шукырес учыръёсъя кун комитет отын вормисе потӥз. Табере МЧС-лэн быдэс Россиысь ёзъёсызлы кивалтон пунктъёсты Ижысь ЭМЗ заводын поттозы. Та уже ик кыскемын луозы "Аксион" огазеяськон, Ижкарысь радиозавод но асьмелэн ваньмыз сямен бадӟым предприятиосмы. Иське, соос удыссэс паськытатозы, элькунмылы уногес пайда сётозы. Граждан обороная штаблэн сярысь, Габричидзелэн туннэ кивалтоно кун комитетэзлэн ужез чылкак мукет луиз, со трослы йылӥз, паськытаз. Табере татын нырысь интые пукто шукырес но шудтэм учыръёсты алон ужез. Нош со понна котькуд кышкытлык кылдытыны быгатӥсь предприятиын нимысьтыз чакласькон системаос кылдытъяно. Соослэсь ивортонъёссэс огъя диспетчер службае люкано. Но соослэн кивалтӥсьёссы талы пумитъясько, угось ватсаса коньдон шедьтоно, нош со - мултэс йыр висён. Уг валало, марысь-мар ке, предприятизы чарак ыштонъёс адӟоз, ворсаськыны но быгатоз. Нош со шукырес учыръёс калыклы макем бадӟым кайгу ваё. Тани али Габричидзе нюръяське, Камбаркаысь но Кизнерысь хими ож тӥрлык возён арсеналъёсын югдурез чаклан (мониторинг) система кылдытон понна. Али ваньмыз понна, мар отын лэсьтӥське, арсеналъёслэн кивалтӥсьёссы гинэ кыл куто. Мар отын луэ, кыӵе юрттэт кулэ, соос гинэ тодо. Озьы уг яра, угось пуштӥз-мар ке, кышкытлык ваньмылэн улонмылы кылдоз, нош шукырес учырлэсь бервылъёссэ Габричидзелэн комитетэзлы палэнтыны усёз. Соин ик арсеналысь югдурез чаклан ужъёсы татын ужасьёсын ӵош мед быдэсъяськозы но эскеронъя вань иворъёс огъя диспетчер службае сётэмын мед луозы. Нош Удмуртиысь граждан обороная но шукырес учыръёсъя кун комитетын ужасьёслэн мониторинг системаос кылдытонъя быгатонзы но тодон-валанъёссы но вань. Тани "Ижмолоко" огазеяськон вӧзтӥ азьвыл ортчыку, аммиак зын нырез чатыртэ вал, ма веранэз ини, маин шоказы отын ужасьёс. Чаклан система ужаны кутскем бере югдур чутрак воштӥськиз. Али татын аммиаклэн зыныз чик уг шӧдӥськы. Хими ож тӥрлыкъёсты быдтон ласянь туж валантэм ужа конвенция удмурт комитет. Боеприпасъёсъя россия комитетлэн вань куронъёсызлы, югдуръя ӵектонъёсызлы дурбасьтэ. Москваос зӥбо, нош асьмелэнъёс татын улэмзэс вунэто-а, мар-а, чик уг пумитъясько. Иське, малы конвенция комитет кылдытӥмы? Улон юртъёс ӝутыны коньдон кыскан понна гинэ шат? Нош кулэ луозы на-а со юртъёс, кудаз ке арсеналын пуштон учыр луиз ке? Паймод ява, но конвенция комитет тямыс ар ӵоже ужатозяз, озьы ик ӧз бырйы на, кыӵе амалэн хими ож тӥрлыкез быдтоно. Габричидзелэсь кивалтоно комитетсэ но арсеналъёсын герӟаськем ужъёслэсь пумен-пумен палэнтыны туртто. Уз пӧрмы. Удмурт Элькунысь граждан обороная но шукырес учыръёсъя кун комитет нырысь ик калыкмес, музъеммес утён понна ужа бере, шаерысьтымы вань кышкытлык ваись макеосты палэнтыны тыршоз. Хими ож тӥрлыкез быдтон ужъёс соосты быдтон понна гинэ медаз быдэсъяське, ваньмыз нырысь ик мед лэсьтӥськоз адямиосты утён вылысь - сыӵе малпанэн герӟаськем ужрадъёс ортчытыны дэмланъёс Тамази Георгиевич хими ож тӥрлыкез быдтонъя федераци программае пыртыны ӵектӥз. Соос лыдэ басьтэмын вал. Габричидзелэн кивалтоно комитетэз элькунысьтымы шуге-леке сюремъёсты утчан, утён службаосты но выльысь улӟытыны тырше. Соос али умой ужало ни Воткинскын, Ижкарын, азьланяз мукет каръёсын но озьы ик луоз. Нош адями утисьёсмылэн быгатонзы вань. Сое ӟеч возьматӥз Россиысь улосвылъёсысь шуге-леке сюремъёсты утчан но утён службаослэн ньылетӥ ӵошатсконзы но. Адямиосты утчан, утён, инкуазен, техникаен герӟаськем шукырес учыръёс дыръя ужаны быгатэмзыя асьмелэн пиосмы трос мукет улосвылъёсысь эшъёссэс азьпалтӥзы. ...Генераллэн ӝӧк вылысьтыз телефон нош ик куаразэ сётӥз, табере со ӧз таргеты, кыӵе ке ӝожмыт тюргетӥз. - Бен, мон, кылзӥсько. Глазов? - ... - Вералэ, ма ини сутскыны сюремъёсын? - Куинез ӧз чидалэ... - Пуштонлэн мугез шараяськиз-а? - Ма но со тодмо луиз... Телефон трубказэ поныса, Тамази Георгиевич сюлэмыз вӧсь луыса малпаз: "Выльысь адямиос быремын, кӧня кайгу, мертантэм ыштон. Нош ма муген? Огез, технологиез тӥяса но вамышезлэсь кытчы вуттонозэ вунэтыса косӥз, мукетъёсыз ӧз эскере, куинетӥосыз косэмез малпаськытэк быдэстӥзы но, тӥни ма луиз. Ӧвӧл, мар ке но кароно, таӵе учыръёс медаз луэ ни". Генерал нош ик кемалась малпаназ вуиз: вань эскерон, чаклан (мониторинг) службаосты, соослы висъяськись коньдонэз огинэ кароно. Соку гинэ шукырес но шудтэм учыръёсты алон ужлэн пайдаез ӟечгес шӧдӥськоз. Нош али кызьы луэ: котькуд предприятилэсь, организацилэсь кышкытлыктэк ужамзэ аслаз удыс кивалтэтысьтыз ыстэм муртъёс эскеро, чакламъёссэс, тодэмъёссэс асьсэ понна гинэ гожто, куддыръя тырмымтэосты вато но. Нош туала вакытэ вань предприятиос, ужюртъёс ог-огенызы туж юн герӟаськемын ук. Кытын ке шексэс, янгышсэс ватозы, асьсэос ке шугадӟонэ ӧз вуэ, соосын йырин мукет интыын шудтэм учыр луыны быгатоз. Соин ик вань эскеронъёсъя чакламъёс, дэмланъёс, косонъёс сярысь иворъёсты огъя диспетчер службае бичано. Вань эскерон, чаклан кужымъёсты, соослы висъяськись ваньбурез но огазе кароно. Улон куке-соку ачиз сыӵе вамышъёс лэсьтытоз. Но али та малпанъёсты быдэстон понна нош ик нюръяськоно, уен-нуналэн ужано луоз. Меӵ гурезе тубем кадь. Азьпалан тыныд нокин тубатъёс лэсьтымтэ, ӝужыт борддоръёсы но пыкиськылод, изъёс но вылад усьылозы, мур вукыремъёс но пумиськылозы, нош генераллы, зэмос офицерлы чигнаны уг яра. Со калыкез, музъемез утьыны присяга сётӥз ук. Ӵок, гурезед меӵ но ӝужыт ке, юн сямо, кужмо адями аслаз мылкыдыныз, ӟеч малпанъёсыныз котьку солэсь ӝужыт. Горд кушман сюан Куке но та сярысь нэнэелэсь верамзэ кылэме вань. Нош ма со, тодыны ик ӧй тыршы, со сярысь вунэтӥськем но вылэм ини. Кемалась ик ӧвӧл, Якшур-Бодья ёросысь Ӵошкыт гуртэ ветлыкум, Нина Ивановна Шкляева та аспӧртэмлыко йылол сярысь тодам вайытӥз. Собере гуртысьтымы тодӥсь нылкышноослэсь юалляськоно кариськи на. Апае, Елизавета Николаевна Кузнецова, Мария Титовна Широбокова, нэнэмылэн ӵош ужам эшъёсыз Марфа Тимофеевна Загребина но Наталия Харитоновна Широбокова одӥг ымысь кадь, соин ӵош ог-огзылэсь верамзэс йылтыса, тазьы мадизы. Горд кушман сюанэз Покро сюан, пичи сюан шуо на вылэм. Сое 14 коньывуонэ ортчыто вылэм. Азьло ик дасяськылӥллям: горд кушман пӧзьто, сюкась чырсато, паронка, кубиста но мукет бакча сиёнъёссэс сылалто но пӧзьто. Ӝӧк вылын одно ик варсь, кенэм пӧзьтэм луэ. Дӥськут но азьло ик малпамын, дасямын луыны кулэ, пе, тужгес но - йыразы поныны такъя. Сое нылкышноос лампа табалэсь лэсьтылӥллям. Вылзэ басмаен котырто, дураз туг вуро, йылаз (пияла понон пасяз) каляга яке картошка юнматылӥллям. Отчы векчи ньӧръёс бышкало, нош соос йылэ сяськаос керттылыса дэмӟытъяло, пе. Табазэ но басма вылтӥз сяськаосын чеберъяло на вылэм. Дӥсяло, пе, сьӧд дӥсь (милям векчи гинэ сьӧд дукесэз, кускытӥз кильымаса вурем дӥсез озьы шуо), вылаз керттылӥллям кузь азькышет. Чыртывесь но поно, пе, вал. Йыразы такъя сяна, палкышет (куинь сэрего), буртчин кышет, чалма керттылӥллям на. Туж чебересь адско, пе, вал. Кинлэн сьӧд дӥсез ӧвӧл, чеберзэгес шортдэрем дӥсяло. Коркась корка ветлылӥллям. Пыремзы бере сюан гур кырӟаса ортчо. Корка кузё сиёнэн-юонэн пумита. Котькудӥзлы сюмык вина сётэ. Пыремъёс сое кутыло гинэ, уг юо, кудӥз пичияк оскалтылэ, пе. Собере куноосты ӝӧк сьӧры пукто. Ӝӧк вылэ бакча сиёнъёслэсь гинэ дасям пӧраськемъёс, пыжиськемъёс, чырсатэмъёс пуктыло вылэм: сюкасен шутэм горд кушман, пӧртэм сямен дасям кубиста (сылалтэм, пӧзьтыса йӧлвылэн шуккем, сюкасен), паронка, сюкасен мукет сиёнъёс. Пыжиськемъёс но бакча сиёнлэсь ик: сяртчынянь, ӵуж кушманэн, кубистаен, горд кушманэн кутэмняньёс, кенэмен но нелькем картошкаен гур пельнянь, кенэм пӧзьтэм. Сое чурыт но, небыт но лэсьто вылэм. Чурытсэ вандылыса тэркые тырылӥллям, нош небытсэ - пичи тусьтые. Кенэм пӧзьтэмлы нимысьтыз тусьты луэ вылэм - вылӥ дур палзэ лёгырес лэсьтылӥллям. Ма, ваньзэ удмурт пӧрамъёсты вераса но уд быдты. Соосты ӝӧк вылэ жалятэк пуктыло ини - пуньы поныны мырдэм инты кыле. Пӧртэм кырӟанъёс кырӟало вылэм. Но вань туж тунсыкоез: сьӧр гуртъёсты серем карыса кырӟало, пе, вал, гурт нимъёсты но отысь егитъёсты верало. Ма бен отын ӟечез кадь? Но мургес учконо ке, туж умой со. Кинлэн зэматэмез потоз уж вылын исаськонъёсын верам кылъёсты? Тани Наталия Харитоновна но шуэ: "Ну серем каро ук кӧкранъёс, кышкаса ик кылзӥсько ин, ма меда шуозы якшуръёсты. "Бӧдья нылъёс - кабак азьын тэтчасьёс" шуизы, табере ми вылэ вуозы ини". Бӧдьяос вылэ дугдӥллям, Якшурозь вуиллямтэ. Озьы таосыз возьытэ усиллямтэ. Улонын, зэмзэ но, сыӵе возьытэ вуонтэм вылысь, котькудӥз ассэ ӟечгес возьыны тыршылӥз ини. Ӝӧк сьӧрысь пото ке, нош ик сюан гур кырӟало на. Та йылол школаын урожайлы сӥзем праздникез ортчытонэн огкадьгес луэ. Вань на Ӟеглуд палъёслэн пӧртмаськонэнызы тупамез но: такъя лэсьтыса, йыразы поно, исаськыса кырӟало. Котьма ке но, огшоры шулдыръяськон гинэ ӧвӧл кадь та йылол, гужем ужам ужъёссылы йылпумъян но лэсьто, ваньбуро, шудбуро улонзэс но возьмато. В. Широбокова, Якшур-Бодьяысь фольклор группаен кивалтӥсь. Оло зэм, оло даур Эмма Загребина Вожась карт серемес верос Мынам картэ туж вожась. Ой, вожа-ась... Вазь тулыс ик возь вылысь вожан турын-а, мар-а сиыны шедьтэм. Егит дыръяз туж зӥбыт вал. Со ӟыгыръям интые, ачим сое ӟыгыртоно луылӥз. Юнме уг шуо: вожась муртлэн синмыз дас кык. Мынамезлэн но юымтэ дыръяз кылыз ньылэмын кожалод. Нош шӧмыз вань ке, тӧл вуко но тӧл вуко. Ай со ведь вордскем кылзэ вунэтэ, син азьын ӟучоме. Нош кинэ гинэ со бордам уг ляк. Алигес тани ужысь шӧмо вуиз. Тодманы вырыса, эбеклэн кадь тордэм синъёсыныз шорам учкиз но шуэ: - Еким целовал! Осто! Ултозям нокыӵе Екимлэн чупаллямез ӧвӧл. Тыл понна! Гуртамы сыӵе нимын пиосъёс ик ӧвӧл. Тодмоосы пӧлын но. Паймыса мукет гуртъёсты но юаса ветлӥ. Нокытысь ӧй шедьты. Картэ выльысь юыса вуэ, ӧс выж вамен вамыштэ гинэ но чиньыеныз нырулам шонаса вазе: - Еким целовал! Це-ло-ва-ал... Улыны маза ӧвӧл ни. Коть Екимез доры пегӟы. Но кытысь сое шедьтод? Кутӥ но ёросысь вань гуртъёсы одӥг нуналэ гожтэтъёс ысъяй. Педоре монэ Екимен вожа ке, озьыен, сыӵе пиосмурт вань. Но гожтэтъёсы берлань вуизы: "Такой не проживает". Ма, уг танӥськы, кинэн но соин чупалляськеме вань. Но соослэн нимъёссы чылкак мукетэсь кадь вал. Куро зурод люкакумы, егит дыръям Тӧдьы Петыр чуп! кариз. Бамам гинэ. Тӧдьы ке тӧдьы ик вань, керпотэменыз бамъёсыз ӝуаны кутскизы. Пӧсезлы чидатэк, аслам бамъёсы ӵындыны кутскизы. "Весна на Заречной улице" киноысь бертыкум ке шуоно, таяз учыре но Еким ӧй вал. Сьӧд Юрик. Кема гинэ Пролка сэргын возиз. Таиз чупаз ке, чупаз... Али но бервылзэ шӧдӥсько на. Бызьыны но куре вал. Пумит кариськи. Егит дыръя ик кынмытозям возь ай. Жалян сямыз ӧвӧл. Песяе собере монэ арня ӵоже пӧсь мунчоын кызьпу веникен пыртоно луиз. Сыӵе муртлы бызид ке, пузэ жаляса, кезьыт коркан возёз. Чайы яке ӟичы шуба сярысь эн ик малпа, кеч шубаен ветлытоз. Нош Сюровайысь Васи... Ой, тазэ веранэз ик ӧвӧл... Ой, шу! Серем-а ӧвӧл. Пал кыл но поттылэмзэ кылэме ӧвӧл, арганэныз гинэ сюлме пыраз. Тылын гоматозяз шудылӥз. Ой, сюлмы ик лычсузьылӥз, ятэ... Ай муспотонэ али мукетыныз вожа. Вадьсам ик пукон вылэ пуксе но шорам до-ол учкыса шуэ: - Марадона! Ой, нырысь-валысь йыры кур луэ вал. Кыӵе-сыӵе ним но шедьтод, пе. Кытчы инты пырыны шедьтытэк, тапыр! гинэ тыбыраз мыжгисько. Ма луоз солы, гондырлы, чибинь куртчем кадь. Аслам гинэ киос лызэктӥзы-вожектӥзы. Йырси нюжа мында но сьӧлыке ӧвӧл, нош со... Городысь бертэм нуноке (внуке) буйгатӥз: - Песяй, Марадонаен исамезлы шум гинэ пот. Марадона быдэс дуннелы тодмо футболист. Тодмо футболист... Тазэ но-а, мар-а Екимез сямен утчаса ветлоно? Быдэс дуннелы тодмо ке, малы мон уг тодӥськы? Мон но та дуннеысь ук? Собере, сыӵе тодмо ке, малы ми палан ӧз адскылы? Кӧня пол Бадяр вӧлемын огнам эмезялляй, отчы гинэ но ӧз вуылы. Семи бульдозереныз вуылӥз ук! Эмезяны, пе, юрттӥсько. Тожо мыным эмезясь. Одӥг фара октӥз, нош ӝыны ведраме сииз. Мукет эмезь шоры учкылэ на вал. Сёто мон солы эмезь... Эмезь пӧлысь пушнерез мед чупалоз... Табере тани Педие чылкак мукет кырӟан кырӟа. Артистъёс сямен программазэ вошъя. Алигес эшъёсыз машинаен ваизы. Корка пыртыны выро, нош со пумитъяське, что я, Федя, что ли, шуэ. Ӧвӧл, шуисько, Педоре, ӧвӧл. Тон Така гуртысь сур пӧзьтон заводлэн директорез Еким. Екимов Еким Екимович. До-ол! шорам учке. Начальник шӧм пыре, лэся, йырзэ айы ӵӧж кадь выретэ, чыртыысьтыз галстуксэ тупатӥсько кожаса, мӧля гонъёссэ чыртыозяз ик кыска. Таба пасьта усьтэм синъёсыныз кыньыръятэк шорам учке но вазе: "Я не Федя". Ӧвӧл, шуисько, Педие, ӧвӧл, тон Бразилиысь тодмо футболист Марадона. Бадяр вӧлеме путёвкая шутэтскыны лыктӥд. Питырес Манилэн ЪВ дауре пуктэм из мунчояз коскам пыдъёстэ пыртыны. Якшуркаын чорыганы, Мукшиысь чеберайёсын пыжен уяны. Со вие картэ диван вылэ пуксе, пыдъёссэ кресло вылэ тыре но, киосыныз культурно шоналтыса, шампанской куре... Вуэ одӥг пуньы сода но песок поныса, зол-зол сурасько но Педиелы сётӥсько: - Тани тыныд Чиган ошмесысь фирменной шампанской. Печатен-маин. Печатез но клоп- клоп гинэ - скал пытьы. Табере ачим но уг тодӥськы, картэлэн кызьы нимыз. Педор-а, Еким-а яке Марадона- а? Паспортсэ учкытэк уз луы. Оло, со воксё шпион яке киллер. Нош зэмзэ но Марадона ке? Ас кылыныз ке вераськыны кутскиз? Кызьы пумитаз вазёд? Мон ӟуч сямен но "дай", "вай" сяна уг тодӥськы... Зэмзэ но, тӥни маке валантэм нукыртэ кадь. - Ма шуиськод, мусое, ма шуиськод? - Хелло, женуляха, хелло... Лидия Нянькина Сылӥсько лыз инлэн бурд улаз Вордскиз Алнаш ёросысь Серп гуртын. Тямыс классэ йылпумъяса, Можга педучилищее дышетскыны пыриз. Кык ар школаын ужаз. 1986-1991 аръёсы Удмуртиысь писательёслэн огазеяськонзы сое ыстылӥз Горький нимо Литературая институтэ удмурт чеберлыко произведениосты ӟуч кылэ берыктон ужлы дышетскыны. Сое быдтэмез бере одӥг ар "Кизили" журналын тыршиз, собере - "Инвожо" журналын. Али но отын ик ужа. Веросъёсыз пыртэмын егит гожъясьёслэн "Инӟарекъян" (1991) бичетазы но туала удмурт веросъёсын "Быльырам синкыли" (1997) антологие. 1996 арын солэн веросъёсын "Ваёбыж кар" нимо аслаз книгаез потэ. 1998 арын Лидия Нянькина Ашальчи Оки нимо премиен пусъемын. Веросъёс гожъям сяна, та егит автор кылбуран удысын но быгатэмзэ возьматӥз ини. Тани алигес "Кенеше" но со ваиз берло кылдэм чуръёсыныз бадӟымос сузьет. Аслэсьтым басьтӥсько интервью... Х Х Х Аслэсьтым басьтӥсько интервью: "Кылбурчи, кыӵе-мар улӥськом?" Салонам - пумиськон. Рандеву Музаен ми туннэ ортчытском. Со вуиз дас часъёс котырын. Синъёсыз - ошмеслэсь но чылкыт. Бордысьтыз лӧсъяське сяська зын... Вамышъёс - коӵышлэсь но небыт. Ах, кыӵе тупаськом ми соин! Кулысал, ӧй ке луысал со! Пукиськом учкыса ваче син, Со туннэ котькулэсь но мусо. Укноям катанчи мон ӧй ош, Ойдо мед вожъяськоз уй инбам! Ми куспын нокыӵе ӧвӧл гож, Милесьтым тӥледлы - пӧсь салам! Лыктэлэ кылбуран салонам! Х Х Х Табыдӟа дуннеын мон огнам. Нокинэн вераськын лул-сюлмысь. Котькудаз лёгиськем вамышам Юасько: "Мон малы-о, кытысь?" Кожалод, мон мукет даурысь Куриськи кадь тӥляд дорады. Тӥ монэ дугдӥды валамысь - Тӥ ӧд басьтэ монэ пӧлады. Ӟечбуресь! Мон мукет Вакытысь - Вань мынам Юг-югыт Шаере. Мон уг дугды Сое ушъямысь - Отын Эш но шедьтӥ ни бере. Ӟечбуресь! Ӟечбуресь, Юг Шаер! О, кӧня мон утчай Тӥ кадьзэ! Тӥледыз пумитай ке но бер - Мылкыдме шӧдскоды весьваньзэ. Одно, одно Югыт Шаерам Мон лэзё выжыме, эшъёсы. "Выжыкыл", - кылӥськиз пель сьӧрам. Нош мынам - пальпото синъёсы... Х Х Х Кӧня пол ни шуи мон аслым: Нокинэ но эн лэзь пушлулад. Кинэ ке лэзиськод но - сурым Аръёсын возиське син азяд. Тон эн лэзьы аслад пушлулад, Уката - ӝыныё тодмодэ. Оскиськод, со юрттоз, Ку огнад Гурезьтӥ нуиськод ныпъеттэ? Тон эн кожа - со туж валалоз Ачидъя улонтӥ мынэмдэ. Сюлэмдэ ке усьтӥд - вузалоз - Бератаз трос кисьтод синвудэ. Кӧня пол ни шуи мон аслым: Нокинэ но эн лэзь пушлулад. Кинэ ке лэзиськод но - макмыр Аръёсын Возиське сӥльвирад. Ӵап соин сётӥсько мон дэмлан: Нош луиз ке тынад пушлулад Укыргес но шимес, Сэрытак Басьты тон горд-курень шоколад, Ӟеч шампанской но - ю шыпытак. Нокинэ но эн лэзь пушлулад! Х Х Х Сылӥсько лыз уйлэн бурд улаз - Ми соин кемалась юлтошъёс. Мар солэн шып улӥсь сюлэмаз, Шат тодо со сярысь шудоос? Кылчинъёс лобало инметӥ, Вӧтато сьӧлыктэм нуныез. Огезлы синмыным кырмыштӥ - Вунэтӥз ни монэ, лудмемез. Пукисько лыз инлэн ал вылаз, Кожалод, ми соин дусымъёс: Эшелэн пеймытэсь синъёсаз Бызьыло эрказмем периос. Пипуос, уйсыос но кӧло, Ми доры уг ик лыктылы ум. Лысвуо улдэрем дӥсяло - Уй вӧзы валесэ выдыкум. Мӧзмон Адӟисько Мӧзмонлэсь синъёссэ, Тани нош со кескич кырмыштэ. Со куштэ катазэ, сьӧд плащсэ - Коӵыш кадь пумитам вамыштэ. Ӟыгыртэ. Нош солэн вешамез Уг, уг шунты - юзыр шымыртэ. Чик уг поты монэ валамез, Аслэсьтыз кужымзэ возьматэ. Мынектэ. Котькинлэсь зол, вылды, Со кожа кырӟасько шулдыргес. Пӧсектӥ но кеськи: "Куарады Чик ӧвӧл тулыслэсь ненеггес! Жингресгес, тӥ сярысь, куараез, Тодэмды ке потэ - ыр тӧллэн. Кудыръя корка тыр бӧрдэмез Мусогес кылӥське нунылэн!" Кӧсэктӥз. Ӵыжектӥз. Вожектӥз. Кыштырак дӥсяськиз-кутчаськиз. Гызмыляк нюжтӥськиз ӧс доры. Ах, Мӧзмон! Тон ӧвӧл огшоры... Х Х Х Тодэмды ке потэ, мынам вань! мынам вань! Шудбурез ас киям кутыса воземе! Со тулыс кадь ненег, со шунды кадь чилясь, О, кӧня мон Солэсь синъёссэ чупалляй! Тӥ уд тодске, кӧня мон Сое вешалляй, Сюлэмы путымон ӝиптылӥ, ӟыгыръяй! Кӧкыысь нуныез кадь таман вешалляй, Жингырес крезьгуръёс Со понна кырӟалляй. Кӧня пол со сярысь кылбуръёс гожъялляй, Корка тыр коть муген-а, мугтэк серекъяй. Дорысьтым со ноку но уз кошкы кожай, Шат юнме мон Сое татчыозь данъялляй? Табере - макем бер мон валай - Юнме, юнме Солэсь синъёссэ чупалляй... Х Х Х Ваньмыз ас интыяз. Но тон дугды ай, сыл! Кайгыре ас понназ Толэзьысь егит ныл. Кыл утча кӧтӝожзэ Кыланы-бураны. Но нёжмыт куаразэ Чик уг лу кылыны. Лыз инмысь малы ке Усьыло шапыкъёс: Я вуэз пальккаське? Я вия синвуэз? Ай усьтоз ӧсъёссэ Тон понна Эдем сад. Ойдо, кынь синъёстэ, Ыш ческыт уйвӧтад! Лираен керетон Ӧй, ӧй бӧрды, кион кадь вузӥ. Мон ачим но ӧй тод, ма муген. Инбамын толэзед туж тузӥ Пазяське чиль-чилясь азвесен. Висисьлы кадь лушкем сипыртӥз... Со сямыд - я кытысь-о, толэзь? Сюлэмы кылбуран куриськиз, Чуръёсы, тӥ эн пӧрме гырезь! "О, тон лэзьы монэ эрике!" - Мон озьы вазиськи Лиралы. "Тон мынам пичие, эркее, Кельшиськод киноысь геройлы". "Мон пичи? Мон эрке? Ма, кызьы Тон укыр вӧсь карид сюлэмме?! Мон уг луы тонъя нокызьы. Иське, гожты ачид кылбурме!" Лирае маялтӥз йырсиме, Киосыз шунтӥзы мылкыдме. Со шуиз: "Чик йыры ӧвӧл кур. Ай трос пол гожъялод выль кылбур!" Х Х Х Паймыса учке шорам Вож синмо тулыс. Вамышъясько одӥгнам, Мон - уйлэн нылыз. Инбамын пиштэ юг-юг Пурысьтам толэзь. Вераны уг тодскы, шуг - Кин доры уг лэзь. Котькулэсь туннэ мон сэзь: Пальпотӥсько весь. "Ымдурыд тынад - эмезь", - Кылӥсько тӧллэсь. Ульчаын шыпыт. Кӧлэ Быдэсак инкуазь. Каллен, пыдчиньы йылам Бертӥсько дорам.