Литературамылэн сюрес лёгисез, нырысетӥез удмурт кылбурчи, веросчи но драматург, нырысетӥез удмурт тодосчи - этнограф, фольклорист, лингвист, дышетӥсь но священнослужитель Григорий Егорович Верещагин вордӥськиз 13 коньывуонэ 1851 арын Вятка губерниысь Глаз уездысь (али Удмурт Элькунысь Кез ёросысь) ӟучо-удмурто Полом черкогуртын крестьян семьяын. 1970 арын Сарапулысь реальной училищеез быдтэм бераз та уездысь ик Ляльшурын но Сосновна, Шаркан, Бураново черкогуртъёсын нылпиосыз дышетэ. Собере черке ужаны кошке: 1895-1900 аръёсы Елабугаын дьяконын ветлэ, 1900-1927 аръёсы - Бурановоын священнослужительын. Революция бере аръёсы со трос кужымзэ сётэ ас калыкезлэсь культуразэ ӝутон ужлы. 1927 арын сое, Совето властьлы мылысь-кыдысь юрттэ шуыса, священникысь кушто. Г. Е. Верещагин кулэ Ижкарын 1930 арын 27 гудырикошконэ. Кузь улонысьтыз витьтон арлэсь ятырзэ со удмурт но ӟуч калыклэсь улон-вылон сямъёссэ но йылолъёссэ эскерон-чаклан ужлы сӥзиз. Трос гуртъёсы поталляз, уно калыкен пумиськылӥз. Люкам материалъёсызъя кык монографиос поттӥз: "Вотяки Сосновского края" (С.-Петербург, 1884, 1886) но "Вотяки Сарапульского уезда Вятской губернии" (С.-Петербург,1889). Та ужъёсыз понна со Императорской Ӟуч географической обществолэсь кык азвесь медальзэ басьтӥз. Озьы ик кылэм- адӟемъёсыз, тодэм-валамъёсыз гожтыса кылемын пӧртэм публикациосаз - бадӟым но пичи статьяосаз но рукописьёсаз. Г. Е. Верещагинлэсь "Чагыр, чагыр дыдыке..." кылбурзэ (потӥз одӥгаз книгаяз) али асьмеос нырысетӥ удмурт чеберлыко произведениен лыдъяськом. Куд-ог мукет кылбуръёсыз потылӥзы на "Гудыри" газетын но "Руководство к изучению вотского языка" (1924) книгаяз. Но туж тросэз гожъямъёсыз: выжыкылъёсыз, веросъёсыз, кылбуръёсыз, поэмаосыз но пьесаосыз потытэк кылемын. Дано "песятаймылэсь" вань та ужъёссэ люкан но лыдӟись кие вуттон борды берло дыре ӟеч-ӟеч басьтӥськиз Историяя, кылъя но литературая Удмурт институт. Со поттыны кутскиз люкам сочинениосыныз книгаоссэ. Книга ӝажыосы ньылез вуэмын ини. Леонид Фёдоров Улытозяз уно эшъёс утчаз "Котькыӵе ужан удысын мед луод, вӧзад ӟеч мылкыдын визьмась, валэктӥсь, бурдъясь, ӟеч адями вань ке, улон ик шулдыргес, инвис ик паськытгес йӧтэ. Суй- пыд уг юскиськы, уката кужмогес ужам потэ". Та кылъёс басьтэмын Удмуртиысь калык кылбурчилэн Герман Ходыревлэн тодэ ваёнъёсысьтыз Г.Д.Красильниковлы сӥзем очеркысьтыз. Малпасько, сыӵе мылкыдын ортчиз Герман Алексеевичлэн аслаз улонэз но. Та ласянь Герми эше туж шудо вылэм - пинал дырысеныз вӧзаз визьмась, бурдъясь адямиос вылӥллям. Собере со егит дырысеныз ачиз трос эшъёсызлы-гожъяськисьёслы мылкыд сётӥсь, визьмась, ӟеч адями луиз. Калык верамъя, ӟечез ӟечен ик берытске уго. Сое кылбурчилэн вань улонэз возьматэ. Кызьы меда будӥсь пи Герми Ходырев, школаын, собере педучилищеын дышетскыса, туж вазь валаз, поэзия - солэн сюресэз, быръёно удысэз, шуыса? Паймымон зол вал, дыр, мылкыдыз но быгатонлыкез. Арысь аре азинскиз талантэз. Вордскемын суро-пожо семьяын, гуртысь ӟуч дышетӥсьлэн пиез. Нош Гера удмурт кыллэсь чебер, жингрес луэмзэ шӧдэм ини, анаез но трос удмурт эшъёсыз луыса. Собере пичиысен ик туж трос лыдӟиськем. Мон паймыса тодам вайылӥсько Германлэсь пинал дырысеныз котьмаин тунсыкъяськемзэ, трос поэтъёсты, удмуртъёссэ но, мукет калыкъёслэсь но тодыны тыршемзэ, гожтэтъёс пыр трос визьмо, дано адямиосын кусып воземзэ, собере соосын пумиськылэмзэ, озьы ик балалайкаен туж чырткем шудэмзэ. Сое котьку ӟеч мылкыдын кылзӥсько вал. 50-тӥ аръёс кутскыку кыкнамы дышетским педучилищеын, мон - Ижевскын, со Можгалан дышетсконзэ мынэсьтым кык ар азьло быдэстӥз. Монэ со ачиз шедьтӥз, шуыны луоз, дыр. Со вакытэ Гера газетъёсын печатласькылэ ни вал, нош мынэсьтым "Советской Удмуртиысь" кӧня ке гинэ чуръёсме адӟыса, педучилищеямы гожтэт ыстэм, милемын, удмурт пиосын, эшъяськон мылкыдзэ вераса. Собере, дыр ортчыса, Гера вуиз Ижевске, Пастухов урамысь печать юртын писательёслэн кыӵе ке но кенешазы нырысьсэ пумиським, вуылӥз Можгалась эшмы милям общежитиямы но. Тодӥсько, Гера соку ик ини тросэзлы гожъяны кутскисьёслы эшъяськыны кизэ мычылӥз. Улон сюресъёс кыкнамес вуттӥзы Удмурт пединститутэ, улӥмы одӥг общежитиын. Вуж тодмоос сямен, ӵем пумиськылӥм. Ӵош хоре ветлылӥм, пӧртэм огазеясь ужъёс шедьылӥзы. Мынэсьтым кык ареслы бадӟымгес эше соку ик кылъя но литературая, историяя факультетамы тодмо ни вал кылбуръёс но кырӟанъёс гожъяны тыршись балалайкаен шудыны яратӥсь луэменыз. Туж капчи но вазиськись, эшъёсыныз котьку огъя кыл утчась адями котыраз пиосты но нылъёсты ӝог люканы быгатэ вал. Институтэ пыремезлэсь азьло ужаса вуттӥз "Егит большевик" (отӥяз "Удмуртиысь комсомолец") газетын. Удмурт газетъёсын кусып возиз, нылпиослы кылбуръёссэ поттылӥз. Сюлме но йырсазе яркыт кылизы таӵе нуналъёс. Институтлэсь нырысетӥ курссэ йылпумъяме бере, 1955-тӥ арын инвожо толэзе, ми, пӧртэм факультетъёсысь но группаосысь 36 нылъёс но пиос, туристъёс луыса, Кам дуре походэ потӥмы. Огшоры гинэ туристъёс ӧй вал ми, ваньмы кадь ик самодеятельносте, удмурт хоре ветлӥсьёс, кырӟаны-вераны дышетскисьёс. Азьветлӥсьмы - усто грезьгурчи - баянист, институтэз соку гинэ быдтэм мурт Геннадий Павлов. Солэн бур киыз луиз, дыр, Герман Ходырев, балайкаеныз жадёнэз валатэк крезьгур кисьтӥсь. Тазьы мынон сюрес выламы шедем гуртын концерт но возьматӥм, собере Кам дуре слётэ пӧртэм интыосысь туристъёс люкаськизы. Соос могӟетъёсты вормылыны но кырӟаны-вераны быгатэмзэс возьматыса ӵошатскизы. Кам пала лыктыкумы, Шаркан ёросысь 15 иськем ӵем нюлэс пыр потоно луиз. Сюбег кужен сюрес вылтӥ. Ваньмес чибиньёс одолизы, соос миллион вал, дыр, шапрак бамъёсмы вылэ пуксё но виръёсмес юо. Киосамы ваньмылэн вож веникъёс, бам вадьсытӥ шонаськытэк, одӥг вамыш но уд лэсьты. Нош Ходыревлэн чиньыосыз ялан балалайка вылтӥз бызьыло, веник кутэмез уг луы. Нылъёс со котырын такмакъёс кырӟало но Германлэсь бамъёссэ дугдылытэк веникъёсын маялляло, пумен крезьгур чузъяське. Тӥни кыӵе етӥз но крезьгурез, кылан-буранэз яратӥсь вал Герман Ходырев егит дырысеныз. Со котырын котьку шулдыр вал, мӧзмыны ӧз сётылы. Яратэ вал маскаръяськыны, куалтыр поттыса вераськыны. Капчи мылкыдо эш вал студент дыръяз но, ужан аръёсаз но. Но, валамон, ялан маскаръяськыса гинэ ӧз ветлы, тодӥсько, юн малпаськись тусо луэмзэ но. Дышетсконэз сокем капчиен ӧз сётӥськы, шӧдске. Вакытэз сыӵе вал, коньдонэн юрттӥсез ӧвӧлэн секыт дыръёс но луылӥзы. Нылпиослы гожъясь усто кылбурчи луэмзэ Герман возьматӥз студент дыръяз ик. Со аръёсы потӥзы ук чебер вылтусо, нылпиосты ӟеч нодъясь кык книгаосыз - "Милям азбарамы" но "Кызьы мон будӥ". Бадӟымесь быгатонлыкъёсыз соку ик шӧдӥськизы. Институт бере газетъёсын ужаса, Г. Ходырев юн журналист но, писатель но ним басьтыны быгатӥз ни, 1963-тӥ арын журналистъёслэн но, писательёслэн но огазеяськонъёсазы пыриз ни. Ялан азьлань мынӥз, нылпи литератураез азинтыны тыршыса. Туж тодэ лыктылэ солэн "Советской Удмуртиын" "Пинал куараос" бамез поттон бордын тыршыса ужамез. Со аръёсты Гера "Дась лу!" газетын ӵош ужан дыръямы но ӵем тодаз вайылӥз. Маин ке но вунэтонтэмесь кылизы соос писательлэн улоназ но, мынам но, лыдӟисьлэн. (Аслам творческой ужъёс борды рос-прос кутскыны мылкыды ляб на вал, кужымелы ӧй оскы, лэся. Куинь ар шклаын ужай. Лудорвайын дыръям удмурт писательёс гурт калыкен пумиськон ӝыт ортчытӥзы. Нош Германлэн 60-тӥ аръёсы ужъёсыз ӟеч ӧръяськыса мынӥзы. Редакциын со котырын эшъяськыса но ог-огзэс валаса ужазы Семён Перевощиков, Николай Васильев, Александр Вотяков но мукет гожъяськисьёс. Ваньзы сярысь Германлэн тодэ ваёнъёсыз гожтыса кельтэмын. "Советской Удмуртия" газетлэн редакцияз та куинь эшъёс куспазы туж тупаса но ог-огзэс валаса ужазы. Ӵем дыръя соос ӵош чуръёссэс но кылдытъязы, ог-огзылы юрттылӥзы, "пӧсь гурысь потэм" чуръёссэс нырысь ик ог- огзылы лыдӟылӥзы. Г. Ходырев сюлэмызлы матысь эшез А. Вотяков сярысь кулэмез бере, кӧня ке ар ортчыса "Ӟечбур!" газетэ бадӟым очерк печатлаз. "Шаер азьын сюлмы чылкыт" нимаське вал. Но сое нокыӵе книгаосаз пыртыса ӧз вуы. Эшезлэсь но трос кылбуръёссэ, кырӟанъёссэ эскере, вылӥ дунъя, со сярысь шуныт кылъёс гожтэ. Мынам малпамея, "Советской Удмуртилэн" историяз таӵе учыр данъяськымон вал. Собере куиньназылэн кылбуран творчествозы юн герӟаськемын вал Удмурт театрен, ваньзы ик пӧртэм спектакльёслы кырӟан гожтыны чуръёс кылдытъязы. Германлэн пинал дырысеныз поэзие, музыкае, гожъян удысэ вань сюлмыныз кыстӥськемез туж тросэзлы, тужгес но туала гожъяськисьёслы адӟем карымон луэ. Трос адямиослэн сюлэмъёсазы со со мур пытьы кельтӥз. Туэ монэ паймытӥз таӵе югдур. "Вордскем кыл" журнал 3-тӥ номераз печатлаз Флор Васильевлэсь, Москваын дышетскыкуз, но Герман Ходыревлэсь ог-огзылы ысъям гожтэтъёссэс. Соосты поттыны дасям Анатолий Перевозчиков, Г. Ходыревлэн семьяезлэн архивысьтыз шедьтыса. А. Перевозчиков шонер вера: "Герман Ходыревлы книгазэ (эсьма, кыксэ ай!) печатланы шуд усиз студент дыръяз ик, пединстиутын дышетскыкуз. Нош Флор Иванович гожъяськон борды рос-прос басьтӥське институтэз йылпумъямез бере, 50-тӥ аръёслэн пумазы. Герман Ходыревлэн книгаез но вал ни бере, Флор Васильев сое пыд йылаз йыг-йыг сылӥсь гожъясен лыдъя ни вылэм. Шӧдӥське вожъяськемез но". Ф. Васильев туж шумпотэ но, вожъяське но вылэм Германэз Писательёслэн союзазы кутэмлы, озьы ик кылбуръёссэ ӟуч кылэ берыктӥсь шедьтэмезлы. Ходыревлэн переводчикъёсыз данак вал. Со ужез азинтыны нош ик юрттӥз трос калыкъёслэн кылбурчиосынызы кусып воземез, шырыт эшъяськон сямыз. Ф. Васильев сярысь ик верано на ке, Герман, соиз Москваын ЦИШ-ын дышетскыку, шӧдскымон трос юрттэм, Флорлы выль газетъёс но журнал ысъяса, гожъямъёссэ интыяса. Кыксылэн но гожтэтъёссы туж шуныт мылкыдо, ог-огзэс мур гажаса гожъяло. Г. А. Ходырев поэзие сюрес лёгемез сярысь трос гожъялляз 1968-тӥ арысен "Дась лу!" газетын ужаны куктскемез бере. Туж удалтӥз солы юрттӥсьёс ласянь, егит дырысеныз эшъяськиз мӧйы писательёсын но. 50-тӥ аръёсы угось гожъяны кутскисьёсын тоос ужаз Т. И. Шмаков. Солэсь визь-кенешъёссэ, юрттыны сюлмаськемзэ Герман Алексеевич егит дырысеныз пеляз понӥз, со сярысь ӧз вунэтылы, сюлмаз но йырсазяз возиз, калык кылбурчи ним басьтыса но. Писатель сярысь тодэ ваёнъёссэ котькуд юбилееныз валче гожъялляз, дыр. Берлозэ Тимофей Иванович Шмаков сярысь гожтӥз со "Дась лу!"-э 1990 арын 2 мартэ, ку сюлмо кылбурчилы вордскемез дырысен 80 ар тырмысал. Статьяезлэн йыръянэз таӵе вал: "Авторъёсын адӟем карымон ужаз". Герман Алекссеевич вылӥ дунъялляз куд-ог мукетъёссэ но аслэсьтыз мӧйы писательёсты, кылсярысь, визьмась, валэктӥсь, бурдъясь мӧйы эшъёсыз пӧлы пыртылӥз со егит дыръяз ик Михаил Петрович Петровез, Аркадий Николаевич Клабуковез но Геннадий Дмитриевич Красильниковез. Удмурт литератураез тужгес тодыны-валаны тыршисьёс кулэезъя мед дунъялозы вылэм Г. Ходыревлэсь соос но асэныз ӵош ужам эшъёсыз сярысь сюлмысь потэм кылъёсын гожъям очеркъёссэ. Огазеямын соос "Ӟеч визь-кенеш котьку дуно" книгае (потӥз 1989-тӥ арын). Та пичи гинэ книгазэ мон туж вылэ пыктӥсько, литературоведъёслэн, критикъёслэн исследовниосынызы одӥг радэ. Тодэ ваёнъёсыз сӥземын сюлэмызлы тужгес дуно но матын адямиосызлы, удмурт литератураысь тодмо мастеръёслы (озьы шуэ книгалэн авторез): Ашальчи Окилы, М. Петровлы, М. Покчи-Петровлы, М. Ляминлы, Н. Васильевлы, Афганистанын бырем ожгарчи журналистлы В. Глезденёвлы. Зэм, вань на Герми эшелэн мукет ӟеч адямиослы сӥзем очеркъёсыз но: Александр Вотяковлы сӥземез (потӥз "Ӟечбур!" газетын гинэ 1992 арын 19-22 южтолэзе), Геннадий Павловлы (Можга педучилищеын крезьгурчиез данъясь ӝыт бере гожтэмын вал, потӥз газетын), Анатолий Уваровлы (солы 60 арес тырмемен валче). Но данакез очеркъёсыз та книгае ӧз пыре. Нылпиослы гожъясь калык кылбурчиез, со огдыре усто журналист но литературовед-критик вал шуыса, оло, куд-ог гожъяськисьёс но дышетӥсьёс уг но тодо. Очеркъёсаз Г. Ходырев яркыт возьматӥз литература но улон сярысь малпанъёссэ. Котькудӥзлы гожъяськисьлы кулэ дунъет сётылӥз, удмурт культураын интызэ дунъяны тыршылӥз. Озьы ик аслэсьтыз поэзие сюрес лёгемзэ номыре ватытэк шараяны тыршиз, гожъяны кутскисьлы дэмлаз кадь: утчалэ, шедьтэ асьтэлэсь сюрестэс, янгышъёслэсь утиське, гожъяськыны калыклэн творчествоезлэсь дышетске. "Ӟеч визь-кенеш котьку дуно" книгазэ Герман мыным таӵе кылъёс гожтыса кузьмаз: "Гажано Леонид Павлович Фёдоровлы, пинал дырысь тодмо но айбат эшелы, чупрес журналистлы, "Дась лу!"-ын ужам аръёсмес тодэ вайыса улон понна. Шудо, таза, батыр лу! 11 февраль 1991 ар". Эшъёсыз пӧлын Герми быдэ вуыса, дано писаетель луыса но ӧз вылтӥяськылы. Со гинэ ӧвӧл, гожъяськыны тьыршись муртъёслы котькинлы кизэ мычыны дась улӥз. Али эшелэсь ӟеч мылкыдъёссэ, калыкез, нылпиосты гажамзэ пумен умойгес валасько ни кадь, но ӵош ужакумы со сярысь трос ӧй малпаськылы, лэся. Герман Алексеевичен ми сыӵе ӟеч эшъёс вал шуыса, туала гожъяськись егитъёс куд-огез, оло, уз но оске ни. Солэн пӧртэм адямиосын эшлыко кусыпъёс возьыны быгатэмезлы мон туж синмаськылӥ, куддыръя вожъяськылӥ но. Праздникъёсты но вордскем нуналъёсты пусъён дыръя со быгатэ вал котькудмылы туж ӝог кылбур чуръёс пӧраны, шуныт но пальпоттытӥсь кылъёс шедьтыны. 1984 арын мон но Выль арлы сӥзем бордгазетамы, солы сӥзьыса, таӵе эшлыко шарж гожтӥськем: Будо тыпы выжыын Оскымон юн пушъетъёс. Котькудаз ньыль бӧлемыҥ Жингырто чебер чуръёс. Школаын - кылбурчиос. Дорамы но - поэтъёс! Кӧня бен али соос Атайзы - тыпы вӧзын? Со Атай - етӥз Герми. Нылпиоссэ вешаса, Туннэ юн кизэс кырмиз. Бен, кылбурчиос со вӧзын будӥзы, редакцуиямы ужасьёс но, туж трос школаосысь пиналъёс но. Гуртъёсы потаса, соос доры сюрес шедьтэ вал Герман Алексеевич. Поэзиын аслэсьтыз интызэ пинал дырысеныз шедьтэм мурт вань улытозяз тыршиз нылпиос пӧлысь талантъёсты утчаны. Азьланьтӥз Тимофей Шмаковлэсь, Михаил Петровлэсь но мукетъёсызлэсь сюлмаськонъёссэс. Туж уно нылпиослы юрттӥз юнкоръёс луыса, собере кылбурчи яке писатель луыса будыны, кызьы вералля вал, инвисъёссэс шедьтыны. "Дась лу!" газетын дас тямыс но ӝыны ар ужамез сярысь тазьы гожъяз: "Бадӟым улон сюресэз ортчи мон татын. Газет баме статьяос, зарисовкаос, очеркъёс, веросъёс, кылбуръёс печатламе сяна, мон вань аръёсме кивалтӥ редакциысь литература но искусство отделэн. Мынам сюлмаськонэ вал - яркытэсь но муресь произведениос печатлано, пинал талантъёсты утчано, соослы будыны юрттоно. Со ласянь мон вань быгатонлыкме, тодон-валанме сётыны тырши". Кӧня школаосы вуылӥз меда со "Советской Удмуртиын" "Пинал куараос" дасяса, "Дась лу!"-ын ужакуз пиналъёсын но дышетӥсьёсын пумиськылыса, пинал гожъяськисьёслы визь-кенешъёс сётылыса, юнкоръёсын слётъёс ортчытъяса?! Тыршылӥз удмурт кылъя но литературая дышетисьёсын кусып возьыны, литературно-творческой кружокъёс кылдытъяны. Юнкоръёслы, пинал кылбурчиослы туж уно гожтэтъёс ысъялляз. Будӥсь кужымъёсты ялан син азяз возьыны тыршиз. Тросэз азьло юнкоръёс, табере тодмо писательёс но журналистъёс, гожтэтъёссэ уг вунэто, оло, синпельлы возё на, луоз. Элькунамы вань сыӵе школаос, кытчы солэн пыдъёсыз котьку кыско вал. Кылсярысь, тужгес но гажаз Пичи Пурга ёросысь Вуж Монья школаысь коллективез, отысь дышетӥсьёсты, удмуртлыкез утьыса, вань сюлмысьтызы ужаны тыршисьёсты. Мон, кылсярысь, утьыса возисько Калык кылбурчилэсь "Советской Удмуртие" 1989 арын 16 апреле потэм "Кивоштӥсьёс будо" бадӟым статьязэ. Татын со школалэсь удонзэ котыр ласянь возьматӥз. Дышетӥсьлэсь ужзэ дунъяны быгатэ вал. "Дась лу!"-ын ужаса, ачиз но "Калыкез дышетонысь отличник" ним нуллӥз ук. Тодам вайылӥсько школаосы нылпиос доры ӵош потам учыръёсмес но. Куке но ӵош вуылӥм Завьял ёросысь Подшивал гуртэ, мынам ӵыжы-выжыелэн, солэн матысь эшезлэн Александр Вотяковлэн вордскем гуртаз. Кылбурчиез буре вайыса но мукет ужпумъёсъя пумиськылӥм нимаз-нимаз бадӟым но покчи пиналъёсын, дышетӥсьёсын. Солэсь азьло пырам нылпи садэ, кенешим воспитательёсын но нылпиосын. Мон кӧня ке паймыса но вожъяськыса кылзӥ Герман Алексеевичлэсь нльыль-куать аресъемъёсын но туж быгатыса, гажаса вераськемзэ, покчиосты дырын-дырын серекъятыны быгатэмзэ. Котькуд аудиториын со ӝог гинэ огъя кыл шедьтыны быгатылӥз, соослы тупась, матын луись кылбуръёссэ лыдӟылӥз. Малпалод вал, солэн "репертуарез" коитьку дась шуыса. Ӟеч кусып возиз аслыз сюрес сётӥсь Можга педучилищеен, со пала вуылыкуз пыратэк ӧз кыльылы, дыр. Татын уго ужаз кемалась гажано эшез Геннадий Павлов, Соос но тодмо журналист Константин Михайлов (таиз но "Дась лу!"-ын кема аръёс ужаз) ог- огзытэк улыны ӧз ик быгатылэ кадь. Можга палъёсы вуо ке, дано крезьгурчиен адӟиськытэк ӧз кошкылэ. Ма меда сокем матэ кариз соосты? Малпасько, крезьгурез но поэзиез, творческой ужез, калыкмес яратон. Тодӥсько на, егит дыръязы ик Гера но Геннадий Иванович ӵош кылдытӥзы "Шулдыресь асьме садъёс" кырӟан. Отӥяз мукетъёсыз гуръёс кылдылӥзы. Та куинь воргоронъёслэн эшъяськонзы берпум нуналозязы, ӝыны даур пала кыстӥськиз, луоз. Туж жаляса верано луэ, куиньназы ик кема ӧз улэ, бадӟым творческой кужымзы лусал на, дыр. Улонысь бӧрсе кошкизы. Котькудзы ик - шӧдтэк шорысь. Озьы, дыр, кылдэмын - ӟырдыт сюлэм малпамтэ шорысь ужамысь дугдэ. Герман Алексеевич Ходыревлэн улонысь кошкемез туж бадӟым ыштон вал нылпи литературамылы, озьы ик литературоведенилы (со трос тодэ ваёнъёссэ гожтыны медэ на вал), вань удмурт но финн-угор национальной движенилы (пӧртэм шаеръёсы вылӥз, Удмуртилэн сьӧраз но эшъёсыз уно вал). Бадӟым кылбурчи-патриот но интернационалист. Ачиз нокинэ ӧз обидьылы, улытозяз уно эшъёс утчаз но шедьтӥз. Адямиосты ӧз люкылы, тон бадӟым яке пичи шуыса. Ачимъяськон сямъёсыз ӧй вал, кенешыса улыны быгатылӥз. Куатьтон аресэз тырмон азяз туж визьмо но малпаськытӥсь валэктонъёс сётъяз со "Удмурт дуннелэн" корреспондентэзлы, ӵош ужам писатель эшезлы Кирилл Ломагинлы. Со шуиз: "Та улонын вань ӟечез - ог-огдэ валам-дунъям, кенеш возем бордын". Талэсь визьмогем шуг ни вераны. Ӧйтӧд, ваньмыз-а меда эшъёсыз сое озьы ик валаны тыршыса ужазы? "Дась лу!" газетын ужакум, ӵош ужась эшъёсыз пӧлын (нош мон артэ ужай "Кизилие" кошкытозяз) солэн данэз, авторитетэз котьку вылӥын вал. Вань на, вань удмурт музъем вылын Чебер крезьгурчиос. Соос азьын мон бӧрдӥсько, Вань сюлмыным мон соослы Музъем дорозь йыбырттӥсько. Чеберез валась вань удмуртъёслэн нимынызы сыӵе чуръёсын вазиськиз, луоз, аслаз лыдӟисьёсызлы удмуртиысь Калык кылбурчи Николай Семёнович Байтеряков. Та кылъёс верамын, мон сямен, усто крезьгурчи но кылбурчи, мынам эше Герман Алексеевич Ходырев сярысь. Тодӥсько, Г. Ходыревлы "Удмуртиысь калык кылбурчи" данъясь ним сётон сярысь Указ улэ Удмурт республикаысь Вылӥ Советлэн Председателез В. К. Тубылов гожтӥськиз вал 1992 арын 22 октиябре. Дано ним сётӥзы "Литература удысын пусйымон ужъёс лэсьтэмез понна но трос аръёс ӵоже мылысь-кыдысь тыршемез понна". Нош тыршиз со пинал дырысеныз, вань улонзэ поэзилы, нылпиосты будэтонлы сӥзьыса. Кылбураны быгатонлык инмар солы, оло, вордскемез бере ик сётэм. 1 Бӧлем - редакциысь отдел Кедра Митрейлэн люкамъёсысьтыз 1929 арын Ленинградысь Д. В. Бубрих профессорлэн кивалтэм улсаз удмурт кылэз эскеронъя экспедиция ортчиз. Отчы соку пыриськиз Эгралан вордскем тодосчи- писатель Кедра Митрей но. Экспедициен ӵош ветлыкуз Кедра Митрей Зури черкогуртысен 75 аресъем Будянь Сидор Миша нимо пересен пумиськем но солэсь туж тунсыко верам-мадемъёссэ гожъям. Соос пӧлысь одӥгез сӥземын Зуриен Эгра вискысь но соослы матысь гуртъёслы: Тури-пари Герейгурт, Сюлоен шуккем Чумошур. Мунчо ӵоксэт Шербет, Тӧл йӧтонтэм Шадбеггурт, Кичи-вачи Кабачи, Эгра выжы - пушнер выжы, Чай юон Лозодур, Ӵуж пуньы Извыл, Вал кышкатскем Бачкейгурт. Паймоно кадь: котькуд гуртлэн аспӧртэмез та чуръёсын лачак лякыса выллем син азе пуктэмын - одӥг-кык кылын гинэ вераса, шулдыр пальпотыса но китырак серектыса- исаса. Та кылбур али зэмос документлы но кельше ини. Малы ке шуоно, отын верам гуртъёсты табере тыпак таӵеен уд ни адӟы. Шуом, кичи-вачи Кабачи али посёлок быдӟаозь будэмын. Герейгурт но тури-пари - отчы но татчы, куӵо-муӵо - пуксемын ӧвӧл, кык ульчаё йӧно гурт луэмын. Шербет, Шадбеггурт (вужез) быремын. Извыл пыремын Эгра посёлоклэн территорияз. Бачкейгурт но "вал кышкатсконо" кадь шуш ӧвӧл ни. Кин кылдытэм меда та кылбурез? Зуриос, дыр. Зури черкогурт угось та даурлэн шор вадесозяз синмаськымон йӧно, чебер вал. Та кылбурын серекъям гуртъёсы зуриос нылъёссэс но кенлы уг сёто, пе, вал... П. ПОЗДЕЕВ. Семён Перевощиков Улон сыӵе чебер, сыӵе ческыт... Эшъёсы-аръёсы Аръёс, аръёс, уд берытске выльысь, Тодэ ваёнъёсын нош улоды! Тани али султо кузь ӝӧк сьӧрысь, Монэным ӵош, оло, кырӟалоды? Мылкыд мед лэйкалоз шулдыр, жингрес, Сое ӝокатыса пушкын уд возь. Синъёс азе пуксёз ортчем сюрес Пинал дырысеным мӧйы дырозь. Вал сяськаос но, узыос но вал, Улон сыӵе чебер, сыӵе ческыт. Нош со дыре ик куд-огез нунал Тӧдьы но сьӧд, капчи но туж секыт. Чорыганы, губияны ветлӥм, Нош бӧрысьгес гырим, нюлэс корам. Бадӟым ожысь вормисьёсты витим, Лудэ кизем юэз киын арам. Кужым сётылӥзы музъем, инкуазь, Сюлэмъёсын ӧз кысы яратон. Кытысь потэ ӟечез сурась-пожась? Пальпотытэк куддыр вуэ ӟардон. Ортчем аръёс, кызьы меда тӥтэк Та дуннеез луоз на валаны? Огдэс но, дыр, огдэс но кельтытэк, Нимын-тулын кулэ вал вераны. Чидан сярысь Бертӥ ке вордскем палъёсам, Кытчы-о пыро, кин дӥне? Берга на кенмы ӵужмуртам, Ӧвӧл ни - уд мын Папане. Чутырь ёросын кемалась Уг кылӥськы, уг черк гырлы. Тодӥсь-валасе мынам - Нязь, "Ӟечбур!" - шуисько мон солы. Тани ворттылэ чуньые, Лудын ужато эрвалэз. Вылез вордӥське дуннее, Вужме но быре азьвылэз. Улон куасалля сямъёсты, Кужым но уг чида - чиге. Вань на-а меда Шашур ты, Узыр-а шыкмет чум сиге? Кинлэсь? Нязь шурлэсь юасько: "Шат вань чиданлэн но пумыз?" Чидан чигымтэ, малпасько, Кин ке ай юэ, дыр, кумыс... Йырам малпанъёс бергало, Дунне шат пумзэ ни адӟоз? Зарни гизьыос чиляло, Тэтча на кузь кук - визьтэм ӟоз. Вужез но вылез Вужез борды ӝабырскыса, Мон улӥсько на та дырозь. Майтал вуэн но гылъяса, Вужзэ, пе, туж кема уд возь. Инбам-а, сюй-а мукетэсь? Калык-а сокем воштӥськиз? Я валэкты но вера, эзь, - Ӧз кыл улос, шып чалмытскиз. Кызьы, малы вужзэ куштом? Жалесь штане но катае. Кырсьсэ, пожзэ посо, гылто, Гольык уг поты ульчае. Кубистаез, картофкаез Пичи дыръям кадь сиисько. Яратӥсько сад-бакчаез... Кызьы сотэк? Туж паймисько! Вуж сямыя ву кисьтасько - Будо огреч, сяртчы, сугон. Ой, тол шорын, мон тодӥсько, Кыӵе ческыт таӵе сиён! Куддыр ӧте бен магазин, Но со азьын мон кепырась. Дунзэ адӟе - уг вала син, Ма, кин меда татчы пыра? Вылез борды кырмиськыса, Йӧно улод шат вужезтэк? Саюл азьын губырскыса, Вушйылыса уг пукы тэк. Удмурт театр Кытчы мынӥсько, шуиськод, такем ӝог, Шуныт пальпотон пазяса котыре. Капчи сюресме сьӧд коӵыш медаз ӵог, Выльысь дыртӥсько мон Удмурт театре. Отысь шедьтӥсько ӟеч мылкыд но кужым - "Кезьыт ошмесысь" яке "Меӵ яр дурысь". Эбга, Италмас но Камит - эш мыным, Мукет геройёс но Удмурт театрысь. Ӧжыт коть луи, дыр, сэзьгес но шӧртчи, Востэм вал угось уж дурын но дорын. Улон пагӟаез мон адӟи но ортчи Чебер калыко та Удмурт театрын! Чус ӝытъёсы но ӵукъёсы Тылобурдо кырӟанъёсты Асьме кылэ берыктыса, Ческыт шӧмо турынъёсты Тылскем вылын быректыса, Пӧсь чай юиськомы кырын Вож вайёслэсь ӝутэм юртын. Чус ӝытъёсы но ӵукъёсы Уӵы сыӵе чебер чирдэ, Пыре мӧзмись сюлэмъёсы: Ой, берыктоз шаян йырдэ! Ӝок-ӝок, ӵок-ӵок арамаын Нылъёс, пиос йыромемын. Кудӥз чипсэ, шула кудӥз, Кытысь шедьто пеллян гумы? Кин ке нош чипчирган кутӥз, Уд басьты сыӵезэ ГУМ-ысь. "Тюрли-тюрли" - баб, тэрагай, Лудэ ӧз поты на анай. Пизэ ыштэм, дыр, пиёкуш, Лоба, утча: "Пиёк, пиёк!" Номыр уг вазьы нюлэс куш, Пичи бурдо ӧвӧл, пе, - ёк... Огназ уг куректы сикын Нылпиоссэ куштэм кикы. Тылскем доры вуэ куара: "Я лык чаляк, я лык чаляк". Шузи кылъёс, нош со - шара, Нылъёс азьын пельдэ коть ляк. Доре озьы шат ӧтёно? Уг возьдаськы кӧй бӧдёно. "Ме-е, бе-е", - бӧксэ на нюртака, Юлтош утча, лэся, уг изь. Писпу сулэз гордйыр кока, Жаде, оло, уг жадьы сизь. Шашы пӧлын шудо юсьёс... Умме усё чай юисьёс... Мынам лулы но улонэ Больницаын - ини арня ӵоже. Сюлмы висе. Кыллиськомы ӵошен. Малпаськыса, вераськыса лумбыт, Лулӟылыса но шокаса секыт. Уг утиськы, уськытӥсько ӝоже, Арня ӧвӧл, быдэс аръёс ӵоже. Тонтэк огнам быро, ышо токма, Сопал дунне ӧвӧл ке но тюрьма... Лек кулонлы пумит асьме коже, Кулэ ке, нюръяськом даур ӵоже. Кызьы ум ворме? Яратон вормоз! Ай кужыммы ӧз сӥя на, тырмоз. Одӥг минут, одӥг секунд ӵоже Тыныд гинэ медаз поты воже. Ӵукна но ӝыт, уин но нуназе Тазьы мыном выль ӟардонъёс азе. Ӟеч мылкыды ӝож малпанме ӵуже, Ойдо ум люкиське векась дырмы ӵоже. Я, кырӟа, бӧрд, но ужа гадь пушкам, Мынам лулы но улонэ мынам. Уг лу огнам "Улӥськомы-а?" - " Улӥськом!" - Кышноеным ӝытсэ лӧпшай. "Будӥськомы-а?" - "Будӥськом!" - Ӵук пал пичиосме вешай. Эх, жаль, - дырто, кошко аръёс, Я, чида, сыл, мугор-пужым. Сюлэм но йыр - кивалтӥсьёс, Киос, пыдъёс - ужась кужым. Эшшо адямилэн пушказ Маиз гинэ ӧвӧл, ятэ. Огзэ ке но кин ке лушказ, Эн вера, туж секыт йӧтэ. Ум сётске ай аксым черлы Сайкыт йырын, чылкыт сюлмын. Оло нош, осконо черклы - Отчы сюрес зол лёгемын. Синъёс, пельёс адӟо, кыло, Кин Инмарез каре аслаз. Возьмаськисьёс но бен кӧло Уйлэн пеймыт бурдъёс улаз. О! Тодӥсько, уг лу огнам, Мар вань, ӧвӧл - валаськомы. Сюдо, вордо музъем, инбам, Тау соослы - улӥськомы! Борисэн Аннок Пужмерен шобыртӥськиз Гурт пумысь нюлэс. Юмшаны пияш ӧтиз Тупалась нылэз. Бур пала азьло мыно, Паллянэ - бӧрысь. Нылашлэн нимыз Аннок, Пияшлэн - Борис. "Гыронмес, марым, быдтӥм", - Ивортэ пияш. "Скалъёсмес гидэ пыртӥм", - Пальпотэ нылаш. Ӟускизэ мычиз палэзь Борислэн кияз. Инбамысь питрес толэзь Аннокез вешаз. "Выль костюм кузьмаз атай", - Шумпотэ пияш. "Шортдэрем сётӥз анай", - Шыпыртэ нылаш. Бурмизы ваче огдыр Ӵуш-пӧсь ымдуръёс. Уй чупъёс ческыт, вылды, Кынисько синъёс... Николай Никифоров Ой, тӧл тӧла... повесть 1 Лӧзь шур дурысь арамаын вожмаськыса, ог-огзэс паймытыны турттыса выллем, бурдоос чипсо, шулало, шальккето. Ӵук омырын крезьгуро дунне веттаське кадь. Ма, бурдоослэн самой шумпотон, крезьгуран, яратон, сюанъёс шудон вакытсы уго. Трос ик дыр уз ортчы - пузъёссы ӵогиськозы, муспотон нылпиоссы вордӥськозы. Анай-атай бурдоос тужгес сюлмаськись, чырткем, ужась кариськозы. Бен кызьы-о ас нылпиостэ утьытэк, сюдытэк-вордытэк, лыз инбаме бурдъятэк? Бурдопиос огнунал карысьтызы турак лобӟозы, писпу вайёс вылэ пуксёзы, ас кужымзэс шӧдыса ӝутскозы но жадьытозязы син сузёнтэм чагыралэс инмын поръялозы. Котькуд бурдолэн аслаз яратоно, мылкыдызлы тупамон интыез луылэ. Отын гинэ солэн кырӟанъёсыз шулдыр пӧрмо. Соин ик, вылды, урамын, Лӧзь шур дурын, Чимошур гурезь бамын, Горло ты вӧзын, Изонюкын но кытын аспӧртэмлыко гуръёс жингырало. Мылкыдэз бурдъясь та тулыс симфониез Уракъёслэн юртсы вӧзтӥ чигиськыса- каргиськыса чильыртӥсь ваёбыж гинэ шӧтэм каре. Солэн синкылитэк бӧрдэм-ӝожамез котькинлы валамон кадь. Юн куректӥсь бурдолэсь ӝожаськемзэ адями кылэ берыктысал ке, тазьы валасалмы, дыр: "Ма понна таӵе кӧшкемыт адӟон, кирень куректон кузьмад тон мыным, Олег? Ма уродзэ лэсьтӥ мон тӥледлы, адямиос? Улэп бурдолэн но бӧрдонэз юнме уз ышы - ӵук лысву ӧвӧл со. Асьтэлы ик куректонэн, гумырдылы ӧпкелёнэн берытскоз". Ваёбыжлэн кайгырыса чияк! шултэмез узвесь пырылы укша, адямилэн сюлэмаз вӧсь карыса мертчиське. Изись Олег мукет кӧтурдсаз берытскиз. Ымдуръёссэ выретыса маке чопкетӥз на. Уйвӧтаз я сиське, и кинэн ке вераське, лэся. Бидырка* сьӧд йырсиосаз турын нюжаос мертчиськемын, гараяськем гадь вылаз куасьмем дыдыксин сяська усем, бур кияз малы ке ческыт зыно турынъёсты кырмем. Отын куасьмыны кутскем узы воректылэ на. Кожалод, пияш та ческыт емышез уйвӧтаз адӟем но вож-бусӥр модосэныз валче кырмыса басьтэм. Со секыт шока - оло кытчы ке дыртэ, оло кинлэсь ке ватскыны тырше. Нош кӧшкемыт вӧтэз йырвизьмаз юн выжыяськемын, шӧдске. Зэм, ымдуръёссэ кырыжъя, пиньёсыныз ӟакыртэ ке но, кӧлон бинетысь мозмытскыны уг йӧндыры на. Тани ваёбыж Онись кенаклэн куараеныз кыла-бура ни: "Эх, пие тон мынам, нункае. Шузие тон мынам, нодтэме. Ма-ось сыӵе йӧнтэм дарманьтонэз вал? Маин-о сьӧлыко тон азьын мискинь ваёбыж? Тылобурдолэсь карзэ ке таркаськод, юртэ-ере дэлет уг кыльы ни - куашка-тӧлӟе. Асьме Кутор гуртамы улӥсьёс ваёбыж карлы котьку лушкемен вожъяськылозы вал. Сыӵе юртын шудбур, тыр улон, ог-огдэ валан но яратон мылкыд кузёяське, шуылӥзы. Нош тон, Олег, ваньзэ ас киыныд таркад-пазяд. Эх, каръян сюлэмы! Пинал мылкыд - юмал йӧлпыд. Ведь тон номыре валасьтэм эке ӧвӧл ни, туннэ-ӵуказе куать аресэд тырмоз, школае мыныны сумкадэ но дасяськод ни кадь. Кылӥськод-а, кыӵе кайгырыса бӧрдэ-викышъя ваёбыж? Кырсь ужед понна кыл кутытэк уд кыльы, нункае. Инмар азьын но, Инкуазь азьын но сьӧлыкъёстэ шараяно луод. Кулэ ке луиз, дауръем вӧсь кызмы доры ветлыса, чабей кеньыр пазялод, тодыса-тодытэк вӧсьёс шыпыртод. Ай уд валаськы, дыр, ваёбыжлэсь ма ӝожамзэ. Ас пыдкутчан ныр йылад тылӝу усьытэк, мурт юртъерлэсь ӝуам-сутскемзэ уд синйылтӥськы, шуо. Синйылтод ай, валатскод. Валатскод но ӧпкелёд. Нош ас гырпумдэ куртчыны уд быгаты ни". Тани ваёбыж из сямен тюак уллань васькиз но, музъем борды шуккиськыса, вож кыйлы пӧрмытскиз. Со сьӧсь лулос Олег вӧзы позыръяськыса нюжтӥськиз. Йырзэ мыкыръяса, золтылыса, дырын-дырын лэчыт ядо кылыныз омырез "ыбылыса" шиетэ. "Я, синъёстэ усьты ни, шайтан воштэм! Алангасар ик вань, лэся, тон. Воксё сьӧлыктэм нуны музэн чыс-чыс кӧлӥськод ук. Кожалод, лулыд ошмес ву кадь чылкыт. Тани лексё мон тонэ, укылтэмез". Гольык мугораз чурыт турын модос бышкалскемен пияшлэн синъёсыз шарак усьтӥськизы. Турак! ӝутскыса пуксиз но котыр утчаськыны ӧдъяз. Небыт, ческыт зыно турын вылын ӟеч вӧтаса кӧлӥсь сузэр-вынзэ синйылтыса валатскиз: Онись кенаксылэн сениказы изё. Тӥни ук, турын ӝутъян пасетӥ бускельзылэн вож буям корка липетсы но адске. Олег дыртытэк йырсиоссэ маялля, уй ӵоже мертчем-лякиськем турын-куарлэсь чылкытатэ. Собере мылпотытэк тубан-васькон пагӟа пала вамыштэ. "Эх, кӧл на вылэм небыт, йырез ческыт зыныныз поромытӥсь валес вылын", - киоссэ ӝутыса назьыльскиз со. Вожъяськыса музэн огшап вын-сузэрез шоры учкыса сылӥз на. Зэм но, сеникын майбыр. Алигес ӝутъям турын возь, нюлэс омырен шокчылэ на. Вылаз ик, чибиньёс-лузьёс но ӧвӧл. Анаеныз-сюратаез кудӟыса керетон ке ӝуто, Олег, чипы анай музэн, вын-сузэрзэ лушкемен сьӧраз ӧте но, соос бускельёссылэн сениказы ватско. Ярам ай, Онись кенаксы уг куареты. Пиналъёслы, уката ик Олеглы, оске, вылды. Огзэ гинэ ӵемысь индылэ: - Шырпуэн, тамак кысконэн гинэ эн дарманьтэ, мискиньёсы. Тыл - шудон уж ӧвӧл. Мынэсьтым юртъерме гинэ пеньлы, сэрегпумъёслы уз пӧрмыты - быдэс гуртмес гумыраз сылэм интыысьтыз нюлыштыны быгатоз. Пиналъёс азьвыл гужем-сӥзьылъёсы асьсэ сениказы ик кӧлало вал. Нош бератаз анайзы шӧдскиз-валатскиз. Утчаса шедьтэ но чик мугтэк куаретэ, йыркурзэ куд ке нылпиез вылэ выжытэ. Кутор калык пиналъёслэн доразы кӧламтэзылэсь мугзэ ӟеч тодо. Олеглэн атаез, Урак Толя, мотоциклэныз шуккиськыса, бырыны шедем бере анайзы куректонзэ курыт вуэн гылъяны ӧдъяз. Ар ортчыса, сизьым ар ӵош улэм кузпалзэ вунэтӥз но вань ӟечсэ курыт вуэн воштӥз. Бератаз, ведраезъя борӟетэз шуэм мактал, юись воргоронэз ик пыртосэ лэзиз. Кузьмаен кык ар улытозязы соос Олеглы Ирина сузэр кузьманы вутскизы. Ӧйтӧд, кызьы азинскысал азьпал улон-вылонзы, но колхозысь ю тысь лушкамез понна воргоронэз пытсэт сьӧры келязы. Урак Нина нош ик кема ӧз кайгыры - ӝоген йыраз изьы-картуз нуллӥсь лулосэз шедьтӥз. Азьвылэз музэн ик, таиз но юись, ужлы азьтэм вал. Герман но юртазы одӥг кортӵог коть шуккыса вуттӥз оло ӧз - семья лыдзэс йылэтыны кужым шедьтӥз. Саня пизы вордӥськиз. Ужлы йӧнтэм ке но, Герман но дасьсэ шупчытыны усточи вылэм. Кузьма юртысьтызы мотоциклзэс гинэ вузаны дӥсьтӥз ке вал, Герман паськытгес шонскиз. Пу вандон мотобычкызы, вуриськон но дӥсь миськон машинаос нырысь араз ик "пыдъяськизы". Берлогес ни огез бӧрсьы мукетыз гидъёс бушазы. Скал, кунян, парсь, ыжъёс вандыса вузамын но аракылы берыктэмын вал. Ай кызьы возисько на меда куинь курегъёссы но чибориё атас? Ма, туночи доры ветлонэз ӧвӧл - бурдоослэн но минутъёссы лыдъямын ни, дыр. Пудо вордымтэ бере, кузпалъёс турын но уг дасяло. Сениказы шал-шал буш. Усьтэм ӧсэтӥ пырыса, янгышем кожем тӧл гинэ эрказъяськылэ на отын. Та муген ик пиналъёс Онись кенаксылэн сениказ кыкетӥ дорзэс шедьтӥзы. Олег сеник пасетӥ гурт урамез синйылтӥз но пагӟалэн вылӥ лёгетысеныз ик балян музэн музэ тэтчиз. Бакча бертӥ гинэ дораз дыртӥз со. Анайзэ, сюратайзэ эскероно ук. Толон нош ик кыкназы кудӟемын вал. Пияш ӝыт шудонпӧлысь бертыкуз но азбараз лушкем кожаз, укноетӥ учкиз-эскериз. Кышкыт ук: сюратаез тамак пумзэ валес вылаз уськытыны медаз шедьты, чаляк шимес адӟонэ ӝимод. "Кӧт тырымон сиськытэк, чебер вылдӥсьёстэк но улыны-вылыны быгатом, чидалом, - ӵемысь ас понназ малпаське Олег. - Нош йыр выламы липеттэк ке кылим, соку ма каром? Соку милемды детдоме келялозы, дыр. Умой вылэм, Иринаен Саняез вӧзам кельтысалзы ке. Но люкозы ук, милесьтым мылкыдмес уз юалэ. Арлыдын пӧртэм нылпиосты люкыло, отчы-татчы пазяло, шуо". Олег, коӵыш музэн шыпыт лёгаськыса, укно доры матэктӥз. Котьку сямен ик, огпӧртэм, вукпотымон суред: кырсь ӝӧк вылын стаканъёс, буш ӟенеликъёс. Нянь возён тэркызы буш. Анаез - койка вылын, сюратаез - выж вылын. Кыкназы кӧло на. Йырвизьмысьтызы кудӟон буссы тӧлӟымтэ на , лэся. Пурысь коӵышсы ӝӧк котыр сиён утчаса берга. "Солы устогес, - кунэрес малпаз пияш. - Нянь, йӧл ке ӧвӧл - шырез кутоз но сиёз". Укно дорысь палэнскыса, Урак Олег огшап малпаськыса сылӥз но, собере шур пала вамыштӥз. Мынон сяменыз мышсэ синйылтӥз. Гурт урам буш ай, ужын жадем калык шутэтске на, шӧдске. 2 Тодмо кужен сюрес кузя вамышъянъяз Олег Апасов туж кулэ луись арберизэ ыштэм мурт сямен отчы-татчы утчалляське. Бератаз со "ыштосэз" сярысь валатскиз ик: инвис сьӧрысь шунды-бискыли югыт ымнырзэ возьматымтэ на. Озьы ке но, вылез нунал вордскемын ни, гужем уй катанчи ӝог тӧлӟе. Зэм, инбаме эшшо огпол учкыса валатскиз: шуныт зор матэктэ. Та дыре уго шунды пальпотыса ас сюрессэ мытыны кулэ ни вал, нош туннэ сое пурысь пилемъёс возъяллям. Тарло нюлэс сьӧрысь инвис гордмыт льӧльмырамын. Вис шедьтыса, музъем вылэ югыт тылсиос кыстӥсько. Пияш ярдурысь лабрес пужым улвае балян музэн тэтчыса кырмиськиз но, котьку сямен ик, кызё пал ки вылаз ӝутӥськиз. Кужымзэ со ӵемысь турникын но эскерылэ. Эсьмаса, "шунды" суредэз но йӧндыре ни - сузэр-вынзэ, эшъёссэ паймытъяса, отын зӥр-зӥр берга. Но тани, выл дӥсьсэ пужым выжые куштыса, Олег шур ӧре вамыштӥз. Зорлэсь азьло мурдозэ эскероно. А то зор вуэн сэрен Лӧзь шур олома дауртыны быгатоз - ӵукналы сиёнзэс но, чорыган тӥрлыксэс но сьӧраз нуоз. Али, ма, ӧйтӧд, но тулыс тудву куашетыку я кужмо зоръёс бере Лӧзь шур кортнамтэ ужпи кадь дауртылэ. Ортчыт бугрес, шаян кариськылэ. Ярдурысь лабрес бадьпуосты жалятэк някыръя-куаса, ӧрысьтыз пачыласа, быдэс нёжалэ вӧлске. Куддыр ярдурлы матысь турын зуродъёсты но, пу артанаосты но "ньылылэ". Нош чебер нуналъёсы со сабырлы сямо: огсыр позыръяськыса, жильыртыса Ватка шурлэн паськыт ӧраз дыртэ. Апасов уяса шур шорысь пуӵ доры вуиз. Кийыгыриеныз утчаса, мурдозэ ӝог шедьтӥз. Сое ӝутон сяменыз шӧдӥз: буш ӧвӧл, ӵукналы кӧттыр вань. Бадьпу ньӧръёслэсь быгатыса керттэм-чильпам мурдое лачак гордбурдъёс, юшъёс, карасьёс пыриллям. Ярдуре потыса, пияш чорыгзэ вуж брезентлэсь вурем сумкаяз тыриз но ярдурысь шашы пӧлы интыяз. Мурдозэ выль интые чӧлтыса-юнматыса, вуысь потыны ӧз дырты - чырмыт уяса, паськыт, визылась ӧре дыртӥз. Отын вучайы музэн бекмылляськыны ӧдъяз. Ву тулкымъёс солэсь мугорзэ вешало-маялляло. Амалтэк тодаз уськыто тэшкыли дыръяз анай-атаезлэсь вешам-мусоямзэс. Сое тодаз вайыса, Апасов секыт лулскиз. Ярдуре потыса, со выл дӥсьсэ дӥсяз но чассэ суйпосаз бырттонъяз ӝожомиз: "Уть ай, атаелэн та синпель кузьымез гинэ кылиз на ук - "Командирской" часэз. Мукет арбериосыз чиптэм-чаптэм ышемын, вузамын, курыт аракыен вошъямын. Эсьмаса, дӥськутсэ но Кузьмаен Герман нуллыса пӧськытӥзы ни, шакшыос..." Курыт малпанъёссэ йырвизьмаз бергатыса, со гурт пала вамыштӥз. Чорыгзэ Онись кенакезлэн азбараз пыртӥз но тусь улэ интыяса кельтӥз. Онись кенакез сайказ ке, ӟеч шыд лым пӧралоз. Арлыдо кышномурт ватэт интызэс ӟеч тодэ уго, ӵукналы быдэ эскере. Курыт малпанъёссэ огдырлы вунэтыса, Олег мыньпотӥз: сузэрез но выныз ӵукна понна кӧттыр луозы. Анайзэс но уз вунэтэ. Герман сюратайзы калтыртӥсь пуны музэн гурт кузя кошкиз ке, Олег анаезлэн валес вӧзаз пӧсь шыд лымен вуоз. Урак Нина сыӵе дыръя бадӟым пизэ шумпотыса пумита, пӧсь, зумыт чорыг лымез ушъяса-ушъяса ӟузьылэ. Таӵе сиён, пе, макмырен курадӟыку туж юрттэ. Куддыр синвуаськыса сиське. Аслэсьтыз "вож кый" азьын кужымтэм луэмзэ малпаса но ӝожа, нылпиоссэ калык радъя утьыны-вордыны быгатымтэысьтыз но кайгыре. Сыӵе учыре Олег анаез вӧзын кема уг ӝега, кыре потэ. Анаез медаз адӟы уго солэсь бычырам синкылизэ, медаз сакты пиезлэн чырты выжыяз кугӟам лёгзэ. Олег бускель азбарын ӧз ӝега ни. Нянь сярысь сюлмаськон солы выль кужым ватсаз кадь. Со виын историяя книгаысь лыдӟемез тодаз усиз. Быдӟым ожмаськон дыръя Сталинград дорын котыртэме шедемъёслы, пе, шырпу коробка быдӟаен гинэ нянь люкылӥллям. "Эх, милемлы но "сталинград" норма мед висъялозы вылэм, - куддыр секыт лулскылэ со. Нош минут ортчыса, ассэ куаретэ ни: - Уть ай, кыӵе возьыттэм мон, куака кадь дасьсэ возьмась адями. Малы монэ калык сюдыны кулэ? Ӧвӧл, уг йыбыртъя, йырме музозь уг ошы. Кужыме но визьмы вань дыръя, уж шедёз. Лушкаськон сюрес вылэ гинэ ӧвӧл кожоно. Ма шуысал соку атае? Мон уго юртамы кузё интые кылем воргорон ни. Сюратаез юртъер возисен лыдъяны ым уз усьтӥськы. Нош соку ма понна яратэ, гажа сое анай? Малы чидаса дорамы возе, малы ас нылпиосыныз воштӥз? Шедьто, шедьто мон нянь, - чырмытгес вамыштэ Апасов. - Кионэз пыдъёсыз сюдо, пе. Нош монэ ужась киосы сюдыны кулэ. Сьӧлыктэм кулэмъёслэн лулъёссы, пе, тӧдьы ӵӧжлы пӧрмытскыса, ин эксэйлыке ӝутско. Отысен, пе, матысь адямиоссылэсь улэм- вылэмзэс, урод но ӟеч ужъёссэс, вамышъёссэс учкыса уло. Озьы ӵемысь мадьылэ Онись кенак. Атае но сьӧлыко лул ӧй вал, дыр, - малпаськон бугорзэ сэратэ пияш. - Ужаны задор вал, котьма ласянь кибашлы. Кудӟем шофёр мотоциклэн мырӟем. Сьӧлыктэм ик быриз, дыр, атае. Онись кенаклэн мадемез зэм ке, со мынэсьтым котькуд вамышме инсьӧрысен эскерыса, дунъяса улэ, дыр. Эх, тод вылэм, зэмзэ озьы меда? Данъяське меда со монэн яке лушкем куаретэ?" Лӧзь вамен выж вылтӥ потыса, Олег кужен сюресэтӥ вамышъяно ӧз кары - нап ӝутскем, сяськаям турын пӧлы кожиз. Сюрес кузя ке мыноно, укыр котыр луэ уго, нош тазьы ческыт зынэн гочатӥсь, нюк вӧзы интыяськем корка доры чаляк вуиськод. Турын вылысь лысву тӧлӟемын ӧвӧл на. Шунды тылсиос шоры соос зарниё-азвесё инӟыосын ворекъяло. Чалбар* кукъёсыз, носкиосыз соку ик сучыр-сучыр котмизы. Соин сэрен нырысь-валысь мугорыз юзыр-кезьырак луиз вал, но отӥяз дышиз, лэся, - шӧдэм-валамысь дугдӥз. Пыд улысьтыз кышкатскыса бурдо ӝутскемысь, нёркак дугдӥз, собере сюрессэ азинтыса, ачиз но шӧдытэк арлыдо мурт сямен ӝожмыт кырӟан мытӥз: Ой, тӧл тӧла, тӧла но, Льӧмпу ваез някыръя но, Льӧмпу ваез някыръя... Лулъяськем кырӟан луд кузя, нёжалъёс валлин поръяса лобиз... Огаз уроказы удмурт кылъя но литературая дышетӥсьсы Фаина Николаевна ӵектӥз вал: - Арлыдоослэсь юалляськыса калык кырӟанъёсты гожъяса вае. Эскером, калык творчествоен тодматском. Олег Апасов кема малпаськыса ӧз пукы - юрттэт курыса Онись кенакез доры вамыштӥз. Ӵапак та арлыдо кышномурт со кырӟанэз нёжъяз вал. Табере, мылкыдыз секыт луыку, ачиз шӧдытэк-валатэк кадь, Олег сое нёжъяны кутске. Льӧмпу ваез някыръя но, Бадьпу ньӧрез куасалля но, Бадьпу ньӧрез куасалля... Кырӟамъяз Урак Олеглы ӵемысь эшшо ӝожмытгес луылэ. Чырты выжыяз адскисьтэм, синме йӧтонтэм лёг кугӟа, гадь пушказ вӧсь карыса бышканы ӧдъя. Озьы ке но, кылан-буранзэ ӧтьымтэ синкыли пыр пезь-пезь азинтэ: Бадьпу ньӧрез куасалля но, Пинал пиез бӧрдытэ но, Пинал пиез бӧрдытэ... Таяз сӥзьылэ дасэтӥ классэ мыноно пияшлэсь та кырӟам-нёжъямзэ кылӥд ке, жалезлы чидатэк, мылкыдыд сӧсырмоз, шоканэд пытсаськоз. Уго ӵемысь мылкыдызлы тупась кырӟан гинэ адямилэн кыл йылаз пуксе, кырӟасьлэн малпанъёсыныз одӥг бугоре биниське но лулъяськыса кыре потэ. Апасовлэн тодаз ай: фольклорлы сӥзем ӝытсэс соос гуртысь клубын ортчытӥзы. Гуртоосыз егит пияшлэн пезьдыт куараезлы паймизы но синмаськизы, чабыса кык пол сцена вылэ ӧтчазы. А ведь туж шугъяськыса, возьытэ усёнэзлэсь курдаса потӥз вал со калык азе. Но шугъяськемез юнме вылэм кадь - соку со но баян сьӧры шулдыр кырӟаз. Зэм, бам чокчороосыз ӵыжектӥзы ик. Отӥяз классэн кивалтӥсьсы Фаина Николаевна Чучалина котькуд концертэ пыриськыны ӵектылӥз ни. Ма, Кутор гуртын улӥсьёсты спектакльёсын рольёсты усто шудыны быгатэменыз но паймытъяз. Но калык кырӟанъёслы сюлэмзэ вӧлакгес усьтыны тыршиз. Соку уго ас мылкыддэ-малпандэ но калыке вуттыны устогес луонлык кылдэ. Нош ӵемгес бырйылӥз со ӝожмыт, сюлэмез бугыртӥсь кырӟанъёсты. Пӧрмытэмысьтыз ик, вылды, Чучалина но сыӵе кырӟанъёсты быдэстыны ӵектылӥз. Урак Олег шӧдылӥз, адӟылӥз: сцена вылын кырӟакуз гуртоосыз кытӥяз синвуасько. Егит пилэсь улэм-вылэмзэ малпаса, солэсь лушкем бӧрдӥсь сюлэмзэ валаса, вылды, ӝожомылӥзы мӧйыос. Огпол Онись кенакез, концертысь вуыса, Олеглэсь йырсизэ маялтыса лулскиз: - Укыр ӝож кырӟаськод, пие. Вашкалаос вералозы вал: кырӟась мурт, пе, шудтэм луэ. Тыныд но, мискине, Инмар кымсад сыӵе секыт адӟон гожтэм, лэся. Соку Апасов мур малпаськонэ усиз. Но Фаина Николаевна котьку сямен ик пияшлэсь шугъяськонъёссэ дыраз шӧдӥз, мылкыдзэ зӥбись малпанъёссэ лад-лад валэктыса тӧлӟытӥз-тарказ. - Асьме удмурт калык кырӟаны усточиосты сӥлы каре, - шуиз со. - Кырӟан дуно ӧвӧл, кырӟаны кутскись дуно, пе. Озьы вераса, удмурт сям-йылолъёсты утёнын- азинтонын дано, сӥлы инты басьтэмзэс пусъё. Сыӵе муртъёс котькуд иськавын- бӧлякын, котькуд гуртын вань. Сиён-юон дыръя дорын но, сюанын но, солдат келянын но, шудон пӧлын но, уж дурын но - калык соослы котьку умойгес, тӧр инты висъяны тырше. Кырӟась адямилэн шудтэм луэмезлы эн оскы. Озьы ке луысал, асьме тодмо кырӟась-верась артистъёсмы, сцена вылысь кизилиосмы ваньзы шудтэмесь луысалзы. Валад-а, Олег? - Валай, Фаина Николаевна. Мылкыдме ик бугыртӥды. - Ай тынад но кырӟанъёсыд ӝожмытэсь гинэ уз луэ. Сюлэмысьтыд одно ик сяська ӝужан гуръёс но калыке куриськозы. - Нош кыӵеесь соос, Фаина Николаевна? - Сяська ӝужан гуръёсты, Олег, асьме калыкын шумпотыку нёжъяло, кинэ ке туж зол яратыку. Дыр вуиз ке, сыӵе кырӟанъёс тынад сюлмад но куриськозы ай, нош отысен - калыке. Классэн кивалтӥсенызы озьы вераськем бере Апасов сцена вылэ эшшо ӵемгес потаны кутскиз. Зэм, дӥськутэзлэсь ӧжытак керпотылӥз ик. Угось эшъёсызлэн выллем кунгожсьӧр дӥськутъёс нуллыны солы ӧз кылдылы на. Адямиез, ма, дӥськут гинэ уг чеберты. Солэн пушказ лулчеберлыкез, калык синме йӧтымон выросъёсыз, ӟеч ужъёсыз медло на. Озьы ке но, тузӥ дӥсяськем эшъёсызлы пияш вожъяськылӥз ик... Урак Олегез палэнысен синйылтӥськод ке, соку ик валаськод: задор, чырткем, синмаськымон ӟыгыт* быдэ вуэ. Арлыдыз шоры учкытэк, паськыт пельпумо, суй быгытъёсаз но кужымез шӧдӥське. Йыгмыт вамышъя, котькуд вамышез азьвыл ик малпамын, ваньмыз лыдъямын-чотамын, кожалод. Туннэ сямен ик, кемалась лёгем сюресэз но шонертэмез, мыноно интыяз ӝоггес вутскемез потэ. Лызпыръем спортивной штанэз ӟоскытгес адӟиське: балетын эктӥсьёслэн музэн золскемын, быдэс мугорзэ, лёго-мого интыоссэ шарая. Матрос тельняшкаез но (атаезлэсь кылем кыкетӥ синпель кузьымез) таза мугораз бурмемын кадь. Чебер, кельышлы, кужмо. Чиганлэн кадь сьӧд йырсиез атаезлэн выллем ик бабыльскемын. Ымнырыз тыр толэзь кадь питырес, ангесысьтыз пичияк гопез сое муспотымон каре. Нырыз ӧжытак чатырскемын - ас дунзэ тодӥсь-валась муртлэн, пе, сыӵе луэ. Мыйык ӝужан интыяз кӧня ке мамык пигонъёс выжыяськемын ни. Дун-лызмыт синъёсыз гинэ котырысь дунне шоры мӧзмылэс учко. Соос вуюись выллем сяськаослы но, лысву инӟыослы но, оло нош, улон кузьмам быдэс югыт дуннелы но уг шумпото кадь. Дырыз вуытэк, гужеме валиськем мактал, синъёсаз кинлэсь ке мӧзмон оло куректон тылгизьы кугӟамын. Соин ик, лэся, паськытэсь сьӧд синкашъёсыз но сӧсырмем папалэн бурдъёсыз выллем адско - оло юзырес тӧллэсь дырекъяло, оло секыт адӟонлэсь огдырлы ке но ватскыны тыршо. Тарло нюлэс вӧзтӥ вамышъякуз ни Апасов инбамын огназ поръясь кучыранэз синйылтӥз. Солэсь эркын, вӧл-вӧл лобамзэ адӟыса, кырӟан нёжъяны кутскемзэ ик ӧз шӧды пияш: Поръялоз-поръялоз Ворпо-чибор душесэд. Со душес кызьы поръя, Мынам сюлэм сыӵе ик. Еж мылкыдо пимуртлэн ӝожалэс куараез писпуос пӧлтӥ шуккиськыса ортчиз но шумпотыса ӟильыртӥсь бурдо куараосын огазеяськиз... 3 Нырез гочатӥсь зынэз шӧдыса, валаса, Урак Олег кырӟан дуннееныз люкиськиз. Чемур гурезь бамалтӥ со кечпи музэн тэтчаса васькиз но бызьыса ик ошмес вӧзы интыяськем нянь пыжон юрт доры тубиз. Тодмо суред (ваньмыз толон кадь ик): пу пильылон пуклё вылэ нырыныз бышкалтэм тӥр "быжзэ" урдэм, вӧзысьтыз мукет пуклёос радэн ныруло. Воштӥськемез со гинэ: пильылыса сюрем артанаысь писъёс трослы кулэсмиллям. Анна кенак гуре пыртылӥз, луоз. Соин пумиськылытэк ик Олег арлыдоос музэн кияз сялӟиз но уж борды ӝабырскиз. Ӟугырес пуклёкъёслэн тырс-тарс! пильылӥськемзы ӵук омырын сюло куара музэн кыдёке шуккиське. Вань мылкыдзэ сётыса, кужымзэ жалятэк тырше Олег. Уй ӵоже кулэсмем артана нош ик вылӥе ӝутскыны ӧдъяз. Ог ӝыны час ёрос тӥрен шонаськемез бере егит пилэн суй быгытъёсыз эшшо юнгес золскизы кадь, отын валантэм пӧсекъяны-кужекъяны ӧдъяз. Секыт ужлы дышымтэ еж мугор чаль жаде уго. "Эх, кыдёке-кыдёке, нап турын пӧлы сэрпалты вылэм та колун тӥрез, - дӥсь улаз чуртнаськись дуринчи музэн, йырвизьмаз кузял малпан гужетэ. - Эшъёсы сямен ик мон но та виысь чебер вӧтъёс адӟыса кӧлысал, ӵукна сайкаса, тыр ӝӧк сьӧры пуксьысал, анаеным ваче син учкыса пыльышасал. Нош кин соку кӧттыр утчалоз? Кин Ирина-чеберинаез, муспотон Санькаез сюдоз? Ма, анайлы но ужаса шедьтэм няне мултэс уз лу. Сёже милемыз вордэм, пыд йыламы султытэм. Нош... кулэ-а вал меда вордыны? Ас кужымедлы, быгатонлыкедлы уд ке оскиськы, малы югыт дуннее выль адямиез вордонэз? Ярам, шуом, мынам дунне вылэ вордскемелэн мугез валамон. Ог- огзэ яратӥсь кузпалъёс, пе, нырысетӥ нылпизылэсь вордӥськемзэ чидатэк витё. Ӝоггес калык радэ султэмзы, анай-атай кариськемзы потэ. Озьыен, мон витем- возьмам "емыш" вал, дыр. Нош малы Ирина, Санька кулэ вал? От, шузи, - та малпанэзлэсь пияш ачиз ик куаляк луиз. - Мар озьы лабыртӥсько? Арлыдоос верамъя, ас лулам сьӧлык басьтӥсько ук! Онись кенак шуэ, Инмар, пе, малпанъёсыз но тодэ". Жадемзэ шӧдыса, пуклё вылэ шутэтскыны пуксиз гинэ - котырак йырез поромытӥсь, дыльдыез шыркошкытӥсь ческыт корел няньлэн зыныз лӧсъяськыны ӧдъяз. Озьыен, Анна кенакез гурысь пыжем няньзэ поттылыса борддор вӧзысь ӝажыосы тыре ни. Кышномуртлэн выросъёсыз ик Олеглэн син азяз пуксё. Ма, сыӵезэ но адӟылэмез вань: чылкыт утялтэм выж вылэ янгышен нянь сукыри усьыны шедьтэ ке, Эрки Анна воксё эли-кеби луэ. Дыртыса сукыриез ӝутэ, ужын сюрмем киосыныз маялля, куинь пол чупа но выльысь ӝажые интыя. Ас понназ шара куриськыны но уг вунэты: "Вождэ эн вай, Инмаре! Янгышен уськытыны шедьтӥ. Эн ватса сьӧлыкъёсме". Апасовлэн син азьтӥз киноын музэн вошъяськись суредъёсты тугаса, пекарнялэн ӧсэз вӧлак усьтӥськиз но, быдэс ёросэз зумыт зынэн напчытыса, Эрки Анна кыре потӥз. Ӟырдам гур вӧзын ӵыжектэм бамъёссэ тӧдьы айшетэныз ӵушылонъяз со Олег доры матэктӥз. - Чырткем-а, Олег? - пуклё вылэ интыяськиз кышномурт. - Однако, ма мында пильылыны вутскемед ни! - Туннэлы тырмоз, кожасько, Анна кенак, - ужзэ ушъямысь пальпотӥз Апасов. - Беромыны шедьтӥ, лэся, туннэ - кемагес назьылляськиськем. Ма, валес магнит сямен бордаз кыскыса возе. - Ой, ой, озьы эн шу, Олег, - киыныз шонтӥз Эрки Анна. - Мон няньме гуре тырыса гинэ вуттӥ - тӥр куараед чузъяськиз ни. Тюрагай кадь вазь сайкаськод. Нош милям Васимы уй-нуналэз валатэк, пыдчиньыоссэ выретытэк кӧлэ на, дыр. Ӧд ке сайкаты, Инмаре-куазе, ӝыны гумырзэ кӧлысал, вылды. Эрки Анна, интыысьтыз султыса, жадем куссэ киыныз маялляз но, ӟус вылысь кык ведраосты кутыса, ошмес пала вамыштӥз. - Анна кенак, вай мон вулы ветло, - чырткемак султӥз Урак Олег. - Ӵапак ошмес ву юэм потыны кутскем ни вал. - Пӧсятозь ужамед бере кезьыт ву трос эн ю, пие. Ньылонэд пыктоз, висьыны усёд. - Ярам, Анна кенак. Мон ӝог берытско. Нош тон шутэтскы. - Ойдо мын, иське, чырткеме. Вудэ юрт пушкы пырты, ява. Собере ӵошен чайлалом*. Эрки Анна ог дасо ар огназ нянь пыже но кык гуртысь калыкез сюдэ ни. Ческыт, буй-буй пӧрмо солэн нянь сукыриосыз. Олеглэн Онись кенакезлэсь верамзэ кылэмез вань: "Каньыл мылкыдо адямиослэн гинэ пыжем-пӧрамзы ӟеч удалтэ, пе". Пияшлэн тодаз на Анна кенаклэн фермаысь парсьёсты сюдэм-утялтэмез. Лулысь- сюлмысь тыршиз. Нош нянь пыжон юрт лэсьтэмзы бере, юри председатель доры ветлыса, ачиз та уже куриськем, шуо. Ас кужымезлы, быгатонлыкезлы оскыса ӵетскиз, луоз. Нош азьвыл ӵош ужам эшъёсыз вожъяськыса шуылӥзы: "Секыт ферма ужлэсь пегӟыса, капчияз кӧчиз-выжиз. Эркияськыса улэмез потэм". Котькуд удмурт гуртын сямен ик, кушем ним ляконэн но ӧз ӝегалэ. Озьы Пилька Анна Эрки Анок луиз. Олег озьы ик мукетсэ но тодаз вайылэ на: атаез бырыны шедьытозь, анаез нянь пыжыны ке басьтӥське, керӟег луылэ вал. Ӝуась гуре писъёс но дыраз ватсано (ӟырдытэз кулэс но, мултэс но медаз лу), ыльняньлэсь ӝутӥськемзэ но синйылтыса улоно, табаосы-формаосы но дыраз тыроно. Шутэтскыса, буй-буй ӝутскыса, пыжыны кужым люкаса, пе, мед вутскоз. Ма, гуртысьтызы кышноос но куспазы вераськыкузы юнме уг пусйыло, дыр: "Жади. Пыжиськи туннэ". Нош Эрки Анок, оло, сюрс адямиез огназ сюдэ ук! Быдэс уез чырым карытэк ортчытъя мискинь кышномурт. Секытлэсь секыт йӧтэ, дыр, солы. Ӝутэтлэсь секталазэ нуись мурт гинэ тодэ, шуо. Кӧня пызь пужноно, тыро мешокъёсты но ӵемысь оген ӝутъяны тупа, пу пыртылоно, ву нуллоно, ыльнянь дасяно, гур эстоно, юрт пушез утялтоно... Вераса уд быдты! Эсьмаса, ас мылкыд каремезъя ву но одно ошмесысь нуллэ. Гумыетӥ лыктӥсь вуэн, пе, няньлэн шӧмыз уродме. Ай дораз бертыса но юрт котыраз ужпӧрез лачак. Вот тыныд, Эрки Анок! Няньзэ гурысь поттылэмез бере кышномурт дораз кошке. Олексей кузпалыз вал кыткыса лыктэ но няньзэ магазинъёсы, школаосы, нылпи садъёсы нуллэ. Собере, кышноезлы юрттӥськыса, пу дася, кытӥяз ву нуллэ на. Воргорон но ужлы сюлмо: кык удысын тырше. Нянь нуллэм сяна, колхоз валъёсты утялтэ на. Кыкетӥез уже, пе, укыр сюлэмъям-мылкыдъям. Пилька Олексей дымак ас выжы калыкез тусо-сямо. Шоро-куспо мугоро, йырсиез мыт- горд, пурысь синъёсыз ӧжытак пожаськемын (вина юэмезлэн тодметэз, луоз). Йылсо ангесэз ӵемысь мычымтэ луэ, ӵогыр-ӵогыр пештырскем гордалэс гонэн шобырске, йылсо нырыз бадӟымос адске. Дугдылытэк тамак ӵындэмысь, лэся, азь пиньёсыз ӵужектэмын. Курытсэ веръяллякуз туж кыло-ымо кариськылэ, мултэс пальпотэ. Сыӵе дыръя солэн вӧзаз мадёссэ кылзӥсь гинэ медло. Кыл биньгозызэ Лӧзь шур вамен но кыскоз, ява! Котькуд ӵукна, пекарня доры вуыса, Тыр-стоп нимо сьӧд-тӧри ужпизэ юбо борды думе но, азяз турын куштыса, Олег вӧзы дыртэ. - Кыӵе улон-вылон ни, ӧрӟипи? - пальпотыса вазиське тамак аратонъяз. Папирос пачказэ кисыяз ватэмезлэсь азьло тунсыкъяське на: - Али но уд-а ӵындӥськы? - Уг. Мар пайда сётоз со мыным? - вакчияк вазе Олег. - Папирос-сигаретлы но коньдон ӧжыт кулэ ӧвӧл, дыр, ук. - Шонер вераськод, Олег, - папирос пачказэ кисыяз ватэ ни воргорон. - Туала арын уждунэз но дыраз уг сётъяло. Ма, кыскись воргоронъёс но ашкынӥзы ни: кисыязы тамаксы вань ке но, муртлэсь куро. Соизлэн дун тырытэк басьтэмын кожало, лэся, чатран люкетъёс. - Милям сюратаймы бакча берамы тамак кизиз. Самосад ӵындэ. - Э-э, - киыныз шонтӥз Пилька Олексей. - Соин дарманьтытозь, мон буш ӟенеликъёс люкаса магазинэ нуисько но папиросэн воштӥсько. Ярам ай, соиз ласянь усто: кытчы гинэ эн учкы, буш полуштопъёс "ӵыжаськыса" кыллё. Паймисько: ческыт сиыны, чебер дӥсяськыны быгатымтэ дыре но воргоронъёс курыт ву басьтыны коньдон шедьто. - Папирос кысконлэсь куштӥськыса ӧд-а утчалэ? - чус пукыны умойтэм потэ Апасовлы. - Трос аръёс ӵоже ӵындӥсьёс но тамаклэсь люкиськыны йӧндыро, пе, ук. - О-о, мон коросэ интыямзы бере но ог папиросме арато ай, - гор-гор серектӥз воргорон. - Нош тон эн кыскы, Олег. Ымдурад ик эн йӧттылы. - Ӧйтӧд, - лулске пияш. - Оскытыса кылме сётыны уг быгатӥськы. Мынам но эшъёсын кык пол пурккетэме вань. Ӧз кельшы. Уйбыт кызӥ, ява. - Милям Васимы уг-а ӵынды? - Адӟылэме ӧвӧл, Олексей агай, - Апасов арлыдо эшсэ эрекчаны дӥсьтӥз. - Кыскысал ке, синмам йӧтысал, дыр. - Нош мон шӧдӥсько: паровоз сямен ӵындэ со, шайтан воштэм лулос! Кисыысьтыз тамак пумъёс, шырпу коробка но шедьылэ. Кык пол визьмалляй ни - хоть бы хны, синкылизэ но уг потты. Толон нош ик одӥг пачка папиросэ тылэ-вуэ пырем кадь шупчиз... А курытсэ веръямед вань-а? - мукет ӧре выжиз воргорон. - Мон сяна но юртамы юисьёс тырмыт, Олексей агай, - синъёссэ улэ лэзьыса, секытак лулскиз Урак Олег. Ас янгышсэ, покчи эшезлэн бурмисьтэм яраяз сылал пызьнаны шедьтэмзэ валаса, Пилька Олексей курыт ӵынэн воньдӥз. Тамак пумзэ, музэ куштыса, ботинка нырыныз лёгиз но синзэ кырмыштыса юаз: - Нош нылъёс котырын ма порма? Атасъяськыны пӧрмытӥськод ни, дыр? Мон тынад арлыдад гольык мугорез мусояны, яратыны вутски ни. - Ӵапак черкысь поп музэн вань сьӧлыкъёсме юаськод, Олексей агай, - серектэм карыса, пияш интыысьтыз султӥз. - Сыӵе лушкем ужез кин-о шарая? - О-о, китрой тон, китрой, - ӵужектэм пиньёссэ ӟар поттыса серектӥз воргорон. - Иське, шӧмзэ тодӥськод ни? Я, мон но ӝегасько ни кадь, Тыр-стопе шорам учкылэ ини, - валэз пала вамыштӥз Пилька Олексей. ...Ошмес вуэн берытскем Олегез адӟыса, Эрки Анна ӧтиз: - Киостэ миськы но сиськыны пыр, пие. Собере гуртамы вамыштытэк уз лу. Юрттӥськыны лыктэм Урак Олегез Эрки Анок котьку шумпотыса пумита. Ужамез бере кунояны, сьӧраз саламъёс ыстыны но уг вунэты. Ас гуртоез бере, ӟеч тодэ уго, кыӵе омырен шока, кызьы улэ-вылэ та семья. Егит пи мисьтаськыса пырытозь Анна кенак ужан дорысьтыз ӝӧк вылзэ ӧтем-витем кунолы сямен дасяны вутскем. Пӧсь табаын пуштэм курег пуз шачыртэ, али гинэ шормам нянь вылысь шуныт бус ӝутӥське на. Электрочайник вӧзы ик сакыр песок, конфетъёс, сутэр варення пуктэмын. Ӵашаосы чай лэзьяса, шкаф вӧзаз вамыштӥз кышномурт. Ӵынатэм чорыг вайыса, Олег азе понӥз. - Однако, чорыг бере чай тужгес ӟеч гылэт, пие. Сиськы, возьдаськыса эн пукы. Пӧсь дыръяз пуштэмдэ но си. - Мон керпотӥсь-возьдаськись ке луысал, сузэреным-выны кемалась сютэм кулысалзы ни, Анна кенак, - чорыг вандэсэз сузянъяз вазиз Олег. - Кӧт сюман куддыр возьытлыкез но, пе, ньылэ. - Однако, шонересь кылъёс. Нош кунояку малы-о возьдаськонэз? Милям атай вералоз вал: "Ӧтисез доры пыр, уллясез дорысь пот". Эрки Анна лапег, тыр мугоро. Котьку ӵыжыт бамъёсысьтыз шадраосыз синме шарак йӧто. Но соос сабырлы сямо, ужез гажась кышномуртэ шуш уг каро. Вожпыръем синъёсыз, киосыз выллем ик, чырткемесь: шырпиос музэн отчы-татчы бызьыло. Тӧдьы кышет улысьтыз адскись йырсиез ӵужпыръем мертчан тусо. Сыӵе йырсиё муртлэсь арессэ валаны шугъяськоно. Азвесь нюжаосын уг сурасько но тӥни. Кулытозяз огтусъем уло. Эрки Аннок сиськыкуз но ӟабыльтэмысь уг дугдылы. Гуртаз бертыса но та сямыз уг воштӥськы. Котькуд ву ваись, ужысь бертӥсь, магазинэ вамышъясь гуртоеныз ог-кык кылын ке но вошъяськоз. Огназ ужамен сэрен вераськонлэсь мӧзме, лэся. Озьы нунал ӵоже тросэзлы аслэсьтыз яратоно "однако" кылзэ вераны кутске. - Анай-атаед уже потало-а, Олег? - Кык нунал юо ни. Толон бригадир но, фермаен кивалтӥсь но пыразы. Куаретӥзы гинэ, уже улляны ӧз йӧндыре. - Ма, кытысь юон шедьто? Паймод но бырод, однако. - Сур чырсатӥзы, лэся. - Нош тон асьсэос адӟымтэ дыръя киськаны уд быгатӥськы-а? - Озьы лэсьтыса но эскери ни, Анна кенак. Ӵошен кутскыса, ӧжыт гинэ йырсиме лӧдытэк-тышкатэк кельтӥзы. Ярам, Онись кенаклэн сениказ ватскыса вуи. - Однако, та Нина воксё визьзэ ыштэ ни, лэся, нылпиосыз сярысь чик уг сюлмаськы. А ведь йӧн адями вал. Ужлы но провор. А юыны ке кутске... Сокем-а ческыт потэ меда? Мон сиён-юон дыръя но юыны керпотӥсько. Ӧжытак веръясько ке, пузъёс вылын пукись курег музэн куӵекъяса ветлыны кутскисько. Олексей вина веръямме соку ик шӧдэ-вала. Аракы юон, кышномуртэ гинэ ӧвӧл, воргоронэз но азьдагы* каре. Паймисько, однако, вераны кыл уг шедьтӥськы: кызьы жаль уг поты пӧсяса, жадьыса поттэм коньдонзэс курыт аракыен воштыны? Тамаша ук, тамаша! Ас киыныд аслыд ачид висён кузьма ай! Мон Олексейме но ялан сизьдӥсько: "Эн ю. Малы юисьёс шоры учкиськод, соослэсь адӟем кариськод. Адямиослэсь ӟеч ужзэс, сямзэс гинэ асэстыны сьӧлык ӧвӧл. Уродэз ачиз сир музэн бордад наштаськоз". - Анайме жалясько мон, Анна кенак. Йыромиз со, нуназе куазен йыромиз. Эшшо ке сюратайёс но чаляк шедё. Зэм вера Осьня кенак: "Йӧно воргорон, пе, пыртосэ уз пыр. Ачиз юртъер кутыса улоз-вылоз". Туж секыт черен курадӟо доръёсмы. Нош милям - покчиослэн - сое вормыны, эмъяны, юрттэт кимес сётыны кужыммы уг тырмы на. Ох- х... - мур лулске Олег. - Ӵукнаысен ик малпанзы, сюлмаськонзы одӥг: маке шедьтыса юоно. Аракытэк шокчыны уг быгато ни, лэся. Ярдуре поттэм чорыг музэн ымзэс гинэ усьяло. Ай ӧй эскериськы на: оло, нош ик мае ке вузаса юизы. - Осто, козма! - гадьзэ кироса кышномурт. - Кызьы улод но кызьы кулод та югыт дуннеын? Шуг вераны, азьпалэз тунаны. Инмар та визьмылэсь гинэ медаз люкы: курыт юонъёсты адӟемпотостэм карон мылкыдме медаз тала. Эрки Аннок ӵашаосы чай ватсанъяз кышет улысьтыз потэм йырсиоссэ лач-лач интыя но лулске: - Детдом шуоназы умойгес ӧй луысал меда, Олег? Отын но пиналъёс уло-выло ук. Ӵемысь адями пуш чеберлыксэс но утьыны йӧндыро, пе. Апасов пӧсь чайлэсь ӵоксузиз кадь. Арлыдо гуртоезлэсь сюлэмзэ ӵушкась верамзэ йырвизьмаз бергатӥз но кышномуртлэн синъёсаз меӵак учкыса юаз: - Анна кенак, тон тодӥськод-а вал Яргуртысь Полипова Марияез? - Бен, бен, школае ог аръёсы ветлыны тупаз, - сак кариськиз Эрки Анна. - Кылем аре операция лэсьтон ӝӧк вылэ кулӥз. Кыллёно музъемед мамык кадь небыт медло, Марья, - гадяз кирос кариз кышномурт. - Мар-о собере? - Та нуналъёсы, шур дурын чорыгакум, солэсь детдомын улӥсь пизэ пумитай. Гужемлы ӵужмуртэз доры куное бертэм. - Однако, сюлэмыз вордскем палъёсаз кыске, луоз. - Отын улэмез-вылэмез, дышетскемез сярысь Геня ӝожаса мадиз. Арлыдо пиос, пе, ӵемысь жуго, коньдон шедьтыны косыса ёрто. Сиён, дӥськут сярысь но поттылӥз. Ушъяськыны немаин, пе. - Та дыре кытысь-о ушъямонзэ шедьтод, Олег? Ярам ай, гуртын улӥськом, пудо вордӥськом, соин ик сӥль, вӧй веръяськом. Сотэк кӧс возьыны, визяны тупасал. - Милемды детдоме интыян сярысь школамылэн директорез но, интыысь тӧромы но кылпум ӝутылӥзы ни вал. Мон аслэсьтым чутрак пумит луэмме верай. Мон, ма, детдомын но асме обидьыны уг сёты. Нош Иринаен Санька? Эшшо ке милемды люкозы но, соос понна бырон вуоз. Кужмысь ке нуизы, мон отысь пегӟо, одно ик татчы берытско. Сӧсырмем бурдо гинэ но берпум кужыменыз вордскем музъемаз дыртэ ук, нырысьсэ лобӟем, нырысьсэ крезьгурам ваяз вутскемез потэ. - Однако, малпанъёсыд, кылъёсыд туж шонересь, пие, - оло ымнырысьтыз пӧсяса потэм шапыкъёссэ, оло бычырам синкылизэ айшет пумыныз ӵушалтӥз Эрки Аннок. - Гуртамы ик улыны тырше ни, мусокаосы. Ас калыкед жалялоз но, юрттоз но, кулэ ке, куаретоз но. Оло, улыса-вылыса анаед но визьмаськоз ай. Олокыӵе кужмо юисьёс но та черзылэсь мозмытскыны быгато. - Эх, уксёе ӧвӧл, - кыдёке учкыса вазиз Олег. - Мон сое усто эмчи я экстрасенс доры нуллысал. Котькуд газетын сыӵе ялонъёс печатлало. - Озьы, озьы. Арлыдо мурт кадь визьмо вераськиськод, пие. Соин ик тонэ гажасько но ас пиме кадь жалясько. Милям Васимылэн тазьы малпаськыны, улонэз валаны йӧныз ӧвӧл ай. Небыт мамык пӧлысь тютюпи музэн улэ. - Улон визьма, Анна кенак. Улон но азьланез сярысь сюлмаськон. Тани тон, Анна кенак, Вася пиед сярысь вераськод. Солы майбыр: анай-атаез сюдэ, дӥся, кулэ дыръяз шуныт кылъёс вера, нуныя. Нош мон... Милем мукет сюрестӥ вамышъяны кылдэм. Мон... веттан куспетӥзы кӧкыысь киргатэм нуны выллем. Куштӥллям но... выльысь небыт кӧкые интыяны вунэтӥллям. Ма кыле на соку? Амалтэк ӵабъяськиськод, азьпала кыстӥськиськод, кӧттыр утчаськод. Мон та сярысь уйёсы трос малпаськисько. Оло, соин ик улон шоры но еж нылпи синъёсын учкемысь дугдӥ... Апасов, мадёс-лабыртонзэ куспетӥ карыса, суйпосысьтыз чассэ синйылтӥз но, тау карыса, ӝӧк сьӧрысь ӝогак султӥз. - Выны-сузэре сайказы ни, дыр, Анна кенак. Дыртытэк ӧвӧл. - Я, ӧжыт ӝега на, пие. Тани саламъёс дасяло, - Эрки Анна ӵогысь полиэтилен сумка басьтӥз но отчы тыриськыны кутскиз. Нырысь ик алигес гурысь поттэм буй-буй нянь сукыриосты понӥз, собере одӥг сузь кампет ватсаз но, нимаз кагазэ бинялтыса, быдэскын ӵынатэм чорыгез чуртназ на. Олеглы сётыса, пыриськыса музэн вазиз: - Семьяды бадӟым ке но, мукет юрттыны уг быгатӥськы, пие. Однако, эн куатаськы. Дыр шедьтыса кожалля татчы. Мӧзмыт мыным оген, бусы шорысь писпулы кадь. Ма, уж ласянь но трос юрттӥськод. Пу пильылыса быдтэм кужымед кык пол мултэсмыса мугорад мед берытскоз. Ӟечезлы оскы, пие. Инмар юрттоз ай. Тӥ но солэн нылпиосыз уго, вӧзтӥды асьтэ кылчинъёсты лобало, дыр. - Бадӟым тау, Анна кенак, куноямедлы но, саламъёсыдлы но, - тыро сумкаез шоры учкиз Урак Олег. - Олексей агайлы вера: пу пильылыса медаз курадӟы, ачим ӵукнаосы вуыло. Сотэк но кыкнадылэн ужпӧръёсты тырмыт. Онись кенак верамъя, курегъёс ӵабъяса уз быдтэ. - Озьы, шонер вераськод, Олег. Однако, анай мылкыдын визьнодатэк уг чида сюлэмы. Саламъёсыныд сузэр-вындэ нырысь куноя. Анай-атаедлы кылиз ке но яра, ӧз ке но. Ужаса, кужымзэс поттыса мед сиёзы, ашкынэмъёс. - Я, мон вамышто ни, - ӧс пала сётскиз Апасов. - Ӟеч сюрес, пие. Вуылы, татчы сюрестэ эн вунэты. Олег тыро сумказэ кужмо кырмыса, лыктыкуз сямен ик Изонюк гурезь бамалэтӥ кечпи музэн тэтчаса васькиз но, ошмес вуэз сузеныз омыртыса, ог ымтыр юытэк ӧз чида. Онись кенакез дышетэмъя, одӥг куарез чигтыса басьтӥз но, монэ эн кут, тани та куарез кут шуыса, ошмес дырдые куштӥз. Кин тодэ, оло зэм, оло даур, нош бускельзы озьы валэктэ: "Кыралысь ошмес син, пе, адямиез кутэ. Мугорзэ гижлояськытэ, висён чер но кузьманы быгатэ. Нош куар ке куштӥськод, сыӵе урод сямзэ уг шарая". Лыктэм сюресэтӥз вамышъянъяз Олег табере котырысь инкуазез пальпотӥсь синъёсын учке. Кӧттыр адямилэн сюлмаськонъёсыз ик ышо-тӧлӟо кадь. Бугырскем мылкыдыз, гадяз пачыласа, кыре куриське. Соку ик кырӟан но бурдъёссэ вӧлъя: Тулыс-а, Сӥзьыл-а Сюрес нош вуттэ, Ӝутскем мылкыдын лыктӥсько. Гуртэ, ой, гуртэ, тон котькуд вакытэ Котьку но мусо потӥськод. Сяськаосын тулкымъяськись клевер бусые кожыса, Олег сумка пушказ учкытэк уг чида ни. Отын - куинь сукыри. Выль пыжем няньлэн зыныз али но йырзэ ик поромытӥз. Со ческытэн шокась омырлэсь мылкыдыз кыӵе ке гуч-гуч луиз - выль чечыез веръям мактал. "Усто, буй-буй нянь пыже Анна кенак, - сюрессэ азинтонъяз Апасовлэн шумпотонэз пачыла. - Вань сюлэмзэ, мылкыдзэ сётыса тырше уго. Онись кенак верамъя, пыжем- пӧрамъёссы сыӵеослэн гинэ, пе, удалто, кин вӧзысьтыз адямиослы ӟечлык кузьманы тыршыса улэ-вылэ. Вашкалаос нянь пыжон нуналазы, пе, эсьмаса, куаразэс будэтыны гинэ но курдало вылэм. Куаретон, урод кылъёс поттылон сярысь малпаны но дӥсьтӥллямтэ. Сыӵе дыръя, пе, ӝутскись ыльнянь кышкатске но берен лапка, буй-буй уг пыжы ни, шумпотон кузьмась, кӧттыр карон кужымзэ ыштэ". Тарло нюлэс вӧзысь ньылпу яг вӧзтӥ вамышъякуз Урак Олег сакгес кариськиз. Кышкаса выллем дауръем вӧсь кыз пала учкиз. Та ӝужыт, зӧк улваё писпу мылкыдэ олокыӵе валантэмлыкъёс пыӵатэ. Татӥ ортчыкуз Пушкинлэн поэмаез тодаз усе. Кожа: тани-тани кӧшкемыт, йырсиос пежырскымон суредэз адӟоз. Нош ачиз шӧдытэк шыпыртыны кутске: У лукоморья дуб зеленый, Златая цепь на дубе том. И днем и ночью кот ученый Все ходит по цепи кругом... ...Там чудеса: там леший бродит, Русалка на ветвях сидит... Собере, кылбур чуръёсты шыпыртэмысь дугдыса, ассэ ачиз буйгатон вылысь, малпаськон ӧрзэ мукет визылэ воштэ: "Ӧвӧл, ӧвӧл, татын пӧртмаськыны кулэ ӧвӧл. Ма, собере та тыпы ӧвӧл ук - дауръем кыз. Вӧсь писпу. Гуртоос татчы инсьӧр кузёлы вазиськыны, ас куронъёссэс шараяны, куддыр кулэмъёслы курбон сётыны лыктыло-люкаськыло. Котьма ке но, та кызлэн кыӵе ке адскисьтэм, адями визьлы валантэм кужымез луыны кулэ. Оло, ӵапак со - Сьӧд дуннеез но Инсьӧрез герӟась нюжа? Раез но адэз люкон пус ӧвӧл-тэ та кыз?" Апасовлэсь малпанъёссэ кир-пазь тугаса, кыз вӧзысь сьӧдалэс пуны потӥз. Дӥсьтытэкгес учкиз вӧзтӥз ортчись адями шоры. Пияш соку ик тодмаз: Ляпа Петыръёслэн Рекс пунызы. Сое кучапи шуыны шонергес луысал ай, дыр. Ляпа Петыр сое райцентрысь тодмоезлэсь дун тырыса ваиз вал. Овчарка, пе. Озьы-а, ӧвӧл-а но, ваён нуналаз ик дас чипызэс кекатэм-вием. Гуртысь покчиос пӧлын чилектэм кадь выль ивор вӧлскиз: "Лякоп Петыр кучапизэ туж кужмо жугем, сӧсыртэм но Изонюклэн меӵ яраз сэрпалтэм". Пиналъёс трос кузя люкаськыса утчазы ке но, ӧз шедьтэ. Арня ортчыса, та шимес югдур сярысь вунэтӥзы. "Уть ай, улэп! - пальпотӥз Урак Олег. - Кулонлы сётскымтэ, югыт дунне вылын ик улэмез потэ на, иське. Эх, таяз учыре но пуны шат янгыш? - ӝожоме пияш. - Оло, солэн ноку но курег-чипыосты адӟемез ӧй вал на? Оло нош, вашкала дыре кион выжыысь луэмез мылкыдзэ пуромытӥз". - Рекс, Рекс! Чаль дорам, - сабырлы куараен вазьыса, киыныз шонтӥз Апасов. Пуны матэктыны ӧз дырты. Оскытэк кадь учке, омырез зынъя. - Рекс, эн курда, нянь турижен кунояло, - Олег, жаляса ке но, няньзэ тӥялтӥз. Ческыт нянь зынлы пуны но ӧз чида ни - азьпала сётскиз. Маке малпаськыса, вылды, нош ик омырез зынъяз, собере, быжзэ выретыса, пияш вӧзы лыктӥз. - Ме, си, Рекс, тынад но кӧтыд сюма ук. Пуны ческыт саламзэ оп! шуытозь ньылӥз. Собере нискетыса куаразэ сётӥз - оло озьы тау каремзэ вера, оло сьӧраз куриське, оло эшшо няньзэ куре на. - Ойдо сьӧрам, Рекс, - киыныз шонтӥз Апасов. - Ми дорын но сютэм уд кулы. Ойдо, уг обидьы. Урак Олег сьӧраз вужер музэн калъяськем ньыль пыдо эшсэ синйылтыса но вылӥысь шунды шоры учкыса пальышаз: "Эх, шумпотозы ни Ираен Санька! Кык кузя бертӥськом. Эшшо ке нянь но вуттӥсько, Онись кенак чорыг лым но дасяз ни, дыр..." Али со шудо вал. "Ма, азьланяз но озьы луыны кулэ!.." 4 Онись кенаксы дорысь бертӥсь пиналъёсты шал-шал буш корка пумитаз. Эсьмаса, коӵышсы гинэ но уг адскы, шыраны кошкем, лэся. Утялтымтэ ӝӧк вылэз, валесъёсты адӟыса, Ирина соку ик уж борды басьтӥськиз. Олег, буш ведраос кутыса, вулы вамыштӥз, нялтас Санькалы но уж шедьтӥз: - Санёк, тон ӵужон кут но корказез, азбарез, капка выжыез ӵуж. Котькытын тамак пумъёс лошъясько. Кузётэм юртъер кадь адске. Пырись ке луиз, мар малпаны кулэ асьме сярысь? Тыршыса ужа, возьытэ медам усе. - Яралоз, агай, - вазиз Санька. - Нош тон мыным кампет сётод на-а? - Нырысь косэмъёсме быдэсты. Мон "уждун" тырыны уг вунэты. - Ярам, али ик ӵужо-утялто, - бызьыса кошкиз Санька. Колонкаысь ву басьтыкуз, Олег доры гуртысь бригадирзы кожиз. Ляпа Петыр та ужын кема тырше ни. Воргорон таза, лапег мугоро, пельпумъёсыз - паськытэсь. Наӵ-наӵ, тэкитэн буям кадь сьӧд, пуштрес мыйык нуллэ. Лэчыт кыло, ужез сыӵелы дышетэм, лэся. Котыръяса уз вераськы, уродзэ но, ӟечсэ но синмад меӵкытоз. Соин ик Апасов но со шоры гажаса учкылӥз. Нош Рекс пуныеныз луэм учыр бере кырыж синъёсын учкылыны кутскиз. - Ву кулэ луиз-а, Олег? - ӟечбуръяськем интые юаз воргорон. Таӵе аспӧртэмлыко сям быдэс Кутор черкогуртысь улӥсьёслы пыӵамын кадь. Ураметӥ ортчыкузы ваче син пумиськыса но ӟечбуръяськыны уз дыртэ - юалозы: "Ву ваиськод- а?", "Пу пильылӥськод-а?", "Магазинэ-а ветлӥд?" Кытчы ветлэмзэ тодо, мар ужамзэ адӟо ке но - юало. Ӟечбуръяськон мактал луэ кадь со. Ымпумысьтыз сигаретсэ музэ куштыса, бригадир сое ботинка тышкыныз лёгиз но тунсыкъяськиз: - Дорад-а анаед, сюратаед? - Ӧвӧл, кытчы ке кошкиллям. Анай уж дураз ӧвӧл шат? - паймиз пияш. - Али фермаен кивалтӥсьмы жингыртӥз. Скалъёсыз кыскытэк, пе, сыло. Акыльтӥз ни мыным солэн юэмез. Синъёссэ но уг усья ук, сазьмытскыны но уг малпа. - Ирина ветлоз, утчалоз анаймес, Петыр агай. Ӵошен ик скалъёсты кыскозы. - Мон ужась шедьтӥ ни, - вожез потыса вазиз бригадир. - Скалъёсты возь вылэ дыраз улляны кулэ ук. Уг, уг чида мон тае, - вожпотэмзэ уг ваты Ляпа Петыр. - Кӧня пол дурбасьтылӥ ни анаедлы. Эмъяны медаз келялэ, нылпиоссэ медаз таркалэ шуыса жаляй. Нош со ӟеч лэсьтэмез воксё уг вала. Валамез но уг поты кадь. Олеглэн ымнырыз ӵыж-горд луиз. Мугорзэ сюрсэн-сюрсэн кузьылиос куртчылыса бызьыло кадь. Бригадирлэн пумитаз вазьыны но уг дӥсьты - верано кылъёсыз пинь бордаз канжасько. - Сюратаед но сволочь! Толон фермаысь висись парсез вандыны ыстӥ вал. Бер куксэ вузаса юэм, тордос. Нош ик участковой инспекторлы жингыртытэк ӧз лу. - Иське, сӥль вузаса юизы соос? - Анаед но-а кудӟемын вал? - Кык нунал юиз ни. - Утчаса шедьтӥды ке, анаедлы вера: чукиндэр* бусые мед мыноз. Люкет басьтӥды бере, калык сямен ик дыраз шератыны, жуг-жаг турынлэсь утялтыны кулэ. - Верало, Петыр агай. Сузэре-выны но анае сьӧры юрттӥськыны ветлозы. - Ачид нош ма ужен выриськод? - кошкыны вамыштэм воргорон тыпак дугдӥз. - Кык нунал фермаын пудо эмъясь врачъёслы юрттӥ. Скалъёслэсь вирзэс эскерыны басьтылӥзы. Илья агай отчы ӧтем вал. - Нош комбайнерлы юрттӥськисе интыяськемед уг-а поты? Тон пӧрмытод, малпасько. Отын уждун но, ю тысь но ӟеч усе. Школае мынон азяды ваньдылы дӥсь басьтымон уськытод. - Мон ачим но со сярысь малпаськисько ни вал, Петыр агай. Нош кинлы юрттӥсь кулэ? Кинлы вазиськоно? - Пачан Миша огназ на. Ветлы со доры мастерское. Мон инженермылы жингырто. - Ярам, ярам. Мон али ик бызё, - тыро ведраоссэ капчияк ӝутыса, Олег тур-пар дор палаз кошкиз. Шумпотон иворлэсь ымдуръёсыз паляк вӧлскемын, киосыз интые адскисьтэм бурдъёс кылдӥллям, кожалод... ...Пачан Миша Олег шоры базарысь басьтоно вуз шоры сямен сӥсъяса учкиз: - Ярам, ӵошен тыршом, Олег. Мон оскисько тыныд. Огзэ вала: азьтэмъяськид ке - соку ик улляло, сюлэмам укшамон ке тыршид - тӧре пукто. Кузё луыса, комбайн штурвал сьӧрын пукод. - Тыршо мон, Миша агай, - пальпотӥз Олег, воргоронлэн синъёсаз меӵак учкыса. * * * Апасов арня ӵоже колхоз мастерскойын тырше ни. Техника котырын берган солы туж мылкыдъяз. Сотэк-а Атняысь ӧнер басьтонъя курсъёсы механизатор кариськон мылкыдзэ шараяса куриськон гожтӥз ни вал. Отчы Кутор школаысь пиналъёс, ёросысь мукетъёсыз сямен ик, толэзяз огпол ветлыса дышетско. Арня ӵоже Атняын уло. Нылъёс дӥсь вурисьлэсь, сиён пӧрасьлэсь ӧнерзэ басьтыны тыршо ке, пиос тракторист, шофёр, токарь луыны мылкыд каро. Укмысэтӥ классысен кутскыса, соос куинь ар ветло та курсъёсы. Школаез йылпумъякузы ни шаплыосыз аттестатэн ӵош дышетскем ӧнерзыя правоос-удостоверениос басьто. Атняе кошкон арняосы Олег Апасовлэн мылкыдыз кык ёзнэтлы люкиське кадь. Огласянь со шумпотэ: гуртын улӥсь адямилы кулэ ӧнер басьтоз, нош мукет ласянь сюлэмшугъяське: кызьы арня ӵоже Иринаен Санька улозы? Анаен сюратаез юон вылэ ке чӧлскизы, сютэм уз-а пуке? "Ярам ай, -шумпотыны, ассэ буйгатыны но муг шедьтэ егит пи, - школаын дышетскись пиналъёсты нуналаз кык пол, дун тырытэк, сюдо. Али, улон мыддотринскем дыре, трос нылпиё, куанер улӥсь семьяослы со но туж бадӟым юрттэт". Пачан Мишаен ужаны Олеглы кельше. Воргорон ваньзэ лачмытак гинэ, лад-лад валэктоз, ӵемысь уж вылын быдэстыса возьматоз. Азьвыл, та гуртозэ пумитаса, со ӟечбуръяськыса гинэ ортчылоз вал. Нош табере ульчаысен пумисько ке, огдырлы дугдыса, со-та вераськыса сыло, ужъёссы сярысь кенешо. Пачан Мишаез тусбуй ласянь чебер воргоронэн уд лыдъя, дыр. Восьтэт ымныро, йылсо ангесо. Синъёсыз япон-китай выжыысь калыкъёслэн выллем сюбегесь, со понна эгырен сьӧдмам кадь синкашъёсыз паськытэсь. Кӧсыт ымныраз купырес нырыз бусы шорын оген сылӥсь писпу мактал адске. Ӵем тамакамысьтыз-а, мар-а пиньёсыз ӵужектэмын, азьпалысьтыз огез киргамын ни. Соин ик пась бакча кенертэт кадь адске. Воргорон вераськыны шаплы, чик ӧвӧлтэмысь но куддыр бадӟымос кылпум пуромытэ. Вылаз ик, мадёссэ одно ик серем пыр ладъя яке лэчыт кылъёсын "сылалтэ". Туала дыре гурт хозяйствоос выль техника басьтыны уг быгато ни. Моӵсы уг сузьы - коньдон ёртэ. Курадӟыса поттэм сӥльзэс, йӧлзэс но государство "курегъёслы серекъямон" дун тырыса октэ. Соин ӵош ик техникалы, воштос ёзъёслы, эстӥськон- вӧйёслы, электрокужымлы ӝутыны вормонтэм дунъёс тупатэмын. Амалтэк вуж техникаез тупатъяса-кышъяса ужано луэ. Тани Олеген Пачан Миша но кыкетӥ нуналзэ жатказэс тупатъяло ни. Я соиз ёз уг шедьы, я мукетызлы ёрмо. Доразы колхоз инженер вуэмысь, Пачан Миша киысьтыз усьтонъёссэ пыд азяз куштӥз но вӧен наштаськем киоссэ ӟустариен ӵушылонъяз юрттӥсезлы ӵектӥз: - Ӧжыт шутэтскы, Олег. Начальствоен кенеш каром ай. Воргорон кисыысьтыз юри вандылыса дасям газет юдэссэ поттӥз но тамак бинялтыса кенжытӥз. Бугырак курыт ӵынзэ пельтонъяз инженерлы ӝожаны кутскиз. - Та "Нивамес" куштӥськем корт пӧлы нуыса султытонэз гинэ кылиз на, - вуж комбайнэз шоры учкыса лулскиз Пачан Миша. - Воксё шальтыраз ни ук. Шӧдытэк ик кылём, шырпу коробкаослэсь лэсьтэм шудон юртъер музэн, бусы шорысен кир-пазь шальтыралоз. Ведь кемалась "пенсие" кошкон арлыдыз вуэмын ни. - О-о, тынадэз йӧно адске ай, Миша агай, - нокыӵе ӧз кариськы инженер. - Мукетъёс эшшо но шуг югдурын. Сваркаен лякылымтэ-кышъямтэ интызы ӧз кыль ни, дыр. Коть туннэ ик колхозысь вань техникаез мартен гуръёсы келя. Но соку сюдӥсь- вордӥсь музъеммы муры кылёз ук. Иське, кызьы уломы-выломы? - Ёрмеменым верасько ни, - лулскиз комбайнер. - Жаткамес тупатъяны гинэ но кулэ ёзъёс шедьтыны ум быгатӥське. Куштӥськем кортъёс пӧлтӥ утчаськыса, воксё нерад луиськиз ни. - Та нуналъёсы колхозысь кӧня ке ошпиосты вузаны кенешим. Одно ик воштос ёзъёс басьтом. Сотэк кызьы араны потод? Улэп коньдон шедьтыны луонлыкмы ичи уго, Миша агай. Алигес нюлэс вузаса поттэм коньдонмес но налоговой инспекция сьӧраз нуыса кошкиз. Лыдтэм тыронъёсмы люкаськемын ни уго. Асьмеос котькинлы пунэмо, нош нокин уксё тырыны уг малпа. Асьмеос но янгышесь: кулэ ёзъёсты, эстӥськон-вӧез, электрокужымез но мар ӝикыт, шыръяса кутыны ум йӧндыриське. Олег арлыдоослэн вераськоназы уг пыриськы. Жатка вылэ интыяськиз но чус кылзӥськыса пуке. - Владимир Германович, - малы ке пальпотыса вазиськиз Пачан Миша. - Туала вакыт но рационализаторъёслы премия висъяло-а? - Оло, кыӵе ке пайдаё, тунсыко ӵектонэд кылдӥз, Потапов? - воргорон шоры сӥсъяса ик учкиз инженер. - Мынам соос тырмыт. Синъёсме кыньыны уг быгатӥськы бере, уйбыт малпаськыса кыллисько. - Нош малы уд кӧлӥськы? Оло, висиськод? - Трос тамак кыскись муртлэн кызыса кӧлэмез уг лу, Владимир Германович. Мон но сыӵе ик категориысь. Но изьылымтэе чылкак пайдатэм ӧвӧл. Тани бускельёсмылэн сад-бакчаязы ӵемысь улмо лушканы кожало, нош милесьтымзэ чик исась ӧвӧл. Кызэм куараме кылыса, уг кӧл на та шайтан шуыса малпало, лэся. Воргоронъёс, ог-огзы шоры учкыса, шулдырак серектӥзы. Апасов но мыньпотытэк ӧз чида. - Ну, вера, кыӵе рационализаторской ӵектонэд кылдӥз? - тунсыкъяське Шаров. - Колхозмылы табыш-барыш сётымон ке, премия ласянь уг обидьы. Оскытыса верасько. - Тани жаткаосмылы вандӥсь агрегатъёс - пуртъёс - шедьтыны гинэ но шугъяськоно. Озьы-а? - Ну, шонер. Шуисько ук: сельхозтехникаен вераськемын ни, коньдон ке луиз, басьтом. - Ӧвӧл, ӧвӧл, мон дунтэмгес ӵектӥсько. Ужазинлыкмы но ӝутскысал, дыр. - Мадь ни, мадь, Потапов. Ма-ось сюлэмез гочатӥськод? - Асьмелэн гуртамы арлыдоос трос. Куд-ог егитъёс но ужлы ёрмыса калтырто. Вот сыӵеосты мон жатка вылэ интыяны малпасько. Киосазы сюрло сётоно, конешно. Секыт уж ӧвӧл: нунал ӵоже комбайнэн мед ворттылозы. Уз жаде, пыдын вамышъяно ӧвӧл ук. Со понна кӧня ю-нянь араськоз! Пайдаё ӵектон, озьы-а, Владимир Германович? - пальпотӥз Пачан Миша. - Да-а, усто кылбураськод, - воргоронлэсь капчиен "кутчамзэ" валаса, инженер йыртышсэ кормыштӥз. Кошкыны вырыса вазиз на: - Тон та ӵектондэ Игорь Абакумовлы ысты, Миша агай. Эсьмаса, нимдэ-тулдэ быдэс Россей музъеме данъялоз. - Кинлы, кинлы? - "Крестьянские ведомости" телепередачаез нуисьлы. - О-о, мон отчы ыстон вылысь кемалась гожтэт ӵабъяй ни вал. Конверт басьтыны коньдонлы ёрмыса пукисько. Куинь манеттэ пунэмен уд сёт-а, Владимир Германович? Рацпредложениелы премия басьтӥ ке, ӝегатскытэк берыкто. - Кияд буш пуйы кут но мастерской котыртӥ ортчы, Миша агай. Котыр буш полуштопъёс лошъясько. Эсьмаса, дасо конверт басьтыны окмоз. - Тау ӟеч ӵектонэдлы, начальник, - Шаровлэн бӧрсяз учкыса пальыша Пачан Миша. Пыд азяз куштэм усьтонъёсты кутэ но юрттӥсез шоры учкыса тунсыкъяське: - Маке укыр мӧзмылэс тон, Олег. Тани мон инженерен кыл йылме шери но быдэс нуналлы тырмымон положительной заряд басьтӥ. Мылкыды бурдъяськиз, сюлэмы шара серекъя. - Умой тыныд, Миша агай, - жатка вылысь султӥз Олег. - Уж дурын но кибашлы, дорад но ваньмыз ӟеч. Нош мынам чик но сереме уг поты. Клубын кинокомедия учкыку но пальпотэмысь дугдӥ. Берпумзэ ку шудо серекъяй - вунэтӥ ни. - Да-а, секыт тыныд, пие, тодӥсько, - соглаш кариськиз Потапов. - Серекъян - со адскисьтэм кужым. Но сыӵе дыръя пальпотыны но секыт. Серекты вылэм - ымдуръёс гинэ пинь висьыку кадь кырыжмо. Анай-сюратаед али но юо шат? - меӵак юаз воргорон. - Анай толон уж дураз ветлӥз ни. Нош Герман ӟамыръя на, лэся. - Жаль пото соос мыным, Олег. Аракы юись мурт - визьзэ, узырлыксэ, шумпотонзэ но яратонзэ ыштэм адями. Тодад возь та верамме. Утиськы со сьӧд адӟонлэсь. Мон Коляелы но ӵемысь верасько: "Быдэ вуэм берад тамак ке ӵындӥд, сокем уг куареты. Малы ке шуоно, ас тазалыкедлы гинэ урод лэсьтод. Нош аракы ке юид, ӟеч кылъёсме эн возьма. Юись мурт, аслыз сяна, вӧзысьтыз трос адямиослы куректон-кайгу кузьманы быгатэ. Олег пумитаз номыр ӧз вазьы. Пачан Мишалэн зэмлык кылъёсыз вӧзы уго номыр ватсаны. 5 Пекарняысь кырӟан нёжъяса бертӥсь Олег суйпосысьтыз чассэ учкиз но чырмытгес вамыштӥз. - Рекс, ӝоггес! - турын пӧлын шыръёсты утчаса бызьылӥсь пуныезлы вазиз со. Угось фермае кожанэз вань на. Толон куазь зоремен бусые ӧз ветлэ но, фермаен кивалтӥсьсы Мартын Илля сое ошпиосты мертанын юрттӥськыны ӧтиз вал. Уждундэ, пе, йӧлын сёто. Тӥни со йӧллы пырано. "Ой, шумпотозы ни Иринаен Санька", - мыньпотэ Урак Олег вын-сузэрезлэсь кӧттыр серектэмзэс син азяз пуктыса. Ватонэз ӧвӧл, уж дуре ветлыкуз анайзы но банкаен йӧл вуттылэ. Лушкаса. Сыӵе дыръя Олег со йӧлэз ӵоксузьыса сие-юэ. Ӟеч тодэ уго: капыртэмын со, ӵош ужась эшъёсызлэсь, Мартын Иллялэсь лушкем ваемын. Скал кыскисьёс сыӵеосты уг гажало, керетон ӝуто. Йӧлзы уго огазе люкаське, уждун но со вылысь тыриське. Лушкам йӧллэн берекетэз но, кӧттырез но ӧвӧл кадь потэ Олеглы. Но ӝӧк вылэ вуэ ке, сиытэк амалыз ӧвӧл. Озьы ке но, ӵемысь укное учкылэ: нокин уг пыр-а, уз тодэ-а, йӧлзы лушкамын шуыса?.. Шунды вылӥе ӝутскемъя инкуазьын воштӥськонъёс син азьын ик ортчо. Уй зор шапыкъёс тӧлӟыны вутскиллям ни, сяськаяськись клевер вадьсын мушъёс, майсыос бызгето. Зор бере бурдоос но кужмогес, шулдыргес жингырало кадь. Ваёбыжъёс улӥетӥ шир-р гинэ лобышъяло. "Таӵе куазен чибиньёс уллань, пе, лэзисько, - кытысь ке лыдӟемзэ тодаз ваиз Апасов. - Соин ик бурдоослы кӧттыр шедьтыны улӥын каньылгес". Йыр вадьсытӥз ширтӥсь огез ваёбыж чияк! шултӥз. Оло аслэсьтыз куаразэ озьы возьматӥз, оло улон азинскемлы шумпотэмзэ шараяз. Олеглэн тодаз усиз алигес адӟем уйвӧтэз. Мылкыдыз соку ик пильмаськиз. Ма, со кӧшкемыт суред али но син азьысьтыз уг тӧлӟы, мылкыдзэ, лулпушсэ пӧсьтурынаса возе, сюлэмзэ шымыртэ. ...Ульчаысь кор вылын пукись пиос вӧзтӥ солань-талань чырткем лобало кык ваёбыжъёс. Векчи чибиньёсты-а кутыло, чебер куазьлы-а сокем куанэмын. - Милям ваёбыжъёсмы та, - данъяськымон мылкыдын вазиз Урак Олег. - Ай туэ нырысьсэ корка карниз уламы кар лэсьтӥзы. - Э-э, шедьтэмед маин ушъяськыны! - эшсэ уретӥз Пачан Коля. - Малы кулэ соос? Коркаез гинэ саптаса возё. Уӵы кадь крезьгурась бурдоос каръёссэс писпу вайёсы интыяло. Нош йӧнтэм ваёбыжъёс юртъере мерско. - Кылем аре милям куалаямы но каръяськыны ӧдъяллям вал. Мон соку ик туздырыса лэзи, - вераськонэ Тюкан Валентин итӥськиз. - Карзэс кык пол кутскыса таркай. Ӧз чидалэ ни - кӧчизы. - Нош малы со востэм бурдоосты исанэз? - пайме Олег. - Юртъермес кельшытӥллям ке, мед каръяськозы, семьязэс мед йылэтозы. - Э-э, озьы эн шу, Олег, - интыысьтыз ик султӥз Пачан Коля. - Уть ай, липет азьды быдэсак кыедамын ни. Кельышлы адске, оло? Олег огшап отчы учкыса улӥз, собере лулскиз: - Зэмзэ борддорез сапталлям. - Карзэс таркано, - ӵектӥз Тюкан Валентин. - Уг, уг яра, - пумитъяське на Урак Олег. - Ай липет йылэ тубыны курдаськод, луоз. - Кышкась! Трус! - Я, возьматы ай чупрес луэмдэ. - Тон нылмурт кадь, Олег. Котьмае, котькинэ жаляськод. Эшъёсызлэн серем пыр верамъёссы пияшлэсь мылкыдзэ бугырто. Соос азьын ассэ лябен, кышкасен возьматэмез уг поты. Соин ик дӥсьтыса но дӥсьтытэк гид беразы урдэм пагӟаетӥ липет йылазы ӝутскиз но ваёбыж кар пала вамыштӥз. Чиль-сьӧд бурдоос чир-р! кесяськыса, эшъёссэс юрттыны ӧтьыса, лэся, пияшлэн йыр вадьсаз поръяны ӧдъязы. Нош Апасов, липет пуме вутскыса, векчи, кузь боды йылын ваёбыж карез сузмытэ ни. Музъем вылэ дэрилэсь но турынлэсь лякылыса-няняса лэсьтэм кар юдэсъёс усьыло. Жильк! пилисько алигес кельтэм пузъёссы. Улӥысен учкыса сылӥсь пиос шумпотэмзэс ватытэк кесясько, шулало, Олеглэсь йӧнтэм ужзэ ушъяло: - От молодец, Олег! - Быгатӥд! Озьы ик кулэ вал! - Тон зэмос воргорон! - Курдась вылымтэед! Тонэн эшъяськыны луоно. Агаезлэсь пырултэм дауртэмзэ адӟыса, Ира сузэрез синвуаськыса сылэ. Нылаш ваёбыжъёсты сюлмысь жаля, нош номыр карыны, нокызьы юрттыны уг быгаты ни. - Мон ваньзэ анай-атайлы верало. Онись кенаклы но али ик мадё, - викышъяса бускелязы бызе нылаш. - Чагыльчи! Милемын бӧрысь уд шуд ни, - бӧрсяз кесясько пиос. Ваёбыжъёс юрт вадьсын бер ӝытозь ӝожаса бергазы на. Ӵуказеяз ӧз адске ни, мукет юртэ кар лэсьтыны басьтӥськизы, луоз. Олеглэн мылкыдыз нош пилиськем пузъёслы укшаны кутскиз. Кык люкетлы висъяськиз. Эшъёсызлэн кышкасьтэм шуэменызы данъяське ке, огӵош ваёыжъёсты жалян мылкыдыз но пуромылэ. Нош ма карод на? Йӧнтэм ужез лэсьтыны котьку капчи ук. Визь но кулэ ӧвӧл. Та йыртэмамез понна анаез лек куаретӥз. Нош Онись кенакез шуиз: "Ваёбыжъёс - шуд ваись бурдоос, пие. Нош соослэсь карзэс таркаськод ке, юрт вӧзы сьӧд адӟон лэзьке, шуо. Озьы, пе, сьӧлыктэм бурдоослэн каргаськем-юриськемзы адямиос вылэ усе". Со аре ик колхоз фермаысь фураж лушкамез понна пытсэт сьӧры шедиз Ириналэн атаез - Кузьма. Нош анайзы курыт вуосын чаркаос пыдсы "зумылыны" кутскиз. Таркам ваёбыж кар пумысен Олег али но ӧпкеле. Вань секыт адӟонъёс отысь потӥзы кадь йӧтэ солы. ...Ферма сюресэтӥ тыро сумкаен бертӥсь агайзэ адӟыса, Санька пумитаз бызиз. Палэнысен учкыса, пыдъёсыз ик музъем борды уг йӧтыло кадь. - Сайкад ни шат, тэшкылие? - пальпотыса вынызлэсь ӵыж-горд йырсизэ маялтӥз Олег. - Укыр вазь сайкаськод, соин ик уд будӥськы, лэся, тон, Санёк. Воксё таӵе мугоро ке кылид, Кутор гуртамы нырысез лилипут луод тон. - Малы монэ мыскыл кариськод, агай? - нырзэ ик кисыртӥз Санька. - Тодӥськод-а, нунал ӵоже кӧня кешыр сиисько? О-о! Нош будӥсь адямилы отын кулэ витаминъёс туж трос, пе. Огаз урокын дышетӥсьмы Светлана Егоровна озьы валэктӥз. - Зэм верам Светлана Егоровнаед. Только трос кешыр сиыса, кечпилы медад пӧрмы вылэм. Шӧдытэк-валатэк ик кылёд: пельёсыд кузёмозы, тани татчыяд вакчи быж кылдоз, - берпалаз киыныз йӧтскыса, куараен серектӥз Олег. - Тыро сумкаен бертыкуд котьку шулдыр мылкыдо луиськод, агай, - вазиз Санька. Нош ик пекарняе пу пильылыны ветлӥд-а? - Отчы. Фермаысь йӧл но басьтӥ. - Лушкад, оло? - ульчаез ӝогак синйылтыса, лушкем юаз Санька. - Ӧй, ӧй лушка. Ошпиосты мертаны юрттэме понна Мартын Иллягай сётӥз. Уждун интые. Выльысь лыктыны ӵектӥз ай. - Усто-о! - Нош тыныд мон, тэшкылие, огзэ верало: кыӵе ке чебер арберилы синмаськыса, сое капыртон, емышъёс понна, мурт сад-бакчаосы пыран сямъёсыд медаз луэ. Чик жалятэк "пушнер ӝукен" сюдо. Лушкаськись адями ас данзэ ачиз выж лёгетлы пӧрмытэ. Тани мон гуртоосмылэсь ӟечен ке курисько, ваньзы юрттыны дасесь. Ачид ке ӟеч, котькуд адями ӟеч кариське. - Э-э, алдаськод тон, агай. Нош анай фермаысь йӧл лушкаса вае ке но, сое асьмеос гажаськом ук. Йӧлзэ но шумпотыса сииськом. Олег вынызлэн кылъёсызлэсь могӟиз, ымнырыз ӵыж-горд луиз. Пыдъёсыз ик либыразы кадь. Йыр йылаз дуринчи бызгетыны ӧдъяз, оло: "Кызьы тае пичи экелы валэктоно? Эшшо ке эшъёсызлы супыльтоз ай. Анаймес, юись гинэ ӧвӧл, лушкаськись шуыны кутскозы". - Санёк, - Олеглэн куараез мырдэм потӥз. - Анаймы ёрмем лулыныз лушкаське. Ӧвӧл, ӧвӧл, уг лушка со, - воксё сураськиз Апасов. - Эшъёсызлы вераса, Мартын Иллягайлэсь гинэ лушкемен басьтылэ. Дун тырыны немаин ук. Нош котькуд нунал сиеммы потэ. Огзэ гинэ вала, - анаез вылысь мукет адями вылэ выжыса валэктоно кариськиз Олег. - Тани Ириналэн атаез фермаысь фураж лушказ но пытсэт сьӧры шедиз. А ведь ужась воргорон вал, но ӵемтыны шедьтӥз. - Пичи пиналъёсты но тюрьмае пытсало-а, агай? - Пытсало. Сыӵеос понна нимаз колониос кылдытэмын. - Кышкыт, дыр, отын, агай. Озьы-а? - Конешно, Санёк. Отчы шедьыны нокинлы медаз кылды вылэм. Ай мон детдоме келямзылэсь но курдасько. Котьма ке но, лушкаськон сямдэ медам шӧды-тоды, Санька. Верасько ук: ӟечен ке курид, котькин юрттэт кизэ мычоз. - Мон ог ннуалэ Чазан Зиналэсь модосаз кисьмам помидорзэ синйылтӥ вал. Кури но, мыным лекак вазиз. Асьтэос, пе, будэтыса сие. - Зэм, адямиос но пӧртэм сямоесь, Санька. Киосамы чиньыосмы но пӧртэмесь ук. Озьы ке но, ӟеч сюлэмо адямиосын асьме Кутор гуртмы узыр. Зина апайлы но йыркурдэ возёнэз ӧвӧл. Шонер верам. Асьмелэн но бакчамы вань ук, гуртын улӥськом. Мерттӥськем вылэ ву киськаны, жаг турынэз дыраз урыны кулэ. Тани туннэлы мон тӥлед ужпум пуктӥсько: Ирина мед уриськоз, нош тон картофка вылысь колорад бӧчыосты окты. - Акыльтӥзы ни соос мыным, агай. - Озьы эн вераськы, Санька. Картофкамы ке ӧз удалты, ма сиёмы толалтэ? Со асьмелэн сӥльмы но, няньмы но. - Мон эшъёсын чорыганы ветлыны кенеши вал. - Ветлод. Нош нырысь мынэсьтым косэмме быдэсты. - Яралоз, яралоз, - соглаш кариськиз соиз. Санька лапег, чиед мугоро пияш. Шундылэн сиосыз но шуныт зор тырмыт йӧтымтэ будос выллем адске. Бам вылаз юри шунды пырыос киземын кожалод. Пияш нодлыко будэ. Дышетӥсьёс я мӧйыос вынзэ ушъяса поттылыку Олег шумпотэ. Таяз сӥзьыл куинетӥ классэ мыноз ни. ...Азбаразы пырыса, Олег отчы-татчы утчаськиз. Вынызлэсь шыпытак юаз: - Анаен сюратай кытын? - Анай уж дураз кошкиз кадь. Вылаз лыз халасэт дӥсям вал. Нош атай... - Санька огшаплы могӟиз но синъёссэ ошиз. - Курегмес пуйые поныса, шур пала кошкиз. - Пекла доры "буль-булен" воштыны мынӥз, луоз, биран!* Пуны лул ик вань та Герман. Колхозын ужамез уг поты, юртъерысь мае нуон, кинлы вузан сярысь гинэ малпаськыса улэ. - Агай, нош мар со "буль-буль"? - Мӧйыос мусурез, кудӟытӥсь юонэз озьы нимало. - А-а-а... Бакчае пырыса, вышкыысь вуэн киоссэ миськонъяз, Санька ӝожмыт куараен юаз: - Агай, нош тон малы мынэсьтым атайме адӟемпотостэм кариськод? Со мыным куддыръя конфетъёс но сётэ, йырме но маялля. - Шуг валэктыны, Санёк. Юэ ук атаед. Мукет воргоронъёс сямен ке тыршысал, йӧн ке улысал, мон сое гажасал, вылды. Ас атаелэсь сямен визь-кенешъёс курысал, пиосмурт ужпӧръёслы дышетыны сюлворысал. Олег бакчаысьтызы ӝӧк вылэ сумкаысьтыз сиён-юонъёссэ поттылӥз. Пумен тунсыкъяськиз: - Маке апаед уг адскы. Анаен ӵош кошкизы, оло? - Ӧвӧл. Онись кенак висьыны усем. Солэсь скалзэ кыскиз но возь вылэ келяса кошкиз, - кружкае шуныт йӧл лэзьыса, нянь шоремзэ бадӟымос куртчонъяз валэктӥз Санька. - Мон мастерское дыртӥсько, - суйпосысьтыз чассэ синйылтӥз Олег. Бакча ӧсэз усьтонъяз вынызлы ӵектӥз на: - Нянез, йӧлэз сутэрпу улэ ват. Атаед бертыса сютэм кион музэн тыкоз, анаен Ириналы уз кельты. Валад-а, Санька? - Валай. Нырысьсэ шат? - вазиз Санька. - Ӧд ке вунэты - умой. Э, чылкак вунэтӥсько вылэм. Кунояськы - сумка пыдсын ирис конфетъёс вань. Анна кенаклэн саламез. - Нянь пыжисьлэн-а? - О-о. 6 Апасов мастерской доры вуыку комбайнзы гуретыса сылэ ни вал. Котыраз кияз усьтонэн Пачан Миша берга. Олег со доры дыртӥз. - Ӟечбур, Миша агай. Вождэ эн вай, ӧжыт ӝеганы шедьтӥ. - Ӵапак дыраз вуид, Олег, - лачмытак вазиз воргорон. - Лысву тӧлӟытэк бусые ум потэ ай. Со дырозь луд корабльмес чаклалом-эскером, куд-ог ёзъёссэ салидолэн кӧятэк-вӧятэк уз лу. - Озьы ке, ярам. Мон шприце салидол тыро, - пияш чырткемак кабина пала вамыштӥз. - Сыл ай, сыл. Киостэ саптаны эн дырты. Тонэ гуртмылэн тӧроез утча вал. Лыктӥз ке, пе, монэ мед шедьтоз. Маке вераськон-кенешонэз вань, лэся. - Нош ик детдом сярысь кылпум ӝутоз ни, - пӧсекъяса вазиз Олег. - Ох, акыльтӥз ни со мыным!.. - Я, я, эн пӧсекъя, пие. Пётр Васильевич улонэз валась адями. Чик пӧсекъятэк вераськы. Лачмытэн, сабырен мытэм кенешлэн пайдаез котьку кык полэс луэ, - егит эшсэ визьноданы ӧз вунэты Пачан Миша. Со вакыт Апасов гараж капкаетӥ потӥсь Николаевез адӟиз но пумитаз вамыштӥз. - Ӟечбуресь, Пётр Васильевич. Малы ке монэ утчасьбкоды шуыса ивортӥзы. - Ойдо ай пуксён вылэ интыяськом, - гурт администрацилэн тӧроез артэ будӥсь кызьпулэн саюлаз вамыштӥз. - Тонэн ваче син вераськон-кенешон муг шедиз. - Мон вератэк но тодӥсько ма сярысь вераськонмес, Пётр Васильевич, - Апасов мылпотытэк сьӧраз вамыштӥз. Николаев скамья вылысь тузонэз киыныз маялтӥз-ӵушалтӥз но отчы пуксиз, собере пӧсь куазь шоры учкытэк, керттэм чибориё галстуксэ лябӟытӥз, ныр йылысьтыз очкизэ чиньы йылыныз шонертӥз. - Комбайнэн ужаськод, лэся, Олег. Кельше-а? - Мылкыдъям, Пётр Васильевич. Толон Миша агай штурвал сьӧраз но пуксьыны лэзиз ни, - пальпотыса ивортӥз Олег. - Сузэред нош колхоз уже уг пота на, дыр? Кӧня классэз йылпумъяз ни со? - Таяз куарусёнэ сизьыметӥ классэ мыноз. Нош колхоз уже ветлэ ни. Санькаен соос чукиндэр бусыысь участокамы ветло. Жаг турынъёссэ уро, шерато. Зор нуналъёсы ачим но доразы юрттӥськыны ветлӥсько. - Анаед уг ветлы шат? Нуназе, скалъёс возь вылын дыръя, солэн но луонлыкез вань ук. - Фермаысь ужъёс ӝегато сое, Пётр Васильевич. Ӧжытак сазьме ке, вань быдэстоно ужъёсты адӟе-синйылтэ. Нош соос фермаын ӧжыт ӧвӧл. Укноосты но миськоно, сиён тусьёсты но чылкытатоно, кунян возён клеткаосты но тӧдь буяно... - Ужез гажаса будӥськоды тӥ, Олег, - нош ик чиньы йылыныз очкизэ тупатӥз Николаев. - Ай бригадирен кенешыса сылӥм. Со но тӥ сярысь ушъян кылъёс гинэ вера. Гуртлэн тӧроез портсигарысьтыз сигарет поттыса аратӥз но лулскиз: - Жалясько мон тӥледыз, нункаосы. Юись анай-атаеныды сэрен вордскем гурттылэсь, эшъёстылэсь люкиськыны кылдоз. - Детдоме келяны турттӥськоды-а, Пётр Васильевич? - Апасовлэн куараез ик дыректӥз. - Кызьы но малы ми чырты выжыяды чорыг лы кадь кугӟамы? - бӧрдоно куараен кеськиз Олег. - Ма, келяды ке, тросэз шумпотозы, тӥляд но сюлмаськонъёсты кулэсмозы. Нош огзэ тодэ: дунне пыдсы нуизы ке но, мон пегӟо. Сӧсырмем бурдо гинэ но берпум кужымзэ люкаса ас вордскем дораз дыртэ. Мон но озьы ик лэсьто. Сьӧрысьтым Ираез но, Санькаез но уг кельты. - Малы гуртысь тӥледыз келяно луиськом - сое тон ачид но ӟеч валаськод, Олег, - сигарет пумзэ Николаев зор ву люкаськем гопе сэрпалтӥз. - Анайдэс кужмысь эмъяськыны ке ыстӥм, тӥледыз нокин аслыз йыр висён уз кар, нокинлэн бордаз 1: басьтэмез уз поты. Нокинлэн но. Тани ӵуказе сельсоветын быдэ вуымтэосын ужанъя 1: комиссилэн кенешез люкаськоз. Атняысь но лыктозы. Ваньмыз сярысь валче 1: люкаськыса вераськытэк амалмы ӧвӧл. Нош тӥледыз дышетскон ар кутскытозь детдоме 1: интыятэк уз лу. Анаед та нуналъёсы уже ветлэ-а? - скамья вылысь султонъяз 1: тунсыкъяськиз Николаев. 1: - Таяз арня вылтӥ кык нунал гинэ юиз. 1: - Нош Герман? 1: - Соиз воксё ашкынэмын, Пётр Васильевич. Туннэ нош ик, курегмес пуйые поныса, 1: юон утчаны кошкем. Вань арберимес аракыен вошъя ни, алкаш. 1: - Ой, уг визьмаськы та Герман. Али гинэ колхозысь сӥль лушказ, нунал пӧрат 1: кудӟыса ульча кузя шонаське. Сыӵеослы сюрес одӥг - пытсэт сьӧры. Эх, улон! Кинлы 1: шумпотон, кинлы куректон... 1: Гуртлэн тӧроез Апасов доры матэктӥз но, кизэ Олеглэн пельпумаз поныса, лачмытак 1: вазиз: 1: - Мынам тӥледыз гуртысь келяме уг поты, Олег. Янгыш малпаськод. Али колхоз 1: председателен но та югдурысь кызьы потон сярысь малпаськыса пуким. Зэм, школалэн 1: директорез мукет сямен учке. Пиналъёс, пе, юись семьяосын кырыж сюрес вылэ 1: султо. Детдомын, пе, умойгес луысал. Отын эскерисьёс, чакласьёс тырмыт, шуэ. 1: - Тодӥсько, Семён Григорьевич котьку со гурез нёжъя. Ас пельпум вылаз ныпъет 1: ӝутэмез уг поты. Милемын маке луоно ке, кыл кутонлэсь кышка. 1: - Ӵуказе сельсоветэ анайдэ но, сюратайдэ но ӧтчалом. Тон но лыкты, Олег. Огазе 1: люкаськыса, оло, маке йӧнзэ малпаны шедьтом. 1: - Яралоз, одно ик вуыло. Миша агай уж дурысьтым ӝамдэлы лэзёз, дыр... 1: Детдоме келянзылэсь кышкаса ке но улӥз, Олег ӧз малпалля, та пумысь вераськон 1: такем ӝог, тазьы шуак-дуак пуромоз шуыса. 1: * * * 1: Гурт пала йырзэ ошыса вамышъянъяз Олеглэн йырвизьмаз югак инвис усьтӥськиз кадь: 1: "Фаина Николаевнаен кенешоно". 1: Гурт пумысь писпуос пӧлы ватскем юртлэн капкаез вӧзы вуыса, Апасов 1: электрогырлылэсь кнопказэ нюртӥз. Кема ӝегатскытэк, азбарын пыд куара кылӥськиз 1: но, капка ӧс вӧлак усьтӥськиз. 1: - О-о, Олег дорамы сюрес шедьтэм ук, - пальпотӥз Чучалина. - Пыр, пыр. Ойдо, 1: корка пыром, - Олегез азьпалаз лэзьыса, дышетӥсь капказэ пытсаз. 1: Фаина Николаевна Чучалина арлыдо ке но, егит адске на. Ымныраз кисыриосыз но 1: ӧвӧл ай, йырсиез но чиль-сьӧд возиське. Кышномуртлэн сайкыт синъёсыз котьку 1: шумпотон кузьмаса тылсияло кадь. Чебер сяськаё басма дэремез кельышлы адӟиське, 1: небыт катаосыз куара ик уг сёто, коӵыш музэн шыпыт, капчи лёгаське. 1: Ӵук куноезлы пуксьыны ӵектыса, классылэн кивалтӥсез ӝӧк котыраз берганы кутскиз 1: - сиськонни палысьтызы алигес пыжем пирожкиос, кофе ваиз. 1: - Ӝӧк сьӧры пуксьы, Олег. Кофе быректӥ тани, пирожкиен юом. 1: - Тау, Фаина Николаевна. Сиськыса, кунояськыса уг пукы. Мынам тӥледын кенешонэ 1: вань. Соин ик дорады кожано кариськи. 1: - Вера, мадь, Олег. Кыӵе юанэд кылдӥз? - пукон вайыса, вӧзаз интыяськиз 1: Чучалина. 1: - Милемды детдоме келян сярысь кылпум ӝуто, Фаина Николаевна. Гуртлэн тӧроез 1: озьы шуиз. Тӥ мыным ӟеч характеристика гожтӥды шуыса верады вал. Ӧвӧл лыдӟиллям- 1: а, мар-а. 1: - Мон та йыр поромымон иворез кылӥ. Семён Григорьевич жингыртӥз. Со дырысен 1: уйжомыса кадь ветлӥсько. Нош быдэ вуымтэосын ужан комиссие тон сярысь мон зэмен 1: ик ушъян кылъёс гинэ гожтыса сётӥ. Тынад дышетсконын тыршемед, ужаны чырмыт 1: луэмед но художественной самодеятельносте пыриськемед сярысь гуртамы котькудӥз 1: тодэ ук. Кызьы-о тонэ курланы? Маке уродзэ вераны ым уз усьтӥськы. 1: - Анаймес мед кельтозы вылэм, Фаина Николаевна. Сюратайме уг жаляськы - кемыз. 1: Оло, визьмаськыса берытскоз. 1: - Йырдэ сокем улӥе эн ош, Олег. Жалясько мон Нина Семёновнаез. Сьӧд адӟон - 1: атаедлэн быремез - сыӵе куасалтӥз сое. Жаль. 1: - Мукетъёс секытлы уг сётско ук, Фаина Николаевна, - ӝотак вазиз Апасов. - 1: Сюратай сое паллянэ валтэ, сюратай. Эх, суй быгытъёсы лябесьгес на. Визьмасал 1: мон сое! 1: - Мыдланес вераськиськод, Олег. Олома эн даурты. Леклы лек лэсьтыса йӧнзэ уд 1: адӟы. Сабырлыкез валаны кулэ. Ӵуказе сельсоветын кенешом ай. Трос визьмын 1: малпаськем, ӵош кенешем котьку пайдаёгес луэ. 1: - Фаина Николаевна, тӥ мыным коньдонэн юрттыны уд быгатэ-а? 1: - Кӧня кулэ, Олег? Малы? - ӝогак интыысьтыз султӥз Чучалина. 1: - Ог вить сю манет. 1: - Кӧня-а?! 1: - Ог вить сю манет тырмысал, кожасько. Анайме Ижкаре дун тырыса эмъяны нуллысал. 1: Одӥг нуналскын, пе, аракы юон черлэсь эмъяны йӧндыро. 1: - Туж шумпотыса юрттысал, Олег, - ӝожмыт вазиз кышномурт. - Но... сыӵе луонлыке 1: ӧвӧл. Ачид тодӥськод, милемлы но уждунмес дыраз уг тыро ни. Дугды ай, дугды. 1: Оло, парсьме вандыса вузаме бере юрттыны багто. 1: - Валасько, - интыысьтыз султыса, Апасов ӧс пала вамыштӥз. - Пыраме понна вождэс 1: эн вае, Фаина Николаевна. 1: - Ачид йыркуръяськыса эн кошкы, Олег. Ог-кык арняскын базаре ветлыса сӥльмес 1: вузаломы, дыр. Коньдонмы луиз ке, соку ик ивор сёто. Уг алда, Олег, оскытыса 1: верасько. 1: Апасов ӧсэз шыпытак ворсаса потӥз. Дышетӥсезлэн буйгатэмез ӟечлык пала 1: воштӥськонлы оскон кузьмаз. "Но... кема витёно ук. Со дырозь милемды детдоме 1: келяса медаз вуттэ вылэм", - сюлэмшуго малпаське со ульча кузя вамышъянъяз. Нош 1: кӧтӝождэ, кайгудэ котькуд адями вӧзы дугдыса уд шарая. Соин ик пиньёстэ вир 1: потымон куртчыса чидатскытэк ӧвӧл. 1: 7 1: Капкаетӥ пырись агайзэ адӟыса, миськем дӥсьёсты гозы вылэ ошылӥсь Ирина чылкак 1: паймиз. 1: - Уже ӧд ветлы шат, агай? Санька тонэ мастерское кошкиз шуиз вал ук. 1: - Берытскытэк ӧз лу, Ирина. Асьме вадьсы нош ик кышкыт пилемъёс бугыръяськыны 1: кутско кадь. 1: - Ма сярысь тон? - ужзэ ик вунэтӥз нылаш. - Анаен шат маке урод луиз? Яке... 1: сюратай? 1: Пилемтэм куазен гудыртэм кадь кӧшкемыт иворез Олег сузэрезлы ватытэк мадиз. 1: Ульчаысь берытскем Санькалы но мазэ-созэ валэктытэк ӧйлась. 1: Нылмурт бере нылмурт ни - Ирина соку ик синвуаськиз. Солэсь бӧрдэмзэ адӟыса, 1: Санька но нырзэ кысканы ӧдъяз. Соку Олег юнак кариськиз: "Юскиськоно ӧвӧл!" Со 1: минутысен ик командир кадь луиз. Иринаен Санькалы шуиз: 1: - Вот ма! Татчы, оло, нош ик комиссия лыктоз. Соин ик корка пуш чылк-чылк 1: утялтэмын, укноосты усьтыса, чылкыт омырен тӧлатэмын медло. Одӥг уй-нуналлы ке 1: но мед тӧлӟозы тамак ӵынлэн, курыт аракылэн, брагалэн йырпоромытӥсь зынзы... 1: Та уе Герман доразы кӧлыны но ӧз берты. Сельсоветэ ӧтёнзы сярысь кин ке ивортыны 1: вутскем, лэся. 1: Анайзы ӵукна фермае кошкем бере Олег вын-сузэрзэ сайкатӥз. Быдэстоно ужъёсты но 1: выльысь вераз. 1: Корка но корказь выжъёсты Ирина ӝоген чылк-чылк миськиз. Ӝӧк вылэз, валесъёсты 1: утялтӥз. Санька но азбарзэс, капка азьзэс йӧн-йӧн ӵужыны тыршиз: агаез медаз 1: куареты. 1: Олеглэн аслаз но сюлмаськонъёсыз тырмыт вал: пекарняе ветлыса, нянь вуттӥз, 1: кутэм чорыгзэс пырсатӥз, сюратайзылэсь лушкемен люкам курег пузъёслэсь пуштэм 1: дасяз, Онись кенаксы пунэмен сакыр песок ваиз. 1: Комиссиысь адямиос Апасовъёслэн юртазы пыраку, мӧйыос доразы ӧз ке но кемдэ, 1: возьытэ усьымон ӧз луы. Ӝӧк вылзы куноосты пумитаны кадь дасямын. Лыктэмъёс, 1: оло, шӧдӥзы но юри дасяськемзэс, угось одӥг сиён но веръяса утчамын ӧй вал на. 1: Сӥямын ке но, исамтэ, пуньыен йӧтскылымтэ. 1: Гуртысьтызы фельдшер - нылкышноослэн комитетсылэн тӧроез Якушева тунсыкъяськиз: 1: - Котьку-а кӧттыр улӥськоды, пиналъёс? Няньлы ёрмон дыръёсты уг-а луыло? 1: - Кӧттыр, кӧттыр, - вын-сузэрзэ азьпалтыны турттыса вазиз Олег. - Гурт кузя 1: сиён-юон лушкаса я кураськыса ум ветлӥське. Уд ке оскиське, ӝӧк вылмес синйылтэ. 1: - Кемалась-а ни конфет, печенье веръямед, пие? - Санька вӧзы мыкырскиз быдэ 1: вуымтэосын ужась инспектор Ольга Билитюк. - Яке шӧмзэс но вунэтӥд-а ни, мискине? 1: - Ай толон гинэ ирис сии, - пулемёт кадь тычыртӥз Санька. - Онись кенак но одӥг 1: пачка вафлиен шумпоттӥз. 1: Комиссилэн ужаз пыриськисьёс Апасовъёс дорын кема ӧз ӝегалэ. Сак синъёсынызы 1: улэм-вылэмзэс эскерыса, куспазы маке шыпыртыса, ульчае потӥзы. Вожалэс машинае 1: интыяськыкузы Николаев Олеглэн тодаз уськытӥз: 1: - Нуназеям бере сельсоветэ лыктэ, Олег. Анаед, сюратаед но мед лыктозы. 1: - Яралоз, Пётр Васильевич. Дыраз вуыны тыршом, - оскытыса вераз Олег. 1: Урак Олег корказ берытскыку ӝӧк сьӧразы "юондыр" кутскемын ни вал. Санькалэн 1: пуньыез таба дорысен ымозяз дугдылытэк "лоба" синъёсыз шумпотонэн чилекъяло. 1: - Вазьгес лыктыны ӧз быгатэ-а, мар-а! Синёмы сӥям ни. Озьы ке но, усто кошке. 1: Пуксьы, агай, - сикьонъяз лабыртэ Санька. 1: - Дыртытэк сиськы, Санёк, - кунэрес мынектӥз Олег. - Пуньыдэ янгышен ньылыны 1: медад шедьты. 1: - Атай бертыттозь сиыса быдтыны тыршиськом, - нокыӵе ӧз кариськы Санька. - Ачид 1: котьку озьы визьнодаськод ук. 1: - Анаймылы кельтыны кулэ, - сузэрез шоры учкыса шуиз Олег. 1: - Мон пуштэмез, тэркые тырыса, гур азе пуктӥ ни, агай, - лачмытак вазиз Ирина. - 1: Миндэр улэ ӝыны сукыри няньмес но ватӥ. 1: - Озьы ке, усто, - ӝӧк сьӧры пуксиз Олег. - Кунояське туннэ. Асьмелы таӵе 1: "юондыр" шер йӧтылэ. 1: - Агай, нош Пётр Васильевичен ма вераськиды? - синъёссэ укно шоры воштыса юаз 1: Ирина. - Келялозы-а асьмеды детдоме? 1: Та юан ваньзэс огдырлы онгыратӥз кадь. Эсьмаса, Санька гинэ но пуньызэ ӝӧк вылэ 1: понӥз. 1: - Уг тодӥськы на, - вакчияк вазиз Олег. - Тани нуназе бере сельсоветэ ветлом - 1: отын ма шуозы. 1: - Азьпалзэ син азям пуктыны ик курдасько, - викыштӥз Ирина. 1: - Юнме шорысь эн бӧрд, апай, - Ирина вӧзы кариськиз Санька. - Асьмеос детдомысь 1: пегӟыны ум шат йӧндыре? Агай вера ук: корт кенерез йырйыса но пегӟо, пе. Мынам 1: но пиньёсы шырпиослэн кадь лэчытэсь. 1: Вынызлэн апайзэс буйгатыны тыршемез Олеглы серем но йӧтӥз, кӧтӝожез но выльысь 1: бугырскиз... 1: ...Сюратайзэс утчаса гурт урамзэс котыръяз ке но, Апасов сое ӧз шедьты. Тылэ-вуэ 1: пырем, оло. Ма, кыл кутонлэсь курдаса ватскем, луоз. Юэмын ке но, аслэсьтыз 1: мыдланес улэм-вылэмзэ вала, шӧдске. 1: * * * 1: Сельсоветын секыт вераськон кема кыстӥськиз. Огез но мукетыз Урак Нинаез 1: визьноданы тырше: 1: - Тон егит на ук, Нина Семёновна, - индылэ гуртсылэн тӧроез Николаев. - Юымтэ 1: дыръяд ужаны но провор. Нырысетӥ кузпалэныд, Анатолий Андреевичен, улыкуды, 1: тӥляд шудо семьяды шоры учкыса, гуртоосмы вожъяськылӥзы, шумпотыса учкылӥзы. 1: Сыӵе дыръёсыд но вал ук: туспуктэмед Данъян пул вылын юнматэмын, ёросамы потӥсь 1: газет но тонэ кӧня ушъяса гожъялляз! 1: - Оло, Герман кузпалды улон-вылондэс пожа? - тунсыкъяське участковой инспектор - 1: милициысь капитан Щербаков.- Кулэ ке, ми сое "кортнаны" быгатом. Со сярысь 1: куриськон гожтыса гинэ вазиське. 1: Урак Ниналэн возьдаськыса бамъёсыз дарали кадь ӵыжектэмын. Котырес ымнырысьтыз 1: менез гинэ сьӧдалэс адске. Кышномуртлы кык полэс возьыт: ас пиез азьын сизьдо 1: ук! 1: Олег анаез шоры дырын-дырын гинэ учкылэ. Солы татын шоканы ик секыт. Быгатысал 1: ке, анайзэ али ик ки вылаз ӝутысал но чылкыт омыре, сяськаясь возь вылэ нуысал, 1: дыр. Отын гадь тыраз тузь омырен мед шокалоз, мӧзмылэс синъёсыз инкуазь 1: чеберлыкен мед палёмозы. 1: Олеглэн тодаз на: анаез туж чебер вал. Котьку сямен пальпотыса ветлылӥз - 1: кожалод, кыӵе ке серемес тысез ньылыны шедьтэм. Я тани ӧвӧл чингыли крезьгурен 1: серектоз. Син шоръёсаз кык кисьмам, чилясь сутэръёс бырттэмын кадь. Тулыс но 1: гужем ӝытъёсы соос уката шудо луылӥзы. Атаез ужысь бертыса дорысьтызы 1: ужпӧръёсты йылпумъяса, соос сад-бакчаязы пото - атайзы, Урак Толя, котьку сямен 1: кияз арганэн. Кык куараен, кык яратӥсь уӵыос музэн кырӟаллязы соос. Олег шоразы 1: воксё палёмыса учкылӥз. 1: "Эх, кытчы ышизы-тӧлӟизы со аръёс? - ортчемзэ син азяз пуктыса, ӵемысь лулӟылэ 1: Олег. - Выжыкыл ӧй вал меда со? Яке чагыралэс шудо вӧтъёс гинэ?" 1: Улэмъя, мылкыдъёс воштӥськемъя, адями синъёс но туссэс вошто вылэм. Кышномуртлэн 1: но соос мукетэсь ни: кык чилясь сутэръёссэ пужмеръёс бездытӥллям. Вылысьтыз 1: дэремезлэн лыз зангари сяськаосыз но гужмаллям ни, гордпыръем кофтаез но ӵужалэс 1: адске. Йырсиез гинэ азьвыл кадьгес ик - бигер нылмуртъёслэн выллем чылкак сьӧд, 1: пуныса йырбераз бинемын... 1: Урак Нина юасьёслы одӥг-кык кылын гинэ валэктонъёс сётъя. Солэн та кузь ӝӧк 1: сьӧры люкаськем адямиослэсь кышкам-кӧберамез шӧдӥське. Куараез ик куддыр мырдэм 1: кылӥське, мур гу пыдсысь шуккиське кадь. 1: - Кушто мон юонме, кушто, - оскытыны выре кышномурт. - Нылпиосме но сюдыны, 1: дӥсяны, калык радэ поттыны быгато. Эн гинэ таркалэ вал семьяме. 1: - Кӧняетӥ ползэ ни вераськод та кылъёстэ, Нина Семёновна? - лек юа школалэн 1: директорез Борисов. - Нылпиосыд тынад кыӵеесь? Арлыдоос верамъя, кылчин кадесь 1: ук! Ужлы но проворесь, школаын но бере кылисьёс пӧлын уг ӵабъясько. Шумпотыны но 1: данъяськыны кулэ вал тӥледлы, Нина Семёновна. Нош тӥ со муспотонъёстэс курыт 1: аракыен воштӥды, соос сярысь сюлмаськондэс мурт пельпумъёс вылэ куштыны 1: турттӥськоды. 1: - Семён Григорьевич, мон валасько мыдланес дауртэмме, - нош ик кышет пумыныз син 1: дуръёсаз йӧтске Урак Нина. - Тупатско мон. 1: Анайзэ жаляса, Олег но вень йылын кадь пуке. Чыртыяз ньылыны луонтэм лёг 1: кугӟамын. "Эх, выжыкылысь синпӧртмась ке луысал, - чилектэ солэн йырвизьмаз. - 1: Анайме шудбур кузьмась чыгыр тылыё бурдолэн вылаз интыясал но паймымон, шудбуро 1: дуннее вуттысал". 1: - Али тӥляд нылпиостылэн самой чакласа-эскерыса возён вакытсы, - визьноданзэ 1: азинтэ Борисов. - Табере гуртъёсы но чуртнасько ни наркотикен усыкмон, нылъёслэн 1: гольык мугорынызы вузкарон учыръёс. Тӥлесьтыд нылпиостэс кин эскерыса возе? А? 1: Ваньзэ школа но солэн директорез вылэ погыльтыны малпаськоды-а? Уз, уз пӧрмы. 1: Мон меӵак верало: Апасовалэсь анай нимзэ талано, кужмысь эмъяны келяно. Нош 1: нылпиоссэ кытчы интыян сярысь мон кулэ бумагаос дасяло, ваньмыз сярысь 1: сюлмасько. 1: Директорлэн кылъёсыз Олегез ӵашйизы кадь. "Уть ай, кыӵе адями! - синъёссэ ӝутыны 1: дӥсьтытэк малпаське пияш. - Школаын ваче син вераськыкумы воксё мукет гурен 1: нёжъяз вал. Хамелеон выллем вылэмед тон, Семён Григорьевич. Тупась учыре сямдэ 1: но, тустэ но вошъяны быгатӥськод". 1: - Нина Семёновна, кызьы уд валаське милесьтым ӟеч лэсьтыны турттэммес? - 1: интыысьтыз султӥз Билитюк. - Анай нимлэсь люкон - со огшоры курдатыса верам 1: кылъёс гинэ ӧвӧл. Россия Федерацилэн выль Уголовной кодексысьтыз 156-тӥ статья, 1: нылпизэс будэтонлэсь аналскем, палэнскем анай-атайёсты кык арозьлы пытсэт сьӧры 1: келяны луэ. Шат отчы шедемды потэ? Нош мискинь нылпиосты детдомын мед будозы 1: шат? Мӧзмозы ук соос гуртсылэсь, школазылэсь, эшъёссылэсь. Тӥлесьтыд но, Нина 1: Семёновна, мӧзмозы. 1: Кышномурт уг вазьылы ни. Кыӵе ке оскытон кылъёс но уг вера ини. Ма, бам вылтӥз 1: чурен васькись синкылиоссэ но ӵушыны вунэтэм, лэся. 1: Олеглэн сюлэмыз тылтэк сутске. Интыысьтыз султыса, ачиз ӵушылысал ни кадь 1: анаезлэн бам вылысьтыз синкылиоссэ. Йырсизэ, сюрмем киоссэ маяллясал. "Ма, кызьы 1: уг валало та мӧйыос? - ас понназ чигиське Олег. - Анай бӧрдэ ук, озьы бере, ас 1: янгышъёссэ вала. Синкылиез сюлэм чылкытаськон шуо. Анай но тупатскоз ай, ваньмыз 1: ыштэмын ӧвӧл на. Нош комиссиын пукисьёс висись яраяз сылал пызьнало". 1: - Луоз-а мыным кӧня ке кыл вераны? - пукон вылысь султӥз та дырозь чус пукем 1: Чучалина. 1: - Вералэ, Фаина Николаевна, - вакчияк шуиз гуртлэн тӧроез. 1: - Мон та кенеше ӧтемын ӧй вал, - кымыс вылаз усем йырсизэ палэнтыса, веранзэ 1: мытӥз арлыдо дышетӥсь. - Олеглэн классэныз кивалтӥсько бере, Апасовъёслэн 1: семьяенызы кема аръёс ӵоже кусыпъёс возисько, доразы вуылӥсько. Бен, Нина 1: Семёновналэсь кырыж сюрес вылэ кожемзэ мон но уг ушъяськы. Та сярысь ми соин 1: огпол гинэ ӧм кенешылэ ни. Озьы ке но, оскем потэ на та анаймуртлы, юрттэт киме 1: сётэме потэ. Комиссилэсь но огзэ курысал: ойдолэ ум дыртэ ай нылпиосты кир-пазь 1: туганы. Тупатыны луонтэм янгышъёс медам лэсьтэ вал. 1: - Мар ӵектӥськоды, Фаина Николаевна? - кышномуртэ куачак карыса юаз Ольга 1: Билитюк. 1: - Оло, Нина Семёновнаез нуналъем эмъяськон интые гинэ нуллыса эскероно? Чагыр 1: экран вылысь рекламаос сыӵеосты нунал пӧрат возьматъяло ук. 1: - Нош коньдон кытысь? - юаз Борисов. - сыӵе эмчиослы вазискьон понна кисыяд тӧл 1: медаз шула. 1: - Нош колхоз воксё уз юртты шат? Соослэн ужасьсы ук. 1: - Кыӵе ужась со? - пилеш йырзэ маялтӥз Николаев. - Одӥг нунал уже пота но арня 1: юмша. Колхозын мылысь-кыдысь тыршисьёс но уждунзэс басьятэк уло. Ма шуозы соос 1: таӵе учыре? Яке сётэм коньдонэз нош ик курыт юонэн ке воштӥзы? Сыӵе учыр вал ни 1: ук. Озьы-а, Нина Семёновна? 1: - Бен, сётӥзы вал коньдон. Но мон соку нылпиосылы школае мыныны дӥськут басьтӥ. 1: - Эн эрекча милемды, Нина Семёновна, - киыныз шонтӥз школалэн директорез. - 1: Мынам но учыр тодам на. Тӥ соку та коньдонэз юыса быдтӥды, нош нылпиостэс школа 1: но интыысь администрация дӥсязы-кутчазы. 1: Ӝӧк сьӧрын эшшо ӝокытгес луиз. Эрикын калгись тӧл гинэ укно сьӧрын юмша. Усьтэм 1: укноетӥ огдырлы пырыса, укноысь буртчин чильтэръёсты выретыса кельтэ. 1: Соку ачиз но мазэ-созэ валаатэк музэн интыысьтыз Олег султӥз. Школа директор 1: шоры меӵак учкыса шуиз: 1: - Семён Григорьевич, дышетскон ар кутскытозь эн исалэ на милемды. Мон ачим но юн 1: тыршо, анаймы но юонлэсь куштӥськыны кыл сётэ. Собере ни... сентябре асьтэос ма 1: карыны тододы. 1: - Со дырозь маке воштӥськоз шат? 1: - Оло, воштӥськоз но, - лачмытак вазиз Олег. - Гуртоос коньдонэн юрттыны 1: оскытӥзы вал... 1: ...Дор палазы соос ог-огзы шоры учкылытэк, вераськытэк вамышъязы - анаез но, 1: Олег но асьсэ малпаськон зарезязы зумемын вал. 1: 8 1: Спектакльлы дасяськон йылпумъяськем бере Апасов отчы-татчы учкиз но дыртыса кыре 1: потӥз. Шур палась крезьгуръёсты кылыса, со чырмытгес кариськиз. Эшъёсыз возьмало 1: ни, дыр. 1: Куазь нясь-нясь шуныт. Нунал ӵоже шунды шорын ӟырдам музъем пӧсь омырен 1: шокыштылэ на. Шурлы матэктэмъя гинэ юзмытгес кариське, шокчыны ик капчия кадь. 1: Кутогурт егитъёс гужеме-сӥзьылэ Лӧзь дурын шулдыръясько. Клубе кино, концерт 1: дыръя но эктон-шулдыръяськон ӝытъёсы гинэ кожало. Егитъёслы майбыр: мӧйыос но ма 1: дауртэмзэс синйылтытэк кылё, нылэн пилы тодматскон, яратон мылкыддэс шараян 1: ласянь но ӟеч - шулдыръяськн дыре ик матысь писпуос пӧлы вамышто но мукет дуннее 1: вуо кадь. Соку соос эрико адямиос ини - мултэс синъёслэсь, пельёслэсь 1: утиськемын. 1: Нырысь Олеген Чабыш Лариса но эшъёссылэсь озьы палэнскылӥзы вал. Огъёзъёс соос. 1: Одӥг классын дышетско, коркаоссы ог ульчаын сыло. 1: Чебыш Лариса чебер но аспӧртэмлыко нылмурт. Веськрес мугоро, базар мунё тусъем. 1: Апасовлэн кытысь ке лыдӟемез вань: вашкала оброс суредасьёс, пе, кылчин 1: ымныръёсты чебер адямиос шоры учкыса лэсьтӥллям-суредаллям. Олег со вакытысь 1: художник ке луысал, зэмен ик классысьтызы Лариса Рябовалэсь тусбуйзэ суредасал, 1: дыр. Нылмуртлэн лыз синъёсаз шунытлык кузьмась кизилиос ватсасал, бур пельпум 1: вылаз чиль-сьӧд, вубуртчин кадь ненег йырсиоссэ вальысал. 1: Та егитъёс куспын эшъяськон, ог-огзылы синмаськон чик витьымтэ шорысь вордӥськиз 1: кадь. Огаз нуналэ, классной час дыръя, Пачан Коля алекчи музэн интыысьтыз султӥз 1: но дышетӥсьсылэсь юаз: 1: - Фаина Николаевна, тӥ кызьы дунъясалды Инмарлы оскись, черкын сётэм кучез 1: чыртыяз нуллӥсь нылмуртэ? 1: - Воксё паймымон юан сётӥськод, Потапов, - лулскиз классэн кивалтӥсьсы Чучалина. 1: - Мон малпамъя, асьме пӧлын инсьӧр кужымъёслы оскисьёс ӧвӧл кадь. 1: - Янгышаськоды, Фаина Николаевна, - Потапов интыяз пуксьыны уг дырты. - Асьме 1: классамы одӥг монашка вань. Со - Лариса Рябова. 1: Пиналъёс пырсйытэк ӧз чидалэ. Куд-огез куараен но серектӥз. Ваньзы йырзэс Рябова 1: пала берыктӥзы. Витё, ма шуоз нылаш. 1: Нош Чебыш Лариса валэктыны уг дырты - чус пуке. Фаина Николаевна югдурез 1: тупатыны дыртӥз. 1: - Потапов, ас эшъёсыдлы кушем нимын вазиськон - умойтэм сям. Вылаз ик, ас 1: синъёсыныд ӧд ке адӟы, вӧзысьтыд адямиосты оскытыны эн тыршы. Тон Рябовалэсь 1: черке ветлэмзэ ӧд адӟылы ук, вӧсьёс шыпыртэмзэ ас пельёсыныд ӧд кыл. 1: - Ӧй ке тодысал, ымме но ӧй усьтысал, Фаина Николаевна, - чангес куараен вазиз 1: Пачан Коля. - Мыным та сярысь анае мадиз. Рябоваез со Казанской но Улмо Спас 1: вӧсь праздникъёсы черкысь адӟем. Николай Чудотворецлэн обросэз азьын сюсьтыл 1: ӝуатыса йыбыртъямзэ но. Кыкетӥез доказательство - Лариса чыртыяз куч нуллэ. Туэ 1: гужем Лӧзь шурын пыласькыкумы олокӧня пол синйылтӥ. 1: Классын эшшо шыпытгес луиз. Ваньзы дышетӥсьсэс сӥсъяло: ма вералоз, кинлы 1: дурбасьтоз? 1: Чучалина кыдёкысен котыръяса кутскиз: 1: - Азьвыл аръёсы асьме калыкез кужмысь карыса люкизы вал инкуазь инмаръёсмылы 1: осконлэсь - Кылдысинлэсь, Воршудлэсь, Шунды-Мумылэсь... Тужгес вӧсь каро вылэм 1: попъёс. Ёртӥллям-ёртӥллям но Инмармес бӧрысь воштӥллям. Нош Инмарез воштон - со 1: шудон уж ӧвӧл. Инмарез воштон - астэ ачид вузам кадь. Калыкез сантэман таин гинэ 1: ӧз йылпумъяськы. Куам ынэтӥ аръёсы туж трос черкъёслэн "йыръёссы" лобӟизы. Асьме 1: Кутор гуртысь черкен но озьы луиз. Нош оскисьёс сс осконзэс ӧз ыштэ. Соос 1: лушкемен ке но вӧссяькылӥзы. Улон возьматӥз: зэмлык соос киын вылэм. Выльысь 1: ӝутско черкъёс, гуртысьтымы черкмес но тӥни выльдӥзы ни. 1: - Фаина Николаевна, - Коля Потапов дышетӥсез куспетӥ кариз. - Тӥ милемлы созэ 1: гинэ шараялэ: Лариса Рябовалы дурбасьтӥськоды-а, уд-а? 1: - Азьвыл аръёсы мон одно куаретысал: ас мылкыдылы пумит луыса но Рябоваез 1: возьытэ вуттыны тыршысал, - Чучалина огдырлы могӟиз. - Асьме политика озьы косэ 1: вал. Уката ик школаын визьмаллямы: Инмар ӧвӧл! Нош югдур воштӥськиз. Мон 1: Ларисаез уг куаретӥськы. Оске - солэн ужез. Ас сюлэм косэмезъя мед улоз. Астме 1: Конституциын гожтэмын: "Котькуд адями ас оскон вӧсьсэ возьыны быгатэ". Озьыен, 1: Рябовалы та осконэз законлэн букваосыныз юнматэмын. 1: Чучалина уӵерак укное учкиз но выльысь класслы вазиськиз: 1: - Нош тӥ асьтэос Ларисалы кыӵе дунъет сётысалды? Вералэ, шараялэ ас мылкыддэс, 1: малпанъёстэс. 1: Классын зорлы дасяськись инкуазьын сямен чум кариськиз. Ваньзы ас малпаназы 1: зымизы, лэся. Яке ас малпанзэс шараяны-а курдало? Но тани, ог-кык минут ортчыса, 1: Апасов кизэ ӝутӥз: 1: - Фаина Николаевна, луоз-а кӧня ке кыл вераны? Мон ас мылкыдме шараяны 1: малпасько. 1: - Пожалуйста, Апасов. Вера, вера, Олег. 1: Олег кырымпыдсаз кызйиз но шуиз: 1: - Мон Рябова Ларисалы дурбасьтӥсько. Со асьме кадь огшоры ӧвӧл. Ваньзэ ас 1: визьмыныз, сюлэмыз косэмъя лэсьтэ. Нош асьмеос - ыж уллё кадь. Алигес 1: Туркмениысь калык писательлэсь Ходыр Дерьявлэсь "Лымы пельскон" романзэ лыдӟи. 1: Отын со гожтэ, нюк-гоп луымтэ шорысь но, пе, азьветлӥсь ыж, малэсь ке 1: кышкатскыса, выллань я урдэслань тэтче ке, та интые вуыса, бӧрсяз мынӥсь котькуд 1: ыж та выросэз лэсьтэ. Йырдэс кур эн каре, эшъёс, но асьмеос ваньмы та уллёысь 1: ыжъёс кадесь. Лариса Рабова гинэ сыӵе ӧвӧл. Асьмелы Инмар ӧвӧл шуизы но - озьы 1: ик малпаськом. Нош вӧсяськыны ке косӥзы, кымысмес пасямон йыбыртъяны дасесь. 1: Асьмелэн зэмос осконмы ӧвӧл, сюлэммы косэмъя улыны ум быгатӥське. Нош Лариса - 1: быгатэ, вань тулкымъёслы пумит ке но уя. 1: Пиналъёс эшсылэсь верамзэ шып кылзо. Куд-огез понназ малпаз, дыр: "Малы-о мон ас 1: мылкыдме Апасов кадь шараяны ӧй дӥсьты?" Мукетыз: "О-о, кыӵе дурбасьтыса 1: вераське. Рябоваез кизили кариз ни. Юнме шорысь ӧвӧл, дыр". 1: Лариса но дӥсьтӥсьгес кариськиз: пельпумъёссэ шонертӥз, синъёссэ но уг ваты ни. 1: Бам чокчороосыз гинэ ӧжытак льӧльмытгес луизы шат. 1: Со вакыт урой йылпумъяськемез ивортыса электрогырлы жингыртӥз. Чучалина кошкыны 1: ӧз дырты. Пиналъёс шоры учкыса ӵектӥз: 1: - Ойдолэ та ужпумез сэрттон-пертчон вылысь нимаз вераськон ӝыт радъяломе. Асьме 1: осконъёсмы, малпанъёсмы зэмзэ пиртэшесь на. Ӝытмес но озьы ик ниалом: 1: "Кырмышъяло пиртэш кизилиос". Тӥ асьтэ малпанъёстэс шараялоды, мон куноосты ӧтён 1: сярысь сюлмасько. Колхозмылэн тӧроез, мон тодэмъя, атеист - инмарлы чик 1: оскисьтэм адями. Асьме черкысь отец Василий но соин ваче син вераськыны пумтт уз 1: луы, дыр. 1: Пиналъёс Фаина Николаевназылэн ӵектонэныз огкылысь соглаш луизы. Урокъёс бере 1: доразы вамышъякузы ни асьсэ ульчаязы кожыса, Рябова Олеглы шуиз: 1: - Тау тыныд, Олег, дурбасьтыса вераськемед понна. Чик ӧй малпа вал. 1: - Мон, Лариса, тодӥсько, маин герӟаськемын тынад Инмарлы осконэд. Соин ик 1: дурбасьтоно кари. 1: - Вера бен, малы черке мыныса йыбыртъясько? 1: - Тынад выныд но агаед секыт висёнъёсын курадӟо. Кыксылэн ик ки-пыдъёссы 1: сӧсыресь. Соослы тазалык курыса вӧсяськиськод, Инмарлы вазиськиськод. Яке мон 1: янгышасько? 1: - Шонер, Олег. Соин ик чыртыям куч но нуллӥсько. Егит арлыдазы медаз курадӟе 1: шуыса. Врачъёс юрттыны кужымтэмесь бере, инсьӧр кузёлы сяна, кинлы-о оскон кыле 1: на? Нош тон та сярысь кытысь тодӥськод? 1: - Мон... ачим но сыӵегес югдурын, Лариса. Анае, сюратае аракы бекчее зымизы. 1: Уйёсы синме кыньыны быгатытэк кылльыкум ачим но ӵемысь Инмарлы вазиськылӥсько. 1: Нош со мынэсьтым вӧсьёсме уг кыл. Фаина Николаевна верамъя, вӧсьёсы пиртэшесь 1: на, лэся. 1: Та вераськон бере егитъёслы кусыпсэс юнматыны мукет учыр юрттӥз на. Шонергес 1: вераса, Апасовлэсь йырзэ Лариса ас быгатонлыкеныз, киуженыз берыктӥз. 1: Школаязы кылдэм сямъя кызь куинетӥ феврале - шаермес утӥсь-ввозьмасьёсты данъян 1: нуналэ - нылъёс пиослы кузьым дасяло. Нош Тямысэтӥ мартэ пиос асьсэ киуженызы 1: нылъёсты шумпоттыны тыршо. 1: Лариса трос нылпиё семьяысь. Бускельёссы шуо, со, пе, ужез гажаса будэ. Вылаз 1: ик, со киужъёслы но усточи. Кызь куинетӥ феврале Лариса Олеглы ыж гонлэсь 1: керттэм чиньы-пӧлыё пӧзьёс кузьмаз. Школаысь ӵошен бертыкузы ни Олег 1: тунсыкъяськытэк ӧз чида: 1: - Мар малпаса мыным кузьмаськоно карид, Лариса? Классамы пиос ӧжыт ӧвӧл кадь. 1: - Ӟырт кезьыт нуналъёсы но пӧзьтэк ветлэмдэ синйылтӥ. Нош адямилы, кулэ арбериез 1: ке кузьмаськод, сыӵе мурт, пе, кык полэс шудо луэ. 1: - Тау, Лариса, - матазгес кариськиз Апасов. Собере нылмуртлэн етӥн сяськаос 1: тусъем синъёсаз учкыса лушкем мылкыдзэ но шараяны дӥсьтӥз: 1: - Мон тон шоры кемалась учкылӥсько, лулӟылӥсько ни. Малпанъёсме, бугырес 1: мылкыдме шараяны гинэ ӧй дӥсьтылы. 1: - Луылэ озьы, - нокыӵе ӧз кариськы нылмурт. Маке малпаськемез бере пальпотыса 1: ӵектӥз: - Ойдо туннэ дискотекае ӵошен ветлом. 1: - Туж шумпотыса мынысал, Лариса, Но... отчы пырон понна коньдон кулэ ук. Таиз 1: ласянь шугъяськисько. 1: - Ачим юртто, Олег. 1: - Кулэ ӧвӧл, - соку ик пумит кариськиз Апасов. - Монэ китэм-пыдтэм, сӧсыр-лябыр 1: адями кожаськод, оло? Кинлы ке кые ке ужзэ быдэстыны юртто но коньдон шедьто. 1: Ветлом, Лариса. Ӝытозь! - валантэм пальпотыса, егит пи дор палаз бызиз. 1: Нуназе бере Олег Онись кенакезлэн гидаз люкаськем кыедэз поттӥз, гидзэ чылк-чылк 1: сузяз. Ужзэ йылпумъяса, со керпотыса ке но, куронзэ шараяны дӥсьтӥз. 1: - Умойтэм кадь юрттӥськем понна бускельлэсь коньдон курыны, Онись кенак, - 1: синъёссэ улэ ошыса вазиз Олег. - Но туннэ коньдонлы туж кулэяськисько. Клубе 1: дискотекае ветлоно вал. 1: - Оло. Гуртысьтымы куд ке чеберайлы синмаськыны вутскид, пие? - пальпотӥз 1: кышномурт. - Ярам, туж умой. Аръёс ортчо ук, егитъёс быдэ вуо, выль чсемья 1: кылдыто. Та дунне озьы азинске: сӥзьыл куасьмем сяськаез тулыс мукетыз воштэ. 1: Яратон сяськалэн но аслаз ӝужан вакытэз вань, Олег. Со дырез туж чакласа улоно. 1: Туж ик вазь но медаз усьтӥськы - ӵукна кезьыт тӧлъёс шуятыны шедьтозы, туж ик 1: беромыны но уг яра - кынтӥсь зоръёс шачыръялозы. Ма, тынад ӵапак дырыз кадь, - 1: бинетысь коньдон лыдъяса сётонъяз лабыртэ Онись кенак. - Монэ нл Педоре тынад 1: арлыдад ик возьдаськыса-возьдаськыса нырысьсэ чупаз вал. Остэ-э, быри! - 1: пальпотӥз кышномурт. - Возьытме ыштыса, олома вашкалаоссэ тодам ваи. Ма, тон 1: понна шумпотӥсько, Олег. Ас пие кадь потӥськод. Чакласькы, яратон тылын сутскыны 1: медад шедьты. Тон кадь чебер но шаплы казакпиез нылъёс ӝог синйылтозы-киултозы. 1: Йырдэ асьсэ пала берыктон понна, инвожо уе нюлэскы ветлыса, абалгы сяськаез но 1: кузьманы йӧндырозы. Мотри, пие: кезльыт толэс кариськы. Нылъёс йырад ӝог гинэ 1: сермет бырттыны медаз быгатэ. 1: - Тӥ мыным яратон сярысь быдэс лекция лыдӟиды, Онись кенак, - пальпотӥз Олег. - 1: Ноку сыӵезэ ӧй малпалля. 1: - Э-э, пие, пие, - ллускиз кышномурт. - Мугор пересьме ке но, мылкыд уг сётскы 1: ук. Арлыдо мурт сыӵе ни со: мылкыдыз чагыр пилемъёс сьӧрын, берпалыз - пень 1: пушкын. 1: Берло верамез пумысен Олег кит-кит серектытэк ӧз чида: 1: - Веран-ӵошатон кылъёс но шедьтӥськод, Онись кенак! Ӟучъёс верамъя, хоть стой, 1: хоть падай. 1: - Ме ини, ме уксёдэ, басьты но мыноно интыяд дырты. Сотэк мон олома но 1: супыльтыны йӧндыро ай. Огез азь пиньы киргамын-усемын, отӥ кулэтэм кылъёс, векчи 1: коньдон музэн, жильтыр! Вияса-киргаса уло, - ымзэ айшет сӧзулэныз ӵоксаса 1: серектӥз Онись. 1: - Малы-о такем трос - дас манет! - сётӥськоды, Онись кенак? - паймиз Олег. - Ку- 1: о мон тае берыктом? 1: - Басьты, пие, басьты. Аслым пенсие но тырме. Вылаз ик, колхозын тыршеме понна 1: но пичи-пич палгытъяло ай. 1: - Мон чик коньдонтэк юрттысал тӥледлы, Онись кенак. Ёрмеменым пӧрмостэм 1: дауртӥсько. Нылмуртэн нырысьсэ шулдыръяськонэ ветлыны кенеши вал. Нош туала дыре 1: отчы но уксё тырытэк уг лэёз ни. Я, мон мукетъят но юрттӥськыны вуыло, - ӧс пала 1: вамыштз Апасов. - Иворты гинэ. Огзэ курисько: пунэмаськемелы вождэс эн вае, 1: анаелы но эн поттылэ. 1: - Олома эн вераськы, Олег. Анаедлы уг вера - мынам ымдуръёсам тунгон ошемын. Нош 1: уксёме ас мылкыд каремея, шумпотыса сётӥсько. Курыт ву яке тамак басьтыны ке 1: курысалыд - туздырыса лэзьысал. Ӧжыт-а мыным юрттӥськод, пие. Пудо сиён дасяны 1: но юрттӥд, пуме но пильылыса артанае сюрид, толалтэ но азбарысьтым лымыез 1: мычылыса улӥськод. Инмар кужым мед ватсалоз ни. Арлыдо муртлы юрттэм музэ уз 1: кирга, шуо. Ӟечен берытскоз. 1: - Я, мон кошки, Онись кенак, - уксёзэ костюмезлэн гадь кисыяз поныса, Апасов 1: ӧсэтӥ чырмыт потӥз. 1: * * * 1: Дискотекаын егитъёс жадьытозязы шулдыръяськизы. Олеглы Ларисаен туж каньыл, усто 1: вал. Эшъёсызлэн тузӥ дӥськутсы шоры учкыса, пияш ӧжытак керпотылӥз ик, но берло 1: ни лушкемен малпаз: "Куке мон но "вылкуме" вошто ай. Ужаме понна коньдон гинэ 1: дыраз мед сётозы. Ай огдылэн но асьтэ коньдонэн дӥськут басьтэмды ӧвӧл. Дасьсэ 1: сиись куака музэн улӥськоды". 1: Дор палазы соос Чебыш Ларисаен валче гинэ вамыштӥзы. Ай нырысьсэ тазьы чусомем 1: ӝытэ артэ берто. Инбамысь сюрло толэзь егитъёсты сак эскере: азьпал сюрессэс 1: ӵужмыт, инӟыосын ворекъясь сюрелэн пазя. 1: Егит пи Ларисалэн мугорыз, киыз борды йӧтскыны ик курда. Кожалод, Лариса 1: хрустальлэсь кисьтэм ваза: бордаз янгышен йӧтскид ке, жиль-куаль пырдоз- 1: жильдӥськоз. 1: Чус вамышъяло соос. Озьы ке но, ог-огзэс валало, шӧдо кадь. Шудо тылгизьыосын 1: кенжытскем синъёссы ваче учкыса кырмышъяло - лушкем мылкыд-малпанъёссэс шараяло, 1: вылды. "Уть ай, нылмуртлы мусо кылъёс вераны, шыпыртыны гинэ но уг йӧндыриськы. 1: Нюлымтэ ошпи!" - ассэ лушкемен куаретэ Олег. 1: Ларисалэн капка выжыяз вуэмзы бере соос нош ик кылтэм-ымтэм луизы. Апасов 1: киноысь адӟемезъя но книгаосысь лыдӟемезъя кожаз: синмаськем нылмуртэ одно ик 1: чупано. Кытын, пе! Чебыш Лариса яра кадь кариськиз - бордаз йӧтскыны но уг 1: лэзьы. Нырысьсэ яратон зарезьлэн тулкымъёсаз шедем егит пи амал шедьтӥз ик: 1: Ларисалэн пельпумаз капчияк йӧтскиз но синъёсаз меӵак учкыса шыпыртӥз: 1: - Мон тонэ яратӥсько, Лариса! 1: Рябова, уй шыпытлыкез жиль-куаль пазяса, чингыли куараен серектӥз но капка 1: сьӧраз лобыштӥз. 1: Дор палаз мылкыдтэк вамышъякуз ни Апасов сактӥз: "Шузи мон, шузи! Нылмуртэ 1: нырысьсэ келякум ик "яратӥсько" шуи. Соин серекъяз, дыр. Вот пӧрмостэм! Книгаысь 1: геройёс та кылъёсты вераны туж шугъясько ук. Нош мон кутӥ но верай". 1: * * * 1: Ӵуказеяз ӝыт пал ужысь вуэм Апасовез Санька мыньпотыса пумитаз. Тае адӟыса, 1: агаез алетскиз гинэ: 1: - Серем пыры ньылыны шедьтӥд, оло, Санёк? Мар-ось шаньги сием кадь пальышаськод? 1: - Агай, - вӧзаз матэктыса, лушкем вазиз Санька. - Мон тыныд туж но туж бадӟым 1: лушкем ужме шараяй ке, мыным сётыны кузьымед, саламед вань-а? 1: - Нырысь лушкем уждэ шарая. Собере ини дунъялом. Нош кисыосы бушесь ӧвӧл. 1: - Мыкырскы ай вӧзам, пельёсад гинэ шыпырто. 1: - Шара вера. 1: - Уг, уг. Мон кыл сётӥ. Чебыш Ларисаез нокин уз адӟы, нокин уз кыл шуыса оскытӥ. 1: Эсьмаса, Ира апайлы вератэк но чидатскыны йӧндыри, ява! Конешно, кыл йылам 1: бичатыса улӥз. Но мон чидатски, воргорон сямме возьматэме потӥз. 1: - Кинлы-кинлы кыл сётӥд? - шуак кариськиз Олег. 1: - Ма, Чебыш Ларисаез шат уд тодӥськы? Ӵапак солы. 1: - Шыпытгес тон, Санёк! - вынызлэсь кизэ кырмиз Олег. - Я, вера, мадь. 1: - Ойдо бакчаысь льӧмпу вӧзы. Ватэтэ отын. 1: Бакчае потэмзы бере Санька куакъёс пӧлын бугыръяськиз но, чагыралэс конверт 1: поттыса, агаезлы мычиз. 1: - Тани со. Чебыш Лариса тыныд лушкемен сётыны косӥз. Косэмзэ ӟеч ке быдэстӥ, 1: шоколадэн кунояны оскытӥз. 1: Олег гожтэтэз кутӥз но ӝогак кисыяз ватӥз. Собере, кисыысьтыз ӵуж пушмульыос 1: поттыса, вынызлы сётӥз но лушкемак куриз: 1: - Санёк, тон та гожтэт сярысь чус ул, ява. Нокин медаз тоды. Тон ми куспын 1: почтальон кариськод. Нош ужамед, тыршемед понна мон тыныд кӧё-вӧё пушмульыосын 1: дун тыро. 1: - Уд вала тӥледыз, агай, - пушмульы кӧмез куртчыса куалгытонъяз пальпотӥз 1: Санька. - Олома мыддорин дауртӥськоды. Ларисаен ӵош дышетскиськоды ук, одӥг 1: классын. Верано кылъёстэс шара вераны уд йӧндыриське шат, малы гожтэтъёс 1: гожъяськоды? 1: - Будэмъяд ваньзэ валалод ай, Санёк, - вынызлэсь пежырес йырсизэ маялтыса 1: пальпотӥз Олег. 1: Мурдооссэ эскерыны Лӧзь шур дуре васькыса, куакъёс пӧлы ватскыса гинэ Апасов 1: чагыр конвертэз усьтӥз. Кышкаса-кӧбераса усьтӥз. Угось толон "яратӥсько" шуыны 1: шедьтэменыз, лэся, Лариса школаысен Олег шоры ӧз но учкылы. Огпол гинэ, урок 1: дыръя, пальышак потӥз ик. 1: "Нылмурт ас малпанъёссэ шара вераны кужым ӧз шедьты, луоз, - малпаське Олег. - 1: Соин ик гожтэт пӧраз, вылды. Ас мылкыддэ кагазэ шараяны котьку каньылгес уго". 1: Чылкыт бумага вылэ гожтэм кылбурез адӟыса, Апасов мынектӥз: "Ассэ Ашальчи Оки 1: кожам! Вот тамаша". Собере ачиз но шӧдытэк, шара лыдӟыны кутскиз: 1: "Яратэмдэ эн дырты вераны - 1: Лушкем гинэ тон мадь вож бадьпулы. 1: Куке васько Чачай ошмес вулы, 1: Лабрес будос вутскоз шыпыртыны. 1: 1: Ас мылкыддэ эн дырт шараяны - 1: Каллен гинэ тон нёжты кырӟандэ. 1: Куке уӵы жильдоз чик жадьытэк, 1: Ныл сюлэмы вутскоз валатскыны. 1: 1: Яратондэ эн дырты вераны..." 1: Нылмуртлэсь кылбурзэ лыдӟыса, Апасовлэн бам чокчороосыз ик кисьмам улмоослэсь 1: туссэс басьтӥзы. Йырвизьмаз чилектӥз: "Адямиос яратон сюрессэс тулысъёсы мыто, 1: шуо. Нош мон, пӧрмостэм, нырысьсэ нылмуртэ сӥзьыл келяй. Э-э, - ас малпанэзлы 1: пальыштӥз со. - Инкуазь шат янгыш таӵе дыре? Ӟырт кезьыт нуналъёсы мытэм яратон 1: но быдэс гумырез шунтэ, шуо арлыдоос". 1: Апасов, дораз берытскыса, чаляк гожъяськыны пуксиз. Кема бырйиз со Пушкинлэсь, 1: Есенинлэсь, Флор Васильевлэсь яратонлы сӥзем чуръёссэс. Мылкыдаз укшамонзэ, 1: Рябовалы сӥзьымонзэ ӧз шедьты кадь. Соку кытысь ке кылэм-лыдӟем чуръёсты тодаз 1: уськытыса, тазэ чылкыт бумагалы шараяз: 1: "Сердце девушки - загадка", - 1: Так сказал один поэт. 1: Если даже очень любит, 1: Всеравно ответит: "Нет!" 1: Гожтэм-пӧрамзэ куинь сэрего гожтэтлы пӧрмытӥз но, Санькалы сётыса, лушкемен 1: шыпыртӥз: 1: - Али ик ас уждэ быдэсты, почтальон. Ӝогак Чебышъёс дӥне ветлы. Гожтэтэз 1: Ларисалы лушкем сёт. Одӥг улэп лул но адӟыны, шӧдыны медаз быгаты. 1: - Яралоз, агай. Ваньзэ тон косэмъя лэсьто, - гожтэтсэ дэрем улаз ватыса, Санька 1: ульчае лобыштӥз. 1: 9 1: Адямиез куректон я секыт малпан зӥбе ке, со инбаме учкылыны ик вунэтэ. Туж дуно 1: арберизэ ыштэм мурт сямен, синъёссэ улэ ошыса, пыдъёссэ секытэн ӝутъяса 1: вамышъя. Нош шумпотыкуз мылкыдыз лопырске, чагыралэс инме турак ӝутске, синъёсыз 1: шумпотон тулсиосын гомӟо. Пыдъёсыз ӟазег мамык выллемесь луо - тани-тани лӧбак 1: ӝутскозы но капчи ыр тӧлъёсын ӵошатскыса ширтозы кадь. 1: Та нуналъёсы Урак Олеглы но капчигес луиз. Уж дураз Пачан Миша агаез, штурвал 1: сьӧры пуксьыса, юосты октыны оскылэ ни. Доразы улон-вылон но, тулыс тудву сямен 1: куашетэмез-шукыръяськемез бере, ас эрказ пыриз: анаеныз сюратаез бускель гуртэ 1: куинь нунал-уйлы ышылыса юизы но выльысь сазьтӥськыса, уже потӥзы. 1: Апасов нош чагыралэс инбамез но, пальпотӥсь шундыез но, ӟег пӧлысь кырмышъясь 1: зангариез но адӟиз. Пель сьӧраз выльысь ужгур куараос, эшъёсызлэн шулдыр 1: серекъямзы, кырӟанъёс нёжъямзы, турын-куар пӧлын ӟозъёслэн гужемен люкиськон 1: крезьгурзэс чиккетэмзы кылӥськыны ӧдъяз. 1: Пӧсь нянь сукыриосын сумказэ юн кырмыса, чырмыт вамышъя со бусы сюрестӥ. Дырын- 1: дырын кырӟан нёжъя. Изнюк вӧзтӥ ортчыкуз ни, ӝужыт ньылпу йылысен, егит пиез 1: куаляк поттыса, кырныж крок-крок! кеськиз. "Ӟечтэ вера, - сьӧд бурдо шоры учкыса 1: куриз Апасов. - Ӟечтэ ке вераськод, вӧен нянь сёто, уродзэ ке бӧтьыртӥськод, 1: чыртывыжыяд ог кырым веньёс кисьто", - арлыдоослэсь кылэмзэс сипыртӥз егит пи. 1: Солэсь малпанъёссэ кылыса выллем, сьӧд бурдо выльысь крок-крок! вазиз. Вӧзтӥз 1: ортчись адями шоры учкыса пукиз-пукиз но, мылпотытэк ӝутскыса, шунды пуксён пала 1: лобӟиз. 1: Ваньзэ тае синйылтыса, Олег огдырлы вамышъямысь ик дугдӥз. Шоканзэ ыштыса музэн 1: учке со сьӧд бурдолэн бӧрысяз. Пель сьӧраз дырын-дырын шуккиське: крок-крок! 1: крок-крок! Йырвизьмаз Онись кенакезлэн куке верам кылъёсыз лулъяськизы. "Кырныж 1: кроккетыса шунды ӝужан пала ке лобӟе - шумпотон ивор вера. Шунды пуксёнэ ке 1: сюрессэ мытэ - кышкыт ивор, сьӧд адӟон возьма". 1: Та дэймыт верамез малпаса, Олеглэн мугорысьтыз пигонъёсыз ик пештырскизы. "Малы 1: мон олокыӵе выжыкылъёслы оскисько?" - ассэ ачиз буйгатыны тырше со. Бератаз 1: зӥбломыны амал шедьтӥз ик - удмурт кылбурчилэсь чуръёссэ тодаз вайыса, шара 1: лыдӟыны кутскиз: 1: Ӝужыт вож кызлэн ӟечырась вай вылаз 1: Кырныж вуӵыртэ кӧттыро куараен. 1: Анай дыртыса кироса ни гадяз: 1: "Кинлы вазиське со кайгу иворен?" 1: Малы кышкаськод, анае, кырныжлэсь? 1: Бурдо шумпотэм шундыё нуналлы. 1: Оло, со озьы куриське Инмарлэсь. 1: Шудо, кузь гумыр сӥзьыса асьмелы? 1: Ӧвӧл сьӧлыкез та чиль-сьӧд бурдолэн, 1: Сюлэм кырӟанзэ со усьтэ та гурен... 1: 1: Олег капкаетӥ пырыкуз ик валатскиз: доразы маке луэм. Корказь ӧс ваӵак усьтыса 1: кельтэмын, азбар шорын ик ӵужон костаське, кузь ӟус вылысь вуэн ведраос 1: бекмыльскиллям. 1: Со бызьыса корка пыриз. Отын чал-чал. Нырысь ик дӥсь ошон ӵогысь анаезлэсь уже 1: ветлон дӥськутсэ синйылтӥз. Ӧвӧл. Озьыен, фермае кошкем, луоз. Та уе соос ваньзы 1: доразы кӧлӥзы вал. Соин ик верандаысь, кеносысь валесъёсты эскериз - сузэрез но, 1: выныз но ӧвӧл. Сайкаса кытчы ке кошкиллям. 1: - Санька! Ирина! Кытын тӥ? - корказе потыса кеськиз Олег. 1: - Татын мон, бакчаын, - Санька мылпотытэк куаразэ сётӥз. - Нянь ваид-а, агай? 1: - Вуттӥ. Нош тон мар-ось ӵук шундыен валче сайкад? - бакчаысь нызьыли бичась 1: вынызлы матэктонъяз юаз Олег. 1: - Атаен анай маке керетӥзы кадь. Мон Ириналэн бӧрдэм куараезлэсь сайкай, - агаез 1: шоры синъёссэ ӝутыны курдаса выллем валэктӥз Санька. Солы но акыльтӥз ни таӵе 1: улон: маке умойтэм ке луэ, агаез одно ик Санькалэн атаез вылэ урдскылэ. Санька 1: ас атайзэ лушкемен жаля. Мур лулӟылыса кайгыре понназ. Нош одӥгезлы но юрттыны 1: луонлыкез ӧвӧл: агай-апаезлы но, атаезлы но. 1: Вынызлэн ивортонэз Апасовлэсь быдэс мугорзэ ӵушказ кадь. Дыртыса отчы-татчы 1: утчаськыны кутскиз. Син шораз алигес миськыса сюрые ошылэм дӥсьёс йӧтӥзы. 1: - Ирина мисьтаськыны шур дуре кошкиз шат? 1: - Бертӥз ни отысь. Гид берын викышъяса сылэ. Малы бӧрдэмзэ юай но, пушнераськи, 1: пе. Паймод но бырод. Со быдӟа нылмурт пушнераськемысь викышъя. 1: Олег ури-бери гид сьӧры бызиз. Пу артанаос вискын синвуаськыса сылӥсь сузэрзэ 1: адӟыса алетскиз: 1: - Мар луиз, Ирина? Кин обидиз? Шакшы Герман-а? 1: Нылмурт валэктыны ӧз дырты, эшшо кужмогес викышъяса, кимышкыныз синкылиоссэ 1: ӵушылыны кутскиз. 1: Ира выросъёсын но, тусбуен но атаез выжые вамыштэм, лэся. Ӝужыт мугоро, 1: веськрес. Кузьма сюратайзы ӵапак сыӵе вал - ез юбо кадь ӝужыт. Нылашез сизьыметӥ 1: классын дышетскись шуыса уд ик малпа - Олеглэн классысьтыз нылъёс выллем. Апасов 1: сузэреныз данъяське. Тусын но чебер уго, мугорын но кельышлы. Котырес бамыз, 1: сьӧд сутэр синъёсыз гинэ анаезлэсь пунэмамын кадь. Ымдуръёсыз буёл йӧттылытэк но 1: мак сяська бурдъёс выллем льӧльырало. Йырсиез вакчиятыса вандэмын но чебер 1: пужыё заколкаен юнматэмын. Тӧдьы вылын лызпыр кӧжыё басмалэсь вурем дэремез 1: мугорызъя но туж кельышлы адске. 1: "Ӝог вуись "емыш", лэся, - сузэрезлэсь пичияк тоторскем гадьёссэ синйылтыса 1: малпаз Олег. - Таӵе нылъёсты казакпиос ӝог синйылто. Эх, эшъёсызлы сямен чебер 1: дӥськут ке шедьысал, - жаляса лулскиз Апасов. - Выжыкылысь Золушка выллем 1: чеберай луысал". 1: - Сюратай маке жоб кылъёс-а вераз? Яке керетӥды? - сузэрезлэсь йырсизэ маялтыса, 1: синъёсаз меӵак учкиз Олег. 1: - Курегмес пуйые понэмзэ адӟыса, карнанэн курдатыны малпай вал. Уго вулы ветлон 1: сьӧртӥм лушкаськыны малпам, возьыттэм адями. 1: - Кизэ ӝутылӥз, оло? Вӧсь-а кариз? 1: Ирина выльысь викыштӥз. Пельпумъёсыз ик дырекъяны кутскизы. 1: - Я, бӧрдыса пайдаез уз луы, Ирина, - либытак вазиськиз Олег. - Мадь ватытэк, ма 1: дауртӥз кык пыдо горд кечтака? 1: - Китӥм зол-зол кырмиз но кужмысь кеносэ пыртыны турттэ вал. Эриктэмало, пе. 1: Соку, шуэ, чус улод, мыным уд мытылы ни, киостэ но уд, пе, лэзья. 1: - Вот шакшы! Воксё адями туссэ ыштэм ни ук! Ма, мар кароно таин? 1: - Курдасько мон солэсь, Олег. Кыкетӥзэ ни таӵе дауртэ, - агаезлэн гадь вылаз 1: йырзэ уськытыса, выльысь ӝожомиз Ирина. - Сюлэмы шӧдэ: куке одно маке... йыруж 1: лэсьтоз. Соку мон югыт дуннеын одӥг минут но уг улы. Кытчы ке ватско но чыртыям 1: кыӵес поно. 1: - Буйгатскы, Ирина. Таӵе югдуре кыӵес уз юртты. Вот айы пуны! - пинь пыртӥз 1: сялӟиз Олег. - Нош малы нырысь урдскылыкуз ик мыным ӧд вера? 1: - Тынэсьтыд кепыр ваи. 1: - Анайлы ивортоно вал ук. Эсьмаса, горд йырсиоссэ лӧдысал. 1: - Верай мон. Анай серектӥз гинэ. Сюратаед, пе, шудыса-маскаръяськыса гинэ сыӵе 1: дауртэ. Лушкемен мусояськон понна, пе, мынам но мугоры быгылес на. 1: - Огпаръёс! - Апасовлэн мыжыкъёсыз ик кырмиськизы. - Кин-о ас нылпизэ сьӧсьлы 1: кесяны сётоз? Малпаса ик йырсиос пежырско. 1: Егит пи кыдёкысь инвисэ учкыса сылӥз-сылӥз но сузэрезлэсь кизэ кутыса оскытӥз: 1: - Эн куректы, Ирина. Мон горд кечтакаен ваче син верасько ай. Кулэ ке луиз, таӵе 1: йыринтэмзэ кинлы ке шараятэк но уг чида. 1: - Щербаковлы, оло? 1: - Ум, участково й инспекторлы ум вералэ на. Милициысь капитан асьмелэсь бумага 1: куроз но, Германэз пытсэт сьӧры келялоз. Нош сыӵе вамыш лэсьтыны мынам сюлэмы уг 1: дӥсьты на. Мугез кыкнамылы валамон: анаймы со шакшыез яратэ. Мыдланес вамыш ке 1: лэсьтӥмы, анайлы гинэ мултэс куректон кузьмалом. Соку эшшо юнгес юон вылэ 1: чӧлскоз. Таиз ини асьмелы сьӧд-шимес адӟон луоз. Ваньмылы: тыныд но, мыным но, 1: Санькалы но, анаймылы но. 1: - Нош мон асьме юртын ик пипу куар музэн дырекъяса улом шат? Верасько ук: 1: нырысьсэ ӧвӧл ни! 1: - Валасько мылкыддэ, Ирина. Тон йырдэ эн ошы. Огнад ӧвӧл ук, ачим вӧзад. Озьы ик 1: югыт дуннеен люкиськон сярысь но эн малпаськы. Егитэсь ай асьмеос, пумитамы 1: шедем шуг-секытъёсты вормыны кулэ. Онись кенак верамъя, ассэ ачиз быдтӥсь адями, 1: пе, кык полэс сьӧлыко уж лэсьтэ. Аслэсьтыз лулзэ но сьӧдма, матысь адямиослы но 1: куректон кузьма. Сыӵеосты шайвылын гинэ но палэнто: урдсаз, такыр музъеме вато. 1: - Тазьы ик курдаса улом, иське? Уин но весь сайкалляса кӧлӥсько ук, агай, - 1: пумен буйгатске кадь нылаш. - Тон шудонпӧлысь бертытозь синъёсме кыньыны но 1: курдасько. 1: - Мынэсьтым немае эн ваты, Ирина. Нырысетӥ учыраз ик мадёно вал. 1: - Шуисько ук: керпотӥ. 1: - Мынэсьтым возьдаськонэз ӧвӧл. Секыт дыре ог-огмы борды пыкъяськыны мед 1: быгатомы. Асьмеос одӥг анайлэн нылпиосыз ук - агаен сузэръёс! Оскиськы мыным, 1: котьку юртто, ӟеч визь-кенеш сётыны тыршо. Огшоры чебер кылъёс гинэ ӧвӧл та, 1: Ирина. Сюлэм пыдсысь потӥсь кылъёс. Ачид но чакласькы: Герман кудӟыса бертыку, 1: син азяз эн берга. Нош бордад ке мерскиз, вань кужмыныд, куараеныд юрттэт курыса 1: кесяськы. Таӵе шимес дыре возьдаськонэз но керпотонэз палэнтыны быгатэм кулэ. 1: Нош горд Герман шӧмоз ай, солэн пытсэт сьӧры шедемез уг поты. Я, мын, бамъёстэ 1: пылаты но сиськы. Санька кунояськиз ни, дыр. 1: - Уже-а дыртӥськод? 1: - Бен. Туннэ сезьы бусые потом ни. Валокъёсты погыръялом, дыр. 1: - Кемалась юало шуисько вал: малы-о Пачан Миша агай тонэ юрттӥсе басьтӥз? Ас 1: пиез но тонэн огъёз ук. 1: - Коля малы юнме шорысь куссэ някыръялоз? Анай-атаез ческыт сюдо, чебер дӥсяло- 1: кутчало. Алигес магнитофон, мотоцикл басьтыса кузьмазы. Улэп дыръяз ик узьмагын* 1: кадь улэ. 1: * Узьмаг - рай 1: 1: - Озьы ла, - нёжтӥз Ирина, агаеныз соглаш кариськыса. - Эх, анаймы ке ӧй 1: юысал... - кыдёке учкыса лулскиз нылаш. 1: Олег капкатӥ потыкуз шуак берытскиз но Ириналэн тодаз уськытӥз: 1: - Анай ужысь бертӥз ке, сиськыны ӵекты. Нош пӧрмостэм Германлы нянез но эн 1: возьматы. Ачиз ужаса, тыршыса кӧтсэ мед тыроз, айы пуны. 1: 10 1: Эсэпез валасьтэм улон Урак Олеглы малпамтэ шорысь шумпотон ваиз. Со чырткем 1: "андан ужпилэн" кузёез луиз - Пачан Миша агаез велосипед кузьмаз. 1: - Уж дуре, шудонпӧлы ветлыны кемыз лукоз, - шуиз со. 1: - Нош Коляед ма шуоз? - паймиз Олег. 1: - Эн абдра. Номыр уз шу. Пиелы мотоцикл басьтӥ ук. Мед ворттылоз. Нош велосипед, 1: лапас улын сисьмытозь, тон кадь ӟеч адямилы служить мед кароз. 1: - Та быдӟа кузьымез басьтыны ик умой ӧвӧл кадь, Миша агай, - пыкиськыны выриз на 1: Олег. Аслаз шумпотэменыз синъёсыз чилекъяло ни, сюлэмыз луп-луп! йыгаське. 1: - Мон тонэ ӧй ке гажасал, велосипедме сётысал, кожаськод-а? - воргорон тамак 1: аратонъяз буйгатыны дыртӥз. - Огзэ курисько: велосипеддэ дорад эн возь. Со лешак 1: басьтонэд, сюратаед шуисько, ӟенеликен воштыны медаз шедьты. Германлэсь сямзэ 1: ӟеч тодӥсько: кык син куспысь нуназе куазен нырдэ ишкалтоз. Мотри, Онись 1: кенакедлэн лапас улаз возьылы. 1: - Верамдыя ик лэсьто, Миша агай. Туж бадӟым тау. Ку-о милемлы велосипед йӧтысал 1: ай? Кемалась вожъяськисько ни вал, - лӧпшам мылкыдзэ шараятэк ӧз чида Апасов. 1: Вылысьтыз вылаз шумпотон. Олеглэн сотэк но мылкыдыз инсьӧрын поръя ни вал. 1: Комбайн штурвал сьӧрын йӧн-йӧн пукемзэ адӟыса но ужам бервылзэ эскерыса, колхоз 1: инженерзы нуназеян дыръя вань калык азьын ушъяз ук. "Апасовлэсь усто механизатор 1: пӧрмоз, - шуиз со. - Нуналлэн кыӵе луонэз шунды ӝужаку ик тодмо. Ужам бервылзэ 1: эскерыса адӟи: ӟеч пӧрмытэ. Озьы ик азинты, Олег". 1: Дораз бертыса, Олеглэн туннэ сузэреныз вынызлы мар но веранэз ӧвӧл! Син азяз али 1: но синпӧртмась суред: ӵужектэм юосын тулкымъяськись зарезетӥ бусы корабль уя. 1: Комбайнлэн моторез огсыр гуретэ-кырӟа. Интыен-интыен зангариос кырмышъяло, 1: кышкатскыса турак! бурдоос ӝутско. Инбаме тубыса, тюрагайёс кышканзэс вунэто но 1: соку ик кырӟанзэс жильдыны кутско. Жатка азьысь чырткем кечпиос пегӟо. 1: Ӝыт пал, ужзэс йылпумъяса, сюрес вылэ комбайнэнызы ӵошкыт бусы сюрестӥ ширтӥзы. 1: Дырын-дырын кисызэ кутылэ. Отын газетэ бинялтэм котлетъёсыз вань. Сузэрезлы но 1: вынызлы. Шӧмзэс малпаса ик солэн дыльдыез шыр-р кошке. Нош саламзэ исаны уг 1: быгаты. Бусыын нуназеян дыръязы колхзоз столовойысь вуттэм пӧсь шыдэн но ӝукен 1: кӧтсэ тыре ке, котлетъёссэ лушкемак газетэ бинялтэ но кисыяз донге. Таӵе 1: дауртэмзэ ӵош сиськись эшъёсыз синйылто, дыр. Озьы ке но, нокин кыл-куара уг 1: поттылы. Ваньзы валало, лэся. 1: Олег велосипед педальёссэ чырмыт лёга. Котьку сямен ик, кырӟан мытэмзэ но ӧз 1: шӧды. Ӝоген бускель гуртэ концертэн ветлозы. Аслаз репертуараз егит пи ӝожмыт 1: кырӟанъёсты ик пыртӥз. Жингрес, задор мылкыдо кырӟанъёсты чик уг тоды кожалод. 1: Бергась куарлэн усемез кадь 1: Аръёсы но ортчо кадь. 1: Келясал, пумитасал но, 1: Мар-о меда кароно? - 1: дыртӥсь тӧлэн огазеяськыса, кырӟанэз бурдъёссэ вӧлъя. 1: Сюлмы висе, сюлмы возьма, 1: Ӟырдаса кадь со гома. 1: Шудэ вань, дыр, кытын ке но, 1: Мар-о меда кароно? 1: Гурт ураме пырыса, Апасов ву басьтон колонка вӧзын бергась вынзэ синйылтӥз. 1: Санька но огшап паймыса учкемез бере агайзэ тодмаз, лэся. Ури-бери пумитаз 1: бызьыны ӧдъяз. 1: - Кытысь велосипед шедьтӥд? - паймеменыз Санькалэн синъёсыз ик питырскизы. - 1: Кинлэсь ке ворттылыны курид-а? - руль борды ӝабырскиз ни со. 1: - Табере та - асьмелэн, Санёк, - пальпотӥз Олег. - Пачан Миша агайлэн кузьымез. 1: - От, усто! Мон велосипедэн ветлыны-ширтыны быгатӥсько ни, агай, - ушъяськытэк 1: ӧз чида выныз. Бератаз маке малпаськиз но чиньыоссэ куасалляса ик лыдъяны 1: кутскиз. - Агай, мон косэмъёстэ быдэстӥ: колорад бӧчыосты бичай, курегъёсты 1: сюдӥ, шыд лым пӧрамон чорыг кутӥ... 1: Вынызлэсь верамзэ Олег ас сяменыз валатскиз но пальпотыса юаз: 1: - Табере велосипедэн-а ширтэмед потэ? 1: - Кытысь-о тодӥськод? 1: - Синъёсыд верало. 1: - Бен ӧжытак котыръяськысал гурт ураметӥ. Эн курда, агай. Мон номырзэ уг тӥя. 1: Сӧл-тазаен дорамы вутто. 1: - Доре эн вай, Санька. Онись кенаклэн лапас улаз пыртыса кельты. 1: - Яралоз, агай. Косэмедъя ик лэсьто. 1: - Анай-атайёс дорын-а? Ирина? 1: - Анаен апай фермае кошкизы. Кунян клеткаосты, пе, тӧдьманы кулэ. Нош атай... - 1: синъёссэ улэ ошыса, Санька могӟиз. - Кудӟемын. Корказь тубат вылын кырӟан 1: нёжъяса пуке. 1: Велосипедэн ульча кузя чырмыт ширтӥсь вынызлэн бӧрсяз учкыса сылонъяз Олег 1: секытак лулскиз. Кудпала вамыштыны, кытчы сётскыны ик абдраз. Кисыысьтыз саламзэ 1: тодаз уськытыса, вынызлэн бӧрсяз шултӥз: 1: - Санька, берытскы ай, - киыныз шонтӥз со. 1: Санька тӧлпери сямен вуиз. Кышкаса кадь учке агаез шоры: "Оло, велосипедзэ берен 1: куроз? Ширтэме шат ӧз кельшы?" 1: - Бусыысь вуттэм саламме сётыны вунэтӥськем, Санёк. 1: - Мон пумитад соин ик бызиськем вал, - пальпотӥз выныз. - Нош велосипеддэ 1: адӟыса, кӧттыр луи, лэся. 1: - Ме, киостэ миськы но сиськы. Одӥгзэ котлетэз апаедлы сёт. Нош велосипедэн 1: чакласькыса ветлы. 1: Кияз кутэм саламзэ Санька ныр бордаз йӧттыса ик зынъяз но шудо пальышаз. 1: - Мон но, бадӟым будӥ ке, тон сямен ик комбайнэн ужало, агай, - малпанзэ шараяз 1: Санька. - Эсьмаса, тон кадь ик котлетъёс гинэ сиыса уло. Тон трос-а сиид, агай? 1: - Трос, Санёк, трос. Кӧты ик тордӥз, ява! - ым пушказ люкаськем дыльдызэ шуген 1: ньылӥз Олег. - Ужасьёслы колхоз сиёнзэ уг жаля, кӧттырмоназы сюдэ. 1: - Усто-о! - велосипедзэ гуждор вылэ выдтыса, Санька колонка доры кизэ миськыны 1: бызиз. 1: Кудӟем сюратайзэ син азяз пуктыса, Олеглэн мылкыдыз нош ик пильмаськиз. Бусыысен 1: лопырскем шумпотонзэ тӧл нюлыштӥз, оло. Шундыё чагыралэс инбамез йӧзор вуттӥсь 1: сьӧдалэс-горд пилемъёс возъязы кадь. Со дыртытэк дор палаз вамышъяз. Егит пи вож 1: гуждорын бичаськись курегъёсты но уг синйылты, пель сьӧраз ужгур куараос но уг 1: шуккисько ни - йӧгуын кадь чус, кезьыт луиз. 1: "Уть ай, малы одӥг адями куинь пиналъёсты вӧсь карыса, сантэмаса улыны кулэ? - 1: секыт малпанъёссэ лӧдыны кутскиз Олег. - Зэм, Санькаез яратэ, ас пиеныз лыдъя. 1: Маиз понна меда сокем синмаськиз солы анай? Яке бырйыны нокинэ вал ни-а? Ма, 1: Герман но куке чебер воргорон вал, дыр. Ужез но гажам, луоз. Нош али... Сазь 1: нуналыз ик ӧвӧл ук! Эшшо ке анаез но секта. Э-э, - отын ик аслыз пумит луиз 1: Олег. - Юыны мылкыд карисьтэм адямилы кужмысь нокин ымаз аракы уг кисьта ук. 1: Озьыен, анай ачиз, ас мылкыд каремъяз кудӟытозяз юылэ. Бен, гуртазы вань гинэ 1: эсэпсэ валатэк юись воргоронъёс. Но со понна кышнооссы уг юо, асьсэлэсь анай 1: нимзэс уг саптало. Вордэм нылпиоссэс ческыт сюдыны, чебер дӥсяны, кулэ дыръяз 1: визь-кенешъёсын юрттыны тыршо. Кызьы потоно, кызьы мозмытоно та кышкыт, егит 1: мылкыдэз ньылыны турттӥсь ву берганысь? Шаугетэ ук, милемды, шелепъёсты музэн, 1: ас ӧраз котыръя-бергатэ. Тани-тани пеймыт гуаз ньылоз. Оло, Германэн куараез 1: золгес поттыса вераськоно ини? Оло, кӧбералоз но дорысьтымы кошкоз? Нош Санька? 1: Со муспотон пияш но соку, ми сямен ик, "атай" шуыса вазиськисьёслы вожъяськыса 1: будоз ук. Анай но таӵе вамышен реза* уз луы. Яке ньылетӥзэ воргоронэз пыртосэ 1: ӧтёз. Нош соиз Германлэсь но урод ке луиз? Ма кароно, кинлэсь визь-кенеш куроно? 1: Оло, Фаина Николаевналы вазиськоно? Зэм, юртъерысь вань кырсез калыке поттыны 1: умойтэм кадь. Йӧнлы адямиос пож вузэс ураме уг палькко. Но та сямен шыпыт улыны 1: но кышкыт: Герман олома дауртоз. Кутоз но сьӧсь малпанзэ уж вылын быдэстоз - 1: Иринаез эриктэмалоз. Алигес сыӵе учыр сярысь одӥг газет но гожъяз вал. Казаньысь 1: куатетӥ классын дышетскись нылаш, пе, сюратаез эриктэманы турттыку, 1: курадӟытӥсьсэ пуртэн бышкалтыса вием. Кемыз! Ӧвӧл, ӧвӧл, - ас малпанэзлы пумит 1: кариське Олег. - Таиз но йӧнлы, ушъямон вамыш ӧвӧл. Но марысь-мар ке, кызьы со 1: ыштэм нылмурт данзэ чиданы кулэ? О-о, кудлань берга та улон питран? Та пумтэм- 1: йылтэм тугаськем гердъёсты ачим ик сэрттыны-пертчыны кулэ. Мон воргорон ни ук. 1: Онись кенак верамъя, азьвыл мынам ёзъёсы кузпалъяськыса семья кылдыто ни, пе, 1: вал. Э-э, лэсянтэм адями, - кунэрес пальпотэ Апасов. - Йӧнтэм вамыш лэсьтыны 1: гинэ быгатӥсько. Аслэсьтым бадӟым луэмме возьматыса, Зюзя Вара доры кожай, валес 1: вылаз лошъяськи. Вот, 1: 1: * Реза - соглаш. 1: ыжйыр! Ярам ай, тодӥсьёс, сактӥсьёс ӧз луэ кадь. Кыӵе ымныр пыжон луысал! Атай 1: ӧвӧлэз, кужмо воргорон киосты шӧдэмысь дугдӥ, синъёсам меӵак учкыса куаретӥсь 1: ӧвӧлэз шӧдӥ-валай кадь. Соин ик лулпуш "биньгозыме" лябӟытӥ. Котьма ке но, 1: Германэн ӝот-ӝот вераськыны кулэ. Солэн но йырвизь интыяз макня луыны кулэ ӧвӧл 1: ук... 1: Пумтэм-йылтэм малпан гердъёссэ йӧнала сэрттыны быгатытэк ик Апасов капка выжыяз 1: вуиз. Азбараз пырыкуз пыд йылаз ӟечыраса сылӥсь сюратайзэ синйылтӥз. Капкалы 1: пумит султэм но "педло пота". Ымнырыз эгырен шумаськем кожалод, синъёсыз тӧрнаса 1: воксё сюбег кылиллям. Туш-мыйыкез кемалась мычымтэ ни, пушнер кадь ӵогыр-ӵогыр 1: ӝужамын. 1: - Тон воксё адямилыктэ ыштӥд ни шат? - капкаез ворсанъяз куаразэ кужмогес 1: поттыны тыршыса вазиз Олег. - Педло потаны нимысьтыз инты вань ук. Возьыттэм! 1: - Шып, кучапи! - чалбарзэ бирдыяны кутскиз Герман. - Кинлэсь-о курдалом- 1: возьдаськом мон? Тынэсьтыд ке шат? 1: - Мынэсьтым керпотыны уг яра, оло? 1: - Тон нылмурт ӧвӧл ук. Ӵошен мунчое ветлӥськом. Мынэсьтым "орудие трудаме" 1: адӟемед вань, - корка азьысь лёгет вылэ интыяськыса, Герман тамак аратӥз. 1: - Эшшо огпол Ирина борды мерскид ке, мон тынэсьтыд "орудидэ" пуртэн куаӵак вандо 1: но пушнер пӧлы сэрпалто. Валад-а, зын кечтака?! - Олеглэн куараез ик дыректӥз. 1: - Оло, монэ курдатыны малпад, зырымесь? - Олег шоры сиёно кадь учкиз сюратаез. - 1: Пигонэ но уг вырӟы. Туж ик эн шокыштылы. Мултэссэ ке лӧпшады, тонэ но пыд азям 1: йыбырттыто, сузэрдэ но кышно каро. 1: - Ымдуръёстэ гинэ нюлыштод, кечтака! - вожомиз Апасов. - Сыӵе "емышъёсты" 1: веръяны, сьӧсь малпанъёстэ уж вылын быдэстыны эрик уз сётэ. Ӝоген пытсэт сьӧры 1: келялозы тонэ. Мон кинлы кулэ ивортӥ ини. 1: - Оло, участковойлы но шыпыртӥд? - сазьтӥськиз кадь Герман. - Гогыедлэсь вылэ 1: тэтчыны эн курадӟы, уз пӧрмы. Монэн маке умойтэм ке луиз, лысьӧмдэ сузмыто, ява! 1: - Эшшо ке монэ курдатӥськод-а? Ирина борды мерскылэмед сярысь мон Щербаковлы 1: ивортӥ ни. Кулэ бумагаосыз вылэ кинюртэмме но кельтӥ, - сюратайзэ кышкатон 1: вылысь шуиз егит пи. 1: - Лушкаськыкуз китӥз кырмымтэ муртэ ворен уг лыдъяло. 1: - Ми Иринаен ӵошен ке мадимы, вань гурт калык но, суд но оскоз. Адями сямен 1: улэмед ке уг поты, тюрьмаын пукод, ява. 1: - Иське, Иуда музэн, матысь адямидэ вузаны турттӥськод? А-а? - вожпотэменыз 1: тамак пумзэ азбар шоры сачыртӥз воргорон. - Ӧй тодылы, ӧй тодылы таӵе сямдэ. 1: Ялан пинал ошпиен лыдъясько на вал. Утёд ке, тынад лекаськон сюръёсыд ӝужало ни 1: вылэм. Ну ничево, ӝог тӥяло-нажгатъяло сюръёстэ. 1: - Кужмыд тырмоз меда, Герман? Вожомем ошпи куддыр вӧсь карись адямизэ виымон 1: сӧсыръя шуо. 1: - Уть ай кыӵе тон! Ог коркан улӥсь, матысь адямидэ милицилы вузаськод? Иуда! 1: - Тон кытысен, ку мыным матысь адями луид? - пыдъёсызлэсь куалекъямзэс шӧдыса, 1: Апасов кенер вӧзысь кор вылэ лэзькиз. - Оло, мыным маке ӟечсэ лэсьтӥд, шумпотон 1: кузьмад ни? 1: - Анайдылы шумпотон кузьмай. Оген улӥсь кышномуртэ ас бурдъёсы улэ басьтӥ. 1: Яратӥськом ми ог-огмес, Санька но будэ. 1: - Санька понна эн сюлмаськы. Ми сое тонтэк но пыд йылаз султытом, адями каром. 1: Пичи эке ӧвӧл ни со, куинетӥ классын дышетскись пияш. Нош яратон сярысь малы 1: поттылӥськод? Кыӵе яратонзы кык юисьёслэн? Ярам ай, возьыттэм "дауртэмдэс" мон 1: гинэ адӟисько. Санькаен Ирина шыр гольык мугордэс медаз адӟе шуыса, ӵемысь 1: кыктэс ик шобыръяса кельтылӥсько. Коттэм, ӧскем бервылъёстэс юрдыса- 1: вукекъяськыса утялтылӥсько. Нош тон яратон сярысь поттылӥськод. Тӥляд яратонды 1: аракыен ӟенелике зымемын ни. 1: - Озьыен, дорысьтыды улляськоды монэ? 1: - Мон уллясько. Юртамы тон мултэс адями, дасьсэ сиись. 1: - Э-э, вупульы музэн эн лӧпша, Олег. Берпуметӥ кылзэ анаед вераны кулэ. 1: - Пересьмем кыр парсь сямен, огнад ортчытод тон берпум нуналъёстэ, Герман агай. 1: Малпаськы. Мон шудыса уг вераськиськы тонэн. 1: Апасов интыысьтыз ӝогак султӥз но бакча беразы дыртӥз. Шӧдӥз со: та сяна лек 1: кылъёс вераны уз быгаты ни, чыртывыжыяз лёг кугӟаз. Аслэсьтыд арлыдо муртлы 1: чурыт кылъёс веран шат капчиен сётскоз? Ярам, ӧжытак коть, оло, кӧбералоз, 1: шыпытгес кариськоз. 1: 1: 1: 1: 1: 1: 1: 1: 1: Тӧл тӧла пумыз Уж дураз ӝегатскемен, Апасов ӝыт шудонпӧлы беромыса вуиз. Пинал мылкыд шулдыръяськыны ӧте, эшъёсыз вӧзы куриське но, мар карод, табере комбайнеръёс бер ӝытозь арало-кутсало. Будэтэмзэ уго ыштонъёстэк, вакчи дыр куспын октыса-калтыса быдтыны, колхоз кеносъёсы вуттыны кулэ. Нылъёслэсь палэнын люкырак сылӥсь эшъёсызлэсь киоссэс кутылыса, Олег, синъёсыныз гинэ утчаса, Ларисаез шедьтӥз. Адӟиз: нылмурт малы ке йыркуро кадь, мӧзмылэс тусо. Лызпыръем синъёсыз но ӝожмытэсь. Нунал ӵоже лудын тырше бере, Олег гуртысьтызы выль иворъёсты беромыса кылэ. "Оло, Ларисалэн дораз маке умойтэм луиз? - малпаз егит пи. - Кинлэсь-о юано?" Со отын ик Тюкан Валентинэз палэнэ ӧтиз: - Ларисаен маке луэм, оло? Тусбуез ик воштӥськемын кадь. - Тыныд йыркуръяське, луоз, - сигарет аратонъяз мынектӥз эшез. - Малы? - эшезлэн суй бордаз кырмиськиз Апасов. - Тон ма сярысь? - Пель сьӧрад ӧз шуккиськы на, иське? - серектӥз Тюкан Валентин. - Тынад Дон- Жуан кариськемед быдэс гуртэ шараяськиз ни ук. Зюзя Вара одӥг учырез вань кышноослы, нылъёслы горыса, пе, мадем. Ларисаед но итыме ю шертыны ветлэ бере, кылэм, луоз. - От, бызьылӥсь пуны! - палэнэ сялӟиз Олег. - Ведь кыл сётӥз: одӥг улэп лул но, пе, уз тоды. Урак Олеглэн быдэс мугорыз пӧсектӥз, вань вирез быректӥз кадь. Ымнырыз, мугорыз лек пушнерен шачыръям адямилэн музэн кужекъя. - Вай одӥг сигарет, Валентин, - куриз со, эшсэ писпуос пӧлы валтыса. - Тон уд ӵындӥськы вал ук. Мар-ось дауртӥськод, Олег? - Сюлэмы, мылкыды ӵуштаське. Вай ӝоггес! Сигарет ӵынэн ӵоксузьыса лулскиз: - Кыӵе умой ни вал Ларисаен кусыпмы. Ӝыт пумиськонмес чидатэк возьмаллям. Малпаськытэк лэсьтэм вамыше, асме арлыдоен лыдъяны турттон сямы ваньзэ сураз- пожаз. Да-а, - лулӟиз Апасов. - Тупаны но кулэ ук. Дышетсконмес огдырлы куспетӥ карыса, ваньместы колхоз ужъёсы ысъязы. Эх, Лариса ю тысь шертон итыме ке ӧй тупасал! Тьфу! - сялскиз со. - Мыдъят та сигаретэз ымам но медам тырылы ни. Мылкыдам-лулам курыт вылэ курыт гинэ ватсаз. - Нош "ческытэз" сярысь шып улӥськод. Озьы-а? - пальпотӥз Тюкан Валентин. - Мадь ай, мадь Зюзя Вара доры ветлэмдэ. Оло, монэ но улон сюрес солэн капка дораз вуттоз. - Сюресэд палэнтӥ мед ортчоз, Валентин. - Э-э, озьы эн шу. Аслад со уе мылкыдыд йӧлвыл лушкаса сием айы коӵышлэн выллем вал, дыр. Шонер-а верасько? ...Спектакльлы репетицизы йылпумъяськем бере Олег сцена вылысь васькиз но залысь эшъёсыз доры мынӥз. - Ну бен витьытӥськод, Олег, - куаретыса пумитаз Тюкан Валентин. - Малы-о сокем витиськоды? Котьку сямен ик, репетиция дыраз йылпумъяськиз, - суйпосысьтыз чассэ синйылтӥз Олег. - Вунэтӥд, оло, туннэ кыӵе нунал? А-а? - мыньпотӥз Валентин. - Кызьы вунэтом? Шумот* ӝыт. - Э-э, огшоры шумот гинэ ӧвӧл ук. Комбайнэн ужаса, йырвизьмад тузон пуксем ни, лэся, - серектӥз Тюкан Валентин. - Коляез ӟечкыланы вунэтӥськод, - Пачан Коля шоры учкиз со. - Эшмылэн вордскем нуналэз ук, кылчинэн эшъяськем нуналэз. - Вот, албасты! Зэмзэ вунэтӥськем, - пальпотӥз Олег. Пачан Коля вӧзы лыктыса, эшезлэсь кизэ юн-юн кырмыса вазиз: - Ӟечкыласько, Никол. Шуд, тазалык. И главноез... - ӟеч кузпал мед шедёз. Пиос огӵош серектӥзы. Пачан Коля ӝутскем мылкыдын ӵектӥз: - Ойдолэ мултэс синъёслэсь, пельёслэсь палэнскоме. Шур дурысь лабрес льӧмпуос вӧзы вуыса, Пачан Коля турын-куарез киыныз солань- талань палэнъяз но отысь тыро сумка поттӥз. - Пичияк "вӧсяломе" ай монэ. Югыт дунне вылэ вордскем нуналме данъялом. Коля сумкаысьтыз сиён-юон, кабак аракыен полуштоп поттӥз. - Оло, кудӟытӥсь юон веръяны малпады? - кушетскиз Олег. - Лимонад-а юэмед потэ? - меӵкытӥз Тюкан Валентин. - Асьмелэн сыӵе арлыдмы ортчиз ни. - Мон со аракы зынлэсь ик курдасько ни, пиос, - берлань сётскиз Апасов. - Куддыр коркась омырен но кудӟисько кадь. - Асьмеос трос ум юэ, быдэн чарка гинэ луоз, - чаркаосты тырмытъянъяз вазиз Пачан Коля. - Мон... нырысьсэ ӧвӧл ни. Атае кудӟем дыръя кык пол пичиен-пичиен веръялляй. - Мынам но веръяме вань, - данъяськыса сямен ивортӥз Тюкан Валентин. - Пичияк юыны врачъёс но дэмлало - "Здоровье" журналысь лыдӟи. - Тӥ юэ, пиос, мон сиёндэс гинэ веръяло, - турын-куар вылэ лэзькиз Олег. - Тон инмарлэн кашка такаез, оло? - мыньпотӥз Валентин. - Милемды эшъёсын ке лыдъяськод - юод. - Монэ шат уд гажаськы, Олег? - тыро чарказэ удыса, эшезлэн синъёсаз меӵак учкиз Пачан Коля. - Ю. Берпуметӥез но медаз луы. Озьы шуо арлыдоос. Эшъёсыз кема сюлворемысь, вукекъяськыса-вукекъяськыса ке но, Олег юиз. Огшап вераськыса пукемзы бере кудӟытӥсь бус йырвизьмазы шуккиськиз. Ӟабыльто, лабырто пиос. Апасов но сюлмаськонъёссэ, курыт малпанъёссэ огдырлы вунэтӥз. Капчи, умой луиз солы. Серекъя, анекдотъёс маде... Шулдыръяськись эшъёссы доры мыныны султэмзы бере Пачан Коля ӵектӥз: - Ойлолэ пичияк ватсалом на. Мынам уксёе вань. Анае вордскем нунал понна кузьым басьтыны сётӥз вал. - Нош кытысь басьтыны малпаськоды? - пумитъяськонзэ вунэтӥз Апасов. - Бер ни ук. - Зюзя Вара вузкаре. Магазин ворсаськем бере воргоронъёс со доры ветло, - ивортӥз Тюкан Валентин. - Ветлы, Олег. - Нош малы мон? Ойдолэ куиньнамы. - Ми тон сярысь мугорын но чиед, собере... атайёсмы вань. Кылӥзы ке, йӧттозы, - мугзэ шараяз Валентин. - Нош тыныд кинлэсь курданэз? Ачид юрт кузё интыын. - Уг, уг ветлы. Уй куазен мурт доры йыгаськыны умойтэм. - Куриськонмес быдэсты, Олег, - уксё урдыса вазиз Пачан Коля. - Кызьы шуо ӟучъёс, не в службу, а в дружбу. - Пиос, ойдолэ ум юэ ни. Тырмоз. Мон та юэменым но вукекъяськисько. Эшшо ке Ларисаез келяно на. - Ӧд ке юы, мырт* ум каре. Милемлы гинэ басьтыса вутты, - сюлворе Тюкан Валентин. - Ларисаед огназ но уз йыромы. Ас гуртаз ук, келясьтэк но корказэ шедьтоз. - Кудӟон мӧль йырвизьмес онгыратӥз ук, пиос. Сабырлыкез ыштыны кулэ ӧвӧл, дыр. - Кудӟем мурт музъем вылын лошъяське. Нош асьмеос пыд йыламы йыг-йыг сылӥськомы. Апасов ӧжытак малпаськыса сылӥз но ӝотак вазиз: - Вае уксёдэс. Татын ик вите. - Ӝог ветлы, Олег. - Сюресэд мед удалтоз... * * * Апасов, кышкатскем койык музэн, вайёсты тӥяса дыртэ. Кӧлыны интыяськем бурдоос кышкатскыса турак! ӝутско но мукет вайёсы ватско. Зюзя Варалэн коркаез Тыкырык урамлэн пумаз сылэ. Капка выжыяз - куинь арлыдо топольёс. Анаез кулэм бере юртэз кӧня ке ар кузётэк сылӥз, но кузпалэныз люкиськем бере егит кышномурт выльысь ас юртаз берытскиз. Табере огназ, пиосмурттэк улэ Вара. Юртъерез но йыг-йыг выльдэмын, тӥр усточиосты медъяса, чебер, аспӧртэмлыко пужыё капка но пуктытӥз. Вара колхозысь пӧртэм ужъёсы ветлэ - бригадир кытчы ыстэ, отчы. Ма, зэмзэ вераса, колхоз уж понна йырыз сокем ик уг вись: ужлэсь палэнскыны муг гинэ утчаса улэ. Дораз трос пудо вордэ, эсьмаса, мушъёс но возе. Шаплы кылыз но, кильтро синъёсыз но трос лэсьтыны быгато кадь. "Вӧямтэ табаысь но табанез лӧпкытоз" шуо со сярысь гуртоос. Тани табере мукет ӧнер шедьтӥз: уйёсы но коньдон дуре - аракыен лушкем вузкаре. Кышноос участковойлы ӝожтӥськизы вал - номыр ӧз воштӥськы. Мугез валамон: ужен гуртазы вуылыкуз Щербаков капитан ӵемысь Зюзя Вара дорын кӧла. Укнояз тылъёс уг адско ни. Кышномурт шутэтске, лэся. Укно пиялаос вылын толэзь кильёс гинэ чильпырало. Апасов дӥсьтыса но дӥсьтытэк, чиньы йылыныз гинэ, укно пиялае коканы ӧдъяз. - Кин отын? - соку ик укно вӧзын кышномуртлэн вужерез адскиз. - Урак Олег мон. Усьты ай, Варапай. Ог полуштоп аракы кулэ вал. - Уксёед вань-а? - Вань, вань. Тани, - кисыысьтыз уксёзэ поттыса, укнолы матэ кариз Олег. Кема ӝегатэк, капка пуннет шальк! куаразэ сётӥз. - Ойдо, пыр. Вара тыл ӧз ӝуаты. Ма, коркан сотэк но нуназе кадь югыт: ньыль укноостӥ тулляськыса кадь толэзь сиос пыро. Калык верамъя, киргам венез но шедьтыны быгатод. Вара буртчин чильтэро ул дэремен гинэ. Егит кышномуртлэн мугорыз шоры палёмемзэ валаса, Олег синъёссэ укно шоры воштӥз. Со дыре ик мугораз олокыӵе валантэм кужым чуртнаськиз кадь. - Сюратаед-а ыстӥз? - уксёзэ укно югытэ лыктыса лыдъянъяз тунсыкъяськиз Зюзя Вара. - Ӧвӧл, эшъёсы ыстӥзы, - ватытэк верано кариськиз Апасов. - Пачан Колялэсь вордскем нуналзэ пусйиськомы. - А-а, - нёжтӥз Вара. - Шӧдӥське, шӧдӥське курытсэ веръямед. Кылъёсыд ик могӟыло. Зюзя Вара валантэм мынектӥз но, уксёзэ шкаф вылэ поныса, гур сьӧры вамыштӥз. Кема ӧз ӝега - тыро графинэн берытскиз. - Графинэн вузаськоды, оло? - Уг. Та - аслам пукетэме, куасьтэм чиялэсь дасям настойкае, - чаркаос вайыса, Вара соосты тырмытъяны ӧдъяз. - Мынам кемалась ни тонэ кунояме, нокинлы шараятэк, сюлмам нуллэм кылъёсме тыныд вераме потэ, Олег. Ваче син пумиськыса вераськыны муг гинэ ӧз шедьылы. - Ма сярысь тон, Варапай? - Вара гинэ шу, - мынектӥз егит кышномурт. - Мон сокем арлыдо уг адскиськы на кадь. Озьы-а? - Уд, уд. Егит адскиськод. Мынэсьтым арлыдо луэмысьтыд озьы вазиськи. - Ӝӧк сьӧры интыяськы, Олег. - Ма муген кунояськыса пуком? Эшъёсы витё. - Я, эшъёсыд нокытчы уз пыре. Тонэ кунояме потэ. Лушкем малпанъёсме шараяме но. Зюзя Варалэн валантэм лабыртэмез Олеглэсь мылкыдзэ гочатыны ӧдъяз: "Ма сярысь-о мадьыны турттэ меда?" Кышномурт ӵектэмысь, Олег кудӟытӥсь юон пумысен шур дурын сямен пыкиськыса ӧз улы. Чаркаоссэс жингырак! шуккылыса, огзэ бӧрсьы мукетсэ кымалтӥзы. Ӝоген Апасов воксё кыло-ымо луиз. Пальпотэ, олома но лабыртэ. Нош синъёсыз, сютэм пӧйшур выллем, кышномурт мугорез учко-сӥсъяло. Чебер возиське на Зюзя Вара. Кык пол кузпаллы бызьылыса но егит ныл выллем адске. Нылпи вордымтэысьтыз, вылды, сыӵе. Уй пеймытын но гуртоезлэсь тусбуйзэ Апасов син азяз ӟеч пуктэ. Варалэн синъёсыз зангари тусъемесь, синкашъёсыз ӵужмытэсь, бабля йырсиез - мертчан. Но али, толэзь югытын, кышномуртлэн быдэс мугорыз сюсьтыл кадь веськрес, ыргон тусъем адске, йырсиосыз чильк-вальк кисьтасько. - Вара, тон малы огнад улӥськод? - Сюлмылы кельшымон адямиез ӧй пумита на, Олег, - валэктӥз кышномурт. - Но... кык пол... яратытэк шат бызьылӥд? Кышномурт шӧдэ: чия настойкаез ас ужзэ лэсьтӥз - егит пи кудӟиз но лӧпшам мылкыдзэ кутыны ӧз вормы ни. Соин ик Вара султӥз но Олег вӧзысь пукон вылэ лэзькиз. - Ёрмем ӵӧж, пе, берлань уя. Монэн но озьыгес луиз, Олег. Бызьытэк кылем арлыдо нылмурт медаз нималэ шуыса, чик яратымтэ адямиосын сюан шудыны соглаш кариськылӥ. Зэм, уг ваты: мынам но сюлмысь яратонэ вал. Визьме ыштымон, аракы веръятэк кудӟымон яратӥ мон сое. Нош гажам-яратэм ӟыгытэ ӧз вала монэ, дунъяны ӧз быгаты, лушкемак палэнтӥз но сюлэмзэ мукетызлы кузьмаз. - Яратон сярысь романын выллем мадиськод, Вара. - Романэз но улэп адямиос гожъяло ук. Асэнызы но куке сыӵе учыръёс луылӥзы, вылды. - Озьы, шонер вераськод. Книга лыдӟыкум мон ачим но ӵемысь сыӵе малпанэ вуылӥсько. Вераськон куспетӥзы Вара шӧдонтэм улсын гинэ Олеглэсь бур кизэ кутӥз но гольык макес вылаз выжтӥз. Апасовлэн киыз ик сутскиз кадь, шоканзэ ик ыштӥз. Нош кизэ берен басьтыны ӧз дырты. Сюлэмыз гинэ, ворттӥсь валлэн музэн, луп-луп йыгаськыны ӧдъяз. - Мон тонэ кемалась синйылтыса возисько ни, Олег. Чебер, синмаськымон, ныл сюлэмъёсты лушкемен ӵушкась ӟыгыт луыса быдэ вуиськод. Ульчаысен пумитаса шорад ке учкисько, быдэс мугоры пӧсьвуаське. Ас арлыдме ик вунэтӥсько. - Малы озьы, Вара? - Одӥг муртэ тодам вайытӥськод. Нырысь яратонме. - Асьме гуртысь-а вал? - Асьме гуртомы, - секытак лулскиз кышномурт. Графинысь настойкаез чаркаяз ӧжытак пальккиз но Олеглэсь юаз: - Юод на-а? - Уг, уг. Сотэк но йырвизьмам муш палэп гужетэ ни кадь. Эшъёсы но витё. - Вунэты эшъёсыд сярысь, - Вара Олеглэсь йырсизэ маялтӥз. Собере кильтро серектӥз: - Ларисадэ лушкем мусояны вутскид-а ни? - Ӧй. Кытысь-о дӥсьтонлык шедьтом? Ма, Ларисае но сыӵегес: ӟыгыртыны но, луч-луч чупаны но уг лэзьы. - Кыткылымтэ толэс, иське? - Со выллем. - Эх, мон но куке сыӵе вал, Олег. Ваньмыз ышиз-тӧлӟиз. Лобӟись аръёс сьӧры, сильтӧлэн ӝутскем тузон катанчи сьӧры согиськиз. Ойдо валес вылэ, - интыысьтыз султыса, Олегез койка дораз валтӥз. Апасов но аслэсьтыз ма дауртэмзэ валамысь дугдӥз кадь. Магнит сьӧры кыстӥськись корт пыры музэн, Вара сьӧры сётӥськиз. Кышномурт нош чылкак возьытсэ ыштӥз, лэся. Буртчин ул дэремзэ сэрпалтӥз но Олеглэсь дӥсьсэ кыльыны кутскиз. Урак Олег ӧз пумитъяськы. Соин олокыӵе валантэм кужым кивалтыны ӧдъяз. Синъёссэ сырк-сырк выретыса учке чырткем вырись нылкышно киос шоры. Со виын Вара абдраса сылӥсь пиез небыт валес вылаз кыскиз. Кык гольык мугоръёсты, кӧбераса выллем, тыр толэзь югдытэ. Арлыдын пӧртэм адямиослэсь лушкем яратон-мусояськемзэс шараяны керпотэ, лэся. Олеглэсь мугорзэ тазьы, небыт маялляса, лул-мылкыдзэ гочатыса, нокин ӧз мусоялля на вал. Сое шуныт Лӧзь тулкымъёс нуныяло кадь. Зюзя Вара нош вань мусояськон устолыксэ возьматыны тырше. Егит пилэсь бамъёссэ луч-луч чупа, кылыныз ымдуръёсаз йӧтскылэ. Олег шоканзэ ик вунэтӥз кадь. Оло возьдаськеменыз, оло синъёсаз веттаськись шумпотонзэ шараяны дӥсьтымтэеныз, синлысъёссэ ик валчеяз. Солэсь сяртчы кадь вольыт, сӥльвиро мугорзэ Вара йӧнлыко мусоя. Кышномурт киос пумен дӥсьтӥсьгес, возьыттэмгес карисько. Кый сямен позыръяськыса, соос пи мугор кузя улӥегес но улӥегес васько... Ӝоген кыксылэн ик мылкыдзы инме ӝутскиз. Валче герӟаськем гольык мугоръёс ог-гзы бордысь палэнскыны ӧз дыртэ. Олег, сьӧлыко ужзэ малпаса, йырзэ Варалэн лопырскем йырсиосыз пӧлы ватӥз но мыньпотӥз: "Адамен Ева но таӵе ик шудоесь выллӥлям, дыр. Мугор но аслэсьтыз инкуазен тупатэм шумптонзэ лушкем горыса басьтэ". - Вара, яратӥсько, лэся, мон тонэ. Э-э, янгыш вераны шедьтӥ. Синмаськи кадь тыныд, - валес вылэ выдэмзы дырысен нырысьсэ пельдӥньёсты чупанъяз шыпыртӥз Олег. Зюзя Вара серектӥз гинэ. Со дыре ик киосыз Олеглэн чыртыяз кый сямен биниськизы. - Огшоры гинэ вераськод тон та кылъёсты, Олег, - лулскиз кышномурт. - Яратонлэсь мазэ-созэ тодытэк, шӧмзэ, дунзэ валатэк. - Тон ваньзэ тодӥськод-валаськод, иське? - Мон огзэ ӟеч тодӥсько: кыӵе секыт но кыӵе курыт, куке ӧвӧл тонэ яратӥсь, мусо кылъёсты шыпыртӥсь адями. Сыӵе дыръя улэм но улэм кадь ӧвӧл, пеймыт дунне но, югыт нунал но огтусъемесь. - Вара, нош мон тыныд кинэ-о тодад вайытӥсько? - гырпумъяськыса, кышномуртлэн валантэм чилекъясь синъёсаз учкыса юаз Апасов. - Атайдэ! - Мар-р? Малы? - Эн паймы, Олег. Тынад атаед - Урак Толя - мынам нырысетӥ яратонэ вал. Италмас сяськалы возь вылэ ветлыкумы нылйырме со талаз. Секыто луэме сярысь ивортӥ но, атаед вӧзысьтым ӝогак палэнскиз. Валэктонэз вакчи вал: кузпалъяськыны вазь на, пе. - Нош нылпиды? Ӧз вордӥськы шат югыт дуннее? - Больницае ветлытэк ӧз лу, - ӝожмыт лулскиз Зюзя Вара. - Нош Толя со сӥзьыл ик анаеныд сюан шудӥз. Олеглы шоканы ик секыт луиз. Огшап чус кыллемез бере мылкыдтэк валес вылысь султӥз но дӥсяськыны кутскиз. - Вара, - вазиз со, - мыным аракыед кулэ ӧвӧл ни. Берыкты уксёме. Ӵуказе Пачан Колялы сётыкум эрекчало, тон дорад ӧд тупа шуо. Кышномурт вылаз ул дэремзэ гинэ бырттӥз но, шкаф вылысь басьтыса, уксёзэ сётӥз. - Нош ик вуылы, Олег, - ӧс пала вамыштэм уй кунозэ куриз со. Кильтыро серектӥз на: - Ачим лушкем яратонлэсь вань чеберлыксэ шараяло. - Вара, - огдырлы могӟиз Урак Олег. - Та уй сярысь нокинлы эн поттылы, ява. - Уг, уг шарая. Нош кема мӧзмытыса ке возид, ваньзэ ватытэк мадё, - оло серем пыр, оло курдатыса вазиз Зюзя Вара. Дораз Олег шур дуртӥ, бакча беръёстӥ ватскыса бертӥз. Сьӧлыко уй сярысь матысь эшъёсызлы но мадьытэк чидатскиз. Мылкыдыз гочатыса ӧтьылӥз ке но, Вара доры мукетъят ӧз йыгаськылы ни со. Инсьӧрысен ас пизэ лушкем эскерись атай синъёслэсь курданы кутскиз. Арлыдоос верало ук: Ин эксэйлыке шедем адями, пе, пилемъёс сьӧрысен учкыса, ваньзэ тодыса, адӟыса улэ. - ...Зюзя Вара туж умойтэм лэсьтӥз, - Тюкан Валентинлэн пельпумаз чабкыса ик мадёнзэ йылпумъяз Олег. - Кый музэн лушкемен лексиз. Кык муртэ огӵош: монэ но, Ларисаез но. 12 Ёросын шулдырак юмшаса кошкем уй зор бере шоканы ик капчи луиз. Тузонэн напчем омыр чылкытомиз, писпуос, турын-куаръёс вож-бусӥр тусо кариськизы. Эсьмаса, беромем бурдоослэн ӟильыртэмзы, дуриськон куала* палась тэкич** тышкам куараос ик пезь-пезь чузъясько. Комбайнеръёс туннэ уг дырто. Мастерской вӧзысь кор вылэ интыяськыса, соос тамак ӵындыса, анекдотъёс мадьыса пуко. Комбайнъёссэс уго уйлы бусыосы кельтыло: сопала-тапала юнме ветлыса, эстӥськон гинэ мултэс сутске. Таӵе секыт дыре уго котькызьы, котьмае шыръяны тыршо. Техниказы ке татын луысал, воргоронъёслы уж шедьысал - мазэ но созэ тупатъясалзы, вӧясалзы. Шунды но воргоронъёслэсь мылкыдзэс вала, лэся. Вазь ӵукнаысен ик тырше ни, пӧсь тылсиоссэ жалятэк музъемлы кузьма. Син азе шарак йӧтэ капчияк воринъяськыса ӝутскись бус. Ас эшез сярысь сюлмаськись адями музэн, шунды зор бервылэз ӝоггес тӧлӟытыны-шупатыны тырше. Апасов пуксем интыысьтыз кык пол ӝутскылӥз ни. Миша агаеныз кенешыса, дораз бертылыны малпа вал со. Нош адямилэсь лушкем малпанзэ тодыны-шараяны быгатод шат? Соин ик Пачан Миша ас юрттӥсез пала уг ик учкылы - кылзэ мукетыз пумысен шере. Олег вень йылын кадь пуке. Нош арлыдо эшез доры матэктыны кепыра. Кутоз но шуоз: "Ужан дыръя малы-о дорад дыртӥськод? Ужан интыяд лу!" Пачан Миша али воксё эрико, аспӧртэм дуннее шедем, кожалод. Синъёсыз чилекъяло, ымдуръёсыз вӧлскемын, киоссэ шонаса, артист музэн мадиське. Озьыез но озьы уго: анекдотъёсты мадьыны но быгатон кулэ, сотэк серемес мадёсэд адями ымдуръёсты уз пальышаты. Пачан Миша кысэм папироссэ аратэ но выль мадёссэ мытэ: "Одӥг нуналэ, пе, кышноос пӧлын ченгешон ӝутскем: малы пудо-животъёслэн, пӧйшуръёслэн нылпиоссы вордскем беразы ик пыд йылазы султо но чырткем бызьылыны кутско? Нош адямилэн нылпиез ар ортчытэк тэтэ уг кары - кык пыд вылаз уг султы. Куспазы кенешиллям но пуктӥллям: Насьтӥез но Марьёкез Инмар доры ыстоно. Сюлэмшугъяськытӥсь юанзылы, пе, Инмар валэктон мед сётоз. Кышномуртъёслэсь кӧтӝожзэс, юанъёссэс кылзыса, Инмар шуэм: "Быгатӥсько мон озьы лэсьтыны: тӥляд нылпиосты но вордскемзы бере ик ветлыны кутскозы". "Ма кароно со понна?" - пӧсекъя, пе, Марьёк. "Пудо-животъёс, пӧйшуръёс сямен ик, кузпалдылэсь гольык мугорзэ араз огпол гинэ яратоно-мусояно". Таӵезэ кылыса, ӧс сьӧрын сылӥсь Насьтӥ дангыр тэтчаны кутскем: "Соглаш эн кариськы, Марьёк! Соглаш эн кариськы! Асьме нылпиосмы вордскем беразы ик пыд йылазы медаз султэ. Малы со кулэ? Нош кузпал вӧзын луллы капчигес, эркынгес". Воргоронъёслэн горемзылэсь кышкатскыса, вож гуждор вылын бичаськись ӟольгыри уллё ик турак! ӝутскыса лобӟиз. Апасовлэн но ымдуръёсыз вӧлско. Нош Зюзя Вараез тодаз вайыса, ымнырыз ик ӵыжектӥз. Арлыдоослы ваньмыз тодмо - уг гинэ поттыло кадь йӧтэ солы. Бератаз Олег чиданлыксэ ыштӥз - Пачан Мишаез палэнэ ӧтьыса вазиз: - Миша агай, мон дорам бертылыны малпасько. Ма но со ужъёсы вань. Нуназеям бере бусые мыном шуиськоды кадь, соку ик лыкто. - Мар-ось уж шедьтӥд? - Бакча берысьтымы нёжалэз турнано вал. Онись кенак кык кечпиоссэ вордыны ӵектэ. Йӧлтэк улыны умой ӧвӧл ук. Турнаны но беромим ни. Озьы ке но, нёжалын турын умой адске ай: нап, вож-вож сылэ. - Мын, иське, берт, турна. Кусоед нош вань-а? - Кӧня ке ар ӵоже мунчо сарачаын сыныса, шальтыраса кылле ни. Пудо сиён дасямтэ бере, кин-о тупатъялоз соосты? - Ми доры кожа, Олег, - ӵектӥз Пачан Миша. - Ӟеч-ӟеч валэкты но, Матрон кенакед сётоз. Мон косӥ шу. - Яралоз, Миша агай. Ализэ тӥлесьтыд басьто, нош дыр шедьыку, оло, милесьтымзэ но тупатод. Асме но со ужлы дышетӥд ке, умой вылэм. Онись кенак верамъя, быгатэм, пе, сиён уг куры. - Ярам, вераським. Нош али мын ни, эн ӝега. Турынэз кот-мускыт куазен турнаны каньыл. Капкаетӥ пельпумаз кусоосын пырись пизэ адӟыса, Урак Нина паймиз. Собере серем пыр юаз: - Оло, комбайн интые, кусоен турнаськоды ни, пие? - Кыкнамылы уж шедьтӥ ай мон, анай, - пальпотӥз Олег. Собере анаезлы ваньзэ радызъя мадиз. Выль иворез кылыса, Урак Нина лулскыса пальпотӥз. Пиезлэсь быдэ вуэмзэ-а, юрт сярысь сюлмаськемзэ-а шӧдӥз - созэ ӧз шарая. * * * Нёжалын турын жалем возиськем на. Ӵужектыны, куро кадь чурыт луыны вуымтэ. Азьвыл аръёсы Уракъёс татысь трос пудо сиён дасяллязы. Нош гидъёссы шал-шал бушесь кылем бере кусоен ӧз поталэ ни - я Онись кенаксы турна, я мукет гуртооссы. Туэ кечпиос сярысь Онись кенакеныз кенеш каремзы бере Апасов нёжалэз синйылтыса улыны тыршиз - турнан удысэз нокин медаз иса. Озьы ке но, беромизы тани. Турынъёс тысямын ини. Сыӵе турынлэн ӟечлыкез трослы синэ, шуо. Нош ма карод? Азьланяз чупырскылозы ни. Анайзэ азьпала лэзьыса, бӧрсяз Олег быгатыса но быгатытэк кусоен шонаське. Кусо йылыз ӧчкарем кадь музъеме ӵогъялскылэ яке турынэз выжытӥз уг ванды. Урак Нина уж вылын возьматъя пиезлы, кызьы кусоез возёно, кызьыгес нюртоно, кызьы каньылгес турнано. Мылзы потытэк кадь пограло будосъёс. Турнасьёслэн пыдъёссы суч-суч котмиз ни. Ог час ёрос кусоен шонаськемзы бере лабрес лулпу вӧзы шутэтскыны дугдӥзы. - Асьмелэн Гордань скалмы ӟеч выжыысь вал кадь, анай. Озьы-а? -юаз Олег. - Али но мынам пель сьӧрам шуккиське кадь солэн гырлы куараез. - Йӧно скал вал, пие. Туж йӧло-вӧё. - Школаез ӟечкын пырпотӥ ке, выльысь скал выжы уськытом. Гуртын улыса вылысь шат фермаысь йӧл нуллыса сиёд? - Пӧрмытом меда, Олег? - синъёссэ шур пала воштӥз Урак Нина. - Ай мон гурт кеч выжы уськытыны дӥсьтэмедлы но паймисько. Дасям турынмы исатэк ик сенике кылёно медаз лу вылэм. - Малы озьы шуиськод, анай? Ас кужымедлы уд оскиськы-а? Яке сюратай вузалоз кожаськод? - Ма шуыны, кызьы валэктыны но ёрмисько, пие. - Кемалась юало шуисько ни вал но, ӵошен гинэ ум кемдӥське. Ма, собере ачид но ӵемысь кудӟемын луиськод. Юэм муртэн кинлэн-о кенешемез потоз? - Ма сярысь тунсыкъяськиськод, пие? - Юанме шонер вала, анай, - вӧзысьтыз ӝакысяськаез чигтӥз но сое кияз бергатонъяз куриз Олег. - Оло йыркуред но лӧптоз, оло монэ куаретод но... - могӟиз со. - Сюратаез дорысьтымы улляса умойгес ӧй луысал меда? Кышномурт пельпумъёс синме йӧтымон дыректӥзы. Синъёссэ шуяны кутскем турын шоры воштыса, Урак Нина секытак лулскиз. - Кузь мадёс кылдоз, дыр, пие. Туж кузь но сылал кадь кузьыт, пӧсьтурын выллем курыт... - Асьмеос ӵошен гинэ ук. Мултэс син-пельёс ӧвӧл. Мон но номае валасьтэм пичи эке ӧвӧл ни. Мадьы, усьты мынэсьтым вотсаськем синъёсме. Урак Нина, малпаськыса, мадён-ӝожанзэ кызьы мытыны ёрмыса, огшап чус улӥз. Кышет улысьтыз потэм йырсизэ лач-лач тупатъяз но, кыдёкысь инвисэ учкыса, пиезлы юанэн ик вазиськиз. - Ма сярысь бен шуод, пие, егит кышномуртлэн вӧсьёсыз? - Уг тодӥськы, анай. - Бен, тон сое тодыны но кулэ ӧй вал. Нош мон атайдэ ватэммы бере воксё йырсазьме ыштӥ кадь. Югыт дунне ик чукинскиз кожай. Ас улонме кулон эзельлы кузьман сярысь но огпол гинэ ӧй малпаськы вал ини. Нош вӧзам тон. Кызьы-о тонэ сирота кельтыса кошкыны кулэ вал мон? Коросэ интыяса, шайвылэ мон атаедлэсь мугорзэ гинэ ӧй келя. Азьланезлы ӟеч осконъёсме но, яратоно адямиме но, луоно шудме-бурме но, дэлетме но келяй. Ог выжыысь будосъёс но пӧртэмесь луо, пие. Огез тӧллы но чидатэк чиге, мукетыз кезьыт йӧзорлы но уг сётскы. Мон нырысетӥосыз пӧлысь вылӥськем. Ӵукна синъёсме усьтыса, тыныд тазалык курыса вӧсяськыны кутскылӥ. Улонын оген кышномуртлэн та самой бадӟым ваньбурез, узырлыкез - ас вӧзысьтыз нылпиез. Аслым но тазалык курылӥ. Адями таза ке, уг висьы ке, солэн ӝӧк вылаз ужаса поттэм нянез но, пудо-животэз но луоз. Нош вӧзаз пальпотӥсь, юрттӥськись нылпиосыз. Мон ачим но ужаны чырткем вал. Пумен вань шуг-секытъёслы дышыны ӧдъяй. Таиз ини кышномурт понна кык полэс секыт адӟон. Вӧзам юрттыны дась луись воргорон киос ӧвӧл ук - нокинлы оскыны. Озьы синвуаськыса киям кутӥсько вал кузёезтэк ныжомыны, сыныны вутскем тӥрез, бакчаез кенерасько, гидысь сисьмем пулъёсты вошъясько... Ёрмон, выль ӧнер сётэмен валче, пельпумам воргорон ужпӧръёсты ныпъятӥз. Нош солэсь секытсэ ужась воргорон гинэ тодэ. Эх, - ӝожмыт лулскиз Урак Нина. - Вань адӟемме кыласа-бураса шат быдтом? Капчи шат вал мыным воргоронъёсын ӵош пу дасяны, турнаны? Инмаре-куазе! Маке лэсьтыны воргоронэз ке медъяно, кытысь коньдон? Огнам ужаса поттэмез сиськыны но дӥськутлы тырмиз ке, ярам ни. Кыкетӥ вӧсе - тыныд шудбур курон вал. Калык синме йӧтымон, пӧй, мед будод. Эшъёсыдлэсь сиёнэн но, дӥськутэн но пӧртэм медад лу. - Озьыен, анай, кыкетӥ вӧсь-курондэ быдэстыны ӧд быгаты? Ӧжыт-а вожъяськисько мон эшъёсылы? Ӧжыт шат Иринаен Санька но лулӟыло? - анаез пала чутрак берытскиз Олег. - Э-э, пие, пие. Пал кышноослы тӥ кадь пи нуныосты быдэтон тужгес но секыт йӧтэ, - мадёссэ азинтӥз Урак Нина. - Тӥледыз уго пиосмурт ужлы но дышетыны кулэ, куронъёстэс но быдэстоно. Тани мон пичи дырысьтыд одӥг учыр сярысь гинэ мадё. Ачид ик ваньзэ син азяд пуктод, валалод, кожасько. Пачан Миша агаед Коляезлы чилясь тыгылиен шудон машина лэсьтэм. Тон бертӥд но сюлвориськод: "Анай, мыным но сыӵе машина лэсьты!" Тон соку ӧд шӧды мынэсьтым секыт лулскемме, ӧд адӟы чырты выжыям кугӟам лёгез, озьы ик ас улонме каргамез но ӧд кыл. Нош мон юн каргай. Озьы-а, тазьы-а, киосме вӧсь карыса, яраос лэсьтыса ке но тырши. Нош нуназе бере тон эшъёсыд азьын выль шудон машинаеныд ушъяськид ни. Воргорон киосын лэсьтэмлэсь со чик урод ӧй вал. - Тау, анай. Вождэ эн вай мыным, - вӧзаз кариськыса, Олег солэсь сюрмем киоссэ маялтӥз. - Оген кышноослэн куинетӥ вӧсьсы но вань на, пие. Сое уйёсы гинэ, нылпиос ческыт уммен кӧлыку гинэ шыпыртӥськом. Тон сое ноку ас пельёсыныд ӧд кыл на, дыр. Яке ог уе Зюзя Вара-а шыпыртӥз? - Тон но со сярысь кылӥд ни шат, анай? - Олеглэн бамъёсыз ӵыж-горд луизы. - Гурт калыклэсь номае но уд ват, пие. Уйшоре дауртэмдэ но адӟоз-синйылтоз, тӧллы лушкем шыпыртэм кылъёстэ но кылоз. - Возьыт мыным, анай. Чик малпаськытэк, валатэк сыӵе капканэ шеди. - Мон шудтэм Вараез но валасько, - лулскиз кышномурт. - Нырысетӥ гажанзэ мон талай, мукетъёсызлы бызьыса, ас шудзэ, яратонзэ ӧз шедьты ни. Больницаын секытэзлэсь люкиськем бераз со нылпи вордыны ӧз быгаты ни. Берло кузпалъёсыз соин ик уллязы, шуо. - Нош атай мар малпаса сыӵе йӧнтэм вамыш лэсьтэм? - Номыр вераны уг тодӥськы, пие. Мыным синмаськиз но - тӥни. Нош Варалэн секытэн ветлэмез сярысь мон сюанмы жингырам бере гинэ тодӥ ни. - Нош азьвылгес тодысал ке, оло, атайме палэнтысал? -Кызьы, ма шуыны ик уг тодӥськы, пие. Оло, палэнтысал но. Соин ӵош ик... котькин ас шудэз понна нюръяськыны тырше ук. Вылаз ик, яратон, пе, адямиез синтэм- пельтэм каре. - Озьыен, куинетӥ вӧсед яратон сярысь вал? - Бен, шонер. Выль яратонлы оскон, ас нылпиосыдлы атай шедьтонлы оскон, секыт дыре пиосмурт пельпумъёс вылэ пыкъяськонлы оскон. Оген кышномурт но, вань адямиос, лулосъёс кадь ик, яратон мылкыдэз шӧдэ-вала ук. Солэн но жадем мугорыз ненег вешамез возьма, пельёсыз мусо кылъёсты витё... Ма, собере Инкуазь ваньмызлы сюлэмзэ, лулзэ пирсэкъятыны быгатӥсь мылкыд но шӧдон кузьмам. Тынэсьтыд уг ваты ни: со - яратоно адямилэн гольык мугорыныз мусояськон. Солэсь но ӵемысь мӧзмиськод... - Нош ӧд пумита шат лушкаськись Кузьмалэсь но юись Германлэсь умойгес воргоронъёсты? Кудъёсызлы "атай" шуыса вазиськыны но возьыт медаз лу вылэм. - Тыныд со сярысь юаны капчи... - выльысь мур лускыса, анаез интыысьтыз султӥз но кусозэ кутӥз. - Со аръёсы мон сьӧд адӟонэн, кирень куректонэн сэрен юыны кутски. Нош юись кышномурт вӧзы кудӥз-о йӧно воргорон матэ кариськоз? Вылаз ик, мукет атайлэн нылпиез ке вань. Огез гинэ кыле на: ачид кадь ик кузпал шедьтон. Анаезлэн ӝожмыт мадёсэз Олеглэсь мылкыдзэ бугыртӥз. Ма, воксё ӵушказ. Соин ик вожомыса, пиньёссэ куртчыса, паськыт шонаськыса турнаны ӧдъяз. Улоназы кылдэм шуг-секытъёс пумысен кӧтӝожзэ турын-куаръёслы берыктыны малпам кожалод... 13 Анаезлэн улон-вылон, лушкем вӧсьёсыз сярысь мадемез Олегез мур малпаськонэ уськытӥз. Ӝыт шудонпӧлысь берытскыса, дораз эскериськиз. Ваньзы кӧло. Анаеныз сюратаез но, вын-сузэрез но - асьсэ валесъёсазы. Олег азбаре потӥз но кизилиё инбаме учкыса сылӥз, собере Онись кенакезлэн сениказ вамыштӥз. Отын, небыт, ческыт зыно турын вылын, малпаськыны люкетӥсь уз лу кожаз, лэся. Огпол Олег Онись кенакезлы ӝожаз вал. - Нуналмысь сюлмы пирсэкъясь луэ, Онись кенак, - азбарысь ӟус вылэ пуксьыса шуиз соку Олег. - Куарусён толэзьлэсь нырысетӥ нуналзэ музъем зурканэз музэн кышкаса возьмасько. - Детдоме келялозы кожаськод-а, пие? - вӧзаз ик лэзькиз бускель кышномурт. - Бен, мон котькуд выль нуналлэсь кышкасько. Кожасько: капка азямы машина дугдоз, отысь кыӵе ке бекче кӧто тӧро потоз но черк гырлы сямен жондоз: "Пиналъёс, сюрес вылэ дасяське! Тӥледлы детдомын инты висъямын". Ох! - секыт лулскиз Олег. - Чиданы, вормыны быгато меда сыӵе ивортонэз? Малпаса ик йыркуэ лӧптоно кадь луэ. - Э, пие, пие, - Олеглэн ки вылаз аслэсьтыз сюрмем кизэ понӥз Онись. - Луылэ озьы: та сьӧд адӟонэз, кирень куректонэз ноку уд вормы ни кадь. Нош ӧвӧл - улӥськод, ужаськод, азьпалась шудо нуналъёслэн лыктонзылы оскиськод но... дунне вылын нош ик улэм потыны кутске. Мынам но сыӵе сьӧд нуналъёсы ӧжыт ӧй вал. Кузпалы но висьыса кулӥз, бадӟымез нылы но Ижкар ульчаын машина улэ шедьыса быриз. Анай муртлы самой секыт но курыт адӟон - ас нылпидэ шайвылэ келян. Мон но уг чида кожасько вал. Нош йӧзор улэ шедем будос музэн катьяськи, йӧнай. Адямиослэн ӟеч кылъёссы, котьку юрттыны дась кариськемзы йӧӟектыны кутскем мылкыдме шунды сиос музэн шунтӥзы. Ой, Олег, - кимышкыныз чсиндураз йӧтскиз Онись. - Мынэсьтым синкылиосме, ӝожъёсме, шыпыртэм вӧсьёсме дауръем вӧсь кызмы гинэ тодэ, дыр. - Со вӧзы огнады ветлӥды, оло, Онись кенак? - Апасовлэн синъёсыз ик питырскизы. - Ветлӥ, пие. Калык кӧлыку, вазь ӵукна ик султыса бызьылӥ вӧсь кыз доры. Оло со юрттӥз, оло улонэз гажаме вормиз - вераны шугъяськисько. - Мыным но отчы ветлыса утчано шат? - Нош ма сярысь ӝожаны, Инмармылэсь куриськыны малпаськод? - Ваньмыз сярысь асьтэос ӟеч тодӥськоды, Онись кенак. Юртмы шудбур дэлеттэк куашкан калэ вуиз ни. Эх, анае ке аракы ӧй юысал. Мон соку кык пол кужмогес луысал, дыр. Сюратаез но чидасал. Ваньзэ-ваньзэ чидасал, вормысал. Пичи дыръям ваёбыж карез таркамысьтым но ӧпкелисько. Оло, юртъерамы шуд ваись бурдоез соку ачим кышкатӥ, улляй? - Ачид малпаськы, пие. Тон визьмо, нодлыко будӥськод. Кулэ ке луиз, дауръем вӧсь кыз доры ветлыса, чабей кеньыр пазялод, вӧсьёс шыпыртод. - Нош тынад вӧсь книгаед вань-а, Онись кенак? - Евангелие вань. Лыдӟыны-а малпаськод? - Вӧсь книгаен тодматскон мултэс ӧй луысал, дыр. - Огзэ курисько: вӧсь книгаез киостэ чылкыт миськыса, Инмарлы вазиськыса кут. - Яралоз, Онись кенак, - интыысьтыз султӥз Урак Олег. - Матысь ӵукнае ик вӧсь кызмы доры ветлыны тыршо. Апасов куинь ӝыт Евангелиез лыдӟылӥз. Лыдӟемезлы оске но, уг но. "Ма карод на? - пумен малпаське егит пи. - Ваньмыз Чебыш Лариса музэн вӧсь возьыны, куч нуллыны, черке ветлыны кужым уг шедьты. Бен, Ларисаен кусыптӥмы сьӧд коӵыш ортчиз, - курыт малпан вылаз вуэ пияш. - Ваньмыз Зюзя Вараен сэрен. Ма, ачим ӝык янгыш ӧвӧл шат? Ветло, одно ик дауръем вӧсь кыз доры вуыло, - выль осконэн Апасов синъёссэ кыниз. * * * Та рад Урак Олег уйшорез данъясь атас куараослэсь сайказ. Ческыт, чебер уйвӧтъёссэ сеник пасетӥ чуртнаськем ыр тӧл нюлыштӥз, оло. Кийыгыриеныз утчаса, со дӥськутсэ шедьтӥз, дӥсяськиз но ӝытазе дасям бинетсэ кияз басьтӥз. Отын ог кырым чабей кеньыр, Евангелие книга бинялтэмын. Уй сазьдӥськыны вутскымтэ на: ӝомало-югдо ай. Эсьмаса, беромем кизилиос но кырмышъяло на. Пилемъёс сьӧры ватскыны инты утчаса, пиртэш тодэзь уя-гылӟе. Чемошур гурезь пала учкыса, Апасов вамышсэ кутӥз. "Вот, пӧрмостэм адями! Уен нуналэз валасьтэм лулос ик вань мон. Кытчы, малы та сямен дыртӥсько? Аслэсьтым шудме-а утчаны вамышъясько, Инмарен кузьмамзэ кир-пазь туганы-а? Ведь малпанъёсы, мылкыд каронъёсы но пиртэш толэзь выллемесь. Оло, со пиртэш толэзьлэсь киргам юдэссэ утчасько? Бер ӧвӧл на, сабырсконо, ваньзэ лад-лад малпано. Вӧсь кызлы уго мылкыд каронъёсты дыртытэк мадёно, дыр..." Изонюк вамен выжыкуз йыр вадьсаз ик ыгы куаразэ сётӥз. Кӧшкемыт куараезлэсь егит пи куаляк потӥз. Бус пыртӥ кадь дауръем кызэз синйылтӥз. Вамышъёсыз дыго-мого луизы. Кышкан-кӧберан егит мылкыдзэ эшшо золгес зӥбыны ӧдъяз. Кыз улвайёс чус ныруло. Изонюк сьӧрысь пельтӥсь тӧл но умзэс куспетӥ карыны уг дӥсьты кадь. Инбамысь тюась кизилиез синйылтыса, пияш шыпыртӥз: "Атай, тон-а мынэсьтым вамышъёсме эскериськод?" Берлогес сактӥз: "Остэ-э! Вӧсь кыз доры матэктыку кулэм муртлэн лулыныз шат лабыртод?" Кыз вӧзы вуыса, Олег соку ик пыдесъяськиз. Дыртыса бинетсэ сэрттӥз но кыз выжые чабей кеньырзэ пазяз. Пумен аслэсьтыз радтэм вӧсьсэ, куриськонъёссэ, ӝожанъёссэ шараяны кутскиз. - Остэ-э, дауръем вӧсь кыз! Сьӧлыко луэмысьтым, дыр, кышкаса-кӧбераса тон доры лыктӥ. Огзэ курисько: быгатыса-быгатытэк верам вӧсь кылъёсме кабыл кары, ваем саламме - чабей кеньырез - керпотытэк басьты. Евангелиез лыдӟи ке но, отысь кылъёсты уг поттылы. Тыныд ас мылкыдъёсме, сюлэм ӝожъёсме, куриськонъёсме гинэ шараяло. Дауръем вӧсь кыз! Тон инбамез но музъемез герӟась лулос. Озьы лэсьты: Кутор гуртысь Урак Ниналэн юртъераз но шудо-берекето дэлет, ог-огдэ гажан, тупаса улон мед берытскозы вылэм. Юртты вал тон анаелы но Герман сюртаелы курыт юонъёслэсь куштӥськыны. Иринаен Санькаез шудо кар. Уг, уг, ачим сярысь уг поттылы. Мон котьмае чидало, вормо. Апасов огшап кыз шоры учкыса пукиз но дыртыса гадяз кирос тыриз. - Дауръем кыз! Чебыш Ларисаен кусыпъёсмы но ӝоген мед тупатскозы. Мон сое яратӥсько. Со но яратэ, дыр. Сотэк монэ Зюзя Вараен вожасал шат? О-о, дауръем кыз! Зюзя Варалы но шуд, шумпотон вай. Эн курадӟыты сое: мед пумиталоз вылэм сюлмысь яратоно адямизэ. Со выльысь анай луыны, трос нылпиос вордыны мед быгатоз. Вӧсь кыз! Онись кенаклы, Эрки Аноклы трос аръёс кузьма на... Гурт калык милемлы туж юрттэ. Пытсэт сьӧрысь Кузьма сюратаймы но сӧл-тазаен мед берытскоз. Ириналы со шумпотон луысал, дыр. Удмуртъёслэн инкуазь инмаръёссы! Тӥледлы но вазиськисько. Куштэ сьӧлыкъёмес, чылкытатэ лулмес. Инмар сяна, сьӧлыктэмез ӧвӧл шуо. Оскытӥсько тӥледыз: туннэысен гучык но аракы уг веръя, киям сигарет но уг кутылы. Нош яратон ласянь, оло, сьӧлыканы но тупалоз. Инмар уго лушкем яратонзы, мусояськемзы понна райысь Еваез но Адамез уллям. Нош Евангелиын гожтэмъя, Инмар анай но пи нунызэ вордэм ук! "Чик сьӧлыкатэк" гожтэмын ке но, мон уг оскиськы. Сое валась ӟыгыт ни мон. Тодӥсько: нылпиос кубиста убо вылын уг будо. Дауръем вӧсь кыз! Вӧсьёсме, куриськонъёсме кабыл карид ке, юрттӥд ке, Онись кенак ӵектэмъя лэсьто: ог курегмес вандыса, тынад выжыяд вирен курбон сёто. Ой, самой бадӟым куриськонме вунэтӥсько вылэм. Утьы милемды детдомлэсь!.. Апасовлэсь лабыртонзэ куспетӥ карыса, Чемошур гурезь палан кӧшкемыт черетскиз ыгы. Умме усем тӧл но сайкам, лэся, - дауръем вӧсь кыз улвайёс лӧсыр-р! каризы. Олег кылем кеньырзэ кыз выжые пазяз но, ӝогак султыса, гурт пала вамыштӥз. Мышсэ но уг учкылы - Онись кенакез озьы ӵектӥз вал. Пиртэш толэзь пилемъёс сьӧры ватскиз. Кӧня ке кизилиос гинэ кырмышъяло на. Со понна ӟардон вадьсын сактэ ни - инвис гордпыръем адске, югыт кузьмась тылсиос музъемен чупаськыны дырто. 14 Олег Апасов таӵезэ малпаны ик, син азяз пуктыны ик ӧз дӥсьтылы. Ма, оскымон шат: быдэс семьяен, ваньзы нёжалысь турынзэс окто-люкало. Анаеныз Ирина мажсало, бӧмъёсы люкало, Санька гинэ но юрттӥське: я мажесэн ӵабъя, я, агаезлы юрттыса, турынэз ӟыгыртыса бӧм вӧзы вуттэ. Ваньзэсты паймытыса, сюратайзы Пилька Олексейлэн ужано Тыр-стоп валэныз вуиз. Олег шумпотэмзэ шара возьматыны уг ке но тыршы, Герман шоры капчи, шуныт вазьылэ. - Турын трос ӧвӧл кадь. Соин мон Онись кенаклэн пичи уробоеныз гинэ нуллом кожасько вал, - уробо доры вуиз егит пи. - Нош валэн урод шат? - паймиз Герман. - Тыр-стоп кузёезлэн капка выжыяз шутэтске. Олексейлэсь юай но, басьты, пе. - Валэн, конешно, каньылгес луоз. Ай турын но мажсамъя люкаськоз. Ӵапак толлы тырмыны кулэ, - воз вылэ турын сётонъяз вазиз Олег. - Кыӵе ке пудо-живот вордыны малпады, иське? - тунсыкъяське воргорон. - Анаед маке ӧз поттылы кадь. - Онись кенак кык гурт кечпиоссэ ӵектэ. Вордом, эсьмаса, йӧлмы луоз. - Кылэмед ӧвӧл шат, Олег, - мынектӥз Герман, - кечлэн, пе, не йӧлыз, не гонэз, шуэ калык. - Мед шуозы. Калыклэн мукет веранэз но вань. Шур ошмесысен кутске. Асьмеос но пичиысен кутском. Бератаз, оло, скал выжы уськытыны йӧндыром. Колхоз ас ужасьёсызлы ветылъёс вуза ук. - Озьы, - вакчияк вазиз Герман воз йылысен. Турынэз люканын но ваёнын ваньзы тыршизы ке, сенике ӝутъян воргоронъёс вылэ кылиз. Герман улӥысен ӝутъя, Олег сенике лач-лач радъя-тыре. Ужзэс йылпумъяса, Олег дэремзэ бакча кенер борды ошиз но шур пала вамыштӥз. - Пыласькыны, оло? - куаразэ сётӥз сюратаез. - Бен, Лӧзь дуре ветло ай. Вань мугорме турын пырыос бышкало. - Вить, ӵош ветлом. Инкуазь покчи гужемен люкиськыны уг дырты на. Пӧсь омырен шока. Беромыса усьтӥськем сяськаос эшшо яркытгес, синъёсты палёмытыса ворекъяло. Номыр вераськытэк вамышъяло соос. Огзы но ма шуыны уг тодо. Шур дурысь бадьпуос вӧзы вуыса, Олег ӝогак кылиськиз но вучайы музэн шур ӧре тэтчиз. Жадем мугорлы каньылак луиз. Юзмыт ву веша но, маялля но кадь. Шурлэн визылаз вуыса, Олег ярдур пала учкиз. Сюратаез вуэ пырымтэ на. Дӥсьсэ кылем но шыр гольык сылэ. "Котьку адямилэсь пӧртэм дауртоз, - воргорон понна возьдаськыса малпаз Олег. - Ойдо, мед пыласькоз, кызьы мылыз потэ. Шур дурын мултэс синъёс ӧвӧл кадь". Германлэн мугорыз сӥльвиро на. Киоссэ выретэмъяз суй быгытъёсыз ик шудо. Ымпумысьтыз папироссэ ярдуре сэрпалтыса, со вуэ тэтчиз. Соку ик зымиз но, горд йырыз ву вылын кематэк ӧз адскы. Жадьытозязы уямзы, пыласькемзы бере Олеген Герман ярдуре потӥзы но луо вылэ лэзькизы. - Коть трусиктэ вылад быртты вал, - шуиз Олег. - Шӧдытэк-адӟытэк ик кылём - кышноос я нылъёс лыктыны шедьтозы. - Мед вуозы, - нокыӵе ӧз кариськы Герман. - Мынам гольык мугорам маке калыклэсь лушкам-киултэм арберие вань шат? Ваньмыз аслам. Вордскыкум Инмарен кузьмамын, - кунэрес мыньпотӥз воргорон. - Тон котьку адямиослэсь пӧртэм дауртӥськод. - Бен, сыӵе адями мон, - мылпотытэк трусиксэ дӥсянъяз вазиз Герман. - Уж ласянь но, яратон ласянь но, улон-вылон ласянь но пӧрмостэм адями. Уг поты мынам, Олег, ыж уллё кадь огазе кариськеме. Ӧжытак ке но мед висъясько, ас тусбуе медло. - Тон ӟечлык я уж палтӥ висъяськыны тыршы вал. - Валасько, шӧдӥсько мылкыддэ. Берло дыре укыргес йыркуръяськыны кутскид, - дэрем кисыысьтыз папироссэ поттыса аратӥз Герман. - Ме, ӵынды, - пачказэ мычиз. - Эшъёсыныд лушкемен сёровно паравоз музэн бугырлатӥськод, дыр. - Уг ваты: кӧня ке пол шӧмзэ эскери, - танӥськытэк сьӧлыксэ шараяз Олег. - Табере ымпумам но уг йӧттылы ни. Кыл сётӥ. - Кинлы? - Уг шарая. Оскымон муртлы... будослы. Нош йыркуръяськемелэсь мугзэ тон ӟеч валаны кулэ, - "атай" шуыса вазиськыны Урак Олег кужым ӧз шедьты. Анаеныз турнакузы вераськемзы бере сыӵе мылкыдыз лӧптылӥз ке но. - Юэмысьтыд куаретӥсько. Нош туннэ сямен ужасалыд ке, мон шум гинэ потысал. Гажасал тонэ, визь-кенешъёс курыса вазиськысал. - Сабырлыкез валасьтэм улон куасалтӥз монэ, Олег. Туж юн нажгатӥз. Соин ик курыт ву вылэ чӧлски. Юиськод ке, огдырлы вань кайгу ыше-тӧлӟе кадь потылӥз. Соку ик кужмо но луиськод, узыр но... - Нош макмырез? Секыт ӧвӧл-а берло? Мукетыз но кышкыт: юэменыд йыруж ке лэсьтӥд?! Иринаен учырез гинэ басьтом. - Э-э, таиз палтӥ эн куасалты, Олег, - Герман куаразэ ик будэтӥз. - Мон Иринаез ноку вӧсь уг кары. Эриктэман сярысь малпанэ ик ӧвӧл. Тюрьмаысь бертэмъёслэн мадемзыя мон ӟеч тодӥсько: кызьы зэкъёс эриктэмам понна отчы сюремъёсты пумитало. - Уг гажало, пе, иське? - Кыӵе гажан?! Адямиен но, пе, уг лыдъяло. Мыскылляло, жуго но берло ассэ ик, пе, "кышно" карыса эриктэмало. Нош Иринаез мон юри курдатӥ. Курег лушкакум куара-ланга ӝутэмысьтыз гинэ. - Ӧйтӧд, ӧйтӧд, осконо оло ӧвӧл тыныд. Нош огзэ меӵак верало. Вын-сузэре борды чиньыдэ йӧттӥд ке, пунэмзэ берыктыны тыршо. - Валасько, шӧдӥсько мылкыддэ, - лулскиз Герман. - Берло дыре тон ас кужымдэ шӧдыны кутскид кадь. Мыным мытылыны дӥсьтӥськод ни. Амалыд ке луысал, кемалась юртысьтыд туздырыса лэзьысалыд ни. Озьы-а? - Бен, мынам йырвизьмам сыӵе малпанъёс ӵемысь вордскылӥзы. Ачид уго улонмес умоятон понна номыр уд лэсьтӥськы. Вань малпанэд юон сярысь гинэ. - Э-э, озьы эн вера, Олег, - папирос ӵынзэ нырпелестӥз бугыр-бугыр пельтыса вазиз Герман. - Сьӧд куакалэн но чылкыт малпанъёсыз луо, пе. Тани ӝоген тон школаез йылпумъялод, собере службае басьтозы. Анаедлы, Санькалы юрттӥсь кулэ уз луы шат? Ирина сярысь уг поттылӥськы. Нылмурт - со тылобурдо выллем, ас карысьтыз лобӟе. Огназ кыльыса анаед улонысь пумитам нужна* азьын эшшо юнгес куасалтӥськоз, йырзэ улӥе ошоз ук. - Ужасалыд ке, ӧй юысалыд ке, оло, оскысал тыныд. Нош озьы дауртӥсь но трос супыльтӥсь адямилы оскон ичи. Онись кенак верамъя, туала дыре, пе, куддыр аслыд но оскемысь дугдӥськод. Мынам малпамея, тынад ми вӧзын кӧттыро, шуныт коркан гинэ улэмед потэ. Вылаз ик, генерал музэн косъяськыса гинэ, - вӧзысьтыз пачкес кӧльы басьтыса, вуэ зӥртӥз Олег. Соиз, ву вылтӥ тэтчаса, олокӧня "табань" лэсьтыса ортчиз но чулькак выиз. - Ма, мон киосме кисыям поныса, шуласа гинэ уг ветлӥськы. Арлы быдэ пу дасясько, туэ, корка гурез сэрттыса, выльысь радъяй-ӝутӥ. Апасов пумитаз ӧз вазьы. Сюратаез уго юртазы кӧня изъян каремзэ тодаз но уг вайы, котькуд воргоронлэсь быдэстоно ужъёссэ но геройлыко вамышен лыдъя. - Вамыштом, Олег, - Герман гурт пала сётскиз. - Тыр-стопез вал гидэ нуоно ай. Бакчазы доры вуытозь, соос чус вамышъязы. Бератаз Герман ӧз чида ни, лэся. - Тани мӧйымемъя визьмогес луиськод шуо. Озьы вылымтэ ай со, Олег. Куддыр эшшо пичигес визьмо луиськод кадь. Мынам но ас юртэ вал, чебер кузпалэ, кык нылпиосы. Нош синтэм вожан семьямес кир-пазь тугаз. Улон сюресэ анаед доры вуттӥз. Ог- огмес яратӥм, лэся. Семьяме, юртъерме кельтыса, тӥ доры улыны выжи. - Тодӥсько, тодӥсько. Кык семьяез шудтэм карид ни тон. Анайме яратӥсько шуэмедлы но оскеме уг поты. Кык яратӥсь адямиос шат визьзэс ыштымон аракы юозы? - Э-э, яратонэз уд валаськы ай тон, Олег, - киыныз шонтыса вазиз Герман. - Со Зюзя Варалэсь гольык мугорзэ мусоян гинэ ӧвӧл ук. Апасовлэн бамыз нош ик гордэктыса-пӧсектыса кошкиз. - Ну, ветлӥ мон Зюзя Вара доры, ну, ог-огмес лушкем яратӥм, - егит пи куаразэ ик кужмоятӥз. - Нош малы со учырез, "козырной картаез" выллем, мынам азям куянэз? - Ваньмыз пичи янгышъёс бордысен кутске, Олег, - лулскиз Герман. - Мон но югыт дунне вылэ юись луыса ӧй вордскы. Канжаськыны шедьтӥ, кӧтӝожъёсме курыт вуэн гылтыны малпай, лэся. Нош меӵ ярдуртӥ лёгаськон нокинэ умое уг вутты. Куддыр вольтчыса улӥе тюаны шедьтӥськод. - Мон сыӵе янгыш уг лэсьты ни. Астэ вормид ке, шуг-секытъёсты но вормод, шуо. Нош тон быгатод на-а тупатскыны, шонер сюрес вылэ султыса "атай" нимдэ выльысь берыктыны? - О-о, тынад кылъёсыд, Олег, изэз пасялозы. Вань лул-мылкыдме ӵушкад. Пумитазы ведра-карнанэн лыктӥсь Иринаез синйылтыса, Герман вераськон ӧрзэс чутрак воштӥз: - Мунчолы выль бугро ӵупыны яра вылэм, Олег. Колхоз нюлэс висъясал, дыр. - Умой луысал. Таизлэн сэрегъёсыз воксё сисьмемын ни. - Ӵошен ик ужасалмы. Ачим тӥр кутыны дышетысал. - Мон соглаш, атай, - "атай"" шуэмзэ ӧз ик шӧдылы Олег. - Тынад гинэ ӟеч ужъёслы мылкыдыд медаз ышы-тӧлӟы... Собере Олеглэн сюратаез вал гид пала ширтӥз. Пияш солэн мышказ кема учкыса сылӥз. Йырвизьмаз пӧртэм малпанъёс гужето: "Малы ай таӵе шуак воштӥськиз Герман? Эсьмаса, нокин вератэк-юатэк уж борды басьтӥськиз. Оло, азбарын керетэммы бере чурыт верам кылъёсылэсь шӧмиз? Яке куинь нунал талэсь азьло макмырен курадӟемез- а воргоронэз мукет малпаськонэ вуттӥз? Оло нош, монэ ас пиеныз лыдъяны кутскиз?" Куинь нунал талэсь азьло Олег Онись кенакезлэн сениказ сайказ но вӧзаз кӧлӥсь сузэрзэ, вынзэ синйылтӥз. "Кыксы ик татын. Вень сьӧры сӥньыс музэн бӧрсям ветло", - мынектӥз Апасов. Но пальпотонэз соку ик кысӥз. Син азяз кӧшкемыт суред пуксиз. Толоназ шудонпӧлысь бертыкуз, анаеныз Герман воксё кудӟемын вал. Асьсэлэсь ма дауртэмзэс, вераськемзэс ик уг валало. Куспазы ченгешо, собере отын ик ваче учкыса серекъяло. Уд но вала: оло соос зэмос адямиос, оло пӧсь шаеръёсысь нюлэскын улӥсь маймылъёс? Пекарняе няньлы мынэмезлэсь азьло Олег анайзэ но сюратайзэ эскероно кариськиз. Азбаразы пырыкуз бакча кенер вӧзын ӧскыса сылӥсь анайзэ адӟиз. Тусбуйыз ик кӧшкемыт: йырсиез тугаськемын, ымнырыз кӧсыт, синъёсыз олома пасьтаесь. Ӧскыны курадӟонъяз кымсаз ву шапыкъёс бычыраллям ни. - Малы-о такем юиськод, анай? - Олег дораз вамыштӥз. - Уть ай, кыӵе курадӟиськод. Ас тазалыктэ винаен воштӥськод ук. Лулыд ымпумад гинэ возиське на. Жаля вал астэ, анай. Бен милемыз но. Оло пиезлэн кылъёсызлэсь, оло макмырен курадӟеменыз Урак Нина катьтэммыса ӟус вылэ лэзькиз но синвуосызлы эрик сётӥз. Киосыз, ымдуръёсыз куалекъяло, шоканы омыр тырмымтэен, лэся, гадьёсыз ик дуриськон куалаысь кӧрык музэн ӝутъясько. - Нуналысь нуналэ макмыр секытгес йӧтэ ук тыныд, анай, - йырсизэ маялтӥз Олег. - Малы со шакшы юонэз ымад тыриськод на? Сазь визьмыныд малпаськы вал. Нырысь чаркадэ кияд кутыкуд ик. - Аракы сыӵе шедиз, лэся, пие, - ассэ ачиз янгыш карыны уг ик малпа кышномурт. - Быдэс пушме сутэ. Герман пичи дунын юон шедьтӥз вал. Аракы вылымтэ, лэся, - яд. - Кытысь басьтӥды? Кинлэсь? - Зюзя Варалэсь, лэся. - Вот, вот. Варалы ужбергатӥсьёс пичи дунын олокыӵе но сурет юонъёс вутто. Тӥ шумпотыса юиськоды. Эх, мискиньёс! Та сямен асьтэлэсь кулэмдэс но шӧдытэк кылёды ук. - Пие, Олег, - секыт лулскиз Урак Нина. - Онись кенакедлэсь сю грамм ке но аракызэ курыса вай али. Туж тэльмырисько. Бускельмылэн кудӟытӥсь юонэз луылэ, макмырен курадӟыкум лушкемак сётылэ вал мыным. - Эн ик куры, анай, - киыныз шонтӥз Олег. - Эшшо ке ас киыным тыныд аракы удом- а? - Та сямен лулэз инмар кие сётыны но кема ӧвӧл, - вукекъяськыса ӧскыны кутскиз Урак Нина. Олеглэн макмырен курадӟыса кулӥсьёс сярысь мадёнъёсты кылэмез тырмыт. Мӧйыос дэмлало: соослы, пе, одно ик кубиста я сылалтэм кияр ву сётоно. Бакча кенер йылэ интыям банкаез кутыса, Олег бускеляз дыртӥз. Ӝоген со кубиста вуэн, сю грамм кабак аракыен берытскиз. Анаезлы кубиста ву удонъяз тунсыкъяськиз: - Сюратай нош? Со но курадӟе-а? - Вандэм атас кадь выж вылын погылляське. Мын, солы но кубиста вудэ секта, пие. Олег корка пыриз. Татысь омырен со ӵоксузиз. Дыртыса форточкаез усьтӥз. Сюратаез выж вылэ пуксем но йыр бордаз кырмиськыса, дыр-р куалекъяса пуке. Синъёсыз ик урмем ошлэн выллем адско: тордэмын, ӵыж-горд тылъёсын чилекъяло. - Ме, сылалтэм кубиста ву юыса утча. Оло, макмыред капчиялоз, - банказэ мычиз Олег. Воргорон гуч-гуч юиз. Сигарет аратыны кутскем вал - дырекъясь киосыныз ӧз пӧрмыты. Тылпоттон басьтыса, Олег юрттоно кариськиз. - Ӧжытак ке но капчияз-а? - тунсыкъяськиз егит пи. - Ох, ог ымтыр коть аракы луысал ке... Сокем курадӟисько. - Ме, мынам пичияк ватосэ вань, - Онись кенаксэ шараятэк гинэ Олег чекушка пыдсысь аракызэ сётӥз. - Ю, нош анайлы "эмъяме" сярысь пал кыл но эн поттылы. Герман пичи ӟенеликез сютэм кионлэн сӥль юдэс борды ӝабырскемез музэн ӵабтӥз. Шокчытэк бушатӥз но гадьзэ маялтыса лулскиз: - Фу-у!.. Соку ик капчияз кадь. Тау, Олег. - Аракы понна тау карыны уг косо. Курадӟемдэ ас синмыным ӧй адӟысал ке, аракы удысал кожаськод-а? - Кытысь-о запасэд? - Тӥ юон дыръя ӧжытак ватӥськем вал. - Умой лэсьтэмед, - Германлы зэмен ик каньылгес луиз кадь. - Ӵемгес лушкалля тон милесьтым, Олег. Макмырен курадӟыкумы эмъясалыд. - Мыным оскиськыса-а юыны малпаськод? - Зюзя Вара, паразит, олокыӵе юон сётӥз. Чылкак отрава. - Аракы ваньмыз сыӵе ӧвӧл шат? - Ӧвӧл, ӧвӧл. Таиз - воксё кыйлэн ядэз. Ма, Зюзя Вара ачиз но кобра кадь. - Мон Вараез гинэ янгышен уг лыдъяськы. Со тӥледыз кужмысь ӧз секта ук. - Щербаковлы иворто. Одно ик уйшоре вузкаремез сярысь иворто. Лавказэ мед пытсалоз. - Участковойлы гуртысь кышноос ӧжыт-а ӝожтӥськылӥзы ни? Капитан уго ачиз Вара дорын кӧла-кунояське... - Милемды кадь шакшы юонэн уг куноя, дыр, сое. - Вератэк но валамон, - соглаш кариськиз Олег. Буш банказэ но ӟенеликсэ кутыса ӧс пала вамыштонъяз Олег куриз: - Сюратай. Эн юы ни вал. Ветлы ай колхоз уже. Тазьы вань калык синмысь усиськод ни ук. Тон понна мыным но возьыт. Ог коркан улӥськом, ог азбаретӥ лёгаськиськом. - Дунне адями тон, пие. Йыркурдэ уд возиськы вылэм. Уть ай, лулъяд, эмъяд монэ. Нош мон кожасько вал... Олег пумозяз ӧз кылзы ни - шуак бӧрсяз ӧсэз ворсаз. Йырвизьмаз югак оскон тылси но чилектӥз: "Оло, Герман тупатскоз ай. Анаез юон черлэсь нырысь эмъяны кулэ. Собере, коньдон шедьтыса, оло, сюратаез но эмъяны йӧндырысал. Ох, сю манет ке но коньдонэ ке луысал! Ёросысь газет ивортэмъя, Атняысь аптекаын "Ацидум-С" эмъюм, пе, вань. Сое, пе, юись муртлэсь лушкемен кыӵе ке юонэ поныса сектаськод но, адями аракы черлэсь мозмытскыны быгатэ. Оло, Фаина Николаевналы вазиськоно? Сӥльзэс вузазы ни, дыр". Озьы малпаськиз Олег куинь нунал талэсь азьло. Нош туннэ тӥни малпанъёсыз мукетэсьгес ни вал, сайкытэсьгес. 15 Куазь уйшорлы ке но ини матэктэ, автобусысь васькем егитъёс доразы бертыны уг дырто. Олома но лабырто, серекъяло. Уго ваньзылэн мылкыдзы инсьӧрын поръя кадь. Ас быгатэменызы уго Лопъял гурт калыкез паймытыса кельтыны йӧндыризы. Спектакльзы туж ӟеч пӧрмиз. Устолыксэс пусйыса, кӧня кичабонъёс, сяськаос, ӟеч кылъёс кузьмамын вал. Апасов сцена вылысен ик шӧдӥз: учкисьёс валало сое, шуныт пумитало. Сыӵе оскон выль кужым сётэ. Залэ учкылыкуз Олеглэн син шораз дырын-дырын Лариса йӧтылӥз. Уго спектакле пыриськымтэ егитъёс но бускель гуртэ лыктӥзы, табере артысь гурт клубын учкисьёс луыса пуко ни. Егит пи лэчыт я серемес кыл вераны шедьтыку залын серекъян пуроме. Соку Лариса но пальпотэ. Нылмуртлэн шуныт зор выллем синъёсаз учкыса, Олег валатскиз: йӧӟектыны кутскем мылкыдаз шуныт тӧлъёс шокышъяло ни кадь. Кусыпсы, оло, тупалоз, ӝытъёсы чусомем гурт ураметӥ ӵошен юмшалозы... Тани табере соос выльысь вордскем гуртазы ини. Уллапала кырӟаса вамыштӥсь егитъёс сьӧры Апасов но калъяськиз. Кырӟамзэс кылзыса огшап вамышъямез бере Рябоваез китӥз кутӥз но шыпытак куриз: - Ӝегатскы ай, Лариса. - Кулэ на меда? - дугдӥз нылаш. Кырӟась егитъёслэн бӧрсязы учкыса, Олег пальпотӥз: - Усто нёжъяло, а? Ӵапак Лӧзь дурысь уӵыосмы кадь. - Нош ачид малы уд юрттӥськы? - мынектӥз Рябова. - Тынад но куараед мылкыдэз бугыртӥсь. Ай Лопъял нылъёс но синмаськыны вутскизы кадь. Лушкемен юало, вань-а, пе, Апасовдылэн яратоно нылыз? - Мар-о шуид? - Вань кадь, шуи. - Ойдо ай, пуксёнэ интыяськом, - Олег арлыдо тополь доры вамыштӥз. Интыяськемзы бере Ларисалэсь кизэ небытак кутӥз но синъёсаз учкыса юаз: - Зюзя Вараен сэрен-а йыркуръяськыса ветлӥськод, Лариса? Вунэты со сярысь. Бен, янгыш мон. Огпол лек сутскытэк, тыллэсь ӟырдытсэ уд валаськы, шуо. Нош мукет веран но вань. Янгышен пӧсьвуаськем адями, пе, кезьыт вулэсь но курданы ӧдъя. Таиз веран мыным тупагес кадь. - Зэм, уг ваты, туж йыркуръяськи вал. Малпай: монэ Зюзя Вараен воштӥд. Нош нуналъёс ортчемъя малпанэ воштӥськыны ӧдъяз. Анае верамъя, пӧсь самовар но сӥя. Апасов пумитаз ма вазьыны ик ёрмиз. Йырсизэ маялтыса лулскиз: - Ойдо вань уродзэ вунэтом, выльысь эшлыко кусыпмес тупатом. Кӧлыны выдэм берам но мынам малпанъёсы тон сярысь гинэ. - Ӧйтӧд, маке пӧрмоз на меда, Олег. Пужмераны шедьтэм сяська выльысь воректоз на-а меда? - Малы озьы вераськод? - зурак луиз Олег. - Вараен вожаськод на, иське? - Тон тусбуен но, сямыдъя но усто, чебер егит пи. Тынад чыртыяд тросэз эшъёсы ӟыгырскыса ошиськыны дасесь. Нош мынам мылкыды... пумитъяське ни. Уго тусбуй чеберлык вӧзы сюлэм чеберлыкез ватсаны тыршоно на. Соку адями кык полэс шудо луоз. - Арлыдо кенакъёс кадь мудрон вераськиськод. - Амалтэк вераськод, ява! Ӵукнаысен ӝытозь пель сьӧрад черк гырлыос кадь мед жонгетозы ай! - Кинъёс жонгето? Анаед, атаед? - Анаен апай. Уг ваты: тужгес но Люк школаын дышетӥсь апае лопырскемын. Юись семьяысь пиен эшъяськиськод, пе. - Кызлэн кускылиез выжыяз усёз шуэ-а? - Апасовлэн вожез потӥз. - Иське, соин ваче син пумиськонлэсь пегӟыса ветлӥд? Шудонпӧлы вуисько гинэ - тон дорад кошкиськод. - Шонер валамед, Олег. Тужгес бадӟым мугез со вал. - Тон мыным оскиськод-а, Лариса? - инбамын чар-чар ворекъясь кизилиос шоры учкыса юаз Олег. - Кыӵе ке журналысь тани мар лыдӟи. Огпол, пе, ӟуч гожъясь Алексей Максимович Горький, ачиз курыт юонъёслэсь туж ик нырзэ чатыртыръямтэ ке но, вожез потыса шуэм: "Уг яратӥськы кудӟытозязы юисьёсты, эсэпсэ валаса кунояськисьёсты гажасько, нош чик но вина веръямтэ адямиослэсь курдасько". Монэ шонер валаны тыршы: анаелэсь но, сюратаелэсь но данзэс инбаме ӝутэме, дунне адямиосын лыдъяме уг поты. Озьы ке но, озьы ке но... - огдырлы могӟиз Апасов. - Аслэсьтым матысь адямиосме мон юн жалясько. - Вождэ эн вай, Олег. Мон ас малпанъёсме ватытэк верано кари вал. - Ӧвӧл, ӧвӧл. Мынам тыныд воже уг пот. Нош дышетӥсь апаедлэн синъёсаз меӵак учкыса верасал: "Мон Мичуринлэн сад-бакчаысьтыз паймымон емыш луыны тыршо. Солэн, пе, палэзь улвайын но сливаосыз кисьмало. Ма, мон тонэ кужмысь уг кариськы. Кужмысь яратыны нокинэ уд косы. Собере гуртамы пиос но ӧжыт ӧвӧл, бырйы сюлэмедлы, анай-апаедлы кельшисьсэ, - Апасов турак султӥз. Лариса но мултэс куасалтэмзэ валаз. Кыӵе ке ӟеч кыл вераса буйгатыны ӧз ке быгаты, кусыпсэс герӟась нюжа воксё чигоз, дыр. Тани ук, гитара ез кадь золскемын ни. - Олег, - ӝогак матэктӥз нылмурт. - Ӵуказе ойдо выльысь пумиськомы. Мон... мон чидатэк возьмало. Урак Олег йырзэ шуак берыктӥз но, синъёсаз тылгизьыос алетскизы кадь. Олокытысь дӥсьтонлык шедьтыса, Ларисаез со ӝик-ӝик ӟыгыртӥз но луч-луч чупаны кутскиз. Нылмурт киос ӧз палэнтэ сое - бордаз биниськизы. 16 Комбайнэн колхоз лудъёсты котыръямез, ужась гуртоосыз пӧлын тыршемез Олег Апасовлы вунонтэм кылёз, дыр. Лушкемен со Пачан Миша агаезлы трос пол тау карылӥз. Угось со Олеглы оскиз, аслыз юрттӥсе басьтыны соглаш кариськиз. Со ке ӟеч кыл ӧй верасал, бригадир но ӧй ыстысал, вылды. Табере ни, "чипыосты сӥзьыл лыдъяло"" шуэмзэ, ӵошен тыршемзы калык син азьын. Юосты аран-кутсанъя соос эштосазы кыкетӥ интыез юн возё. Ужезъя ик данэз но. Ёросазы потӥсь "Азьлань" газетын соос сярысь ушъян кылъёс гинэ гожтэмын. Эсьмаса, Олеген Миша агайлэсь туспуктэмзэс ик шуккиллям. Комбайн вӧзазы сыло - кыксы ик шудо пальпото. Туала арын газет-журналъёслы гожтӥськыны но гурт калык шугъяське. Уракъёс доры но газетъёс уг вуо. Миша агаез со газетэз уж дуразы возьматыны ваем. - Миша агай, та газеттэс доре нуллыны уз лу-а? Анаелы, вын-сузэрелы возьматэме потэ. - Возьматы, данъяськы, Олег, - пальпотыса шуиз Пачан Миша. - Ас лэсьтэм уженыд данъяськон урод ӧвӧл. Сыӵе дыръя мылкыд эшшо но лопырске, ас азяд эшшо бадӟымесьгес куронъёс пуктӥськод. Уг ваты, мынам но мылкыды инсьӧрын: кужмогес луи кадь, из гурезез берыктыны дась. Егит пилэсь газетэз кисыяз лач-лач куасаса понэмзэ синйылтыса, арлыдо эшез ӵектӥз на: - Одно ик сюратаедлы возьматы, Олег. Вожъяськыса сэпез мед пӧсьтоз, лулпушсэ возьытлык мед бугыртоз. - Возьмато, мед учкоз, - Олег но пальпотӥз. Ӝытазе ни, Ларисаен шур дуртӥ ӵошен юмшакузы, нылмурт но мылкыдзэ шараяз: - Газет бамын артист кадь чебер адскиськод. - Мон тазьы но чебер ӧвӧл шат? - мыньпотӥз Апасов. - Чебер но мусо. Нош газет бамын - кык полэс. Туспуктэмдэ качыен вандыса басьтӥ но дневникам ляки. - Малы? - Куке ушъяськыны, данъяськыны муг луоз кожай. Туспуктэмдэ эшъёсылы возьмато но шуо: "Учке ай, мынам гажанэ - ужысь азьмынӥсь! Тусбуен но кылчин выллем". Эшъёсылэн вожъяськыса синъёссы ик кымсазы мед тэтчозы. Олег шулдырак серектытэк ӧз чида. Нылмуртэ мусояса ӟыгыртӥз но синъёсаз учкыса шыпыртӥз: - Мусое тон мынам, крезьгурась уӵые. Тынэсьтыд та сямен крезьгурамдэ кылзыны ноку уд жадьы. - Мон зэмлыкез кырӟась-верась бурдо, Олег. Ачид но нуналмысь мусогес адскиськод, сюлмылы матэгес кариськиськод. Газетысь туспуктэмдэс адӟыса, эсьмаса, апае но ӟуремысь дугдӥз. - Мар-о шуэ? - Пальпотэ. Тынад Олегед, пе, нинлэсь керттэмын ӧвӧл вылэм. Янгышаны, пе, шедьтӥськем. - Э-э, мон шоры учкыса, тросэз янгышало ай, Лариса. Ваньзы анай-атаея дунъет сётыны тыршо. Нош мугортӥм соослэн вирзы ке но бызьылэ, мон чылкак мукет адями. Лулы - ас поннам. Оло, быдэс дуннеын мон кадь адями ӧвӧл. Ма, озьы ик луыны кулэ, дыр. Нокинэн медам сураськы. Зэм, урод сямъёсме куштоно ик. Нош чылкак кылчин, инмар выллем адями луоз шат? Шундылэн но, пе, виштыосыз вань. - Олег, кылчинъёсты, инсьӧр кузёосмес исатэк гинэ вераськыны уд йӧндыриськы шат? Уг яра соосты ултӥяны. - Валай, мусое, валай. Куректон сямен ик, шумпотон но оген уг ветлы вылэм. Мукет нуналаз Урак Олеглы эшшо юнгес шумпотыны муг шедиз. Колхозын ужасьёслы уждун сётъязы. Туала дыре таӵеез но шер луылэ. Колхоз-эштос кассаязы "улэп коньдон" туж ӧжыт кожалля. Олег, та иворез кылыса, анайзэ азьпалтыны малпаз. Аслыз, анаезлы но вынызлы- сузэрезлы чукиндэр бусыын тыршемзы понна суменак коньдон басьтӥз. "Эх, школае ветлыны ваньмылы чебер дӥськут басьты вылэм, - кисыысьтыз уксёзэ маялляса лулскиз со. - Уг лу. Анаез одно Ижкаре, курыт юонъёслэсь куштӥськон вылысь эмъяны нуллоно. Ай аран бырем бере но ӟеч премия йӧтоз шуэ Пачан Миша. Тӥни соку ик дӥсяськом-кутчаськом, "вылкумес" воштом ни". Магазинэ кожыса, Олег чай, конфет, нянь басьтӥз. Огшап малпаськыса, сюратаезлы кык пачка папирос куриз на. Милициен кышкатэмез, дорысьтызы улляло шуыса курдатэмез бере Герман кышкатскиз кадь. Лёгаськоно музъемезлэсь пыд улаз зурканы кутскемзэ шӧдӥз-валаз, лэся. Мунчо бугро ӵупыны басьтӥськиз. Ӝытъёсы, шудонпӧлы кошкытозяз, Олег но юрттылӥз. Ӵошен коръёсты ӝутъяны но каньылгес уго. Агаезлэсь ваем саламъёссэ адӟыса, Санькалэн синъёсыз ик питырскизы. - О-о, туннэ асьмеос узыресь, - кильтро серектӥз со. - Комбайнэн ужамед понна-а тамында салам сётӥзы, агай? - Бен, кунояськы, Санёк. Колхоз уждун сётӥз. Тыныд, Ириналы чукиндэр бусыын тыршемды понна но сётӥзы. Соин ик тонэ ческыт кампетъёсын шумпоттыны малпай. Огнад сиыса эн быдты, анаен апаедлы но мед кылёз. - Нош атайлы? - Атаедлы мон папирос басьтӥ. - Тон быдӟа будӥ ке, мон но комбайнерлэн юрттӥсез луыса тыршо. Эх, соку шоколад, киндэр-сюрприз, мороженой гинэ сиыса улысалмы. - Ческыт сиёнэз трос ке сиид, пиньёсыд усьылозы, Санька. Пиньтэм пересь кадь ветлод. - Мон, Онись кенак музэн ик, чилясь кортлэсь тырыто, - нокыӵе ӧз кариськы пияш. Выныз Онись кенаклэсь нимзэ поттылэмысь, Олег бускеляз ветлоно кариз. Соос кенешизы ни вал: сюрес вылэ мед дасяськоз шуыса кышномуртлы ивортоно. Анайзэ эмчи доры келяса ветлыны арлыдо мурт, пе, кулэ. Пачан Миша но, Фаина Николаевна но озьы валэктӥзы. Дышетӥсьсы келяса ветло шуиз ке но вал, Олег Онись кенаксэ ӧтёно кариськиз. Арлыдо кышномуртэз со ӵужанаез интыын адӟе. Оске: таяз учыре но юрттоз. ...Сюрес вылэ потон азязы Олег бугро ӵупись Герман доры мынӥз но шуиз: - Ми ӧвӧл сьӧртӥ эн юы вал, атай. Иринаен Санька кытчы пырыны уз тодэ. Кӧттыр ласянь но сюлмаськы, мон Ирина кие коньдон кельтӥ. - Нош юртъерез утем понна одӥг поштоп аракы ваёд-а? - кораськемысь ик дугдӥз воргорон. - Вутто, - синъёссэ улӥе лэзиз Олег. - Ӟеч гинэ улэ, возь вылысь бертӥсь кечпиосмес пумитаны, сюдыны, люктаны эн вунэтэ. - Зэмзэ аракы ваёд-а? - Германлэн синъёсыз ик питырскизы. - Мунчо бугро ӵупемдэ шат буш каром? - Озьы бере, ӟеч ветлэ. - Анаен ваньмыз ке умой луиз, тонэныд но Ижкаре ветлом ай. Мыным премия уксё гинэ ӟеч мед усёз. - Азьпалзэ тунанэз ӧвӧл ай, Олег. - Кызьы-о тунатэк? Котькуд лэсьтоно вамыш лыдъямын-чотамын медло, шуо. Автобусэз кема возьмано ӧз луы. Калык но трос ӧвӧл. Анаеныз Онись кенакез, артэ пуксьыса, соку ик маке сярысь вераськон мытӥзы. Олег усьтэм укноетӥ йырзэ педпала мычиз. Ыркыт тӧл солэсь бабля йырсиоссэ туга. Синъёсыз кыдёкысь-кыдёкысь инвисэ вутскизы. Югыралэс-чагыр адске азьпалась дунне. "Эх, улонамы но сыӵе ик югыт тылсиос ке ӝужасалзы... - малпаське Олег. - Эмъяськонмы пӧрмиз ке, Ижкарысь черке пырыса, мудор азе сюсьтыл ӝуатыса пукто. Инмарлы тау карыса. Лариса озьы лэсьтыны ӵектӥз. Мон но Инмарлэн нылпиез ук, юрттыны кулэ. Вӧсь кызлы сётэм кылме но быдэсто: курегмес вандо но вирен курбон сёто... Уть ай, кыӵе чылкыт инбам! Шунды но быдэс дунне тыр пальыша. Со вылысь виштыос синме уг йӧто. Озьыен, ваньмыз ӟеч луоз ай. Азьпалась ӟечезлы осконэз ыштыны кулэ ӧвӧл". * * * "О-о, та Фаина Николаевна сочиненилы тема шедьтыны но быгатэ ке быгатэ! - ӝӧк сьӧрын пуконъяз мыньпотэ Апасов. - Кин сярысь-о гожтоно меда? Адямилык но дунне адями сярысь мадёс пӧран - секыт уж. Нош йырвизез бергатытэк амал ӧвӧл. Кудпаласен кутсконо ай та? Адямилык. Дунне адями... Нылпи веттан кӧкыысен ик уг кутскы меда со сюрес?.." Анайзэ эмъяса бертыкузы ни, автостанциын автобус возьмакузы, Олег матысь лавкаостӥ котырскиз. Нырысетӥ уждунэныз ас сяменыз пайдаяськыны малпаз. Чыры- пыры кузьымъёс октӥз. Ас семьязэ сяна, гуртысьтыз ӟеч лэсьтыны, юрттэт кизэс сётыны дась луись адямиосты но ӧз вунэты. Онись кенакезлы но Эрки Аноклы чебер ныркышетъёс басьтӥз, Фаина Николаевналы - тузӥ ручка, Пачан Мишалы - портсигар, Ларисалы - духи... Ваньзы туж шумпотӥзы. Зэм, Герман сюратаез кунэрскиз. Солы уго Олег, витем-возьмам аракыез интые, сур гинэ вуттӥз. Винаен вузкарон лавка пала вамыштыкуз малпаз: "Малы-о мон солы ас киыным висён чер кузьманы кулэ? Ужаме понна премия ке сётӥзы, Ижкаре эмъяськыны вуылыны малпасько на. Пачан Миша агай келяса ветлыны оскытӥз. Медаз ӝожомы, сурен но тырмоз". Ижкарысь бертэмзы бере школае вуиз гинэ - Фаина Николаевна Олегез палэнэ ӧтиз но парсь вузам уксёзэ суменак сётӥз. Куиньнады ик дӥсяське, пе. Олег пумитъяськыны выриз ке но, дышетӥсез буйгатӥз: - Ужалод но берыктод ай, Олег. Мон тыныд оскисько. Улон сюрестэ али гинэ мытӥськод ук. Кунэрес, вожъяськон мылкыдын медаз кутскы со. Улонэд адямиослы осконэн мед азинскоз. Онись кенакез ныркышетсэ кузьмакуз синвуаськиз ик: "Ой, дунне адями ук тон, пие", - топ-топ вешаз Олеглэсь тыбырзэ. "Дунне адями... Кызьы-о со дорозь ӝутсконо меда?.." - кияз ручказэ бергатэ Олег Апасов. 25 шуркынмон-12 толсур 1999 ар. 1: * Шумот - суббота, кӧснунал. 1: * Мырт - кужмысь. 1: * Дуриськон куала - кебит. 1: ** Тэкич - молот. 1: * Нужна - секыт адӟон. 1: 1: 1: 1: 1 1: 1: Михаил Иванов Эшмед но эшмедъёс Удмуртъёс эш кылэз ярато но, туж мур валало но. Милям гуртмылэн нимыз но солэсь кылдэмын - Эшмед. Селта черкогурт дорын со. Гуртмылэн матэтӥз вашкала Сибыр тракт ортче. Ми палась куд-ог фамилиос но та кыл бордысь ик потэмын: Эшмаков, Эшманов. Удмурт калык кылосысь одӥгез легенда но со вылысен кутске - "Эш-Тэрек". Пересьёс Эшмедмылэн ма муген тазьы нимаськемез сярысь тазьы лабыртыло вал. Выль гурт кылдоно интые, пе, азьло ик Моко нимо воргоронлэн пиез юртъяськем. Нырысетӥ аръёсаз солэн юртъяськем интыезлэн нокыӵе нимыз вылымтэ. Та адями, огназ улэменыз, сюлэмыз позыръяськымон мӧзмылэ вылэм. Юрт пушказ бергакуз но, азбараз со-та ужакуз но, Анлэт ӧр дуртӥ солань-талань ветлылыкуз но, шур валлинысь тэлетӥ поръяллякуз но аслыз ачиз уйбыртыса выллем со кылалоз-буралоз вылэм: - Эш мед... Эш мед... Эш мед луоз вылэм... Э-э-эк... Ок-ок-ок... Солэсь огназ дыръя та вераллямъёссэ кинъёс ке кылӥллям, шӧдске. Моколэн пиезлэсь пуксем интызэ Эшмед шуыны кутскиллям. Солэн коркаеныз артэ мукет юртъёс кылдэм бере ини та выль гуртэз ваньмыз Эшмед шуыны кутскиллям. Гурт кылдэмын бере, сое кызьы ке одно ик ниманы кулэ ук. Эшмед гуртэ мыным калыкезъя но, нимызъя но ӵыдонтэм чебер потэ. Сылэ со, уг быры. Нокыӵе сильтӧл сое отчы-татчы пазяны уг вормы. Ма, медаз но вормы. Мед, котьку мед улоз Эшмед. Быдэсакез та югыт дунне сямен ик. Тятие Тӥни самой со Моко выжыысь ми но - Ивановъёс - потӥськеммы. Моко пилэн пиез Миквор луэм, Микворлэн пиез Иван, Иванлэн пиез Микаль, Микальлэн - Матё но Ботё, Матёлэн берпуметӥ пиез - мон, мынам пие - Витя (Виктор гожтӥське). Выжымы, озьыен, паськыт-паськыт но юн луоно вылэм. Но Октябрь революция солэсь вань улон азьзэ сураз-пожаз... Тятиелэн Микаль тятиез кулон азяз кык пиоссэ дораз ӧтем но шуэм: "Я, мон та югыт дуннеысь кошкисько ини. Тӥледлы тани быдэн кырым зарни кельтӥсько. Азвесез асьтэос тодэмъя люке. Та зарни вӧзы эшшо кырым-а, тросгес-а люкалэ но асьтэ пиостылы тазьы ик кельтэ. Узырлык пичиен-пичиен гинэ люкаське. Тон, Матё, вузкаронэныд ик выр. Тон, Ботё, гурт котырез возь". Тазьы вераськемзы бере ӵуказеяз Микаль песятае кулэм. Сое Мултан черке пырталлям, вӧсяллям но ватӥллям. Та вакытэ мынам тятие но, Ботё но кышноёесь вылӥллям ини. Но тятиелэн со дырысь нырысетӥ кышноез кыӵе ке кыль висён сэрен кулэм. Тятие, туж ик трос дышетскымтэ ке но (церковно-приходской школаез быдтэм ик кадь), ваньмон дыръёсаз книга-газет но кияз кутылоз вылэм. Уксё лыдъян-чотанын со укыргес нодлыко вылэм. Отысь-татысь пӧйшур но пудо ку бичаса, Вавоже но, Сюмсие но вуылозы, пе, вал. Умошуд гуртысь Шапей Иван вузчиен ӵошенназы Тылошур доры етӥн завод пуктыны кенешо вылэм ини. Но малпанзы малы ке быдэсмымтэ. Отӥяз ини тятие Вятка губерниысь Слободской городэ кык бигеръёсын ӵош ку посон завод пуктэм. Тылошур кенакелэсь агайзэ отчы приказчике келяллям. Песятае но, тятие но туж ӝужыт мугороесь вылӥллям. Тятие чагыр синмо, веськрес, чебер вылэм. Маскаръяськыны, пе, ортчыт яратэ вал. Тамак ӧвӧл кыскем, вина ӧвӧл юэм. Куное дораз кинэ ке ӧте ке яке ачиз куное мынэ ке, одно ик дуно папирос пачка поттоз вылэм. Кыске, пе, дуно куноос, чик жаль ӧвӧл! Граждан ож вакытэ карательной отрядъёс (шонергес верано ке, бандитъёс, мародёръёс), пе, ветло вал. Эшмедэ соос кык пол вуылӥллям. Зарнизэ таланы турттыса, тятиме туж зол жугиллям. Тятие вӧсь луэменыз кровать улэ, пе, ватӥське, бандитъёс сое отысь куктӥз кыскыса потто но урысэн нош ик жуго. Ӵапак соку, со минутэ ик, тӧдьыос гуртэ вуиллям но бандитъёс соослэсь кышкаса пегӟиллям. Кин тодэ, учырез тазьы ӧй тупасал ке, тятиме соку ик виысалзы но, оло. Та дырысен солэн тыбырыз куазь воштӥськемлы быдэ чидантэм висьылэ вылэм. Тятиме мон ӟеч уг тодӥськы ни. Уйвӧтысь кадь гинэ син азям пуктӥсько: ссылкаысь висьыса, лы но ку гинэ кыльыса бертӥз но, со нуналэ ик нэнэеным ӵош Анлэд дуре васькизы. Шурмес, возьёсты-лудъёсты - оглом инкуазез, пе, туж яратэ вал со. Кулон азяз соосын люкиськыны шуыса ветлӥз, дыр, соку. Шур дурысь тубемзы бере койка вылысь ӧз султылы ни. Туж зол висиз ке но, ӧз ӝуштылы, ӧз керӟегъяськы. Ын улын шып кыллиз. Кулӥз но озьы ик: шып, нокыӵе куара поттылытэк. Кинлэн тятиез вал, мон, конешно, соослы туж вожъяськылӥ. Но нэнӥе укыр куректэмме, вожъяськемме эшъёслы возьматыны ӧз лэзьылы. Со шуоз вал: вожъяськон - самой урод сям, со ляльчиослэн улон радзы. Али дырозь мынам нокинлы но вожъяськеме но, йыбырттэме но ӧвӧл. Ӟеч мылкыдо, чылкыт малпано ке - тон мынам эше, юлтоше, кырсь малпано ке - кош дорысьтым, азьыдлэсь тыбырыд чебер. Озьы улӥллям мынам тятие но, нэнӥе но. Калыклэсь пӧртэменызы ик, оло, сокем трос курадӟонэз но адӟизы. Нэнӥе Костя - лапег мугоро, паськыт пельпумо, тыр сӥльвиро егит воргорон. Блинов дораз ӝомо-югдо вакытэ гинэ вуиз. Корка пыриз но, дӥськутсэ но кыльытэк, лыз дэра сумкаысьтыз ньыль полэс куасалтэм газетэз поттӥз. Бер вуэмысьтыз паймыса, пумитам Насьток кышноезлы газетлэн ӝыны бамез быдӟа патретэз возьматӥз но шуиз: - Тани та луоз табере Инмармы. Собере ӟус вылэ султӥз но мудор рамаысьтыз Христосэз басьтыны кутскиз. Насьток, тае адӟыса, кыӵак абдраз, бакомиз кадь, ма вераны кыл уг шедьты ни. Ӧжытак буйгамез бере алвылаз чабкыса шуиз: - Мар дауртӥськод тон, Костя! Эн иса! Мар озьы выриськод? Инмар борды эн йӧтскылы. Ой, быри, быри! Мар ишан та, мар ишан! Костя, конешно, кышноезлэсь вӧсяськемзэ, Мултан черке но ветлэмзэ ӟеч тодӥз. Но со ӧз малпалля, Насьтӥез туннэ таӵе пурӟоз шуыса. Костя азьвыл но вералляз: Инмарлы оскон - со синпӧет гинэ, дунне вылын нокыӵе Инмар но, мукетыз но ӧвӧл. Солы, куанер семьяысь егит воргоронлы, Селталась партийной ячейкаын ялан индылӥзы: "Вӧсяськон, Инмарлы оскон - со узыръёслэн калыкез пӧян понна верамъёссы гинэ". Костя талы пумен-пумен оскыны кутскиз. Собере огезлы но, кыкезлы но та малпанзэ пыӵатыны турттылӥз. Отӥяз, партячейкалэн дэмламезъя, аслаз Сурӟи гуртаз ачиз кадь ик дасо мында егит пиосын но нылъёсын ӵош комсомол ячейка кылдытӥз. Ӵош люкаськыса, та егитъёс выль улонэз данъясь кырӟанъёсты кырӟаллязы, комбед, ликбез шуонъёслэн ужъёсазы пыриськылӥзы. Но ӝоген граждан ож пуромиз. Сурӟи, Мугло, Гопгурт, Эшмед палъёстӥ со ож огпол гинэ ӧвӧл, куинь-ньыль пол гудыръяса но котыр дуннеез тылын ӵушкаса ортчиз. Та гуртъёс туннэяз гордъёс кие, ӵуказе тӧдьыос кие сюрылӥзы. Тӥни соку Костя Блиновез, партячейкалэн дэмламезъя, Горд Армие мынытӥзы но комиссаре пуктӥзы. Блинов ӵапак соку веськрес мугоро, курень синмо, мертчан йырсиё Насьтоксэ адӟыны Селталась бертӥз. Корка пыремез бере ик мудорысь Инмарез интые Ленинлэсь патретсэ интыяны кутскиз. Яратоно кышноез солэн мылкыдызлы меӵак пумит кариськиз: - Васькы отысь, Костя, эн иса Бадӟым Инмарез. Озьы вырид ке, мон тон дорысь кошко. Нош Костя Насьтаезлэсь уг кылзӥськы. Ас понназ малпа: "Валалод ай, валалод..." Кузпалыз Насьтӥлы азьвыл но вералляз: "Азьланьын асьмеос умой улом, али кадь ум курадӟе. Узыръёслэсь ваньбурзэс талалом но куанеръёслы люкылом". Сюлмызлэн куд ке пал сэргыныз, оло, Насьток вала но вал картэзлэсь малпанзэ. Ведь учконо ке, вань калык курадӟе. Сурӟиослэн няньзы, вылез вуытозь, арлы быдэ уг тырмы. Насьтӥ нэнэзэ ялан жаля вал. Огназ ужа, огназ сюдэ ук со. Тӥни куинь ар талэсь азьло гинэ дядяез кулӥз, вылаз ик, олокытысь-марысь тылпу потыса, корказы сутскиз. Гуртысьтызы узыр улӥсь Никодим агай ке ӧй юрттысал, оло, пыдйылскысалзы но соос. Со Никодим агай таослы куинь арлы, пунэмен шуыса, дас кык пуд нянь но ветыл сётӥз. Али капчигес ини: вынъёсыз будӥзы, мар но со ужаны быгато ини. Никодимлы пунэмен тыронзы но трос ӧз кыльы ни. Насьток малпа, тае Инмар радъяз шуыса. Соин ик арнялы быдэ нэнэеныз ӵош черке ветлэ, семьязылы юрттэмез понна Инмарлы тау каре. Нош табере таӵе югдур кылдӥз: аслаз картэз, яратоно картэз, Бадӟым Инмарез сантэма, солэн интыяз улэп муртлэсь - Ленинлэсь - тусбуйзэ пуктӥз. Озьы нырысьсэ та кузпалъёс туж лек керетӥзы но пӧртэм интыосы изьыны выдӥзы: Костя кровать вылэ, Насьтӥ - сэндрае. ...Туж вазь ӵукна, ӟардэм бере ик, урамысь вал пыд куараос кылӥськизы. Костя соосты ӝоггес кылӥз. Сюлмыз мае ке шӧдӥз, лэся: кышказ, либрак луиз. Пельпумъёсаз дукес возъяз но Насьтӥезлы сэндрае сузьтӥськыса шыпыртӥз: - Монэ утчало ке, мон татын ӧвӧл, Селталан. Валад-а? - собере гулбеч ӧсэз усьтӥз но отчы шыпак зымиз. Валъёс, зэмзэ ик, соослэн капка доразы дугдӥзы. Капкае урыс ныдынызы йыгало ини. Насьтӥ дэремзэ ӝогак дӥсяз но педло потӥз. Ӧтьымтэ куноос капкаез пыдынызы ӵыжало. Насьтӥ кутэтэз усьтӥз гинэ но, сое егит солдат, номыр вератэк, бур пала донгыса погыртӥз. Кык солдатъёс но офицерзы корка бызьыса пыризы. Солдатъёслэн киосазы винтовкаос, офицер пистолетэн. Сьӧразы Насьтӥ но кыстӥськиз. - Кытын картэд? Кытчы сое ватӥд? - пистолетсэ сэзъя офицер. - Уг тодкы, - шуэ Насьтӥ. - Ах, уг тодкы-а? Вера, кытчы ватӥд! - урыссэ урдӥз солдат. - Утчалэ, со татын кытын ке, - солдатъёсыз шоры лек учкыса шуиз офицер. - Тон коргидысь, чуланысь утча, нош тон - гулбечысь, - солдатъёсызлы косъяськиз белогвардеец. Ну, мар-о утчанэз? Гулбеч ӧсэз одӥгез солдат усьтӥз гинэ но, отысь Костяез соку ик адӟиз. Соиз косытэк но, маратэк но отысь потӥз. - Эй, эн утчаське ни. Тани со - горд комиссар, - педло потэм солдатъёслы кеськиз тӧдьы офицер. Собере Костялэсь киоссэ мышласянь урысэн керттылӥзы но ураме поттӥзы. Соос сьӧры канжаськылыса но шонаськыса мынэ Насьтӥ. Сынамтэ йырсиосыз сураськемын, синъёсыз шулӟектэмын. Мугорыз куалекъяса тэльмыре: - Эн ыбе картме. Со интые монэ вие... Тӧдьы офицер шуак дугдӥз но шуиз: - Сылэ! Тани мар, горд комиссар, мон тыныд улон кузьмало. Ойдо ми сьӧры, ойдо ми палан гордъёслы пумит ожмаськыны. Соглаш-а? - Ӧвӧл. Революция понна, Кенешо власть понна мон улонме но уг жаляськы, - офицер пала берытскиз но лек тусын вераз Костя. - Ачид тодӥськод! Азьлань! - команда сётӥз но гуртлэн пум палаз возьматӥз офицер. Ӧжыт улыса, офицер солдатъёсты нош ик дугдытӥз. - Дугдэ! Кылзӥськы ай, пась бер, бер ӧвӧл на, визьмаськы. Ойдо ми сьӧры. Мынам тонэ виеме чик уг поты. Астэ ке уд, чебер кышнодэ коть жаля, - мылкыдыз шунытасагес вера ни офицер. - Яке пегӟы-а, мар-а кытчы ке... Насьток, так кылыса, Костя доры лобӟыса кадь лыктӥз но солэн саес бордаз юн-юн кырмиськиз: - Кылзӥськы, кылзӥськы, мусое. Тӧдьыосын кошкемед ке уг поты, ойдо туннэ ик Вавоже пегӟом но, война бырытозь, отын Зина апаед дорын улом. Жаля астэ, жаля монэ. - Мон, комиссар маке, пегаса мед ветлом-а? Уг. Вормон понна мон вордскемын, улэпкын уг сётскы! - урам тыр кесяське Костя. Сое кылыса, отысь но татысь корка укноосы адямиос мычиськизы, но ураме потыны огзы но ӧз дӥсьтэ. - Азьлань! - нош ик косӥз офицер. Костя вамышъя но малпа: кӧня вамыш меда мынам улонэ кылиз на? Э-э, курадӟыса улонлы тани-тани пум вуэ вал кадь. Революция куанер калыклы ӟеч улон сётыны медэ вал ини... Вот табере мон одӥг-кык-куинь вамыш вамышто, усё но... уг шока ни. Оло нош, Инмар доры мон али мынӥсько. Но... большевикъёс верамъя, дуннеын нокыӵе Инмар ӧвӧл. Оло мон обросысь Инмарез басьтэме понна таӵе кыл кутӥсько-а? Оло берытсконо но таослэн пыд азязы выдыса тэльмыроно, медаз ыбе шуыса. Одӥг-кык вамыш... Нош Насьтӥ? Со дугдылытэк синву кисьтэ но тэльмыре: - Жалялэ сое. Монэ, монэ ыбе со интые... Вуизы урам пуме. Костялэн йырсазез тыкиськиз, сураськыны кутскиз. Вамышъямзэ ик уг шӧды ни. Со дась вал ини вераны, тӧдьыос сьӧры мыноз шуыса, но малпаз: "Мон соосъя кариськи ке, гордъёс татчы вуозы но кышноме сопал дуннее келялозы". Урам пуме дугдӥзы. Костя "мон соглаш" шуыны ымзэ усьтӥз вал ини, со вакытэ офицер йырзэ резяк шоналтӥз но, кык винтовкаосысь ыбем куараос быдэс гуртэз зуркатӥзы. Костя пограз. Насьтӥ солэн мӧля вылаз лэзиськиз, дэрем гадьыз пӧсь вирен пеймыт-горд луиз. Тӧдьыос сое жальмаса, жаляса сылыны ӧз ик малпалэ, валъёссы вылэ пуксизы но Мугло пала ӝог-ӝог лашкинтӥзы. Со дырысен Насьтӥлы быдэс дунне уй кадь пеймыт луиз. Картсэ ватэмез бере ик нэнэ юртаз берытскиз. Вынъёссэ утиз-вордӥз, ужаз но арня нуналъёсы Мултанысь черке ветлӥз. Конешно, картсэ виён нуналэ ик обросэ Христосэз лад-лад интыяз. Озьы сюлэмзэ ӧжытак буйгатӥз кадь. Насьтӥлэн валамезъя, картэз Инмар азьын сьӧлыкеныз йырин озьы быриз. Ма, Христосэз Ленинэн вошты ай... Со ведь адями виемезлэсь но бадӟымгес сьӧлык. Выль Мултан черкын та чебер но туж куректӥсь егит кышномуртэз Пётр отец, удмурт поп, синйылтӥз. Одӥг пол, вӧсяськон йылпумъяськем бере, со Насьтӥ доры лыктӥз но каллен гинэ юаз: - Мар сэрен сюлмыд сокем бӧрдэ, нылы? - Ой, святой отец, мынам чик-чик улэме но уг поты ни. Картме тӧдьыос виизы... - Э-э, тынэсьтыд-а карттэ ыбизы? Мон кылӥ вал, кылӥ. Буйгатскы, нылы. Кылдэмез сыӵе вылэм, дыр. Весь бӧрдӥсь, куректӥсь адямиез Инмар уггес яраты. Мар карод. Улон али сыӵе уга... Ӟечезлы оскондэ эн ышты. Уно пол озьы буйгатъяз сое удмурт баӵко. Одӥг пол дораз пыртылӥз, Елена матушкаеныз но тодматӥз. Паяен, пыжем нянен утялтӥзы. Мукет радаз, вӧсяськон бырем бере, Насьтӥ Сурӟияз бертыны потӥз вал. Тымет пала васькон дорысен сое сутӥз Эшмедысь узыр егит воргорон - Микаль Матё. Татчы со тӧдьы валэн, тарантасэн вӧсяськыны ветлылӥз. Егит кышномуртэн артэ валзэ дугдытӥз но вазиськиз: - Асьмелэн сюресмы одӥг, дыр. Пуксьы, дыдые. Пыдын кема вамышъяно луод. Жадёд но. Насьтӥ ӵыжак ӵыжектӥз. - Мон пыдын ветлыны дышемын, уг жадиськы, - шуиз. - Ойдо пуксьы ини, валлы секыт уз луы. Тон Сурӟиысь ведь? - тэльмырем кадь вазиз Матё. - Уг, у-уг. Нош кызьы монэ тодӥськод? - паймыса юаз Насьтӥ. - О-о, мон тонэ кемалась синйылтӥ ни. Зэмзэ верано ке, тонэ адӟыны шуыса татчы ветлӥсько. - Матё тарантасысьтыз шуак тэтчиз, егит кышномуртэз кускытӥз лӧбак ӝутӥз но тарантасаз пуктӥз. Соиз мар шуыны ик ӧз шедьты. Вал гонӟыртыса Умопуд пала ворттӥз. Собере сое Матё пырак Сурӟияз нуиз на. Гуртэ ӧз пыра. Гурт пумысен васькытӥз. Отӥяз соос нош но нош черкын пумиськылӥзы. Матёлэн нэнэез Муглоысь вал. Пизэ со ялан индылӥз, Насьтӥез кышно мед басьтоз шуыса. Ужась семьяысь, пе, востэм, чебер, кин-о, мар-о, пе, тыныд кулэ на. Нош Насьтӥлэн выльысь бызён сярысь йыраз малпан но ӧз лыктылы. Берло гинэ синмаськиз-а, мар-а, вылды, граждан ож бере кык ар ортчыса, со Матёлэн, чебер но узыр воргоронлэн, кышноез луиз. Нырысь-валысь Насьтӥ та юртъерын йыромем-усыкмем кадь но луылӥз. Пересьсы - ӝужыт Микаль - "Мын ай, кен, льӧмпу вадьсысь кеносысь тари кеньыр пырты" шуэ ке, уг тоды вал, кытын соиз - льӧмпу вӧзысез кенос. Таослэн уго куать кеноссы. Котькудӥз вӧзын - льӧмпу. Отӥяз дышиз. Вазь ӵукнаысен бер ӝытозь уж тырмылӥз. Пудолы сиён дасян понна колдэч вӧзын ик ту-у-ж бадӟым пурты сылэ. Доразгес эшшо кык пичиесь пуртыос. Кык корка. Одӥгез ньыль сэрего, улыно-вылыно, мукетыз - куать сэрего. Семьязы бадӟым. Песятайлэн куинь вынъёсыз. Куинез вӧзаз: Дмитрий, Николай но Сергей. Зэм, пичиез вынзы, Сергей, Селталан улӥз. Булычёв вузчиослэн приказчиксы вал. Эшмедаз арня вискын одӥг нуналлы гинэ бертылӥз. Семья бадӟым бере, сиён но трос пӧзьтоно, тусьты-пуньы но трос миськоно. Нош бусы ужъёс кӧня! Ньыльдон десятинлэсь уно бусы но Анлэд шур дуртӥ сомында ик возьёс. Насьтӥ жадёнэз ӧз шӧдылы. Вузкаремысь бертэ ке, картэз со доры лобӟыса кадь вуэ но чыртыяз ошиське. Матё картэз улосын туж тодмо ужбергатӥсь. Пӧйшур но пудо куос октыса, гуртысь гуртэ ветлылӥз. Люкамзэ коротникын сузя, куасьтэ но кык бигер вузчиосты возьма ини. Соос солы дун тыро, тау каро но кошко. Лыктыкузы, конешно, олокыӵе бискылиос, саламъёс ваё: куасьтэм но сылалтэм горд чорыг, мызь, кампетъёс - оломар но. Матёослэн горд чорыгзы ноку ӧз бырылы. Сӥльзы котьку асьсэлэн. Няньзэс ӝыныез гуртсы пунэмалляз. Огпол, изьыны выдэм беразы, Насьтӥ картсэ ӟыгыртӥз, чупаз но юаз: - Матё, мон весь юаме потыса улӥсько: кызьы тӥ тамында ваньбур люкады? Уть, зарнидэ но толон возьматӥд - лыдъянтэм трос ук! - Э-э, нуные, мусонькае, та ваньбур дауръёс ӵоже люкамын. Выжыямы тани кин но кин вылэм: Миквор, Иван, Вася, соос бӧрсьы ини мынам дядие. Али тодӥсь но ӧвӧл ни, оло Миквор, оло Иван доры йыромыса кык бигеръёс-вузчиос вуиллям. Соослэн валзы висьыны кутскем. Вот тӥни, Миквор ик, дыр, со бигеръёсты ас валэныз гуртысь гуртэ ку бичаса нуллэм. Собере ачиз но вузкарыны дышем. Тӥни отысен ни та уж мон кие вуиз. Но ведь ваньбур люканы уй но нунал ужам кулэ. Ачид адӟиськод: ми ноку но ужтэмаса ум пукиське. Зэмзэ ик, таос лумбыт ужало, ӝытазе гинэ котькудӥз ас интыяз пуксе но эшшо мар но со ужа на. Пересь Микаль шур сьӧры тэль мерттыны тысь дася, Ботё - Матёлэн выныз, кут кута, кышноос черсо, керттӥсько, дэра куо... Ӵукна ини пудо люктано. Таиз - Насьтӥлэн ужез. Одӥгъёсыз скалъёс, ыжъёс, ветылъёс, валъёс, парсьёс гидысь гинэ пото ай, мукетъёсыз ошмес дорысь ву юыса берто ини. Ӟазегъёсты, курегъёсты, ӵӧжъёсты, немычъёсты лыдъясь но ӧй вал. Дасо мында вал но чуньы возизы, кык ужпи - ворттылыны. Одӥгез лымы кадь тӧдьы, мукетыз - су кадь сьӧд. Вольытэсь соос, чебересь, сэзесь, проворесь. Соосты утялтыны, сюдыны, сузяны Матё мукетъёслы ӧз оскылы. Соослэн вамышен вамышъямзы ик уг луы кадь вал. Йырзэс вылӥе урдыса гонӟырто яке лашкинто. Валъёсты кыдёкысен адӟыса, урам дурын шудӥсь пиналъёс кир-пазь пегӟо. Ульча паськыт, нош сюрес урдэсъёсын вож-вож ожо. Ма, улон огсыр мынэ вал. Кинлэн ке коркаез сутскыны шеде яке пудоез - валэз, скалэз кулэ ке, соку ини адямиос курадӟылӥзы. А так огсыр улон вакытэ нокин ик сокем ӧз курадӟылы. Нош кураськыса эшмедъёс ӧз ветлэ. Та палан музъем туж удалтытӥсь. Вӧё музъем. Ну, юись, картаен шудӥсь, азьтэм семьяос вал ик. Но гуртоос соослы но юрттылӥзы. Тужгес ик тау каро вал Сатёослы. Курадӟись семьяослы соос дунтэк ӟегзэс изылӥзы (вукозы но Анлэд дурын вал уго), пунэмен кеньыр но, пызь но сётъяллязы, кунян но, чуньы но дунтэм дунын вузаллязы. Огъя вераса, гурт калык понна та семья матэ кариськыса улонтэм ӧй вал. * * * ...1919 арын Выль Мултанэ учительской семинария усьтыны малпазы. Со дышетскон юртлы аслэсьтыз бугрозэ сётӥз Умопудысь кыкетӥ гильдиё вузчи, Куӟебай Гердлэн кышноезлэн ӵыжы-выжыез Шапей Иван - Иван Антонович Ирисов. Семинария кылдытон сярысь укыр сюлмаськиз Насьтӥлэн тодмо удмурт попез Пётр Фёдорович Лекомцев. Нош Матё та вузчиен но, та попен но туж эшъяське вал. Нырысетӥ пиез вордскем бере киросатае Ирисовез басьтӥз. Лекомцев поп солы нимзэ но Пётр кариз, аслэсьтыз сётӥз. Огпол, вазь ӵукна ӟардон азьын ик, Ирисов вузчи но Лекомцев Матё доры вуизы. Насьтӥ пыд йылаз вал ини. Тодмо попез капка дорысен пумитаса, солы музъемозь йыбырттӥз но кизэ чупаны турттэ вал. Поп кизэ палэнтӥз. Мон, пе, черкын, службаын ӧвӧл. Мон, пе, дорады али огшоры адями музэн лыктӥ. Насьтӥ лыктэм куноосты корка пыртӥз, кыкетӥ этаже тубытӥз. Отысь бадӟым залэ Матё но со вакыт вуиз. Олокытысь-мар сурон сапег но кутчаны вуэм, выль лыз дэремзэ но дӥсям, пумен векчи мыйыксэ маялля. - Ой, кыӵе дуно куноос вуиллям, - киоссэ лопак карыса, доразы лыктӥз, я одӥгзэ, я кыкетӥзэ ӟыгыръяз но куинь пол чупаз. Ӝӧк сьӧры пуксизы. Насьтӥ олокытӥ-мартӥ сиён-юон пуктылӥз. Но сое нокин ик ӧз веръя. Та куинь воргоронъёс вина но уг юо, тамак но уг кыско. - Кыӵе сюрес вуттӥз меда тӥледды та пала? - юаз Матё. - Муген лыктӥм ай. Уд юртты-а тон, Матвей Михайлович, Мултанын семинария пуктыны? - юаз Пётр отец. - Ӧйтӧд, кыӵе юрттэт бон кулэ? - ӟудомиз Матё. - Борддоръёс вань, липет кулэ, - шуиз Шапей Иван. - Да-а, липет, иське, - малпанэ усиз Матё. Собере шуак луиз но вераз: - Ма, мынам пулъёсы вань. Вуко кеносэз пулэн шуккыло шуисько вал... - Ӵапак сое тодыса ик мон баӵкоез дорад ӧти. Вунэтӥд-а, кызьы ке верад вал, пулэд вань шуыса? - юаз Шапей Иван. Озьы ик кенешизы. Семинариез та куинь воргоронъёслэн сюлмаськеменызы но юрттэменызы пуктӥзы. ...Кӧня ке ар ортчыса, Шапей Иванэз Сибире келязы, нош удмурт баӵкоез, Пётр Фёдорович Лекомцевез, "калык тушмон" карыса ыбизы. Берлогес ини отын дышетскизы мынам нэнэелэн ӵыжы-выжыосыз - Пётр Блинов но Михаил Лямин. Пыдйылчи Та аре укыр трос лымы усиз. Азбарысь сое сузяськод гинэ но, ӵуказеяз сомында ик люкаське. Матёлэсь одӥг липет корзэ но зӧк лымы чигтэм. Гужемозьлы шуыса, отчы зӧк юбоослэсь кык пыкет пуктоно луиз. Одӥг пол вазь ӵукна ик Матёлэн капкаез вадьсы кошовкае кыткем пар валъёс дугдӥзы. Ӝоген капка ӧсэ туж зол йыгаськыны кутскизы. Ӵыжало-а, бодыен йыгало-а. Матёлэн кӧшкеман но кышкан сямыз вал. Соин ик кышноезлы - Насьтӥлы шуиз: - Мын ай, учкы, асьме доры кин таӵе вазь вуиз. Нош ӧтьымтэ куноос вистэс-вожтэм йыгасько, кык пуныос соос шоры урмыса уто. - Кин отын? - юаз Насьтӥ. - Усьты! Ӝоггес! - лек вазиз капка сьӧрысь воргорон. Насьтӥ усьтӥз. Син шораз соку ик куинь милиционеръёс адӟиськизы. Лекесь, кышкамонэсь. Огез милиционер Насьтӥез винтовка прикладэныз донгиз но лымы пуктосэ паллян пала уськытӥз. Насьтӥлэн сюлмыз пилиськиз кадь. Соку, чилектэм музэн, син азяз пуксиз нырысетӥ картэз Костя, горд комиссар, сое ыбыны лыктэм белогвардеецъёс. Насьтӥ огдырлы йырсазьзэ ыштӥз. Сазьтӥськемез бере корка пыриз но адӟе: та милиционеръёс корка шорын Матёлэсь кисыоссэ, дэремъёссэ эскеро. Пистолетэз-маиз ӧвӧл-а шуыса эскеро, луоз. Собере кровать котыръёсты бугыръязы. Полате-сэндрае тубазы. Насьтӥ мар карыны, мар вераны тодытэк, мурт адями кадь, ӧс дорын сылэ. Милиционеръёслэн кузёзы ӝӧк сьӧры пуксиз но юалляськыны кутскиз. Собере одӥгзэ милиционерез гуртысь адӟисьёсты-понятойёсты вайыны косӥз. Матёез ӝӧк сэргы пуксьытӥз. Юалляське: - Тон Матвей Михайлович Иванов, озьы-а? - Озьы, - вера Матё. Собере Матёлэн кышноез шоры учкиз: - Ма, куноос лыктӥллям ук, уродэн-а, умоен-а, утялтон пуктылы ай, Насьтӥ. Соиз соку гинэ уммысь сайказ кадь. Сылалтэм чорыг, сӥль, кубиста поттӥз, олокытысь бадӟым штопен горд вина но вуттӥз. - Сиелэ, юэлэ. Кыдёкысь вуиды, луоз. Кынмиды но, дыр, - шуиз. Кык милиционеръёс уралмем кадь сиськыны ӧдъязы. Горд вина но юо. Кузёзы дугдылытэк юалляське но гожъя. Мар-о юа? Кӧня ляльчи возид? Кызьы тамында ваньбур люкад? Оломар сярысь но. Собере, эшъёсызлэсь горд винаез ӵем бекыръямзэс адӟыса, шуак ӝӧк вылэ мыжгиз: - Тырмоз! Мар-о тӥ? Службаын-а яке куноын-а? Соосыз, вӧесь ымдуръёссэс саесъёсынызы ӵушылыса, ӝӧк сьӧрысь кыштырак потӥзы. Корка пушкы со вакыт трос калык люкаськиз. Кин лушкемак-лушкемак ӟеч дӥськутъёсты поттылэ, кин ӟенеликъёсты нуллэ. Насьтӥ но огыр-бугырен валче зарниен коробказэ лушкемак поттӥз, лобӟыса кадь артысь корка пыриз но со ящикез сьӧрос пыдэсазы выйытӥз. Собере нош ик улоно корказы вуиз. Со вакыт милиционеръёслэн йырзы приговор мактал лыдӟе вал ини Матёлы: - Волисполкомлэн пуктэмезъя, тон, Матвей Михайлович Иванов, кулаке поттэмын но тынад быръён правоосыд таламын, тонэ арест улэ басьтэмен лыдъяськомы. - Озьы ке озьы, мар карод, - номыр шугъяськытэк, огшоры вераз Матё. - Но мон ваньзэ ӧй лыдӟы на, - шуиз милица йыр, - ваньбуред таламын луоз. Озьы кутскиз та семьяын мур лымыё тол нунал. Пеймытозь татын кузёяськизы куинь милиционеръёс. Соослы юрттӥзы комбедчикъёс, адӟисьёс. Кулаке поттэмъёслэн валъёсынызы ик куать воз ваньбурез Селтала нуизы, кылемзэ, Мултанын но Выль Моньялан торг лэсьтыса, куанеръёслы дунтэм дунын вузамъяськизы. Бератаз та куанер семьяосысь кышноос Насьтӥлэн буртчин дэремъёсыныз кутсаськыны но, кыед ворттыны но ветлылӥзы. Озьы шузимиз И. В. Сталин. Озьы шузимиз калык но. Ай 1960-тӥ аръёсозь Эшмедгуртэ "Шудо шур" нимо (кылӥськоды-а: "Шудо шур" мурт чотын шудо улон, пе) колхозын одӥг пудо гид но, склад но, итым но, пудо гид но, вуко но ӧз лэсьтэ, валъёс-скалъёс но Матёлэсь быръем-утем выжыосысьтыз возиськизы. Гуртоос, таӵе дась "шуд" усемез адӟыса, воксё азьтэммизы, тросэз рай вуонэз возьманы кутскизы. Матёез но Насьтӥез, соослэсь пиналъёссэс кураськыса ветлон калэ вуттӥзы, пыдйылтӥзы. * * * 1931 арын, мон вордскем бере кык арня ортчыса, мынэсьтым нэнэ-дядиме но монэ ссылкае Архангельск областьысь Няндом посёлок доры келязы. Ачим мон, валамон, уг тодӥськы ни со дырез. Тятие-нэнӥе верамъя гинэ тодӥсько. Нэнӥе, Анастасия Фёдоровна Блинова (Иванова), со нуналысен та дуннеысь кошкытозяз, ас югдаз улӥсь но вераськисьтэм луиз. Инмарлы гинэ лулысь-сюлмысь вӧсяськоз вал - котькуд вазь ӵукна, бер ӝыт. Келяллям милемыз пудо нуллон вагонъёсын. Самой уродэз, пе, вал вагон пумысь ведраосы "педло потан". Пиосмуртъёс но, нылкышноос но отын огазьын ук. Нырысь, пе, кышноос одеялэн-маин шобырскыса ведралы шара верантэм интыоссэс возьмато, собере - пиосъёс. Берло, пе, ваньмызлэн возьдаськонзы быриз, тӧлъя кытчы ке кошкиз кадь. Ведра вылын пиосмурт пуке но, со бӧрсьы отчы ик нокыӵе кариськытэк лаптӥське кышномурт. Мар карод, адями котьмалы - уродэзлы но, ӟечезлы но - ӝог дыше. Нина апай Сыӵе бадӟым семьяысьтымы ми кык кузя гинэ: Нина апай но мон кылимы. Солы али тямыстон ньыль арес тырмиз ини, мон сизьымдонме выжисько. Ми выжыысь нылкышноос азьло кема уло вылэм. Мынамез песянае укмыстон тямысаз кулэм, солэнэз - даурзэ сю кык аресозяз кыстӥськытэм. Пиосмуртъёс малы ке вазь кулылӥллям. Асьсэды жалятэк уй но нунал ужано луэмысь, дыр. Собыдӟа юртъерез, сомында пудо-животэз возь ай. Верай ук ини: милям кык коркамы (одӥгез улыно-вылыно), мукетыз куать сэрего вылэм, куать кеносмы, быдэн дасо валъёсмы но скалъёсмы, уллёен-уллёен ыж, парсь вордӥллям на. Со сяна, кык кеносмы, кык мунчомы, итым, вуко, кизён, аран, тӧлӥськон машинаосмы, чипы- курегъёсмы, ӵӧжъёсмы, ӟазегъёсмы вылӥллям на. Таосызлэсь лыдзэс семьяямы тодыны ик турттӥллямтэ. Гырон-кизён музъеммы, возьёсмы но быдэн ньыльдон кык десятин вылэм. Нина апае ваньзэ тае тодаз возе. Сое сяна, мон уг тодӥськы сыӵе адямиез, кудӥз вань улытозяз нокинэ ӧз пӧя, нокинлы ӝоже уськытон кыл ӧз вера. Пичи дыръяз ӝоже кык пол усемез сярысь гинэ поттылӥз ик. Огполаз, пе, начальной школаын дышетскыкуз, пиналъёс солэн чыртыысьтыз кироссэ адӟиллям но со кирос сӥньыстӥз кыскаса но донгаса нуллӥллям. Серекъяло, пе, школа тыр ик горо но шуо: "Учке ай, учке, Нина Иванова Инмарлы оске. А Инмар ӧвӧл, а Инмар ӧвӧл. Сталин эш Инмар ӧвӧл шуиз ук. Со шуиз бере - Инмар ӧвӧл!" Кыкетӥез ӝож учырез таиныз ик герӟаськемын. Ваньзэ пиналъёсты пионере кутӥллям. Нина апайме кутӥллямтэ. Со, пе, кулак выжыысь. Со, пе, Инмарлы оске. Та дырысен Нина апае чыртыяз кирос ӧз нуллы (али нуллэ ини). Гурт калыклы тау карыса, со ялан тодаз вайылэ ссылкаысь пегӟемзэ. Сое отысь вайыны колхоз правление Трефин Иванэз ыстэм. Сое сокеме юри лэзиллям. Контролёръёс билет эскерыку, ява, та Трефин Иван Нина апайме сьӧросэ ватыны ятвылтэм. Таин валче тодам лыктӥз на таӵе учыр. Милемды ссылкаысь мед лэзёзы шуыса, сельсовет но, гурт калык но кык пол кенеш ортчытӥллям. Ваньзы-ваньзы эшмедъёс гожтӥськиллям. Кызьы со понна тау уд кары. Зэм, пайдаез солэсь ӧз луы. Кулэ вал, пе, Сталин кадьёслы Удмуртиысь кыӵе ке эшмедъёс... Нина апаелэн отӥяз но улонэз шулдыр ӧй вал. Ижкаре лыктыса, 74 номеро заводэ ужаны интыяськиз. Кин ке чагиськыны вуэм но, отысь уллязы. "Калык тушмонлэн" нылызлы ожгар тӥрлык лэсьтонын ужаны уг яра, пе. Война вакытэ со мукет заводлэн парсь вордон гидаз ужаз. "Пудоослэсь кылем-мылем картофказэс сиыса улэп кыли", - шуэ. Татын ужакуз со доры кыӵе ке сютэм пияш пырем. Чик тодмотэм маке. Нина апай сое картофкаен кӧня ке сюдэм. Кӧты ӧз тыры шуыса, картофка эшшо курем на. Нина апай картофка ваё на шуыса парсь гидаз мынэм. Соку та пияш апаелэсь быдэс толэзь ӵоже нянь басьтон карточкаоссэ но уксёзэ лушкаса кошкем. Али но ай солэсь марзэ ке-марзэ ке дырын-дырын лушкало. Ваучер нергеоссэ но, уксёзэ но ялан ыштылэ. Малыез тодмо. Вань адямиосты ачиз кадесь кожа, ваньмызлы оске. Куинь ар талэсь азьло чик ӵыжы-выжытэм висись кышномуртэз дораз утялтыса возиз. Ӝыны ар пала. Пуньыен сюдӥз, сьӧросэ нуллӥз. Сомында сюлмаськемез понна кулыны дасяськем кышномурт солы витьтон манет гинэ уксё сётэм. Нош со кышномуртлэн кенэз, ӵыжы-выжыосыз но вылӥллям. Одӥг пол но со доры ветлӥллямтэ. Кулэм бераз квартиразэ куспазы люкон понна керетыса жугиськиллям но, шуо. Сыӵе секыт улон сюресэз ортчыса но, Нина апае мылкыдзэ уг куашкаты. Нуналлы быдэ вазь ӵукна со зарядка лэсьтэ, одӥг комнатаен квартираетӥз бызьылэ. Ми доры но арнялы быдэ сямен ветлэ. Тазьы огшоры учкыса, та апае воксё валантэм кадь. Нош мур малпаськод ке, валаны луэ ик. Тӥни ук, Кенешо властьлэн унь-мань карем адямиосыз ноку но ӧз каргаськылэ, нокинлы урод ӧз сӥзьылэ. Эксэй Николай ИИ но калыкезлы ӟечсэ гинэ сӥзьыса улонысь кошкиз. Тае Инмарлы оскисьтэм, урод мылкыдо адямиос ноку уз валалэ, дыр. Анна апай Умопудысь семилеткаын дышетскыкум, пинал йырыным мон ялан малпасько вал: малы эшъёсылэн тятиоссы но бадӟым агайёссы фронтын ожмасько, нош милям семьяысь отын нокин ӧвӧл. Тятие мынам, кулаке поттэмзы бере, дорамы вуиз но ӝоген кулӥз, бадӟымез агае, самопал лэсьтыкуз, патрон пуштыса, чиньыостэм кылиз. Война кутскем бере кык-куинь толэзь ортчыса, Анна апайме коть фронтэ нуизы ик. Ну мон шумпотӥ ук. Анна апае связистка вылэм. Смоленскез мозмытон дыръя, 1942 арын толшор толэзе, со куинь нунал ӵоже кезьыт окопын улэм. Тыбырзэ кынтэм. Солэн тыбырыз Северысь бертыкуз но туж зол кынтэмын вал. Вирсэръёсыз кынмыса уродмиллям. Та апае вералоз вал: Смоленске, пе, пырим но, отын но татын юбоос борды асьме адямиос ошылэмын. Со ошем адямиослэн, пе, кылъёссы потылэмын... Война бырем бере Анна апае тэльын сир бичаса улӥз. Куать нылпи будэтӥз. Фронтын ожмаськиз шуыса, военкоматысь но, сельсоветысь но нокыӵе кузьымъёс-маръёс ӧз басьтылы. Ачиз но йыбыртъяса ӧз ветлы. Отын ужасьёслэн сое ӟечкын тодэ вайылыны тодазы ӧз лыктылы. Сыӵе милям сяммы: нокинлы, ноку эн йыбыртты. Нош кезьытэз солэн тыбырыз ялан шӧдэ вал - пӧсь гужемъёсы но тыбыры кынме шуыса вераллялоз вал. Кулон азяз пиналъёсызлы шуэм: "Монэ ватыны дасякуды, одно ик шуныт кофта дӥсялэ. Шайгуын ке но тыбыры медаз кынмы ни". Нош кулаке ӧй ке поттысалзы, тятиелэн пуктыны юрттэм педтехникумаз сое кутысалзы ке, кыӵе меда солэн улонэз луысал. Со туж ӟеч дышетӥсь луысал, дыр, "- сал" ке ӧй люкетысал. * * * Дискотекаын егитъёс жадьытозязы шулдыръяськизы. Олеглы Ларисаен туж каньыл, усто вал. Эшъёсызлэн тузӥ дӥськутсы шоры учкыса, пияш ӧжытак керпотылӥз ик, но берло ни лушкемен малпаз: "Куке мон но "вылкуме" вошто ай. Ужаме понна коньдон гинэ дыраз мед сётозы. Ай огдылэн но асьтэ коньдонэн дӥськут басьтэмды ӧвӧл. Дасьсэ сиись куака музэн улӥськоды". Дор палазы соос Чебыш Ларисаен валче гинэ вамыштӥзы. Ай нырысьсэ тазьы чусомем ӝытэ артэ берто. Инбамысь сюрло толэзь егитъёсты сак эскере: азьпал сюрессэс ӵужмыт, инӟыосын ворекъясь сюрелэн пазя. Егит пи Ларисалэн мугорыз, киыз борды йӧтскыны ик курда. Кожалод, Лариса хрустальлэсь кисьтэм ваза: бордаз янгышен йӧтскид ке, жиль-куаль пырдоз- жильдӥськоз. Чус вамышъяло соос. Озьы ке но, ог-огзэс валало, шӧдо кадь. Шудо тылгизьыосын кенжытскем синъёссы ваче учкыса кырмышъяло - лушкем мылкыд-малпанъёссэс шараяло, вылды. "Уть ай, нылмуртлы мусо кылъёс вераны, шыпыртыны гинэ но уг йӧндыриськы. Нюлымтэ ошпи!" - ассэ лушкемен куаретэ Олег. Ларисалэн капка выжыяз вуэмзы бере соос нош ик кылтэм-ымтэм луизы. Апасов киноысь адӟемезъя но книгаосысь лыдӟемезъя кожаз: синмаськем нылмуртэ одно ик чупано. Кытын, пе! Чебыш Лариса яра кадь кариськиз - бордаз йӧтскыны но уг лэзьы. Нырысьсэ яратон зарезьлэн тулкымъёсаз шедем егит пи амал шедьтӥз ик: Ларисалэн пельпумаз капчияк йӧтскиз но синъёсаз меӵак учкыса шыпыртӥз: - Мон тонэ яратӥсько, Лариса! Рябова, уй шыпытлыкез жиль-куаль пазяса, чингыли куараен серектӥз но капка сьӧраз лобыштӥз. Дор палаз мылкыдтэк вамышъякуз ни Апасов сактӥз: "Шузи мон, шузи! Нылмуртэ нырысьсэ келякум ик "яратӥсько" шуи. Соин серекъяз, дыр. Вот пӧрмостэм! Книгаысь геройёс та кылъёсты вераны туж шугъясько ук. Нош мон кутӥ но верай". * * * Ӵуказеяз ӝыт пал ужысь вуэм Апасовез Санька мыньпотыса пумитаз. Тае адӟыса, агаез алетскиз гинэ: - Серем пыры ньылыны шедьтӥд, оло, Санёк? Мар-ось шаньги сием кадь пальышаськод? - Агай, - вӧзаз матэктыса, лушкем вазиз Санька. - Мон тыныд туж но туж бадӟым лушкем ужме шараяй ке, мыным сётыны кузьымед, саламед вань-а? - Нырысь лушкем уждэ шарая. Собере ини дунъялом. Нош кисыосы бушесь ӧвӧл. - Мыкырскы ай вӧзам, пельёсад гинэ шыпырто. - Шара вера. - Уг, уг. Мон кыл сётӥ. Чебыш Ларисаез нокин уз адӟы, нокин уз кыл шуыса оскытӥ. Эсьмаса, Ира апайлы вератэк но чидатскыны йӧндыри, ява! Конешно, кыл йылам бичатыса улӥз. Но мон чидатски, воргорон сямме возьматэме потӥз. - Кинлы-кинлы кыл сётӥд? - шуак кариськиз Олег. - Ма, Чебыш Ларисаез шат уд тодӥськы? Ӵапак солы. - Шыпытгес тон, Санёк! - вынызлэсь кизэ кырмиз Олег. - Я, вера, мадь. - Ойдо бакчаысь льӧмпу вӧзы. Ватэтэ отын. Бакчае потэмзы бере Санька куакъёс пӧлын бугыръяськиз но, чагыралэс конверт поттыса, агаезлы мычиз. - Тани со. Чебыш Лариса тыныд лушкемен сётыны косӥз. Косэмзэ ӟеч ке быдэстӥ, шоколадэн кунояны оскытӥз. Олег гожтэтэз кутӥз но ӝогак кисыяз ватӥз. Собере, кисыысьтыз ӵуж пушмульыос поттыса, вынызлы сётӥз но лушкемак куриз: - Санёк, тон та гожтэт сярысь чус ул, ява. Нокин медаз тоды. Тон ми куспын почтальон кариськод. Нош ужамед, тыршемед понна мон тыныд кӧё-вӧё пушмульыосын дун тыро. - Уд вала тӥледыз, агай, - пушмульы кӧмез куртчыса куалгытонъяз пальпотӥз Санька. - Олома мыддорин дауртӥськоды. Ларисаен ӵош дышетскиськоды ук, одӥг классын. Верано кылъёстэс шара вераны уд йӧндыриське шат, малы гожтэтъёс гожъяськоды? - Будэмъяд ваньзэ валалод ай, Санёк, - вынызлэсь пежырес йырсизэ маялтыса пальпотӥз Олег. Мурдооссэ эскерыны Лӧзь шур дуре васькыса, куакъёс пӧлы ватскыса гинэ Апасов чагыр конвертэз усьтӥз. Кышкаса-кӧбераса усьтӥз. Угось толон "яратӥсько" шуыны шедьтэменыз, лэся, Лариса школаысен Олег шоры ӧз но учкылы. Огпол гинэ, урок дыръя, пальышак потӥз ик. "Нылмурт ас малпанъёссэ шара вераны кужым ӧз шедьты, луоз, - малпаське Олег. - Соин ик гожтэт пӧраз, вылды. Ас мылкыддэ кагазэ шараяны котьку каньылгес уго". Чылкыт бумага вылэ гожтэм кылбурез адӟыса, Апасов мынектӥз: "Ассэ Ашальчи Оки кожам! Вот тамаша". Собере ачиз но шӧдытэк, шара лыдӟыны кутскиз: "Яратэмдэ эн дырты вераны - Лушкем гинэ тон мадь вож бадьпулы. Куке васько Чачай ошмес вулы, Лабрес будос вутскоз шыпыртыны. Ас мылкыддэ эн дырт шараяны - Каллен гинэ тон нёжты кырӟандэ. Куке уӵы жильдоз чик жадьытэк, Ныл сюлэмы вутскоз валатскыны. Яратондэ эн дырты вераны..." Нылмуртлэсь кылбурзэ лыдӟыса, Апасовлэн бам чокчороосыз ик кисьмам улмоослэсь туссэс басьтӥзы. Йырвизьмаз чилектӥз: "Адямиос яратон сюрессэс тулысъёсы мыто, шуо. Нош мон, пӧрмостэм, нырысьсэ нылмуртэ сӥзьыл келяй. Э-э, - ас малпанэзлы пальыштӥз со. - Инкуазь шат янгыш таӵе дыре? Ӟырт кезьыт нуналъёсы мытэм яратон но быдэс гумырез шунтэ, шуо арлыдоос". Апасов, дораз берытскыса, чаляк гожъяськыны пуксиз. Кема бырйиз со Пушкинлэсь, Есенинлэсь, Флор Васильевлэсь яратонлы сӥзем чуръёссэс. Мылкыдаз укшамонзэ, Рябовалы сӥзьымонзэ ӧз шедьты кадь. Соку кытысь ке кылэм-лыдӟем чуръёсты тодаз уськытыса, тазэ чылкыт бумагалы шараяз: "Сердце девушки - загадка", - Так сказал один поэт. Если даже очень любит, Всеравно ответит: "Нет!" Гожтэм-пӧрамзэ куинь сэрего гожтэтлы пӧрмытӥз но, Санькалы сётыса, лушкемен шыпыртӥз: - Али ик ас уждэ быдэсты, почтальон. Ӝогак Чебышъёс дӥне ветлы. Гожтэтэз Ларисалы лушкем сёт. Одӥг улэп лул но адӟыны, шӧдыны медаз быгаты. - Яралоз, агай. Ваньзэ тон косэмъя лэсьто, - гожтэтсэ дэрем улаз ватыса, Санька ульчае лобыштӥз. 9 Адямиез куректон я секыт малпан зӥбе ке, со инбаме учкылыны ик вунэтэ. Туж дуно арберизэ ыштэм мурт сямен, синъёссэ улэ ошыса, пыдъёссэ секытэн ӝутъяса вамышъя. Нош шумпотыкуз мылкыдыз лопырске, чагыралэс инме турак ӝутске, синъёсыз шумпотон тулсиосын гомӟо. Пыдъёсыз ӟазег мамык выллемесь луо - тани-тани лӧбак ӝутскозы но капчи ыр тӧлъёсын ӵошатскыса ширтозы кадь. Та нуналъёсы Урак Олеглы но капчигес луиз. Уж дураз Пачан Миша агаез, штурвал сьӧры пуксьыса, юосты октыны оскылэ ни. Доразы улон-вылон но, тулыс тудву сямен куашетэмез-шукыръяськемез бере, ас эрказ пыриз: анаеныз сюратаез бускель гуртэ куинь нунал-уйлы ышылыса юизы но выльысь сазьтӥськыса, уже потӥзы. Апасов нош чагыралэс инбамез но, пальпотӥсь шундыез но, ӟег пӧлысь кырмышъясь зангариез но адӟиз. Пель сьӧраз выльысь ужгур куараос, эшъёсызлэн шулдыр серекъямзы, кырӟанъёс нёжъямзы, турын-куар пӧлын ӟозъёслэн гужемен люкиськон крезьгурзэс чиккетэмзы кылӥськыны ӧдъяз. Пӧсь нянь сукыриосын сумказэ юн кырмыса, чырмыт вамышъя со бусы сюрестӥ. Дырын- дырын кырӟан нёжъя. Изнюк вӧзтӥ ортчыкуз ни, ӝужыт ньылпу йылысен, егит пиез куаляк поттыса, кырныж крок-крок! кеськиз. "Ӟечтэ вера, - сьӧд бурдо шоры учкыса куриз Апасов. - Ӟечтэ ке вераськод, вӧен нянь сёто, уродзэ ке бӧтьыртӥськод, чыртывыжыяд ог кырым веньёс кисьто", - арлыдоослэсь кылэмзэс сипыртӥз егит пи. Солэсь малпанъёссэ кылыса выллем, сьӧд бурдо выльысь крок-крок! вазиз. Вӧзтӥз ортчись адями шоры учкыса пукиз-пукиз но, мылпотытэк ӝутскыса, шунды пуксён пала лобӟиз. Ваньзэ тае синйылтыса, Олег огдырлы вамышъямысь ик дугдӥз. Шоканзэ ыштыса музэн учке со сьӧд бурдолэн бӧрысяз. Пель сьӧраз дырын-дырын шуккиське: крок-крок! крок-крок! Йырвизьмаз Онись кенакезлэн куке верам кылъёсыз лулъяськизы. "Кырныж кроккетыса шунды ӝужан пала ке лобӟе - шумпотон ивор вера. Шунды пуксёнэ ке сюрессэ мытэ - кышкыт ивор, сьӧд адӟон возьма". Та дэймыт верамез малпаса, Олеглэн мугорысьтыз пигонъёсыз ик пештырскизы. "Малы мон олокыӵе выжыкылъёслы оскисько?" - ассэ ачиз буйгатыны тырше со. Бератаз зӥбломыны амал шедьтӥз ик - удмурт кылбурчилэсь чуръёссэ тодаз вайыса, шара лыдӟыны кутскиз: Ӝужыт вож кызлэн ӟечырась вай вылаз Кырныж вуӵыртэ кӧттыро куараен. Анай дыртыса кироса ни гадяз: "Кинлы вазиське со кайгу иворен?" Малы кышкаськод, анае, кырныжлэсь? Бурдо шумпотэм шундыё нуналлы. Оло, со озьы куриське Инмарлэсь. Шудо, кузь гумыр сӥзьыса асьмелы? Ӧвӧл сьӧлыкез та чиль-сьӧд бурдолэн, Сюлэм кырӟанзэ со усьтэ та гурен... Олег капкаетӥ пырыкуз ик валатскиз: доразы маке луэм. Корказь ӧс ваӵак усьтыса кельтэмын, азбар шорын ик ӵужон костаське, кузь ӟус вылысь вуэн ведраос бекмыльскиллям. Со бызьыса корка пыриз. Отын чал-чал. Нырысь ик дӥсь ошон ӵогысь анаезлэсь уже ветлон дӥськутсэ синйылтӥз. Ӧвӧл. Озьыен, фермае кошкем, луоз. Та уе соос ваньзы доразы кӧлӥзы вал. Соин ик верандаысь, кеносысь валесъёсты эскериз - сузэрез но, выныз но ӧвӧл. Сайкаса кытчы ке кошкиллям. - Санька! Ирина! Кытын тӥ? - корказе потыса кеськиз Олег. - Татын мон, бакчаын, - Санька мылпотытэк куаразэ сётӥз. - Нянь ваид-а, агай? - Вуттӥ. Нош тон мар-ось ӵук шундыен валче сайкад? - бакчаысь нызьыли бичась вынызлы матэктонъяз юаз Олег. - Атаен анай маке керетӥзы кадь. Мон Ириналэн бӧрдэм куараезлэсь сайкай, - агаез шоры синъёссэ ӝутыны курдаса выллем валэктӥз Санька. Солы но акыльтӥз ни таӵе улон: маке умойтэм ке луэ, агаез одно ик Санькалэн атаез вылэ урдскылэ. Санька ас атайзэ лушкемен жаля. Мур лулӟылыса кайгыре понназ. Нош одӥгезлы но юрттыны луонлыкез ӧвӧл: агай-апаезлы но, атаезлы но. Вынызлэн ивортонэз Апасовлэсь быдэс мугорзэ ӵушказ кадь. Дыртыса отчы-татчы утчаськыны кутскиз. Син шораз алигес миськыса сюрые ошылэм дӥсьёс йӧтӥзы. - Ирина мисьтаськыны шур дуре кошкиз шат? - Бертӥз ни отысь. Гид берын викышъяса сылэ. Малы бӧрдэмзэ юай но, пушнераськи, пе. Паймод но бырод. Со быдӟа нылмурт пушнераськемысь викышъя. Олег ури-бери гид сьӧры бызиз. Пу артанаос вискын синвуаськыса сылӥсь сузэрзэ адӟыса алетскиз: - Мар луиз, Ирина? Кин обидиз? Шакшы Герман-а? Нылмурт валэктыны ӧз дырты, эшшо кужмогес викышъяса, кимышкыныз синкылиоссэ ӵушылыны кутскиз. Ира выросъёсын но, тусбуен но атаез выжые вамыштэм, лэся. Ӝужыт мугоро, веськрес. Кузьма сюратайзы ӵапак сыӵе вал - ез юбо кадь ӝужыт. Нылашез сизьыметӥ классын дышетскись шуыса уд ик малпа - Олеглэн классысьтыз нылъёс выллем. Апасов сузэреныз данъяське. Тусын но чебер уго, мугорын но кельышлы. Котырес бамыз, сьӧд сутэр синъёсыз гинэ анаезлэсь пунэмамын кадь. Ымдуръёсыз буёл йӧттылытэк но мак сяська бурдъёс выллем льӧльырало. Йырсиез вакчиятыса вандэмын но чебер пужыё заколкаен юнматэмын. Тӧдьы вылын лызпыр кӧжыё басмалэсь вурем дэремез мугорызъя но туж кельышлы адске. "Ӝог вуись "емыш", лэся, - сузэрезлэсь пичияк тоторскем гадьёссэ синйылтыса малпаз Олег. - Таӵе нылъёсты казакпиос ӝог синйылто. Эх, эшъёсызлы сямен чебер дӥськут ке шедьысал, - жаляса лулскиз Апасов. - Выжыкылысь Золушка выллем чеберай луысал". - Сюратай маке жоб кылъёс-а вераз? Яке керетӥды? - сузэрезлэсь йырсизэ маялтыса, синъёсаз меӵак учкиз Олег. - Курегмес пуйые понэмзэ адӟыса, карнанэн курдатыны малпай вал. Уго вулы ветлон сьӧртӥм лушкаськыны малпам, возьыттэм адями. - Кизэ ӝутылӥз, оло? Вӧсь-а кариз? Ирина выльысь викыштӥз. Пельпумъёсыз ик дырекъяны кутскизы. - Я, бӧрдыса пайдаез уз луы, Ирина, - либытак вазиськиз Олег. - Мадь ватытэк, ма дауртӥз кык пыдо горд кечтака? - Китӥм зол-зол кырмиз но кужмысь кеносэ пыртыны турттэ вал. Эриктэмало, пе. Соку, шуэ, чус улод, мыным уд мытылы ни, киостэ но уд, пе, лэзья. - Вот шакшы! Воксё адями туссэ ыштэм ни ук! Ма, мар кароно таин? - Курдасько мон солэсь, Олег. Кыкетӥзэ ни таӵе дауртэ, - агаезлэн гадь вылаз йырзэ уськытыса, выльысь ӝожомиз Ирина. - Сюлэмы шӧдэ: куке одно маке... йыруж лэсьтоз. Соку мон югыт дуннеын одӥг минут но уг улы. Кытчы ке ватско но чыртыям кыӵес поно. - Буйгатскы, Ирина. Таӵе югдуре кыӵес уз юртты. Вот айы пуны! - пинь пыртӥз сялӟиз Олег. - Нош малы нырысь урдскылыкуз ик мыным ӧд вера? - Тынэсьтыд кепыр ваи. - Анайлы ивортоно вал ук. Эсьмаса, горд йырсиоссэ лӧдысал. - Верай мон. Анай серектӥз гинэ. Сюратаед, пе, шудыса-маскаръяськыса гинэ сыӵе дауртэ. Лушкемен мусояськон понна, пе, мынам но мугоры быгылес на. - Огпаръёс! - Апасовлэн мыжыкъёсыз ик кырмиськизы. - Кин-о ас нылпизэ сьӧсьлы кесяны сётоз? Малпаса ик йырсиос пежырско. Егит пи кыдёкысь инвисэ учкыса сылӥз-сылӥз но сузэрезлэсь кизэ кутыса оскытӥз: - Эн куректы, Ирина. Мон горд кечтакаен ваче син верасько ай. Кулэ ке луиз, таӵе йыринтэмзэ кинлы ке шараятэк но уг чида. - Щербаковлы, оло? - Ум, участково й инспекторлы ум вералэ на. Милициысь капитан асьмелэсь бумага куроз но, Германэз пытсэт сьӧры келялоз. Нош сыӵе вамыш лэсьтыны мынам сюлэмы уг дӥсьты на. Мугез кыкнамылы валамон: анаймы со шакшыез яратэ. Мыдланес вамыш ке лэсьтӥмы, анайлы гинэ мултэс куректон кузьмалом. Соку эшшо юнгес юон вылэ чӧлскоз. Таиз ини асьмелы сьӧд-шимес адӟон луоз. Ваньмылы: тыныд но, мыным но, Санькалы но, анаймылы но. - Нош мон асьме юртын ик пипу куар музэн дырекъяса улом шат? Верасько ук: нырысьсэ ӧвӧл ни! - Валасько мылкыддэ, Ирина. Тон йырдэ эн ошы. Огнад ӧвӧл ук, ачим вӧзад. Озьы ик югыт дуннеен люкиськон сярысь но эн малпаськы. Егитэсь ай асьмеос, пумитамы шедем шуг-секытъёсты вормыны кулэ. Онись кенак верамъя, ассэ ачиз быдтӥсь адями, пе, кык полэс сьӧлыко уж лэсьтэ. Аслэсьтыз лулзэ но сьӧдма, матысь адямиослы но куректон кузьма. Сыӵеосты шайвылын гинэ но палэнто: урдсаз, такыр музъеме вато. - Тазьы ик курдаса улом, иське? Уин но весь сайкалляса кӧлӥсько ук, агай, - пумен буйгатске кадь нылаш. - Тон шудонпӧлысь бертытозь синъёсме кыньыны но курдасько. - Мынэсьтым немае эн ваты, Ирина. Нырысетӥ учыраз ик мадёно вал. - Шуисько ук: керпотӥ. - Мынэсьтым возьдаськонэз ӧвӧл. Секыт дыре ог-огмы борды пыкъяськыны мед быгатомы. Асьмеос одӥг анайлэн нылпиосыз ук - агаен сузэръёс! Оскиськы мыным, котьку юртто, ӟеч визь-кенеш сётыны тыршо. Огшоры чебер кылъёс гинэ ӧвӧл та, Ирина. Сюлэм пыдсысь потӥсь кылъёс. Ачид но чакласькы: Герман кудӟыса бертыку, син азяз эн берга. Нош бордад ке мерскиз, вань кужмыныд, куараеныд юрттэт курыса кесяськы. Таӵе шимес дыре возьдаськонэз но керпотонэз палэнтыны быгатэм кулэ. Нош горд Герман шӧмоз ай, солэн пытсэт сьӧры шедемез уг поты. Я, мын, бамъёстэ пылаты но сиськы. Санька кунояськиз ни, дыр. - Уже-а дыртӥськод? - Бен. Туннэ сезьы бусые потом ни. Валокъёсты погыръялом, дыр. - Кемалась юало шуисько вал: малы-о Пачан Миша агай тонэ юрттӥсе басьтӥз? Ас пиез но тонэн огъёз ук. - Коля малы юнме шорысь куссэ някыръялоз? Анай-атаез ческыт сюдо, чебер дӥсяло- кутчало. Алигес магнитофон, мотоцикл басьтыса кузьмазы. Улэп дыръяз ик узьмагын* кадь улэ. * Узьмаг - рай - Озьы ла, - нёжтӥз Ирина, агаеныз соглаш кариськыса. - Эх, анаймы ке ӧй юысал... - кыдёке учкыса лулскиз нылаш. Олег капкатӥ потыкуз шуак берытскиз но Ириналэн тодаз уськытӥз: - Анай ужысь бертӥз ке, сиськыны ӵекты. Нош пӧрмостэм Германлы нянез но эн возьматы. Ачиз ужаса, тыршыса кӧтсэ мед тыроз, айы пуны. 10 Эсэпез валасьтэм улон Урак Олеглы малпамтэ шорысь шумпотон ваиз. Со чырткем "андан ужпилэн" кузёез луиз - Пачан Миша агаез велосипед кузьмаз. - Уж дуре, шудонпӧлы ветлыны кемыз лукоз, - шуиз со. - Нош Коляед ма шуоз? - паймиз Олег. - Эн абдра. Номыр уз шу. Пиелы мотоцикл басьтӥ ук. Мед ворттылоз. Нош велосипед, лапас улын сисьмытозь, тон кадь ӟеч адямилы служить мед кароз. - Та быдӟа кузьымез басьтыны ик умой ӧвӧл кадь, Миша агай, - пыкиськыны выриз на Олег. Аслаз шумпотэменыз синъёсыз чилекъяло ни, сюлэмыз луп-луп! йыгаське. - Мон тонэ ӧй ке гажасал, велосипедме сётысал, кожаськод-а? - воргорон тамак аратонъяз буйгатыны дыртӥз. - Огзэ курисько: велосипеддэ дорад эн возь. Со лешак басьтонэд, сюратаед шуисько, ӟенеликен воштыны медаз шедьты. Германлэсь сямзэ ӟеч тодӥсько: кык син куспысь нуназе куазен нырдэ ишкалтоз. Мотри, Онись кенакедлэн лапас улаз возьылы. - Верамдыя ик лэсьто, Миша агай. Туж бадӟым тау. Ку-о милемлы велосипед йӧтысал ай? Кемалась вожъяськисько ни вал, - лӧпшам мылкыдзэ шараятэк ӧз чида Апасов. Вылысьтыз вылаз шумпотон. Олеглэн сотэк но мылкыдыз инсьӧрын поръя ни вал. Комбайн штурвал сьӧрын йӧн-йӧн пукемзэ адӟыса но ужам бервылзэ эскерыса, колхоз инженерзы нуназеян дыръя вань калык азьын ушъяз ук. "Апасовлэсь усто механизатор пӧрмоз, - шуиз со. - Нуналлэн кыӵе луонэз шунды ӝужаку ик тодмо. Ужам бервылзэ эскерыса адӟи: ӟеч пӧрмытэ. Озьы ик азинты, Олег". Дораз бертыса, Олеглэн туннэ сузэреныз вынызлы мар но веранэз ӧвӧл! Син азяз али но синпӧртмась суред: ӵужектэм юосын тулкымъяськись зарезетӥ бусы корабль уя. Комбайнлэн моторез огсыр гуретэ-кырӟа. Интыен-интыен зангариос кырмышъяло, кышкатскыса турак! бурдоос ӝутско. Инбаме тубыса, тюрагайёс кышканзэс вунэто но соку ик кырӟанзэс жильдыны кутско. Жатка азьысь чырткем кечпиос пегӟо. Ӝыт пал, ужзэс йылпумъяса, сюрес вылэ комбайнэнызы ӵошкыт бусы сюрестӥ ширтӥзы. Дырын-дырын кисызэ кутылэ. Отын газетэ бинялтэм котлетъёсыз вань. Сузэрезлы но вынызлы. Шӧмзэс малпаса ик солэн дыльдыез шыр-р кошке. Нош саламзэ исаны уг быгаты. Бусыын нуназеян дыръязы колхзоз столовойысь вуттэм пӧсь шыдэн но ӝукен кӧтсэ тыре ке, котлетъёссэ лушкемак газетэ бинялтэ но кисыяз донге. Таӵе дауртэмзэ ӵош сиськись эшъёсыз синйылто, дыр. Озьы ке но, нокин кыл-куара уг поттылы. Ваньзы валало, лэся. Олег велосипед педальёссэ чырмыт лёга. Котьку сямен ик, кырӟан мытэмзэ но ӧз шӧды. Ӝоген бускель гуртэ концертэн ветлозы. Аслаз репертуараз егит пи ӝожмыт кырӟанъёсты ик пыртӥз. Жингрес, задор мылкыдо кырӟанъёсты чик уг тоды кожалод. Бергась куарлэн усемез кадь Аръёсы но ортчо кадь. Келясал, пумитасал но, Мар-о меда кароно? - дыртӥсь тӧлэн огазеяськыса, кырӟанэз бурдъёссэ вӧлъя. Сюлмы висе, сюлмы возьма, Ӟырдаса кадь со гома. Шудэ вань, дыр, кытын ке но, Мар-о меда кароно? Гурт ураме пырыса, Апасов ву басьтон колонка вӧзын бергась вынзэ синйылтӥз. Санька но огшап паймыса учкемез бере агайзэ тодмаз, лэся. Ури-бери пумитаз бызьыны ӧдъяз. - Кытысь велосипед шедьтӥд? - паймеменыз Санькалэн синъёсыз ик питырскизы. - Кинлэсь ке ворттылыны курид-а? - руль борды ӝабырскиз ни со. - Табере та - асьмелэн, Санёк, - пальпотӥз Олег. - Пачан Миша агайлэн кузьымез. - От, усто! Мон велосипедэн ветлыны-ширтыны быгатӥсько ни, агай, - ушъяськытэк ӧз чида выныз. Бератаз маке малпаськиз но чиньыоссэ куасалляса ик лыдъяны кутскиз. - Агай, мон косэмъёстэ быдэстӥ: колорад бӧчыосты бичай, курегъёсты сюдӥ, шыд лым пӧрамон чорыг кутӥ... Вынызлэсь верамзэ Олег ас сяменыз валатскиз но пальпотыса юаз: - Табере велосипедэн-а ширтэмед потэ? - Кытысь-о тодӥськод? - Синъёсыд верало. - Бен ӧжытак котыръяськысал гурт ураметӥ. Эн курда, агай. Мон номырзэ уг тӥя. Сӧл-тазаен дорамы вутто. - Доре эн вай, Санька. Онись кенаклэн лапас улаз пыртыса кельты. - Яралоз, агай. Косэмедъя ик лэсьто. - Анай-атайёс дорын-а? Ирина? - Анаен апай фермае кошкизы. Кунян клеткаосты, пе, тӧдьманы кулэ. Нош атай... - синъёссэ улэ ошыса, Санька могӟиз. - Кудӟемын. Корказь тубат вылын кырӟан нёжъяса пуке. Велосипедэн ульча кузя чырмыт ширтӥсь вынызлэн бӧрсяз учкыса сылонъяз Олег секытак лулскиз. Кудпала вамыштыны, кытчы сётскыны ик абдраз. Кисыысьтыз саламзэ тодаз уськытыса, вынызлэн бӧрсяз шултӥз: - Санька, берытскы ай, - киыныз шонтӥз со. Санька тӧлпери сямен вуиз. Кышкаса кадь учке агаез шоры: "Оло, велосипедзэ берен куроз? Ширтэме шат ӧз кельшы?" - Бусыысь вуттэм саламме сётыны вунэтӥськем, Санёк. - Мон пумитад соин ик бызиськем вал, - пальпотӥз выныз. - Нош велосипеддэ адӟыса, кӧттыр луи, лэся. - Ме, киостэ миськы но сиськы. Одӥгзэ котлетэз апаедлы сёт. Нош велосипедэн чакласькыса ветлы. Кияз кутэм саламзэ Санька ныр бордаз йӧттыса ик зынъяз но шудо пальышаз. - Мон но, бадӟым будӥ ке, тон сямен ик комбайнэн ужало, агай, - малпанзэ шараяз Санька. - Эсьмаса, тон кадь ик котлетъёс гинэ сиыса уло. Тон трос-а сиид, агай? - Трос, Санёк, трос. Кӧты ик тордӥз, ява! - ым пушказ люкаськем дыльдызэ шуген ньылӥз Олег. - Ужасьёслы колхоз сиёнзэ уг жаля, кӧттырмоназы сюдэ. - Усто-о! - велосипедзэ гуждор вылэ выдтыса, Санька колонка доры кизэ миськыны бызиз. Кудӟем сюратайзэ син азяз пуктыса, Олеглэн мылкыдыз нош ик пильмаськиз. Бусыысен лопырскем шумпотонзэ тӧл нюлыштӥз, оло. Шундыё чагыралэс инбамез йӧзор вуттӥсь сьӧдалэс-горд пилемъёс возъязы кадь. Со дыртытэк дор палаз вамышъяз. Егит пи вож гуждорын бичаськись курегъёсты но уг синйылты, пель сьӧраз ужгур куараос но уг шуккисько ни - йӧгуын кадь чус, кезьыт луиз. "Уть ай, малы одӥг адями куинь пиналъёсты вӧсь карыса, сантэмаса улыны кулэ? - секыт малпанъёссэ лӧдыны кутскиз Олег. - Зэм, Санькаез яратэ, ас пиеныз лыдъя. Маиз понна меда сокем синмаськиз солы анай? Яке бырйыны нокинэ вал ни-а? Ма, Герман но куке чебер воргорон вал, дыр. Ужез но гажам, луоз. Нош али... Сазь нуналыз ик ӧвӧл ук! Эшшо ке анаез но секта. Э-э, - отын ик аслыз пумит луиз Олег. - Юыны мылкыд карисьтэм адямилы кужмысь нокин ымаз аракы уг кисьта ук. Озьыен, анай ачиз, ас мылкыд каремъяз кудӟытозяз юылэ. Бен, гуртазы вань гинэ эсэпсэ валатэк юись воргоронъёс. Но со понна кышнооссы уг юо, асьсэлэсь анай нимзэс уг саптало. Вордэм нылпиоссэс ческыт сюдыны, чебер дӥсяны, кулэ дыръяз визь-кенешъёсын юрттыны тыршо. Кызьы потоно, кызьы мозмытоно та кышкыт, егит мылкыдэз ньылыны турттӥсь ву берганысь? Шаугетэ ук, милемды, шелепъёсты музэн, ас ӧраз котыръя-бергатэ. Тани-тани пеймыт гуаз ньылоз. Оло, Германэн куараез золгес поттыса вераськоно ини? Оло, кӧбералоз но дорысьтымы кошкоз? Нош Санька? Со муспотон пияш но соку, ми сямен ик, "атай" шуыса вазиськисьёслы вожъяськыса будоз ук. Анай но таӵе вамышен реза* уз луы. Яке ньылетӥзэ воргоронэз пыртосэ ӧтёз. Нош соиз Германлэсь но урод ке луиз? Ма кароно, кинлэсь визь-кенеш куроно? Оло, Фаина Николаевналы вазиськоно? Зэм, юртъерысь вань кырсез калыке поттыны умойтэм кадь. Йӧнлы адямиос пож вузэс ураме уг палькко. Но та сямен шыпыт улыны но кышкыт: Герман олома дауртоз. Кутоз но сьӧсь малпанзэ уж вылын быдэстоз - Иринаез эриктэмалоз. Алигес сыӵе учыр сярысь одӥг газет но гожъяз вал. Казаньысь куатетӥ классын дышетскись нылаш, пе, сюратаез эриктэманы турттыку, курадӟытӥсьсэ пуртэн бышкалтыса вием. Кемыз! Ӧвӧл, ӧвӧл, - ас малпанэзлы пумит кариське Олег. - Таиз но йӧнлы, ушъямон вамыш ӧвӧл. Но марысь-мар ке, кызьы со ыштэм нылмурт данзэ чиданы кулэ? О-о, кудлань берга та улон питран? Та пумтэм- йылтэм тугаськем гердъёсты ачим ик сэрттыны-пертчыны кулэ. Мон воргорон ни ук. Онись кенак верамъя, азьвыл мынам ёзъёсы кузпалъяськыса семья кылдыто ни, пе, вал. Э-э, лэсянтэм адями, - кунэрес пальпотэ Апасов. - Йӧнтэм вамыш лэсьтыны гинэ быгатӥсько. Аслэсьтым бадӟым луэмме возьматыса, Зюзя Вара доры кожай, валес вылаз лошъяськи. Вот, * Реза - соглаш. ыжйыр! Ярам ай, тодӥсьёс, сактӥсьёс ӧз луэ кадь. Кыӵе ымныр пыжон луысал! Атай ӧвӧлэз, кужмо воргорон киосты шӧдэмысь дугдӥ, синъёсам меӵак учкыса куаретӥсь ӧвӧлэз шӧдӥ-валай кадь. Соин ик лулпуш "биньгозыме" лябӟытӥ. Котьма ке но, Германэн ӝот-ӝот вераськыны кулэ. Солэн но йырвизь интыяз макня луыны кулэ ӧвӧл ук... Пумтэм-йылтэм малпан гердъёссэ йӧнала сэрттыны быгатытэк ик Апасов капка выжыяз вуиз. Азбараз пырыкуз пыд йылаз ӟечыраса сылӥсь сюратайзэ синйылтӥз. Капкалы пумит султэм но "педло пота". Ымнырыз эгырен шумаськем кожалод, синъёсыз тӧрнаса воксё сюбег кылиллям. Туш-мыйыкез кемалась мычымтэ ни, пушнер кадь ӵогыр-ӵогыр ӝужамын. - Тон воксё адямилыктэ ыштӥд ни шат? - капкаез ворсанъяз куаразэ кужмогес поттыны тыршыса вазиз Олег. - Педло потаны нимысьтыз инты вань ук. Возьыттэм! - Шып, кучапи! - чалбарзэ бирдыяны кутскиз Герман. - Кинлэсь-о курдалом- возьдаськом мон? Тынэсьтыд ке шат? - Мынэсьтым керпотыны уг яра, оло? - Тон нылмурт ӧвӧл ук. Ӵошен мунчое ветлӥськом. Мынэсьтым "орудие трудаме" адӟемед вань, - корка азьысь лёгет вылэ интыяськыса, Герман тамак аратӥз. - Эшшо огпол Ирина борды мерскид ке, мон тынэсьтыд "орудидэ" пуртэн куаӵак вандо но пушнер пӧлы сэрпалто. Валад-а, зын кечтака?! - Олеглэн куараез ик дыректӥз. - Оло, монэ курдатыны малпад, зырымесь? - Олег шоры сиёно кадь учкиз сюратаез. - Пигонэ но уг вырӟы. Туж ик эн шокыштылы. Мултэссэ ке лӧпшады, тонэ но пыд азям йыбырттыто, сузэрдэ но кышно каро. - Ымдуръёстэ гинэ нюлыштод, кечтака! - вожомиз Апасов. - Сыӵе "емышъёсты" веръяны, сьӧсь малпанъёстэ уж вылын быдэстыны эрик уз сётэ. Ӝоген пытсэт сьӧры келялозы тонэ. Мон кинлы кулэ ивортӥ ини. - Оло, участковойлы но шыпыртӥд? - сазьтӥськиз кадь Герман. - Гогыедлэсь вылэ тэтчыны эн курадӟы, уз пӧрмы. Монэн маке умойтэм ке луиз, лысьӧмдэ сузмыто, ява! - Эшшо ке монэ курдатӥськод-а? Ирина борды мерскылэмед сярысь мон Щербаковлы ивортӥ ни. Кулэ бумагаосыз вылэ кинюртэмме но кельтӥ, - сюратайзэ кышкатон вылысь шуиз егит пи. - Лушкаськыкуз китӥз кырмымтэ муртэ ворен уг лыдъяло. - Ми Иринаен ӵошен ке мадимы, вань гурт калык но, суд но оскоз. Адями сямен улэмед ке уг поты, тюрьмаын пукод, ява. - Иське, Иуда музэн, матысь адямидэ вузаны турттӥськод? А-а? - вожпотэменыз тамак пумзэ азбар шоры сачыртӥз воргорон. - Ӧй тодылы, ӧй тодылы таӵе сямдэ. Ялан пинал ошпиен лыдъясько на вал. Утёд ке, тынад лекаськон сюръёсыд ӝужало ни вылэм. Ну ничево, ӝог тӥяло-нажгатъяло сюръёстэ. - Кужмыд тырмоз меда, Герман? Вожомем ошпи куддыр вӧсь карись адямизэ виымон сӧсыръя шуо. - Уть ай кыӵе тон! Ог коркан улӥсь, матысь адямидэ милицилы вузаськод? Иуда! - Тон кытысен, ку мыным матысь адями луид? - пыдъёсызлэсь куалекъямзэс шӧдыса, Апасов кенер вӧзысь кор вылэ лэзькиз. - Оло, мыным маке ӟечсэ лэсьтӥд, шумпотон кузьмад ни? - Анайдылы шумпотон кузьмай. Оген улӥсь кышномуртэ ас бурдъёсы улэ басьтӥ. Яратӥськом ми ог-огмес, Санька но будэ. - Санька понна эн сюлмаськы. Ми сое тонтэк но пыд йылаз султытом, адями каром. Пичи эке ӧвӧл ни со, куинетӥ классын дышетскись пияш. Нош яратон сярысь малы поттылӥськод? Кыӵе яратонзы кык юисьёслэн? Ярам ай, возьыттэм "дауртэмдэс" мон гинэ адӟисько. Санькаен Ирина шыр гольык мугордэс медаз адӟе шуыса, ӵемысь кыктэс ик шобыръяса кельтылӥсько. Коттэм, ӧскем бервылъёстэс юрдыса- вукекъяськыса утялтылӥсько. Нош тон яратон сярысь поттылӥськод. Тӥляд яратонды аракыен ӟенелике зымемын ни. - Озьыен, дорысьтыды улляськоды монэ? - Мон уллясько. Юртамы тон мултэс адями, дасьсэ сиись. - Э-э, вупульы музэн эн лӧпша, Олег. Берпуметӥ кылзэ анаед вераны кулэ. - Пересьмем кыр парсь сямен, огнад ортчытод тон берпум нуналъёстэ, Герман агай. Малпаськы. Мон шудыса уг вераськиськы тонэн. Апасов интыысьтыз ӝогак султӥз но бакча беразы дыртӥз. Шӧдӥз со: та сяна лек кылъёс вераны уз быгаты ни, чыртывыжыяз лёг кугӟаз. Аслэсьтыд арлыдо муртлы чурыт кылъёс веран шат капчиен сётскоз? Ярам, ӧжытак коть, оло, кӧбералоз, шыпытгес кариськоз.