ПЁТР КУБАШЕВ
Кайсы 
Роман 
кыкетӥ люкетэз 
Йӧ вырӟон вакытэ
Тулыс, йӧ вырӟон вакытэ, вырйылъёсысь но бусыосысь шунам лымы ву 
нюкъёстӥ, вукыремъёстӥ шаугетыса паськыт шуре ваське но, поръяса, 
бугыръяськыса, йӧэз тӥяса, азьлань дыртэ. Кызьы шуркынмон бере толсур я 
куартолэзь бере инвожо вуэ, озьы ик йӧ вырӟон но ас вакытсэ тодэ - 
инкуазь радлыкез мылыд потэмъя уд сура, уд вошъя.
Нош адямиослэсь улонзэс сураны но, вошъяны но луэ. 1920-30-тӥ аръёсы 
быдӟалаеныз но ӝог будӥсь кужмыныз быдэс дуннеез паймытӥсь СССР гурт 
калыкез колхозъёсы кыскыны ӧдъяз. Кайсы черкогурт но палэнэ ӧз кыль. 
Солэн улонэз туж вакчи дыр куспын тулыс тудву кадь шаугетӥсь, поръясь, вань 
люкетӥсь арбериосты тӥясь-сузмытӥсь шурлы пӧрмиз. Граждан ожлэсь но 
сютэм 1921 "пот" арлэсь сайкиськыса вуымтэ калыклы ноку кылымтэ-адӟылымтэ 
"колхоз" кыл нырысь валантэм йӧтылӥз. Бен соиз но: кызьы тыныд висъям музъем 
позёмлэсь люкиськод? Сое тон вылэ гурт кенешын гожтӥзы вал ук. Нюлэс 
бервылэ висъям позёмез нош кыӵе-кыӵе курадӟыса гыроно-кизёно музъемлы 
пӧрмытылӥзы! Нош кызьы валано гидын сылӥсь валдэ колхозлы сётонэз? Кызьы 
валтэк кельтӥськод? Ма, юртъерез валтэк кутыны луоз шат? Солэсь ортчыт, улон 
коркаосыз но огазеялозы шуо, ваньмыз, пе, ӵош сиёзы-юозы, ӵош кӧлалозы! 
Ма, нёшто зэмзэ озьы луоз? Ӧйтӧд, ӧйтӧд... Но косӥзы ке, кин законлы 
пумит мыныны дӥсьтоз? Удмуртлэн сямыз сыӵе ӧвӧл...
Кайсы черкогуртын удмуртъёслэн но ӟучъёслэн кык нимаз колхозъёссы 
кылдоз шуыса вераськон арлэсь кема кыстӥське ни. Калык пӧлы со тодмотэм 
колхоз сярысь паймымон пӧллетъёс вӧлмо. Огезлэн верамез мылкыдэз лӧпкытэ, 
мукетызлэн - кышкатэ. Но тани шуизы, туннэ, пе, Кайсыысь удмуртъёсын 
сельсоветысь кивалтӥсьёс пумиськозы. Выль ивор интыяз уг пук - тӧллэн 
бурд вылаз пуксе: кайсыос пересен-пиналэн школаысь одӥгаз бадӟым классэ 
туйылӥськизы. Кытчы гинэ пуксьыны, кытын гинэ сылыны луэ - ваньмыз 
тырмытэмын! Кенеше сельсовет кивалтӥсьёс Михаил Григорьевич Кудрявцев но 
Василий Ефимович Кокорин лыктӥллям. Кайсы черкогуртын соосты Горей Мика 
но Коко Васьлей шуо. Соос горд басмаен шобыртэм ӝӧк сьӧры пуксизы. 
Отчы ик кенешлэсь мынэмзэ протоколэ гожъяны начаръёс пӧлысь Филипп 
Самаровез - Самар Пилькаез ӧтизы.
Кенешез Михаил Григорьевич Кудрявцев усьтӥз. Со ӝутскем мылкыдын 
ивортӥз партилэн райкомезлэн нырысетӥ секретарезлэсь но райсоветлэн 
исполкомезлэн тӧроезлэсь колхоз кылдонэн валче сюлмысь ӟечкыланзэс. Соос, 
пе, асьсэос лыктыны малпало вал но, мукет гуртъёс маза уг сёто - 
дыртыса колхозъёс кылдытъяло. Гуртъёс уно, вакчи дыр куспын ваньмаз 
вуыны тыршоно. Собере сельсоветлэн тӧроез дуннеын но асьме шаерын улон-
вылон сярысь мадиз. Гурт улон вылэ выжыса шуиз:
- Кулакъёс крестьян калыкез котьку зӥбыса возизы, нош али, эркынак 
шокчем крестьянъёс кужымзэс огазеяны медам быгатэ шуыса, со кулакъёс 
синтэм-пельтэм вожомыса нюръясько. Огазеям кужым со вить чиньыез мыжыке 
кырмем кадь луэ, тӥни марлэсь кулакъёс кышкало! Асьмелэн Кайсы черкогуртмы 
туж бай но ӧй вал, укыр курадӟыса но ӧз ул - котькугес ик огшоры 
гуртъёс радын лыдъяськылӥз. Музъеммы, шонерак ке верано, олокыӵе 
ушъяськымон ӧвӧл. Малы ке-а ас мылкыддыя дэменлык -товарищество - 
кылдытӥды вал. Табере озьы валчеяськыса улондылы мукетгес шӧм пыртыны дыр 
вуиз: чыры-пыры кужымдэс огазеяса, одӥг артель кылдытомы. Коллективной 
хозяйство нимаськоз со, вакчияк вераса - колхоз.
- Тодӥськом! - пересь Левоньлэн пиезлэн, Олексейлэн, куараез 
кылӥськиз. - Писэйгуртъёс ӝыны арлэсь кема колхозын уло ни. 
- Кельше-а улэмзы? - юаз Кудрявцев.
- Огкылысь уло, пе. Огъя шобрет улэ пыронзы гинэ кылем на, - 
серем пыр вераз Олексей. 
Отысь но татысь лушкем серектэмъёс кылӥськизы. 
- Одӥг шобрет улэ пырыса умой уз лу, конешно, - шуиз Михаил 
Григорьевич.
- Малы уз лу? Луоз! - лӧпшамысь уг дугды Олексей.- Единоличной 
хозяйствоез быдтӥськомы бере, нылпиос но коллективной луыны кулэ, 
колхозной, значит. Нош нылпи кызьы лэсьтӥське - асьтэос тодӥськоды: шобрет 
улын! 
- Валэктэмедлы, визьнод сётэмедлы тау, гажано эше, - сельсоветлэн 
секретарез Василий Ефимович Кокорин Олексейлы ӧжытак йыбырттӥз.
- Удмурт кылын нош ик чылкыт вераськыны дышемедлы тау, - ӧз 
дугды ни Олексей. 
- Ӟуч кылэз умой тодыса вуиз шат со? - киыныз шонтӥз Максим. 
- Кызьы ке дан поттоно ук, ваньмыз мед адӟозы, мед тодозы, кин со 
Коко Васьлей. Соин ик удмурт кылзэ .но вунэтэмъяськиз вал. Али 
кивалтӥсе сюриз но, кӧтыз буйгаз, шӧдске. 
- Мон - лепутат! Мон сельсоветлэн секретарез! Кызьы вераськиськоды 
монэн! - пӧсекъяны ӧдъяз Кокорин.
- Зэм но, эшъёс, мыдлань вераськонэ выжим асьмеос, - вазиз 
Кудрявцев. - Вае колхоз ужмес пумаз-йылаз вуттом. 
Та кылъёсыз бере со пыр-поч мадиз, кызьы бусы анаос огазеямын 
луозы, межаос бырозы. Музъем ужан тӥрлыкез со одӥг лапас улэ тырыны, пудо-
животэз одӥг коргидэ пыртыны, ужлэсь емышъёссэ одӥг кеносэ люканы дэмлаз.
Кайсыос та верамез кылзо но паймо: вот вуиз ке вуиз улон! Ас 
позёмад, юрт куспад губырмыса ужанэд но, пудо-животэн курадӟонэд но уз 
лу ни - колхоз кеносэ мын но мар кулэ басьты. Иське, кызьы колхозэ уд 
пыр.
- Пыром, пыром! Ми соглаш! - кылӥсько куараос. Горд басмаен ӝӧк доры 
мыныса, я асьсэ семья выжызылэсь пуссэ пукто, я чиньызэс ляко. 
Тазьы "гожтӥськемзэс" огшап учкыса пукем бераз сельсоветлэн тӧроез 
паймем тусын юаз:
- Тӥ ликбезэ ветлэмын ӧвӧл шат? Ваньды гожъяськыны дышиды ни 
шуыса, мынам секретаре отчёт сётӥз вал ук. Табере со отчёт туж вылӥ 
кивалтӥсьёс дорын, дыр, ини. Чиньы лякылэмдэс адӟизы ке, мар шуозы 
соос?!
Возьдаськизы кайсыос, ваньзы сямен ӵыжектӥзы. Кылемъёсыз фамилизылэсь 
ӝынызэ ке но бадӟымесь букваосын гожъяны тыршизы ини.
Пересь Левоньлэн пиез, Олексей, тамак аратӥз. Вӧзаз пукись атаез 
ӵынэн ӵоксузиз но, Кудрявцевлэсь куаразэ согыса, кызыны ӧдъяз. 
Люкаськемъёс соку гинэ сайкиськем кадь луизы: со нош колхозэ пыроз-а, 
уз-а? Малы ӝӧк доры нимтулзэ пуктыны уг мын? Юртэз - музъем вормонтэм, 
пудоез - таляк, вуж нянь кабанъёсыз олокӧня! Вань узырлыксэ нокин тодӥсь 
ӧвӧл ке но, юмшанъёсын капчиям дыръяз аслэсьтыз кылылозы вал: мынам, пе, 
Алабгоысь гинэ ӧвӧл, Нижнёйысь но бадӟым купечъёсын одӥг тэркыысь 
сиськеме вань. Вот тӥни сыӵе со Левонь! Зэм ик-а тамак ӵынын ӵоксузиз 
яке колхоз сярысь вераськонэз суран понна-а юри пычкиськыса кызэ - мын 
но тод, мар берга бай муртлэн йыраз! 
Колхозэ пырыны мылкыд карисьёс бырем бере гуртысь активист Филипп 
Самаров Левонь шоры учкиз: 
- Левонь агай, нош тон? Возьмаськом.
Левонь соку ик кызэмысь дугдӥз.
- Монэ-а возьмаськоды? Хм... Ма... мон чылкак пумит ӧвӧл но... Ӧжыт 
малпасько ай, ява... Али аслам улонэ ик кельшегес. Валаськод-а, Пилька? 
Колхозады пыртыса, эрикме уд талалэ меда, шуисько...
- Ваньбурме, шу! - боз-боз вазиз Коко Васьлей.
Та кылъёс бере класс гуж-ж! вазьыны ӧдъяз, люкаськемъёс пӧлын 
Коко Васьлеез курласа верамъёс кылӥськизы. Малызэ валаны шуг ӧвӧл: 
Коко Васьлейлэн кадырез та гуртын туж улӥе усемын. Азьтэменыз гинэ со 
нимо-дано луэмын. Корка липетэз но пуж кадь ини, куазь зорыку, 
тусьтыез-тэркыез, лянэсэз, вышкыез - оломаиз но тёп-тёп усьылӥсь ву 
шапыкъёс улэ пуктылэмын луэ. Бусы кенерез но калыклэсь пӧртэм: одӥг 
интызэ ӝутэм каре но, мукет интыез пудо пырыны пась ини. Соин сэрен 
арамаостӥ ветлӥсь пудо, Левоньлэн бусыяз пырыса, кисьмась сезьызэ нымыляк 
лёгаса кельтэм. Ужам уждэ озьы изъянтӥзы ке, кинлэн бен вожез уз поты! 
Левонь соку, гурт кенешез люкаса, бусызэ возьматыны ӧтьылӥз. Лыктэмъёс 
учкизы но абдразы. Кенешлэн косэмезъя, Коко Васьлеез отын ик туж зол 
ньӧразы. Со дырысен Коко Васьлей Левонез адӟонтэм каре. "Ваньбурме, 
шу!" кеськемез бере эшшо мар ке вераны ӧдъя на вал, но сое Максим 
согиз. 
- "Колхозды" шуид-а, Левонь агай?! - вазиз со. - Тон мар, астэ 
Кайсы калык радэ уд пыртӥськы ни шат? Мон ке татчыозь тонэ тужгес 
кадырлыос пӧлы карисько вал.
- Максим, - шуиз Левонь, - али верай ук: мон чылкак пумит 
ӧвӧл. Тодэме гинэ потэ: Коко Васьлей выллем шал-шал гольык улӥсьёс 
марзэс колхозлы сётозы? Огезлэсь, шуом, отчы кык-куинь валзэ кыскозы, нош 
Самар Пилькаед коӵышсэ сётоз-а, мар-а? Обидно ведь озьы, милой друг! 
- Ха-ха-ха!
- Кылӥд-а, Максим, серекъямзэс? - веранзэ азинтэ Левонь. - Утёд но 
улод: мукетъёслэн ваньбуренызы нырысь ик Самар Пилькаед пуньыръяськоз.
- Вераськонэз мукет ӧре кожытӥды! - ӝӧк вылэ мыжгыса кеськиз 
Самар Пилька. - Вылӥ кивалтӥсьёсмы но ачиз Сталин эш валэкто: колхозъёс 
кылдон вакытэ кулакъёс, подкулачникъёс йырзэс ӝутозы но туж кужмо 
пумитъяськозы. Вераськонамы сыӵе шӧмыз вань ини.
- Вот, вот, шонер! Пельдэ сакгес кар, Левонь, тон сярысь со кылъёс! 
- лӧптӥз Кокорин. - Тонэ шымыртон эсэп вуиз кадь, дорогой. Кӧй-вӧй 
пӧлын пыласькеменыд, берло дыре сьӧраз ортчыны кутскид.
- Кин люкетэ? Тон но пыласькы! - вазиз кин ке.
- Ма, люкетӥсез тодмо ӧвӧл шат? Азьтэмез!
- Нылзэ-пизэ но мурт ӝӧк сьӧрын сюдыса будэтэ бере...
- Тыршы вал ай Левонь агайлэн семьяез кадь...
- Тыршоз со! Хе!
Люкаськемъёс ӵаш карыны ӧдъязы. Вераськонлэсь Коко Васьлей вылэ 
выжемзэ шӧдыса, Самар Пилька нош ик Левоньлы вазиськиз:
- Левонь агай, Максим Семёнов туж шонер юаз: астэ Кайсы калык 
радэ уд пыртӥськы ни шат? Мар-о, тон зэмзэ гуртлы пумит мыныны малпад-а? 
Сыӵеосыз мар каро вал кенешын? Ӧд вунэты-а?
- Ньӧрало вал, Пилька, ньӧрало! Коко, тыбырдэ возьматы ай, 
бервылыз ӧз кыль-а? - ӵашетӥсьёсыз Отялэн куараез согиз.
- То-то! - кеськиз Самар Пилька.
- Зырымесь! - кеськиз Левоньлэн пиез Олексей. - Оло, тон ньӧраны 
малпад-а? Ме! - пӧлызэ кык чиньыосыз вискы карыса, Пилька шоры урдӥз.
Люкаськемъёс кужмогес ӵашетыны ӧдъязы.
- Дугдэ! - вазиськиз кенешез нуись Горей Мика. - Вунэтӥды шат кыӵе 
ужпумен люкаськемдэс?!
Солэн куараез огъя ӵашетонэ ышиз.Коко Васьлей интыысьтыз 
тэтчиз но Олексей шоры мыжыксэ сэзъяны кутскиз: 
- Кинэ ултӥяськод, пӧлыдэ кык чиньыосыд вискы туйнаса?! А?!. 
Тодӥськод-а, кин со Филипп Самаров?! А?! Со гуртысьтымы одӥгезлэн 
начар улӥсь семьялэн нуныез, тодэмед ке потэ!
Классын гурак серектӥзы.
- Нянез сакырен кушаса, нуныедлы ноны сёт, - ӵектӥз кин ке.
- Тӥляд ваньдылэн Пилька но мон кадь шудтэмъёсыз серекъяны ымды 
усьтӥськемын! Огды шоры но учкеме уг поты, тусты ик обезьянлы 
кельше!
- О-о! 
- А-а!
- Ха-ха-ха!
- Мар, пе?
- Марпа, пе!
- Обезьянэз адӟемед вань-а?
- Ма, чонари вотэсэн нориськем синучконэз вань ук, отчы учкылэ, 
дыр.
- Ха-ха-ха! Хо-хо-хо!
Коко Васьлей, мар ке вераса, ӝӧк котыртӥ бызьылыны ӧдъяз. Собере 
Левонь шоры лек учкиз но ӝот-ӝот вераз:
- Али ик, та ӧтчамын ик, Левоньлэсь юртсэ, ваньбурзэ кыскон 
сярысь вераськоно. Малпасько, асьмеос одно колхоз кылдытом, соин ик 
колхоз музъем вылысь Левонь кадь кулакез выжыеныз, лӥялэз сямен, порыса 
сэрпалтоно! 
Коко Васьлейлэсь верамзэ кылыса, ӧтчаме лыктэмъёс гуньдэм кадь 
луизы: Кайсыын та дырозь одӥг муртлэсь гинэ юртсэ суд пыр кыскиллям 
шуыса тодо. Со кемалась, кылем даурын, вылэм ини - Елабугаысь купецез 
таласьёс пӧлы Кайсыысь воргорон но пыриськем вылэм. Кутӥллям но, судэтӥ 
кыскаса, каторгае келяллям, семьяезлы пичигес корка но коргид 
кельтыса, юртсэ вузаллям. Со дырысен та учыр Кайсы калыкез алама 
ужъёслэсь жильыяса кадь возе. Тужгес но лушкаськонлэсь. Малы ке-а одӥг 
капкаез но, одӥг ӧсэз но кыр ласянь-а, пушласянь-а пытсась-замокась 
ӧвӧл? Марысь-мар ке, соку ик гуртысьтызы нимо-дано лушкаськисез тодазы 
ваё. Али но тани, Коко Васьлей пересь Левоньлэсь юртсэ талан сярысь 
вераськон ӝутэм бере, Максим юаз:
- Васьлей агай, вера, пожалыста, Левонь агаез лушкаськемен 
кутӥллям-а, мар-а? 
- Подкулачник! - кеськиз Коко Васьлей, Максим шоры возьматыса. 
- Мар, мар?! - кӧсэктӥз Максим. - Я, эшшо огпол вера! Давай! - 
со мур шокчиз но, висись пыд вылаз умойтэм лёгиськеменыз, ымнырыз 
кисырскиз. 
- Кияд арганэн но кисыяд аракыен Кайсы урамъёстӥ калгемдэ 
вунэтӥд-а, мать твою?! - кеськиз Отя Коко Васьлей шоры. - Али, кивалтӥсь 
луи шуыса, ымдэ пеперъяса вераськись луэмед!
- Кенеш-а та, Алабгоысь базар-а?! - сялӟиськиз ас мерттэм тамаксэ 
пурккетыса пукись Илля Паша. Ӵоксузьытӥсь ӵын пӧлысь кисыриё ымнырыз 
адӟиськем бере Кудрявцев солэсь ас шораз мертчытэм синъёссэ адӟиз. - 
Вунэтӥды-а, кызьы ортчыло вал гурт кенешъёсмы? Йӧн-йӧн ортчыло вал, 
радызъя, нокинэ ултӥятэк, ог-огедлэсь верамзэ кылзыса. Нош али? Мар дунне 
та? Кин татын кузё? 
- Мыскылляськоды! Кулакез утиськоды! - интыяз тэтча Коко Васьлей.
- Кыӵе со кулак, Васьлей агай? - татчыозь кыл-куара поттытэк 
пукись Иван Митрошин но вазьытэк ӧз чида. - Солэн семьяез кадь 
тыршисьёс гуртамы вань меда? 
- Санька Копаров вералоз, со - Левонь агайлэн ку посӥсь ляльчиез, 
- шуиз Самар Пилька. 
- Сылэ ай! - нош ик кеськиз Горей Мика. - Мар ӟудӥды ни Левонтей 
Макарычен? Вунэтӥды-а, мар-а: эскероно ужпуммы чылкак мукет ук!
- Вождэ эн вай, Михаил Григорьевич, - вазиз Санька кенешез 
нуисьлы. - Мынэсьтым нимме поттылӥзы бере, вератэк амалы ӧвӧл. 
Иськавынъёс! Левонтей Макарыч сярысь малпанме тодэмды потэ ке, мон 
тазьы шуо: тау карисько тыныд, Левонтей Макарыч, ужаны ӧтемедлы, - Самар 
Пилькалэн пель дӥняз салем кадь лач-лач вераз Санька Копаров. - Кам 
сьӧртӥ тол куазен костаськыса-медъяськыса ветлытозь, мыным тон дорын 
ужаны умойгес ӧвӧл шат? Коньдондэ но тон ужамъя, ноку ӝегатытэк 
тыриськод. Кин тон вылэ пиньзэ шере, шып мед пукозы, мон тыныд пумит 
уг лу.
- Дугдэ ай, иськавынъёс, дугдэ! - нош ик интыысьтыз султӥз Михаил 
Кудрявцев. - Мон сак кылзӥ вераськемдэс, ваньзэ пелям понӥ. Одно малы ке 
палэнэ кожиськоды - тӥни мар монэ паймытэ. Колхоз сярысь вераськонмес 
нокызьы пумаз-йылаз ум вуттӥське ни. Председатель ӧм быръе на ук, 
колхоздылы тӧро, шуод-а, мар-а. Кинлы оскиськоды, кин та ужез быдэсъяны 
быгатозгес?
- Кайсыысь котькуд адями кивалтыны быгатоз, Коко Васьлеед но 
кивалтӥсьын ветлэ ни бере, - серектэм куара кылӥськиз.
- Паримонэз быръёно, Паримонэз!
- Илька Петыр умой тупалоз!
- Сандырлэн кадь огезлэн но уз пӧрмы. Огкутскемен соос кышноеныз 
кыкто нылпи потто!
- Охо-хо! Ха-ха-ха!
- Кылзэ, мон верало, - вазиз ӝӧк сьӧрын кенешлэсь мынэмзэ гожъяса 
пукись Самар Пилька.
- О-о, ачиз вералоз! - азьчиньызэ выллане ӝутӥз Максим Семёнов. - 
Шып кариське!
Куаш карись класс чалмиз. Али гинэ синйылтӥзы: сельсоветлэн тӧроез 
вӧзын пукись Самар Пилькаед ассэ туж йӧно возе - йырзэ но уг корма 
ни, кунулъёсаз но уг сузьтӥськы. Классын пукисьёсты котырак учкемез бере 
куаразэ Кудрявцевлэн кадьгес карыны тыршыса шуиз:
- Паримон агайлы но, Петыр агайлы но, Сандыр агайлы но мон пумит 
ӧвӧл. Соос йӧно адямиос, номыр уд шу. Мукет ласянь, сюлэмы шуг: кулэ 
кагаз вылэ кыӵе пус пуктозы меда та адямиосмы? А? Чиньызэс лякозы шат, 
гожтэт тодонзы ӧвӧл бере? Вот уго! Соин ик шуисько: та уже гожтэт 
тодӥсь адямиез пуктоно.
- Астэ ке дэмласькод, давай!
- Мон сяна но адямиос вань... - ӵыжектӥз Пилька но интыяз 
пуксиз.
- Шонер вера со, - шуиз кин ке. - Кыӵе ке пеймыт бутылка тӧро луоз-
а? Ма, тани, ожмаськон сюресэз ортчем пиосмы вань ук: Максим, Санька, 
Иванька.
- Иванэз! Иванькаез! - ӵош вазизы кӧня ке куараос.
- Мон но Митрошинэз дэмласько, - ваньмызлы кылӥськымон вераз 
Санька Копаров. - Соин котьмар ласянь вераськыны-кенешыны луэ. Солэн йырыз 
ужа! Кызьы малпаськод, Максим? - юаз со укно дорын пукись эшезлэсь.
- Соглаш, - шуиз Максим Семёнов.
- Нош тон, Мани?
- Мон но соглаш.
- Кызьы соглаш уз кариськы? Кузёмылэн матысь эшез луоз ук, хи-хи, 
- 
шыпыртӥз огез кышномурт.
- Шып ул, тыныд тэргаськон гинэ мед луоз, - озьы ик сипыртӥз 
вӧзаз пукисез.
- Мон но Митрошинэз дэмласько, - вазиз Самар Пилька.
- Сое быръёно, сое! - уно куараос кылӥськыны ӧдъязы.
- Огъя мылкыдын Иван Митрошин пала луиськоды кадь, - шуиз 
Кудрявцев. - Кин со сярысь умой-умой вералоз?
- Асьмелэн пимы ук! Тодӥськом! Сое быръёно! - ӵаш поттыны ӧдъязы 
люкаськемъёс. - Быръёно но тӥни. Умой адями, син медам усьы.
- Кимес ӝутэммылэсь азьло веранэд ӧвӧл-а? - юаз сельсоветлэн тӧроез 
дарали кадь ӵыжектыса пукись Митрошинлэсь.
- Вань, - шуиз Иванька. Султыса котырак учкиз. - Ма... тӥ колхозэз 
шудон уж кожады шат? Мон - тӧро? Кыӵе мон председатель? Кытысь со ужез 
адӟеме вань? Гырыны-кизьыны, кутсаськыны, кут кутаны, пу кораны - киосы 
дасесь, нош соизлы...
- Огмылэн но колхозэз адӟеммы ӧвӧл, - шуиз Максим. - Ӧм адӟе 
ке, адӟом, ас киынымы лэсьтом.
- Ныл кадь эн пыкиськы, кеносэ ум валтӥське, - серемес вазиз кин 
ке.
- Шып ул! - кеськиз Максим. - Басьтӥськы, Иванька, ӵош ужалом, ӵош 
лэсьтом. Кужыммы тырмоз.
Со нуналэ Кайсы черкогуртысь удмуртъёс выль улонэ - колхоз улонэ 
- вамыштӥзы. Колхоззылы председателе Иван Григорьевич Митрошинэз 
бырйизы.

* * *

Самар Пилька ӧтчамын серем каремзылэсь гинэ кепыраз. Тӧрое нимъёс 
веракузы, сюлмыз нёркак-нёркак луылӥз, малпаз: тани-тани солэсь нимзэ 
ӵектозы. Но ӧз, нимзэ таки ӧз поттылэ, Иванькаез бырйизы. "Хы, йырзэ 
урдоз ини! - сюлмыз ӝуаса вамышъя Самар Пилька дор палаз. - Маин со 
мынэсьтым пӧртэм? Маин?! Гожтэт тодэмез бадӟымгес-а? Кутски ке, мон но со 
мында ик дышетскыны быгато... Гражданскойын, пе, ожмаськиз. Хы! 
Ожмаськиз!.. Кин тодэ, кызьы ожмаськиз, быдэс бертӥз бере?.."
Озьы малпаськыса, Пилька Максим вылэ но, Санька вылэ но вуэ. 
"Огпаръёс, " - вожомыса вераське ас понназ. Митрошин интые Максимез яке 
Санькаез бырйысалзы ке, Пилька соосты но сыӵе ик адӟонтэм карысал. Солэн 
сюлэмыз нош но нош гизяк луылэ: "Сантэмазы!.. Котыраз матысь эшъёссэ 
люказ! Максимез, чутыгеез, аслыз юрттӥсе кариз - бригадире. Нош Санька, 
ыжлюгы Санька! Тыпы нушы мугорыныз председатель вӧзын гожъяськем нерге 
пукоз ини. Учётчике ведь пуктӥз! Хы! Учётчик ужез кудласянь бергатоз 
меда? Мон но уг тодӥськы бере, кыӵе со учётчик? А монэ серем карыса-а, 
мар-а, кладовщик, пе, луод-а? Тьфу! Комак-а, мар-а мон? Кеносын, пе, 
ужалод, колхозлэн ваньбурез, пе, копак тон киын луоз. Кытын ай со 
ваньбуред? Ма, кеносэд но ӧвӧл на! Амалтэк Левонь агайлэн юртэз шоры 
ымды усьтӥськоз ай, али сое утьыны выриды ке но... Монэ председателе 
бырйысалзы ке, одӥгзэ корказэ контора карысал, мукетсэ - нылпи юрт, 
гидъёсыз колхоз пудоез возьыны тупало. Сыӵе ваньбурзэ ас мылкыдызъя сётоз 
кожаськоды-а? Хы! Сёто-оз, ымдэс усьтэ! Нош мыным сётысал! Мон соин 
кема ӧй вераськысал, выль законэн кекатысал но - ужез бырысал. Око-ко! 
Монтэк тӥляд ужды уз пӧрмы!.. Адӟом ай, оло, тӥлесьтыд вылӥегес тэтчо. 
Малы ке-а шуиллям: улон - колёса, со, пе, вуко кӧ кадь берга, берга 
но лябзэгес сэстэ, нырке, изэ. Бен, бен, лябъёссэ! Мон борды "ляб" кыл 
уз лякиськы!.."
Ас понназ мур малпаськыса бертонъяз со Копаров Санькаен пумиськиз. 
Оло, музъем улысь потӥз соиз. Пилька куалектӥз.
- Мар сюлмаськонэ вуид, кладовщик? - серектӥз Санька. - Адямиез 
но уд адӟиськы ни - ӧжыт гинэ шорам ӧд донгиськы.
- Хы! Сюлмаськод, сыӵе бадӟым уж сётӥды бере! - ӝуштыса кадь 
вераз Пилька. - Ӧйтӧд, мар бордысен кутсконо. Кенос гинэ но ӧвӧл.
- Али ке ӧвӧл, сэре луоз.
- "Луоз", "луоз"!.. Ку луоз ай?! Куштӥськоно-а, мар-а та ужлэсь. 
Уг кельшы со мыным, сюлэмыя ӧвӧл.
- Косӥзы бере, ужалод ини. Сюлэмъя гинэ улыны уг лу.
- Тынад луэ ук. Ишь, председательлэн бурд улаз кыӵе шыпак 
каръяськид! 
- Ма, вожъяськиськод ке, ойдо воштӥськом. Мон но мар ласянь 
кутскыны уг валаськы.
- Митрошин дышетоз. Со котьмае тодэ-вала.
- Кытысь тодоз-валалоз? Маин со асьмелэсь пӧртэм? Но калык бырйиз 
бере, ужатэк амалыз уз лу.
- Калык бырйиз, калык, хе-хе... Ог-огдэс бырйиды!
- Тон но нимзэ верад ук! 
- Верай. Мукетъёс веразы бере!.. Табере пызьыръяны кутскоз! Кияз сюло 
сётӥзы ук...
- Ой, Пилька, Пилька... Секыт адями тон!

* * *
Ӧс куспетӥ вамыштыкуз ик Иванька валаз, кыӵе вераськонэн йылпумъяськоз 
кышноеныз пумиськонэз. Коркан сутӥськем кӧй-вӧй зын но ӵын лӧсъяське 
ке, тод: пӧраны быгатымтэзэ Люба одно кин ке вылэ погыльтоз. Ӵемгес 
коӵышсы яке анайзы вылэ: я солэн пыд улаз Лусьтрозы мяугетыса 
ветлэмысь уг дугды, я анайзы домбылё мугорзэ кышнопалась поттыны уг 
вормы. Нош картэныз вераськонэз одӥг: сиёнэз номырлы ярантэм сутӥськон 
дыръя одно Марья янгыш луэ. Али но тани, ӧсэтӥ пырись Иванькаез адӟыса, 
Люба чангес куараен кеськиз:
- Кытӥ калтыртӥськод, шуккыса куштон?! Мон ке татын... ужаса- 
ужаса... пыд йылысьтым пограсько ни! Синъёсыд мар сыӵе вӧй сием 
коӵышлэн кадь кескичесь? Нош ик дусымед дорын вал-а?
Кышноезлэн таӵе кылъёсын пумитамезлы Иванька дыше ни кадь. Тодэ 
уго: вазид ке, кыл вӧзы кыл кошкоз, нош ик арня яке кык ог-огзылы 
вазьылытэк улозы. Сыӵе дыре соос куспазы анайзы пыр гинэ верасько. 
Шуом, Иванька нуназеяны бертэ ке, Люба анайзылэсь юа: "Пиед сиськыны 
бертэм-а? Ассэ мурт дорын кадь медам возьы, ӝӧк сьӧры мед пуксёз". Яке: 
"Мусо пиед бордысь нош ик кечтака зын паке, уд шӧдӥськы-а? Ачид ик 
сюд ини сое, мон юрдӥсько..."
Котькуд керетон нуналаз Люба одно кыӵе ке выль кыл шедьтыны 
тырше. Огполаз Иванька "дыг нушылы" пӧрме, мукетаз - "котмем куреглы". 
Туннэ тани "вӧй сием коӵыш" луиз. Но таиз - кутскон гинэ вылэм ай.
- Кытын калтыртӥд та дырозь, шуисько? Уд кылӥськы-а юамме?
- Кытын вал, отын ӧвӧл ни, али тани - тон азьын, - пальышак 
потыса, кышнозэ ӟыгыртыны вамыштӥз вал, но соиз кияз гур суран 
кутӥз: 
- Эн ветлы матам! Шорад учкеме уг пот! Мын, мын, зынӟем пузъёстэ 
нош ик Марьёкед азьын сэзъя!
Ыме тэронтэм кылъёсты кылыса, Иванька пумем кадь луиз. Долкаса 
учке кышноез шоры, ымнырыз ӵыжектӥз, секыт шоканы ӧдъяз.
- Я, али верам кылдэ эшшо огпол вера ай! - ӝот-ӝот вазиз со, 
чиньыосыз амалтэк секыт узвесьлы укшась мыжыкъёсы кырмиськизы.
- Осто, жугиськыны малпад, оло? Тусыд ик урмем пунылы кельшыны 
ӧдъяз ук.
- Вера, шуисько!
- Ма, туж кельшизы-а, мар-а? Хи-хи-хи, мон вунэтӥ ни.
- Нуналлы быдэ мыскыллямдэ татчыозь чидай, - Иванька пиньёссэ сыскыны 
ӧдъяз но кышноезлы эшшо матэгес кариськиз. Соиз югдурлэсь умойтэме 
воштӥськемзэ шӧдӥз но, киысьтыз гур суранзэ выж вылэ куштыса, картэз 
шоры дол-дол учкиз.
- Ма... лӧпшаса вераськемез но уд валаськы шат? Осто, пичи 
пияшлэсь вожзэ поттӥськем, лэся.
- Тырмоз!!! Тынад лӧпшамед ньылонвыжыям вуиз ини!
- Осто-о, кытысь таӵе урмыса вуид? Тусыд ик изьверлэн кадь. Таӵе 
дырдэ адӟеме ӧй вал на. Я, я, тырмоз , серемез поттӥськод. Кут но 
чупа ай. Ӟыгырты но азьвыл сямен гуч-гуч чупа. Лӧпшаса верай, шуисько 
ук. Юнгес мед яратод шуыса.
Любалэн витьымтэ шорысь кильтыръяськемез Иванькалэсь мылкыдзэ кӧш 
сиён кадь сураз, мылкыдаз адӟонтэм карон бугырскиз.
- Кош азьысьтым!
- Мар луиз? Кытысь таӵе-таӵе пурӟыса вуид? Мон ке тонэ ческыт 
сиёнэн пумитаны малпай вал. Ӧйгес пӧрмыты уго тани... анаед люкетӥз. 
"Пӧрмостэм! Киыд сисьмемын!" шуыса кесяськиз но ӧсэз йыг ворсаса кошкиз. 
Ӧйтӧд, азьланяз кызьы улыны малпа со асьмемын? Мон ке... мон ке 
семья кусыпез юнматон понна...
- Пытса ымдэ!
- Тон но соя? Тодӥсько, тодӥсько-о, анаеныд одӥг кылысь...
- Дугды зулемысь, эшшо огпол верасько!
Люба, кизэ гадь вылаз поныса, пукон вылэ лэзиськиз:
- Ой!.. Ой!.. Тани нош ик... Ой!.. Сюлэмы... сюлэмы бышке... 
Валай, кемалась ини валай: монэ анаеныд ӵош погыртыны малпады! Уз пӧрмы! 
Кыкты ик тӥ зын песьтэръёс! Быдэс родня выжыды зынӟемын! Со чик 
ӧвӧлтэм Марьёкед гинэ но тонэ кулэ карымтэ бере...
- Люба!
- Эн вазьылы шорам! Ымныр тусыд ик юрӟым!
Иванька, душес кадь омырскыса, Любаез пукон вылысьтыз ӝутӥз.
- Мон тонэ выж вылэ сэрпалто! Мон тонэ кисаль карыса 
кушто! Валад-а?!
Любалэн чирак кеськемез Иванькаез секыт уммысь сайкатӥз кадь. 
"Мар дауртӥсько?!" - малпаса, кышнозэ нош ик пукон вылэ пуктӥз но 
бызьыса коркась потӥз, лапас улэ мынӥз. Огшап ма карыны тодытэк сылӥз. 
Собере тӥр кутӥз но пу пильылыны ӧдъяз. Азбаре Люба потӥз, лапас пала 
вамыштӥз.
- Эн лыкты дорам! - кеськиз Иванька, тӥрзэ урдыса.
- А-а-а! - кеськиз Люба но бызьыса ураме потӥз. - А-а-а! Со 
монэ виыны турттэ! А-а-а!..
Кӧня ке улыса, Митрошинъёслэн азбаразы таляк калык люкаськиз. Люба 
шоры учкыны кышкыт вал: йырсиез тур-пар лӧсъяське, киосыз дырекъяло, 
йырыз кыля. Паймем гуртоос Иванька доры но лыктыны кышкало, Любаез 
но буйгатӥсь ӧвӧл. Кӧня ке улыса, Марья вуиз. Нокин шоры учкытэк, 
нокин шоры вазьытэк, лапас улэ Иванька доры вамыштӥз.
- Мар дауртӥськоды? - юаз. - Мар ласянь таӵе-таӵе дан 
поттӥськоды? Жугид-а сое? - Люба шоры возьматӥз.
- Ӧй.
- Шонерзэ вера!
- Шонерзэ верасько: мон сое ӧй жугы!
Марья зӥрак берытскиз но Люба доры лыктӥз:
- Кудды янгыш?
Любалэн синъёсаз вожомем тылгизьыос пиштӥзы. Марья доры туж матэ 
лыктыса, пинь пыртӥз сипыртӥз:
- Тынад нош мар ужед?! Кин тонэ татчы ӧтиз? Тон милям утись-
вордӥсьмы-а, ӵыжы-выжымы-а? А?! Кин тон милемлы?!
- Кудды янгыш, шуисько?!
Вань люкаськемъёс мед кылозы шуыса, лэся, Люба кужмо вераське:
- Тон янгыш, тон! Вань улонмес тон сураса возиськод, возьыттэм 
ымныр! Малы татчы лыктӥд?! Одӥг дыре кык юртын кузё луэмед потӥз-а? 
Максим но тынад мед луоз, Иванька но уз мыль-а? А?! Мар ымнырдэ 
кисыръяськод, мар вераны кыл уд шедьтӥськы ни-а? Оло, ымад ву ӟузид?! 
Шонер верай, иське? Кош азьысьтым, кошкы та юртысь, кылӥд-а?! Мынам 
юртэ та, мон татын кузё! - люкаськемъёс пала берытскиз но киоссэ 
сэзъяны ӧдъяз: - Уллялэ татысь та костаськись кышномуртэ!
Тӥрзэ сэрпалтыса, лапас улысь Иванька вуиз. Любаез борддор борды 
ӝиптӥз но сипыртӥз:
- Дугды. Калыклэсь возьыт.
- А-а-а! - нош ик шуш кесяськыны ӧдъяз Люба но Иванькалэн ки 
улысьтыз мозмытскиз. - Адӟиды-а, мар дауртэ со?! Адӟиды-а?! Марьяен 
лушкем пумиськем бераз со таӵе луэ! Сое Марья узатыса возе! Азэмын соос, 
кылӥськоды-а?!
Азбаре люкаськемъёс пӧлын вожпотэм куараос кылӥськыны ӧдъязы.
- Вождэ эн вай, Гозег кен, только аслэсьтыд кин луэмдэ али 
быдэсак возьматӥд. - Люба доры матэктӥз Пичи урамысь мӧйы воргорон 
Офонь Петыр. - Кемалась верасько ни, семьяяды керетонъёс, пе, луыло. 
Татчыозь мазэ-созэ валатэк улӥмы. Митрошинъёсыз ми умой ласянь гинэ 
тодӥськомы. Умой ласянь гинэ, эшшо верасько! Вот!.. Мукетсэ но верало: 
Марьяез ултӥяны ум сётэ!
- Кытын вожан - отын ӟырдыт яратон! Егит дырдэ вунэтӥд шат, 
хи-хи-хи! - люкаськемъёсыз шулдыртыны выриз одӥгез кышномурт.
- Я, тырмоз. Ойдолэ кошким! - вазиз Марья. - Мурт семьялэн 
улоназ пыриськыны умой ӧвӧл, радзэ асьсэос шедьтозы. Нош тон, Люба, 
Петыр агайлэсь кылъёссэ пеляд пон. Эшшо огпол тазьы дауртӥд на ке, 
тод но ул: лыз-вож ымнырын ветлод. Уд оскиськы-а? Ачид верад ук, 
Иванькаез узатыса возисько шуыса. Узато! Ачид тодӥськод, верам кылме 
мон одно быдэстӥсько.
Марья капка сьӧры ышиз. Со бӧрсьы вань гуртоос дыртӥзы.

* * *
Кайсыысь колхоз правленилэн кенешез оло вить, оло куать час кыстӥське 
ни. Вераськон одӥг: тулыс бусы ужъёсыз ортчытон. Правленилэн ужаз 
сельсоветысь Михаил Кудрявцев но Василий Кокорин лыктэмын.
Быдэс инкуазь туэ мыдлань берыктӥськем, лэся: колхозникъёслэсь визьзэс 
сынаса-а, мар-а, оштолэзь вуон азьын ик лымы шуназ. Дырызлэсь вазь 
ӟырдам омыр музъемез туж ӝог шупатӥз - коть ӵуказе ик кизьыны пот. 
Вазь тулыс - кӧс гужем. Крестьян калык сое умой тодэ. Кылем сӥзьыл 
кайсыос нимазы улӥзы на бере, котькудӥз ас позёмаз ӟег кизьыса кельтӥз. 
Лымы улын умой толъем узьым, музъем шупамен, туж ӝог тэлеӟиз. Валэс 
юосын нош мар кароно? Картофкаез, емышъёсыз мерттыны вазь ӧвӧл на-а? 
Бере кылид ке нош?
Председательлэн сюлмаськон-юанъёсыз правленилэсь членъёссэ но, 
сельсовет кивалтӥсьёсты но одӥг гердэ бинизы. Ӵектонъёс пӧртэмесь: "али 
ик кизьыны потоно", "куазь кынтоз на, дыртыны уг яра", "сезьылэн кизён 
дырыз - кызьпу куар ыж син быдӟа ке луэ, нош али кызьпуэд пучыяське 
гинэ ай", "пал пыд йылаз сылӥсь ӟазег кезьытэз вите", "курегъёслэн 
ӟускиоссы гордэктэмын - тулыс вуиз, дыртоно!".
Та кылъёс пӧлысь кудӥз шонер, кинъя кариськоно? Митрошин котькуд 
верасез сак кылзэ, нош ачиз малпа: "Инкуазьлэсь воштӥськонзэ нимаз-
нимаз семья ас сяменыз чакланы дышемын. Тани мон но ас музъемме али 
кизьысал шат? Ӧй. Позём вылтӥмы шунды сиос гылӟысагес кошко, уй пала 
со нялмытгес уго. Нош Карабаевъёслэн бусызы чылкак мукет - вазь шупа. 
Мускытсэ кутыса уг ке вуо, юзы уг удалты. Огезлэн бусыяз ю-нянь "кызьпу 
куар ыж син быдӟа" луэм бере кизьыса гинэ удалтэ, мукетызлэн музъемезлэн 
кизён дырыз - "ӟазег пал пыд йылаз сылыку". Пӧртэм йырсилы - пӧртэм 
сын..."
Котыраз пукисьёсты кылзэм бераз Митрошин шуиз:
- Мон тазьы малпасько, иськавынъёс: куд-ог бусыосы али ик кизьыны 
потоно. Нырысь ик - вырйылъёсы, мускытэз ыштонтэм вылысь. Собере ини - 
улыг интыосы. Усы-герыос тырмымон люкаськизы-а, бригадир?
- Тырмыны, ма, тырмоз но, куд-ог колхозникъёслэн кей сямзы кыре 
потӥз: мурт чотын асьсэлы умойгес каремзы потэ.
- Валамонгес вераськы, - шуиз Иванька. 
- Мар валантэмез? - султӥз Максим. - Куштӥськем усы-герызэс 
колхозлы сёто, умойзэ асьсэлы кельто. Тани милесьтым Семон кудомес ик 
басьтом. Куинь номырлы ярантэм герызэ вайыса, азям сэрпалтӥз. Тон, 
шуисько, колхозын тазьы улыны малпад-а?! Сьӧраз мынӥ. Тодӥсько ук: кык 
умой герыез вань на. Куалаязы ватэм ведь, жулик, ӟустариосын согем! 
Судэ сёто, шуисько, колхоз ваньбурез лушкамед понна! Гӧртэм синъёсыныз 
шорам учке - кинлэсь марзэ, пе, лушкай, та герыос мынам ук. Ну, мон, 
конешно, аслад кадь потыса, берпумзэ учкы, шуи, табере со колхозлэн 
ини, гурт калыкмылэн, иське. Одӥг герызэ Семон кудое ачиз нуоно луиз, 
кыкетӥзэ - кышноез, туклячие. Мон бӧрсязы мынӥсько. Винтовкае гинэ 
ӧвӧл. Луысал ке, шоразы урдыса мынысал.
- Родняосыд ӧз тышкалэ-а? - гор-гор серектӥз Санька. Максимлэн 
тазьы дауртэмез мукетъёслы но тумошо потӥз.
- Со гинэ мар ай, - шуиз Максим. - Кимок Гореед, ява, аслаз 
шерык-турык пинё ымыз кадь пу усызэ ваем. Мынам, пе, ваньмыз вуж 
юртам кылиз. Ӧй оскы, конешно. Мон-а, шуисько, юртысь юртэ ветлом, 
тынэсьтыд ватэм усыостэ утчаса? Али ик кытынзэ ӧд ке возьматы, кытчы 
вуэмдэ уд вала! Тусыз воштӥськиз, ымдуръёсыз дыректӥзы. "Артана сьӧры 
урдылӥ вал" шуэ. Куажгам-пиньтэм усызэ берен нуытӥ, ӟечъёссэ - колхозэ. 
Озьы тӥни.
- Азьланяз но калыкез тазьы ик куасалляд ке, колхозамы одӥг мурт 
но уз кыль, - шуиз Иванька. - Безытод тон калыкез, валаськод-а?
- Ваньмыныз озьы уг вераськиськы. Нош колхозлэсь дисциплиназэ 
тӥясьёсыз юн кырмоно! Тон сямен небыт ке вырид, сильсьӧрад пуксёзы, 
кытын улэмзэс вунэтозы.
- Мынам но, кладовщик шуондылэн, Максимлэн кадь ик югдуре, - 
вазиз Самар Пилька. - Председатель, вера ай, валэс ю кидыс кытысь 
карыны малпаськод?
- Со сярысь мон тынэсьтыд юаны малпасько вал, - чурыт вазиз 
Митрошин. - Тон мар понна правленилэн членэз?
- Мон доры, кеносэ, огез но одӥг кырым но ю кидыс ӧз вай на 
бере, мар каром? - пештырскиз Самар Пилька. - Кинлэн кӧня пуд юэз 
вань, веразы вал-а? Веразы. Ваньзэ сое огазеяса, лыдъямы-чотамы вал-а? 
Лыдъямы но, чотамы но. Колхоз кеносэ ваёмы шуыса, кагаз вылэ гожтӥськизы 
вал-а? Гожтӥськизы. Кытын нош кидысмы? А? Тю-тю! 
- Ӵектонэд кыӵе? - юаз Санька.
- Хы! Кылынымы ужаськомы! Тодӥськоды-а, малы уг сёто кидыссэс? 
Нош ик "пот ар" берыктӥське, пе. Марысь-мар ке, колхоз-а, пе, сюдоз? 
Уз, шуо, ас пияд понэмез ик, пе, сюлэмдэ шунтоз. Валаськоды-а, мар кыл 
со? Колхозлы уг оско, ваньбурзэс одӥг кисые тырыны уг дӥсьто. Уноез 
асьсэлэн азьвыл позёмазы ик кизьыны дасясько кадь. "Мурт музъем вылын 
губыр-губыр ужалод но, аслад кеносад тӧл шулалоз", шуо. Я, мар веранэ 
вал, верай, пеляды поноды ке, поноды, уд ке, уд - асьтэос тододы.
- Палэнын чакласькыса улӥсь мурт кадь вераськиськод, Пилька, - 
шуиз .Максим. - Ас уждэ кин вылэ погыльтыны малпаськод? Толэзьлэсь кема 
кизён сярысь вераськиськомы ни, со ке одӥг кырым но кидыс люкамтэ на! 
Али тани вераз но сётӥз: мукетъёс малпаське, мукетъёс ужалэ!
- Пилькалэсь верамзэ санэ басьтоно ик, дыр, - шуиз Санька 
Копаров. - Колхозникъёслэсь берлань чигнаны кутскемзэс огмы но шӧдытэк 
ум улӥське. Калыклэсь сыӵе мылкыдзэ вормыны Пилька огназ уз быгаты. 
Асьмелы ӵуказе ик коркась корка ветлоно, котькуд адямиен вераськоно.

* * *

Ӵуказеяз кӧня ке корка пырам беразы ик Митрошин валаз: Самар 
Пилька шонер вера. Огез кышномурт, вить нылпиосын карттэк кылем маке, 
ӧз но кесяськы, ӧз но бӧрды - шыпытак гинэ шуиз:
- Мынэ, кеносам пыре но, мар кылем на, ӵужыса нуэ. Эксэй дыръя 
выт кыскасьёсын какалмиськиз, граждан ож бере продотряд сьӧд чер кадь 
ветлоз вал, табере кузёос - тӥ, мар карод на...
- Мар тон? - абдраз Иван Митрошин. - Кыӵе выт кыскасьёс ми? 
Аслыд но умой уз лу шат, огъя кужымен ю-нянь будэтӥмы ке? Колхозэ 
пырыны ачид соглаш луид вал ук.
- Нылпиосыным кизён кудыез кыскаса улӟытӥмы вал бусымес. Табере 
кизем юмы муртлы мед луоз ини, ӵок ойдо.
- Эке-ке-кей, Оксиння апай! - лулӟиз Санька. - Выль улонмылэн шӧмыз 
вирад пыӵаса вуымтэ на. Колхоз ужмы - со веме выллем ук. Огнад, векчи 
нылпиеныд, уно-а лэсьтод? Пырак ас кожад курадӟыса улэмед потэ-а, мар-а?
- Нош ик сютэм ар ке вуиз, тӥ-а мон сярысь сюлмаськоды? - викыштӥз 
кышномурт. - Уть, куазед мар дауртэ! Граждан ож дыръя гордъёс сиён-
юонмес нымыляк тазатыса кошкизы но, тӥни со бере кураськыса ветлонэз но 
адӟимы. Табере нош ик кие пуйы кутомы-а? Осто-о!.. Выль закон начар 
улӥсь калык понна шуизы вал кадь но...
- Пуйы уд куты ни, - либатӥсь куараен вераны тыршиз Максим. - 
Совето власть син азьын юнма. Тон гинэ, Оксиння апай, номыре адӟытэк 
улӥськод. Кеностэ тазатыны ми ӧм лыктэ, кидыслы гинэ. Кӧня быгатӥськод, 
сёт. - Собере эшъёсызлы вазиськиз: - Малы колхозэ пырем адямиосын 
тэльмырыса вераськиськом? Асьмелы куриськомы шат? Собраниын огез но ӧз 
пумитъяськы, табере тани йыбыртъяськом: сёт, пожалыста, сёт!
- Сыл ай, Максим, эн пӧсекъя, - палэнтӥз сое Митрошин но 
Оксиннялы вазиськиз: - Тодӥськод-а, огнадлы секыт луоз, Оксиння апай, 
вала сое, - быгатэмезъя небыт вазиз кышномуртлы. - Валэд но ӧвӧл 
бере, кызьы бусыдэ гырод? Нош колхозамы куамын кык валмы вань ини. 
Гырон сярысь тыныд чик сюлмаськоно уз луы. Будэтэм ю-няньмес котькуд 
семьяез, нылпиез чакласа люкыломы.
- Ньыль мешок кидысэ вань... Уд ке куштэ... иське... Кыл вылады 
ке сылӥды...
- Вылез вуытозь, нянед тырмоно кадь-а? - юаз Самар Пилька.
- Тырмытыны тыршо. Чылкак сютэм ум кулэ. Оломар но вераськисьёс 
вань уго... Пыд йылэ кылемлэсь курдасько.
- Кин, мар вераське? - тэтчиз Пилька.
- Ма, колкоз шуондылы умгес оскиське. Ас юртад бертэмез - аслад 
ини. Кӧня сётӥ, сомында коть берыктыны быгатысалды ке...
- Кык мешоктэ сёт, кыксэ аслыд кельты, - шуиз Митрошин.
- Тон мар?! - кеськиз Самар Пилька. - Тодӥзы ке, мукетъёсын кызьы 
вераськыны малпаськод?
- Оксиння апайлэн вить нылпиез! - йыг-йыг кариськиз Митрошин. - 
Валаны кулэ. Со чотэ ӧжытак тон йылтод, мон йылто, Максим, Санька... 
- Хы! - ымнырзэ кырыжтыса чабкиськиз Самар Пилька.
Кышномурт котмем синъёссэ кышет пумыныз ӵушылӥз но, председатель 
доры шуак вамыштыса, азяз пыдесъяськиз:
- Тау, Иванька, тау! Пыремдэс адӟыса, йыры ик берганы кутскиз 
вал: тани, малпасько, выт кыскасьёс лыкто, берпумзэ нуозы, маин улом, 
кызьы нылпиме сюдом? Оски табере тыныд, Иванька, оски! Сётӥсько, вань 
кидысме сётӥсько... Быдэс семьяеным колхозын ужалом, уй-нуналме жалятэк, 
тыныд юртто, Иванька, тыныд но, Максим, тыныд но, Санька... Вождэ эн 
потты мыным, Пилька: мукетъёсын вераськыны кылыд мед тупалоз. Эн, 
мыным луыса кизёнэз бере эн кельтэ, колхозэз эн куашкатэ. Оскисько, тӥ 
уд куштэ монэ... Нылпиосме ӝутыны огнамлэн моӵе уз тырмы, асьтэос 
адӟиськоды, кыӵе ми шал-шал кылемын. Дӥсян-кутчанмы но ӧвӧл ни. 
Оскисько...
Митрошин кышномуртэз выж вылысь ӝутӥз.
- Азьло-берло мон азе тазьы эн пыдесъяськылы ни, ява. Мон кыӵе 
ке староста ӧвӧл ук. Ӵош ужаломы, пыд йыламы но ӵош султыны тыршомы...
Огеныз тазьы, мукетыныз чурытгес вераськыса, кык нунал куспын 
колхоз кенсы кидыс байтак гинэ, сюлэмез буйгатымон люкаськиз. Суро-пожо 
кидыс вал со - огезлэн синкыли кадь чылкыт, мукетызлэн - жуг-жагесь. 
"Ничево, - малпаз Митрошин, - шертӥм ке, ваньмыз одӥг радэ вуоз. Музъем 
гинэ буш медам кыль".
Председатель ассэ буйгатыны выре ке но, сюлэмыз гыбдамысь уг 
дугды. "Малы калык уг оскы колхозлы?! Нырысь лӧбак ӝутӥськиз вал ук, 
малы али берлань кыстӥське? Я, шуом, таиз тулыс туж шурдыт. Нош 
туэлы гинэ шат одӥг ёзэ огазеяським?.. Шуге-леке вуон учырез шӧдыса, шыръёс 
сямен гуосазы ватӥськыны выро бере, кызьы оскод сыӵе адямиослы, кызьы 
сыӵе калыкен ужалод?" 
Иванька куд-ог колхозникъёслэсь юзэс ваткан амалзэс тужгес секыт 
мылкыдын тодаз вае. Тани алигес Койык Ладимер доры пыразы. Лапас 
улысь кор вылэ пуксьыса кенешо. Кор но кор, понназ кылле но кылле. 
Кинлэн сое берыкъяны тодаз лыктоз? Ладимер нош ваментӥське: коть татчыям 
ик вандэ, шуэ, ӧвӧл, пе, ю тысе. Самар Пилька ӧй ке луысал, 
вераськонзы керетонозь пуромысал, дыр. Ӵемтыса со корез ӵыжыны шедьтӥз. 
Кор ӟукырак вазиз. Пилька куалектӥз но палэнэ тэтчиз. Учке: кор но 
кор, кылле но кылле. Эшшо огпол ӵыжиз. Бум! вазиз кор. Тырттэм бекче 
выллем. Нош ик ӵыжиз: бум! "Усьты ай ватэгдэ!" - кеськиз Пилька. Койык 
Лади йырзэ ошиз... "Сыӵеосын-а колхоз лэсьтод? - нош но нош куректонэ 
вые Митрошин. - Малы чыртыям думет керттыны соглаш кариськи? Та 
кыстаськонъёсын гуртын синазькыльлэсь но синазькыль луи ни ук..."

* * *

Кайсыос тулыс бусы ужъёссэс радъязы ке но, калыклэн мылкыдыз 
пумен сӧриськыны ӧдъяз: шапык но зор усьымтэен, ӝужаса вуымтэ валэс ю 
куасьмиз. Ӟеч толъем ӟеглы гинэ оскон кылиз на. Со но умой-умой 
тысятэк ӵужектэ ни. Малпан вӧзы малпан: ю ӧз удалты бере, пудо сиёнэн 
но шуг луоз. Картофкаез но ӝутканы ӧз дӥсьтэ: пудэз, пе, сутӥськоз. 
Калык кушетскемын: нош ик "пот ар" вуэ!
Иван, Максим но Санька, тарантасэ пуксьыса, кӧняетӥ радзэ ини 
бусыосты котыръяло. Котькудӥзлэн йыраз малпан: ма кароно, калыкен 
кызьы вераськоно?
Нош калыкен вераськыны туж бадӟым муг кылдӥз: колхозысь потыны 
куриськыса, куать семья конторае ветлӥз ини. Председательлэсь но, 
правленилэн членъёсызлэсь но верамзэс пелязы понӥсь ӧвӧл - кошком но 
тӥни!
Митрошинэз партилэн райкомаз нырысетӥ секретарь доры ӧтизы.
Райком Ӟуч урамысь азьвыл волостной правленилэн юртаз интыяськемын. 
Отын ваньмыз озьы ик кылемын: ӧсъёс-укноос но, кабинетъёс, ӝӧкъёс, 
шкафъёс, пуконъёс но. Уноез ужасьёс но азьвылъёсыз ик. Пӧртэм кагазъёсын 
вырыны валам кулэ ук - выль ужасьёсты ку дышетод ай? Кивалтӥсьёс, 
конешно, - мукетъёс. Таосыз - коммунистъёс. 
Нырысетӥ секретарьлэн кабинетаз, Иван Иванович Шибаев доры, 
Иванька кепыраса пыриз: вылӥ кивалтӥсьёс дортӥ ветлыны дышемын ӧвӧл 
уго. Нош кӧня ке пукиз но, кемалась тодмоос кадь луизы. Шибаев эш туж 
мыло-кыдо адями, шӧдске: пальпотыса гинэ ӧвӧл, лӧпшаса вераськись 
вылэм. Кытысь ке кылэм ини Иванькалэсь зор ултӥ, кышно интые, дэри 
комок ваемзэ.
- Анаедлы выль кензэ кема миськоно луиз, дыр? - серекъя. Собере тулыс 
кизёнлэн мынэмез, шуг-секытъёс сярысь юалляськиз. Отӥяз шуиз:
- Малы ӧтьытэк дорам уд лыктӥськы?
- Ваньмаз аслым вуттӥськоно луэ, дыры уг тырмы.
- Али бен дыр шедьтӥд ук.
- Шедьтӥ.
- Ваньмаз огнад ноку уд ву.
- Ма, воксё огнам ӧвӧл ук, эшъёсы умоесь. Правленилэн членъёсыз, 
шуисько.
- Тодӥськод-а, малы ӧти? Калыкез ултӥямды понна, тонэ бюрое 
ӧтьытэк уз лу, дыр.Мыным ивортӥзы, кызьы тӥ усы-герыосыз, кусоосыз 
таласа ветлӥды, юртъёстӥ утчаськыса ветлӥды. Со понна тодӥськод-а кытчы 
келяло?
- Сибире.
- Молодец, тодӥськод вылэм.
- Ма... кинэ ке ултӥяса ӧм ветлэ ук, - абдраз Иванька.
- Ю кидыс бичакуд огзэ кышномуртэ жугид-а?
Иванлэн син азяз пеймыт луиз.
- Ӧй... Кин сыӵе кыл вӧлдэ?.. Кин?!.. Оло, оскиды со кыллы?
- Ӧй оскы. Озьы ке но, та иворез эскерытэк ӧйлась. Кышномуртты 
доры ужасьме лэзьяй.
- Мынэсьтым лушкем-а?
- Озьы кулэ вал, Иван Григорьевич. Эн куректы, со кышномурт тон 
сярысь умой кылъёс гинэ вераз. Азяд пыдесъяськыса тэльмыремез сярысь 
мыным умойтэм ивортӥллям.
- Мон тодӥсько со чагиськисез!
- Милемлы уг чагисько, ивор сёто.
- Озьы, иське?..
- Кылзы ай: вӧзад сыӵе адями вань шуыса тодӥськод бере, солэсь 
чакласькысагес ул.
- М-м... ма...
- Нош колхозысьтыд кошкисьёсын мар карыны малпаськод?
- Со сярысь но тодӥськоды?
- Тодӥсько.
- Колхозысь одӥг семья но уз кошкы. Оскисько.
- Кӧняез ке кошкиллям ук ини.
- Кӧс гужемлэсь курдаменызы озьы выро. Соосыз ӝуткась-
булгандырисьёс вань.
- Кылсярысь?
- Шуом, Филипп Самаров. Самар Пилька, иське.
- Ну-ко, ну-ко!
- Колхозэ пырыны ӧтьыса коркась корка ветлыкумы, колхоз понна 
сюлмаськемзэ туж возьматылӥз, нош ми берын калыкез олокызьы но ултӥя, 
мыскылля, азьтэмен пыкылэ вылэм Солы луыса, "милемыз ляльчи карыны 
малпады-а мар-а?" шуисез но вал ини. Та ласянь мон Пилькаен туж юн 
керетӥ.
- Валамон... - секретарьлэн куараез ӧжытак небӟиз. - Тодӥськод-а, 
алигес мон Кудрявцев эшен кенеши. Со улон радэз туж умой валась 
коммунист. Со шуэ, тон, пе, бадӟым янгыш лэсьтӥд, колхоздылэн 
правленияз аслэсьтыд эшъёстэ гинэ ӵектыса.
- Мар умойтэмез? Ог-огмес ми ӟеч тодӥськомы ук!
- Озьыез озьы, но... Гуртоосыдлэсь тӥ сярысь "одӥг тэркыысь 
сиисьёс" шуэмзэс ӧд кылылы-а?
Митрошин нош ик абдраса учкиз секретарь шоры.
- Эн паймы, Иван Григорьевич, бен, таиз но мыным тодмо.
- Эшъёсылы мон оскисько!
- Мукетъёслы но оскыны кулэ.
- Нош со кышномуртлы, бусыысь ӟегез куръяса ке но бичамы, ньыль 
мешок пунэмез одно берыкто. Кыл сётӥ.
- Шонер лэсьтод... Кылзы ай: Михаил Григорьевич Кудрявцев шуэ, 
колхозады, пе, туж йӧно адямиос вань, соосты, партие кутыса, ячейка 
кылдытыны, пе, луоно. Тыныд, пе, соос умой визьнод сётӥсьёс луысалзы. 
Ачид кызьы малпаськод, партие кутыны луымон адямиосты вань-а?
- Гожтэт тодӥсьтэмъёссэ яра-а?
- Ма бен карод, ваньмызлы дышетскыны кылдымтэ. Выль улонэз йыг-
йыг валасьёс дышетскымтэос пӧлын но вань. 
- Бен, милям но сыӵе адямиосмы вань. Али ик Сидор Васьлеез, Ерми 
Очанэз, Пуппы Варокез, Серга Илляез дэмласал.
- Аслад мылкыдыд ӧвӧл-а?
- Оскоды ке...
- Кинэ секретаре дэмласалыд?
- Копаровез.
- Паймымон. Кудрявцев эш но та нимез ик вераз.
- Учкисько ке, соин тӥ ми сярысь уно гинэ малпаськиллям ни, 
секретарь эш, - мыняк потӥз Митрошин.
- Партячейка кылдытыкуд Михаил Григорьевичез одно ӧть. Соин одӥг 
кылысьгес ужаны тыршы. Дышетскемез солэн но трос ӧвӧл, нош политика 
ласянь тодон-валанэз тырмыт. Гурт калыктэс но умой тодэ.

* 
* *
Ужез тросэн Митрошин партийной ячейка кылдытонэз весь берлолы но берлолы 
кельтылӥз. Озьы араны потон нуналъёс но матэктӥзы. Огаз нуналэ председатель 
вань колхозникъёсты ӧтчаме люказ. Кенешазы сельсовет секретарь Василий 
Ефимович Кокорин лыктӥз.
- Шуг-секытэз огъя кужымен гинэ вормыны быгатомы, - шуиз со. - 
Мылкыддэс чылкак эн куашкатэ: ӟеглы но картофкалы осконмы вань. Алигес 
райкомлэн нырысетӥ секретарез Шибаев эш вераз, мукет районъёсын, пе, 
валэс юос но алама ӧвӧл. Секыт учыре сюрем колхозъёслы юрттон сярысь 
Ижкарысь кивалтӥсьёс пӧлын вераськон вылэм ини. Озьы ке но, палэнысь 
юрттэтлы оскыса улыны уг яра. Одӥг шепмы но, одӥг куро ӝыжымы но 
арам медам луы. Тӥни мар сярысь сюлмаськоно асьмелы.
Люкаськемъёс Коко Васьлеез туж сак кылзо, паймемзылэн пумыз ӧвӧл: 
вот ведь азьтэм песьтэред кыӵе вылӥе ӝутӥськиз! Вераськон кылыз но шур 
кадь ӧръяське!
- Вуоноез тол секытэн ортчоз шуыса, ваньмы умой валаськомы, - 
веранзэ азинтэ Кокорин. - Озьы ке но, таиз ар "пот ар" уз лу. 
Иванькаен мон соглаш: мылкыдэз куашкатыны уг яра. Мукет ласянь, 
Иванькаен соглаш ӧвӧл, - Коко Васьлей котырак учкиз. Адӟе: куспазы 
шыпыртӥсьёс но йырзэс со пала берыктӥзы, верамзэ витё. - Мон сямен, 
али тӥ интыяз эктӥсь айы ӟазеглы кельшиськоды. - Люкаськемъёс гурак 
серектӥзы. - Туннэ нунал умой ортче ке, ярам, туж ӟеч. Вуоно гужемозь 
умой толйимы ке, эшшо устогес! Нош революциез интыямы сылон понна 
ортчытӥмы шат? Интыямы тэтэ карыны ожмаськимы шат? Коммунизм лэсьтӥськомы 
бере, сое улонмылы матэ кароно! Ӧм ке лэсьтэ, ачиз лыктоз-а? Уз. Таӵе 
ӵектонэ вань: арандэс шаплыгес ортчытэ но, вань улон юртъёстэс кесяса, 
одӥг бадӟым юрт пуктыны кутске. Отын столовоез но, пичи нылпиосты возён 
интыез но, дышетскон классъёс но, шулдыръяськон сэрегез но мед луозы. 
Дӥсьёстэс, пыдкутчанъёстэс огазе люкан сярысь но малпаськоно. Озьы ик 
уждундэс но огкадь люкылоно. Коммуна ке, коммуна ик медло!
Кӧняез ке люкаськемъёс, Коко Васьлейлэн верамезлы паймыса но 
шумпотыса, вылды, чабыны ӧдъязы. Соослэн али ик коммунаын улэмзы потэ 
ни вылэм, шӧдске. Но тани мылкыдзэс одӥг кышномуртлэн юанэз сураз:
- Сандӥдэ мынам кашамер кышетэным ветлытэмед потэ-а, Коко? - вазиз 
со. - Мыным сое ӵужанае кулон азяз кузьмаз вал. Со синпельме бон кыӵе 
сюлмын мукет йырысь адӟом меда?
Люкаськемъёс ӵашетыны ӧдъязы.Пӧртэм сямен вераськисьёсты кылзэм 
бераз Иван Митрошин Кокоринэз серем карысагес шуиз:
- Мон, оло, зэмзэ интыяз эктӥсь айы ӟазеглы кельшисько. Но 
коммунизме пась штаниен, укмысо кутэн пыреме уг пот.
Санька Копаров Иван Митрошинъя кариськиз.
Максим Семёнов Кокоринлы серемпыр шуиз: 
- Таӵе визьмо кылъёсыд понна Кайсы черкогурт куке-соку тыныд 
памятник пуктоз. Огзэ гинэ уг валаськы: кудбыдӟа луыны кулэ со корка, 
быдэс Кайсы калыкез тэрытон понна? 
- Бадӟым луоз со, бадӟым, гажано эше, быдэсак одӥг липет улын. 
Зор-кот дыръя, пыддэ чик саптатэк, столовояд но мынод, дышетскон интыяд 
но, син пӧртманад но.
- Вот выжыкы-ыл!.. - вазиз кин ке.
Серемзэс кутыны быгатымтэос кырымпыдэсазы кызйылыны ӧдъязы.
Самар Пилькалэн мылкыдыз Кокорин палагес кыске: со шонер вераз 
кадь потэ. "Та ужпум шоры мургес учконо ке, Коко Васьлей ӟеч улон 
понна ук, - малпа со. - Аслэсьтыз юртъерзэ, вань тӥрлыксэ огъя 
ваньбуре кузьманы дась. Одӥг юртын ӵош улӥмы ке, шуг-секытъёсыз вормыны 
капчигес луоно кадь. Ог-огдэ умойгес адӟод но мургес валалод. Мон 
сямен, Кокорин шонер вера." Но Максимлэн кылъёсыз, лушкем серекъясьёс солэсь 
мылкыдзэ воштӥзы: "Ма, кызьы одӥг липет улын собыдӟа семья - быдэс 
гурт! - улоз?! Крестьян нылпиос вашкала дырысен яна потыло вылэм ук. 
Сыл ай, сыл, яна потон - со единоличникъёслэн йылолзы шуиськом бере, 
коммуна мукетгес луыны кулэ, дыр... Коко шонер вера. Конешно, шонер!.. 
Но... кашамер кышет... Зэмзэ ик, со кышномурт Коко Сандӥлэн йырысьтыз 
аслэсьтыз кашамер кышетсэ кыӵе синмын учкоз? Иванька шонергес, дыр, малпа: 
коммунае пырыны вазь на..."
Отӥяз Самар Пилька кызьы малпаськыны ӧз вала ни, ваньмыз сураськиз-
пожаськиз. Вераськонэ ӧз пыриськы - Иван пала но, Коко Васьлей пала но 
ӧз кариськы. Витьымтэ шорысь со ӧс янак борды пыкиськыса сылӥсь Маниез 
адӟиз. Алигес лыктӥз, дыр, кенеш кутскыку татын ӧй вал. Огшап уӵерак-
уӵерак учкылӥз Мани шоры: "Чебер ик, шуккыса куштон! Мукет егит 
кышномуртъёсын ӵошатоно ке, ой-ёй кыӵе висъяське! Сяськаё тӧдьы кышет 
улысьтыз сьӧд йырсиосыз ӧжытак лусьтрогес мычиськемын - юри карыса но 
сыӵе кельышлы уд пӧрмыты! Око-ко-о, чутыгей Максим, зориз ке зориз 
тыныд!.."
Пилькалэн туж тодэмез потӥз, кудзы палан Мани: Коко Васьлейлэн 
ӵектонэз кельшиз-а, Иванькаез-а утьыны дась? Кин тодэ, солэн верамез, 
оло, Пилькалэн малпанэныз тупалоз... 
- Марья Карабаевалы, ой!.. табере Семёнова ини со - таӵе юанэ 
вань, тӥни со ӧс дорын сылэ, - шуиз Самар Пилька люкаськемъёслы. 
Ваньзы ӧс пала берытскизы. - Али тани тынад йырад, Мани, мурт 
кышномуртлэн кашамер кышетэз ӧвӧл. Нош коммунае пыримы ке...
- Нырысь ик тынад сузэредлэн йыраз луоз со! - кашамер кышет 
пумысен вераськон ӝутӥсь кышномуртлэн куараез кылӥськиз.
- Кыӵе сузэрез вань солэн? Огназ будӥз ук, песянаез вӧзын, - 
вазиз кин ке.
- Приютын будэмез татчы бертыны сюрес шедьтэм, табере уг ни 
кошкы, пе, шуэ.
- А-а...
Пилька ӧз малпа, юанэз ас вылаз умойтэмен берыктӥськоз шуыса. 
Могак луиз но, йырзэ ошыса, интыяз пуксиз.
Мани калык азе потӥз. 
- Васьлей агайлэсь шонер кылъёссэ тӥ мыдлань берыктӥды, кашамер 
кышет вылэ вуттӥды, - шуиз со. - Одӥг бадӟым юрт лэсьтон - со, 
кужыммес огазеяса, шуг-секытъёсты вормон сярысь верам кыл. Мон юн 
оскисько: сыӵе улон юрт ноку уз лэсьтӥськы, нош одӥг гердэ биниськон 
сярысь малпанлэсь куштӥськыны уг яра.
- Юртъёсыз кесяса, али ик одӥг бадӟым корка пуктоно ӧз шуы шат 
Кокомы? - вазиз кин ке.
- Юртъёсыз кесян - со вуж улонэз выльдон. Озьы валасько мон 
сое. Васьлей агай но озьы вала, дыр. Юртъёсыз асьмеос ум кесялэ, вуж 
улон борды дэмӟем визьмес мукет ласянь выльдом, - шуиз Мани.
- Кытын таӵе визьмо вераськыны дышид? - серектӥсь луиз. - Мар 
сярысь верамдэ валаны туж шуг. Ачид коть валаськод-а?
- Валасько. Огкутскемен тани мае тодытэме потэ на...
- Ой, уте ай, кыӵе валэкъяськись луиз Манимы, асьмемын кивалтӥсь 
Максим вӧзын улыса, хи-хи-хи! - Таиз нош ик кашамер кышет сярысь 
кылпум поттӥсь кышномурт.
- Эн люкетэ Марьялы вераськыны! - чурыт вазиз Иван Митрошин. - 
Давай, давай, Мария Игнатьевна!
- О-о! Игнатьевна луэм ини таид! - кин ке нош ик серектӥз.
- Мон кема уг ӝегаты... Огдэс но дышетыны уг малпаськы, солы 
кужмы но, тодонэ но ӧвӧл. Но асьтэос кашамер кышет сярысь кылпум поттӥды 
бере, ас кылме верало!
- Давай, давай, кисьматы!
- Оскисько, дӥсьёсмес но пыдкукмес огазе люкано шуыкуз, Васьлей 
агай мукетгес вераны турттэ вал. Малы со ӟустыриез огазе люкалод? 
Малы мон кинлэсь ке кышетсэ йырам керттом? Мынам аслам, ас киыным 
ужаса, кашамер кышет басьтэме потэ! Мынам но, мукетызлэн но!
- Шонер! 
- Ӵош ужаса люкам коньдонмы колхоз янчикмес узырмытӥз ке, 
котькудӥз ас пайзэ басьтоз но - лавкае. Мар нуллэмед, мар сиемед потэ - 
басьты. Озьы ведь, Васьлей агай?
Коко Васьлей мар ке вераны киыныз суралскиз вал но, Мани сое 
азьпалтӥз:
- Сыл ай, тон та кылъёсыз ик ас сяменыд вераны вырод, собере 
тонэ выльысь мыдлань валалозы.
- Мар, м-мар? - могась луиз Коко Васьлей. - Тон мар милям, 
воргоронъёслэн, ужазы пыриськиськод?! Кин тонэ татчы ӧтиз?!
- Ачим лыктӥ. Колхоз - со мынам но улонэ, тодэмед ке потэ!
- Хи-хи-хи!
- Хы!
- Однако-о, Коко Васьлеез дышетыны лыктэм ук таид татчы...
- Ма... таосыд кусыпсэс ку таӵе-таӵе тупатӥллям? Осто-о, ог-огзэс 
валаса кырӟась тылобурдоос кадесь...
- Шып кариське! - лек вазиз лабыртӥсьёс шоры Коко Васьлей. - Тӥ 
татын ярмарка кожады-а, мар-а?
- Ярмарка ӧвӧл, Василий Ефимович, - шуиз Иванька. - Только тон 
эн люкеты ай, ява, кенешез нуыны. Мыным оскиды бере, ачим ик пумаз-
йылаз вутто. Мар ке веранэд вал на кадь, Игнатьевна?
Люкаськемъёс пӧлын нош ик сипыртэмъёс кылӥськизы:
- Ми шоры ке - Педочча, Варок, Малання... Таизлы - Мария 
Игнатьевна! Кылӥды-а?
- Озьы уго... Ма!.. Кылзы ай...
- Осто-о!
- Я, тырмоз, - шуиз Мани. - Мар верамдэс мон ӟеч кылӥ. Уг валаськы 
кожаськоды-а, кинлы тӥляд кӧтты пӧсь?
- Кинлы? - пӧртэм интыосысь паймем куараос кылӥськизы.
Ӝӧк вылысь вуэн графин борды карандашеныз йыгаса, Митрошин Манилы 
вазиськиз:
- Тынад мар ке веранэд вал на кадь, Мария Игнатьевна?
- Вот концерт! - вераськисьёслэн висказы пыриз Самар Пилька.
Ӧжытак шып луэм бере Мани шуиз:
- Тодӥськоды-а, одӥг ужпумъя мон Максимен соглаш ӧвӧл.
Люкаськемъёс нош ик кушетскизы: 
- Ой, соглаш, пе, ӧвӧл!.. Ой, Максимлы пумит!..
- Вера, вера, Мани! - шуиз Самар Пилька. - Шып кариське! 
Кытындэс вунэтӥды-а, мар-а? Марья Игнатьевна кыл кутэ...
- Вот уго! Мон кыл кутӥсько! Тазьы верало: ужам уждунэз огкадь 
люкылыны мон соглаш ӧвӧл. Та ласянь Максимен огкылысь луыны уг 
быгатӥськы.
Тае кылыса, Самар Пилька интыысьтыз тэтчиз но Мани доры лыктӥз:
- Молодец, Марья Игнатьевна! Мон но озьы малпай вал: Максимен 
одӥг уробоын пукыны тыныд секыт луоз!
- Туж янгышаськод, дуно эше! Максимен вань даурме одӥг уробоын 
ӵош мыныны гожтэмын шуыса, сюлмыным шӧдӥсько, - Самар Пилька шоры мыняса 
учкиз Мани. - Максимен мон мукетыз пумысен соглаш ӧвӧл.
- Уждунэз со ваньмызлы огкадь люкылыны дэмла - тӥни кытын 
солэн янгышез!
- Ма... кыӵе янгыш? Туж шонер! - лӧптӥз Самар Пилька. - Шонер 
ук, оведь? - ваньмызлы вазиськиз. - Нокин ултӥямын, вӧсь каремын уз 
лу. Асьмеос одӥг радэ ӝутэмын бере, кисымы но ваньмылэн одӥг зӧкта мед 
луоз. Максимлэн ӵектонэз туж шонер кадь потэ мыным.
- Эк, Пилька, Пилька!.. Уг куареты ни, шуисько вал но, кылтӥм 
ачид кыскиськод бере, вератэк амалы ӧвӧл... Гыльым-гальым ужамы ке, 
быдэс колхозэнымы кыдёке-а вуом?
- Тон верано кылдэ валамонгес вера, Марья Игнатьевна! - Самар 
Пилька чурыт сямзэ возьматыны ӧдъяз. - Мар сыӵе-сыӵе котыръяськыса 
визьманы выриськод?
- Гурт калыке пӧлын Марья Игнатьевна ӧвӧл мон. Нимы туж огшоры 
- Марья. Валамон-а, Пилька эше?
- Ма... Председатель озьы шуэ бере, мон но озьы вераны 
дӥсьтӥ...
- Тӥ кема сапайтыны малпаськоды на-а? - кышномурт куара 
кылӥськиз. - Нуныме нонтыны бертоно! Шаплыгес вералэ, мар кароно 
милемлы. Собере бертом ини, ӵукнаозь татын уд пукы ук.
Люкаськемъёс ӵашетыны ӧдъязы.
- Пилька, эн люкеты, пуксьы интыяд! - вазиз Мани. - Вот... Я, 
кӧнялы ке шып кариське. Пилька кадь йырзэс урдыса гыльым-гальым 
ветлӥсьёс тыршыса ужасьёс мында ик уждун басьтӥзы ке, умой луоз шат? 
Тыршытэк ӟеч уждун басьтыны луэ бере, мар сюлмаськонэз? Тӥни кытчы кыско 
асьмемыз Максимен Пилька.
- О-о! - кылӥськизы куараос. - Картсэ гинэ ӧвӧл, Самар Пилькаез 
но миське ук ини таид!..
- Шонер, Мани! - вазиз председатель. - Уждунэз, конечно, 
ужамъя тыроно.
Максим мар ке вераны султӥз вал но, Иванька мукет ужпум борды 
выжиз...

* * *
Со ӝытэ люкаськемъёс кема вераськизы. Максимлэн Марьялы йырыз кур 
луиз, уждун сярысь ӵектонзэ калык азьын умойтэмен лыдъямез понна. 
Кенешлэсь быремзэ мырдэм чидаз.
Мукет нуналъёсы но мылкыдыз ӧз воштӥськы. Ма, уката керӟегъяськись 
луиз. Огъя кариськыса, юри ултӥяло кадь потӥз солы. 

* * *
Улыса-вылыса араны потон дыр вуиз.Колхозэ пыремъёс пельпумъёсазы 
сюрлоосын, киосазы лянэсъёс тыр аръянэн но ӝожон пызен Чимошур кузя 
тубо. Азьвыл та бусы Самар Пилькалэн анай-атаезлэн позёмез вал. Кыедэз 
кема адӟылымтэ музъем пильылӥськемын, ӟегез шерык-турык гинэ, сое но 
жаг турын согем.
- Осто, мар таӵе аналтэм бусы та? - чабкиськиз огез 
кышномурт. - Милямаз-а, Ондоклэназ-а мыноно вылэм ук! Музъеммес ми 
арлы быдэ кыедаса возим. Тани туэ но ӟегмы татын сярысь чарак ӟечгес 
удалтэмын. Одӥг суслон ке но потоз меда татысь?
- Ӧйтӧд... Та такыр бусызэ колхозлы кузьмам кариз но кизэ 
кусказ тырыса ветлэ ини!
- Кузёослэн бурд улазы ук!
- Кин вылтӥ вераськиськоды? - Самар Пилькалэн куараез кылӥськиз.
- Тон вылтӥ! - ӟег культозэ керттонъяз шонерскиз огез кышномурт. 
- Бусыдэ, уть, мар калэ вуттэмед!
- Мурт чотын кӧтэз тырыны каньыл уго-о... - нёжтӥз мукетыз.
- Тӥ араны лыктӥды-а, керетыны-а?! - кеськиз Самар Пилька. - 
Таӵе вераськемдэс председатель кылӥз ке, кылдэс пинь сьӧрады ватытоз 
ведь!
- Милесьтым-а? - серектӥз нырысез кышномурт. - Тырмоз! Азьвыл 
кылмес пинь сьӧрамы куртчыса улӥм. Али выль сямен улыны косо. Та 
законэз утьыса, картэ но, выны но гражданскойын быризы. Мон ӝык та 
законлы пумит луом-а?! Председателен эн курдаты, со ишан адями ӧвӧл.
- Мон аслым ачим кузё! - шуиз Пилька вӧзын сылӥсь егит 
кышномурт.
- Тон кадьёс кузё кариськизы ке, Совето власть ӵуказе ик 
куашкалоз, - мытылыса кадь вазиз Самар Пилька.
- "Тон кадьёс" шуид-а? - егит кышномуртэн артэ арась воргорон 
сюрлозэ музъем вылэ сэрпалтӥз. - Кин нош та Совето властез лэсьтӥз? 
Оло, тон?
- Лэсьтоз со! - серем карись луиз.
- Кылызъя ужез ке луысал! - ватсаз мукетыз.
- Сылэ ай, иськавынъёс, мар асьмеос талэн пашмем бусыяз кусмес 
жадьытыса бекыръяськиськом? Давай, Пилька, ачид ара, мон аслам бусыям 
кошкисько!
Та кылъёс арасьёсты бугыртӥзы:
- Ас позёммес ми таӵе ӧм шалӟытэ, нуныез кадь маялляса возимы!
- Асламез ик бусые дуно!
- Уж луоз-а та?! Ӟегед кырыме но уг сюры ук, Пилька! Нуналэз 
быдтыны гинэ лыктӥм.
- Мон но ас бусыям мынӥсько! - вазиз кин ке.
- Мон но!
- Мон но...
Ужзэс куштыса, колхозникъёс витьымтэ шорысь ог-огзы сьӧры вамыштӥзы.
- Кошкелэ, ваньды кошкелэ! - мыжыкъёссэ сэзъяны ӧдъяз Самар 
Пилька. - Асьтэлэсь ю-няньдэс асьтэлэн кеносъёсады нуллэ! Тӥ кадь 
ыжлюгыосын колхозэз лэсьтод-а? Тӥляд визьды сёросэз тазатыны но уз 
тырмы! Кыедъёс!..
Колхозникъёс юр-яр карыса кошкизы. Самар Пилька культо вылэ пуксиз 
но йырзэ ошиз: "Умойтэм вераськи, умойтэм! Тазьы кулэ ӧй вал... Ваньзэ 
тае председательлы кызьы валэктом? - интыысьтыз тэтчыса кадь султӥз но 
Чимошур нюк кузя Кайсые дыртӥз. - Митрошинэз шедьтоно! Умойтэм лэсьтӥ. 
Лачмытгес вераськоно вал. Эк-ма! Хм... Позёменым пыкыло! Ӧз удалты бере, 
мон-а янгыш? Вӧсяськом шат? Ма... али та музъем мынам ӧвӧл ни ук! 
Малы соос шорам ыргето, кыедъёс?.."
Самар Пилька секыт шока, дыртэ. Партилэн райкомысьтыз инструкторен 
вераськемез тодаз лыктӥз. "Митрошин райкоме ветлэмме ӧз шӧд меда? Эшшо ке 
чагиськись шуоз! Валалоз шат, солы ик умой лэсьтӥсько шуыса? Инмарлы 
кадь вӧсяськыны, йыбыртъяны, азяз пыдесъяськыны кутскизы ни, нош со 
шумпотэ, мыня. Сыӵе-а луыны кулэ туала кивалтӥсь? Нет, брат, уз пӧрмы! 
Дыраз ӧд ке сермета тонэ, Иванька, сьӧраз ортчод, лашкин ворттӥсь вал кадь 
луод. Мон ке ӧй мын, кин райкоме мыныны дӥсьтоз? Эшъёсыд-а, мар-а? 
Хы! Возьма соослэсь! Сыл ай, сыл... Нош Максим? О-о-о, берло ӧтчамын 
кыӵе вал солэн тусыз! Мон интыын вот кин луыны быгатысал райкомын! "Максим 
чагиськыны ветлэм" шуыса кык-куинь муртлы шокчи ке, соку ик ваньмызлы 
валамон луоз. 
Максимен герӟам малпанзэ со пумаз-йылаз ӧз вутты - сюрес дуртӥ 
люкрак будэм лулпуос сьӧрысь Отя потӥз. Сяськаё басма дэремен, кышетэз 
йыр бераз керттэмын, пыдъёсаз - сизьымо кут, тӧдьы мертчан бинялтонэн, 
чеберъям пунэтэн. Кияз - бадӟым сарба.
- Осто, куалектӥ! Мар-о таӵе шок-пуль бызьылӥськод? - Отя могак 
луэм Пилька шоры мыняз.
- Тон нош малы таӵе кысык дыръя мунё кадь дӥсяськыса 
калтыртӥськод?!
- Али кураськись кадь ветлӥ ке, пересьмем берам чеберъяськом 
шат?
- Хы!
- Эмезь бичаны тубисько ай Мукшур яге. Ойдо сьӧрам, ӵошен 
шулдыргес луоз.
- Вот возьыттэм! Ваньмыз шатыр поттыса арало, тон нош - 
эмезяны!
- Аслым тырмымон уже вань. Колхоз скалъёсыз, оло, тон кыскиськод-
а?
- Кыско тани!.. - Отялэн ӝутъяськись гадьыз шоры учкыса, со жӧлак 
луиз, ньылоныз кӧсаз, чурыт кылъёсыз амалтэк небӟизы.
- Ымнырыд сюлмаськись тусо дыръя, учкымон пияш луиськод вылэм ук! 
- пырсйиз Отя.
Та кылъёс бере Самар Пилькалэн зэмзэ пиосмурт мылкыдыз бугырскиз.
- Ӧлексы кожад шат монэ? - Пилька мур шокчиз но Отяез кустӥз 
ӟыгыртӥз.
- Ӟыгыръяськемед но луэ, оло? - эшшо мынясьгес луиз Отя.
Пилька золгес ӟыгыртӥз. Соиз, палэнскем ӧвӧл, пиосмурт борды 
ӝиптӥськиз...

* * *
Самар Пилька Митрошинэз ӝыт пал гинэ шедьтӥз. Колхозникъёслэсь асьсэ 
бусыосазы кошкемзэс со тодэ ни вылэм. Вераськыкузы Максимен Санька пыризы.
- Мон сямен, номыр кышкытэз ӧвӧл, - шуиз Митрошин. - Огинын-а, 
асьсэ коже-а аралозы - мар пӧртэмез? Арамын гинэ мед луоз.
- Ӧд шузимы-а?! - абдраз Максим. - Единоличной хозяйствое берыктӥськем 
луэ ук со! Арам ю-няньзэс колхоз амбаре нуллозы кожад, оло?
- Нуллытом!
- Паймымон вераськиськод, Иванька! - Санька но Максим пала 
кариськиз. - Таӵе ужед понна тонэ райкоме кыскалозы!
- Отчы чагиськиллям ни... - Пилька шоры кырыжак учкиз Митрошин. 
Со куспын Пилька, пал синзэ кырмыштыса, йырыныз лушкемак Максим шоры 
возьматӥз: со, пе, чагиськем. Митрошинлэн ымныраз паймем тус кылдӥз. 
Озьы ке но, ӧз куареты - шуиз: 
- Ӧйтӧд, ӧйтӧд... Мар шуыны пайми ни. Чурытгес кариськисько ке, 
райкоме вутто, лябгес ке, "калыклэсь серметсэ лябӟытӥськод" шуо. Эшшо 
кызьы ке мукет амалэн ужаны кутски ке, нош ик райкоме бызись сюроз, 
вылды.
- Мар тон "райком" да "райком"?! Кин чагиськыса ветлоз? - пӧсектӥз 
Максим.
Митрошин Самар Пилька шоры учкиз. Соиз нош ик синзэ кырмыштӥз. 
"Уть, кыӵе выре таид!" шуиз кадь.
- Югдурез али ик радъяны ӧм ке быгатэ, огмылэсь но йырмес уз 
маялтэ, - шуиз Митрошин.
- Калыкез люкано, вот мар! - котьку сямен дыртытэкгес, нод-нод 
вераз Санька. - Секыт югдурез умой-умой валэктоно. Та вакчи дыр куспын кин 
ке колхозлы дышыса вуиз кожаськоды-а? Ӧз!
- Берлань сюресэ кожемзэс мед валалозы. Шонер вера Санька, - 
шуиз Максим.
- Тон кызьы малпаськод, Пилька? - юаз Митрошин.
- Таӵе кысык вакытэ кин люкаськоз! Жадьыса-какалмыса бертэм мурт 
ӧтчаме лыктоз на-а?!
- Таиз но шонер, - вазиз Максим.
- Огпол ке но монъя кариськид, бадӟым тау! - Максим шоры 
йыбырттэм выллем кариз Самар Пилька.
- Визьмо верамдэ ӧй кыл на вал уго.
- Я, я, нош ик кутскиды! - вераськон висказы пыриськиз Санька. - 
Коркась корка ветлытэк уз лу, дыр. 
- Мон соглаш, - шуиз колхозлэн председателез.
Правленилэн членъёсыз нош ик коркась корка вамыштӥзы. Асьсэ 
бусыосазы аранлэсь куштӥськыны курыса вераськизы. 
* 
* *

?????? Митрошин сельсоветэ Михаил Григорьевич Кудрявцев доры 
мынӥз. Мадиз, кызьы коркась корка ветлӥзы, кызьы соосты куд-ог?? 
улляса лэзиз.
Кудрявцев гуртысьтызы тужгес сӥлы адямиосын кенешыны ӵектӥз. Огаз ӝытэ 
соос правление Сидор Васьлеез, Ерми Очанэз, Луппы Вараез но Серга 
Илляез ӧтизы. Мар сярысь гинэ ӧз вераське, кыӵе ужпумез гинэ ӧз ӝутэ 
та пумиськонын. Иванькаез та арлыдо адямиослэн улонэз котыр ласянь 
валамзы но сое туж огшоры сэрттыны-пертчыны быгатэмзы паймытӥз. Сидор 
Васьлеез Кудрявцевлы шуиз:
- Ас малпанме мон тазьы верасал, Мика. Уг кельшы мыным та егит 
эшъёсмылэн кивалтэмзы. ?оть татчыям ик ожалтыса куштэ! Ӧтчаме люкало но 
куспазы егит атасъёс кадь пуриськыны кутско. Син пӧртманзы шоры учкыса 
пукиськод, пукиськод но гуртэ номырзэ валатэк бертӥськод. Уно пӧртэм кыл 
пӧллён вӧлмытыны муг ӧвӧл шат со? - Сидор Васьлей Митрошин пала 
берытскиз. - Уг яра озьы, Иванька, уг яра! Куспады кенешем берады гинэ 
калыкез люканы кулэ. - 
- "Ми куспамы тазьы-тазьы кенешимы ", "ми тае-тае лэсьтыны малпамы, 
пумит уд луэ-а?" шуыса юано, дыр, ӧтчаме лыктэм калыклэсь.
- Кызьы малпаськоды, кошкемъёс колхозэ берытскозы на-а? - юаз 
Горей Мика.
- Чаклалэ ай, кинъёс нырысь ик кошкизы. Тужгес тыршисьёсыз но 
тыр улӥсьёсыз, - шуиз Ерми Очан. - Малы-о нош соиз яке таиз семья 
тырогес улӥз, малы солэн валэз но кык-куинь луоз вал, пудоез но таляк, 
нянь кабанъёсыз но бусы тыр сылӥзы? Малы? Ужзэс радъяны быгатэменызы, 
нылпизэс ужаны дышетэменызы! Асьтэос ӝык, Иванька, ӟудыса улӥды-а? Мае 
гинэ тон лэсьтыны уд быгатӥськы! Кин дышетӥз тонэ ужаны? А? Вот уго: 
анаен атаед! Ваньмыз ужез радъяны быгатэм, нылпиез ужаны дышетэм 
бордысь потэ.
- Ма, Левоньлэн пиез, Олексей, берлояз ӧтчамын шонер ӧз вера 
шат? - мукетъёслы вераськыны люкетӥсько кожаса, лэся, дӥсьтытэкгес вазиз 
Луппы Вара. - "Самар Пилька но Коко Васьлей кадь пась беръёс куаныса 
улозы ни милям байлыкамы" шуиз ук со.
- Вераськонмылэсь ӧрзэ палэнэгес кариськод, Варок, - шуиз Горей 
Мика. - Коко Васьлеед табере - тӥляд депутатты, кивалтонын ?????.
- Коко Васьлей Коко ик кылёз, коть инме мед ӝутӥськоз! - 
серектӥз Луппы Вара. - Удмурт кылаз коть берыктӥськиз ??. 
Люкаськемъёс мыняк потӥзы.
- Огзэ валаны тыршелэ, иськавынъёс, - шуиз Горей Мика. - 
Колхозъёс кылдытон крестьян калыклэсь улонзэ чакласа малпамын. Кир-пазь 
улонэз огазеянэн герӟамын со. Кӧня курадӟон вае крестьян семьялы ас 
позёмаз огназ тыршемез! Со пичи музъеме нокыӵе машина уд пырты. Али 
тани верало, корт машинаос кылдытъяло ни, пе. Трактор шуо, лэся, со 
машинаосыз. Соин ик калыкез азьпала учкыса улыны дышетоно вылэм. ????? ас 
позёмъёсамы пазяськимы ке, ой, шумпотӥсьёс но, серекъясьёс но кӧня 
сюрозы!
- Кужыммес колхозэ огазеян ласянь калыкен вераськыны дӥсьтоды-а? 
Валче улон но ужан ласянь, шуисько. Кир-пазь медам луэ шуыса, - 
вазиз Митрошин.
- Ма, малы уд дӥсьты? - шуиз Луппы Варок. - Кин кызьы шока, 
ум тодӥське шат? Огезлэсь тузонзэ куртком, мукетсэ либатом, люкетӥсьсэ 
уллялом.
- Ваньзэ огкадь карыса, колхоз??? кужмысь кыскыны уг яра, дыр,. Та 
выль ужын асьмемыз умой ласянь возьматӥм ке, али пырымтэос асьсэос 
лыктозы, - шуиз Ерми Очан.
- Партилэн райкомез та ужен гызмыльтыны уг лэзьы, - шуиз Горей 
Мика. - Нырысь собраниын тодӥськоды на-а, кин пырыны мылкыд ӧз кар, 
но "чакласько ай" шуиз? 
- Ма, Левонь.
- Вот уго! Солэсь табере мукетъёс но адӟем каро. Левонь - 
кулак! Со шоры асьмеос кемалась мукет синмын учкыны кулэ ни. Сыӵеосын 
нюръяськоно! Коммунистъёслэн партизы озьы косэ, Сталин эш озьы косэ.
- Осто! - куаляк луиз Луппы Варок. - Асьме гурт калыкен 
керетон ӝутомы-а? Ма, Левонь кинлы люкетэ? Вань семьяос сыӵе ужасесь 
луысалзы ке, туж умой вылэм но... 
- Левонь - кулак! - чурыт вазиз Горей Мика. - Сыӵеослы выль 
закон, выль правительство сюлэмъязы ӧвӧл, малы ке шуоно, выль 
правительство огшоры калыклэсь улонзэ умой карон понна тырше, нош соос 
мукетъёслэсь бусьтыргес улыны дышемын. Озьы бере, Левонь кадьёс пала 
пыриськыны уг яра, со али асьме улонын - кышкыт тушмон! Лушкем 
тушмон, тодэмды ке потэ! Валалэ сое. Одӥг куронэн вазиськисько тӥледлы, 
гуртоосы: та секыт вакытэ юрттэ предедательдылы, Иванькамылы.
- Юрттом! - огкылысь вазизы люкаськемъёс.
- Тау! Мон оски тӥледлы, тӥ мынам котьку гажано муртъёсы вал. 
Тау, - кошкыны дасяськемъёслэсь Иванька киоссэс кутылэ. - Табере тани 
мар ласянь кенешон муге вань ??, кӧня ке дырлы пуксе ай. Алигес 
монэ партилэн райкомезлэн нырысетӥ секретарез ӧтьылӥз. Юаз, ӧвӧл-а, пе, 
коммунистъёс радэ кутымон адямиосты? Мон шуисько: вань. Собере тӥлесьтыд 
нимъёстэс верай.
- Мынэсьтым но-а?! - паймиз Луппы Варок. - Ма, мон гожтэт уг 
тодӥськы ук! Кинлы мон кулэ, осто быри! Та пияш монэ серем уг кары-
а, Мика? - вазиз со Кудрявцевлы.
- Паймод но бырод! - мыняк потӥз Горей Мика. - Шибаев эш 
монэн но ӵапак та ласянь вераськиз. Мон но солы тӥлесьтыд нимъёстэс 
верай. Тупаны но кулэ ведь! Мон эшшо кык нимъёсыз йылэтӥ на: Иван 
Митрошинлэсь но Санька Копаровлэсь. Пумит уд луэ-а, соос но тӥ радын 
луизы ке?
- Ойдо, кош! - киыныз шонтӥз Луппы Варок. - Ма, ӵапак сыӵе 
егитъёслэн интызы ук со! Ми кадьёс отчы тупаломы на меда? 
- Ужаны тыршемдыя но, улон шоры валаса учкемдыя но тӥ 
уноезлэсь гуртоосмылэсь вылӥынгес сылӥськоды, - шуиз Михаил Григорьевич 
Кудрявцев. - Тӥ кадь адямиос коммунистъёслэсь партизэс ас вылазы возё 
но вань калыкез сьӧразы кыско. Партийной ячейка кылдытӥды ке, тӥ 
люкыны луонтэм кужымлы пӧрмоды, мукетъёслы адӟем карымон коллектив 
луоды. Асьтэос тодӥськоды: партие куто туж оскымон адямиосты, соослэн 
нокуд ласянь но шексы медам лу. Гурт калык пӧлын тӥ - сыӵосыз.
Председательлэн кабинетаз кӧня ке дырлы чал-чал луиз. Митрошинлэн 
быдэс мугорыз золскиз: кыӵе кыл вералозы та адямиос, уз палэнске-а, 
дӥсьтозы-а колхозысь партячейкалэн шорсюлмыз луыны?
- Тау оскемдылы, - лулӟем кадь вазиз Серга Илля. Со шоры Иванька 
учкиз но паймиз: арлыдо воргоронлэн тусыз воштӥськыны ӧдъяз. Тани 
со султӥз но, куалекъясь киоссэ кытчы ватыны тодымтэеныз, ӝӧк борды 
юн-юн кырмиськиз. - Герман ожез ортчем мурт мон... Окопъёсын 
костаськемын... Пӧсьсэ но, кезьытсэ но, курытсэ но веръяй. Мар понна 
курадӟимы соку - юась-верась ӧй вал. Али тани монэн адямиен кадь 
верасько, оско мыным. Зэм-а, даур-а та?!
- ????? ??, ??? ?????? ?? ???????? ????? ???????????? - кышет пумзэ 
посыны ӧдъяз Луппы Варок. - Али тани ликбезазы ветлӥсько, Копаров 
Санька доры. Однако, мыло-кыдо вылэм ук дышетскон уж! Букваос пуктылыны 
йӧндырисько ни. Гожъяськыны умой-умой дыши ке, мылкыдме вераса, 
газетэ гожтэт ысто ай. Мон кадь огшоры кышномуртъёс сярысь гожтэмзэс 
котьку паймыса кылзӥсько!. . Я, возьматэ, кытчы гожтӥськоно, нимме 
нюртыны Санькамы дышетӥз ини. Дышетӥсьмы монэ Луппы Варок уг шуы - 
Варвара Ивановна Луппова. ?зьы ик гожтыны ?? дышетӥз. Тани тазьы... - 
ручка кутӥз но партие пырыны мылкыдзэ вераса гожтэм куриськон улэ 
бадӟым букваосын ӝыны нимтулзэ пуктӥз. Собере пӧсям кымессэ ӵушиз, 
мур лулӟиз но шуиз: - Однако-о, мар быдӟа уж лэсьтӥ мон 
туннэ та кагаз вылэ гожтӥськыса!.. - Кышетсэ тупатӥз, сэзь-сэзь 
кариськиз, эшъёсыз шоры учкиз: - Мон - коммунист!..

* * *

???? газет бадӟым букваосын ивортон печатлаз: "Кайсы черкогуртысь уноез 
удмуртъёс ВКП(б)-е пыризы но партячейка кылдытӥзы. Секретаре огкылысь 
Александр Копаров быръемын." 
Та чуръёсыз лыдӟыса, Максим Семёновлэн мылкыдыз четлыке сюрем 
тылобурдолэн кадь жугиськыны ӧдъяз. "Санька, иське, хм!.. м-
да...коммунистъёслэн йырзы луиз. Нош Иван?.. Калыкез мынэсьтым лушкем 
люкам, партие ӝуткам... - уйёсы иземез луымтэен лулӟылэ ??????. - ??? 
????? куриськон гожтыны ӵектӥсь ӧвӧл. Уг оско, ????. Мон, иське, Совето 
властез но ӧй утьы, колхозэз но уг лэсьтӥськы?.. Хм!.. Шӧдӥсько, 
Иванэн кусыпмы, шур вылысь пилиськем йӧ люкъёслэн ог-огзы дорысь 
палэнскемзы выллем, люкиське но люкиське... Малы палэнскемзэ но 
тодӥсько: небыт сямыз понна пыкылэме сюлэмызъя ӧвӧл. Колхозэз куашкан 
калэ вуттӥз ни ук! "Коллективной хозяйство" шуиськом бере, малы 
котькуд семьялы бакча кулэ на? Уг адӟы шат: ваньмыз ас му вылаз? 
шыр кадь гудӥськыса уло! Котькуд семья скал, ыж, парсь вордыны тырше, 
соин ик колхоз бусыысь но возь вылысь пудо сиён нимаз-нимаз ?????? 
гылӟе. Кызьы сое уг вала Митрошин?! Берло нуналъёсы монэн кенешемысь но 
дугдӥз ни. Сыл ай, шонер ӧвӧл меда Самар Пилькалэн "Марьяед сюлмысьтыз 
уг кошкы, луоз" шуэм???.. Оло, зэмзэ та муг милемыз люке?.."
* 
* *
Максимлэсь воштӥськемзэ Иванька но шӧдыны кутскиз. Талэсь азьвыл 
райкоме Самар Пилька чагиськиз, дыр, шуыса малпа ке вал, ?????? со 
малпанэз амалтэк Максим вылэ выжиз. "Мар ӟудӥз ини вуж улонэз ??????????? 
воштонэн! - председательлэн вожез потэ. - Уг вала шат: та вакытэ соин 
вырыны нокыӵе луонлык ӧвӧл. Таӵе секыт дыръя кызьы скаллэсь, векчи 
пудо-животлэсь, ӟазег-куреглэсь куштӥськод? Малы ?????????н, калыклэсь 
мылкыдзэ сураса, суй-пыдэз юскыса, одно та ужпумъёс сярысь вераськон 
ӝутоно? Нокызьы уг валаськы!.. Соос, мон сямен, Коко Васьлеен одӥг кыл 
шедьтӥзы. Соиз но уг дугды вань юртъёсты одӥг липет улэ карон? ????? 
????????????. Кыӵе корка луоз со, кудбыдӟа? Мон сое син азям пуктыны 
уг быгатӥськы. Райкомын амалтэк малпалозы, кулэтэм ужен выриськом, 
куспамы ум тэриське шуыса..."
Ӧз чида, Максим доры мынӥз.
- Вера, Максим, мар луиз? Висиськод ке, колхоз чотын эмъяськыны 
келялом. Тусыдъя адӟисько: тазалыкед ляб.
- Уг висиськы, - киыныз шонтӥз Максим. - Мар веранэд вань?
Митрошин могак луиз. Лулысь-сюлмысь вераськыны лыктӥз вал, нош 
Максим со мылкыдэз ӧвӧлак кариз, ымзэ пытсаз. ????? ???? ?г-огзылы ма 
вазьыны ӟудыса пукизы. Собере Максим юаз:
- ?равленияд мон интые табере Луппы Варокез-а, мукет коммунистэз-а 
быръёд?
- Ой-ой-ой, Максим! - серектӥз Иванька. - Куатаськид, оло?
- Мар тон? Ӧй. ???? ?жед каньылгес мыноз, дыр, шуисько.
- Тодӥськод-а, шонерзэ ке верано, со мӧйыос сайкатӥзы монэ, - 
вераськонзылэсь умой ӧре кожемзэ шӧдыса, председатель лӧптӥз. - Малы меда 
асьмеос азьвыл ик соос вӧзы ӧм кариське? Куиньнамы- ньыльнамы 
пычкиськыса выримы-выримы но пайдаез - чӧльы! Райкомын шуизы вал: 
колхозлэсь пайдазэ куд-огез нырысь уз вала, соин ик, пе, котырады 
кужмо актив кылдытыны тырше. Мон со верамез пелям ӧй поны. Асьме коже 
выременымы бадӟым янгыш лэсьтӥськеммы. Сое мон али гинэ умой-умой 
валаны кутски. Учкы ай, Максим: олань-талань шонаськись колхозникъёсыз 
кӧня ке нунал куспын ас котыразы биньыны быгатӥзы ук, озьы бере, 
асьме котыре но! Мугез мар бордын, тодӥськод-а?
- Верад ке, тодо, - вушйыса кадь вераз Максим.
Иванькалэн ӝутскем мылкыдыз соку ик тӧлӟиз. Озьы ке но, ассэ кияз 
кутӥз, веранзэ пумаз- йылаз вуттоно кариськиз.
- Асьмеос ????????? гожтэм ӧтёнъёс пумысен киосмес шонаса 
кесяськиськом, нош соос, ?? ӧтёнъёслэсь ик пуштроссэс усьтыса, огшоры 
кылын улонэз валэктыны быгато.
- Ма бен, усто. Мылкыддэ бурдъяллям. Шумпотымон.
Максимлэн верамез Митрошин вылэ кезьыт ву кисьтэм кадь луиз. 
Мылкыдыз сӥяз.
- Зэм но, мар-о ваньзэ тае зульыса пукисько, ачид тодӥскод- 
адӟиськод ук. Собере райкомын но пельтэмъёс уг пуко вылэм: чыры-пыры 
ужъёсмес гинэ но тодо. Таиз ласянь кинлы ке туж тау карыны кулэ, 
вылды: дыраз визьмало.
- Озьы но, дыр... - вераськонзэс йылпумъямез ?????? ?????? вазиз 
Максим. Иванька??? ????? ?зьы ик валаз, кема ӧз ни пукы, кошкиз.
Кӧня ке нунал улыса, Кайсы черкогуртэ паймымон ивор вӧлмиз: 
Максим Семёнов, пе, ас бусыяз ара! Семьяеныз даллашем. Марья 
колхозникъёс пӧлын ужа, Максим - ас ана вылаз.

* 
* *
Ог ӝыны ар ортчыса, тулыс лымы шунан вакытгес, Кайсы черкогуртысь 
сельсоветлэн тӧроезлэсь Михаил Григорьевич Кудрявцевлэсь партилэн райкомез 
отчёт куриз: солэн сельсоветаз пырись гуртъёсын кӧня узыр семьяос, пе, 
кулаке поттэмын, кӧняез поттымтэ но малы? 
Горей Мика мур малпаськонэ усиз. ?росысьтызы котькуд семьяез ?? умой 
тодэ. Озьы ик - кин кызьы ужа-тырше, кин та вакытэ секыт учыре шедемын 
- висемен яке сюдӥсьсы вазь кулэмен яке оже быремен. Пӧлазы азьтэм-
бертэм, шаляй-валяй улӥсьёсыз но вань. Кулаке поттоно семьяослэн 
нимтулъёссы райкомын кемалась, пе,вылэм ини. Кудрявцевлэсь олокӧня пол 
юаллязы: та ужрадэз ку ортчытод? Нош со нокызьы басьтӥськыны ӧз 
дӥсьтылы, малпаз: та кышкыт ужрад ортчоз ай, Москваысь бадӟым кузёос, 
оло, мукет сямен лэсьтыны косозы.
Кудрявцевлэсь витьымтэ шорысь таӵе дӥсьтӥсьтэм луэмзэ валэктыны 
шуг ӧвӧл. ?копъёсын костаськыкуз, большевик агитаторъёслэн вань секыт 
улонэз узыръёс вылэ погыльтэмзы туж оскымон вал, малы ке шуоно, 
узыръёс - зӧк кӧтъёс, дасеныз гинэ улӥсьёс, крестьян калыклэсь вирзэ 
сюпсись?? - кытын ке туж кыдёкын уло ук, Горей Микалэн сыӵеосыз 
адӟылэмез но ӧвӧл. Солы, жадем, семьяез понна сюлмаськись но 
музъем ужлэсь мӧзмем солдатлы, ожмаськон пумит ӧтён кылъёс сюлэмъяз 
луизы. ?????? ????? ?? ?ольшевик агитаторъёслэн кенжытэм кылынызы кытысь 
ке палэнысь зӧк кӧто узыръёсын нюръяськон мылкыдын гомаса бертӥз. 
Солэн йыраз но ӧз лыктылы, ас иськавынъёсыныз ваче пинь вуоз шуыса. 
Нош райкомысь гожтэтын тани пырак со сярысь верамын. ????? ??, дыртыто.
Ма карыны паймыса пукем бераз секретарьзэ, Василий Кокоринэз, 
кабинетаз ӧтиз.
- Тодӥськод-а, мар? 
- Тодӥсько, - дыртыса вазиз Коко Васьлей. - Кулакъёс вылэ ожен 
мыноно, райкомысь гожтэтэз лыдӟи.
- Лыдӟид ке, умой. Та ужез ас вылад басьтоно луод. Мон висисько-а, 
мар-а таӵе - ӧйтӧд...Та нуналъёсы маке тазалыке ляб... 
- Валай! Ку кутсконо? Туннэ ик-а? 
- Эн лопыръяськы. Шудон уж ӧвӧл со.
- Тодӥсько. Но мон уг кышкаськы, кытчы кулэ, кин доры кулэ, 
ачим ветло.
- Огнад эн выр. Нырысь ?редседателен пумиськоно. Конторае ӝытпал 
мынод-а?
- Мар луоз ай отчыозь - кин тодэ...

* * *
Михаил Кудрявцев колхоз конторае ӝыт бер вуиз. Кинэ ке шедьтоз 
шуыса уг оскы ни вал, нош отын, председатель сяна, парторганизацилэн 
секретарез Александр Копаров но вылэм на - ӵошен кыӵе ке ужпумъя 
кенешо.. Сельсоветлэн тӧроезлэсь мар муген лыктэмзэ тодэм бераз Санька 
куашкам мылкыдын шуиз:
- Таиз - кыкетӥез граждан ож!
- Малы озьы шуиськод? - ӧз вала Иванька.
- Тон ас иськавынъёсыдлэсь улон-вылонзэс тарканы мынод-а? Мон - 
уг!
- Кулэ бере, мар карод, Санька, - шуиз Митрошин. - Асьме понна 
кин ке мурт лыктыса уз ужа ук.
- Кыӵе синмын учком Левонтей агай шоры, юртысьтыз улляно луим ке? 
Малы монэ соин одно тушмон карыны туртто? Собере... корказэ таламы ке, 
кытын улоз солэн семьяез?
- Сибырын яке тон дорын. Пыдлось коркады буш ук, йыг-йыг на, - 
витьымтэ шорысь Самар Пилькалэн куараез кылӥськиз. 
Куспазы вераськисьёс, куаляк луыса, ӧс пала берытскизы. Самар 
Пилька пальпотыса, ӧс янакез пыкъяса сылэ.
- ???? кошкисько вал но - учкисько: тыл ӝуа. Малпасько, пырало ай 
эше доры. Утёд ке, татын бадӟым ужрадэз эскеро вылэм. Левонтей агай 
понна эн куректэ: кулак карыны лыктондэс со тодэ ни. Коко Васьлей 
ивортэм. Ватыны луоно ваньбурзэ туж пыдло донгаз ни, дыр. Ӧйтӧд, ас 
югдаз дауртэ-а, кинлэсь ке косэмзэ быдэсъя-а - со вакчи визьем Коколэсь 
тодод шат.
- Берло дыре , Пилька, кылыд кузь луыны ӧдъяз, - вожпотэмзэ 
ватытэк шуиз Санька. - Ми кисыяд ум пыраське ук, маид вань, маид ӧвӧл 
- ?? ????????. Милям коркамы вань-а, ӧвӧл-а, буш-а со, ӧвӧл-а, мар тынад 
ужед?
- Янгышаськод, Санька! Мон- правленилэн членэз, огъя кенешын 
калык бырйиз. Озьы бере, колхоз ужъёсты мынэсьтым лушкем лэсьтыны уг 
яра. Нош тӥ тани куспады лабыртыса пукиськоды. Кин тодэ, оло, мыным 
пумит ужаськоды.
- Дугды, Пилька! - ????? Санька.
- Тӥляд гинэ колхоз понна сюлэмды висе шуыса малпаськоды-а? Хы! 
Тӥ гинэ ваньзэ валасьёс, быгатӥсьёс уго! Нош мон? Кин-о мон татын, 
а?! - ӝӧк доры лыктыса, гадяз мыжганы ӧдъяз. - Мон - бедняк, монэ 
нокытчы уз кыскалэ! Мынам ?ӥ понна йыры висе, кылӥськоды-а? Тӥ понна! 
Тӥледыз райкомъёстӥ но милициостӥ кыскалозы, кулакъёсты утиськоды 
шуозы! Подкулачникъёс радын луоды тӥ, валаськоды-а?!
- Пилька!.. - мар ке вераны медэ вал Иванька, но кыл куспаз 
нош ик Самар Пилька пыриз:
- Кылзэ! Огпол ке но мон верало! Монэ тӥ ноку но калык радэ 
ӧд карылэ. Табере - кылзэ!.. - мур шокчеменыз, ?? омырен ӵоксузиз, 
кызонэз пӧсьтӥз. - Ой!.. Нош ик кынми-а, мар-а...Уф!.. Кылӥ мон 
вераськемдэс, кылӥ! Туж умой валай: тӥ узыръёслэсь кышкаськоды. Кулакъёсыз 
тарканы кышкаськоды, озьы бере, тӥледыз соосын кыӵе ке адӟиськисьтэм 
нюжа герӟа! Тодэлэ: со нюжады кыре потӥз ке, йырды быгылес уз кыль, 
тушмонъёс радэ сюроды. Валамон-а верай?
- Сыл ай, Пилька, тон... тон - кышкыт адями, - Кудрявцев 
паймемзэ ӧз ваты. - Тон милесьтым шекмес утчаськод, оло? Малы со тыныд 
кулэ?
- Тӥляд шекты мыным кулэ ӧвӧл. Вань ке, ачиз кыре потоз. Мынам 
мукет веранэ. Шӧдӥсько: кулак карон ужен тӥ бере кылиськоды. Со понна 
райкомын уз ушъялэ.
- Ушъямзы милемлы кулэ ӧвӧл, - шуиз Иванька.
- Кулэ, Иванька, кулэ... Вань выросъёсыдъя адӟиське: яратӥськод 
тон ушъямез! Данъяса верам кыл тустэ воштэ, чебергес каре.
- Мар зулён та, Василий Григорьевич? - абдраз Иванька но 
амалтэк Кудрявцев пала берытскиз..
- Сыл! Кылзы! - нош ик кеськиз Самар Пилька. - Малы таӵе бадӟым 
ужлэсь монэ но, Максимез но п?лэнтӥды?
- Бен али ??????? кулакъёс дорын-а, правлениын-а? - чылкак паймиз 
Кудрявцев. - Ми соос доры правленилэн членъёсызтэк кызьы мыномы? Нырысь 
мар но со сярысь кенешыны малпамы. Кулэ ке луиз, тонэ но ӧтёмы, 
Максимез но...
- Ми соин беспартийнойёс! - ӝот-ӝот вераз Самар Пилька. - 
Милемлы партие но сюрес пытсамын...
- Тӥледлы ?ыр ӧзгес ву на, - шуиз Санька.
- Со дырез тон мертад-а?
- Мон но, со но, со но! - ассэ кияз кутыны быгатытэк, вӧзаз 
пукисьёс шоры чиньыеныз ?????? возьматъяны ӧдъяз Санька. 
- Сыл ай, Санька, эн пӧсекъя, - шуиз Кудрявцев. - Партячейка 
кылдытыкумы, Пилька, тон сярысь но, Максимен Мани сярысь но вераськон 
вал. Иванькаен Санька соку шуизы: ми, пе, ӵош будэмын, ог-огмес туж 
умой тодӥськом, соин ик милемыз партие ӵош, пе, кутэлэ. Котыр ласянь 
эскереммы бере арлыдоосыз коммунистъёсмы шуизы, Максимлы, пе, ассэ кияз 
кутыны дышетсконо на, нош тыныд, пе, туала политикаез валандэ будэтон 
бордын тыршоно. Тӥни сыӵе вераськон вал, егит эше. 
- Луппы Варок апай политика ласянь лябме шӧдӥз, дыр, оведь?
- Тон сое уд тодӥськы, шӧдске. Сыӵеос пӧламы уногес мед луысалзы - 
шуиз Кудрявцев.
- Бен, бен, сыӵеосын ӵуказе ик коммунизме вуомы! - серем пыр 
веракуз Пилькалэн синъёсаз лек тылъёс ӝуатскизы.
- Мар ӵектыны мылкыдыд вань? - юаз Митрошин.
- Кулаке поттон ужрадэ монэ но кутӥды ке, политикая валанэ, оло, 
ӧжытак ӝутскоз, - серем пыр вераз Пилька.
- Ивор сётомы, одно сётомы, - шуиз Санька.
- Туж тау. 
- Со ужез умой ортчытӥмы ке, астэ партиын лыдъяны быгатод, - 
Пилькалэсь мылкыдзэ капчигес карон ваылысь ???? Кудрявцев.
* 
* *
Капкаетӥзы ӵукна ик пырись калыкез пересь Левонь туж 
огшоры пумитаз: кияз пыӵалэз, саникез яке тӥрез но ӧй вал, жоб 
кылъёсын но ӧз кесяськы. Пудозэ сюдэм, шӧдске: коргидысь потэ, кыскето 
вакчи шуба вылаз турын-куро кылемын на.
- Паймымон! - Иванькалы сипыртӥз милиционер. - Уть, кыӵе выризы 
мукетъёсыз!
Лыктэмъёс - сельсоветысь Кудрявцев но Кокорин, правленилэн 
членъёсыз Митрошин, Копаров, Семенов но Самаров, гуртысь коммунистъёс 
Луппова но Сергеев, милиционер азбар шоры султӥзы. Корказь пагӟаос 
вылэ Левоньлэн семьяез потӥз: Олексей пиез, кенэз но соослэн куинь ???? 
нылпиоссы. Кенэзлэн кияз алигес вордӥськем нуныез вань на.

Азбарын кӧня ке дырлы чус луиз. Бусэн напчем тулыс омыр ваче 
сылӥсьёслэсь мылкыдзэс культо возэз чеплетэн шымыртыку кадь зӥбе, 
шоканз?? секыт каре.
Михаил Григорьевич Кудрявцев, вераськыны дасяськыса, кырым пыдэсаз 
кызйиз, нош со кызъем гудыртэм кадь кылӥськиз.
- Совето властьлэн выль законэзъя, - шуиз со, - тӥляд семьяды 
кулакъёс радэ пыртэмын. Туннэ нуналысен быдэс юртты, ку посон коркаосты 
но арбериосты, пудоды, зарни-азвесь коньдонды, дӥськутты, емышо садды 
- ваньмыз государство?? выже. Тани сельсоветлэн депутатъёсызлэн верам 
кылзы. Та кагазэз тӥ кие кельтӥськомы.
- Ваньбурмы государство?? выже ке, - ассэ кияз кутыны тыршыса, 
ӧжытак дырекъясь куараен вазиз Олексей, - ми асьмеос кин луомы ни табере? 
Государство милемыз дӥсялоз-кутчалоз-а, сюдоз-а, кытчы ке улыны интыялоз-
а? Ми чылкак гольык кылиськомы ук!
- Тӥляд ватэгды ньыль-вить гуртэз сюдыны-вордыны тырмоз на! - 
????? но туж йӧно вераны быгатӥ малпаса, Самар Пилька корказь пагӟаос 
вылын сылӥсьёс шоры йырзэ урдыса учкиз.
Та кылъёс напчем омырез шори пилизы кадь. Чеплетэз кыскыса возись 
гозы сэрттӥськыку возлэн лӧбак ӝутӥськемез выллем, ваче сылӥсьёс огыр-
бугыр сураськизы, юр-яр кесяськемъёс, нылпиослэн бӧрдэмзы кылӥськиз.
Левоньлэн кенэз, пичи нунызэ вӧзаз сылӥсь пиез кие сётыса, 
???????? ?????? коӵыш сямен тэтчиз но Митрошин борды кырмиськиз:
- Уг сёт!!! Лулды вань дыръя кошкелэ! Ваньмыз та милям, ас 
киынымы ужаса поттэмын!
Митрошинэз Санька мозмытоно кариськиз. ???? ?ышномурт Санька борды 
ӝабырскиз: 
- Гульымдэ сыско, сюлдэ ишко! Азьтэм песьтэръёслэсь гольык берзэс 
милям тыршеменымы ӵоктаны малпады-а?!
Таяз радэ кышномуртэ Санька бордысь милиционер палэнтыны малпаз.
- А-а! - шуш куараен кесяськыны ӧдъяз Левоньлэн кенэз. - Ме, 
ме, си! - милиционерлэн ымныраз мыжга. Максимен милиционер кышномуртэ 
кенос борды ӝиптӥзы. 
Азбаретӥ юр-яр кесяськыса бызьылӥсь нылпиосты Левонь ас котыраз 
люказ. Коко Васьлей соосты корка пыртӥз. Со куспын Олексей, лапас улэ 
мыныса, зыр кутӥз - шораз учкыны кышкыт. 
Ма борды кутскыны тодымтэеныз, Самар Пилька азбартӥ олань-талань 
бызьылэ. Вылӥ Инмарез но нюлэскысь кылчинэз огазе сураса кесяське. 
Лапас улын сылӥсь Олексей доры вамыштӥз вал, но соку ик гаӵоло 
пограз: Левоньлэн пиез солэн кус ваменаз сётӥз. Та суредэз адӟисьёс 
кынмем кадь луизы: Олексей доры но мыныны кышкало, Самар Пилька но 
лулзэ сётэм ни кадь.
- Олексей, - быгатэмезъя каньылгес вазьыны тыршиз Кудрявцев. - 
Выль законлы пумитъяськемед умое уз вутты. Быдэс семьяедлы кышкыт адӟон 
эн лэсьты. Кушты кивалтостэ, буйгатскы.
Олексей ся?ӟиськиз но зырзэ сэрпалтӥз. Милиционерен Иванька соку ик 
сое погыртӥзы но киоссэ туж ӝог думылӥзы. Милиционер Пилька доры 
тэтчиз, йырзэ ӝутӥз - улэп!
Совето властен ыстэм адямиос пумитэ кивалтос ӝутэмез понна, 
Олексеез милиционер соку ик сьӧраз нуиз, кылемъёсыз, Левоньлэн 
юртысьтыз шубаос, сапегъёс, тусьты-тэркыос, самовар, дэраос, алача, 
дузъёсын чечы, вышкыосын пызь, кеньыр, сюсь но уно мукет узырлыкез 
ураме поттылыса, кыткето бадӟым дӧдьые тырыны ӧдъязы. Нош Коко Васьлеен 
Самар Пилька, Левоньлэсь данъяськоно валзэ сюлоен шуккылыса, со узырлыкез 
шуласа-кырӟаса сельсоветлэн лапас улаз нуллыны ӧдъязы.

* * *
Левоньлэсь семьязэ ураме поттыса, Совето властен ыстэм адямиос 
коркаез, кеносъёсты, бакча ыбесэз, урам дурысь капкаез замоказы но 
сургуч вылэ печать лякылӥзы.
Урамын сылӥсь семья доры Левоньлэн бадӟым нылыз лыктӥз. Одӥг 
муртлы нуымон бинетсэс кияз кутыса, ваньзэсты ас дораз ӧтиз. 
Та суредэз артысь коркаос лушкем чакласа улӥзы, юрттӥськыны яке 
буйгатыны нокин потӥсь ӧйлась - кышказы. Нош кыӵе ке муген Левонь 
вадестӥ кошконо адямиос мукет урамъёсы - бадӟым сьӧлыклэсь палэнэгес - 
кожылӥзы.

* * *
Кайсы сельсоветэ пырись тямыс пичиесь гуртъёсысь но починкаосысь кулаке 
поттэм дас кык семьяосты Сюгинск станцие нуизы. Отысен, кезьыт 
вагонъёсы пуктыса, Урал гурезьёс сьӧры, Сибире келяллям. Соос пӧлын 
Левоньлэн Олексей пиез но кенэз вал - куинь нылъёсынызы, вож нуныенызы 
???. 
Левонез, пересь ини шуыса, ӧз йӧтылэ. 

* * *
Кайсы ёрослэн котькуд сэрегаз ивор сётӥзы: вуоно арня нуналэ, пе, 
сельсоветлэн азбараз кулакъёслэн дӥсьёсынызы но дуно арбериосынызы бадӟым 
вузкарон ??????. Отын ик, пе, сушкаен-пряникен но кампетэн сюдозы, пӧсь чай 
удозы, арганэн шулдыръяськонъёс луозы. 
Вузкаронэ Кайсыысь одӥг семья гинэ лыктӥз - Коко Васьлейлэн кышноез, 
нылпиосыз. Та начар улӥсь семьялы дунтэк сётӥзы нылпи гын сапегъёс, 
изьыос, шубаос, кык мешок пызь но одӥг пуд кеньыр.
Самар Пилька, аслэсьтыз кышъям-пуръям кыскето шубазэ сэрпалтыса, 
Левоньлэсь туж чебер вурем выль шубазэ дӥсяз - юри со вылэ мертамын 
кожалод, мугорызъя сыӵе-сыӵе тупа, воксё паймод!
Калык люкаськымтэен, вузано арбериосты Елабугаысь базаре келязы. 
Отын умой октӥллям, шуо, сельсоветлэн кассаяз таляк коньдон люкаськем, 
пе.

* * * 
Партилэн Кайсы райкомезлэн конференциез крестьян калыклэсь улон-
вылонзэ радъянлы но ???????? чотын узырмем кулакъёсты пазьгонлы сӥземын 
вал. Шибаев эш докладаз та ужрад ӝог но вылӥ ӟечлыкен ортчытэмын 
шуыса пусйиз. Кудрявцевен Кокоринлэсь тыршемзэс тужгес шуныт кылъёсын 
данъяз. 
* * *
Ар ортчыса, Левоньлэн кенэз ньыль нылпиосыныз Сибирьысь берен ????. 
Кыкез нылъёсыз мырдэм вамышъяло: келякузы кезьыт вагонын пыдчиньыоссэс 
кынтылӥллям.
Олексеез, семьяезлэсь люкыса, кытчы ке палэнэ нуиллям, кытчызэ 
семьяезлы вераллямтэ...
* * *
Кайсы черкогуртэ Ижкарысь партилэн обкомезлэн бадӟым комиссиез 
вуиз. Сталин эшлэн "Головокружение от успехов" статьяез потэмен 
валче, пыр-поч эскеризы кулак карон ужрадлэсь бервылъёссэ. Комиссия 
туж ик бадӟым тырмымтэосты ӧз шарая ке но, куд-ог учыръёс сое 
паймытӥзы. Кайсы сельсоветэ пырись гуртъёсын, кылсярысь, кулак 
карылӥллям урам пала ньыль укноё яке пулэн шуккем коркаосын улӥсьёсты, 
дас умортолэсь уно муш вордӥсьёсты, кык валэн но толэсэн семьяосты.
Азьланяз крестьян калыклэсь улон-вылонзэ радъянын та выллем 
тырмымтэос медам ни луэ шуыса, партилэн райкомезлэн бюроез Кудрявцев 
Михаил Григорьевичлы выговор ялӥз, нош Кокорин Василий Ефимович 
ужысьтыз мозмытэмын вал.
Партилэн райкомезлэн бюроез Кайсы сельсоветэз, юртысьтызы поттэм 
кулакъёс улонзэс выльысь радъяны мед быгатозы шуыса, ?????? выль интые 
музъем висъяны ӵектӥз.
Озьы Кайсыын выль урам кылдӥз. Отчы Левонь но Кайсыысь мукетъёсыз кулаке 
поттэмъёс пичигес коркаос, гидъёс пуктӥзы. Бӧрысьгес соос вӧзы яна потӥсь 
егит семьяос интыяськылӥзы. Урам кузь но чебер луиз, отӥяз солы 
Александр Сергеевич Пушкинлэсь нимзэ сётӥзы.

* 
* *
Левоньлэн бадӟым юртаз колхозлэн быдэс улэм-вылэмез тэриз: контора 
но отын ик, нылпи ясли но, скал, ыж, парсь возён гидъёс но. Лапас 
улаз - музъем ужан тӥрлык. Валъёсты бадӟым гидаз интыязы.
Пересь Левонь конюхын ужаны мылкыд кариз. "Ватытэк верасько, - 
шуиз со председательлы Иван Митрошинлы, - кулак карыса, сомында 
тыршемме таламзы но пыд йылам кельтэмзы понна сюлэмы ӝуа, со куректон 
кулытозямлы тырмоз. Озьы ке но, валасько: ачид тон монэ озьы ӧй 
карысалыд, выль закон озьы косэ, соин ик тыныд вожме уг поттӥськы. 
Выль властьлы но пумит уг луиськы: мон сое огнам уг вормы. Пие туж 
жаль потэ: кытын меда ????????? ?? ???? Гожтэтэз но ӧвӧл. Луэ ке, 
Иванька, ас юртам ик ужаны лэзь. Валъёсыз утьыны быгато на.
- Туж умой, - шуиз председатель.- Егит кышноос но воргоронъёс 
мукет ужын кулэ. Тон - ????? киыз но пыдыз.
Левоньлэн ыж гон тугон, тысь вӧй поттон кеносъёсыз ӧз пытсаське: 
отын ужез радъяны Левоньлэн эмеспиез мылкыд кариз. Огдышемъя Кайсые 
уноысьтыз ёрос гуртъёсысь ыж гон тугыны яке тысь вӧй поттыны вуыло. 
Соослэсь колхоз шыкысэ шӧдскымон табыш пырыны ӧдъяз.
Колхоз ужлэсь радъяськемзэ Коко Васьлей гинэ уг адӟы. Сельсоветын 
ужатозяз ассэ бадӟым кивалтӥсь луи, малпам, шӧдске, табере тани 
котькинлэсь шексэ туж чаль адӟе. Выль улонлэсь со туж уно пайдазэ вите 
вылэм: юртсэ воштыны но пумит ӧй луысал, колхоз ???????? возэн-возэн ю-
тысь но ворттысалыз, нылпизэ но огъя кужымен дӥсясал-кутчасалыз...
- Сельсоветысь пезьгытӥзы шуэмзылы эн оскы, - огпол вераськон 
мытӥз Самар Пилькаен. - Кулакъёс сиизы монэ, кулакъёс, дуно эше! 
Левоньлэн семьяез, значить, кызьы кӧй-вӧй пушкын пыласькыса улӥз, али 
но озьы ик! Мар бен воштӥськиз? Кулак семьяед озьы ик ашкынэмын! Кытын 
Советъёслэн властьсы, юасько мон? 
- Хы, мар мыным кулэтэмзэ чирдӥськод! Вылад кинлэн шубаез? 
Левоньлэн ӧвӧл шат? Кӧтыд ӧз тыры-а? Сельсоветысь уллям беразы калык 
рад уже потад-а ни? Ӧд! Нош мон доры колхоз амбаре пыдыд туж 
шаплы вамыштэ: председатель созэ сётыны кагаз гожтӥз, тазэ сётыны кагаз 
гожтӥз... Беднякъёс радын уго тон, мискинь, кызьы жалятэк!Тод но ул: 
юри тон понна колхоз собраниез люканы косо, ваньзэ верало, кызьы 
дасьсэ сиыны ымыд усьтӥськемын. Ньылон выжыям кугӟад ини кураськеменыд! 
Учкы ведомостез, ме: ужамед сярысь кык пол уногес сиемед ини!
- Вераськонэд, нуныкае, берло дыре мукет шӧмогес ӧз луы-а? 
Азьвыл, значить, Левонь сярысь кырӟанэд таӵе ӧй вал.
- Али мынам ӵошатыны луонлыке вань: соос кызьы ужало но тон 
кызьы ужаськод. Соос кураськисе кельтэмын ке но, конторае кагаз курыны 
уг мыно, татчы складэ уг лыкто, валаськод-а тон сое?
- Лушкем ватэгзы уно, значить.
- Я, кошкы азьысьтым, йыры висе, куараед бадӟым!..
- Макмыр, значить. Бурмытоно. Мын ай, шедьты векчи виямзэ, мон 
но оскалто. Складад юомы-а, мон доры-а мыномы?
Самар Пилька зӥрак берытскиз но контора пала вамыштӥз.

* * *
Самар Пилькаен вераськем бераз, Коко Васьлейлэн мылкыдыз пилеш 
йыраз гомась эгыр кисьтэм бере кадь луиз. Суралляськыса, ас понназ 
шара вераськыса ураметӥ мынэ. Али со кулакъёсыз но, колхозэз но, Совето 
властез но, гуртысьтызы коммунистъёсыз но огинэ сураса, сӥсъя-поръя, 
ваньзэс одӥг тусьтыысь сиисьёс радэ пуктэ. "Левонь, значить, усто ужась, 
мон - дась сиись... Ярам!..Самар Пилькалэсь та верамзэ таяз кырымам 
поном. Та ужпумез ик табере мукет ласянь учком: колкоз, значить, мон 
кадь беднякъёс понна кылдытэмын ӧвӧл, Левонь но солэн эмеспиезлы бадӟым 
тусь дуре шунытак интыяськыны малпамын. Таизэ кыкетӥ кырымам поном. 
Табере, значить, та верамъёсыз ӵошатытэк луоно ӧвӧл. Ой, сыл ай, 
вунэтӥськем! Кинэ партие кутӥзы? Шакшылэсь но шакшы адямиосыз! Монэ, 
калык азьын сюлоен жугем муртэ, беднякез, партиысь куштӥзы, сельсоветысь 
тузӥзы. Мыскылэ вуттӥзы. Таиз вераме кырымам уг ни тэры бере, кисыям 
поном. Табере, значить, вань верамъёсме ӵошатыса учконо ке, таӵе малпан 
кылдэ: колхозын лушкем ужасьёс вань! Али со выредительёс котькытын, пе, 
вань. Ми доры но соос каръяськемын, значить. Кивалтӥсьсы - кулак 
Левонь! Солэн бурд улаз шуныт инты шедьтӥллям Митроша пыредседатель но, 
биргадир но, собере, значить, кыладовщик Самар Пилька. Нош гожтэт 
тодӥсьтэм коммунистъёс мар лэсьтыны косӥзы, сое лэсьтозы, тылэ-вуэ 
пырозы, значить, но лэсьтозы!"
Урам тыр вераськыса мынӥсь Коко Васьлеен Отя пумиськиз. Мар 
вазьыны тодытэк, шораз паймыса учке: соизлэн ымнырыз вожомемын - киоссэ 
суралляса, чиньыоссэ куасалляса я Левоньлэсь нимзэ вера, я колхоз 
председателез Иван Митрошинэз сизьдэ, Самар Пилька но палэнэ кылемын 
ӧвӧл, коммунистъёс но, быдэс Совето власть но.
- Клубамы вераськыны дасяськиськод-а, мар-а, Васьлей агай? - серем 
пыр юаз Отя.
- Мар, мар?! - куаляк луиз Коко Васьлей но Отя азе кынмем кадь 
султӥз. - Мар ке вераськи шат?
- Мар ке гинэ, луысал ке... Куараедлэсь укно пиялаос жингырто ук.
- Воже потэ, Отя, воже потэ!..
- Кинлы? Марлы?
- Колкоз ваньбурез тус-тас каро. Ачид но тани сыӵеос пӧлы 
пыриськод.
- Осто, Васьлей агай!.. Туннэ вӧсяськытэк султӥд-а, мар-а тон?
- Вӧсяськонэз эн лякы ай кулэтэм интые! Инмарлы оскыны косэмын 
ӧвӧл табере. Астэ тод: Инмарлы оскысалыд ке, значить, кысконо 
скалъёстэ, алама утеменыд, ӝуткано карысалыд-а? Вот уго! Нош Сталин эш 
адӟиз ке ӝуткано скалъёстэ?
- Со скал фермаямы пыралоз, оло, уз, нош тынэсьтыд урам тыр 
вераськыса ветлэмдэ одно ик кылоз. Кызьы тон туннэ сазь ай таӵе? 
Кышноедлэсь ватэгзэ ӧд шедьты-а, мар-а?
- Асьмеос, значить, давай тазьы кенешом: Сталин эшлы мон уг вера 
выредительской ужед сярысь, но со понна тон мыным али кобыен нырйылдэ 
удод. Валамон-а верай?
- Кытысь тон тодод милесьтым ужмес, фермаямы пырамед но ӧвӧл 
но...
- Беднякъёс пӧлысь, значить, мон самой кужмоез активист, соин ик 
колхозын мар лэсьтӥське, ваньзэ дырыз дыръя тодыны кулэ. Ачиз Сталин 

эш сыӵе уж сётӥз мыным, валад-а, нушы йыр? Дышетскемед ӧвӧл уго 
тынад, значить, дышетскеме-ед...
- Аслад нош? Мон коть ликбезэ ветлӥсько.
- Милям ликбезмы кужмогес, тодэмед ке потэ! Отын, значить, пыр-поч 
эскериськомы Сталин эшлэсь верам кылъёссэ. Со котькуд лэсьтэм ужмес, 
котькуд вамышмес адӟе.
- Туж визьмо шуыса верало уго но, тон нош сое кытысь тодӥськод? 
Эшед-а, мар-а со тынад?
- Эше ке ӧй луысал, кин монэ активистын возьысал, кин сельсоветэ 
ужаны басьтылысал? А?
- Осто, Васьлей агай, ку эшъяськид сыӵе нимо-дано адямиен?
- Ма, верай кадь ук ини, кызьы тодматскеммес. Йырыд тырттэм 
горшок кадь ӧй ке луысал, ӧй вунэтысалыд. Эшшо верасько, кылзы: ми соин 
гражданскойын Чебер нюкамы пумиськимы. Ас частезлэсь йыромыса кылем: 
шинелез кесяськемын, штани-дэремез сурыкмемын, пыдкукез нош чик ӧвӧл, 
гольык пыд, значить. Жаляй мон сое: пустол пенӝакме, выль катаосме но 
горд сатинет дэремме кузьмай. Адями тус пырем бераз, сиеме потэ, шуэ. 
Мон, значить, котомкаысьтым картофкаме поттӥ но артысь шурын миськыса 
ваи. Тылскимы. Адӟысалыд ке, Отя, кыӵе ческыт потыса сииз со пыжем 
картофкаме!
- Картофкаед но ведь ӵапак тупам, однако та Васьлей агаен!
- Мон, значить, сьӧрам картофкатэк уг потаськы. Картофка со - 
улон!
- Сэре, вылад ноку пырамтэ пустол пенӝактэ но, горд сатинет 
дэремдэ но, ноку кутчамтэ выль катаостэ вылысьтыд кыльыса кузьмад-а 
Сталин эшлы? Ачид чапчара гольык кылид-а?
- Конечно! Э-э... ма... значить, тазьы вал со...
- Тырмоз, Васьлей агай, - серектӥз Отя. - Тодӥсько ке но вал, 
Кайсы черко гуртамы Коко Васьлей кадь алдаськисез ӧвӧл шуыса, таӵезэ 
тынэсьтыд кылэме ӧй вал на. Бертыса, нырйыл аракыме ачим ик пичи 
веръяло ай, алдаськисьёсын кусып воземе уг поты мынам. Ӟеч лу!
* 
* *
Огаз кӧс нуналэ бер ӝыт Санька Копаров Отя доры пыриз.
- Огшоры гинэ лыктоно кариськид-а, кыӵе ке праздникед-а туннэ? - 
пальпотыса пумитаз Отя ӧжытак шӧмаськем кунозэ.- Кызьы сюрес шедьтӥд 
ай таӵе, мусо дышетӥсе?
- Вунэты "дышетӥсь" кылэз, ява, али мон урокын ӧвӧл.Тодӥськод-а, 
гыдыке, паймымон шулдыр нунал вал туннэ. Егит эшме пумитай но пукимы 
ӧжытак. Эше кошкиз, мон тани тӧлатӥськыны потӥ.
- Кызьы шуид монэ? "Гыдыке" шуид, лэся, ук! Осто быри, таӵе мусо 
кылын вазьылӥсь ӧй вал на шорам... Я, вера эшшо огпол!
- Ма... гыдыке, шуи... Кельше ке, ӵемгес верало... Мыным но та 
кыл кельше...
- Кыӵе ке мугед вань-а мусояны монэ, Санька? - серектӥз Отя.
- Ма... эше кошкем бере, дорын пукыны мӧзмыт луиз. Урамтӥ 
мыныкум, адӟисько: тылыд вань. Ма, кызьы, малпасько, пырытэк-чаклатэк? Улляд 
ке, кошко, ӧд ке улля - куно луо.
- Сыӵе -сыӵе куно луэмед потэ-а?
- Атае пырись муртлы мукет сямен шуоз вал...
- Кызьы?
- Ӧс дорын - куно, ӝӧк сьӧрын - кузё! Малпаськы, Отя, ӧс дорын 
куно радын сылыса умой луоз-а меда? Оло, ӝӧк сьӧрад кузё радэ карод?
- Кузё луэмед потӥз-а? - кильтыръяськысагес вазиз Отя.- Сямыд 
шуняньӟем кадьгес ӧвӧл-а? Мынам малпамея, кузё, тодӥськод-а, кыӵе луыны 
кулэ? Ӧс дорысь тӧр шорозь солэн вамышъёсыз зарниямын мед луозы, вот! 
Тынад кисыяд тӧл уг шула-а?
- Тынад ӟеч кылыныд но мынам яратонэным зарнияломы, - шубазэ кылиз 
Санька. - Ой, кезьыт урамын! Шунтӥськоно вал пичияк...
- Шунытэд бордад ук ини, - гур котырын берганы ӧдъяз Отя.
Ӝоген ӝӧк вылэ вуизы горд кушманэн, кӧжыен пирогъёс, кыстыбей, 
сылалтэм кубиста но пыжем картофка. Кубиста лымез но пыжем картофкаез 
адӟыса, Санька куараезлэсь кытӥ потэмзэ ик ӧз шӧды:
- Вот таиз зол! Пыжем картофка но кубыста лым - о!..
Отя быдэс черык нырйыл аракы поттӥз.
* * *
... Санька ӵукна сайказ но огшап утчаськыса кыллиз: нокызьы но уг 
вала кытынзэ. Артэ - кыӵе ке кышномурт.Умой-умой учкиз но тодмаз: Отя. 
Бадӟым миндэр вылын йырсиез пазьгиськемын, гольык гадь вылысьтыз 
шобретэз палэнтэмын. 
- Отя! - каллен гинэ вазиз Санька. - Кема ум кыллиське-а? 
Куазь ӟардэм ини...
- Ойдо ӧжыт погылляськом на! Мынам таӵе шудо дыръёсы ӵем уг 
луыло...
- Отя..- ӧжытак дӥсьтытэкгес вазиз Санька. - Вождэ эн вай 
верамелы, ява...
- Гыдыке, шуод-а? - мыняк потӥз Отя.
- Уг. Али мон учкыса улӥ шорад но чебередлы пайми.
- Ой! - Санька пала зӥрак берытскиз Отя.- Малы тон но серем 
кариськод монэ! Эк шу!.. Мон янгыш шат, улонэ уг пӧрмы бере! Мон 
но шудо улонэн улысал...
- Дунтэм вузаськод дандэ...
- Ма-ар?!.. Кыӵе дан сярысь тон? Кыӵе данэ вань на мынам? 
Ураметӥ кошкись воргоронъёсыз кыскыса пыртонэ гинэ кылиз на...
- Отя... Уг яра озьы... Малы астэ ултӥяськод? Мон тонэ серем 
карыны ӧй пыры
Ой... Санька... Сыл ай!.. Тон мар?.. Тон... кыӵе ке... мукет! 
Малы монэн тазьы вераськиськод?.. Монэн тазьы вераськись ӧй вал на... 
Зэм, зэм, тон мукет адями...Лачмыт... Кылъёсыд но шунытэсь...
- Отя...
- Санька...

* * *
Нош ик ортчиз огез гужем, нош ик йылпумъяськиз аран дыр. Колхоз 
амбаре кутсам но шертэм юэз нырысь ик кидыслы понӥзы, государстволы 
келязы, собере колхозникъёслы люкылыны кельтӥзы.
Таяз аре кайсыослэн мылкыдзы умой - ю нянь удалтӥз!
Самар Пилька колхоз кенос вӧзысь кутсаськон лапасын ужасьёсын ӵош 
куатланэ: тӥляд визьды, пе, чонари вотэслэсь но векчи, дырызлэсь вазь 

кушетскон-а мед луоз тӥледлы, кайгырон ке луиз - эшшо усто, ваньды ик 
бе-е 
но ме-е карыса ветлыны дасесь! Нош куазь шузи ӧвӧл, ас ужзэ со 
радызъя тодэ. Тани туэ солэн мынэсьтым мылкыдме умой каремез потӥз но 
- пожалуйста, ю нянь кенос тыр! Во!.. 
Самар Пилька колхозникъёсын вӧй кадь небыт луиз шуыны уг ке но 
луы на, вераськон но ассэ возён йылолыз берло дыре шӧдскымон 
воштӥськиз, котькуд кылзэ чакласа вера, куд-огзэ ушъя, куд-огзэ 
буйгатэ, мӧйыослэсь егитомем туссэс адӟе, нош тазалыксы лябӟемъёслэсь - 
быгыльскем сӥльвирзэс. Ӧжытак серем карыса вазисьлы пальпотэ: я валамтэ 
улсы кариське, я верам кылзэс кӧш эмъюмез выллем ньылэ. Али со 
колхозникъёсын туж пыриськыса улыны тырше, ассэ умой ласянь гинэ 
возьматэмез потэ. Малы ке-а куд-огез лачмытгес луэмзэ, колхоз понна 
тыршемзэ синйылтӥзы ни. "Самар Пилькаедлэн визьмо кылыз, уть ай, лад-
лад воргоронлэн выллем шур ву кадь ӧръяське..."
Самар Пилькалы та выллем усто кылъёс туж кулэ та дыре: колхозын 
партийной ячейка кылдэмен валче, мылкыдыз бурдъяськемын, вань малпанэз - 
партие пырон. "ВКП(б)-лэн членэз ке луи, монэн мукет сямен вераськозы, 
котькуд верам кылы азвесь дунын кошкоз, - уйлы быдэ таӵе кылъёсын 
валесаз погылляське со. - Маин пӧртэм мон Луппы Варок кадь мӧйыослэсь, 
кинъёсыз ӟыгыръяса-вешаса выллем партие кыскизы! Кин тодэ, оло, 
Митрошинлэн интыяз но вуо: дуннеез колёса кадь берга, шуо ук. Берга, 
берга но улонэз пӧртэм тусо карыса вошъя... Со бергась колёсае адями 
но, пе, сюре.. Огез отысь выльмыса потэ, мукетыз - сисьмыса..."
Самар Пилька партие пырыны куриськон гожтӥз
- Уж ласянь нокыӵе шектэ ум адӟиське, - шуизы солы. - Лек 
сямдэ ӧжытак зӥбломытоно луод.
Самар Пилькаез партие кутӥзы.
Тае кылыса, Максим Семеновлэн син азьыз пеймыт луиз. "Иван, 
Санька, кинэ вӧзады кариды?!.. - куараен кесяськыны дась со. - Око-ко, 
Митрошин, Митрошин!..Кызьы бен синдэ усьтом мон тынэсьтыд? Кызьы?!.. 
Кыӵе дышмон люкиз асьмемыз?! Кин пыриз куспамы?!.. Ачим лыктӥ ке 
дорад, вераськод-а монэн? Одӥг гинэ кыл вера, Иван: маин мон янгыш?! 
Валай ке, соку ик вӧзад карисько, утьыны тыршо котькыӵе шуг-
секытлэсь... Тодэмед уг поты шат, кызьы но малы мон ас анаме арасько? 
Юри арасько, тыныд ӧч карыса! Малпасько, оло, дорам лыктод но 
тышкаськод, соку, оло, ог-огмес валан кылмы но ӧръяськоз.. Азьвыл 
ветлыкуд, монэ юри исам карыса вераськид ук, ӧй вала кожад-а, мар муген 
кенешемъяськид монэн?!.. Иван, Иванька, али мыным туж секыт, лыкты 
дорам, тышкаськы, жуг монэ, янгыш ке... Нош Самар Пилька дуногес ке 
потэ, уг мыны дорад, уг!.. Уг ултӥя асме, уг пыдесъяськы азяд!.."

* * *
Крезьлэн мултэс золтэм сиез чӧльыез йӧттыса но чиге. Син шоры 
йӧтӥсьтэм учыр гинэ кулэ вылэм Максимлы аслэсьтыз улонзэ сураны-
пожаны...

* * *
Колхозникъёслы выль ӟегез авансэн сётыны правлениын ведомость 
лэсьтӥзы. Самар Пилька доры соиз яке таиз колхозник лыктэ но ведомосте 

ас нимтулзэ пуктэ. Собере солы колхоз валэн юзэ ас дораз келяло. 
Максим но складэ лыктӥз. Трудоденезъя тодэ вал, кӧня пуд ӟег вуэ 
солы.
- Кӧня татын? - вераськон муг утчаса гинэ юам кариз но ведомосте 
учкиз.
- Отын гожтэмын, - шуиз Самар Пилька.
- Кык пудэз уг тырмы ук... - паймиз Максим.
- М-ма... - могась луиз кладовщик. - Мон в-ведомость ӧй лэсьты 
ук... Санька сураз ке щат?.. Ветлы правление, тод...
Максим номыр но ӧз куареты, берытскиз но кошкиз. "Юри мыскыллям 
уж ӧвӧл-а та? - шоканэз секыт луиз. - Ваньзы, одӥг кылысь 
кариськыса, бордысьтызы палэнтыны уг выро-а таос?.. Ма, неужто Митрошин 
сыӵе акырӟан сямо? Соин соглаш луымтэеным, син азьзэ соги-а мар-а? Оло, 
мон колхозын но мултэс ни табере?.." - сюлэмыз кужмо но кужмо 
йыгаськыны ӧдъяз, ымнырыз но пельёсыз ӟырдазы. Дор палаз нуись сюрес 
вылысь кожиз но правление мынӥз. Председатель доры пыриз.
- Валамон... - шуиз ӝӧк сьӧрын пукись Митрошинлы, пиньёсыныз 
куажыр! карыса. - Кузяд ветлымтэысьтым но бердэ нюлымтэысьтым пунэмзэ 
берыктӥськод, иське, а?!
- Мар, мар? - паймиз соиз. - Кыӵе пунэме вань мынам тыныд? 
Хм!..
- Ӟичы кадь выриськод, председатель... Шӧдонтэм вылысь 
куртчылӥськод...
- Сыл ай, Максим... Тырмоз! - егит дыръяз Маниен кусыпез пумысен 
пыкылэ кожаса, чурыт вазиз Митрошин. - Ортчемез вунэмын. Ӧвӧл ни 
ортчемез, вал.аськод-а?
- Мон вунэтӥ, нош тон ӧд... Уд но вунэты! Сямыд мукетгес вылэм 
танад.
Со куспын шок-пуль шокаса пыриз Самар Пилька.
- Умойтэм луиз, Иванька! Кык пуд ӟегез ведомосте пырымтэ солэн, 
- Максим шоры возьматӥз. - Тон эн пӧсекъя, Максим, сюроз со, одно 
сюроз. Санька сураськиз, дыр.
- Вот мар, - шуиз председатель. - Али ик складэ мын но кӧня 
гожтэмын ведомосте, сое басьты. Ма, со мында лыдпусъёс пӧлын Санька гинэ 
ӧвӧл, ачид но, оло, йыромысалыд... Ӵуказе ми соин, документъёсыз 
бугыръяса, та ужез пумаз-йылаз вуттомы.
Ӵуказеяз учётчиклэн янгышез шедиз: зэм но кык пудлы сураськем. 
Соку ик колхоз амбарысь юэн уробо Максимлэн капка азяз дугдӥз. Ваиз 
сое Самар Пилька. Лыктӥз учётчик Санька Копаров но. Максимлы со шуиз:
- Вождэ эн вай, сураськиськем, янгышме шедьтӥ.
Максим, огзы шоры но вазьылытэк, юзэ кеносаз ӝоктӥз.
Мани сюлворыса вазиськиз картэзлы:
- Мар дауртӥськод, Максим, малы кык пуд понна семьядэ серем 
кариськод?
- Эн люкеты! Тынад монэ валамед уг поты... Соос мыным пумит 
кужымзэс огазеяло, тонэ но отчы кыско.
- Янгышаськод, Максим... Астэ туж бадӟым но кужмо адями 
кожаськод-а тонэн нюръяськыны?.. Мар вераны паймеменым, суйы-пыды 
юскиське, бурдтэм тылобурдо кадь луисько...
- Котьку сямен чебер вераськиськод!.. Нош мыным со веран кылыд 
берло дыре малы ке валантэм но валантэм луэ. Таиз сярысь ӧд малпаськылы-
а?
- Максим...
Марьяез кеносэ огназэ кельтыса, Максим бызьыса сямен корка пыриз, 
ӟег ваисьёслы тау но ӧз шуы.
Паймем Санька мар вераны тодытэк ик кошкиз. Ураме потэм беразы, 
Самар Пилька шуиз:
- Огшоры лэсьтэм уж ӧвӧл та, эше... Максимез улаз куажгатон 
вылысь малпам вамыш.. Малы ке мыным озьы потэ.
- Номыре но уг валаськы!
- Уд шӧдӥськы шат: соос кемалась пуныен коӵыш кадь ук ини. Нош 
али огъя кужымен люкам ваньбурмес куспазы люкыны ӧз быгатэ, луоз.
- Эн зуль! Мон ачим янгышаськем!
- Э-э, брат, шалишь!.. Юри тонэ сураса лэсьтэм ведомость со, 
шузи!.. Лыдпусъёс сураса сётэмын бере, кызьы уд янгыша! Вот тон 
янгышад тӥни... Ведомосте гожтӥськыкуз со лыдпус сярысь вунэтӥз-а 
кожаськод? Ӧз!.. Таяз радэ со тон сярысь но малпаз! Бен, бен, туж 
кескич малпаз: ведомостез тон лэсьтӥд бере, ваньмыз пожвуэз тон вылэ 
кисьтӥське, нош со - чылкыт! Во, кызьы ужаны кулэ!.. Нош тон 
шуиськод!..
- Мон уг оскиськы тыныд, Пилька! 
- Максим вылэ суралскем зырезлэн мукет пумыз тонэ шуккиз ке, 
монэ тодад ваёд.
- Туж котыръяса вераськиськод!
- Уг. Туж валамон верасько. Эн вунэты: тон партячейкалэн 
секретарез. Та ужпум кыре потӥз ке, райкомын нырысь ик тон кыл кутоно 
луод. Лушкаськисьёсты ватыса воземед шуозы. Ма, сэре, ведомостез ачим 
лэсьтӥ шуиськод бере, ачид но капыртӥсьёс радэ уд пыриськы-а, эше? 
Малпа ай, кытчы кыске та кык пуд ӟегед?
- Дугды! Верамедлэсь йыры пороме ни!
- Ваньмыз азьпалан на ай... Та уж амалтэк тон вылэ но 
кыстӥське... Табере чылкыт кариськыны вырид ке но, бордад "лушкаськись" 
ним одно ик лякиськоз!
- Мон борды-а?! - пӧсекъяны кутскиз Санька.
- Аслыд, оло, уз но вералэ, нош со кылэз нырысь ик Иванька 
вӧлдоз, адӟод но улод.
- Малы?
- Кырсь ужез ас вылысьтыз погыльтон понна.
Санька уробоысь тэтчыса султӥз:
- Али ик Иванька доры мыно! Ваньмыз та малпаса лэсьтэм уж ке, 
матысь эшъёсы кырсь лаканэ нӧдӥллям ке...
- Мын, мын!.. Асме ачим быдто, ошисько, шу!.. - кышкаса, быдэс 
мугорыз дырекъяны ӧдъяз Самар Пилькалэн. - Уг ни быгатӥськы тӥледын 
артэ улыны, шу! Иванькаед соку ик тонэ жалялоз. Мын, мын!.. 
Председательлэсь пуконзэ, оло, соку ик тыныд сётоз, интыез понна кык 
киыныз ӝабыртӥськыса уз ни пукы. Мын!.. 
- Мар шузи нунал та туннэ?! - йыр бордаз кык киыныз кырмиськиз 
Санька.

* * *
Матэктэ Быдӟым Октябрь праздник. Кайсыос сое котьку шулдыр 
пумитало: клуб тыр калык люкаське, школаысь нылпиос концерт возьмато. 

Азьвыл та кылэз мӧйыос "син пӧртман" шуозы ке вал, табере соос но 
выль сямен вераны дышизы ни, "концерт" гинэ каро.
- Значить, тазьы: туэ мон но кончертын шудо, - оло лӧпшаса, оло 
зэмзэ вераз огпол Коко Васьлей контораын пукисьёслы. Санька Копаров, 
кагазъёсын бугыръяськонъяз, Коколэсь верамзэ кылӥз но, сцена вылэ 
потэмзэ син азяз пуктыса, гор-гор серекъяны ӧдъяз. Дугдэмез уг ни луы. 
Сое адӟыса, мукетъёс но гудыртӥзы.
- Мар серекъяськоды? - борддоръёс кузя лэсьтэм скамьяос вылын 
пукисьёслы вазиз Коко Васьлей.- Уг пӧрмыты, малпады-а? Кырӟаме-вераме, 
эктэме уг луы, кожаськоды-а?
- Синмез мальдытод, эн шузияськы! - серемзэ кутэмез луытэк, 
мырдэм вераз Санька.
- Кытын эктыны дышид? Ноку но адӟеммы ӧй вал ук татчыозь? - 
горо люкаськемъёс.
- Ыж гидын, егит дыръям на ай, - калык серекъямъя, Коко 
Васьлейлэн мылкыдыз котьку сямен ик лопыръяськыны кутске. Сое кылзӥсь 
но серекъясь вань ке, кытын улэмзэ ик вунэтэ. - Огрейлы синмаськон 
арам вал со, эктыны быгатымтэ дыръям на ай. Учкисько, значить, но 
адӟисько: сылэ со огаз шудон пӧлын эшеныз, солэн пельпум вылаз 
зӥбиськыса но, синъёссэ шорам уӵерак-уӵерак золтылэ.
- Осто быри, синъёсыз солэн ошлэн кадесь вал-а, мар-а? - юась 
луиз.
- В строю не разговаривать! Молчать! - кеськиз Коко Васьлей но 
соку ик валэктӥз: - Эксэй армиын командирлы, строй азьын вераськыкуз, 
таӵе шузи юан сёто ке вал, со "Молчать!" шуыса кеськылӥз. Ӝыт шудон 
пӧлы потон азям, значить, кутчасько долк-долк чилясь сурон сапегъёсме 
но нырысь ик ыжгидамы мынӥсько. Эктыку отын пыдъёсыз тыпыр-тапыр карыны 
луэ, скал гидын кадь ӧвӧл. Вот, значить, огшап улыса, ачим шӧдыны 
кутски: эктэме пӧрме! Дыр вуиз Огреелы возьматӥськыны. Шудон пӧлын 
арганчимылы синме кырмыштӥ но - эктыны потӥ. Эк, лопыръяське ук мугоры, 
эк, ӝутъясько ук пыдъёсы. Арган шудэ, ваньзы мыным чабо. Одӥг кылын, 
значить, калык мыным паймемын. Син пумыным Огрее шоры учки: ой, лулы-
сюлмы! Соид, ява, чагаськем синъёсын шорам учке ини, улытозяз мон кадь 
эктӥсез адӟемез вылымтэ, шӧдске.
- Кин со Огрей, гуртамы сыӵе нимын адямиос ик ӧй вал кадь? - 
юась луиз.
- Сьӧд Исьтапанъёслэн пукись нылзы вал со, Карабайысь. Я, эн 
люкетэ ай, веранэлэн пумаз ӧй вуы на. Озьы, значить, чагаськем 
синъёссэ адӟем берам, мылкыды кужмогес бугырскиз вал но, пыды кытчы ке 
ӵемтӥз. Вамыштэме ӧйлась ни, олань-талань сэзъялски но эктон интыям ик 
зоньтӥськи. Кут гозые сэрттӥськем ук, лешак!
- Ма, сыл ай, тон чилясь сурон сапеген вал кадь но? - юаз кин 
ке.
- Молчать! В строю не разговаривать!..
Гурак серектэмлэсь, конторалэн укно пиялаосыз жингыртӥзы.
- Огреед шорад ӧз учкылы ни-а со учыр бере?
- Ӵукнаяз ик Карабаяз лобатэм. Азьло-берло пумиськылыны ӧз ни 
кылды. Озьы ке но, эктыны дышеме монэ чылкак мукет ласянь нимо-дано 
кариз, тодэмды ке потэ! 
- О-о-о! - паймем куараос кылӥськизы. - Давай, давай, кисьматы!
- Герман ожын дыръям, значить, окопын тамак кыскыса пукиськом 
огпол. Ваньмылэн, солдатъёслэн, мылкыдмы секыт, гуртамы бертэммы потэ. 
Витьымтэ шорысь немец солдатъёс ми доры лэзиськизы. Абдрамы, кышкамы, 
конечно. Нош соос пальпото, ӟыгыръяло: "Асьмеос агай-вынъёс ук, малы 
виылӥськомы ог-огмес?", шуо, значить. Ми доры таӵе кылъёсын 
большевикъёслэн агитаторъёссы ӧй вуылысалзы ке, немец солдатъёслэсь 
лӧпшамзэс асьме сямен валасалмы, бер палазы ӵыжаса лэзьысалмы но 
тӥни.
- Сэре? - дыртытӥз кин ке.
- Мар, сэре! Сэре, винтовкаосмес штык палыныз музъеме бышкимы но, 
эктыны-кырӟаны ӧдъямы. Соку тӥни возьматӥ ке возьматӥ удмурт эктонэз! 
Ой, оскоды, оло, уд, - немецъёс монэ ки йылазы нуллыны ӧдъязы. .Озьы, 
значить, ки йылазы нуыкузы, бур палась лӥял вылын сылӥсь воргоронэз 
синйылтӥ. Со но мон шоры паймыса сылэ вылэм. Синме чагасагес учки но 
тодмай - Ленин! Вылтуссэ солэсь, значить, нокинэн уд сура: ӝужыт, юрт 
пуктыны мынӥсь пужым кадь веськыт, пальпотыкуз пиньёсыз, чай юон тӧдьы 
ӵашкаос кадь, чиляло.
- Осто, быри! Ӵашка кадесь пиньёсын адями уйвӧтад уз пуксьы-а?
- Молчать! В строю не разговаривать!.. Котыраз сьӧд пилем мында 
калык люкаськиз. Кызьы адӟиз со монэ, ачим но паймисько: азь 
чиньыеныз купыръя, лык ай, пе, дорам. Кышкаса мынӥ. Ленин ук! Нош со 
киме кутӥз но, небытак пальпотыса, шуэ: эктӥськод, пе, туж чебер, 
паймыса быри. Собере гудыръясь бадӟым куараеныз котыраз сылӥсьёслы немец 
но ӟуч кылъёсын вазиськиз:
- Эшъёс! Огшоры солдатъёс! Тӥледлы, значить, али ик дугдытоно та 
ожмаськонэз! Ог-огдылы тушмонъёс ӧвӧл тӥ, туж кышкыт тушмонды, значить, 
асьтэлэн ик фабрикантъёсты но заводчикъёсты, асьтэ гуртысьтыды сьӧсь 
кулакъёсты. Тӥни кинъёс тӥлесьтыд вирдэс юо. Тӥни кинъёслы пумит, 
значить, ожмаськоно. Та ожмаськонэз пӧрмытоно граждан ожлы. Бертэ гуртады 
но кутске крестьян ужды борды, нош граждан оже кулэ луиды ке, ми 
тӥледлы, значить, вазиськом. 
- Верам кылыз сярысь мар шуыны уг тодӥськы, но тусыз...ӧйтӧд... 
тусыз газетъёсын гожъямъёслы чик уг тупа, - вазиз огез воргорон.
- Молчать! В стро...
- Дугды ми шоры "Молчать!" шуыса кесяськемысь! Ми фронтын ӧвӧл, 
тон командирмы ӧвӧл.
- Озьы, значить?.. Ярам... значить... Валай, зна... зна...чить...
Тазьы шулдыр серекъяса пукыкузы, конторае колхозлэн председателез 
Иван Митрошин пыриз.
- Тӥ мар ӵукна ик таӵе шулдыр? - юаз со.
- Кончерт! - шуиз корка шорын сылӥсь Коко Васьлей. - Мон 
серекъятӥсько. 
- Кыӵе концерт? - ӧз вала Иванька.
- Син пӧртман, иське, - валэктӥз Коко Васьлей.
Иван кутӥськыны ӧз быгаты - пырсйиз, собере контораын нош ик 
гудыртӥз.

* * *

Праздник азьын кынтэм музъем вылэ ӧжытак лымы усиз. Инбам 
сайкиськиз, куазь сэзь-сэзь луиз.
Иван Григорьевич Митрошин уез умой кӧлыны ӧз быгаты. "Кызьы 
ортчоз митинг? Калык люкаськоз, соиз ласянь кышкыт ӧвӧл. Быгато-а мон 
вераськыны шайгу азьын?" - сюлмаське со. Выль дэремзэ но ӟечсэ костюмзэ 
дӥсяз. Шубазэ кутӥз вал но, "вазьгес кадь али" шуыса, берен ӵоге 
ошиз. Вакчи пальтоеныз конторае мынӥз. 
- Праздникен ӟечкыласько! - вазиз Митрошин конторае люкаськемъёслы 
но ваньзылы кизэ сётъяз.
Пальпотӥсь синъёсаз ӵукна шундылэн сиосыз пишто. Чебер чылкыт 
дӥсез туссэ егит каре, ӝужыт мугорыз эшшо но веськрес адӟиське. Сӥзьыл 
куазьлэсь юзмыт нуналзэ, праздниклэсь шулдыр мылкыдзэ ваньзэ ас бордаз 
лякем кадь.
Самар Пилька вожъяськись синъёссэ вошъятэк учкиз Иван шоры.
- Мар ке юанэд вань-а? - шудыса кадь вазиз солы Митрошин. Ас 
ёзъёсыз пӧлын со аслэсьтыз председатель луэмзэ вунэтэ.
- Чебер ик тон, албасты! - шуиз Пилька но мур лулӟиз. - Туннэ 
тон сцена вылэ арганэныд потод, ява. Ачим ик шудо шуыса малпай вал 
но, учкисько: арганчи - тон! Ой, кӧня нылъёс концертын эктыны мылкыд 
каризы - бырод! - йыр бордаз кутӥськиз Пилька. - Тон ке, пе, ӧй 
луысалыд (мон сярысь озьы шуизы соос, - ас гадяз чиньыеныз возьматӥз 
Пилька), концертъёстӥ ветлэм ӧй йӧтысал. "Тон понна сцена вылын эктом 
но, кырӟалом но", шуизы. Нош али шорад учкисько но, тон "син пӧртмась" 
гинэ ӧвӧл, тон - лул басьтӥсь! Вань егит нылъёслэн лулзы тон доры 
кошкоз. Сцена вылын ми сыӵе шудонпӧл ортчытыны малпамы - кулэмъёслэн 
но вирзы улӟоз.
- Кулэмъёс сярысь эн вера.. - витьымтэ шорысь серекъянэз могак 
луиз Митрошинлэн. - Ыбылэм солдатъёслэн но землякмылэн шайгу вылазы 
вераськонэ вуэ. Эн люкеты ай концертэныд, ява? Нош ӝыт киям арган 
одно куто. Кызьы шудыны ик вунэтӥ ни, дыр...
Пионеръёслэн барабан но горн куаразы вань гурт калыкез Азамат 
Лёгорлэн корка вадьсаз люказ. Бадӟым капкаез вӧлак усьтӥзы но 
люкаськемъёс бакча сюресэтӥ нимтэм шурлэн ярдурысьтыз пичи арамае 
гылӟизы.
Лымыен согем ӵошкыт музъем шорын, ньылпу вӧзын - пичигес вырйыл. 
Тодӥсьтэмез сое огшоры муӵ кожасал. Нош со - шайгу. Санька Копаров но 
Самар Пилька вырйыллэсь палэнынгес сылӥсь лулпуос улэ султӥзы. 
- Ваньмыз, кызьы вал, озьы вера, ява, - Самар Пилькалэн пель 
дораз кариськыса, шуиз парторганизацилэн секретарез Санька. - Нылпиослэн 
син азязы но мед пуксёз, йырвизьмазы но мед кылёз. Пыраклы, валад-а?
Собере люкаськемъёслы вазиськиз:
- Асьмеос люкаськимы вирен пылатэм Кайсы муземмылэн одӥгаз 
сэрегаз. Татчы тодмотэм куинь сӧсырмем солдатъёс но асьмелэн гуртомы 
Лёгор агай - Иванов Егор Иванович ватэмын. Огшоры удмурт крестьян 
адями, со, туж кышкыт вакытэ, сӧсырмемъёсты ватыса возиз, утиз, сюдӥз-
вордӥз, быгатэмезъя бурмытыны тыршиз. Солдатъёсын ӵош со но геройлыко 
быриз. Али асьмелы соосты мозмытыны тыршем но соослэсь быремзэс адӟем 
мурт Филипп Самаров ваньзэ вералоз. Солы кыл сётӥсько. 

Самар Пилька котмем синъёссэ ӵушылӥз но йырзэ уллане лэзиз. 
Собере туж ӝожмыт куараен шуиз:
- Урысэн шуккем беразы, монэ тани татчы, али кытын сылӥсько, 
султытӥзы. Соосыз асьсэлэн киынызы гудэм гуазы ыбылӥзы... Татчы 
вайыкузы, мон сьӧразы бызьыса лыктӥ но огзэ сӧсырмем солдатэз кунултыны 
малпай вал, солы мыныны каньылгес мед луоз шуыса. Монэ тӧдьыос 
сэрпалтӥзы, урысэн шуккизы. Кулон азяз огез солдат мыным шуиз: "Эн 
бӧрд, пияш! Тынад улонэд азьпалан. Тон - шудо адями."
Люкаськемъёс пӧлысь кин ке викыштӥз. Самар Пилькалэн но синвуэз 
потӥз. 
- Мон соослы ас поннам кылме сётӥ. "Вань улонме коммунизм 
лэсьтонлы сӥзё" шуи. Со понна ик коммунистъёслэн радазы но пыри. Сётэм 
кылме быдэстыны тыршо.
Самар Пилькалэн кылъёсыз люкаськемъёслэсь мылкыдзэс бугыртӥз. 
Коьтькуд семьяын уго граждан ожен герӟам сюлэмез вӧсь карись пӧськыос 
вань. Викышъясьёс уно но уно луизы.
- Та шайгу вадьсын бӧрдыны возьыт ӧвӧл, - шуиз Митрошин. - 
Быремъёс понна, секыт улонэз адӟеммылэн, туннэ шулдыр нуналмылэн 
вӧсяськон интыез та. Туала сямен вӧсяськон инты!..
Иван Григорьевич ачиз паймиз веран кылъёсызлэн ӧръяськемзылы. Со 
чик ӧз малпа вал тазьы вераськыны. Со дасяз вал мукет кылъёс. Малпан 
кылъёсыз вунӥзы, мукетъёсыз сюлэмез аратӥзы.
Шайгу вылэ горд кизилиен памятник пуктӥзы. Со кизили юг-юг лымы 
шорын гомась тыл кадь пиштыны ӧдъяз.

* * *
Кык пуд ӟег ласянь туж умойтэм вераськонъёс Кайсы черко гуртэз 
кӧткылен висён дыръя кадь жуммытыны ӧдъяз. Калык валамысь дугдӥз, мар 
пумысен керетон мынэ, кин кинэн керетэ, кин пала кариськоно, кинэ 
пыкылоно... Иванька но, Максим но, Санька но, Марья но, Самар Пилька но 
ог-огзэс урод кылъёсын уг ултӥяло, куд-ог дыръя гинэ соизъя яке таизъя 
ужпумъя соглаш луымтэзэс верало ке, мар паймонэз, ужын олокыӵе дыр но 
луыэ ук! Кин бен татчыозь тодӥз, мар со колхоз, кызьы отын ужано но 
улоно? Кин но уз янгыша выль ужын! Куд-огезлы кельше, дыр, мар 
веранэз, ӧтчаме люкаськемъёс азьын Максимлэн Митрошинэз пӧсекъяса тузэмез, 
Марьялэн Максимлы пумит вераькемез. Сюлэмзы лыдсузьыса пуко, дыр, 
люконтэм эшъёслэн кусыпсылэсь сӧриськемзэс адӟыса. Аламаезлы шумпотӥсез 
котькыӵе ёросысь пумиталод: умойтэм учырез мадьыкузы, синъёссы чиляло, 
ымнырзы егитоме. Шонерзэ ке верано, кайсыос пӧлын таӵе кас сюлэмо 
адямилы улыны туж секыт: татын дышемын ӧвӧл лушкем вераськыса ветлыны, 
кызьы капказылэн но ӧсъёссылэн тунгонъёссы ӧвӧл, озьы ик сюлэмзы-
мылкыдзы котькуд пырисьлы вӧлак усьтэмын. Соин но, дыр, тулыс шур 
вылтӥ тыгиськылыса кошкись йӧлэн куашетэмез выллем, кык пуд ӟег сярысь 
лушкем вераськонлэн усыкмытӥсь кужымез усьтэм капкаостӥ но ӧсъёстӥ 
коркась корка пальккиськиз. 
Берло нуналъёсы кайсыос асьсэос паймо: кык пуд ӟеген герӟаськем 
вераськонын кыӵе ке выль нюжыез ӧвӧл ке, та вераськон мӧзмыт потэмен, 
сое уг ни азинто, мукет кылпуме выжо. Тае нырысь ик синйылтӥз Самар 
Пилька. Туж сюлмаськись тусо кариськыса, пыриз огпол правление 
председателен лулысь-сюлмысь вераськыны.
- Максимен кусып ты сярысь гуртын оломар но верасько, Иванька. 
Ачид тодӥськод-а со сярысь?
- Тодӥсько, Пилька. Мон уез изьыны уг ни быгатӥськы, Максимлы 
луыса. Мар аламазэ лэсьтӥмы асьмеос солы, а?! Мар аламазэ!
- Номыр но ӧм, ум но лэсьтэ! - шуиз Пилька.
- Максимен вераськеме ик уг ни луы берло дыре, - йырзэ ошыса, 
туж мӧзмыт вераз Иванька. - Думетысь мозмем лек пуны но тӥни! Алигес 
гинэ вордӥськем колхозэз йырчукин берыктыны выремзэ калык ас азяз ик 
серекъя.
- Сыӵе серем каремез Максим ноку но уз вала! Сямыз сыӵе ӧвӧл...
- Вот уго! Сямыз калык пӧртэм!.. Озьы ке но, мынам соин артэ 
луэме потэ...
- Хи-хи!.. Пуриськыса улыны-а? Тодӥськод-а, кызьы шуиз со огпол 
мыным?
- Мар шуиз?
- "Тӥ гинэ валасьёс, тӥ гинэ котьмае тодӥсьёс!"
- Кинъёс со - "тӥ"?
- "Ваньды, кинэ Митрошин ымаз учкыса улыны дышетӥз", шуиз.
- Шуиз-а, шуоз-а?
- Шуиз но, шуоз но!
- Озьы, иське? Хм... Уг оскиськы та кылыдлы мон, Пилька.
- Ма... эн оскы!.. Мын но, аслэсьтыз юа, та кылъёсыз ик тыныд 
но вералоз!
- Тодӥсько ук, тонэн со ноку но лад-лад ӧз вераськылы.
- О!.. Али со монэн вӧй сием коӵыш кадь! Кусыпты шальтрам уробо 
выллем луэм дырысен, мон борды кыстӥське. Вала, лэся, быдэс гуртысь мон 
кадь оскымон адямиез уд шедьты шуыса.
- Ха-ха-ха!.. Ха-ха-ха! - ӝӧк сьӧраз куасалляськыса серекъяны 
ӧдъяз Иванька.
Председатель шоры учкыса, Самар Пилька долкам кадь луиз. Собере, 
ултӥяса серекъямзэ шӧдӥз но быдэс мугорыз золскиз, синъёсаз лек тылъёс 
ӝуатскизы. Но ассэ кияз кутыны быгатӥз. Номыре валамтэ улсы кариськыса, 
юаз:
- Нош ик маке тумошозэ вераны шедьтӥ-а? Мар таӵе маскарчи адями 
меда мон!
- Ха-ха-ха! - эшшо но кужмо гудыртӥз Иванька - Ой!.. Ой!..
- Тырмоз! - председательлэн ӝӧк вылаз мыжгиз Самар Пилька. - 
Тырмоз монэ серекъяны!
Иванька, куаляк луыса, интыысьтыз тэтчиз.
- Мар дауртӥськод?..
- Тод: :вань керетонъёс тон бордысь пото! Тон бордысь!.. Пичи 
дырысеным тон монэ ултӥяса возид! Тон, тон! Котькуд серем карыса верам 
кылдэ мон кӧш эмъюмез кадь ньылылӥ!
Витьымтэ шорысь Пилькалэн бам вылтӥз жаль-жаль синву кисьтӥськиз, 
нискетӥсь кучапилэн куараеныз бӧрдыны ӧдъяз.

- Сыл ай! .. - абдраз Иванька. - Ма... мар тон?.. Мынам 
тынэсьтыд бӧрдэмдэ ноку но адӟеме ӧй вал...
- Адӟы, адӟы, кызьы мон тынад мыскыллямедлы чидатэк бӧрдӥсько!.. 
Тон монэ котьку пыд улын костаськись арбериез кадь ӵыжаса возид... 
Тынэсьтыд адӟем каро вал Санька но, Маниен Максим но...
- Сыл ай, Пилька...
- Хы!.. Буйгатыны выриськод-а табере?
- Уг.
- Тау шу, пунэмзэ берыктыны йылолы ӧвӧл... Мон интыын кас сямо 
адямиос тонэ кемалась сизьым шур йылэ вуттысалзы ни.
- Ма... нокинлы алама лэсьтэме ӧвӧл кадь но...
- "Кадь" уго, "кадь"! Тодысалыд ке, тыныд луыса, кӧня уйёсыз 
мон синкылиын пыласькыса потылэмын... - нош ик нискетыны ӧдъяз 
Пилька.
Иванька Самар Пилькаен артэ пуксиз. Бордаз ӝиптӥз.
- Тонэ мон ноку но мултэс ӧй карылы, Пилька, эшъёсы пӧлысь ӧй 
люкылы...
- Эн алдаськы!.. Мон уго арганчи но ӧвӧл, эктыны-кырӟаны но уг 
быгатӥськы, кылы но быгыльмемын! Кинлы кулэ таӵе ӧлексы эш!..
- Я, эн ни бӧрд, Пилька... Шорад учкыса, мынам но пушкы тырыны 
кутскиз... Эх!... Тодысалыд ке, макем секыт мыным та дыре!..
Митрошин кышнозэ син азяз пуктӥз. Толон райисполкомысь, 
совещание кема кыстӥськемен, бер бертоно луиз. Мар дауртӥз Люба! 
Ой!.. Иванька уг ни вала, мар кулэ кышноезлы... Калыклэсь возьдаськеменыз, 
тодмоосыз доры но уг ни ветлы, родня-иськавынъёсыныз но кусыпсы 
люкиськиз. Уг но висьы кадь со Люба, нош висемзэ возьматыны кутске 
ке, быдэс корка йырчукин луэ. Иванька алигес врачез ӧтьылӥз но табере 
больница вадескытӥ йырзэ ошыса вамышъя - ӧтьылэм врачез адӟоз кадь 
потэ. Сое уго Люба ӵыжаса улляз.. Пиосмурт ке луысал, судэ сётысал, 
шуиз врач, кышномуртэн, пе, суд пыр саптаськеме уг поты. Тӥни сыӵе 
Иванькалэн семьяяз улон-вылонэз...
- Астэ ӧлексы эн шуы, Пилька. Секыт мылкыдме шӧдыса лыктӥд бере, 
тынад сюлэмыд зарни!.. Озьыен, тон зэмос эш!..
- Ы-ы-ы!.. - оло бӧрдэ, оло викышъям каре Самар Пилька. Митрошин 
сое эшшо но юнгес ӟыгыртӥз, йырзэ маялля.
- Вождэ эн вай, дуно эше... Улонын оломар но луылэ... 
Котькуд вамышез чакласа уд вамышъяськы ук, сюрес вылын адӟиськисьтэм 
ныро-гопо интыос луыло...
- Соин лыктӥ вал уго дорад, маин ке но юрттыны быгато, оло, 
кожаса... - котмем синъёссэ ӵушылэ Пилька. - Быдэс гуртын оломар но 
верасько бере, мар шуыны ик пайми ни...
- Быдэс гурт со - ӧтчам, митинг... яке... Мар со? Кыӵе 
люкаськемын оломар но верасько?
- Котькуд коркан!
- Мар, мар?!.. Котькуд коркаетӥ уд ветлӥськы, дыр, ук зулёнъёс 
бичаса?
- Ветлӥсько!
- Хм!..
- Ветлӥсько!.. Азьланяз но ветло!.. Кельше со уж мыным. Кыл коскы 
луэменым ик партие но ӧд кутэ шат!

- Ой, Пилька!..
- Кылзы, эн люкеты! Калыкен вераськыны быгатэмме нырысь радэ ӧд 
пуктэ шат партие пырыкум?
- Малы кыл коскыез но вераськыны быгатэмез артэ пуктӥськод? 
Ма... мар тон?.. Фу, дырме быдтӥськод мыдланяк вераськонэныд!
- Кылэз тон кадь радъяны уг быгатӥськы уго...
- Вот, вот, тон котьку озьы... Вормытъяськон сямыд кыре потэ.
- Умой адямиос радозь ӝутӥськыны ӧй быгаты бере, мар карод на...
- Я, Пилька, дугды.
- Райкомын, мыным луыса, котькуд вамыштэ тодозы ни, шуэмед потэ-
а?
- Вот тани та вераменыд астэ кыл коскыос радэ пуктӥд. Только 
вот райкомын тонтэк но ваньзэ тодо ни, эн сюлмаськы!
- Иське, молодецъёс пуко отын! Монэ азьпалтыса, Кайсыысь асьсэлы 
кулэ эш шедьтӥллям... Адӟид-а, кызьы ужаны кулэ! Во!.. Нош тон... 
Эх!.. Тьфу!..
- Пилька... Кылзы ай... Мынам тонэн лулысь-сюлмысь вераськеме потэ. 
Я, мыдланяк эн даурты.
Пилька мур лулӟз но зӥбломиз. Йырзэ Иванькалэн гадь вылаз лэзиз.
- Мыным но секыт, Иванька... Партие пыри ке, буйгало, кожасько 
вал...
- Партиын уг буйгато, отын уж понна кыл кутыто.
- Вот, вот, мынам но уж понна кыл кутэме потэ, бадӟым уж понна, 
- Пилька зӥрак султӥз но кабинетэтӥ мыдлань-азьлань ветлыны ӧдъяз. - 
Тодӥськод-а, Иванька, мыным бадӟым уж оскысалзы ке, мон дуннеез 
берыктыны быгатысал!
- Кин оскысал ке?
- Тон, кылсярысь.
- Мон тыныд колхозлэсь ваньбурзэ оски, тодэмед ке потэ!
- Хе, уж-а со?!.. Кла-дов-щик!.. Кин монэ кылэ-адӟе отын? 
Комакъёс-а?
- Асьмелэн татын кылымон-адӟымон ужмы ӧвӧл уго.
- Вань!.. Вань сыӵе уж!..
Али гинэ нискетыса бӧрдӥсь Самар Пилькалэн тусыз витьымтэ шорысь 
воштӥськиз, мугорыз золскиз, верано кылъёсыз йыг-йыгесь луизы.
- Вера бен, иське, кыӵе-сыӵе уж со?
- Колхоз председательлэн ужез!
- Зэм-а? Давай, мон шумпотыса воштӥсько тонэн... Но...
- Мар "но"?
- Та уже райкомлэн бюроез юнматэ..
- Ӵекты монэ но ачид райкоме куриськы.
- Хм!.. "Мынам райкомын ужаме потэ" шуом-а? Серем ӧвӧл-а со?
- Ӧвӧл. Давай, иське, ачим райкоме ветло но тонэ отчы ӵекто.
- Ойдо та вераськонмес асьмеос вунэтомы, Пилька. Умойтэм кылпум 
поттӥд, умойтэм... Тон но, мон но туннэ нуналлы туж кулэ интыын 
пукиськомы. Котькудмы оскем удысмес ӟеч быдэсъямы ке, со ик луоз 
колхозмылэн кужымез.
- Вот уго, вот уго, тӥни сое ик вераны пыри дорад. Мар 
верало калыкын, тодӥськод-а?
- Уг.
- Иванька, пе, иншыре кыске, Максим - тыметэ. Аслыд тыныд пырак 
верась ӧвӧл бере, кинэн кызьы вераськыны уд валаськы. Мон номыре уг 
ватӥськы, мынам лул-сюлэмы - кырын. Соин ик, умойтэм вамыш медад лэсьты 
шуыса, тон понна сюлмаськисько. 
Иванька оскытэкгес учкиз Пилька шоры. Со учкемез Пилька валаз но 
туж дыртыса шуиз:
- Шуисько ук, тон ноку ӧд оскылы мыным, мон котьку кыкетӥ радын 
вал.
- Паймымон вераськиськод.
- Ас бордад лякыса кадь возид Максимез но Маниез. Утёд ке, 
соос ик тынэсьтыд нырысь палэнскизы, сереме уськытӥзы, шуыны луоз.
- Янгышаськод. Али но соос мынам матысь эшъёсы.
- Ой, ой!.. Серемез поттӥськод!.. Тодӥськод-а, мар шуо калыкын? 
Верай ке, улӥ аныд ошиськоз!
- Мед ошиськоз, вера! Тон номыре уд ватӥськы ук, лулыд-сюлэмыд - 
кырын...
- Тод, иське: Маниен Максимез серем карыны пӧрам кык пуд ӟегед 
пунэм берыктон понна малпамын ӧй вал, со председательлэсь интызэ Максим 
талалоз шуыса курдаменыд лэсьтэмын!
Тае кылыса, Иванькалэн зэмзэ но ымыз усьтӥськиз. Огшап ма 
вазьыны ӟудыса пукиз.
- Али верамад бадӟым янгышез вань, Пилька. Ачид валаса 
вуымтэед, шӧдске.
- Кыӵе?
- Со акыльтымон кык пуд ӟеген мон асме ачим возьытэ вуттӥ 
ук, лыдъяськыны быгатымтэме возьматӥ. Валаны шуг шат сое? Малы Маниен 
Максимез лякод татчы! Собере: нокуд ласянь но герӟаны уг быгатӥськы 
кык пуд ӟегез но председательлэсь интызэ... Со ӟег понна монэ та 
контораысь улляно но Максимез татчы пуктоно кадь ук? Огезлы паймисько: 
кытысь бичаськод тон та жуг-жагез?
- Калык вера!
- Дугды зулемысь! "Калык вера, калык"... Сюлмыным шӧдӥсько: одӥг 
мурт кылдытэ со вераськонэз! Малызэ уг валаськы...
- Кин со "одӥг мурт"? - туж дыртыса юаз Пилька.
- Кытысь мон тодом! Дыры ӧвӧл сыӵе жуг-жагез бичаны!
- Мон тодӥсько!
- Уд тодӥськы тон но.
- Тодӥсько! Максимлэн ужез со!
- О-о-ох, Пилька!..
- Максимлэн ужез, эшшо огпол верасько!
- Уг оскиськы!
- Дыр вуиз ке, монэ тодад ваёд.
- Соин, иське, Максимез азьпалтыны малпад, монэ райкоме 
куриськыны дэмласа?
- Уд валаськы тон монэ!
- Ма, валалод, пе...
- Иванька, кылзы!

- Сыл! Али тон кылзод монэ. Вай вераськомы тазьы: тон мынод 
Максим доры но...
- Уг, Максим доры мон уг мыны!
- Алигес гинэ шуид ук, бадӟым уж ке оскизы, дуннеез берыктыны 
дась.
- Максим дорын дуннеез уд берыкты!
- Берыктыны уд берыкты, нош умой уж лэсьтод.
- Малы ачид уд мынӥськы?
- Кылзы... Асьмеос солэсь верамъёссэ ум быдэсъяське, соя ум 
кариськиське, соин солэн йырыз кур. Огназ кылиз ук! Ачид но ӧтчамъёсын 
кӧня пол ини солы пумит кыл вералляд, солэсь малпанъёссэ выжыкылэн 
ӵошатылӥд. 
- Ма, выжыкыл ӧвӧл шат, Коко Васьлеен одӥг ту-уж бадӟым коркан 
коммунизм лэсьтыны малпало бере! Со малпанэныз Максим висись кадь 
луэмын ини. Кытысь-марысь сыӵе одӥг шобрет улын кӧланы мылкыдыз 
ӝутскем, паймод но бырод!..
- Санька но та янгышсэ адӟе, мукетъёс но ӟечен гинэ 
валэктыны тыршо солы. Нош Максим, валам гинэ ӧвӧл, йырзэ кур каре! 
Кусыпмылэн сӧриськемез та бордын кадь потэ мыным...
- Шонер малпаськод.
- Малы асьмеос тани ог-огмес валаськомы, нош малы со асьмемыз 
уг вала?
- Валаны ке тыршысал! Улошо така кадь, ваментӥське ук ай со.
- Кылзы, Пилька, оло, тыныд сюлэмзэ усьтоз? Монэ со матаз но 
уг лэзьы...
- Монэ нош ку адями чотэ карылӥз?
- Ветлы дораз, Пилька, тупаты кусыпмес, туж курисько!
- Уг ветлы! Мон сое адӟонтэм карисько!
- Озьыен, монэ но?
- Тон вӧзын гинэ сюлэмы буйга... Нош... нош... ачим ласянь 
верам кылы?.. Ма, марым... Вунэтӥд-а?
- Тон уно мар но со верад. Йыры али одӥг малпан котырын 
берга бере, куд-огзэ вунэтӥсько но, дыр... Тодам вайыты...
- Ма... ас кужымея, ас быгатонлыкея уж сярысь поттылӥ вал... 
Кладовщик со - шыръёсын но комакъёсын кенешыса пукон выллем гинэ 
ук...
- Ой, Пилька!.. Амалтэк серемез поттӥськод!..
- Мыным чик серем ӧвӧл... Мон аслэсьтым кужымме шӧдӥсько. 
Мыным бадӟым уж кулэ! Максимен кусыпты ӧвӧл ни бере, солэсь 
бригадазэ мон басьто, иське, бригадир луыса коть ужало...
- Валамон, Пилька, туж валамон... Вераськонмес туннэ ойдо таин 
йылпумъялом. Ӟеч лу! Мон ӧжытак пуко на ай, мар но со уже 
лэсьтымтэ...
* 
* *
Председатель но, правленилэн членъёсыз но Максим доры сюлворыны ӧз 
ни ветлэ: ма бен, пичи нуны ӧвӧл ук, ымаз ноны уд пон. Али солы 
сюлворыса пайдаез но ӧй луысал. Кык пуд ӟеген луэм учыр солы пӧям 
гинэ ӧвӧл, мыскыллям кадь потӥз. "Бен, бен, председательлэн мыным 
пумит кемалась гыбдась сюлмыз кык пуд ӟег пыр гомась тылӝуэн 
кенжиз, - 

юн-юн малпан кылдӥз Максимлэн йыраз. - Туннэ со пичияк гинэ 
чепыльтӥз, нош ӵуказе?.. Уг, уг, сыӵе мыскыллямез уг чида!.. Нош 
гурт калык кивалтӥсь азьын ыж уллё вал, озьы ик кылёз. Монэ, 
граждан ожын сӧсыр кылем муртэ, монэ, колхозэ нырысь пырем 
адямиез, мыскылляны-а выро?!.. Уз пӧрмы!.. Мед улозы, мед 
ужалозы!.."
Максим колхозысь кошкиз.

* * *
Максим доры Санька лыктӥз. Корка пырыкуз ик шӧдӥз: татын 
умойтэм. Озьы ик вань: кышноез но кык нылъёсыз бӧрдо, анаез 
Максимез тышкаське. Санька пырем бере, бӧрдӥсьёслэн куаразы эшшо но 
кужмояз.
- Шып кариське, тырмоз вузыны! - кеськиз нылпиосыз шоры Максим. 
Соосыз огшаплы гуньдӥзы, кышнопалась возъет сьӧры ватскизы.
- Быдтӥз улонмес та акырӟан ӝуш, пыд йыламы кельтӥз! Ой!.. 
Ой! - Санька доры лыктӥз Мани. - Улонлэн радаз пыриськомы вал кадь 
ини. Ой!..
Буйгатон вылысь, лэся, Максим кышноез доры вамыштӥз вал но, 
соизлэсь вожпотӥсь синъёссэ адӟыса, берлань сётскиз, чутӥсь пыд вылаз 
умойтэм лёгиськеменыз, ӧжыт гинэ ӧз усьы. Бӧрдыса тордылэм синъёссэ 
киыныз ӵушылыса но тугаськем йырсизэ кышет улаз усьтыр-табыр туйылыса, 
Марья чурыт кариськиз:
- Судэ мыно. Уг сёты нылпиосыз но, асме но пыд йылам кельтыны. 
Мын ветлы, кытӥ ветлэмед потэ!
- Кытчы сое улляськод, Мани? - паймиз Санька. - Кӧня ке нунал 
ортчыса, со нош ик колхозэ вуоз.
- Гурт калыклэсь ӟечсэ валасьтэм адями со! Уть, со гинэ 
ожмаськем, со гинэ сӧсырмем, со гинэ колхозэз лэсьтэм! Дуннеез огназ 
кутӥ кожам, лэся! Уг сёт! - картэз борды кырмиськиз.
Нылашъёс нош ик бӧрдыны ӧдъязы. Киоссэ ал вылаз поныса, бадӟым 
ӟус вылын кынмем кадь пуке Максимлэн анаез. Али со вераськонэ но уг 
пыриськы, уг но бӧрды. Марья картсэ кык киыныз огшап сэзъяз но 
витьымтэ шорысь шыпак луиз, мур лулӟиз:
- Санька, та шузиед Сибыре нуыны малпа милемыз. Кылэмед вань-а, 
мар со Сибыр?
- Ма-а-ар?!
- Юртмес, милемын кенешытэк, Усмангуртысь бигерлы лушкем вузам.
- Сибире-е?!
- Отын, пе, чорыгез киын кутыло, нюлэскысь пӧйшуръёс асьсэос .юртэ 
пыро. Оло, усьтэм ымазы шорем нянь но ачиз лобе? - картэз пала 
берытскиз Марья. - Али ик бигеред доры мынод но вузам коньдондэ 
берыктод! Нокыӵе Сибыр кулэ ӧвӧл мыным. Ас гуртэ, ас калыке вань. 
Татын вордски, татын ик мед пересьмом!
Санька, ма вазьыны ӟудыса, ӧс дорысь ӟус вылын пуке.
- Ӧз ке кельшы, бертом. Мар курдад? - Максим Манилы туж лачмыт 
вазиз. - Даур-гумырлы ум кошкиське ук.
- Артысь гуртэ юмшаны дасяськид, оло? - чапкиськиз Мани.
- Атаймы кулэм бере лад-лад воргорон луэмедлы шумпотӥсько ни вал, 
- кынмем ымныр туссэ чик воштытэк, вераз Максимлэн анаез. Кышет 
пумыныз кӧс синъёссэ ӵушылӥз. - Куректонлэсь мозмоно адями ӧвӧл ни, 
дыр, мон. Эзеле но палэнтӥ ветлэ. Кулысал ке, ганяк луысал, эсьма.
Та кылъёс бере, Санькалэн мугораз кезьыт йӧгуысь юзырак омыр 
пыӵаз кадь. Мӧйы кышномурт азьын, викышъясь нылпиос азьын Санькалы 
аслыз но туж умойтэм потӥз. Со номыр но вераны уг вала - оло, 
эшезлэсь семьязэ буйгатоно, оло, Максимез пыкылоно. Султӥз но ӧс пала 
вамыштӥз.
- Сыл ай, - вазиз Максим. - Мар ке веранэд вал-а?
- Вал.
- Вера.
- Тонэн вераськыны йӧныз ӧвӧл ни шуыса валай. Семьяеным кенешо, 
анайдэ, оло, ми доры кельтомы. Бертытозяды улоз.
Витьымтэ шорысь Максимлэн анаез тэтчыса кадь султӥз но, Санькалэсь 
бур кизэ кутыса, сюлэм вылаз понӥз:
- Тау, ӟеч кылыдлы, Санька. Тодӥ, оски: гурт калыке ноку но уз 
кушты. Кинлы бен уродзэ-лексэ лэсьтэм адямиос ми? Ноку но ӧвӧл. Ӟеч 
кылдэ кылэмелы тау, Санька... - лӧбак ӝутскем мылкыдыз шуак лапказ, 
йырзэ ошиз но мугорыз ик пичигес кылиз кадь: - Кыӵе сюлмын татчы 
кылём, Санька, семьяелэсь люкиськыса? Кызьы кыкназы пичи нылашъёсме 
мурт дуннеын утёзы-вордозы? Мар улонэ вуиськиз та, инмаре-кылсинэ?! 
Вераськы Максимен, оло, ваньзэ тае радъяны луоно на? Кытысь-марысь таӵе 
ваментул сямзэ бугыртӥз та, шуккыса куштон! Выжыямы ик таӵеез ӧй вал 
кадь ук. Пыд йылысь пограмон кайгу кузьмаз пересьмон-уймон вакытам...
- Гурт калыкез тон юнме шорысь мыскылэ вуттӥд, Максим, - шуиз 
Санька Копаров. - Уг куареты ни щорад, малпасько вал, но семьяед жаль 
потэ. Малы астэ синазькылькарытӥськод, ӧйтӧд... Кык пуд ӟег понна ке 
куатаськид - со серем ӧвӧл шат? Ойдо берытскы, Максим, тодӥськод-а, 
кӧня уж вите асьмемыз! Колхозамы ӝоген трактор ваёзы...
Максим номыр но ӧз вазьы.

* * *
Самар Пилька Максимлы Сибире кошкем кырсиезлэсь адрессэ сётӥз. Туж 
ӝог вуиз отысь ивор. Кыӵе гинэ чебересь кылъёс ӧй вал со гожтэт 
чуръёсын! Зарни вылтӥ ветло, кожасалыд. Со кылъёс Максимлэсь йырзэ 
поромытӥзы, изён уммезлэсь люкизы. Собере ӧтьыса гожтэт но вуиз: 
лыктэлэ, пе, пумиталом. Соку тӥни Максим юртъерзэ вузаз.

* * *
Кулэм муртэ келяку кадь люкиськиз Кайсы черкогурт Максимлэн 
семьяеныз - шулдыр кырӟанъёстэк, жингрес серектонъёстэк. Кышноос сюрес 
вылэ пыжиськемъёс ваиллям, люкиськон азязы котькудӥзлэн аслэсьтыз 
аракызэ веръятэмез потэ. Пиосъёс, тамак пурыса, куспазы куазь сярысь 
верасько, огез но Максимлы со-та визьнод сётӥсь ӧвӧл. Асьсэос но уг 
тодо уго, кыӵе улон вите та семьяез палэнын.
Ураме потэм беразы, кошкисьёс доры туж дыртыса Иванька вуиз. 
Максимен Иванька огшап ваче учкыса сылӥзы, собере кыӵе ке кужым соосты 
ог-огзы борды кыскиз - ӟыгырскизы! Пал кыл но уг куарето. Кыксылэн но 
бам вылтӥзы синву ваське. Соос борды ӝиптӥськиз Мани.
Митрошин, ӟыгырскыса кӧня ке сылэм бераз, зӥрак палэнскиз но, 
дыртыса, мукет ураме ышиз.
Максимлэсь семьязэ но дӥськутсэ юртъерлэн выль кузёез Сюгинск 
чугун сюрес станциозь кык валэн келяз.

* * *
Котькуд Кайсы семьялэсь ю кизён анаоссэ колхоз бусыослэн туссы 
кӧня ке ар куспын тодмантэм воштӥзы. Ӧвӧл ни межаос, бусы кенеръёс, 
тодметлы возиськись ньылпу яке беризь. Ваньзы соос люкетӥзы бусыосты 
вӧл-вӧл гырыны-кизьыны но араны. Гурт калыклы пумен кельшыны ӧдъяз таӵе 
улон: кӧня сюлмаськытэ но кужымез поръя вал ук ас бусыдэ кыедан, 
кенераса возён, сюрлоен аран но арам юдэ валэн лапас улэ возэн-возэн 
ворттон! Табере уть! - огъя кужымен араськод, кутсаськод, гыриськод-
кизиськод - ваньмыз узырлыкед колхоз амбарын!..
Санька но Отя туннэ Карйыл бусы сьӧрысь Чумой возьёсыз турнаны 
ветлӥзы. Бер ӝытозь ужазы, озьы ке но жадемын ӧвӧл: калыкен ӵош 
дырлэсь ортчемзэ уд шӧдӥськы уго. Колхозникъёс дор палазы Грах сюресэтӥ 
вамыштӥзы, нош Санька Отяез арама кузя бертыны ӧтиз - ю бусыослэсь, 
арамаослэсь, Кайсы шурлэсь сюлэм, пе, уг ӵыды. 
- Мыным скалъёсме кыскыны дыртоно, - шуиз Отя.
- Ӵошен мыном фермае, мон тыныд тыро ведраостэ нуллыны юртто.
- Ярам, иське.
Пичигес арамаез потэмзы бере, соос азе кикур вылын кадь Кайсы 
черкогурт усьтӥськиз: нялмыт вырйыл кузя кыстӥськись урамъёс сад пӧлы 
ышемын, одӥг ӝуждаесь пу коркаос пӧлын выль кен кадь кильтро сыло 
исполкомлэн, средней школалэн но клублэн кык этажъем юртъёссы. Нош Кайсы 
сьӧрысь Сизьгурт бамал нюлэсэн шобыртэмын. Али та нюлэс сьӧры шунды 
лэзиське, нунал ӵоже тыршыса, со ӧжытак катьтэммем, лэся: тусыз дарали 
кадь гордэктэмын, озьы ке но берпум тылсиосыныз Кайсы вадьсысь инбамез 
яркыт буёлэн гордманы тырше.
- Отя, учкы ай, учкы со суредэз! - Отялэсь кизэ кутӥз Санька 
но пальпотӥсь тусын инбам шоры возьматӥз. - Кӧня ке улыса, тае ноку-
ноку уд ни адӟы - со интые мукетыз суред кылдоз, собере таизэ суредэз 
нош ик мукетыз воштоз, эшшо но, оло, чеберезгес... Эх!.. - мур 
лулӟиз Санька но огшап яркыт инбам шорысь синъёссэ вошъятэк сылӥз, 
ымнырыз пумен малпаськись тусо луиз. - Тодӥськод-а, гыдыке, мон малпамъя, 
улон но сыӵе ик. Малы ке-а туж дыртыса ортчись нуналъёс но, адямиос 
но ог-огзылы уг кельшо? Я, шедьтод-а ог-огзылы тупась, люкыны луонтэм 
кызэз, пужымез яке нылпиез?
- Осто, ма, кызъёсты но нылпиосты артэ пуктӥд ке, люкыны быгато 
ик, дыр... - серектӥз Отя.
- Ӧд вала, мон мукет ласянь...
- Ма, валалод, пе. Дырын-дырын оломар дуннее лобӟиськод но... Мар 
верамдэ валаны тыршыса, йыр висьыны кутске.
- Улонлэн, тани та инбамлэн сямен ик, син азьын вошъяськемез 
сярысь мон, Отя, солэн туж уно пӧртэмлыкез сярысь. Дунне вылын улонлэсь 
узырез мар ке вань на меда, маин меда луоз сое ӵошатыны?
- Улон одӥг ук, маин сое ӵошатод? Алиеныз мынам улонэным гинэ 
ке шат. Та дыре мон кадь шудоез дунне вылын ӧвӧл.
- Шонер, шонер. Тон вӧзын тани мон но шуд пуйы луи ни. Озьы 
ке но мон мукет сярысь. Сое али валэктыны уггес быгатӥськы, кылъёс уг 
шедьтӥськы. Улон - одӥг, шонер, нош быдэс дуннеез ке басьтоно, со туж 
узыр но вераны луонтэм паськыт,.солэн пумыз но, йылыз но ӧвӧл, дыр. 
Малы ке-а "Дунне - колёса" шуо. Мон сямен, туж валаса верам кыл со: 
колёсалэн пумыз но, йылыз но ӧвӧл ук.
- Ой, Санька, монэ нош ик валантэм дуннеяд вуттыны ӧдъяд.
- Мон ачим но унозэ уг валаськы на... Аслэсьтым валаны тыршемме 
тыныд шара верасько. 
- Санька, Санька, учкы ай, инбам мукет тусын ворекъяны ӧдъяз! Ой 
чебер! Уть, уть, со пилемъёсыд ог-огзы доры матэкто ни.
- Бен, бен! Тани-тани ӟыгырскозы.
Санька Отяез лачмытак ас бордаз кариз. Отя картэзлэн кунулаз 
пыриз но лач-лач ӝиптӥськиз.
- Эх, Санька!.. Тон вӧзын сюлэм шуна.
Санька пальпотӥз но, Отя шоры кескич учкыса, шуиз:
- Ма, ма... зэм-а, даур-а! Инбаме учкы ай: пичиез пилем тыныд 
кельше ук!
- Ой, ой! - серектӥз Отя. - Вераны кыл но шедьтоз!
- Тон кадь ик аслаз чебереныз ворекъя, тӥни, тӥни.
- Мон-а чебер?! Ой, Санька... возьытэ вуттӥськод... Мыным та 
кылэз верась ӧй вал на. Эн дырты, калленгес мын, яке ойдо огшап инбам 
шоры учкыса сылом. Солэсь таӵе туссэ ӧй адӟылы на вал.
- Тон сое котьку адӟылӥд, дыдые, дунъет гинэ ӧд сётылы.
- Тодӥськод-а, Санька, али мон асьмелэн черкамы сылӥсько кадь. 
Сюсьтылъёс ворекъямъя, отын но борддоръёс тазьы ик зарниен кисьтасько 
вал. Сыл ай, сыл!.. Черкын кырӟасьёслэн куаразы но пель сьӧрам 
кылӥськизы тани!.. Зэм, зэм, Санька, уд оскиськы-а?
- Оскисько.
- Инбам шоры учкыса, али но, черкын сямен ик, мылкыды 
бурдъяськиз. Ой, Санька!.. Кызьы азьвыл ӧй синйылтылы таӵе чеберез! 
Вот, шуккыса куштон!..
- Кин "шуккыса куштон"? Тон-а, инбам-а яке мон-а?
- Хм! Нош ик умойтэм кылы лобӟиз-а, мать твою...! Кыӵе 
чакласькыса вераськыны тыршисько кадь но. Тынэсьтыд возьдаськисько ук...
- Малы? - паймиз Санька.
- Эх, Санька, уд шӧдӥськы шат, тон вӧзын кыӵе мыным умой: 
лачмыт кылъёсын гинэ вераськеме потэ малы ке.
- Я, я, эн лӧпкыты!.. Юри быръем кылъёсыд кулэ ӧвӧл мыным, дыдые.
- Быръем кылъёс ӧвӧл со. М-м... Кызьы шуод ай... Кулэтэмезлэсь, 
кырсезлэсь куштӥськон! Вот!.. Али аслым ачим паймисько: ыме тэронтэм 
кылъёсын вераськисько вылэм ук, шузи!..
- Шузи ӧвӧл тон, Отя, тон туж визьмо но чебер адями! Мон 
понна, конечно.
- Вера, вера эшшо огпол та мусо кылъёстэ, Санька!.. Соос монэ 
сылмыто, соос монэ небӟыто, соос мыным аслым ачим оскыны кужым сёто. 
- Тон тани та инбам кадь сайкыт, ӵук лысву кадь чылкыт, 
жильыртӥсь ошмес кадь - веран кылъёсыд...
- Ой,Санька, зэм ик-а осконо та верамедлы?.. Сыл ай, сыл!.. Асме 
ачим тодӥсько ук мон. Тыныд гинэ сыӵе потӥсько, дыр. Шорам йыркуро 
адямиос 

"калгись" шуыса кесясько, тон сое тодӥськод! Олексейлэн кышноезлэсь 
вожамзэ но тодӥськод... Соин ик со чебер кылъёсыд синмез палёмытӥсь 
вупульы гинэ ӧвӧл-а меда? Ӵош улыны кутскеммы дырысен ас поннам туж 
кышкаса малпасько: уд янгышаськы-а тон егит дырдэ монэн ортчытыса? Туннэ 
нуналлы мон, веранэз ӧвӧл, шудолэсь но шудо адями, тонэ яратонэ муроме 
но муроме, нош ӵуказе сюлэмыдъя тупась егит нылэз пумитад ке? Тани та 
яркыт пилемлэн воштӥськемез кадь уз воштӥськы-а мылкыдыд?
Санька туж сак кылзӥз Отялэсь верам кылъёссэ. Собере, номыр 
куаретытэк, ӝип-ӝип ӟыгыртӥз. Нюлэс сьӧры лэзиськись шунды эшшо но 
чебергес кариз инбамез, ог-огзы сьӧры гылӟись пилемъёс эшшо но яркытгес 
воректӥзы.. 
- Мон шудо! - каллен гинэ вазиз Санька.
- Мон но! - шуиз Отя.

* * *
Максимлэн кошкон тулысаз Кайсы бусые нырысь трактор вуиз. Артысь 
гуртъёсысь пересен-пиналэн "корт валэз" учкыны ветлӥзы - паймемзылэн 
пумыз ӧй вал.
- Уть ай, уть ай, радтӥз кӧня герыен музъемез бугыртэ ук, 
албасты! - ас синъёссылы оскытэк верасько воргоронъёс.
Тракторлэн ужамез Иван Митрошинэз чылкак лӧпкытӥз. Уйзэ кӧламез уг 
ни луы, малпаське, лыдъя: "Нош вить... ӧвӧл...эшшо но уногес - дас 
трактор ке гыриз бусыосмес, кӧня валэз, кӧня адямиез воштозы соос! 
Крестьян калык губырмыса уз ни ветлы геры сьӧрын, уз!.."
Огпол, ас малпанъёсызлэсь радзэс ыштэм бераз, валес вылысьтыз 
чутрак султӥз но уйшор вакыт Санька Копаров доры мынӥз. Соиз уг кӧлы 
на вылэм.
- Санька! - кеськиз со корказь выжыысен ик, эшсэ куалектытыса. - 
Мон лыкто шуыса ӧд вӧта-а? Ха-ха-ха! - бадӟым куараез быдэс ёросэз 
зуркатӥз - отын но татын пуны утэм куараос кылӥськизы. - Чаль, кыре 
пот! Эх, куазед кыӵе!.. Омыр нош, омыр!.. Куртчыса сиымон... Ойдо пот, 
Отялы шутэтскыны эн люкты.
Санькаен Иван, бакчае потыса, льӧмпу улэ пуксизы.
-Йырад нош ик выжыкылысь улон лыктӥз-а? - серектӥз Санька.
- Улонысь выжыкыл - самой умоез! Чебер улонлы оскыса кылдытъям 
маке со. Нош али тани сыӵе выжыкыл асьме доры ачиз вуэ ни! Трактор 
- выжыкыл ӧвӧл шат?..
- Быгатӥськод ик тон, Иванька, мылкыдэз лӧпкытыны!.. Уть, мынам но 
умме тӧлӟиз тани...
Витьымтэ шорысь Иванькалэн куараез воштӥськиз, йырзэ уллане лэзиз:
- Таӵе шумпотон дыръёсам одӥг малпан йыръе монэ, Санька.
- Мынэсьтым но... Малы со али асьмемын артэ ӧвӧл!.. Кыӵе 
шумпотысал, кыӵе лӧптысал!.. Ваньмыз выросъёсыз син азям... Мӧзмисько 
мон солэсь, Иванька...
- Зэмзэ ик мыным луыса кошкиз меда?.. Зэмзэ ик мон люкетӥ-а 
солы татын улыны?.. Кызьы малпаськод, Санька, мон-а?
- Ужпум тон бордын ӧвӧл кадь потэ мыным. Коммунае тэтчыны 
малпанэз сое асьме бордысь палэнтӥз. Собере ини пӧсекъян сямыз вормиз, 
ассэ кутыны ӧз быгаты.
- Мыным Мани жаль потэ. Со янгыш шат озьы костаськыса ветлыны!.. 
- Кыӵе-мар интыяськизы меда? Нокинлы гожтэтсы но ӧвӧл...
- Эх, Мани... - лулӟиз Иван.- Мани... Марья... Максимез ачиз 
бырйиз бере, улонэз пӧрмоз, дыр, кожасько вал... Максим сярысь соин 
вераськыны ноку но ӧй дӥсьты, мыдлань валалоз кожай. Оло, вераськоно 
вылэм. Ваньмыз кызьы ке умойтэм пӧрмиз. Э-эх... Ӧм быгатэ, Санька, 
асьмеос Максимез утьыны!
- Тон сое музъеме эн согы ай, кин тодэ, Сибирь дуннеяз, оло, 
эксэй чотын улэ? - серем пыр вераз Санька. 
- Мон пумит ӧвӧл, мед улоз. Вӧзамы возьыны ӧм быгатэ, шуисько.
- Мон валай...

* * *

Максимлэн семьяезлэн Сибире лыктэм гуртэз Кызошур нимаське. Сое 
кылдытӥллям герман ожлэсь азьло татчы вуэм удмуртъёс. 
Максимъёс Самар Пилькалэн ӵыжы-выжыезлэн кеносаз улыны интыяськизы. 
Нырысь ик паймытӥз соосты ачиз нюлэс: пумыз но, йылыз но уг адӟиськы, 
малпан кылдэ, сое ноку но корась вылымтэ на шуыса - пересьмем батыр 
писпуос куке-соку пограллям но интыязы ик сисьмиллям, ӝуйыен 
нориськиллям, нош вӧзазы чеберъясько сюсьтыл кадь веськрес егит кызъёс, 
пужымъёс. Нуназе вераны луонтэм шулдыр, нош уин - шимес! Тодмотэм 
инты, тодмотэм куараос...Максим но солэн семьяез нюлэс шорын ноку но ӧз 
улэ вал уго, писпуослэсь шаугетэмзэс но нюлэс караез кылозы вал пу 
дасякузы яке губи бичакузы гинэ.
Татын улӥсьёслэн вераськемзы но Максимлэсь семьязэ туж паймытэ: 
Глаз, Дебес, Шаркан, Ципья палась удмуртъёсын пумиськылэмзы ӧй вал на. 
"Зӧкез нылы райцентрысь базаре мынӥз ай туннэ," - Максимлы вера 
Глаз паласез воргорон. Мазэ-созэ валатэк, Максим юмоке усьымон юан 
сётӥз: "Векчиез но нылыд вань-а?" Ципья палась кышномурт йӧл вайыса 
лыктэм: "Дёгуысь дёу ваи, дюэ". Йӧлын лянэссэ ӝӧк вылэ пуктӥз но 
дыртыса кошкиз, нош Марья паймыса сылэ: мар вераз со мыло-кыдо адями, 
мар кароно та йӧлэн?
Вераськон-тодматскон сямен, Максим удмурт Кызошурлэн кылдэмез сярысь 
мар но со тодӥз.. Даурлэн кутсконаз, Столыпинлэн музъемъя реформаез 
улонэ пыӵан вакытэ, туж уноез удмурт крестьян семьяос выль гуртъёс-
починкаос кылдытъяны ӧдъязы. Ӟуч семьяос сьӧры Енисей но Амур шуръёс 
пала мынӥсез но луиз. Нош Крестьян банкысь пунэмен коньдон басьтыны 
лэземзы бере, пичи музъем позёмен улӥсь гурт калык эшшо но улӟиз, 
Сибире мыныны мылкыд карисьёслэн лыдзы шӧдскымон будӥз. Отчы 
ӝутӥськемъёсты нимаз-нимаз "группаосы" огазеяса келяллязы. Кузь сюрес 
вылын ссоос ог-огенызы тодматскылӥзы, эшъяськылӥзы но ог-огзылэсь ӧз ни 
люкиськылэ. Сибире вуэм беразы, соослы лэземын вал тайга шоры асьсэлы 
улон инты бырйыны, мылкыд каремзыя но асьсэ моӵсыя позём басьтыны. 
Банкысь пунэмам коньдонзы валъёслы, мукет пудо-животлы, усы-герылы 
кошкылӥз.
Крестьян калыклы улон ноку но, нокытын но капчиен ӧз 
сётӥськылы. Кызошурын но ваньзэ выльысь кутсконо луиз: огъя кужымен 
нюлэс коразы, вемеен юрт пуктылӥзы, лӥялъёсты порылыса, гыроно-кизёно 
музъемзэс .паськыт карылӥзы. Сопал дуннее кошкылӥзы пересьёс но 
висисьёс, 

вордӥськылӥзы нылпиос. Тыршись удмурт калык Сибирьын но тыршисен ик 
кылиз, востэм, лякыт сямызлэсь но ӧз люкиськы. Нюлэс пыдэсэ улон инты 
быръем кызошуръёс доры палэнысь ветлӥсьёс ӧй вал. Озьы ке но, татысь 
калык ӧз вунэтылы выт но Крестьян банклы пунэм тыронзэ: арлэн пумаз 
гурт кенешсылэсь тӧрозэ ыстылӥзы сю иськемлэсь ятыр кемысь райцентре. 
Сюрес ӧвӧлэн, отчы сюрыны туж шуг вал, соин ик кенешлэн тӧроез 
Кызошуреныз быдэс арнялы люкиськоно луылиз.
Максимлэсь семьязэ быдэс гурт капчи мылкыдын пумитаз. Бадӟым юон 
ортчытӥзы, кӧня ке нунал ӵоже коркась корка арганэн кырӟаса-эктыса 
ветлӥзы. Шулдыръяёськисьёс шоры учке Максим но малпа: Сибире ик лыктӥз-а 
со яке Кайсы вӧзысь гуртэ сюанэ сюриз-а? Котькуд коркан - табань, ӝӧк 
вылын сыӵе ик пыжиськемъёс. Максимлэсь синзэ мальдыто картофкаен 
перепечъёс, бадӟым котырес юача, пыш-пыш ӝужъем мушникъёс, кидыслы 
кельтэм кияр быдӟаесь ӵуж-ӵуж вӧй шуккемъёс. Корка пушъёссы но Кайсыын 
кадь ик: ӧс вадьсын бадӟым сэндра, кышно палан паськыт ӟус, солэн 
сэргаз погыльтэм тушак, со вылэ миндэръёс тыремын но пужыё ыжгон 
шобретэн шобыртэмын.
Ваньмызлэсь капчи, шырыт мылкыдын куноятӥз Демей Христофорович 
Поляков. Максим но, Марья но сое соку ик тодмазы. Со но пальпотыса 
шуиз: "Кытысь ке адӟылэме вань кадь тӥледыз!" Кайсыысь шуыса тодэм 
бераз, туж шумпотӥз, эшшо но шырыт кариськиз. Кайсы черкогуртэ, Левонь 
агай доры ӵем гинэ вуылэ вал уго та адями. Дыр уно ортчемен, со туж 
воштӥськем: ымнырыз паськыт луэм, мугорыз ӝужыт ӧвӧл, тыпы кадь кужмо 
но таза сӥлё-виро. Кышноез но ачизъя ик: наш-наш зӧк мугоро, ошиськем 
гурулыз сыръяса кадь улэ, синъёсыз лэчытэсь, шоре учкыкуз поръяло кадь. 
Куноослы ӟеч мылкыдзэс возьматон понна, Демей Христофорович ӝӧк вылаз 
быдэс черык кабак вина пуктӥз. Мукетъёс сямен зын бургы вуэн уг 
сектаськы, шӧдске.
Берекет! - ог ымысь кадь вазизы ӝӧк сьӧрын пукисьёс, кабак 
винаез адӟыса. Демейлы нянь юдэсъёс сётыло - ноку но медам, пе, буша 
та пияла черыкез. Чылкак кайсыос но кайсыос! Демей, котькудзылэсь нянь 
юдэссэс веръяса, куноос азе пуктылэм чаркаосты тырмытъяны ӧдъяз. Кышноез 
котькудзы азе пичи тэркыен губи, кубиста пуктылӥз: кабакез пинь улэ 
куртчонтэк уд юы ук. Марья паймыса учке: мукет удмуртъёс дорын но, 
Кайсыязы но тазьы ӧй вал. "Демейёсыд мукетгес адямиос, шӧдске! - 
малпа со. - Э-э, ма со егит дырысеныз Ижын улэмын ук, отысь куно 
карон йылолэз татчы ваиз, луоз". Кайсыослэн ведь кызьы: ӝӧк выл сиён-
юонэн сыръя, нош сиыны яра ӝӧклэн тӧр шор пумаз пуктылэмзэ гинэ Кузё 
кышно, черыкен аракызэ кунулаз ӟыгыртоз но чарказэ тырмытэм бераз, 
нырысь ачиз кыл йылаз веръялоз, собере гинэ со чаркаысьтыз кунозэ 
секталоз. Нош Демей дорын чаркаосты шуккыса, ваньзы ӵош, ӟучъёс сямен, 
юо. Паймод но бырод! Демей Христофорович Поляков удмуртъёссэ уг, 
ӟучъёссэ кырӟанъёсты кырӟа.
Ӝӧк сьӧрын Марьяен ӵош пукись Катьырна, Демейёсын артэ улӥсь 
кышномурт, каллен гинэ сипыртӥз:
- Однако-о, кабак виналэсь шӧмзэ ик вунэтӥ вал ини! Пыжиськем-
пӧрамзы но кыӵе удалтэм тани. Уло ке уло ни шол та майбыръёс! Си, 
Марья, си, ми дорысь кӧтыд сюмаса потӥд, дыр.

- Сиисько но, юисько но. Ваньзэ веръясько. Воксё ас гурт калыке 
кадь потӥськоды! Огзэ гинэ валаса ӧй вутты на, Катьырна: чылкак вашкала 
улонэн улӥськоды кадь ук? Вӧсяськон куалады но вань на, оло? - нюлэс 
дурын нимазэ сылӥсь куала шоры возьматӥз. 
- Осто, кызьы уд вӧсяськы! - абдраз Катьырна. - Ю-нянез но, 
пудоез но кызьы уд вӧся, кызьы уд утьы кас синъёслэсь!
- Милям Кайсы черкогуртамы вунэ кадь ини сыӵе йылол. Ма, черкмес 
но кесязы ни но... Попъёсмес кытчы ке тузыса уллязы. Ойдо ӵок, кыӵе 
вӧсяськон луоз на туала дауре! - кит-кит серектӥз Марья.
- Быдэс гуртэныды ведӥнь кылэз тодӥськоды, дыр, - мыдланяк 
вазиз Катьырна но Марьяен вераськемысь дугдӥз, пыжиськемъёс сиыны ӧдъяз.
- Кыӵезэ инмарез тужгес гажаськоды? - ӧжытак капчияменыз-а мар-а, 
мынямзэ ватэмез уг ни луы Марьялэн.
- Ымдэ пытса! - лек сипыртӥз Катьырна. - Таӵе ческыт сиськон 
дыръя берекетэз эн быдты! Тон но, оло, тодӥськод ай ведӥнь кылэз?
- Ма, кызьы уд тоды, - тумошо потӥз Марьялы таӵе вераськон, 
мылкыдыз эшшо но капчи луиз. - Кайсы гуртамы ог-огмес ведӥнь кыллы 
дышетӥськомы. Ведӥньёсты дасясь школа но усьтыны малпало ни кадь.
- Ымнырад ик ведӥньтус пыӵамын шуыса учкисько уго...
- Вождэ эн вай, Катьырна, - кыл кусыпсы умойтэме кожемез валаз 
Марья. - Мон лӧпшаса гинэ ук! Туж маскара потӥз. Ма, вӧсяськон 
милям но чылкак быремын ӧвӧл на. Оскисез мед вӧсяськоз, мар ке шат!
Кудӟемъяз Демей Христофорович ог дас вить аресъём, бадьпу ньӧр 
кадь векчи но ӝужыт Ерофей пиеныз ушъяськыны кутскиз. Пияш одӥг 
нюжаеныз но анаен атаез выжые мынымтэ: сьӧд кысъем кузялэс ымныро, 
сайкыт синъёсыз адями шоры паймыса но оскыса кадь учко. Нош сузэрез, 
Катя, ог дас аресъем нылаш, анаезлэсь туссэ лякем: ныгыль-ныгыль таза, 
соин но, лэся, киосыз но, пыдъёсыз но вакчиесь адӟисько, синъёсыз 
вупульы кадь быльккиськемын. Соку ик валаны луэ: Демей нылзэ уггес 
яраты, соин ик со сярысь пал кыл но ӧз поттылы.
Куноос шулдыръяськыку, Максимлэн бадӟым нылыз Анна (анай-атаез но 
кайсыос сое Аннушка шуо, нимызлэсь пумзэ зӥбысагес вераса) Ерофей доры 
лыктӥз но юаз, дышетске-а со шуыса, вань-а, пе, татын, Кызошурын, 
школа.
- Татын начальной гинэ, - шуиз Ерошка. - Но мон сое йылпумъяй 
ини, - вераны дыртӥз. - Райцентрын дышетскисько. 
- Мыным но, иське, отын ик дышетсконо луоз. Кыдёкын-а?
- Сю но витьтон иськем.
- О- ой!
- Мар "О-ой!" ?
- Кыдёкын.
- Нуналлы быдэ бертано ӧвӧл ук. Мон отын ик улӥсько.
* 
* *
Скалъёссэ кыскем бераз Отя, халатсэ кыльыса, эшъёссэ возьматэк 
ик азбаре потӥз. Туннэ солэн вордӥськем нуналыз. Уже лыктон азяз, 
Санькаен кыкназылы шуыса, табань котыса кельтӥз. Али тани дораз дыртэ. 
Контораысь потӥсь Левонен ураме вамыштыны ӵош тупаз.
- Мар таӵе кильтро дэремен тон туннэ? - паймиз Левонь.
- Кыӵе ке кыд бертэм пересь синйылтоз, оло, шуыса. Кинэ ке но 
гуч-гуч ӟыгыръям потэ ук! Мон огшоры кышномурт ӧвӧл, дыр, воргоронэн 
ӟыгыръяськон сярысь гинэ малпасько бере. Тон кызьы шуысалыд?
- К-х... Х-м-м...Ӧйтӧд... Ӧйтӧд... Санькаед пегӟиз-а мар-а ни?
- Кытчы пегӟоз Санька! Мон дорын солы шуныт.Озьы ке но егит 
муртлы оскон ӧвӧлгес. Зарни адями вылэм уго но, сюлэмы со борды пыдло 
но пыдло лякиське ни ке но, шудэлы уггес оскиськы. Соин ик, Санька 
сяна, лушкем дусым кулэ на ай!
- Ой, Отя, Отя...
- Мар-о? Вераме ӧз кельшы-а? Э-э, кыд бертэмъёсыд пӧлын, 
тодӥськод-а, ваньмыз тон кадь куашкам беро ӧвӧл на ай, кочон кадьёсыз 
но пумиськыло. Тонэ кужмысь таркаменызы дырызлэсь вазь пересьмид уго, 
мискинь, эк шу-у! Талам узырлыкед-байлыкед жаль потэмен, сюлэмыд 
пилиськонозь вуэ, дыр, оведь?
Та кылъёсыз кылыса, Левонь куаляк луиз, шымырскиз, мугорыз эшшо 
но пичи кылиз кадь. Собере золскем синъёсыныз Отя шоры лек учкиз:
- Тон ке но коть эн ӵабъя сюлэмме!
- Око-ко-о, Левонь агай... Чидамедлы паймисько. Тон интыын мон 
нокызьы ӧй чидасал. Юртме таласалзы ке-а?! О-о, таласьёслэсь ымнырзэс 
кесясал! Улӥськод со чик ӧвӧлтэм Коко Васьлей, Самар Пилька кадьёслэн 
сальтыртӥсь ымазы учкыса, яке, эшшо но серемес, со вож кунянлэн - 
Иванькалэн куспаз пыриськыса!.. Кинъёс со, тонэн ӵошатоно ке?! Тьфу!.. 
Соосын артэ чут Максимзы - тӧл вукозы, вал на ай. Кошкиз, ойдо, 
Сибыраз куаныса мед улоз.
- Дугды, Отя! Куараед ураме шуккиське... Калленгес вераськы...
- Уг дугды! Тон понна, семьяед понна сюлэмы пыже!.. Ы-ых! - 
киоссэ кырмыса, омырын сэзъяз Отя. - Шубаед Коко Васьлей вылын уть 
кыӵе чебер адӟиське!... Нош Самар Пилькаед куинь куз гын сапегдэ дораз 
нуэм ук, возьыттэм! Тынэсьтыд куать валдэ, со мында уробо тӥрлыктэ, 
быдэс юрттэ таласа, асьсэос соос мар ке сётӥзы-а колхозлы?! А?..
- Отя...
- Сётӥзы-а, шуисько?.. Вот уго, вераны кыл шедьтымтэеныд, дыжмем 
синъёстэ шорам кырмытъяськод! Мар ватонэз: соослы каньыл, ой кыӵе каньыл, 
муртлэн дасеныз ас семьязэс но дӥсяны-кутчаны, колхозэз но лэсьтыны!
- Тон... тон... дугдод-а, уд-а?.. Вераськемдэ быдэс гурт кылзэ 
ни, дыр...
- Мед! Шорам вазизы ке, кылымтэ кылзэс кылозы, мать твою!..
- Ой, Отя, Отя... Кышномуртлы уг кельшы ӟуч кылын тышкаськыны...
- Олексеедлэсь но Ижысь Серафималэсь кызьы дыши, озьы ик 
вераськисько. Соослэн та кылзы мыным синпель выллем.
- Сыл ай...
- Кылзы! Эн усья ымдэ! Аслад но со кылыд ӵем гинэ потылоз 
вал. Ой кыӵе кильтыръяськись вал тон гурт калык азьын! Котькинлэсь йӧно, 
котькинлэсь уно тодӥсь-валась!.. Али зӥбизы, шымыртӥзы. Сыӵе-сыӵе нимо-
дано воргоронлэн ымнырыз лусъем чача кадь кылемын табере... Вот уго, 
шуисько мон, улон-вылонлэсь азьланяз кызьы бергамзэ тодыны уг луы...Чик 
алдатэк верасько: дырын-дырын туж жаль потӥськод. Малы, шуиськод-а? Ас 

киыныд люкам ваньбурад мукетъёс пыласько, осто Инмаре, кызы уд жаля 
тонэ!
- Отя, дугды шуисько! Котькуд сэргын пельёс вань! Олокытчы вуттод 
монэ та кылъёсыныд!
- Кин йӧтылоз на тонэ, кинлы кулэ на тон! Олексейдэ келязы ни, 
тырмоз. Эк шу, Левонь агай!.. 
- Дугды!!! - бӧрдонлы кельшись векчи куараен кеськиз Левонь но 
сылон интыяз тапыр гинэ тэтчаны ӧдъяз.- Дугды, шуисько, ашкынэм 
кышномурт!
- Ой, Левонь агай... Мон...мон туж кипырмес адями, дыр. Вождэ эн 
вай. Кылылэсь чурытсэ дырын-дырын ачим шӧдӥсько. Кинэ ке нош ик вӧсь 
кари шуыса, верам берам гинэ валасько, - йырзэ ошиз Отя.
Левонь шып кариськиз. Дырекъясь киоссэ кытчы карыны уг тоды: я 
кисыосаз понэ, я посыны ӧдъя. Собере мур лулӟиз но шуиз:
- Вераськонэдлэн мугез мукет, уг валаськы-а мар-а... Эн котыръяськы, 
вера шонерак.
- Олексейлэсь мӧзмисько, Левонь агай... Мӧзмисько мон солэсь!.. 
Нокызьы но сюлмысьтым уг кошкы... - витьымтэ шорысь викыштӥз Отя, бам 
вылтӥз бадӟымесь синкылиос васькизы.
- Озьы ик шу вал! А то... Ишь!.. Бугыръяськод оломае но...
Мылкыдызлы али гинэ адӟемпотостэм адями Левоньлы витьымтэ шорысь 
туж жаль потӥз, тусыныз но со чебергес луиз кадь, чурыт кылъёсыз но 
кытчы 
ке ышизы-быризы. Озьы ке но ассэ кияз кутӥз, Отялэн кыл радаз ӧз 
пыриськы:
- Тон... Олексеез вунэты, кылӥд-а? Солэн аслаз семьяез, нылпиосыз 
вань, эн люкеты соослы, эн костаськы пыд улазы. Тани бертӥз ке, нош 
ик тон доры кожылыны ӧдъяз ке, кенэ укно пиялаостэ эшшо огпол 
чальпара карыса куштоз ведь. Чебер уж-а мар-а со! 
- Мӧзмисько мон Олексейлэсь! Мӧзмисько! Тыныд сяна, кинлы 
ӝожтӥськом! Ы- ых!.. Малы уд валаськы монэ, пересь кочон, мать твою!..
- Я, тӥни, нош ик...
- Иворез ӧвӧл-а?.. Кытчы чиптэм-чаптэм каризы сое? Осто шу, мискинь 
адямиез кытӥ меда коскало...
- Та кылъёс бордысен ик кутскы вал вераськондэ! А то...выриськод 
котыръяса - юртэд, пудоед... Кылпум поттэмедъя ик ӧй вала шат, монэн 
пумиськонэдлэн мугез Олексей шуыса! Хе, мать твою! - кырым пыдэсаз кит-
кит серектӥз Левонь.
- Иворез ӧвӧл-а, шуисько, зын кечтака!
- Мон котырысь кечтакалэн зыныз кемалась кошкиз ини, нуныкае. 
Арлыд ке вуэ, мар но со ыше-быре вылэм.
- Тьфу, домбылё шыр! Мыным кулэ ӧвӧл кечтака зыныд, мынам Олексей 
сярысь тодэме потэ!
- Олексее чиптэм-чаптэм ышиз-быриз. Ачиз но уг берты, иворез но 
ӧвӧл. Кытчы ке ожалтӥзы, луоз. 
- Улэп, пе, со.
- Мар, мар?! - куаляк луиз Левонь.
- Можгалась одӥг воргорон алигес тюрьмась бертэм но ӵош пукимы 
шуыса верам. Туж лушкем ивор та, шуэ, пе, мон вӧлдӥ шуыса тодӥзы ке, 

соку ик берен арестовать карозы, шуэм..Тӥни сыӵе улон-вылон, Левонь 
агай.
- Малы татчыозь ӧд куареты?! - чурыт вазиз пересь. - Вера, кин 
адями со, али ик Можгала кошко.
- Ачим но туннэ гинэ кылӥ... Ой!.. - корка сэргы учкиз Отя но 
ымнырыз пумен кӧсэктыны ӧдъяз. - Самар Пилька лушкем кылзэ асьмемыз!
- Солэсь но нимзэ поттылӥмы кадь ук, оведь? - лушкем юаз 
Левонь. 
- Пилька! Лык ми доры, али гинэ тонэ тодамы ваимы...Лык, 
шуисько, ойдо ӵош лабыртомы, - вераськонзэ серем пыр карыны выре Отя. 
Собере корка сэрег пала вамыштӥз. - Пилька, ма... кытын тон? Осто!.. 
Нуназе куазен ишан адӟисько-а мар-а? Али гинэ татын вал ук тон! 
- Монэ пересь каремъяськиськод, эшшо ке. Ачид нош? - пычкиськыса 
кадь серектӥз Левонь. - Тон кадь егит дыръям мынам йыры туж умой 
ужа на вал. Ишанъёс, пӧртмаськонъёс котыртӥм ӧз бергалэ.
- Вот таиз зол!.. - ас понназ вераськыса, котыр утчаське Отя. - 
Ма... Пилька вал со, Пилька! Мупыр вияз шат?
- Я, мон кошки. Вераськонмы туж удалтӥз, Отя, тау! - киыныз 
шонтӥз Левонь но дор палаз вамыштӥз.
Паймыса огшап сылэм бераз, Отя но ас урамаз дыртӥз.
* 
* *
Тайгаысь Кызошурын улон-вылон ас ӧраз пыриз: тодматсконъёс, 
юмшанъёс ортчизы. Максим Петрович Семенов корка сярысь малпаськыны 
кутскиз - тодмоезлэн кеносаз уд толйы ук. "Мар куректонэз! - уг 
кӧбера со. - Вамышлы быдэ куинь-ньыль адямилы ӟыгыртымон лыстэм пужым 
будэ, кыз, ньылпу. Быдэс тайга! Погыръя, лусйы, ӵуп. Гурт калыкез вемее 
ӧть но арня куспын - юрт дась!"
Кунокуаезлэсь тӥрзэ, бычкызэ куриз. Соиз сётонзэ сётӥз, но юаз:
- Сьӧрад нокыӵе ужан тӥрлык ӧд вайы шат?
- Ӧй, - шуиз Максим.
- Кинлы оскыса та кеме лыктӥд?
- Ма... - паймиз Максим, - татысь басьтыны уг луы шат? Уг 
вузало шат татын?
- Вузало, малы уз вузалэ. Кызошурын уг, конечно, татын лавкамы 
ӧвӧл. Сельсовето гуртэ ветлӥськомы яке черкогуртэ, отын милям 
райцентрмы.
- Кыдёкын-а?
- Матын ӧвӧл. Тыныд сояз но, таяз но ветлоно луоз. Татын улӥсько 
шуыса, кагаз ӧд ке басьты, ыштраф тырытозы яке галак карозы.
Максим эшшо мар ке юаны малпа вал но, иськавынэз шуиз:
- Нокыӵе пайда сётӥсь визьнод ӵектыны уг быгаты мон, Максим. 
Ваньмыз ласянь Демеен кенешы.
- Гурттылэн тӧроез-а со?
- Со выллем луэ кадь. Со ваньзэ вала, тодэ Улон-вылонмы со 
котырынгес берга. Бычкые но, тӥре но ӧвӧл, шу.
Демейлэсь нимзэ поттылэмез бере, Максимлэн кунокуаез ачиз марлэсь 
ке кышказ кадь.
- Малы ваньмызлы веранэз, вань-а, ӧвӧл-а мынам тӥре-пуртэ, сӥньысэ-
вене? - паймемзэ уг ваты Максим.
- Мын, мын. Мон номыре но уг тодӥськы.

* * *

Максим Демей доры мынӥз. Юрт куспаз ужа вал со: бакчаысьтыз 
кырыжам кенерзэ тупатъя.
О-о-о, земляк! Давай, давай, пыр! Тустэ ик вунэтӥ ни вал, кытчы 
ышид-бырид? Айда пуксём. Фу, жади! Ужез син шоры йӧтымон но ӧвӧл, 
кутскиськод ке нош - ой-ой-ой! Ваньмыз куашкамын, ваньмыз сисьмемын. 
Моӵе уг тырмы, Максим, моӵе-е! Нырысь учкыса, ваньмыз ки улын кадь: 
нюлэс - ме, басьты! Музъем - ме! Лӥяллэсь, жуг-жаглэсь гинэ тазаты но 
- ваньмыз аслад! Око-ко-о, озьы гинэ уг луы вылэм, эше... Дуннеенымы 
адӟиськыны потӥд-а?
- Кенешыны лыктӥ.
- Визьмо кыл вераны быгато меда! Я, иське, туж сак кылзӥсько.
- Кенешеммылэсь азьло одӥг юанэ вань.
- Давай, давай!
- Тон тодӥськод-а, мон Кайсы черкогуртысь шуыса?
- Ма, тодматским вал ук ини...
- Тодэмед уг поты шат, кызьы тодмоосыд уло, Митрошинъёс, Левонь 
агайёс, кылсярысь?
- Юало, юало, шуыса улӥсько но, дыр уг тырмы ук, дыр! Левонь 
агай улэп на шат? Туж пересь, дыр, ини со, оведь?
- Сое кулак каризы. Пудозэ но, юртъерзэ но колхозэ кысказы.
- Талазы, шуид ке, шонергес уз луы-а?
- Ма... ӧйтӧд. "Кыскам" но "талам" огвыллемесь кадь.
- Ку посон кеносъёссэ но талазы-а?
- Отын али ку уг ни посо, со кеносъёсын колхозмылэн ю возён 
складъёсыз. Тысь вӧй поттон но ыж гон тугон коркаоссэ озьы ик 
кельтӥзы, отын эмеспиез ужа.
- Ӧз талалэ, оло?
- Ма... Левонь агайлэн ӧвӧл ни соос, колхозлэн.
- А-а...
- Ку посон кеносъёсаз али склад ини, шуи ук, оведь, отын 
кладовщик луыса Самар Пилька ужа. Тодӥськод на-а сое?
- Уг, сое уг ни тодӥськы. Тонэ тани син азям пуктыны ӧдъяй. 
Огпол тынэсьтыд кидэ вӧсь каризы вал кадь?
- О-о, сое но тодӥськод на-а?
- Нёред мугорыд сыӵегес ик кылем. Луло узвесь кадь чупрес вал 
ук тон, оведь? 
- Ма, ӧйтӧд.
- Пыдыд нош мар луиз? Уд чутӥськы вал кадь ук?
- Мадьыны кема.
- Одӥг кылын ке но.
- Одӥг кылын ке, Иж заводын бугыртӥськем тӧдьы солдатъёс 
сӧсыртӥзы
- У-тю-тю-тю! Ма, Ижъёс. Кайсые вуылӥзы шат? Соослэн сюрессы 
мукет вал кадь но...
- Кытысь мон тодӥсько вал ай соку, кытысь кыӵе тӧдьы солдатъёс 
со! Ожлэн огъя бадӟым тулкыменыз гордъёсын ӵош мынӥ. Тӥни отын Иж 

заводысь йырвандӥсьёсын пумиськимы. Монэ сӧсыртӥзы. Со куспын мынэсьтым 
отрядме чигнатӥллям. Тӧдьыос кие сюри. Соос асьсэлэн лазаретазы понӥзы но 
кыдёке, кыдёке, Урал гурезь сьӧрозь вуттӥзы. Ӧжытак бурмем берам, пегӟыны 
быгатӥ
- Кызьы валай, йырвандӥсь тӧдьы солдатъёс тонэ утиллям? Бурмытӥллям! 
Озьы-а?
- Озьы луэ кадь.
- Нош вера ай, Левонтей Макарычлэн Олексей пиез гордъёс палан-а, 
тӧдьыос палан-а ожмаськиз меда? Со но колхозэ пыриз-а?
- Олексей агай тӧдьыос пӧлын вылэм - кулак карон вакыт тодмо 
луиз. Левонь агаез, пересь шуыса, ӧз ни йӧтылэ. Пизэ, ваньбурзэс 
кыскакузы милиционерез тышкамез понна, мукет кулакъёсын ӵош кытчы ке 
келязы но чиптэм-чаптэм ышиз, нокыӵе иворез ӧвӧл.
- Валамон. Иворед шулдыр ӧвӧл, конечно. Мар бен карод, быдэс 
улонмы чукин-бекин луиз бере. Кыӵе муген лыктӥд, вера.
- Юрт лэсьтон борды басьтӥськыны куд ласянь йӧнзэ уг шедьтӥськы.
- Юрт, конечно, шудон уж ӧвӧл. Бадӟым сюлмаськон со.
- Вот уго! Нюлэс ке дасяно, бычкы-тӥре гинэ но ӧвӧл на. Я, шуом, 
погыръяй, бугро ӵупи, нош кызьы кыскытъялод сое валтэк? Сюлмаськон огез 
бордысь мукетыз потэ. Кайсыосмы шуозы вал: "Пызе ке луысал, табань си 
вылэм но, вӧйы ӧвӧл.."
- Ха-ха-ха! Тодмасько Кайсы калыкез! Соос, пе, кулон азязы но 
серекъяло, шуозы вал милямъёс. Ма, тани, Левонь агайлэсь Олексейзэ ик 
басьтом. Со ведь быдэсак ачиз серекъятӥсь пуйы! Левонь агай нош маин 
пӧртэм, со но туж мыло-кыдо адями ведь. Нош ужало соос кыӵе! Ой!.. 
Кыӵе луоз вал соослэн посэм кузы! Кыӵе шубаос пӧрмо вал со куослэсь!
- Со ушъяно адямиостэ сыӵе шымыртӥзы! Писэй кадь небӟизы.
- Тон но сыӵе ужен вырид, иське?
- Мон ваньмызлэсь азьло колхозэ пыри. Иванькаен, Санькаен но 
Пилькаен ӵош кылдытӥмы. Нырысь милям со ТОЗ нимаське вал, сэре ини 
ваньзэ калыкез котырамы бинимы.
- Э-тэ-тэ! Тӥни кызьы вылэм ай со! - шултыса ик лэзиз Демей. 
- Мон соку верамдэ пелям но ӧй поны вал. Мар нош ӧз кельшы колхозады? 
Кыӵе муген милям гуамы усид?
- Татын колхоз кылдытыны, - лӧпшаса кадь вераз Максим.
- Э-э-э... - кужмысь серектыны выронъяз, Демейлэн куараез кечлэн 
бӧксэмезлы кельшыны ӧдъяз. - Колхоз шуонлэн тылсиосыз кема уз вуэ на 
ай милям тайгаямы. Ми татын туж бере кылем калык... Я бен, юрт 
йӧндыронад мар бордысен басьтӥськод ини? - колхоз сярысь вераськон сюлмаз 
ӧз кельшы, шӧдске. - Музъем позём сярысь но малпаськытэк уд луы ведь, 
эше.
- Позёмтэк но уд улы, шонер.
- Позём ласянь тыныд мон кагаз ваё. Ӵуказе районэ ветлыны муге 
вань. Сельсоветэ но пырало. Кыӵе позём луоз со, тодӥськод-а? Азьло ик 
верасько - нюлэс. Сое быдэсак сайконо луод.
- Сайконо? - Максимлэн мылкыдыз куашказ.
- Кин ке сайкем музъем дасяса возиз, кожад-а? - серектӥз Демей. 
- Шорад учкыса ик жаль потӥськод: тол вуоз ведь, дыртоно. Ма, 
куректыны 

чылкак эн сётӥськы ай, мар ке но малпалом. Ӟичылэн быжыз кузь ке 
но, капканэ уг сюры. Куректонэд ӟичылэн быжыз кузьда но ӧвӧл. Гурт 
калыкмы уз кушты. Ачим но мар но со малпало. Тани, со бугрое шоры 
учкыса, йырам таӵе мульы берганы кутскиз, - возьматӥз со бакча бераз 
ӵупем бугроез шоры. - Коркаме выльдыны шуыса дасяй вал но, али моӵе 
ӧвӧлгес. Вузало мон сое тыныд, а? Кык ар сылэ ни, куасьмемын, кӧльы 
кадь юн луиз, калер басьтон! Вемелы уногес аракы дасяд ке, ать! шуыса 
но уд вуы, выль корка пырод.
Максимлы, пилемъёс вискытӥ пиштӥсь шунды сиос выллем, оскон 
кылдӥз.
- Басьто! Кӧняен сётӥськод?
- Э-э, эн дырты! - азь чиньызэ урдӥз Демей. - Вузан-басьтон ныл 
куранлэсь мудронгес. Басьтӥсь дунтэмгес сётэ, вузась дуногес куре. Ог-
огдэ алдаса шудон кадь со. Я,я, оломар сыӵезэ-таӵезэ эн малпа - 
лӧпшаса мон.
- Вузалод-а, уд-а? - Максимлы Демейлэн кузь вераськонэз акыльтыны 
ӧдъяз.
- Дуно дунын! - котыръяськытэк вераз Демей.
- Шуге-леке вуэм муртлэн лулыныз шудӥськод, иське? - ӧз 
котыръяськы Максим но. Демейлэн мынясь тусыз голькыт потыны кутскиз.
- Басьтод ке басьтод, уд ке уд - ачид тодӥсь.
- Вай кидэ. Вераським! - шуиз Максим.
- Вераським, - кизэ сётӥз Демей. - Позём сярысь кызьы?
- Таизэ ум дыртэ ай. Кинэн ке, оло, шори вылэ вераськомы.
- Шори вылэ ке, огзэ бусыме, мултэссэ, мон но сёто.
Максимлэн Кайсыысь юрт вузам коньдонэз ваньмыз сямен корка, 
мунчо, сарай, гид пуктыны кошкиз. Демейлэсь ик валзэ курыса, бусызэ 
гыриз, усыяз, сӥзьыл ӟег кизён вылысь.
Максимлэн улонэз пумен радъяськыны ӧдъяз.

* * *
Максим паймыса учкылӥз выль гуртоосыз шоры: кызьы соос палэнскыны 
быгатӥллям туала улонлэсь? "Кызошуре нокыӵе тӧл но пельтылымтэ-а мар-а? - 
малпалляз со ӵем дыръя. - Котькытын колхозъёс кылдо, нош татын - 
вашкала улон!" Райцентрозь кыдёкын, сельсоветэ но огшоры гинэ уд вуы - 
котыр сьӧд нюлэс, йыромыны но кема ӧвӧл. Кулэ луись вузъёслы быдэс 
гурт Демеез ысъя. Солэн аслаз лавкаез ӧвӧл бере, ваем вузъёссэ коркась 
корка нуллэ но ас дунынызы ик вуза. Ачиз ас дуныныз шуэ - озьы-а, 
ӧвӧл-а, кин тодэм, дыр, выжыятыса кин улоз. Ма, сэре, вузкарись ӧвӧл 
ук со, райцентре яке кытчы ке мукет азе мыныкуд, иськавынэдлэсь 
куронзэ кызьы уд быдэсты! Тыршем понназ пичияк будэто ке, пумит уг 
луы: ужам уж кисыез пась уз кар, коскам пыдэз ӧжытак буйгатоно... 
Ӟырдыт собраниосты, митингъёсты адӟылэм но отын вераськылэм, гуртын 
выль сямъёсты пыӵатонэ пыриськем Максимлы чылкак паймымон потэ: 
Кызошурын калык тём-тём пеймыт, книгаос, газетъёс уг лыдӟо. Кайсы 
черкогуртын тазьы ӧй вал: лыдӟыны быгатӥсьёс люкалозы вал калыкез но 
туала улонэз валэктозы, удмурт газетэз лыдӟозы вал. Кызошурын шып пуко, 
улонзы вукуарен согиськем тыметлы кельше!..

Огпол, сьӧразы ваем арбериосыз пӧлысь Максимлэн кияз "Гудыри" 
газет шедиз. Шумпотэменыз, коркась корка ветлыса возьматъяз. Удмурт кылын 
но гожъяськыны луэ шат, шуыса, паймизы кызошуръёс..
- Гожтэмын бере, луэ, вылды, - лад-лад вераз Демей. - Мынам но 
удмурт книгае вал. Артэ гуртысьтымы поп кузьмаз вал, - ӧжытак 
данъяськысагес вераз но соку ик валатскиз: - Туннэ вакытэ со книгалэн 
кулэлыкез быриз. Нылпиосы сурыкмытӥзы кадь... 
Одӥг ӝытлы "Гудыриез" куриз. Ӵуказеяз Максимлы шуиз:
- Татын зол политика! Ми улонлэсь ой-ой бере кылиськеммы. 
Политикалэн тулкымез ми доры огпол гинэ пальккиськылӥз: Колчаклэн тайгае 
йыромем солдатъёсыз арня ӵоже гуртамы пегаса улӥзы. Ваньзы туж кышкамын 
вал: быриз, пе, улонмы, табере, пе, коммунистъёс сюлмес кыскозы! Собере 
чиптэм-чаптэм ышизы. Тайгаын соос туж уно на, шуо. Активистъёсты но 
вандыло, пе. Тайга со - тайга, солэн аслаз улонэз. Туж шимес интыосыз 
уно на солэн, - берпум кылъёссэ висъясагес вераз Демей Поляков.
Максим нокызьы уг вала, кин Кызошурын кузё - Демей яке Совето 
власть? Выль тодмоосызлы Максим вералляз, кызьы Кайсы черкогуртын колхоз 
кылдытӥзы, кызьы, жуг-жагез сямен, Левонь кулакез зӥбизы. Веракуз, 
Максимез туж сак кылзо кадь, синъёсазы пальпотон пыре, ымныръёссы 
ӵыжекто, нош Демеез адӟо ке, соку ик пазьгисько, Максим огназ кыле. 
Уг, Демей ассэ мукетъёслэсь ноку но уг висъя, ассэ вылӥе уг пукты - 
ӧтчамъёс уг люка, уг кесяськы. Узырез ласянь но кинлэсь бен пӧртэм со? 
Тӥни, кырыжам амбарзэ но тупатыны моӵез ӧвӧл ук... Озьы ке но, Максим 
шӧдӥськыны кутскиз: Демей киын вылласянь адӟиськисьтэм туж бадӟым кужым. 
Ӟазыресгес куараяз но лачмыт вераськоназ - чурыт сям, аслыз ачиз оскон. 
Мултэс кылыз ӧвӧл, нош вераз ке, ӵогем выллем - валэктытэк, кыдёке 
ӧръяськытэк.

* * *
Тӧдьы солдатъёслэн Кызошуре вуылэмзы сярысь Демей Поляков огшоры 
гинэ вераськон ӧз потты, со выль лыктэм адямилэсь мылкыдзэ соку ик 
зӥбыны малпаз тайгалэн кужыменыз. Со валан сётӥз, тайгалэн кужымез 
адямилэн лёгамтэ интыосыз бордын гинэ ӧвӧл, тайга ас пушказ уно 
тодмотэмзэ, кышкытсэ ватыса возе на шуыса. Чиптэм-чаптэм ышо-быро 
адямиос - мын но утча, кыӵе му ньылэ соосты...
Демей Христофорович Поляковез тайга ассэ но ӧжыт гинэ ӧз ньылы 
огпол. Граждан ож йылпумъяськем берегес вал со. Кызошурысь воргоронъёс 
огдышемен, огъя вераськыса, райцентрысь базаре вузкарыны келязы сое. 
Ваньзылы нимаз-нимаз мыноно ке, туж дуно усе. Ма гинэ ӧз тыре 
Демейлэн бурдо дӧдьыяз: выль кутъёс, ӝуткам шобретъёс, куэм алачаос, 
пужыятэм ӵушконъёс, ыжку шубаос, изьыос, пӧзьёс, чечы, кеньыр, ӵыжтэм 
но нӧкы вӧй... Демей ваньзэ сое ынэн шобыртыса керттӥз но, тулуп 
дӥсяса, кузь сюрес вылэ потӥз. Быдэс гурт келяз сое. Ог ӝыны сюресэз 
ортчыса, азьпалаз кык кузя вамышъясь воргоронъёсты адӟиз. Кыксы но туж 
начар дӥсяськемын: кышъям-пуръям шубаен, пыдъёсазы урдэг бинялтонэн 
кутъёс, тыбыразы пичиесьгес котомкаос. Валлы сюрес сётон вылысь, лымые 
гуштыса ик, палэнскизы. "Кураськисьёс, - малпаз Демей. - Бадӟым тайга 
но сюдыны уг ни быгаты, мискиньёсты..."

- Кыдёке-а потӥды, воргоронъёс? - капчи вазиз. 
- Кытчы вуомы, отын кӧломы, - мыняк потӥз огез, - Уж утчаса 
ветлӥсьёс ми: бугро-а ӵупоно, ку-а посоно, гын сапег-а лэсьтоно - 
ваньмызлы кимы мынэ. Матынгес гуртъёс ӧвӧл-а та палан?
- Ойдолэ пуксе! Ог вить иськем мыныса, паллянэ кожись сюрес 
бадӟым гуртэ вуттоз. Отын милям сельсоветмы. Только ӧйтӧд, отысь уж 
шедьтыны быгатоды меда - асьсэос райцентрысь базарез киужъёсынызы 
тырмытыса возё.
Воргоронъёс, тау карыса, Демей вӧзы дӧдьы ныре интыяськизы. Туж 
капчи мылкыдоесь, вераськисесь. Вить иськемез мынэмзэс ик ӧз шӧдэ. 
Сюрес коже вуэм беразы шуизы, та гуртэ кыльыны уд дэмласькы бере, 
мар, пе, ӝеганэз, азьлань вамыштом. Огшап мыныса, одӥгез воргорон, 
вераськем улсын, тэльбугоез шыпак бур пала кыскиз но ас кайтаяз 
гонӟыртӥсь валэз син шоры йӧтӥсьтэм пыдын ветлон сюрес вылэ кожытӥз.
Демей тае нырысь ӧз синйылты. Лабырес ньылпу ултӥ потэм беразы, 
сюрес сюбегомыны но нюлэс пушкыгес вуттыны ӧдъяз. Тӥни соку со куаляк 
луиз.
- Тпру-у, лешой! - валэз шоры кеськиз. - Сюрестэ вунэтӥд-а мар-
а, долкам! Уть, кытчы кожид!..
- Шонер сюрестӥ нуэ со, - небытак вазиз бур паласез воргорон. - 
Сое татчы мон кожытӥ. Но-о, вамышты!. - тэльбугоез кыскиз.
Паймем Демей мар ке вераны малпаса, паллян палаз пукись воргорон 
шоры учкиз но, пель дӥняз урдэм револьвер гумыез адӟыса, кӧтыз ик 
уллане лэзиськиз кадь.
- Мар... малпады тӥ? - ньылоныз золскиз, бамыз уллань-выллань 
кыстаськыны ӧдъяз.
- Табере милям сюрестӥмы мынод! - чурыт вазизы солы. - Кыл-куара 
поттыны ум дэмлаське, озьы умойгес луоз. Вай тэльбугодэ, - Демеез 
палэнтӥз бур паласез воргорон, нош паллян паласез револьверзэ озьы ик 
со шоры мертаса возе.
Демей лапкиз. Пумитъяськыны нокыӵе луонлыкез ӧй ни вал. Нош сюрес 
нюлэскы пыдло но пыдло пыртэ. Сое бен сюрес но ӧй шуысалыд: кызъёс, 
ньылпуос, лыстэм но лысо пужымъёс ултӥ мыныса, пограм писпуосты читыр-
чутыр кожылыса но мур лымыё нюкез мырдэм выжыса, бадӟым кыре потӥзы. 
Гушъяса мынӥсь вал соргетӥз но уродос корка вӧзы дугдӥз.
- Пӧйшурасьёс-а мар-а тӥ? - тайгаысь та выллем коркаосты адӟемез 
ванен, юано кариськиз Демей, - Вералэ вал соку ик, мар пӧртмаськонэз!
- Пӧйшурасьёс, пӧйшурасьёс... - кит-кит серектӥз огез. - Ӝоген 
пӧйшур сӥльын выль шыд сиёд.
Ӧслэн ӟукыртэмез кылӥськиз. Коркась бызьыса сямен вить-куать 
воргоронъёс потӥзы но дӧдьыез котыртӥзы.
- Купецез ваиды, оло?..
- О-о, уть ай, кӧня пыдкук, шобретъёс, дӥсьёс татын! Сиёнэз нош 
ма мында!..
- Узырмим, братва!..
Кызошуръёслэн вузаны люкам ваньбуренызы ынэн шобыртэм бурдо дӧдьы 
син куспын бушаз.

- Пыром шунтӥськыны, - шуизы Демейлы. - Валэд понна эн 
сюлмаськы, солы инты сюроз, сюдэмын-люктамын луоз.
Демей корка пыриз. Соку ик нырзэ чатыртӥз пыкмем, пыд нюлам но 
тамак зын. Корка шорын ик эстӥськись кортгур вылын бадӟым горшокын кыӵе 
ке сиён бульыртэ. Борддор кузя - паськыт ӟусъёс, соос вылын - кыжмем 
дӥськут.
- Абыршак улӥськоды, воргоронъёс! - вазиз Демей но аслыз ачиз 
паймиз: кышканэз олокытчы тӧлӟиз. - Юрӟым улӥськоды, шуисько, пуксьымон 
интыды но ӧвӧл!
- О-о!.. - ӵош вазизы кызошуръёслэн дӥсьёссы пӧлын бугыръяськись 
воргоронъёс. - Милемын тазьы ӧз вераське на вал. - Огез, тугаськем 
йырсиёез но кемалась мычымтэ ымныроез воргорон, ӝӧк вылэз но ӟусэз 
ӵушылӥз: - Пуксьы, куно, вождэ эн вай, нюлэскасьёс дворецын улонэз 
огшаплы вунэтоно луо. Тау дырыз дыръя верам кылыдлы!
Демей ӝӧк сьӧры пуксиз. Котыр утчаське, эскере. "Ӧвӧл, таосыд 
пӧйшурасьёс ӧвӧл. Люкам пӧйшур куоссы синпӧет гинэ. Таосыд - Колчаклэн 
киргаса кылемъёсыз..." - малпаз со но шуиз:
- Умойтэм возиськоды асьтэдыз, нош ик ватытэк верано луисько. Туж 
умойтэм! Совето власть тӥледыз гольык киыныз кутылоз.
Коркан нош ик шып луиз. Инмысь усем кадь узырлыклы шумпотыса 
чилясь синъёс соку ик бездӥзы. Нош Демейлэн йыраз чилекъяса лыктӥсь 
малпанъёс ог-огзы вылэ тыгылӥсько, сюлэмыз четлыке сюрем тылобурдолэн 
кадь лопыръяське. "Али асме лябен но кышкасен ке возьматӥ, монэ 
йыръёзы, кесялозы та кыромем адямиос, соин ик, улэп кылён понна, таосты 
азьпалтоно, Совето властьлэн кужыменыз кышкатоно!.."
Малпаськонзэ уретӥз одӥгез воргорон, тусызъя тужгес но кышкытэз, 
гондыр кадь лопшо мугороез. Демей доры лыктыса, йырси бордаз кырмиськиз 
но йырзэ зӥрак гаӵолтӥз. Мукет киыныз сапег пулсысьтыз пурт поттӥз, ныж 
палыныз Демейлэн чыртыетӥз зырӟиз:
- Озьыен, ми дорын куноын - партийной но советской органъёслэн 
агитаторзы... Улыны дышетэ!.. Хе-хе!.. Нош ми со агитаторъёсын тазьы 
вераськиськом, - Демейлэн син азьтӥз, шудыса кадь, пуртсэ бергатӥз, 
берытскыса кинлы ке вазиз: - Василий, эскеры, куэз зӧк-а?..
Со куспын Демей, зӥрак мыкырскыса, йырзэ мозмытӥз но азяз сылӥсь 
воргоронэз ӵыжиз. Соиз, тыбыр вылаз усёнъяз, кык муртэ погыртӥз. Демей 
тэтчыса кадь ӝӧк сьӧрысь потӥз. Шораз долкам синъёсын учкисьёслы шуш 
куараен кеськиз:
- Совето власть мынэсьтым куме тани ма зӧкта кариз, мелэ, 
учкелэ! - дэремзэ ӝутыса, кӧтаз чабылыны ӧдъяз, собере ӵыжыса погыртэм 
адямиез доры мыкырскиз: - Нокыӵе пуртэд но, пуляед но уз басьты сое, 
ме, кутылы, кырма, зыра! - быдэс мугорыныз куасалляськыса, кӧшкемыт 
серекъяны ӧдъяз. Ымнырыз ӵыжектӥз, синъёсыз золскизы.
Витьымтэ шорысь ваньзэс ыбем куара куалектытӥз. Демей но могак 
луиз, чалмиз. Дӧдьыын соин артэ лыктэмез, пельдораз наган гумы возисез, 
татчыозь ӧс дорын возьмаськись нерге луыса пукись маке, Демейлэсь юри 
кильтыръяськемзэ валаз, шӧдске, вӧлдэтэ ыбиз но, Демей вадьсы султыса, 
серем пыр нёжтӥз:
- Арти- и - ист!.. - Эшъёсыз пала берытскиз, синзэ кырмыштыса, 
валан сётӥз: медам люкетэ! - Я, табере вера, только чик ватытэк: 
кинлэсь улэм-вылэмзэ талад, разбойник?!.. А?!..Тод бен: со узырлыкез ми 
али ик кузёезлы берыктыны, нош тонэ, преступникез, Советъёслэн законзыя 
арестовать карыны кулэ. Валамон-а верай?
- Дугды зулемысь! - кеськиз Демей. - Ишь, Советъёслэн законзы 
сярысь кылпум поттылэ, кыед! Со законэз тон, учкисько ке шорад, м-м-
м!.. чупкарыны дась! - ассэ ачиз ӟыгыртӥз но омырез чупкариз Демей. - 
Кош азьысьтым, беглой!..Кидэ миськы нырысь, собере вераськом! - Демейлэн 
кылыз шур кадь ӧръяськыны ӧдъяз, паймыса долкам воргоронъёслы пал кыл 
но вазьыны уг сёт. Собере скамья вылэ сумбрак лэзиськиз но, пальышак 
потыса, пӧсям кымессэ ӵушылӥз. - Я, тырмоз шудыны, мон мунё ӧвӧл... 
Мын ай, дӧдьы нырысь пичи бекчеме пырты. Гуртын пӧзьтэменыз, нырйылын, 
куно каро, асьтэлэн нодды уг тырмы бере монэ кунояны.
Демей шоры кесяськись воргорон наганзэ кисыяз понӥз но вӧзаз 
сылӥсезлы йырыныз шонтӥз.
- Бекчеез мон пыртӥ ни, - мыняк потӥз соиз. - Ӝӧк вылэ пуктом-а?
- Пукты!
Демей бекчеез усьтӥз. Солы кобы сётӥзы. Тыраз тырмытыса, шуизы:
- Ю! Ачид нырысь быдэсак ю!
Демей дугдылытэк, мур шокаса юиз. Собере кобыез ӝӧк вылэ 
сэрпалтӥз:
- Озьы тӥни... Эн кышкалэ, ӝушъёстэс уз суты, мылкыддэс гинэ 
лӧпкытоз...Куртчонды ӧвӧл-а мар-а?! Вае, иське, мынэсьтымзэ!
Бекче дуре черод люкаськиз. Кобыен, тэркыосын, кружкаосын гульк-
гульк юо, кхе-кхе! куараос кылӥсько.
- Вае табере вераськом, - шуиз Демей. Пуриськыны дась калыкез 
зӥбломытыны быгатӥ, малпаса, капчияк лулӟиз. 
Демейлэн кудӟыны кутскем йырыз пумен сайкиськыны ӧдъяз. "Маин 
йылпумъяськоз та шузи пумиськон? Уть, кыӵе кышкыт соослэн туссы! Уноез монэн 
одӥг ёз, ог ньыльдон арес. Чылкак егитъёсыз но вань...Супыраса изизы ке,оло, 
пегӟыны быгато? Уг, уг быгаты! Тӥни, ӧс дорын кык кузя пукисьёсыз аракыез кыл 
йылазы но ӧз йӧттылэ, шорысьтым синзэс уг вошъяло.Монэ эскерыны пуктэмъёссы 
соос, точно!"
Вӧлдэтэ револьверен ыбисез воргорон Демей вӧзы пуксиз.
- Хе-хе-хе...-витьымтэ шорысь серектӥз но кизэ Демейлэн тыбыраз понӥз.-
Тон монэ пересь кураськись кожаса жаляд, дӧдьыяд ас вӧзад пуктӥд.Ӟеч сюлэмо 
вылэмед.Вераськом,шуиськод,иське? Усто! Кин луиськод бен ай тон? Оло, 
тодматском?
-Ӵошен шуккыса юэммы бере гинэ,-шуиз Демей, посудаосты тырмытыса.- Мон 
огшоры крестьян адями. Базаре вузкарыны мынӥсько вал.Ӧй малпа,таӵе шулдыр 
пумиськон луоз шуыса. 
- Кельше-а ми дорын? 
-У-у-у! Сюлэмы лыдсузе!
- Фу, пӧсь!..- шуиз Демей вӧзы пуксемез. Собере назьыльскем выллем 
кариз но ымнырзэ маялтӥз. Демей, со шоры учкыса,могак луиз: "кураськисьлэн" 
погмаськем тушез но мыйыкез ымнырысьтыз гылӟизы но Демей шоры учкиз... Евгений 
Васильевич Зименков! - Кураськись кожад-а, Демей Христофорович, хе-хе-хе... 
Ӧвӧл эше, ми котомкаен ветлыны дышемын ӧвӧл. Котомка тон кадь узыр вузчиосыз 
гинэ алданы юрттэ. Я бен, юом!
Юизы.
Демей ма вераны ӟудэмын, Зименков шоры дол-дол учкыса пуке. 
Мукетъёсыз асьсэ понна куаш каро,кин мар вера,валаны шуг.
- Эн паймы, Демей Христофорович, мон та, бен, бен, Евгений 
Зименков мон!
- Ӟечбур, господин офицер! - Демей Зименковез ӟыгыртӥз.
Нош Демейлэн бекчеез бекыръяське но бекыръяське,ӝокыт коркалэсь огзэ 
сэрегзэ юр-яр кесяськись,мукетсэ ӟыгыръяськись карыса.Пумен кырӟам,бӧрдэм 
куараос кылӥськизы.
Зименков но Поляков кудӟыны уг сётско, ог-огзэс эскеро ик, шӧдске.
- Тон,Демей Христофорович, бадӟым адями луод,милемын кусып ке 
тупатӥд...Совето власть шуон - со пӧртмаськон,пеймыт калыкез чебер кылъёсын 
пӧян.Кема уз улы та власть, Россия одно ик асьме киын луоз.Али кӧня ке 
дырлы кужыммес тус-тас пазязы ке но,тон кадь адямиосын кусып ке тупатӥмы,ваньмыз 
радъяськоз, Россия нош ик улӟоз.
- Табере мон мукет адями, Евгений Васильевич. Мон табере огшоры 
крестьян адями. Политикае уг сураськиськы, тодӥсько ас юртме но - 
мыным тырме. Асьмелэн сюресмы одӥг ӧвӧл!..- чурыт сямзэ ӧжытак небӟытыны но 
мукет ласяньгес,каньылэнгес сӥсъян-поръяны малпаз Демей вӧзаз пукисьсэ.Со ӧжытак 
валатскиз ини, тайгае кугӟаса кылем та беглойёслэн улон-вылонзы туж ик ческыт 
ӧвӧл шуыса: соослы туала улонысь адямиен кусып тупатыны кулэ,шӧдске.Асьсэос кыре 
возьматӥськыны яке кышкало, яке куд ласянь кутскыны уг тодо.Зэм но,кызьы бен 
соос сельсоветэ,райсоветэ яке райкоме пырозы,кин кариськыса? Уз шуэ ук: "Ми 
Колчаклэн куштэм нылпиосыз".Йырзэ выллане урдыса,кышкасьтэм тусо 
кариськыса,Евгенийлы шуиз:
-Уд,сюрес вылады огшоры гинэ кожытыны уд быгатэ монэ! Тэльбугое сырк ӧвӧл. 
Асме дунтэм дунын уг вузаськы.
-Хе-хе-хе...Тодӥсько, огшоры гинэ уд кожыты тонэ. Озьы ке но,сётӥськид ук 
ини,Демей Христофорович...Сырк тэльбугодэ ӧжытак гинэ кыскимы но, валэд ачиз ми 
доры вуттӥз.Только эн кышка милесьтым - вӧсь ум каре Мар ласянь кельшид 
милемлы,тодӥськод-а? Кескич адями тон. Соин ик тон - милям адямимы!
- Уз пӧрмы!
- Пӧрмо-оз...Я, ӵуказе вераськом. Туннэ шӧмаськем йырын кылмы иназ уз 
мыны. Вай,юом на одӥген, собере шутэтском...
Бекчеысь аракы ваньзэс супырӟытӥз. Кин кытчы кӧлыны выдӥз -
соргето,ӝушто,умйылтӥзы кинэ ке тышкасько.Демей но скамья вылэ выдӥз. Йырыз 
сазь,уг кӧлы. Ӧс дурын пукисьёс,бекчеысь быдэн кобы юыса,тылэз кысӥзы но сэргы 
шымыртӥськизы.Ӝуась кортгурлэн берпум сэрегпумъёсыз гинэ тэляло на.Демейлэн 
йыраз нош ик малпан лыктӥз,шыпак потыса,буш вал вылын пегӟыны, но со куспын ӧс 
доры выдэмъёслэсь шыпыртэмзэс кылӥз - уг кӧло,возьмасько...
Кызьы пумиталоз Демеез ӵуказе нунал,кызьы возёно ассэ азьланяз? Та 
юанъёслы валэктыны быгатымтэеныз, уйбыт погылляськиз гольык скамья вылын, быдэс 
мугорыз висьыны ӧдъяз.

Ӵукна, сайкиськем беразы,толло шулдыръяськисьёс,макмырзэс веськатон 
понна,бекчеез кема бекыръязы на. Евгений мар косэ, ваньзэ соку ик быдэсто:мыно-
ваё,пырто-потто,пӧзьто...Демей туж умой валаз ни, кин татын кузё, кин кивалтэ та 
кышкыт калыкен, соин ик Евгений вӧзыгес кыстӥськыны тыршиз,соингес вераськиз.
Мукетсэ но синйылтӥз Демей: та пегасьёс тайгаын пӧйшурасьёс улэ 
ватӥськемын.Малы ке-а самой адӟиськон интые пӧйшуран пыӵалъёс, пӧйшур куос 
ошылэмын,азбарын - котькытын паськытэсь куасъёс...
Демеен туж шуныт люкиськизы беглойёс, ваньзы келяны потӥзы. 
-Вождэ эн вай, дӧдьыдэ бушатэмысьтымы,-кескич пальпотӥз Евгений.-
Мукетъяд лыктыкуд дӧдьыдэ тыро келяломы. Мон аслэсьтыд но ӟечтэ ӧй 
вунэты на: тон ведь милемлы Кайсы черкогуртэ винтовкаос ваид вал! 
- Азьланез сярысь ум малпаське ай,- шуиз Демей..- Мыным али гурт калыке 
азьын кыл кутоно луоз.Ческыт сюдӥды-вордӥды,тау!Дӥськут но уть! кӧня зориз 
тӥледлы. Кытысь табере со мында коньдон шедьтом дунзэ берыктыны?!
-Кисыдэ ӧжытак бушатод ини,-мынямысь уг дугды Евгений,- Я бен,вераськеммес 
эн вунэты,ява,сюресэд но ми доры,пӧйшурасьёс доры, медам вуны.
- Хе!..Пӧйшурасьёс!..- Демей но мыняк потӥз.- Галакъёс ти! Ӧй вала, кожады 
шат?
- Валад бере,та сюрес тыныд гинэ тодмо луыны кулэ! Сотэк...
- Та сюресэз мон вунэто.Номыр сярысь ӧм вераське асьмеос! Мон номыр но ӧй 
кылы, ӧй адӟы.
- Кызьы ӧм вераське?! - паймиз Евгений.- Юрттӥсьмы луыны кыл сётӥд ук? Тон 
пыр Совето органъёсын кусып возён сярысь вераськимы.Ми но музъем вылын улӥсьёс 
ӧвӧл шат? Туала улон-вылон ужпумъёс - со милям но сюлмаськонмы.
- Я,я,вераським! Ӟеч луэ!-валзэ берыктӥз Демей но вань кужмысьтыз тэльбугоен 
шуккиз.Соиз, шузимыса кадь тэтчыса,мур лымыетӥ ӵошпыд ворттыны ӧдъяз.
Демей кышканы ӧдъяз та шимес адямиослэсь, та кырыжам коркалэсь, Зименков 
тодмо ке но солы. Туж ик тодмо меда? Огпол гинэ пумиськылӥзы ук. Кин 
со табере, кин тодэ? 
Тани кыр интылэсь ӝынызэ ортчиз ни,нюлэс пала но вуэ ни,нош Демей малы 
ке тыбыраз ыбозы шуыса малпа, вите...Берзэ учкиз: воргоронъёс люкрак 
султӥллям но син ултӥзы лек учкыса келяло,улэпкын лэземзылы ӧпкелё,вылды... 
"Ӝоггес,ӝоггес,ньылпу дорозь,нош отӥяз - лабырес пужымъёс,кызъёс утёзы!-валзэ 
улля но улля Демей.-О-ох!..-лулзэ лэзиз со.-Табере уз ни ыбе,уз ни уиське...Мар 
вал та? Улэп-а мон, оло, ваньмыз та - уйвӧт?.."
Бадӟым сюрес вылэ потэм бераз,валзэ ӧз ни улля,уйжомем кадь мынэ,дӧдьы 
ныре мыкырскыса. "Кыӵе ишан,кыӵе кайгу сураны малпаз улон-вылонме?..Пегӟи ни 
кожасько вал сьӧрам уиськись кышкыт вужерлэсь! Неужто ваньмыз кыре 
потоз,неужто?"- туж мур кайгуэ-сюлмаськонэ усеменыз,Демей дырын-дырын йырсазьзэ 
ышытылыны ӧдъяз.Мугез но вань уго: Ижысь тӧдьыослэн дружинаязы ожмаськемез со 
вадьсын кекатӥсь кыӵес кадь улэ.
Нуназе ёросын Демей Кызошуре вуиз: валэз но быдэс,ачиз но быдэс, бурдо 
уробоез гинэ буш."Вот Демей ке Демей! - шумпото гуртоос,базаре келям вузъёссылы 
Демей киысь бусьтыр коньдон басьтыса.-Милемлы кытын вал ай таӵе 
вузаськон,палэнысь калыкен вераськыны но ум пӧрмытӥське бере..."
Демей пальпотыса сётъя коньдонзэ, нош сюлмыз тачыртыса ӝуась кӧс улвай 
кадь гома:уд мадьы ук,сое галакъёс тазатӥзы шуыса.Уз оске.Нош оскемысь ке 
дугдӥзы,Демейлэн кисыяз лушкем коньдон ӧжытэнгес пырыны ӧдъялоз.Со умой тодэ 
ни,маин пӧртэмесь луо "кык но вить" но "кык пол вить". Кык но вить - сизьым 
гинэ, нош кык пол вить - дас.Жиляк чылкыт мултэс куинь коньы ассэ ачиз будэтыны 
уг быгаты шат:куинь но куинь - куать гинэ ке,куинь пол куинь - укмыс! Нош отӥяз 
мултэс коньдон йырез поромытыны ӧдъя: шуом, дас но дас - кызь гинэ ке, дас пол 
дас - сю!..Вот ведь ма со коньдонэз лыдъяны но сое улӟытыны быгатон...Ойдо 
ӵок,таяз радэ гуртоосызлы ас коньдонзэ сётъялоз ини, ма карод, нош мукет радаз 
базаре ке мынӥз,котькуд вуззылэсь дунзэ "дас но дас" интые "дас пол дасозь" 
куасалтыны тыршоз!

* 
* *
Лымы шунамлэсь азьло Кайсыысь колхозлэн правлениез бусые кыед 
поттонъя месячник ялӥз. Фермаосысь но колхозникъёслэн гидъёсысьтызы 
кыедэз поттыны вань калык басьтӥськиз.
Пересь Левонез но Отяез кык валэн скал вордон ферма дорысь люкам 
кыедэз кыдёкысяз бусые - Атабай нёжалэ нуллыны косӥзы. Кӧня ке 
дӧдьызэ ӝоктэмзы бере, Левонь валзэ бадӟым вукырем доры нуиз, котыр 
утчаськиз но Отялы шуиз:
- Тулыс ву туж капчиен гылтоз тае...
Отя ӧз вала, ма сярысь вераське Левонь.
- Кинэ, мае гылтоз?
- Тынэсьтыд но мынэсьтым ужмес. Нокин адӟыса но валаса уз вутты.
- Оломар вераськиськод! - валзэ улляз Отя.
- Тынад йырыд куиньмойлы бере кыльыса ужа уго, - кеськиз Левонь. 
- Мукет возъёстэ бадӟымгес тырыны тыршы. Мед ушъялозы правлениын 
пукисьёс, умой ужаськод шуыса, оло, ударник радэ пыртозы.
Мукет нуналъёсы вань кыедзэс Левонь но Отя вукыреме кисьтазы: 
кинлэн бен тодаз лыктоз бусые мыныса ужзэс эскерыны! 
Одӥгаз нуналэ Отялэн уже потэмез ӧйлась - висьыны усиз. Со интые 
Санька мынӥз.
Левонь, дышемезъя, пал кыл но вератэк, валзэ вукырем доры нуиз 
но кыедэз отчы мекалтӥз.
- Мар дауртӥськод? - абдраз Санька.
- Вукыремез кыедасько, уд адӟиськы шат?
Санька, ма вазьыны ӟудӥз.
- Я, я, эн пӧсекъя... - каньылак вазиз Левонь. - Ачид но 
мынэсьтым адӟем кар ай.
Санька валзэ туж ӝог берыктӥз но, кыедзэ бусы шоры ӝоктыса, 
Левонез возьматэк, правление мынӥз - Митрошинлы вераны. Контора 
юртлэн ӧс кутонэз борды йӧтӥськиз но ӟырдам корт борды сутӥськем кадь 
луиз. Ӧсэз ӧз усьты - берен кошкиз. Кыӵе кужым сое пыкиз - ачиз но 
ӧз вала.
Нош кыедзэ Левонь сьӧры Атабай нёжалэ ӧз ни нуллы, мукет бусые 
куриськиз. Нокинлы ӧз куареты Левоньлэн ужез сярысь. Отялэн гинэ 
синдурыз арня ӵоже лыз ветлӥз.
Иван Митрошин районысь организациосы ивортӥз: месячник ӵоже 
колхозлэн бусыосаз кык сюрс ньыль сю воз кыед поттэмын. 
Левонь ӧз но малпа, солэсь кибервылзэ Самар Пилька, бригадир, соку 
ик синйылтоз шуыса. Ӝыт пал, ужъёс бырем бере, бусыостӥ котырсконо 
кариськиз со. Котькуд колхозниклэсь ужам ужзэ ас синмыныд адӟыса, 
дунъет сётыны каньылгес: дыго-мого вераськисьёс уз луэ. Атабай нёжал 
солы тодмо. Музъемез отын туж ик ушъёмон ӧвӧл: луоез уно, кыр инты, 
мускыт уг возиськы. Ваньзэ тае тодэменыз ик уго Атабай бусыез туэ 
умойгес кыеданы малпаз. Вукыреме кисьтам кыедэз адӟыса, долкам кадь 
луиз: "Мар та?.. Кинлэн ужез та?.. - нюк дурын соргетыса сылӥсь 
валэзлэсь чыртызэ маялтӥз. - Валамон, эше, валамон... Абыршак ужам 
Левонь агаймы, ватӥськытэк... - Бригадирлэсь кылъёссэ валаса кадь, ужпи 
йырзэ сэзъяз, соргетӥз. - Ойдо ай, эскером, эше, мар дауртоз Левонь 
агаймы мукт нуналъёсы?" - валзэ берыктӥз но мукет бусыосыз котыръяз на 
Самар Пилька.
Кыкетӥяз но, куиньметӥ нуналаз но эскериз бригадир Атабай бусыез. 
Отысь вукыреме кыед уногес но уногес люкаськиз. Месячниклэн берпум 
нуналаз бригадир малпаз вал, Митрошинэз вайыса, Левонез татын ик китӥз 
кутыны. Ӵапак со нуналэ сое райкоме ӧтиллям.
Пересь Левонь но Отя берпум воззэс бусые поттыны вырӟемзы бере, 
Пилька соосты азьпалтоно кариськиз: Атабай нёжалэ мукет сюрестӥ мыныса, 
вукырем дорысен кутыны. Малпамъяз ик луиз. Кыедзэс туж сюлмо ӝоктон 
вакытазы, Левонен Отя, вӧзазы лымы ӟукыртэмез кылыса, куаляк луизы.
- Тазьы ужаськоды, иське? - серем пыр вазиз бригадир.
- Кызьы косӥды, озьы ик ужаськом... - куалекъясь киоссэ саник 
ныд бордаз юнгес кырмиз Левонь.
- Кин косӥз? Оло, мон-а? - Пилькалэн куараез чурытгес луиз.
- Тынэсьтыд бадӟымгес кузёос вань на... Отя, мар домбылё кадь 
сылӥськод, вера, кин косӥз! - Отя шоры синъёсыныз мертчиз Левонь.
- Мар чик кулэтэм азе лякиськод монэ, мать твою! Синмы но уг 
адӟы, пельы но уг кылы - киы гинэ, кин мар косэ, лэсьтэ. Табере 
малпаськыны лэземын ӧвӧл, косэмез гинэ быдэсъяно. Выль законъя - ми 
пичи адямиос, кивалтӥсьёс асьсэос ваньзэ тодо-валало.
- Кыкты но али ик мон сьӧры милицие мыноды! - кеськиз 
бригадир. - Отын мукет сямен тяпайтоды!
- Санькалэн ужез та... Председатель косэм... - дыртыса вераськись 
луиз Левонь. - Председатель, пе, татчы кисьтаны косӥз... Ми пичи 
адямиос, нымы-кибыос гинэ ми... Косо бере, озьы кулэ, дыр...
- Санькалэн?! - Левонь шоры кеськиз Отя. - Тон мар чик 
янгыштэм муртэ ас ужад лякиськод! Кош азьысьтым, саникен бышкалто!..
Бригадир таосын ӧз ни вераськы, кошовкаяз пуксиз но кошкиз. 
"Колхозамы берло дыре туж уно валантэм учыръёс луыло, - ас понназ 
вераське со. - Вукоез но кырись вань, Максим но колхозысь малы ке туж 
дыртыса кошкиз. Огез бӧрсьы мукетыз валантэм ужъёс кыре пото... 
Митрошин, конечно, ачиз вукоез уз кыры, кыедэз кулэтэм интые уз кисьта. 
Лушкем юрттӥсьёсыз ӧвӧл-а таос?.. Кӧня адями люкамын на меда со 
котыре? Али, классовой нюръяськон кужмоян вакытэ, - малпанэз ӧръяськиз 
бригадирлэн, - Сталин эш тужгес но сак кариськыны косэ. Тани ук сьӧд 
ужлэн бервылыз син азьын! Сое лэсьтӥсьёс но мон азьын вал. Санькаез, 

пе, косэм... Сыл ай, сыл ай, - тодаз ваиз бригадир. - Бен Санька ик 
ӧз янгыша шат Максимлэн кык пуд ӟегеныз?.. Огшоры гинэ-а Максим вераз 
вал Митрошинлы, пунэмзэ берыктыны кема муг утчад шуыса... Ваньмыз таос 
ог-огзы борды уг герӟасько-а?.. Эскероно, мар дауртозы азьланяз та 
адямиос. Али мон соосыз уг йӧтылы, - малпаз со. - Кызьы таоссэ кырми, 
Митрошинэз но озьы ик уз луы-а кутыны?.."

* * *
Демей Поляковлэн нюлэскысь галакъёсын пумиськемез дырысен ог ӝыны ар 
ортчиз. Демей пумен катьяськыны ӧдъяз: со шимес адямиослэн туссы но бездӥзы 
ни кадь, гуртоосызлы сётъям коньдонэзлэсь дунзэ но кык вылтӥ берыктыны 
быгатӥз.Дырекъясь сюлмыз лапкиз, улон-вылонэз нош ик радъяськиз. Витьымтэ 
шорысь...
Акшан вакыт сиськыса пукыкузы,капкалэн ӟукыртэмез кылӥськиз. Демейлэн 
пиез, Ерошка, укное учкиз:
- Уть ай, кык кураськисьёс пыро!
- Таӵе бер-а? - анаезлэн киысьтыз пуньыез ӧжыт гинэ ӧз усьы.- Кӧлон корка 
утчало,дыр,шакшыос.Мын,Демей,пумитазы потыса, быдэн юдэс нянь сёт но 
келя,капкаез но ӵога одӥгысь. 
Демей но укное учкиз.Кураськисьёсты адӟиз но...йырыз жоломиз: соос доры 
нюлэскысь тодмоосыз пыро!..Самой со галакъёс!.."Ма кароно?!..Потоно-а 
пумитазы,ӧвӧл-а? - ньылоныз кӧсаны ӧдъяз.- Тодыса-а лыкто соос татын улэмме, 
тодытэк-а?.." 
Уно малпаськыны дыр ӧй вал, кураськисьёс корказь ӧсэз усьто ни. Демей 
бызьыса сямен корказе потӥз
- Пумита куноостэ, Демей Христофорович,- небытак вазиз Евгений.- Эн паймы 
пыремысьтымы.Котыр ёросъёстӥ юалляськыса-мараса,гурттэс но шедьтӥмы,коркадэс 
но.Вунэтӥд тон милемыз малы ке,а? Нырйыл винадэ али но тодамы ваиськомы... 
Коркад ӧтёд-а,кыре-а потомы?
- Мар тэбиниды бордам! Кошкелэ али ик!
- Эн пӧсекъя,Демей Христофорович...Мултэс пельёс ӧвӧл ке коркад,оло,пӧсь 
чаен удод? Кузь сюресэз ортчыса, жадимы...Куазед но тани ӝытлань салкымгес 
кариськиз...
Со куспын Демейлэн син азяз сельсоветлэн председателезлэн тусыз 
пуксиз.Верам кылъёсыз но таӵе ик пель сьӧраз кылӥсько:"Кык сюрес вылын уд 
сылы.Кин ке но пала кариськытэк амалыд уз луы..." Демейлэсь ортчем сюрессэ 
тодыса ӧз вераськы со, Сибирьын огъя улон соку сыӵегес вал на: тайга уно
пӧртэм муген пазяськем калыкез ас пушказ ватыса возиз.Тросэз соос пӧлысь 
коммунистъёслэсь Советъёссэс пазьгыны кужым люказы. Сыӵеос пӧлын вал Демей доры 
али пырись "кураськисьёс" но.Сельсовет председательлэн верам кылъёсыз Демейлэн 
пель дӥняз сализы кадь. Али та кураськисъёсын артэ со но ке сылысал,Демейлэсь 
юасалзы ке,кудзы пала кариськод шуыса,Демей одно ик Советъёсын кивалтӥсьёс пала 
кариськысал, малы ке шуоно,туннэ улонын соос кузё ук! Нош таосыз - 
шакшыос,шпанаос,кык сюресъёс вискы киргаса кылемъёс.Та дыре мар пайдазэ басьтод 
таослэсь!..Но Демейлэн али озьы бырйыны луонлыкез ӧвӧл. Со умой тодэ: ӧжытак 
пумитъяськид ке,наганлэн кышкыт гумыез нош ик шораз учкоз.Сётӥськытэк амалыз 
ӧйлась:
- Пырелэ-а мар-а, иське...
Демейлэн кышноез нылпиоссэ ӝӧк сьӧрысь улляз но сиён-юонэз туж ӝог октыны 
кутскиз.Уг яраты со тазьы гыж-кал ветлӥсь калыкез,тужгес но кураськисьёсыз,юрдэ 
соослэсь. Кин тодэ, кыӵе гинэ но висёнзы ӧвӧл,дыр,сютэм костаськисьёслэн.Солэн 
малпамезъя,кураськисьёс - азьтэм но кырсь адямиос,ужаны мылзы потымтэен, 
кусок бичаса ветло.
- Тодмо адямиосы та,Мавра,- шуиз Демей, куноосызлы ӧс дорысь ӟус вылэ 
пуксьыны возьматыса.- Райцентрысь базарын вузкарыны юртто мыным.Чайдэ пӧсяты 
ай,жадимы,пе. Сюрес кузь, ачид валаськод.
Пыремъёслы вузкаронэн герӟаса вераськон туж кельшиз, соослы та кыл али 
ӵапак интыяз луиз: кутскизы ук базар дунъёс,коньдонлэн дунтэмамез,казна 
вузъёслэн кулэсмемзы,нош со дыре ик туала кивалтӥсьёслэн калык понна жадьытэк 
сюлмаськемзы сярысь бӧтьыртыны!
Чай юэмзы бере, пыремъёс шуизы:
- Демей Христофорович, ми туж усто вузчи шедьтӥмы,со доры ветлытэк ум 
луэ,дыр.Мукетъёс азьпалтӥзы ке,бадӟым ыштон луоз.
Демейлэн быдэс мугорыз юзрак луиз.Валаз: таослэсь табере уд мозмы! Юаз:
- Туннэ ум ветлэ ни,дыр,ук? Куазед уй пала учке.
- Бере кыльыны уг яра.Сюресэз ми тодӥськомы,уй уз люкеты.Мын,валдэ кыткы,- 
котькуд кылзэ кортӵогез шуккем выллем вераз Евгений.
Демейлэн кышноез номыр со-та пумит ӧз куареты, тодэ: картэз аслыз 
но,семьяезлы но уродзэ уз лэсьты,шуге-леке уз сюры,сюриз ке но,кӧсын потоз.
* * *
Нюлэскысь корка пырем беразы, Демей думылэм милиционерез адӟиз: ӟус вылын 
секыт шокаса кылле, ымнырыз лыз-вож, тӧрнамын, бур саесыз кесемын.
- Тонэ юрттӥсе ӧтьытэк ӧйлась,Демей Христофорович,- шуиз Евгений.- Оло 
одӥг кыл шедьтод соин: нокызьы но мия уг кариськы.
- Кызьы со татчы сюриз? - паймиз Демей,райцентрысь тодмо милиционер шоры 
учкыса.
- Зынэз умой шӧдэ, вылды. Пытьыез эскерыса лыктэм.Арестовать карыны малпа 
вал но,кӧня ке витьыны косӥм: огназ нуиз ке ваньмес,мултэс данъялозы.Кыкнадылы 
капчигес луоз, оло, милемыз властьёс кие сётыны,а? - мыняк потӥз Евгений.
Эшъёсыз серектӥзы.
- Пертчылэ сое,мар курадӟытӥськоды! - кеськиз Демей.
Евгений эшъёсызлы йырыныз шонтӥз но милиционерез соку ик пертчылӥзы. Соиз 
пуксиз,ву куриз.
- Кызьы огнад ветлыны дӥсьтӥськод кыр нюлэстӥ? - вазиз Демей милиционерлы 
но жаляса учкиз егит тусыз шоры.- Нош кионъёс,гондыръёс яке мукет сьӧсьёс 
кесясалзы ке?
Милиционер номыр ӧз вазьы,вожомем синъёсыныз гинэ Демейлэсь быдэс мугорзэ 
вандыса кадь лэзиз.Солэн учкемысьтыз Демей валаз: та туж чебер, веськыт мугоро 
пияш уг оскы, быдэс кылёз шуыса.Солы со сюлэмыз шымырскымон жаль потӥз.
- Тонэ нуыны мон валэн лыктӥ, ойдо дӥсяськы, - милиционерлы ӵоге ошем 
дӥсьсэ сётӥз.
Коркан огыр-бугыр луиз: Демейлэсь таӵе выроссэ ӧз вите,шӧдске.
- Шыпак! - кеськиз Евгений.- Демей Христофорович усто ӵектон сётӥз. Али 
ваньмы гажано куномес келяломы: уд возьы ук сое татын четлыке пытсам тылобурдоез 
сямен, асьмемын одӥг кыл шедьтыны мылкыдыз ӧвӧл бере.
Милиционер дӥсяськиз Ваньзы кыре потӥзы,Демейлэн бурдо дӧдьыяз 
тыриськизы.Огшап мыныса,нюлэс ӵем но ӵем луыны кутскем бере,Евгений валэз 
дугдытӥз.
- Вуимы,- шуиз со,- Азьпала сюрес ӧвӧл ни.- Милиционерез ӝужыт пужым вӧзы 
султыны косӥз. Демейлэн кияз пистолет сётӥз, нош ачиз Демей шоры мертаськиз.- 
Тыныд бадӟым уж оскиськомы,Демей Христофорович.
Писпуос йылтӥ куашетыса кезьыт тӧл ортчиз, пужым улын сылӥсь милиционер 
вылэ лымы куашказ.Демей куалектӥз,зӥрак берытскиз но палэнэ тэтчиз.
- Уте монэ сьӧлыклэсь!..Мар дауртӥськоды?!..Егит на ук со,мынам пие кадь!
- Сыл!- саестӥз кырмиз Евгений.- Пумитъяськид ке, ачид со сьӧры кошкод! - 
наган гумызэ Демейлэн пель дӥняз урдӥз.
- Уг,уг!..Бадӟым йыруж малпаллямды!..Сьӧлык!
- Ыб,Поляков! Ыб,сволочь! - кеськиз милиционер.- Кӧня дунын вузаськид та 
гыжкалъёслы?!
Ассэ кылэм бераз,Демейлэн йырсазьыз сураськем кадь луиз.-
Тон...тон...тодӥськод шат монэ?..-дыректӥз куараез.
-Выль улон...Школа...Выль сямъёс...Быгатӥсько-од!
-Тырмоз!..Тырмоз!..Тон мар?!..Тон уд тодӥськы монэ,уд!..Ме! Ме!.. - 
витьымтэ шорысь милиционер пала вамыштыса, кык пол ыбиз Демей. 
Милиционер,номыр куаретытэк, каллен гинэ лымы вылэ пограз.
- Ме,ме,ме!..- вожомыны ӧдъяз Демей. Патронъёсыз быризы,нош со кесяське но 
милиционер шоры киыныз сэзъя:- Ме,ме,ме!..- Собере, пистолетсэ палэнэ 
сэрпалтыса,пограм милиционер вылэ пыдыныз лымыез пазяны ӧдъяз.Векчи куараен 
кесяське: оло бӧрдэ,оло шумпотэ - уд вала.Витьымтэ шорысь Евгений вылэ тэтчиз но 
гадяз ӝабырскиз: - Виё!... Виё!.
Демеез кырмизы,дӧдьые зӥбизы но валзэ нюлэскысь корка пала уллязы.Ваньмыз 
та уж туж ӝог ортчемен,Демей мазэ-созэ валаса ик ӧз вуы. Воргоронъёс улын 
мыныса,ӝоканы кутскиз.Йырзэ мырдэм ӝутӥз но лябӟем куараеныз шуиз:
- Ӵуказе ватоды-а со пияшез?.. Кионъёс кесялозы, жаль ук!..
Та нуналысен Демей Поляковез Евгений ас кияз туж юн кырмиз.

* * *
Милиционерез вием бераз, Демей тодмантэм воштӥськиз: та шимес учырысь 
йырзэ мозмытыны луонлыклэсь ӧвӧлзэ валаса,урмем пуны кадь ыргетӥсь луиз,тужгес 
но семья пӧлаз.Паймем кышноез олокӧня пол вераськон мытылӥз, ма луиз,шуыса,нош 
Демей сое кылэм-адӟем уг карылы.Юрт котыраз-а ужа,кӧлыны-а выдэ,син азяз - лымы 
вылэ погрась егит пи. Таӵе ик пеляз шуккиське берпум кылыз. Котькуд шарк! 
вазись куара куалектытэ сое, мугорыз юзыр-кезьыр луэ,арестовать карыны лыкто 
кожаса.
Кема гинэ курадӟиз озьы.Нош огпол соос доры ачиз Евгений Васильевич 
Зименков вуиз.Таяз радэ "кураськись" ӧй вал ни со: ӟеч костюмен но шляпаен,кияз 
портфелен,сюбег сьӧд мыйыкез туссэ эшшо но чебер каре.Демейлэн кышноез,картэзлэн 
таӵе сӥлы-данлы эшез но вань вылэм шуыса,лопырскиз,бызьылыса ӝӧк вылэ 
пуктӥськыны ӧдъяз,нош ачиз пумен 

малпа:"Гуртоос ваньмыз адӟизы меда татчы пыремзэ? Мед адӟозы,лызэктымоназы мед 
вожъяськозы, мед тодозы,кинъёс ми!.."
Нылпиоссэ Демей кырын шудыны косӥз.
Евгений пӧсь чайзэ эмезь вареньяен ӟузиз но шуиз:
- Малпасько, кузпалыдлэсь ум ватэ вераськонмес?..Ӟеч иворен лыктӥ мон, 
Христофорыч. Толон кыкез эшъёсмы берытскизы.Тодмоосмес пумиталлям,валаськод-а? 
Байкаллы матысь чугун сюрес станцие,пе, ужаны интыяськиллям.О-о,гадь тыразы 
шокамон уж радъяллям ини соос, ёроссэс оскымон адямиосынызы чонари вотэсэн кадь 
согиллям!.. Асьмеос гинэ нырулӥсь бӧчыос кадь выриськомы...
Демейлэн кышноез та вераськонысь номырзэ ӧз ке но вала, шумпотӥсь 
сюлэмыз тук-тук! йыгаське, макем мыло-кыдо куно пуке уго соос дорын! 
Азязы чечыен пӧсятэм нырйыл вина, сылалтэм губи пуктӥз: "Шулдыръяське, 
вераське, ойдо, воргоронъёслэн ужазы кышномурт уз пыриськы",- малпаса, юрт 
куспысь ужзэ ужано кариськиз.
- Асьмелы косэмын, - Демей вӧзыгес кариськиз Евгений, - райкомъёсысь 
но исполкомъёсысь ужасьёсын юн кусып тупатыны. Соос пыр ужъюгдурез умой 
тодыса, пӧртэм амалъёсын саботажъёс ортчытъяно, калыкез кивалтӥсьёс вылэ 
узатыса возёно, ог-огзы вылэ чагиськылыса, куспазы пуриськыса мед 
улозы, валаськод-а? Быгатэммыя, асьсэды но кивалтӥсьёсты асьме пала 
берыктыны тыршомы. Тани талы пумит огез но пумит уз луы! - кисыысьтыз 
зарни коньдонъёс поттыса, ӝӧк вылэ пазьгиз. Жильк-жильк карись зарниез 
адӟыса, Демейлэн син азьыз пеймыт луиз. Евгений ӧз янгыша, выль эшезлэн 
тусызлэсь воштӥськемзэ тодӥз.
- Ме, таиз тыныд.Верай вал ук, ми тонэ вӧсь ум каре шуыса.Ужмы азинскиз 
ке,зарни пӧлын пыласькомы,вань улон-вылонэз ки уламы басьтомы!
Та пумиськон бере Демей буйгаз, сюлмаз мур оскон кылдӥз: Совето 
власть зэмзэ но огдырлы гинэ кылдэмын, ӝоген со куашкалоз. Россиялэн 
кузёоыз, Евгений выллем адямиос, - улэп, соос пазяськем кужымзэс люкало. 
Соин ик та адямиослэсь палэнскыны уг яра...

* * *
Матэ вуэ сентябрь. Максим Семеновлэн семьяяз огыр-бугыр: Аннаез 
райцентре дышетскыны келяло.
Максим но Марья куспазы кема кенешизы, ыстоно-а, ӧвӧл-а нылзэс 
огназэ со кеме, сизьым класс дышетскемез вань ук ини, оло, тырмоз? 
Собере Максим чутрак вераз, аслым, пе, тыро-пыдо гожтэт тодыны ӧз 
кылды - нылпиосылэсь сюрессэс уг пытса. Оля нылзы бордазы ук - уз мӧзме.
Максимлы райцентре ветлыны татчыозь муг ӧз сюрылы на вал, сюресэз 
но отчы уг тоды, соин ик Демеен кенешоно кариськиз: солэн Ерофеез 
отын дышетске.
Демей, таӵе вазиськонлы шумпотэм гинэ ӧвӧл, Аннушкалы улон инты но 
шедьтыны юртто шуиз, отын тодмоосы, пе, туж уно. Вераськизы тазьы: 
Максим нылзэ но Ерофеез Демеймлэн валэныз нуоз - Ерофей сюресэз тодэ, 
нош Демей аслаз тодмоосызлы гожтэтъёс гожтоз - кудӥз ке но Аннушкаез 
одно ик ас дораз улыны басьтоз. Вуэмзы бере,пе, Ерофейлэн кунокуаосыз 
дорын мед кӧлозы, соосыз пумит уз луэ. "Туж умой адямиос дорын улэ 
пие,- шуиз Демей. - Ачиз Антон Павлович - мӧйы большевик, Колчаклы пумит 
партизанъёс пӧлын ожмаськемын, али исполкомын секретарь луыса 
ужа. Кузпалыз, Евдокия Германовна, - дышетӥсь. Весяк сюрес вылын но 
секыт улэменызы, нылпиоссэс утьыны быгатӥллямтэ, табере тани Ерофеез 
чипыез кадь утьыса но шунтыса возё".
Райцентрозь сюрес кузь но зуркыт вал. Вашкала пужымъёслэн, 
кызъёслэн музъем вылтӥ позыръяськись зӧк выжыоссы уробоез туж кужмо 
сэзъяло. Адӟиське, та сюрес вылтӥ ветлӥсь-марась туж ӧжыт. Уробо чутрак 
кырыжтӥськыку, Аннушка кышка но вӧзаз пукись Ерошка борды кырмиське. 
Лумбыт озьы мыныса, ваньзы жадизы - вал но, уробоын пукисьёс но. Нош 
шунды инвисэ лэзиськыса ӧз вуы - тайга ӧс сямен вӧлак усьтӥськиз но, 
син азе бадӟым черко гурт кылдӥз.
- Мон татын мӧзмо! - витьымтэ шорысь викышъяны ӧдъяз Аннушка. - 
Кыдёкын но, тодмотэм но та черкогурт.
- Эн малпа мӧзмон сярысь. Дышетскыны лыктӥськод ук, шудыны уд! - 
чурыт вераны выриз вал Максим но берпум кылъёссэ ньылоназ тубись 
комокен ӵош ньылӥз. Собере вазьылытэк кема улӥз. Ӧз вазьылы паськыт 
шур вамен выжыкузы но, гуртэ пырыкузы но - оло нылзэ та кеме 
келямезлэсь-а сюлмыз вӧсь луиз, оло азьвыл ик-а мӧзмыны ӧдъяз - ӧйтӧд. 
Урамысен Ерофей пала берытскиз: 
- Кытчы мыноно, пияш?
- Шонерак. Вуимы ке, верало.
Тодмотэм черкогуртлэн кузь ураметӥз кема гинэ мыно ини.
- Таиз милям школамы, - возьматӥз Ерофей кык этажъем кузь юрт 
шоры. - Кык коркаосты бугроен огазеяллям но, одӥг юрт пӧрмем. Вузкарись 
вын-агайёслэн быдэн коркаоссы вылӥллям соос. Туж узыресь, пе, вал. Вань 
зарнизэс сьӧразы басьтыса, Колчакез та палась тузыкузы, Китае пегӟиллям. 
Юртъёссэс но сутыны малпало вылэм, большевикъёслы медам кыльы шуыса, - 
вуиллямтэ.
- Уно вылэм-а татын узыръёс? - йыг-йыг юртъёс шоры учкыса, юаз 
Аннушка.
- Сьӧд пилем мында. Ваньзы, кин кытчы быгатэ, пегӟиллям. Атае 
огпол анаелы шуиз, мыным гинэ, пе, тодмо соослэн сюрессы. Озьы верамзэ 
ас пельыным кылӥ. Пичи вал на, озьы ке но тодӥсько: лыктӥзы ми доры 
куинь воргоронъёс. Атаеным ӵош юизы, картаен шудӥзы, маке сярысь 
вераськизы но ӝӧк вылэ уно-уно чилясь питрес арбериос кисьтӥзы. Огез 
со арбери выж вылэ усьыса, кыдёке питыраз. Ӝӧк сьӧрысь потытозязы мон 
цап! кутӥ но гур вылэ пегӟи. Мон киысь ӧз ни талалэ, серекъязы гинэ. 
Со чилясь арбериен огшап шудэм берам, анае пелям сипыртэ: "Ойдо 
воштом. Мон тыныд - кампет, тон мыным - шудондэ ." 
Воштӥм.
- Али озьы воштысалыд-а? - юаз Анна.
- Ӵуж арбериез кампетэн-а? Ӧй! - жингрес серектӥз Ерошка.- Со 
воргоронъёс отӥяз ӵем гинэ вуылыны кутскизы. Шуозы вал: "Тайга - 
оскымон шалаш". Собере ӧз ни ветлэ, ышизы.
- Мар со "шалаш"? - юаз Аннушка.
- Тон мар, ӟуч сямен уд тодӥськы шат?
- Валасько. Тон умой тодӥськод-а? - паймыса кадь юаз нылаш.
- Кызьы сотэк! - данъяськыса вазиз Ерошка. - Сыл ай, кызьы бен 
сизьым классэз быдтӥд, ӟуч кылэз тодытэк?
- Удмурт школаын дышетски мон. Туж капчи но валамон ортчылӥзы 
урокъёс.
- Номырзэ уг валаськы: кызьы удмурт сямен лыдӟод но гожъяськод? 
Тазьы ик гожъяды-а: "У-к-н-о"? - азь чиньыеныз Аннушка азьын омыре 
гожтӥз Ерофей.
- Озьы ик гожъямы: "У-к-н-о" , - Ерофей сямен ик омыре гожтӥз 
Аннушка но кыксы ик серектӥзы.
Тодмотэм черкогурт Максимлы ӧз кельшы: нюко-гопо, писпутэм. Коркаос 
тып-тып зӧк коръёслэсь ӵупемын, нош туссыя чик чебересь ӧвӧл - ӝужытэсь 
но кыӵе ке сюбегесь. Куд-ог коркаос гинэ векчи пужыен пужыятэм 
наличникъёсынызы бордазы кыско.
Ерофей валэз пичигес юрт доры дугдытыны куриз. Уробоысь тэтчиз но 
бадӟым капкаез усьтӥз. Аннушка но атаез азбарын сылӥсь лапеггес, ужан 
дӥсен кышномуртэ адӟизы. Валэз азбаре пыртӥзы, ӟечъяськизы.
- Евдокия Германовна, - бур кизэ сётӥз со Максимлы но Аннушкалы. - 
Валдэс юскелэ но ойдолэ корка пыром. Ерофеюшка, вай юртто, - уробо 
котырын берганы кутскиз со, пияшлэсь котомкаоссэ, сиёнэн-юонэн, дӥсен 
бинетъёссэ музъем вылэ тырыса. - Мусо нылаш, - шуиз Аннушка шоры учкыса.- 
Жадид, дыр, уть, сюрес кыӵе кузь. Эн возьдаськы, мусое, эн кепыра...Ух, 
йырси пунэтъёсыд нош кыӵе чебересь! Егит дыръям мынам но таӵеесь вал.
Ӝоген Антон Павлович но ужысьтыз вуиз. Чай юыса но вераськыса 
пуконъязы, Максим валатэк но кылиз, та семьяын со нырысьсэ шуыса. Соку ик 
одӥг кыл шедьтэменызы, Максимлы сюлмаз туж кельшизы та адямиос, вашкала 
тодмоосыз кадь луизы.
Максим Демейлэн мукет тодмоосыз сярысь кылпум поттӥз, кудӥз соглаш 
кариськоз меда Аннаез ас дораз басьтыны шуыса. Таосыз нош огымысь кадь 
пумит луизы: интымы, пе, тырмоз, мед улозы кыкназы ик ми дорын. Озьы 
ик вераськизы: Аннушка татчы кылёз.
Кызошураз Максим капчи мылкыдын бертӥз.

* * *
ВКП(б)-лэн радаз пыремез бере, Самар Пилька тодмантэм воштӥськиз: 
котькинлэсь ужзэ чаклась, тырмымтэосты шараясь луиз. Вылласянь учконо ке, 
сыӵе сям алама ӧвӧл кадь, со сямлы Пилькалэн йылолыз тупасал ке. 
Уггес тупа уго: ваньзэ умойзэ аслыз лякыса, тырмымтэосты мукетъёс вылэ 
погыльтэмез потэ. Ма бен ватонэз: тырмымтэосты шараяны каньылгес ук, 
соос син шоры йӧто. Самар Пилька котькуд лэсьтэм ужысь пиртэшъёссэ 
бадӟыматӥсь пияла пыр учке кожалод. Соин но, дыр, партсобраниосын но, 
правленилэн заседаниосаз но туж ӟырдыт кылъёсын вераськыны дышиз ини. 
Солэн тужгес но председателез шонер сюрес вылэ пуктэмез потэ. "Сюлмыным 
шӧдӥсько, - малпа Самар Пилька, - Иван Митрошин кыӵе ке лушкем уж 
нуэ. Мон зэмос коммунист луисько бере, колхозлы юнманы люкетӥсь лушкем 
ужъёсыз выжыеныз порыны дась! Алясь йӧныез дырыз дыръя уд ке ышкиськы, 
со быдэс бакчаез соге. Одӥг сыӵе выжыез борды кырмиськыны быгатӥ тани 
- Санька, Левонь но Отя. Пызьырто мон соосыз, вань сьӧд ужъёсынызы ӵош 
Митрошинэз но кыре потто!.."
Самар Пилька Санька Копаровен пумиськиз:
- Вот ведь кытчы вуттэ чакласькытэк улэммы, Санька! Дырыз дыръя 
ӧй ке синйылтысал, председатель тонэ улэпкын сисьтысал ини, ачиз 
миськем сяртчы кадь чылкыт кыльысал.
- Тон мар сярысь? 
- Кызьы мар сярысь? - лӧбак луиз бригадир. - Оло, вунэтӥд-а? 
Тодад вайытом-а? Шуом, кызьы председатель тӥледыз ас кияз кырмиз.
- Кинэ "тӥледыз"?
- Отяез, Левонез, тонэ...
- Монэ?!
- Бен... - мыняк потыса, пыр-пыр учкиз Санька шоры. - Мар-о али 
сайкам пичи пи кадь выриськод!
- Мон янгыш ӧвӧл, мон... мон юэмын вал соку...
- Во, во, юэм муртэ ӝутканы но капчигес!
- Со ӧз ӝутка монэ, ӧз! Мон ачим!
- Ачид, шуиськод-а? Ваньзэ ас вылад басьтыны валэктӥз, иське? Ма 
бен, зол кыл кутоно луод, председателез утьыса, ас гадьдэ пуктӥськод 
бере.
Санька кытын улэмзэ вунэтыны кутскиз: ураметӥ мыныкуз, соин 
ӟечъяськись адямиосыз но уг тодма, кияз кутоно арбериосты но сура. 
Малпанэз одӥг: "Ма кароно? Кытчы пегӟоно? Оло, правление мыныса, ваньмыз 
кызьы вал, верано? Пуктозы ке, пуктозы - чидало. Нош тазьы улыса 
шузимод! Уен-нуналэн малпаськод: тани-тани лыктозы но кырмозы. Уг ни 
быгатӥськы, йыры пороме! Огнам гинэ ке луысал со ужын... Малы соку 
правление ӧй пыры малы ваньзэ Митрошинлы ӧй вера! Малы? Мон гинэ-а 
кыл кутоно? Левонь малы палэнэ кыльыны кулэ?! Со Отяез отчы пазяны 
валэктэм ук. Куто но озьы ик верало: "Левонь - косӥсез, Отяен ми - 
быдэсъясьёсыз". Малы та уже Митрошинэз лякод? .
Бер ӝыт Отяен Санька доры бригадир лыктӥз. Сьӧраз Левонез ваем.
- Пукселэ ай, умой-умой вераськом. Тӥ, ас янгыштэс шӧдыса, 
кышкаллямды но ужпумлэсь кызьы ӧръяськемзэ валамтэеныды, ваньзэ 
сураськоды-пожаськоды. Ӝоген тӥ доры лыктоз партилэн райкомезлэн 
инструкторез. Солы ваньмыз тодмо ни - тӥ преступникъёс, Совето 
властьлэн тушмонъёсыз. Ну, ну, ну!.. Мар пукон интыяды позыръяськыны 
кутскиды! Тӥ чылкак преступникъёс ӧвӧл на, тӥ председательлэсь сьӧд 
ужъёссэ гинэ быдэсъясьёс.
- Митрошин монэн ноку но мыдлань уж лэсьтон сярысь ӧз вераськы! 
Кылзы, бригадир, - кесяськыса вераськись луиз Санька Копаров. - Мон али 
ик председатель доры мыно но ваньзэ верало, кызьы вал.
- Райкомысь адями юалляськыны кутскиз ке, кылды одӥг ӧретӥ мед 
гылӟоз, оведь? Валамон! Ярам ойдо, номыре ватытэк вераськиськод монэн. 
Татчыозь гӧртэм синъёсыным улӥськем, паймод но бырод! Колхозэнымы 
кивалтэ преступник, классовой тушмон! Ас котыраз номыре валасьтэм, 
пеймыт калыкез люкам, - йырзэ сэзъяса, мыдлань-азьлань лёгаськыны ӧдъяз. 
- Мон коммунист бере, котырысьтым калыкез сакгес эскероно вылэм. 
Оскиськод ук, оскиськод ас гурт калыкедлы, эк шу!.. Ачим янгыш, ачим! 
Нош тон, Санька, секретарьмы милям, мар малпаса сыӵе уже кыстӥськид? 
Мон выллем рядовой коммунист кинлы табере оскыны кулэ?
- Председатель ас малпанъёссэ ваньмызлы вераса ветлоз шат... - 
сипыртӥз Левонь. - Уно калык - уно пель. Отя но Санька кытысь тодозы, 
председатель монэн гинэ вераськылӥз, лушкем ужъёссэ мон пыр лэсьтылӥз 
шуыса! Соин ик Санька али паймемын, малы ке шуод, Отяез но сое мон 
озьы лэсьтыны косӥ.
- Мар лэсьтыны косӥд тон монэ? - пуштӥз Санька. - Тон косэмъя 
кыӵе ужъёс лэсьтӥ?
- Огез гинэ лэсьтэмед но кӧт тырымон, - серектӥз бригадир.
- Озьытэк-а! - туж дыртыса вазиз Левонь. - Тод но ул: али 
председательлы вераны малпад ке, со соку ик тонэ арестовать карытоз. 
Нокинлы номыр валэктыны уд быгаты - ачиз со тонэн ӧз кенешы ук.
- Тон нош мар сыӵе номыре но ватытэк ас сярысьтыд вераськод? 
- Левоньлэсь юаз Самар Пилька.
- Улон сюресэз ортчи ни мон, табере номыр кышкыт ӧвӧл. Егитъёс 
жаль пото - соосыз чик дауре шорысь олокытчы но кыскалозы, - шуиз 
Отяен Санька сярысь.
- Паймымон но осконтэм вераськиськод, - шуиз Самар Пилька.
- Осто, кыӵе вылэм ук со Митрошин! - абдраса пуке Отя. - Ӟичы 
но ас пытьызэ сыӵе усто уз согы. Вот тыныд председатель! Оскыса ведь 
улӥськом... Вераськемзэ кылзыса, коммунизм шуоназы вуисько ни кожасько 
вал. Осто! Ярам ойдо, сьӧлыктэм нуны кадь номыре но валатэк улӥсько. 
Огез паймытэ: кызьы музъем чида сыӵе адямиез, мать твою! - Лек 
кыл верам бераз, куаляк луыса, Санька шоры учкиз. - Ӧй дышы ни чебер 
вераськыны, вождэ эн вай, Санька. Воже потыку, сыӵе кылъёс сюлэмме 
небӟыто.
- Тон, сьӧлыктэм нуны, вера ай, кызьы тонэ Митрошин Коскам 
нюкын сантэманы выриз вал? - кескич юаз Левонь.
- Мар, мар? - ӧз вала нырысь Отя. Нош Левоньлэсь туж лэчыт 
учкемзэ адӟиз но, пӧяськыны ӧжытак возьыт ке но вал, вератэк амалыз 
ӧйлась:
- Ма... кызьы сое картэ азьын вералод!.. Шып гинэ улӥсько вал 
ай... Осто, кышкатӥз ке, кышкатӥз, шуккыса куштон!" Ассэ председатель 
шуыса, котьма дауртэмез луэ кожа, лэся. Колхоз кылдыку ик ини со 
"вань кышноосын одӥг ын улын кӧлалом ай" шуэ вылэм.
- Коко Васьлейлэн ческыт малпанэз вал со! - Отялэн кыл куспаз 
пыриз Самар Пилька. - Сэре Отя, сэре?
- Ма, сэре... малпанэз ӧз пӧрмы, конешно!
- Кызьы вал, сое вера. Мыным радызъя тодыны кулэ! - вазиз 
Пилька.
- Ма, турын ӝутонысь ваньмыз кошкем бере, монэ ведь зурод вӧзын 
сантэманы малпа вал. Осто, кышкай ке кышкай!
- Ваньмыз кошкиллям, тон нош малы меда кылемед? Тьфу! - 
сялӟиськиз Санька.
- Ма, педло ветлэме но, оло, потӥз, дыр, хи-хи! Солэсь 
ватӥськыса улэмзэ адӟи шат!
Самар Пилька туж шумпотӥз таизлы иворлы. Кайсы урамтӥ дор палаз 
вамышъя но, кизэ посыса, ас понназ вераське: "Таиз учыр Митрошинэз 
чылкак куашкатоз! Малы мон та сярысь ӧй тодылы?!.."

* * *
Самар Пилькаен вераськемзылэн кышкытэз Отялэн йыраз берлогес лыктӥз. 
"Шузи мон, шузи! - гадяз мыжгаса бӧрдэ. - Ас картэлы пыдме пуктӥ!.. 
Малы номыр малпатэк, Левонья кариськыса, со кыед кисьтаммес Санькалы 
верай соку!.. Ма, сэре, уть ай...председатель ку монэ сантэманы 
выриз! Малы чик ӧвӧлзэ но вань карыса, Левонья вераськисько! Азьланяз 
со пересь улошоен улом шат! Шузи!.. Мар ке но малпано..." 
Ӝогак Левонь доры мынӥз. Ӝуась лек синъёсыз пересь борды 
мертчизы: - Тон, йӧмырам сарача, мать твою, малы монэ Санька вылэ 
узатӥд!
- Юалляськисьёслы мукет кыл вераны малпад-а табере? Тодӥськод-а, 
мар луоз со понна?
- Котьмар мед луоз - уже но быжы но ӧвӧл. Кызьы вал, шонерак 
верало но, Санькаме утё!
- Кема малпад-а та кылъёстэ? - пештырскиз Левонь. - Кош 
азьысьтым, кӧй бӧдёно! Ӧй вал ке ӧй вал ини йырад кеньыред. Адӟымтэдэ 
адӟод тонэн...
- Левонь агай, картэ ук со мынам... Картэ! Огнам кылём-а, пуктӥзы 
ке? - бӧрдыны ӧдъяз Отя. 
- Азьвыл малпано вал! Я, я, эн куректы, огнадэ уз кельтэ - келязы 
ке, ӵошендэс келялозы.
- Мар шуид?! - Левонь борды ӝабырскиз Отя. - Уд келя, уд! 
Ваньзэ, кызьы вал, верало. Тон косэмъя... Тон, тон!.. Ой, сюлмы, ой, 
лулы-виры! Санька-а!.. Санька-а! - нош ик бӧрдыны кутскиз.

* * *

Тайгаысь Кызошурын улон-вылон, мар веранэз, капчиен уг сётӥськы. 
Гыроно-кизёно музъемез нюлэслэсь арлы быдэ пичиен-пичиен талан - со 
туж секыт уж! Котькуд семья ас кужыменыз гинэ писпу погыръя, лӥял 
поре, кизе, турна, ара, муш вордонэн вырисьёсыз но вань.
Ваньзэ тае адӟем бераз, Максим Семенов куд-ог семьяосын, кужымзэс 
огазеяса ужаны мылкыд уз каре-а шуыса, вераськыны малпаз. Кайсы гуртазы 
колхоз кылдэмлэсь азьло туж пайдаё огазеяськизы вал ук соос: одӥг 
шыкысэ коньдон люкаса, аран, тӧлӥськон, етӥн сэстон машинаос, кык толэс 
басьтӥзы вал Татын но озьы ик лэсьтыны соглаш уз луэ меда? Вань,дыр, 
ук районын, ми палан сямен ик, ссуда сётъясь кредитной товарищество 
шуонзы, малпаз со. Ӧвӧл ке, кылдытоно, кызьы таӵе курадӟыса улод!..
Вить гуртоосыныз одӥг кыл шедьтӥз. Максимлэн ӵектэмез соослы 
кельшиз. Ӵуказеяз ик райцентре мыныса, ваньзэ умой-умой тодыны дэмлазы 
Максимлы.
Гуртоосыныз кенешемзэ Максим нылызлэн кунокуаезлы Антон Павловичлы 
мадиз. Соиз кылзӥз но шуиз:
- Крестьян калыклэн огазеяськыны мылкыдыз кемалась ӝутскемын ини. 
Сое чакласа ик, партимылэн дас витетӥ съездэз вань крестьян калыкез 
колхозъёс кылдытонэ выжыны косӥз. Али быдэс районмы бугыртэм кузьыли 
карлы кельше: ваньмыз интыысь советъёс пыриськизы та уже. Дыраз вуид 
тон,Максим Петрович: ӝоген районысь коммунистъёс, комсомолецъёс, 
бригадаос кылдытыса, колхоз, дышетон но культураез ӝутон ужпумен 
районэтӥ ветлозы. Тон ваньмыныз гурт калыкеныд вераськы, дася соосыз 
колхозэ пырыны, соку та ужез ӝог ортчытыны луоз. Кулакъёсты вань-а 
гуртады?
- Ӧвӧл кадь. Ваньзы огвыллемгес уло.
- Тон сямен, кинэ председателе пуктыны луоно?

- Малпаськоно, дыр. Так-то отын Демей Поляков сӥлы-данлы адями - 
ваньмыз солэсь кылзо, пунэмасько но солэсь гинэ.
- Пунэмасько? - юаз Антон Павлович. - Пунэм сётъяны моӵез вань 
шат солэн? Лыктэмезлы быдэ ӝожтӥське ук секыт улэмезлы?
- Мар куриськод, вань ке, сётэ... Ватсаса берыктон вылысь.
- Сыл ай, сыл... - паймиз Антон Павлович. - Верамедъя малы ке 
сюлэмы шуг луыны кутскиз, кемалась тодӥсько ни ке но сое. Сыӵе 
кыскон сямыз вань, иське? Эскерытэк уз луы, кыӵе мылкыдын со колхозэ 
гожтӥськоз.

* * *
Максим райцентре кошкиз гинэ но, Катьырна но солэн картэз 
Демейёс доры лыктӥзы.
- Демей, кызьы малпаськод, колхозэ пырыса, улон умой луоз-а? - 
чильымзэ аратӥз но пурккетыны кутскиз Катьырна. Тамак кыскеменыз, куараез 
боз-боз, шоканэз секыт. Демей кышнолэн куараез, эсьма, макмыр дыръяз 
гинэ сыӵе гудыръясь луылэ.
- Кыӵе-сыӵе колхоз уйвӧтад пуксиз? - кушетскиз Демей кышно.
- Максим булгандыриз-а? - юаз Демей. - Кайсы черко гуртазы кызьы 
дауртӥллям, сое вераны вуттӥз-а?
- Око-о... Озьы умой луоно кадь, Демей, - вераськонэ пыриськиз 
Катьырналэн картэз, ты висёнэн висьыса, лы но ку кылем воргорон.
- Тӥляд асьтэ йырыныды улэмды ӧйлась ни, тӧл вукоез сямен, кин 
ке одно со-та пала бергатэ! - вожез потӥз Демейлэн.
- Кин милемын бергатӥсь вань! - куажак вазиз Катьырна. - Тон 
сяна, кин милемын бергатэ! Мар валась адямиос ми! Бергаты ойдо, одӥг 
дышемен. Туэ, тани, тӥледлы тыронмы нош ик вуоно арлы кылёно кадь, 
моӵмы узгес тырмы, дыр. Нош ик бергатоды ни, кудпала мылды потэ...
- Ачид ик таӵе валаса вераськись луид-а, кин ке валэктӥз-а?- 
синъёсыз золскизы, ымнырыз кӧсэктӥз Демей кышнолэн. - Марьялэн кылыз туж 
вольыт шуо кадь, воксё вӧяса, пе, ветлэ гурт кышноосыз. Тонэ но вӧяны 
вуттӥз, оло?!
- Осто, кыл но шедьтӥськод!
- Ма, ымдуръёстэ ик пеперъяса вераськись луэмед кадь но.
- Кинэн вераськид, солэсь ик юа колхозэд сярысь, - шуиз Демей. - 
Ми пеймыт адямиос, номыр но ум тодӥське. Калык кызьы, ми но озьы ик 
улӥськомы.
- Верай ук, пӧзем ыжйыр! - картэз шоры мыжыксэ урдӥз Катьырна. - 
Ветлӥськод, сюям кадь соныро пельыныд олокытысь олокин пыдйылчилэсь верам 
кылзэ кылэм карыса! Кызьы кенешиды Максимен, радызъя, валамон мадь!
- Вунэтӥд-а мар-а, шуи ук: "Колкозэ пырид ке, Демейлы вань 
пунэмед куштӥськоз..." Максимлэсь со кылзэ гинэ валай, кӧня пол верано 
тыныд!
- Киыд мырк ке, колкозын дасяк сюдозы кожад-а?! Демейтэк асьмелэн 
улэммы луоз кожад, оло? Кылзы ай, - чильымысьтыз ӵынзэ пельтонъяз, 
Демейлэн кышноезлэсь ымнырзэ сьӧдмаз Катьырна. - со Марья. ява, ведӥн 
кыл тодӥсько шуиз мыным. Вот та шундые, ачиз вераз тани та ӝӧк сьӧрын 
пукыкумы. Кайсы калыкмы, пе, ог-огзэ дышетэ ведӥн кыллы. Мынам, пе, 
вань син уськытон кылы но, пудоез черлатонэ но, будӥсь юэз арам 
карытӥсез но... Адӟод но улод тани, кас синмыныз пудоез нымыляк 
быдтоз...

Осто, тыкиз ке тыкиз пыжиськемъёстэ соку! Воксё, ява, воньдоз, дыр, 
ини кожасько вал. Сыӵе сиён-юонэз адӟылэмез но ӧй вал, дыр, ай, 
шакшылэн!
- Кӧня муртэн вераськиз Максим колхозэ пырон сярысь? - юаз Демей 
Катьырналэсь.
- Ма...ма... кытысь мон тодом... Тани ук, со вераськи шуиз. Кӧня 
муртэн вераськиз Максим колхозэ пырон ласянь, пельтэм?! - картэз доры 
мыкырскиз Катьырна.
- Лыдъянме ӧй лыдъя так-то... Коркалы быдэ вуылӥмы кадь, монэ но 
сьӧрысьтыз ӧз кельты. Ваньмы соглаш луимы но, со районэ кошкиз.
- Али ик мын со шузиосыд доры! - нош ик картэзлэн пеляз 
кеськиз Катьырна. - Кыд бертэмъёс! Мушко йырынызы дуннеез бергатыны 
малпаллям, уть!.. Мын, шуисько!
- Ма... мон... али ик... - дыртӥз Катьырналэн картэз.

* * *
Кызошуре бертэм бераз, Максим вань гуртооссэ школае ӧтчаз. Со мадиз 
Антон Павловичлэсь верам кылъёссэ.
- Асьме гуртын кулакъёс ӧвӧл бере, колхоз кылдытыны капчи луоз, 
нокин пумит уз султы, - шуиз со.
Та кылъёсыз бере талэсь азьло гинэ огазеяськыны мылкыд карем огез 
воргорон султӥз но шуиз:
- Мон тодӥсько, малы тыныд колкоз кулэ: муртлэн валэныз, муртлэн 
бусы ужан тӥрлыкеныз куаныса уд-а улы муртлэн позёмаз!
- Бен вань позёмъёсыз, кенеръёсыз сэрттыса, одӥг бусылы пӧрмытомы 
ук, - шуиз Максим. - Антон Павлович вераз, огъя кужымен, пе, трактор 
но басьтэммы луоз. Тодӥськоды-а, кӧня валэз воштоз со!
- Аслад нош адӟемед вань-а ни со тырактур шуонзэс? - вожомем 
тусын юаз мукетыз огазеяськыны соглаш луись воргорон.
- Верамзыя кылэме вань: паймымон машина, пе. Трактор шу, ява, 
озьы шонергес луоз.
- Тынад куштӥськем позёмед но огъя бусые огазеяськоз-а? - серем 
карись луиз.
- Огъя кужымен...
Максимлы вераны ӧз сётэ:
- Кин тон таӵе - муртэ ужатӥсь! Ишь!
Интыысьтыз султӥз Демей.
- Иськавынъёс. - шуиз со. - Максим шонер кылъёс вера. Совето 
власть колхоз кылдытоно шуиз бере., солы пумит мыныны асьмелы уг яра. 
Максимлэн чебер суредаса возьматэм улонэз асьме доры куке соку 
одно вуоз. Нош али, мон сямен, ӧжытак вазьгес на. Учкомы, кызьы 
мукетъёс ужалозы, дышетском соослэсь. Дыртэмлэсь кылдэм ортчем, озьы-а?
- Мон тодӥсько ук, мар со - колхоз. Кайсы черкогуртамы сое 
асьмеос кылдытӥмы.
- Кельшеменыз татчы вуид-а?.. - вазиз кин ке.
Гуртоос ваньзы Демеен соглаш луизы но, одӥг кылысь кариськыса 
кадь, ӵош султыса, кошкизы.
Максим огназ кылиз.
* 
* *

Кӧня ке нунал ортчыса, ӝытомыку, Кызошуре витьымтэ шорысь ог дас 
ёрос адямиос вуизы. Ваньзы пыӵалъёсын.Ымнырзы басмаен ӵоксамын, синъёссы 
гинэ чиляло. Вань улӥсьёсты люкаськыны косӥзы урам капка доры. Ӝегаса 
лыктӥсь кӧня ке воргоронъёсты но кышномуртъёсты прикладэнызы шуккизы, 
собере калык пӧлысь сильсьӧртӥзы кыскыса поттӥзы Демеез но Максимез.
- Милемлы тодмо луиз, - котькуд кылзэ мед кылозы но умой мед 
валалозы шуыса, лэся, вераны кутскиз одӥгез тодмотэм адями, - улон-
вылондэс тӥ выль сямен лэсьтыны малпаллямды. Калыкез кужмысь кыскиськоды 
колхозэ, мукет сямен вераса, пудодэс, ужан тӥрлыктэс, кышноостэс но 
нылпиостэс огазеяны малпаллямды. Со тӥляд бадӟым янгышты, йыромонды, 
синтэм луонды! Уз пӧрмы! Гурттэс тӥ мыдлане кыскиськоды. Соин ик 
милемлы оскемын, вылӥысь Инмарлэн но эксэйлэн косэмзыя, тӥледыз ӧжытак 
визьманы!
Та кылъёс бере, лыктэмъёс люкаськем калык шоры пыӵалъёссэс 
урдӥзы. Кылӥськизы кесяськем, бӧрдэм куараос. Витьымтэ шорысь пыӵаллэн 
ыбемез кезьыт омырез сэзъялтӥз. Кышкам калык соку ик шыпак луиз. 
Нокин но ӧз погра, юри ыбиллям, шӧдске, медам кесяське шуыса.
- Быдэн дас шомпол! - кеськиз лыктэмъёс пӧлысь огез.
Максимлэсь но Демейлэсь выл дӥсьёссэс кылизы, дэремзэс кесязы.
- Дугдэ! - кеськиз Максим но висись пыдыныз бордаз тэбинем 
лыктэмъёсты ӵыжаны ӧдъяз. - Кинъёс тӥ, кытысь вуиды?!.. Уг сётскы!
Лымы вылэ туж капчиен погыртыса, сое кӧня ке пол шомполэн 
шуккизы. Со куспын Марья, кужмо кеськыса, люкаськемъёс пӧлысь коӵыш кадь 
тэтчиз но Максим вылэ уськытскиз. Сое прикладэн палэнтӥзы. Нюжтӥськыса, 
Марья нош ик Максим борды кырмиськиз но мугорыныз ӵоктаз. Лыктэмъёс 
пӧлысь огез Марьялэн кӧт урдсаз туж зол ӵыжиз. Кышномурт позырскиз но 
чалмиз.
- Марья! - куаляк луиз Максим. - Малы чалмид, мар луиз?!.. Мар 
кариды тӥ сое?! - секыт ӝуштыса, вазиз Максим тодмотэм адямиослы.
Максимез нош ик жугыны ӧдъязы.
Демей, ма карыны ӟудыса, интыяз берга, я люкаськемъёс, я Максимен 
Марья шоры вазиське:
- Иськавынъёс!.. Кинъёс та?!.. Мар даурто асьмемын?!.. Мар ӧбылямъёс 
кадь сылӥськоды? Уллялэ соосты, уд адӟиське шат, виыны малпало 
милемыз!..
Со куспын люкаськемъёс доры буш вал вылын ӵошпыд ворттыса вуиз 
эшшо одӥгез ымнырзэ ӵоктам тодмотэм мурт. Вал вылысьтыз тэтчыса кадь 
васькиз но, Демей шоры, лымы вылын погылляськись Максимен Марья шоры 
учкиз.
- Самой таос-а выль улон лэсьтӥсьёс? Ха-ха-ха!. Туж дано, шоразы 
вазьыны дӥсьтонтэм адямиос та ужен выро, дыр, кожасько вал! Утёд ке... 
тьфу!..
Лымы вылын кыллись Максим каллен гинэ йырзэ ӝутӥз: вераськись 
муртлэн куараез туж тодмо потӥз солы.

Пыд азьысьтыз султыны быгатымтэ муртъёсты ултӥяса, серем карыса 
вераськись тодмотэм мурт, Максим шоры умой-умой учкиз но, могак луиз, 
берлань сётскиз:
- Малы та ӧлексы адямиез жугиськоды! - кеськиз со эшъёсызлы, - Уд 
адӟиське шат, кыӵе кивалтӥсь со, тодэ меда, мар со выль улон?! Юрттэ 
соослы султыны!
Максим, ӝуштыса, ньыльпыдъяськыса пыд йылаз султӥз, тодмотэм муртлы 
вазиськиз:
- Янгышаськод, Ваше благородие... господин офицер... Евгений 
Васильевич Зименков... Выль улонэз лэсьтыны ми быгатӥськом. Бен, бен, 
быгатӥськом!.. 
Витьымтэ шорысь Демейлэн викышъяса бӧрдэмез кылӥськиз:
- Сантэмало!.. Караул!.. Пыд йыламы кельтозы соос асьмемыз! 
Пудомес, няньмес талалозы! Иськавынъёс, мар учкыса сылӥськоды, мозмытэ 
милемыз соослэн ки улысьтызы!..
- Сураса лыктӥськеммы та гуртэ! - вазиз буш валэн берло вуэм мурт 
эшъёсызлы. - Асьмелы татысь али ик кошконо! Та адямиосыз чик юнме 
шорысь янгыше уськытӥллямды...Мон сьӧры!..
Кызьы лыктӥзы, озьы ик вужер кадь ышизы тодмотэмъёс. Нош гуртоос, 
кӧня ке дыр кынмем кадь сылэм беразы, витьымтэ шорысь синйылтӥзы: 
Демей борды йӧтылӥсь ӧйлась! Собере, штыкъёсын котыртэмысь мозмемзэс 
валазы но, та кышкыт интыысь тӧлын пельтэм кадь пазьгиськизы. Максим 
Марьяез вирен саптаськем лымы вылысь ӝутӥз. Кыксы но пыд йылазы 
мырдэм сыло. Собере, ог-огзы борды кутӥськыса, дыл-дал шонаськыса, дор 
палазы вамыштӥзы. 

* * *
Ӵуказеяз Максимъёс доры Демей лыктӥз:
- Уйбыт кӧлэме ӧйлась... Али но быдэс мугоры куалекъя... Кинъёс 
вал со, Максим? Кинлы ним-тулыныз вазиськид, тодмоед-а мар-а?
- Око-о..
- Ма-ар?.. Тодмоед?!..
- Око-о...
Демейлэн ымнырыз кӧсэктӥз:
- Асьмеос одӥг гердэн герӟаськемын ӧвӧл-а? - дӥсьтытэкгес, ӧжытак 
дырекъяса юаз Демей.
- Око-о...
- Мар пичи муртэн кадь вераськиськод! Мар со "око-о" но "око-о"! - 
пурӟиз Демей. 
- Висисько мон... Марьялэн но султэмез уг луы.
- Туж эрказъяськизы уго... Тынад со тодмоед уг ке вуы, ӧйтӧд, 
улэп кыльысалмы на меда! Беда, брат! Ой-ёй!.. Евгений Васильевич, шуид 
кадь нимтулыз? Ӧй янгыша-а? "Ваше благородие" но, "господин офицер" но 
шуид кадь? Кемалась-а ни тодмо соин?
- Кызьы тодом, кин со! Ымнырыз ӵоктамын вал ук. Куараез гинэ 
тодмо кадь потӥз. Кинэ малпасько, со ик ке, паймымон...
- Со дыр, со! Ӧд вала шат: тонэ адӟиз но эшъёссэ соку ик 
эрказъяськемысь дугдытӥз!
- Ӧвӧл, со ӧвӧл... Кызьы со та кеме вуоз? Мар кароз со 
татын?!.. Э-эх, мынам тодмо тӧдьы офицере зарнилэсь но зарни адями!
- Самой со Евгений Васильевич-а?
- О-о...
- Тӧдьы офицер - зарни адями?!.. Тон.. тон.. кылдэ кузь эн лэзь, 
котькудӥз тӧдьы солдат - асьмелэн тушмонмы! Та кылъёстэ кылӥзы ке, 
тодӥськод-а, кытчы вуттозы?!
- Юась муртлы ватытэк шуо: тӧдьы офицеръёс монэ, соослы пумит 
ожмаськись горд солдатэз, ож бусыысь сӧсырмемен шедьтыса, асьсэлэн 
лазаретазы нуизы но кулонлэсь утизы Нош Евгений Васильевич тӧдьы 
офицерен ми Кайсыын эшъяським. Отын со сӧсырмыса кыллиз, йырсазьзэ 
ыштылӥз Ми сое утялтӥськомы вал. Ӧвӧл, ӧвӧл, татчы вуылэмез со 
офицер ӧвӧл! Евгений Васильевич монэ одно ик тодмасал, ымныр ӵоктэтсэ 
соку ик куштысал но ми ӟыгырскысалмы! Таиз - огшоры галак! Нюлэсъёстӥ 
калгисьёсын ӵош, сиемез потэмен, гурт калыкез тазатыса ветлӥсь.
- Паймымон вераськиськод тон, Максим. Выль улон понна, колхозъёс 
понна нюръяськисько шуиськод но, вуж улонысь тӧдьы офицерен ӟыгыръяськыны 
дась! Йырам уг тэро та кылъёсыд.
- Тӧдьы офицер ке, одно ик алама адями луыны кулэ-а? Сыӵе муртэн 
пумиськылэмед ӧвӧл на, иське! Тӧдьы солдатъёс асьме калык ик ӧвӧл шат! 
Милям Кайсы черкогуртамы кык пол пыразы соос. Шонерзэ ке верано, 
гордъёс, революцилэн вакытэз шуыса, кеносэз, гидэз бушато но кошко вал 
яке дунзэ берло тыромы, пе! Тырозы - ымдэ усьты! Та юртын векчи 
нылпиос, висись пересьёс вань на, дыр, шуыса, ӧз но малпаськылэ. Уноез 
тӧдьы офицеръёс гурт калык пӧлын ашкынӥсь солдатъёссэс, строй азе 
поттыса, урысэн жугылӥзы. Ас синмыным адӟеме вань!
- Максим! - кышно палась бадӟым ӟус вылын кыллись Марьялэн 
куараез кылӥськиз. - Кылдэ кузь эн лэзь! Мултэссэ уд зулиськы-а?
- Эн сюлмаськы, Марьюш, - небыт вазиз Демей. - Таӵе лулысь-сюлмысь 
вераськеме туж кемалась вал ини. Тӥледыз мон чик уг тодӥськы на вылэм! 
Кылзы ай, Максим... Эшшо огпол верасько: нокызьы но уг валаськы тани 
мае...
- Кылзӥсько.
- Кызьы одӥг сюлэмын улыны быгато вуж но выль улонъёс? Э-э... 
шорам паймыса учкемедъя шӧдӥсько: юанме удгес валаськы. М-м... вуж улон 
понна но кадь тон, вылезлы но пумит ӧвӧл кадь? 
- Вуж улонын умоез ӧй вал шат! Умой адямиос ӧй вал шат отын! 
Кызьы ваньзэ сое сюлэмысь ӵушод?
- Ма... мон но озьы малпасько так-то.Только вот, мукет ласянь 
учконо ке... Выль закон ваньзэ сое асьмемыз вунэтыны косэ ук. Косэм 
гинэ ӧвӧл, выжыеныз пороно, шуэ. Кулакез но, черкез но. Ачид ӧд ушъяськы 
шат, кызьы Левонез таркады, черктэс кесяды... Ваньзэ тае валаны туж 
шуг.
- Умойзэ утёно, умойтэмзэ выжыеныз пороно!
- Нош со умоез, кудӥз тыныд кельше, мынам сюлэмъям ке ӧвӧл? Со 
умойтэмез, кудӥз тыныд уг кельшы, мынам сюлэмъям ке?..
- Ой, Демей Христофорович, сыӵе позыръяса, мудронъяськыса 
вераськиськод!.. Йыры пороме, валаны турттыса.
- Мукет сямен, иське: тыныд со тӧдьы офицер, Евгений Васильевич 
Зименков, сюлэмъяд гинэ ӧвӧл, тон соин ӟыгыръяськыны дась, нош со 
мыным - тушмон! Со мынэсьтым каньылак улонме сӧре! Со - вашакала 
улонлэн кылем-мылем юдэсэз. Мыным туала улонэз лэсьтӥсьёс дуно! А?! 
Валад-а?!..Мар чалмид? Мон шонер ӧвӧл-а?!
- Вера шонерак: тон со шпанаосын тодмо-а?
- Мон мукет юан сётӥ ук!
- Мон но кильтыръяськыса вераськонэд котыртӥ бергасько. Со мында 
калык пӧлысь малы соос монэ бырйизы, мар ласянь сыӵе-сыӵе висъяськи 
мукетъёслэсь? Мар ласянь, кызьы тодо соос монэ?!
- Монэ но косказы!
- Тон борды ӧз йӧтылэ, монэ жугизы! Марья но тӥни, монэн йырин, 
сӧсырмемын!
- Та учырез туж капчиен валэктыны быгатӥсько: мозмытӥсед лыктэмен, 
монэ жугыны дырзы ӧй ни вал...
- Хм... Мозмытӥсь... Со адямилэн куараез гинэ тодмо потӥз мыным, 
нош кин со, кытысь тодом, ымнырыз ӵоктамын вал бере! Ог-огзылы 
кельшись куараос ӧжыт ӧвӧл, дыр. Монэ паймытэ мукетыз: кытысь тон 
тодӥськод Евгений Васильевичлэсь Зименков луэмзэ? "Зименков" кылэз мон ӧй 
поттылы ук...
Демей пукон интыысьтыз шуак тэтчиз но паськыт ӟус вылын кыллись 
Максим доры мыкырскиз:
- Верад!.. Верад!.. 
- Ӧй вера, Демей Христофорович. Мон сое Евгений Васильевич шуыса 
гинэ тодӥсько. Нимтулзэ ачиз вераз вал, Кайсыын висьыса кылльыкуз.
- Со дырысен тодмо-а ни тон соин?!
- Кинэн, Демей Христофорович?
- Ма... Э-э...
- Али тани, Демей Христофорович, тынад нырысь юанэд доры вуимы.
- Кыӵе, мар юанэ?! - нош ик куалектӥз Демей.
- "Ӧвӧл-а асьмеос одӥг гердэн герӟаськемын?"- юан сётӥд вал 
пырем берадгес ик.
- А-а... Хм... Серемес юан, оведь? Кайсыын висьыса кылльыкуз 
нырысьсэ тодматскиды, шуид кадь? Собере тон солы пумит ожмаськид, 
сӧсырмид, нош со тонэ кулэмлэсь утиз, оведь? 
- Ачиз ӧй шуы, тӧдьы офицеръёс, шуи. Сэре?
- Сэре, тодэмед ке потэ, гажано эше, тӧдьы офицерен туж юн 
гердэд кыре потыны ӧдъя. Нош со туала аръёсы кышкыт арбери...
- Ой- ёй-ёй! Юанэдъя мон валай, тынад но со выллем адямиосын 
кыӵе ке кусыпед вань кадь шуыса, соин ик асьмеос одӥг гердэн герӟамын, 
кожай.
- Озьы, иське? Шалишь, брат! - Максим азьын Демей эктӥсь ӟазег 
кадь тапыртыны ӧдъяз. - Кыкнамес жугыны поттэмзылы паймыса, сыӵе юан 
сётӥ мон. Соин валче гинэ! Мынам нокыӵе гыжкалъёсын кусыпе ӧвӧл, 
соос татын туж уно, шуо ке но. Али вераськеммыя амалтэк таӵе малпанэ 
вуи: со тӧдьы офицерен кусыптэ выльдыны ми доры вуэмын ӧвӧл-а тон? 
Татчыозь ватыса возид вал, кыӵе муген лыктэмдэ. Табере синмы усьтӥське 
ни кадь!
-- Максим, - кылӥськиз Марьялэн лябӟем куараез. - Дугды соин 
вераськемысь! Адӟиськод ук, вань сьӧлыкъёсыз тон вылэ погыльтэ.
- Мон ваньзэ сьӧлыкъёстэс уг тодӥськы. Но тӧдьы офицерен 
ӟыгыръяськымон кусыпед гинэ но паймымон. НКВД - е шокчись луиз ке нош? 
- Уть ай, кытчы куасалтӥд! Нош мон ачим мыныса верай ке?.. А? 
Мар сыӵе долкам синмын шорам учкись луид? Малы толон тон борды огзы 
но кизэс ӧз йӧттылэ? А? Паймымон ӧвӧл-а со ? Таизэ учырез НКВД-е 
шокчись луиз кен нош?
- Курдатыны малпад-а? Уз пӧрмы! Монэн татын ваньмыз кивалтӥсьёс 
кизэс сётыса ӟечбуръясько. Тон кин? Кураськись радэ вуэм пыдйылчи! Кин 
оскоз тыныд! Кыӵе муген вуэм адями тон тайга шаере? Кинлэсь пегаса?!
Максимлэн ньылоныз кекатэм кадь луиз.
- Дугды, Демей Христофорович. Адӟиськод ук, милемлы кыкмылы но 
туж секыт... 
- Тод, Максим, татын тон мон дорозь ноку но уд ӝутӥськы. Колхоз 
ласянь вераськондэ но вунэты: уз вамыштэ кызошуръёс тон сьӧры. Валамон-
а?..
Демей, ӧсэз йыг! ворсаса, кошкиз. 
Максим мырдэм но кызьы ӟус вылысь султӥз но кышноез доры мынӥз. 
Соиз котмем синъёссэ лушкем ӵушылыса кылле.
- Шедьтэм кин понна бӧрдыны! - чурыт вазиз Максим.- Али туж 
умой валай: ми соин ноку но одӥг кыл ум шедьтэ, ми соин - тушмонъёс! 
Тодоно вылэм, ачиз ку но кыӵе муген татчы вуэмын?
- Эн даурты, Максим, адӟид ук, кыӵе кышкыт адями со!
- Солы-а сётӥськом? Со ваньзэ вормыса мед улоз-а? Хе! Кызьы шуиз 
ай? Э-э... "Шалишь, брат!", тӥни кызьы шуиз. Мон но табере соин аслаз 
кылыныз верасько!

* * *
Аннушкаен Ерофей кыкетӥ толзэ ни ӵош уло но дышетско. Соос 
шумпотыса ветло школаысь самодеятельной кружокъёсы - спектакльёсын шудо, 
хорын кырӟало. Огпол Нардоме но ӧтьылӥзы - отын праздниклы сӥзем бадӟым 
концертын эктӥзы. Ог-огзэс кемагес уггес ке адӟо, мӧзмыны кутско кадь, 
сыӵе эшъяськизы берло дыре.
Антон Павлович но Евдокия Германовна туж ярато та нылпиосты. 
Евдокия Германовна Аннушкалэсь удмурт кырӟанъёсты кырӟамзэ дугдытэк 
кылзысал, дыр. Солы соос небыт но сайкыт гуренызы кельшо.. Антон 
Павлович гуртэ шергес берта - районэтӥ ветлэ. Дорын дыръяз Аннушкаен 
Ерофей вӧзысь уг ик кошкы ни.
Огпол, бер уин, Максим вуиз - кынмемын, жадемын, кушетскемын. Нылзэ 
чакланы но сиён вайыса лыктон сяменыз, нюлэскы йыромем. Чай юонъяз но 
шунтӥськонъяз, йыромемез сярысь верамез кунокуаосты но, Аннаез но 
паймытэм гинэ ӧвӧл, мур малпаськонэ уськытӥз. Ерофей соку эшез дорын 
вал.
- Ӧй пумиськы меда мон гуртамы колхоз кылдытыны люкетӥсьёсын? - 
ас малпанзэ шара азинтэ Максим. - Котьку сямен ик, мынӥсько валэлы 
оскыса, сюресэз уз ышты шуыса. Учкисько но, валэн ветлон сюрес сюбег 
но сюбег луэ, писпу улвайёс улӥе но улӥе лэзисько. Валай: мукет сюрес 
вылэ кожиськем. Котьма кар - берытскыны но, азьлане мыныны но уг ни 
луы. Мур гушъяса, кызьы но озьы валме азьпала нуи ик. Пичигес нюк 
вамен потэм берамы, учкисько: нюлэс шеромиз но кыр интые вуи.. Валэ, 
пельёссэ урдылыса, соргетыны ӧдъяз. Син шорам йӧтӥзы кӧня ке гид-а, 
лапас-а нергеос но пичигес корка. Нырысь малпай, пӧйшурасьёслэн шутэтскон 

интызы ук та! Валме дугдытӥ: пыроно-а, ӧвӧл-а? Кин ке вань меда отын? 
Со куспын киязы пыӵалэн кӧня ке воргоронъёс потӥзы. Огшап ог-огмы шоры 
учкыса улӥмы. Собере эшшо огез потӥз, вужер кадь сылӥз но берен туж 
ӝог корка пыриз. Сюлмы зуркак луиз: туж тодмо вужер вал кадь со... 
Ачим но малызэ валатэк, кышканы ӧдъяй. Тодӥськоды-а, ӧс дорын куалектэм 
тусо ымныръёс но, паймымон тодмо вужер но, валэлэн кышкаса пельёссэ 
выретэмез но мыным туж умойтэм потӥзы. Ӝогак берытскыса, лымыез но, 
сюресэз но ӧй ни учкы - валме уллясько но уллясько. Сьӧрам нокин 
уиськись ӧйлась, озьы ке но син азям - со тодмо вужер... Демей 
Поляков ӧй вал меда со?..
Та нимез кылыса, Аннушка кӧсэктӥз:
- Соос... тонэ...
- Сыл ай, сыл... - шуиз Антон Павлович. - Ӧд ӝимы меда тон 
пегась колчакъёслэн каразы? Тодӥськомы, та палан кытын ке кылемын соос, 
нош шедьтыны ум быгатӥське. Кык милиционеръёс чиптэм-чаптэм ышизы ни... 
Нош тодӥськод на-а сельсовет доры сӧсыртыса кельтэм дышетӥсез? - вазиз 
со кышноезлы.
Анна вырӟылытэк пуке. Нырысь со атаез понна туж кышказ вал, табере 
Ерошкаез адӟонтэм карыны ӧдъяз. Со малпаз, атаезлэн адӟем вужерез - 
одно ик Демей Поляков, Ерошкалэн атаез! "Шузи, - тышкаське ассэ, - 
кинэн эшъяськисько мон!"
Демей вал со шуыса, Максим пырак вераны уг быгаты, адями зэмзэ 
но вужер выллем гинэ потаз ук. Нош Демей сярысь малпанъёссэ чик 
ватытэк вераз. Максимлэн чакламезъя, Кызошур калыкен кивалтэ со, Демей, - 
мултэс кыл-куара поттылытэк, пыд ул лёгетэзлы юн оскыса. "Колхоз, оло, 
со умой 
но, дыр, - соглаш луэ Демей. - Нош огазеяськыны мылкыд карись ӧвӧл 
бере... Улон возьматоз... Кужмысь уд кары ук..."
Ӵуказеяз Анна Ерошкаен ӧз ни вераськы. Соиз, паймыса, сьӧраз ветлэ 
- "мар луиз?" но "мар луиз?" Валэктэм гинэ ӧвӧл, Аннушкалы со 
синазькыль луиз. Кӧня ке нунал улыса, вератэк ӧз чида:
- Тынад атаед Совето властьлэн тушмонэз! Матам но эн ни 
кариськы!
Ерошка кӧсэктӥз, киосыз куалекъяны ӧдъязы. Собере шуиз:
- Тодӥсько мон, Анна...
Аннушка зӥрак палэнскиз но паймыса учкиз Ерошка шоры:
- Тон... комсомолец... ватыса -а возид?!
- Чылкак уг тодӥськы ук, шӧдӥськисько гинэ
- Тодӥськод тон, тодӥськод! Ватыса возиськод! Ойдо али ик Антон 
Павлович доры мыном но ваньзэ вералом!...
- Мар сярысь?.. Мон ачим но уггес оскиськы ук... Кытчы ке ветлэ 
но уно коньдон вае. Сое гинэ тодӥсько. Аслам адӟеме вань...
- Кош мон дорысь!
- Сыл ай, Аннушка...
- Кош!
- Некинлы эн куареты на, курисько... Оло, мон янгышасько... Атае 
ук со мынам...
Ерошкалэн ватытэк верамезлы Анна паймиз: "Антон Павловичлы солэсь 
кылъёссэ ке верано, эштэ умойтэме вуттод, со ачиз но уг тоды ук, кин 
солэн атаез - тушмон-а, ӧвӧл-а. Ӧд ке вера - Совето властьлэсь 
тушмонзэ 
ватыса возем луэ... Нош лэсьто-а озьы комсомолецъёс?.. Атае нош янгыш 
ке?.. Вужерлы оскод шат?.. Собере, малпано ке, Ерошка атайзэ чакласа уг 
ветлы ук, кытысь тодоз, мар ужа со... Ас атайзэ чакласа кин ветлоз!"
Таӵе малпанъёсызлэсь Анна чылкак шузимон калэ вуиз. Ерошка солы 
витьымтэ шорысь туж жаль потыны ӧдъяз. Ма, солы, Анналы, атаед сярысь 
вань малпанъёстэ кут но вера ай... "Ассэ ачиз утьыны но уз быгаты 
со, мискинь... Оло синмаськемын мыным, оло соин ватытэк вераз? - йыраз 
нырысьсэ таӵе малпан лыктӥз. - Ӧвӧл, ӧвӧл, таиз ини мултэс! Мон, 
Аннушка, Совето властьлэн тушмонэзлэн пиеныз-а кушласьком?.. Хм... Нош 
малы, малы со мынэсьтым номыре но ӧз ваты?.. Оло зэмзэ но атае 
янгышаз? Малы со нюлэскын одно ик Демей агай луыны кулэ?.. Ваньзэ, 
ваньзэ тае чаклано, малпано... Ерофеен нош ик кенешоно..

* 
* *
Пересь Левонь малпамтэ шорысь Санька Копаровез ас дораз куное 
ӧтиз. "Мар луэм таин?" - паймиз Санька, ноку но со дырозь пересен 
умой-умой кушласькымтэ мурт.
Санькаез Левонь туж капчи мылкыдын пумитаз. Ӝӧк вылзы соку ик 
сиён-юонэн тырмиз, черык аракы но юэмлэсь азьло ик мылкыдэз лӧпкытӥз.
- Туннэ мынам шудо нуналэ, - кызйылыса, Левонь куко 
чаркаосты тырмытӥз. - Вашкала тодмоеным пумиськи. Кылмы пӧсьтытозь 
вераськимы. Ю, пие, ю... Эк, мусо егит эше, дуно Санькае, кыӵе улон 
вуиз асьме доры! Улэмъя улэм потэ. Тодмоеным пумиськеме выль кужым 
сётӥз, ачим ик егитми кадь. Вай, эшшо оген питыртом... Во, во, 
молодец!
Санька туж ӝог кудӟиз.
- Тон мар, Левонь агай, монэ тазьы?.. Гажаськод-а яке мынэсьтым 
мар ке кулэ-а?
- Номыр кулэ ӧвӧл. Яратӥсько мон тонэ. Пиелэсь мӧзмисько, тон 
тани со интые кылид. Эк, улон-вылон! Берга со вуко кӧ сямен, лябзэ 
но, кужмозэ но адямиосты, огинэ сураса, сизьдэ, пыргытэ - пызьлы 
пӧрмытэ...
- Малы ӧтид? - чарказэ бушатыса но ымдуръёссэ ӵушылыса, мылыз 
потытэкгес юаз Санька. Пересьлэн зулемез акыльтыны ӧдъяз.
- Кызьы малпаськод, Санька, шимес корт валзы сярысь?
- Трактор-а мар-а? Хм, усто машина! Паймымон машина - вот мар 
шуо мон тыныд, тёмной бутылка!
- Бен, бен, мон но озьы шуыны малпасько вал, кыл ӧй шедьты. 
Кылзы ай, пияш, - Санька доры мыкырскиз Левонь но лек сипыртӥз: - 
Тон зэмзэ но лушкаськись вылэмед ук, лешой!
- Мон-а? Мар?! - зӥрак йырзэ урдӥз Санька. - Лушкаськись? Тон 
мар? Ку лушкаськисен кутӥд?
- Мон ӧй куты. Мукет сямен ке верано, колхозлэсь лушканы дышемед 
вылэм ини тон. Тӥни сое вераны курадӟи, кураськисьёс радэ пыртэме 
потымтэен.
- Я, валамонгес вера на ай!
- Мурт чотын узырмемед потэм. Во, шедьтӥ веранэлэсь ӧрзэ! Выль 
законъя аслыд шуныт инты шедьтыны быгатӥд ке, улыны луэ вылэм, шуисько. 
Тод: лушкаськись кылэз мон ӧй лякы тон борды, гурт калык лякиз.

- Пӧяськод! - интыысьтыз тэтчиз Санька. Ымныраз пӧсям вуос 
потӥзы. - Пӧяськод!
- Я, я, эн ӵашеты... Бадӟым куараен вераськисез уг яратӥськы. Мон 
- небыт сюлэмо адями. Калыкез яратӥсь адямим мон, Санька. Ваньзэ уг, 
кончно. Шуом, Митрошинэз ик. Тон жаль потӥськод, вот мар. Со ук кыл 
вӧлдэ, тон лушкаськись шуыса.
- Со?..
- Бен, со!
- Пӧяськод! - пересь шоры шоналскиз Санька.
- Ме, жуг! - кужмо кеськиз Левонь но, кык киыныз ик дэремзэ 
кесьыса, Санька азе восьтэт гадьзэ урдӥз. - Жуг, лушкаськись! Мон ке 
тонэ, чик ӧвӧлтэмез, жаляны, урод кылъёслэсь утьыны вырисько!.. Ме, ме, 
жуг!
Санька шымырскиз но йырзэ сэзъяны кутскиз:
- Ох!.. Улытозям одӥг тысь но юатэк басьтэме ӧвӧл... Ас 
кужмыным... Висись анаеным... Кӧня аресысен ужаны кутскемме но уг 
тодӥськы... - викышъяны кутскиз Санька.
Левонь, мусояса выллем, ӟыгыртӥз Санькалэсь бадӟым мугорзэ но 
тыбыраз вешаз. Ӧжыт гинэ кылымон шуиз:
- Сыӵе ултӥямез чидамедлы паймисько... Тон кадь тыршись мед 
луысал ай кин ке. Око-ко-о!
- Уг, уг чида! - ӝӧк вылэ мыжгиз Санька. - Вай эшшо юо! - 
нош ик чаркаез кымалтӥз.
- Шыпгес, гыдыке, шыпгес... Мон тодӥсько ук - тон лачмыт, кужмо 
пияш. Кужмо но дӥсьтӥсь. Дӥсь-тӥсь!.. Валамон-а?.. Сыӵе ултӥямез тон уд 
чида, тодӥсько!
- Виё! Музъеме сого со Митрошинэз!.. Ух!
- Сыл ай, сыл... Мултэссэ вераськиськод... Малы сое виёнэз? 
Сыӵеосыз виыны уг яра... Сыӵеос асьсэ эзеленызы мед чоньдозы, дыртытэк, 
пыд йылазы куасьмыса. Одӥг ласянь чепыльтод, мукет ласянь куртчод... 
Учкиськод но - адями ӧвӧл ни.
- Тон мар вераськиськод, зын песьтэр? Кызьы ымад тэро сыӵе жоб 
кылъёс!
- Кужмогес чепыльтӥд ке, эзелез матэктоз...
- М-мон... туннэ ик солы эзь-зель ваё. Ссь-сьӧсь-ллы! - Санькалэн 
йырыз вуштыса чылк-чылк миськем ӝӧк вылэ мыкырскиз.
- Тани, кылзы ай, - Санькаез сэзъяны кутскиз Левонь. - Шуом, 
тынэсьтыд юрттэ талазы. Шуом, Митрошин ик талаз. Чидасалыд-а тон сыӵе 
ултӥямез? Ӧд, ӧд чидасалыд...
- М-мар ужез солэн м-мынам юрр-тэ бб-ордын?!
- Озьы ке луысал, шуисько мон... Я, я, сайкиськы!.. Кыл бӧрсьысь 
потэм кыл гинэ со, ас вылад эн басьты. Тани мынэсьтым талазы ук. 
Малпаськод, сюлмы уг пӧзьы-а? Юрт вадестӥм кошкеме уг луы! Котькуд 
сэреге, коькуд укно пиялае шорам учкыса, тэльмыре кадь: "Кузёмы, тала, 
милемыз берен аслыд кар, эн кушты! Таланы луонлыкед ӧвӧл ке - сут!.. 
Сут!.. Сут милемыз!.. " - Левонь, вожомем синъёсыныз выллане учкыса, 
киосыныз суралляны кутскиз - тани-тани омырысь мае ке кутоз. Куараез 
пумен кынмем пислэн гурын шиетыса ӝуась куараезлы кельшыны ӧдъяз: 

- Сутыны косо соос монэ. Валаськод-а? Сс-утыны-ы!.. Сс-санька... мусс-
сое.. коть татчыям ик ожалтыса кушты - киы уг пыры ас юртме с- с-
сутыны!
- Тон понна лэсьто! - гырпумыныз Левоньлэн гадяз мырӟиз. - Ужан 
ӝӝӧ- кке но мм-ед ӝуалоз, быдэс контора, гг-гидъёс, амм-баръёс мм-ед 
лл-лобӟозы! Озьы-а? А, Левонь агай?!.. Сволочь тон, валад-а кин?! 
Митрошинэз саптан понна ас юрттэ сутыны косӥськод-а?! - ӧжытак 
сайкиськыны кутскиз Санька. - Ух!.. - нош ик гырпумзэ ӝутӥз. Левоньлэн 
гадяз мырӟыса ӧз вуы, Санькаез пересь кужмысь палэнтӥз но кеськиз:
- Мын, али ик чагиськы Митрошинлы та вераськеммес! Мын!..
- Мыно, Левонь агай, мыно. Только сётэм кылме нырысь быдэсто: 
юрттэ суто.
- Калленгес! Эн кесяськы, калленгес!.. Шудон уж ӧвӧл со...
* 
* *
Льӧмпу улын вераськыса пукись Иванька но Горей Мика куазьлэсь 
ӟардыны кутскемзэ ик шӧдытэк кылизы. Витьымтэ шорысь пель сьӧразы юр-яр 
куараос кылӥськыны ӧдъязы. Пукисьёс шып кариськизы. Кылзо. Куараос кужмо 
но кужмо луо. Со куспын артэ урамысь чирак! кеськем кышномурт куара 
чус омырез пилиз кадь: 
- Караул! Ӝуаськом!..
Иванька но Горей Мика кенер вамен ураме тэтчизы но адӟо: колхоз 
кенос но, гидъёс но, правление но яплак гомась тылын баьтэмын.
* * *
Кайсыысь колхозын тылпу сярысь ивор чилектэм кадь быдэс ёросэ 
вӧлмиз.. Комиссия бӧрсьы комиссия вуылӥз - сутӥсьсэ ӧз шедьтэ. Нокинлэн 
йыраз но ӧз лыкты уго Санька сярысь умойтэмзэ малпаны.
Ӝуам юрт бервыл лымы усьытозь туж шимес улӥз: сутӥськем 
сэрегпумъёс, сьӧдэктэм коръёс, пулъёс, сӧриськем пиялаос... Гидъёсысь 
пудоез но кеносысь юэз поттыса вуизы ик, нош лапас улысь музъем ужан 
тӥрлык ваньмыз сямен ярантэм луиз.
Колхозлы та тылпу туж бадӟым изъян ваиз, нош вылӥысь 
кивалтӥсьёс азьын Иван Митрошинлэн данэз шӧдскымон куашказ: калыклэсь 
мылкыдзэ уг тод, вӧлдэтысь бичам лыдпусъёсын отчётъёс ысъя, райкомлэн 
но исполкомлэн решениосызлы пужет ужрадъёс ортчытъя, семьяяз ассэ 
умойтэм возе... Со сярысь тӥни сыӵе малпан кылдӥз.
* * *
Нёжалысь ӵукна пал кезьыт бус ӝутӥськиз. Писпуос сюсьтылъёс кадь 
тӧдь-тӧдь сыло - гӧртэмын, укно пиялаосын йӧспӧртэм пужыос чиляло. 
Кыдёкысь нюлэсо вырйыл вадьын инбам ӟардыны кутскиз. Коркаос вадьсын - 
отын но татын - ӵын юбоос. Пуныослэн утэмзы, пудоослэн бӧксэмзы 
кылӥськиз.
Тайгаысь Кызошур выль нуналэз пумита.
Демей кышно учкиз но, люкмесэ вулы мынӥсь Марьяез адӟыса, 
Катьырна иськавынэз доры туж ӝог дыртӥз. Со но султэм вылэм ини. 
Нылпиосыз, эстӥськись кортгур борды вылӥяз но урдэсъёсаз лякылыса, 
вандылэм картофка пыжо. Ческыт сыӵе картофка, тужгес ик аръянэн!..
Демейлэн кышноез пыжиськон кортлы лыктэм. Катьырнаен вераськонъяз, 
укное учкиз но куалектӥз:
- Осто, учкы ай, Катьырна, Марья, лэся, ук со! Выль лымы вылтӥ 
нырысь ик со сюрес лёге, паймод но бырод!
Катьырна но чапкиськиз: бен, бен, Марья!
- У, шуккыса куштон! - сялӟиськиз. - Солэн пытьы бервылаз 
лёгиськид ке, тод - нуналэд уз удалты! Ведӥнь!
- Каньылгес вераськы... Эн сапта выль нуналэз сыӵе кылъёсын, - 
буйгатыса вазиз Демей кышно. - Люкмес дурын кинлы ке нырысь луоно ук. 
Ӧд кылы-а, солэн Максимез, пе, колхозэ пырымтэысьтымы гурт калыкмы вылэ 
районысь кузёослы чагиськыны ветлэ. Ымныръёссэс ӵоксам пыӵалъёсын адямиос 
но солэн ӧтемезъя асьмемыз пыӵалъёсын кышкатӥллям ук! Та висись сюлэмы 
али но дырекъя...- викыштӥз но синзэ кышет пумыныз ӵушиз Демей кышно.
- Вот уго, вот уго!.. Оломае но кылод-адӟод улӥд-вылӥд ке... 
Однако-о, соос ӧвӧл дыръя шыпак улӥськиз! Сыл ай, бен со пыӵалэн 
лыктэмъёс Максимез гинэ тышказы кадь ук?..
- Ма, калык азьын юри тышкам карыны уг луы шат? Кин тодэ, 
берло, ӵош пуксьыса, оло, сиизы-юизы но, дыр.
- Соиз но вань. Осто-о!.. Уть ай, зэм но ук: ӧжытак тышкам 
каризы но, ӧз йӧтылэ ни, тӧл кадь кытчы ке шупчизы, ышизы-быризы..
- Кытӥяз тазьы малпасько мон, Катьырна: мултэс адямиос гуртамы 
пыризы! Мултэс!.. Соос, адӟод но улод, ваньмес пыд йыламы кельтозы...
- Сӧсырто мон со ведӥнэз, люкмесэ донго! - Катьырналэн синъёсыз 
ӝуалскизы. - Соослы татын шоканы омыр медам тырмы!
- Астэ сыӵе йӧнтэм эн возьы. Чидаломы ни, мар карод на... 
Адӟонмы сыӵе, дыр. Инмар гожтэмлэсь палэнэ уд ортчы.
- Инмарлэсь нимзэ мар со ведӥнь борды лякиськод! Калыклэсь азьло 
ик ведь чылкыт ву дуре кырсь пыдыныз сюрес лёге ай со, шуккыса 
куштон! - кортгур котырын пукись нылпиоссэ паймытыса, корка тыр 
кесяське Катьырна. Собере, Демей кышнолы пыжиськон кортсэ сётыса, ӝогак 
дӥсяськиз но ведра-карнанэныз ураме потӥз. Демей кышно гуртаз бертӥз, 
нош Катьырна - коркась корка. Ӝоген люкмес дуре огез бӧрсьы мукетыз, 
пельпумазы ведраен-карнанэн, кышномуртъёс васькизы. Пал кыл но 
куаретытэк, Марьяез котыртӥзы.
- Ӟечбуресь! - капчи мылкыдын пумитаз Марья гуртооссэ. - Малпай 
вал, туннэ, оло, мон гинэ-а таӵе вазь султӥськем шуыса...
- Кытын, пе, милемлы тон сьӧры уйиськыны! - нёжтӥз Катьырна.- 
Муръёысьтыд ӵын потэмъя гинэ дырез валаса улӥськомы... Кытысь таӵе 
сюлэм пурыос ми доры вуизы, паймод но бырод!
- Эн лёгиськы пытьыяз! - лек сипыртӥз огез кышномурт мукетызлы, - 
Пудоедлы кас син усёз!
Со сипыртэм куараез кылыса, Марья онырам кадь луиз, син азяз 
ӵуж-вож пужыос кылдӥзы. Куалектыса учкиз кышноос шоры. Соосыз нош - 
матэ но матэ...
- Мар арсыз ведраеныд люкмесэз пожаськод? Учке ай, учке, мар 
дауртэ таид! - кылӥськиз куара. Кышноос кесяськыны ӧдъязы:
- Парсьёс чылкытгес уло!..
- Со котьку озьы! Бервылаз омыръяны юрӟым!..
Со куспын кин ке Марьялэсь ведразэ ӵыжиз. Марьялэн дэрем сӧзыез 
но, пыдкукез но соку ик йӧӟектӥзы. Огез кышномурт, олань-талань берганъяз, 
вольтчыса усиз.
- Ой! - кеськиз со. - Ой!.. Инмаре-кылсинэ, кизэ урдӥз ук та мон 
вылэ, убир!.. Ой!..
Марьяез карнанъёсын жугыны кутскизы. Соиз киосыныз йырзэ ӵоксаз. 
Тыбыраз, пыдъёсаз карнанъёсын тышкало. Марья пограз. Сое ӵыжало, лымыен 
пазяло. Вылаз кин ке быдэс ведра ву кисьтӥз.
- Кылдэ берпалад ньылӥд-а, мар-а?! - Марьялэн шып улэмез эшшо но 
пурӟытӥз кышноосты.
Шуш кесяськемез кылыса, Демей кышно бызьыса лыктӥз. Ӵапак соку 
Катьырна бералскиз но вань кужмысьтыз Марьялэн йыраз карнанэн шуккиз. 
Ӝуштыса, Марья кӧт вылаз погыльскиз Ымысьтыз вир потӥз.
- Мар дауртӥськоды, шузиос?! - вожомем кышномуртъёсты сэрпалляны 
ӧдъяз Демей кышно. - Йыруж лэсьтыны малпады, оло?1 Судъёстӥ костаськемды 
потӥз-а, чик ӧвӧлтэмъёс?!. Осто-о!.. - Марья доры мыкырскиз. - Вииллямды 
ук тӥ сое!. Вииллямды!
Ваньзы чалмизы. Кышноос, йӧнтэм ужзэс адӟыса, пумем кадь луизы. 
Демей кышно Марьялэсь йырзэ ӝутӥз. Карнанэн шуккем бервыл лызэктыса 
пыктыны кутскем.
Марья каллен гинэ синъёссэ усьтӥз. Котырак учкиз но пуксиз. Демей 
кышноез бордысьтыз палэнтыса, султӥз.
- Б-басьты... в-ведраостэ... Марья, - вазиз огез кышномурт.
Марья, пал кыл но куаретытэк, шонаськыса, дор палаз вамыштӥз. 
Кышноос огшап чал-чал сылӥзы. Собере, ог-огзылы вазьыны дӥсьтытэк, буш 
ведраосынызы кошкизы.
* 
* *
Марья корказ пыриз но, йӧӟектэм дӥсьсэ мырдэм кыльыса, гур сьӧры 
сэрпалтӥз, собере, ымнырзэ гылтыса, бадӟым ӟус вылазы выдӥз. Оля нылыз 
тулуп шуба улын изе. Кӧня ке улыса, Марьялэн быдэс мугорыз куалекъяны 
ӧдъяз.
- Гурысь пӧсь лыктэ... Си, нылы, си, ческыт шыд пӧзьтӥ... - 
уйбыртэ. - Я, ортчиз, дыдые, каньыл луоз ай... Аннушка, мар-о тон, пыд 
вылам пӧсь ву кисьтӥд-а, мар-а? Ой, ӝуасько...
Школаын Оляез ыштӥзы. Дышетӥсез урокъёс бере соос доры мынӥз. 
Урамысен Демей кышноен пумиськиз.
- Малы ке Оля школае ӧз лыкты, - шуиз дышетӥсь. - Возьмай, 
возьмай но чаклано кариськи. Оло, висе-а?
- Мон но пайми ни: калыклэсь азьло муръёысьтыз ӵыныз потоз вал, 
нош туннэ... Малпасько, пырало ай... Ярам, пумиськимы.
Пыризы. Коркан кезьыт. Бадӟым ӟус вылын кыллись Марьяез но солэсь 
сьӧд ымнырзэ адӟыса, дышетӥсь амалтэк кеськиз. Шуба улысь Олялэн йырыз 
мычиськиз. Пыремъёс шоры паймыса учке: ой возьыт, татчыозь изем! Анаез 
пала берытскиз. Адӟиз но шымырскиз...
Пыремъёс Марья доры лыктӥзы.
- Марья, Марья... - сэзъя сое Демей кышно.
Ӝуштыса, Марья йырзэ выретӥз.
- Максим... вуид-а?.. Ярам... Ярам бертӥд.. Тонтэк... Демей 
кышно...
Нылаш бӧрдыны ӧдъяз. Дышетӥсь ӟыгыртӥз сое:
- Эн бӧрды, Оленька, эн бӧрды... Мар луиз, кин жугиз сое?..
- Ӧйтӧд... - вераны дыртӥз Демей кышно. - Люкмес дуре ӵукна 
мыныкум, шатыр гинэ жугисько ни вал.
- Кинъёс? - паймиз дышетӥсь.
- Бускельёсын ӧз тупа ни со.
- Пӧяськод... - сазьтӥськыса, синъёссэ усьтытэк, ӝот-ӝот вераз 
Марья. - Пӧяськод. Тодӥсько, кин узатӥз...
- Кин? - юаз дышетӥсь
- Уйбыртэ со, мар верамзэ уг вала... - сипыртӥз Демей кышно.
- Валасько, ваньзэ валасько... Пыдъёсы ӝуало... Йыры ӝуа... Ой!.. 
Пӧсь...
- Оля, ӝоггес дӥсяськы. Сое больницае нуоно!
- Мар со кеме косканэз! Татын ик бурмытомы. Тани мунчозэс эсто 
ачим... - шуиз Демей кышно. - Куазед но уть, кыӵе кезьыт. Осто, осто, 
мар дауртӥллям ведь, а! Тани та шобреттэ но вылад поно ай, оло, 
шунытгес луоз... Гурдэ кенжыто, мунчодэ... Пӧсь веникен паро но, эмез-юмез 
со луоз! Вашкалаосмы першалъёсыз тодӥллямтэ, мунчоын небӟытӥсько вылэм... 
Ваньмыз ортчоз, эн куректы...
- Маке татын умойтэм, - малпаз дышетӥсь. Собере Демей кышнолы: - 
Тон эн кушты сое, ява. Мунчоын парысалыд ке, туж умой луысал. 
.- Ачид нош кытчы? - куаляк луиз Демей кышно.
- Мыным районэ ветлоно. Оляез анаеным кельто.
* 
* *
Райцентрысь врач но прокуратураысь следователь вуизы.
Кызошур бугырскиз. Ваньмыз ог-огзы доры бызьылыса ветло, ӧтчазы ке, 
мар верано луоз шуыса, юаллясько. Катьырна но Демейёс доры лыктӥз. 
Вожез потыса, Демейлэн синъёсыз ӝуалскизы.
- Жугид-а? Жугид! Кызьы жугид, озьы ик кыл кут!
- Ведӥнь понна-а?
- Озьы ик шу, иське: ведӥнэн улыны уг ни луы, шу! Мар юалод на 
эшшо?! - чальгес мед кошкоз шуыса, кеськиз Демей.
- Кылем сӥзьыл тӥляд такады но ышиз вал кадь ук? - вераськонэ 
пыриськиз Демей кышно. - Максимъёс лыктытозь пудолэсь ышемзэ кылыны уг 
луы вал ук?
- Кионъёс кесяллям, - лулӟиз Катьырна. - Пусэзъя тодмамы.
- Шузи! - интыысьтыз тэтчиз Демей кышно. - Кык пыдо кионъёс но 
уг луо шат?!
Следователь котькудзэ кышномуртэз нимаз-нимаз ӧтьылӥз. Собере эшшо 
но эшшо лыдӟылӥз гожъям протоколъёссэ: "Ваньзы адӟонтэм каро Максим 
Петрович Семеновлэсь семьязэ. Малы? Валаны шуг. "Ведӥн"... Хм... Таиз 
ини... Нош ачиз кин со Максим Петрович Семенов? Малы со та шаере 
лыктэм?.."
Арня ортчыса, следователь нош ик Кызошуре лыктӥз. Максим али гуртаз 
вал. Сое школа юртэ ӧтизы.
- Уноез валантэм, Максим Петрович, - ӟечбуръяськонъяз шуиз 
следователь. - Мар малпаськод гуртады луэм таиз учыр сярысь? Соку тонэ 
жугизы, али кышнодэ.
- Малпасько, туж урод.
- Валамонгес уд вера-а?
- Солэсь но валамон кызьы вералод на?
- Мон шуисько, уд быгаты-а жугиськонлэсь мугзэ усьтыны, сэрттыны-
пертчыны?
- Уг. 
- Кыӵе муген татчы, Сибире, лыктоно луид, Максим Петрович?
- Озьы тупаз...
- Хм... Нош кызьы тодмо, отын, Кам шур палан, тон дано адями 
вылэмед, колхоз но кылдытыны юрттэммед.
- Тодмо бере, мар юанэз...
- Огшоры гинэ. Валантэм интыосыз вань.
- Валантэм интыос? Таӵе со интыос: Совето властез гражданскойын 
ути, сӧсырми. Солэсь но валамонэз мар ке вань меда?
- Валаны понна ми, юристъёс, тужгес валантэмез бордысен 
кутскиськом. Эн пӧсекъя, уг ултӥяськы мон тонэ.
- Мон, иське, валантэм адями?
- О-о.
- Тау.
- Вера: мар муген лыктӥд та шаере?
- Ӧтизы но лыктӥ. Гуртоосмы ӧтизы. Милесьтым азьло лыктэмъёс.
- Демей Христофорович Поляков но-а?
- Со но.
- Тӥ ӵыжы-выжыос-а соин?
- Удмуртъёс ваньзы ӵыжы-выжыос.
- Хм...Мыным веразы: тайгае йыромыса, тон кыӵе ке тодмотэм 
адямиосын пумиськемед, пе? Поляковлэсь вужерзэ но адӟемед.
- Вужер - со вужер. Вужерез адями уд шу.
- Малы уд шуы, солы кельше ке вал.
- Мон валантэм адями. Вера, эн вера - уд вала монэ.
- Мар гожтом протоколам? Оскыны курисько: огшоры ӟабыльтыны ӧй 
лыкты.
- Гожты озьы: ваньмыз йыраз сураськемын, номыре вераны уг тод. 
- Адӟид-а, ӧд-а Демей Поляковез соку?
- Ӧй!
- Нош кузпалдэ жугыса сӧсыртэмзэс тодӥськод-а?
- Син азьын ук...
- Семенов эш, сое тодӥськод бере, тон уд висиськы, йырыд сазь.
- Озьы-а ма? Ӧвӧл, мон - шузимемын! Номыре эн юалляськы ни.
- Жаль, ӧм валалэ ог-огмес,- следователь протоколлэсь гожъямтэ 
кагаззэ портфеляз понӥз.- Юанэ быриз. Мон сямен, тон йыромем, улонлэн 
ӧраз сюрымтэ адями.
- Кин тодэ, кин тодэ... Тани та туала улонлэн визыл ӧрыз ик уг 
куасалля меда монэ..
- Озьы бере, улонмылэсь воштӥськемзэ пумозяз ӧд вала на. Соин ик 
сэрпалляськиськод, отчы-татчы донгиськылӥськод, нош тонэ валась ӧвӧл... 
Я, вождэ эн вай. Таиз вераськонмы мынам ужея ӧвӧл. Но асьмеос 
пумиськомы на, вераськонмы - азьпалан.

* * *
Максим ачиз но валаз следователен умойтэм вераськемзэ: "Мытылӥ, 
легезьпу кадь вози асме - эн йӧтылы, бышко!.. Нош радызъя 
вераськысал ке, кылмы одно ик Демей Поляков вылэ вуттысал ук. Мар 
тодӥсько мон Демей сярысь? Мар но со гинэ. Тодымтэдэ тодэмъяськыса кыл 
вӧлдӥд ке, умой луоз-а? Гурт калыкен, Демеен ӵош азьланяз улоно ук 
мыным..."
Школа юртысь ураме потэм бераз, кезьыт тӧл ымнырзэ векчи 
веньёсын кадь бышкыны ӧдъяз. Шуба воротниксэ ӝутӥз но лымы букосъёстӥ 
дор палаз вамыштӥз. Мыныса, мыныса жадиз, ӝужыт лыстэм пужым доры 
дугдӥз. Со борды огшап пыкиськыса сылӥз но шуак викышъяны ӧдъяз... 
Синкылиосыз, шуныт ву сямен, бам вылтӥз васько. Мугорыз пумен кужмогес 
но кужмогес дырекъяны кутскиз. Викышъямзэ дугдытыны быгатымтэеныз, 
ымнырзэ тӧл шоры карыса сылэ. "Аннушкаме каникулэ ваи, сюлмам шумпотон 
пыриз, кожасько вал. Шумпотон интые - сьӧд кайгу... Анае но монэн 
сэрен та югыт дуннелэсь вазьгес люкиськиз. Анае, вождэ эн вай... 
Шедьто мон улон ӧрме, малпаськыны дыр гинэ мед сюроз..."
Кезьытэз но кынмись мугорзэ шӧдытэк, кема сылӥз со лыстэм пужым 
улын. Ӧз шӧды матаз сылӥсь адямиез но. Со вал Демей Поляков. Кема 
возьмаз со Максимлэсь школаысь следователь дорысь потэмзэ. Вузӥсь тӧллэн 
дырын-дырын вис луон вакытаз, Максим лымы ӟукыртэмез кылӥз. Куалектыса, 
лыстэм пужым бордысь палэнскиз.
- Максим... эн кышка. Мон та - Демей.
- Тон?
- Тодӥськод-а, шумпотымон ивор вань. Мынам пие Аннокедлы синмаськем.
- Со гинэ-а веранэд?
- Туннэ понна со гинэ.
Максим зӥрак берытскиз но чутыса, кузь вамышъёсын, киоссэ паськыт 
сэзъяса, дор палаз кошкиз.
Марья сюлэмшуген пумитаз картсэ. Мар ке вазьыны малпа вал но 
Максим, сое палэнтыса, ыж гон носки керттыса пукись Аннушка доры 
лыктӥз:
- Демейлэн пиеныз мусояськиськод, иське?
- Анай! - паймыса, анаез пала берытскиз Анна 
- Уждэ ужа, нылы... Мӧзмем сюлмыз лопыръяське, луоз.
Максим кылиськиз но, номыр куаретытэк, пичи сэндрае тубиз. 
Аннушкалэн керттӥськонэз ӧз ни мыны, кылиськиз но выдӥз. Тылэз кысыса, 
Марья но пичи нылыз вӧзы интыяськиз. Соиз, умйылтӥз шунытэсь киосыныз 
анайзэ ӟыгыртыса, маке бӧтьыртӥз но чалмиз. Ӝоген коркан шып луиз. Умме 
ӧз усе Максим но Марья гинэ. Котькудзылэн аслаз малпанэз.
Марья пеймыт вӧлдэтэ учкыса кылле, картэз сярысь, ачиз но 
нылпиосыз сярысь, улонысь кошкем анайзы сярысь малпа. Анаенызы улыны 
Марьялы капчи вал, соос ог - огзэс валазы, ноку ӧз керетылэ. Ӟеч сюлэмо 
вал пересь. Максим но со улэп дыръя ассэ кияз кутыны быгатылӥз - ӧз, 
анаезлэсь кышкаса ӧз ул, яратӥз, гажаз, кызьы ваньмыз йӧно удмуртъёс 
анай-атайзэс сӧлы каро.. Марьялэь но кылзӥське, уг ултӥя, нош мултэс 
керӟегъяьконэз ньылон выжые вуымон луиз ини. Чик кулэтэм вераськонлэсь 
но 

пазяськыны, киосыныз суралляськыны кутскылэ, кесяське. Нош кин шоры 
кесяське, ачиз но уг тоды. Марья огпол гинэ ӧз вера ни: "Усьты синдэ, 
учкы! Тон гинэ гражданскойын ӧд ожмаськы, колхозэз но огнад ӧд 
лэсьты... Калыкен одӥг кыл шедьтыны тыршы. Мар бен татын, мурт дуннеын, 
колхозэныд ӟудӥд ини! Демей шуэмъя, колхозэ пыремзы уг поты бере, 
кужмысь карод шат! Колхозэ ас мылкыдызъя пыре ук калык. Кайсыысь 
кошконэз ӧй вал, иське".
Максим но пеймыт вӧлдэтэ учкыса кылле. Огез вылэ мукетыз 
малпанъёс лыкто, йырзэ поромыто, ымнырзэ ӟырдато. "Мон - валантэм 
адями... Следователь монэн одӥг ёз, дыр. Ожмаськиз меда? Нюлэс коранэз, 
лӥял поронэз адӟиз меда? "Тон мыным юрттыны быгатод", - шуиз. Демей 
сярысь мон пыр уногес тодэмез потэ кадь, уть кыӵе котыръяськыса 
юалляськиз. Бен мон солэсь вужерзэ гинэ ке адӟи, кызьы сое Демей шуом! 
Вужерез адями карыса вералом шат? Око-ко-о!.. Со кипырмес Демейлы луыса, 
нылме но тани мыскылэ вуттӥ. Аннушкалэн йыраз но ӧвӧл, дыр, ай яратон 
мылкыд. Ачим но дас тямысам мыныку гинэ валай яратонэз... Пот арын 
тӥни, кызь одӥгын, Аннуше вордӥськиз. Ӧжыт гинэ ӧз кулы, мискинь! Эк, 
кызьы меда уло али отын, Кайсыям? Одӥг нуналлы ке но бертаса учкы 
вылэм! Малы бен Санькалы гожтэт уг гожтӥськы ай? Со гожтӥз - мон ӧй. 
Малпа, дыр: йырыз курен, вормытъяськыса улэ. Тодысалыд ке, Санька, кыӵе 
мӧзмисько мон Кайсы калыкелэсь, Чимошурлэсь, Атабай вырйыллэсь, Чебер 
нюклэсь, Карйыл бамаллэсь!.. Султӥськод вал Атабай вырйылэ но ымнырдэ 
тӧллы пумит кариськод, нош со небытак маялля, йырсиез туга, дэрем пушкы 
пыре. Арамаостӥ, тэльёстӥ лёгем сюресъёсы син азям. Вордскем музъеме? 
Али мон тонэ, небыт турынэн лӧсъяськись, италмас сяськаен ворекъясь возь 
вылад гань-гань выдыса, ӟыгыртысал, нырез бичатӥсь ческыт зындэ гадь 
тырам шокчысал, ас киыным будэтэм ю-няне пӧлтӥ вамышъясал... Иван, 
Санька, Пилька, тодысалды ке, кыӵе секыт мыным татын...Ӧте монэ 
дорады, басьтэ монэ татысь... Иванька!.. Дуно эше!.. Кылӥськод-а, тыныд 
вазиськисько мон... Мӧзмисько!.. "
Максимлы шоканы секыт луиз. Ньылоназ тубись чурыт но вӧсь карись 
комокез мырдэм ньылылэ.

* * *
Демей Поляковлэн туж тодэмез потэ вал, мар сярысь следователь 
Максимен вераськиз. Тодыны ӧз быгаты. Максимен нокызьы одӥг кыл ӧз шедьты 
ни уго со. Малпа вал, оло, шумпотоз Аннушкаен Ерофейлэн кусыпсылы, Демей 
семьяен кудо-туклячи луэмез потоз. "Мон сьӧры уиськыны ныр улдэ ӵуш, 
зырымесь, - малпаз со Максим сярысь. - Нош Ерофее кадь егит пи нылтэк 
уз ул. Мон выжые ке мыноно - ой-ёй-ёй!.. Тайга адӟымтэзэ адӟоз, туж 
уно яратон учыръёсыз ватоно луоз ас бурд улаз!.."
Ерофей берло дыре шӧдскымон будӥз, пельпумъёсыз паськытазы. Сьӧд 
кысъем ымныраз тазалыксэ возьматӥсь егит вир шудэ, юг-юг тӧдьы 
пиньёсыз пальпотонзэ чебер каро. "Адӟиськод-а, - шуылӥз со кышноезлы, 
пиез шоры данъяськонэз валась синъёсыныз учкыса, - адӟиськод-а, кыӵе 
будэ пияшмы! Уд но шӧды, асьмелы кен ваёз. Али сое тужгес чаклан 
дырыз - сюлмамы кельшонтэмзэ медам шедьты".
Улон-вылон кытӥяз адямиез шудон кожа, лэся: мылыз потэмъя посэ, 
нырке, ӵыжа, серекъя, вылӥе ӝутэ но дэрие сэрпалтэ. 
Демейлы Катьырна толон туж бадӟым иворез выллем шыпыртыса вераз, 
Ерофен Аннушка,пе, соослэн капка азязы ӟыгырскыса сылӥзы, чупаськыны но, 
пе, выро вал кадь но, со, Катьырна, люкетэм. Вераз, адӟемезлы 
шумпотыса, синъёссэ кырмышъяса. Со, конечно, Демейлэсь мылкыдзэ сӧрыны ӧз 
малпа, солэн адӟемзэ гинэ верамез потӥз, кин тодэ, оло, егит дырзэ но 
тодаз ваиз, кин тодэ... Демеез ке ӧй пумитасал, мукетызлы верасал, 
кыӵе пӧртэмез - Демей-а, мукетыз-а, ваньмыз чупаськон гожез куке соку 
вамыштэ бере...
Катьырна таӵе дуно выль иворез ымдуръёссэ нюлыса вераз, нош 
Демейлэсь, сое кылзыкуз, быдэс мугорзэ та пал шаерысь ашкынэм чибиньёс 
норизы кадь. Озьы ке но, со чибиньёсты улляку выллем, ӧз шонаськы, 
чидаз, ӧжытак серектэм выллем но кариз. Нош туннэ, следователь дорысь 
Максимлэсь потэмзэ возьмаса сылыкуз, гадяз тылӝу гомӟиз кадь. "Ныл 
шӧмез веръяны Аннушка но яралоз" шуыса, ассэ буйгатыны ке но выриз, 
вожомем мылкыдыз ӧз тӧлӟы. "Кие кутоно пияшез", - малпаз со.
Демей, Максимен люкиськем бераз, пизэ дышетоно кариськиз. Ас 
понназ Ерофеез тышкаськыса бертэ, нош син азяз - чутыса вамышъясь 
Максим. "Ишь, вераськыны но пумит луиз! Кинэн? Демеен!.." Вожпотон 
мылкыд тулкымен-тулкымен жугиське Демейлэн сюлмаз, со тулкым я Максим 
доры вуттэ, я солэн Аннушка нылыз доры, со дорысь нош ик Демейлэн 
сюлмаз шуккиське но Ерошка пала пальккиське, отысен - Максим доры... 
"Уг сёты пиме, уг! - ас понназ вераське. - Демей вӧзын жаг турын 
медам буды, мынэсьтым вирме кулэтэм вирен медам сура!.."
Демей пырыку, Ерофей ӧс дорысь ӟус вылын кылле вал.
- Шутэтскиськод-а, пие?
- Шутэтскисько.
- Жадид, луоз?
- Ӧжытак.
- Мар ужаса бен жадид ай таӵе?
Атаезлэсь кескич юалляськемзэ шӧдыса, Ерофей шуба улысьтыз ӧжытак 
кыре потӥз. Катя сузэрез но анаез, та дыре маке умойтэм луоноез 
валаса, кышкам тусын ваче учкизы.
- Ӧй жадьы мон. Пыдъёсме шунтӥсько.
- Кытын бен сыӵе-сыӵе кынтӥськид?
- Ма... урамын.
- Мон но тани урамысь но, пыдъёсме малы ке ӧй кынты.
- Ӧд? - пальпотӥз Ерошка.
Демей мыдлань-азьлань ветлыны ӧдъяз. Вожомыкуз со мыдлань-азьлань 
ветлӥсь луэ.
- Аннаен кушласькемед, шуо?
Ерофей кушетскиз но пуксиз.
- Султы! - шуш куараен кеськиз атаез но пиез вылысь шубазэ 
сэрпалтӥз. Ерофей тэтчыса султӥз. 
- Кыль штанидэ!
Ерофей кӧсэктӥз. Мазэ-созэ валамтэеныз, атаез шоры синъёсыныз 
мертчиз:

- Малы?
- Кыль, шуисько!
- Возьдаськисько мон...
Анайзы пиеныз картэз куспы пыриз:
- Мар-о тон, Деми?
Демей вань кужмысьтыз кышноезлэн йыраз мыжгиз но азьысьтыз 
сэрпалтӥз. Соиз гур сэргы шуккиськыса пограз. Анаез доры бӧрдыса нылыз 
лыктӥз.
- Кыль штанидэ! - пиез бордысь уг тэбиньы Демей. Ерофей йырзэ 
ошиз но атаезлэсь косэмзэ быдэстӥз. - Выд!
Ерофей кӧт вылаз выдӥз. Али со валаз, мар сое вите. Огпол таӵе 
учыр вал ини. Атаез сарайысь тылпоттон но тамак шедьтэм, со понна 
пизэ туж зол жугиз. Ерофейлы соку сизьым арес вал. Солэн али ваем 
турын вылын кыллемез потӥз. Атаезлэсь шубазэ вализ вал. Со ӧз тоды, 
кисыяз тылпоттонэн тамакез вань но соос турын вылэ усёзы шуыса. Демей 
пиез тамак кыскыны кутскем кожаз. Со тужгес но куалектӥз юртъерез 
сутӥськемлэсь. Пизэ жугиз жалятэк, шузимыса, кык нунал вутэк но сиёнтэк 
чуланын возиз. Кышноез бӧрдӥз, картэзлэн пыд азяз йыбыртъяз, нош Демей 
ӧз сётскы. Ерофей али ваньзэ сое тодаз ваиз но витиз... Атаез езэ 
бур кияз бинялтӥз. Туж паськыт шоналскыса, еэзлэн бычыеныз жугыны 
кутскиз. Пызйись вирез адӟыса, Демей урмем кадь луиз: пизэ жугемзэ 
вунэтыса, вирез гинэ адӟе на. Со вир нош ик син азяз пуктӥз 
Максимез, нош ик следовательлэсь Максимлэсь мар сярысь вераськемзэс 
тодымтэез вожпотонэн гомӟиз. Солы одно тодыны кулэ со вераськонэз: оло, 
следователь но Максим киын али Демейлэн улонэз, оло, ӵуказе ик Демеен 
Максим куспын вир ӧръяськоз!.. Кин тодэ, кыӵе муген вуылӥз Максим 
тайгаысь Демейлэн эшъёсыз доры? Максим сое адӟиз, оло, ӧз, нош Демей 
тодмаз! Бен, бен, Максим вал со!..
Катя нылзы выж вылын ӝуштыса кыллись анаез дорысь лыктыса, 
атаезлэн ки бордаз ошиськиз вал но, со куспын ик берен анаез доры 
пезьдӥз. Ерофей, вӧсь луэмезлы чидатэк, ымдуръёссэ куртчылэ. Котькуд 
шуккем бере, пияшлэн быдэс мугораз атайзэ адӟемпотостэм карон мылкыд 
пыӵа.
- Султы! - вазиз Демей. Езэ борддоре ошиз но дӥсяськыны ӧдъяз.
- Таӵе ӟечед ас вылад вуоз... - мырдэм вазиз Ерофей. Атаез та 
кылъёсты ӧз ни кылы, азбаре потыса, валзэ кыткыны кутскиз. Сое отын, 
сьӧд нюлэскын, эшъёсыз витё.
* * 
* 
Огаз кӧснуналэ Максимъёс доры гуртысьтызы дышетӥсь пыриз: ӵуказе, 
пе, райцентре мынӥсько, ӧвӧл-а Аннушкалы маке лэзёнды? Марья бызьылыса 
сиён-юон тырыны ӧдъяз, нош Максим ачиз мыноно кариськиз, кемалась, пе, 
райцентрын ӧй вал ни, выль иворъёсты но кылэм потэ, Антон Павловичен 
но адӟиськеммы кемагес ни.
Мыныны вазь ӵукна потӥзы. Дӧдьы сюрес, мынӥсь-ветлӥсь ӧвӧлэн, - 
нырокъёстэк, ӵошкыт. Дышетӥсьлэн мылкыдыз капчи - дугдылытэк маде 
школаысь нылпиосыз сярысь.
- Котькуд дышетскисе пыр адӟисько, кызьы улэ соиз яке таиз 
семья, мар сярысь малпа, кин кинэн валче улэ. Нылпиос анай-атайёссы 
вӧзын будо 

бере, туж уно йылолъёссэс соослэсь басьто. Олечкады тӥляд визьмо, 
тыршись, но вераськись ӧвӧл, солэсь кылзэ огшоры гинэ уд потты. Атаез 
выжыын, дыр, - жингрес серектӥз дышетӥсь.
- Мон сыӵе ӧвӧл, - кепыр ваиз Максим.
- Сыӵе.
- Ма сярысь бен бӧтьыртом?
- Шуом, Демеен кусыпты сярысь.
- Малы милям кусыпмы кулэ тыныд?
- Следователь вераськиз монэн. Тӥ, пе, быдэс гуртэныды мае ке но 
ватӥськоды.
- Мар мон вералом солы? Ӧвӧлзэ вань уд кары, - шуиз Максим.
Вераськонзы могӟиз. Шып кариськизы. Лымылэн ӟукыртэмез гинэ кылӥське. 
Дышетӥсь кема шып улыны ӧз чида:
- Ерофей туж кельше мыным. Синмаськымон пияш.
- Атаезъя, вылды, - мыняк потӥз Максим.
- Кылме пыӵкиськод-а? - шуиз дышетӥсь. - Уз, Ерошка анай-атаез 
кадь уз луы, солэн али воштӥськон аресэз. Палэнын, умой адямиос вӧзын 
улэмез бадӟым пайда сётоз.
- Кин тодэ.. Кызлэн кускылиез, пе... 
Тулыс шунды вылӥе ке но тубе ни, сюрес вылысь лымы гушъямон 
ӧвӧл на. Вал капчиен гонӟыртэ. Витьымтэ шорысь со, пельёссэ урдыса, 
кужмо гырдалтӥз но тып! дугдӥз. Дышетӥсь но Максим мазэ-созэ валаса ӧз 
вуэ - музъем пыдэсысь выллем соос пумитэ вал кылдӥз. Маким соку ик 
тодмаз Демейлэсь кошовказэ но, валзэ но. Дышетӥсен Максим но, Демей но 
ог-огзы шоры паймыса учкизы. Максим адӟыса вуттӥз Демейлэсь куалектэмзэ, 
синъёсыныз олань-талань утчаськемзэ. Собере Демей ассэ туж ӝог кияз кутӥз 
но шулдыр серектӥз:
- Ӟечбуресь, землякъёс! Кыдёке-а потӥды? Кызьы ай азьлань 
вамыштомы, лымые ум вые-а?
- Палэнэ мултэс эн кожы... Сюрес вылэз ыштытэк, бурегес сёт. 
Вот, вот, озьы... - валзэ бур палагес берыктыса, вазиз Максим. Дӧдьыос 
артэ луизы.
- Усто пумиськон!.. Ӵемгес уд ворттылӥське-а тӥ кыкнады? - лӧпшаса 
выллем шуиз Демей, дышетӥсь шоры учкыса. - Марья ке тодӥз...
- Мар тон... - киыныз шонтӥз дышетӥсь. - Райцентрысь-а ?
- Отысь.
- Куронме ӧд быдэсты, конечно? Исполкоме ӧд пыра? Ку тупатыны 
кутскозы школамес, ӧд тоды?
- Ӧй пыра. Дыры чик ӧй вал.
- Озьы ик малпай. Ойдо вамыштӥм, - вазиз со Максимлы.Демей 
валзэ шуккиз но гурт пала ӵошпыд ворттыса кошкиз. Райцентре нуись 
сюрес ӝоген бур пала кожиз. Витьымтэ шорысь Максимлэн тусыз 
воштӥськыны ӧдъяз, интыысьтыз султыса, оло, кышкаменыз, оло, паймеменыз, 
котыр утчаськыса мынэ. Собере валэз дугдытӥз.
- Тӥни!.. - киыныз возьматӥз со кытчы ке. - Тӥни со сюрес!.. 
Адӟиськод-а, лабрес пужым улысь потэ! - дышетӥсьлэн пельпумаз йӧтскиз. 
- Адӟиськод-а али лёгем дӧдьы пытьыез? Демейлэн со! Со отысь бертэ!
Дышетӥсь мазэ-созэ валатэк учкиз Максим шоры.
- Кытысь кин бертэ? Мар луиз?
- Ӝоггес, ӝоггес райцентре! - Максим тэльбугоез кыскиз. Вал 
ӵошпыд ворттыны ӧдъяз. - Вот таиз тани ачиз Демей, таиз вужер ӧвӧл 
ни!.. Ышыг сюрес но самой со, мынам йыромем сюресэ! Кӧня утчай сое 
берло, нокызьы шедьтыны ӧй быгаты! Уть, пытьызэ кыӵе согыны вырем - 
пужым улваез ведь кыскыса нуэм ас бервылаз, шуккыса куштон!
Райцентре вуыса, Максим следователь доры пыриз.
* * * 
Кӧня ке дыр куспын партилэн райкомез крайысь кивалтӥсьёсын 
герӟаськиз. Ӵуказеяз ӝытпал райцентре солдатъёсын отряд вуиз. Максимлэн 
мадемезъя чаклазы-малпазы, тушмонъёслэсь карзэс котыртыны кызьыгес умой 
луоз шуыса. "Луэмезъя, ваньзэс улэпкын кутылоно," - сыӵе огъя ужпум 
пуктэмын вал 
Сюрес вылэ вырӟизы уйшор бере. Кык кошовкаосын Максимлы тодмотэм 
адямиос пуко - областьысь, шӧдске. Нош отӥяз - туж уно дӧдьыос. Соосаз - 
милиционеръёс но солдатъёс. Максимлэн дӧдьыяз - райкомысь но исполкомысь 
ужасьёс. Максим соосты тодэ.
Тулыс омыр кезьыталэс-сайкыт, мылкыдэз лӧпкытэ. Дӧдьы сюлъёслэн юж 
лымы вылтӥ ӟукыртэмзы, валъёслэн соргетэмзы, чылкыт уй инбамын яркыт 
кизилиослэн ворекъямзы но та мында калыклэн кыл-куара поттытэк тодмотэм 
тайгае мынэмзы Максимлы тодаз вайытӥзы граждан ож вакытэ учырез. Соку 
но та выллемгес ик ужпум пуктӥзы вал сюрес вылэ потыкузы: тӧдьыослэн 
мышказы лушкем пырыса, гуртэз котыртоно но ваньзэс пазьгоно. Ой кыӵе 
каньыл: котыртоно но пазьгоно! Нош со верам кыл кыӵе секытэн берытскиз 
соку. Асьсэос пӧлысь ик кин ке тӧдьыослы ивор сётыны вуэм. Мар вал 
отын, мар вал!.. Кызьы пленэ ӧз сюры соку Максим - али но малпаса-
малпаса пайме. Туннэ но озьы ик луиз ке нош.. Кин тодэ, кыӵе кужым, 
кӧня адями отын?
Шунды ӝужан палась инвис югектыку, тайгаысь кышкыт интые кожон 
доры вуизы. Мар вите соосты азьпалан? Вормон, сӧсырмон яке бырон? 
Максимлэсь мылкыдзэ мукет сюлэмшугъяськон но бугыръя: "Та мында калыкез 
сюрес вылэ ӝутӥ! Нош отын нокин ке ӧвӧл? Кышкамелэн синпӧетэз гинэ ке 
вал со вужер? Мар утчаса бен ветлоз Демей шимес тайгаетӥ? Оло, со 
нюлэс коркан огшоры пӧйшурасьёс уло? Ма, мед. Кызьы-марзэ тодомы но 
ужез быроз. Только... Отын вал меда Демей? Вал! Вал! Вужер кадь ке 
но адӟиськиз, тодмай мон сое Озьы бере, али либыр-лябыр выронэз ӧвӧл 
ни. Азьлань!" 
Нюлэсэз калык вашкала дырысен турлы нимъёсын нималляз Со 
нимъёсысь адӟыны но валаны луэ адямилэсь кышкась туссэ но данъяськон 
мылкыдзэ, чеберез валамзэ но инкуазьлэн кужымезлы паймемзэ, со кужымез 
валаны тыршемзэ. Тани, учке ай: "сьӧд нюлэс", "пыдэстэм нюлэс", "улэп 
нюлэс", "шаугетӥсь нюлэс", "нюлэс бӧрдэ", "нюлэс сюдэ", "нюлэс уте", 
"нюлэс гырк", "нюлэс пыдэс"...
Тайгае пыдло но пыдло пыремъязы, Максимлэн вылтырыз юзыр-
кезьыр луыны ӧдъяз: нюлэс сярысь солы тодмо кылъёс - ӟечез-уродэз но, 
чеберез-шушез но - ваньмыз огинэ сураськыса, одӥг кӧшкемыт валанэ 
огазеяськизы. Али со умой-умой шӧдӥз: макем со пичи но ляб та 
ӝужытэсь но пеймытэз возись писпуос вӧзын.
Витьымтэ шорысь тайга шеромыны кутскиз. Кыдёкынгес адӟиськиз 
сайкем выллем инты. Максим вӧзын пукись милиционер биноклен учкиз но 
бераз мынӥсь адямиослы киыныз возьматӥз: "Дугдэ!"
Солдатъёс но милиционеръёс туж ӝог пазьгиськизы нюлэскы, юртъерез 
котыртон вылысь. Кӧня ке улыса, ыбем куара кылӥськиз. Чалмыт омыр 
сэзъялскиз, кышкам тылобурдоос юр-яр каризы, писпуосысь лымы куашказ.
Улӟиз корка но: укноосын ымныръёс адӟиськизы.
- Тӥ котыртэмын! Пумитъяськемдылэн пайдаез уз луы! - кылӥськиз 
куара.
Витьымтэ шорысь корка сиглэн укноез тылын гоманы кутскиз кадь: 
отысь пулемёт тачыртыны ӧдъяз. Котыр ласянь пыӵал куараос кылӥськизы...
* * *

Ваньмыз туж ӝог йылпумъяськиз. Дас кык кузя кыромем 
белогвардеецъёсты райцентре нуизы 
Максимез но сьӧразы ӧтизы.

* * * 
-Ура-а!.. Дышетӥсьмы висьыны усем! Ура-а! - укмысэтӥ классысь 
пиналъёс коридоре кӧжы кадь кисьтӥськизы но куаш карыса, ог-огзэс лёган 
вылысь, азбаре потӥзы. Соос пӧлын - Аннушка но Ерофей. 
Лапас улын - бадӟым вуж дӧдьы, пиналъёслэн яратонзы. Лымы пул 
кадь чурыт лёгамын. Пиналъёс дӧдьыен, кин кызьы кечырскыса, нискылтӥзы. 
Ерофей дӧдьылэн пыдэсаз шедиз. Со вылэ вылласянь зӥбо но зӥбо, лӧпшаса 
тэтчасез но вань.. Шоканэз пытсаськыса, ваземез уг ни луы, нош дӧдьы 
нискылтэ но нискылтэ, гурезьлэн пумыз-йылыз ӧвӧл, лэся. Тани дӧдьы 
дугдӥз. Пиналъёс, куаш карыса, горыса васькизы отысь. Ерошкалэн гинэ 
султэмез уг луы. Ӝутыса васькытӥзы. Лымы вылын кылле со, кӧсэктэмын.

* * *
Ерошкаез больницаысь бадӟым палатае интыязы. Отын ог дасо висисьёс 
кыллё - ваньзы сямен арлыдоос. Ерошка соос пӧлы уг сураськы. Палатаын 
нош висёнъёссы, огъя тодмооссы, дунне вылын ортчись иворъёс сярысь чик 
дугдылытэк бӧтьырто.. Куддыръя керетон калэ вуо. Ерошка тодӥз, 
кылсярысь, кыӵе умойтэм югдур азинске Япониын, нош Германиын фашистъёс 
чылкак ашкынӥллям ини: дано писательёслэсь, быдӟым тодосчиослэсь 
книгаоссэс суто, коммунистъёсты нуналлы быдэ тюрьмаосы келяло. Палатаысь 
воргоронъёсты фашистъёслэн ужзы мур малпаськонэ уськытӥз. 
- Немец асьме доры лыктыны уз ни дӥсьты, - шуиз огез воргорон. 
- Граждан ожлэн самой секыт нуналъёсаз но со мында армиосты 
пазьгыны быгатӥмы, нош али асьмеос эшшо но кужмогес. Мед гинэ 
чуртнаськозы - адӟымтэзэс адӟозы!
- Асьмелэн Сталин эшмы вань.. Со киын кужым но визь!
- Шонер! - ӵош вазизы кӧня ке куараос.
Сталин эшез данъясьёс пӧлын Ерошкалэн но куараез кылӥськиз.
- Мон но оскисько, Сталин эш государствомес утёз шуыса, - 
вераськонэ пыриськиз мукетыз воргорон. - Только вот мукетыз понна 
сюлэмы шуг: государство пушкамы туж уно на тушмонъёсмы! Районысьтымы но 
ай кылем-мылем гыжкалъёсты быдтыны ӧм быгатэ.

- Шонер, - вазе мукетыз висись. - Малпаськоды, соос нырулыса 
пукозы-а, асьме вылэ тушмон лыктӥз ке!
- Со кылем-мылем лушкем тушмонъёс - Совето властьлэн тыбыраз 
бышкалтэм пурт выллем.
- Со ик кышкыт уго, - валес вылаз пуксиз огез висись. - 
Кылӥды-а, алигес татысь, асьме районысь, белогвардеецъёслэсь шайказэс 
пазьгиллям.
- О-о! - висисез мукетъёсыз котыртӥзы.
- Тужгес но паймымонэз тани ма: со белогвардеецъёслэн лушкем 
юрттӥсьсы вылэм пичигес гинэ гуртысь воргорон. Тусызъя но, сямызъя но 
уд ик, пе, малпа, сыӵе шимес адями шуыса. Туж, пе, лякыт возе 
ассэ.
- Сыӵеос - кышкытгес...
- Ассэ кутыны вуиллямтэ, пегӟем. Уг ни, пе, шедьто.
- Кутозы!.. Котькуд сюреслэн пумыз вань.
- Мукетъёссэ кутылӥллям-а?
- Судзы вылэм-а?
- Кутылӥллям но, судзы но луоз. Асьмелэнъёс кӧня ке бырыны 
шедиллям уго... Пулемётсы вылэм, гадъёслэн. Ферма возиллям, базаръёсысь 
дунэз юри суран-пожан понна, пудо вузаса улӥллям.
Воргоронъёслэсь вераськемзэс кылзонъяз, Ерошкалэн сюлмыз пумен юнгес 
жугиськыны ӧдъяз. "Неужели, - малпа со, - али но асьме музъем вылын 
белогвардеецъёс вань на? Бен соос кемалась вормемын вал ук ини. Учкы 
вылэм, кыӵеесь соос? Туж лекесь, тушоесь, кесяськем дӥсьёсын, дыр. 
Адями сямен вераськыны но уг ни быгато, оло?.." Ух, пумиськысал ке 
соосын Ерошка, судэз витьыса ӧй улысал, интыязы ик пулемётэн ыбылысал. 
Собере сэзь синмыныз учкысал Аннушка шоры: "Во! Тонэ мон кулонлэсь 
ути". Аннушка, конечно, лыктысал со доры но ӟыгыртысал. Ерошка таӵе ик 
шӧдыны кутскиз солэсь шуныт киоссэ, адӟиз шумпотӥсь, яратӥсь синъёссэ. 
Бен, бен, яратӥсь синъёссэ! Ерошка но сое яратэ ук. Атаезлы юри ӧч 
карыса яратэ. Жугем бераз Ерошкалэн малпанэз чылкак воштӥськиз - атаез 
мурт адями луиз. "Мыным дас куать арес ини, - малпа со. - Ачиз мон 
кадь дыръяз, ӧйтӧд, ӧз яраты меда! Нош мыным уг яра шат?.. Эх, 
Аннушкаен йылпумъялом школамес но шонтом, кытчы синъёсмы адӟо. Вот 
мон лётчик луыны ке быгатысал! Нош Аннушкаез дышетӥсь карысал. Солэсь 
усто дышетӥсь пӧрмысал, дыр: сямыныз лякыт, лыдӟем материалэз валамон, 
ас кылыныз вераны быгатэ.. "Дышетӥсьлэн ужаз тужгес но кулэез - 
валэктыны быгатон," - шуэ ук Евдокия Германовна. Омырысен мон Аннушкалы 
но солэн дышетскисьёсызлы ӟырдыт салам ысъясал..."
Со нуналэ Аннушка больницае ӧз лыкты. Евдокия Германовна гинэ 
лыктӥз. Котьку сямен ческыт пыжиськем ваем. Коридоре потыса, кушетка 
вылын эк! бӧтьырто ук, бӧтьырто. Ерофей юаны возьдаськиз, малы огназ 
лыктӥз шуыса. Евдокия Германовна ачиз вераз, Аннушка, пе, уг ваньмы, 
школаын кыӵе ке вечер дася, собере ивортӥз: алигес солэн атаез вуылӥз 
но шуиз, гужем, Аннушка дышетсконзэ йылпумъям бере, пе, ас гуртазы, 
Удмуртие бертозы.
- Зэм-а? - ваземзэ ӧз шӧды Ерофей, нош Евдокия Германовна туж 
ӟеч валаз, Аннушка солы огшоры гинэ эш ӧвӧл шуыса
- Яратӥськод-а? - лачмыт юаз.
Ерофей ӵыжектӥз но йырзэ ошиз.
Евдокия Германовналы пияш сюлэмыз вӧсь луымон жаль потэ, бен со 
тодэ ни уго, кинъёсын герӟаськемын Ерофейлэн атаез, кыӵе лушкем адями 
вылэм со. Ерофейлы та секыт иворез вераны ӧз дӥсьты, жаляз.
- Тыныд азьланяз но дышетскыны кулэ, пие.
- Мон лётчике дышетскысал...
- Мылкыдыд гинэ мед луоз. Туала аръёсы малпанэд выжыкыллэсь 
кыдёкегес лобӟоз. 

* * *
Кӧня ке нунал ортчыса, Кызошуре милиция вуиз. Ваньмаз сямен 
коркаосы пыразы, юалляськизы, ӧз адӟе-а, уг тодо-а, кытын Демей 
Христофорович Поляков. Кин бен тодоз, кытын со! Вераса ӧз кошкы ук.
Демейлэсь вань улэм-вылэмзэ гожъязы. Секыт улонэзлы ӝожтӥськись та 
семьяысь зарнизэ но трос гинэ шедьтӥллям. Оло, ӧй но шедьтысалзы, дыр, 
но Демейлэн сумбрес нылыз, кышкаменыз, вылды, укно дурысь сяськаен сюй 
горшокез уськытэм. Зарни манетъёс, пол вылэ пазьгиськыса, сьӧд сюй вылын 
тыло эгыръёс кадь чилектӥллям.
Демейлэсь кышнозэ райцентре нуыны дасяськизы. Юртысьтыз поттыкузы, 
корка доразы быдэс Кызошур люкаськиз. Кыл-куаратэк, чалмыт учкыса сыло.
- Синъёстэс мар сыӵе чагады?! - кеськиз Демей кышно гуртоосыз шоры. 
- Шумпотӥськоды-а?.. Пш-шол!.. Гольык беръёс вал, гольык беръёс ик 
кылёды! Мупыр мед виялоды ваньды, нымырӟыса мед сисьмоды!
Та кылъёсыз бере, оло, музъем пилиськиз, лэся: люкаськемъёс вырӟизы, 
куаш! карыны, кесяськыны ӧдъязы. 
- Кузь гозылэн но пумыз вуоз вылэм...
- Адӟонэдлэсь уд пегӟы!
- Дасез вылын сыръямон куайыса уд ни улы!
- Милямез властьмы кужмогес ик вылэм, оведь?
Максимен Марья, вераськонэ пыриськытэк, палэнын сыло. Демей кышно 
Марья шоры синъёссэ золтыса учкиз но кужмо кеськиз:
- Тынэсьтыд, шакшылэсь, люкмес дурын лулдэ поттоно вылэм!
- Инмар мед ӵашъёз тонэ, сьӧськаб! - люкаськемъёс пӧлысь 
викышъяса Катьырна потӥз. Демей кышно доры лыктӥз но шораз сялӟиз. 
- Марьялы пумит тон лушкем сипыртыса, узатыса ветлӥд, тон, тон, 
сьӧд ӝуш!..
- Соос уго таослы мылпотэмзыя шоканы люкетӥзы, - лад-лад вераз 
огез воргорон, Марьяен Максим шоры возьматыса.
Демей юртлэсь капказэ сургучен пытсаса но нылзэ кӧня ке дырлы 
иськавынзы доры кельтыса, милиционеръёс сюрес вылэ потӥзы.
- Каргасько!.. Ваньдэс каргасько!.. - дӧдьые пуктэм Демей кышно 
гуртоосыз шоры шузимем кадь кесяське.. Солэн куараез пумен кыдёкысь но 
кыдёкысь кылӥськыны ӧдъяз, собере нюлэскысь вашкала писпуос йылэ ышиз.
Люкаськемъёс шыпак кошкизы. Вераськыны мугез ӧй ни вал.

* * *

Белогвардеецъёслэсь бандазэс пазьгем сярысь ивор быдэс шаере 
тудӟись ву сямен ӝог вӧлмиз.. ВКП(б)-лэн край комитетэз со ужпумъя 
нимысьтыз пленум ортчытӥз. "Та бандаен нюръяськон - Совето властьлэн 
вань тушмонъёсыныз нюръяськонлэн одӥгез люкетэз. Пазьгем тушмонъёс 
дуннеысь империализмлэн но Германиысь фашизмлэн юрттӥсьёсыз луо." - 
гожтэмын солэн решенияз. Тужгес но саклык висъямын валэктон ужез 
кужмоятыса, котькуд адямилэсь политикая тодонлыксэ но саклыксэ уката 
вылэ ӝутонлы.
Максим Петрович Семеновлэн патриот мылкыдын нюръяськемез сярысь 
пленумын но веразы, газетъёс, журналъёс но гожъязы.
Партилэн крайысь организациезлэн пленумез бере ваньмаз гуртъёсы 
пропагандистъёс но агитаторъёс келямын вал.
* 
* *
Кызошуре Антон Павлович но кык дышетӥсьёс-агитаторъёс лыктӥзы. Гурт 
калыкез школае люказы. Лыктӥзы ог дасо воргоронъёс гинэ. Соос но ай, 
ӧс дорын сылӥзы-сылӥзы но, нош ик юалляськонэн анӟыратозы кожаса, 
нырысь оген но кыкен, собере ваньзы кошкизы.
Лыктэмъёс коркась корка ветлоно кариськизы. Соос сьӧры Максим но 
мынӥз. Котькуд семьяын веразы, кыӵе муген лыктэмзэс, валэктӥзы, малы 
Совето власть понна нюръяськыны но сое утьыны кулэ, выль законъёс 
сярысь мадизы. Кызошуръёс оско но кадь, уг но кадь, со дыре ик 
кышканзы но ортчемын ӧвӧл на: Демей ке нош ик берытскиз? Кутэмын ӧвӧл на 
ук со!..
Демейлы пунэм тыроно семьяос гинэ мукетгес вераськыны ӧдъязы: 
колхозэ, пе, огазеяськимы ке, Демейлы ужаммы сярысь, оло, пайдаёгес 
луоз? Котьма ке но, такем ӟудыса улонэз ум ни адӟе. Таӵе огъя кылэ 
вуизы: тулыс бусы ужъёс кутскем бере, вань гыроно-кизёно музъемъёсысь 
межаосты быдтоно, музъем ужан тӥрлыкъёсты огазеяса, колхоз кылдытоно. 
Антон Павлович ю кидысэн юрттыны кыл сётӥз, вераз, табере, пе, ӵемгес 
вуыло татчы, гурт калыкез ултӥяны ум сётэ, улон-вылонды азьланяз озьы 
ик вылӥе ӝутӥськоз, кызьы быдэс странамы ӝутӥське. "Колхозын улыны 
кутскиды ке, - шуиз Антон Павлович, - нылпидэс но дышетыны, югытэ 
поттыны каньыл луоз. Нунал быдэ юртъерды борды думиськыса уд ни улэ, 
ог-огдэс ӵемгес адӟылоды, кенешылоды. Тӥляд огназ-огназ пичи хозяйствоен 
улэмды асьме государствоысь но кунгож сьӧрысь тушмонъёслэн мылкыдзыя 
гинэ луэ, малы ке шуоно, кужымды тӥляд пазямын, ваньды ас юрттэс но 
ас анаостэс гинэ адӟиськоды. Быгатод-а тушмонэз одӥг чиньыен вормыны? 
Уд. Нош вань чиньыосты огазе кырмид ке? Соку ини юн, бадӟым мыжык 
луоз. Ужды но огазеям кужымен капчигес мыноз, ултӥяны, ужам уждэс 
таланы вырисьёслы пумит сылыны но быгатоды. Малы тӥледыз Демей Поляков 
нюртыны быгатӥз? Огъя мыжыкты ӧй вал. Али тани герман, итали, япон 
калыкъёсыз нош ик асьме вылэ узато. Со узатӥсьёс, конечно, туж 
шумпотысалзы, асьме адямиос, пеперъям чиньыос сямен, пӧртэм азе 
учкысалзы ке. Пазяськем кужымдэс огазеяса, тӥ ӝоген валалоды, мар со 
огъя уж, огъя мылкыд, ог-огдэ гажан, ог-огедлы юрттон мылкыд"
Максим кылзэ Антон Павловичез но пайме: кызьы сыӵе огшоры но 
валамон вераськыны луэ бадӟым ужпумъёс сярысь? Кӧня пол со ачиз ӵапак 
та ужпумъёс сярысь ик гурт калыкеныз вераськон ӝутылӥз вал! Кӧня ке 
кылзо, кылзо но кошко яке куспазы мукет кылпум потто. Максим витьымтэ 
шорысь валаз: аслаз солэн дышетскемез ӧжытгес, соин ик визьмыз но нуны 
вись кузьда гинэ, кылыз но соин ик дыго-мого, дыр. Бен со но ӧй 
быгатысал шат вераны: шомполэн жугись белогвардеецлэсь йырзэ бадӟым 
мыжыктэк, одӥг чиньыен гинэ уд пешкыты, нош солэн малпанэз но ӧй вал, 
со банда но единоличникъёс, тужгес ик йырзэс ӝутӥсь фашизм ог-огзылы 
матын луо шуыса. Гуртоосыныз Максим мукет сямен вераськылӥз. Со шуылӥз, 
кылсярысь: "улонлэсь тӥ бере кылемын". Кыӵе улонлэсь? Бен соос мукет 
улонэз адӟылэмын шат? Соосты граждан ожлэн тулкымез но ай йыромем 
белогвардеецъёс сэрен гинэ йӧтылэм но! Колхоз сярысь малпаськыса ик 
вуиллямтэ на. Уло но уло вашкалаос сямен.
Антон Павловичез кылзыса, Максим пумен сайкам кадь луиз: "Самой 
тазьы ик уг вераськы вал шат калыкен Иван Митрошин но! Со но тазьы ик 
радъяны кутскиз вал ук колхозэз. Мон зэмзэ но янгыш вылӥськем кадь 
соку... Бен маин пӧртэм вал со вакыт кайсыос татысь кызошуръёслэсь? 
Митрошин шуэмзэ, укмысо кутэн но кышъям-пуръям штаниен коммунизм лэсьтод 
шат! Тани та вӧзам пукись воргоронлэсь сурыкмем штанизэ мон-а дӥсясал, 
мукетыз-а, коммуна лэсьтыса, вань дӥсьёсты, арбериосты огинэ ке 
люкасалмы? Нош мон мар сётысал со коммунае? Эке-ке-е... Вордӥськымтэ 
чуньы вылын ворттылӥсько вылэм ук мон!.. Колхозэз юнматыса но котькуд 
семьяез пыд йылаз йыг-йыг султытыса гинэ выль улонлы оскон кылдытыны, 
выль сям пыӵатыны кулэ вылэм ук... Кызьы ваньзэ сое Митрошин валаны 
быгатэм, нош мон ӧй? Дышетскеммы но огмында ук. Ужпум дышетскем бордын 
гинэ ӧвӧл, иське? Улонлэсь кызьы бергамзэ шӧдон-валан бордын! 
* * *
Кызошур вадьсы ӝомал лэзиськыку, тайгаын кӧшкемыт луэ: 
шаугетӥсь лысо писпуос эшшо но ӝужытэсь адӟисько, кузесь улвайёссы 
йӧспӧртэм тылобурдоослэн бурдъёссы кадь шонасько. Сыӵе дыре татысь калык 
юрт котыразгес кариське, сике туж кулэ муген гинэ пота.
Демей Христофорович Поляков вырйылын сылӥсь лабырес пужымлэсь улвайзэ 
туж чакласькыса палэнтӥз но Кызошур пала учкиз. Гуртын одӥг лул но уг 
адӟиськы. Пуныослэн одӥг-ог утэмзы гинэ кылӥське.
Демей тём-тём пеймыт луэмез возьма. Соку со арамаетӥ бызись пичи 
шур вамен пыдын ветлон сюресэ кожоз но бакча бертӥз лапас улаз пыроз. 
Отын, борд борды урдэм кошовка улын, музъеме согем дуно ватосэз вань 
- зарниез. Аслыз ачиз со сюрес бырйиз ини: зарнизэ басьтыса, Герман 
кунгож пала мыноз. Китай музъем вылын ӟуч офицеръёсын огазеяськон 
сярысь малпанэз куашказ: большевикъёс кунгожез туж юн пытсаллям! " Ма 
бен, - малпаз Демей Христофорович, - та ласянь ӧз ке пӧрмы, мукет 
ласянь эскером, зарни котькытын огкадь пиштэ..."
Винтовказэ лыс улваен но ӝуен согиз. Наганзэ но кельтыны малпа 
вал. Ӧз кельты - кисыяз понӥз, кин тодэ, оло, кулэ луоз. Пужым улысь 
потыса, шур дурысь куакъёс улэ туж ӝог бызиз. Огшап кылзӥськыса 
кыллиз. Котыр шып. Мышкысьтыз сьӧд нюлэскын гинэ уй тылобурдоос шимес 
кесясько. Тани шур вамен понэм пуӵъёс. Куке соку аслаз тырем пуӵъёсыз. 
Соос вылтӥ выль музъем позёмаз шонерак ветлоз вал. Паллян пыдыныз 
лёгиськиз гинэ но ӟукыр-р! вазиз огез пуӵ. Азьвыл но озьы ик ӟукыртэ 
вал, дыр, со, нош али Демейлэсь сюлэмзэ пуртэн зырӟиз кадь. Сисьмысагес 
но вуиз, луоз - музъемзэ Мксимлы шори вылэ сётэмез бере, татӥ Демей 
ӧз пота ни вал уго.
Тани солэн юртэз. "Ох!.." - Ас лулӟемезлэсь кышказ: кызъёс улын 
та кема ветлыса ни, зор-кот но, тӧл но ньылонзэ ӟазырес каризы, 
лулӟемез гинэ но шулась куара сётэ. - Мӧзмиды-а, мусоосы!.. - небыт 
пальпотыса учкыны выриз сайкыт инбамез согись гид, мунчо, куала 
липетъёсыз шоры. - Вите монэ, возьмалэ, ява! Оло, выльдыны кылдоз на 
тӥледыз. Люкиськонмы огдырлы гинэ луоно кадь: Герман но Японь палась 
эрик ваись тӧл пельтыны ӧдъяз, шӧдӥськоды-а, мусоосы?"
Бакча ыбес борды кутӥськиз гинэ но, витьымтэ шорысь урам вӧзысь 
кенер дурын туж шуш куараен куаньгетыса но вузыса, вӧзысьтызы 
Катьырнаослэн пунызы утыны кутскиз.. "Монэ шӧдӥз-а та? - куаляк луиз 
Демей. - Ишан азьын пуныос сыӵе йӧнтэмъясько! - пересьёслэсь верамзэс 
тодаз ваиз. - Оло мыным ишан каргаськод-а? - кисыысьтыз наганзэ поттӥз. 
- Мекалто тани, матам ке лыктӥд!.. Мар мон.. мар дауртӥсько? Быдэс гуртэз 
сайкато ук!" - наганзэ берен кисыяз донгиз но люгыос улэ лаптӥськиз. 
Пуны кужмогес ыргетыса утыны ӧдъяз. Со борды итӥськизы мукет пуныос: 
тани-тани пурыны кутскозы. 
Демей тӧл кадь лобиз кышкыт интыысь. Секыт шокаса вырйылысь солы 
гинэ тодмо лабырес пужым улэ вуиз но, пумем кадь кыллиз огшап. Собере 
котырысьтыз музъемез эскериз: татын, винтовкаез татын! "Мукет амал утчано 
ватосме басьтыны, - малпаз со. - Катьырналэн пуныезлы гинэ но мурт 
луиськем ини..."
Кышкаса жадем мугорыз туж ӝог кисальӟиз. Кыниськись синъёссэ 
вормыны ӧз ни быгаты - умме усиз.
Уйвӧтаз семьяеныз пумиськиз. Кышноез зарни ватэгзэ шедьтэм кадь 
но, Демейлы зынъятэ, ултӥяса серекъя. Собере ӵынлы пӧрмиз но зарниеныз 
валче чиптэм-чаптэм тӧлӟиз. Со куспын бус пыр кадь адӟиськиз Ерошка 
пиез. Демей со доры кыстӥське, нош пиезлэн синъёсыз вожпотонэн чиляло, 
тон, пе, тӧдьыослэн гыжкалзы! Вожомем Демей, огдышем сямыныз, борддорысь 
е басьтыса, ӟус вылэ выдтыны выре пизэ, нош соиз куал-куал бадӟым ини, 
уг сётӥськы, атаезлы пумит султэ. Пизэ вормыны быгатымтэеныз, таза 
мугоро но шуш нылзэ жугыны кутскиз вал. Со куспын... 
Со куспын вераськем куараез но уробо поглянъёслэсь ӟукыртэмзэс 
кылыса, шарак! сайказ, мугорыз золскиз. Ӝоген валаз: гурезь ултӥ сюрес 
кузя валэн мынӥсьёс вань. Улвайёс вискытӥ шунды сиос пишто. Гырпум 
вылаз ӝутӥськыса, улвай вискытӥ учкиз: лабыр гинэ вераськыса, Максимен 
Марья бусы позёмазы мыно! Пужым вадьсы вуэмъязы, вераськемзы валамон 
луиз: 
- Ваньзэ арбериез кызьы нуод, колхозлы вузаса кельтоно, - шуиз 
Максим. - Осто шу! - лулӟиз Марья. - Татчы лыктыкумы но кӧня 
ваньбур тус-тас луиз, али нош ик... Кайсы калыклэсь возьыт: Сибирьысь 
шалӟыса бертӥллям, шуозы ни... 
- Демейлэсь йырыд быгылес кылемлы шумпот, - вазиз Максим.
Демей тэтчыса султэмзэ ик ӧз шӧды. Винтовказэ кутӥз но затворзэ 
шыльк-шальк! тупатӥз. Люкетӥсь улвайёсты палэнтыса, Максимлэн йыраз 

мерта. Уробо азьлане мынэмъя, Демейлэн но мугорыз Максимлэн йырыз сьӧры 
берытске.
Улонэзлэн сӧриськемезлы вожпотонэз, семьяезлэн куашкамез, ваньбурзэ 
ыштэмез, адями син азе возьматӥськыны кышкамез, вань коммунистъёслы но 
быдэс Совето властьлы йыркурез, Кызошур гуртоосызлэн солы пумит султэмзы 
- ваньмыз, ваньмыз али люкаськиз одӥг интые - Максимлэн винтовка гумы 
йылтӥ гылӟись йыр вадьсаз. Демей али уг малпа, мертаськысал-а со, 
Максим интые мукет мурт та сюрес кузя мынысал ке. Мертаськысал, дыр: 
быдэс дунне солы пумит султэмен, сюлэмаз вожомем тылгизьыос укыргес 
уно люкаськизы ни бере!Пунэмзэ берыктыны таӵе усто луонлык кылдэмен-
а меда, оло, нош ик бадӟым йыруж матэктэмен-а, ӧйтӧд, - Демейлэн киыз 
куалекъяны ӧдъяз. Максимлэн йырыз винтовкалэн гумы йылаз туп кадь 
тэтча. Ӧчкарем кадь Катьырналэн пуныезлэн толло вузэм куараез йырсазьзэ 
поромытыны кутскиз. "Тани та йыруж лэсьтон ишанэз шӧдӥз, дыр, со. 
Озьы ке - умой!" - малпаз но... ыбиз. Ӧз йӧтты! Нош ик ыбиз. Ӧз 
йӧтты!.. Йырзэ ошыса мынӥсь вал сурак! тэтчиз но гырдалтӥз, сюрес 
вылысь сюй комокъёсты пазяса, ӵошпыд ворттыны ӧдъяз. Максимъёс вырйыл 
сьӧры ышизы.
Демей пужым борды кысмыляк ланьырскиз. "Мар дауртӥ мон!.. Малы 
кулэ вал та ыбылӥськон!.. Ватэге доры кызьы мыном на табере! Быдэс гурт 
пыд йылаз султоз!.. Мар? Сыл ай, сыл!.. Мар вераськизы соос? Кайсыязы 
бертон сярысь куаретӥзы кадь ук! Озьы ке, мынэсьтым уд пегӟы, Максим, 
сюресмы одӥг пала нуоз!.. Кырмо мон тонэ, кырмо!.."
* * *
Инвожо толэзьлэн огаз арня нуналаз, Аннушкалэн укмысэтӥ классэз 
йылпумъян азяз, райцентре анаен атаез лыктӥзы. Дуно куноосыз кадь 
пумитазы соосты Антон Павлович но Евдокия Германовна. Ӝӧк сьӧрын 
вераськыса пукыкузы, мукет комнатаысь Ерофей потӥз. Мылкыдтэггес 
ӟечъяськиз но азбаре шупчиз. Максим синйылтӥз: пияш восьмем, соин, 
вылды, азьвыллэсь но ӝужыт, векчи адӟиське.
- Туж куректэ, - шуиз Антон Павлович.- Кык арня школае ӧз ветлы. 
Калык син азьысь пегӟыны малпа вал - мырдэм буйгатӥ. Ми дорын мед 
улоз. Анай-атайёсыз понна нылпи янгыш ӧвӧл.
- Пияш жаль потэ, - лулӟиз Марья но кышет пумыныз синъёссэ 
ӵушылӥз. - Тӥ сое кызьы ке но пыд йылаз султытэ ни...
- Татын со сизьым тунгоно юртын кадь, - шуиз Максим.
- Аннушкаез яратэ пияш, - лушкемгес вераз Евдокия Германовна. - 
Шӧдӥсько но, адӟисько но. Кыксы но син азям будо ук. Усто кузпалъёс 
луысалзы.
- Озьы эн вераськы, - пумит луиз Максим, - Демей выжы ми доры 
пытьызэ но медаз кельты!
- Тынэсьтыд нош ӧз ке юалэ? - серектӥз Антон Павлович. - Табере 
егитъёсыд бызён-басьтон ласянь анай-атайёсынызы шергес кенешо ни кадь
- Ми но чик ӧм кенеше! - жинграк серектӥз Марья. - Картме мон 
ачим бырйи. Корказы пыри, дӥсен бинетме тӧр шоразы понӥ но азяз 
султыса шуи: "Мон - тынад кышноед. Пумит ӧвӧл-а?" Карт луонэ шорам 
долкаса учке. Мон нош кут но чупа! Сылмиз ведь!.. Кыкмы но ми ог-
огмес шузимымон яратӥськомы ни вылэм: со но ас пушказ возем, мон но. 
Ӝыт 

шудон пӧлы ке потӥськомы, тани та адямилы вожомыса, эк! поръясько вал 
ук арганчимы азьын. Собере учкисько но, Максиме кытын ке палэнын 
писпуэз пыкъяса сылэ ни. "Мон солы чик кулэ ӧвӧл ук!" шуыса, гадям 
мыжгаса бӧрдэме вань. Со нош чут пыдызлэсь возьдаське вылэм.
- Арганчиды но ог-огдэс валаны люкетӥз, дыр? Гуртысь арганчиос 
ведь... ой-ой... йӧлвыл сиись коӵышъёс кадесь! - мыняк потӥз Евдокия 
Германовна.
- Со милям туж матысь, ӵош будэм эшмы. Котьмар ласянь удалтэмын: 
вылтус но, тазалык но, тодон-валан но. Мон шӧдӥсько вал, со но 
Марьялы, Марья но солы синмаськемын шуыса. Озьы бере, малпалляй, мар 
мыным, чутыгейлы, соослэн куспазы пыриськонэз, сюроз ай куке соку ас 
паре.
- Мукет мурт тонэн улыны ӧй чидасал, Максим.
- Малы озьы шуиськод, Марья? - паймизы Евдокия Германовнаен Антон 
Павлович. - Таӵе лачмыт сямо адямиен кин уз улы!
Максим Петрович амалтэк серектӥз:
- Шонер вера со. Ассэ ачиз та мискинь кышномурт гомась эгыр 
вылэ пуктӥз.
- Пуктӥз но со эгырез кысыны ӧз сёты... Монтэк тонэ кысысалзы..
- Ой! Ой! Ой! - интыяз тэтчась луиз Максим.
- Паймымон адямиос тӥ! - ӵашкаяз кӧняетӥзэ меда ини чай пононъяз, 
шуиз Антон Павлович.- Валэктоды, оло, яркыт тылын гомась пиосмурт но со 
тылскемез аратыса возись кышномурт сярысь чебер выжыкылдэс?
- Радызъя ке верано, тазьы луэ со, - кузь вераськонлы дасяськыса, 
лэся, Марья пӧсям тыбырысьтыз кышетсэ артысь пукон вылэ понӥз.- Милемыз, 
гуртысьтымы огвакытэ вордӥськем вить нылпиосыз, черке чукыныны одӥг 
нуналэ пырталлям: Иванэз, Александрез, Филиппез, тани та Максимез но 
монэ. Ваньмы ми туж-туж пӧртэмесь, нош ог-огмытэк улыны ум быгатӥське 
вал, кыӵе ке валантэм кужым милемыз огинэ каре вал-а, мар-а! Школаын 
но ваньмы одӥг классын дышетскимы. Соослэсь сямзэс, йылолъёссэс, яратоно 
сиёнзэс, мар ужаны быгатэмзэс - ваньзэ-ваньзэ мон кадь тодӥсь мурт ӧй 
вал. Санька эшмы йыг-йыг сямо, дыртӥсьтэм, котькуд вамыштоно вамышез, 
котькуд верано кылыз малпамын вал кадь. Со понна мон ӧй сюлмаськылы - 
ассэ ачиз уз ышты. Но сое валасьтэмъёс но уно вал, "ас кайтаяз улӥсь" 
шуылӥзы, маке йӧспӧртэмез адӟыса, жальмамез понна.
- Сыӵеос пӧлы творческой адямиос, пе, пыро, - шуиз Антон 
Павлович. - Соды тӥляд кыӵе ке удысын туж быгатӥсь ӧвӧл-а? Суредась, 
крезьгурчи яке кылбурчи?
- О-о, гожъяськыны со быгатэ! Чебер кылъёсын гожъяськыны быгатэ. 
Инкуазьлэн буёлъёсызлэсь вошъяськемзэс ми сярысь мургес шӧдэ, - шуиз 
Максим.
- Одӥг кылын вераса, Санькады тӥляд - талант! - шуиз Евдокия 
Германовна.
- Ӧйтӧд ӧйтӧд, кыӵе ке талант сярысь малпаськон милям йырамы но 
ӧй вал, люкиськытэк ӵош будӥмы но тӥни. Нош тани Пилька эшмылэн 
лушкем куртчон, вожъяськон сямыз вал, солэсь ми утиськыны тыршылӥм. 
Иван эшмы-арганчимы вань на ай... Око-ко-о, таиз сярысь кызьы вераны 
ик паймисько.
- "Яратӥсько" шу но тӥни, - вазиз Максим.
- Эн дырты, яратон доры вуо на ай... Иван эшмы бадӟым кивалтӥсь 
луыны вордӥськемын, дыр. Монэ котьку паймытылӥз солэн котькыӵе ужез 
радъяны, котырысьтыз калыкез лӧпкытыса ужатыны быгатэмез. Гражданскойысь 
бертэммы бере, гуртамы мар гинэ выль уж ум лэсьтӥське, - ваньмыз солэн 
ӵектэмезъя. Ачиз ужаны кутске бере, ваньмыз со сьӧры кыстӥсько. Тӥни 
сыӵе адями со. 
- Верамедъя, таиз эшты кыдёке лобӟоз, - шуиз Евдокия Германовна. - 
Сыӵе адямиосыз али туж дунъяло.
- Кыӵе уло меда ини, ӧйтӧд, кусып ум возиське, - шуиз Марья.- 
Туж жаль мыным со, сюлмысьтым нокызьы но уг кошкы... Кышноез сиыса, 
кыедэн сураса быдтӥз, дыр, кадь потэ. Семья кусыпсэс радъяны но монэ 
ӧтьыло вал ук ай соос, паймод но бырод!.. Осто, кузь гозы кадь луиз 
вераськонэ... Олокытчы палэнэ кожытӥ мадёнме..Э-э, Иван Митрошинэн улыны 
ӧй быгатысал, шуыны турттӥсько вал, лэся. Тодӥськоды-а, малы? Монэ со, 
кивалтыны быгатон сямыныз, зӥбысал, косъяськыса ужатысал. Нош монэ косыса 
уд ужаты, уд! Ачим, мукет син шоры йӧтытэк, кызьы кельше, озьы ужаны 
яратӥсько. Косъяськись кулэ ӧвӧл мыным. Иванькамы милям котьма ласянь туж 
шонер адями: ныркышетсэ гинэ но, лачмыт-лачмыт бинялтыса, кисыяз нуллэ, 
огпол но погмаськем дэремен уд адӟы сое, ӧжыт гинэ саптаськем интызэ 
соку ик миськоз, ӵушылоз, чылкыт кароз. Мон сыӵе утиськыса улыны 
дышетэмын ӧвӧл бере, сюлэмы шуг луыса учкылӥ шораз. Котькуд вамыштэ 
чакласа улыны туж секыт, дыр, малпасько.
- Пичиысеныз озьы улыны дышетэм мурт ас выросъёссэ уг ни шӧды. 
Верамдыя туж чылкыт семьяын будэм уга соды тӥляд, - шуиз Евдокия 
Германовна.
- Солэн анаез, ява, коркасьтызы ползэ но, корказь пагӟаоссэ но ӵуж 
чипы кадь миськыса возиз, соос доры пырыку, амалтэк пыдкукез куштоно луэ 
вал.
- Иванька эшмес базар мунё яке миськем сяртчы дорозь ӧд вутты-а 
тон? - серектӥз Максим.
- Али тани тон сярысь верало, базар мунё но, миськем сяртчы 
но каро! Веран кылы тон вылэ вуиз.
- Асьмелы ӵуказе вазь кошконо, сюрес кузь. Ойдолэ кӧлыны выдом! 
- дыртыны ӧдъяз Максим.
- Уд пегӟы, уд! - нош ик самоварез аратӥз Евдокия Германовна. - 
Та чебер выжыкыллэн шорсюлмыз али гинэ усьтӥськыны кутске кадь ай, 
озьы-а, Марья?
- Шонер!
- Асьтэос тодӥськоды, иське, мон изьыны кошки, - интыысьтыз 
султӥз вал Максим но, Марья сое саестӥз кырмиз: 
- Пук! Аслэсьтыд кыӵедэ мон ӧй вералля на. Мар но со сярысь 
малпаськыны дырыд вуэмын. 
- Ярам. Тынад кылыдлэсь уд ортчы...
- Та шузие борды, гажано эшъёсы, сюлэмы пичи дырысеным 
лякиськемын. Ветлӥськомы табере тани дуннеез котыръяса...
- О-о, веран кылыд шузи бордысен кутске бере, мон татын мултэс, - 
шуиз Максим но нош ик султыны малпаз.
- Пук!.. Кылзы!

Максим нош ик пуксиз.
- Котькуд нылмурт, котькуд кышномурт азьпала бадӟым шудэз сярысь 
малпаське. Мон но пӧртэм ӧй вал. Син азям пуктылӥ вуоно семьяме, 
нылпиосме. Картэ одно ик тыл кадь сэзь, котькинэ утьыны быгатӥсь, 
яратонэз валась но туж каньыл сямо луыны кулэ вал.
- Одно ик мон кадь тусо но чутӥсь, - Марьялэн кыл куспаз пыриз 
Максим.
Евдокия Германовнаен Антон Павлович амалтэк серектӥзы.
- Кыӵе гинэ учырысь ӧй утьылы мон та адямиез! Пичи дыръямы, 
школаын, чумолё пыдэсэн шудыса ум дугдӥське вал. Учкисько но, Максим 
нош ик улӥяз! Ваньзэс усьтыр-табыр пазяса, пыд йылаз султытӥсько вал.. 
Огполаз ведь, ява, чумолё пыдэсын лызэктон калэ вуэм...Люкмесэ но 
усьылӥз со, писпу улвай борды но кугӟалляз со, юэн мешок улэ но 
пачкалляз! Осто быри!.. Малы меда соин артэ котьку ик мон луисько 
вылэм, паймисько! Гражданскойын сӧсырмыкуз, тӧдьыос кие сюримы ук. Ыбозы 
кожаса, мугорыным ӵоктай. Офицерзы шуэ, тон, пе, гуртад берт, нош ми 
сое бурмытомы. "Уг сёт, уд люке монэ солэсь! - Максим борды ӟыгырски. 
- Мон ке вӧзаз ӧй луы, со кулоз! - кесяськисько. - Мар косӥды, 
ваньзэ быдэсъяло, мон котьмалы быгатӥсько, эн люке монэ солэсь, эн 
люке..." Тӧдьыослэн лазаретынызы Урал гурезь сьӧрозь вуимы. Озьы ортчиз 
тӥни егит дырмы, ог-огмес валаса но валатэк. Куке Иван ми доры 
курасьёссэ ыстӥз, соку тӥни чик малпаськытэк Максимез бырйи. Мон 
тодӥсько ни вал, ми ӵошен луыны кулэ, монтэк солы секыт луоз шуыса. 
Анаез туж умой пумитаз. Одӥг кыл улӥмы соин. Табере тани палэнысь 
музъеме кельтӥськомы ни...
- Кошконо ик кариськиды-а? - юаз Антон Павлович..
- Кошком, - шуиз Максим.
- Нош мон тонэ колхозады председателе дэмланы малпасько вал. Оло, 
кылёд? Уг кельшы шат татын?
- Кельше. Татын усто! Вӧл-вӧл, тайга... Тодмоос но трос ини. 
Озьы ке но, уг кыльы, берто.
- Мугез вань-а?
- Мӧзмисько... Секыт черен висись кадь луи ни...Уйвӧтам но ас 
калыкеным вераськисько, ас шаерме адӟисько. Собере...эшъёсы азьын янгыше 
вань: колхозмылэн тужгес но секыт вакытаз соосыз куштыса кошки. Али но 
сюлэмы гыбда. Сыӵе сьӧлыкен пегаса выллем улыны уг ни быгатӥськы. Нош 
тӥледлы ваньмыз понна тау...
Ӵуказеяз куноос кошкыны дасяськизы.
* * * 
Аннушка корказе потӥз. Сюлэмыз тани-тани гадьысьтыз тэтчоз! 
Ерофейлэсь кытынзэ нокинлэсь юаны уг дӥсьты, нош адӟытэк ке кошкиз, 
быдэс улытозяз ассэ ачиз каргалож Ма кароно, кытысь сое шедьтоно?! 
Малы берпумзэ адӟиськемез уг поты?! Берпумзэ ук!
Витьымтэ шорысь гырпумаз йӧтӥськись луиз. Со!.. Ерофей! Ерошка!
- Ойдо яратоно возь выламы. Дырыд вань на-а?
- Вань!
Ваче ки кутӥськыса, бакча ыбесэтӥ бызьыса потӥзы, картофка пудъёс 
вылтӥ убоысь убое тэтчаса, вырйылысь пичигес возь вылэ вуизы, соослы 
гинэ тодмо ышыге пуксизы.
- Малы пегӟид? - Ерофейлэсь чиньыоссэ юн-юн кырмиз Аннушка. - 
Адӟытэк ке нош кошкысал!
- Мон тонэ синмыным келясал.
- Кыӵе кышкай.
- Мыным соосыдлэсь возьыт...
- Кӧня пол верай ини: тон шат янгыш?! Табере быдэс улытозяд 
астэ сюпсьыса улод-а? Ерофей... Мон мӧзмо тынэсьтыд...
- Асьмеос одно пумиськомы, Аннушка...
- Ку? Кызьы? Кытын тон луод табере?
- Кайсыяд вуэмды бере, татчы гожтэт гожтод. Отын тынад адресэд 
луоз. Со адресъя тон мынэсьтым тани та-а-а быдӟа яратонэн пачылмем 
гожтэтме басьялод! - нылашез бордаз ӝиптӥз Ерошка. - Аннушка, чупалом-а?
- М-м.. Ӧйтӧд....
- Ӧз ке пӧрмы, эн серекъя. Мынам чупаськеме ӧвӧл на...
- Мынам но... Ой, мар возьыт та!..Мар шуоз атае, адӟиз ке!
- Со асьмемыз люкыны-а турттэ?
- Уг. Солы тон туж кельшиськод. Нырысь гинэ пеперъяськиз, атаедлы 
луыса. Солэн дауртосъёсызлы мон дыши ни: нырысь кылзэ вералоз, собере 
йырыныз малпалоз. Нош чылкак шонерзэ ке тодэмед потэ, мон тазьы шуо: 
дунне вылын мынам атае кадь умой адями ӧвӧл.
- Монэ уг курла, шуид-а? Озьы бере, нош ик чупало, шумпотыса!
- Ой!... Ой... Ерофеюшка... Ой... Мар алдаськид, нырысьсэ шуыса! 
Уть, кыӵе дышемед ни чупаськыны!
- Аннушка! Яратӥсько мон тонэ! Нырысь адӟеме дырысен...
- Мон но.
- Дас классэз йылпумъяй ке, городэ дышетскыны мыно.
- Мон но. Тон лётчик луод! Омырысен мыным салам ыстылод.
- Тон дышетӥсь луод. Омыре быдэс классэныд мыным салам ыстылод.
- Асьмеос шудо луомы, Ерофеюшка!
- Малы "луомы"? Тани шудмы - киямы ини. Тон табере - мынам! 
Мон - тынад! Ӝоген, туж ӝоген валче луомы, Аннушка!..
Аннушкаен Ерофей ваньзэ верано кылзэс ог-огзылы вераса ӧз вуэ, 
азбарын кыӵе ке валантэм кыл-куара кылӥськиз.
- Асьмемыз утчало! - кушетскиз Ерофей но Аннушкаез эшшо юнгес ас 
бордаз ӝиптӥз.
- Ерофей!.. Ма, зэм но туж-туж кемалы люкиськомы-а ни табере?.. 
- ӝожмыт вазиз Аннушка.
- Нош ик пумиськоно дырмы тӧлпери кадь ортчоз. Мон тон доры 
самолетэн вуо!
- Ой!.. Лӧпыгей!..
Валантэм куараос кужмогес кылӥськизы. 
- Отын маке умойтэм кадь... - лопырскиз Ерофей. 
- Эн куареты кулэтэмзэ! - вазиз Аннушка но азбар пала учкиз. - 
Зэм... Зэм... Маке валантэм... Ойдо! 
Картофка пудъёс вылтӥ убоысь убое тэтчаса, азбаре вуизы. Учко: 
отын куинь милиционеръёс Антон Павловичен Евдокия Германовнаез уробое 
пукто. Киоссы берлань думылэмын. Максим Петрович милиционеръёслы мар ке 
валэктыны выре, соосыз сое бордысьтызы палэнто. Собере огез милиционер 
сюлэмыз сэректыса выллем шуиз:
- Со тӧдьы офицердэ адӟемед ке потэ, ойдо ми сьӧры!
- Мыно!
- Максим! - картэзлэн саесаз кырмиськиз Марья. - Эн лякиськы 
кулэтэм уже, тонтэк но ваньзэ асьсэос радъялозы. Маин янгыш Евдокия 
Германовна! Маин янгыш Антон Павлович!.. Ӧвӧл соос янгыш! Уз валалаэ-а 
мар-а тонтэк?! 
- Сыл, Марья, огпол ке но палэнскы ай бордысьтым! Оскисько, 
янгыш ӧвӧл таос, нош милициын мон ке верай, эшшо но оскозы. 
Аннушкаен Ерофеез адӟыса, Евдокия Германовна уробоысь тэтчыны малпа 
вал но, сое кужмысь интыяз пуктӥзы.
- Ерофеюшка, али тынад корка пыремед уз луы, сое замоказы. Тон 
сузэре дорын ул мон бертытозь, ява, пие. Эн кышка, ми ӝоген вуомы! 
Аннушка, мусо нылы, ӟеч берт ас музъем вылад, дышетскондэ йылпумъяд 
ке, дорамы куное лыкты, ми туж шумпотом. Ми тонэ сюлмысьтымы яратӥмы, 
тод со сярысь, мусое. Ӟеч лу!..
Максим но Марья уробое пуксизы. Вал вырӟиз но азбарысь потӥз. 
- Аннушка, Ерофей, эн ыше! Ми ӝоген вуомы, - шуиз Марья. 
* * *
НКВД-ын Максим Семеновлэн лыктэмезлы шумпотӥзы. Ӧтьытэк, пе, амалмы 
ӧй луысал, ярам, ачид вуэмед. Кема ик дыр ӧз ортчы, кабинетэ пыртӥзы 
тӧдьы офицерез. Максим сое соку ик тодмаз. Зименков но тодмаз, 
пальпотӥз но синзэ кырмыштӥз.
- Господин офицер! Евгений Васильевич! Ӟечбур! - интыысьтыз султӥз 
вал Максим но НКВД-ын ужась со шоры чурыт вазиз:
- Интыяды пуке, Семенов эш! Тӥ тодмады-а та адямиез? Зэм ик-а 
со тӧдьы офицер?
- Бен, со тӧдьы офицер, Евгений Васильевич Зименков.
- Кытын соин тодматскиды?
- Удмурт музъем вылын, мынам черкогуртам ож мыныку. Сое отын 
сӧсыртӥзы. Следователь эш, оске мыным, со Россиялэн тушмонэз ӧвӧл, 
со патриот! Таӵе адямиосын Россия данъяськыны кулэ!
- Тӥ но-а тодӥськоды та адямиез? - Марьялы вазиськиз следователь.
- Тодӥсько. 
- Тушмон-а со, ӧвӧл-а?
- Ой, кыӵе со тушмон! Со кадь йӧно адямиос уногес мед луозы 
вылэм! - лопырскиз Марья.
- Луоз-а мыным вераны? - следовательлы вазиськиз тӧдьы офицер.
- Вералэ.
- Та мусо лулъёс ог-огзылы пумит луись кык идеологиосты люкыны 
уг валало на ай. Шонер вераз Максим: мон Россиялэн адямиез. Но... 
азьвыл Россиялэн. Азьвыл идеологиез утись офицер мон Озьы бере, тӥляд 
тушмонды. Тау, тыныд, Максим, дуно эше, ваньмызлы та кыстаськонэлы 

пум понэмед понна. Мон жади ни вал, оскы мыным. Ваче вуэм тушмонъёс 
кудзы ке но одно ик вормыны кулэ. Али тӥ вормиды. Мон сётӥськисько.
Тӧдьы офицерез нуизы. Максим но Марья, мар вазьыны тодытэк, 
йырзэс ошыса пуко. Собере Максим, зуркак сайкам кадь луиз:
- Нош Антон Павлович?! Евдокия Германовна?! Соос мар понна 
арестовать каремын? Нош ик мон пум понӥ-а кыстаськонзылы?
- Соос Демей Поляковен кемалась лушкем ӵош ужало ни вылэм. 
Тайгаысь тӥляд тодмо офицердылэн гыжкалъёсыныз матысь кусып возиллям.
- Осто, мар дуннее сюримы асьмеос, Максим! - пыдес вылаз мыжганы 
ӧдъяз Марья.
- Уг оскиськы! - кеськиз Максим. - Антон Павлович - революционер! 
Быдэс лулыз-вирыз туала улонэз лэсьтонэн герӟамын. Тӥ янгышаськоды! 
Янгышаськоды! 
- Демей Поляковез но, оло, утьыны выроды? - ултӥяса кадь серем 
пыр юаз следователь.
- Нокызьы валаны ӧй быгаты мон со адямиез! Со - киысь 
вольтчись чорыг кадь.
- Шонер. Пегӟиз, луоз, Ижевске, вуж эшъёсыз доры. Ми отчы ивор 
ыстӥмы ни. Тодӥськоды-а тӥ, Демей Христофорович Поляков Иж заводын 
1918 арын тӧдьыослэн кужмынызы ӝутэм восстание пыриськемын вал шуыса? 
Нош тайгаысь тӥляд юрттэменыды пазьгем банда - Иж заводысь 
тӧдьыослэн дивизизылэн кылем-мылемъёссы. Тӥни сыӵе югдур, Максим Петрович. 
Ватытэк верасько: со бандаез пазьгыны милемлы ӧд ке юрттысалды, тӥ но 
соосын ӵош отын луысалды - кортэн дурем ӧс пала возьматӥз следователь. 
- Антон Павлович нош маин янгыш?!.. О-о!.. Уг оскиськы! - кык 
киыныз йырзэ кутыса пуке Максим.
- Тӥледын пумиськонме йылпумъясько, - шуиз следователь, кыре потон 
ӧс пала возьматыса.
Урамын, НКВД юртлэн сэрегаз султыса, Максим туж кужмо викышъяны 
кутскиз. Ассэ нокызьы но кутэмез уг ни луы.
- Максим, Максим, дугды, татӥ калык ветлэ, мар шуозы!.. - 
буйгатыны выре Марья.
- Уг оскиськы!.. Уг!.. - борддорез ӵабъя Максим. - Малы мон 
таӵе шудтэм!.. Малы улонлэн вань секытэз мынам пельпумам зӥбиське?!.. 
А?! Вера мыным, Марья!..
* 
* *
Пересь Левонь Сюгинск станция вӧзысь черкогуртэ мыныны потӥз. 
Семьяезлы вераз, отын, пе, одӥг тодмое улэ, кемалась пунэм тыронэз 
вань но, вунэтӥз-а, мар-а...
Та черкогурт кызетӥ аръёсы быдэсак сямен сутскиз. Али но тани 
умой-умой катьяськыса вуымтэ на. Черк гинэ тӧдьы мугорыныз лобӟыны 
дасяськыса кадь сылэ. Урамын калык ӧвӧл.
Левонь буш черке пыриз. Пыжись шунды шорысь пырем муртлы татын 
сайкыт, юзмыт. Левонь ӝуась сюсьтыл доры султӥз но кирос кариз. Номыр 
со-та малпаса ӧз вуы, мышказ кин ке султӥсь луиз. Берытскытэк но 
шӧдэ: 

мышкысьтыз адями туж сак учке со шоры, таӵе ик шокамез кылӥське. 
Собере Левоньлэсь саессэ каллен кыскиз но шыпыртӥз:
- Ойдо мон сьӧры.
Левонь берытскиз: бен, бен, самой со тодмоез, азьвыл солы ыжку 
нуллӥсь адями. Дӥсез туж начар, саесъёсыз чиляло, гольык пыдаз - вуж 
колошаос. Сюбег ымнырзэ шерык-турык тушез ортчыт кӧсыт возьматэ.
Левонез со адями ураме ӧтиз но артысь ураме ас дораз пыртӥз.
- Лыктод, дыр, шуыса, нуналлы быдэ черк пала ветлӥсько, тон ке 
ӧвӧл но ӧвӧл. Ме, тани, пунэмме кема воземысьтым вождэ эн вай, - 
лыдъяса, Левоньлы кагаз коньдонъёс сётӥз. - Юртмы ӝуам бере нокызьы 
катьяськыны ӧм ни быгатэ... Я, мар, кыӵе ни аслад улон-вылонэд? 
- Мар юанэз.. Ми кадьёс табере лёгамын, сэстыса куштэмын - 
нокинлы кыл эн вера, пумит эн вазьы... Сюлмы ӝуа!.. Асме кытчы карыны 
уг тодӥськы!.. Кӧня ар ортчиз ини - озьы ке но Совето власть 
шуонзылэсь быдэс мугоры шымыртӥське!.. - гадяз мыжгаса, кужмо кесяськыны 
ӧдъяз Левонь. Собере, веранзэ азинтон вылысь, мур шокчыса омыр люказ 
гинэ но, йырзэ ӝутыса ӧз вутты - тодмоеныз артэ мукет пыдъёс кылдӥзы, 
таосыз ботинкаосын. Йырзэ выллань ӝутэмъяз, пурысь костюм адӟиськыны 
ӧдъяз, собере азяз сылӥсь адями шоры учкыса, берлань сётскиз...
- Ма... ма... ма... Тон шат та?!..
- Эн паймы, Левонтей Макарыч... Тодмад, иське?
- Кытысь вуид тон, Демей?.. Ма кариськод та гуртын?..
- Эн дырты, Левонтей агай, ваньзэ радтӥз мадё. - Демей ӝӧк вылэ 
кабак аракы но мар но со куртчон ваиз..- Пукселэ, - шуиз со Левоньлы 
но коркалэн кузёезлы.
Быдэн чарка юизы. Левонь синзэ уг вошъя Демей шорысь, ма муген 
лыктэмзэ ик вунэтӥз. 
- Аръёс бугыресэсь луизы, шуиськод-а, Левонтей агай? - кыкетӥ 
чарказэ юэм бераз, вераськон мытӥз Демей. - Сюлэмыд ӝуа, иське? Хе-
хе... Тодӥськод-а, асьмеос ведь усто вузчиос луимы вал ини. Око-ко-о... 
Егит на вал мон соку...Озьы ке но, шубаостэ кытын но кызьы вузаны 
быгатылӥ. Тужгес но Ижын вожмаськыса басьяло вал. Ку посон ласянь тон 
вылӥ мастерозь вуид, ватытэк верасько. Табере ваньмыз тю-тю луиз, 
иське? Жаль, туж жаль...
- Ортчемзэ эн ни бугыръя.. - кышкаса кадь учкиз Левонь вӧзаз 
пукись тодмоез шоры но, Демей шоры но. Уг тоды уго со, кыӵе ӧре 
пыриськыса вераськоно табере Демеен, люкиськемзы дырысен лыдъянтэм аръёс 
ортчизы ни бере. Кин али со: вузчи, коммунист яке галак?. 
Корка кузё кыӵе ке муген кыре потӥз.
- Мултэс кылъёс ӧвӧл татын, ог-огмес тодӥськом, - шуиз Демей.
- Кемалы-а вуид?
- Украина пала командировкае мынӥсько. Татчы дугдылытэк ӧй чида. 
Сюлэм ас музъем вылэ кыскиз.
- Озьыез озьы но... Умой ужен ветлӥсь адями ӧвӧл кадь тон, 
Демей, сюлмы шӧдэ...
- Пересь сюлмыд мыдланьгес шӧдыны кутскиз ни, дыр... - 
пычкиськыса серектӥз Демей но Левоньлэн восьтэт пельпумаз секыт кизэ 
понӥз. Соиз амалтэк кырыжтӥськиз.
- Кин тон али? Черкен герӟаськыса ужась-а, мар-а?
- Мар мыным черк! Солэн данэз пыд улэ лёгамын. Малы мон татын, 
шуиськод-а? Та вӧсяськись эше доры шутэтскыны гинэ куриськи. Ог 
лыктэмен, Кайсы гуртады вуылыны но муге вал - Максимен пумиськыны. 
Солэн мыным пунэм тыронэз вань...
- Максим?... Пунэм?... Бен Максим Сибыре кошкемын ук! Отын улэ ук 
со! Кыӵе пунэмез луоз солэн тыныд?..
- Вань уго, ва-ань! - нёртӥз Демей.- Ми, пе, Кайсы гуртамы 
бертӥськомы, отчы вуыны быгатӥд ке, туж шумпотомы, шуиз. Али тани сое 
шумпоттыны мылкыды кылдӥз.
- Со Сибырын, шуисько, ук! Кытысь тон тодод солэсь бертон 
эсэпсэ?.. - чылкак паймыса пуке Левонь. 
- Э-э... ма... ӧй вера шат, ми соин одӥг гуртын лул-гажан 
иськавынъёс кадь улӥмы шуыса?
- Сибырын-а?! - эшшо но абдраз Левонь.
- Отын, отын, Левонтей агай.
- Ма... тон Ижын улӥсь ӧвӧл шат?
- О-о, Левонтей агай, со дырысен дуннеед мынам мугоры кадь 
вошъяськиз ини: я тазамиз, я восьмиз, я чебер луиз, я кисырмиз...
- Кильтыръяськыса вераськонэд гинэ воштӥськымтэ... - серем пыр 
вераз Левонь.
- Тынэсьтыд ватыны мугез ӧвӧл, Левонтей агай: асьмеос кемалась 
одӥг гердэ биниськемын.
- Кыӵе герд сярысь вераськиськод? Нокыӵе гердэз уг тодӥськы, 
нокуд ласянь асьмелэн кусыпмы ӧвӧл!
- Вань, Левонтей агай, вань!.. Тынад шубаосыд кинэ шунтӥзы 
кожаськод граждан ож вакытэ?
- Уг тодӥськы, тодэме но уг пот!
- Нош мон тодыто! Аслад тыршеменыд тон Ижысь тӧдьыослы юрттӥд, 
тынад шубаосыд соослэсь мугорзэс шунтӥзы, валад-а? Уноезлы офицеръёслы со 
шубаосыд Китай границаез но выжыны юрттӥзы. Нош мон Сибырысь удмурьтъёс 
пӧлы кугӟаса кылёно луи. Мукет кышно шедьтӥ. Тайгаын, калык синлэсь 
палэнын, ачид валаны кулэ, улыны каньылгес. 
- Озьы ик малпай, тон галак шуыса? 
- Ӧвӧл, мон галак ӧвӧл, мон зэмлык понна нюръяськем адями, ас 
шаерме горд черлэсь утьыны тырши. Милемыз со гольык беръёс, 
коммунистъёслэн бурд улазы кариськыса, ӝиптӥзы, сыскизы, ужаса-тыршыса 
поттэм ваньбурмес таласа, тонэ сямен ик, пыд улазы лёгазы!..
- Уг оскиськы мон тыныд, Демей!
- Макимедлы оскод, иське, со ӝоген бертоз...Вералоз, кызьы колхоз 
кылдытӥз, нош ачиз тайгаетӥ калгись тӧдьы офицеръёсын та властьтылы 
пумит лушкем нюръяськиз... Быгатыса ужа соды тӥляд, котькытчы вуттӥське, 
котькытын сое ушъяло!
- Умойтэм иворен лыктэмед, Демей!.. Мынам тонэн одӥг кыл 
кариськеме уг поты. Ӟеч лу, мон кошки.
- Уд, уд кошкы. Озьы гинэ мон тонэ уг лэзьы!
- Мар малпад, вера.
- Мыным коньдон кулэ. Уно коньдон!
- Монэ мунчое улыны кельтӥзы, тодӥськод-а тон сое?!
- Мунчоын улэмед - синпӧет. Зарниед кӧня мешокен ватэмын?
- Осто, Инмаре-куазе, мар вераськон та?! Луысал ке но, сое мон 
тыныд ӧй сётысал! Кин тон мыным? А?
- Дугды зулемысь! Вераськонмылэн йылыз-пумыз таӵе луоз: туннэен-
ӵуказеен Сибырысь Максим бертоз. Тон солы вералод,Демей пунэм тырондэ 
дасяны косӥз шуыса. Тон но зарниен одӥгзэ мешоктэ кыре поттоно луод. 
Тӥ доры мон тани та юрт кузёез ысто. Эн берланьяськы только, мон 
лӧпшаны уг яратӥськы... 

* * *
Кайсы черкогуртын Демей Поляков сярысь лушкем вераськонъёс вӧлмизы: 
со, пе, утёд ке, ява, берло аръёссэ чик но Ижын улымтэ ук, тӧдьыос 
палан ожмаськемез понна кутэмзылэсь кышкаса, кытын ке тайга нюлэсъёсын 
пегаса ветлэм. Пегаса ветлонъяз, пе, кыромем, галаклы пӧрмем но табере 
тани Кайсы ёросэтӥ поръя, кинлэсь ке юртсэ тазатыны, пе, малпа.
Демей Поляковез тодӥсьёс шуэрскизы: соку ик Левонез качаса 
воземзэ, жугиськемзэ, алдаськемзэ, егит кышноос котыртӥ гожеръямзэ, Отяез 
сьӧраз нуллэмзэ тодазы ваизы. Отяез, ӧйтӧд, ачиз уллям-а, Отя со 
дорысь кошкем-а, умой-умлй тодӥсь ӧвӧл.
Демей сярысь вераськон Самар Пилькалэн но пеляз кылӥськиз. Пӧртэм 
учырысь аслыз кыӵе ке пайда утчаны дышем мурт, таяз радэ мылкыдыз 
эшшо но бугырскиз. Со вакытэ омырын лӧсъяське ни вал кыкетӥез бадӟым 
ож сярысь вераськон, соин валче котькуд сэрегысь, котькуд верам кылысь, 
котькуд лэсьтэм ужысь шедьтыны тыршылӥзы фашистъёсын лушкем ыстэм 
шпионъёслэсь кибервылзэс. "Тушмон уг кӧлы, со сьӧд ужзэ туж чакласькыса 
быдэсъя, соин ик сак улоно, мултэс вераськоно ӧвӧл. Тушмон тужгес но 
яратэ кузь кыло адямиосты, сыӵеос борды лякиськыны тырше," - вераллязы 
пропагандистъёс, гожъязы газетъёс но журналъёс, та выллем кылъёс 
ӵукнаысен ӝытозь радио пыр чузъяськылӥзы. 
Самар Пилька, ӵукна уже мыныкуз, ӵем дыръя Митрошинъёс доры пыре, 
собере соос Иванькаен конторае ӵош вамышто. Туннэ но пыроно кариськиз, 
дорысьтыз ӧжытак бере кыльыса ке но потӥз вал. Бере кылёнэзлэн мугез 
таӵе: солы, Иванька ӧвӧл дыръя, одно ик Любаен вераськоно.
Пыриз, ӟечбуръяськиз, шуиз "Туж жаль, Иванька кошкыса вуэм, дырме 
ӧй чакла туннэ". Люба лачмыт сямо, мылкыдэз лӧпкытыса вераськись 
бригадирез котьку умой пумита.. Али эшшо но лӧптӥз: солэн та осконо 
адямилы верано кылыз туж уно люкаськиз ини..
- Макем усто, макем усто! - чечег кадь поръя Пилька котыртӥ. - 
Монэ та гуртын нокин но уг вала, кинэн ке лулысь-сюлмысь вераськеме 
ик вунӥз ини. Кызьы шӧдӥсько, Иванэлэн тон сяна йӧно эшез но ӧвӧл, 
мукетъёс ваньзы курды-кардыос!
- Таки ӧз тупа ни-а улонды? Вождэ эн вай, семья куспады 
пыриськон муген уг юаськы.
- Тау юамедлы! Одӥг муртлэн коть йыраз лыктӥз, та сярысь 
вераськыны. Мон пыжи но ни, сисьми но ни со вӧзын, тодэмед ке 
потэ... - викыштӥз Люба. - Ой, кытчы сюри мон, ой, кинэн улыны кылдӥз 
мыным! О-о-ой!

- Тыныд, оло, калык пӧлы ужаны потоно? - дӥсьтытэкгес вераз 
Пилька. - Калык пӧлын сюлэмыд ырак луоз, оло?
- Мар ужалом мон! Юрт куспын, бакчаын ужаса, киосы тани кыӵеесь 
ини! Кыедын бугыръяськыны косӥськод, оло? Эн но малпа! Кин зынӟем, со 
ик отын мед зынӟоз. Мар понна председательлы бызи? 
- Озьыез озьы но... Ӧжытак тӧлатӥськыса но умой луысал, дыр, 
шуисько... Мар люкетэгес кадь семьядэс юнматыны, ачид валаса вуттӥд-а ни, 
Люба?
- Кемалась синмы усьтӥськемын! Уг тодӥськы-а мар-а, али со кинэн 
костаське?!
- Нош ик-а? Ма,,, Марьяез татын дыръя, сое янгыш кариськод вал 
кадь ук но...
- Эн чеберъяськы мон азьын! Тон ваньзэ тодӥськод, ваньзэ, куашкам 
бер! Юри ватыса возиськод!
- Сое чакласа уг ветлӥськы. "Куашкам бер" шуэмедлы йырме кур 
карисько но тонэн уг ни вераськиськы! Ӟеч лу! - ӧс пала вамыштӥз 
Самар Пилька. Со тодӥз: али со Любалы туж кулэ адями, озьы гинэ 
кошкыны уз лэзь. Шонер малпам: Люба суй бордаз ӝабырскиз.
- Сыл ай! Эн кошкы! Вождэ эн вай, вераськон йылолы сыӵе...
- Тодӥсько, вераськон йылолдэ тодӥсько... Чидад ке чидад, ӧд ке 
ӧд.
- Пилька, мусое, ӧвӧл-а тынад тодмо туно-пеллёед? Йырзэ берыктоно 
вал шакшы Иванлэсь!
- Шакшы бере со, люкиськы но тӥни, мар йырзэ берыкъяса улонэз! 
Тон миськем сяртчы кадьзэ шедьтод ай.
- Зэм-а? Осто!.. Ой, возьытэ вуттӥд... Тани, чиньы йылъёсы ик 
ӵыжектӥзы...
- Э-э... М-м... Кинэн нош ик костаське, шуид, Иванэд? Малы 
мон уг тодӥськы?
- Осто! Ма... парсь сюдӥсь Веркаен азэмын ук! Со домбылё 
шырен!.. Ӝыт ке бертэ, котыраз парсь зынын шоканы уг луы. Тон 
бордысь тани одеколонэн паке, ой кыӵе ческыт... Тройной-а?..
- Хы! Аслым но тройной кельшегес. Я, я, сэре... Со Верка 
бордысь палэнтыны туно-пеллё кулэ-а мар-а?
- Вот уго!
- Иванькаедлэсь йырзэ берыктоно ӧвӧл, сое мукет сямен визьмано, 
валад-а? Кудрявцевен кыкназылэсь быжзэс купыртоно!
- Иван сярысь ачим но озьы малпасько уго но, радзэ уггес 
валаськы. Горей Микаез нош малы?
- Одӥг тэркыысь ӵош сиисьёс соос! Кызьы пызьыртыны валэктысал, 
дыр, но, аслыд уггес оскиськы: кылдэ кутыны уд быгаты кадь потэ. Та 
чебер мугордэ тюрьмаын ке сисьтӥд, ой!.. Тодӥськод, дыр, ини, кызьы 
шуиз Сталин эш? Со шуиз: "Кузь кыло адямиос - асьмелэн нырысь 
тушмонъёсмы. Соосты ваньзэс выжыеныз пороно!" Сётӥськод-а кылдэ, нокинлы 
уд куареты шуыса?
- Ме, али ик чиньыме ӵог! Ӧвӧл, ӧвӧл, - кыксэ ӵог!
- Кылдэ ӧд ке куты, мукетъёс ӵогозы, мар мон тынад чиньыеныд 
асме виресь каром! Кулэез вань!
- Я, дышеты, мар кароно.

- Кылэмед вань-а Демей Христофорович Поляков сярысь?
- Вань. 
- Кызьы тодӥськод сое?
- Ма... Иванькаослэн куд ласянь ке но роднязы, лэся, со. Азьвыл 
ӵем гинэ вуылэ, пе, вал, али уг ни ветлы. Мынам аслам сое адӟеме 
ӧвӧл.
- Медад но адӟы! Со - преступник, Германиысь фашистъёслэн шпионзы. 
Али, пе, кытын ке Кайсы черкогурт котырын гожеръя. Советъёслэн но 
колхозъёслэн тӧроосынызы кусып тупатыны тырше, лэся, туала властез 
пушласянь куашкатон понна. Кин тодэ, Иванькаеныд но Горей Микаен, оло, 
кемалась пумиськыло ни соос.
- Тон монэ кышкатӥськод!.. 
- Медад кышка шуыса верасько ук. Тодэмед ке потэ, Горей Мика со 
Веркаедлэсь кышкытгес адями. Со - сельсоветэн кивалтэ, интыысь Совето 
власть со киын! Мар со Верка! Хы! Дэрем сӧзызэ ӝутказ но ужез быриз, 
Иванькаед нош ик тонэн артэ! Нош Горей Мика, олокытӥ но ветлыса волям 
адями, Иванькадэ кыӵе ке бадӟым лушкем уже кыскоз но - тю-тю, тон 
огнад кылид! Валаськод-а, мар верамме?
- Иванькаез мон нокинлы уг сёт! Шузимымон яратэменым вань 
кышноос со котырын бергало кадь потэ!
- Вот соин ик верасько: сое ас вӧзад возён понна, НКВД-е мыныса, 
ивортыны кулэ. " Мынам Иванькае Михаил Григорьевич Кудрявцевен ӵош 
ӝытлы быдэ кытчы ке ышыло. Тӧдьыосын ӵош ожмаськем роднязы - Демей 
Христофорович Поляков та пала вуэм, лэся, но, соин пумиськыло, дыр, 
кадь потэ" шуид ке, оскод оло уд, Иванькаед соку ик котмем курег кадь 
востэм луоз, вӧзысьтыд уз кошкылы ни.. 
- Сэре? Ӧйтӧд, кылзӥськоз меда Иванька со НЫКЫВЫДЫ-едлэсь?
- Сое сыӵе-сыӵе пызьыртозы - парсь сюдӥсь Верказэ соку ик 
вунэтоз.
- Ой, зэм-а?! Демей сярысь гинэ вералом-а, зынӟем Веркалэсь но 
нимзэ поттылом-а?
- НКВД-лы Веркаед кулэ уз луы. Соослы Демей кулэ! Во! Демей но 
соин герӟаськем Кудрявцев но Иванька.
- Я, иське... Мыно мон НЫКЫВЫДЫ-е.
- Кыл кутон ласянь мар шуи?
- Эн сюлмаськы! Верай ук ини, ый, домбылё!
* * *
Демей сярысь шыпыт вераськонэз Отя но кылӥз. Солэн сюлэмыз шуг 
луиз Санька понна. Колхозысь парторганизацилэн секретарез луэ бере, 
Демей пумысен нырысь ик сое кыскалозы, малпаз со.
Пересь Левоньлы Санька ласяньсюлэмшугзэ вераз. Собере шуиз:
- Кытын пумиськылӥд таяз радэ, Чумолё гуртын ик-а?
- Малы тыныд со кулэ?
- Та ёросысь али ик тӧл кадь пегӟыны косо, НЫКЫВЫДЫ-ёс пытьыдэ 
зынъяллям, шуо.
- Соку ик мон вылэ малпалоз, мон чагиськи, шуоз!
- Быдэс гурт тодэ ини, шуо. Тон сяна, сое адӟем мурт ӧвӧл 
шат!
- Соиз но шонер. Ветлы, иське. Али со Сюгинск палась черко 
гуртын. Мынам чырты выжыям вуиз ини, сьӧд чер! Нош ик коньдон 
куре. Кин со мыным, кытысь солы коньдон шедьтом, аслым но уг тырмы 
бере!
* 
* *
Отя Сюгинск станция вӧзысь черкогуртэ вуиз. Черкын вӧсяськем 
нерге сылӥз огшап, сюсьтыл но ӝуатӥз. Кӧня ке улыса, со вӧзы Демей 
султӥз.
- Тон тодмантэм воштӥськемед, Отя, - пальпотыса сипыртӥз - 
Егитгес но луэмед кадь, дӥсед но чебер, тусыд но...
- Гольтыръяса улыны дырмы ӧвӧл. Тон вадьсы туж кышкыт сьӧд 
пилем лэзиськемын. Быдэс Кайсы ёрос тодэ ни.
- Ойдо кыре!
Ураме потӥзы.
- Татын кема сылоно ӧвӧл. Тонэ но, монэ но тодмасьёс сюрозы, - 
котыр утчаське Отя.
- Мар луиз, вера ӝоггес! - кушетскиз Демей. - Мае быдэс Кайсы 
ёрос тодэ, шуиськод?
- Ма, марым... Сюгинск станция котыре тӧдьыос палан ожмаськем 
убиръёс каръяськиллям, шуо. Кивалтӥсьсы, пе, - тон. Ӝоггес пегӟы - 
беда!..
* 
* *
Отялэн иворез Демеез ӧжыт гинэ пыд йылысьтыз ӧз погырты. Со 
нуналэ ик юрт кузёзэ Кайсы черкогуртэ Левонь доры ыстӥз. Куазь ӝомаку 
вуиз соиз отчы. Левонь юрт куспаз ма но со лэсьтэм карыса берга вал. 
Тодмоезлэсь бакча ыбестӥ пыремзэ адӟыса, куалектэменыз сылмем кадь луиз 
но малпаз: "Таид огшоры ветлӥсь ӧвӧл..."
- Ужано ужед азинлыко мед луоз! - ӟечъяськем карыса вазиз лыктэм 
мурт, нош ачиз лушкаськись мурт кадь утчаське. - Ӧжытак ваньмытӥськы 
ай, вераськон вань.
- Ойдо корка пыром, сюрес вылысь, оло, куртчемед но потэ.
- Бӧрысь куно карод...
Ыбес сьӧры потӥзы но картофка пудъёс пӧлтӥ бакча пуме вуизы. 
Отын, читыр-чутыр бызись пичи шур дурын, пыш чӧлтон тыос сыръяса пуко. 
Левоньлэн сюлмыз, маке умойтэмез шӧдыса, зуркак луиз но пыдес синъёсыз 
лябӟизы. "Пунэм тыроно" адямиезлэн котыр утчаськемез шимес суредлы 
кельшыны ӧдъяз. Левонь тодмоезлэсь берегес кылиз но, зӥрак 
берытскыса, юрт палаз бызьыны ӧдъяз. Кӧня ке пол тэтчыса, куноез сое 
сутӥз, погыртӥз... Со куспын чус омырез туж кужмо но кӧшкемыт куара 
пильыса кадь лэзиз. Ӧжыт улыса, нош ик куара кылӥськиз, таяз 
ӟазыресгес. "Эн виы!.." - лӧсъяськиз ёросэ.
Оло куараез-а кылыса, оло маке умойтэмзэ-а сюлмыныз шӧдыса, 
Левоньлэн кенэз азбаре туж ӝог потӥз. "Атаймы али гинэ татын ма но 
со лэсьтэм карыса берга вал кадь но, кытчы бен кариськиз?.. Бакча ыбес 
пась - отчы потӥз шат?.." Бакчае учкиз но кӧшкемыт суредэз адӟиз: 
картофка пудъёс пӧлын адямиос погыллясько. Самой соку со "эн виы!" 
куараез кылӥз. Шулӟектыса кадь ураме потӥз но, кӧня кужмыз вань, 
кесяськыны ӧдъяз:
- Караул!.. Виё!..
Бектэр нюк йылэ ӝыт шудонэ люкаськем егитъёс бызьыса вуизы.
- Отын, отын... бакчаын... - Левоньлэн кенэз киыныз ыбес шоры 
возьматӥз но корказь выжыязы ланьырак лэзиськиз.
Егитъёс шур дурысь арама пала бызись тодмотэм мурт сьӧры 
уиськизы . Туж ӝог кутӥзы сое...
- Демейлэн ужез ук та! - шуэрскиз Отя, Кайсыын огыр-бугыр 
дауртэмез адӟыса но кышкам калыклэсь вераськемзэс кылзыса. - Со кырмем 
адями ассэ утён понна Демей вылэ уз чагиськы кожаськод-а!..
Отя тӧл кадь ширтӥз Демей доры. Пумиськизы. Дыртэменыз, верано 
кылъёссэ ньылылэ:
- Пегӟы!.. Али ик пегӟы татысь!.. Левонь агаез виыны лэзем мурттэ 
кутӥзы... Чагиськоз со тон вылэ... Пегӟы!..
- Мын берт. Асьмеос ум ни адӟиське... - Демей Христофорович 
Поляков син куспын вужер кадь кытчы ке ышиз.
* * *
Удмурт шаерын гужемлэн тужгес чебер дырыз - тулыс бусы ужъёс бырем 
бере но турнаны потэмлэсь азьло. Тӥни та ужъёс вискын, огаз арня 
нуналэ, кайсыос Чебер нюк дорысьтызы Бадӟым арамаын "Гырон быдтон" 
праздник ортчытӥзы.
"Гырон быдтон" - Кайсыысь удмуртъёслэн вашкала дырысь шулдыр 
нуналзы. Кизем ю но мерттэм емыш мед удалтозы шуыса, быдэс гурт нырысь 
вӧсяськоз, собере, юри та нуналлы сӥзьыса, така вандозы, бадӟым 
пуртыосын выль шыд, ӝук пӧзьтозы, котырак пуксьыса сиськозы но бер 
ӝытозь шулдыръяськозы вылэм. Соку бен, инвожо толэзе, ӝытэн ӵук ог-
огзылы мыняло уго, шунды пуксемез но ӟардэмез валаны ик уг луы. 
Колхозлэн председателез Иван Митрошин но партийной организацилэн 
секретарез Александр Копаров та праздникез выль сямен ортчытыны 
малпазы. Вӧсяськонэз палэнтӥзы, со интые митинг ортчытоно, шуизы. 
Праздниклэсь пӧртэм люкетъёссэ-ёзъёссэ дасяны нимысьтыз адямиосты 
бырйизы. Шуом, ужын азьмынӥсьёслэн суредъёсынызы "вож урамез" дася Санька 
Копаров, со умой суреданы быгатэ. Концерт дасяны Самар Пилька ачиз 
куриськиз: кылемаз концерт бере, пе, клубе ветлӥсь нылъёс солэсь уг ни 
люкисько. Сиён пӧзьтӥсьёс, шудон-шулдыръяськон инты тупатӥсьёс но нимаз-
нимаз адямиос вал..
Чебер дӥсяськем Кайсы калык Бадӟым арамае кыстӥськиз.
Ӵукна дас час. Праздникез усьтӥз Иван Митрошин. Арган марш гурез 
шудыны кутскиз но ӝужыт юбо йылэ ӝутскиз горд флаг - праздник 
усьтэмын!..
Председатель мадиз берло аръёсы колхозлэн вамышъёсыз, туэ тулыс 
бусы ужъёслэн мынэмзы сярысь, умой ужасьёслэсь нимъёссэс вераз. Дуннеысь 
улон-вылон сярысь мадьыкуз, фашизмлэсь кышкаса улыны уг яра шуиз, 
Германиен, пе, договормы вань, нош марысь-мар ке, кужыммы бадӟым, эрико 
улонмес зӥбыны ум сётэ.
Гурт калыкез сярысь шуныт кылъёс вераз сельсоветлэн тӧроез Михаил 
Григорьевич Кудряыцев.
Ма гинэ дасяллямтэ праздниклы! Радэн-радэн юнматэм суредъёсысь 
уноез адямиос, асьсэдыз тодмаса, паймо, шумпото, серекъяло. Тани Отя, 
скал кыскись, йӧлын бидонъёссэ пар вал карыса уробое кыткем но, тузон 
пурӟытыса, маслозаводэ ширтэ. Мукетызлэн кышномуртлэн етӥн аньыос пӧлысь 
ымнырыз гинэ адӟиське - сыӵе ӟеч етӥн будэтэ, пе, со. Ваньмызлы кельшиз 
трактористэз возьматӥсь суред: одӥг киыныз рулез бергатэ, мукет 
кияз - пыӵал: "Эн дӥсьтэ, тушмонъёс, ми вылэ урдӥськыны! Ми - ужась 
калык, нош лыктӥды ке, пумитаны дась!"
Кӧня ке дыр ортчыса, Самар Пилька ялӥз: "Концерт!"
Быгатэ, быгатэ Пилька концерт дасяны: эктӥсьёсыз поръяло, 
кырӟасьёсыз гурлало, ачиз со кырӟаны-эктыны уггес пӧрмыты ке но. Иван 
Митрошин нош, Иван Митрошин мар малпам, воксё паймод но бырод: кык 
лулпуос вискы гозы кыскыса, ӝынӥнья, пыдэсаз но тыраз вуэн полыштоп 
посудаосты ошылӥз но соос борды пу пуньыен йыгаса, кутскиз ук чебер 
гуръёс шудыны! Йырад но ведь лыктыны кулэ!.. Мукет интые люкаськемъёс 
гур-р! серекъяло, мешокен бызьылӥсьёс шоры учко
Чебер нюк дорысь Бадӟым арама вадьсын ӵукнаозь лӧсъяськиз 
шулдыръяськем, кырӟам куара.
Ыркыт тӧл ӟардӥсь инвис палась люкен-люкен гылӟись бабылес 
пилемъёсты Сизьгурт бамал сьӧры улляз но быдэс инбам чылкыт миськем 
лыз шобретлы кельшыны ӧдъяз.
Михаил Григорьевич Кудрявцев но Иван Митрошин, люкиськыны ӵыдытэк, 
Митрошинъёслэн капка азьысьтызы скамья вылын, пал кыл но вератэк, ӵук 
инбамлэсь вошъяськемзэ паймыса учкыса пуко. Соослэн пель сьӧразы али 
но жингырто на чебер удмурт кырӟанъёс.
Шудэн пачылмем мылкыдзы я али, я вуоно улонэ вуттэ, я 
колхоззылэн нырысь вамышъёсыз сярысь малпаськытэ.
Колхозъёс кылдон аръёсыз Митрошин малы ке тулыс йӧ вырӟон вакытэн 
ӵошатэ. Соку уго вырйылъёсысь но нюкъёсысь шаугетыса бызись тудву, 
бадӟым кужым люкаса, йӧэз тӥя, поръя, бугыръяське - азьлане дыртэ. Вань 
крестьян калыкез колхозъёсы кужмысь огазеян но чылкак со выллем ӧй 
вал шат! 
Иванькалэсь мар сярысь малпамзэ валаса выллем, Горей Мика шуиз:
- Паймымон вакытэ улӥськомы асьмеос, егит эше! Гуртын улӥсьёслэсь 
дауръёсын кылдэм йылолъёссэс тӥянэ пыриськимы, улон шоры выль синмын 
учкыны дышетскиськомы.
* * *
Бен, выль улонлэн тудвуэз межаосты, бусы кенеръёсты жуг-жагез 
выллем гылтӥз, вуж сямъёсты, ассэ адямиез воштӥз.
Нош со дыре ик мукетыз но йырысь уг кошкы: выль улонлэн поръясь 
кужымез жуг-жаген ӵош адямиос куспын кылдэм умой сямъёсты, ужан 
амалъёсты но нымыляк нюлӥз. Адями малпаськемысь дугдӥз, "кызьы косӥзы, 
озьы лэсьто", шуыны ӧдъяз, кивалтӥсьёслэн йырзы умойгес, пе, ужа. 
Озьы ке но, адями адямиен ик кыле. Куд-огезлэн жуг-жаген 
согиськем малпанъёсыз но сямъёсыз сыӵе мур пыӵамын, соосты 
огкутскемен гинэ уд гылты. Валады, дыр, кин сярысь верасько. Бен, бен 
Люба сярысь!
Колхоз председательлэн кышноезлэн иворез Кайсыысь кивалтӥсь но 
утись органъёсын ужасьёсты вераны луонтэм паймытӥз, мур малпаськонэ 
уськытӥз. Унозэ лэсьтэм ужъёссэс туж дыртыса, выльысь эскероно луизы, 
нош Левонез виён учыр чылкак мукет ӧре кожытӥз. Та дырозь Михаил 
Кудрявцев но Иван Митрошин кышкыт тушмонэн - Демей Поляковен герӟаськыса, 
лушкем террористической группа кылдытӥллям шуыса малпась но ӧй вал. Соослэн 
ужазы векчиесь шекъёс вал, кинлэн со уг луылы. Нош 

таиз!.. Азьвыл белогвардеецен, фашистъёслы юрттӥськись преступникен 
Демей Поляковен лушкем кусып возён - таиз ини партилэн райкомезлы но, 
Советъёслэн исполкомзылы но, НКВД-лы но пель дӥнязы салем кадь ивор 
луиз! Малпаны но кулэ ук: интыысь Советъёс но колхозъёс пыр 
фашизмлэн гыжкалъёсыз удмурт калык пӧлы кизэс лэзьыны кутскиллям! 

* * *
Выль нунал вордӥськыку, Митрошинъёслэн капка азязы ас шудазы 
пыласькыса пукись Михаил Кудрявцевез но Иван Митрошинэз НКВД-ысь 
лыктэмъёс арестовать каризы.

* * *
Гужемлэн шораз, вераны луонтэм шулдыр, шундыё нуналэ Сибирьысь 
Москвае мынӥсь поезд Максим Петрович Семеновлэсь семьязэ Сюгинск 
станцие вуттӥз.
Дӥськутсы уно ӧй вал, кӧня ке бинет гинэ. Вокзал вӧзысь писпу 
улэ ӝоктӥськем беразы, семьязэ со писпу улэ ик кельтыса, Максим 
Петрович Кайсые нуись сюрес вылэ подвод утчаны потӥз. Гужемлэн та 
вакытаз, синмез усьтыны луонтэм тузон пурӟытыса, сюрес вылтӥ валэн, 
машинаен, велосипедэн ветлӥсьёслэн лыдзы вистэм-вожтэм луоз вал азьвыл.
Туннэ малы ке шыпак. "Арня нунал, соин шат меда ? - малпаз гинэ 
но, вадесаз буш уробоен валэн воргорон дугдӥз.
- Кытчы мынӥсь? - юаз.
- Кайсые! - шумпотэмзэ ватытэк лӧптӥз Максим.
- Пуксьы. Ачим мон Мукшурысь. Эш луод.
Максимлы валэктытэк ӧйлась вокзалын подвод возьмаса пукись 
семьяез сярысь. Мукшурысь воргорон соосыз басьтыны соглаш луиз.
Эх, мӧзмем сюлэм, вордскем дунне!.. 
Палэнын кемагес улэм мурт гинэ валалоз, мар со ас шаереныд 
пумиськон. Уробо берын пукись нылъёсыз куспазы ӟольгыриос сямен 
ӟабыльто, соослы Сибирь-а, Кайсы-а - одӥг дунне, шӧдске, сюрес дурысь 
тодмо вукыремъёс но, пичиесь арамаос но, кисьмась юэн веттаськись 
вӧл-вӧл бусыос но мылкыдзэс уг вырӟыто кадь потэ Максимлы, соин ик 
ӟабыльтэмзэс сюлэмыз сэректыса кылзэ. Марья кышет пумыныз синзэ ӵушылэ 
- лушкем, медам шӧдэ кадь сюлмызлэсь лопыръяськемзэ. Нош Максимлэсь уд 
ват! Соослэн мылкыдзы кемалась огвыллем ини - Максимлы кельшоноез Марьялы 
кельше, Максимлэн шумпотонэз - Марьялэн но шумпотонэз, ма, сэре, мар 
ватонэз: куректонзы но соослэн кемалась ини одӥг кисыын.
- Кема улӥды-а Сибирьын? - юаз воргорон.
- Мӧзмымон... 
- Шорад учкыса ик адӟиське, - пальпотӥз Мукшур пи.
- Туэ ю нянь кыӵе-кыӵе удалтэмын! - вераз Марья.
- Ю нянь умой вылэм но... Октыны-калтыны кужым тырмоз на меда?
- Малы? - паймизы Семеновъёс.
- Война кутскем ук...

* * *
Быдӟым ожлэн нырысь араз ик Кайсы черкогуртын "Кайгу" нимын выль 
кырӟан кылдӥз. Кутсконэзлэн кылъёсыз таӵе:

Сӥзьыл уйёс векчи 
зоро,
Векчи ке но 
пыӵато.
Война аръёс туж 
секытэсь -
Кырӟато но 
бӧрдыто.

* * *

1

Пётр Поздеев
Пицундаысь ваем кылбур
Ю бусы кадь сыръя, югекъя Сьӧдзарезь,
Пыгыли кадь баблес погыльске ярдурысь.
Ӟег аран вуонэз вераса кадь, толэзь
Апснылэсь* крезьгурзэ поръятэ омырын.

Тодӥсько, тодмасько: мон азьын ву зарезь
Гурезен вераське, толэзез лэйкатэ.
Нош сюлэм? Со малпа пужымо Камдурез,
Ӟег пӧлысь лызйырлэсь** со мӧзме та ӝытэ.

Ю бусы кадь сыръя, югекъя Сьӧд зарезь,
Пыгыли кадь баблес погыльске ярдурысь.
Иськемъёс пыр тонэ адӟисько, Камдоре,
Сьӧд зарезь ярдурын малпасько тон сярысь.

Иднакар - Ӟеч Инмар
Котькудӥз кошкыны кылдэм ар
Шуре из кадь вые син азьын.
Нош тонэ, вашкала Иднакар,
Уг, уг кыско аръёс бӧрсязы.

Гурезьлэн лыз инмозь йылъёсаз,
Чупчиен Пызеплэн висказы,
Кырӟаськод тон, лулдэ бурдъяса,
Ӵыдонтэм чебересь крезьёсыз.

Дас даур ни озьы кырӟаськод,
Утиськод удмуртлэсь аслыксэ.
Юн сылэ тон котыр ӝутэм борд,
Сюй уг быдты солэсь юрсирзэ.

Иднакар - Ӟеч Инмар...
Таӵезэ
Чур герӟет шат шедьтод кытысь ке?
Удмурт рифма. Удмурт со, зэмзэ,
Со сандал кадь дынгыр чузъяське.

Лозое мынам
Покчи дырысьтым яратоно эшме Виталий Леконцевез буре вайыса
Лозое мынам,
Ин кадь лыз ӧре,
Тон котьку тодам,
Котькыӵе дыре.

Нясь тулыс дыръя
Тудӟиськод паськыт.
Йӧ кошке, тӥя
Лулпудэ кышкыт.

Пӧсь гужем дыръя -
Турнаку - сяська
Нылк киысь вуя
Чупчие ваське.

Сӥзьыл зор дыръя
Тон висись кадь жум.
Бадь ӵуж куар зӥръя,
Сумедӟе дун сюм.

Ӟырт кезьыт дыръя
Кӧлӥськод шуныт.
Вӧтъёстэ вож яг
Чус уте толбыт.

Лозое мынам,
Ин кадь лыз ӧре,
Кырӟа, ул сюлмам,
Котькыӵе дыре.

Марӟан кырӟан
Тракт пумитын, ошмес азьын,
Иже учкись пичи коркан,
Сӥзьыл ӵуж куар усён дырын
Тон вордӥськид, дуно кырӟан,
Марӟан кырӟан - удмурт мадей* 
Эгра Митрей, Кедра Митрей.

Тӧл лекъяськиз ке но шурдыт,
Тон весь мынӥд солы пумит.
Ас калыктэ гажад ӟырдыт,
Вань улондэ солы сӥзид.
Марӟан кырӟан - удмурт мадей
Эгра Митрей, Кедра Митрей.

Ӟырдытлыкед понна эксэй
Тонэ сюрпи кариз, каргаз.
Вылез эксэй - Кремльысь генсек -
Мурт дуннее тонэ келяз,
Марӟан кырӟан - удмурт мадей
Эгра Митрей, Кедра Митрей.

Тыныд вордскем дуннеосад
Ӧз ни, ӧз кылды вуыны.
Лулыд бертӥз Эгра палад.
Бертӥз со из тусбуеныд,
Марӟан кырӟан - удмурт мадей
Эгра Митрей, Кедра Митрей.

Тонэ калык дунъя, данъя,
Нимдэ котьку возе тодаз,
Сюрес гожзэ лёге тонъя,
Визьдэ уте сюлэм пушказ,
Марӟан кырӟан - удмурт мадей
Эгра Митрей, Кедра Митрей.

Мемие
Йырсиед ӵуж мертчан ӧвӧлысь,
Синъёсад лыз сяська ӧвӧлысь,
Бамъёсыд лемлет мак ӧвӧлысь,
Мугорыд тӧдь кызьпу ӧвӧлысь,
Дэремед вуж буртчин ӧвӧлысь,
Бускеле, родняе потыкуд,
Мемие, возьдаськид тон котьку.

Кинлы ке касласа малпамен,
Кинлы ке йӧнтэм уж лэсьтэмен,
Кинэ ке малы ке каргамен,
Мае ке юатэк басьтэмен,
Кинлы ке умойтэм ваземен
Тон ӧд сьӧлыка, ӧд, мемие,
Мынам лул но визьбур дуннее.

Бен соин ик чиль-сьӧд йырсидэ,
Бен соин ик сутэр синъёстэ,
Бен соин ик лапкес мугордэ,
Бен соин ик дэра дэремдэ,
Бен соин ик чибор ӵуглэстэ
Вӧтаса адӟисько, мемие,
Шундылэсь но мусо-дуное.

Тодоно вал, тодоно
Тодоно вал, тодоно
Лыз ингож тапалан,
Лыз ингож сопалан
Азьланяз ма луоно.

Тодоно вал, тодоно
Йыр вадьсысь инсьӧрын,
Пыд улысь му пыдсын
Азьланяз ма луоно.

Тодоно вал, тодоно
Улонам-вылонам,
Мынам та дуннеям
Азьланяз ма луоно.

Кылбур сярысь кылбур
Гужем ӵукна ке асьмеос
Уӵертӥськом возез котыр,
Адӟиськомы: лысву весьёс
Куаръёс вылын экто шудыр.

Со - чебергес ӵук шундылэн
Инмысь ыстэм югытэзлэсь,
Солэн батыр кизись музэн
Улэп тысьсэ пазямезлэсь.

Шунды сямен ик, кылюурез
Ӟеч визь лулъя, бурдъя, ӝутэ,
Жингыртытэ кылэз, чурез,
Сюлэмъёслы дартсэ сётэ.

* Апсны - Абхазилэн вашкала нимыз.
** Лызйыр - зангари, ӟегсяська.
* Мадей - татын: проза гожъясь писатель
Искусство удысысь
Милитина Гаврилова-Решитько
Анна кенак
Таӵе нимын сое быдэс калыкмы тодэ. Ассэ ачиз, ас дунзэ валаса но калыкез гажаса, 
сыӵе ним басьтӥз, дыр, шуыса малпасько. Шумпотыса учкисько солэсь 
ӧтчаськемъёссэ, йӧспӧртэм "пӧрам" "Марӟан" телевозьматонъёссэ. Котькудӥз соос 
шырыт мылкыдын, пӧсь сюлэмын но яратыса лэсьтэмын. Троссэ со ачиз гожтэ но, 
радъя но, нуэ но.
Удмурт Элькунысьтымы сӥё-дано артистка Анна Николаевна Прокопьева калыклы нырысь 
ик тодмо луиз чебер кырӟаменыз, собере ини - журналист уженыз.
1996 арын 15-тӥ куарусёнэ Анна кенак аслэсьтыз учкисьёссэ устолык удысын 25 ар 
ужамезлы сӥзем ӝытаз "Металлург" культура двореце ӧтчаз. Отын дауркылъёс 
(легендаос), нылпи веттан гуръёс, удмурт, башкир, пор калык кырӟанъёс 
чузъяськизы. Троссэ соосты Анна Прокопьева калыкысь шедьтыса гожтӥз но выльысь 
калыке поттӥз. Монэ но мукет учкисьёсты ӝытлэн кутсконэз ик паймытӥз. Сцена 
сюсьтылъёсын югдытэмын, нош солэн паллян палаз пурысь вал вылын удмурт дӥсен, 
айшонэн, чалмаен кышномурт пуке. Валэн суред сцена вамен ортчиз но, чебер, 
данлыко, азьланезлы оскон сётӥсь мылкыд ыралскиз. Удмуртлыкез утьыны, улӟытыны 
но азинтыны удмурт нылкышноос быгатозы шуэм тодэ лыктӥз. Та суредэн Анна кенак 
залысь вань учкисьёслэсь сюлэмзэс бугыртӥз. Быдэс ӝыт сярысь ке верано, со А. 
Прокопьевалэн быгатонлыкъёсызлэсь пӧртэм палъёссэ усьтӥз, юн семьяезлэсь 
огмылкыдын улэмзэ, Николай кузпалэзлэсь но Андрей пиезлэсь солы секыт ужаз 
пельпумзэс пуктыны дась луэмзэс возьматӥз. Нош анаез, Серафима Семёновна, залын 
пукиз. Ма меда малпаз со: шумпотӥз-а, кышказ-а, ваньмыз мед умой ортчоз шуыса ас 
понназ вӧсяськиз-а?..
* * *
- Ой, Инмарлы тау но тау. Нылпиосме огнам ке но, курадӟыса ке но будэтӥ, палэн 
сюрес вылэ ӧз коже,- керттӥськонзэ ал вылаз поныса шуэ Серафима Семёновна. - 
Газетысь, телевизорысь но учкисько вал, кыӵе мумы-бубылэн ӟеч нылпиосыз сярысь 
мадё меда шуыса. Табере тани асламъёсыз сярысь верало ни.
Мон атайтэк будэм ныл, нылпиосме но атайтэк будэтӥ. Ачим Агрыз ёросысь Сарсак-
Омга гуртын вордски но будӥ, нош Аняе 1952 арын 22-тӥ оштолэзе Амур палась 
Февральский посёлокын вордскиз, отын фермаын ужакум. Милицилэн сюлмаськеменыз, 
отчы вуылыны кылдӥз. Пермь палась Кизелак гурт дорын нюлэс кораме, Новгород 
котырысь нюръёсысь гыбед поттэме бере апае кулӥз но солэсь нылпиоссэ утисько 
вал. Озьы луиз уго: соос кисыязы колхоз кӧжыез понӥллям. Кӧтсы туж сюмаз, вылды. 
Монэ, лушкаськисьёсты дорад возиськод шуыса, 8 арлы тюрьмае ворсазы. Нош кык но 
ӝыны ар ортчыса, Амур шур пала губырскыны келязы. Отын карт но шедьтӥ вал. 
Аняелы арен ӝыныен тырмиз но, бертыны лэзизы. Гуртам куинь кузя вуим но, отын 
шал-шал тырттэм коркае гинэ кылемын на. Кызьы ке улысалмы ни, вылды, но Аняелы 
куинь арес тырмыса, вордсконо пизэ но адӟытэк, картэ дор палаз кошкиз но ӧз ни 
берытскы. Пиналъёсме огнам вордоно луи. Нылы атаезлэсь туж мӧзмылӥз. Мӧзмеменыз 
дорысь пега но вал. Одӥг пол нылме ӧжыт гинэ ӧй ышты. Почтае пырано шуыса, Аняме 
одӥг кышномуртэн ураме кельтӥ. Потӥсько - нылы ӧвӧл. "Кытчы кошкиз?"- 
адямиослэсь юасько. Кыӵе ке кышномурт, пе, ки вылаз ӝутыса кошкиз. Э, маке ӧвӧл 
со! Возьматэмзы пала дыбыр бызисько. Сутӥ со кышномуртэ. Малы нылме нуиськод, 
шуисько. Мон, пе, весь пи ваисько, нош картэлы ныл кулэ. Тӥни кыӵе но адямиос 
пумиськыло, ява. Дышетскиз умой, ялан кырӟа вал, доре сётэм ужъёссэ но кытӥ 
кырӟаса ик лэсьтылӥз. Ӝытъёсы но ялан ӵош кырӟаса пукылӥмы. Дас класс бере 
культпросветучилищее мынӥз. Дышетӥсьёсыз монэ куаретӥзы: малы, пе, сое отчы 
лэзид, институтын дышетскыны быгатысал ук. Кытчы мылыз потӥз, пӧй, отчы ик 
мынӥз. Ӧй янгыша кадь. Уть ай, ачим но табере доразы улӥсько. Эмеспие лякыт. 
Андрей пизы ки вылам будӥз. Гастроле кошко но, ми соин ӵошен кылиськом вал. 
Чылкак аслэсьтым пиме кадь будэтӥ. 
* * *
Сцена вылысь но телеэкранысь чеберлэсь чебер, шогольлэсь шоголь дӥсяськем Анна 
Николаевнаез адӟыса, со бадӟым, трос висэто патерын улэ шуыса малпано. Но солэн 
улонниез огшоры гинэ, кык бӧлето маке. Борддорын - кузё кышнолэн тус суредэз 
(Пётр Ёлкинлэн ужез), ӝажыосын - уно книгаос, соос вӧзын - киноплёнкаос. Анна 
Николаевна патераз утялске, Николай Алексеевич шыд пӧзьтэ.
- Ма, тӥ сиён пӧраськоды шат?
- Ма, котьку уг но, мынам со яратоно уже. Кытчы гинэ уг мынӥськы, маке выльзэ 
оскалтӥсько но яра ке, одно юасько, кызьы сое лэсьто. Кышнолы пӧраны ӵемысь дыр 
но уг шедьылы. Нош али куномы вань: Андрейлэн Даниысь эшез лыктэмын. Соин ик 
ческытгес пӧрано. Театре кошкизы ай, бертыкузылы сиёнэ ӝӧк вылэ пуктыны дась 
медло шуыса вырисько. Бакчаямы ветлыкумы но пӧраськон мон вылэ усе. Кузпалы отын 
будосъёслэсь уг ӵыды, музъем бордын сюлмысьтыз ик ужа. Сяськаосыз олома мында. 
Весь соосын вераське. Ма соосын лабыртӥськод, шуисько, соос уг валало ук. Ӧвӧл, 
вераськиськод ке, соос чебергес будо, пе. Зэм но, милям бакчаямы сяськаос вазь 
тулысысен бер сӥзьылозь мальдыто. Нырысь ик - тюльпанъёс, италмасъёс, собере - 
мукетъёсыз, мон ваньмызлэсь нимъёссэс но уг тодӥськы. Адямиос сяськаосмес юри 
учкыны ветло.
- Кышноды ачиз но сяська выллем ик чебер.
- Мон но озьы ик шуисько. Ӧйтӧд, кызьы сое азьвылгес ӧй синйылты. Ми одӥг 
гуртысь ук. Со улӥ урамысь, мон вылӥ урамысь. Армие мыныны дасяськисько ни вал. 
Шудыны потӥ но витьымтэ шорысь адӟисько: чиль сьӧд йырсиё, паськыт синкашо, 
лапеггес гинэ, мусо но веськрес нылаш. Келяны калъяськи. Аняе соку школаез гинэ 
йылпумъя вал ай, озьы ке но, армие монэ келяз. Милям гуртамы сыӵе йылолмы вань 
уго: армие кошкись пиез одно ик туганэз келя. Гуртэным люкиськыса коркась корка 
ветлыкум, Анна ялан вӧзам вал. Но школаез келлямысьтыз сое нокин ӧз лекаты. 
Йылоллы пумит уд мыны ук. Бӧрдыса келяз монэ Анна.
Армиын дыръям со культпросветучилищеын дышетскиз. Бертӥ но, кузпалъяським.
Куамын ар ӵоже улэммылэсь ортчемзэ ик ӧй вала. Искусство удысын ужаку, дыр туж 
ӝог ортче, лэся. Гастрольёстӥ ветлонтӥямы одӥг гинэ пи но вордӥм.
- Со понна - удалтэм пи. Искусство удысын сӥё-дано адями.
- Анналэн сюлмаськеменызгес ини. Пимылы умой сям пыӵатон но туала ужаз юрттон 
понна со жадёнэз ик уг валалля кадь.
* * *
Атаеныз но песяеныз вераськонъямы Андрей но куно пиенызы, Норвегиысь тодмо 
театр режиссёрен Хёйкур Гуннарсонэн вуиз.
- О-о, Анна апай! Со сизьым ар талэсь азьло нырысь пумиськыкумы ик монэ дуно 
куноез кадь пумитаз, - киосыныз ик шонаса вера Хёйкур. - Чеберлыкез ӟеч вала, 
шӧдэ, зэмос удмурт кышномурт со.
Мынэсьтым юанъёсме но Хёйкурлэсь веранъёссэ кылысь кылэ берыктӥз Анна 
Николаевналэн но Николай Алексеевичлэн пизы. Англи кылын шатыр гинэ вераське.
- Бен, мон Инмарлы тау карисько, мынам таӵе анае вань шуыса,- Андрей но эшез 
вӧзы итӥськиз. - Со мыным анай но, эш но. Пуш дуннеез ваньмызлы усьтыны уг луы 
ук, нош мон солы усьтӥсько. Со мынам дышетӥсе но, сюрес возьматӥсе но. Улон шоры 
учконэ но, ужан ӧр быръёнэ но, тунсыкъяськонэ но - ваньмыз анае бордысь потэ. 
Калыкез яратон, удмурт сямъёсты сэрттон-пертчон, соосты валаны тыршон, туала 
интызэс утчан ужын анае - мынам нырысетӥ юрттӥсе. Вань нылъёсты но анаеным 
ӵошатӥсько вал. Кышнолы но анае кадьзэ бырйи.
- Ой, кенме туж яратӥсько, - Анна Николаевна шуныт пальпотэ. - Нылмы ӧй вал 
бере, со мыным нылы кадь потэ. Асьме палась ик, ми пал сямъёсты, йылолъёсты 
тодэ.
- Анна апай ачиз но удмурт калык сямъёсты, йылолъёсты пичи дырысеныз тодэ.
Нергеосы, кисьтонъёсы, нуны сюанъёсы, корка туй каронэ пичи нылаш мемиез сьӧры 
ветлэ вал. Атайзы уго соосты кельтӥз, песяйзы ӧй вал, соин ик амалтэк куно пӧлы 
шедьылӥз. Кышноос кырӟало ке, Аня но бӧрсязы нёжъялляз.
- Муми пегалляме сярысь вераз, - тодаз вае ни Анна Николаевна. - Бубилэсь 
мӧзмыса озьы лэсьтылӥ кадь потӥсько. Со сюлмам шырпу кадь мертчемын вал ук. Весь 
малпалляй: артист луо. Телевизорысь ас нылзэ мед адӟоз но, сюлмыз мед чигиськоз. 
Сыӵе малпанэн будӥ.
- Нош кызьы "Италмас" ансамбле шедиды?
- Азьло аръёсы, бадӟымесь праздникъёс дыръя, огъя хор люкалляло вал. Радиолэн но 
телевиденилэн хорзы, "Италмас", культпросветучилищеысь хор сцена вылэ огӵош 
потылӥзы. Ӵапак соку Анатолий Васильевич монэ синйылтэм, лэся. Дораз ужаны 
бурдъяз.
Со куспын Коляе армиысь бертӥз но, ми ӵошен "Италмасын" ужаны кутским. Ялан уг 
вунэтӥськы: нырысетӥ гастрольёсмы Омскын вал. Туж кельшиз. 
- Ма сётӥз "Италмасын" ужан?
- Кырӟанъя но эктонъя "Италмас" ансамбль чеберлыкез валан но дунъян школае луиз.
- Нош "Айкае"малы потоно луиды?
- Улон озьы косӥз. Пушкам но сыӵе малпан ачиз быгыльскиз, лэся. Ансамбле егитъёс 
вуизы, нимаз кырӟанъёсты соослы сётъяны кутскизы. Мон палэнэ кыльыны кутски. 
Бурдъяським, ӝутским. Нырысетӥ постановкамы "Акашка шудонъёс" шуыса нимаськиз. 
Со бордын мон выри. Тодосчиосын пумиськылӥ, ваньзэ улонын кадь чебер но оскымон 
карыны сюлмаськи.
- Нырысетӥ концертады мон но вал. Со туж паймытӥз. "Италмас" но кадь, со но ӧвӧл 
кадь. Со артистъёс ик мукет сямен кырӟало, мукет шудонъёсты шудо. Вераны кулэ, 
та выль коллективез учкисьёс умой пумитазы. Тодӥсько на история наукаосъя 
докторлэсь Владимир Владыкинлэсь верамзэ, люкиськемзы понна куректоно ӧвӧл, пе, 
удмурт коллективъёс уката трос мед луозы. Со понна шумпотыны кулэ.
- Но, Анна Николаевна, тӥ отын малы ке трос ӧд ужалэ...
- Татын но мугъёсыз вал. Мамонтовен керӟегъяськем бере, мыным туж секыт вал. 
Соку ик малпай: улонын олома луоз, дышетсконэз азинтоно. Культпросветучилище 
бере кызь ар ортчыса, университетлэн удмурт факультетаз дышетскыны пыри. Улонэ 
асьме кырӟанъёсын, фольклорен герӟаськемын бере, удмурт кылэз ӟеч тодоно. Со 
дыре ик монэ телевидение ӝутканы кутскизы. "Италмасын" но, "Айкайын" но дыръя 
телевидение пыр интервью сётоно ке, ялан монэ ӧтьылӥзы. 1990 арын ни телевидение 
ужаны выжи.
- Анна Николаевна, нош сӥё-дано ним ку сётӥзы тӥледлы?
- "Италмасын" ужакум ай, 1983 арын. Соку мон ай трос кырӟанъёсты кырӟасько вал. 
Сяськаян дыры вал, шуыны луоз.
Улон сюресэ телевидение вуттӥз. Отын соку удмурт кылын крезьгуро программазы ӧй 
вал. Мон сое усьтӥ. Вераны гинэ капчи. Нош туж трос шуг-секытъёсты вормоно луиз. 
Куронъёсы туж вылӥын, супыр-сапыр ужамез уг яратӥськы. Ачим гожтӥсько но, ачим 
ик режиссёр но луисько, ассистентэ но ӧвӧл. Кышкаськом, пе, тонэныд ужаны. Оло 
верано сое, оло ӧвӧл. Куддыръя аслым ачим воже потэ но, ма карод, мукет сямен уг 
быгатӥськы. Нырысь интыын мынам - крезьгур. Москвае дышетскыны ысъязы. Отысь 
дышетӥсь но шуылӥз: крезьгур вылэ пыкиськоно. Со дырен, ритмен, тактэн 
герӟаськемын. Солы пумит мынӥськод ке, ваньзэ воштоно луэ. Мынам крезьгурлы 
пумитъяськеме уг луы.
- Сюлэмад кыӵе ватосэд вань на?
- Кырӟанлэсь нокызьы но люкиськеме, куштӥськеме уг луы. Дӥсьтонэ уг тырмы ке но, 
верало ик. Анае сярысь книга гожтэме потэ. Солэн улонэз туж секыт но туж узыр. 
Мон ведь дышетскыкум ик кылбуръёс но, проза но гожъясько вал. "Пионерской 
правдае" но ысъяме вань. Г. Ходыревлы но возьматъяй, гожъяськемме со дышетскыкум 
ялан эскере вал. Со книгаоссэ но мыным кузьмалляз, гожтэтъёс но ысъяз. Но мон 
ӟуч сямен гожъяй. Буби ӟуч вал бере, мон но ӟуч сямен вераськи. Тодско на таӵе 
учыръёсты: бускельёсмылэн бадӟым кечсы вал, пегӟисько ке но, со монэ леканы 
шедьтэ. Одӥг пол леказ но, мон бӧрдыса шуисько: "Забодать-то забодала, а лёлё-то 
не даёшь". Атае арганэн туж ӟеч шудэ вал. Со шудэ - мон эктӥсько. Кошкемез бере 
туж куректӥ, мӧзми, бӧрдылӥ.
Паймод, кошкемез бере кызь кык ар ортчыса, мон сое шедьтӥ. Дораз картэным но 
пиеным ветлӥм. Бӧрысьгес мемеймес но нуллӥм. Капчи-а со, секыт-а, али вераны шуг 
ни, но со йыркуръяськыса пумиськон ӧй вал...
* * *
Анна Николаевна Прокопьевалэн улонэз туж узыр, мон отысь пичи-пичи гожъёссэ гинэ 
возьматыны быгатӥ. Ужез но туж чебер. Калыкмес со шулдыртэ но узырмытэ. Картэз, 
пиез но кенэз калык син азьын. Кинлэсь ке кылэме вань: Анна Николаевна пизэ 
будэтэм сяна номыр но ӧй ке лэсьтысал, со но туж бадӟым уж луысал, малы ке 
шуоно, Андрейзы туж удалтэмын, кырӟано ке, куараез чебер, эктоно ке, пыдыз тапыр 
гинэ каре, вераськоно ке, удмурт, ӟуч сяна, мукет кун кылъёсын но вераськыны 
пӧрмытэ. Ваньмысьтыз адӟиське Анна Прокопьевалэн улон ӧрез ӟеч валамез, сое йӧн-
йӧн радъяны быгатэмез.

1

Римма Игнатьева
Сьӧлыклэн емышез
повесть
Манилы ӝоген кызь тямыс арес тырмоз, нош вордскем нуналзэ со огпол но рос-прос 
ӧз пусйы на. Ма, нылпи юртын кинэ ке нимысьтыз висъялозы шат? Отын уго ваньмыз 
огъя: шудонъёс но, дӥськут но, валес но, сиён-юон но. Одӥг толэзе 
вордскемъёслэсь "именниксэс" но ӵош пусйылӥзы, солы гинэ сӥзем шуныт кылъёс 
нокин ӧз вералля. Нош нылаш котьмалэсь золгес нуныямзэс, вешамзэс, яратэмзэс 
витьылӥз...
Тани табере сое но ярато. Озьы шуиз кыкетӥзэ пумиськыкузы сьӧд сутэр синмо, 
чиганлэн выллем йырсиё, ӝужыт но веськрес мугоро Слава. Мани соку ӵош ужась 
эшеныз паркетӥ юмша вал. Вить аресъем Таняез но соосын ӵош. Шутэтскон нуналъёсы 
садик уг ужа уго - нылзэ дораз огназэ уд кельты.
Матрослэн выллем сюрсо майкаен, гитараен пиез Мани кыдёкысен синйылтӥз: 
"Тодмалоз на меда?" Славаен соос куартолэзе татысен ик тодматскизы. Со дырысен 
быдэс гужем ӧз адскылэ. Нош Мани сое ялан малпалляз, кыллы бырем пи кӧня ке пол 
уйвӧтъёсаз но лыктылӥз. Та парке Мани котькуд шутэтскон нуналаз ветлӥз. Выльысь 
пумиськонзылы оскыса. Нош синмаськоно муртэз олокытчы чиптэм-чатэм ышиз...
Манилэн сюлмыз гадьысьтыз потымон жугиськыны кутскиз.
- Надя, тӥни со пи! - эшезлэн суй бордаз юн кырмиськиз егит нылкышно.
- Кудӥз? - котыр утчаськыны шӧтаз Надя. Со уго Славаез ӧз адӟылы на.
- Ма, тӥни ук, самой ӝужытэз но самой чеберез, - вить оло куать пиос пӧлысь 
одӥгез шоры возьматӥз Мани. Туннэ Слава нылкышнолы уката ӝужытгес кадь йӧтӥз.
- Гитараенэз-а, мар-а? - паймиз Надя. - Ма, соид шырмачлы укша ук!
Манилэн вожез потӥз:
- Шырмач, пе! Тодэмед ке потэ, со - артист!
- Артист погорелого театра, - серектӥз соиз. - Нош мон, пельме урмытымон 
зулемысьтыд, со зэмзэ йӧно пиосмурт кожай вал. Уг валаськы, малы тыныд сыӵе 
зырымесьёс кельшо? Ведь тыныд кызь арес ӧвӧл ни, - быдэ вуымтэослэн выллем 
выросъёссэ синйылтыса, лэся, Надялэн мылкыдыз усиз. Эшез уго сое весь оскытъяз, 
туж йӧно пияшен, пе, тодматски. Нош учконо ке, чик озьы вылымтэ. Шонер верало: 
кинлы - мар, куреглы - кеньыр. Озьы ке но, эшезлэсь бырйиськыны быгатымтэзэ 
Надя пусйытэк ӧз кельты: - Кут нырыныд тузонэз пурӟытэмысь дугдоно ни вылэм, 
Мани. Кӧняеныз пинал пиосын тодматскылӥд - аслыд карт но, нылыдлы бубы но ӧд 
шедьты на. Таизлэсь но маке умойзэ витёнэз ӧвӧл. Бер ӧвӧл на дыръя, ойдо сюрес 
вылысьтызы палэнском.
Мани эшезлэсь суйзэ лэзиз. Надя шоры паймыса уӵертӥз: мар озьы зуле? Мани та 
пумиськонэз быдэс гужем возьмаз, нош со пегӟыны дэмла. Уг яра ке, мед кошкоз, 
Мани сое кутыса уг возьы.
Куатаськыса Надя кужен сюрес вылэ кожиз, нош Мани нылыныз пырак пиос пумитэ 
вамыштз.
- Слава, тӥ монэ уд тодмаське ни-а? - кыӵе ке валантэм кылын кырӟанэз нёръясь 
пиосын ваче ымныр вуыса вазиз нылкышно.
Гитараен пи дугдӥз. Мани шоры со тодманы тыршыса сямен учкиз, собере - нылыз 
шоры.
- Ю-у-ля-а?! - нёжтӥз со. Пиосмурт шокчыку, Мани доры аракыен, тамак зынэн 
сураськем омыр вуиз. Но та кӧш зынэз кышномурт ӧз ик шӧды кадь:
- Юля ӧвӧл - Маша мон. Оло, тодӥськоды на Нырысетӥ май нуналэ кафеын, черодын 
сылыкумы, тодматским.
- А-а, Машенька-а! Тодмай, ма, кызьы ум тодма? Капитально! - Маниез ӟыгыртонъяз 
шуиз егит пи. - Ойдо, машенька, пумиськеммес нош ик кафеын пусъём. Только... 
марым... Сур басьтыны уксёед сюроз-а? Видишь ли, ми пиосын, кисыосысьтымы вань 
шильтыртӥсьсэ гинэ ӧвӧл, жингыртӥсьсэ но сузямы ни. Капитально! Нош юэм потэ на. 
Сӥзьыллэн нырысетӥ нуналъёсыз ке но, куазь июле кадь, капитально пӧсь, о-о-а? - 
Маниез со гужем кафе пала валтӥз. Таня но соос сьӧры вамыштӥз. - Нош таиз тынад 
сузэред-а, Машенька? - дугдӥз Слава.
- Бен со мынам нылы ук, вунэтӥды шат? - абдраз Мани.
- А-а! - йыр пыдсаз чабкемъяськиз Слава. - Ну, капитально! Тасенька ук та!
- Мон Тасенька ӧвӧл! - Танялэн кудӟем агайлы вожез потӥз. Нош мумиз со шоры лек 
вазиз:
- Таня! Кызьы арлыдоосын вераськиськод?!
- А-а, Танюша, вождэ эн вай. Капитально, озьы-а? Мон тупатско, - Слава, гитаразэ 
Манилы сётыса, нылаш азе пыдесъяськиз. - Мон пичи пиналъёсты туж яратӥсько. - 
Выльысь шонерскыкуз, кудӟем пиосмурт шонскиз. Мани сое ӧй кутысал ке, оло, 
пограсал но. - Капитально, йыр пороме, тынад чебередлэсь со, Машенька. Яралоз-а, 
мон тонэ ӟыгыртӥ ке?
Пиосмурт нылкышнолэн пельпум вылаз зӥбиськиз. Манилы вамышъяны шуггес луиз, нош 
пиосмуртлэсь суйёссэ ӧз палэнты. Воргорон киос солэсь зӧкомыны ӧдъям мугорзэ 
кемалась ӧз ӟыгыръялэ ни. Огназ улӥсь егит нылкышно шоры жальмасьёсыз бен ӧжыт 
ӧй вал, нош Мани кышнояськем воргоронъёсты бордаз йӧтскылыны ӧз лэзьылы: 
кузпалъёссы тодӥзы ке, йырсидэ лӧдозы. Огпол янгышаменыз но тырмоз. Нош Слава 
нырысь пумиськыкузы ик вераз, со огназ шуыса. Кӧня ке толэзь куспын семья 
кылдытыса ӧз вутты, дыр...
* * *
- Та патер аслад-а? - нырысетӥ этажысь одӥг висъетэн, пичигес пӧраськонниен 
улонтӥе пырыса, воргоронлэн йырысьтыз сурымез ӧжытак тӧлӟиз, лэся. Кроссовкиоссэ 
пыронние кыльыса, со Мани сьӧры пӧраськонни пала вамыштӥз.
- Ма, тон миллионерша вылэмед ук! Капита-ально! - Слава шултыса лэзиз.
"Кыӵе миллионерша? Вылам дӥсяны, та сарафанэ сяна, рос-прос дӥськутэ но ӧвӧл. 
Куддыръя коньдонэ нянь басьтыны но уг луы", - малпаз Мани. Солэн тодаз лыктӥз, 
кызьы толэзь талэсь азьло, одӥг пыры но няньзы ӧвӧл дыръя, нылзэ кемагес кӧлыны 
косӥз: "Изьыку сием уг поты". Нылыз йырзэ ӝутылӥз ик но берен синъёссэ кыниз.
- Мон, меми, туж кема изё, ява. - Кӧня ке озьы кӧлэмъяськыса кыллемез бере со 
валесаз пуксиз но мӧйы мурт сямен шуиз: - Тыныд уждундэ сётъясалзы ке, мон быдэс 
сукыри нянез огкутскемен сиысал, дыр. Нош тон?..
Манилэн, со учырез тодаз вайыса, нош ик синкылиосыз быльыразы. Ачиз со, мумы-
бубытэк, нылпи юртын будӥз ке но, сиськытэк изьыны ноку ӧз выдылы. Нош нылзэ 
тӥни, сьӧлыко лулэз, эсьма, нянен гинэ но кӧтыз тырымон сюдыны уг быгаты. 
Уждунзэс олокӧня толэзьлы беромыса сёто. Нылыз понна пособие шуон нергезс но 
аръёсын ӝегато. Валля ар понна алигес сиён-юонэн сётӥзы. Мани пызь, сакыр но 
макарон басьтӥз. Кӧняез ке кылиз на - соин туннэ кунозэ утялтыны быгатоз. Нош 
ӵуказезэ - Инмар возьматоз. Заводзы тыро-пыдо ужаны ӧдъяз ке, уждунзэс, оло, 
дыраз сётъяны кутскозы. Соку нылпи пособие чотын дуно дунын сиён-юон октэмысь 
дугдоз, заводэ ужаны пыремез бере нырысь аръёсаз кадь ик номырлы ёрмытэк улозы.
Зэм, Манилы соку но маке уг тырмы вал. Со "маке" - яратон. Матысь адямиосызлэн 
яратэмзы. Аслэсьтыз ог вить ареслы пиналгес муртлы бызем Мила акаез сяна, солэн 
нокин матысь ӵыжы-выжыез ӧвӧл. Со но кыдёкын. Нош Таня вордӥськем бере акаеныз 
ӧз ик пумиськылэ ни. Сузэрезлэсь сьӧлыкамзэ тодыса, Мила Манилы туж лек гожтэт 
лэзиз: дорамы сюрестэ вунэты, пе...
Мани табере вала: кыӵе кышномурт шумпотоз аслаз картэзлэсь сузэреныз сьӧлыкамзэ 
тодӥз ке? Угось Таня нылызлэн бубиз - Мила акаезлэн юыны но мурт кышноосын 
юмшаны яратӥсь картэз. Озьыен, Манилэн кырсиез. Улонын сыӵеез но луэ вылэм. 
Тодӥз шат соку нылмурт, пиосмуртъёс пӧлын трос алдаськисьёс шедьыло шуыса? 
Кырсиез уго егит нылэз оскытӥз, акадэ, пе, ноку ӧй яратылы, мынэсьтым 
секытаменыз гинэ соин кышнояськи. "Тон мынам зэмос яратонэ!" - пӧсь шокалляз со 
Манилэн пеляз кеносысь валесын я гид сигысь куасьмем турын пӧлын 
погылляськылыкузы. Нош таизлэсь секытэн луэмзэ тодӥз но вань сьӧлыксэс Мани вылэ 
погыльтӥз.
Ярам ай, заводысь эшъёсыз юмоке сюрем нылмуртэ ӧз аналтэ. Мумы-бубытэк будэм но 
карттэк нуны вордыны дасяськись егит кышномуртлы одӥг висъетэн улонни висъязы. 
Таиз пумысен вожъяськисьёс-лекъяськисьёс но сюризы, озьы ке но, уноезгес 
шумпотӥзы кадь - Манилы озьы йӧтӥз. Уката ик шумпоттӥз "Удмурт улос" газетлэн 
редакцияз ужась нылкышно журналист. Семья ужпумъёслы сӥзем бамез дасякуз, со 
огпол Манилэн огъяулоннияз лыктэм. Со сярысь газетэ гожтыса, нылмуртлэн 
кивалтӥсьёсызлы вазиськем: катъя, пе, сирота муртлы одно нимаз улонни висъяно. 
Вылаз ик, мумы-бубытэк будэм нылмурт нылпи вайыны дасяське. Тӥни озьы Мани татчы 
- та патераз - вуиз...
* * *
- Мыным тон дорын капитально яраз. Мукетъят лыктӥ ке, валесад лэзёд-а? - 
ӵуказеяз ӵукна ӧс дорысен Маниен но солэн нылыныз люкиськыкуз мынектӥз Слава.
- Милем тонтэк но номыр сиыны! - макмырен курадӟись воргорон бордысь кӧш зын 
лыктэмен, вылды, Таня ымнырзэ кисыртӥз, нырзэ киыныз ӵоктаз.
- Вот козявка! Капитально! - паймиз пиосмурт. Нош Мани, нылзэ чабкыса, 
пыронниысь улляз. Мурт воргорон азьын бӧрдэмезлэсь возиськыны турттыса, соиз 
кӧлонниязы кошкиз. Тэтэ карись нылпиослы чаклам пу кровать вить аресъем дыдылы 
ӟоскытгес ни ке но, мурт дядяйёс нэнэеныз артэ изьыны мылкыд карыку, нылашлы 
амалтэк пичи валесаз каръяськоно луэ. Зэм, со адӟемпотостэм агайёс Таняос доры 
ӵем уг вуыло. Нош лыкто ке, пичи ныллэн сюлэмаз оломар быдӟа вожан тылӝу гоманы 
ӧдъя. Та Славагаез но со аслаз кикиосыныз кекатысал кадь. Нш нэнэез эшшо ке солы 
шудонъёссэ возьматъяны косэ.
Та шудонъёсты Танялы кузьмазы нэнэезлэн ӵош ужась, озьы ик огъяулонниын артэ 
улэм эшъёсыз. Нош газетын ужась Валяпай та небыт гоно гондырпиез ваем. Валяпайзэ 
Таня туж яратэ. Ма, нылкышно ачиз но соин часэн-часэн суредаса я выжыкыл 
мадьыса, я книга лыдӟыса пукылэ. Нэнэез огпол Танялы вераз вал, лякыт сямо 
Валяпай улон сюрес вылазы ӧй пумиськысал ке, соослэн нимаз улоннизы но ӧй 
луысал, оло. Бен нэнэеныз ӵош кӧлан диванзэс но Валяпай редакциын ужась 
эшъёсыныз ваиз. Кивалтэтысь семья ужпумъёсын вырись ёзэт, лэся, соослы диван 
басьтыны коньдон висъям. Та диванэз адӟыса, Танялэн нэнэез воксё синкылияськиз:
- Маин но кызьы мон тӥлед тау карыны быгато?
Валяпай соку Танялэсь мертчан йырсизэ маялтыса шуиз:
- Танюша гинэ тазалыко мед будоз.
Валяпайлэн воргорон эшъёсыз но Танялы туж лякытэсь потӥзы. Уката ик пурысьтам 
йырсиёез - мукетъёс диванэз ладъяку, со нылашез чырты бераз пуктыса ворттылытӥз.
- Монэ Гена песятай шу, ява, дыдые, - кизэ мӧйы муртлэсь музэн юн кырмыса 
валэктӥз пурысьтам йырси.
Мар веранэз, Таняен мумиз диванлы туж шумпотӥзы. Со дырозь уго Таня ӟоскыт пу 
кроватьын кӧлаз, нош нэнэез аслыз выж вылэ матрац вальылӥз. Диван вайыкузы 
Танялы ньыль арес вал. Соин ик та учырез нылаш ӟеч тодэ на. Огез жаль: малы ке 
но Валяпайлэн эшъёсыз Таняос доры бератаз огпол но ӧз ветлэ ини. Нылаш тужгес но 
ӵем Гена песятаез тодаз вайылэ. Со дырысен уго Таняез чырты сьӧраз нокин ӧз 
ворттылыты ни.
Огаз шутэтскон нуналэ, Валяпай Таня доры лыктэм дыръя, пичи дыды юатэк ӧз чида:
- Нош малы ми дӥне Гена песятай уг пыралля?
Валяпайлэн ымнырыз мӧзмыт тусо луиз:
- Геннадий Петровичез кык арня талэсь азьло ватӥм. - Собере Танялэн мумизлы 
валэктӥз: - Геннадий Петрович газетамы куамын арлэсь кемагес ужаз, берло дыре 
катэз тӥясьёс сярысь тросгес гожъялляз. Кыӵе ке сьӧськаблы кельшымтэ, лэся, 
командировкаысь бер ӝыт бертыкуз аслаз подъездэз дорын вииллям. Али та пумысен 
уголовной уж утэмын.
Нылкышнолэн верамысьтыз Таня троссэ ӧз анла ке но, огзэ ӟеч валаз: Гена песятай 
соос доры ноку уз лыкты, сое чырты бераз пуктыса уз ворттылыты ни...
Со куспын Танялэн пель сьӧраз Славагайлэн гольтырес куараез чузъяськиз:
- Чао, чао, бомбино! Озьыен, вераським? Капитально! Вордскем нуналад мон одно 
лыкто, уг вунэты. Нош тон тросгес сур дася. Капитально!
Ӧс шарк! вазиз. Висъет ӧс дорын соку ик нэнэез адӟиськиз. Солэн ымнырыз 
ӵыжектэмын, синъёсыз лек тылын ӝуало:
- Тон кема-а озьы монэ муртъёс азьын возьытэ вуттылод на?! Шуозы: та нылзэ пичи 
но умой сямъёслы дышетымтэ!
- Со Славагаед асьме дӥне медам ветлы! - ӧчкариз нылаш.
- Тынэсьтыд уз юалэ! Мӧйыосты дышетыны пичи на! - пурӟем кышномурт, е кутыса, 
нылзэ нырысьсэ зол-зол лачкытъяз. Та дырозь мумиз Таня шоры кизэ ӧз урдылы на 
вал. Нош ваньмыз понна со синазькыль Славагай янгыш. Таня ымдурзэ юнгес куртчиз 
но кровать сэргы ӝиптӥськиз. Тазьы жугемзэ нэнэез берло жалялоз ай...
* * *
Нылзэ вӧсь каремез пумысен Мани берло зэмзэ ӧпкелиз. Угось пичиысен ассэ йӧно 
возьыны дышем нылаш (олокин выжые мынэм!) муминыз азьло сямен мыло-кыдо 
вераськыны, садикын луэм учыръёсты ӟабыль поттыса мадьыны ӧз дырты ни. Озьы ке 
но, Славагаен азьланяз керетытэк улыны кыл сётӥз:
- Асьмеос шоры, нуные, табере принцъёс уз учке ни, - нылыз азе пыдесъяськыса, 
синвуоссэ ӵушиз нылыз. - Адӟиськод ук: мон егит ӧвӧл ни, вылаз ик, быжы вань.
- Кытын тынад быжыд? - паймиз нылаш.
- Тани, - нылызлэн гадяз чиньыеныз йӧтскиз кышномурт.
- Мон быж ӧвӧл - а-дя-ми! Валад-а? - йӧн-йӧн вераз Танюша, собере ӝӧк улысь 
картон коробкае ватскем шудонъёсыз доры мынӥз.
"Пичи на, будӥз ке, визьмаськоз ай", - мур лулӟиз Мани. Ма, лулӟылыны мугез туж 
трос. Нырысь ик, уждунзэс дыраз сётъямтэенызы, куанермон, сютэм улон чыртыёзяз 
вуиз ни. Вылаз ик, семьяен улонэз ӧз удалты. Нош макем потэ калык рад карто-
нылпиё кышномурт луэмез! Мила акаез но, кырсиез но, вань даурзэ пытсэт сьӧрын 
ортчытӥсь бубиз но мед вожъяськозы. Со понна Манилэн чеберез но, визьмыз но, 
ужаны быгатэмез но тырмыт. Эшшо ке улонниез но вань. Туала вакытэ уноез-а нимаз 
улонниеныз ушъяськыны быгатоз? Корка пуш тӥрлыкез бен, диванэз, уродос ӝӧкез но 
кык пуконэз сяна, номыриз ӧвӧл ке ӝык, мар-о сыӵе-таӵеез? Вӧзаз карт кылдӥз ке, 
ваньмыз луоз ай. Нош али номырлы уждунэз уг тырмы. Ярам ай, Валя Маниез уг 
аналты. Пӧраськонние пуктыны тани вуж буфетсэ, сиськон ӝоксэ, тусьты-пуньы 
куасьтонзэ сётӥз. Асьсэлэн нылпиоссы ӧвӧл бере, уждунзы кыкназылы тырме, вылды. 
Вылаз ик, Валялэн картэз корка пуш тӥрлык лэсьтон фирмаын тырше. Зарни киё 
пиосмурт кык висъетэн улонниысьтызы ваньзэ сямен тӥрлыкъёсты ачиз лэсьтэм. Валя 
шуиз, Мишае, пе, азьло туж зол юылэ вал. Огазе кариськемзы бере кык-куинь арзэ 
кышноез чидам ик, чобере чурт-чурт верам:
- Яке ӵош уломы но тон эмъяськод, яке чемодандэ кутыса кошкы!
Тӥни табере йӧнатскемез дырысен дас арлэсь ятыргес луэм ини. Валя шудолэсь но 
шудо. Огез гинэ умойтэм: нылпиоссы ӧвӧл. Нош нылпиосты семья ужпумъёсын вырись 
газетчи туж яратэ, лэся. Соин но, вылды, шудон я книга басьтыса, котькудаз 
шутэтскон нуналэ Таня доры лыктэ. Куддыръя Мани вожаны ик ӧдъялля: нылыз 
Валяпайзэ, мумызэ сярысь, золгес яратэ кадь.
- Малы асьтэос нылпи ӧд заводе? - юаз огпол Мани эш выллем луэм газетчилэсь.
- Картме пӧяме уг поты. Мишае, армиын служить карыкуз, туж юн радиация улэ 
сюрылэм, соин сэрен нылпитэк кылимы. Таня нылыд ӧй вордскысал ке, та дырозь 
нылпи юртысь пинал басьтысалмы ни. Нылдэ аслам кадь карисько. Только тон номыр 
уродзэ эн малпа, Танюшадэ таланы уг медӥськы, - сюлэм висёнзэ усьтӥз газетчи. 
Трос дышетскем мурт ке но, со нылкышно ук. Нош нылкышно мукетсэ нылкышноез 
котьку валаны быгатоз. Манилэсь Славалы синмаськемзэ но Валя уз курла кадь йӧтэ 
пал кышномуртлы. Нош Слава юэ ке, ӵок. Валялэн Мишаез музэн йӧнатскоз но ваньмыз 
ас ӧраз пыроз. Маниез гинэ мед яратоз. Эшшо Танязэ медаз обидьы. Таиз ласянь 
Мани ачиз сюлмаськоз ини...
Я, улыса-вылыса Манилэн вордскем нуналыз но вуиз. Ог дасо нунал талэсь азьло 
кошкыкуз Слава Маниез оскытӥз: яратӥсько, пе. Озьы бере, туннэ солэн "именникез" 
шуыса но ӧз вунэты, луоз - уж бере ӝыт одно лыктоз. Нош ачиз Мани туннэлы ужысь 
куриськиз: куно пумитаны дассяькытэк уг лу. Ярам ай, уж дураз аванс нерге 
сётӥзы. Али Мани буяськоз, йырсизэ плойкаен бабыльтоз но магазинэ потоз. 
Синмаськоно муртэз гинэ лыктытэк медаз кыль.
"Уз, Слава уз вунэты. Со одно сяськаен лыктоз. Нош ваньмыз куноос кошкем бере 
соин уйбыт ог-огмес яратомы", - ас малпанъёсызлы пальпотыса, кышномурт 
синкашъёссэ, собере синлысъёссэ буяны кутскиз.
2
Дораз Слава сютэм кион кадь вуиз. Дас одӥг аресъем Натӥ но укмыс аресъем Ондӥ 
магнитофонэз юн улӟытӥллям но асьсэос ӝӧк вадьсы мыкырскиллям. Нюнюзылэсь корка 
пыремзэ пиналъёс ӧз ик шӧдылэ. Сузэреныз выныз доры матэктыса, егит пиосмурт 
валаз: таосыд нош ик суредасько. Буёло карандашъёс, тӧдьы кагаз гинэ медло 
соослы - кӧт сюманзэс но вунэтозы. Бубызы выжые-а, мар-а мынӥллям. Владиславлэн 
сюрбубиз уго кибашлылэсь но кибашлы: пулэсь вӧлыса, пӧртэм арбериос лэсьтылэ, 
усто суредаське, куиське-керттӥське. "Шундыё" эмъяськонниын-санаториын суредась-
оформитель луыса ужа. Ӧйтӧд, сыӵе йӧно воргорон Славалэн азьтэм-бертэм, егитысен 
ик юыны но мурт пиосъёсын калтыртыны яратӥсь мумизлы маиз понна меда синмаськиз. 
Кызь кык аресъем Слава талы пумтэм абдра: Нюрка (озьы гинэ вазиське со нэнэезлы) 
выллем кышномуртъёс семьяен улыны ӧвӧл вордскемын, нош Борис Петрович - ӟег нянь 
кадь, юртъер котырысь вань уж со вылын возиське. "Пӧрмостэм мумилэн чеберезлы 
синмаськиз вал, дыр", - выльысь аслыз ачиз валэктӥз Владислав.
- Нюрка нош ик бускелетӥ чарка бичаса ветлэ ни-а, мар-а? - вазиськиз со 
сузэреныз вынызлы.
Огкадь вакчи ӵышкем тӧдьы йырсиё пияшен нылаш йыръёссэс куара пала берыктӥзы. 
Ымныръёсазы юан пус пуксем кожалод.
- Мемиды кытӥ калтыртэ, шуисько? - выльысь юаз Слава.
Кыктоослы укшась нылашен пияш таяз учыре валазы, лэся, ма сярысь юамзэ.
- Дышем сямызъя кытӥ ке ветлэ, дыр, - вазиз выныз.
- Нош тӥ ӵукназэ маке сииды-а ни? - оло, Петрович нылыныз пиезлы маке сиён 
дасяса кельтӥз шуыса оске вал Владислав.
- Ми печенняен чай юим. Нош нуназезэ школаын сюдозы, - шуиз Натӥ, выльысь ӝӧк 
вадьсы мыкыртӥськыса.
"Курва! - мумиз сярысь лек малпаз Владислав. - Монэ, мирошкаез, бабуше вылэ 
аналтӥз, нош таоссэ - бубызы вылэ. Сёже дождёшша тон, капитально!"
Егит пилэн йырыз пилиськыны турттэ кадь. Вылаз ик, сиемез потыса, кӧтыз чутыръя 
ини. Выль дусымез ӝукен утялтыны турттэ вал, но Слава пумит луиз. Ӵукна валысь 
так но сиемез уг пот, нош туннэ, вылаз ик, макмырен курадӟе. Сыӵе дыръя сьӧд-
сьӧд чай юрттэ. Нош ог кык час ортчыса, туж зол сием потыны ӧдъя...
Холодильникысь кыӵе ке сӥль юдэс шедьтыса, егит пи мискае ву лэзиз но газ вылэ 
пуктӥз. Пӧземез бере лымаз сугон юдоз, сьӧд пӧсьтурын пызьналоз но отчы нянь 
юдыса сиёз. Солы таӵе сиён кельше...
Со вие корказьын шарк! вазиз. Лангыр-куангыр карыса, тубат кузя тырттэм ведраос 
питыразы. Сюрбубиз туннэ ужаз вазьгес кошкем, лэся, - ульча колонкаысь ву 
вайылымтэ. Зэм, гур азь палась пичи бакын ӝыныяз вань на, нылпиослы тырмоз, ӝыт 
бертыса вортто, шуиз, дыр. Яке сюрпиез вылэ оскиськиз-а?
- Мать твою за ногу! Ачид ву ӧд нуллы ке, та козёлъёслэн тодазы ик уз лыкты! - 
ӧс кусып вамен мырдэм вамыштӥз лыз-вож ымныро мумиз. "Кыӵе ке кышномурт, 
картэныз мусояськыкузы шедьтыса, Нюркаез дышетӥз, вылды", - шумпотӥз Владислав. 
Номыр куаретытэк, егит пи выльысь гур азь пала кӧчиз. Нош Нюрка суредаськыса 
пукись нылыныз пиез шоры урдӥськиз:
- Дась кӧтъёс! Малы ву ӧд ворттэ?! Нош ик ужтэмаса пукиськоды?! Урокъёстэс ке - 
ӧд быэстэ, луоз! Тӥледын сэрен школаын монэ нош ик тышкаськозы, в натуре!
"Огпол коть школае кенешъёсы ветлэмед вань меда?" - мынектӥз Слава али гинэ 
быректэм шыд вылысь шукызэ октонъяз. Нюрка уго нылпиосызлэсь дневникъёссэс гинэ 
но уг чаклалля. Ваньмыз Петрович вылын. 
Солэсь, Славалэсь, дышетскемзэ песянаез чаклалляз. Дас куать арес тырмытозяз 
соос та пу коркан ӵошенназы улӥзы. Школаын умой дышетскем сяна, Владислав нылпи 
творчествоя юртысь эктонъя-кырӟанъя кружоке но мылысь-кыдысь ветлӥз.
- Бадӟым будӥ ке, артист луо. Тонэ сьӧрам кунгож сьӧры нуо, - шуылӥз со 
песянаезлы.
- Нюрка но артист луыны дасяське вал, нош тӥни дас сизьым аресысен пивылэс 
кариськиз, - бусаськем синъёссэ сыӵе дыръёсы ӵушылоз вал песянаез. Улэп анаез но 
тодмотэм атаез ваньмысь, сирота будӥсь нуноксэ со туж жалялляз. Соин ӵош ик ӧз 
но эркия: "Нюркаез мултэс эркияй, соин ик нылы ассэ гинэ яратӥсь луиз". Ӵужаез 
туж вазь пал кылем. Уй сменаысь бертӥсь картсэ кыӵе ке йырвандӥсьёс виытозязы 
жугиллям. Кыкетӥзэ бызьыны дӥсьтымтэ ни: "Аслым карт, оло, шедьтысал, нош нылылы 
атай - ӧй". Кузь тол ӝытъёсы эстэм гур дорын шунскыкузы пересь кышномурт 
нунокезлы удалтымтэ улонэз пумысен огпол гинэ ӧз ӝожтӥськылы.
Пенсие потэмез бере со арен ӝыныен гинэ улыса вуттӥз на. Славалэн мумиз соосты 
чакланы толэзьлы огпол - песяез уждун, собере пенсия басьтон нуналаз гинэ - 
вуылӥз. Пересь нэнэезлэсь коньдонзэ "пунэма" но берен толэзьлы ыше вал. Пиез 
сярысь тодаз ик ӧз вайылы, лэся.
- Кулӥ ке, кызьы улод меда, пие? - берло дыре лулӟылӥзпесянаез. Славалэн сыӵе 
дыръя йырыз кур луылӥз: мар озьы супыльтэ, куатьтон арес но ӧз тырмы на ук. Нош 
пересь кышномурт тазалыкезлэсь лябӟемзэ шӧдэ ни вылэм, лэся. Куартолэзьлэн огаз 
шундыё, шуныт нуналаз Слава школаысь бертӥз но, песянаез сое пальпотыса ӧз 
пумита. Валесысьтыз но ӧз султы. Нунокез ӧтемысь синъёссэ ик ӧз усьты. "Сюлэмыз 
путэм", - шуизы ӝог юрттэт сётӥсь машинаен вуэм эмчиос.
Песянайзэ ватэмзы бере Нюрка вить аресъем нылыныз, кык аресъем пиеныз но Борис 
Петровичен анаезлэн Костина мельница шуонысь пу коркаяз улыны лыктӥз. Со дырысен 
Славиклэн улонэз йырин-чукин кошкиз. Мумиз пиез борды кулэен но, кулэтэмен но 
тэбиньылӥз, оломар понна но даллашылӥз. Эсьма, куазь зоремысь гинэ но Славаез 
янгыш карылӥз.
- Адями виись тон! Мынэсьтым нэнэме тон виид! - кудӟем йырыныз ма верамзэ ик ӧз 
валалля, лэся, куамын ньыль аресъем кышномурт. Пиез пумитаз мытылыны дӥсьтыку, 
мыжыксэ урдыны но ӧз возьдаськылы.
- Нюра, дугды! Мар понна тон Славаез янгыш кариськод? Сузэреныз вынзэ чакламез, 
юрт котырын юрттӥськемез понна-а, мар-а? - дурбасьтӥз огпол Борис Петрович. Соку 
Нюрка урмиз ук:
- Ваньды тӥ дась кӧтъёс! Мынам коркаям улӥськоды, эшшо ке ӧчкариськоды! Уг ке 
яра, мынэ, кошке татысь - ӧс усьтэмын!
Сюрбубиз солы дурбасьтэ шуыса шумпотӥз ке но, берпуметӥ классын дышетскись Слава 
дораз мылыз потытэк бертылӥз. Ачиз выллем нокинлы кулэтэм пияшъёсын-нылашъёсын 
эшъяськиз. Экзаменъёслы дасяськем интые, улыно-вылыно коркаослэн сигъёсазы яке 
мурӝолъёсазы люкаськыса, соос клей зынъяллязы, берлогес "турын" кыскыны дышизы. 
Зэм, визьтэммытӥсь эмъюмъёс пӧлысь кужмооссэгес аслыз бышканы Слава чутрак пумит 
кариськиз. Со угось артист луон сярысь малпанэзлэсь песяез кулэм бере но ӧз 
куштӥськы. Собере наркотикъёслы трос коньдон кулэ, нош Владиславлэн кисыяз 
котьку тӧл шулаз. Нош музон пияшъёс сямен лушкаськыны солы возьыт вал.
Школазэ йылпумъямез бере культурая училищее пырон сярысь малпанэз ӧз зэма. 
Аттестатаз угось "куиньёс" кылдӥзы. Училищее экзаменъёссэ сётыны но шуг йӧтӥз. 
Шонерзэ вераса, экзаменъёслы дасяськыны дырыз ӧй вал, шуыны луоз. Дораз уго 
пияшлы нимаз сэрег ӧз донгаськы, нош сузэреныз выныз ялан суредаськыны выризы. 
Собере Борис Петровичлы но киужъёсыныз вырыны инты кулэ вал.
Ярам ай, дас тямыс арессэ тырмытэмез бере сое армие басьтӥзы. Нош вордскем караз 
бертыса, нырысь нуналаз ик валаз: сое татын нокин витьымтэ. Нюрка азьлолэсь но 
золгес зын вуэн эшъяськем. Вылаз ик, Борис Петрович но чаркалэсь пыдэссэ 
учкылыны шӧтам. Кытчы кариськоз егит пи, рос-прос дышетскемез ӧвӧлэн ӟеч уж но 
уг шедьты бере? Вылаз ик, быдэ вуымтэ Натӥен Ондӥ егит пилы жаль потӥзы. Атайзы 
но кудӟем дыръя кин соослы сиён дасялоз, кин урмем нэнэзылэсь утёз? Армиысь 
бертэмез бере Нюрка бадӟым пиез шоры кивалтосэн урдӥськылыны ӧз дӥсьты ни. Ма, 
сюрбубиз но сое алӥз:
- Мотри, Нюра, Славаез эн обидьы, шабишь! Адӟиськод-а, кыӵе солэн суй 
быгытъёсыз? То-то, аслыд золгес сюроз.
Мумиз зэмзэ кышказ-а, мар-а - жугиськыны ӧз выр ини, нош кылыз азьло кадь ик 
сюлэмзэ вӧсь каре, куддыръя вир ик орсме кадь... Тани али но пичиосыныз мар юнме 
керетэ меда? Соослынуназе бере школае мыноно ук. Кыӵе мылкыдын урокъёсын пукозы? 
Кылозы на-а дышетӥсьёслэсь нодламъёссэс? Вылаз ик, керӟег, вог, уродъяськись 
сямо будӥзы ке, кинлы умой луоз?
Ӝыны час ёрос кесяськемез-черекъямез бере Нюрка басылаз, лэся, - куараез чалмиз. 
Коркан чал-чал. Слава покчиосты чаклано кариськиз. Бадӟым висъетын, Натӥен Ондӥ 
сяна, нокин ӧй вал ни.
- Мумыды кӧчиз-а, мар-а? - юаз Слава.
- Коть воксё медаз бертылы вал, - мӧйы мурт сямен нод-нод вазиз Ондӥ.
- Зэмзэ ик! - выныз борды итӥськиз Натӥ банкаысь вуын кисточказэ миськонъяз. - 
Со ведь доре керетыны-даллашыны гинэ вуылэ. Кыӵе акыльтӥз ни таӵе улон!
Сузэрезлэсь озьы шуэмзэ кылыса, Славалэн сюлэмыз ныж пуртэн бышкалтэм кадь луиз. 
"Зэмзэ но, Нюрка ӧй ке луысал, Борис Петрович, оло, йӧнозэгес кышно шедьтысал. 
Выныным сузэрелы но юисьтэм нэнэ вӧзын умойгес луысал, дыр". Зэм, таӵе 
малпанэзлэсь егит пилэн тыбырыз ик юзыр-кезьыр луиз...
- Слава нюню, милем школае мыноно ни, - Натӥен Ондӥ ранецъёссэс кутӥзы.
"Натӥ Ондӥлэсь куинь ареслы бадӟым ке но, кыктоос кадь адӟисько ук, ӝуждалаен но 
огкадесь, йырсиоссы но кыксылэн ӵуж мертчан выллемесь - бубызылэн кадь. Ачим ке 
сьӧд моколы кельшисько. Эсьма, гадям, суйёсам (бен макесъёсам но!) сьӧд-сьӧд 
гон. Кин меда буби - грузин яке армянин, оло нош, чечен? Нюркалэсь юад ке, со 
ачиз но вераны уз тод, вылды. Шлюха, котькуд воргорон улэ выдыны дась. 
Капитально!" - сузэреныз выныз бӧрсьы ӧс ворсаськем бере аслаз малпанъёсаз выиз 
егит пи. Но сиемез потэмен со выльысь гур азь пала вамыштӥз. Сӥлез небӟем ни, 
лымыз но туж зумыто адӟиське. Слава, дуры кутыса, шыд лым омыртэм ни вал, но 
нянь возённиязы... одӥг пыры но нянез ӧвӧл. "Магазинэ ветлытэк уз лу. Ярам, сием 
потонме пичи сӥль юдэсэн басылскыто но нянь басьтэме бере ӟеч-ӟеч сисько ини", - 
сумка кутыса но холодильник вылын лошъяськись векчи коньдонэз ӟепаз донгыса, 
Слава коркась потӥз.
* * *
Доразы нокин луымтэлы Чебер Нюрка шумпотӥз: картэзлэсь ватоссэ - синучкон 
сьӧрысь пичи бинетэз - кайпалтыны нокин уз люкеты. Нодтэм Борис малпа, дыр: 
уждунзэ кытын воземзэ кышноез уг тоды. Нош Нюркаез уд пӧя, со кескич но амало 
кышномурт - аслыз мар ке кулэ, музъем улысь но шедьтоз. Туннэ кышномуртлы 
коньдон кулэ- макем тросгес, сокем умойгес. Пал пыд Петька Татар базарын улэ, 
аслаз коркаяз. Кышнозэ пери шуккем - уг султылы, озьыен, соослы гань-гань 
мусояськыса, сиыса-юыса улыны нокин уз люкеты. Нюркалэн картэзлэн но кышнозэ 
карлэн чылкак музон палысьтыз утчаны тодаз уз лыкты. Нош майбыр улон понна данак 
уксёед медло. Петькалэн афган тылӝуысь сӧсыр луыса бертэмез понна кун ласянь 
висъям пенсиез кемалы ик уг тырмы. Зэм, соос Петькалэн кышноезлэсь пенсизэ но 
асьсэлы каро. Вӧзаз Борислэн уждунэз но уз люкеты...
Синучконысь Нюрка шоры лыз-вож, тӧрнам ымныро, чылкак тодмотэм кышномурт учкиз. 
Йырсиез таркаськемын, дӥськутэз погмаськемын. Ог вить ар талэсь азьло но ай 
ульчаысьтызы улӥсьёс сое Чебер Нюрка шуо вал. Табере тани веськрес мугорыз 
кустэм-гадьтэм-сауртэм макелы пӧрмем. Азьвылэн мугорызъя вурем дэремез вакчи, 
ӟоскыт кылем. "Шедьтэм ук ма сярысь куректыны! Чебереныд пыддэ уд бинялты, кӧттэ 
уд тыр", - ассэ ачиз буйгатӥз кышномурт. Нош пушкысьтыз кыкетӥ куара солы пумит 
вазиз: "Эн алдаськы, Нюрка! Егит дыръяд кӧня пиосмуртъёс, чебередлы синмаськыса, 
тонэ сюдӥзы, дӥсязы, лымшор палъёсы шутэтскыны, шунды шорын вылтырдэ пыжыны 
нуллӥзы. Эсьма, Бористэ но "Шундыё" эмъяськонниысь шедьтӥд. Востэм удмурт 
воргорон тыныл майбыр улыны уз люкеты, эшшо ке сюдоз-вордоз шуыса ӟеч валад уго. 
Вылаз ик, шӧдӥд: арлыдыд будэмъя зӧк кисыё пиосмуртъёс шорад шергес учкыло 
ни..."
Таиз зэм: кызь укмыс аресъем Нюркалы аслэсьтыз вить-куать ареслы пиналгес, 
небыльток кадь Борисэз киуылтыны сокем секыт ӧй вал. Нош зӧк кисыё сьӧд туганэз, 
Нюркалэсь суредасьлы кырмышъямзэ синйылтыса, чылкак урмиз - ӟуз вир луытозяз 
тышкаса, кык интыем палатае огназэ кельтӥз. Кулон калэ вуэм Нюркаез ӵуказеяз 
ӵукна выж миськись шедьтӥз. Аслэсьтыз янгышсэ шӧдэменыз, вылды, Борис со нуналэ 
ик Нюркалы аслыз кышно луыны ӵектӥз.Нош амало кышномуртлы ӵапак та ик кулэ 
вал...
Санаторийлэн кивалтӥсьёсыз кузпалъёслы пичияк улонтӥ висъязы. Угось картэз ужам 
сяна, Нюрка но татчы ик возьмаськисе интыяськиз. Куать ар отын улытозяз кӧняеныз 
меда шутэтскись-эмъяськисьёсын дусымъяськиз?! Солэсь юмшамзэ Борисэз шӧдылытэк 
ӧз ул ке но, пумит вазьыны ӧз дӥсьтылы. Нюрка угось солы ӵош улыны кутскыкузы ик 
чурт-чут вераз, семьяязы ачиз кузё луоз шуыса. Вормытъяськыны кутскид ке, пичи 
нылыныд но пиеныд куштыса, пе, кельто. Чужанов нылпиоссэ жаляз: котькыӵе азьтэм-
бертэм мед луоз но, пиналъёс вордэм анайзы вӧзын будыны кулэ.
Нюркалэн мумиз кулэмлэсь азьло кӧня ке толэзь азьло Чужановаез юэмез понна 
ужысьтыз мозмытӥзы. Та пумысен Нюрка олокыӵе ик ӧз куректы. Огез гинэ умойтэм 
вал: Чужановъёсты та пичи висъетысьтызы улляны кутскизы. Соку егит нылкышнолэн 
тодаз лыктӥз: со - мумизлэн одӥг гинэ, озьыен, юртъерез Нюркалы кыльыны кулэ. 
Мумизлы та сярысь шара вераз но, соиз черекъяны ӧдъяз: пиед сярысь, пе, пичи но 
уд сюлмаськиськы. Нош мар Славик сярысь сюлмаськонэз, солэн котьмаиз тырмыт ук. 
Эшшо ке со адӟемпотостэм пияш Нюркалэсь нэнэзэ талаз.
- Бен со аслад пиед ук, Нюрка! - паймиз Ивановна.
- Пичи дыръяз сое синтэм коӵышпиез музэн, вуын ӝокатоно вылэм! Ачид ӧд сёты, 
табере чида! - уката юнгес пурӟиз Нюрка. Пумитаз мар вераны тодытэк, Ивановна 
сблэм бордаз кутӥськиз. Нылызлэсь кошкемзэ возьматэк, со валесаз выдӥз но ӧз 
султы ини...
Картэзлэсь ватоссэ кайпалтыны ылам Нюрка бадӟым пиезлэсь ӧсэтӥ пыремзэ ӧз шӧды.
- Мар тон отын утчаськиськод?! - Славалэсь лек куаразэ кылыса, Нюрка нырысь-
валысь куалектӥз. Но кышномурт курдасьёс пӧлысь ӧвӧл.
- Тынад мар ужед?! - кеськиз со. - Тынад ужаса поттэмед ке луысал, эшшо ик. 
Дворникын ужаса трос коньдон поттӥсько кожаськод-а?! - пулемёт музэн тачыртӥз 
Нюрка. Пиез сое кылзыса ӧз улы ни - нянь сукыризэ кутыса, гур азь пала вамыштӥз. 
Чуки-беки шонаськыса, мумиз но сьӧраз калъяськиз.
Газ плита вылысь мискаез егит пи ӝӧк пуме, вӧш вылэ, пуктӥз, собере, тэркы 
басьтыса, пӧсь лымез понӥз но али ваем няньзэ шорманы кутскиз.
- Вот, иське, кызьы тӥ сӥль-вӧй пушкын пыласькиськоды, в натуре! Нош родной 
мумыдэ сиськыны но уд чортӥськы! Ярам, возьмато ай мон тыныд, кин та юртын кузё! 
- урмем кышномурт шыдэн мискаез кутӥз но сокем тыршыса пӧзьтэм лымез пыласькон 
улысь пож ведрае кисьтӥз. Таӵезэ егит пи уг возьма вал. Кема малпаськытэк, со 
Нюрка шоры ожалскиз...
* * *
Сюрбубиз ужысь бертыку, Слава бакчаын гудӥське вал.
- Тон мар озьы толлы пумит убоос копаськод? - паймиз Борис Петрович. Солэсь 
куаразэ кылыса, Слава куаляк луиз. Собере шуиз:
- Виктория пудъёсты мерттыны медӥсько. А то вуж убоын емышез но уг пот ни, 
капитально вужмем.
- Шонер вераськод, пие, песяед кулэм дырысен со боры убо борды нокинлэн киыз ӧз 
йӧтылы на кадь. Ачим ужысьтым уг мӧзмылӥськы, мемиед юмшаса уг ваньмы, лэся. 
Туннэ коть дорын-а со? - сюрбубизлэн супылес выремезъя Слава валаз: Борис 
Петрович шӧмаськемын.
- Нюркаез думет вылын но кокран уд пукеты. Нош ик кытчы ке лобатӥз. Таяз учыре 
синучкон сьӧрысь ватостэ но басьтыны ӧз вунэты кадь.
Таӵе ивор Борис Петровичез ӧз паймыты: кышноезлэн быдэс арняосын олокытӥ 
калтыртэмезлы со дышемын ни.
- А-а, юмшаса акыльтӥз ке, вуоз ай, - киыныз шонтыса, воргорон корка пыриз.
Убозэ копаса йылпумъямез бере Слава боры пушъетъёсты небыт музъеме мерттӥз. Та 
ужез бен гудырикошконэ лэсьтоно ни вал, но ярам, воксё бер ӧвӧл ай, сӥзьыллэн 
нырысетӥ толэзяз куазь гужем выллем шуныт возиське...
3
Вожъяськон - урод сям. Ма, урод сям гинэ шат? Вожъяськон - со бырон. Вожъяськись 
мурт, аслэсьтыз йырзэ быдтыны малпась музэн, улонзэ каллен, нуналмысь 
вакчиёмытэ, лулсэрзэ, тазалыксэ вирюись выллем сюпсе. Та урод сямзэс умоен 
возьматыны турттыса, вылды, куд-огез вожъяськонэз кык пумо возьмато: тӧдьы 
вожъяськон но сьӧд вожъяськон. Тӧдьы но сьӧд магия кадь.

Шаермылэн историысьтыз
Уд кылы ни уӵы чирдэмъёсты
"Кенеш" ("Молот") журналэз кемаласен басьтӥсько ни бере, со мынам аръёсын туж 
уно люкаськемын. Анай кылынымы быгатыса гожъяськись адямиослэсь вордэм 
номеръёссэс куяны жаль потэ угось. Дыр ортчыса, выльысь но выльысь соос пӧлын 
бугыръяськисько, нош но нош аслым кулэзэ отысь шедьтӥсько. Огпол озьы 
утчаськонъям журналлэн 1996 арын потэм номерез ки улам шедиз. Малы ке соку отысь 
одӥг статьяез адӟытэк кылиськем. Бырем гуртъёс сярысь иворъёс вуттыны курыса 
редакция лыдӟисьёсызлы вазиськем вылэм. Дыр трос гинэ ортчемын ни ке но, мон 
выльысь отчы берытсконо кариськи. Егитъёс мед тодозы: историын сыӵе вакыт вал - 
шаерысьтымы пичиесь гуртъёс дасоосын бырылӥзы. Странаен со дыре кивалтӥсьёслэн 
лэсьтэм вамышсы макем трос семьяослы мултэс сюлмаськон ваиз. Песянай-
песятайёссылэсь, анай-атайёссылэсь дауръёс ӵоже улэм-вылэм интыоссэс пыраклы 
куштыса кошкылоно луизы. "Прогресс" колхозысьтымы но уноез пичиесь гуртъёс сыӵе 
адӟонэз чидазы. Хозяйстволэсь историзэ, ортчем кузь сюрессэ тодон но бӧрысь 
ваньзэ сое выльысь калыке поттон бордын ужасько бере, туала егитъёслы бырем 
гуртъёсмы сярысь мар но со вераны быгато, дыр.
Басьтом тани Эметаж ӟуч гуртэз ик. Быдӟым Отечественной ож кутскемлэсь азьло ик 
ини отын улӥсьёс радио пыр веранъёсты кылзылӥзы. Котькуд корка пушез 
электролампа тылъёс югдытылӥзы. Эметажын улӥсьёс асьсэлы туж кулэзэ магазинысь 
басьязы, школаын тодон-валан люказы, шутэтскон дырзэс клубын ортчытъязы. Гуртсы 
быдэсак сямен вож-вож сад пӧлы ышемын вал. Ас кожазы будӥсь писпуослэн 
шулдыренызы гинэ ӧз буйгатскылэ. Трос нылпиё семьяос улон интызэс емышо садъёсын 
но вож-вож карыны сюлмаськылӥзы. Пичи гинэ шурысьтызы тырмымон чорыг кутылӥзы. 
Кызьы малпаськоды, одӥг семья ке но сыӵе чебер интыосты пыраклы куштыса кошконэз 
куке-соку син азяз пуктылӥз-а? Валамон ни, ӧз.
Алнаш ёросысь хозяйствоос пӧлын со аръёсы азьмынӥсьёс радын ветлӥз "Карл Маркс" 
колхоз. Отысь Чистяково гуртын ӟучъёс уло вал. Туж огкылысь кариськыса ужаллязы. 
Няньзы котьку но удалтылӥз. Ю тысьсы государстволы вузаны но, котькуд семьялы 
люкылыны но тырмылӥз. Мар паймымонэз, соос ож мынон аръёсы но няньлы ёрмыса ӧз 
улэ. Котькыӵе секыт ужез киын быдэсъязы. 1950 арозь бусыосазы одӥг трактор но ӧй 
вал на. Гурт сьӧрысьтызы пичи гинэ шурзы пӧсь гужем куазен куасьмылӥз. Соингес 
ик котькудӥз ас бакчаяз яке азбараз кыйгу возьылӥз. Нош кӧня улмопуоссы вал. 
Котырысь вань пичи хозяйствоос "Прогресс" колхозэ огазеяськем бере, со вань 
калыксылэн огъя садэзлы пӧрмиз. Соос ик муш вордонын но мукетъёслы адӟем 
карымон ужазы. Огкылын вераса, Чистяково гуртын ӟуч калык музъемъёссэ котьку но 
пайдаё кутон сярысь сюлмаськылӥз.
Таосызлэсь номыр ласянь бере кыльытэк ужазы одӥг урамъем Вишур починкаын 
улӥсьёс. Вашкалаоссылэсь кылем сямзыя-а яке огзылэсь огзы адӟем карыса-а, 
котькудӥз семья укно улысьтыз котыртэмаз турлы сяськаос будэтылӥз. Бакча беразы 
ик нюлэссы вал. Нош отысь жадёнэз тодылытэк бызись кужмо ошмесэз тодылӥсьтэмез 
ӧй вал, дыр. Та гурт котырысь бусыосын гырись-кизисьёс, ю-нянез утялтӥсьёс, 
мукет ужасьёс со ошмесысь гинэ кезьыт но чылкыт вузэ басьяны тыршизы. Вишур 
починка бырем бере трос дыр ортчиз ини, нош кузётэк кылем кужмо ошмес али ке но 
ялан бызе. Вакытлэн воштӥськемез со вылын но шӧдӥськытэк ӧз кыльы: ошмеслэн 
лапасэз куашказ, дырдыез сисьмыса быриз, котырыз ӵакмиз.
Мукетыз пыраклы ышем гурт - Шаршада. Ву ласянь татын курадӟысагес улӥзы. Со 
понна котькуд семья кыйгузэ туж утялтыса возьылӥз. Азьвылъёсаз сямен ик, татын 
но емышо писпуоссы туж уно вал. Гурт пумен куашканы кутскиз, улӥсьёсыз кытчы но 
отчы кошкылыны ӧдъязы. Бӧрысь кузёоссы вордскем палъёссэс одӥгтэм кельтыса 
кошкем бере но ай та интыосысь писпуосты колхоз огшап утялтыны выриз. Гужем 
каникулъёссы дыръя хозяйстволы юрттонэ пыриськем пиналъёсыз емышъёсыныз 
утялтылӥзы.
Та бырем гуртъёсын ӵош вераны луысал на Шарипово но Пичи Пойма сярысь: ваньзы 
соос одӥг адӟонэз чидазы угось. Отысь улӥсьёсыз кошкем бере но ай соос кык-куинь 
аръёс ӵоже котькуд тулыс юг-юг тӧдьы улмопу но льӧмпу сяськаосынызы котыр улосэз 
шулдыртылӥзы. Та ӵыдыны луонтэм интыосын азьло мытэм гуръёссэс уӵыос кырӟаллязы. 
Мӧзмыталэс кылем сэрегъёсты адӟемлы быдэ сюлэм шымырскылӥз, тылобурдо 
чирдэмъёсты кылэмлы быдэ егит дыр вакытысь эшъёс, тумошо учыръёс, валче ужан 
вакытъёс син азе пуксьылӥзы. Кужмо тракторъёслэн нырысь-валысь пуртъёссы, нош 
отӥяз герыоссы музъемен огкадь ӵошкытатӥзы, гожмазы со гурт бервылъёсты. 
Колхозъёслэн гыроно-кизёно муоссы ӧз тырмылы, малпалод. Трос лыдын верасько 
соин, угось калыкез вордскем музъем вылысьтыз кужмысь уллян учыръёс котькытын 
пумиськылӥзы. Тани милям колхозамы огазеяськемын вал дас одӥг гуртысь дас кык 
хозяйствоос. Витьтонэтӥ аръёслэн кутсконысенызы сизьымдонэтӥ аръёслэн шорозязы 
ваньзы соос туж тупаса, кенешыса улӥзы, огзылы огзы юрттыса ужазы. "Прогресс" 
колхозлэн экономикаез арысь аре юнмаса мынӥз. Со вакытэ трос общественной, 
производственной но социально-культурной юртъёс лэсьтэмын, уно техника басьтэмын 
вал. "Прогресс" колхозлэн данэз быдэс удмурт шаерамы вӧлмемын вал. Нырысь ик 
отын шӧдӥськиз Социалистической Ужысь геройлэн Иосиф Ефимович Семёновлэн 
быгатыса кивалтэмез, кудӥз куамын ар председательын вал. Соку котькуд ар 
государстволы вузаллямы 22 сюрс центнер нянь, 4 сюрс центнер сӥль, 195 сюрс 
центнер йӧл, 40 центнер ыж гон, 1400 сюрс кукей, етӥн кидыс, мертчан но трос 
мукет продукция. Али, жаляса верано луисько, хозяйствомылэн туала вакытэ улэмез-
вылэмез сярысь гожтыны ки уг ӝутӥськы. Быдэс Россиын ортчись реформаос 
колхозъёсты но совхозъёсты зол зӥбизы, нош отын тыршись калыкез пачкатӥзы. Озьы 
ке но, шӧдэмея но валамея, гуртын улӥсь адямиос нокыӵе шуг-секытъёс азьын уг 
куасалско: гыро но кизё, арало но кутсало, пудо вордо - сӥль-йӧл потто, чебересь 
но бадӟымесь улон юртъёс ӝуто. Мае возьмало ӵуказе нуналлэсь? Гурт калыклэн 
улон-вылонэз вылын нокыӵе эскеронъёс (экспериментъёс) медаз ортчытъяське ни 
вылэм. Азинскыны быгатӥсьтэм шуыса быдтэмъёссэ табере выльысь уд берыкты, отысь 
куке-соку "выжыеныз" ишкалтэм адямиослэсь сюлэмъёссэс уд буйгаты ни. Мар вал, 
ваньмыз со историе пырыса мед кылёз. Нош милемыз воштыны дасяськись егитъёс та 
сярысь тодазы мед возёзы.
Михаил Соловьёв,
Алнаш ёросысь "Прогресс" колхозысь пенсионер.