Книга бӧрсьы - книга Андрей Самсоновлы - 60 Андрей Александрович Самсонов - калык писательлэн Семён Самсоновлэн шоретӥ выныз. Солэн нимыз берло дас аръёсы гинэ лыдӟисьлы тодмо луиз. Витьтон арескысен гинэ куаӵ-куаӵ кылбураны кутскыса, дас ар куспын со покчи пиналъёслы дас ньыль но бадӟымъёслы кык книга поттӥз. Ижевске со пиналысен вуиз. Ижкарын редакциосы пыралляз, Герман Ходырев, Александр Вотяков сое эш каризы. Соос ик пияшез калык театре кыскизы (зэмзэ вераса, нырысь массовкаосы гинэ), собере Ондӥ калык хоре но ветлыны кутскиз, куараез уго чебер вал. Лэсьтӥськон училищеын дышетскыкуз но плотник луыса ужакуз эркын дырыз уно вал. Пияш улонлэсь пӧртэм университетъёссэ ортчиз. Ужаз но дышетскиз, армиын служить кариз, Алнаш но Можга ёросъёсын киномеханик луыса тыршиз. Собере совхозын отделениен кивалтӥз, берло дас куать арзэ "Ижмаш" заводын мастер луыса тыршиз. Калыкен кылыз тупалляз. Котырысьтыз адямиос солэн котьмае тодыны-валаны тыршемезлы синмаськылӥзы. Ваньмон дыръяз со ас кожаз баянэн шудыны дышиз. Сюлэмаз крезьгуръёс кылдылӥзы, пезьгытэсь кылъёс, чебересь малпанъёс йыраз лыктылӥзы. Сизьыметӥ классысен со кылбуръёс гожъяны кутскиз. Но соосты нокинлы ӧз возьматъя. Малпано ке, Семон агаез гожъяськон удысын бадӟым, тодмо адями вал ини, солы но вазиськыны кепыралляз. Кылбур тетрадьёсыз зӧкомизы. Витьтон арес палаз вуыкуз, Андрей Александрович покчи пиналъёслы кылбуръёссэ машинкаен печатлаз но Владимир Романовлы, Анатолий Леонтьевлы, Иосиф Ивановлы учкыны-дунъяны сётӥз. Дунъетъёссы паймоно кадесь вал: огезлы одӥг люкетэз яраз, кыкетӥезлы - мукетыз, куинетӥезлы - куинетӥез. Огез но урод дунъет ӧз сёт. А. Самсонов нырысетӥ книгазэ печатланы кутске. Со дырысен огзы бӧрсьы мукетыз дас ньыль книгаосыз - покчиослы сӥземъёсыз - удмурт но ӟуч кылын пото. Кылбуръёсыз шулдыр мылкыдоесь, сайкытэсь но валамонэсь. Тросэз соос ньыльчурен кылдытэмын, визьнодоесь, ӟечлы дышетӥсесь. Таин ӵош данак пальыштонъёсыз, мадиськонъёсыз, ӝог веранъёсыз, шудон-серектон чуръёсыз, эсьма, басняосыз но вань. Андрей Самсоновлэн бадӟымъёслы кылбуръёсысьтыз лирической героез - война бере секыт аръёсы будэм егит адями. Солэн сюлэмыз азьланезлы осконэн, сайкыт чебер малпанъёсын, эшъёссэ гажанэн тырмемын. Нош кыӵе ӟырдыт, чылкыт яратонэз! Солэн кылбуръёсызъя куамын кырӟан гожтэмын (данакезлы Галина кузпалыз крезьгур кылдытӥз). Огшоры улонын но кылбурчи жадёнэз валатэк ужа. Пичи Пурга вӧзысь Постольский посёлокысь корказэ но, Кияик станциысь дачазэ но, нылызлы улон корказэ но ас киыныз но кужмыныз лэсьтӥз. Со ноку но кизэ мычыса, кураськыса ӧз ветлы, уз но ветлы. Книгаоссэ но ас кужмыныз, ас коньдонэныз поттэ, ачиз вуза. Озьы бере, кин-о тон, Андрей Самсонов? Умой адями, усто кылбурчи. Юн лу, шуд но тазалык тыныд сӥзисько! Анатолий Уваров. Никвлад Самсонов Граня верос Туннэ ӝыт Гранялэсь сюлэмзэ сокем вӧсь каризы - дораз бертӥз но, нидаз пырыса, паськыт вылтыро скалзэ маялтӥз, саураз кымессэ лякиз, зар-зар бӧрдӥз: синкылиосын гинэ ӧз тырмы, дугдэм бераз но викышъянъяз пельпумъёсыз кема ӝуткаськизы на. Лулӟылэмезлы быдэ. Алигес кунян ваем скалэз кузё кышнолэсь суралтэмзэ пужалтыса ик куртчонъяз кышномурт шоры паймыса учкылӥз: мар, пе, сокем луиз тыныд. Вӧсь каризы Гранялэсь сюлэмзэ, самой векчи интызэ ик шедьтӥзы. Кин-о сыӵе мурт вань Иллягуртын, самой со кӧй мугоро Олёна сяна? Вирсэртэмез. Сюлэмтэмез. Гуртоос туала арын ог-огенызы магазинысен гинэ огазе люкасько на: толэзьы огпол пенсия басьттэменызы ӵош ог-огенызы адӟиськемзы, кенешемзы со луэ. Мар карод на, улон озьы бергаса кошкиз бере. Пенсия сёткась кышномурт сэргысь ӝӧк сьӧры интыяське, мӧйы радо калык со котыре черодэ султэ. Татысен ик кышномуртъёс лычсузьымоназы ик кин ке сярысь пӧллёзы, чигозы, кинэ ке серекъялозы, ултӥялозы. Вожъяськон мылкыдзэс кыре уз поттэ, но со шӧдӥськытэк уг кыльы. Шонерак верано ке, люккськем кышноос ушъяны мыло-кыдоесь ӧвӧл: одно ик гуртооссылэсь маке но шексэс утчалозы, собере, трос тодӥсь луэмзэс возьматыса, оломар но пӧллёзы. Сыӵе, пе, сямыз кышномуртлэн. Вордскем дырысеныз. Сое, пе, номырин уд бералты, уд быдты. Асьме дырозь озьы вал, асьме бӧрсьы но озьы ик кылёз... Ӧйтӧд, ӧйтӧд, но удмурт кышномурт азьвыл сабырлыгес вал. Озьы кадь потэ. Нош Гранялэн кӧтӝож луонэз кыл пӧллем вылысь ӧз пот, пырак синмаз вераса ик куштӥзы. Калык син азьын. Пенсия ваем сярысь иворез Иллягуртын ог кык-куинь нунал ик вазенгес возьманы кутско, пенсия сёткась кышномуртлэсь Клавалэсь вуэмзэ олокызьы гинэ тодо, магазинысен соку ик черодэ султо: туала арын уд вала, пенсилы но, ява, тырмыт коньдон уг нулло, уд но шӧды, буш кылёд, эшшо арнязэ возьмано луод на... Толон Граня но озьы шуыса ик дыртӥз вал. Калык манер сылэ, кыл шеремзэс пеляз тыре но, уг но кадь, сокем анланы уг тыршы. Сопал урамысь Ольга апай бӧрсьы султӥз но сылэ. Ас малпанъёсыз пӧлын. Гранялэн кузпалыз - гур ӝутӥсь, ӵемысь мукет гуртъёсы ӧтчало. Кибашлы. Табере гур ӝутӥсь калык но ёросын чиньыен лыдъямон сяна ӧвӧл ни. Пал киысь чиньыен. Соин Гранялэн кузпалыз ки вылэ ӝутыса нуллымон адями: легковоен нуо, паськыт пельпумо, быгыль-быгыль мугоро начальникез сямен, доразы асьсэос ваё. Куддыръя воргоронлэн пыд-кукыз сокем либрамын луэ, Граня ачиз кунултыса валтэ капка ул пул ваментӥ. Коньдонэз, ма, ужамысьтыз тырмыт потэ, но... Юонэз вань ук... Тӥни мар уг кельшы Гранялы. Мултэс трос сектало. Таизлэн пыкъяськон уг тырмы. Аракы чаркалэсь... Тӥни со сярысь малпаськыса сылэ туннэ но. Неужто гур пуктӥсез туннэ но Биялась тютьырмыса вуоз меда? Самой соку ик азьпалаз чуртнаськыса Олёна султӥз. Шок-пуль луэм. Мукет дыръя пал кыл но ӧй поттылысал, дыр, Граня, но али мылкыдыз позырак луиз: ма, кызьы-озьы суам ымнырын мукет муртлэн азьпалаз султод, пе. Юатэк но, вератэк но. - Дугды ай, Олён, тон татын ӧд сылы ук? - Кызьы? Нош тон мар понна? Урамтӥ магазинэ васькемдэ адӟи, малпай, мон понна но сылод, дыр, шуыса. Калыклы ивортӥд, дыр, ук? Мон но вуо шуыса? Пензи ӵош басьяськом ук... Ӧз вера-а, мар-а, Ольгапай, мон татчы султӥсько шуыса? Ӧз? Осто, Грани, ымныртэм ик адями тон... Пичи дырысен весь верасько, монэ эн вунэты шуыса, нош тон... - Ма... - Мар-о "ма"? Уд тодӥськы-а, шай-а? Мынам сиисьёс, уксё понна бӧрдӥсьёс ӝӧк котырак ик. Тынад мар? Тыныд пензи дуре сокем дыртытэк но ярасал, ачид да гур ӝутӥсед, писэед сяна, нянь куртчисед ӧвӧл.. - Яралоз ни милемлы... - Яралоз. Кызьы-о уз яра. Муры скал но озьы ик, пе, шуэ. Хы-хы-хы... Олёналэн гырдалтэмез пумысь нокин нокыӵе ӧз кариськы, магазинын шыпак луиз: ӵапак гудыръяса зорон азьын кадь. Вань люкаськемъёс лычсузьыса ик возьмало кык кышномуртъёс куспын керетон потэмез. Ярато ке ярато Иллягурт кышноос мукет адямиослэсь ваче гадь шуккиськылэмзэс! Пырс! потӥз но кошкиз магазинысь Граня. Урам кузя вамышъякуз викышъямзэ ӧз возьматы, пушказ тымиськыса улэм бӧрдӥсь кӧтӝожзэ скалэзлы саур вылаз кисьтӥз... Тӥни соку ик тодаз ваиз кемалась ортчемъёссэ. Тани соос Олёнаен ӵош дас классын дышетско. Средней школаед соку райцентрын гинэ вал ай: бадӟым ожмаськон али гинэ быремын. Татын дышетскемед понна коньдон тыроно. Фронтысь бертэм агаез Граня понна коньдон тыре. Бухгалтерын ужа. Мытесын. Кыкез но кукъёсыз вандылэмын. Семья заводьыса ӧз вутты вал. Кудӟем дыръяз озьы ик бӧрдэ: мыным табере кин бызёз на, одӥг тон гинэ, Граняе, дыдые, шумпотонэ. Дышетскы, визьмо лу, калыклэсь эн возьдаськы. Сирота поннад но йырдэ мукет адямиос азьын мыкыртыса астэ ултӥ эн кар... Лёгор агаез тӥни озьы дышетылӥз Граняез. Нош улыны кӧй мугоро ӟуч кышномурт дорын улӥзы. Патерын. Пичияк висъетын. Граняен Олёна отысь сюбег койка вылын артэ ик кӧлаллязы. Гранялэн мугор шур дурысь векчи бадьпу ньӧр зӧкта сяна ӧвӧл бере, койка дуре лякиськыса кадь изе вал. Олёна вӧл-вӧл кариськыса улыны дышемын: кӧлыкуз но быг-быг пыдъёссэ койка вамен вӧлъя но кӧтыз тырымон соргетэ. Граня вӧзаз ик ӧвӧл кадь потэ, лэся. Сиськыны но Олёна мыло-кыдо. Иллягуртын солэн бубиз председатель бере, сиён-юон ласянь Олёна ёрмонэз ӧз тодылы. Райцентре олокыӵе но ӧтчамъёсы-совещаниосы Иллягуртысь колхоз тӧро арнялы-толэзьлы олокӧня пол вуылэ. Кошовкаяз* одно ик макес сӥль я мешокын кеньыр, шунытгес куазен картошка я кубиста вуттоз. Трос уз вераськы, умой улэ шуоз но капказьысь кельыт ужпилэсь сермет калзэ пертчылоз - сылон интыяз далай гинэ ӵабъяськыса сылӥсь, дор палъёсаз табере ыбиськыса лобӟыны дась валлэн кошовкаяз олокызьы гинэ тэтчыса ганяк лэзиське. Предлэсь ворттылон валзэ устолэсь но усто сюдо. Иллягуртысь пыдэс мырдэм кыскась валъёс чотын шуэмзы шонер но, дыр... Школаысь бертон азязы нылъёслы кузё кышно Глафира бырем гуртаз шыд пӧзьтэ вал. Кыкназылы но нимаз. Кык гӧршокъёсын. Олёналэн бубиз озьы косӥз, пе. Олёналы вӧл- вӧл, паськыт кӧтурдэсо гӧршокын, нош Гранялы - ачиз кадь ик шымырскем мугоро пичи чугунын. Сиськон дырзы Граня понна самой курадӟытӥсез вал. Ма, шонерак верано ке, Олёналэн кӧйын-вӧйын пальккаськись шыдэз шоры учкыса, сюмамтэ муртлэн но сиемез потыны кутскоз: сокем зумыт пӧрме вал гурын пырс-пырс луэм шыдэз. Кубистаен, парсь сӥлен. Кӧня ке ӟузьылэмез бере Олёна сӥлез борды кутске, котькуд лызэ, оло, чупаны ик дась луэ. Тае адӟыса, вожъяськыса, Гранялэн кӧтӝожен тырмем мылкыдызъя синкылиосыз бездыт, лызпыръем шыдэныз тусьтыяз ӧжыт гинэ уг усьыло. Шыд нерге шуоно, дыр. Глафира патерантъёсызлы тазьы нимаз пӧзьтылыны чутрак пумит кариськиз вал: сомында-сомында, пе, выронэз, утялсконэз. Олёналэн бубиз одӥгаз лыктэмаз кузё кышнолы корказяз быдэс мешок кӧжы вайыса кельтӥз. Глафира кума, пе, таиз мынам кышнолэн саламез. Ӟуч кышно кобызэ ӧз усьялля ни. Нош Гранялэн отӥ-татӥ уясь кеньырен, кык-куинь картошка юдэсэн шыдэз пумысен ымзэ кырыжтыса шуылоз вал: мон, пе, Глафирунька, пуныме но тынад шыдэдлэсь ческытгес сиёнэн сюдӥсько. Неужто, пе, агаед уг валатскы со пумысен? Кызьы уз валатскы Гранялэн Лёгор агаез, одно валатске. Юрттыны уг быгаты. Ачиз но е бычыезлы выль пась лэсьтӥз ни бере: ӟоскыт жаловання тыро, пе. Ачиз озьы шуэ. Соиз но шонер, дыр, но Лёгор агаезлэн мукетыз но вань: жалованняысьтыз тросэз чыртызэ гочатӥсяз кошке. Со пиртэшсэ нокызьы вормыны уг быгатӥськы, пе, куректыса юисько шуэ. Олёналэсь парсь сӥль сиемзэ адӟыкуз, Гранялэн гадь вылаз оломаиз оломар луылӥз, куддыр ас малпанъёсаз Олёналы йыбырттылӥз: "Сёт ук, Олёнӥ, самой со куажымо лыдэ мыным йырйыны. Эшъёс ук асьмеос..." Гранялэсь таӵе мылкыдзэ Олёна ӧз шӧдылы, пичи ке но сӥль юдэссэ мычыны тодаз но ӧз лытылы. Со понна перепечъёсын утялтэ вал: тригонометриен Олёна мыркомем тул но тӥни - номырзэ уг йӧндыры. Граняез бергатытэ. Гранялы мар-о, ӵӧжлы вуын пыласькем кадь сяна уг йӧты. Котькуд тригонометри задача понна Олёна Гранялы перепеч мычылӥз: мумиз олокыӵезэ но пыжыса келялоз вал - сяртчыен но, картошкаен но, губиен но, кӧжыен но, кукеен- кубистаен но, сюлэн но, виро ӝукен но... Со ортчемъёсыз пӧлысь мукетыз но таӵе ик син азьын на. Ожмаськон-жугиськон война бере аръёсы сиён-юон уг тырмы бере, гурт калык ассэ сюдӥсь но утись нюлэскы кыстӥськылӥз. Мыло-кыдо мурт гужем куазен отысь одно маке шедьтоз. Граняен Олёна эмезяло. Пӧсь. Дурыстэм пӧсь. Вылаз ик, лӥялъёс котыре ӝужам эмезьпудъёс оломарлы сокем пушнерен эшъясько: киосыз но, пыд котыръёсыз но пульсатъяло. Олёна нюло саюлысь лӥял вылын пуке, Граняез аслаз сарбаяз бичаськытэ. Капчи-а таӵе куазен бичаськонэд? Нош кытчы кариськод? Олёна бичаськемез понна кӧня ке аръян, кык шорет нянь сёто шуиз. Чабей нянь. Сыӵе нянез Граня веръямзэ ик вунэтӥз ни. Нош Олёналэн азьысьтыз уг бырылы. Бубиз пред бере... Мылысь-кыдысь бичаськиз Граня. Ымыз одӥг эмезь донгыны но аслыз маза ӧз сёт. Озьы ке но, куакъёс сьӧрысь ӵем гинэ Олёналэн вазьылэмез кылӥськылэ: "Граня! Тырмытӥд-а ни? Мар-о сокема?" та куара ик Граняез эшшо но дыртытэ. Пушнераськон шоры учкыны ик маза ӧвӧл. Нуназе котырын гинэ Олёналэсь сарбазэ тырмытӥз. Шумпотыса ик сётскиз вал нюло куакъёс пала. Дыртонъяз, силё борды канжаськыса, бичаськемзэ ӧжыт гинэ ӧз питыраты. Гранялэсь мылазяз ошем сарбаез Олёна кыскыса ик басьтӥз. Мын, пе, табере аслыд бича, мон саюлын ныралско. Вай, пе, артчёттэ* ымныр вылам возъяло. Чибиньёслэсь, пе... Собере Гранялы ӝыны шорет нянь сётӥз на. Котмем мае ке. Лянэсысьтыз аръянэз кисьтаськиз, луоз. Вождэ, пе, эн потты, Грани, сюэ куасьмиз, ваньзэ аръянме юыса быдтӥ... Со нянь шоретэз гуньдылыса-гуньдылыса сииз Граня. Викышъяса-викышъяса. Олокыӵе но мылкыдъёслы луыса, лэся. Сюлэм пушкысьтыз. Шуо ук, сирота муртлэн сюлэм вир тылын гыбдась, пе, луэ. Верамзы шонер. Сарбазэ тырмытэм бераз Граня Олёнаез сайкатӥз, артчётсэ ымныр вылысьтыз сюлтрак кыскиз но ас кусказ ик керттылӥз... * * * Ваньзэ тае тодаз вайыса, Гранялэн мылкыдыз пызьырак луиз: малы тазьы скалэз вӧзын бӧрдыса сылоно? Чик ӧвӧлтэм Олёналэсь суам ымнырзэ вань улон даураз чиданы кулэ-а, мар-а? Маин ке янгыш шат Граня? Со-а калык рад уг улы? Солэн-а коркаез, юрт котырыз калык рад ӧвӧл? Олёна сямен чабей нянь сиыса улысал, Лёгор агаез аракы вылэ чӧлскыса улонысь дырызлэсь вазь ӧй кошкысал ке, со-а азьланяз дышетскыны ӧй быгатысал? Быгатысал! Нош нылпиез? Солэн-а "ӝӧк котыр" нылпиез ӧй луысал, Посьтолысь делянкаын секыт кислэсъёсыз ӝутканъяз едӥнь котырысьтыз оломарзэ ӧй ке чигтысал? Иллягуртысь председатель Олёна интые келяз ук Граняез нюлэс дасянэ. Луысал, одно луысал Гранялэн но нылпиосыз, со проклят война- ожмаськон, солэн бервылыз ке ӧй луысал... Вералоз, одно пырак синмаз вералоз Граня вирсэртэм Олёналы аръёсын тымиськыса улэм мылкыдзэ. Кисьтыса ик лэзёз! ...Таӵе дӥсьтӥсь луэмез аслыз ик мусо потӥз. Гидысьтыз ӟеч мылкыдын потӥз. Учке но - гур ӝутӥсез пыре. Ассэ ачиз капка ул пул вамен чырткемак вамыштытӥз. Сазь, лэся. "Умой-а улӥды?" - шуиз, корка пыриз. Тае адӟыса, Гранялэн мылкыд шуназ, кузпалыз сьӧры ик пырон вылысь корказь ӧсэз усьтыны шӧтам вал - шуак дугдӥз. Нош Олёна? Тырмоз-а Гранялэн соин ӝот-ӝот вераськон вылысь бугырскем мылкыдыз, быгатоз-а али гинэ аслыз кыл сётэмез Олёна вылэ ӧръяськыны? Пождаськем тулыс тудву кадь поръяса, позыръяськыса? Оло эшшо чидано, оло ческыт ымез кӧш кароно ӧвӧл, оло ваньмыз азьло сямен ик мед кылёз ни? Ӧйтӧд, ӧйтӧд... Гур ӝутӥсен кенешоно шат? Мар меда шуоз? Али ик... Кышномурт чырткемак, егит арлыдъёсаз кадь, кокразь тубатлэн лёгетъёсыз вылтӥ вамыштӥз. 1995, оштолэзь. * Кошовка - бурдо, кык кузя пуксьымон дӧдьы. * Артчёт - (диал.) айшет. Елизавета Камашева Будӟыннал Азьло дыръя будӟыннал уйлэсь кыӵе луонзэ туж гажало вал. Шуылӥзы: пуныез умой сюдоно. Пуны будӟыннал уе утэ ке, шуозы вал: ар секыт луоз. Пиналъёсыз но ӝыт шудыны ӧз лэзьылэ. Аракы юыса но лекъяськыса ветлыны уг яра, пе. Будӟыннал уез уйбыт тылын пукылӥзы но вуриськылӥзы. Мукет нокыӵе киужез кутылыны ӧз лэзьылэ. Кинлэн сюсьтылэз вал, соос сюсьтыл ӝуам улсын уйбыт вӧсяськылӥзы. Валамон ни, кытын черксы вал, отын улӥсьёс черке мынылӥзы. Нош черкъёс котькуд гуртын ӧй вал. Соин ик быдӟым куала вамыштылӥзы. Кин отчы вӧсяськыны ветлэ, солэн нимысьтыз пу чагез луэ. Со чаг вылэ котькудӥзлэн нимысьтыз кӧм ӵушконэз ошемын. Котькуд кузёлэн нимтулыз-а, пусэз-а (тангаез-а) отчы пусъемын луэ вал. Будӟыннал ӵукна вазьгес султылӥзы но сюсьтыл ӝуатылӥзы, собере ни Инмарлы вӧсяськылӥзы. Бӧрысь вулы мыно вал, соку гинэ ваем вуэн самовар пукто, гур эсто, табань пыжо, нянь сукыри но шаньги пыжо, ӝук пӧзьто. Тросэз ӟазег сӥль пыжылӥзы я пӧзьтылӥзы. Сур дасяны но ӧз вунэтылэ. Кенэм вӧйзэс но будӟынналозь нимысьтыз возьылӥзы. Со кенэм вӧй будӟынналэ табань сиыны дасяськылӥз. Кӧжы пог но лэсьтылӥзы. Ӝуксэс вазьгес пӧзьтылӥзы. Изэм кеньырез со вакытъёсы кикоен поттылӥзы. Котькуд адями гуртаз будӟыннал ӵукна шунды ӝужан пала вӧсяське вал. Гур ӝуаку, нырысьёссэ куинь табаньёсты вӧсяськыны пыжылӥзы. Со табань вӧсямын. Та табаньёсты семьяен гинэ сиёно, мурт семьяен уг яра. Инмарлэсь шуд, тазалык но азинлык курыса, коркаысь тужгес арлыдоез мурт семьялы азинлыко улон-вылон курыса вӧсяське. Ӵукна сием-юэм, вӧсяськем бере пудо сюдон борды кутскылӥзы. Песятаен атай нырысь ик валэз корка пушкы пырто. Солы отын вӧсям нянь сёто. Бератаз валмы коркаысь ачиз потэ но азбаре вуэ. Мукет пудо-животлы но тани черод вуэ ни. Соосты колодча дуре улляло. Бадӟым тусь вуэн тырмытэмын. Скалъёс, ыжъёс, кунянъёс но мукетъёсыз гуч-гуч ву юо. Воргоронъёслы но, кышноослы но, нылпиослы но уж тырме. Нош ӝыт пал вӧсь нерге ветло вал. Вӧсь нерге дыръя уллапаласен выллапала бӧлякъёс коркась корка ветлылӥзы. Вӧсь нерге туж шулдыр ортчылӥз. Вӧсь гур сюлэмез ик вырӟытылӥз. Со кырӟанъёс пӧлысь таӵеез ялан малы ке уг вуны. Осто-о гинэ, Инмаре-е, Бадӟы-ын Инмаре-е. Армись огпол быдӟыннуналмы. Сёт, Инмаре, ӟеч ардэ, Сёт, Инмаре, шудбурдэ. Сёт, Инмаре, тазалык, Калыкедлы каньыл улон. Осто, Инмаре, сёт шуныт Гужемдэ, шуныт зордэ. Кизем ю-няньдэ удалтыты Сьӧлыктэм нуныос понна. Туж чакласькыса, сабырлы гинэ юмшалозы вал. Будӟыннал вӧсь нерге дыръя пересь атайёс но пересь анайёс туж чакласькылӥзы. Шуылӥзы: номыр керетон медаз луы. Сабыр возиськем бордысь угось ю-няньлэн удалтонэз потэ. Таӵе чакланэ но вань: будӟынналэ чуньы вордскыны кемдэ ке, корка кузё ассэ туж узырен но шудоен лыдъяны кутскылӥз. Чуньыез соку ик корка пушкы пырто, утё, шунто. Вал лыд йылӥз. Чуньы ӝоген будоз, бусые ужаны мыноз, кузё соин гыроз но усыялоз, кизёз но культозэ дораз нуллоз. Кутсам кидыссэ, курозэ крестьян калыклы валэн ворттыны кулэ. Чуньы вордскем понна кызьы шум уд поты, пе. Гуртын улӥсь, кык-куинь валэз ӧз ке луылы, ассэ умой кузёен ӧз лыдъялля. Нош ми, нылпиос, будӟынналэз мукетыз понна яратылӥм. Котькуд коркан угось та нуналэ курег пуз буяллязы. Ӵуж, вож, горд, лыз буяло вал соосты. Вӧсь нерге дыръя, кызьы верай вал ни, бӧлякысь адямиос коркась корка ветлӥзы. Милям бӧлякмы дас тямыс корка вал. Пиналъёслы котькуд коркан буям курег пуз сётылӥзы. Курег пуз узырлыкмы кык-куинь нунал сиыны тырмылӥз. "Кенешлэн" кенешез Осконэз ыштэм уг пот 73 аресам мынӥсько ни ке но, та бадӟым арлыды "Кенеш" журналэн эшъяськыны уг люкеты. Со мыным тужгес но матысь, дуно эш кадь потэ. Одӥг ар но та изданилы гожтӥськытэк уг кылиськы. Сюлэмлы кельшисьсэ, мылкыдэз бугыртӥсьсэ котькуд номерысь шедьтӥсько. Кылем аре потэм дасэтӥ номерысь туж паймытӥз артисткалэн Анна Григорьевна Колесниковалэн ортчем улон сюресэз. Та статья уноезлэсь лыдӟисьёслэсь синъёссэс усьтӥз, луоз. Театрын шудэм нылкышнолэсь улэм-вылэмзэ писатель Егор Загребин сокем быгатыса возьматэм угось. Со понна гожтӥсезлы тау карон кылъёс верасько. Журнал бамъёсысь чуръёс турлы малпанъёсыз бугырто. Соин валче кытӥяз вуж номеръёсыз выльысь ӝутӥсько. Бугыръяськисько, утчаськисько, ас малпанъёсылы валэктонъёс шедьтыны турттыса. Та улнамы огшоры адямилы тросэз валантэм. Монэ, кылсярысь, одӥг юан ялан курадӟытэ: малы, шуом, финн-угор выжыысь потэм калыкъёс - мадьяръёс (венгръёс), эстонъёс, финнъёс - умойлэсь но умой уло, нош Россие выжыяськемъёс - удмуртъёс, комиос, поръёс, вепсъёс но мукетъёс - номырлы ярантэм урод? Та пумысен ӵектонме верамал. "Кенеш" журналын дырын-дырын возьматылоно вылэм мукет кунъёсысь ӵыжы-выжыосмылэсь кызьы улэм-вылэмзэс, шонергес ке, улыны быгатэмзэс. Соос сярысь гожъямъёсьытыды удмуртъёс но асьсэ дорын кутыны, пыӵатыны луонозэ ӧй шедьтысалзы-а? Валамея, асьме писательёслы, журналистъёслы Венгрие, Финляндие яке Эстоние потаны дунтэм уз усьы. Тазьы пӧрмоно ӧвӧл кадь ке, соку отысь гожъясьёсын кусып тупатыны ӧй быгатысалды-а? Асьмелэсь кыдёкын, палэнын, чылкак мукет кунъёсын улӥсь ӵыжы-выжыосмы сярысь мае но сое туж тодэм потэ. Табере жалян мылкыдъёсме усьто на. Милям Лазарево черкогуртамы (селоямы) Ципья палъёсысь вуэм удмуртъёс уло. Одӥг вакытэ колхозазы югдур туж уродмылӥз ке, уноез татчы кыстӥськизы. Тӥни со аръёсы черкогуртамы кызь удмурт семья лыдъяськиз. Берло дыре, валамон ни, воштӥськонъёс ортчизы. Мӧйыос сояз дуннее пыраклы кошкизы. Нош егитъёс сярысь верано ке, соос ӟучомон сюрес кузя вамыштӥзы. 40-50 аръёс ортчыса, соос удмурт выжыысь луэмзэс уз но тодылэ ни. Югдур сюлмаськытэ. Тани ёросамы "Кенеш" журналлы мон огнам гожтӥськись. Та сярысь мукетъёс пӧлын кылпум ӝутӥсько ке, соос валэкто: кинлы кулэ удмурт кылын журналэд? Али туж интыяз луысал ӟучъёслэн веранзы: кыӵеесь асьмеос, сыӵеесь ик дӧдьыосмы. Мар вите азьпалан, туннэ вераны шуг. Осконэз чылкак ыштэм уг пот ке но. Семён Камашев, Киров улосвылысь Уржум ёросысь Лазарево черкогуртын улӥсь. Людмила Карпова Людмила Кириллова Удмурт вераськетъёсты дышетонъя сузьет Удмурт вераськетъёсты дышетонлы берло вакытэ бадӟым саклык висъяське. Пусйыны кулэ, соосты эскерон кутскиз кылем даурлэн шораз кунгож сьӧрысь но асьме кунысь тодосчиослэн (Ф. Й. Видеманн, Т. Г. Аминофф, Б. Мункачи, Ю. Вихманн, Б. Гаврилов, Г. Е. Верещагин, И. С. Михеев, И. В. Яковлев, В. Д. Крылов но мукетъёсыз) ужъёссы потэм бере. 1920-50-тӥ аръёсы та удысэз азинтӥзы асьме кунысь тодосчиос. Пӧртэм пумо экспедициосын трос гинэ материал люкамын вал. 50- тӥ аръёслэн шорысенызы удмурт диалектология пыд вылаз йыг-йыг султӥз. Ужъёслэн ӟечлыксы трослы будӥз. Та удысъя нимысьтыз диссертациос гожтэмын но утемын вал. Нош Удмурт кун университетысь профессор, филологи тодосъёсъя доктор Валентин Кельмакович Кельмаков удмурт вераськетъёсты эскерон борды кутскем бере кылтодонлэн та люкетэз тужгес но трослы азьлане вамыштӥз. Тодмо тодосчи пӧртэм интыосын улӥсь удмурт калыклэсь вераськемзэ дышетон удысэз чылкак выль сямен радъяз. Профессор Валентин Кельмакович Кельмаков - удмурт тодосчиос пӧлысь одӥгез тужгес но тодмо кылчи. Сое кызьы ке асьме элькунын, озьы ик кунгож сьӧрын но ӟеч тодо. Удмурт кылэз эскеронын сяна, огъя перм, финн-угор кылтодонысь эскерымтэ ужпумъёсты сэрттон-пертчон удысын но В. К. Кельмаков трос лэсьтӥз но лэсьтэ. Жаляса верано луэ: вылӥ дышетсконниослы (вузъёслы) удмурт кылъя поттэм книгаос, пособиос та дырозь та дырозь туж ичи на, ужан программаос, методической юрттэтъёс но уг тырмоош табере тани йӧ вырӟиз кадь. В. К. Кельмаков удмурт диалектъёсты дышетонъя но эскеронъя нырысьсэ дасяз бадӟым сузьет, отчы огъя программа, ужан программа, методической юрттэт но диалект текстъёсъя хрестоматиен ӵош удмурт диалектологияя дышетскон книга пыро. Удмурт диалектология удмурт филология факультетлэн дышетскон планаз 70-тӥ аръёслэн кутсконазы нимысьтыз дисциплина карыса пыртэмын вал. Та дышетскон курс капчи ӧвӧл. Нош куке дышетскон книгаос ӧвӧл, со эшшо но секытэн сётске. Кулэ темаосъя материал куд-ог тодосчиослэн публикациосысьтызы но статьяосысьтызы гинэ шедьтӥськод, соосты, валамон ни, пӧртэм интыосын потэм книгаосысь но бичетъёсысь утчано луэ вал. Табере, куке та дисциплиная быдэс сузьет дасямын но печатламын, студентъёслы, аспирантъёслы, дышетӥсьёслы, тодосчиослы но ваньмызлы, кин тунсыкъяське удмурт калыклэн вераськон сямъёсыныз, удмурт диалектъёсын, соослэн фонетика, грамматика но лексика удысысь асп(ртэмлыкъёсынызы но азинскон сюресэнызы тодматскыны трослы каньыл луиз. Дышетскон вылӥ верам сузьетэ пырись ужъёс п(лысь нырысь ик дасямын вал удмурт диалектологияя огъя программа. Нырысетӥзэ со потӥз 1974 арын, нош бӧрысь ини выльдыса но паськытатыса - 1992 арын. Отын та дисциплиная эскероно ужпумъёс, кылсярысь, огъя но удмурт диалектологилэн историенызы тодматскон, транскрипция, вераськетъёслэн грамматической но лексической сӧзнэтсылэн инъетсы но пӧртэмлыкъёссы сярысь валан вакчияк гинэ сётэмын. Программалэн пумаз огъя но удмурт диалектологилы сӥзем ужъёслэн нимъёссы, кытын но ку потэмзы пусъемын. Мукетыз методической пособие - "Удмурт диалектология: Ужан программа" (1991; 1997) -дышетӥсьлэсь но студентлэсь лекциослы но семинаръёслы дасяськонзэ умойгес радъян понна, озьы ик студентъёслэсь удмурт диалектология удысын валанъёссэс ас понназы будэтон вылысь чакламын. Татын котькудӥз бадӟым тема нимысьтыз юанъёслы люкылыса сётэмын, студентъёслы дэмлам литература пыртэмын. Удмурт диалектологияя курсэз ортчемзы бере отысь басьтэм тодон-валанъёсты юнматон понна студентъёс нимысьтыз эскерон (контрольной) уж быдэсто но лудвыл практикае потало. Пӧртэм гуртъёсысь вераськетъёссылэн аспӧртэмлыкъёсынызы тодматскон но соосты пыр-поч эскерон понна В. К. Кельмаков профессор дасяз та дисциплиная "Удмурт диалектология: Методической юрттэт" нимо пособие, со ньыль пол ни поттылэмын (1985; 1990; 1994; 1998). Та программае контрольной ужен, лудвыл практикаен герӟаськем ужрадъёс, куронъёс но юанъёс, транскрипция сярысь валэктон пыртэмын, куд-ог вераськетъёсъя транскрипциен текстъёс сётэмын. Методической юрттэтлэн пумаз интыямын та дышетскон дисциплиная зачётлы юанъёс. Сузьетын тужгес но бад(ым инты басьтэ "Краткий курс удмуртской диалектологии" (1998) нимо пособие. Ужын кык люкетэз вань. Нырысетӥез теория ласянь тодон- валанъёсын тодматэ, озьы ик удмурт вераськетъёсын. Выльысь пусъёмы: удмурт вераськетъёс сярысь та выллем огъясь уж ӧй вал на. Соос сярысь материалэз пӧртэм книгаосы пыртэм публикациосысь гинэ шедьтыны луэ вал. Книгалэн мукет люкетаз пыртэмын удмурт вераськетъёсысь гожтэм сю текстъёс, соос ӟуч кылэ но берыктыса сётэмын. Та текстъёс пӧртэм интыын улӥсь удмуртъёслэн вераськон сямъёсынызы тодматскыны юртто. Книгалэн пумаз узыр библиография ӵектэмын, отчы кылем даурысен туала вакытозь удмурт вераськетъёсъя печатлам литература пыртэмын. В. К. Кельмаковлэн удмурт диалектологияя кылдытэм дышетскон сузьетэз кызьы ке удмурт, озьы ик огъя перм но финн-угор кылтодонын туж бадӟым уж луэ. Туж оскем потэ: удмурт кылтодонлэн мукет люкетъёсызъя но та выллем дышетскон сузьетъёс потозы. Нош гажано Валентин Кельмакович Кельмаков профессорлы азьланяз но таӵе тунсыко ужъёс дасяны мылкыд карем потэ. 3 Людмила Хрулёва "СЮЛЭМЫ НОКУ УЗ ПӦЯ..." "Тулыслэн мон нылпиез, Тулыслэн вазь сяськаез...", - тазьы гожтӥ вал мон одӥгаз кылбурам. Зэмзэ но, вордӥськи мон вазь тулыс, ӵапак 8-тӥ мартэ. Соингес-а, мар- а, выль чуръёс та вакыт тросгес кылдо. Уноез кылбуръёсы тулыслы сӥземын. Тулыс уго быдэс инкуазь улӟе-пушъе, мугоре кытысь ке выль кужым пыре, вань лулпуш эркынак шокче. Таӵе вакытэ бурдъяськиськод, инметӥ лобаськод кадь. Мылкыд бугырске, мар ке но выльзэ гожтэм потэ. Х Х Х Тӧдьы юсь сямен Чебер бурдъёсын Шаермы вадьсы Вӧлскиз Тулысмы. Аслэсьтыз пӧсьсэ Сётэ жалятэк. Шумпотэ солы Тудву амалтэк. Вань жобзэ-кырсьсэ Гылтэ, Дунматэ. Гужемлы сюрес Озьы со усьтэ. ЭШЪЁСЫ ВАНЬ ДЫРЪЯ Сюлэмы ноку уз пӧя, Ӟеч мылкыды вань дыръя. Мылкыды ноку уз сӥя, Ӟеч эшъёсы вань дыръя. Улонэ шуак уз кысы, Осконъёсы вань дыръя. Осконэ ноку уз быры, Ӟеч эшъёсы вань дыръя. Эшъёсы ноку уз быре, Ӟеч мылкыды вань дыръя... Х Х Х Уин Мынам Быдэс лул-сюлэмы, Оло, пӧрме Чебер бубылилы: Ӝуась сюсьтыл доры кадь Кыстӥське, Тынад Лулыд борды Шымыртӥське. Соку Ӧвӧл кышкыт Мыным Пеймыт - Пӧсь мылкыдыд-лулыд Кузьма Югыт. НОКУ НО ЭН ВЕРА Ноку но эн вера "ноку" шуыса, Сюлэм сэрегысь оскондэ ыштыса. Вуоз вакытэз, тон шедьтод ас пардэ - Сюлэм сюлэмез герӟалоз ог гердэн. Кусо вандэм кадь, мылкыддэ ӵогыса, Эн малпа ноку "ай вуо" шуыса. Туннэ лэсьтондэ берлолы ке кельтӥд, Туннэ улондэ ӵогыса кадь куштод. Ноку но эн вазь гудыртӥсь лек кылын, Астэ ик озьы ӵушкалод лек тылын. Ноку но эн гуды муртлы усён гу, Аслыд ик отчы усёно медаз лу. ОСКОН Кыӵе умой, оскон ке вань Артэ мынӥсь ӟеч эшедлы. Кыӵе умой, оскон ке вань Аслад мытэм ӟеч ужедлы. Ӵук ӟардонлы шумпотӥськод, Аслыд ачид ке оскиськод. Куке быре ӟечлы оскон, Ӝокыт луэ угось улон. Х Х Х Тӧдьы юсь сямен Чебер бурдъёсын Шаермы вадьсы Вӧлскиз Тулысмы. Аслэсьтыз пӧсьсэ Сётэ жалятэк. Шумпотэ солы Тудву амалтэк. Вань жобзэ-кырсьсэ Гылтэ, Дунматэ. Гужемлы сюрес Озьы со усьтэ. ДОРЕ СЮРЕС Доре бертон сюрес Капчи, Анай, атай ке Возьмало. Угось соку Сюрес Вакчи. Пумит тӧлъёс Нялтас луо. Дэри куасьме, Сильтӧл чалме, Букос сюрес Вольыт луэ. Ачиз инкуазь Тыныд юрттэ: Азьлань, Ӝоггес! ...Таре Нылпиоссэс Доре Анай, атай Уг возьмало. Туж кузь, Секыт луиз Сюрес. Ноку уз пуксьы, Кожалод, Сильтӧл. Лымы букос - Пумтэм. Сӥзьыл-тулыс Дэриетӥ Тон лёгаськод Мырдэм-мырдэм Иськемъёсты... СЮРЕС СЁТӤСЬКЕ МЫНӤСЬЛЫ Котькудӥз аслыз Ачиз быръе Сюрес. Огезлы яра Вольыт лёгем сюрес: Курданэз ӧвӧл Нюкъёс-гопъёс ваньлэсь, Тубыны кышкыт Меӵкыт гурезьёслэсь. Мукетыз быръе Ӧжыт ветлэм сюрес. Чакласа мынэ: Ӧвӧл-тэ меӵ гурезь? Кудпала нуэ? Малы буре кожем? Мыныса Паллян Уз лу-а шонергем? Ветлымтэ сюрес усьтэ Кышкасьтэмез. Одӥг пол гинэ ӧз ӵемты Со Отӥ. Нош мынӥз Азьлань Аслаз выль сюрестӥз. ...Котькудзэ тон бырйы Сюресъёс пӧлысь, Вамышты азьлань, Эн кож сюрес вылысь. Сётӥське уго со Мынӥсьлы гинэ Ӝог Яке каллен. Эн сылы, Мын гинэ. Мон вордӥськи Игра ёросысь Зури черкогуртын 1927 арын оштолэзе. Сизьым классэз йылпумъяй гинэ - Быдӟым ож кутскиз. Дышетсконэ куспетӥ луиз. Улонын туж трос шуг-секытъёс кылдӥзы. Соку угось фронтлэн мышказ, пересьёсын артэ, котькуд удысэ султылӥмы ми, быдэ вуымтэ нылпиос. Бен, сыӵе вакытэз вал - секыт война - вормымон-а ныпъетэд шуыса ӧз юалэ. Кыткозы но - нуиськод. Колхоз лудын, нюлэскын, заводын, станок дурын - сыӵе мынам "университетэ". Ож сильтӧл пуксем бере бухгалтере дышетски. 1963-77 аръёсы Пазял гуртысь библиотекаын кивалтӥсь луыса ужай. Пинал дырысь малпанэ быдэсмиз: пичиысен лулы-сюлмы книга бордын вал угось. Нош поэзия - мынам "висёнэ". Нырысетӥез кылбуре потӥз 1960 арын "Советской Удмуртия" газетын. "Куатаськись" нимаськиз со. Ушъяськытэк верасько: поэзие сюресэ капчи ӧй вал. Ӵушкаллязы но, курлаллязы но, нош мон ваменэс вылӥськем. Лидия Чернова ОСКОНЭ, УТЬЫ, ВАЛТЫ МОНЭ... Х Х Х Поэзия - мынам висёнэ. Ӵемысь - кӧлымтэ уйёсы. Кагаз вылэ вань лул-пӧсьме Тырши пырыен кизьыны... Та чуръёсы, Оло, бездытэсь но? Кин кызьы меда Пуктылоз ини дун? Воршудэ-утисе, Эн палэнскы на - Быръем удысэ но Медаз шедьты пум! Утьы, валты монэ Ой, аръёс тӥ, аръёс, - Серметтэм сэзь толэс. Ой, малы-о туж вазь Келяды тулысэз? Сяськаясь вож тулыс Мон доры ӧз ни лык: Сӥзьылэд сьӧд-пурысь Выдэмын пыд улын. Со юзмыт омырен Ӟыгырске мугоре. Йырсиме пужмерен Юг-югак шобыртэ. Сяська дыр ортчемын - Мылкыды туж бездыт. Ымныры кӧсамын, Пыроз на шат ӵыжыт? Туж потэ на вылэм Выль крезьгур мытэме. Осконэ, осконэ, Утьы, валты монэ! Эн гинэ мыдланьскы Ой, малы-о меда тыршиськом Лек кылын шияны ог-огмес? Нош берат малпаськын кутскиськом: Ма пумысь тэшкатӥм кусыпмес? Нош кусып - со векчи нюжы кадь, Йӧтсконо ке ӝабрак - чигиське. Лек пужмер йӧтскемын ке сюлмад Бурмонтэм - уй-нунал весь висе. Улонмы - Инмарен сётэм шуд. Утьыны быгатон - ас кияд. Валтӥсьмы оскымон: со - воршуд, Эн гинэ тон сое ултӥя. Эн гинэ мыдланьскы со бордысь, Кайгуэз но уд тоды соку. Тон шӧдод ай одно ик бӧрысь - Шуд уг лык ас кожаз неноку. Х Х Х Даур но ортчиз. Ӧз вуы картэд. Шудэд, бен, гылӟиз, Погра ни юртэд. Синву пыр учкод тон Ӝожмыт ингоже. Картэд йыромиз-а Сюрес но воже? ... Котькуд нуналэ Потаськод гурт пуме. Мугор чеберед но Изме ни пумен... Жадиз ни пересь Пыр-пыр витёнъяз. Кырныж - сьӧд ересь - Поръя йыр вадьсаз. Туннэ пересьмы Ӧз пот гурт пуме - Укно сьӧд-сьӧдмыт, Пуны но жуммем. Х Х Х Аръёс кошко берытсконтэм, Ыштонъёсын но бӧрдонэн. Муртлэн визьмыз чик кулэтэм - Нокин уз буйгаты монэ. Эх, пумита вылэм тонэ! Оло, луысал пиналмеме. Мӧзмонэлэсь уг люк асме, Со пыр адӟо ӵош улэммес. Чылкыт тыысь шудо юсьёс - Ӧй вал меда бен асьмеос? Нош табере вань нуналъёс - Шудлэсь сайям ӝож пилемъёс... Х Х Х Мон сярысь тодэмед но уг поты. Гожтэтэд но, лэся, мыным жаль. Мон - йӧно. Тон доры уг, уг мыны, Ас поннам бӧрдӥсько ке но каль. Дыр ортчоз. Сюлэм вӧсь но бурмоз ай, Вылэмзэ пӧлэстод малпанад. Оскисько: шуныт май но пыртоз ай Выль крезьгур, выль кырӟан вӧтъёсад... Тудвуэд бере шур но Одно басылме ук! Ӵап сыӵе улон ӧр но - Капчиен уж уг лык. Я бен, кырӟа туннэ Ӵыжак выль крезьгуръя тон. Лул-сюлмад гажанэд - Усьтӥськиз Яратон! * * * Тон солань, Мон талань. Люкиським Укыр капчи. Кыткетысь кадь Юскиським. Эркынак, лэся, Шокчим... * * * Сизьымдон шуръёс сьӧры Кельтэмын вордскем гуртэ. Зымемын пинал дыры Визылась Иты шуре. Ой, тунсыко пинал дыр, Малпанъёсам кылемын. Ум ни серектэ шулдыр Толло ыштэм эшъёсын. Арлыды пачыламын Дуноесь малпанъёсын, Кузьмалляй калыкелы Быгатэмъям соосты. Мӧйымемъям табере Сюлэмы гуртам чорске. ...Азьпалтэм ук юбере! - Чуркаез бордын пырске. * * * Гылӟиз пыдул му - Уд ӝутскы ни, уд! Кыске ни, ньылэ Мурлэсь но мур гу!.. Берпум йырсазе: Уз шедьы юрттӥсь. Шудэ ай вылэм: Шедиз вазьылӥсь. Кылӥ на, кылӥ Либыт ваземез... Кытысь-о, кин тон, Улон кузьмасе? ...Льӧльмыт гизьыё Сайка выль нунал. Улон-тылсие, Тыныд бадӟым тау! Людмила Христолюбова Газетэ но мон гожтӥ... Удмурт нылкышноос трос аръёс ӵоже гурт ужъёсты гинэ тодыса улӥзы. ХИХ даурлэн пумозяз ик соос пӧртэм мугъёсъя дышетскытэк кыльылӥзы (1897 арын грамотаез тодӥсьёс пӧлы ӝыны процентэз гинэ удмурт нылкышноос пыртэмын вал). Но дыр ваньзэ воштэ. Удмуртъёслэн сузэр-апайёссы но пумен тодон-валан басьтон пала кыстӥськыны ӧдъязы. Нош дышетскемъёсызлы выль удысъёсын ужаны сюрес усьтӥськиз. Та гожтосам мон верасько удмурт нылкышноос-журналистъёс сярысь. Кызьы тодӥськом, Вяткаын 1915 арын потыны кутскиз нырысетӥез удмурт газет - "Войнаысь ивор". Та газет удмуртъёсты югытэ поттонын трос ӟечсэ лэсьтӥз. Куинетӥ араз татысь нылкышноослэсь гожъямъёссэс но адӟыны луэ вал ини. Кылсярысь, Т. Захарова дышетӥсь син висёнлэсь утиськон амалъёс сярысь гожтэ. Со понна астэ но, корка пуштэ но чылкыт возёно, пе. Нош висён паласькем ке ини, пелляськисьёс доры мыноно ӧвӧл, угось соос эмъяны ӵемысь уг быгато, алдаса гинэ возё, пе (1.09.1917). "Удмурт ныл" нимын гожъясь автор сюлэмшугзэ усьтэм: удмуртъёслэн, пе, политика ласянь тодон-валанъёссы туж начар. Лыдӟисьёссэ Учредительной собрание быръёнъёсы пыриськыны ӝуткаса, со гожтэ: "... митэк но ортчоз али, маке кулэ лэсьтозы шуыса, та ужлэсь палэнскыны, уг яра". Та гожтэмаз ик со валэктыны тырше: ас выжыысьтыд адямиез - удмуртэз, бырйыны пе, кулэ, со ас калыкезлэсь кулэяськонъёссэ ӟеч тодэ, иське, ужез но пайдаёгес мыноз - удмуртъёс понна трос лэсьтыны быгатоз (15.09.1917). Удмурт калык понна сюлмаськисьёслэн тыршемзы юнме ӧз луы: Учредительной собрание Глаз уездлэсь зэмзэ но удмурт адямиез - Иван Волковез - бырйиз. Та номерын ик "Удмурт ныл" ас выжы калыксэ огазеяськыны ӧте, сотэк, пе, ултӥясьёслы пумит султыны ум быгатэ. Со маде, Глазовын удмуртъёс лулчеберетъя но тодон-валан люканъя огазеяськем кылдытӥзы ини шуыса, тӥ но, пе, гуртысьтыды кинэ ке отчы ыстылэ, соос, тӥледлы ивортылозы, мар лэсьтӥське уездын, губерниын но быдэс шаерын, асьтэлэн но гурт улонды сярысь отын верамды луоз. 1917 арын "Войнаысь ивор" гужемысен "Удморт" нимын потыны кутскиз. Со Глазовысь лулчеберетъя но тодон-валан люканъя огазеяськемлэсь мылкыдъёссэ возьматӥсь, удмурт калык пӧлын огазеян но югдытон уж нуись газет луиз. Пиосмурт гожъясьёс но удмурт нылкышноослэсь асваланзэс улӟытыны зол юрттӥзы. Соос трос ик ӧй вал, но ужзы син шоры йӧтытэк ӧз кыльы. Кылсярысь, газетлэн корреспондентэз В. Вильмон лыдӟисьёсызлы валэктылӥз, воргорон но нылкышно номырин ог-огзылэсь улӥын ӧвӧл шуыса: "...Воргорон но нылкышно одӥг музъем вылтӥ ветло, одӥг нянь сиё. Юртъер котырын номыр нылкышнотэк уг лэсьтӥськы. Соос ваньзэ пӧрмыто. Империалистической ож вакытэ соос гыризы но, кизизы но, аразы но, нылпи но будэтӥзы. Асьмеос ваньмы Инмарлэн нылпиосыз, нылдэ но, пидэ но одӥг кадь учконо. Нылъёсты но дышетоно. Дышетскем пилэн кышно но дышетскемзэ басьтэмез потоз. Визьмо кышномуртлэн нылпиосыз но визьмоесь луозы..." (3.02.1918). Вяткаын потӥсь "Югыт сюрес" газетлэн редакторез В. Максимов удмурт кенакъёсты но нылъёсты ӟуч эшъёссылэсь адӟем карыны ӧте: огазеяське, дышетске, политика уже, пе, пыриське (9.07.1919). "Сюрло" газетын И. Векшин но удмуртъёслы али тужгес но дышетскон борды басьтӥськоно шуыса индылэ: пичиосызлы но егитъёсызлы гинэ ӧвӧл, мӧйыосызлы но арлыдоосызлы но, воргоронъёслы гинэ ӧвӧл, нылкышноослы но, пе (17.08.1920). Н. Конюхов "Сюрлолэн" та номераз ик нылпи садъёслэн кулэлыксы сярысь вера. Соос, пе, нылпиос сярысь ӟеч сюлмасько но анайёслэсь ужзэс капчиято, нылкышноослэн мукет ужъёс быдэсъяны дырзы кыле ини. Егит нылъёсты нылпи садъёсын ужасе дышетскыны ӧте. М. Ильин кумышка пӧзьтонлы пумит гожтэм "Одӥг гуртысь кышноос" кылбурзэ поттӥз. Та сярысь ик мукет авторъёс но сюлэмшугъяськыса трос гожъязы. Я. Ильин "Сюрло" газетын удмурт нылкышноосты куаретэ, Кенешо властен сётэм эрикрадзэс уг тодо, ялан картъёссылэн пельпум сьӧразы ватӥськыса уло на шуыса. "Эн ултӥялэ асьтэдыз, тӥ мукетъёслэсь номырин пӧртэм ӧвӧл", - пыкылӥз со нылкышноосты (25.09.19). К. Герд "Гудыри" газетэ нылкышноослэн Сарапулын ортчем кенешонзы сярысь гожтэ. Отын, со вера, 150 делегатъёс пӧлын одӥгез но, пе, удмуртэз ӧй вал. Соос, пе, али ке но изё на. Толэзь ортчыса, та газетын ик Герд удмуртъёслэн устолыксылэсь пӧртэм удысъёсъя азинскемзэ возьматӥсь "Удмурт искусство" статьязэ поттэ. Усто тыршо, шуэ со, кылбурчи А. Векшина, артистка Урасинова, удмурт калык кырӟанъёсты кырӟась Евдокия Павлова, удмурт эктонъёсты эктӥсь Александрова, крезен шудӥсь Крылова. Тыршемзэс возьматэм сяна, автор валан сётэ: кыӵе но кыӵе удысын нылкышноос асьсэлэсь кужымзэс эскерыны быгато.1 1920-тӥ арлэн шораз "Гудыри" газет нылкышноослы нимаз сэрег усьтэ. Ар йылпумъяськытозь, кык бам потыса вуиз. Вань материалъёссэ нылкышноос асьсэос гожтӥллям. Соос улонысьтызы пӧртэм ужпумъёсты сэртто-пертчо, озьы ик бускель калыкъёслэн улонэнызы но тодмато: кылсярысь, ӟучъёслэн, финнъёслэн, шведъёслэн, бигеръёслэн но чувашъёслэн. "Докъя ныл" нимын гожъяськись автор вера: финн нылъёс, пе, ваньзы дышетскемын, соос министерствоосын но пуко, парламентын но ужало. Тазьы, пе, котьку ӧй вал, таӵе улонзы понна соос асьсэос трос сюлмаськизы. Тодмотэм авторлэн швед нылкышноос сярысь гожтэмаз озьы ик соослэн дышетскемзы но асьсэ эрикрадзэс тодыса улэмзы сярысь пусъемын. Соос, пе, "Нылкышноослэсь огазеяськемзэс" кылдытӥллям, отчы дас куинь сюрс мурт пыре. Улэммес учкыны, соос, пе, Россие но ветлӥзы ини. Костромаын нылкышноосын ужан отдел кылдэм сярысь ивортонын ушъяса гожтэмын нылпи садъёс усьтон бордын ужамзы. Автор та гожтэмзэ юнме шорысь "Озьы кулэ" шуыса нимамтэ, дыр, валаськод: адӟем карон понна малпанъёссэ газетэ поттэм - асьмелы но тазьы ужаны кулэ шуыса кадь. Мукетаз сэрегын (18.09.1920) удмурт нылкышноослэн вуоно конференцизы сярысь гожъямын. Нылкышноосты та ужрадэ пыриськыны ӧтемын. Та номерын ик кенешо кунлэн семья кусыпъёс пумысен катъёсызлы валэктонъёс сётэмын. Со сяна, та сэрегысь лыдӟыны луэ чуваш нылкышноос сярысь гожтэмез, выль потэм книгаос но "Муш" нылпи журнал сярысь вакчияк ивортонэз, К. Гердлэсь кык кылбурзэ но гуртысь вуэм вакчи иворъёсты. Нылкышно авторъёс ӵемгес гожъязы политикаен но лулчеберетэн герӟаськем ужпумъёсъя валэктонъёс, нылпиосты ас вордскем кылынызы дышетонлы бадӟым саклык висъяллязы. Кылсярысь, "Выль син" газетын "Уно курадӟем ныл" ӝожтӥське: школаын дышетскыкуз, ӟуч кылэз тодымтэеныз, кӧня ултӥянэз, пе, адӟоно луиз; шумпотыса вера: табере ас кылын дышетскыны луонлык сётэмын. Та сярысь ик гожъяз вал А. Векшина (Ашальчи Оки). Одӥгзэ гожтэмзэ со "Малы удмурт нылпиос азьвыл дыръя дышетскыны ӧз яратэ?" шуыса нимам. Дышетскыны мылкыдтэм луэмзы кылдэ, шуэ автор, ӟуч кылэз тодӥсьтэм удмурт нылпиосты ӟуч кылын дышетэм бордысь. Ӵапак соин пиналъёс неномыртэм трос ултӥямез но ӝоже усёнэз адӟоно луо. Кӧня ке дыр ортчыса, А. Векшина нош ик та ужпумез ӝутэ ("Гудыри", 30.12.21). Вуж дышетсконэз адӟемпотостэм карисько, гожтэ со. Мон шоры, ӟуч кылэз тодӥсьтэм нылаш шоры дышетӥсьмы юрдыса выллем учкылӥз, нуналлы быдэ сямен ултӥяны выриз. Солэсь адӟем карыса, ӟуч эшъёсы но ӝоже уськытъяны ӧз кепыралэ ни. Такем ултӥямез чидаса улэменыз, нылаш аслэсьтыз ачиз керпотыны кутскем, возьдаськись но калык азьын вераськыны дӥсьтӥсьтэм луэм. Газетэ потэм материалъёслэн нимъёссы ик сайкатыны тыршись, ӝуткась мылкыдоесь: "Тырше валаны", "Эн кыле", "Дышетске, удмурт нылъёс", "Пеймытысь потыны тырше" но мукет. Сузэр-апайёссэс дышетскыны ӧтьыса, авторъёс бускель улосъёсысь нылкышноослэсь адӟем карыны ӧтё. Кылсярысь, "Удмурт ныл" ("Виль синь", 23.03.19) Алнаш уездысь удмуртъёслэн ортчем кенешсы сярысь гожтыкуз вера: табере удмурт кылын но книгаос, газет-журналъёс пото, коньдонэз жаляно ӧвӧл, соосты басьтоно. Учке, пе, финн, эстон, латыш калыкъёслэн кышнооссы дышетскон борды макем кыстӥсько. 1919 арын куарусёнэ но инвожое Восточной фронтысь РВС-лэн кыкетӥ армиезлэн политотделэз удмурт ожгарчиослы "Горд салдат" газет поттылӥз. Удмурт пиосты дышетскыны ӝуткаса, одӥгзэ материалэз "Ужась ныл" нимын удмурт ныл гожтэм. Дышетскымтэ муртъёсты алданы капчи, шуэ со, нош тодэм-валамед ӟеч улон понна ожмаськонын вормыны юрттоз. Кенешо власть, пе, ваньместы дышетскыны косэ, нош буржуйёс вормизы ке, асьмеос нош ик школаостэк кылём. Та ӟырдыт мылкыдо удмурт ныл солдатъёсты лыдӟиськонниысьтызы удмурт газет-журналъёсты но книгаосты тросгес лыдӟыны косэ. Авторъёс гуртъёсын пуктэм спектакльёс сярысь гожъязы, соослэсь кулэлыксэс пусйылӥзы, таин ӵош ик нылъёсыз егитъёслэн огазеяськемъёсазы пырыны ӧтьылӥзы, нош кышномуртъёсыз - нылкышно огазеяськемъёсы, егит нылъёслэсь дышетскон пала вырӟемзэс адӟыса, шумпотэмзэс вераллязы ("Гудыри", 5.10.1920). Нылкышно гожъяськисьёс ик потребительской кооперацилэн пуштросэз сярысь валэктылӥзы, куд- огъёсыз сиён пӧран амалъёс пумысен но мукет кулэ дэмланъёс ыстылӥзы. Кылбуран мылкыдъёссы но шараяськылӥз - газетэ ӵемысь кылбур чуръёссы потылӥзы. Ваньзы ик авторъёс асьсэ нимъёссэс пырак гожтыны возьдаськылӥллям. Соос "Удмурт ныл", "Ужась ныл", "Удмурт дышетӥсь", "Уно курадӟем ныл", "Докъя ныл", "Эль" но мукет со выллем нимъёс улэ ватӥськылэмын. Асьсэ нимтулзэс пуктыны дӥсьтӥсьёс пӧлын: А. Векшина, О. Андреева, Е. Главатских-Бурбурова, О. Главатских, Е. Ильина, А. Майорова. Газетын потылэм материалъёссыя соосыз со вакытэ трос удмурт лыдӟисьёс тодылӥзы. Оглом вераса, удмурт кылын потӥсь нырысь газетъёсысь ик адӟиське: татын нылкышноослэн улонзы сярысь гинэ ӧз гожъялэ, соос асьсэос но гожъяськыны йӧндыризы. Мар пусйымонэз, гожъясь нылкышноос ужпӧръёсын, юртбур чыры-пырыосын сокем ик ӧз тунсыкъяськылэ, соос тодон-валан, визьбур узырмытон пала но политика удысысь ужъюгдуръёс котыре кыстӥськылӥзы. Гожъясь авторъёс туж ӧжыт ке но вал, соос асьсэлэсь дунлыксэс но данлыксэс валаны, быдэс удмурт калыклэн азинскон сюресэз сярысь малпаськыны быгатэмзэс возьматӥзы. 20-тӥ аръёслэн шораз нылкышноос редакциосын но ужало вал ини. "Гудыри" газет гуртъёсысь нылкышно гожъясьёсын уж нуон борды рос-прос басьтӥськиз. Соосыз улосвылъёсын но элькунын ортчылӥсь пӧртэм семинаръёсы ӧтчаллязы, быгатӥсьёссэ газетъёсы ужаны но басьтылӥзы. Нырысь-валысь нылкышноос редакциын машинистка я корректор луылӥзы. 30-тӥ аръёсы пумиськыло вал ини нылкышно литсотрудникъёс, секретарьёс, отделъёсын кивалтӥсьёс, берыктӥсьёс, библиотекарьёс, архивариусъёс, счетоводъёс, шофёръёс но вал. 40-тӥ аръёсы "Советской Удмуртия" газетын нылкышно туспуктӥсь но, суредаськись но, радист но, телетайпист но вал ини. Литсотруднике но корреспондентэ ӵемгес Удмурт пединститутысь (собере университетысь) удмурт кылъя но литературая ёзэтэз йылпумъям егитъёсты басьтылӥзы. Пединститут университет луэм бере (1972), татын журналистика удысъя специализация усьтӥськиз. Тае быдтэмъёс али элькун газетъёсын, радиоын, телевидениын (Р. Куликова, А. Гребина, С. Семёркина), журналъёсын (Р. Лаптева, Л. Бадретдинова) но ёрос газетъёсын (Н. Березина, Т. Спешилова, А. Князева) ужало. 90-тӥ аръёслэн кутсконаз журналист ужлы нимысьтыз дышетонниос пыр потэмъёс нылкышноос пӧлын ӧжыт на вал - ог дасо пала (Л. Камашева - ЛГУ, С. Пушина-Благинина - КазГУ, Г. Кондратьева - МГУ, С. Самсонова - ЛГУ , А. Ушакова - КазГУ , Е. Артемьева - УрГУ, С. Чиркова - УрГУ) 1994 арын Удмурт университетлэн удмурт филологи факультетаз журналистикая ёзэт усьтӥськиз, берло со факультет каремын вал (1999). Асьме университетмы но табере журналистика удысын ужаны вылӥ дышетскем муртъёсты дася ини. 1998 арын "Удмурт дуннеын" (пӧртэм аръёсы со пӧртэм нимъёсын потылӥз) та газетын кылдэмез дырысен 1997 арозь ужам адямиослэн нимъёссы сётэмын вал. Нырысь аръёсаз нылкышноос отын туж ӧжыт ужаллям ке, берлогес соослэн нимъёссы ӵемгес пумисько ини. Туннэ нуналъёсы нош кык куиньмосэз отын ужасьёс нылкышноос луо. Т. Банниковалэн, Л. Медведевалэн, Л. Малыхлэн, Е. Виноградовалэн, З. Рябининалэн, Ю. Александровалэн, Е. Камашевалэн, Е. Миннигараевалэн политика улон, экономика но лулчеберет удыс, семья кусыпъёс сярысь гожъямъёссы мур пуштросо луэменызы лыдӟисьёслэсь сюлэмъёссэс бордазы кыско. Л. Медведева Т. Чернова кылбурчиен нылкышноослы журнал кылдытон борды басьтӥськизы, "Ашальчилэн" (тазьы нимамын вал журнал) кык номерез лыдӟись кие вуиз ини. Удмурт нылкышноос али тросаз ёрос газетъёсын ужало. 1990-тӥ арозь ёросъёсысь газетъёс ӟуч кылын гинэ пото вал, удмурт кылынзэ берыктыса лэсьтылӥзы. Берло аръёсы удмурт газетъёс ас кожазы потыны кутскизы. Соин ик соослы удмурт удысчиос тросэн кулэ луизы. Куамын арлэсь кема ёрос газетъёсын ужаз Кез ёросысь Стеньгуртын вордскем ныл Елена Дмитриевна Захарова (1917 - ?2). 1934 арын Глазовысь педтехникумез йылпумъяса, со комсомол ужын тыршиз: Балезино ёросын секретарь но вал, Уйпал Осетиын ВЛКСМ-лэн ёзэтэныз кивалтӥз (кузпалзэ отчы ыстылӥзы), собере Белоруссиын пиналъёсты дышетӥз. Война кутскыса, со Удмурт шаераз берытскиз. Понино ёрос газетын солы нырысь кылкутӥсь секретарьлэсь интызэ сётӥзы, кӧня ке улыса, редакторе пуктӥзы. 1942 арын Елена Дмитриевна редакторе дышетон курсъёсты ортчиз. 1944 арысен 1973 арозь Игра ёросысь "Светлый путь" газетын редактор вал. 1940-50-тӥ аръёсы Балезиноысь радиоен кивалтӥз, собере "Коммунае сюрес" ("Путь в коммуну") ёрос газетын кылкутӥсь секретарь луыса ужаз Александра Алексеевна Назарова. Мария Дмитриевна Ишматова Алнашын но Завьялын ёрос газетъёслэн редакторзы вал. Элькунамы тодмо луэ Надежда Константиновна Золотарёвалэн нимыз. 1982 арысен 1990 арозь Глаз ёросысь "Красное знамя" газетын редаторезлэн воштӥсез луыса ужаз. 1990 арын уйпал ёросъёсысь удмурт лыдӟисьёс понна "Иднакар" газет" кылдытэмын вал, со али дорозь отын валтӥсь редактор луэ. Куамын ар палаПичи Пургалась "Маяк" ёрос газетын ужаз Зоя Яковлевна Титова, та ёросысь ик Куреггуртын вордскем ныл. Можга педучилище бере Удмурт пединститутысь филологи ёзэтэз йылпумъяса, со матысь школаосы аслыз ужан инты уг шедьты но ёрос газетэ йыгаське. Со дырысь та ужысьтыз нокытчы кошкемез ӧз потылы ни. Озьы ке но, ужан сямаз дышетӥсьлэн мылкыдыз ӵемысь шӧдӥське вал. Кылсярысь, со котыраз люканы быгатӥз кылбурез яратӥсьёсты но кема дыр ӵоже "Пурга гуръёс" литературая огазеяськемен кивалтӥз. Удмурт радио (1931) но телевидение (1957) кылдэм бере ик отын удмурт нылъёс но мыло-кыдо ужаны кутскизы. 1933 арын радиокомитетэн кивалтыны оскизы азьвыл дышетӥсьлы, собере дышетон удысын ужасьёслэн профсоюззылэн обкоменыз кивалтӥсьлы Любовь Прокопьевна Будиналы (1902-1994). Со Ижевскысь педтехникумез но Кировысь пединститутэз быдтэм мурт. Всесоюзной радиоын дышетскон курсъёсты йылпумъяса, со вань мылкыдыныз выль ужаз пыриськиз. Москваысен Д. С. Васильев-Буглай крезьгурчиен огкыл шедьтыны быгатӥз но крезьгуръя перечадаос кылдытон понна юрттэт сётыны сое Ижевске ӧтиз. Ижевскысь педтехникумын ужась крезьгуръя дышетӥсез Е. В. Молотковаез но радиое кыскыны быгатӥз. Соиз отын хор кылдытӥз, 1996 арын, куатьтон арессэ тырмытон юбилеяз, та хорлы академической ним сётэмын вал. Радиоын ар но кӧня гинэ тыршемез бере, калыкен ужаны быгатэмзэ шӧдыса, Любовь Прокопьевнаез Удмурт драматической театре директоре пукто. Озьы ӝамдэ радиоын но театрын ӵош ужано луиз, но берлогес Л. П. Будина быдэсак театре выжиз. Ижевск педтехникумын дышетскыкуз, Анастасия Прохоровна Прохороваез (1908-1991) выль кылдэм "Егит большевик" газетэ кылкутӥсь секретаре ӧтизы. Со ачиз ик статьяос но корреспонденциос гожъя вал. Педтехникумзэ йылпумъям бераз сое школае ужаны ысто, кӧня ке улыса, со нош ик газетэ берытске но азьвыл иныяз ик ужа. 1932-37 аръёсы Анастасия Прохоровна радиокомитетын ужаз, солы отын соку гинэ кылдэм удмурт литературая передачаос лэсьтыны оскизы. Егит журналист заводъёсы но ужъюртъёсы ветлэ вал, отын ужасьёслы радио кылдытон сярысь мадьылӥз, соос сярысь удмурт но ӟуч кылын передачаос дасялляз. 1934 арын Удмурт шаере лыктэм крезьгурчилэн Д. С. Васильев-Буглайлэн экспедициосаз пыриськиз, Шаркан, Якшур- Бодья, Алнаш пал гуртъёсысь калык кырӟанъёсты гожтыны-люканы юрттӥськиз. Кызь вить арзэ радиолы но телевиденилы сётӥз Галина Николаевна Баженова. Соос пӧлысь укмыс арзэ со телевидениын редактор луыса ужаз, дас куатьсэ - Удмурт радиоын валтӥсь редактор вал. 1975 арын сое журналистъёслэн огазеяськемазы кутӥзы. Ижевскын улӥсьёслы туж кельшылӥз "Ижевск вечерний" передача, солэн нырысетӥ редакторез вал Галина Николаевна. Г. Н. Баженова озьы ик телевидениын учкисьёслэн гожтэтъёссыя но "Наш город" программаосты нуиз, радиоын но телевидениын - "Здоровье", радиоын - "На страже порядка". Пенсие кошкем бераз но радиоен уг люкиськы, нылпиослы "Чагыр-чагыр дыдыке" передачаез поттыны юрттэ, татысь коллектив Удмуртиысь Кун премилэн лауреатэз луэ. Ньыльдон ар пала ини радиоын ужа Милитина Васильевна Гаврилова-Решитько. Пединститутын дышетскыкуз ик, конкурс пыр потыса, радиоын диктор луыса ужаны кутске, собере корреспондент луэ, кызь ар (1975-1994) чеберлыко литературалы сӥзем передачаослэн редакторзы но та ёзэтлэн ик кивалтӥсез вал. Со кылыдытӥз но трос аръёссэ ачиз ик нуиз "Арня ӵукна" передачаез, солэн кичӧлтэмезъя дышетӥсьёс доры радио пыр вуиз "Школалы юрттэт" радиоверан. Лулчеберет но литература удысын тыршись удмурт пиос но нылъёс сярысь трос радиоочеркъёсыз радиолэн фондаз кылемын. Татысь пичи люкетэз "Ӵыдонтэм пумиськонъёс" нимо книгаяз пыризы, уно гинэ очеркъёсыз "Кенеш", "Инвожо", "Вордскем кыл" журналъёсын но "Удмурт дунне" газетын потазы. Али со "Ингур" радиоын "Пумиськонъёс" радиоверанэз нуэ, удмурт калыкез дано удмурт пиосын но нылъёсын тодматэ. Радиоын туж тыршыса но пайдаё ужа Раиса Семёновна Куликова. Удмурт радиое со 1975 арын лыктӥз, Удмурт университетын дышетскыкуз ик. Вить арзэ дикторын ужаз, собере - иворъёсъя ёзэтын, со бӧрсьы вить арзэ крезьгуръя радиоверанъёсты дасяз. Та интыын ужакуз, кык пол "Жингырты, удмурт кырӟан" конкурс ортчытъяз. Та ужрад егит крезьгурчиосты шедьтыны, выль нимъёслы ӝужаны туж бадӟым юрттэт луиз. 1990 арысен Раиса Семёновна чеберлыко радиоверанъёсъя валтӥсь редактор луыса ужаны кутске. Солэн кичӧлтэмез улсын радиоын кылдытэмын вал нылкышноослы "Ибырвесь", калык сямъёслы но нергеослы сӥзем "Тангыра" передачаос но "Кыл дунне" радиоальманах. 1999 арын М. Кастрен нимо огазеяськемлэсь (Финляндия) грант басьтыса, быдэс ар радио пыр удмурт кыллы дышетон "Ойдо вераськом удмурт кылын" урокъёс нуиз. Со сяна, та нылкышнолэн дэмламезъя радио арнялы быдэ сётъяны кутскиз удмурт калыклэн азинскон сюресэзлы но лулчеберетэзлы сӥзем радиоверанъёс, та передачаосты нуыны тодмо адямиос ӧтемын вал - удысчиос но тодосчиос. Евгения Ивановна Плотникова Удмурт радиое 1976 арын лыктӥз, нырысь-валысь берыктӥсь луыса ужаз. Собере вань сюлмыныз "Тангыра" борды биниськиз. Бигер улосысь удмуртъёслэн сямъёссы, улон-вылонзы сярысь трос гинэ аспӧртэмлыко радиоверанъёс дасяз. Кылзӥсьёслы соос туж кельшизы. Ижевскын телевидение усьтӥськем бере нырысетӥ удмурт диктор луыса ужаз Милитрисса Воронцова. Куамын ар пала со телевидениын тыршиз. Журналист удысын сюресэз "Советской Удмуртия" газетысен кутскиз. Отын со литсотрудник вал. 1963 арын южтолэзе, конкурс пыр потыса, телевидение дикторе кутэмын вал. Эшъёсыз сое удмурт Нефертити шуо вылэм. Нош ваньмызлы пичи учкисьёслы со яратоно Миляпай луиз. Кунгожсьӧр муртлы синмаськемез (соин М. Воронцова отпускез дыръя Ленинградысь одӥгаз музейын тодматскиз вал) диктор ужзэ азинтыны солы юн люкетӥз, со дикторысь кошкытэмын вал. Дас тямыс арзэ режиссёрлэн юрттӥсез вал, та ужезлы чырмыт дышетскиз. 1991 арын гинэ сое нош ик эфире потаны лэзизы. Табереяз со, 1997 арозь, пенсие кошкытозяз, иворъёсъя программаослэн режиссёрзы луыса ужаз. 1957 арысен 1986 арозь Ижевск телестудиын мыло-кыдо тыршиз Эльза Алексеевна Борисова. Кутскиз со нылпиослы передачаос кылдытъян бордысен, собере егитъёслы передачаос нуиз, бӧрысь валтӥсь редактор луиз, чеберлыко литературая ёзэтэн кивалтӥз. Удмурт шаерын улӥсьёсты телевидение пыр со тодматылӥз СССР-ысь дано артистъёсын: Иван Петровен, Махмуд Эсамбаевен, Екатерина Шавринаен, Вероника Дудароваен но трос мукетъёсыныз. Солэн передачаосаз Удмуртиысь ваньзы сямен тодмо луэм но данэ потэм адямиос асьсэ сярысь мадьылӥзы: писательёс, суредасьёс, крезьгурчиос, артистъёс, тодосчиос, озьы ик калык усточиос но кибашлыос - куиськисьёс, пу но корт вӧлон бордын ужасьёс, кырӟасьёс но мукетъёсыз. Радиоын но телевидениын ужась егитъёсызгес журналистъёс сярысь но шуныт кыл вераны луысал. Телевидениын кема тыршо ини Мария Фоминична Евсеева но Светлана Денисовна Семёркина. Соос шаермылэн пӧртэм сэрегъёсаз вутскыны тыршо, палэнын улӥсь удмуртъёсыз но уг вунэто: ӵем гинэ Башкирие, Татарстанэ, Киров но Пермь улосвылъёсысь ӵыжы-выжыосмы доры вуыло. Азьвыл чик гожтэт тодымтэ удмурт нылкышноослэн нылъёссы пӧртэм ӧнерчиос луизы. Гожъяськон удысын но соос быгатыса ужало. Журналистика удысэн улонзэс герӟам уноез нылкышноос ужын вормонъёс басьтэмзы но быръем удысазы мыло-кыдо тыршемзы понна сӥлы карон нимъёсын данъямын. 1 Статьяын вань нылкышноослэн нимъёссы сётэмын ӧвӧл. 2 Кулэм арез тодмо ӧвӧл. Суредысь чагыр сяськаос Телерепортажелы усто адями шедьтэмелы шумпотыса, тузонэн шобыртӥськем но музъем зын пыӵам подъездэ пыри. Ӧсэ йыгаськи. Нокин уг усьты. Та пумиськонлы осконме ыштыны кутски ни вал, со вискын ӧс шӧдтэк шорысь каньылля усьтӥськиз. Пичи гинэ вистӥ сюбег кӧсыт ымныр адӟиськиз. Малы лыктэмысь юаса кадь, со шорам учкиз. Ӟукыртӥсь шальтрам ӧссэ песятай кема усьтыны выриз. Ӧтьымтэ куноез шоры эшшо огпол учкиз на но, киыныз гинэ шонтыса, сьӧраз ӧтиз. Нырме буёл зын чатыртӥз. Котырак учки но, йырам таӵе малпан лыктӥз: "Суредъёс сяна, та коркан номыр йӧныз ӧй вал, дыр..." Пичи гинэ ӝӧк вылысь пумаз вуттымтэ суред син шорам йӧтӥз. Отысь гурт инкуазез адӟыса, вордӥськем палъёсы тодам лыктӥзы. - Али тани гурт инкуазез гожтӥсько. Нуназеозь ни интыям пумыса кадь сылӥсько. Уже уг мыны. лӥсько. Уже уг мыны. Нокызьы тодам уг лыкты, кыӵе буёло сяськаос анаелэн садаз мерттэмын вал, - борддораз ошылэм ужъёссэ учкыса, веранзэ пересь малпаськись тусын мытӥз. Солэн синъёсыз портрет вадьсы дугдӥзы. Пересь доры матэгес лыктыса, суредэз эскерыны кутски. Отысь чебер, йӧно кышномурт пальпотэ. Синъёсыз лыз инбам кадь чагыресь, песятайлэн выллемесь ик. - Та тӥляд анайды, дыр... - суредлы синмаськемме ватытэк вази мон. - Анае, со монэ чеберез валаны но яратыны дышетӥз. Вань улытозяз котыраз чебер сяськаос вал. Тулыс ке вуэ, кыӵе гинэ но буёлэн ӧз пиштылэ соос садамы. Пересьлэн синъёсаз кизилиос пиштӥзы. Тодэ ваёнъёслэн лулъясь кужымзы сыӵе бадӟым вылэм. Кузь, пурысьтам йырсизэ маялтыса, воргорон юаз: - Чай уд юэ-а? Пумитаз ваземме возьматэк, со ӝӧк доры вамыштӥз. Огшап ортчыса, зуркак дугдӥз. Ипполит Иванович янгышам синъёсыныз шорам учкиз: - Шонерзэ верано ке, чае но вужмемын ини, бускелелы валлян пӧзьтӥ вал. Син шорам йӧтӥз банкаысь чай. Куинь кук вылаз мырдэм сылӥсь ӝӧк вылын нянь туриж костаське. Толон нуназеямлэсь яке ӝыт сиськем бервыллэсь-а, мар-а. Ныр улаз мар ке нукыртыса, Ипполит Иванович укно доры вамыштӥз. Секыт, ӝокатӥсь возъетэз кыскиз. Котырак югыт луиз. Утялтымтэ патерез понна возьдаськыса кадь шорам янгышам синъёсын учкиз, выж вылысь лошъяськись бумагаосты, дӥськутэз, кисточкаосты октыны кутскиз. Соку мон валай: та воргорон вань улонзэ суреданлы сётэм. Со ик луэ солэн сиёнэз но, юанэз но, сюлэм буйгатонэз но... - Вождэ эн вай, нылы. Мыным одно ик тодам ваёно, анаелэн сяськаосызлэсь буёлзэс, - быдэстымтэ суредэз шоры учкыса, песятай нош ик аслаз малпаськон дуннеяз выйиз. Ӧз шӧды ни со мынэсьтым мукет суредъёс шоры учкыса сылэмме но, ӧз шӧды, юанъёсме но ӧз кылы. - Чагырысь вал соос, чагыресь! - пересь суредась дорысь потыкум ни кылӥ шумпотэм куараез. Сюрес вылысен но ялан син азям улӥзы йӧно кышномуртлэн портретысь сайкыт тусбуез но сое яратӥсь пиезлэн мӧзмыт учкись чагыр синъёсыз. Суредысьтыз чагыр сяськаос пересь художниклэсь улонзэ азьланьын кема-кема мед шулдыртозы на вылэм. Лилия Берёзкина. Сям-Какси гурт. Алнаш ёрос. Лэчыт веранъёс Кылэмын но малпамын Адямилы кайгуэз но, шумпотонэз но адями ик вае. Урод сямо адямиостьы но адямиос ик будэто. Асфальто сюрес лэсьтыса но ог-огзы доры ветлымтэ ӵыжы-выжыос пумиськыло. Аслыз мар ке кулэ ке дыръя адями ӟичы амало кариське. Батыр муртэ но одӥг урод кыл погыртыны быгатоз. Буш посуда юнгес шальтыртэ. Быгатӥсьтэм муртлы уж оскид ке, сое ачид ик лэсьтоно луод. Вазь ӝужась сяськалэн чебер дырыз вакечи. Вамышлы быдэ муртэ пыкылыны яратӥсь адями ассэ гинэ гажа вылэм. Ӝыт вуэмез возьмаса пукид ке, нунал кузь потоз. Изись мурт кӧлӥсьтэмезлэсь калзэ уг тоды. Капчиен пырем байлык капчиен ик быре но. Кенеш сётъяны тодӥськод ке, мукетъёслэсь визьнодзэс но пеляд пон. Ваньзэ ас сяменыз лэсьтыны тыршись муртэ уг ярато. Кепыранэз тодӥсьтэм адямилы оскыны шуг. Кивалтыны визь кулэ, нош косъяськыны котькин но быгатэ. Кисыяд пыремзэ поттэм интыяз пыртыны но быгаты. Котькыӵе со адями мед луоз но, куно чотын лыктэм муртэ куно карыны кулэ. Куддыръя чебер кылъёсын гожтэм чуръёс но усто кылбур уг кылдыто. Астэ кужмысь карыса адямиез яратыны уг кутскы. Кырӟанэн кайгуэз таратыны но, шумпотонэз бадӟыматыны но луэ. Лэсьтӥськытэк лэсьтӥськись, гожъяськытэк гожъясь, пӧратэк пӧрась уд луы. Музъемез умой гыремедлэн мар пайдаез, отчы ӟеч кидыс согыны ӧд пӧрмыты ке. Мылкыдыд сайкыт луиз ке, тём-тём пеймытын но сюрес шедьтод. Кивалтӥсьёслы йыбыртъяса губырскемъёс но вань. Вакчи дыр куспын быдэстэм ужзы сярысь аръёсын верасьёс но пумиськыло. Одӥг юбоед кырыж луиз ке, быдэс кенеред чебер уз поты. Ишак вылэ но азьлань мынон понна пуксё. Пересь муртлэн дӥсезлэн азьыз кузя, сьӧрыз вакчия. Пунэмзэс тыныд пунэмен сётэм кадь вырыса берыктӥсьёс но вань. Супыльтӥсь адямиослэн ымъёссылы ӵогет малпано вал. Сюдымтэ валдэ бархатэн ке но шобыртӥд, со азьлань уз мыны. Тазалыклэсь дунзэ висись мурт тодэ. Тулыс гектар сьӧры уиськись трактористлэн сӥзьыл центнеръёсыз ӧжытгес луозы. Тунгон олокызьы лэсьтэмын ке но, усьтэт сое усьтэ. Тынад матысь эшедлэн мукет матысь эшез но луыны быгатоз. Уждэ ӵуказелы эн кельты - ӵуказе мукет ужъёс кылдозы. Улонын вылӥе ӝутскыны секыт но кема, нош улӥе усьыны данак дыр кулэ ӧвӧл. Чылкыт ведраын гинэ юыны ярамон ву луоз. Шуге-леке шедем адямиез буйгатыны луэ, но солэн сюлэмаз герд кыле. Эшъяськон адямиосты огазея, керетон - люке. Андрей Гильмаев. Улон гердъёс Татьяна Образцова Кизилиос но огкадь уг пишто Света сюрес урдсын сылӥсь машинаысь потӥз. Руль сьӧрын пукись пиосмуртлы маке вераса, пал синмыныз кырмыштӥз но чик мылпотытэк гольтрес серектӥз. Бӧрсяз тузон ӝутыса машина кошкиз. Егит нылкышнолэн тусыз шуак воштӥськиз. Пумтэм-йылтэм сюрес шоры, машина мышкы лек учкиз. Собере, тӧдьы буям вакчи йырсизэ маялтыса, мон пала вамыштӥз. - Мар татӥ ветлӥськод ай тон, бускель? - жадем куараен юаз со мынэсьтым. Пумитаз ваземме возьматэк, вераськон мытӥз. - Адӟид-а тӥни со пиосмуртэ? Шуэ: монэ кышно басьто, нош ачиз шорам учке но малы ке весь мыньпотэ. Узырен узыр со, но юылэгес. Нош шӧмаськем воргоронъёс, ачид тодӥськод, мыжыкъёссэс ӝогак урдыны дасесь. Вылаз ик, мынэсьтым азьвыл улэм-вылэмме тодӥз на ке. Ӵок ини, Поленькалы сыӵе атай кулэ ӧвӧл. Мон пумитаз номыр ӧй вазьы. Нош Света пичи гинэ сумкаысьтыз куалекъясь киосыныз сигарет пачказэ поттӥз но одӥгзэ кенжытӥз. Туж дыртыса, шоканы омыр тырмымтэ мурт сямен, ӵындыны кутскиз. Курыт ӵынэныз ӵоксузиз, кутскиз ук кызыны - шокан пасьсэ уг шедьты ни. - Шайтан басьтон, тазьы чатыраны но кема ӧвӧл, - кызонзэ мырдэм возьыса, Света мон пала берытскиз. Туж секыт шока. Быгыль-быгыль бамъёсаз одӥг кисыриез но ӧвӧл ке но, малы ке ымнырыз али пересь адскиз. Отысь шумпотонзэ но, куректонзэ но синйылтыны ӧйлась. - Тон бертӥсь-а, ӧвӧл-а, малы ке номыр вераны ӧд вутты на кадь, - нош мыным вазиз. - Ӵошен шулдыргес луоз. Ӝамдэлы дорам пырало, дӥськутме вошто. Полечкаме басьтыны садике ветлоно луоз ай. Мӧзме ни, дыр, мусое. Мунё басьтыны косыса кемалась ёртэ ини. Ачид валаськод, коньдон уг тырмы, - пумозяз вераса ӧз вутты, нош ик кызонэз пӧсьтӥз. Мон шӧдӥ: нылыз сярысь веракуз, Светалэн синъёсаз кизили воректӥз, ымдуръёсаз мырдэм адӟиськымон пальпотон чилектӥз. - Света, нош нылыд, кызьы ай сое верано вал, тодэ-а? - юатэк ӧй чида. - Нылы? Ӧйтӧд. Адямиос верало но, дыр. Пиосмуртъёс дорам ноку уг ветло, нылылэн но со сярысь юалляськемез ӧвӧл. Тодӥськод ук, Полечкае ветлыны уг быгаты. Вордскыкуз ик со мынам сӧсыр вал. Картэ, тодэмед потэ ке, Поленькаез нылпи юртэ сётыны ӧдъя вал - ӧй лэзьы. Соин ик со милемыз кулэ ӧз кар ни: ми дорысь кошкиз. Со дырысеныз огпол но ӧз ветлы ай, шайтан басьтон! Ачиз Казахстаназ кылиз, нош милемыз дорамы, татчы, улляз. Собере отысь кивалтӥсьёс но сыӵе политика нуыны кутскизы: люкиськиды бере, гражданстводы татын уз луы ни. Бертӥмы - уж ӧвӧл. Вылаз ик, вордэм анае но милемыз кулэ ӧз кар: кызьы улэмед потэ, озьы ик ул, пе, нош нылыдлэсь йӧназ адями уз пӧрмы. Ми доры пыдзэ ик уг лёга. Тани али нылылэсь висись пыдзэ эмъяны коньдон кулэ. Кытысь мон сомында шедьтом? Нош соос тӥни, - пинь пыртӥз вераз Света, - монэ шудон каро. Кыӵе со ваньмыз юрӟым, адӟемпотостэм. Гоно ымныръёс улонме та калэ вуттӥзы угось. Огшоры калыкез мыскылляло, - мыжыкъёссэ юн кырмемзэ но шӧдытэк кылиз, кузь гижыосыз кырымпыдэсъёсаз вир потымон мертчиськизы. Мар вераны тодытэк, соин артэ вамышъясько. - Тани садике но бере кылё ини, - Света часэз шоры учкиз. Монэ ӧз возьма ни, паськыт урамамы кожиз. Огшап ортчыса, укно пыр адӟи: Света Поленьказэ сӧсыръёсты нуллон коляскаен садикысь вае. Капка азязы вуыса, нылзэ ки вылаз ӝутӥз, ӟыгыръяны но чупаны кутскиз. Нош Полечка анаезлэсь али кузьмам мунёзэ кутӥз но солэн гадь бордаз ӝиптӥськиз, лек адямиослэсь утьыны курыса кадь. Та учыр бере мон Светаез ӧй адӟылы ни: егит нылкышно чиптэм-чаптэм кытчы ке ышиз. Ӝыны ар ортчыса, ӵыжы-выжыосызлы Казаньысь гожтэт ыстэм: "Эн сюлмаське ми понна, кенак. Улӥськом туж умой. Аслым лякыт сямо кузпал шедьтӥ. Мынэсьтым кызь одӥг ареслы бадӟым ке но, ог-огмес туж валаса улӥськом. Нылме аслэсьтыз сямен зол яратэ. Операция но лэсьтӥзы. Туннэ Поленькае юрттэттэк нырысетӥ вамыш лэсьтӥз..." Алексей Ельцов Удалтэм адями Та ӝужыт но веськрес мугоро воргоронэз нырысьсэ адӟем бере кӧня ке аръёс ортчизы ни. Нош со ялан син азям улэ. Соин пумиськылэммы сюлэмам кыӵе ке но яркыт, ялан пиштӥсь тылгизьы кельтӥз. Мон солэн дыртытэк, ӝот-ӝот, мур малпаськыса визьмо вераськемезлы, ужзэ оскымон быдэсъямезлы соку ик синмаськи. Мынам та тодмое - Валерий Шкляев, Ижысь тылпу кысонъя кыкетӥ номеро частьысь карауллэн кивалтӥсез. Валерий Геннадьевичен ужан интыяз ӝӧк сьӧрын чай юыса пукыны, дыртытэк гинэ вераськыны ӧз кылды. Угось тылпу кысонын ужась муртлэн котькуд секундэз дуно. Соин ик таиз но пумиськонмы-вераськонмы кӧня ке пол куспетӥ луылӥз. Валерий Шкляев кивалтӥсь бере, со адямиос понна но кыл кутэ. Ачиз котькуд тылпу кысонэ уг ке но потылы, эшъёсыз берытскытозь, сюлмыз интыяз ӧвӧл. Тодэ угось, тыл - со кышкыт маке. Ма, ужантӥяз кыльылыкуз но тэк пукыны чик дырыз ӧвӧл. Ӧжыт гинэ ялкарон вис сюре но, я ужамзылы йылпумъянъёс сярысь кивалтӥсьёслы гожъяно, я тылпу кысонъя дышетсконъёс ортчытъяно луэ. Валерий Геннадьевич кивалтӥсьёсыз доры пырем бере, мон соин ӵош ужасен Александр Чирковен вераськоно кариськи. - Тӥляд ужан дырды кемалась йылпумъяськиз, дыр дас час ини. Кыӵе муген ӝегатскиды? - Озьы луиз уга. Огшоры нуналъёсы милемыз но тямыс но ӝыные эшъёсмы вошто, нош туннэ, доре бертон азьын, одӥгаз заводын цех ӝуаны ӧдъям. Соосты возьмаса пукод шат? Тылпуэз кысыны усьтыр-табыр потоно луиз. - Ӵем-а сыӵе учыръёс кемдыло? - Таӵе учыръёслы дорамы но дышемын ни. Соослы иворто, беромиськомы шуыса. - Александр, тӥ Валерий Геннадьевичен ӵош ужаськоды, кыӵегес со кивалтӥсь? - Мон понна со нырысь ик - умой адями!.. Тани нош ик одӥгез машина тылпуысь вуиз. Тылпу кысӥсьёслэн вань дӥськутсы йӧкурамын, киоссы но, ымныръёссы но шумаськемын. Со понна воргоронъёслэн синъёсазы - шумпотон, озьыен, ваньмыз умой, таяз учыре но соос тылэз вормизы... Нырысь пумиськыкумы Валерий Шкляевлэн но мылкыдыз таӵегес ик вал. Соку тыл туж ик ӧз лопыръяськы, нош макем бадӟым изъян со лэсьтысал, тылпу кысӥсьёс дыраз ӧй ке вуысалзы! Угось "Удмуртия" кинотеатр кенжем вылэм. - Ми отчы вуыкумы, липет улысь бугыр-бугыр ӵын потэ ни вал, - тодаз вае Валерий Геннадьевич. - Машинаосысь тэтчамы, сьӧрамы противогазъёс басьтӥм но кинотеатре пырим. Гомась интыез кема утчано ӧз луы: сцена борды тыл ӝабырскем вылэм. Мон пиослы со вылэ ву пызйыны косӥ. Ачим кинотеатрын калыкез трос-а, ӧвӧл-а шуыса тодыны дыртӥ. Милемлы ведь нырысь ик адямиосты утьыны кулэ. Ярам, таяз учыре татын калык вылымтэ. Соин ик ваньмы тылэз ӝокатон борды кутским. Кызьы милям шуо, сое кутон борды. Тыл нокытчы кошкыса ӧз вутты. Сиге потысал ке, сое кортнаны юн секыт луысал ни. - Нош адямиос кино дыръя учырасалзы ке? - Калык отын луысал ке, туж кышкыт югдур кылдысал. Адямиос таӵе учыре шузимо, огыр-бугыр выро, коркась поттыны инты уг шедьто но ог-огзэс лёганы, пачкатъяны ӧдъяло. - Октябрь ёрос Ижын одӥгез бадӟымез луэ бере, тӥляд караулдылы мукетъёсызлы сярысь тылэн ӵемгес ожмаськоно уг-а луы? - Озьыгес, дыр. Милям частьмы арлы быдэ сюосын тылпуосты кысылэ. Со сяна, мукетъёсызлы но частьёслы юрттыны потаськомы на. Тодам лыктэ одӥгез сыӵе учыр. Милемлы ивортӥзы: подвалын, пе, тылпу. Отчы вуэммы бере адӟиськом: утиськон дӥсен, противогазъёсын тыл доры пыроно. Сое нимысьтыз утчано ук. Ми дорозь отчы эшъёсмы куинь-ньыль пол пыраллям ни вылэм но гомась тыл доры вуыны быгатӥллямтэ. Пырим, эскериськиськом, котырак ӵын, номыртэм пӧсь. Ог кызь минут отын ужамы, куд-огез, омыр тырмымтэен, йырсазьзэс ыштыны ӧдъязы. Ӟырдам каскаосысь буёлэз ик ломдылӥз, дӥсьмы но ӵыжаны ӧдъяз. Озьы ке но, тылэз милемлы ик шедьтыны удалтӥз. Борддорез кыр пала пасяса, подвалысь пӧсез ӧжытак кулэсмытӥм. Но соин ӵош отчы шуласа омыр пыриз но, тыл лопырскиз. Азьвыл со гыбдаса гинэ улэм. Тӥни малы ӝуан интыез кема шедьтыны ӧм быгатэ. Подвалысь бадӟым пуклёкъёс кенжиллям вылэм. Ӝоген тылэз зӥбим. Тӥни озьы, таяз учыре но Валерий Шкляев но солэн эшъёсыз - зэмос воргоронъёс - тылпуэз вормизы но быгатэменызы, кышкасьтэм луэменызы, ӝуаны кутскем коркан вань улӥсьёсты шугадӟонлэсь утизы. Паймоно кадь, нош Валерий Геннадьевич таӵе секыт учырез но огшорыен гинэ лыдъя. Аслаз кышкасьтэм луэмез сярысь но чик уг поттылы. Вань веранэз: пиос вуизы, пиос утчазы, пиос шедьтӥзы, пиос кысӥзы. Та зэмос воргоронъёс угось одӥг семья кадь уло. Арлыдзыя кивалтӥсьсылэсь но бадӟымъёсыз вань ке но, котькудзы соос ог-огзылы эшъёс луо. Шкляевлэн верамезъя, ӵош ужасьёсыдлы "пиос" шуыса вазиськиськод ке, соослы матынгес луоно, адямиос тон пала сюлмынызы берытско, соосын котькыӵе шуг-секытэн нюръяськыны капчигес. Кышкыт тылӝуэ но пал кыл вератэк пыро. Нош карауллэн кивалтӥсезлэн улоназ кышкыт учыръёс трос гинэ вал ини. Сыӵеос пӧлын - адямиосты быронлэсь утёнэн герӟаськемъёсыз но. Одӥгзэ сыӵе учырез Валерий Геннадьевич котьку тодаз возёз, дыр. Песочной урамысь юртын одӥгез патер ӝуаны кутскем. Шкляев отчы эшъёсыныз вуиз но, соослы ивортӥзы: патерын пичи пиналъёс, пе, кылемын. Пиос, противогазъёссэс ымныр вылазы кыскыса, ву пызъён гумыосын укмысэтӥ этаже бызьыса тубизы. Лифтэ пуксьыны уг яра, дугдӥз мар ке, асьсэлы юрттэт куроно луоз. Ӧсэз тӥяса, патере пыризы. Одӥгез комната быдэсак тылэн басьтэмын. Ӝоггес пиналъёсты утчаны кутскизы. Куинь висэто патерлэн пыдлось сэрегысьтыз Шкляев пыд улысьтыз пиналэз шедьтӥз, сое ӝутӥз но кыре поттӥз. Эшъёсыз валес вылысь кыксэ пиналъёсты шедьтӥзы на. Огез ӝокаса вуттэм... - Валерий Геннадьевич тӥледлы ваньзэ уз но вера, сямыз сыӵе: мултэссэ мадьыны уг яраты, - валэктӥз мыным тылпу кысонъя кыкетӥ номеро частьлэн азьвыл командирез, али элькунысьтымы тылпу кысонъя управленилэн кивалтӥсезлэн воштӥсез подполковник А. И. Вахрушев. - Со милям медален но пусъемын вал. - "За спасение погибающих" медаль вить ар талэсь азьло сётӥзы, - юанъёсын ёртэме бере мадьыны кутскиз В. Г. Шкляев. - Нош учыр тазьы вал. Холмогоров урамысь одӥгаз коркан тылпу потэм. Кыӵе ке но юондыр нуналъёсы со тупаз. Адямиос шулдыръясько, ӵем дыръя юэменызы мар каремзэс уг ни чаклало: я тамак пумзэс кысыны вунэто, я пӧзьтоно сиёнзы ӝуаса, тыл корка вӧлме. Татын но озьы ик луэм. Патер кузёос куно ӧтчаллям, юиллям, умме усьылӥллям. Со вакытэ улонтӥязы тылпу кузёяськыны кутскем. Отысь ми соку вить муртэ поттӥм. Ӧжыт гинэ беромысалмы ке, ваньзы ӵын пушкын ӝокасалзы. Тӥни со понна, мыным сяна, Олег Обуховлы но, Сергей Кузнецовлы но медальёс сётӥзы. Туэ южтолэзе озьы ик туж кышкыт учыр вал. Ижкарысь 2-тӥ нылпи больницаын тылпу ӝутскылӥз. Солэн подвалаз милесьтым юатэк пу арбериос лэсьтон инты кылдытӥллям вылэм. Ужасьсылэн янгышеныз со кенжем. Вань ӵынэз вылӥ этажъёсы ӝутскем. Юртысь 120 пиналъёсты поттылоно луим. Ярам ай, столярка гинэ ӝуаз, адямиос ваньзы улэп кылизы. - Тылпу - кышкыт маке. Нош сое кысон - тӥляд али ужды но, улонды но. Мынам тодэмея, тӥ азьвыл но кышкытэн, кулонэн артэ ветлэмын, угось армиын дыръяды тӥ десантник вал. - Мыным десантнике сюрес лёгизы анай-атайёс. Соос монэ вордӥзы, кужым, тазалык сётӥзы, дышетӥзы. Кык вынъёсме, сузэрме но адями каризы. Вордски мон Игра ёросысь туж чебер Ильяпиын. Анае, Евдокия Ивановна, туж кема скал кыскыса улӥз, бӧрысь ини фермаен кивалтӥз. Тятяе, Геннадий Харитонович, отын ик электрик вал. Милемды соос умой дышетӥзы. Ноку но начар ӧм улэ. Та понна соослы кык вынъёсыным но сузэреным тау шуиськом. Дас классэз быдтӥ Зураын. Отын но мыным удалтӥз. Дышетӥсьёс туж умоесь вал. Ачим сокем ик умой ӧй ке но дышетскы. Спортэн юри ӧй ке но вырылы, тазалыкелы ноку ӧй ӝожтӥськылы. Ма, тятяе выжые мынӥськем, дыр, со уго кужмо воргорон вал. Гуртын ужъёс но кыдатӥзы. Пичиысен ик ялан колхоз уже потай. Дас классэз быдтэме бере военкомат водителе дышетскыны ыстӥз. Нош армиын машинае ӧз пуктэ, миномёт борды юнматӥзы. Афганистанэ шеди. Военкоматын азьло ик тодо вылэм ини, лэся, монэ Афганистанэ келялозы шуыса. 1981 арын сӥзьыл милемыз эшъёсыным Белоруссиысь Афганистанэ нуизы. Отын мон ар но ӝыны вал... Валерийлэн дораз тазьы ивортӥллям: бадӟымзэ пидэс ож тылӝуэ ыстӥм, быриз мар ке, кык вынъёсыз будо на... Сыӵе кылъёсты лыдӟем бере, анай сюлэм кайгыремысь дугдылӥз на меда? Нош Валерийлэн анаез ваньзэ чидаз. Чидаз тятяез но, Геннадий Харитонович. Зэм, кыксылэн но ымныръёсазы дырызлэсь вазьгес кисыриос кылдӥзы, йыръёссэс маялтӥз сӥзьыл пужмер. Афганистан, Чечня... Та кылъёс уноезлэсь мумы-бубыослэсь, кузпалтэк кылем нылкышноослэсь, атайтэк кылем пиналъёслэсь, бызьыса вуымтэ нылъёслэсь сюлэмъёссэс вӧсь каро, выльысь но выльысь бырем пиосты тодазы вайыто. Ильяпиысь Шкляевъёслэн шудзы вылэм: пизы гадяз Горд Кизили орденэн бертӥз. Миномёт расчётлэн командирез тросаз ожмаськонъёсы пыриськылэм, улонэн люкиськон учыръёсы но трос пол шедьылэм, но Инмар утем сое. - Бен, секыт йӧтылӥз ке но, тунсыко уж вал отын... Таӵе кылъёсты тросэз ӧй но верасалзы, дыр. Малы ке шуоно, ожмаськон - шимес мар ке. Но ожгарчи понна - виро, секыт уж но. Тодам лыктэ Афган музъем вылын бырем удмурт майор, вертолётчик Виктор Вахрушев. Со кык пол отчы ожмаськыны ветлӥз. Кык Горд Кизили орденъёс басьтӥз но... быриз. Нылпиосыз луыса, кузпалыз луыса, сое отчы уг келяло вал ни, эмчиослэн но лэземзы ӧз поты ни вал, нош со, тазалык люкаса, выльысь отчы лобӟиз... Паймод, мар кыске сыӵе уже-оже? Мынам малпамея, нырысь ик - эшъёс, быремъёсыз понна пунэмзэ берыктон мылкыд. Собере "патриот", "патриотизм" кылъёс но азьвыл асьме понна юнме веран ӧй вал ук. Али со кылъёсын адямиез ӵем дыръя ултӥян калэ вуттыло ни... Якшур-Бодья пи Виктор Вахрушев сямен ик, ас улонзэ афган музъем вылын ожгар журналист Валерий Глезденёв но сётӥз. Таиз будӥз но быдэ вуиз Алнаш палъёсын. "Советской Удмуртия" газетын ужакум, редакциямы со огпол гинэ ӧз вуылы. Угось татын солэн эшез Владимир Алашеев ужа вал. Тӥни ӵапак соку ик тодмо журналистэн адӟиськыны но кылдӥз. Валерий но кыкетӥзэ Афганэ лобӟиз. Таиз но вертолётэн быриз... Мон ачим но афган ожъёс вакытэ арми пыр потӥ. Озьы ке но, та кык учыръёсты тодам вайыса, Валерий Шкляевлэн "тунсыко вал" шуэмез сюлэмез ик позыртэ, мур малпаськытэ. Ожмаськон уж адями понна туж умойтэм но кулэтэм маке. Со ноку шуд но, ваньбур но уг сёты, кайгу гинэ вае. Нош Валерий Геннадьевичлэн та пумысен аслаз веранэз. - Мынам малпамея, воргорон нырысь ик атыкай музъемзэ утись ожгарчи луыны кулэ. Азьвыл, тужгес но гуртъёсын, армие ветлэмъёсты гинэ зэмос пиосмуртэн лыдъяло вал. Бен, ожмаськонэз тунсыко шуыса веран сокем ик умой ӧвӧл, но йӧспӧртэм валатонэз отын вань. Секыт, кышкыт, но соосты адями вормыны кулэ. Таиз но уже сыӵе ик ук. Татын но капчи ӧвӧл, адямиос ог-огзылы юрттытэк ныпъетсэс уз ворме. Афганын но. Азьвыл шуо вал: "интернациональной долг". Со кылъёслэн пуштроссы ми понна озьы ик кылиз. Али супыльто, ми, пе, умойтэм лэсьтӥмы. Но милемыз Родина ыстӥз, куриз. Политикъёс янгышазы ке, малы соослэсь сьӧлыкъёссэс ожгарчиос вылэ погыльтод? Валерий Геннадьевич Присягазэ но, Долгзэ но Родина азьын туж умой быдэстӥз. Малы ке шуоно, Горд Кизили орден гадь вылэ юнме шорысь нокин но уз быртты. Бен, со уг данъяськы, мон интыын ваньмыз, пе, озьы ик лэсьтысалзы, угось эшъёстэ утёно ке, уд ни учкиськы, секыт-а, кышкыт-а яке бырод-а тон. "Мынам малпамея, зэмос адями котьку мукет адямиез утьыны дась луыны кулэ. Татын но мон аслэсьтым ужме тазьы ик валасько, озьы ик ужасько. Афганын сямен ик, - шуэ со. - Орден сярысь ке верано, туннэ но со учыр син азьын. Одӥг пол милям пиос котыртэме шедизы. Соос отысь асьсэ кужымен потыны уг быгато вал. Кызьы юрттоно? Душман пуляос, снарядъёс йырез ӝутыны уг сёто. Нош милемлы миномётэз одно ик пуктоно, ыбылоно, озьы гинэ эшъёсмылы юрттыны быгатом. Сотэк ваньзы бырозы. Тодӥськоды-а ма со, куке ожъёс пыр ӵош потэм эшъёсыд быро ке? Кыӵе-кыӵе сюлэм вӧсь луэ. Нош сыӵе учыръёс трос гинэ вал. Армиысь бертэм бере но ай со виро ожъёсты вӧтъёсам кема гинэ адӟылӥ на. Радио пыр но "Голос Америки" афган ожъёс сярысь ивортэ ке, син азе пуктӥськод кыдёкысь гурезё шаерез, отын одӥг тусьты-пуньыен сиськем эшъёстэ тодад ваиськод, пель сьӧрын пуляос шуланы кутско, снарядъёс пуштыло... Дуно эшме удмурт пиез Валерий Андреевез но ялан кылӥсько кадь потэ вал. Афганын ми соин артэ кӧласьком, ӵош сиськиськом вал. Удмурт сямен но вераськылӥм. Ижысь трос пиос сямен ик быриз... Туж ичи вуылӥськом берло дыре соослэн шайвылъёсазы..." Валерий Геннадьевичез кылзӥськисько но, пумен йырам кылбур чуръёс вордско. Мон но афган ожъёс вакытэ армиез ортчи. Троссэ отчы ветлэм пиосты тодӥсько, соослэсь мадемъёссэс но уно пол кылылӥ. Оло, соин но куд-ог дыръя афган ожъёс сярысь вераськонъёс, отчы вуылэм муртлэсь сямен ик, мынэсьтым но сюлэмме позыръяны кутскыло. Юнме шорысь ӧз вордске, дыр, таӵе чуръёсы но: Афганистан - мынам лул висёнэ! Нош ик туннэ Быдэс уй пӧсекъяй: Адӟи тонэ - Сьӧрад зол черекъяй. Ӧд дугдытскы - Кошкид тон гурезе, Кытын салкым, Ошмес жильыр бызе. Афганистан - Мынам лул висёнэ! Афганистан Йыръе визез, сӧнэз. Ӧд шӧд, иське, - Ӵушказ монэ лек тыл. Кӧня иськем Ортчи, сое уд кыл. Нимтэм пусэн Кӧлод гурезь бамын. Дун ошмесэн Пылатэмын бамыд. Афганистан - Мынам лул висёнэ! Афганистан Йыръе визез, сӧнэз. Султылытэк Ортчо дасо аръёс. Мӧзмыт тӥтэк - Коть лэсьтыт ни корос... Нош ик тани Вирез кисьтон мынэ. Я, бертэ ни: Тӥ жалялэ монэ! Афганистан - Мынам лул висёнэ! Афганистан Йыръе визез, сӧнэз! Валерий Геннадьевичлы но афган сюресъёсыз сярысь тодаз вайыны туж секыт вал. Соиз бен валамон. Кинлэн бурмыны кутскем яраоссэ выльысь вӧсь каремез потоз. Юнме шат вераськонмес со но, мон но каллен-каллен азьвыл ӧре ик выжтыны тыршим. Но мар веранэз, тылпу кысӥсьёслэн улонзы - со сыӵе ик армия ук. Татын но сыӵе ик кышкытлык, татын но сэзь син, лэчыт визь, юн кужым кулэ. Ваньмыз ик со Валерий Геннадьевичлэн вань. Соингес, дыр, шаплы мурт тыл пыртӥ но нуналмысь кышканэз тодытэк кадь потэ. Солэн нимтулыз, кивалтоно караулэз ялан устоосыз, тылпу кысонын умоен висъяськемъёсыз пӧлын луыло. Валамон ини, юн мылкыдтэк, нуналмысь дышетскытэк, тыршытэк со уг сётӥськы. Нош В. Г. Шкляевлэн та пумысен аслаз валэктонэз: - Милям частьмы борды Ижкарысь одӥгез бадӟымез ёрос юнматэмын. Тылпуос но отын тросгес луо. Ижын ӝынызэ пала тылпуосты милям часть кысэ шуыны луэ. Соин ик калыклэн син шораз но ӵемгес сюриськод. Но милям ужмы мукетъёслэн кадь ик. Секыт ке шуоно, металлурглэн но ужез капчи ӧвӧл. Кышкыт ке шуоно, шахтёрлэн но ужез сыӵе ик. - Валерий Геннадьевич, тӥ вань улондэс уж сярысь сюлмаськонэн герӟаськоды, нош ваньмон дырдэс кызьы ортчытъяськоды? - Тэк уг улӥськы. Ужась адямилы уж шедёз, шуо калыкын. Лэсьтӥ мебель но. Ас киын лэсьтэмез чебергес луэ кадь потэ. Учкиськод но, кибервылыд адӟиське, со магазинысь ӧвӧл басьтэмын шуыса шумпотӥськод. Кемагес выриськод ке, котьмар но пӧрме. Киыд ас интыяз ке, мае лэсьтэмед потӥз, одно ик пӧрмытод. Мылкыд гинэ кулэ, нош мылкыд вӧзы - кӧня ке валан-а, мар-а шуод. Али тани кухняысь котырез выльдӥсько. Яратӥсько бакчаын ужаны, нош тужгес но - покчи нылыным дырме ортчытыны. Солы али куать арес. Пианиноен шудэ. Крезьгуро школае пырыны дасяське. Мемиелэн выныз вань, Юрий Николаевич Лекомцев, али со Игралан улэ, туж усто арганчи. Ми соин ӵем пумиськылӥськом. Со выжые-а, мар-а нылмы мынэ. Атай кулӥз ни, мемиелы юрттоно, соин ик дораз толэзяз кык-куинь пол вуылӥсько. - Нош анайды дорын яке дорады кыӵе сиён яратӥськоды? - Кузпалы усто плов пӧра. Сӥльлэсь но, чорыглэсь но. Скумбриен ческыт луэ. - Нош юон ласянь кызьы? - Яратӥсько сур юыны. Тужгес но кельше бекчеысь лэзьямез. - Спортэн выриськоды-а? - Милям вань ужмы - спорт. Соин-а, мар-а нимаз уг выриськы. Нош телевизор пыр учкыны яратӥсько ӵошатсконъёсты. - Кыӵе буёлъёс кельшогес? - Гордэн курень. Тылпуэн нюръяськисько ке но, солэн буёлъёсыз ик монэ бордазы но кыско, лэся. - Тӥляд яратоно лыдпусты? - Кызь куинь. Малызэ валэктэме уг ке но луы, со лыдпусэн мыным удалтэ. - Оскиськоды-а гороскоплы? - Уг. Озьы ке но, кузпалэным ми тупаськом кадь потэ: Телец но Стрелец. Кылпумъёссы ик кылбуре курисько... ...Пичи Валера вордскем бере ик гуртоосыз, ӵыжы-выжыосыз анай-атаезлы со сярысь пиды далтэм (удалтэм) шуылӥзы. Зэм но, Валерий Геннадьевич Шкляев удалтэм пияш, удалтэм ожгарчи вал, удалтэм тылпу кысӥсь, удалтэм адями но луиз. 1 Олег Четкарёв Сюлмо ужад - кенсыд но тыр Кӧня гинэ элеваторъёсты адӟылӥ - ваньмыз соос кар яке черкогурт пуме пуктылэмын. Ма, гурт возёсъёслэн итымъёссы, кеносъёссы но улон юртъёслэсь палэнын сыло. Зарни ю тысь будэм, гыам муосызлы матынгес мед луоз шуыса яке сое тылпулэсь утён вылысь-а озьы лэсьтэмын меда? Тани таиз но элеватор Ижкарысь Можгала пырон сюреслэн бур палаз ӝутскемын. Нош азьвыл ("Заготзерно" база дыръяз ай) солэн кеносъёсыз Казанской, Азин урамъёс кузяна отын-татын сылӥзы. Соку ай Можга но кар ӧй вал на, Красный посёлок шуыса нимаськиз. Электрокужым сярысь можгаос ӧз тодылэ на бере, юэз киын тӧлӥзы-шертӥзы, уйёсы - керосин лампаослэн бездыт югдытэмзыя. Ю тысез интыысь интые валъёсын ворттӥзы. Валамон ини, базаын ужасьёслы секыт йӧтылӥз. Соин ик Можга горсовет, карын улӥсьёслы пызь, нянь уногес сётон понна, 1936 арын выль "Заготзерно" базаез но вить сюрс тонна тысь тэрымон пу элеваторез лэсьтыны инты висъяз. 1938 арын ик ини Можга элеваторлы нырысетӥ электрогенератор, сепараторъёс но транспортёръёс басьтэмын но пуктэмын, колхозъёсысь ваем юэз кисьтыны кенос лэсьтэмын, татчы чугун сюрес кыскемын. Предприятие ӝог азинскыны, кужмояны кутскиз, но, война пуромемен, югдур чутрак уродмиз. Воргоронъёс огез бӧрсьы мукетыз фронтэ кошкизы, вань секытэз кышномурт пельпумъёс вылэ усиз. Куддыръя уен-нуналэн ужано луылӥзы ю тысь, пызь бордын, но сютэм улонэз чидазы. Огез кышномурт, чылкак жадьыса, жуммыса, вить минутлы умме усем но, та понна сое судэ сётӥллям. Нош плотниксылэсь кисыысьтыз 370 грамм ю тысьсэ шедьтӥллям но, солэсь но ужзэ судэ келяллям, сиён-юон басьян карточказэ талаллям. Мар луиз меда бӧрысь со мискиньёсын, директорлэн гожъям приказъёсысьтыз соиз тодмо ӧвӧл. Можгаысь "Заготзерно" витьтонэтӥ аръёслэн кутсконазы гинэ выльысь азинскыны ӧдъяз. Соку ӝутыны кутскизы бетонлэсь выль элеватор, уй-нунал куспын 15 тонна комбикорм дасяны агрегат пуктӥзы. Та дыре ик лэсьтӥзы тямыс патеръем кык улон юртъёс но базаез возьмасьёслы мунчо, котельной, музъем пушкысь мурысь чылкыт ву кыскыны кутскизы. Бӧрысьгес ини электровукозэс йӧндыризы. Электрокужым тырмымтэен, сое уйёсы дугдылытэк ужатӥзы. Али син азе но шуг пуктыны, кызьы ньыльдон адямиос гинэ трос сюрс тонна юэз куасьтыны, шертыны-тӧлыны, пызьлы, комбикормлы изыны вормылӥзы. Со сяна, тысез кема ӵоже кеносъёсын кылльытыны уг луы ук, сое, медаз пӧсекты шуыса, ялан выретоно, тӧлатоно. Огдыре ик лэсьтӥськон ужъёс но мынӥзы, отчы но кужым поныны кулэ вал. Вераны кулэ, татын предприятизэс ялан выльдыны, кужмоятыны тыршизы. Улонлэсь куронъёссэ тодыса. Гурт возёсъёс пумен юнмамъя, бетонлэсь элеваторзэс лэсьтыса вуттӥзы. Тысь куасьтон агрегатъёсыз сокем кужмоесь, час куспын 160 тонна юэз пыртӥзы куаштырес карыса потто. 1970 арын комбикорм лэсьтонъя кужмо цех ӝутӥзы, угось та пудо сиёнэз пумен тросгес но тросгес кулэ каризы тылобурдо вордон фабрикаос но парсь куайытон комплексъёс, колхоз-совхоз фермаос. Возёсъёслэсь куронъёссэс лыдэ басьтыса, та вакытэ ик ю кидыс шертон-сузян станция лэсьтӥзы но со пыр поттэм куать но ӝыны сюрс тонна пала кидысэз возьыны из кеносъёс пуктӥзы. Можга элеваторын котьку ик рос-прос ужаны тыршизы, мар ке но выльзэ утчазы. Тани соослэн трос тоннаосын пызь, комбикорм изыкузы пужнӥськем кыдэз, кеносъёсты ӵужыкузы жаген сураськем тысез люкаське гинэ. Кытчы та ваньбурез карод? Мукет элеваторъёсын машинае тыро но кытчы ке нуыса кисьто вал. Кеносысь ӵужем быдэс уробо ю тысен жуг-жаг кисьтан интые Ижысь ворттӥсь тракторез аслам дугдытэме но гуртам валтэме вань. Дас манетэн басьтэм со юэн, киын тӧлэм-шертэм бере, парсез быдэс гужемзэ но сӥзьылзэ сюдыны тырмиз. Валамон ини, парыса, чырсатыса но ӝӧк вылысь кылем-мылемъёсын узырмытыса. Жаг пӧлы кошкись мае ке но ваньбур карыны луоно шуыса ик можгаос 1982 арын парсь гид пуктӥзы. Ӧз янгышалэ. Табере ини соос араз куинь сю парсь куайыто. Быдэс ферма, ява. Пияно мумы парсьёссы но вань. Элеваторын ужасьёслы со туж ӟечен берытске ини, угось сӥль но, парсьпи но базарын сярысь чараклы дунтэмгес басьтыны быгато. Гидъёссэс учкыкум, пызесь дӥсен воргорон (вукоязы ужа, лэся) токыль-токыль но майталэн миськем кадь чылкыт парсьпиез мешоказ донгыса дораз нуиз. Шумпотыса. Ас юртаз улэ, дыр, иське, пудозэ ужысьтыз басьтэм дунтэм сиёнэн, бакчаысьтыз векчи картофкаен, жаг турынэн сӥзьылозь куйытоз но быдэс толлы сӥлен луоз. Татын ужасьёс тросэз озьы карыло, угось элеватор юрттэмен - коньдонэн, кирпичен, цементэн но мукетыныз - йыг-йыг коркаос, гидкуаос пуктылӥзы. Ужан интызылы матэгес ик. Нош кинлэн ас юртэныз улэмез ӧз поты, соосызлы артэ ик ӝутскизы трос патеръем ньыль коркаос, кылдӥз элеваторлэн посёлокез. Соин ик али элеваторын сю витьтонлэсь ятыр ужасьёс пӧлын улон интылы кулэяськисьёс ӧвӧл, шуыны луоз. Паймоно кадь но, быдӟым кунмы но экономикамы куашкан вакытэ азьвыл "Заготзерно", "Можга элеватор" кун предприятие луыса, уката но золгес азинскиз, кужмояз. Ӵапак укмыстонэтӥ аръёслэн кутсконазы татын кык этажъем выль ужан юрт лэсьтӥзы но солэн улӥяз пӧртэм агрегатъёсты тупатъясьёслэн, токарьёслэн цехъёссы, сиськонни интыяськизы, вылӥяз - дӥсь воштон но пыласькон бӧлетъёс усьтӥзы. Собере воштос ёзъёс, пӧртэм кулэ арбериос возён складзэс пуктӥзы, цехъёсазы шуныт сётон гумыоссэс воштӥзы но вань сюресъёссэс, юрт азьёссэс асфальтэн шобыртӥзы, тепловоз депо ӝутӥзы. Нош 1994 арын выль котельнойзэс ужатыны кутскизы но, татысь газ, шуныт но пӧсь ву элеваторлэн посёлокысьтыз коркаосы вуизы. Та аре ик "Можга элеватор" "Кама" но "Колосок" бадӟым магазинъёсты басьтӥз, вуонояз - куать автомашина, автобус, тепловоз, куинь трактор но экскаватор. Ма, укмыстонэтӥ аръёсы татын ортчем воштӥськонъёсты вераса но уд быдты. Ваньзэ тае чаклано ке, малпан кылдэ: тямыстонэтӥ аръёслэн пумазы но укмыстонэтӥ аръёсы "Можга" элеваторлы кыӵе ке выль кужым пырем. Мукет предприятиос векаку, со дыатскиз, уката вылӥе ӝутскыны быгатӥз. Кызьы? Ма чотын? Валамон ни, ваньмыз сямен потэ адямиос бордысь. Соос предприятизы понна, иське, ас улонзы сярысь но, нуналмысь мыло-кыдо тыршо, сюлмасько ке, секыт югдуръёсы суй-пыдзы уг юскиськы, ӵуказе нуналлы осконзы уг ышы. Бен, ӟеч ужан понна ас ӧнердэ умой тодоно, югдурез валано, шӧдоно. Сыӵе адямиос элеваторын уно гинэ. Данакез татын куамын но солэсь трос ар ужало ни. Котькуд дасэтӥез вылӥ дышетсконниез йылпумъямын, котькуд витетӥез - шор ёзо ӧнеръя дышетсконниез. Нош котькыӵе ӟеч ужасьёс мед луозы, соослэсь кужымзэс, тодон-валанъёссэс, быгатэмзэс огазеяса одӥг ӧретӥ ӧръяно ук, азьланезлы осконзэс утьыны, мылкыдзэс бурдъяны быгатоно. Созэ ини кивалтӥсь гинэ быгатэ, зэмос кузё. Сыӵе кузёен "Можга элеваторлы" ӵапак тужгес огыр-бугыр аръёсы удалтӥз. Азьвылъёсыз элеватор директоръёс куинь-вить аръёс сяна ужаса ӧз вуттылэ, соосты воштылӥзы. Нош 1987 арын кивалтӥсе пуктӥзы татын ик дас ар пала ужаса вуттэм егит инженерез-экономистэз Наиль Назмуллович Масагутовез. Пермь улосвылысь Чернушка нимо карысь та бигер пиез Можгала институтэз йылпумъямез бере ыстӥзы вал. Интыез кельшиз, удмурт ныллы синмаськиз но кышнояськиз. Асьме выжыысь кузпал юнме шорысь ӧз бырйы шуыса малпасько, угось солэн дор палъёсаз но трос удмуртъёс уло. Куинь нылпи будэтӥзы. Бадӟымез пизы Удмурт университетын юристэ дышетсконзэ йылпумъя ни. Ма, Наиль Назмуллович ачиз но Восточно-Европейской университетлэсь юрфаксэ йылпумъяз на. Трос тодон-валан люкаменыз, ялан дышетскеменыз но туала югдурын ужез бергатыны быгатэменыз, калыкен огкыл шедьтэменыз но ужасьёсыз понна ялан сюлмаськеменыз ик Наиль Масагутов дас вить арзэ ини элеваторен кивалтэ. Ӟеч тыршемез понна солы Удмурт Элькунысь гурт удысын дано ужась ним сётэмын. Калыкен но калыкын ужаны быгатэмзэ лыдэ басьтыса, адямиос сое Можга кар кенеше депутатэ бырйизы. Кивалтӥсьлы та вакытэ капчи ӧвӧл. Вазь ӵукнаысен бер ӝытозь солы бергано, нуналлы быдэ трос дасо ужпумъёсты быдэсъян сярысь сюлмаськоно луэ. Азьланез сярысь но ялан малпаськоно. "Можга элеватор" уго табере - бадӟым предприятие. Куамын гектар музъем вылын кеносъёсыз кызьлэсь ятыр. Али отын ю тысь гинэ куамын кык сюрс тонна кылле. Бетон гурезь кадь элеватор вӧзын - комбикорм поттонлэн сыӵегес ик корпусэз. Сое огназэ быдэс завод шуыны луоно. Уй-нунал куспын 250-300 тонна пӧртэм ватсэтъёсын узырмытэм пудо сиён поттыны быгатэ. Тросэз со "Восточный" парсь вордон комплексэ кошке. Пусйыны кулэ, элькунысьтымы комбикорм поттӥсь предприятиос али ужатэк сыло. Шуом, Глазовысь завод уй-нунал куспын 700-800 тонна пудо сиён сётыны быгатэ, нош отын ю тысьсы гинэ но ӧвӧл. Сыӵе ик югдур Кезысь комбикорм поттӥсь заводын но. Малы со озьы луиз? Угось 2001 арозь Кун Кивалтэтмылэн ваньбур поттӥсьёслы юрттон сярысь Пуктэмезъя ю тысез кӧняен басьтонлы дунъёс юнматылӥзы, бускель улосвылъёсысь югдурез чаклатэк. Нош Татарстанын, Пермь, Киров улосвылъёсын юзы дунтэмгес вал. Соин ик тылобурдо но парсь вордон комплексъёсмы кыдёкысьгес - палэнысь ке но, со понна ӧжытгес дунын - ю тысь басьязы. Нош асьмелэнэз кӧня ке сюрс тонна ӟегмы, чабеймы элеваторъёслэн кеносъёсазы кык аръёсын кыллизы. Юэз сыӵе кема огинтыын возьыны уг луы, сое выльысь но выльысь тӧлатоно, интыысь интые ворттоно. Озьы солэн дуныз будэ но будэ. Бӧрысь кинлэн-о со тысь понна мултэс коньдонзэ кисьтыны мылыз потоз на? Тае шӧдыса, тросэз возёсъёс юзэс элеваторъёсы кисьтыны ӧз нуллэ ни, Татарстанын, Кировын удобренилы вошъязы. Башкортостанысь ю-няньмы понна ужбергатӥсьёс возёсъёстӥмы асьсэос солярка ӵектыса ветлӥзы. Ма, кызьы озьы со луэ ай? Удмурт шаерамы будэтэм няньмы татын нокинлы кулэ луымтэ. Иське, ма понна тыршо, курадӟо, шуыны луоз, асьмелэн музъем ужасьёсмы? Кыӵе мылкыдын, кыӵе малпанэн потозы табере соос бусыосазы? Нош парсь вордон комплексъёсмы векало. Пычасысяз 24 сюрс парсьёсты куайытыны кулэ, вить сюрссэ гинэ вордо. Тукляысь, Кигбаевоысь комплексъёсын но гидъёссы бушесь. Тылобурдо вордон фабрикаосмы гинэ кызьы но озьы возиськыны быгато ик. Соин ик Кивалтэтмылэн Пуктэмаз одно ик пусъёно вал, тылобурдо вордон фабрикаосмы но парсь куайытон комплексъёсмы асьме дорын поттэм комбикормъёсты мед басьялозы шуыса. Озьы ик возёсъёсмы но. Огъя вераса, Удмуртиын комбикорм поттонъя но сое тыро-пыдо кутонъя нимысьтыз программа кулэ. Сотэк али элеваторъёс но, музъем ужасьёс но трос ыштонъёс адӟо. Тани тросаз возёсъёсын пудозылы юэз пыргытыса гинэ сёто. Сыӵе сюдэмлэн пайдаез трос-а ма? Куддыръя со тысь скаллэн "табаньысьтыз" выльысь будыны кутске. Я, шуом, мукетъёсаз ю тысьсэс пудозылы изо ке но, кӧня электрокужым быдто. Мешокъёсты тыбыр вылазы пычкиськыса нулло. Нош изэменызы лэсьтэм суралтэтсылэн пайдаез туж ик уг шӧдӥськы. Нуэ вал со тысьсэс элеваторе, отын сое нунал куспын быдэс арлы окмымон туж ӟеч пудо сиён лэсьтысалзы. Уг нуо, дуно потэ. Но "Можга элеваторлэн" кивалтӥсезлэн верамезъя, азьвыл кин ке соослэсь комбикормзэс басья вал, отын йӧл но ятыргес кыскылӥзы, пудозы но йӧнгес куайылӥз. Бен, ватсэтъёсын узырмытэм пудо сиён тысьлэсь дуногес, но ошпиосты соин, кык тол-тол гужем интые, ар куспын быг-быг будэтӥд ке, ю тысен сюдэмлэсь тросгес пайдаез уз лу меда? Лыдъяны кулэ. Мукетсэ но чаклано: комбикормен сюдэм пудо ӧжытгес висе, нош таза скаллэн, парсьлэн пиоссы но таза вордско. Али ке учкиськод но, одӥгаз, мукетаз ёросысь возёсъёсын сю скаллэсь сизьымдон кунян гинэ басьтӥллям. Нош кытын куамынэз? Иське, скалъёс начаресь, кунянъёссы куло. Пудозэс ватсэтъёсын узырмытэм сиёнэн сюдӥсь возёсъёсын котькуд мумы парсьлэсь араз кызь вить парсьпи басьто, нош мукетъёсаз - 10-15 гинэ. Соосыз но ай лябесь вордско, тросэз куло. Тӥни кӧня ыштонъёс. Табере, лыдъяд-чотад ке, дуно-а меда потоз элеваторын дасям комбикорм? Нош сое дасяны можгаос быгато. Ватсэтъёсты, эсьма, Финляндиысь но Магнитогорскысь басьяло. "Восточный" возёслы пудо сиён дасяны ю тысьсы но, ватсэтъёссы но выль ю-нянь вуытозь кеносъёсазы тырмыт люкамын. Комбикормзэс мукет улосвылъёсысь возёсъёс но шумпотыса басьто. Пызьзэс но трос интыосы келяло. Соин ик ужтэк уг сыло. Но можгаос таин гинэ буйгатскыса уг уло. Алигес тани Наиль Масагутов Ленинград улосвылысь Невской вукоос нимо огазеяськонэ ветлӥз но отчы куинь сюрс тонна ӟег келян сярысь тупанкыл гожтӥз. Тазэ но вамышсэ со малпаса лэсьтӥз, угось тодэ вал: гурт возёсъёсамы али лачак ӟегзы тэк кылле. Кытчы вузаны уг тодо. Нош Нева дурысь вукоос Санкт-Петербургысь ваньмаз нянь пыжись предприятиосы пызьзэс келяло но уй-нунал куспын гинэ ӝыны сюрс тонна ӟегез изо. Табере "Можга элеватор", музъем ужасьёсмылэсь тэк кыллись ӟегзэс басьтыса, соослы но юрттоз, юэз шертыса-куасьтыса Нева шур пала келялоз, аслыз но табыш поттоз. Тазьы ужан понна Масагутовлы быдэс Россиетӥ уно гинэ ворттылоно луэ. Угось тупанкыл гожтоно фирмаен ӟеч-ӟеч тодматсконо, сотэк юмоке но сюрыны кема ик ӧвӧл: ю тысьтэ, пызьдэ келялод но, коньдон уз тыре. Утча на соку йылзэ-пумзэ. Соин ик "Можга элеватор" оскымон, тодмо предприятиосынгес кусып возьыны тырше. Татын ини чупрес но валаса ужало маркетингъя службаысь адямиос. Соослы но, элеваторлэн директорезлы но, кызьы шуо, йырынызы ӵош пыдъёссэс жадьытоно луэ. Ӝӧк сьӧрад гинэ пукыса, азяд нянь сукыри уз вуы уго. Нош ӟеч кусыпъёссэс утьыны тыршо, котькуд тупанкылзэс дыраз быдэсъяло. Озьы элеваторзылэсь но оскымон предприятие луэмзэ возьмато. Со понна ик лабораторизэс но выльдӥзы: ю тысез, пызез, комбикормез эскерыку нокыӵе янгышъёс, валантэм учыръёс медаз кылдылэ. Та сярысь малпаса ик весъёссэс ялан чаклаллято, палэнысь эскерисьёсты юри ӧтьыса. Нош весъёссы соослэн быдэс вагон яке машина юэз но, килоен-кыкен пызез мертасьёсыз но вань. Огез но одӥг граммлы но медаз алдаськы, сотэк калык синмысь усёд, бӧрысь ӟеч нимдэ берыктыны туж секыт йӧтоз. Уката ик туала вакытэ. Нош ӟеч ним али понна - со туж дуно маке. Ужбергатон удысын тыныд оско ке, кулэ дыръяз пунэмаськыны но уд ёрмы, вуздэ но капчиенгес вузалод, тупанкыл гожтонын но шуг- секытъёсын уд пумиськы. Тае лыдэ басьтыса ик, ма, аслаз пайдаез сярысь но сюлмаськыса, "Можга элеватор" тулыс ужъёс азьын возёсъёслы эстӥськон, воштос ёзъёс сётэ но, соосыз ини куинь-ньыль толэзь ортчыса выль ю тысен пунэмзэ берыкто. Таӵе юрттэт сярысь мынам кылэме вал ини. Можга ёростӥ азьвылгес ветлыкум, одӥгез возёс кивалтӥсь шуиз: "Элеватор ке эстӥськон пунэмен ӧй сётысал, кизёнмес дырыз дыръя ӧй ортчытысалмы". Тӥни озьы: предприятие юрттэмен возёс шуг-секытысь потӥз, нош элеваторын ужасьёслы, кытысь ке палэнысь утчатэк, кеносъёсазы жиль-жиль ю тысь вуиз. "Можга элеватор" музъем ужасьёслы мукет юрттэт но сётэ. Шуом, кудаз ке возёсын ю тысьсэс возьыны кеносъёссы уг тырмо ке, элеваторе вайыса кисьто. Бӧрысь кулэ луэмезъя нулло. Яке кытын ке тысьсэс куасьтыса уг вутто, пӧсектыны ӧдъя - элеваторе вазисько но, татын сое та шуытозь шупато. Со дуно уг усьы, малы ке шуоно, предприятиын шуге-леке сюремъёс чотын мултэс коньдон жильдыны уг туртто, асьсэлэсь ужан ужзэс но укыр вылӥ уг дунъяло. Рентабельностьсэс куинь процент котырын возё, угось солэсь вылэгес ӝутӥд ке, дуноям пызьдэ, комбикормдэ басьтӥсь уз лу ни. Али туж трос кылдыло пызен вузкарись пичи фирма нергеос. Вакчи дырлы гинэ. Кык-куинь кузя ужбергатӥсьёс огазеясько но нянь пыжисьёслы "КамАЗ"-эн пызь ӵектыса ветло. Одӥг интыысь басьто, мукет интые дуноенгес ӵекто. Валамон ини, соослэн одӥг машиналы гинэ тыронъёссы ичигес. Нош бадӟым предприятилэн тыронъёсыз уногес люкасько. Электрокужым тани ялан дуноя но дуноя. "Можга элеваторез" музъемез понна гинэ но алигес кык пол тросгес тырытыны ӧдъязы. Но та предприятиын котьмае шыръяса, ӝикыт ужаны дышемын бере, котыртэмазы буш кыллись музъемзэс азьвылгес ик пайдаё кутыны тыршизы ни: одӥг интыяз улмопуос, сутэрпуос мерттӥзы, мукет азяз - картошка, ӵуж кушман. Кылем арын асьсэ киын будэтэм но бичам емышъёссы сиськонниязы лачак сётэмын ни: вить тонна картошка, куинь тонна ӵуж кушман, тонна пала улмо но куинь сю килограмм сутэр. Туэ шӧдскымон люкаськоз ини выль чия садысьтызы емышсы. Озьы ик буш интые скал гид пуктӥзы но отын арлы быдэ ошпиосты куайыто. Дунтэм сӥль сиськоннизылы но тырме, ужасьёссылы но вузаны кӧня ке кыле на. Возьмаськисьёслэн (ВОХР-лэн) кивалтӥсенызы - со ассэ Света гинэ шуиз - элеваторлэн азбартӥз вамышъяськом. Вань сюресъёсысь, юрт азьёсысь лымы чылк-чылк мычемын. Куд-ог предприятиослэн азбартӥзы корт силёен йырин кытчы вамыштыны ӟудоно, нош татысь мон одӥг машина шӧез но, куштӥськем кортэз но ӧй адӟы. Адямиос ваньмыз кыштыр гинэ ас ужзэс ужало, юнме кыл шерыса яке тамак кыскыса сылӥсьёсты ӧм пумиталэ. Верано ке, Светлана южмам лымыё азбаретӥ поръякумы гинэ но монэ тамак аратыны ӧз лэзьы. Ачид утиськид ке, Инмар но утёз, пе, угось омыре пурӟем пызь тузон - со кышкыт мар ке: пичи тылгизьылэсь но пуштыны быгатэ. Мынӥськом азьлань. Шуак адӟисько: кузь лапас кадь юрт дорын уло-ваё зӧк писпуос кыллё. Погыръяса соосты быдэскын татчы кыскаллям. - Татын милям пул пилёнмы, - валэктӥз Света. - Сыӵе кикыр-кокыр, позырес топольёсты пуллы пилиськоды шат? Дунтэмен басьтэмын, дыр. Но дунтэм - гонтэм но луэ ук. - Дунтэмен, - серекъя Света. - Та писпуос азбарамы будо вал. Кенер дуртӥмы эшшо но погыръяноосыз вань на. - Жаль уг поты-а? Уть, кыӵе батыресь вылӥллям. - Ма, соос пересьмыса куасьмыны кутскемын ни. Собере тӧло куазен улвайёссы чигыса усьыло, липетэз пасялозы, адями вылэ учыралозы я шай. Нош погыръям писпуос интые, лӥялъёсты порылыса, ми выль бакча гыром яке сад мерттом. - Гм, тӥ изысь но вӧй пызьыртыны быгатӥськоды, лэся. - Кыӵе кузёез - сыӵе вукоез. - Директорды сярысь вераськоды-а? - Пастухезъя - уллёез но, - пальыша Светлана. - Со кикыр-кокыр шуэм писпуостылэсь столяръёсмы сыӵе учкымон арбериос лэсьтозы, адямиос синмаськыса басьтозы. - Палэнэ но вузало шат? - Бен. Можгалан улӥсьёслэн куремзыя соос укно янакъёс, рамаос, чебересь ӧсъёс лэсьто. Директормылэсь кабинетсэ адӟиды ук - столяръёсмылэн ужамзы. Зэм но, Масагутовлэн кабинетэзлэн бордъёсыз быдэсак пулъёсын чеберъяса шобыртэмын. Нош огпал борддор интые - пияла ӧсъёсын канаос. Отын, кылсярысь, адӟиськымон тыремын "Можга элеваторлы" сётэм Тау карон гожтэтъёс, ярмаркаосын басьтэм Дипломъёс, Удмурт Элькунлэн Кивалтэтэзлэн Данъян грамотаез. Пусйыны кулэ, столяръёс сямен ик, элеваторын мукет тыршисьёс но удыссэс паськытатэм чотын ватсаса коньдон поттыны амалъёс утчало. Нуллон-ваён цех кулэяськисьёслы машинаоссэ висъялля. Сиськонниын Можгаын улӥсьёс сюанъёссэс, вордскем нуналъёссэс, пӧртэм юондыръёссэс ортчытъяло. Предприятиын, эсьма, калтонъёс но керттыса вузаны кутскизы. Угось котькуд цехын тыршисьёслы табыш поттэмзэс лыдэ басьтыса уждун тыро. Лябгес ужад - кисыед векчияз, золгес бергад - янчикед зӧказ. Сое вань ужасьёс валало. Мукетсэ но тодазы возё: ас удыстэ гинэ тодыса улоно ӧвӧл, быдэс предприятие но медаз чуты шуыса сюлмаськоно. Соин ик кулэ ке, мукет цехысь эшъёсызлы юрттыны нокин пумит уг кариськы. Собере озьы но луэ. Аран-кутсан дыръя элеваторын ӟырдыт вакыт: тросэн вуись ю тысез мертано, эскероно, шертыса куасьтоно, кеносъёсы кисьтоно, но пызь изонэз, комбикорм лэсьтонэз но дугдытыны уг луы. Нош толалтэысен выль нянь вуытозь ю тысь бордын ужасьёс ӧжытгес кулэ. Кытчы мултэс луэмъёсты карод, доразы уд пукеты ук? Тодӥсь- валась ӧнерчиосыд озьы мукет интые ужаны кошкозы. Соин ик соосты мукет цехъёсы выжто. Адямиос таӵе вамышлы уг пумитъясько. Югдурез валаса, тросэз кык-куинь удысын ужаны дышетскемын. Соос уго ас ужзэс но, предприятизэс но ярато, дунъяло. Малпасько, татын адями понна сюлмаськемез шӧдыса но. Чылкак пайми но синмаськи котельное пыракум. Асьмеос но шуныт но пӧсь ву сётӥсь инты сярысь кылӥськом ке, син азямы соку ик ӵынам, ӵыкмем юрт пуксе. Нош элеваторлэн котельнояз, мон шуысал, эмъяськонниын кадь чылк-чылк, жагез гинэ ӧвӧл, тузон пытьыез но уд адӟы. Валамон, татын газэн эстӥсько, но ужан интызы сыӵе яратыса чеберъямын - чылкак абдралод. Вань гумыоссы турлы яркыт буёлъёсын ог-огзылэсь висъясько, борддоръёс вӧзын выж вылын олокыӵе но будосъёс мерттэмын, нош пичи ву пызъет котыртӥ пукись вуын кикур пасьта чорыгъёс уяло, ява. Ма, сиськонниязы, лабораториязы, эмъяськонниязы но чылк-чылк, олокыӵе но будосъёс синмез шулдырто. Вукоын пызь изӥсь воргоронъёсын вераськыкум но, пудо утись кенакъёслэсь юалляськыкум но, кенос кузёен - удмурт кышномуртэн - пумиськыкум но, син шоры соку ик йӧтӥз адямиослэн капчи мылкыдзы, ӵуказе нуналэ оскыса учкемзы. Трос мукет предприятиосын ужасьёсын кенешыку, соос улонзылы, ӧжыт уждунзылы ӝожтӥсько, нош татын нырысь ик вераськон ӝуто удыссэс паськытатон, пызьзэс, пудо сиёнзэс кытчы вузан пумысен. Сыӵе мылкыд но кылдӥз: "Можга элеваторын" ужасьёс туж эшлыко, тупаса но ог-огзэс валаса улӥсь гуртысь калык кадь. Тӥни таин но предприятие кужмо, юнлыко. Кызьы вераз Наиль Назмуллович, элеваторзы али быдэс Можга карез возён коньдэтэ одӥг процентсэ сётэ. Чаклалэ ай, татын ужась сю куатьтон пала гинэ адямиос. Нош со сяна, предприятие Можгалан пӧртэм ӵошатсконъёс ортчытъяны юрттэ, матысь школаосын, нылпи садъёсын но конкурсъёс, шулдыр ӝытъёс радъян понна коньдон висъялля, посёлоказы улӥсь пересьёсты но уг вунэты. "Можга элеваторлэн" ӟезьыез дортӥ ик уен-нуналэн дыбыртэ чугун сюрес. Карлэн пумаз сылӥсь кун предприятиез палэнэ кельтыса со уг кошкы, солэн одӥг ваез татчы но коже но сюлмо тыршись адямиослэн киосынызы поттэм ваньбурез матысь но кыдёкысь шаеръёсысь калыкъёслэсь улонзэс тыргес карон понна нуэ. 1 Олексан агай "Кылё тодэм калыкъёс" сузьетысь Дунне вылысь самой матысь адямие - анае кулэм бере нырысь ик бызьыса мынӥ черке: анаелэн лулыз понна вӧсяськыны ньыльдон нуналлы, быдэс арлы заказной сётӥ. Улэп дыръяз анайме черке келяса кельтӥсько, пумитаны мынӥсько - гуртысь лыктэм, ӟуч кылэз тодӥсьтэм пересь мурт бадӟым каре йыромиз ке, мар карод? Нош ачим черке уг вамыштӥськы, туж ке но пыреме потэ. Анае но шуэ: "Ойдо, пие, пыр, кыӵе отын шулдыр, пиосмуртъёс но вань". Но кышкан ворме: Троица черклы сю вамыш кемын сылэ ужано институтэ. Огшоры институт гинэ ӧвӧл - Удмурт Элькунысь Министръёслэн Кенешсылэн идеологияя шорсюлмыз со. 1986 арын - анаелэн кулон араз - Россей кунын коммунистъёс осконлы пумит, черклы пумит ужзэс ялан нуо на вал. Тодосчилэсь черке ветлэмзэ, пырамзэ тодӥзы ке, нокин но умой лэсьтӥськод шуыса йырдэ ӧй маяллясал. Кивалтӥсьёстэ, эшъёстэ, ӵыжы-выжыостэ кысканы кутскысалзы. Анайме ватэм бере, сюлмын сыӵе секытлык, сыӵе мӧзмон каръяськиз. Кышканме вунэтыса, ӝыт службае пыри. Вӧл-вӧл черк пушкын пачылаз калык сылэ. Куд-огез али гинэ пыре но вашкала обросъёс азе сюсьтыл пуктэ. Урамын пеймыт, кезьыт, нош татын шуныт, мугорез гинэ ӧвӧл, сюлэмез шунтӥсез но вань кадь, ӧс дорыгес султӥ но сылӥсько... Табере мыным потэ ини, быдэс дунне мон шоры учке кадь. Сыӵе кирос кареме, йыбырттэме потэ, но киез нокызьы но ӝутыны уг луы - оло, тонна секта корт эгес пельпум вылам понӥллям. Возьдаськон, курдан улэ нюрто, суез-пыдэз, мылкыдэз вылэ ӝутыны уг луы. Кыкетӥ ползэ лыктыкум, кышканме киям кутыны тыршыса, черклэн шор палаз кыстӥськи ни. Вӧзам сылӥсь удмурт кышноос (удмуртме уг тодмало-а, мар-а?) куспазы лушкемен чигисько: "Кыӵе муртлэн нылыз-пиез тазьы черке ветлэ меда, мынам одӥгзэ пиме но, нылме но косыса-косыса, либатыса но ваеме уг луы". Мукетыз кышномурт артэ вӧсяськыса сылӥсь эшезлы шуэ: "Мынам но озьы ик, номыр кареме уг луы, черк пала огзэс но берыктэме уг луы". Куинетӥзэ черк службае лыктыкум, самой азьпалаз сылӥсь сюсьтыл пуктон доры вуи. Инмар Анайлэсь оброссэ кирос карыса чупай но, сюсьтыл пуктыса сылыкум, кин ке пельпум бордам йӧтӥськиз, бадӟым куараен шуиз: "Ӟуч-а, удмурт-а тон?" - "Удмурт",- шуисько. Со виын быдэс дунне зурказ но, черкысь вань калык ми шоры учкиз кадь потӥз мыным. Зэм но, укыр бадӟым куараен вазиськиз чиед гинэ, мынэсьтым ӧжытак лапеггес ог куатьтон аресъем воргорон. "Удмурт ке, ойдо ми пӧлы", - Святой Екатериналы сӥзем придел дорын сылӥсь мӧйы воргоронъёс пала со валтӥз монэ. Служба кутскемын ӧй вал на, соин ик та адями монэ ӵош вӧсяськон эшъёсыныз тодматыны вуиз. "Таиз Леонтий Гаврилович, таиз Александр Иванович, таосыз агай- вынъёс - Павел но Сергей Яковлевичъёс..." Ог дасо-дас витё пиосмуртъёс люкасько вал со виын черк вӧсяськонъёсы, нош кышномуртъёс храмын пачылаз - кирос карыны киез но ӝутыны уг луы, ява. Пӧлазы кык пересь удмурт воргоронъёс сыло - одӥгез Алнаш ёросысь Варӟи-Ӟатча вӧзысь Шадрасак-Кибья гуртысь, мукетыз - Якшур-Бодья ёросысь Варавай котырысь. Монэ валтыса ваись муртэ ачиз сярысь шуиз, мон, пе, Александр Петрович, удмуртъёс монэ Олексан гинэ шуо. Мон но удмурт бере, та дырысен солы "Олексан агай" шуыса вазиськылӥ. Чебер но, капчи но ук "Олексан агай" шуыны. Пересьёс пӧлын мон самой егитэз вал. Соос ваньзы куатьтонлэсь ортчемын ни, пенсиын, нош мыным алигес гинэ ньыльдон одӥг арес тырмиз. Туж шумпотыса соос монэ пумитазы - егит мурт лыктэм бере, черк улоз на! Бордысьтызы кыӵе ке но каньыллык, яратон-гажан, дэлет лыктэ - Инмарлэн зэмос оскись муртъёсыз уго соос. Вань сюлмыным мон та выль тодмоосме яратӥ, возьмаса гинэ улыны кутски: ку кӧснуналэн арнянунал вуозы но, черкысь службаын нош ик та яратоно эшъёсыным пумисько. Соос монэ сюсьтыл пуктылон вӧзы, азязы султытӥзы. Ӝуаса бырем сюсьтылъёс интые выльёссэ пуктылӥ. Шумпотон уж сётӥзы. Кызьы мон валай, Олексан агай таослэн кивалтӥсьсы кадь: кыллы шаплы, вӧсяськонэз тодэ, арлыдын но куатьтон котырын гинэ, тодымтэ муртэз ик ӧвӧл кадь. Леонтий Гавриловичен, туж зӥбыт-востэм, лачмыт ӟуч воргоронэн ӵош, Олексан агай черк кенеше пыре, соку сое "двадцатка" шуо вал. Нош йырзы - староста Николай Данилович. Войнаысь ӧлексы луыса бертэм офицер, таза сӥльвиро, кырӟаны шулдыр куараё мурт. Улэп кылемезлы тау карыса, пӧсь ожысь вуэм воргорон бертыкуз ик черке пыриз. Сюсьтыл пуктӥз но, бӧрысь ини, черк кенер сьӧры потатэк, черк юртын ик улӥз. Та выль улон потытозь, вань черк ужен со кивалтӥз, ктитор - староста луиз. Калык гажа вал сое, вань ужез быгатыса нуиз уго. Со вакытэ, паймоно кадь, быдэс черкен ктитор кивалтӥз. Соос пӧлын котькыӵеез но вал, "кыгыбы" шуон тыршиз аслыз ярамон адямиосты черке кивалтӥсе чуртнаны. Старостаослэсь юатэк-вератэк, священникъёслы нокыӵе ужез но лэсьтыны лэземын ӧй вал. Ктиторен огъя кыл уг ке шедьто, священникез ӝог гинэ пыдлось гуртъёсы келяло я служить карыны уг ни лэзё. Выль закон потытозь, черкын ужась-тыршисьёслэн улонзы капчи ӧй вал, соосты котыр ласянь сантэманы, ултӥяны тыршизы. Но оскон улӥз, калык черке ветлэмысь ӧз дугды. Эшшо мон ветлыны кутскыку, осконэн кыӵе кужмоесь адямиос вал! Коммунист зӥбетлэсь кышкатэк черке ветлӥзы, кыдёкысь монастырьёсы вуылӥзы. Вӧсяськон книгаос ӧй вал бере, ас киынызы гожъязы. Ог-огзы доры ветлыса вӧсяськизы. Университетын дышетскыкум таӵе адямиосын нырысьсэ пумиськи: ӵужапае доры лыктыса, синкылиен верасько вал Инмар закон сярысь, молитваос чирдо, сьӧлыкъёссы пумысен чигиськыса верасько. Святойёслэн улэмзы, вӧсяськемзы, оскон понна курадӟон чидамзы сярысь веранъёсты мон но ымме усьтыса кылзӥськылӥ. Ӵужапае шуэ вал: "Миша, священнике дышетскыны мын". Мон шуисько: "Ой, ӵужапай, бер ни, азьлогес вера вал, мон табере университетын дышетскисько ук". Черке кошкытозям но диаконлэсь санзэ басьтытозям, эшшо кызь ар ортчиз на. Олексан агай Пичи Пурга ёросысь Яган-Докъя гуртын вордскемын, но пичи дырыз, пинал дырыз бускель Чутожмон-Пурга гуртын ортчемын. Туж секытэсь вал быдэ вуон аръёсыз. "Аляк улон дыръёсыз но вал", - тодаз вайыса шуэ укмыстон сизьым аресъем Марпа апай. Анайтэк, атайтэк кыльыса, ачиз курадӟыса-курадӟыса пыд йылаз султыны дауртӥз. Ӵыжы-выжыосыз аслэсьтыз арескын бадӟымгес кышно ваизы. Война бере городэ улыны интыяськизы. Олексан агай андан пӧзьтон заводын ужаз. Пӧсь цехын ужаса, со пенсие вазь потӥз но вань улонзэ черкен герӟаз. Одӥг праздникез но, кӧснуналэз, арнянуналэз кельтытэк черкын вал. Табере Библиен мургес тодматскыны дыр но тырмыт луиз. Уйёсы кухняяз пытсаське но Священной Гожтэмысь чуръёсты лычсузьыса лыдӟе. Ӝыт правилоез чирдытэк, Евангелиысь, Апостолъёслэсь ыстэм гожтэмъёсысьтызы кӧня ке люкетсэ, Псалтирьысь одӥгзэ ке но кафизмаез чирдытэк изьыны уг выдӥськы, шуэ вал со. Кызь ньылетӥ, витьтонэтӥ, укмыстонэтӥ псаломъёсты черк-славян кылын но, удмурт кылын но учкытэк вераны дышиз. Йырсазезлы но паймисько: Вуж Сӥзёнысь иворъёсыз туж усто мадьылӥз, пересьёс ымзэс усьтыса ик сое кылзӥзы, уката - гуртъёсысь лыктэм, ӟуч кылэз но, Евангелиез но ляб тодӥсь мӧйы удмурт кышноос. Таӵе адямиосын Олексан агай туж шумпотыса вераськылӥз. Тодонзэ ватыса ӧз улы. Одӥг Леонтий Гаврилович гинэ Олексан агайлэсь тросгес тодэ вал ке тодэ вал, дыр. Но со, удмурт эшез кадь, тодытыса ӧз ветлы. Ӟучъёс черк-славян кылэз удмуртъёслэсь ӟеч тодо уго. Асьсэлэн кылзы. Паймымон, Олексан агай быдэс Библиез укмыс пол лыдӟыса пыр потэм. Черке алигес гинэ ветлыны кутскем мурт, мон но паймыса кылзӥсько та кык мӧйы муртъёслэсь Библиын гожтэм ужъюгдуръёс сярысь вераськемзэс. Учкытэк веранын Олексан агай ӟуч агайзэ ортче вал кадь. Али но пель сьӧрам кылӥське удмурт гуртысь кенакъёслы укмыстонэтӥ псаломысь чирдэм чуръёсыз: "...Аслыд ватӥськон интылы Вылысь Инмарез тон бырйид. Тон борды урод уз йӧтӥськы, чер но юртэдлэн матаз уз лыкты. Котькыӵе сюресъёстӥ ветлон дыръяд Аслаз кылчинъёсызлы Со тонэ утьыны косоз уго. Пыдыныд но из борды медад канжаськы шуыса тонэ киязы ӝутыса нуозы. Шиетӥсь кый вылэ, лек кый вылэ лёгиськод, сьӧсь пӧйшурез, лобась кыез пыдыныд лёгалод". "Монэ яратэм понназ сое мозмыто, утё сое, - со Мынэсьтым нимме тодэ уго. Мыным вазиськиз ке, сое кыло, куректон-кайгуэз дыръя - Мон со дорын. Сое мозмыто, данэ потто. Кема улонэн тыр каро, Аслэсьтым утёнме солы возьмато". Котькинэн но вераськыны вуэ, ваньмызлы ӟечлык, дэлет сӥзе. Куд-ог индылонъёсыз кинлы но солы, уката ик доръёсызлы, сокем уг кельшо вал, дыр. Кытӥяз Олексан агай шуэ вал: "Ымылэн кортнэтэз ӧвӧл, ӧжытаклы ке но вуроно вал сое". Вӧсяськись эшъёсмы пӧлысь нырысь ик кулӥз удмурт эшмы - Стефан. Тямыстонлэсь ортчемын вал ини. Олексан агай шумпотыса кадь шуиз: "О-о, Стефан братмы дораз бертӥз!" Туж яратылӥз ваньмызлы тодаз вайытыны: асьмелэн бырисьтэм-вужмисьтэм дормы Инмын, нош музъем вылын улонмы - сьӧлыкан, но со понна вань шугадӟонъёсты, висёнъёсты, кӧтӝожъёсты, курадӟонъёсты чидан интымы. Кураськисьёс, пыдйылчиос, пе, асьмеос та дуннеын. Ялан мар ке но утчаськомы, возьмаськомы, но номырин кӧтмы уг тыры. Байлык-узырлык кулэ, нош лулмы потэ но - мугормылы сажем сюй тырме. "Музъем вылын пыдйылчи мон, курон-косонъёстэ мынэсьтым эн ваты... Сюлэмме узырлык люкан пала ӧвӧл, курон-косонъёсыд пала берыкты. Синъёсме палэнты - алекъяськонэз медам адӟы, Тынад сюрес вылтӥд ветлыны улон сёт мыным... Ӟеч, ӟеч карись Тон, Кузё-Инмаре, Аслад законъёсыдлы монэ дышеты... Тынад ымысьтыд потэм закон Мон понна трос сюрс зарнилэсь но, азвесьлэсь но умойгес луэ". Псалтирь книгазэ усьтыса лыдӟылӥз, нодъялляз Олексан агай черке выль лыктэмъёсты, кулэм ӵыжы-выжыоссы понна чигиськыса, бӧрдыса улӥсьёсты. Диакон луэм берам черке ваньмызлэсь вазь вуылыны тырши. Соку ик адӟисько вал: черке вань вӧсяськисьёслэсь азьло Олексан агай вуэ. Обросъёсты чупа, вӧсяське но служба кутскемлэсь азьло одно ик тырше ни кыӵе ке но юанэн мыным вазиськыны - дыры ке но ӧвӧл, ог вить минутъёс вераськиськом ни. Самой бадӟым шумпотонэз луиз, куке мон асьме кылэ берыктыны кутски Библиез, вӧсяськон книгаосты. Маин дуно мыным, маин сюлмам, тодэ ваёнъёсам улэ Олексан агай? Инмарез, Библиез яратэм сяна, со ас дыраз удмурт кылэ берыктэм вӧсь книгаосты калыкез гажаны дышетӥз, берыктон уж бордын тыршыны мылкыдме ӝутыса возиз. Тау карисьёс трос, но Олексан агай кадь мылкыдзэ вераны шер мурт быгатэ. "Вот, - шуэ, - ӟуч кылэз но ӟеч валасько, лыдӟисько вӧсяськон книгаосты, нош вордӥськем кылыным лыдӟисько ке, мукет дунне усьтӥське кадь. Одӥг кылыз но валатэк уг кыльы. Йыртӥм пырыса, тани татчы - сюлмам вуэ но отысь уг ни поты. Быдэссэ Библиез берыкты, берыкты, отец Михаил". Псалтирь книга потэм бере, Иерусалиме вуылэме бере "Ньыль зарезь пыр - Иерусалиме" векчи гинэ книгае потэм бере кӧня-кӧня шумпотӥз, тау кариз Олексан агай. Уйшор уин но, ӵукна черке мынон азям но, пе, Псалтирь книгаез лыдӟисько. Сыӵе со усто агитатор, вераськыны быгатӥсь адями вал. Сокем со мур яратӥз ас калыксэ. Али дыре сыӵе адямиосты, уката ик пиосмуртъёс пӧлысь, шуг ни шедьтыны. Курдаса, кепыраса уг улы, шумпотонзэ но, куректонзэ но калыклы усьтэ но тӥни. Епископен но вераськыны кепыраса уг улы. Укмыстонэтӥ аръёслэн пумазы Олексан агай, кызьы ачиз яратэ вал вераны, - "дораз бертӥз". Рак висён малпамтэ шорысь таӵе шаплылэсь но шаплы воргоронэз пыд йылысьтыз погыртӥз. * * * Эх, Олексан агай, тод вал, тон кулэм бере кызьы, кыӵе амалэн сьӧд тушмон урдӥськиз удмурт кылэ вӧсяськон книгаосты, Библиез берыктон уж вылэ! Ӟучомем удмурт пи, Антоний иеромонах, кинлэн косэмезъя, индылэмезъя меда кутскиз удмурт кылэ берыктонлы, удмурт кылын вӧсяськонлы пумит уж нуыны? Со али но туж бадӟымесь, лекесь гожтэтъёс гожъяса ыстылэ черкъёсы, монастырьёсы, Патриархие. Черкъёстӥ ветлыса, калыклэсь мылкыдзэ сӧре, мыдлань валан сётэ, калыкез булгандыре. Книгаосты но сутылыны вуиз ини. Куд-ог священникъёсты но ас палаз карыны быгатӥз. Гомаса ӝуась Евангелилэн тылсиосыз ӵушкало сюлмылэсь вӧсь луись интыоссэ. Солэн дышетэмезъя, вань адямиос лыдӟыны, вӧсяськыны кулэ черк-славян кылын, со гинэ, пе, адямиез Инме ӝутэ, нош пичи калыкъёслэн "варварской кылзы" адямиез адэ, пе, нуэ. Монэ куаретыса но, кышкатыса но берыктон ужлэсь куштӥськыны косыса выриз ини. Паймымон, худграфез йылпумъям, вылӥ образование басьтэм адямилэн, Инмарлэн престол азяз сылӥсьлэн Инмарлэн курон-косонъёсызлы тупасьтэм таӵе дышетонэз. Кытысь потэмын та йыромон дышетон? Ачиз Кузё-Инмармы Иисус Христос инме ӝутскон азяз дышетскисьёссэ - апостолъёсты вань калыкъёс доры мыныны но Евангелиез тодытыны косӥз. Язычникъёслэн югдытӥсьсы быдӟым Павел апостол Коринф карын улӥсьёслы ыстэм гожтэтаз таӵе нодъян сётӥз: "Агай-вынъёсы, Инмарлэсь кылзэ ивортон сярысь сюлмаське; пӧртэм кылъёсын вераськыны но эн люкетэ" (1 Кор. 14:39). Библиын нокытын но верамын ӧвӧл ук, утиськон кыл пыр лыктэ шуыса. Гожтэмын: утиськонэз оскон пыр, ӟеч ужъёс лэсьтыса басьто. Сьӧраз потэм "дышетӥсез" визьманы нокин но уг басьтӥськы. Эй, Олексан агай, Библиез тон кадь тодӥсь, удмурт калыкез, кылэз гажась, азинтон понна сюлмаськись, кышкасьтэм дасо удмурт воргоронъёс луысалзы ке, йыромем дышетӥсьёслы инты ӟоскыт кыльысал. Но жаль, сыӵе адямиос асьме пӧлын ӧвӧл ни, лэся. Ваньмыз понна тау Тыныд, Инмаре. Оло, та кӧтӝожъёс, синву пыр кӧня ке но сьӧлыкъёсы куштӥськозы... Сюлмез вырӟытӥсь псаломъёс гожъясь Давид эксэй шуэмзэ, "Кузё-Инмаре! Макем йылӥзы тушмонъёсы! Тросэз мыным пумит султо, тросэз лулылы шуо: "Инмар бордын солы утиськон ӧвӧл". Нош тон, Кузё-Инмаре, азьысьтым щитэ, мынам данэ, Тон мынэсьтым йырме ӝутӥськод. Куараме поттыса Кузё-Инмарлы вазиськисько но, Аслаз святой гурезьысеныз Со монэ кылэ. Выдӥсько мон, изисько но султӥсько, Кузё-Инмаре монэ утьыса возе уго. Сюрс-сюрсэн котыр ласянь мыным пумит султэм калыклэсь мон уг кышка. Кузё-Инмаре, султы". Тани кылем арын, православной монахен огкылысь луыса, протестант группаысь сектантъёс удмурт калыкез, "Инмар" кылэз сантэмась рукописен книга нерге поттыса калык пӧлы вӧлмытӥзы. Кӧня отын ӧрекчаськонэз, кӧня дэри кисьтэмын курадӟон чиданы кылем мискинь калыкмы вылэ. Соосты-а Инмарлэн адямиосыз, христиан калык шуод? Удмурт кылэ Библиез берыктэм поннам языческой вӧсез удмурт калык пӧлын утён понна нюръяськисьёслэн сьӧд вирзы кисьтӥське. Шуо, удмурт Инмарлы, пе, вӧсяськыны кулэ, тон ке нош удмурт калыклы еврей Инмарез тодытӥськод. Укмыстонэтӥ аръёслэн кутсконазы, тон музъем вылын улон дыръя, улон мукетгес на вал. Али кызьы ке но тушмон кужмогес но кужмогес луэ, урод ужъёс туж ӝог аляло. Тон улэп дыръя асьме дорын наркомания но, СПИД но ӧй на вал. Удмурт калык понна кылылымтэ висёнъёс. Оскон син азьын сӥяны кутске. Вӧсяськон юртэ - черке мынэм интые, калык телевизор азе, видикъёс доры кыстӥське; табере Интернет потӥз на. Калыклэсь визьзэ чылкак суразы ни ИНН сётъянэн. Иеромонах Антоний татын но азьпал радын мынэ: туэ тулыс пал калыкез Правительстволэн юртэз азе демонстрацие поттазы. Революция потон азьын поп Гапон но калыкез демонстрациосы, пуля улэ ӝутказ вал. Олексан агай, кытын тон али? Инмысь Атаймылэн Эксэйлыкезлэн капка дораз вуид ке, удмурт калыкед понна вӧсяськы. Монэ но эн вунэты вал. Ӟигары-кынары вань на дыръя, ӵукналы быдэ мон тонэ буре вайыны тыршисько: "Христос Инмармы, кулэм муртэдлэсь Александрлэсь лулзэ дун-сьӧлыктэмъёсын огазе интыя, кытын ӧвӧл висён но, куректон-кайгу но, лулӟылӥськон-викышъян но, нош вань пумтэм вапумъёс ӵоже каньыллыко улон". "Кенешын" - выль ним Светлана Петрова Нырысетӥ кылбуре 5-тӥ классын дышетскыкум потӥз. Удмурт литературая урокын кылбур гожтыны гуртэ уж сётӥзы вал. Парта сьӧрын ӵош пукись эше пионер сярысь ньыль чур гожтэм (ачим ма сярысь гожтӥ вал, уг тодӥськы ни), мыным кылбурез яраз, со вӧзы эшшо тямыс чур будэтӥ на но газет ыстӥ. Со огшоры шудон вал. Нош 8-тӥ классын "Ӟечбур!" газетэ кылбур сузьетъёсы потылыны ӧдъязы. Кылбуръёс борды рос-прос басьтӥськи, Сосновка школаез (Шаркан ёрос) быдтэме бере Удмурт кун университетысь журналистикая факультетэ пырыса. Ма со кылбур, кызьы со кылдэ, ку? Котькудӥз та юанъёслы ас сяменыз валэктоз, дыр. Нош мон шуысал: кылбур кылдэ соку, куке маке но веранэд вань. Кылбуръёс - со малпанъёс, осконъёс, дуннеез валаны тыршон, сюрес вылын утчанъёс. Та улонын мон утчасько асме... Х Х Х Шудтэм луонэ - Муртъёслы монэ Серем карон гинэ. Сое мон ватӥсько Пыдло-пыдло, Но адӟисько Мурт синъёсысь. Х Х Х Шокчи мон омырез, но сюлэмы шурдэ: Та улонын мон утчасько асме Нунал но уй, гужем но толалтэ... Шедьто меда шудме? Х Х Х Гожъёс, гожъёс, сьӧд вужеръёс... Мед соослэсь Инмар утёз. Мон вордӥськи шудлы гинэ. Чебер но пайдаё улэм потэ. Х Х Х Джульетта кадь? - Юад но тон могӟид - яратыны? Со яратон сярысь уг лу вераськыны - Мылкыд кылъёс сьӧры потэ. Озьы яратыны Шудоослы гинэ кылдэ. Нош огшоры улӥсьёслы Со выжыкыл выллем луэ. Х Х Х Сурон бамдэ наждакен сузяй, Кырымпыдсысьтыд гонзэ ишкай, Вир сюпсись пиньёстэ тӥяй. Но шӧтэм лулдэ воштыны ӧй вормы на. Х Х Х Укноосам кезьыт чебер йӧ суредъёс лэсьтэм. Шокаменым мон соосты шунтӥсько но Улонэз адӟисько... Озьы дышетӥзы монэ дунне шоры учкыны. Х Х Х Инбам бӧрдэ тонэн артэ Жальыр но кот. Жаля тонэ? Оло, ачид ик бӧрӟытӥд сое? Толон яратоно нылдэ тон обидид - Мукет "гажанэныд" кошкид. Оло, озьы солэсь лушкем малпанъёссэ тон зэматӥд - Солы эрик но шумпотон сётӥд?.. Сое валад, йырдэ ошид. Х Х Х Тӧллэн кесэгеныз Уй инбамез ӵужисько. Азвесь пыры кизилиосын Йырсиосме чеберъясько - Тон лыктон азьын. Мусо кылъёс но мылкыдъёс Ӵушконъёсам пужъятӥсько. Тӧри валъёсы вылэ Чингылиос ошылӥсько - Сюан азьын. Толэзьлэн югытэныз Кык зарни зундэс лэсьтӥсько, Шундылэн шунытэныз Соосты ӟырдатӥсько - Яратон азьын. Х Х Х Улонмы урод луэ?! Но со улон ик милемлы юрттэ: Висёнмылэсь эмъя - Шудо улыны дась луымтэмес ватэ. Но весь азьлань, азьлань мон мынӥсько. Малы, уг валаськы, Куд-ог дыръя дугдылӥсько. Со дугдонэ выйтэ мургес курадӟонэ. Малы мон улонме Курадӟонъёс пыр басьтӥсько?- Озьы дышетэмын. Но мон та дуннеын Огпол гинэ ук улӥсько. Шудо улэм потэ! Шудо луон понна ук вордӥськи! Х Х Х Сюрс пол ини мон юасько: Малы мыным синмаськиськод? Та юанэ гинэ азьло бордад кыске вал. Али быдэс ини кыстӥськисько. Ӧд, йырме ӧд поромыты тон. Сазь визьмын мон паймисько - кызьы дӥсьтӥ? Уг, асме уг пыкылӥськы мон - Шумпотонэз, шудэз, яратонэз ас улонам пыртӥ. Х Х Х Юнме кутӥ тӧдьы сяська киям - Уз вера со, луом-а ӵош. Тон ас поннад, мон ас поннам - Пӧртэм дуннеосысь кык кужмоос. Ӧй тодысал ке мон тонэ, Ӧй луысал куректонэ. Но ултозям мон утчасал Тон выллемзэ. Х Х Х Малпанъёсын асме котыртӥсько, Дунне шоры малпанъёсы пыр учкисько, Котыръёсме но сыӵеен ик адӟисько. Малпанъёсы выллем ачим но луисько, Малпанъёслэсь дӥськут мон нуллӥсько, Мон соослэсь корка но пуктӥсько. Малпанъёсы думо... Куке но соосыз, оло, вормо. Х Х Х Тон улӥськод - "кызьы кулэ". Мон улӥсько - "кызьы мынам потэ". Уг жаляськы, маи мынам ӧвӧл, Уг жаляськы, маи уз луы неноку. Уг куректӥськы ортчемез сярысь, Уг тунаськиськы, мар вите монэ. Мон улӥсько соин, мар котыртэ монэ. Уг куриськы тонэ маке но лэсьтыны... Но шӧдӥсько, Тынад но мон кадьгес ик луэмед потэ. Алексей Ельцов Чипейёс Чорыгасьлэн мадемез Котькуд сӥзьыл Чупчи дуръёсысь тыос вылын пеймыт уйёсы мыдлань-азьлань ветлӥсь тылъёс адӟиськыло. Озьы ми палан чорыгасьёс чипейёсты шиё бодыосын кутыло. Вашкала дыръя вуэз чаг тылэн югдытъяло вылэм. Нош туала амалоос ӵемгес батарейкаосын яке аккумуляторъёсын лампаосты сьӧразы басьто ни. Огпол мон но чипейёсты кутылыны малпай. Гаражамы ужась электриклэн визьнодамезъя, ужан машинаысьтым аккумуляторме пыже интыяй но одӥгаз уе ву вылэ потӥ. Кема утчаськи. Дышымтэ вылысь нокызьы но чорыгъёсты уг синйылтӥськы. Жадьытозь полысай - эмыз ӧвӧл. Малпасько, куакъёс дортӥ котырско на но ярдуре пото ни. Бадьёс доры матэктӥ гинэ - вуысь кор выллем мае ке адӟи. Вӧзтӥз калленак ортчыса, выльысь дораз гылӟи. Таяз учыре синъёсы ӧз пӧялэ ни. "Чипей!" - чилектӥз йырам. Сюлэмы луп-луп! жугиськыны кутскиз. Нош чипей нырулэ кадь, уг вырӟылы. Мон каллен гинэ со вадьсы матэктӥ но шиё бодыме чорыглэн чырты сьӧраз бышкалтон вылысь лэзи. Кызьы вуэ усемме ӧй ик вала. Ярам коть, мур вылымтэ. Бекмыльскем пыжме пыдэс вылаз пуктӥ но ярдуре потӥ. Чорыганэн йырин ӧй вал ни. Коньывуон толэзе уйёс кезьытэсь ни. Ӵем дыръя я пужмертэ, я лымы усе. Та уе но турын-куаръёс пужмерен гӧртэмын вал. Тылскыса-мар ӧй ни улы, гурезь бамалэ пуктэм машинаме вырӟытӥ но ӟонгырамелэсь азьло доре ширтӥ. Пӧсь чаен шунтӥськеме бере гинэ кыӵе юмоке сюремме валай. Шиё бодые ки бордам векчи гозыен думемын вал. Чорыг борды мертчиськыса, со шуак ӧз мозмытскы, луоз. Нош кужмо чипей быдэс пыжен валче монэ вуэ кыскем бере бодые чорыг сьӧры кошкем. Ярам, шибоды жаль ӧвӧл. Нош аккумулятортэк уд ужа ук. Ӵуказе ӵапак каре вырӟоно. Вазь ӵукна ик гараже мынӥ но мотор котырын бергасько. Ачим синпумтӥм механиклэсь вуэмзэ чакласько. Ӧжыт гинэ юмоке ӧй шедьы. Кытӥ-мар пырем: - Дасяськиськод-а? Молодец! Со понна ик мон тонэ гажасько... Соку мон вылэ кезьыт ву кисьтысал ке, бультыр-бультыр ик пӧзьысал яке мунчо из бордын кадь ӵажак карысал, дыр. Сокем пӧсектӥ. - М-марым, дасяськисько... моторез уг кыскы, мултэс ӵындэ. Поршень кульчоос пӧсьтэмын ни, шӧдске... - Кылем тулыс гинэ капиталкаысь ваим вал кадь ук, - паймыса шуиз механикмы. - Макмыр йырын тупатъяллязы ке, коть нуналлы быдэ Глазысь заводэ нуллы, - машина азбарлэн кузёезлы валэктыны кыл утчасько. - Мотордэ ӝыттэк чередьыса уд вуы, дыр, мукетсэ кинэ ке каре ыстытэк уз луы. Инмарлы тау. Тӧлпери палэнэтӥм ортчиз, лэся. Ӝытозь гаражын улыны ӧй ни чида. Механик конторае кошкиз гинэ, мотое пукси но аккумуляторме утчаны лобатӥ. Мыдлань-азьлань кема ик ӧй уя, бекмыльскеме паласьгес ик куакъёс дорысь шибодылэсь ныдзэ синйылтӥ. Матазгес полысасько, бодые майыг кадь ӵогъялскыса сылэ. Кыскисько, кыскисько ини но, ӝутэме уг луы. Мырдэм-мырдэм чорыгме поттӥ. Инмаре! Шораз учкыса кӧшкемалод, ява. Вожектэм пуклёк кадь, крокодиллы кельше. Кӧтыз тордэмын. Вуттӥ сое доре. Корка пыри гинэ, чипее ымзэ ӟубис кариз но... отын - вукомак. Басьтӥ, ведрае куштӥ. Кырылыны кутски но кӧтысьтыз эшшо комак шедьтӥ на. Дас сизьым килограмм кыскиз чипее. Пересьёслэн верамзыя, ог ӝыны даурлэсь кемаласьгес шур мукет ӧртӥ бызе вал. Оло, Чупчи выль ӧретӥ быземлэсь азьло ик со татчы сюремын. Сузяй чипейме. Юдэсэн-юдэсэн векчи корало но парсьёслы коть сюдыны яралоз, малпасько. Ӵап гуртомы пыре. Озьы но озьы шуэ, мон чорыген бертэмдэ адӟи, нош мынам куноосы вуизы. Пудоез ум вандӥське на бере, маин кунояны ёрми. - Чорыг ӝӧк вылын, басьты, - шуисько. - Жаль ӧвӧл. Только... Бускеле верамме пумозяз ӧз кылзы - чорыген ӧсэтӥ потэ ни. Ойдо, пӧй, ӵок. Комакъёс сярысь верад ке, чорыге жаль потэмен, озьы зуле кожалоз. Нош ачим чипей пушкысь комакъёсты син шорам пуктӥсько но соку ик вукекъяськыны ӧдъясько. Тӥни сыӵе вал нырысь кутэм чипее. Мукетыз учыр толалтэ вал. Одӥг люкмесысь векчи чорыгез поттаса акыльтӥз но мукет азе выжыны малпай. Визнанме интыяз ик кельтӥ, ачим выль люкмесъёс портӥ. Азьвыл пукем интыям вуисько но, визнанэ интыяз ӧвӧл ни. Йылыз вуэ месӥськем, кутонэз гинэ адӟиське на. "Бадӟымез кырмиськем ук та!" - лӧптӥ мон. Куазь кезьытэн люкмес пасе бырдамын ӧй ке луысал, визнанэ кошкысал ни. Кырми ныдтӥз, зурк кыски - уг сётскы. "Эн дырты, сидэ чигтод", - буйгатӥсько асме ачим. Каллен-каллен кыски но шӧдӥсько: чорыге выллань ӝутскыны ӧдъяз. Кема-а, ӧжыт-а дыр ортчиз, быдэс тымет вылысь чорыгасьёс котырам люкаськизы ни. Кин курико боды вае, кин портонзэ ӵектэ. Ваньмыз ик юрттӥськыны выро. Со куспын чорыгелэн йырыз люкмес пасетӥ потыны кутскиз. Чипей вылэм. Куриканы курикай, нош поттыны уг луы. Кыкетӥ люкмес портоно луиз. Поттӥ - вань калык паймиз. Ӵапак ачим кузьда. Нош мон туж ик лапег ӧвӧл. Чипейме тыбырам оши но бакча бертӥ доре бертӥсько ни. Мунчомы пала вуыса гинэ йырам малпан чилектӥз: "Собыдӟа чорыг кутыса, гурт калыклэсь пегам сямен бертӥсько ук". Сюресме чутрак воштӥ но пролкаетӥ контора ульчае потӥ. Вузкаронтӥ дорын лачак калык нянь ваемез возьмаса сылэ вал. Дугдытъяса-дугдытъяса учкизы чипейме. Контораын ужась кенакъёс, эсьма, форточкае йырзэс донгыса, монэ синъёсынызы келязы. Мылкыд бурдъяськемын. Азбаре пырыкум, семьяе чипей кутэме сярысь тодэ вылэм ни. Оло бакча укноетӥ адӟиллям, оло коӵо быж йылаз вуттэм. Метр но сизьымдон сантиметр кузьда чорыг визнанам кутскем, ява. Со учыр сярысь ёрос газетэ но гожъязы. Чипееным партретме ик шуккизы. Со дырысен монэ быдэс ёросын тодӥзы. Дан будӥз. Одӥгез гинэ умойтэм луиз, контораын пукисьёслы ӧвӧл кельшем нуназе чорыгаса ветлэме. Урод ужаськод, пе. Уин тон ке, пе, кочегаркаын эстӥськод, шобрет улын но пыдъёс кынмо. Мон пумитазы: "Трос йӧлвыл сииськоды, луоз", - шуисько. Таосыд пурӟизы: "Татын тыныд вал гид ӧвӧл, парткенешын пукиськод..." Кутӥзы но партиысь лобӟытӥзы, ява. Али бен со учыр тодам лыктэ ке, тумошо потэ. Нош соку серекъянэн йырин ӧй вал... Анна Евсеева "Яратонэ тон, вожанэ..." Очерк бӧрсьы кылдэм чуръёс Кылем арын "Кенеш" журнал 10-тӥ номераз Егор Загребинлэсь таӵе нимо очерксэ печатлаз. Сое мон бам вылтӥм синвуэ шапыр-шапыр вияса но, кытӥяз викышъяса, куараен бӧрдыса но лыдӟи. Кык мугез озьы лыдӟемелэн. Нырысетӥ мугез: очерксэ автор верано адямиоссэ ӟеч тодыса, валаса но туж быгатыса гожтэм. Кыкетӥ мугез: очерк пичи дырысеным тодэм но яратэм адямиосыным выльысь пумиськыны луонлык сётӥз. Со адямиос пӧлысь огез - Анна Григорьевна Колесникова, кыкетӥез - Анна Владимировна Чубукова. Кыксы ик - Удмурт театрысь асьсэ вакытэ туж бадӟым быгатонлыко артистъёс. Очеркез лыдӟыны кутскыкум, син азям улэп-улэп суредаськыса пуксиз пичи дырысьтым адӟеме: театр А. Н. Островскийлэн "Гроза" драмаезъя Ува посёлокын спектакль возьматэ. Залын чал-чал. Учкисьёслэн синъёссы сцена вылэ чӧлтылэмын. Ваньмыз возьмало: ма луоз, ма луоз? Спектакль тани-тани йылпумъяськоз ни. Сцена вылэ дыртытэк но номыре вазьылытэк пото кужмоесь, йыгмытэсь воргоронъёс - чорыгасьёс. Ӝужыт но меӵ ярдуре соос спектакльлэсь валтӥсь героинязэ вутто - вуэ куштӥськыса ассэ быдтэм Катеринаез. Катериналэн шокасьтэм гадь вылаз гудыри ӵашйыса сямен погра ачиз кадь ик егит картэз - Тихон (солэсь рользэ соку шудӥз К. Ложкин). Залын викышъям, бӧрдэм куараос кылӥськизы. Мон, куать аресъем маке, ӧй чида: залысь пукон интыысьтым султӥ но тэтчыса кадь бызи кулисаос сьӧры. Ярдурын кыллись кулэм мугор доры адямиос - артистъёс лыкто но лыкто. Мон но сцена вылэ потӥ, кулэм мугор доры матэктӥ но долкам выллем сылӥсько. "Нюра апие, - шыпыртӥсько, - мусое, чебере, яратонэ, уд шокаськы ни ук, кулӥд ук тон. Малы меда? Уд но учкиськы, уд но вазьылӥськы ни..." Озьы шудӥз Нюра апае - Анна Колесникова. Мон зэмзэ ик оски, зэмзэ ик кулӥз кожай. Труппаен ӵош лыктэм Анна апаелэн матысь ӵыжы-выжыез - Анатолий Поликарпович Колесников та учыр сярысь дневниказ тазьы гожтэм. Сцена вылэ потамме но вератэк кельтымтэ. "Витьымтэ шорысь... - шуэ со, - сцена вылэ, йырзэ ошыса, каллен гинэ пичи ныл потэ. Артистъёс абдрамын. Ма шуыны ик уг тодо. Нош залын озьы ик луыны кулэ шуыса малпазы, дыр. Та учыр артистъёс понна вунонтэм луиз". Анатолий Поликарпович монэ нимыным верамтэ. Но со "пичи ныл" зэмзэ ик мон вал. Со учырез али но ай син азям пуктӥсько. А. П. Колесниковлэсь та чуръёссэ "Кенеш" журналлэн кылем аре потэм номераз Б. Е. Саушкин печатлаз. Ачим та учырез тодам ваи вал "Память сердца" книгаям. "Удмуртия" издательство сое 1990 арын поттӥз. Та пумысь театрысь артистъёс но пумиськеммылы быдэ тодам уськытыса серекъяло вал. Кылсярысь, В. Гаврилов синъёсыз кескич чиляса юаллялоз вал: "Соку, Уваысен, зэмзэ ик-а тон оскид вал, Нюра апаед - Анна Григорьевна Колесникова кулӥз шуыса?" Йырам со учыр вань улытозямлы кылиз мукет муген но. Сцена вылын таӵе "дебютэ" понна, ужан дисциплинаез сӧреме понна, анаен атаелы выговор сётӥзы: малы, пе, асьтэ нылпидэс уд эскериське, уд чаклаське... Сыӵе вал уго со - Анна Григорьевна: яратымон, соин ик жалямон но. Аслазтэмъёссэ нылпиосты но вешалоз, эркиялоз, нуныялоз, мусоялоз. Арлыдоосын но сыӵе ик либыт, каньыл вал. Чебер ветлэ, чебер ик дӥсяське но. Котькытын, котьку артист луэмез син шоры соку ик йӧтылӥз. "Будӥ ке, мон но со кадь ик мед луо!" - шуылӥ аслым ачим. Сям ласянь чаклано ке, Анна Григорьевна лирик мылкыдо вал. Соин ик, луоз, солэн ныл но нылкышно образъёсыз ӵыдонтэм чебересь но яратымонэсь пӧрмылӥзы. Ӵемысь но туж быгатыса, оскымон шудылӥз со нылпи рольёссэ но, нимысьтыз ик пияшъёсты. С. Гляттерлэн гожъямезъя, сыӵеез травести Удмурт театрын одӥг гинэ - Колесникова гинэ вал. Егор Загребин таӵе быгатонлыкез ласянь нимысьтыз пусъем И. Гавриловлэн "Азинэзъя" спектакльысь пияшсэ - Шурказэ, "Камит Усмановысь" Гарасез. Анна Григорьевна паймымон усто лыдӟылӥз нылпиос сярысь арлыдо калыклы гожтэм веросъёсты. Одӥгез сыӵе верос пичи Петя сярысь вал. Петя эшъёсыз пӧлы ураме потыны дасяськем но, нокызьы вамыштэмез уг луы: сылон интыысьтыз вырӟыны уг быгаты. Вамыштыны турттэ но - сачак погра, нош ик султэ, вамыштыны ӧдъя но сачак усе. Анаез но атаез пизылэсь кыксэ ик пыдъёссэ одӥг штаг куке донгытӥллям. Куаразэ актриса пичиослэн кадь векчиятыса лыдӟе. Берпум чурзэ верамез бере ни вакчияк гинэ ивортэ: "Глупая история" верос. Михаил Зощенколэн гожтэмез". Быдӟым Отечественной война аръёсты Удмурт театр Алнашын но Можгалан ортчытӥз. Анна Григорьевна Иже кылиз, картэз вӧзы. Театр Иже бертэм бере, 1946-1947 аръёсы сезонэ, выльысь отын ужаны ӧдъяз. Та вакытэ со шудӥз Лазарь Перевощиковлэн "Удмурт ныл", Максим Горькийлэн "Васса Железнова", Игнатий Гавриловлэн "Камит Усманов" пьесаоссыя спектакльёсын. Ноку вунонтэм яркыт пӧрмытӥз Василий Садовниковлэн "Сюан" комедиезъя спектакльысь Ориналэсь образзэ. Та вакытэ, малпамтэ шорысь быронэз азьын, мон соин кык пол пумиськи на. Нырысетӥяз, 1946 арын, кык пияшъёсыныз Милиционной урамысь 4-тӥ юртэ ветлӥз. Война аръёсы отчы 22 номеро школа интыямын вал. Бератаз та юртлэсь кӧня ке люкетсэ улоннилы пӧрмытӥзы. Огаз бӧлетын - висъетын - театрлэн директорез Кондратий Меркурьевич Корепанов улӥз, кыкетӥяз - милям семьямы, куинетӥяз - Аркадий Данилович Иванов (берло со кивалтӥз Иж горисполкомен но республикамылэн госпланэныз). Та школа юртэ ик интыямын вал на "Художник" эштос но Калык творчествоя юрт. Уллапал этаж быдэсак сётэмын вал Мунё театрысь артистъёслы. 22 номеро школа юртэ Анна Григорьевна кыӵе ке муген театрлэн директореныз кенешыны шуыса ветлэм, дыр. Со дыре театрлэн коллективез гастрольёсы кошкемын вал. Соин директорен вераськыны солы соку ӧз кылды. Пиосыз ачиз кадесь ик чебересь но мусоесь. Анайзы огез шоры Лёвик нимын вазьылӥз, кыкетӥез шоры - Адик шуыса. Ачиз но мыным ӵыдонтэм чебер потӥз. Кыкетӥ полаз (трос дыр ортчем бере ини) ми адӟиськимы театрлэн юртаз. Монэ со шуныт пальышаса пумитаз. Сайкыт-пурысь шубаен дӥсяськемын. Пыдъёсаз фетрлэсь вурем ботыос. Со вакытэ таӵе дӥськутэз дунтэм но, йӧнтэм но нокызьы ӧй шуысалыд. Таяз учыре Нюра апие мыным В. Садовниковлэн "Шудо пумиськон" пьесаезъя спектакльысь пичи ныллэсь рользэ шудыны ӵектӥз. Ролезлэсь текстсэ но сётӥз. Удмурт сямен гожъямын вал со. Шара лыдӟи. Мырдэм-мырдэм. Анай-атаелэн кылзылы мон уго чик дышетэмын ӧй вал. Озьы ке но, тазьы ке но актриса луыны мон ӧй яра. Собере пьесаысь нылаш но вить-куать аресъем гинэ луыны кулэ вылэм. Мынам арлыды соку кык поллы бадӟымгес вал ини. Мон интые спектакльын шудыны ӧтизы тямыс аресъем Галяез - Анастасия Васильевна Шкляевалэсь, артисткалэсь нылзэ. Спектакльын но со ик шудӥз, только Анна Григорьевнатэк ни... 1947 арын одӥгаз тол нуналэ Тамара Гаврилова, Игнатий Гаврилов драматурглэн нылыз, но мон "Динамо" стадионысь йӧ вылын нискыласькомы. Сокем-сокем шулдыръяськон дыръямы ми пала дыртыса бызе Лёва - Тамаралэн братэз. Куаразэ ӝот-ӝот карыса, милемды со доре бертыны косэ: Нюри апимы ассэ быдтэм но та сярысь ӝогак ивортоно, пе, театрлэн директорезлы, улон интымыя бускельмылы. Дыртыса бертэме юнме луиз. Верано иворме монтэк но ваньмыз тодӥллям ини. Тамараез сямен ик, монэ но Нюра апимес шайвылэ келяны ӧз лэзе. Еж сюлэмъёсмес яраӟытэмзы ӧз поты, луоз. Анна Григорьевна Колесниковалэн но Степан Прокопьевич Широбоковлэн семьяязы соку кызьы но мар луэм сярысь мон ньыль ар талэсь азьло гинэ тодӥ. Соку вылэм шимес учыр сярысь мыным мадиз РСФСР-ысь сӥё-дано артистка А. В. Шкляева. Нокудзы сярысь но лек кыл вератэк, сюлэм пӧсекъямзэ шарае поттыны турттытэк. Сыӵе мылкыдын - А. Г. Колесниковаез но, С. П. Широбоковез но, А. В. Чубуковаез но курлатэк, янгыше уськытыны турттытэк ик, луэм учыр сярысь Егор Загребин но очерк гожтэм. Шонер верам. Уго кыкназы ик та кышномуртъёс шудтэм шудэз адӟыны кылдӥллям вылэм, шӧдске. Кызьы верай ини, асьсэ вакытэ шудо шудзэс адӟемзыя но соос огкадесь, артэ пуктымонэсь. Василий Садовников "Будон сюрес" статьяяз ("Советской Удмуртия" газетын печатламын вал со) тани тазьы гожъяз А. В. Чубукова сярысь: "Куазь югыт луэм бере, мур лымыез коласа, гурт пала пыдын лыктӥсь адямиос адӟиськизы. Соос ваньзы, ымнырзэс чепыллясь тӧллэсь ватыса, пальтооссылэсь воротникъёссэс ӝутӥллям. Азьпалазы мынӥсь вал каллен гинэ вамышъя. Дӧдьы нырын пичи пи пуке - ямщиксы, шӧдске... Кинъёс бен со, малы соос таӵе жоб куазен но сюрес вылэ потӥллям? Со - Удмурт театрысь артистъёс, гуртысь гуртэ концертъёс возьматъяса ветло. Нош дӧдьы берын пукисез - артистка Анна Владимировна Чубукова. Озьы со вал Быдӟым Отечественной война аръёсы. Соку, театрысь артистъёс тросэз фронтэ кошкемен, татчы кылем артистъёсты люкаса... Алнаш селое келязы. Со аръёсы тужгес секыт вал Анна Владимировна Чубуковалы. Картэз фронтын, нош со пичи нылыныз - Таняен - ваче син кылиз. Но Анна Владимировна калык азьын, аслаз секыт улонэз вылэ ӝожтӥськыса, огпол но ӧз сюлворы, ваньзэ ас понназ вормыны тыршылӥз". Василий Евдокимовичлэсь та чуръёссэ лыдӟыкум, амалтэк тодам ваи Чубукова фамилиё Нюра апиме. Со куремъя уго мон, сцена вылын ужан дыръёсаз, ӵем гинэ пукылӥ пичи нылыныз - Таниеныз. Артистъёсты котькытын витё. Уж удыс сыӵезэ бырйид бере, учкисьёсыд доры мынытэк нокызьы но уг луы. Веранме азинто-йылэто на таӵе иворен: Анна Владимировналэн картэз фронтэ пыртэмзы берегес ик бырыны шедиз. Ачиз пал кылиз, пичи нуныез сирота луиз... Война аръёсы спектакльёс вакчи пьесаосъя гинэ возьматъяськылӥзы. Бадӟымъёссэ дасяны артистъёс уг тырмо вал. Калыклэн но ужысь мозмылон дыръёсыз туж ӧжыт вал. Артистъёс вакчи спектакльёссы бере кылбур-верос лыдӟылӥзы, кырӟаллязы, балалайкаен, гитараен, арганэн яке баянэн шудэм улсын эктылӥзы. Концертсы бере ини учкисьёсынызы огазьын но шулдыръяськылӥзы. 20-21 ар талэсь азьло та вакыт сярысь тодэ ваёнъёссэ ӵапак тазьы гожъяз война бӧрсьы Удмурт театрлэн режиссёрез, УАССР-ысь искусствоосъя сӥё-дано ужась Соломон Абрамович Гляттер. Гожъямзэ печатлаз "Удмурт театр сярысь веросъёс" нимын "Молот" (али "Кенеш") журналын. А. В. Чубуковалы сӥземез 1980 арын потӥз. Анна Владимировна сярысь отын тазьы верамын: "Анна Владимировна Чубукова вордскиз 1915 арын 21 декабре Игра ёросысь Ӟуч Лозо гуртысь ӟуч крестьянлэн семьяяз. 1921 ар бадӟым куректон ваиз кузётэк кылем семьялы. Анна кӧня ке улоно луиз Зура ёросысь нылпи юртын. Ужасьёс татын адямиез дунъяны, валаны, жаляны быгатӥсесь вылӥллям. Нылпиослы соос ог-огзэс гажан, ужез но чеберез яратон мылкыд пыӵатӥзы. Анналы вераны луонтэм кельшизы эктонъёс. Вальс-а, краковяк-а чузъяськыны ӧдъя ке, солэн киосаз-суйёсаз капчиесь лемлет бурдъёс кылдо кадь. Выж пулъёс вылэ пыдчиньыосыз ик уг йӧтыло. Тыпырто но тыпырто. Веськыт но чиед мугорыныз ӵош синъёсыз но, ымдуръёсыз но кырӟало. Зури нылпи юртын Анна котькуд кырӟанлэсь лулзэ-сюлэмзэ шӧдытыса гурламез понна, синмаськымон чебер эктэмез-шулдыръяськыны быгатэмез понна нимысьтыз яратоноез дыды луиз. Анналэн анаез 1924 арын Якшур-Бодья ёросэ бызиз. Но сюратаеныз кусыпъёсыз шумпотымон ӧз луэ. Озьы ке но, Анна Якшур-Бодьялась одӥгетӥ ступенё школаез но, техникуме пырыны дасясь курсэз но азинлыко йылпумъяз. Мынӥз землеустроителе дышетскыны. Огаз нуналэ солэн син шораз вадьсаськиз "Гудыриын" печатлам таӵе ивортон: Ижысь театральной техникум дышетскисьёсыз кутон сярысь ялэ, пе. Нылашез "дышетскисьёс удмурт кыл мед тодозы" кылъёс шуге ӧз вуттэ. Удмуртъёс пӧлын будӥз бере, та кылэз со анай-атай кылзэ кадь ӟеч тодэ вал. Театральной техникум Чубуковаез, мукетъёссэ сямен ик, вылӥ классъем мастерозь ӧз вутты ке но, сцена вылын ужаны ваньзэ кулэзэ но тужгес дунозэ тырмыт сётӥз. Техникумысен со ӟеч валаз: драма-а, комедия-а, трагедия-а мынэ театрлэн сцена вылаз, валтӥсь герой котьку одӥг луэ. Со геройлэн нимыз - Зэмлык. Чубукова ваньзэ рольёссэ тазьы малпаса шудыны тыршылӥз. Мукетъёсыз азьын быгатонлыкеныз вылтӥяськыны турттонэз ӧз ик валалля. Анна Чубуковаен Анна Колесниковалэн сюресъёссы кечатак-вожвылак вуылыны кутскизы Удмурт театрын ӵош ужаны кутскемзы берегес ик. Азьло ик - быгатонлыкъёссыя, кужымзэс жалятэк ужаны сюлмаськемзыя, собере ини - учкисьёс кудзэс ке юнгес мед яратозы вылэм шуыса лушкем возиськись мылкыдъёссыя. Сыӵе малпанэ вутто театрлэн архивысьтыз программаос но. Одӥгаз учыре тани Анна Колесникова - Италмас (М. Петровлэн пьесаезъя спектакльын), Марья Антоновна (Н. Гогольлэн "Ревизорезъя" спектакльын), Анна Чубукова - Люсинда (Ж.-Б. Мольерлэн "Лекарь поневоле" пьесаезъя спектакльын), Соколова (И. Гавриловлэн "Азин" драмаезъя спектакльын). К. Гольдонилэн "Слуга двух господ" комедияз кыксы ик шудӥз: А. Колесникова - Смеральдинаез, А. Чубукова - Беатричеез. Семьяез ласянь Анна Григорьевна нырысь-валысь туж шудо адями вал. Война аръёсы но со картэз вӧзын, солы но, талы но укыр ӟудытэк улӥз. Анна Владимировналэн та ласянь, кызьы верай ини, югдурез ортчыт шугмылӥз. Война кутскон азьынгес картэз улонэн люкиськиз, школае мынон арлыдаз вуытэк, висьыса, сопал дуннее Юра пиез кошкиз. Пиез кулэм нуналэ Анна Владимировна спектакльын валтӥсь ролез шудыны кулэ вал. Ӵапак озьы тупаз: воштӥсез ӧвӧл, билетъёс вузамын. Чубукова, мур куректонзэ пушказ ватыса, синвуосызлы эрик сётытэк, котьку сямен та нуналэ но сцена вылын синмаськымон шудӥз. Нош син азяз ялан вал дораз пичи коросын кыллись яратоно пиез. Сюлэмыз ишкалскымон куректылон, курадӟон дыръёсаз но Анна Владимировна образъёссэ номыре сыӵе-таӵетэм дыръёсы кадь ик шудылӥз. Артист со сямыныз ик пӧртэм луэ, дыр, артистын ужасьтэм адямиослэсь: сцена вылын рользэ, кылдытоно образзэ гинэ мед возьматоз, ас дуннезэ, ас югдурзэ, ас сямъёссэ но выросъёссэ дымак вунэтыса кадь. 1945 арын Быдэс Россиысь национальной театръёсты учкон дыръя Анна Владимировналэсь быгатонлыкъёссэ вылӥ дунъязы. Нырысетӥ полаз татын со шудӥз К. Симоновлэн "Русские люди" пьесаезъя спектакльын, кыкетӥ полаз - М. Петровлэн "Вуж Мултаназ", 1946-1947 аръёсы сезонын М. Алигерлэн "Сказка о Правде" пьесаезъя спектакльын (Зоя Космодемьянскаялэсь рользэ), таосыз бӧрсьы сезонъёсы - В. Садовниковлэн "Пӧртмаськись тушысьтыз" Зараез, И. Поповлэн "Семьяысьтыз" Владимир Ульяновлэсь (Ленинлэсь) анайзэ. "Пӧртмаськись тушын" солы огпар луыса шудӥз Москва консерваториысь соку гинэ бертэм артист Г. И. Титов. Удмурт театр искусствоез азинтонын нимысьтыз бадӟымесь вормонъёсыз понна кыксылы ик Аннаослы сётэмын вал Удмурт АССР-ысь сӥё-дано артист нимъёс. Анна Владимировналэн гадь вылаз берлогес бырттӥзы на "Знак Почёта" орден но. Анна Колесникова ассэ ачиз вожаса быдтэм бере Анна Владимировналэн но данэз шур ӧрын лэйкась тулыс йӧ кадь пичияса-пичияса сылмиз-быриз. Анна Григорьевна бордысь талам картэзлы но, аслыз но шумпотон ӧз ни шедьты. Кыӵе ке но лек адӟон со сьӧры ветлӥз кадь. Быдэ вуыса бырыны шедиз Таня нылыз. Берпуметӥ нылпизэ ыштыса, Анна Владимировна чигиськиз, ӵушкаса сутӥсь вӧсь тылэз кысыны кужым ӧз шедьты ни. Аракы вылэ чӧлскиз. Со дырысен артистка театрын одӥг ролез но ӧз шуды ни. 60-70-тӥ аръёсы лыктэм артистъёс, жаляса верано луэ, А. Чубуковаез юись, керӟегъяськись-керетӥсь нылкышноен гинэ тодӥзы, бадӟым быгатонлыкен артисткаез соос ӧз адӟе ни. Котьма ке но, кыксы ик Аннаос - Колесникова но Чубукова - Удмурт театрлэн, удмурт искусстволэн но удмурт калыклэн историязы улӥзы, уло но котьку яркыт кизилиос кадь югыт ӝуаса улозы. Синву пызьырамон ӝож соиз: кыкезлэн ик кузпалзы С. П. Широбоков театрын ужаз ке но, соослэсь такем дуно вылэмзэс таки ӧз вала. Анна Григорьевналэсь "Мон шудо" повестьсэ калык син азе поттыны сюлмаськемез, солэсь нимзэ удмурт литературае пыртэмез понна солы тау карыны кулэ ик. Бадӟым тау Егор Загребинлы "Кенешын" такем ӟеч очерк печатламез понна. 1 Улон гердъёс Кылё тодэм калыкъёс (очеркъёсын сузьет) Анна Павловна Инмарлы оскисьёс пӧлын нимын, атай нимын вераськисьёс ӧжыт, уката но удмуртъёс пӧлын. Нош таизэ удмурт кышномуртэз вань калык Анна Павловна шуэ вал. Священникъёс но. Малы со озьы луэмын, - али но уг тодӥськы. Анна Павловна профессор но, нокыӵе кивалтӥсь но, школаын дышетӥсь но ӧй вал. Но озьы ке но... Инмар Анайлэн Успениезлы сӥзем черке ветлыны кутскем берам ик та кышномуртэз синйылтӥ: ӝыт-а, нуназе-а вӧсяськон, литургия-а йылпумъяське, калык черкысь потыны кутске, но заводын ужасьёс кадь, гуртазы туж ик уг дырто. Тросэз удмурт кышноос, ышыггес интые кариськыса, вераськыны, юалляськыны кутско. Шоразы сылэ сабыр гинэ, зӥбыт-востэм, мӧйымыны кутскем кышномурт - Анна Павловна. Юанъёсын солы вазисько, нош со дыртытэк гинэ ответъёс сётъя. Нырысь-валысь соослэн матазы мон туж ик ӧй кариськылы. Солэн аслаз мугез но вал: асьмелэн, удмуртъёслэн, трос умоесь сямъёсмы пӧлын умойтэмъёсыз но вань. Шуом, бигерен еврей котькытын мед луозы, но соос ас калыксэс музъем улысь но шедьтозы, огазе кариськозы, нош удмуртлэн озьы ӧвӧл. Иськавын-бӧлякеныз, оло, огазе кариськоз ик, но мукет бӧлякез уг тодӥськы шуоз. Тодмотэм муртлы удмурт сюлэмзэ уз усьты, бордаз уз кыскы, донгыны - донгытоз. Соин ик та чылк-чылк удмурт адямиосын кӧня ке аръёс ортчыса гинэ тодматски, куд-огзэ таки тодытэк кыли - кулыса вуизы. Со виын мон отец Ювеналийлэн чадоез луи. Удмуртъёс но, ӟучъёс но, чувашъёс но - пӧртэм калыкъёс одӥг семьяысь агай-вынъёс, сузэр-апайёс кадь ми луимы, али но улӥськомы. Сьӧд тушмон духовной атаймы но солэн духовной нылпиосыз куспы верантэм секытэсь визь сынаськонъёс ке но сётэ, ми духовной атаймес вордэм атаймес кадь яратӥськомы. Нош та удмурт нылкышноослэн духовной атайзы олокин вал. Анна Павловна улэп ӧвӧл ни. Ярам коть, улэп дыръяз мар но со юаса вуи. Уго солэн улэм сюресэз - паймымон, вӧсяськись калык понна гажамон, тодэ-буре вайымон. Анна Павловна Тимофеева вордскиз бугырес, кышкыт, вирен орсмем 1919 арын 4-тӥ августэ Бадӟым Уча (туала Можга) ёросысь Камышлы гуртын крестьян семьяын. Атаез Выль Мултанысь гимназиез быдтэмын, пе, вал (педучилищеез ӧвӧл меда?). Анаезлэн дышетскемез вылымтэ. Солэн быземез чик но уг поты вылэм, но вазен нылмуртлэсь уг юало вал: потэ-а, уг-а, кинлы потэ быземед - сёто но тӥни. Нырысь нуныеныз секытэн луэм бераз со Инмарлэсь тазьы куриськем: "Картлы кужмысь сётӥзы бере, та вордӥськоно нуные, Инмаре, Тон азьын улыны, ужаны ярамон адями мед луоз вал". Тимофеев кузпалъёс тупаса улӥзы. Музъем ужасьёс вал. Вуз но каризы. Колхозъёс потыку, кулаке поттӥзы. Инмарлэсь ноку но ӧз куштӥське. Удмурт Евангелизы но вал. Арнянуналъёсы, праздник нуналъёсы Бадӟым Учалась черке ветлӥзы, быдэс семьяенызы кӧс утьылӥзы. Нылпизэс пичиысен ик вӧсяськыны дышетӥзы. Уча черкын кема дыр ӵоже псаломщикын улӥз Василий Григорьевич, Тыловыл пи. Туж мур осконэз вал. Службаос бере удмурт калыкез огазе люкаса шуэ вал: "Ваелэ Инмарез данъяломе". Кутске туж чебер куараен чирдыны-кырӟаны: "Инмысь Эксэй Буйгатӥсь..." Удмурт кылын но, славян кылын но кырӟаллязы. Кинлэн шулдыр, тупась куараез, сое кырӟасьёс пӧлы, клиросэ султытылӥз. Анна пиналысен сюриз клиросэ, куараез уго укыр жингрес, кырӟанэз огпол кылэ ке, кыкетӥяз калык сьӧры нёртыны быгатэ ни. Василий Григорьевич Инмар законэз туж ӟеч тодэ вал, дышетскымтэ удмурт калыклы сое дугдылытэк тодытылӥз, ваньзэ пыр- поч, лад-лад валэктылӥз. Колхозъёс потон вакытэ, 1929-30-тӥ аръёсы, Учалась черкез пытсазы, Василий Григорьевичез судить каризы, калыкез, пе, ӧрекчаса возе, выль улонлы пумитъяське. Архангельской областе келязы, отчы ик быриз, иворъёсыз ӧз ни вуэ. Отец Павел батюшкаез но пытсазы. Кӧня удмуртлэсь синзэ усьтӥз со, кыӵе ӟеч тодытэ вал Инмар законэз! Быдэ вуэм бераз Аннаез атаез Можгала педучилищее дышетскыны келяз. Чебер куараез понна сое "Италмасэ" мыныны туж косо вал. Но пичиысен Инмарез тодэмез солэсь сюлэмзэ нош ик черке кыскиз. Пичиысен ик со Инмарлы мур оскись калыкен тодматскиз, кулытозяз соосты буре ваиз, соос понна вӧсяськиз. Сюлэмзэ поныса ик вера вал Яголудысь Окси но солэн Никон братэз сярысь, Ынэгысь Матвей агай сярысь, Ува ёросысь Аркип агай сярысь, Жужгесысь Гавриил иеромонах сярысь. Аркип агай трос пол вуылэм Пермь ёросысь Белогорской монастыре, отын улӥз солэн духовной атаез Варлаам (та чуръёсме гожъян куспын паймымон учыр луиз: курадӟытыса вием Варлаам али святойёс радэ пыртэмын ни, обросэз-иконэз но вань ни. Сое мыным асьмелэн гажано землякмы игумен Даниил Ишматов Белой Гораын наместник луыкуз, отчы вуылыкум кузьмаз вал. Али гинэ малпай: оброс бордаз кызьы меда гожтэмын? Святой преподобномученик Варлаам... Обросысь кизэ чупай но... отысь пӧсь потэ. Святой преподобномученик Варлаам мон понна но, вань удмурт калык понна но вӧсяськы! Инмарлэн паймымон ужъёсыз...). Аркип агай куать муртэн ӵош - пӧлазы Яголудысь Окси но вылэм - Сарове мыныны потӥллям. Соку преподобной Серафим атаймы святойёс радэ пыртэмын ӧй на вал ке но, вӧсяськись калык сое святойёс пӧлысь святойёс пӧлы кемалась пыртэ вал ини. Пумтэм трос паймымон ужъёс пыр трос адямиослы со улэп мурт кадь возьматскылӥз. Аркип агай удмурт эшъёсыныз Саров пала вуыкузы, пумитазы губырскем пересь песятай потыса соослэсь юаз: "Кытчы мынӥськоды - шутэтскыны-а, вӧсяськыны-а?" - "Вӧсяськыны", - шуизы удмуртъёс. Соку песятай ваньзылэн киязы быдэн сюсьтыл сётӥз, бӧрысь ачиз син азьысьтызы ышиз. "Туж тодмо, адӟем мурт кадь, кин со?" - огзылэсь огзы юало Сарове мынӥсьёс. - "Ӧд тодмалэ-а, со ачиз Серафим атаймы вал ук!" - шуиз Аркип агай. Солы азьпалзэ тодон сётэмын вал. "Анналэн туж секытэсь адӟонъёсыз-мытарствоосыз луозы", - шуиз Аркип агай. - Аннаез ас интыям кельтӥсько". Нош мон шуисько: "Номыр но уг тодӥськы, уг валаськы, шыр кадь адями мон". Котырысь вань черкъёс ворсаськизы ке но, калык вӧсяськемысь ӧз дугдылы. Огзы доры огзы люкаськыса вӧсяськылӥзы. Анналэн егит сюлмыз Инмарез яратонэн пачылмыса улӥз, гуртысь гуртэ, ёросысь ёросэ вуылыса, дышетскымтэ адямиослы Евангелиысь чуръёсты лыдӟылӥз, псалом гуръёсты, духовной кырӟанъёсты кырӟалляз, ӝикаса-ёрмыса улӥсьёслэсь сюлэмзэс Инмар кылын буйгатылӥз. Кивалтӥсь йыръёс тодытэк ӧз улэ егит ныллэсь калыкез югдытонэ пыриськемзэ. НКВД- ын ужасьёс туж чакласа, муг гинэ утчаса улӥзы, кызьы та нылмуртлэсь ымзэ ворсаны. Гуртысь гуртэ, интызэ вошъяса улоно луиз Анна. "Одӥг пол, - шуэ, - Иж палась Никольской черке мынӥськомы. Куинь куско шуба дӥсяй, пыдам сизьымо кут кутчай, тыбырам песьтэр оши, ымнырме кышетэн ворсай - пересь мурт мед кожалозы, киям боды кутӥ. Озьы сюрес кузя мынӥськомы ни. Бӧрсям мынэ вакчи визьем Анна нимо ныл. Ми солы шуим: "Кин ке юаз ке, кулэм муртэ ватыны мынӥськомы шу". Озьы ик луиз: пумитамы валэн райисполкомын ужась потӥз но юа: "Куда идёте, куда направились?" Аннамы шуэ ни: "Папу в Ижевск взяли, убили, коронить идём". Кузёйыр киыныз шонтӥз, валзэ шуккиз но ми дорысь ворттыса кошкиз. Огшап чус улэм музъем вылэ нош ик тушмон урдскиз: немец ожгарчиос Москва пала вуыны кутскизы. Пиосты гинэ ӧвӧл, нылъёс вылэ но шинель дӥсяса, ӟырдам, пӧзись оже келяны кутскизы. Аннаез но келяны дасязы вал ни, но Инмар жаляз: кыӵе ке но муген сое ожгарчиос радэ ӧз пыртэ. Соку Анна Никольской черке улыны но ужаны интыяськиз. НКВД-лы муг сюриз Инмар кылэз кышкатэк тодытӥсь нылмуртэз пытсэт сьӧры келяны. Та сьӧсьёслы трос юрттӥз та черкын служить карись Кокорин фамилиен батюшка, НКВД-лэн пуктэм адямиез. Пытсэтэ пуктон азязы Анна анаез-атаез дорын вал. Милицилэсь гуртэ вуэмзэс тодыса, атаез валзэ кыткиз но уробо пыдсы Аннаез выдтӥз, вылаз турын, пызь мешокъёс тыриз но гурт сьӧры поттӥз. Пазялэ вуттӥз. Отысен нылаш малпаз Никольской черке ватскыны, нош отын батюшкаен ӵош милиция возьмаськыса улэ вал ини. Судэ сётӥзы. "За агитацию..." шуыса дас арлы пытсэтэ келяны решение кутӥзы, но бӧрысь куинь арзэ кулэстӥзы. Со виын анай-атайзэ кысканы кутскизы. Лиза сузэрезлэн тодэ ваемезъя, вань ваньбурзэс талазы, бадӟым кеноссэс но сэрттӥзы, няньзэс одӥгтэм нуизы. Гурт калык адӟонтэм карыны, пе, кутскиз. Соин сэрен атайзы семьяеныз валче Какможе улыны кошконо луиз. 1945-тӥ, война бырон арын, Аннаез кыдёкысь уй палась кезьыт Тӧдьы зарезь (Белое море) доры нуизы. Малпасько, аслыз Анна Павловналы кыл сётыны (Инмарлы тау, кык пол соин пумиськылыса мар но со гожтыса вуи): "...Келязы Архангельск областе, Белой море дуре. Отын Молотовск (али Северодвинск) городэз ӝутон мынэ вал. Удмуртиысь огнаме ваизы. Копак нюр, болота. Шокчыны луонтэм трос чибинь. Каторга вал со. Кус кемозь кезьыт нюр вуэ пыртыса канава гудыто. Вузэ куасьтыса быдтэм бере ваем луоез носилкаосын пыртаськомы, пытсэтэ сюремъёсты со вылэ юртъёс пуктылыто ини. Монэ, зӥбыт, кылзӥськись муртэ, весь секыт ужато. Лыосы куалекъятозь кынмисько. Секытлы, ӝожлы чидатэк чигиськыса бӧрдон дыръёсы но вал. Одӥг пол уин, бӧрдыса улон дыръям, Николай Чудотворец возьматскиз но со шуиз: "Малы роптать кариськод? Чиданы кулэ". Чидантэм секыт дыръёсы дорам дыдык лыктэ но гур-гур! карыса гурласа улэ, сюлэмы буйга, каньыл луэ. Кӧня ке улыса, огъя тюрьмае ваизы. "Узыр монашкаез ваёзы" шуо. Тюрьма пӧлын но тюрьма вань на. Уксё бичаны кутскизы, "лапа", пе, октӥськомы. "Хорошая лапа тебе будет" шуо ни мыным, нош мон мар со "лапа" уг но тодӥськы. Гришка нимо егит но лек пи, воръёслэн кузёзы, дорам лыктӥз но юа ни: "Тон-а Тимофеева?" - "Ӧвӧл", - шуи. Сюлмы шӧдӥз ни мар ке но умойтэмзэ лэсьтыны дасясько шуыса. Ялан монэ преследовать каре, мон солэсь туж кышкасько - йырвандӥсьёслэн йырзы вал уго со. Но Инмар монэ ӧз кушты, утиз та лек муртлэсь. Войнаысь пегамъёс но пӧламы вал. Асьме армилы пумитъяськем, немецъёслы ужам латыш нылъёсты, украинкаосты татчы вуттӥзы. Сиён уг тырмы. Сием потыса йыр ик пороме вал. Ужато, ужато но, асьсэос ик морально быдто. Дугдылытэк обыскъёс лэсьто. "Вы враги Советской власти, вас надо уничтожать как лягушек!" шуыса, шуш куараен шорамы кесяське вал тюрьмалэн кивалтӥсез Львов. Кулӥз но (оло виизы но), куинь пол кутскыса сое гуысьтыз поттаса шӧйзэ зӥртылӥзы: со милемды адӟемпотостэм каре вал, пукисьёс - сое. Шайгузэ ик бетонэн шобыртоно луизы. Ӧрекчаськытэк, честно ужаны тыршисько вал. Тодам ваисько вал, кызьы вашкала святойёс но туж трос курадӟонъёсты, кӧтӝожъёсты чидано луизы, но со пыр Инмарлэн Инмысь Эксэйлыказ сюрылӥзы. Озьы асме буйгатӥсько, улыны кужым басьтӥсько. "Какая преданная коммунистка" шуэ вал мон сярысь колонимылэн кивалтӥсез. Котькызьы но ултӥяны, сантэманы тырше вал. Секытлы, котлы, сютэм улонлы чидатэк, чылкак восьми ни, кужыме быриз, суйы-пыды тӧрназ. Больницае мынӥсько но, "симмулируешь" шуыса, уж доры улляса лэзё. Татысен тодматски Черниговысь Александр баӵколэн нылыныз. Отец Александр туж кужмо вӧсяськись священник вал, со Алексей И Патриархен ӵош дышетскемын. Нылыз доры лыктыса, сое но, монэ но Святой Дарен причастить кариз. Со мынам духовной атае луиз. Монастыре кошкыны малпасько вал но со шуиз: "Удмурт калыктэ просвещать кар". Тамында гожтыса вуи Анна Павловналэн тюрьмаын пукем нуналъёсыз сярысь. Тюрьмаысь потыса, Анна дор палаз бертӥз. Малпа вал Иже интыяськыны, татын ужась черк но вань, но, "калыклэн тушмонэз" шуыса, городын улыны прописка ӧз сётэ. Город вӧзысь Люк черке ужаны интыяськиз, куинь ар отын улӥз. Бӧрысь заводэ ужаны кутӥзы. Эрик луиз черке ветлыны. Клиросын чирдӥз, но ужамез понна уксё ӧз басьты, сиськыны но ӧз пыра, шуэ вал: "Вӧсяськыны толке ӧвӧл, дась сиёнэз сиыны уг пыры". Котыраз трос калык биниське, уката ик - удмурт кышноос. Ӟуч кылэз ляб тодэменызы, черк службаез но соос шуген валало уго, нош Анна соослы валэктэ, кушаса сётэ туннэ литургиын чирдэм Апостолэз, Евангелиез, священниклэсь верам тодытонзэ но удмурт кылын соослы валэктэ. Шарканысь удмурт монастырьын улэм Мария монахиня (калык пӧлын Миндэр Маша шуо вал - гурт нимызъя) шуиз вал: "Аннаез венец возьма. Но дыр ӧз на вуы". Анна Павловналэн верамезъя, солы уйвӧтаз верамын вал: "Тынад курадӟон адӟонъёсыд - мытарствоосыд музъем вылын луозы". Пинал дыръяз Аркип агай но вераз: "Анналэн туж секыт мытарствоосыз луозы". Озьы ик луиз но. Пинал дыръяз НКВД-лэсь пегаса улӥз, сизьым ар пытсэтын курадӟиз. Соос ӧз тырме: Украинаын улӥсь трос нылпиё выныз кышноеныз валче шуккиськыса быризы. Вань анайтэк-атайтэк кылем нылпиосты Иже ваёно луиз. Ачиз ноку но ӧз бызьылы, нылпи ваёнэз ӧз тодылы, но вынызлэсь векчи нылпиоссэ солы пыд йылазы султытоно луиз. Курадӟыса-курадӟыса, уйёсты изьылытэк, кӧттырымон сиськытэк улон дыръёсыз кӧня вал?! Ваньзэ тае кин тодэ на - Инмар сяна. Туж тыршиз вордосъёссэ Инмар пала берыктыны, пичиысен вӧсяськыны дышетылӥз, кӧс утьылӥзы, валче черке но нуллӥз, нош быдэ вуизы но, Инмар бордысь палэнскизы. Инмарлы оскись понна талэсь секытэз мар вань? Бӧрдон, синкыли... Со гинэ ӧз тырмы, таиз мон тодыса вал ини, Ирина нылзы улэп картсэ (кык нылъёссы будо вал ини) куштыса, шпанаен кушласькиз - сое дораз ваиз. Анна Павловналэн юрттэменыз пичи корка басьтӥзы. Кушласькид ке, ул вал ни, но та кык ашкынэм муртъёс куспазы жугиськыса, керетыса улыны кутскизы. Бордазы Ириналэн азьвыл картэзлэн кык нылъёсыз шимес суредъёсты адӟыса улоно луизы. Анна Павловналы соос туж жаль пото вал. Кытӥяз доразы ик кӧлано луиз. Кызетӥ даурлэсь вань секытсэ ас пельпум вылаз нуоно ке но луиз, Анна Павловналэн чик лекез ӧй вал. Инмарез яратонэз солэн пумтэм мур вал. Удмурт кылэ трос кырӟанъёсты со берыктылӥз, со дорысь калык ӧз бырылы. Лыктэм калыкен кырӟаса Инмарез данъяллязы. Уго духовной атаез, Черниговысь о. Александр солы удмурт калыкез Христос Инмарлэн дышетонэныз югдытыны, тодытыны бакель кариз. Духовной атаезлэсь косонзэ со данэн быдэстӥз. Тямыстон аресаз потэмын вал ни, берло аръёсы шӧдскымон пересьмиз: синъёсыз ляб гинэ адӟо на, губырскемын, но калык ялан котыраз берга. Сюлмыз шӧдӥз-а, мар-а, та нуналэ черке лыктыса, со вань тодмоосыныз люкиськыса кадь шуиз: "Ӟеч луэ, ӟеч улэ, Инмарен улэ. Монэ простить каре, оло уло на, оло кулонэ мынӥсько ни". Эшъёсыныз люкиськыса, Ириналэн улон корка палаз вамыштӥз: нылъёсыз школаысь бертозы, пумитано, сюдоно. Сюратайзылэсь туж кышкало, сьӧсь пӧйшур кадь ассэ возе уго. Ки уг берыктӥськы та берпум чуръёсты гожтыны, но ма карод: адями -сьӧсь пӧйшур, кораз, вандылӥз Анна Павловнаез, Ириналэсь бадӟым нылзэ Иулияез. Господи, помилуй! Мукет мар шуыны уг тодӥськы... Инмаре, жаля, уть милемыз вань уродлэсь. Анна Павловналэн азьвыл ик тодытыса верам музъем вылын курадӟонъёсыз йылпумъяськизы. Дьяволлэн лэзем муртэз вииз вань улонзэ Инмарез данъяса, ас калыксэ югдытыса улэм удмурт нылкышноез. Кузё-Инмармы Иисус Христос шуэ: "Мынам нимы понна ваньмыз тӥледыз адӟемпотостэм карозы", та вӧзы Ачиз ик Со ватса на: "Эн кышкалэ мугорез виисьёслэсь, кудъёсыз лулэз виыны уг быгато. Нош ваньмызлэсь но юн кышкалэ Солэсь, Кин быгатэ лулдэс но, мугордэс но кысылӥсьтэм тыл пӧлын быдтыны" (Матфейлэсь Ӟеч Ивор 10:22;28). "Улонлэн бугыръяськонъёсыз кошкизы, музъем вылын курадӟонъёс быризы, йыркуро тушмонъёс кужымтэм луизы, нош яратонлэн кужымез бадӟым, со мозмытэ пумтэм вапумъёслы пеймыт азе сюронлэсь, со уте ваньзэ, кинъёс понна Тон азьын кышкатэк кырӟало! Аллилуия! (Кулэмъёслы сӥзем акафистысь). Оло зэм, оло даур Валентина Баймачева пуныос Одӥг шулдыр ӵукна кар урамын куинь пуныос пумиськиллям. Кузёоссы соосты огдыре калгыны лэзиллям-а яке таос ӟус вылын нырулӥсь пересьёс дорысь пегӟиллям-а - соиз тодмо ӧвӧл. Шунды шоры вӧш-вӧш выдӥллям но шунскыса кыллё, пе, куспазы оангето. - Кыӵе-кыӵе шудоесь асьмеос, - куара сётэм куӵоез, - ма но ӧз малпа ни адями, улонмес майбыр карон понна. - Эн но вера, эн но вера, - итӥське вандэм быжо шоголез. - Вашкалаосмылы кӧс нянен лы но уг донгиськы вал,,, нош монэ олокыӵе турлы сиёнъёсын сюдыса ёртӥзы ни. - Нош монэ алигес инметӥ корт тылобурдо пушкын лобатӥзы, шуныт зарезь дорын шутэтскытӥзы. Пыласькыны отын умой вылэм но, вуэз кузьыт, - вушйиз ошиськем пелёез. - Атае, пе, толэзь шоры вузылэ вал, нош монэ арган сьӧры кырӟаны дышетӥзы. Быгатэмме телевизор пыр но возьматӥзы ни, - ушъяське Шоголь. - Бен, бен, - ымзэ выретӥз Куӵо, - ӝоген асьмеос адями сямен вераськыны дышом ини. - А мар-о, вераськом, - Ошиськем Пель кӧтсэ бер пыдыныз кормаз. - Туала вакытэ улӥськом ук - цивилизация. Со олома но быгатэ ни. Со вискын матазы ик калгись пуныосты кутылӥсьёслэн машиназы дугдӥз. Отысь пыӵалэн но казен воргоронъёс потӥзы. Лаптӥськыса ик пуныос доры лыктыны шӧтазы. Таос усьтыр-табыр султӥзы но пегӟо ук, пегӟо. Ошиськем Пель азьпалазы бызе но Куӵоен Шоголез дыртытэ: "Ӝоггес, ӝоггес бызе, асьмеды цивилизация уе". Бакаос Луоё ярдуре тулкым корез шуккем. Со вылын туж йӧноесь ньыль бакаос пуко. Шӧдтэк шорысь кор вырӟиз но ву кузя кошкиз. Бакаослэн кор вылын уямзы ӧй вал на, соин ик та учыр соослы туж тунсыко йӧтӥз. - Паймисько, - шуэ огез бака, - та кор чорыг сямен уя ук. Таӵезэ кылэм но, адӟем но ӧй вал на. - Ӧвӧл, ӧвӧл, - пумит луиз мукетыз, - кор ачиз уг уя, сое ву нуэ. - Огды но шонер уд вераське, - куаразэ поттӥз куинетӥез бака. - Кор но уг уя, шур но сое уг нуы, асьмеос озьы малпаськом гинэ. Ӧм ке малпалэ, номыр уз уя. Нош ньылетӥез бака палэнынгес пуке, эшъёсызлэсь куашетэмзэс кылзонъяз чибиньёсты ымыныз кабылэ. Ченгешон солы акыльтӥз но вазёно кариськиз: - Эшъёс, тырмоз ини ӵашетыны. Куиньнады ик нодтэмесь вылӥллямды, олома пуымсен кылдэс шериськоды, нош учке ай, дормылэсь кудкеме кошким ни. Ченгешись бакаослы солэн верамез ӧз кельшы, йырзы кур луиз но, эшсэс кукъёстӥз кутыса, из вылэ сэрпалтыса кельтӥзы. Собере выльысь ӵашетыны ӧдъязы. Шур соосты дорзылэсь кыдёке но кыдёке нуиз. Оло, али но ченгешыса кор вылын уяло на. Нош ньылетӥез бака уяса, ярдуртӥ тэтчаса дораз берытскиз. Чибиньёсты, кутъёсты сабылыны но, луо вылэ пуксьыса, шунды шорын шунскыны. Валентина Куликова Кезьыт толэзь * * * Сӥзьыл тэльын шыпыт, Котыр шал-шал мӧзмыт. Губи писпу улын, Куртчи, веръяй - курыт. Каллен усё куаръёс, Огез вылэ огез. Вож-вож сыло кызъёс, Шулдыртыса тэлез. ... Огназ кылем тылобурдо Каллен гинэ шула. Озьы шат ас понназ бӧрдэ, Шулдыр дырез малпа? * * * Малы меда уг сяськая сюлмыд, Уг воректы инмысь кизилиен. Та улонысь ваньзэ ӟечсэ тыныд Мон кузьмасал, ӧй улысал юнме. Лобӟысалмы вылэ, чагыр инме, Шудысалмы отын чималиен. Ӧй жалясал лулме но мугорме Мон лыдъяны асме шудо нылэн. Тодско: уз пунӥське сюресъёсмы, Тон кыдёкын, ӧвӧл вӧзам. Ум вамыштэ ог-огмылэн пумитамы, Озьы ке но, котьку улод сюлмам. * * * Кыӵе сильтӧл кырын, Сьӧд-сьӧд уя пилем. Шимес Тӥгырменын Лек тӧл лоба, урмем! Кузь ӝӧк, нош дыр - дас кык. Мон весь ай пукисько. Уг луы иземе, Куазен вераськисько. Кыӵе ми кельшиськом Ог-огмылы туннэ. Ӵошен зар-р бӧрдӥськом... Уд дугдыты монэ! * * * Лоб татчы... Куака... Эн кышка... Кыл вератэк но Ог-огмес валалом. Ваньмыз лушкем... куашка... Секыт... Мӧзмыт... Куноелы но мӧзмыт, лэся, - Кельтӥз огнаме... Эх, куака. * * * Малы, пе, весь тынад Кылбуръёсыд бӧрдо? Уг лыкто шат йырад Бурдъяськытӥсь чуръёс? Мон гожтысал, эше, Йӧно-йӧно кылбур. Уг быгатскы али - Сюлэм вӧсе туж мур. Шуо ук, дыр эмъя Ваньзэ ик висёнэз. Аръёс воштӥськемъя Бурмоз, дыр, ярае. Соку гожто тыныд Сыӵе чебер кылбур. Кудӥз керӟег сюлмад Уз кельты ни йыркур. * * * Сӥсъясь ыр тӧл... Эктӥсь тылӝу... Ньылпу... Кезьыт толэзь... Юо на одӥг пол дун ву, Эн кут монэ, я, лэзь. Пеймыт ӝомал... Куака лобӟиз... Котыр нап бус паре... Тылпу кысӥз... Атас чортӥз... Мӧзмон гадям пыре... * * * Ньылетӥ куартолэзь... Уйшор... Сюсьтыл ӝуа... куасалляське... Жӧломыса катьтэм мугор Возьма, вите на кинэ ке. Синъёс уг кынисько, сюлэм Арлэсь кема ни позыръя. Куддыр уг пот кадь ни улэм, Мӧзмон быдэс пушез ӵабъя. Кирос, корос, шыпыт молитва... Векчи сюсьтыл ӵындэ лушкем... Оло, со синпӧет гинэ вал? Кыӵе уг пот солы оскем... Улон нош аслэсьтыз маде, Сое мон алигес валай... Вӧтын ке но пичи нылдэ Огпол тон веша вал, атай! * * * Кӧлӥсь урамъёстӥ Мон ветлӥсько огнам. Мынялляло, вылды, Кизилиос шорам. Уй сюресчи - ыр тӧл Монэн ӵош вамышъя, Вань йыр висёнъёсме Лэзе кыръя-буръя. Секыт мӧзмон туннэ Вань лулпушме ӵабъя. Шумпотыса монэ Кайгу ни ӟыгыръя. Ваче син Пётр Сергеев - Леонид Кузелин Кулонэ кыскись вакчи сюрес Вакчи дыр куспын быдэс дуннее вӧлмыны быгатӥсь шимес висёнэн черлам мурт нырысьсэ 1981 арын шараямын. Со Америкаын вал. Та кышкыт через эмъясьёс СПИД шуыса нимазы. Номырин эмъяны луонтэм висён, дуннеысь мукет кунъёсы сямен ик, Россие но ӝог вуиз. 1987 арын соин курадӟись адями шедьтэмын вал ини. Нош со дырысен эшшо куать ар ортчыса, та висён асьме шаерамы но шараямын. Трос йыро кыйлы укшась кышкыт черен али Россия Федерациын гинэ 175 сюрслэсь ятыр адямиос курадӟо. Соин черласьёслэн лыдзы арысь аре йылэ. Мар тужгес но кышкытэз: берло дыре та висён егитъёс пӧлы ӝог вӧлме. Таин валче амалтэк юан куриське: нош шаерамы та ласянь кыӵе меда югдур? СПИД висёнлэсь вӧлмонзэ кулэстон понна мар лэсьтэмын но мар лэсьтӥськоз? Кыӵеен адӟо солы пумит нюръяськисьёс ӵуказе нуналэз? Та но мукет юанъёслы валэктыны курыса, ми Удмурт Элькунысьтымы СПИД висёнэз алонъя но соин нюръяськонъя центре вазиським. Отысь эпидемиология отделениен кивалтӥсь Леонид Герасимович Кузелин кылдэм югдурен тодматэ. - Зэмзэ но, СПИД висён туж бадӟым ужпумлы пӧрмиз. Солы пумит нюръяськонын кыӵе ке вормонъёс, азинсконъёс сярысь вераськыны туж вазь на. Вылаз ик, та кышкыт черен висьыны кутскем адямиослэн лыдзы, быдэс Россиын сямен ик, асьме дорын но ялан йылэ. Шаерамы туннэ нуналозь 1583 соин висисьёс шараямын. Но таин ӵош мон меӵак вераны уг дӥсьтӥськы, со лыдпусэ ваньмыз висисьёс пыро ни шуыса. Вить но, дас но поллы солэсь троссэ эмъясьёс но шараяны ӧз быгатэ на, луоз, асьсэос со адямиос но кышкыт черен курадӟемзэс валатэк уло. Югдур тани та вылысь но умой адӟиське: ньыль каръёсысь но дас ньыль ёросъёсысь азьвыл висисьёс вӧзы берло дыре трос выльёсыз ватсаськизы. Соос пӧлысь укмыстон процентэз наркотикен усыкмылӥсьёс луо. Нош тужгес кышкытэз, сюлэмшугъяськытӥсез, мон сямен, тани мар бордын: та через нуллӥсьёс-вӧлмытӥсьёс пӧлысь 71,6 процентэз - 15-ысен 25 аресозь нылъёс но пиос, 74,5 процентэз нокытын ужасьтэмъёс луо. Кылдэм югдур котькудзэ йыр бордаз кырмиськытыны кулэ, та вӧзы мукет кылъёс вераны уг шедьтӥськы. Предприятиослэн, хозяйствоослэн кивалтӥсьёссы та пумысен юнгес мед малпаськысалзы. Нош берло дыре я отын, я татын ужась киос мултэс луыны кутскизы угось. Кивалтӥсьёслы адямиосты капка сьӧры кельтыны секыт ӧвӧл, шӧдске. Нош кыӵе сюрес вите со ужтэк кылем адямиосты? Юонэн, наркотикен усыкмылыса улон? Уката ик - егитъёсты? Кызьы тодмо, мар карыны ёрмеменызы, соос сыӵе адямиосын герӟасько, кудъёсыз дасо аръёсын поликлиникае ӧз возьматъяське, нокыӵе анализъёс ӧз сётъялэ. Ӵапак со муртъёс палась висёнъёсты вӧлмытӥсьёс луыны быгато. Кык адямиос куспын ӝог вордскем "ӟырдыт яратонэз" ик тани басьтоно ке, кӧня мурт сыӵе амалэн висьыны кутскиз ни меда. Кинэн сюрем соин кӧлан туж ӵем дыръя кышкыт черен берытске. Нош наркоманъёс пӧлын со висёнъёс уката ӝог вӧлмо. Глазовын луэм учыръёс сое умой возьматӥзы. "Тӧдьы кулон" кузьмаса ветлӥсьёс - наркотик вузасьёс - асьсэлы трос юрттӥсьёс шедьтӥллям. Шаермылэн уйпал шоркараз сое чугун сюрес кузя вуттыны секыт ӧвӧл, шӧдске. Кизерто но бӧрысь со суретэз Балезино, Яр, Юкаменск ёросъёсы келяло. Тӥни малы татын СПИД-эн висисьёс котькытын сярысь уно. Наркотикъёсты вузаса узырмисьёс, валамон ни, Ижын но, Воткаын но уг кӧло. Ижысь Буммаш микрорайонын, кылсярысь, первитин нимаськись наркотикез нуналлы быдэ одӥг но ӝыны литр вузало. Нырысь-валысь уд но вала, трос-а со яке ӧжыт-а. Соку тазьы валэкто: сомында первитин 1500 муртлэсь йырсазьзэ шузимытыны тырме. Соин вузкаро микрорайонысь наркотикъёслы кулэяськись адямиослы тодмо сэрегъёсын, куд-ог школаосын, техникумъёсын, дискотекаосын, баръёсын. Калыклэсь тазалыксэ утёнын тыршисьёсты пиналъёслэн ВИЧ-инфекциен висьыны кутскемзы уката юн сюлэмшугъяськытэ. Нош пала со анай-атайёссы пыр. Туннэ нуналэ шаерамы 283 нылкышноос СПИД-лэсь вируссэ нулло. Ваньзы соос нылпи вордыса- будэтыса улон арлыдъёсазы ай. Али 246 семьяос учётын сыло: 51-аз кыксы но кузпалъёс та черен курадӟо, 160-аз воргорон гинэ висе, 35-яз - нылкышно. Нылпи вайыны дасяськись нылкышноослы выльысь но выльысь тодазы уськытӥськом: консультацие дыраз вазиськылэ. Пиналды вордскон азьын яке вордскемез бере ӧвӧл, сьӧд чер данаклы вазь мед шараяськоз. - Зэмзэ но, Леонид Герасимович, югдур котькудзэ малпаськытыны кулэ. Та висён отӥяз но, али кадь ик ӝог вӧлмиз ке, 40-50 аръёс ортчыса, син азе пуктыны луонтэм суред кылдыны уз быгаты-а? Котьма ке но, солы пумит нюръяськонъя ужрадъёс сярысь мар верасалды? - Россия Федерациын СПИД-эн висисьёсты эмъянэ али 12 пӧртэм препаратъёс кутӥсько. Соос пӧлысь кыкез гинэ - тимазид но фосфозид - асьме тодосчиосын шедьтэмын-малпамын. Соосты ялан юылоно ке, кышкыт черлэсь быдэс мугоре вӧлмонзэ дугдытыны луоно. Отӥяз со ачиз сярысь дырын-дырын тодаз вайытылӥсь висёнлы пӧрмоз, шуом, сахар диабет выллем. Препаратъёс вань, но со нокызьы ик буйгатыны уг быгаты. Малы ке шуоно, соин эмъяськон туж дуно усе. Ар ӵоже со йӧнатскон курсэз ортчон понна 10 сюрс доллар кулэ. Калыклэсь тазалыксэ утёнын ужась тодосчиос та вакытэ утчало нимысьтыз дунтэм вакцина, кудӥз ВИЧ-инфекцилэсь утиськыны юрттысал но дунтэм усьысал. Но со понна дас ар пала дыр кулэ луоз на. Кузпалъёслэн валче улон сярысь вылесь тодон-валан люкамзы семья понна бадӟымесь ыштонъёс уз вайы. Калыкез дышетоно. Газетъёс но журналъёс, радио но телевидение пыр сомында лыдӟемын, верамын, возьматэмын, лэсьтэмын ни кадь, но, шӧдске, со туж ӧжыт ай. Озьыен, валэктон ужез паськыт нуоно. Калыклэсь тазалыксэ утёнын тыршисьёсты таӵе учыръёс туж куалектытӥзы. Асьсэды шузимытон, йырсазьзэс ыштон понна олокыӵе но кужмо арбериосты юисьёс но кыскисьёс пӧлысь кудӥз но соиз дун тырыса вирзэс сётӥсьёс радэ пыро, шӧдске. Туэ, кылсярысь, асьсэды донор шуисьёс пӧлысь витезлэсь инфекцизэс шедьтэмын ни. Но, кызьы тодмо, вирысь ВИЧ-инфекциез куд-ог учыръёсы бер шараяло. Соку тӥни соиз яке таиз чер вирлы кулэяськись висисьлэн мугораз шедьыны быгатоз. Озьы медаз луы шуыса, Россиысь куд-ог улосвылъёсын куинь толэзьем карантин тупатыны косэмын. Со сяна, унояз субъектъёсын аутодонорство шуон амал кутӥське: операцилы дасям висисьлэсь вирзэ басьто но аслыз ик лэзё. Валамон ни, палэнысь инфекция соку шедьыны уг быгаты. Вир сётон-басьтон ужез ӟеч радъян вылысь берло аръёсы трос лэсьтэмын. Нырысь ик, доноръёс туж сак эскерон пыр ортчо. Дун тырыса вир сётон данаклы кулэстэмын луоз. Асьсэ мылкыд каремзыя вирзэс ӵектӥсьёсты пӧртэм амалэн пусйылозы. Со станциосын но отделениосын ужась сестраос пӧлын ватсаса дышетон ортчытъяськоз. Будӥсь кивоштӥсьёсмы - асьмелэн ӵуказе нуналмы. Ӵапак со егитъёс пӧлын вань амалъёсты кутыны тыршоно. Наркоманиез вӧлмытӥсьёслы чутрак пум пононо. Али уноезлэн егит пиослэн но нылъёслэн таӵе малпанзы юнмамын: наркотикен эшъяськисько ке, мон туала улонлэн куронъёсызлы туж тупасько. Со мылкыдъёссы мед тӧлӟозы шуыса, вань луонозэ лэсьтоно. Наркомания пытсэт сьӧрын пукисьёс пӧлын но паськыт но ӝог вӧлме. Юстицияя министерстволэн шаерысьтымы ёзэтэзлэн учреждениосаз пукисьёс пӧлын 388 мурт ВИЧ- ен курадӟе (шаерысьтымы вань висисьёс пӧлысь котькуд куинетӥез). Удмуртиысь шедемъёс пӧлазы данаклы трос. Пытсэт сьӧры но соос наркотикъёсты вӧлмытэмзы но уже кутэмзы понна сюремын угось. Мар эшшо лэсьтыны луоно на кадь? Котькуд гуртэ, посёлоке, предприятие, учреждение вуылыса, адямиос пӧлын валэктон ужез кужмоятоно. Мылкыд карисьёсты асьсэлэсь кин но кытысь луэмзэс шараятэк эскерылоно. Ижын со амал кутӥське. Гуртъёсын улӥсьёс озьы ик дорамы лыктыса эскериськыны быгато. Пӧртэм листовкаос, бюллетеньёс котькуд семьялы тырмымон дасяно. Та ласянь кытын но отын адӟем карымонэз но вань ини. Басьтом тани Балезино ёросэз. Шаерамы соос та шимес но кышкыт висён вӧлмонъя куинетӥ интыын мыно. Ёрос администрацилэн кивалтӥсез Р. З. Касимов вань калыкен лэсьтоно ужез быдэсъян борды ачиз басьтӥськиз. Солэн воштӥсьёсыз, отделъёслэн кивалтӥсьёссы, мукет адямиос умой валазы: наркотикен эшъяськисьёсты кышкатыса гинэ уд дугдыты. Выль амалъёс утчамын-шедьтэмын вал. 2000-01 аръёсы 16 гурт администрациос пӧлысь ӝыныяз "Тазалыко улон понна" акциос ортчытъязы. Ёрос учреждениосысь специалистъёс пӧртэм ужез быдэсъясьёс пӧлын вераськылӥзы. Бӧрысьгес асьсэос гуртъёсын но посёлокъёсын улӥсьёс вераллязы: милям ёросамы, СПИД-лы но наркоманилы пумит нюръяськон сяна, мукет нокыӵе ужпумъёс ӧвӧл ни кадь. Тыршемзы пайдатэм ӧз кыльы. Туж ӝог вӧлмись наркоманилы сюрес пытсамын вал. 2001 арын куартолэзе эскерем наркоманъёс пӧлын ВИЧ-инфекциез нуллӥсьёс ӧз шараяське ни. - СПИД-лы пумит нюръяськонын осконмы чылкак быремын ӧвӧл на, иське? - Осконэз адямилэн, кызьы шуо, котьку луыны кулэ. Улонын сотэк мӧзмыт но шимес мылкыдъёс кылдозы. Эшшо но эшшо ӧтисько: пӧртэм амалъёсты кутыса, валэктон ужез кужмоятоно. Аслаз тазалыкез сярысь котькуд адями нырысь ик ачиз мед сюлмаськоз. Берло дыре шаерамы соя нимысьтыз ужрадъёс чакламын. Кылсярысь, 2000 арысен кутскыса 2003 арозь "Анти-СПИД", озьы ик наркоманиез алонъя но наркотикъёсты катэз тӥяса вӧлмытӥсьёслы пумит нюръяськонъя программаосъя ужаськом но ужалом. Мукет но ужпумъёс быдэсъяськозы. Котькудӥз адями та туж кышкыт черлэн вӧлмонэз пумит нюръяськонэ ӧз султы ке, ваньмыз со огшоры программаен гинэ кылёз. Эн вунэтэ: СПИД улон уг кузьма, со - кулонэ кыскись туж вакчи сюрес. Гавриил иеромонах Коммунистъёс кивалтыса улон аръёсы ворсам черкъёсты усьтылыны кутскем бере, нимысьтыз дышетскем священникъёс тырмытэен, черкъёсын кивалтыны кутскизы кыдёкысь шаеръёсысь вуэм яке асьме дорын ик будэм, но удмурт калыклэсь ортчем сюрессэ тодӥсьтэм адямиос. Кытысь ке но, кинлэсь ке но кылэм иворъёсъя, куд-огез вераськыны кутскиз, удмуртъёс, пе, язычникъёс, шаманистъёс, Зэм Инмарез уг тодо, трос, пе, соос пӧлын ведӥнъёс. Куд-ог удмурт кышноослэсь но таӵе "тодытӥсьёс" визьзэс тугазы, соос ог-огзэс ведӥн шуыса ченгешыса улыны кутскизы. Сюлмы ныж пуртэн зырӟем кадь вӧсь луэ сыӵе вераськонъёсты кылыса. Эшшо кылем, 2000-тӥ арын, протестант сектаослы пасторъёсты дасясь курсъёсын (сыӵеез но вань асьме Ижын) кивалтӥсьсы, Басалыко фамилиен Украинаысь вуэм адями, вань сюлэмзэ поныса монэ осктыны выриз: "удмуртъёс - язычникъёс, шаманистъёс, соослэн лулсэрзы сӧриськемын, соин ик соос Христос Инмарлэсь дышетонзэ - Евангелиез кабыл басьтыны уг быгато". Талы пумит мынэсьтым верамме кылэм-адӟем но ӧз кары. Укмыстонэтӥ аръёслэн кутсконазы Люкысь (Иж вӧзысь) черке Воткинскысь батюшкалэсь нимысьтыз дышетскымтэ, сантехникын ужам пизэ священнике пуктӥзы. Одӥгаз проповедяз со удмуртъёсты озьы ик куаретыны кутскем, тӥ, пе, язычникъёс, Вуж Мултанын адямиез вӧсяды. Пӧлазы учырам удмурт дышетӥсь, со кӧтӝожзэ вераса, "Удмурт дунне" газетэ гожтэт лэзем. Со статьяез ӟуч кылэ берыктыса Владыкомылы сётытэк ӧйлась. Палладий епископмы йыромем тодытӥсез удмурт приходысь палэнэгес келяз. Укмыстонэтӥ аръёсы ик кӧня ке ӟуч газетъёс удмуртъёсты язычникъёс, ведӥнъёс, шаманъёс шуыса янгыше уськытӥсь кырсь статьяос печатлазы. Ӵектонъёс но вал: удмуртъёслэсь генаоссылэсь кодзэс воштоно, выльдоно. Со аръёсы ик печатласькиз шимес "Мурлот" роман. Тодазы но ӧз вае оскон понна улонзэс сётэм удмурт христианъёс сярысь гожъяны. Эх, бытмем язычество! Тонэн сэрен кӧня пол удмурт калыкез вӧсь каризы ни?! Удмурт язычникъёс уло Кам сьӧрын, нош тышез, вӧсь каронэз усе Кам тапалась удмуртъёслы. Ку тон милям калыкмылэсь улон радзэ саптамысь дугдод? Котькуд газетлы, котькудӥзлы удмурт луисьтэм адямилы уд вера ук ми кык сю витьтон ар ини Христос Инмарлэн нылпиосыз луиськомы, янгышаса сьӧлыкъёс лэсьтӥськомы ке, со понна ми ӧпкелиськомы. Мукет ласянь, та понна ми гинэ янгыш ӧвӧл - ӧвӧл ке вӧзамы зэмос дышетӥсьёсмы, кинъёслэн сюлмазы Инмарлэн сётэм яратонэз мед луысал. Одӥг тодмо батюшкае, солэн атаез но, вить братъёсыз но священникъёс, песятаез но священник вылэм, оскон понна коммунистъёс сое ыбиллям, ӟуч адями, удмуртъёс пӧлын далай гинэ улэм мурт, кӧтӝожен улон вакытам таӵе гожтэт ыстӥз: "Вань калыкъёслэн, удмуртъёслэн кадь кужмо осконзы мед луоз вал; удмуртъёс исповеде лыкто ке, синвуэн бӧрдыса сьӧлыкъёссылэсь куштӥсько..." Та выллем веранъёсты мукет ӟуч батюшкаослэсь но кылэме вань. Вань пумит ужасьёсын, урод малпасьёсын ожмаськыса кыӵе пайда басьтод? Керетон, ожмаськон - Инмарлы ярантэм ужъёс. Инмар Пиез, Утисьмес Иисус Христосэз музъем выл адямиос кыӵе но урод кылъёсын ӧз сантэмалэ - Со чидаз, жугизы, кортӵогазы, но Со вожпотонзэ, йыркурзэ нокин вылэ но ӧз кельты. Инмар Пилэсь чидамзэ асьмеос но адӟем карыны кулэ. Со котькинэ но яратэ, нокинэ но улӥ-вылӥ уг кары, куриськемез-вӧсяськемез санэ понэ. Удмурт калыкез ултӥясьёсты, соослэн ваче пумитазы сылӥсь язычникъёслэсь кивалтӥсьёссэс, коммунистъёсты-атеистъёсты югдытон понна гожтэмын мынам та веросъёсы. Учке, лыдӟе, тодэ удмурт калык пӧлысь потэм, мур осконэн улӥсь, Христос Инмарлэсь дышетонзэ чылкытэн утён понна асьсэлэсь улонзэс сётэм удмурт христианъёс сярысь. Сюосыз удмурт пиос, нылъёс, священникъёс, монахъёс оскон понна тюрьмаосын пукизы, соосты курадӟытыса виылӥзы, жугизы, сантэмазы, но соос Христос Инмарлэсь адӟем карыса осконлэсь ӧз куштӥське. Жаль, йырсазьмы вакчиен, осконмы пичиен, азьтэммы бадӟымен, историмес, калыкмес гажамтэенымы, соослэсь нимъёссэс вунэтӥськомы ни. Но Вылысь Инмармы соосты тодэ, уго оскон понна курадӟон чидамъёс Солэн Инмысь пиштӥсь данлыказ уло, соослэн нимъёссы Инмарлэн Улон Книгаяз гожтэмын. ...Эшкей Микайло, со ик Ешкеев Михаил Васильевич, со ик Гавриил иеромонах, вордскемын дас укмысэтӥ даурлэн пумаз Сарапул уездысь Нылга-Жикья волосте пырись Бадӟым Ӝужгес гуртын, Инмарлы оскись крестьян семьяын. Та гуртын Микайлоез тодӥсьёс ӧвӧл ни шуыны луоз, уката ик солэсь пичи дырзэ. Та веросме но гожтӥсько Анна Павловна Тимофеевалэн (учкы со сярысь очеркмес) тодэ ваемъяз, Элькун архивысь кӧня ке документъёсъя но УдНИИ-ын ӵош ужам, та гуртын вордскем егит эшелэн Людмила Леонидовна Карповалэн гурт калыксы пӧлысь люкам тодэ ваёнъёссыя. Микайло пичи дырысеныз черк службаез яратӥз, молитваосты дышетӥз. Визь дыръя анай-атаеныз ӵош кӧс утизы. Бусы ужъёсты, юрт котырысь ужъёсты Микайло пичиысен ик тыршыса быдэсъяз. Анай-атайлы пумит вазьылэмзэ нокинлэн но кылэмез ӧй вал. Арня нуналъёсы, праздникъёсы со ялан черкын вал, пономарьлы кадило ӝуатыны, вӧсяськон интыез чылкыт возьыны юрттӥз. Черк службаез быдэссэ тодаз возиз. Бӧрысь клиросэ но кырӟасьёс-чирдӥсьёс пӧлы султылӥз. Нылга-Ӝикья черклэн но, Булай-Ӟумъя черклэн но батюшкаосыз вордэм пизэс кадь яратӥзы пичи гинэ мугоро но вань верамез кылзӥськись, зӥбыт удмурт пиез. Ёросысь калык сое "Вӧсяськись Микайло" гинэ шуыны кутскиз. Озьы ортчиз пинал дырыз. Быдэ вуиз но анай-атаез солы кышно вайыны малпазы - музъем ужась, юрт котырын ки воштӥсь кулэ - асьсэос секыт ужаса, висьыса кынартэм луэмын ини. Микайлолэн мылкыдыз Инмар дорын улӥз, кышнояськон сярысь со уг но малпа вал. Дэмлазы бускель Косой гуртысь Инмарлы оскись Наталля нимо нылмуртэз. "Шудо луомы меда?" - юаз Наталля карт луонэзлэсь. - "Асьмелэн шудмы Инмын луоз", - шуиз Микайло кышно луонэзлэн пумитаз. Инмарлы оскись егит пиен егит нылъёс - кузпалъёс - кыл сётӥзы братэн сузэр кадь улыны. Ӵош ужазы, ӵош ик черке ветлӥзы. Кышкытэсь аръёсы улыны кылдӥз Микайлоен Наталля кузпалъёслы: граждан ож, сютэм аръёс. Улон огпала берытскиз кадь. Коммунистъёсын, комсомолецъёсын ӵош гуртэ выль улон вуиз. Кутскизы осконлы пумит ожмаськыны. Огез бере мукетыз урод ивор вуэ - я сояз гордын,я таяз гуртын черкез пытсаллям, сутӥллям, клуб кариллям; соизэ я таизэ священникез вииллям, я пытсэт сьӧры келяллям. Олокыӵе но шимес вераськонъёс вӧлмизы - антихрист, пе, эксэй пуконэ пуксем ни, ӝоген номер пуктылыны кутскозы ни, собере - дунне бырон... Осконлы пумит кужмо ож кутскон вакытэ Микайло кузпалыныз вераськыса, духовной атаезлэсь бакель каронзэ басьтыса мынӥз Сарапулэ епископ доры солэсь ас гуртаз часовня пуктыны лэзён курыны. Инмарлэн ӟеч эрикеныз, выль корка пуктыны дасям бугрозэ со бакча пумаз, гопъёс дурысь возь вылэ нуллӥз часовня ӝутыны. Часовнязы вуэм бере, татчы трос калык ветлыны кутскиз. Соку Микайло малпаз часовня вӧзаз алтарь ӝутыны. Озьы часовня интые черк пӧрмиз. Сарапулысь оло Ижысь епископ, табере тодӥсь ӧвӧл ни, Микайлоез священнике пуктӥз; куриськон гожтэмезъя, сое епископ монахе ӵышкиз но Гавриил ним сётӥз. Озьы Ӝужгес пи Микайло Гавриил ним басьтыса, иеромонах луиз. Ас киыныз пуктэм черказ ачиз ик служить карыны кутскиз. Анна Павловналэн верамезъя, Микайлоен ӵош ик солэн кузпалыз Наталля но монашкае ӵышкиськиз, но та сярысь шарае ӧз поттэ. Уй-нунал усьтэм черке котыр ёросысь гинэ ӧвӧл, Шарканысь удмурт монастырьысь но миссионеркаос вуылыны, пе, кутскизы; Кам сьӧрысь Николо-Березовкаысь, Казань сьӧрысь нимо-дано Семиозерной пустыньысь но монахъёс вуылыны ӧдъязы. Нош со виын кӧня вал пыдйылчи калык! Одӥг улосвылысь мукетаз вӧсяськыса, кӧттыр утчаса ветлӥсь калык ӵоттэм трос вал. Гавриил иеромонах ваньзэс яратоно агай-вынъёссэ, сузэр-апайёссэ кадь пумиталляз, нош Наталля ческыт сюкасен, шыдэн, нянен утялтылӥз. Кӧлыны но ваньмызлы шуныт сэрег шедьылӥз. НКВД кемалась дырысен ини Ӝужгес черклы, уката ик отысь Гавриил иеромонахлы пиньзэ гизьыр йырйыса улӥз но муг утчаз - кызьы та Инмар кылэз жадьытэк тодытӥсьлэсь бурдзэ ӵогоно - гуртысь гуртэ тодытыса медаз ни ветлы, выль пуктэм черказ но калык медаз ни пыра. Кызетӥ аръёслэн пумазы Ӝужгес-Пельгала, быдэс бадӟымлэсь но бадӟым Россей кунысь гуртъёсы сямен ик, туж ӝож, кышкыт, бугрес аръёс вуизы. Коммунаос, артельёс, колхозъёс кылдытъяны кутскизы. Удмурт крестьян калыклэсь дауръёсын ӝик-ӝик утялтыса возем бусыоссэс, кенеръёссэс тӥяса, йыранъёссэс (межаоссэс) гырыса син сузёнтэм колхоз лудъёс кылдытъяны кутскизы. Пудо-животэз, ужан тӥрлыкез таласа сямен огазе люказы - колхоз фермаос кылдытӥзы, асьсэзыз ик скал кыскись, вал, ыж, парсь сюдӥсь, мушкась каризы, нош емышсэ - йӧлзэ, вӧйзэ, ыж гонзэ, музэ- чечызэ государстволы келязы. Ассэ крестьянэз гид берысьтыз картофка бакчаеныз кӧтсэ тырыса улыны кельтӥзы. Ужез яратӥсь, ӟеч улӥсь крестьян калыкез кулаке поттыса, вань ваньбурзэ таласа, асьсэзыз сантэмаса дор музъемысьтызы кужмысь улляса келязы я Сибире, я уйпал шаеръёсы. Гуртын улон туж огыр-бугыр луиз. Дауръёсын тупаса, зӥбыт-востэм улэм калык ог-огеныз ваче гадь вуизы, трос вир кисьтӥськиз. Ог-огдэ адӟемпотостэм карон, вожъяськон потӥзы. Ужез яратӥсьтэм калык улонэн кузёяськыны кутскиз. Пельга выжыослэн Ӝужгес гуртазы но ваче вуылонъёс луизы. Калык йыромиз: кытчы мыноно, кинлэсь юано, кытын зэмлык? Трос вал черк пала вамыштӥсьёс. Черк ӧз ваты таӵе кылылмтэ-адӟылымтэ сьӧсь ужъёслы ортчытонлы пумит луэмзэ. Бугыръяськон ӝутэм шуыса 1929 арын Гавриил иеромонахез ГУЛАГ-е келязы. Черксэ пытсазы. Кышкыт лагерьёс пыр потыса, Гавриил иеромонах гурт палаз берытскиз. Отысь со эшшо кужмогес осконэн вуиз. Черксэ усьтыны ӧз ни лэзе бере, оскись калыкен, лушкем азьёсы люкаськыса, вӧсяськылӥзы - тэльёсын, гурезь бамалъёсы гудэм гуосын-кельяосын, мурӝолъёсын. Сизьыметӥ, пе, вал лушкем вӧсяськон интызы. НКВД синзэ кыньыса ӧз улы, Ӝужгесысь батюшкаез син азьысьтыз ӧз ыштылы. Трос кышкатъязы, ӵыжопкае пытсаллязы, но Гавриил иеромонах Христос Инмарлэсь Ӟеч Иворзэ тодытэмысь ӧз дугдылы. Наталля солы шуиз вал: "Атай, уд кышкаськы-а? Виёзы ук! Эн ни тодыты". - "Кошкись ошмес вуэз дугдытыны уг луы", - пумитаз вазиз отец Гавриил. Нош ик НКВД-ос отец Гаврилэз пытсэт сьӧры келязы. Косӥзы осконлэсь куштӥськыны, со понна, пе, тыныд эрик сётомы, выль уже пырод, мукет адямиос кадь ик шудо-буро улод. Кинэ, кинэ, дыр, но пичи дырысеныз кын куртчон аресозяз вуэм, Инмарез яратыса, вӧсяськыса улэм, мукет улонэз, кырсез тодӥсьтэм иеромонахез озьы гинэ осконлэсь уд куштӥськыты, Иудаен артэ одӥг радэ уд пукты. Гавриил иеромонах судын ассэ зӥбыт-востэм возиз. Инмарлэсь ӧз куштӥськы, ас лулзэ ӧз вуза, мукетъёслэсь но. Та тырмыт вал ини сое "калыклэн тушмонэз" карыса ыбыны. Со вал 1938 арын. Со виын оскон понна курадӟон чидам эшшо одӥг удмурт пилэн дун-чылкыт лулыз Инмысь Атаймылэн престол азяз вуиз. Та арын ик черксэ куашкатӥзы, сэрттӥзы, тарказы. Анна Павловналэн верамезъя, черк юртэз парсь гид но карылӥзы. Ки уг берыктӥськы та сярысь гожъяны... Та сьӧлык но асьме калык вылын улэ-а? Инмаре, жаля! Синву вия... Шимес... Та сьӧд ужъёс понна ӧм ке ӧпкеле, асьмеды азьпалан номыр ӟечез уг возьма. Курадӟытыса виемъёслэн дун-шектэм вирзы "ӧпкеле, вӧсяське!" асьмелы шуэ. Библиялэн Усьтӥськон (Апокалипсис) люкетаз шуэмын: "Кузё-Инмар бордын али кулӥсьёс шудоесь; озьы шуэ Дух, асьсэлэн секытэсь ужъёссылэсь соос шутэтскозы, соослэн ужъёссы соослэн бӧрсязы мынозы". (Усьтӥськон 14:13). Нош кытчы мынозы сюрс но сюрс черкъёсты таркасьёслэн, Гавриил иеромонах кадь дун-чылкыт улэм Инмар адямиосты виылӥсьёслэн, вӧсяськон юртъёсты таркасьёслэн, Библиез тылэ куясьёслэн лулъёссы? Инмар тодэ, Со - Судья. Куке но одӥг институтын ӵош ужам Люси эшелэн, Людмила Леонидовна Карповалэн ас гуртысьтыз люкам иворезъя, Наталля кема аръёс, кулытозяз улӥз Ӝужгесын. "Калыклэн тушмонэзлэн" кузпалызлэн улонэз капчи ӧй вал. Улон азез гинэ ӧвӧл, улон интыез но таркаськиз. Быгатэмезъя, ӟеч муртъёслэн юрттэменызы, балаганлы укшась аслыз улон инты лэсьтӥз. Инмарез яратӥсь адями огшоры гинэ улыны ӧз быгаты, сюлмыз куриз на Инмар азьын ярамон кыӵе ке но уж лэсьтыны. Инмар солы сыӵе ужез возьматӥз: Сулейман Васьлейлэн кышноез, Олёна, нуны вайыкуз суйтэм- пыдтэм кылиз, вырӟылӥсьтэм луиз - паралич шуккиз. Картэз выль кышно ваиз, висись, вырӟылӥсьтэм кышноез солы кулэ ӧз ни луы - Олёнаез жаляса, Наталля сое дораз басьтӥз. Кӧня ке улыса, Олёналэсь Пильып пизэ но дораз ваёно луиз - Васьлейлэн выль кышноез сое урод кариз, кулэ ӧз кары. Наталля та кык кынартэм лулъёсты утялтӥз, вордӥз. Вӧсяськись Наталля апаезлэсь верамъёссэ пеляз поныса быдэ вуиз Пильып. Балаган коркаязы ик кышно ваиз; пыд йылаз йыг-йыг султэм бераз, выль юрт пуктӥз. Вить нылпи будэтӥз. Наталля апайзы кулэм бере, Пильыплэсь нылпиоссэ анаез, Олёна апай, бордаз кариз, визьлы-бурлы дышетӥз. Наталля апайлэн вӧсяськемныз Олёналэн мугорыз небытаз, ветлыны ӧз ни ке но быгаты, пуксьыса пукыны йӧндыриз. Вӧсяськись удмурт кышномуртлэн Инмар азьын ярамон уж лэсьтыса улэмез сярысь гожтӥсько но син азям пуксе, тодам лыктэ Финляндиын та выллемгес ик луэм учыр: секыт война бер аръёсы Ева нимо чебер финн ныл бызе ачиз кадь ик чебер швед пилы. Шумпотыса, шудо улӥзы егит кузпалъёс нунызы вордскон нуналозь. Выль шумпотонэн - нылзы вордсконэн ӵош, та семьяе ӝутыса вормонтэм секыт кайгу пыриз: нунызэ вайыкуз Еваез паралич шуккиз. Со вал 1945 арын. 2000 ар вуытозь, 55 ар ӵоже, кулытозяз, Ева ноку но ӧз султылы. Мар но ӧй вал та аръёс ӵоже! Нунызэ детдоме нуизы, картэз мукет кышно шедьтӥз, выль семья кылдытӥз. Ева висёнэныз ӵош огназ буш корказ кылиз. Улэмез уг ни поты вал, кулон но ӧз лыкты. Сюдыны, эмъяны, утялтыны кун учреждениос юрттӥзы, но оген кылён, быдэс ар ӵоже вырӟылыны луытэк кылльыны - Инмарез тодӥсьтэм мурт понна - со ад ук! Тон огнад, нокинлы кулэ ӧвӧл - пичи нылзэ но со доры нокин уг вайы, яратоно кузпалыз но ымнырзэ уг возьматы... кулон, кулон - кытын тон?! Тазьы туж курадӟыса, шимес малпанъёсын катьтэммем егит кышномурт доры Инмар аслэсьтыз адямиоссэ лэзиз - оскись кышномуртъёсты. Та дырозь Ева Инмарез уг тоды вал шуыны луоз - анай-атаез оскисесь ӧй вал, нылпизэс но Инмар законъя ӧз будэтэ. Выль лыктэм кышномуртъёс туж лякытэн гинэ Еваен вераськизы, Псалтирь чирдӥзы, Евангелиысь люкетсэ лыдӟизы. Эшшо лыктом шуизы, мед лыдӟоз шуыса Евангелие кельтӥзы. Ӵуказеяз но, усьсэ но, берло но вуылӥзы Инмарез яратӥсь кышномуртъёс. Ар куспын Ева Евангелиез кӧня ке пол лыдӟыса пыр потӥз, туж яратӥз псалом гуръёсты. Озьы со Инмарез тодӥз но улон азяз шунды ворекъяны кутскиз. Больницаын туж ке но умой утялто, Евалэн отын улэмез ӧз поты, солы гуртаз утялтӥсь сётӥзы, нош уйёсы утялтыны ветлӥзы Инмарлы оскись егит нылъёс - студентъёс, ужасьёс. Соос пӧлын ик асьмелэн тодмомы Маръя Картано но вал. Маръя пыр Евалэн улон юртаз мыным но вуылыны кылдӥз. ...Койка вылын кылле пурысьтам йырсиё, шунды кадь чилясь ымныро кышномурт. Чиньыосыз сяна, мукет мугор люкетъёсыз чик уг выро. Витьтон арлэсь но трос курадӟе ке но ини, Ева ассэ шудоен лыдъя: шимес курадӟон пыр со Инмарез тодӥз но выль адями луиз. Быдэс Псалтирез учкытэк лыдӟыны быгатэ, нош Библиез быдэссэ кӧня пол со лыдӟыса пыр потӥз! Инмарлы тау карыса, Инмарез данъяса, курадӟыса кылле кышномурт. Но малы пайми - татын, пичи гинэ коркан, сыӵе шӧдскымон Инмарлэн дэлетэз (благодатез) улэ - солэн но, мынам но ымнырам шумпотон- пальпотон улэ, синме усьтэме но уг луы, нош сюлмын - сыӵе шумпотон, каньыллык! Вераны кыл ик уд шедьты. Ева шуэ, та курадӟонэ ке ӧй луысал, ноку но Инмарез ӧй тодысал, кулысал ке, адэ сюрысал. Анаез но, атаез но, агай-вынъёсыз но сояз дуннее мыныны дасяськытэк, чылкытатӥськытэк кошкизы. Карт луонэз но кемалась кулӥз ини, нош Ева улэ но Инмарлы тау каре. Курадӟыса, вӧсяськыса, ӟеч ужъёс лэсьтыса, лулзэ-мугорзэ дун-чылкыт возьыса дасяське Инмысь Атайлэн юртаз пырыны. Священник лыктыса исповедь ортчытэ, причастие сётэ. Евалэн одӥг кайгуэз: вордэм нылыз, нылпи юртын будыса, Инмарез уг тоды, тодыны но уг тыршы. Ева доры со туж шер гинэ вуэ, но "анай" уг шуы. Вӧсяськыны куремзэ санэ уг поны. Та Евалэн вӧсь интыез. Ева кадь ик, мон но паймисько: Инмарез тодон понна одно ик курадӟон адӟыны кулэ-а? Малы сӥльвиро, шудо-буро, егит, кужмо адями сюлэмзэ Инмар пала уг берыкты? Яке туж ӧжытэз гинэ Инмар пала кариське... Эшшо малы паймисько: султылытэк, вырӟылытэк улӥсь кышномурт быдэс Псалтирь книгаез учкытэк вераны дышем сяна, вырись чиньыосыныз кулытозяз ӟеч уж лэсьтӥз. Олокыӵе но учыре сюрыса ӧлексы кылем адямиез гажась кунъёсын, шуом, Финляндиын, пӧртэм амалъёс утчало солэсь улон нуналъёссэ шулдыргес, улэм потымонгес карон понна. Одӥгысьтыз Инмар кылэз тодытӥсь эштосысь адямиос Ева доры лыктыса солы туж огшорыесь гинэ сувениръёс лэсьтыны ӵектӥзы... Вырӟылытэк кыллись кышномурт шумпотыса басьтӥськиз со уж борды. Ева кадь ӧлексы кылем муртъёслэсь киужъёссэс нимысьтыз магазинъёсын вузало. Инмарлы оскись калык юри лыктэ октӥськыны, секытэ сюрем адямиослэсь озьы тыршо мылкыдзэ ӝутыны. Трос дасо аръёс ӵоже Ева ас киыныз туж трос сувениръёс лэсьтӥз но соосты вузаса поттэм коньдонзэ, оло сю сюрс марка пала со люкаськиз, ваньзэ сётылӥз Африкаысь куанер, сютэм улӥсь калыкъёслы, миссионерской уже. Оло асьмелэн берыктэм книгаосамы но Евалэн ужаса поттэм лептаез (коньыез) вань? Удмурт кышномурт Олёна но финн кышномурт Ева одӥг кадь шугадӟонэз чидано луизы: кыксэс но нуны вайыкузы пери шуккиз. Еваез нырысь нуналысен берпум нуналозяз (Ева туэ кулӥз) Финн кун пичи нуныез кадь утялтӥз, сюдӥз-вордӥз, ӧз кушты. Вӧсяськись калык но вань уйёсы со вӧзын пукылӥз. Ӧлексы кылем кышномуртэз государство ас ки улаз басьтӥз. Мукет адӟонэз-чиданэз вал удмурт кышномуртлэн. Олёна картэзлы но, государстволы но кулэ ӧз ни луы. Инмар гинэ сое ӧз кушты: сётэм лулзэ утьыны Со Аслэсьтыз быръем сосудзэ - вӧсяськись, Инмарез уй но нунал данъяса улӥсь, пумтэм трос курадӟон чидам Наталляез сётӥз. Сюе гудӟыса, кызьы но озьы лэсьтэм балаган корказ со Олёнаез но солэсь вордэм атаезлы кулэтэм луэм пизэ ваиз. Каръян, мусо Наталля апае! Маин сюдӥд, кызьы вордӥд шудтэм улонэз адӟыны кылем та кык лулъёсты? Али кадь соку государство ӧлексыослы пенсия ӧз тыры, ӧз юрттӥськы ук. Туж секыт, сютэм аръёс вал со виын. Мон, война бырон арын вордскем адями, ас синмыным адӟи, пичи ке но сиёно-оскалтоно луи турын-куарез, лебедаез, сием потыса пуконэз но тодӥсько, кушкутэн но ветлэме вань. Нош тӥ куиньнады - ачид мӧйымемын ини, эшшо вӧзад пуко, кыллё кык кынартэм лулъёс. Инмар ке ӧй юрттысал, нокызьы но улыны ӧй быгатысалыд. Тон, Наталля апай, шонер верамед: Олёна - Инмарлэн нылыз, сое котькызьы ке но утёно. Чидантэм секыт учыре сюрем муртэз утялтэмед понна ик уго Инмар тледлы кӧттыр сётӥз, гольык но ӧд ветлэ. Ӧд кулэ, ӧд быре. Выжыды, ӟеч ужъёсты кылизы. Пичи нуны Пильып но быдэ вуиз, кузпал ваиз, вить пинал будэтӥз. Таре соос асьсэос быдэ вуэмын ни, асьсэлэн семьяоссы. Ю-нянь будэто, заводын ужало. Но Инмарлы тау каро меда? Сюдӥсь-вордӥсь, улэп улонысь адэз адӟем но таисьтыз дуннеысь кемалась кошкем Наталля апайзы, Олёна песяйзы понна вӧсясько меда? Пильып но кулэмын ни, лэся. Мед вӧсяськозы вал. Вань удмурт калык улэп ӵыжы-выжыосызлэн тазалыксы, осконзы понна, кулэмъёсызлэн - лулъёссы Инмарлэн Инмысь Эксэйлыказ мед сюроз шуыса мед вӧсяськозы вал. Асьмеос кылтэм-ымтэм, номыр валасьтэм пудо-живот ӧвӧл ук. Вӧсяськыса, ӟеч ужъёс лэсьтыса улон понна асьмеос кылдытэмын, со понна Кылдытӥсьмы, Вылысь Инмар асьмеды югыт дунне вылын возе. Инмарлы оскисьтэмъёс кышнозэс, нылпизэс кушто, Инмарлы оскисьёс шуге-леке сюремъёсты пыд йылазы султыто. Оскон понна курадӟон чидаса лулдэ сётэм Гавриил иеромонах, тонэн ӵош улонлэсь секыт ныпъетсэ - кироссэ нуыны чидам Наталия, Инмарлы оскись вань калык понна тӥ удмурт калыклэн зарни сосудъёсыз луиськоды. Калыкмы пӧлын тӥ кадьёс ӧй ке луысал, Инмарлэн улон книгаысьтыз удмуртъёс, оло нош, ӵушиськысалзы ини, кызьы Зэм Инмарез тодӥсьтэм трос лыдъем, кужмо калыкъёс дунне вылысь ышизы-быризы. Христос Инмарлэсь Ӟеч Иворзэ, дышетонзэ удмурт калыкты пӧлы вӧлмытӥсь, курадӟон чидам Гавриил иеромонахен Наталия, Инмарлэн престол азяз ми, сьӧлыкоос, понна но вӧсяське: удмурт калык Христос Инмар бордысь ноку но медаз усьы, сьӧлыко ужъёслэсь со мед куштӥськоз но Дунне Кутӥсь Куиньмо Инмарез данъяса, Инмар Анаез, вань святойёсты сӥлы карыса, вӧсяськыса мед улоз, азьпалась вань шугадӟонъёсты, куректон кайгуосты чиданы мед быгатоз. Аминь. 1 Азькыл Мукет ужъёсме ӝоггес быдэстонэз кулэенгес лыдъяса, лэся, "Комбат сюресъёс" шуыса нимам тодэ ваёнъёсты ялан палэнтылӥ но палэнтылӥ. Соосты лыдӟись доры кемалась вуттыны кулэ вал ке но ини. Угось Быдӟым Отечественной война пыр ортчемъёсты берло дыре пумен-пумен шергес тодазы вайыло, соос сярысь уг мадьыло, книгаос но уг гожъяло. Вормон нуналэ гинэ ожъёсын быремъёсты буре ваиськом, улэп кылем солдатъёсты сӥлы кариськом. Кӧт ӝож луэ таӵе югдурез адӟыса... Ми, ож тылӝу пыр потэмъёс, пумен ӧжытгес но ӧжытгес кылиськом. Ма карод, дыр бызе, сое уд дугдыты. Ог кызь ар ортчоз на но, оло, Быдӟым Отечественной войнаын шимес, секыт но виро сюресъёсты ортчемъёслэсь мадемъёссэс, тодэ ваёнъёссэс кылэммы уз лу ни. Соин ик мон нырысь ик вазиськисько егитъёслы, атыкай музъеммес али но вуоно утисьёслы: ноку эн вунэтэ, макем бадӟым виро курбон сётӥзы тӥляд атайёсты, песятайёсты, анайёсты но песянайёсты, тӥ эрико но шудо мед улоды шуыса. Соин ик лыдӟисьёслы ӵектӥсько "Комбат сюресъёс" шуыса нимам гожтэмме но. Владимир Голубев, отставкаысь полковник. Комбат сюресъёс Пичияк комната. Одӥг гинэ укно, отӥ кыре учкыны но уг луы - жон-жон кынмемын. Ӝӧк вылысь телефонъёс чалмемын. Борддорысь часлэн огпӧртэм тиккетэмез гинэ кылӥське. Час вӧзын ик бадӟым календарь ошемын. Владимир Васильевич Каракулов туннэ уй палась предприятиязы дежурной луэ. Та комнатаын со огназ. Укно дорын кӧня ке сылӥз но отӥ неномыре но адӟымтэеныз календарь вадьсы дугдӥз. Отын ӵужектэм кызьпуос суредамын, соос шур дуртӥ будо, укыр чебер адско. Огназ дыръя Каракулов ӵемысь учкылэ со кызьпуос шоры. Тодаз вае Удмурт шаерзэ, гурт вӧзысьтызы пичи шурез, отын чорыгамъёссэ. Электролампочка кысӥз - татын озьы луылэ гинэ. Владимир Васильевич таӵе учырлы дасям кӧйтылзэ ӝуатӥз. Ӝӧкез сьӧры пуксиз. Азяз - лыз вылӥё тетрадь. Нырысетӥ бамзэ усьтӥз но выльысь малпаськонэ усиз. Солы татчы, Чукоткае, возьмамтэ шорысь вуоно луиз. Али татын ялан уй. Кырын тӧла. Кыкетӥ этажысь укноез туэ лымы ӧз ӵокса, нош улӥез быдэсак согемын. Коркась потан ӧс вадьсын сюбег гинэ сюрес гудӟемын. Мурдалаезъя со мӧйы муртлы но пельпумозяз ик. Югыт нунал вуылымтэлы нырысь-валысь дышыны туж шуг. Часъёс шоры учкылыса гинэ валано: нуназе-а, уйшор-а али. Каракулов дырез чаклаз: ӵукна вуэ вылэм ини, нош со ӧз выдылы на. Весь малпаське, дырын-дырын кияз кутылэ кыдёкысь шоркарысьтымы вуэм гожтэтэз. "Бен, кутсконо ини. Тыныд но, отставкае потэм гвардиысь майорлы, тодэ ваёнъёс гожъян борды кутскыны дыр вуиз. Война ӵоже генерал кизили пельпумад ӧз усьы, нош батальонэн кивалтоно луиз. Комбатъёслэсь гожъямъёссэс лыдӟылыны ӧз кылды на. Тодмоосыд пӧлын но гожъяськисьёс ӧвӧл кадь. Я, оло тон ик нырысетӥез луод. Дор палысьтым тодмое но куре, туж куре ожмаськыса ортчем сюресэ сярысь гожтыны. Тани татчы, Чукоткаысь Лаврентие но гожтэтэз вуиз, шедьтэм ук, ява. Марлы бен кулэ луи солы? Мон кадьёс удмурт шаерысьтымы потэм муртъёс пӧлын ӧжыт ӧвӧл. А-а, валай, вылӥ орденэд, пе, вань. Озьы ик гожтэ: Днепр понна, пе, тыныд Ленин орден сётӥзы... Кыӵе дырысен гожъянъёсме кутсконо ай? "Вордӥськи но егит дырме Каракулино ёросысь Вылӥ Гыя гуртын ортчытӥ. Школаын дышетсконме йылпумъяме бере Иже мынӥ, ремесленной училищее дышетскыны пыри. Кӧня ке ар заводын но ужай, нош 1938 арын сӥзьыл монэ армие басьтӥзы". Владимир Васильевич ручказэ кияз кутӥз но, тетрадь бам вылын нырысетӥ чуръёс кылдӥзы. * * * Война кутскыку, мон, лейтенант, Амур дурысь карын сылӥсь огаз ожгар частьын миномётной взводэн кивалтӥ. Ньыльдон кыкетӥ арын гужем оже пыриськыны кылдӥз. Фронтъёсын югдур соку секыт вал. Гитлер ожгарчиос Волга но Кавказ пала ожалскизы. Фронтэ мынонмы сярысь тодӥмы вал ини. "Вуиз милям но возьмам дырмы!" - шумпотӥськом. Казармаосамы берпуметӥ уйзэ кӧломы но, эшелонъёсы пуксьыса, фронтэ вырӟом. Куазь ӝомытаку, шуак тревога ялӥзы но милемыз плаце султытӥзы. Нокин уг тоды, мар луиз. Оло, нош ик фронтэ мынонмес ӝегато-а шуыса малпан йырамы берга. Полклэн командирез Исаков майор но малы ке сюлэмшугъяське. Но тани со зол кесяськыса вераз: - Фронтэ мынон дырмы уг воштӥськы! Ми тӥледыз, тазьы тревога ялыса, Обороная Калык Комиссарлэн али гинэ полкамы вуэм приказэныз тодматыны люкам. Кылзэ, туж сак кылзэ! Тушмонэн ваче син луыкумы, та приказысь кылъёсыз котьку тодады возе!" Озьы ми кык сю кызь сизьым номеро приказэн тодматскимы. Отын шуэмын вал: "Эшшо чигнамы на ке, асьмемыз но быдтозы, соин ӵош атай музъеммес но быдтомы. Одӥг вамышлы но чигнаны уг яра!". Али ке но та кылъёсыз кылӥсько кадь. Командиръёсмы но, комиссаръёсмы но соосты ож лудын туж ӵем тодамы вайытылӥзы. Мон но - взводысьтым солдатъёслы. Эшелонысь васькеммы бере фронт дорозь пыдын мыноно луиз. Куазь пӧсь. Сюрес вылысь тузон ӝутске, шоканы секыт. Нош командиръёсмы ялан дыртыто: ӝоггес Дон шур дуре потоно. Шунды пуксем бере гинэ ӧжыт капчигес луэ, инме но ялан учкылоно ӧвӧл, тушмон самолётъёс уг ни лобало. Мон взводысьтым вал уробо вӧзынгес вамышъясько. Отчы ньыль миномётъёс но минаос тыремын. Нош юрттӥсе, старшой сержант Кирпиченко, взводлэн азяз ик сюрес шортӥ вамышъя. Дырын-дырын мышказ учкылэ. Тани со дорам вуиз. Пилоткаеныз ымныр вылысьтыз пӧсямзэ ӵушылӥз. - Пӧсь, лейтенант. Кема мынӥськомы ини. Ӝоген пыласькомы, дыр. Донэз адӟылэме ӧвӧл на, паськыт но чылкыт шур шуо. - Пыласькомы, фрицъёс ке лэзизы, - ачим но, юрттӥсе сямен ик, Дон шур сярысь малпаськыса вамышъясько. Милям дивизимылы Дон шур вамен выжыны но Серафимовичи кар дорын плацдарм басьтыны косэмын вал. Полкысьтымы нырысетӥ батальонлы ваньмызлэсь азьло мыноно. Шур дуре потыса, сое выжыны дасяськыны кутскимы. Дыр тупатэмын ини - уйшор бере выжоно. Пуръёс лэсьтӥм. Соос вылын сю кызь метр ёрос шур вамен уяны кулэ. Стрелковой роталэн командиреныз, полкысьтымы разведчикъёсын кусып тупатӥ. Батальонмылэн командирез Бакшеев капитан соосын ӵош, ваньмызлэсь азьло, мыным но взводэным шур вамен потыны косӥз. Расчётъёсмес но, миномётъёсмес но кык пур вылэ интыямы. Нырысетӥез вылын ачим, мукетаз - юрттӥсе - старшой сержант Кирпиченко. Дыртоно, кужмогес полысано, визыл ву пуръёсыз уллань но уллань нуэ. Котырамы минаос пуштыло. Сӧсырмыны сюрем солдатъёсмылэн юрттэт куремзы но кылӥськылэ ни, нош ярдурозь куамын-ньыльдон метр ёрос на. Огез мина пурмы вӧзын ик пуштӥз, милемыз вуэн пужрак пазьгиз. Вуэ тэтчылӥмы. - Пур борды кырмиськылэ, дэмен донгомы, - косӥ мон солдатъёслы. Потӥм. Азямы ик - меӵ ярдур. Милемлы удалтӥз: пулемётъёс йыр вадьсамы ик дугдылытэк тачырто ке но, пуляос отчы уг ни вуыло. Югыт луэ ини, дыртоно. Миномётъёсмес но минаосмес басьтыса, шур кузя вамыштӥмы. Разведчикъёслэсь командирзэс пумитамы. Мыным но визь-кенеш сётӥз: - Азьпаламы вукырем вань, отчы мынэ. Но мыным стрелковой роталэсь командирзэ шедьтыны кулэ на. Кытын со? Оло, яр вылэ но тубиз ини. Мыным миномётъёсыным ыбылыса батальонмылы выжыны юрттоно. Сюбег но мур вукыреметӥ вамышъяськомы. Милемлы миномёт, мина ныпъетъёсын вамышъяны секыт. Озьы ке но, солдатъёсы куаразэс уг поттыло. Ӝыны иськем ёрос ортчыса, вылӥе тубимы. Вукыремысь потэммы бере ик немецъёс шоры учырам. Ӟырдыт ож пуромиз. Ярам ай, разведчикъёсмы юрттӥзы. Озьы ке но, вакчи гинэ ожын взводысьтым быдэс расчёт бырыны шедиз. Стрелковой роталэн командирез но татчы ик вуиз. Ми, куинь лейтенантъёс, ярдуре лэсьтэм дзотъёсысь пулемётчикъёсыз нырысь ик быдтыны малпам. Соос батальонмылы шур вамен выжыны люкето. Солдатъёсмес отделениен-отделениен люкылыса, дзотъёс пала мышкысенызы матэ но матэ кариськиськомы. Тушмон пулемётчикъёслы милям омырскеммы возьмамтэ шорысь луиз. Кӧнязэ ке дзотъёсыз гранатаосын чалмытъямы, нош огез ялан ыбылэ на. Куинь солдатъёсыным со доры нюжтӥськимы. Таиз дзот мур гудыса лэсьтэмын вылэм, амбразураез меӵ ярдуре пасямын. Отысен немецъёс асьмелэнъёсты узвесь зорен пылато. Ӧссы юн, ӵоксамын. - Та ӧсэз пуштытоно, - косӥ мон огезлы солдатэлы. Танк пуштытон граната гудыртэм бере гинэ пулемёт чалмиз, киоссэс ӝутыса, немецъёс кыре потӥзы. Ӧжыт улыса, мон со дзотлэн пушказ пырай. Кык пулемётъёсын ыбыло вылэм фашистъёс, патронъёссы, гранатаоссы лачак кылиллям на. Табере мукет подразделениосмылы люкетӥсь сокем ӧз луы ни. Милям нырысетӥ батальонмы но, бӧрсямы мукетъёсыз но та нуналэ, шур вамен выжыса, вить иськем ёрос азьпала мынӥмы на. Ожмаськонлэн кыкетӥ нуналаз мыным бырыны сюрем командирме воштоно луиз. Озьы мон миномёт ротаен кивалтыны ӧдъяй. Лек ожмаськыса, батальонмы нуналлы быдэ азьлань но азьлань мынӥз. Миномётъёсынымы ыбылыса, ми пехоталы юрттӥм. Кӧня пол тушмон пумитамы ӝутскылӥз но, сое пазьгылоно луиз со нуналъёсы - вераны ик шуг. * * * Та чуръёсме гожтӥсько но, синъёсы нюромизы. Вуж яраосме исаме уг поты ни вал но, дор палысьтым тодмое кулэ шуиз. Нош ик ӝӧк вылысьтым гожтэтъёссэ киям кутылӥсько. Бен, тодам ваёно, гожтоно: кӧня умой адямиос бырылӥзы со нуналъёсы, котькуд гурт, котькуд вырйыл вӧзы ватылыса кельтылӥм соосты. Кӧня ар ортчиз ини, нош сюлэм ялан вӧсь луэ. Ӧвӧл, огез но ож вунэмын ӧвӧл, али кадь ик син азям пуксё..." * * * Та нуналэ полкмылэн командирез азьысьтымы вырйылэз басьтыны косӥз. Комбатмы шуге-леке вуиз: кинэ ыстоно? Кыказ ротаосын алигес гинэ егит лейтенантъёсыз командире пуктоно луиз, нош куинетӥяз ротаын солдатъёс ӧжыт кылемын. Малпаса- малпаса, со монэ дораз ӧтиз. - Люкалэ ротаысьтыды вань солдатъёстэс но сержантъёстэс. Бӧрсяды басьтоды на куинетӥ ротаез. Отын дасо пала гинэ адями кылемын на. Мон боецъёсты люкай но ужпумез валэктӥ. Шунды инвис сьӧры лэзиськиз, бусыын шыпыт, ыбылӥськемъёс уг кылӥсько ни. Полклэн командирез разведчикъёсмылэн ивортэмзыя шуиз вал, немецъёс, пе, вырйылэз кельтӥзы. Соин ик ми туж дыртӥськомы. - Ӝоггес, ӝоггес, эшъёс! Учконо ке, вырйыл сокем ик ӝужыт ӧвӧл кадь, но отысен азьпалась интыос кыдёке адско. Соин ик та вырйылэз одно басьтоно, отчы юнматсконо. Вырйылэ тубыса вуимы гинэ, пумитамы немецъёс лыкто. Соос милесьтым тросгес. Ваче луыса, ми но, немецъёс но тыпак дугдӥмы. Огмы шоры огмы учкиськомы. Соку мон кеськи: - Жуге убиръёсыз! Тышкалэ сьӧсьёсыз! Кин кызьы быгатӥз, озьы тышказы фашистъёсыз: прикладъёсын, пичи лопатаосын, мыжыкен. Мон но лопатаен шонаськисько. Фрицъёс танкъёссы сьӧры мыныкузы гинэ кышкатэк, йырзэс вылэ ӝутыса вамышъяло. Нош татын соослы пумит ӟуч солдатъёс мыжыкъёсынызы урдскизы. Ма веранэз, тышкамы ми соосыз, дас кыксэ солдатъёссэс пленэ но басьтӥмы. Мынамъёс пӧлысь куинез сӧсырмизы. Аслам йырам но фриц маин ке шуккыны вуиз. Йырме бинёно луиз... * * * Ӝӧк вылысь кагазъёсме бугыръяй, кулэзэ шедьтӥ: нырысетӥзэ сӧсырмиз 1942 арын 17 гудырикошконэ. Бен, ӵапак со нуналэ вырйыл понна ожмаськонмы вал. * * * Вырйылын окопъёс гудӥм но талам пыӵал тӥрлыкез лыдъямы. Ӝыт пал старшинамы термосъёсын сиён-юон вуттӥз. Котелокысь ӝук сиыны кӧтурдэс вылам выдӥ. Но мар-о та, из вылэ выдӥськем шат? Интыме воштӥ, нош ик мар ке люкетэ. "Татын но из", - нукыртӥсько. Юрттӥсе паймиз: - Татын нокыӵе изъёс ӧвӧл. Султӥ но бур пал урдэсысьтым наганэ ки улам сюриз. Али гинэ йырам чильдӥз: "Фашистъёсын жугиськыкум со сярысь чылкак вунэтӥськем ук! Кӧнязэ ыбыны быгатысал..." Но, кызьы шуо, жугиськон бырем бере мыжыкъёсын уг ни сэзъяло. Кӧня ке нунал ортчыса, выльысь азьлань вырӟим. Собере дугдӥмы, юн-юн окопъёс гудылӥмы. Ми доры выль юрттэт кужым вуиз, ротамылы минаос но тырмыт ваизы. Нош фронтъёсысь нуналлы быдэ шурдытэсь иворъёс вуыло. "Немецъёс Волга дуре потӥзы ини, Сталинградын лек ожъёс мыно". Ми вылэ но немецъёс ӵем плацдармысь урдскылӥзы, но милемыз сэрпалтыны ӧз быгатэ. Та ожъёсын мынам солдатъёсы кыдазы. Табере соос зэмос боецъёс вал ини. Ротае ӝыныез воштӥськиз ке но, егитъёсыз солдатъёсы трос чидамъёсызлэсь адӟем карозы, ожмаськыны дышетскозы. Тодам ваисько, кызьы ми Октябрь праздникез пумитамы. Немецъёс быдэс уй ракетаосын югдытӥзы, ыбылӥськонъёс но ӧз чалмылэ. Ми серекъяськомы: фрицъёс дано нуналмылы салют сёто. Старшинамы солдатъёсмылы быдэн сю граммзэ люкылӥз, кызьы шуиськомы вал, "наркомлэсьсэ". Сӥлен ӝук но туж ческыт кошкиз. "Праздникмы удалтӥз!" - юрттӥсеным Попов лейтенантэн шумпотӥськом. Со полкамы алигес гинэ вуиз, егит на, но оже пыриськылыны вуиз ини. Огпол вазь ӵукна монэ батальонмылэн командирез Бакшеев капитан дораз ӧтиз. Дыртӥсько комбатлэн чакласькон интыяз. Пыд улын лымы куажыртэ, кезьыт тӧл ымныре пельтэ, шинель пыр ик сӥсъя. Чакласькон интыын капитан Бакшеев но кык связнойёс гинэ. Комбат, пичи пуклёк вылэ султыса, учкон пась доры матэ кариськиз но возьматӥз: - Разведчикъёсмы толон гинэ немецъёслэсь выльёссэ пулемётъёссэс шараязы. Учке умойгес, чакласькон интызэс но воштӥллям, лэся. Тӥледлы соосыз та нуналъёсы пазьгоно луоз, минаосты тырмыт-а? - Ӧжыт кылизы. - Эн жаля, туннэ-ӵуказе вуттыны кулэ. Капитан валэктонзэ йылпумъяны ӧз вуы, телефон вӧзын пукись связист сое ӧтиз но трубказэ сётӥз. Бакшеев кема ик ӧз вераськы. - Возьмалэ монэ татын, ротаосы связнойёсыз ыстэ, командиръёс татчы мед люкаськозы, - траншеяе потон азяз шуиз комбат. Шӧдӥсько: капитанэз юнме шорысь ӧз ӧте, бадӟым воштӥськонъёс луозы. Блиндаже пыремез бере ик комбат командиръёслы вазиськиз: - Азьлань мыныны дасяськоно. Дырмы ӧжыт. Ваньзэ чаклано: патронъёс, гранатаос тырмыт луыны кулэ. Сталинградын ожмаськисьёслы юрттыны дыр вуиз. Ӝоген ми ожмаськон тӥрлык тырмыт басьтӥм, калык но вуиз на. 19 шуркынмонэ уез кӧлытэк ортчытӥм. Ӵук ӟардонэз солдатъёс но командиръёс траншеяосын пумитазы. Ӵапак 7 час но 30 минутэ йыр вадьсытӥмы горд шиос лобизы, озьы "катюшаосмы" ӵашйизы. Шундыё нуналэ кадь ик югдӥз. Ваньмыз орудиос ыбылыны кутскизы. Мон косонъёсме кесяськыса вераны турттӥсько, нош куараме ачим но уг кылӥськы. Комбатлэн берлозэ пумиськыкумы возьматъям тушмон пулемёт каръёс шоры ыбылӥськомы. Котырак гудыръя, азьпаламы ваньмыз тылын, ынэн басьтӥськемын. Кема кыстӥськиз озьы. Но тани чалмыт луиз. Азьлань мыныны ӧтьыса, инмын ракетаос ӝуатскыны кулэ кадь ини. Но выльысь гудыръяны кутскиз, "катюшаос" выльысь ӵашйизы, бадӟым орудиос но ыбылыны ӧдъязы. Со дыре ик отын но татын омыре ракетаос лобизы. Асьме боецъёс траншеяосысьтызы потылӥзы но танкъёс бӧрсьы азьлань бызизы. Немецъёслэн нырысетӥ траншеяоссы дорозь. Отын немецъёслэн тросэз пулемётъёссы, миномётъёссы пазьгемын вал. Нош кыкетӥ траншеяос азьын ротаосмы музэ ӝиптӥськоно луизы, угось немецъёс татчы кужым люканы вуиллям ини. Пулемётъёссы ыбыло, миномётъёссы но улӟизы. Ми ыбылон интымес ялан вошъяськом, стрелок ротаослэсь кыльыны уг яра. Комбатэн но кусып возёно, со тушмонлэсь ватскем интыоссэ возьматъя, соосыз ачим но шедьтылыны тыршисько. Шуак вӧзам секыт шокась егит солдат уськытскиз - батальонлэн штабысьтыз связист: - Капитан... Капитанмы быриз. Батальонмы командиртэк кылиз. Комбатлэн политчастья юрттӥсез тӥледыз ӧтьыны косӥз. Со но сӧсырмемын, - ивортӥз со. Мон матысьтым Попов лейтенантэз адӟыса кеськи: - Мон интые кылиськод. Тушмон миномётъёслы маза эн сёт. Зӥбе соосыз. Вис карытэк ыбылэ! Немецъёслэн талам траншеяысьтызы комбатлэн чакласькон интыяз шимес суредэз адӟи: Бакшеев но, радист но, кӧняез ке связнойёс но быремын. Рация сузмемын. Полклэн командиреныз кусып ышемын. Югдур валамон: татын ӝегатскыны уг яра, ялан азьлань мыноно. Ваньзэ связнойёсыз ротаосы ыстылӥ. Мынам ӧтемея ротаос выльысь ӝутскизы но немецъёс вылэ омырскизы. Бызьыны шуг вал, интыен-интыен нюжтӥськылоно но луылӥз. Тушмон палась пуляос лобо, котырын минаос пуштыло. Пӧсь но, ӝокыт но, кышкыт но. Азьпаласьёсыз солдатъёсмы доры бызьыса вуи но гуэ выдӥ. Отын эшшо кык боецъёсмы вал на. Малы, пӧй, кыллиськоды? Огез шорам учкытэк шуэ: - Уд адӟиськы шат, йырез но ӝутыны уг луы ук... - Ваньмылы ӵош ӝутсконо но тушмон вылэ ожалсконо. - Ма, ӝутскыны луысал, дыр, но, кин бӧрсяз нуоз. Командиръёсмы, пе, ваньзы быриллям... - Ваньмыз ӧз быре. Комбат интые мон кыли. Вераськон куспын шоканме радъяй но кеськи: - Кык ракета лэзи ке - азьлань! Часэ шоры учкисько: ротаосы связнойёсы вуизы, дыр, ини. Ракетница кутыса, бӧрсьысь кык пол омыре ыби. Соку ик гуысь потыса султӥ но "ура-а-а!" кеськыса азьлань бызи. Бур паласен но, паллян паласен но "ура!" кесяськемъёс кылӥськизы. Фрицъёслэн траншеязы доры та шуытозь вуимы но сое басьтӥмы. Кӧняез ке немецъёс киоссэс ӝутылӥзы. Ӝытазе, 20 шуркынмонэ, мон полклэн командирезлы нырысетӥзэ ивортонме ыстӥ. Майор паймиз, пе: "Малы нырысетӥ батальонэн Каракулов старшой лейтенант кивалтэ? Со миномётчик ук?" - Собере валатскем но ватсам на: "Тодӥсько мон старшой лейтенантэз, усто командир. Солэн пӧрмоз. Комбатэ юнматоно". Вить уй-нунал ӵоже батальонмы азьлань мынӥз. Милемлы та нуналъёсы танкистъёсмы зол юрттӥзы. Куд-ог дыръя соослэсь бере но кыльылӥмы. Соин ик нуналаз кызь вить- куамын иськем ортчылоно луылӥмы. 24 шуркынмонэ мукет батальонъёсын ӵош Калач каре вуимы. Милесьтым азьло отчы танкъёсмы пыризы ни вал. Татын ми тодӥмы, лымшор паласен тушмонэз пачкатӥсь частьёсын пумиськимы шуыса. Политчастья юрттӥсе котырысьтыз командиръёслы но боецъёслы ивортӥз: "Тушмон котыртэмын!" Та сярысь тодыса, ми пумтэм шумпотӥм, угось Сталинградын ожмаськись куатетӥ немец армия нальыке шедиз. Мукетъёсызлы сямен ик, нырысетӥ стрелковой батальонлы но Калачын кема ӝегатскыны ӧз кылды. Солдатъёслэн шуэмзыя, бинялтонъёсмес но умой-умой куасьтыны ӧм вуэ, нош ик азьлань мыныны приказ сётӥзы. Ярам ай, патронъёс но гранатаос тырмыт вуттӥзы. Сюресмы нош ик Дон шур дуре вуттӥз. Та паськыт шурез выжыны ачиз инкуазь но юрттӥз. Кезьытъёс шурез зӧк йӧэн шобыртӥзы. Со нуналэ ик батальонмы тушмонэн пумиськиз. Артиллеритэк оже кызьы пыриськод? Полклэсь командирзэ пушкаосын юрттыны курисько. Нош полкысь артиллерия Дон дурын ӝегам. Соку дорам вуиз азьвыл кивалтэм ротаысьтым старшой сержант Кирпиченко. - Вукыремысь кык немец орудиосты шедьтӥм, - ивортӥз со. - Снарядъёссы но отын тырмыт. Ыбылыны быгатӥськомы, ойдолэ фашистъёсты зуркатом. - Малпанэд туж умой но, туж дыраз но, - шумпотӥ мон. Кирпиченколэн солдатъёсыз тушмон пулемётъёсты пазьгылӥз но, ротаос выльысь азьлань мынӥзы. Кужыммы пумен кулэсмиз но кулэсмиз. Озьы ке но, 28 шуркынмонэ полклэн командирез Гумрак пала мынон но Россошка шур дуре потон сярысь ялӥз. Уйшор бере кык часын нырысетӥ батальонмы азьлань вырӟиз, со бӧрсьы - мукетъёсыз. Ӝоген тушмон сайказ. Пумитамы секыт пулемётъёсыз йыггето. Йыр йылтӥ пуляос шуласа ортчыло, ракетаос уез нуназе кадь югыт каро. Сюресмылэн кык пал дуртӥз ик чакласьёсты ыстыса, одӥгеныз ротаен вукыреметӥ азьлань мыныны кариськи. Со вие ик мукет батальонъёслэн азязы ыбылӥськон кужмояз но кужмояз. Нош мон ротаеным тушмон мышкы потыны быгатӥ. Пулемётъёс кытын ке берамы тачырто ини. Ӵапак со вакытэ чакласькыны ыстэмъёсы вуизы. Азьпаламы куараос, пе, кылӥсько. Дугдӥмы. Тушмон палан пеймыт тыл чилектӥз, землянкалэн ӧсэз усьтӥськиз - куараос отысь кылӥсько вылэм. Одӥгез взвод сое котыртӥз. Дорамы мукетыз но чакласькись вуиз на. Матын ик мукет землянка, пе, вань на. Тазэ мон ачим эскероно кариськи. Учкисько: музъем улысь ӝутэм муръёетӥ ӵын потэ, иське, фрицъёс шунтӥсько. Мар кароно? Та кык землянкаосын роталэсь ятыр тушмон солдатъёс люкаськемын, дыр. Уть, кыӵе лабырто. Нош милям кык взвод гинэ. Малпаськыса улонэн, ӝегатсконэн йырин ӧвӧл, кыкетӥ взводлы тазэ но землянкаез котыртыны косӥ. - Пленэ сётӥське, тӥ котыртэмын! - ӧслы матэгес кариськыса кеськиз огез солдатмы. - Хендэ хох! Плен!.. Плен!.. - черектӥз на со. Землянкаын шып кариськизы. Усьтӥськем ӧсысь шуак автоматэн ыбылыны кутскизы, мукет землянкалэн ӧсэз но паськыт усьтӥськиз но отысь трос немецъёс бызьыса потӥзы. Автоматъёсынызы ыбылыса, траншея кузя бызё. Пленэ сётскыны уг ик малпало. Землянкаосы муръёостӥ но пичи укноостӥ гранатаос куям. Улэп кылем фашистъёс киоссэс ӝутыса потылӥзы. Соосыз полклэн штабаз келямы. Та нуналъёсы ик вунонтэм учыр вал на. Мон батальонэным мукетъёсызлэсь азьпала потӥ, паллян паламы но, бур паламы но подразделениос ӧвӧл. Рацимы уг ужа, полкмылэн командиреныз кусыпмес ыштӥм. Азьпаламы чакласьёсты ыстыны кариськи. Ӝыны час пала ортчыса, соос берытскизы. Азьпаламы, пе, кыӵе ке гурт адске. Планшетысьтым картаме поттыса учкисько: нокыӵе но гурт луыны кулэ ӧвӧл. Сюресмес шат ыштӥмы? Ӧвӧл, шонер мынӥськомы кадь. Ӝоген азьпаламы бус пыр коркаос адскизы. Выльысь картаме поттӥсько, учкисько: татын чылкыт бусы гинэ луыны кулэ шуыса возьматэмын. Ас поннам топографъёсыз тышкаськисько ини, вужмем картаез сётӥллям шуыса. Оло, мон ик янгышай, бус пушкытӥ мынонъямы ачим йыроми но батальонэз мукет интые поттӥ. Озьы ке, полклэн командирез азьын возьытэ вуо ук. Я, мар луоз - луоз. Гуртэ мыноно, солэсь нимзэ тодоно. Ротаос пасьтана кариськизы, гурт дорозь иськем ёрос гинэ кылиз на. Куашетытэк мыныны тыршиськомы. Бинокль пыр адӟисько ини: пичиесь гинэ коркаос быдэсак лымыен согылэмын, лапегесь гинэ вугуослэн юбооссы букосъёсысь урдскылэмын. Нош гуртын нокин уг адӟиськы, иське, немецъёс гуртэз кельтӥзы, дыр. Оло, ватскиллям но милесьтым матэ кариськеммес возьмало, шӧдтэк шорысь ыбылыны кутскыса, трос калыкмес быдтыны малпало. Гурт дорозь кыдёкын ик ӧй вал ни, бур паласен шорамы автоматъёс тачыртӥзы. Ми азьлань бызиськом, миномётъёсмы ыбылыны кутскизы. Гурт доры вуимы гинэ но, ыбылӥськонъёс чалмизы. Разведчикъёс ивортӥзы, рота мында немецъёс вукыреметӥ, пе, чигнало. Соосыз уйыны косӥ. Нош ми азьын нокыӵе коркаос вылӥллямтэ. Согиськем сюрес вылын бадӟым шобыртылэм машинаос, тягачъёс, танкъёс но зениткаос сыло вылэм. Инме орудиослэн гумыоссы вылэ ӝутылэмын, соосыз ми вугу юбоос кожаськеммы. Машинаос ваньмыз лымыен согиськемын, бензинзы быремен, лэся, дугдӥллям. Табере ини мон Сталинград пала шонер мынӥсько шуыса валай. Ӝыт пал полклэн командиреныз герӟаськыны быгатӥ. Нош со выльысь косэ: тушмон бӧрсьы ик, сое ыштылытэк, азьлань но азьлань мыноно. Сталинград дорозь кыдёкын ӧй вал ни. 10 толшоре 8 часын ӵукна артиллеримы кужмо гудыръяны ӧдъяз. Инмын ялан гуретӥзы штурмовикъёсмы - ИЛ-ёсмы. Батальонмылэн азяз тушмонлэсь юнматэм пузкаръёссэ пазьгылыны нимысьтыз дасям солдатъёс мынӥзы, соосын ачим кивалтӥ. Секыт йӧтӥз та нуналъёсы: куазь кезьыт, лымы мур. Асьмелэн артиллеримы ӵындӥсь снарядъёсын но ыбылӥз. Ӵын сьӧры ватскыса, милемлы азьло ик чакласа шедьтылэм дзотъёс доры потыны кулэ. Кык час ӵоже солдатъёсмы тушмонлэсь юнматэм каръёссэ басьтыны выризы. Нырысь огзэ дзотэз пазьгизы, бератаз траншеяетӥзы мукетызлэн мышказ потӥзы. Татын но лек ож пуромиз, фашистъёс сётсконо луизы. Сталинградэ пыреммы бере но ай батальонъёсмы кык арня ӵоже жугиськизы на урмыса пумитъяськись фашистъёсын. Тулыспалэ шумпотон ивор вуиз: "Вормон! Тушмон сётскиз!" Витьымтэ шорысь чалмыт луиз. Солдатъёс соку гинэ ульчаосыз но, Волга шурез но ӟеч-ӟеч адӟыны быгатӥзы. Огзэс-огзы ӟечкылало, шумпото. Вӧзтӥзы ик йырзэс ошыса ортчыло пленэ сётскем гитлеровецъёс, пыдъёссэс секытэн кыскало, мычиськыны луымтэен будэм тушъёссы бордын йӧ ӟузыриос ошиськылэмын, йыръёссы маин сюрем биньылэмын: вуж кышетъёсын, мешокъёсын, ӟустариосын, куашкам пыдкутчанъёссы гозыен керттылэмын... Вормонлы шумпотэмме солдатъёсы азьын мынам но вераме, соосты ӟечкыламе потӥз. Политчастья юрттӥсеным кенешыса, Волга дуре потӥмы но батыръёсмес шур дуре ик султытӥмы. Трос ӧй вал ни соос, быдэс батальонысь рота мында гинэ кылемын на. Сюлмысьтым ик шумпотыса но со дыре ик бырем эшъёсмы понна куректыса вазиськи: - Батыр солдатъёсы, дуно эшъёсы, ӟечкыласько тӥледыз бадӟым вормонэн. Кышкасьтэм ожмаськемды понна тӥ пӧлысь троссэ матысь дыре вылӥ дан пусъёсын сӥлы карыны ӵектомы. Но азьпалан асьмелы кузь но секыт сюрес ортчоно на. Тушмонэз пузкараз улляно, быдтоно. Изьыме йырысьтым басьтӥ но азям сылӥсь солдатъёсылы йыбырттӥ. 4 тулыспалэ дивизимес вакчи дырлы гинэ шутэтскыны ожъёсысь поттӥзы. Интыяським Воронеж областьысь Графская станцие. Та нуналъёсы ик ивор вуиз: ми гвардеецъёс луимы. Нуналлы быдэ полкамы, батальонамы выльёсыз командиръёс но солдатъёс вуылӥзы. Али вуэм ожгарчиосты дышетӥмы. Соослы ожмаськеммы сярысь мадимы. Мед, пӧй, адӟем карозы ожъёсын кыдам солдатъёслэсь. Егит пиос шоры учкисько но валасько: соос тодо ини, мар но кыӵе со война - вир кисьтон, трос быремъёс. Нош ми войнаез киноосъя гинэ тодӥськомы вал. Ачим но Ижын "Колосс" кинотеатрын нырысетӥзэ куараё "Чапаев" киноез учкыкум горд армеецъёслэсь валъёс вылын ворттэмзэс возьматыкузы тодӥсько ни вал: соос вормозы. Кӧня ке дыр ортчыса, мон батальонме тырмыт калыкен нырысьсэ адӟи. Полкмылэн командирез воштӥськиз. Сталинградын секыт сӧсырмем Еремеев майор интые алигес гинэ вуиз Артемьев. Таиз но майор. Мугорын ӝужыт ик ӧвӧл, шинель вылтӥз еен ӝик-ӝик керттӥськыса ветлэ. Йыраз кезьыт куазен но горд дуро фуражкаен. Плац вылын зӧк куараез командирлэн кадь кылӥське, нош кызьы возьматоз со ассэ ож лудын? Строй азьын мыным Горд Кизили орден сётыкуз, майор вераз: - Орденъёсыд, медальёсыд уно мед луозы на. Инты тырмоз: уть, гадьыд кыӵе паськыт. Пельпумъёсад но бадӟымесь кизилиосын погонъёс вурыны мед кылдоз, комбат! Берлогес пумиськылыкумы, майор кытысь луэмме, кыӵе училищеез быдтэме сярысь юалляськиз. - Кам шур пала, Урал гурезьёс пала вуылыны ӧз кылды. Шулдыресь интыос, дыр, шуыса малпасько. Нош мон Одессаын вордски. Али вордскем интыосы немец ки улын на, - лулӟиз со. Шутэтскыны кема ӧз сётэ. Ньыльдон куинетӥ арын гужем нуналъёсы, Курск дорын ожмаськонъёс дыръя, тросэз солдатъёсмы оже пырылӥськымтэен, лэся, милемыз - гвардеецъёсыз Воронеж фронтлэн командующиез утьыса возиз. Нош асьмелэнъёс азьлань вырӟем бере, дивизимы но оже пыртэмын вал. Туж умой тодӥсько на Белгородэ пыреммес. Татысь калык милемыз сяськаосын пумитаз, улмоосын но мукет ческыт емышъёсын кунояз. Нош собере сюресмы ортчиз Злочев, Богохудово но Ахтырка каръёс пыр. Ахтыркаысен дивизимылэн командирез милемлы, нокытын но ӝегатскылытэк, Днепр доры потыны косӥз. Ми валамы, макем секыт ожъёсы пыриськоно луоз табере егит солдатъёсмылы. Ротаосамы калык тырмыт, пыӵал тӥрлык ваизы, со сярысь мыным, комбатлы, сюлмаськоно ӧвӧл. Дыраз потыны быгатоно Днепр дуре. Милемын ӵош ик мынозы гвардеецъёс - танкистъёс но, артиллеристъёс но. Азьпаламы вырӟизы ни сапёръёслэн понтонъёсын машинаоссы. Вань сюресъёс вылтӥ ожгарчиосмы Днепр пала кыстӥськизы. Шур дуре ми 21 куарусёнэ ӝомытан вакытэ потӥмы. Милемлы косӥзы: ваньзэ ик шыпытэн лэсьтэ, нокыӵе ӵашетэм куараос медаз кылӥське. Фашистъёс татчы вуэммес медаз шӧдэ. Днепр - одӥгез дано шурмы. Волга дурын ӟечкылам солдатъёсме Днепр кузяна будӥсь куакъёс пӧлы интыяськем солдатъёс пӧлысь ӧй адӟы ни: кин быремын, кин сӧсырмемын, иське, таиз шур понна ожмаськонэ выльёсыз солдатъёсы пыриськозы. Вань командиръёслэн одӥг сюлмаськонзы: маин но кызьы та паськыт шурез выжоно. Понтонъёс вылтӥ танкъёс потозы. Соин ик соос танкъёслы сётэмын. Котырысь гуртъёсысь пыжъёс утчаськом. - О, милок, бере кылид. Немецъёс чорыган пыжъёсмес ваньзэ ик огазе люказы но сутӥзы. Ярам ай, дыртэменызы юртъёсмес ӧз пеньӟытэ, - мылкыдмес куашкатӥзы гуртын улӥсьёс. Полклэн командирез милемыз, комбатъёсыз, люказ но ялӥз: - Азьпаламы нырысетӥ батальонзэ гвардиысь старшой лейтенант Каракулов нуоз. Вуоно уе ик, шур сопала потыса, отчы одно кырмиськоно. * * * Укно сьӧрын тӧл куашетэ, пеймыт. Ӝӧк вылысь кагаз бамез кӧйтыл югдытэ. Кунмылэн шунды ӝужан палаз, Лаврентия посёлоке, монэ вуттӥз улон сюресэ. Озьы луиз - госпитальёсын кема эмъяськи. Инвалид каризы. Соку огеныз эшеным пумиськи но, со сьӧраз Кубане ӧтиз. Удмурт шаерамы ӵыжы-выжыосы ӧз ни кыле. Бӧрысь со эше ик татчы чортӥз, пенсие потон азямы дуннеез, пе, адӟомы. Мон али кезьыт шаерын, нош тодэ ваёнъёсы выльысь но выльысь Днепр шурез син азям пукто. * * * Тулкымъёс луо ярдуре шыпытэн гинэ шуккылӥсько. Шурлэн вуэз узвесь кадь пеймыт. Бурдъёсынызы ву вылэ ӧжыт гинэ йӧтытэк, ваёбыжъёс лобало. Шур вадьсын секытэсь но пеймытэсь сӥзьыл пилемъёс уяло. Туж ӝог уйме. Бур пал ярдур пеймытэ ыше. Курск дорын ожмаськонъёс дыръя ик немецъёс Днепр котырез юнматыны кутскизы. Отысен ожмаськыны угось умой вал, паллян улыг котырысь ваньзэ адӟыны быгатылӥзы. Немецъёс малпало вал, Горд армия та бадӟым шурез выжыны уз быгаты шуыса но соос татын огшап шутэтскыны, кужымзэс люканы быгатозы. Унозэ гуртъёсты соос котыртэме сюрыса но ожмаськыны дасязы. Котькуд вырйылэ пушкаосын дотъёс лэсьтылӥзы, пулемётъёс пуктылӥзы. Танкъёсын мыныны луоно интыосы минаос тыризы, нош нюлэс сюресъёсты погыръям писпуосын ваменъязы. Киевлэн лымшор палаз, Букрин гурт дорын, 23 куарусёнэ потон уе 68-тӥ дивизиысь батальонъёс Днепрез выжыны кутскизы. Куазь югдэ вал ини. Шур вылын нап бус вӧлдӥськемын. Пыжъёс огез бӧрсьы мукетыз ярдурысь куара-лангатэк донгиськыло. Отын солдатъёс, автоматъёссэс бордазы ӝиптыса, чус пуко, тушмон пала синзы вӧсь луымон учко. Шурлэсь вогыриоссэ вандыса, пыжмы ву вылтӥ гылӟе. Тушмонлэн ярдурез уг адӟиськы на. Солдатъёс шыпытак полысало: тушмон медам шӧды вал, ярдуре потыны мед вуомы. Пыжъёсмы пуксён азьын гинэ политрукъёсмы Воронеж фронтысь Военсоветлэсь вазиськонзэ ялӥзы: азьпалан, Днепр сьӧрын, - Киев, украин музъем, атайёсмы но анайёсмы, вынъёсмы но сузэръёсмы. Соос возьмало тӥледыз! Ӟырдыт кылъёс пыжъёсын пукись боецъёслэн сюлмазы пыӵазы. Нырысетӥ батальонын украинъёс но вал. Милям пыжамы гинэ сизьым пӧлысь кыкез украин пиос вал. Фашистъёс окопъёсазы сак пуко вылэм. Шыпыт уез сайкатыса тачыртӥз бадӟым калибро пулемёт. Инме ӵыжыртыса лобизы тӧдьы ракетаос. Пыжмы котырын пуляос шуланы ӧдъязы. Отын но татын, вуэз вылэ пазьгыса, минаос пуштылыны кутскизы. - Чалякгес, эшъёс. Чалякгес! - дыртытӥсько полысасьёсыз. - Ӝоггес ярдуре потоно. Музъем матын ини, но вӧзамы ик мина пуштӥз, кин ке вуэ тэтчиз. - Сӧсырмемъёсмы вань, - куараос кылӥськизы. Вуэ тэтчам солдатъёс пыжез ӝоггес донгизы но ярдуре поттӥзы. - Сӧсырмемъёс татчы кылёзы. Мукетъёсыз - мон бӧрсьы. Ваньды атакалы дасяське, - дорамы вуэм командиръёслы косӥ мон. Пыжъёс ваньмыз ик ӧз вуэ на, нош милемлы дыртоно, угось меӵ ярдурысь пулемётъёс дугдылытэк тачырто, кулон кизё. Ӝегатскытэк чалмытоно соосты. Калыкез люканы туж шуг луиз, взводъёс ваньмыз сураськизы. Озьы ке но, мынам косэмея боецъёс но сержантъёс яр йылэ кин кызьы быгатэ тубо ини. Немецъёс ву вылысь пыжъёс шоры ялан ыбылӥзы на. Милям яр вылэ тубеммы соослы возьмамтэ шорысь луиз. Окопъёссы доры матэктыса, гранатаос зӥръяськом. Пулемётъёссэс пазьгылӥм. Озьы оже пыриським. Ярдурысен кыдёке ортчыны ӧм быгатэ. Ржищево хутор азьын немецъёс милемыз нош ик окопъёсысенызы ыбылыса пумитазы. Милемлы но кӧня ке дырлы окопаськоно луиз. Радистэ берамы кылемын, связнойме ярдуре ыстӥ: тодоно, кыкетӥез батальон выжыны быгатӥз на-а, артиллеристъёсмылэсь но юрттэт куроно. Сюлмаськисько: кытын радист? Кытчы со ышиз? Куазь югдэ ини. Немецъёс вань пыӵал тӥрлыкъёсынызы шорамы ыбыло. Ми ум ыбылӥське: патронъёсмес шыръяно, нунал ке вордскиз, кулэ луозы. "Максим" пулемётэн боецъёс дорам вуизы. Соос - милемлы бадӟым юрттэт. Танкъёсты ыбылон пыӵалъёсмы но вань ини. "Ум чигналэ!" - малпасько. Нош ярдуре ыстэм Кириков связное ӧвӧл но ӧвӧл. Радистэ но ышиз. Ярдуре мукет муртэ ыстоно шуыса малпаны гинэ вуи - вӧзысьтым огез боеце дорамы нюжтӥськись муртэ адӟиз. Биноклен учкыса связнойме тодмай, паллян суйыз бинямын. - Шур вамен выжонмы дугдытэмын... Троссэ пыжъёсыз немецъёс выйтӥллям... - кӧня ке кыл гинэ вераны быгатӥз Кириков. Мон сое берен ярдуре, сӧсырмемъёс пӧлы, ыстӥ но, со ӧз мыны. Кема ик дыр ӧз ортчы, инмын "юнкерсъёс" кылдӥзы. Соос трос вал. Ваньзы ик бомбаоссэс асьме палась ярдуре куштылӥзы. Отын вистэм-вожтэм гудыръямъёс но пуштылэмъёс кема кылӥськизы. Дыр туж каллен кыстӥське. Кыллиськомы пичи окопъёсамы, бӧрсямы басьтэм куасьтэм няньмес йырйиськом. Мон пумитъяськонмес радъясько. "Максиммылы" но ПТР-ёслы инты бырйи. Юасько боецъёслэсь: - Тӥ пӧлын Волга дурын ожмаськемъёс вань-а? - Вань! - кӧня ке куараос ӵош кылӥськизы. Иське, умой. Соослэсь мукетъёс но адӟем карозы. - Одӥг вамышлы но ум чигналэ, эшъёс-гвардеецъёс! - кеськи мон. - Волга дурын сямен ик ожмаськом! Немецъёс милемыз одно ик берен шур сьӧры чигнатыны турттозы, вань кужыменызы выламы омырскозы. Озьы ик луиз. Огшап ортчыса, окопъёсмы котырын минаос пуштылыны кутскизы. Собере фрицъёс атакае выжизы. Ми талы дась вал, узвесь зорен пумитамы соосты. Фашистъёс усьтыр- табыр чигназы. Час но ортчиз-а, ӧз-а - соос выльысь ми вылэ омырскизы. Табере уката тросгес кузя, куд-огез окопъёсмылы матэ но вуылӥзы, выламы гранатаос куязы. Нош троссэ адӟем гвардеецъёсмы кузь ныдо гранатаоссэс берен ас шоразы сэрпалтылӥзы, угось тодӥськом вал, со граната музъем вылэ усе но 10-12 секунд ортчыса гинэ пуштэ. Немецъёс куинетӥзэ шорамы лыктыку, нуназе бере час ёрос вал кадь ини. Та рад фрицъёслэн азязы куинь танкъёссы лыктӥзы. Милям орудиосмы ӧй вал, артиллеристъёсмы милемын ӵош выжыны ӧз быгатэ. Шур сьӧрысен но соос юрттыны уз быгатэ, соосын кусыпмы ӧвӧл. Вань осконэ танкъёсты ыбылон пыӵалъёслы. Соос мынам али кык. Огез расчёт доры матэгес нюжтӥськисько но косӥсько: - Азьпалысезлэн гусеницаосыз шоры мерта, башняез борды ыбылыса пайдаез уз луы. Боецъёсы ыбылыны кутскизы. Куинетӥез ыбемзы шонер йӧтӥз, одӥгез танк берытскиз но урдэскыныз ми пала луиз. Кыкез ик расчётъёс со шоры ыбылӥзы. Танк бордысь ӵын ӟизаны ӧдъяз, собере танклэн люкез усьтӥськиз но отысь фрицъёс тэтчазы. Асьме боецъёс соосты уськытъязы. Расчётъёс табере кыкетӥ танкез кокчало. Немецъёс выдӥзы, собере берлань пегӟизы. Озьы куинетӥ атакаез но пазьгим. Но табере милям но ыштонъёсмы вал ини: дасоез солдатъёсмы сӧсырмылӥзы, кӧняез ке быризы. Дорамы нюжтӥськыса радистмы вуиз но полкмылэн штабеныз кусып тупатыны быгатэмез сярысь ивортӥз. Шур вамен выжыкуз рацизэ коттыны шедьтэм но соин ӝегам вылэм. Полклэн командирезлы Артемьев майорлы югдурез ивортӥсько: - Ржищев азьын юнматскимы. Азьлань мыныны ум ни быгатӥське. Фашистъёслэсь куинь атаказэс пазьгимы. Кужыммы ялан лябӟе, калыкмы но ӧжыт кыле, патронъёсмы но... - Возиське, возиське уёзь. Соку гинэ юрттэт вуоз. Ми тӥледыз плацдарм басьтэмды но сое воземды понна герой ним сётыны ӵектом. Кема ик дыр ӧз ортчы, майор монэ выльысь рация пыр ӧтиз. - Ярдуре берытске но зол юнматске, ярдурез берпум патрон ыбытозяды возе. Уин тӥ доры мукет батальонъёс выжозы. Полкмылэн командирезлэсь косэмзэ быдэстӥм, одӥген-кыкен, нюжтӥськыса но кызьы ярдуре берытскимы, немецъёслэн кельтэм окопъёсазы. Татын соос зол юнматскиллям вылэм, траншеяоссы муресь гудылэмын, дзотъёссы, блиндажъёссы вань. Соиз гинэ умойтэм: амбразураоссы асьме палась ярдуре учко. Ыбылон пасьёсты кызьы но озьы тушмон пала ӵогылӥм. Табере азямы фашистъёс, нош берамы - кызь метр ёрос меӵ ярдур но паськыт Днепр. Полкмылэн командирез валам: немецъёс бур паласен но паллян паласен шуккет лэсьтысалзы ке, милемыз котыртэме басьтысалзы, ярдурлэсь люкысалзы. Ярдуре берытскимы но, немецъёс, ньыльдон минут ёрос ортчыса, кельтэм окопъёсмы вылэ ӝыны час пала снарядъёс куязы, отчы ик "Мессеръёс" пулемётъёсын узвесь зор кисьтӥзы. Собере кельтэм окопъёсмес басьтӥзы но ярдур пала вырӟизы. Мон командиръёсылы косытэк ыбылыны ӧй лэзьы. Патронъёсмес но гранатаосмес ӝикытано. Ӧжыт кылизы. Радио пыр нош ик полклэн командирезлы югдур сярысь ивортӥсько, юрттэ, пӧй, вал. Ӝоген Днепр сьӧрысь артиллеримы ыбылыны кутскиз. Фрицъёс выдылӥзы, гудӥськыны кутскизы вал но, офицеръёссы соосыз выльысь ӝутӥзы. Снарядъёс улысь ӝоггес ми пала лыкто ини. Нош мон ыбылыны ялан уг лэзиськы. Немецъёс, оло, малпазы: ӟучъёс уг ыбыло бере, берен шур сьӧры пегӟиллям. Ӵукна кельтэм окопъёссы доры бызё ук, бызё. Фрицъёслэсь гордэктэм ымныръёссэс но адӟиськом ини. Тӥни соку танкъёсты ыбылон пыӵалмы ыбиз, со бӧрсьы - вань боецъёсмы. Немецъёс музэ сапкиськизы, кудӥз пуля йӧтэмен, кудӥз - узвесь зорлэсь ватскыса. Улэпъёсыз берлань нюжтӥськизы, но сыӵеосыз трос ик ӧй вал ни. Милям но сӧсырмемъёсмы но, быремъёсмы но вал. Сӧсырмемъёсыз яр улэ васькыны косӥ, отын пуляос но уг шулало, минаос но уг пуштыло. Кӧня ке улыса, немецъёс выльысь выламы урдскизы, табере куать танкъёссы сьӧры ватскыса. Но ми ӧм кышкалэ, угось окопъёсмы меӵ ярдурын ик, танкъёсын татчы лыктыны уз дӥсьтэ. Мынам боецъёсы шер но шонер мертаса ыбылыны тыршизы. Милемлы одно ик возиськыны кулэ. Немецъёс ярдурез берен басьтӥзы ке, полкмылэн но, дивизимылэн но, шур вамен выжыкузы, трос ыштонъёссы луозы. Пеймытозь одӥгзэ но немецез ярдуре ӧм лэзе. Шунды пуксем бере чалмыт луиз. Немецъёс какалмизы, иське. Ӝоген мыным ву вылын пыжъёс адскизы шуыса ивортӥзы. Ми полкысьтымы кыкетӥ но куинетӥ батальонъёсты витиськомы вал бере, туж шумпотӥм. Кужыммы йылэ. Уин ми доры мукет ротаос выжизы на. Азьвыл ротаысьтымы миномётчикъёслэн командиръёссы Попов лейтенант но Кирпиченко старшой сержант шур вамен потэмзы бере ик монэ шедьтӥзы. Мынам соослэсь одӥг гинэ юанэ вал: - Минаос тырмыт-а басьтӥды? - юасько. - Тырмыт, тырмыт, - монэ лулоен адӟыса, Кирпиченко шумпотэ. Вазь ӵукна немецъёсты чигнатӥм. Милям полкмы Ржищево хуторез басьтӥз. Нош азьлань мыныны ӧм ни быгатэ. Немецъёс бадӟым кужымзэс люказы но нуналлы быдэ олокӧня пол пумитамы ӝутскылӥзы. Дугдыса юнматсконо, музъеме гудӥськоно луим. Собере милесьтым дивизимес мукет интые воштӥзы но, ми Казатин, Бердичев, Проскуров, Тарнополь но Львов каръёсыз мозмытӥм. Львов урамъёсын ожмаськыкум, мон куинетӥзэ сӧсырмыны сюри но госпитальын эмъяськоно луи. Берлоосаз ожъёсы мыным пыриськыны кылдӥз 1945 арын тулыспалэ Будапештын. Дунай шур дурын мон нош ик секыт сӧсырми. Татын мынам ожмаськон сюресэ но йылпумъяськиз. Вормон нуналэз госпитальын пумитай. * * * Гожъямъёсме кӧня ке нунал киям ӧй кутылы. Дыры ӧй вал. Нош туннэ выльысь ӝӧкысьтым поттӥ, учкыса потӥ. Сыӵе малпанэ кылдӥз: лыдӟисьёслэн, оло, юанзы но кылдоз, малы мон, гвардиысь майор, Сталинград но Днепр понна ожмаськонъёсме гинэ нимысьтыз висъяй. Луысал, дыр, ук Львов город дорын фашистъёслэсь сьӧсьяськемзэс адӟеме, Будапештын улӥсьёслэсь милемыз шумпотыса пумитамзэс но мадьыны, мурӝолъёсысьтызы ваткам виназэс поттылыса куноямзэс но вераны. Одно ик мадьыны кулэ вал, дыр, Дунай шур вамен выжонмы дыръя асьме шаерысь солдатъёсын пумиськеме сярысь но. Ӵапак со нуналэ мон секыт сӧсырмыны сюри: Дунай шур сьӧрысен монэ немец снайперлэн пуляез погыртӥз но кемалы госпитале выдытӥз. Нош макем бадӟым шумпотон вал милемлы, сӧсырмем муртъёслы, война бырем сярысь иворез тодыны. Куке вунэтод шат, кызьы госпитальын султылыны быгатӥсьтэмъёсыз но, сӧсырмемъёс но ӝутскылыны турттӥзы но шумпотон синкылиоссэс ватытэк кесяськылӥзы: "Вормон! Вормон!!!" Бен, мадьыны трос луысал, но мон тыло-виро сюресысьтым кыксэ гинэ ожез висъяй. Соос понна монэ орденъёсын данъязы, Сталинград понна ожын мон комбат луи. Нош Днепр шур сьӧры нырысетӥ батальонэным потэммы бере ик полкмылэн командирез Артемьев рация пыр вераз вал, монэ, пе, Герой нимлы ӵектӥськом. Ортчизы толэзьёс. Гварди дивизиямы Днепр понна Герой ним сётэмъёслэсь нимъёссэс ялӥзы. Мон соос пӧлын ӧй вал. Кӧтме ӝож ӧй кары, угось ми соку зарни кизили понна ӧм ожмаське, атыкай музъеммес утимы. 1