Улон гердъёс Кылё тодэм калыкъёс (очеркъёсын сузьет) Анна Павловна Инмарлы оскисьёс пӧлын нимын, атай нимын вераськисьёс ӧжыт, уката но удмуртъёс пӧлын. Нош таизэ удмурт кышномуртэз вань калык Анна Павловна шуэ вал. Священникъёс но. Малы со озьы луэмын, - али но уг тодӥськы. Анна Павловна профессор но, нокыӵе кивалтӥсь но, школаын дышетӥсь но ӧй вал. Но озьы ке но... Инмар Анайлэн Успениезлы сӥзем черке ветлыны кутскем берам ик та кышномуртэз синйылтӥ: ӝыт-а, нуназе-а вӧсяськон, литургия-а йылпумъяське, калык черкысь потыны кутске, но заводын ужасьёс кадь, гуртазы туж ик уг дырто. Тросэз удмурт кышноос, ышыггес интые кариськыса, вераськыны, юалляськыны кутско. Шоразы сылэ сабыр гинэ, зӥбыт-востэм, мӧйымыны кутскем кышномурт - Анна Павловна. Юанъёсын солы вазисько, нош со дыртытэк гинэ ответъёс сётъя. Нырысь-валысь соослэн матазы мон туж ик ӧй кариськылы. Солэн аслаз мугез но вал: асьмелэн, удмуртъёслэн, трос умоесь сямъёсмы пӧлын умойтэмъёсыз но вань. Шуом, бигерен еврей котькытын мед луозы, но соос ас калыксэс музъем улысь но шедьтозы, огазе кариськозы, нош удмуртлэн озьы ӧвӧл. Иськавын-бӧлякеныз, оло, огазе кариськоз ик, но мукет бӧлякез уг тодӥськы шуоз. Тодмотэм муртлы удмурт сюлэмзэ уз усьты, бордаз уз кыскы, донгыны - донгытоз. Соин ик та чылк-чылк удмурт адямиосын кӧня ке аръёс ортчыса гинэ тодматски, куд-огзэ таки тодытэк кыли - кулыса вуизы. Со виын мон отец Ювеналийлэн чадоез луи. Удмуртъёс но, ӟучъёс но, чувашъёс но - пӧртэм калыкъёс одӥг семьяысь агай-вынъёс, сузэр-апайёс кадь ми луимы, али но улӥськомы. Сьӧд тушмон духовной атаймы но солэн духовной нылпиосыз куспы верантэм секытэсь визь сынаськонъёс ке но сётэ, ми духовной атаймес вордэм атаймес кадь яратӥськомы. Нош та удмурт нылкышноослэн духовной атайзы олокин вал. Анна Павловна улэп ӧвӧл ни. Ярам коть, улэп дыръяз мар но со юаса вуи. Уго солэн улэм сюресэз - паймымон, вӧсяськись калык понна гажамон, тодэ-буре вайымон. Анна Павловна Тимофеева вордскиз бугырес, кышкыт, вирен орсмем 1919 арын 4-тӥ августэ Бадӟым Уча (туала Можга) ёросысь Камышлы гуртын крестьян семьяын. Атаез Выль Мултанысь гимназиез быдтэмын, пе, вал (педучилищеез ӧвӧл меда?). Анаезлэн дышетскемез вылымтэ. Солэн быземез чик но уг поты вылэм, но вазен нылмуртлэсь уг юало вал: потэ-а, уг-а, кинлы потэ быземед - сёто но тӥни. Нырысь нуныеныз секытэн луэм бераз со Инмарлэсь тазьы куриськем: "Картлы кужмысь сётӥзы бере, та вордӥськоно нуные, Инмаре, Тон азьын улыны, ужаны ярамон адями мед луоз вал". Тимофеев кузпалъёс тупаса улӥзы. Музъем ужасьёс вал. Вуз но каризы. Колхозъёс потыку, кулаке поттӥзы. Инмарлэсь ноку но ӧз куштӥське. Удмурт Евангелизы но вал. Арнянуналъёсы, праздник нуналъёсы Бадӟым Учалась черке ветлӥзы, быдэс семьяенызы кӧс утьылӥзы. Нылпизэс пичиысен ик вӧсяськыны дышетӥзы. Уча черкын кема дыр ӵоже псаломщикын улӥз Василий Григорьевич, Тыловыл пи. Туж мур осконэз вал. Службаос бере удмурт калыкез огазе люкаса шуэ вал: "Ваелэ Инмарез данъяломе". Кутске туж чебер куараен чирдыны-кырӟаны: "Инмысь Эксэй Буйгатӥсь..." Удмурт кылын но, славян кылын но кырӟаллязы. Кинлэн шулдыр, тупась куараез, сое кырӟасьёс пӧлы, клиросэ султытылӥз. Анна пиналысен сюриз клиросэ, куараез уго укыр жингрес, кырӟанэз огпол кылэ ке, кыкетӥяз калык сьӧры нёртыны быгатэ ни. Василий Григорьевич Инмар законэз туж ӟеч тодэ вал, дышетскымтэ удмурт калыклы сое дугдылытэк тодытылӥз, ваньзэ пыр- поч, лад-лад валэктылӥз. Колхозъёс потон вакытэ, 1929-30-тӥ аръёсы, Учалась черкез пытсазы, Василий Григорьевичез судить каризы, калыкез, пе, ӧрекчаса возе, выль улонлы пумитъяське. Архангельской областе келязы, отчы ик быриз, иворъёсыз ӧз ни вуэ. Отец Павел батюшкаез но пытсазы. Кӧня удмуртлэсь синзэ усьтӥз со, кыӵе ӟеч тодытэ вал Инмар законэз! Быдэ вуэм бераз Аннаез атаез Можгала педучилищее дышетскыны келяз. Чебер куараез понна сое "Италмасэ" мыныны туж косо вал. Но пичиысен Инмарез тодэмез солэсь сюлэмзэ нош ик черке кыскиз. Пичиысен ик со Инмарлы мур оскись калыкен тодматскиз, кулытозяз соосты буре ваиз, соос понна вӧсяськиз. Сюлэмзэ поныса ик вера вал Яголудысь Окси но солэн Никон братэз сярысь, Ынэгысь Матвей агай сярысь, Ува ёросысь Аркип агай сярысь, Жужгесысь Гавриил иеромонах сярысь. Аркип агай трос пол вуылэм Пермь ёросысь Белогорской монастыре, отын улӥз солэн духовной атаез Варлаам (та чуръёсме гожъян куспын паймымон учыр луиз: курадӟытыса вием Варлаам али святойёс радэ пыртэмын ни, обросэз-иконэз но вань ни. Сое мыным асьмелэн гажано землякмы игумен Даниил Ишматов Белой Гораын наместник луыкуз, отчы вуылыкум кузьмаз вал. Али гинэ малпай: оброс бордаз кызьы меда гожтэмын? Святой преподобномученик Варлаам... Обросысь кизэ чупай но... отысь пӧсь потэ. Святой преподобномученик Варлаам мон понна но, вань удмурт калык понна но вӧсяськы! Инмарлэн паймымон ужъёсыз...). Аркип агай куать муртэн ӵош - пӧлазы Яголудысь Окси но вылэм - Сарове мыныны потӥллям. Соку преподобной Серафим атаймы святойёс радэ пыртэмын ӧй на вал ке но, вӧсяськись калык сое святойёс пӧлысь святойёс пӧлы кемалась пыртэ вал ини. Пумтэм трос паймымон ужъёс пыр трос адямиослы со улэп мурт кадь возьматскылӥз. Аркип агай удмурт эшъёсыныз Саров пала вуыкузы, пумитазы губырскем пересь песятай потыса соослэсь юаз: "Кытчы мынӥськоды - шутэтскыны-а, вӧсяськыны-а?" - "Вӧсяськыны", - шуизы удмуртъёс. Соку песятай ваньзылэн киязы быдэн сюсьтыл сётӥз, бӧрысь ачиз син азьысьтызы ышиз. "Туж тодмо, адӟем мурт кадь, кин со?" - огзылэсь огзы юало Сарове мынӥсьёс. - "Ӧд тодмалэ-а, со ачиз Серафим атаймы вал ук!" - шуиз Аркип агай. Солы азьпалзэ тодон сётэмын вал. "Анналэн туж секытэсь адӟонъёсыз-мытарствоосыз луозы", - шуиз Аркип агай. - Аннаез ас интыям кельтӥсько". Нош мон шуисько: "Номыр но уг тодӥськы, уг валаськы, шыр кадь адями мон". Котырысь вань черкъёс ворсаськизы ке но, калык вӧсяськемысь ӧз дугдылы. Огзы доры огзы люкаськыса вӧсяськылӥзы. Анналэн егит сюлмыз Инмарез яратонэн пачылмыса улӥз, гуртысь гуртэ, ёросысь ёросэ вуылыса, дышетскымтэ адямиослы Евангелиысь чуръёсты лыдӟылӥз, псалом гуръёсты, духовной кырӟанъёсты кырӟалляз, ӝикаса-ёрмыса улӥсьёслэсь сюлэмзэс Инмар кылын буйгатылӥз. Кивалтӥсь йыръёс тодытэк ӧз улэ егит ныллэсь калыкез югдытонэ пыриськемзэ. НКВД- ын ужасьёс туж чакласа, муг гинэ утчаса улӥзы, кызьы та нылмуртлэсь ымзэ ворсаны. Гуртысь гуртэ, интызэ вошъяса улоно луиз Анна. "Одӥг пол, - шуэ, - Иж палась Никольской черке мынӥськомы. Куинь куско шуба дӥсяй, пыдам сизьымо кут кутчай, тыбырам песьтэр оши, ымнырме кышетэн ворсай - пересь мурт мед кожалозы, киям боды кутӥ. Озьы сюрес кузя мынӥськомы ни. Бӧрсям мынэ вакчи визьем Анна нимо ныл. Ми солы шуим: "Кин ке юаз ке, кулэм муртэ ватыны мынӥськомы шу". Озьы ик луиз: пумитамы валэн райисполкомын ужась потӥз но юа: "Куда идёте, куда направились?" Аннамы шуэ ни: "Папу в Ижевск взяли, убили, коронить идём". Кузёйыр киыныз шонтӥз, валзэ шуккиз но ми дорысь ворттыса кошкиз. Огшап чус улэм музъем вылэ нош ик тушмон урдскиз: немец ожгарчиос Москва пала вуыны кутскизы. Пиосты гинэ ӧвӧл, нылъёс вылэ но шинель дӥсяса, ӟырдам, пӧзись оже келяны кутскизы. Аннаез но келяны дасязы вал ни, но Инмар жаляз: кыӵе ке но муген сое ожгарчиос радэ ӧз пыртэ. Соку Анна Никольской черке улыны но ужаны интыяськиз. НКВД-лы муг сюриз Инмар кылэз кышкатэк тодытӥсь нылмуртэз пытсэт сьӧры келяны. Та сьӧсьёслы трос юрттӥз та черкын служить карись Кокорин фамилиен батюшка, НКВД-лэн пуктэм адямиез. Пытсэтэ пуктон азязы Анна анаез-атаез дорын вал. Милицилэсь гуртэ вуэмзэс тодыса, атаез валзэ кыткиз но уробо пыдсы Аннаез выдтӥз, вылаз турын, пызь мешокъёс тыриз но гурт сьӧры поттӥз. Пазялэ вуттӥз. Отысен нылаш малпаз Никольской черке ватскыны, нош отын батюшкаен ӵош милиция возьмаськыса улэ вал ини. Судэ сётӥзы. "За агитацию..." шуыса дас арлы пытсэтэ келяны решение кутӥзы, но бӧрысь куинь арзэ кулэстӥзы. Со виын анай-атайзэ кысканы кутскизы. Лиза сузэрезлэн тодэ ваемезъя, вань ваньбурзэс талазы, бадӟым кеноссэс но сэрттӥзы, няньзэс одӥгтэм нуизы. Гурт калык адӟонтэм карыны, пе, кутскиз. Соин сэрен атайзы семьяеныз валче Какможе улыны кошконо луиз. 1945-тӥ, война бырон арын, Аннаез кыдёкысь уй палась кезьыт Тӧдьы зарезь (Белое море) доры нуизы. Малпасько, аслыз Анна Павловналы кыл сётыны (Инмарлы тау, кык пол соин пумиськылыса мар но со гожтыса вуи): "...Келязы Архангельск областе, Белой море дуре. Отын Молотовск (али Северодвинск) городэз ӝутон мынэ вал. Удмуртиысь огнаме ваизы. Копак нюр, болота. Шокчыны луонтэм трос чибинь. Каторга вал со. Кус кемозь кезьыт нюр вуэ пыртыса канава гудыто. Вузэ куасьтыса быдтэм бере ваем луоез носилкаосын пыртаськомы, пытсэтэ сюремъёсты со вылэ юртъёс пуктылыто ини. Монэ, зӥбыт, кылзӥськись муртэ, весь секыт ужато. Лыосы куалекъятозь кынмисько. Секытлы, ӝожлы чидатэк чигиськыса бӧрдон дыръёсы но вал. Одӥг пол уин, бӧрдыса улон дыръям, Николай Чудотворец возьматскиз но со шуиз: "Малы роптать кариськод? Чиданы кулэ". Чидантэм секыт дыръёсы дорам дыдык лыктэ но гур-гур! карыса гурласа улэ, сюлэмы буйга, каньыл луэ. Кӧня ке улыса, огъя тюрьмае ваизы. "Узыр монашкаез ваёзы" шуо. Тюрьма пӧлын но тюрьма вань на. Уксё бичаны кутскизы, "лапа", пе, октӥськомы. "Хорошая лапа тебе будет" шуо ни мыным, нош мон мар со "лапа" уг но тодӥськы. Гришка нимо егит но лек пи, воръёслэн кузёзы, дорам лыктӥз но юа ни: "Тон-а Тимофеева?" - "Ӧвӧл", - шуи. Сюлмы шӧдӥз ни мар ке но умойтэмзэ лэсьтыны дасясько шуыса. Ялан монэ преследовать каре, мон солэсь туж кышкасько - йырвандӥсьёслэн йырзы вал уго со. Но Инмар монэ ӧз кушты, утиз та лек муртлэсь. Войнаысь пегамъёс но пӧламы вал. Асьме армилы пумитъяськем, немецъёслы ужам латыш нылъёсты, украинкаосты татчы вуттӥзы. Сиён уг тырмы. Сием потыса йыр ик пороме вал. Ужато, ужато но, асьсэос ик морально быдто. Дугдылытэк обыскъёс лэсьто. "Вы враги Советской власти, вас надо уничтожать как лягушек!" шуыса, шуш куараен шорамы кесяське вал тюрьмалэн кивалтӥсез Львов. Кулӥз но (оло виизы но), куинь пол кутскыса сое гуысьтыз поттаса шӧйзэ зӥртылӥзы: со милемды адӟемпотостэм каре вал, пукисьёс - сое. Шайгузэ ик бетонэн шобыртоно луизы. Ӧрекчаськытэк, честно ужаны тыршисько вал. Тодам ваисько вал, кызьы вашкала святойёс но туж трос курадӟонъёсты, кӧтӝожъёсты чидано луизы, но со пыр Инмарлэн Инмысь Эксэйлыказ сюрылӥзы. Озьы асме буйгатӥсько, улыны кужым басьтӥсько. "Какая преданная коммунистка" шуэ вал мон сярысь колонимылэн кивалтӥсез. Котькызьы но ултӥяны, сантэманы тырше вал. Секытлы, котлы, сютэм улонлы чидатэк, чылкак восьми ни, кужыме быриз, суйы-пыды тӧрназ. Больницае мынӥсько но, "симмулируешь" шуыса, уж доры улляса лэзё. Татысен тодматски Черниговысь Александр баӵколэн нылыныз. Отец Александр туж кужмо вӧсяськись священник вал, со Алексей И Патриархен ӵош дышетскемын. Нылыз доры лыктыса, сое но, монэ но Святой Дарен причастить кариз. Со мынам духовной атае луиз. Монастыре кошкыны малпасько вал но со шуиз: "Удмурт калыктэ просвещать кар". Тамында гожтыса вуи Анна Павловналэн тюрьмаын пукем нуналъёсыз сярысь. Тюрьмаысь потыса, Анна дор палаз бертӥз. Малпа вал Иже интыяськыны, татын ужась черк но вань, но, "калыклэн тушмонэз" шуыса, городын улыны прописка ӧз сётэ. Город вӧзысь Люк черке ужаны интыяськиз, куинь ар отын улӥз. Бӧрысь заводэ ужаны кутӥзы. Эрик луиз черке ветлыны. Клиросын чирдӥз, но ужамез понна уксё ӧз басьты, сиськыны но ӧз пыра, шуэ вал: "Вӧсяськыны толке ӧвӧл, дась сиёнэз сиыны уг пыры". Котыраз трос калык биниське, уката ик - удмурт кышноос. Ӟуч кылэз ляб тодэменызы, черк службаез но соос шуген валало уго, нош Анна соослы валэктэ, кушаса сётэ туннэ литургиын чирдэм Апостолэз, Евангелиез, священниклэсь верам тодытонзэ но удмурт кылын соослы валэктэ. Шарканысь удмурт монастырьын улэм Мария монахиня (калык пӧлын Миндэр Маша шуо вал - гурт нимызъя) шуиз вал: "Аннаез венец возьма. Но дыр ӧз на вуы". Анна Павловналэн верамезъя, солы уйвӧтаз верамын вал: "Тынад курадӟон адӟонъёсыд - мытарствоосыд музъем вылын луозы". Пинал дыръяз Аркип агай но вераз: "Анналэн туж секыт мытарствоосыз луозы". Озьы ик луиз но. Пинал дыръяз НКВД-лэсь пегаса улӥз, сизьым ар пытсэтын курадӟиз. Соос ӧз тырме: Украинаын улӥсь трос нылпиё выныз кышноеныз валче шуккиськыса быризы. Вань анайтэк-атайтэк кылем нылпиосты Иже ваёно луиз. Ачиз ноку но ӧз бызьылы, нылпи ваёнэз ӧз тодылы, но вынызлэсь векчи нылпиоссэ солы пыд йылазы султытоно луиз. Курадӟыса-курадӟыса, уйёсты изьылытэк, кӧттырымон сиськытэк улон дыръёсыз кӧня вал?! Ваньзэ тае кин тодэ на - Инмар сяна. Туж тыршиз вордосъёссэ Инмар пала берыктыны, пичиысен вӧсяськыны дышетылӥз, кӧс утьылӥзы, валче черке но нуллӥз, нош быдэ вуизы но, Инмар бордысь палэнскизы. Инмарлы оскись понна талэсь секытэз мар вань? Бӧрдон, синкыли... Со гинэ ӧз тырмы, таиз мон тодыса вал ини, Ирина нылзы улэп картсэ (кык нылъёссы будо вал ини) куштыса, шпанаен кушласькиз - сое дораз ваиз. Анна Павловналэн юрттэменыз пичи корка басьтӥзы. Кушласькид ке, ул вал ни, но та кык ашкынэм муртъёс куспазы жугиськыса, керетыса улыны кутскизы. Бордазы Ириналэн азьвыл картэзлэн кык нылъёсыз шимес суредъёсты адӟыса улоно луизы. Анна Павловналы соос туж жаль пото вал. Кытӥяз доразы ик кӧлано луиз. Кызетӥ даурлэсь вань секытсэ ас пельпум вылаз нуоно ке но луиз, Анна Павловналэн чик лекез ӧй вал. Инмарез яратонэз солэн пумтэм мур вал. Удмурт кылэ трос кырӟанъёсты со берыктылӥз, со дорысь калык ӧз бырылы. Лыктэм калыкен кырӟаса Инмарез данъяллязы. Уго духовной атаез, Черниговысь о. Александр солы удмурт калыкез Христос Инмарлэн дышетонэныз югдытыны, тодытыны бакель кариз. Духовной атаезлэсь косонзэ со данэн быдэстӥз. Тямыстон аресаз потэмын вал ни, берло аръёсы шӧдскымон пересьмиз: синъёсыз ляб гинэ адӟо на, губырскемын, но калык ялан котыраз берга. Сюлмыз шӧдӥз-а, мар-а, та нуналэ черке лыктыса, со вань тодмоосыныз люкиськыса кадь шуиз: "Ӟеч луэ, ӟеч улэ, Инмарен улэ. Монэ простить каре, оло уло на, оло кулонэ мынӥсько ни". Эшъёсыныз люкиськыса, Ириналэн улон корка палаз вамыштӥз: нылъёсыз школаысь бертозы, пумитано, сюдоно. Сюратайзылэсь туж кышкало, сьӧсь пӧйшур кадь ассэ возе уго. Ки уг берыктӥськы та берпум чуръёсты гожтыны, но ма карод: адями -сьӧсь пӧйшур, кораз, вандылӥз Анна Павловнаез, Ириналэсь бадӟым нылзэ Иулияез. Господи, помилуй! Мукет мар шуыны уг тодӥськы... Инмаре, жаля, уть милемыз вань уродлэсь. Анна Павловналэн азьвыл ик тодытыса верам музъем вылын курадӟонъёсыз йылпумъяськизы. Дьяволлэн лэзем муртэз вииз вань улонзэ Инмарез данъяса, ас калыксэ югдытыса улэм удмурт нылкышноез. Кузё-Инмармы Иисус Христос шуэ: "Мынам нимы понна ваньмыз тӥледыз адӟемпотостэм карозы", та вӧзы Ачиз ик Со ватса на: "Эн кышкалэ мугорез виисьёслэсь, кудъёсыз лулэз виыны уг быгато. Нош ваньмызлэсь но юн кышкалэ Солэсь, Кин быгатэ лулдэс но, мугордэс но кысылӥсьтэм тыл пӧлын быдтыны" (Матфейлэсь Ӟеч Ивор 10:22;28). "Улонлэн бугыръяськонъёсыз кошкизы, музъем вылын курадӟонъёс быризы, йыркуро тушмонъёс кужымтэм луизы, нош яратонлэн кужымез бадӟым, со мозмытэ пумтэм вапумъёслы пеймыт азе сюронлэсь, со уте ваньзэ, кинъёс понна Тон азьын кышкатэк кырӟало! Аллилуия! (Кулэмъёслы сӥзем акафистысь). Семён Карпов Ульча кузё Пьеса тусо нылпи поэма 1 - Ульча кузё!.. - Ульча кузё!.. Ӟабыль каро гурт нылпиос. Кинэ сыӵе нимын вазё, Ӧтё, шулто чидасьтэмъёс? Шундыен ӵош ик шӧртчиос Кӧлон умзэс сайкатӥллям. Киосазы корт ведраос, Буш пуйыос но кутӥллям. Ини ӧй чида доразы Юанъёсын вамыштытэк. Кызьы но ма вераськозы Соос карысь лыктэм муртэн? Йырзэс улланьтозы таос, Возьдаськозы, малпай, пумтэм. Мын кенешы на соку трос - Кылзэс уд усьты сиктантэк... АГАЙ: Ӟечесь-буресь-а, юлтошъёс! НЫЛПИОС: Умой. - Таӵеесь вань. - Ӟечесь. АГАЙ: Иське, ваньдэс кысык ужъёс Ӧтё, сюлмаськыто валче... Кылме шуак уретыса Кесько соос: НЫЛПИОС: Ульча кузё! Кытын-о, мар-о карыса Улэ меда со лобась ӟоз?.. - Ульча Кузё мемей понна Скал сюдыны потэмын, дыр... АГАЙ: Дядяйёсты кинъёс бон ай, Кыӵе тӥляд нимтулъёсты? Радаз мон лад-лад верало, Кудӥз кинлэн пиез луоз. Мемей-дядяй мар ужало, Кудпалангес уло соос. Иське, та ульчаын ваньды, Вож бадяръёс, будӥськоды. Ульча Кузё нош - юлтошты - Кин со тӥлед? Азьветлӥсьты? Малпаськонэ выйтӥ кадь. Ма, Юай, оло, валантэмгес? НЫЛПИОС: Аслаз нимыз солэн Кузьма, Ульча Кузё нош - кушемез. АГАЙ: Дас-дас одӥг аресъемесь Нылъёс-пиос чакласькыса Суредало юанъёсме, Нодлыкозэс возьматыса. Шедьтӥм вераськонлэсь ӧрзэ Покчи гурточиосыным. Кызьы тодод на табере, Кытчы вуттоз кенешонмы? 2 1-тӥ пи: Дядяйёсмы вералляло Пионерын улэм дырзэс. Мемейёсмы возьматъяло Куинь сэрего галстукъёссэс. АГАЙ: Бен мон но ук тодам ваи Куттэмпыдо арлыдъёсме. Кызьы со вал, кыӵе со вань - Али луоз ӵошатэме... 2-тӥ пи: Арлы быдэ котькуд гужем Шутэтскыны ветлылӥллям. 1-тӥ пи: Нош ми тани асьме коже - Таяз арын но кылемаз. 3-тӥ пи: Ма, валамон ни, уксёзы Уг тырмы, пе, кытӥ-отӥ. Озьы туннэ валэктозы Телик но радио пыртӥ. 1-тӥ ныл: Янгыш бон кин? 3-тӥ пи: Ма, олокин... 1-тӥ пи: Озьы но ми Ӝожомыса Ум улэлэ. Юрттэмъёссэс но Жальмаса Ум вителэ... 2-тӥ пи: Озьы шуэ Ульча Кузё - Улом-вылом но, пе, адӟом. 1-тӥ пи: Йӧнэз, ӟечез ми шӧдӥськом, Одӥг-огмес но валаськом. 2-тӥ ныл: Дырмы ортче ке пайдаё... 3-тӥ ныл: Мылкыд лыз ин кадь шундыё. 1-тӥ пи: Я кытын-о меда Ульча Кузё? Ойдо ӧтём на ӵош: ВАНЬЗЫ: - Ульча Кузё! 1-тӥ пи: Гави, Пави, Лёви но беромо... 2-тӥ пи: Тӥни соос вуо - умой! АГАЙ: Матэктӥзы на куинь кузя татчы, капка азе. ВАНЬЗЫ: Ӧвӧл на шат Ульча Кузё? - Одӥг ымысь вазё. АГАЙ: Кӧнялы ке вӧжоесьгес* Али вуэм пиос. Кымалтыса ведраоссэс Артэ пуксё соос. Оскытэкгес учко шорам: Кин, пе, таӵе агай... Ваньзэ кылэм-тодэм берам Мугзэ ини анлай. 3 ГАВИ: Огпол тазьы Гуртмы пумын Ожо вылын кыллиськомы. Кияр, улмо йырйиськомы, Утыр кылмес шериськомы. Вуын ӵӧжпи сямен огъя Телик азьын уд голекъя. ПАВИ: Кылем арын вал со, Ӵапак гужем шорын. Мемей-дядяй дорын Уг возё алыса. Дэмлась луи: Оло, Акаршуре ветлом, Отын ӵужатае Уте муш бакчаез. ЛЁВИ: Ньыль бускельёс - Гави, Пави, Кузи но мон Лавыр Лёви - Великъёсы пуксим - ширтӥм! Муш бакчае ми ӝог вуим. Ӵужатаед вераськыны Ой, яратэ вылэм. ПАВИ: Ы-ы. ЛЁВИ: Ёз калыксэ со ӟеч тодэ, Покчиосты но тодэмез потэ. Кин выжыысь, пе, луиськом, Куд ульчаын, пе, улӥськом? ГАВИ: Мар но со вераны выримы - Нош кытысь-о ваньзэ тодомы? Нодтэмесь ай. пе, тӥ, шекраос, Йырады бызьыло тӧлпиос. Ӧд ке тоды гурттэ калыктэ, Ваньлыктэс но уд валалэ, пе. Ӵогем кадь ик вераз но лулскиз, Оло нош, ӧжытак ӝожомиз. Эк, шуэ, пиосы, пиосы, Ӝыжомо кадь улон гердъёсмы. ЛЁВИ: Ми - ньыль эшъёс - Мар шуыны ик ӟудӥмы. Таӵе вераськонъёс Ноку ӧй вал на милемын. Оло возьыт, Оло кезьыт - Котьма ик вал Ӧжыт-жыт. ПАВИ: Эх, паймытӥз та ӵужатай. Йырме оши но пукисько. Малы, пӧй, лыктыны дэмлай - Асме ачим тышкаськисько. Маялляса йылсо тушсэ, Вождэс удвае, дыр, шуэ. ЛЁВИ: "Ваньмыз шонер но зэм", - Вазиз Кузьма мырдэм. Тыршим ке, луомы Визьмо шекераос. Уз луэ милемын Урод эшъёс, ужъёс. ГАВИ: Мон оскисько, - Шуэ пересь, - Бызись вулы Шеде сюрес. АГАЙ: Вунэтыса малы люкаськемзэс, Шыпыт гинэ уло нылъёс-пиос. Таӵе но тунсыко мадьылэмзэс Кылылэмзы ӧй вал вал на та дырозь. 4 АГАЙ: Валасько, Пересьлэн кылъёсыз Шугъятэм тӥледды ньыльнадэс. Кыӵегес, мар выллем ужъёсын Мытӥды лёгоно сюрестэс? ГАВИ: Бертӥмы ми соку, Вунэтӥм, Сиимы-а чечы яке ӧм. Учкимы ог-огмес - пальпотӥм, Но ӧз поты серем. "Быгатӥз кадь пересь визьманы? - Вератэк ӧз ни чида Кузи. Эх, кутскиз ук, ява, вераны: Ку, малы но кызьы... ПАВИ: Кылдэмын ульчамы но гуртмы - Азьлозэ, ализэ, туннэзэ Тодыны-валаны тыршомы, Утчалом гердъёссэ. Ас гуртмы ик, Олыт Учамы, Мар шуэм со луэ? Вашкала пуштроссэ валаммы Усьтысал, дыр, троссэ. Учке ай, нюк-гопъёс, вырйылъёс, Ошмесъёс нимоесь вылӥллям. Нош кыӵе бӧлякъёс, выжыос Азьлогес кылдӥллям? Песятай-песянай муртъёслэсь Юанмы-веранмы сокем трос. Бер луиз ке сое ни кинлэсь Кыломы асьмеос? ЛЁВИ: Трос пусйиз соку Кузьма Лэсьтоно ужмес. Кылзӥськиськомы, эсьма, Усьтыса ыммес. Уно пол, дыр, бергатъяз Та малпанъёссэ. Нуналэз вуиз-тупаз, Ой, пужнэ визьзэ. ГАВИ: Соингес, оло, Лёви Муш бакча дырозь Исамъяськы вал али - Керӟегез пурӟоз! ЛЁВИ: Бон, мултэс уз вераськы, Юамез пельыз уз кыл. ГАВИ: Нош али сокем няськыт Шедьтоз веран кыл. ПАВИ: Ӵап Ульча Кузё кадь тон, - Мон верась луи. Бон, пе, Ӵапак тӥ но мон Зэм кузё луом. Ужъёслы ёрмись муртлэн Мар ӟука йыраз? Уродэз гозы сямен Биниське бордаз. ГАВИ: Шуимы: пайдаё ужъёсын Нуналмес каромы тунсыко. Мылкыдмы но медло байлыко, Луиськом ке кузё интыын. Мӧзмонэз курлалом, уздыром, - Кельтомы шат солы эрик гур... Гуртмылы ми ум луэлэ мурт, Кырӟаса но, эсьма, данъялом. ЛЁВИ: Ми кылмес верамы, Тыршиськом. Музеймес но куке Кылдытом. ПАВИ: Кылӥськом - гожтӥськом, Тодӥськом - пусйиськом. Малы, ку но кызьы Юанъёс огазьын. ГАВИ: Ульчалэн пумъёсаз Емышо куакъёсыз Мерттӥмы но - будо, Инкуазьмес шулдырто. Нюк улысь ошмесъёс - Чыртывесь уксёос. Жильыртэм куаразы Крезьгурлы кельшизы. ЛЁВИ: Бызьылон но шудон, Ёзвиез кыдатон Интыос лэсьтэмын - Бадяр сик вырйылын. Оскемед ке уг пот, Поръя, учкы - адӟод. Ми палан улӥсьёс - Шурсьӧрысь пиналъёс - Мертаськом кужыммес, Сэзьмыто луэммес. Будэто: ми палъёс Котькугес вормисьёс. ПАВИ: Но эшъёс - ньыль пиос - Бускелё юлтошъёс Луомы шат куно, Ужъёсмы ке уно? ГАВИ: Тон юад - вераськом. Со ӧвӧл ушъяськон... Туэзэ гужеммес Тыршиськом ни дэмен. Мылкыдо луисез Пӧламы куриське. ЛЁВИ: Ӟеч кылын, мылкыдын Юрттӥсьёс ке вӧзын, Та сямъёс милемлы Чик ӧвӧл мылемын. АГАЙ: Бугыртэ мылкыдме вераськон. Курытэк, косытэк, понназы Ныпъяллям туж секыт сюлмаськон - Я кызьы ни сое вормозы? Куд-огез агайёс - соос трос - Йыромо улонын, могӟыло; Нош татын огшоры нылпиос - Куаш! каро, бергало, ужало. Синчебер кадь чылкыт малпанзэс Веттало выль сайкась ӵукнаен. Ӟыгырто кадь соос ог-огзэс. Сэзь, чырмыт но югыт малпанэн. ПАВИ: Тодӥськод, гурт сьӧрыгес Кыстӥське асфальт сюрес; Со пала али ӵемгес Потаны сюре мугез. 1-тӥ ныл: - Чукыр-чакыр нюк со палан Паськыт-паськыт эмезь вӧльы Сарваосмес йыровылаз Тырмытъямы ми туж чаляк. 2-тӥ ныл: - Гави, Пави но ми - нылъёс - Луим чырмыт эмезясьёс. 3-тӥ ныл: - Дэмен мынӥськомы, Дэмен бичаськомы. Вузаськомы - бертӥськомы. 1-тӥ ныл: Кызьы шуо али гуртын? 3-тӥ ныл: - Ӧм бертылэ тырттэм киын. 1-тӥ ныл: - О-о, озьы. Эмезямысь Бушен ӧвӧл на бертаммы. ГАВИ: Эн пайме чик, Шонер ваньмыз. Пичи-пичи Ужаськомы. 1-тӥ пи: Ульча Кузё, Лёви но ми - Ваньмы татысь пиос - Пешкес* сьӧры ветлылӥмы, Бичам нингубиос. 2-тӥ пи: Отысь шурын пыласькиськом - Жадем ортче-быре. Котомкамес ныпыяськом - Ӝоггес сюрес дуре. 3-тӥ пи: Одӥгъёсыз - эмезясьёс, Нош ми - губиясьёс. 3-тӥ ныл: Узы-боры но бичасьёс. 1-тӥ ныл: Уг луо ке пӧртэм ужъёс, Ми ваньмы ӵош - одӥг ужын - Кытын ке но емышанын. 2-тӥ ныл: Оген курдыт. Нош собере Валче ужлэн Вань * *Арлыдогес, бадӟымгес. * Пешкес - шур ним. Генрих Перевощиков Палэсмурт верос Клубысь со сурым мунчоысь кадь потӥз. Мушкояськем йырыз йӧнтэм жонгетэ-пиле, сюлмыз лук-лук шуккиське, ымнырыз копак ӝуа. Ма, ноку нокытын такем ӧз лӧдылэ на вал, ноку таӵе возьытэ ӧз усьылы. Вылаз ик, кытын ке ӧвӧл - аслаз вордскем гуртаз. "Ӝоггес, ӝоггес татысь!"- дугдылытэк чилекъяз солэн жӧлмем йырсазяз. Кезьыт мускыт омырез гадь тыраз гучыкъяса, Илья Федотовичлы ӧжыт каньылгес луиз, озьы ке но, лымыен суро пужнӥськись зор пырыосты но йӧнала ӧз шӧдылы, пыд улысьтыз тулег дэриез но ӧз чакла, кытчы мынэмзэ но ӧз анла, угось пель сьӧраз али но черк гырлы кадь жондӥз-гудыръяз на: "палэсму-урт!", "шайтан воштэ-эм!", "сурон ба-ам!" Зэмзэ вераса, берло вакыт сое олокызьы но сизьдӥзы-пушнеразы ини, но ӧй, укыр таӵеез ӧй вал ай. Пеймыт ульчаетӥ (куд-ог укно улъёсын гинэ югырес виштыос адскыло) дырын-дырын ӵемтылыса, гылӟылыса, тыро-пыдо номыре кылытэк-адӟытэк, дыртӥт вамышъян сяменыз со дораз - вордскем коркаез дӥне! - вуэмзэ ик ӧз шӧд. Ма, озьызэ но чаляк ӧз вала - капка ӵогетсылэсь кульчозэ кужмысь берыктыны турттонъяз, пулъёсын кечат- вамат шуккылэм укнозэс синйылтыса гинэ мазэ-созэ ятвылтӥз. "Малы татчы лыктӥськем?- абдраз со, кульчо бордысь лэзькыса. - Нокинэз ӧвӧл ни, нэнэ кулэм бере шал-шал тырттэм кылиз. Мар-о, таӵе шуге-леке вуэмысьтым жаляз но, котькуд вордскем юртъер, аслад гуртэд, дор палъёсыд сямен ик, магнит музэн бордаз кыскиз-а? Кин тодэ, оло, зэмзэ озьы. Ма, умой, туж умой - лыктыкум ӵужодӥг дӥньын-а, киросняос дорын-а кӧло шуисько вал, но табере кызьы, ма синмын отчы пырод на?" Ваньмыз тодаз усьыса, Макаровлэн сюлмыз выльысь радтэм чепыльтӥськиз. Со виын клуб палась куараос кылӥськизы. Юзыр-кезьыр луыса, Илья Федотович нош ик ӝабырак капка кульчо борды кутскиз: "Кин ке адӟемлэсь азьло чаляк пыроно!" Нош мар таӵе? Кульчозэ бералъя, бералъя - ӟезьы ӧс уг усьтӥськы. Э, ма, азьвыл бертылыкуз ачиз ик сопал ласянь ӵогаз вал ук. Куараос нош весь матэкто. Мар кароно? Лыктӥсьёс пала эшшо огпол нёркыт уӵертыса, со ӝужыт забор пулъёс борды шуак кечырскиз но, ки йылаз мырдэмгес ӝутскыса, азбаре тэтчиз. Собере, корказь выж улэ ватэм усьтонзэс шедьтыса, усьтыр-табыр корка пыриз. Отын тём-тём пеймыт вал. Пеймыт но пыкмылэс-кезьыт. "Кузёез-шунтӥсез ӧвӧл ке, озьы ни со,- лулскиз Илья Федотович, сутӥсь малпанъёсыз огшаплы озёлскыса. - Дасо ар нокин улымтэ ни кадь. А ведь нэнэ Тукля гурезе кошкем дырысен ар но ӧз ортчы ай..." Зэмзэ вераса, та юртъерзэс басьтыны юась но вал ини - артэ коркась Офонь Санко. Яна потоно, пе, вал но, выльзэ пуктыны пока моӵе уг сузь. Но Макаров пумит кариськиз. Ма бен вузаз ке, вордскем гуртэныз герӟась нюжа воксё чигоз ук. Собере гужем шутэтскыны но кытчы бертылоз? Матысь ӵыжы-выжыез ӧвӧл ни. Дас вить аресъем сузэрзэ школаысь бертыкуз машина лёгам (Илья Федотович сое йӧскадь уг тод ни, пичи вал на), бубиз куд йырын трактореныз валче мур нюке бекмыльскем, сизьымдоназ мынӥсь муминыз тӥни толсур котырын люкиськиз - озьы чоркак огназ кылиз. Мукет выжы-кумыосыз бен вань ик но, соос дорын ог-кык нунал сяна улод шат? Кунояськид-марад но - сё, азьыдлэсь берыд. Нош аслад - со аслад ини: кӧня мылыд потэ, сомында ик ӵыдэтскы. Ма, собере юртъер ке юртъер но, мумизлэн вань "узырлыкез" татын ай: дӥсез-кутэз но, валес котырез но, ӝӧк-пуконъёсыз но, тусьты-пуньыез но. Зэм, таӵе макеосты карын кулэ узгес ни каре шуыса, йӧнъёссэгес юбка-кофтаоссэ, пыдкуксэ но мар со ӵужодӥгъёсызлы но кироснэнэезлы сётӥз. Ачиз синпельлы кашамер кышетсэ но чебер пужъятэм вашкала шортдэремзэ гинэ нуиз. Бен созэ но, тазэ но утялты вал но, огъяулонние ёрказ бере, кытын возёз? Комнатаез нимаз ке но, берытсконтӥез ӧвӧл ук. Ӵапак соин сэрен ведь улонэз шебеляз. Ма, ма шебеляз гинэ - воксё йырчукин луиз. Малы ке-а нылпиоссы но ӧвӧл, малы ке-а отӥяз кышноез но кошкиз? Мынам, пе, та четлыкын чырсаме уг пот - адями сямен улэме, тон ке небытэныд кулытозяд патер уд басьты, татчыяд ик ташъёд. Ӧйтӧд, "адями сямен" улэ ни-а, уг-а, нош со, Илья Федотович, зэмзэ уг. Бен та гинэ ке луысал, кызьы ке чидасал-а, мар-а ини, но тани ук, эшшо одӥг йыр висён шедиз на, эшшо одӥг шимес адӟон ӝужаз. Ма, таиз но ӵапак отысь, со чиндыс четлыкысь, бычыяз. Эх!.. Та вылэ вуыса, ӧсторе пумем Илья Федотовичлэн сюлмыз сыӵе позыртӥськиз - солэн синъёсыз ик ӵуж-вож адӟизы. Чидантэм ӵушкась тулкым палэнэгес погыляса, со тыл ӝуатыны медэ вал, но соин ваче кин ке кизэ кырмиз кадь. "Ӧвӧл, ӧвӧл!- шуэрскиз Макаров.- Лач шуккымтэ пулъёс вискытӥ тылэз адӟыса, эке, пырись луоз. Вуозы но выльысь сыныръёсме золъяны кутскозы. Ӵок ини, таиныз но кӧт тыр, соин ик тазьы но яралоз, синъёсы пеймытлы дышо ни кадь - тӥни ук, пул висъёстӥ педлось кыӵе ке сыӵе югыт ӟиза". Ӝытсэ со таки пеймытын ортчытысал, дыр, но шӧдтэк шорысь тодаз лыктӥз: "Уть ай, гур азь палан, ӝажыын, сюсьтыл вал кадь. Тазэ оломар синйылтӥсь уз лу, дыр, вылаз ик, отысь укно бакчае учке". Маке шоры мырӟиськемлэсь чакласькыса, Илья Федотович висъет сьӧры тэтэ карыса выллем сётскиз но, шедьтэм сюсьтылзэ аратыса, "лемень" тусьты вылэ юнматӥз. Собере, секытлэсь секыт ужез быдэстыса музэн, куртказэ но куштытэк, ӟус вылэ катьтэмак лэзькиз. Кӧня отын курыт кайгузэ йырйыса-ӝоместыса пукиз - ӧйтӧд, дырез со табере чик ӧз шӧдылы ини. Но тани мугораз гинэ ӧвӧл, сюлэмаз но юзматӥсь кезьыт сузьтӥськыны ӧдъяз. "Ма, татын педлонлэсь но салкым, лэся, ук,- юзыр-кезьырак луиз со. - Ай ӟырдаме сӥяменгес-а сыӵе йӧтэ ни? Бен озьы коть тазьы но, пичи гурез эстытэк ӧвӧл кадь. Сотэк кызьы татын кӧлод?" Но верантэм возьдаськем-пӧсекъяменыз вань мугорыз, лулсэръёсыз сыӵе жадиллям, лэся, - солэн, султыны ӧвӧл, вырӟыны но кынарыз ӧй вал ни. Золгес эбыльтыса, ма, кызьы ке ӝутскысал ик, дыр, чупырскысал, но йыраз возьмамтэ шорысь "йӧн" малпан вуыса, со шара ваземзэ ик ӧз шӧдылы: - Дак, эн ай, шунсконэ сумкаям ук! Пыд азяз, сиськон ӝӧк урдсы, куштэм кузь кало сумкаысьтыз со кабак аракызэ эли- кеби поттӥз, собере, ӝамдэ эсэпласа, - кузялэс булкаен сӥльтыремзэ. Ваньзэ тае киросняосызлы салам шуыса ваиз вал, но мар на табере, доразы таки-так уз возьматскы ини: синмазы учкемез уз лу. Ӝӧк вылысь ӵашаез ӵоге ошем пӧран ӵушконэн маялтэм карыса, Илья Федотович отчы ӝыныёзяз аракызэ лэзиз но огшокчемен кадь чалак кымалтӥз. Арым курытэн орсмем но кезьытэн эбылям сюлмыз сыр-р! куалекъямен, лэся, со юонэзлэсь шӧмзэ ик йӧнала ӧз вала. Ма, нокытчыяз ӧз йӧтылы. Соин ик эшшо сомында гуро вылаз кисьтӥз на. Та рад ини ымъяськыса выллем пичияк куртчиз но. Собере сигаретсэ кенжытӥз но куж-куж тамаканы ӧдъяз. Озьы пурккетыса, музэ чӧлтӥськыса пукон сяменыз со утыр шунаны, лапканы кутскиз, гадьзэ кырмыса-кекатыса возись эгес лябомыны шӧтаз. Но, час ёрос талэсь азьло кылэмез пель сьӧраз чузъяськыса, дэймыт адӟонэз син азяз яркыт суредэн пуксьыса, кайгуэз уката лэчытомиз. - Инмаре!..- солэн тупыттэм вӧсез пумтэм чигиськись, бозмыт куараен бурсйиськиз. - А ведь кыӵе сабырлы мытӥськиз вал пумиськонмы!.. Зэм но, гуртоосыз сое - университетысь сӥё-дано дышетӥсез, тодмо кылбурчиез Илья Федотович Макаровез - кема витем дуно куноез кадь пумитазы. Котькуд вуыкуз сямен ик, огез но мукетыз, кизэ юн-юн кырмаса, шуныт пальышъяса, олокыӵе но юанъёсын тэбинизы, нош клубазы берытсконтэм тулляськем калык азьын кылбуръёссэ лыдӟыкуз (ма, пиналъёс но данаксэ дышетӥллям - творческой отчётэн лыктӥсько шуыса, арня талэсь азьло ивортӥз вал уго), пӧртэм юанъёссылы валэктыкуз ӟырдыт чабылӥзы. Бен гожъяськемез пумысен татысьёс но - огшоры лыдӟисьёс - туж мыло-кыдо, ушъяса- данъяса вераськизы. Зэм, куд-огез шораз кырыжгес но учкылӥз кадь, но Илья Федотович понназ малпаз: "Кин тодэ, оло, малы ке мылкыдзы лӧскамын но мыным гинэ озьы йӧтэ. Бен собере кыӵак мыняса пукозы-а?" Огъя вераса, нырысь-валысь ваньмыз умой, шумпотымон вал - сюлмызлы небыт мамык. Но тани, гурт артистъёс жингыр-жин кырӟам-эктэм бере ини, Илья Федотович люкаськемъёслы вазиськиз: - Бератаз, гуртоосы, мынам но тӥлед одӥг юанэ вань. Ӝоген асьмеос элькун тӧромес быръём. Лушкем малпанъёстэс усьтэмды потоз оло уз но, юало ик: кинэгес меда сӥлы карыны чакласькоды? - Кузнецовез! Юрий Максимовичез!- одӥг ымысь кадь дасо куараос кылӥськизы. - Эшшо кин кызьы малпа? - Дак... ми чисто со понна куараосмес сётыны медком,- вазиз солэн ӵужодӥгез Гирыш Коля.- Пӧлазы солэсь ӟечез ӧвӧл кадь. Вылаз ик, асьме бӧлякмы-землякмы. - Гм...- ӟудӥз кунозы.- Ну... конешно, Юрий Максимович... зэмзэ умой адями. Гурт улонъя усто ӧнерчи. Но... кызьы ай шуод? Мон сямен, нӧзьгес ай со, лябытгес. Сямын но небытгес. Во-от... Музон удысъёсъя тодон-валанэз но ӧжытгес. Соин ик, мон сямен, быдэс элькунэн кивалтыны вазьгес на солы. - Ачид бен, Илля Педотыч?- юаз пересь Миквор.- Кин понна кидэ ӝутод? Макаров вазьыса ӧз вутты - шораз куймыр учкалтыса, Широбоков инженерзы лекмыт шуиз: - Ма, ӧд кылылэ на шат, со - Дмитриевлэн ӝутӥсь-лэзисез. Вань ёросъёстӥ калыкез со понна ӝуткаса ветлэ, шуо. Тӥни ук, Агафонов но, ёрос администрацилэн кузёез, гуртысь гуртэ Дмитриевез данъяса, соя кариськыны косыса ворттылэ - самой озьы ик. Залын чал-чал луиз. Со чалмытэз сӧрыса, ӵемоназ йӧтэм Илья Федотович ("уть ай, ӧвӧл янгышаськем ук, кӧтурдэстӥзы шокасьёс зэмзэ вылӥллям") кужмысь серектэм кариз: - Маин бен со тӥлед уг яра, Леонид Данилыч? Мон сямен, туж визьмо, шаплы, йӧно адями. Программазэ но учке ай. Малпам-чакламъёсыз кыӵак кикур вылын кадь адӟисько. Котькыӵе удысэз басьты - ваньмыз рос-прос сэрттэмын-пертчемын, ваньмыз лыдъямын-чотамын, котькинлы валамон возьматэмын, мар кароз со чакламзэ ӝоггес быдэстон, калыклэсь улонзэ умоятон понна. Одӥг кандидатлэн но сыӵе зол программаез ӧвӧл. Соин ик, уг ваты, мон сое сӥлы каро - Кивалтэтлэсь йырзэ. Ма, тӥ но, ӟеч-ӟеч малпаськиды ке, оскисько, та вылэ вуоды. - Э-э, гожтыны мар но уг лу!- вазиз бер пал радъёсысь тодмотэм воргорон. - Программа пумысен шуко. Гожтыны, вераны - асьмеос ма-астёръёс. Дышемын супыльтыны, коробен-коробен зарни-азвесь сӥзьыны, а лэсьтоно ке... - Василий Фёдорович сётэм кылзэ тӧлъя-буръя уг лэзья,- пулсаськиз Макаров,- одно быдэстыны тырше, калык сярысь нуналмысь сюлмаське. - Хо, сюлмаське!- уг сётскы топкес куараё пиосмурт.- Соин-а, матысь улосвылъёсын ӵошатыса, асьмелэн шоро-куспо уждунмы самой пичи, а дунъёсмы оло ке самой бадӟымесь? "Азьлань" газетын со чисто кушаса сётэмын. - Паймод тӥледлы!- Макаров нош ик кужмысь серектӥз.- Вылӥ кивалтӥсьмылы уд оскиське, нош сое сьӧдмась статьялы... Мар-о, отын кыӵак зэм кожаськоды, оло? - Кыӵак не кыӵак, а со лыдпусъёсты мон ас вылам шӧдко. А нефтьын пыласькем вылысь, нефтьтэк кылеммес ке верано? Тожо зэм ӧвӧл шат?.. Ини та воргорон вераськыны кутскем дырысен Илья Федотович эли-кеби малпаськиз: "Кин со? Ма, палэнысь вӧжъемын, шӧдске. Ай кинлэн ке куноез-а? Бен котькин медло но, та ведь шыдзэ ӟузёнтэм кузьыт карыны быгатоз. Угось со статьяын оломаиз но вань на. Ваньмыз таки-так ӧз, дыр, лыдӟе, нош со, ӧд ке уреты, кыӵак шараялоз. Соку..." - Мар шуод,- Илья Федотович выльысь дыртӥт кыл куспаз мертчиз,- кытӥяз зэмзэ янгышалляськом ай, эшъёс.- Шуге-леке вуэмзэ валаса, солэн мылкыдыз чарак нӧзёмиз ке но, гуртоосыз азьын чозырес возиськыны тыршиз. - Но ведь ӟечез но... - А мукет газетъёслэн-кинлэн дарманьтэмзы сярысь?- воргорон сое ӧз ик кыл, ӧз ик адӟы кадь, - чалмыны валатэк, весь ас гозызэ пунӥз.- Оло, таиз но шонер ӧвӧл? Тани шуэмын: огезлэн, нимыз гинэ ӧвӧл, тусбуез но, пе, газет бамъёсысь, телевизорысь уг пота - весь ушъяло, инмозь ӝуто, нош куд-огез сярысь пал кыл но уг поттыло - сыӵе кандидатъёс ик ӧвӧл кадь. Либо нӧдын, пе, лошъяло, сярысьтызы жоб нимъяра вӧлдо... "Ӧвӧл, тае ӟеч-ӟеч гуньдытоно! Только... кызьы?" Шуак гинэ йыраз номыр сыӵе- таӵеез вуымтэен, Макаров амалтэк шуиз: - Зэмзэ ик, таиз ласянь но кытӥяз эсэпсэ ум валаське. Но... верасько ук, асьмелэн ӟечез но ичи ӧвӧл. Со куспын залын ӵаш! вазьыны ӧдъяз. - Бен, бен, шумпотымонэз но!- гужлась куараосты согыны турттыса кеськиз Илья Федотович.- Учке ай тани!.. Но табере сое кылзӥсь ӧй вал ни кадь - котьма ке но, куаш! поттӥсь гуртоосыз ӧз лапкоме. Соку солэн киросняез, Кирло Сергей, султӥз. Тае адӟыса, куашетӥсь зал пумен чалмыны шӧтаз. - Зэм оло даур, пие,- кыӵе ке вӧсьмыт вазиськиз киросбубиз.- Туннэ тон маке... мыдлань вераськиськод. Уть ай, азьвылъёсын весь "удмортлык", "удмортлык" каркод вал. Тат вуылыкуд но, статьяосад но. Ма, куд-ог кылбуръёсад но асьме выжы калык понна сюлмыд висе кадь вал. Нош ӟеч малпанъёстэ улонэ пыӵатыны луонлык возьматскиз но, сайкыт инвис усьтӥськыны ӧдъяз но... малы ке берыктэм шуба дӥсямед. Мар луиз тонэн, кыӵе кыль йӧтӥз? - Элькун тӧроез бырйыку... озьы учкыны уг лу, киросня,- ини пиж-горд ӵыжектыса, могӟылыса вазиз кунозы.- Татын ведь пӧртэм калыкъёс уло. Котькин выжыысь со медло - адямиез нырысь ик ужезъя дунъяло. Кузёмы удмурт ке луысал, мон, конешно, тожо шумпотысал. Но, жаляса верано луисько, асьмелэн со ӝужда будэм, сыӵе кибашлы, быдэс элькунэн кивалтыны быгатӥсь адямимы ӧвӧл на. Азьланяз - оском - одно луозы, дыр, а пока... - Вань, пие, вань! Кузнецов ик тани. Ми ведь синтэмесь ӧвӧл. Ма, со гинэ шат?! Сэре... тонэ кылзоно ке, мар-о, ваньмы асьмеос нодтэмесь, оло? Манӥтэмесь? Киосмы мыркесь? Йыркобыосмы тырттэмесь? Ӧвӧл! Дугдоно ни асьмеды ултӥямысь, кулэс каремысь. Сайкано ини, чонь-чонь кариськоно, йыръёсмес вылэ ӝутоно. Дак, сыл ай, кемалась-а ачид озьы чирдылӥд? Аслад кылъёсыд ук та. Люкаськемъёс сыӵе шып кариськизы - чибиньлэн лобемез но кылӥськоз. - Сэре... Эн ай, ма вераны медко на вал? Сурад тон монэ... А-а, тани мар! "Пӧртэм калыкъёс уло" шукод. Но ведь асьмеос Удморт Элькун нимаськиськом. Значит, асьме выжы адями кивалтыны кулэ. Музон азьёсын чисто озьы. - Ну... мукетъёс асьсэос тодозы, нош мон... одӥгзэ пусйыны турттӥсько: одно ик озьы луыны кулэ ӧвӧл. - Ярам, соку тазьы юало. Мар лэсьтӥз ини Дмитриев асьме понна? Удмортъёс понна, шуко. Оло, солэн тыршеменыз вань пиналъёсмы школаосын ас кылзэс дышето ини? Оло, мумы-бубыослэсь уг юало ини: нылды-пиды вордскем кылзэ дышетоз-а, уз-а? Та пумысен но со статьяын шонер гожтэмын: ӟучъёслэсь, пе, озьы юалэ ай - шузимем шуозы. - Шонер, Сергей Кириллович, туж шонер! - пыдлось векчи нылкышно куара кылӥськиз. - Давай, валэкты, Илья Федотович, кызьы ваньзэ тае валано? Бен астэ но! Мон сеен дак, сыӵе сюлмаськемен, улӟем места, асьмеос ӝоген выжытэм быром. Гуньдэм-губырам Макаровлэн пыд улаз сцена выж ӝуаны ӧдъяз кадь - бамъёсыз, пельёсыз гинэ кенжем ӧвӧл, пыдпыдэсъёсыз но кужи-ин! карыны шӧтазы. Со нош ик номыр вазьыса ӧз быдты - инженерзы йыркурен шуиз: - А мар валэктонэз? Дмитриев солы патер сӥзем. Мон поннам, пе, зубыр-зубыр тыршид ке, вормим ке, ӵуказеяз ик басьтод. Вот и всё. - Маке ӧвӧл со! Зэм оло даур!- кылӥськиз отысь но татысь. - Зэм! Залын нош ик пеймыт гуын кадь шып луиз. "Быриськиз ук, быриськиз!- кӧшкемыт чилекъяны ӧдъяз Макаровлэн зубектэм йыраз.- Ма, кытысь тодэм?! Зэм, Василий Фёдоровичен асэныз сыӵе вераськон ӧй вал - юрттӥсьёсыз ӧтчазы, но мар пӧртэмез?.." Вӧзысьтыз удмурт кылъя но литературая дышетӥсьсы Нина Петровна (со пумиськонзэс дасяны но, ортчытыны но юрттӥз) азьвылгес ик чылкак гуньдыса-ыштӥськыса, номыр лулатэк пуке ни вал, нош та берлозэ кылыса, воксё интыяз кынмиз. Собере витёнтэм шорысь шуак берытскиз но кунозэс синъёсыныз сыӵе ӵушказ - тае уӵерак гинэ адӟем Илья Федотович, копак шымырскыса, быдэс тылын басьтӥськиз. - Дак... озьы ке, пие...- кытысь ке мурӝолысь кадь ӟазыртӥз киросбубизлэн пуксем куараез,- палэсмурт луэм, лэся, ук тон. - Да мар палэсмурт гинэ - шайтан воштэм! - Ох и возьыттэ-эм!.. Ну, сурон ба-ам!.. Алигес гинэ дуно куноез сямен пумитам гурт калык табере сое жалятэк сэстӥз ини. Ма, та рад оло ке ваньмыз лек дуринчиос кадь пурӟизы - отӥяз нокинлэсь номыр верамзэ валаны ӧйлась ини. Кылтэм-ымтэм кылем Илья Федотович, йыраз васькытэмзылэсь шӧмыса музэн, эшшо юнгес шымыртӥськиз но пӧзись юрсире сюриз, оло. "Маке ик верано, маке ик верано!- зӥ-ир бергаз солэн онгромем йырсазяз. - А то воксё сиёзы, улэпкын сокалозы. Но... ма-ар?! А-а, тани!" Кулэ кылъёс шедизы ке но, солэн быгыльмем кылыз нокызьы ӧз пертчиськы. Ма, пыдъёсыз либырамен, султэмез ик ӧз лу. Зэм, огшап эшшо курадӟыса, со ассэ кужмысь ӝутӥз но (тае адӟем калык командая музэн чалмиз), чылкак воштӥськем, ӵакмыт куараен шуиз: - Юнме супыльтон со, эшъёс... Монэ гинэ ӧвӧл, вылӥ кивалтӥсьмес но саптаны малпам пу гырлыослэн бӧтьыртэмзы. - Пу гырлыос - ӧйтӧд,- вазиз Широбоков,- нош мыным сое оскымон тодмое, Дмитриев вӧзын ужась адями, шыпыртӥз. - Дак талы чик паймонэз ӧвӧл,- итӥськиз клубзылэн директорез Наговицын.- Огез дано кырӟасьмы но, пе, со пала турнаса-чирдыса поръя. Тазэ машина кузьмало шуыса оскытэм. Нош журналистъёс тач-тач кырмемын. Либо тазьы ик вузаськемын,- со уӵерак Макаров шоры учкалтӥз.- Дак мар-о кыдёке ветлонэз? Алигес тӥни клубмылэн ужамез сярысь телевизорын вераськи. Нялтас та сярысь но поттыло шуисько вал. Да Кузнецов сярысь ӟеч кыл, пӧй, верало. Дак ведь ӧз лэзе! Пырак шуизы: уг яра. Вылӥос кылӥзы ке, милемыз, пе, ужысь уллялозы. Вот тыныд демократия! Озьы шуыса, со кежак кызйиз, галстуксэ лябомытӥз (соиз кекатыны ӧдъяз-а, мар-а) но кылрадзэ выльысь шедьтыса шуиз: - Сэре соос ик... бен кудӥзлы озьы дауртэмзы возьыт йӧтэ ни, дыр... Лушкем сипыртӥзы, ми, пе, асьмелы асьмеос юрӟым потӥськомы ни, нош номыр кареммы уг лу - ыммес ик усьтыны уг сёто. Дмитриевез, пе, ӟечен гинэ вераны косо, нош Кузнецовез курласа-пыкылыса гинэ. Озьы ик, пе, вань газетъёслы но, радиолы но, ёрос-кар кивалтӥсьёслы но сыӵе указание сётэмын. Вот и... Ма, огез газет тӥни, "Азьлань", ымзэ усьтыны дӥсьтэм ик но, редакторзэс живо-два пешкытӥллям. - Пешкытӥлля-ам?! - Ма, со газетэз лыдӟиськоды ке, адӟиды ни, дыр, ук: пумаз воштӥсез гожтӥськылэ ини. - Сое со понна ӧз куштэ - одӥг нылмуртэ эриктэмамез понна,- Илья Федотович выись мурт музэн "куро борды" кырмиськыны турттӥз на. - Ӧйтӧд, ӧйтӧ-ӧд...- вазиз тодмотэм пиосмурт. Соин огӵошгес ик чангес нылкышно куара кылӥськиз: - Эриктэма-ам?! - Дак... косӥзы ке, азяз быдэс короб уксё кисьтӥзы ке, тон но эриктэмазы шуод... Вень йылын кадь пукись Макаров отӥзэ кылзыны ӧз чида, ӧз быгаты ини - улласянь кин ке-маке палгытыса музэн, со дуак тэтчиз но сцена вылысь синтэм-пельтэм лобатӥз. Собере дугдылытэк - клубысь но. Тани табере вордскем коркаяз аракыен но тамакен уката кузялмем кайгузэ йырйыса пуке. Мар веранэз, секытлэсь секыт, курытлэсь курыт вал солы. "Палэсмурт!..", "шайтан воштэм!..", "сурон бам!.." Ӧй, таӵезэ кӧшкемыт уйвӧтаз но кылэмез-адӟемез ӧй вал ай. Бен йыраз ик сыӵеез ӧз вуылы. "А кулэ вылэм... М-да... Иське, кызьы табере? Мар табере?..- Чылкак ыштӥськыса, со вылысьтыз вылаз лыздари курытэн лулӟылӥз, ӵашаяз выльысь но выльысь аракызэ палькказ. - Эх!.." Ма, так-то чик ӧз малпаськылы уд шуы. Сыӵе дарманьтэмезлэн корелэз шараяськиз ке, мар калэ вуонзэ но валалляз. Озьы ке но, ӧз ваменскы, ӧз дугды. "Бен квартира, квартира, шай басьтон!.." Ма, пичияк осконэз но вал уго: шарае уз ик, дыр, пот. Но тани ук... Бен, солэн та шукырес адӟонэз али ӧз вордӥськы - мукет гуртъёсын, мукет ёросъёсын но ӧжыт ӧз пыкылэ ини. Соиз озьы, музон интыосын, Ижкарез вератэк, патер сярысь уг тодо, шӧдске, соин, вылды, шораз такем ӧз ожалскылэ. Нош ижъёс олокызьы данакез тодӥллям. Та вие отчы коть эн ик бертылы. Лек учкылэм гинэ ӧвӧл, куд-ог эшъёсыз, тодмоосыз кизэс ик сётъямысь дугдӥзы. Со, ма, сеське, нокыӵе табыштэк, ас мылкыдыя, шонерен лыдъяса тыршисько шуэ ("котькуд адямилэн лул дуннеез - аслаз, котькин малпанзэ шара вераны быгатэ"), но астэ уд пӧя ук, аслэсьтыд уд ватскы. Вылаз ик, адямиос шонер сюръяськемын, ваньзэ шонер меӵкытъяло. Бен, бен! Сотэк-а, ас калыкезлы но аслаз зэмос малпанъёсызлы ваче пумит султыса, со пумысен нуналмысь курекъяса-пӧсекъяса, сюлмаз олома быдӟа сутӥсь яра кылдӥз ини. Соиз озьы, котькин котьма мед шуоз - возьытэз тодӥсьтэм вирсэртэмъёслы со пӧсь но, кезьыт но ӧй йӧтысал, акылес кутъёслэсь музэн шонскысалзы но тӥни - "айда, маке шат, тырттэм кобыоссэс кокалозы, кокалозы но дугдозы ай", но паняс дауртэмзэ ачид ке валаськод... Солэсь ортчыт, ас интыяз мукет мурт ке луысал, ачиз но сое жалятэк сизьдысал. Ма, мар сизьдысал гинэ - воксё адӟемпотостэм карысал. Нош ачиз ке тӥни... - Инмаре!..- дурыстэм вӧсьсэ вормыны быгатытэк, со кежырак бурсйиз но кыкна киыныз йырсияз кырмиськиз.- "Зэмзэ ик, мар кароно табере, ма-ар? Кызьы улоно? Оло... оло, та кырсь ужлэсь куштӥськоно? Тазьы туртскыса ведь ӟечез уд адӟы - весь пыжод, ваньмызлы адӟемпотостэм луод. Но... куштӥськид ке, патерен соку кызьы? Вот угось..." Со куспын солэн сурымӟем йырсазяз шӧдтэк шорысь югак воректӥз: "Сыл ай, оло, ваньзэ куштыса, кыштырак татчы вӧжъёно? Та юртам-ерам? Весяклы! - Со син куспын сазьмытак луиз но, йӧспӧртэм пижныысь мозмон амал возьматӥсь малпанэз азьлань сётскиз: - А мар-о, вужгес ке но ини, ярантэм ӧвӧл ай. Ма, зэмзэ ик!" Та малпанэзлэсь солы шӧдскымон лякытаз но, буко кадь куасалскем-пызем мугорыз ик кытӥ-мартӥ чатырскиз. Но улӟытӥсь-бурдъясь малпанэзлы со умоёс дышыса но, тыро- пыдо шумпотыса но ӧз вутты - кытӥ ке ӧвӧл мукетыз возьматскиз: "Нош ужед - университет ужед?! Собере, татчы лыктӥд ке, кытын, кин луыса тыршод? Тупамон ӧнеред ӧвӧл ук. Соиз озьы, дышетскид ке, созэ но, тазэ но пӧрмытод, дыр, но тӥни ук, трактор-машинаос шальтырамын, пудозы синэмен, асьсэос но тросэз - сыӵе кочон-таза воргоронъёс, нылкышноос! - ужтэк кылемын. Гожъяськод? Соиз пумысен татын зэмзэ майбыр луоз, но, со сяна, сиемед но потоз ук. А мае? Ма, так-то вань гуртоос музэн ик, бакчаяд мертскысал, пудо вордысал. Иське, сютэм ӧй кулысал. Но... эн ай!.." Выль малпанэз нёрк! поттыса, Илья Федотовичлэн мылкыдыз та шуытозь шуяз. - Бен, саесъёстэ пужалъяд ке, зэмзэ уд чоньды,- шораз палэнысен учкыса музэн, со аслыз ачиз шара вазиз. - Но кызьы соос пӧлын улод? Пыраклы татчы выжид ке, нунал потэм одӥг ульчаетӥ ветлоно, я соиныз, я таиныз пумиськоно, шоразы учконо луоз ук - гулбече ватскыса уд пук. Нош ма синмын? Да эшшо бышкыны, кылдэ юаны кутскизы ке? Дэй кылъёсын шачыръяны? Нуналаз кӧня пол му пыр вияллялод? Ӧвӧл, ӧвӧл, сыӵе адӟонлэсь Инмар мед утёз, таиныз но кӧт тыре ини. Вань даурелы. Соин ик татчы шоканэз но ӧвӧл. Вот сюриськиз ке сюриськи-из!.." Выльысь йӧнтэм юмекъяны кутскем сюлэмзэ ӧжыт ке но басылатон вылысь, со нош ик ӵашаяз лэзиз. Но, ӧйтӧд, пайдаез луоз оло уз - тани ук, шӧмзэ ик умой-умой ӧз вала, аракыез, ӟырдам мунчо изъёс вылэ пальккем ву мактал, гадяз ӵажыртӥз гинэ ке шат. Ма, собере, уть ай, "шулдыртӥсь вуэз" пыдсаз гинэ кылем на, нош со тыро- пыдо ӧз ке но куртчы, оломар ик йыраз но йӧтымтэ. Бен, ӵашетэ, кытӥяз, оло, пилиськыны турттэ, но соиз клубысен ик кутскиз, нош ӟамыръямезлэн кудӟытӥсь- лӧпкытӥсь я небӟытӥсь палыз матын но уг шӧдӥськы - аракылэсь курытсэ аслаз куректонэз ворме, лэся. Ай бӧрысьгес-а сутоз? "Я, маке вань - вань, но кызьы сётаки, кызьы азьланяз? А кароно, мар малпано на?" " - Ой-йы, пие, ой-йы! Былама курадӟиськод ук. Нокызьы жальдэ уг вормиськы ни". - Кин со?! Нэнэ?! Куалектэм Макаров шуак чатырскиз но куара пала доллы учкиз. Ма, зэмзэ нэнэез! Шонергес вераса, солэн арлыдын но куректонэн кисырам жум тусбуез. Усьтэм ӧсэтӥ висъет сопалась, бадӟым палась, чильпыра. Мугорыз уг адӟиськы (пеймытэ ышемын-а, мар-а) - йырыз, ымнырыз гинэ. Бен соиз но сюсьтыл кыл гыам-веттаськемъя сайкытак-вужерак вогыръяське - я пужмер йырсиез югдытскылэ, я гужам-куасьмем, чонари вотэс кадь гожмаськем бамъёсыз, кымсыз, я мур гуэ усем синъёсыз чилин- долӥн воректыло. "Мар ишан та?!- шымырак луиз интыяз быльккы пумем Илья Федотович.- Ма, кудӟиськем, шӧдске. Соин олома но кылӥське-адӟиське ини. Ай умме усиськем но вӧтасько-а? Оло нош, шузимиськем?!" - Ӧвӧл, пие, ӧвӧл, эн дэймы. Бен тазьы кайгырыса, соиз но кема ӧвӧл. Уть ай, копак восьмид ни ук, кымысад, тӥни, кисыриос кылдӥллям. Ма, эшъёсыдлэсь но кайпалскид ини, лушкем кариськид - кабзэ ас вактад усид. Пальпотонэд но кысӥз. Бен номыр йӧнала уг шумпотты ни тонэ. Инмысь шунды но, чебер нунал но. Дак уд ик адӟиськы ни кадь соосты. Ма, йырыд ошиськыса улӥз ке... Соин ик, бер ӧвӧл на дыръя, со лэсянтэм дарманьтонэдлэсь зэмзэ куштӥськы". - Но соку...- амалтэк вазиз со пумитаз, но веранзэ пумозяз ӧз вутты - мумиз куспетӥ кариз: - Ӵок, пие, ӵок. Мон валай ма шуыны турттэмдэ. Ӵок, чылкак липеттэм ӧвӧл ук. Ӝож ке но, секыт ке но, кызьы ке улод ай, чидалод, тынад гожтэмез сыӵе, дыр. Нош ӧд ке, воксё калык синмысь усёд но, кепыранэз тодӥськод бере, югыт куазез ик адӟемысь дугдод, весяк тазьы юрсирын пӧзёд. Нош таиз, оло, сюрс пол секытгес. Но со гинэ шат?! Лык ай сьӧрам". - Дак...- Илья Федотович чылкак ёрмиз. "- Лык, пие, лык. Мон тыныд мае ке-мае ке возьмато, мае но сое тодад уськыто. Ойдо". Копак ыштӥськем Макаров интыысьтыз вырӟыса вуттӥз-а, ӧз-а - пельпумъёсаз кытӥ- мартӥ олома быдӟаесь бурдъёс кылдӥзы кадь. Бен мумизлэн но! Ма, табере соос асьсэ коркан но ӧвӧл ни кадь - шулдыр возь вылын, нош вадьсазы, пыдэстэм лыз инбамын, дораз ӧтьыса выллем, ымныр пасьтаназ пальышаса, яркыт пиштӥсь шунды кырмышъя. "- Ойдо лобим, пие, сьӧрысьтым эн кыль". Вӧлмыт бурдъёсынызы лӧбак лопырскыса, соос лэймыт вырӟытскизы но, радтэм бадӟым ӧрӟиос оло пичигес еропланъёс музэн, выллань, мынясь-ялтрась шунды пала сётӥськизы. Паймытэк паймод! Огшоры дыръя со, Педот Илля, витетӥ этажысь укноетӥз но уллань шурдыса учке, нош али оло витьтон, оло сю этаж кеме ӝутӥськизы ни - зыл-зыл лобе. Ма, мар кӧберан - макем вылӥегес тубе, сокем эркынгес, няськытгес луэ солы, сокем юнгес лычсузе гадяз тэрисьтэм шумпотонэн пачылам, икак-икак карылӥсь сюлмыз. Нош инкуазь, инкуа-азь! Котырак - синэз палёмытӥсь ӵыдонтэм суред: шуныт тӧл пельтэмъя лэймыт воринъяса гыась буртчин турыно, турлы сяськаё возьёс, вуись юосын огсыр веттаськись ӵужмыт бусыос, мылкыдэз бордазы кыскись, лӧпкытӥсь но буйгатӥсь вож арамаос, чагырмыт-вож нюлэсъёс, чильк-вальк кисьтаськись шуръёс, тыметъёс, пумтэм-йылтэм сюрес нюжаос. "Инмаре, учкыса-учкыса кӧтыд уз тыр!.. А ведь шонер вераз нэнэе: таӵе-таӵе чеберез но адӟемысь-шӧдэмысь дугдӥсько ни вал..." Нош бурдъёссы весь вылэгес но вылэгес тубыто. Тани сюресъёс вылтӥ мыд-мыдлань ширъясь машинаос но шудон машинаос кадь гинэ адӟисько ини, нош адямиос, возьёс вылын кӧтсэс тырись пудоос - векчи кибилиос кадь гинэ. Ма, гуртъёс-городъёс но выжыкылын выллем йӧто, отысь юртъёс-еръёс шудон коркаослы, шырпу "каръёслы" укшало. Бен выжыкыл ик вань! Нокыӵе бӧрдон-куректон, тэргаськон-вожвылъяськон ӧвӧл татын - пумтэм шумпотон гинэ. Сыӵе капчи, сыӵе майбыр - дун ошмес ву кадь чылкыт омырез кӧттырмоназ гучыкъяса, гань-гань уя но уя. Но... уть ай, яркыт тылсиясь шунды маке бездыны, ӟаректыны ӧдъяз кадь. Музъем но бусэн оло мар возъяськыны - кыӵе ке ӵынкытэ ышыны шӧтаз. "- Нэнэ, кытчы тазьы лобиськом? Музъем но йӧнала уг адӟиськы ни ук". "- Макем вылэгес тубом, сокем пыдлогес, кыдёкегес адӟом, пие". "Пыдлогес?- паймиз Илья Федотович.- Кыдёкегес - валамон, нош пыдлогес..." Со куспын шунды уката гужаз но... ӵын пӧлы ышыны кутскиз кадь. Ма, эн ай, музъем палась зэмзэ бугыр-бугыр ӵын ӝутске ук. Тани зыныз но кылӥське ни, ньылонэ кутске, шоканэз кырме. Мар со? Оло, нюлэс ӝуа? Ӧвӧл - коркаос! Гуртъёс! Бен чик уг адӟисько ни вал но, кытысь, кызьы кылдӥзы соос? Уть ай, каръёс но! Вашкала каръёс! Гордмыт тыл кылъёс югак-югак лопыръясько. Адямиос соосты кысыны ик уг малпало, лэся, солань-талань бызьыло, кытчы ке пегӟо, нош борӟемчиос сьӧразы уйылӥсько но... палашъёсын корало. Асьсэос - быжо изьыосын оло йырси пунэтъёсын. Бен монголъёс, шӧдске, ук со! Паймытэк паймод! Пересьёсты но, кышномуртъёсты но, пиналъёсты но жалятэк корало-бышко. Инмаре!.. Нош сопалаз - ой-ёй-ё-ой! - сьӧд пилем кадь лыкто. Тулкымен-тулкымен. Со тулкымъёс инвис дорозь кыстӥсько. Ваньмыз - вал вылын. Азьпаласьёсыз кинэн ке ожмасько ини. Соосыз - чарак ичигес. Вистэм-вожтэм пукыӵ ньӧлъёс шулало, палашъёс лангырто, шибодыос чилекъяло, валъёс соргето-гырдалляло, адямиос кесясько. Соосыз но, таосыз но кусо улэ сюрем турын модосъёс кадь усьыло- пограло. Инмаре, со пограм-быремъёслэсь оло ке гурезь кылдэм ни. Отысь олома пасьта, олома кузьда вир шур бызе. Сьӧд пилемлы пумит ожмаськисьёс весь ичигес, ичигес кылё. Тани соос кабзэ сылмо ини, нош быремъёс интые вуэм выль кышкыт тулкымъёс, соосты лёгаса, тӧлпери музэн азьлань вортто - мукет гуртъёс-каръёс пала. Озьыен - выль тылпуос, бырон, бӧрдон-куректон!.. "- Учкы, пие, учкы! Учкы но тодад вай, тодад возь: асьмелэн вашкала выжыосмы озьы быро. Эрик, улон понна батыр ожмаськыса". "Бен, бен, ваньмыз озьы вал. Бигер-монголъёс, ӟуч эксэй ожгарчиос... Соос сяна ӝык, берлогес ӝык кинъёс гинэ ӧз быдтэ калыкмес! Самой кужмооссэ, визьмооссэ, шаплыоссэ! Нокыӵе ожтэм дыръя но ини, музъемъёссэс талан-киултон вылысь, кӧня гуртъёсты, нимаз юртъеръёсты пень каризы, отын улӥсьёсты коразы, ыбылӥзы, ошылӥзы, нош улэп кылемъёсыз пеймыт нюлэсъёсы пегӟылӥзы. Утиськон но улонзэс выльысь радъян понна. Сыӵеос, ма, трос ӧз кыле ни. Тужгес но - воргоронъёс..." "- Ӵапак соку ук, со вашкала дауръёсы, асьме калыклэн сюрлыез куасалскиз. Малы ке-а сыӵе востэм, дӥсьтӥсьтэм, кивалтон ужлэсь палэнскись луим? Сотэк-а али но таӵе кышкасесь? Азьвыл, тросэн быдтэмзылэсь азьло, чик сыӵе вылӥськымтэмы ук. Ма, ваньзэ тае ачид но тодскод. Вылаз ик, кӧнязэ сталин лагерьёсын, тюрьмаосын сисьтӥзы на, кӧняез герман ожъёсын быризы. Нош ик - тужгес тазаосыз, визьмоосыз, етӥзъёсыз, кужмоосыз!" "- Бен... Бен..." "- Озьы ке но, асьмеос выльысь улӟим. Пӧламы туннэ батыръёс нош ик ӧжыт ӧвӧл ини, шонер вераз киросняед. Но... нёшто табере тон сыӵе йӧнтэм дышмонъёс радэ султӥд. Ас калыкедлы пумит?! Уг, уг оскиськы талы. Озьы луыны кулэ ӧвӧл. Ӟеч-ӟеч сазьдӥськы но - уз, ноку озьы уз лу. Угось созэ но умой тодӥськод: ог-огмылы, йӧно, дано пиосмылы-нылъёсмылы пыдъёсмес пуктылыса, соосты саптаса-интэмаса улӥм ке, тодмо мадёсысь куинь юлтошъёс музэн, калыкмес мыд-мыдлань кыскаса возим ке, асьмеос ноку ӟече ум потэ". "- Бен, бен..." "- Иське, со пырултэм туртсконэдлэсь куштӥськод?" "- Куштӥсько". Тае кылыса, нэнэез нырысьсэ пальыштӥз. Ма, мар пальыштӥз гинэ - ымнырысьтыз кисыриосыз ик син куспын волязы, бамъёсаз ӵыжыт пыриз, егитомиз но школаын дышетыкуз шуккем туспуктэмын кадь чеберскиз. Бен тылсияськем шунды но выльысь мынектӥз, музъем но берен шулдырскиз-сяськаяськиз. Валамон, солы но, Илья Федотовичлы, каньыл луиз. Зэм, кылэмез-адӟемез сое номыртэм жадьытэм, лэся, - вань ёзвиосыз жиль-жилязы. Сыл ай, нош нэнэез кытчы пыриз? А-а, тани со, та палаз, солэсь йырзэ маялля. Ма, соин но таӵе небӟиз-каньсыраз, дыр. "- Буйгад-а, пие, лякытаз-а?" "- О-о". "- Я, туж умой, иське. Уть ай, та шундыед пӧсятэм но кадь ини - кымсад ву шапыкъёс быльыраллям. Ма, синмыд но кыниське ни, лэся. Иземед потэ, дыр, бен-а?" "- О-о-о..." "- Кӧл бен, кӧл соку. Нош мон йырдэ маялляло, веттан гуръёсме нёръяло... И-изь, и-изь, нуные, за-арни-и бу-го-ре..." Та мусоян гурен солэн синъёсыз зэмзэ кыниськизы но, Илья Федотович ганьмыт, майбыр умме усиз. ...Сайкакуз куазь югыт вал ини. "Ма, шунды но ӝужам ни ук - тӥни, пул висъёстӥ тылсиос пыро,- малпаз Макаров, дын-дын мушкояськем йырзэ ӝӧк вылысь мырдэмгес ӝутыса. - Вот ведь, а... Ӝомо-югдоен ик кӧчо шуи вал но...- ыштӥськем тусын ёрмыт посалскиз со.- Нокин, пӧй, медаз адӟы... Только, тани ук, кӧлэме кылиськем. Хм, хм..." Шунды тылсиосты выльысь синйылтыса, Илья Федотович уммезлэсь эшшо но сайкиськиз: "Уть ай, куазь тупатскем ук, шулдырскем...- Зэм, таӵе воштӥськон сое оломар ик шум ӧз потты, угось жӧлмыт йырзэ весь мукетыз портӥз:- Кызьы табере татысь кошкод? Ӵушкаса быдтозы ведь. Бакча бертӥ ке шат?.." Сюэз куасьмемен, со султыны ылам вал, но йырыз кыскыса, берен интыяз ланьдӥз. Кушетскыса вазиз: - Дак юэме но бордам на, лэся. Тани ук, йыры шузи нушы кадь, нош ымын - тьфу!..- Собере, тырттэм ӟенеликсэ адӟыса, пыктылэм синъёсыз воксё кымсаз тубизы:- Ма, быдэс мекалтӥськем ук! Да-а... Соин ик татчы кисьмаськем, валес вылэ но мынӥськымтэ ни... Бен, вылаз ик, йӧнала ӧй сиськы, вот и... Ини номыртэм юэмез потэмен, со нош ик ӝутскыны, колодчаысь ву пыртыны вырӟе ни вал, но ӵап со виын... нэнэеныз пумиськемез, соин ӵош... инметӥ лобамез тодаз усиз. - Мар вал со?!- выльысь ӵакмытак шара вазиз Макаров.- Пӧртмаськон? Кудӟеменым кылдэм адӟон? Ай уйвӧт-а?.. Ма, нырысь возьматскыкуз уг изиськы на вал... Собере тӥни лобамы. Кыӵе майбыр вал отын!.. Собере... собере - кӧшкемыт ожмаськон. М- да... Нош отӥяз... Нэнэе ӟырдыт индылӥз ке но, ваньмыз сямен со аслам малпанъёсы ук! Иське, ас малпанъёсме озьы адӟи?.. Ярам, отӥяз нош мар вал? А, шай тодэ... Йӧспӧртэм адӟон оло уйвӧт нюжазэ ыштыса, Илья Федотович могак луиз но мур лулскиз. Зэм, йырсазьыз макмырен сурымӟемын ке но, вунэм суред отын ик шуак возьматскиз - нэнэезлы кыл сётэмез. "Бен, бен, куштӥськыны кыл сётӥ. Нэнэе талы верантэм шумпотӥз... Ма, озьы-а, тазьы-а но, аслыд ачид воксё синазькыль луэмлэсь азьло та паняс йыринтонлэсь зэмзэ куштӥськоно, дыр. Бен, куштӥськоно. А квартира... - огдышем со четлыкын но кызьы ке улод, вылды, ини..." Та малпанэзлэсь солы, огласянь, чарак каньылазгес, нош мукет ласянь, каргам огъяулоннияз "ташъёнзэ" валаса, верантэм ӝож луиз. Соин ӵош ик сюэз но эриктэм ёртӥз ини - ньылоныз ӵак-ӵак кӧсэктӥз. Ма, соин валче йырыз но золгес висьыны ӧдъяз. Секытэн султыса, Илья Федотович ӟус вылысь тырттэм ведра кутӥз но гамбы-ыр вулы потӥз. Корказьысен со, лыз инметӥ лобакуз музэн ик, яркыт шундыен, чебер куазен ваче син вуиз, но та рад Макаровез чик ӧз шунтэ, ӧз шумпоттэ соос. Бен йӧнала ӧз ик адӟы та шулдырез - колодча доры губыр-губыр мынӥз но, ву ӝутыса, кӧсам ымдуръёсыныз уралмем гажын тыр ведра дуре лякиськиз. Ӵаж-ӵаж кезьыт ву пуш тылӝузэ ӧжыт юзматэм-басылатэм бере со кӧня ке сузь ымныраз пальккиз на, собере, ӵушиськытэк-маратэк, колодча бугролэн сэргаз пуксиз но тамаксэ аратӥз. - Сё, котьма медло но, туннэ нуналысен куштӥськисько!- сигаретсэ куж-куж зопыштыса, азьвылэныз чутрак люкиськон мылкыдын вазиз Илья Федотович.- Но... сыл ай, озьы шып палэнскыса гинэ умой луоз-а? Уть ай, пӧртэм ёросъёстӥ калтыртыса, кӧня муртлэсь йырзэ берыктӥ ни, кӧнязэ йыромытӥ! Уз, кыштырак кайпалскыса, йӧнала пайдаез уз лу. Вылаз ик, та вамыше сярысь калык уз тодылы. Иське, адямиослэн синмазы таӵе ик пырултэм кылё. Озьы бере, ма кароно?.." Бугыр тамакан куспетӥз Макаров та югдурез пӧртэм ласянь бергатӥз но бератаз таӵе малпанэ вуиз: вуылэм интыостӥз выльысь котырскыса (ӵок, ас уксёеныз ке но - кинлэсь ке пунэмалоз), ваньмызлы валэктоно: озьы но озьы, монэ шайтан бадӟым сьӧлыке пыртӥз - Дмитриевез данъяса ветлӥд ке, патер сётом шуизы но, соин сое ушъяса-чеберъяса, куарадэс со понна сётыны ӧтьыса калтыртӥ, нош табере умме сайказ, возьытэ ёртӥз но солы - сыӵе-сыӵе вирсэртэм алангасарлы! - пӧлы пум возьматыны курисько... Валамон, нялтас солэсь мукет сьӧлыкъёссэ но шараялоз (ма, вань сарпаськемзэ!), таин ӵош ик удмуртлыкмес утён сярысь но кылпум поттылоз. Бен Кузнецовлэсь нимзэ но! Сое сӥлы карыны ӧтьыса. Соиз озьы, нош ик олокӧня пол му пыр виялляно луоз, но тазэ кызьы ке чидалоз ини - со понна адямиос но янгыш вамыш уз лэсьтэ, ачиз но ӧжытак коть чылкыталоз. Нош главноез - ваньмыз со асьме выжы калыклы пайдаен берытскоз. Тӥни сыӵе малпанэ вуыса, Илья Федотович кыштырак ӝутскиз но пырыны медэ ни вал, но со вакыт кужекъясь, анӟырам йырсазяз шӧдтэк шорысь шуккиз: "Эн ай, быръён нуналозь куинёй сяна ӧз кыль ни ук! Иське, кызьы, ку сомында ёросэ, сомында гуртэ вутскод? Нокызьы уд. Иське, та малпанме йӧнала быдэстэме но уз лу. Уз, матын но уз!" Та шуытозь суйыз-пыдыз юскиськыса, со берен либырак интыяз лэзькиз. - Вот шедиськи-из...- пӧсьйыл-керек нёртӥз со, выль сигаретлы кисыяз эли-кеби пырыса. Ымпушкыз ӵапак со тамакен, аракыен былама ӵуштаськемын ни бере, Илья Федотович тазэ мырак кароно, дыр, шуэ ни вал но, гуркак куашкам мылкыдыз таки эриктэм кенжытытӥз.- Мар-о, та сикыӵысь мозмыны нокыӵе амал ӧвӧл ни-а?.. Дак, эн ай, газетъёс вань ук! Радио, телевизор. Чаляк бертыса, отчы гожтоно, отын вераськоно,- кытӥ-мартӥ лӧпшаз со.- Таиз бер ӧвӧл на, вуо. Соку, ветлэм интыосам гинэ ӧвӧл, мукет азьын но кыӵак кылозы, адӟозы, лыдӟозы. Зэм, та бӧрсьы ожалскем выль малпан со вылэ быдэс ведра кезьыт ву пальккиз кадь. Ма, бен ваньмыз сямен редакциос Дмитриев пала турнало бере, таосты со мыжыказ кырмыса возе дыръя, сыӵе-сыӵе веранзэ кин печатлалоз, кин радиое, телевизоре лэзёз? Вот угось. "Азьлань", конешно (со гинэ!) поттысал, но табере... Уз, уз ни. "Ярам, чик осконтэм ке но,- солэн ӟуг-керӟег малпаськонэз азьлань визылаз,- шуом, кызьы ке пӧрмиз. Нош ӵуказеяз мар луоз? Кандидатэз токма шорысь дэриын погылляськод, юромо жоб кыл вӧлдӥськод шуыса, психбольницае келялозы. Музон пытсэт сьӧры - тюрьмае! - ке ӧз. Бен гожтэмед газетэ ӧз пот ке но, веранэд радио я телевизор пыр ӧз чузъяськы ке но, ӵапак озьы ик луоз, угось кагаз вылэ гожтэм ӧпкелён-шараян-ӧтёнэд та шуытозь вылӥ кабинетъёсы вуоз. Ма, укыр сокем ӧз ке но сьӧсьяське, сёровно кыедэн суралозы. Огъя вераса, нальык ворсаськиз!" Та вылэ вуыса, Макаровлы сыӵе вӧсь, сыӵе курыт, сыӵе секыт луиз - эсьма, кытчы пырыны ик ӧз тод. Со виын кытысь ке мышкысьтыз - мур гуысь оло воксё музъем пыдсысь выллем - сыӵе ик дурыстэм вӧсен-курытэн но пумтэм жалянэн пачылам тодмо куара кылӥськиз: "- Ой-йы, пие, ой-йы!.. Либо сокем эн чигиськы ни вал, сокем эн кайгыры - буйгатскыны тыршы. Ма карод на, озьы луиз бере?.. Главноез - тон астэ ачид вормид, куштӥськид но азьлане аслыд чебер сюрес усьтӥд. Озьы бере, вылысьтыд сьӧд вишты но чарак пичиёмиз". - Но ведь, тон сяна, со сярысь нокин уг тод, нэнэ!- шудтэмлэсь шудтэм куараен кеськиз Илья Федотович, шуак сьӧрлань берытскыса. Ноку вунонтэм мусо тусбуй нокытысь ӧз адскы ке но, со ӧз чалмы, угось ӟеч тодэ: нэнэез солэсь сюлэм куаразэ котьку котькытын кылоз.- Уз но тодылэ! Кызьызэ-марзэ ваньмызлы нимаз- нимаз валэктыса уд ветлы ук. Озьы бере, отӥяз но весь каргалозы, адӟонтэм карозы, весяк тушмон шоры кадь, ас калыкеныз вузкарись шоры кадь учкозы. Нош сыӵезэ чиданы... "- Озьы ке но, пие..." - Паймод, шуозы, та зын кудылы! Ведь ужантӥяз но, кылбуръёсаз но лулмес чебермытон сярысь сюлмаське кадь вал, нош ӟечгес учконо ке, солэн шорсюлмыз, шуозы, копак кӧшмамын-сисьмемын вылэм. "- Ма, котьма мед шуозы но, верасько ук, тон синмаськымон вамыш лэсьтӥд ни, азьпала азелы аслыд йӧскадь сюрес ӵогид. Таре ӵапак со азьланез сярысь ик малпаськы ини - отӥяз та выллем янгышъёс лэсьтыны медад шедьты. Соку ваньмыз умой луоз". - Эх, нэнэ!.. "- Буйгатскы, пие, буйгатскы. Чидатскы, буйгатскы но..." - Уг быгатӥськы-ы-ы! "- Ой-йы, ой-йы!.." Радтэм курыт лулскем мумиз верантэм жаль потыса, Илья Федотович ури-бери султӥз но отчы - уллань - учкиз. Ма, нокин, номыр сыӵе-таӵеез уг адӟиськы. Ай ӧвӧл, пыр-пыргес учкысааз ву вылэ бездыт кизилиос кылдӥзы, собере - кизер-лыз инбам. Но тани ворекъясь кизилиос пыр нэнэезлэн кӧд-кӧд гужам куректӥсь ымнырыз чильпыраны шӧтаз но, со восьмыт тусбуй пумен яркытаны ӧдъяз. Бен отысь ин кесэг но. Кизилиос нош йӧскадь ялтраны-кырмышъяны кутскизы. "Ма, уть ай, отын - зэмос инбам ук!- воректӥз Макаровлэн жонгетыса, пилиськыны турттӥсь бусаськем йырсазяз.- Кылем уй гань-гань, вӧт-вӧт уям-лобам ӵыдонтэм инбаме! Кыӵе эркын, кыӵе умой отын!.. Эн ай, нэнэе тӥни нош ик бурдъёссэ вӧлъя ини, нош ик лобаны дасяське. Мон но, мон но соин ӵош!.. Зэм, та рад кыӵе ке туж секытэн ӝутскиз. Монэн сэрен шугъяськыса-кайгырыса кынарыз быриз, вылды. Но мон сое лӥято, зӥбломыто, ёзвиосаз выль кужым шокчо. Собере со чеберлэсь чебер дуннеын сюлэмъёсмы икак луымон поръялом, шуныт, чылкыт омырын кӧттырмонамы пыласьком. Отчы, отчы, со доры!.." Шуэрскем мумиз солы "Эны! Эн! Дугды, сазьдӥськы, пие, олома эн даурты!" кеськиз кадь, но чеберлы ӝутӥськем Илля пиез тае йӧнала ӧз анла, нэнэезлэн алэмез нокытчыяз ӧз гердъяськы - лӧпшам малпан бурдъёсыз дуак вырӟытыса, со ӧжытак выллань ӝутскиз но - тю-у! отчы, улӥ инбаме, нэнэез доры, лобиз. Жомбыляк сэзъялскем-пальккиськем ву кӧня ке бульыртыса улӥз но утыр лапканы ӧдъяз. Зэм, отысь бездыт кизилиос эшшо огшап лэймыт, вогыр-вогыр веттаськизы на, собере выльысь тӧдьыр-тӧдьыр чимыяськизы. Вылӥ инбамысь шунды (Педот пилэн адӟоназ но няськыт палям шунды!), тае синйылтыса, туж ӝожомиз, кытӥ ке ӧвӧл сьӧд пилем бӧмез вуттӥз но соин ӵош кузял синвуэн ӧръяськиз. Бен улӥ инбам но пеймытаз, отысь кизилиос чиптэм-чаптэм ышизы-быризы. Но кемалы ӧз - зор ортчем бере, кык инбамъёс выльысь чагырскыса, соос нош ик яркыт ӝуатскозы. Оштолэзь-куартолэзь, 2002 ар. 13 1 Атаманов-Эграпи Микаль КЫЛЁ ТОДЭМ КАЛЫКЪЁС очеркъёсын сузьет "Улон даур кызьы но уг ортчы", - шуо калыкын. Зэмзэ но, куд-огезлы выжы-кумымылы яке бускельмылы кӧня шуг-адӟонъёс, кайгу-куректонъёс пыр потоно луэ. Нош мукетызлы малпамтэ шорысь, инмысь зорем кадь, шумпотон вылэ шумпотон лыктэ. Малы озьы луэ? Кин тодэ ини. Оло нош, палэнысен гинэ озьы адӟиське, угось "мурт улонэз улыны кылдымтэ". Мургес учкид ке, оло, бадӟым кайгу-куректонлэн бурд улаз но ай кинлэн ке ненег сюлэмыз пальпотон-серектонлы шумпотыса улэ, нош шудбурлэн вуюись тылсиосаз кинлэн ке юзмамтэ лулыз ӝожезлы чидатэк бӧрдэ. Та улонын ваньмыз ик вань, дыр. Гажано эшъёс, тӥляд куремдыя, таяз номерысенымы "Улон гердъёс" нимо сэрегамы ми печатланы кутскиськом вӧзамы улӥсь зэмос адямиос, тодмо но тодмотэм муртъёс сярысь тунсыко мадён-веранъёсты. Писательёс, тодосчиос но журналистъёс сяна, ас чакламъёстэс, малпанъёстэс тӥ но, милям лыдӟисьёсмы, ыстыны быгатоды. Ми соосты журнал бамъёсамы ӝегатытэк сётыны тыршом. Нош улон-вылон сярысь мадёсмес ми кутскиськом Атаманов-Эграпи Микальлэн гожъямъёсыныз. "Кӧня тодмоосы, ӵош шудэм, будэм, дышетскем, ужам, вӧсяськем эшъёсы, выжы-кумыосы, самой матысь муртъёсы - анае, атае но таисьтыз дуннеысь кошкизы ни. Кытын соос али? - Инмар тодэ. Малы ке но мынам соос сярысь, кӧня быгатӥсько, сомында ке но, пичияк ке но, куд-огез сярысь гожтыса кельтэме потӥз..." - ручка борды кутскон мугзэ шарая автор. Гожъяно адямиосыз: Марпа песяй, Дарья Михайловна, Ювеналий игумен, Анна Павловна, Гавриил иеромонах но мукетъёсыз - ваньзы улонысь басьтэмын. Котькудӥзлэн аслаз сюресэз. Мадён-веранзэ Атаманов-Эграпи "Кылё тодэм калыкъёс" нимо сузьетэ огазеям, котькуд геройзэ нимаз ёзэтэ висъяса сётэм. Таӵе радлык лыдӟисьлы котькуд суредам муртэн матысьгес тодматскыны, мылкыдъёссэ-малпанъёссэ ӟечгес валаны усто луонлык сётэ. Атаманов-Эграпи Микаль (Михаил Гаврилович Атаманов) - тодмо удмурт кылчи, кылтодосъя доктор, удмуртъёслэн интынимъёссылы (топонимъёслы), аснимъёссылы (антропонимъёслы), озьы ик удмурт калыклэн вашкала улонысьтыз куд-ог юанъёслы (кылсярысь, воршудъёсъя огазеяськонъёслы) сӥзем данак кылужъёслэн авторзы вордскиз Грах ёросысь Вуж Эгра гуртын 1945 арын 19 куарусёнэ. Дас одӥг ар Историяя, кылъя но литературая Удмурт институтын тыршемез бере 1989 арын черке ужаны кошке. Али со - протодиакон, отец Михаил, Удмурт Епархиысь референт, Святой равноапостольной Владимир князьлэн ИИИ степенё орденэныз Патриархен данъям но Россиысь Президетлэн Указэзъя "За заслуги перед Отечеством" орденлэсь ИИ степенё медальзэ басьтэм мурт, Иж карысь Свято-Успенской черкын службаос нуэ. Отец Михаил калыклы тужгес но тодмо луэ Библиез но вӧсяськон книгаосты удмурт кылэ берыктэменыз. Туннэ нуналлы удмуртъёс кие вуизы ини таӵе книгаос: "Марклэн гожтэм Евангелиез", "Ӟеч Ивор", "Псалтирь. Вӧсяськон гур "Данъяса кырӟан гуръёс", "Вӧсяськонъёс", "Апостолъёслэн ужъёссы", "Выль Сӥзён", "Часэн- часэн вӧсяськонъёс но кырӟанъёс", "Нылпиослы Библия". "Кылё тодэм калыкъёс" гожтосэныз тодматскыса валаськод: та визьмо но йӧно удмурт воргоронлэн Инмарен сётэм эшшо одӥг быгатонэз вылэм на -котырысь адямиос сярысь лулысь-сюлмысь, яркыт суредаса, оскымон но шуныт мылкыдын мадьыны-гожтыны пӧрмытэмез. Озьыен, тӥ но лыдӟе, тодматске та аспӧртэмлыко сузьетэн. Ой, дуннеос, дуннеос, Кылё лёгем пытьыос... Кылё лёгем пытьыос но, Кылё тодэм калыкъёс. (Удмурт калык кырӟан) "Улон вань но, кулон вань" "Таяз дуннеын кызьы ке но, оло, улод ик, но сояз - кытчы сюрод?" - аныкаелэн тазьы чигиськон дыръёсыз вал. Пичи дыръя оло кулонлэсь, оло кулэм муртлэсь курдано вал. Анаелы ньыльдон арес тырмем бераз, малы меда со тазьы шуиз: "пересьми ни, кулон дыры вуиз". - "Ан-а-а-й, эн кулы!" - корка трос бӧрдӥсько. Соку мыным вить арес вал ни. Анае ачиз ик монэ, пичи пизэ, буйгатӥз, либатӥз. Но со курдаме быдэс даурамлы кылиз: весь анае кулоз кадь потылӥз, анае кулӥз ке, кызьы меда та дуннеын улыны чидалом? Гуртмы бадӟым бере, арлы быдэ кин ке но вордӥське, кин ке но кулэ. Эшъёсмылэн вынъёссы, сузэръёссы вордӥсько ке, анаелэсь паймыса юасько вал: "Анай, Пету Витяос пичи нунызэс кытысь басьтӥллям?" - "Ошмесысь ваиллям" - шуылӥз анае. - "Асьмелы но ваёно" - солэн пумитаз вазисько. Кызьы меда та учыре алдалляз анае, уг ни тодӥськы. Но туж потэ вал милям но пичи вынмы, сузэрмы мед луысал... Сое мон кӧкыын веттасал, пичи уробоын нуллысал, соин шудысал. Мынэсьтым бадӟымгес, кужмогес луэмме шӧдыса, со монэ "дадай" шуысал, ато нокин но "дадай" шуисе но ӧвӧл. Но тужгес ик паймоно вал кулонлы. Кулон... мар со? Анае келяськыны мынэ ке, мон одно ик сьӧраз калъяськисько. Анае китӥм кутыса нуэ. Куддыръя пыдъёсы сюй борды ик уг вуо, омыртӥ лобӟисько, анае дыртытэ, - келяськоно но колхоз уже мыноно. Кызьы али тодам лыктэ, "кулон" кылын нырысьсэ пумиськи куинетӥ аресам мыныкум. Соку кулӥз ваче беринысьтымы Тока абие. Война бере секыт, сютэм аръёс вал. Тулыс вазь ик со йӧ вуэ корзинкаен чорыганы пырем - бадӟым оже бырем одӥг гинэ Биктур пиезлэсь нылзэ, кензэ чорыг лымын сюдэмез потӥз, дыр, оло, аслаз но сиемез потӥз? Анае шуэ вал, Тока абиед туж, пе, чорыганы яратӥз. Уяз ик черлам, пыдъёсыз кор кадь тӧрналлям. Султэмез ӧз луы ни мискиньлэн, кӧня ке висьыса кыллем бераз кулӥз. Улэп дыръяз анаеным пӧсь шыд нуыса мынӥм, монэ вешаз, тодӥсько на. Ой, кыӵе жаль Тока абие! Милям пичи гинэ, но вож гуждоро, тополь садо, шыпыт Шонеркенер урамамы юри быръем кадь умоесь адямиос уло вал. Валче, дэмен ужало: веме ке лэсьтоно, валче ортчыто; ӝыт ке вуэ, гужем шуныт ӝытъёсы кор вылэ пукыны пото; кузесь тол ӝытъёсы огзы доры огзы киуж кутыса, - я керттӥськонэн, я черсонэн, пукыны мыно; юондыр ке вуэ, нош ик огазьын. Одӥг семья кадь улӥмы. Кыӵе ӟеч адямиос вал. Со ӟечъёс пӧлысь одӥгез Тока абие. Солэн нимыз Окля, но милемыз малы ке но сое Тока картэзлэн нимызъя Тока аби шуыны дышетӥллям. Тока абие кулэм бере, шулдыр садо урамысьтымы одӥгез веськрес тополь садмы чигиськиз но со интые шал инты кылиз кадь мон понна. Кӧня ке ар ортчыса, Тока абиеным артэ коркась Самар аби кулӥз. Али но син азям: гужем пӧсь куазен но шымыриё шубаен, гын катаен, конгылё боды вылаз пыкъяськыса ветлэ вал. "Эй, Лявоке, Лявоке, кытчы пырид, кытчы бырид?" - шуыса чигиське вал Самар аби, войнае бырем одӥг гинэ пизэ буре вайыса. Гитлер вылэ одӥг пол гинэ карган кылъёс ӧз кисьты пиналысен карттэк кылем ӟырдыт сюлэмо кенэз Лангыр Сана апай. Каргам война!.. Тямыс коркаё Шонеркенер урамысьтымы витез воргорон вордӥськем юртаз ӧз берытскы ни: Тока Биктур, Самар Лявок, атаелэн дадаез Опоня Мика - мынам бадӟым атае, Этэль Кикон, Лякоп Сеня. Кӧня ужась удмурт нылъёс, удмурт пиос дунне вылэ вордскытэк кылизы - соос мынам ёзъёсы, эшъёсы луысалзы ук! Этэль кудолэн Кикон пиез кышнояськыса но вуымтэ - ож бусые нуиллям. Юон бере, макмыр веськатыса, Этэль кудо ми доры но вуэ вал. Вань веранэз, бӧрдонэз одӥг вал: "Эй, Киконэ, Киконэ..." Бӧрдод уго, одӥг гинэ юрт утисез вал бере. Таре Этэль кудоен Палагей туклячи кемалась кулӥзы ни. Вашкалалэсь но вашкала корказэс Иж вӧзысь Лудорвай музее нуизы вал. Оло пуктӥзы, оло сисьтӥзы ни сое. Этэль кудо бере, кытӥяз солэсь но вазьгес, макмыр веськатыны сямен, Шонеркенер урам шоры учкыса сылӥсь коркась Микой бабай вуэ. Солэн но кышнояськыса вумтэ Вася пиез войнаысь ӧз берты. Микой бабай одӥг сюмык юэ но Вася пизэ жаляса бӧрдэ вал... Анаелэн-атаелэн ал вылазы пукон аръёсам, тодӥсько на, кыдёкысь, ваннапалась, эшшо одӥг песятай кайгузэ-мӧзмонзэ вераны вуэ ми доры - Пӧсег Микулай - трос дышетскем адями, анаелэн киросатаез, ӵужатайёсылэн яна потэмзы. Таизлэн но песятайлэн чур вияло синвуосыз: Гондыргурт кышноезлэсь кылем одӥг гинэ Паша нимо пиез быдӟым ожлэн тылӝуаз быриз. Кыӵе визьмо пи шуо вал сое. Алабгоысь пединститутэз йылпумъяз гинэ, кышнояськыса но ӧз вуы, оже нуизы. Ышиз-быриз... Кайгу, кайгу но мӧзмон... "Секыт ужез ужасал но та мӧзмонэз ӧй мӧзмысал", - кырӟало вал вашкалаос. Чын но озьы, дыр. Вылаз вуэм мурт та кылъёсыз вераса кырӟам ни. Дыр вуиз но, оже бырем солдатъёслэн анай-атайёссы гинэ ӧвӧл, кышнооссы но - салдаткаос - таисьтыз дуннеысь картъёссылэн улон интыязы кошкизы ни. Одӥг Аннок апае гинэ, Тока абиелэн кенэз, вань на. Со но тямыстонлэсь ортчемын ни. Выль кен куен, кызь куинь арескын, одӥг гинэ ныл нуныеныз кылиз Аннок апай, яратоно картсэ Тока-Биктурез пырак ӵожелы ож бусые келякуз. Кема-кема ул на, Аннок апае! Гуртэ ӧжыт кылизы ни анай-атайме тон кадь ӟеч тодӥсьёс. Тонэ адӟисько ке, гольык пыд бызьылэм пичи дыр дуннеям вуисько кадь. Шонеркенер урамамы, ми кошкем бере, ваньмыз выльдӥськиз ни, выль адямиос лыктӥзы, одӥг тон но Юрик дадаеным Надя нылыд гинэ вань на пичи дырмес, пичи коркамес тодӥсьёс. Со понна но мон тонэ яратӥсько, Аннок апае: тон котьку но шулдыр, капчи мылкыдо адями, нокин сярысь но урод кыл верамдэ кылэме ӧвӧл - анаелэн киросапаезлэн нылыз. Милям пичи гинэ коркаенымы артэ улӥз Йыраш кенак (кыдёкысь Йырашйыл гуртысь со Эграла буземын вал, гурт нимызъя сое Йыраш кенак шуизы, чын нимзэ уг но тодӥськы) кык пиеныз огазьын. Бадӟым нылыз, Маня апай (Иисус Христослэн Ӟеч Иворез пыр ми соин огмес огмы туж гажаськомы), быземын вал ми вордскем берегес ик. Война аръёслэн секытсы, ой, секыт ке секыт йӧтӥз ини Йыраш кенаклы! Сиыны - нянь ӧвӧл, гур эстыны пу ӧвӧл (вашкала гурт котырысьтымы нюлэсъёс кемалась аръёсы кораса быдтэмын ни; гурт межа сьӧрамы Бигер Элькун - кыр дунне). Пиос шаплыесь, атайтэк кыӵе шуг соосты кие кутыны. Вань секытлык, шугадӟон, куректон- кайгырон усиз мӧйымыны кутскем кышномуртлэн пельпум вылаз. Сеняез ке луысал!.. Солэсь но улонзэ сьӧд немец пуля дырызлэсь вазь уретӥз. Пичиез пиез, Олёш, милесьтым кӧня ке ареслы - бадӟым вал. Шудон пӧлысен, кӧт сюмаса улэмен йырин вал, дыр, ни со, Олёш милемлы вера, Йырашкысь ӵужмуртъёсыз кыӵе бай уло вылэм: "Вот, - шуэ, - ӵужмуртъёсылэн улмо садазы тросаз улмо, муш бакчаязы мар ке мында муш умортооссы, чечызы быдэс вышкыен сылэ". О-о, милям, кӧтмы сюмаса, ческыт сиён сием потыса будӥсь нылпиослэн, дыльдымы шыр-р! вия. Чечы, улмо! Кытын вал ми кадь крестьян нылпиослы таӵе ӟечлыкъёс! Олёшлэн ӵем дыръя шорыны нянез но ӧй вал. Школаысь бертыса, Балан Мишаен, Майор Мишаен ("Кутыпи" сое шуо вал), Ӟанкае, байгес ӟучо-крашино гуртэ, нянь кураны ветлэмзэс но ӟеч тодӥсько на. Эшшо, ӧжыт гинэ ӧй вунэты: ог куинь арес дыръямы, эшмы Северьян - Пира Паша дадаен Орина апайлэн милемын одӥг арес пизы, кулӥз. Атае сьӧрын, Гардаша валэн, Ганя братэ, Северьян, мон, юэн пуйыос вылын пукыса, быдэс нунал ветлӥмы. Оло соку, оло берло, уг ни тодӥськы, Северьянэз тӧл шуккем. Со ӝог черлаз но ӝог кулӥз. Лулыз потытозь, пе, весь "Ганяе, Ганяе!" шуиз. Кыӵе жаль вал эшмес ыштыны! Весь возьмамы: тани Северьянмы лыктоз. Но со ӧз ни лыкты. Соку ми валамы: кулэм мурт адямиослы уг ни возьматскы вылэм, Паша бабай актык кулытозяз весь утчаз Северьян пизэ. Ганяеным милемыз адӟе ке, кулэм пизэ адӟем кадь луэ вал, лэся: дугдыса ик вераськыса сылэ. Пичи юэмез ке луэ, бӧрдытэк уг кыльы ни. "Простить каре, простить каре!.." - шуыса дор палаз вамыштэ кыз ӝужда будэм но персьмыса губырес луэм лякыт сямо Паша бабай. Кыӵе лачмытэсь вал та вашкала удмурт пересьёс! Али но шумпотыса тодам ваисько, кызьы милемыз, кыкто пиосыз, гурт калыкмы эркияса будэтӥз, тужгес но анай- атайлэн ёзъёссы, яке солэсь но мӧйыос. "Гавирелэн, Веркаелэн пиосыз" шуыса, топ- топ вешало вал тыбырамы. Кызьы вунэтод сыӵе адямиосыз? Сояз дуннеын но ӟеч мылкыдоос ӟеч мед улозы, Инмаре. * * * Тӥни озьы. Война бырон арын вордскем лулы пичиысен "кулон" кылэз кылоно луиз. Табере, пурысьтатозям улэм берам, кӧня тодмоосы, ӵош шудэм, будэм, дышетскем, ужам, вӧсяськем эшъёсы, матысь выжы-кумыосы, самой матысь муртъёсы - анае, атае но таисьтыз дуннеысь кошкизы ни. Кытын соос али? - Инмар тодэ. Малы ке но мынам соос сярысь, кӧня быгатӥсько, сомында ке но, пичияк ке но, куд-огез сярысь гожтыса кельтэме потӥз - мед тодозы ми бере будӥсь пинал калык, вуоно вакытъёсы, выль дауре улоно муртъёс, кыӵеесь адямиос улӥллям бугырес, пыраклы кошкем кызетӥ дауре. Ваньзы соос - огшоры ужась калык - гуртын вордскемъёс, городын улӥсьёс, Инмарлы пумитъяськисьтэм адямиос, но соос - святойёс но ӧвӧл. Кулытозязы ужамын; курданэз, возьдаськонэз тодӥсьёс, матысьёсынызы гажаса, тупаса улэмъёс. Кинлы Инмар сётэм - нылпи вордэмын. Одӥгъёсыз Инмарлы туж матын улӥзы, ялан вӧсяськыса, ӟеч ужъёс лэсьтыса. Мукетъёсыз - кыдёкынгес, уж пӧлы выйыса улӥзы. Но соос озьы но йыромыса коммунистъёс, атеистъёс радэ пыремын ӧй вал, черклы, осконлы пумит уж ӧз нуэ. Таӵе адямиос пӧлын мон вордски, пичи дырме ортчытӥ, дышетски, ужай, вӧсяськи, пересьмон даурам вуи. Таисьтыз дуннеысь соос ваньмыз кошкемын ни. Соос ваньзы мынам яратоно, гажано, мусоесь, сюлмылэн яратон муртъёсыз вал. Мон соослэсь мӧзмисько, ялан буре ваисько но куд-огзы сярысь кагаз вылэ гожтыса туж кельтэме потӥз. Мукетыз мугез со бордын: асьме удмурт литература будӥз, кыдаз, азинскиз кызетӥ дауре, куке дунне вылысь самой бадӟым, трос калыко кунын осконлы пумит кужмо нюръяськон мынӥз. Соин ик вань удмурт романъёсыз, повестьёсыз, веросъёсыз, поэмаосыз, кылбуръёсыз, кызьы шуо, йырысенызы пыдозязы бугыръяд ке но, Христос Инмарлы оскись йӧназ адямиослэсь образъёссэс отысь уд шедьты: Инмар Анаез, дун- шектэм улыса Инмарлы ярамон луэмъёсты (святойёсты) сӥлы карись кылан-буранъёс но уз сюре, выль даур - перестройка шуон вакытъёс вуытозь. Оскисьёсты, священникъёсты мыскыллянъёс - пачылаз. Возьыт. Калык понна Инмар азьын кышкыт. Та муген но киям ручка кутытэк ӧй чида. Вал ук, али но вань кужмоесь гожъяськисьёсмы, но малы озьы палдурес азинске литературамы? Христиан цивилизациялэн ӧс сьӧраз малы со йырзэ ошыса, кепыраса сылэ? Кык сю витьтон ар ӵоже ини удмуртъёс христиан калык лыдъясько ук. Оло нош удмурт калык пӧлын Инмарлы оскисьёс чик но ӧй вал,оло удмурт калык вӧсяськытэк, Зэм Инмарез тодытэк шайтан законъя тэргаськыса, ог-огзэ йырйыса, ченгешыса, вожъяськыса, вожвылъяськыса, керетыса, чагиськыса-урттылӥськыса, юыса, юмшаса- калгыса, асьсэзыз быдтыса, ог-огзэс синазькыль карыса, юриськыса-каргаськыса, тунаськыса, пелляськыса, веднаськыса, кӧт пӧсен гинэ улӥзы? Ӧвӧл, озьы ӧвӧл! Озьы ке но, малы бен куд-ог тодосчиосмылэн, публицистъёсмылэн, журналистъёмылэн та дырозь возьытсы тырме Христос Инмарлэн пеймыт дуннеез югдытыны ваем дышетонэз вылэ, Библия вылэ, черк вылэ, Инмарлы оскись калык вылэ дугдытэк дэри ву пазяны? Соос ас калыксылы тушмон уж нуо, югыт сюрес вылысь пеймыт дуннее кыско. Уг тодо, тодэмзы но уг поты, лэся, асьме Православной черкъёсы сюрсъёсын ветлӥсь удмурт калык сярысь, соослэн улон-вылонзы, осконзы, сюлэмшугъяськонъёссы сярысь. Соос асьмелэн вордэм анай-атайёсмы, песяйёсмы-песятайёсмы, ӵужайёсмы-ӵужатайёсмы, апайёсмы, эшъёсмы, бускельёсмы ук, кинъёслэн чылкыт сюлмынызы, ужаса сюрмем киосынызы, сураськымтэ-пожаськымтэ визьмынызы лэсьтӥське, возиське улон-вылонмы. Соослэн вӧсяськеменызы возиське югыт дунне. Инмар сётэ дэлетсэ, берекетсэ. Коммунистъёс кивалтон аръёсы сюрсъёсын-сюрсъёсын Инмарлы оскисьёс пытсэтъёсы келямын, виылэмын вал. Соос пӧлын ӧжыт ӧй вал удмурт пиос но нылъёс. Нош кӧняез лушкемен, ватӥськыса Инмарез данъяса улӥзы?! Котькуд адямилэн та улонын аслаз сюресэз. Мынам гожъяно-суредано адямиосы (геройёсы) ваньзы улонысь басьтэмын, нимъёссы но, улон-вылон сюрессы но ваньзылэн асьсэлэн; пӧяса, чеберъяса одӥгзы сярысь но ӧй гожты. Сыӵе сямы ик ӧвӧл. Черке вуи но, тросэныз геройёсыным отысен пумиськыса, тодматскыса, ӵош вӧсяськи, Инмарез данъяса сылӥ. Тани соос, тодмоосы, выжы-кумыосы пӧлысь куд-огез... Марпа песяй Инмар Анайлэн кудӥз ке но праздникез вуэ ке, черкын одно ик Евангелиысь та чуръёсты чирдо: "Сюрес кузя мынон сяменызы, Иисус одӥгаз гуртэ вуэм. Татын Марфа нимо кышномурт Сое аслаз корказ ӧтем. Солэн Мария нимо сузэрез Иисуслэн пыд выжыяз пуксем но Солэсь верамзэ кылзӥськыса улэм. Нош Марфа, трос сиён-юон дасяса, Сое куно карон сярысь сюлмаськем. Собере Иисуслэн матаз лыктыса шуэм: "Кузё-Инмаре! Сузэре монэ огнаме ужаны кельтӥз шуыса, тыныд нокыӵе но уг поты шат? Вера солы, мыным мед юрттоз". Нош Марфалы валэктон сётыса, Иисус шуэм: "Марфа, Марфа! Тон тросэз сярысь сюлмаськиськод, шугъяськиськод, нош кулэ огез гинэ. Мария ӟечсэ люкетэз бырйиз, кудӥз солэсь уз басьтӥськы!" Сюдыны-вордыны укыр мултэс сюлмаськем понназ Кузё-Инмармы Марфаез пыкылӥз ке но, кык сюрс ар талэсь азьло улэм та кышномурт сюлэмлы матын, гажано мурт: кин ке дорад куное пыриз ке, кызьы сое уд сюды-ворды? Мултэссэ гинэ бызьылыны кулэ ӧвӧл - маид вань, соид тырмоз. Кыдёкысь Вифаниысь еврей ныллэн выросъёсыз, куноян сямыз огшоры улӥсь удмурт калыклы (урттылӥськон сямзэ вератэк) туж матын, валамон. Асьме калык но уго юртаз пырем муртэ ӧвӧлзэ но вань карыса кунояны тырше. ...Черк шоры потыса священник чирдыны кутске ке та чуръёсты: "М(рфо, М(рфо, печешися и молвиши о мн(зе...", соку ик тодам лыктэ, син азям улэп кадь пуксе кык ар талэсь азьло таисьтыз улонысь кошкем Марпа песяе. Со мынам вирыя нокыӵе но ӵыжы-выжые ӧвӧл, но Христос Инмарлы оскон монэ та пересь муртэн тодматӥз, огазе кариз. Со анае кадь потыны кутскиз. Нуналлы быдэ со тодам улэ, уката ик кулэмъёсты буре вайыса вӧсяськыкум. Тямыстонэтӥ аръёслэн пумазы черкын мон выль адями вал. "Кыгыбыос", уполномоченной шуонъёс черкен кивалтыны тыршизы ке но, Марпа песяйлэн кадь кужмо осконэн адямиос черк улонлэсь пуш улонзэ, этикетсэ ки улазы возизы. Кӧня соос мыным юрттӥськизы, ӟеч мылкыдзэс сётӥзы, осконме юнматӥзы! Олокызьы озьы, но трос-трос вӧсяськисьёс, Марпа песяй кадь ик, монэ туж каньылэн, шумпотыса пӧлазы пыртӥзы, вордэм пизэс кадь яратӥзы. Диакон санэ ке но вал ини, тросэз удмурт песяйёс мыным "пие" шуыса гинэ вазиськылӥзы, нош Марпа песяе кулытозяз ӟуч сямен "сынок" шуиз. Яратон со бордысь но потӥз: Марпа песяй анаеным одӥг арын - 1910 арын вордскемын, анае - Елабуга уездын, туала Грах ёросын, нош Марпа песяй - Малмыж уездысь туала Селта ёросысь удмурт гуртын. Кинлэн улоназ мар ке огъяез вань яратоно анаеным, ваньмыз мон понна дуно. Мыным дуно, мусо адямиосылэн улон сюрессы пӧртэмесь вал. Марпа песяй ноку но бызьылымтэ, ныл куен кылем, пиосмуртъёсты тодымтэ мурт, соослэсь, пе, со кышка вал - тодазы ваё Марпа песяез тодӥсь муртъёс. Вордскем дырысеныз солэн улонэз черкен герӟаськемын. Атаез, атаезлэн агай-вынъёсыз Инмарлы мур оскись адямиос вылӥллям. Кудзы ке но оскон понна тюрьмаын но пукемын. Марпа песяй вера вал: "Кӧня асме тодӥсько, вань улонэ черкын ортчиз". Мукет улонэз ӧз тоды, со солы тунсыко но ӧз пот. Туж, пе, яратӥсько вал службаын сылыны, сюлмы лычсузьыса кылзӥсько черкын кырӟан гуръёсты. Быдэ вуэмъям тодытонъёсты (проповедьёсты) но валаны, пе, кутски. Мылкыдыз вылэм монастыре кошкыны но... Сизьым арес тырмиз но, Октябрь революция потӥз. Собере - граждан ож, сютэм аръёс, НЭП, кужмысь колхозэ пыртон, кулаке поттон. Ой, секыт, чидантэм секыт аръёс вал! Со гинэ ӧз тырмы, калыклэсь лулзэ эмъясь юртэз - черкез ворсаны, куашкатыны кутскизы; священникъёсты, монахъёсты, Инмарлы юн оскись калыкез пытсэт сьӧры келяны кутскизы. Москва, Петербург каръёсын кылдэм урод тӧлъёс Быдӟым Россей кунлэн вань сэрегъёсаз пельтыны кутскизы. Шугадӟонъёсты чидан дыръёс, секыт аръёс Селта ёросэ, Калмез улосвылэ, быдэс Удмурт шаере вуизы. Вашкала-вашкала дыръёсысен кылдэм лякыт улон сямъёс, калыкен, семьяеныд кивалтон сямъёс, ог-огдэ гажан, ог-огедлэсь возьдаськон, мӧйыослэсь кылзӥськон - ваньмыз йырин-чукин берытскизы, кин кызьы быгатӥз, озьы улыны кутскиз. Секыт, сютэм аръёс вуэмен йырин, пинал Марпа Селтала одӥг кивалтӥсь мурт доры нунызэс утьыны, жуг-жагзэс утялтыны интыяськиз. Ньыль пиналъёссы вал та семьяын. Кузёка кышно бухгалтерын ужаз. Картэз кадь ик чебер улонэз яратӥз. Уксё тырмымтэзэ шедьтыса, пытсэт сьӧры келязы. Шенгыль-пенгыль гинэ ӟуч сямен вераськиз гуртысь вуэм егит нылаш. Но нылпиос, уката ик анайзы пытсэтэ сюрем бере, вордэм мумызы борды кадь лякиськизы лякыт сямо, ческыт сиён пӧраны быгатӥсь удмурт апайзы борды. Соос Марпиез кулытозяз "кока" шуизы. Юрт кузё, ас нылпиоссэ вунэтыса, нуналэн-нуналэн, кытӥяз арняосын но гуртаз ӧз вуылы. Кӧберыз ӧй вал кивалтӥсь атайлэн вордэм нуныосыз сярысь сюлмаськыны. Куинь ар ортчыса, кышноез пытсэтысь потэм бере но, та ӝужыт, чылкыт, таза ӟуч воргорон семьяез сярысь укыр ик трос малпаськыса ӧз улы. Кышнозэ вузкарисе интыяны быгатӥз ке но, улонзы азьвыл радаз ӧз пыры ни. Пытсэтын сӧриськем кышномурт ӵемгес но ӵемгес сюмык борды вуттӥськыны ӧдъяз. Со виын ик эшшо одӥг нылзы вордскиз на. Но кузпалъёслэн кемалась дырысен тэрсканы кутскем кусыпъёссы эшшо но золгес вайяськыса кошкизы. Картэз шергес но шергес гуртаз вуылыны кутскиз, нош ачиз кышномурт сюмык пыдсы чылкак выйыны ӧдъяз - ужысьтыз уллязы. Визьмаськем интые, трос нылпиослэн анайзы, дорзэ вунэтыса, калык вылтӥ лошъяськыса ветлон сяменыз, юыса кулӥз. Мар малпаськоды? Кивалтӥсь воргорон, коммунист, атай, кышнозэ оло ватыса вуттӥз, оло ӧз, вордэм вить нылпиоссэ кельтыса, ужзэ куштыса, кытчы ке но пегӟиз. Ноку но ӧз берытскылы ни гуртаз. Семьязэ вунэтӥз. Пичи Галязылы соку куинь арес но ӧй вал. Кӧня возьмазы нылпиос атайзэс, но со тусбуйзэ ӧз ни возьматылы. Из сюлэм. Кыӵе анай-атай вордэм сыӵе муртэ? Та учыр тодэ ке лыктэ, мугор ик юзыр-кезьыр луыса кошке. Кызь вить аресъем Марпи куалектӥз, абдраз. Мар тамаша адӟон та? Мар кароно? Аиз улэп на вал соку. Со шуиз: "Инмар законъя ул. Мумытэк-айытэк кылем нылпиосты куштыны уг яра, уть соосты. Аслад вордэм нылпиосыд кадь соос тыныд мед луозы. Бызьыны благословение уг сётӥськы". Тамаша ук: кужмо силё-виро, дышетскем воргорон, выль улонлэн кивалтӥсез, вордэм нылпиоссэ куштыса кытчы ке пегӟе, нош юртысьтыз кулак карыса поттэм воргорон бызьыны вуэм, вордэм нылзэ куштэм нылпиосты вордыны, пыд йылазы султытыны бакель каре. "Секыт киросэд луоз, нылы, но чида. Инмар Пи Иисус Христос ваньзэ чидаз, асьмемыз но чиданы косӥз. Инмар дорысь награда басьтэмед потэ ке, та нылпиослы мумы лу", - Марпалы шуиз аиз. Атайлэн верамез - закон. Озьы вал Марпи егит дыръя. Йӧназ адями анай-атайлы, мӧйы муртъёслы пумит кыл вераса ӧз улы. Косо бере, кылзӥськыны кулэ. Озьы вал вашкала дырысен. Кыллы пумит кыл веран, каршон - йӧнтэм муртъёслэн ужзы. Ньыль ныл но одӥг пи. Шаплыесь. Кутыны кулэ. Анай-атайзы ышем-бырем бере пичи дыдыос но гажано этезы коказы борды бурмизы, сьӧрысьтыз кыльылытэк, пичиосыз дэрем сӧзы бордаз кутӥськыса ветло. Юрт кузёос тодо вал Марпилэсь Инмарлы оскемзэ; уйёсы, вазь ӵукна, калык изьыку вӧсяськемзэ но туж ик ӧз куаретылэ - кытысь мукетсэ шедьтод таӵе ужась, кылзӥськись, зӥбыт-востэм нылмуртэз? Но шуизы: "Ми коммунистъёс, нылпиосмес Инмарлы оскыны эн дышеты. Черкъёсы ветлэмдэ но калык, уката ик кивалтӥсьёс, медам тодэ, а то милемыз ужысь поттозы". Война бере аръёс... Мӧйы калык кин уг тоды, макем но макем соос секытэсь вал! Сиыны сиён ӧвӧл, дӥсяны - дӥськут. Одӥг-кык нылпиез но сюдыны-вордыны секыт, нош татын - вить ӵошен, огезлэсь пичи огез... Бадӟым кузё корказэс вузано луизы. Дунтэм дунын. Селта пуме пичи гинэ корка басьтӥзы. Липетэз вия. Куроен, шашыен, куасьмем турын-куарен сураса корказэс ачиз ик Марпи липиз. Ӵыжы-выжыосыз жаляса кечпи сётӥзы, ӝоген асьсэлэн пичи ке но йӧлзы луиз. Тулыс вазь ик ӝужась, сиыны ярась турын-куарез бичаса шыд пӧзьтылӥзы, кузь толлы куасьтыса но дасяллязы. Ӟеч адямиос котькытын но вань. Жалязы Марпиез. Кин шорем няньзэ, кин пичи кылем дӥськутсэ вае сирота кылем нылпиослы. Но соку мукетъёс но туж секытэн, курадӟыса улӥзы. Уйёссэ Марпи ӧжыт изиз - черсӥз, керттӥськиз, куиськиз. Мумиз кадь ик киужлы Марпи усто вал, пичиысен та ужъёслы гуртаз дышиз. Вордосъёсыз гольык ӧз ветлэ, чылкак сютэм но ӧз кулэ. Аслаз сиемез потыса син азьёсыз лыз-вож адӟылон дыръёсыз ке но вал, анай интые кылем нылмурт берпум куртчон нянь люкетсэ но самой сиемез потыса син шораз учкыса сылӥсь нылызлы сётылӥз. Ужаз но вӧсяськиз. Дырыз, кужымез ӧй ке но вал, егит анай одӥг ужзэ но вӧсяськытэк ӧз кутскылы. Нылпиоссэ ваньзэс вӧсяськыны дышетӥз. "Отче нашез" чирдытэк сиськыны ӧз пуксьылэ, изьыны ӧз выдылэ. Таӵе чидантэм секыт аръёсы Инмар та семьяез ӧз кушты, сютэм ӧз возьы, шумпотонъёстэк но ӧз кельты. Ӟеч муртъёслэн сюлмаськеменызы, государство но кӧня ке но пособие сётыны кутскиз. Огзы бӧрсьы огзы школае мынӥзы. Олокыӵе ик усто ӧз ке но дышетске, дышетӥсьёс ноку ӧз пыкылэ, урод дышетско, асьсэды умойтэм возё шуыса. Егит анай куаразэ будэтытэк, кизэ вуттылытэк, лякыт кылын вӧсяськыса, ог-огзэс гажаны дышетыса будэтӥз соосты. Будӥсь пиналъёслэн котькыӵе но дырзы вал ке но, яратоно коказэс соос вӧсь ӧз карылэ, кылзӥськылӥзы. Кызьы нош сотэк? Дунне вылын соослэн, коказы сяна, матысь муртсы ӧй вал уго. (Нош кытын вал ӵужатайёссы, ӵужмуртъёссы, песяйёссы, ӵужайёссы, песятайёссы? - Уг тодӥськы, кин сое вералоз на?). Дыр ортчиз. Быдэ вуыса, огзы бӧрсьы огзы Иже кошкизы, ремесленной училищее пыризы. Отын сюдо но, дӥсяло но. Ужан дырзы, бызён-басьтон дырзы вуиз. Пичи нылыз но дышетскыны пырем бере, витьтонэтӥ аръёслэн пумазы, Марпи но, Селтазэ кельтыса, Иже лыктӥз. Одӥг ласянь, мӧзмиз вордэм нылпиосызлэсь, мукет ласянь, нылпиос быдэ вуэм бере дырыз вӧсяськыны тросгес луиз. Но Селталан кемалась черк ворсамын ни. Нылпиосыз ивортӥзы, Ижын, пе, кык черк ужа, калыкез но лачак. Лыкты, шуизы, городэ улыны. Иже вуыса, Марпи город пуме пичигес гинэ, ланьыраны кутскем корка дунтэм дунын басьтӥз. Общежитиын улӥсь Галяез бордаз кариськиз. Мукетъёсыз быземын ни вал; этезы, кышно басьтыса, Глазове улыны интыяськиз. Нырысь-валысь коказэс ӧз вунэтылэ, саламен-кузьымен вуылӥзы, шер ке но, Украинае бызем нылыз но гожтэт ыстылӥз. Галя но ӝоген бызиз. Ваньзылэн асьсэлэн семьяоссы, асьсэлэн улон радзы кылдӥз. Арлы одӥг пол ке но коказы доры вуылӥзы. Галяез кузпалэныз Марпи борды кылиз. Улонни басьтыны городын кема сылӥз ке но, басьтыса ӧз вуэ - выль юрт пуктыны кутскыса, ланьырскыны ӧдъям корказэс кесязы но со интые куинь комнатаен квартира сётӥзы. Галялэн пиез вордскемын вал ини соку. Нош Марпи со вакытэ вань вордэм нылпиосызлэн нылпиосызлы "бабушка" луиз - бабушка Марфа. Городэ вуэм нуналысеныз Марпи вань улонзэ шур сьӧрысь Инмар Анайлэн Успениезлы сӥзем черкен герӟаз. Егит дырыз тодаз лыктӥз, кызьы со анай-атаеныз, ӵыжы- выжыосыныз, гуртоосыныз ӵош туж шулдыр, вӧл-вӧл Селта черкын вӧсяськиз: зарниен, азвесен пишто вашкала обросъёс, сюсьтыл пуктылонъёсын ӝуало синмез мальдытӥсь сюсьтылъёс, черкын тыраз калык, нош кыӵе шулдыр кырӟа хор! Соос пӧлын ик Инмарез данъясь гуръёс чирдыса сылэ Марпилэн одӥгез агаез. Кышкыт аръёсы, сюрс адямиослэсь сюлэмзэс вӧсь карыса, Селта вылысь самой чебер юртэз - висись, курадӟись, бӧрдӥсь калыклэсь буйгатскон интызэ - пытсазы, тарказы. Священникез пытсэтэ келязы, Марпилэсь клиросын чирдӥсь агайзэ но тушмон карыса келязы, чиптэм-чиптэм ышиз, ивортэк быриз. Успенской черк Удмуртиын одӥгназ ворсаськытэк кылемын. Тушмон кужым вашкала шай шоры, лабрес писпуос пушкы ватӥськем черкез саптаса, ворсаса ӧз вуы, соин ик, дыр, татын Инмарлэн дэлетэз шӧдӥськымон возиськемын. Марпи сое вань лулыныз- сюлмыныз шӧдӥз - одӥг пол пыриз но - отысь ноку кошкемез ӧз поты ни. Зэм ик, вал меда одӥг ке но нунал, куке Марпи одӥгзэ ке но литургиез мед кельтысал? Вӧсяськыса, вӧсяськыса кӧтыз ӧз тыры. Гуртаз бертыса кӧня эшшо вӧсяськиз на - Инмар тодэ. Татысь акафистъёсты но, псаломъёсты но шедьтыны луэ вылэм: вӧсяськись калык утьыны быгатэм вӧсяськон книгаосты талась, сутылӥсь муртъёслэсь. Ас киыныз гожъяса, Марпилэн кӧня ке зӧкесь тетрадьёсыз ӝӧк вылаз улӥзы. Огзы доры огзы ветлыса, вашкала Евангелиосты чирдылӥзы. Одӥг кышномуртлэн удмурт кылынэз но вылэм. Трос уйёссэ гуртаз бертылытэк вӧсяськись эшъёсыз дорын ик улӥз: я Вера дорын, я Мария, я Нина дорын. Гуртысь вуэм, ӟуч нылпиос пӧлын улыса ӟуч кыллы йӧназ дышымтэ, шенгыль-пенгыль вераськись, но тыл кадь ӝуась сюлмын Инмарез кужмо яратӥсь Марпиез черк калык соку ик синйылтӥз но яратыса аслыз эш кариз. Марпи тэк пуконэз ӧз тоды: я выж миське, я обросъёсты ӵушылэ, я трос нылпиё батюшкаослы юрттӥське. Ужась муртлы уж сюре. Сое тодӥсь муртъёс али но паймыса тодазы ваё: кызьы та пичи гинэ мугоро, туж чупрес нылмурт черкез, черк улонэз яратӥз, уй но нунал, шуэм сямен, со Инмар юртын вал. Одӥг ужлэсь но со ӧз палэнскы. Тазьы улэменыз, ужаменыз ик мыным но, сьӧлыколы, кылдӥз соин пумиськыны. Эк, Марпа песяе! Та дуннеын улон азьмы макем ӟоскыт, мынон-ветлон сюресмы сюбег, выро-гопо, кӧня отын визь сынаськон, канжаськон интыосыз! Пичи дыръязы вӧсяськыны дышетэм нылпиосыз, быдэ вуыса бызем-басьтэм беразы, Инмар дорысь палэнскизы. Марпа песяй кӧня сюлворыса куриз черке ветлыны, но сое санэ ӧз понэ. Инмар дорысь палэнскыса, коказэс яратонзы но сӥяны кутскиз. Тужгес но секыт луиз картъёссылэн Марпа песяез кулэтэм каременызы. Таняезлэн картэз сое дорысьтыз улляз. Нош ик берытскиз Галяез доры. Таизлэн но кузпалызлы Марпа песяй кулэ ӧй вал, аслэсьтыз анайзэ ваиз. Марпа песяез кухняе пыраны ӧз ни лэзе, пичи комнатаезлэн сэрегаз ӝиптӥськоно луиз. Мар сётӥзы, сое ик сииз. Со гинэ ӧз тырмы, Галя но, Таня но кузпалъёсынызы ӵош юон борды басьтӥськизы. Галялэн пиез ӧз удалты: ужаны мылыз ӧз поты, юиз, калтыртыса ветлӥз но, кыӵе ке но йыруж лэсьтыса, пытсэтэ сюриз. Нош пытсэтысь потэм бераз сьӧсь пӧйшур кадь луиз - Марпа песяйлэсь пичи пенсиязэ вина юыны кыскаса басьтылӥз. Уг ке сёты - мыжыксэ урдэ. Анай-атайёс уг адӟо, я асьсэ кадь эшъёссы дорын, я сад бакчаязы арняосын бертатэк уло. Мукетыз песяй, таӵе улонэз адӟыса, ӝоггес ширтӥз аслаз вордскем городаз. Марпа песяй огназ кылиз. Газзэс, тылзэс, звоноксэс кысыса, корказэс тып-тып ворсаса кельто. Соку песяйлы укмыстон пала мынэ ни вал. Учкыны лыктӥськом ке, шер дыръя пырыны луэ: звонок уг ужа, йыгаськемез пельыз уг кылы. Пумиськыны кылдэ ке, кӧня шумпотон луэ вал! Бӧрдыса шумпотэ, весь Инмарлы тау каре. Одӥг урод кыл но уг вера Галяез сярысь но, мукет нылпиосыз сярысь но. Ялан соос сярысь сюлмаське, ӟеч дырзэс туннэ нуналэн сураса, ялан ушъяса вера. Мугорыз пичи мунёлэн кадь гинэ кылемын ни, ымнырыз чиляса улэ. Вань сиёнэз просфора но вӧсям ву - кин ке вайыса вуттэ ке. Туж кӧтыз сюмаку дышиз бускель кышноезлэн борддораз йыганы - ӟеч кышномурт улэ вал отын, Екатерина нимо. Ачиз но ӟудэм порма гинэ улэ ке но вал, пӧзьтэм шыд лымзэ Марпа песяйлы одӥг пол гинэ ӧз нуллы. Укмыстон аресэз тырмыса, Марпа песяй кулӥз. Инмар - судья! Со тодэ ас ляльчиезлэсь улонзэ но, кулонзэ но. Кулонэз пумысен куд-ог вераськонъёс но вал... Улон даур! Паймымон тон. Одӥг муртлэн но улонэз мукет муртлэн улонэзлы уг укша. Кӧня пол пумиськылӥ, вераськылӥ Марпа песяен, одӥг пол но улонлы ӝожтӥськемзэ ӧй кылы. Дугдылытэк Инмарлы тау карыса, Инмарез данъяса улӥз: "За всё слава Тебе, Господи! Прости меня, великую грешницу", - ялан шуоз вал Марпа песяе. Туннэ нуналысь егит калыклэн синмыныз учконо ке, Марпа песяйлэн кузь улон даурез шоры: мар вал синмаськымонэз, адӟем карымонэз? Нырысетӥ мировой война, революция, граждан ож... Вань егит улон даурзэ ортчытӥз мурт нылпиосты вордыны, пыд йылазы султытыны тыршыса. Дунне кылдытӥсь Инмарез, Инмар Анаез, святойёсты яратон, уй но нунал вӧсяськон; Инмарлэн Эксэйлыказ сюремез потэмен, Марфа ныл куен кельтӥськиз, пиосмуртэз ноку но ӧз тодылы. Уж, вӧсяськон, ӟеч уж лэсьтыны тыршон. Укмыстон ар ӵоже адэ нуись сьӧлыкъёслы пумит тодыса-валаса нюръяськон... Курадӟон, пересьмон даур, но озьы но, вожпотытэк, йыркуръяськытэк яратыса улон... Та подвиг ӧвӧл-а? Быгатоз-а туала егит адями лулзэ но, мугорзэ но дун- чылкыт возьыны, мурт адямиос понна ас улонзэ сётыны, адямиослы но, Инмарлы но ярамон луыны? Марпа песяй кадь адямиослэн дун-чылкыт улэменызы, вӧсяськеменызы уг-а возиськы югыт дунне, пиштэ улон сётӥсь шунды, кырӟало тылобурдоос, сяськаяське италмас? Даурдэ курадӟыса но Инмарез данъяса улэм Марпа песяе! Инмарлэн пиштӥсь данлыказ сюрид ке, мон понна но вӧсяськы. Э, Инмысь Атаймы, та улонысь кошкем ляльчидэ Марфаез Ас Эксэйлыкад пырты вал, кытын Тынад святой эрикедъя уло, кытын сюрсъёсын-сюрсъёсын дун-чылкыт улэм лулъёс пӧлын, дун-чылкыт кылчинъёс пӧлын Тынад дэлето нимыд пиштыса улэ, отысь ческыт зын поттыса ӝутӥське ушъян гур: Аллилуя. Дарья Михайловна Черке ветлыны кутскыкум, Ижкарамы Троицалы но Инмар Анайлэн Успениезлы сӥзем кык гинэ Православной черкъёс вал. Соку мон Соцгородын улӥ -Троица черкозь дас минут мында пыдын мынонэз. Соин ик ог ӝыны ар ӵоже отчы гинэ ветлӥ. Тросэныз вӧсяськись воргоронъёсын тодматски но соос ваньзы мыным туж матысь эшъёсы кадь пото вал ини. Арняысен арняозь огмес огмы ум адӟиське но, соин ик мон соослэсь мӧзмисько, соос мынэсьтым мӧзмо вал. Одӥгаз ӝытэ Шурсьӧрысь Успение черке ветло шуыса малпай: улӥсько быдӟалаезъя шоро-куспо городын, черкез отын кык гинэ, но татчыозь огзэ тодӥсько, мукетсэ - уг. Но мукет мугез но вал: университетэ дышетскыны лыктэме дырысен, дас куать ар ӵоже ини, пельме жондытозь кыӵе ке но Ювеналий игумен сярысь гажано ӵужапае вера но вера. Пумиськеммылы быдэ ӵужапаелэн верамысьтыз тамында дыр ӵоже та монахез таӵе ик син азям пуктӥсько кадь вал ини. Монах... Кыӵе ке мур пуштросъем, тодмотэм, валантэм, кыдёкысь дуннеысь вуэм но ас бордаз кыскись кыл кадь со мыным потӥз. Книгаосысь лыдӟеме вань, монастырьёсы вуылыса йырысенызы пыдозязы сьӧд дӥськутэн, шобретэн ветлӥсь муртъёсты адӟылэме но вань, но вераськеме ӧвӧл. Соос уг но верасько, дыр, кадь мыным потэ. Соос кыӵе ке вылӥын, югыт, сузёнтэм ӝуждалаын сыло кадь, нош мон сьӧлыко лул- мугорыным музъем вылтӥ пычей сямен йыромыса-поръяса ветлӥсько. Та черке пырон нуналам огшоры ӝыт вӧсяськон мынӥз, нокыӵе праздник ӧй вал. Калыкез укыр трос ик ӧй вал. Но маиз паймытӥз: туж урод кырӟало, "Господи, помилуй" шуыкузы но янгышало, дугдо. Соку каллен гинэ ӧс усьтӥське но, отысь священник потэ, гур сётэ но, куать-сизьым ӵошен кырӟасьёс службазэс нош ик азьланьто. Ӧсэтӥ нырысь потыкуз ик тодмай, игумен Ювеналий! Ӝужыт, веськрес мугоро, кузь йырсиё, сьӧд тушо, туж зӥбыт гинэ выросо, синмыныз пыд выжыяз гинэ учкыса ветлэ. Со нуналэ диаконзы ӧй вал, туж чылкыт, валамон ектениосты- куриськонъёсты чирдэ ачиз игумен. Троица черкын Федосия Павловна, Кукмор Лиза но ньыль-вить мӧйы кышноос чик дугдылытэк туж чебер, сюлме пырымон кырӟало, бадӟым куараен чирдо. Нош татын... Чебер черк кырӟан адямиез инме ӝутэ, нош пӧрмымтэ кырӟан черк пушкысь донгытэ кадь, уката но черк улонэз валасьтэм, али гинэ ветлыны кутскисьёсты. Озьы ас поннам служба бырытозь шекланыса сылӥ, тушмонлэн сётэм урод малпанэныз нюръяськыны выри. Но черкысь ӧй кошкы, пумозяз сылӥ. Со понна туж бадӟым шумпотон басьтыса бертӥ. ... Служба быриз, нош калык уг кошкы. Ваньзы пуконъёс, ӟусъёс вылэ лач-лач гинэ пуксизы но маке но возьмало кадь. Оло кошконо, оло ӧвӧл. Нырысь нуналзэ татын бере, тодмое, нодъясь-валэктӥсе ӧвӧл, юаны ке, кепыр ваёно. Обросъёсты- мудоръёсты чупаса ветлон сьӧркытӥм ... игумен потӥз. Ваньмыз чус кариськизы. Дыртытэк гинэ вераськыны кутскиз. Шуг вераны, мар вал со: проповедь-а яке огшоры нодъян, визьман, дышетон. Тросгес вераз нуналлы быдэ лэсьтӥськись сьӧлыкъёсмы сярысь: вожъяськон, трос вераськон, ляб но кезьыт вӧсяськон. "Кылынымы, - шуэ игумен, - молитва чирдӥськомы, нош мылкыдынымы магазинъёстӥ, базаръёстӥ ветлӥськомы - сиён-юон октӥськомы, пельнянь кутӥськомы, картэнымы яке пиенымы, кенэнымы керетӥськомы... Быдэс ӝыт правилоез чирдӥмы - нош маиз кылиз сюлмамы? Ӝыны час вӧсяськонмес пельнянь кутыса, бускеленымы керетыса ортчытӥмы ук! Автобусын яке троллейбусын киямы чётка кутыса мынӥськомы, Утисьмылы, Инмар Анайлы сьӧлыкъёсмес мед куштозы шуыса вазиськиськомы, нош синмынымы, мылкыдынымы кыӵе гинэ сьӧлык ум лэсьтӥське: тӥни отын кудӟем мурт пограса изе, вӧзтӥз мини-юбкаен буям ымдуро гольтрес нылъёс тамак кыскыса ортчизы; нош завод трубаосысь сьӧд ӵын макем потэ но пырак улон коркаос йылэ кугӟа ук!.. Тӥни озьы, саклыкмес ыштӥмы но, тушмон вань ӟеч малпанмес, куриськонмес лушказ. Святой атайёс соин ик калык пӧлтӥ ӧз ветлэ, сьӧд нюлэсъёсы, кыр дуннеосы, гурезьёсы, калыктэм интыосы пегӟылӥзы, мылкыдынызы судить каронлэсь туж утиськыса улӥзы, нош асьмеос, лек судьяос, нуналлы быдэ кинэ но, маин но судить ум кариське. Ачиз Кузё-Инмармы, Иисус Христос шуиз ук: "Судить эн каре, тӥледыз но судить уз каре. Кыӵе судэн судить кариськоды, сыӵеен ик тӥ но судить каремын луоды; кыӵе мертэтэн мертаськоды, сыӵеен ик тӥледыз но мерталозы. Малы тон братэдлэн синмысьтыз жагез шоры учкиськод, нош аслад синмысьтыд корез уд шӧдиськы? Чеберъяськись! Нырысь аслад синмысьтыд корзэ поттоно, соку адӟод, кызьы братэдлэн синмысьтыз жагзэ поттоно!" Игумен йырзэ ӝутӥз, вань сылӥсь калыкез синмыныз пыр потӥз кадь... Чус луиз, кытын но отын викышъям куара гинэ кылӥське на, собере юаз: "Муртъёсты судить каримы-а?" Калык вазиське: "Сьӧлыкамы, судить каримы". Игумен нош юа: "Та сьӧлыктылэсь куштӥськыны но тупатӥськыны кыл сётӥськоды-а?" Калык шуэ: "Сётӥськомы. Атаймы, ми, сьӧлыкоос, понна вӧсяськы". Игумен! Тӥни кыӵе вылэмед?! Инмарез туж мур яратӥсь калык тӥни мар понна тон борды бурмемын... Служба бере оло час, оло кык вераськиз, нокыӵе книгаос, кагазъёс шоры ӧз учкылы, вераз но вераз. Ваньмыз сюлэм пыдсы пыриз. Кызьы таӵе тодытӥсез-проповедникез кылзӥськыны уд ветлы? Удмуртиысь гинэ ӧвӧл, Казаньысь, Ульяновскысь но духовной чадаосыз уллёен-уллёен вуыло; трос чувашъёс. ... Толэзь-а, кык-а ортчиз, еленаос, павелъёс, иринаос, маргаритаос, антонина семёновнаос, михаил павловичъёс дугдылытэк, вольыт кырӟаны кутскизы. Мар луиз таӵе? Азьпалазы сылэ ог витьтон аресъем кышномурт, вӧзысьтыз эшъёссэ дугдылытэк кырӟатэ. Ачиз ик, яке солэн косэмезъя пурысьтам мӧйы, таза воргорон - Михаил Павлович шуон кутскиз но "Отче нашез" удмурт сямен лыдӟиз. Шумпотэменым мар карыны но пайми. Та молитва вӧзы ик ватсаз на "Инмаре, жаля!" - дас кык пол. Тӥни кыӵе адямиос вылэм Успение черкын. Ог кык ар ортчыса, Павел братлэн (али улэ Сергиев Посадын)мылкыд каременыз, кырӟасьёс пӧлы клиросэ сюри. Соку тодӥ, кин со Михаил Павлович но кин со кырӟасьёслэн кивалтӥсьсы - Дарья Михайловна. Одӥг службаын но Михаил Павлович удмурт кылын маке но лыдӟытэк уг кыльы. Ӧй чида ни, юай: "Тӥ ӟуч-а, удмурт-а?" Со шуиз: "Ӟуч ке шуид - ӟуч, удмурт ке шуид - удмурт, но вирыя - ӟуч. Атае Уралын вордскемын, но вань улонзэ удмурт калык пӧлын ортчытӥз. Со священник вал. Анае но ӟуч. Со - дышетӥсь. Пичи дыры ортчиз Ӟуч Пычас (нимыз "ӟуч" ке но, улӥсьёсыз удмуртъёс) черкогуртын, пичиысен удмурт пиосын шудӥ, кылзэс но чаль дыши. Поп пи шуыса, школае ӧз басьтэ, анае гуртын дышетӥз. Пинал дыры черкын но удмурт калык пӧлын ортчиз. Вань семьяенымы ми удмурт калыкез яратӥмы. Атае службазэ ӝынызэ сямен удмурт кылын нуиз, уго соку, войналэсь азьло, удмурт кышноос ӟуч кылэз уг тодо вал, шуыны луоз". Михаил Павлович мон понна маин но паймымон ӧвӧл! Солэн ымысьтыз одӥг но лек кыл ӧй кылы, чик уг эрекчаськиськы, одӥг мурт сярысь но нокыӵе урод кылзэ кылэме ӧвӧл. Нош мар но уг тоды! Быдэс службазэ книгаосы учкытэк нуэ, вань гласъёсты, тропаръёсты, кондакъёсты, троссэ псаломъёсты учкытэк вера. Ассэ ноку но вылэ уг пукты. Но эшшо малы пайми - черклы, осконлы пумит ожмаськон вакытэ, тодӥськоды- а, кин луыса ужам Павел священниклэн пиез Михаил? Коммунальной хозяйствоя министрлэн воштӥсез луыса, ява. Пионере но, комсомолэ но, коммунистэ но ноку пырамтэ, институтэз но йылпумъямтэ адями 1950-тӥ аръёслэн шорысенызы, пенсие потытозяз, таӵе бадӟым пост басьтыса ужам. Черке котькуд арня нунал ватӥськытэк ветлӥз, сое нокин но номыр ӧз кары. Инмар утиз. Кызьы вераз одӥг пересь удмурт инженер (Москваын полпредствоын ужась Лебедевлэн атаез), котькыӵе секыт ужез, кудзэ одно ик туннэ быдэстоно, министрлэн воштӥсезлы М. П. Вершининлы оскылӥзы. Ӧй вал сыӵе уж, кудзэ со дыраз медаз быдэсты. Одӥг адямиен но солэн ченгешемез ӧвӧл. Зэмос Инмар адями. Та адямилэсь улон сюрессэ пыр-поч гожтоно ке, быдэс книга потоз, книгае но уз тэры. Эшшо тае вераме потэ на: мон уг тодӥськы одӥг но ӟуч адямиез, кин Михаил Павлович кадь мед яратысал удмурт калыкез, сокем мед гажасал удмурт кылмес. Туэ гужем со доры радиоысь журналист вуылӥз но кык передача тыр вераськонзэ гожтӥз. Соку элькунамы кылъя закон кутэмын ӧй вал на, соин ик Михаил Павловичлэн, ӟуч адямилэн, бадӟым пост басьтыса ужам муртлэн верамез пеле кылӥськымон вал. Со шуиз: "Удмуртиын улӥсь вань выжыосысь калыкъёс удмурт кылэз тодыны, вераськыны быгатыны кулэ. Удмурт кыл одно ик кун кыл луыны кулэ". Михаил Павлович туж пересьмиз ни, катаракта шуон синчеберзэ ӵоксаз, чик уг адӟы. Вӧсяське, но улонлэсь уг ватӥськы - радио кылзэ. Толон ӝыт жингыртӥз но туж бадӟым тау кариз удмурт кылын "Нылпиослы Библия" потэмлы сӥзьыса презентация ортчытэммы понна. Радиоын ужасьёс праздниклэсь мынэмзэ 40 минут ӵоже кылзӥськыны луонлык сётӥзы. Радио пыр удмурт кылын Евангелиез тодытонлы сӥзем передачаосме, удмурт кылын черк кырӟанъёсты кырӟалляммес но ваньзэ кылзэ, туж тау каре. Шу ӟуч адями! Калык пӧлын калык вань, адями пӧлын адями вань. Михаил Павловичлэсь телефон пыр вераськемзэ мырдэм тодмай, бадӟым жингрес куараез мырдэм гинэ кылӥське на. Кызьы шуэ вал Олексан агай, "дораз бертыны" со дасяське ини. Татьяна кузпалыз, паймымон лачмыт кышномурт, шуиз: "Уин но, нуназе но ялан вӧсяське ӟуч кылын но, удмурт кылын но". Синвуосы ик потӥзы... Ӟуч адями кулон азяз но удмурт кылэз уг вунэты, удмурт кылын вӧсяське, нош тросэз удмуртъёс анай кылынызы одӥг молитва но уг тодо, кулэ но уг каро, нылпиоссэс удмурт кыллы уг но дышето (презентация шуонамы удмурт эшъёсылэн ас кылзэ тодӥсьтэм пизы эшъёсыныз лыктэм, удмурт кылын вераськыны кутскем бере, со потыса кошкем). Михаил Павловичлэн удмуртлыкез гажамез возьматэ солэсь Христос Инмарлы зэмос оскись луэмзэ. Уго Вылысь Инмар одӥг калыкез но улӥ-вылӥ уг кары, Солы матынгес удмурт калык кадь пичиесь, ёрмыса-ёрмыса улӥсь калыкъёс. Кызьы шуэмын Библиын, Инмар азьын "ӧвӧл грек но, иудей но, вандӥськем но, вандӥськытэк кылем мурт но, скиф но, ляльчи но, эрико улӥсь но, нош табере ваньмыз бордын, котькытын - Христос". Та борды ик Павел апостол ватса на: "Тӥляд сюлэмъёсады Инмарлэн сётэм тупаса улонэз мед кузёяськоз. Тӥ ваньды одӥг Мугорлэн люкетэз луиськоды, тӥ тупаса улон понна ӧтемын. Ваньмыз понна тӥ тау карыса улэ"...(Колоссы карын улӥсьёслы Павел апостоллэн ыстэм гожтэтэз: 11). Таисьтыз дуннеысь кошкыны дасяськем эшмылэсь1 нимзэ поттылӥсько Успение черклэсь регентсэ Дарья Михайловна Кузьминаез буре вайыса гинэ. Уго та кык гажано адямиосы трос аръёс ӵоже Инмарез данъяса клиросын артэ сылӥзы. Дарья Михайловна... Эшмы, дышетӥсьмы, куаретӥсьмы, кылмес юасьмы - ми пӧлын куиньметӥ арзэ ӧвӧл ни. Дас арлэсь кема артэ коркан улӥмы, дас ар пала черкысь ӵош бертамы (ӵукнаосы мон солэсь вазьгес ветлӥ, яке черкын ик кӧлалляй, уката ик нырысетӥ вить-куать арзэ), соин ик та адями сярысь мар но со тодыса вуи. ... Туж секытэн ортчиз Диналэн пичи дырыз. Анаез туала Алнаш ёросысь Жаггуртын вордскемын. Колхозъёс кылдыку, кулаке поттыса, анайзэ-атайзэ келяло. Нылэз выжы- кумыосыз бордазы кельтыны быгато. Ӝоген картлы сёто. Но шудэз вылымтэ: ар улыса картэз кулэ. Та семьяын со мултэс мурт луиз, соин ик, вож нунызэ басьтыса, калык вылэ потӥз. Сюресэз Иже вуттӥз. Возьдаськись, ӟуч кылэз йӧназ тодӥсьтэм удмурт ныл кытчы мыноз? Одӥгаз огъяулонние выж миськыны интыяськиз, пичи гинэ улон сэрег сётӥзы. Улон-вылон сямен татын ик улӥсь ӟуч пиен тодматскиз. Семья кылдытӥзы. Сьӧраз ваем Коля пиез вӧзы ватсаськизы Дина нылзы но кык пиоссы. Кызьы но озьы, коньдон люкаса, Бигер базаре вуж гинэ корка басьтыны быгатӥзы. Бакчаез вал. Ньыль нылпиё анай нылпиоссэ пыд йылазы султытыны выриз, кык ужын ужаса, бакчаяз картошка, емыш будэтыса. Картэз, Михаил, шонерзэ ке верано, ужаны чик мылкыдо ӧй вал. Уждун басьтэ ке, уксёзэ олокытчы быдтэ. Яратыса улон семьяын ӧй вал. Оло, соин но егит дырысеныз секыт улонэз адӟем кышномурт чигиськиз: сюмык борды кутӥськиз. Макем секыт вал еж нылпиослы кудӟем анайзы шоры учкыны. Но анай нылпизэ ӧз кушты, берпум дӥськутсэ вузаса но нылпиосызлы шорем ке но нянь шедьтыны тыршиз. Нылыз, Дина, вынъёсызлы эш луэм сяна, пиналысен гурт котырысь ужъёслы дышиз: атайзы уже кошке но доре бертыны сюрессэ ыштэ, анайзы куасалскытозяз кык-куинь ужын ужа, уждун басьтэмез бере винаез яратӥсь эшъёсыныз пумиське, дораз бертыны моӵез уг сузьы ни. Дарья Михайловналэн тодэ ваемезъя, чидантэм секыт улон вал война аръёсы. Атайзэс, бронь сётыса, ож заводэ кельтӥзы. Уждун уг тыро, ужам понназы сиён сёто, нош доре мае ваёд? Семья понна со ноку но зол-зол ӧз сюлмаськы. Анайзэс но, со вакытысь вань кар ужасьёсты кадь ик, нянь вылэ карточкаен ужатӥзы. Анайлэн но, нылпиослэн но, сием потыса, погран дыръёссы трос вал. Город котырысь сиыны ярамон турынэз но туж шуг вал шедьтыны. Сием потон урод: чуньыбыж, пушнер, колыс, сарда, чырскуар, беризь куар, кызаузы, узы-боры, губи - мар сюре, ваньзэ бича вал калык. Улэм потэ, кулэм уг поты ук. Война бере но улон туж секыт вал. Пичи дырысен уж пӧлын кыдам Дина школаын вань сюлэмзэ поныса дышетскиз. Пионере но, комсомолэ но пыриз. Котькытын азь радын вал со. Дыртӥсьтэм, шыпытэсь вынъёссэ но улыны дышетӥз. Ас шаплыеныз ик педучилищее пырыны быгатӥз, нылпи садъёсын крезьгуръя ужась луыны малпаз. Дышетсконзэ йылпумъяса, трос аръёс ӵоже нылпи садъёсын ужаз. Будӥсь воштӥсьёсмес кырӟаны, эктыны, пианиноен шудыны дышетӥз, соослы выль улонын - коммунизмын улоно луоз ук! Нош партия кызьы косэ? Коммунизмын улӥсь адями котьмае быгатыны, тодыны кулэ, пе. Выль адямилэн кылыз но, ужез но, вылтусыз но бере кылем капитализм улонысь адямиослэн кадь медаз кыльы, ваньмыз вылӥын мед луоз. Дина Кузьмина талы мур оске. Ужзэ йылпумъя но библиотекае бызе: книга, газет, журнал солы кулэ. Артэ библиотекаысь вань кельышлы книгаосты лыдӟыса быдтэм бераз, кыдёкысязгес выже. Дораз но библиотека кылдытыны быгатӥз ни: книга ӝажыяз Достоевский, Толстой, Бальзак, туала ӟуч литература вуизы. Вань ортчись ужъюгдуръёсты газетъёс пыр тодэ. Никита Сергеевичлэсь одӥг вераськонзэ но лыдӟытэк уг кельты. Ужаса, ӝикыт улыса, одӥг комнатаен кооперативной квартира басьтӥз. Туж шумпотӥз. Лыдӟиськыны эрик. Пинал дырысеныз ик Дина пиос вылэ мылкыдзэ ӧз поны. Оло ымнырын туж ик чебер вордскымтэеныз, оло анаеныз-атаезлэсь кезьыт улон кусыпсэс адӟыса, егит нылаш бызён сярысь сокем ик ӧз малпаськылы, синмаськон пиосыз но ӧй вал. Киное вынъёсыныз, ӵемгес огназ, ветлылӥз. Озьы со вуиз куамын куать аресаз. Со вакытэ газет-журналъёсы печатланы кутскизы асьме улонысь пӧртэм амалэн узырмыны, коньдон капыръяны быгатӥсь муртъёс сярысь, пӧлазы вал бадӟым пост басьтӥсьёс, кивалтӥсьёс, коммунистъёс. Мар кыдёке мынонэз, асьме котыре ик учкы ай: огъёсыз кызьы но озьы векаса уло, нылпиосын ӵош огъяулонниын курадӟо, нош мукетъёсыз - кивалтӥсьёс, пыриськыны, чеберъяськыны быгатӥсьёс - нимысьтыз коркаосын уло, узыресь санаториосы, курортъёсы, кунгож сьӧры но ветлыны быгато. Мар ке но сӧриськемын... Коммунизм но пӧяськон уж гинэ ӧвӧл-а? Заводъёсын ужась воргоронъёс коммунизм сярысь сомында серемес анекдотъёс юнме шорысь уг верало, дыр. Та пумысен Дина Михайловна трос но трос малпаськиз ни, но сюлэмзэ буйгатӥсь валэктон шедьтыны уг быгаты. Одӥг нуналэ, ас малпанъёсыныз "Италмас" кинотеатр вӧзысь скверетӥ лёгаськыса ветлыкуз, солэн син шораз вашкала, пичигес гинэ пу черк йӧтӥз. Малы ке но сое сюлмыз, мылкыдыз одно ик отчы пырыны косӥзы кадь. Ачиз но ӧз вала черк ӧс доры вуэмзэ. Паймиз: ӝыт пала кыстӥськись шундылэн сиосыз выльысь укнотӥ пыро но Эксэй капкаез, зарнивуам вашкала обросъёсты чилято, мальдыто - быдэс храм пушкын югыт шунды шудэ, тэтча, кырӟа кожалод. Ӝоген служба кутскиз. Мыд-мыд палась хоръёс, ог-огзэс воштыса, сюлме пырымон кырӟало. "Кызьы мон татчыозь тазьы улӥ но таӵе чеберез ноку ӧй адӟылы? Малы анай, атай но черке ветлыны ӧз косэ? Пылатэмын но ӧвӧл. Ӧс дорын сылӥсь кышномуртлэн йыраз таӵе малпанъёс лыктӥзы. Пумем кадь сылӥз: мар кароно, кызьы вӧсяськоно - валантэм. Озьы ке но, сое сюлмыз ӵуказеяз но, ӵуказе улысаяз но храме кыскиз. Куд-ог мӧйы вӧсяськисьёс солэсь ветлэмзэ синйылтыса но вуизы, пылатэмын-а шуыса юазы. Дина Михайловна сьӧлыксэ ӧз ваты. Вӧсяськись кышномуртъёс ваньзэ рад-рад валэктӥзы: кызьы пылатсконо, мар дасяно, кызьы пылатскем бере улоно. Куамын куать аресэз тырмыса, Дина Михайловна пылатскиз. Евгений батюшка шуиз: "Дина ним черк календарьын ӧвӧл, тынад выль нимыд, христиан нимыд, Дария луоз, перс кылысь берыктыса, "кужмо, вормись" шуэм луэ со". Черке ветлэмъяз ветлэмез потӥз Дарья Михайловналэн. Черк кырӟан гур сюлмаз, лулаз пыре, уйвӧтын но пель сьӧраз кылӥське. Ӟучсэ но, удмуртсэ но, шуэм сямен, кырӟанъёсты, романсъёсты, классической музыкаез но кылзыны яратэ. Ӵукна яке ӝыт, уж бере кыльыса, нылпи садысь пианиноен кӧтыз тырымон шудэ. Но черк кырӟанъёс... Вераны кыл уг сюры, соос музъем вылысь адямиосын кылдытэмын ӧвӧл, дыр. Кырӟасьёс пӧлы султыны макем сюлэм кыске, но... Озьы ке но, кышканзэ кияз кутыса, огпол со хорен кивалтӥсьлы вазиськиз. Нотаосын кырӟаны быгатэмзэ тодыса, сое кырӟасьёс пӧлы султыны лэзизы. Шутэтскон нуналъёссэ, одӥгзэ кельтытэк, черкын ортчытъяз. Одӥг-ог литература но лыдӟыса вуиз ни, тросгес киын гожъямъёсыз ветло. Паймымон дунне - та черк калык! Малы со куамын куать ар улыса вылысь ӧз тоды, музъем вылын мукет дунне но вылэм шуыса? Ческыт сиён-юон но, модая чебер дӥсяськон но, киноостӥ, ресторанъёстӥ ветлон но, Сьӧд зарезь дурын тазалыкез юнматон но та дуннеысь адямиослы кулэ вылымтэ. Кулэ вылэм вӧсяськон, кӧс утён, сьӧлыкъёслэсь ӧпкельыса куштӥськон, кураськисьёслы, висисьёслы, ёрмисьёслы юрттӥськон, святой интыосы ветлон... Отпуске потыса, Дарья Михайловна ӟуч Православилэн шоркараз - Сергиев Посадэ (соку Загорск шуо вал) ветлыны малпаз. Отын, пе, прозорливой старецъёс вань - отец Кирилл но отец Наум. Сергиев Посад сое чылкак паймытӥз: кыӵе храмъёс, семинария, академия, нош калык - оло, быдэс Россиысь люкаськемын! Оскисьёслэн эксэйлыксы! Вашкала ӝужытэсь из борддоръёс сьӧры, лавралэн азбараз пырем бере ик, Инмар дуннее сюрем кадь луоно. Вить часын ӵукна преподобной Сергий Радонежскийлэн - православной калыклэн духовной атаезлэн, чыры-пыры пазяськем ӟуч музъемъёсты быдӟым Россия карыны, бигер-монгол зӥбетэз сэрпалтыны юрттӥсьлэн шайпул (рака) дораз молебен ортче. Электротыл уг ӝуа, пӧртэм буёло лампадаос но трос-трос сюсьтылъёс гинэ ӧжыт югдыто та вашкала, туж ӝужыт из черкез. Котырак борддор кузя монахъёс сыло но, преподобной Сергий атаез данъяса, акафистэз, тропаръёсты, кондакъёсты чирдо. Вераны кыл уд шедьты та кырӟанлэсь, вӧсяськонлэсь адямилэсь лулзэ югдытыны быгатэмзэс. Ӵукна правилоосты чирдӥзы, акафистэн молебен ортчытӥзы но, монахъёс, соос бӧрсьы студентъёс, пиосмуртъёс преподобной Сергий атайлэсь сисьмисьтэм мугорзэ чупаны кузь черодэ султӥзы. Шайпуллэсь шобретсэ усьтӥзы гинэ, калык пӧлысь кыӵе ке егит кышномурт шуш куараен черкез зуркатыса кеськиз но муз вылэ усиз. Дарья Михайловна куалектӥз: мар тамаша та? Нокин нокыӵе уг кариськы... Берло тодӥз: тазьы, пе, святыняез усьтыку, яке сое чупаны мыныку, адямиос пушкысь периос кесясько. Та егит кышномурт пушкын но пери, пе, пуке. Таӵеос нуналлы быдэ татчы преподобной Сергий атайлэсь юрттэт курыны вуо. Мар но ӧвӧл та дуннеын?! Литургия мынӥз Успение храмын. Вашкала-вашкала храмын. Нош ӝуждалаез - син уг сузьы! Нош обросъёс-иконъёс макем бадӟымесь, вашкалаесь, улэп адямиос кадесь адӟисько. Паллян но бур клиросъёс ог-огзэс вошъяса кырӟаны кутскем бере, Дарья Михайловна пыд ул музъемзэ ӧз ни шӧды, котырысьтыз адямиосты но ӧз ни адӟы - инме ӝутскиз, лэся. Йӧӟектэм сюлэмо адями но таӵе кырӟанэз кылыса шуналоз, дыр. Кырӟало, пе, духовной семинариын дышетскисьёс, вуоно священникъёс. Служба бере калык кин кытчы вырӟиз: кин вӧсям ву басьтэ, кин лабрес беризьёс улысь ӟусъёс вылэ шутэтскыны, сьӧраз ваем сиёнзэ сиыны интыяське. Дарья Михайловналэн сиемез но, юэмез но ӧз поты, мылкыдыз инмын, нош пыдъёсыз старецъёслэн кельяоссы пала нуизы. Бур палаз но, паллян палаз но лачак калык. "Куинь нунал но сылӥд ке, пырыны быгатод меда?" - малпаз Дарья Михайловна. Черод сярысь юам бераз, солы таӵе валэктон сётӥзы: отец Наум ачиз тодэ, кинэ нырысь пыртоно, кинлы визьнод сётыны тужгес кулэ. Ортчиз ни кӧня ке час. Калык, кулэсмем интые, эшшо тросгес люкаське. Оло, быдэс Россиысь вуэмын: таосыз кышноос Алтайысь, шуизы, со куинез - Белоруссиысь, вань на Украинаысь, Молдавиысь, Новосибирскысь - кин кытысь. Кӧня висисьёс... Татын но кесяськись, перияськись адямиос вань. Украинаысь вуэм кышномуртлэн кияз нуныез вань, нош ачиз дырын-дырын куалекъяны, пуны сямен утыны кутске, пушказ кесяськисез вань. "Ненавижу Наума, Кирилла и всех этих стариков!" - шуса периез черекъя. Отыназгес кык егит кышноос ваче вуизы - кыксы но перияськемын, пе. Кызьы меда адями пушкы пери пыре? Дарьялэн та дырозь ноку но кылэмез ӧй вал. Но татысь кышномуртъёс, нокыӵе кариськытэк, кин чётказэ бичаса вӧсяське, кин акафист, кин псаломъёс чирдэ. Дарья Михайловналэн, ас киыныз гожъям ӵукна но ӝыт вӧсяськонъёсыз сяна, номыриз ӧвӧл. Дас кыкетӥ часэ вуыку, кельяысь пурысьтам йырсиё, чиед мугоро ӝужыт пересь монах потӥз но каллен гинэ трос калык пӧлтӥ пырак Дарья Михайловна доры матэктыса дугдӥз. Паймиз кышномурт, но вӧзаз сылӥсь кышноос, урдэсаз калленак йӧтӥськыса, шыпытэн шуизы: "Бакель каронзэ кур". Дарья Михайловна, нылпи садын ужан дыръяз кышканэз тодӥсьтэм адями, татын пичи мурт кадь чылкак куалектӥз, пыдъёсыз ик либрак луизы. "Кытысь вуиды, сузэр?" - туж лачмытэн, туж лякытэн, дыртытэк гинэ юаз старец (кызьы шуиськом, пересь визьнодчи). "Удмуртиысь, Ижысь", - вазиз Дарья. "О-о, тодӥсько удмуртъёсты, ужась калык, вӧсяськыны но ярато", - шуиз старец. Дарья Михайловналы но котыраз люкаськем трос калыклы отец Наум Крыловлэн басняысьтыз эктыса, кырӟаса улон даурзэ ортчытӥсь ӟозы сярысь мадён вераз. "Ӟозы сямен кырӟаса, эктыса улонзэ ортчытэм адямилэн но пересьмон даурез вуоз, кытчы со пыроз? Кулон дырыз ке вуиз, кыӵе ответ сётоз Инмысь Судьялы?" "Ой, та мон сярысь вера ук!" - малпаз Дарья Михайловна. "Нимыд Дарья шуиськод-а? Вот ай, Дарья сузэр, тӥляд Ижевскады Успение черкты вань, отын тон регент луод!" - Дарья Михайловнаез бакель карыса шуиз отец Наум. "Ой, учкы ай, Успение черкез но тодэ!" Бӧрсяз вераз на, тӥляд Удмуртиын, пе, асьтэлэн визьнодчиды вань - отец Василий, тӥни со доры вуылыны тыршы. Кошкон азяз отец Наум Дарья Михайловналы кылылымтэ книга кузьмаз -вылаз "Добротолюбие" шуыса гожтэмын. Эшшо уй кӧлыса, сьӧлыкъёссэ вераны исповеде пыриз, причастие басьтӥз но бурдъяськиз кадь: лулын-мугорын сыӵе каньыллык, шумпотон - оло музъем вылтӥ вамышъяськод, оло омыретӥ лобаськод?! Кузьым книгазэ поездын бертыкуз ик лыдӟыса быдтӥське вал. Выль улон усьтӥськиз. Евангелиез кык-куинь пол лыдӟыса пырпотӥз ни, но отын трос гинэ валантэм интыосыз, нош та кузьым книгаын кушаса сётэмын кадь, кызьы улыны кулэ Инмарлы оскись адямилы таяз дуннеын. Евангелие но "Добротолюбие" Дарья Михайловна понна та дыре самой бадӟым книгаос луизы. Успение черкын со дыре регентсы кошкыны дасяське вал, соин ик Дарья Михайловнаез шумпотыса кутӥзы. Шуген мынӥз уставез дышетон: сомында праздникъёс, котькуд праздниклэн аслаз пӧртэмлыкез вань. Кӧня гласъёс! Ваньзэ йырын возёно. Нылпи садысь кошкемзэ ӧз жаля. Тросгес но тросгес духовной книгаос, Библиез лыдӟыса, черкысь тодытонъёсты кылзыса, со валаз: куамын куать ар улонэз сьӧлыкъёс пӧлын ортчытэмын. Нылпиосты Инмар Законлы ӧз дышеты, кырӟаны, эктыны, выль улонлы дышетӥз. Ӝоген выль настоятель лыктӥз -Ювеналий иеромонах. Нуналлы быдэ тодытонъёс вера но вера. Дарья Михайловна, зӧк тетрадь басьтыса, вань верамзэ гожъяса пуке но синвузэ лушкем ӵушылэ. Монахлэн верамез сюлэм пыдсы вуэ. Узырлык люканлы, ческыт сиыса-юыса, керетыса, ченгешыса, трос изьыса, ӧжыт вӧсяськыса улонлы пумит валэктонъёссэ кӧня пол вераз ни, но вань верамез нырысьсэ кылэм кадь потэ. Настоятельлэсь бакель каронзэ курыса, Дарья Михайловна сӥль, курег пуз, чорыг, чечы, торт выллем ческыт сиёнъёслэсь но чылкак куштӥськиз. Нимысьтыз пусъем нуналъёсы кӧс сиён гинэ сииз. Нош быдӟым визьлэсь нырысетӥ но берпуметӥ арняоссэ нуналлы кык пичи просфора но стакан вӧсям ву юыса ортчытъяз. Визь сынаськонъёсы сюрылыкуз, вуж сьӧлыкъёсыз сюлэмзэ писыръятыны кутскыку, куинь нуналэн ӧз сиськылы, вӧсям ву гинэ юиз. Кыӵе ке сиён, уката ик емыш яке кампет ӵектӥськод ке, шуэ вал: "Мынам солы кирос". Мар меда со шуэм луэ, малпасько вал нырысь ас поннам. Дарья Михайловна вылаз эшшо таӵе кирос понӥз: со черкын уксётэк ужаны кутскиз. Дас тямыс ар ӵоже одӥг коньы но уксё ӧз басьты. Укыр трос дӥськутэз, мебелез ноку но ӧй вал, но, маиз вал, я адямиослы, я братэзлы сётъяз. Холодильниксэ гинэ дунтэм дунын вузаз: квартира понна кӧня ке дун тыроно вал уго. Одӥг но мирской книгазэ корказ ӧз кельты. Электротылзэ ӧз ик ӝуатъя, шуыны луоз. Ульчаысь пиштӥсь югытэн ӝог гинэ пӧрам сиёнзэ сиылӥз. Вӧсяськыны - ӝытсэ но, ӵуксэ но правилооссэ со учкытэк вераны дышиз. Чёткаен Иисусовой шуон молитваез лыдӟылӥз, пыдесъяськыса сю полъёсын музозь йыбыртъялляз. Нырысь-валысь ӵош бертыкумы мар но со вераськем, юам потэ вал, но Дарья Михайловна ӝог ымме ворса вал: "Лыдӟы Иисусовой молитваез!" Инмарез яратонэз пумтэм мур вал. Кӧня пол меда Библиез лыдӟыса пыр потӥз? Кӧня акафистъёсты чирдэ вал? Висисько шуыса, уже потытэк одӥг пол но ӧз кыльы. Ӧз шутэтскылы. Одӥг дыре пиньыз висьыны кутскиз, бамыз маке кадь зол пыктӥз, но больницае ӧз мыны, сылал вуэн гылъяса йӧнатыны выриз. Ужасьёслэсь азьло лыктэ, берло бертэ. Сӥзьыл пеймыт уйёсы, толалтэ жобаськыку, кезьыт дыръя гуртаз ӧз бертылы, пылатон коркан ӟус вылын кӧлалляз. Ассэ чик ӧз жалялля. Вань улонзэ святойёслэсь адӟем карыса радъяны кутскиз: визь утён, вӧсяськон, оскем уждэ вань сюлэмдэ поныса быдэсъян. Майбыр улонлэсь, ческыт сиён-юонлэсь, чебер ветлонлэсь со чылкак куштӥськиз. Котькытын но, луонлыкез ке вал, ӟеч уж лэсьтыны чик ӧз жадьылы. Дарья Михайловналэн эшшо одӥг тунсыко сямыз вал на: со малпамзэ ватыса уг возьы, меӵак вера. Учкыса уг улы, батюшка-а со, кыӵе ке кивалтӥсь-а, огшоры адями-а яке вӧзаз ужась, чирдӥсь эшез-а - янгышъёссэс, шекъёссэс адӟе ке, шонерак вера. Тросэзлы солэн та сямыз ӧз кельшылы, клиросысь но одӥг пол гинэ ӧз уллялэ. Дарья Михайловна юн сылӥз зэмлык, шонерлык понна. Дарья регенттэк кӧня ке уло но, нош ик амалзы ӧвӧл, сотэк хор уг кырӟа, нош Дарья Михайловна отын ке, служба вӧй вылтӥ кадь мынэ, дугдылытэк. Клиросэ султэм дырысен со ӧз дугдылы монэ священник луыны косыса, нош мукетыз псаломщик, мӧйы кышномурт - Антонина Семёновна, уг лэзьы вал, жаль, пе, потӥськод, исповедьын вань юрӟым-кырсь сьӧлык верамъёссэс кылзӥськоно луод; али, пе, калык туж сӧриськемын, кылылымтэ-адӟылымтэ сьӧлыкъёс лэсьтэ, уката но - кышноос. Кытысь меда кылэмез, лыдӟемез вань, но со шуэ вал: берпум аръёсы священникъёс утиськыны уз быгатэ - байлык люкан вылэ, пе, выёзы, осконзы но ляб луоз. Антонина Семёновна вань улон даурзэ черкын ортчытэмын. Дарья Михайловнаен ваче вуон дыръёссы но вал. Табере кыксы но таисьтыз дуннеысь кошкизы ни. Дарья Михайловна черк кырӟанъёсты удмурт кылэ берыктэмме туж шумпотыса пумитаз. Адӟе вал уго, кызьы мӧйы удмурт кышноос синвуэн бӧрдыса сыло, Инмарез, Инмар Анаез, святойёсты данъяса асьсэ вордэм кылынызы кырӟаку. Ялан косэ вал я созэ, я тазэ кырӟанэз, тропарез удмурт кылэ берыктыны. Туж чебере куараё юлияос, валяос, таняос со куспын ик кырӟаса лэзё ини. Эх, Дарья Михайловна, - эше, бускеле! Куинь ар тырме ини пӧлысьтымы кошкемед дырысен. Нош тон ялан ми пӧлын - тынад дышетэм нылъёсыд быгатыса кырӟало, черк службаез вольыт нуо. Удмурт кылын кырӟатэк одӥг арнянуналэз но ум кельтӥське. Быдэс кассета тыр люкаськизы ини удмурт кылын черк кырӟанъёс. Эшшо малы тонэ утчасько: тон кадь шонерак, кузёослэн синмазы меӵак вераны дӥсьтӥсь одӥг мурт но ӧвӧл ни. Ошмес ву но пукон-пукон сяменыз пыкмыны кутске ук, сурась, выль ву ваись ӧвӧл ке... Дарья сузэр, сояз дуннеын ӟеч ул. Инмарлэн Инмысь Эксэйлыказ сюрид ке, мон понна но вӧсяськы. Кузё-Инмармылэсь кур Священной Гожтэмез, литургиез, удмурт кылэ янгышъёстэк-шекъёстэк берыктыны мед быгатом шуыса. Удмурт калык но литургиез аслаз анай кылыныз мед кылзӥськоз вал. Анна Павловна Инмарлы оскисьёс пӧлын нимын, атай нимын вераськисьёс ӧжыт, уката но удмуртъёс пӧлын. Нош таизэ удмурт кышномуртэз вань калык Анна Павловна шуэ вал. Священникъёс но. Малы со озьы луэмын, - али но уг тодӥськы. Анна Павловна профессор но, нокыӵе кивалтӥсь но, школаын дышетӥсь но ӧй вал. Но озьы ке но... Инмар Анайлэн Успениезлы сӥзем черке ветлыны кутскем берам ик та кышномуртэз синйылтӥ: ӝыт-а, нуназе-а вӧсяськон, литургия-а йылпумъяське, калык черкысь потыны кутске, но заводын ужасьёс кадь, гуртазы туж ик уг дырто. Тросэз удмурт кышноос ышыггес интые кариськыса, вераськыны, юалляськыны кутско. Шоразы сылэ сабыр гинэ, зӥбыт-востэм, мӧйымыны кутскем кышномурт - Анна Павловна. Юанъёсын солы вазисько, нош со дыртытэк гинэ ответъёс сётъя. Нырысь-валысь соослэн матазы мон туж ик ӧй кариськылы. Солэн аслаз мугез но вал: асьмелэн, удмуртъёслэн, трос умоесь сямъёсмы пӧлын умойтэмъёсыз но вань. Шуом, бигерен еврей котькытын мед луозы, но соос ас калыксэс музъем улысь но шедьтозы, огазе кариськозы, нош удмуртлэн озьы ӧвӧл. Иськавын-бӧлякеныз, оло, огазе кариськоз ик, но мукет бӧлякез уг тодӥськы шуоз. Тодмотэм муртлы удмурт сюлэмзэ уз усьты, бордаз уз кыскы, донгыны - донгытоз. Соин ик та чылк-чылк удмурт адямиосын кӧня ке аръёс ортчыса гинэ тодматски, куд-огзэ таки тодытэк кыли - кулыса вуизы. Со виын мон отец Ювеналийлэн чадоез луи. Удмуртъёс но, ӟучъёс но, чувашъёс но - пӧртэм калыкъёс одӥг семьяысь агай-вынъёс, сузэр-апайёс кадь ми луимы, али но улӥськомы. Сьӧд тушмон духовной атаймы но солэн духовной нылпиосыз куспы верантэм секытэсь визь сынаськонъёс ке но сётэ, ми духовной атаймес, вордэм атаймес кадь яратӥськомы. Нош та удмурт нылкышноослэн духовной атайзы олокин вал. Анна Павловна улэп ӧвӧл ни. Ярам коть, улэп дыръяз мар но со юаса вуи. Уго солэн улэм сюресэз - паймымон, вӧсяськись калык понна гажамон, тодэ-буре вайымон. Анна Павловна Тимофеева вордскиз бугырес, кышкыт, вирен орсмем 1919 арын 4-тӥ августэ Бадӟым Уча (туала Можга) ёросысь Камышлы гуртын крестьян семьяын. Атаез Выль Мултанысь гимназиез быдтэмын, пе, вал (педучилищеез ӧвӧл меда?). Анаезлэн дышетскемез вылымтэ. Солэн быземез чик но уг поты вылэм, но вазен нылмуртлэсь уг юало вал: потэ-а, уг-а кинлы потэ быземед - сёто но тӥни. Нырысь нуныеныз секытэн луэм бераз со Инмарлэсь тазьы куриськем: "Картлы кужмысь сётӥзы бере, та вордӥськоно нуные, Инмаре, Тон азьын улыны, ужаны ярамон адями мед луоз вал". Тимофеев кузпалъёс тупаса улӥзы. Музъем ужасьёс вал. Вуз но каризы. Колхозъёс потыку кулаке поттӥзы. Инмарлэсь ноку но ӧз куштӥське. Удмурт Евангелизы но вал. Арня нуналъёсы, праздник нуналъёсы Бадӟым Учалась черке ветлӥзы, быдэс семьяенызы кӧс утьылӥзы. Нылпизэс пичиысен ик вӧсяськыны дышетӥзы. Уча черкын кема дыр ӵоже псаломщикын улӥз Василий Григорьевич, Тыловыл пи. Туж мур осконэз вал. Службаос бере удмурт калыкез огазе люкаса шуэ вал: "Ваелэ Инмарез данъяломе". Кутске туж чебер куараен чирдыны-кырӟаны: "Инмысь Эксэй Буйгатӥсь..." Удмурт кылын но, славян кылын но кырӟаллязы. Кинлэн шулдыр, тупась куараез, сое кырӟасьёс пӧлы, клиросэ султытылӥз. Анна пиналысен сюриз клиросэ, куараез уго укыр жингрес, кырӟанэз огпол кылэ ке, кыкетӥяз калык сьӧры нёртыны быгатэ ни. Василий Григорьевич Инмар законэз туж ӟеч тодэ вал, дышетскымтэ удмурт калыклы сое дугдылытэк тодытылӥз, ваньзэ пыр- поч, лад-лад валэктылӥз. Колхозъёс потон вакытэ, 29-30-тӥ аръёсы, Учалась черкез пытсазы, Василий Григорьевичез судить каризы, калыкез, пе, ӧрекчаса возе, выль улонлы пумитъяське. Архангельской областе келязы, отчы ик быриз, иворъёсыз ӧз ни вуэ. Отец Павел батюшкаез но пытсазы. Кӧня удмуртлэсь синзэ усьтӥз со, кыӵе ӟеч тодытэ вал Инмар законэз! Быдэ вуэм бераз Аннаез атаез Можгала педучилищее дышетскыны келяз. Чебер куараез понна сое "Италмасэ" мыныны туж косо вал. Но пичиысен Инмарез тодэмез солэсь сюлэмзэ нош ик черке кыскиз. Пичиысен ик со Инмарлы мур оскись калыкен тодматскиз, кулытозяз соосты буре ваиз, соос понна вӧсяськиз. Сюлэмзэ поныса ик вера вал Яголудысь Окси но солэн Никон братэз сярысь, Ынэгысь Матвей агай сярысь, Ува ёросысь Аркип агай сярысь, Жужгесысь Гавриил иеромонах сярысь. Аркип агай трос пол вуылэм Пермь ёросысь Белогорской монастыре, отын улӥз солэн духовной атаез Варлаам (та чуръёсме гожъян куспын паймымон учыр луиз: курадӟытыса вием Варлаам али святойёс радэ пыртэмын ни, обросэз-иконэз но вань ни. Сое мыным асьмелэн гажано землякмы игумен Даниил Ишматов Белой Гораын наместник луыкуз, отчы вуылыкум, кузьмаз вал. Али гинэ малпай: оброс бордаз кызьы меда гожтэмын? Святой преподобномученик Варлаам... Обросысь кизэ чупай но... отысь пӧсь потэ. Святой преподобномученик Варлаам мон понна но, вань удмурт калык понна но вӧсяськы! Инмарлэн паймымон ужъёсыз...) Аркип агай куать муртэн ӵош, пӧлазы Яголудысь Окси но вылэм, Сарове мыныны потӥллям. Соку преподобной Серафим атаймы святойёс радэ пыртэмын ӧй на вал ке но, вӧсяськись калык сое святойёс пӧлысь святойёс пӧлы кемалась пыртэ вал ини.Пумтэм трос паймымон ужъёс пыр трос адямиослы со улэп мурт кадь возьматскылӥз. Аркип агай удмурт эшъёсыныз Саров пала вуыкузы, пумитазы губырскем пересь песятай потыса соослэсь юаз: "Кытчы мынӥськоды - шутэтскыны-а, вӧсяськыны-а?" - "Вӧсяськыны", - шуизы удмуртъёс. Соку песятай ваньзылэн киязы быдэн сюсьтыл сётӥз, бӧрысь ачиз син азьысьтызы ышиз. "Туж тодмо, адӟем мурт кадь, кин со?" - огзылэсь огзы юало Сарове мынӥсьёс. - "Ӧд тодмалэ-а, со ачиз Серафим атаймы вал ук!" - шуиз Аркип агай. Солы азьпалзэ тодон сётэмын вал. "Анналэн туж секытэсь адӟонъёсыз-мытарствоосыз луозы", - шуиз Аркип агай. - Аннаез ас интыям кельтӥсько". Нош мон шуисько: "Номыр но уг тодӥськы, уг валаськы, шыр кадь адями мон". Котырысь вань черкъёс ворсаськизы ке но, калык вӧсяськемысь ӧз дугдылы. Огзы доры огзы люкаськыса вӧсяськылӥзы. Анналэн егит сюлмыз Инмарез яратонэн пачылмыса улӥз, гуртысь гуртэ, ёросысь ёросэ вуылыса, дышетскымтэ адямиослы Евангелиысь чуръёсты лыдӟылӥз, псалом гуръёсты, духовной кырӟанъёсты кырӟалляз, ӝикаса-ёрмыса улӥсьёслэсь сюлэмзэс Инмар кылын буйгатылӥз. Кивалтӥсь йыръёс тодытэк ӧз улэ егит ныллэсь калыкез югдытонэ пыриськемзэ. НКВД- ын ужасьёс туж чакласа, муг гинэ утчаса улӥзы, кызьы та нылмуртлэсь ымзэ ворсаны. Гуртысь гуртэ, интызэ вошъяса улоно луиз Анна. "Одӥг пол, - шуэ, - Иж палась Никольской черке мынӥськомы. Куинь куско шуба дӥсяй, пыдам сизьымо кут кутчай, тыбырам песьтэр оши, ымнырме кышетэн ворсай - пересь мурт мед кожалозы, киям боды кутӥ. Озьы сюрес кузя мынӥськомы ни. Бӧрсям мынэ вакчи визьем Анна нимо ныл. Ми солы шуим: "Кин ке юаз ке, кулэм муртэ ватыны мынӥськомы шу". Озьы ик луиз: пумитамы валэн райисполкомын ужась потӥз но юа: "Куда идёте, куда направились?" Аннамы шуэ ни: "Папу в Ижевск взяли, убили, коронить идём". Кузёйыр киыныз шонтӥз, валзэ шуккиз но ми дорысь ворттыса кошкиз. Огшап чус улэм музъем вылэ нош ик тушмон урдскиз: немец ожгарчиос Москва пала вуыны кутскизы. Пиосты гинэ ӧвӧл, нылъёс вылэ но шинель дӥсяса, ӟырдам, пӧзись оже келяны кутскизы. Аннаез но келяны дасязы вал ни, но Инмар жаляз: кыӵе ке но муген сое ожгарчиос радэ ӧз пыртэ. Соку Анна Никольской черке улыны но ужаны интыяськиз. НКВД-лы муг сюриз Инмар кылэз кышкатэк тодытӥсь нылмуртэз пытсэт сьӧры келяны. Та сьӧсьёслы трос юрттӥз та черкын служить карись Кокорин фамилиен батюшка, НКВД-лэн пуктэм адямиез. Пытсэтэ пуктон азязы Анна анаез-атаез дорын вал. Милицилэсь гуртэ вуэмзэс тодыса, атаез валзэ кыткиз но уробо пыдсы Аннаез выдтӥз, вылаз турын, пызь мешокъёс тыриз но гурт сьӧры поттӥз. Пазялэ вуттӥз. Отысен нылаш малпаз Никольской черке ватскыны, нош отын батюшкаен ӵош милиция возьмаськыса улэ вал ини. Судэ сётӥзы. "За агитацию..." шуыса дас арлы пытсэтэ келяны решение кутӥзы, но бӧрысь куинь арзэ кулэстӥзы. Со виын анай-атайзэ кысканы кутскизы. Лиза сузэрезлэн тодэ ваемезъя, вань ваньбурзэс талазы, бадӟым кеноссэс но сэрттӥзы, няньзэс одӥгтэм нуизы. Гурт калык адӟонтэм карыны, пе, кутскиз. Соин сэрен атайзы семьяеныз валче Какможе улыны кошконо луиз. 1945-тӥ, война бырон арын, Аннаез кыдёкысь уй палась кезьыт Тӧдьы зарезь (Белое море) доры нуизы. Малпасько, аслыз Анна Павловналы кыл сётыны (Инмарлы тау, кык пол соин пумиськылыса мар но со гожтыса вуи): "...Келязы Архангельск областе, Белой море дуре. Отын Молотовск (али Северодвинск) городэз ӝутон мынэ вал. Удмуртиысь огнаме ваизы. Копак нюр, болота. Шокчыны луонтэм трос чибинь. Каторга вал со. Кус кемозь кезьыт нюр вуэ пыртыса канава гудыто. Вузэ куасьтыса быдтэм бере ваем луоез носилкаосын пыртаськомы, пытсэтэ сюремъёсты со вылэ юртъёс пуктылыто ини. Монэ, зӥбыт, кылзӥськись муртэ, весь секыт ужато. Лыосы куалекъятозь кынмисько. Секытлы, ӝожлы чидатэк чигиськыса бӧрдон дыръёсы но вал. Одӥг пол уин, бӧрдыса улон дыръям, Николай Чудотворец возьматскиз но со шуиз: "Малы роптать кариськод? Чиданы кулэ". Чидантэм секыт дыръёсы дорам дыдык лыктэ но гур-гур! карыса гурласа улэ, сюлэмы буйга, каньыл луэ. Кӧня ке улыса, огъя тюрьмае ваизы. "Узыр монашкаез ваёзы" шуо. Тюрьма пӧлын но тюрьма вань на. Уксё бичаны кутскизы, "лапа", пе, октӥськомы. "Хорошая лапа тебе будет" шуо ни мыным, нош мон мар со "лапа" уг но тодӥськы. Гришка нимо егит но лек пи, воръёслэн кузёзы дорам лыктӥз но юа ни: "Тон-а Тимофеева?" - "Ӧвӧл", - шуи. Сюлмы шӧдӥз ни мар ке но умойтэмзэ лэсьтыны дасясько шуыса. Ялан монэ преследовать каре, мон солэсь туж кышкасько - йырвандӥсьёслэн йырзы вал уго со. Но Инмар монэ ӧз кушты, утиз та лек муртлэсь. Войнаысь пегамъёс но пӧламы вал. Асьме армилы пумитъяськем, немецъёслы ужам латыш нылъёсты, украинкаосты татчы вуттӥзы. Сиён уг тырмы. Сием потыса йыр ик пороме вал. Ужато, ужато но, асьсэос ик морально быдто. Дугдылытэк обыскъёс лэсьто. "Вы враги Советской власти, вас надо уничтожать как лягушек!" шуыса шуш куараен шорамы кесяське вал тюрьмалэн кивалтӥсез Львов. Кулӥз но (оло виизы но), куинь пол кутскыса сое гуысьтыз поттаса шӧйзэ зӥртылӥзы: со милемды адӟемпотостэм каре вал, пукисьёс - сое. Шайгузэ ик бетонэн шобыртоно луизы. Ӧрекчаськытэк, честно ужаны тыршисько вал. Тодам ваисько вал, кызьы вашкала святойёс но туж трос курадӟонъёсты, кӧтӝожъёсты чидано луизы, но со пыр Инмарлэн Инмысь Эксэйлыказ сюрылӥзы. Озьы асме буйгатӥсько, улыны кужым басьтӥсько. "Какая преданная коммунистка" шуэ вал мон сярысь колонимылэн кивалтӥсез. Котькызьы но ултӥяны, сантэманы тырше вал. Секытлы, котлы, сютэм улонлы чидатэк чылкак восьми ни, кужыме быриз, суйы-пыды тӧрназ. Больницае мынӥсько но, "симмулируешь" шуыса уж доры улляса лэзё. Татысен тодматски Черниговысь Александр баӵколэн нылыныз. Отец Александр туж кужмо вӧсяськись священник вал, со Алексей И Патриархен ӵош дышетскемын. Нылыз доры лыктыса, сое но, монэ но Святой Дарен причастить кариз. Со мынам духовной атае луиз. Монастыре кошкыны малпасько вал но со шуиз: "Удмурт калыктэ просвещать кар". Тамында гожтыса вуи Анна Павловналэн тюрьмаын пукем нуналъёсыз сярысь. Тюрьмаысь потыса, Анна дор палаз бертӥз. Малпа вал Иже интыяськыны, татын ужась черк но вань, но "калыклэн тушмонэз" шуыса городын улыны прописка ӧз сётэ. Город вӧзысь Люк черке ужаны интыяськиз, куинь ар отын улӥз. Бӧрысь заводэ ужаны кутӥзы. Эрик луиз черке ветлыны. Клиросын чирдӥз, но ужамез понна уксё ӧз басьты, сиськыны но ӧз пыра, шуэ вал "вӧсяськыны толке ӧвӧл, дась сиёнэз сиыны уг пыры". Котыраз трос калык биниське, уката ик удмурт кышноос. Ӟуч кылэз ляб тодэменызы, черк службаез но соос шуген валало уго, нош Анна соослы валэктэ, кушаса сётэ туннэ литургиын чирдэм Апостолэз, Евангелиез, священниклэсь верам тодытонзэ но удмурт кылын соослы валэктэ. Шарканысь удмурт монастырьын улэм Мария монахиня (калык пӧлын Миндэр Маша шуо вал - гурт нимызъя) шуиз вал: "Аннаез венец возьма. Но дыр ӧз на вуы". Анна Павловналэн верамезъя, солы уйвӧтаз верамын вал: "Тынад курадӟон адӟонъёсыд - мытарствоосыд музъем вылын луозы". Пинал дыръяз Аркип агай но вераз: "Анналэн туж секыт мытарствоосыз луозы". Озьы ик луиз но. Пинал дыръяз НКВД-лэсь пегаса улӥз, сизьым ар пытсэтын курадӟиз. Соос ӧз тырме: Украинаын улӥсь трос нылпиё выныз кышноеныз валче шуккиськыса быризы. Вань анайтэк-атайтэк кылем нылпиосты Иже ваёно луиз. Ачиз ноку но ӧз бызьылы, нылпи ваёнэз ӧз тодылы, но вынызлэсь векчи нылпиоссэ солы пыд йылазы султытоно луиз. Курадӟыса-курадӟыса, уйёсты изьылытэк, кӧттырымон сиськытэк улон дыръёсыз кӧня вал?! Ваньзэ тае кин тодэ на - Инмар сяна. Туж тыршиз вордосъёссэ Инмар пала берыктыны, пичиысен вӧсяськыны дышетылӥз, кӧс утьылӥзы, валче черке но нуллӥз, нош быдэ вуизы но Инмар бордысь палэнскизы. Инмарлы оскись понна талэсь секытэз мар вань? Бӧрдон, синкыли... Со гинэ ӧз тырмы, таиз мон тодыса вал ини, Ирина нылзы улэп картсэ (кык нылъёссы будо вал ини) куштыса, шпанаен кушласькиз - сое дораз ваиз. Анна Павловналэн юрттэменыз пичи корка басьтӥзы. Кушласькид ке, ул вал ни, но та кык ашкынэм муртъёс куспазы жугиськыса, керетыса улыны кутскизы. Бордазы Ириналэн азьвыл картэзлэн кык нылъёсыз шимес суредъёсты адӟыса улоно луизы. Анна Павловналы соос туж жаль пото вал. Кытӥяз доразы ик кӧлано луиз. Кызетӥ даурлэсь вань секытсэ ас пельпум вылаз нуоно ке но луиз, Анна Павловналэн чик лекез ӧй вал. Инмарез яраонэз солэн пумтэм мур вал. Удмурт кылэ трос кырӟанъёсты со берыктылӥз, со дорысь калык ӧз бырылы. Лыктэм калыкен кырӟаса Инмарез данъяллязы. Уго духовной атаез, Черниговысь о. Александр солы удмурт калыкез Христос Инмарлэн дышетонэныз югдытыны, тодытыны бакель каиз. Духовной атаезлэсь косонзэ со данэн быдэстӥз. Тямыстон аресаз потэмын вал ни, берло аръёсы шӧдскымон пересьмиз: синъёсыз ляб гинэ адӟо на, губырскемын, но калык ялан котыраз берга. Сюлмыз шӧдӥз-а, мар-а та нуналэ черке лыктыса со вань тодмоосыныз люкиськыса кадь шуиз: "Ӟеч луэ, ӟеч улэ, Инмарен улэ. Монэ простить каре, оло уло на, оло кулонэ мынӥсько ни". Эшъёсыныз люкиськыса, Ириналэн улон корка палаз вамыштӥз: нылъёсыз школаысь бертозы, пумитано, сюдоно. Сюратайзылэсь туж кышкало, сьӧсь пӧйшур кадь ассэ возе уго. Ки уг берыктӥськы та берпум чуръёсты гожтыны, но ма карод: адями-сьӧсь пӧйшур, кораз, вандылӥз Анна Павловнаез, Ириналэсь бадӟым нылзэ Иулияез. Господи, помилуй! Мукет мар шуыны уг тодӥськы... Инмаре, жаля, уть милемыз вань уродлэсь. Анна Павловналэн азьвыл ик тодытыса верам музъем вылын курадӟонъёсыз йылпумъяськизы. Дьяволлэн лэзем муртэз вииз вань улонзэ Инмарез данъяса, ас калыксэ югдытыса улэм удмурт нылкышноез. Кузё--Инмармы Иисус Христос шуэ: "Мынам нимы понна ваньмыз тӥледыз адӟемпотостэм карозы", та вӧзы Ачиз ик Со ватса на: "Эн кышкалэ мугорез виисьсёслэсь, кудъёсыз лулэз виыны уг быгато. Нош ваньмызлэсь но юн кышкалэ Солэсь, Кин быгатэ лулдэс но, мугордэс но кысылӥсьтэм тыл пӧлын быдтыны" (Матфейлэсь Ӟеч Ивор 10:22;28). "Улонлэн бугыръяськонъёсыз кошкизы, музъем вылын курадӟонъёс быризы, йыркуро тушмонъёс кужымтэм луизы, нош яратонлэн кужымез бадӟым, со мозмытэ пумтэм вапумъёслы пеймыт азе сюронлэсь, со уте ваньзэ, кинъёс понна Тон азьын кышкатэк кырӟало! Аллилуия! (Кулэмъёслы сӥзем акафистысь). Гавриил иеромонах Коммунистъёс кивалтыса улон аръёсы ворсам черкъёсты усьтылыны кутскем бере, нимысьтыз дышетскем священникъёс тырмытэен, черкъёсын кивалтыны кутскизы кыдёкысь шаеръёсысь вуэм яке асьме дорын ик будэм, но удмурт калыклэсь ортчем сюрессэ тодӥсьтэм адямиос. Кытысь ке но, кинлэсь ке но кылэм иворъёсъя, куд-огез вераськыны кутскиз, удмуртъёс, пе, язычникъёс, шаманистъёс, Зэм Инмарез уг тодо, трос, пе, соос пӧлын ведӥнъёс. Куд-ог удмурт кышноослэсь но таӵе "тодытӥсьёс" визьзэс тугазы, соос ог-огзэс ведӥн шуыса ченгешыса улыны кутскизы. Сюлмы ныж пуртэн зырӟем кадь вӧсь луэ сыӵе вераськонъёсты кылыса. Эшшо кылем, 2000-тӥ арын, протестант сектаослы пасторъёсты дасясь курсъёсын (сыӵеез но вань асьме Ижын) кивалтӥсьсы, Басалыко фамилиен Украинаысь вуэм адями, вань сюлэмзэ поныса монэ осктыны выриз: "удмуртъёс - язычникъёс, шаманистъёс, соослэн лулсэрзы сӧриськемын, соин ик соос Христос Инмарлэсь дышетонзэ - Евангелиез кабыл басьтыны уг быгато". Талы пумит мынэсьтым верамме кылэм-адӟем но ӧз кары. Укмыстонэтӥ аръёслэн кутсконазы Люкысь (Иж вӧзысь) черке Воткинскысь батюшкалэсь нимысьтыз дышетскымтэ, сантехникын ужам пизэ священнике пуктӥзы. Одӥгаз проповедяз со удмуртъёсты озьы ик куаретыны кутскем, тӥ, пе, язычникъёс, Вуж Мултанын адямиез вӧсяды. Пӧлазы учырам удмурт дышетӥсь, со кӧтӝожзэ вераса, "Удмурт дунне" газетэ гожтэт лэзем. Со статьяез ӟуч кылэ берыктыса Владыкомылы сётытэк ӧйлась. Палладий епископмы йыромем тодытӥсез удмурт приходысь палэнэгес келяз. Укмыстонэтӥ аръёсы ик кӧня ке ӟуч газетъёс удмуртъёсты язычникъёс, ведӥнъёс, шаманъёс шуыса янгыше уськытӥсь кырсь статьяос печатлазы. Ӵектонъёс но вал: удмуртъёслэсь генаоссылэсь кодзэс воштоно, выльдоно. Со аръёсы ик печатласькиз шимес "Мурлот" роман. Тодазы но ӧз вае оскон понна улонзэс сётэм удмурт христианъёс сярысь гожъяны. Эх, бытмем язычество! Тонэн сэрен кӧня пол удмурт калыкез вӧсь каризы ни?! Удмурт язычникъёс уло Кам сьӧрын, нош тышез, вӧсь каронэз усе Кам тапалась удмуртъёслы. Ку тон милям калыкмылэсь улон радзэ саптамысь дугдод? Котькуд газетлы, котькудӥзлы удмурт луисьтэм адямилы уд вера ук ми кык сю витьтон ар ини Христос Инмарлэн нылпиосыз луиськомы, янгышаса сьӧлыкъёс лэсьтӥськомы ке, со понна ми ӧпкелиськомы. Мукет ласянь, та понна ми гинэ янгыш ӧвӧл - ӧвӧл ке вӧзамы зэмос дышетӥсьёсмы, кинъёслэн сюлмазы Инмарлэн сётэм яратонэз мед луысал. Одӥг тодмо батюшкае, солэн атаез но, вить братъёсыз но священникъёс, песятаез но священник вылэм, оскон понна коммунистъёс сое ыбиллям, ӟуч адями, удмуртъёс пӧлын далай гинэ улэм мурт, кӧтӝожен улон вакытам таӵе гожтэт ыстӥз: "Вань калыкъёслэн, удмуртъёслэн кадь кужмо осконзы мед луоз вал; удмуртъёс исповеде лыкто ке, синвуэн бӧрдыса сьӧлыкъёссылэсь куштӥсько..." Та выллем веранъёсты мукет ӟуч батюшкаослэсь но кылэме вань. Вань пумит ужасьёсын, урод малпасьёсын ожмаськыса кыӵе пайда басьтод? Керетон, ожмаськон - Инмарлы ярантэм ужъёс. Инмар Пиез, Утисьмес Иисус Христосэз музъем выл адямиос кыӵе но урод кылъёсын ӧз сантэмалэ - Со чидаз, жугизы, кортӵогазы, но Со вожпотонзэ, йыркурзэ нокин вылэ но ӧз кельты. Инмар Пилэсь чидамзэ асьмеос но адӟем карыны кулэ. Со котькинэ но яратэ, нокинэ но улӥ-вылӥ уг кары, куриськемез-вӧсяськемез санэ понэ. Удмурт калыкез ултӥясьёсты, соослэн ваче пумитазы сылӥсь язычникъёслэсь кивалтӥсьёссэс, коммунистъёсты-атеистъёсты югдытон понна гожтэмын мынам та веросъёсы. Учке, лыдӟе, тодэ удмурт калык пӧлысь потэм, мур осконэн улӥсь, Христос Инмарлэсь дышетонзэ чылкытэн утён понна асьсэлэсь улонзэс сётэм удмурт христианъёс сярысь. Сюосыз удмурт пиос, нылъёс, священникъёс, монахъёс оскон понна тюрьмаосын пукизы, соосты курадӟытыса виылӥзы, жугизы, сантэмазы, но соос Христос Инмарлэсь адӟем карыса осконлэсь ӧз куштӥське. Жаль, йырсазьмы вакчиен, осконмы пичиен, азьтэммы бадӟымен, историмес, калыкмес гажамтэенымы, соослэсь нимъёссэс вунэтӥськомы ни. Но Вылысь Инмармы соосты тодэ, уго оскон понна курадӟон чидамъёс Солэн Инмысь пиштӥсь данлыказ уло, соослэн нимъёссы Инмарлэн Улон Книгаяз гожтэмын. ...Эшкей Микайло, со ик Ешкеев Михаил Васильевич, со ик Гавриил иеромонах, вордскемын дас укмысэтӥ даурлэн пумаз Сарапул уездысь Нылга-Жикья волосте пырись Бадӟым Ӝужгес гуртын, Инмарлы оскись крестьян семьяын. Та гуртын Микайлоез тодӥсьёс ӧвӧл ни шуыны луоз, уката ик солэсь пичи дырзэ. Та веросме но гожтӥсько Анна Павловна Тимофеевалэн (учкы со сярысь очеркмес) тодэ ваемъяз, Элькун архивысь кӧня ке документъёсъя но УдНИИ-ын ӵош ужам, та гуртын вордскем егит эшелэн Людмила Леонидовна Карповалэн гурт калыксы пӧлысь люкам тодэ ваёнъёссыя. Микайло пичи дырысеныз черк службаез яратӥз, молитваосты дышетӥз. Визь дыръя анай-атаеныз ӵош кӧс утизы. Бусы ужъёсты, юрт котырысь ужъёсты Микайло пичиысен ик тыршыса быдэсъяз. Анай-атайлы пумит вазьылэмзэ нокинлэн но кылэмез ӧй вал. Арня нуналъёсы, праздникъёсы со ялан черкын вал, пономарьлы кадило ӝуатыны, вӧсяськон интыез чылкыт возьыны юрттӥз. Черк службаез быдэссэ тодаз возиз. Бӧрысь клиросэ но кырӟасьёс-чирдӥсьёс пӧлы султылӥз. Нылга-Ӝикья черклэн но, Булай-Ӟумъя черклэн но батюшкаосыз вордэм пизэс кадь яратӥзы пичи гинэ мугоро но вань верамез кылзӥськись, зӥбыт удмурт пиез. Ёросысь калык сое "Вӧсяськись Микайло" гинэ шуыны кутскиз. Озьы ортчиз пинал дырыз. Быдэ вуиз но анай-атаез солы кышно вайыны малпазы - музъем ужась, юрт котырын ки воштӥсь кулэ - асьсэос секыт ужаса, висьыса кынартэм луэмын ини. Микайлолэн мылкыдыз Инмар дорын улӥз, кышнояськон сярысь со уг но малпа вал. Дэмлазы бускель Косой гуртысь Инмарлы оскись Наталля нимо нылмуртэз. "Шудо луомы меда?" - юаз Наталля карт луонэзлэсь. - "Асьмелэн шудмы Инмын луоз", - шуиз Микайло кышно луонэзлэн пумитаз. Инмарлы оскись егит пиен егит нылъёс - кузпалъёс - кыл сётӥзы братэн сузэр кадь улыны. Ӵош ужазы, ӵош ик черке ветлӥзы. Кышкытэсь аръёсы улыны кылдӥз Микайлоен Наталля кузпалъёслы: граждан ож, сютэм аръёс. Улон огпала берытскиз кадь. Коммунистъёсын, комсомолецъёсын ӵош гуртэ выль улон вуиз. Кутскизы осконлы пумит ожмаськыны. Огез бере мукетыз урод ивор вуэ - я сояз гордын,я таяз гуртын черкез пытсаллям, сутӥллям, клуб кариллям; соизэ я таизэ священникез вииллям, я пытсэт сьӧры келяллям. Олокыӵе но шимес вераськонъёс вӧлмизы - антихрист, пе, эксэй пуконэ пуксем ни, ӝоген номер пуктылыны кутскозы ни, собере - дунне бырон... Осконлы пумит кужмо ож кутскон вакытэ Микайло кузпалыныз вераськыса, духовной атаезлэсь бакель каронзэ басьтыса мынӥз Сарапулэ епископ доры солэсь ас гуртаз часовня пуктыны лэзён курыны. Инмарлэн ӟеч эрикеныз, выль корка пуктыны дасям бугрозэ со бакча пумаз, гопъёс дурысь возь вылэ нуллӥз часовня ӝутыны. Часовнязы вуэм бере, татчы трос калык ветлыны кутскиз. Соку Микайло малпаз часовня вӧзаз алтарь ӝутыны. Озьы часовня интые черк пӧрмиз. Сарапулысь оло Ижысь епископ, табере тодӥсь ӧвӧл ни, Микайлоез священнике пуктӥз; куриськон гожтэмезъя, сое епископ монахе ӵышкиз но Гавриил ним сётӥз. Озьы Ӝужгес пи Микайло Гавриил ним басьтыса, иеромонах луиз. Ас киыныз пуктэм черказ ачиз ик служить карыны кутскиз. Анна Павловналэн верамезъя, Микайлоен ӵош ик солэн кузпалыз Наталля но монашкае ӵышкиськиз, но та сярысь шарае ӧз поттэ. Уй-нунал усьтэм черке котыр ёросысь гинэ ӧвӧл, Шарканысь удмурт монастырьысь но миссионеркаос вуылыны, пе, кутскизы; Кам сьӧрысь Николо-Березовкаысь, Казань сьӧрысь нимо-дано Семиозерной пустыньысь но монахъёс вуылыны ӧдъязы. Нош со виын кӧня вал пыдйылчи калык! Одӥг улосвылысь мукетаз вӧсяськыса, кӧттыр утчаса ветлӥсь калык ӵоттэм трос вал. Гавриил иеромонах ваньзэс яратоно агай-вынъёссэ, сузэр-апайёссэ кадь пумиталляз, нош Наталля ческыт сюкасен, шыдэн, нянен утялтылӥз. Кӧлыны но ваньмызлы шуныт сэрег шедьылӥз. НКВД кемалась дырысен ини Ӝужгес черклы, уката ик отысь Гавриил иеромонахлы пиньзэ гизьыр йырйыса улӥз но муг утчаз - кызьы та Инмар кылэз жадьытэк тодытӥсьлэсь бурдзэ ӵогоно - гуртысь гуртэ тодытыса медаз ни ветлы, выль пуктэм черказ но калык медаз ни пыра. Кызетӥ аръёслэн пумазы Ӝужгес-Пельгала, быдэс бадӟымлэсь но бадӟым Россей кунысь гуртъёсы сямен ик, туж ӝож, кышкыт, бугрес аръёс вуизы. Коммунаос, артельёс, колхозъёс кылдытъяны кутскизы. Удмурт крестьян калыклэсь дауръёсын ӝик-ӝик утялтыса возем бусыоссэс, кенеръёссэс тӥяса, йыранъёссэс (межаоссэс) гырыса син сузёнтэм колхоз лудъёс кылдытъяны кутскизы. Пудо-животэз, ужан тӥрлыкез таласа сямен огазе люказы - колхоз фермаос кылдытӥзы, асьсэзыз ик скал кыскись, вал, ыж, парсь сюдӥсь, мушкась каризы, нош емышсэ - йӧлзэ, вӧйзэ, ыж гонзэ, музэ- чечызэ государстволы келязы. Ассэ крестьянэз гид берысьтыз картофка бакчаеныз кӧтсэ тырыса улыны кельтӥзы. Ужез яратӥсь, ӟеч улӥсь крестьян калыкез кулаке поттыса, вань ваньбурзэ таласа, асьсэзыз сантэмаса дор музъемысьтызы кужмысь улляса келязы я Сибире, я уйпал шаеръёсы. Гуртын улон туж огыр-бугыр луиз. Дауръёсын тупаса, зӥбыт-востэм улэм калык ог-огеныз ваче гадь вуизы, трос вир кисьтӥськиз. Ог-огдэ адӟемпотостэм карон, вожъяськон потӥзы. Ужез яратӥсьтэм калык улонэн кузёяськыны кутскиз. Пельга выжыослэн Ӝужгес гуртазы но ваче вуылонъёс луизы. Калык йыромиз: кытчы мыноно, кинлэсь юано, кытын зэмлык? Трос вал черк пала вамыштӥсьёс. Черк ӧз ваты таӵе кылылмтэ-адӟылымтэ сьӧсь ужъёслы ортчытонлы пумит луэмзэ. Бугыръяськон ӝутэм шуыса 1929 арын Гавриил иеромонахез ГУЛАГ-е келязы. Черксэ пытсазы. Кышкыт лагерьёс пыр потыса, Гавриил иеромонах гурт палаз берытскиз. Отысь со эшшо кужмогес осконэн вуиз. Черксэ усьтыны ӧз ни лэзе бере, оскись калыкен, лушкем азьёсы люкаськыса, вӧсяськылӥзы - тэльёсын, гурезь бамалъёсы гудэм гуосын-кельяосын, мурӝолъёсын. Сизьыметӥ, пе, вал лушкем вӧсяськон интызы. НКВД синзэ кыньыса ӧз улы, Ӝужгесысь батюшкаез син азьысьтыз ӧз ыштылы. Трос кышкатъязы, ӵыжопкае пытсаллязы, но Гавриил иеромонах Христос Инмарлэсь Ӟеч Иворзэ тодытэмысь ӧз дугдылы. Наталля солы шуиз вал: "Атай, уд кышкаськы-а? Виёзы ук! Эн ни тодыты". - "Кошкись ошмес вуэз дугдытыны уг луы", - пумитаз вазиз отец Гавриил. Нош ик НКВД-ос отец Гаврилэз пытсэт сьӧры келязы. Косӥзы осконлэсь куштӥськыны, со понна, пе, тыныд эрик сётомы, выль уже пырод, мукет адямиос кадь ик шудо-буро улод. Кинэ, кинэ, дыр, но пичи дырысеныз кын куртчон аресозяз вуэм, Инмарез яратыса, вӧсяськыса улэм, мукет улонэз, кырсез тодӥсьтэм иеромонахез озьы гинэ осконлэсь уд куштӥськыты, Иудаен артэ одӥг радэ уд пукты. Гавриил иеромонах судын ассэ зӥбыт-востэм возиз. Инмарлэсь ӧз куштӥськы, ас лулзэ ӧз вуза, мукетъёслэсь но. Та тырмыт вал ини сое "калыклэн тушмонэз" карыса ыбыны. Со вал 1938 арын. Со виын оскон понна курадӟон чидам эшшо одӥг удмурт пилэн дун-чылкыт лулыз Инмысь Атаймылэн престол азяз вуиз. Та арын ик черксэ куашкатӥзы, сэрттӥзы, тарказы. Анна Павловналэн верамезъя, черк юртэз парсь гид но карылӥзы. Ки уг берыктӥськы та сярысь гожъяны... Та сьӧлык но асьме калык вылын улэ-а? Инмаре, жаля! Синву вия... Шимес... Та сьӧд ужъёс понна ӧм ке ӧпкеле, асьмеды азьпалан номыр ӟечез уг возьма. Курадӟытыса виемъёслэн дун-шектэм вирзы "ӧпкеле, вӧсяське!" асьмелы шуэ. Библиялэн Усьтӥськон (Апокалипсис) люкетаз шуэмын: "Кузё-Инмар бордын али кулӥсьёс шудоесь; озьы шуэ Дух, асьсэлэн секытэсь ужъёссылэсь соос шутэтскозы, соослэн ужъёссы соослэн бӧрсязы мынозы". (Усьтӥськон 14:13). Нош кытчы мынозы сюрс но сюрс черкъёсты таркасьёслэн, Гавриил иеромонах кадь дун-чылкыт улэм Инмар адямиосты виылӥсьёслэн, вӧсяськон юртъёсты таркасьёслэн, Библиез тылэ куясьёслэн лулъёссы? Инмар тодэ, Со - Судья. Куке но одӥг институтын ӵош ужам Люси эшелэн, Людмила Леонидовна Карповалэн ас гуртысьтыз люкам иворезъя, Наталля кема аръёс, кулытозяз улӥз Ӝужгесын. "Калыклэн тушмонэзлэн" кузпалызлэн улонэз капчи ӧй вал. Улон азез гинэ ӧвӧл, улон интыез но таркаськиз. Быгатэмезъя, ӟеч муртъёслэн юрттэменызы, балаганлы укшась аслыз улон инты лэсьтӥз. Инмарез яратӥсь адями огшоры гинэ улыны ӧз быгаты, сюлмыз куриз на Инмар азьын ярамон кыӵе ке но уж лэсьтыны. Инмар солы сыӵе ужез возьматӥз: Сулейман Васьлейлэн кышноез, Олёна, нуны вайыкуз суйтэм- пыдтэм кылиз, вырӟылӥсьтэм луиз - паралич шуккиз. Картэз выль кышно ваиз, висись, вырӟылӥсьтэм кышноез солы кулэ ӧз ни луы - Олёнаез жаляса, Наталля сое дораз басьтӥз. Кӧня ке улыса, Олёналэсь Пильып пизэ но дораз ваёно луиз - Васьлейлэн выль кышноез сое урод кариз, кулэ ӧз кары. Наталля та кык кынартэм лулъёсты утялтӥз, вордӥз. Вӧсяськись Наталля апаезлэсь верамъёссэ пеляз поныса быдэ вуиз Пильып. Балаган коркаязы ик кышно ваиз; пыд йылаз йыг-йыг султэм бераз, выль юрт пуктӥз. Вить нылпи будэтӥз. Наталля апайзы кулэм бере, Пильыплэсь нылпиоссэ анаез, Олёна апай, бордаз кариз, визьлы-бурлы дышетӥз. Наталля апайлэн вӧсяськемныз Олёналэн мугорыз небытаз, ветлыны ӧз ни ке но быгаты, пуксьыса пукыны йӧндыриз. Вӧсяськись удмурт кышномуртлэн Инмар азьын ярамон уж лэсьтыса улэмез сярысь гожтӥсько но син азям пуксе, тодам лыктэ Финляндиын та выллемгес ик луэм учыр: секыт война бер аръёсы Ева нимо чебер финн ныл бызе ачиз кадь ик чебер швед пилы. Шумпотыса, шудо улӥзы егит кузпалъёс нунызы вордскон нуналозь. Выль шумпотонэн - нылзы вордсконэн ӵош, та семьяе ӝутыса вормонтэм секыт кайгу пыриз: нунызэ вайыкуз Еваез паралич шуккиз. Со вал 1945 арын. 2000 ар вуытозь, 55 ар ӵоже, кулытозяз, Ева ноку но ӧз султылы. Мар но ӧй вал та аръёс ӵоже! Нунызэ детдоме нуизы, картэз мукет кышно шедьтӥз, выль семья кылдытӥз. Ева висёнэныз ӵош огназ буш корказ кылиз. Улэмез уг ни поты вал, кулон но ӧз лыкты. Сюдыны, эмъяны, утялтыны кун учреждениос юрттӥзы, но оген кылён, быдэс ар ӵоже вырӟылыны луытэк кылльыны - Инмарез тодӥсьтэм мурт понна - со ад ук! Тон огнад, нокинлы кулэ ӧвӧл - пичи нылзэ но со доры нокин уг вайы, яратоно кузпалыз но ымнырзэ уг возьматы... кулон, кулон - кытын тон?! Тазьы туж курадӟыса, шимес малпанъёсын катьтэммем егит кышномурт доры Инмар аслэсьтыз адямиоссэ лэзиз - оскись кышномуртъёсты. Та дырозь Ева Инмарез уг тоды вал шуыны луоз - анай-атаез оскисесь ӧй вал, нылпизэс но Инмар законъя ӧз будэтэ. Выль лыктэм кышномуртъёс туж лякытэн гинэ Еваен вераськизы, Псалтирь чирдӥзы, Евангелиысь люкетсэ лыдӟизы. Эшшо лыктом шуизы, мед лыдӟоз шуыса Евангелие кельтӥзы. Ӵуказеяз но, усьсэ но, берло но вуылӥзы Инмарез яратӥсь кышномуртъёс. Ар куспын Ева Евангелиез кӧня ке пол лыдӟыса пыр потӥз, туж яратӥз псалом гуръёсты. Озьы со Инмарез тодӥз но улон азяз шунды ворекъяны кутскиз. Больницаын туж ке но умой утялто, Евалэн отын улэмез ӧз поты, солы гуртаз утялтӥсь сётӥзы, нош уйёсы утялтыны ветлӥзы Инмарлы оскись егит нылъёс - студентъёс, ужасьёс. Соос пӧлын ик асьмелэн тодмомы Маръя Картано но вал. Маръя пыр Евалэн улон юртаз мыным но вуылыны кылдӥз. ...Койка вылын кылле пурысьтам йырсиё, шунды кадь чилясь ымныро кышномурт. Чиньыосыз сяна, мукет мугор люкетъёсыз чик уг выро. Витьтон арлэсь но трос курадӟе ке но ини, Ева ассэ шудоен лыдъя: шимес курадӟон пыр со Инмарез тодӥз но выль адями луиз. Быдэс Псалтирез учкытэк лыдӟыны быгатэ, нош Библиез быдэссэ кӧня пол со лыдӟыса пыр потӥз! Инмарлы тау карыса, Инмарез данъяса, курадӟыса кылле кышномурт. Но малы пайми - татын, пичи гинэ коркан, сыӵе шӧдскымон Инмарлэн дэлетэз (благодатез) улэ - солэн но, мынам но ымнырам шумпотон- пальпотон улэ, синме усьтэме но уг луы, нош сюлмын - сыӵе шумпотон, каньыллык! Вераны кыл ик уд шедьты. Ева шуэ, та курадӟонэ ке ӧй луысал, ноку но Инмарез ӧй тодысал, кулысал ке, адэ сюрысал. Анаез но, атаез но, агай-вынъёсыз но сояз дуннее мыныны дасяськытэк, чылкытатӥськытэк кошкизы. Карт луонэз но кемалась кулӥз ини, нош Ева улэ но Инмарлы тау каре. Курадӟыса, вӧсяськыса, ӟеч ужъёс лэсьтыса, лулзэ-мугорзэ дун-чылкыт возьыса дасяське Инмысь Атайлэн юртаз пырыны. Священник лыктыса исповедь ортчытэ, причастие сётэ. Евалэн одӥг кайгуэз: вордэм нылыз, нылпи юртын будыса, Инмарез уг тоды, тодыны но уг тыршы. Ева доры со туж шер гинэ вуэ, но "анай" уг шуы. Вӧсяськыны куремзэ санэ уг поны. Та Евалэн вӧсь интыез. Ева кадь ик, мон но паймисько: Инмарез тодон понна одно ик курадӟон адӟыны кулэ-а? Малы сӥльвиро, шудо-буро, егит, кужмо адями сюлэмзэ Инмар пала уг берыкты? Яке туж ӧжытэз гинэ Инмар пала кариське... Эшшо малы паймисько: султылытэк, вырӟылытэк улӥсь кышномурт быдэс Псалтирь книгаез учкытэк вераны дышем сяна, вырись чиньыосыныз кулытозяз ӟеч уж лэсьтӥз. Олокыӵе но учыре сюрыса ӧлексы кылем адямиез гажась кунъёсын, шуом, Финляндиын, пӧртэм амалъёс утчало солэсь улон нуналъёссэ шулдыргес, улэм потымонгес карон понна. Одӥгысьтыз Инмар кылэз тодытӥсь эштосысь адямиос Ева доры лыктыса солы туж огшорыесь гинэ сувениръёс лэсьтыны ӵектӥзы... Вырӟылытэк кыллись кышномурт шумпотыса басьтӥськиз со уж борды. Ева кадь ӧлексы кылем муртъёслэсь киужъёссэс нимысьтыз магазинъёсын вузало. Инмарлы оскись калык юри лыктэ октӥськыны, секытэ сюрем адямиослэсь озьы тыршо мылкыдзэ ӝутыны. Трос дасо аръёс ӵоже Ева ас киыныз туж трос сувениръёс лэсьтӥз но соосты вузаса поттэм коньдонзэ, оло сю сюрс марка пала со люкаськиз, ваньзэ сётылӥз Африкаысь куанер, сютэм улӥсь калыкъёслы, миссионерской уже. Оло асьмелэн берыктэм книгаосамы но Евалэн ужаса поттэм лептаез (коньыез) вань? Удмурт кышномурт Олёна но финн кышномурт Ева одӥг кадь шугадӟонэз чидано луизы: кыксэс но нуны вайыкузы пери шуккиз. Еваез нырысь нуналысен берпум нуналозяз (Ева туэ кулӥз) Финн кун пичи нуныез кадь утялтӥз, сюдӥз-вордӥз, ӧз кушты. Вӧсяськись калык но вань уйёсы со вӧзын пукылӥз. Ӧлексы кылем кышномуртэз государство ас ки улаз басьтӥз. Мукет адӟонэз-чиданэз вал удмурт кышномуртлэн. Олёна картэзлы но, государстволы но кулэ ӧз ни луы. Инмар гинэ сое ӧз кушты: сётэм лулзэ утьыны Со Аслэсьтыз быръем сосудзэ - вӧсяськись, Инмарез уй но нунал данъяса улӥсь, пумтэм трос курадӟон чидам Наталляез сётӥз. Сюе гудӟыса, кызьы но озьы лэсьтэм балаган корказ со Олёнаез но солэсь вордэм атаезлы кулэтэм луэм пизэ ваиз. Каръян, мусо Наталля апае! Маин сюдӥд, кызьы вордӥд шудтэм улонэз адӟыны кылем та кык лулъёсты? Али кадь соку государство ӧлексыослы пенсия ӧз тыры, ӧз юрттӥськы ук. Туж секыт, сютэм аръёс вал со виын. Мон, война бырон арын вордскем адями, ас синмыным адӟи, пичи ке но сиёно-оскалтоно луи турын-куарез, лебедаез, сием потыса пуконэз но тодӥсько, кушкутэн но ветлэме вань. Нош тӥ куиньнады - ачид мӧйымемын ини, эшшо вӧзад пуко, кыллё кык кынартэм лулъёс. Инмар ке ӧй юрттысал, нокызьы но улыны ӧй быгатысалыд. Тон, Наталля апай, шонер верамед: Олёна - Инмарлэн нылыз, сое котькызьы ке но утёно. Чидантэм секыт учыре сюрем муртэз утялтэмед понна ик уго Инмар тледлы кӧттыр сётӥз, гольык но ӧд ветлэ. Ӧд кулэ, ӧд быре. Выжыды, ӟеч ужъёсты кылизы. Пичи нуны Пильып но быдэ вуиз, кузпал ваиз, вить пинал будэтӥз. Таре соос асьсэос быдэ вуэмын ни, асьсэлэн семьяоссы. Ю-нянь будэто, заводын ужало. Но Инмарлы тау каро меда? Сюдӥсь-вордӥсь, улэп улонысь адэз адӟем но таисьтыз дуннеысь кемалась кошкем Наталля апайзы, Олёна песяйзы понна вӧсясько меда? Пильып но кулэмын ни, лэся. Мед вӧсяськозы вал. Вань удмурт калык улэп ӵыжы-выжыосызлэн тазалыксы, осконзы понна, кулэмъёсызлэн - лулъёссы Инмарлэн Инмысь Эксэйлыказ мед сюроз шуыса мед вӧсяськозы вал. Асьмеос кылтэм-ымтэм, номыр валасьтэм пудо-живот ӧвӧл ук. Вӧсяськыса, ӟеч ужъёс лэсьтыса улон понна асьмеос кылдытэмын, со понна Кылдытӥсьмы, Вылысь Инмар асьмеды югыт дунне вылын возе. Инмарлы оскисьтэмъёс кышнозэс, нылпизэс кушто, Инмарлы оскисьёс шуге-леке сюремъёсты пыд йылазы султыто. Оскон понна курадӟон чидаса лулдэ сётэм Гавриил иеромонах, тонэн ӵош улонлэсь секыт ныпъетсэ - кироссэ нуыны чидам Наталия, Инмарлы оскись вань калык понна тӥ удмурт калыклэн зарни сосудъёсыз луиськоды. Калыкмы пӧлын тӥ кадьёс ӧй ке луысал, Инмарлэн улон книгаысьтыз удмуртъёс, оло нош, ӵушиськысалзы ини, кызьы Зэм Инмарез тодӥсьтэм трос лыдъем, кужмо калыкъёс дунне вылысь ышизы-быризы. Христос Инмарлэсь Ӟеч Иворзэ, дышетонзэ удмурт калыкты пӧлы вӧлмытӥсь, курадӟон чидам Гавриил иеромонахен Наталия, Инмарлэн престол азяз ми, сьӧлыкоос, понна но вӧсяське: удмурт калык Христос Инмар бордысь ноку но медаз усьы, сьӧлыко ужъёслэсь со мед куштӥськоз но Дунне Кутӥсь Куиньмо Инмарез данъяса, Инмар Анаез, вань святойёсты сӥлы карыса, вӧсяськыса мед улоз, азьпалась вань шугадӟонъёсты, куректон кайгуосты чиданы мед быгатоз. Аминь. Олексан агай Дунне вылысь самой матысь адямие - анае кулэм бере нырысь ик бызьыса мынӥ черке: анаелэн лулыз понна вӧсяськыны ньыльдон нуналлы, быдэс арлы заказной сётӥ. Улэп дыръяз анайме черке келяса кельтӥсько, пумитаны мынӥсько - гуртысь лыктэм, ӟуч кылэз тодӥсьтэм пересь мурт - бадӟым каре йыромиз ке, мар карод? Нош ачим черке уг вамыштӥськы, туж ке но пыреме потэ. Анае но шуэ: "Ойдо, пие, пыр, кыӵе отын шулдыр, пиосмуртъёс но вань". Но кышкан ворме: Троица черклы сю вамыш кемын сылэ ужано институтэ. Со огшоры институт гинэ ӧвӧл - Удмурт Элькунысь Министръёслэн Кенешсылэн идеологияя шорсюлмыз со. Сюрс укмыс сю тямыстон куатетӥ арын - анаелэн кулон араз - Россей Кунын коммунистъёс ялан осконлы пумит, черклы пумит уж нуо на вал. Тодосчилэсь черке ветлэмзэ, пырамзэ тодӥзы ке, нокин но умой лэсьтӥськод шуыса йырдэ ӧй маяллясал. Кивалтӥсьёстэ, эшъёстэ, ӵыжы-выжыостэ кысканы кутскысалзы. Анайме ватэм бере, сюлмын сыӵе секытлык, сыӵе мӧзмон каръяськиз. Кышканме вунэтыса, ӝыт службае пыри. Вӧл-вӧл черк пушкын пачылаз калык сылэ. Куд-огез али гинэ пыре но вашкала обросъёс азе сюсьтыл пуктэ. Урамын пеймыт, кезьыт, нош татын шуныт, мугорез гинэ ӧвӧл, сюлэмез шунтӥсез но вань кадь, ӧс дорыгес султӥ но сылӥсько... Табере мыным потэ ини, быдэс дунне мон шоры учке кадь. Сыӵе кирос кареме, йыбырттэме потэ, но киез нокызьы но ӝутыны уг луы - оло, тонна секта корт эгес пельпум вылам понӥллям. Возьдаськон, курдан улэ нюрто, суез-пыдэз, мылкыдэз вылэ ӝутыны уг луы. Кыкетӥ ползэ лыктыкум, кышканме киям кутыны тыршыса, черклэн шор палаз кыстӥськи ни. Вӧзам сылӥсь удмурт кышноос (удмуртме уг тодмало-а, мар-а?) куспазы лушкемен чигисько: "Кыӵе муртлэн нылыз-пиез тазьы черке ветлэ меда, мынам одӥгзэ пиме но, нылме но косыса-косыса, либатыса нокызьы но ваеме уг луы". Мукетыз кышномурт артэ вӧсяськыса сылӥсь эшезлы шуэ: "Мынам но озьы ик, номыр кареме уг луы, черк пала огзэс но берыктэме уг луы". Куинетӥзэ черк службае лыктыкум, самой азьпалаз сылӥсь сюсьтыл пуктон доры вуи. Инмар Анайлэсь оброссэ кирос карыса чупай но сюсьтыл пуктыса сылыкум кин ке пельпум бордам йӧтӥськиз, бадӟым куараен шуиз: "Ӟуч-а, удмурт-а тон?" - "Удмурт" - шуисько. Со виын быдэс дунне зурказ но черкысь вань калык ми шоры учкиз кадь потӥз мыным. Зэм но, укыр бадӟым куараен вазиськиз чиед гинэ, мынэсьтым ӧжытак лапеггес, ог куатьтон аресъем воргорон. "Удмурт ке, ойдо ми пӧлы", - Святой Екатериналы сӥзем придел дорын сылӥсь мӧйы воргоронъёс пала со валтӥз монэ. Служба кутскемын ӧй вал на, соин ик та адями монэ ӵош вӧсяськон эшъёсыныз тодматыны вуиз. "Таиз Леонтий Гаврилович, таиз Александр Иванович, таосыз агай- вынъёс - Павел но Сергей Яковлевичъёс..." Ог дасо-дас витё пиосмуртъёс люкасько вал со виын черк вӧсяськонъёсы, нош кышномуртъёс храмын пачылаз - кирос карыны киез но ӝутыны уг луы, ява. Пӧлазы кык пересь удмурт воргоронъёс сыло: одӥгез Алнаш ёросысь Варӟи-Ӟатча вӧзысь Шадрасак-Кибья гуртысь, мукетыз - Якшур-Бодья ёросысь Варавай котырысь. Монэ валтыса ваись муртэ ачиз сярысь шуиз, мон, пе, Александр Петрович, удмуртъёс монэ Олексан гинэ шуо. Мон но удмурт бере, та дырысен солы "Олексан агай" шуыса вазиськылӥ. Чебер но, капчи но ук "Олексан агай" шуыны. Пересьёс пӧлын мон самой егитэз вал. Соос ваньзы куатьтонлэсь ортчемын ни, пенсиын, нош мыным алигес гинэ ньыльдон одӥг арес тырмиз. Туж шумпотыса соос монэ пумитазы - егит мурт лыктэм бере, черк улоз на! Бордысьтызы кыӵе ке но каньыллык, яратон-гажан, дэлет лыктэ - Инмарлэн зэмос оскись муртъёсыз уго соос. Вань сюлмыным мон та выль тодмоосме яратӥ, возьмаса гинэ улыны кутски: ку субботаен арня нунал вуозы но черкысь службаын нош ик та яратоно эшъёсыным пумисько. Соос монэ сюсьтыл пуктылон вӧзы, азязы султытӥзы. Ӝуаса бырем сюсьтылъёс интые выльёссэ пуктылӥ. Шумпотон уж сётӥзы. Кызьы мон валай, Олексан агай таослэн кивалтӥсьсы кадь: кыллы шаплы, вӧсяськонэз тодэ, арлыдын но куатьтон котырын гинэ, тодымтэ муртэз ик ӧвӧл кадь. Леонтий Гавриловичен, туж зӥбыт-востэм, лачмыт ӟуч воргоронэн ӵош, Олексан агай черк кенеше пыре, соку сое "двадцатка" шуо вал. Нош йырзы - староста Николай Данилович. Войнаысь ӧлексы луыса бертэм офицер, таза сӥльвиро, кырӟаны шулдыр куараё мурт. Улэп кылемезлы тау карыса, пӧсь ожысь вуэм воргорон бертыкуз ик черке пыриз. Сюсьтыл пуктӥз но, бӧрысь ини, черк кенер сьӧры потатэк, черк юртын со улӥз. Та выль улон потытозь, вань черк ужен со кивалтӥз, ктитор - староста луиз. Калык гажа вал сое, вань ужез быгатыса нуиз уго. Со вакытэ, паймоно кадь, быдэс черкен ктитор кивалтӥз. Соос пӧлын котькыӵеез но вал, "кыгыбы" шуон тыршиз аслыз ярамон адямиосты черке кивалтӥсе чуртнаны. Старостаослэсь юатэк-вератэк, священникъёслы нокыӵе ужез но лэсьтыны лэземын ӧй вал. Ктиторен огъя кыл уг ке шедьто, священникез ӝог гинэ пыдлось гуртъёсы келяло я служить карыны уг ни лэзё. Выль закон потытозь, черкын ужась-тыршисьёслэн улонзы капчи ӧй вал, соосты котыр ласянь сантэманы, ултӥяны тыршизы. Но оскон улӥз, калык черке ветлэмысь ӧз дугды. Эшшо мон ветлыны кутскыку, осконэн кыӵе кужмоесь адямиос вал! Коммунист зӥбетлэсь кышкатэк черке ветлӥзы, кыдёкысь монастырьёсы вуылӥзы. Вӧсяськон книгаос ӧй вал бере, ас киынызы гожъязы. Ог-огзы доры ветлыса вӧсяськизы. Университетын дышетскыкум таӵе адямиосын нырысьсэ пумиськи: ӵужапае доры лыктыса, синкылиен верасько вал Инмар закон сярысь, чирдо молитваос, сьӧлыкъёссы пумысен чигиськыса верасько. Святойёслэн улэмзы, вӧсяськемзы, оскон понна курадӟон чидамзы сярысь веранъёсты мон но ымме усьтыса кылзӥськылӥ. Ӵужапае шуэ вал: "Миша, священнике дышетскыны мын". Мон шуисько: "Ой, ӵужапай, бер ни, азьлогес вера вал, мон табере университетын дышетскисько ук". Черке кошкытозям но диаконлэсь санзэ басьтытозям, эшшо кызь ар ортчиз на. Олексан агай Пичи Пурга ёросысь Яган-Докъя гуртын вордскемын, но пичи дырыз, пинал дырыз бускель Чутожмон-Пурга гуртын ортчемын. Туж секытэсь вал быдэ вуон аръёсыз. "Аляк луон дыръёсыз но вал", - тодаз вайыса шуэ укмыстон сизьым аресъем Марпа апай. Анайтэк, атайтэк кыльыса, ачиз курадӟыса-курадӟыса пыд йылаз султыны дауртӥз. Ӵыжы-выжыосыз аслэсьтыз арескын бадӟымгес кышно ваизы. Война бере городэ улыны интыяськизы. Олексан агай андан пӧзьтон заводын ужаз. Пӧсь цехын ужаса, со пенсие вазь потӥз но вань улонзэ черкен герӟаз. Одӥг праздникез но, субботаез, арня нуналэз кельтытэк черкын вал. Табере Библиен мургес тодматскыны дыр но тырмыт луиз. Уйёсы кухняяз пытсаське но Священной Гожтэмысь чуръёсты лычсузьыса лыдӟе. Ӝыт правилоез чирдытэк, Евангелиысь, Апостолъёслэсь ыстэм гожтэмъёсысьтызы кӧня ке люкетсэ, Псалтирьысь одӥгзэ ке но кафизмаез чирдытэк изьыны уг выдӥськы шуэ вал со. Кызь ньылетӥ, витьтонэтӥ, укмыстонэтӥ псаломъёсты черк-славян кылын но, удмурт кылын но учкытэк вераны дышиз. Йырсазезлы но паймисько: Вуж Сӥзёнысь иворъёсыз туж усто мадьылӥз, пересьёс ымзэс усьтыса ик сое кылзӥзы, уката гуртъёсысь лыктэм, ӟуч кылэз но, Евангелиез но ляб тодӥсь мӧйы удмурт кышноос. Таӵе адямиосын Олексан агай туж шумпотыса вераськылӥз. Тодонзэ ватыса ӧз улы. Одӥг Леонтий Гаврилович гинэ Олексан агайлэсь тросгес тодэ вал ке, тодэ вал, дыр. Но со, удмурт эшез кадь, тодытыса ӧз ветлы. Ӟучъёс черк-славян кылэз удмуртъёслэсь ӟеч тодо уго. Асьсэлэн кылзы. Паймымон, Олексан агай быдэс Библиез укмыс пол лыдӟыса пыр потэм. Черке алигес гинэ ветлыны кутскем мурт, мон но паймыса кылзӥсько та кык мӧйы муртъёслэсь Библиын гожтэм ужъюгдуръёс сярысь вераськемзэс. Учкытэк веранын Олексан агай ӟуч агайзэ ортче вал кадь. Али но пель сьӧрам кылӥське удмурт гуртысь кенакъёслы укмыстонэтӥ псаломысь чирдэм чуръёсыз: "...Аслыд ватӥськон интылы Вылысь Инмарез тон бырйид. Тон борды урод уз йӧтӥськы, чер но юртэдлэн матаз уз лыкты. Котькыӵе сюресъёстӥ ветлон дыръяд, Аслаз кылчинъёсызлы Со тонэ утьыны косоз уго. Пыдыныд но из борды медад канжаськы шуыса, тонэ киязы ӝутыса нуозы. Шиетӥсь кый вылэ, лек кый вылэ лёгиськод, сьӧсь пӧйшурез, лобась кыез пыдыныд лёгалод. "Монэ яратэм понназ, сое мозмыто, утё сое, - со Мынэсьтым нимме тодэ уго. Мыным вазиськиз ке, сое кыло, куректон-кайгуэз дыръя Мон со дорын. Сое мозмыто, данэ потто. Кема улонэн тыр каро, Аслэсьтым утёнме солы возьмато". Котькинэн но вераськыны вуэ, ваньмызлы ӟечлык, дэлет сӥзе. Куд-ог индылонъёсыз кинлы но солы, уката ик доръёсызлы, сокем уг кельшо вал, дыр. Кытӥяз Олексан агай шуэ вал: "Ымылэн кортнэтэз ӧвӧл, ӧжытаклы ке но вуроно вал сое". Вӧсяськись эшъёсмы пӧлысь нырысь ик кулӥз удмурт эшмы - Стефан. Тямыстонлэсь ортчемын вал ини. Олексан агай шумпотыса кадь шуиз: "О-о, Стефан братмы дораз бертӥз!" Туж яратылӥз ваньмызлы тодаз вайытыны асьмелэн бырисьтэм-вужмисьтэм дормы Инмын, нош музъем вылын улонмы - сьӧлыкан но со понна вань шугадӟонъёсты, висёнъёсты, кӧтӝожъёсты, курадӟонъёсты чидан интымы. Кураськисьёс, пыдйылчиос, пе, асьмеос та дуннеын. Ялан мар ке но утчаськомы, возьмаськомы, но номырин кӧтмы уг тыры. Байлык-узырлык кулэ, нош лулмы потэ но мугормылы сажем сюй тырме. "Музъем вылын пыдйылчи мон, курон-косонъёстэ мынэсьтым эн ваты... Сюлэмме узырлык люкан пала ӧвӧл, курон-косонъёсыд пала берыкты. Синъёсме палэнты - алекъяськонэз медам адӟы, Тынад сюрес вылтӥд ветлыны улон сёт мыным... Ӟеч, ӟеч карись Тон, Кузё-Инмаре, Аслад законъёсыдлы монэ дышеты... Тынад ымысьтыд потэм закон Мон понна трос сюрс зарнилэсь но, азвесьлэсь но умойгес луэ". Псалтирь книгазэ усьтыса лыдӟылӥз, нодъялляз Олексан агай черке выль лыктэмъёсты, кулэм ӵыжы-выжыоссы понна чигиськыса, бӧрдыса улӥсьёсты. Диакон луэм берам черке ваньмызлэсь вазь вуылыны турши. Соку ик адӟисько вал: черке вань вӧсяськисьёслэсь азьло Олексан агай вуэ. Обросъёсты чупа, вӧсяське но служба кутскемлэсь азьло одно ик тырше ни кыӵе ке но юанэн мыным вазиськыны, - дыры ке но ӧвӧл, ог вить минутъёс вераськиськом ни. Самой бадӟым шумпотонэз луиз, куке мон асьме кылэ берыктыны кутски Библиез, вӧсяськон книгаосты. Маин дуно мыным, маин сюлмам, тодэ ваёнъёсам улэ Олексан агай? - Инмарез, Библиез яратэм сяна, со ас дыраз удмурт кылэ берыктэм вӧсь книгаосты калыкез гажаны дышетӥз, берыктон уж бордын тыршыны мылкыдме ӝутыса возиз. Тау карисьёс трос, но Олексан агай кадь мылкыдзэ вераны шер мурт быгатэ. "Вот, - шуэ, - ӟуч кылэз но ӟеч валасько, лыдӟисько вӧсяськон книгаосты, нош вордӥськем кылыным лыдӟисько ке, мукет дунне усьтӥське кадь. Одӥг кылыз но валатэк уг кыльы. Йыртӥм пырыса, тани татчы - сюлмам вуэ но отысь уг ни поты. Быдэссэ Библиез берыкты, берыкты, отец Михаил". Псалтирь книга потэм бере, Иерусалиме вуылэме бере "Ньыль зарезь пыр - Иерусалиме" векчи гинэ книгае потэм бере кӧня-кӧня шумпотӥз, тау кариз Олексан агай. Уйшор уин но, ӵукна черке мынон азям но, пе, Псалтирь книгаез лыдӟисько. Сыӵе со усто агитатор, вераськыны быгатӥсь адями вал. Сокем со мур яратӥз ас калыксэ. Али дыре сыӵе адямиосты, уката ик пиосмуртъёс пӧлысь, шуг ни шедьтыны. Курдаса, кепыраса уг улы, шумпотонзэ но, куректонзэ но калыклы усьтэ но тӥни. Епископен но верасьыны кепыраса уг улы. Укмыстонэтӥ аръёслэн пумазы Олексан агай, кызьы ачиз яратэ вал вераны, - "дораз бертӥз". Малпамтэ шорысь рак висён таӵе шаплылэсь но шаплы воргоронэз пыд йылысьтыз погыртӥз. * * * Эх, Олексан агай, тод вал, тон кулэм бере кызьы, кыӵе амалэн сьӧд тушмон урдӥськиз удмурт кылэ вӧсяськон книгаосты, Библиез берыктон уж вылэ! Ӟучомем удмурт пи, Антоний иеромонах, кинлэн косэмезъя, индылэмезъя меда кутскиз удмурт кылэ берыктонлы, удмурт кылын вӧсяськонлы пумит уж нуыны? Со али но туж бадӟымесь, лекесь гожтэтъёс гожъяса ыстылэ черкъёсы, монастырьёсы, Патриархие. Черкъёстӥ ветлыса, калыклэсь мылкыдзэ сӧре, мыдлань валан сётэ, калыкез булгандыре. Книгаосты но сутылыны вуиз ини. Куд-ог священникъёсты но ас палаз карыны быгатӥз. Гомаса ӝуась Евангелилэн тылсиосыз ӵушкало сюлмылэсь вӧсь луись интыоссэ. Солэн дышетэмезъя, вань адямиос лыдӟыны, вӧсяськыны кулэ черк-славян кылын, со гинэ, пе, адямиез Инме ӝутэ, нош пичи калыкъёслэн "варварской кылзы" адямиез адэ, пе, нуэ. Монэ куаретыса но, кышкатыса но берыктон ужлэсь куштӥськыны косыса выриз ини. Паймымон, худграфез йылпумъям, вылӥ образование басьтэм адямилэн, Инмарлэн престол азяз сылӥсьлэн, таӵе Инмарлэн курон- косонъёсызлы тупасьтэм дышетонэз. Кытысь потэмын та йыромон дышетон? Ачиз Кузё- Инмармы Иисус Христос инме ӝутскон азяз дышетскисьёссэ-апостолъёсты вань калыкъёс доры мыныны но Евангелиез тодытыны косӥз. Язычникъёслэн югдытӥсьсы быдӟым Павел апостол Коринф карын улӥсьёслы ыстэм гожтэтаз таӵе нодъян сётӥз: "Агай-вынъёсы, Инмарлэсь кылзэ ивортон сярысь сюлмаське; пӧртэм кылъёсын вераськыны но эн люкетэ" (1 Кор. 14:39). Библиын нокытын но верамын ӧвӧл ук, утиськон кыл пыр лыктэ шуыса. Гожтэмын, утиськонэз оскон пыр, ӟеч ужъёс лэсьтыса басьто. Сьӧраз потэм "дышетӥсез" визьманы нокин но уг басьтӥськы. Эй, Олексан агай, Библиез тон кадь тодӥсь, удмурт калыкез, кылэз гажась, азинтон понна сюлмаськись, кышкасьтэм дасо удмурт воргоронъёс луысалзы ке, йыромем дышетӥсьёслы инты ӟоскыт кыльысал. Но жаль, сыӵе адямиос асьме пӧлын ӧвӧл ни, лэся. Ваньмыз понна тау Тыныд, Инмаре. Оло та кӧтӝожъёс, синву пыр кӧня ке но сьӧлыкъёсы куштӥськозы... Сюлмез вырӟытӥсь псаломъёс гожъясь Давид эксэй шуэмзэ, "Кузё-Инмаре! Макем йылӥзы тушмонъёсы! Тросэз мыным пумит султо, тросэз лулылы шуо: "Инмар бордын солы утиськон ӧвӧл". Нош тон, Кузё-Инмаре, азьысьтым щитэ, мынам данэ, Тон мынэсьтым йырме ӝутӥськод. Куараме поттыса Кузё-Инмарлы вазиськисько но Аслаз святой гурезьысеныз Со монэ кылэ. Выдӥсько мон, изисько но султӥсько, Кузё-Инмаре монэ утьыса возе уго. Сюрс-сюрсэн котыр ласянь мыным пумит султэм калыклэсь мон уг кышка. Кузё-Инмаре, султы". Тани, кылем арын православной монахен огкылысь луыса, протестант группаысь сектантъёс удмурт калыкез, "Инмар" кылэз сантэмась рукописен книга нерге поттыса калык пӧлы вӧлмытӥзы. Кӧня отын ӧрекчаськонэз, кӧня дэри кисьтэмын курадӟон чиданы кылем мискинь калыкмы вылэ. Соосты-а Инмарлэн адямиосыз, христиан калык шуод? Удмурт кылэ Библиез берыктэм поннам языческой вӧсез удмурт калык пӧлын утён понна нюръяськисьёслэн сьӧд вирзы кисьтӥське. Шуо, удмурт Инмарлы, пе, вӧсяськыны кулэ, тон ке нош удмурт калыклы еврей Инмарез тодытӥськод. Укмыстонэтӥ аръёслэн кутсконазы, тон музъем вылын улон дыръя, улон мукетгес на вал. Али кызьы ке но тушмон кужмогес но кужмогес луэ, урод ужъёс туж ӝог аляло. Тон улэп дыръя асьме дорын наркомания но, СПИД но ӧй на вал. Удмурт калык понна кылылымтэ висёнъёс. Оскон син азьын сӥяны кутске. Вӧсяськон юртэ - черке мынэм интые, калык телевизор азе, видикъёс доры кыстӥське; табере интернет потӥз на. Калыклэсь визьзэ чылкак суразы ни ИНН сётъянэн. Иеромонах Антоний татын но азьпал радын мынэ: туэ тулыс пал калыкез Правительстволэн юртэз азе демонстрацие поттазы. Революция потон азьын поп Гапон но калыкез демонстрациосы, пуля улэ ӝутказ вал. Олексан агай, кытын тон али? Инмысь Атаймылэн Эксэйлыкезлэн капка дораз вуид ке, удмурт калыкед понна вӧсяськы. Монэ но эн вунэты вал. Ӟигары-кынары вань на дыръя, ӵукналы быдэ мон тонэ буре вайыны тыршисько: "Христос Инмармы, кулэм муртэдлэсь Александрлэсь лулзэ дун-сьӧлыктэмъёсын огазе интыя, кытын ӧвӧл висён но, куректон-кайгу но, лулӟылӥськон-викышъян но, нош вань пумтэм вапумъёс ӵоже каньыллыко улон". 1 2001 арын 27 декабре Михаил Павлович Вершинин � Инмарлэн зэмос ляльчиез - асьме дорысь кошкиз. Вячеслав Ар-Серги Бачи но кыктоос верос Нокин вераны уг быгаты, марлы та гурт али но вань на. Ма, йӧно гурт но шуыны шуггес. Бен, бен. Куке отын черкез но, пе, вылэм. Тӥни ук, вырйылын вашкала из ломдэтъёс но лошъясько на. Вӧзазы - нимтэм баӵколэн весяк шутэтскон интыез. Плитаез вылысь номырзэ лыдӟыны уг луы ни - "Раб божий..." гожтэмез гинэ мырдэмгес адӟиське на. Почта но лавка кадьёс татын мимала дыръёсы ик вунэмын. Нянь ке шуоно, гуртоос сое асьсэос пыжо. Кыӵе ке визьмо картаосын солэн нимыз пусъемын ке но, вылды, али татын ог дас корка гинэ кылемын на. Отысь улӥсьёс куашкам калэ вуэм колхозын но уг тыршо ни. Доразы пудо вордонэн но бакчаосын гинэ выро на. Гужем турнало, пу дасяло, губияло, узы-борыяло... Та гуртын табере самой бадӟым адями - почтальон Доми. Пенсия вуттылыкуз солы котьку нимын-тулын вазиськыны выро - я Домна Петровна, я Домна Фёдоровна, я огшоры гинэ Домна Марымовна. Ма, соослэн электрозы но ӵемысь кысылэ, соин ик тросэз карасин лампа возё. Кин кивалтэ странаен, Удмурт шаерен, асьсэ ёросэн - соослы оломар ик тунсыко ӧвӧл. Бен улонлэн сыӵе палъёсыз татын учкемын ик ӧвӧл кадь - кытын ке воксё мукет дуннеосын. Нош удалтэм-а туэ Мурнюк сьӧрын коньыгубиед, кытысь ке дунне пыдсысь предсельсоветсы пуэн юрттоз-а (миым "вунэтӥз", лешак!) - таиз но данак мукетыз гуртоосты юн сюлмаськытэ. Паймымон ке но, татысь мӧйы калык шер висьылӥз. Першалзы ӧй вал ке но. Кӧт чутыръя ке - кулэзэ турын-куарез парыса юоно, йыр ке висе - озьы ик. Нош пиньын курадӟон ке усе - меӵак Бачи доры вамыштоно. Соиз чаляк кискач борды кырмиське... Бачи куке-соку, ортчем даурын, фронтысь лазаретын ужам, сӧсырмем солдатъёсыз ӝуткаса-лэзьяса улэм. Эсьма, "За отвагу" но "За взятие Кенигсберга" медальёсыз но вань - вожектэм тусоесь. Укмысэтӥ мае со гужам пенжаказ бырттылэм медальёссэ одно ыштылэ. Собере кызьы ке одно шедьтэ. Вань гуртэз сӥсъяса ортчоз, но медальёссэ шедьтоз. Нялтас мукетсэ но - жалясь сюлэмо салдаткаослэсь тыро чаркаоссэс. Бачилэн агаез флотын быриз, японецъёсын ожмаськонын. Быдэс корабльзы, ява, ву пыдсы тюам. Ӵапак со агаез пичи дыръяз Васиез Бачи шуылоз вылэм. Собере та ним бордаз лякиськем но лякиськем - Бачи бускель, Бачи кум, Бачи кудо. Кышноез Бачи кышно луэм. Туннэ гурт пумысь Певриннялэн юондыр нергеез. Созэ, тазэ бускельёссэ куное ӧтиз. Ма, тазьы учкыса, оло ке быдэс гуртэз. Зэм, Опоч ӧй вал - кык нунал ини гулбечысьтыз мусурзэ куалькке. Особь Леви но ӧз ву - кускыныз ёрмем. Бакель выжыос но малы ке ӧвӧл - олошай каро. Сыл ай, соос, пе, казна нюлэскысь лушкемен сик дасяло. Ойдо кужмо мед кариськозы. Иж котыре коттедж шуонзэ лэсьтӥсь пизылы, пе, берпалаз так но пӧськы потэм ни. Кылемез мӧйыос ваньмыз вуизы. Валамон, егитъёс ӧвӧл. Соос уго гуртэ кемалась уг кылё ни. Ма, таосызлэн юонзы ик ас виятэм ӧвӧл ни, дыр, - коньяк я мар. - Ай, со коньяксэс адӟем уг пот!- сялӟиське Бачи.- Кобла кизь но тӥни. Польшаын юылӥськиз. - Хм!.. Оло нош, тон воксё коньяк но ӧд ю?- вазиз гуртысь тужгес грамотноез мӧйы воргорон - колхозысь азьвыл "чотовод". - А мае? - Ма, самой со кобла кизез, оло. - Ах, тон, клей конторской, казяин!- Бачи солэн кӧтурдэсаз мырӟиз. Лёгор усиз. Но со куспын Бачилэн кулэ интыяз ӵыжалтыса вуттӥз. - Ах, тон, антифашист!- черетскиз Бачи. Жугиськон ӝук бульы-ыр! пӧзьыны кутскысал, дыр, но со вие доразы бызьыса Певриння вуиз но шоразы ведраысь вуэз пальккиз. - Мунчокузёлэн пал кукыз тон,- мылпотытэк кадь сялскыса, Лёгор саесэныз ӵушалскиз. Собере кыкназы капка доры дӥри-дари ӟус вылэ пуксизы. Калык азьын соослы мар ке возьыт луиз. - А малы тон монэ антифашист шуид?- Бачи шоры Лёгор пыр-пыр учкиз. - А озьы кужмогес кылӥське. Ватсэт. Контрагайка но шуыны быгатысал. Яке кронштейн, штангерциркуль, вейсшина. Таосыз но йӧн кылӥсько. - Тьфу! Грамотей! Пятый коридор. - Тон опеть-а? - Да пук ни тон, луткам курег. - Кылзы ай, тарезэ почта Доми кематэк асьме пала уз вуылы ни, дыр. Сюресъёс быризы. - М-да... Мар карод - тулыс... - Какой хрен тулыс? Оштолэзь гинэ кутскиз ай. Тулыс - со кизён! Нош али вуос гинэ жальыр бызё. Лымы шуна. Шур вылысь выжез - озьы бере, шонер сюресэз но - дас ар талэсь азьло тудву нуиз, нош тупатъясь ӧвӧл. - Бен угось. Нош котыр сюрес кыдёкын. Юромо Доми понна гинэ машинаез куамын иськем уз бызьылытэ. - Валамон, бензинэд али - тово! Мар карод, картошмес тыкыса пуком ни... Ӧтчам ӝӧк сьӧры нырысь кышноос пуксизы. Воргоронъёс урамын ас ужъёссы сярысь кенешизы но собере тӥни тамак нонон куспетӥзы олома пумысь но кылъёссэс шеризы. Нош юондырлэн мугез таӵе вал. Певриння кенаклэн ышем-бырем пиез гожтэт лэзем. Вакчи гинэ. Эн, пе, сюлмаське, ваньмыз огсен. Ӝоген, оло, гурт палъёсы но сюрес усёз. Кык арзэ, пе, тюрьмаын пуконолась. Валамон, юнме шорысь... Шӧмо йырын грузовоезлэн руль сьӧраз пуксем но юбо борды дыгиськем. Оло нош, Владивостокысьтыз кыӵе ке ларёк шоры? Ӧйтӧд, Бачи отӥзэ ӧз ни выжыяты. Мар шуод, Певриннялэн пиез - шӧртчи пияш. Татчыозь сое кулэмен лыдъяло ни вал. Черкын сюсьтылъёс но пуктылӥзы. Ма, арзэ но пусйизы. Нош утёд ке, тӥни... Татчыозь анаезлы гожтэт гожтыны дырыз, пе, вылымтэ. Хе!.. Воргоронъёс пуксизы-а, ӧз-а - кышноос ӝӧк сьӧрысь потыны шӧтазы ини. Олён, Бачилэн пукыль-пукыль мугоро кышноез, картэз доры ыбыштӥськиз: - Мон, марым... кошко ни. Парсьмы пияно. Учконо, чаклано. - Мын,- вакчияк вазиз Бачи. Олён кошкиз. Буй-буй меӵ макесъёсыз пыжлэн урдэсъёсыз кадь лэйкало. Бачилэн сое кытӥяз чабкыштэм-чепыльтэмез но потылэ на... Юом-юом та винаез, Марлы уд ю винаез? Эмезь кадь ик туж ческыт но Кирень кадь ик туж курыт... Пал кияз графинэн, мукетаз куско румкаен Певриння беромем кунооссэ кырӟаса- кырӟаса утялтэ. Бачи доры мыныса, чибирикъёсыныз шатыр-шатыр эктыны ӧдъяз. - Берекет! Берекет кар, Бачи кудо! - Тырмоз, тырмоз ни мыным,- пумит луиз соиз. Соку Певриння (восьтэт гинэ ке но, со кужмо кышномурт) тач гинэ лёгиськиз Бачилэн сурон сапег ныраз, киыныз нош пеляз кырмалскиз, собере Бачилэсь йырзэ сьӧрланьтӥз но аракызэ воргоронлэн усьтӥськем ымаз гулькак! лэзиз. Бачи нырысь шокчыны ик ӧз быгаты. Собере, лулзэ шедьтыса, Певриннялэсь таӵе нодтэм сямзэ тодӥсь мурт, со кышномуртлэн кӧс но чурыт гадяз донгем кариз: - Тыныд, йырсиостэ лэзьяса, уин инметӥ лобано вылэм. - Ӵошен ке - ойдо! Потты ӵужон ныддэ! - Ха-ха-ха!- гудыртӥзы гуртоос. Дырыз вуыса, Бачи ураме потӥз. Педлон - тулыс уй. Та сьӧд чернилаын коть маин ке синмад донгы. Нокытын одӥг югыт сӥ но уг адскы. Юбоос вылысь электроез кемалась октӥзы ни уго. Лампочкаосты ӧвӧл - езъёссэ. Пыд улын саплес-волег. Кезьыт кариськем. Юн-юн кынтоно, шӧдске. Ма, куазь но бер ни кадь. Уйшор ке ӧвӧл. Кин ке доры люкаськыса сиён-юон табере татын клубе ветлэм чотэ пыре. Олома сярысь но вераськонъёс-кенешонъёс, керттӥськонъёс куддыр ӵукна палозь кыстӥсько. Пудоез сюдон гинэ дыртытъялля ке шат. Уть ай, инбам кытӥ-мартӥ сайкытам, отчы лыдтэм кизилиос пазьгиськиллям. Куазь уката юзмыт кариське. Пыд улын кынмем йӧ но чурыт лымы куажыр-куажыр каро. Бачилы быдэс гуртэз пумысеныз пумозяз выжоно. Ог кык иськем луоз. Отын но татын, паллян но бур палъёсын шимес вужеро куштэм я воксё куашканы ӧдъям юртъёс адӟисько - олома быдӟаесь гырко сисьмем пиньёс кадесь. Сюрес шорын ик маке пасьта вукырем. Бачи отчы туж чакласькыса васькиз - вамышъёссэ вись кузьдаесь гинэ карылыса. Озьы ке но, солы ӧз удалты - шӧдтэк кыльыса, пырак вукырем пыдсы гылӟиз. Та вукырем ӝужыт адямилэсь но мур. Тӥни отчы шуак тюаса, Бачи туж вӧсь луиз. Вылаз ик, бур пыдаз лек пежъян мертчиз кадь. Ма, оло, воксё саник вень. - Э-э, калтак, нёшто пыдме чигтӥ? Ай вольтчытӥ-а?- пиньёсыныз гизьыртӥз со. Султыны но, вырӟыны но уг дӥсьты - зонь кылле. Куштэм культо кадь. Кӧня ке улыса, солэн бур пыдыз зубектыны, кынмыны кутскиз. Бачи вырӟытскыны шӧтам вал, но пыдыз сыӵе вӧсь луиз - синмысьтыз тылкизилиос пальккиськизы. "Эшшо ке татчы ӟонгыралод но чатралод ай,- шымырес луиз солы.- Мар-о, кесяськоно ке шат? Оло, кин ке кылоз но юрттозы..." - Гуртоос!..- жумгес кеськиз со.- Юрттэ вал... А?..- Собере ини юнгес черекъяны ӧдъяз: - Певриння туклячи!.. Лёгор уром!.. Ах, антифашист, пельтэм куды!.. Опоч кудо!.. Э-эй, бускельёс-чёртъёс! Ау-у!.. Караул, юрттэ!.. Ма, кесяськыса-кесяськыса куараез но пуксе ни, нош кылӥсь ӧвӧл, лэся. - Юрттэ, пӧй!.. Кулӥсько ни.. Мон та - Бачи!.. Ох, бохаматъёс! Ваньды гуньдӥды- а, мар-а?! Нош гуртын шал-шал буш но чус. Бен, оло, кылӥсез но дэйме. Уть, тӥни, Пеклалэсь миым кык ыжзэ шупчытӥзы. Нокин ӧз кыл? Яке кылыса но куаразэс сётыны ӧз дӥсьтэ- а?.. Матысь улоно корка дорозь эшшо ог ӝыны иськем на... "Ӧвӧл, татын тазьы кылльыса копак кынтэм минтай кадь луод.- Бачи султыны выре.- Боды коть шедь вал. Кытын, пе!.. Озьыен, нюжтӥськоно луоз.- Бачи вукыремысь мырдэм но кызьы потыса (ог час пала курадӟиз, дыр), тан-тан кынмем музъем вылэ зоньтӥськиз.- Ай сюен суро йӧ-а та?.. Я, со шимес адысь потӥ бере, нумыр сямен нюжтӥсько ни". Эшшо огшап кылльыса, со вырӟыны ылам ни вал, но пыдыз выльысь пӧсь тылын сутӥськиз, оло, кортӵогаськиз кадь. Ма, кынарыз но ӧвӧл ни - ваньмыз вукырем баме кылем, лэся. Выльысь кынмыны, куалекъяны ӧдъяз. Шӧмыз тӧлӟемын ни. Ай макмырез-а озьы дырекъятыса потэ? Эх, шу-у... Нош куазь уката кезьытгес луэ кадь. Киосыз но, пыдъёсыз но ӟонгыразы ини. "Эх, тылскыса ӧжыт шунскы вылэм! Но маин тылскод?.. Э, сыл ай, мар будосъёс та? Кӧс полынь кадь ук. Бен, бен!- котырысьтыз полынез Бачи вожомыса порылыны ӧдъяз. Пичияк люк кылдэм бере шырпузэ поттӥз. Но... мар та? Нокызьы уг ӝуатскы.- Тьфу, едриттвой! Вукыремын кылльыкум котмем ук. Штан но тани. Воксё йӧкурам ини... Сеньки коть луысал ке, куфайка мамыкез аратысал. Но кытысь-марысь татчы сеньки кылдоз? Эх!.." Йӧнтэм кынмемзэ шӧдыса, со копак дэймиз ини. Шара вераськыны кутскемзэ ик ӧз шӧд. - Остэ, Быдӟым Инмаре, утисе-вордӥсе! Эн кушты вал сьӧлыко пидэ. Юрттӥд ке, черке но пырало, самой дунозэ сюсьтыл но басьто... Кынмеменыз, вӧсь луэменыз, кынартэм кылеменыз, зэмзэ пумыз вуэ ни шуыса, куаратэк бӧрдыны ӧдъяз. Оло ке вань улэм-вылэмез син азяз пуксьыны ӧдъяз. Кӧня янгышъёс лэсьтӥз со!.. Олёнзэ но огпол погыртымон мыжгиз... "Простить кар, Олён... Ма, таре номыре уд тупаты ни. Уд ни..." Бачи нош ик нюжтӥськыны ылаз. Уть ай, ӧжыт пӧрмиз ук! Эшшо ӝыны вамыш пала, эшшо... "Чидантэм вӧсь ке но, азьлань, азьлань, татчы аналскыны уг яра - иське, зэмзэ бырод, йӧӟектод... Тау, мусо Инмаре, пумтэм тау, тон, дыр, чидан но, кужым но сётӥськод! Азьлань, азьлань!.." Озьы нюжтӥськонъяз со сюрес вамен кыллись зӧк кор борды йырыныз мырӟиськиз. Бачилэн сюрес вылаз со домблё сьӧд кый кадь кылле. "Кызьы тае выжоно? Таӵе-таӵе Байгурезез... Та корез кин ке миым ай киргатыса кельтэм вал. Геолог шуонъёс, дыр... Та дырозь ведь сое палэнтыны нокин ӧз вырӟы. Да-а..." Кор вылэ векчи йӧ кынмем. Гылыт но кезьыт. "Ма, уть ай, талэн улваез вань кадь ук... Кузёс гинэ... Лысо палыз чигем-а, коралтӥллям-а, нош татӥзэ ӵогиллямтэ..." Бачи сое вань мугорыныз зӥбиськыса чигытӥз но, со вылэ пыкъяськыса, пыд йылаз султыны оскалтоно кариськиз. Нырысь пыдес вылаз ӝутскиз, собере мырдэм но кызьы... воксё пыдъяськиз. Паймымон! Бур пыдыз олома ик вӧсь уг лу ни кадь. Ма, пыд улысьтыз музъемез но йӧнала уг шӧдылы. Кыӵе ке лултэм пис кадь. Ма, тӧрнам ни, шӧдске. Ай тан-тан кынмем-а?.. Я, котьма ке но, та пыдзэ пуклёез музэн кутыса, Бачи сое кор сьӧры выжытӥз но, со вылэ лёгиськыкуз, мешок сямен лач пограз. Вылаз ик, паллян пельпумзэ шуккиз на. Мырдэмгес гаӵолскыса адӟиз: вань инбам кизилиосын тэчиськемын. Кыӵе чебер адске! Куке-соку Олёнэзлэн таӵе кизилиё сьӧд кышетэз вал... Со кизилиос пӧлысь кудӥз-огез аляк нылпиос музэн ог-огзы сьӧры уисько, кескич кырмекъяло... Мар-о, табере со, Бачи, сыӵе чебер дунне азьын шакшы кучапи сямен чоньдоз ни-а? Жаль, туж жаль... Шедьылӥз ни-а со куке таӵе шимес югдуръёсы? Пожалуй, война бере ӧз на. Ма, зэмзэ вераса, отын но сое Инмар та выллем адӟонъёслэсь утиз. Нош табере... "Марысь-мар ке, кытчы меда ватозы? Бен кытчы луоз - Дэри гурезь йылысь шайвылэ... Укмыс уй карозы... Сыл ай, мар уйбыртӥськод?- Бачилэн аслыз вожез потӥз.- Эркиям ненег сяська шат мон? Куке-соку пырак Кенигсберге вуылӥ ук! Озьыен... султоно! Одно султоно! Раз, два - взяли! Вот озьы... Давай, давай, эн тяпайты! А то..." Султӥз ведь, быгатӥз! "Табере каллен - азьлань!.." Пыдъёссэ шӧдылыса но шӧдылытэк, Бачи тэтэ карем кадь азьлань, дор палаз конгыляз. Тани азяз Ориналэн вуж коркаез кылдӥз. Солы, Ориналы, ог куамын арес, дыр, ини. Учкымон, вольыт кышномурт. Кытын ке Казахстанын-а, мар-а картэн улӥз. Кусыпсы пӧрмымтэен, ог куинь ар талэсь азьло вордскем гуртаз бертӥз. Табере весяклы, дыр. Огназ улэ. Ӝикыт. Куд-ог дыръя, пе, дораз артэ гуртысь кышноё-нылпиё Васьлей вуылэ. Кышноос - кыллы быремъёс - оломар но тодо уго. Кызьы но озьы солэн корка дораз вуыса, Бачи укыр улӥе ӵогем укнояз йыгаськыны медэ ни вал. Но кышно палась шыртылэз синйылтыса, бодызэ ӝутӥсь киыз берен уллань лэзькиз. "Карасин лампа, лэся,- малпаз со.- Мар-о, кӧшкемаменыз тылын кӧла-а, мар-а?.. Дак эн ай..." Паймымон суред укно пыр возьматскыса, корка кор борды пыкъяськем Бачи отчыяз ик пуксиз, синъёсыз ӵем-ӵем кыньыръяськыны ӧдъязы. Валес. Со сьӧрын тӥни, пыдлонгес, шыртыл ӝуа. Шобрет музэ усемын кадь. Нош валес вылын... Кышномуртэн пиосмурт вожомыса ог-огзэсты ярато. Кыкназы шыр гольыкесь. Ориналэн йырсиосыз котырак вӧлмыт пазьгиськемын. Солэн тӧдьы чилясь кый кадь мугорыз Васьлей улын позыр берга, воргоронлэсь кужмо, гоно гадё мугорзэ лӧбышак-лӧбышак ӝутка. Нош соиз Ориналэн пеляз маке весь сипыртэ кадь, ненег куртчылэ-чупалля. Бачи чигыса, оло, вольтчыса кынмем пыдзэ но, шуккиськем пельпумзэ но, аслэсьтыз кытынзэ но вунэтӥз ни - мылкыдыз, лулыз сяськаясь возьёс вадьсы вуиз кадь, нош ачиз оло бубылилы, оло тылобурдолы пӧрмиз. "Инмаре! Кыӵе чебер адске та Орина! Кыӵе чебер! Ноку гужам халат но ӧз дӥсялля, ныгӟем бигер колошаос но ӧз бырттылы кадь. Нош тыр гадьёсыз! Кыӵе экто соос, кыӵе экто! Ма, яратон эктон ук та!.." Чылкак палёмиз Бачи. Угось Орина али - Инмарлэн-эксэйлэн яратоно нылыз, солэн вылӥ кылдытэмез! Тём пеймытэ ӝокам ёросын, сьӧд гуэ усем гуртын солэн ымныраз быльырам пӧсям вуэз азвесь-марӟан кадь пиштылэ. Нош пиньёсыз шунды сиос шорын выжыкыл лысвуос выллем югектыло. Кытын ке дунне вылын туж тузӥ нылкышноослэн суредам портретъёссы вань, пе. Соосты музейёсын гинэ возё-утё, пе. Бачи табере соослы уг оскы ни. Озьы сылонъяз Бачи ассэ витёнтэм шорысь Васьлей интыын адӟиз. Нош Орина интыын - Олён кышнозэ. "Эх, та дуннеын, оло, самой дунозэ, чеберзэ, шунытсэ дунъяны ӧйлась. Ялан кытчы ке дыртӥм, муген но, мугтэк но усыкмыса кадь бызьылӥм..." Ог ньыльдон ар талэсь азьло Бачи та Васьлейлэсь ныр улзэ ӵушалтысал. "Ма, так-то со но - ӟечок!.. Олён но бере ӧй кыльысал... Но отӥяз соосты секыт уж пачкатӥз. Нуналмысь весь юнгес но юнгес... Нодтэм шаер, нодтэм вакыт... Сыл ай, та суред - оло, бадӟым шудбурлэн тусбуез? Озьы ке, мон но куке шудо вал",- шунытак шокыштӥз Бачи. Тани Орина эзэр-безэр вырыны ӧдъяз но, Бачилэн пель сьӧраз кылӥськиз: - Ах-хы!.. Ах-хы!.. Ах-хы!.. Ма, Бачи ӟеч тодэ сыӵе вакытъёсты - озьыен, кышномурт пушкы йӧно тысь пыриз. Бен, тодэ. Солэн уго аслаз но куинь нылпиез. Зэм, соос кин кытчы пазьгиськизы. Но анай-атайзылы весь юртто, уг вунэто, ас нылпиоссэс ни вайыло, соосын ушъясько. Азьланяз но озьы медло. Но тани Бачи шарак луиз. Умойтэм йыртэмамзэ али гинэ валаса кадь, лул но карытэк, кыштырак вырӟиз. "Возьыттэм гоно бам ук мон,- бамъёсыз посӥнак луизы.- Но, мукет ласянь, юри учкыны ӧй лыкты ук - ӝими гинэ. Озьы ке но..." Кенер пуӵъёс борды кутскылыса, боды нергеез вылэ пыкъяськыса, со быгатэмезъя сэрытгес ини азьланьтыны тыршиз та секыт сюрессэ. Озьы ке но, гуртаз конгылляны кема курадӟиз на. Ярам ай, йырсазьыз ӧз ыш. Дораз со ини нюжтӥськыса пыриз но соку ик ӧс дорысь выж вылэ гаӵолскиз. Кышноез усьтыр-табыр султӥз но карасин лампазэс ӝуатӥз. Кыӵе со мусо, небыт, шуныт адӟиське! - Мар ни таӵе-таӵе тордоно вал?- чабкиськиз Олён. Собере витёнтэм шорысь: - Парсьмы но пияз... - Пыдме... Пельпумме... Уси... - Ма, та воксё сазь ук,- эли-кеби берганы кутскиз Олён. Бачи со шоры учкиз но вирӟектэм ымдурыныз пальпотэм кариз: "Эх, кыӵе йӧтскем потэ та кышнолэн буйгыт макесаз!.. Яке эркияса чепыльтэм..." * * * Вазь ӵукна ик Бачиез валэн ёрос больницае нуизы. Отын со кема гинэ кыллиз. Кӧня ке пыдчиньыосыныз люкиськоно луиз. Пыдзэ утьыны быгатӥзы ик. Нош со уе адӟемез сярысь со нокинлы номыр ӧз поттылы, ваньзэ-ваньзэ сюлэм пыдсаз вань даурезлы ватыса ӵогаз, нош усьтонзэ... весяклы ыштӥз. Васьлей нош отӥяз гуртэ ноку ӧз вуылы ни. Ойдо ӵок. Ориналы табере соин йырин ӧвӧл ни. Кышномуртлэн сюлмаськонэз табере вормонтэм бадӟым но туж шуныт. Ма, гуртсылы но со - шумпотон. Огӵош кык муртлы будӥз уго. Кыкназы таза вордскизы - нылыз но, пиез но. Гуртоос со муспотонъёсты туж ярато, ӵемысь доразы вешаны- эркеяны пырало. Ма, Бачи но пенсиезлы быдэ отчы кожаса, кыктоослы пичияк кампет- преник пыртылэ. Табере со ӟеч тодэ: вордскем гуртэз уз быр ай, эшшо улоз на! 1 Гавриил иеромонах Коммунистъёс кивалтыса улон аръёсы ворсам черкъёсты усьтылыны кутскем бере, нимысьтыз дышетскем священникъёс тырмымтэен, черкъёсын кивалтыны кутскизы кыдёкысь шаеръёсысь вуэм яке асьме дорын ик будэм, но удмурт калыклэсь ортчем сюрессэ тодӥсьтэм адямиос. Кытысь ке, кинлэсь ке кылэм иворъёсъя куд-огез вераськыны кутскиз, удмуртъёс, пе, язычникъёс, шаманистъёс, Зэм Инмарез уг тодо, соос пӧлын, пе, ведӥнъёс трос. Куд-ог удмурт кышноослэсь но таӵе "тодытӥсьёс" визьзэс тугазы, соос ог-огзэс ведӥн шуыса ченгешыса улыны кутскизы. Сыӵе вераськонъёсты кылыса, сюлмы ныж пуртэн зырӟем кадь вӧсь луэ. Протестант сектаослы пасторъёсты дасясь курсъёсын (сыӵеез но вань асьме Ижын) кивалтӥсьсы, Басалыко фамилиен Украинаысь вуэм адями, 2000 арын вань сюлэмзэ поныса монэ оскытыны выриз: "Удмуртъёс - язычникъёс, шаманистъёс, соослэн лулсэрзы сӧриськемын, соин ик соос Христос Инмарлэсь дышетонзэ - Евангелиез кабыл басьтыны уг быгато". Талы пумит мынэсьтым верамме кылэм-адӟем но ӧз кары. Укмыстонэтӥ аръёслэн кутсконазы Люкысь (Иж вӧзысь) черке Воткинскысь батюшкалэсь нимысьтыз дышетскымтэ, сантехникын ужам пизэ священнике пуктӥзы. Одӥгаз проповедяз со удмуртъёсты озьы ик куаретыны кутскем, тӥ, пе, язычникъёс, Вуж Мултанын адямиез вӧсяды. Пӧлазы учырам удмурт дышетӥсь, со кӧтӝожзэ вераса, "Удмурт дунне" газетэ гожтэт лэзем. Ӟуч кылэ берыктыса, со статьяез Владыкомылы сётытэк ӧйлась. Палладий епископмы йыромем тодытӥсез удмурт приходысь палэнэгес келяз. Укмыстонэтӥ аръёсы ик кӧня ке ӟуч газетъёс удмуртъёсты язычникъёс, ведӥнъёс, шаманъёс шуыса янгыше уськытӥсь кырсь статьяос печатлазы. Ӵектонъёс но вал: удмуртъёслэсь генъёссылэсь кодзэс воштоно, выльдоно. Со аръёсы ик печатласькиз шимес "Мурлот" роман. Тодазы но ӧз вае оскон понна улонзэс сётэм удмурт христианъёс сярысь гожъяны. Эх, бытмем язычество! Тонэн сэрен кӧня пол удмурт калыкез вӧсь каризы ни! Удмурт язычникъёс Кам сьӧрын уло, нош тышез, вӧсь каронэз Кам тапалась удмуртъёслы усе. Ку тон милям калыкмылэсь улон радзэ саптамысь дугдод? Котькуд газетлы, котькудӥзлы удмурт луисьтэм адямилы уд вера ук: ми кык сю витьтон ар ини Христос Инмарлэн нылпиосыз луиськомы, янгышаса сьӧлыкъёс лэсьтӥськомы ке, со понна ми ӧпкелиськомы. Мукет ласянь, та понна ми гинэ янгыш ӧвӧл - ӧвӧл ке вӧзамы зэмос дышетӥсьёсмы, кинъёслэн сюлмазы Инмарлэн сётэм яратонэз мед луысал. Одӥг тодмо батюшкае, солэн атаез но, вить братъёсыз но священникъёс, песятаез но священник вылэм, оскон понна коммунистъёс сое ыбиллям, ӟуч адями, удмуртъёс пӧлын далай гинэ улэм мурт, кӧтӝожен улон вакытам таӵе гожтэт ыстӥз: "Вань калыкъёслэн удмуртъёслэн кадь кужмо осконзы мед луоз вал; удмуртъёс исповеде лыкто ке, синвуэн бӧрдыса сьӧлыкъёссылэсь куштӥсько..." Та выллем веранъёсты мукет ӟуч батюшкаослэсь но кылэме вань. Вань пумит ужасьёсын, урод малпасьёсын ожмаськыса, кыӵе пайда басьтод? Керетон, ожмаськон - Инмарлы ярантэм ужъёс. Инмар Пиез, Утисьмес Иисус Христосэз, музъем выл адямиос кыӵе но урод кылъёсын ӧз сантэмалэ - Со чидаз, жугизы, кортӵогазы, но Со вожпотонзэ, йыркурзэ нокин вылэ но ӧз кельты. Инмар Пилэсь чидамзэ асьмеос но адӟем карыны кулэ. Со котькинэ яратэ, нокинэ но улӥ-вылӥ уг кары, куриськемез-вӧсяськемез санэ понэ. Удмурт калыкез ултӥясьёсты, соослэн ваче пумитазы сылӥсь язычникъёслэсь кивалтӥсьёссэс, коммунистъёсты-атеистъёсты югдытон понна гожтэмын мынам та веросъёсы. Учке, лыдӟе, тодэ удмурт калык пӧлысь потэм, мур осконэн улӥсь, Христос Инмарлэсь дышетонзэ чылкытэн утён понна асьсэлэсь улонзэс сётэм удмурт христианъёс сярысь. Сюосыз удмурт пиос, нылъёс, священникъёс, монахъёс оскон понна тюрьмаосын пукизы, соосты курадӟытыса виылӥзы, жугизы, сантэмазы, но соос, Христос Инмарлэсь адӟем карыса, осконлэсь ӧз куштӥське. Жаль, йырсазьмы вакчиен, осконмы пичиен, азьтэммы бадӟымен, историмес, калыкмес гажамтэенымы, соослэсь нимъёссэс вунэтӥськомы ни. Но Вылысь Инмармы соосты тодэ, уго оскон понна курадӟон чидамъёс Солэн Инмысь пиштӥсь данлыказ уло, соослэн нимъёссы Инмарлэн Улон Книгаяз гожтэмын. ...Эшкей Микайло, со ик Ешкеев Михаил Васильевич, со ик Гавриил иеромонах, дас укмысэтӥ даурлэн пумаз Сарапул уездысь Нылга-Жикья волосте пырись Бадӟым Ӝужгес гуртын, крестьян семьяын вордскемын. Та гуртын Микайлоез тодӥсьёс ӧвӧл ни, шуыны луоз, уката ик солэсь пичи дырзэ. Та веросме но гожтӥсько Анна Павловна Тимофеевалэн (учкы со сярысь очеркмес) тодэ ваемъяз, Элькун архивысь кӧня ке документъёсъя но УдНИИ-ын ӵош ужам, та гуртын вордскем егит эшелэн Людмила Леонидовна Карповалэн гурт калыксы пӧлысь люкам тодэ ваёнъёсъя. Микайло пичи дырысеныз черк службаез яратӥз, молитваосты дышетӥз. Визь дыръя анай-атаеныз ӵош кӧс утиз. Бусы ужъёсты, юрт котырысь ужъёсты Микайло пичиысен ик тыршыса быдэсъяз. Анай-атайлы пумит вазьылэмзэ нокинлэн но кылэмез ӧй вал. Арнянуналъёсы, праздникъёсы со ялан черкын вал, пономарьлы кадило ӝуатыны, вӧсяськон интыез чылкыт возьыны юрттӥз. Черк службаез быдэссэ тодаз возиз. Бӧрысь клиросэ но кырӟасьёс-чирдӥсьёс пӧлы султылӥз. Нылга-Ӝикья черклэн но, Булай-Ӟумъя черклэн но батюшкаосыз вордэм пизэс кадь яратӥзы пичи гинэ мугоро но вань верамез кылзӥськись, зӥбыт удмурт пиез. Ёросысь калык сое "Вӧсяськись Микайло" гинэ шуыны кутскиз. Озьы ортчиз пинал дырыз. Быдэ вуиз но, анай-атаез солы кышно вайыны малпазы - музъем ужась, юрт котырын юрттӥсь кулэ - асьсэос секыт ужаса, висьыса кынартэм луэмын ини. Микайлолэн мылкыдыз Инмар дорын улӥз, кышнояськон сярысь со уг но малпа вал. Дэмлазы бускель Косой гуртысь Инмарлы оскись Наталля нимо нылмуртэз. "Шудо луомы меда?" - юаз Наталля карт луонэзлэсь. - "Асьмелэн шудмы Инмын луоз", - шуиз Микайло кышно луонэзлэн пумитаз. Инмарлы оскись егит пиен ныл - кузпалъёс - кыл сётӥзы братэн сузэр кадь улыны. Ӵош ужазы, ӵош ик черке ветлӥзы. Кышкытэсь аръёсы улыны кылдӥз Микайлоен Наталля кузпалъёслы: граждан ож, сютэм аръёс. Улон огпала берытскиз кадь. Коммунистъёсын, комсомолецъёсын ӵош гуртэ выль улон вуиз. Осконлы пумит ожмаськыны кутскизы. Огез бере мукетыз урод ивор вуэ: я сояз городын, я таяз гуртын черкез пытсаллям, сутӥллям, клуб кариллям; соизэ я таизэ священникез вииллям, пытсэт сьӧры келяллям. Олокыӵе но шимес вераськонъёс вӧлмизы: антихрист, пе, эксэй пуконэ пуксем, ӝоген номер пуктылыны кутскозы ни, собере - дунне бырон... Осконлы пумит кужмо ож кутскон вакытэ Микайло, кузпалыныз вераськыса, духовной атаезлэсь бакель каронзэ басьтыса мынӥз Сарапулэ епископ доры, солэсь ас гуртаз часовня пуктыны лэзён курыны. Выль корка пуктыны дасям бугрозэ со бакча пумаз, гопъёс дурысь возь вылэ нуллӥз часовня ӝутыны. Часовнязы вуэм бере, татчы трос калык ветлыны кутскиз. Соку Микайло малпаз часовня вӧзаз алтарь ӝутыны. Озьы часовня интые черк пӧрмиз. Сарапулысь, оло, Ижысь епископ, табере тодӥсь ӧвӧл ни, Микайлоез священнике пуктӥз; куриськон гожтэмезъя, епископ сое монахе ӵышкиз но Гавриил ним сётӥз. Озьы Ӝужгес пи Микайло, Гавриил ним басьтыса, иеромонах луиз. Ас киыныз пуктэм черказ ачиз ик служить карыны кутскиз. Анна Павловналэн верамезъя, Микайлоен ӵош ик солэн кузпалыз Наталля но монашкае ӵышкиськиз, но та сярысь шарае ӧз поттэ. Уй-нунал усьтэм черке, котыр ёросысь гинэ ӧвӧл, Шарканысь удмурт монастырьысь но миссионеркаос ветлыны, пе, кутскизы, Кам сьӧрысь Николо-Березовкаысь, Казань сьӧрысь нимо-дано Семиозерной пустыньысь но монахъёс вуылӥллям. Нош со виын кӧня вал пыдйылчи калык! Одӥг улосвылысь мукетаз вӧсяськыса, кӧттыр утчаса ветлӥсь калык ӵоттэм трос вал. Гавриил иеромонах ваньзэс яратоно агай-вынъёссэ, сузэр- апайёссэ кадь пумиталляз, нош Наталля ческыт сюкасен, шыдэн, нянен утялтылӥз. Кӧлыны но ваньмызлы шуныт сэрег шедьылӥз. НКВД кемалась дырысен ини Ӝужгес черклы, уката ик отысь Гавриил иеромонахл,ы пиньзэ гизьыр йырйыса улӥз но муг утчаз, кызьы та Инмар кылэз жадьытэк тодытӥсьлэсь бурдзэ ӵогоно - гуртысь гуртэ тодытыса медаз ни ветлы, выль пуктэм черказ но калык медаз ни пыра. Кызетӥ аръёслэн пумазы Ӝужгес-Пельгала, быдэс Россей кунысь гуртъёсы сямен ик, туж ӝож, кышкыт, бугрес аръёс вуизы. Коммунаос, артельёс, колхозъёс кылдытъяны кутскизы. Удмурт крестьян калыклэсь дауръёсын ӝик-ӝик утялтыса возем бусыоссэ, кенеръёссэ тӥяса, йыранъёссэ (межаоссэ) гырыса, син сузёнтэм колхоз лудъёс кылдытъяны кутскизы. Пудо-животэз, ужан тӥрлыкез таласа сямен огазе люказы - колхоз фермаос кылдытӥзы, асьсэзыз ик скал кыскись, вал, ыж, парсь сюдӥсь, мушкась каризы, нош емышсэ - йӧлзэ, вӧйзэ, ыж гонзэ, чечызэ - государстволы келязы. Ассэ крестьянэз гид берысьтыз картофка бакчаеныз кӧтсэ тырыса улыны кельтӥзы. Ужез яратӥсь, ӟеч улӥсь крестьян калыкез, кулаке поттыса, вань ваньбурзэ таласа, асьсэзыз сантэмаса, дор музъемысьтызы кужмысь улляса келязы я Сибире, я уйпал шаеръёсы. Гуртын улон туж огыр-бугыр луиз. Дауръёсын тупаса но зӥбыт-востэм улэм калык ог-огеныз ваче гадь вуиз, трос вир кисьтӥськиз. Ог-огдэ адӟемпотостэм карон, вожъяськон потӥзы. Ужез яратӥсьтэм калык улонэн кузёяськыны кутскиз. Пельга выжыослэн Ӝужгес гуртазы но ваче вуылонъёс луизы. Калык йыромиз: кытчы мыноно, кинлэсь юано, кытын зэмлык? Трос вал черк пала вамыштӥсьёс. Черк ӧз ваты таӵе кылылымтэ-адӟылымтэ сьӧсь ужъёсты ортчытонлы пумит луэмзэ. Бугыръяськон ӝутэм шуыса, 1929 арын Гавриил иеромонахез ГУЛАГ-е келязы. Черксэ пытсазы. Кышкыт лагерьёс пыр потыса, Гавриил иеромонах гурт палаз берытскиз. Отысь со эшшо кужмогес осконэн вуиз. Черксэ усьтыны ӧз ни лэзе бере, оскись калыкен, лушкем азьёсы люкаськыса, дэмен вӧсяськылӥзы - тэльёсын, гурезь бамалъёсы гудэм гуосын-кельяосын, мурӝолъёсын. Сизьыметӥ, пе, вал лушкем вӧсяськон интызы. НКВД синзэ кыньыса ӧз улы, Ӝужгесысь батюшкаез син азьысьтыз ӧз ыштылы. Трос кышкатъязы, ӵыжопкае пытсаллязы, но Гавриил иеромонах Христос Инмарлэсь Ӟеч Иворзэ тодытэмысь ӧз дугдылы. Наталля солы шуиз вал: "Атай, уд кышкаськы-а? Виёзы ук! Эн ни тодыты". - "Кошкись ошмес вуэз дугдытыны уг луы", - пумитаз вазиз отец Гавриил. НКВД-ос отец Гавриилэз нош ик пытсэт сьӧры келязы. Осконлэсь куштӥськыны косӥзы, со понна, пе, тыныд эрик сётомы, выль уже пырод, мукет адямиос кадь ик шудо-буро улод. Кинэ, кинэ, дыр, но, пичи дырысеныз кын куртчон аресозяз вуэм, Инмарез яратыса, вӧсяськыса улэм, мукет улонэз, кырсез тодӥсьтэм иеромонахез осконлэсь озьы гинэ уд куштӥськыты, Иудаен артэ одӥг радэ уд пукты. Гавриил иеромонах судын ассэ зӥбыт-востэм возиз. Инмарлэсь ӧз куштӥськы, ас лулзэ ӧз вуза, мукетъёслэсь но. Та тырмыт вал ини сое "калыклэн тушмонэз" карыса ыбыны. Со вал 1938 арын. Со виын оскон понна курадӟон чидам эшшо одӥг удмурт пилэн дун-чылкыт лулыз Инмысь Атаймылэн престол азяз вуиз. Та арын ик черксэ куашкатӥзы, сэрттӥзы, тарказы. Анна Павловналэн верамезъя, черк юртэз парсь гид но карылӥзы. Ки уг берыктӥськы та сярысь гожъяны... Та сьӧлык но асьме калык вылын улэ-а? Инмаре, жаля! Синву вия... Шимес... Та сьӧд ужъёс понна ӧм ке ӧпкеле, асьмеды азьпалан номыр ӟечез уг возьма. Курадӟытыса виемъёслэн дун-шектэм вирзы "ӧпкеле, вӧсяське!" шуэ асьмелы. Библилэн Усьтӥськон (Апокалипсис) люкетаз шуэмын: "Кузё-Инмар бордын али кулӥсьёс шудоесь; озьы шуэ Дух, асьсэлэн секытэсь ужъёссылэсь соос шутэтскозы, соослэн ужъёссы соослэн бӧрсязы мынозы". (Усьтӥськон 14:13). Нош кытчы мынозы сюрс но сюрс черкъёсты таркасьёслэн, Гавриил иеромонах кадь дун-чылкыт улэм Инмар адямиосты виылӥсьёслэн, вӧсяськон юртъёсты таркасьёслэн, Библиез тылэ куясьёслэн лулъёссы? Инмар тодэ, Со - Судья. Куке но одӥг институтын ӵош ужам Люси эшелэн, Людмила Леонидовна Карповалэн, ас гуртысьтыз люкам иворезъя, Наталля кема аръёс, кулытозяз улӥз Ӝужгесын. "Калык тушмонлэн" кузпалызлэн улонэз капчи ӧй вал. Улон азез гинэ ӧвӧл, улон интыез но таркаськиз. Быгатэмезъя, ӟеч муртъёслэн юрттэменызы, тылыслы укшась улон инты лэсьтӥз. Инмарез яратӥсь адями огшоры гинэ улыны ӧз быгаты, сюлмыз куриз на Инмар азьын ярамон кыӵе ке но уж лэсьтыны. Инмар солы сыӵе ужез возьматӥз: Сулейман Васьлейлэн кышноез, Олёна, нуны вайыкуз суйтэм-пыдтэм кылиз, вырӟылӥсьтэм луиз - паралич шуккиз. Картэз выль кышно ваиз, висись, вырӟылӥсьтэм кышноез солы кулэ ӧз луы ни - Олёнаез жаляса, Наталля сое дораз басьтӥз. Кӧня ке улыса, Олёналэсь Пильып пизэ но дораз ваёно луиз - Васьлейлэн выль кышноез сое урод кариз. Наталля та кык кынартэм лулъёсты утялтӥз, вордӥз. Вӧсяськись Наталля апаезлэсь верамъёссэ пеляз поныса быдэ вуиз Пильып. Та уродос коркаязы ик кышно ваиз; пыд йылаз йыг-йыг султэм бераз ини выль юрт пуктӥз. Вить нылпи будэтӥз. Наталля апайзы кулэм бере Пильыплэсь нылпиоссэ анаез, Олёна апай, бордаз кариз, визьлы- бурлы дышетӥз. Наталля апайлэн вӧсяськеменыз Олёналэн мугорыз небытаз, ветлыны ӧз ни ке но быгаты, пуксьыса пукыны йӧндыриз. Вӧсяськись удмурт кышномуртлэн Инмар азьын ярамон уж лэсьтыса улэмез сярысь гожтӥсько но син азям пуксе, тодам лыктэ Финляндиын та выллемгес ик луэм учыр: секыт война бер аръёсы Ева нимо чебер финн ныл ачиз кадь ик чебер швед пилы бызе. Шумпотыса, шудо улӥзы егит кузпалъёс нунызы вордскон нуналозь. Выль шумпотонэн - нылзы вордсконэн ӵош, та семьяе ӝутыса вормонтэм секыт кайгу пыриз: нунызэ вайыкуз, Еваез паралич шуккиз. Со вал 1945 арын. 2000 ар вуытозь, 55 ар ӵоже, кулытозяз Ева ноку ӧз султылы. Мар но ӧй вал та аръёс ӵоже! Нунызэ нылпи юртэ нуизы, картэз мукет кышно шедьтӥз, выль семья кылдытӥз. Ева висёнэныз ӵош огназ буш корказ кылиз. Улэмез уг поты ни вал, кулон но ӧз лыкты. Сюдыны, эмъяны, утялтыны кун учреждениос юрттӥзы, но оген кылён, быдэс ар ӵоже вырӟылыны луытэк кылльыны Инмарез тодӥсьтэм мурт понна - со ад ук! Тон огнад, нокинлы кулэ ӧвӧл - пичи нылзэ но со доры нокин уг вайы, кузпалыз но ымнырзэ уг возьматы... Кулон, кулон - кытын тон?! Тазьы туж курадӟыса, шимес малпанъёсын катьтэммем егит кышномурт доры Инмар аслэсьтыз адямиоссэ лэзиз - оскись кышномуртъёсты. Та дырозь Ева Инмарез уг тоды вал, шуыны луоз. Анай-атаез оскисесь ӧй вал, нылпизэс но Инмар законъя ӧз будэтэ. Выль лыктэм кышномуртъёс Еваен туж лякытэн гинэ вераськизы, Псалтирь чирдӥзы, Евангелиысь люкетсэ лыдӟизы. Эшшо лыктом шуизы, Евангелие кельтӥзы. Ӵуказеяз но, усьсэ но, берло но вуылӥзы Инмарез яратӥсь кышномуртъёс. Ар куспын Ева Евангелиез кӧня ке пол лыдӟыса пыр потӥз, туж яратӥз псалом гуръёсты. Озьы со Инмарез тодӥз но улон азяз шунды ворекъяны кутскиз. Больницаын туж умой ке но утялто, Евалэн отын улэмез ӧз поты, солы гуртаз утялтӥсь сётӥзы, нош уйёсы утялтыны ветлӥзы Инмарлы оскись егит нылъёс - студентъёс, ужасьёс. Соос пӧлын ик асьмелэн тодмомы Маръя Картано но вал. Маръяен ӵош Евалэн улон юртаз мыным но вуылыны кылдӥз. ...Койка вылын кылле пурысьтам йырсиё, шунды кадь чилясь ымныро кышномурт. Чиньыосыз сяна, мугорызлэн мукет люкетъёсыз чик уг выро. Витьтон арлэсь но трос курадӟе ке но ини, Ева ассэ шудоен лыдъя: шимес курадӟон пыр со Инмарез тодӥз но выль адями луиз. Быдэс Псалтирез учкытэк лыдӟыны быгатэ, нош Библиез быдэссэ кӧня пол со лыдӟыса пыр потӥз! Инмарлы тау карыса, Инмарез данъяса, курадӟыса кылле кышномурт. Но малы пайми - татын, пичи гинэ коркан, сыӵе шӧдскымон Инмарлэн дэлетэз (благодатез) улэ - солэн но, мынам но ымнырам шумпотон- пальпотон улэ, синме усьтэме но уг луы, нош сюлмын - сыӵе шумпотон, каньыллык! Вераны кыл ик уд шедьты. Ева шуэ, та курадӟонэ ке ӧй луысал, ноку но Инмарез ӧй тодысал, кулысал ке, адэ сюрысал. Анаез но, атаез но, агай-вынъёсыз но сояз дуннее мыныны дасяськытэк, чылкытатӥськытэк кошкизы. Картэз но кемалась кулӥз ини, нош Ева улэ но Инмарлы тау каре. Курадӟыса, вӧсяськыса, ӟеч ужъёс лэсьтыса, лулзэ-мугорзэ дун-чылкыт возьыса дасяське Инмысь Атайлэн юртаз пырыны. Священник лыктыса исповедь ортчытэ, причастие сётэ. Евалэн одӥг кайгуэз: вордэм нылыз, нылпи юртын будыса, Инмарез уг тоды, тодыны но уг тыршы. Ева доры со туж шер гинэ вуэ, но "анай" уг шуы. Вӧсяськыны куремзэ санэ уг поны. Та Евалэн вӧсь интыез. Ева кадь ик, мон но паймисько: Инмарез тодон понна одно ик курадӟонэз чиданы кулэ-а? Малы сӥльвиро, шудо-буро, егит, кужмо адями сюлэмзэ Инмар пала уг берыкты? Яке туж ӧжытэз гинэ Инмар пала кариське... Эшшо малы паймисько: султылытэк, вырӟылытэк улӥсь кышномурт, быдэс Псалтирь книгаез учкытэк вераны дышем сяна, вырись чиньыосыныз кулытозяз ӟеч уж лэсьтӥз. Олокыӵе но учыре сюрыса ӧлексы кылем адямиез гажась кунъёсын, шуом, Финляндиын, сыӵе муртлэсь улон нуналъёссэ шулдыргес, улэм потымонгес карыны пӧртэм амалъёс утчало. Одӥгысьтыз Инмар кылэз тодытӥсь эштосысь адямиос Ева доры лыктӥзы но туж огшорыесь гинэ синпель кузьымъёс (сувениръёс) лэсьтыны ӵектӥзы... Вырӟылытэк кыллись кышномурт со уж борды шумпотыса басьтӥськиз. Ева кадь ӧлексы кылем муртъёслэсь киужъёссэс нимысьтыз магазинъёсын вузало. Инмарлы оскись калык юри отчы октӥськыны лыктэ - секытэ сюрем адямиослэсь мылкыдзэ озьы ӝутыны тыршо. Трос дасо аръёс ӵоже Ева ас киыныз туж трос сыӵе ужъёс лэсьтӥз но соосты вузаса поттэм коньдонзэ - оло, сю сюрс марка пала со люкаськиз - ваньзэ сётылӥз Африкаысь куанер, сютэм улӥсь калыкъёслы, миссионер уже. Оло, асьмелэн берыктэм книгаосамы но Евалэн ужаса поттэм юрттэтэз вань? Удмурт кышномурт Олёна но финн кышномурт Ева одӥг кадь шугадӟонэз чидано луизы: кыксэс но нуны вайыкузы пери шуккиз. Еваез нырысь нуналысен берпум нуналозяз (Ева туэ кулӥз) Финн кун пичи нуныез кадь утялтӥз, сюдӥз-вордӥз, ӧз кушты. Вӧсяськись калык но вань уйёсы со вӧзын пукылӥз. Ӧлексы кылем кышномуртэз кун ас ки улаз басьтӥз. Удмурт кышномуртлэн адӟонэз-чиданэз мукетгес вал. Олёна картэзлы но, кунлы но кулэ ӧз луы ни. Инмар гинэ сое ӧз кушты. Тон, Наталля апай, шонер верамед: Олёна - Инмарлэн нылыз, сое кызьы ке но утёно. Чидантэм секыт учыре сюрем муртэз утялтэмед понна ик уго Инмар тӥледлы кӧттыр сётӥз, гольык но ӧд ветлэ. Ӧд кулэ, ӧд быре. Выжыды, ӟеч ужъёсты кылизы. Пильып но быдэ вуиз, кузпал ваиз, вить пинал будэтӥз. Таре соос асьсэос быдэ вуэмын ни, асьсэлэн семьяоссы. Ю-нянь будэто, заводын ужало. Но Инмарлы тау каро меда? Сюдӥсь-вордӥсь, улэп улонысь адэз адӟем но таисьтыз дуннеысь кемалась кошкем Наталля апайзы, Олёна песяйзы понна вӧсясько меда? Пильып но кулэмын ни, лэся. Мед вӧсяськозы вал. Вань удмурт калык улэп ӵыжы-выжыосызлэн тазалыксы, осконзы понна, кулэмъёсызлэн лулъёссы Инмарлэн Инмысь Эксэйлыказ мед сюрозы шуыса мед вӧсяськозы вал. Асьмеос кылтэм-ымтэм, номыр валасьтэм пудо-живот ӧвӧл ук. Вӧсяськыса, ӟеч ужъёс лэсьтыса улон понна асьмеос кылдытэмын, со понна Кылдытӥсьмы, Вылысь Инмар асьмеды югыт дунне вылын возе. Оскон понна курадӟон чидаса лулдэ сётэм Гавриил иеромонах, тонэн ӵош улонлэсь секыт ныпъетсэ - кироссэ нуыны чидам Наталия. Калыкмы пӧлын тӥ кадьёс ӧй ке луысалзы, Инмарлэн улон книгаысьтыз удмуртъёс, оло нош, ӵушиськысалзы ини, кызьы Зэм Инмарез тодӥсьтэм трос лыдъем, кужмо калыкъёс дунне вылысь ышизы-быризы. Христос Инмарлэсь Ӟеч Иворзэ, дышетонзэ удмурт калыкты пӧлы вӧлмытӥсь, курадӟон чидам Гавриил иеромонахен Наталия, Инмарлэн престол азяз ми, сьӧлыкоос, понна но вӧсяське: удмурт калык Христос Инмар бордысь ноку но медаз усьы, сьӧлыко ужъёслэсь со мед куштӥськоз но Дунне Кутӥсь Куиньмо Инмарез данъяса, Инмар Анаез, вань святойёсты сӥлы карыса, вӧсяськыса мед улоз, азьпалась вань шугадӟонъёсты, куректон кайгуосты чиданы мед быгатоз. Аминь. 7 Елена Виноградова Тросэзлы туала гожъяськисьёслы сямен ик, кылбурет удысэ сюрес усьтӥз мыным "Дась лу!" газет. Татын со вакытэ ужаз кылбурчи Герман Алексеевич Ходырев. Со гожтэтъёсаз котьку лӧпкытъялляз: "Йырдэ эн ошы - гожъя! Сэзьгес кариськы!" Мон бен озьы ик лэсьтылӥ. Аресъёсы будэмъя кылбурет монэ ас бордаз юнгес кыскиз. Нош али выль чуръёс кылдытъян уж мон понна аспӧртэмлыко висён выллем луиз ини: сотэк одӥг нунал но улыны уг быгатӥськы. Юнме уг шуы, дыр, кылбурчи Иосиф Бобров: адями дас тямыс арес дыръяз кылбур гожъя ке, отӥяз та висёнэзлэсь мозмеме уз луы ни... Ма, со озьы ик вань. Кылбур гожъясь муртлэн улонэз-вылонэз капчи ӧвӧл. Данакез уг ик валало солэсь ялан лобась мылкыдзэ. Нош со, пичи мурт кадь, ялан вешамез, ушъямез яратэмез, мусоямез вите... Удмурт поэтъёслэн гожъямъёссы пӧлысь мыным тужгес ярало улонысь дырызлэсь вазь кошкем бесерман кылбурчилэн Михаил Федотовлэн веранъёсыз. Михаил Иванович макем зол шӧдэ вылэм кылэз! Котькуд суредэз, котькуд чурез сюлэмам лякиське. Ноку но уг вуны. Макем устоесь, макем вольытэсь Николай семёнович Байтеряковлэн чуръёсыз... Ӟуч кылбурчиослэн гожъямъёссы пӧлысь тужгес ярало Сергей Есенинлэн кылбуръёсыз. Сергей Александровичлэсь ӵемысь юало вылэм: Малы, пе, тӥ кулон сярысь весь гожъяськоды? Поэт соослы шукыръяськыса валэктылэм: - Кызьы бен уд гожъя - вӧзысьтымы улонмес учкелэ ай - кыӵе! Кылбурчилэн сюлэмыз талы чидвлоз шат?!.. Аслам но тросэз чуръёсы кайгу сярысь малпаськонэн пачыламын. Мӧзмытӥськы вал соослэсь - уг луы: секыт мылкыд, вуберган сямен, потыны уг лэзьы. Мон лобышто йӧтылымтэ кыре... Тазьы нимай та сузьетме. Бен, удмурт кылбуретын кӧня на йӧтылымтэ кыръёс!.. Соосты лулысь-сюлмысь мед утчасал но мед шедьтысалзы удмурт кылбурчиос. Мон лобышто йӧтылымтэ кыре... * * * Киез но, пыдэз но ваче думыло ни - Кытын тон, мынам эрике? Синэз но, пелез но кужмысь ӵоксало ни - Кытын тон, мынам югытэ? Огпол шӧмъялтод но шӧдод ческытсэ тон - Выльысь гучыктод тыр сузен. Огпол учкалтод но - кырмод шудбурдэ тон, Ӝӧквыл тыр кисьтод коробен. Кытын тон, кытын, адскисьитэм эрике трон? Тыныд но кылдо шат бурдъёс? Огпол учкалтон но - кырмо шудбурме мон, Укыр вылӥе кыстӥсько. Кытын тӥ, кытын, ини дыр но пуме ни - Солы но кулэ, дыр, эрик. Паллян пыдпыдэс чидантэм зубектэ ни, Шуо ни: кулӥз, пе, Эрик. Кытын тӥ, кытын - возьытэ но, вӧсе но, Эркын лулъёсы тӥ мынам? Кырын кӧс шудбур кадь шупчоз пыд улысь со, Чагтыл кадь лулӟоз югыра... Тани сузькисько ни, мырдэм кутӥсько ни - Зулё ни: кулӥз, пе, Эрик. Пыдлон со, пезьгыт со, укыр чидантэм ни, Укыр чидантэм тыр эрик. Соку мон шокчо, дыр, берпум лулӟемозь ик, Берпум кылъёсме верало... Вакыт аслэсьтыз быронзэ шӧдыса ни Бырдась вирсэрзэ вурӟылоз... * * * Мон лобышто йӧтылымтэ кыре - Закрась* синъёс соку шузимозы, Думет йылын кадь, весь кыстаськозы, Мон лобышто йӧтылымтэ кыре... Мынам азям - лёго-выро сюрес, Меӵлэсь но меӵ изо выр-бамалъёс, Уллань-выллань шонске питран-эгес, Уллань-выллань лобе ӟечырет ёз. Тани валэ но - кыӵе со кужмо! Солы но кыр - эрик ваись дунне! Тӧллэсь шаплы питыранъёс лобо, Нуо монэ йӧтылымтэ кыре... Мон со кырысьшедьто зарни юдэс, Кепыраса выллем, поно пиям. Монэ уз пӧя нокыӵе но бес, Малы со бесъёслы зарни юдэс?! Мон со кырен кыллё эзыласа, Ӵок, вунэмын ке дор но жаг бакча... Эшшо кытын ваньзэ вунэтыса Кыллёд тазьы, чыс-чыс нырулыса?.. Мыным маке шат со закрась синъёс? Маке шат кыстаскись думет йылъёс? мыным дуно йӧтылымтэ кыръёс, Ноку медаз вуэ отчы бесъёс! * * * Песяй лыдъя манетъёссэ - Кык-куинь быртык ини соос, Дырызлэсь вазь бездэм шальзэ Коньдон улэ вӧлъям кузёс... Кин ке нош ик куштэ ыргон, Кудӥз уг жаля азвесьсэ. Нош пыд улын ини - бырон, Куке вуоз, дыр, нуналэз... Калык лыдтэм ортче туннэ, Кышет вылын ни - трос быртык, кушто ай мон но азвесьме - Соин уз начармы пуйы... Лыдъя песяй манетъёссэ... Чутӥсь Чутӥсь мынэ нюжтӥськыса, Сюрес вылэ учкылытэк, Вӧсен тырмем синпушъёсаз Синвуоссэ кисьтылытэк. Тӥни - адске ни сюрес пум, Нош пыд улэ шеде на лёг, Висись пыддэ бунэн уд дум, Висись пыдыд вылэ уд лёг. Мынэ чутӥсь нюжтӥськыса, Сюрес пуме учкылытэк, Оло, отын со шедьтысал Берпум вырзэ чик лулӟытэк? Сюрес, сюрес, тодскод-а тон, Кыӵе муртъёс тонэ лёго? Сюлэмбужон, кайгуйыръён Кудаз вожын ӟугоясько?.. * * * Адӟи чебер синмо нылэз: Синкӧльыез солэн тӧдьгес, Синнуныез солэн лызгес, Синкабакез солэн меӵгес... Адӟи чебер синмо нылэз: Синлысъёсыз солэн кузьгес, Синкашъёсыз бурдоесьгес... Синкотырыз буямынгес. Адӟи чебер синмо нылэз... * * * Гадяд тэрылӥсьтэм шумпотонэн Весь уртчиськод, весь уртчиськод, Уйвӧт гинэ луэ таӵе тусэн - Зэм улонын ичи шумпотӥськод... Зэм улонын котьку чидатскиськод, Весь оскиськод азьпал умоезлы, Интыл музэн куддыр ӝуатскиськод Шуак веньйыл быдӟа пальыштэмлы... Нош адӟиськод котьку кайгыронэз - Синпумъёстэ лушкем ӵушалтӥськод, Та улонын ӧвӧл вылэм ӟечез - Зэм улонын ичи пальпотӥськод... * * * Сыӵе, дыр, ни со - адями сюлэм - Огназ солы мӧзмыт та дуннеын. Огназ солы уг серекты шудэз, Чагыр инмын уг мынекты шунды... Чагыр инбам ӵемысь кузьма зорзэ, Льӧль инвожо уг сяськая гужем... Кыӵе дунне, кыӵе адӟон сэстэ Оген муртэ вакытэзлэсь вазьгем?.. Кыӵе адӟон уиськылэ сьӧраз? Суйзэ-пыдзэ сьӧлта кыӵе сьӧлтэт? Виръюисед сюпсе ке, измертан! Йырбыронозь уз вутты-а ишан?.. Сыӵе, дыр, ни со - адями сюлэм - Огназ солы укыр мӧзмыт луэ... * * * Зоро нуналэ адскисьтэм вужеръёс но Ышыг интые люкасько огазе... Выльысь, дыр, выльысь лушкемен кенешо, шол: Кинэ уёно шундыё нуназе. Ышыг интылэсь куддыръя шӧмисько мон, Юзыр-кезьытъёс бышкало тыбырез. Тӥни ук, тӥни, сэрегын - сьӧд ишан нош, Шорам мертамын ни лэчыт пукыӵез... Зортэм нуналэ мон уг пота коркась мк, Юртэ вадесам нош сылӥз ке вужер, Боды-кивалтос дасяло пумитаз мон, Ӵукна, ӵуказе мед луо ай быдэс? Пурысь-сьӧд акшан бурдъёссэ но лэзья ни, Нош мон витисько ни, лэся, эзельме. Сюрод, дышмонэ, ай вормо ай ачим ик, Сюрс пол юриськод ке но тон нуназе... * * * Нош ик туннэ шара со лулӟылоз, Синпумъёстӥз гинэ учкалтылоз, Уз вазьы, уз, уз сёт одӥг куара, Ӧсэз гинэ йыг подылоз, чатран! Нош сюлэмад ӝужъёз вылез яра, Пӧськы выллем, со ранӟытоз кема, Лулсэр нош ик вуж висёнзэ кутоз, Сюлмыд туннэ я ӵуказе путоз... Синпумъёстӥз гинэ учкалтылоз, Эшъёс пӧлын нош тон сярысь зулёз, Вӧзад куддыр пуксёз пальпотыса, Укыр кема со бӧтьыртоз, кема... Тон со виын уждэ но вунэтод, Чебер малпанъёстэ сӧсыртылод, Нош ӧс сьӧрын со выльысь ӟургетоз, Ӟызы кышномуртъёс выллем зулёз... * * * Мон турнасько вал огӵукна Дӥньтэм нюкын. Калык ичи. Турын буртчин выллем ялтраз, Качыоссэ шериз ӟозпи. Ӵапак ӧй шӧды, кызьы ин Мынам азяз шобыртӥськиз. Шуак чалмиз чырткем ӟозпи, Пыдул куашказ кадь - гудыртӥз! Мон кусоме чаляк куштӥ - Медаз сисьмы вал ӟеч турын. Кин ке гурезь йылын кеськиз: "Зоред уз окмы коттыны..." Нош со ӧз тод та зэмлыкез: Турын пӧлын ни - чум-чум ву... Эх, турнаськиз вал вазь, вазьгес, Дыртӥ - кожай, лэся, уг ву... Кема ӧз ӝега лек сильзор, Выльысь сайказ кырӟась ӟозпи, Кусотышлэсь кышка пыддор, Киын кусо шудэ капчи... * * * Кын сюй вылын - ӟузыриос, Нош сюлэмын ай - инвожо, Толон гинэ шуим: "Зороз!" Туннэ - йӧос ини кынмо. Нош сюлэмын ай вож гужем, Тӥни - эшшо гербер пушхе, Кыӵе сяськаяське шепед! Вылын шоккес шудэ сюрел... Тӥни - эшшо чипсэ чалбер, Кусошуккись но ташкетэ, Тэль бамалэ ӝужам намер Кырымпыдсэз тылтэк сутэ... Толон гинэ зориз - шуръёс кадь Ӧръяськизы пукыл вуос. Нош тол туннэ гинэ сайкам кадь - Вож гужемез улля сьӧрло. Кын сюй вылын, пукыл вуын но Экто туннэ ӟузыриос. Нош сюлэмысь, пӧсь мылазьысь коть Йӧэз вормо тулыс вуос... * * * Яратӥсько огнам кыльылыны, Яратӥсько, ӧвӧл ке ӵашетӥсь, Соку йырын тужгес луэ сайкыт, Сайкыт вимын шуак ӝужа выль визь... Соку мон луисько, лэся, Кылчин, Вадьсам лэзько пуштрес кылчинпиос, Ӵош луыса, одӥг но мыддорин Уг берытско татчы люкаськемъёс... Кылчинпиос экто но кырӟало, Мо висказы нуны выллем шудо, Эшшо ай ку тазьы ӟечырало? Эшшо ай ку лыктоз таӵе тудӟон? Но туж вакчи, укыр вакчи со ви, Мед луысал пичи гинэ на вис, Йыр йылысьтым туж мусоез Кылчин, Эн кош чаляк, тонтэк уз мӧзмы ин... Шуак жильна суй-пыдъёсысь кужым, Шуак гылӟо, катьтэм кошко тусъёс... Туж кыдёкын, чалмыт ин пыдэсын Вожомыса экто кылчинпиос... * * * Мон уг валаськы асме ачим: Куд кужым монэн кузёяське?.. Весяклы кылё-а сюресчи? Ай султо, оло, сюрес воже? Мон уг валаськы асме ачим, Синъёсме вотса ке сьӧд адӟон... Исасько асме: "Эх, чульымчи", Калгисько, лулы шугомымон... Мон уг валаськы асме ачим, Йырсазьме кортна ке лек висён. Юрттыны уг быгаты эмчи, Киоссэ мыче ке йырбырон... Мон уг вала, дыр, асме ачим, Мугоры муэ согиськытозь. Жалясез, тодско, уз луы чик, Синвузэс уз кисьтэ ӵукнаозь... * * * Сютэм мон, сютэм калгисько - Лулы нош куре ни кырӟан. Кырӟай ке, сюлмы серектоз, Висён но уз мертчы бордам. Кырӟай ке, уг викышты мон, Уг лыдъя асме шудтэмен. Кизэ но уз мычы мӧзмон - Сыӵе кужымез крезьгурлэн. Кырӟай ке, капчи бурд вылын Васько пумитад ӝытазе. Инмар-кылчинэ юг тылын Ӝамдэ югдытоз сюресме... Кырӟай ке, думем пыдъёсы, Сьӧлтась гозызэс тӥяса, Эктон курозы мынэсьтым - Кема мед шудоз вал арган... Кема мед шудоз вал арган, Эн шуга, эн жадьы, лулы: Лэзькиз ке, напчиз ке акшан, Ышоз пеймытэ мугоры... Сютэм мон, сютэм калгисько, Лулы нош куре ни кырӟан. Кырӟай ке, сюлмы серектоз, Висён но уз мертчы бордам... * * * Тулыс мыче ини бамзэ Но гылтӥське кезьыт вуэн. Мозмытскыса кырсьлэсь-курлэсь, Асфальт чиля ини чебер. Нош му вылын небӟе лымы, Ини сюрес но дэриӟе. Пыдъёс уг сётско сьӧлтэтлы, Вамышъяны ке но шуггес. Сюрес дурысь кызьпу сурдэ Сизэ ыштэм, лэся, шунды. Соин, вылды, соин туннэ Татын укыр шуныт, югыт. Соин, вылды, соин тулыс Пальышаса мыче кизэ. Музъем вылэ пуктэм тылыс Но туннэзэ, лэся, мултэс. * * * Иж тымет вадьсы туннэ васько - Нош ик нош дораз ӧте вувыл. Иж вадьсын инбам но - чиль уко, Туж небыт ӵыпет вӧзысь мувыл. Пыд азям интыяськоз визькыл, Вылысьтыз вылаз выжыятоз: "Кытысь, кин тон, кыӵе даурлы Кельтыны малпад сюлэмбудос?" Бен, шедиз ай будосэ мынам: Дас полэс но сю полэс куо. Оло, тон шедьтод ӟечос эм-ям - Кӧтӝожме тымет пыдсы нуод? Вылысьтыз вылаз ёртоз визькыл, Юанзэ уг вутты анласа. Мурт ӧвӧл ӵыпет вӧзысь мувыл - Иж вадьсы ӧте сюлмаськыса... * Закрась - вожъяськись. Константин Емельянов Дась ньылонъёс верос Кык эшъёс, кык ужасьтэм паньтэмъёс (одӥгзэ Дима шуо, мукетсэ - Митя) котьку сямен туннэ ӵукна но магазин азьысен пумиськизы. Соку ик дышем гурзэс мытӥзы. - Йыр-ы висе,- ӝуштэ Дима. - Ой, мынам но,- вазе Митя. - Маин йӧнатском? Шильыртӥсед ӧвӧл-а? - Одӥг коньы но. Тынад но-а? - Луысал ке, тынэсьтыд юасал-а?.. Кисыоссы бушесь бере, кинэ ке коньдоно муртэ возьмало. Сылон сяменызы тамак аратоно кариськизы. Одӥгез кисы пыдсысьтыз азьвыл бичам сигарет но папирос пумъёссэ поттӥз, мукетыз - газет юдэссэ. Тамаксэс бинялтыны ӧз вуттэ - Дималэн син шораз йӧтӥз бадӟым букваосын гожтэм ялон: вань мылкыд карисьёсты Коньывыре, гуртлэн юбилеезлы сӥзем празднике ӧтиськом, пе. Отын ивортэмын: автобусэн дунтэк нуон-ваёнзы. Кык эшъёс ваче син учыртӥзы но, пал кыл поттылытэк, ог-огзэс валазы: ӝегатскытэк Коньывыре шонтоно. - Со куштӥськем фотоаппараттэ но сьӧрад басьты,- ӵектӥз Митя. - Оло, куке сямен опеть кинэ ке кутчаны пӧрмытом. - Зэмзэ басьтоно,- лӧпшаз соиз. - Мон чаляк дорам пырало, тон автобус сылонтӥе мын, монэ медаз кельтэ. Празднике мыныны мылкыд карисьёс быдэс автобус люкаськизы. Димаен Митя но пӧлазы чуртнаськизы. Гурт матын ӧвӧл ке но, вольыт сюрес соосты отчы чаль вуттӥз. Шулдыръяськон кутскемын вылэм ини. Шур дурысь возь калыкен тырмемын. Арган куара, нылъёслэн но пиослэн кырӟамзы кыдёке шуккиське. Куакъёс котырын бӧлякен- бӧлякен гуртоос но куноос пуко. Ожо вылэ валем ӝӧккышетъёс вылын кыӵеез гинэ сиён-юонъёс ӧвӧл: сӥльын ӝук но чорыг лым, табань но перепеч, мукет пыжиськемъёс но пӧртэм пумо гочатӥсь ӟенеликъёс. Паньтэмъёс ӟенеликъёсын тужгес узыръёсыз доры вамыштӥзы. - Чырткемесь-а, гажано юлтошъёс?- йыбырттыса ик вазиськиз Дима ӝӧккышет котыре интыяськемъёслы. - Ӟечкыласьком тӥледды дано, чебер, вунонтэм праздникеныды! - Тау, тау. Нош кинъёс тӥ?- тодэмзы потӥз кузёослэн. - Райцентрысь ми, юри ӟеч кылмес вераны лыктӥм. - О!- бурдъяськизы соосыз. Лыктэмъёслы соку ик инты бушатӥзы. - Чале татчы, пӧламы кариське. Димаен Митя сое гинэ возьмаса улӥзы, ӧтисьёс вӧзы усьтыр-табыр лэзиськизы. Интыяськыкузы ик соослы чаркаос вуттӥзы. Макем бадӟым шумпотон вал со кык эшъёс понна! Нош кытын одӥгез, отын кыкетӥез но дась. Толло кечыръямзылэн секыт бервылыз син куспын пытьытэм сылмиз - адямиосыд воксё выльмизы. Йырзы шулдырмыса, котыр улос ик воштӥськиз кадь - улон-вылон льӧль-чебер палыныз берытскиз. Эскериськизы, чакласькизы но чылкак паймизы: ма, зэмзэ выжыкыл дунне вылэм ук татын! Пӧртэм пумо писпуос вож куаръёсынызы каньылля ыртӥсь тӧл шорын вераськем кадь огсыр шильыртыса сыло, тэлеӟыса ӝутскись турын-куар пӧлын вожмаськыса пишто синэз гочатӥсь турлы буёло сяськаос. Тасолэсь но йӧно адӟисько возь пасьтана тузӥ дӥсен пӧрмытскем адямиос. Пыдэстэм лыз инмысь пӧсь тылсиосыныз пылатӥсь зарни шунды мылкыдзэс уката няськатэ. Но кык эшъёслэн инкуазьлэн чебереныз тунсыкъяськыса, ӵыдонтэм возь шоры жальмаса улыны дырзы ӧй вал - ымдуразы тыро сюмыкъёс сюрылӥзы бере, ватсэт кулэ на. Куноятӥсьёссылы тау карыса, соос кыштырак мукет интые гылӟизы. Татын но соосты кема витем куноосты сямен пумитазы, мылысь-кыдысь утялтӥзы. Паньтэмъёслы уката шулдыр луиз. Соку Митя эшезлэн кӧтурдэсаз лушкемак йӧтскиз, фотоаппаратэз шоры возьматӥз. Огзэс огзы нош ик ӝог валазы. - Эшъёс, огинэгес кариське,- вазиз Дима пукисьёслы. - Ваньдэс патретэ пуктом, газетэ поттом. Тае адӟыса, возь вылысь мукет юмшасьёс но татчы кыстӥськизы. Адямиослэн ас тусбуйзэс пыраклы кельтэмзы потэ уго. Димаен Митялы коньдон донго, чаркаоссэс кымало. - Арня ортчыса, патретъёстэс асьмеос дорады вуттом,- оскыто кык эшъёс. Кисызы тордэм бере валатскизы: чаляк шупчоно татысь. Но юнме вераллямтэ: юись муртэ, пе, ньылоныз быдтэ. Димаен Митя но ӧз чидалэ, ӝогак чальтчем интые, татын ик сылӥсь автолавкаысь ӟенелик басьтӥзы на. Палэнэ кариськыса, сое пыдэсозяз кымалтӥзы. Но кыдёке кошкыны ӧз быгатэ ни, коньдонэн басьтэм черзы пыд йылысьтызыпогыртӥз. Кӧня ке улыса, праздникын юмшасьёс соосты туж тумошоен адӟизы-шедьтӥзы: одӥгез, Митя, пушнер пӧлы сапкиськем, Дима гопе питырам. Таизлэн футлярысьтыз фотоаппаратэз ик палдэм. - Ыштозы ук аппаратсэс,- музъем вылын костаськись мае ке ӝутӥз татчы кемдэмъёс пӧлысь одӥгез. Сое эскериз, кияз бергатӥз но чабкиськиз гинэ: - Ма, тӥяськем арбери вылэм ук та. Пияла синмыз но ӧвӧл, плёнкаез но. - Иське, алдаллям асьмеды таос, пӧяса коньдон октӥллям!- вазиз мукетыз. - Вот покачъёс!- куашетыны ӧдъязы гуртоос. - Ми ке соосты ӟеч адямиос кожаськом, куноятӥськом-утялтӥськом, нош соос... Кудӟыса пограмъёс доры данак калык люкаськиз. Изисьёсты, кылзэс юан вылысь, сайкатыны выро - мырыло, китӥзы золъяло, нош соосыз номыре уг шӧдыло. - Вылтӥзы кезьыт ву палькконо - сайкалозы,- ӵектӥз кин ке. Кытӥ-мартӥ ведра вуттӥзы но ошмесэ вулы бызьылӥзы. Ӵаж-ӵаж кезьыт вуэз нырысь Дима вылэ пальккизы. Адямиед соку ик синъёссэ усьтӥз, "ы!", "ы!" карыса пуксиз. Та амалэн ик пушнер пӧлысь Митяез но ӝутӥзы. Кыаназы долкамын, номыре уг валало - уйжомылэмын. Вылтӥзы эшшо одӥг ведра юзматӥсьсэ кымалтоно луизы на. Соку гинэ сазьмизыгес. - Та фотоаппаратэд тынад-а? - юазы Дималэсь. Соиз чыртыяз ошем буш футлярзэ кутылӥз но шуиз: - Бен, мынам. - Уг ужа вылэм ук таид, малы калыкез ӧрекчаса ветлӥськоды? Дима гуньдӥз, кылзэ ньылэм музэн мыг-маг гинэ кариз на. Нош котыразы люкаськемъёс дуринчи кадь пурӟизы - ӵаш потто, сётэм коньдонзэс берыктыны куро: - Берыктом, берыктом,- шуэрскем алдаськисьёс кисыосысьтызы уксёзэс усьтыр-табыр поттӥзы. - Ваньмыз-а татын?- юало соослэсь. - Одӥг ӟенелик тӧдьызэ басьтыса вуттӥм,- вазиз Митя. - Иське, асьтэлэсь ватсалэ. - Ма, ӧвӧлы...- Дима буш кисызэ возьматӥз. Гуртоос уксёзэс куспазы люкыны ӧдъяса, эскерись-чаклась луымтэен, эшъёс- тордосъёс чулькак куакъёс пӧлы зымизы... Димаен Митя одӥг гуртысь ӧвӧл. Нырысез райцентрын улэ, мукетыз - куинь иськемысь Льӧмошурын. Озьы ке но, куальккыны яратэмзы соосты юн эшъяськытӥз, соосты котьку сямен ӵош адӟод. - Чидатэк витисько ни вал тонэ,- Дима шумпотӥз дораз вуэм эшезлы. - Кунояськон инты вань! - Кытын?- лӧпшаз соиз. - Такавыр гуртын. - Кинэд отын улэ? - Мынам ӧвӧл - муртъёслэн. - Эшез шораз эбек музэн былькмемысь лад-лад валэктыны ӧдъяз. - Татысь, посёлокысь Назарлэн Ижын улӥсь покчи выныз Такавырысь кышно басьтэм. Кыкназы городын, пе, уло. Назар выль родняоссэ ӧвӧл адӟылэм на, пумиськылӥллямтэ на соос. Огкылын вераса, кудоос-туклячиос ог-огзэс уг тодо. Назарез туннэ куное ӧтиллям. Вераськемзэс кылӥ. Одӥг пиосмуртэ со машинаеныз нуллыны куриз. Бергес, уйзэ кӧлон вылысь, пе, мыном. Выныз но городысь бер вуыны медэ. Соослэсь азьло асьмелы отчы вутскылоно - ох, куноятозы! Мар-о, ветлом-а? - Маин сокеме мынод? - Ма, ӧжыт-а нефть поттӥсьёслэн машинаоссы отӥ ворттыло? Нуозы но, ваёзы но. Кык эшъёс кема тунаськыса ӧз улэ - лӧптӥзы, вырӟизы, живо-два машина шедьтӥзы. Такавыре вуыса, кулэ коркаез шедьтӥзы но зэмзэ куноос сямен йӧн-йӧн отчы пыризы. - Ӟечбуресь!- чазырес вазиз Дима. - Умой,- пӧран паласьтыз мычиськиз кузё кышно. - Уд но тодмаське, дыр, милемды, туклячи,- кескич кылзэ-бурзэ азьланьтӥз Дима. - Назар кудоды мон, нош таиз - юлтоше. - Э-э,- куалектэм кадь луиз кышномурт. - Пыдло кариське, пыдло, ойдо пукселэ. - Вазь лыктоно луиськиз,- интыяськон сяменызы кылгозызэ нуйтэ Дима. - Кышноез уин ужаны косӥлям, нош пиналъёсты нокинэн кельтыны - ӝытозь мыным берытскыны кулэ. Сыӵе эли-кеби луыс а но лыктоно кариськи: адӟиськем потӥз. - Олӥ-олӥ, кемдэ ук,- жаляса лулӟиськиз корка кузё. - Я, коть озьы но лыктӥллям ай. - Ма, шуисько ук, адӟиськем потэ ни вал, пӧй. Сэре тани юлтоше машина шедьтӥз но ӵош ик лыктӥм. - Я, умой, туж умой. Кышномурт могаса ӧз ул ни, соку ик ӝӧк вылэ сиён-юон ворттыныкутскиз - олокытӥ- матӥ быдэс ӝӧк выл тыр пуктылськиз. Бератаз быдэс черык ас виятэмзэ поттӥз. Тае адӟыса, воргоронъёслэн синъёссы уйсылэн кадь чилектӥзы, косэмез возьматэк, ӝӧк сьӧры кыстӥськизы. Кузё кышно кунооссэ гажаса, лулысь-сюлмысь утялтэ. Ачиз олома но юалляське, ваньзэ выжыятыны тырше. Нош соосызлэн кылзы шаплы, Назарлэн нимыныз туклячиенызы лабыр потто, юанъёсызлы валэктыкузы пичи но уг сьӧлтаськыло. - Ма, созэ но, тазэ но веръялэ, а то лябыт куртчиськоды кадь,- аракызэ удонъяз индылэ кышномурт. - Сузьке, ваньмаз вутске. - Вутском, туклячи, вутском, тау,- вазё соосыз. Асьсэос копак аракы вылэ гинэ чӧлскемын, вылысьтыз вылаз ӟамыръяло, кузё кышно лэхьяса уг ву. Озьы пукон-вераськон сяменызы кышномурт борддорысь час шоры учыртӥз. - О, выныныд но адӟиськод ай,- шумпотэм мылкыдын Дималы шуиз кышномурт, - ӝоген вуыны кулэ ни. Куноос зурак луизы, юзэктӥзы. - Бер ӝыт гинэ вуом шуиз вал но...- ма вераны ӟудыса нёртӥз Дима. - Бен озьы вал но, бӧрысь мукет малпаллям - ужысьтызы куриськыса, мунчое пырон вылысь, ывазьгес бертоно кариськиллям. - Хм, хм...- вазиз Дима. - Ма, туж умой малпаллям вылэм но, милям кошкон дырмы вуэ ни. Отӥяз машина кузёмы шугъяськыны кутскоз. - Кытын нош соды?- кузё кышно укное учкиз. - Магазин дорын витьыны курим. Озьы шуыса, воргоронъёс пукыны ӧз дӥсьтэ ни, лэзем чаркаоссэс кымалтӥзы но умойтэме сюремзылэсь азьло чаляк шупчыны дыртӥзы. - Э, таосын...- кузё кышно паймыса кылиз. Нош алдаса кунояськисьёс гор-гор серекъяса кошкизы. - Однако, колӟамы, лэся! - Зэмос кудозэ, Назарез, куноятоз на меда? Кык эшъёслы одӥгез гинэ жаль потӥз: черык пыдсысь юытэк кылем аракы. ...Митя, гуртын улӥсь егит воргорон, ужтэк кылемен лыдъяське, государстволэсь токма шорысь коньдон басьяса улэ. Туннэ но солы шуд усиз: куинь толэзь ӵоже басьямтэ уксёзэ огполскын сётӥзы. Шумпотэменыз ымпумъёсыз ик пель дорозяз вуизы. "Табере тае миськоно,- понназ малпаз со. - Паньтэмме но куноято". Со эшез доры вамыштэм ни вал, но собере тыпак дугдӥз: "Пичильтык веръямы ке, таме быдтытэк ум дугдэ ук, паньтэм эрик уз сёт.- Огшап малпаськыса сылэмез бере нодъяськиз: - Ярам, уксёме гуртэ нуо но кытчы ке вато, нош "миськыны" кӧнязэ ке гинэ куто". Туала арын адями азгынмемын - чик пыдын уг ветлы, одно машина мед нуоз. Мынонэз кыдёкын ӧвӧл ке но, Митя но автобус дугдылонтӥе кожиз. Калыкез трос вылымтэ - буш пукон вылэ лэзькиз. Кема ик ӧз пукы - шораз вазись луиз: - Ӟечбуресь! Вӧзады пуксьыны яралоз-а? - Пуксе, пуксе,- Митя оглань сётскиз. Вазись мурт шоры учкиз но отчыяз ик долказ: вӧзаз - выжыкыл дуннеысь вуэм кадь чебер егит нылаш. Сутэр синъёсыныз шудэ, мусо пальпотэ. Нылмуртлэн бордаз кыскись тусбуез воргоронлэн сюлмаз мертчиз. Кырыжак-кырыжак весь шораз учкылэ. - Кыдёке-а мынӥськоды?- жингырак юаз нылмурт. - Льӧмошуре гинэ. Гуртам бертӥсько. - О, мыным но отчы кулэ,- шумпотӥз кадь нылаш. - Кин доры?- тунсыкъяськиз Митя. - Мон университетын дышетскисько, удмурт фольклор люканы потӥ. Гуртады вань, дыр, кырӟаны-вераны шаплы пересьёсты? - Милям соос ваньзы артистъёс кадесь, кырӟамысь-эктэмысь ӧй ик дугдылысалзы. - Туж умой. Кылзэ ай, оло, пыдын гинэ вамыштом? Ма, таӵе ӵектонлы кызьы пумит луод? Такем тузӥ бубылиен дунне пыдсозь но вамышъялод. Митя ӝегатскытэк пукон интыысьтыз ӝутскиз. Куазь йӧскадь шулдыр. Толло зоремен улос копак выльмемын, омыр чылкыт, сайкыт, котыр будӥсь сяськаос ческыт зын лӧсъяло. Нош воргоронлэн сюлмаз чебер инкуазьлэсь но шулдыргес, майбыргес. Бен кыӵе пиосмуртлэн мылкыдыз уз вырӟы, уз бурдъяськы сыӵе мусокаен артэ мыныкуз?! Митя сюресчизэ пырак ки йылаз но нуыны дась. Озьы мынон сяменызы нылаш сюрес урдсы сяська бичаны кожиз. Митя но сьӧраз вамыштӥз. Ныл доры матэктӥз гинэ - соиз серекъяса сюрес валлин мерттэм писпуос пӧлы бызиз: - Сут монэ! Митя сутӥз. Нылмуртэз бордаз ӝик-ӝик шымыртӥз. Соос ваче син, ваче ымныр луизы. Воргоронлэн вылтырыз ик куалекъяны ӧдъяз. - Ойдо ӧжыт пуком,- дырекъясь куараен вазиз со. Нылмурт ӧз пыкиськы, кыштырак сьӧраз вамыштӥз. Тани соос ышыг интые вуизы. Нылаш дэремзэ курткем-тупатъям карыса вазиз: - Оло, пенжактэ кылёд? Митя кытӥ-мартӥ кылиз но вож турын вылэ вӧлдӥз. Шонерскиз гинэ - ымныраз, синъёсаз мар ке жалькак пальккиськиз. Пиосмурт отчыяз ик шымырскиз, номыре уг адӟы ни. Собере отчыяз ик ланьырак лэзиськиз. Кема-а, ӧжыт-а курадӟиз - синъёссэ мырдэм но кызьы усьтыса учкиз но, мусокаез ӧвӧл ни, му ньылэм, кожалод. Мазэ-созэ йӧндырыса, кизэ пиджак кисыяз чуртназ. Шал-шал буш, одӥг коньы но кыльымтэ. - Шузи тон, нодтэм!- ассэ шара лӧдыны кутскиз, йыр бордаз кырмиськыса. - Олокин пӧечилы, шармачлы оскиськид, кӧлэм ыж йыр. Тӥни тыныд - мусо ныл, тӥни тыныд - коньдон! Кайгыременыз воргорон ныллы дасям интые кынартэм лэзиськиз... Ма, кӧткуректонэз уй куспын но ӧз ортчы. Бен кызьы буйгалод сомында коньдонэз ыштэм бере? Кайгуэзлы чидатэк, со вазь ӵукна ик Дима эшез доры мынӥз. Ваньзэ солы кисьтӥз. Эшезлэн но кӧтыз урод луиз: - Ай-ай-ай, кӧня юмшаны тырмысал соид! - Таре ма каром?- мылкыдтэк вазиз сюлмыз позырскись Митя. - Ма карод? Со нылдэ уд шедьты ни, шедьтӥд ке но, падиез уз лу. Митя мур лулӟиськиз. - Я, сокема эн чигиськы,- буйгатыны кутскиз Дима. - Ньылонмы сотэк но кӧс уз кыль. Туннэ Иванов Ипполитэз берло сюресаз келяны мыном. Тодӥськод-а сое? - Ма... со ке, ми ӵош дышетским, одӥг классын. Мар луэм? - Сюлмыныз, шуо. - Сыӵе егитысен... - Бун уго, бен. Асьмелы но, жалям-керектэммес возьматыса, ӧжыт синвумес кисьтоно луоз, сотэк куноямзы уз поты. Ма, тыныд секыт уз лу,- серектӥз Дима. - Толон ыштэм уксёдэ малпад ке, синкылиед ачиз жальыр васькоз. Ойдо мынӥм. 1 Олексан агай "Кылё тодэм калыкъёс" сузьетысь Дунне вылысь самой матысь адямие - анае кулэм бере нырысь ик бызьыса мынӥ черке: анаелэн лулыз понна вӧсяськыны ньыльдон нуналлы, быдэс арлы заказной сётӥ. Улэп дыръяз анайме черке келяса кельтӥсько, пумитаны мынӥсько - гуртысь лыктэм, ӟуч кылэз тодӥсьтэм пересь мурт бадӟым каре йыромиз ке, мар карод? Нош ачим черке уг вамыштӥськы, туж ке но пыреме потэ. Анае но шуэ: "Ойдо, пие, пыр, кыӵе отын шулдыр, пиосмуртъёс но вань". Но кышкан ворме: Троица черклы сю вамыш кемын сылэ ужано институтэ. Огшоры институт гинэ ӧвӧл - Удмурт Элькунысь Министръёслэн Кенешсылэн идеологияя шорсюлмыз со. 1986 арын - анаелэн кулон араз - Россей кунын коммунистъёс осконлы пумит, черклы пумит ужзэс ялан нуо на вал. Тодосчилэсь черке ветлэмзэ, пырамзэ тодӥзы ке, нокин но умой лэсьтӥськод шуыса йырдэ ӧй маяллясал. Кивалтӥсьёстэ, эшъёстэ, ӵыжы-выжыостэ кысканы кутскысалзы. Анайме ватэм бере, сюлмын сыӵе секытлык, сыӵе мӧзмон каръяськиз. Кышканме вунэтыса, ӝыт службае пыри. Вӧл-вӧл черк пушкын пачылаз калык сылэ. Куд-огез али гинэ пыре но вашкала обросъёс азе сюсьтыл пуктэ. Урамын пеймыт, кезьыт, нош татын шуныт, мугорез гинэ ӧвӧл, сюлэмез шунтӥсез но вань кадь, ӧс дорыгес султӥ но сылӥсько... Табере мыным потэ ини, быдэс дунне мон шоры учке кадь. Сыӵе кирос кареме, йыбырттэме потэ, но киез нокызьы но ӝутыны уг луы - оло, тонна секта корт эгес пельпум вылам понӥллям. Возьдаськон, курдан улэ нюрто, суез-пыдэз, мылкыдэз вылэ ӝутыны уг луы. Кыкетӥ ползэ лыктыкум, кышканме киям кутыны тыршыса, черклэн шор палаз кыстӥськи ни. Вӧзам сылӥсь удмурт кышноос (удмуртме уг тодмало-а, мар-а?) куспазы лушкемен чигисько: "Кыӵе муртлэн нылыз-пиез тазьы черке ветлэ меда, мынам одӥгзэ пиме но, нылме но косыса-косыса, либатыса но ваеме уг луы". Мукетыз кышномурт артэ вӧсяськыса сылӥсь эшезлы шуэ: "Мынам но озьы ик, номыр кареме уг луы, черк пала огзэс но берыктэме уг луы". Куинетӥзэ черк службае лыктыкум, самой азьпалаз сылӥсь сюсьтыл пуктон доры вуи. Инмар Анайлэсь оброссэ кирос карыса чупай но, сюсьтыл пуктыса сылыкум, кин ке пельпум бордам йӧтӥськиз, бадӟым куараен шуиз: "Ӟуч-а, удмурт-а тон?" - "Удмурт",- шуисько. Со виын быдэс дунне зурказ но, черкысь вань калык ми шоры учкиз кадь потӥз мыным. Зэм но, укыр бадӟым куараен вазиськиз чиед гинэ, мынэсьтым ӧжытак лапеггес ог куатьтон аресъем воргорон. "Удмурт ке, ойдо ми пӧлы", - Святой Екатериналы сӥзем придел дорын сылӥсь мӧйы воргоронъёс пала со валтӥз монэ. Служба кутскемын ӧй вал на, соин ик та адями монэ ӵош вӧсяськон эшъёсыныз тодматыны вуиз. "Таиз Леонтий Гаврилович, таиз Александр Иванович, таосыз агай- вынъёс - Павел но Сергей Яковлевичъёс..." Ог дасо-дас витё пиосмуртъёс люкасько вал со виын черк вӧсяськонъёсы, нош кышномуртъёс храмын пачылаз - кирос карыны киез но ӝутыны уг луы, ява. Пӧлазы кык пересь удмурт воргоронъёс сыло - одӥгез Алнаш ёросысь Варӟи-Ӟатча вӧзысь Шадрасак-Кибья гуртысь, мукетыз - Якшур-Бодья ёросысь Варавай котырысь. Монэ валтыса ваись муртэ ачиз сярысь шуиз, мон, пе, Александр Петрович, удмуртъёс монэ Олексан гинэ шуо. Мон но удмурт бере, та дырысен солы "Олексан агай" шуыса вазиськылӥ. Чебер но, капчи но ук "Олексан агай" шуыны. Пересьёс пӧлын мон самой егитэз вал. Соос ваньзы куатьтонлэсь ортчемын ни, пенсиын, нош мыным алигес гинэ ньыльдон одӥг арес тырмиз. Туж шумпотыса соос монэ пумитазы - егит мурт лыктэм бере, черк улоз на! Бордысьтызы кыӵе ке но каньыллык, яратон-гажан, дэлет лыктэ - Инмарлэн зэмос оскись муртъёсыз уго соос. Вань сюлмыным мон та выль тодмоосме яратӥ, возьмаса гинэ улыны кутски: ку кӧснуналэн арнянунал вуозы но, черкысь службаын нош ик та яратоно эшъёсыным пумисько. Соос монэ сюсьтыл пуктылон вӧзы, азязы султытӥзы. Ӝуаса бырем сюсьтылъёс интые выльёссэ пуктылӥ. Шумпотон уж сётӥзы. Кызьы мон валай, Олексан агай таослэн кивалтӥсьсы кадь: кыллы шаплы, вӧсяськонэз тодэ, арлыдын но куатьтон котырын гинэ, тодымтэ муртэз ик ӧвӧл кадь. Леонтий Гавриловичен, туж зӥбыт-востэм, лачмыт ӟуч воргоронэн ӵош, Олексан агай черк кенеше пыре, соку сое "двадцатка" шуо вал. Нош йырзы - староста Николай Данилович. Войнаысь ӧлексы луыса бертэм офицер, таза сӥльвиро, кырӟаны шулдыр куараё мурт. Улэп кылемезлы тау карыса, пӧсь ожысь вуэм воргорон бертыкуз ик черке пыриз. Сюсьтыл пуктӥз но, бӧрысь ини, черк кенер сьӧры потатэк, черк юртын ик улӥз. Та выль улон потытозь, вань черк ужен со кивалтӥз, ктитор - староста луиз. Калык гажа вал сое, вань ужез быгатыса нуиз уго. Со вакытэ, паймоно кадь, быдэс черкен ктитор кивалтӥз. Соос пӧлын котькыӵеез но вал, "кыгыбы" шуон тыршиз аслыз ярамон адямиосты черке кивалтӥсе чуртнаны. Старостаослэсь юатэк-вератэк, священникъёслы нокыӵе ужез но лэсьтыны лэземын ӧй вал. Ктиторен огъя кыл уг ке шедьто, священникез ӝог гинэ пыдлось гуртъёсы келяло я служить карыны уг ни лэзё. Выль закон потытозь, черкын ужась-тыршисьёслэн улонзы капчи ӧй вал, соосты котыр ласянь сантэманы, ултӥяны тыршизы. Но оскон улӥз, калык черке ветлэмысь ӧз дугды. Эшшо мон ветлыны кутскыку, осконэн кыӵе кужмоесь адямиос вал! Коммунист зӥбетлэсь кышкатэк черке ветлӥзы, кыдёкысь монастырьёсы вуылӥзы. Вӧсяськон книгаос ӧй вал бере, ас киынызы гожъязы. Ог-огзы доры ветлыса вӧсяськизы. Университетын дышетскыкум таӵе адямиосын нырысьсэ пумиськи: ӵужапае доры лыктыса, синкылиен верасько вал Инмар закон сярысь, молитваос чирдо, сьӧлыкъёссы пумысен чигиськыса верасько. Святойёслэн улэмзы, вӧсяськемзы, оскон понна курадӟон чидамзы сярысь веранъёсты мон но ымме усьтыса кылзӥськылӥ. Ӵужапае шуэ вал: "Миша, священнике дышетскыны мын". Мон шуисько: "Ой, ӵужапай, бер ни, азьлогес вера вал, мон табере университетын дышетскисько ук". Черке кошкытозям но диаконлэсь санзэ басьтытозям, эшшо кызь ар ортчиз на. Олексан агай Пичи Пурга ёросысь Яган-Докъя гуртын вордскемын, но пичи дырыз, пинал дырыз бускель Чутожмон-Пурга гуртын ортчемын. Туж секытэсь вал быдэ вуон аръёсыз. "Аляк улон дыръёсыз но вал", - тодаз вайыса шуэ укмыстон сизьым аресъем Марпа апай. Анайтэк, атайтэк кыльыса, ачиз курадӟыса-курадӟыса пыд йылаз султыны дауртӥз. Ӵыжы-выжыосыз аслэсьтыз арескын бадӟымгес кышно ваизы. Война бере городэ улыны интыяськизы. Олексан агай андан пӧзьтон заводын ужаз. Пӧсь цехын ужаса, со пенсие вазь потӥз но вань улонзэ черкен герӟаз. Одӥг праздникез но, кӧснуналэз, арнянуналэз кельтытэк черкын вал. Табере Библиен мургес тодматскыны дыр но тырмыт луиз. Уйёсы кухняяз пытсаське но Священной Гожтэмысь чуръёсты лычсузьыса лыдӟе. Ӝыт правилоез чирдытэк, Евангелиысь, Апостолъёслэсь ыстэм гожтэмъёсысьтызы кӧня ке люкетсэ, Псалтирьысь одӥгзэ ке но кафизмаез чирдытэк изьыны уг выдӥськы, шуэ вал со. Кызь ньылетӥ, витьтонэтӥ, укмыстонэтӥ псаломъёсты черк-славян кылын но, удмурт кылын но учкытэк вераны дышиз. Йырсазезлы но паймисько: Вуж Сӥзёнысь иворъёсыз туж усто мадьылӥз, пересьёс ымзэс усьтыса ик сое кылзӥзы, уката - гуртъёсысь лыктэм, ӟуч кылэз но, Евангелиез но ляб тодӥсь мӧйы удмурт кышноос. Таӵе адямиосын Олексан агай туж шумпотыса вераськылӥз. Тодонзэ ватыса ӧз улы. Одӥг Леонтий Гаврилович гинэ Олексан агайлэсь тросгес тодэ вал ке тодэ вал, дыр. Но со, удмурт эшез кадь, тодытыса ӧз ветлы. Ӟучъёс черк-славян кылэз удмуртъёслэсь ӟеч тодо уго. Асьсэлэн кылзы. Паймымон, Олексан агай быдэс Библиез укмыс пол лыдӟыса пыр потэм. Черке алигес гинэ ветлыны кутскем мурт, мон но паймыса кылзӥсько та кык мӧйы муртъёслэсь Библиын гожтэм ужъюгдуръёс сярысь вераськемзэс. Учкытэк веранын Олексан агай ӟуч агайзэ ортче вал кадь. Али но пель сьӧрам кылӥське удмурт гуртысь кенакъёслы укмыстонэтӥ псаломысь чирдэм чуръёсыз: "...Аслыд ватӥськон интылы Вылысь Инмарез тон бырйид. Тон борды урод уз йӧтӥськы, чер но юртэдлэн матаз уз лыкты. Котькыӵе сюресъёстӥ ветлон дыръяд Аслаз кылчинъёсызлы Со тонэ утьыны косоз уго. Пыдыныд но из борды медад канжаськы шуыса тонэ киязы ӝутыса нуозы. Шиетӥсь кый вылэ, лек кый вылэ лёгиськод, сьӧсь пӧйшурез, лобась кыез пыдыныд лёгалод". "Монэ яратэм понназ сое мозмыто, утё сое, - со Мынэсьтым нимме тодэ уго. Мыным вазиськиз ке, сое кыло, куректон-кайгуэз дыръя - Мон со дорын. Сое мозмыто, данэ потто. Кема улонэн тыр каро, Аслэсьтым утёнме солы возьмато". Котькинэн но вераськыны вуэ, ваньмызлы ӟечлык, дэлет сӥзе. Куд-ог индылонъёсыз кинлы но солы, уката ик доръёсызлы, сокем уг кельшо вал, дыр. Кытӥяз Олексан агай шуэ вал: "Ымылэн кортнэтэз ӧвӧл, ӧжытаклы ке но вуроно вал сое". Вӧсяськись эшъёсмы пӧлысь нырысь ик кулӥз удмурт эшмы - Стефан. Тямыстонлэсь ортчемын вал ини. Олексан агай шумпотыса кадь шуиз: "О-о, Стефан братмы дораз бертӥз!" Туж яратылӥз ваньмызлы тодаз вайытыны: асьмелэн бырисьтэм-вужмисьтэм дормы Инмын, нош музъем вылын улонмы - сьӧлыкан, но со понна вань шугадӟонъёсты, висёнъёсты, кӧтӝожъёсты, курадӟонъёсты чидан интымы. Кураськисьёс, пыдйылчиос, пе, асьмеос та дуннеын. Ялан мар ке но утчаськомы, возьмаськомы, но номырин кӧтмы уг тыры. Байлык-узырлык кулэ, нош лулмы потэ но - мугормылы сажем сюй тырме. "Музъем вылын пыдйылчи мон, курон-косонъёстэ мынэсьтым эн ваты... Сюлэмме узырлык люкан пала ӧвӧл, курон-косонъёсыд пала берыкты. Синъёсме палэнты - алекъяськонэз медам адӟы, Тынад сюрес вылтӥд ветлыны улон сёт мыным... Ӟеч, ӟеч карись Тон, Кузё-Инмаре, Аслад законъёсыдлы монэ дышеты... Тынад ымысьтыд потэм закон Мон понна трос сюрс зарнилэсь но, азвесьлэсь но умойгес луэ". Псалтирь книгазэ усьтыса лыдӟылӥз, нодъялляз Олексан агай черке выль лыктэмъёсты, кулэм ӵыжы-выжыоссы понна чигиськыса, бӧрдыса улӥсьёсты. Диакон луэм берам черке ваньмызлэсь вазь вуылыны тырши. Соку ик адӟисько вал: черке вань вӧсяськисьёслэсь азьло Олексан агай вуэ. Обросъёсты чупа, вӧсяське но служба кутскемлэсь азьло одно ик тырше ни кыӵе ке но юанэн мыным вазиськыны - дыры ке но ӧвӧл, ог вить минутъёс вераськиськом ни. Самой бадӟым шумпотонэз луиз, куке мон асьме кылэ берыктыны кутски Библиез, вӧсяськон книгаосты. Маин дуно мыным, маин сюлмам, тодэ ваёнъёсам улэ Олексан агай? Инмарез, Библиез яратэм сяна, со ас дыраз удмурт кылэ берыктэм вӧсь книгаосты калыкез гажаны дышетӥз, берыктон уж бордын тыршыны мылкыдме ӝутыса возиз. Тау карисьёс трос, но Олексан агай кадь мылкыдзэ вераны шер мурт быгатэ. "Вот, - шуэ, - ӟуч кылэз но ӟеч валасько, лыдӟисько вӧсяськон книгаосты, нош вордӥськем кылыным лыдӟисько ке, мукет дунне усьтӥське кадь. Одӥг кылыз но валатэк уг кыльы. Йыртӥм пырыса, тани татчы - сюлмам вуэ но отысь уг ни поты. Быдэссэ Библиез берыкты, берыкты, отец Михаил". Псалтирь книга потэм бере, Иерусалиме вуылэме бере "Ньыль зарезь пыр - Иерусалиме" векчи гинэ книгае потэм бере кӧня-кӧня шумпотӥз, тау кариз Олексан агай. Уйшор уин но, ӵукна черке мынон азям но, пе, Псалтирь книгаез лыдӟисько. Сыӵе со усто агитатор, вераськыны быгатӥсь адями вал. Сокем со мур яратӥз ас калыксэ. Али дыре сыӵе адямиосты, уката ик пиосмуртъёс пӧлысь, шуг ни шедьтыны. Курдаса, кепыраса уг улы, шумпотонзэ но, куректонзэ но калыклы усьтэ но тӥни. Епископен но вераськыны кепыраса уг улы. Укмыстонэтӥ аръёслэн пумазы Олексан агай, кызьы ачиз яратэ вал вераны, - "дораз бертӥз". Рак висён малпамтэ шорысь таӵе шаплылэсь но шаплы воргоронэз пыд йылысьтыз погыртӥз. * * * Эх, Олексан агай, тод вал, тон кулэм бере кызьы, кыӵе амалэн сьӧд тушмон урдӥськиз удмурт кылэ вӧсяськон книгаосты, Библиез берыктон уж вылэ! Ӟучомем удмурт пи, Антоний иеромонах, кинлэн косэмезъя, индылэмезъя меда кутскиз удмурт кылэ берыктонлы, удмурт кылын вӧсяськонлы пумит уж нуыны? Со али но туж бадӟымесь, лекесь гожтэтъёс гожъяса ыстылэ черкъёсы, монастырьёсы, Патриархие. Черкъёстӥ ветлыса, калыклэсь мылкыдзэ сӧре, мыдлань валан сётэ, калыкез булгандыре. Книгаосты но сутылыны вуиз ини. Куд-ог священникъёсты но ас палаз карыны быгатӥз. Гомаса ӝуась Евангелилэн тылсиосыз ӵушкало сюлмылэсь вӧсь луись интыоссэ. Солэн дышетэмезъя, вань адямиос лыдӟыны, вӧсяськыны кулэ черк-славян кылын, со гинэ, пе, адямиез Инме ӝутэ, нош пичи калыкъёслэн "варварской кылзы" адямиез адэ, пе, нуэ. Монэ куаретыса но, кышкатыса но берыктон ужлэсь куштӥськыны косыса выриз ини. Паймымон, худграфез йылпумъям, вылӥ образование басьтэм адямилэн, Инмарлэн престол азяз сылӥсьлэн Инмарлэн курон-косонъёсызлы тупасьтэм таӵе дышетонэз. Кытысь потэмын та йыромон дышетон? Ачиз Кузё-Инмармы Иисус Христос инме ӝутскон азяз дышетскисьёссэ - апостолъёсты вань калыкъёс доры мыныны но Евангелиез тодытыны косӥз. Язычникъёслэн югдытӥсьсы быдӟым Павел апостол Коринф карын улӥсьёслы ыстэм гожтэтаз таӵе нодъян сётӥз: "Агай-вынъёсы, Инмарлэсь кылзэ ивортон сярысь сюлмаське; пӧртэм кылъёсын вераськыны но эн люкетэ" (1 Кор. 14:39). Библиын нокытын но верамын ӧвӧл ук, утиськон кыл пыр лыктэ шуыса. Гожтэмын: утиськонэз оскон пыр, ӟеч ужъёс лэсьтыса басьто. Сьӧраз потэм "дышетӥсез" визьманы нокин но уг басьтӥськы. Эй, Олексан агай, Библиез тон кадь тодӥсь, удмурт калыкез, кылэз гажась, азинтон понна сюлмаськись, кышкасьтэм дасо удмурт воргоронъёс луысалзы ке, йыромем дышетӥсьёслы инты ӟоскыт кыльысал. Но жаль, сыӵе адямиос асьме пӧлын ӧвӧл ни, лэся. Ваньмыз понна тау Тыныд, Инмаре. Оло, та кӧтӝожъёс, синву пыр кӧня ке но сьӧлыкъёсы куштӥськозы... Сюлмез вырӟытӥсь псаломъёс гожъясь Давид эксэй шуэмзэ, "Кузё-Инмаре! Макем йылӥзы тушмонъёсы! Тросэз мыным пумит султо, тросэз лулылы шуо: "Инмар бордын солы утиськон ӧвӧл". Нош тон, Кузё-Инмаре, азьысьтым щитэ, мынам данэ, Тон мынэсьтым йырме ӝутӥськод. Куараме поттыса Кузё-Инмарлы вазиськисько но, Аслаз святой гурезьысеныз Со монэ кылэ. Выдӥсько мон, изисько но султӥсько, Кузё-Инмаре монэ утьыса возе уго. Сюрс-сюрсэн котыр ласянь мыным пумит султэм калыклэсь мон уг кышка. Кузё-Инмаре, султы". Тани кылем арын, православной монахен огкылысь луыса, протестант группаысь сектантъёс удмурт калыкез, "Инмар" кылэз сантэмась рукописен книга нерге поттыса калык пӧлы вӧлмытӥзы. Кӧня отын ӧрекчаськонэз, кӧня дэри кисьтэмын курадӟон чиданы кылем мискинь калыкмы вылэ. Соосты-а Инмарлэн адямиосыз, христиан калык шуод? Удмурт кылэ Библиез берыктэм поннам языческой вӧсез удмурт калык пӧлын утён понна нюръяськисьёслэн сьӧд вирзы кисьтӥське. Шуо, удмурт Инмарлы, пе, вӧсяськыны кулэ, тон ке нош удмурт калыклы еврей Инмарез тодытӥськод. Укмыстонэтӥ аръёслэн кутсконазы, тон музъем вылын улон дыръя, улон мукетгес на вал. Али кызьы ке но тушмон кужмогес но кужмогес луэ, урод ужъёс туж ӝог аляло. Тон улэп дыръя асьме дорын наркомания но, СПИД но ӧй на вал. Удмурт калык понна кылылымтэ висёнъёс. Оскон син азьын сӥяны кутске. Вӧсяськон юртэ - черке мынэм интые, калык телевизор азе, видикъёс доры кыстӥське; табере Интернет потӥз на. Калыклэсь визьзэ чылкак суразы ни ИНН сётъянэн. Иеромонах Антоний татын но азьпал радын мынэ: туэ тулыс пал калыкез Правительстволэн юртэз азе демонстрацие поттазы. Революция потон азьын поп Гапон но калыкез демонстрациосы, пуля улэ ӝутказ вал. Олексан агай, кытын тон али? Инмысь Атаймылэн Эксэйлыкезлэн капка дораз вуид ке, удмурт калыкед понна вӧсяськы. Монэ но эн вунэты вал. Ӟигары-кынары вань на дыръя, ӵукналы быдэ мон тонэ буре вайыны тыршисько: "Христос Инмармы, кулэм муртэдлэсь Александрлэсь лулзэ дун-сьӧлыктэмъёсын огазе интыя, кытын ӧвӧл висён но, куректон-кайгу но, лулӟылӥськон-викышъян но, нош вань пумтэм вапумъёс ӵоже каньыллыко улон". Пельтэм Илля Тодад ваёд яратэмме Кызьы яркыт тыл котыртӥ Думем кадь бубыли берга, Озьы ик мед аръёс пыртӥ Кыскоз бордаз та бумага. Куке-соку шедьтод сое, Лыдӟод тыныд гожтэм чурме. Коть мон уг лу ни со дыре, Тодад ваёд яратэмме. * * * Куддыр секыт луэ улонэ - Дунне ик пеймыт потэ. Оло сюрес возьма-а монэ, Оло висён-а йӧтэ. Кӧня дунне вылын сюресъёс - Мон сюресчи карисько. Котькытчы мын - вань ук эшъёс, Кинъёс монэ утё. Вань ке эшъёс, улон капчигес, Макмыр но майбыр луэ. Коть ас дорам омыр каньылгес, Нош ик сюрес ӧте. Мар бен карод, шунтӥсь синъёстэк Сюлэм йӧӟектоз соку. Кызьы улод дуно эшъёстэк? Уд быгаты неноку. Кырӟа но кырӟа, гитара, Буйгаты сюлэмме. Кырӟа но вера, гитара, Шумпотты эшъёсме. * * * Мынэсьтым бен ма кылёз? Омырлы - чагыр инбам, Нюлэслы - горд палэзьёс, Музъемлы - льӧль сяськаос Но бӧрдӥсь ошмес синъёс... * * * "Я пуксьы матэгес, я чаль ни, чаль, Я кушты палэнэ возьдаськондэ", - Одӥг киям веднась вуэн хрусталь, Мукетыныз маяллясько бамдэ. Пиньёс бордам хрусталь жингыртылоз, Мӧзмем киосыным кылё дӥсьтэ. Одӥг Инмар гинэ, дыр, валалоз, Малы али сюлэм озьы дӥсьтэ. Зуректомы, ум вуэ валесозь, Пӧсь яратон инсьӧр пала ӝутоз. Луд ӟазегъёс лобон сюрес дорозь... Ӵемгес тазьы хрусталь мед жингыртоз. * * * Пурысь пилем кадь ас поннам, Лобо ӝужыт инбаметӥ. Мӧзмон йӧтӥз ке сюлэмам, Зорен кошко музъем вылтӥ. Тынад корка липет вылад Шатыр потто исаськыса. Со куаш вуиз ке но пеляд, Уд вала, мон со шуыса. * * * Сюлмаськон, малпаськон но ӧвӧл - Кайгуэз тодытэк улӥсько. Яратон пыласькиз ке огпол, Сюресме чакламысь, дыр, дугдӥ. Вуюись эгеслэсь кышкаса, Инбамысь пилемъёс сылмозы. Калыкъёс, синъёсам учкыса, Ӝуатскем сюлэмме шӧдозы. Ӝытазе тӧдьы бус вӧлскемъя, Пӧсь тылын кадь сутэ гадь пушме. Жингырес ныл куара ӧтемъя, Мынӥсько чаклатэк сюресме. * * * Кыӵе капчи, небыт лымы соку усиз, Ку возьыны вӧзам тонэ ӧз луы, Синйылтыса пытьыостэ но мон ӧй вуы. Кыӵе капчи, небыт лымы соку усиз. Бен кин алдаз, ма малпаса, музъем, пе, - шар? Берен вуод отчы, кытысь али кошкид. Нош кошкыса тон татчыозь ӧд вуы ни, ышид. Бен кин алдаз, ма малпаса - музъем, пе, - шар? Быдэс дунне кезьыт йӧ ӟузыри выллем, Жингыртыса пырдоз, бордаз йӧтскид ке. Сюлэм кынмоз ини, тон весяклы кошкид ке. Быдэс дунне кезьыт йӧ ӟузыри выллем. Кыӵе капчи - небыт лымы али усе, Ӝоген сое тулыс шунды шунтоз. Нош сюлэмам кезьыт йӧ пырыез кылёз. Кыӵе капчи - небыт лымы али усе. * * * Мон ноку но уг ышы весяклы, Коть ӝутӥськоз вылам музъем вырйыл. Ышо гинэ ог куинь, ньыль, вить арлы, Но берытско небыт зорен сӥзьыл. Вуо мон толалтэ юг лымыен, Тулыс куашетыло тудвуосын, Гужем пушъё возьвыл льӧль сяськаен, Ческыт зынэн вӧлмо дунне вылэ. Даур ортчоз - кин ке лыдӟоз ужме, Озьы берен улӟоз мынам лулы. Коть ноку но уд адӟе ни асме - Мон ноку но уг ышы весяклы. * * * Трос сюресэ пытсаськиз ни, Луонлыкъёс быремын. Со кизили но кысӥз ни, Кудӥз мыным сӥземын. Секытэнгес ик йӧтэ ни Быдэстыны мае ке. Суд йырсие но бездэ ни Туж-туж чаляк малы ке. Кинъёс тодам но уз лыктэ: Кинэн кытын но ма вал, Кинэн юим я ӧм вуттэ, Кинлэсь юрттэт курысал. Тодмоосын пукисько ке, Оломалы мӧзмисько. Нош одӥгнам кылисько ке, Малпанъёсам адӟисько: Сяськаё возь вылъёс, Узыресь кузьымъёс Жильтыр-жиль пыд азям Инсьӧрысь усыло, Чеберъям лыз капка Но бадӟым из корка, Кытын котьку монэ Яратса, оскыса возьмало. * * * Нокинлы но уг оскиськы мон (Верамзы - омырез позыръям). Улэме ке ӧвӧл ярамон, Сьӧлыко ке - ваньмыз ик аслам. Тыр толэзь но, шунды но монэ Та дыре ини вунэтӥллям. Ужрадэ ӟукырес ке мынэ - Киосы губырес, дыр, аслам. Урамын син шорам верало: "Ми тонэ туж но туж яратӥм". Ужъёсме нош али курлало - Азьлогес курлалляй, дыр, ачим. * * * Малы асьмеос ӧм пумиьске Егитгес дыръямы? Уйёсме но мон уг кӧлӥськы, Йырвизьмы сурамын. Ма каром на мон табере, Сюлэмы юмекъя .ере, Сузёнтэм инмысь кизилие Тон мынам? Нокытчы али уг потаськы, Мӧзмыса кыллисько. Мар таӵе монэн? Уг валаськы, Паймисько,паймисько. Сюресмы но одӥг вылэм, Куке но артэ, дыр, мынм, Сузёнтэм инмысь кизилие Тон мынам. Нокызьы но ӵукна ӧз вуы ни, Шат кысӥз горд шунды? Берпуметӥез, луоз, лыктӥз Яратон сюлэмам. Малы ке вазьыны возьыт. Шат весяк-а луоз озьы, Сузёнтэм инмысь кизилие Тон мынам? Пётр Куликов Пилиськем музъем повесть 1 ...Нош со будэм. Вӧлскем но. Кыӵе кужым кулэ меда сокем бадӟым ужез лэсьтыны? Кылем тулыс гинэ со быдэсак сыномем но йырчукин берыктэм пичигес ведралы укша вал. Нош али учкы ай: йылыз кызлэн улӥ вайёсыз дорозь сузьтӥське ни. Тазьы ик будӥз ке, сиресь шадра вайёсты пушказ пыртоз, оло, ньылоз но. Нокин уг тоды (уз но вала, вылды), кыӵе кужым лулъя-вӧлскытэ сое. Котькуд бертэмаз Димаез пыдъёсыз нюлэс кушлэн та ӵыдонтэм чебер интыяз кыско. Ваньмыз сое татын витьыса гинэ улэ кадь. Институтын дышетсконзэ йылпумъяса дораз бертэм пиез пумитаса сямен, али но тани, олокытысь-марысь лобыштӥськыса, кыз йылэ коӵо вуиз но вань котырысьёслы ӟеч иворзэ коӵыртыса ивортыны дыртэ ини. Ӝужыт, йыг-йыг мугоро пилэсь кышкасьёсызгес мед, пе, ватскозы, дӥсьтӥсьёсыз пумитаз потыны но, оло, быгатозы, нош мон, коӵо, быдэс нюлэскысь лулоослы: лобасьёсызлы но нюжмыльтӥсьёсызлы, тэтчасьёсызлы но гонӟыртӥсьёсызлы, шиетӥсьёсызлы но нурскетӥсьёсызлы, пиньгетӥсьёсызлы но каргетӥсьёсызлы - ваньмызлы-ваньмызлы со пумиськонъёс сярысь тупен-тупен иворто. Кызьы бен сотэк? Ивор вылын улон возиське ук. Нюлэскы вуэм мурт нош коӵолэсь коӵыртэмзэ уг ик кыл кадь. Гарамӧля гадьзэ урдэм, дэрем саесъёссэ пужаллям. Гадь пушкыз лычсузьымон шока. Но тани малы ке паймиз кадь. Котьмае ас синмыныз адӟемез потӥсь коӵо кызлэн улӥгес ваяз тэтчытэк ӧз чида, огшаплы чалмытскыны валатскиз. Ваньзэ, пе, ачим синйылто но соку гинэ иворто. Егит пи малы ке мыкырскиз, пыдесъяськиз. Коӵолэн та интыын сыӵезэ адӟемез ӧй вал на. Кыдёкынгес, артысь пичи гурт вӧзысь ӝужыт кызъёс улын, вӧсяськисьёс люкаськыло ик кадь. Нош татын... Уть, вож-вож турын улысь музъемез чатрес нырыныз гырыны дась ни. Шузи, кузьылиослэсь бызьылэмзэс со озьы учке, лэся, ук, нош солэсь, коӵолэсь, кырӟамзэ уг ик кылы, уг но синмаськы. Егит пи со вакыт йырзэ выльысь ӝутӥз. Кузьыли муӵ шоры долказ. Паймод но бырод та адямиослы. Нюлэскын кузьыли мында мар вань меда?.. Коӵо музъем вылэ васькиз. Пыд ултӥз отчы-татчы бызьылӥсь кузьылиосты, оло, кокчаны ик дась. Огшап улыса, коӵолы озьы тэтчан акыльтӥз. Вылаз ик, сюлмызлы кельыштырымонгес уж шедьтӥз: кужен сюрес кузя гурезь выллань тубись нылмуртэз синйылтӥз. Тылобурдо эшшо кужмогес кыӵыртыны ӧдъяз: учкы ай, пе, чебер апок, шузи пияш шоры, кузьылиослы, кузьыли муӵлы паймем, нош мынэсьтым кырӟамме пеляз поныны нодлыкез уг тырмы. Коӵолэсь сюлмаськонъёссэ нылмурт валаз, кожалод: зӧк кыз улысь кузьыли муӵ котырын бергась пияш доры матэктыса, со киысьтыз тӧдьы канистразэ пыд дораз пуктӥз. Кыл-куара уг поттылы, до-ол! учке, солэн но пилэсь ма дауртэмзэ тодэмез потэ. Нош пияш номыре уг шӧды, турын-куаръёс пӧлтӥ лёгем сюрестӥзы кузьылиослэсь бызьылэмзэс синъёссэ вошъятэк чакла. Нылмурт ӧз чида, кызъем кариз но серемез потыса вазиз: - Студентлэн эмъяськемез потэм-а, мар-а? Эшъёссэ но вунэтэм. Черлад шат? Ньыльпыдъяськем пи соку ик тэтчиз, ымнырыз ӵыжектӥз. Мар вазьыны паймиз. Огшап чус улэмез бере гинэ ымыз усьтӥськиз: - Студент вал, нош табере - архитектор. Мон дышетсконме быдтӥ, Надя. "Гражданпроектэ" интыясько. Улон юртъёс лэсьто. Нош ачид кызьы ни? - "Гражданпроектэ"? Ма, мон но отын ужасько. - Тон но институтын дышетскид шат? - Дима паймемзэ ӧз ват. - Э-э, проект дасянын ужез трос. Чертёжница, дыр? Киыд мынэ вал. - Милям фирмамы отын. Николай Владимирович инты шедьтӥз но, ужаськом ай. Курсъёсын дышетски. Табере тани чотаськисько, - пальпотыса валэктӥз Надя. - Озьыен, фирмачка? Новосибирскысь институтамы но ньылё-витё фирмаос каръяськизы. Институтлы но шуныт, со фирма шуонъёслы но. Коньдонэн юртто ук. Тӥ но озьы ик, дыр, - валатскемзэ возьматыны дыртӥз Дима. - Вулы тани ветлӥ. Ошмес ву юод-а? - вераськонэз малы ке мукет ӧре выжтыны дыртӥз. - Кызьы, пе, пумитъяськод сыӵе чебер апайлэн ӵектэмезлы? Надя канистразэ музъем вылысь секытэн ӝутӥз, ӵоксэтсэ усьтӥз но Дималы мычиз. Соиз шонерскиз, пыдъёсыз но, мугорыз но золскизы. Ӵаж-ӵаж кезьыт вуэз юонъяз пияшлэн гадь вылаз но шапыкъёс виязы, дэрем сирессэ коттӥзы. - Усто-о! - пияш кужмо черетскемзэ ик ӧз шӧд. - Гембернюкысь, дыр? Мон но отчы ветлӥсько вал. Канистразэ пытсанъяз ни Надя кескич пальпотыса шуиз: - Таки ӧд вера ведь, малы та кузьыли муӵлы йыбыртъяськод? - Хе, соиз ини милям лушкем ужмы - кузьылиослэн но мынам. Тодэмед потэ ке, та кузьыли кар быдэс музъем шар вылын возиське. - Пайми кожад-а? - кунэрскиз нылмурт. - Институтын дышетскемдэ возьматэмед потэ? Астэ учёной шуиськод ни, дыр. Ваньмы музъем вылтӥ ветлӥськом ук. - Вождэ эн потты, Надя. Ваньмыз со шонер. Мон чик уг быдӟияськиськы. Куке-соку рос-прос мадё ай. - Ойдо бен вамыштом. А то дорын ыштӥзы ни, дыр, - сӥялэс мылкыдын вазиз нылмурт. - Ку ни уже потод? - Огшап шутэтско но - дорады. Ӵош ужалом. Одӥг юртын, шуисько. Я, вай али канистрадэ. Сектаны сектад, ужаны но табере сьӧлык уз лу. Соос дыртытэк кужен сюрес пала вамыштӥзы. Мышсы ышытозь коӵо шып пукыны чидаз, собере вань кужмысьтыз коӵыртыса, артысь писпуос пала лобӟиз. Табере солы лумбыт коӵыртыны-кырӟаны муг сюриз угось. 2 Котькуд адями улон дуннеез ас мертэтэзъя мерта. Лангыр Насьта но озьыгес ик. Куке-соку со Ондреезлы юн оскылӥз. Нош осконэз тылын ӵуштаськыса быриз. Кузпалыз корт ӵыжатонын ужаз. Мартен гур дорын ужасьёслэн бригадирзы вал. Данъязы, грамотаосыз быдэс чемодан тыр люкаськемын, медалез но вань. Пӧсектон дыръёсаз Насьта ӵем гинэ со грамотаос вылтӥ лангыртэ: - И мар басьтӥд со заводэдлэсь? Патер-а тынад адямилэн кадь? Пензиед но курег кокчалтымон гинэ. Адямиослэн патеръёссы но дворец кадесь. Колтыр Никодимлэн ик тӥни. Аслыз но йӧндыриз, табере пиезлы басьтэм на. Нош милесьтымзэ ке сыӵе кагазъёсын сюдӥзы. Гур эстод-а соин, кӧттэ тырод-а? Ой, кӧты-сюлмы. Ваньзэ малпасько ке, улэм ик уг пот. - Дугды ни, Насьта. Кин тодӥз улонлэсь озьы берытсконзэ? Мыным но патер сёто вал. Но асьмелэн кыӵе ке сыӵе коркамы вал ук. Малпай, бригадаысьтым Алексей Андриановлы со кулэгес. Общежитиын семьяеныз улӥз ведь. Солы секытгес вал. Вот и черодме сётӥ. Кин тодӥз, авария луоз шуыса? - кышноезлэн тусьты-пуньыен кужмо жингыртэмез пала берытскыса нёжъяз Ондрей. - Инвалид кельтӥзы но вунэтӥзы, - синвуаськыса но соин ӵош ик сюлмыз берытскыса вазиз Насьта. - Мар улон та?! Адӟыны быгатысалыд ке, корка липет но быдэсак ӝуйӟемын ни. Толь шуонэнызы коть шобыртоно вал. Укно янак улэ ӟустари донгаса- донгаса но толыкез ӧвӧл. Мар улонэ вуиськиз та? Адямиослэсь возьыт. Вождэ эн потты, Ондрей. Чидаськод кадь, возиськиськод, нош собере ваньмыз пӧсьтэ. Тынад но винаматэд ӧвӧл, мынам но. Лык ай дорам, огшап бӧрдом коть. Ондрей конгро алюминь бодызэ кутӥз но кышноез пала чутышак-чутышак вамыштӥз. Корка пушкын со бодытэк лёгаськыны йӧндыре ке но, кузпалызлэн тазьы лангыртон- куашетон вадесъёсаз воргоронлэн пыдъёсыз кылзӥськемысь дугдо - измо, уг куасаллясько ни. Кышноезлэн шонер но меӵак вандыса верам кылъёсыз таза муртэ но пыд йылысьтыз погыртоно кадесь уго. Лангыр Насьта тусьты-пуньыоссэ лачмытак интыяз но картэз пумитэ дыртӥз, экеез сямен бордаз ӝиптӥз. Кыкназылэн ик пересьёслэн бамъёссы синкылиен сутӥськизы. Ондрейлэн адӟисьтэм синъёсыз таӵе вакытъёсы усьтӥсько, лэся, со кышноез шоры вырӟылытэк учке, солэсь секыт малпанъёссэ сайяны, палэнтыны, чидантэм урод мылкыдзэ ӧлексы кылем мугораз пыдло-пыдло выйтыны турттэ кадь. Но синтэм, чут адямилы аслыз юрттэт кулэ ук. Кин со сярысь сюлмаськоз? Кин? Ваньзэ сое Насьта зӥбломыны кутскем мугорыныз но визьмыныз вала, пурысьтам тушо картэзлэсь бамзэ вылысьтыз вылаз чупаны ӧдъя: - Ӧвӧл, асьмеос, Ондрей, винамат ӧвӧл. Малы со асьмеды такем вӧсь каре? Митрейлы гинэ оскон кылемын на. Со гинэ асьмеды медам кушты вал. А то этеед мар дауртӥз ведь, мар дауртӥз?! Номыр солы кулэ ӧз лу. Уксёмы, пе, лыдъянтэм луоз, адями сямен улом. Улӥм. Как жо. Уксёез но уг адӟиськы, ачиз но тюрьмаязы сисьмоз ни. Солы но оским ук. Сое но асьмеос будэтӥм. Страм. Вот Митрей... - Насьта кузпалыз дорысь палэнскиз, укно пала сётскиз. Малпалод: укноетӥ пиштӥсь шундылэн но Митрейлэн кужымзы одӥг кадесь, кыкназы соос ӝуйӟыны шӧтам мылкыдъёсты шунтыны, улонысь сайкытсэ но чеберзэ сайкатыны йӧндыро. "Эх, адями сямен улыны пӧрмыты вылэм! Та люгыт шундылэн котькуд сайкамезлы шумпотыны, артысь нюлэскысь бурдоослэн чипсэменызы-сайкаменызы кӧттэ тырыны, - Лангыр Насьталэсь бамзэ синкыли шапыкъёс суто но суто. - Сиён сярысь малпаськиськод. Пинал дырысеныд со сюлмаськонъёслэсь бадӟымъёсыз, оло, ӧз ик пумиськылэ..." Пинал дыр суредъёс вунонтэмесь. Соос ваньзы буёласькыса син азе пуксё но кайгырыто, малпаськыто, куректыто. Атайзэ но тани ньыль аресъем дыръяз сяна ӧз адӟылы. Озьы ке но, йырвизьмаз ук со, сюлэмаз. Пурысьтаны кутскем тушеныз бамаз йӧтске но мусояса вазе кадь: - Музонъёсыз пыдъяськизы ни. Тон гинэ кылид, Насьтоке, - осконэ но сюлэм висёнэ. Семон но, Коли но асьсэды вӧсь карыны уз сётэ ни. Кӧтсы сюмалоз - ужалозы, шумпотонзы тулкымъяськоз - эктозы-кырӟалозы. Нош тон пичи на, укыр пичи. Марысь- мар ке... Ӵапак со "марысь-мар ке" ик вуиз угось. Секыт адӟонъёссэ шӧдыса вера вылэм бубиз. Насьта вордскемлэсь азьло ай - Лангыр Оддоким - атаез кутсаськон машина заводьыны йӧндырем. Валэз, кык скалэз вылэм. Со дыръёсысь мертэтъёсъя - кулак. Но ваньзэ со ас киыныз, визьмыныз лэсьтэм-люкам. Бен, бен, визьмыныз но. Ӵапак соин мудрон кушем нимыз но бордаз сир кадь лякиськем. Гурт кенешын вераськон уг кельшы ке, чалмыт пукыны уг чида ни, пе, вал. Ӵыжектоз, интыяз дыгыр тэтчаны шӧталоз, бератаз ини вань калык азе потоз но малпанъёссэ кобыысь музэн пальккоз вылэм: - Та Лангыр нош ик лангыртыны кутскиз кадь. Вераськонэз часлы но, кыклы но нуйтӥськоз... Гуртазы колхоз кылдэм бере Лангыр Оддоким ымаз ву ӟузем кадь луэм. Арня ортчем, кык. Собере ини валзэ но, скалъёссэ но колхоз гидэ валтыса шуэм: - Мон но со колхозады пыро-а, мар-а ни. Сотэк нерад кароды ведь. Тодӥсько. - Нош малы "колхозады" шуиськод? - ымдурзэ кырыжтэм колхоз тӧрозы. - Тынад мнениед умойтэм, Оддоким, безответственной. Вылаз ик, кутсаськон машинадэ ватыса кельтэмед потӥз-а? Уз пӧрмы! - Ма, со машинаме гозыен думыса гинэ валтыны уг лу. Секыт но дуно маке, - малэсь ке куалектыса музэн, воргорон ӧс пала чигнаны кутскем но ульчае вамыштонъяз ни вазем: - Мон маке шуисько-а, мар-а, кулэ ке, басьтэ, - итымын сылэ. Лангыр Оддокимлы лангыртонэн йырин луымтэ ни. "Шонер линиез" валан сюресэз секыт но, курыт но вылэм. Колхозчиослэн люкаськылон интыысьтызы ӧсэз йыг! пытсаса потыкуз, тӧролэсь верамзэ кылэм на: - Юаса улом кожад, дыр. Ми киын - власть. Мар лэсьтэммы потэ, лэсьтом. Йыбыртъяса ум улэ. Озьы кутсаськон машиназэ талаллям. Нош сое ужатыны моӵсы сузьымтэ. Тӥямзы бере ик Оддокимлы асьсэос йыбырттоно луиллям. Воргорон кыл-куара верамтэ. Итыме мынэм. Со ик луэм колхоз уже кыткиськемез. Трос аръёс ӵоже озьы тыршем. Ма, гуртын куке-соку уж бырылэ-а? Тазалыкед гинэ медло. Пельпумдэ куасалтыны, мугордэ губырскытыны уж сюроз. Сӥзьыл но толалтэ итымын ужам, тулысэн-гужемзэ - лэсьтӥськонын. Со сӥзьылэ но Оддоким колхоз итымын ю кутсам. Ваньзэ тае Насьта мумизлэн мадемезъя гинэ тодэ. Озьы ке но, зэмос суредэн син азяз пуктэ но, мугорыз ик пӧсьвуаське, быдэс вылтырыз ньӧрен шачыръям кадь луэ. Итыме вуттэм ӟегез нуназеозь кутсаллям но тысьсэ артысь кеносъёсы нуиллям. Оддоким итым вӧзысь зӧк кор вылэ секытэн лэзиськем. Кема, туж кема со кор отын кыллем ни, шӧдске: улӥ люкетэз музъеме согиськем, сисьмем, нош вылӥыз ужась муртъёслэн беръёсынызы чилятозь волятэмын, улвай бервылъёсыз но уг адӟисько, пилиськем путэтъёсаз тузон но макня тулляськем-измем. Артэ сылӥсь лянэсысь ву юыса, Оддоким назьыльскиз, синъёссэ шунды шоры чӧлтӥз: нуназеозь дыр вань на, нош ю ворттӥсьёс малы ке уг возьматско. Озьы ни со: я ужен ӵоксузиськод, я кӧттэ вӧлъяса пукиськод. Дораз матэктӥсь муртэ адӟыса, Оддоким корез бордысь юзырак луыса ишкалскиз. Чиед но шача кадь кузь воргоронлэсь дораз лыктэмзэ чал-чал витиз. Матаз вуэм муртлэн киысьтыз сурыкмем ку портфелез синйылтыса, ымдурзэ пальпотон кырыжтӥз. "Портфель" лыктэ бере, уж донгиськоз. - Шунды шорын пыжиськом? - Оддоким шорысь синзэ вошъятэк вазиз Павол. - Генеральной линиез сӧриськом? Ужаны кулэ. Ас хозяйствояд озьы ӧй дауртысалыд. Тодӥськом ми тӥледыз, кулакъёсыз. - Тузонэз тӧлоно ке шат? - мукетъёсызлэн кузяназы ветлымтэ Оддокимлэн серемез потӥз. - Вань кутсамзэ кенсы келям ини. - Нош райкомъёс отчёт куро, - райкомлэсь вылӥын луэмзэ возьматыны тыршыса выллем, колхоз тӧро векчи, кузь азьчиньызэ шунды пала урдӥз. - Вылаз ик, сигналъёс, пе, вань. Нянь тӧлъя-буръя кошке, пе. Районысь агрономез ыстӥллям. Нуназе бере Сялбер бусыысь ю ворттозы. Со агроном ваньзэ лыдъяз-чотаз ни. Бусылэн шорысьтыз, значицца, золгес усьыны кулэ, сюрес дуръёсысь - ӧжытгес. Килоен-килоен чотамын. Ӧз пот ке, мотри. Заготовка планэз тӥяны нокинлы лэземын ӧвӧл. Ӝытазе ини, кутсам ю тысез мертаку, Оддокимлы серекъянэн-пальпотонэн йырин ӧй вал. Вес доры секыт мешокъёсты нуллонъяз керӟег малпанъёс быдэс мугорзэ шияллязы. Адӟе угось: мертамтэ тысь гурезь пумен лапкагес но лапкагес, нош дас куать центнер дорозь (колхоз тӧро сыӵе лыдпус сярысь поттылӥз вал) туж кыдёкын на. Тыр мешокъёсты вес дорозь нуллыны кынарыз ӧз окмы ни, пыдъёсаз пудъем гираос думылӥзы, кожалод. - Лушкад?! - кырныж музэн кроккетӥз Горд Павол. - Сигнал шонер вылэм. Кулак сямыдлэсь куштӥськымтэед. Центнер но ньыльдон куинь кило уг тырмы. Лангыр Оддокимез со килоосын йырин пуктӥзы. 1938 арын сӥзьыл вал со. Вылаз ик, властьёс сярысь умойтэм вераськемзэ но судын тодазы ваиллям. Ма, Горд Паволлэсь юылэмзэ солэн верамезтэк но гуртын чипыен куреген шуэм сямен тодо вал, но мукетъёс кылзэс серметын возён сярысь вунэтӥллямтэ, Оддоким тӥни лангыртон сямзэ вормыны ӧз йӧндыры. Со зоро сӥзьыл Лангыр Насьтаез атайтэк кельтӥз. Бубизлэсь туссэ-буйзэ син азяз пуктыны со уг быгаты ни - ӵогыр-ӵогыр сьӧд тушсэ ке шат. Семьяеныз люкиськыкуз но угось Оддоким пичи нылызлэсь бамзэ льӧль-горд ӵыжектымон чупаз. Зу выллем чурыт тушлэсь вӧсь каремзэ но мусоямзэ Насьта али ке но быдэс ымнырыныз шӧдэ кадь. Тужгес но - со секыт дыръёсты тодаз вайыкуз. Милицаын ужась лякыт сямо вылэм, лэся. Вал серметсэ сокугес гинэ инъям капкаысь кульчо борды керттэм но корка йыгаськыса пырем. Нокин вазьымтэ. Паймем милица ӧсэз усьтэм но кызъем, собере гинэ куаразэ поттэм: - Коркан кин ке вань-а? - кышнопалась потӥсь лапкыӵес мугоро, вакчи тушо воргоронэз адӟыса ни ватсам: - Тӥ бон Загумённов ӧвӧл-а? Мон Палиысь Колыс Педор, - ӵыжектыса но кӧбераса шуэм лыз галифе штанэн мурт. Та кылъёсты веран секытэн сётскемен, лэся, пӧсям кымессэ ӵушалтоно кожам. Бур киыз милиционер кокардаез борды йӧтскем бере быдэс мугорыз зугырак кариськем но золскем, куараез олокытӥ-мартӥ чурытомем. - Кык толэзь гинэ милицаын. Николаев Фёдор мон. Значицца, тӥледды нуыны лыктэмын. Доръёсыныды люкиськелэ. Укыр кема эн. Сьӧрады лишнойзэ эн басьтэ. Талалозы гинэ. Нош мон кырын возьмало. Нуназе котырын гинэ Лангыр Оддоким пытсэт сьӧры нуисез доры потэм. Нош соиз кыл- куаратэк возьмам. Шимес кайгу шоры ӝимем муртъёслэсь мылкыдъёссэс валам угось. Бадӟым, чебер тарантас уробое ныпъет мешоксэ интыянъяз ини Оддоким пӧсьйыл шуиз: - Сюанэ сямен мыном. Тарантасад чингылиосыз гинэ уг тырмо. Оддокимез Нӧднюк починка гуньдыса сямен келяз. Кузпалызлэн бӧрдэмез кема кылӥськиз на. Нош бускельёсыз потыны но кӧберазы. Умой адямиез утьыны моӵсы ӧз сузьы угось, дӥсьтонзы-а ӧз тырмы. Табере тани со сьӧлыксэс понназы сюпсьыны но валаны тыршо. Нош Горд Павол сыӵеос пӧлысь ӧвӧл. Милиционерен Оддоким правление дортӥ ортчыку, тарантас доры юромо потӥз но ассэ буйгатыса сямен шуиз: - Генеральной линия сыӵе. Кин милемын ӧвӧл, со - тушмон. Небыт уробоын пукисьёс пумитаз номыр ӧз вазелэ, кылымтэ улэ аналскизы кадь. Возиськиз, чидатскиз Оддоким. Лангыртон сямзэ кортназ. Шӧдӥз уго: сюлэмаз тымиськем вань пӧсьсэ но кезьытсэ пальккиз ке, пайдаез уз лу ни, номыр уз воштӥськы, семьяезлы гинэ урод лэсьтоз - ваньмыз со кузпалзэ но, нылпиоссэ но тӥр обыкен музэн шуккоз, сотэк но секыт улонзэс уката шугомытоз. Колыс Педор кельыт валзэ уг дыртыты. Вӧзаз пукись нюромем синмо воргоронлы дор палъёсыныз рос-просгес люкиськыны луонлык сётэ. Сялбер бусы вӧзтӥ ортчыкузы ни Оддоким ӧз чида, милицалэн кӧтурдсаз гырпумыныз мырӟиз но шуиз: - Дугдыты ай. Лангыр Оддоким кузь вамышъёсын бусые вырӟиз, сюрес дурысь вукырем вамен но сёр музэн тэтчиз. Шуак луэменыз, милицалэн бур киыз соку ик кобураез доры сузьтӥськиз: пегӟыны уг-тэ малпа? Нош бусые вуэм мурт со виын пыдес вылаз лэзиськиз ни. Тани мыкырскиз, киосыз куро ӝыжыез маялляло. Ачиз маке кыла-бура, верамзэ милиционер уг кылы. Огшап ортчыса, Оддоким кисыысьтыз ныркышетсэ поттӥз но бусыысь одӥг кырым тыр сюез отчы керттӥз. Султӥз, пыдессэ курткиз но сюрес дурысь утялтытэк кельтэм ӟег шепъёсты ишкыны кутскиз. Собере выльысь бусы пала берытскиз но кирос тырыны кутскиз, Фёдор Николаевлы кылӥськымон шуиз: - Быдӟым Инмаре, та Сялбер бусыме выльысь адӟыны сёт. Доръёслэн ваньмыз умой медло... Озьы лэсьтэмез бере гинэ милицалэн тарантасаз секытэн лэзиськиз но вазиз: - Кельтӥллям ведь. Нош монэ ке винамат каро. - Мар сярысь тон? - паймыса юаз милиционер. - Ӵап та шепъёсын йырин пукто ук. Ӧз тырмы, пе, - лушкаськиськем. - Нош тон сое ик вешаськод? Музъемез, шуисько. Сьӧрад но басьтӥд на. - Ма, со музъем ук, дор музъем. Кыедасалыд ке, ӟеч кузёез кылдысал ке, та пичи музъем кесэгысь центнер гинэ басьтысалыд-а? Сизьымзэ но, тямыссэ но. Кызь одӥгетӥ арын кадь кӧс ӧй вал ук. Вот соку музъем но, калык но курадӟиз. Такыр кадь пилиськылэмын вал. Нош али ӵошатонэз ӧвӧл, ужа но ужа. Музъем ведь йыбырттэмез яратэ. - Соингес но арми бере милицае донгиськи. Йыбыртъяме ӧз пот. Нош ачид сярысь ке, директива сыӵе вал, дыр. - Кыӵе-сыӵе директива?.. - Ма, нянь басьтонъя план тупато ук. Милям но озьыгес. Э-э, укыр трос зулисько ни кадь. Та вакытэ ымез серметын возёно, - вераськонзылы пум вуэмез возьматыса кадь, Николаев сюлоез борды кутскиз. - Но-о! Красавчик, давай ӝоггес!.. ...Пинал дырысеныз куректыны кылемзэ, улытозяз зэмлык утчамзэ тодаз вайыса, Лангыр Насьта сюлмыз чигиськыса ик кузь нёжтӥз: - Пегӟи-из... Уг адӟиськы... - Пимы сярысь-а тон? Нюлэстӥ гинэ котырско шуиз кадь ук, - паймыса йырзэ ӝутӥз Ондрей. - Бертоз ни, дыр... Тушез но мычоно вал. А то Дима паймоз. Бритваме вай али. - Пимы шуиськод... - Лангыр Насьта ӵоксузьыса кадь гуньдӥз, айшет пумзэ дырекъясь киосыныз посыны кутскиз, нош бамзэ сутӥсь синкыли шапыкъёсты ӵушалтыны ӧз дырты, тодэ ваёнъёсыз угось соослэсь но курытэсьгес вал. Огшап чус улэмез бере ни сайкытамгес мылкыдын шуиз: - Нош Ленамы кыӵе шумпотысал! Пиез дышетскиз - адями луиз. Шайвылазы ветлоно. Митрей но муминыз мед адӟиськоз. - Мон но сьӧрады мынысал... Ох, Лена, Лена-а-а!.. - нылызлэсь нимзэ кузь-кузь нёжтэмез бере Ондрейлэн веранэз чутрак уриськиз. Со вие ульчаысь ыбылэм куараос кылӥськизы. Насьта куалектыса укно доры бызиз. Кыӵе ке киноын сямен, быдэс корка пуш лыз, вож, горд буёлъёсын лопыръяськыны кутскиз. - Нош ик шулдыръясько, дыр, - вазиз Ондрей. - Ракетаос лэзьяло. - Соос ке уксёзэс кытчы поныны ёрмо, тон ке куалекъяса пук. Пень вылэ кельтозы, - ӧс пала дыртӥз Насьта. Город сизьым вырйылъёс вылэ интыяськемын. Олокыӵе но фирмаослэн кузёоссы берло дыре туж йӧспӧртэм сям пыӵатыны кутскизы. Вордскем нуналазы я мукет учыръёсы соос фейерверкъёс ортчытъяло. Пӧлазы аспӧртэм ӵошатскон но ялӥзы: кинлэн фейерверкез ӟечгес, тузӥгес луоз. Сыӵе люкаськонъёсазы эшъёссэс, туганъёссэс ӧтчало но со пуштытъянын кӧня коньдонзэс тӧлъя-буръя лэзьыны чакламзы сярысь данъяськыса верало. Город шорын фейерверк шуонъёссэс ортчытъяны уг лэзё, соин, лэся, татысьсэ вырйылэз кельыштыризы. Лыктэм муртъёс шулдыръясько. Ыбылӥськонзы куддыр уйшорозь но кыстӥське. Отчы ик ӝӧк пукто. Сиё, юо, экто. Пиналъёс уллёяськыса-уллёяськыса сыло, фирмачъёслэн улыны быгатэмзылы вожъясько. Нош артэ юртъеръёсын улӥсьёслы шулдыръяськонэн йырин ӧвӧл. Ведра вузы доры матэгес султо но котькуд ыбем бере соослэн кӧдэктэм, шулӟектэм ымныръёссы югак луыло. Кышканы мугез вань угось: кылем гужем одӥгез ракетазы, инбаме ыбыштӥськем интые, бускель юртъерысь куроен шобыртэм липет лапас вылазы вуэм... Ракета ыбылон интые шулдыръяськонэ сямен вуэм кузёос юртъерзылэн бервылысьтыз эгыр но пень азе шулӟектыса бызёно луиллям. Ӵапак со дырысен татын улӥсьёс юртъеръёссэс утён сярысь уг вунэто. Выль ыбем куара соосты вуэн ведраоссы но луоен ларъёссы доры ыбыштӥськыны ӧтён выллем луэ. Лангыр Насьталэн но сямаз-вираз ваньмыз та мур пыӵамын ини. Ыбем куара кылӥське гинэ - со вуэн ведраез дорын ни. Нош Ондрейлэн пайдаез со выллемгес. Сукыр кылем пересь сое ачиз но вала. Ыбылэм, пуштытъям куараосты кылэ ке, маке муг шедьтыса, дораз кыльыны амал шедьтэ. Туннэ но тани тушсэ мычоно кариськиз. Кыӵе синучкон, кыӵе тыл кулэ луоз сукыр муртлы? Киосыз йыгыръяло - ярам ини. Нош электробритвазэ кыӵе ке пятилетка йылпумъяськемен валче кузьмазы вал. Усто тыршемед понна, пе, Андрей Петрович. Йӧн арбери вылэм. Тужгес но - сукыр муртлы. Но таяз учыре солы тушсэ йӧн-йӧн мычыны ӧз кылды - люкетӥсь луиз: Димазылэн паймысагес юамез кылӥськиз: - Атай, кырын шулдыръясько, нош тон... Вылаз ик, пеймытын. - Мыным котьку уй, Митреюшкае, - ӝожмыт, соин ӵош ик керӟеггес вазиз Ондрей. - Анаед азбарын лутка-берга, дыр, ни. Маиз ке медам сутскы, - вераськонэз мукет ӧре выжтыны турттыса музэн, со, электробритвазэ кысыса ини, киыныз ульча пала шонтӥз. - Мон сое адӟи. Супырӟыны кутскем корказэ ас лул-сюлэмыныз утьыны тырше. Нош мае утёнэз на? Ваньмыз сисьмемын: со ке ведраез дорысь вамыш но лэсьтыны уг дӥсьты, - серем пыр вазиз Дима. - Котькуд адямилы аслазэз, ас киыныз лэсьтэмез дуно, - пырем муртлэсь серекъян- мыскыллян мылкыдзэ валаса, ӝожомысагес шуиз Ондрей. - Нош кинъёс озьы даурто? Уй но ӧвӧл ук, - соос ке фейерверк каро ини. Малы сокем шумпото? Праздник но ӧвӧл кадь, - паймем куараен шуиз пиез. - Новосибирскын но тазьы ыбылӥзы... - Кисызы зӧкен шулдыръяськыны муг шедьто, дыр. Улон озьы кошкиз ук: кинлэн уксёез трос, со ик законъёс кылдытэ. - Атай, тодӥськод-а, мон но сыӵе праздник ортчыто. Муг сюроз, одно ортчыто. Соос гинэ-а шулдыръяськыны кулэ? Асьмеос маин пӧртэмесь? Малы мон институтын дышетски? Атаез номыр ӧз вазьы. Мур лулӟиськиз гинэ. Мар вераны паймыса, лэся, туш мычонзэ ик уретӥз, пиезлэн задор, аслыз оскись куараез пала дыртӥз но шуиз: - Мед луоз озьы, мед. Нош али анаед доры потом. А то юртъерез сутыны шедьтозы. Кык адямиослэн синъёссы лэчытгес адӟо, дыр, нош мон мар? Не то адями, не то... - секыт лулскиз воргорон. Дима сьӧры Ондрей ӧз дырты, ӧс выжыысь пукон вылэ ланьырскиз. Сюлэмзэ лэчыт маин ке бышкалтӥзы кадь. Куасалскиз, шымырскиз, тышкам пуны музэн нискетон калэ вуиз. Покчиез но школаын дышетсконзэ быдтэмез бере ӵапак сыӵе малпанъёсын ик сюдӥз уго: "Мар со уксё? Туннэ ӧвӧл, ӵуказе быдэс гурезь луоз. Дышетскемлэн ке пайдаез ӧвӧл. Институт быдтэмъёс но ужтэк пуко. Нош мон - пӧрмыто. Мынам киосы шудоесь"... Пӧрмытӥз тӥни. Пытсэт сьӧры вуиз. Таиз но табере озьыгес ик кырӟаны шӧтаз. Фейерверк, пе, ортчыто. Едэ пертчылыса, ӟеч-ӟеч шлачкытъя вал но бӧрдыны эн сёт. Вань шузи малпанъёссэ йырысьтыз пызьырты. Нош кызьы?.. Ондрей сукыр кылем синъёссэ киосыныз зыра, посэ - соосты усьтыны турттэ кадь. Буш кылем коркан солэн ӝуштэмез кылӥське. Бератаз ӧз чида ни, кужмо черектӥз. Но воргоронлэсь куаразэ ульчаын ыбем ракеталэн куараез согиз-ньылӥз. 3 Чебер-а со ӧй вал, визьмо-а, шудо-а?! Андреевъёслэн одӥг гинэ нылзылы Инмар ваньзэ жалятэк кисьтэм-сётэм. Ленаен котькуд вераськемзы сярысь тодэ ваён Насьтаен Ондреез али ке но шунтэ, соин ӵош ик уката мур кайгырытэ. Шумпотон котькугес ик пачылгес но вӧл-вӧлгес луыны кулэ. Нош егит Андреевъёслэн вань ӟечез сярысь малпанъёссы Ленаен герӟаськемын вал. Нылзы вордскем бере ар- кык ортчыса, Ондрей амалын но амалтэк вераськон поттылӥз ик: - Андреевъёслэсь выжызэс азьланьтӥсь но кулэ ни, дыр. Ленушкамылы огназлы мӧзмытгес йӧтэ кадь... Ӧз пӧрмы. Мар карод на? Лакокраскаын нуналлы быдэ йӧл юнме уг сётъяло вылэм. Со йӧлзэс Насьта ваньзэ ик ачиз юысал, дораз ӧй нуллысал, но... кызьызэ-марзэ ӧз тод уго. Гырпум матын, нош сое куртчыны уг луы. Бератаз ини врач Насьтаез ӧжыт гинэ пыд йылысьтыз ӧз погырты: - Тӥляд, Андреева, нылпиды уз лу ни. Тани мар ватсасал на: луонлыкты вань ке, уждэс одно воштыны тыршелэ. Тӥни соин егит анай вань сюлэм шунытсэ Ленаезлы сётӥз. Ӧвӧл, ӧз эркия, кузяназ сокем ӧз ветлы, но нылызлы пӧртэм амалъёсын юрттыны тыршылӥз. Пинал дыръяз куинь пол-а, ньыль пол-а Нӧднюк починкаяз нуллӥз. Сялбер бусые но вуттылӥз. Зэм, табере сое Лангыр бусы шуо ни. Нӧднюк починкаос Оддокимлэсь та бусыен йырин сокем бадӟым шугадӟонэ вуэмзэ но, дор палъёсыныз сюлмыз ишкалскымон ик бӧрдыса люкиськемзэ но адӟытэк кылиллямтэ угось. Ваньзэ сое малпаса, гуртоос пичигес гинэ бусызылы сыӵе выль ним лякиллям. Насьта мукетыз сярысь но сюлмаськиз: гуртаз вуылыса, нылыз ас выжыоссэ ӟечгес мед тодоз. Валамон, выжыоссэ рос-прос валаса ӧз вутты, нош удмурт сямен вераськыны дышиз. Отысь огъёзъёсыз угось огзы но ӟуч сямен ӧз вераськылэ. Арня куспын Лена удмуртомиз. Гуртысь пересь кышноос чабкиськыса юало: - Ма, тӥ, Насьта, дорады удмурт сяин уд вераськиське-а, мар-а? - Малы озьы юаськод, ӵужапай? - ӵыжектӥз Насьта. - Ленаед бон татын гинэ анай кылзэ поттылыны кутскиз кадь но... - Нылмы медам вала шуыса, Ондрееным пранцуз кылын гинэ бӧтьыртӥськом, - ӵужапаезлэсь паймеменыз молькак шораз учкемзэ валатскыса ни ватсаз: - Ку гинэ бон адӟиськом ми сое? Ӝытъёсы. Жадьыса ужысь бертӥськод. Сиён пӧрано, дӥсь миськоно... Ондреен, конешно, удмурт сяин ик вераськиськом но - пайдаез ӧвӧл ук. Нылмы садике ветлэ. Ялан ӟуч нылпиос пӧлын. Соослэсь ик дышетске. Ярам коть, татысь пиналъёс бордаз басьтӥськизы, мурт ӧз карелэ. - Соиз но бон озьы ни, - киыныз шонтӥз пересь кышномурт. - Кӧня пиналъёс ас кылзэс вунэтыса будо. Колӟо Микаль но центральной усадьбае улыны выжиз но - пиез ӟучомиз. Мар ини городъёсты веранэз. Нӧднюк починкаын уськытэм кидысэз Лангыр Насьта утьыны, тэлеӟытыны тыршиз. Леназы удмурт сямен но, ӟуч сямен но огкадь усто вераськись луиз. Дышетсконэз но усто ӧръяськиз. Покчи классъёсын дыръяз старостаын возизы, бӧрысь ни комсорг каризы. Лангыр Насьта дышетскись пиналъёслэн анай-атайёссылэн кенешъёсазы празднике сямен ветлылӥз. Кинлы бен уз кельше ас нылыд сярысь верам ӟеч кылъёс?! Лена ваньмаз вутскыны, аслэсьтыз пытьызэ котькытчы кельтыны дыртӥз. Улонэзлэсь сокем вазь уриськонзэ сюлмыз шӧдӥз, дыр. Кисьтон ӧвӧл ке но, Хохряки дорысь шайвылын одӥг-ог адямиос адӟисько. Соос ӝож тусоесь, лачмытэсь, зӥбытэсь. Куазь шундыё ке но, татчы вуэмъёс пильмаськем мылкыдоесь. Пумитазы шедемъёс шоры сокем уг учкыло, ваньзыгес ик асьсэ матысьёссылэн шайгуоссы доры дыртытэк вамышъяло но сояз дуннее кошкемъёсты син азязы пукто, вылды, соосын кенешо. Та кенешонын мукетъёс мултэсэсь. Лангыр Насьта но уг дырты. Сюбег асфальт сюрес вылтӥ уг - омыретӥ лэймыт вамышъя кадь, нош мугорыз куасалскемын, губырскемын. Секыт ныпъет сое уг зӥбы - азьвылэз сярысь тодэ ваёнъёс музъемлы матэгес каро. "Со Эграысьтызы чугун сюрес вамен выжонзы ӧй луысал ке, эмеспи руль возёнэзлы йӧнгес дышетскемын луысал ке, - олокӧня "ке" шуонъёс Насьталэн йыраз огез бӧрсьы мукетыз кылдо, нокыӵе валэктонъёстэк шайвыл омыре выё, - со берпум сюресазы сокем-сокем ӧй дыртысалзы ке..." Школаын дышетсконзэ йылпумъямез бере Елена Андреева туж капчиен пединститутэ дышетскыны пыриз. Отын но сое группазылы старостае бырйизы. Пыриз пединститутэ - йылпумъяз университетэз. Ӵапак со дыръёсы угось данак институтъёсты я университет, я академия карылӥзы. Вадесэз сыӵе вал, шуод ни табере. Географилы дышетӥсь луиз. Студент аръёсаз ик механикая институтысь студентэн тодматскем. Группаоссы эшласько вылэм. Гуртын будэм Сергей Перевозчиков ӵем гинэ Андреевъёс доры вуылыны кутскиз. Нош бӧрысь ини, диплом басьтэмзы но уже интыяськемзы бере, пиен ныл кузпалъяськон сярысь вераськонэз мытӥзы. - Сыӵе дыр но вуиз, уске, - пальпотӥз соку Ондрей. - Кылды тупа бере, ми пумит луом шат? Сюандэс бон ресторанын-а, кафеын-а ортчытом? Туала вакыт озьы лэсьто кадь но... Моӵмы сузёз. Одӥг нылмылэн сыӵе нуналэз вунонтэм мед кылёз. Лангыр Насьта та вераськонэз чал-чал кылзыны ӧз чида, лопырскыса ик кышнопалась вуиз но "лангыртыны" кутскиз: - Ныл курантэк но-а? Сергейлэн анай-атаеныз коть тодматсконо вал. Кызьы сотэк? Ваньмыз удмурт сямъёсъя-йылолъёсъя медло. Студент дырысь эшъёстэс удмурт сюанэ ӧтьыны кепыраськоды шат? Городын ке но улӥськом, калыклэсь пӧртэм ум ортчытэ... Кузь но секыт та шайвыл сюрес. Воргоронъёсыз азьын вамышъясь арлыдо кышномуртлэн я быдэсак мугорыз пӧсьвуаське но сутске, я шуак, азьвылысьтыз ӟечсэ тодаз вайыса, ымдур пумаз пальпотон гизьыез улӟытске. Кызьы тани гуртысь дышетӥсьёслэсь, Сергейлэн анай-атайёсызлэсь, Андреевъёс доры нырысьсэ лыктэмзэс пальпотытэк тодад ваёд? Сергейлэн мумиз, Анастасия Леонтьевна, лапег но веськрес мугоро кышномурт, ӧс выжыын огшап лёгаськиз-лёгаськиз но шуиз: - Ми тӥ дӥне туж бадӟым муген лыктӥм. Порозмы будӥз но... Доразы вуоно сватъёсызлэсь пыремзэс валатскем Насьта паймыса ымзэ усьтӥз: - Поро-оз! - Ма, ныл кураны ветлэм ӧй вал но... - уката ӵыжектӥз Анастасия Леонтьевна. - Та ужлы дышем муртэ сьӧрамы ӧтиськом вал - ӧз пӧрмы, ӵужодӥгмес Украинае куро дасяны келязы. Тӥ палъёсъя ке, ош луэ, дыр... "Бон" палъёс но "бен" палъёс ог-огзэс ӝог валазы. Ӝӧк вылэ ӟенелик вуэм бере кемалась тодмоос кадь луизы. Сюан но усто ортчиз. Нокыӵе ресторанъёс, кафеос кулэ ӧз луэ. Лангыр Насьта тыпак дугдӥз. Мышказ Ондреез кунултыса мынӥсь Дима ӧжыт гинэ анаез борды ӧз мырӟиськы, одӥг вамышлы берлань чигнано луиз. - Вуим-а? - валатскиз сукыр кылем воргорон. Корт кенер сьӧрысь огкадь памятникъёс шорысь Насьта синъёссэ ик уг вошъя. Тулыс кисьтонэ но, бӧрысь но со татчы вуылӥз. Соку мерттэм сяськаосыз тӧлӟиллям ни. Пичияк капкаетӥ котыртэме пыризы но, Насьта огшокчемен кадь шуиз: - Вуим тани... Пумиталэ... Пиды но лыктӥз... Дышетсконзэ быдтӥз. Атайды но вуиз. Олексей гинэ ӧвӧл, - гуньдэм кадь дугдӥз, собере гинэ валэктоно кожаз. - Ӧз пӧрмы. Ӧз удалты. Асьмеос винаматэсь, дыр. Сьӧраз ортчымон эркиям уго. Вылаз ик, улон но со порма луыса кошкиз. Воргоронъёс чал-чал сылӥзы. Котькудӥз ас малпаськонъёсаз выемын-гуаськемын. Дима мемейзэ-тятязэ син азяз рос-прос пуктыны но уг йӧндыры ни. Мумизлэсь мильымен сюдэмзэ ке шат. Солы садике дыртоно, нош анаез весь пыжиське. Садикын пизэ уз сюдэлэ кожа, лэся. Тятязэ ке верано, солэсь шурдэмзэ тодаз вае. Ужысьтыз бертэмез бере котькуд ӝытэ вылӥе-вылӥе ӝутъялляз угось, вӧлдэтэ йӧтымон. Дима кышкаменыз бӧрдэ, нош со ялан гы-ы! каре, пальпотэ. Кыӵе вал со мугорын, ымнырын - созэ син азяз нокызьы пуктыны уг быгаты. Сайкыт ымныро, шоре меӵак учкись но пальпотӥсь кышномуртлэн, суд йырсиё, паськыт кымысо но маке сярысь кунэрскыса малпаськись воргоронлэн гранит памятник вылысь туспуктэмъёссы шоры Дима паймысагес учке. Соос кыкназы мусоесь но матынэсь, соин ӵош ик нокызьы сузьтӥськыны быгатонтэм кыдёкынэсь кадь. Кин тодэ, оло, соос ялан артэ. Янгышъёсыд пумысен ӧпкелё, вормонъёсыдлы шумпото. Кулэ дыръяз юртто но. Бен, бен, юртто. Институтэ пыронэн ик тани кызьы луиз. Солэн одӥг баллэз ӧз тырмы. Мар карод? Ӟеч лу, Новосибирск, шуыны дасяське вал ни Дима. Сумкаяз дӥсьсэ-кутсэ тыриз, документъёссэ берен басьтыны мынӥз. Нош приёмной комиссиысь нылашка сое деканатэ келяз - собеседование луыны кулэ, пе. "Мар бен, архитектураысь дано тодосчиосын пумиськом но люкиськом, Ижкаре бертом. Улон возьматоз ай..." - мылкыдтэк малпаз егит пи. Жум тусо, восьтэт мугоро воргорон деканатысен сое ӧжыт гинэ пыд вылысьтыз ӧз погырты. - Так, та-ак, Дмитрий Перевозчиков. Озьыен, ватскемен шудӥськом? Институтэ пырыны кужмысь келязы-а, мар-а? - юан бӧрсьы юан палькке тодосчи. - Малы кужмысь? Мон ачим. Но ӧз пӧрмы тани, - мылкыдтэк вазиз Дима. - Мукетъёс ке ӧвӧлтэмзэ но вань каро, льготаос утчало. Нош тон ваньзэ но ватӥськод. Автобиографияд малы ӧд пусйы, анай-атайтэк кылемын шуыса? Ярам, анкетадэ учкыны шедьтӥ. - Ма, мон песянаен песятай дорын, - дыго-мого валэктыны тырше абитуриент. - Соос будэтӥзы. Анай но атай интыын. - Валамон. Мон ачим но озьы будэмын. Туннэ нуналысен тон - студент. Юанъёсыд вань на-а? Тӥни кызьы но луэ вылэм улонын. Со сярысь вераны умой ӧвӧл ке но, Дима ӵапак та адямиосын йырин студент луиз... Ондрей дорысьтыз шер поталля. Та кузь сюрес вылын со жадиз. Соин, лэся, соку ик пичигес гинэ ӟус вылэ лэзиськиз. Мугорыныз шӧдӥз: ӟус кукъёс сисьмыны ӧдъяллям ни. Кемалы мед чидалозы шуыса, зӧк пуклёкъёсты ас киыныз пуктылӥз вал. Нош дыр бызе тани. Номыр пыраклы ӧвӧл уга. Тодэ ваён гинэ йырвизьмез сэзъя, сюлэмез бугыръя. "Митреез вырӟытоно луоз, ваньзэ кулэезъя мед ладъялоз", - малпан куспаз Ондрей пыдесъяськиз, фарфор туспуктэмъёсты киыныз йыгыръяны кутскиз. - Э-э, нылы, нылы... - кыла-бура пересь воргорон. - Чебероке, визьмоке тон мынам. Географ кариськид, быдэс дуннеез адӟемед потӥз. Кошкид ук... Милемды кельтӥд. Эмеспие, Сергуне мынам. Инженер ке но вал, машинадэ поезд улэ месӥд. Тодысал ке, со машинаез воксё но кулэ ӧй карысал. Ӟеч улэ ни сопал дуннеяды, милемлы вождэс эн поттэ. Шӧдӥсько: кема ӧз кыльы ни - мон но дорады вамышто, - куараен бӧрдэ Ондрей. - Мар карод на, Ондрей... Асьмеды гинэ кельтысалзы ке, ярасал ай. Пиоссэс но ук, пиоссэс но-о... - Лангыр Насьта но кыланы-бураны шӧтаз. - Та шайгуослэн пыдсозязы ик синкылиосы вуизы ни, дыр. Э-э, нылы-ы, э-э, эмеспие-э!.. Сыл ай, доразы кошкон сярысь поттылӥд кадь. Эн ик малпа. Шайвылын озьы уг верасько. Пересьёсты буре ваё, соослэсь тазалык, шуд куро. Нош тон ке - мотри! Кытчы монтэк кошкод? Озьы ик кыштыр гинэ улыны тазалык мед сётозы. Митрейлэсь но Олёшлэсь ӟечсэс адӟыны мед кылдоз. Озьы шуыса куяськом али. Тани шаньги, мильым, кампет. Куяськелэ но ӟечсэ гинэ курелэ. Тон, Митрей, отӥ аракыез усьты. Шайгу вылэ но кисьтыны эн вунэты. Ачим но озьы ик лэсьто. Ӟеч карелэ, Лена, Серёжа, милемлы вождэс эн ваелэ. Нӧднюк починка шайвылысь пересьёс, анайёс-дядяйёс, тӥ но кунояськелэ. Ми ваньдэс тодамы возиськом но тӥледыз буре ваиськом. Шайвылэ вуттэм аракыез доре нуыны лэзьымтэзэс Насьта ӟеч тодэ. Тӥни соин чекушка гинэ басьтӥз. Одӥг чаркаысь ик черодэн юизы. Валамон, Димаен Насьта пичильтык гинэ веръязы но чаркаысьтызы кылемзэ шайгу муэ кисьтӥзы. Кылемез Ондрейлы донгиськиз. Пересь ӝог небӟиз, вераськись луиз. - Со куен улӥськом, Лена, Серёжа. Синтэм кылиськиз бере, кышно тани аракы сёткамысь но дугдӥзгес ай. Тӥ ке луысалды, монэ, пересь муртэ, ӧй вунэтысалды. Асьтэос тодӥськоды, пересьлы трос-а кулэ. Нош куддыр-куддыр ёзвиез ӧжытак небӟытэм но потэ. Шонер-а верасько, Серёжа? Тани тонэн но, эмеспи, ӵошен тамакаса пукылыны гинэ но ӧз кылды. Ӧд кыскы уго, ымад но ӧд тыры. Мон сыӵе муртъёсты, конешно, уважаю, туж уважаю. Тазалык быдтон, уксё кисьтон... Мар ай вераны турттӥсько вал, Серёжа? Тон отын тамаканы но, оло, дышид ни? Ме, жаль ӧвӧл, - Ондрей олокытӥ-мартӥ сигарет пачказэ поттӥз но ньыль тамаксэ шайгу вырйыл вылэ понӥз. - Кыскы. Ӧд дышы ке, отӥ пересьёслы сётод... - Воксё шуямезлэсь азьло доре кошком ни ай, - малпаськон дуннеяз выем кышномурт ӟус вылысь султыны дыртӥсьтэм кузпалызлэн бур суйыз борды кырмиськиз. - Шайгу вылысь жаг турынэз ури, Митрей котырак утялтӥз. Дор пала вамыштом ни. Я, пересьёс, я, Лена, Сергей, маиз ке-маиз ке тупатэм радъя ӧй вал ке, вождэс эн поттэ. Юри озьы ӧм лэсьтэ - йылолъёсты тодымтэысьтымы, - йыбырттӥз Насьта. - Кошком ни ми. Лулоосызлы улоно ук... Шонер вераз Ондрей, со машина ӧй луысал ке, оло, Ленаен Сергей луло кыльысалзы, пиоссэс асьсэос будэтысалзы. Квартира басьтон черодзэ Андриановлы сётэмез бере ог вить ар ортчыса ни вал со. Устоезлэн бригадирлэн номыр басьтытэк кылемез завод кузёослы умойтэмгес потэм, лэся. Ӵапак сокугес заводын ужасьёслы вузаны дас "Москвич" автомашина висъяллям. Соос пӧлысь одӥгзэ Андрей Петровичлы басьтыны ӵектӥзы. Бригадирзы басьто но, уг но ӧз шу, соку ик эмеспиез доры дыртӥз. Со семьяеныз соку нимаз улэ ни вал. Егит специалистлы, инженерлы, пичигес гинэ комната висъязы. Со квартираын куинь кузёос вал. Ёркыт ке но, тупаса улӥзы-вылӥзы. Дима бере ньыль ар ортчыса, Алёша вордскиз. Егит кузпалъёслэн сюлмаськонъёссы уката будӥзы. Андрей Петровичлэсь верамзэ кылэмез бере Сергейлэн бурдъёсыз кылдӥзы кадь. Тудӟем мылкыдзэ кышноезлы вера, нош Лена сотэк но ваньзэ кылӥз ни. - Дышетскыкум, тодыса кадь, право басьтӥ вал. Э-эх, ширтом, Ленуш! Доре но, Кам дуре но. Бӧрысь, пиос будэм бере, Сьӧд зарезь дуре но ас машинаенымы шонтом! Шонтӥзы тӥни. Машина басьтэмзы бере нырысетӥ шутэтскон нуналазы ик Эгра палъёсазы вырӟизы. Димаез песятайзы доры кельтӥзы. Черламез бере рос-прос ӧз катьяськы на вал угось. Пинал мугоре тулыс куазен оломаиз но биниське. Табере шуод ни: шудэз вылэм. Берло ини вань газетъёсын но, радиоын но Эгралан луэм со шимес учыр сярысь гожъязы-веразы. Одӥг газетысь гожтэмез Андреевъёс али ке но ӝикыт утё. Димаен Алёшалы но сое одӥг пол гинэ ӧз возьматылэ. Отын гожтэмын: "Чугун сюрес переездъёс - шимес интыос. Соосты чакласа возёно, инструкциосты кулэезъя быдэсъяно. Сое ӟеч возьматӥз Эгралан луэм учыр но. Линиос вискы йӧвалег кылдэм. Утялтӥсь сюрымтэ, луо пазяллямтэ. Ӵапак соин кызь кыкетӥ оштолэзе авария луиз. Кынмем йӧ вылэ машина дугдӥз, водитель сое азьлань но, берлань но нуыны ӧз быгаты. Ӵапак со вие грузопассажирской поезд отӥ ортчыны кемдӥз. Валамон ни, тепловоз чутрак дугдыны уг быгаты. Шимес авариын быризы Перевозчиков кузпалъёс. Паймод: одӥг аресъем пизы луло кылемын, вылаз ик, сӧсырмем интыосыз чылкак ӧвӧл. Эшшо огпол вераськом: чугун сюрес линиос - шимес интыос. Чаклаське!" Адямиослэсь быремзэс инструкциосты быдэсъяны ӧтёнлы пӧрмытӥзы. Соин сюлмаськонзы йылпумъяськиз. Нош кык пиос анай-атайтэк кылизы. Соиз сярысь одӥг кыл но поттылэмын ӧвӧл. Кӧня куректон вал, сое пурысьтам йырсиос, мур кисыриос но тазалык гинэ тодэ вайыто на, дыр. Нош ӟеч-ӟеч чаклано ке, кӧй-вӧй пӧлын улэмъёс но пурысьтало ук, арлыдзы йылэмъя, соослэн но кисыриоссы кылдо, тазалыксы лябоме. Нылзэ но эмеспизэ ватон нуналъёсты Лангыр Насьта уйвӧтын кадь гинэ тодаз возе на. Анастасия Леонтьевна пизэ гуртысьтызы шайвылэ ватыны турттэ вал - дыр ортчыса, пе, Серёжаме нокин тодаз уз вай ни. Нош Лангыр Насьта аслэсьтыз ӵогиз: ми но шайвылазы ветлом, пиоссы но будэмзы бере уз вунэтэ. Ӵош улӥзы, ог-огзэс яратӥзы но огӵош быризы, озьыен, артэ ик ватоно. Дышетскемез ӧвӧл ке но, дышетӥсез вормиз. Озьы Перевозчиковъёс Хохряки шайвылэ пыраклы артэ выдӥзы. Пиосты ог-огзылэсь люкон сярысь пуромем вераськонъёсты но Насьта лэчыт пуртэн музэн шырӟалтӥз - огъя нунокъёсмы бере, ӵош ик мед будозы, пе, гужемъёсы, Анастасия Леонтьевна, дорады но вуылозы ай. Газетын ужась мурт но Алёшалэн луло кылемезлы паймем, Насьта но чабкиськыса шуэ: Инмар утиз, дыр. Тепловоз угось автомашинаез дас метрлэсь кыдёке азьпалаз гыж! кыскем но палэнэ сапкытыса кельтэм. Мумизлэн-бубизлэн яратонзы-а Алёшаез утиз меда? Кин тодэ ини созэ. Нылзылэн пиосызлы Насьтаен Ондрей одӥг пол но внукмы я нунокмы шуыса ӧз вазиськылэ. Удмурт адями угось чылкак тодмотэм егит муртлы но пие шуыса вазиськылэ. Алёшалы тӥни "эте" ним лякиськиз. Лангыр Насьта пересьмон-уймон вакытаз вуиз ни ке но, улон питранлэсь трос вадесъёссэ валэктыны уг йӧндыры. Тани малы Ленаен Сергей сыӵе егит дыръязы улонэн люкиськоно луизы? Малы сыӵе эрке будэтыса но яратоно Олёшсы тюрьмае кугӟаз?.. Уг тоды, уг вала. "Инмарлэн гожтэмез сыӵе вал, дыр", - ассэ ачиз буйгатыны тыршыса музэн шыпыртэ соку пересь кышномурт. Али но со, синтэм кузпалзэ кунултыса, шай сюресэтӥ вамышъя, шундылэсь но юг-юг пиштэмзэ, шунтэмзэ уг ик шӧдылы кадь, нош ымдуръёсыз ялан огпӧртэм шыпырто: "Инмарлэн гожтэмез сыӵе вал, дыр..." Шайвылэ ветлэмъёс автобус дугдылонние ӧз кожелэ, пырак город пуме мыноно кариськизы, отысен угось, троллейбусэ пуксьыса, доразы бертыны каньылгес. Ярам, кужен сюрес лёгемын. Мынӥсь-ветлӥсьёс одӥг-ог гинэ пумиськыло. Таяз учыре Насьта нылызлэн пиез но кузпалыз бӧрсьы луть гинэ вамышъя - кожалод, шайвылын ымзэ солэсь вурӟизы-кышъязы, ымзэ ик уг усья. Нош Ондрей шулдырмиз, кема дыр ӵоже юон сюрылымтэысь, лэся, сокем ӝог кисальӟиз. Заводын ужан дыръёссэ тодаз вае, бригадаысьтыз эшъёсыныз косъяське. Дима, сазь маке, валамон ни, пальпотэ, песятайзэ кунултыса азьлань валтэ. Нош пересь воргорон тани тыпак дугдӥз, киыныз шонтӥз: - Нюлэс зын! Ма, нюлэскы пырим-а? Кыдёкын на-а? Маке жадиськиз ни. - Ӧ-ӧм, дуртӥз гинэ мынӥськом, - валэктӥз Дима. - Нош сюресмы байтак на. Азьпалан пичияк тымет вань, отын ик ялкаром, - кык мусо воргоронъёсызлэн вераськоназы Насьта но итӥськиз. Я, тымет доры мырдэм но кызьы вуизы. Ондрей соку ик вож гуждор вылэ ланьырскиз, Дима но вӧзаз пуксиз. Нош кышномурт тэк пукыны ӧз чида. Ярдуре мынӥз но юзмыт вуэн кизэ, бамзэ гылтӥз, собере гинэ пиосъёс вӧзы интыяськиз. Озьы огшап пукемзы бере егит пи лӧбак султӥз но анаез музэн ик мисьтӥськиз, киоссэ, бамзэ ныркышетэныз ӵушем кариз но нимысьтыз нокинлы вазиськытэк шуиз: - Чорыгез но вань, дыр. Уть, отӥяз шашы но будэ, вутурынэз но трос... - Ма, каракаез луоз, - ымзэ усьтӥз Насьта. - Соос куасьмись вуын но кызьы ке тэлеӟо ук. Э-э, тани ву шоры учкисько но быдэс мугоры пӧсьвуаськыса кошке. Ачид но, пие, мемеед-тятяед вӧзы ӧжыт гинэ вуытэк кылид ук. Дас арес но ӧй вал али. Тодад ваиськод на-а? - Музъем пилиськиз ук. Вот гылӟиськиз... - Гылӟо-од!.. Ярам коть, эте чупырскиз, Ондрей но доре кемдӥз. Сотэк... - Ӝыт смена бере кӧлӥсько вал, - Ондрейлэн кудӟемез сайкиськемгес ни, со но вераськонэ итӥськиз. - Эте бызьыса вуиз, суйтӥм кыска но черекъя: "Вые! Вые!" Мазэ-созэ уг валаськы. Улштанэн но дэрем коже гинэ сьӧраз дыртӥ. Э-э, анае-атае, мае но уд адӟы вылэм... Карлуд шурез али шур шуыны но кепыралод ни. Азьвыл, бадӟым город ӝутскемлэсь азьло, та интыосын нюлэсъёс шаугетыку, со зэмос шур но вал, дыр, нош али бадӟым мурт ярдурысен ярдурозяз пыдзэ коттытэк вамыштыны быгатэ. Котыраз бадьпуос, лулпуос будо, гужем уйёсы уӵы куара уг чалмылы. Со шур нерге дурын улӥсьёс жуг- жагзэс кытчы куян пумысен йырзэс уг тӥяло, вань кулэтэмезлы берпум сюрес отчы - Карлуд шур котыре. Нош тулысъёсы та шур сайка, япылак вӧлске но вашкала дыръёсысь кужымзэ тодаз вае - котырысьтыз вань силё-сюрноез сьӧраз гылтэ. Кытын ву, нылпиос но отын ни. Со тулысэ но озьы луиз. Пиослы мар: пыдазы резина сапег кутчамын ке, дэриез-напраез но, вуэз но одно шедьтоно кожало. Тудӟыса бызись шур дуре котырысь ульчаосысь, оло нош, вань нылпиос люкаськемын. Пож вуэтӥ кошкись куке-соку куштэм пу ящикъёс, пулъёс, буш ӟенеликъёс шоры изъёсын зӥръяло, снайперен шудо. Кин трос полгес йӧттоз - со ик йӧно снайпер. Вуэн тырмытэм ӟенеликъёс, банкаос шоры "ыбылыны" тужгес но умой. Кык-куинь пол йӧттӥськод - ӟенелик чыртыетӥ ву пыре, соид ӵоксузьыса кадь вые. Устолэсь но усто! Димаен Алёша но кыӵе ке мукет шумесын чырсатэмъёс ӧвӧл. Тулыс каникулъёс! Доразы сиськыны бертылон сярысь но вунэтӥзы ни. Кинлэн изэз кыдёкегес лобоз, кин кужмогес? Тани бадӟым корт бекче адӟиськиз. Бадьпуос борды мырӟиськылыса, сумбрес, каллен ваське. - О-о! Крейсер! - черекъяло ни пиналъёс. Йӧттоно ук! Выйтыны, оло, уз кылды, но йӧттоно! Вожомем Дима татысь ик шедьтэм кӧльыосыныз ярдурлы матэгес кариськиз. Шоналскиз гинэ - пыд улысьтыз музъем пилиськиз, пияш жумбыляк пож вуэ усиз. Мур вылэм. Пыдсозяз вуэмез бере пыдъёсыныз донгиськиз, йырыз вуысь мычиськиз но, котыр улосэ нылпи куара шуккиськиз: - Э-э-э! Нош ву кужмо. Пияшлэн сьӧд картузэз кыдёке гылӟем ни, жомбылляськись, ву вылын возиськыны тыршись кузёзэ но пумен палэнэгес кыске. Я, огшап ортчыса, Дима бадьпу вай борды кырмиськиз, нош вылӥяз тубыны уг луы, со някырске. Пиослы из-кӧльы зӥръянэн йырин ӧз лу ни. Ярдуре люкрак кариськизы но эшсылэсь шимес вуэн нюръяськемзэ учко. Юрттыны дӥсьтӥсез ӧвӧл. Ярдурысен гинэ косъясько: - Артысь бадь зӧкгес! Со борды кутскы! - Кутско-од!.. Нош нуыса кошкиз ке? - ӧжытак буйгаса, пумитазы вазиз пияш. Ма, отын арлыдоос но вал. Пересьёсыз, ох! но ах! карыса, отын ик сылӥзы, нош егитъёсызгес пож ву шоры учкылӥзы но ӝоггес шупчыны дыртӥзы. Тае адӟыса, Алёша Перевозчиков дораз лобатӥз, валаз угось: атайзы гинэ юрттыны быгатоз. Озьы ик луиз. Кезьыт вуын сыӵе кема возиськыны Дима ӧй, дыр, быгатысал. Ярам, пересь кышномуртъёс пияшлы дӥсьтон пыӵатӥзы, артысь зӧк бадь борды кечырскыны визьнодазы. Сотэк Ондрей вуытозь Дималэн мугорыз коскасал, шузимем Карлуд шур сое ньылысал... Мискинь пияш арня ёрос больницаын йырсазьзэ ыштыса погылляськиз. Насьта нылызлэн пиез дорысь ӧз ик кошкылы, ялан котыраз бергаз. Ужен йырин ӧй вал ни. Сазьдӥськемез бере Дима котырак учкиз но адӟиз: анаез артэ кресло вылын пуке, синъёсыз кыниськемын, ваньмыз тӧдьы - миндэр но, шобрет но, борддоръёс но, ӧс но. Огшап озьы кылльыса, пияш тӧдь-тӧдь кроватьысьтыз чулькак султӥз но, шобретсэ кутыса, анайзэ шобыртӥз. Шуак луыса, анаезлэн синъёсыз молькак усьтӥськизы. - Ой, пие!.. - мукет номыр вазьыны ӧз быгаты ни со. - Уин кӧлыны кулэ, - лад-лад шуиз сокугес гинэ сазьтӥськем пичи мурт. - А то ужаны уд быгаты, нош мон - дышетскыны. - Мон чидало, пие, ваньзэ чидало, падиез гинэ медло. ...Город ульчаетӥ кык пересьёс но казакпи мыно. Номыр уг верасько. Ваньзы малпаськон, тодэ ваён дуннеетӥзы уяло. Лыз плащен, кашамер кышетэн дӥсяськем кышномурт кытӥ ке ӧвӧл артэ мынӥсь муртъёслы кылӥськымон сипыртэ: - Тау, Инмаре, ӧд тала пимес, бадӟым адямиёзь будыны кужым сётӥд. 4 - Егит кужым! - "Гражданпроект" институтлэн директорез Кузьма Васильевич Доронин уртчем мылкыдзэ ӧз ваты, горд тушсэ но шумпотэменыз маялтыны ӧз вунэты. - А то ведь милям озьыгес... Коньдон басьтыны дасесь, нош ужаны моӵсы уг сузьы. - Кыӵе моӵ? - паймиз Новосибирскысь архитектурая институтысь вуэм егит специалист. - Йырсазьыд ӟеч ке, мар кулэ на? - Э-э, коллегае, - вӧл-вӧл кабинетлэн кузёезлэн ымдуръёсыз, нодтэк дасям чертёжез адӟыса сямен, пельдӥньёсыз дорозь кузялскизы. - Улон-вылон ведь воштӥське. Мон но тон сямен ик малпалляй. Нош табере тани юн сӥльвиро проектировщикъёсты но утчано луэ ни. Улон озьы косэ. - Ноку ӧй малпалля, коркаослы проектъёс дасясь муртлы юн сӥльвиро, кужмо луыны кулэ шуыса, - дипломен но направлениен институтэ лыктэм мурт директор шоры дол- дол учкиз. - Тӥ эн пайме, коллега, - Доронин киоссэ вӧлъяз. - Шуисько ук, улон озьы косэ. Ачид но ӝоген валалод ай. Финансирование сярысь кылылэмед вань-а? - Ужез ӧръяны висъям коньдон, - студент сямен вазиз Дмитрий Перевозчиков. - Тодӥськод, тодӥськод, - шуиз Кузьма Васильевич. - Но сое басьтон понна трос йыбыртъяно луиськом. Ӵуказеез сярысь малпаськыса. - Кинлы? Малы? - суд йырсиё пияшлэн йырыз зуркак сэзъялскиз. - Номырзэ уг валаськы. - Кинлызэ но, марлызэ но ӝоген валалод ай, - вазиз Кузьма Васильевич. - Нош зэмзэ ке верано, мон ачим но троссэ уг валаськы ни. Азьвыл ваньзэ валасько вал, нош табере, Инмар мед кылоз, данакез йырам но, сюлэмам но уг тэр. - Мон, иське... кытчы соку? - юаз ужаны лыктэм егит ӧнерчи. - Корка лэсьтон отделэ, - шокыштӥз директор. - Но со сяна, мукет ужед луоз на. - Кыӵе? - уката паймиз Перевозчиков. - Николай Владимирович дорын, - вандыса куштӥз Доронин. - Кыӵе Владимирович? - бакомон калэ вуиз ни уже интыяськыны лыктэм мурт. - Николай Владимирович Степанов! Вот кин! Дима мазэ-созэ валатэк учке Доронин шоры. Та нимтулэз со кылылӥз ни вал. Надялэсь. Бен, солэсь. Артэ урамын улӥсь, куке-соку одӥг классын дышетскем нылмурт ӵапак та адями сярысь поттылӥз. Данъяськыса, со адямиен артэ ужамезлы шумпотыса музэн. Нош табере тани Дималы но со доры вамыштоно луоз, пе. Малы нош? Николай Владимирович сярысь малпанъёссэ уретыса сямен, Кузьма Васильевич егит пияш шоры очкизэ куштыса учкиз но юаз: - Ярам, аслад ужед сярысь. Ваньзэ рос-прос тодӥськод-валаськод? - Бен... дышетӥзы кадь, - дӥсьтытэкгес вазиз Перевозчиков. - Дышето тӥледды... - буш тысез сялӟем мактал шуиз Доронин. - Ысто. Нош милем дышетоно луоз на. А ведь ми нянькаос ӧвӧл. Тани городэз учкид, адӟид. Мар шуысалыд? - Коробкаос. - Кыӵе коробкаос? - Нажгатъяно, куашкатъяно кадь коробкаос. Тусбуйзы но, ымнырзы но ӧвӧл. Малы соосты ӝутонэз вал? - Вераны гинэ капчи... Но ведь квадратной метръёс кулэ вал. Адямиослы кытын ке улоно. Ӵуказеез сярысь малпаськыса ужамы. - Тыро-пыдогес малпаськоно вал. - Капчи вераны. - Таяз микрорайонэ вамыштӥськод-а, мукетаз-а - номыр пӧртэмез ӧвӧл, - люкаськем малпанъёссэ пумозяз кисьтыны-вераны дыртэ Дима. - Мар со микрорайонъёс? Площадкаос. Лэсьтӥськон площадкаос. Нош самой кулэез - квадратной метръёс. Улонлэсь чылкак ишкалскыса ӧз дышетэ, дыр, ук тӥледыз, - Кузьма Васильевич сюлэм висёнъёссэ гылтыны тыршиз кадь. - Но со коробкаос... - Акыльтӥд ни со коробкаосыныд! Шуисько ук: со - квадратной метръёс, ужась адямиослэн улон интызы. Йырвизяд могъялтод сое, - та вераськонлэсь акыльтэмзэ шӧдытыса, Кузьма Васильевич интыысьтыз султӥз но шуиз: - Табере Николай Владимирович доры вамыштод, дыр, коллега. Со музъем вылэ васькытоз. Ньыль сю ньылетӥ кабинет. Кызьы со шуэ - офис. Отын мынам воштӥсе пукиз. Но улон озьы косӥз: со пичигес кабинетэ выжоно луиз. Улон шымыртэ, валаськод, дыр, коллега? Кузьма Васильевич валантэмгес ке но вераськиз, Дмитрий Сергеевлэн мылкыдыз "Гражданпроектлэн" кузь коридоретӥз вамышъянъяз но бурдъяськемын на вал. Пумитаз шедемъёс гадьысьтыз ромбиксэ адӟыса пальпото кадь, выль кужымлы шумпото. Сюбег коридор но сайкыт, чебер, вӧлмыт адӟиське. Но со вие ик пеляз вень кадь лэчыт маке бышкалтӥське, пумен пыдлогес но пыдлогес мертчиське: "Улон ачиз дышетоз, коллега". Тае выльысь но выльысь кылыса, Дима али ке но мазэ-созэ йӧнала валаны уг быгаты... Кабинетъёс, кабинетъёс, соослэн ӧсъёссы вылын олокыӵе но мудрон фирмаослэн нимъёссы гожтэмын. Я, тани ньыль сю ньылетӥ кабинет. Ӧс борды кык пол кокыштыса пыремез бере Дмитрий Перевозчиков пыд йылысьтыз пограно кадь луиз. Учке но - Надя. Ас синъёсызлы уг оскы. - О-о, Дмитрий Сергеевич дорамы вуэм! - кылӥськиз Надя Смагиналэн нёжмыт куараез. Соин артэ пукись веськрес, чебер нылаш киысьтыз пичияк котрес синучконзэ ӝӧказ понӥз. Нош ӧс дорысь пуконъёс вылэ зоньтӥськем егит пиос сое гинэ витё вылэм, кожалод: интыосысьтызы тэтчизы но Дималэн киосыз борды кыкналасянь ӝабырскизы. - Мар кулэ тӥлед? - умйылзэ куспетӥ каремез понна вожез потыса сямен керӟег вазиз бур паласез таза пияш. - Дмитрий Сергеевич со, - Надялэн куалектэм куараез пиослэн но Дималэн пельёсазы вуиз. - Монэ Николай Владимирович доры ыстӥзы. Кузьма Васильевич. Егит пиосты та кылъёс небӟытӥзы кадь, соос син азьын шуязы. Перевозчиковлэн киосыз бордысь ишкалскизы но пуконъёсазы лэзиськизы. Кожалод, номыр сокем- такемез ӧй вал. Нош секретарьлэн ӝӧкез сьӧрын пукись нылаш олокытӥ-мартӥ чупрес сямзэ возьматӥз. Валаз, вылды: табере солы кузёяськыны дыр вуиз. Кунозылэсь нимтулзэ, ма муген вуэмзэ юаз, собере селектор пыр векчи но гольтрес куараен нёжъяны кутскиз: - Николай Владимирович, тӥ доры - куно. Дмитрий Сергеевич Перевозчиков. Сое Доронин ыстэ-эм, - берло кылзэ со малы ке уката кузьгес нёжтӥз. - Кузьма Васильевич ке, лэзелэ дорам, - кылӥськиз ӝӧк вылысь "сайкам" селекторысь. Нылаш син куспын кузёлэсь косэмъёссэ быдэсъяны котьку дась луэмзэ возьматӥз: пурысё-тӧдьыё текстуркаен лякем но лакен шобыртэм чебер ӧс доры ӝогак бызиз но сое вӧлак усьтӥз, Дмитрий Перевозчиковлы сюрес сётӥз. Вӧл-вӧл кабинет йӧскадь узырлыкеныз кузёзэ ышытэ, пичи кельтэ. Кузь пурысь стенка, выж быдэсак со тусъемгес ик коверен шобыртэмын. Укно дорысь сэргы бадӟым сайкыт сейф пуктэмын. "Т" букваен инъям ӝӧкъёс, вӧзазы радэн пуконъёс сыло. Малпалод, татын улон-вылонэз ӟечгес радъян сярысь нуналмысь кенешыло. Собере гинэ Дима кабинетлэсь кузёзэ умойгес синйылтӥз ини. Со вӧлак усьтэм укно дорын сылэ. Ымнырыз тӧрнамын, мугорыз бырдамын. Кожалод, чибориё костюмез тани-тани пилиськоз. Пырем мурт шоры огшап учкемез бере со шокыштӥз: - Кузьма Васильевич юнме уз ысты, дыр. Мар ужен, кыӵе муген? - кабинет кузёлэн тодэмез потӥз. - Мон институтэ ужаны лыктэм вал, но... - мар вераны тодытэк, Дима пыд вылысьтыз пыд вылаз лёгиськиз. - Новосибирскысь институтын дышетски. Архитектор. Табере тани татчы, дор палъёсам, келязы. - Хм... - кариз шоро-куспо мугоро зӧк воргорон, - милемлы архитекторъёс кулэ ӧвӧл. Ми ведь сиён-юонэн выриськом. Дӥськутэн. Нош архитектура... Хм... - выльысь паймемзэ возьматӥз Николай Владимирович. - Ми сыӵееныз ум выриське. Но... Кузьма Васильевичлэсь дорам малы келямзэ валасько кадь. Пӧрмытод. Ма, студент ӝуткан-ӝоктон ужез ӟеч тодэ, дыр. - Кыӵе ӝуткан, кыӵе ӝоктон? - абдраз Дима. - Стипендиед шупчыку ӧд ужалля шат? - пальпотӥз Степанов. - Мон военной училищеын дышетски ке но, сыӵе ужъёс сярысь ӟеч тодӥсько. Ничё-о, ӧраз пыро-од. Милям ведь горд дипломен студентъёс но кыл-куара поттылытэк ужало: сокен банкаосты ӝокто, вӧен коробкаосты ӝуткало... Уксё кулэ луиз ке, ва-аньзэ пӧрмытод. Городлэн ульчаостӥз чебер, сайкыт малпанъёсын вамышъям егит архитектор та кабинетысь гуньдэм кадь потӥз. Доронинлэн кабинетаз со кызьызэ-марзэ ӧз йӧндыры вал, нош Степанов сое, кортӵогез кӧс-чурыт пулэ шуккем сямен, тып-тып интыяз пуктӥз. Со шуиз кадь: тырмоз лопыръяськыны, студент, уж борды кутсконо. Нош кыӵе уж?! Со корка лэсьтыны дышетскиз ук! Солы аслэсьтыззэ - аслаз киыныз суредамзэ- пӧрамзэ городлэн ульчаосаз вуттоно. Нош татын шуо: ӝоктоно, ӝуткано. "Бен улыса адӟом ини", - секыт лулскиз со. Нош коридорлэн пумыз но, йылыз но ӧвӧл, лэся. Со чидантэм ӝокатэ, ӝиптэ, шымыртэ. "Сайкыт омырен одӥг пол коть шокыштыны ӝоггес кыре, ульчае вутсконо вал!.." 5 Секыт, туж секыт аслэсьтыд пайдатэм луэмдэ валаны. Дунне йырчукин берыктӥськиз кадь. Толон гинэ тыныд ваньмыз Андрей Петрович шуыса вазиськылӥзы, нош туннэ тон нимтэм-тултэм адями ини. Висись. Улон ӧрысь пешкытэм мурт. Солы-а, Андрей Петровичлы, чипыен-куреген сямен ӧз вазиськылэ мартен цехын котькуд вамышсэс лэсьтон азьын? "Андрей Петрович, тыроно ни-а?" "Андрей Петрович, поттоно ни-а?" Оскизы. Юн оскизы Перевозчиковлэн быгатонлыкезлы. Быдэс заводын шуылӥзы: "Перевозчиковлэн кортэз номырлы уг сётскы. Коть нош кыӵе эскеронъёс-чакланъёс мед луозы, Перевозчиковлэн анданэз - вань анданъёслы андан". ...Война вакыт со асэныз Геннадьичен, нимо-дано металлурген, артэ ужаз. Броня пӧзьтӥз. Нош Геннадьичлэн син зол вал. Шлак шоры кисырскыса ик учкоз но шуоз: "Сё, вуиз та". Амало вал пересь. Ноку уз куалекты, уз керӟегъяськы. Гурын укыр пӧсь луэ ке (котькуд пӧрась тодэ ук: мултэс бадӟым пӧсьлык сиёнэз я ӵуштаськытэ, я уртчытэ, нош сталеварез пӧрасен оградэ пуктыны луоно), шомполэныз пичияк пась лэсьтоз но палэнысен чакласа сылоз. Ваньзэ кулэезъя лэсьтоз. Соку йӧн-йӧн химлаборатория гинэ но ӧй вал. Али ук ваньзэ сое чакласа возё ни. Углеродзэ но, марзэ но. Соку нош ваньмыз андан пӧзьтӥсьлэн быгатэмез бордысь потылӥз. Со - Иван Геннадьевич Останин, гуртысьтыз тузонэз кутэныз пурӟытъямез бере Ижкаре мобилизация шуонзыя кыскем пиёшкалы Петрович шуыса гинэ вазиськылоз вал. Созэ но пусйыны кулэ: куд-огез мукетъёслы атай нимын ултӥясагес вазиськыло. Малпало, лэся: мон озьы шуи ке, со но амалтэк атай нимме поттылоно луоз. Нош Геннадьичлэн сыӵе пырултэм мылкыдъёсыз ӧз шӧдӥськылэ. Веранзэ меӵак вералоз, ӵогонзэ - ӵогоз. Подручнойзэ ӧз кельыштыры ке, котыръяса-мараса уз ул, соку ик меӵкытоз: "Шабаш! Кытысь ке мукет интыысь уж утча, пияш". Собере тӥни Перевозчиков солэсь ужзэ азинтӥз. Бригадаысьтыз эшъёсыз вань косэмъёссэ кулэезъя быдэсъязы. Подручноез но, Колтыр Никодим. Оскымон адями. Вылаз ик, бускель гуртысь пияш. Заводэ соос огвакыт вуизы. ФЗО пыр ортчизы. Гуртъёсазы дышетсконзэс йӧнала йылпумъямтэ пиосты уго война вылтӥ туж тросэн заводэ кыскылӥзы. Ондреен но озьы луиз, Никодимен но... - Э-эх, кышно гинэ сое уг вала. Пурӟектыса ветлэ-ветлэ но куара-ланга поттэ. Ойдо, ме-эд. Со понна ик кышномурт. Нош воргорон ас ужзэ лэсьтыны вордскемын. Кышноезлэсь лангыртэмзэ кылзӥськыны, аслэсьтыззэ ке - лэсьтыны. Нылкышнолэн йырси кузь угось. Соя мынӥд ке, ку-о пумаз вуод? Патер ласянь но шонер лэсьтӥ. Ас юртъерез вал ни ук. Олёш ке ялан муртъёс дортӥ костаськиз. Адями ӟечезлы шумпотыны вордскемын. Ойдо, мед шумпотоз. Нош Насьталэсь верамзэ кылымтэ улэ но аналскыны луэ. Соиз гинэ умойтэм: Колтыр Никодим но пенсие потэмын ни. Нош ас интыяз кинэ кельтӥз? Йӧн адямиез будэтыны ӧз йӧндыры, моӵез ӧз сузьы. Таиз сярысь малпаськыса, Ондрейлэн мылыз-кыдыз юскиське. Бригадаез Тяпнин Васьлей вылэ кылиз угось. Сыӵе адямиен кыдёке-а вуод? Арлыдыз, пе, вуэ ни. Пенсиез азьын уждунэз, пе, мед будоз. Нош кин уж сярысь малпаськоз? Соин, со Тяпнинэн йырин, плавка но одӥг полаз сӧриськиз. Ведь адямилы сямен верамын вал: сыӵе-сыӵе дыре йылпумъяно. Нош со ке зульыны кошкем. Эшъёссэ шедьтэм... Ӟеч-ӟеч чаклано ке, со авария шуон но ӧй луысал. Нош ик Тяпнин. Со ук йӧскадь чакламтэ. Уж дураз кӧлэ. Адями ӧвӧл - шлак. Нош со шлакен кыдёке уд ву. Шлаклы сюрес одӥг - отвалэ. А вот Назаровлы ке оскысалзы - соиз да-а! Степан пӧрмытысал. Ма, Назаров сотэк но ӝутскем. Институтын дышетсконзэ йылпумъям. Табере цехен кивалтэ ни. Ӵапак сыӵе адямиос анданэз кортнаны быгато. Азьзэс-берзэс учкыса уг уло. Асьсэос но ужало, мукетъёслы но тэк пукыны уг сёто. Одӥгез гинэ паймытэ: кызьы ай со Тяпнинэн янгышаз? "Оло нош, ваньмыз мон бордысь потӥз? - йырзэ тӥя Ондрей. - Со авария бере сьӧлыкез сярысь ӧй вера. Жаляй адямиез. Нош кулэ вал меда жаляны? Назаровен пумиськыса, одно со сярысь поттылоно. Андан пӧзьтон - шудон уж ӧвӧл". Бригадаысьтыз адямиосты озьы одӥген-одӥген син азяз пуктыны но дунъет сётыны тырше Ондрей. Ӟечсэ - ӟечен, уродзэ - уродэн. Тани Изосимовез но кызьы ӟечен тодад ваёд? Школаын дышетсконзэ йылпумъяса, институтэ пырыны кынарыз-а, кеньырез-а тырмымтэ. Бригадае вуэмез бере кызьы но ӧз гожеръя Перевозчиков котыртӥ. Берзэ нюлыны дась вал. Одӥг ар ортчыса, пе, мыным институтэ пырыны характеристика кулэ вал, гожтэлэ, Андрей Петрович, усто производственник но азьмынӥсь шуыса, мон, пе, пунэме уг кыльы, сямы сыӵе ӧвӧл, ӟечсэ одно ӟечен берыкто. Гожтыса ӧз быдты ай - ӟырдам андан гурысь серметтэм кисьтӥськыку, со олокытчы чиптэм-чаптэм ышиз-быриз. Оло, улаз лэзиз? Больницае но ӧз вутскылы. Валаз, лэся: та бригадирлэсь, Перевозчиковлэсь, пади уд потты ни. А ведь со характеристикаез портыны турттыса кый кадь бергаз вал. Учкы на вылэм солэн синмаз - уг лу ни. Эх, Изосимов, Изосимов, тон кадь адямиос вылын дунне-шарез уд возь. Завод ужын сукыр кылем муртлэн син азяз азьвылэз суредэн-суредэн пуксе. Нош ализэ со адӟыны уг быгаты ни. Тани али но ведраысь картофкаосты киыныз йыгыртыса поттылэ, пала но бадӟым тэркые тыре. Картофкаос трос, нош малпанъёс солэсь но уногес. Быгатэмезъя, ма, Насьтаезлы юрттыны йӧндыре. Синмо ке луысал, пыдыз кылзӥськысал, ӟечгес юрттысалыз, но... Кузпалызлэн пеймытын озьы дарманьтэмез шоры Лангыр Насьта учке, учке но синвуаське. Табере солэн синкыли шапыкъёсызлэсь бам вылтӥз питрамзэс адӟись гинэ но ӧвӧл ни ук... 6 Уж дураз нырысьсэ потам нуналаз Дима дораз бергес вамыштӥз. Кытчы но малы дыртонэз? Ёмыраны кутскем корказэс адӟыса, ӵогӟем кадь дугдӥз. Корка-а шуод на сое? Липетэз ӝуйӟемын, наличникъёсыз огез урам пала, мукетыз пушпалаз ланьырскемын. Пичи дырысеныз ик ини Дима та суредэз адӟылӥз. Артэ кык этажъем коркаос лэсьтэмын ни. Атаезлэн гинэ дырыз но, кужымез но ӧз тырмы, лэся. Ӵапак та корказы валлин ик Дима кыдёкысь Новосибирске дышетскыны ӝутӥськиз вал. Тодӥз угось: отын корка лэсьтӥсьёсты - архитекторъёсты дасяло. Мумиз нырысь-валысь ӟукыртэм кариз ик, нош бератаз сюлмыз басылаз, лэся, мукет гурен кырӟаны ӧдъяз. Ульчаысь пересьёсын я доразы гуртысь лыктэм ӵыжы-выжыосыныз вераськылыкуз сайкыт но чебер осконзэ одно амалтыса кисьтоно кожалляз. - Ондреен милям моӵмы со пормагес ни. Нош нылмылэн пиез корка лэсьтӥсе дышетске. Со ик та ёмырам гутёысьтымы милемыз, пересь кудыосты, поттоз ни. Озьы ик шуэ: нимысьтыз проект, пе, дасяло, соя лэсьтомы. Ӟубис усьтӥськем капкаетӥ пыронъяз Дима юбоез киыныз ӧжытак донгыштӥз - соиз ланьырак сётскиз. Тани ук, татын но уж вань, швеллер вайыса, юбоез юнматоно луоз. Собере корка сэзъян борды но кутскыны дыр вуоз. Нош со понна ужано, коньдон поттоно. Коньдонтэк номыре уд бералты. Лангыр Насьта пизэ азбарын вите вал. Дӥсьсэ воштэменыз-а, мар-а арлыдызлэсь трослы егитгес адӟиське. Городын улэ ке но, Насьта бадӟым праздникъёсы но гуртысьёсты пумитакуз одно удмурт дэремзэ дӥся. Туннэ солэн шумпотонэз чиед, лапег мугораз тэрыны инты уг шедьты: пиез ужаны кутскиз! Дышетскон кӧкыысь потӥз! Корка пушкын но кытӥяз кырӟан нёжъялляз. Бӧрысь ӧз чида ни, бадӟым шумпотонзэ люкыт, пеймыт коркась кыре поттӥз. Шумпотонлы но эрик кулэ ук. Азбарез ӵужиз, парсезлы сиён сётӥз. Та ужъёссэ огдышемъя гинэ лэсьтӥз, нош синъёссэ капка шорысь ӧз вошъялля. Дималэсь юбо котырын бергамзэ адӟыса, Насьталэн ымпумъёсаз пальпотон тылгизьы кенжиз: - Уть ай, капкаез погыртӥськод ни вал ук. Ма, сыӵе со милям. Отӥзэ пыкиськод, татӥзэ кышъяськод, нош падиез ӧвӧл. Вужзэ выль уд кар ни. - Та кылъёссэ Насьта огшорыгес гинэ, ӝожомытэк вераз, секыт малпанъёс но куддыр акыльто ук. - Рельса ваём. Гудӟом. Юбоос огшап сылозы на. Нош собере ваньзэ выльдом, - кузё музэн шуиз Дима. - Озьы, пие, та гондыр гуысь потонэз но куке-соку мед адӟомы вал. Нош ужад мар ни? Ӟеч пумитазы-а? А то ведь дышетскем муртъёс но безработной кыльыло, пе. Улӥмы-вылӥмы, ужлы ёрмисьёсты ӧм адӟылэ, уж мында мар вал? Табере ке... - Кутӥзы-ы. Кытчы пырозы? Направлениен ук, - куаразэ золомытыса вазиз Дима. - Вылаз ик, кык уже. Чертёж доска сьӧрын но ужалод, пе, грузчикын но. - Дышетскем муртъёсты грузчикын возё шат? - шулӟектӥз арлыдо кышномурт. - Нырысь нуналъёсысен ик рос-прос кариськоно. Небыльток радэ сюрид ке, улытозяд отысь уд пот. - Ма, мукет архитекторъёссы но тырон-ӝоктон ужлэсь уг палэнско, пе. Институтазы фирмачъёс каръяськиллям. Ужам понна коньдон донго, пе. - Озьы ке шат, - оскыса но оскытэкгес нёжтӥз Насьта. - Мукетъёслэсь висъяськыны уг яра. Гадьдэ но ортчыт урдоно ӧвӧл, йырдэ но укыр уллань ошыса эн ветлы. Поттэм коньдондэ кутыны уд ёрмы. Дӥсед но сокем тузӥ ӧвӧл кадь. Мар ай таӵе азбарлэсь ум ӵыдӥське? Ужысь вуэм муртэ кылын сюдыны кутски, - чабкиськиз кузё кышно, дыртыса корказь тубат пала вамыштӥз. - Татӥ но тупатоно вал. Воксё сисьмемын ни, - тубат пул шоры улэп мурт шоры музэн керӟегъяськыса вераз. - Ондрейлэн но тонэ возьмаса сэпез пӧсьтӥз ни, дыр. Та бадӟым нуналэдлы шуыса огзэ курегез вандэм вал. Мумиз ӝӧк выл тыр сиён-юон пӧрам. Пыжиськыны но вутскем. Соин, лэся, корка пушкын пӧсь, корказь ӧсэз вӧлак пась кельтытэк ӧйлась. Пырисьёслэсь пыд куараоссэс кылыса, Ондрей ӧс пала сётскиз, кӧня ке вамыш лэсьтӥз но тыпак дугдӥз, мылкыдзэ шара возьматэмезлэсь кепыраз, вылды. Тушез мычемын, вылаз тӧдьы дэрем дӥсям. Сукыр синъёсыз малы ке кырмекъяло, отысь синкыли шапыкъёс вияло. - Милям озьы ни: шумпотӥськом - бӧрдӥськом, куректӥськом - эшшо золгес ӟизгетӥськом, - Насьталэн серемзэ кутэмез ӧз луы. - Вуид-а, пие? Кутӥзы? Дималы та нуналзэ кызьы ортчытэмез сярысь нош ик мадёно луиз. Пиджаксэ кыльыса, ӝӧк сьӧры пуксиз но шумпотыса ваземзэ ӧз вала: - Шекера! - Яратоно сиёндэ анаед ӧз вунэты. Пичи дыръяд астэ но шекера гинэ шуылӥськом вал. Малы ке нуйтӥськыны кема ӧд вала. Шекера но шекера! - бам вылысьтыз синкыли шапыкъёссэ ӵушылонъяз вераз Ондрей. - Шекера пыжыны ведь самой ӟеч пызь гинэ мынэ. Вӧез но уг жаляло, - ӵыжектыса ик валэктоно кожаз Насьта. - Тон - милям Шекерамы - улонын самой бадӟым осконмы. Э- э, калтак! - чабкиськиз кышномурт. - Ондрей но тодам уг уськыты. Пумитаны шуыса юон басьтӥм вал ук... ...Асьсэ коже гинэ ке но, Андреевъёс но Перевозчиков ӝӧк сьӧрысьтызы султыны кема ӧз ӵыдэ. Насьтаен Ондрей ӵошенназы удмурт кырӟанъёсты но кырӟазы. Ваньмыз сярысь вераськыны вутскизы кадь. Нош этезылэсь нимзэ огзы но ӧз поттылэ. Малпалод, та семьяын Дималэн выныз - Алёша - ноку ӧй вал. 7 Ӵуказеяз Перевозчиковлы ӵукна ик Доронинлэн приёмнояз вамыштытэк ӧйлась. Нырысьсэ пумиськыкузы уго директор егит специалистлэн кытын но кинэн ӵош ужанэз сярысь ӧз вера. Егит нылмурт-секретарь отын огназ пуке вал. Горд выло зӧк папкае кыӵе ке гожтэтъёсты тырон ужзэ куспатыса, со пырем мурт шоры ӝамак учкиз но гольтрес куаразэ поттӥз: - Кузьма Васильевич туннэ бергес вуоз. Со дачаяз кошкемын, собере министерствое кожаны медэ вал, - кемалась дышетэм кырӟанзэ нёжъяз секретарь. - Фамилиды Перевозчиков вал кадь. Нош мон Света. Малыгина Света. Кузьма Васильевич вераз на: тӥ, пе, Михаил Григорьевич Молотковен ӵош ужалоды. Куатетӥ этажын, куать сю ньылетӥ комнатаын. Меӵак верало: эшед-кивалтӥсед туж тунсыко. Ма, сойзэ ачид адӟод ни. - Озьы ке, мыным вырӟоно? - ӧс кутон борды кырмиськиз Перевозчиков. - Ужед пегӟемлэсь кышкаськод-а? Вуод ай, - Светалэн серемез потӥз, олокытӥ-мартӥ тон карыны кутскиз, - татчы но кожалляны эн вунэты. Новосибирск палъёслэн улэм- вылэмзы сярысь мадёд. Одӥг коть егит пи дорамы кылдӥз. А то пересьёс я нылъёс... - векчи куараен нёжъя но нёжъя Малыгина. - Вуыло. Одӥг коркан ужалом ук. Я, мон бызи. А то Михаил Григорьевичед ыштоз. Нырысь нуналэ ик прогул лякоз, - кивалтӥсьлэн приёмнойысьтыз Дима кошкыны мырдэм но кызьы амал шедьтӥз. Лифтэз со ӧз возьма ни. Кивалтӥсьёслэн куинетӥ этажысьтызы тубат кузя гинэ кык- куинь лёгет вамен тэтчаса выль ужан интыяз дыртӥз. Ӧсэ йыгаськиз. Ныр пыртӥ верам куараез мырдэм кылӥз: - Пырелэ. Ӧс усьтэмын. Дима пыриз. Зӧк, курень вугыё очкиен воргорон пилеш йырзэ киыныз маялтэм кариз но дораз вуэм Дима пумитэ вамыштӥз: - Кызьы мон валатски, Перевозчиков Дмитрий Сергеевич, - шуиз со. - Мон сярысь но веразы ни, дыр: Молотков Михаил Григорьевич. Пырак Новосибирскысь шуизы кадь. М-да, - арлыдо пиосмуртлэн лыз синъёсыз малы ке кырмыштӥзы, - егит эше, бугро ӵупыны йӧндырисьтэм мурт нокызьы но архитектор уз луы. - Буйносов профессор, - вазиз Дима. - Тӥ но-а отын дышетскиды? - Обь шурез ӟеч тодӥськом. Революцилэсь азьло со городэз Новониколаевск шуо вылэм. Табере тани сизьым вырйыло Ижкармес уката ӝужытгес карыны сюлмаськиськом. Таза мугоро воргорон ныр пыртӥз вераське. Солы дышымтэен, лэся, Дмитрий пальышак потӥз. - Нош мар бордын ужалом? - серемзэ кутыны турттыса юаз егит архитектор. - Кыӵе со чупрес. - Молотков очкизэ басьтӥз но ныркышетэныз ӵушылыны кутскиз. - Уж сюроз! Нырысь мон вӧзын гожмаськод, собере ни... кузёос учкозы. Возьматод, макем зол дышетэм тонэ Буйносов профессор. Молотков кема озьы вераськысал на, дыр, но ӝӧк вылысь телефон жингыртӥз. Михаил Григорьевич дыректыса трубкаез кутӥз. Вераськемез бере куашкам мылкыдын шуиз: - Нош тон уж утчаськод вал. Дӥсьмес воштоно, пе, улӥе васьконо. Со фирмачъёс тэк пукыны уг чидало. Ялан вортто, вортто. Нош тон соослы ужа... М-да... Тынад воштос дӥсед но ӧвӧл ай, дыр. Ярам, халат шедьтозы. Ми кадь пересьёслы бызьылыны секытгес йӧтэ ни. Нош кытчы пырод, сием потэ ук. Татын уждунэз но дыраз уг сёткало, нош соослэн майбыр: ужад - соку ик басьты. Сурыкмон калэ вуэм лыз халатъёсын дӥсяськем архитекторъёс одӥген но кыкен институтэ пырон ӧс доры люкаськизы. Дима но соос борды итӥськиз. - Выль кужым вуиз! Новосибирскын дышетскемын. Перевозчиков Дмитрий Сергеевич, - Михаил Григорьевич эшъёсызлы ивортыны дыртӥз. Ӟечбуръяськизы. Тодматскизы. "Грузчикъёс" егитэсь уд шу. Ньыльдон ареслэсь пиналэз пӧлазы ӧвӧл кадь. - Малы ке трос кузя люкало. Ужзы бадӟым, дыр, - шултэмзэ ик ӧз вала горд йырсиё, чиед но ӝужыт мугоро Алексей Степанович. - Машинаоссы но татын ни. Аслазэз но, Виталькаезлэн но, - пеймыт-лыз "Жигулиос" шоры киыныз шонтӥз чибориё галстуксэ куштыны вунэтэм Пётр Никонорович. Со вие ӧс усьтӥськиз но, питраса кадь Степановъёс потӥзы. Кыкназы гондыр кадь тазаесь, сумбресэсь. Николай Владимировичлэн Виталий выныз агаезлэсь ӝужытгес, мугорын но зӧкгес. Костюме тэрыны быгатымтэеныз, лэся, "Адидас" фирмалэсь лызо- гордо-тӧдьыё спортивной дӥсьсэ золтэм. Суд йырсиоссы тӧлъя лопыръясько. Николай Владимировичлэнэз шер-тургес кылемын ни. Ныръёссы табань кадь паськытэсь, ымныръёссы ӵыж-ӵыжесь. Халатъёсын муртъёс доры матэктэмзы бере кӧнялы ке азьпалангес вамышъясь Николай Владимирович бур кизэ вылӥе урдӥз: - О-о, ӧрӟиос дасесь ни! Давай машинаосы. Ужез ӝог бергатоно, а то со астэ куасалтыны шедьтоз, - визьмо верай кожаса, лэся, арлыдоез Степанов ужпи музэн ымтросаз гырдалтӥз. "Жигулиосы" пуксьыса ӧз вуэ на - ӧс дорысен нылмурт куара кылӥськиз. Дима соку ик Надяез тодмаз. - Николай Владимирович! Складэ жингыртӥм, шедьтӥм соосты, возьмалозы. - Хе, эн шедьтэ ай! Мар понна уксё тырисько? - машинаяз пырон висказ ни выльысь гырдалтӥз Степанов. - Ойдолэ вырӟим! Виталько, ӵошатском! Дима Николай Владимировичлэн машинаяз пуксёно луиз. Михаил Григорьевич урдсӥнак- урдсӥнак Виталийлэн машинаяз зымиз. "Кузёенызы ӵош ворттылыны таос малы ке кӧберало кадь", - малпан чилектӥз Дималэн йыраз. - Учком, адӟом, бӧрысь визьмогес луом", - ассэ ачиз буйгатӥз со кузь халатсэ машина пушкы сюлтрак кысконъяз. Фирмалэн кузёосыз ульчаысь мукет машинаосты уг ик адӟо, кожалод. Чакласькод ке, та "Жигулиосын" артэ соос гызмылес бокроослы укшало. Нош ог-огенызы ӵошатскись агай-вынъёс машинаоссылэсь ӝоглыксэс йылэто но йылэто. Нырысь-валысь Виталий азьпалан вал. Арлыдоез Степанов вожомиз но усьтэм укноетӥ сяласькыны шӧтаз. Бӧрысь ӧз чида ни, светофорлэн соку гинэ ӝуатскем горд тылыз но сое ӧз дугдыты. Покчиез Степанов мышказы кылиз. - Зырымесь! Монэ вормыны? Уз пӧрмы! Мышказ пукись Алексей Степанович кызъем кариз но секыт лулскиз: - Мынам но машина нергее вань но, такем уг ворттылӥськы. Кышно дӥне луло вутскем потэ. Калленгес мынод - кыдёкегес вуод. - Танкистъёс сыӵе законъя уг уло, - арлыдо муртлэсь веранзэ уретӥз Степанов. - Мон - майор. Египетын военспец вал. Тодэмды потэ ке, отысь луо гурезьёсын танкеным ньыль пол бекмыльскылӥ. Зэм, кышъязы, вуризы, лыосме лякылӥзы. Но луло ук! - Таиз витетӥ танк медам лу вал. ГАИ-ос но кырмыны шедьтозы, - Пётр Никонорович но куаразэ поттытэк ӧз чида. - Хе, ГАИ! Кышкатӥд! Киязы "вожзэ" мычиськод ке, честь сётыса келяло. Синъёссы таба пасьтаесь луо. Валютаез ваньмыз ярато. Аэропорт доры матэктыса, паллянэ кожизы. Бадӟым складлэн корт ӧс азяз рефрижератор сылэ. - Машина но дась! - шумпотэмзэ ӧз ват Николай Владимирович. - Но татысь базаын ужась агайёс-апайёс сьӧраз ортчо кадь. Укыр трос ниё. Телевизор вузамедлэсь падизэ но уд адӟы. Сьӧраз ортчыны уг яра. Порядок медло! Теплосетьёсын кенешемын. Кык поллы ичигес дун куро. Вот соосын кылмы тупалоз. Пӧсь йӧтӥз архитекторъёслы. "Самсунг" телевизоръёслэн пумзы-йылзы ӧй вал кадь. Ярам ай, электрокарзы вылэм. Дималы Пётр Никоноровичен ӵош ужаны усиз. Рефрижераторе ӝутэм секыт картон ящикъёсты соос кыкналасянь кутыса пыдло нуылӥзы но лач интыяллязы. - Тентэн шобыртэм кузов коть мед луысал. А то корос кадь. Шоканы омыр уг тырмы, - мур лулскылӥз Пётр Никонорович. Я, кызьы но озьы машиназы тулъяськиз кадь. Тани ӧсэз но пытсамын ни. Топорков пӧсям кымессэ халат саесэныз ӵушылонъяз Николай Владимирович доры матэктӥз но юаз: - Мукетъёссэ пока татчы ик кельтоды, дыр? А то теплосетёзь сюрес кузь гинэ. Жадиськиз но. Шурын пыласькем кадь луиськиз. - Тыро, тыро! Буйгатскелэ. Кык пол-а, мар-а машина медъялод? Ваньзэ туннэ лэсьтом. Теплосетьёсын электрокарзы вылымтэ. Куинь питрано бадӟым уробо вуттӥзы - соин, пе, ворттоды. Ярам коть, Степанов ужасьёссэ жаляны ӧз вунэты. Предприятилэн азбартӥз ужтэмаса ветлӥсь ньыль рабочийёсты медъяз на. Дималы таяз учыре удалтӥз. Ӝокыт кузове ӧз сюр ни. Николай Владимирович сое но Алексей Степановичез телевизоръёсты машинаысь васькытъяны пуктӥз: - Мугорын ӝужытэсь. Ящикъёсты уробое пуктылыны йӧндыроды. Нош Пётр Никоноровичлы пӧсь-окыт машина кузоветӥ коньы музэн солань-талань бызьылоно луиз. Соин артэ секыт лулскылыса вамышъяз Михаил Григорьевич. Халат бирдыоссэ пертчылэм, дӥсезлэн кузь сӧзулъёсыныз коть, пе, тӧл мактал ыралъяськоз. Ӝыт тямыс час котырын гинэ "грузчикъёсты" институтсылэн ӧсэз доры вуттӥзы. Ваньзы жуммемын, кӧсэктэмын. - Ну, егит архитектор, кыӵе-мар мылкыдыд? Боевой крещениед зол вал кадь, - машинаысь потӥсь Дималы серем пыр вазиз Степанов. - Ничё-о, дышод ай. Дас вить минут ортчыса, дорам васькоды. Та фирмач коньдонзэ уг жаля вылэм. Дималэн кисыяз огнуналскын куинь стипендиезлэсь ятыр коньдон вуиз. Тузонэн наштаськем костюмзэ адӟыса, Надя егит пилы жаляса кадь шуиз: - Э-э, воштос дӥсед но вылымтэ ук. Ӧз вералэ шат? - Уксёез ке луиз, выль дӥсь но заводёз. Шедьтэм мар сярысь сюлмаськыны. Холодильникысь шампанской потты ай. Ужасьёсты куноятоно, - Надялэсь Димаен вераськемзэ Николай Владимирович кылэм. - Та апокъёс соку ик егит пиосты синйылто. Тодмоесь шат? - Одӥг классын дышетским, - куспазы шыпыртэмзылэсь мугзэ соку ик валэктыны дыртӥз Надя. Нырысь нуналаз Дима огласянь шум ке но потӥз, ӝоген валаз: вузкаронъя та покчи предприятиысь коньдон капчиен уг вуы вылэм. Туж шерез нунал тырон-ӝоктон ужтэк йылпумъяськылӥз. Егитэсьгес шуыса, лэся, вузъёссэ магазинъёсы пичи партиен келяллякуз, Степанов котькугес ик сое но Пётр Никоноровичез ужатъяз. Зэм, музонъёсызлы но уж шедьылӥз. Михаил Григорьевич пумаз-йылаз вуттымтэ чертёжез доры сыӵе секыт уж бере матэктэ но кушетскыса шуэ: - Со каргам коньдонэн!.. Эх, чёрт басьтон! Таӵе куалекъясь киосын кызьы шонер гож лэзёд на? Грузчик ке - грузчик луоно, архитектор ке - архитектор. Тазьы ӟечез уд адӟы. Но Степановлэн покчи предприятиысьтыз ужаны ӧтьыса жингыртӥсь луэ ке, отын ик ваньзэ вунэтэ кадь. Дӥсь возён шкаф доры кыштырак мынэ но оло аслыз, оло Дималы шуэ: - Тол но матэктэ ни. Кышнолы шуба, пе, кулэ... Ма, архитекторъёс пӧлысь огез но покчи предприятиын ужанлэсь уг палэнскы. Нош институтлэн директорез та пумысен чик но кыл-куара уг поттылы. Бен сое но Степанов уг вунэты, дыр... 8 Кисыяд тӧл уг шула ке, аслыд осконэд но будэ, котырысьтыд адямиос но мыло- кыдоесьгес кадь пото. Лангыр Насьта сое ӟеч шӧдӥз-валаз ни. Мар шуод, пиез номыртэм шуныт инты шедьтӥз. Дышетскемын. Инмар тазалык гинэ мед сётоз ини. Ачиз Насьта вань улонзэ со коньдон сьӧры уиськыны тыршиз. Ӟеч-ӟеч чаклано ке, "уиськиз" шуыны но сьӧлык луоз. Пичи дырысеныз ик со шӧгзэ но кузьытсэ ньылё- витё муртлы тырмымон шӧмъяз. Чидаз, возиськиз. Зэм, шумпоттӥсез-бурдъясез но та сюрес вылаз пумиськылӥз, но куректытӥсез, куасалтӥсез данаклы тросгес вал. Атайзэ Сибыре келямзы бере мае но чидано ӧйлась! Нош война дыръя? Нӧднюк починкалэсь вылӥысьгес зӧк кызэз я ньылпуэз-пужымез шедьтэ ай. Отӥостӥ дауръёсын нюлэс шаугетӥз ке вал, война вылтӥ ньыль ар куспын кыр инты кылиз. Отӥяз лӥялъёс но сисьмизы - нюлэс бервылын табере ю-нянь тулкымъяське ни. Нӧднюкысь пиналъёс быдэс нюлэсэз эстыны, юртъерзэс шунтыны, сиён пӧраны коразы-погыръязы. Насьталэн агайёсыз но толалтэ ӟырт кезьытэн вазь ӵукна ик сузэрзэс сайкатъяллязы но шуылӥзы: - Тырмоз изьыны. Чаляк куртчы но салазкидэ кут. Астэ шунтымон коть пу ваёд. Ыштыред вылысь амалтэк ишкалскод. Бакча кенерзэс гур ньылӥз ни. Лапасэз я мунчоез сутыны кутскод-а? Озьы номыртэм кылёд. Агайёсыз коть жаляны валало ай. Выллапал урамез ортчемзы бере Семон сузэрзэ ас салазкияз пуксьыны лэзе: аслэсьтыдзэ мынамез борды думод но бычкыез, тӥрез чаклалод, пе, лымые кирганы медам шедьтэ... Собере Семонэн Коли зӧк коръёсты погыръяло. Коръёссэс нюк улэ питыръяло но пуръёс керттыло. Пинал киосын уно гинэ пичи пуръёс керттылыса дасямын ни. Тулыс тудвуэн со пуръёсты Нӧднюк починкаязы вуттозы. Нош али тросгес пу корано. Ӝытазе ни Лангыр Оддокимлэн нылпиосыз кык салазкиоссэс дор палазы нюж кыско. Со салазкиос но табере вал дӧдьыослы укшало. Пу тросгес мед тэроз шуыса, Семон отчы ваменак пуӵъёс тыре. Тол куазен доразы пиналъёс сучыр-сучыр пӧсяса вуо. Бадӟым ожмаськонлэн кыкетӥ араз Лангыръёс доры ӟеч ивор но вуиз. Зэм, мукет ласянь, со иворез умоен лыдъяны но кыл уг берыктӥськы. Оглом вераса, Лангыр Оддокимез тюрьмаысь мозмытӥллям но ож лудэ келяллям. Нэнэзы та иворлы шум но потӥз, шулӟектӥз но. - Быдтыны келяллям сое, быдтыны! - чигиськыса бӧрдӥз дырызлэсь вазь пурысьтам кышномурт. Зэмзэ ик, ӝыны ар ёрос ортчыса, Нӧднюк починкае шимес ивор вуиз. Загумённов Евдоким Ларионович батыр сямен быриз, пе. Насьта кие Оддокимлэн ас киыныз гожтэм куинь гожтэтъёсыз но похоронка кылизы на. Адями вал но ӧвӧл ни. Но... бырем мурт сярысь но ивор кылӥське на вылэм. Война гуньдэм бере ог тямыс ар ортчыса вал кадь со. Озьы, озьы, ӵапак Сталин кулон аре но толэзе Насьталы (егит нылмурт соку быземын но городын улэ вал ини) телеграмма вуиз. "Нылы, Насьта, - шуэм колхозлэн азьвыл тӧроез, - ӝоген та дуннеен люкиськоно луо. Мынам туж бадӟым вераськонэ вань". Лесозаводысь кык этажъем пу баракысь пичигес комнатаетӥзы Насьта быдэс нунал керӟегъяськыса солань-талань ветлӥз: - Атаймес тюрьмае келяз - эшшо ке монэ нылы шуыны кылыз берыктӥськем. Сурон бам! Ондрей кузпалызлэсь куашетэмзэ кылзӥз, кылзӥз но вератэк ӧз чида: - Дауре озьы пӧсекъяськод. Мыноно. Телеграмма юнме уз шуккы. Одно мыноно. Ужысьтыд куриськы но шонты. - Кӧня ке кило тысь лушказ шуыса, атайме тюрьмае пытсаз ук. Таре ке ӧте, - Насьталэн пушкысьтыз уртчись пуртыез ялан сӥяны уг вала. Насьта Нӧднюк починкае Горд Паволлэсь синзэ кыньыны кадь гинэ вуиз. Агайёссэ но сьӧраз чортӥз. Юртъер кузёлэн кизер-вож синъёсыз бездӥллям, мугорыз куасьмемын, ымнырыз сюсьтыл кадь ӵужектэмын. Сое гур сьӧрысь куашкан калэ вуэм паськыт пу кровать вылэ интыяллям. Валес котыр донгиськымтэ ни - кесяськем фуфайкаоссэс но пальтооссэс вӧлдӥллям но соин буйгатскиллям. Таза дыръяз Горд Павол туж юрдӥсь адями вал, нош табере кыл-куара вераны кынарыз уг окмы ни бере, семьяосыз висись муртэ озьыгес кароно кожаллям. - Лыктӥды?.. - пыдлось лулскиз Павол дораз пырем муртъёсты тодмамез бере. - Мынам сьӧлыке байтак люкаськиз. Сопал дуннее вамыштыны но уг сёт ни, лэся. Ямсыз, туж ямсыз ужай. - Ма, сю кило ю-нянь понна адямиез тюрьмаын сисьты ай. Кыӵе Инмар сыӵезэ бакель кароз?.. - Семонэн Колилэсь кӧтурдсаз мырӟылэмзэс шӧдыса гинэ Насьта сюлмаз тымиськем веранзэ уретӥз. - Озьы, сьӧлыкъёсы байтак. Чидан но чигиське вылэм. Мон ведь атайдэс берло но адӟи на. Ӧвӧ-ӧл, мон уг саташиськы. Фронтысен. Мон соку батальонной писарь вал. Табере малпасько ке, монэ почерке луло кельтӥз. Смоленск дорысен вал со. Дорамы штрафбат пыр ортчем муртъёсты вуттӥзы. Оддоким но пӧлазы. Соку ведь кызьы вал? Виреныд, пе, йӧн адями луэмдэ возьматоно. Тюрьмаысь потэмъёсын озьы карылӥзы. Сӧсырмид ке, мукет часте сюрес усьтӥське ни. Оддоким но сӧсырмылэм, но секыт ӧвӧл. Пумиським тӥни. Нош со монэ тодмамтэ улэ аналскылӥз. Мон но солы уг вазьылӥськы. Но шӧдӥсько: сюлмыз дырекъя. Мон особистмылы верано кожай. Установка сыӵе вал ук. Вань тодэмдэ солы ивортоно. Быдэсъятэк уг лу. Шуи, та Загумённов кулакъёс пӧлысь, мынам гуртысьтым, тысь лушкамез понна тюрьмае пытсамын вал. Особист номыр ӧз вера. Йырыныз гинэ шоназ. Собере огпол... Войналэн кыкетӥ араз вал ини со, сӥзьыл. Батальонмы азьлань мынэ. Тушмон умой- умой уг ик пумитъяськы. Но собере кутскиз ук, кутскиз ук!.. - висись гизьырак берытскиз, пу кровать лосыр-р! вазиз - ортчемысьтыз суредъёс арлыдо муртлы али но лӧж-лӧж кылльыны уг сёто, шӧдске. - Самолётъёсын, пушкаосын, пулемётъёсын!.. Дунне йырчукин луиз кадь. Милям батальонмы мукетъёслэсь кӧня ке ишкалскем. Полклэн командирез дорамы связнойзэ келям. Али ик чигналэ, пе. Нош кызьы чигналод? Тушмон сильсьӧрад тэтчоз. Батальонлэн командирез доброволецъёс сярысь кылпум поттӥз. Соку тӥни Рязань палан будэм егит пи но тӥляд атайды стройысь потӥзы. Ми, пе, татчы кыльыны, тушмонэз пумитаны соглаш. Пулемёт, гранатаос но мукет пыӵал тӥрлык соослы кельтӥзы. Быдэс час возиськыны косӥзы. Собере, пе, чигнамды но луоз. Ми кошким. Вырӟон азямы Оддоким дорам лыктӥз но шуиз: "Мар вал - вал. Вань сьӧлыкъёсмес Инмар адӟоз ни. Шӧдӥсько: та берпум ожмаськонэ луоз. Мон одӥгзэ гинэ курисько: нылпиосме эн вунэтэ. Юрттэ соослы". Со ик Оддокимен люкиськеме луиз... Собере ни батальонлэн командирез представление гожтӥз: кык пиосты, пе, быремзы бере орденэн пусъёно. Особистмы соку ик сямзэ возьматӥз. Кулакъёслы но орден сёткамы ке, пе, кыӵе пример возьматомы?.. Мон янгыш. Мон ке ӧй верасал, Рязаньысь пи сямен ик атайды но орден басьтысал. Со сьӧлыке шымыртӥз монэ... Ваньзэ тае сопал дуннее сьӧрам нуэме ӧз пот. Атайды азьын но, тӥ азьын но мон туж юн сьӧлыко. Простить каре пересь муртэ. Установкаос быдтӥзы монэ. Котькытысь вредительёсты, кулакъёсты утчаны косылӥзы угось... Эшшо одӥг куронзэ вунэтӥськем. Берпум оже мынон азяз Оддоким ныркышетэ бинялтэм сюез сётӥз вал. Сялбер бусыысь, пе. Доре вуыны шуд усиз ке, одно, пе, со бусые ик ну, мынам нимыным йыбырттыса, интыяз ик пазьгы. Паймисько: немецъёс сомында музъемъёсынымы кузёяськизы, нош со одӥг кырым сярысь сюлмаськиз. Бырон азяз но... Ӧй быдэсты со куронзэ. Германиысен кадь кытчы ке сэрпалтӥ. Котомкаеным ӵош. Солдатъёслы но трофей дӥсьёсты сьӧразы басьтыны лэзизы ук. Кожай, капчигес луоз. Сыӵе сьӧлыке но вань... Насьта но, Семонэн Коли но сопал дуннее одӥг пыдыныз лёгиськыны вутскем муртлэн ӟукыртӥсь кроватез вӧзын измыса кадь сылӥзы. Насьталэн сюлэмыз ӧз берыктӥськы. Горд Паволэз берпум сюресаз келянэ но ӧз ветлы. Вактаз усем мурт кадь улӥз... Паймод ук: быдӟым ожын миллионъёсын адямиос нюръяськизы, нош соос пӧлын Лангыр Оддоким но Горд Павол пумисько, кыкназылэн улон-вылонзы кечат-вамат позырскыса кошке. Одӥг кырым музъем, пе. Ӵапак со одӥг кырымысен, чепыльтэтысен ас Дордэ гажан но дунъян кутске ук. Бӧрысь ни, трос но кема малпаськемез бере, Насьта аслыз ачиз шуиз: "Адӟонзы сыӵе вылэм, дыр..." Соин ӵош ик атайзэ выльысь адями радэ берыктон сярысь малпанэз ӧз безды - юнмаз. Нырысь-валысь Насьта механической заводын мотоцикл бичанын ужаз. Нош автозавод лэсьтэмзы бере ӵош ужам эшез Лена Кривилёва сое сьӧраз чортӥз: лакокраска цехын инты, пе, вань. Отын, пе, ӟечгес тыро. Вылаз ик, отын ужамъёсты пенсие но вазьгес лэзё. Гочатӥз. Бурдъяз. Отын со нуналмысь респираторен ужаз. Нош респиратор йӧнала утёз шат буёл зынэн, химиен напчем омырлэсь? Йырыз жон вазьыса бертылӥз дораз. Нуналлы быдэ йӧл сётылӥзы. Вредность понна, пе. Насьта сое дораз нуллӥз. Но кышномурт чидаз. Ӟеч-ӟеч чаклано ке, удмурт нылкышно оломае но чида, ворме. Секыт ке но, уг ӝожтӥськы, ас ныпъетсэ кыл-куара вератэк нуэ. Насьта но озьы ик. Буяно машина кузов вӧзы ик ланьырскысал вылэм, со синазькыль пульверизаторзэ огшаплы коть куштысал но кыре чылкыт омырез одӥг гучык коть юыны потасал вылэм, но - уг луы. Кривилёва но тӥни возиське. Комбинезонэз лызо-вожо- тӧдьыё-гордо луэмын, Ижкарын поттэм "Москвичъёслэсь" вань буёлъёссэс шедьтод, дыр, отысь. Тани али но эшезлэсь шораз дол-л! учкемзэ синйылтӥз но респираторзэ ымнырысьтыз ишкалтыса, ӵужектыны кутскем пиньёссэ ӟарак возьматӥз: - Чидатскы, чидатскы, Анастасия Евдокимовнае, ӝыны ар гинэ кылиз на. Собере пенсие кошком. - Лена эшшо мар ке вераны турттэ на вал, но пӧсьтэм кызонэз мадёнзэ азьланьтыны ӧз сёт ни. Насьта но респираторзэ куштоно луиз: - Лена! Кыре пот! - шулӟектыса кеськиз со. - Али ик! - Ок, Насьтоке... Больницае мыноно луоз, дыр, мыным. Быдэс мугоры жугем кадь... Кривилёва лакокрасочной цехе ӧз ву ни. Туберкулёз, пе. Эмъяськонниын тӧдьы халатэн апайёс но тыро-пыдо юрттыны быгатӥллямтэ ни. Лена син азьын сутскиз- быриз. Лул вылаз вутскемез потыса, одӥгаз шутэтскон нуналэ Насьта эшез доры мынӥз. Саламлы шуыса, асьсэ бакчаязы будэтэм ӵуж кушман, базарысь басьтэм улмо нуиз. Ӧз тодма эшсэ. Ымныраз мур кисыриос гопчиськиллям, йырсиез тӧдь-тӧдь пурысьтам. Насьталэсь пыремзэ адӟыса, со малы ке кисырскиз, койка вылаз шымырскиз, шобрет улысьтыз мугорыз ик кытчы ке лобӟиз-кошкиз кадь. - Вуид?.. - мар вазьыны паймыса, шӧдске, кышномурт кужмысь пальпотэм кариз, но мыньпотэмез ымнырзэ ӧз егитомыты, оло нош, пересь тус пыртӥз: бамысьтыз кисыриосыз азьлолэсь но золгес будӥзы-вӧлскизы, сюсь выллем ӵужектэм ымныраз ӵыжыт ӧз пыр - со кӧд-кӧдэктӥз, тӧдьыектӥз. - Нош мон тани... - викыштӥз Лена, - артана пис кадь кыллисько. Адямиослэсь возьыт... - Зэм но, возьдаськыны кулэ, - эшезлэсь мылкыдзэ бурдъяло кожаса, Насьталэн пыкылон гажез араз. - Урамын тулыс кузёяське. Льӧмпуос сяськаяло. Нош со ке... - мултэс куасалтыны шӧтамзэ валаса, куное лыктэм муртлэн веран ӧрыз куспетӥ уриськиз, бам вылтӥз питрась синкылиосызлэсь курытсэс шӧдӥз но укно доры палэнскиз, куректон но кайгырон шапыкъёссэ эшезлэсь лушкеменгес саесэныз ӵушалтӥз. - Озьы луиз бере, мар карод на? Адӟонэ сыӵе вал, дыр, - мырдэм кылӥськиз висисьлэн куараез. - Нош заводын выль машинаос поттыны кутско. Начальникмы, Петрович, эшшо золгес ужаны косэ. Асдунзы, пе, мед кулэсмоз, - вераськонэз мукет ӧре выжтыны амал утчаны ӧдъяз Насьта. - Поттозы-ы... - куасьмем мугорызлэн олокытысьтыз кужым шедьтыса, Кривилёва сэзъялскиз, солэн куараез олокытӥ-мартӥ чурытомиз. - Азьло но, али но озьы. Весь соослы асдунэз ичиёмытон медло. Нош адямилэсь дунзэ вунэто. Асьме кадьёслэн но кыӵе ке сыӵе дунмы вань, дыр, ук. Ялан ӧпкелисько. Ой, сюлмы! Кытчы пырыны инты уг шедьты. Асме ке верано, ярам ни. Мар басьтод шузи муртлэсь? Но ведь тонэ но ӝуткай. Ӧй адӟылы, кожаськод-а, тон но висиськод ук. Олокытӥ-мартӥ кызонэд пӧсьтэ, шоканэд пытсаське. Ӧй ке ӝуткасал, озьы ик мото бичасалыд. Мон ке, шузи, коньдон сьӧры уиськи, нош аслам дуны сярысь вунэтӥ. Кинлы ке ӧвӧлтэм асдунзэс пичигес карыны, кисызэс тордытыны юрттӥ... Эх, малы тонэ но сьӧрам чортоно вал?!. - веранзэ сюлмыз чигиськоно кадь луыса йылпумъяз Лена. Та вие со оло кинлэсь ке озьы юаз, олокытысь ке вылӥ кужымъёслы вазиськиз. - Гозыен думылыса ӧд ну - ачим мынӥ, - эшсэ буйгатыны дыртӥз Насьта. - Катьяськод ай. Бызьылод! Ачид шуиськод вал ук: йырын ужаны кылдымтэ бере, киосы коть тэк улонэз медам валалэ, пыдъёсы коть бызьылэмысь медам дугдэ. - Дугды ни, Настасьюшкае! - сюлворыса куриз Кривилёва. - Со кылъёсме тыныд сӥзисько. Инмар тыныд тазалык мед сётоз. Сопал дуннеын улон ке вань, мон отын но тонэ уг вунэты. Аслыз Инмарлы вазисько. Тыныд юрттыны куро. Нош таяз мынам нуналъёсы чотамын ни кадь. Улӥ-а мон, ӧй-а? Уг валаськы. Мото бичаса, мотоцикл кузё луыны ӧз кылды, машина поттыса, легковой машинаен но ворттылыны ӧйлась. Семьяос но мултэс каро ни, соин, лэся, та кылъёсты веракум, одӥг синкыли шапыке но уг поты. Висёнэд, пе, палась. Улон вирсэръёсме завод сюпсиз-быдтӥз. Ваньзэ карга вал кадь. Нош астэ ачид кызьы-о каргалод?.. Ӟечсэ гинэ сӥзисько мон тыныд, Настасьюшка... Лангыр Насьта оброс доры вамыштӥз, вылысьтыз вылаз кирос тыриз но кыштырак ульчае потӥз. Юзмыт омыр ньылонзэ пумтэм трос кезьыт шиосын бышкалля кадь. Арлыдо кышномуртлэн кызонэз пӧсьтӥз. Кисыяз котьку нуллоно эмъюмзэ пызйыны со ӧз дырты - корказь выжые пумиз но вылӥе, инбаме, учкиз. Погмаськем пилемъёс тӧлӟыны уг валало, куазез ялан бӧрдыто. Та висись муртэз но курадӟытэмысь уг дугдо. Бронхиальной астмаен висьыны кутскемез дырысен ни Насьта таӵе зор-котэз адӟонтэм каре, угось соку висёнэз уката эрказме, шоканэз пытсаськоно кадь луылэ. Кызэмысь дугдэмез бере со выльысь инбаме учкиз. Отысь, пурысь пилемъёс сьӧрысь, со Лена эшсэ но мудоре суредам тушо пересез адӟиз кадь. Пилемъёс вылтӥ лэймыт ветлӥсьёс Насьта шоры учко, куспазы маке верасько. Со зорез но, юзмыт тӧлэз но уг шӧд ни... 9 Димаез уд тодма ни. Со син азьын воштӥськиз. Базарысь тузӥ шуба басьтӥз. Изьыез но табере выль. Чайы кулэсь. Костюм сярысь ке верано, соиз ласянь ачиз Степанов юрттӥз. Одӥг пол дораз ӧтиз но егит пи котыртӥ берганы кутскиз. "Мар ай талы кулэ луэм? - малпаз Дима. - Нош ик кыӵе ке уж вань шат?" Нош Николай Владимирович со куспын пияшлэн пенжак саесэз борды йӧтскиз но юаз: - Размеред кыӵе? - Мар размер? - паймыса юаз Перевозчиков. - Эн куалекты, кук вискыседлэсь уг юаськы, - кабинетэз тыр гырдалтӥз Степанов. - Студент дӥсьысь потоно ни. Телевизор ворттонын но таиныд ик вал кадь. Ужан дӥсь ке ужан дӥсь ик медло. Нош калык азе учкымон потано. Улӥ этажысь магазинам васькалод. Кудӥз костюм тупалоз - со ик тынадэз. Степановлэсь кузьым. Со куспын офислэн ӧсэз вӧлак усьтӥськиз. Степанов пырись мурт шоры керӟег учкиз. Телохранительёсыз - ош кадесь кык пиос - приёмнояз пуко, секретарез но отын ик, нош лыктӥсь муртэ кыл-куаратэк лэзё. Со адями пунэмзэ берыктыны, пыд вылысьтыд мекалтыны пыре ке? Киллеръёсты сю долларен но медъялляло ни, пе. Отӥяз, кин тодэ, ужбергатӥсьлэн улонэз, оло, одӥг ӟенелик чильпырасеныз дунъяськыны кутскоз ни. Со "ошъёслы" кӧня пол верано: Степанов доры кыӵе ке окты-калтыос матэктыны кулэ ӧвӧл! Николай Владимирович олокытӥ-мартӥ кузь стенка сьӧры ыбыштӥськиз. Отысен йырзэ мычиз но пырем мурт шоры дол-л учкиз. Кӧня ке улыса, солэсь паськыт ымнырзэ пальпотон сяськаятӥз, золскем мугорыз ватскем интыысьтыз тэтчыса сямен потӥз: - О-о, выт бичасьёс но милемды уг вунэто вылэм, - Степановлэн али но кӧдэктэм ымныраз пумен-пумен ӵыжыт пырыны ӧдъяз. - Котьку витиськом но гажаса пумитаськом. Александр Геннадьевич, - со вие ик ӝӧк дораз юбо кадь сылӥсь Дима пала берытскиз. - Нош тӥ, Дмитрий Сергеевич, ваньзэ валады, луоз. Отысь вузкарись ӟеч ужмы сярысь тодэ. Институтлэн нырысетӥ этажаз Степановлэн магазинэз вань. Отын дӥськутэн но, сиён- юонэн но вузкаро. Магазинэ пӧртэм вузъёс пыртанэ Дима но одӥг пол гинэ ӧз пыриськылы ни. Тодэ: вузкарисьлэн нимыз Оксана. Тузӥ, чебер нылаш. Мугорызлэсь узырлыкъёссэ халат пушкы ватэмез уг пот, лэся: модаосты возьматон салонын сямен, уж дураз котькуд нуналэ выль дӥсен вуылэ. Макаронэн ящикез я кеньырен мешокез интыысьтыз мукет азе вырӟытоно луэ ке, соку ик телефон борды ӝабырске но архитекторъёслы жингыртэ. Соос лэсьтозы ай. - Синмаськем кадь тӥледлы Николай Владимирович, - магазинын мӧзмыса пукись нылмуртлэн духи зыныз Дима доры ырак вуиз. - Мукет архитекторъёстэс ноку озьы ӧз дунъялля на. - Синмаськыны мон тӥ кадь чебер апай ӧвӧл ук, - мар вазьыны паймыса, Перевозчиков таӵе вераськонэз уретоно кожаз. - Соиз озьы но, дыр, - малы ке лулскиз Оксана. - Нош пайдадэс валаз. Со пересьёслэсь мар на толыкез? Пырско, ӝушто, кер-кор шокась луо. Ӝуткан-ворттонын ведь тон кадь егитъёсыз кулэ, - нылмуртлэн гадьёсыз витьымтэ шорысь Дималэн тыбыраз мырӟиськизы, пияш соослэсь шунытсэс дэремез пыр но шӧдӥз кадь. - Костюм мертаны лыктӥд, о-о? Соку пытсаськом. Дӥсез кылиськыса мертало. - Ма, озьы но ярасал, дыр, - Перевозчиковлэн ымнырыз дарали кадь ӵыжектӥз. Со куспын мышказ мар ке жилькак кариз, кияз пичигес гинэ усьтонэн шудыса, дораз Оксана матэктӥз: - Табере висъет сьӧры мыном. Дӥсез милям отын мертало. Нокин уз люкеты. - Озьы но ярасал. Размерме мон тодӥсько. - Кунгожсьӧръёслэсь озьы гинэ уд вала. Нош тон эке ик вылэмед. Сыӵеослы мон синмаськисько, - гольтрес серектӥз Оксана. - Оло, юрттоно? Мон уг учкы. Сыӵе товарез адӟымтэ ӧвӧл. Дима трусик коже кылиз гинэ - бордаз йӧтскись луиз. Ӟырдам шаръёс нош ик тыбыраз лякиськизы. Егит пилэн вань быгытъёсыз золскизы. Со нылмурт пала берытскиз. - Нош тон пӧсь вылэме-ед... - кырӟаса музэн нёжъяз Оксана, горд-горд буям гижыё чиньыосыныз пияшлэн дэрем бирдыосыз доры сузьтӥськыса. - Диван - бӧлет сьӧрын... Но тон эн дырты. Мон ведь шоккетӥсько гинэ вал... Кыӵе шоккетон на! Дималэсь мугорзэ убир кужым перияськытэ ни. Нылмуртэз лӧбак ӝутыса, со бӧлет сьӧры дыртӥз... - Дима, чупа ук, чупа монэ... - пӧсь шокаса тэльмыре нылмурт. Нош егит пи уг ик кылы кадь - со вожомыса но ӟырдаса ас ужзэ лэсьтэ. Ымнырзэ юри палэнэгес каре. Вань кужымзэ, дартсэ пиосмурт ужзэ быдэстонлы сётэ. Но тани кык мугоръёс зубектыса, пӧсектыса кошкизы, нош огшап улыса, кыкназы вез-вез золскизы но шокамысь ик дугдӥзы кадь... - Дӥсь мертандэ но вунэтӥд-а? - Димаез Оксаналэн куараез сазьдытӥз. Со дӥсяськыны вуэм ни. Номыр ӧй вал кадь - кылъёссэ озьы ик нёжъяса вера. - Уж ко- отьку ик йырын медло. "Кин ай тазьы вераське вал? Уж, пе, котьку йырын медло. Кытысь ке тае кылэм вань ни, - чурыт диван вылысь ӝутсконъяз малпаз Перевозчиков. - А-а, Степанов! Бен, со". Та кылъёс Димаез соку ик музъем вылэ вуттӥзы. "Оло нош, куспазы номыр со-та ӧй вал? Соку малы быдэс мугорын буш?.." - Степановлэн саламез вӧзы аслэсьтымзэ но сёто ай, - келякуз Оксана пальпотыса эшшо одӥг керттэт мычиз. - Та дэремез монэ тодад возьыса мед нуллод. Кужмо ик вылэмед. Нош чупаськыны-вешаськыны дышетӥллямтэ кадь. Кин бен дышетоз? Люба ке шат? Со анаез-атаез вӧзы кылиз. Ижкаре лыктэмез ӧз пот. Гужем каникулъёсы бертакуз, Дима сое одӥг пол дораз но вуттылӥз. Мумизлы но, атаезлы но кельшиз кадь нылмурт. Нош распределение дыръя Ижевске гожтӥськыны чутрак пумит луиз. Патер басьтӥд ке, пе, соку, оло, вуо. Ма, ваньмыз валамон: Академгородокысь куинь комнатаен квартираысьтызы кошкемез, ланьыраны кутскем корка кен луыса вамыштэмез ӧз пот. Анай-атайёсыз но, наукаосъя кандидатъёс, одӥг нылзэс сокем кыдёке келяны ӧз ӝутске. Кулэ ке, уж тыныд но татын ик, Новосибирскын, шедьтом, шуылӥзы. Кыль гинэ. Нылмылэсь но эмеспимылэсь улонзэс радъяны-ӧръяны кужыммы-моӵмы тырмоз ай, пе. Инмар мед утёз пыртос луонлэсь! Дима чылкак бырем адями ӧвӧл ай. Ас корказэ ас киыныз лэсьтоз. Любаен соос ӝытъёсы ӵем гинэ Академгородокетӥ лёгаськылӥзы. Егитъёслэн бульварысьтызы Арбузов ульчае мыно, собере - берлань. Пумен чупаськылӥзы но. Лычсузьымон, ымдуръёссы пульсамон... Нош та буяськем апаен кызьы? Чупа, пе. Кызьы озьы шуак чупалод? Астэ эриктэмаса кадь. Сотэк но ваньмыз витьымтэ шорысь луиз. Пуныослэн музэн... Лифтэз возьмаса сылонъяз Дима выльысь Любаез син азяз пуктэ. Соин ке луысал, валамо-он, чупаськыны косытэк-маратэк бурдъяськысал. Нош таиныз.... Со вие лифтлэн ӧсъёсыз ӟукыртыса усьтӥськизы. Николай Владимировичен Александр Геннадьевич кудзылы нырысь потыны валатэк, лэся, ӧсъёс вискы ёрказы. Кыкназы уго сумбресэсь, кыкназы азьлань мерско. Я, мырдэм но кызьы донгиськизы. Ӵыжектыса но шокась луыса, ог-огзы шоры кунэрес учкыло. Потэмзы бере ини Степанов умойтэм лэсьтэмзэ шӧдӥз, лэся, - куноезлэн пельпумаз йӧтскиз но вешам музэн шуиз: - Александр Геннадьевич, азьлань. Танкистъёс чигнанэз уг тодо. Бадӟым могӟетъёсты пушкаен пазьгоно, пичи мишеньёсты - пулемётэн. - Кыӵе-сыӵе мишеньёс? - азьпалагес сётскыса вазиз выт бичась куноез. Но Николай Владимирович солы мазэ-созэ ӧз валэкты - ачиз кадь ик ӵыжектэм Димаез адӟыса шуиз: - Оксана отын огназ-а? Уж котьку йырын медло, нош со ке весь аслэсьтыз... - мышказ кылем Александр Геннадьевич пала берытскиз но чырс палэзез сялӟем мактал вазиз: - Дыртӥм, а то асьмеды азьпалто ни кадь, уть, егит пимы кыӵе пӧсям. Вӧзтӥз ортчыкузы, Перевозчиков шӧдӥз: кыкназы бордысь бургы вышкыысь кадь аракы зын паке. Кузь, пеймыт коридорысь Перевозчиковлэн пеляз Степановлэн жинмыт куараез кылӥськиз на: - Мон тыныд, Геннадьевич, номырме уг жаля. Толон выль вузъёс ваи. Городысь сыӵезэ уд шедьты на... Мугорызъя но туж тузӥ костюм быръем Оксана. Дораз, выль дӥсьсэ мертакуз, Дима мумизлы костюмзэ дунтэк сётӥзы шуыса вераны шедьтӥз. Соиз копак паймиз: - Дунтэк, шу-у?! Инмар солы тазалык мед сётоз. Сыӵе-сыӵе матерьяллэсь вуремы-ын! Паймод но бырод. Кен гинэ кулэ на табере асьмелы, Ондрей. Адӟысалыд ке пидэ, паймыса пыд вылысьтыд пограсалыд. Вот адямиос - уло ке уло! Кусьтюмзы но кузьманы жаль ӧвӧл. Дэрем но сётӥллям на... Паймытэк паймод та адямиослы. Ужамдэ дунъяны валало. Нош Дима со ӝытэ сокем паймись тусо ӧй вал. Зор-кот улын но, кезьыт куазен но Степановлэсь вузъёссэ ӝоктон-ӝутканын ужамзэ син азяз пуктӥз угось. Нош дэрем сярысь ке... Оломар ужен, оломар лэсьтыса вуэм кузьым. Михаил Григорьевичлэн но син шораз егит эшезлэн выль дӥсез йӧтӥз. Арлыдо воргорон паймемзэ сокем тулкымъяськыса ӧз возьматы. Ныр пыртӥз вераськыны дышем мурт малы ке шултӥз но костюм шорысь синъёссэ вошъятэк шуиз: - Степанов дорын узырмиськод ни, лэся. А ведь мынам но бадӟымез фирмач кариськыны медэ вал. Ачим кырми. Табере куддыр ӧпкелисько ни. Дышетсконэн малы ке ӧз пӧрмыты. Проводнике мынӥз. Дунъёс тэтчан вакытэ, эшъёсызлэсь адӟем карыса, лэся, рейсъёсысьтыз олокыӵе но вузъёс вуттылӥз. Собере сооссэ магазинъёсы сётказ. Я Москвае, я Питере ветлӥз. Кельшиз, лэся. Нош мон солы уретӥ: Молотковъёс пӧлын спекулянтъёслы инты ӧвӧл. Кин тодэ, оло, со ик сюдысал- вордысал ни монэ. Ӧйлась. Табере тани ачим ик спекулянт дорын гырисько. Огшап ужай ке, пичиезлы пиелы видеомагнитофон коть басьтоно шуисько вал. Эшъёсызлэн вань. Вожъяськон... Со котькыӵеез вань. Сьӧд вожъяськон йыртэман сюрес вылэ но сапкытэ. Соку тон адями уд луиськы ни. Вожъяськон вирдэ но, сюлэмдэ но сюпсе, кӧсатэ. Соку астэ ачид валамысь дугдӥськод. Уйёсы кион музэн вузыны дась луиськод. Собере уд чидаськы ни - йыруж я мар лэсьтӥськод. Нош вань на мукетыз вожъяськон. Ӟеч вожъяськон. Бускеледлэсь я эшедлэсь адӟем карыны тыршон. Таиз ини кыӵе ке ӵошатскон мактал. Вир но соку мугоретӥ золгес бызьылэ-ужа, сюлэм но сэрытгес йыггетыны кутске: ӝоггес, ӝоггес, улон одӥг пол гинэ сётӥське, тынад со чебер но адӟем карымон медло, тэк пукыса, ноку ӟече уд вуы. Дима та вие нокыӵе вожъяськонэз ӧз тодылы кадь. Солы ужезлэн ӧраз пыроно. Зэмос архитектор луоно. Нош та малпанъёссэ быдэстон сюресаз пумен тросгес нырко-гопо интыос шедьылыны кутскизы. Чертёжез вадьсы мыкырске гинэ, мылкыдъёссэ тӧдьы кагаз вылэ кисьтон сярысь малпа гинэ - ӝӧк вылысь лэчыт вӧлэм карандашъёсын ваза вӧзысь телефон жингыртэ ини: - Ӧрӟиос! Машина вуиз! Уж борды!.. Малпалод, таиз, ӝӧк сьӧрын быдэсъяноез, выль коркаослы проект кылдытъяноез, уж но ӧвӧл ни. Егит пилэн татын, та удысын, аслэсьтыз быгатэмзэ возьматэмез потэ. Диплом басьтон понна вить арзэ юнме ӧз быдты ук. Нош улон тани мукет ӧре выжтэ, чальтчытэ - тынэсьтыд мылкыдъёстэ, малпанъёстэ санламез чик уг поты. 10 Ондрейлэн быдэс улонэз тылэн герӟаськемын вал. ФЗО бере доменной гур дорын пӧсяно-ӟырдано луиз. Бератаз тӥни мартен цехе выжтӥзы. Улоназ вань ӟечез тыл бордысь потӥз. Тыл - со андан, корт, огкылын вераса, промышленностьлэн нянез. Со тыл ик улонзэ но чутрак уретыса куштӥз. Авария дыръя бригадир со шимес интые юрттӥсьсэ-а, кинэ ке мукетсэ-а лэзьыны быгатысал. Но со озьы ӧз лэсьты - ачиз дыртӥз... Пьезозажигалкалэсь нырзэ Ондрей газ плита вадьсы вуттӥз, чирк! кариз но кизэ урдӥз. Ӝуа. Со тазьы ик адӟиз кадь форсункаысь потӥсь лызалэс-горд тылэз. Табере отчы вуэн миска пуктоно. Номырзэ вунэтоно ӧвӧл. Насьтаен Дима уралмыса вуозы ук. Сиён пӧрано. Паймод та нылкышноослэн чиданзылы. Шуг-секытъёс соосты вожомыто гинэ кадь. Воргорон сыӵе дыръя кемалась нискетыны шӧтасал ни, мугорыз юскиськысал но, юыны я мар кутскысал. Нош кышноос - мукетэсь. Тани Насьта ик. Астма - шудон уж ӧвӧл. Астмопенэзлэсь, эмъюмъёсызлэсь ноку уг люкиськылы. Кызонэз пӧсьтэ ке, ньылоназ пызйыны соку ик, пе, дась мед луоз. Пенсие потэмез бере дораз но пукыны быгатысал ни. Кытын, пе! Ӵукналы быдэ сямен шундыберган тысен бадӟым пуйызэ, стаканзэ кутэ но вузкарыны кошке. Дима дышетскон вакытэ шуылоз вал: - Асьмеос инвалидъёс луэм понна пимы винамат ӧвӧл ук. Мукет городын юрттӥсь но, марась но уз сюры. Пензилы гинэ оскиськон ӧвӧл. Сое но дыраз уг сёткало. Дунтэм дунын басьтӥсько, вузасько но - Сергеичмылы нош ик перевод. Дима дышетсконзэ йылпумъяса бертэм но ужаны кутскем бере кырӟанэз воштӥськиз: - Тодӥськод ке, сема вузанын но вожмаськон вань. Транвай я автобус дугдылон интыосынгес вузасько. Ми Тимирязев нимояз сылӥськом. Куинь кузя. Одӥг пол вӧзамы кыӵе ке пересь султӥз. Пу ящик но ваем. Со вылэ пуйыоссэ интыяз, огез вылэ "сылалтэмын" гожтэмын, мукетаз - "сылалтымтэ". Ох, тод вал, мар луиз соку! Карповнамы, ӟуч кышномурт, мар гинэ ӧз вера солы! Конкурентъёс, пе, милемлы кулэ ӧвӧл. Ми татын куинь кузя ужаськом, азьланьын но озьы ик мед луоз. Тышкаське, воргоронъёслэсь пӧртэм ӧвӧл. Выль вузаськисьмы кылэм-адӟем уг кары. Карповна соку вань семазэ кузёезлэн ымаз-ныраз пазьгиз. Инмар мед утёз со кышномуртъёс интые вуонлэсь. Но улонлэсь кудпала питырсконзэ тодӥсь ӧвӧл ведь... Лангыр Насьта чакласькисьгес луиз. Тысьсэ пиезлэсь лушкемен куасьтэ. Дима уже кошкем бере гинэ вузаськон интыяз дыртэ. Кепыра. Нош воргорон сярысь ке... Зэм но, солэсь пайдаез сыӵегес ни. Тани кызьы сукыр мурт корказэ липоз? Уз, уз пӧрмыты. Медъяно ке, коньдон кулэ. Насьта со сярысь но поттылӥз вал. Сюлэмыз чигиськон, вирыз пазьгиськон калэ вуон дыръёсаз гинэ озьы лангыртылэ Насьта. Ма, Ондрей сое ӟеч вала. Больницаын дыръяз, аслэсьтыз сукыр кылемзэ валаса, воргорон ассэ быдтыны малпа вал. Палатаын одӥгназ гинэ кыллиз. Адӟись но чаклась ӧвӧл дыръя та ужез быдэстоно кариськиз. Синвуэныз но пӧсяменыз котмем простынез кылзкисьтэм мугорыз улысь мырдэм но кызьы кыскиз. Шорзэ шедьтыса, кузяназ кесиз. Ӝыжомемын вылэм, лэся: укыр капчиен сётскиз. Воргоронэз та ӧз дугдыты ни. Тӧдьы бӧз кесэглэсь одӥг пал пумзэ корт кроватезлэн пумаз керттӥз но позыръяны кутскиз. Бордаз кыскыса утчаз - йӧн кадь, чидалоз. Кыӵес лэсьтӥз. Со кыӵес бордысьтыз лэзиськытэк, кроватьысь васькиз. Табере йырзэ гинэ чуртнано на. Катьтэммем мугорысьтыз лулыз ӝог потоз. - Султӥд ни-а, мусокае? - кышноезлэн нёжмыт куараез усыкмыса выллем сылӥсь воргоронэз электроен кадь шуккиз. - Малы ке сюлэмы шуг луиз но, дорад лыктоно кожай. Мырдэм лэзизы. Висисьёслы, пе, али кӧлыны кулэ. Люкетод гинэ. Шуисько, кызьы мон солы люкето? Юэмез потоз я мар. Лэзизы. Синтэм воргорон бакомиз, кылзӥськисьтэм чиньыосыз койка пыкет бордысь гердэз пертчыны тыршо. Но уг пӧрмы. Зол керттылэмын. - Сыл ай, сыл, юртто, ваньзэ лэсьто, - кышномуртлэн куараез пумен матэктэ но матэктэ. - Мар сыӵе керттӥллям? - гозы кадь позыръям бӧз борды кутскиз Насьта, вылӥегес ӝутӥз но, кыӵесэз анласа, синъёсыз лыз-вож адӟыны кутскизы, астмаеныз сэрен кӧсэктэм ымнырыз ӵыжектӥз. Мар вераны валатэк, кыӵесэз кияз возе. Бӧрысь гинэ дырекъяса-дырекъяса шуиз: - Ондре-эй! Тон сыӵе малпанъёсын улӥськод-а? Монэ огнаме кельтэмед потӥз? - Кыӵе пайда на мынэсьтым? - измыса кадь сылэ Ондрей. - Артана пис. Синтэм бӧчы. Кинлы мон кулэ? Шлак куян интые - отвалэ куштоно. - Шузи ик тон вылэмед. Шузи! Астэ гинэ малпаськод. Нош мон сярысь быртык коть малпад-а? Кин но мар мон? Кинлы мон кулэ? Пиос будэмын ни. Кышнояськозы. Асьме сярысь, оло, тодазы но уз лыкты ни. Нош асьмелы улоно. Ог-огмес яратыса, ог- огмылы юрттыса. Инмарен озьы гожтэмын ук. Эшшо ке ымыз усьтӥське. "Шла-ак!". "Отва-ал!" Мон кызонэн нерад. Озьы ке, монэ но отвал шуонад? Уз пӧрмы! Мукетъёслэн но я татӥзы, я отӥзы висе. Соосты но отвал шуонад-а? Кин гинэ кылёз на соку люгыт дуннее? Синтэмъёс ӝык ӧжыт-а? Уло ук. Котькуд ӵук сайкамзылы, выль нуналлы шумпото. Тон ке... Собере, синвуаськыса, Ондрейлэн гадь бордаз ӝиптӥськиз но дырекъясь, сюлворись куараен шуиз: - Кылдэ сёт: сыӵе сьӧд малпанъёс йырад уз вуэ ни. Озьы ик вера: мон котьку Насьтокеным уло. Инмар кӧня гожтэм, сомында. Шу: Инмарен сётэм мында Насьтокеным уло. Нокытчы уг кошкы. - Шуисько. - Воргоронлэсь но бамъёссэ синкыли шапыкъёс ӵушкало ни. - Казакпи-а, мар-а мон кытчы ке кошкыны? - Эшшо ке со ик серекъя ук! - вожомиз Насьта. - Жуг вал но - бӧрдыны эн сёт. Асьмеос ог-огмылы вордскемын ук. Кызьы тон сое уд валаськы?! Шу: улонамы коть нош ма мед луоз, коть нош кыӵе секыт мед луоз, мон возисько, асме ачим саптаны уг сёт. - Шуисько. - "Шуисько", "шуисько"!.. Йӧнала верамед но уг лу-а, мар-а? Та кылъёсыдлы оскыны луоз-а, уз-а? - Оскы, Насьтоке. Оскы! Мон ваньзэ чидало, возисько, - пинал мурт музэн, кышноезлэн гадяз ӝиптӥськиз, шымырскиз Ондрей... Со али картофка дася. Соосты йыгыръяса ведраысь басьтэ но пала. Насьта со ведрае ачиз устооссэ бырйыса тыре. Синъёссы мур гыркоесь медам луэ, дэйёсыз, нумыр портэмъёсыз пӧлазы медаз шеде. Кубистаез но со чылкыт сузяса кельтылэ, юдонэз гинэ кыле на. Ондрей отӥзэ ваньзэ ачиз лэсьтэ. Синтэм мурт киыныз, чиньыосыныз адӟе, шуо. Озьы ик вань. Ондрейлы та ужез вискын но тодэ ваёнъёсыз лачмыт ужаны уг сёто. Больницаын тӧдьы бӧзэн озьы дауртэмзэ тодаз вае ке, вань ёзвиосыз шальтрало. Аслыз вожпотонэз мугорзэ ӟырдатэ. Кышноез азьын лябзэ возьматӥз угось. Со азьын гинэ-а? Соин сэрен Ондрей табере аслыз но синазькыль потылэ ни. - Кыштыр ужаськом-а? - ӧс дорысь ырак вӧлскем кезьытэн ӵош шуккиськиз задор куара. - Зэмос сталеварлы салам! Картофка паласьлэн киысьтыз пурт кӧмен тырмем тазэ усиз. Ондрей, дӥсьтытэк но мазэ-созэ валатэк, интыысьтыз султӥз. Мугорыз шонерскиз. Авария дыръя сутскыны шедем ымныраз ӵыжыт пыриз. Нош мукет дыръя солэн синъёсыз котырын котьку тӧдьыалэс-ӵуж луэ. Ачиз гинэ сое уг адӟы. Быгытъёсыз но золскизы кадь - чонь- чонь кариськиз. Пельпумъёсыз вылысь пеймыт-лыз костюмзэ но шӧдӥз кадь. "Зэмос сталеварлы салам!" - заводлэн директорез Тарасов озьы вазиськылэ вал ук солы. Ӵапак со ик пеймыт-лыз костюм но кузьмаз. Азьмынӥсь сталеваръёслэн Москваын ортчоно бадӟым совещанизы азьын вал со. Делегациез ас дораз люказ, Москвае ку, кызьы мынон сярысь вераз но, автобусэ пуктыса, центральной универмаге келяз. Мастеръёсты но рабочийёсты пырак складазы ыстӥзы. Лыктэмъёслэн синъёссы палёмон калэ вуизы. Германиысь, Франциысь, Венгриысь костюмъёс радэн-радэн ошылэмын, кузёоссэс возьмало. Нош сыӵе дӥсез шедьты ай вузкарон залысь. Уд, нокызьы уд шедьты. "Кыӵе дуннее вуиськиз та? - Ондреен ӵош лыктэм арлыдо рабочий ошылэм дӥсьёс дортӥ ортчиз, одӥг костюм борды но йӧтскыны ӧз дӥсьты. - Коммунизм!" Я, кызьы но озьы костюмъёс но, дэремъёс но бырйизы. Табере коньдон тыроно. "Эн сюлмаськелэ, - шуиз складлэн кузёез, - ваньмыз тыремын ни". Ӵапак отын быръем костюменыз Андрей Петрович совещание но ветлӥз, бератаз ни трос пӧртэм кенешъёслэн президиумъёсазы но пукылӥз. Вераськыны уно пол ӝуткаллязы. Но Перевозчиков сыӵе учыръёсы киыныз гинэ сэзъялляз, шуылӥз: "Мон ведь, эшъёс, киосынымгес ужаны дышемын. Нош татын кылзы мынӥсьёс мед лабыртозы ни". Президиумын пуконлэсь ӧз палэнскылы. Аслэсьтыз дунзэ но данзэ валалляз угось. Тӥни соку но Тарасов шуылоз вал: "Зэмос сталеварлы салам!" Ӵапак сое тодаз вайыса, пересь муртлэн катьтэммем мугораз вирыз шудыны кутскиз кадь. Собере ни костюмзэ син шораз пуктӥз. Насьтаез кызьы ке огпол кушектӥськыса шуиз вал ук: "Собрання костюмдэ кейёс номырлы ярантэм кариллям. Дӥсяллямысь дугдӥд. Мон но тӧлатыны вунэтӥськем"... Э-э, ӟеч-ӟеч чаклано ке, Тарасов но кемалась сопал дуннеын ни. "Кинэз-маиз солэн кылъёсыныз шоккетыны дӥсьтэ?" - малпаськон дуннеысьтыз потыны тыршыса, Ондрей пырем мурт пала берытскиз. Озьы огшап чус улэмез бере гинэ куаразэ сётыны валатскиз: - Ужасько-ом... Сием потэ ук. Вождэс эн поттэ, киндэс ӧйгес вала. Малы ке Тарасов кадь вераськиськоды. - Андрей Петрович, мон та, Степан! - пырем мурт корка кузёлы кизэ мычиз. - Таӵе бугрес вакытэ азьвылэз куддыр кыӵе ке уйвӧт кадь потылэ. Вал-а со, ӧй вал-а? Лыктӥ тани... Ужамдэ весь син азям пуктылӥсько. Тынад кызьы вал: ковшъёс дыраз вуттэмын, шихтаед но дасямын. Саесъёсыз пужалляса ужаны гинэ кылемын на. Корт пӧзён вакытэ полировочка лэсьтылэмдэ но ӧд вунэты, дыр. Нош плавкаосыд скоростной вал. Дыртытъяд. Гур сӥямлэсь азьло ик отчы шихтаез но, мукетсэ но киськатъяд. Пӧсез выль плавкалы утёно. - Назаров... Степан!.. - Ондрейлэн номыр мукет верамез ӧз луы ни. - Тӥ, Андрей Петрович, вождэс эн поттэ, - ӧтьымтэ кунолэн куараез дыректӥз. - Вунэтӥм ветеранмес. Весь ужъёс вылэ чӧлскиськом. - Соиз озьы, дыр, но, Степан... - корка кузё могӟалскиз. - Атай нимдэс вунэтӥ. Соку ведь мар - Степан но Степан вал. Али ни кылӥ, быдэс цехамы кузё луиллямды. Нош азьлоез сярысь ке... Лулӟиськыны гинэ кыле на. - Уг яра озьы ултӥяськыны, Андрей Петрович. Степан вал, али но Степан ик. "Тӥ" карыса но ӧм вераськылэ кадь. - Озьы, озьы, Степан. Мар ай асьмеос корка шорын юбо мактал сылӥськом? Ӝӧк сьӧры пуксём, кенешом-лабыртом. Козяйкалэн мар но со дасямез но вань, дыр. Пумит ӧвӧл- а? - Пуксём. Мар пуксёнтэмез? Кузё ӧте бере. Мон но тани салам ваи, - кулэсь вурем сьӧд портфельысьтыз консерва банкаос, колбаса но коньяк поттонъяз, соосты ӝӧк вылэ интыянъяз шуиз Назаров. Кунолэн юрттэмез улсын ӝӧк вылэ олокытӥ-мартӥ сиён-юонъёс вуизы. Сылалтэм кубиста, огреч, нянь. Ондрей валэктылӥз гинэ, кытысь но мае шедьтоно, кытчы тыроно. - Мар бен, пумиськеммы понна оген бекыртыны но сьӧлык уз луы, дыр, - ӟенеликез борды кутскиз Степан. - Озьы медло, - Ондрей но пумит ӧз кариськы. Ваче шуккиськизы, юизы. Степан соку ик огреч дуре сузьтӥськиз, кочыр карыса сииз но ушъятэк ӧз чида: - Усто-о! Асьтэ сылалтэмез, дыр. Уксустэк-мартэк. Нош мынам кышно малы ке весь мариновать каре. Сотэк, пе, ӵоктэтэз пезьдэ. - Насьталэн ужез. Йӧгуын сыло. Нош тон малы ке ялан котыръяськод кадь потэ. Киярмес мактаны гинэ ӧд лыкты, дыр, ук. Радиоысь кылӥ, "Ижстальлы", пе, электротыл сётэмысь дугдӥллям. Кызьы нош электромартен электротэк ужалоз? - Гуръёсты кысонозь ӧз куасалтэ. Но вал сыӵеез. Шуге-леке вуылӥськиз, - Степанлэн куараез ӟазыресгес луиз. - Вылӥысьёс но куддыр малпаськыны быгатыло вылэм ай. Уката ик, куке соосты котыр ласянь шымырто. Ойдо эшшо оген лэзём на. Ачид вераськод вал ук: андантэк, корттэк одӥг кун но кун уз лу. Страналэн кыкетӥ нянез ук со. Ӵок, куртчыны но сиыны уг луы ке. Но со - нянь! Вот сое валаны кутско ни кадь. Чаркаоссэс бушатэмзы бере вераськонзы нош ик огшаплы уриськиз. Куное лыктэм мурт котырак учкиз, мур лулскиз но секытэн вераз: - Ми ведь тонэ, Петрович, "шундымы" гинэ шуылӥм. Йырсиды пиж-пиж горд вал. Нош али учкисько ке, быдэсак пурысьтамын. Юртъерды тани номырлы ярантэм луэм ни. Уд кышкаськы-а? Кӧлыны выдод но уд султы ни: вӧлдэтэд-липетэд вылад куашкалоз. - Тон, Степан, визьме сынаны лыктӥд-а? Сыӵе вылэ кылиськиз бере, мар карод на? Выльзэ ке лэсьтоно, коньдон но, кужым но ӧвӧл. Сберкассаын кык машина тыр коньдонэ вал - ваньмыз быриз, силё интые кылиз. Ас дыраз соин корка но басьтыны луоно вал, дыр. Нош али... - Ондрей веранзэ ӧз азьланьты ни, киыныз гинэ шонтӥз. - Йырез поромытӥсьёс тонтэк но трос. - Вождэ эн вай, Петрович. Вераськонме, оло, мукет ласяньгес ӧръяны кулэ вал, дыр. Егит на, дышо. Мон ведь улон-вылон сярысь кенешыны лыктӥ. Мар шуысалыд, тыныд, Петрович, квартира сётысалмы ке? - Кин бон сётоз ай сое? Рынок шуо ни ук табере. Ваньмыз коньдонэн вузаське но басьтӥське. Нош милям кыӵе коньдон? Миллионеръёс радэ пырыны ум быгатэ ни. Гогыедлэсь вылӥе уд тэтчы. - Нош ми тыршом! - кудӟемез шуккемен-а, мар-а, Назаров кык киоссэ ик ӝӧк вылэ лаш-лаш понӥз, тусьты-пуньыос жингырак вазизы. - Ветеранъёсты вунэтыны уг яра. Вылаз ик, вань улонзэ заводмылы сётэм муртэ. Соиз ини милям сюлмаськонмы, Петрович. Кык комнатаеныз кыкнады тэроды? - Пимы но тэроз. Ваньмы. Меӵак верано ке, Степан, лымыё толлэсь кӧбераны кутски ни. Сисьмем мумыкор секытлы чидатэк чигиськыны но быгатоз. Тау вунэтымтэед понна! - пересь муртлэн бам вылтӥз синкыли шапыкъёс погыльскизы. - Вот озьы ик мед луоз! Маке огзэ гинэ ӧй вала: пиды дышетсконзэ быдтӥз ни шат? - Туэ бертӥз. Табере - архитектор. - Ну, али - кык комнатаен, отӥяз пиды ачиз мед малпаськоз ни, - Степан Назаров пересьлэн пельпумаз кизэ лап-лап понӥз. Кунозэ келямез бере Андрей Петрович выльысь ӝӧк сьӧры пуксиз. Со валаз: таӵе куд йырын ӝӧк вылысь сиён-юонэз утялтыны уз пӧрмыты ни. Нош кулэ меда ӟеч адямиен кунояськемезлэсь бервылзэ утялтыны, лушкеме кельтыны? Семьяез но мед адӟоз: сое уг вунэто, сое адями радысь поттӥллямтэ на. Ӝӧк сьӧраз пуксиз но ас понназ гинэ нёжъяны кутскиз: Куке но мон вал, дыр, Туж пинал пиосмурт. Мон уг валаськы вал Куректонэз, бӧрдонэз... Но тани кырӟанэз шуак уриськиз. Кылэмзэ тодаз вайыса, со пальышак потӥз: "Шундыен, пе, ӵошатӥм. Тӥ ӵошатоды-ы... Куке, ма, шунды но вал, дыр, нош табере со сӥяз, кынмиз..." Патер сярысь ке шуоно, Ондрей сокем шузи ӧвӧл ай: Назаровлэсь квартира сётон пумысен верамзэ со нокинлы уз поттылы: чуньы вордскымтэ на бере, со вылэ пуксьыны дыртоно ӧвӧл. 11 Котырысьтыз пичи но бадӟым гуртъёсты ньылӥсь город ӵоксузиз кадь. Квартиралы ёрмисьёслэн лыдзы ӧз кулэсмы ке но, выль микрорайонъёс уг кылдо ни. Тани Перевозчиковъёс но, выль патер сётӥсь луысал ке, соку ик вырӟысалзы. Но кытын ай со? Коньдон тырмымтэен, лэсьтӥськисьёс векаса улыны кутскизы. Нош лэсьтӥськон йӧнала ӧвӧл бере, валамон ни, архитекторъёслэсь но ужъёссэс курись-дунъясь кулэсмиз. - Кытчы тазьы мынӥськом, малы ранӟиськом, йырмес тӥяськом? - Михаил Григорьевич чигем карандашсэ ӝӧк вылаз зӥртӥз. - Проект дасяськом ке но, мар пайдаез? Озьы ик костаськоз. Кинлы со али кулэ? Нош дас ар ортчыса, проектъёс но мукетэсь луозы ни. Ноку ӧй малпалля, пересьмон-уймон арлыдам таӵезэ адӟыны кылдоз шуыса. - Та ужмы... - пуны куртчем бере музэн интыысьтыз тэтчиз Дима, - та ужмы но-а? - Тодэмед потэ ке, егит эше, мон берло вить арзэ архиве ужасько ни. Дасясько, вуттӥсько но - выльысь отчы. Нош ик лэсьтӥсько. Тазэ но отчы ик. - Малы соку ужаськом? Дырмес быдтӥськом? - Дыр... Ӵапак со понна ик ужаськом. Дыр ортчемъя, пенсия матэктэ. Верасько ук: кык но ӝыны ар кылиз на. Со гинэ буйгатэ. Ӝоген тани нуналъёсты лыдъяны кутско. - Мыным соку ма кароно - ньыль толэзьем ужам стажен егит муртлы? - Уг оскиськы, весь тазьы луоз шуыса. Лэсьтӥськисьёс но, архитекторъёс но кулэ луозы ай, - куараез дырекъяса шуиз арлыдо воргорон. - Йырчукин улон. Йырчукин малпанъёс. Поттылыны ик уг турттӥськы вал но - пальккиськиз тани. - Мар ке ӝоканы кутски кадь. Кыре потало, - Дима пальтозэ шифоньерысь сюлтрак кыскиз но вужер музэн ӧс сьӧры ышиз. Тышкасалзы-жугысалзы ке, егит пи чидасал. Лыз-вож интыосыз бурмысалзы, вольтчем азьёсыз интыязы пуксьысалзы. Молотков ӧз жуг, но Дималэсь чебер малпанъёссэ бус пӧлы сылмытӥз. "Кызьы, иське, табере? Корка лэсьто шуисько вал... Сапкытӥзы. Бумага наштась луиськем кадь, - ульчаетӥ вамышъясь егит пи кезьыт тӧллэсь пальто пушказ пыремзэ но уг шӧд - бирдыяськыны но, шарфсэ чыртыяз бинялтыны но вунэтӥз угось. - Кин мон, мар мон?.." Кудӟем мурт музэн вамышъя Дима. Гылыт интые лёгиськыны шедьтыса, тротуар шоры ик зуняк усиз. Йыртышкыз нушыен шуккем кадь вӧсь луиз. Султы вал - ӝутскыны кужымез но, мылкыдыз но ӧвӧл. Синъёсыз лыз-вож адӟемысь дугдэм бере гинэ ньыльпыдъяськиз, султӥз но корт кенер борды кырмиськиз. Озьы сылонъяз мугораз выль кужым шапыкен-шапыкен пырыны ӧдъяз кадь. Синъёсыз пумен сазёмизы, мугорыз шонерскиз. Со виын ӝужыт из корка сьӧрысь кранэз адӟиз. "Та гуньдэм городын но лэсьтӥсько на ук. Уть, кирпичъёс ӝутэ", - ужась кран пала дыртӥз Дима. Нап-вож каскаен воргорон доры вуиз но сьӧд курткаезлэн саесаз ӝабырскиз. - Мар та? - кезьытын ужаса ӵыжектэм ымныро воргоронлэсь шузи мурт шоры сямен учкемзэ адӟыса, Дима веранзэ азьланьтыны дыртӥз. - Кинлы корка лэсьтӥськоды? - Офис, пе. Фирмачъёслы. Кылъёс но малпало ук! - вӧзысьтыз кирпич люк вылэ шлёп! сялӟиз лэсьтӥськонын ужась. - Коттеджъёс, офисъёс... Калыкез качало... Ярам, соосын йырин коть уж сюриз. Со эшшо мар ке вераны турттэ на вал кадь, но Дима ӧз кылзы ни, лэсьтӥськисьёслэн будкаоссы сьӧры вамыштӥз. Кыдёке ортчыса ӧз ву - гырпум бордаз йӧтскись луиз. Дима шораз паймыса учкиз-учкиз но... мугорыз юзыр-кезьыр луиз. Тӧрнам ымныро егит пилы лыз будкаос вискытӥ лёгем пытьы люкытгес потэм кадь - таза мугорыныз Димаез сюрес урдсысь лымы букосэ донгиз. Кыл-куара уг поттылы, ваньзэ чалмыт лэсьтэ. - Тыныд... мар? Тӧлӟы татысь! Бергало, зынъясько. Мае ке но нюлыштэмед потэ, дыр. Смотри, берло-азьло медам адӟы ни, - соку гинэ тӧрнам ымныр ымызлэсь усьяськыны быгатэмзэ возьматӥз. - Кызьы тодӥд? Со крандэс пыдъяськытыны малпасько вал, - та акылес но шимес вераськонэз серекъян ӧре выжтыны турттэ вал Дима. - А тон кылдэ шерыны мастёр вылэмед. Смотри, бӧрдоно медад лу. Ярам, люкиськизы. Нош куазь пумен кезьытске. Дима ӝоггес вамышъяны кутскиз, пальто воротниксэ ӝутӥз. "Кион уллёын, оло, кион сямен ик кырӟано? - вамышъянъяз йыраз вень кадь мертчиськиз. - Архитектор... Архивлы ужась... Оло, Степанов доры вырӟоно? Дораз кутыны пумит уз кариськы, дыр. Нош архитекторын ужаса, квартира уд басьты. Кызьы коньдон люкалод? Анай-атаез со гондыр гуысь поттоно ик вал. Архитектура нокытчы уз пегӟы. Марысь-мар ке, дипломе вань. Молотков сямен пенсие потонме уг витиськы ук. Нош отӥяз улон возьматоз", - ассэ ачиз буйгатӥз Перевозчиков. Дималэсь дораз малы пыремзэ тодэмез бере Степанов ужпи музэн гырдалтӥз: - Хе, оски мон, оски: одно дорам лыктод! Улонлэсь бере кылёно ӧвӧл. КГБ-ын но, милициын но ужам адямиосы вань ни, табере архитекторе но луоз. - Нош... уж кыӵе? - пельпумъёссэ ӝутказ Перевозчиков. - Грузчикъёс монтэк но сюрозы, дыр. - Вот куасалтӥд! Грузчик, пе. Созэ - архитекторъёс! Соос ӝоктозы-ӝуткалозы. Ярам, табере тыныд вераме луэ ни. Малпаськод, малы мон архитекторъёсты теплосетьёсы, мукет интыосы нуллӥсько? Дунтэмгес усе. Мон кадь адямиос котькуд копейказэс, манетсэс лыдъяно луо. Рабочийёс асьсэлэсь дунзэс тодо. Машинадэ ӝоктон сомында тыр усёз шуо но тӥни. Вылаз ик, чильпырасьсэ куро на. Нош архитекторъёсын кыл шедьтыны каньыл. Ма, ӟеч-ӟеч чаклано ке, кыл шедьтонэн курадӟонэз но уг лу. Кӧня сётӥськод, соослы сомындаен ик тырме. - Тӥни малы теплосетьёсысь рабочийёс шорамы кырыж учкыло вылэм. Газировкаен ящикъёсты ворттыны уробозэс куриськом вал - соку ик уретӥзы: штрейкбрехеръёслы ум юрттӥське. Соку ми малпамы ай: капиталистъёс забастовка дыръя гинэ штрейкбрехеръёсты утчало. Нош татын огыр-бугырез чик ӧй вал. - Бугыръяськозы мынам! Коньдонэд ке луиз, коть нош кинэ шымыртыны, ӝокатыны, сопал дуннее но келяны быгатод. - Та кылъёсты веракуз, Николай Владимировичлэн лачмыт куараез чурытомиз. - Нош монэн кызьы ни? - быдэс мугорыз юзыр-кезьыр луыса юано кариськиз Дима.- Кытын ужатоды? Кин луыса? - Оборот кулэ. Коньдон тэк кылле ке, со дунтэма. Нокыӵе пайда уг вай. Вуз нуон- ваёнэн макем золгес, сэрытгес бергаськод, табышез но сокем кие кутымонгес луэ. Белорусъёслы алигес машина вузай. Соослэсь зайчик шуон коньдонзэс татчы ваём-а? Мар каром мон соин? Сьӧросэ ветлыны но уз яралэ, - визьмо вераны шедьтӥ кожаса, лэся, Степанов кабинетэз тыр гырдалтӥз. - Соослэн "Белвест" фирмазы вань. Пыдкутчанзылы синмаськод. Кунгожсьӧръёсын ӵош потто. Машина дунлы, шуи, со пыдкутчандэс вузалэ. Соглаш кариськизы. А кытчы пырозы? Вот отчы ик мынод. Потон азяд инструктаж лэсьто на. Сюрес вылын, ачид тодӥськод, туала дыре олома но луыны быгатоз. Шаянтӥсьёс укыр трос алязы. Котькуд дуринчилэн лексемез, чечы сиемез потэ... Азьвыл ужед сярысь эн сюлмаськы. Директореныды ачим верасько. Собере эшшо одӥг веранэ вань на. Оксана котыртӥ ни-ни! Шӧдӥ-марай ке!.. Вуонояз вордӥськонэ Перевозчиков КамАЗ рефрижераторен кузь сюрес вылэ потӥз. Удалтӥз солы. Машина тыр пыдкутчанъёсын бертыкузы кык интыын гинэ могӟалскылӥзы. Белоруссиысь потыкузы, милиционер дӥсен адямиос асьсэлы пай куризы, нош Татарстанысен машиназы тӥяськылӥз но, кык "Жигулиен" олокытысь-марысь вуэм куать кузя ош кадь пиос Дима но шофёр шоры автоматсэс урдӥзы. Пыдкутчанэн гинэ тыриськытӥзы. Дораз вуэмез бере со ваньмыз сярысь Степановлы мадиз, соиз интыысьтыз тэтчиз но пальтозэ кыльыны вуымтэ ужасезлэн пельпумаз клач! чабкиз: - Шудэд вылэм, Перевозчиков! Оло, фамилиед сыӵеысь инмаред юрттӥз-а? Сюрес вылысен машина тӥяське - шабаш! Одӥг машина дӥсе озьы тюаз ни. Ярам, ужасьме коть луло кельтӥллям. А так не машинаед, не вузэд. Усто-о! Шунтӥськы, - кабинетлэн кузёез стенка барысьтыз "Белый аист" коньяксэ поттӥз. - Ваем вузэд сярысь эн сюлмаськы. Архитекторъёс ӝоктозы. Задание сётэмын. Накладнойёстэ бухгалтерие пыртод но - дорад. Давай, одӥген кымалтом. Нырысетӥ рейсэд понна! Кыкетӥ чарка бере Дималэн мугортӥз пӧсь тулкымъёс вӧлскыны кутскизы. Со тазьы ик шӧдэ пыдъёсызлэсь небӟемзэс, суй быгытъёсаз выль кужым пыремез. Синъёсыз но, бусомем интые, уката сайкытомизы кадь. - Табере вера ни, кызьы соослэсь сыӵе капчиен мозмытӥськыны йӧндыриды? - тодэмез потӥз Николай Владимировичлэн. - Фитилед юрттӥз. Инструктажед дыръя ачид шуид ук: шуге-леке вуыку, та кылэз поттылоно. - Хе, уголовникъёс ӟеч тодо "атайёссэс". Казаньысь-а соос, Ижевскысь-а - ваньмыз тодо! Мусоръёслэн министрзылэсь нимзэ верасалды ке, сялӟысалзы гинэ. Асэныз Фитилен пумиськылэм ӧвӧл на, Инмар мед утёз, нош нимыз кык пол юрттӥз ни. Тау кароно солы. Степановлэн кабинетысьтыз потэмез бере Перевозчиков азьвыл ужам кабинетаз вамыштӥз. Нырысетӥ рейсэ ветлэмез сярысь Молотковлы коть мадёно. Кызьы шумпотондэ аслад матысь арлыдо эшедлы уд вера?! Нош ӧс пытсамын вылэм. Дима соку гинэ валатскиз: Михаил Григорьевич но, солэн эшъёсыз но Белоруссиысь ваем пыдкутчанъёсты ӝокто. Ворсам ӧс дорын сылыкуз гинэ солэн йыраз шуккиз: архитекторъёслэн ужзылэсь но сюлмаськонъёссылэсь ачиз со ишкалскиз ни. Отысен Перевозчиков бухгалтерие вамыштӥз. Надя Смагина одӥгназ вылэм. Димаез адӟыса, со кымыс вылаз лэзиськем бабля суд йырсизэ пельтӥз, собере калькуляторез бордысь паллян кизэ ӝутӥз но син дораз вуэм йырсизэ паналтӥз. Ымныраз малы ке ӵыжыт пыриз. Огшап чус улэмез бере гинэ шумпотэм гажын вазиз: - О-о, Белоруссие ветлэмъёс но вуиллям ни. - Дор палъёс кыско ук. Собере тонэ но ӝоггес адӟем потӥз, дыр, - Степанов дорын кунояськемез бере Дима дӥсьтӥсьгес луиз. - Олома но вералод, - киыныз шонтӥз Надя. - Нош мон тыныд салам ваи. Француз духи. Шуизы, ческыт зыно, - дипломат сумкаысьтыз вожо-гордо-лызо чилясь коробкаез поттонъяз вераз Дима. - Рейсэд ӟеч ортчем кадь. Тау, туж бадӟым тау саламедлы. - Зол ворттылӥськиз. Ваньмыз умой вал, - шукрес учыръёсы сюрылэмез но йырызлэн кызьы быглес кылемез сярысь Перевозчиков одӥг кыл но ӧз поттылы. - Озьыен, ачид но кыӵе ке фирма кылдытод, дыр. Степанов дорын Жигаловен Волков ужазы вал. Табере асьсэос бергато ни. - Улон возьматоз. Та уже вуи бере, сыӵе малпанъёс но куддыръя вуыло. - Оло, мон но маин ке-маин ке юрттысал, - лачмытак вераз Смагина. - Вот соиз йырам но ӧз вуылы. А то лыдъяськыны-чотаськыны гинэ но йӧнала ӧз дышетэ. - Пӧрмыто-од! - нош ик нёжтӥз Надя. - Кызьы, пе, архитекторъёс чотаськытэк ужалозы? - тодэмзэ возьматӥз нылмурт. - Бухгалтериен, вытъёсын герӟаськемез сярысь мон верасько, - таяз учыре Дималэн ымныраз ӵыжыт пыриз. - Дышод ай, татчы вуид бере, - Перевозчиковлэсь накладнойёссэ эскеронъяз вазиз Смагина. - Малы ке тонэ Оксана утча вал, - шуак тодаз ваиз со. - Магазинысь вузкарись. - Марлы кулэ луиськем? - ӵыжектэм гинэ ӧвӧл, Дималэн ымнырыз горд-горд буёласькиз. - Ярам, ӵуказе пырало, нош али дорын возьмало, дыр, ини. - Саламед понна туж бадӟым тау, - люкиськыкузы эшшо огпол вераз Надя. Дораз но Дима кузьымъёс ваиз. Корка пушказы бубиз гинэ вал. Синмыз уг адӟы ке но, пыд куараезъя-а, мукет тодметъёсъя-а нылызлэн пиез пыре шуыса соку ик шӧдӥз- валаз. Ӝӧк сьӧрын маке ас понназ малпаськыса пукись мурт интыысьтыз чотак ӝутскиз но ӧс пала сётскиз: - Дима! Возьмаса кать быриз ни. Быдэс арнялэсь кемалы ышылӥд ук. - Сюрес кузь. Нош анай кытын? Акшан ни ук. - Бызьылэ. Тэк пукыны уг чида, - шундыберган тысен вузкаремез сярысь кузпалызлэсь поттылыны лэзьымтэзэ тодаз вайыса, арлыдоез Перевозчиков киыныз гинэ шонтӥз. - Нош мон тыныд салам ваи. Сигареттэ аратыны тылпоттонэн курадӟиськод, нош зажигалкалэн татчыяз зӥбиськод - пожалуйста, тыл. Андрей Петрович зажигалкаез кутӥз, сое кема бергатӥз, собере гинэ зӥбон интызэ шедьтӥз. Тылзэ улӟытӥз но со вадьсы паллян кизэ урдӥз. Кырымпыдэсыз гордэктон калэ вуэм бере гинэ ӝуась тылэз кысӥз. - Хм-м, киос но небӟо ни, лэся, - мӧзмылэс кунэрскиз со. - Азьлон гольык киын ӟырдам кортэз но кутылыны шедьтылӥськиз - ничё-о, чидаськод вал. - Ярам, мон, пожалуй, шутэтскыны выдо. Нош анайлы - сапег. Кулэсь. А то весь чосонкаен ветлэ. Гуртын кадь. - Тон озьы эн вераськы, пие. Со астмаезлэсь озьы утиськыны тырше. Милям, пересьёслэн, чебер сьӧры уиськон дыръёсмы ортчизы ни. Вылаз ик, тол куазен кырын сылыны но кезьыт, дыр. - Тазьы верамез бере ымзэ пытсаны дыртӥз Ондрей. - Малы кырын сылод? - паймиз Дима. - Ма, эшъёсыныз пумиськиз ке, кышномурт ӝог гинэ вырӟоз-а? - керӟеггес вазиз арлыдо воргорон. Валес вылэ зоньтӥськемез бере но Дима синъёссэ ӝог кыньыны ӧз быгаты. Белоруссие ветлыкуз адӟемъёсыз но чиданъёсыз суредэн-суредэн азяз пуксё. КамАЗ-лэн шофёрез кыллы бырем мурт вылэм. Мугорын ӝужыт, восьтэт. Кӧнялы ке коть тазагес адӟиськон понна, лэся, ыж кулэсь вурем сьӧд шубаезлэсь бирдыоссэ дэмӟытъян-бирдыян сярысь ноку тодаз уг лыктылы. - Константин Загумённов, - тодматскыкузы кизэ мычиз со. "Песятайлэн но фамилиез Загумённов вал. Оло, ӵыжы-выжы луиськом? - Перевозчиковлэн йыраз соку ик малпан бышкалскиз. - Тодом ай". Вераськонъязы Дима сое Костя шуыны шедьтӥз вал, но руль сьӧрын кырӟан нёжъяса мынӥсь эшез соку ик уретӥз: - Мон - Константин. - Собере ни пальпотыса ватсаз: - Мугорыя ик нимы но кузь. Котькуд адямилэн аслаз сямыз шуыса, Дима выль эшезлы Константин нимын гинэ вазиськылыны кутскиз. Малы сокем зулись луэмзэ но валаз. Соиз ачиз шуиз угось: - Тодэмед ке потэ, огнам ворттылыкум но кырӟасько я аслым ачим анекдотъёс мадисько. Тумошо пӧрме ке, кабина тыр серекъясько. Юаськод, малы озьы дауртӥсько? Руль сьӧрын бабид ке, кытчы вуэмдэ уд вала. Моргысен ымыд уз усьяськы ни. Мон ведь дас куать ар дальнобойщик ни. Уй-а, нунал-а - рульдэ бергатӥськод. Тодэмед потэ ке, огпол кык но ӝыны сутка ӵоже кӧлытэк мынонолась. Ческыт ӧй вал. Синъёсы асьсэос кынисько, нош мон чидасько, анекдотъёсты кабина тыр шара верасько но горисько. Дугдыны, шутэтскыны быгатысалыд, шуиськод? Э-э, брат, тодмотэм сюрес вылын дугдӥд ке, штантэм кылемдэ уд вала. Котькытын мафия. Ваньмызлэн улэм, сиськем потэ. Кӧс нянь гинэ ӧвӧл - вӧйын, чорыг мызен медло. Тьфу, сьӧд кырныжъёс! Инмар мед утёз сыӵеослэсь. Нош тон, Дима, вождэ эн вай озьы гинэ ваземелы, егит на кадь, кӧлэмед ке потэ, сиденье сьӧры интыяськы, кроватед но, креслоед но отын луозы. Мон ас кожам но лабыртыны мастак. Городъёс, посёлокъёс, гуртъёс огез бӧрсьы мукетыз мышказы кыльыло. Дима соослэсь нимъёссэс вӧзаз пукись шофёрлэсь нырысь-валысь юалляз ик, нош бӧрысь акыльтӥз. Ма, юамлэн кулэез но ӧй вал ни: Загумённов городэ я посёлоке пырон азьын соослэсь нимъёссэс вератэк ӧз чидалля. Бӧрысь ни ушъяськоно кожаз: - Машинае - зверь! Тодэмед ке потэ, со мыным дунтэк донгиськиз. - Лушкад шат? - паймемзэ ӧз ват Перевозчиков. - Государство ачиз кузьмаз, - пӧлызэ вылӥе урдӥз но кырмыштӥз Константин. - Автоколоннаын ужай. Отын но дальнобойщик вал. Коньдон воштӥськон азьын акционер огазеяськон каризы. Шуизы: мултэс машинаосыз вузано. Мынам та "оше" ньыль ар ветлэмын ни вал. Дас тямыс сюрс манет тыр дунъязы. Мырдэм но кызьы басьтыны соглаш кариськи. Дуно кадь потӥз. Со коньдонэн кык легковушка басьтыны луысал ук. Ярам, документъёс пӧрамын. КамАЗ-э аслам кадь ни. Но колоннаысь кошкыны ӧй дырты. Ялан кӧберай. Малпасько, марысь-мар ке, мон - пас. Малы юнме шорысь сиесаськом? Нош со куспын коньдон дунтэманы кутскиз. Копейкаед но олокытчы ышиз- быриз. Со дас тямыс сюрссэс куинь толэзь куспын тырыны быгатӥ. Табере тани ас кожам ужасько ни. Кин куре, солы ик нуисько-ваисько. - Коть нош кинлы-а? - тодэмез потӥз Дималэн. - А мар-о мыным? Степанов-а, мукетыз-а - одӥг чёрт. Коньдон гинэ мед тырозы. Телефон пыр жингырто - мон вуисько. Табышез люкаське гинэ. Легковушка но басьтӥ ни. "Лада", берпуметӥ моделез. Кунгож сьӧрысьсэ но быгатысал. Нош тӥяськиз ке, мар соин карод? Тайзэ коть ачим ик тупатъяны но йӧндыро. Минске вуэмзы бере Загумённов шуиз: - Тон - кузё, тон ик сюлмаськы. Фирмачъёсыд машинаме интыяны гараж мед шедьтозы. Нош мон уйзэ-нуналзэ кӧло. Кужым люкано. Ваньмыз усто пӧрмиз. Перевозчиковлы рефрижераторе кыӵе пыдкутчанъёс тыремез чакласа-пусйылыса гинэ сылоно луиз. Табере - дор пала. Таможня шуоназы бордазы тэбинизы ик вал. Документъёсты, пе, йӧназ пӧрамын ӧвӧл. Степановлэн визьнодамез юрттӥз. Кык сю манет донгемез бере, егит пиослы номыр кулэ ӧз лу ни. Нош дор пала вуон азязы йырсизы пештырскылӥз. Кемдыны но кулэ ук. Бер уин Загумённовлэн машинаез бадӟым нюлэскысен тыпак гуньдӥз. - М-да, пуксиськиз кадь, - машинаез котыртӥ ортчемез бере шуиз Константин. - Карбюратор кизьнылэ. - Оло, кызьы ке вырӟоз ик? - оскон мылкыдын юаз Перевозчиков. - Мышкытӥз донгыны вормид ке, оло, вырӟоз но, - керӟег пальпотэмъяськиз шофёр. - Легковушка басьтыны быгатӥськод, нош карбюраторлы моӵед ӧз сузь-а? - меӵкытӥз Дима. - Кылдэ шериськод? Ойдо ай сэрттом но кабинаын тупатъялом. Ӧсэз кема пась эн возь. Чупресгес бергано. Ӵукна пал ини тупатъям карбюраторзэс интыяз пуктыны выльысь кыре потӥзы. Ӝомо- югдо на. Бадӟым сюрес вылтӥ машинаос одӥг-ог гинэ ортчыло. Соослэн куаразы кыдёкысен ик кылӥське. Нош таосызлэсь вуэмзэс Перевозчиковен Загумённов шӧдытэк кылизы. Мотор котырын берганъязы озьы луиз, вылды. - Ми пӧйшураськом, нош луд кеч ныр уламы пуке вылэм, - азьпал "Жигулиысь" потонъяз кужмо серектӥз сьӧд ку курткаен егит воргорон. - Мар ай тӥ коньыос сямен отчы тубиды? Ми коньыпиосты но васькытъяны быгатӥськом. Озьы-а, Амбал? - вакчи гумыё автоматсэ урдэм эшез пала берытскиз КамАЗ вӧзы вуэм мурт. - Карбюратор... - лулскиз Загумённов. - Сётом ми тӥлед карбюратор - вань пружинаосты тэтчылозы-пештылозы, номыриз кулэ уз лу ни, - Амбал шуон Дималэн пыдаз автомат гумыеныз мырӟиз. "Сюриськиз! - чилектӥз Перевозчиковлэн йыраз. - Машинаос но уг адӟисько. Нокин уз юртты. Виёзы но лымые месыса кельтозы". - Маин узырмиды? Оло, милем но донгиськоз? - куинетӥез егит пи доразы матэктӥз на, таизлэн мугор шыньыр-ваньыргес, огпол васькытысалыд ке, оло, ваньмысал. Но со ик етӥзъяське ай. Киысьтыз пистолетэныз йыр вадьсаз шона: - Э-э, сётэмзэс витьыса... - Водила, кинлы верало?! - автоматэн пи Константинлэн пертчылэм шубаез борды кырмиськиз ни. - Мон мар? - интыяз лёгаськыны кутскиз Загумённов. - Кузёлэсь юалэ. - Кыӵе кузё? - куаразэ чурытгес карыса, кышканзэ ватыны турттыса юаз Дима. - Кузёмы - Фитиль. Камальдылы но салам вераз вал кадь. - Хм-м, Фитиль шуиськод, иське? Нош кытысь Камалез тодӥськод? - Кузё поттылӥз. Солэсь "ошъёссэ" ке, пе, пумитад, салам вера, - пыд улаз чизак сялӟиз Перевозчиков: адӟелэ, пе, ми но ыж уллёысь ӧвӧл. - Нош тон мар долкад? - интыысьтыз вырӟыны дӥсьтытэк сылӥсь Загумённов шоры кырыжак учкиз. - Камальлы кузьым сёт. Вить коробка самой ӟечъёссэ. Ӧс дорын ик соос. Автоматэн "ошак" но Загумённов рефрижераторлэсь ӧссэ усьтӥзы. Соку ик Амбаллэн гудыртэмез кылӥськиз: - Ё-моё, Фитильды узыр вылэм! Тае пыдъяськытысал ке, санаториын кадь улысал. - Пыдъяськытод, нош собере ас пыдъёстэ нюж кыскано луоз, - гизьыртӥз ку курткаенэз воргорон... Кӧня ке улыса, "Жигулиос" бӧрсьы лымы гинэ пурӟиз на. Загумённовлэн рефрижератор пушкысь тэтчыны кынарыз ӧз тырмы ни, лэся. Отысь коробкаос вылэ ланьырак лэзиськиз. Дима ӧс доры дыртыса бызиз но керӟег юаз: - Тон мар-о, выльысь вуэмзэс возьмаськод-а? Валатскозы но кырмозы. - Нош Фитиль? Камаль но шуид кадь. - Фитиль Ижевскын эрказъяське, нош Камаль - Казаняз. Соосын герӟаськыны визьзы тырмиз ке... - Мон али ик, - вазиз Константин. - А то кӧт кизермиз ни вал. Удмуртие вуэмзы бере Константин Загумённов ваньзэ вунэтӥз кадь. Нош ик анекдотъёссэ, мурт кышноос котыртӥ бергамез сярысь тодэ ваёнъёссэ дугдылытэк вераны кутскиз. "Гражданпроектлэн" юртэз доры кожыкузы ни машина тупатъям бере вӧйын наштаськем кизэ Дималэнэз вылэ понӥз но шуиз: - Дальнобойщиклэн улоназ олома но луылэ. Мар ватонэз, мынам но соос вал. Нош таӵеез... Кельшид тон мыным. Вуоно рейсъёсы но тонэн ветлыны курисько. Степановды кылзӥськоз кадь потэ. Нош тон пумит ӧвӧл-а? - Карбюратордэ воштӥд ке, оло, соглаш луо, - Перевозчиковлэн серемез потӥз, собере ни зӥб-зӥб юаз: - Тон Нӧднюк починкаысь ӧвӧл-а? Мынам песянаелэн бубиз но Загумённов вал... - Ӧвӧл ведь. Сыӵе гуртлэсь нимзэ но кылылэме ӧвӧл. - Ӵыжы-выжыме, пӧй, оло, пумитай. - Ма, та рейс бере асьмеос роднялэсь но матынгес луим кадь. Ваньмыз понна тау. Машинаме но утид, асьмеды но... ...Кык нунал ортчыса, Николай Владимирович Димаез мукет рейсэ келяно кариськиз. Таяз учыре Братске, пе, мыноно. Китайын вурем курткаос, пе, ваёно. Ваёно ке ваёно. Нылызлэн пиез кык арнялы кошкемез сярысь верам бере Лангыр Насьта куалектыса юаз: - Малы нош ик кошкиськод, пие? Азьло ужад ик ӟеч вал кадь. - Таиз но уж, анай, таиз но. Тыршоно, сотэк кин сюдоз? 12 Димаез келямез бере Лангыр Насьта оло ке воксё адями радысь потӥз. Эмъюмезлэн но пайдаез тӧлъя-буръя кошкиз кадь. Чыртыяз, кытын ке пыдлон, вакчи но йылсо ез бышкалтӥськемын, оло. Сое потты, ишкалты но - шоканы соку ик каньылгес луысал кадь. Кышномурт дырекъясь кияз эмъюмзэ кутэ, ымаз сэзёмытӥсь но сайкыт омырен ӵош выль кужым ӧръяське-визыла. Но со кема ик уг кыстӥськы. Выльысь бышкыны, кызытыны ӧдъя. Секыт, кема кызэмез бере Насьта сялӟыса но утча, собере жоб дыльдыез шоры до-ол! учке: оло, со бышкись езэз, курадӟытӥсь эзелез пушкысьтыз потӥз ни? Ӧвӧл, номыриз ӧвӧл. Ассэ жаляменыз, арлыдо кышномуртлэн кӧдэктэм бам вылтӥз синкыли шапыкъёсыз питырско но кот пытьы кельто. Ӵукна вазьгес ик вузкарыны потон вылысь толон ӝытазе куасьтэм шундыберган тысез йӧтылытэк кылле. Тысьёсыз чебересь, тазаесь. Кеносын эшшо ӝыны мешок мында кылемын на. Краснодар палъёсысь лыктэмъёс пырак машинаысенызы ведраен вузало вал. Базаре сӥль учкыны шуыса мынэм Насьта тае адӟиз, одӥг кырым мында куриз но кияз бергатӥз, веръяз, собере - дуй не стой! - трамваен дораз бертаз но пичи уробоен, мешокен вуиз. Дораз одӥг мешок вуттэмен ӧз буйгатскы, эшшо ветлӥз на. Дунтэм дунын чебер тысь шедьтыку кызьы, пе, тэк пукод. Ванё-буро луонлэсь кин-о, пе, киыныз-пыдыныз пыкиськоз... Но тани ук, тазалыкез номырлы ярантэм луиз ни. Ондрейлэн алюминь бодыеныз туккетэмез кылӥськиз. Огпӧртэм кызэмзэ со но ӧз чида ни, шӧдске, корказе потӥз. Ӧс усьтӥськем бере корка тыр кезьыт бус вӧлскиз. Насьталэн кызонэз нош ик пӧсьтӥз. Кызэмысь мырдэм но кызьы дугдӥз гинэ - выльысь ӧс усьтӥськиз. - Ондрей, мар кӧлыны уд валаськы? Вазь на ук, - кызонзэ мырдэм кутыса вазиз Насьта. - Туннэ со вузаськонад эн пота вал. Пелляське, лымыя. А то нош ик валес мертано луод. Куазез учкыны потай, - ӟукыртӥсь корт кроватез вылэ пуксёнъяз шокыштӥз Ондрей. - Карповна но, мукетъёсыз но шумпотозы ни. Макем ӧжытгес кузя сылӥськод, сокем тросгес семаед кошке ук, - мылкыдтэк соглаш кариськиз Насьта. Огшап ортчыса ни верано кожаз: - Озьы ке, пельнянь пӧралом ай. Трос-а кулэ асьмелы. Быртык мында сӥльмы но вань, кубиста ватсалом. Асьмеос но сиём, Дималы но бертэмез берелы кельтом. Ӝоген со ыльнянь лайиз, парсь сӥлез но сугонэз мясорубка пыр поттӥз. Табере кубиста корано. Сое но мясорубкаен гинэ поттыны луысал, дыр, но, Насьта озьы дасям пельнянь пушез уг яраты: пинь улын, пе, мед шӧдӥськоз. Кыштыр ужа. Кызонэз но та вие кытчы ке палэнскиз кадь, сюлмо муртлы ужаны луонлык сётэ. Нош кубиста кораны шичказэ кутӥз гинэ - куараен зар-зар бӧрдыны кутскиз. Викышъян куспаз ик пельпумаз кузпалызлэн киосызлэсь лачмытак лэзиськемзэс шӧдӥз. - Настюш, сокем эн чигиськы, - кышнозэ веша Ондрей. - Мон ваньзэ валасько. Тыныд но секыт, мукетызлы но... Ваньмызлы. Синкылиен уд юртты ук. - Валасько, шуиськод... - эшшо кужмогес ӧръяськиз Лангыр Насьта. - Ачид малы бӧрдэмме но уд тодӥськы. Этемес син азям пуктӥ. Митрей но дышетсконзэ быдтыса бертэмез бере ик юаз: нош Лёшик кытын? Тюрьмаын, шуисько, та шуныт коркан солэсь нимзэ эн ик поттылы. Ымы берыктӥськиз ук. Ас вордэм нылылэн пиез сярысь озьы верай. Кыӵе мон песянай? Озьы шуи, нош сюлмысьтым нокызьы уг ишкалскы. - Кош, олома эн вераськы. Улоз-вылоз, курадӟоз, оло, визь но пыроз, - сыӵе дырез син азяз пуктыса, лэся, Ондрейлэн ымнырыз сайкытомизгес, ӵыжытэз но йылӥзгес кадь. - Та шичкаез кутӥ но пель сьӧрам озьы ик солэн чангес куараез кылӥськиз кадь: "Анай, давай мон пӧрало. Мынам киы капчи. Корай ке, пельняньмы но ческыт луоз". - Нош мунчо лэсьтыку кызьы вал? Олексей пичи на, кык тӥр ныд ӝужда гинэ. Кор лусйыны дасяськемме адӟиз но соку ик дорам вуиз: "Атай, ойдо мон кутско. Мынам киы капчи. Кутскон сётӥ ке, мунчомы пӧсь луоз". Шонер вераз ук: одӥг гур тыр пу сутыса, пӧсез кык семья пырымон люкаське. - Эркеямыгес кадь... - кузпалыз пала йырзэ зуркак берыктӥз Насьта. - Сотэм но ӧй вал, дыр, - Ондрейлэн мугорыз юзырак луиз. - Пичиез вал ук. - Инмарен утем мурт кадь потылӥз со мыным, - синкылизэ айшетэныз ӵушалтӥз Насьта. - Ленуш но, Сергей но быризы, нош солы ке номыр ӧз лу. Веразы, Лена, пе, сое ас мугорыныз сайям. Ма, паровоз вылаз пыриз ке, коть нош кызьы сайя, падиез уз лу. Инмарлэн ужез со. Ӵапак соингес но воля сётӥм. Кузяназ ветлӥм, сиён но ческытсэгес донгылӥм... - Кин тодэм ни созэ. Эх, эте, эте... - мур лулскиз Ондрей, огшап ортчыса, ымнырыз сайкытскиз. - Со но умой улон сярысь малпаськылӥз. Кызьы ке огпол мынэсьтым юа: "Нош ӟеч адями луон понна, атай, кӧня "витьёс" басьяно?" "Макем тросгес, сокем умойгес", - сереме потыса валэктӥсько. Басьтылӥз ведь! Шузи ӧй вал. Нош бӧрысь акыльтылӥз, лэся, - "ньыльёсы", "куиньёсы" лэзиськылӥз. Чакласагес возёно вал этемес - пайдаез луысал. - Эн но вера, казиноосазы вань улонзэ сӧриз. - Отын гинэ меда? Та йырчукин улон быдтӥз. Ужасал ке, уж визьмаса-ал. Соку шузияськонэн йырин ӧй луысал. Лангыр Насьта кубистазэ кора. Шичкаез ялан огпӧртэм выллань-уллань ӝутӥськылэ- лэзиськылэ. Кубиста юдэсъёс палэнэ но палдыло, нош кышномурт соосты уг адӟы кадь. Син азяз - яратоно этеез. Чупресэн чупрес ик вал Алёша. Шаянтэмез понна бераз но йӧтылӥз, нош солы номыр кадь ӧй вал. Дышетӥсьёсыз но ӝожтӥськылӥзы: я со история уроке уг мын но шуэ: Нина Петровна книгаысь гинэ лыдӟе ук, мон но дорын сое лыдӟо, я химия уроказы натрийзэс басьтэ но перемена дыръя вуэн бекчее выж миськись пересь кышномурт азе куштэ, ву вылтӥ тэтчась-шиетӥсь тӧдьы мае ке адӟыса, соиз отчыяз ик погра. Укмысэтӥ классэз йылпумъямез бере школае мынэмез ӧз пот ни - токарь, пе, луо. Андрей Петрович пизэ металлурге дышетскыны ӝутка вал, нош соиз чутрак пумит луиз: цехады номыриз ӧз кельшы - пӧсь, ӝокыт, эше, пе, токаре дышетске, мон но соин ӵош мыно. Дышетскиз. Нош уж ӧз шедьты. Дышетсконзэ соку гинэ йылпумъям муртлы пӧртэм заводъёстӥ уж утчаса ветлоно луиз. Ваньмыз та егит пиез вожомытӥз гинэ, дораз вуыкуз котьку сямен шуылӥз: - Мынам киы капчи. Шедьто, одно шедьто. Витялэнлэсь ӟечазгес интыясько ай. Но солы весь шуылӥзы: рабочийёсмес уждунтэк отпуске келяськом, эшшо ке тӥледды кутом-а? Ма, арлыдзы люкаськымтэ адямиоссэс но пенсие келяло ни кадь. Озьы куинь арня ветлэмез бере Алёша дораз кудӟыса вуиз но койка вылэ дӥсьсэ кыльытэк выдӥз: - Вот улон! Безработной каризы. Ужатэк, пе, уксё тырозы. Сялӟи мон со уксёзы вылэ. Мон - токарь, рабочий класс! - Кылиськыса выд, рабочий класс! - лангыртыны кутскиз Насьта. - Ми ум ужаське, тон уд ужа. Мар сиёмы? Эшшо ке безработной уксёзы солы кулэ ӧвӧл. Кыӵе узыр мурт сюрем! Кӧтсэ вӧлъялоз но кыллёз. Уть, ботинкаед но тӥни сиён куре ни. Маин выльзэ басьтод? Милям пельпуммылы весь эн оскы. Чал-чал кариськиз "рабочий класс". Ӵуказеяз ӵукна нош ик уж утчаны кошкиз. Ӧз шедьты. Со кадь уж утчасьёс укыр трос вылэм. Ондрей туж ӧпкелиз: металлурге дышетскыны кужмысь келясал ке, ас цехысьтыз ик тодмоосыныз вераськысал но, пизэ, оло, интыясалзы. Авариен сэрен ӧлексы кылем эшсэс соос куинь ар куспын гинэ ӧз вунэтэ, дыр, ук. Ӧйлась, мар карод на табере. Одӥгаз нуналэ Лангыр Насьта пиезлы шуиз: - Со пась пыдкутчанэныд кема ветлыны малпаськод на-а? - Ма, безработнойёслэн учётазы султӥ но, уксё малы ке уг тыро. - Э-э, тонэн. Пенсимы тани вуиз, - со пиезлэн кияз коньдон донгиз. - Кельышлызэ басьты. Только укыр дуно медаз лу. Базарын дунтэмгес вузало кадь, отысь утча. Кемалы ышылӥз пизы. Доразы бер ӝыт гинэ вуиз. Синъёсыз чиляло, кияз картон коробка возе. - Верай ук: мынам киосы шудо! - кисыысьтыз коньдон поттӥз но анаезлы мычиз. - Ма, сётэмелэсь тросгес кадь ук татын, - коньдонэз лыдъянъяз паймыса шуиз Насьта. - ЦУМ-ысь но ботинка утчано кожай. Вот удалтӥз! - вазиз Алёша. - Дыр вань бере, вань отделъёстӥзы ортчоно кожай. - Кожад, кожад!.. Собере лушкад-а, мар-а? Кытысь тамында уксё? - Учкисько: ЦУМ-лэн одӥг сэрегаз кыӵе ке аппаратъёс дорын егит пиос сыло. Экран вылазы олокыӵе но картаослэн тусъёссы потыло. Ӧй чида, одӥгезлэсь юай: мар озьы дауртӥськоды? Нош со серектӥз: "Деревня, поккерен шудонэз гинэ но уд тодӥськы. Казино татын". Учки - утӥсьёсыз но вань кадь. Утчаме потӥз. Уксё тыри. Киы шудо вылэм. Нырысь одӥген гинэ шудӥ. Озьы пайдаез ӧвӧл. Кызе выжтӥ. Тодӥськод-а, рояль мыным потӥз! - шумпотэменыз эктыны дась ни Перевозчиковъёслэн покчиез нуноксы. - Кыӵе рояль? Со картаысьтыды сыӵе бадӟым арбери но потылэ-а? - дэймиз Насьта. - Кривилёвалэн нылызлэн соиз вал, адӟи, кырӟан гуръёсты туж чебер пӧрмытъя вал. - Ачид тон рояль, - песянаезлэн сыӵе нодтэм луэмезлы Алёша мыняк потӥз. - Одӥг мастен дас, валет, дама, король, туз мед потозы. Ну, соос пӧлын поккер но луэ ке, туж умой. Мынам валет интыын поккер вал! Синъёсы палёмизы, ява. Шуисько ук, кызен шудӥсько, шудӥсько. Очкоосы но быро ни вал. Нош тани соос усьтӥсько - соку ик куать сюрс очко! Дӥсьтысал ке, эшшо зӥбысал ке, оло, уката тросэ но вуттысал. Потӥсь мастьсэ гинэ тодоно. Горд яке сьӧд. Мон ӧй зӥбы ни. Малпай, куать сю манетэн но тырмоз. Сомында уксё сюрес вылын уг костаськы. Эшшо ке соос монэ деревня шуо. Уг тодо: мынам киы шудо!.. Шичка ужа но ужа. Насьталэн малпанъёс нош кыдёкетӥ поръяло-тэтчало. Арлыдо кышномурт кытӥ ке ӧвӧл мур лулскемзэ ик ӧз шӧды. Собере кушетскыса шара вазиз: - Э-эх, берыкты вал со дырез! Соиныз ымаз-ныраз сальысал. Киям ик ӧй кутысал. - Мае? Кинэ? - гур доры артана писъёс пыртэмез бере креслояз пуксем Ондрей куалектыса интыысьтыз тэтчиз. - Этемылэсь уксёзэ, пӧй. Нырысь вуттэм уксёзэ ӧй басьтысал ке, ӟеч-ӟеч куаретысал ке... Сомында уксёез адӟыса, асме но воштӥзы кадь. Басьтӥ ук, басьтӥ! Ас киыным сӧри! - кыласа-бураса бӧрдыны ӧдъяз Насьта. Нош Алёшалы кельшиз, лэся, казиное ветлон. Уйёсы но куддыр ышылӥз-бырылӥз. Кошкон азяз песянаез кытчы мынэмзэ юалляз ик. Алёша пальпотыса шуылӥз: - Ужано ук, анай, ужано. Казиное ветлонэз солы уж кадь потылӥз ни. Коньдон сярысь ке верано, со пумысен сюлмаськонъёссэ Андреевъёслэн внуксы песянаезлы-песятаезлы ӧз шараялля. Дораз бертэ, лыз ин кадь чагыр синъёсыз солань-талань бергало, мае ке шедьтыны туртто кадь. Номыр уг вераськы. Ӝӧк вылэ пуктэм шыдэз сие но кыре потэ, ымаз сигарет донге. Одӥгзэ кыскыса быдтэ, таин уг буйгатскы, ӝуась тамак пумыз борды мукет сигаретсэ ляке ни. Азбарын озьы огшап пуке но выльысь дӥсяське. Анаезлэсь шораз паймыса учкемзэ шӧдыса, быдэс мугорыз юзырак кариське но, йырзэ палэнэ берыктыса вазе: - Ужано ук, анай, ужано, - куараез табере ӟазырес но керӟег ни, пальпотон тылсиос кысэмын. Ма, доразы кӧлон учыръёсыз но луылӥзы. Сыӵе дыръя Насьта кытчы пырыны ӧз тодылы. Алёшикез шоры жальма, кузпалзэ учке. Одӥгез дораз куное сямен гинэ возьматскылэ, нош мукетыз, креслоезлэсь пӧсьтэм интыоссэ мугорыныз ватыны-ӵоксаны турттыса кадь, ялан интыяз огпӧртэм пуке, ымзэ но уг усья. Насьталэн пушкысьтыз зарезь тулкымъёс амалтэк кыре пальккисько: - Ку ни адями радэ потом? Ужаны вуэм ослоп уксё пазяса ветлэ. Олокытӥ-мартӥ костаське но сиён куре. Нош песятаез ке ымаз ву ӟузьыса пуке. Пензимы вылын ӟече вуом-а? Тани Дималы но кӧня ке юрттоно, шуисько вал. Кызьы юрттод? - кышнопалан тусьты-пуньы миськонъяз Насьта дымбыр-шалтыр каре. - Сиёнэд жаль потӥз ни? - ымдурзэ кырыжтэ Алёша. - Уж шедьтысал ке, ӧй мынысал кожаськод-а? - Соку, эте, тазьы вераськом. Ӵуказе ик цехамы ветлом. Оло, уж ласянь кызьы ке юрттозы. Соослы, конешно, дышетскем муртъёс кулэ, но... - Ондрей но ини куаразэ поттытэк ӧз чида. - Ма мон ыштӥ со "Ижсталяды"? "Комокын" ужан ке луысал. Уждун но басьто, дуно дунын вузаськыса, эшшо коньдон ки бордазы лякиське на. Киос, пе, отын уг пульсалляло, - аслэсьтыз кырӟан гурзэ нёжтэ покчиез Перевозчиков. - Уксё ас кожаз кисьтӥське... - Кыӵе комок? Ми дыръёсы уксё ужасезлы гинэ вуылӥз. Катьтэммытозь ужаськод, тазалыктэ быдтӥськод... Э-э, малы но паймыны шедьтӥ! Алдаськон дуннее вуиськиз ук. Корка пуктыны люкам уксёез но со сберкассаосы супырӟытӥзы. Быдэс корка басьтымон уксёен табере кило сӥль но уд басьты ни!.. "Комо-ок"... Ваньзы соос ужась муртэ комъяло-алдало... Радиоын но тани весь со МММ шуонъёссэс верало. Узыръёсты кужмысь тэлеӟыто... Кылӥ, быдэс Россей музъем вылын табере телевизор уг потто ни, пе. Номырзэ уг валаськы. Табере кунгожсьӧръёслы гинэ оскиськыса улод ни-а? Соос ведь сокем шузиесь ӧвӧл, дыр. Чиньыоссы асьсэ пала купырскемын. Дышетскем, ужась адямиостэк кызьы улод-вылод? Со вузаськон интыосад, "комокъёсад", одно вуз кулэ. Нош сое уг потто ни ке... Уг валаськы, номырзэ уг валаськы. Таӵе вераськонъёссы кутсконазы ӟечезлы осконэн пачыламын вал, нош пумазы чылкак гуньдытъязы. Азьысьтызы шуг-секытъёсын зӥбетлэсь секталазэ шӧдыса-валаса сямен, Андреевъёс кылтэм-ымтэм луылӥзы, нош Перевозчиков койка вылаз зоньтӥськылӥз. Ондрей радио доры мынылӥз но кыӵе ке тулкымысь коть сюлэмзэ буйгатыны, няськатыны быгатӥсьсэ шедьтыны тыршылӥз. Кышнопалась кылӥськылӥзы сотэк но кемалась ни чылк-чылк миськем тусьты-пуньыослэн бӧрдэмзы-черекъямзы. Нош ӝытъёсы Насьталэсь бамзэ синкыли шапыкъёсыз сутылӥзы. Кызонэз тани-тани пӧсьтоз шуыса валатскыса, со ӝоггес азбаре дыртылӥз. Дорысьёсызлы ческыт уммен кӧлыны медам люкеты шуыса сюлмаськылӥз анаймурт. Та сюлмаськонэз но юнме вылэм. Огпол тазьы азбарысь пыриз но, тём-тём пеймыт коркан секыт ӝуштэм кылӥськиз. Насьта нунокезлэн койкаез доры дыртӥз. Гаӵоло изись муртлэн киосыз койкалэн пумаз мычиськиллям но ялан огпӧртэм выро. Я таиз зугырак луэ, я мукетыз. Собере чалмыт коркан ини нош ик ӝуштэм кадь кылӥське: - Горд! Сьӧд! Сьӧд! М-м, череда вылэм... Уто! Сёровно уто. Мынам киос шудоесь! Горд!.. Тыро! Люкало! Насьта ӧз чида, Алёшалэн ки бордаз йӧтскиз. Нунокезлэн зугырскылӥсь киосыз электро шуккем бере сямен зуркак луизы. Егит пи интыысьтыз чоркак султӥз: - М-мар?! Мар луиз?! Песянайзэ адӟыса гинэ мырдэм но кызьы буйгаз... Куректонлэн кыӵесась зӥбетэз та семьяез бӧрысьгес ни ӝокатӥз. Андреевъёслэн капказы доры ог ӵукна милица машина дугдӥз. Куазь сӧриськемен коркасьтызы потаны дӥсьтымтэ Насьтаез пырем мурт пыд вылысьтыз погыртэ вал. - Перевозчиков Алексей Сергеевич татын-а улэ? - йыгаськытэк-маратэк пыремез бере ик юаз пурысялэс-лыз дӥсен воргорон. - Татын, татын. Только олошаяз пыриз. Куинь уйзэ ни нырзэ но ӧз возьматъя, - куалектыса, соин ӵош ик керӟегъяськыса вазиз Лангыр Насьта. - Уз но возьматъя, - чырс палэзь сием бере мактал пальпотэм кариз пырем мурт. - Казна сиён но дӥсь вылэ выжоз. Авангарднойысь ларёкез качаллям. Сьӧраз документъёсыз ӧвӧл. Пидэс тодмано луоды. Монэн ӵош ик мыноды. Соин ыстӥзы. - Эте-э?.. Лушкаськи-из? - Насьталэн пыд улысьтыз выж отчы-татчы шонаськыны кутскиз, кӧдэктэм ымнырыз ӵыжектӥз, лулыз пытсаськемен, мургес шокчыны турттэ вал, ӧз пӧрмыты - секыт но кӧс кызонэз пӧсьтӥз. - Тӥ, мамаша, азьлонгес сюлмаськелэ вал. Эркияло, ки вылазы нулло. Ӵашъем бере гинэ анай-атай луэмзы йыразы шукке, - милица дӥсен воргорон та вие но визьнодан эсэпезлэсь ӧз куштӥськы, пересь кышномуртлэсь ым пушказ эмъюм пызъемзэ адӟемез бере гинэ валатскиз: кышномурт зэм но висе. - Озьы ке, кузпалды мыноз. - Адӟыны быгатысал ке, тӥ косытэк но вырӟысал. Синъёссэ заводэзлы кузьмаз, - мур лулскиз Насьта. - Озьы-а, ма?.. - мукет номыр вераны ӧз быгаты ни милицаысь вуэм мурт. Зорись но тӧласькись куазь шоры учкытэк, кышномуртлы кыре потоно, нылызлэн пиез доры дыртоно луиз. Отӥыз ваньмыз бус пӧлын кадь вал. Пиеныз адӟиськемез но, суд но. Тодаз кылиз на бадӟым залын егит нылмуртлэн чангес куараен черектэмез: "Суд лыктэ!" Суд лыктӥз но этезэс нуиз. Суд меда? Алексей ачиз ик ассэ со ву берганэ валтытӥз, дыр. Сотэк ерсаськысал-а казино шудонэныз, сотэк киыз ӝутскысал-а ларёкысьтызы со каргам кабак виназэс лушканы? Люкиськон азязы ни Насьтаез нунокеныз вераськыны лэзизы. "Пунэмме тырыны турттӥсько вал. Ӧз пӧрмы", - кытчы ке палэнэ, из борддор шоры учконъяз шуиз соку Алёша. Нош пунэмез дуре берло ни вуылӥзы. Насьта соку дораз ӧз кемды. Дораз ке луысал, со пунэме пыртӥсьёс озьы эркынак ӧй кошкысалзы. Вирын пыласькись сюлмысьтыз вань вӧсьсэ пальккысал. Нош синтэм Ондрей мар кароз? Ужпиос музэн гырдалляса пыриллям но соку гинэ басьтэм телевизорзэс но, магнитофонзэс но валтӥллям. Вылаз ик, шуиллям на: - Со октос-калтостылы озьы ик вералэ: ӝыны тыриськонэз кылемын на. Бертӥз ке, ожалтом. Милям уз вун. Лангыр Насьта вылэ олокыӵе но сюлмаськонъёс, малпанъёс омырскемын. Кузпалызлэсь керӟегъяськемзэ шӧдыса, лэся, Ондрей ымзэ ик уг усья: мылкыдъёсызлэсь ӧръёссэ ачиз мед шӧдоз-валалоз, пе. Нош тани анаймурт мур лулскиз но кузпалыз пала берытскиз: - Та пельнянь борды но оломарлы лякиським... - Ма, пӧрано шуид вал кадь но... - пельпумъёссэ ӝутказ Ондрей. - Кызьы бон пельнянез этелы нуод? Пӧзьтыны интызы но ӧвӧл, дыр. Пирожки, шаньги пӧрано. Дор сиёнэз мед веръялоз. - Кемалась кулэ ни вал, - мукет номыр вазьыны ӧз шедьты корка кузё. 13 Рейсысь вуэмез бере Дима соку ик дораз дыртӥз. Ваем вузъёсыз интыямын. Отӥыз сярысь Степанов йырзэ мед висьытоз ни. Табере шутэтсконо, катьяськоно. Дораз бертӥз но - егит пи ас песянайзэ ӧз тодма. Чеберскем, егитомем кадь. Азьвыл ялан кышнопалан, гур котыраз берганы муг-амал утчалля ке вал, та рад сиськыны пуксем пиез доры вуиз но кошкыны уг ӵыд ни. - Нош этемы, пие, простить карыны куриз. Синкылидэс, пе, трос виятӥ. Тырмоз. Коть нош кыӵе ужез быдэсъяло. Лушкаськонэ но, казиное но уг месӥськы ни. Чуртнаськиськод, нош ишкалскыны уг лу ни вылэм. Шуисько, пе, вал: киосы шудоесь. Шуд - уж бордын. Вот сое, пе, мон йырвизьмам лусйи. - Гожтэтэз вуиз-а, мар-а? - юаз Дима. - Анай-атаез ас внуксы сярысь ӧз ке сюлмаське, кинъёс бызьылозы, сюлэмзэс висьытозы? Этемы доры ветлӥ. Чидало, пе, тупатско. Зэмзэ ик, визь мед пырысал ни, Инмар мед юрттысал. Куасьмем, жуммем. Ачиз но воштӥськем. Монэ адӟиз но азям пыдесъяськиз. Пыдесъяськемезлы но, мукетызлы но ӧй оскысал, дыр, нош синъёссэ адӟи но - оски. Шӧл-палэсь но, бездэмесь но ӧвӧл ни соос. Эке дыръёсысьтыз тылгизьы пыремын. Пересь сюлэмез уд алда. Мар ай мон тонэ кылын гинэ сюдӥсько? Сиён дась ук. Дималэн песянаезлэсь ӟеч мылкыдзэ наштамез, пильмаськытэмез ӧз пот. Мар но со вераны турттэ ик вал но, ярам, ымзэ дыраз лач пытсаны валатскиз. "Шуд - уж бордын, пе, - егит пилэн ымдуръёсыз пальпотонэн кырыжтӥськизы. - Озьы гинэ ке луысал. Уксётэк кыӵе шуд луоз? Пож вуын жомбылляськон. Мон но тани архитекторын ик ужасал. Нокин ӧз улля ук. Нош мон кошки. Та рейс понна но Николай Владимирович трос гинэ донгыны малпа кадь. Архитекторъёс сомындазэ толэзь ужаса но уг потто. Созэ но, уждунзэс, толэзьёсын ӝегато кадь. Нош мыным ке - пожалуйста. Ӵуказе ик мыно но, ваньзэ сётозы. Ас проектэдъя корка сярысь ке, соиз но уз пегӟы. Уксё трос люкай ке, коттедж ӝуто. Тӥни озьы. Мынам планъёсам номыриз уз воштӥськы". - Тӧл воштӥське кадь. Ӵуказе жобаськоз, - Дималэсь малпанъёссэ куспетӥ уриз ульчаысь соку гинэ пырем Ондрей. - Кыӵе тӧл? Кыӵе воштӥськон? - паймыса йырзэ урдӥз Перевозчиков. - Ваньмыз планъя... - малпанъёсызлэсь но песятаезлэн верамезлэсь сураськемзэс, пӧлэстӥськемзэс валатскыса гинэ Дима гуньдэм кадь луиз. - О-о, Дима но вуэм, лэся. Мон тани ульчае лёгаськыны потам вал но... - уно пол зор-кот улэ сюрылыса шымырскем, куренёмем кролик изьызэ ошетъёс вадьсысь ӝажы вылэ интыянъяз вазиз Ондрей. - Шуисько, тӧл воштӥськем. Лыос но шӧдыто. Ваньмыз - куазь жобанлы. Дима номыр ӧз вазь ни. Анаезлэсь ваем шыдзэ шӧмзэ но валатэк ӟузьылӥз но ӟузьылӥз. Собере ӝӧк сьӧрысь кыштырак потӥз но корт койкаез доры вамыштӥз: кӧлоно, шутэтсконо, собере нош ик ужано. * * * Ваньмыз малпамъя гинэ уг лу вылэм. Ӵуказеяз ӵукна Степановез интыысьтыз Дима ӧз шедьты. Секретарез шуиз: - Тӥ, Дмитрий Сергеевич, эн сюлмаськелэ, со ӝоген вуоз. - Малы мон сюлмаськом? Вуоз ке вуоз. Солдатлэн ведь кӧлыкуз но службаез мынэ, - Перевозчиковлэн серемез потӥз. - Куинь нунал ӧй вал ни но, туннэ коть возьматскоз, дыр. Маке ышылыны кутскиз. Оксанаез но, вузкарисьсэ, сьӧрысьтыз уг келля. Только тӥ мон озьы верай шуыса нокинлы эн поттылэ. А то тодӥз ке, соку ик туздыроз. Ми кадьёсын солэн вераськон вакчи. Ми ведь Оксана кадесь ӧвӧл, - вузкарисьын ужась эшезлы оло вожъяськыса, оло кыӵе ке мукет муген сюлмаз люкаськем вань малпанъёссэ секретарь пальккыны тыршиз. - Марысь-мар ке, мон татын луо, - ӧс кутон доры сузьтӥськонъяз ни вазиз Дима. Кытчы мынон пумысен Дима йырзэ кема ӧз тӥя. Бухгалтерие. Уждун басьтыны дыр вуэмын ни ук. Бадӟым вож сейфен, кык курень ӝӧкъёсын пичигес комнатаын Надя огназ вал. Куке-соку одӥг классын дышетскем пилэсь дораз пыремзэ адӟыса, со малы ке дарали кадь ӵыжектӥз но интыысьтыз султӥз. Дима паймемзэ ӧз ват: - Мар луиз? Кыкетӥяз кабинетэ пырисько - кыказ ик монэ султыса пумитало. Секретарьмы монэ уг ик адӟылы вал, нош туннэ ке сое уд тодма. "Дмитрий Сергеевич, Дмитрий Сергеевич, эн сюлмаськелэ..." Тон но озьы шуод-а? - Настя сярысь ке, паймонэз ӧвӧл, - пуконэз вылэ лэзиськиз Надя. - Нош тон? - Сойзэ ачим тодӥсько, - нылмуртлэн векчи ымдуръёсыз пеперскизы. - Мон уксё басьтыны пырем вал, - бухгалтерие вуон мугзэ Дима усьтоно кожаз. - Настя ӧз вера шат: Николай Владимирович кытчы ке ышиз-быриз. Нош сотэк кыӵе коньдон луоз? - Ма, вузъёс ворттӥськом кадь ук, - ваче пуктэм ӝӧкъёс доры матэктӥз пырем мурт. - Нош тыриськонъёсын кызьы? Кредит понна процентъёс бызё ук. - Кыӵе кредит, кыӵе процент? - Ӝыны ар талэсь азьло Степанов банкысь кредит басьтӥз вал. Куинь толэзьлы. Дырыз ортчиз, нош со уг берыкты. Вылаз ик, Оксанаен мынчыръяськыса ветлэ. Бриллиант зундэс, пе, басьтэм. Со ушъяськиз ни. Табере не магазин уг ужа, не ачиз нырзэ уг возьматъя. Кытысь коньдон потоз? - Нош вузъёс? Соос тэк уг кыллё ук, - паймиз Дима, ӝӧк сьӧрысь пукон вылэ лэзиськемзэ ик ӧз вала. - Со вузъёсыд понна коньдон вуэ кожаськод-а? Тодазы ӧд уськыты ке, толэзь но, кык но возёзы, - таяз учыре но Смагиналэн валэктонэз дась вал. - Кузё уг сюлмаськы ке, кин йырзэ висьытоз? Солэн покчи предприятиез ук. Асьмеос медоос гинэ. - Нош мар соку лэсьтоно? - юскиськем мылкыдын юаз Перевозчиков. - Ма, Жигаловлэсь, Волковлэсь адӟем кароно. Соослэн фирмаоссы маял вылын кадь ӝужъё. Бергато, пӧрмыто. - Э-э, соиз сярысь мон юалляськи ни, - киыныз шонтӥз Дима. - Уксётэк номыр уз пӧрмы. Фирмадэ пусйыны ик кӧня шильыртӥсез кулэ луоз! Собере маке бордысен кутсконо ук. Нош ик уксё... - Ваем вуздэс Ворошиловаысь "Мебель" магазинэ кельтӥд-а? - Ну и мар? - Директореныз вераськоно. Перечислениен медам келялэ, наличкаен, пырак кияд мед сётозы. Степанов шунды сямен возьматскытозь, тон со коньдонэз бергатод, кык- куинь пол тросгес карыны вутскод. Вуиз ке, кулэ мындазэ оприходовать каром но тӥни. Спорткультторглэн но, мукетъёсызлэн но заявкаоссы вань. Кытысь вузъёс вуттоно, соизэ но тодоно... - Да-а, тазьы пукемлэн пайдаез уз лу, - интыысьтыз чотак султӥз Дима. - Дунне шарез аслыд бергатоно, со шоры долкаса учконэз ӧвӧл. Али ик Загумённовлы жингыртӥсько. - Кыӵе-сыӵе дунне-шар? - паймыса юаз Надя. - Волгоградэ ветлон сярысь вераськиськом. Нош со ке - дунне-шар. - Тулыс мон сое тыныд возьмато. Возьманэз кема ӧвӧл ни. Одно ик. Табере - Волга дурад, - ӧсэз пытсакуз ни вазиз Перевозчиков. 14 Кӧлон но сайкан. Сиён пӧран но тусьты-пуньы миськон. Эмъяськон но Инмарлэсь пичильтык коть тазалык курон. Митреез уж дураз келян но кема-кема витён... Андреевъёслэн семьяязы берло кык арня куспын номыр сокем пусйымонэз ӧй вал. Э-э, нимысьтыз верамон праздниксы ортчиз. Кыкназы пересьёс куинь толэзь талэсь азьлолы пенсизэс басьтӥзы. Коньдонэз трос ӧвӧл ке но, шумпотон ук: вылӥос кызьы ке соос сярысь но тодазы ваиллям... Со сяна, Нӧднюк починкаысь гожтэт вуиз на. Насьталэн ӵужапаезлэн нылыз улэм- вылэмзы сярысь гожтэм. "Озьы ик со куен улӥськом, - гожтэтэз картэзлы шара лыдӟе Насьта. - Пудо вордӥськом. Сотэк угось уг луы. Сием но потэ, дӥськут но басьтоно - шыр гольык уд ветлы ук. Колхозлы оскон со пормагес луиз ни. Гуртоосмы серекъяло: "Ӟардонмы", пе, уймонлы пӧрмиз. Уд вала: серемез-а отын тросгес, синкылиез-а. Кыкетӥ арзэ ни уждунэз ӧм адӟылэ. Ваньзэ ворало, качало. Мынам пензие ӧй луысал ке, незнай, пиелэн нылпиосыз школае но кызьы меда ветлысалзы. Тон, Насьтапай, гожтэтад Лангыр бусы сярысь юамед. Сое пермер нергелы сётӥзы вал. Ужаны моӵез ӧз сузьы кадь. Уксё кулэ ук, уксё. Табере бусызэ но бусы шуыны ым уг бералтӥськы ни. Жаг турын нориз, куд-ог интыосаз пипу будэ ни кадь. Солы тон, Насьтапай, эн паймы. Эшшо но бадӟымесь бусыос аналтэмын ук. Гырон-кизён- утялтонэз, пе, басьтэм ю-няньлэсь дуногес усе..." - Осто, Инмаре! - гожтэт лыдӟонзэ вискатыса, Насьта чабкиськиз. - Атае тае тодысал ке, мар шуысал? Ӵапак со бусыен йырин сыӵе курадӟонэз чидано луиз ук. Быриз но. Музъемез фермерлы сётӥллям но, со ке музъемез аналтэм. Йыре уг тэр. - Радиоез уд кылзӥськы, козяйка. Отын весь верало: музъемен вузкарыны лэзёно. Озьы, пе, уксё люкаськоз, - Ондрейлэн туала улон радэз тодэмзэ возьматэмез потӥз. - Ма, вуза, вуза! Ваньзэ вуза! Гуртысьёс воксё номыртэм мед кылёзы. Собере тон ик мынод но - басьтод. Кӧттэ вӧлъяса ветлод. Козяин-барин луод, - арлыдо кышномурт, усто вераны пӧрмытэмезлы шумпотыса, кит-кит серектӥз. - Собере озьы ик аналтод. - Мар паймонэз, со пичи бусыеныд гинэ ма лэсьтод? Тодэмед потэ ке, мынам быдэс Музъемез басьтылэме вань. Музъем шарез. Вот озьы. Насьталэн паймыса ымыз ик усьтӥськиз, киысьтыз гожтэтэз ӝӧк вылэ усиз. Нош Ондрей чорк-чорк кариськиз но веранзэ азьланьтӥз: - Пичи дыръяз Митрей туж шаян вал, созэ ачид но ӟеч тодӥськод. Но кызьы ке дышетскыны но пӧрмытылӥз. - Асьме выжыысь ук, - кузпалызлэн суй бораз йӧтскиз но вешам кариз Насьта. - Выжыямы шузиос ӧй вал. - Дак вот, со визьмо пиед школаяз шоккетыса музъем шарез пилем... - Оломае но тодад ваиськод. Кылобус шуо кадь вал сое. - Уен-нуналэн дорад пукид ке, ваёд. Йырын макня ӧвӧл ук. Глобус... Тӥни кызьы сое нимало. Пилем сое. Митрей школаысьтыз быз-з! бӧрдыса вуиз. Ляконо, пе. Сотэк школае уз лэзе. Вырим ни бон, кык ӵошен тыршим. Но ӧз пишмы милям. Быдэс Австрализы палдэм ук. Глобусмы наштаськиз, паньсаськиз. Выльзэ басьтытэк ӧйлась. Ижкарлэн шорысьтыз ик огаз магазинын школаослы олома но сыӵе арбериос вузало вылэм. Отысь шедьтӥм. Потӥськом ни магазинысь. Киям глобусэз возисько. Малы ке сыӵе шурдыт, сыӵе кышкыт вал мыным соку. Огшоры арбери ӧвӧл, ачиз Музъем мон кие вуиз ик. Янгыш лёгиськыны шедьтӥ ке, быдэс Музъем пилиськоз кадь. Нош Митрей бордам тэбине: вай, пе, мон но нуыны юртто. Ӧй сёт, шуи: та Музъем оскымон киосын луыны кулэ. - Паймод но бырод тонэн, Ондрей. Нош Катьырналы, ӵужапаелэн нылызлы, мар гожтом? - гожтэтэз выльысь кутыса юаз кышномурт. - Озьы ик гожты: со фермерды ужаны уг пӧрмыты ке, толыкез ӧвӧл ке, талано, музъем оскымон киосын медло. 15 Фирма кылдытон капчиен уг сётскы вылэм. Калыкын юнме уг верало ук: "Капчиез ӝӧк вылын". Ӵапак ӝӧк вылэз сярысь сюлмаськыса, тыргес но ӟечгес улон сярысь малпаськыса, Перевозчиков та уж борды басьтӥськиз. Волгоградэ но ветлӥз. Отысь воштос ёзъёс вуттӥз. Собере Ивановое ширтӥз. Дӥсь но пӧртэм-пӧртэм басмаос вайыса, табышез верамон люкаськиз. Копейка вӧзы копейка ӧвӧл ни - Дмитрий Сергеевич огшокчемен сю сюрс манетъёсын вырыны кутскиз. Константин Загумённовлы тау шуод ни. Машинаез ӧз сӧриськылы, вуз ворттэмез понна мултэс ӧз куасалтылы. Нош сюрес вылын, Инмарлы тау, ӝегатон, кырмон, талан учыръёс ӧй вал. Ма, талы сокем паймонэз но ӧвӧл. Укыр кыдёке ӧз ветлылэ. Ӵукна туж вазь пото но бер ӝыт чаклам интые вуо ни. Ужбергатон борды кутскем муртлэн штаб нергеез но кылдӥз. Кытысь вузъёс басьтоно, кызьы коньдон тыроно, ваем вузъёстэ кытчы интыяно - ваньзэ сое Надежда Карповна Смагина радъялляз. Нырысь рейсъёсы ветлыку, азьдэ-бердэ чаклано луылӥз. Волгоградысен но, Ивановоысен но Дима ӵош дышетскем эшезлы жингыртылӥз но ӧжытак куалектысагес юалляз: - Ышем-бырем кузёмы ӧз возьматскылы-а? Вуиз ке, Перевозчиков дораз пуке шу. Нош дор адресме тон уд тодӥськы. Кенешим? - Кузпалыз но пыраз. Утча. Оло, пе, милицаен утчано ни. Ми буйгатӥм: огшап ортчыса, одно бертоз. Нош тон отӥ сэрытгес, - телефон трубкаысь косъяськон гажын верам кылъёс чузъясько ни. - Тюмене ветлоно луоз на. Коньдонэз бергатоно. Собере ни учредительной документъёс борды басьтӥськоно. - Ваньмыз о'кей луоз, осконэ мынам, - шоккетон мылкыдын пумитаз вазиз Перевозчиков. Палэнысь вуттэм вузъёсты ӝоктон ласянь но шуг-секытъёс ӧз кылдылэ. Грузчикъёс тодмоесь - архитекторъёс. Валамон, соосты "Жигулиен" нуись-ваись ӧй вал. Константин, йырберзэ амалын кормам карыса, киыныз шонтылӥз: - Кыдёкын ӧвӧл, уд ӝокалэ, дыр. Пеймытэз но чидалоды. Нош правилоос шоры сялӟом - рефрижератор ведь адями ворттыны чакламын ӧвӧл. Дмитрий Сергеевич тае лыдэ басьтоз, дыр. - Кескич ик тон, Загумённов, - уж ӧръяськемлы шумпотон мылкыдын вазе Перевозчиков, нош понназ малпа: "Жигули" я мукет машина заводёно ик луоз, "питрантэм" фирмачез син азе пуктыны шуг. Да-а, расходъёс люкаськозы. Но кутскид бере, чида ни". Огпӧртэм пеймыт-лыз халатъёсын дӥсяськем архитекторъёс, сумбрес, гызмыльтыса, ог-огзылы юрттыса, рефрижераторлэн паськыт ӧсэз сьӧры пеймытэ ышо. Пумитъяськисьёсыз но куаретӥсьёсыз ӧвӧл. Арлыдо воргоронъёслэсь интыяськыны кема курадӟемзэс адӟыса, Дима кызьы ке огпол ымзэ усьтоно кожаз на: - Чалякгес тӥ отын. Дыр уг витьы, - курень вугыё зӧк очки пыр лек тылын чилясь синъёсты адӟыса, егит ужбергатӥсь дыртыса ватсаз на: - Тӥ отӥ, Михаил Григорьевич, ӧжытак чидалэ ни. Водитель вераз ук, кема ум мынэ. Пыдкутчанэн коробкаос вылэ ик интыяське. Рефрижераторлэн кабинаяз пуксемез бере но Дима кема буйгатскыны ӧз быгаты на. Ялан Молотковлэн сутӥсь-ӵушкась синъёсыз тодаз лыкто, соин, лэся, быдэс мугортӥз кузьылиос бызьылыны кутскизы кадь. Ужбергатонэ калъяськем мурт ӧз чида ни - ассэ буйгатыса музэн, ӝожалэс мылкыдын ас понназ выллем гинэ шуиз: - Ма, соос асьсэос мылкыд каро ук... Коньдон понна ужамзы потэ. Озьы бере, рос- просгес, сэрытгес бергано... Тазэ но учырез Загумённов кутсконысеныз пумозяз адӟиз. Ужасьёслэсь но, егит ужбергатӥсьлэсь но мылкыдъёссэс валаз. Рульзэ бергатон висказ ик вӧзаз пукись "шефсэ" буйгатыны тыршиз: - Дышод ай, котьмалы дышод. Косъяськод но, куашетод но... Степанов ӝык пӧртэм-а вал? Нырысь небыльток кадь выриз. Ӧз косъяськы - йыбыртъяз. Нош табере - пери, истинной пери-и, - та кылъёсты верамез бере усьтэм укное сялӟиз но ӵогыса кадь йылпумъяз: - Уксё - со уксё! Машинаез ӝоктон та рад малпам радъя ӧз пӧрмы. Перевозчиков ужез ӝог йылпумъяны но соку ик коньдон люкылыны турттэ вал. Но пыдкутчанэн вузкарон магазинлэн бадӟым "уробоез" вылымтэ. Пичияз нош трос-а коробкаос тырод? Соин ик, нуллонэз укыр кыдёкын ӧвӧл бере, киын гинэ пӧрмытсконо кариськизы. Магазин мышкысь бадӟым ӧс сьӧры пыртӥськод но - ужез быриз. Отысь товаровед но Дима машинаысь ӝоктӥськись коробкаосты лыдъяны кутскизы, нош грузчикъёс, вить-куать коробкаосты кутыса, кузёосын возьматэм азе нуо но лач-лач тыро. Ваньмыз умой вал кадь. Но Пётр Никонорович коробкаосын йырин-а, мар-а ӧс янакез но синйылтымтэ - нуоно арбериосыныз ӵош магазинлэн складаз тюаз ук! Пыдберъёсыз гинэ адӟиськизы на. Товаровед, вылтӥяськись тусо егит нылмурт, тае адӟыса, гор-гор серекъяны кутскиз. Мышкин сылӥсь Перевозчиков амалтэк солань берытсконо луиз но, малпамезлэсь азьло ымыз усьтӥськиз: - Костан арбери-а, мар-а та? - дыртыса коробкаос доры бызиз но оген-оген бичаны кутскиз. Таза, сумбрес мугоро Пётр Никонорович со вие ньыльпыдъяськиз, султэмез ӧз луы. Отчыяз ик пуксьыса, со штан куксэ куасалтӥз, вирӟектэм пыдессэ зыраны ӧдъяз: - Юри-а, мар-а?.. Янгышай... Кинэн уг луылы?.. Со ке товарез понна бӧрдэ. Серекъясь товаровед, виясь вирез адӟыса, чылкак кӧдэктӥз, ымдуръёсыз мукет пала кырыжтӥськыса, бӧрдӥсь тусо луиз. Бӧрысь гинэ мазэ-созэ валатскиз, лэся, но чангес черектӥз: - Аптечка! Аптечка кулэ! Вӧсезлы чидасьтэм муртлы машиналэн шофёрез юрттӥз. Пётр Никоноровичлэсь пыдессэ йодэн зыранъяз малы ке туж керӟег мылкыдын огпӧртэм шуылӥз: - Дышод ай... Ортчоз ай... Дышод ай... Кинлы но малы со озьы вераз - тодӥсь ӧйлась. Пётр Никонорович-а вӧсезлы дышоз, чидалоз но, ваньмыз капчиен ортчоз, кин ке мукетыз-а. Котьма ке но, Дмитрий Перевозчиков ваньзэ тае ас вылтӥз погыльтӥз но, ӝуась тылӝу вылын сямен, огинтыяз лёгаськыса сылӥз - синазькыль картон коробкаосты лыдъянэн йырин ӧй вал ни... Ужзы йылпумъяськыса, со грузчикъёслы машина вӧзын ик коньдон тыриз. Йырзэ ӝуткатэк гинэ коньдон мычылӥз. - О-о, выль кран зол ӝутка-а! - уждунзэ лыдъямез бере одӥгез архитектор вазьытэк ӧз чида. Нош Пётр Никонорович кошкымтэ. Ужаны ӧз пӧрмыты ни ке но, складэ пырон ӧс дорысь скамья вылын биньылэм бур пыдессэ маялляса пукиз. Сокем вӧсь ке, эмъяськонние но конгыляны йӧндырысал но, ӧз кошкы тӥни, витиз. Мукетъёслы тыремез бере Перевозчиков дыртытэк Пётр Никонорович доры вамыштӥз. Таизлы суменак коньдон сётӥз но кыкназылы гинэ кылымон шуиз: - Вождэс эн поттэ, Пётр Никонорович. Мон... кызьы ке шуак... ачим но валаса ӧй вутты. - Луылэ, Дмитрий Сергеевич. Мар карод на... Мон ведь зэмзэ верасько: со синазькыль янаксы но тубат сярысь чылкак вунэтӥ... Катьтэммем тусо, чилясь синмо архитекторъёс-грузчикъёс дыртытэк, соин ӵош ик кежектысагес, рефрижераторе тубо. Пётр Никоноровичен Михаил Григорьевичез егит фирмач кабинае келяз. Пересьёслы (Перевозчиков ужасьёссэ ас понназ озьы ниманы кутскиз) выльысь институтэ мыноно, ужан дӥсьсэс воштоно. Нош Дима дораз трамваен гинэ кошконо кожаз. Туннэ луэм учыръёс йырысьтыз озьы гинэ уг тӧлӟо. "Оло, люкиськоно соосын? - одӥг юан сое висьытэ. - Уг ярато ук, уг гажало... Амалзы луысал ке, пызь-кеньыр карысалзы, пазьгысалзы-таркасалзы. Михаил Григорьевичлы ик маза сёт ай. Вулкан, пӧзись пурты! Нош кисыяз уксё тросэнгес вуыны кутскиз но, адямиед киез чупаны дась ини. Весяк кышноезлы шуба басьтон сярысь зуле вал. Басьтӥз. Табере тани пиезлы видак кулэ луэм. Озьы пумтэм-йылтэм... Нош Пётр Никонорович - небыльток, уксё понна ваньзэ вунэтӥсь небыльток. Дугды ай! Нош малы соос монэ яратыны, гажаны кулэ, мон выль кен но, ческыт кампет но ӧвӧл ук. Соос - ужало, мон - тырисько. "Чупаськонъёс-вешаськонъёс татын мултэс, соос ужлы люкето", - та малпанэ вуыса, Перевозчиков "пересьёсыз" сярысь тодэ ваёнъёссэ жаг турынэз сямен сэрпалтӥз. Трамвай йыггетэ но йыггетэ. Калык тыраз тулляськемын. Нунал ӝытлань питыра ни. Адямиос керӟегесь, жум тусоесь. Дима но жадемын. Куиньмой ӵоже кабинаысь ӧз васька, шуыны луоз. Сиденье вылэ али ик лӧж-лӧж пуксьысал, но уг луы. Кыӵе ке челнок пыд азяз ик бадӟым сумкаоссэ куштӥз но ачиз огез вылэ интыяськиз. Умой пукон шедьтэмезлы шумпотэменыз, лэся, кескич пальпотӥз но Дималэсь гольтрес юаз: - Уг люкетӥськы-а? - "Люкетӥськод" шуи ке, трамвайысь уд пот ук, - мылкыдтэк вазиз егит воргорон. "Ӧвӧл, тазьы ворттылонэз чиданы йӧныз ӧвӧл. Одно машина басьтоно. "Питрантэм" фирмач - мешокъёсын бызьылӥсь челнок. Одно Степановлэн кадьзэ. "Девяткаез" яке "десяткаез". "ВАЗ-лэсь улӥе лэзиськоно ӧвӧл. Клиентъёс но ужбергатӥсез машинаезъя дунъяло ук", - азьвыл кылдэм малпанэз чилектӥз но трамвайысь потытозяз йырысьтыз ӧз кошкы ни. Нош дораз номыр уг воштӥськы. Лангыр Насьта Митрейзэ адӟемез бере ик юан бӧрсьы юан пальккыны дыртӥз: - Малы сокема? Кыдёке кошкондэ ӧд поттылы вал ук. Уд жаляськы милемыз, одӥг но уд жаляськы. Сюлэм путоно кадь луиз ни. - Фирма кылдытыны малпасько, анай. Ачим ик кивалто, - "ачим" кылзэ кужмогес вераны тыршиз егит Перевозчиков. - Шырмачъёс уг тырмо, кожаськод-а? Котькуд сэргын, котькуд гутёын соос. Ӝоген буш подвалъёс уз кыле ни. Пыдло пыро. - Со фирма шуонад мар поттод, мар лэсьтод? - таиз ини Ондрей куаразэ сётэ. - Производство кулэ, производство! Милям заводын котьку озьы шуо вал. Нош али? Киысь кие вошъяло - кисызэс тордыто. - Начальной капитал кулэ, - нуналэз сыӵе, лэся, шуыса, Дима, "пересьёсызлэсь"- архитекторъёслэсь сямен ик, таосызлэсь пересьёслэсь шуккетъёссэс но чидано кариськиз. - Вылӥегес ӝутскем потэ. Нош коньдонтэк уг луы. Соин тӥни нырысь вузкаром. Отӥяз адӟом, улон возьматоз. - Архитектор луид. Солэсь вылӥез мар вань? - уг сётскы Ондрей. - Уд валаськы тон монэ, атай, уд, - киыныз шонтӥз Перевозчиков. - Тани тятяе ужысьтыз бертэм бераз монэ вылӥе-вылӥе ӝутка вал. Пырак вӧлдэтозь. Мон кышкасько - бӧрдӥсько. Нош со - эшшо вылӥегес! - та суредэз тодаз вайыса, Дима огшап чал- чал сылӥз. - Сое гинэ син азям пуктӥсько на. Али ӧй бӧрдысал ни кадь потӥсько... - Ма, ӝуткалод на тонэ! Мугорын солэсь бадӟым ни ук. Арлыдын но ортчиськод ини, - Насьталэн бамысьтыз пальпотон кылдон вакытаз ик кысӥз. - Нош мукетъёслэн папаоссы ӝуто ук. Вылӥе-вылӥе. Пиоссэс акционер огазеяськонъёслы, фирмаослы кузё каро. Тани одӥгез генеральной пизэ но гендиректоре донгиз. Ачиз - Кун Кенешлэн депутатэз, табере пизэ отчы кыске. Пӧрмыто-о-оз! Кожаськоды, сыӵеос ӧжыт?.. Нош мон пырскисько, утчасько, бергасько. Ланьырам коркась вылӥе ӝутскыны секыт ук. Соин ик верасько: начальной капитал кулэ. Атайёссы шӧлкын ӝутскем нюлымтэ кунянъёслэсь ми но пӧртэмесь ӧвӧл. Оло, ӟечесьгес но. - Пыкылӥськод?.. - Ондрейлэн конглё алюминь бодыез выж борды мырӟиськылыны кутскиз. Кожалод, сукыр пересь мурт отысь сись интызэ копыштыны, палдытыны туртске. - Ми ӝык ум тыршиське-а? Студент дыръяд пензиысьтымы уксё келяськом вал, - Лангыр Насьталэн бам вылтӥз синкыли шапыкъёс питырскизы. - Мон ваньмыз понна сюлмысь тау карисько, атай, анай. Тӥ тятяме, мамаме воштӥды, будэтӥды. Табере мынам черодэ. Пунэмзэ берыктоно, - ветровказэ кыльыны вуымтэ мурт дӥсьсэ койка вылэ сэрпалтӥз но артэ сылӥсь песянаез-песятаез доры дыртӥз. - Кыӵе, мар пунэм? Тыныд ке умой, милемлы но, пересьёслы, ӟеч ни, - нылызлэн пиезлэсь тыбырзэ вешаны ӧдъяз Насьта. - Тани пичияк шумпотонэ но вань ни. Тодӥсько: тӥледлы секыт. Больницае но, мукет интые но ветлыны. Ши-ирк гинэ коть нош кытчы вуом. Мон машина басьтӥсько. - Машина-а? - куалектыса, огымысь кадь, шулӟектыса юазы пересьёс. - Ӵыжак выльзэ! - номыре валатэк, Дима веранзэ азьланьтэ. Пукселэ, анай, "десяткае", тӥ но, атай, эн кылелэ. Инты тырмыт, пуконъёсыз небытэсь. Озьыен, вырӟиськом?! Лангыр Насьта синкыли шурзэ тымыны ӧз вормы ни, пыдессинъёсыз либрак луыса, Митреезлэн суй бордаз ӝабырак кырмиськиз. - Нош тятяед? Нош мамаед? Соос сярысь малпад-а? - Мар тятя, мар мама? Улон азьлань бызе. Гызмылёкъёсты лёгаса кельтэ. 16 Висёнъёс... Адӟемпотостэм черъёс... Вань лулоеныз уен-нуналэн ожмаськиськоды ук тӥ. Куасьтӥськоды, курадӟытӥськоды, быдтӥськоды. Кулонлэсь юмшанзэ быдэс дуннее вӧлмытӥськоды... Каргам висёнъёс!.. Синазькыль черъёс!.. Лангыр Насьтаез нош ик висён погыртӥз. Астмазэ кызьы ке чидасал ни, дыр, сюлэмыз кутӥз. Со вераськонзы бере ӵуказеяз ӵукна Димаез келяны султэмез но ӧйлась. Ма, вырӟемез но уг лу, улон нюжаез тани-тани чигиськоз кадь. Соин ик валессэ мертаса кыллёнэз гинэ кылиз на. Эмъяськонние выд вал - Ондрейзэ кинэн кельтоз? Митрей но вань на. Ӧвӧл, чидатсконо. Оло, лэзёз ай. Соиз озьы, Дима вань. Со но анаезлэсь курадӟемзэ адӟытэк-шӧдытэк уг ул. Висись мурт котырын берганы, солы юрттыны пӧрмытысал. Но ӧз ук. Ялан начальной капитал шуонэз сярысь кырӟа. Коньдонэз, пе, бергатоно, сотэк штантэм кылёд. Со ужен йырин матысьёстэ вунэтыны яра шат? Тани Насьта но нылызлэн пиосыз шоры киыныз шонтыны быгатысал. Тудӟем Карлуд шуре усьыса черламез бере но яратоно Митреез дорысь уен-нуналэн ӧз кошкылы. Ялан вӧзаз вал... - Тон, козяйка, воксё куасалскид кадь. Больницае ветлы. Астэ быртык коть жаляны вала, - сюлэмшугъяське Ондрей. - Ма, ортчоз ай, лэзёз. Первойзэ ӧвӧл ук. Машина басьтонэныз онгратӥз, лэся. Соку ик Ленушен Серёжа син азям пуксизы. Соос но кузьымедлы кыӵе шумпотӥзы. Тэтчазы, лопыръяськизы, доразы пукыны ӧз чидалэ. Мыным ке кылем, со машинаоссы чик медам луэ вылэм. Вашкалаос кызьы ке улӥллям ук, - висатыса-висатыса, шокан ӧрзэ шедьтыны тыршыса музэн, Насьта могӟалскыса вераське - лангыртонэн йырин ӧвӧл ни. - Бен ачид машина поттонын ужад ук, - ымзэ усьтытэк ӧз чида пересь Андреев. - Нылынымы эмеспимылэн адӟонзы сыӵе вал, дыр. Мукетъёс ворттыло ук. Номыр уг луо. Дима понна но сокем эн чигиськы. Ваньмыз йӧн луоз. - Медло вал, медло, - картэныз соглаш кариськиз Насьта. Вераськонэз мукет ӧе кожытон понна-а, кузпалызлэсь мылкыдзэ буйгатон вылысь-а яке эшшо кыӵе ке муген-а, Ондрей сюлэмаз пыдлон нуллэм ватоссэ шараяз. Ӧй верасал, дыр, чидатскысал, но Дима гыбдась малпанъёсаз тыл аратӥз. - Степан вуылӥз. Назаров. Начальник ни со табере. Цехлы йыр. Вот со шуиз: ӟеч ужамдэс, Андрей Петрович, ум вунэтӥське. Тӥледлы, пе, патер сётом, - данъяськон гажын вера сукыр пересь. - Ужъёссы но ӧръясько ни, лэся. Сотэк патер люкылыны кутскысалзы-а? Производство, производство ваньмызлы йыр. Купи-продайёс асьсэды улонлэн гогыез кожало. Пӧлы пум тӥледлы! Озьы вера производствоын быдэс гумырзэ ортчытэм но сӧсырмыны сюрем мурт, - пересь Андреев ассэ кыӵе ке кенешлэн трибунаяз кожаз, лэся, - лад-лад, дыртытэк вераське. - Зэм шу-у?! Вадьсам мыкырскы ай. Чуп каро, кузёе мынам, - огшап ортчыса ини ӵыжектысагес шуиз: - Ма, асьмеос кызьы ке чидасалмы ни. Митрей вот шумпотоз. Варгас ӟазег сямен уз ветлы. Кышнояськоз, выль патере пыроз. - Мумыкор но сисьмемы-ын, ачиз корка но ланьырамы-ын... - кырӟаса музэн лабыртыны кутскиз Ондрей. - Вылаз ик, весь ымдэ усьяськод: Андрианов Лёшкалы чероддэ сётӥ-ид, ачид номыр ӧд ба-асьты... Ялан сое чидалом-а? - Адӟом ни, адӟом, кузёе мынам. Улон возьматоз ай. Мон огшап кыллё на, ӝытозь, оло, катьясько... 17 Берло дас нуналъёсы Дмитрий Сергеевич Перевозчиков рейсъёсы ӧз пота. Пичи но бадӟым кабинетъёс, котькудаз кузь черод, йыбырттон, кӧян-вӧян, ог-огедлы юрттон сярысь оскытон. Синазькыль, юрӟым! Учредительной документъёс люкан кык но, куинь но толэзь кыстӥськысал, дыр, ярам, Надя визьнодаз. - Ма, котькудӥз ас ужзэ бергатыны кулэ, дыр, - Дималэсь ӵоксузён калэ вуэмзэ валаса вераз со. - Юристъёслэн нимысьтыз фирмазы вань. Лэсьтозы, бергатозы. Коньдон тросгес курозы, конешно. Нош дыр дуногес ук. Фирмаедлэсь нимзэ но малы ке ӧд поттылы на. Кыӵе ке конспиратор музэн выриськод. - "Оскон", гажано Надежда. Нимыз сыӵе луоз. Удмурт кылысь ӟуче берыктоно ке - "надежда", "вера". - Эн шоккеты! - Смагиналэн серемез потӥз. - Классын но сыӵе вал, али но пӧртэм ӧвӧл. Фирмаен кузёяськыны турттӥськод - йӧнгес возиськыны дыр вуэмын ни. Надялэн ӵектэмезъя ик лэсьтӥзы. Юристъёс кылем документъёсты ладъязы, кулэ интыосысь кинюртэмъёс люказы - коньдон ваньзэ бергатӥз. Печатез кияз вуэм бере Дима шампанской басьтӥз но Смагиналэн кабинетаз пыриз. Ымыз пельдорозяз вуэмын. - Гажано валтӥсь бухгалтер Надежда Карповна Смагина, кытчы ай "Осконлэсь" печатьсэ ляконо? Платёжной поручение, чековой книжкае яке мукет документэ? Тон ведь дорам выжод? Степанов доры ик уд кыль? - Фирмалэн кузёез ӧте бере, кызьы чутрак пумит кариськод? - Кутэм ӧвӧл, мон тонэ асэным ӵош учредитель но карыны турттӥсько вал. Ачид пумит луид. Ойдо шампанскоен салют сётом, - "дипломат сумкаысьтыз" ӟененик поттонъяз шуиз выль фирмалэн кивалтӥсез. Нош ӵуказеяз выльысь рейсэ кошкиз. Таяз учыре но Константин Загумённовен. Кызьы шуиз Степанов, коньдонэз бергатыны кулэ, соку гинэ со борды выль манетъёс но коньыос лякисько. Ижкаре берытскемез бере нош ик архитекторъёсты грузчике медъятэк ӧйлась. Соос бен, валамон, кыл-куара поттылытэк, шумпотыса ужаны вырӟизы. Машина доры васькемез бере ик Михаил Григорьевич Молотков шуиз: - Тӥледды, Дмитрий Сергеевич, кузёмы утча вал. Оло, али ик пыралоды? - Нош вузэз кызьы? Сое базае нуоно ук. - Ма, Надежда Карповна но пӧрмытоз, дыр. - Зэмзэ ик... - чабкиськиз Перевозчиков, архитекторъёсын-грузчикъёсын со ассэ лачмытгес возьыны тыршиз ни. Кузьма Васильевич сое кабинетэзлэн ӧс дораз возьмаса сылэ вылэм, кожалод. Соку ик егит ужбергатӥсьлы кизэ мычиз но пыкылэм мактал шуиз: - Кема витьытӥськоды, Дмитрий Сергеевич, кема, - табере со малы ке тӥ шуыса вазиське, Перевозчиковлэсь нимзэ-тулзэ но тодэм. - Ужъёс ук, ужъёс, Кузьма Васильевич, - мукет номыр вераны ӧз быгаты Дима. - Озьыез но озьы, - киыныз шонтӥз институтлэн директорез. - Соос асьме бере но кылёзы. Нырысьсэ пумиськеммы бере ик кельшиды тӥ мыным, Дмитрий Сергеевич. Дӥсьтӥсь, кӧберасьтэм! Кызьы ай шуиды вал: коробкаос? Директор доры егит специалист лыктэ но меӵкытэ: городысь коркаос - коробкаос. Гажасько сыӵеосты, уг ватӥськы. Ачим но куке-соку сыӵе ик вал. - Доронинлэн ымныраз огшаплы ӝож тус пыраз. - Э-э, мар вал - вал. Сое уд берыкты ни,- киыныз шонтӥз но ӵектӥз: - Оло, кофе юоды, Дмитрий Сергеевич? Верады: алигес гинэ кузь сюрес вылысь берытскиллямды. Момент, ваньмыз дась луоз. - Чутрак пумит уг кариськы, - азьвыл кузёеныз ассэ кызьы возьыны паймысагес вераз Перевозчиков. Доронин селекторез доры егит мурт кадь чупрес вуиз но бозгес куараен вазиз: - Кофе ласянь сюлмаськы ай, Олюша. Кызьы вераським, нокинэ дорам эн лэзь, мон татын ӧвӧл. - Ваньмыз дась, Кузьма Васильевич, - кабинетын секретарьлэн векчи куараез чузъяськиз. Кузь чилясь ӝӧк сьӧрын кофе юон висказы ни Кузьма Васильевич ужбергатӥсез ӧтён мугзэ но шараяно кариськиз. Кунгож сьӧрын поттэм векчи печенья вылэ вӧй зыранъяз со шуиз: - Валаськоды-а, Дмитрий Сергеевич, милям но куддыр-кужжыр вӧен нянь сиеммы потэ. Нош бюджет чотын озьы уггес пӧрмы. Кӧс нянь вылынгес возё, остаточной принцип, понимаешь ли. Чидано луэ. Кытчы пырод... - Нош мон маин алче кулэ луи? - пӧсь кофеез гучыктонъяз юаз куно. - Понимаешь ли, Дмитрий Сергеевич, милем ӟеч эшъёс кулэ. Пайдаё эшъёс. Кылӥськиз: тӥ асьтэлы офис утчаськоды. Малы палэнэтӥ утчаськыса улод? Дыр быдтон гинэ. - Уг валаськы, Кузьма Васильевич. - Мар отын валантэмез? Степановлэн кабинетаз интыяськелэ но ужалэ. Нокин уз люкеты. - Нош ачиз Николай Владимирович? - Мар "Николай Владимирович", мар "Николай Владимирович"? - керӟег вазиз Доронин. - Ньыль толэзь ӵоже аренда понна ӧз тыр, понимаешь ли. Нош милем сыӵе балласт кулэ ӧвӧл. Алигес пыраз. Огшап вителэ, пе. Нош со витёнэз ар но, кык но кыстӥськоз. Милем туннэ улоно. - Солэн мебелез но отын кадь ук. - Кыӵе меьель луоз на? - эшшо керӟеггес вазиз Кузьма Васильевич, сӥяны вуэм кофееныз ӧжыт гинэ ӧз воньды. - Шуко ук: аренда ӧз тыр. Со понна ик кельтӥм. Мебелез понна, шуом, ньыльдон сюрс манет тырелэ но - ужез быриз. Валамон, бухгалтерия пыр ӧвӧл. малы соосын герӟаськонэз? Озьы но пишкыртом. - Нош аренда ласянь кызьы? - Соиз ини документъёсъя. Перечислениен. Договор кутом, - арлыдо директор горд тушсэ маялляны кутскиз. - Куинь кабинет понна - быдӟалазэс асьтэос тодӥськоды - толэзяз кызь тямяс сюрс тырысалды ке, кылмы тупасал. - Ма, кабинетэз кык гинэ кадь ук... - Кызьы кык? Воштӥселэн... э-э... азьло озьы вал, шуом, тӥляд ни луоз бухгалтердылэн, собере ведь приёмной нергеез вань на. "Номыре уг вунэты мӧйы кескич ӟичы", - ас понназ малпаз ужбергатӥсь, нош шара вераз: - Зэм но, приёмной... Тодэмея, Николай Владимирович кызь вить сюрс гинэ тыре вал. Дунъёс тэтчыны з вуэ на кадь. - Оломае но тодӥськоды, - керӟег вазиз Кузьма Васильевич. - Кызь вить ке кызь вить медло. Но тӥ мукетсэ но тодӥськоды, луоз: вить сюрс манет сярысь мон верасько. Таиз ини нокыӵе бухгалтериостэк, нокытчы пусйылытэк, киысь кие. Кызьы шуод ай сое? Конфиденциально. Расходъёс, понимаешь ли... Кузьма Васильевич интыысьтыз егит мурт сямен тэтчиз но кизэ Перевозчиковлы мычиз. Курегез али гинэ кабем ӟичы музэн, зӧк ымдуръёссэ нюлыса ӵектӥз: - Огкылэ вуэммес, оло, коньякен пусъём, Дмитрий Сергеевич? - Мон руль сьӧрын. Куке берлогес ни дырзэ шедьтом. Выль машиназэ Дмитрий Сеогеевич "Гражданпроект" институтлэн азбараз гинэ возёно кариськиз. Гаражен выроно ке - мултэс сюлмаськон. Нош татысь сторожъёс сокем трос уг кесё, эсэпсэ чакласа куро. Пеймыт-лыз машинаез доры вуэмез бере егит ужбергатӥсьлэн сюлэмыз лычсузиз. Номыр уд шу, усто тачка! Перевозчиков руль сьӧры пуксьыны ӧз дырты. Сигарет аратӥз, гуч-гуч кыскон висказ машинаез котыртӥ ортчиз. Кузё сямен питранъёсты пыдыныз лякытак ӵыжаз (вӧсь каремлэсь кышкаса кадь), машина вылэз маялтӥз, собере гинэ сигнализация пультэз вылысь кнопкаез зӥбиз. Машина, луло мурт сямен, соку ик кузёзэ тодмаз. Нош кузёез кошкыны ялан ӧз дырты. Лӧж-лӧж пуксиз но кабина пушез учкиз. Небыт, усто! "Сотовой телефон гинэ уг тырмы на. Ничё-о, басьтом. Соиз проблема ӧвӧл, - ӟеч малпан кылдэмлы шумпотӥз выль машинаяз пуксем егит мурт. - Нош табере кытчы? Складэ? Архитекторъёс ужзэс ӧз быдтэ на, дыр. Нош малы мон отчы ветлом? Надя мынӥз ук. Со ваньзэ бергатоз. Доре ик бертоно, дыр. Пересьёс ыштӥзы ни, дыр, сюлмасько, луоз". Соку гинэ машина интыысьтыз вырӟиз. Аслэсьтыз выль чеберзэ возьматыса кадь, азбарысь мукет машинаос дортӥ котырскиз но корт капка доры кожиз. "А Надя - молодчина! Степановлэсь аренда понна кӧня тыремзэ но тодыса кадь вераз, - городэтӥ мыныкуз но Дималэн малпанъёсыз выльысь Смагина вылэ вуизы. - А то пересь ӟичы пӧяны но пӧрмытысал. Кызь тямыс, пе, солы! Шишь! Вӧен нянь сиемез потэм. Нош тон кадьёс укыр трос ке? Ваньмызлы вӧен нянь уд донгы. Можот, милям но сиськем потэ?! Чорыг мызь но! Сотэк но тон, пересь ӟичы, сьӧраз ортчемын кадь. Институт ӧвӧл - фирма пузкар. Ватсаса вить сюрссэ сётылод, пе, бухгалтеритэк гинэ. Расходъёс, понимаешь ли", - Перевозчиковлэн та берло малпанэз малы ке Доронинлэн кылъёсыныз кисьтӥськиз, соин-а, мар-а машинаез тыр гырдалтӥз. Собере ни рулез сьӧрын кӧня ке губырскиз, газ педалез вылэ зӥбиз. Дима озьы Доронинэн пумиськемез бере кылдэм мылкыдъёсызлэсь ишкалскыны тыршиз кадь. Нош Надя бордысьтыз уг лэзь. Ялан йыраз, ялан сюлмаз. Вань ужъёсыд соин герӟаськемын ке, амалтэк озьы луоз. Тани со ӧй бурдъясал ке, "Оскон" но кылдысал-а? Ӧй. Фирма усьтон вадесэ но макем-макем юрттӥз. Со ужын бергамын бере, тросгес тодэ, паськытгес вала. "Оскон - надежда, оскон - надежда! - руль сьӧрын пукись мурт, ачиз ик гур кылдытыса, ӝутскем мылкыдын кырӟаз, таин гинэ ӧз буйгатскы, вӧзаз нокин ӧвӧл ке но, шара вераськыны кутскиз: - Учкымон апай! Визьмо, дӥсьтӥсь, ымнырын-мугорын но чебер! Котыраз гожеръясьёсыз но уг адӟисько. Оло, кылмы тупалоз? - нылмурт сярысь вузано-басьтоно арбери сярысь кадь понназ вераськемзэ шӧдыса, лэся, Дима огшаплы чалмиз - малпалод, машинаез азьын светофорлэн ӝуатскем горд тылыз сыӵе йӧнтэмъяськонзэ чутрак уретыны косӥз. Вож тыл ӝуатскем бере гинэ пияш выльысь ас роляз пыриз: - Нош Люба? Шуг- секытъёслэсь кышказ! Ланьырам коркамы, куанер улэммы солы сюлэмъяз ӧз лу! Ну и сялӟом со вылэ. Новосибирсказ ик мед улоз - ма-амонькаезлэн-па-апонькаезлэн бурд улазы. Парзэ шедьтоз ай. Нош ми шудмес ас киынымы дуром! Хе-е, доре но вуисько ни кадь. Анаен атай нош ик кутскозы: ох, ах, машинаен бертэм, кышкыт ук, шимес, я мырӟозы, я мар... Мон уг сётскы! Кулэ луиз ке, ачим мукетъёссэ мырӟыто но, пезьгыто но..." 18 Катьяськемез бере Лангыр Насьта шундыберган тысь вузаны ӧз пота на. Дор ужъёс, сюлмаськонъёс одолизы угось. "Эх, Карповна шумпотэ ни, дыр. Гужем куазен сема басьясьёс но люкаськогес, - сиён пӧран висказ но малы ке таӵе малпан шияськыса йыраз мертчиськылӥз но ӟеч мылкыдзэ сӧрылӥз, огшап ортчыса зӥбломылӥз, собере ини няськалляз но. - Ма, вожъяськисько кадь ук. Мед пӧрмытоз, ме-эд! Со но адями. Со но висьысагес улэ. Озьы ке но, чида, дырзэ, кужымзэ уг жаля". Аслыз Насьталы базаръёстӥ, магазинъёстӥ трос бергано луиз. Рейсаз кошкон азяз Митреез угось вить сю манет сётӥз. Сиёнлы но, юонлы но яралоз, пе. Солэсь но ӟечсэ адӟод вылэм ни... "Татын воксё ик сюмаса ум улӥське. Митрейлэн уксёеныз этелы посылка келяло", - Ондреезлы шуиз соку Насьта. Вераны гинэ капчи вылэм. Нош посылка люкан туж секытэн сётскиз. Азьло уго котькуд магазинын дунъёс одӥг кадесь вал. Нош али ваньзы асьсэлэсь пукто, оло нош, одӥг магазинысь отделъёслэн но дунъёссы пӧртэмесь. Насьта, валамон ни, дунтэмзэгес но ӟечсэгес утчаз. Ярам ай, трамвай-автобус-троллейбусын пенсионеръёслэсь ветлэмзы понна дун уг куро. Басьтысалзы ке, оло нош, вань коньдонэз мынон-ветлонлы шупчысал. Посылкаен келяно бере, сӥльтырем но чурытсэ, сервелат шуонозэ, басьтоно, улмоос, грушаос но чеберъёссэгес утчано - сюрес вылын сӧриськыны медам вуттэ. Нош чурытэзлэн, чеберезлэн дунзы но шукресэсь. Пересь кышномурт соосты быдэс мугорыз шымыртӥськыса басьтылӥз: талы ик пӧзьтэмзэ сӥльтыремез, огшоры емышъёсты кык, оло нош, куинь поллы тросгес басьтысалыд. Мар бен, чидалод ни. Этелы ӟеч сиён но, витамин шуонзы но туж кулэ. Пумиськыны ветлыкуз, уть, кыӵе восьмемын вал - лы но ку. Ӧжытак коть мед тупатскоз. Ма но со дӥсь, гожтэт ысъяны конвертъёс - ваньмызлы коньдон кулэ ук. Соин ик Насьталы пенсия коньдоназ но пырытэк ӧйлась. Нош посылка пушказ келяно гожтэтаз пусйиз: Митреедлэсь салам. Кыӵе курыт синкылиосын гожтэмын вал та гожтэт - созэ пересь кышномурт ачиз гинэ тодэ. Коньдон шуэмысь, Митрейлэн сётэм манетъёсыз огдыре ик шунтӥсесь но, сутӥсесь но вал. Котькуд анаймурт аслаз вордэм-сюдэм-будэтэм пиналэзлэсь куке но тау карон дыръёссэ адӟон сярысь малпаськылэ. Зэм, зэм, малпаськылэ гинэ, нош улонын сыӵеез луонлы оскыны уггес дӥсьты. Вордэм нуныкайзэ нонтыкуз но, секыт висён дыръёсаз уйёссэ кӧлатэк ортчытъякуз но, школае дышетскыны келякуз но сыӵе малпан шияк вуылэ но озьы ик ӝог сылмылэ, сое мукетыз, йӧноезгес сайя угось: пиналэ калык радъя гинэ мед улоз, солы ӟеч луэмен но ас сюлэмме буйгатысал. Лангыр Насьта Митреезлэн песянаез гинэ, озьы ке но, анай сюлмаськонъёс со вылэ дурыстэм трос ныпъяськизы. Ленушезлэн но эмеспиезлэн быремзы бере Димаен Алёшаез нылпи юртэ я кыӵе ке мукет интые сётон сярысь вераськон ик ӧз потылы. Моӵмы сузьытозь асьмеос ик сюдом-вордом ай, шуизы Андреевъёс. Вань сюлмаськонъёс песянаен песятай вылэ усизы. Со понна тау карыса кадь, пиос Насьтаен Ондреез анай но атай шуыны кутскизы. Со коньдонэз сётыкуз, Митрей лякытак шуиз: "Сиёнлы но юонлы яралоз. Уж каллен ӧръяське ни кадь". Адямилэн улонын интызэ шедьтэмезлы, тыршемез понна ӟеч уждун басьтэмезлы шумпотыны кулэ вал кадь, нош Лангыр Насьта ялан сюлмаське. Мылкыдъёссэ выль ужен вырыны кутскем пиезлы но шараяз: "Бон со фирмач шуонъёсты виыло но, лэся, ук..." Митрей нокыӵе кариськытэк шуиз: "Сьӧраз ортчыны уг яра". Нылызлэн пиеныз басьтэм телевизорез но учкыны уг лу: я отын, пе, адямиез вииллям, я мукет интыын. Ма, Ижкарын но сопал дуннее кошкемъёс ӧжыт-а? "Мафия" шуо, "рэкет" шуо, "киллеръёс" шуо... Сое кылыса, коркасьтыд но кыре потаны уд дӥсьты ни... "Ваньзы со виемъёс сьӧраз ортчемъёс ке, - малпаське Насьта, - быдэс улон сьӧраз ортчемын ӧвӧл-а? Тани Митреез но тодманы уг лу ни. Весь керӟегъяське. Начальной капитал сярысь поттылэ. Уксёез, пе, бергатоно. Кызьы бон сое бергатод? Шудон чача ӧвӧл ук. Тросгес уксё кылдэ ке, сберкассае понӥськод вал. Кулэ дыръяз басьтӥськод ни. Ма, со сберкассаослы но оскон табере ӧвӧл. Милесьтым но кӧнязэ арам каризы. Мӧйымон аръёс сярысь сюлмаськыса, коньыен коньыен люкам уксё. Ичи ӧй вал. Табере ке соин номыр басьтыны уг лу ни. Дунзы, пе, бырем. Кызьы бон дауре шорысь быроз? Со - уксё ук! Ужам понна басьтэм уксё. Лакокраскаын тазалыкме быдтӥзы. Ондрей но бон пӧртэм-а ӝык?.. Талазы, ваньзэ талазы. Тазалыкез но, уксёез но... Карповна но соингес, дыр, сыӵе керӟег. Конкуренция. Сема вузан интыысь муртъёсты улля. Дышетӥсьын, пе, ужай. Пересьмон- уймон вакытад сема вузасе кыль ай. Амалтэк ваньзэ пазьгемед потоз. Ӵапак со талам уксё ик адямиосты сураса ветлэ. Митрей но пӧртэм-а? Уксё сяна, номыре тодэмез уг пот ни. Капитал, пе, кулэ. Ондрей шонер вера кадь: уксёез ваньбур поттыса люкано. Нош уксёлы вань осконэз быдтӥзы ке, соку мар?.." Рейс шуонъёсаз Митрей берло дыре шергес поталляз. "Осконэныз" кивалтӥз. Вузъёс ворттон ужез быдэсъяны Степановлэн фирмаысьтыз кык пиосты кутӥз. Бер ӝыт ни дораз вуылӥз. Лангыр Насьта нылызлэсь пизэ котьку ик капка вӧзысь пичияк ӟус вылын пумита. Пеймыт-лыз машиналэсь сюбег пролкаысь ульчае кожемзэ адӟыса, пересь кышномурт кежектэ, солэн губрес мугорыз ӟус вылысь ишкалске но пичи капкае ыше, огшап ортчыса, бадӟымез капка усьтӥське ни. Машина ужамысь дугдэм бере Насьта Митреез доры дӥсьтытэкгес, урдсӥнак-урдсӥнак матэктэ но котьку сяменгес кепырйыл юа: - Укыр кема ужаськод, пие. - Бергано луэ ук, анай, бергано-о! Сотэк номыр уз лэсьтӥськы. Нош таяз учыре машина паськыт ульчае кожем бере ик Митрейзэ возьман интыысьтыз егит ныл музэн лӧбак тэтчиз но гурезь выллань бызьыны кутскиз. Паймем Дима тормоз педальзэ зӥбоно, машиназэ гуньдытоно луиз. - Мар луиз, анай? - кабинаысь потытэк ик юаз руль сьӧрын пукись мурт. - Гожтэт, гожтэт вуиз! - бадӟым конверт мычонъяз шуиз Насьта. - Про-прокуратураысь?.. - могаса шокыштӥз но мукет номыр вераны ӧз быгаты ни Перевозчиков. - Озьы, пие, озьы, аслэсьтыз прокурорлэсь! - шумпотон йылкытӥз нылызлэн пиезлэсь шулӟектэмзэ но, моганы кутскемзэ но Лангыр выжыысь кышномурт шӧдытэк-валатэк кылиз. - Республиканскойысь... - конверт шоры эшшо учкемез бере ымзэ усьтӥз егит ужбергатӥсь. - Степановлэн эшъёсыз, дыр. - Сиденье бордысь кырмет еэзлэсь мозмытскыса ини: - Ничё-о, озьы гинэ ум сётске. Дугды ай, нош малы татын Андреева Анастасия Евдокимовналы шуэмын? Лангыр Насьта, кожалод, тае гинэ витем. Уртчыса ик потыны дась веранъёссэ кисьтыны ӧдъяз: - Ма, мыным сяна, кинлы луоз?! Ачим ик прокуратурае но ветлӥ! Ваньзэ верай. Ӟеч адямиос дышетӥзы! Кызьы бон сыӵе юрӟым ужез озьы кельтод? Чиданлэн но пумыз вань ук. - Чида-ан? - ялан номырзэ уг вала Перевозчиков. - Чидан сяна, мар-о луоз? Мынам но атае адями вал ук. Нош сое калык тушмон, вредитель каризы. - Кыӵе атай? Кыӵе вредитель? - кӧнялы ке буйгасагес ни юаз Дима. - Мынам но атае вал. Ма, лыдӟы ук. Дима конвертэз усьтӥз но лыдӟыны кутскиз. Та вие но Лангыр Насьта чалмыт сылыны ӧз вала - мар шуод, ас анай-атаезлэн нылзы. Нош лангыртон сям та выжыын виразы пыӵамын. - Ребилитация кариллям! Тӥни озьы. Отын озьы ик гожтэмын: "Нӧднюк починка гуртын 1886 арын вордскем гражданин Загумённов Евдоким Ларионович - "Ӟардон" колхозысь колхозник - 1938 арын судить карыса но ваньбурзэ таласа пытсамын. Али солэн ӟеч нимыз-даныз берыктэмын. Талам ваньбурлэсь дунзэ берыктон сярысь ужпум туала законодательствоя эскериське". Кыӵе ваньбур? Тӧлӥськон машина-а? Юртъер-а? Машинаез атай ачиз колхозлы сётӥз ук. Котьма ке но, атае нош ик адями радэ пыриз... - Нош мон ке малпам вал... - машинаысьтыз нюшмыляк потонъяз нёжтӥз Перевозчиков. - Пыдессинъёс либразы. - Горд Павол улэп луысал ке, солэн пыдессинъёсыз либрасалзы. Нош асьмеос малэсь кышканы кулэ? Шумпотон со! Мынам атае ӟеч адями вал! Сое буре вайыса пуком. Ондрей пӧраськиз ни, дыр. Сокем зол шумпотӥ - сиён-юон дасяны но уг пӧрмытӥськы. - Мон но шумпотӥсько, анай, туж шумпотӥсько, - ымныраз кужмысь пальпотон тус суреданы тыршыса шуиз Дима. - Ӵындо, катьясько но пыро. Сыӵе шумпотӥ - машинае пырыны, сое азбарозь вуттыны ик ӟигары ӧвӧл ни. 19 Перевозчиков офисаз ӵукна вазьгес вуыны тырше. Тани туннэ но тямыс час ӧвӧл на - со ке интыяз ни. Егит ужбергатӥсь ӟеч щӧдӥз-валаз: макем вазь ужаны кутскиськод, сокем трос лэсьтыны вуиськод. Ӵукнаосы угось базаослэн, магазинъёслэн кузёоссы интыязы луо, нош соосын нуналмысь кусып возьытэк ӧвӧл. Городэ ваем вузъёсты киысь кие аслыд бадӟымгес табышен сётыны кулэ угось. Офисаз вазьгес вутскемез мукет ласянь но пайдаен берытскиз. Ужасьёсызлэн но кузёзылэсь бере кылемзы ӧз пот. Лыкто, ужало - тэк уд пукы ук. Таяз нуналэ Надя Смагина ӵукна ик Перевозчиков доры дыртӥз. Кияз ньыль бадӟымесь картон коробкаос кутӥз. Выль вузъёсты со котькугес ик озьы кивалтӥсез доры возьматыны нуллэ, со "образецъёсъя" ни быдэс партилы дун пукто. Коробкаосыз укыр бадӟымесь вал бере, ӧсэ йыгаськыны ӧз быгаты, кутонэз мырдэм но кызьы уллань зӥбиз - ӧс ачиз усьтӥськиз. Пырыны турттӥсь муртлэсь курадӟемзэ адӟыса, Дима юрттыны дыртӥз. Вань коробкаосты басьтонъяз бур киыз шуакгес нылмуртлэн гадь бордаз йӧтӥз. Нылмурт мугор зугырак луиз, пыдкутчанъёс ӧжыт гинэ выж вылэ ӧз лобе. - Секыт ук озьы, - ӵыжектыса вераз Дмитрий Сергеевич. - Пиосты но вайытыны луысал. - Кулэ дыръяз соосты шедьтод, пе. - Монэ ӧтёно вал. Со куспын Надя коробкаосты усьтылыны кутскиз, ужан висказ ик маде: - Белоруссиысь нылкышно сапегъёс ваизы. Кельшизы. Дун пуктоно вылэм. - Тодмо сюресъёс... Мынам нырысетӥ командировкае отчы вал. "Белвест" фирма, - тодаз ваиз Перевозчиков. - Кунгожсьӧръёслэсь бере уг кылё. - Ма, немецъёсын ӵош потто ук. Я, пыдад кутчаса возьматы ай. Надяез кыкетӥзэ куроно ӧз луы. Нылкышноослэн сям сыӵе уга: быдэс нуналъёсын но дӥсьёсты, пыдкутчанъёсты, чеберманъёсты мерталляны дасесь. Сыӵе ужлэсь соос чылкак уг жадё кадь. Нош пиосмуртъёс воксё мукетэсь: одӥгзэ, кыксэ мерталозы но, кӧтсы тыроз. Тани Надя но озьы верамез витьыса гинэ улэм, лэся, - ӝужыт пыдберо туфлизэ олокытӥ-мартӥ кылиз но аслыз тупамон сапегез кутчаз. Огдышемезъя синучкон доры дыртӥз но зӥрак берытскиз: вылӥе ошем синучконысь выль пыдкутчан чылкак уг адӟиськы. Дима нылмуртлэн веськрес мугорыз шоры долказ, Надяез нырысьсэ адӟем кадь луиз. - Чебе-эр! - пӧсьйыл вераз егит воргорон. - Нош мон мар шуисько?! Усто вузлы дун но йӧнгес луыны кулэ. - Таӵе чеберез понна мон номырме ӧй жалясал. - Котьмалэн аслаз дуныз луыны кулэ. Сотэк кызьы лыдъялод-чоталод? - бухгалтер ужез быдэсъясь нылмурт сьӧлыко-яратоно музъем вылэ васькыны уг вала. - Собере магазин но усьтоно вылэм. Соку табышмы уката люкаськысал. - Оксана кадь вузкарисен-а? - шоккетон макталгес юаз Дима. - Ӟечъёссэ шедьтом. Оскымонъёссэ. - Нош мон тон кадь ӟечсэ, оскымонзэ нокызьы уг шедьты, оскон-Надежда. - Олома но вералоды, - ӵыжектыса вераз Смагина. - Веран гинэ ӧвӧл, лэсьтысал но, дыр. Дӥсьтон уггес тырмы. - Фирмалэн кузёез дӥсьтӥсь луыны кулэ. - Озьы-а, ма? Соку тани мар верало: Москваысь театр гужем гастрольёсы лыктэмын. Ойдо ӵошен ветлом. - Кузё косэ бере, кытчы пырод? - огшап малпаськиз но вераз Надя. - А то улляны шедьтод. - Уг косӥськы - курисько. Соку кенешим, - лопырскыса ик шуиз Дима. - Нош та сапегъёсын кызьы? - кескич пальпотыса юаз нылмурт. - Йӧнгес дун пуктоно, дыр. - Мон верай ук: тынад пыдад вуылэмез понна мон номырме ӧй жалясал. Да тодэмед потэ ке, мынам сюлмы толон ӧжыт гинэ ӧз путы. - Сыӵе егитысен? Отӥяз Дима прокуратураысь вуэм гожтэт сярысь пыр-поч мадиз. - Тайзэ малпасько, мукетсэ. Кызьы, пӧй, куриказы меда? Нош ваньмыз юнме вылэм, - йылпумъяса ни вераз ужбергатӥсь. Нош Смагина чус кылзӥз, соглаш луэмзэ возьматыса, лэся, куддыр-куддыр йырыныз гинэ шонтылӥз. Бератаз ини сюлэмшугъяськонзэ шараяно кариськиз: - Чакласькыны кулэ. - Мон но озьы малпасько. Тани та сапегъёс, шуиськод, устоесь. Оло, Александр Геннадьевичлы ӵектоно? Со выт бичасьмы ялан котыртӥмы берга. Я коньдон солы кулэ, я мар. Меӵак верало: акыльтӥз ни. Но валасько: соин кусыпъёсты юнматоно. Мукет адямиосын но кусыпъёсты тупатыны кулэ вылэм. Но ужбергатон борды басьтӥськем мурт со борды ачиз ӧз кутскы. Тодӥз угось: Перевозчиковез соос асьсэос шедьтозы но бордаз ӝабырскозы. Ӝабырскем гинэ ӧвӧл, рос-прос зуркатозы, кужымзэс возьматозы. ...Нуназе котыр вал ни. Дима ӝӧк сьӧрысьтыз султӥз, назьыльскиз. Сиськоно, столовое ветлоно. Зарядка лэсьтэм мактал киоссэ шонаса кабинетэтӥз котырскиз. "Номыр вылез басьтэмын ӧвӧл, ваньмыз -Степановлэн, - ӝӧклэн, пуконъёслэн, кузь стенкалэн кузёзы сярысь малы ке тодаз ваиз Перевозчиков. - Нош малы вылез? Сиён уг куро. Дунзы тыремын. А то Николай Владимирович возьматскылӥз. Мебелез понна коньдон куре вал. Пӧлы пум солы! Шонер меӵкытӥ: Доронинэн вераськы..." Со вие ӧс вӧлак усьтӥськиз. Малпаськон дуннеяз выем муртлэн суй бордаз ӝужыт пельпумо егит пи олокытӥ-мартӥ ӝабырскиз. Нош мукетыз стенка сьӧры кожаз, ваньзэ чаклаз но кабинет кузёлэн ӝӧкез доры измиз. - Тӥ ма-ар? - кӧдэктыса юаз Перевозчиков. Нош пиос ымзэс уг усьяло, быдэс ымнырзы данъяськемзэс возьматэ: тӥ кадьёсын ми тӥни кызьы вераськиськом! Ӝӧк доры измем пи вырӟыны валаз ик. Вӧлак усьтэм ӧс доры бызьыса сямен мынӥз но шуиз: - Порядок! Пырелэ! Паллян пыд вылаз чутышак-чутышак лёгиськылыса, лапег но чиед мугоро воргорон пыриз. Перевозчиковез суйтӥз кырмыса возись пи шоры учкалтӥз но мылкыдтэкгес вераз: - Эшшо ке сӧсыртод. Лэзь. Кыкнады ик потэлэ. Секретарочкаез дорын витёды, - ӧс пытсаськем бере ини Перевозчиков шоры учкыны кужмыз тырмиз. - Егит, таза! Сыӵеосты яратӥськом. Юон ласянь сьӧраз уд ортчиськы, соиз но айбат, кызьы шуысал Камаль. Суйзэ посон вискытӥз Дима пырем мурт шоры эшшо огпол учкиз на. Кытыназ гинэ лулыз возиське меда? Таӵе пӧсь куазен но пиджакен ветлэ. Озьы но солы кезьыт кадь. Шымырскемын, губырскемын. Нош гыркйиськем синъёсыз, оло, быдэс мугорез сӥсъяло. - Ӟеч адямиослы ог-огенызы тодматсконо, - зарни пиньёс кабинетлэн кузёез шоры кезьытак чилектӥзы. - Перевозчиков Дмитрий Сергеевич... Удмурт-а, мар-а? Умой, умой. Удмуртъёс пӧлын но ужбергатӥсьёс мед будозы. Нош мон - Фитиль. Нимын-тулын вазиськонэз ми ум гажаське. Озьы но яралоз. Кыӵе-мар ни ужъёс? - Йӧллы но няньлы тырме, - огдышемезъя вазиз Перевозчиков. - Мон озьы ӧй шуысал, - Фитильлэн синъёсыз Дималэсь быдэс мугорзэ порто ни. - Та толэзе гинэ ньыль рефрижератор вузъёс ваид. Туала макаръя верано ке, ваньмыз - компьютерын, нош компьютермы - тани, - ӧтьымтэ куно векчи но кузь азьчиньыеныз йырыз шоры возьматӥз, собере ни веранзэ азьланьтӥз. - Йӧллы но няньлы, пе... Чурытаськиськод. Соингес ик тани вӧлдэтэд но вия кадь, - шампанской ыбыштэм бере куалдэм инты шоры чиньыеныз возьматӥз. - "Липетэд" но ӧвӧл. - Ма, Инмар уте кадь. - Инмар сяна но утисьёс луыны кулэ. Телохранитель медъяны кынарыд ӧвӧл-а? Приёмнойысьтыд апаёшкаедлы оскиськиськод? Ӟучъёс верамъя, проходной двор, кинлэн мылыз потэ, со ик пырыны быгатэ, - кабинет кузя чутышак лёгаське ӧтьымтэ куно. - Тӥ пӧлысь телохранитель медъяло но, одӥгаз чебер нуналэ со монэ мед кокыштоз- а? - Гажано егит эше, туж умойтэм вераськиськод. Ми ведь ужась мушъёсты яратӥськом, гажаськом но утиськом. Со понна ик милемлы тыро. - Озьыен, тӥ зур мушъёс ӧвӧл - утись мушъёс? - дӥсьтӥсьгес луиз ни Перевозчиков. - Юэмед ке но ӧвӧл, шонер вераськод, - Фитильлэсь кыскем коньы кадь мугорзэ серекъян зуркатӥз. - А то та ӝӧк сьӧрын ик Степанов пукиз. Милициысь, ФСБ-ысь кошкем муртъёсын ассэ котыртӥз. Соос но ӧз уте. Мекалскиз... - Гульымез мекалтӥз кадь... - Николай Владимировичез чылкак жалятэк ни шуиз Перевозчиков. - Таиз но шонер. Соин ик, гажано егит эше, юон ласянь сьӧраз эн ортчы. Уть астэ, ми но сюлмаськом. - Дунтэк ӧвӧл, дыр, ук. - Рынок шуон вакытэ сьӧросэ но дунтэк уг ветло. - Кӧня? - Пока вить процентэн буйгатском. Ми но адямиос ук. Тыныд катьяськыны кулэ. Нош бӧрысь ватсалом. - Сыӵе трос-а? Вытъёс ӝокато ук. - Тодӥськом, кызьы тон вытъёс тыриськод, - нош ик серектӥз Фитиль. - Александр Геннадьевичед котыртӥд гожеръя кадь. Пайдаё адями. Только вот интыяз кема возиськоз меда? Тӥни озьы, гажано егит эше, "Оскон" фирмаеныд Пончик кусып возёз. Ӵуказе лыктоз. Телефондэ но, мукетсэ но вералоз. Сяськаяськы, пушйы! - Собере али ик коньдон тыроно ни-а? - Буйгатскы, ми кыӵе ке но рэкетиръёс ӧвӧл. Ужаммы понна коньдон басьтӥськом. Туннэ нуналысен лыдъялод-чоталод ни. Пӧяськыны ке малпад, аслыд секыт йӧтоз. Сыӵе номеръёс милям ӝог шараясько. 20 Андреевъёслэн ланьырам корказы доры одӥгаз шундыё чебер нуналэ тӧдьыалэс-пурысь "Волга" дугдӥз. Отысь потэм йыг-йыг таза мугоро, пурысьтаны кутскем йырсиё воргорон ланьдэм корка шоры огшап учкыса сылӥз но капка доры вамыштӥз. Капка ӟиры ӟукырак вазиз, сисьмем корказь пулъёс лосырак каризы. Ярам коть, корка ӧс пӧсь куазен пытсамын вылымтэ, сотэк таиз но кыӵе ке куаразэ сётысал, дыр. Ӧс янак борды бур азьчиньыеныз кӧня ке пол кокыштэмез бере ни воргорон корка пыриз но гудыртӥз: - Кузёос доразы-а? Кышнопалась Насьта потӥз, кизэ айшетаз ӵушылонъяз шуиз: - Дорын, дорын. Кытчы бон ми пыром? Каллен ӟукыртӥськом, улэм кариськом. Ачид бон кин ай? Маке уг тодмаськы. - Ма, зэмзэ уд тодмаськы ни-а, Насьта апай? Андрей Петровичлэн витьтон арес тырмоназ кыӵе гинэ шулдыръяським вал. Кышнопалась ик Ондрей возьматӥськиз, дораз со алюминь бодыезтэк гинэ лёгаське. Солэн ымныраз пальпотон тусбуяськиз. - Ӵапак дыраз вуид. Нуназеяськом вал. Ӟеч малпаса лыктэмед. Ойдо ӝӧк сьӧры, - кузпалызлы вазиськыса ни ватсаз: - Ма, Степанэз, Назаровез, уд тодмаськы-а? Бригадаям вал. Нош таре - начальник, цехлэн йырыз. - Ӟечлэсь но ӟеч малпаса лыктӥ. Ордер ваи тани. Туннэ ик выль квартираяды пырыны быгатӥськоды ни, - лыктон мугзэ соку ик шараяны дыртӥз Назаров. - Озьы-а, ма? - Лангыр Насьталэн шумпотэменыз анлыэз ошиськиз. - Сыӵе чаляк лэсьтондылы чик уг оскиськы вал, - Ондрей но паймиз, собере отын ик аслыз ачиз валэктыны тыршиз: - Ма, завод ук со. Не шутка. - Туннэ нуналысен, дано сталевармы Андрей Петрович, тӥ - кык комнатаен квартиралэн кузёез. Кыкетӥ этаж, нош коркаез - укмыс этажъем. Лифтэн ворттылоды. Жуг-жагдэс, кылем-мылемъёстэс куштоно ке, пожалста, - мусоропровод. Мар ай мон ваньзэ мадьыны курадӟисько? Машина - ульчаын, пуксим - вырӟим. Ас синмыныды адӟоды. - Нош сиён? Сиён вылэ вуыса вылысь одӥг пуньы но уд си шат? Собере ӟеч иворед понна пичияк ӟамыртыны но сьӧлык ӧй луысал, - ӵектӥз Ондрей. - Нуназеяй ни. - Али ик мыном шуиськод но... писэез шедьтоно вал. Выль патере нырысь со пырыны кулэ. Ӵок ни-а, мар-а... Пересьёс вожзэс медам поттэ. Вӧй, нянь нуом ик, - кежектыса бызьылыны кутскиз Насьта. Я, кызьы но озьы вырӟизы. Машинаын ни Насьта кӧтыз тырымон лангыртӥз. Атайзэ но, Леназэ но, эмеспизэ но, Алёшиксэ но тодаз ваиз. Тодыны быгатысалзы ке, пе, кыӵе шумпотысалзы! Собере вань веранъёссэ йылпумъяй ни шуыса, лэся, киоссэ ал вылаз лӧж-лӧж тыриз но бурдъяськыса ик шуиз: - Быдэс гумырам казённой патерын улӥсьёслы вожъяськи. Табере ми но пӧртэмесь ӧвӧл. Ракат улом ай. Инмар тазалык гинэ мед сётоз. - Со вие ик, йыраз мукет малпан чилектыса, Насьта азьпал сиденьеын пукись Назаровлэн пельпумаз йӧтскемзэ валатэк кылиз. - Нош со коркаенымы мар луоз? Талалозы-а? - Кин талалоз? Мар каремды потэ, сое ик лэсьтэ. Моӵты ке сузиз, дача чотын возе. Но укыр кышкыт ни кадь со. Тани-тани куашкалоз. - Озьыез но озьы угось, - нош ик буйгаз пересь кышномурт, кылем сюрессэс чал-чал мынӥз ни. Выль квартирае вуэмзы бере Насьта нош ик ӧръяськиз. Пыремзы бере пыдкуксэ кылиз, воргоронъёсты но кылиськытӥз. Собере няньзэ но вӧйзэ понон инты утчаны кутскиз. Одӥгаз комнатае донгиське, мукетаз бызе - номыр тупамонзэ уг шедьты. Ачиз ялан ассэ пыкылэ: "Вот макня йыр ке макня йыр. Пукон коть ваёно вылэм ук". Ӧжытак зӥбломемез бере ини кухняысь укно янак вылэ ӵушкон вӧлдӥз но отчы одӥг колды нянь но вӧй интыяз. Бӧрысь гинэ патерен тодматскон ужзэ азьланьтӥз. - Адӟы вал, Ондрей, кыӵе вольыт, чебер паркетсы! Шкафъёс но басьтонэз ӧвӧл - кык тёмной комнатаосыз. Вӧлдэтсы - тӧдь-тӧдь, - синтэм кузпалызлы ваньзэ вераны турттэ Насьта. - Шпалерез бон, шпалерез! Таиз зало шуонзы-а? Бадӟы-ым. Коридорез но кузь. Комнатаосаз коридорысь пыроно. Таӵезэ патерез изолированной шуо кадь. Кухняез но бадӟым. Газ плитаез сылэ ни. Сьӧросэз, ванноез нимаз-нимаз. Нош лоджиез туж кузь, балкон кадь пичи ӧвӧл. Пияла рамаос пуктылӥд ке, эшшо одӥг комната кылдоз, - мебельтэм но мартэм комнатаосын кышномуртлэн шумпотэм куараез вӧл-вӧл шуккиськыса кошке. Туж адӟысал вылэм но, Ондрейлэсь синъёссэ уд усьты ни. Пересь воргорон уйвӧтъёсаз гинэ буёло-буёло дуннее вуылэ. Собере шарак сайка но синъёссэ киосыныз зыра - озьы соосты усьтыны тырше кадь. Номыр уг пӧрмы. Тае валаса, пересь мурт шобретэз улэ ватске - нош ик буёло-буёло дуннее вуэмез потэ. Выль квартираын буёл зын тӧлӟымтэ на. Ондрей сое гучыкен-гучыкен юэ но пумен жӧломе. Али но солэн шобрет улэ ватскемез потэ. Та выль патерзэ соку одно буёло адӟоз кадь. Озьы огшап сылэмез бере пересь воргорон, алюминь бодызэ азьпалаз урдыса, комнатаослэсь быдӟалазэс мертаны кутскиз. Борддорысен борддорозь вамышъя, собере укно доры мынэ но мукет борддор пала конгыля, маке ас понназ чота, тусыз-буйыз пумен сайкытоме. Мукетаз но комнатаын озьы ик дауртэ. Бӧрысь ини Назаровлы вазе: - Степан, та бадӟым кадь ук. - Ма, воксё ик дворец ӧвӧл, но тӥледлы, малпасько, окмоз, - пальпотыса вера цехлэн начальникез. - Кельше ке, ордере гожтӥськоно. Усьтонъёсты асьтэлы кельто ни. Мыным уж дуре вутсконо на. Нош котырдэс вайыны юрттом... Шумпотонзылэн пумыз но, йылыз но ӧй вал. Нылызлэсь пизэ ӝыт пумитакуз, Лангыр Насьта ассэ мырдэм но кызьы вормыны быгатӥз, номыре ӧз шарая. Корка пыремез бере Дима огдышемезъя шуиз: - Ну и уралмиськиз. Анай, ческыт сиён дасяд, дыр. - Ческытлэсь но ческыт, - пальпотыса вазиз Насьта. Дима ӧс дор висъетысь залое дыртӥз но черектэмзэ ик ӧз вала: - Ё-моё, татын кыӵе ке праздник! Салатъёс, яратоно шекерае! Водка но басьтӥллям. Анай, атай, вунэтӥды шат, вордскем нуналэ арня ортчыса гинэ ай. Соку ик пусъём, шуисько вал. Кызь ньыль арес тырмоз ведь! - Ӟеч муг вань ке, кызьы уд пусйы?! - арлыдо кышномуртлэн кескич пальпотонэз ӧз сылмы на. Со вакыт кышнопалась атаез потӥз. Малпалод: талэн синъёсыз адӟыны кутскиллям. Ымдурыз пельдорозяз вуэмын. Бур азьчиньыяз усьтонъёсын кульчо бырттэм но соосты, э, шона ук, э, шона. Ӝӧк сьӧры пуксиз но Насьтаен Митреез ӧтиз: - Тани таосты пусъём! - Мае? - паймиз нылызлэн пиез. - Выль патере выжонмес. Лангыр Насьталы соку гинэ ымзэ усьтыны черод вуиз. Патерзы сярысь, оло, ӝыны час ӵоже дугдылытэк мадиз. Номырзэ ӧз кельты. - Вунэтӥллямтэ ведь ужамез! - йылпумъяса кадь бӧрысь шуиз Ондрей. - Нош табере сиём-юом!.. 21 Котырес лыдпус ӧвӧл ке но, Дмитрий Сергеевич Перевозчиков вордскем нуналзэ рос- прос пусъёно кариськиз. Ужысьтыз эшъёсыныз город сьӧры кык машинаен шашлык сиыны потазы. Дима пересьёссэ но ӧте вал, нош соос выль патерзылэсь ӧз ӵыдэ, лэся. - Ми дорын гинэ дасяськом ни, - шуизы. - Та патермылы дышыса ӧм вуттэ на. Нош "Гражданпроект" институтлэн директорез Кузьма Васильевич Доронин тылскем дорын горд тушсэ сэзъяса эктӥз. Шашлык но ческыт кошкиз, юон но тырмыт вал. Кӧня ке юэмзы бере ни вордскем нуналзэ пусйись мурт Надя Смагина доры дыртӥз, нылмуртлы гинэ кылымон пӧсьйыл шуиз: - Осконэ тон мынам, Надеждае. Озьы-а? - Бухгалтерын возиськод бере, оскиськод ик, дыр, - мыньпотыса вазиз нылмурт. - Ойдо бен соку огшаплы ыштытскылом. Таос огзы но уз шӧдэлэ, - тылскем дурын кырӟаса пукисьёс шоры возьматыса шуиз Дима. Зэм но, веськрес кызьпуос доры кунулскыса вамышъясь пиен ныл пала одӥгез но ӧз берытске. Перевозчиков тулкымъяськись мылкыдзэ кисьтоно кожаз: - Тодэмед потэ ке, школаын дышетскон аръёсамы ик мон шорад учкылӥ. Чебер, тузӥ! Нош дӥсьтон ӧз тырмы, - Новосибирскысь Любаез, Степановлэсь вузкарисьсэ тодаз вайыса, егит пи гуньдӥз, ӵыжектӥз, веранзэ азьланьтыны ӧз быгаты ни. - Юэм бере коть нош ма вераны луэ, - пумитаз меӵакгес вазиз Надя. - Ма, воксё ик озьы ӧвӧл. Сюлэмез уд вормы ук. Яратӥсько, вань сюлмысьтым яратӥсько! Шулдыръяськонмы но таин гинэ уз быр. Мукетыз, паймытӥсез вань али. Егит ужбергатӥсь аслэсьтыз кемалась малпанзэ быдэстоно кариськиз. Шулдырмем кунооссэ Дима машинаосы пуксьытӥз но анаеныз атаезлэн выль корказы доры вуттӥз. Татын но кема ӧз ӝегалэ. Изьыны дасяськем Насьтаен Ондреез азьпал машинае пуктӥзы. - Уй куазен мар ворттылэм луоз? Ӝӧк тыр пыжиськемъёс, пӧраськемъёс дасяй, - нылызлэн пиезлэн кужмысь сямен кыре поттэмысьтыз Лангыр Насьта ялан буйганы уг вала на. Бӧрысь ни, уй городэтӥ кудпала мынэмзэс валаса, пересь кышномурт куалектэмгес тусын юаз: - Ма, куштӥськем коркамы мынӥськом-а? Пие, вордскем нуналдэ отын пусъёд, оло? - Адӟод, анай, адӟод, - буйгатыны тыршиз Дима. Пӧямтэ. Адӟымонэз трос гинэ вал. Ас ульчаязы кожизы гинэ - ӝужыт ярбамысь горд- лыз-вож тыл кизилиос инбаме ыбыштӥськылыны кутскизы. Котырак нуназе куазен кадь югыт луиз. - Ма... ыбыло кадь ук, - кежектыса ымзэ усьтӥз анаймурт. - Ведра но ӧвӧл. Сояз патерын. Бакын коть ву кылиз кадь. Дыртоно. Пень вылэ кельтозы... - Сыл ай, сыл, анай. Асьмеды озьы пумитало. Вордскем нуналме, выль патере выжеммес данъяса! - бурдъяськыса валэктӥз Дима. - Озьы-а, ма... - мукет номыр вераны ӧз быгаты ни песянай. ...Зол дасяськиллям та вырйылын! Кузь ӝӧк вылын тыраз олокыӵе но сиён-юонъёс пуктылэмын. "Гражданпроектлэн" директорез ӟечкыланъёс верамез возьмаса ӧз ул - коньяк бутылкаез усьтӥз, азьысьтыз сюмыке тыраз лэзиз но оп! шуытозь бушатӥз, собере ни вӧен, чорыг мызен бутерброд доры сузьтӥськиз. - Таизэ ми яратӥсько-ом! - ымтыросказ сиёнэн гондыр музэн бурсӥз со. Дима анайзэ но атайзэ ӝӧк доры вуттӥз, фейерверк ортчытонын но сиён-юон дасянын бергась пиослэн кузёзы, кожалод, сое гинэ витем, ужбергатӥсь доры лыктӥз, аракы зынэн шокчыса, гольтрес юаз: - Шеф, ваньмыз чин-чином! Одӥг пол ыбыштом на-а? Тӥляд верамды - закон. - Огшап возьмалэ на. Эшшо ӟамыртыны вутскем Доронин доразы танк сямен вуиз. Электролампочкаослэн югытазы адӟиське: сотэк но ӵыжыт бамыз бурлат кадь луэмын. Горд йырсиё адямиослэн озьы угось: вань юэмзы ымныразы потэ. Сюмыксэ та рад но вунэтымтэ. Егит ужбергатӥсьлэн пельпумаз чабкем кариз но гудыртӥз: - Вот таӵезэ адӟем ӧй вал на! Фейерверк! Нюлэс кушысен тост верай ке но, али нош ик уг чидаськы. Тазалыкты медло, Дмитрий Сергеевич! Тӥ кадь адямиосын артэ милемлы но шунытгес. Ӧз сьӧлталэ ке, вылӥе тубоды. Шуныт гинэ ӧвӧл, пӧсь но йӧтӥз. Ракетаос ыбыштӥськылӥзы, ӟечкылан бӧрсьы ӟечкылан чузъяськиз, нош соосты, валамон ни, курытэныз гылатӥзы. Дима возиськиз. Зэм, тыр сюмыксэ ӝутканы ӧз вунэтылы, ӟеч кылъёс понна тау карылӥз, нош юонзэ ымдураз гинэ йӧттылӥз. Солы туннэ сотэк но усто вал. Ӵемысь Надя шоры учкылӥз. Нылмурт артэ сылэ, со но одӥг сюмыксэ огпӧртэм ӝуткалля. - Мон тонэ, Надюша, эшшо паймыто ай, - нылмуртлы гинэ кылӥськымон вераз Перевозчиков. Зӧк кисыё муртъёслэсь шулдыръяськонзэс, ракета ыбылэмез адӟыны лыктэмъёс пӧлысь одӥгез егит пи со вискын омырез зуркатымон черектӥз: - Пожа-ар! - Коркае! - шулӟектыса кеськиз Лангыр Насьта. Куноос но, учкисьёс но ярбам уллане питыразы. Одӥгез шонаськись мурт палдэ - со борды мукетъёсыз канжасько но отчы-татчы чукинско. Выльысь султо, бызё. Нош корка ӝуа но ӝуа, тыл быдэс липетсэ басьтӥз ни. Тылпу кысӥсьёстэк сое табере нокызьы уд вормы. - Артысь коркаосы гинэ медаз тэтчы! Соку бырид! - кытысь ке черектэм кылӥськиз. - Мурӝолэ картош кылиз вал. Дӥськутэз но ваньзэ нуыса ӧм вуттэ, - чигиськыса бӧрдэ Насьта. Ярам коть, ас юртъеръёссэс фейерверклэсь утись муртъёс ӝог люкаськизы но тыллы бускель коркаосы выжыны ӧз сётэ. - Пӧ-ӧсь! - трос гинэ ӟамыртыны вутскем Ондрей ӝуась юртъерез шоры кизэ мычиз но... пальпотӥз. Малпалод, со озьы мартен гурез дорын сылэ. - Мар карод на? Ас киыным лэсьтэмын вал... И-э-эх!.. Нош фейерверк ортчытӥсьёслэн кузёзы, вамышлы но кыльытэк, весь Перевозчиков сьӧры бызьылэ. Кудӟемез олокытӥ-мартӥ тӧлӟем, куараез нискетӥсь пунылэн кадь луэмын: - Мон янгыш ӧвӧл, шеф! Ваньмыз чин-чином ортче вал кадь. Курозы я турынзы учырам, дыр. Сотэк сыӵе ӝог ӧй гомӟысал. Ракета музъем вылэ усе ке но, кужмыз ӧвӧл ни, соку ик тёпак кысэ. Дима киыныз гинэ шонтӥз. Бускель коркаосты тыллэсь утись муртъёслы юрттӥське. Костюмез но, тӧдьы дэремез но быдэсак суэн наштаськемын ни. Ярам, тылпуэз кысӥсьёс но ӝоген вуизы. Куинь машинаосысь огӵош ву пызъемзылэн пайдаез сэрыт шӧдӥськиз - тылпу эшшо огшап лопыръяськиз но гуньдӥз. Пожарнойёс ӵындӥсь коръёсты отчы-татчы кысказы но - ужзы быриз. - Табере мар?.. - нылызлэн пиез доры бӧрдыса вуиз Лангыр Насьта. - Коркатэк кылим ук, коркатэк! - Улон ачиз возьматоз, - суаськем кымыссэ ӵушылонъяз вазиз Дима. - Нош али ӝӧкез утялтэ но - доре. Машина - тӥни. Нош мон татчы кылё на. Лангыр Насьта ӧжытак палэнынгес сылӥсь Надя шоры учкиз, кужмысьгес мыньпотэм кариз, кузпалзэ выльысь кунултӥз но ӝожалэс шуиз: - Ойдо, Ондрей, вырӟом ни. Асьмелы кошкыны дыр вуиз. Коркамы пень луиз, табере пимес но талало ни кадь... Али гинэ тём-тём пеймыт вал кадь. Со пеймытын бадӟым тылпулэн шимес кылъёсыз кузёяськизы, черекъям-бӧрдэм куараос пельёсты кесьылӥзы. Но тӥни олокытӥ-мартӥ югдомыны вутскем, пумен шунды но возьматскоз. Тулыс ук, тулыс - уй шобрет улос вадьсы возъяськыны ик уг вуылы кадь. Дима азьысьтыз эгырӟем сэрегпумез ӵыжиз, соиз артысь вукыреме питыраз но шорияк тӥялскиз - котырак эгыр пазьгиськиз. Егит пи быдэс мугорыныз шӧдӥз: татчы - тылпу бервылэ - одӥгназ ӧз кыльы, сое витё. Кинлэсь возьмамзэ но валаз, нош берытскыны, матаз вамыштыны кужмыз ӧз тырмы. Вордскем нуналэз тазьы йылпумъяськемен, тылпу пуромемен солы туж возьыт. Фейерверк шуонэн но, моторъяськон-чеберъяськонэн но малы сокем сьӧраз ортчоно вал? Быдэ вуэмзэ, зӧк кисыосын одӥг радэ пыремзэ возьматэмез потӥз уго. Нош кинлы но малы ваньмыз со кулэ? Чеберез сотэк но адӟо, узырмемез гордо-вожо-лызо ракетаостэк но валало- шӧдо. Я, мар луиз - луиз. Номыре уд берыкты ни. Атаез, анаез фейерверк ортчытон ӝӧк сьӧрысен ӟеч кылъёссэс ӧз вералэ, тылпу дыръя но ӧз пыкылэ, ӧз каргалэ, мыжыкъёсынызы вылаз ӧз урдске. Нош быгатысалзы ук. Соос уго пичи дыръяз но шуылӥзы: небыт интыяд чабкы но бӧрдыны эн сёт вал. Пересьёс таяз учыре но малпазы, вылды: азьланяз визьмаськоз ай. Озьыез но озьы, дыр. - Нош табере мар? - Перевозчиков мышкысьтыз юамез кылӥз. Со зуркак берытскиз но йырзэ ӝутъятэк вазиз: - Коттедж ӝутом, нылпи будэтом, ваньмыз радызъя луоз... - Кинэн? - Валамон ни, тонэн, бадӟым осконэ мынам, - тышкам мурт сямен сылӥсь егит пи соку гинэ Надяен ваче син учкыны кужым шедьтӥз. - Ойдо вамыштӥм. Салкым на. Кӧня ке гинэ дыр ортчоз - шунды быдэс улосэз сайкатоз-шунтоз. Пияш суаськем пиджаксэ курккалтэм кариз но Надялэн пельпумъёсыз вылэ интыяз, собере ульча пумын адскись нюлэс пала валтӥз. - Гембернюке ошмес вуэн мисьтӥськыны-а? - юатэк ӧз чида Надежда. - Адӟод ай, ӧжытак чида, мусое мынам! - зӥбытак вераз Дима. Тазьы ӵошен соос кыдёке-кыдёке мынысалзы, дыр. Яратӥсь адямиослэн кужымзы мертантэм ук. Соосты юзмыт тӧл но, кезьыт куазь но уг кышкаты: яратӥсь адямиослэн сюлэмзы шуныт. Ялан артэ, ялан азьлань! Егит пи ас яратонзэ зӧк кыз доры вуттӥз. Солэн выжыяз туж бадӟым кузьыли муӵ адӟиське. Нюлэс но, кузьылиос но сайкаллямтэ на. Кытысь ке палэнысь, Гембернюк палась, уӵылэн эшъёссэ дораз чортыса кырӟамез гинэ котыр улосэ чузъяське. - Музъем шар вӧзын... осконэ мынам - Надеждае... сюлэмдэ но кидэ курисько. Бызь мыным. Гажасько... яратӥсько тонэ, - могаса-дугдылыса вераз Дима. - Маке уг валаськы, - егит пилэн пиджакез улын нылмурт пельпумъёс тумошо ӝуткаськизы. - Музъем шар шуиськод... - Ваньзэ валэкто, мусокае! - Дима нылмуртлэсь кизэ кутӥз. - Тодад ваиськод на-а география урок азьын перемена дыръя глобусэз пилемме? Юри ӧй. Ӝӧкез мырӟытыны шедьтӥ но, со отысь пештӥз. - Витетӥ-а, куатетӥ-а классысен кадь вал... - Куатетӥын. Географичка лякыны косӥз. Атаен ӵош курадӟим, нош пайдаез ӧйлась. Выльзэ басьтӥм но школае нуим. Нош соиз, пилиськемез, мыным кылиз. Кӧня кыл кылӥськиз. Школаын но, дорын но. Воже потӥз. Син азям медам ни лошъяськы шуыса, нюлэскы нуи но сэрпалтыса кельтӥ. Со ке кузьыли муӵ вӧзы кемдэм. Кузьылиос глобусэз мултэс кариллямтэ. Уд оскы: пилиськем музъем шар муӵ пушкын ни. Сюлмо кузьылиос утё сое. - Шуныт, дыр, солы отын, - лачмытак шуиз Надя. - Вожпотон ортче вылэм, сӥя... Новосибирскын дышетскон аръёсам но каникулъёссы дыръя пыдъёсы асьсэос татчы кыскылӥзы. Мон вераськи соин - музъем шареным. Ватосэ сярысь табере ваньзэ тодӥд. Быдэс Музъем азьын кылдэ сётӥськод-а, пыраклы-пыраклы кузпал луод шуыса? - Пыраклы-пыраклы, - куара шуккиськем музэн, нылмуртлэн кылъёсыз чузъяськизы. Та вераськонэз нокин мукетыз ӧз кыл. Кык егит адямиос, кык сюлэмъёс гинэ. Кыӵыртӥсь коӵо но ӧз учыра. Я, ӵок. Куинетӥез но, ньылетӥез но татын мултэс. 1 Римма Игнатьева Сьӧлыклэн емышез повесть Манилы ӝоген кызь тямыс арес тырмоз, нош вордскем нуналзэ со огпол но рос-прос ӧз пусйы на. Ма, нылпи юртын кинэ ке нимысьтыз висъялозы шат? Отын уго ваньмыз огъя: шудонъёс но, дӥськут но, валес но, сиён-юон но. Одӥг толэзе вордскемъёслэсь "именниксэс" но ӵош пусйылӥзы, солы гинэ сӥзем шуныт кылъёс нокин ӧз вералля. Нош нылаш котьмалэсь золгес нуныямзэс, вешамзэс, яратэмзэс витьылӥз... Тани табере сое но ярато. Озьы шуиз кыкетӥзэ пумиськыкузы сьӧд сутэр синмо, чиганлэн выллем йырсиё, ӝужыт но веськрес мугоро Слава. Мани соку ӵош ужась эшеныз паркетӥ юмша вал. Вить аресъем Таняез но соосын ӵош. Шутэтскон нуналъёсы садик уг ужа уго - нылзэ дораз огназэ уд кельты. Матрослэн выллем сюрсо майкаен, гитараен пиез Мани кыдёкысен синйылтӥз: "Тодмалоз на меда?" Славаен соос куартолэзе татысен ик тодматскизы. Со дырысен быдэс гужем ӧз адскылэ. Нош Мани сое ялан малпалляз, кыллы бырем пи кӧня ке пол уйвӧтъёсаз но лыктылӥз. Та парке Мани котькуд шутэтскон нуналаз ветлӥз. Выльысь пумиськонзылы оскыса. Нош синмаськоно муртэз олокытчы чиптэм-чатэм ышиз... Манилэн сюлмыз гадьысьтыз потымон жугиськыны кутскиз. - Надя, тӥни со пи! - эшезлэн суй бордаз юн кырмиськиз егит нылкышно. - Кудӥз? - котыр утчаськыны шӧтаз Надя. Со уго Славаез ӧз адӟылы на. - Ма, тӥни ук, самой ӝужытэз но самой чеберез, - вить оло куать пиос пӧлысь одӥгез шоры возьматӥз Мани. Туннэ Слава нылкышнолы уката ӝужытгес кадь йӧтӥз. - Гитараенэз-а, мар-а? - паймиз Надя. - Ма, соид шырмачлы укша ук! Манилэн вожез потӥз: - Шырмач, пе! Тодэмед ке потэ, со - артист! - Артист погорелого театра, - серектӥз соиз. - Нош мон, пельме урмытымон зулемысьтыд, со зэмзэ йӧно пиосмурт кожай вал. Уг валаськы, малы тыныд сыӵе зырымесьёс кельшо? Ведь тыныд кызь арес ӧвӧл ни, - быдэ вуымтэослэн выллем выросъёссэ синйылтыса, лэся, Надялэн мылкыдыз усиз. Эшез уго сое весь оскытъяз, туж йӧно пияшен, пе, тодматски. Нош учконо ке, чик озьы вылымтэ. Шонер верало: кинлы - мар, куреглы - кеньыр. Озьы ке но, эшезлэсь бырйиськыны быгатымтэзэ Надя пусйытэк ӧз кельты: - Кут нырыныд тузонэз пурӟытэмысь дугдоно ни вылэм, Мани. Кӧняеныз пинал пиосын тодматскылӥд - аслыд карт но, нылыдлы бубы но ӧд шедьты на. Таизлэсь но маке умойзэ витёнэз ӧвӧл. Бер ӧвӧл на дыръя, ойдо сюрес вылысьтызы палэнском. Мани эшезлэсь суйзэ лэзиз. Надя шоры паймыса уӵертӥз: мар озьы зуле? Мани та пумиськонэз быдэс гужем возьмаз, нош со пегӟыны дэмла. Уг яра ке, мед кошкоз, Мани сое кутыса уг возьы. Куатаськыса Надя кужен сюрес вылэ кожиз, нош Мани нылыныз пырак пиос пумитэ вамыштз. - Слава, тӥ монэ уд тодмаське ни-а? - кыӵе ке валантэм кылын кырӟанэз нёръясь пиосын ваче ымныр вуыса вазиз нылкышно. Гитараен пи дугдӥз. Мани шоры со тодманы тыршыса сямен учкиз, собере - нылыз шоры. - Ю-у-ля-а?! - нёжтӥз со. Пиосмурт шокчыку, Мани доры аракыен, тамак зынэн сураськем омыр вуиз. Но та кӧш зынэз кышномурт ӧз ик шӧды кадь: - Юля ӧвӧл - Маша мон. Оло, тодӥськоды на Нырысетӥ май нуналэ кафеын, черодын сылыкумы, тодматским. - А-а, Машенька-а! Тодмай, ма, кызьы ум тодма? Капитально! - Маниез ӟыгыртонъяз шуиз егит пи. - Ойдо, машенька, пумиськеммес нош ик кафеын пусъём. Только... марым... Сур басьтыны уксёед сюроз-а? Видишь ли, ми пиосын, кисыосысьтымы вань шильтыртӥсьсэ гинэ ӧвӧл, жингыртӥсьсэ но сузямы ни. Капитально! Нош юэм потэ на. Сӥзьыллэн нырысетӥ нуналъёсыз ке но, куазь июле кадь, капитально пӧсь, о-о-а? - Маниез со гужем кафе пала валтӥз. Таня но соос сьӧры вамыштӥз. - Нош таиз тынад сузэред-а, Машенька? - дугдӥз Слава. - Бен со мынам нылы ук, вунэтӥды шат? - абдраз Мани. - А-а! - йыр пыдсаз чабкемъяськиз Слава. - Ну, капитально! Тасенька ук та! - Мон Тасенька ӧвӧл! - Танялэн кудӟем агайлы вожез потӥз. Нош мумиз со шоры лек вазиз: - Таня! Кызьы арлыдоосын вераськиськод?! - А-а, Танюша, вождэ эн вай. Капитально, озьы-а? Мон тупатско, - Слава, гитаразэ Манилы сётыса, нылаш азе пыдесъяськиз. - Мон пичи пиналъёсты туж яратӥсько. - Выльысь шонерскыкуз, кудӟем пиосмурт шонскиз. Мани сое ӧй кутысал ке, оло, пограсал но. - Капитально, йыр пороме, тынад чебередлэсь со, Машенька. Яралоз-а, мон тонэ ӟыгыртӥ ке? Пиосмурт нылкышнолэн пельпум вылаз зӥбиськиз. Манилы вамышъяны шуггес луиз, нош пиосмуртлэсь суйёссэ ӧз палэнты. Воргорон киос солэсь зӧкомыны ӧдъям мугорзэ кемалась ӧз ӟыгыръялэ ни. Огназ улӥсь егит нылкышно шоры жальмасьёсыз бен ӧжыт ӧй вал, нош Мани кышнояськем воргоронъёсты бордаз йӧтскылыны ӧз лэзьылы: кузпалъёссы тодӥзы ке, йырсидэ лӧдозы. Огпол янгышаменыз но тырмоз. Нош Слава нырысь пумиськыкузы ик вераз, со огназ шуыса. Кӧня ке толэзь куспын семья кылдытыса ӧз вутты, дыр... * * * - Та патер аслад-а? - нырысетӥ этажысь одӥг висъетэн, пичигес пӧраськонниен улонтӥе пырыса, воргоронлэн йырысьтыз сурымез ӧжытак тӧлӟиз, лэся. Кроссовкиоссэ пыронние кыльыса, со Мани сьӧры пӧраськонни пала вамыштӥз. - Ма, тон миллионерша вылэмед ук! Капита-ально! - Слава шултыса лэзиз. "Кыӵе миллионерша? Вылам дӥсяны, та сарафанэ сяна, рос-прос дӥськутэ но ӧвӧл. Куддыръя коньдонэ нянь басьтыны но уг луы", - малпаз Мани. Солэн тодаз лыктӥз, кызьы толэзь талэсь азьло, одӥг пыры но няньзы ӧвӧл дыръя, нылзэ кемагес кӧлыны косӥз: "Изьыку сием уг поты". Нылыз йырзэ ӝутылӥз ик но берен синъёссэ кыниз. - Мон, меми, туж кема изё, ява. - Кӧня ке озьы кӧлэмъяськыса кыллемез бере со валесаз пуксиз но мӧйы мурт сямен шуиз: - Тыныд уждундэ сётъясалзы ке, мон быдэс сукыри нянез огкутскемен сиысал, дыр. Нош тон?.. Манилэн, со учырез тодаз вайыса, нош ик синкылиосыз быльыразы. Ачиз со, мумы- бубытэк, нылпи юртын будӥз ке но, сиськытэк изьыны ноку ӧз выдылы. Нош нылзэ тӥни, сьӧлыко лулэз, эсьма, нянен гинэ но кӧтыз тырымон сюдыны уг быгаты. Уждунзэс олокӧня толэзьлы беромыса сёто. Нылыз понна пособие шуон нергезс но аръёсын ӝегато. Валля ар понна алигес сиён-юонэн сётӥзы. Мани пызь, сакыр но макарон басьтӥз. Кӧняез ке кылиз на - соин туннэ кунозэ утялтыны быгатоз. Нош ӵуказезэ - Инмар возьматоз. Заводзы тыро-пыдо ужаны ӧдъяз ке, уждунзэс, оло, дыраз сётъяны кутскозы. Соку нылпи пособие чотын дуно дунын сиён-юон октэмысь дугдоз, заводэ ужаны пыремез бере нырысь аръёсаз кадь ик номырлы ёрмытэк улозы. Зэм, Манилы соку но маке уг тырмы вал. Со "маке" - яратон. Матысь адямиосызлэн яратэмзы. Аслэсьтыз ог вить ареслы пиналгес муртлы бызем Мила акаез сяна, солэн нокин матысь ӵыжы-выжыез ӧвӧл. Со но кыдёкын. Нош Таня вордӥськем бере акаеныз ӧз ик пумиськылэ ни. Сузэрезлэсь сьӧлыкамзэ тодыса, Мила Манилы туж лек гожтэт лэзиз: дорамы сюрестэ вунэты, пе... Мани табере вала: кыӵе кышномурт шумпотоз аслаз картэзлэсь сузэреныз сьӧлыкамзэ тодӥз ке? Угось Таня нылызлэн бубиз - Мила акаезлэн юыны но мурт кышноосын юмшаны яратӥсь картэз. Озьыен, Манилэн кырсиез. Улонын сыӵеез но луэ вылэм. Тодӥз шат соку нылмурт, пиосмуртъёс пӧлын трос алдаськисьёс шедьыло шуыса? Кырсиез уго егит нылэз оскытӥз, акадэ, пе, ноку ӧй яратылы, мынэсьтым секытаменыз гинэ соин кышнояськи. "Тон мынам зэмос яратонэ!" - пӧсь шокалляз со Манилэн пеляз кеносысь валесын я гид сигысь куасьмем турын пӧлын погылляськылыкузы. Нош таизлэсь секытэн луэмзэ тодӥз но вань сьӧлыксэс Мани вылэ погыльтӥз. Ярам ай, заводысь эшъёсыз юмоке сюрем нылмуртэ ӧз аналтэ. Мумы-бубытэк будэм но карттэк нуны вордыны дасяськись егит кышномуртлы одӥг висъетэн улонни висъязы. Таиз пумысен вожъяськисьёс-лекъяськисьёс но сюризы, озьы ке но, уноезгес шумпотӥзы кадь - Манилы озьы йӧтӥз. Уката ик шумпоттӥз "Удмурт улос" газетлэн редакцияз ужась нылкышно журналист. Семья ужпумъёслы сӥзем бамез дасякуз, со огпол Манилэн огъяулоннияз лыктэм. Со сярысь газетэ гожтыса, нылмуртлэн кивалтӥсьёсызлы вазиськем: катъя, пе, сирота муртлы одно нимаз улонни висъяно. Вылаз ик, мумы-бубытэк будэм нылмурт нылпи вайыны дасяське. Тӥни озьы Мани татчы - та патераз - вуиз... * * * - Мыным тон дорын капитально яраз. Мукетъят лыктӥ ке, валесад лэзёд-а? - ӵуказеяз ӵукна ӧс дорысен Маниен но солэн нылыныз люкиськыкуз мынектӥз Слава. - Милем тонтэк но номыр сиыны! - макмырен курадӟись воргорон бордысь кӧш зын лыктэмен, вылды, Таня ымнырзэ кисыртӥз, нырзэ киыныз ӵоктаз. - Вот козявка! Капитально! - паймиз пиосмурт. Нош Мани, нылзэ чабкыса, пыронниысь улляз. Мурт воргорон азьын бӧрдэмезлэсь возиськыны турттыса, соиз кӧлонниязы кошкиз. Тэтэ карись нылпиослы чаклам пу кровать вить аресъем дыдылы ӟоскытгес ни ке но, мурт дядяйёс нэнэеныз артэ изьыны мылкыд карыку, нылашлы амалтэк пичи валесаз каръяськоно луэ. Зэм, со адӟемпотостэм агайёс Таняос доры ӵем уг вуыло. Нош лыкто ке, пичи ныллэн сюлэмаз оломар быдӟа вожан тылӝу гоманы ӧдъя. Та Славагаез но со аслаз кикиосыныз кекатысал кадь. Нш нэнэез эшшо ке солы шудонъёссэ возьматъяны косэ. Та шудонъёсты Танялы кузьмазы нэнэезлэн ӵош ужась, озьы ик огъяулонниын артэ улэм эшъёсыз. Нош газетын ужась Валяпай та небыт гоно гондырпиез ваем. Валяпайзэ Таня туж яратэ. Ма, нылкышно ачиз но соин часэн-часэн суредаса я выжыкыл мадьыса, я книга лыдӟыса пукылэ. Нэнэез огпол Танялы вераз вал, лякыт сямо Валяпай улон сюрес вылазы ӧй пумиськысал ке, соослэн нимаз улоннизы но ӧй луысал, оло. Бен нэнэеныз ӵош кӧлан диванзэс но Валяпай редакциын ужась эшъёсыныз ваиз. Кивалтэтысь семья ужпумъёсын вырись ёзэт, лэся, соослы диван басьтыны коньдон висъям. Та диванэз адӟыса, Танялэн нэнэез воксё синкылияськиз: - Маин но кызьы мон тӥлед тау карыны быгато? Валяпай соку Танялэсь мертчан йырсизэ маялтыса шуиз: - Танюша гинэ тазалыко мед будоз. Валяпайлэн воргорон эшъёсыз но Танялы туж лякытэсь потӥзы. Уката ик пурысьтам йырсиёез - мукетъёс диванэз ладъяку, со нылашез чырты бераз пуктыса ворттылытӥз. - Монэ Гена песятай шу, ява, дыдые, - кизэ мӧйы муртлэсь музэн юн кырмыса валэктӥз пурысьтам йырси. Мар веранэз, Таняен мумиз диванлы туж шумпотӥзы. Со дырозь уго Таня ӟоскыт пу кроватьын кӧлаз, нош нэнэез аслыз выж вылэ матрац вальылӥз. Диван вайыкузы Танялы ньыль арес вал. Соин ик та учырез нылаш ӟеч тодэ на. Огез жаль: малы ке но Валяпайлэн эшъёсыз Таняос доры бератаз огпол но ӧз ветлэ ини. Нылаш тужгес но ӵем Гена песятаез тодаз вайылэ. Со дырысен уго Таняез чырты сьӧраз нокин ӧз ворттылыты ни. Огаз шутэтскон нуналэ, Валяпай Таня доры лыктэм дыръя, пичи дыды юатэк ӧз чида: - Нош малы ми дӥне Гена песятай уг пыралля? Валяпайлэн ымнырыз мӧзмыт тусо луиз: - Геннадий Петровичез кык арня талэсь азьло ватӥм. - Собере Танялэн мумизлы валэктӥз: - Геннадий Петрович газетамы куамын арлэсь кемагес ужаз, берло дыре катэз тӥясьёс сярысь тросгес гожъялляз. Кыӵе ке сьӧськаблы кельшымтэ, лэся, командировкаысь бер ӝыт бертыкуз аслаз подъездэз дорын вииллям. Али та пумысен уголовной уж утэмын. Нылкышнолэн верамысьтыз Таня троссэ ӧз анла ке но, огзэ ӟеч валаз: Гена песятай соос доры ноку уз лыкты, сое чырты бераз пуктыса уз ворттылыты ни... Со куспын Танялэн пель сьӧраз Славагайлэн гольтырес куараез чузъяськиз: - Чао, чао, бомбино! Озьыен, вераським? Капитально! Вордскем нуналад мон одно лыкто, уг вунэты. Нош тон тросгес сур дася. Капитально! Ӧс шарк! вазиз. Висъет ӧс дорын соку ик нэнэез адӟиськиз. Солэн ымнырыз ӵыжектэмын, синъёсыз лек тылын ӝуало: - Тон кема-а озьы монэ муртъёс азьын возьытэ вуттылод на?! Шуозы: та нылзэ пичи но умой сямъёслы дышетымтэ! - Со Славагаед асьме дӥне медам ветлы! - ӧчкариз нылаш. - Тынэсьтыд уз юалэ! Мӧйыосты дышетыны пичи на! - пурӟем кышномурт, е кутыса, нылзэ нырысьсэ зол-зол лачкытъяз. Та дырозь мумиз Таня шоры кизэ ӧз урдылы на вал. Нош ваньмыз понна со синазькыль Славагай янгыш. Таня ымдурзэ юнгес куртчиз но кровать сэргы ӝиптӥськиз. Тазьы жугемзэ нэнэез берло жалялоз ай... * * * Нылзэ вӧсь каремез пумысен Мани берло зэмзэ ӧпкелиз. Угось пичиысен ассэ йӧно возьыны дышем нылаш (олокин выжые мынэм!) муминыз азьло сямен мыло-кыдо вераськыны, садикын луэм учыръёсты ӟабыль поттыса мадьыны ӧз дырты ни. Озьы ке но, Славагаен азьланяз керетытэк улыны кыл сётӥз: - Асьмеос шоры, нуные, табере принцъёс уз учке ни, - нылыз азе пыдесъяськыса, синвуоссэ ӵушиз нылыз. - Адӟиськод ук: мон егит ӧвӧл ни, вылаз ик, быжы вань. - Кытын тынад быжыд? - паймиз нылаш. - Тани, - нылызлэн гадяз чиньыеныз йӧтскиз кышномурт. - Мон быж ӧвӧл - а-дя-ми! Валад-а? - йӧн-йӧн вераз Танюша, собере ӝӧк улысь картон коробкае ватскем шудонъёсыз доры мынӥз. "Пичи на, будӥз ке, визьмаськоз ай", - мур лулӟиз Мани. Ма, лулӟылыны мугез туж трос. Нырысь ик, уждунзэс дыраз сётъямтэенызы, куанермон, сютэм улон чыртыёзяз вуиз ни. Вылаз ик, семьяен улонэз ӧз удалты. Нош макем потэ калык рад карто- нылпиё кышномурт луэмез! Мила акаез но, кырсиез но, вань даурзэ пытсэт сьӧрын ортчытӥсь бубиз но мед вожъяськозы. Со понна Манилэн чеберез но, визьмыз но, ужаны быгатэмез но тырмыт. Эшшо ке улонниез но вань. Туала вакытэ уноез-а нимаз улонниеныз ушъяськыны быгатоз? Корка пуш тӥрлыкез бен, диванэз, уродос ӝӧкез но кык пуконэз сяна, номыриз ӧвӧл ке ӝык, мар-о сыӵе-таӵеез? Вӧзаз карт кылдӥз ке, ваньмыз луоз ай. Нош али номырлы уждунэз уг тырмы. Ярам ай, Валя Маниез уг аналты. Пӧраськонние пуктыны тани вуж буфетсэ, сиськон ӝоксэ, тусьты-пуньы куасьтонзэ сётӥз. Асьсэлэн нылпиоссы ӧвӧл бере, уждунзы кыкназылы тырме, вылды. Вылаз ик, Валялэн картэз корка пуш тӥрлык лэсьтон фирмаын тырше. Зарни киё пиосмурт кык висъетэн улонниысьтызы ваньзэ сямен тӥрлыкъёсты ачиз лэсьтэм. Валя шуиз, Мишае, пе, азьло туж зол юылэ вал. Огазе кариськемзы бере кык-куинь арзэ кышноез чидам ик, чобере чурт-чурт верам: - Яке ӵош уломы но тон эмъяськод, яке чемодандэ кутыса кошкы! Тӥни табере йӧнатскемез дырысен дас арлэсь ятыргес луэм ини. Валя шудолэсь но шудо. Огез гинэ умойтэм: нылпиоссы ӧвӧл. Нош нылпиосты семья ужпумъёсын вырись газетчи туж яратэ, лэся. Соин но, вылды, шудон я книга басьтыса, котькудаз шутэтскон нуналэ Таня доры лыктэ. Куддыръя Мани вожаны ик ӧдъялля: нылыз Валяпайзэ, мумызэ сярысь, золгес яратэ кадь. - Малы асьтэос нылпи ӧд заводе? - юаз огпол Мани эш выллем луэм газетчилэсь. - Картме пӧяме уг поты. Мишае, армиын служить карыкуз, туж юн радиация улэ сюрылэм, соин сэрен нылпитэк кылимы. Таня нылыд ӧй вордскысал ке, та дырозь нылпи юртысь пинал басьтысалмы ни. Нылдэ аслам кадь карисько. Только тон номыр уродзэ эн малпа, Танюшадэ таланы уг медӥськы, - сюлэм висёнзэ усьтӥз газетчи. Трос дышетскем мурт ке но, со нылкышно ук. Нош нылкышно мукетсэ нылкышноез котьку валаны быгатоз. Манилэсь Славалы синмаськемзэ но Валя уз курла кадь йӧтэ пал кышномуртлы. Нош Слава юэ ке, ӵок. Валялэн Мишаез музэн йӧнатскоз но ваньмыз ас ӧраз пыроз. Маниез гинэ мед яратоз. Эшшо Танязэ медаз обидьы. Таиз ласянь Мани ачиз сюлмаськоз ини... Я, улыса-вылыса Манилэн вордскем нуналыз но вуиз. Ог дасо нунал талэсь азьло кошкыкуз Слава Маниез оскытӥз: яратӥсько, пе. Озьы бере, туннэ солэн "именникез" шуыса но ӧз вунэты, луоз - уж бере ӝыт одно лыктоз. Нош ачиз Мани туннэлы ужысь куриськиз: куно пумитаны дассяькытэк уг лу. Ярам ай, уж дураз аванс нерге сётӥзы. Али Мани буяськоз, йырсизэ плойкаен бабыльтоз но магазинэ потоз. Синмаськоно муртэз гинэ лыктытэк медаз кыль. "Уз, Слава уз вунэты. Со одно сяськаен лыктоз. Нош ваньмыз куноос кошкем бере соин уйбыт ог-огмес яратомы", - ас малпанъёсызлы пальпотыса, кышномурт синкашъёссэ, собере синлысъёссэ буяны кутскиз. 2 Дораз Слава сютэм кион кадь вуиз. Дас одӥг аресъем Натӥ но укмыс аресъем Ондӥ магнитофонэз юн улӟытӥллям но асьсэос ӝӧк вадьсы мыкырскиллям. Нюнюзылэсь корка пыремзэ пиналъёс ӧз ик шӧдылэ. Сузэреныз выныз доры матэктыса, егит пиосмурт валаз: таосыд нош ик суредасько. Буёло карандашъёс, тӧдьы кагаз гинэ медло соослы - кӧт сюманзэс но вунэтозы. Бубызы выжые-а, мар-а мынӥллям. Владиславлэн сюрбубиз уго кибашлылэсь но кибашлы: пулэсь вӧлыса, пӧртэм арбериос лэсьтылэ, усто суредаське, куиське-керттӥське. "Шундыё" эмъяськонниын-санаториын суредась- оформитель луыса ужа. Ӧйтӧд, сыӵе йӧно воргорон Славалэн азьтэм-бертэм, егитысен ик юыны но мурт пиосъёсын калтыртыны яратӥсь мумизлы маиз понна меда синмаськиз. Кызь кык аресъем Слава талы пумтэм абдра: Нюрка (озьы гинэ вазиське со нэнэезлы) выллем кышномуртъёс семьяен улыны ӧвӧл вордскемын, нош Борис Петрович - ӟег нянь кадь, юртъер котырысь вань уж со вылын возиське. "Пӧрмостэм мумилэн чеберезлы синмаськиз вал, дыр", - выльысь аслыз ачиз валэктӥз Владислав. - Нюрка нош ик бускелетӥ чарка бичаса ветлэ ни-а, мар-а? - вазиськиз со сузэреныз вынызлы. Огкадь вакчи ӵышкем тӧдьы йырсиё пияшен нылаш йыръёссэс куара пала берыктӥзы. Ымныръёсазы юан пус пуксем кожалод. - Мемиды кытӥ калтыртэ, шуисько? - выльысь юаз Слава. Кыктоослы укшась нылашен пияш таяз учыре валазы, лэся, ма сярысь юамзэ. - Дышем сямызъя кытӥ ке ветлэ, дыр, - вазиз выныз. - Нош тӥ ӵукназэ маке сииды-а ни? - оло, Петрович нылыныз пиезлы маке сиён дасяса кельтӥз шуыса оске вал Владислав. - Ми печенняен чай юим. Нош нуназезэ школаын сюдозы, - шуиз Натӥ, выльысь ӝӧк вадьсы мыкыртӥськыса. "Курва! - мумиз сярысь лек малпаз Владислав. - Монэ, мирошкаез, бабуше вылэ аналтӥз, нош таоссэ - бубызы вылэ. Сёже дождёшша тон, капитально!" Егит пилэн йырыз пилиськыны турттэ кадь. Вылаз ик, сиемез потыса, кӧтыз чутыръя ини. Выль дусымез ӝукен утялтыны турттэ вал, но Слава пумит луиз. Ӵукна валысь так но сиемез уг пот, нош туннэ, вылаз ик, макмырен курадӟе. Сыӵе дыръя сьӧд- сьӧд чай юрттэ. Нош ог кык час ортчыса, туж зол сием потыны ӧдъя... Холодильникысь кыӵе ке сӥль юдэс шедьтыса, егит пи мискае ву лэзиз но газ вылэ пуктӥз. Пӧземез бере лымаз сугон юдоз, сьӧд пӧсьтурын пызьналоз но отчы нянь юдыса сиёз. Солы таӵе сиён кельше... Со вие корказьын шарк! вазиз. Лангыр-куангыр карыса, тубат кузя тырттэм ведраос питыразы. Сюрбубиз туннэ ужаз вазьгес кошкем, лэся, - ульча колонкаысь ву вайылымтэ. Зэм, гур азь палась пичи бакын ӝыныяз вань на, нылпиослы тырмоз, ӝыт бертыса вортто, шуиз, дыр. Яке сюрпиез вылэ оскиськиз-а? - Мать твою за ногу! Ачид ву ӧд нуллы ке, та козёлъёслэн тодазы ик уз лыкты! - ӧс кусып вамен мырдэм вамыштӥз лыз-вож ымныро мумиз. "Кыӵе ке кышномурт, картэныз мусояськыкузы шедьтыса, Нюркаез дышетӥз, вылды", - шумпотӥз Владислав. Номыр куаретытэк, егит пи выльысь гур азь пала кӧчиз. Нош Нюрка суредаськыса пукись нылыныз пиез шоры урдӥськиз: - Дась кӧтъёс! Малы ву ӧд ворттэ?! Нош ик ужтэмаса пукиськоды?! Урокъёстэс ке - ӧд быэстэ, луоз! Тӥледын сэрен школаын монэ нош ик тышкаськозы, в натуре! "Огпол коть школае кенешъёсы ветлэмед вань меда?" - мынектӥз Слава али гинэ быректэм шыд вылысь шукызэ октонъяз. Нюрка уго нылпиосызлэсь дневникъёссэс гинэ но уг чаклалля. Ваньмыз Петрович вылын. Солэсь, Славалэсь, дышетскемзэ песянаез чаклалляз. Дас куать арес тырмытозяз соос та пу коркан ӵошенназы улӥзы. Школаын умой дышетскем сяна, Владислав нылпи творчествоя юртысь эктонъя-кырӟанъя кружоке но мылысь-кыдысь ветлӥз. - Бадӟым будӥ ке, артист луо. Тонэ сьӧрам кунгож сьӧры нуо, - шуылӥз со песянаезлы. - Нюрка но артист луыны дасяське вал, нош тӥни дас сизьым аресысен пивылэс кариськиз, - бусаськем синъёссэ сыӵе дыръёсы ӵушылоз вал песянаез. Улэп анаез но тодмотэм атаез ваньмысь, сирота будӥсь нуноксэ со туж жалялляз. Соин ӵош ик ӧз но эркия: "Нюркаез мултэс эркияй, соин ик нылы ассэ гинэ яратӥсь луиз". Ӵужаез туж вазь пал кылем. Уй сменаысь бертӥсь картсэ кыӵе ке йырвандӥсьёс виытозязы жугиллям. Кыкетӥзэ бызьыны дӥсьтымтэ ни: "Аслым карт, оло, шедьтысал, нош нылылы атай - ӧй". Кузь тол ӝытъёсы эстэм гур дорын шунскыкузы пересь кышномурт нунокезлы удалтымтэ улонэз пумысен огпол гинэ ӧз ӝожтӥськылы. Пенсие потэмез бере со арен ӝыныен гинэ улыса вуттӥз на. Славалэн мумиз соосты чакланы толэзьлы огпол - песяез уждун, собере пенсия басьтон нуналаз гинэ - вуылӥз. Пересь нэнэезлэсь коньдонзэ "пунэма" но берен толэзьлы ыше вал. Пиез сярысь тодаз ик ӧз вайылы, лэся. - Кулӥ ке, кызьы улод меда, пие? - берло дыре лулӟылӥзпесянаез. Славалэн сыӵе дыръя йырыз кур луылӥз: мар озьы супыльтэ, куатьтон арес но ӧз тырмы на ук. Нош пересь кышномурт тазалыкезлэсь лябӟемзэ шӧдэ ни вылэм, лэся. Куартолэзьлэн огаз шундыё, шуныт нуналаз Слава школаысь бертӥз но, песянаез сое пальпотыса ӧз пумита. Валесысьтыз но ӧз султы. Нунокез ӧтемысь синъёссэ ик ӧз усьты. "Сюлэмыз путэм", - шуизы ӝог юрттэт сётӥсь машинаен вуэм эмчиос. Песянайзэ ватэмзы бере Нюрка вить аресъем нылыныз, кык аресъем пиеныз но Борис Петровичен анаезлэн Костина мельница шуонысь пу коркаяз улыны лыктӥз. Со дырысен Славиклэн улонэз йырин-чукин кошкиз. Мумиз пиез борды кулэен но, кулэтэмен но тэбиньылӥз, оломар понна но даллашылӥз. Эсьма, куазь зоремысь гинэ но Славаез янгыш карылӥз. - Адями виись тон! Мынэсьтым нэнэме тон виид! - кудӟем йырыныз ма верамзэ ик ӧз валалля, лэся, куамын ньыль аресъем кышномурт. Пиез пумитаз мытылыны дӥсьтыку, мыжыксэ урдыны но ӧз возьдаськылы. - Нюра, дугды! Мар понна тон Славаез янгыш кариськод? Сузэреныз вынзэ чакламез, юрт котырын юрттӥськемез понна-а, мар-а? - дурбасьтӥз огпол Борис Петрович. Соку Нюрка урмиз ук: - Ваньды тӥ дась кӧтъёс! Мынам коркаям улӥськоды, эшшо ке ӧчкариськоды! Уг ке яра, мынэ, кошке татысь - ӧс усьтэмын! Сюрбубиз солы дурбасьтэ шуыса шумпотӥз ке но, берпуметӥ классын дышетскись Слава дораз мылыз потытэк бертылӥз. Ачиз выллем нокинлы кулэтэм пияшъёсын-нылашъёсын эшъяськиз. Экзаменъёслы дасяськем интые, улыно-вылыно коркаослэн сигъёсазы яке мурӝолъёсазы люкаськыса, соос клей зынъяллязы, берлогес "турын" кыскыны дышизы. Зэм, визьтэммытӥсь эмъюмъёс пӧлысь кужмооссэгес аслыз бышканы Слава чутрак пумит кариськиз. Со угось артист луон сярысь малпанэзлэсь песяез кулэм бере но ӧз куштӥськы. Собере наркотикъёслы трос коньдон кулэ, нош Владиславлэн кисыяз котьку тӧл шулаз. Нош музон пияшъёс сямен лушкаськыны солы возьыт вал. Школазэ йылпумъямез бере культурая училищее пырон сярысь малпанэз ӧз зэма. Аттестатаз угось "куиньёс" кылдӥзы. Училищее экзаменъёссэ сётыны но шуг йӧтӥз. Шонерзэ вераса, экзаменъёслы дасяськыны дырыз ӧй вал, шуыны луоз. Дораз уго пияшлы нимаз сэрег ӧз донгаськы, нош сузэреныз выныз ялан суредаськыны выризы. Собере Борис Петровичлы но киужъёсыныз вырыны инты кулэ вал. Ярам ай, дас тямыс арессэ тырмытэмез бере сое армие басьтӥзы. Нош вордскем караз бертыса, нырысь нуналаз ик валаз: сое татын нокин витьымтэ. Нюрка азьлолэсь но золгес зын вуэн эшъяськем. Вылаз ик, Борис Петрович но чаркалэсь пыдэссэ учкылыны шӧтам. Кытчы кариськоз егит пи, рос-прос дышетскемез ӧвӧлэн ӟеч уж но уг шедьты бере? Вылаз ик, быдэ вуымтэ Натӥен Ондӥ егит пилы жаль потӥзы. Атайзы но кудӟем дыръя кин соослы сиён дасялоз, кин урмем нэнэзылэсь утёз? Армиысь бертэмез бере Нюрка бадӟым пиез шоры кивалтосэн урдӥськылыны ӧз дӥсьты ни. Ма, сюрбубиз но сое алӥз: - Мотри, Нюра, Славаез эн обидьы, шабишь! Адӟиськод-а, кыӵе солэн суй быгытъёсыз? То-то, аслыд золгес сюроз. Мумиз зэмзэ кышказ-а, мар-а - жугиськыны ӧз выр ини, нош кылыз азьло кадь ик сюлэмзэ вӧсь каре, куддыръя вир ик орсме кадь... Тани али но пичиосыныз мар юнме керетэ меда? Соослынуназе бере школае мыноно ук. Кыӵе мылкыдын урокъёсын пукозы? Кылозы на-а дышетӥсьёслэсь нодламъёссэс? Вылаз ик, керӟег, вог, уродъяськись сямо будӥзы ке, кинлы умой луоз? Ӝыны час ёрос кесяськемез-черекъямез бере Нюрка басылаз, лэся, - куараез чалмиз. Коркан чал-чал. Слава покчиосты чаклано кариськиз. Бадӟым висъетын, Натӥен Ондӥ сяна, нокин ӧй вал ни. - Мумыды кӧчиз-а, мар-а? - юаз Слава. - Коть воксё медаз бертылы вал, - мӧйы мурт сямен нод-нод вазиз Ондӥ. - Зэмзэ ик! - выныз борды итӥськиз Натӥ банкаысь вуын кисточказэ миськонъяз. - Со ведь доре керетыны-даллашыны гинэ вуылэ. Кыӵе акыльтӥз ни таӵе улон! Сузэрезлэсь озьы шуэмзэ кылыса, Славалэн сюлэмыз ныж пуртэн бышкалтэм кадь луиз. "Зэмзэ но, Нюрка ӧй ке луысал, Борис Петрович, оло, йӧнозэгес кышно шедьтысал. Выныным сузэрелы но юисьтэм нэнэ вӧзын умойгес луысал, дыр". Зэм, таӵе малпанэзлэсь егит пилэн тыбырыз ик юзыр-кезьыр луиз... - Слава нюню, милем школае мыноно ни, - Натӥен Ондӥ ранецъёссэс кутӥзы. "Натӥ Ондӥлэсь куинь ареслы бадӟым ке но, кыктоос кадь адӟисько ук, ӝуждалаен но огкадесь, йырсиоссы но кыксылэн ӵуж мертчан выллемесь - бубызылэн кадь. Ачим ке сьӧд моколы кельшисько. Эсьма, гадям, суйёсам (бен макесъёсам но!) сьӧд-сьӧд гон. Кин меда буби - грузин яке армянин, оло нош, чечен? Нюркалэсь юад ке, со ачиз но вераны уз тод, вылды. Шлюха, котькуд воргорон улэ выдыны дась. Капитально!" - сузэреныз выныз бӧрсьы ӧс ворсаськем бере аслаз малпанъёсаз выиз егит пи. Но сиемез потэмен со выльысь гур азь пала вамыштӥз. Сӥлез небӟем ни, лымыз но туж зумыто адӟиське. Слава, дуры кутыса, шыд лым омыртэм ни вал, но нянь возённиязы... одӥг пыры но нянез ӧвӧл. "Магазинэ ветлытэк уз лу. Ярам, сием потонме пичи сӥль юдэсэн басылскыто но нянь басьтэме бере ӟеч-ӟеч сисько ини", - сумка кутыса но холодильник вылын лошъяськись векчи коньдонэз ӟепаз донгыса, Слава коркась потӥз. * * * Доразы нокин луымтэлы Чебер Нюрка шумпотӥз: картэзлэсь ватоссэ - синучкон сьӧрысь пичи бинетэз - кайпалтыны нокин уз люкеты. Нодтэм Борис малпа, дыр: уждунзэ кытын воземзэ кышноез уг тоды. Нош Нюркаез уд пӧя, со кескич но амало кышномурт - аслыз мар ке кулэ, музъем улысь но шедьтоз. Туннэ кышномуртлы коньдон кулэ- макем тросгес, сокем умойгес. Пал пыд Петька Татар базарын улэ, аслаз коркаяз. Кышнозэ пери шуккем - уг султылы, озьыен, соослы гань-гань мусояськыса, сиыса-юыса улыны нокин уз люкеты. Нюркалэн картэзлэн но кышнозэ карлэн чылкак музон палысьтыз утчаны тодаз уз лыкты. Нош майбыр улон понна данак уксёед медло. Петькалэн афган тылӝуысь сӧсыр луыса бертэмез понна кун ласянь висъям пенсиез кемалы ик уг тырмы. Зэм, соос Петькалэн кышноезлэсь пенсизэ но асьсэлы каро. Вӧзаз Борислэн уждунэз но уз люкеты... Синучконысь Нюрка шоры лыз-вож, тӧрнам ымныро, чылкак тодмотэм кышномурт учкиз. Йырсиез таркаськемын, дӥськутэз погмаськемын. Ог вить ар талэсь азьло но ай ульчаысьтызы улӥсьёс сое Чебер Нюрка шуо вал. Табере тани веськрес мугорыз кустэм-гадьтэм-сауртэм макелы пӧрмем. Азьвылэн мугорызъя вурем дэремез вакчи, ӟоскыт кылем. "Шедьтэм ук ма сярысь куректыны! Чебереныд пыддэ уд бинялты, кӧттэ уд тыр", - ассэ ачиз буйгатӥз кышномурт. Нош пушкысьтыз кыкетӥ куара солы пумит вазиз: "Эн алдаськы, Нюрка! Егит дыръяд кӧня пиосмуртъёс, чебередлы синмаськыса, тонэ сюдӥзы, дӥсязы, лымшор палъёсы шутэтскыны, шунды шорын вылтырдэ пыжыны нуллӥзы. Эсьма, Бористэ но "Шундыё" эмъяськонниысь шедьтӥд. Востэм удмурт воргорон тыныл майбыр улыны уз люкеты, эшшо ке сюдоз-вордоз шуыса ӟеч валад уго. Вылаз ик, шӧдӥд: арлыдыд будэмъя зӧк кисыё пиосмуртъёс шорад шергес учкыло ни..." Таиз зэм: кызь укмыс аресъем Нюркалы аслэсьтыз вить-куать ареслы пиналгес, небыльток кадь Борисэз киуылтыны сокем секыт ӧй вал. Нош зӧк кисыё сьӧд туганэз, Нюркалэсь суредасьлы кырмышъямзэ синйылтыса, чылкак урмиз - ӟуз вир луытозяз тышкаса, кык интыем палатае огназэ кельтӥз. Кулон калэ вуэм Нюркаез ӵуказеяз ӵукна выж миськись шедьтӥз. Аслэсьтыз янгышсэ шӧдэменыз, вылды, Борис со нуналэ ик Нюркалы аслыз кышно луыны ӵектӥз.Нош амало кышномуртлы ӵапак та ик кулэ вал... Санаторийлэн кивалтӥсьёсыз кузпалъёслы пичияк улонтӥ висъязы. Угось картэз ужам сяна, Нюрка но татчы ик возьмаськисе интыяськиз. Куать ар отын улытозяз кӧняеныз меда шутэтскись-эмъяськисьёсын дусымъяськиз?! Солэсь юмшамзэ Борисэз шӧдылытэк ӧз ул ке но, пумит вазьыны ӧз дӥсьтылы. Нюрка угось солы ӵош улыны кутскыкузы ик чурт-чут вераз, семьяязы ачиз кузё луоз шуыса. Вормытъяськыны кутскид ке, пичи нылыныд но пиеныд куштыса, пе, кельто. Чужанов нылпиоссэ жаляз: котькыӵе азьтэм- бертэм мед луоз но, пиналъёс вордэм анайзы вӧзын будыны кулэ. Нюркалэн мумиз кулэмлэсь азьло кӧня ке толэзь азьло Чужановаез юэмез понна ужысьтыз мозмытӥзы. Та пумысен Нюрка олокыӵе ик ӧз куректы. Огез гинэ умойтэм вал: Чужановъёсты та пичи висъетысьтызы улляны кутскизы. Соку егит нылкышнолэн тодаз лыктӥз: со - мумизлэн одӥг гинэ, озьыен, юртъерез Нюркалы кыльыны кулэ. Мумизлы та сярысь шара вераз но, соиз черекъяны ӧдъяз: пиед сярысь, пе, пичи но уд сюлмаськиськы. Нош мар Славик сярысь сюлмаськонэз, солэн котьмаиз тырмыт ук. Эшшо ке со адӟемпотостэм пияш Нюркалэсь нэнэзэ талаз. - Бен со аслад пиед ук, Нюрка! - паймиз Ивановна. - Пичи дыръяз сое синтэм коӵышпиез музэн, вуын ӝокатоно вылэм! Ачид ӧд сёты, табере чида! - уката юнгес пурӟиз Нюрка. Пумитаз мар вераны тодытэк, Ивановна сблэм бордаз кутӥськиз. Нылызлэсь кошкемзэ возьматэк, со валесаз выдӥз но ӧз султы ини... Картэзлэсь ватоссэ кайпалтыны ылам Нюрка бадӟым пиезлэсь ӧсэтӥ пыремзэ ӧз шӧды. - Мар тон отын утчаськиськод?! - Славалэсь лек куаразэ кылыса, Нюрка нырысь- валысь куалектӥз. Но кышномурт курдасьёс пӧлысь ӧвӧл. - Тынад мар ужед?! - кеськиз со. - Тынад ужаса поттэмед ке луысал, эшшо ик. Дворникын ужаса трос коньдон поттӥсько кожаськод-а?! - пулемёт музэн тачыртӥз Нюрка. Пиез сое кылзыса ӧз улы ни - нянь сукыризэ кутыса, гур азь пала вамыштӥз. Чуки-беки шонаськыса, мумиз но сьӧраз калъяськиз. Газ плита вылысь мискаез егит пи ӝӧк пуме, вӧш вылэ, пуктӥз, собере, тэркы басьтыса, пӧсь лымез понӥз но али ваем няньзэ шорманы кутскиз. - Вот, иське, кызьы тӥ сӥль-вӧй пушкын пыласькиськоды, в натуре! Нош родной мумыдэ сиськыны но уд чортӥськы! Ярам, возьмато ай мон тыныд, кин та юртын кузё! - урмем кышномурт шыдэн мискаез кутӥз но сокем тыршыса пӧзьтэм лымез пыласькон улысь пож ведрае кисьтӥз. Таӵезэ егит пи уг возьма вал. Кема малпаськытэк, со Нюрка шоры ожалскиз... * * * Сюрбубиз ужысь бертыку, Слава бакчаын гудӥське вал. - Тон мар озьы толлы пумит убоос копаськод? - паймиз Борис Петрович. Солэсь куаразэ кылыса, Слава куаляк луиз. Собере шуиз: - Виктория пудъёсты мерттыны медӥсько. А то вуж убоын емышез но уг пот ни, капитально вужмем. - Шонер вераськод, пие, песяед кулэм дырысен со боры убо борды нокинлэн киыз ӧз йӧтылы на кадь. Ачим ужысьтым уг мӧзмылӥськы, мемиед юмшаса уг ваньмы, лэся. Туннэ коть дорын-а со? - сюрбубизлэн супылес выремезъя Слава валаз: Борис Петрович шӧмаськемын. - Нюркаез думет вылын но кокран уд пукеты. Нош ик кытчы ке лобатӥз. Таяз учыре синучкон сьӧрысь ватостэ но басьтыны ӧз вунэты кадь. Таӵе ивор Борис Петровичез ӧз паймыты: кышноезлэн быдэс арняосын олокытӥ калтыртэмезлы со дышемын ни. - А-а, юмшаса акыльтӥз ке, вуоз ай, - киыныз шонтыса, воргорон корка пыриз. Убозэ копаса йылпумъямез бере Слава боры пушъетъёсты небыт музъеме мерттӥз. Та ужез бен гудырикошконэ лэсьтоно ни вал, но ярам, воксё бер ӧвӧл ай, сӥзьыллэн нырысетӥ толэзяз куазь гужем выллем шуныт возиське... 3 Вожъяськон - урод сям. Ма, урод сям гинэ шат? Вожъяськон - со бырон. Вожъяськись мурт, аслэсьтыз йырзэ быдтыны малпась музэн, улонзэ каллен, нуналмысь вакчиёмытэ, лулсэрзэ, тазалыксэ вирюись выллем сюпсе. Та урод сямзэс умоен возьматыны турттыса, вылды, куд-огез вожъяськонэз кык пумо возьмато: тӧдьы вожъяськон но сьӧд вожъяськон. Тӧдьы но сьӧд магия кадь. Озьы-а, тазьы-а, нош солэн нимыз одӥг: вожъяськон. Соосты висъясь гож уг адӟиськы, пеле уг кылӥськы. Кылын бен висъялод ик, дыр. Но озьы висъямлэсь та урод сямлэн пуштросэз уг воштӥськы ук. Юнме шат Библиын - трос дауръёс ӵоже визьмо адямиосын кылдытэм, вань книгаослы КНИГАЫН - кӧня ке куронъёс пӧлысь одӥгез шуэ: "эн вожъяськы". Данакез адямиос та куронэз яке сюлэмазы уг басьто, яке сое валаны кужымзы уг тырмы. Соин валче сьӧлыкъёс йыло. Нош сьӧлыклэн, котькуд ужлэн музэн ик, аслаз емышез. Таӵе ужпумъёс Маниез ноку ӧз сюлэмшугъяськытылэ. Ма, зэмзэ вераса, озьы малпаськон визьмаз ик ӧз сузьылы. Дышетскемез сокем трос ӧвӧл бере, йырын, шонергес вераса, йырвизьмын ужанэз егит нылкышно ноку ӧз гажалля. Интернатысь огезлэн кыл кутӥсь апайлэн косэмезъя со профтехучилищее пыриз. Дышетсконзэ кызьы но озьы йылпумъяса, заводэ мынӥз, лаборант нерге луиз. Кивалтӥсезлэсь косэмъёссэ ӝог ӝог но ӟеч быдэсъя. Арлыдоослы уг мытылы. Со сяна, ма кулэ на? Книга, газет уг лыдӟылы. Бен та вакытэ политдышетскон ӧвӧл ни ук, малы синъёстэ юнме быдтод? Телевизорысь пумтэм-йылтэм сериалъёсты учкыса но син жаде. Оглом вераса, Мани, лул пуш дуннезэ узырмытон сярысь сюлмаськытэк, уно огшоры адямиос кадь ик улӥз. Зэм, ваньмыз сямен йӧнала кышномуртъёс семьяен, карт вӧзын уло, нош со ялан огназ но огназ. Куддыръя сокем мӧзмыт луэ - коть кион сямен вуз. Ма, вузӥз ке но, нылыз сяна, нокин уз кыл, уз жаля, уз дурбасьты, уз сайя. Соин ик Мани туж вожъяськылӥз. Картэн улӥсь акаезлы, эшъёсызлы, тодмоосызлы. Бен муртъёслы но. Солэн но калык радъя кузпалэн нылпи вордэмез, уж дурысь бертыса, картэзлы ӝожтӥськемез, оло нош, урттылӥськемез, яратоно пиосмуртэн ӵош шутэтскемез, солэсь кужымзэ но мусоямзэ шӧдэмез потэ. Кин бен та понна кышномуртэ курланы дӥсьтоз? Дунне кылдэм дырысен озьы ук. Котьма кар, татчыозь Манилы карт шедьтыны ӧз кылды. Нош осконзэ со уг ышты. Осконтэк уго улонлэн азьыз но быре. Кыӵе воргорон нерге гинэ но шораз лякыт вазьылэ ке, Мани бурдъяське. Йыраз аслыз ик осконтэм малпанъёс вуо. Тани али но со кӧня ке толэзь ӵоже ини азьпал улонзэ сьӧд чиган тусо Владиславен герӟа... ...Мани ӧссэ усьтӥз но кияз бадӟым сяська тугокоен Надяез адӟиз. Эшезлэн мышкысьтыз пиосмуртэз со Слава кожаз вал - йырыз поромыса, ӧжыт гинэ ӧз погра. - Маняша, ми тонэ ӟечкыласьком, юн тазалык, яратон сӥзиськом. Нош мар ай тон дырызлэсь вазь шонаськыны шӧтад? Оло, куноостэ возьматэк, курытсэ оскалтӥд-а?- чингыли выллем чузъяськиз Надялэн серекъямез. - Ой, мар тон?.. Ортче, пожалуйста. - Маняша, таиз Виктор, мынам вуоно кузпалы,- шуиз Надя.- Ми соин туннэ загсэ куриськон сётӥм. Так что, милемды но ӟечкыланы быгатӥськод. - Ви-и-икто-ор?- Манилэн синъёсыз чарка быдӟаесь луизы. Тямыс ар пала огазьын тыршо, уже ӵош мыно, собере нош ик ӵош берто, нош та дырозь Надя пал кыл но ӧз поттылы, кинэз ке вань но бызьыны дасяське шуыса. Эшшо ке ассэ Манилэн эшез каре! - Малы паймиды? Оло, нимы уг яра? Вообще-то, монэ эшъёсы Витя шуо. Со куспын Надяен Таня огъя кыл шедьтӥллям ини - "Кизили" журналысь "Ачид буя" бамзэ усьтӥллям но тупась буёл утчаны шӧталлям. "Музьызэ таламелэсь пичи но уг кышка, лэся,- ас понназ мыньпотӥз Мани.- Оло нош, Витяез сое сокем яратэ но мукетыз шоры уз учкы кожа меда?" Нош шара вазиз: - Вить часлы ӧти вал но, тӥ сяна, малы ке нокин ӧз ву ай. Оло, кӧня ке возьмаломы на? - Именинница кызьы шуиз, озьы ик луоз,- огымысь кадь вазизы Надяен Виктор. - Ма, зэмзэ вераса, одӥг мурт гинэ лыктыны кулэ,- янгыше усем кадь ӵыжектӥз Мани.- Ӵош ужась эшъёсыным ӵуказе нуназеян вакыт пусъём. - Тодӥсько, тодӥсько, кин пумысен лулӟылӥськод,- киыныз шонтӥз Надя. Туганэзлэсь выроссэ Виктор ас сяменыз валам, лэся, - нылашен вуоно кузпалэз вӧзы выж вылэ пуксиз. Куиньназы йыръёссэс журнал вадьсы мыкыртӥзы - солэсь тунсыко уж дунне вылын ӧвӧл ни кожалод. Нош ачиз Маниукно дорысь мукет укно доры ветлыны шӧтаз. Зэм, нылкышнолэсь керӟегъяськемзэ нокин ӧз шӧдылы кадь. Угось татчы люкаськемъёс пӧлысь куинез - котькудӥз ас понназ - шудоесь вал. Пичи Таня, вань пиналъёс сямен ик, шудэн пыласькиз, бадӟымъёс солэсь тыршемзэ асьсэлэн ужъёсынызы оградэ пукто, огшоры шудон гинэ уг каро шуыса. Вить аресъем нылашлэн уго улонлы, соин ӵош артэ улӥсьёслы куронъёсыз сокем бадӟымесь ӧвӧл на. Пинал мурт арлыдоезлэсь соин висъяське: со шумпотэ та вие шокамез, шундыез, инбамез, бычырась турын-куарез адӟемез пумысен но. Мӧйыос нош вань та чыры-пырыослы уг паймо ни. Тани али но Таня лыз бырдо хризантемаослы пумтэм пайме. Мемиез эшезлэс кузьымзэ вуэ пуктӥз но со сярысь соку ик вунэтӥз, нош Таня огшап суредаське но выльысь ӝӧк доры лыктэ: - Малы сяська таӵе ческыт зыно луэ? Витягай пальпотыса валэктэ: - Сяська, вань турын-куаръёс музэн ик, музъемлэсь ческытсэ сюпсе, соин ик зыныз но сыӵе... Вуоно картэзлэн пичи Таняен сокем ӝог огъя кыл шедьтэмез Надялэсь сюлэмзэ шудюурен пачылмытэ: озьыен, Виктор усто атай луоз. Озьы ик сое но, кышнозэ, яратоз. Мани гинэ шудтэм. Слава ӧз лыкты уго - Манилэн туннэ вордскем нуналыз шуыса вунэтӥз, дыр. Нош макем оске вал со, таиз пиосмут, куреглэн чипыоссэ бурд улаз шунтэмез музэн, сое улонысь шуг-секытъёслэсь сайялоз шуыса. Осконэз зэмамтэен, со али Надя эшезлы вожъяське. Соингес ик керӟегъяське. "Тазьы уг яра. Астэ кияд кут",- косӥз пуш куараез. Пӧсь пельнянез тэркые октыса, Мани бадӟым палаз, куноосыз доры, потӥз. - Сё, мынам ваньмыз дась! Ойдолэ ӝӧк сьӧры пуксём!- кужмысь пальпотыны выре Мани. - Та ӝӧк сьӧрын мон огнам пиосмурт бере, таӵе мусо нылъёслы чебер кыл но мыным вератэк уз лу,- Надя шоры учкыса, шампанскоен тырмытэм чарказэ ӝутӥз Виктор.- Мон кылбурчи ӧвӧл, соин ик, дасьсэ асэстыса, тазьы шуо: нылкышно дунне вылэ вордске ке, пиосмуртлы озьы кулэ. Тон понна, Маняша! - Тон понна, эше!- шукыяськись юонэн пачылась сюмыксэ Надя но Манилэнэныз ваче шуккиз... * * * "Мон пнна? Нош кин мон? Малы вордскемын? Чылкак ышем-бырем, выжыоссэ вунэтэм, нокинлы кулэтэм адями ӧвӧл кадь ук..."- куноос доразы, артысь подъездысь куинь висъетэн квартираын муминыз-бубиныз но пичи сузэреныз улӥсь Надя дӥне, кошкем бере тусьты-пуньы миськыкуз малпаськиз Мани. Зэмзэ ик, котькуд адямилэн сямен, Манилэн но выжыосыз вань. Тямыс аресысен нылпи юртын будӥз ке но, гужемлы быдэ гуртын, песянаез дорын, улылӥз. Куддыръя тол каникулъёсыз дыръя но отчы бертылӥз. Песянаезлэн, озьы ик Манилэн нэнэезлэн но бубизлэн вордскем гуртсы Тылошур нимаське. - Вуын тыл ӝуа шат?- паймыса юалляз Мани песянаезлэсь. - Ма, кызьы вуын тыл ӝуалоз?- юанлы юанэн ик вазьылӥз Марпа песяй.- Вашкалаос мадьыло вал: гурт дортӥ бызись шур дурын, пе, туж трос лудӟазегъёс но ӵӧжъёс улӥллям. Соослэн тылыосынызы быдэс шур шобыртӥське вылэм. Соин ик кин ке шурез Тылыё шур шуэм, лэся. Нош шурлэн нимыз гуртлы выжем. Ӟучъёс ини сое капчиезъя Тылошур гожтӥллям. Манилэн нэнэез ог куинь сю ар талэсь азьло кылдэм гуртын Быдӟым ож тылӝу кутскемлэсь вить арлы азьлогес вордӥськем. Кык пиос бере ныл вордскемлы Очей песятай туж шумпотэм. Ма, кызьы уз шумпоты пиосмурт? Пиосыз асэныз ӵош гырыны- кизьыны быгато ини, ӝоген кышнояськон дырзы вуоз, нош Марпаез тӥни ньыльдон аресказ ныл ваиз на. Шудо атай яратоно нылызлы Люби ним сётӥз. - Пересьмон-уймон вакытамы та нылмы асьмеды утёз-вордоз,- маке ке шӧдыса, лэся, нылзэ мултэс эркиямысь лекъяськись кузпалызлы шуылӥз, пе, Очей песятай. Тунаськись вылымтэ ке но, Очей песятай, вуэ учкыса кадь, шонер тодэм: нылзылы вить арес гинэ тырмем но, война кутскем. Очей песятаез, собере Васинь пизэ, эшшо кык ар ортчыса, Митрофанэз но фронтэ басьтӥллям. Отысь соос огзы но бертӥллямтэ ни. Марпа песяй нылыныз ваче кылем. Люби веськрес, таза, котькыӵе ужлы провор будэм. Яратонэз но вылэм ини. Нош Колиеныз улыны кылдымтэ. - Уйпал удмуртъёслэн сыӵе сямзы вань - ныл куккон. Покач Арсень Любалы синмаськем-а, Колялы вожъяськеменыз-а, пу ваён веме карыку, эшъёсыныз нылме керттылӥллям но Арсеньлэн юртаз нуиллям,- нылызлэн шудтэм кылемез сярысь Марпа песяйлэн синкылитэк мадемез ӧз луылы.- Любаез лушкамзы сярысь кылэме бере, боды кутыса, гурт пумысь корка мынӥ. - Эн даллашы ни, сваття, таре соос кышноен картъёс,- пиезлы дурбасьтӥз Ульяна. Нош Арсень гор-гор серекъяз гинэ: - Любаез татын кутыса нокин уг возьы. Мед кошкоз. Только Колиезлы кулэ луоз на-а ныл чечымзэ ыштэм кышномурт? - Люба, нылы, яратытэк кызьы-о улод? Ӵок, Коляед кулэ ӧз кар ни ке, ӵошеннамы уломы,- тэльмыре синъёссэ вошъятэк укное учкись нылызлы. Нош Люба гуньдылыса вазем пумитам: - Нош секытэн ке кыли? Ачид тодӥськод, кыӵе курадӟыса монэ будэтӥд. Аслэсьтым нылпиме озьы будэтэме уг поты. - Соку война вал ук. Таре улон тупатске ни. Нош Люба ас сяменыз кариз: - Бубиз улэп дыръя пинал бубы вӧзын ик мед будоз... Веранэзлэн та интыяз вуыса, Марпа песяй котьку сямен чалмытскылӥз. Азьланьын ма луэм сярысь туж юн потэмен, пичигес дыръяз Мани чидатэк юалляз: - Со пинал мынам Мила акае-а? - Бен, укмыс толэзь ортчыса, Мила вордскиз. Нылыз вордскемлы шумпотэм интые, Арсень Люби вылэ нырысьсэ кизэ урдэм. Пи, пе, кулэ вал, нош тон ныл ваид... Собере, оло, пе, та мынам пиналы ӧвӧл - Колиедлэн. Милями выжымы, пе, пиосын узыр...- песянай огшаплы нош ик чалмытске. Нош Мани тодэ ни, отӥяз мар вералоз со, угось та сярысь песянаез ӵем мадьылӥз.- Йӧнала пиос ке луысалзы - куиньназы адями виисьёс. Ма, токма уг шуо, вылды: кызлэн ӵыжинэз выжыяз усе. Ачиз Митрей сват тожо нырысетӥ кышнозэ жугыса кулон калозь вуттэм. Вашкалазэ тодэ ваёно ке, бубаедлэсь атайзэ тожо со Подуз выжыос ик коньдонэз понна быдтӥллям. Озьы бӧрдылоз вал пересь нэнэед, мынам Очеелэн мумиз. Тӥни сыӵе семьяын улоно луиз шудтэм нылылы... Кыкез ик шыгнаръёсыз каре дышетскыны шуыса кошкизы но отын йыруж лэсьтӥллям - кудӟем йырынызы ӵош улӥсь юлтошсэс пуртэн вандӥллям, изьверъёс. Арсень но тӥни, Любилэсь гинэ ӧвӧл, тӥлесьтыд но, мынэсьтым но улонмес быдтӥз, муньылон,- песянайлэн куараез чидантэм вӧсь тырмемын. Татысен Мани сое алылоз вал: - Я, окмоз, баби, отӥзэ мон тодӥсько ни,- ачиз пумен песяезлэсь кисыриё киоссэ маялля. Нош мӧйы кышномурт нунокезлэсь куронзэ уг ик кыл кадь - выльысь азьланьтэ: - Мила бере мумид куинь пол секытэн луылӥз. Картэз ӵыжамен-мыжгамен кылдэм лулъёс куспетӥ усьылӥзы. Берлояз нылы уз ик катьяськы ни кожасько вал. Тау першалъёслы, бурмытӥзы ведь. Ар ортчыса, тонэ вайыны пӧрмытӥз на. Нош ныл вордэмез понна выльысь тыш сиёно луиз, ымнырысьтыз но мугорысьтыз лыз-вожез ӧз ик бырылы. - Бен малы соку картэз дорысь ӧз кошкы?- паймылӥз нылаш. - Ӧйтӧд, Уляна сваття-а, мар-а озьы индылэм: кышномурт, пе, ваньзэ чиданы кулэ. Вот и чидаз. Одӥг нуналэ, тӥ Милаен школаын дыръя, Уляна сваття шок-пуль вуиз но шуэ: "Любиед валесысьтыз уг султы, пумитам уг но вазьылы. Ачиз Арсень нош ик кудӟемын: тулыс куазен парсез вандо шуыса гидэ потӥз, со куспын мон дорад лыктӥ",- песянайлэн пельпумъёсыз уката юн куалекъяны ӧдъяло. Татӥзэ Мани умой тодэ ни. Нырысетӥ классэз йылпумъям Мани укмысэтӥ класс понна экзаменъёссэ сётӥсь Милаен доразы пырыку, мемизы коросын кылле ни вал. Мила соку ик куараен черекъяса бӧрдыны ылаз, нош марзэ-созэ рос-прос валасьтэм Мани пукон вылэ пуксиз но нэнэезлэсь синъёссэ усьтэмзэ витиз. Кышномурт покчи нылызлы азьвыл сямен ӧз пальпоты, ӧз но вазьы. Мани со куспын кышноослэсь шыпыртэмзэс кылӥз: милиционеръёс Арсенез кутӥллям но каталажкае пытсаллям, пе. Соку Манилы "каталажка" шуонзы тылобурдо четлыкен огкадь потӥз... Мемизэс ватэмзы бере Милаен Мани Марпа песяйзы дӥне улыны мынӥзы. Зэм, пересьлы кык нылъёсты пыд вылазы ӝутыны секыт йӧтоз шуыса, Маниез мумы-бубытэк кылемъёслэн юртазы келязы. Нош Мила акаез али ке но Марпа песяйлэн коркаяз улэ. Ачиз песянай ог дас вить ар талэсь азьло кулӥз. Пересь ни вал угось - тямыстон ареслэсь ятыргес улӥз. Кулон араз гужем Марпа песянай, Маниез вешаса, мур лулӟиз: - Э-э, нуные, шудтэм ук тон. Чылкак мемиед тус. - Малы бен мон шудтэм луом, песянай?- абдраз нылаш. - Ма, мемиед шудо улонэз ӧз адӟы бере, нылпи солэсь адӟонзэ азьланьтэ, шуо вал пересьёс,- синвутэм синъёссэ китышкыныз малы ке ӵушалтэм кариз пересь. - Озьы ке, Мила акае но шудтэм луысал. Нош соос Иван кырсиен шудоесь ук. Ӝоген тани нунызы вордӥськоз, тон сое утёд,- песяезлэн вераменыз соглаш ӧз кариськы куатетӥ классэз йылпумъям Мани. - Али, ма, урод уг уло но... Картэз ужась, курытэныз мултэс уг эшъяськы, только вот мурт кышноослэн юбка улазы учкылыны яратэ кадь. Иванлэн бубиз но юмшась бере.. Ярам ай, жугиськон-керетон сямыз ӧвӧл... Я, мар ай мон тонэ, пинал муртэ, аслам супыльтонъёсыным акыльтытӥсько? Мын, шуд эшъёсыныд, нош мон шутэтскыны выдыло,- басмаен висъям сэрегаз вамыштӥз пересь... Нош сӥьыл карысь интернатэ дышеткыны кошкемез бере ӝыны толэзь ортчыса, Мила акаез сое ӝож иворен гуньдытӥз: песяймы, пе, кулӥз... "Туала экстрасенсъёс карма шуо, лэся, сое. Ӵапак со карма шуон сярысь ас сяменыз вераз вал, дыр, песянае,- мӧзмыт тодэ ваёнъёсызлэсь мур лулӟиз Мани тусьты- пуньызэ корт ньӧръёслэсь кутам ӝажые куасьтыны тырон куспетӥз.- Нош малы шумпоттӥсьтэм адӟон нылпи вылэ выжыны кулэ? Яке Марпа ӵужае озьы вераны турттӥз- а: мемиме буби виыкуз мынэсьтым но, аслэсьтыз но выжыосмес коралтӥз? Бен озьы ик вань кадь - мемие улэп ке луысал, мон но али вордскем Тылошурам улысал. Оло нош, семья кылдытысал. Иван кырсие сяна но шорам учкылӥсьёс вал кадь ук. Кылсярысь, Коля нюнюлэн Петькаез..." Та малпанъёсыз Маниез шуак могӟытӥзы. Угось солэн али гинэ тодаз усиз: Коля нюню - со Любилэн, озьыен, Манилэн мемиезлэн, нырысетӥ яратонэз ук! ...Пӧрзэ быдтыса, нылкышно ымнырысьтыз буёлзэ ӵушылӥз. Собере пичи кроватяз пальпотыса изись нылызлэсь шобретсэ тупатӥз но бамысьтыз синкылизэ маялтыса лулӟиз: "Нош Слава таки ӧз лыкты... Нокинлы асьмеос, нуные, кулэ ӧвӧл!.." 4 Дас кык сотык бакчазэс сюрпиеныз ваче гинэ копаменыз-а, мар-а Борис Петровичлэн кускыз вырӟиз. Яке сӥзьыл тӧллэсь салкымзэ-а валатэк кылиз. Котьма ке но, туннэ со уж дураз мырдэм вуиз. Кускыз гинэ ке висьысал, ортчысал ай, вылды, нош солэн берло кык арнязэ сюлэмыз интьыяз ӧвӧл. Ваньмыз Нюркаен сэрен. Административной шуиськись корпусысь пичи висъетаз пыратэк, пиосмурт эмъян юртэ кожиз. Физиотделениын ужась Лиди ке ӧз, кин валалоз на Борис Петровичлэсь сюлэмшугъяськемзэ? Мертчан йырсиё, лыз инбам кадь синмо, ӧжытак зӧкомыны кутскем медсестра бордысь уго кыӵе ке шуныт лыктэ. Лидия Яковлевнаен вераськем бере котькыӵе висён басыла, урод мылкыд буйга. Озьы потэ ньыльдон кык аресъем воргоронлы. - Мар сыӵе ымнырыд кунэрес, Боря? Оло, маке умойтэм?- пиосмуртэз адӟемез бере ик юаз кышномурт. - Номыр умоез ӧвӧл... Тани кускы вырӟиз ай - больничное потытэк уз лу, дыр. Эмъяськем сяна, нылпиосын коть кӧня ке пуко. А то Ондӥе математикаен "кыкъёс" октыны шӧтам ни. Натӥ но географияя чутэ,- лапег пукон вылэ интыяськонъяз мӧзмыт валэктӥз Борис Петрович. - Нош кышноед бертӥз-а ни?- медсестра малы ке ӵыжектӥз. - А-а, олокытӥ ветлэ со перилэн нылыз. Тани ӝоген кык арня тырмоз. Такемалы огпол но ӧз ышылы на вал. Уйёсы вить-куать градуслэсь кезьыт кариськылэ ни, со ке пальтотэк, сапегтэк кошкемын. Ялан под градусом улэменыз-а, кыӵе ке кобелезлэн валесысьтыз потамтэеныз-а сӥзьыллэсь вуэмзэ но уг шӧдылы,- пиосмуртлэн куараяз вожпотэмез шӧдӥськиз. - Йырыд кур луоз коть уз, но мон тӥляд озьы улэмдылы чылкак абдрасько, Боря. Тонэ со ӧвӧлтэм кышноед пыдул лёгет интыын возе ук! Нёшто тыныд озьы яра?- процедураос лэсьтэм сярысь тетрадьзэ ксьтыса, лек шуиз Лидия Яковлевна.- Астэ зэмос пиосмурт кадь возьыны кулэ ни вылэм. Ярам, шузи-мази йырыныд "буш бекчелы" синмаськид. Но табере асьмеос йӧно арлыдамы вуим ни ук! - Озьы, Лидочка, шонер вераськод, мон ваньзэ валасько, нош номыр кареме уг луы. Милям ведь нылпиосмы будо. Мумызытэк соослы умой луоз-а?- пельпумъёссэ гинэ ӝутъяз Борис Петрович. - Да кыӵе со мумы?! Нылпиосыз, семьяез сярысь малпасал ке, арняен-арняен калгись пуны музэн ӧй калтыртысал! Паймисько мон тыныд, Боря. Малы астэ но, нылыныд пидэ но сокем улӥе пуктӥськод?! Ярам, аслыд, оло, озьы кельше - кышноед юмша бере, ачид но паллянэ кожалляны быгатӥськод. Нош нылпиослэсь психиказэс малы сӧронэз? Соослэн азьланьын улонзы сярысь коть малпаськы вал! Ведь Нюркадэ табере уд тупаты ни, номыр понна кыл кутытэк, воля ветлыны, эшшо ке вормытъяськыны со пиналысен дышемын. Да мон сыӵе керестэм кышномуртъёсты лудмем-кыршам пуныосты музэн ваньмытъясал,- тетрадьзэ пытсаса, Лидия Яковлевна ручказэ ӝӧк вылэ сач! сэрпалтӥз. Сое таӵе лекен Борис Петровичлэн та дырозь адӟылэмез ӧй вал. Та санаторие ужаны соос Лидаен одӥг аре лыктӥзы. Со дырысен - дас куать ар ини - сюлмаськонъёссэс дырын-дырын ог-огзылы кисьтыло. Лидочка санаторийлы матысь юртын витетӥ этажысь кык висъетэн квартираын улэ. Пиосмурт киос кулэ луыку, Лидия Яковлевна матысь тодмоезлы - Борис Петровичлы - вазиське. Воргорон но куректонзэ-кайгузэ, та оген кышномуртлы сяна, нокинлы уг ӝоктылы. - Ӧй, Лида, ӧй виысалыд - киыд ӧй ӝутскысал. Калгись, юись, ассэ гинэ яратӥсь ке но, Нюра адями ук... Мон тани мар малпасько: оло, милицие вазиськоно ни?- берло кылъёссэ Борис Петрович оло Лидия Яковлевналы, оло аслыз вераз. - Ма, мон сое ик ӝыны час пала валэктыны уг-а турттӥськы ни? Со йӧнтэм кышномуртлэсь анай луон правозэ мед талалозы. Фу, нылкышноос пӧлын сыӵе азьтэм- бертэмъёс вань шуыса мыным но возьыт,- медсестралэн синъёсаз кыӵе ке оскон тылгизьыос чилектӥзы кадь потӥз Борис Петровичлы. - Ӧвӧл, тон монэ шонер ӧд вала, Лида. Мон шуисько: кышноелэн ышемез сярысь ялыны кулэ, дыр. Нош маке умойтэм ке луэм соин? Вань документъёсыз дорын. Коньдон ватосме гинэ лушкаса кошкем,- нош ик аслыз гинэ тодмо малпанъёсаз выиз пиосмурт. Огшап чалмыт пукемез бере Борис Петрович ойгетыса пукон вылысь ӝутскиз: - Ярам, Лида, ӝегатэме понна вождэ эн вай. Тонэн вераськи но кӧня ке капчияз,- сюлэм бордаз кутӥськыса, пиосмурт секытэн вамыштӥз коридор кузя. Лидия Яковлевна маке вераны медэ на вал но, ымзэ шуак киыныз ӵоксаз: кулэтэмез пинь сьӧрысь медаз поты ни. Сотэк но мылкыдыз сураськемын-пожаськемын ни... * * * - Ку тӥ берлозэ адӟиды кузпалдэс - Чужанова Анна Петровнаез?- горд мыйыко капитан Борис Петровичез пыртӥз сӥсъяса сямен учкиз. - Ма, мон, капитан эш, заявлениям гожтӥ ук: дас куинетӥ сентябре ӵукна уже кошкыкум, со доре кылиз. Нош ӝыт бертӥ но, коркан нокин ӧвӧл. Владислав пимы гинэ садын, выль убо лэсьтыса, отчы боры пушъетъёсты мерттэ вал. Пичиосыз со вакытэ школаын луо на, соос кыкетӥ сменаын дышетско,- вераз Борис Петрович. - Озьыен, кык арнялэсь кемагес ортчемын, нош тӥ та дырозь в ус не дуете, гур вылады пукиськоды?- милиционер мыйыкъёссэ позыртӥз. Чужановлы азяз пукись капитан маин ке тараканлы укша кадь потӥз. Оло, ӵапак горд мыйыкъёсыныз-а котькытчы нырзэ чуртнась лулосэз тодаз уськытӥзы. Лушкем малпанъёсызлы Борис Петрович мыньпотӥз ке но, капитанлэн юанэзлы нод-нод валэктӥз: - Мынам кышноелэн сямыз йӧспӧртэмгес, капитан эш. Выль дусым яке ачиз выллем ӟизтыны яратӥсьёсты пумита ке, дорез сярысь вунэтэ. Зэм, таяз учыре укыргес кема юмша ни. Капитан кабинетаз пукись пиосмурт шоры дол-дол паймыса учке: кызьы озьы картэз уг тоды, кинэн, кытӥ ветлэ солэн кышноез? - Понимаете ли, гражданин Чужанов, таӵеез милям ужамы пумиськылэ ке но, туж шер. Кызьы шуэ ӟуч пословица, муж да жена - одна сатана. Озьы учконо ке, тӥ тодыны кулэ, малы кышноды дорысьтыз пегӟиз. Оло, тӥ сое жугылӥськоды яке жугонэн кышкатылӥськоды? - Бен кызьы пиосмурт йырыным кышномуртэ обидьыны дӥсьтом, капитан эш?- чылкак абдрам пиосмут нырысь-валысь ма вераны ик ӧз шедьты. Нош милиционер, тараканлэн кадь мыйыкъёссэ выльысь позыртыса, Чужанов шоры уката мыр-мыргес учкиз: - Ну, знаешь ли, улонын котькызьы луылэ. Иське, керетыны ӧд керетэ, кужымдэс кышнодылы мыжыкъёсыныды ӧд возьматэ? Озьы ке но, кышноды тӥлесьтыд пегӟиз? А ведь ӟеч кышномурт йӧно картэз бордысь уз кошкы, это факт. Так-так-с...- чиньыосыныз ӝӧк вылэ коканъяз горд мыйыко милиционер Борис Петровичлэсь пушсэ ик синъёсыныз портэ кадь.- Ну, ярам. Али мынэ, дорады бертэ, нош ми бускельёстылэсь юалляськом на. Учком, оло, маке интереснойзэ тодом. Оло нош, тӥ асьтэос ик Анна Петровнаез тово, а? Ну, акыльтӥз, понимаешь ли, солэн ассэ йӧнтэм воземез. И всё, тӥ сое тово?- кошкыны шуыса пукон вылысьтыз султэм Борис Петрович шоры милиционер кескич учкиз. Таӵе мыкылзэ кылыса, Чужанов онгромиз - пал кыл но вератэк, пукон вылэ берен лэзькиз: - Тӥ мар, капитан эш, серем кариськоды-а, мар-а? - Я, я, мын, пока лэзисько. Верай ук, тодом, эскером, одним словом, выясним. Адями - со вень ӧвӧл, турын зуродысь но сюроз, ха-ха-ха!- визьмо вераны быгатӥ малпаса, вылды, капитан гор-гор серектӥз. Нош Чужанов бӧрсьы ӧс ворсаськем бере юрттӥсезлы, егит сержантлы, вазиськиз: - Вот мар, Ванчо, давай-ко та дядяез чакла. Со мыным маке туж подозрительной потӥз. Со, видите ли, уг тоды, кытӥ кышноез калге... * * * Милицилэн ёросысь ёзаз пырамез бере но паймымон капитанэн вераськемез сярысь Борис Петрович сюрпиезлы со нуналэ ик ивортӥз. - Ма-алы?- абдраз Владислав, собере, кисыысьтыз ныркышет поттыса, ныр улзэ ӵушалтӥз. Ныркышет Чужановлы туж тодмо кадь йӧтӥз: "Кытысь таӵезэ ик адӟылӥ ай?.. Та носовик мыным мае ке тодам уськытэ. Нош мае?" Зэм, пиосмуртлы укыр кема малпаськыны ӧз кылды - сюрпиез куспетӥ кариз: - Мон, Петрович, тонэн кенешыны ӧдъясько вал. Кызьы тон учкиськод, мон одӥг дусыме доры улыны выжи ке? - Пыртосэ мынод-а, мар-а?- паймиз воргорон. Но сюрпиез сое сылон интыяз ик кортӵогаз: - А мар-о урод шат? Тон ачид но пыртос ук, Нюркалэн корказ улӥськод. Собере туала вакытэ... кинлэсь кин дорын улэмзэ уг чаклало ни кадь. Чужанов ӝыны нунал куспын кыкетӥзэ ма вераны ӧз тоды. Номыр вазьытэк, со пулъёсын висъям сэрегаз вамыштӥз. Нош егитэз "пока капитально бер ӧвӧл на", кылдэм югдурысь потон сярысь малпаськыны шӧтаз. Мани доры улыны мынон сярысь малпан Владиславлэн йыраз шуак лыктӥз. Та коркан егит пиосмуртлэн одӥг минут но ӝегамез уг поты ни, уката ик туннэ сюрбубиныз та вакчи вераськонзы бере. Татын солы, сюрпилы, ваньмыз акыльтӥз ни. Татын со нокинлы кулэ ӧвӧл. Песяез кулэмын ни. Сузэрез но выныз бубызы ваньысь уз быре... Славалэн таиз дусым шуонэз, ма, сокем ик синмаськымон ӧвӧл: мугорзэ но веськрес уд шу, арлыдын но аслэсьтыз куать ареслы бадӟымгес, ымнырын но сокем чебер ӧвӧл. Озьы ке но, та дырозь пумиськылэм нылкышноос пӧлысь, Манилэн сяна, огзылэн но асьсэлэн нимаз улон интызы ӧвӧл. Мирошка нылыз уз лыкты. Собере... тазьы учконо ке, Владислав ачиз но олокин ӧвӧл ук - сые ик мирошка. "Так што, ваньмыз капитально луоз", - лушкем малпанъёсыз егит муртэ буйгато, но со вакытэ ик сюлэмшугъяськыто. Мани сое уз кут шуыса, пиосмурт пичи но уг куректы. Нырысьсэ пумиськылэмзы бере ик нылкышно сое ачиз утчаны кутскем. Тӥни ук, кыкетӥзэ адӟиськыкузы та сярысь ачиз вераз.Валесаз но сое, Славаез, кыскыса сямен выдтӥз... Зэм, Мани сое вордскем нуналаз чортӥз вал, но... Бен таиз пумысен малпаны луоз, пичи мурт выллем котькинлы оскись кышномуртэ лӥятыны шуг уз луы. Вылаз ик, пиосмуртлэн гольык мугорызлэсь сыӵе мӧзмем - Слава бордаз йӧтскыса но ӧз вутты, нылкышнолэн мусторъёсыз чорк-чорк ӝутскизы. Таӵе кышномуртэ буйгатыны трос кужым но визь кулэ ӧвӧл... "Оглом вераса, маке-маке арбериосме, умойзэгес дӥськутме чемоданам тыро но туннэ ик Новостроительной ульчае шонто,- шифоньерын бугыръяськыны шӧтаз егит пиосмурт.- Капитально!" * * * Пичи "глазокетӥ" ӧс сьӧрысь тодмо ымнырез синйылтыса, Манилэн сюлэмыз икак луиз. Усьтоно-а, ӧвӧл-а шуыса малпаськыны тодаз но ӧй вал. "Вунэтымтэ, вунэтымтэ! Иське, шуд, ӝегатскыса ке но, мон доры лыктэ!"- таӵе малпанэзлы шумпотыса, солэн сюлэмыз уката золгес жугиськыны кутскиз. Нош пиосмурт киысь чемоданэз но кырым тыр сяськаоссэ адӟыса, кышномуртлэн йырыз ик поромиз - усьтэм ӧс азе ӧжыт гинэ ӧз погра. - Ӧд возьма вал-а?- чемоданзэ выж вылэ пуктыса, пиосмурт нылкышноез бордаз ӝиптӥз. Манилэн ныраз соку ик тамак но... шӧй зын пыризы. "Фу, кыӵе шимес зыно одеколонэз! Ну ничего, мон солы, кыӵе дунтэм-гонтэм "Шипр" интые ческыт зыно туалетной ву кузьмало",- Владислав борды юнгес ӝиптӥськыса, шудо пальпотӥз Мани. - Тон мыным вождэ уд поттӥськы-а?-кӧё-вӧё куараен вазиз Слава. - Ма понна? - Бен вордскем нуналад лыктымтэе понна. Ӧй быгаты, капитально, ужъёс трос вал,- писэй выллем нургетэ пиосмурт.- Видишь ли, командировкае ыстӥзы. Кык арнялы. Толон гинэ берытски. Нош туннэ тани тон доры пыраклы лыктӥ. Уд-а улля? Манилэн тодаз но ӧз лыкты, кыӵе командировкае ыстыны быгато "Металлург" эмъяськонниысь азбар ӵужисез. Зэм, кылем пумиськыкузы Владислав вераз, азбар ӵужем сяна, пе, музыкальной ужен вырисько на - кызьы шуо, массовик. Пинал дыръям нылпи творчествоя юртын арганэн но гитараен шудыны, эктыны дышетэмзы, пе, улонам яра ини. - Соин ик ӵош ужась эшъёсы куддыръя Артист шуыса вазьыло. Капитально, озьы-а?- серектӥз Владислав. Мани пиосмуртлэсь ассэ вылӥегес пуктыны турттэмзэ ӧз вала. Ма, шӧдэмез ик ӧз пот. Яратон уго (ай, яратэм потон-а?) синтэм-пельтэм, шуо. Тямысэтӥ классын дышетскись Мани та сярысь кылбур но пӧраз вал: Тон эн шуд чебер синъёсыныд, Тодӥсько: сюлмыд ӟырдыт. Эн вера чебер кылъёс - Со ӧвӧл оскон тылъёс. Яратӥд ке нош сюлмысь, Адӟо сое тон синмысь. Яратон кылтэм-ымтэм, Нош сюлмысь со ӵушонтэм... Лобӟыса лыкто дорад, Оскыса учко синмад, Но уг вера гажамме, Шат уд вала тон монэ? Та кылбур нергезэ Мани Петькалы сӥзиз вал. Но пичи дырысь эшезлы тӥни ӧз оскы - Иван кырсиезлы оскиз, нош табере Владиславлы оскемез потэ. Мар карод, улон ӵем дыръя адямиез витьымтэ визылъёсаз пылатэ... - Тон?! Мон доры?! Пы-ыра-аклы?- воргорон бордысь ог вамыш чигнаса, нылкышно амалтэк могӟылыны шӧтаз. - Бен уго, дорад, капитально. Яке мон тыныд кулэ ӧвӧл ни-а? Оло, мукет пиосмурт валесысьтыд интыме занятьтӥз?- Тазьы шара юаз ке но, ас понназ Владислав мукет сямен малпаз: "Кинлы кулэ меда та "пурысь шыр" выллем нодтэм кышноос?" Бен, со ачиз но татчы ӧй лыктысал, улоназ одӥг "но"-ез ке ӧй кылдысал. Та "но" сярысь мильтонъёс, озьы ик сюрбубиз, бускельёссы, Мани медаз гинэ тодэ вал. Амалыз ке луысал, пиосмурт ачиз но та сярысь тодаз ӧй вайылысал, но со кӧшкемыт суред ӧчкарем кадь котькуд уе вӧтъёсаз пыре... - Ма, пыраклы шуиськод ке, ортчы. Ӧс азьын серьёзной ужпумъёс сярысь уг верасько,- пиосмуртэ сьӧраз чортыса, Мани висъет пала вамыштӥз. Укно дорысь ӝӧк вадьсы мыкырскем нылызлы вазиз:- Танюша, Славагай асьмеды вунэтымтэ, пумита сое. Нылаш воргорон шоры мыр-мыр учкиз. Ас понназ огшап малпаськемез бере шуак юаз: - Нош тынад вӧтъёсыд кыӵеесь? Воргорон ма шуыны ӟудӥз. Огшап онгромыса сылэмез бере нёжтӥз: - Ну-у, капитально-о! Вӧтъёс пӧртэмесь луо. Тани берло жыре весь кӧшкемыт вӧтъёс адӟисько. А малы со тыныд? Кукъёссэ пукон вылысь лэзьыса,Таня пиосмурт азе султӥз но киоссэ кусказ тыриз - быдэс вылтусыныз "ну-ко, ма вералод меда?" шуыны дасяськиз кадь. Собере юаз: - Нош со вӧтъёсыд буямын-а, ӧвӧл-а? Табере кыкез ик арлыдоос ог-огзы, собере нылаш шоры паймыса учкизы. Соослэн уго тодазы но ӧй вал вӧтъёссы сярысь малпаськыны. Нош пинал мурт валэктэмзэс кема возьманы ӧз чида, нод-нод шуиз: - Валяпай вераз: мукет адямилэсь куректонзэ яке шумпотонзэ валаны быгатӥсь муртлэн гинэ вӧтъёсыз трос буёлоесь луо. Монэным эшъяськемед потэ ке, вӧтъёстэ буёлоесь карыны тыршы. -Веранзэ йылпумъяса, нылаш берен ӝӧк вылын кыллись векчи книгаос но фломастеръёсыз пала берытскиз. Нош Маниен Слава ог-огзылы пальпотӥзы но, Танялы люкетыны дӥсьтытэк музэн, шыпак пӧраськонни пала вамыштӥзы.Шонергес вераса, кышномурт пиосмуртэ китӥз кутыса сьӧраз валтӥз. Нылызлэн сямыз уго, ачиз пичи на ке но, лекос йӧспӧртэм. Газетын ужась Валяпаезлэсь-а, мар-а сыӵе визьнод басьтэ? - Чай юэмед потэ-а?- юаз Мани, пиосмуртэ шудэн чилясь синъёсыныз нуныяса. - Чайлы бен кин пумит луоз? Только нырысь вера, кытчы та чемоданме пуктом? Славалэн чемоданэз али но бур кияз на шуыса, Мани али гинэ адӟиз - пияла банкае пуктэм сяськаосты зынъяса, оло, йырыз поромем. - Ой, вождэ эн вай. Пырем берад сяськаосты кухняе пуктыны дыртэменым чемоданэд сярысь воксё вунэтӥ. Пинь сузян щёткадэ, бритваостэ ванное гинэ интыя, отын уродос жажы вань. Нош дӥськуттэ чемоданад ик кельты но пыронниысь "пеймыт комнатае" пукты - дӥськут ошылын шифоньере ӧвӧл,- чай пуктонзэ вунэтыса бызьылыны шӧтаз нылкышно. Манилэн эли-кеби выремез шоры учкыса, Владислав чылкак буйгаз: "Иське, со монэ уз улля. Капитально! Оло, татын со кӧшкемыт вӧтъёслэсь мозмо". * * * Слава дорысьтызы чемоданэн потыку, Борис Петрович картошка пала вал. Натӥен Ондӥ ӝоген школаысь вуозы, нош ӵукна пӧзьтыса кельтэм ӝукез сюрпиез сииз - йӧлын сезьы ӝук уго ваньзылы яра. Дыртыса выронъяз, лэся, пиосмурт пӧлызэ вандыны шедьтӥз. - Кытыч каризы ай таос созэ, кузь бамо пуртэз?! Тазэ сэрпалтонэз гинэ кылем на,- ужзэ уретыса, Борис Петрович ӟуз вир виясь пӧлызэ бинён утчаны шӧтаз. Со вие корказьын жингырак вазиз. Пиосмуртлэн сюлэмыз нёркак луиз: оло, пе, кышноезлэн калгыса кӧтыз тыриз но со бертэ ни? Нош ӧс куспын, Нюрка интые, бускель Зинка адӟиськиз. Син улъёсаз "фонарьёс" чиляло. Зэм, бур палысез далайгес пуктэмын ни, лэся, - вожектыны ӧдъямын. Кышномуртлэн суд йырсиосыз куж кадь ошиськылэмын. Бордысьтыз кӧш зын паке. "Ведь ньыльдонзэ но ӧз тырмыты на - чылкак песянайлы укша ни. Ма, куд-ог пересь кышноос таин артэ принцессаос кадь адскозы ай",- кышноезлэн эшез Борис Петровичлы юрӟым потыны кутскиз. - Пятро-ови-ич!- Зинкалэн кылыз но, пыдъёсыз музэн ик, ӵемтыло. - Мар-о вералод, Зинаида Микитична? Нош ик лосьон басьтыны коньдонэд уг окмы-а?- пӧлызэ бинён куспетӥз юаз кузё. - А вот ӧд тоды, в натуре!- ӟазырес куараен серектэмъяськиз Зинка.- Мон тыныд верало, кытысь Нюркаез утчано. Только тон мыным со понна дас сизьым манет сётод. Ваще, йыр висе, в натуре! А тынад кышноед, сука, мынэсьтым кобельме талаз. Ну ничо, мон соин расчитаюсь, блин! - Ма, мон соку ик юай ук: коньдон кулэ-а? Нош тон... - Ӧв-вӧ-ӧл! Коньдон мыным кулэ ӧвӧл, в натуре! Просто йыр висе, макмырез веськатоно вал. А эшшо Нюркалы воже потэ. Таӵе йӧно картэз ваньысь Пал пыд доры кошкиз, сука! Со озьы бере, оло, табере асьмеос валчеяськом,а, Петрович, ха-ха- ха!- кудӟем кышномурт пиосмурт доры матэктӥз. - Ӵок ни ай, Зинка, мыным Нюркаен улыса но акыльтӥз ини. Тӥ кышноеным бур но паллян сапегъёс выллем,- чигназ Чужанов. Со кожа вал, кышномурт тусо бакча сульдэр тазьы верамез пумысен куатаськоз но кошкоз. Нош Зинка кӧтсэ урод карыны ӧз ик малпа: - А тон, Петрович, токма монэ палэнтӥськод, в натуре! Соиз зэм, ми Нюркаеныд - огпаръёс. Соин ик кобельмы но одӥг. Так вот, замангес кызь манеттэ вай но мон тыныд верало, кыӵе адресъя шалавадэ шедьтод. Та акылеслэсь озьы гинэ уд мозмы шуыса, пиосмурт штан кисыысьтыз дас манетсэ поттӥз: - Ме, таин тыныд макмыръяськыны тырмоз. Табере вера, кытын улэ со Пал пыд шуонды? - Вот спасибочки, в натуре, зарни пиосмурт тон, Пятрович! Нош Нюркадэ Татарской ульчаысь Пал пыд Петька дорысь утча. Петькалэсь кышнозэ пери шуккем - пиосмуртэн кӧламез но уг лу ни. Ачиз Петька оло Афганын, оло Чечняын пал кук кылем, в натуре. Нош шор кукыз сёровно зол ужа, ха-ха-ха!- дас манетлыксэ кырмыса, Зинка ӧс сьӧры ышиз. Нош Чужанов малпаськонэ усиз: "Оло, туннэ ик со Петька доры ветлоно? Только уйлы пужит муртъёс дортӥ ветлыны умой ӧвӧл кадь. Вылаз ик, нылпиос пеймытэн огназы кыльыны кисыралозы. Славка но ӵапак кошкиз..." 5 Ньыльдон аресъем Анна Петровна Чужановалэн чиптэм-чаптэм ышемез сярысь ужез сэрттыны-пертчыны Музыкантов следовательлы сётӥзы. - Да мазэ отын эскеронэз? Ваньмыз валамон: юмшась кышнозэ мыжыкеныз дышетыкуз, понимаешь ли, вожась картэз сое тово, вииз и всё,- горд мыйыко Траткановкапитан следовательлы аслэсьтыз та учыр шоры кызьы учкемзэ пӧсекъяса валэктыны шӧтаз.- Таӵе историосты человеческтво дунне кылдэм дырысен тодэ, понимаешь ли! Со сьӧд Отеллодэ ик басьты... - Озьы гинэ ке луысал, Иван Мартемьянович...- ас понназ маке малпаськыса вазиз следователь. "Вазиз" интые кырӟаз шуыса шонергес луысал, дыр. Музыкантов следовательлэн куараез уго нимтулызлы туж тупа - Александр Анатольевич векчи нёжъяса вераське. - Самой секыт ужъёс - кутсконысеныз ик валамон ужъёс. Ваньмыз валамон кадь, а кырмиськыны номыр борды. Ярам, шуом, зэмзэ ик, ачиз Чужанов виноват. - Не виноват, понимаешь ли, а уголовник,- нош ик ӟырдам самовар кадь шиетыны, мыжыкъёсыныз выретыны кутскиз капитан. - Ӧвӧ-ӧл, Иван Мартемьянович, шонер уд вераськыю Малпаськы ай, Чужанов кышнозэ вожаса вием ке, кышномуртлэн шӧйыз луыны кулэ ук. Нош похоронной бюроосын но, больницаосын но пцусъемын ӧвӧл, куатьтонэтӥ арын вордскем Анна Петровна Чужанова, ныл фамилиез Митрофанова, сыӵе-сыӵе нуналэ виемын но отчы-отчы ватэмын шуыса,- капитан палась лыктӥсь тамак ӵынэз котырысьтыз палэнтыны турттыса сямен Музыкантов кык киыныз ик омырез шоназ: ачиз тамак уг кыскы бере, муртлэн зыныз- ӵыныз но уг кельшы уго. - А со кутӥз но лушкемен кытчы ке сэрпалтӥз, понимаешь ли, кышноезлэсь шӧйзэ,- тамак ӵынзэ пушкысьтыз кульчоен-кульчоен лэзёнъяз шуиз капитан. Таяз учыре но солэн мыйыкъёсыз тумошо урдӥськизы - соосын омырысь мае ке шӧдэ, кожалод. - Ну-у, тон эшшо шу на: мешоке поныса, Оӵ прудэ куштӥз,- серектӥз Александр Анатольевич. Нош Траткановлы следовательлэн кылъёсыз уката узатэм кадь йӧтӥзы, лэся: - А тон эн серекъя, понимаешь ли. Кылем арын ачид расследоватьтӥд вал кадь, кызьы кышномурт психически висись картсэ, патер понна виыса, садоогородаз ватэм. - Бен отын кышноез но висись вылэм ук,- нёжтӥз следователь.- А таяз учыре санаторийлэн кивалтӥсьёсыз но, ӵош ужась эшъёсыз но, бускельёссы но Борис Петрович Чужановлы туж умой характеристика сйто: лачмыт, трос уг юы, тамак уг кыскы, адямиосын котьку лякыт вераське, нылпиоссэ яратэ. Вот озьы, Иван Мартемьяновиче. - Да-а?! А вот сержант Косин, понимаешь ли, ас синъёсыныз адӟем, кызьы со тыныд яратоно Чужановед Татарской ульчаысь 7 номеро коркан улӥсь пал куко воргоронэз гадьтӥз сэзъям,- "яратоно" кылэз нимысьтыз пусйыса вераз капитан. - Кин со пал пыд воргорон? Малы тазэ мыным азьло ик ӧд вералэ?- "кырӟаз" следователь. - Татарбазарын Пал пыд Пётрез ваньмыз тодо. Афганистанын, понимаешь ли, служить каремын. Значитца, герой. Отын ик, понимаешь ли, огзэ пыдзэ ишкалтэм. Зинаидалэн, Чужановъёслэн бускельзылэн, мадемезъя, Пётр но Нюрка, то бишь, Анна Петровна Чужанова, видишь ли, любовникъёс вылӥллям,- капитан следовательлэсь юанзэ гинэ возьмам, кожалод. Со Пётрлэн кышноез, нылпиосыз вань-а?- чоркак кариськиз следователь. - Кышноез, понимаешь ли, ог вить ар живым трупом кылле ни, пе, то есть парализованной. Пётр сое пуньыен сюдэ, секта. Дом инвалидове келяны жаля. Нылпиоссы ӧвӧл, кызьы шуо, Бог не дал,- тамак пумзэ сэрегысь жаг куян куянние сэрпалтыса, мыйыксэ позыртӥз капитан. - Ну и Чужанова отчы вуылэм-а? - В том и дело, Саша, вуылымтэ. А Пётр, понимаешь ли, сое возьма вылэм. Нюрка пенсия басьтон нуналме тодэ, пе, со вакытлы ик лыктэ. А таяз толэзе, то есть кылемаз луэ ини, лыктымтэ, видишь ли. Всё просто: Чужанов тодэ вал, толэзьлэн кыӵе вакытаз кышноез ышылэ. Вот и принял меры, понимаешь ли,- аслаз нодлыко луэмезлы шумпотыса выллем, капитан пукон вылын назьыльскиз но киоссэ йыр бераз кариз. - Так-та-ак...- нёжтӥз следователь. - Ну-у, а Пётрлэн кышноез ма шуэ? - А со, понимаешь ли, номыр уг вера. - Кызьы озьы уг вера?- паймиз Музыкантов. - Очень просто. Со, видишь ли, парализованной, а значитца, кылтэм-ымтэм. Натурально живой труп, только синъёсыныз гинэ сопала, тапала, понимаешь ли, бергало. - Соку бускельёссылэсь юалляськоно вал,- чиньыосыныз малы ке ӝӧк вылэ коказ следователь. - А ми так но юалляським, понимаешь ли. Но соос Нюркаез кылем толэзе татысь тожо адӟылӥлялмтэ. Вот так вот, понимаешь ли. Нош азьло ветлылэмъёссэ тодо. Татарскойысь ваньмыныз сямен улӥсьёсын со керетэ вылэм. Етӥз кышномурт вылэм, лэся, понимаешь ли,- капитан, пуконысьтыз султыса, ӝӧк вылын сылӥсь графинысь вуэз стаканэ лэзиз но гуч-гуч юиз: - Со тамакен, понимаешь ли, туннэ ым пушме сутӥ ни, лэся. "Эн кыскы со ядэз, соку нокытӥдэ уз сут",- малпаз Александр Анатольевич. Нош шара вазиз: - В общем, свидетельёсты утчано на. Кстати, малы ай асьмеос та дырозь потерпевшойлэсь бадӟым пизэ ӧм допросалэ на? - В чём же дело, понимаешь ли, гожты повестка, ӧть кабинетад. Правда, со али сюрбубиныз уг улы - тожо дело тёмное. Но азьло сямен ик санаторийын дворником ужа и на полставки культмассовиком,- вераськон йылпумъяськиз шуыса, вылды, капитан ӧс пала сётскиз. Нош следователь пумтэм-йылтэм малпанъёсаз выиз. * * * Следователь доры ӧтёнэз Борис Петрович сюрпиезлы куинетӥ нуналаз гинэ сётыны быгатӥз. Слава уго азбар ӵужыны вазь ӵукнаосы ветлэ, нош культмассовой ужаз - кырӟаны яратӥсь кӧня ке кышномурт шутэтскисьёсын одӥг час пукыны - ӝытъёсы вуылэ. Со вакытэ ӵужанов дораз дыртэ ни: школаысь бертон азязы нылпиослы сиён дасяно, нош ӵукна Натӥен Ондӥлэсь гуртэ сётэм ужъёссэс кызьы