Юлия Байсарова Лымы усе - Гань гинэ лымы усе. - Ойдо мед усёз. - Музъеммес ини соге. - Ойдо мед согоз. Толалтэ солэн но, дыр, Шутэтскем потэ. Асьмелэн но ук куддыр Тэк улэм потэ. Йыртэм ыж Косӥзы монэ султыны - Мон султӥ. Косӥзы монэ мыныны - Мон мынӥ. Косӥзы монэ лэсьтыны - Мон лэсьтӥ. Собере монэ уллязы, Йыртэм ыж тон, шуизы - Мон кошки. Вӧтасько Вӧтасько - мон бызисько, Аръёс пыртӥ бызисько. Финише вуытозям, Мар но ай ӧвӧл азям. Гурезьёс, нюкъёс, шуръёс, Йӧзоръёс но лек тӧлъёс. Сяськаё чебер возьёс, Шунытэсь зоръёс. Быгто-а чиданы, Ваньзэ ортчыны. Марафон кадь бызёнэ Туж шуген мынэ. Адӟисько ни финишме, Мычисько кадь киосме. Нош сои азьлань мынэ, Ул на, бызь, шуэ монэ. Пӧсь шунды кадь луоно Весь пурысь ке улоно, Туж чаляк пересьмоно. Номыре но адӟытэк, Чик пытьы но кельтытэк. Пӧсь шунды кадь луоно, Кенжоно но ӝуано. Вот соку улӥ, шуод, Вот соку пытьы кельтод. Леонид Емельянов "Ӟеч визь-кенеш котьку дуно" Озьы нимам Герман Алексеевич матысь эшъёсыз сярысь тодэ ваёнъёсын поттэм книгазэ. Мон сое выльысь лыдӟи быдэсак но эшшо мургес валай Герман Алексеевичлэсь сюлмысьтыз потэм малпанъёссэ, сюлмаськонъёссэ. Адямиез, асьмемын артэ улыкуз, уноез ӟеч-ӟеч валаса, дунъяса ум вуттӥське. Улэ но ужа. Тырше адями, семьяосыз шудо-буро мед улозы, эшъёсыз мед гажалозы, шуыса. Зэмзэ но, Ходыревез гажасьтэм адямиосыз, тужгес но покчи лыдӟисьёсмес, шедьтыны шуг луысал но луоз азьланяз но. Солэн ӟырдыт но лякыт лул-сюлэмыз ваньмызлы паськыт усьтэмын вал. "Дась лу!" газетын ужакуз, "Кизили" журналэн кивалтыкуз кӧня удмурт нылпиослэсь сюлэмъёссэс кенӝытӥз гожъяськон удысэ. Уноез соос пӧлысь табере луизы тодмо гожъяськисьёс, нош куд-огез зэмос писательёс. Мон журналист, писатель уже бер басьтӥськи. Зэм, Можга педучилищеын но Удмурт пединститутын дышетскыкум огшоры информациос но пичиесь статья нергеос йӧндырылӥ ик. Нош Герман Алексеевичен тодматскеммы бере, со котькуд пумиськылыкумы мылкыдме бугыръялляз: тон, пе, малы веросъёс гожъян бордын уд выриськы, эн кепыра, пӧрмоз тынад. Солэн куремезъя "Дась лу!" газетэ нылпиослы кӧня ке веросъёс гожтӥ. Герман соосты, кудзэ ачиз волятъяса, кудзэ, мыным кенешъёс сётылыса, выльысь ужаны косылӥз. Тӥни озьы, Герман Алексеевич, монэ но кыскиз гожъяськон уже. Куатьтонэтӥ аръёсы мон басьтӥськи асьмелэн сӥё-дано землякмы авиациысь Маршал Ф.Я.Фалалеев сярысь книга бордын ужаны. Сое тодыса, Герман Алексеевич шуиз: - Умой луысал. Маршалмылэн улон-вылон сюресэз сярысь покчи лыдӟисьёсмылы верасалыд ке, Леонид Петрович. Тӥни озьы, Ходыревлэн дэмламезъя Маршал сярысь документальной повесте быдэсак сямен нырысь потӥз "Дась лу!" газетын. Со вал мынам творчествоям нырысетӥ бадӟым вамыше. Кин тодэ, Герман Алексеевич ӧй ке мылкыдме бугыръясал, эшлыко мылкыдэн ӧй ке юрттысал, гожъяськон борды, оло, ӧй но кутскысал. Соин но мыным туж дуно Герман Алексеевичлэн тодэ ваёнъёсын книгаез вылэ тазьы гожтэмез: "Гажано землякелы, айбат но сэзь журналистлы но писательлы Леонид Петрович Емельяновлы творческой сюрес вылад ӟечез таляк мед луозы. Ноку эн вунэты - ӟеч визькенеш котьку дуно. Таза но чырткем лу! Эш мылкыдын Геоман Ходырев. 11 декабре 1989 аре. Ижевск". ...Удмурт радиоын ужакум, Герман Алексеевичен ми ӵош ветлӥмы Дэбес ёросэ командировкае. Со аръёсы Дэбес черкогуртын улэ вал сӥё-дано кылбурчимы Быдӟым Отечественной ожез ортчем ветеран Степан Павлович Широбоков. Командировкаын вань чаклам ужъёсмес быдэстэммы бере, ми Герман Алексеевичен Степан Павловичен пумиськыны малпамы. Шонерзэ вераса, ожысь ветеранэн, тодмо кылбурчиен пумиськонмы луиз командировкаын лэсьтэм ужъёсмылэн самой устоез но дуноез. Дэбесын люкам но дасям материалъёсмы ортчизы эфире. Герман гожъяз "Дась луэ!". Соосты табере нокин но тодаз но уз вайы ни. Нош Степан Павлович сыӵе задор мылкыдын, сюлмысьтыз ик потӥсь малпанъёссэ мадиз кышкыт ожын ортчем сюрессэ. Сое мон гожтӥ магнит плёнка вылэ. Но бӧрысь Степан Павловичлэн малпанъёсыз чузъяськизы Удмурт радио пыр. Али но со тодэ ваёнъёсыз утисько Удмурт радиолэн зарни фондаз. Кӧня ке ар ортчыса, Быдӟым ожлэн юбилеез азьын мон малпай Степан Павловичлэсь тодэ ваёнъёссэ выльысь радио пыр сётыны. Нош кыӵе толэзе, числае пумиськылӥм ми соин Германэн, блокнотъёсме бугыръяса, таки ӧй шедьты. Соку жингыртоно кариськи Герман Алексеевичлы. "Али ик, - шуиз Ходырев. - учко архивелэсь картотеказэ но верало". Ивортӥз, ку ми пумиськылӥм С.П.Широбоковен. Бергес ини Герман Алексеевич возьматӥз мыным ӝикыт люкам архивсэ но картотеказэ. Мон пайми сыӵе усто люкам но радъям архивлы. Ходыревлэсь адӟем карыса, мон но малпай архивам люкам материалъёсме радъяны. Уг ваты, со акылес ке но, туж кулэ уж. Но та ужме али но пумаз-йылаз ӧй вутты на. Герман Алексеевичен ми котьку но умоесь, эшлыко кусыпъёс возим. Ӵем кылдылӥз Вараксино птицефабрика дорысь пӧртэм массивъёсы интыяськем сад-бакчаямы ӵош мыныны-бертылыны. Берло аръёссэ ми улӥмы одӥг ульчаын - Холмогорова нимо. Юртъёсмы но огмылы-огмы туж матын. Мон ноку но уг вунэты берпуметӥ пумиськонмес. Со вал 1995 аре Удмурт республикаысь Госсоветэ быръёнъёс ортчем бере ик. "Север" шуыса микрорайонысьтымы бырйисьёс пӧлын ми удмурт писательёс, журналистъёс, артистъёс (та "Северамы" соос трос гинэ уло) бадӟым уж нуим сӥё-дано удмурт писательмылэсь-классиклэсь Геннадий Красильниковлэн пиез, Удмурт университетын ужась тодосчи Алексей Геннадьевичез депутатэ быръён понна. Тыршеммы юнме ӧз луы. А.Г.Красильников вормиз ог дасо кандидатъёсыз но луиз милям депутатмы. Мон солэн доверенной адямиез вал бере, улӥськом но одӥг юртын, Алексей Геннадьевич ӝытпал жингыртӥз но куное лыктыны ӧтиз. Час но вераськыса, сур юыса ӧм вуттэ, кызьы жингыртӥсь луиз. Герман Алексеевич вылэм. Бертӥсько, пе, вокзалысь, пиме келяй Москвае. Лумумба нимо калыкъёслэн эшъяськонзы нимо международной университетысь студентэз. Ми со ӝытэ кема пуким на вераськыса. Малы ке но Герман Алексеевичлэн мылкыдыз секыт вал. Ми малпамы: пиеныз люкиськемез бере сыӵе мылкыдыз, дыр, шуыса. Тӥни сыӵе вал Герман Алексеевич берпуметӥ пумиськонамы. Ӝоген секыт ивор вуиз. Уноезлы сое тодӥсьёслы но со вал секыт ивор. Туж вазь кошкиз улонысь удмурт калыклэн гажано писателез Герман Алексевич Ходырев. Со асьме дорысь кошкиз ке но, кылизы солэн трос гожъямъёсыз. Соос али но, дауръёс ӵоже но улозы удмурт калыклэн сюлмаз. Леонид Фёдоров Улытозяз уно эшъёс утчаз "Котькыӵе ужан удысын мед луод, вӧзад ӟеч мылкыдын визьмась, валэктӥсь, бурдъясь, ӟеч адями вань ке, улон ик шулдыргес, инвис ик паськытгес йӧтэ. Суй- пыд уг юскиськы, уката кужмогес ужам потэ". Та кылъёс басьтэмын Удмуртиысь калык кылбурчилэн Герман Ходыревлэн тодэ ваёнъёсысьтыз Г.Д.Красильниковлы сӥзем очеркысьтыз. Малпасько, сыӵе мылкыдын ортчиз Герман Алексеевичлэн аслаз улонэз но. Та ласянь Герми эше туж шудо вылэм - пинал дырысеныз вӧзаз визьмась, бурдъясь адямиос вылӥллям. Собере со егит дырысеныз ачиз трос эшъёсызлы-гожъяськисьёслы мылкыд сётӥсь, визьмась, ӟеч адями луиз. Калык верамъя, ӟечез ӟечен ик берытске уго. Сое кылбурчилэн вань улонэз возьматэ. Кызьы меда будӥсь пи Герми Ходырев, школаын, собере педучилищеын дышетскыса, туж вазь валаз, поэзия - солэн сюресэз, быръёно удысэз, шуыса? Паймымон зол вал, дыр, мылкыдыз но быгатонлыкез. Арысь аре азинскиз талантэз. Вордскемын суро-пожо семьяын, гуртысь ӟуч дышетӥсьлэн пиез. Нош Гера удмурт кыллэсь чебер, жингрес луэмзэ шӧдэм ини, анаез но трос удмурт эшъёсыз луыса. Собере пичиысен ик туж трос лыдӟиськем. Мон паймыса тодам вайылӥсько Германлэсь пинал дырысеныз котьмаин тунсыкъяськемзэ, трос поэтъёсты, удмуртъёссэ но, мукет калыкъёслэсь но тодыны тыршемзэ, гожтэтъёс пыр трос визьмо, дано адямиосын кусып воземзэ, собере соосын пумиськылэмзэ, озьы ик балалайкаен туж чырткем шудэмзэ. Сое котьку ӟеч мылкыдын кылзӥсько вал. 50-тӥ аръёс кутскыку кыкнамы дышетским педучилищеын, мон - Ижевскын, со Можгалан дышетсконзэ мынэсьтым кык ар азьло быдэстӥз. Монэ со ачиз шедьтӥз, шуыны луоз, дыр. Со вакытэ Гера газетъёсын печатласькылэ ни вал, нош мынэсьтым "Советской Удмуртиысь" кӧня ке гинэ чуръёсме адӟыса, педучилищеямы гожтэт ыстэм, милемын, удмурт пиосын, эшъяськон мылкыдзэ вераса. Собере, дыр ортчыса, Гера вуиз Ижевске, Пастухов урамысь печать юртын писательёслэн кыӵе ке но кенешазы нырысьсэ пумиським, вуылӥз Можгалась эшмы милям общежитиямы но. Тодӥсько, Гера соку ик ини тросэзлы гожъяны кутскисьёслы эшъяськыны кизэ мычылӥз. Улон сюресъёс кыкнамес вуттӥзы Удмурт пединститутэ, улӥмы одӥг общежитиын. Вуж тодмоос сямен, ӵем пумиськылӥм. Ӵош хоре ветлылӥм, пӧртэм огазеясь ужъёс шедьылӥзы. Мынэсьтым кык ареслы бадӟымгес эше соку ик кылъя но литературая, историяя факультетамы тодмо ни вал кылбуръёс но кырӟанъёс гожъяны тыршись балалайкаен шудыны яратӥсь луэменыз. Туж капчи но вазиськись, эшъёсыныз котьку огъя кыл утчась адями котыраз пиосты но нылъёсты ӝог люканы быгатэ вал. Институтэ пыремезлэсь азьло ужаса вуттӥз "Егит большевик" (отӥяз "Удмуртиысь комсомолец") газетын. Удмурт газетъёсын кусып возиз, нылпиослы кылбуръёссэ поттылӥз. Сюлме но йырсазе яркыт кылизы таӵе нуналъёс. Институтлэсь нырысетӥ курссэ йылпумъяме бере, 1955-тӥ арын инвожо толэзе, ми, пӧртэм факультетъёсысь но группаосысь 36 нылъёс но пиос, туристъёс луыса, Кам дуре походэ потӥмы. Огшоры гинэ туристъёс ӧй вал ми, ваньмы кадь ик самодеятельносте, удмурт хоре ветлӥсьёс, кырӟаны-вераны дышетскисьёс. Азьветлӥсьмы - усто грезьгурчи - баянист, институтэз соку гинэ быдтэм мурт Геннадий Павлов. Солэн бур киыз луиз, дыр, Герман Ходырев, балайкаеныз жадёнэз валатэк крезьгур кисьтӥсь. Тазьы мынон сюрес выламы шедем гуртын концерт но возьматӥм, собере Кам дуре слётэ пӧртэм интыосысь туристъёс люкаськизы. Соос могӟетъёсты вормылыны но кырӟаны-вераны быгатэмзэс возьматыса ӵошатскизы. Кам пала лыктыкумы, Шаркан ёросысь 15 иськем ӵем нюлэс пыр потоно луиз. Сюбег кужен сюрес вылтӥ. Ваньмес чибиньёс одолизы, соос миллион вал, дыр, шапрак бамъёсмы вылэ пуксё но виръёсмес юо. Киосамы ваньмылэн вож веникъёс, бам вадьсытӥ шонаськытэк, одӥг вамыш но уд лэсьты. Нош Ходыревлэн чиньыосыз ялан балалайка вылтӥз бызьыло, веник кутэмез уг луы. Нылъёс со котырын такмакъёс кырӟало но Германлэсь бамъёссэ дугдылытэк веникъёсын маялляло, пумен крезьгур чузъяське. Тӥни кыӵе етӥз но крезьгурез, кылан-буранэз яратӥсь вал Герман Ходырев егит дырысеныз. Со котырын котьку шулдыр вал, мӧзмыны ӧз сётылы. Яратэ вал маскаръяськыны, куалтыр поттыса вераськыны. Капчи мылкыдо эш вал студент дыръяз но, ужан аръёсаз но. Но, валамон, ялан маскаръяськыса гинэ ӧз ветлы, тодӥсько, юн малпаськись тусо луэмзэ но. Дышетсконэз сокем капчиен ӧз сётӥськы, шӧдске. Вакытэз сыӵе вал, коньдонэн юрттӥсез ӧвӧлэн секыт дыръёс но луылӥзы. Нылпиослы гожъясь усто кылбурчи луэмзэ Герман возьматӥз студент дыръяз ик. Со аръёсы потӥзы ук чебер вылтусо, нылпиосты ӟеч нодъясь кык книгаосыз - "Милям азбарамы" но "Кызьы мон будӥ". Бадӟымесь быгатонлыкъёсыз соку ик шӧдӥськизы. Институт бере газетъёсын ужаса, Г. Ходырев юн журналист но, писатель но ним басьтыны быгатӥз ни, 1963-тӥ арын журналистъёслэн но, писательёслэн но огазеяськонъёсазы пыриз ни. Ялан азьлань мынӥз, нылпи литератураез азинтыны тыршыса. Туж тодэ лыктылэ солэн "Советской Удмуртиын" "Пинал куараос" бамез поттон бордын тыршыса ужамез. Со аръёсты Гера "Дась лу!" газетын ӵош ужан дыръямы но ӵем тодаз вайылӥз. Маин ке но вунэтонтэмесь кылизы соос писательлэн улоназ но, мынам но, лыдӟисьлэн. (Аслам творческой ужъёс борды рос-прос кутскыны мылкыды ляб на вал, кужымелы ӧй оскы, лэся. Куинь ар шклаын ужай. Лудорвайын дыръям удмурт писательёс гурт калыкен пумиськон ӝыт ортчытӥзы. Нош Германлэн 60-тӥ аръёсы ужъёсыз ӟеч ӧръяськыса мынӥзы. Редакциын со котырын эшъяськыса но ог-огзэс валаса ужазы Семён Перевощиков, Николай Васильев, Александр Вотяков но мукет гожъяськисьёс. Ваньзы сярысь Германлэн тодэ ваёнъёсыз гожтыса кельтэмын. "Советской Удмуртия" газетлэн редакцияз та куинь эшъёс куспазы туж тупаса но ог-огзэс валаса ужазы. Ӵем дыръя соос ӵош чуръёссэс но кылдытъязы, ог-огзылы юрттылӥзы, "пӧсь гурысь потэм" чуръёссэс нырысь ик ог- огзылы лыдӟылӥзы. Г. Ходырев сюлэмызлы матысь эшез А. Вотяков сярысь кулэмез бере, кӧня ке ар ортчыса "Ӟечбур!" газетэ бадӟым очерк печатлаз. "Шаер азьын сюлмы чылкыт" нимаське вал. Но сое нокыӵе книгаосаз пыртыса ӧз вуы. Эшезлэсь но трос кылбуръёссэ, кырӟанъёссэ эскере, вылӥ дунъя, со сярысь шуныт кылъёс гожтэ. Мынам малпамея, "Советской Удмуртилэн" историяз таӵе учыр данъяськымон вал. Собере куиньназылэн кылбуран творчествозы юн герӟаськемын вал Удмурт театрен, ваньзы ик пӧртэм спектакльёслы кырӟан гожтыны чуръёс кылдытъязы. Германлэн пинал дырысеныз поэзие, музыкае, гожъян удысэ вань сюлмыныз кыстӥськемез туж тросэзлы, тужгес но туала гожъяськисьёслы адӟем карымон луэ. Трос адямиослэн сюлэмъёсазы со со мур пытьы кельтӥз. Туэ монэ паймытӥз таӵе югдур. "Вордскем кыл" журнал 3-тӥ номераз печатлаз Флор Васильевлэсь, Москваын дышетскыкуз, но Герман Ходыревлэсь ог-огзылы ысъям гожтэтъёссэс. Соосты поттыны дасям Анатолий Перевозчиков, Г. Ходыревлэн семьяезлэн архивысьтыз шедьтыса. А. Перевозчиков шонер вера: "Герман Ходыревлы книгазэ (эсьма, кыксэ ай!) печатланы шуд усиз студент дыръяз ик, пединстиутын дышетскыкуз. Нош Флор Иванович гожъяськон борды рос-прос басьтӥське институтэз йылпумъямез бере, 50-тӥ аръёслэн пумазы. Герман Ходыревлэн книгаез но вал ни бере, Флор Васильев сое пыд йылаз йыг-йыг сылӥсь гожъясен лыдъя ни вылэм. Шӧдӥське вожъяськемез но". Ф. Васильев туж шумпотэ но, вожъяське но вылэм Германэз Писательёслэн союзазы кутэмлы, озьы ик кылбуръёссэ ӟуч кылэ берыктӥсь шедьтэмезлы. Ходыревлэн переводчикъёсыз данак вал. Со ужез азинтыны нош ик юрттӥз трос калыкъёслэн кылбурчиосынызы кусып воземез, шырыт эшъяськон сямыз. Ф. Васильев сярысь ик верано на ке, Герман, соиз Москваын ЦИШ-ын дышетскыку, шӧдскымон трос юрттэм, Флорлы выль газетъёс но журнал ысъяса, гожъямъёссэ интыяса. Кыксылэн но гожтэтъёссы туж шуныт мылкыдо, ог-огзэс мур гажаса гожъяло. Г. А. Ходырев поэзие сюрес лёгемез сярысь трос гожъялляз 1968-тӥ арысен "Дась лу!" газетын ужаны куктскемез бере. Туж удалтӥз солы юрттӥсьёс ласянь, егит дырысеныз эшъяськиз мӧйы писательёсын но. 50-тӥ аръёсы угось гожъяны кутскисьёсын тоос ужаз Т. И. Шмаков. Солэсь визь-кенешъёссэ, юрттыны сюлмаськемзэ Герман Алексеевич егит дырысеныз пеляз понӥз, со сярысь ӧз вунэтылы, сюлмаз но йырсазяз возиз, калык кылбурчи ним басьтыса но. Писатель сярысь тодэ ваёнъёссэ котькуд юбилееныз валче гожъялляз, дыр. Берлозэ Тимофей Иванович Шмаков сярысь гожтӥз со "Дась лу!"-э 1990 арын 2 мартэ, ку сюлмо кылбурчилы вордскемез дырысен 80 ар тырмысал. Статьяезлэн йыръянэз таӵе вал: "Авторъёсын адӟем карымон ужаз". Герман Алекссеевич вылӥ дунъялляз куд-ог мукетъёссэ но аслэсьтыз мӧйы писательёсты, кылсярысь, визьмась, валэктӥсь, бурдъясь мӧйы эшъёсыз пӧлы пыртылӥз со егит дыръяз ик Михаил Петрович Петровез, Аркадий Николаевич Клабуковез но Геннадий Дмитриевич Красильниковез. Удмурт литератураез тужгес тодыны-валаны тыршисьёс кулэезъя мед дунъялозы вылэм Г. Ходыревлэсь соос но асэныз ӵош ужам эшъёсыз сярысь сюлмысь потэм кылъёсын гожъям очеркъёссэ. Огазеямын соос "Ӟеч визь-кенеш котьку дуно" книгае (потӥз 1989-тӥ арын). Та пичи гинэ книгазэ мон туж вылэ пыктӥсько, литературоведъёслэн, критикъёслэн исследовниосынызы одӥг радэ. Тодэ ваёнъёсыз сӥземын сюлэмызлы тужгес дуно но матын адямиосызлы, удмурт литератураысь тодмо мастеръёслы (озьы шуэ книгалэн авторез): Ашальчи Окилы, М. Петровлы, М. Покчи-Петровлы, М. Ляминлы, Н. Васильевлы, Афганистанын бырем ожгарчи журналистлы В. Глезденёвлы. Зэм, вань на Герми эшелэн мукет ӟеч адямиослы сӥзем очеркъёсыз но: Александр Вотяковлы сӥземез (потӥз "Ӟечбур!" газетын гинэ 1992 арын 19-22 южтолэзе), Геннадий Павловлы (Можга педучилищеын крезьгурчиез данъясь ӝыт бере гожтэмын вал, потӥз газетын), Анатолий Уваровлы (солы 60 арес тырмемен валче). Но данакез очеркъёсыз та книгае ӧз пыре. Нылпиослы гожъясь калык кылбурчиез, со огдыре усто журналист но литературовед-критик вал шуыса, оло, куд-ог гожъяськисьёс но дышетӥсьёс уг но тодо. Очеркъёсаз Г. Ходырев яркыт возьматӥз литература но улон сярысь малпанъёссэ. Котькудӥзлы гожъяськисьлы кулэ дунъет сётылӥз, удмурт культураын интызэ дунъяны тыршылӥз. Озьы ик аслэсьтыз поэзие сюрес лёгемзэ номыре ватытэк шараяны тыршиз, гожъяны кутскисьлы дэмлаз кадь: утчалэ, шедьтэ асьтэлэсь сюрестэс, янгышъёслэсь утиське, гожъяськыны калыклэн творчествоезлэсь дышетске. "Ӟеч визь-кенеш котьку дуно" книгазэ Герман мыным таӵе кылъёс гожтыса кузьмаз: "Гажано Леонид Павлович Фёдоровлы, пинал дырысь тодмо но айбат эшелы, чупрес журналистлы, "Дась лу!"-ын ужам аръёсмес тодэ вайыса улон понна. Шудо, таза, батыр лу! 11 февраль 1991 ар". Эшъёсыз пӧлын Герми быдэ вуыса, дано писаетель луыса но ӧз вылтӥяськылы. Со гинэ ӧвӧл, гожъяськыны тьыршись муртъёслы котькинлы кизэ мычыны дась улӥз. Али эшелэсь ӟеч мылкыдъёссэ, калыкез, нылпиосты гажамзэ пумен умойгес валасько ни кадь, но ӵош ужакумы со сярысь трос ӧй малпаськылы, лэся. Герман Алексеевичен ми сыӵе ӟеч эшъёс вал шуыса, туала гожъяськись егитъёс куд-огез, оло, уз но оске ни. Солэн пӧртэм адямиосын эшлыко кусыпъёс возьыны быгатэмезлы мон туж синмаськылӥ, куддыръя вожъяськылӥ но. Праздникъёсты но вордскем нуналъёсты пусъён дыръя со быгатэ вал котькудмылы туж ӝог кылбур чуръёс пӧраны, шуныт но пальпоттытӥсь кылъёс шедьтыны. 1984 арын мон но Выль арлы сӥзем бордгазетамы, солы сӥзьыса, таӵе эшлыко шарж гожтӥськем: Будо тыпы выжыын Оскымон юн пушъетъёс. Котькудаз ньыль бӧлемыҥ Жингырто чебер чуръёс. Школаын - кылбурчиос. Дорамы но - поэтъёс! Кӧня бен али соос Атайзы - тыпы вӧзын? Со Атай - етӥз Герми. Нылпиоссэ вешаса, Туннэ юн кизэс кырмиз. Бен, кылбурчиос со вӧзын будӥзы, редакцуиямы ужасьёс но, туж трос школаосысь пиналъёс но. Гуртъёсы потаса, соос доры сюрес шедьтэ вал Герман Алексеевич. Поэзиын аслэсьтыз интызэ пинал дырысеныз шедьтэм мурт вань улытозяз тыршиз нылпиос пӧлысь талантъёсты утчаны. Азьланьтӥз Тимофей Шмаковлэсь, Михаил Петровлэсь но мукетъёсызлэсь сюлмаськонъёссэс. Туж уно нылпиослы юрттӥз юнкоръёс луыса, собере кылбурчи яке писатель луыса будыны, кызьы вералля вал, инвисъёссэс шедьтыны. "Дась лу!" газетын дас тямыс но ӝыны ар ужамез сярысь тазьы гожъяз: "Бадӟым улон сюресэз ортчи мон татын. Газет баме статьяос, зарисовкаос, очеркъёс, веросъёс, кылбуръёс печатламе сяна, мон вань аръёсме кивалтӥ редакциысь литература но искусство отделэн. Мынам сюлмаськонэ вал - яркытэсь но муресь произведениос печатлано, пинал талантъёсты утчано, соослы будыны юрттоно. Со ласянь мон вань быгатонлыкме, тодон-валанме сётыны тырши". Кӧня школаосы вуылӥз меда со "Советской Удмуртиын" "Пинал куараос" дасяса, "Дась лу!"-ын ужакуз пиналъёсын но дышетӥсьёсын пумиськылыса, пинал гожъяськисьёслы визь-кенешъёс сётылыса, юнкоръёсын слётъёс ортчытъяса?! Тыршылӥз удмурт кылъя но литературая дышетисьёсын кусып возьыны, литературно-творческой кружокъёс кылдытъяны. Юнкоръёслы, пинал кылбурчиослы туж уно гожтэтъёс ысъялляз. Будӥсь кужымъёсты ялан син азяз возьыны тыршиз. Тросэз азьло юнкоръёс, табере тодмо писательёс но журналистъёс, гожтэтъёссэ уг вунэто, оло, синпельлы возё на, луоз. Элькунамы вань сыӵе школаос, кытчы солэн пыдъёсыз котьку кыско вал. Кылсярысь, тужгес но гажаз Пичи Пурга ёросысь Вуж Монья школаысь коллективез, отысь дышетӥсьёсты, удмуртлыкез утьыса, вань сюлмысьтызы ужаны тыршисьёсты. Мон, кылсярысь, утьыса возисько Калык кылбурчилэсь "Советской Удмуртие" 1989 арын 16 апреле потэм "Кивоштӥсьёс будо" бадӟым статьязэ. Татын со школалэсь удонзэ котыр ласянь возьматӥз. Дышетӥсьлэсь ужзэ дунъяны быгатэ вал. "Дась лу!"-ын ужаса, ачиз но "Калыкез дышетонысь отличник" ним нуллӥз ук. Тодам вайылӥсько школаосы нылпиос доры ӵош потам учыръёсмес но. Куке но ӵош вуылӥм Завьял ёросысь Подшивал гуртэ, мынам ӵыжы-выжыелэн, солэн матысь эшезлэн Александр Вотяковлэн вордскем гуртаз. Кылбурчиез буре вайыса но мукет ужпумъёсъя пумиськылӥм нимаз-нимаз бадӟым но покчи пиналъёсын, дышетӥсьёсын. Солэсь азьло пырам нылпи садэ, кенешим воспитательёсын но нылпиосын. Мон кӧня ке паймыса но вожъяськыса кылзӥ Герман Алексеевичлэсь нльыль-куать аресъемъёсын но туж быгатыса, гажаса вераськемзэ, покчиосты дырын-дырын серекъятыны быгатэмзэ. Котькуд аудиториын со ӝог гинэ огъя кыл шедьтыны быгатылӥз, соослы тупась, матын луись кылбуръёссэ лыдӟылӥз. Малпалод вал, солэн "репертуарез" коитьку дась шуыса. Ӟеч кусып возиз аслыз сюрес сётӥсь Можга педучилищеен, со пала вуылыкуз пыратэк ӧз кыльылы, дыр. Татын уго ужаз кемалась гажано эшез Геннадий Павлов, Соос но тодмо журналист Константин Михайлов (таиз но "Дась лу!"-ын кема аръёс ужаз) ог- огзытэк улыны ӧз ик быгатылэ кадь. Можга палъёсы вуо ке, дано крезьгурчиен адӟиськытэк ӧз кошкылэ. Ма меда сокем матэ кариз соосты? Малпасько, крезьгурез но поэзиез, творческой ужез, калыкмес яратон. Тодӥсько на, егит дыръязы ик Гера но Геннадий Иванович ӵош кылдытӥзы "Шулдыресь асьме садъёс" кырӟан. Отӥяз мукетъёсыз гуръёс кылдылӥзы. Та куинь воргоронъёслэн эшъяськонзы берпум нуналозязы, ӝыны даур пала кыстӥськиз, луоз. Туж жаляса верано луэ, куиньназы ик кема ӧз улэ, бадӟым творческой кужымзы лусал на, дыр. Улонысь бӧрсе кошкизы. Котькудзы ик - шӧдтэк шорысь. Озьы, дыр, кылдэмын - ӟырдыт сюлэм малпамтэ шорысь ужамысь дугдэ. Герман Алексеевич Ходыревлэн улонысь кошкемез туж бадӟым ыштон вал нылпи литературамылы, озьы ик литературоведенилы (со трос тодэ ваёнъёссэ гожтыны медэ на вал), вань удмурт но финн-угор национальной движенилы (пӧртэм шаеръёсы вылӥз, Удмуртилэн сьӧраз но эшъёсыз уно вал). Бадӟым кылбурчи-патриот но интернационалист. Ачиз нокинэ ӧз обидьылы, улытозяз уно эшъёс утчаз но шедьтӥз. Адямиосты ӧз люкылы, тон бадӟым яке пичи шуыса. Ачимъяськон сямъёсыз ӧй вал, кенешыса улыны быгатылӥз. Куатьтон аресэз тырмон азяз туж визьмо но малпаськытӥсь валэктонъёс сётъяз со "Удмурт дуннелэн" корреспондентэзлы, ӵош ужам писатель эшезлы Кирилл Ломагинлы. Со шуиз: "Та улонын вань ӟечез - ог-огдэ валам-дунъям, кенеш возем бордын". Талэсь визьмогем шуг ни вераны. Ӧйтӧд, ваньмыз-а меда эшъёсыз сое озьы ик валаны тыршыса ужазы? "Дась лу!" газетын ужакум, ӵош ужась эшъёсыз пӧлын (нош мон артэ ужай "Кизилие" кошкытозяз) солэн данэз, авторитетэз котьку вылӥын вал. Вань на, вань удмурт музъем вылын Чебер крезьгурчиос. Соос азьын мон бӧрдӥсько, Вань сюлмыным мон соослы Музъем дорозь йыбырттӥсько. Чеберез валась вань удмуртъёслэн нимынызы сыӵе чуръёсын вазиськиз, луоз, аслаз лыдӟисьёсызлы удмуртиысь Калык кылбурчи Николай Семёнович Байтеряков. Та кылъёс верамын, мон сямен, усто крезьгурчи но кылбурчи, мынам эше Герман Алексеевич Ходырев сярысь. Тодӥсько, Г. Ходыревлы "Удмуртиысь калык кылбурчи" данъясь ним сётон сярысь Указ улэ Удмурт республикаысь Вылӥ Советлэн Председателез В. К. Тубылов гожтӥськиз вал 1992 арын 22 октиябре. Дано ним сётӥзы "Литература удысын пусйымон ужъёс лэсьтэмез понна но трос аръёс ӵоже мылысь-кыдысь тыршемез понна". Нош тыршиз со пинал дырысеныз, вань улонзэ поэзилы, нылпиосты будэтонлы сӥзьыса. Кылбураны быгатонлык инмар солы, оло, вордскемез бере ик сётэм. К.Ломагин - Г.Ходырев Та улонын вань ӟечез - ог-огдэ валам-дунъям, кенеш возем бордын К.Л. Герман Алексеевич, кызьы тон будӥд, тросэз ӟеч тодо. Но, аръёс ортчемъя, газетмылэн выль лыдӟисьёсыз будо. Соос, оло, чынзэ вераса, уг но тодо ортчем сюрестэ? Вакчияк вера вал. Г.Х. Тунсыко юан. Та юанлы нокызьы но вакчияк вераны уг луы.Нырысь ик, мон "Советской Удмуртилэн" ӝыны даур ӵоже лыдӟисез. Война аръёсы потыны ӧдъяз та нимын. Писэйгурнтысь калык гажаса лыдӟылӥз сое. Мон покчи классъёсын дышетскисько ке но ай, школаын та газетэз басьтӥзы, мон лыдӟыны тырши. Тӥни соку тодматски Семён Шихаревлэн, Филипп Кедровлэн, Тимофей Шмаковлэн, Степан Широбоковлэн, Игнатий Гавриловлэн кылбуръёсынызы, Михаил Ляминлэн очеркъёсыныз. Оло, тӥни соку мынам мылкыды ӝутӥськиз гожъяськыны. Нырысетӥ кылбурме мон гожтӥ 1944 арын, южтолэзе. Та кылбурме пыраклы синпель возисько. Мынам анае туж умой тодэ вал калык кырӟанъёсыз, лыдӟемын Куӟебай Гердлэсь кылбуръёссэ. 1920 арын Сарапулысен ас синмыныз адӟемын но кылзэмын солэсь вераськемзэ, кырӟамзэ. Со, озьы ик сюлмыным шӧдӥсько мон, ӟеч тодэ вал Михаил Тимашевез, Лина Григорьевна Векшинаез, Константин Яковлевез, Прокопий Гороховез, Иван Векшинэз, Яков Ильинэз. Оло, кинэ ке эшшо мукетъёссэ но тодэ на вал. Соос сярысь верамъёссэ мон кылзылӥ но, нокытчы гожъятэк, йырвизьмам кельтӥ. Аръёс ортчыса, со мынам кылэмъёсы выльысь тодам лыктӥзы. Анае уно аръёс ӵоже нылпи площадкаын ужамын (туала сямен - нылпи садъёс). Кык ар Можга педтехникумын дышетскыса вуттэмын. 1924 арын куарпотон толэзе соослэн корказы ӝуам но, ӵужатай анайме дышетскыны лэзьымтэ ни. Соин йырин ӧй вал ни. Со сярысь мамае берло но жаляса вералоз вал. Алабгоысь учительской семинариез Можга селое Трофим Кузьмич Борисов ваем. Со дырысен ик Можга педтехникумлэн данэз вылӥ ӝутскиз. Турлы палъёсысь дышетскылӥзы, шуылӥз со. Коноваловез, Медедевез, Гавриловез но поттылӥз. Нош мыным, пинал муртлы, ваньмыз со дунне вал на. Но мон ӧй вунэты. Писэйгуртын дышетскыкум, кылбуран борды кутски ке, Вуж Утчан школаын мон газетэ пичиесь заметкаос гожъяны вырӟи. Та удысын мынам дышетӥсе но визь-кенеш сётӥсе луиз Семён Тарасович Шихарев. Кылбуран удысын но со огшоры но туж валамон валэктылӥз. 7-тӥ классысен, тол каникулъёс бере ик, мон малпаськи кытчы ке городэ дышетскыны мынон сярысь. Ӵап ведь тупаны но кулэ: "Алнаш колхозникын" Можга педучилищее дышетскыны ӧтьыса, ялон печатламын вал. Сюлэмы ик нёркак луиз кадь. "Мама, - шуи солы, - мон Можга педучилищее дышетскыны мыно". Мама малпаськиз. Нырысь ик, пе, 7-тӥ класстэ ӟечен быдты ай. Оло нош, Алнаш школае гинэ мынод, 8-тӥ классэ? Татын матын но. - Уг, - шуи мон, - Можга педучилищее мыно. Кошки. Экзаменъёс сётӥ. Пыри. 1948-1952 аръёсы отын дышетски. Татысен мынам малпанъёсы вал географ луон сярысь. Школаын сямен ик (географиен дышетӥз Нина Ивановна Королёва), мукет дуннеосыз адӟеме потэ вал. Но Можгаласен эшъяськи "Ленинъя" районной газетлэн редактореныз Серафим Алексеевич Орловен. Шихарев кадь ик туж зӥбыт но туж бордаз кыскись, мылкыдэз юнматӥсь адями вал со. Та газетэ гожъяськонэ уката ӧръяськиз, тодон-валанэ паськытаз. Собере училищеысь литературной кружок ӟырдыт ужаз.Кивалтӥз родной кыллы но литературалы дышетӥсьмы Екатерина Алексеевна Коновалова. Старостамы вал 3-тӥ курсысь Миша Петров (берло ни со Покчи луиз). Можгаласен мынам нырысь кылбуре потӥз "Советской Удмуртиын" 1949 арын, 9 апреле. Алнаш - мынам журналист луонэлэн кутсконэз вал ке, Можга литературае сюрес возьматӥз. Ижевске егитъёслэн семинаръёсазы, совещаниосазы ветлылӥ, выль эшъёсын тодматскылӥ. Тимофей Иванович Шмаков, Михаил Петрович Петров война бере аръёсы кужмо но быгатыса ужазы. Соос вӧзы мон пуктысал на Афанасий Васильевич Лужанинэз. К.Л. Иське, "литературной" атаед одӥг гинэ ӧй вал? Г.Х. Мон татын куинь нимтулъёсты верай, поттылӥ. Таослы мон бадӟым тау карисько но каро но. Куддыр мыным Аркадий Николаевич Клабуков - тынад киросатаед шуо. Со, "Молот" журналэ 1955 арын 7-тӥ номераз "Кызьы мон будӥ" кылбуре потэм бере, монэ синйылтӥз. Отчыозь ми ӧм эшъяськылэ. Михаил Петрович мыным со аре меӵак шуиз: тынад быгатонлыкед - нылпи литератураын. Тӥни со бере Клабуков мон борды кариськиз ини. Фольклорез мур но ялан син азяд возь, шуылӥз со. Шонерзэ верано ке, егит будӥсь авторлы ас вакытаз быгатонлыкезъя ӧрзэ бырйыны юрттоно. Та ласянь Михаил Петрович шӧдыса улэм вылэм мынэсьтым быгатонлыкме, вакытаз синйылтӥз но сюлэмам оскон пыӵатӥз. Таӵе ик мылкыдо вал Тимофей Шмаков но Афанасий Лужанин, берлогес ни Аркадий Клабуков. К.Л. Тон юнэсь кусыпъёс возиськод данакеныз палэнысьёсыныз но тодмо писательёсын. Со кусыпъёс шӧдӥськытэк уг кылё творчествоын но. Кинэ но мар ласянь пусйысалыд туннэ нимысьтыз? Можга педучилищеын но Удмурт пединститутын дышетскон аръёсам мон аслам сюлэмелы матынэсь произведениосыз утчасько, лыдӟисько вал. Кин кызьы малпа, мон озьы мытӥ творчествое сюресме, озьы ужасько али но. Кызь арес дыръям мон тодматски Самуил Маршаклэн берыктэмезъя украин поэтлэн Платон Вороньколэн но абхаз поэтлэн Дмитрий Гулиалэн нылпиослы кылбуръёсынызы. Мон малы ке соку малпай: мынам пинал дыръёсы сярысь таос гожтӥллям ук! Кыӵе огшоры но сюлэмез вырӟытӥсь но шунтӥсь кылъёс! Лыдӟем сяна, мынам соосты удмурт кылэ берыктэме но потӥз. Михаил Петров котьку вералляз: эгит эшъёсы, удмурт кылэ берыктон ужлэсь ноку но эн пыкиське. Берыктон - со егит авторлы туж бадӟым школа... Озьы тӥни мон дӥсьтӥ берыктыны Вороньколэсь но Гулиалэсь нылпиослы кылбуръёссэс. 1959 арын гудырикошкон толэзе ветлӥ куное Украинаысь писательёс доры. Соку шуд усиз Платон Воронькоен пумиськыны. Макем паймымон но атай сюлэмо адями вылэм со. Мынам сое гажан но сӥлы карон мылкыды, осконэ уката но юнмазы. Вань улытозяз ми соин кусып возим. Озьы ик эшласькисько туркмен писателен Каюм Тангрыкулиевен, армянинэн Сурен Мурадянэн. Кык арлэсь ятыр мон эшъяськи Смоленск музъем вылын вордӥськем но будэм, бадӟым улон дуннеез адӟем писателен, туж ӟеч сюлэмо адямиен Георгий Афанасьевич Ладонщиковен. Со монэ 1963 арын синйылтӥз но Писательёслэн союзазы кутыны дэмлаз. Геннадий Красильниковлэн СП-ен кивалтон аръёсаз мон уно пол ветлӥ нылпи литературая совещаниосы. Вуылӥ Свердловске, Перме, Саратове, Москвае. Тӥни соку пумиськылӥ Ладонщиковен. Бератаз со мынэсьтым кылбуръёсме ӟуч кылэ берыкъяны ӝутӥськиз. Солэн берыктэм ужъёсыз потӥзы "Чипчирган", "Луговой цветок", "Счастливая ива" книгаосам. Мо н дасяй, гожъяз со мыным, гажано нылпи кылбурчиослэсь берыктэм кылбуръёсынызы бадӟым книга. Тынад но отын кылбуръёсыд вань гинэ... Но жаль огез: Ладонщиков туэ оштолэзе улонысь кошкиз. Со туж ӟеч тодэ вал ӟуч фольклорез, национальной писательёсыз гажа, дунъя вал. 1982 арын со коньывуон толэзе Ижевске ветлӥз, мыным витьтон арес тырмон праздникам туж ӟеч кылъёс но мылкыд каронъёс вераз. Мон данак кылбуръёссэ удмурт кылэ берыктӥ, печатлай газет-журнал бамъёсын. Тӥни со но дышетскон школае вал. Мынэсьтым нылпи кылбуръёсме ӟуч кылэ берыктӥз Иосиф Курлат. 1979 арын со Удмуртие вуылӥз. Со выль книгаосме берыктӥз. Нош "Наш двор" книгае Ижын кык пол потӥз. Мон озьы ик ӟеч кусыпъёс возисько мынэсьтым нылпи кылбуръёсме ӟуч кылэ берыктӥсь кибашлы усточиосын Игорь Мазнинэн, Юрий Кушакен но Владимир Данькоен. Тӥни ваньмыз монэ ӟуч кылэ берыктӥсь адямиос. Соос асьсэос но кылбурало. Туж ӟеч тодо дунне литератураез, кужмоесь берыктӥсьёс. Соослэсь сыӵе луэмзэс туж возьматӥз Москваын нырысез потэм книгае но "Чипчирган" (1985 ар), кудӥз быдэсак сӥземын вал удмурт нылпи поэзилы. К.Л. Герман Алексеевич, буйгатскымон-а, кызьы шуом ай, кӧт тырымон-а азинске шаерамы нылпи литература? Кыӵеесь солэн шугъяськонъёсыз, могӟетъёсыз, улон дуннеез? Г.Х Мон витьтонэтӥ аръёсы гожъяськыны кутски бере, литературамылэн со дырысен ортчем сюресэз туж ӟеч тодмо. Нылпиослы гожъяны мылкыд карисьёс оску но вал, но чиданзы ӧз тырмы. Куд-огез одӥг-кык книга поттыса вуиз но буйгатскиз, лэся. Дырын-дырын выль нимъёс ӝужаллязы. Али тазьы учконо-чаклано ке, нылпиослы уно гинэ веросъёсын книгаос кузьмаз Григорий Симаков. Василий Скобелевлэн кӧня ке книгаосыз потӥзы. Евгений Николаев, Лидия Чернова, Юлия Байсарова, берлоосыз егитъёсызгес - Владимир Котков, Владимир Михайлов, Владислав Кириллов ӝутскем мылкыдын басьтӥськизы нылпиослы гожъяны. Чырмыт но сэзьгес мед ужалозы вылэм соос. Проза удысын трос ӟечсэ кельтӥз Николай Васильев. "Дась лу!" газет поттыны кутскемен, со данак веросъёс, выжыкылъёс, повестьёс гожтӥз но, ваньмыз сямен "Дась лу!"-ын печатламын. Критиклэн сюрес вылысьтыз нылпиослы гожъянэ выжиз Пётр Чернов. Пиналъёслы газет выльысь потыны кутскемен, со "Кион кар" приключенческой повесть гожтӥз но быдэсаксэ та газетын печатлаз. Солэн пиналъёслы сӥзем повестьёсын трилогиез табере историе но нылпи литературамылэн зарни шыкысаз кылиз. Семён Самсонов но пиналъёслы ас вакытаз кузьмаз "Кам вадьсын гудыръя" книга. Нылпиослы кӧня ке книгаоссэ озьы ик кузьмаз Владимир Романов но. Туала прозаез верано ке, мон пусйысал Ульфат Бадретдиновез, Римма Лаптеваез, Николай Никифоровез. Соослэн веросъёссы юн герӟасьткемын семьяен, шклаен, улонэн. Соослэн та удысын пӧрме. Азьланяз но сэзь мед ужалозы. Поэзия удысын данак умой книгаоссэс пиналъёслы кузьмазы Анатолий Леонтьев, Илсиф Иванов. Соослэн асьсэлэн адӟонзы но сюлэм шӧдонзы. Республикаямы али пото "Кенеш", "Инвожо". "Кизили", "Вордскем кыл" журналъёс. Шуом, "Инвожо" но "Кизили" бадӟым саклык висъяло быдэ вуымтэослы но покчи пиналъёслы. Мед со сюрессы сэзь но чырмыт бызёз. "Вордскем кыл" журнал пушказ нимаз произведениосты книга выллем сётъя. Умой кутскон ялан мед паськытасал. Та огыр-бугыр вакытэ нылпи литература, меӵак вераса, одӥг минутлы но басылмыны кулэ ӧвӧл. Солэн азинсконэз сярысь ялан сюлмаськыны кулэ Писательёслэн союззы, Калыкез дышетонъя министерство, Министръёслэн Советсы, республикамылэн Вылӥ Кенешез. Вань вакытъёсы писательёс кылдытъязы пиналъёслы но быдэ вуымтэослы произведениос. Али но со мылкыд медаз сӥя. Та удысэз мед азинтозы нылпиосыз гажась, ас ужзэс дунъясь, эшъёссэс валась, сабыр адямиос. Ассэ вылэ ӝутӥсь, бадӟымъяськись муртлы та ужын немар карыны. Нылпи литератураын чылкыт сюлэмо, чылкыт кио, чылкыт сямо автор ужаны кулэ. Мукет сюресэз уг адӟиськы. Вань дауръёсы адями ужен герӟаськемын. Уж темаез, инкуазез, солэсь чеберлыксэ утён, вань улэпсэ - бурдоосыз, пӧйшуръёсыз утён, ог-огдэ гажан, юрттон, вазиськись луон - тӥни мае возьматоно туала вакытэ. Адямиос, мӧйыос но пиналъёсызгес но, туж торккесэсь, керетӥсесь, уродъяськисесь, ог-огдэ лёганы, вормыны, малпасесь луизы. Улонын сыӵе муртъёсын ноку но ӟечсэ, умойзэ уд адӟы. Соин ик, шуылоз вал ас вакытаз бадӟым ӟуч писатель Лев Толстой, урод муртлы ӟеч лэсьты. Озьы пумен тон солэсь алама, урод йылолзэ сапкытыны быгатод. Нош лек, урод муртлы лек луон ноку но ӟече уз вутты. Тани таӵе ужпумъёс но сюлэмшугъято монэ. Тае медаз вунэтэ, ялан тодазы мед возёзы вылэм пиналъёслы но егитъёслы гожъяны мылкыд карисьёс. К.Л. Выль книгаосты, произведениосты дунъян, вӧлмытон уж бере кыле. Рецензиос но шер потало. Та ласянь газетмылэсь редакцизэ меӵак пыкылыны но яра. Критикъёслэсь ужъёссэс ӧръян, вырӟытон понна мар кароно? Г.Х. Тодӥсько на, ньыльдонэтӥ аръёслэн пумазы но витьтонэтӥ аръёсы "Советской Удмуртиын" выль книгаосъя дискуссиос ортчыло вал. Озьы, кылсярысь, вал М. Ляминлэн "Шудбур понна", М. Петровлэн "Ӟардон азьын", Г.Красильниковлэн "Вуж юрт" повестьёссы пумысен. Бератаз редакция та ӟеч ужлэсь куштӥськиз, йӧназ рецензиос но ӧз поталэ. Али но со ӟеч кутсконэз азинтоно вылэм. Собере критикъёс пумысен тазьы но вераме потэ: ӵемысь ялан одӥг автор котырын бергало, мукетъёссэ уг адӟо, яке адӟымтэ улсын уло. Кулэ ужпумъёсты уг ӝуто. Критикъёс пӧлысь лэчыт-меӵкыт гожъя но ӟырдыт ужа Фома Ермаков гинэ. Собере редакцилы аслыз но кичӧлтӥсь радынгес луоно вылэм. К.Л. Нылпиослы книга поттон табере туж дуно усе, коньдон уг тырмы. Но пиналъёсты югытэ поттон понна, амалъёс утчано. Кыӵеесьгес дэмланъёсыд? Г.Х. Нылпиослы книга поттон ласянь нокыӵе но мыдлань-азьлань вераськонъёс луыны кулэ ӧвӧл. Кылем война аръёсы улон-вылон капчи вал-а? Чидантэм секыт йӧтӥз. Озьы ке но, издательствоос нылпиослы книга поттон сярысь ӧз вунэтэ. Нош али? Удмурт Республикалэн Вылӥ Кенешез но правительство удмурт нациез утемзы, солэсь выжызэ азьланьтэмзы потэ ке, нылпиослы литература поттонэз котьку син азязы возьыны но юн-юн сюлмаськыны кулэ. Мар-о, нош ик Западлы йыбырттомы, юрттэ ай милемлы нылпиослы книга поттонэз радъяны шуомы-а? Астэ ачид ултӥян уг со. Утчано выль амалъёс, луонлыкъёс. Асьмеос плановой амалэн хозяйствоез нуонлэсь куштӥським. Соин ик, мон сямен, оломар туган-суран-йыромонъёс со бордысь ик пото. Писательёслэн союззы сяна, та удысэ пыриськыны кулэ Калыкез дышетонъя министерство но. Нылпиослы литература поттонэз государственной ужен лыдъяллязы азьвыл СССР-ысь кивалтӥсьёс но. Озьы бере, али но, туалаосыз кивалтӥсьёс, озьы ик мед дунъялозы сое. Берлань чигнан - нацилы бырон. К.Л. Герман Алексеевич, тынад творчествояд нимысьтыз яркыт инты басьто кырӟанъёс. Калыклы тужгес ярало нылпиослы но, мӧйыослы но гожтэмъёсыз. Вера вал, кызьы сюлмад ӝужало кылъёс? Г.Х. Кырӟан гожтон борды ми басьтӥськимы Можга педучилищеын Геннадий Павловен одӥг вакытэ дышетскон дыръямы. Ми соин ог дасо пала кырӟанъёс кылдытӥмы. "Шулдыресь асьме садъёс" кырӟанмы 1961 арын Пётр Поздеевлэн антологияз но пыремын. Отӥяз кырӟан гожтон удысын мон ужай композиторъёсын Николай Шкляевен, Геннадий Шаклеинэн, Герман Корепановен, Геннадий Корепанов-Камскиен, Антаолий Сутягинэн, Геннадий Матвеевен, Юрий Толкачен, Николай Шабалинэн, Николай Постниковен. Кӧня мынам кылъёсыя гожтэм кырӟанъёс? Малы ке лыдъян-чотан сярысь уг малпаськиськы. Ужпум лыд бордын ӧвӧл. Котькудӥз кырӟан адямилы мед яралоз, кельшоз. Мыным ваньмыз та верам эшъёсылэн кырӟанъёссы ярало. Кырӟанлы кылъёс гожтон ласянь верано ке, композиторен одно ик кенешоно. Мынам ваньмыз сямен кырӟанъёсы озьы вордӥськемын. К.Л. Музыкальной произведениосты кутонъя художественной совет ужа на-а? Ӧз пытсалэ на-а кыранъёсты вӧлмытон но кутон ужез? Г.Х. Шонерзэ та юанлы валэктыны шугомисько, малы ке шуоно, мон, художественной советлэн членэз, солэн заседаниосаз кемалась ӧй ни вал. Мар ке ӧтчамысь но дугжӥзы. Малы? Мугзэ уг валаськы. Дас пол ведь уд юа. Та удысын Композиторъёслэн союззылы но Культурая министерстволы ужзэс кужмоятыны кулэ. К.Л. Театрлы гожтэм кырӟанъёсыд но трос, ӟечесь, но соос кугӟаса уг кылё-а? Мар кароно? Оло, нимысьтыз сборник дасяно? Г.Х. Удмурт театрен кусыпъёсы кутскизы 1959 арын. Толсур толэзе солэн сцена вылаз Геннадий Красильниковлэн "Вуж юрт" повестезъя инсценировка пуктэмын вал. Мынам куке но соку гожтэмын вал "Сюлэмме эн чигы вал" кылбуре. Композитор Николай Шкляев спектакльлы кырӟан куре. Мон та кылбурме возьматӥ но, солы кельшиз. Красильниковлы но та кырӟан яраз. Собере мон кырӟанъёслы кылъёс гожъяй "Кезьыт ошмес", "Насьток но Исьток", Сьӧрлось куно" спектакльёслы. Татысь кырӟанъёс нокытын печатламын ӧвӧл на. Но калыкъёс кытысь тодӥллям-шедьтӥллям со кырӟанъёсты. Тани, кылсярысь, "Насьток но Исьток" спектакльысь "Поезд кошке" кырӟанэз яратыса кырӟало. Малы ке но, радио пыр спектакльёсысь кырӟанъёсыз сётъякузы, крезьгурлэсь авторзэ верало, нош кылъёслэсь авторзэ - уг. озьы со шонер ӧвӧл. А то ведь малпан кылдэ: спектакльлы кырӟанэз кылъёссэ но, крезьгурзэ но композитор огназ гожтӥз. К.Л. Герман Алексеевич, туж бадӟым тау тыныд юанъёслы верамъёсыд понна. Таза, кужмо лу, творческой удысын ноку но жадёнэз медад тоды. Г.Х. Та улонын вань ӟечез - ог-огдэ валам-дунъям, кенеш возем бордын. Тазьы улӥзы мынам ӵыжы-выжыосы, али но озьы уло. Мон но озьы улыны тыршисько. "Удмурт дунне", 1992, 22 октябрь. Дмитрий Лукьянов Герман Алексеевич Ходырев сярысь тодэ ваён Германэз мон нырысьсэ пумитай 1948 арын августэ Можга педучилищеын. Татчы мон вуи вал дышетскыны пырыны шуыса вступительной экзаменъёсы. Коридорын огыр-бугыр: педучилищее дышетскыны пырыны мылкыд карисьёс трос гинэ люкаськиллям. Пичи мугоро, сьӧд брюкиен но тӧдьы дэремен, гольык пыдын пияш туж сэзь ветлэ, вераське. Тани со укно дур вылэ пуксиз, чик кепыратэк, вераськыны кутскиз со котыре люкаськем егитъёсын. Соку мыным эше вераз (Юриысь ми ӵошен вал): со, пе, Ходырев. Ачим туж востэм, кыре-буре потамтэ мурт, мон соку пайми солэн сыӵе кепырасьтэм но сэзь луэмезлы. Со аре мон училищее ӧй шедьы. Нош Герман пырем. Мон сое тодӥ, 1949 арын училищее дышетскыны пырыса. Озьы куинь арзэ мон вуоно тодмо нылпи кылбурчиен училищеын огвытэ дышетски. Вазиськись, вераськыны яратӥсь, эшъяськыны быгатӥсь вал ни соку ик. Сое тодӥсьтэмез ик ӧй вал, дыр, училищеын, удмуртэз но, ӟучез но, шуэм сямен. Литературно-творческой кружоклэн ужаз но со мылысь-кыдысь пыриськиз. Татысен кутскиз солэн литературае сюресэз. Можга районын потӥсь "Ленинъя" газетэ потылӥзы солэн пичиесь информацмиосыз но кылбуръёсыз. Германэн ӵош дышетскыны кылдӥз мыным Ижевскысь пединститутын но. Одӥг гужем, каникулъёс дыръя, "Советской Удмуртия" газетлэн редакцияз но ӵош ужамы. Соку солэсь вераськыны яратэмзэ эшшо но ӟечгес шӧдӥ. Ӵукна уже ӵошен мынӥськом. Солэн кылыз уг быры, ымыз уг ворсаськы общежитиысен редакциозь. Ялан польтыртэ маке но сярысь. Куд-ог дыръя акыльтӥсько но вал вераськемезлэсь. Институтын дышетскыкуз но Герман литературно-творческой кружоке ветлӥз. "Советской Удмуртия" газетын но, "Молот" журналын но кылбуръёсыз печатласькизы. Удмурт хоре но Герман мылысь-кыдысь ветлӥз. Хорен кивалтӥз солдэн эшез Геннадий павлов. Студентъёс матысь гуртъёсы концерт возьматыны мыно ке, герман отын ни. Озьы котькытчы вуыны тыршиз. Солэн кылбуръёсыз ярало вал мыным. Нош эшшо но зол яра вал мыным, солэн балалайкаен туж быгатыса шудэмез. Котькин ик яратыса кылӟиз солэсь балалайкаен шудэм гуръёссэ. Синмаськисько но вожъяськисько вал солэн шудэмезлы. Ӵем дыръя соос Геннадиен ӵош сцена вылын шудылӥзы: Герман - балалайкаеныз, Гена - баянэн. Усто пӧрме вал соослэн. Одӥг гужем Геннадий Павлов пичи гинэ (7 муртлэсь) концертной бригада кылдытӥз. Отчы Германэз но кутӥзы, монэ но. Республикамылэн уйпал районъёсаз (Кулича но Кез районъёсын) концертъёс возьматъяса ветлӥз та бригада дас нунал ӵоже. Тӥни соку эшшо но ӟечгес тодыны кылдӥз Германэз. Солэсь балалайкаен шудмзэ но Геняен ӵош шудэмзэс учкисьёс кужмо кичабконъёсын келяллязы. Концерт бырем бере но гуртысь егитъёс Германэз шудыны косылӥзы на. Ми бертӥськом кунокуае, нош Герман кыле егитъёсын шулдыръяськыны. Мылкыд шулдыр дыръя ми солы, Германлы юмок учыръёс но малпаськом вал. Огпол ӧс куспы чемоданъёсмес пуктылӥм. Ӝоген Герман вуиз. Пеймытын чемоданъёсыз адӟытэк, со соос борды мырӟиськиз но дыбыр-колтыр чемоданъёсын валче выж вылэ усиз. "Мар та таӵе? Лёня, тынад-а та ужед?" - юа со. Милемлы серем. Мукет учыр тазьы вал. Одӥг гуртын (али вунэтӥ ни, кыӵе гуртын вал со). Коргид сигын кӧлыны малпамы: уй шуныт, сигын трос куроез. Концерт бере Германмы нош ик егитъёсын кылиз, нош ми бертӥм но кӧлыны коргид сиге тубим. Сьӧрамы тубатэз но тубтӥм. Возьмаськом Германэз. Ма меда дауртоз ни тубаттэк? Тани вуиз ни со. Учке - тубат ӧвӧл. Отчы мынэ, татчы мынэ - тубат ӧвӧл. Кеське ни: "Кытын тубат?" Ум вазиське. Озьы ӧжыт ранӟытэммы бере тубатэз лэзим ни. Я, тубиз ни, кӧлыны люкам куро вылэ интыяськиз, кӧня ке минут ортчиз но, Германмы соргетыны кутскиз. Нош Лёня сое, куктӥз кыскыса, куро люкысь васькытӥз. Олокӧня пол озьы кариз. Ӟеч сюлэмо Герман озьы выреммылы вожзэ ӧз потты. Сыӵе вал со бадӟым таланто ӟеч мылкыдо эшмы. Вячеслав Михайлов Бордаз кыскись кизили 1977 арын "Удмуртия" издательство поттӥз Герман Ходыревлэсь выжыкыл-поэмаосын "Однажды на опушке" книгазэ. Сое ӟуч кылэ берыктӥз Москваысь кылбурчи Игорь Мазнин, нош суредаз Леонид Прозоров. Та книга мыным сокем кельшиз - со сярысь "Неделя Удмуртии" газетэ гожтоно кариськи. Рецензиме нырысь ик аслыз Герман Алексеевичлы возьматӥ. - Слава, - шуиз со, - гожтэмме лыдӟыса потэмез бере. - Зэмзэ но шат мон таӵе умой книга пӧрмытӥськем? Озьы ке, оло, та рецензидэ Москвае "Детская литература" журналэ ыстыса утчалод? Куинь ар талэсь азьло отын мон сярысь пичияк гожъязы ни вал... Верамын - лэсьтэмын. Табере ми Герман Алексеевичен, "Дась лу!" газетлэн редакциезлэн одӥгаз кабинетаз ӵош ужасьёс, Москваысь ивор витиськом. Со Выль ар азьынгес вуиз. Журналлэн национальной литератураосъя отделаз ужась Владимир Александров (нимтулыз озьы вал кадь) гожтэм: "Рецензиды яраз. Кӧня ке вакчиятыса, сое 5-тӥ номерамы поттом". Но журналлэсь азьло Ижкаре ачиз В.Александров вуиз: "Дась лу!"-ын ужасьёсын пумиськоназ шуиз: - Валтӥсь редактормы ӧтиз но юа: "Вуоно арын кыӵе нылпит литературая сузьет дасяськоды?" Мынам планэ лэсьтэмын ӧй вал на. Мар шуоно? Шуак тодам ваи Михайловлэсь Ходыревлэн книгаезлы рецензизэ. Удмурт литературая, шуисько. "Малы?" - юа валтӥсь реадктормы. Отын туж тунсыко кылбурчизы Ходыревсы вань, шуисько. Асьмеос лыдӟисьёсмес 75-тӥ арын соин тодматӥм вал ини. Алигес солы выль книгаезлы рецензия вуиз. Соя учконо ке, книга умой пӧрмемын. Ходырев вӧзын мукет нылпи писательёссы но вань. "Ярам - соглаш луиз кивалтӥсе. - Дасяське Удмуртие командировкае". В.Александров Ижкаре вуиз 78-тӥ арын 23-тӥ тулсыспал азьын. Нырысь ик со "Дась лу!"-э пыраз. Югдурен кӧня ке тодмасткемез бере пумиськылӥз писательёслэн Союззылэн тӧроеныз Флор Васильевен. Соин кенешиз сузьетлэн пуштросэз но быдӟалаез, кыӵе дырлы сое дасян сярысь. Кӧня ке нунал ортчыса, Флор Иванович нылпи писательёсын но соос сярысь гожъясь литературоведъёсын кенешон люказ. Отын мон но пуконо луи. Котьма ке но, мынам рецензие "узатӥз" ук Москваысь журналэз удмурт нылпи литература вылэ. Со кенешонэз Флор Иванович туж ӝутскем но капчи мылкыдын нуиз. Люкаськемъёс вераськизы, кудӥз критик яке писатель кин ма сярысь гожтозы шуыса. Мыным гинэ ӧз удалты. - Славалэн отын рецензиез вань ини, - шуиз Флор Иванович. - Одӥг авторез арскын кык пол уз поттэлэ, дыр. Нош асьмелы та сузьетысь котькуд ужъя гарантия кулэ. Соин ик, Слава, вождэ эн вай, задание ум сётӥське шуыса... Туннэ гудырикошкон толэзь. Солэн одӥгаз нуналаз Ижкарын трос адямиос киысь адӟоно луиз "Детская литература" журналлэсь 8-тӥ номерзэ. Отысь "Удмуртилэн нылпи литератураез" нимо сузьетэз усьтэ вал Вылӥ Кенешмылэн президиумезлэн тӧроезлэн Афанасий Тубыловэн статьяез. Нылпи литературамылэн кылдэмез, аспӧртэмлыкез, солэн классикъёсыз но сокулы азинскемез сярысь статьяос гожтӥллям Пётр Поздеев, Роза но Даниил Яшинъёс, Надежда Кралина, Фома Ермаков, Александр Шкляев, Клавдия Дзюина, Анетта Сидорова но Наталья Розенберг. Нимаз статьяосы шедьымтэ дас кыкез писательёсмы туспуктэмъёсынызы пыртэмын вал биобиблиографической словаре. Герман Ходырев гожтэм нылпи литературае нырысетӥ вамышъёссы сярысь. "Дорожу своей дорогой" шуэм со статьязэ. Герман Алексеевич монэ котьку бордаз кыске вал. Либыт сямыныз, задор мылкыдыныз, трос тодэм-валаменыз со мыным агае кадь потэ вал. Та верам учыръя учконо ке, Герман Ходырев аслаз творчествоеныз возьматӥз бордаз кыскись кизили луэмзэ. 70- тӥ аръёсы солэн тылсиосыз быдэс Советской Союзэ пишто ни вал угось. Виктор Ивашкин Басьтоно-а, мар-а... балалайкаме... 2000-тӥ арын, кытын ке но сӥзьыллэн кыкетӥ ӝыныяз алнашъёс, шуныт, мур мылкыдо но ас выжыоссэс туж сӥлы карыса пырак возьыны сюлмаськись но быгатӥсь дано алнаш калыкъёс, ортчытӥзы туж тодмо удмурт нылпи кылбурчилы Герман Ходыревлы сӥзем лыдӟонъёс. Ветлӥзы шайвылаз, синпелет усьтӥзы, нош собере ини вал творчествоезъя шуныт вераськонъёс, тодэ ваёнъёс, произведениоссэ лыдӟонъёс... Нош мон соку ӵукна чузъяськоно радиоверанме дасяны тупай. Фонотекаысьтымы поттӥм Герман Ходыревлэсь балалайкаен шудэменыз магнит пленкаез. Кадрмы берпуметӥез. Тани пленка магнитофон вылэ юнматэмын, тани ӵукна чузъяськоно радиоверанэ гожтӥськизы мынам кылъёсы, зӥбиськиз мукетыз кнопка - тюрагайлэн паськыт лудын, пумтэм чагыр инлэн пыдэсаз ватӥськыса, кужмо тулкымен воринъяськись юос вылэ аслэсьтыз жингырес тюр-тюр гуръёссэ пызьнам сямен чузъяськизы балалайкаен шудэм крезьгуръёс... Сыӵе соос пинал дырен шокало, сыӵе соос чебер бусые чорто, сыӵе соос Вало дуре ӧтё - вӧлак пазьгиськизы студиысь зӧк ньыль борддоръёс! Вань калык инструментлэн сыӵе сямыз: сюлэм пыдэсы ик пырыса кырмоз сое но нуоз тонэ вордӥськем шаерад, сое уката но кужмогес яратытоз. Яратытоз но, шумпоттытоз но, синвуськытоз но,эктытоз но... Куинь сӥё, куинь сэрго но одӥг бодыё инструмент сыӵе инвожо крезьгуръёс поттыны быгатэ кибашмылэн чиньыосыз улын. Шудэ Герман Ходырев! Радиоверанмы биниське магнит лентае, нош мон соку сэрттӥ Герми - ми озьы шуылӥм сое малы ке - сярысь куд-ог тодэ ваёнъёсме... 50-тӥ аръёслэн пумазы студентъёслэн трос сюлмаськонъёссы пӧлысь одӥгез - улон мнтыез чылкыт возён. Гужем каникулъёслэсь азьвыл яке каникул дыръя ик Ижкарлэн Шумайлов урамаз сылӥсь куинь улыно-вылыно, завод ӵынъёслэсь но дырлэсь сьӧдэктэм общежитилэн вож писпуо но шер-тур потэм ожоё азбараз егитъёс быдэс толлы тырмымон пу дасяло - ваем коръёсты, пуклёослы люкылыса, вандыло, собере пильыло, артанае люкало. Нюлэскын пу дасян дыр мактал луэ ини со. Собере пӧсь гужемзэ дымбыр-йыг каремъёслэсь, задор куараослэсь шутэтскем корпусъёс нош ик пачылмо студентъёсын. Сачырес сӥзьыл элькунысь бусыосын ужамзы бере соос вуо комнатаосазы - улон-вылон азинске. Кема-а чылкыт возёд улон интыез сӥзьыл? Асфальт вылтӥ тузӥ туфлиен ӝикыт ортчыны турттыса но, улонни кырсь мучолоез кӧня ке ведраын чылкыт миськымон сьӧдэктэ. Нош со аръёсы Ижкар асфальто ульчаосыныз но тротуаръёсынызы ушъяськыны чик но ӧз быгатылы на - тужгес азинскем городъёсысь вуылэм куноос паймыса юало: "Город-а ма та? Кык вамыш лёгиськид ке, пу коркаё гуртэ вуид". Кинлы кызьы, нош милям асьмелэн данъЯськонмы - ??(ц)ӥськомы кыӵе ке но сыӵе элькунлэн шоркарысьтыз Шумайлов урамын, дышетскиськом отысь валтӥсь но тодмо вузын, педагогикая институтын. Нош урамъёсысь, зэмзэ но, бусыостӥ дэри колам бере сямен ик дэриесь пыдкутчанъёсын вуылӥськиз общежитие. Корказь дорын вуэм тусьв ань ик но, комендант кӧс нуналъёсы корпусъёсты миськылыны косылӥз. Жингырто ведра кутонъёс, киысь мозмыса, ӵуш-паш поръя коридорысь выж вылтӥ ӟучтари. Пи муртлэн, ма, ужез нылмуртлэн сямен уггес ик пӧрмы ке но, тыршиськод ни, эсьмаса. Я, тани, со ӝыт вал кадь, малы ке но тодам лыкто пальпотӥсь лампочкаос, кузь коридормы тазатӥськиз. Дыр вуиз шутэтскыны. Нош кӧня ке пиос люкаськизы коридорлэн огпал пумаз. Кин ке но ӧтиз Герман Алексеевичез. Давай но давай, Герми, кут ай балалайкадэ. Кырӟанэз яратӥсь, крезьгурез кылзыны быгатӥсь муртъёс вылӥллям корпусэз чылкыт карисьёс - адямилы пумит кыл вераны быгатӥсьтэм, солэсь сюлэмзэ вӧсь карыны дӥсьтӥсьтэм егит пи вуиз аслаз кисьмам бусы кадь ӵуж балалайкаеныз. Кисьтӥськи-из у-ук! Кисьтӥськи- и-из... Улӥ, улӥ, улӥ, Вылӥ, вылӥ, вылӥ... ........ Анае гурзэ эстэм, дыр, но, муръётӥз ӵыныж потэ, дыр. Корказь выжыяз потэм, дыр, но "Пие бертэ!" - шуэ, дыр... ....... Возь кузя но васькыса мон Возь шулдырлы паймем вал. Возь шулдыр но вылымтэ со, Яратон сыӵе вылэм... Кырӟасьёс, ма, нырыь-валысь мыло-кыдо басьтӥськизы вал тодмо гуръёсъя кырӟаны но- валазы-а,умой ӧз поты-а сыӵе чибориё гуръёсыз асьсэлэн куараосынызы согыны, ӧйтӧд: коридорын одӥг Германлэн гинэ чиньыосыз ӧръяськыто со вакытысь тодмо гуръёсты. Ой, кыӵе чупрес тэтчазы солэн чик но крезен шудоно кадь вылымтэ чиньбыосыз, макем ӝог ветлӥзы соос ладъёс вылтӥ вошъяськыса,сӥ вылысь сӥ вылэ потаса! Герми шудыса пукиз азямы, нош ми, коридор миськем егитъёс, история но кылъя факультетысь пиос, сылӥм мышказ. Коридормы концерт заллы пӧрмиз... Виртуоз, инмар понна, виртуоз! Сыӵе ик шаплы шудэмез биниське милям "Визылмылэн" ӵуказе ӵукна бергано лентаяз. Мынам малпамея, солэсь быдэс концертлы тырмымон программазэ гожтыса кельтоно вылэм фонотекае - яке ог 20-30 аръёсы азьпала учкыны визьмы уггес тырмы, яке "мон ачимм тодӥсько" шуыса малпаз со вакытэ пичиесь гуръёсты гожтыса кельтонлы кыл кутӥсь кивалтсь, яке туннэ нуналэн гинэ кӧтмес гусъяса улыны дышеммы уг лэзьы дунъяны ӝужась талантэз. Кыӵе вакытын улӥськод, сыӵе аршинэн ик мертаськод. Солэсь уг луы, дыр, пегӟыны. Кулэ ке вал кинэ ке улӥгес карыны - солы сыӵе кабен ни улоно, кесёно ке кинэ ке куал-куалӟезиськытозь, со озьы ик кошке. Н.Гоголь шуэмзэ, лякиськиз ке, уд вушты ни. Аръёс ортчыса озь ымалпаськыны кутскиськод, нош табере - мар вань, со вань ини. Озьы ке но, Рам коть, лэп пӧрме "Визылысьтым" кадре. Общежитиын пумиськон но балалайкаен сыӵе шулдыр шудэез - мынам нырысетӥ пумиськонэ вал, дыр. Ӧвӧл, ӧвӧл, нырысетӥез синмаськыса паймем институтын дышетскись пилы. Кызьы озьы быгатэ? Кызьы? МИНмарен сётэмез, вылды. Мон соку, угось, чик но уг вӧтаськы вал ай, коридорез миськисьёс пӧлысь куд-огез, Герман но Можгаысь педучилищеез пыр потэм муртъёс шуыса, отын соос нотая шудыны мандолинаен но мукет сыӵе езо инстурментъёсын дышетскемъёс вылӥллям шуыса. Сьӧлыктэм малпан! Нотаосты мон ачим технической училищеын дыръям кӧня ке, кызьы шуод, самоучителья зынъяй,оркестре пуксьыса, балалайкаен но шудэм кари, нош - сыӵе-е! Табере валаськод ини,Герман инмарен сётэмзэ училищеын муромытэм, собере сое ми азьын возьматэм вылэм шуыса. Сыӵе шаплы но жингрес шудыны быгатэмзэ тодыса ни ӧтиллям вылэм сое татчы, коридоре шудыны. Сыӵе тӥни тодматскон. Нош татӥяз, сюресъёс ӵош вуттыозь, ми соин турлы интыостӥ лёгаським. Огазеяським ини одӥг юртын, пастухов урамын 13 номеро коркан - Печатья юртын. "Комсомолец Удмуртии", "Советской Удмуртия", "Молот", "Удмртская правда", книга поттон издательство, татӥяз собере "Дась лу!" - ваньмыз отын. Отысен кутскылӥз журналистлэн но дано-а, дантэм-а сюресэз, отысен ик аслаз сюресэз вылэ потылӥз удмурт писатель но. Тазьы малпано ке, удмурт гожъяськисьёслэн литературной институтсы. Ӵошен ужаны кутским "Дась лу!" газетын. Бабалайка пиналъёслэн газетсылэн редакцияз ӧз вуылы ни - мон уг тодӥськы редакциын янгышен-а, янгышатэк-а чебере гуръёсты куинь сӥё инструментэн шудэмзэ. Татын - гожтэтъёс, чуръёс, пумиськонъёс, малпаськонъёс. Нуналлы быдэ ог выллемгес уж, со понна нуналлы быдэ материалъёсты тунсыкогес карыса сётыны сюлмаськон. Таяз ини турлы шутэтскыны маза ӧвӧл. Медло со сюлэме вӧез понэм кадь кельшись но, медло со выль но, медло со жингыртӥсь но. Кылбурасьлы сыӵе уж, зэмзэ вераса, сермет, нош ма карод, удмурт шаерын со вакытэ но туж ӧжытэз, киысьтыд чиньыен лыдъямонэз сяна писательёс кӧтсэс тырыны, семьязэс сюдыны ӧз быгатылэ. Нош Герман но, мукетъёсыз но кылбурчиос асьсэлэн сыӵе адӟонзылы ӧз пумитъяськылэ: гогыедлэсь вылэ уд тэтчы, вужередлэсь азьло уд мын. Ӵош ужамын, ӵош данак ужъёс лэсьтэмын кадь. Ӵапак со ик вань уродэз ӵош ужанлэн: кусыпъёс мыркомо, ог-огедлы дышетӥськод но яркыт интыоссэ вунэтӥськод. Нош татын, мынам малпамея, Германлэн шара мылкыдыз пумен но пумен ватӥськыны ӧдъяз. Кескич но лек улон сыӵе шара мылкыдын улон сямъёслэсь палэнскыны дышетыны ӧдъяз. Вал соку сыӵе валатон: тынад творчествоед ужъёсыд аслад медло, темаед - аслад. Кинлэн ке кадь гожтыны - инмар мед утёз! Кемагес улэмъёсыз, ас удысазы пиньёссэс сиемъёсыз сое тужгес но чакласа улӥзы. Соин ик творческой омырын кыӵе ке но вожвылъяськон мылкыд улӥз. Кызьы, шуом, вуз поттӥсьёс мар поттэмзэс но потыны дасяськемзэс ватыны ярато, со мактал ик югдур творчество удысын но. Аслэсьтыз планъёссэ но кылбур темаоссэ со тужгес но ӧз вералля В.Романов азьын. Германлэн чакламезъя,солэн мурт визез аслаз карыса кылбуран сямыз лэчыт. Зэм, со вакытэ В.Романовлэн кадырез печатласьёс, гожъясьёс пӧлын вылӥын вал - техникаезъя кужмо гожтэмзэ солэсь ӝогак гинэ сётъяллязы: мукетъёсызлы сыӵе сюрес тросэзлэнил1гемын ӧй вал. Соин ик Герман но шонен малпан вылын ветлӥз, дыр. Мылкыдъёс калыкъёслэсь пумен пытсаськылӥзы - зэмзэ но, ваньмызлы уд усьты сюлэмез. Малы ваньмызлы, ӵошен ужаседлы но. Кызьы шуо али, тушмон азьлань мынон сюресэз ӵоге, азьпалтӥд ветлэ. СО вакыьэ, оло, омыр но сыӵе вал. Тӥни со дырысен, шуыны луоз, мылкыдъёс ватскизы блокнотъёсы, кылбур чуръёсы. Мыным потэ, лэсьтылоно луиз аслаз мылкыдызлы тупасьтэм ужъёсыз, эрико сюлэм сяськаез ӝокатыса будэтэм вамышъёсыз... Герман Алексеевичлэн балалайкаен шудэменыз пленка йылпумъяськиз - быриз монтажмы но. Ойдо, вера, герми, нош ик, макем шаплы шдӥськод вал тон куинь сӥё балалайкаеныд Ӵуказе но, ката но... котьку но. Герман Ходырев "Шаер азьын сюлмы чылкыт" (Кылбурчи но журналист Александр Вотяков сярысь тодэ ваёнъёс) 1. Можга педучилищеын дышетскон аръёсам Удмурт радио пыр ӵемысь кылылоно вал "Бер сӥзьыл вожектэ ӟег бусы" кырӟанэз. Ньыльдонэтӥ аръёслэн пумазы та кырӟан тужгес но мусо но дуно вал, малы ке шуоно, бадӟым ожысь каргам тушмонэз вормыса бертэм солдатъёслэн пиоссы армие мыныны но вуизы ини. Со кылбур-кырӟанлэсь кылъёссэ гожтэм вылэм егит автор Саша Вотяков. Нош солы гур пуктэм тып-тып мугоро удмурт крезьгурчи Иван Краснопёров. Мынам та кырӟанэз 1: быдэсак тодэ вайытэме потэ, тросэз арлыдо луэм атайёс но анайёс выльысь син 1: азязы пуктозы вунонтэм егит дырзэс: 1: Бер сӥзьыл вожектэ ӟег бусы. 1: Писпулэсь люкисько кураъёсыз. 1: Со вакыт люкиськи мон тонэн, 1: Армие кошкыкуд, гажанэ. 1: Туннэ кадь ик пуксё син азям 1: Сад улын пукеммы ӝытазе. 1: Кошкыны ӵыдытэк кырӟамы, 1: Кырӟанын мылкыдмес ӧръямы. 1: Малпаса вордӥськем шаердэ, 1: Сак утёд тон узыр странамес. 1: Оскисько - сюлэмад мур возёд 1: Асьмелэсь яратон кусыпмес. 1: Шонер лэсьтӥз Саша Вотяков, аслэсьтыз нырысетӥ вамышъёссэ аслаз ёзъёсызлы 1: сӥзьыса. Ӟырдыт мылкыдзэ но пӧсь сюлэмзэ быгатӥз чуръёсаз мур пыӵатыны. 1: Мынам ёзъёсы тодазы ваё на, дыр, Сашалэсь "Асьмеос кужмо" кылбурзэ. Со 1: печатласькиз витьтонэтӥ аръёслэн кутсконазы "Советской Удмуртиын", поттэмын вал 1: "Кизили" альманахын но. Али но тани лыдӟысаа потӥ мон сое: макем шӧдӥське отын 1: ас вакытаз улэм егит муртлэн малпанэз но мылкыдыз. Капчи ӧй вал солы: пӧсез но 1: кезьытэз чидано луиз. Но ӵуказеезлы осконэз мылкыдзэ куашкатыны, зӥбыны ӧз 1: лэзьы. Тужгес но ож аръёсы, со бере но капчи ӧз йӧты. 1: Ӧм валалэ, оло, ӧй вал жадён, 1: Шаер понна яратӥмы ужез. 1: Школа вошкиз паськыт колхоз лудэн, 1: Ужын нэнэй валтӥз, дядяй музэн. 1: Кӧня нюлэс сётӥм странамылы 1: Мужвай, Подмой бадӟым нюлэсъёсысь. 1: Туж ӵем кӧлам инбам шобрет улын - 1: Уен-нунал ӧм поталэ ужысь. 1: .... 1: Улон пыриз аслаз ӧраз. 1: Книга выльысь кутӥм на асьмеос. 1: Школамылэн адскиз паськыт ӧсэз - 1: Дышетскыны кутским егит муртъёс... 1: Туала егитъёс радио пыр, сцена вылысен кыло Саша Вотяковлэн кылъёсызъя гожтэм 1: но калыке паськыт вӧлмем кырӟанъёссэ. Тазьы умой-умой чаклано ке, солэн 1: кылъёсызъя уно гинэ кырӟанъёс гожтӥз егит дыр эшез тодмо удмурт композитор 1: Николай Егорович Шкляев. 1: Мон нырысь-валысь уг валаськы вал, малы ай та Коляен Саша воксё родной братъёс 1: кадь. Шкляевлэсь юаны ӧй-а кариськы. "Что ты, - шуиз но шунды кадь пальпотӥз 1: Николай Егорович, - ми ведь соин 1939 арын Ижысь музыкальной школа- 1: интернатын дышетскыны ӧдъямы вал. Милемын ӵош вал Гозек ныл Ольга Гуртова, 1: Ӵӧжйылысь Семён Садовников но мукетъёсыз. Юн эшъяськыса, огмылы-огмы юрттыса 1: улӥмы. Кстати, Сашалэн куараез жингрес чузъяськиз, со усто кырӟаз. Фортепьяноен 1: шудыны дышетскиз. Бурдъяськем мылкыдын мынэ вал солэн дышетсконэз... 1: Нош собере, ачид тодӥськод, асьме кунмы вылэ убир Гитлер ожен лыктӥз. Кутскиз 1: Быдӟым Отечественной война. Сашалэн атаез Митрей агай, Дмитрий Иванович Иже 1: лыктӥз но пизэ дораз нуиз. Мон, шуиз со, оже кошкисько, дорын покчи вынъёсыд 1: кылё, ужано луод. Мон интые воргорон кылиськод, шуиз. Тӥни озьы, Сашалэн ӟеч 1: кутскем малпанэз куспетӥ уретэмын вал". 1: Армие ветлыса но мар, Саша кышнояськиз. Асьсэ гуртысь лачмыт но визьмо, ужась 1: нылэз Маниез аслыз эшлы ваиз. Собере со Иже ужаны лыктӥз. Воткинской линия шуыса 1: нимаськись трамвай дугдылон палась Квартальной переулокысь одӥг интые мунчо 1: быдӟа гинэ юрт пуктэм кариз. Со юртэз мон али но ӟеч тодӥсько на. Саша 1: вневедомственной охранаын ужаз. 1: Студент дыръёсам, витьтонэтӥ аръёслэн кыкетӥ ӝыныязы, Удмурт театрысь яке 1: Культура дворецысь спектакль яке концерт учкыса бертыку, Советской урамысен 1: пумитано вал кыскето шубаен яке сьӧд буям шубаен, пуштырес гоно изьыен, зӧк 1: шуныт пӧзьёсын сзэь мугоро воргоронэз. Саша уйлы ворсаса кельтэм магазинъёсты 1: чакласа ветлӥз. Со сяна, егитъёслэн ӝыт ужась школаязы дышетскиз на... Куинь 1: нылъёсыз будӥзы. Веранэз ӧвӧл, капчи ӧй вал. "Тани йыг-йыг пыд йылам султӥ ке, 1: соку тодмо кылбурчи эшъёсме но дорам ӧтчаны быгато", - шуылоз вал Саша, тазьы 1: урамысен пумиськыку... 1: Нош ог аре Сашалэн атаез, Митрей агай, пиезлы юрт пуктӥз. Урам пала куинь 1: укноен, гидкуазе - кык укноен. Та корказэ липыны, пулъёслы дырды лэсьтыны Саша 1: монэ но ӧтчаз. Соку ай быдэс корка липетсэ пулэн липим. 1: Туж тумошо вал мынам ужаме. Монэ дырды кырыны косӥзы. Митрей агай вань та 1: лэсьтӥськон-пуктӥськон ужъёсын ачиз кивалтӥз бере, ваньзэ чакла, учке, кутэ но 1: мон доры лыктэ. Валэктэ, кызьы капчигес но кысыкгес ужаны луоз. Тульӟемгес 1: кимышме адӟиз но пальпотӥз, ничего, пе, ужыны сотэк уг луы. Куазь малы ке пилемо 1: вал но, зор усемлэсь азьло корка липонэз быдтыны тыршим. Нуналлэн пумаз кыӵе 1: йӧн-йӧн но чебер адӟиськиз Сашалэн выль улоно юртэз. 1: "Нэнӥен вераськон" бадӟым кылбураз, номыре ватытэк, меӵак но туж зэм верам 1: кылбурчи: 1: Мар ватонэз, курадӟимы, 1: Нош чидаммы ӧз луы юнме. 1: Асьме ӟырдыт уженымы 1: Ми утимы выль улонмес. 1: Пиналысен тэльын, лудын 1: Луим кузё но воргорон, 1: Синмаськымон эшъёс пӧлын 1: Улон понна юнмаз оскон. 1: Пинал аръёс лобо сэрыт, 1: Ортчем дырез уд жаляськы. 1: Шаер азьын сюлмы чылкыт - 1: Уже понна уг возьдаськы. 1: Витьтонэтӥ аръёслэн кыкетӥ ӝыныяз Сашалэн улоназ бадӟым шумпотон луиз: 1: кылбуръёсын "Нырысетӥ вамыш" сборникез потӥз. Татчы авторлэн вордӥськем шаерлы, 1: яратонлы, серемес но нылпиослы сӥзем кылбуръёсыз пыремын вал. 1: 1958 арын куарусён толэзьлэн кутсконаз Ижын ортчиз Удмуртиысь писательёслэн 1: витетӥ съездзы. Тани та бадӟым кенешысен Саша кузьмаз соку гинэ типографиысь 1: вуттэм, сьӧд буёл зынэн лӧсъяськись книгазэ. Мон верай ини - та нырысетӥ 1: сборниказ солэн нылпиослы кык кылбурез пыртэмын вал. Соосты лыдӟи но эшелы соку 1: ик верай: "Саша, тынад нылпиослы но гожъяны быгатонлыкед вань. Вай, ӝегатскытэк 1: кутскы та выль удыс борды но..." Мылкыд кареме солы интыяз луиз кадь. Та 1: сборникысьтыз ик "Куинь эшъёс" кылбураз поэт возьматэ пиналъёслэсь кин луыны 1: малпамзэс. Огез малпа машинист кариськыны, чугун сюрес вылтӥ бадӟымесь 1: составъёсты нуллыны. Мукетызлэн шофер луыны мылкыдыз вань. Нош куинетӥ эшсы 1: сабырак вера: 1: Мон уг лобы гуртысьтым, 1: Нош уже луоз дано. 1: Ас гуртам, асьме клубын, 1: Возьмато, эшъёс, кино... 1: 1: 2. 1: Алигес аслам архивам бугыръяськыкум, Сашалэн нылпи кылбуръёсыз пумысен 1958 арын 1: кык тетрадь листъёс вылэ гожтэм ужме шедьтӥ. Сашалэн газет-журнал бамъёсын 1: потылэм нылпи кылбуръёсыз пумысен малпанъёсме гожтӥськем: "Милям семьямы будэ" 1: (нылпи литературае пырись выль нимъёс сярысь). Ньыльдон ар пала мон та ужме 1: утялтыса возиськем, гожтэмме тодэ ваёнъёсам пыртыны мылкыд кари: 1: "Кыӵе шумпотэ сюлэм, куке тынад матысь эшед тонэ маин ке но туж кулэен 1: шумпоттытэ. Сыӵе мылкыды луиз мынам, "Молот" журналэ но газетъёсы алигес 1: печатлам Александр Вотяковлэсь нылпиослы сӥзем кылбуръёссэ лыдӟыса. Та берло 1: аръёсы егит поэт журналъёсы но газетъёсы улонысь пӧртэм темаослы сӥзем 1: кылбуръёссэ печатлаз ке, туэ со витьымтэ шорысь та удысын ужась эшъёссэ 1: паймытӥз: Вотяковлэн нылпиослы гожъяны но бадӟымесь быгатонлыкъёсыз вань. Со 1: сярысь умойгес веран понна басьтомы "Молот" журналлэн 8-тӥ номераз печатлам 1: "Ойдолэ азбаре" нимо сузьетысьтыз нылпи кылбуръёссэ. Татын - куинь кылбур. Ма 1: сярысь маде егит поэт отын? Тани нырысяз, "Кубиста" нимояз. Вотяков дас кык 1: чурен усто возьматыны быгатэм пиналлэн песянаеныз ӵош будосъёслэн сӥзьыл пал 1: удалтэмзылы шумпотэмзэ: 1: Сӥзьыл пал будосъёсмы 1: Убомес шобыртӥзы. 1: Йыръёссы, уд-а паймы?- 1: Тыкваос кадь луизы. 1: Собереяз пинал удалтэм кубистаос сярысь тазьы шуэ: 1: Кожалод тон, пуксиллям 1: Ӟазегъёс бакчаямы - 1: Юг, тӧдьы пиштэ милям 1: Удалтэм кубистамы. 1: Поэт кылбураз уг вера пиналлэн будосъёсты кызьы утялтэмез но будэтэмез сярысь. 1: Оло нош, со сярысь вераны кулэ ик луысал, дыр. Но та кылбурез лыдӟем бере, сыӵе 1: ятвылтон лэсьтыны уг луы. Нырысь чуръёсты лыдӟем бере ик ини, асьмеос син азе 1: пуктыны быгатӥськом бакча ужез гажась пиналэз. Нош макем пайдаё луоз, пичи 1: пиналъёс пичиысен ик бакчаын мерттэм будосъёсты утялтыны дышизы ке. Ӟеч ужъёсты 1: быдэсъяны соосты вазь дышетыса ӟеч луоз. Мыло-кыдо гожтэмын "Огреч" но 1: "Шундыберган" кылбуръёс. Отын шӧдӥське егит поэтлэн пиналъёслы матэ кариськыса 1: вераськыны, эшласькыса улыны тыршемез. 1: Пинал мылкыдын гожтэм чуръёс вань озьы ик газетэ печатлам "Ваньмыз дась" 1: кылбураз. Поэтъёс уно гожтӥзы нырысьсэ школае мынӥсь пиналъёс сярысь 1: кылбуръёссэс. Вотяков выль сямен гожтэм та кылбурзэ: 1: Ваньмыз дась: букварь, пенал, 1: Выль портфель тани, 1: Ӵуказе туж вазь ӵукна 1: Сайкалоз Вани. 1: 1: Пияшлэн али мылкыд 1: Школае чортэ. 1: Нуналэд соин, вылды, 1: Кузь но кузь потэ. 1: Кыӵе огшоры но шонер кылъёсын возьматэмын нырысьсэ школае мынӥсь дышетскись 1: пиналлэн мылкыдыз. Веранэз ӧвӧл, пиналъёс та кылбурез мылысь-кыдысь лыдӟизы, 1: луоз. Ведь пинал уйзэ рос-прос уг кӧл. Со чидатэк возьма ини, ку гинэ школае 1: мынон дыр вуоз. 1: Асьмеос А.Вотяковлэсь кӧня ке гинэ кылбуръёссэ эскерим. Поэт нылпи литературае 1: нырысь вамышъёс лэсьтэ, вамышез йыг-йыг, оскымон. Ас сяменыз гожъяны выре 1: Вотяков, вот ведь мар самой дуноез но валтӥсез поэт понна. 1: Нырысетӥ вамышъёс. Али соос юнэсь ӧвӧл на. Поэт устоесь, пеле шуккиськымон 1: рифмаос утчан бордын уг выр на. Со али пуштросэз умойгес мед луоз, дыр, шуыса 1: малпа. Кылсярысь, "Огреч" кылбурез рифма ласянь ляб пӧрмем. Мӧйыослы гинэ 1: лыдӟымон луэм "Шундыберган" кылбурез. Тырмымтэосты тупатыны луоно, поэтлэн 1: кужымез вань. Солэн шӧдӥське нылпи литература удысын ужаны бадӟым мылкыдыз. 1: Нылпиослы гожъясь авторъёслэн отрядзы будэ. Со туж шумпотымон. Мон оскисько, 1: ӝоген Удмуртиын нылпиослы гожъясь авторъёс асьсэлэн дуно лыдӟисьёссылы кие зуч- 1: зуч кутымон книгаос кылдытозы шуыса. Ваньмыз - азьпалан. Нош азьланез макем 1: тунсыко". 1: Азьпала мыныса вераме потэ тани мае: 1962 арын Александр Вотяковлэн нылпиослы 1: потӥз нырысетӥез кылбуръёсын "Ойдолэ бакчае" сборникез. Лыдӟисьёс сое умой 1: пумитазы. 1: Куатьтонэтӥ аръёс Александр Вотяков понна удалтэм аръёс луизы. "Ойдолэ бакчае" 1: книгаез бере 1966 арын печатласькиз кылбуръёсын "Вить кузя ми" сборикез. Ӟеч 1: мылкыдэн тырмем книга со. Мон али но сое яратыса лыдӟисько, малы ке шуоно, уж 1: тема татын нош ик азьланьтэмын но быгатыса возьматэмын. Тужгес но сюлэмез 1: бугыртэ "Иши" выжыкыл-поэмаез... 1: Нош солэсь азьло... 1: 1: 3. 1: Александр Вотяков витьтонэтӥ аръёслэн пумаз "Советской Удмуртия" газетэ ужаны 1: лыктэ. Дас арлэсь кема тыршиз татын. Кык ар но ӝыны мыным соин одӥг отделын 1: ужаны шуд усиз. Нош кызьы но мар муген вуи мон та газетэ? 1964 арын 1: пӧсьтолэзьлэн кутсконаз "Удмуртиысь комсомолец" газетэ Алнашысь ужаны лыктӥ. 1: Татын мон арнялы быдэ поттыны дасяй "Дась лу" бамез. Нош куарпотон толэзьлэн 1: берпум нуналаз газетлэн кузёез Флор Васильев монэ кошкытӥз: тынад, пе, 1: должностед сокращение сюриз. Ӵуказеяз ик мынам интыям Василий Садовниковез 1: ӧтизы. Та югдур сярысь веран кузь луоз, мукет дыръялы кельтом ини. 1: "Советской Удмуртиын" 1964 арлэн кутсконысеныз арнялы быдэ дышетскись пиналъёслы 1: сӥзем бам поттыны кутскизы. Нимазы сое - "Пинал куараос". Нырысь ик сюрес мытӥз 1: Саша Вотяков, собере та ужез азьланьтӥз Аркадий Кузнецов. Мон та отделэ ужаны 1: лыктыкум, Саша клубъёсын, театръёсын, самодеятельностен выриз. Нош Кузнецовез 1: ответственной секретарьлы, Степан Григорьевич Машковлы, кивоштӥсе юнатӥзы. Тӥни 1: соку ик Степан Григрьевич монэ та газетэ ужаны ӧтиз. 1: Культура отделэн соку кивалтӥз аспӧртэмлыко адями, журналист Семён Васильевич 1: Шкляев. "Шӧкыч" бамез дасянын тыршиз кылбурчи Семён Андреевич Перевощиков, нош 1: школа ужпумъёсты нуиз Михаил Алексеевич Перевозчиков. Отдэлэн кивалтӥсьмылэн 1: маскара йылолыз вал: лумбыт ужаса, чур дасяса пукиськод-мараськод, нош со эшшо 1: ке парторганизацилэн секретарез вал на, лумбыт сямен уг луы, ӝыт пал, ужан нунал 1: бырыку, вуэ но, пиджаксэ пукон вылэ ныпъяса, саесъёссэ пужалляса, шорамы йӧн-йӧн 1: учкыса шуылоз вал: "Пукиськоды, пуконо луоз на. Мар со журналист, редакциын бер 1: ӝытозь уг пукы ке". 1: Сашаен Семён кисыязы уг пыро вал, синмаз ик учкыса меӵак вераллязы: "Семён 1: Васильевич, кин лумбыт пӧсямон ужаз, кин кытӥ ветлӥз - ми ведь ӧм адӟе. Так что 1: милемлы кошкыны пора..." Нош со, серекъяса гинэ верай шуылӥз ке но, огъя 1: редакционной кенешъёсын отделысьтыз ужасьёссэ, тужгес но милемыз, еигтъёсыз, 1: яратэ вал "чепылляны" - ужысь, пе, вазь кошкыло... 1: Нош Сашалэн сюлэмаз котьку но гомаз ӵуказе нуналлы осконэз. Берлогес ини, 1: мӧйыгес аръёсаз, кылбурчи "Вордскем бусы" кылбураз тазьы гожтӥз: 1: Колхоз бусы, паськыт бусы, 1: Татысь валай ас шудбурме. 1: Сюдӥсь но тон, вордӥсь но тон, 1: Тыныд сӥзи мон улонме... 1: Таӵе мылкыдо вал Саша эшъёсыз, калык пӧлын. Со котьку но чылкыт, кельышлы, 1: аслыз тупась дӥськутэн ветлӥз. Гужем нуналъёсы котьку но вакчи саесо дэремен, 1: пурысялэс яке куренялэс брюкиен. Но мынам тодам пыраклы кылиз таӵе суред: со 1: ӟарыт-лыз дэремен ветлыны яратылӥз потэ мыным. Синъёсыз лызэсь вал, оло, соин но 1: шат? Пурысялэс-ӵужмыт йырсиез бабыльтӥськемын вал, котьку ӝикыт сынамын. 1: Сӥзьыллы матэ Саша котьку но чылкыт костюмен, дэрем воротниксэ костюм воротникез 1: вылэ поттыса ветлӥз. Галстукен ветлэмзэ туж ик уг тодӥськы.Пиджаклэн, пе, дурыз 1: чырты котыртӥ чаляк посӥське. Дэремлэн чырты котырыз кырсёмиз ке но, сое 1: миськыны кема ӧвӧл. 1: Саша - лап-лап удмурт гуртын, ужась семьяын будэм пи. Ас гуртоосызлэсь вераськон 1: кылзэс со туж ӟеч тодӥз. Аслаз кылбуръёсаз туж быгатыса кутылӥз калыкысь кылэм 1: лэчыт веранъёсты. Маскаръяськонэз туж ӟеч валалляз, мултэс лӧпшанэз ӧз гажа. 1: Эшелэн вордскем Подшивалово гуртаз мынам ветлэме огпол гинэ ӧй вал. 1967 арын 1: 19 мае ӵошен вуылӥм татысь школае. Туж умой дасяськиллям пумиськонлы. Нюк кузя 1: тубыса, милемды нюлэс кыралэ нуизы. Отын пионеръёслы сӥзем тылскем ортчытэмын 1: вал. Саша нырысь ик ӟечкылаз пиналъёсты тулыс праздникен, дышетскон арзэс усто 1: йылпумъяны мылкыд кариз. Гурт котырысьтыз вӧлмыт бусыосты учкыса, со тодаз ваиз 1: герыен гыремзэ-усыямзэ. Пиналъёслы лыдӟитз "Нэнӥен вераськон" бадӟым кылбурзэ. 1: "нырысетӥ вамыш" сборникысьтыз но куд-ог кылбуръёсыныз тодматӥз: 1: Ӧй пыра мон ӝуась тылэ, 1: Ӧй кыл ожлэсь гудыръямзэ. 1: Нош со аръёс пинал пилэсь 1: Туж вазь сайкатӥзы визьзэ: 1: 1: Ӝожтэк верам ке но уг лу, 1: Ми люкиським дышетсконэн, 1: Пинал кие кутӥм вуж плуг, 1: Тыршим мӧйы муртъёс музэн. 1: 1: Яке тэльын. Лымы - кускозь, 1: Куазь пелляське - сюрес ӧвӧл. 1: Валъёс воззэз мырдэм кыско, 1: Сыӵе дыръя тэльын коть кӧл... 1: Кыӵе гинэ ужын ӧй вал со - тыршиз, йӧн-йӧн адями сямен. Литературае сюрес 1: лёгемез сярысь кылпум поттэмез бере, вераз Тимофей Иванович Шмаковчлэсь нимзэ. 1: Война бере аръёсы егит куараосты будэтонын, соосты бурдъянын трос кужымзэ сётӥз 1: Тимофей Шмаков. Гожъяны кутскисьёсыз ялан син шораз чакласа, синйылтыса возиз. 1: Яраз солы Саша Вотяков но. "Дышетскемез ӧжыт ке но, аслаз шӧдон-валаменыз, 1: тыршеменыз азинлык басьтэ", - шуэмзэ тодӥсько на мон солэсь Саша сярысь. 1: 1: 4. 1: Тани асьмеос Вотяковез кылбурчи гинэ шуиськомы. Но ведь со кужмо, нодлыко 1: журналист вал на. Солэн улонысьтыз тае нокызьы но вератэк кельтэме уг поты. 1: Газетын соин ӵош ужакум, мон солэсь трос умойзэ басьтӥ. Саша материалзэ кызьы ке 1: туж кысык но валаса, йӧнзэ шедьтыса лэсьтэ вал. Сыӵе вал Семён Перевощиков но 1: газетын ужан аръёсаз. Малпалэ ай асьтэос: котькуд арняе потӥсь "Шӧкычлэсь" 1: пуштроссэ аспӧртэм кароно вал. Ӵем дыръя Сашаен ӵош "Шӧкычез" дасяны юрттылӥм. 1: "Тани, Саша, - вазиськылӥз Семён Андреевич ваче пумит ӝӧк сьӧрын пукись эшезлы, 1: - та материалэз сценка выллем дася. Нош тон, Герман, тазэ монолог вылллем кар". 1: Саша вакчи дыр куспын сценкаез пӧрмытъяз. Мон солы шулдырак шуылӥ: "Тон артист 1: кадь, котьмалэсь йӧнзэ шедьтӥськод, жаль, пьесаос уд гожъяськы". Оло, тон пушкын 1: бадӟым драматург каръяськемын, шуиськом вал солы. Но со меӵак вазьылӥз: "Монтэк 1: но соин вырисьёс вань, кылбураны пӧрмытӥ ке, со понна но тау". 1: 1966 арын оштолэзьлэн пумаз Сашалэн потӥз нылпиослы "Вить кузя ми" кыкетӥ 1: книгаез. 1: Со потэм бере, Сашалэн творческой сюресэз уката паськытаз. Табере, оло, бадӟым 1: арбери но гожто ай, шуылӥз со. Озьы милесьтым, ӵош ужась эшъёсызлэсь, визьзэс 1: сына вылэм. Мон, пе, лякыттэм, азьтэм гондырпи сярысь поэма-выжыкыл гожтыны 1: басьтӥськи, нимай сое "Миши". 1: Огпол со ваиз киын гожъям ужзэ. Тани, пе, маке пӧрмытӥ кадь. Семён Перевощиковен 1: но Николай Васильевен (соку со секретариатын ужаз) лыдӟыса потӥм но, одӥг ымысь 1: кадь верамы эшмылы: кылзы, Саша, поэмаед эшшо но зол йӧтоз, героедлэсь нимзэ 1: одӥг куаралы вакчиятӥд ке - Миши интые вай Иши гинэ шуом. Адӟид-а, чылкак мукет 1: пала берытскиз, серем пырыосыз но ымгай луизы. 1: - Вот идея, пиос. Ох, зол ук! Вае киостэс кутыло. Вот эшъёс ке, эшъёс. Мон ачим 1: но нимзэ мукетгес кароно шуыса малпалляй... 1: Но... кӧня ке сузяно, волятоно чуръёсыз вань на. А так, Саша, тон молодец. 1: Эшъёсыдлэсь верамзэс, индылэмзэс пеляд понӥд, муг-маг уд кариськы, - син ултӥз 1: кескичак учкиз со шоры Семён Перевощиков. 1: - Вай али тупатыса потом. Собере Фомалы васькыты. "Молотын" шумпотыса 1: печатлалозы, - шуиз Николай Васильев. 1: - Зэм но, - лӧптӥз Саша. 1: Озьы тӥни, эшмылэн таиз выль ужез 1967 арын "Молот" журналын потӥз. Нош кык ар 1: ортчыса, Иши сярысь выжыкыл "Удмуртия" издательствоын нимаз книгаен 1: печатласькиз. Ӟуч кылын но югыт дуннеез адӟиз. Берыктӥз сое Олег Поскрёбышев. 1: Вераны кулэ тани мае но: Саша ачиз ик выжыкылэз инсценировать кариз но, Удмурт 1: телевидение нылпиослы мыло-кыдо спектакль возьматӥз. Ишилэсь рользэ шудӥз артист 1: Валерий Галеев. 1: 1: 5. 1: Сизьымдонэтӥ аръёсы А. Вотяков одӥг книга гинэ поттыса вуттӥз. Нимаськиз со 1: "Оскисько тыныд" шуыса. Мукет уже кошкеменыз, эшъёсызлэсь люкиськыса улэменыз, 1: дыр, малпасько, солэн творческой мылкыдыз сӥялскиз. Газетысь кошкыса, со радиоын 1: ужаз, собере - заводэ выжиз. Тазалыкез уродмиз... 1: Алигес Николай Шкляевен пумиським но, бадӟым ӝожтӥськемзэ мыным вераз: асьме 1: интеллигенция, пе, кӧм пушкы ватскыса кадь улэ. Ваньмыз ас понназ, эшедлэн 1: сюлмаськонэз кулэ ик ӧвӧл. Озьы ик луиз Саша Вотяковен. Нокин но сое буре ваись 1: ӧвӧл, бадӟымос книгазэ но поттыса, сьӧлык ӧй луысал, дыр. Ведь солэн кӧня 1: лирической, сатирической, нылпиослы гожтэм кылбуръёсыз, кырӟанъёсыз. Калык 1: визьмолэсь но визьмо верам: тон алама кылид ке, нокинлы но кулэ ӧвӧл; яке адями 1: улонысь кошке но - туж чаляк вунэто. Со - вераны луонтэм бадӟым кайгу... 1: Мон Николай Егоровичлы дурбасьтӥ. Литературной критик Алексей Ермолаев огпол 1: тазьы вераз: "Александр Вотяков "Нэнӥелы" кылбур-кырӟанзэ сяна, номыр ке но ӧй 1: гожтысал, солэн нимыз историе кылемын ни. Зэм, "Нэнӥелы" кырӟан - кужмо кырӟан. 1: Аслаз пуштросэныз но, крезьгуреныз но со адямиез мур но бадӟым малпаськонэ 1: уськытэ. Со бордын ик, мон сямен, та кырӟанлэн ноку бездонтэм буёлэз, тӧлӟонтэм 1: крезьгурез". 1: "Мынам дорам но, ӵыжы-выжыосы но кырӟанэз ярато. Мон ачим но кырӟанэн пиналысен 1: эшласьки. Кин тодэ, ож ке ӧй луысал, мон одно ик кырӟась но музыкальной 1: инструментъёсын шудӥсь луысал. Ӧз тупа, ӧз кемды. Озьы ке но, со мыным 1: литературае сюрес лёгыны юрттӥз. Иже улыны лыктыса, эшъёсын но узырми. 1: Гожъяськон удысын ужан мылкыды уката но пуромиз", - тодаз олокӧня но пол вайылэ 1: вал Саша. Али радио пыр кылзӥськод ке солэн кылъёсызъя гожтэм тазэ яке созэ 1: кырӟанэз, соку ик А.Вотяковлэн аслаз куараез, вераськемез вӧзад ик кылӥське 1: кадь... 1: 1: 6. 1: "Нылпиослы тынад, Саша, ньыль книгаосыд потэмын ини. Оло, писательёслэн Союзазы 1: пырон сярысь малпаськоно?" - шуи мон солы. Соку "Дась лу!" газетын ужасько вал 1: ини. Оло, солэн мылкыдыз малы ке урод вал, мон ӧй тоды угось, Саша киыныз шонтӥз 1: но ӟеч мылкыдын верам ӵектонме уретӥз: "Э-э, мар со Союзад! Мон сотэк но улыны 1: быгато. Кожаськод, Клабуков мыным дурбасьтоз-а? Одӥг но уз. Союзэ монэ матаз но 1: уз лэзьы..." 1: "Кылзы ай, Саша, тыныд куинь дэмланъёс кулэ луозы. Огзэ, али ик верасько, мон 1: тыныд гожто, мукетсэ, шуом, Василий Григорьевич гожтыны пумит уз луы. Куинетӥзэ, 1: шуом, Гай Сабитов яке Даниил Яшин..." 1: "Озьыез озь но, адӟиськод ук, нылпиослы гожъясь писательёсты кесё, азбарлэсь но 1: бакчалэсь кыдёке уд потӥське, шуо... А тон эшшо ке монэ писательёслэн Союзазы 1: пырыны ӝуткаськод. Уз, Германэ, монэ матаз но уз лэзе..." 1: "Ну, Саша, тон токма пӧсекъяськод. Азбар но, бакча сярысь но умой гожтэмын ке, 1: сое нокин уз курла. Курла со, кин ке нылпи литературалэсь быртык лысьӧмзэ но, 1: пуштроссэ но уг вала. Мон тодӥсько, кин озьы бызгетэ, тон но тодӥськод. Тон 1: малпа али, нош асьсэлэн нылпи литература ласянь кыӵе ке тодон-валанзы вань-а? 1: Ӧвӧл, ӧй вал, уз но луы. Тани монэ верам шуод али: асьмеос гурт котырысен 1: кутскыса, бадӟым дуннее но вуимы ини. Нош со вылынъяськись муртъёсмылэн сое чик 1: но адӟемзы уг поты. Улон ваньзэ интыяз пуктоз али, чиданмы гинэ медаз чигы..." 1: "Туж тау, Герман, мынэсьтым сюлэмме буйгатэмед понна. Но, пожалуй, мон все равно 1: Союзэ чуртнаськыны уг туртты. Книгаос гожъяны визьмы медаз быры, тазалыке умой 1: мед луоз. Лыдӟись мынам гожъямысьтым мар ке но ӟечсэ аслыз шедьтоз ай..." 1: Озьы тӥни Сашаез Союзэ ӝутканы ӧйлась. 1: Сашалэн мылкыдыз уката но зӥбиськем кадь луиз, сюлэмызлы дуно эшез, мусо 1: кузпалыз - Марусяез кулэм бере. Эшелэн улонэз ик пильмаськиз кадь. 1977 арын 1: потӥз солэн кылбуръёсын но кырӟанъёсын "Оскисько тыныд" выль сборникез. Саша 1: улонлэсь котькыӵе дырзэ, вакытсэтодэ, вала вал. Ваньмаз сямен кылбуръёсаз солэн 1: одӥг малпанэз югекъяз - вае эшъяськыса уломе. "Бур пыдыным лёгышто" кылбур- 1: кырӟаназ вань кужмо верам мылкыдыз: 1: Чале, эшъёс, огазе но, 1: Чале шулдыръяськоме, 1: 1: Огмес огмы яратом но 1: Весь гажаса уломе. 1: Ужез, ог-огдэ гажаны ӧтиз кылбурчи. Но сое гажамтэзэс возьматӥзы 1985 арын 1: писательёслэн Союззы, "Молот" журналлэн, газетъёслэн редакциоссы. 23 сентябре 1: Саша улонысь кошкиз, секыт висемез бере. 25 сентябре сое ватӥзы. Берпум сюресаз 1: Сашаез келяны ветлӥзы композитор Николай Шкляев, кылбурчи Гай Сабитов но милям 1: редакциысь ужась, Сашалэн ӵыжы-выжыез, Леонид Фёдоров. Нош вань редакциосты 1: Завьялово районысь одӥгаз колхозэ картофка октыны лэзизы. "Советской Удмуртия", 1: Сашаез буре вайыса, нокыӵе ивортон но ӧз сёты. Нош Саша та газетын дасо арлэсь 1: ятыр ужам адями вал. Марисовлэн эксэйяськон вакытаз вал со... 1: Нош Александр Вотяковез калык котьку но ӟечен буре ваёз. Со "Нэнӥен вераськон" 1: бадӟым кылбураз туж визьмо вераз: 1: Шаер азьын сюлмы чылкыт - 1: Уже понна уг возьдаськы. 1: Вань улытозяз со сыӵе вал. Ортчозы аръёс. Выль лыдӟисьёс будозы но, А.Вотяковез 1: чебер, мыло-кыдо лирической кылбуръёсыз, кырӟанъёсыз, нылпиослды гожтэм чуръёсыз 1: понна буре ваисьёс уз быре. Кӧня вань гожъямъёсыз - соос асьмелы дунъяны луонтэм 1: дуно шыкыс. 1: "Ӟечбур!", 1992, 15 1: южтолэзь, 22 южтолэзь 1: 1: 1: 1: 1: 1: 1: 1: 1: 1: 1: 1: 1: 1: 1: 1: 1: 1: 1: 1: 1: 1: 1: 1: 1: 1: 1: 1: 1: 1: А.Лаптев - Г.Ходырев 1: 1: "Мон гажасько зӥбыт адямиосты..." 1: 1: А.Л. Тӥ, Герман Алексеевич, котькинэн вераськыны, огъя кыл шедьтыны быгатӥськоды 1: кадь потэ. Кыл шыкысты но сцена вылын шудӥсьёслэн выллем узыр: туж трос яратоно 1: веранъёсты вань. Кылсярысь, "Омель агай верамъя, мон, как честной колхозник...", 1: "верасал но, ачим татын", "далеко пойдешь"... Артист луыны уд-а малпаське вал? 1: Г.Х. Веранме кутскеме потэ Г.Красильников бордысен. Со но пинал дыръяз инженер 1: но, артист но луыны малпа вал. Писательлэн сузэрезлэн верамезъя, Г.Красильников 1: Ижкаре экзамен сётыны ветлэм. Возьматыны турттэм чечы лушкасез. Туж умой со 1: возьматэм сценкаез. Нош театре малы ке но кутӥллямтэ. Пичи дыръяз ик ини со 1: юодыръёс вакытэ кырӟам-верамъёссэс туж сак кылзылэм, гур сьӧры пегӟыса, кагаз 1: вылэ гожъяллям. Литературалы ӵапак сыӵе сям кулэ. Мон но сое лыдэ басьтськем, 1: лэся. Ачид но шӧдӥськод, тӥни вераськонам соос кыре потыло. Мынам кылъёсы ӧвӧл 1: со, калыклэн. Но котькудӥзлы кенешон дыръя шедьтоно интызэ, вакытсэ. Супыльтон 1: медаз луы со, малпандэ мед юнматоз. 1: Артист луон сярысь поттылӥд тани... Мынам мамае 30-тӥ аръёсы Алнашысь колхозно- 1: совхозной театрын шудылэм. Солэн мадемезъя, бӧрысь ини, М.Тимашевлэн "Насьток" 1: пьесаезъя спектакльын валтӥсь героинялэсь рользэ возьматэмез сярысь "Кенеш" 1: журналэ гожтӥ. Та тодэ ваёнэз мон туж шурдыса дасяй. Ӧй тодылы угось Насьтоклэсь 1: образзэ Алнаш сцена вылын нырысетӥзэ шудэмзэ. Та сярысь ини, ӵыжы-выжыосылэсь 1: юалляськыса, П.Кубашев вераз. 1: А.Л. Вордскем пал одӥг гинэ луэ кадь, нош тӥляд со малы ке трос: Ӵӧжйыл, 1: Писэйгурт, Алнаш черкогурт, Вуж утчан. Соос пӧлысь табере кудӥз- дуногес? 1: Г.Х. Алнаш село - мамаелэн вордскем интыез, Ӵӧжйыл - атаелэн. Атай Алнашын ужа 1: вылэм, ёрос исполкомын секретарь луыса, маме - нылпи площадкаын. Пуиськиллям- 1: мараллям тӥни... Ним сётӥллям мыным - Валентин, мамелэн вынызъя. Атай басьтыны 1: вуымтэ вордскеме сярысь кагаз. Мама сельсоветэ ветлэм но, вынъёсыз, выжы- 1: кумыосыз сярысь верам, кудоосыз Игорь но Герман вылэ вуэм. Озьы тӥни Герман 1: луиськем... Со, Герман Семёнович Батуев. Москваысь вылӥ технической училищеысь 1: (али -университет) профессор вылэм. Отын кема дыр ӵоже дышетэм... 1: Тӥни озьы, Алнаш селоен Ӵӧжйыл анай-атайёсылэн вордскем интыоссы бере, соос ик 1: мыным дуно. Нош Писэйгуртын атай кема дыр ӵоже дышетӥз. Мынам пичи дыры быдэсак 1: отын ортчемын. Утчанын семилеткаез йылпумъяй. Таяз учыре ӵужапай дорын кык ар 1: улӥм. 1: А.Л. Семьяяды кӧня пиналъёс вал? 1: Г.Х. Ньыль кузя. Кыкез кулӥзы. 1: А.Л. Анай-атаед пӧлысь кудзы ке ӟуч вал кадь? 1: Г.Х. Атай - ӟуч, анай удмурт вал. Атаез нокин ӟуч шуыса ӧз ик поттылы, удмурт 1: кылын туж вольыт вераськылӥзё. Атай но, песятаен песянай но Кировской областьысь 1: Ӵӧжйылэ лыктэмын. Табере мон тани М.Атамановлэсь "Удмурт нимбугорзэ" шедьтӥ, 1: учкыса потӥ но отысь шедьтӥ аслэсьтым фамилиме. Кылдэмезъя бесерман выжыысь 1: вылэм. 1: А.Л. Мон тани учки "Литературная жизнь Удмуртии (1917-1957 г.г.)" указателез. 1: Отын пусъемъя, нырысьсэ печатласькиллямды 1949 арын. Витетӥ кылбурды ик ини, 1: лыдъямея ("Гажаськом ми дуно атаймес" - "Советской Удмуртия", 1950, 25 1: инвожотолэзь), сӥземын И.Сталинлы. Укыргес "дуно атаенымы" герӟаськем мукет 1: кылбуръёсты но вань на-а? Сыӵе муртлы кылбуръёстэс сӥзьылӥды шуыса жаляськоды-а 1: табере? 1: Г.Х. Вакытэз сыӵе вал. Мон гинэ озьы ӧй гожъяськы ук. Али мон соосты лыӟылӥсько 1: на. 1: А.Л. Нош Т.Шмаковлэн "Покчи выны" кылбурысьтыз Рудик вераськыны дышыкуз ик 1: Сталин нимез тодэ ни. 1: Г.Х. Ма, А.Клабуковлэн но одӥг кылбурысьтыз куинь аресъем нылаш трос портретъёс 1: пӧлысь одӥгзэ тодманы дышем. 1: Нош Н. Байтеряковлэн тани И.Сталинлы сӥзем одӥг-кык кылбурез сяна ӧвӧл, дыр. 1: Соку ик со лирика борды кутскиз. Секыт вал та авторлы, кесё вал со понна, нош 1: берлань ӧз чигна. 1: И.Сталин сярысь гожъязы А.Лужанин но, М.Петров но, Т.Шмаков но, А.Клабуков но... 1: Нош ӟуч поэзиысь басьты ай тани А.Сурковез. Солэн кылбуръёсыз вить томен потӥзы, 1: со пӧлысь ӟеч-ӟеч чуръёсыз одӥг книга люкаськозы-а, уз-а... 1: Монэ ас вакытаз весь курлало вал азбарын, урамын, нюлэскын "поръяме" понна. 1: Политикаен герӟаськем кылбуръёс чик, пе, уд гожъяськы. Озьы монэ пыкылӥзы 1: Ф.Васильев, А.Леонтьев - жаляса верано луисько - Г.Симаков, В.Романов, 1: В.Ванюшев. Табере учкиськод но - мон шонер вылӥськем. 1: А.Л. Малы туала пиналъёс ӧжыт лыдӟисько, гожъясько? 1: Г.Х. Асьмелы, редакциын ужасьёслы, тж бадӟым кусып возьыны кулэ удмурт кылъя 1: дышетӥсьёсын, начальной школаосын. Быгатэммыя соос доры ӵемгес потаны кулэ. 1: Гожтэт но лэзьяно. Дышетӥсьёс пиналъёсты тросгес сочинение мед гожъятозы, 1: ӟечъёссэ мед ыстозы газет-журналъёсы. Котькуд быгатӥсьсэ син азьын возьыны кулэ. 1: Собере гожъяськыны кутскид ке, кылбур-веростэ кӧня ке курлазы ке, мылкыдэз 1: уськытоно ӧвӧл. Тани Т.Шмаков, произведениез сэрттыку-пертчыку, туж зол зуркатэ 1: вал. Одӥг пол, Ижкарысь пединститутын 4-тӥ курсын дышетскыкум, экзаменъёсме 1: сётъяй но дораз пыри. "Тимофей Иванович, - шуисько, - мынам кык-а, куинь-а 1: кылбуре кылле вал..." - "Кык", - вакчияк вераз со. Собере кутскиз ук кесьыны: 1: мар тон кылэз но уд шӧдӥськы. Тӥ, пе, коть пересьёслэсь визьнодамзэс пеляды 1: понэ. Собере капчияк кариськыса вера ни: "Тани мон кылбуръёстэ дасяй". Кык-куинь 1: кылзэ воштэм но - тӥни. Мыным со валан сётӥз, кыллы сак луыны кулэ шуыса. 1: Берло аръёсы интыысь писательёслэн Союззы егитъёслы нокыӵе саклык уг висъя. 1: Котькудӥз сямен ас понназ ужа, ас сярысьтыз гинэ малпаське. Куспазы керетыса 1: уло. "Удмуртия" издательствоын одӥг нимъёс гинэ пото, повестьёс, романъёс гинэ 1: гожъяло. А.Чеховлэн малы ке романъёсыз ӧвӧл. Г.Красильников но кык-а, куинь-а 1: веросъёсын книга поттӥз... Киез сётыны кулэ ук кутскись авторлы. Кытысь-о тодэ 1: пинал мурт, быгатонлыкез вань шуыса? Нырысь-валысь мылкыдзэ ӝутод, собере 1: куронъёс но пуктыны кутскод. 1: Г.Х. Кыӵе редактор дыръя, кыӵе вакытэгес тунсыко вал ужаны "Дась лу!"-ын? Нош ку 1: - тужгес секыт? 1: А.Л. "Дась лу!"-ын дыръям трос редакторъёсын ужаны шуд усиз. Тани П.Черновен 1: ужаны тунсыко вал.Со ачиз гожъяськылӥз. 1968 арын вуыса, сӥзьылаз ик ини повесть 1: ваиз, йыг-йыг творческой коллектив но люказ. Котькуд редактор сыӵе луыны кулэ, 1: адӟем карымон. Номенклатурной адями пукиз ке кивалтӥсьын, номыр ӟечсэ уд басьты. 1: Собере ужай К.Дзюинаен, В.Ившинэн, А.Гребинаен. "Дась лу!"-ын мон литература но 1: искусство отделэн кивалтӥ, собере "Кизилиын" старшой редактор вал, бӧрысь, татын 1: урод югдур кылдэмен, коллектив монэ куриз главной редактор луыны. 1: А.Л. Поэтической чуръёстэс лыдӟыса, пумиськоно "мудрон" образъёсын. Уноез соос 1: литературае юнмазы, калыке вӧлмизы. Тани, шуом, Тэшкыли но Кузьгубей. Асьтэос-а 1: малпады соосты яке кылӥды-а сыӵе нимъёсты? 1: Г.Х. Зэмос Кузьгубей вань Писэйгуртын. Туж ӝужыт со. Урдэм Пу но шуо со адямиез. 1: Нош озьы верам чебер уг ни кылӥськы. Тэшкыли - положительной образ. "Пиос но 1: будо но" книгаям пумиське на Тӥрлыга. Куд-ог адямиос, серекъяса-а, серекъятэк-а, 1: та образэз мыдлань берыкто. Тӥрлыга - тордига шуо. Умойтэм со. Тӥрлыга - со ӟеч 1: сямо герой. 1: А.Л. Герман Алексеевич, та вакытэ кӧня книгаосты ини, кыӵе жанрен печатласькиды? 1: Г.Х. Книга лыд сярысь верано ке, куамын пала люкськоз, дыр. Вань отын кылбурез, 1: прозаез, тодэ ваёнъёсыз но. Тани мынам потӥз вал "Ӟеч визь-кенеш котьку но дуно" 1: книгае. Табере сыӵе жанрен выльзэ дасясько. Таиз нырысетӥезлэсь 3-4 пол бадӟым 1: луоз. Гожъямъёсы сӥземын писательёслы, артистъёслы, дышетӥсьёслы. Соос пӧлын - 1: Г.Векшин, И.Карачёв, Г.Корепанов, Г.Шаклеин... 1: А.Л. Ӟуч кылын но книгаосты тырмыт потэмын ни кадь, озьы-а? Нош берыктӥсьёсыд - 1: ваньмыз сямен еврейёс. Тӥ соосты асьтэос-а бырйылӥды яке соосты ӵектылӥзы-а? 1: Ӟеч-а соос берыкто, национальной авторъёс чотын коньдон кыскон понна гинэ-а 1: ужамъясько? 1: Г.Х. Мынэсьтым гожъямъёсме нырысь ик берыктыны кутскиз И.Курлат. Вань пӧлаз 1: ӟечъёсыз но, лябъёсыз но. Москваын, "Малыш" издательствое пыран дыръям, 1: тодматски И.Мазнинэн. Отын ик вал Ю.Кушак но. "Мон тӥлесьтыд кылбуръёстэс кытысь 1: ке лыдӟи. Тӥ сярысь кытысь ке кылӥ, - шуиз И.Мазнин, - ыстэ мыным чуръёстэс". 1: Ыстӥ дас вить-кызь кылбуръёсме. Ю.Кушакен ӝогак берыктӥзы лэзьям ужъёсме. Та 1: берыктӥсьёсын валче тӥни ӟуч кылын потӥзы "Малышын" "Солнышко" но "Детская 1: литература" издательствоын "Счастливая ива" книгаосы. Отын, конечно, вань 1: тырмымтэосыз. Нош самой кулэез - удмурт авторлэн кибервылыз, гожъяськон сямыз - 1: кылемын. 1: Ижевске ветлэм бераз кылбуръёсме берыкъяны кутскиз Г.Ладонщиков. Одӥг пол со 1: тазьы шуиз: "Подстрочникъёстэ мон учки но, асьмелэн вир группаосмы ӧз тупалэ. 1: Соин ик перевод борды басьтӥськыны ӧй быгаты". Но со мынэсьтым кылбуръёсме 1: троссэ берыктӥз. Монэн кусып возиз В.Данько но. Берыктон удысын туж задор вал... 1: Соосын ужаны туж каньыл. Ог-огмес ӟеч тодӥськом, гожъяськон манермы одӥг кадь. 1: Со ик милемыз герӟаз. Нош адями ӟуч-а, еврей-а - монэ чик уг шугъяськыты. Тани 1: басьты ай Расул Гамзатовез. Берыктӥсез одӥгез но ӟуч ӧвӧл. Нош кылбуръёссэ ӟуч 1: лыдӟисьлы кызьы вутто? Отын - быдэсакыз ачиз Р.Гамзатов. 1: А.Л. Ӟуч но удмурт сямен сяна, кыӵе кылъёсын печатласькиды на? 1: Г.Х. Бигер, башкир, туркмен, узбек, якут, украин, белорус, мордва, мари, коми 1: кылъёсын. 1: А.Л. Мынам тодэмея, тӥляд маке мында дневникъёсты. Соос номеръёсын но пусйылэмын 1: кадь. Мар сярысь отчы гожъяськоды? Луоно-а отысь куд-ог интыоссэ али ик 1: печатланы? 1: Г.Х. "Ленинъя" газетысь Орлов (Можга педучилищеын дышетскисько вал ай соку) одӥг 1: пол шуэ: "Герман, тон гожъя ай малпанъёстэ блокнотэ-а, дневнике-а, мон тетрадь 1: но лэсьтысал". Мыным, зэмзэ но, Можга педучилищеын соосты дасязы, сыӵе вож 1: вылоесь. 20-30- пала луозы. Али но отчы гожъяськисько. Куд-огзэ поттыны кулэ ни, 1: малпасько. Тани соос пӧлысь одӥгез. 1977 арын 27 оштолэзе Удмуртиысь 1: писательёслэн союзазы правление вал. Отын Н.Байтеряковлэсь творчествозэ 1: эскеризы. Та кылбурчилэсь "Советская Россия" издательствоын книгазэ но автор 1: сярысь монография поттыны туртто вал. Огзэ но ӧз лэсьтэ. Соку кивалтӥсьёс 1: асьсэлэсь книгаоссэс поттазы. 1: А.Л. Быгатэ-а сьӧд сюлмо адями талантливой писатель луыны? Луэ ке, уг пӧрмы-а со 1: кык ымныро муртлы: кагаз вылын укыр чебер гожъяське, нош улонын кырсь ужъёс 1: лэсьтэ? Сыӵе писатель мар ке но ӟечсэ лыдӟисезлы сётыны быгатоз-а? 1: Г.Х. Ӵапак та сярысь мынам нимысьтыз статьяе вань. Сое мон потто ай. Одӥг учырез 1: гинэ верало. 1977 арын Москваын ортчиз нылпи литературая пленум. Мыным 1: командировочной басьтыны кулэ. Уксё, пе, ӧвӧл. Табере бертӥсько но Галина 1: Мироновна доры пырисько (соку со писательёслэн Союзазы секретарь но, бухгалтер 1: но вал: командировочной басьтоно, шуисько. "Ма, ӧд басьты шат?" - "Ӧй". - "Малы 1: ӧд басьты?" - "Соид уксё ӧвӧл шуиз". - "Э-э, кассаын котьку но кык сю манет 1: луэ". 1: А.Л. Тӥ ялан-а асьтэды пиналэн лыдъяськоды яке, пенсие потон азяды, 1: сюлмаськонъёс йылэмен, "Кизилилы" валтӥсь редакторе пуктэмен валче, арлыдъёс 1: зӥбыны-а кутскизы? 1: Г.Х. Мон асме, ужасьёсы сямен, егит лыдъясько. Мынам мылкыды каньыл. Весь ужам, 1: ӟечсэ лэсьтэм, лачмыт сямо пиналъёсты будэтэм потэ. Мон гажасько зӥбыт 1: адямиосты. 1: "Ӟечбур!", 21 коньвуон, 1992. 1: 1: 1: 1: 1: 1: 1: 1: 1: 1: 1: 1: 1: 1: 1: 1: 1: Виктор Ивашкин 1: 1: Шуныт но, шулдыр но 1: Алнаш черкогуртысь ӟуч дышетӥсьлэн Алексей Александрович Ходыревлэн но солэн 1: удмурт кузпалызлэн Анастасия Васильевналэн 1932 арын 23 октябре вордӥськиз пи 1: нунызы. Солы сётӥзы Герман ним. 1: Выль иворлы вордскем нунылэн анай-атайёсызлэсь но, оло, юнгес шумпотӥз Германлэн 1: Ӵожйыл гуртын улӥсь Олексан песятаез. Дышем сямызъя, синпумъёссэ кескич 1: шымыртыса, со шуиз: "Уске, пи вордӥськиз. Озьыен, выжые уз быры, улоз". 1: Вуоно кылбурчи понна Олексан агай дунолэсь но дуно адями вал. Пичи дыръяз, 1: Ӵожйылын улыкуз, Герман вамыш кузьдала но со бордысь ӧз люкиськылы. Юртъер 1: котырын ужъёссэ быдэстылыны юрттылӥз. Яратоно песятаез пыр Германлы пичи-пичи 1: дырысен пыӵаз чылкыт но чебер сямъёсты гажан, дунне шоры шуныт но шулддыр учкон 1: мылкыд. Котьмае тодыны-валаны тыршись пияш ас калыкезлэсь кылзэ, культуразэ но 1: соя ик йӧндырыны кутскиз. Олексан агайлэсь улэп тусбуйзэ али адӟыны луэ на 1: Герман Ходыревлэн егит дыръяз гожтэм кылбуръёсысьтыз. "Кызьы мон будӥ" - сыӵе 1: нимын со тодмо луиз лыдӟисьёслы. 1: Пияшсылы кылбурчи шӧм сётӥзы анай-атаез но. Трос дышетскемез ӧй вал ке но, 1: Германлэн анаез уго удмурт литературалэсь но искусстволэсь олокыӵе палэнын ноку 1: но ӧй вал. Алнашын котькинлэсь азьло но синмаськымон ӟеч со шудӥз Михаил 1: Тимашевлэн "Насьток" пьесаезъя спектакльысь Насьтоклэсь рользэ. Нош Алексей 1: Александрович, вераськем гинэ ӧвӧл, гожъяське но вал удмурт кылын. Валамон ини, 1: алнашъёс манер. Солэн трос гинэ корреспондециосыз потылӥзы "Гудыри" газетын. 1: Жаль, та сямзэ пиезлы пыӵатыны ӧз кылды. Быдӟым Отечественной война дыръя 1: фронтысен со ивортэк бырыны сюриз. 1: Герман атаезтэк будӥз. Но атаезлэсь кельтэм мылкыдзэ улӟытыны солы нокин но ӧз 1: юртты шуыны уг луы. Тужгес юрттӥськизы дышетӥсьёсыз, кылсярысь, Мария 1: Ксенофонтовна Меньшикова (Сергеева). Вуоно кылбурчилы гожъяськон ужъя матысь 1: эшъёс луизы Алнашысь журналистъёс Евсей Алашеев но Семён Шихарев. Соос пыр 1: "Алнаш колхозник" газетын потӥз пинал селькорлэн Герман Ходыревлэн нырысетӥ 1: информациез. 1: Но та дыре Ходырев ӧз малпа на журналист яке кылбурчи луон сярысь. Солэн потэ 1: вал географе дышетскемез. Таӵе мылкыдын сюлэмзэ шунтыса возиз Писэйгуртын, 1: Карйылын улыкуз но. Таӵе малпанэн ик мынӥз Можга педучилищее дышетскыны. 1: Дыр ортчемъя, педучилище Герман Ходыревлэсь сюлэмзэ мукет пала берыктӥз. Татын 1: уго, боддоръёс гинэ ӧвӧл, юртъёс пушкысь, азбарысь омыр но литература шӧмын 1: пыӵамын. Пияшез аспалаз тужгес но зол кыскиз литературной кружок. Соин кивалтӥз 1: Михаил Коноваловлэн сузэрез - Екатерина Алексеевна Коновалова. Валамон, Михаил 1: Коновалов сярысь шара вераськыны уг луы на вал та аръёсы. Озьы ке но, 1: дышетскисьёс та пумысен ма но со тодӥзы. Екатерина Алексеевна понна шум но пото 1: вал соос. 1: Ӵапак та вакытэ, педучилищеын дышетскон дыръяз, 1949 арын, "Советской Удмуртия" 1: газетын Ходыревлэн "Дурись" нимо нырысетӥ кылбурез печатласькиз. Сюлэмез 1: вырӟытымон кужмо гожтэмын ӧй вал со. Газетын ужасьёс печатланы ярамон шуыса 1: лыдъяллям бере, егит автор понна со вераны луонтэм бадӟым шумпотон вал ини. 1: Авторзэ ӟечгес но ӟечгес ужаны бурдъяз. 1: Асьме удмурт дуннеямы озьы луиз. Котькудӥз сямен писатель луыны вордскем адями 1: азьло ужа-тырше газетын, журналистика удысын. Чебберлыко произведениос бордын 1: ужамен гинэ уго вылдэ но уд дӥся, кӧттэ но уд тыры. Можга педучилищеын 1: дышетсконзэ йылаз-пумаз вуттэмез бере, Герман Ходырев но редакцие, Ижевскын 1: потӥсь "Удмуртиысь комсомолец" газетэ вуиз. Солэн кияз сётэм "Трудовой книжкаяз" 1: тӥни соку нырысетӥ чураз ик кылдӥз "переводчик" кыл. 1: Вуоно кылбурчи тодон-валанъёссэ отӥяз будэтӥз Удмурт государственной 1: пединстиуттлэн кылъя но литературая факультетаз. Татын соку ӟеч ужа ни вал 1949 1: арын кылдытэм литературно-творческой кружок. "Советской Удмуртия" газет отчы 1: ветлсьёслэн гожъямъёссылы инты тырмыт сётылӥз. Кружокен кивалтӥз аслаз быръем 1: кенешез. Котькуд занятилэн ортчемез сярысь протокол лэсьтылӥзы. 1951 арын та 1: протоколъёсы пфриз ини Герман Ходыревлэн но нимыз - куд ке дыръя рукописьёсты 1: эскерем пумысен, куд ке дыръя аслэсьтыз кылбуръёссэ дунъям пумысен. Кружокчиос 1: ог-огзылэн ужъёссы сярысь эркын, лэчыт, пезьгыт но мыскылляськонъёстэк 1: ывераськылӥзы. мукетъёслы сямен ик. 1: 1: 1: 1: 1: 1 Бӧлем - редакциысь отдел Татьяна Чернова Весь котыръя сюрес... Кыӵе паськыт дунне, Кыӵе пӧртэм улон... Нош мон кыштыр гинэ Дышем сюрес вылын. Одӥг сюрес кузя Доре вамышъясько. Куддыр кызьпу эшме Каллен ӟыгыртӥсько. Солэн ёзвиысьтыз Мед пыӵасал кужым. Кошки ке дорысьтыз, Ышо, дыр, тэль пушкын. Весь котыръя сюрес: Доре - уже - гуртэ... Уез но лымшорез Сура, сураськытэ. Озьы ортче улон, Озьы кошке даур. Улон - со муньылон. Озьы ке но - шулдыр. Тӥни - чирдэ уӵы. Иське, вуэм гужем. Уд пыры нокытчы - Зымод нюлэс куше. Выёд сяська пӧлы, Кутод италмасэз... Но... малы ке дыры Ӧвӧл ни та вадес. Доре - уже - гуртэ... Весь котыръя сюрес. Кин ке монэ ӝутэ - Нош адӟисько кырез. Пушкам пеймытэным Ялан нюръяськисько. Югыт сюрес вылын Шудо кадь потӥсько. Х Х Х Тӥрен лусъемын - Пуртэм вӧлымтэ. Сыӵе муртэным Капчи вылымтэ. Сыӵе муртэ чик Уг адӟы монэ... Со мурт - воксё, чик Мынам вылымтэ. Тӥрен лусъемын, Пуртэн вӧлымтэ. Монэ валаны Со чик дышымтэ. Туривесь Туривесь - турилы весь. Синпӧет со, лысвулэсь. Пазьгиськиз... Бмъёсме гинэ коттӥз. Туривесь - со турынлэсь куасьмыса кылем модос. Мон ачим - таӵе ик весь Ӟудыса улӥсь могдос. Туривесь - сяська но, дыр, Уйвӧтэ пыре куддыр. Но ӵукна вуэ - утыр Ышыса быре бус пыр. Туривесь, туривесе, Пӧясе, мальдытӥсе. Кутоно ик вал киям... Кин монэ тазьы пӧм? 2.08.2000 Х Х Х Ӵапак тон со, ӵапак тон, Кин сярысь кырӟай толон... Ӧй, толон гинэ ӧй вал со, Тон сярысь - быдэс улон. Тон доры вань сюресъёс но, Инвисъёс но кыстӥсько. Тон сярысь кырӟан гуръёс но Асьсэос шуак вордско. Тон быдэс - пужыослэсь кадь. Вань буёл, дыр, тон бордын. Чильпамын - тылсиослэсь кадь... Тӥнь соин тон котырын Югытлэсь югыт пиштэ, дыр, Син ъёсыз мальдытыса. Тон бордын ик со сутске, дыр, Кин улэ на оскыса. 2.08.2000 Х Х Х Зор пыры усиз Шытыр-шатырак, Улосэз миськиз Котыр-котырак. Укное йыгаз - Мон доры ӧз пыр. Юртлэн ышыгаз Дугдэмын кадь дыр. Сэзъялско, пото Сэзь тӧллы пумит. Веша, иса, тӧл - Мон ӧвӧл пумит. Веша, чупа, тӧл, Небыр зореныд. Нокинэ ӧвӧл... Шунытэ - тыныд. 2.08.2000 Шудэд огпол гинэ сётске Кӧты ӝоже - быдэс дунне тыр, Векчи чурен ке но ваське. Бамтӥм - чурен. Коть выр, коть эн выр - Шудэд огпол гинэ сётске. Огпол гинэ сётске, адске но Пумен чиньы пыртӥ вия. Уг вуы, бен, пылатыса но - Йӧэн эгесаське, сӥ. Соин - одӥг - коть выр, коть эн выр, Син азьысьтыд уз быр вотэс. Ыштэм понна сизьым полэс тыр - Шудэд уз луы ни быдэс. 2.08.2000 Шудэ -кышет Кин ке - гожтэм. Кин ке - ӵушем. Соин мынам Шудэ ышем. Бездэм кышет Йырам керттэм. Со пуж кадь пась ни, Ярантэм. Со кышетэ Гужам-ӝыжам. Кин ке сое Кутэм - кесям. Сэре карем ни Ӟустари, Пыд ул ӵушет, Пазял дэри. Сыӵе кышет вал - пужыё, Возьвыл сяська тусо-буё. Сое ӧй утьы - аналтӥ. Тӥни озьы шудме ыштӥ. 2.08.2000 Х Х Х Табере - зоре... Кӧс улэм бере, Сапырес, дэри Луэ ни сюрес. Акылес сӥзьыл Вуэ ни матэ... Улонам акшан Озьы матэктэ. 2.08.2000 Х Х Х Лул пушъетъёсы - Дыдыкайёсы Бордысьтым ини Ишкалско-лобӟо. Лул куараосы, Лул пырыосы, Лул пӧськыосы, Лул кылчинъёсы Мынэсьтым ужме Азьланьто, ӝуто... 2.08.2000 Х Х Х Сюлэм уг ӵыды гужемлэсь... Но палэсмиз ини толэзь... Но ышизы кизилиос, Вакчиязы ни нуналъёс. Пеймытомиз ини ёрос, Акыльтӥзы пумтэм зоръёс... Кин ке меда нош валалоз? Оло, кин ке но пыкылоз, Малы ӧй луы ни рос-прос, Малы уг гожъяськы верос, Малы уже сыӵе ик трос... Малы, малы та удысысь - Сьӧдо-чуро кагаз бордысь Мон кокчасько на зарни тысь? 8.08.2000 Х Х Х малы-о жалянэз? Шунды пуксиз. Со выльысьӝужалоз на. Кин ке сьӧры малпан тӧлъя лобӟиз... Оло, куке но жалялоз на. Малы ӧпкелёнэз? Нунал кысӥз. Со выльысь югектоз на. Кин ке сьӧры оскон ӝабырскылӥз... Оло, берытскыны малпаськылоз на. Малы-о жалянэз? Гужем ортчиз. Выляз аре эшшо ай со луоз на. Кин ке бӧрсьы кезьыт саюл кылиз. Со интые сад пушйылоз на. Гудырикошкон 20000 Х Х Х Улон соку гинэ бусьтыр вал, Куке ваньмы ӵош, огазьын. Йырсиосы соку пуштыр вал. Нош синъёсы -весь нюр азьын. Улон соку гинэ сайкыт вал, Куке учким синмысь синме. Улон азьмы но кадь югыт вал - Пилем пожаз чылкыт инмес. Улон соку гинэ майбыр вал, Куке оским ог-огмылы. Соку ай мон тонтэк ӧй быр вал... Соку ӧз усьы на лымы. 5.08.2000 Х Х Х Чыры-пырен вырисько но - Кинлы-о кулэ меда со? Зарни вакытме келясько но - Кинлы-о луо на мусо? Тани котырам эшъёсы но - Шудо-серекто уноез. Уло ук тросэз огназы но - Ӧвӧл соослэсь шудоез. Нош мон - четлыке сюрем мурт кадь, Уг луы ӧссэ тӥяме. Отысь потӥсько ке но - мурт кадь, Уг лу тросэзлэн валамез. Озьы улӥсько - олокин кадь. Не вань, не ӧвӧл кузпало. Озьы шузимод но - "ведӥн кадь" - Луоз шуисез но, оло... 5.08.2000 О стихах Анатолия Петрова Анатолий Петров известен удмуртским читателям с 70-х годов. Именно тогда он начал публиковать свои произведения в удмуртских газетах и журнале "Молот". Первые его опыты были тепло приняты критиками. В 1975 году он как перспективный литератор был направлен на Всесоюзный фестиваль молодой поэзии братских республик, проходивший в городе Ашхабад. В виду неблагоприятных жизненных обстоятельст в течение некоторого времени, а именно, в 80-е годы, творчество Анатолия Петрова оставалось вне поля зрения любителей удмуртской поэзии. В настоящий момент его стихи вновь начали появляться на страницах газет и журналов. Недавно в издательстве "Удмуртия" у него вышла книга стихов. В прошлом году в журнале "Кенеш" он дебютировал как автор венка сонетов. Как известно, удмуртская поэзия всегда пополнялась именами, вышедшими из деревень. Не составляет исключения и Анатолий Петров. Уроженец деревни Большие Сибы Можгинского района ( родился в 1953 году) после окончания средней школы учился в Удмуртском госуниверситете. В годы учебы активно посещал литературно- творческий кружок, работавший под руководством Даниила Александровича Яшина при университете, и студию начинающих писателей при газете "Советской Удмуртия" . Руководил студией Семён Александрович Самсонов. Стихи А.Петрова в большинстве своем отражают те же чувства, что характерны для всей нынешней удмуртской поэзии. Это: неуверенность, смятение, поиск своего места в жизни, боль за сделанные ошибки, печаль по неудавшейся любви. В мире, где живет лирический герой А.Петрова, очень часто приходится отстаивать свои собственные убеждения на порядок вещей, так как "разумные" соседи любят поучать как жить ("Пычей"). С юмором, с нескрываемой иронией поэт разоблачает тех, кто не может сделать свой собственный выбор ("Мудрон Матрон"). В мире, по мнению А.Петрова, должно править добро. А где есть вера в добро, там человек окружен и друзьями, и достойными делами. Как истинный сын деревенских полей и лугов, деревенского уклада жизни, цель существования человека поэт видит в построении чего-то, в творении: Эше ӝутэ ӵыж выль корка. Кирпич тыре, корзэ лусъе... ("Малпаськон") Красной нитью в творчестве А.Петрова проходит мысль об ответственности человека за свою судьбу, сожаление о сделанных ошибках. Это все привносит в его поэзию трагедийность. Образная система и ритмико-синтаксический строй стихотворений А.Петрова так же говорят о том, что поэт много работает над формой. Каждой поэтической мысли он старается найти неповторимую оболочку. Правда иногда не все получается. В заключении хочется сказать: творчество А.Петрова несомненно нашло уже своё определенное место в удмуртской поэзии. Остается только от поэта ждать новых строк и новых книжек. Анатолий Петров Х Х Х Бермуд, шуо, Бермуды, Отын, пе, куинь сэрег. Отчы вуод, я уд-а, Татын нош ньыль сэрег. Одӥг сэрег - аслым, пересьёслы. Кыкетӥез - кышноелы, пиналъёслы. Куинетӥез - пырись муртлы. Нош соиназ - дуно мудор. Куиняз сэрегъёсын - монэ малпаськыто. Ньылетӥяз - пумтэм кайгырыто. Кинлы-о вералом сьӧлыкъёсме, Шедьтэм но шедьтымтэ кайгуосме! Мон юн кадь ас поннам, Нюрысь писпу кадь позырес. Нош малы-о куддыр ялан Бермуд сярысь малпаськисько ай одӥгнам. Отын, пе, куинь сэрег. Нош мон татын - ньыль сэрегын Уг шедьтӥськы аслым Сюлэм буйган инты. Бермуд, шуо, Бермуды... Отчы вуод меда, я уд-а... Анатолий Петров Х Х Х Ьуй-буй нянь ке кузё ӝӧк вылын, Самой ӟеч кырӟанмы со туннэ асьмелэн. Уй-нунал анданэз ӵыжато тыл йылын, Озьыен, инбаммы но сайкыт асьмелэн. Жингырто сюанъёс, Выль кенъёс - дыдыкъёс, Сяськалэсь но чебер ӝужало нылпиос. Кам шукы кадь шудэ мылкыды, Уӵы пи кадь кырӟа сюлэмы. Вало пал, Чупчи йыл, Кам тупал калыклы Ыстӥсько мон соку аслэсьтым кырӟанме. Калыклэн уж гураз Котьку мед жингралоз ас дыраз: Куректон вакытэ мед луоз буйгатон, Шумпотон вакытэ мед луоз серектон. Буй-буй нянь ке кузё ӝӧк вылын, Самой ӟеч кырӟанмы со туннэ асьмелэн. Анатолий Петров Мудрон Матрон Одӥгез "та сьӧд" шуэ, Матронлы со сьӧд потэ. Мукетыз "тӧдьы" шуэ, Матронлы тӧдьы потэ. Татчыозь уг тод Матрон - Оло сьӧд, оло тӧдьы. Одӥгез шуэ: "Выждэ Ӵуж эн буя - сьӧдэктоз". Мукетыз вазе: "Матрон, Эн кылзӥськы, ӵуж буя". Татчыозь, пе, Матронлэн Буямтэ на ай выжез. Одӥгез шуэ: "Скалдэ Ӝыт эн кыскы - начармоз". Мукетыз вазе: "Матрон, Эн кылзӥськы, ӝыт кыскы". Татчыозь, пе, Матронлэн Кыскытэк сылэ скалэз. Шур дурын Матрон сылэ, "Татӥ пот", - шуэ огез. "Отӥ эн пот, татӥ пот!" - Визь сётэ кыкетӥез. Татчыозь Матрон уг тод: Кытӥ эн пот, кытӥ пот. Чылкак-чылкак абдрано кадь, Азё-беро уробо кадь Татчыозь номыр уг тод. Тодэмез, оло, уг пот... Эх, Матрон, тазьы улӥд ке, Кин тодоз, Кытчы вуод? Анатолий Петров Пычей Вань юанэз но веранэз: "Я, ку луоз ни сюанэд"? "Ма, - шуисько, - мусо эше, Куке ортчо ке сюанъёс, Соку луо шат юанъёс"? Уг лу, эке, буйгатыны Ялан выре выжыятны: "Я, кыӵе-мар ни кузпалыд, Кыӵе будо нылпиосыд"? "Ма, - шуисько, - мусо эше, Умой шуи ке - вожъяськод, Урод шуод - жалямъясько". Уг лу, ява, буйгатыны, Нош ик выре выжыятны: "Маке мултэс начармемед, Кышноеныд люкиськемед?" "Ма, - шуисько, - мусо эше, Пал вайыжен улон мӧзмыт, Шуныт коркан, эсьма, юзмыт". Нош ик уг лу буйгатыны, Таре кутске дышетыны: Ас улэмед ке, пе, уг быга, Мурт улонэз, пе, тон эн туга... Тӥни озьы пычей сямен Сюлэм пушкы мертче пумен. Оло, кин ке но косисъя, Со кылыныз тонэ сӥсъя. Уд шӧды, ведь, ожалтэмдэ, Бӧрысь уд куртчы гырпумдэ. Анатолий Петров Малпаськон Вуэ гинэ чиданэдлэн пумыз, Соку малпаськиськод: Улонэдлэн кыӵе-о вал дуныз? Ваиз-а со шудбур, я чеберлык, Оло, кошкиз со чиганъёс сямен ик Табырлык... Оло, кошкиз со чиганъёс сямен ик Табырлык, Сюлмад куректонэн инъяськыса, Оло, кельтӥз пумтэм сюлмаськытса: Кулэ-а тон та дуннеын Яке мултэс. Но улэме потэ, Та дуннее вордскем бере, Отын укыр уно на чеберез. Тани писпу но погыра пересьмыса, Вӧзаз нош пичиез нырзэ мыче Шунды сиез гочатыса. Вамыштӥськод аслад ураметӥд, Ай ку вуод солэн пумаз? Эшъёсыныд гинэ медад луы мынтӥд. Малпанъёсыд сюлмад тымиськемын - Кинлы ке но сое Кулэ ук вераны Вань эшъёсыд соку валаозы: Вераськиськод мылысь-кыдысь, Малпанъёсыд пото лулысь-сюлмысь. Озьы бере, та эшмылэн аслаз йырыз, Ас сюресэз, Ас кынарыз. Озьы бере, вуоз ай со берен, Тырмоз на ӟигарыз, Вуоз солэн кын корт куртчон дырыз. Соку ваньзы шоры Пальпотыса учкоз пилем сьӧрысь. Анатолий Петров Дунне паськыт но... Та улонын янгышъёсы быдэс уллё, Малы меда одно ик мон вылэ усё? Кытын меда сыӵе туно-пеллё, Ӧвӧл-а мар-а воксё утисе? Аслым ачим мон туж дуно, Та улонын зэмзэ ик мон куно. Но куддыръя малпаськонъям Усьылӥсько ас дуннеям. Дунне паськыт, Сюрес ӵошкыт. Инбам гинэ Кизилиен тымиськемын. Нош ӟезьыез отчы ялан Ачим понна пытсаськемын. Анатолий Петров Бурдъёсы - валъёсы Вань мынам кык бурдъёсы, Сьӧд но тӧдьы валъёсы. Соосын шӧртчи ворттӥ Та улон букосъёстӥ. Сюресъёс нош пӧртэмесь, Я ӟечесь, я уродэсь. Куддыръя огез кыскиз, Мукетыз - ворттэмъяськиз. Мукетаз кыкетӥез Ӧз но пота кыскетысь. Улонмы сыӵе угось, Кӧсэктод тӧдьы лутозь: Вож садысь уӵы выллем Уллямын туннэ зэмлык, Палэнысь муртъёс выллем Алдамын на ас калык. Инмарлы гинэ оскон Вайылэ ӵукна сактон. Ой, инкуазе, инкуазе, Мар ваёд ни ӵуказе? Зореныд-а миськиськод, Лыммыдэ-а пужниськод, Арлыдъёсме тымиськод. Куд-огез малпанъёсы Бурд вылын кадь лобӟемын, Мукетыз малпанъёсы Шӧдтэк шорысь лябӟемын. Лобӟемез калык пӧлын Крезьгурен ӝокатэмын. Лябӟемез нош сюлэмын Бурдъятэк ӝокатэмын. Нош вуоз али тулыс, Усьтӥськоз сюлэм шыкыс. Вань мынам кык бурдъёсы, Сьӧд но тӧдьы валъёсы. Бурдъяса кылбуръёсме Улляло пар валъёсме. Улонмы сыӵе угось - Ворттыо шукы лутозь. Анатолий Петров Х Х Х Ӝамдэлы-а, Кемалы-а Потыкуд сюрес вылэ Басьты сьӧрад мӧзмонме. Капчиен тубтоз гурезь йылэ, Пыжъёстэк выжтоз зарезь вамен... Басьты сьӧрад мӧзмонме, Потыкуд сюрес вылэ. Жобаку-а, Зорыку-а Пытсаськоз аэропорт. Кызьы ке но тон бертод - Мӧзмонэ сюрес шедьтоз, Тыл но ву пыртӥ поттоз. Нуназе-а, Бер уйин-а, Катьтэммон, жадён дыръяд, Йыромон-ышон дыръяд Мӧзмонэ азьлань валтоз, Сюрестэ вакчиятоз... Басьты сьӧрад мӧзмонме, Потыкуд сюрес вылэ. Анатолий Петров Х Х Х Кайгу сюлэме ӝабырскон вакытэ Уд лӥяты, уд, веттаса-вешаса, Уд буйгаты, уд, кырӟаса-юмшаса. Кайгу сюлэме ӝабырскон вакытэ Валлэсь кадь уд корна солэсь ымдурзэ, Уд ваты ноку но солэсь ымнырзэ. Кайгу сюлэме ӝабырскон вакытэ Куараен бӧрдыса но уд келя сое, Кыласа-бураса но уд улля сое. Кайгу сюлэмад ӝабырскон вакытэ Огкадь пукыку со кужмо кариське, Мултэс малпаку со шӧртчи кариське, Кайгу сюлэмад ӝабырскон вакытэ. Дауръёс пыр одӥг эмъюмез сюлэмлэн: Ӟырдыт уж, яратон но эшъёс. Отын со сылме, отын со ӝуа, Отын гинэ со ыштэ кужымзэ. Анатолий Петров Х Х Х Кошкид! Уретыса яратонмес, Дымбыр но йыг пытсад ӧсэз. Кошкид ке, ӵок вылэм Кошкид ке, ӵок вылэм гинэ но! Огназ кылем кион музэн Борддор шоры сюлэм вузэ. Сое кылод меда? я уд-а? Яратӥськод ик ке - кылод, вылды... Х Х Х Тулыс шур ву весь жильыртэ, Ялан берга, Берга. Ярез ярлы уй но нунал маке вера, Вера. Егит даур шур ву музэн Ялан дыртэ, Дыртэ. Пияш ныллы яратэмзэ Сюлмысь кера, Вера. Сӥзьыл писпу ни шыпыртэ, Пумен берга, Берга. Куарез куарлы уй но нунал Маке вера, Вера. Даур ортче, сяська тӧлӟе, Ялан пурӟе, Пурӟе. Пияш ныллы яратэмзэ Выльысь вера, Вера. Шунды ӝужа, шунды пуксе, Ялан берга, Берга. Музъем солы уй но нунал Маке вера, Вера. Ортчиз даур жингытыса, Синъёс бездо, Бездо. "Пияш" нош весь яратэмзэ Выльысь вера, Вера. Анатолий Петров Вальс Ой, бурдо мон туннэ, туж шудо, Та вальсэз мон понна, шудо. Мылкыдме чик юнме юаськод, Адӟиськод ук ачид - ӝуасько. Припев: Ойдо, ӟыгырты, берга золгес, мусое, Та вальсын лобӟисько выжыкыл шаере. Мон уг вунэты ноку, ноку но сое Котьма медло азьпал улонын - Выисько ни, лэся, яратон дауре. Ой, йыры-мугоры, кылчинэ, Асьмеос луимы огинэ. Бубыли кадь ачим киосад, Ой, чебер адскисько синъёсад. Припев: Ой, кема мон тонэ утчалляй Та югыт дуннеысь, калыкысь, Минутэн но часэн возьмалляй, Ку поттод сюлэмме четлыкысь! Припев: Шӧдӥсько, одӥг мылкыдмы, Бурдъямын жингырес крезьгурмы, Ойдо, мед тодозы весь ваньмыз, Сюлэмам яратон кенжемын. Анатолий Петров Х Х Х Эше ӝутэ ӵыж выль корка, Кирпич тыре, корез лусъе, Куддыр марлы ке но ёрка, Нош малпанзэ тазьы пусъе: "Куинь малпанэ пӧлысь кыксэ Быдэстыны вуи, лэся, - Писпуосы но мерттэмын, Будэтэмын ныдлпиосы. Кулэ вылэм на выль корка Урам шоры ик ӝутыны. Оло, сэре луоз ни, пӧй, шутэтскыны". Но коркаез уг ӝутскы ас эрказ. Выль юрт ӝутон понна туэ, Пичи кортӵог но ведь кулэ луэ. Вӧзаз кулэ на ай атай визьнод, Сотэк юнме гинэ кизьнод. Ваньзэ басьтэ кадь со лыдэ: Вашкалазэ, туалазэ, Озьы ке но куддыр йыртыш лыдэ. Медам, пӧй, янгыша - уз валалэ. Нош мон поннам малпаськыса, Учкылӥсько солэн шораз. Куинетӥез но малпанэз быдэсмиз. Нош сюлмаськон выльысь пыроз дораз: Соиз кулэ луоз, таиз, т.д. и т.п. Шуныт корказ, ӝӧк котыраз, Шаньги выл сиисьёс люкаськыку, Либыт кылъёс мед шедьтысал на ас дыраз, Мылысь-кыдысь вераськыку. Шуныт корка пушкы кулэ на ай, Ӟырдыт сюлэм но ӟеч мылкыд Та улонмы но возиське на ай, Солы луса гинэ - сыӵе вакыт. Эше, ӝутэ ӵыж выль корка, Кирпич тыре, корзэ лусъе, Мертэд пусэз выллем пусъе Улон корез вылэ малпанъёссэ.