Кизили Инмысь кизили васькыса Журнал вылэ интыяськиз. Выллет* вылын воректыса, Лыдӟисьёсты бордаз кыскиз. *Выллет - журнал (книга) выл. ххх Сӥзьыллмы ни уллямын. Кузёяське тол кырын. Эн куректы тон, сӥзьыл, Берытскод ай, вуоз дыр. Нош али ми эшъёсын Куасъёсын, дӧдьыосын Ширтомы гурезь уллань, Йырмы ӝутэмын выллань. Погылляськом лымыын, Кужмогес луом кырын. Лена Кузнецова. Удмурт Гондыргурт. Алнаш ёрос. Виталий Морозов Мадиськонъёс Ческыт ю тысь кокчасько, Курегъёсты возьмасько. Котькинлэн но азбараз Кин кузё меда? (Атас). Пельёсы мынам кузесь, Синъёсы нош - кырыжесь. Пыдъёсы бызё туж ӟеч, Тодмад, иське, мон - (луд кеч). Гонэ чебер, гордалэс, Быжы бадӟым, пуштырес, Ныры кузьЮ пиньы лэчыт, Нош нимы - кескич (ӟичы). Кин муртэз утэ, утэ, Пырыны уг лэзь гуртэ? Тодмалоз пичи нуны: Юрт возьмась ук мон - (пуны). Котрес, бадӟым мугоры, Тракторлэн кадь ӟигары. Мусое тодӥд ни, дыр, Туж шонер - нимы (гондыр). Шыръёсты кутылӥсько, Нумырен гусъяськисько. Со понна тросэз ушъя: - Ӟеч тырше венё (ӵушъял). Инмын толэзь ӝужаку Вузӥсько ни: у-у-у! Эх, куанер, мискинь ук мон, Нюлэскысь пурысь (кион). Туж ческыт Нюлэскы ми ветлыса Трос губиос шедьтӥськом. Соин отчы дыртыса Эшъёсыным бызиськом. Тэльын будо шыргуби, Коньыгуби, нингуби, Вӧёгуби, яггуби Но эшшо тӧдьыгуби. Туж ческыт ук вылӥллям Шыдпӧлын, перепечен, Шаньгиен, картофкаен Но эшшо курег пузэн. Таня Петрова. В. Женвай гурт. Завьял ёрос. Инкуазьлэсь кыӵе узырлыксэ возьматӥсь кылъёс ватскемын та ребусын? Суредъёс басьтэмын Пичи Пурга ёросысь Улын Юри школаысь Надя Демидовалэн но Олеся Пестеревалэн гожтэтъёсысьтызы. Шыпыт нюкын Гужем уйёс вакчиесь. Шунды нюлэслэн огпалаз умйылске гинэ ай, мукет палтӥз ӝужа ини. Ӵапак сыӵе уе кӧня ке кырныжъёс ӝужыт пужымъёслэн лысо интыязы изё вал. Соос ӧз шӧдэ, кызьы ӵем нюлэсо мур нюкысь матэктӥз бадӟым пурысь вужер. Таяз учыре ӧз удалты пересь кырныжлы. Бадӟым кырныж � кужмо тылобурдо. Нырыз но юн, секталаезъя но ог ӝыны кило кыске. Нуназе шорын кырныжъёслы пумитъяськыны одӥгез но сьӧсь бурдо уз, дыр, дӥсьты. Нош али уй. Кужмо пыдъёсысь лэчыт гижыос улысь потод шат. Йылсо макеос чурыт тылы пыр быгытаз мертчиськизы, капкан улын кадь пачказ-шымырскиз быдэс мугорыз. Соин кырныж ӧз ик вырӟылы ни, пелё кучыран нюк дурысь вырйылэ пуксьытозь. Та интылы кучыран кемалась синмаськиз. Ӝужыт пужымъёс йылысен котыр дунне вӧл- вӧл адске. Мынӥсь-ветлӥсь луымтэен, нокыӵе кышкытлык уг кылды. Нуназезэ отын гань-гань шутэтске. Писпуос улын костасько егит кырныжлэн тылыосыз но лыосыз. Сиськем бервыл котькытын адӟиське: отыназ коньылэн йыркрбыез, татыназ � быжыз... Кырныж сӥлен кӧтсэ тырыса, пелё кучыран кыз улэ интыясьиз но чаомиз. Шӧдске, отын со азьвыл но трос пол шутэтскылэм ни. Нюкын солы нокыӵе кышкытлык ӧвӧл. Сиён тырмыт. Соин сьӧсь бурдо татысь уг ик кошкылы. Одӥгез гинэ умойтэм � нюкын луо ӧвӧл. Тузонын пыласькыны пелё лобано луэ сюрес вылэ. Ӵапак отысь солэсь кӧня ке тылыоссэ шедьтӥ но уйёсы йыртэмамзэ тодыны тырши. Пелё кучыфранъёс, яке ыгыос, асьме шаерын берло аръёсы шергес пумиськыло ни. Угось соослы йылыны луонлыкъёс пумен кулэсмо. Сиськон но шутэтскон интыос ӧжыт но ӧжыт кылё. Котыр нюлэсъёс интые ӝутско сад-бакчао, дачаос, соин ӵош ик уногес луо калгись пуныос, коӵышъёс, гужем машинаосын вуо узы-боры, губи бичасьёс, пӧйшурасьёс. Куд-ог дыръя пелё кучыранъёс быро, кужмо электроезъёс борды дэмӟыса. мырӟиськыса. Озьы ке но, пелёос выжызэс утьыны тыршо. Берло дыре соос сиыны ӧдъязы адями котырын улӥсь тылобурдоосты: сьӧд но пурысь куакаосты, коӵоосты, кызьы тодӥмы � кырныжъёсты но. Куакаослэн алямзы � инкуазьлэн одӥгез кышкытлыкез. Соин ик пелё кучыранлэн соосты быдтэмез адямилы бадӟым пайда вае. Зэм, сютэм дыръяз ыгы сиёз турез, луд кечез. Нош инкуазьлэн сӧриськеменыз, пӧйшурамен, пуныосын быдтэмен ӵошатыса, со трос ик изъян уг луы. Шаерамы унояз ёросын тросэзлы тылобурдоослы но пӧйшуръёслы берпуметӥ ватскон- пегӟон интыос луизы шыпыт нюкъёс. Отын уло нардыос, ӟичыос, енотъёс. ӵем дыръя нюкъёсысь дэриын мугорзэс тазато кыр парсьёс. Отын вань гырко бадӟым писпуос, ӝужыт турыно возьёс, лулпу но бадь куакъёс, укыр чебер куаро турикук,пашпу. Нош будосъёс но писпуос вань бере. отын кыйкаез но трос луэ. Озьы инкуазь адямилы валэктэ: утьы эштэ, со тынад юрттӥсед. Сергей Пучковский. биологи наукаосъя кандидат. Ирина Ходырева Ульма Сыӵе ним сётӥмы яратоно, чиль-чиль сьӧд "дӥсен", тӧдьы "дэремен" пичи гинэ кучапилы. Кыӵе мусо! Йырзэ выллань ӝутэ но шоре адями сямен учке. Нош маке ужаку, со сьӧре ветлэ нл юа кадь: "Маин юрттоно?" Ӝыт. Ульма малы ке сюлэмшугъяське, аслыз кыллён инты но уг шедьты. Мон витисько Марина нылылэсь телефон пыр жингыртэмзэ. Шуак жингыртӥз телефон. Ульма лопыртӥськиз, собере бызьыса мон доры лыктӥз. Синъёсыз верало: "Жингырто!" Трубкаез басьтӥ. Кучапие вӧзам сылэ ни., йырзэ выллань урдыса учке мон шоры. "Марина", � шуисько кучапиелы. Ульма шумпотэменыз утыны кутскиз. Ог интыяз тэтча, трубка борды йӧтскылэ... Пичи пинал выллем выре. Кызьы кылдэ сыӵе шумпотон, адямиез валан? Мусо но чебер Мар дунне вылын котьмарлэсь дуно, мусо но чебер? Со вордскем интыос, вордскем интыос, вордскем палъёс: паськыт бусыос но вож тэльёс, шуръёс но арамаос, сяськаё возьёс но киьмам емышъёс... Эн гинэ аналскы, мын но бича инкуазь ваньбурез: емышез но губиез, эмьюм турын-куарез но пушмульыез... Калыкын шуо: "Инкуазьлэн урод вакытэз ӧвӧл". Котькуд дырлэн аслаз чеберлыкез. Толалтэ небыт, мамык лымы улын шутэтско бусыос. Тулыс шундылэн шунтэмезъя бычыяло писпу куаръёс, сяськаяло емышо писпуос. Гужем со емышъёс будо, кисьмало. Сӥзьыл кузьма ю тысь но бакча емышъёс. Асьме инкуазьмы узыр но чебер! Маша Чумарёва, Костя Ермаков. Ижевскысь удмурт пиналъёслэн школаязы дышетскисьёс. Инкуазь - асьмелэн узырлыкмы Экология - (оикос грек кылын - корка, улон инты) будосъёслэн но лулосъёслэн ӵош улэмзы, соослэн ог-огенызы но котыр инкуазен кусыпъёссы сярысь наука. "Экология" кыл нырысьсэ кутэмын вал 1886 арын Э Геккелен. Адями ас малпамезъя инкуазез кужмысь ужатыны кутскыса, Э. валатонлэн пуштросэз уката паськытаз. Нош кызетӥ даурлэн пумаз экология асьме улонамы уката мургес пырыны ӧдъяз. Угось котыр инкуазез утьытэк, адями ассэ но, югыт дуннеез но быдтыны быгатоз. Соин ик асьме шаерамы 1988 арын 11 пӧсьтолэзе кылдытэмын вал инкуазез утёнъя Кун комитет. Туннэ солэн ёзъёсыз ужало ини Удмуртиысь ваньмаз каръёсын но ёросъёсын. Отын тыршо ог 150 ӧнерчиос-экологъёс. Асьме шаермы туж узыр ошмесъёсын но шуръёсын. Кам но Ватка, Чупчи но Кильмезь, Вало но Сива шуръёс Элькунмылэн ву вирсэръёсыз луо. Огъя музъеммылэн быдӟалаез 4 миллион 205 сюрс гектарлэсь ятыр луэ. Со пӧлысь куиньмос люкетэзлэсь унозэ гурт возёсъёс (хозяйствоос) куто. Шаерамы 2 миллион 81 сюрс гектар нюлэсъёс, яке 45 процентэз пала музъёмъёс писпуосын но куакъёсын шобыртэмын. Удмуртиын вань мувӧй,музъем эгыр, лэсьтӥськон материалъёс, гыбет но мукет узырлыкъёс. Соос пӧлысь тужгесно дуноез луэ нефть. Асьме нюлэсъёсын 64 пумо пӧйшуръёс но 224 пӧртэм тылобурдоос уло, шуръёсын 45 пумо чорыгъёс уяло.. Россиысь Горд книгае пыртэмын Удмуртиын улӥсь 6 пӧртэмез чорыгъёс, 15-ез тылобурдоос но вудурчайы (выхухоль) пӧйшур. Тӥни сыӵе узырлыкез туж но туж утьыса возьыны кулэ. Сотэк шаермылэн пыӵал-тӥрлык но мувӧй поттонъя кужмо промышленностез но мукет удысъёс ваньзэ тае саптаны- быдтыны быгатозы. Ӵапак со сярысь сюлмаське Удмурт республикаысь инкуазез утёнъя кун Комитет. Со чакласа возе инкуазез саптасьёсты, соос азе чурытэсь куронъёс но, бадӟымесь коньдон тыриськонъёс но тупатэ. Уже кутэм вуэз выльысь дун карыны шаерамы 200 пала нимысьтыз чылкытатонъёс пуктэмын. Берло дас аръёс ӵоже гинэ кырсь вуосты куштон 4 поллы кулэсмиз. Озьы ке но, инкуазез саптасьёс трос на. Али арлы быдэ омыре 300 сюрс тонна пала ӵын но су шеде. Нимаз адямиослэн автомашинаоссы уно луэмен но омыр кырсёме. Сое лыдэ басьтыса, арлы быдэ "Чылкыт омыр" ужрад ортчытъяське. Инкуазез зол саптамен шаерысьтымы 500 пала будосъёс чылкак бырон калэ вуэмын ни. Будосъёсты но лулосъёсты утёнэз ӟечгес радъян вылысь, кунэн эскероно интыос кылдытъясько. Сыӵеос пӧлы висъямын "Нечкинский" "Шаркан", "Каракулинское прикамье" паркъёс но пӧйшуръёсты утёнъя даслэсь ятыр заказникъёс. Берло аръёсы инкуазез утёнэ тросгес но тросгес школаос пырисько. Устоосыз пиналъёс экологъёслэн лагерьёсазы люкаськыло. Соос ошмесъёсты но шуръёсты сузьяло. Инкуазьлэн зэмос юрттӥсьёсыз луо. Гильман Касимов Амало камкоӵо Огпол Кам дурын шыпыт гинэ чорыгаса пукисько. Каллен тулкымъяськись ву вылын пукы лэйка но лэйка, нош чорыг уг зыгаты. Котырак чал-чал. Сьӧрысьтым ӵыштыр- ӵыштыр карем куара кылӥськиз. Векчм кӧльыос вылтӥ кин ке ветлэ кадь. Мышкам учки но - камкоӵо*. Мар мееда утча со кӧльыос пӧлысь? Эскероно кариськи, визнанме ик вунэтӥ. Камкоӵо кӧс улваез ымаз басьтэ но выльысь куштэ. Собере мукет кӧс вай утча. Тани шедьтӥз, лэся, аслыз ярамонзэ. Кык ваё кӧс ньӧрез ымаз куртчиз но выллане лобиз. Мынам тунсыко потӥз: мар кароз со улваеныз? Ӝогак туби ӝужыт яре. Тылобурдо выллань но выллань лобе. Собере одӥг интыын котыръяськыны ӧдъяз. Уллане сак учкыса котыръяськиз-котыръяськиз но ымысьтыз ньӧрзэ куштӥз. Ачиз улӥезгес лэзиськиз, куштэм ньӧр вадьсытӥ лобаны ӧдъяз. Мон но со ньӧр шоры учкисько. Кӧня ке дыр ортчыса, со улвай котырын векчи чорыгъёс берганы-шудыны кутскизы, сьӧмъёсынызы шунды улын чилекто-ворекъяло. Соосты адӟыса, камкоӵо из кадь уллань усиз. Огзэ чорыгез кутӥз но палэнэ лобиз. Чорыгзэ сием бере нош ик берытскиз ву вылт_8 уясь ньӧр пала. Кин-о меда камкоӵоез сыӵе амалэн чорыганы дышетэм? А? *Камкоӵо - чарлан, чайка. Римма Николаева Бускельёс Выжыкыл Шунды сьӧд нюлэс сьӧры пуксем бере, Ӟичы апай шуныт караз изьыны выдэм. Умме усьыса гинэ вуттэм, кинлэн ке ӵаштыртэмез сое сайкатэм. Ӟичы апай пельзэ сак карем: - Инмаре, кыӵе мусо ӵаштыртэ! Ой, йры ик пороме! Шыр ачиз лыктэ мон доры! Шыр мудӥськонъяз йырзэ чульк гинэ поттэм Ӟичы апай азе. - Чырткем-а, мусокае? - Ӟичы апай синъёссэ кескич кыньыртэм. - Чырткем! - Тон мар, ерпечка, уд изиськы? Ымнырыд нош кыӵе наштаськем! Вай ӵушыло. - Кулэ ӧвӧл, Ӟичы апай. Мон копасько на. - Тумошо, марлы меда тон со музъемын гудӥськиськод? - быжыз шудэ Ӟичы апай. - Аслым кар лэсьтӥсько. - Кынмиськод, вылды, одӥгнад? Мон доры улыны лыкты. Тау, Ӟичы апай. Мынам аслам каре шуныт, валесэ но небыт. - Оскисько, оскисько, гыдыкае. Туннэзэ коть кыль вал. Ачим тыныд выжыкыл мадё. Мынам мадёсъёсы бадӟым воз мында. Одӥгзэ тани кылзы. Улэм-вылэм бадӟым тэльын визьмо, лякыт сямо, чылкак мон кадь ик ӟичы. Со туж яратэм шыръёсын эшъяськыны. Нош шыръёс, пе, солэсь кышкало вал. Одӥг пол бускель шыр, караз пырон азяз ӵемтыса, пыдзэ вольчытэм. Ӟичы интыын кескич коӵыш ке луысал, ӧлексы шырез со сиысал ни. Бен, синмыныз но ӧй кырмыштысал. Нош ӟичы мискинь шырез утялтэм, пыдзэ бурмытэм. Шырпи омырез зынъяны кутскем: - Ӟичы апай, шӧдӥськод-а, сутскем зын потэ. Ӟичы апай но нырзэ урдэм, зынъяське, пе: - Ӧвӧл кадь... - Гуре чабей няне кылиз вал, - шыр чульк! пырем караз. Ӟичы апай мышказ вазем: - Возьманоа тонэ, бускеле? - Вить, вить! Ӟичы апай возьмам, возьмам Шырез, соиз вуымтэ. Чидамтэеныз Шырлэн гуаз кеськыса вазем: - Тон, бускеле, няньдэ гурысь поттӥд-а ни? - Поттӥ, - пыдлось кылӥськем Шырлэн куараез. - Мон тонэ витисько. - Кӧлан дэремме дӥсяса выдӥ ни вал... Ӟеч кӧл, Ӟичы апай. - Тон монэ пӧяд? - Ӟичы апайлэн синъёсыз ӝуатскиллям. - Пӧяй. - Малпаськод, дорам уд ни поты? - Уг. - Потод. Кӧтыд сюмаз ке, кытчы пырод? - Кеносъёсам сиёнэ лачак. - Тон потытозь интыысьтым но уг вырӟы! - вожомем Ӟичы апай. - Пук ойдо. Одӥгзэ эн вунэты, кармес ми одӥг гинэ пырн пасен ум лэсьтӥське. - Ха-ха-ха! Мукет пыран ӧстэ мон изэн пачкатӥ ни. - Хи-хи-хи! тон ас кардэ кык пыронэн лэсьтӥськод. Нош мон кӧня мылы потэ, сомында ик ӧсъёс ӵогисько. Чебер уйвӧтъёс мед адӟод, бускеле. Со дырысен Ӟичы апай одӥг шырлы но уг ни оскы, пе. Ӵаштыртэмзэс кылэ ке, соку ик музъемез берыктыны дась. Ирина Ходырева Ышиз Ӵукна. Кытын Ульма? Интыяз ӧвӧл. Валесэз буш. Вань комнатаос ворсамын. Коркан шыпыт. Паймыса потӥ лоджие. Татын но Ульма ӧвӧл. Абдраменым вань комнатаостӥ ветлоно кариськи. Одӥгез гинэ комната эскерытэк кылиз на. Кучапилэн отчы пыремез уз луы, дыр. Отчы пырысал ке, ӧсэз пась луысал. Паймод но бырод, � Ульма ӵапак со комнатаын, Мариналэн валес шораз ик изе. � Мар-о луиз? � юаз кадь Ульма, дораз лыктэмме адӟыса. Каньылак гинэ султӥз, валесысь тэтчиз. Кучапимы туж мӧзме Мариналэсь. Кык арня ог-огзэс адӟытэк уло ни. Мӧзмонзэ капчичтон понна, оло, та уе Мариналэн валесаз кӧлӥз. Кӧня бадӟым но кӧня пичи губи миськем Апок перепеч пыжыны? Бакапи мӧзме Выжыкыл Улэм-вылэм Тиша нимо бакапи. Со туж яратэ вылэм аслэсьтыз шурзэ. Ӵукна султэ ке, соку ик ярдуре тэтчаса потэ но вож сад пӧлы ышем коркаосты чакла, ку отысь гольык пыдъёс тыпыр! бызьыса вуозы шур дуре. Собере пиналъёсын ӵош зымылэ, чомбылляське вуын, яркыт бубылиос сьӧры тэтча. Нош уйёсы шулдыресь ортчем нуналъёссэ адӟыса вӧта. Толалтэ солы мӧзмыт луэ: кезьыт люкетэ кыре потаны. Изён куспаз олокӧня пол сайкалля Тиша: оло гужем вуиз-а ини? Нош одӥг пол озьы сайказ но ярдуре шумпотыса тэтчиз - тол ортчем, котькытын вож- вож. Но мар-о сыӵе мӧзмыт, одӥг куара но уг кылӥськы? Нунал куспын муспотон гольык пыдъёс но ӧз тыпыртэ гуждор вылтӥ, ӧз утэ пуныос но, ӧз кылӥське нокыӵе мукет куараос но. Тиша тэтчаса котырскиз коркаос котыртӥ. Нокин ӧвӧл. "Кытчы ваньзы ышиллям, ма луэм?" - ӧз вала куанер бакапи. Со ӧз тоды уго гуртлэн быремез сярысь. Пиналъёс анай-атайёсынызы ӵош мукет интые улыны кошконо луизы. Л. П. Баранова. Аксакшур гурт. Пичи Пурга ёрос. Гондырпи но лӥял Выжыкыл Одӥг нюлэскын улӥз-вылӥз гондырпи. Солэн иськавынъёсыз мушъёс вал. Соос улӥзы тыпылэн гырказ. Огпол гондырпи мынӥз узыяны. Сюресэз ӵапак орче вал мушъёслэн улон тыпызы вӧзтӥ. Бускельёсызлэн гужлам куаразы кылӥськымтэысь валаз: соос лобӟиллям мӧль бичаны. "Кематэк уз вуэ, дыр. Солань-талань ортчоно сюрессы туж кузь", � малпаз гондырпи но азьлань лашкинтӥз. Солы но узыё интыозь кема вамышъяно. Мушъёслы мӧль бичаны куазь удалтӥз. Шумпотыса дор палазы дыртӥзы. Гондырпилэн но кудыез ӵыж-ӵыж узыен тырмиз. Жадемзэ ческыт узыен веськатыса бертыны потӥз. Иськавынъёс пала вуэмъяз кылӥз лек гужламез. Дыртысагес вамыштӥз но тыпы бервылысь лӥялэз адӟиз. Паймеменыз киысьтыз кудыез ик усиз. Солэн ӝож бурсъем куараез нюлэс тыр шуккиськиз: � Кинлэн киыз ӝутӥськиз вож батырез погыртыны?! Светлана Широбокова. Ижкарысь 45-тӥ школа. Оскалтэм потэ Эмезь кисма пушер пӧлын. Шунды пӧсьсэ кузьмам солы. Емышез ӵыж-горд пиштэ. Туж оскалтэме потэ. Но пушнер киез ӵушка. Вылтыры солэсь кышка... Пульсатэ ке но киез � Веръяло ик эмезез. Басьтӥ туж чакласькыса, Сиисько шумпотыса. Эх, ческыт вылэм эмезь, Уг ни курда пушнерлэсь. Елена Игнатьева. Бураново гурт. Пичи Пурга ёрос. Эмьюм будосъёс Та йыртӥянын эмьюм будосъёс кузэн суредамын. Малы ке шуоно, одӥгезлэсь нимзэ буш клеткаосы гожтӥд ке, мукетызлэсь но нимзэ лыдӟыны быгатод. (Учконо час бергамъя). Сьӧдэн гинэ суредам будосъёсты асьтэос буялэ. Сергей Игонин. Аналтэмын вылэм Милемыз гужем каникулэ келяса, берпумзэ жингыртӥз гырлы. Пиналъёс пазьгиськизы школа азбаре. Но ми классысьтымы потыны ум дыртӥське. Ми уго ум бертэ на дорамы � ошмесэз утялтыны мыном. Юнме луымтэ дасяськеммы. Ошмес син доры вуыса адӟим, макем со аналтэмын. Маиз но ӧвӧл котыраз: пал ката, сӧриськем ӟенеликъёс, вуж дӥськут, силё... Лопаткаен, мажесэн жуг-жагез поттам, огазе люкаса сутӥм. Ошмес синэз кенерен котыртӥм. Лэсьтэм ужмылы шумпотӥм. Надя Имполитова. Вуж Монья школа. Пичи Пурга ёрос.