ӞАЗЕГ

Дӥго-дӥго, дӥго-дӥг!
Утчаса ветлӥм ӟазег.
Утчаса ветлӥм, ветлӥм,
Шур дурысь сое шедьтӥм.
Азбере гинэ пыриз,
Сиён доры ӝог кошкиз.
Дыртыса кокчаз-сиськиз,
Собере гидэ пегӟиз.

Катя Кайсина.
Качкашур школа.
Глазов ёрос.

Сергей Игонин

БУДОН

Кин будэ бурдо карын -
Лобалоз чагыр инмын.
Чирдом, чирдом -
Гурлалом.

Кин улэ писпу гыркын -
Тэтчалоз пужым ягын.
Эктом, эктом -
Бергалом.

Кин лэйка чылкыт шурын -
Зумылоз тылкым шорын.
Чабом, чабом -
Тэтчалом.

Кин шона сяська пӧлын -
Юмшалоз возьёс вылын.
Шудом, шудом -
Бызьылом.

Кин шудэ нылпи садын -
Пальпотэ эшъёс радын.
Будом, будом -
Шумпотом.

"ЧОРЫГАСЬ"

Одӥг пол коӵыш визнан, ведра, нумыръёс басьтӥз но чорыганы мынӥз. Куазь шулдыр 
вал. Нош чорыг одӥг но ӧз кыска. Одӥг, кык нунал пукиз, нокинэ но ӧз куты. 
Чорыгъёс сое исаса сямен, ву вылэ быжынызы шлач! гинэ шуккыло.
Коӵышлэн кӧтыз ӝож луиз. Котырзэ кутыса, дораз бертыны потӥз. Ӵапак магазин 
вӧзтӥ ортчоно вал. Отчы пырыса, ведра тыраз чорыг басьтӥз. Кышноез сое шумпотыса 
пумитаз, ушъяз. Йӧлвылэн сюдӥз. Со ӧз но малпа угось картэз сыӵе кескич 
"чорыгась" шуыса.

Настя Селивёрстова,
5-тӥ классын дышетскись.
Чура гурт.
Глазов ёрос.
ШАЛУНЬКА

Мынам коӵыше вань. Нимыз Шалунька. Со шудэ тылобурдоосын, бубылиосын, шыръёсын. 
Песянае керттӥськыкуз, бугоръёс сьӧры бызьылэ. 
Коӵышелэн ӵужалэс-горд гонэз. Мон сое яратӥсько. Анай уг ке адӟы, эшелы йӧлвыл 
сётӥсько. Шалунька сиськыкуз мургетэ. Нош песянае коӵышлэсь йӧлвыл сиемзэ адӟе 
ке, куаретыны ӧдъя. Нош мон сылӥсько, эшме жалясько.

Женя Ельцов, 
5-тӥ классын дышетскись.
Чура гурт.
Глазов ёрос.

А-ысен - Я-озь

Азбарын аксым атас
Арбузэз ачиз ашаз.

Бакчаын бадӟым бака
Будосысь бӧчы бича.

Вал вылын вуиз Вова -
Вало возе ветлӥз вал.

Гоногуби, гордгуби,
Гуртаз гыж бертэ Габи.

Дуня дыртэ дынялы,
Дыдык долкам душеслы.

Еж емышез ерпечка
Ёзъяны етӥз ёртэ.

Жагы, жагез ӵуж, ӵуж,
Гужам кужед вуж-вуж.

Ӝакыпи ӝытлы ӝегам -
Ӝуйые ӝик-ӝик ӝикам.

Зарезьтыр зорем Зина,
Зыбкаез зурк-зурк зурка.

Ӟильыр, ӟильыр ӟольгыри -
Ӟурись ӟезьы ӟукыри.

Инкӧльӹ инмын изе,
Ивимы избур2 изэ.

Йыгылэн йырыз йылын,
Йырийсь йыръе йыртурын.

Кибыез какся3 кокча,
Кукеймес коӵо кача.

Лапег Лади ладь-ладь,
Лымы лапка лач-лач.

Миша, мувыр меӵ-меӵ,
Мушед мӧля ӵем-ӵем.

Нэнэй нуй-нуй нянь нырке -
Ныллэн нунышыд нерге.

Ошлы ожо окмымтэ -
Ожогубиез октэ.6

Ӧлёк4 ӧрекча ӧрын,
Ӧстӧр5 ӧвӧл ӧс сьӧрын.

Петыр питыр питыра,
Пал пыдзэ пуны пуре.

Р

Сарваын сизьым сакыр,
Сарилэн6 синмыз сукыр.

Толя - тӧлбер тэшкыли,
Табань тыкись тыкыли.

Урткыӵ уин утчаське,
Уртбубыли7 уйылэ.

Ф, Х, Ц

Чима-чима, чимали -
Чумын - чоньдэм чонари.

? Ӵан! Ӵан! - ӵангетэ ӵана -
Ӵынэн ӵакмытозь ӵынам.

Шаян шунянен шугмем,
Шупшадиозь8 шонерскем.

Щ, Ъ

Ыбесэз ыж ыбыштэм -
Ымтэм ыжпизэ ыштэм.

Ь

Эмма эмъя эшъёссэ,
Эля эктэ эгесэн.

Юся юсьёсты сюдэ,
Юбер юри юргетэ.

Яша ягын янгышам:
Ядо ялгуби9 ярам.

Инкӧльӹ - шаровая молния.
Избур2 - известняк.
Какся3 - цапля серая.
Ӧлёк4 - пескарь.
Ӧстӧр5 - порог.
Сари6 - буланая лошадь.
Уртбубыли7 - ночная бабочка.
Шупшади8 - гурт ним.
Ялгуби9 - опёнок.

Валентина Иванова

ӞЕЧ ЛУ, ГУЖЕМ!

Ӟеч лу, ӟеч пӧсь гужем!
Зарнияд тон дурен.
Бусые ми кожам,
Нюлэскы, шур дуре...

Ческытлэсь но ческыт
Емышен кунояд,
Губилы нюлэскы
Милемыз ӧтчалляд.

Шундыен ӵош шурын
Пылаським, зумылӥм,
Сяськаё возь вылын
Бубыли кутылӥм.

Горд чуньы кадь етӥз
Гонӟыртӥз гужеммы,
Жингыр-жин! шаертӥм
Шуккиське кырӟанмы.
ГОНДЫР
Вуиз тулыс, 
Гондыр сайказ.
Тол бере кӧтыз сюмаз.
Со султӥз, синзэ усьтӥз,
Нязьыльскиз но топ! усиз.
Кынарыз солэн бырем,
Гужемзэ ичи сиськем.
Тон гондыр бадӟым, кужмо,
Тыныд тросгес сиськоно.

Наташа Корепанова,
5-тӥ классын дышетскись.
Чура гурт.
Глазов ёрос.

ИТАЛМАС

Ӝоген ини ми пала
Вож тулыс вуоз.
Шулдыресь возьёс вылам
Италмас будоз.
Дӥсялоз вожмыт дэрем,
Зарни чук - йыраз.
Шундыез , оло, курем 
Пиштыны шораз
Мушъёсты но со ӧте,
Милемыз но со вите
Паймытыны чеберен,
Возь вылысь ӵуж зарниен.

Настя Золотарева.

Ивановя
ЧЕСКЫТ ПАЛЭЗЬ

Ӟольгыри пуксиз куаке,
Кокчаны кутскиз маке.
? Туж ческыт та сьӧд палэзь,
Кӧт уз висьы, дыр, солэсь.
Семьяме но ӧтӟно,
Ӵуж ныръёсме сюдоно.
Чив-чив-чив! татчы, татчы,
Тырмоз кокчаны бӧчы.
Дас кузя сисько ни резь -
Ческыт вылэм сьӧд палэзь.
Сад ултӥ берга коӵыш -
Со но шат возьма емыш?

КИН ЛУОНО?

Ӝоген быдто школаме,
Кин нош потэ луэме?
Дышетӥсь, я йӧнатӥсь,
Скал кыскись, кунян сюдӥсь,
Тракторист, бусы ужась -
Котькин луыны мон дась.
Ой, кӧня пӧртэм соос,
Йырыд воксё поромоз.
? Ойдо, дышетскы на ай, -
Маялтэ йырме анай. -
Котькытын но ужаны,
Кулэ ӟеч дышетскыны.

Алёна Юферева.
Глазов ёрос.
Гулеково школа.

МУНЁЕ
Тани мынам мунёе,
Зарни кадь ик чебере.
Дэремз солэн югыт,
Йырсиез нош вож-лызмыт.
Пыдсаськыло синъёсыз,
Улмо кадь ик бамъёсыз.
Шуисько эшме Натӥ -
Сое сюлмысь яратӥ.

Катя Щепина,
Люм школа.
Глазов ёрос.
ПАЙМЫТӤЗ

Вань пиналъёс бызьыло 
Шунды шорын тэтчало.
Дугдытэк серекъяло,
Ческыт узы бичало.
Ушъяське пичи Аня:
"Мон октӥ быдэс кужня*!"
Паймытӥз Аня, зэмзэ -
Узыен наштам бамзэ.

Аня Баженова.
4-тӥ классын дышетскись.
Чура гурт.
Глазов ёрос.

*Кужня - куды, корзина.