А-ысен - Я-озь Азбарын аксым атас Арбузэз ачиз ашаз. Бакчаын бадӟым бака Будосысь бӧчы бича. Вал вылын вуиз Вова - Вало возе ветлӥз вал. Гоногуби, гордгуби, Гуртаз гыж бертэ Габи. Дуня дыртэ дынялы, Дыдык долкам душеслы. Еж емышез ерпечка Ёзъяны етӥз ёртэ. Жагы, жагез ӵуж, ӵуж, Гужам кужед вуж-вуж. Ӝакыпи ӝытлы ӝегам - Ӝуйые ӝик-ӝик ӝикам. Зарезьтыр зорем Зина, Зыбкаез зурк-зурк зурка. Ӟильыр, ӟильыр ӟольгыри - Ӟурись ӟезьы ӟукыри. Инкӧльӹ инмын изе, Ивимы избур2 изэ. Йыгылэн йырыз йылын, Йырийсь йыръе йыртурын. Кибыез какся3 кокча, Кукеймес коӵо кача. Лапег Лади ладь-ладь, Лымы лапка лач-лач. Миша, мувыр меӵ-меӵ, Мушед мӧля ӵем-ӵем. Нэнэй нуй-нуй нянь нырке - Ныллэн нунышыд нерге. Ошлы ожо окмымтэ - Ожогубиез октэ. Ӧлёк3 ӧрекча ӧрын, Ӧстӧр5 ӧвӧл ӧс сьӧрын. Петыр питыр питыра, Пал пыдзэ пуны пуре. Р Сарваын сизьым сакыр, Сарилэн6 синмыз сукыр. Толя - тӧлбер тэшкыли, Табань тыкись тыкыли. Урткыӵ уин утчаське, Уртбубыли7 уйылэ. Ф, Х, Ц Чима-чима, чимали - Чумын - чоньдэм чонари. ? Ӵан! Ӵан! - ӵангетэ ӵана - Ӵынэн ӵакмытозь ӵынам. Шаян шунянен шугмем, Шупшадиозь8 шонерскем. Щ, Ъ Ыбесэз ыж ыбыштэм - Ымтэм ыжпизэ ыштэм. Ь Эмма эмъя эшъёссэ, Эля эктэ эгесэн. Юся юсьёсты сюдэ, Юбер юри юргетэ. Яша ягын янгышам: Ядо ялгуби9 ярам. Инкӧльӹ - шаровая молния. Избур2 - известняк. Какся- цапля серая. Ӧлёк - пескарь. Ӧстӧр - порог. Сари - буланая лошадь. Уртбубыли - ночная бабочка. Шупшади - гурт ним. Ялгуби - опёнок. 2 Мынам оскеме потэ, ХИХ-тӥ даур Творчестволэн даурез луоз. Котькыӵе уж творчествотэк каторгалы пӧрме, нош адями - машиналы, яке сюдос валлы. Котькуд удысысь адями мае выльзэ кылдытӥсь мурт медло. Сюлмысь ужась адями ноку но уз пӧрмы роботлы но, компьютерлы но, малы ке шуоно, ӟырдыт сюлэм гинэ зэмос творчествоез вордӥськытэ. Малы мон та сярысь верасько? Туала вакытэ адями туж кышкыт "гож" доры вуиз. Со кылдытӥз пӧртэм машинаос, кудъёсыз ӝоген ассэ зӥбыны но вормыны быгатозы. Учкы ай, кыӵе сӧсыртӥмы асьмеос Музъем-мумымес! Вуоно поколение "кузьыммылы" шумпотоз меда? Умой одӥгез гинэ - дунне вылысь та кышкытлыкез валась адямиос ӧз быре на. Ойдолэ вуоно дауре чылкыт малпанъёсын, шуныт сюлэмъёсын, ӟеч ужъёсын вамыштоме. Василий Мустаев. "Кизили" журналлэн редакцияз ужасьёслы Калыкез дышетонъя министерство ӟечкыла нылпи журналэз поттӥсьёсты, солэсь лыдӟисьёссэ "Кизилилы" дас вить ар тырмемен. Сӥзиськом выль азинсконъёс но чебересь малпанъёс, тунсыко произведениос но озьы ик шудбур, тазалык! Удмурт Элькунысь Калыкез дышетонъя министр Любовь Захарова. Ольга Константиновна Шилова, Куӟебай Герд нимо удмурт гимназилэн директорез: Пӧртэм амалъёсын ужась школаос мед йылозы но азинскозы. Котькуд пиналлэн аслаз быгатонлыкъёсызъя но мылкыдызъя школа бырйыны луонлыкез медло. Екатерина Анатольевна Булатова, Калыкез дышетонъя министерствоысь ӧнерчи: Сю ар ортчыса но, нылпи садъёс анай-атайёслы туж кулэ юрттӥсьёс луозы. Нылпиос отын тазалыксэс кыдатозы, тодон-валанзэс будэтозы, паськыт дуннее йыгмыт вамышъёсын потыны дасяськозы. Соин ик "Кизили" журналлы азьланьын но нылпи садъёсын юнэсь кусыпъёс возёно. ДЕЦИЛЛИОН Компьютер бам тыр пуксем кульчоосты адӟыса, Оля синъёссэ кыниз. Нош соос кынем син пушказ но ворекъяло. ? Малы сокем трос кульчоос? - Оля паймыса юаз агаезлэсь. ? Кульчоос ӧвӧл со, дыды. Нольёс со. ? Кыӵе ке выль шудон-а, мар-а тодӥд? Малы номыр ӧвӧлэз возьматӥсь нольёс сокем трос бичамын? ? Умойгес учкы ай - котькуд чур кутске одӥг лыдпусэн. Нош лыдпусэн артэ сылӥсь ноль - со тӧлпуз ӧвӧл ни. ? А-а, валай, котькуд чурын нолез, вылӥысяз сярысь, куиньлы тросгес. ? Озьы. Котькудӥз лыдпус азьвылэзлэсь сюрс поллы бадӟым. ? Нош мон сюрсэз но миллионэз гинэ тодӥсько, - шуэ Оля. ? Со но умой. Тон пичи на ук. ? Ма, триллион шуэмез но кылылӥ ни. ? Солэн азьпалаз миллиард вань на. ? Одӥг, кык шуыса лыдъяськыны кутскод но, миллионозь вуэм бере, миллион одӥг, миллион кык шуыса азьланьтӥд ке, миллиардозь вуод-а? Кӧня час ӵоже меда лыдъяськоно луоз? Мон огпол кутски вал сюрсозь лыдъяськыны. Но кылы жадемен, ым пушкы куасьмемен, вить сюозь гинэ вуи. ? Сюрсэн, миллионэн но солэсь тросэн мертан, чотан макеосты одӥген-одӥген уг лыдъяло. Ачид шӧдӥд, озьы лыдъяны уно дыр быре. ? Я, табере компьютер бамысь лыдпусъёслэсь ваньмызлэсь нимзэс вера ай. ? Кылзы: сюрс, миллион, миллиард, триллион, квадриллион, квинтиллион, секстиллион, септиллион, октиллион, нониллион, дециллион. ? Та нимъёсты мон соку ик вераны уг быгаты. Но квадриллион йырам кылиз. Ой-ой, солэн нолез дас вить! Мае со быдӟа лыдпусъёсын мерталод, лыдъялод? ? Та бадӟымесь лыдпусъёс инсьӧрысь кизилиослэсь, планетаослэсь кусыпсэс мертаны гинэ кутӥсько. Нош асьме улонын со быдӟа лыдпусъёсын номыре мертаны, лыдъяны. ? Нош берпум чурысь лыдпуслэн 33 нолез. Солэсь бадӟым лыдпус ӧвӧо ни, оло? ? Ӟечгес малпаськы ай, оло, ачид но валатскод. Нош тӥ, покчи эшъёсы, Олилы мар шуоды? Елена Глебова. 1 000 - сюрс 1 000 000 - миллион 1 000 000 000 - миллиард 1 000 000 000 000 - триллион 1 000 000 000 000 000 - квадриллион 1 000 000 000 000 000 000 - квинтиллион 1 000 000 000 000 000 000 000 - секстиллион 1 000 000 000 000 000 000 000 000 - септиллион 1 000 000 000 000 000 000 000 000 000 - октиллион 1 000 000 000 000 000 000 000 000 000 000 - нониллион 1 000 000 000 000 000 000 000 000 000 000 000 - дециллион Семён Перевощиков КУИНЬ ЭШЪЁС Ветлыса магазинэ, Басьтӥзы быгылес вуз. Сиёзы Миша, Зина, Шариксы уз сиы, уз. Со али учкоз гинэ - Басьтӥзы бадӟым..... Ӵош юмшазы возь вылын, Ветлӥзы дэмен ялан. Мишаен Зина пыдын Туннэ дырто кудпала? Шарик нискетоз дорын: Эшъёссэ вите..... Урокысь, пе, бертӥмы, Шарик, Шарик, чаль татчы! Лык, бакчае потомы. Тон эн паймы ай, ортчыт - Ми ум ворме огнамы, Убоысь кыском...... Ай ӝоген, пе, басьтомы Зина "вить", нош Миша - "ньыль". Шариксы уг ул чалмыт, Кыз шоры тэтча каньыл. Вож лысъёс пӧлын пеймыт, Нош отын вылэм.... Ульфат Мынам туннэ 2001-тӥ арын улӥсь пиналлы вазиськеме потэ. Тӥни со компьютер пыр "Кизилилэсь" та номерзэ шедьтӥз. Мынэсьтым гожтэмме лыдӟе: "Ӟечбур, тодмотэм эше! Эн паймы: мон ачим ӧвӧл ни, но лулы котырад берга, "Кизили" журналэн тонэ тодматэ. Асьмеос пӧртэм дауръёсысь адямиос. Нош кылмы ог-огмес герӟа. Со пыр тон мынэсьтым сю ар талэсь азьло малпаськемме но валаськод. Удмурт кыл кема уз улы шуыса верасьёс ми дыръя ӧжыт ӧй вал. Тани эшшо одӥг даур ортчиз. Адӟиськод - кылмы азинтӥське. Радио, телевидение пыр веранъёс-возьматонъёс быдэс нунал ӵоже удмурт кылын мыно. Удмурт Элькунамы улӥсь ӟучъёс, бигеръёс, поръёс но асьме кылмес ӟеч валало, нош асьмеос - соослэсьёссэ. Удмурт кылын, "Кизили" сяна, мукет нылпи журналъёс но пото ни. Мылкыд карисьёс соосты компьютерысь но лыдӟыны быгато. Малы пальпотӥськод, эше? Мынэсьтым пальпотэмме шӧдӥд-а? озьы ке, туж умой. Вань эшъёсыдлы мынэсьтым салам вера. Юрий Курягинлэн кизилиез 1999-тӥ арын оштолэзе Юрий Курягин вордскем палъёсаз, Татарстанэ, берпуметӥзэ бертылӥз. Озьы кылдэм, вылды. Оштолэзьлэн 24-тӥ нуналаз Санкт-Петербургысь командиръёсты дасянъя С. М. Киров нимо вылӥ училищеез алигес гинэ йылпумъям егит лейтенант Мурманске кошке. Татысь одӥгаз частьын удмурт пияш офицер службазэ нуыны кутскиз. Солы десантно-штурмовой взводэн кивалтыны оскизы. Ӝоген та взводэз Кавказ гурезьёсы, Чечняе ысто. 30-тӥ толсуре Юрий Курагинлэн взводэз Харачой дорысь вырйылэ интыяськиз. Та гурезь йылысен вань котыр умой адске. Асьме солдатъёслы отӥ ортчыны сюресъёс усьтэмын вал. Боевикъёслы соос вылэ омырскыны ӧз лэзьылэ. Шӧдтэк шорысь десантникъёсты ог 15 пала тодмотэм адямиос котыртыны ӧдъязы. Командирлэн быгатыса кивалтэмез улсын, боевикъёс пазьгемын вал. Кин кытчы пегӟиз, сӧсыртэмъёсыз но вал. Та кечат-вамат ыбылӥськонысен ик Курягин лейтенантэз пыдаз сӧсырто. Но со эшъёссэ ӧз кушты, медсанчасте мыныны чутрак пумит кариськиз. Вылӥысь командиръёс валазы, морской пехотинецъёслэсь взводзэс выльысь котыртыны быгатозы шуыса. Соослы юрттон вылысь, харачой дорысь 1406,0 номеро вырйылэ разведгруппа но авианаводчик ыстэмын вал. Мукет нуналаз, 31-тӥ толсуре ӵукна 8 час но 30 минутэ, взвод вылэ боевикъёс плась огнеметъёсысь тылъёс лобаны кутскизы. Улос ик юг-юг луиз, музъем зурка, омырын ваньмыз сураськиз - сюй но, лымы но, из пырыос но. Аспӧртэмлыко катанчи сьӧрысь опорной пункт вылэ олокытысь гранатаос вуизы. Шузи-мази ыбылыса, кесяськыса, ог 100-200 тушо воргоронъёс взвод пала вамыштӥзы. Вакчи дыр куспын котькудӥзлы валэктэмын вал, таӵе кышкыт учыре кин ма карыны кулэ. Лейтенант Курягин автомат кутыса, ачиз но гурезь йылэ тубисьёсты ӵышкыны кутскиз. Одӥгез бӧрсьы мукетыз исламлэн флагез улсын ӝамбыръяськисьёс погылляськыса уллань питыразы. Десантникъёс пӧлын но кулэмъёс вань ни. Роталэн командирез но быриз. Сӧсырмем офицер Юрий Курягин взводэн кивалтэмысь ӧз дугды, солдатъёсызлы быгатыса приказъёс сётъяз. Кылем эшъёссэ ӝутыса, соос тушмон вылэ омырскизы. Соку автоматысь но гранатомётысь ыбылыса, пулемётной ротаез пазьго, изъёс сьӧры ватскем гранатомётчикез быдто. Быгылес йыро кылем гыжкалъёс кир-пазь луизы. Ньыльдон минут пала кыстӥськиз та ожмаськон. Со дыр куспын лейтенант Юрий Курагин пыраклы историе кылиз. 1999-тӥ арын 31-тӥ толсуре, выль ар нунал азьын, 9 час но 10 минутэ удмурт пилэн кужмо сюлэмыз жугиськемысь дугдэ. Тушмон пуля асьме офицерез погыртӥз ке но, туж кулэ инты десантно-штурмовой батальонлэн киулаз ик кылиз. Ож йылпумъяськем бере, тодмо луиз: ожгарчиосмы пӧлысь дас кыкез быронзэс гурезь йылын шедьтӥзы, куинез туж зол сӧсырмизы. Нош боевикъёсты верано ке, соос пӧлысь ог витьтонэз асьсэ базаосазы ӧз берытске ни, талэсь кык поллы тросэзгес сӧсыртэмын вал. Камбаркаын улӥсь Надежда Николаевна но герман Александрович синчеберзэс кадь утьыса возё бадӟым пизылэсь офицер мундирзэ. Син шоры соку ик йӧто зарнивуам погонъёс вылын быдэн кык ӵуж кизилиос, нош гадь бордаз бадӟым зарни медалез. Россиысь Президентлэн 2000-тӥ арын 25-тӥ куарусёнэ потэм Указэзъя, удмурт пияшлы Юрий курягин лейтенатлы Рооссилэн героез дано ним сётэмын. Быремез бере. Мундир вылын Зарни Кизили ворекъя. Надежда Николаевна но Герасим Александрович мур малпаськыса пуко. Кыӵе малпанъёс йыразы бергало? Ку меда бурмоз Кавказ гурезьёсын басьтэм "яразы"? Кӧня семьяосы пыроз на куректонэн сураськем- пожаськем шыпытлык? Георгий Грязев, Удмурт телевидениысь журналист. Яратоно "Кизили" журналэ! Мяу! Одӥг пол Кузьгубей но Тэшкыли мыным туж тунсыко юан сётӥзы. Кин, пе, дунне вылын тужгес но визьмоез. Юанзылы валэктон сётыны ӧй быгаты. Соку Надяпай шуиз: "Эх, тон, Пома коӵыш, "Кизили" журналэн эшъяськоно. Сое лыдӟыса, Кузьгубеен Тэшкыли уть кыӵе визьмоесь, кыланы-бураны устоесь луизы ни." Табере мон но эшъёсылэсь адӟем карисько. Котькуд номерзэ туж сак лыдӟисько. Вань коӵышъёсты но та журналлы гожтӥськыны дэмласько. Нош туннэ яркыт сиосын пиштӥсь "Кизили" эшме ӟырдыт коӵыш сюлэмыным ӟечкыласько потыны кутскемез дырысен 15 ар тырмонэныз. "Чагыр, чагыр дыдыке!" радиоверанысь Пома коӵыш. "Кизили" журналлэн редакцияз ужасьёслы Дас вить ар ӵоже ни "Кизили" журнал ас лыдӟисьёсыз доры дыртэ. Та дыр ӵоже элькунысьтымы но солэн палэнысьтыз дасо сюрс покчиесь удмурт пиос но нылъёс, яратоно журналэнызы пумиськылыса, уно шумпотон басьтӥзы. Вакчиесь кылбуръёс, веросъёс, выжыкылъёс, тунсыко мадиськонъёс, йыртӥянъёс но яркытэсь суредъёс пиналъёсты чеберез валаны дышето, мылкыдъёссэс ӟеч уже кыско. Удмурт Элькунысь печатья но иворъёсъя министерство "Кизили" журналлэн редакцияз ужасьёслы выль вормонъёс, азинсконъёс, шудбур, тазалык но ӟеч мылкыд сӥзё. Сергей Васильев, Удмурт Элькунысь печатья но иворъёсъя министр. "Кизили" журналлэн редакцияз ужасьёслы Калыкез дышетонъя министерство ӟечкыла нылпи журналэз поттӥсьёсты, солэсь лыдӟисьёссэ "Кизилилы" дас вить ар тырмемен. Сӥзиськом выль азинсконъёс но чебересь малпанъёс, тунсыко произведениос но озьы ик шудбур, тазалык! Удмурт Элькунысь Калыкез дышетонъя министр Любовь Захарова. Вла. Котков СИКЕ ГОЖТЭТ Тюр-люр! Тить-тюить! Люр-люр! Вить -вить! Кря-кря! Куа-ка-ка! Тук-тук! Та-та-та! Быз-з-з! Шлёп! Тарс! Лосырак! Тур-р-р! Бряк! Ӵуштыр-паштыр! Фук-фук! У-у-у! Уггы-уг! Ӧд вала? Эн вай вождэ. Сик кылын Коли гожтэ. "Кизили" журналлэн редакцияз ужасьёслы Калыкез дышетонъя министерство ӟечкыла нылпи журналэз поттӥсьёсты, солэсь лыдӟисьёссэ "Кизилилы" дас вить ар тырмемен. Сӥзиськом выль азинсконъёс но чебересь малпанъёс, тунсыко произведениос но озьы ик шудбур, тазалык! Удмурт Элькунысь Калыкез дышетонъя министр Любовь Захарова. Владимир КОТКОВ Шунды, Мемей сямен, Туж вазь султэ котьку. Мемей, Шунды сямен, Мыня мон кӧлыку. Шунды, Мемей сямен, Веша монэ ӵукна. Мемей, Шунды сямен, Йырсиоссэ сына. Дас вить арес - Быдэ вуон! Иське, рос-прос ни, Воргорон! Иське, витём Ӟечгес уждэ, Чебермемдэ, Сабыр визьдэ. Тодматскыса Таӵе эшен, Пиштэм потэ Яркыт сиен. Саламен - "Вордскем кыл" эшед. Дуно "Кизили"! Ӟечкыласько 15 аресэныд. Азьланяз но инбамын тон котьку аспӧртэмлыко, мукетъёсыныз ӵошатонтэм кужмо но яркыт, паймытъяса но пальпотыса мед пиштод. Журналын ужасьёслэн шырыт сюлэмъёссы, лякыт сямъёссы, гожъяськон мылкыдъёссы, тулкымъёсын пачыласа, покчи лыдӟисьёс доры мед вуозы. Кудымкарысь покчи выныд - "Силькан". "Кизили" журналлы - 15 арес журналмылэсь дас арессэ алигес гинэ пумитамы вал кадь. Со дырысен вить ар лобӟыса ортчиз. Тӥледлы, гажано пинал эшъёсы-лыдӟисьёсы, озьы уг йӧты-а? Уг, дыр. Пичи дыръя чалякгес бадӟым будэм потэ угось. Нош вакыт кема кыстӥське. Нуналлы быдэ дышетскыны ветлоно. Мӧзмыт урокъёс акыльтыны кутско. Каникулэ потыса вуиськод-а, уд-а - со йылпумъяське ни. Нош ик школае мыноно... Бадӟымгес будэмъя дырлэн ӝоглыкез но йылэ, лэся. Сьӧраз уйиськыса но уд суты, ява! Та чуръёсты мон гожтӥсько али дыре. Кӧня ке секунд бере со дыр уз луы ни - ортчемаз кылёз. "Кизили" журналлэн котькуд потэм номерез но али дырын кема ик уг улы, соку ик ортчемаз выже. Ортчем но вуоно дыръёс кема кыстӥсько. Котьку озьы вал. "Кизили" журналлэсь ортчем сюрессэ тодыны шуг ӧвӧл. Мылкыдды гинэ медло. Журналлэсь вань номеръёссэ библиотекаысь яке архивысь шедьтоды но учкыса потоды. Соку ик син азяды "Кизилилэн" будэмез пуксёз. Сое кылдытӥсьёслэсь нимъёссэс но тододы: нырысетӥ аръёсаз журналлэн валтӥсь редакторез Вениамин ившин вал, кылкутӥсь секретарез - Елена Глебова, отделлэн редакторез - Герман Ходырев, художественной редакторез - Василий Мустаев. Та адямиос пӧлысь али "кизили" журналлэн редакцияз одӥгез гинэ ужа на - со суредась Василий Мустаев. Кинъёс туннэ тыршо на -Кизилиез" поттон бордын - соосты та номермес лыдӟыса но тододы. Туспуктэмъёссыя, оло, уд но тодмалэ - ваньзы ик пичи дыразы "берытскиллям" угось. Нош асьсэос вуоно даур сярысь верасько. Бен, сьӧлык уз луы малпанэн 2100-тӥ аре но вуыны. Редколлегилэн членъёсыз но азьпал улон чярысь малпасько. Тӥ но, лыдӟисьёсмы, "Малпанэн - 2100-тӥ аре" конкурсамы мылысь-кыдысь пыриськиды. Озьыен, "Кизили" журналмы но вуоно дырын улоз на. Бадӟым осконэн - Ульфат Бадретдинов, "Кизили" журналлэн валтӥсь редакторез. Котков КИНЛЫ МА Яген йырин ӧвӧл, Йыгын, Чорыг уг зугаты ягын. Чорыг чарак шурын - Сьӧрад яге уг мын. "Малпанэн - 2100-тӥ аре" конкурслы йылпумъянъёс Кытчы ми вуимы? Котырак сок фонтанъёс, емышо но дӥськуто писпуос, чебересь но ӝужытэсь адямиос, куспазы антеннаос пыр гинэ верасько. Нош коркаос кытын гинэ уг сыло: ву вылын но, писпуосын но, омырын но. Адямиослэн кытын улэмзы потэ - отчы ик коркаенызы ӵош лобо. Вань ужъёсты компьютеръёс быдэсъяло: адями соосын кивалтэ гинэ. Пӧйшуръёс но татын аспӧртэмесь: адями кылэз валало, пӧртэм ужъёсты быдэсъяло. Висёнъёс сярысь планетаын улӥсьёслэн кылылэмзы ик ӧвӧл. Омырзы но инкуазьзы котьку чылкыт. Чеберлы но буёло малпанъёслы татын инты. Тӥляд гожтэтъёсты юрттэмен. Тӥни сыӵе 2100-тӥ арысь кык пӧртэм дуннеосы ми вуылӥм. Чеберез но умоез сярысь гожтэтъёс уногес вуизы. Туж паймымон но аспӧртэм гожтӥллям вуоно чебер дунне сярысь Можга ёросысь Решетниково гуртысь Женя но Аня Сухоруковаос. Узыр малпанъёссы соослы вормисе потыны юрттӥзы. Ӟечезлы осконэн тырмемын гожтэтъёссы Балезино ёросысь Люк школаысь пиналъёслэн: Света Емельяновалэн, Надя, Вася, Саша Наговицынъёслэн. Та школаысь ик Лариса Ашихмина азьпал улонэз мукетгес адӟе. Та пиналъёслэн но ужъёссы синпель кузьымъёсын пусъемын луозы. Суредъёсысьтызы аспӧртэм улон коркаосыныз паймытӥзы Ижевскысь 60 номеро школаысь Юлия жевлакова но Ульяна Бадретдинова, Шаркан ёросысь Вукогуртысь Маша Каштанова. Та ужъёс понна нимысьтыз синпель кузьымъёс сётомы. Конкурсамы мыло-кыдо пыриськемзы понна кузьымъёс басьтозы на ижкарысь Марина Суронова, Алнаш ёросысь Серп школаысь Аня Нянькина, В. Асаново гуртысь Света Марданова, Можга ёросысь Кватчи школаысь Надя Владимирова, Нынек школаысь Яна Раинцева, Татарстанысь Балтась ёросысь Алеся Смердова. Чебересь малпанъёсты, гажано пиналъёс, одно ик быдэсмозы! "Кизили" журналлэн редакциез. Мар со редколлегия? Кинъёс отчы пыро? Соос журналэн редакцияз ужало-а? Таӵе юанъёсын мыным, Малыоклы, пиналъёс но, бадӟымъёс но вазиськыло. Ачим но котьма сярысь юалляськыны яратӥсько бере, нокинлы вожме уг поттӥськы. Редколлегия сярысь вакчияк верало. Редколлегия - журналлэн яке газетлэн визькенеш сётӥсь органэз. Та кылъёс валамонгес мед луозы шуыса, журналмылэн редколлегиез сярысь мадё. Милям редколлегиямы пыро редакциямы ужасьёс (валтӥсь редакторез, солэн воштӥсез, кылкутӥсь секретарь но художественной редактор), озьы ик мукет удысъёсын тыршисьёс: художник Александр Михайлович Андрюшкин, кылтодос наукаосъя доктор Татьяна Григорьевна Владыкина, дышетӥсьёслэсь тодон-валанзэс будэтонъя будэтонъя институтын ужасьёс Вера Александровна Анисимова но Раиса Спиридоновна Пчельникова, Калыкез дышетонъя министерствоысь ӧнерчи Екатерина Анатольевна Булатова, библиотекарь Татьяна Михайловна Фёдорова, крезьгурчи Марина Германовна Ходырева, Кузёбай Герд нимо удмурт гимназилэн директорез Ольга Константиновна Шилова, журналмылэн азьвыл кылкутӥсь секретарез, али пенсионер Елена Кондратьевна Глебова. Редколлегилэн членъёсыз редакциямы дырын-дырын люкаськыло но журналмылэсь печатласькем яке потоно номеръёссэ эскеро, "Кизилие" вуэм ужъёслы дунъет сётыло, ӵектонъёссэс, дэмланъёссэс верало, куд-ог мукет ужпумъёсты сэртто-пертчыло. Ваньзылэн ик сюлмаськонзы одӥг - "Кизили" журнал чебер, мур пуштросо, кие кутымон медло. Редколлегие пырись пӧртэм удысъёсын тыршись ӧнерчиос тазьы ужамзы понна редакциысь уждун уг басьто. Сыӵе ӟеч мылкыдо луэмзылы музъемозь йыбырттэм потэ. Тау тӥледлы, гажано агайёс но апайёс, Кизилиез яратэмды понна. Журналлэн эшъёсыз, юрттӥсьёсыз, лыдӟисьёсыз табере тӥлесьтыд тусбуйёстэс но тодмалозы.