ӜОГ ВЕРАНЪЁС Бобы бусыын уг буды, Бакчаын будэ бобы. Пети пепе* пыже, пе. *Пепе - котырес вандыса пыжем картошка. Аня Вахрушева, 6-тӥ класс. ЛЫМЫПОГ Мон туннэ кыре потӥ, Эшме шудыны чортӥ. Ми соин бызьылӥмы, Котмим, кынмим - пыримы. Анае нош чапкиське: "Тон кытысь, лымыпоге?" "Ма, кытысь? - ваньзы тодо, - Ульчамы лымыпого". Марина Вахрушева, 2-тӥ класс. ЛЫМЫ КУНО Лымы мунё мон лэсьтӥ, Ӝӧк сьӧры сое пуктӥ. Азяз понӥсько тусьты, Ӝӧк вылме дасяй бусьтыр. Лымы мунёе пуке, Тусьтые шоры учке. "Си, мунёе, тон куно". Умойгес мон учки но - Куное шунам ини, Кот гинэ кылем тӥни. Аня Вахрушева, 6-тӥ класс. ЛЫМЫ ПЫРЫОС Лобало, лобало Туж чебер пырыос, Шыпытак усьыло Тӧдьыесь мамыкъёс. Бакчасьӧр льӧмпуме, Укноул сиреньме Юг мамык шобретэн Тол бабай шобыртэм. БАСМА СЮРЕС Выжлёгет керттэ анай, Та ужез, пе, вала ай. Кыӵес бӧрсьы пуксе кыӵес - Чебер пӧрме басма сюрес. Аня Крылова. Порозово школа. ЛЫМЫ Ма со лымы, котькин сое тодэ. Со музъемез толбыт шунтэ-сюдэ. Мон но малпай, оло, оскалтоно?.. Стоп! Визьмаськи: уг сиы - висёно. Роман Евсеев, 6-тӥ класс. МӦЗМОН Витисько ни тулысэз, Мӧзмисько шунытэзлэсь. Жильыртоз, бызёз вуэз - Мӧзмыны кутско толлэсь. Маша Вотина, 4-тӥ класс. МАДИСЬКОНЪЁС Питырес но котырес, Туж усто но чупырес. Ӵыжиськод - лобе капчи, Золгес возьма капкачи. Оля Фролова, 6-тӥ класс. МАДИСЬКОНЪЁС Ӵыж-горд бамо, Ӧвӧл улмо. Монэн Шулдыр луэ убо. (Помидор). Возь вылын Трос пумо со будэ, Бубыли Туж монэ яратэ. (Сяська). Борддорын - Трос лыдпусъёс, Отын пӧртэм Нуналъёс. (Календарь). Катя Вахрушева. Быги школа, 5-тӥ класс. СУГОН Палай огпол, Бӧрдӥ сю пол. Тон но пала ай, Тодод, Палай! Катя Безрукова, 4-тӥ класс. * * * Та бурдо сикын улэ, Нуназе гыркын кӧлэ. Синъёсыз нош ӝуало - Кин меда. Кион оло? (Пелёкучыран). Аня Вахрушева, 6-тӥ класс. "Туннель" Одӥг нунал, кык нунал, Карытэк одӥг но ял, Лымы туннель лэсьтӥськом, Ог арня ни выриськом. Туннэ гинэ быдтӥмы, Усто пӧрмиз туннельмы. Шудӥськом, серектӥськом, Со пушкытӥ ветлӥськом. Выламы нош дымбырак! Потэммы уг лу чаляк. Ӧвӧл ни шумпотонмы, Выламы ни туннельмы. Саша Безрукова, 6-тӥ класс. Алексей ЕЛЬЦОВ ТӦЛПЕРИ СЬӦРЫ Новелла Пичи дыръя котькудӥз лумбыт бызьылыны, шудыны яратылӥз, дыр. Ми но эшъёсын - зор-а. лымы-а - урамысь ӧм ик пыраллялэ. Пӧртэм шудонъёс асьмеос ик малпаллямы. Ӵем дыръя керетонъёс-тупамтэос но потылӥзы. Ма со керетон вал шат? Ӧжытаклы люкиськиськод но, выльысь эшъяськиськод. Гужем уйёсы ми пересь Олексанэн ӵош вал возьманы ветлылӥм, нош толалтэ сиес- тӥрлык возён корка люкаськылӥм.Пересь ма но ӧз мадьылы. Одӥг пол Олексан агай милемлы Тӧлпери сярысь вераз. Вот, шуэ, шуд ке шедьтэмды потэ, тӥледлы одно ик Тӧлпериез кутоно. Соку пе, улонады ваньмыз капчи, шулдыр луоз. Со дырысен ваньмы, ог-огмылэсь лушкем, Тӧлпериез уйылыны кутским. Нунал-лумбыт бызьылӥськом, вылысь дӥсь но кесяське, пыдъёс но, ымныр но, саптасько, вир потоно кадь гожмасько, нош ми асьмелы "шуд" кутылӥськом. Одӥг пол Тӧлпери сьӧры бызьыса, бызьыса жади но шур дуре пукси. Пукисько, но йыре пӧртэм малпанъёс лыкто. Тӧлпериез кутӥ ке, мон ма солэсь куро? Ваньмыз вань кадь. Гужемез шут кузьгес карыны косысал?! Нунал-лумбыт шудыса бызьылысал, школа сярысь но малпан ӧй луысал ни. Нош гужем быдэс ар кыстӥськиз ке, ку куасэн бызьылом, лымыен шудом на? Гужем огназ кулэ ӧвӧл, тол но мед луоз. Толбыт нискылалод, лымыен шудод, нош шурчикъёс ку лыктозы? Ку куръёс потозы, сяськаос усьтӥськозы, шуръёс йӧзэс нуозы?.. Гужем шат? Уз, гужем шырчикъёс уз вуэ, соос тулысэз ярато. Тулыс но кулэ. Мед луоз ваньмызлэн сяськаяськись шулдыр мылкыдзы. Нош садын емыш ку вуоз? Гужем бере соку ик тол ке лыктӥз, ваньмыз кынмоз: бурдоос но, пӧйшуръёс но, будосъёс но, писпуос но. Сӥзьыл вань емышъёс вуо, писпуос куарзэс кушто, бурдоос шуныт пала лобо, тросэз пӧйшуръёс каразы кӧлыны пыро. Нош школае мынон но сӥзьыл ук. Бен, сӥзьыл. Кызьы уд мыны школае? Отын вань эшъёсыныд пумиськиськод. Кӧня выль тодонъёс басьтод! Я ӵок ини, мед луоз сӥзьыл но. Озьы малпаськыса пукытозям Тӧлпери сярысь вунэтӥ. Мед юмшалоз ни ас понназ. Оло, со но шудзэ утча... ШУР ДУРЫН Одӥг пол арня нуналэ Митрен Иви ӵукна ик шур дуре васькизы. Куазь шулдыр. Шунды туж яркыт пиштэ. Иви кылиськиз но вуэ зымиз. Нош Митрей, турын вылэ выдыса, книга лыдӟыны кутскиз. Соку ик мукет дуннее выиз кадь. Огвакытэ Митрей шуак луиз. Кытын Иви? Выиз шат? Митрей кышкаменыз кесяськыны ӧдъяз. Олокытысь адямиос люкаськизы. Митрей вуэ тэтчиз, чорыг сямен зымиз. Собере ву вылэ потӥз. Со вакытэ Митреен артэ Ивилэн йырыз мычиськиз. ? Мар тон дауртӥськод?! - кеськиз Митрей. ? Выем муртэз утчасько, - шуэ иви. ? Тонэ дэмен утчаськом ук! Ярдуре потэмзы бере, Иви маде ни: - Шур со пала уяса потӥ но будьпу улэ выдӥ, олокызьы умме уськем. Кесяськемез кылыса, шуак сайкай. Кылӥ: кин ке но выем. Ӝогак вуэ тэтчи. Шуге-леке шедем муртлы юрттоно ук! * * * Туннэ нуназе, пиналъёс, Кулэ возь вылэ мыныны. Отын чебересь сяськаос Ӧтё доразы шудыны: Отын тюрагай но чирдэ, Лоба бубыли но отын; Чечы отын муш но басьтэ, Кибы но адске куар бордын; Отын чирдэмез кылӥське Лобась кырӟасьлэн - бурдолэн. Учкид ке вылэ - адӟиське Каллен ветлэмез пилемлэн. Шулдыр возь вылын, пиналъёс. Отысь мыл уг поты кошкын: Ӧтё доразы сяськаос. Шулдыр али туж возь вылын! СӤЗЬЫЛ Уй палась лыктыло лек тӧлъёс, Лымылэсь кезьытэсь пилемъёс. Пиналъёс! Шунытгес дӥсяське - Лымылэсь милем мал кышканы? Со - мамык кадь, валес кадь небыт; Шакырес сюресэз шобыртоз; Дӧдьыен ветлыны кутскозы: Итымез сузялом - кутсаськом. Городэ нуом ю вузаны; Вузалом но сётозы уксё; Уксёмес нуом выт тырыны; Выт тырса, ми мыном ӵужмортэ, Куное сиыны-юыны. Шакырес луэ сюрес; Азбаре дӧдьы потто; Дасяло ини кутэс, Обине тыро культо. Кышноос сэсто етӥн - Дасяло соос черсон; Черсыса пуко ини; Тугыны сёто ыжгон. Ӝытъёсын черсӥсь нылъёс Огазе пукны ветло; Мертчанзэс черсо соос, Кырӟанзэс но кырӟало. ОГНАЗ ЧЕРСӤСЬ Огнам ук, огнам, Огнам пукисько. Чебер мертчанме Сюлмын черсӥсько. Малпан но лыктэ, Мӧзмон но вуэ. - Кӧты куректэ, Сюлмы путыртэ. Мусо дядие! Малы тон кулӥд? Пеймыт шайгуэ Висьтэк но ватскид. Ӧй ке кулысал, Дорам ветлысал, Кызьы улыны Монэ дышетысал. Ялан мон тонэ Куно карысал, Ачим но дорад Адскын ветлысал. Андрей САМСОНОВ САМОЛЁТ Вылӥе чатыртӥ мон йырме, Учконъям нош синмы йыроме. Кытын ке самолёт гуретэ, Адӟисько ке, сюлэм дыректэ. Пытьызэ ватыны турттыса, Чурс! Зыме бугырес пилеме. Туж кема, ӵӧж сямен уяса, Нош ик тюак! потэ лыз инме. Чимаса, пегаса лыз и нмын, Оло, юри шудэ монэным. Сюлэмам вожъяськон аратэ, - Солэн кадь ик лобам туж потэ. ВЫЖЫКЫЛЪЁСТЫ УЛӞЫТӤСЬ Пичи дыр. Котькуд адямилэн со аспӧртэм, яркыт, вунонтэм луэ. Быдэ вуэммы бере но пичи дыр асьмемын артэ ветлэ. Тани тодмо суредасьлэн Менсадык Гариповлэн творчествоез но но пичи дырыныз герӟаськемын. Со шудо вакытысьтыз тодэ ваёнъёсыз художниклэн сюлэмаз пыраклы кылизы но бӧрысь выльысь суредъёсаз улӟизы. ... Башкириысь Бальзюга гурт. Татын Менсадык вордӥськиз но будӥз, юнмаз, аслыз дуннелэсь чеберлыксэ усьтӥз. Бусыын, гурт котырын анай-атаез вӧзын тыршыса, ужез гажаны дышиз. Удмурт семьяын нылпиез вӧсь карон сьӧлыкен лыдъяло вал, соин ик Гариповлы анай-атаезлэн лякыт, яратыса вазиськемзы гинэ тодаз кылиз. Ужаны сяна. гуртын шулдыръяськыны но усто быгатылӥзы. Шудон-серектон, эктон- кырӟан пӧртмаськон - ваньмыз вал удмурт сямьёсъя тупатэм юондыръёсын. Пичи Менсадыклы со выжыкыл дунне кадь йӧтылӥз. Адӟемзэ одно кагаз вылэ пуктыса кельтыны тыршылӥз. Карандашсэ киысьтыз уг ик куя вал угось - дораз но, школаын но ялан суредаськылӥз. Бадӟым классъёсын дышетскыкуз, Менсадыклэн суредась мылкыдыз эшшо но юнмаз. Соку ик аслыз "художник луо" шуиз. Озьы 1962 арын, школазэ йылпумъяса, Ижкарысь Удмурт пединститутэ дышетскыны пыре. Егит муртлы ваньмыз тунсыко вал. Татын быгатонлыксэ волятӥз, котыр дуннелэсь чеберзэ кагаз вылын ас сяменыз возьматыны дышетскиз. Институтын дышетскон аръёсыз туж ӝог ортчизы. Табере уже интыяськоно. Менсадык Гарипович "Дась лу!" "(Ӟечбур!") газетын художник луыса ужаны кутскиз. Школаосы вуылӥз, пиналъёслэсь мылкыдъёссэс суредъёс пыр возьматыны тыршылӥз. Гариповлэн туж потэ на вал книгаослы суредъёс лэсьтылэмез. Та ужлэн аслаз пӧртэмлыкез, куронъёсыз. Мар бордысен кутсконо? Художник дышетсконзэ Москваысь полиграфия институтын азьланьтэ. Малпанэз быдэсмиз. Тушен но тылыен лэсьтэм нырысетӥ суредъёсыз "Урал но Волга котырысь калыкъёслэн выжыкылъёссы" нимо книгаын потӥзы. Бӧрысь со ноку но выжыкылъёсын ӧз люкиськылы ни. Та удысын ужамезлы йылпумъян выллем луиз ӟуч кылын потэм "Мифы, легенды и сказки удмуртского народа" книгаез. Вань сюлэм шунытсэ тодон-валанзэ со та ужаз пыӵатӥз кадь. Офорт амалэн лэсьтэм суредъёсыз калыкмылэсь лулпуш узырлыксэ туж зол усьтӥзы. "Мифы, легенды и сказки удмуртского народа" книгаез усто суредъёсын чеберъямез понна 1986 арын Менсадык Гариповичлы Удмурт АССР-лэн Кун премиез сётэмын. Ас калыксэ, солэсь сям-йылолъёссэ, узыр вашкалазэ яратэмез Гариповлэн котькуд ужаз шӧдӥське. Озьы шуыны луэ "Зарни крезь" - "Золотые гусли" сузьетысь вань книгаосыз сярысь но. Огъя вераса, Менсадык Гарипов кызьлэсь уно книгаосты чебересь суредъёсыныз "улӟытӥз". Соос "Удмуртия" но "Детская литература" издательствоосын потылӥзы. "Ныл но шыр" книгалы лэсьтэм иллюстрациосыз пӧлысь кӧнязэ ке Третьяков галереяе но басьтӥзы. Удмурт художникъёслэн ужъёссы отчы та дырозь ӧз сюрылэ на вал. Менсадык Гарипович яратыса суреда вал "Кизили" журналлы но. Огшоры улонысь со маке но паймымонзэ, выжыкыллы укшасьсэ шедьтыны быгатылӥз. Озьы котырысь дунне пиналъёслы мкет ласянь усьтӥськылӥз. Тани куинь ар Менсадык Гарипов асьмемын ӧвӧл ни. Югыт дуннеысь туж вазь кошкиз. Озьы ке ноЮ вормонтэм трос лэсьтыса вуттӥз. Со - Россиысь сӥё-дано художник, Удмуртиысь калык художник, профессор, аслаз ужъёсыз пыр али но асьмеды ог-огмес гажаны, яратыны дышетэ. Светлана Государева, Искусствовед. ГОЖТЭТ Мынам киям конверт, Эше лэзем гожтэт. Отын нош ыстэмын - Шуныт кылъёс мыным. Аслым но гожтоно, Ӧвӧл ӝегатоно. Мед шумпотоз эше, Гожтэт ведь со сыӵе - Куке вуэ дорад, Пыӵа кадь мугорад. Настя Каштанова, 4-тӥ класс. Герман КИРИЛЛОВ АТАС Ӵыж-горд ворино Тыл пиштэ йыраз. Ветлэ туж йӧно Аслаз азбараз. Котьку дыраз Чоръяны тодэ. Ёросэз огназ Сэзъялтэ быдэс. Крезьгурез борды Итӥське улос. Нуналмы шулдыр Толлолэсь луоз. Елена ГЛЕБОВА ЭМЕСПИ Верос ? Коли, тон та Аняез кышно басьтод! - азьлань улонэз тодӥсь кадь юн-юн куараен шуиз Максим. Шудыны люкаськем пиналъёс серемзэс кутыны ӧз ворме. Нош Коли йӧн-йӧн вераз: ? Уг, мон сое кышно уг басьты. Мынам Любие вань. Пияш огдырлы садиказы вуиз кадь. Любиез али отын, дыр. "Кинэн меда шудэ? Мон ӧвӧл дыръя садике ветлэмез потэ меда?" Коли уго тодэ на , кыӵе мӧзмыт вал солы Люби висеменыз гуртаз пукон нуналъёсы. Соин сэрен мемиеныз огпол керетон калэ вуизы. Садике мынон понна котьку шумпотыса дасяськись Коли одӥг ӵукна укыр нюштыртӥз. Ужаз дыртӥсь мемиезлэн зуркытак ваземез но ас дуннеяз выем пияшез ӧз шаплыяты. Оло висён ӝабырске-а бордад шуыса кушетскемез кылыса гинэ, мемиезлэсь кизэ кымесысьтыз палэнтыса Коли лулскиз: ? Люби ӧвӧл но, садике чик мынэм уг пот. "Тӥни мар, - абдраса долказ анай мурт. - мон ас сюлмаськонэным тэбинисько. Нош пиелэн лул-сюлэм пушкыз но вань вылэм. Пиналъёсме "ать-два, ать-два" шуэммыя гинэ улыны косӥськом", - тае валаса, мемилэн йыркуэз ик лӧптӥз кадь. Со виын Коли йӧтскиз мемиезлэн ки бордаз: ? Мынӥм. Мон дась. Пиезлэн шуныт киыз чик но пичи ӧз поты, кужмо ужаны дась кадь йӧтӥз. Со кужым но шуныт анай сюлэмез небӟытӥзы, огдыре ик шугъяськытӥзы но: "Трос сямъёсты ум чаклаське ни. Пиналъёссэс азьло дусымъяло но вылэм. Озьы кык семьяосын ог-огзэс гажан кылдэ вал, дыр. Оло, Любиен Колиез но дусымъяно? Ма, серекъясь-мактась уз луы, дыр? Умойлы ук со - адямиос куспын яратон, гажан. . ." Одӥг пол Колиослэн семьяязы туж ческыт пыжиськизы. Маиз но ӧй вал: вӧйын пӧзьтэм шекера, губиен, чорыген, бакча сиёнъёсын куасам няньёс, пыжем ӟазег. . . Ваньзэ сое Любиос доры, пе, нуозы. Малы? Коли паймемын. Та корка Колилэн пырамез ӧй вал на. Гуртсы бадӟым уго. Покчиос котькуд ураме уг вуыло на. Тани ӧс устӥськиз. Коля адӟиз Любаез. Со мунё кадь дӥсяськемын. Пияш шоры пальпотыса учке. Колиез но Любиез артэ пуктӥзы. Шудбур сӥзьыса трос чебер кылъёс веразы. Бадӟым колды нянь пыжимы шуыса, вань люкаськемъёс кырӟаса бергазы, шудӥзы. Коли туж шумпотыса бертӥз Любиос дорысь. Оло гадь пушказ, оло йыраз маке лопыръяськисез вань кадь. Тӥни со шумпоттӥсь лопыръяськон нош ик берытскиз Коли пушкы. Соин ик пияш Максимлы пумит ӵогем кадь вераны быгатӥз: - Уг, мон сое кышно уг басьты. Мынам Любие вань! КИНЛЭН МУНЁЕЗ ВИСЕ? Олялэн я Ниналэн Мунёез туннэ висе? Мунёез бӧрдэ кинлэн, Пельёсты ик весь кесе. Олялэн ке мунёез, Мон сёто анальгинэз. Солэн висе, дыр, йырыз - Чик уг вись бере пыдыз. Ниналэн ке нош эшез, Возьма, луоз, ӟеч кылэз. Яратэ со ушъямез, Чик ӧвӧл возьдаськонэз. Олялэн но Ниналэн Сямъёссы урод вылэм. Шудыкузы мунёен Вунэто вань дуннеез. КОӴЫШЕ Мяу, мяу кесяське, Ас кылыныз вазиське. Ушъяське кузь быжыныз, Виштыё пельёсыныз. Сыӵе мусо Васькае - Мон сое нуныясько, Матысь эшен лыдъясько. Ольга Гильмуранова. Башкортостанысь Татышлы ёросысь Калмияр гурт. КУАЗЬ ЗОРЕ Куазь зоре, зоре, зоре - Вань пиналъёс шумпото. Губиос но зор бере Шудыны кыре пото. Женя Якимов, 3-тӥ класс.