Августа КОНЮХОВА УЛМОПУ Улмопуме киськаса, Жуг-жагзэ ури, Ӵыж-жалем емышъёссэ Сиыны кури. Йыбыртъя каллен мыным Шумпотэменыз. Мыче азям вайёссэ Улмоосыныз. КУДЫМУЛЬЫ Куды-куды-мульые, Мар ватскиськод куар улэ? Тон ческыт кудымульы, Пыр ай, тэтча кудые! Ческыт варення пӧзьто, Вань эшъёсме ктялто! ЭМЕЗЬ Горд эмезь кыдёкысен Синъёсме бордаз кыске. Ой, кыӵе со удалтэм! - Му вылэ ик кисьтӥське. Мон ӵыж-горд вуэмъёссэ Тэркы тыр бичай. Эмезьпулэсь саламзэ Ме ай, си, анай! ГУБИОС Мон нюлэс дуре потӥ, Муӵ вылэ туби - Син шорам шуак етӥз Трос тӧдьыгуби. Осто, кыӵе чебересь! Изьызы курень. Вить кузя, козлок кадесь, Султӥзы чурен. Ӝикытак мон соосты Кудыям октӥ, Выльысь мыно щдорады - Выжыдэс кельтӥ! ТЮРАГАЙ Куазь шулдыр: Пыже шунды, Тюрагай кырӟа. Ин пыдсы юри, вылды, Лумбытлы кугӟа. Тюр-тюр-тюр! со Кисьтылэ Гуръёссэ отысь! Бен кызьы музъем вылэ Гаӵолӥн уг усь?!. Рашит ХАЙДАР АТАС Чибори быжо атас Кенере тубем. Чоръялтэм ньылон тыраз - Куараез могӟем: Кӧ-кӧ-кӧ!.. Сереме усем бераз, Палэнэ лобӟем. Люгы куар шедем азяз - Со отчы пегӟем: Тык-тык-тык!.. Огшапсэ отын кыллем, Чалмытак пукем. Ньылонзэ сузьям-марам - Лысвуэн гылтэм: Гы-гы-гы!.. Собере выльысь йӧн-йӧн Азбаре потэм. Бурдъёсыныз шоналтэм, Гадь тыраз чортэм: Ко-ко-ри-ко-ко!.. ВЫЛЬ КАТА Кин ай ветлэ лобаса, Бӧрсяз тузон ӝутыса, Бызьыса йыг-дым гинэ, Исаське: "Кутэ монэ!" Со милям ук - Лариса! Ветлэ, поръя бергаса, Лӧптэмын туннэ укыр, Серекъя, зуле жингыр! Учке, пе, ай, учке ай, Горд катае ӵыж выль ай. Со ачиз монэ нуллэ, Тӥ но монэн ворттылэ!.. Аня ЛЮБИМОВА ЭШЕ Кин мыным котьку юрттэ, Урокын кенеш сётэ, Монэ ӵемысь паймытэ, Ӵош ик гурак серектэ? Ручкаме ке ыштӥсько, Мон солэсь ик курисько. Кык ке канфетэ мынам - Соосты уг си огнам. Вань уго дуно эше, Со мыным туж зол кельше. Нош нимыз ныллэн Оли, Ӵош дышетскиськом али. ШУНДЫ Вазь султэ но бер выдэ, Пиналъёсты сайкатэ. Со югыт, мусо шунды, Инкуазьлэн эшез, вылды. Пальпотэ быдэс нунал, Солы шумпотэ пинал. Мусое тон, шундые, Небыт киё гыдыке. Шунты, вешаса монэ, Ӝог будо, паймоз нэнэ. БУДИЛЬНИК Сое лэсьтыны качы, вогыриё картон (картон ящиклэсь), клей, буёло бумага кулэ луозы. Будильниклэн корпусэзлы кык огкадь котыртэт ванды (суредэз учкы). Соосты пушко карыса лякыны диаметрзыя вогыриё картон ванды на. Пасьталаез 5-6 сантиметр мед луоз. Котыртэтъёсты со картонэн герӟа но лякем интыоссэ векчи вогыриё бумагаен согы. Картонъёсты вольыт палынызы лякы но будильниклэн йылаз котыртыса интыя. Со - будильниклэн зӥбылонэз. Пуктон интызэ зӧк картонлэсь тупаты. Часлэсь возьматон стрелказэ но лыдпусъёссэ буёло бумагалэсь лэсьты. СУРЕДЪЁСЛЫ РАМКА Чебер буёло суредъёсты борддорад юнматыса воземед потэ ке, картонлэсь рамка лэсьты. Солэсь быдӟалазэ но формазэ быръем суредъя ванды. Дуръёссэ векчи вогыри лентаен чеберты. Суреддэ пушказ интыямед бере, солэн но дуръёсаз векчи вогыриё рамка тупаты (суредэз учкы). ВОЗЬМАСЬКОМ ТОЛ БАБАЕЗ Сӥзьыл бере тол лыктэ, Со котьма но быгатэ: Писпуосты чеберъя, Баммес, нырмес чепылля. Лык дорамы, Тол Бабай, Мон тонэ кема возьмай. Кыткы тон парвалъёстэ, Басьты сьӧрад кузьымдэ. Ми соку кыз котырын, Ӵош дышетскись эшъёсын, Кырӟалом тонэн артэ Яратоно кырӟандэ. Настя Петрова . Зоя ТРУХИНА КЕЧПИЕ Кечпие, кечпие, Малы бӧксӥськод? Кечпие, кечпие, Малы ӝожаськод? Чаль дорам, ачим сюдо, Жалем кубиста сёто. Мон вӧзын ӝог буйгалод, Ӝиптӥськыса шунтӥськод. Кечпие, кечпие, Ойдо возь вылэ. Кечпие, кечпие, Тубом шур йылэ. Ӝытсэ жадьыса вуод, Кӧлыны гидэ пырод. Быдэс уйзэ шутэтскод, Ӵукна капчи бызьылод. Кеч-пи-е! КАЛЫК ЧАКЛАНЪЁС Уй инмын луд ӟазег лобӟон сюрес яркыт пиштэ ке, куазь сайкыт возиськоз. Ӝытазе, шунды пуксьыку, инбам льӧль-горд кариське - ӝоген тӧласькоз. Уй кизилиос толалтэ яркыт ворекъяло ке, кезьыт луоз. Тол куазен гудыри гудыртэ - кужмо тӧл ӝутскоз. Муръёысь ӵын меӵак вылӥе тубе - кезьыт кариськоз. Куазь уг тӧласькы ке но, муръёысь потӥсь ӵын музъем вылэ ваське - ӝоген лымыялоз. Пуны музъем вылын погылляське - куазь зороз яке лымыялоз. Коӵыш ымнырзэ аслаз гонэз пушкы ватэ - куазь кезьдэктоз. Куакаос кесяськыса уллёен лобало - кезьыт луоз. Толэзьлэн сюръёсыз лэчыт йылсоесь но яркыт пишто - азьланьын сайкыт куазь. КАРТОНЛЭСЬ - ВЫЖЫКЫЛ ДУННЕ Та паймымон арбериос лэсьтэмын огшоры картонлэсь. Сыӵе картонэз котькуд вузкарон магазинысь шедьтод. Солэсь кие кутымон, синъёсты шумпоттӥсь шудонъёс лэсьтыны луоно. Та шудонъёс кибашлы но быгатӥсь киос улын вордӥськизы. Вордӥсь анайзы - Татьяна Петровна Корепанова, Игра посёлокысь "Светлячок" нылпи садын ужась. Нош солы таӵе киужлы кичӧлтӥсь вал Тамара Иосифовна Чибышева. Покчи пиналъёс но дышетӥсьсылэсь Татьяна Петровналэсь бере уг кылё: вогыриё- вогыриё бумагалэсь йӧспӧртэм арбериос кылдытъяло. Тон но, покчи лыдӟисе, сыӵе шудонъёс лэсьтыны быгатод. "Кизили" журнал соосты лэсьтонъя валэктонъёсын тыныд нимысьтыз бам кузьма. МАЛЫ МЕДА? Крезьгурез Пантелей Кузнецовлэн Кылъёсыз Герман Ходыревлэн Пияш: Вӧсь луымон чепыльтэ Мынэсьтым бамме кезьыт. Песятай кыре потэ, Нош солэсь уг кар озьы. Малы меда, малы, малы, Малы, ой, малы? Пиос: Малы меда, малы, малы, Малы, ой, малы? Пияш: Туше вань угось мынам, Чепыльтыны со уг сёт. Туше вань угось мынам, Чепыльтыны со уг сёт! Пияш: Эх, малы мон пичи на, Малы меда туш уг пот? Ваньзы ӵош: Эх, малы мон пичи на, Малы меда туш уг пот? Малы меда, малы, малы, Малы, ой, малы? Малы меда, малы, малы, Малы, ой, малы?! МАЛЫ МУДӥСЬ ШЫР ЛЯБ АДӞЕ? Кыӵе нюлэскын, оло луд вылын улэм-вылэм Мудӥсьшыр. Со уно узырлык люкам. Дӥсяськем но тузӥ: дуно сьӧд костюмен, шляпаен, кияз зарни часъёсын. Мудӥсьшыр узыр ке но улэм, улонлэсь шулджырзэ но ческытсэ чик валамтэ. Уй но нунал одӥг малпан гинэ сое сюлэмшугъяськытэм: кызьы ваньбурзэ лушкаськисьёслэсь утёно. Соин ик со нокинэн но эшъяськымтэ, огназ палэнскыса улэм. Ваньбурзэ ватыса возьыны Мудӥсьшыр бадӟым юртъер лэсьтыны малпам. Со юртъерзэ музъем пушкы пуктыны кутскем. Турынэн воринъяськись лудэз, сяськаясь возь вылэз сьӧд муӵъёсын согем. Инкуазьлэсь шулдырзэ но, кузьылиослэсь тыршыса дэмен ужамзэс но, бубылиослэсь эктыса лобамзэс но, ӟозъёслэсь кырӟамзэс но адӟымтэ- кылымтэ ни. Мудӥсьшыр татчыозь но аслыз гу лэсьтыса улэ. табере синъёсыз но ляб адӟо ни. Зарнилэн чилямез шунды сиослэсь дуногес потэ угось. Сӧсырмем лулыз кышка ни югытлэсь но, чылкытлэсь но. Люда Игонина. МИ ДОРЫН КУНОЫН - КУӞЕБАЙ ГЕРД НИМО УДМУРТ ГИМНАЗИЯ Ас кылзэ, выжыоссэ, сямъёссэ но йылолъёссэ тодытэк, соосты азинтытэк - калык бырон калэ вуэ. Таӵе югдурысь потыны одӥгез амал - пиналъёслы покчиысен ик анай кылэз гажан сям пыӵатон. Ӵапак со понна ик берло аръёсы Удмурт шаерын улӥсь пӧртэм калыкъёслы нимысьтыз дышетсконниос усьтэмын вал. Соос пӧлысь одӥгезлы, Ижкарысь Куӟебай нимо удмурт гимназилы, туэ куарусён толэзе кылдэмез дырысен вить ар тырмиз. Сое усьтонъя кичӧлтӥсь вал гимназилэн кивалтӥсез О. К. Шилова. Та аспӧртэмлыко дышетсконнилы улонэ сюрес сётыны трос сюлмаськизы Калыкез дышетонъя азьвыл министр А. В. Еременко, солэн воштӥсьёсыз Г. Н. Васильева но В. М. Ившина, министрлэн туала воштӥсез З. В. Суворова но мукетъёсыз. - Гимназиямы пырыны мылкыд карисьёс арысь аре тросгес луо, - шуэ солэн кивалтӥсез Ольга Константиновна. - Адямиос валазы, ми дорын соослэн нылпиоссы асьсэды золгес гажаны кутско, дӥсьтӥсесь луо, муресь тодон-валанъёс басьтыны быгато шуыса. Дышетӥсьёсмы милям туж сюлмоесь. Соос пӧлын Н. И. Демакова, В. З. Фомина, В. Г. Широбокова но трос мукетъёсыз. Зэм но, гимназиын нылпиосты котыр ласянь умоезлы дышето. Отысь пинал усточиослэн кӧня ке ужъёсынызы тӥ туннэ асьтэос но тодматскыны быгатоды.