Владислав Кириллов САЙКАН Чагыр инме ӝужам шунды Каллен йӧтске бадьпу борды. Мусо анай киос сямен Веша, потэ сайкатэмез. Бадьпу усьтӥз ӵуж синъёссэ, Тютю выллем пучыоссэ. Вож киоссэ ӝутэ выллань, Шунды ӝутске - нунал азьлань. КЫЗЕТӤ ДАУРЫСЬ ВИСЁН СПИД сярысь кылэмды вань, дыр. Со туж кышкыт висён. Ӟуч сямен вераса, СПИД - синдром приобретённого иммунодефицита. Музъем вылын сое шараязы 1981-тӥ арын. Кышкыт кылез улӟытэ пичильтык гинэ микроб. Сыӵе макеослы ним сётонъя комитет сое нимаз ВИЧ-вирус иммунодефицита человека. Удмурт сямен вераса - адямиез утись кужымез быдтон чер. Вирус туж векчи. Одӥг сантиметръем гож вылэ пуксьыны быгатысал 100 сюрс пала микроб. Адямилы сыӵе вирус шеде ке, мугорысьтыз пӧртэм нёредъёсыз но ёзъёсыз (органъёсыз) шуге-леке сюро. Собере СПИД кылдэ. Адямиез лек чер пуш ласянь йыръе кадь. Вань висисьёс пӧлысь ӝыныез одӥг арскын куло. Сыӵегес ик вирусъёссы вань маймылъёслэн (обезьянъёслэн), скалъёслэн, коӵышъёслэн. Но таосыз адямилы нокыӵе кышкытлык уг кылдыто. Соин ик пудо бордысь СПИД висёнэз уд куты. СПИД вӧлме пӧртэм сюресъёс кузя. Усыкмытӥсь уколэз (наркотикез) одӥг шприцен тросэзлы пуктылыку, кинэн шедем соин юмшаку, воргорон воргоронэн яке кышномурт кышномуртэн мусояськон дыръя. Висись мурт таза адямиез черлатыны быгатэ куинь амалэн: 1) валесын яратон пыр; 2) вир пыр; 3) нуны кар ?плацента) пыр. Висён ӵемгес вӧлме нырысетӥ амалэн. Соин ик шуге-леке тросгес сюро мусояськон понна куз бырйыны быгатӥсьтэмъёс. Вир пыр висьыны усьыло наркотикен вырисьёс, одӥг шакшы шприцен яке венен тросэзлы уколъёс пуктыло ке. Куинетӥ учыре нуны черла вордскемезлэсь азьло ик. Дуннеысь тазалыкез утёнъя организацилэн ивортэмезъя, 1997-тӥ арлэн пумаз музъем вылын ВИЧ-ен черланъёс 30,6 миллион адями вал. Та пӧлысь 1,1 миллионэз - пиналъёс. Дуннеын нуналлы быдэ ог 16 сюрс мурт черла. 2000-тӥ арын соослэн огъя лыдзы 40 миллионозь вуоз, пе. Удмурт Элькунамы но СПИД вӧлме ни. Али 500 мурт пала ВИЧ-ен черламын. Соос пӧлын вань пиналъёс но. Тани Ижкарысь 6 дышетскисьёс сыӵе висёнэн курадӟо, Глазовын - 9, Шаркан но Яр ёросъёсын - 3. СПИД висён сярысь котькуд адями тодыны кулэ. Сотэк шуге-леке но сюрыны кема ӧвӧл. Тазалыкез утьыны нуналмысь сюлмаськоно. Валамон, улонын котькуд вамыш - кулонлы матэ карись вамыш. Озьы ке но, асьмелы со сярысь малпаськоно ӧвӧл, куректонъёсты вормоно, котькуд нуналлы шумпотыса улыны быгатоно. Ленид Кузелин, Удмурт Элькунлэн СПИДЭН нюръяськонъя центрысьтыз ёзэн (отделениен) кивалтӥсь, элькунысьтымы тазалыкез утён удысысь дано ужась. ЛУД КЕЧ Луд кечен, улэп кечен Тэльысен вуим ваче. Кырмисько вал "кузь" быжтӥз, Ки улысь мозмиз етӥз. Ой, быжыз укыр вакчи, Мед будоз ай - со пичи! Михаил Иванов ТӦЛ ПУЙЫ Вуиз аран дыр. куазь чидантэм пӧсь. Кышноос сюрлоен арало но суслонъёс пуктыло. Соосын ӵош татын ик кык-куинь аресъем нылъёссы шунды шорын бызьыло. Куатчи кенак керттылэм культооссэ суслонэ люказ. Пичияк ышыг кылдӥз. Нылъёс дэмен со саюлэ люкаськизы. Но ӝоген соослы йыг-йыг пукыны акыльтӥз. Шудыны, суслон улэ вожмаськыса пырыны ӧдъязы. Суслон пограз. Тае адӟыса, Куатчи кенак Оля нимо пичи нылзэ дораз ӧтиз но шуэ: ? Мын ай, нылы, гуртэ бертылы но, Одоть песянаедлэсь тӧл пуйызэ курыса, татчы вай. Тае кылыса. Мукетъёсыз но нылъёс Оли сьӧры бызьыса кошкизы. Пыд улысьтызы тузон ик пурӟиз. Пиналъёс вуизы Одоть песянай доры. Оля шуэ: ? Песянай, мыным нэнэе тынэсьтыд тӧл пуйыдэ курыны косӥз. Песянай пальыштык потӥз но нылъёслы вераз: ? Ма, тӧл пуйы уг луы, нуныосы. Пӧяллям тӥледды. Араны соослы люкетӥды шат? Нылъёс берен вуизы нэнэоссы доры. Нош соосыз гор-гор серекъяло. Соку олокытысь- марысь ыркыт тӧл потӥз, пичиос но, мӧйыос но солы дурыстэм шумпотӥзы. Жадемзы ик огдырлы быриз кадь. СУРЕД Тӧдьы кагазме вали, Карандаш лэчыт вӧлӥ. Ӵок, ымныр ке наштаськиз, Бурдое умой пӧрмиз. Учкисько, кинлы кельше?.. Пештыр луиз коӵыше. Ма, куча ук со вылэм, Бурдо - пунылы пӧрмем. ШУМПОТЫСА ВЕТЛӤСЬКО Милям корка сьӧрамы нюк вань. Отысь ошмес потэ. Нуналлы быдэ мон пичи ведраен отчы вулы ветлӥсько. Песятае со ошмес котыре ведра пуктыны инты лэсьтӥз, дырды шуккиз. Табере ошмесэ шумпотыса ветлӥсько, доре ческыт ву вайылӥсько. Линда Ялалова. 3-тӥ классын дышетскись. ШУНЫТ, ЧЕБЕР - ЭН КЫЛЬЫ БЕР! Ивормес лыдӟы сак тон, Туннэ куноын - "Сактон". Керттэм дӥськут вуронъя Ижкарысь "Сактон" фабрика котькуд аре школае мынон азьын нылпиослы устоесь кузьымъёс дася. Али но со 30-тӥ размерысен 42-тӥозь пӧртэм дӥсь ӵектэ. Та фабрикаын вурем костюмъёс, жакетъёс, сарафанъёс, джемперъёс, водолазкаос, юбкаос но брюкиос нылъёс вылын туж чебер адӟисько. Пиослэн юнмась мугоразы лач- лач пуксёзы джемперъёс, водолазкаос, спортивной брюкиос. "Сактонын" поттэм дӥсь вылӥ ӟечлыко, чебер но шуныт, юн сӥньысъёслэсь вуремын, капчиен миськиське, уг но безды, уг но нуйтӥськы. Джемперъёсты, водолазкаосты но костюмъёсты пиналъёс ас мылкыдзыя бырйыса басьтыны быгато. Пӧртэм буёло, яркытэсь клеткаосын джемперъёсты, костюмъёсты но водолазкаосты мукет дӥсен но вошъяса нуллыны луэ. Гажано анай-атайёс но пиналъёс! Эн вунэтэ пыраны керттэм дӥськут вуронъя "Сактон" фабрикалэн магазинъёсаз! Тӥледыз витё "Сактон" фабрикалэн дӥсьёсыныз вузкарись магазинъёс: Ижкар, Ключевой посёлок, 7, магазин фабрикаын ик интыяськемын; Коммунаров урам, 201, "Сактон"; Ленин урам, 140, "Радиотехника"; Школьной урам, 44, "Культтовары"; Гагарин урам, 25, "Экспресс"; Клубной урам, 37 "Прмхозтовары"; Можга, базарной алощадь, 57, "Сактон"; Сарапул, 20 лет Победы, 2 а, "Мечта"; Воткинск, 1-тӥ Май урам, 83, "Товары для дома"; Чайковский, К. Маркс урам, 34, "Чайка"; Глазов, Калинин урам, 2 а, "Сактон"; Игра посёлок, Труд урам, 8 "Сактон"; Каракулино, 60 лет Октября, 12, "Сактон". Ижкарысь "Сактон" фабрикалэн вузкаронъя отделэзлэн телефонэз - 75-12-70.