Азьлань, мульы шаере! Покчи эше, тон яратӥськод-а мульы сиыны? "Нош кыӵезэ?" - юалод, дыр. Озьыен, ойдо ай вуылом "мульы" шаере. Зэм но, кыӵе но мульыос ӧвӧл! "Мульы" шуиськом ке, тынад соку ик син азяд пуксе, дыр, тани таӵе пушмульы. Со уго асьме палась нюлэсъёсын трос будэ. Атаед сое ӵем дыръя кисэн пильылэ но тон кылдэ ик ньылыса сииськод. Ческы-ыт, озьы-а? Нош легезьпулэн мульыезлэсь компот юылэмед вань, дыр. Кыӵе витамино со! Нош тыпылэсь мульызэ тужгес но парсьёс ярато, сусыпулэсь - тылобурдоос. Валад ини, таосыз мульыос писпуосын будо. Нош вань на куд-ог турын-куар будосъёслэн мульызы. Суред вылысь учкыса, тон, эше, соосты ачид вераны быгатод, малпасько. Эшшо вань на ягмульы (брусника), лызмульы (голубика). Соосты тодманы тыныд, оло, секытгес потоз ай. Соос уго котькуд ёросын уг будо. Одӥг кыл но ӧм вералэ на грецкой но кедра, арахис (музъем) но каштан мульыос сярысь. Ма, соос шуныт палъёсын будо угось. Озьы ик трос емышъёслэн мульызы вань: вишнялэн, льӧмлэн, сливалэн, алычалэн, абрикослэн, персиклэн. Таосызлэсь кӧмзы пушкысь мульызэс сиыны уг яра - тодӥськод, дыр. Тӥни, эше, сыӵе паймымон со "мульы" шаер! Кудзэ но созэ, оло, вератэк кельтӥм. Соосты тон суреда но ысты редакцие, мон туж шумпото. Надежда Лопатина. Антонида ЕРМОЛИНА КӦШКЕМАЛОЗЫ - Пӧзьёстэ пӧзьы, нылы, Кикыосыд кынмозы. Отын пеймыт соослы, Кӧшкемаса кынмозы. ГОМАСЬ ПАЛЭЗЬПУ Милям вож палэзьпумы Сӥзьылпал ӵыж-чыж гомӟиз. Пичи Аня паймемын, Ведраен со ву ваиз: "Палэзьпу, я. Сыл ӧжыт, Тон уд сутӥськы, уд быр". Доразгес вуиз - юзмыт, Шоканы омыр чылкыт. АГАЕ ТЕЛЕФОНЫН Телефон жингыр вазиз. Мон пайми: я мар луиз? Киям кут?, бергат?, Куара туж тодмо пот?з. Агае вазе: "Алло!" Трубкае пырем оло? "Дась лу!"-ысен "Ӟечбур!"-озь Ой, та сюрес туж кузь. Иськемен лыдъяны уг луы. Аръёсын шат чоталоме? Ойдолэ эскерыса утчалом. Удмурт нылпиослы "Дась лу!" газет вордӥськиз 1930-тӥ арын толшор толэзе. Озьыен, со вал кылем дауре, куке асьме кунамы колхозъёс кылдытъяны, бадӟымесь заводъёс лэсьтылыны кутскизы. Соку гуртъёсын улӥсьёс пӧлысь уноез лыдӟиськыны но, гожъяськыны но ӧз быгатылэ. "Дась лу!" газет покчиос но бадӟымъёс понна дышетӥсь но выль улонэ сюрес возьматӥсь луиз. "Дась лу!" газетлы нырысетӥ редакторе юнматӥзы 22 аресъем егит журналистэз Трофим Архиповез. Со угось Можга педтехникумын дышетскемын, пиналъёслэсь сямъёссэс, кулэяськонъёссэс ӟеч тодэ вал. Трофим Архипович покчиослы потӥсь газетэз пыд йылаз султытӥз, солэсь куаразэ юнматӥз. 1931-тӥ арын Т. А. Архиповез воштӥз Ириада Николаевна Постникова - нырысетӥ удмурт нылкышно-редактор. Сокугес ик Удмурт автономной область пӧрмиз УАССР-лы. Удмурт шаерлэн быдӟалаез но будӥз, отчы Сарапул, Воткинск, Камбарка ӟуч ёросъёс пыртэмын вал. Соин ик "Дась лу!" газет удмурто-ӟучо потыны кутскиз, нош собере нимысьтыз кык газет луиз - "Дась лу!" но "Будь готов!". Кыкеныз ик соосын кивалтӥз И. Н. Постникова. Бӧрысь Ираида Николаенаез юнме шорысь янгыше уськытӥзы, пытсэт сьӧры келязы. 1937-1938-тӥ аръёсы "Дась лу!" газетлэн редакторез вал кылбурчи Филипп Кедров. Мукет уже выжемез бере, сое воштӥз Александр Васильевич Волков. Таиз 1947-тӥ арозь ужаз. Война кутскон азьын "Дась лу!"-лы редакторе Алексадр Николаевич лисицынэз юнматӥзы вал. Но солы кема ужаны ӧз кылды ни. 1941 арын июль толэзьысен "Дась лу!" газет потэмысь дугдӥз. Удмурт пиналъёс "Дась лу!" газетлэсь выльысь "улӟемзэ" кызь сизьым ар! возьмано луизы. Уно сюрс удмурт нылпиос понна 1968-тӥ ар вунонтэм кылиз. "Дась лу!" выльысь печатласькыны кутскиз угось. Солэн редакторез луиз егит журналист но веросчи Пётр Константинович Чернов. Та редактор ужан вакытэ "Дась лу!"-лэн тиражез 16 сюрсозь вуиз. Тросэз пиналъёс асьсэос но газетэ гожъяны кутскизы. Соос кылбуръёс, веросъёс пӧрмытъязы, пӧртэм конкурсъёсы пыриськылӥзы. Азьвыл юнкоръёс пӧлысь уноез бӧрысь дышетӥсьёс, журналистъёс луизы. Журналистлэсь удыссэ бырйизы: Пётр Куликов, Владимир Алашеев, Людмила Медведева, Валерий Нуриахметов, Рашит Хайдаров, Анастасия Гребина. Геннадий Коряков но мукетъёсыз. Вячеслав Михайлов но Юрий Лобанов суредасьёс луизы. Виктор Шибанов - тодмо тодосчи. Татчы трос нимтулъёсты пыртыны быгатысалмы на. Ваньзы ик соос "Дась лу!" газетэз ӟечен гинэ тодазы ваё, матысь эшсылы тау шуо. Тани "Кизили" журналлэн редакцияз ужасьёс но "Дась лу!"-эн кызьы ке но герӟаськемын. Суредась Василий Мустаев но кылкутӥсь секретарь Люза Бадретдинова со газетлэн редакцияз кӧня ке ужамын. Алексей Ельцов но та чуръёслэн авторзы "Дась лу!" газетлэн юнкоръёсыз вал. Аръёс ортчемъя, "Дась лу!" газетлэн редакторъёсыз, мукет ужасьёсыз воштӥсько. Пётр Чернов бӧрсьы редактор луыса тыршизы Клавдия Дзюина, Веньямин Ившин, Анастасия Гребина, Владимир Возняков. 1992-тӥ арын газетлэн нимыз но выльмиз, "Ӟечбур!" кариськиз. Озьы ке но, нылпиос понна потӥсь издание чик ӧз мӧйымы, азьло сямен ик со жингрес куараё, задор мылкыдо, шаплы, котьмае тодыны тыршись. Ас котыраз уно нылъёсты но пиосты огазеяны быгатӥсь. Туннэ "Ӟечбур!" газетэн кивалтэ азьвыл юнкор, табере тодмо журналист но кылбурчи Надежда Серафимовна Лопатина. Нылпи газетын кинъёс ужало на, ма сярысьгес гожъяло - ваньзэ сое тододы, журналмылэсь та номерзэ лыдӟыса. Озьыен, туннэ "Кизили" дорын куноын - "Ӟечбур!" газетын ужасьёс. Ульфат Бадретдинов, "Кизили" журналлэн валтӥсь редакторез. ЛОБАСЬ ТЭРКЫ Улонысь учыр Радио пыр лобась тэркыос сярысь вераськон мытӥзы. Пичи ондӥ ӟуч кылэз умой уг ке но вала на, ӝог сое ятвылтӥз. Лыдӟиськыса пукись агаез угось, лӧбак тэтчыса, радио доры вуиз но, азь чиньызэ ӝутыса, выныз шоры учкиз: шибыт, пе. Ондӥ укно дорысь пукон вылэ ури-бери кечырскиз: оло, лобась тэркыез адӟоз? Нокызьы валаны уг быгаты со: кызьы озьы тэркы лобалоз? Солэн бурдъёсыз ӧвӧл ук. Нош Вася агаез соослы луыса висьыны усем ни, лэся. Ӝытлы быдэ сямен очкизэ ныр вылаз понэ но жадьытозяз уй инмез эскере. Ондӥ но потысал вылэм но, анаез уг лэзьы. ? Я, тон ке но эн шузияськы, пие. Агаед ӝоген тани ачиз инопланетянин луоз. Соос сяна, солы номыр кулэ ӧвӧл кадь. Уг оскы анайзы нокыӵе лобась макеослы но, инсьӧр куноослы но. ондӥ оске. Соин ик ӝытъёсы ӵем дыръя укно дорын инмез эскерыса пуке. Уй куноосты адӟемез потэ. Нош нокыӵе лобась тэркыос татчыозь син азяз ӧз на шедьылэ. Радиоын крезьгур чузъяськыны ӧдъям бере, пияш вамыштӥз Вася доры. ? Агай, кызь-о тэркыос лобало? Кыӵеесь соос? Адямиосыз но вань-а? - юан вылэ юан сётэ куать аресъем пияш. Нош Вася ачиз но рос-прос валэктыны уг быгаты. Соосты ӧз на адӟылы уга. Собере куатетӥ классын гинэ дышетске ай. Озьы ке но, выныз азьын визьмо кариськемез потэ. Пияшлэн кымесаз калленак тэшкыльтӥз но шуиз: ? Трос тодод - вазь пересьмод. Вӧсь ке но ӧз луы, ӝожомиз Ондӥ. Нырзэ кыскаса, висъет сьӧры ышиз. Син шораз йӧтӥз ӝӧк вылын кыллись тэркы. Оло, асьсэлэн но тэркизы лобаны быгатэ? Ондӥ ӝажы влын пукись пичи мунёез тэркые пуктӥз но синзэ вошъятэк учке.тэркы уг вырӟылы. Соку пияш тэркыез киыныз бергатыса оскалтӥз. Тэркы кык-куинь котыр берытскиз. Ондӥ эшшо но кужмогес бергатӥз. Таяз учыре тэркы, , зӥр-питыр бергаса, ӝӧк пуме вуиз но... Ӧз, ӧз лобы, ӝӧк вылэ усиз, жинграк вазиз. Лемлет сяськаё тӧдьы юдэсъёс котыр пазьгиськизы. Мунё усиз ымныр вылаз. ? Ой! сюлмы! Мае меда сӧриз ини? - анаез висъет сьӧрысь вуиз но пизэ тышкаськыны кутскиз. Кышномурт ӧз тоды угось, выж вылэ лобась тэркы усиз шуыса. Надежда ШКЛЯЕВА. МЫЛКЫД Кутскиз ужан нунал. Редакцие вуэм гожтэтъёсты шып гинэ эскериськом, гожтоно чуръёсмес азьланьтӥськом. Со вискын ӧсамы туж каллен йыгаськиз. Пичи Пурга ёросысь Улын Юри гуртысь Н. С. Егорова вылэм. ? О-о, али но та диск вань на-а? - ӟечъяськемез бере ик сэзь куараеныз вазиз Надежда Семёновна. - Со берганэз Черепанова Римма Кузьминична гожтэтъёсъя отделын ужакуз басьтӥз вал ай. Нош собере, милесьтым валэктонъёсмес ик кылытэк, куномылэн синъёсыз ортчизы ӝӧкъёс шкафъёсы тырем книгаос, горшокъёсы мерттылэм сяськаос вылтӥ. Аслэсьтыззэ, маке но туж тодмозэ адӟемез потӥз, вылды. Макем бадӟым шумпотон вае вылэм адямилы азьвыл, сюлмыз куремъя, ужам интыяз пыран. Кӧня тунсыко учыръёссэ, шулдыр нуналъёссэ тодаз вайыса вуттӥз со кӧня ке минут куспын! Шудо пинал дыр. Ӵапак нылпи газетэнымы герӟаськемын ук та чырмыт нылкышнолэн льӧль малпанъёсын улон нуналъёсыз. Кутсконэз тазьы вал. 1970-тӥ аръёсы "Дась лу!" газетын потылӥзы Надя Васильевалэн звено, дружина сярысь заметкаосыз, ӵектонъёсыз, куронъёсыз, ӟечкыланъёсыз. Со вакытэ редакциын ужасьёс Г. А. Ходырев, Е. К. Глебова юнкорлэсь тыршемзэ ӝог синйылтӥзы. 1975-тӥ арын Надяез лэзьязы калык куспо "Артек" пионер лагере. Нош собере газетэз но анай кылэз ӟырдыт яратэменыз ик, улон сюресэз сое вуттӥз "Дась лу!"-э. Школазэ йылпумъяса, нылаш "Дась лу!" газетэ ужаны лыктӥз, со дыре ик университетысь филология факультетын дышетскиз. Та чцупрес егит ныл 1979-81-тӥ аръёсы кыӵе но ужъёсты ӧз быдэсъя. Редакцие вуэм гожтэтъёсты радъяз, корреспонденциосты машинкаен печатлаз, выпускающей но луыса вуттӥз. Одӥгаз газет поттон нуналэ Васильева редакциысь типографие, типографиысь редакцие бызьылыса ветлонъяз, коридорысен газетлэн редактореныз В. Н. Ившинэн пумиськем. "Бамдэ ӵушылы ни ай, Нади", - ужасезлы лякытак вазем Вениамин Никонорович. Нылаш паймеменыз синучкон доры мынэм но - бамыз типографи буёлэн сьӧд-сьӧд наштаськемын. Та учыр но вера ни нылашлэсь мылысь-кыдысь тыршемзэ, яратоно ужез пӧлы "выемзэ". Надежда котырын улон соку зэмзэ но "пӧзиз". Нуназе ужаз, ӝытазе удмурт егитъёслы усьтэм драмкружоке ветлӥз. Солэсь гожтэм чуръёссэ тодмо писательёс Г. А. Ходырев но К. Е. Ломагин эскерылӥзы. Егит гожъясьлэн семинаръёсазы но ӧтчаллязы. Одӥг пол Надя отчы мыныны ӧз быгаты. Семён Самсонов егит веросчиез со понна зол "пыжиз". Соку будӥсь кужым сярысь трос сюлмасько вал угось. Ортчизы аръёс. Табере Улын Юри гуртысь "Ӟечбур!" газетэ вуыло ини Лена Егоровалэн иворъёсыз. Усто дышетскемез но котькыӵе ужрадъёсы мылысь-кыдысь пыриськемез понна, та нылашез туэ тулыспалэ "Орлёнок" лагере шутэтскыны ыстылӥзы. Аслэсьтыз быгатонлыкъёссэ Васильева-Егорова нылызлы но пыӵатэм. Нош ачиз Надежда Семёновна дас сизьыметӥ арзэ ини вордӥськем гуртаз дышетӥсь луыса ужа. Пиналъёсты удмурт кыллы но литературалы дышетэ, "Ӟечбур!" газетэн мукет удмурт изданиосын эшъяськытэ. Урокъёссэ ортчытъякуз, со ӵемысь вералля: "Мон та писателен ӵош ужай. Таиз мыным визь-кенеш сётъяз". Школаын дышетон удыссэ но Надежда Семёновна ортчыт гажа. "Туала пиналъёс туж визьмоесь. Ёросамы ортчись олимпиадаосын туэ кыкез пиналъёсы вормисе потӥзы", - данъяське со аслаз дышетскисьёсыныз. Озьы "Дась лу!" газет вуоно дышетӥсьлы кема дыр ӵожелы ӟеч мылкыд кузьмам вылэм. Табере сыӵе мылкыдзэ Надежда Семёновна будӥсь нылпиослы но пыӵатыны сюлмаське. Дышетӥсь оске: "Ӟечбур!" газет али но, азьло сямен ик, пиналъёслэн матысь эшсы луыны кулэ. Алевтина Айманова. СӤЗЬЫЛ ЧУРЪЁС Нылпи садэ ветлӥсьёслы сценка. Сӥзьыл. Мар-о луэм вож куарен, Ӵужектэм со, гордэктэм? Кин солы чик жалямтэ, Пӧртэм пумо буёлзэ? Мон со, пичи этеос, Нимме кин меда тодоз? Нылпиос. Сӥзьыл, Сӥзьыл! Сӥзьыл. Бен, шонер, мон - Сӥзьыл. Куноын мон тӥ дорын. Тани та коркаосын Уло мынам эшъёсы: Си, до, ре, ми, фа, соль но ля, Шудозы тӥ куремъя. Сӥзьыл металлофонэ шукке но До нота потэ. До (кырӟа). До-до-до-до-до- до! Сӥзьыл вуэ ке доамы. Мӧзмыт луэ кырӟанмы. Пиналъёс. "Ӝуа тэльмы" кырӟанэз кырӟало. Сӥзьыл но ик металлофонэ шукке но Ре нота потэ. Ре (кырӟа). Ре-ре-ре-ре-ре-ре! Зор пужнэ сӥялэс, Шумпото пиналъёс. Чале, лыктэ, эшъёсы, Кутэ зонтик кияды. Сӥзьыл металлофонэ шукке но Ми нота потэ. Ми (кырӟа). Ми-ми-ми-ми-ми-ми! Нюлэскын шулдыр али. Куды кутом киямы, Мыном губи бичаны. Пиналъёс. "Кин ӝоггес губи бичалоз?" шудонэн тодматско. Фа но Соль (кырӟало). Фа но Соль, Фа но Соль Пӧрме сиёно Фасоль. Фасоль будэ бакчаын, Ми уӥ3ськом кырӟанын. Чузъяське "Фа, соль но фасоль" кырӟан. Ля нота потэ. Ля (кырӟа). Ля-ля-ля, ля-ля-ля, Эктэ мусо Микаля. Золгес чабе киостэс, Микаля эктоз золгес. Сӥзьыл (пиналъёслы вазиськыса). Кыӵе нотамы ӧз поты на? Нылпиос. Си! Си! Сӥзьыл. Лыкты дорамы Си, Си, Возьмаськом тонэ ваньмы. Си нота потэ. Си (кырӟа). Си-си-си-си-си-си, Улӥськом шулдыр, капчи.ойдо кутске ваче ки, Чебер гурмес мытоме, Сӥзьылмес данъяломе. Сӥзьыл сярысь кырӟан чузъяське. Дасяз Ангелина Бадретдинова.